Молитвы

Минея, 20 Октября, Канон праведнаго отрока Артемия Глас 8 Песнь 1 Ирмос: Посе́ченный несеко́маго пресече́,/ и ви́де со́лнце зе́млю, ю́же не ви́де,/ лю́таго врага́ вода́ потопи́,/ и непроходи́мое про́йде Изра́иль./ Пе́снь же воспева́шеся:/ Го́сподеви пои́м, сла́вно бо просла́вися. Припев: Святы́й пра́ведный Артéмие, моли́ Бо́га о на́с. Пречестна́я твоя́ па́мять просия́,/ и ра́ка твоя́ мно́гая исцеле́ния прояви́,/ Богому́дре Арте́мие, приходя́щим к тебе́,/ пе́снь же воспева́шеся:/ Го́сподеви пои́м, сла́вно бо просла́вися. Припев: Святы́й пра́ведный Артéмие, моли́ Бо́га о на́с. Посече́ся враг от Влады́ки всех,/ И́же прия́т ду́шу твою́ в пречи́стыя ру́це;/ ты же благода́ть прия́л еси́, блаже́нне, неду́жныя исцеля́ти./ Сего́ ра́ди пе́снь воспева́ем:/ Го́сподеви пои́м, сла́вно бо просла́вися. Сла́ва Отцу́ и Сы́ну и Свято́му Ду́ху. Преди́вный Госпо́дь,/ ви́дя врага́ и устраша́я того́ преще́нием гро́зным,/ и мо́лниею паля́, и водо́ю потопля́я,/ ду́шу твою́ прия́л е́сть, Арте́мие,/ те́ло же твое́ в чудесе́х просия́, и́миже исцеля́емии вопию́т:/ Го́сподеви пои́м, сла́вно бо просла́вися. И ны́не и при́сно и во ве́ки веко́в. Ами́нь. Богородичен: Пречи́стая Де́во, ро́ждшая Преве́чнаго Бо́га,/ Того́ моли́, да изба́вит ны от напа́стей, и бед лю́тых, и от лука́ваго врага́,/ мо́лим Тя, вопию́ще:/ пои́м Го́сподеви, сла́вно бо просла́вися. Песнь 3 Ирмос: Страх Твой, Го́споди,/ всади́ в сердца́ раб Твои́х,/ и бу́ди нам утвержде́ние,/ Тя во и́стине призыва́ющим. Припев: Святы́й пра́ведный Артéмие, моли́ Бо́га о на́с. Страх Твой, Го́споди, возгреме́,/ и страстоте́рпец Твой дух испусти́ и прия́т Ца́рствие Небе́сное,/ ны́не же мо́лится о всех, призыва́ющих Тя. Припев: Святы́й пра́ведный Артéмие, моли́ Бо́га о на́с. Престо́лу Влады́чню предстоя́, Богому́дре Арте́мие,/ не преста́й моля́ся о и́же ве́рою приходя́щих к тебе́/ и тя призыва́ющих. Сла́ва Отцу́ и Сы́ну и Свято́му Ду́ху. Исцеле́ния струи́ источа́еши ко гро́бу твоему́ приходя́щим, Арте́мие,/ вои́стинну тя призыва́ющим. И ны́не и при́сно и во ве́ки веко́в. Ами́нь. Богородичен: Мари́е, Ма́ти Христа́ Бо́га,/ поми́луй моля́щихся Тебе́,/ несумне́нною ве́рою вои́стинну Тя призыва́ющих. Седален, глас 4 От младе́нства душе́ю Бо́гу прилепи́вся,/ двоюна́десяти лет к Бо́гу преста́вился еси́/ и, в ве́чное Ца́рство всели́вся,/ прия́л еси́ дар от Бо́га/ неду́жныя исцеля́ти, прокаже́нныя очища́ти,/ слепы́м о́чи отверза́ти, лука́выя ду́хи прогоня́ти/ и от трясави́ц избавля́ти с ве́рою тя призыва́ющих;/ непреста́нную благода́ть у Христа́ испроси́, Богоуго́дне Арте́мие,/ и душа́м на́шим ве́лию ми́лость. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Удиви́ся Ио́сиф, е́же па́че естества́ зря,/ и внима́ше мы́слию руно́вному дождю́,/ в безсе́меннем зача́тии Твое́м, Богоро́дице./ Ты бо и купина́ еси́, огне́м неопаля́ема,/ и жезл Ааро́нов прозя́бший,/ и свиде́тельствует обру́чник Твой и храни́тель, свяще́нником вопия́:/ Де́ва ражда́ет, и по рождестве́ па́ки Де́вою пребу́дет. Песнь 4 Ирмос: Услы́шах, Го́споди, слух Твой и убоя́хся,/ я́ко неизрече́нным Сове́том,/ Бог сый Присносу́щный,/ от Де́вы прише́л еси́, вопло́щся./ Сла́ва снизхожде́нию Твоему́, Христе́,/ сла́ва си́ле Твое́й. Припев: Святы́й пра́ведный Артéмие, моли́ Бо́га о на́с. Услы́ша, Го́споди, слух Твоего́ смотре́ния, и убоя́ся пра́ведный Арте́мий,/ егда́ неизрече́нным све́том мо́лния возсия́ из тучено́снаго о́блака, и вопия́ше:/ сла́ва снизхожде́нию Твоему́, Христе́, сла́ва си́ле Твое́й. Припев: Святы́й пра́ведный Артéмие, моли́ Бо́га о на́с. Услы́шим и мы слух чудоде́йствия твоего́, пра́ведниче Бо́жий Арте́мие,/ и притеце́м к гро́бу твоему́, с ве́рою вопию́ще Го́сподеви:/ сла́ва снизхожде́нию Твоему́, Христе́, сла́ва си́ле Твое́й. Сла́ва Отцу́ и Сы́ну и Свято́му Ду́ху. Услы́ши нас, гре́шных,/ призыва́ющих тя в ско́рбех и в неду́зех,/ и да́руй исцеле́ние, свя́те Арте́мие,/ покланя́ющимся о́бразу твоему́ и вопию́щим Влады́це всех:/ сла́ва снизхожде́нию Твоему́, Христе́, сла́ва си́ле Твое́й. И ны́не и при́сно и во ве́ки веко́в. Ами́нь. Богородичен: Услы́ши ны, Пречи́стая Богоро́дице Де́во, моля́щияся Тебе́,/ и изба́ви нас от враг ви́димых и неви́димых,/ я́ко да вопие́м Го́сподеви:/ сла́ва снизхожде́нию Твоему́, Христе́, сла́ва си́ле Твое́й. Песнь 5 Ирмос: Страсте́й мя мглы,/ я́ко от глубо́кия но́щи избавля́яй,/ у́треневати сподо́би дух мой, молю́ся,/ во све́те дне повеле́ний Твои́х, Христе́. Припев: Святы́й пра́ведный Артéмие, моли́ Бо́га о на́с. Стра́шныя мглы и те́мнаго о́блака устраши́ся Богому́дрый Арте́мий/ и преста́вися в ве́чный живо́т,/ во све́те дне повеле́ний Твои́х, Христе́. Припев: Святы́й пра́ведный Артéмие, моли́ Бо́га о на́с. Стра́шныя мглы изба́ви нас/ и одержа́щия боле́зни исцели́, прему́дре Арте́мие,/ предстоя́й во све́те дне повеле́ний Христо́вых. Сла́ва Отцу́ и Сы́ну и Свято́му Ду́ху. Страстьми́ мно́гими одержи́м е́сть/ и стремле́нием грехо́вным погруже́н;/ изба́ви мя, Го́споди, от прегреше́ний/ моле́нием уго́дника Твоего́ Арте́мия. И ны́не и при́сно и во ве́ки веко́в. Ами́нь. Богородичен: Стра́шными Херуви́мы сла́вима еси́, Пречи́стая Де́во,/ изба́ви нас от напа́сти/ и возведи́ во свет дне повеле́ний Сы́на Твоего́. Песнь 6 Ирмос: Бе́здна грехо́в и прегреше́ний бу́ря мя смуща́ет/ и во глубину́ ну́жднаго ре́ет мя отча́яния,/ но Твою́ кре́пкую ру́ку мне простри́, я́ко Петро́ви,/ о Упра́вителю, и спаси́. Припев: Святы́й пра́ведный Артéмие, моли́ Бо́га о на́с. Две́ри Небе́сныя отверзо́шася тебе́,/ и ра́йския пи́щи наслади́лся еси́, водвори́вся в жи́зни ве́чней,/ и со святы́ми пребыва́еши, Арте́мие;/ моли́ся у́бо о нас Бо́гу и от тли ны возведи́. Припев: Святы́й пра́ведный Артéмие, моли́ Бо́га о на́с. Со А́нгелы ликовству́еши, у Престо́ла Влады́чня предстоя́/ и благода́ть име́я исцеля́ти неду́ги любо́вию приступа́ющих к тебе́,/ прему́дре Арте́мие. Сла́ва Отцу́ и Сы́ну и Свято́му Ду́ху. Име́я к Бо́гу Боже́ственное дерзнове́ние, преблаже́нне Арте́мие,/ ве́рою чи́стою хва́лящих тя помина́й,/ от бу́рей и от напа́стей спаса́й и от тли возведи́. И ны́не и при́сно и во ве́ки веко́в. Ами́нь. Богородичен: Дании́л Тя го́ру мы́сленную прови́де,/ от нея́же Ка́мень отсече́ся, Пренепоро́чная,/ и сни́де от Небеси́ роса́ во чре́во Твое́, Богоразу́мием напои́в зе́млю:/ Ты бо израсти́ла еси́ Изба́вителя всех Творца́. Кондак, глас 8 Возсия́ дне́сь пресве́тлая па́мять прему́драго Арте́мия;/ Богода́нная благода́ть, я́ко ре́ки, излива́ет от целе́бных моще́й его́ ди́вная исцеле́ния,/ и́миже от многоразли́чных неду́г избавля́емся,/ с ве́рою прие́млюще я и взыва́юще:/ ра́дуйся, Арте́мие Богому́дре. Икос От ю́ности возлюби́в Бо́га и незло́бив сый,/ в де́тстве яви́лся еси́, я́ко муж смы́слен,/ от гро́мнаго же преще́ния сме́рть вкуси́л еси́/ и уго́дник яви́лся Влады́це, пречу́дне Арте́мие,/ положе́но же бы́сть те́ло твое́ на пу́сте ме́сте,/ иде́же обрето́шася мо́щи по три́десять тре́тием ле́те преставле́ния твоего́,/ чудеса́ творя́ща пресла́вная и исцеле́ния мно́га неду́жным,/ с ве́рою приходя́щим ко гро́бу твоему́ и вопию́щим:/ ра́дуйся, Арте́мие Богому́дре. Песнь 7 Ирмос: А́нгелом о́троки из огня́ спасы́й/ и гремя́щую пе́щь преложи́вый на ро́су,/ благослове́н еси́, Бо́же оте́ц на́ших. Припев: Святы́й пра́ведный Артéмие, моли́ Бо́га о на́с. А́нгели слу́жат Вседержи́телю Бо́гу/ быва́ющим мо́лниям и о́блаком гро́мным;/ ты же, свя́те Арте́мие, коне́ц жития́ от сего́ прие́мля, взыва́л еси́:/ благослове́н Госпо́дь, Бог оте́ц на́ших. Припев: Святы́й пра́ведный Артéмие, моли́ Бо́га о на́с. Пресели́вся в жи́знь Небе́сную,/ предстои́ши Го́сподеви, пребога́те Арте́мие, вопия́:/ благослове́н Госпо́дь, Бог оте́ц на́ших. Сла́ва Отцу́ и Сы́ну и Свято́му Ду́ху. Чудоде́йствия дар прии́м от Бо́га неду́ги исцеля́ти, прему́дре Арте́мие,/ воспева́л еси́ Го́сподеви:/ благослове́н Бог оте́ц на́ших. И ны́не и при́сно и во ве́ки веко́в. Ами́нь. Богородичен: Пресвята́я Де́во, Христа́ ро́ждши,/ непреста́нно моли́ о рабе́х Свои́х,/ да вопие́м Го́сподеви:/ благослове́н еси́, Го́споди, Бо́же оте́ц на́ших. Песнь 8 Ирмос: Покрыва́яй вода́ми превы́спренняя Своя́,/ полага́яй мо́рю преде́л песо́к/ и содержа́й вся,/ Тя пое́т со́лнце, Тя сла́вит луна́,/ Тебе́ прино́сит пе́снь вся тва́рь,/ я́ко Соде́телю всех во ве́ки. Припев: Святы́й пра́ведный Артéмие, моли́ Бо́га о на́с. Покрыва́яй во́дными о́блаки небеса́/ и пролива́яй во́ды на зе́млю,/ прия́т ду́шу пра́веднаго Арте́мия, возвеселя́я ю чудоде́йствы;/ Ему́же вопие́м, я́ко Соде́телю всех во ве́ки. Припев: Святы́й пра́ведный Артéмие, моли́ Бо́га о на́с. Пречестны́я мо́щи твоя́ источа́ют чудеса́, блаже́нне Арте́мие,/ мы же, здра́вие прие́млюще, прино́сим хвалу́ Го́сподеви,/ я́ко Соде́телю всех во ве́ки. Сла́ва Отцу́ и Сы́ну и Свято́му Ду́ху. Пребоже́ственное селе́ние име́яй,/ чудотворе́ния благода́ть прия́л еси́ от Вседержи́телевы руки́,/ и притека́ющии к тебе́ ве́рою мо́щи твоя́ лобыза́ют, пресла́вне Арте́мие,/ и моли́твенно вопию́т Бо́гу, я́ко Соде́телю вся́ческих во ве́ки. И ны́не и при́сно и во ве́ки веко́в. Ами́нь. Богородичен: Еди́наго от Тро́ицы родила́ еси́, Препе́тая Де́во, Преве́чнаго Бо́га,/ Его́же моли́ о воспева́ющих Ти,/ да изведе́т ны от обдержа́щих напа́стей и бед,/ я́ко да вопие́м Творцу́ и Соде́телю всех во ве́ки. Песнь 9 Ирмос: Устраши́ся всяк слух/ неизрече́нна Бо́жия снизхожде́ния,/ я́ко Вы́шний во́лею сни́де да́же и до пло́ти,/ от деви́ческаго чре́ва быв Челове́к./ Те́мже Пречи́стую Богоро́дицу, ве́рнии, велича́ем. Припев: Святы́й пра́ведный Артéмие, моли́ Бо́га о на́с. Устраши́ся слух пра́веднаго о́трока Арте́мия,/ от гла́са гро́ма Твоего́, Го́споди,/ и преставле́ние прия́т пречу́дный Арте́мий по Боже́ственней Твое́й во́ли, Влады́ко,/ те́мже Тя велича́ем. Припев: Святы́й пра́ведный Артéмие, моли́ Бо́га о на́с. Вопие́м ти, Богому́дре Арте́мие, страстоте́рпче:/ не оста́ви нас, си́рых,/ но да́руй нам душе́вное спасе́ние, и теле́сное здра́вие, и по́мощь неосла́бну,/ да тя ве́рою велича́ем. Сла́ва Отцу́ и Сы́ну и Свято́му Ду́ху. Притеце́м, лю́дие, к пречестно́му о́бразу Арте́мия/ и, припа́дающе, возопии́м ему́:/ бу́ди нам стена́ неруши́ма от супоста́т на́ших/ и изба́ви от враго́в ви́димых и неви́димых,/ да тя, ве́рнии, велича́ем. И ны́не и при́сно и во ве́ки веко́в. Ами́нь. Богородичен: Гора́ неруши́мая и две́рь Небе́сная,/ ковче́же златы́й, Влады́чице Де́во,/ покры́й нас кро́вом крилу́ Твое́ю и соблюди́ ны от всех зол,/ да Тя, Пречи́стую Богоро́дицу, ве́рнии, велича́ем. Светилен Я́ко све́тлая звезда́, возсия́ша мо́щи твоя́, Арте́мие прехва́льне,/ и, я́ко многоце́нный би́сер, обрето́шася/ многоразли́чная подаю́ще исцеле́ния и чуде́с зарю́ испуща́юще,/ те́мже ны́не предстои́ши Влады́це всех,/ во све́те ра́дуяся. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Пресве́тлая Цари́це Богоро́дице,/ ро́ждшая Христа́ Спа́са без се́мене от Свята́го Ду́ха,/ от Отца́ исходя́щаго и просвети́вшаго вся ве́рныя,/ да́руй нам во Све́те присносу́щнем водвори́тися/ и Ду́хом Бо́жиим освяти́тися,/ я́ко да Тя, Богоро́дице, сла́вим.

Минея, 5 Июня, Кано́н свято́му Глас 8 Песнь 1 Ирмос: Ди́вному Бо́гу вели́чия принесе́м,/ и великоле́пно с на́ми/ да воспое́т земля́ и не́бо/ я́сно сла́ву Его́. Припев: Святы́й благове́рный кня́же Феóдоре, моли́ Бо́га о на́с. Я́ко еле́нь жела́ет на исто́чники водны́я,/ си́це жела́ше душа́ твоя́, кня́же Фео́доре, к Бо́гу,/ И́же и прия́ тя с любо́вию и сотвори́ насле́дника Ца́рствия Своего́. Припев: Святы́й благове́рный кня́же Феóдоре, моли́ Бо́га о на́с. Кра́ткое жи́зни твоея́ име́л еси́ тече́ние,/ но по́двигом до́брым в зако́не Бо́жии подвиза́лся еси́/ и ве́ру соблю́л еси́,/ сего́ ра́ди отложи́ся тебе́ вене́ц сла́вы безсме́ртныя. Сла́ва Отцу́ и Сы́ну и Свято́му Ду́ху. Ди́вный, Го́споди, во святы́х Твои́х,/ ди́вен еси́ вои́стинну и во святе́м Твое́м кня́зе Фео́доре,/ и́бо в не́мощнем естестве́ челове́честем/ вышеесте́ственную си́лу Твою́ соверша́я,/ дал еси́ те́лу его́ нетле́ние. И ны́не и при́сно и во ве́ки веко́в. Ами́нь. Богородичен: Чу́дно бысть, е́же огне́м опаля́тися купине́ и не сгара́ти;/ чу́дно же и сие́ вои́стинну,/ я́ко Де́вою безсе́менно зачала́ и родила́ еси́ Сы́на Бо́жия/ и по рожде́нии Его́ па́ки Де́ва пребыла́ еси́./ Те́мже Тя, я́ко Ма́терь Бо́жию и Де́ву, благоче́стно велича́ем. Песнь 3 Ирмос: Несть свят, я́ко Госпо́дь,/ и несть пра́веден, я́ко Бог наш,/ Его́же пое́т вся тварь:/ несть пра́веден, па́че Тебе́, Го́споди. Припев: Святы́й благове́рный кня́же Феóдоре, моли́ Бо́га о на́с. И́стинная лоза́ виногра́да Христо́ва был еси́, кня́же Фео́доре,/ сего́ ра́ди и в кра́ткое вре́мя мног плод доброде́телей израсти́л еси́. Припев: Святы́й благове́рный кня́же Феóдоре, моли́ Бо́га о на́с. Дозре́вшим твои́х доброде́телей гро́здием,/ еще́ тебе́ мла́ду су́щу,/ да не ка́ко же́стокия страсте́й бу́ри повредя́т я,/ преселе́н еси́ в вертогра́д Небе́сный. Сла́ва Отцу́ и Сы́ну и Свято́му Ду́ху. Коль пра́веден и щедр еси́, Благоутро́бный Влады́ко,/ в мздовоздая́нии Твои́м пра́ведником!/ Довле́ет и еди́н о́браз:/ ка́ко пра́ведника Твоего́ Фео́дора уще́дрил еси́. И ны́не и при́сно и во ве́ки веко́в. Ами́нь. Богородичен: От утро́бы ма́тере Себе́ Бо́гу посвяти́ла еси́, Отрокови́це,/ и усе́рдием Ему́ служи́ла еси́,/ тем Тебе́ и Бог воздаде́ по правоте́,/ я́ко Тя вси ро́ди Богоро́дицею ублажа́ют. Седален, глас 8 Исхо́д твой, кня́же Фео́доре, от сея́ вре́менныя жи́зни,/ мно́гия источи́ сле́зы от о́чию сыно́в росси́йских,/ но Оте́ц щедро́т и Бог вся́кия уте́хи награди́ их изоби́льно весе́лием,/ возложи́в на свято́е твое́ те́ло оде́жду нетле́ния, во вя́щшее увере́ние,/ я́ко ты по исхо́де твое́м в ра́дости пребыва́еши. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Усумне́ся обру́чник Твой Ио́сиф, ви́дев Тя непра́здну,/ но а́бие разреши́ся сумне́ние,/ егда́ извеще́н бысть от А́нгела,/ я́ко заче́ншееся в Тебе́ от Ду́ха есть Свя́та. Песнь 4 Ирмос: Услы́шах слух си́лы Твоея́,/ и возвесели́ся се́рдце мое́ о Го́споде. Припев: Святы́й благове́рный кня́же Феóдоре, моли́ Бо́га о на́с. Хваля́шеся иногда́ ева́нгельский ю́ноша пред Го́сподем,/ я́ко вся за́поведи соблюде́ от ю́ности своея́,/ но не послу́ша Го́спода, ма́лое сотвори́ти ему повелева́ющаго,/ и не и́де вслед Его́,/ ты же, блаже́нне Фео́доре, и, не хваля́ся, повеле́ний Госпо́дних слу́шал еси́/ и Ему́ с весе́лием после́довал еси́. Припев: Святы́й благове́рный кня́же Феóдоре, моли́ Бо́га о на́с. Даны́ бы́ша тебе́ от Го́спода тала́нты душе́вныя и теле́сныя,/ и́хже во бла́го употребля́я,/ в кра́ткое вре́мя мно́гое приобре́тение Ему́ сотвори́л еси́,/ сего́ ра́ди и введе́ тя, я́ко раба́ блага́го и ве́рнаго, в ра́дость Свою́. Сла́ва Отцу́ и Сы́ну и Свято́му Ду́ху. Слу́шаяй моли́твы пра́ведных Твои́х, Го́споди,/ услы́ши моли́тву и пра́ведника Твоего́ Фео́дора,/ ю́же прино́сит Тебе́ о ро́де свое́м. И ны́не и при́сно и во ве́ки веко́в. Ами́нь. Богородичен: С ра́достию гото́ва су́щи к званию,/ на не́же избра́ Тя Вы́шний, Де́во Мари́е,/ со смире́нием Гаврии́лу рекла́ еси́:/ се раба́ Госпо́дня./ Мы же, Тя си́це смири́вшуюся, Влады́чицею ны́не почита́ем. Песнь 5 Ирмос: Я́ко Бо́га ино́го, Бла́же,/ па́че Тебе́, не зна́ем,/ к Тебе́, Све́ту Незаходи́мому, от но́щи у́тренююще,/ воспева́ем Тя, Человеколю́бче. Припев: Святы́й благове́рный кня́же Феóдоре, моли́ Бо́га о на́с. В ма́лых днех жития́ твоего́, блаже́нне Фео́доре,/ вели́ких свети́ло яви́лся еси́ доброде́телей,/ и́миже Бог благоугожда́ется. Припев: Святы́й благове́рный кня́же Феóдоре, моли́ Бо́га о на́с. Све́тлу ду́шу твою́ хотя́ предста́вити Бо́гу,/ чистоту́ в житии́ твое́м соблю́л еси́,/ сего́ ра́ди по твое́м успе́нии вшел еси́,/ а́може ничто́же нечи́сто вхо́дит. Сла́ва Отцу́ и Сы́ну и Свято́му Ду́ху. Ра́ди пра́ведных Твои́х, Го́споди,/ простира́еши лучи́ Твоея́ ми́лости на гре́шныя:/ озари́ у́бо и нас, недосто́йных рабо́в Твои́х, луча́ми Твоего́ благоутро́бия/ ра́ди пра́ведника Твоего́ Фео́дора. И ны́не и при́сно и во ве́ки веко́в. Ами́нь. Богородичен: Егда́ Гаврии́л благовести́ Тебе́, Неискусому́жная Де́во,/ я́ко во чре́ве Твое́м зачне́ши и роди́ши Сы́на Бо́жия,/ с ве́рою отвеща́ла еси́:/ бу́ди Мне по глаго́лу твоему́./ Сего́ ра́ди по ве́ре Твое́й и бысть Тебе́ благослове́ние Вы́шняго,/ Тобо́ю же и вси лю́дие,/ и́же сиде́ша во тьме и се́ни сме́ртней,/ узре́ша свет ве́лий. Песнь 6 Ирмос: Ри́зу мне пода́ждь све́тлу,/ одея́йся све́том, я́ко ри́зою,/ Многоми́лостиве Христе́ Бо́же наш. Припев: Святы́й благове́рный кня́же Феóдоре, моли́ Бо́га о на́с. И мя́гкия нося́й оде́жды, кня́же Фео́доре,/ си́це житие́м твои́м в кра́ткое вре́мя Бо́гу угоди́л еси́, я́ко мно́гим диви́тися,/ и́же угоди́ша Ему́, долговре́менно облача́ющеся во вре́тище. Припев: Святы́й благове́рный кня́же Феóдоре, моли́ Бо́га о на́с. Уве́рен быв, я́ко и златотка́нныя ри́зы о́бщему подлежа́т тле́нию,/ потща́лся еси́ в животе́ твое́м из доброде́телей истка́ти себе́ ри́зу нетле́ния,/ в не́йже ны́не красу́ешися. Сла́ва Отцу́ и Сы́ну и Свято́му Ду́ху. Коле́на се́рдца на́шего преклоня́я,/ благодаре́ние Тебе́ возсыла́ем, Человеколю́бче,/ я́ко те́ло кня́зя Фео́дора, тле́нию по естеству́ подлежа́щее,/ обле́кл еси́ в ри́зу нетле́ния,/ и́мже умножа́ется сла́ва всея́ Росси́и. И ны́не и при́сно и во ве́ки веко́в. Ами́нь. Богородичен: Позлаще́нными доброде́телей ри́зами/ оде́янна и преиспещре́нна была́ еси́ на земли́, Пренепоро́чная,/ сего́ ра́ди и Бог Сло́во во утро́бе Твое́й/ благоволи́ облещи́ся в плоть челове́ческую. Кондак, глас 4 В благоче́стии рожде́нна,/ в стра́се Бо́жии воспита́на,/ в житии́ целому́дрие стяжа́вшаго,/ по успе́нии же нетле́нием телесе́ просия́вшаго,/ благове́рнаго кня́зя Фео́дора во святы́х почита́я,/ смире́нно мо́лимся Тебе́, Всеси́льный Влады́ко,/ да и во ве́ки прославля́еши святы́ми Твои́ми/ страны́ на́ша росси́йския. Икос Досто́йно и пра́ведно есть ра́доватися тебе́, свя́те Фео́доре, на Небеси́,/ я́ко неизрече́нную благода́ть от Бо́га получи́л еси́,/ мы же ра́дуемся на земли́,/ я́ко тя и́мамы те́плаго к Бо́гу моли́твенника,/ и от ра́дости си́це зове́м:/ ра́дуйся, похвало́ росси́йская. Песнь 7 Ирмос: В нача́ле зе́млю основа́вый/ и Небеса́ сло́вом утверди́вый,/ благослове́н еси́ во ве́ки, Го́споди, Бо́же оте́ц на́ших. Припев: Святы́й благове́рный кня́же Феóдоре, моли́ Бо́га о на́с. Я́ко чи́стое доброде́телей зерца́ло был еси́ на земли́, кня́же Фео́доре,/ сего́ ра́ди Вы́шний, восприя́в ду́шу твою́ в черто́г Свой Небе́сный,/ оста́ви нам о́браз, нетле́нное твое́ те́ло,/ да после́дуем стопа́м твои́м. Припев: Святы́й благове́рный кня́же Феóдоре, моли́ Бо́га о на́с. Не стыди́мся хвали́тися, пра́ведниче Бо́жий,/ я́ко моли́тва твоя́ к Бо́гу мно́го мо́жет поспешествова́ти нам во благо́е:/ ве́мы бо, я́ко моли́твы пра́ведных прия́тны Ему́. Сла́ва Отцу́ и Сы́ну и Свято́му Ду́ху. Хва́лим, пое́м и благослови́м Тебе́, Го́споди,/ я́ко призира́еши на Росси́ю с высоты́ свята́го жили́ща Твоего́/ и посеща́еши ю, я́ко виногра́д Твой,/ его́же насади́ десни́ца Твоя́. И ны́не и при́сно и во ве́ки веко́в. Ами́нь. Богородичен: Блажи́м Тя, Богоро́дице Де́во,/ и блажи́ти никогда́ не престае́м:/ благослове́нна бо Ты еси́ в жена́х/ и благослове́н Плод чре́ва Твоего́. Песнь 8 Ирмос: Покрыва́яй вода́ми превы́спренняя Своя́,/ полага́яй мо́рю преде́л песо́к/ и содержа́й вся,/ Тя пое́т со́лнце, Тя сла́вит луна́,/ Тебе́ прино́сит песнь вся тварь,/ я́ко Соде́телю всех во ве́ки. Припев: Святы́й благове́рный кня́же Феóдоре, моли́ Бо́га о на́с. Блаже́н еси́, кня́же Фео́доре,/ я́ко сый посреде́ волну́ющагося душетле́нных страсте́й мо́ря,/ к ти́хому приста́нищу в кра́ткое вре́мя безбе́дно дости́гл еси́. Припев: Святы́й благове́рный кня́же Феóдоре, моли́ Бо́га о на́с. А́ще и устремля́хуся ми́ра сего́ во́лны, е́же потопи́ти ю́ность твою́,/ но ничто́же успе́ша:/ ковче́г бо тебе́ бысть чистота́,/ корми́ло – Правосла́вная ве́ра,/ ко́тва 14 – тве́рдая на Бо́га наде́жда,/ ве́трило – любо́вь к Бо́гу и бли́жним. Сла́ва Отцу́ и Сы́ну и Свято́му Ду́ху. Прославля́ем Тя, Го́споди Бо́же,/ я́ко, удивля́я хоте́ния Твоя́ во святы́х Твои́х,/ удиви́л еси́ хоте́ние Твое́ и в благове́рнем кня́зе Фео́доре. И ны́не и при́сно и во ве́ки веко́в. Ами́нь. Богородичен: Удивля́хуся волсви́ еги́петстии си́ле чудотво́рнаго жезла́ Моисе́ова,/ мы же удивля́емся Тебе́, Мари́е:/ ка́ко Невмести́маго все́ми во утро́бе Твое́й вмести́ла еси́? Песнь 9 Ирмос: Благослове́н Госпо́дь, Бог Изра́илев,/ воздви́гнувши рог спасе́ния нам/ в дому́ Дави́дове, о́трока Своего́,/ в ни́хже посети́ нас Восто́к с высоты́/ и напра́вил ны есть на путь ми́ра. Припев: Святы́й благове́рный кня́же Феóдоре, моли́ Бо́га о на́с. Ви́дяще тя росси́йстии сопоста́ты,/ лета́ми доспева́ющаго ко изощре́нию меча́ на вы́и их,/ не можа́ху не смуща́тися:/ ты бо, душе́внаго сопоста́та, еще́ млад сый, победи́ти в си́лах был еси́;/ сего́ ра́ди кре́пкий во бране́х Госпо́дь/ и причте́ тя, я́ко до́браго во́ина,/ к Безпло́тному Своему́ во́инству. Припев: Святы́й благове́рный кня́же Феóдоре, моли́ Бо́га о на́с. Несумне́нная наде́жда был сыново́м росси́йским к защище́нию оте́чества,/ но Прему́дрый о всех Промысли́тель/ благоволи́ тя прия́ти безмяте́жна в поко́й Свой,/ Росси́ю же защити́ти руко́ю бра́та твоего́, свята́го Алекса́ндра. Сла́ва Отцу́ и Сы́ну и Свято́му Ду́ху. Благослове́н еси́, Го́споди Бо́же наш,/ я́ко ве́си пути́ непоро́чных,/ и достоя́ние их во ве́ки пребыва́ет,/ его́же прича́стником бы́ти сподо́бил еси́/ и непоро́чнаго кня́зя Фео́дора. И ны́не и при́сно и во ве́ки веко́в. Ами́нь. Богородичен: Призира́яй на смире́нныя рабы́ Своя́ Вы́шний/ призре́ и на Твое́ смире́ние, Пречи́стая Де́во,/ и превознесе́ Тя па́че всех дще́рей сыно́в челове́ческих. Светилен Прекра́сный доброде́телей храм на земли́ быв, благове́рный князь Фео́дор/ оста́ви нам по свое́м успе́нии те́ло свое́, украше́нное нетле́нием,/ душе́ю же вни́де в храм нерукотворе́нный. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Вели́ким благодаре́нием до́лжни мы Тебе́, Влады́чице:/ еди́на бо Ты от земноро́дных яви́лася еси́/ досто́йна прия́ти во утро́бу Твою́ Сы́на Бо́жия,/ Его́же Оте́ц посла́ на зе́млю разруши́ти зако́нную кля́тву/ и пода́ти ве́чное всем благослове́ние.

Минея, 21 Марта, Канон преподобного Глас 2 Песнь 1 Ирмос: Во глубине постла иногда/ фараонитское всевоинство преоруженная сила,/ воплощшееся же Слово всезлобный грех потребило есть,/ препрославленный Господь,// славно бо прославися. Припев: Преподо́бне о́тче Серафи́ме, моли́ Бо́га о на́с. Како возможем достойно воспети твое богоугодное житие, Серафиме преподобне?/ От юности бо Христу любовию уязвився,/ светильник пресветлый многим явился еси./ Темже молим тя:/ даруй и нам просвещение достойно тя славити. Припев: Преподо́бне о́тче Серафи́ме, моли́ Бо́га о на́с. Ангелом собеседник явился еси изрядный, святе,/ прежде бо жития иноческаго волю Божию о себе исправляя,/ в мире благочестно пожил еси/ и душу Господу в сосуд избранный уготовал еси. Сла́ва Отцу́ и Сы́ну и Свято́му Ду́ху. К Богу ум твой вперяя, отче преподобне,/ страсти многоразличныя смирением и житием многотрудным умертвил еси/ и в радости всем требующим твоея помощи послужил еси. И ны́не и при́сно и во ве́ки веко́в. Ами́нь. Богородичен: О, Пречистая Дево Богородице,/ не презри нас, грешных, требующих Твоея помощи и заступления,/ и буди нам Ходатаица,/ да покаянием обрящем отпущение грехов и живот вечный. Песнь 3 Ирмос: Процвела есть пустыня, яко крин, Господи,/ языческая неплодящая церковь пришествием Твоим,/ в нейже утвердися мое сердце. Припев: Преподо́бне о́тче Серафи́ме, моли́ Бо́га о на́с. Верным чадом преподобнаго старца Варнавы Гефсиманскаго явился еси, святе,/ усердно послушание ему во всем являя./ Темже и сподобился еси от него быти наследник благодати и даров духовных. Припев: Преподо́бне о́тче Серафи́ме, моли́ Бо́га о на́с. Отче преподобне,/ ты, попечение о убогих присно имея,/ не возгнушался еси послужити оным твоима рукама,/ показуя, яко всяк человек сердцу твоему возлюблен есть. Сла́ва Отцу́ и Сы́ну и Свято́му Ду́ху. Словеса аввы твоего Варнавы добре исполняя,/ на страсти вельми подвизался еси./ Сего ради, многими добродетельми от Бога украшен,/ дом Трисолнечнаго света явился еси, преподобне. И ны́не и при́сно и во ве́ки веко́в. Ами́нь. Богородичен: Преблагословенная, Всенепорочная Богородице Марие,/ рождшая нам Слово Божие, от греха избранныя Своя избавившее,/ заступи и спаси души наша. Седален, глас 3 Возрадуйся, граде святаго Петра,/ и малая весе Вырице, возвеличися,/ се бо светильник веры новый Серафим,/ проповедник любве и покаяния является/ и, дары Божественныя щедро источая,/ молится о душах наших. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Яко невозделанная, Дево, Лоза, краснейший Грозд прозябла еси,/ источающ нам вино спасения, всех веселящее души и телеса./ Темже, яко вину Тя добрых блажаще присно со Ангелы, вопием Ти:/ радуйся, Благодатная. Песнь 4 Ирмос: Пришел еси от Девы, не ходатай, ни ангел,/ но Сам, Господи, воплощься,/ и спасл еси всего мя человека,/ тем зову Ти:/ слава силе Твоей, Господи. Припев: Преподо́бне о́тче Серафи́ме, моли́ Бо́га о на́с. Очи сердца ко Творцу всяческих вперив/ и на Бога Единаго упование возложив, преподобне Серафиме,/ иноческий образ восприял еси/ и во дни гонений козни вражия мужественне претерпел еси. Припев: Преподо́бне о́тче Серафи́ме, моли́ Бо́га о на́с. Евангельских заповедей истинный последователь явился еси, преподобне,/ темже лествицею добродетелей к совершенству многотрудне восходил еси,/ всякое послушание добре исполняя и молитву в сердце непрестанно совершая. Сла́ва Отцу́ и Сы́ну и Свято́му Ду́ху. Монашеское житие в мире взыскуя и житейских трудов не отвращаяся,/ от юности добрый наставник всем явился еси, отче Серафиме,/ сего ради сана иерейскаго от священномученика Вениамина Петроградскаго удостоился еси. И ны́не и при́сно и во ве́ки веко́в. Ами́нь. Богородичен: Тебе, Дево, Едину, вси вернии, стяжахом Заступницу тверду,/ Ты бо Бога родила еси нам,/ сего ради хвалами, Чистая, Тя ублажаем по глаголу Твоему. Песнь 5 Ирмос: Ходатай Богу и человеком был еси, Христе Боже,/ Тобою бо, Владыко, к Светоначальнику Отцу Твоему,/ от нощи неведения,// приведение имамы. Припев: Преподо́бне о́тче Серафи́ме, моли́ Бо́га о на́с. Яко светильник не может укрытися, верху горы стоя,/ тако труды и подвизи твои, преподобне Серафиме, яже в келии втайне совершал еси, явиша тя миру./ Сего ради лаврская братия и мирстии людие притекаху к тебе, наставления взыскуя. Припев: Преподо́бне о́тче Серафи́ме, моли́ Бо́га о на́с. Посреде бури тяжких гонений/ и лютых испытаний тверд и непоколебим пребыл еси, преподобне Серафиме,/ теплую молитву непрестанно ко Господу возсылая/ и научая всех творити святую волю Его. Сла́ва Отцу́ и Сы́ну и Свято́му Ду́ху. Образ ангельский, великую схиму, прием, отче,/ именем преподобнаго Серафима, угодника Саровскаго, наречен был еси,/ егоже от юности всем сердцем возлюбив,/ подвигом онаго подражати потщался еси. И ны́не и при́сно и во ве́ки веко́в. Ами́нь. Богородичен: Дивно возсия слава Твоя, Богородице Дево,/ се бо Христа Бога неизреченно имела еси во чреве,/ якоже некогда Исаия провозгласи,/ и выше естества родила еси Спаса душ наших. Песнь 6 Ирмос: В бездне греховней валяяся,/ неизследную милосердия Твоего призываю бездну:// от тли, Боже, мя возведи. Припев: Преподо́бне о́тче Серафи́ме, моли́ Бо́га о на́с. Озаряемь светом Христовым свыше, богомудре,/ и по преселении твоем к Богу неоскудно исцеления источаеши/ всем с верою к тебе притекающим. Припев: Преподо́бне о́тче Серафи́ме, моли́ Бо́га о на́с. Любовию божественною распалаемь,/ дух мирен стяжал еси, отче преподобне,/ духи же нечистыя изгоняя,/ многия люди ко Христу привел еси. Сла́ва Отцу́ и Сы́ну и Свято́му Ду́ху. Гласом тихим и кротким/ притекающия к тебе любви и смирению наставлял еси, отче Серафиме,/ таже и молитве непрестанней, попаляющей всякий грех, научал еси. И ны́не и при́сно и во ве́ки веко́в. Ами́нь. Богородичен: Ужасошася Ангелов воинства и человеков собори, Всенепорочная,/ дивнаго и паче ума Рождества Твоего:/ како и Дева пребыла еси/ и Мати Божия быти сподобилася еси./ Сего ради достойно Тя вси славим. Кондак, глас 5 Древним отцем подражая,/ подвигом добрым подвизался еси/ и, благодать Духа Святаго обильно стяжав,/ Саровскому угоднику уподобился еси/ и многим путь спасения явил еси./ Сего ради зовем ти:/ радуйся, преподобне Серафиме,/ Александро-Невския лавры дивный подвижниче/ и Вырицкия веси славная похвало. Икос Ангелов Творец и Господь Сил предызбра тя от юности, преподобне,/ быти Ему служителем верным/ и наставником на путь спасения притекающим к тебе./ Мы же, дивящеся таковому о тебе промышлению, с любовию вопием:/ радуйся, яко измлада Богу послужити возжелел еси;/ радуйся, яко в мире пребывая, добродетельным житием Богу угождал еси;/ радуйся, яко утешитель страждущих был еси;/ радуйся, яко пламенную любовь ко Христу стяжал еси;/ радуйся, преподобнаго Варнавы Гефсиманскаго учениче прилежный;/ радуйся, дивнаго Серафима Саровскаго подражателю усердный;/ радуйся, Александро-Невския лавры чудное прозябение;/ радуйся, веси Вырицкия Божие благословение;/ радуйся, скорый помощниче в скорбех и болезнех;/ радуйся, светильниче веры православныя и благочестия;/ радуйся, преподобне Серафиме, милостивый наш предстателю пред Господем. Песнь 7 Ирмос: Богопротивное веление беззаконнующаго мучителя/ высок пламень вознесло есть:/ Христос же простре богочестивым отроком росу духовную,// Сый благословен и препрославлен. Припев: Преподо́бне о́тче Серафи́ме, моли́ Бо́га о на́с. Серафиму и Варнаве преподобным подражая,/ святыми их молитвами укрепляемь был еси, святе,/ темже от Бога сподобился еси пророческаго дара:/ грядущая народу нашему и Церкви Российстей предвозвещати. Припев: Преподо́бне о́тче Серафи́ме, моли́ Бо́га о на́с. Еленю подобяся, устремился еси душею твоею к горним обителем, преподобне,/ Промыслом же Божиим соблюдаемь,/ подвигом добрым непрестанно подвизался еси, взывая:/ благословен еси, Боже отец наших. Сла́ва Отцу́ и Сы́ну и Свято́му Ду́ху. Руце твои ко Господу со умилением воздевая/ и угоднику Божию Саровскому подражая, отче Серафиме,/ моление на камени совершал еси, поя:/ благословен еси, Боже отец наших. И ны́не и при́сно и во ве́ки веко́в. Ами́нь. Богородичен: Ангельския Силы воспевают Тя немолчно, Богородительнице,/ и мы грешнии взывати дерзаем:/ житие наше, Пречистая, к Твоему всетихому пристанищу направи, зовущих:/ благословен еси, Боже отец наших. Песнь 8 Ирмос: Пещь иногда огненная/ в Вавилоне действа разделяше,/ Божиим велением халдеи опаляющая,/ верныя же орошающая, поющия:/ благословите, вся дела Господня, Господа. Припев: Преподо́бне о́тче Серафи́ме, моли́ Бо́га о на́с. Фараониты мысленныя мужески победив,/ чистоту сердечную стяжал еси, отче преподобне,/ сего ради душевныма очима Бога узрев,/ с любовию воспевал еси:/ благословите, вся дела Господня, Господа. Припев: Преподо́бне о́тче Серафи́ме, моли́ Бо́га о на́с. Имуще тя, отче, молитвенника тепла и помощника изрядна,/ от стрел вражиих спасаемся и Богу вопием:/ благословите, вся дела Господня, Господа. Сла́ва Отцу́ и Сы́ну и Свято́му Ду́ху. Многая чудеса, преподобне,/ силою Божиею, в тебе богатно действующею, сотворил еси:/ слепии бо прозреваху, немии глаголаху,/ одержимии же от духов злобы свобождахуся./ Сего ради Богу, дивному во святых Своих, поем:/ благословите, вся дела Господня, Господа. И ны́не и при́сно и во ве́ки веко́в. Ами́нь. Богородичен: Естество человеческое из Тебе восприял есть, Владычице,/ всех Царь и Господь./ Сего ради Тя, яко Богородицу и Матерь Света, в песнех прославляем. Песнь 9 Ирмос: Безначальна Родителя Сын, Бог и Господь,/ воплощься от Девы нам явися,/ омраченная просветити, собрати расточенная.// Тем Всепетую Богородицу величаем. Припев: Преподо́бне о́тче Серафи́ме, моли́ Бо́га о на́с. Чисте зрети сподобился еси Царицу Небесную, преподобне,/ скорое отшествие твое от мира сего ти возвестившую./ Темже духом возрадовався, Бога прославил еси. Припев: Преподо́бне о́тче Серафи́ме, моли́ Бо́га о на́с. Утверди сердца наша на пути заповедей Господних, отче преподобне,/ да обрящем милость на Страшнем Суде Его/ и прославим Отца нашего, Иже есть на Небесех. Припев: Преподо́бне о́тче Серафи́ме, моли́ Бо́га о на́с. Душею твоею, яко огненный Серафим, пламенея,/ поприще жизни твоея свершил еси, отче преподобне./ Научи и нас истинней любви ко Господу/ и помози имя сладчайшее Иисуса непрестанно призывати. Сла́ва Отцу́ и Сы́ну и Свято́му Ду́ху. Недостойными усты песнь ныне тебе принесохом, преподобне,/ сподоби нас твоего отеческаго благословения,/ да прославим Бога нашего, дивнаго во святых Своих. И ны́не и при́сно и во ве́ки веко́в. Ами́нь. Богородичен: Егоже паче естества родила еси, Мати Пренепорочная,/ моли о всех нас, православно воспевающих Тя,/ яко Матерь Божию и Приснодеву. Светилен Благодать Святаго Духа, обильно всельшаяся в тя,/ яко светильника многосветлаго, показа тя верным, преподобне./ Освети омраченная сердца наша,/ да во свете невечернем узрим Христа, Бога нашего. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Честнейши еси всея твари, Богородице Дево, Христа рождшая:/ Того убо моли сохранитися стаду Твоему невредиму/ от всякаго навета сопротивнаго.

Минея, 21 Мая, Други́й кано́н преподо́бному Кассиа́ну, его́же краегране́сие си́це: Благода́ть мне, Христе́ мой, да́руй Глас 2 Песнь 1 Ирмос: Гряди́те, лю́дие,/ пои́м пе́снь Христу́ Бо́гу,/ разде́льшему мо́ре и наста́вльшему лю́ди,/ я́же изведе́ из рабо́ты еги́петския,/ я́ко просла́вися. Припев: Преподо́бне о́тче Кассиа́не, моли́ Бо́га о на́с. Просвеще́нием Трисо́лнечнаго Божества́ озари́вся, преподо́бне Кассиа́не,/ свети́льник яви́ся нам, на земли́ сия́я,/ чудесы́ твои́ми просвеща́я ве́рно притека́ющих к тебе́,/ светоно́сную твою́ па́мять чту́щих. Припев: Преподо́бне о́тче Кассиа́не, моли́ Бо́га о на́с. Со́весть име́л еси́ чи́сту к Бо́гу и о́ко серде́чное, преподо́бне Кассиа́не,/ взира́я к Нему́ непреста́нно со сле́зными тече́нии и ча́стыми воздыха́нии,/ те́мже Христо́с внят моли́тве твое́й. Сла́ва Отцу́ и Сы́ну и Свято́му Ду́ху. Ве́сь Тро́ицы бы́сть жили́ще/ и душе́вное жела́ние Небе́сное возлюби́л еси́, преподо́бне о́тче наш Кассиа́не,/ сего́ ра́ди безсме́ртную восприя́л еси́ па́мять/ и жи́знь несконча́емую сподо́бился еси́ получи́ти. И ны́не и при́сно и во ве́ки веко́в. Ами́нь. Богородичен: Пло́тию ро́ждши Безпло́тнаго, Богоро́дице Пречи́стая,/ стра́сти лю́тыя ума́ утоли́, Де́во,/ испра́ви мя, заблу́ждшаго, Ма́ти Бо́жия, я́ко да сла́влю Тя. Песнь 3 Ирмос: На ка́мени мя ве́ры утверди́в,/ разшири́л еси́ уста́ моя́ на враги́ моя́,/ возвесели́ бо ся дух мой, внегда́ пе́ти:/ не́сть свят, я́коже Бог наш,/ и не́сть пра́веден, па́че Тебе́, Го́споди. Припев: Преподо́бне о́тче Кассиа́не, моли́ Бо́га о на́с. Напо́лнив се́рдце твое́ на земли́ мно́гими сле́зными пото́ки,/ преподо́бне о́тче наш Кассиа́не,/ плодоно́сно показа́л еси́ вся́ких доброде́телей,/ износя́ще чуде́с твои́х показа́ние,/ и ны́не предстои́ши со А́нгелы Бо́гу, моля́ся непреста́нно. Припев: Преподо́бне о́тче Кассиа́не, моли́ Бо́га о на́с. Высото́ю смире́ния украша́емь,/ свергл еси́ на зе́млю велехва́льнаго, Кассиа́не, о́тче преблаже́нне,/ изря́дными де́лы свои́ми, посто́м и моли́твами всено́щными предстоя́ Бо́гу. Сла́ва Отцу́ и Сы́ну и Свято́му Ду́ху. Исцеле́ния безчи́сленно источа́ет гроб твой, преблаже́нне о́тче наш Кассиа́не,/ с ве́рою притека́ющим к тебе́ со стра́хом:/ отгоня́еши боле́зни от челове́к и душе́вныя и теле́сныя врачу́еши стра́сти/ похваля́ющих труды́ твоя́, всече́стне. И ны́не и при́сно и во ве́ки веко́в. Ами́нь. Богородичен: Из ложе́сн Твои́х возсия́ пресла́вно Вели́кое Со́лнце,/ Христо́с Бог, Богоро́дице Де́во,/ и, вся земны́я концы́ просвети́в,/ преподо́бных ли́ки че́стно венча́л е́сть. Седален, глас 4 Приспе́ всечестны́й твой пра́здник, преблаже́нне Кассиа́не,/ просвеща́я всех, торжеству́ющих па́мять твою́ све́тло/ и Христа́ непреста́нно пе́сньми сла́вящих. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Мно́гими прегреше́ньми ум помраче́н иму́ще,/ вопие́м ко Твоему́ кре́пкому заступле́нию, Богома́ти Пречи́стая,/ просвети́ о́чи на́ши душе́вныя и возсия́й нам покая́ния зарю́,/ моли́твами уго́дника Твоего́, преподо́бнаго Кассиа́на, Еди́на Благослове́нная. Песнь 4 Ирмос: Прише́л еси́ от Де́вы не хода́тай, ни А́нгел,/ но Сам, Го́споди, вопло́щся,/ и спасл еси́ всего́ мя, челове́ка./ Тем зову́ Ти: сла́ва си́ле Твое́й, Го́споди. Припев: Преподо́бне о́тче Кассиа́не, моли́ Бо́га о на́с. Зе́млю до́льную проше́д, соде́лал еси́ ду́шу свою́ храм Свято́му Ду́ху,/ те́мже Небе́сную стяжа́л еси́ жи́знь неконча́емую,/ со Безпло́тными ли́ки смеси́вся, кро́тких зе́млю насле́довал еси́/ во Ца́рствии Небе́снем во вся ве́ки. Припев: Преподо́бне о́тче Кассиа́не, моли́ Бо́га о на́с. Я́ко Христо́во смире́ние во́лею свое́ю, преподо́бне о́тче наш Кассиа́не, стяжа́в,/ Небе́сное Ца́рство восприя́л еси́,/ бесо́вскую же горды́ню, блаже́нне Кассиа́не, низложи́в, на зе́млю пове́рже. Сла́ва Отцу́ и Сы́ну и Свято́му Ду́ху. Я́ко со́лнце от восто́ка, лучи́ свои́х чуде́с испуща́еши, преподо́бне о́тче наш Кассиа́не,/ и, а́нгельскому житию́ поревнова́в в житии́ свое́м/ непреста́нными твои́ми мно́гими моли́твами, просвети́л еси́ всю подсо́лнечную,/ те́мже прославля́ешися. И ны́не и при́сно и во ве́ки веко́в. Ами́нь. Богородичен: Блажи́т Тя, Пречи́стая Богоро́дице,/ всяк во́зраст и вся́ка душа́ ве́рных,/ Бо́жие бо Сло́во па́че ума́ и сло́ва родила́ еси́, Препе́тая. Песнь 5 Ирмос: Све́та Пода́телю и веко́в Тво́рче, Го́споди,/ во све́те Твои́х повеле́ний наста́ви нас:/ ра́зве бо Тебе́, ино́го бо́га не зна́ем. Припев: Преподо́бне о́тче Кассиа́не, моли́ Бо́га о на́с. Возсия́ в тебе́ Госпо́дь, Его́же от души́ возжела́л еси́, преподо́бне о́тче Кассиа́не,/ жили́ще свое́ име́я в пусты́ни У́чме, близ гра́да У́глеча, любве́ ра́ди Христо́вы,/ и Того́ сла́вы наслажда́ешися ны́не в Небе́снем Ца́рствии непреста́нно. Припев: Преподо́бне о́тче Кассиа́не, моли́ Бо́га о на́с. Еди́ней Христо́вей любви́, преподо́бне Кассиа́не, приложи́вся в житии́ свое́м на земли́,/ Бо́жиим за́поведем потща́лся еси́ все́ю душе́ю прилежа́ти,/ тем прия́л еси́ благода́ть изгоня́ти бе́сы от бесну́ющихся челове́к. Сла́ва Отцу́ и Сы́ну и Свято́му Ду́ху. Незло́бив и кро́ток был еси́ на земли́, вся зло́бы вра́жия погуби́в,/ и ми́лостив до конца́ яви́лся еси́ ко всем челове́ком, о́тче Кассиа́не,/ ми́лость душе́вную стяжа́в от еди́наго Бо́га,/ сего́ ра́ди благода́ть и ми́лость восприя́л еси́ и́стинную спасе́нную. И ны́не и при́сно и во ве́ки веко́в. Ами́нь. Богородичен: Воспо́йте Го́сподеви, вся земля́,/ и по́йте, вси, Я́вльшемуся из чре́ва Де́вы Неискусобра́чныя неизрече́нно и боголе́пно/ и Сию́ ве́рным показа́вшему тве́рдую наде́жду и похвалу́. Песнь 6 Ирмос: В бе́здне грехо́вней валя́яся,/ неизсле́дную милосе́рдия Твоего́ призыва́ю бе́здну:/ от тли, Бо́же, мя возведи́. Припев: Преподо́бне о́тче Кассиа́не, моли́ Бо́га о на́с. Си́лою Христо́вою укрепля́емь, преподо́бне о́тче наш Кассиа́не,/ вся кова́рства лука́ваго врага́ низве́ргл еси́,/ и ны́не безстра́стия умо́м очище́нным предстои́ши Бо́гу Вседержи́телю,/ на Него́же все жела́ние свое́ возложи́л еси́. Припев: Преподо́бне о́тче Кассиа́не, моли́ Бо́га о на́с. Твоя́, всеблаже́нне Кассиа́не, преподо́бныя и святы́я мо́щи,/ во гро́бе лежа́ще, неду́ги врачу́ют,/ бесо́вския же полки́ отгоня́ют всегда́ от душ с ве́рою приходя́щих к тебе́,/ всем бо подае́ши неоску́дная исцеле́ния. Сла́ва Отцу́ и Сы́ну и Свято́му Ду́ху. Боже́ственных повеле́ний, о́тче, нра́вы стяжа́в,/ кро́тость, и незло́бие, и смире́ние,/ сего́ ра́ди от Благода́теля Бо́га бога́тно дарова́ние восприя́л еси́, преподо́бне Кассиа́не,/ исцеле́ний же да́ры тре́бующим от Тебе́ и с ве́рою приходя́щим подае́ши:/ слепы́м зре́ние, хромы́м хожде́ние, разсла́бленным поможе́ние и бе́сы одоля́емым свобожде́ние. И ны́не и при́сно и во ве́ки веко́в. Ами́нь. Богородичен: Душе́вныя моя́ стра́сти, Де́во, исцели́,/ Я́же безстра́стия бы́вши исто́чник/ Ма́ти Бо́жия, просвети́ Рождество́м Твои́м, преподо́бных моли́твы прие́мля. Кондак, глас 8 Я́ко светоза́рная звезда́, прише́л еси́ от восто́ка на за́пад,/ оста́вль оте́чество и княже́ние твое́ Христа́ ра́ди,/ и в ца́рствующий град Москву́ прише́л еси́,/ и, промышле́нием Боже́ственнаго ра́зума направля́емь,/ У́глеча гра́да дости́гл еси́,/ и, близ его́, над Во́лгою реко́ю, в пусты́ни У́чме всели́вся,/ оби́тель сотвори́л еси́, и це́рковь созда́,/ и созва́ мона́хов во спасе́ние;/ с ни́миже моли́ о нас, чту́щих па́мять твою́, да зове́м ти:/ ра́дуйся, преподо́бне о́тче Кассиа́не. Икос Дар Бо́жий вои́стинну яви́лся еси́ земли́ У́чемстей/ и гра́ду на́шему У́глечу, преподо́бне Кассиа́не,/ по́двигом бо до́брым до конца́ зде подвиза́лся еси́/ и, благода́ти Боже́ственныя сосу́д быв избра́нный,/ дарова́ния ве́лия прия́л еси́;/ те́мже и по преставле́нии твое́м со дерзнове́нием возде́еши преподо́бныя твоя́ ру́це,/ Го́сподеви те́пле моля́ся о всей стране́ Росси́йстей./ Сего́ ра́ди, с ве́рою и любо́вию к тебе́ притека́юще, вопие́м:/ ра́дуйся, Ду́ха Свята́го прия́телище;/ ра́дуйся земны́й а́нгеле и Небе́сный челове́че./ Ра́дуйся, оте́чество твое́ и род земны́й оста́вивый и в пусты́ни жи́ти изво́ливый;/ ра́дуйся, дре́во доброде́телей, при вода́х насажде́нное./ Ра́дуйся, я́ко плод прине́сл еси́, благоцвету́щ вся́кия доброде́тели;/ ра́дуйся, притека́ющих к тебе́ спасе́ния хода́тай./ Ра́дуйся, я́ко исцеле́ний источа́еши реку́;/ ра́дуйся, я́ко стра́ждущих от бед избавля́еши./ Ра́дуйся, и́ноков исправле́ние;/ ра́дуйся, душ на́ших ра́дование./ Ра́дуйся, оте́честву на́шему похвала́ и утвержде́ние,/ его́же соблюди́ моли́твами твои́ми от враг ненаве́тно, да зове́м ти:/ ра́дуйся, преподо́бне о́тче Кассиа́не. Песнь 7 Ирмос: О́бразу злато́му, на по́ле Деи́ре служи́му,/ трие́ Твои́ о́троцы небрего́ша безбо́жнаго веле́ния,/ посреде́ же огня́ вве́ржени, ороша́емы, поя́ху:/ благослове́н еси́, Бо́же оте́ц на́ших. Припев: Преподо́бне о́тче Кассиа́не, моли́ Бо́га о на́с. Всех теку́щих и вре́менных земны́х страсте́й свободи́вся, преподо́бне о́тче Кассиа́не,/ всю бо наде́жду стяжа́в к Бо́гу,/ Его́же ра́ди ны́не де́йствуеши, блаже́нне, пресла́вная и мно́гая твоя́ чудеса́, поя́:/ оте́ц на́ших Бо́же, благослове́н еси́. Припев: Преподо́бне о́тче Кассиа́не, моли́ Бо́га о на́с. Ору́жием моли́тв твои́х лука́выя победи́л еси́ полки́,/ с Небе́с благода́ть прия́л еси́ исцеля́ти неду́ги и зу́бныя боле́зни/ и прогоня́ти бе́сы от взыва́ющих ве́рно:/ благослове́н Бог оте́ц на́ших. Сла́ва Отцу́ и Сы́ну и Свято́му Ду́ху. Пло́ть свою́ повину́в Христо́ви, о́тче преподо́бне Кассиа́не,/ в воздержа́нии вели́цем пожи́л еси́ в житии́ свое́м на земли́,/ в труде́х и во бде́ниих, прехва́льне,/ име́я пред ми́лостивым Бо́гом со́весть всегда́ чи́сту,/ в Небе́сное Ца́рствие всели́лся еси́, воспева́я:/ благослове́н Бог оте́ц на́ших. И ны́не и при́сно и во ве́ки веко́в. Ами́нь. Богородичен: Ору́жие, вся храня́щее пре́жде врата́ еде́мская,/ плещи́, Деви́це, всем дае́т,/ низложи́вшим врага́ губи́теля по́стническими боре́нии,/ всегда́ взыва́ющим: благослове́н, Пречи́стая, Плод чре́ва Твоего́. Песнь 8 Ирмос: В пе́щь о́гненную ко отроко́м евре́йским снизше́дшаго/ и пла́мень в ро́су прело́жшаго Бо́га/ по́йте, дела́, я́ко Го́спода/ и превозноси́те во вся ве́ки. Припев: Преподо́бне о́тче Кассиа́не, моли́ Бо́га о на́с. Мы́слию очище́нною, прему́дре Кассиа́не, к Бо́гу приближа́яся/ и всем всяк бы́сть, да Христа́ приобря́щеши,/ моли́ Его́ спасти́ вся, пою́щия тя, преподо́бне о́тче. Припев: Преподо́бне о́тче Кассиа́не, моли́ Бо́га о на́с. Слез мно́гих твои́х тече́ний ка́пли погаси́ше о́гнь грехо́вный,/ реку́ же чуде́с показа́л еси́ всем нам, преподо́бне Кассиа́не,/ вся́кия стра́сти потопля́ющую, притека́ющим к тебе́ ве́рно, прехва́льне о́тче. Сла́ва Отцу́ и Сы́ну и Свято́му Ду́ху. Ве́ру и наде́жду неразори́му, и любо́вь и́стинну име́яше, о́тче Кассиа́не,/ и Боже́ственное прилежа́ние Христо́вым словесе́м,/ и терпе́ние, и благоуче́ние смиренному́дренно,/ сего́ ра́ди соверше́нно сподо́бился еси́ получи́ти жи́знь ве́чную, всехва́льне. И ны́не и при́сно и во ве́ки веко́в. Ами́нь. Богородичен: Спаси́ мя, Ма́ти Бо́жия,/ спасе́ния нача́ло ми́рови я́вльшаяся,/ избавля́ющи мя молвы́, и нечи́стых страсте́й, и вся́кия проти́вныя ско́рби,/ да сла́влю Тя, Богоро́дице. Песнь 9 Ирмос: Безнача́льна Роди́теля Сын, Бог и Госпо́дь,/ вопло́щся от Де́вы, нам яви́ся,/ омраче́нная просвети́ти, собра́ти расточе́нная./ Тем Всепе́тую Богоро́дицу велича́ем. Припев: Преподо́бне о́тче Кассиа́не, моли́ Бо́га о на́с. Процве́л еси́ в по́двизех свои́х по́стнических, прехва́льне Кассиа́не,/ я́ко ши́пок благово́нен и я́ко кедр благоуха́нен,/ ве́рных се́рдца облагоуха́л еси́,/ те́мже отжени́ ны́не стра́сти лю́тыя от се́рдца моего́, преподо́бне. Припев: Преподо́бне о́тче Кассиа́не, моли́ Бо́га о на́с. Отве́рзеся тебе́, о́тче, Небе́сное Ца́рство,/ сконча́вшу тебе́ на земли́ до́брое свое́ тече́ние,/ ви́диши, я́же ви́дят А́нгели, трудо́в твои́х воздая́ние прие́мля,/ по́чести бо тебе́ Христо́с да́рует,/ те́мже тя, преподо́бне Кассиа́не, ублажа́ем. Сла́ва Отцу́ и Сы́ну и Свято́му Ду́ху. Слез твои́х мно́гими ту́чами напо́лнився, грехо́вный о́гнь угаси́л еси́,/ Бо́гу угоди́в, преподо́бне Кассиа́не,/ сокруши́л еси́ бесо́в мно́гия полки́ и ко́зни их лука́выя,/ те́мже покланя́емся ны́не моще́м твои́м и ве́рно ублажа́ем тя, о́тче досточу́дне. И ны́не и при́сно и во ве́ки веко́в. Ами́нь. Богородичен: Пощади́, Го́споди, пощади́, Ми́лостиве,/ егда́ хо́щеши суди́ти всем,/ тогда́ не осуди́ мене́ во о́гнь гее́нский,/ ни я́ростию Свое́ю обличи́ мене́,/ мо́лит Тя Де́ва Чи́стая, А́нгелов собо́ри и преподо́бных соста́ви. Светилен Светода́вче Го́споди,/ свети́льника земли́ на́шея, Кассиа́на преподо́бнаго моли́твами/ просвети́ нас, ве́рою Тебе́ служа́щих/ и благоче́стно пра́зднующих светоно́сную того́ па́мять. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Свеще́ та́инственная, Богоневе́сто,/ су́щим во тьме́ неразу́мия све́том ра́зума и́стины возсия́й,/ и спаси́ всех, благоче́стно Тя, я́ко Ма́терь Бо́жию, велича́ющих.

Минея, 5 Ноября, Кано́н святи́теля Ио́ны Глас 4 Песнь 1 Ирмос: Триста́ты кре́пкия,/ Рождейся от Де́вы,/ безстра́стия во глубине́/ души́ трича́стное потопи́, молю́ся,/ да Тебе́, я́ко в тимпа́не,/ во умерщвле́нии телесе́/ побе́дное воспою́ пе́ние. Припев: Святи́телю о́тче Ио́но, моли́ Бо́га о на́с. Избра́ тя благода́ть, о́тче, от утро́бы ма́тере твоея́/ поста́вити тя проро́ка лю́дем свои́м,/ хода́тайствовати ко Го́споду о спасе́нии ми́ра/ и оставле́нии неве́ждеств их, блаже́нне. Припев: Святи́телю о́тче Ио́но, моли́ Бо́га о на́с. Руко́ю вели́каго архиере́я Ио́ны/ со и́же о не́м собо́ра свяще́нных муже́й судо́м/ прие́млеши пома́зание архиере́йства, Ду́хом воздвиза́емь, Ио́но,/ и па́стырь вели́кому гра́ду, свяще́нне, полага́емь. Сла́ва Отцу́ и Сы́ну и Свято́му Ду́ху. Блаже́ннаго Михаи́ла сбы́стся на тебе́ прорече́ние,/ не вне́шнюю бо на тебе́ нищету́ зря́ше,/ но вну́треннее преспе́яние души́ твоея́ духо́вными очесы́ смотря́я,/ а́ще и еще́ о́трочищу ти су́щу, блаже́нне. И ны́не и при́сно и во ве́ки веко́в. Ами́нь. Богородичен: Пресве́тлая свеще́ Со́лнца сла́вы,/ души́ моея́ огнь, угаше́нный при́сно уны́нием, возжзи́,/ Боже́ственных дел еле́ем, Пречи́стая, напая́ющи,/ да ве́рою и любо́вию при́сно Тя сла́влю, Богороди́тельнице. Песнь 3 Ирмос: С высоты́ снизше́л еси́ во́лею на зе́млю/ превы́шше вся́каго нача́ла/ и смире́нное возне́сл еси́/ из а́да преиспо́дняго/ естество́ челове́ческое,/ несть бо свя́т, па́че Тебе́, Человеколю́бче. Припев: Святи́телю о́тче Ио́но, моли́ Бо́га о на́с. От ю́ности твоея́ Боже́ственное просвеще́ние, Ио́но, на тебе́ сия́ше,/ я́коже преподо́бный прови́де, и́же ми́ру юро́д, Бо́гу же прему́др:/ я́ко Бо́гу избра́н еси́ из чре́ва ма́тере твоея́, свяще́нне. Припев: Святи́телю о́тче Ио́но, моли́ Бо́га о на́с. Мир усмири́ся моли́твами твои́ми, иера́рше, во твое́м епи́скопстве,/ но, я́ко тогда́, и ны́не Бо́жие человеколю́бие умоли́ приле́жно/ в ми́ре утверди́тися ми́ру, Ио́но. Сла́ва Отцу́ и Сы́ну и Свято́му Ду́ху. Плоды́ Го́споду нача́ток дел твои́х прине́сл еси́,/ плоды́ же земли́ моли́твами твои́ми умно́жил еси́./ И ны́не моли́, блаже́нне, земли́ на́шей плодоно́сие при́сно подава́ти,/ яко благопослу́шна тя име́ем. И ны́не и при́сно и во ве́ки веко́в. Ами́нь. Богородичен: Е́вину дре́внюю кля́тву,/ Христа́ ро́ждши, Ма́ти Чи́стая, пресве́тло разреши́ла еси́,/ И́же всех венчава́ющаго благослове́ньми:/ не́сть бо, Пречи́стая, па́че Тебе́, ины́я Помо́щницы. Седален, глас 4 Доброде́тельми светя́ся, о́тче, па́ствити Христо́вы о́вцы поставля́емь,/ и преподо́бнаго Се́ргия красе́н храм вну́трь епи́скопии воздви́гл еси́./ Я́ко душе́ю любя́ того, по́двиги его́ почита́я/ и смоли́твенника себе́ о ста́де твое́м ко Го́споду полага́я,/ ны́не сра́дуешися Ему́, о́тче свяще́нне,/ моли́ спасти́ся душа́м на́шим. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Обнови́ла еси́, Чи́стая, Боже́ственным Рождество́м Твои́м/ истле́вшее во страсте́х земноро́дных ме́ртвенное существо́/ и воздви́гла еси́ вси от сме́рти к жи́зни нетле́ния./ Те́мже Тя по до́лгу блажи́м вси, Де́во Препросла́вленная,/ я́коже прорекла́ еси́. Песнь 4 Ирмос: Любве́ ра́ди, Ще́дре, Твоего́ о́браза/ на Кресте́ Твое́м стал еси́,/ и раста́яшася язы́цы:/ Ты бо еси́, Человеколю́бче,/ кре́пость моя и хвале́ние. Припев: Святи́телю о́тче Ио́но, моли́ Бо́га о на́с. Боже́ственнаго Предте́чи, вели́каго Иоа́нна, храм свяще́нный воздви́гл еси́,/ я́ко ве́рен, ду́шу тому́ и те́ло в снабде́ние возлага́я, о́тче свяще́нне. Припев: Святи́телю о́тче Ио́но, моли́ Бо́га о на́с. Я́ко рачи́тель и подража́тель тепл Крести́телю Госпо́дню показа́лся еси́,/ те́мже в хра́ме его́, его́же тому́ созда́л еси́, те́ло твое́ полага́еши,/ и во дворы́ его́ прия́тися жела́я. Сла́ва Отцу́ и Сы́ну и Свято́му Ду́ху. Возлюби́л еси́, архиере́ю, свяще́нных муже́й/ пе́сньми восхваля́ти свяще́нныя их па́мяти,/ я́ко рачи́тель добро́ты их и подража́тель дея́ний Боголюбе́зных. И ны́не и при́сно и во ве́ки веко́в. Ами́нь. Богородичен: Име́я Тя Помо́щницу, кого́ убою́ся когда́ или устрашу́ся?/ Кто́ же, хотя́ ско́рбная навести́ рабу́ Твоему́,/ и не устраши́тся Тебе́, Пречи́стая,/ и не паде́т под но́зе? Песнь 5 Ирмос: Нечести́вии не у́зрят сла́вы Твоея́, Христе́,/ но мы Тя, Единоро́дне,/ Оте́ческия сла́вы сия́ние Божества́,/ от но́щи у́тренююще,/ воспева́ем Тя, Человеколю́бче. Припев: Святи́телю о́тче Ио́но, моли́ Бо́га о на́с. Приноси́мое я́ко че́стно возложе́ние Бо́гу/ и освяще́нно первопресто́льником Росси́йским, Ио́ною,/ твое́ свяще́нное па́стырства возведе́ние,/ я́ко пасу́щу ти Госпо́дни лю́ди, Ио́но святи́телю,/ преподо́бием и кро́тостию. Припев: Святи́телю о́тче Ио́но, моли́ Бо́га о на́с. А́ще и на преставле́ние митрополи́том Ио́ною зово́м саме́м погребсти́ его́,/ отре́кся еси́ ста́рости ра́ди приити́, Ио́но свяще́нне,/ оба́че обеща́лся еси́ ему́/ ви́дети того́ по свое́м преставле́нии во све́те Христо́ве. Сла́ва Отцу́ и Сы́ну и Свято́му Ду́ху. Пе́сньми поче́л еси́ па́мять иера́рха, Ио́ны митрополи́та,/ и хвала́ми, я́ко досто́йно, ублажи́л еси́ того́:/ сам ны́не, иера́рше Ио́но, прича́ствуеши похвала́м его́/ и по сотворе́нию твоему́ к бли́жнему восприе́млеши. И ны́не и при́сно и во ве́ки веко́в. Ами́нь. Богородичен: Низложи́, Влады́чице, враго́в мои́х шата́ние, Пренепоро́чная,/ Тя́ бо и́мам и Предста́тельницу, и наде́жду, и по́мощь кре́пкую./ Ты́ мя соблюди́, Чи́стая, наве́та вра́жия, избавля́ющи ла́яния тех. Песнь 6 Ирмос: Пучи́ною жите́йскою/ дея́ньми мои́ми снидо́х во а́д,/ но, я́ко от ки́та Ио́на, та́ко вопию́:/ из глубины́ зо́л возведи́, молю́ся,/ Сы́не Бо́жий и Сло́ве. Припев: Святи́телю о́тче Ио́но, моли́ Бо́га о на́с. Прильпе́ любо́вию душа́ твоя́ к Госпо́дню Крести́телю, святи́телю Богоблаже́нне,/ те́мже те́ло твое́ честно́е в честне́м хра́ме его́ нетле́нно/ во мно́га ле́та соблюде́но яви́ся. Припев: Святи́телю о́тче Ио́но, моли́ Бо́га о на́с. Красота́ гове́ния твоего́ е́же ко Го́споду/ привлече́ благода́ть благоле́пию души́ твоея́, свяще́нне,/ и возведе́ тя Вели́кому Нову́гра́ду отца́ и первопресто́льника,/ Госпо́дня свяще́нства преподо́бна показа́. Сла́ва Отцу́ и Сы́ну и Свято́му Ду́ху. Просла́ви тя Госпо́дь, Ио́но,/ те́ло тво́е соблюде́ во мно́га ле́та нетле́нно,/ явля́я тя о́бщника раб Свои́х, и́хже подража́тель в житии́ бы́л еси́,/ сим и по сме́рти досто́йно соублажа́ешися, блаже́нне. И ны́не и при́сно и во ве́ки веко́в. Ами́нь. Богородичен: Всесвята́я Де́во, Предста́тельнице и покро́ве всех ве́рных,/ предста́ни и изба́ви ны враг на́ших нападе́ния,/ и от вся́кия ско́рби, и Стра́шнаго Суда́ испыта́ния,/ да ве́рою при́сно пою́ Тя. Кондак, глас 4 Свы́ше прия́л еси́ Боже́ственную благода́ть/ ходатайствовати Бо́гу и челове́ком,/ яко архиере́й возноше́ние вознося́,/ и мир лю́дем твои́м снося́,/ и оби́лие плодо́в, Ио́но блаже́нне;/ ты́ бо еси́ Вели́каго Нова́гра́да похвала́/ и су́щих о нем ра́дость. Икос Похва́лим досто́йно ны́не иера́рха,/ я́ко от чре́ва ма́тере своея́ избра́н Бо́гу во освяще́ние,/ и, о́трочищ еще сый,/ пронарече́н во архиере́йство гра́ду своему́ от Бо́га./ Те́мже не от челове́к произведе́н архиере́й,/ но свы́ше пронарече́н и Духом пома́зан,/ священноде́йствуя Богоприя́тно,/ и умире́ние, и тишину́ моли́твами свои́ми да́рует,/ и оби́лие плодо́в./ То́й бо Вели́каго Нова́гра́да слава/ и всех, и́же о нем, ра́дость. Песнь 7 Ирмос: Авраа́мстии иногда́ в Вавило́не о́троцы/ пе́щный пла́мень попра́ша,/ пе́сньми взыва́юще:/ оте́ц на́ших Бо́же, благослове́н еси́. Припев: Святи́телю о́тче Ио́но, моли́ Бо́га о на́с. Зи́ждеши Боже́ственному И́мени/ бога́тною руко́ю в пусты́нях уда́лено, Ио́но,/ свяще́нныя хра́мы вели́ких Богоуго́дник,/ Боже́ственных архиере́й с преподо́бными. Припев: Святи́телю о́тче Ио́но, моли́ Бо́га о на́с. Но́ву оби́тель составля́еши вели́ких трие́х иера́рх/ и мона́шестей черте́ благоути́шно приста́нище, о́тче,/ ме́стным же удале́нием обруча́я им безмо́лвие. Сла́ва Отцу́ и Сы́ну и Свято́му Ду́ху. Виногра́д насажда́я Бо́гу,/ огра́ду свяще́нную, вино́ износя́щую веселя́щее,/ в свяще́нных хра́мех Боже́ственное пе́ние,/ И́же в Тро́ице Еди́ному, хвали́му и благослови́му Бо́гу оте́ц на́ших. И ны́не и при́сно и во ве́ки веко́в. Ами́нь. Богородичен: Еди́ну Всесвяту́ю, Еди́ному Бо́гу вселе́ние еди́но пречи́сто,/ от Иоаки́ма и Анны ражда́ему, свяще́нным хра́мом почита́я,/ я́ко в не́м воспева́ти всепе́тое Де́вы Рождество́. Песнь 8 Ирмос: О́троки благочести́выя в пещи́/ Рождество́ Богоро́дичо спасло́ есть:/ тогда́ у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте дела́/ и превозноси́те Его́ во вся ве́ки. Припев: Святи́телю о́тче Ио́но, моли́ Бо́га о на́с. Кро́ткое и молчали́вое нра́ва твоего́ восприе́м, Госпо́дь, блаже́нне,/ поста́ви тя па́стыря лю́дем Свои́м,/ на кого́ бо при́зрит?/ Но на кро́ткаго и молча́щаго, трепе́щущаго слове́с Его́. Припев: Святи́телю о́тче Ио́но, моли́ Бо́га о на́с. Уста́ вдов благослови́ша тя,/ заступле́ния от Тебе́ сподо́бльшеся, иера́рше блаже́нне,/ благоугожда́ющаго Бо́гу, по непоро́чному И́ову,/ и оби́димыя от наси́лия изима́ющаго. Сла́ва Отцу́ и Сы́ну и Свято́му Ду́ху. Лю́дие твои́, священнонача́льниче преподо́бне,/ се́товаху сиротства́ своего́ в твое́м к Бо́гу отше́ствии,/ до́браго па́стыря своего́,/ ны́не же свяще́нною па́мятию твое́ю возра́довашася вся́ческая. И ны́не и при́сно и во ве́ки веко́в. Ами́нь. Богородичен: На Тя́ всю наде́жду спасе́ния моего́ возложи́х, Богома́ти Неискусобра́чная,/ и Тя́ призыва́ю при́сно на помо́щь:/ спаси́ мя от напа́стей и печа́ли врага́,/ разреши́ плени́цу зол мои́х и Суда́ мя исхити́. Песнь 9 Ирмос: Сотвори́ держа́ву мы́шцею Свое́ю,/ низложи́ бо си́льныя со престо́л/ и вознесе́ смире́нныя Бог Изра́илев,/ в ни́хже посети́ нас Восто́к с высоты́,/ и напра́вил ны есть на путь ми́ра. Припев: Святи́телю о́тче Ио́но, моли́ Бо́га о на́с. Блаже́ннаго Евфи́мия престо́л насле́довал еси́, свяще́нне Ио́но,/ я́ко подража́тель доброде́телей его́ был еси́/ и, пе́сньми сего́ ублажи́в па́мять изря́дно,/ сам ны́не обществу́ешися хвала́м его́,/ я́ко соводворя́ешися ему́ во Све́те незаходи́мем. Припев: Святи́телю о́тче Ио́но, моли́ Бо́га о на́с. В зе́млю кро́тких со архиере́и досто́йно всели́лся еси́,/ иера́рше Ио́но, кро́ткаго Учи́теля учениче́./ Тому́ предста́ни о нас, пою́щих па́мять твою́,/ и испроси́ нам собла́знов оставле́ние, и шу́ия ча́сти в день Суда́ избавле́ние,/ и лю́тыя гее́нны, блаже́нне. Сла́ва Отцу́ и Сы́ну и Свято́му Ду́ху. Не изнемо́жет всяк глаго́л, и́же от Бо́га,/ убо́га тя и сироту́ Оте́ц сиро́т прие́млет, Бог,/ и́же на престо́ле со кня́зи посади́ тя,/ лю́дем Свои́м я́ко досто́йна па́стыря производя́,/ отца́ сирота́м и засту́пника вдова́м те́пла положи́ тя, Ио́но блаже́нне. И ны́не и при́сно и во ве́ки веко́в. Ами́нь. Богородичен: Просвети́, Чи́стая, любо́вию чту́щих Тя и велича́ющих,/ разреши́ стра́сти на́ша./ Тем, Де́во, уста́ви бу́рю, лука́ваго собла́зны от сре́ды отжени́,/ ва́рвары покори́ правосла́вным лю́дем моли́твами Твои́ми. Светилен Трисо́лнечнаго Све́та, сла́вы сия́нием, трие́х учи́телей све́том озари́вся,/ вся просвеща́еши, просия́в де́тельми и благода́тию, преподо́бне священнонача́льниче. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Сла́дость А́нгелов, скорбя́щих ра́досте,/ христиа́н предста́тельнице, Де́во, Ма́ти Госпо́дня,/ заступи́вши ны, спаси́ от ве́чнаго муче́ния.

Минея, 30 Марта, Канон Глас 4 Песнь 1 Ирмос: Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,/ и воспою́, ра́дуяся, Тоя́ чудеса́. Припев: Святáя пра́ведная Евву́ло, моли́ Бо́га о на́с. Чти́телие Пантелеи́мона сла́внаго,/ того́ святу́ю ма́терь пе́сньми почти́м,/ обои́х вку́пе велича́юще. Припев: Святáя пра́ведная Евву́ло, моли́ Бо́га о на́с. К злому́дрию идолослужи́телей не примеша́ющися, Богому́драя Евву́ло,/ Христа́ возлюби́ла еси́/ и Тому́ усе́рдно порабо́тала еси́. Сла́ва Отцу́ и Сы́ну и Свято́му Ду́ху. И́стинное чадолю́бие к рожде́нному тобо́ю име́ющи,/ благоче́стием па́че, не́же млеко́м,/ того́ воспита́ла еси́, достоблаже́нная. И ны́не и при́сно и во ве́ки веко́в. Ами́нь. Богородичен: Яви́лася еси́, Богороди́тельнице,/ вы́сшая Го́рних сил и всея́ тва́ри,/ возвы́сившая естество́ челове́ческое рождество́м Твои́м. Песнь 3 Ирмос: Твоя́ песносло́вцы, Богоро́дице,/ живы́й и незави́стный Исто́чниче,/ лик себе́ совоку́пльшия, духо́вно утверди́,/ в Боже́ственней Твое́й сла́ве,/ венце́в сла́вы сподо́би. Припев: Святáя пра́ведная Евву́ло, моли́ Бо́га о на́с. Твоя́ песносло́вцы, засту́пниче наш, лик себе́ совоку́пльше,/ воспева́ем дне́сь достоблаже́нную ма́терь твою́./ Моли́твами у́бо ва́шими духо́вно утверди́те ны. Припев: Святáя пра́ведная Евву́ло, моли́ Бо́га о на́с. Словеса́ свята́го Дави́да испо́лнишася на тебе́, пра́ведная Евву́ло:/ ты бо еси́ ма́терь,/ о святе́м ча́де свое́м веселя́щаяся в Небе́сных селе́ниих. Сла́ва Отцу́ и Сы́ну и Свято́му Ду́ху. Я́ко иму́щии дерзнове́ние ко Го́споду, дво́ице свята́я,/ чту́щия вас свобожда́йте от бед и нужд/ и ве́чных мук изба́витися нам Того́ умоли́те. И ны́не и при́сно и во ве́ки веко́в. Ами́нь. Богородичен: Благоле́пная ски́ние Божества́, Мари́е,/ первозда́нную ле́поту возврати́вшая нам Вопло́щщимся из Тебе́,/ неблаголе́пие души́ мое́й претвори́ во благоле́пие. Седален, глас 8 Ми́лование име́ла еси́, честна́я ма́ти, ко и́скреннему,/ ве́ру же и́стинную и любо́вь, я́же к Бо́гу,/ сего́ ра́ди Бо́жия благода́ть в тебе́ предпочи́ла е́сть,/ ю́же испроси́ и нам, воспева́ющим тя. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Богоро́дицу Тя испове́дуем, Влады́чице,/ Ро́ждшимся от Тебе́ спа́сшиися гре́шнии раби́,/ Бо́га бо непостижи́мо родила́ еси́,/ Кро́вию Свое́ю очища́ющаго нас от вся́каго греха́/ и в ра́йское весе́лие приводя́щаго. Песнь 4 Ирмос: Седя́й в сла́ве на Престо́ле Божества́/ во о́блаце ле́гце,/ прии́де Иису́с Пребоже́ственный/ Нетле́нною Дла́нию и спа́се зову́щия:/ сла́ва, Христе́, си́ле Твое́й. Припев: Святáя пра́ведная Евву́ло, моли́ Бо́га о на́с. Кто не похва́лит, о Евву́ло, благоче́стие твое́,/ ве́ру же и любо́вь ко Христу́ посреде́ идолослужи́телей,/ их же су́етная чти́лища презирала еси́. Припев: Святáя пра́ведная Евву́ло, моли́ Бо́га о на́с. Я́ко сын предо́брый, весели́ши ты, Пантелеи́моне, ублажаемую на́ми ма́терь твою́,/ ея́же почита́ние отно́сится и к тебе́,/ благотво́рное нам, обои́х вас восхваля́ющим. Сла́ва Отцу́ и Сы́ну и Свято́му Ду́ху. Удиви́шася никомиди́йцы,/ возра́довашася Небожи́телие о му́ченическом боре́нии кра́снаго прозябе́ния твоего́, Евву́ло,/ его́же увенча́ Христо́с венце́м побе́ды. И ны́не и при́сно и во ве́ки веко́в. Ами́нь. Богородичен: Неудо́бь соединя́емая в Себе́ соедини́вшая,/ е́же пре́жде рождества́, в рождестве́ и по рождестве́ де́вство,/ в де́встве утверди́ и в чистоте́ соблюди́ ны, Чи́стая Присноде́во. Песнь 5 Ирмос: Ужасо́шася вся́ческая/ о Боже́ственней сла́ве Твое́й:/ Ты бо, Неискусому́жная Де́во,/ име́ла еси́ во утро́бе над все́ми Бо́га/ и родила́ еси́ Безле́тнаго Сы́на,/ всем воспева́ющим Тя/ мир подава́ющая. Припев: Святáя пра́ведная Евву́ло, моли́ Бо́га о на́с. И́стинную любо́вь име́ла еси́ к Бо́гу, Боголюби́вая ма́ти,/ за́поведи Его́ храня́:/ сей бо и́стинно лю́бит Бо́га, и́же за́поведи Его́ соблюда́ет. Припев: Святáя пра́ведная Евву́ло, моли́ Бо́га о на́с. Благода́тию спасе́ннии чрез ве́ру,/ благи́ми де́лы угожда́ти Бо́гови до́лжни есмы́,/ я́коже угоди́ Тому́ благолюби́вая Евву́ла. Сла́ва Отцу́ и Сы́ну и Свято́му Ду́ху. Не оправди́тся пред Бо́гом всяк живы́й,/ ты же пра́ведна яви́лася еси́ пред Ним, приснопа́мятная./ Пра́ведную у́бо, тя пе́сньми почита́ем. И ны́не и при́сно и во ве́ки веко́в. Ами́нь. Богородичен: Кра́сную, и избра́нную, и всечестну́ю разуме́в Тя,/ Сын Бо́жий Сын Твой бы́сть./ Сы́ны сотвори́ по благода́ти, чту́щия Тя, Богоневе́сто. Песнь 6 Ирмос: Боже́ственное сие́ и всечестно́е/ соверша́юще пра́зднество,/ Богому́дрии, Богома́тере,/ прииди́те, рука́ми воспле́щим,/ от Нея́ ро́ждшагося Бо́га сла́вим. Припев: Святáя пра́ведная Евву́ло, моли́ Бо́га о на́с. Блаже́нна в христиа́нских жена́х вои́стинну показа́лася еси́, Евву́ло,/ вели́каго Христо́ва страстоте́рпца ма́терь су́щи, прехва́льная. Припев: Святáя пра́ведная Евву́ло, моли́ Бо́га о на́с. Досто́йна еси́ почита́ема бы́ти, ма́ти всечестна́я,/ я́ко в Боже́ственных повеле́ниях поуча́лася еси́/ и сих при́сная храни́тельница была́ еси́. Сла́ва Отцу́ и Сы́ну и Свято́му Ду́ху. Благочести́ва су́щи,/ и рожде́ннаго тобо́ю, Евву́ло, благоче́стию учи́ла еси́, глаго́лющи:/ Христо́с бу́ди тебе́, ча́до, Свет, Пу́ть, И́стина и Живо́т. И ны́не и при́сно и во ве́ки веко́в. Ами́нь. Богородичен: Тя, Госпоже́, жи́зни на́шея/ предлага́ем Храни́тельницу и Засту́пницу Непобеди́мую:/ Помо́щница нам бу́ди, избавля́ющи от бед сла́вящих Тя. Кондак, глас 3 Па́мять твоя́, Евву́ло,/ весели́т чту́щих тя,/ ма́терь сла́внаго Пантелеи́мона,/ с ни́мже Бо́жию Престо́лу предстоя́щи,/ моли́ся прегреше́ний оставле́ние да́ти нам. Икос Достоблаже́нную и святу́ю Еввулу во гла́се ра́дования ны́не ублажи́м./ Сия́ бо, благоче́стие, я́ко щит, иму́щи,/ и́дольскую пре́лесть и сопроти́внаго низложи́/ и по кончи́не свое́й пра́ведною душе́ю свое́ю на Небеса́ возлете́,/ иде́же с Пантелеи́моном Бо́жию Престо́лу предстоя́щи,/ мо́лится прегреше́ний оставле́ние да́ти нам. Песнь 7 Ирмос: Не послужи́ша тва́ри Богому́дрии/ па́че Созда́вшаго,/ но, о́гненное преще́ние му́жески попра́вше,/ ра́довахуся, пою́ще:/ препе́тый отце́в Госпо́дь и Бог, благослове́н еси́. Припев: Святáя пра́ведная Евву́ло, моли́ Бо́га о на́с. Не послужи́сте тва́ри, Богому́драя дво́ице, па́че Созда́вшаго,/ но преще́ние неве́рных и и́долы их попра́вше,/ с весе́лием взыва́ете:/ препе́тый отце́в Госпо́дь и Бог, благослове́н еси́. Припев: Святáя пра́ведная Евву́ло, моли́ Бо́га о на́с. Стре́лы огнено́сныя де́монов ты угаси́ла еси́, Евву́ло, огради́вшися ве́рою,/ смире́нием же твои́м низложи́ла еси́ го́рдаго зми́я, взыва́ющи:/ препе́тый отце́в Госпо́дь и Бог, благослове́н еси́. Сла́ва Отцу́ и Сы́ну и Свято́му Ду́ху. Побе́дных по́честей, я́же прия́ Пантелеи́мон,/ о́бщница еси́, блаже́нная того́ ма́ти:/ тобо́ю бо пе́рвее наста́вленный,/ му́жески подвиза́ся за Христа́ Богому́дрый сын твой. И ны́не и при́сно и во ве́ки веко́в. Ами́нь. Богородичен: Сбытие́ слове́с Твои́х, Влады́чице, испо́лнися:/ се бо ублажа́ют Тя вси ро́ди,/ ро́ждшую Спа́са ро́да челове́ческаго,/ Ему́же о Тебе́ пое́м:/ препе́тый отце́в Госпо́дь и Бог, благослове́н еси́. Песнь 8 Ирмос: О́троки благочести́выя в пещи́/ Рождество́ Богоро́дичо спасло́ е́сть,/ тогда́ у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте, дела́,/ и превозноси́те Его́ во вся ве́ки. Припев: Святáя пра́ведная Евву́ло, моли́ Бо́га о на́с. Свети́льник нога́ма свои́ма иму́щи зако́н Госпо́день и свет стезя́м свои́м,/ воспи́товала еси́ в том сы́на своего́, пою́щи с ним:/ Го́спода по́йте, дела́, и превозноси́те Его́ во вся ве́ки. Припев: Святáя пра́ведная Евву́ло, моли́ Бо́га о на́с. Я́ко зве́зды, просия́ете све́тлостию благоче́стия, свята́я дво́ице,/ науча́юще в но́щи неве́рия су́щих пе́ти:/ Го́спода по́йте, дела́, и превозноси́те Его́ во вся ве́ки. Сла́ва Отцу́ и Сы́ну и Свято́му Ду́ху. Зря́щи Пантелеи́мона, му́ченическим венце́м укра́шенна,/ на Небеси́, лику́еши, прехва́льная, и вопие́ши:/ сра́дуйтеся мне вси, пою́ще:/ Го́спода по́йте, дела́, и превозноси́те Его́ во вся ве́ки. И ны́не и при́сно и во ве́ки веко́в. Ами́нь. Богородичен: Я́ко Небе́снаго Царя́ чисте́йший храм,/ Того́ моли́, Де́во, очи́стити души́ на́ша/ и хра́мы себе́ человеколю́бием Свои́м соде́лати, да пое́м:/ Го́спода по́йте, дела́, и превозноси́те Его́ во вся ве́ки. Песнь 9 Ирмос: Всяк земноро́дный/ да взыгра́ется, Ду́хом просвеща́емь,/ да торжеству́ет же Безпло́тных умо́в естество́,/ почита́ющее свяще́нное торжество́ Богома́тере,/ и да вопие́т:/ ра́дуйся, Всеблаже́нная Богоро́дице,/ Чи́стая Присноде́во. Припев: Святáя пра́ведная Евву́ло, моли́ Бо́га о на́с. Ве́руя во Христа́ Бо́га и за́поведи Его́ усе́рдно храня́,/ благоугоди́ла еси́ Ему́, Боголюби́вая Евву́ло,/ моли́ у́бо Всеблага́го Влады́ку и нам благоуго́дным Ему́ бы́ти/ и спасти́ся душа́м на́шим. Припев: Святáя пра́ведная Евву́ло, моли́ Бо́га о на́с. И́же за́поведи Бо́жия сохраня́ет, того́ возлюби́ти обещава́ется Бог./ В за́поведех Его́ ходи́вшая, возлюблена еси́ Им, ма́ти,/ но моли́ся, да и мы возлю́бим Бо́га/ и возлю́блени бу́дем благоутро́бием Его́. Сла́ва Отцу́ и Сы́ну и Свято́му Ду́ху. Чту́щую вас, честна́я дво́ице, оби́тель присеща́йте, блаже́ннии,/ предста́тельством ва́шим избавляеши от вся́ких лю́тых обстоя́ний,/ и грехо́м на́шим испроси́те проще́ние. И ны́не и при́сно и во ве́ки веко́в. Ами́нь. Богородичен: А́да Победи́теля ро́ждшая,/ Того́ моли́, Влады́чице,/ да изба́вит ны, гре́шныя, от де́рзости лука́вых де́монов,/ страстьми́ нас борю́щих,/ и да огради́т ми́ром ду́ши на́ша. Светилен Све́том Тро́ическим осиява́емая, яви́лася еси́, Евву́ло, я́ко свеща́,/ све́том Богоразу́мия светя́щая Никомиди́и./ Те́мже, светоно́сную твою́ па́мять чту́ще,/ похва́льными пе́сньми тя ублажа́ем. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Две́ре Боже́ственная све́та,/ Безле́тный Свет ми́рови возсия́вшая,/ све́том благода́ти просвети́ ны/ и во све́те Того́ повеле́ний жи́тельствовати укрепи́,/ да похва́льными пе́сньми Тя, Богоро́дице, ублажа́ем.

Минея, 1 Января, Ин кано́н святи́теля Васи́лия. Творе́ние Иоа́нна Дамаскина́ Глас 2 Песнь 1 Ирмос: Гряди́те, лю́дие,/ пои́м песнь Христу́ Бо́гу,/ разде́льшему мо́ре и наста́вльшему лю́ди,/ я́же изведе́ из рабо́ты еги́петския,/ я́ко просла́вися. Припев: Святи́телю о́тче Васи́лие, моли́ Бо́га о на́с. Твоему́ гла́су подоба́ше приити́, Васи́лие, нача́ти хотя́щим хвалы́ твоя́, но, о́тче, мольбу́ прие́м, благода́ть подава́й незави́стно на́м. Припев: Святи́телю о́тче Васи́лие, моли́ Бо́га о на́с. Доброде́телей ты́ жесто́кий ше́ствовал еси́ пу́ть, в гла́дкий дости́гл еси́ и несопроти́вный небе́сный восхо́д и все́м яви́лся еси́ о́браз, Васи́лие. Припев: Святи́телю о́тче Васи́лие, моли́ Бо́га о на́с. Страстно́е взыгра́ние, томя́щее пло́ть, любому́дрия жела́нием наказа́л еси́, те́мже в нетле́нных водворя́ешися Ца́рствиих, о́тче Васи́лие. Припев: Святи́телю о́тче Васи́лие, моли́ Бо́га о на́с. Душе́вныя стра́сти благопотре́бно, Васи́лие, вку́пе же и теле́сныя, духо́вным посе́кл еси́ мече́м, себе́ же Влады́це же́ртву прине́сл еси́. Сла́ва Отцу́ и Сы́ну и Свято́му Ду́ху. Ты́, бы́в неизрече́нных таи́нник, Васи́лие, Христо́ву Ца́рствию тайнонаучи́л еси́, свяще́нне о́тче, я́ве Тро́ический све́т облиста́л еси́ на́м. И ны́не и при́сно и во ве́ки веко́в. Ами́нь. Богородичен: Кто́ изрещи́ Твое́ по досто́инству возмо́жет, е́же па́че сло́ва зача́тие? Бо́га бо родила́ еси́ пло́тию, Всечи́стая, на́м я́вльшася Спа́са и Го́спода. Песнь 3 Ирмос: Утверди́ на́с в Тебе́, Го́споди, дре́вом умерщвле́й гре́х, и стра́х Тво́й всади́ в сердца́ на́с, пою́щих Тя́. Припев: Святи́телю о́тче Васи́лие, моли́ Бо́га о на́с. Спритече́ Христо́ву и спросия́ па́мять твоя́, о́тче, Рождеству́, Его́же несказа́нное та́инство твои́ми уче́ньми я́ве сотвори́л еси́. Припев: Святи́телю о́тче Васи́лие, моли́ Бо́га о на́с. Стра́хом Госпо́дним утвержда́емь, нача́ло бо му́дрости се́й е́сть, любо́вию лу́чшею впери́лся еси́ прему́дрости, о Васи́лие. Припев: Святи́телю о́тче Васи́лие, моли́ Бо́га о на́с. Наказа́ния бы́в вся́каго испо́лнен, не то́кмо до́льнаго и попира́емаго, мно́го же па́че лу́чшаго, показа́лся еси́ ми́ру све́т, Васи́лие. Сла́ва Отцу́ и Сы́ну и Свято́му Ду́ху. Васи́лие прему́дре, вшел еси́ дея́нием, и дея́ние вше́ствие виде́ния боже́ственнейшаго показа́л еси́, и су́щих ра́зуму научи́лся еси́ я́ве. И ны́не и при́сно и во ве́ки веко́в. Ами́нь. Богородичен: Безсе́менно во чре́ве Бо́га зачала́ еси́ и ражда́еши несказа́нно воплоще́нна, на Него́же зре́ти не сме́ют, Чи́стая, небе́сных си́лы, Присноде́во. Седален, глас 8 Прему́дрости сло́ва навы́к и писа́ние зако́на отложи́в,/ всем пропове́дал еси́ благода́ти сло́во/ и душ скрижа́ли угла́дил еси́ словесы́ твои́ми,/ в ни́хже начерта́л еси́ Боже́ственная уче́ния./ Те́мже и мрак проше́д о́блаком покро́ва телесе́,/ и просия́л еси́ ду́хом, святи́телю Васи́лие./ Моли́ Христа́ Бо́га/ грехо́в оставле́ние пода́ти/ чту́щим любо́вию святу́ю па́мять твою́. Песнь 4 Ирмос: Услы́шах, Го́споди, слу́х Твоего́ смотре́ния, и просла́вих Тя́, Еди́не Человеколю́бче. Припев: Святи́телю о́тче Васи́лие, моли́ Бо́га о на́с. Украша́ется я́коже Рождество́м Христо́ва неве́ста Це́рковь, та́ко и па́мятию твое́ю, всеблаже́нне. Припев: Святи́телю о́тче Васи́лие, моли́ Бо́га о на́с. Непребори́мь яви́лся еси́, по Бо́зе боря́, Васи́лие, во все́х Того́ повеле́нию покаря́яся. Припев: Святи́телю о́тче Васи́лие, моли́ Бо́га о на́с. Це́ркви подаде́ся от Бо́га огражде́ние и стена́ тверда́, Васи́лие всеблаже́нне. Сла́ва Отцу́ и Сы́ну и Свято́му Ду́ху. Сопротивобо́жным се́чиво ты́ сека́тельное и о́гнь, пояда́яй пре́лесть, яви́лся еси́, о́тче Васи́лие. И ны́не и при́сно и во ве́ки веко́в. Ами́нь. Богородичен: Мо́лим Тя, Чи́стая, я́же Бо́га безсе́менно заче́нши, при́сно моли́ти за рабы́ Твоя́. Песнь 5 Ирмос: Све́та Пода́телю и веко́в Тво́рче, Го́споди, во све́те Твои́х повеле́ний наста́ви на́с: ра́зве бо Тебе́, ино́го Бо́га не зна́ем. Припев: Святи́телю о́тче Васи́лие, моли́ Бо́га о на́с. Во́дит вои́стинну сугу́б Це́рковь пра́здник дне́сь обре́зания, я́ко младе́нца Влады́ки, я́вльшагося на земли́, и па́мять раба́, му́дра и треблаже́нна. Припев: Святи́телю о́тче Васи́лие, моли́ Бо́га о на́с. Непостижи́мый Све́т почи́в в тебе́, преподо́бне, пресве́тлу свещу́ ми́ру тя́ показа́ Христо́с, те́мже па́мять твою́ пое́м, Васи́лие. Припев: Святи́телю о́тче Васи́лие, моли́ Бо́га о на́с. Всете́мно напи́санное в Сина́и бытие́ Моисе́ем, ты́, сказу́я от боже́ственных сокро́вищь, начерта́л еси́ все́м, преблаже́нне Васи́лие. Сла́ва Отцу́ и Сы́ну и Свято́му Ду́ху. Ни законополо́жник Моисе́й, ни пе́рвее зако́на Ио́сиф бы́сть, и́же по тебе́ пи́щи пшеницоме́ритель: Боже́ственныя бо пло́ти са́м раздроби́тель яви́лся еси́, Васи́лие. И ны́не и при́сно и во ве́ки веко́в. Ами́нь. Богородичен: Тебе́, ро́ждшей Христа́, все́х Соде́теля, зове́м: ра́дуйся, Чи́стая, ра́дуйся, Све́т возсия́вшая на́м, ра́дуйся, вмести́вшая Бо́га Невмести́маго. Песнь 6 Ирмос: Бе́здна мя́ мно́га грехо́вная окружа́ет, и вопию́ Ти, проро́ка подража́яй: от тли́ мя́, Го́споди, возведи́. Припев: Святи́телю о́тче Васи́лие, моли́ Бо́га о на́с. Напита́л еси́ ду́ши, та́ющия гла́дом, ни́щих оби́льно и а́лчущих сердца́ вся́каго испо́лнил еси́, Васи́лие, боже́ственнаго весе́лия. Припев: Святи́телю о́тче Васи́лие, моли́ Бо́га о на́с. Напита́л еси́ бога́тно а́лчущия пи́щею небе́сною: хле́б бо Ангельский е́сть сло́во твое́, Васи́лие, и́мже изря́ден пшеницода́вец бы́л еси́. Припев: Святи́телю о́тче Васи́лие, моли́ Бо́га о на́с. Собра́л еси́ пче́льный, Васи́лие, люботру́дно доброде́тели вся́кия цве́т и, худо́г быв, в ни́хже ублажа́ешися. Сла́ва Отцу́ и Сы́ну и Свято́му Ду́ху. Потща́лся еси́ ми́ра отлучи́тися и с Бо́гом пожи́ти, те́мже нестоя́тельная и тле́нная, всеблаже́нне Васи́лие, оста́вль, пребыва́ющая, я́ко му́др, стяжа́л еси́. И ны́не и при́сно и во ве́ки веко́в. Ами́нь. Богородичен: Спаси́ от бе́д рабы́ Твоя́, Богоро́дице, я́ко вси́ по Бо́зе к Тебе́ прибега́ем, я́ко к неруши́мей стене́ и предста́тельству. Кондак, глас 4 Явился еси́ основа́ние непоколеби́мое Це́ркве,/ подая́ всем некрадо́мое госпо́дьство челове́ком,/ запечатле́я твои́ми веленьми,/ небоявле́нне Васи́лие преподо́бне. Икос Целому́дрия ча́ша, уста́ прему́дрости/ и степе́нь уче́ний, Васи́лий Вели́кий всем облиста́ет мы́сленно./ Прииди́те у́бо, и ста́нем в дому́ Бо́жии, те́пле взира́юще,/ чудесы́ сего́ крася́щеся, я́коже луче́ю, облиста́вшеся жития́,/ чи́стым духом прохла́ждшеся,/ подо́бящеся того́ ве́ре, и теплоте́, и смире́нию,/ и́миже дом яви́ся естества́ Бо́жия./ К нему́же вопию́ще, пое́м:/ небоявле́нне Васи́лие преподо́бне. Песнь 7 Ирмос: Образу злато́му на по́ле Деи́ре служи́му, трие́ Твои́ о́троцы небрего́ша безбо́жнаго веле́ния, посреде́ же огня́ вве́ржени, ороша́еми, поя́ху: благослове́н еси, Бо́же оте́ц на́ших. Припев: Святи́телю о́тче Васи́лие, моли́ Бо́га о на́с. Образ Отца́ Сы́н, и Сы́на Ду́х е́сть. Ты́ же Ду́ха, о Васи́лие, нескве́рнено зерца́ло, до́м же всея́ Тро́ицы. Блаже́нна па́мять твоя́, и сла́вящии ю́ воспрославля́ются. Припев: Святи́телю о́тче Васи́лие, моли́ Бо́га о на́с. Углуби́в у́м во глубины́ Бо́жия непостижи́мыя и собра́в многоце́нный ты́ би́сер ра́зума, напо́лнил еси́ ми́р прему́дростию и зва́ти научи́л еси́: благослове́н еси́, Бо́же оте́ц на́ших. Припев: Святи́телю о́тче Васи́лие, моли́ Бо́га о на́с. О, еди́но дохнове́ние ума́ свяще́нных сопру́г, я́коже еди́на душа́ во двою́ телесе́х неразде́льно: в Григо́рии Васи́лий, жела́нием боже́ственным совоку́плени, в Васи́лии же Григо́рий, ны́не моли́те Христа́ о ста́де ва́шем. Припев: Святи́телю о́тче Васи́лие, моли́ Бо́га о на́с. Оте́ц сиро́т, и вдо́в защи́тник, и бога́тство ни́щих, боля́щих утеше́ние и су́щих в бога́тстве окормле́ние, ста́рости же́зл яви́лся еси́, и наказа́ние ю́ности, и мона́шествующих доброде́тели пра́вило, Васи́лие. Сла́ва Отцу́ и Сы́ну и Свято́му Ду́ху. Очи́стив от вся́каго ти́ннаго скверне́ния у́м, Васи́лие, сразсмотри́л еси́ духо́вная жела́нным твои́м ду́хом. Те́мже, воспева́я Тро́ицу, со дерзнове́нием взыва́л еси́: благослове́н еси́, Бо́же оте́ц на́ших. И ны́не и при́сно и во ве́ки веко́в. Ами́нь. Богородичен: Тя́ купину́ Моисе́й в горе́ Сина́йстей огнепали́му, Чи́стая, прови́дяше, прие́мшую неопа́льно нестерпи́мую зарю́ Неизглаго́ланнаго Существа́, соедини́вшагося дебельству́ пло́ти еди́ныя в Не́м святы́х Ипоста́сей. Песнь 8 Ирмос: Неизрече́нною му́дростию соста́вльшаго вся́ческая Бо́га Сло́ва и от не су́щих во е́же бы́ти приве́дшаго, благослови́те, дела́, я́ко Го́спода, и превозноси́те во вся́ ве́ки. Припев: Святи́телю о́тче Васи́лие, моли́ Бо́га о на́с. Несказа́нным про́мыслом дарова́вшаго Васи́лия ми́ру, све́т благоче́стия, трубу́ же богосло́вия, благослови́те, дела́ Госпо́дня, Го́спода. Припев: Святи́телю о́тче Васи́лие, моли́ Бо́га о на́с. Бога́тным де́йством все́льшася в му́драго Васи́лия и те́м благоче́стно богосло́вившаго, благослови́те, дела́ Госпо́дня, Го́спода. Припев: Святи́телю о́тче Васи́лие, моли́ Бо́га о на́с. Боже́ственных твои́х слове́с наслади́вшиися, Васи́лие, непреста́нно в твое́й па́мяти торжеству́юще, вопие́м: благослови́те, дела́ Госпо́дня, Го́спода. Сла́ва Отцу́ и Сы́ну и Свято́му Ду́ху. Лучи́ слове́с испусти́л еси́, Васи́лие, ми́ру, све́том наставля́ющия Еди́но чествова́ти Тро́ическое Естество́: благослови́те, дела́ Госпо́дня, Го́спода. И ны́не и при́сно и во ве́ки веко́в. Ами́нь. Богородичен: Из Отца́, проше́дшаго пре́жде век, и безле́тнаго Бо́га Сло́ва и в после́дняя возсия́вша из Де́вы, благослови́те, дела́ Госпо́дня, Го́спода. Песнь 9 Ирмос: Яже пре́жде со́лнца Свети́льника Бо́га возсия́вшаго, пло́тски к на́м прише́дшаго, из боку́ Деви́чу неизрече́нно воплоти́вшая, Благослове́нная Всечи́стая, Тя́, Богоро́дице, велича́ем. Припев: Святи́телю о́тче Васи́лие, моли́ Бо́га о на́с. Пе́рваго па́стыря, я́ко овча́ ве́рное Христо́во, Васи́лие, живоно́сным стопа́м после́довал еси́, мучи́телю бо твою́ ду́шу, о́тче, преда́л еси́, до́блественне предбе́дствуя о Це́ркви, всеблаже́нне. Припев: Святи́телю о́тче Васи́лие, моли́ Бо́га о на́с. Церко́вное всесвяще́нное Христо́во ви́дев совокупле́ние, твои́м укра́шено святи́тельством, му́дре, всегуби́тель, я́ко от гро́ма, треснове́н быв, паде́ся мучи́тель, су́щия бо в тебе́ Ду́ха зари́ не стерпе́, Васи́лие. Припев: Святи́телю о́тче Васи́лие, моли́ Бо́га о на́с. Апо́столов седа́лища, ли́ка же страда́лец Христо́вых, патриа́рхов ски́нии, и пра́ведных сла́дости, и ра́дости проро́ков сподо́бился еси́, Васи́лие: Богоро́дицы бо служи́тель и Тро́ицы таи́нник бы́л еси́. Припев: Святи́телю о́тче Васи́лие, моли́ Бо́га о на́с. Превы́спренняя вода́ми покрыва́яй Еди́н Госпо́дь, востязу́яй мо́ре, бе́здны же изсуша́яй, из Тебе́, Чи́стая, пло́ть восприе́мый, от Вифлее́ма тщи́тся ко Иорда́ну крести́тися пло́тию. Светилен Любому́дрия жела́нием обре́зал еси́, о́тче, души́ твоея́ покрыва́ло,/ и ми́ру показа́лся еси́, я́ко со́лнце, чудесы́,/ и ве́рных озари́л еси́ мы́сли, Богому́дре,/ Тро́ицы таи́нниче, о Васи́лие му́дре, и служи́телю Богоро́дицы.

Минея, 14 Февраля, Кано́н, его́же краегране́сие: Авксе́нтия Боже́ственнаго пою́ прему́дре. Творе́ние Феофа́ново Глас 4 Песнь 1 Ирмос: Мо́ря чермну́ю пучи́ну/ невла́жными стопа́ми/ дре́вний пешеше́ствовав Изра́иль/ крестообра́зныма Моисе́овыма рука́ма/ Амали́кову си́лу в пусты́ни победи́л есть. Припев: Преподо́бне о́тче Авксе́нтие, моли́ Бо́га о на́с. Возрасти́в ю́же к Бо́гу любо́вь твою́, о́тче Авксе́нтие,/ и мирску́ю любо́вь оста́вив, Богоно́се,/ сосу́д вмести́телен Ду́ха дарова́ний показа́лся еси́. Припев: Преподо́бне о́тче Авксе́нтие, моли́ Бо́га о на́с. Подвше́л еси́ твои́ми хоте́ньми, о́тче Авксе́нтие, ты под и́го Госпо́дне благо́е/ и зе́млю новоде́лал еси́, доброде́телей слеза́ми умаща́я, досточу́дне. Сла́ва Отцу́ и Сы́ну и Свято́му Ду́ху. Устрани́вся жите́йския молвы́,/ твою́ ду́шу и ум к Бо́гу сочета́в усе́рдно, кре́пкими поще́ньми/ на земли́ я́ко безпло́тен пожи́л еси́, всеблаже́нне. И ны́не и при́сно и во ве́ки веко́в. Ами́нь. Богородичен: В Тебе́ ны́не ви́деся, Влады́чице,/ непости́жное Богому́жное соше́ствие Христо́во,/ я́ко Бог бо и Челове́к из Тебе́, Чи́стая, роди́ся,/ обновля́я существо́ мое́. Песнь 3 Ирмос: Не му́дростию, и си́лою, и бога́тством хва́лимся,/ но Тобо́ю, О́тчею Ипоста́сною му́дростию, Христе́:/ несть бо свят, па́че Тебе́, Человеколю́бче. Припев: Преподо́бне о́тче Авксе́нтие, моли́ Бо́га о на́с. Вжиля́емь Креста́ си́лою,/ упраздни́л еси́ де́монов стремле́ния и кова́рства разруши́л еси́,/ поще́нием побежда́я сих наше́ствие. Припев: Преподо́бне о́тче Авксе́нтие, моли́ Бо́га о на́с. А́нгельское житие́ на земли́ подража́я,/ чи́стое в моли́твах, во бде́ниих благомо́щное,/ усе́рдно проше́л еси́, о́тче Авксе́нтие. Сла́ва Отцу́ и Сы́ну и Свято́му Ду́ху. Яд сме́ртный, ду́шам происхода́тающ,/ Авксе́нтие, поразуме́в сла́дость,/ воздержа́нием умертви́л еси́ тоя́ движе́ния, Богому́дре преподо́бне. И ны́не и при́сно и во ве́ки веко́в. Ами́нь. Богородичен: Созда́вый в нача́лех от пе́рсти мя челове́ка,/ зи́ждется мене́ ра́ди во чре́ве Твое́м, Всенепоро́чная,/ дре́внее паде́ние исправля́я. Седален, глас 8 Земна́я вся оста́вив, и в ми́ре сый теле́сне,/ ду́хом был еси́ А́нгелом собесе́дник,/ су́щия бо стра́сти умертви́в теле́сныя,/ Тро́ицы показа́лся еси́ уго́дник, блаже́нне./ Те́мже неду́гующих исцеля́еши стра́сти/ и сло́вом ду́хи отго́ниши благода́тию, Богоно́се Авксе́нтие./ Моли́ Хри́ста Бо́га прегреше́ний оставле́ние дарова́ти/ чту́щим любо́вию святу́ю па́мять твою́. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Со́лнца о́блаче разу́мнаго, Боже́ственнаго све́та свети́льниче златокова́нный,/ нескве́рная, небла́зная, Всенепоро́чная Влады́чице,/ омраче́нную ду́шу мою́ ослепле́нием страсте́й безстра́стия заре́ю просвети́, молю́ся,/ и оскверне́ное мое́ се́рдце омы́й пото́ки умиле́ния, покая́ния же слеза́ми,/ и от тиме́ния мя очи́сти дел мои́х, да любо́вию зову́ Ти:/ Богоро́дице Присноде́во, моли́ Христа́ Бо́га прегреше́ний оставле́ние пода́ти ми,/ Тебе́ бо име́ю наде́жду, раб Твой. Песнь 4 Ирмос: Вознесе́на Тя ви́девши Це́рковь на Кресте́,/ Со́лнце пра́ведное,/ ста в чи́не свое́м,/ досто́йно взыва́ющи:/ сла́ва си́ле Твое́й, Го́споди. Припев: Преподо́бне о́тче Авксе́нтие, моли́ Бо́га о на́с. Победи́тель на ду́хи лука́вствия,/ Свята́го Ду́ха, о́тче, соде́йством яви́лся еси́ и благода́тию,/ зовы́й, Авксе́нтие:/ сла́ва си́ле Твое́й, Го́споди. Припев: Преподо́бне о́тче Авксе́нтие, моли́ Бо́га о на́с. От пото́ков, Богоно́сне, беззако́ния моли́твою, всеблаже́нне, себе́ утверди́в,/ убежа́л еси́ смуще́ния,/ сла́дости же пото́ка напи́лся еси́ досто́йно, всеблаже́нне. Сла́ва Отцу́ и Сы́ну и Свято́му Ду́ху. Богоно́сец, ве́ру и любо́вь, ю́же к Бо́гу, возрасти́в,/ к Го́рней высоте́ Боже́ственнаго присвое́ния возвы́сился еси́, зовы́й:/ сла́ва си́ле Твое́й, Го́споди. И ны́не и при́сно и во ве́ки веко́в. Ами́нь. Богородичен: Бо́га Сло́ва Тя ро́ждшую, я́ве зна́юще теле́сно,/ вои́стинну Богоро́дицу, ве́рнии вси, имену́ем,/ зва́ние по коему́ждо естеству́ веще́й принося́ще. Песнь 5 Ирмос: Ты, Го́споди, мой свет,/ в мир прише́л еси́,/ Свет Святы́й, обраща́яй из мра́чна неве́дения/ ве́рою воспева́ющия Тя. Припев: Преподо́бне о́тче Авксе́нтие, моли́ Бо́га о на́с. Близ су́щия твоего́ пути́, о́тче, собла́зны/ о́стрым умо́м невре́дно преше́л еси́ и душе́вною чистото́ю. Припев: Преподо́бне о́тче Авксе́нтие, моли́ Бо́га о на́с. Житие́ твое́ све́тло, и ве́ра правосла́вна,/ воздержа́ние чу́дно,/ растворе́но сло́во благода́тию, Авксе́нтие. Сла́ва Отцу́ и Сы́ну и Свято́му Ду́ху. Ра́вностию мы́слей жизнь преше́л еси́, привре́менная претека́я,/ ве́чным же, о́тче, при́сно прилага́яся. И ны́не и при́сно и во ве́ки веко́в. Ами́нь. Богородичен: Ум иму́ще прав, уче́ний испо́лнен,/ Тя, Пречи́стая, Богоро́дицу имену́ем вси/ и любо́вию ублажа́ем. Песнь 6 Ирмос: Пожру́ Ти со гла́сом хвале́ния, Го́споди,/ Це́рковь вопие́т Ти,/ от бесо́вския кро́ве очи́щшися/ ра́ди ми́лости от ребр Твои́х/ исте́кшею Кро́вию. Припев: Преподо́бне о́тче Авксе́нтие, моли́ Бо́га о на́с. Сы́на тя све́та и дне показа́ житие́ твое́, блаже́нне,/ благообра́зно вои́стинну ходя́ща/ и свети́льника в ми́ре жи́зни сло́во иму́ща. Сла́ва Отцу́ и Сы́ну и Свято́му Ду́ху. Поуче́ние сме́рти житие́ твое́ положи́в,/ преизя́щно преде́л му́дрости, о́тче, поразуме́в,/ преложи́лся еси́ к Прему́дрости Ипоста́сней. И ны́не и при́сно и во ве́ки веко́в. Ами́нь. Богородичен: Храм Тя Бо́жий и черто́г зна́ем,/ ста́мну, и све́щник, и скрижа́ль, иму́щую внутрь напи́сано/ за милосе́рдие вопло́щшееся Сло́во, Всенепоро́чная. Кондак, глас 2 Наслади́вся, Богому́дре, воздержа́ния/ и жела́ния пло́ти твоея́ обузда́в,/ яви́лся еси́, ве́рою сия́я,/ я́коже сад посреди́ рая́, процве́л еси́,/ Авксе́нтие о́тче свяще́нне. Икос Кто по́двиги твоя́ ны́не изрече́т или́ боле́зни твоя́, о́тче,/ и́хже подъя́л еси́ на земли́?/ за Боже́ственное наслажде́ние зако́ном Госпо́дним после́довав/ и повеле́нием Сего́ послужи́в, нов нам показа́лся еси́ И́ов боре́ньми;/ ми́рови яви́ся пришле́ц и земли́ всей, я́ко стра́нен,/ поще́нием ве́рою процве́л еси́,/ бде́ние и чистоту́ изобучи́л еси́,/ Авксе́нтие о́тче свяще́нне. Песнь 7 Ирмос: В пещи́ Авраа́мстии о́троцы перси́дстей,/ любо́вию благоче́стия па́че,/ не́жели пла́менем, опаля́еми, взыва́ху:/ благослове́н еси́ в хра́ме сла́вы Твоея́, Го́споди. Припев: Преподо́бне о́тче Авксе́нтие, моли́ Бо́га о на́с. Я́ко уя́звлен Влады́чнею, о́тче, Боже́ственною любо́вию,/ все к Нему́ неосла́бное жела́ние се́рдца твоего́ преложи́л еси́, зовы́й:/ благослове́н еси́ в хра́ме сла́вы Твое́й, Го́споди. Сла́ва Отцу́ и Сы́ну и Свято́му Ду́ху. Просвеще́н Спа́совою заре́ю, всему́дре,/ тьмы предста́теля обличи́л еси́ терпели́вно,/ мироде́ржца же низложи́л еси́,/ благослове́н еси́, зовы́й, в хра́ме сла́вы Твое́й, Го́споди. И ны́не и при́сно и во ве́ки веко́в. Ами́нь. Богородичен: Истле́вшее дре́вле, е́же к лу́чшему возведе́нию,/ естество́ челове́ческое, Пречи́стая, восхоте́в обнови́ти,/ всели́ся Соде́тель Бог во утро́бу Твою́, Еди́на Всепе́тая. Песнь 8 Ирмос: Изба́вителю всех, Всеси́льне,/ посреде́ пла́мене благоче́ствовавшия,/ снизше́д ороси́л еси́/ и научи́л еси́ пе́ти:/ вся дела́, благослови́те, по́йте Го́спода. Припев: Преподо́бне о́тче Авксе́нтие, моли́ Бо́га о на́с. Весь к Бо́гу преложе́н, оттря́сл еси́ плотско́е удобостра́стие/ и чуде́с прия́л еси́ де́йство, поя́:/ благослови́те, вся дела́ Госпо́дня, Го́спода. Сла́ва Отцу́ и Сы́ну и Свято́му Ду́ху. Стра́шен яви́лся еси́ де́моном, Христа́ стяжа́в помо́щника,/ Его́же Крест взем, после́довал еси́, поя́:/ благослови́те, вся дела́ Госпо́дня, Го́спода. И ны́не и при́сно и во ве́ки веко́в. Ами́нь. Богородичен: Вити́йствует, я́влься, Арха́нгел/ и возвеща́ет Рождества́ Твоего́, Пречи́стая, е́же па́че сло́ва, зача́тие и спаси́тельное ми́ру:/ вся дела́, благослови́те, по́йте Го́спода. Песнь 9 Ирмос: Ка́мень нерукосе́чный,/ от несеко́мыя горы́ Тебе́, Де́во,/ краеуго́льный отсече́ся,/ Христо́с, совокупи́вый разстоя́щаяся естества́./ Тем, веселя́щеся, Тя, Богоро́дице, велича́ем. Припев: Преподо́бне о́тче Авксе́нтие, моли́ Бо́га о на́с. Всему́ Божеству́, о́тче, креще́нием твои́м обеща́лся еси́/ и соблю́л еси́ чи́сте о́браза, блаже́нне, досто́инство,/ к Трисия́нней све́тлости с весе́лием вмести́лся еси́. Припев: Преподо́бне о́тче Авксе́нтие, моли́ Бо́га о на́с. Ны́не не в гада́нии, о́тче, ниже́ в зерца́ле зри́ши Богонача́лия просвеще́ние,/ лице́м же, всему́дре, к лицу́,/ па́че ума́ све́тлости и Боговиде́ния сподобля́емь. Сла́ва Отцу́ и Сы́ну и Свято́му Ду́ху. Я́ко име́я мно́го дерзнове́ние ко всех Царю́, о́тче,/ изба́витися моли́ся твою́ па́мять соверша́ющим ны́не от вся́каго обстоя́ния,/ да тя вси ублажа́ем. И ны́не и при́сно и во ве́ки веко́в. Ами́нь. Богородичен: Плени́цы мои́х прегреше́ний разреши́, Де́во Богоро́дице,/ я́же благоутро́бия исто́чник ро́ждши, Еди́на Богоблаже́нная,/ и утеше́ния испо́лни,/ я́ко да досто́йно Тя велича́ю. Светилен Мирска́го благостра́стия, я́ко от скве́рны, уклони́лся еси́,/ и, неяде́нием плоть увяди́в,/ обнови́л еси́ душе́вную кре́пость, преподо́бне,/ и сла́вою обогати́лся еси́ Небе́сною, сла́вне./ Те́мже моля́ся не преста́й о всех нас Го́сподеви. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Соединя́ется по Ипоста́си пло́тию/ Пресу́щное Сло́во души́ посреде́ и мы́сленне и соверше́нне,/ и Еди́н от Двою́ прохо́дит из Тебе́ несме́сно, Пречи́стая,/ обожи́в, е́же прия́т./ Те́мже Тя прославля́ет, вои́стинну Богоро́дицу.

Минея, 14 Марта, Канон Богородицы Глас 4 Песнь 1 Ирмос: Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,/ и воспою́, ра́дуяся, Тоя́ чудеса́. Припев: Пресвята́я Богоро́дице, спаси́ на́с. Отве́рзый ум разуме́ти Писа́ния ученико́м Твои́м, Го́споди,/ отве́рзи ны́не и на́ша се́рдца к разуме́нию вели́чия Твоего́ и Ма́тери Твое́я,/ да с Не́ю боголе́пно просла́вим Тя. Припев: Пресвята́я Богоро́дице, спаси́ на́с. Отве́рсти толку́щим две́ри милосе́рдия Твоего́ обетова́вый, Влады́ко наш,/ отве́рзи нам утро́бы человеколю́бия Твоего́,/ име́я на сие́ моля́щую Тя Хода́таицу. Сла́ва Отцу́ и Сы́ну и Свято́му Ду́ху. Отве́рсто иногда́ бы́сть моли́твою Илиино́ю не́бо,/ ра́ди беззако́нновавшаго Изра́иля заключе́нное,/ отве́рст да бу́дет и нам, гре́шным, вход в Небе́сная предста́тельством Твои́м, Богороди́тельнице. И ны́не и при́сно и во ве́ки веко́в. Ами́нь. Отве́рзшая рождество́м Твои́м врата́ ве́чная, Богороди́тельница Пречи́стая,/ отве́рзи предста́тельством Твои́м заключе́нный серде́ц на́ших две́ри,/ да Сын Твой и Бог наш вни́дет и освяти́т я. Песнь 3 Ирмос: Твоя́ песносло́вцы, Богоро́дице,/ Живы́й и Незави́стный Исто́чниче,/ лик себе́ совоку́пльшия, духо́вно утверди́,/ в Боже́ственней Твое́й сла́ве/ венце́в сла́вы сподо́би. Припев: Пресвята́я Богоро́дице, спаси́ на́с. Твоего́ плотска́го е́же на земли́ смотре́ния/ да незабве́нно устро́иши воспомина́ние,/ дал еси́ нам, Влады́ко, ико́ну Твою́ и Ро́ждшия Тя,/ те́мже, взира́юще на о́ную, мо́лим Тя:/ руководи́ нас к позна́нию и любле́нию Тебе́,/ воплоще́ннаго Бо́га и Спа́са душ на́ших. Припев: Пресвята́я Богоро́дице, спаси́ на́с. Твое́й Пренепоро́чныя Ма́тере всечестны́й о́браз любо́вию объе́млюще,/ из глубины́ души́ взыва́ем к Тебе́, живу́щему на Небесе́х:/ начертай на сердца́х на́ших кра́сный о́браз доброде́телей Ея́,/ да велича́ем Тя, Го́спода и Спа́са на́шего. Сла́ва Отцу́ и Сы́ну и Свято́му Ду́ху. Твой всечестны́й о́браз, Влады́чице, любе́зно на земли́ прие́млюще,/ зове́м к Тебе́, су́щей во сла́ве Небе́сней,/ да при́сно хода́тайствуеши нам благода́ть мы́слити и твори́ти досто́йная Твоего́ вели́чия,/ е́же сотвори́ Тебе́ Си́льный. И ны́не и при́сно и во ве́ки веко́в. Ами́нь. Твои́х благодея́ний воспомина́ние, твори́мое дне́сь,/ дви́жет се́рдца на́ша со устна́ми к благохвале́нию Твоему́, Влады́чице,/ но сотвори́, да и кра́сный лик Твои́х доброде́телей/ привлече́т се́рдца на́ша к любле́нию и подража́нию о́ных. Седален, глас 3 Си́и лю́дие устна́ми чтут Мя,/ се́рдце же их дале́че отстои́т от Мене́, –/ рече́ иногда́ Госпо́дь Вседержи́тель ко иуде́ем, еди́н вне́шний вид благоче́стия являющим./ Но да и мы не ту́южде с ни́ми ча́сть и осужде́ние восприи́мем, бра́тие,/ вся́чески блюде́мся дел, подо́бных лицеме́рию./ Сего́ ра́ди пра́зднующе и всечестны́й сей пра́здник,/ да не яви́мся извне́ то́чию благогове́йны,/ вну́трь же у́ду зли и нечести́вии пред Испыту́ющим се́рдца и утро́бы,/ в простоте́ се́рдца поклони́мся Ему́, я́коже Сам рече́, Ду́хом и и́стиною,/ да та́ко бу́дем подража́тели Пресвяте́й Де́ве,/ в Не́йже не глас то́чию, но па́че душа́ велича́ше Го́спода/ и Дух ра́довашеся о Бо́зе, Спа́се Свое́м. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Покро́ва Твоего́ Боже́ственнаго, Пречи́стая Богоро́дице Влады́чице,/ да не отъи́меши от рабо́в Твои́х, мо́лят Тя уго́дники Сы́на Твоего́:/ великому́ченик Фео́дор Стратила́т и преподо́бнии чудотво́рцы,/ страны́ сея́ Костромски́я и Га́лицкия засту́пницы,/ и́хже моле́ние приими́ и поми́луй нас. Песнь 4 Ирмос: Седя́й в сла́ве на Престо́ле Божества́/ во о́блаце ле́гце,/ прии́де Иису́с Пребоже́ственный/ Нетле́нною Дла́нию и спа́се зову́щия:/ сла́ва, Христе́, си́ле Твое́й. Припев: Пресвята́я Богоро́дице, спаси́ на́с. Седя́й одесну́ю Престо́ла вели́чествия на высо́ких,/ снизше́л еси́ к дольнейшим страна́м земли́/ и, всели́вся во чре́во смиренному́дрыя Ма́тере Де́вы,/ яви́л еси́ ми́рови, я́ко Ты призира́еши на смире́ние рабо́в Твои́х/ и дае́ши им благода́ть Твою́,/ ея́же да и мы сподо́бимся, да́руй нам бы́ти ревни́тели смиренному́дрыя Твое́я Ма́тере. Припев: Пресвята́я Богоро́дице, спаси́ на́с. Седя́й на ра́мех Херуви́м и Серафи́м,/ благоволи́л еси́ пло́тию седе́ти на объя́тиях Чисте́йшия Отрокови́цы,/ да сим пока́жеши нам, я́ко Ты, Свя́те святы́х,/ обита́еши в сердца́х еди́ных любителей чистоты́ и целому́дрия,/ его́же рачи́тели и нас покажи́ моли́твами ро́ждшия Тя. Сла́ва Отцу́ и Сы́ну и Свято́му Ду́ху. Седя́щему во сла́ве на Престо́ле Божества́/ сподо́билася еси́ Ма́терь бы́ти,/ ра́ди изя́щнейшия чистоты́ и смиренному́дрия,/ и́хже люби́тели и нас покажи́ моли́твами Твои́ми,/ да и мы сподо́бимся ча́сти, угото́ванной рачи́телем чистоты́ и смиренному́дрия Твоего́. И ны́не и при́сно и во ве́ки веко́в. Ами́нь. Седе́ти во сла́ве Сы́на Твоего́ сподо́бившаяся, Пренепоро́чная Де́во,/ не преста́й моля́щи бла́гость Его́,/ да и мы, взира́юще на о́браз святы́я жи́зни Твое́я/ и о́ному на́шим жи́тельством сообразу́ющеся,/ тоя́жде сла́вы на Небесе́х бу́дем прича́стницы. Песнь 5 Ирмос: Ужасо́шася вся́ческая/ о Боже́ственней сла́ве Твое́й:/ Ты бо, Неискусобра́чная Де́во,/ име́ла еси́ во утро́бе над все́ми Бо́га/ и родила́ еси́ Безле́тнаго Сы́на,/ всем воспева́ющим Тя/ мир подава́ющая. Припев: Пресвята́я Богоро́дице, спаси́ на́с. Ужаса́хуся и смуща́хуся костромсти́и жи́телие,/ мне́вше зна́мение Твоего́ о них про́мысла,/ ико́ну Ма́тере Твое́й, во пла́мени сгоре́вшу,/ но сие́ смуще́ние премени́л еси́ в ра́дость, Го́споди,/ показа́в им а́бие о́браз сей, от огня́ и пе́пела невреди́м./ Си́це да и мы, по обурева́ющих нас искуше́ниях и напа́стех,/ при́сно ра́дуемся о Твое́м, е́же о нас благоволе́нии,/ мо́лим Тя, Человеколю́бче. Припев: Пресвята́я Богоро́дице, спаси́ на́с. Ужасо́шася иногда́ полки́ наше́дших на град Кострому́ супоста́тов,/ егда́ от воображе́ния зра́ка лица́ Твоего́, Го́споди, и Пресвяты́я Твое́й Ма́тере/ пусти́л еси́ на сих стре́лы мо́лниины,/ но сей у́жас да вложи́ши в се́рдца/ и всех, стремящихся ратобо́рствовати достоя́ние Твое́,/ мо́лим Тя с Хода́таицею на́шего избавле́ния. Сла́ва Отцу́ и Сы́ну и Свято́му Ду́ху. Ужа́сни и ско́рбни бы́вше жи́телие Городца́,/ узре́вше ико́ну Твою́, Богома́ти, пренесе́ну во град Кострому́:/ мня́ху бо себе́ сим пренесе́нием лише́нных бы́ти Твоего́ о них Ма́терняго благоволе́ния,/ но да не и мы, таково́ю же иногда́ ско́рбию объя́ти,/ бу́дем лише́ни зна́мений Твоего́ покровительства,/ не преста́й, Влады́чице, пребыва́ющи с на́ми Твое́ю ми́лостию. И ны́не и при́сно и во ве́ки веко́в. Ами́нь. Я́ко о́чи рабы́ни в ру́ку госпожи́ свое́й,/ та́ко о́чи на́ши всегда́ к Тебе́ возводи́м,/ о Многоблагоутро́бная Госпоже́ на́ша и Спаси́тельнице Всесвята́я Богоро́дице!/ При́зри у́бо на ны ми́лостивно,/ ца́рствующая на Небеси́ с Сыно́м твои́м и Бо́гом,/ и уще́дрити ны, гре́шныя, потщи́ся,/ я́ко вся Тебе́ возмо́жна су́ть. Песнь 6 Ирмос: Боже́ственное сие и всечестно́е/ соверша́юще пра́зднество,/ Богому́дрии, Богома́тере,/ прииди́те, рука́ми воспле́щим,/ от Нея́ ро́ждшагося Бо́га сла́вим. Припев: Пресвята́я Богоро́дице, спаси́ на́с. Боже́ственное Твое́ разуме́ем истоща́ние, Иису́се, Бо́же наш,/ егда́, взира́юще на о́браз Ма́тере Твое́я,/ зрим Тя с Не́ю я́ко Младе́нца, рука́ми Ея́ держи́ма,/ те́мже благодаря́ще сему́ Твоему́ е́же к нам снизхожде́нию,/ мо́лим Тя, нас ра́ди младе́нствовавшаго,/ бы́ти нам ми́лостива о гресе́х на́ших. Сла́ва Отцу́ и Сы́ну и Свято́му Ду́ху. Боже́ственнаго Твоего́ воплоще́ния е́же от Де́вы, да при́сно сла́вится та́инство,/ дарова́л еси́ нам, Христе́ Царю́, всечестну́ю Ма́тере Твое́я ико́ну/ с воображе́нным на ней ви́дом Пречи́стаго лица́ Твоего́,/ те́мже и мо́лим Тя, Вседарови́тый Го́споди,/ да да́си нам при́сно сла́вити воплоще́ние Твое́,/ и́мже челове́цы Божеству́ соединихомся. И ны́не и при́сно и во ве́ки веко́в. Ами́нь. Боже́ственнаго Твоего́ воплоще́ния е́же от Де́вы, да при́сно сла́вится та́инство,/ дарова́л еси́ нам, Христе́ Царю́, всечестну́ю Ма́тере Твое́я ико́ну/ с воображе́нным на ней ви́дом Пречи́стаго лица́ Твоего́,/ те́мже и мо́лим Тя, Вседарови́тый Го́споди,/ да да́си нам при́сно сла́вити воплоще́ние Твое́,/ и́мже челове́цы Божеству́ соединихомся. Кондак, глас 8 Благода́рственная принося́ще Ти, раби́ Твои́, Богороди́тельнице, о всех,/ и́миже благоде́яла еси́ гра́ду на́шему,/ из глубины́ души́ взыва́ем к Тебе́ и ми́ли ся де́ем:/ не преста́ни, Влады́чице,/ Ма́терними к Сы́ну Твоему́ и Бо́гу на́шему моли́твами/ подава́ти вся блага́я и спаси́тельная всем,/ ве́рою и любо́вию вопию́щим Ти:/ ра́дуйся, Де́во, христиа́н похвале́. Икос Стена́ еси́ де́вам, Богоро́дице Де́во,/ и всем, к Тебе́ прибега́ющим,/ и́бо Небесе́ и земли́ Творе́ц устро́и Тя, Пречи́стая, все́лься во утро́бе Твое́й/ и вся приглаша́ти Тебе́ научи́в:/ ра́дуйся, сто́лпе де́вства;/ ра́дуйся, две́рь спасе́ния./ Ра́дуйся, Нача́льнице мы́сленнаго назда́ния;/ ра́дуйся, Пода́тельнице Боже́ственныя бла́гости./ Ра́дуйся, Ты бо обнови́ла еси́ зача́тыя сту́дно;/ ра́дуйся, Ты бо наказа́ла еси́ окра́денныя умо́м./ Ра́дуйся, тли́теля смы́слов упраждня́ющая;/ ра́дуйся, Се́ятеля чистоты́ ро́ждшая./ Ра́дуйся, черто́же безсе́меннаго уневе́щения;/ ра́дуйся, ве́рных Го́сподеви сочета́вшая./ Ра́дуйся, до́брая Младопита́тельнице де́вам;/ ра́дуйся, Невестокраси́тельнице душ святы́х./ Ра́дуйся, Неве́сто Неневе́стная. Песнь 7 Ирмос: Не послужи́ша тва́ри Богому́дрии/ па́че Созда́вшаго,/ но, о́гненное преще́ние му́жески попра́вше,/ ра́довахуся, пою́ще:/ препе́тый отце́в Госпо́дь и Бог, благослове́н еси́. Припев: Пресвята́я Богоро́дице, спаси́ на́с. Не служи́ти тва́ри па́че Творца́ законоположи́вый челове́ком, Спа́се наш,/ сотвори́, усе́рдно мо́лим Тя с Богоро́дицею,/ да Ду́хом Твои́м просвеща́еми,/ не к рукотворе́нным изображе́нием отно́сим Боголе́пное служе́ние,/ но чрез о́браз Твой возно́симся умы́ и се́рдцы,/ к Еди́ному Тебе́, отце́в Бо́гу благослове́нному. Припев: Пресвята́я Богоро́дице, спаси́ на́с. Не послужи́ша бы́вшии в пещи́ Вавило́нстей му́дрии ю́ноши безду́шному истукану,/ но Еди́ному Тебе́, во о́бразе А́нгела посреде́ пла́мене я́вльшемуся Сы́ну Бо́жию, поклони́шася,/ и́хже ли́ку и ча́сти сопричти́ и всех, изображе́нием сладча́йшаго зра́ка Твоего́ дви́жимых/ к прославле́нию Тебе́, отце́в Бо́га благослове́ннаго. Сла́ва Отцу́ и Сы́ну и Свято́му Ду́ху. Не послужи́ла еси́ Бо́гу нра́вом плотски́х иуде́ев, Пренепоро́чная Де́во,/ но ду́хом и и́стиною, я́ко и́стинная Раба́ Его́, покланя́лася еси́ Ему́./ Те́мже да и мы с Тобо́ю и́стиннии бу́дем покло́нницы Его́,/ хода́тайствуй нам благода́ть,/ е́же не в суеве́рном Богопочита́нии, но во и́стинном благоче́стии и ве́ре/ служи́ти отце́в Бо́гу благослове́нному. И ны́не и при́сно и во ве́ки веко́в. Ами́нь. Не послужи́ла еси́ ми́ру и суете́ его́, Богороди́тельнице,/ но, всему́ предпоче́тши еди́наго Бо́га и зако́н Его́,/ была́ еси́ усе́рднейшая всех Раба́ Госпо́дня,/ те́мже и сподо́билася еси́ послужи́ти ве́лией та́йне Бо́жия воплоще́ния, я́ко Богома́терь,/ но сотвори́, да и мы, отве́ргшеся ми́ра и я́же су́ть в ми́ре,/ вседу́шно прилепи́мся и послу́жим Еди́ному Отце́в Бо́гу благослове́нному. Песнь 8 Ирмос: О́троки благочести́выя в пещи́/ Рождество́ Богоро́дичо спасло́ е́сть,/ тогда́ у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́: Го́спода по́йте, дела́,/ и превозноси́те Его́ во вся ве́ки. Припев: Пресвята́я Богоро́дице, спаси́ на́с. Отроча́ мла́до на́шего ра́ди спасе́ния был еси́, Безле́тный Бо́же наш Иису́се,/ Его́же воображе́ние зря́ще на свяще́нней ико́не,/ усе́рдною в Тя ве́рою вопие́м Ти:/ бу́ди Воспита́тель, Наста́вник и Покрови́тель младе́нцем и отроко́м на́шим,/ да и си́и во и́стинней ве́ре навы́кнут глаго́лати Тебе́:/ Го́спода по́йте, дела́,/ и превозноси́те Его́ во вся ве́ки. Припев: Пресвята́я Богоро́дице, спаси́ на́с. О́трок дванадесятоле́тен бы́вый, Иису́се,/ посреде́ ста́рец и учи́телей во святи́лищи пребыва́я, послу́шал еси́ их/ и, совопрошася с ни́ми, явля́л еси́ святу́ю ре́вность к Боже́ственному зако́ну,/ да сим и на́ша о́троки наста́вший/ тща́тися во вре́мя ю́ности стяжава́ти духо́вную, я́же от зако́на Твоего́ прему́дрость,/ да и они́ науча́тся се́рдцы и усты́,/ словесы́ же и де́лы превозноси́ти Тя во вся ве́ки. Сла́ва Отцу́ и Сы́ну и Свято́му Ду́ху. О́троки от пещи́ Вавило́нския изба́вльшему Го́споду/ моли́ся приле́жно, Богоневе́стная Отрокови́це,/ да да́рует всем, под кров Твой прибега́ющим,/ неврежде́нным бы́ти от огня́ искуше́ний и пла́мене похоте́й,/ да, та́ко Тобо́ю изба́вльшеся,/ чи́стыми душа́ми и нескве́рными устна́ми благослови́м с Тобо́ю Еди́наго Изба́вителя Го́спода/ и превозно́сим Его́ во вся ве́ки. И ны́не и при́сно и во ве́ки веко́в. Ами́нь. Отрокови́цам Твое́ целому́дрие и чистота́ да бу́дет красота́ и сла́ва,/ чревонося́щим Твое́ безболе́зненное и свято́е рождество́/ да бу́дет сла́дкое утеше́ние и отра́да,/ всем же, вся́каго по́ла и во́зраста чту́щим Тя, Богоневе́сто,/ доброде́тели Твоя́ да бу́дут еди́ным упражне́нием их,/ я́ко си́ми то́кмо досто́йне от челове́ка прославля́ется Госпо́дь, живы́й во ве́ки. Песнь 9 Ирмос: Всяк земноро́дный/ да взыгра́ется, Ду́хом просвеща́емь,/ да торжеству́ет же Безпло́тных умо́в естество́,/ почита́ющее свяще́нное торжество́ Богома́тере и да вопие́т:/ ра́дуйся, Всеблаже́нная Богоро́дице,/ Чи́стая Присноде́во. Припев: Пресвята́я Богоро́дице, спаси́ на́с. Вся́кое коле́но Небе́сных, и земны́х, и преиспо́дних да покланя́ется Тебе́,/ я́ко нося́щему в Себе́ неизме́нный Преблаже́ннаго Отца́ Твоего́ о́браз, Иису́се./ С ни́миже и мы, ве́рою просвеща́еми,/ Тя, И́стиннаго Бо́га, о́браз челове́ч от Де́вы прии́мшаго, боголе́пно велича́ем. Припев: Пресвята́я Богоро́дице, спаси́ на́с. Вся́ка уста́ да заградя́тся суесло́вящих,/ я́ко не́сть досто́йно чествова́ти Твою́ и Пречи́стыя Ма́тере Твое́й ико́ну, Влады́ке:/ се бо, просла́вив сию́ чудеса́ми,/ научи́л еси́ достоя́ние Твое́ Тебе́ и во о́бразе пло́ти Твое́й/ с Пренепоро́чною Твое́ю Ма́терию прославля́ти и велича́ти. Сла́ва Отцу́ и Сы́ну и Свято́му Ду́ху. Вси ро́ди ве́рных, по прорече́нию Твоему́, блажа́т Тя,/ Благослове́нная, Христа́ Бо́га на́шего Ма́ти./ С ни́ми же и мы, ве́рою совоку́плени,/ благогове́йно чту́ще свяще́нное лица́ Твоего́ изображе́ние,/ прославля́ем Твоя́ вели́чия, я́же сотвори́ Тебе́ Госпо́дь сил,/ с Ним же Тя велича́ем. И ны́не и при́сно и во ве́ки веко́в. Ами́нь. Всяк язы́к сме́ртных, по достоя́нию, изнемога́ет велича́ти Тя,/ над все́ми превознесе́нную, о Богоневе́сто!/ Те́мже и мы, прославля́юще Тя дне́сь, испове́дуем на́ше кра́йнее неможе́ние,/ но, сие́ испове́дующе, мо́лим Тя,/ да по мно́жеству щедро́т Твои́х, прии́меши ма́лое сие́ приноше́ние,/ во зна́мение мно́гия любве́ и усе́рдия нас, велича́ющих Тя. Светилен Свет Лица́ Твоего́ и Пресвяты́я Твое́я Ма́тере/ яви́вый нам, Влады́ко, во всечестне́й ико́не сей,/ сотвори́ нас, я́ко ча́да све́та ходи́ти во све́те за́поведей Твои́х,/ да, егда́ яви́шися во сла́ве с Ро́ждшею Тя,/ сообра́зны бу́дем светле́йшему со́лнца о́бразу Твое́й сла́вы. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Бо́жия тезоимени́тый да́ра страда́лец Христо́в Фео́дор/ Боже́ственный вои́стинну дар, пречестну́ю Пречи́стыя Богома́тере ико́ну,/ гра́ду на́шему Костроме́ прине́с, вруча́ет,/ ю́же мы с неизрече́нною ра́достию, я́ко Небе́сное сокро́вище, прие́млюще,/ играим духо́вне и ликовству́ем, просвеща́еми све́том Боже́ственнаго лица́ Мари́и При́сноде́вы,/ от Нея́же возсия́ Пра́ведное Со́лнце – Христо́с,/ просвеща́яй вся́каго челове́ка, гряду́щаго в мир.

глас 8 Пе́снь 1 Ирмо́с: Во́ду проше́д, я́ко су́шу, и еги́петскаго зла́ избежа́в, изра́ильтянин вопия́ше: Изба́вителю и Бо́гу на́шему пои́м. Припев: Пресвята́я Богоро́дице, спаси́ на́с. У́м мо́й, мно́гими напа́стьми помраче́нный, просвети́, Де́во, Све́т ро́ждшая Боже́ственный, во́лю, в доброде́тели уныва́ющую, воспламени́ свяще́нною любо́вию, па́мять, в славосло́вии изнемога́ющую, укрепи́, да пресве́тлое Твое́ на То́лге явле́ние воспою́ досто́йно, Чи́стая. Хра́ме Трисо́лнечнаго Све́та прекра́сный, украси́ моя́ чу́вства, молю́ся, да, все́ми чу́вствы целому́дрен сы́й, честно́е Твое́ на То́лге явле́ние целому́дренно воспою́, Чи́стая. К Твое́й пресве́тлаго зра́ка ико́не припа́даю, окая́нный: ду́шу мою́ просвети́, яви́ и те́ло нескве́рно и, от лю́тых мя́ неду́гов свободи́вши, покажи́ прича́стника насле́дия Небе́снаго, Богоневе́стная. Я́коже столпо́м о́гненным зарю́ Твоего́ зра́ка яви́ла еси́ Богоно́сному святи́телю, та́ко и ны́не све́том благода́ти явля́еши ве́рным Твое́ ско́рое предста́тельство и заступле́ние. При́зри у́бо на рабы́, призыва́ющия Тя́ и тре́бующия Твоея́ по́мощи, Благода́тная, да́руй стране́ Росси́йстей на враги́ держа́вное одоле́ние, вино́вна бо еси́ все́х благи́х, ве́чную бла́гость на́м воплоти́вшая, Небеси́ хвало́ и ми́ру Помо́щнице. Пе́снь 3 Ирмо́с: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ в любви́ Твое́й, жела́ний кра́ю, ве́рных утвержде́ние, Еди́не Человеколю́бче. Низложи́ во мне́ нало́ги бесо́вския, го́рдость в доброде́телех, лицеме́рие в свя́тости, тщесла́вие во бде́нии, высокоу́мие в благогове́нии и неблагода́рность в благодея́ниих Сы́на Твоего́, Еди́на Всепе́тая Де́во. Стра́нна мя́ любоче́стия сотвори́, молю́ Тя́, Де́во, и чу́жда любопы́тства о челове́ческих согреше́ниих, де́рзость и изли́шнее на ми́лость Сы́на Твоего́ упова́ние отдали́ от мене́, да досто́йны Сы́ну Твоему́ плоды́ принесу́, еди́на Пречи́стая. Нача́ло и ху́дость моего́ естества́ познава́я, молю́ Тя́, Де́во, да́ждь ми́ презре́ние самолю́бия, бе́гство челове́ческия хвалы́, позна́ние со́бственнаго греха́ и со́бственныя не́мощи, Еди́на Богоблаже́нная. Кра́ткий все́х веще́й и всего́ ми́ра сме́ртнаго коне́ц и муче́ние бу́дущее за суету́ дея́ний тщесла́вных помышля́ти сподо́би мя́, Де́во, да, благода́тию Сы́на Твоего́ к пути́ и́стиннаго покая́ния наста́влен, ве́чнаго избе́гну прокля́тия, Пренепоро́чная. Седа́лен, гла́с 4: Сто́лп Тво́й о́гненный еди́ну печа́ть благода́ти Твоея́ сильне́йшую мни́м, Всенепоро́чная, се́ю бо в соблюде́ние за́поведей Сы́на Твоего́ и Бо́га печа́таеши ве́рных сердца́ прекре́пко, да не вра́г, ху́лящий и́мя Твое́, преодоле́в ле́стию, порабо́тит ны́, рабы́ Твоя́, в поги́бель кроме́шнюю. Но поспе́шеством бла́гости Твоея́, с Твои́м зна́мением, пока́жемся имени́ты насле́дницы Ца́рствия Нетле́ннаго, Пречи́стая Де́во. Возбра́нное на́м и ди́вное избавле́ние дарова́ся, о́браз Тво́й честны́й, Преблагослове́нная Госпоже́ Де́во Богоро́дице, к нему́же мы́ взира́юще, си́це к Тебе́ зове́м: ра́дуйся, святи́телем благоле́пие; ра́дуйся, прибе́жище на́ше, и упова́ние, и спасе́ние; ра́дуйся, красото́ и сла́во оби́тели То́лгския и всея́ Росси́и прибе́жище и защище́ние; ра́дуйся, Неве́сто Неневе́стная. Пе́снь 4 Ирмо́с: Услы́шах, Го́споди, смотре́ния Твоего́ та́инство, разуме́х дела́ Твоя́ и просла́вих Твое́ Божество́. Жестокосе́рдием отягче́ннаго мя́ облегчи́, немилосе́рдием к тре́бующим окамене́нную утро́бу мою́ умягчи́, бу́рею сребролю́бия объя́таго мя́ утиши́, Богоневе́стная Влады́чице. Во упова́нии тле́нных и вре́менных веще́й не оста́ви мя́ и пла́мень хище́ния непра́веднаго, бе́здною милосе́рдия Твоего́ покры́вши, угаси́ во мне́, Еди́на Присноде́во. Идолослуже́ние в лихоима́нии и безбо́жность в заблужде́нии и́стиннаго благоче́стия и Правосла́вныя ве́ры потреби́ от правосла́вных, Влады́чице, и вконе́ц разори́ от единове́рных, да единоду́шно восхва́лим Тя́, Еди́на Присноде́во. У́м мо́й, молю́ Тя́, благоустро́й к позна́нию Еди́наго Су́щаго Бо́га, к разсмотре́нию ве́чных бла́г, и щедролю́бие да́руй ми́, я́коже Тави́фе, и благода́тию Христо́вою украси́ мя́, я́коже Корни́лия со́тника, Еди́на Присноде́во. Пе́снь 5 Ирмо́с: Просвети́ на́с повеле́нии Твои́ми, Го́споди, и мы́шцею Твое́ю высо́кою Тво́й ми́р пода́ждь на́м, Человеколю́бче. О́гнь нечистоты́ и вся́кия скве́рны во мне́ разжиза́тельный мо́рем бла́гости Твоея́ потопи́, и мглу́ грехо́вную разжени́, и се́рдце мое́ ра́дости испо́лни, Всенепоро́чная. Срамосло́вию безобра́зному не да́ждь во мне́ ме́ста, Влады́чице, селе́ние собла́знов разори́, хра́м мя́ чистоты́ и вся́каго благоче́стия соде́лай, да чи́стыми усты́ велича́ю Тя́ вы́ну, Всенепоро́чная. Сме́рть, су́д, гее́нну, Ца́рствие Небе́сное в па́мяти мое́й углуби́, Влады́чице, да, поне́ после́дняя сия́ в па́мяти содержа́, нало́ги лю́тых беззако́ний оста́влю и по сме́рти мое́й получу́ Тобо́ю Ца́рство Небе́сное, ны́не же велича́ю Тя́ при́сно, Еди́но души́ моея́ упова́ние. Любо́вь сея́ жи́зни преизли́шнюю, и вре́меннаго плотска́го поко́я раче́ние отложи́ от мене́, молю́ Тя́, Чи́стая, да, су́етнаго помышле́ния избе́г, Тобо́ю получу́ нетле́нное на Небеси́ бога́тство, Еди́но души́ моея́ упова́ние. Пе́снь 6 Ирмо́с: Моли́тву пролию́ ко Го́споду и Тому́ возвещу́ печа́ли моя́, я́ко зо́л душа́ моя́ испо́лнися и живо́т мо́й а́ду прибли́жися, и молю́ся, я́ко Ио́на: от тли́, Бо́же, возведи́ мя́. Ра́дости, к преогорче́нию бли́жняго низвлеку́щия, чу́жда мя́ соде́лай, Пречу́дная Цари́це, о нестрое́ниих и́скренняго без печа́ли бы́ти не допуща́й мене́, Человеколюби́вая Влады́чице, и враго́в злоде́йствия изба́ви мя́, приле́жно молю́ Тя́, Всенепоро́чная. За́висти в по́мысле мое́м не да́ждь вкореня́тися, ро́ждшаяся от ко́рене свя́та, Де́во, и братоненавиде́ния изба́ви мя́, Чи́стая, да не за́вистию диа́волею, прине́сшею сме́рть в ми́р, помраче́н бы́в, лишу́ся Бо́жия благода́ти и жи́зни ве́чныя, Всенепоро́чная. Равноду́шие в беда́х положи́ во мне́, Всечи́стая, с ра́дующимися в благополу́чии духо́вную ра́дость, к се́тующим в злоключе́нии сожале́ние да́руй ми́, Пресвята́я, и братолю́бие по тому́жде естеству́ и по приобще́нию тоя́жде благода́ти Христо́вы низпосли́ ми́ свы́ше, любве́ пучи́ну ро́ждшая Де́во. Жела́ние кра́йнее согре́й во мне́ вся́кому по естеству́ и по и́мени Христо́ву от души́ благотвори́ти, Блага́я, да не ка́ко зло́б лю́тых душа́ моя́ испо́лнится, и живо́т мо́й а́ду прибли́жится, и пре́дан бу́ду без ми́лости, я́ко не сотвори́вый ми́лости, во тьму́ кроме́шнюю, Всенепоро́чная. Конда́к, гла́с 8: Стра́нное и богоприя́тное светоно́снаго зра́ка Твоего́ явле́ние, Пречи́стая Де́во, с ве́рою взира́ющим быва́ет изве́стное ча́яние спасе́ния, столпо́м бо о́гненным явля́ющи предста́тельство, неусы́пное и те́плое за ны́ к Бо́гу возсыла́еши моле́ние, и́мже от вся́ких бе́д изба́ви, мо́лимся, да ра́достными усты́ вопие́м Ти́ вси́: ра́дуйся, Хода́таице ве́чнаго блаже́нства. И́кос: Лучеза́рная Твоего́ явле́ния на То́лге све́тлость ди́вно блиста́нием свои́м все́х осиява́ет, Бо́жиею бо в Тебе́ су́щею благода́тию ближа́йшая Бо́гу бы́вши, все́м позна́вшим Тя́ и́стинную Богоро́дицу земноро́дным подае́ши незави́стную исцеле́ния ра́дость, е́юже вся́ земля́ Росси́йская преизоби́льно обогати́вшися ны́не, весели́тся непреста́нно и вопие́т Тебе́ с единове́рными: ра́дуйся, Предводи́тельнице ве́чнаго блаже́нства. Пе́снь 7 Ирмо́с: От Иуде́и доше́дше, о́троцы, в Вавило́не иногда́, ве́рою Тро́ическою пла́мень пе́щный попра́ша, пою́ще: отце́в Бо́же, благослове́н еси́. Весе́лие мирско́е пресецы́ и душетле́нное пристра́стие умертви́ во мне́, Де́во, презре́ние вре́менных, жела́ние ве́чных бла́г и нетле́нную ра́дость пода́ждь ми́ с пою́щими: отце́в Бо́же, благослове́н еси́. Безчи́нное утеше́ние и изли́шество, у́м вредя́щее, душе́ скве́рну ражда́ющее, отлучи́ от мене́, Де́во, и сподо́би, те́лу здра́вие ну́ждное подава́ющи, житию́ же утеше́ние дово́льное, предвкуше́нием ве́чных бла́г наслажда́тися ку́пно с пою́щими: отце́в Бо́же, благослове́н еси́. Грехо́м, сме́рть лю́тую ражда́ющим, оскверни́х и окаля́х ду́шу мою́, но Ты́, Пречи́стая Влады́чице, очи́сти мя́ от сего́, и наста́ви на богоуго́дное житие́, украси́ же воздержа́нием и благогове́нием, и да́ждь ми́ чи́стым се́рдцем пе́ти: отце́в Бо́же, благослове́н еси́. Обнови́ мя́, омраче́ннаго самолю́бием, просвети́ све́том зра́ка Твоего́ Влады́чице, и, по́хоти плотски́я укроти́вши во мне́, сподо́би мя́ Ро́ждшемуся от Тебе́ непреста́нно чи́стыми усты́ пе́ти: отце́в Бо́же, благослове́н еси́. Пе́снь 8 Ирмо́с: Царя́ Небе́снаго, Его́же пою́т во́и А́нгельстии, хвали́те и превозноси́те во вся́ ве́ки. Возмуще́ние души́ моея́ утоли́, Всенепоро́чная, от клеветы́ наве́тующих изба́ви мя́, вражду́ грехо́вную во мне́ укроти́ и не́нависть с памятозло́бием отврати́ от мене́, Де́во, да прославля́ю Тя́, Чи́стая, во ве́ки. О́гнь я́рости, во мне́ зело́ разжже́нный, росо́ю благода́ти Твоея́ угаси́, хулу́, умножа́ющую души́ моея́ озлобле́ние, и вся́кий ви́д зло́бы, гнездя́щийся в се́рдце мое́м, искорени́, Де́во, да прославля́ю Тя́, Чи́стая, во ве́ки. О́браз благода́ти Бо́жия напиши́, Всечи́стая, в души́ мое́й и печа́тию ми́лости Твоея́ укрепи́ и утверди́ мя́, да, все́х зло́б изба́влен, ми́рными усты́ прославля́ю Тя́, Чи́стая, во ве́ки. Кро́тости и незло́бия Твоего́ не отыми́ от мене́, Пренепоро́чная Де́во, терпе́ние ми́ да́руй тве́рдое во искуше́нии, да, ра́дуяся, прославля́ю Тя́, Чи́стая, во ве́ки. Пе́снь 9 Ирмо́с: Вои́стинну Богоро́дицу, Тя́ испове́дуем, спасе́ннии Тобо́ю, Де́во Чи́стая, с безпло́тными ли́ки Тя́ велича́юще. Ско́рби се́рдца моего́ отложи́, уны́ние, презира́ющее благода́ть, отыми́ от мене́ и ле́ность ко взыска́нию доброде́тели потреби́ огне́м благода́ти Твоея́, Чи́стая. Малоду́шием уныва́ющаго мя́ оживи́, отча́янием па́дшаго возста́ви, лише́нием и нераде́нием до́брых ме́ртваго воскреси́, Де́во, Жи́знь безсме́ртную ро́ждшая. Усе́рдие во мне́ к Бо́жией во́ли сози́жди благода́тию Сы́на Твоего́, ре́вность ко сла́ве Бо́жией воспламени́ в се́рдце мое́м, благогове́ние ко святы́ни Бо́жией устро́й и постоя́нство в благодея́нии да́руй ми́, Де́во, Предводи́тельнице моего́ спасе́ния. Любо́вь Небе́сныя сла́дости в не́дра души́ моея́ всади́, попече́ние ве́чных бла́г свы́ше посли́ ми́, умиле́ние к покая́нию и сокруше́ние к исправле́нию да́ждь ми́, Де́во, лучеза́рным сия́нием чуде́сне я́вльшаяся. Свети́лен, гла́с 6: Досто́йное дне́сь Ма́тери, Творца́ все́х ро́ждшей, почте́ние воздади́м, ве́рнии, Сия́ бо явле́нием Свои́м две́рь ра́йскую отверза́ет, и на́с от скве́рны очища́ет, и на враги́ стране́ на́шей подае́т одоле́ние.

Минея, 16 Мая, Кано́н, его́же краегране́сие: Пою́ Бо́гу тя да́ра свяще́нна Глас 2 Песнь 1 Ирмос: Во глубине́ постла́ иногда́/ фараони́тское всево́инство преоруже́нная си́ла,/ вопло́щшееся же Сло́во всезло́бный грех потреби́ло есть,/ препросла́вленный Госпо́дь, сла́вно бо просла́вися. Припев: Преподо́бне о́тче Фео́доре, моли́ Бо́га о на́с. Песнопе́нии хотя́щему твое́ пе́ти ны́не торжество́,/ Боже́ственных даро́в я́ко сый тезоимени́т,/ дар пода́ждь ми светоно́сен,/ от сокро́вищ почерпа́я неиздае́мых благода́ть Боже́ственную, всеприснопа́мятне. Сла́ва Отцу́ и Сы́ну и Свято́му Ду́ху. Поуча́яся зако́ну приле́жно, о́тче, чи́стому,/ весь чист и пречи́ст был еси́,/ Всечи́стому же Сло́ву совокупля́яся,/ чистоты́ све́тел сосу́д показа́лся еси́ и освяще́н, всеблаже́нне. И ны́не и при́сно и во ве́ки веко́в. Ами́нь. Богородичен: Умертви́в себе́ ми́ру,/ жизнь, о́тче, равноа́нгельну на земли́ благоче́стно проходя́,/ Возсия́вшему от ложе́сн деви́ческих после́довал еси́,/ крест твой на ра́мо взем, Богому́дре преблаже́нне. Песнь 3 Ирмос: Процвела́ есть пусты́ня, я́ко крин, Го́споди,/ язы́ческая неплодя́щая, Це́рковь/ прише́ствием, Твои́м,/ в не́йже утверди́ся мое́ се́рдце. Припев: Преподо́бне о́тче Фео́доре, моли́ Бо́га о на́с. Я́ко дар люби́м, Влады́це, преподо́бне,/ твою́ ду́шу, Фео́доре, спаса́ему/ и воздержа́нием от страсте́й измене́нну прине́сл еси́. Сла́ва Отцу́ и Сы́ну и Свято́му Ду́ху. Бо́гу освяще́н, превозше́л еси́, всему́дре, зри́мых чу́вство,/ чи́стым же умо́м бесе́довал еси́ уму́ превы́спреннему, преблаже́нне. И ны́не и при́сно и во ве́ки веко́в. Ами́нь. Богородичен: Удали́лся еси́ в пусты́ни, бе́гая, сла́вне,/ и́же от Де́вы просия́вшаго Бо́га Сло́ва ты прии́м,/ о Не́мже и спа́слся еси́, досточу́дне. Седален, глас 3 Боже́ственною си́лою оде́ян,/ обнажи́л еси́ полки́ супроти́вных сил, Богоно́се,/ и, доброде́телей просия́в све́тлостию,/ исцеле́ний зарю́ облиста́л еси́, о́тче преподо́бне:/ Христа́ Бо́га моли́ дарова́ти нам ве́лию ми́лость. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Боже́ственная ски́ния была́ еси́ Сло́ва,/ еди́на Пречи́стая Ма́ти Де́во, чистото́ю А́нгелы превозше́дшая,/ па́че всех мене́, персть бы́вша, оскверне́на плотски́ми прегреше́ньми,/ очи́сти моли́тв Твои́х Боже́ственными вода́ми,/ подаю́щи, Чи́стая, ве́лию ми́лость. Песнь 4 Ирмос: Прише́л еси́ от Де́вы, не хода́тай, ни А́нгел,/ но Сам, Го́споди, вопло́щся,/ и спасл еси́ всего́ мя, челове́ка./ Тем зову́ Ти: сла́ва си́ле Твое́й, Го́споди. Припев: Преподо́бне о́тче Фео́доре, моли́ Бо́га о на́с. Купносе́льник Пахо́мию Боже́ственному быв,/ нра́вы подража́л еси́, о́тче Богому́дре Фео́доре,/ того́ воздержа́нию и правосла́вней ве́ре подо́бяся. Припев: Преподо́бне о́тче Фео́доре, моли́ Бо́га о на́с. Пева́емаго Ца́рства и Боже́ственнаго сия́ния, досто́йно получи́л еси́,/ я́ко быв худо́г, о́тче, чистото́ю, к прича́стию неизрече́нныя красоты́. Сла́ва Отцу́ и Сы́ну и Свято́му Ду́ху. Се́ла ефио́пская, де́монская со́нмища твоего́ ужасо́шася терпе́ния, и смире́ния,/ и непреста́ннаго во бде́ниих твоего́ стоя́ния, досточу́дне. И ны́не и при́сно и во ве́ки веко́в. Ами́нь. Богородичен: Во изступле́нии главы́ си́льных ссеко́шася/ стра́хом рождества́ Твоего́, Богороди́тельнице Всенепоро́чная,/ собо́р же преподо́бных удиви́ся досто́йно Боже́ственною благода́тию. Песнь 5 Ирмос: Ходата́й Бо́гу и челове́ком был еси́, Христе́ Бо́же:/ Тобо́ю бо, Влады́ко, к Светонача́льнику, Отцу́ Твоему́,/ от но́щи неве́дения/ приведе́ние и́мамы. Припев: Преподо́бне о́тче Фео́доре, моли́ Бо́га о на́с. Уче́ния те́пле честна́я име́в,/ разори́л еси́ всех ересе́й преле́стная прия́тия, му́дре,/ Тро́йческою ве́рою огражда́я ста́до твое́. Сла́ва Отцу́ и Сы́ну и Свято́му Ду́ху. Я́ко свет вои́стинну на земли́ был еси́, Фео́доре,/ житие́ непоро́чно пожи́в, всеприснопа́мятне,/ по́стников украше́ние, мона́шествующих похвала́. И ны́не и при́сно и во ве́ки веко́в. Ами́нь. Богородичен: Тече́нием по́стнических слез напая́я се́рдце твое́,/ плодоно́сно показа́л еси́ возсия́вшему Влады́це Христу́ от Де́вы Святы́я,/ Фео́доре пребога́те. Песнь 6 Ирмос: В бе́здне грехо́вней валя́яся,/ неизсле́дную милосе́рдия Твоего́ призыва́ю бе́здну:/ от тли, Бо́же, мя возведи́. Припев: Преподо́бне о́тче Фео́доре, моли́ Бо́га о на́с. Све́тлое и Богоуго́дное житие́ твое́/ тебе́ Небе́сную, о́тче, све́тлость святы́х показа́,/ в се́лех небе́сных, Фео́доре. Сла́ва Отцу́ и Сы́ну и Свято́му Ду́ху. Победи́тель, одолева́я, Фео́доре, лука́вствия духо́в, был еси́,/ Уте́шителя Ду́ха помо́щника стяжа́в, Богоприя́тне. И ны́не и при́сно и во ве́ки веко́в. Ами́нь. Богородичен: О́блак ле́гкий еси́, Чи́стая,/ на не́мже седя́, прии́де во Еги́пет Вседержи́тель Госпо́дь/ и свети́льники преподо́бныя соде́ла. Кондак, глас 2 В дому́ Бо́жии, я́ко фи́никс, процве́л еси́,/ плоды́ же доброде́телей Го́сподеви прине́сл поще́нием изря́дным,/ о́тче преподо́бне,/ те́мже и убла́жаешися,/ я́ко Безпло́тных равностоя́телен. Песнь 7 Ирмос: Богопроти́вное веле́ние/ беззако́ннующаго мучи́теля/ высо́к пла́мень вознесло́ есть,/ Христо́с же простре́ Богочести́вым отроко́м ро́су духо́вную,/ Сын благослове́н и препросла́влен. Припев: Преподо́бне о́тче Фео́доре, моли́ Бо́га о на́с. Разу́мно возжела́л еси́, я́коже Богови́дец,/ Боже́ственную све́тлость ви́дети, Фео́доре,/ те́мже ви́димая вся оста́вил еси́,/ во мрак же вшед, зре́ти сподо́бился еси́ Непостижи́маго. Сла́ва Отцу́ и Сы́ну и Свято́му Ду́ху. Я́да ты змии́на душетле́ннаго, преблаже́нне Фео́доре, ника́коже прии́м,/ сего́ па́мять, о́тче, погуби́л еси́,/ па́мять непреста́нно Бо́жию в се́рдцы, блаже́нне, стяжа́в. И ны́не и при́сно и во ве́ки веко́в. Ами́нь. Богородичен: Святы́х Свята́го, во святы́х почива́ющаго,/ свя́то породила́ еси́, Де́во Всенепоро́чная,/ за милосе́рдие мно́гое Челове́ка бы́вша, из Тебе́ воплоще́нна,/ пре́жде Безпло́тнаго. Песнь 8 Ирмос: Пещь иногда́ о́гненная в Вавило́не де́йства разделя́ше,/ Бо́жиим веле́нием халде́и опаля́ющая,/ ве́рныя же ороша́ющая, пою́щия:/ благослови́те вся дела́ Госпо́дня, Го́спода. Припев: Преподо́бне о́тче Фео́доре, моли́ Бо́га о на́с. Ты светови́ден, Све́ту пресве́тлому бесе́довав, яви́лся еси́, преблаже́нне Фео́доре,/ едине́нием же лу́чшим па́че естества́ обожа́емь, зовы́й ны́не:/ благослови́те вся дела́ Госпо́дня, Го́спода. Сла́ва Отцу́ и Сы́ну и Свято́му Ду́ху. Му́ченик быв тверд ко греху́, да́же до кро́ве проти́влься, Богому́дре Фео́доре,/ венце́м страда́ния твою́ главу́ украси́л еси́, зовы́й ны́не:/ благослови́те вся дела́ Госпо́дня, Го́спода. И ны́не и при́сно и во ве́ки веко́в. Ами́нь. Богородичен: Яви́ся нам из Тебе́, Богороди́тельнице, пра́вды све́тлое Со́лнце,/ просвеща́я вся́ческая заре́ю Божества́,/ вопло́щся Вы́шний, Его́же ны́не воспева́ем:/ благослови́те, вся дела́ Госпо́дня, Го́спода. Песнь 9 Ирмос: Безнача́льна Роди́теля Сын, Бог и Госпо́дь,/ вопло́щся от Де́вы, нам яви́ся,/ омраче́нная просвети́ти, собра́ти расточе́нная./ Тем Всепе́тую Богоро́дицу велича́ем. Припев: Преподо́бне о́тче Фео́доре, моли́ Бо́га о на́с. Ны́не не в гада́ниих тебе́ Христо́с ви́дим есть,/ к лицу́ же па́че ви́дится лице́м, и́стинным явле́нием,/ и́же сено́вным разре́шшимся зерца́лом,/ даро́в тезоимени́те, Спа́са и Бо́га на́шего. Сла́ва Отцу́ и Сы́ну и Свято́му Ду́ху. Жела́ние Боже́ственное твое́ испо́лнися, Фео́доре,/ я́ко дости́г кончи́ну, е́же поще́нием издале́ча зря́ше со умиле́нием,/ его́же и получи́в, жела́ния уста́вил еси́,/ по́стников похвало́, мона́шествующих благоле́пие. И ны́не и при́сно и во ве́ки веко́в. Ами́нь. Богородичен: Неду́говав растле́тися преслуша́нием, пе́рвый Ада́м Тобо́ю, Богома́ти, обнови́ся:/ Ты бо, воплоще́нна Сло́ва ро́ждши без истле́ния неизрече́нно,/ тлю искорени́вши, нетле́ние процвела́ еси́.

Минея, 22 Июля, Канон Глас 6 Песнь 1 Ирмос: Се́ченое сече́тся мо́ре Чермно́е, волнопита́емая же изсуша́ется глубина́, та́яжде ку́пно безору́жным бы́вши проходи́ма и всеору́жным гро́б. Пе́снь же богокра́сная воспева́шеся: сла́вно просла́вися Христо́с Бо́г на́ш. Припев: Святи́и новому́ченицы и испове́дницы, моли́те Бо́га о на́с. Го́споди, Бо́же на́ш, при́сно прославля́яй вся́ святы́я, ны́не и на́с, недосто́йных, сподо́би сыно́вне просла́вити святы́х сро́дников на́ших, новому́чеников и испове́дников Росси́йских. Припев: Святи́и новому́ченицы и испове́дницы, моли́те Бо́га о на́с. Кровьми́ ва́шими, священному́ченицы, я́ко в Чермне́м мо́ри, потопи́ли есте́ безбо́жныя мучи́тели, Це́рковь же Ру́сская, ва́ми крася́щися, похвалы́ побе́дныя, я́ко земля́ обетова́нная ме́д и млеко́, ва́м источа́ет. Сла́ва Отцу́ и Сы́ну и Свято́му Ду́ху. Егда́ даде́ся ва́м благода́ть не то́чию во Христа́ ве́ровати, но и по Не́м страда́ти, немо́кренно пучи́ну кро́вных му́к проидо́сте, святи́и му́ченицы, ве́рным сыново́м росси́йским о́браз я́вльше, и со дерзнове́нным испове́данием во врата́ Небе́сная внидо́сте. И ны́не и при́сно и во ве́ки веко́в. Ами́нь. Богородичен: Приими́ пе́снь хвале́бную, от недосто́йных у́ст возноси́мую, препросла́вленная Ма́ти Бо́жия. Песнь 3 Ирмос: Госпо́дь Сы́й все́х и Зижди́тель Бо́г, созда́нное, Безстра́стный, обнища́в, Себе́ соедини́, и Па́сха, за я́же хотя́ше умре́ти, Са́м, Сы́й, Себе́ предпожре́: яди́те, вопия́, Те́ло Мое́ и ве́рою утверди́теся. Припев: Святи́и новому́ченицы и испове́дницы, моли́те Бо́га о на́с. Егда́ бу́ря нече́стия на Це́рковь Ру́сскую воздви́жеся, вы́, святи́и новому́ченицы, страда́ньми ва́шими со тща́нием укроти́сте ю́ и по́двиги ва́шими Правосла́вие утверди́сте. Припев: Святи́и новому́ченицы и испове́дницы, моли́те Бо́га о на́с. Му́ки ве́лия за Це́рковь Христо́ву претерпе́сте, святи́и новому́ченицы, моли́те утверди́тися е́й незы́блемей и непоколеби́мей до сконча́ния ве́ка. Сла́ва Отцу́ и Сы́ну и Свято́му Ду́ху. Страда́ньми и испове́данием Христа́, святи́и сро́дницы на́ши, вше́дше в Небе́сная селе́ния, я́ко дре́вле Изра́иль в зе́млю обетова́нную, оте́чество ва́ше земно́е, Ру́сь Святу́ю, в любви́ сохраня́йте моли́твами ва́шими. И ны́не и при́сно и во ве́ки веко́в. Ами́нь. Богородичен: Небе́сных круго́в вы́шшая и сла́вою Боже́ственною преукраше́нная, Де́во Ма́ти Бо́жия, спаси́ ду́ши на́ша. Седален, глас 2 Но́вии страстоте́рпцы Росси́йстии, му́ченически по́прище земно́е сконча́вшии и страда́ньми дерзнове́ние ко Го́споду приобре́тшии, моли́теся Ему́, ва́с укре́пльшему, да и мы́, егда́ на́йдет на ны́ испыта́ния ча́с, му́жества да́р Бо́жий восприи́мем. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Не премолчи́м при́сно, Богоро́дице Де́во, благода́рственно воспева́ти от се́рдца Твоя́ ми́лости, Влады́чице, раби́ Твои́, вопию́ще и глаго́люще: Пресвята́я Де́во, предвари́, и изба́ви на́с от вра́г ви́димых и неви́димых, и от ну́жды и вся́каго преще́ния, Ты́ бо еси́ на́ше заступле́ние. Песнь 4 Ирмос: Прови́дев проро́к та́йну Твою́ неизрече́нную, Христе́, провозгласи́: положи́л еси́ тве́рдую любо́вь кре́пости, О́тче Ще́дрый, Единоро́днаго бо Сы́на, Благи́й, очище́ние в ми́р посла́л еси́. Припев: Святи́и новому́ченицы и испове́дницы, моли́те Бо́га о на́с. Все́м конце́м земли́ яви́ся чу́до смотре́ния Твоего́, Влады́ко, кро́вию бо новому́ченик, я́ко водо́ю, угаси́л еси́ в Росси́йстей земли́ пла́мень нече́стия и развраще́ния и спа́сл еси́ лю́ди Твоя́. Припев: Святи́и новому́ченицы и испове́дницы, моли́те Бо́га о на́с. Сла́ву Бо́жию унасле́довасте, новому́ченицы, просия́вшии в земли́ на́шей, отве́ргшеся бо себе́ и стра́х сме́ртный препобеди́вше, любо́вь к Бо́гу да́же до сме́рти му́жественне сохрани́ли есте́. Сла́ва Отцу́ и Сы́ну и Свято́му Ду́ху. По́двигом до́брым подвиза́вшиися, святи́и новому́ченицы Росси́йстии, к покая́нию и доброде́тельному житию́ подви́гните на́с, да и мы́ ва́шими моли́твами сподо́бимся прославля́ти Го́спода во Ца́рствии Его́. И ны́не и при́сно и во ве́ки веко́в. Ами́нь. Богородичен: На Тво́й наде́ющеся покро́в, Ма́ти Бо́жия, со святы́ми новому́ченики и испове́дники Росси́йскими прославля́ем милосе́рдие Твое́. Песнь 5 Ирмос: Сою́зом любве́ связу́еми, апо́столи, влады́чествующему все́ми себе́ Христу́ возло́жше, кра́сны но́ги очища́ху, благовеству́юще все́м ми́р. Припев: Святи́и новому́ченицы и испове́дницы, моли́те Бо́га о на́с. Дерзнове́нно, святи́и, испове́дали есте́ Го́спода пред отсту́пники и гони́тели: с на́ми Бо́г, взыва́юще, разуме́йте и покаря́йтеся, стра́ха ва́шего не убои́мся, ниже́ смути́мся, я́ко с на́ми Бо́г. Припев: Святи́и новому́ченицы и испове́дницы, моли́те Бо́га о на́с. Уврачу́йте моли́твами ва́шими, святи́и новому́ченицы Росси́йстии, лю́ди богобо́рныя, враждо́ю и уби́йствы ды́шущия, и ми́р стране́ на́шей и ве́рным лю́дем да́руйте. Сла́ва Отцу́ и Сы́ну и Свято́му Ду́ху. Предстоя́ще Христу́, вла́сть иму́щу суди́ти всему́ ми́ру, святи́и новому́ченицы и испове́дницы Росси́йстии, очи́стите на́с от грехо́в на́ших моли́твами ва́шими, да не с ми́ром осужде́ни бу́дем. И ны́не и при́сно и во ве́ки веко́в. Ами́нь. Богородичен: Водворя́ет ны́ зми́й во юдо́ль пла́ча и ча́яния злы́х, не мо́жем терпе́ти ско́рби своея́, взыва́ху новому́ченицы, Ты́ же, Богороди́тельнице, просте́рла еси́ и́м покро́в Сво́й и спасла́ еси́ от сете́й вра́жиих. Песнь 6 Ирмос: Бе́здна после́дняя грехо́в обы́де мя́, и, волне́ния не ктому́ терпя́, я́ко Ио́на, Влады́це, вопию́ Ти́: от тли́ мя́ возведи́. Припев: Святи́и новому́ченицы и испове́дницы, моли́те Бо́га о на́с. Во́лны безбо́жнаго нече́стия тща́хуся потопи́ти кора́бль Це́ркве Ру́сския, Ты́ же, И́стинный Ко́рмчий, спа́сл еси́ ше́ствующия на не́м моли́твами страстоте́рпцев Росси́йских, вопию́щих: Го́споди Си́л, из смертоно́сныя глубины́ возведи́ ны́. Припев: Святи́и новому́ченицы и испове́дницы, моли́те Бо́га о на́с. Безбо́жнии Ка́иновы вну́цы святы́ни церко́вныя поруга́нию и огню́ преда́ша, оби́тели разори́ша, хра́мы я́ко ово́щная храни́лища соде́яша, христолюби́выя лю́ди в темни́цы заключи́ша и уму́чиша. Вы́ же, страстоте́рпцы, с любо́вию учи́ли есте́: сие́ бы́сть по грехо́м на́шим, лю́дие, пока́йтеся. Сла́ва Отцу́ и Сы́ну и Свято́му Ду́ху. Увы́ на́м, увы́, вопия́ху испове́дницы Росси́йстии, ви́дяще, я́ко безу́мнии богобо́рцы святы́ни земли́ на́шея разори́ша, оби́тели я́ко узи́лища темни́чная соде́яша, хра́мы Бо́жии в скве́рная и позо́рищная места́ обрати́ша и кро́вь христиа́нскую в ни́х пролия́ша. Сего́ ра́ди опустоши́шася сердца́ нечести́вых и живо́т и́х а́ду прибли́жися. И ны́не и при́сно и во ве́ки веко́в. Ами́нь. Богородичен: Изведи́ на́с из ро́ва поги́бели и уврачу́й на́ша грехо́вныя я́звы, Пресвята́я Ма́ти Де́во, да неосужде́нно сподо́бимся при́сно прославля́ти новому́ченики Сы́на Твоего́ и Бо́га на́шего. Кондак, глас 3 Дне́сь новому́ченицы Росси́йстии в ри́зах бе́лых предстоя́т А́гнцу Бо́жию и со А́нгелы пе́снь побе́дную воспева́ют Бо́гу: благослове́ние, и сла́ва, и прему́дрость, и хвала́, и че́сть, и си́ла, и кре́пость на́шему Бо́гу во ве́ки веко́в. Ами́нь. Икос Кра́сный ли́че, светоза́рнии и боже́ственнии свети́льницы, Све́ту вели́кому предстоя́ще при́сно, богоблаже́ннии му́ченицы, и отту́ду испуща́емыми невече́рняго Божества́ сия́нии, всегда́ просвеща́еми и обожа́еми, ве́рою па́мять ва́шу соверша́ющия боже́ственную просвети́те, и омраче́ния и страсте́й и бе́д и зло́бы изба́вите, моля́щеся непреста́нно о все́х на́с. Песнь 7 Ирмос: О́троцы в Вавило́не пе́щнаго пла́мене не убоя́шася, но, посреде́ пла́мене вве́ржени, ороша́еми поя́ху: благослове́н еси́, Го́споди, Бо́же оте́ц на́ших. Припев: Святи́и новому́ченицы и испове́дницы, моли́те Бо́га о на́с. О́троцы в Вавило́не дре́вле, я́ко основа́ние, новому́ченицы же Росси́йстии ны́не, я́ко увенча́ние, с ли́ки страстоте́рпец при́сно взыва́ют: благослове́н еси́, Го́споди, Бо́же оте́ц на́ших. Припев: Святи́и новому́ченицы и испове́дницы, моли́те Бо́га о на́с. О́троцы в Вавило́не пе́щнаго пла́мене не убоя́шася, новому́ченицы же Росси́йстии, те́м подража́юще, гоне́ния безбо́жных в ничто́же вмени́ша, те́мже ны́не согла́сно с ни́ми воспева́ют: благослове́н еси́, Го́споди, Бо́же оте́ц на́ших. Сла́ва Отцу́ и Сы́ну и Свято́му Ду́ху. Дне́сь торжеству́ет Це́рковь Ру́сская, святи́и бо новому́ченицы, сро́дницы на́ши, к ликостоя́нием святы́х, от ве́ка Бо́гу благоугоди́вших, присовокупи́вшеся, согла́сно с ни́ми воспева́ют хвале́бную пе́снь: благослове́н еси́, Бо́же оте́ц на́ших. И ны́не и при́сно и во ве́ки веко́в. Ами́нь. Богородичен: Предстоя́щи Ти́ Кресту́ Сы́на Твоего́, Богома́ти, ору́жие про́йде ду́шу Твою́, те́мже и попече́ние сугу́бое о возлюби́вших Его́ прия́ла еси́, и́же Тя́ сыно́вне велича́ют: благослове́нна Ты́ в жена́х еси́, Всенепоро́чная Влады́чице. Песнь 8 Ирмос: За зако́ны оте́ческия блаже́ннии в Вавило́не ю́ноши, предбе́дствующе, царю́ющаго оплева́ша повеле́ние безу́мное и, совоку́плени, и́мже не свари́шася огне́м, Держа́вствующему досто́йную воспева́ху пе́снь: Го́спода по́йте, дела́, и превозноси́те во вся́ ве́ки. Припев: Святи́и новому́ченицы и испове́дницы, моли́те Бо́га о на́с. Зако́ны Христо́вы возлюби́ша новому́ченицы и испове́дницы Росси́йстии, безбо́жная же повеле́ния отри́нуша и, ре́вностию о Бо́зе связу́емии, Бо́гу побе́дную пе́снь воспева́ху: да благослови́т Го́спода Ру́сь Свята́я и превозно́сит Его́ во ве́ки. Припев: Святи́и новому́ченицы и испове́дницы, моли́те Бо́га о на́с. Егда́ земля́ Росси́йская тьмо́ю безбо́жия и Ка́иновым озлобле́нием объя́та бы́сть, тогда́ мно́зи христолюби́вии лю́дие на го́рькия рабо́ты изгна́ни бы́ша и гла́д, мра́з, зно́й и сме́рть лю́тую му́жественне претерпе́ша, ве́рою же, наде́ждею и любо́вию совоку́плени, досто́йную воспева́ху пе́снь: да благослови́т Го́спода Ру́сь Свята́я и превозно́сит Его́ во ве́ки. Сла́ва Отцу́ и Сы́ну и Свято́му Ду́ху. А́нгелов хвалу́ и новому́чеников славосло́вие ми́лостивно прие́мляй, не отри́ни, Триипоста́сный Бо́же, от со́нма и́х и на́с, недосто́йных, но сподо́би вку́пе с ни́ми воспева́ти: да благослови́т Го́спода Ру́сь Свята́я и превозно́сит Его́ во ве́ки. И ны́не и при́сно и во ве́ки веко́в. Ами́нь. Богородичен: Зря́щи поруга́ние свята́го уде́ла Своего́, скорбя́ше Пречи́стая Ма́ти и держа́вную по́мощь ве́рным лю́дем простира́ше, Сы́на же Своего́ усе́рдно моля́ше, взыва́ющи: да благослови́т Го́спода Ру́сь Свята́я и превозно́сит Его́ во ве́ки. Песнь 9 Ирмос: Стра́нствия Влады́чня и безсме́ртныя трапе́зы на Го́рнем ме́сте высо́кими умы́, ве́рнии, прииди́те, наслади́мся, возше́дша Сло́ва, от Сло́ва научи́вшеся, Его́же велича́ем. Припев: Святи́и новому́ченицы и испове́дницы, моли́те Бо́га о на́с. Безсме́ртныя трапе́зы и жи́зни ве́чныя во Ца́рствии Бо́жием наслажда́ются ны́не новому́ченицы и испове́дницы Росси́йстии, испо́лнися бо на ни́х обетова́ние Госпо́дне: побежда́ющим да́м се́сти со Мно́ю на Престо́ле Мое́м. Припев: Святи́и новому́ченицы и испове́дницы, моли́те Бо́га о на́с. Да просла́вятся с ли́ки новому́чеников и испове́дников Росси́йских жены́ богому́дрыя земли́ на́шея, я́же, мироно́сиц восприе́мша чи́н и му́жески Христу́ после́довавша, страда́ния за и́мя Его́ претерпе́ша и ве́рно отце́м, муже́м и бра́тиям на́шим, Христа́ ра́ди му́чимым, послужи́ша. Сего́ ра́ди ны́не в жи́зни ве́чней вку́пе с ни́ми трапе́зы безсме́ртныя наслажда́ются. Сла́ва Отцу́ и Сы́ну и Свято́му Ду́ху. Жизнода́вче Го́споди, моли́твами новому́чеников и испове́дников Росси́йских упоко́й со все́ми пра́ведными ве́рныя рабы́ Твоя́, за и́мя Твое́ пострада́вшия: святи́тели и иере́и, мона́хи и мирски́я, ста́рыя, ю́ныя и вся́к во́зраст, имену́емыя и неимену́емыя, я́ко и́стинныя сы́ны и дру́ги Бо́жия. И ны́не и при́сно и во ве́ки веко́в. Ами́нь. Богородичен: Я́ко взбра́нная Воево́да во́инства новому́чеников и испове́дников Росси́йских, держа́вный покро́в и ми́лостивное заступле́ние яви́ла еси́, Пресвята́я Де́во, земли́ на́шей, опустоша́емей ско́рбными и безбо́жными наведе́нии. Сего́ ра́ди ны́не мо́лим Тя́: прости́ лю́ди согре́шшия и сохрани́ Святу́ю Ру́сь. Светилен Я́ко отре́бие ми́ру бы́ша, святи́и новому́ченицы и испове́дницы Росси́йстии, ка́мением побие́ни бы́ша, претре́ни бы́ша, искуше́ни бы́ша, уби́йством меча́ умро́ша, свиде́тельствующе о Све́те И́стиннем, Иису́се Христе́, Го́споде на́шем.

Глас 8 Песнь 1 Ирмо́с: Песнь возслем, лю́дие,/ Чу́дному Бо́гу нашему,/ свободи́вшему Изра́иля от рабо́ты,/ песнь победну́ю пою́ще и вопию́ще:/ пои́м Тебе́, Единому Владыце. Вси славу дади́м Бо́гу,/ мирови возсиявшему, плотска́го Его ви́дения образом/ и разори́вшему и́дольскаго служения всяку лесть от человек. Тело приим опи́сано Безплотный Бог наш,/ изво́ли я́ко во всех и в написа́нии виден бы́ти,/ тем образ Твой сей Богомужия вообразующе свойством, покланя́емся. Божественным дохнове́нием ум многий вообразова́ти,/ рече́ Христово образование,/ Василий же паки на Первоо́браз честь иконы менова́ти верно взывает. Вся́кое вопие́т Боже́ственное Писа́ние,/ я́ко едино обнови́ свое́ние естеством Христос, вочеловечився,/ вы же вво́дите два, в нечестии Спаса необразопи́сано пи́шуще. Грядите ны́не прочее, еретицы́,/ Божественным поклони́мся священнообра́зным зраком:/ Христову образу с Богоматерию и святых всех, Бо́гу угоди́вшим. Едино Божество в Трех Ли́цех пропове́дается/ Богосло́вящим нам Безначальна Отца, Слово рождшаго,/ от Того и Дух присносущно изходя́щий. Богоро́дичен: Честь до́лжнующе Ти, Чистая,/ я́ко воистину Матерь Тя Божию, явльшуюся Воплоти́вшагося,/ Божественную икону Твою́ любовию вообража́юще,/ покланя́емся ей до́лжно. Песнь 3 Ирмо́с: Несть свят, я́ко Господь,/ и несть пра́веден, я́ко Бог наш,/ Егoже поет вся тварь:/ несть праведен, па́че Тебе́, Го́споди. Видится Пло́тский и Безплотный Бог/ и воображается зраком человеческим, Безчисленный,/ да иже сущая злобою омрачшая, соли́чны покажет Своя. Икон в ви́дении ви́дяще Твое́ присно сошествие, Го́споди,/ поем державу Твою́ и, образ чтуще,/ ум возносим Божественней ве́щи. Христово писа́ется, что льститеся, злольсти́вии,/ не я́ко Бог, но я́ко Человек, сугу́бен показу́ется,/ Егoже икону чтуще,/ Тому возно́сим славу служения нашего. Троице Пресущественная и Пребоже́ственное Единство,/ разделением Единство и паки име́ющи Ли́цы Естеством,/ в еди́но ны сочета́й хотение Твоих заповедей. Богоро́дичен: Храм Тя Богоустроенный прописа́л есть Моисей,/ Серафимом покрываемый святых святая,/ прообража́я Твое́, Дево, Рождество неизрече́нное,/ Христа плотию напи́сана быти. Седален, глас 7. Самогласен: Истинных повелений светлости/ и благолепных икон воображе́нием/ Церковь Твоя украси́вшися,/ страсте́м Твоим похвали́ся, Христе Боже наш,/ и тех ра́ди в едину веру возводи́ми,/ славим непостижимое Твое́ величествие. Песнь 4 Ирмо́с: Из горы́ приосене́нныя, Сло́ве, пророк,/ Единыя Богоро́дицы,/ хотя́ща воплоти́тися, Богови́дно усмотри́/ и со страхом славосло́вяше силу Твою́. Дщи́цу разумную, добро сочета́нну всем,/ иконное писание Твоих чудес почитающе, имеем, Всещедрый,/ я́ко Евангелие Твое́ второ́е. Я́ко воистину Тебе́ тело приимшу плотя́но,/ ви́димое виде́ние вообра́жаем,/ не начерта́ющие, ибо Его в мене́нии не разумевают, Тебе́, воплощшагося Христа. Ты погуби́ идоли ле́стныя/ и Свою нам предложи́ икону,/ да Егoже чтуще,/ Того же видения содержа́ще, не льстимся. Честь первоо́бразным суща иконам укаря́ете,/ чтите сия, о неми́и, прочее познайте, льстивии,/ ка́мо злоче́ствуете, отгоняюще икону Христову. Разумно видно Нераздельно Единство в Единора́слену Троицу простира́юще,/ Единаго Бога над всеми славословим/ и Соста́вы Три проповедаем. Богоро́дичен: Ты во святых еси Пресвятая/ и в достойных еси Предостойна,/ я́ко Бога всех раждаеши/ и но́сиши описа́ема плотию Твое́ю, Чистая. Песнь 5 Ирмо́с: От но́щи неве́дения/ Богове́дением просвети́вый концы,/ просвети мя утром человеколюбия Твоего, Го́споди. Иже и́дольскую лесть плотски́м Своим зра́ком разорив, Христе,/ спаси́ чтущая Твой плотоявле́нный образ верою. Божественную красоту паки Церковь прии́мши, украси́ся,/ о́бразы сияющи пришествия Твоего, Го́споди. Описа́ние Божества везде чу́жде сый безбожным,/ мудрии Сего не написа́хом,/ едино же плотско́е лице Христово. Обруга́нием иконы Христовы врази́ я́ве показа́стеся,/ приимите разшибении печать Царствия Его. Троическое Едино безчи́слено сильное Естество славяще,/ Едино Пресоверше́нное от Три Совершен воспои́м. Богоро́дичен: Всею честию Боголепно Тя чтуще, Чистая,/ и того чтим Твоего плотови́дения образа Твоего. Песнь 6 Ирмо́с: Я́коже проро́ка избавил еси/ из глубины́ преиспо́дния, Христе Боже,/ и мене́ от грехов моих изба́ви я́ко Человеколюбец/ и упра́ви живо́т мой, молюся. Да радуется тварь, своего Зиждителя и Бога видящи то́ю созидающася,/ непретваря́ема же и написа́ема плотию, а не Божеством. Пришед к челове́ком,/ восхотел еси образ человечь прияти,/ то написа́юще, Спа́се,/ целу́ем на воспоминание смотре́ния Твоего. Свята́го образа плотскаго Твоего видения зряще, Христе,/ на ра́зумы возносимся Божественнаго Твоего Естества,/ оставльше до́лу плотский смысл. Соста́вы Трое, аще и Естеством Едино Божество есть,/ во Иже крестимся, Имже служим,/ Отец, Слово и Дух Сово́зрастен. Богоро́дичен: Царский образ писанием вообража́юще Твой, Владыко,/ всех Царя Тя Матерь славим/ и, чтуще Того, Тебе́ славу возсылаем. Песнь 7 Ирмо́с: О́троки ороси́вый в пещи́/ и Деву сохрани́вый рождшую Тя по Рождестве,/ благословен еси, Боже отец наших. Написа́яй вся рукою Своею/ и на дщи́це нося написа́тися человекообразно,/ благословен еси, Боже отец наших. Иже свойствы всеми человеческими воплощся, кроме́ единаго греха, Спасе,/ о сем и алкание прия́т, жажду же, я́ко во плоти описа́тися,/ благословен еси, Боже отец наших. Иже из безначальна Твоего рождества имея Сына, соприше́дша,/ исходна же и Духа,/ благословен еси, Боже отец наших. Богоро́дичен: Воображающе Божественную Твою́ икону, я́ко печать являющу,/ Царское имя Твое́ в покланение и́мам своем,/ Богородице Чистая. Песнь 8 Ирмо́с: На горе́ святей просла́вльшася/ и в купине́ огнем/ Приснодевы Моисе́ови тайну я́вльшаго,/ Господа пойте/ и превозноси́те во вся веки. Неизрече́нных видений обличил ти́нными де́лы ви́дев Моисей, воображаше,/ мы же я́вльшагося в телеси зраковообра́жающа Тя, Христе,/ поем во вся веки. Воображающе иконы вещьми́, не ве́щи покланя́емся несмы́слено,/ но на ней ту ста́вльшаго Господа Славы,/ Егoже превозносим во вся веки. Святых всечестны́я иконы,/ я́ко исцеления нам совершающа,/ иже к ним нашего доброчи́нства верою покланяемся,/ и благоуха́нии чтим,/ и свеща́ем во вся веки. Икону Христову злосло́вяще,/ жидо́вским прельститеся гневом,/ от полу́ Тому безчествующе,/ о́ни бо О́ному,/ Того же вы иконе ругающеся. Прежде Сущаго прежде безчисленных век/ с Сыном же и с Духом Святым вседержи́тельне царствующаго Господа/ пойте и превозноси́те во вся веки. Богоро́дичен: По всему достойно Тя чту́ще/ и Божественному покланяемся образу Твое́му,/ показа́юще зде честно́е, Владычице, миру,/ Юже песнословим во вся веки. Песнь 9 Ирмо́с: Проявле́нное на горе́ законополо́жнику во огни́ и купине́/ Рождество́ Приснодевы/ в наше, верных, спасение,/ песньми немо́лчными велича́ем. Пребывая Неопи́санный я́ко Бог по Естеству,/ написа́ешися, Го́споди, человеческим существом,/ да уверит обое́ имети, непризрачствовав, таинство. Ты, предавый нам свыше от святых в телописа́нии/ и вещественнем сказании Ветхаго и Новаго Завета,/ вся чудеса Твоя, Го́споди. О Христе мой, како стерплю́ Твое́ терпение,/ я́ко претерпел еси, ви́дя Свой телообразный вид,/ укаряема честнаго образа/ и дерзких не спали́л еси. Отъи́мшим красоту церковную/ и прозвавшим ю́ я́ко куми́рницу обруга́нием святых икон/ буди анафема вечная. Тресветлое, Го́споди, Твоего Единоначалия явленными сиянии в ум наш блистая,/ от льсти многостро́енныя обращаеши в единственное обоже́ние. Богоро́дичен: Ты еси ереси прогоняющи, Чистая, Нестория расторгнувши, на Тя хулу́ ре́кша,/ Сама и ны́не враги иконы Своея и Сына Твоего победи́.

глас 4 Песнь 1 Ирмос: Отверзу уста моя, и наполнятся Духа, и слово отрыгну Царице Матери, и явлюся, светло торжествуя, и воспою, радуяся, Тоя чудеса. Припев: Святая великомученице Параскево, моли Бога о нас. Светом Божественным осветившися свыше, мрак отжени неразумия моего и подаждь ми молитвами твоими, Параскево, благодать, воспевати твоих, мученице, чудес множества. Солнца светлейши, яко истинно возсияла еси утро, утверждение Церкве бывши Христовы, озарила еси лучами подвигов, мученице Параскево, твоими чудесы мира концы. Жениха, Безсмертнаго Христа, возлюбивши, яко верою Того страсти общница показалася еси и восприяла еси вечное Царство и венец нетленный, мученице Параскево славная. Богородичен: Дево Всенепорочная, Христа родившая, и Сего в ложеснах понесла еси, истинноименитая, разреши мрак души моея и просвети мя, да пою Тя. Песнь 3 Ирмос: Лук сильных изнеможе, и немощствующии препоясашася силою: сего ради утвердися в Господе сердце мое. Палицами немилостивно биема, радовашеся, лыстом сокрушаемым и костем вкупе, приснопамятная мученица Параскева, вопиющи: ничтоже мя разлучит от любве Твоея, Христе. Уста нечестивых, глаголющая беззаконие на преподобнаго, и язык велеречив заградишася, мученица Параскева вопияше, Спаса проповедающи. Кровей твоих кроплении безбожия огнь погасила еси, многострадальная мученице Параскево, и верных разумы просветила еси. Богородичен: Глаголы благочестивно исполняются Исаиины: Дева бо родила есть во плоти Жизнодавца Христа, Спаса душ наших. Седален Кровей твоих струями, мученице Христова, потоки нечестия изсушивши, всехвальная Параскево, одождением же благодати словесныя напаяеши бразды, в нихже прозябаеши клас веры. К сему же, славная, и по смерти явилася еси, точащи жизнь мучения ради, страстотерпице всехвальная. Моли Христа Бога даровати душам нашим велию милость. Песнь 4 Ирмос: Седяй в славе на Престоле Божества во облаце легце, прииде Иисус Пребожественный нетленною дланию и спасе зовущия: слава, Христе, силе Твоей. Уязвившися любовию Христовою, ополчения мучительская крепостию твоею умертвила еси, благодать источаеши присноживотную: страстей ради мздовоздаяние, восприяла еси, Параскево, мучениц Христовых доброта. Превозшедши вся любовию Христа, Жениха твоего, плотскую любовь возненавидевши, крепко болезненная страдания претерпела еси, мученице Параскево, вопиющи: не разлучи мене, Христе, от желания Твоего мучения подвиг совершити. Отвергши мира суету всю, Богу Единому прилепилася еси, Параскево мученице, и болезни страдания претерпевши, невесто Божия, мужеумная. Богородичен: Сниде, яко дождь на руно, во утробу Твою Господь, якоже рече древле пророк, Всенепорочная, Егоже во двух Существах родила еси, Емуже взываем: слава силе Твоей, Господи. Песнь 5 Ирмос: Ты, Господи, мой свет в мир пришел еси, Свет Святый, обращаяй из мрачна неведения верою воспевающия Тя. Свет незаходимый вселися в души твоей, да добродетелию сияеши, озаряя тебе непрестанно славящия. Струю, мученице Параскево, нечестиваго безбожия изсушила еси: течении кровными, неправедно проливаемыми, огнь прелести погасила еси. Ум имущи прозрачен, пророческаго дара сподобилася еси, хотящая быти всем яве предглаголала еси, Параскево многострадальная. Богородичен: Мати Божия, души моея злобу исцели, родившая Бога Слова неизреченно. Сего ради вси роди блажат Тя. Песнь 6 Ирмос: Пожру Ти со гласом хваления, Господи, Церковь вопиет Ти, от бесовския крове очищшися, ради милости от ребр Твоих истекшею Кровию. Возсияла из Рима, яко солнце светлое, святая мученице, мрак демонский от человек отгоняющи мольбами твоими, Параскево многострадальная. Исцеления приемлют приходящии прикосновением к раце мощей твоих, кровоточивии и прокаженнии очищаются, отбегают демонския полки, призыванием святаго твоего имени. Утреневала еси ко Христу, невечернему Солнцу, и Того светлостьми душу, Богомудрая, и сердце озарила еси, Параскево честная, и к Свету Троическому, радуяся, прешла еси. Богородичен: Исцели души моея страсти, Всенепорочная, безстрастия рождшая Источник, и отжени томительство, непрестанно смущающее сердце мое. Кондак, глас 3 Всесвятое и непорочное мучение принесши, яко вено пречестное, безсмертному Жениху Христу, Ангельское ликостояние возвеселила еси и победила еси демонския козни. Сего ради тя честно верою чтим, мученице Параскево многострадальная. Икос Кто изглаголет силы Господня; или кто повесть страдания твоя и добродетели, мученице; или кий язык воспети возможет по достоинству. Темже и аз, недостойный, воспети покушаюся, хвалити же и славити Владыку Жизнодавца, давшаго тебе на тризнищи крепость мучителей не убоятися, исповедающей Истиннаго Бога. Сего ради тя чтим верою и любовию, мученице Параскево многострадальная. Песнь 7 Ирмос: Спасый во огни Авраамския Твоя отроки, и халдеи убив, яже правда праведно уловляше, препетый Господи, Боже отец наших, благословен еси. Голубице, крила имущи златая и оружием хранима крестным, агаряны же, в нощи граду твоему приближившияся, отгнала еси, спасши верныя от убийства, мученице Параскево, поющия: препетый отец наших Боже, благословен еси. Многообразныя болезни претерпевши Христа ради, мученице Параскево, неболезненный у Него обрела еси покой и, радующися, взываеши: препетый отец наших Боже, благословен еси. Коль непобедим твой разум, Параскево честная, яко от начальников лика мучителей мук не убоялася еси. С нимиже бравшися, скончалася еси яко служительница тайны Божественныя славы, поющи: препетый отец наших Боже, благословен еси. Богородичен: Благословен Плод благословеннаго Твоего чрева, Егоже благословят Небесныя Силы и человечестии собори восхваляют, нас избавльшаго клятвы древния, Благословенная, поющих: препетый отец наших Боже, благословен еси. Песнь 8 Ирмос: Отроки благочестивыя в пещи Рождество Богородичо спасло есть, тогда убо образуемое, ныне же действуемое, вселенную всю воздвизает пети Тебе: Господа пойте дела и превозносите Его во вся веки. Божественными светлостьми Солнца мысленнаго просветившися, мученице всехвальная Параскево, нощь претекла еси безбожия, поющи единомыслием души: Господа воспевайте дела и превозносите Его во веки. Яко агница, яко нескверная юница, яко Божественная голубица, яко самовольное заколение, привелася еси, мученице Параскево, Зиждителю твоему и, яко жертва непорочна, принеслася еси, согласно поющи: Господа пойте дела и превозносите Его во веки. Светлу себе от кровей ризу мучением обложила еси, Параскево, добляя мученице, совлекшися истинно тленнаго со грехи человека, радостно воспевающи: Господа пойте дела и превозносите Его во веки. Богородичен: Во след Тебе текоша жены, мира сладковоннаго ведуще, Всечистая Богоневесто, Едина Неискусобрачная, из утробы Твоея возсиявшаго Единороднаго Сына, Христа Бога, и с Тобою царствуют истинно, песнословяще Его во веки. Песнь 9 Ирмос: Всяк земнородный да взыграется, Духом просвещаем, да торжествует же Безплотных умов естество, почитающее священное торжество Богоматере, и да вопиет: радуйся, Всеблаженная Богородице, Чистая Приснодево. В Небесный чертог всельшися, дево Параскево всечестная, и невидимых доброт разумно насладившися, восприимши неизреченную светлость, просвети поющия и величающия тя. Венец восприяла еси на главе твоей, Параскево доблеумная, яко скончавши течение и сохранивши веру непоколебиму, праведных чини радостно тя прияша. Тем ныне ублажаем тя. Подаеши исцелений капли требующим, яко от источника, всебогатая мученице Параскево, уставляющи токи недугов и страстей отгонящи зной, сердца благочестивых напаяющи ко благоплодию Божественных деяний. Богородичен: Мудрости Вместилище, паче ума лучшаго, явилася еси, Отроковице Всенепорочная, одушевлен же престол и дверь. Тем яко Царицу Тя возлюбльше, девы во след Тебе приведошася, Богоотроковице. Светилен Яко шипок краснейший от терновнаго прозябла еси корене, дево Параскево, оброшением, мученице, священнаго страдания обагрившися кровию. И ныне Божественную твою память творящия любовию спасай ны от бед.

Минея, 14 Октября, Канон преподобному Глас 4 Песнь 1 Ирмос: Отве́рзу уста моя,/ и напо́лнятся Духа,/ и слово отры́гну Царице Матери,/ и явлю́ся светло торжествуя,/ и воспою, ра́дуяся, Тоя́ чудеса. Припев: Преподо́бне о́тче Нико́ло, моли́ Бо́га о на́с. Отверзи мне устне́, Христе мой, посли Паракли́та,/ да Твоего угодника пети возмогу стихосло́вии высоту́ добродетелей,/ на нюже в чистоте сердца смирением взыде. Припев: Преподо́бне о́тче Нико́ло, моли́ Бо́га о на́с. В пра́вду нареклся еси Святоша:/ исполнь бо сый святыни, всякаго непреподобнаго действа удалился еси/ и, к Богови́дению ум свой впери́в,/ оттуду познал еси вся, яже в мире су́етная быти. Припев: Преподо́бне о́тче Нико́ло, моли́ Бо́га о на́с. Прежде тебе бывших помяну́л еси,/ от коли́кия славы напрасно отпадо́ша, и с безче́стием пожат серп смерти;/ сего ты да изба́вишися, престол на земли княжий оставил еси,/ и приял еси на Небеси престол, иже пребывает выну со святыми. Сла́ва Отцу́ и Сы́ну и Свято́му Ду́ху. Блаженному Иоаса́фу Инди́йскому поревновал еси:/ якоже бо той остави царство земное и взыска́ Небесное,/ тако и ты, блаженне, временное княже́ние оставль, приял еси вечное. И ны́не и при́сно и во ве́ки веко́в. Ами́нь. Богородичен: Вышняго Царствия не лиши мя,/ Небесными и земными Владычествующая Госпоже,/ сего бо ища́, удаля́юся, обладаем вою́ющими всегда на мя страстьми́,/ обаче к Тебе несумне́нною наде́ждою прибега́ю. Песнь 3 Ирмос: Твоя песносло́вцы, Богородице,/ живы́й и незави́стный источниче,/ лик себе совокупльшия, духовно утверди́,/ в Боже́ственней Твоей славе/ венцев славы сподо́би. Припев: Преподо́бне о́тче Нико́ло, моли́ Бо́га о на́с. Раб Единому Богу да будеши, не восхотел еси работати миру,/ от негоже изшед, аки вторы́й Авраа́м, дом и землю свою оставил еси/ и пришед, аки в Харра́нь, в пречестну́ю Божия Матере Печерскую обитель,/ видел еси ле́ствицею деяния и ве́дения блаженных отец к Небеси восходящих. Припев: Преподо́бне о́тче Нико́ло, моли́ Бо́га о на́с. Господин сый иногда́ княже́нию своему,/ за любовь Господа своего сотворился еси раб,/ служа рабом Христовым в пова́рни,/ да бывшему нас ради Послушли́ву до смерти последуеши. Припев: Преподо́бне о́тче Нико́ло, моли́ Бо́га о на́с. Порфи́рою одея́н и в руце́ имеяй ски́петр,/ не устыде́лся еси на ра́менах дрова носити и сещи́ рукама своима;/ да вся уды в порабощение предаси Вышнему Владыце,/ от Негоже возмездие приял еси живот вечный. Сла́ва Отцу́ и Сы́ну и Свято́му Ду́ху. Мирсти́и мирска́я му́дрствующе, братия твоя, блаженне,/ мняху дея́ние твое в пова́рне безче́стно быти,/ тем и развращаху тя, да оставиши сие./ Но ты, любя послуша́ние сие,/ еще едино лето испросил еси себе в том пребывати. И ны́не и при́сно и во ве́ки веко́в. Ами́нь. Богородичен: За́поведем Господа моего не повину́ющася, ни хранящаго послуша́ния уставы,/ убеди́ мя, Владычице моя, к де́ланию тех/ и укрепи в прочее время в обои́х совершенно испра́витися,/ да не в лености скончався, с непотребными рабы казнь прииму по дело́м. Седален, глас 8 Яко истиннаго послу́шателя Евангельскаго слова,/ и иноков любителя, и ревнителя преподобным,/ приидите, братие, песненными хвалами воспоем блаженнаго Николу:/ той бо тело свое порабо́ти Богу, да душу свободит от страсте́й/ и, аки солнце, возсияв лучами добродетелей своих,/ всех нас озаряет, поющих:/ слава Богу, призывающему рабы Своя в вечное спасение. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Вышняго мя гражданина покажи, Чистая Дево,/ прибегающаго к Твоему покрову и просящаго от Тебе теплаго заступления,/ яко, да Тобою обрет благодать, воспою:/ слава Богу, спасающему род человеческий. Песнь 4 Ирмос: Седя́й в славе на Престоле Божества/ во облаце легце,/ прии́де Иисус Пребожественный/ нетленною дланию и спасе́ зовущия:/ слава, Христе, силе Твоей. Припев: Преподо́бне о́тче Нико́ло, моли́ Бо́га о на́с. Седя́й во славе прежде на престоле и вельможам предстоящим ти,/ не устыде́лся еси, блаженне, седе́ти при врате́х монасты́рских три лета,/ яко верно храня́й сих вход от бездельно влазя́щих. Припев: Преподо́бне о́тче Нико́ло, моли́ Бо́га о на́с. Председящу ти пе́рвее на трапе́зе любопи́щней/ и многим рабом служа́щим яко владыце,/ не возгнушался еси последи́, святе, раб быти рабом Христовым,/ тем служа и представляя брашна от Божияго дарования. Припев: Преподо́бне о́тче Нико́ло, моли́ Бо́га о на́с. Якоже степе́ньми на высоту́ мирския славы возшедши, имут упокоение по трудех,/ тако и ты, преподобне, советом игумена и братии вся послушания чины прошед,/ принужде́н с миром в келлии безмолвствовати и внимати спасению своему. Сла́ва Отцу́ и Сы́ну и Свято́му Ду́ху. Яко трудолюби́вый раб, умножа́я Владыце своему талант,/ не дал еси упокое́ния многотрудному твоему телу,/ но рукама своима насадил еси вертоград;/ и видеша братия трудов твоих плоды. И ны́не и при́сно и во ве́ки веко́в. Ами́нь. Богородичен: Леня́щася мя, на добродетели пону́ди, Богородице,/ и даждь ми вертогра́д душевный мысленными древесы насади́ти,/ слезами умиления напая́ти, и принести Владыце моему стори́чный плод,/ да и аз с верными рабы Его прииму от руку́ Его мзду трудов моих. Песнь 5 Ирмос: Ужасощася всяческая/ о Божественней славе Твоей,/ Ты бо, Неискусобрачная Дево,/ имела еси во утробе над всеми Бога/ и родила́ еси Безлетнаго Сына,/ всем воспевающим Тя,/ мир подавающая. Припев: Преподо́бне о́тче Нико́ло, моли́ Бо́га о на́с. Дивля́хуся вси трудолюбию твоему, блаженне,/ яко никогдаже ви́ден был еси пра́зден,/ но в руках дело, в устех же имел еси выну молитву Иису́сову/ и сею́ отразил еси беса, празднолюбием напа́дающаго. Припев: Преподо́бне о́тче Нико́ло, моли́ Бо́га о на́с. Да пищи Небесныя причастник будеши, сластолюбия отверглся еси:/ ничтоже бо ядяше, кроме от о́вощия монастырскаго мало/ и тако соблюл еси чистоту души и тела. Припев: Преподо́бне о́тче Нико́ло, моли́ Бо́га о на́с. По многих твоих постнических трудех/ приял еси от Бога дар единем словом недуги исцеля́ти и посо́бствовати в ско́рбех./ Молюся ти, и мене от одержащаго недуга в здравие премени́ скоро. Сла́ва Отцу́ и Сы́ну и Свято́му Ду́ху. Многоплете́нными се́тьми тщася враг/ отврати́ти Боголюбивую душу твою от добраго трудолю́бия пути,/ наусти́ не́когда служа́щаго тебе врача;/ ты же, святе, увеща́нием увещал еси того,/ яко да не тебе, но своему спасению внимает. И ны́не и при́сно и во ве́ки веко́в. Ами́нь. Богородичен: Сердцем и душою развратихся/ и, отвергшися данныя ми благодати, в неподобныя хожду пути,/ но, прежде даже не впаду в руце врагом,/ Ты, Мати Божия, управи мя на первое блаженство:/ овча́ бо есмь спасенныя Твоея́ огра́ды. Песнь 6 Ирмос: Божественное сие и всечестно́е/ соверша́юще празднество,/ Богомудрии, Богоматере,/ приидите, руками восплещем,/ от Нея рождшагося Бога славим. Припев: Преподо́бне о́тче Нико́ло, моли́ Бо́га о на́с. Божественным желанием к Божией любви устреми́вся,/ вся находя́щия ти скорби, блаженне, сладце терпел еси,/ разсуждая реченное, яко недостойны суть страсти века сего к хотя́щей яви́тися в нас славе. Припев: Преподо́бне о́тче Нико́ло, моли́ Бо́га о на́с. Увещава́ющему тя Петру врачу от трудов и́ноческих преста́ти/ целомудренно отвещал еси мно́гажды, святе:/ престани, отвращая мя от сицева́го начинания,/ ни скорбь бо, ни глад, ни теснота отлучит мя от любве Христовы,/ ея́же ради терплю вся находящая на мя. Припев: Преподо́бне о́тче Нико́ло, моли́ Бо́га о на́с. Да во Христе Живот Вечный обрящеши,/ умертвил еси тело твое многим воздержанием и трудом/ и не лишился еси, егоже желал:/ се бо ныне живеши со святыми во дворех Небесных. Сла́ва Отцу́ и Сы́ну и Свято́му Ду́ху. Единаго имея врача Христа,/ никогдаже попустил еси себе в болезни врачевати,/ но глаголал еси со Апостолом:/ мне еже жити Христос, а еже умре́ти приобре́тение,/ и сим словом сам свой недуг исцелял еси. И ны́не и при́сно и во ве́ки веко́в. Ами́нь. Богородичен: Изнемогшую мою душу от грехов многих,/ посещением Твоим исцели, Госпоже́,/ и водою благодати Твоея напои́ мя,/ да сво́бод сый душевных и телесных недугов,/ порабо́таю Тебе, Владычице моей, со усердием всегда. Кондак, глас 8 Вся кра́сная мира сего/ и тленное богатство нивочтоже вменив,/ обогати́лся еси многими чудесы и зна́мении от Христа Бога,/ Емуже в веселии предстоя́,/ поминай нас, чтущих любовию память твою, да зовем ти:/ радуйся, Нико́ло пречудне. Икос Ангельски на земле поживша/ и со Ангельскими чи́нми ныне светло на Небеса́х ликующа,/ тя, блаженне, сими ублажаем песньми:/ радуйся, ро́да светлость и княже́ние презревый;/ радуйся, богатство и славу тщетную попра́вый;/ радуйся, нищ и убо́г, вся оставль, Господеви последовавый;/ радуйся, гордость низложи́вый и смирению прилежа́вый;/ радуйся, вся послушания монастырская проше́дый;/ радуйся, в тех со всяким смирением пребы́вый;/ радуйся, пова́рства и вра́тарства невозгнуша́выйся;/ радуйся, братий твоих, князей, отвергийся сожительства;/ радуйся, сам от немощи возмоги́й и врача исцели́вый;/ радуйся, спасение враче́ви молитвами твоими исхода́тайствовавый/ и свою, и онаго смерть прозревый;/ радуйся, брату твоему по уме́ртвии твоем исцеление пода́вый,/ радуйся, всем те́пле тя призывающим чудный и скорый помощниче,/ радуйся, Нико́ло пречу́дне. Песнь 7 Ирмос: Не послужиша твари Богомудрии/ паче Создавшаго,/ но огненное прещение мужески попра́вше,/ ра́довахуся, пою́ще:/ препе́тый отцев Господь и Бог благословен еси. Припев: Преподо́бне о́тче Нико́ло, моли́ Бо́га о на́с. От коли́кия славы прешел еси, княже, глаголаше ти Петр,/ и укоря́ше тя, блаженне, яко всем работаеши и сме́тищу приседи́ши,/ но ты отвещал еси ему:/ не погубих чести моея, паче же сим прославля́юся,/ последуя всем пришедшему послужити Христу, Емуже и зову,/ благословен Бог отец наших. Припев: Преподо́бне о́тче Нико́ло, моли́ Бо́га о на́с. Тебе хотя́й в болезни Петр уврачева́ти, сам разболеся,/ егоже не зе́лием, но молитвою исцелил еси/ и наказал того не надеятися на врачебную хитрость,/ но токмо на Бога уповати, зовущи:/ препетый отцев Боже, благословен еси. Припев: Преподо́бне о́тче Нико́ло, моли́ Бо́га о на́с. Послушание твое у врат скончава́я,/ провидел еси, святе, по триех месяцех и живота твоего кончину,/ тем призвал еси Петра и увещавал еси,/ да восприимет зде иноческий образ и вместо тебе послужит Богу,/ Иже есть благословенный во веки. Сла́ва Отцу́ и Сы́ну и Свято́му Ду́ху. Измене́ние жизни твоея слышав Петр,/ припаде со слезами к ногам твоим, преподобне,/ рыдающи, яко лишается господина своего;/ ты же воздви́г его, утешал и увещавал еси не скорбети о сем, но звати:/ благословен Бог отец наших. И ны́не и при́сно и во ве́ки веко́в. Ами́нь. Богородичен: Измене́ния жизни моея скверных ради дел не иму́ща,/ кто мя не воспла́чет, отхожду бо в путь неве́дом./ От пути за́поведей Сына Твоего уклони́хся, темже, слезя́, призываю Тя, Владычице,/ скажи мне путь, и пойду́ во истине, поя́:/ Препе́тая еси, Богородице, и Благослове́нная от рода в род. Песнь 8 Ирмос: Отроки благочестивыя в пещи,/ Рождество Богоро́дичо спасло есть,/ тогда убо образу́емое,/ ныне же действуемое,/ вселенную всю воздвиза́ет пети Тебе:/ Господа пойте дела/ и превозносите Его во вся веки. Припев: Преподо́бне о́тче Нико́ло, моли́ Бо́га о на́с. Благочестномудренне пожив и присно провидя исход свой, преподобне Нико́ло,/ сам себе угото́вал еси место во святей пещере,/ еже Петру на моление его даровал еси, глаголя:/ буди тебе, аще хощеши и якоже Господь восхощет, превозносимый во веки. Припев: Преподо́бне о́тче Нико́ло, моли́ Бо́га о на́с. Дерзнове́ние име́яй к Богу и упование по вере непоколебимо,/ приял еси прозрения дар, имже уве́дав по триех днех отшествие Петрово к Богу,/ повелел еси тому угото́витися к сицево́му исходу,/ он же по словеси твоему Святая Святых прием, отыде радуяся и поя:/ превозносимый Бог во веки. Припев: Преподо́бне о́тче Нико́ло, моли́ Бо́га о на́с. Три́десят лет по смерти врача свято пожив и верно Господеви поработав,/ стори́чныя израсти́л еси плоды, с нимиже отшел еси, блаженне,/ ко святых Святе́йшему Господу Иисусу, поя́ и превознося́ Его во веки. Сла́ва Отцу́ и Сы́ну и Свято́му Ду́ху. Твое сла́вное и честно́е успе́ние лю́дие слышаще,/ стекошася от всего града, дати тебе последнее целование/ и погребоша тя со слеза́ми, несе́ннаго с радостию Ангелов на лоно Авраа́мле,/ да тамо со всеми святыми предстоиши Господеви во веки. И ны́не и при́сно и во ве́ки веко́в. Ами́нь. Богородичен: Жизнь вре́менная скончава́ется, увы мне!/ камо несе́н буду, всех человек окая́ннейший:/ Судия ждет, Книги разгну́шася и по делом моим злых часть насле́дити ми есть известно;/ но прежде даже не отыду́ отсю́ду со угодником Твоим Нико́лою,/ молися, Госпоже, Сыну Твоему благих части мне насле́дити. Песнь 9 Ирмос: Всяк земноро́дный/ да взыгра́ется, Духом просвеща́ем,/ да торжествует же Безплотных умов естество́,/ почита́ющее священное торжество Богоматере,/ и да вопиет:/ радуйся, Всеблаженная/ Богородице, Чистая Приснодево. Припев: Преподо́бне о́тче Нико́ло, моли́ Бо́га о на́с. Всяк от земнородных да подражает житию Богохвальнаго отца,/ той бо славу временную на земли презрел и, во славу вечную прешед,/ ныне радуется, име́яй престол недвижим в Небесных селениих,/ идеже и о нас молит, да будем наследницы блаженныя жизни. Припев: Преподо́бне о́тче Нико́ло, моли́ Бо́га о на́с. Всяк, любя́й Мя, Мне последует, да будет со Мною./ Сия Ева́нгельская внуши́в словеса,/ преблаженный Свято́ша, возлюбив Бога, Тому после́дова/ и ничтоже паче Того любве стяжа́ в мире;/ темже ныне живет со Христом в Свете неприступнем. Припев: Преподо́бне о́тче Нико́ло, моли́ Бо́га о на́с. Рекий: прославляющаго Мя прославлю,-/ исполни обеща́ние на тебе, святе;/ не токмо бо тя просла́ви сама́го дароноше́ньми,/ но и крест твой, возгла́вница и власяни́ца славлятся от брата твоего/ и воспомина́ются даже досе́ле, яко сла́вная от них сотвори́шася. Сла́ва Отцу́ и Сы́ну и Свято́му Ду́ху. От ро́да в ро́ды память твоя сла́вится, преподобне отче:/ труды же и подвиги твоя хвалит Церковь с нами,/ но и мощи твоя, содержащияся во свято́й пещере,/ являет рака и созывает всех молити тя ныне/ яко теплаго предстателя и заступника в неможе́нии нашем. И ны́не и при́сно и во ве́ки веко́в. Ами́нь. Богородичен: От всех племе́н сла́вимая и почте́нная от Троицы Пресвятыя,/ нам, в песнех хва́лящим Тя, Чистая Дево, Предстательница буди/ и Заступница скорая от вражиих навет, да выну поем ти:/ радуйся, Богородице Приснодево. Светилен Храм Духа Пресвятаго был еси,/ и, пришед Отец с Сыном, обитель в тебе сотвори́,/ и тем Божественных причастием райскаго тя гражданина показа;/ в немже ныне от Разумнаго древа питаяся и нетленныя славы наслажда́яся,/ помяни и нас, верою кланяющихся раце мощей твоих, отче преподобне. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Храм пречистый воплощшемуся из Тебе Слову была еси, Дево;/ храм мя всякаго беззако́ния суща,/ сотвори храм узаконе́нных повелений Сына Твоего предстательством Твоим,/ да селение Божия благодати быв, достойно воспою Тя,/ яко вся о Бозе могу́щую, Богоотрокови́це.

Минея, 17 Мая, Кано́н свята́го, его́же краегране́сие: Но́ваго му́ченика побе́ду воспева́ю, Сло́ве. Глас 2 Песнь 1 Ирмос: Гряди́те, лю́дие,/ пои́м песнь Христу́ Бо́гу,/ разде́льшему мо́ре и наста́вльшему лю́ди,/ я́же изведе́ из рабо́ты еги́петския,/ я́ко просла́вися. Припев: Святы́й му́чениче Нико́лае, моли́ Бо́га о на́с. Несозда́ннаго всех Соде́теля, И́же дре́вле в мо́ри чудоде́йствовавшаго/ и всю си́лу фарао́ню пото́пльшаго,/ му́чеников же в страда́ниих благода́тию укре́пльшаго, совоку́пно воспои́м, я́ко просла́вися. Припев: Святы́й му́чениче Нико́лае, моли́ Бо́га о на́с. Огненным твои́м по Христе́ искуше́нием чи́ны преми́рных А́нгел удиви́л еси;/ мы же, восхваля́юще кре́пкое твое́ страда́ние, мо́лим тя:/ испроси́ нам соверше́нное избавле́ние у Го́спода, я́ко просла́вися. Припев: Святы́й му́чениче Нико́лае, моли́ Бо́га о на́с. Ве́лия прему́дрость Бо́га на́шего:/ ве́дый созда́ний существо́ пре́жде быти́я/ и ви́дев твоея́ души́ бо́дренное к Нему́ стремле́ние,/ многострада́льным иску́сом изъяви́ жития́ твоего́ исправле́ние, и́мже просла́вися. Припев: Святи́и трие́ му́ченицы, моли́те Бо́га о нас. А́ще и многомяте́жно жития́ мо́ре,/ но долувлеку́щая страсте́й мечта́ния, до́блии страда́льцы, терпе́нием попра́ша,/ и ти́хому приста́нищу себе́ возложи́ша,/ и произволе́нием муче́ния град Софи́йский просла́виша. И ны́не и при́сно и во ве́ки веко́в. Ами́нь. Богородичен: Ада́мский род, к Твоему́ притека́яй покро́ву, Пречи́стая Де́во,/ я́ко си́льна, в кре́пости предвари́ и вся́ких душевою́ющих напа́стей изба́ви,/ ми́лостива су́щи, я́ко Ма́ти Взе́млющаго грехи́ ми́ра. Песнь 3 Ирмос: Утверди́ нас в Тебе́, Го́споди,/ Дре́вом умерщвле́й грех,/ и страх Твой всади́/ в сердца́ нас, пою́щих Тя. Припев: Святы́й му́чениче Нико́лае, моли́ Бо́га о на́с. Го́рькаго муче́ния многоте́сную проше́д стезю́,/ широ́каго же и па́губнаго уклони́вся пути́,/ ны́не Ца́рствия Небе́снаго селе́ние, я́ко труда́ возме́здие,восприя́л еси́/ и со а́нгельскими си́лами ликова́ние. Припев: Святы́й му́чениче Нико́лае, моли́ Бо́га о на́с. Очеса́ устреми́в души́ твоея́ к жела́нию бу́дущих,/ несмуще́нне к страда́нию поте́кл еси́,/ его́же ра́ди безсме́ртия венце́м от Христа́ увяза́лся еси́, Нико́лае,/ и я́ко красе́н победи́тель Ему́ предста́л еси́. Припев: Святы́й му́чениче Нико́лае, моли́ Бо́га о на́с. Маловре́менную сла́ву земна́го жития́, я́ко мно́гаго су́етства испо́лненную, презре́л еси́,/ страда́ти же па́че по Христе́ изволя́я, и, ка́мением за Него́ побие́н быв,/ сын и насле́дник Ца́рствия яви́лся еси́. Сла́ва Отцу́ и Сы́ну и Свято́му Ду́ху. Умре́ти по Христе́ восхоте́вше, присносла́внии,/ мирска́я пристра́стия и боя́знь жесто́каго муче́ния не поколеба́ша ва́шея ве́ры основа́ния,/ те́мже ны́не, в де́лех жела́ния ва́шего все́льшеся, при́сно ра́дуетеся. И ны́не и при́сно и во ве́ки веко́в. Ами́нь. Богородичен: Ни песка́ морска́го исчести́ кто мо́жет,/ ни глубины́ изсле́дити бе́зднам,/ ни Твои́м косну́тися та́инством, Богоро́дице,/ вся бо преми́рныя си́лы превосхо́диши че́стностию./ Те́мже по вели́чию мы́шцы Своея́ снабди́ рабо́в умерщвле́нных,/ ве́рою Сы́ну Твоему́ при́сно покланя́ющихся. Седален, глас 8 Прему́дростию па́че слове́с,/ от не́мощи в си́лу по Бо́зе дерзнове́нием к дея́нию себе́ возве́л еси́;/ к виде́нию же восте́к Боже́ственных позна́ний/ и высоту́ дости́г соверше́ннаго богосло́вия тве́рдаго ка́мене ве́ры,/ мглы грехо́вныя а́бие от души́ прогна́л еси́ и дерзну́л еси́ к супоста́том,/ и́же ка́мением ри́зу души́ твоея́ испра́ша/ и подо́бника тя Влады́це твоему́ показа́ша,/ от Едо́ма восходя́щу оброщвле́нну48 оде́ждею и червле́ну от Восо́ра./ Те́мже кро́вию восхо́д получи́л еси́ Ца́рствия Бо́жия/ и неизрече́нная восприя́л еси́ блага́я,/ страстоте́рпче Нико́лае, моли́ Христа́ Бо́га грехо́в оставле́ние дарова́ти/ чту́щим любо́вию честну́ю па́мять твою́. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Прему́дрость и О́тчее Сло́во в Тебе́ непреме́нно воплоти́ся во обои́х существа́х кра́йним смотре́нием/ и воста́ви естество́, па́дшее преступле́нием,/ многосмра́дныя скве́рны мир свободи́в./ Того́ моли́ со дерзнове́нием, Ма́ти Чи́стая,/ дарова́ти безме́стным дея́нием исправле́ние/ и ту́нею бла́гостию грехо́м оставле́ние./ Ми́лостива бо еси́ Тя пою́щим/ и вско́ре отвраща́еши сугу́бых враго́в наве́ты./ Те́мже потщи́ся от всего́ се́рдца Тебе́ вопию́щим,/ согреше́ний проще́ние да́рующи,/ Тя бо и́мамы наде́жду, раби́ Твои́. Песнь 4 Ирмос: Услы́шах, Го́спода,/ сла́вное Твое́ смотре́ние/ и просла́вих, Человеколю́бче,/ непостижи́мую Твою́ си́лу. Припев: Святы́й му́чениче Нико́лае, моли́ Бо́га о на́с. Челове́к сый, сверхчелове́ческая дости́гл еси́, сла́вне Нико́лае,/ исто́чник бо кро́ве и струи́ страда́ния по Христе́ излия́в/ и непостижи́мыя высоты́ косну́вся,/ неизрече́нных ны́не наслажда́ешися благи́х,/ с му́ченическими ли́ки ра́дуяся. Припев: Святы́й му́чениче Нико́лае, моли́ Бо́га о на́с. Его́же трепе́щут бе́здны и преиспо́дняя,/ не стерпе́л еси́ ага́ряны злочести́выми в тварь своди́тися,/ де́лом па́че, не́жели сло́вом, кре́пость мудрова́ния своего́ уверя́я,/ го́рькия бо сме́рти не убоя́вся,/ всех ужаси́л еси́ терпе́нием свои́м и Бо́гови присво́ился еси́. Припев: Святы́й му́чениче Нико́лае, моли́ Бо́га о на́с. Напа́дшия тя ме́рзости злоче́стия совле́кся/ и вся преоби́дев маловре́менная,/ Христа́ по существу́ Бо́га бы́ти на суди́щи злочести́вых испове́дал еси́/ и добро́ту прекра́сныя твоея́ души́ в терпе́нии твое́м стяжа́ти потща́лся еси́. Сла́ва Отцу́ и Сы́ну и Свято́му Ду́ху. Изве́стнаго раче́ния вожделе́вше, присносла́внии му́ченицы,/ ве́чнующаго весе́лия и николи́же ско́рбными прило́ги та́емаго,/ вконе́ц горя́щею любо́вию му́ки усво́исте/ и, ны́не в преми́рная жили́ща все́льшеся,/ с Небе́сными ли́ки при́сно весели́теся. И ны́не и при́сно и во ве́ки веко́в. Ами́нь. Богородичен: Де́во Ма́ти Бо́жия,/ Его́же во пло́ти Христа́ породила́ еси́,/ непрело́жна пребы́вша си́лою Божества́ и де́йством,/ Того́ приле́жно со все́ми святы́ми моли́ грехо́м на́шим да́ти соверше́нное разреше́ние/ и пре́жде конца́ жития́ на́шего исправле́ние. Песнь 5 Ирмос: Све́та Пода́телю и веко́в Тво́рче, Го́споди,/ во све́те Твои́х повеле́ний наста́ви нас:/ ра́зве бо Тебе́, ино́го бо́га не зна́ем. Припев: Святы́й му́чениче Нико́лае, моли́ Бо́га о на́с. Коль неизсле́дованная насле́дия получи́л еси́ терпе́нием, Нико́лае,/ я́же земны́х ни о́ко ви́де, ни у́хо слы́ша,/ ниже́ на се́рдце челове́ку взыдо́ша когда́,/ но, муче́нием измени́вся, широту́ неизглаго́ланную дости́гл еси́ весе́лия и незаходи́маго све́та. Припев: Святы́й му́чениче Нико́лае, моли́ Бо́га о на́с. А́нгельскою любо́вию вои́стинну ко Христу́ распала́емь/ и жела́ние к подо́бию простира́я,/ о́браз честна́го первообра́зия, я́коже сокро́вище, в не́дрех скрыл еси́/ и написа́ние ца́рския печа́ти,/ во́инство же своея́ ве́ры Царю́ своему́ возложи́в, кровь свою́ по Нем пролия́л еси́. Припев: Святы́й му́чениче Нико́лае, моли́ Бо́га о на́с. По́двига твоего́ терпе́ние изве́стно всем показа́/ и наде́жду твою́ несолга́нну яви́ Христо́с,/ на Него́же упова́л еси́, Нико́лае;/ сего́ ра́ди ве́рнии ужаса́ются, малоду́шнии:/ отку́ду кре́пость ра́зуму подаде́ся ти,/ а́ще не Призва́вшим тя к страда́нию, присносла́вне. Сла́ва Отцу́ и Сы́ну и Свято́му Ду́ху. Оте́ческаго до́ма возвраще́ния/ и, я́же на три́знищи, побе́дных по́честей жела́юще,/ ели́цы до́брыя па́мяти су́ще незабы́тливи,/ ва́ия взе́мше, цве́ты доброде́телей, му́чеников усря́щим, хвалу́ Бо́гови возсыла́юще,/ их ра́ди всем нам да́рующему ве́лию ми́лость. И ны́не и при́сно и во ве́ки веко́в. Ами́нь. Богородичен: Раб Твой аз и сын рабы́ни Твоея́, держа́вная всех Цари́це,/ за неусыпа́ющую мольбу́ я́же к Сы́ну Твоему́ и Бо́гу/ приими́ моего́ се́рдца сокруше́ние и оче́с сле́зы,/ моля́щи рожде́ннаго от Тебе́ Судию́,/ я́ко да десны́я ча́сти сподо́бит мя в день Суда́. Песнь 6 Ирмос: В бе́здне грехо́вней валя́яся,/ неизсле́дную милосе́рдия Твоего́ призыва́ю бе́здну:/ от тли, Бо́же, мя возведи́. Припев: Святы́й му́чениче Нико́лае, моли́ Бо́га о на́с. Быв умерщвле́н, неве́рие зде́шних непщева́ше тя погреши́ти благонаде́ждия путь/ и в мо́ри погруже́нна волна́ми отчая́ния,/ но ты, я́коже Ио́на из чре́ва ки́това, малоденству́я, воззва́в,/ от Го́спода Бо́га твоего́ услы́шан был еси́. Припев: Святы́й му́чениче Нико́лае, моли́ Бо́га о на́с. Его́ призыва́ющим Ско́рый Послу́шатель Бог тебе́ в волне́нии жре́бий возложи́,/ в пучи́ну страда́ний самоизво́льне вве́ргнутися,/ но, я́коже по Бо́зе жив от них изше́д,/ градово́м пропове́дуеши спасе́ния покая́ние му́ченическим терпе́нием твои́м. Припев: Святы́й му́чениче Нико́лае, моли́ Бо́га о на́с. Де́лом по́двига твоего́ леня́щимся/ проре́кл еси́ не отчаява́ти своего́ спасе́ния,/ но от пре́жних злых отступа́ти и смире́ние лобза́ти:/ страда́нием бо твои́м чу́дный яви́лся еси́ пропове́дник благода́ти позна́ния,/ кровь твою́ неща́дно за Христа́ пролия́в, Нико́лае. Сла́ва Отцу́ и Сы́ну и Свято́му Ду́ху. У́бо тве́рдость терпе́ния ва́шего, Гео́ргие,/ земны́ми вещми́ изобрази́ти немо́щно кому́ николи́же:/ в безду́шных адама́нта, в одушевле́нных же се́рдца ва́шего ничто́же крепча́йше,/ вели́ким бо упова́нием с Гео́ргием други́м и Никола́ем сла́вным преидо́сте отсю́ду, ра́дующеся. И ны́не и при́сно и во ве́ки веко́в. Ами́нь. Богородичен: Еда́ ли когда́ не вско́ре явля́ешися взира́ющим на си́льный Твой покро́в, Влады́чице ми́ра?/ Ины́я бо наде́жды несть спасе́ния рабо́м Твои́м по Бо́зе,/ зане́ вы́сшую Тебе́ дарова́ сла́ву Рожде́йся из Тебе́/ и прекланя́ется проше́нию Твоему́, Тебе́ то́кмо хотя́щей. Песнь 7 Ирмос: Вети́и яви́шася о́троцы любому́дрейшии дре́вле,/ от богоприя́тныя бо души́, богосло́вяще устна́ми, поя́ху:/ Пребоже́ственный отце́в и наш Бо́же,/ благослове́н еси́. Припев: Святы́й му́чениче Нико́лае, моли́ Бо́га о на́с. Всели́в в ду́шу твою́ трие́х, и́же в Вавило́не, отроко́в терпе́ние, присносла́вне,/ превозше́л еси́ я:/ ти́и бо позна́вше, прореко́ша себе́ избавле́ние,/ ты же проста́го страда́ния и сме́рти произво́лил еси́, зовы́й:/ оте́ц на́ших Бо́же, благослове́н еси́. Припев: Святы́й му́чениче Нико́лае, моли́ Бо́га о на́с. Отда́в Бо́гу плоть свою́,/ дар соверше́н себе́ вручи́л еси́, многострада́льне;/ по сме́рти же те́ло твое́ огню́ преда́вше злочести́вии,/ я́ко зла́то в горни́ле, очи́стиша/ и нам всесожже́ние Боже́ственное оста́виша, пою́щим:/ оте́ц на́ших Бо́же, благослове́н еси́. Припев: Святы́й му́чениче Нико́лае, моли́ Бо́га о на́с. Сокруше́н ка́мением исхо́д твой неве́рным вмени́ся/ и безу́мие им смерть твоя́ возмне́ся,/ но упова́ние твое́, безсме́ртия испо́лнено, яви́л еси́/ и страда́ния о́браз всем показа́лся еси́, пою́щим:/ оте́ц на́ших Бо́же, благослове́н еси́. Сла́ва Отцу́ и Сы́ну и Свято́му Ду́ху. Пою́щих вас и ве́рою покланя́ющихся честны́м ва́шим страда́нием/ ду́ши спасти́ и мир умири́ти моли́теся, святи́и му́ченицы,/ я́коже бо све́та ко тьме ра́знствие,/ си́це выспрь от нас возлете́сте, зову́ще:/ оте́ц на́ших Бо́же, благослове́н еси́. И ны́не и при́сно и во ве́ки веко́в. Ами́нь. Богородичен: Обрела́ся еси́ в ро́дех челове́ческих, Богома́ти Присноде́во,/ еди́на До́брая и Преблаже́нная,/ пло́тски объя́вшая и воздои́вшая Его́же трепе́щет вся тварь;/ Того́ приле́жно моли́ упова́ющим на Тя ве́чных благ не погреши́ти. Песнь 8 Ирмос: Пещь иногда́ о́гненная в Вавило́не де́йства разделя́ше,/ Бо́жиим веле́нием халде́и опаля́ющая,/ ве́рныя же ороша́ющая, пою́щия:/ благослови́те, вся дела́ Госпо́дня, Го́спода. Припев: Святы́й му́чениче Нико́лае, моли́ Бо́га о на́с. Е́же к тебе́ на́шего любле́ния не забу́ди, присносла́вне Нико́лае,/ та́мо ны́не водворя́яся, иде́же шум пра́зднующих му́ченик и А́нгел,/ но, я́коже сам измени́лся еси́ лу́чшею жи́знию,/ моли́ся преме́ншимся нам недале́че тебе́ яви́тися, пою́щим:/ благослови́те, вся дела́ Госпо́дня, Го́спода. Припев: Святы́й му́чениче Нико́лае, моли́ Бо́га о на́с. Вели́ким страда́нием и кро́ве излия́нием о́гненный столп целому́дрия яви́лся еси́,/ разреши́ша бо ся земна́го естества́ омраче́ния/ и све́тел храм себе́ очи́стил еси́ Пресвято́му Ду́ху,/ Его́же ны́не соверше́ние в себе́ позна́в, зове́ши:/ благослови́те, вся дела́ Госпо́дня, Го́спода. Припев: Святы́й му́чениче Нико́лае, моли́ Бо́га о на́с. Адама́нтски кровь свою источи́л еси́, не посрами́в упова́ния своего́,/ но восте́кл еси́ в соверше́нную к Царю́ всех высоту́,/ Его́же приле́жно моли́ ка́плей слез на́ших не отврати́тися,/ с пла́чем и се́тованием Ему́ зову́щих:/ благослови́те, вся дела́ Госпо́дня, Го́спода. Сла́ва Отцу́ и Сы́ну и Свято́му Ду́ху. Ю́же ны́не пра́зднуем,/ честна́я па́мять ва́ша у́тро яви́ся духо́внаго и при́снаго весе́лия гра́ду ва́шему,/ в не́мже пострада́вшие, вели́ких и ди́вных сподо́бистеся,/ но и вся подсо́лнечная ва́ше му́дрое терпе́ние ублажа́ет, воспева́ющи:/ благослови́те, вся дела́ Госпо́дня, Го́спода. И ны́не и при́сно и во ве́ки веко́в. Ами́нь. Богородичен: Весе́лие ве́чное и ра́дость ми́ру ро́ждшая, возвесели́ ду́ши на́ша,/ я́ко да в тишине́ се́рдца богоуго́дни всегда́ яви́мся,/ за́поведь Сы́на Твоего́ соверша́юще,/ И́же в не́мощь на́шу нас ра́ди обо́лкся,/ си́льных нас в кре́пости Боже́ственней соде́ла. Песнь 9 Ирмос: От Бо́га Бо́га Сло́ва,/ неизрече́нною му́дростию прише́дшаго обнови́ти Ада́ма,/ я́дию в тле́ние па́дшаго лю́те,/ от Святы́я Де́вы неизрече́нно воплоти́вшагося нас ра́ди,/ ве́рнии, единому́дренно пе́сньми велича́ем. Припев: Святы́й му́чениче Нико́лае, моли́ Бо́га о на́с. Си́льных в сло́ве и кре́пких держа́вою прови́дев злове́рие, Нико́лае,/ и ме́рзость вмени́в с ни́ми вселе́ние,/ сла́дце па́че восприя́л еси́ сме́ртию ско́рою избежа́ти тех злово́ния/ и, ка́мением побие́н, ко Христу́ восте́кл еси́, ра́дуяся. Припев: Святы́й му́чениче Нико́лае, моли́ Бо́га о на́с. Лжу тще́тну вмени́в ага́рян пре́ния,/ не уве́девших смотре́ния Бо́жия, ни та́йны позна́вших,/ но усты́ ху́льными глаго́лавших на Бо́га непра́вду,/ Христа́, Бо́жию си́лу и Прему́дрость, пред ни́ми испове́дал еси́/ и Его́ ра́ди стра́шныя всем сме́рти не ужа́снулся еси́. Припев: Святы́й му́чениче Нико́лае, моли́ Бо́га о на́с. О́ком мы́сленным разсмотре́в привре́менная,/ я́ко вся се́ни и сну подо́бна,/ сме́рти же не убоя́вся, но па́че бла́го вмени́в, е́же по Христе́ во́лею умре́ти,/ с Ним просла́вился еси́ и стра́шен сме́рти показа́лся еси́,/ сию́ попра́в во́льным терпе́нием, подо́бяся Влады́це своему́. Припев: Святы́й му́чениче Нико́лае, моли́ Бо́га о на́с. Ве́ру не на́гу показа́л еси́ Бо́гу твоему́, Нико́лае,/ па́че же сопря́гл еси́ ей дела́ пра́вды терпе́нием:/ что бо си́льнейше твои́х муче́ний и что приболе́зненно па́че сме́рти,/ на ню́же ты укрепи́вся во́льным произволе́нием,/ Го́сподеви обе́ты своя́ в де́лех ве́ры прине́сл еси́. Сла́ва Отцу́ и Сы́ну и Свято́му Ду́ху. Е́же о́ко не ви́де, ни у́хо слы́ша,/ ни на се́рдце челове́ка взы́де угото́ванное вам возме́здие,/ его́же ра́ди до́брыми преложе́ньми во́льную по Христе́ смерть восприя́сте,/ и ны́не, со А́нгелы водворя́ющеся, при́сно мо́лите Христа́ Бо́га на́шего,/ да сопричте́мся ва́шему ликостоя́нию. И ны́не и при́сно и во ве́ки веко́в. Ами́нь. Богородичен: А́ще и согреша́ем, раби́ Твои́, Ма́ти Жива́го Бо́га,/ но оба́че, Твои́ми хода́тайствы объе́мши,/ моли́ Сы́на Твоего́, да не вконе́ц разгори́тся на нас я́рость Его́,/ ино́го бо Бо́га не ве́мы, ра́зве Того́, смире́ннии,/ ниже́ крепча́йшия по́мощи и́мамы, ра́зве Тебе́, Влады́чице ми́ра. Светилен Посеще́ния от преми́рныя сподо́блься сла́вы, великому́чениче Нико́лае,/ и муче́ние терпе́нием победи́в,/ А́нгелы удиви́л еси́ и бе́сы посрами́л еси́/ простото́ю нра́ва Христа́ Бо́га на́шего. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Покажи́ ско́ро си́лу Твою́, Ма́ти Жива́го Бо́га,/ и кре́пость дел Твои́х на нас, под кров Твой прибега́ющих,/ ничто́же бо сопротивля́ется вла́сти Твое́й, Влады́чице Всемогу́щая.

Минея, 18 Июня, Ин кано́н Глас 4 Песнь 1 Ирмос: Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,/ и воспою́, ра́дуяся, Тоя́ чудеса́. Припев: Пресвята́я Богоро́дице, спаси́ на́с. Сло́во рабу́ Твоему́ пода́ждь, Госпоже́ Пресвята́я,/ Сло́во бо сни́де на Тя, я́коже свы́ше роса́,/ гре́шную ду́шу мою́ очи́сти, Цари́це Блага́я,/ я́ко да, ра́дуяся, сла́влю Твоя́ чудеса́. Припев: Пресвята́я Богоро́дице, спаси́ на́с. Кня́зю Андре́ю в нощи́ предста́вши, Небе́сная Ма́ти,/ в се́рдце смяте́нном его́/ бу́рю сомне́ний Ты всех кро́тце смири́ла еси́,/ подви́гши того́ воспева́ти ми́лость и си́лу Твою́,/ ди́вну всегда́ в чудесе́х. Сла́ва Отцу́ и Сы́ну и Свято́му Ду́ху. Ру́це просте́рла еси́, моли́твенно Сы́ну предста́вши:/ сла́вы и ми́лости луч, Сы́не, да схо́дит с небе́с/ лю́дем и ме́сту сему́./ Того́ умоли́ о созда́вших храм и оби́тель сию́,/ Ро́ждшая бе́здну чуде́с. И ны́не и при́сно и во ве́ки веко́в. Ами́нь. Боголюби́вая всех Цари́це, оби́тели сла́во,/ гре́шных, моля́щихся нас дне́сь, приими́ словеса́,/ де́рзость враго́в низложи́, неве́рных разруши́ держа́ву,/ ве́рным же при́сно пода́ждь пе́ти Твоя́ чудеса́. Песнь 3 Ирмос: Твоя́ песносло́вцы, Богоро́дице,/ Живы́й и Незави́стный Исто́чниче,/ лик себе́ совоку́пльшия, духо́вно утверди́,/ в Боже́ственней Твое́й сла́ве/ венце́в сла́вы сподо́би. Припев: Пресвята́я Богоро́дице, спаси́ на́с. Чту́ще ико́ну Твою́, вси в ско́рби к Тебе́ прибега́ем,/ то́чиши бо, Госпоже́, Ты утеше́ние всем,/ в ра́дости па́ки Тебе́, Пречи́стая, пе́снь воспева́ем./ Те́мже пода́ждь, да и аз ми́лость Твою́ испове́м. Припев: Пресвята́я Богоро́дице, спаси́ на́с. Све́тло красу́ется дне́сь оби́тель сия́ всечестна́я,/ о́браз иму́щая Твой, я́ко исто́чник цельба́м,/ Ты же, Засту́пнице всех, Спору́чнице гре́шных свята́я,/ Спа́са Христа́ преклони́ к на́шим смире́нным мольба́м. Сла́ва Отцу́ и Сы́ну и Свято́му Ду́ху. В бу́ри приста́нище всем Ты, Боголюби́вая Ма́ти,/ су́щим в пути́ и в беда́х, в мо́ри дале́че покро́в,/ спу́тница ве́рна всем:/ Тебе́ бо даде́ся спаса́ти ду́ши убо́гих Твои́х,/ Тя вознося́щих рабо́в. И ны́не и при́сно и во ве́ки веко́в. Ами́нь. Ве́чныя му́ки и тьмы́,/ губи́тельных вра́жиих сете́й,/ Чи́стая Де́во, спаси́, Тя призыва́ем в мольбе́,/ сла́ву же Бо́га духо́в безсме́ртных/ сподо́би нас зре́ти в све́тлых черто́зех Его́:/ вся бо возмо́жна Тебе́. Седален, глас 2 Моле́ние те́плое и стена́ необори́мая,/ ми́лости исто́чниче, ми́рови прибе́жище,/ приле́жно вопие́м Ти:/ Богоро́дице Влады́чице, предвари́/ и от бед изба́ви нас,/ еди́на вско́ре Предста́тельствующая. Песнь 4 Ирмос: Седя́й в сла́ве на Престо́ле Божества́/ во о́блаце ле́гце,/ прии́де Иису́с Пребоже́ственный/ Нетле́нною Дла́нию и спасе́ зову́щия:/ сла́ва, Христе́, си́ле Твое́й. Припев: Пресвята́я Богоро́дице, спаси́ на́с. О́блаком ле́гким носим, Твой Сын, Пресвята́я, прии́де,/ Ма́тере во́лю творя́./ Кня́зь же блаже́нный Андре́й паде́ со слеза́ми во прах, просла́ви о всех, я́же ви́де,/ сла́ва, Христе́, вопия́,/ Бо́жией си́ле Твое́й. Припев: Пресвята́я Богоро́дице, спаси́ на́с. Све́том Твои́м просвеще́н, на Го́рнюю сла́ву взира́я,/ глас Пребоже́ственный Твой слы́ша блаже́нный Андре́й,/ Ду́хом же Святы́м взыгра́в, воспе́ о Тебе́, Пресвята́я:/ сла́ва, Христе́ Всецарю́, Бо́жией си́ле Твое́й. Сла́ва Отцу́ и Сы́ну и Свято́му Ду́ху. Ми́лость Его́ и покро́в моля́щимся нам ниспосла́ти/ Сы́на и Бо́га моли́, Чи́стая, ве́рных люде́й щи́те, забра́ло Церкве́й,/ вселе́нней реко́ благода́ти,/ я́ко да пе́снь принесе́м ве́лией си́ле Твое́й. И ны́не и при́сно и во ве́ки веко́в. Ами́нь. О́блаче све́тлый Христо́в, неве́рия мглы нас изба́ви,/ ве́рным осла́бу пода́ждь в жи́зни привре́менней сей,/ Це́рковь Святу́ю Твою́ незы́блему в ми́ре упра́ви,/ я́ко да вси воспое́м:/ сла́ва держа́ве Твое́й. Песнь 5 Ирмос: Ужасо́шася вся́ческая/ о Боже́ственней сла́ве Твое́й:/ Ты бо, Неискусобра́чная Де́во,/ име́ла еси́ во утро́бе над все́ми Бо́га/ и родила́ еси́ Безле́тнаго Сы́на,/ всем воспева́ющим Тя/ мир подава́ющая. Припев: Пресвята́я Богоро́дице, спаси́ на́с. Сы́на Безле́тнаго Ты носи́ла еси́ несказа́нно,/ гре́шным спасе́ние всем све́тло веща́ющая;/ ны́не о нас, Госпоже́, моли́ся Тому́ непреста́нно,/ всем воспева́ющим Тя мир подава́ющая. Припев: Пресвята́я Богоро́дице, спаси́ на́с. При́сно Твоя́ благода́ть, Цари́це, нисхо́дит на ме́сто,/ е́же избра́ла еси́, всем источа́ющая да́ры целе́бныя,/ тем пое́м Тебе́, Богоневе́сто,/ ве́рою сла́вящим Тя мир подава́ющая. Сла́ва Отцу́ и Сы́ну и Свято́му Ду́ху. Обремене́ннии вси страстьми́ и неду́ги, гряди́те,/ во́ду спаси́тельную, всех исцеля́ющую,/ зде от ико́ны сея́ в весе́лии дне́сь почерпи́те,/ сла́вяще Ма́терь Христа́, мир подава́ющую. И ны́не и при́сно и во ве́ки веко́в. Ами́нь. Гла́да, огня́ и меча́, наше́ствия иноплеме́нных,/ язв губи́тельных при́сно спаса́ющая,/ Ма́ти Всепе́тая, дне́сь услы́ши мольбу́ нас, смире́нных,/ бу́рю страсте́й ути́ши, мир подава́ющая. Песнь 6 Ирмос: Боже́ственное сие́ и всечестно́е/ соверша́юще пра́зднество,/ Богому́дрии, Богома́тере,/ прииди́те, рука́ми воспле́щим,/ от Нея́ ро́ждшагося Бо́га сла́вим. Припев: Пресвята́я Богоро́дице, спаси́ на́с. Боголюби́вая дне́сь к весе́лию вся созыва́ет,/ храм преукраси́вши сей о́бразом чу́дным Свои́м,/ благочести́вых собо́р Небе́сными да́ры венча́ет./ Тем, Богому́дрии вси, Ма́терь Христо́ву почти́м. Припев: Пресвята́я Богоро́дице, спаси́ на́с. Ра́достно, ве́рнии вси, гряди́те, воспле́щим рука́ми,/ зря́ще Превы́сшую всех а́нгельских го́рних чино́в/ Де́ву, Цари́цу Небе́с, во хра́ме дне́сь су́щую с на́ми,/ всем источа́ющую то́ки целе́бных даро́в. Сла́ва Отцу́ и Сы́ну и Свято́му Ду́ху. Ра́зве Тебе́, Госпоже́, не и́мам наде́жды ины́я:/ Ты мя изба́ви от бед, Ты помози́ до конца́/ по́прище мне преити́ небла́зненно жи́зни земны́я,/ да воспою́ Тя всегда́, ро́ждшую ми́ру Творца́. И ны́не и при́сно и во ве́ки веко́в. Ами́нь. При́зри, Свята́я, с Небе́с, к рабо́м Твои́м в по́мощь потщи́ся,/ вся́кую я́зву, боле́знь, вся́кий неду́г исцели́./ Ста́рцу согбе́нному жезл, Засту́пница си́рым яви́ся,/ Ма́ти Оте́ршаго вся го́рькия сле́зы земли́. Кондак, глас 3 Де́ва дне́сь предстои́т Сы́ну,/ ру́це Свои́ к Нему́ простира́ющи,/ святы́й кня́зь Андре́й ра́дуется,/ и с ним Росси́йская страна́ торжеству́ет,/ нас бо ра́ди мо́лит Богоро́дица Преве́чнаго Бо́га. Икос Де́во и Ма́ти Боголюби́вая, Цари́це Мари́е Богоро́дице,/ Ми́лостивая Хода́таице к Сы́ну Своему́ и Бо́гу на́шему за ны, рабы́ Твоя́!/ Ты, Отрокови́це, благоизво́лила еси́ Твоему́ пречу́дному о́бразу,/ его́же написа́ Богоглаго́ливый Лука́,/ пе́рвее от страны́ Гре́ческия, пото́м же и от ца́рствующаго гра́да Ки́ева изы́ти,/ по умоле́нию благове́рнаго кня́зя Андре́я,/ и яви́ти ми́лость Свою́ новопросвеще́нным лю́дем страны́ сея́,/ но, не изво́ливши дости́гнути гра́да Росто́ва, возлюби́ла еси́ пребыва́ти в преде́лех Влади́мирских,/ иде́же и яви́лася еси́ ве́рному рабу́ Твоему́, кня́зю Андре́ю,/ моля́щися о лю́дех Твои́х Сы́ну и Бо́гу Твоему́,/ я́коже дре́вле свято́му Андре́ю в хра́ме Влахе́рнстем./ Те́мже святы́й кня́зь Андре́й, новописа́в Тебе́, Моли́твенницу о лю́дех Твои́х,/ оста́ви нам сей моли́твенный лик Твой, Боголюби́вая Ма́ти,/ и основа́ оби́тель в ме́сте Твоего́ явле́ния,/ из нея́же от чудотво́рныя Твоея́ ико́ны и по всей стране́ Росси́йстей/ ми́лость, и по́мощь, и исцеле́ние подае́ши с ве́рою приходя́щим к Тебе́:/ нас бо ра́ди мо́лиши, Богоро́дице, Преве́чнаго Бо́га. Песнь 7 Ирмос: Не послужи́ша тва́ри Богому́дрии/ па́че Созда́вшаго,/ но, о́гненное преще́ние му́жески попра́сте,/ ра́довахуся, пою́ще:/ препе́тый отце́в Госпо́дь и Бог, благослове́н еси́. Припев: Пресвята́я Богоро́дице, спаси́ на́с. Сла́вит Тя при́сно страна́ Росси́йская, Де́во,/ иму́щи к Бо́гу Хода́таицу те́плую на Небеси́,/ те́мже и пра́зднует дне́сь, Тебе́ благодари́в пою́щи:/ Ма́ти Христо́ва, во век благослове́на еси́. Припев: Пресвята́я Богоро́дице, спаси́ на́с. Град и оби́тель сию́ Твои́м омофо́ром, Честна́я, при́сно покры́й/ и мольбу́ на́шу горе́ вознеси́ к Сы́ну и Бо́гу щедро́т,/ да сла́вим Тя вси, Преблага́я,/ Боголюби́вая, Ты благослове́на еси́. Сла́ва Отцу́ и Сы́ну и Свято́му Ду́ху. Зно́я паля́щаго вся изба́ви,/ до́ждь ра́нний и по́здний жа́ждущей лю́те земли́/ Ще́драго да́ти проси́,/ ни́вы от вре́да спаси́,/ да ми́лость Госпо́дню сла́вим,/ Тебе́ же пое́м: благослове́на еси́. И ны́не и при́сно и во ве́ки веко́в. Ами́нь. Лю́дем Твои́м, Госпоже́, земли́ устрое́ние зре́ти,/ му́дрость в прави́телех, суд пра́вый сподо́би,/ да вси в ми́ре всегда́ поживе́м, немо́лчно дерза́юще пе́ти:/ ми́ру Храни́тельнице, благослове́на еси́. Песнь 8 Ирмос: О́троки благочести́выя в пещи́/ Рождество́ Богоро́дичо спасло́ е́сть;/ тогда́ у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте, дела́,/ и превозноси́те Его́ во вся ве́ки. Припев: Пресвята́я Богоро́дице, спаси́ на́с. О́бразом, Де́во, святы́м обхо́диши ве́си и до́мы,/ вся́кому во́зрасту че́сть, всем христиа́ном хвала́,/ всех ты наде́жда еси́,/ Тобо́ю бо род наш блюди́мый сла́вит усе́рдно Творца́:/ Го́спода по́йте, дела́. Припев: Пресвята́я Богоро́дице, спаси́ на́с. Ве́ру мою́ приими́, приста́нище ти́хое бу́ди;/ ду́шу, Блага́я, спаси́,/ Ты бо еси́ родила́ Спа́са нам, гре́шным, Христа́./ Убо́гих Твои́х не забу́ди,/ да́руй нам зва́ти всегда́:/ Го́спода по́йте, дела́. Сла́ва Отцу́ и Сы́ну и Свято́му Ду́ху. Те́ло мое́ исцели́,/ страсте́й треволне́ние вско́ре, Де́во, в души́ укроти́./ Ты бо еси́ низвела́/ свы́ше Боже́ственный мир на во́лны жите́йскаго мо́ря/ ве́рно пою́щим всегда́:/ Го́спода по́йте, дела́. И ны́не и при́сно и во ве́ки веко́в. Ами́нь. В де́нь о́ный стра́шный конца́,/ егда́ пробужде́нии вста́нем гла́сом после́дней трубы́,/ бу́ди нам Ты похвала́,/ ру́це возде́вши Твои́,/ Благо́му за гре́шных предста́ни,/ да одесну́ю Того́, Го́спода, хва́лим, дела́. Песнь 9 Ирмос: Всяк земноро́дный/ да взыгра́ется, Ду́хом просвеща́емь,/ да торжеству́ет же Безпло́тных умо́в естество́,/ почита́ющее свяще́нное торжество́ Богома́тере,/ и да вопие́т:/ ра́дуйся, Всеблаже́нная Богоро́дице,/ Чи́стая Присноде́во. Припев: Пресвята́я Богоро́дице, спаси́ на́с. Всяк земноро́дный в сей де́нь, Святы́м просвеща́емый Ду́хом,/ ве́село ра́дуяся Го́рних умо́в естеству́,/ та́йно пою́щему зде, да вне́млет очище́нным слу́хом,/ вся да покло́нится тва́рь де́вственному Рождеству́. Припев: Пресвята́я Богоро́дице, спаси́ на́с. И́ноков ли́ки и дев, Пречи́стыя пра́здник почти́те,/ му́жи, и жены́, и вси, ра́достно дне́сь к торжеству́/ с на́ми соше́дшеся зде, псало́мски игра́юще, рцы́те:/ Де́во, да бу́дет во век че́сть Твоему́ Рождеству́. Сла́ва Отцу́ и Сы́ну и Свято́му Ду́ху. Ве́рных пресве́тлый собо́р, Пречи́стая, дне́сь назира́ет/ свы́ше Свою́ благода́ть, душ и теле́с врачевство́,/ гре́шным проще́ние, всем осла́бу долго́в обеща́ет:/ Ма́терь бо слы́шит Свою́ при́сно Той Рождество́. И ны́не и при́сно и во ве́ки веко́в. Ами́нь. Боголюби́вей возда́х усте́н похвалу́ и молю́ся:/ бу́ди Спору́чница ми, хра́ме святы́й Божества́, в час испыта́ния дел,/ егда́ пред суди́щем явлю́ся,/ Де́во, уми́лостиви суд Твоего́ Рождества́. Светилен Боголю́бскому дре́вле Андре́ю предста́вшая/ и ико́ну исто́чник чуде́с показа́вшая,/ Боголюби́вая Ма́ти пе́сненно дне́сь да почти́тся. Слава: Тя Предста́тельницу и́мамы, гре́шнии, о Пресвята́я Де́во:/ Ты благопреме́нна сотвори́ Сы́на Твоего́ и Бо́га на́шего/ ма́терними Твои́ми моли́твами. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Те́плое заступле́ние в беда́х, и Помо́щницу на́шу,/ и к Бо́гу примире́ние,/ Е́юже тли изба́вихомся, Богоро́дицу, ве́рнии, ублажа́ем.

глас 8 Пе́снь 1. Ирмо́с: Во́ду проше́д, я́ко су́шу, и еги́петскаго зла́ избежа́в, изра́ильтянин вопия́ше: Изба́вителю и Бо́гу на́шему пои́м. Припев: Свята́я великому́ченице Варва́ро, моли́ Бо́га о на́с. Во́ду нече́стия тиме́нну оста́вивши, к воде́ чисти́тельной притекла́ еси́, Варва́ро, и на́ша очи́сти сердца́, чи́сто пе́ти твоя́ страда́ния. Водо́ю креще́ния очи́стившися, великому́ченице, чи́стому Жениху́, Христу́, прилепи́лася еси́, Ему́же и на́с чи́сто присво́й, моли́твами твои́ми. Сла́ва: В воде́ пото́пльшему зми́я лука́ваго подо́бящися, кро́вию твое́ю страда́льческою вра́жию погрузи́ла еси́ си́лу, страстоно́сице, от него́же и на́м изба́витися Спа́са умоли́. И ны́не: Во́ду сле́з очища́ющую, Пречи́стая, пода́ждь ми́ и, очи́стивши мя́ от ка́ла беззако́ний, чи́ста предста́ви, Богороди́тельнице, Сы́ну Твоему́ и Бо́гу. Пе́снь 3. Ирмо́с: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ в любви́ Твое́й, жела́ний кра́ю, ве́рных утвержде́ние, еди́не Человеколю́бче. Небе́снаго кру́га смотря́ющи украше́ние, му́драя де́во Варва́ро, Верхотво́рца позна́ла еси́, Его́же и возлю́бльши, Тому́ служи́ти изво́лила еси́; и на́с в любви́ Его́ утверди́, мо́лимся. Небе́снаго Творца́ в Тро́ице пресве́тлое изобразу́ющи естество́, три́ о́кна в ба́не оте́честей изобрази́ти повеле́ла еси́, Тро́ическому покланя́тися уча́щи Божеству́, Ему́же и на́с ве́чно покланя́тися сподо́би. Сла́ва: Небе́снаго черто́га жела́ющи, небе́сному Жениху́ чистоту́ де́вства твоего́ соблюла́ еси́, вре́меннаго презре́вши; и мене́ в чистоте́ Тому́ служи́ти, му́ченице, укрепи́. И ны́не: Небе́снаго Творца́, Богоро́дице Всепе́тая, поро́ждши, небе́с простра́ннейша яви́лася еси́; мене́ от простра́ннаго пути́ поги́бельна укло́нши, на небе́сный пу́ть наста́ви, молю́ся. Седа́лен, гла́с 3. В страда́нии твое́м вся́ удиви́ла еси́, я́ко претерпе́вши мучи́телей ра́ны, вяза́ния, му́ки и темни́цы, Варва́ро прехва́льная. Те́мже и вене́ц с небесе́ тебе́ даде́ Христо́с, к Нему́же, возжеле́вши усе́рдно, притекла́ еси́; То́й благода́ть подаде́ тебе́, му́ченице, врачева́ния источа́ти челове́ком. Сла́ва, и ны́не: Боже́ственная ски́ния была́ еси́, Сло́ва, еди́на Пречи́стая Ма́ти Де́во, чистото́ю а́нгелы превозше́дшая; па́че все́х мене́, пе́рсть бы́вша, оскверне́на плотски́ми прегреше́ньми, очи́сти моли́тв Твои́х Боже́ственными вода́ми, подаю́щи, Чи́стая, ве́лию ми́лость. Пе́снь 4. Ирмо́с: Услы́шах, Го́споди, смотре́ния Твоего́ та́инство, разуме́х дела́ Твоя́, и просла́вих Твое́ Божество́. Услы́шавши, Варва́ро, небеса́, пове́дающа сла́ву Бо́жию, на земли́ Бо́га сла́вити возжела́ла еси́, Его́же сла́вы и на́с сподо́би. Услы́шав оте́ц тво́й тебе́, Вы́шняго Отца́ испове́дующу, гоня́ше на убие́ние, но не возмо́же отто́ргнути от и́стиннаго Бо́га. Сла́ва: Услы́шавши преще́ния оте́ческая и му́ки от него́ терпя́щи, Варва́ро, непоколеби́ма пребыла́ еси́, и мене́ непоколеби́ма в доброде́телех упра́ви. И ны́не: Услы́ши, Пречи́стая Влады́чице, моле́ние мое́, и изба́ви мя́ от зо́л, и гла́с благослове́нных, призыва́ющий в Ца́рство, слы́шати удосто́й. Пе́снь 5. Ирмо́с: Просвети́ на́с повеле́нии Твои́ми, Го́споди, и мы́шцею Твое́ю высо́кою Тво́й ми́р пода́ждь на́м, Человеколю́бче. Просвети́вши свещу́ свою́, му́ченице, ве́рою, свеща́ми опали́ти те́ло твое́ предала́ еси́, в черто́г небе́сный све́тло вни́ти жела́ющи. Просвеща́хуся ве́рою неве́рием омраче́ннии лю́дие, ви́дяще тя́, жже́ния, бие́ния, ре́зания терпя́щую до́блественне, му́ченице. Сла́ва: Просвети́ мя́, о Варва́ро, омраче́ннаго мгло́ю грехо́вною, и све́том невече́рним осиява́тися, све́тлая де́во, молю́ся, сотвори́. И ны́не: Просвети́ла еси́ потемне́нное естество́, Богоро́дице, Све́т и́стинный ро́ждши; те́мже и мене́, све́том просвети́вши, от мра́чных вра́г свободи́. Пе́снь 6. Ирмо́с: Моли́тву пролию́ ко Го́споду и Тому́ возвещу́ печа́ли моя́, я́ко зо́л душа́ моя́ испо́лнися и живо́т мо́й а́ду прибли́жися, и молю́ся, я́ко Ио́на: от тли́, Бо́же, возведи́ мя. Моли́тву твою́ страда́льческую услы́шав, Христо́с, Варва́ро, в темни́це затворе́нную посети́, исцеле́ние от ра́н подаде́ и на по́двиг укрепи́; ты́ же моя́ ра́ны грехо́вныя уврачу́й, му́ченице, молю́ся. Моли́твою ти́, и страда́льческим тве́рдым терпе́нием, и чу́дным исцеле́нием Иулиани́ю от злоче́стия привлекла́ еси́ страда́ти с тобо́ю за Христа́, привлецы́ и мене́ к го́рнему мудрова́нию, страстоно́сице. Сла́ва: Моли́тву вся́к принося́й с ве́рою тебе́, му́ченице, и к моща́м твои́м святы́м притека́яй, душе́вных страсте́й и теле́сных исцеле́ние ско́ро прие́млет, е́же и на́м бога́тно подава́й, мо́лимся. И ны́не: Моли́тву на́шу приими́, Пречи́стая, и моли́твою Ти́ всемо́щною, изба́вити на́с от вра́г ви́димых и неви́димых, от грехо́в же и вся́кия му́ки, моли́, Его́же родила́ еси́, Человеколю́бца Бо́га. Конда́к, гла́с 4. В Тро́ице благоче́стно пева́емому, после́довавши Бо́гу, страстоте́рпице, и́дольская притупи́ла еси́ чти́лища; посреде́ же по́двига страда́льчествующи, Варва́ро, мучи́телей преще́ния не устраши́лася еси́, мужему́дренная, велегла́сно пою́щи при́сно: Тро́ицу чту́, еди́но Божество́. И́кос: Уневе́стившуюся Христу́ муче́нием Варва́ру, соше́дшеся, почти́м досто́йно: я́ко да, тоя́ моли́твами па́губы душетле́нныя изба́вльшеся и губи́тельства, тру́са и паде́жа, житие́ в ми́ре препрово́дим, сподо́бившеся со все́ми святы́ми, от ве́ка Бо́гу благоугоди́вшими, ходи́ти во све́те и пе́ти с ни́ми: удиви́л еси́, Спа́се, твоя́ ми́лости все́м челове́ком, ве́рою испове́дающим: Тро́ицу чти́м, еди́но Божество́. Пе́снь 7. Ирмо́с: Де́ти евре́йстии в пещи́ попра́ша пла́мень дерзнове́нно и на ро́су о́гнь прело́жше, вопия́ху: благослове́н еси́, Го́споди Бо́же, во ве́ки. Де́ти евре́йския а́нгел от огня́ неопа́льны сохрани́вый и тебе́, Варва́ро, на́гу води́му, от студа́ защити́, оде́ждою свы́ше обле́к, пою́щую: благослове́н еси́, Го́споди Бо́же, во ве́ки. Де́тское игра́лище вменя́ющи му́ки, не пощади́ла еси́ те́ла твоего́, е́же бы́ти ему́ за Христа́ стру́жему и о́стро стира́ему, великому́ченице, пою́щи: благослове́н еси́, Го́споди Бо́же, во ве́ки. Сла́ва: Дете́й евре́йских и а́з подража́я, Варва́ро, хвалю́ Христа́, да́вшаго тебе́ кре́пость; ты́ же мя́, на по́двиг доброде́телей укре́пльши, оде́ждою небе́сною облещи́ся сподо́би во ве́ки. И ны́не: Деторо́дию Твоему́, Де́вою и по рождестве́ пребы́вшу, дивлю́ся, Богоро́дице; удиви́ у́бо и на мне́ ми́лость Сы́на Твоего́, да, поми́лован Тобо́ю, пою́: благослове́н Бо́г, ублагослови́вый Тя́, Ма́терь Свою́, во ве́ки. Пе́снь 8. Ирмо́с: Победи́тели мучи́теля и пла́мене благода́тию Твое́ю бы́вше, за́поведем Твои́м зело́ прилежа́ще, о́троцы вопия́ху: благослови́те, вся́ дела́ Госпо́дня, Го́спода. Победи́телие непобеди́мыя твоея́ ве́ры мучи́теле тща́шеся бы́ти, сосца́ твоя́ неща́дно отре́зоваху, ты́ же, тве́рдо терпя́щи, млеко́м уче́ния о Бо́зе напои́ла еси́ предстоя́щия и благословя́щия Христа́ во ве́ки. Победи́ла еси́ му́жеством твои́м, му́ченице Варва́ро, вся́ мучи́тельская ухищре́ния. Моли́ у́бо Влады́ку Христа́, мо́лим тя́, все́м ве́рным на враги́ побе́ду да́ти, пою́щим: благослови́те вся́ дела́ Го́спода, и превозноси́те Его́ во ве́ки. Сла́ва: Победи́тельница суро́ваго отца́ твоего́ яви́лася еси́ му́ченице: о́н бо небе́сным огне́м во а́дский о́гнь низведе́ся, ты́ же на не́бо возшла́ еси́, е́же и мне́ исхода́тайствуй, от огня́ избавля́ющи мя́ во ве́ки. И ны́не: Победи́, Пречи́стая, враго́в ви́димых и неви́димых, низложи́ти на́с тща́щихся, и страсте́й мя́ вся́ких изба́ви, да пою́ торже́ственне: благослови́те, вся́ дела́, Го́спода и превозноси́те Его́ во ве́ки. Пе́снь 9. Ирмо́с: Вои́стинну Богоро́дицу, Тя́ испове́дуем, спасе́ннии Тобо́ю, Де́во Чи́стая, с безпло́тными ли́ки Тя́ велича́юще. Вои́стинну Бо́га испове́дающи, му́ченице, черто́г небе́сный насле́дила еси́, его́же и на́с сподо́би, да с Тобо́ю Христа́ ве́чно велича́ем. Вои́стинну на тебе́, Варва́ро, испо́лнися Христо́во прорече́ние: преда́ст оте́ц ча́до на сме́рть, е́юже ты́ ве́чный живо́т обрела́ еси́. Сла́ва: Вои́стинну никто́же притека́яй к тебе́, страстоно́сице, то́щ благода́ти твоея́ отхо́дит, ея́же и мене́ испо́лни, молю́ся. И ны́не: Вои́стинну и́стиннаго Бо́га пло́тию, Богоро́дице, родила́ еси́, Его́же ми́лостива на́м в де́нь Суда́ соде́лай, да безконе́чно с Ни́м Тя́ велича́ем. Свети́лен: Я́ко шипо́к красне́йший из терно́внаго израсла́ еси́ ко́рене де́во Варва́ро, твое́ю за Христа́ излия́нною обагри́вшися кро́вию. И ны́не Боже́ственную твою́ па́мять соверша́ющыя любо́вию, спаса́й от бе́д. Сла́ва, и ны́не: Вои́стинну Тя́ испове́дуем Влады́чице, Тобо́ю спаса́емии: и́бо Бо́га неизрече́нно родила́ еси́ разори́вшаго Кресто́м сме́рть, и к Себе́ привле́кшаго пра́ведных собо́ры, с ни́миже восхваля́ем Тя́ Де́во.

Минея, 18 Июня, Кано́н Глас 4 Песнь 1 Ирмос: Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,/ и воспою́, ра́дуяся, Тоя́ чудеса́. Припев: Пресвята́я Богоро́дице, спаси́ на́с. Благогове́ют пред Тобо́ю, Богоро́дице, А́нгелов нача́льницы/ и святы́х чи́ни че́стно слу́жат Ти,/ пра́веднии красу́ются, кня́зь же Андре́й мо́лится,/ и град Влади́мир похваля́ется све́тло./ Мы же, гре́шнии, припа́дая к Твое́й свято́й ико́не, Боголюби́вая, ми́лости про́сим:/ озари́ на́ша сердца́, Пресвята́я Де́во Богоро́дице. Припев: Пресвята́я Богоро́дице, спаси́ на́с. Кня́зь Андре́й вопия́ше со слеза́ми:/ Пресвята́я Цари́це Богоро́дице, упова́ние христиа́ном,/ умоли́ Сы́на Своего́, Христа́ Бо́га на́шего, о держа́ве Твое́й,/ Ты бо изво́лила еси́ в преде́лех страны́ Влади́мирския/ оби́тели Свое́й сла́вно созда́тися во и́мя Твое́, Боголюби́вая. Сла́ва Отцу́ и Сы́ну и Свято́му Ду́ху. Прииди́те, христоимени́тии лю́дие,/ умы́ та́йно очи́стившеся,/ притеце́м в храм Ма́тере Христа́ Бо́га на́шего,/ Боголюби́мое ме́сто страны́ Влади́мирския/ я́ко Богоприя́тное селе́ние ви́дяще:/ в нем бо явля́ет нам Свою́ ми́лость Влады́чица. И ны́не и при́сно и во ве́ки веко́в. Ами́нь. Под кров Твой, Богоро́дице Де́во, прибега́ем вси, ро́ди челове́честии:/ просвети́, Боголюби́вая, ме́сто свято́е торжества́ Твоего́,/ и мы, гре́шнии раби́ Твои́, моля́щеся Пречи́стей Твое́й ико́не,/ про́сим от Тебе́ прия́ти вели́кия ми́лости. Песнь 3 Ирмос: Твоя́ песносло́вцы, Богоро́дице,/ Живы́й и Незави́стный Исто́чниче,/ лик себе́ совоку́пльшия, духо́вно утверди́,/ в Боже́ственней Твое́й сла́ве/ венце́в сла́вы сподо́би. Припев: Пресвята́я Богоро́дице, спаси́ на́с. Засту́пнице и покро́в гра́ду Влади́миру и вся́кому гра́ду и стране́,/ бу́ди нам Помо́щница и прибе́жище, Боголюби́вая,/ всех нас заступи́, Госпоже́ Цари́це и Богоро́дице,/ и во вся́ких злых ме́стех ве́рныя сохрани́. Припев: Пресвята́я Богоро́дице, спаси́ на́с. Приими́ хвалу́ от уст на́ших недосто́йных, о Пресвята́я Богоро́дице, Де́во Боголюби́вая,/ наде́ждо на́ша и похвало́!/ Покланя́емся Твоему́ пресла́вному о́бразу:/ мольбу́ приими́ о рабе́х Твои́х. Сла́ва Отцу́ и Сы́ну и Свято́му Ду́ху. Пречи́стеи ру́це Твои́, Цари́це и Богоро́дице,/ ми́лостивно воздви́гни к Сы́ну Твоему́ и Бо́гу на́шему,/ прося́щи отпуще́ния согреше́ний на́ших, и житие́ на́ше испра́ви,/ и вся́кия благода́ти испо́лни нас и ми́лости сподо́би. И ны́не и при́сно и во ве́ки веко́в. Ами́нь. Пресвята́я Де́во, Ма́ти Боголюби́вая,/ сохрани́ рабы́ Твоя́ от вся́кия сопроти́вныя си́лы,/ и изба́ви от вся́кия напа́сти,/ и ра́дость ми́ру сотвори́ душе́вную и теле́сную,/ и пре́зри нам вся согреше́ния. Седален, глас 2 Моле́ние те́плое и стена́ необори́мая,/ ми́лости исто́чниче, ми́рови прибе́жище,/ приле́жно вопие́м Ти:/ Богоро́дице Влады́чице, предвари́/ и от бед изба́ви нас,/ еди́на вско́ре Предста́тельствующая. Песнь 4 Ирмос: Седя́й в сла́ве на Престо́ле Божества́/ во о́блаце ле́гце,/ прии́де Иису́с Пребоже́ственный/ Нетле́нною Дла́нию и спасе́ зову́щия:/ сла́ва, Христе́, си́ле Твое́й. Припев: Пресвята́я Богоро́дице, спаси́ на́с. Ева́нгелия Христо́ва Богогла́сный списа́тель Лука́/ написа́ о́браз Твой чу́дный, Всенепоро́чная Влады́чице,/ и Младе́нца Ти Преве́чнаго на руку́ изобрази́;/ святы́й же кня́зь Андре́й в нощно́м виде́нии узре́в Тя, моля́щуюся за ны,/ даде́ нам о́браз Твоего́ моле́ния,/ к Нему́же притека́ющия бед и напа́стей избавля́еши. Припев: Пресвята́я Богоро́дице, спаси́ на́с. О Пресвята́я Де́во Богоро́дице,/ Ты изво́лила еси́ изы́ти из Гре́ческия страны́ в чудотво́рнем о́бразе Твое́м/ и дойти́ до свята́го ме́ста, иде́же и яви́лася еси́ кня́зю Андре́ю;/ он же, моля́ся Тебе́, со слеза́ми вопия́ше:/ Пресвята́я Де́во Богоро́дице,/ изба́ви нас от вся́ких бед и скорбе́й. Сла́ва Отцу́ и Сы́ну и Свято́му Ду́ху. На Тя упова́ние возложи́хом, Боголюби́вая Ма́ти Де́во,/ Предста́тельницу Тя живота́ тве́рду и непоколеби́му стяжа́хом,/ моли́ о нас, рабе́х Твои́х, Всеще́драго Бо́га. И ны́не и при́сно и во ве́ки веко́в. Ами́нь. Ты еси́ похвала́ и вене́ц святы́м всем,/ вси на Тя по Бо́зе наде́жду возложи́хом/ и Тебе́ мо́лимся, Боголюби́вая Цари́це, Бо́жия Ма́ти,/ Помо́щнице гре́шным и спасе́ние рабо́м Твои́м. Песнь 5 Ирмос: Ужасо́шася вся́ческая/ о Боже́ственней сла́ве Твое́й:/ Ты бо, Неискусобра́чная Де́во,/ име́ла еси́ во утро́бе над все́ми Бо́га/ и родила́ еси́ Безле́тнаго Сы́на,/ всем воспева́ющим Тя/ мир подава́ющая. Припев: Пресвята́я Богоро́дице, спаси́ на́с. Вся́кое ме́сто, Пресвята́я Де́во Богоро́дице, Свое́ю ми́лостию просвеща́еши,/ гра́ду же Влади́миру и ме́сту Боголюби́мому вели́кая похвала́ и утвержде́ние,/ в беда́х су́щим ско́рая Помо́щница. Припев: Пресвята́я Богоро́дице, спаси́ на́с. Пропове́дует пресла́вно вели́чия Твоя́ Ла́вра,/ я́же во Твое́ и́мя нача́ло прия́, Ма́ти Бо́жия Боголюби́вая,/ хва́лят моле́бницы, и велича́ют чудотво́рный о́браз Твоего́ моле́ния о нас, и глаго́лют:/ утверди́, Го́споди, оби́тель сию́. Сла́ва Отцу́ и Сы́ну и Свято́му Ду́ху. Приспе́ дне́сь па́мять твоя́, кня́же Андре́е,/ ра́дуется пресла́вный град Влади́мир/ и Боголюби́мое ме́сто красу́ется, зову́ще:/ Пресвята́я Де́во Богоро́дице, спаси́ нас/ и изба́ви от вся́кия ну́жды и печа́ли. И ны́не и при́сно и во ве́ки веко́в. Ами́нь. Мари́е, злата́я кади́льнице,/ стра́сти па́губныя отжени́ от нас/ и утверди́ нас непоколеби́мых, Пресвята́я Де́во Боголюби́вая,/ не и́мамы бо и́ныя по́мощи, ра́зве Тебе́, Влады́чице. Песнь 6 Ирмос: Боже́ственное сие́ и всечестно́е/ соверша́юще пра́зднество,/ Богому́дрии, Богома́тере,/ прииди́те, рука́ми воспле́щим,/ от Нея́ ро́ждшагося Бо́га сла́вим. Припев: Пресвята́я Богоро́дице, спаси́ на́с. Прише́ствием честна́го о́браза Твоего́, Цари́це Богоро́дице,/ освяти́ла еси́ ме́сто Боголюби́мое,/ на не́мже оби́тель Свою́ от дре́вних лет сохраня́еши,/ иде́же и нас сподо́би Тебе́ пе́ти чи́стыми се́рдцы. Припев: Пресвята́я Богоро́дице, спаси́ на́с. Не ужаса́йся, кня́же Андре́е, и не диви́ся,/ ви́дев о́браз Пречи́стыя Богоро́дицы, от Гре́ческия страны́ изше́дший,/ доити́ же гра́да Росто́ва не изво́ливший:/ се бо до́йде до ме́ста свята́го, свы́ше пронарече́ннаго,/ и подви́же вопи́ти тебе́ к Преблагослове́нней:/ о Всеми́лостивая!/ моли́ о нас Сы́на Своего́, Христа́ Бо́га на́шего. Сла́ва Отцу́ и Сы́ну и Свято́му Ду́ху. Воздви́гнем ру́це свои́ горе́ и вознесе́м хвале́ния Го́сподеви:/ се бо вои́стинну прии́де Пречи́стая Де́ва и Богоро́дица Боголюби́вая:/ вся озаря́я ве́рныя Боже́ственною Свое́ю ико́ною. И ны́не и при́сно и во ве́ки веко́в. Ами́нь. Храм живы́й и освяще́нный су́щи, Пренепоро́чная,/ Пребезнача́льное Сло́во пло́тию родила́ еси́, безслове́сия мир изба́вльшее,/ изба́ви и нас от напа́стей Твои́ми моли́твами, Боголюби́вая. Кондак, глас 3 Де́ва дне́сь предстои́т Сы́ну,/ ру́це Свои́ к Нему́ простира́ющи,/ святы́й кня́зь Андре́й ра́дуется,/ и с ним Росси́йская страна́ торжеству́ет,/ нас бо ра́ди мо́лит Богоро́дица Преве́чнаго Бо́га. Икос Де́во и Ма́ти Боголюби́вая, Цари́це Мари́е Богоро́дице,/ Ми́лостивая Хода́таице к Сы́ну Своему́ и Бо́гу на́шему за ны, рабы́ Твоя́!/ Ты, Отрокови́це, благоизво́лила еси́ Твоему́ пречу́дному о́бразу,/ его́же написа́ Богоглаго́ливый Лука́,/ пе́рвее от страны́ Гре́ческия, пото́м же и от ца́рствующаго гра́да Ки́ева изы́ти,/ по умоле́нию благове́рнаго кня́зя Андре́я,/ и яви́ти ми́лость Свою́ новопросвеще́нным лю́дем страны́ сея́,/ но, не изво́ливши дости́гнути гра́да Росто́ва, возлюби́ла еси́ пребыва́ти в преде́лех Влади́мирских,/ иде́же и яви́лася еси́ ве́рному рабу́ Твоему́, кня́зю Андре́ю,/ моля́щися о лю́дех Твои́х Сы́ну и Бо́гу Твоему́,/ я́коже дре́вле свято́му Андре́ю в хра́ме Влахе́рнстем./ Те́мже святы́й кня́зь Андре́й, новописа́в Тебе́, Моли́твенницу о лю́дех Твои́х,/ оста́ви нам сей моли́твенный лик Твой, Боголюби́вая Ма́ти,/ и основа́ оби́тель в ме́сте Твоего́ явле́ния,/ из нея́же от чудотво́рныя Твоея́ ико́ны и по всей стране́ Росси́йстей/ ми́лость, и по́мощь, и исцеле́ние подае́ши с ве́рою приходя́щим к Тебе́:/ нас бо ра́ди мо́лиши, Богоро́дице, Преве́чнаго Бо́га. Песнь 7 Ирмос: Не послужи́ша тва́ри Богому́дрии/ па́че Созда́вшаго,/ но, о́гненное преще́ние му́жески попра́вше,/ ра́довахуся, пою́ще:/ препе́тый отце́в Госпо́дь и Бог, благослове́н еси́. Припев: Пресвята́я Богоро́дице, спаси́ на́с. Боголюби́вому житию́ первонача́льник и наста́вник, кня́же Андре́е, был еси́/ и моле́бно подвиза́лся еси́ пред пречу́дным о́бразом Бо́жия Ма́тере:/ светле́йши бо со́лнца возсия́ пречестна́я ико́на Пресвяты́я Богоро́дицы,/ Е́йже моли́ся спасти́ся нам. Припев: Пресвята́я Богоро́дице, спаси́ на́с. Херуви́м и Серафи́м превы́шши яви́лася еси́, Богоро́дице:/ Ты бо еди́на прия́ла еси́ Невмести́маго Бо́га во утро́бе Свое́й/ и благоволи́ла доити́ о́бразу Твоему́ Боголюби́маго ме́ста./ Мы же, раби́ Твои́, вси ве́рнии, пе́сньми Тя ублажа́ем. Сла́ва Отцу́ и Сы́ну и Свято́му Ду́ху. Пресвята́я Госпоже́ Де́во Богоро́дице, Ма́ти Христа́ Бо́га на́шего,/ вся́ко мо́жеши нам бы́ти Помо́щница,/ посети́вшая чу́дным о́бразом Твои́м Боголюби́мое ме́сто сие́, Боголюби́вая Влады́чице,/ посети́ и нас и не оста́ви, я́коже Сама́ ве́си,/ с ве́рою приходя́щих к Тебе́. И ны́не и при́сно и во ве́ки веко́в. Ами́нь. Приступи́ к чу́дному о́бразу Боголюби́выя Богома́тере вели́кий кня́зь Андре́й/ и, просте́р ру́це свои́, взем я́ко безце́нное сокро́вище, и возвести́ отцу́ своему́,/ ка́ко чуде́сно из Вышегра́да посети́ ме́сто Боголюби́мое. Песнь 8 Ирмос: О́троки благочести́выя в пещи́/ Рождество́ Богоро́дичо спасло́ е́сть;/ тогда́ у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте, дела́,/ и превозноси́те Его́ во вся ве́ки. Припев: Пресвята́я Богоро́дице, спаси́ на́с. Приими́ моле́ние на́ше, Пречи́стая Богоро́дице,/ сохрани́ и заступи́ от вся́каго зла/ и не отри́ни нас от Своего́ честна́го о́браза:/ Тя бо и́мамы Моли́твенницу те́плу, и сте́ну тве́рду, и покро́в неруши́мый,/ и земли́ на́шей вели́кую похвалу́ и утвержде́ние. Сла́ва Отцу́ и Сы́ну и Свято́му Ду́ху. Ра́дуемся душе́ю и весели́мся се́рдцем,/ взира́юще на о́браз Твой, Пресвята́я Богоро́дице Боголюби́вая,/ иму́ще Тя держа́ву непобеди́мую и утвержде́ние непоколеби́мое,/ наде́жду, и упова́ние, и душа́м на́шим спасе́ние. И ны́не и при́сно и во ве́ки веко́в. Ами́нь. Помо́щница еси́ в ско́рбех, и в напа́стех, и беда́х/ и в темни́цах избавле́ние,/ на бра́ни и в ра́тех заступле́ние, Богоотрокови́це Чи́стая,/ и избавле́ние всем ве́рным челове́ком, и похвала́,/ и гра́ду на́шему вели́кое утвержде́ние. Песнь 9 Ирмос: Всяк земноро́дный/ да взыгра́ется, Ду́хом просвеща́емь,/ да торжеству́ет же Безпло́тных умо́в естество́,/ почита́ющее свяще́нное торжество́ Богома́тере,/ и да вопие́т:/ ра́дуйся, Всеблаже́нная Богоро́дице,/ Чи́стая Присноде́во. Припев: Пресвята́я Богоро́дице, спаси́ на́с. Се Тебе́, Пресвята́я Цари́це Боголюби́вая,/ посыла́ется с Небесе́ Арха́нгел Гаврии́л,/ Царя́ всех и Бо́га провозвести́ти прише́ствие и возгласи́ти Тебе́:/ ра́дуйся, Благода́тная, Госпо́дь с Тобо́ю. Припев: Пресвята́я Богоро́дице, спаси́ на́с. Ра́дуйся, Ма́ти Де́во, ра́дуйся, Пречи́стая, прия́телище Бо́жие,/ ра́дуйся, све́щниче Све́та, Ада́мово воззва́ние и Е́вино избавле́ние,/ горо́ свята́я и пресла́вная и свяще́нный черто́же. Сла́ва Отцу́ и Сы́ну и Свято́му Ду́ху. Ты еси́ похвала́ христиа́ном, Влады́чице,/ Ты ору́жие на враги́ и стена́,/ к Тебе́ прибега́ем, Тя и ны́не на по́мощь призыва́ем:/ Госпоже́ Цари́це Богоро́дице,/ спаси́ и сохрани́ правове́рныя лю́ди Твоя́, Боголюби́вая. И ны́не и при́сно и во ве́ки веко́в. Ами́нь. О Всеми́лостивая христиа́ном Помо́щнице!/ Не мо́жет Тя воспе́ти досто́йно ум челове́ческий и а́нгельский,/ я́ко всея́ тва́ри Честне́йшую, Небе́сных и земны́х сил сла́внейшую,/ всех бо Творца́ родила́ еси́ и Бо́га./ Но, о Влады́чице!/ приими́ ми́лостивно на́ше моле́ние,/ всегда́ бо на Тя наде́емся. Светилен Боголю́бскому дре́вле Андре́ю предста́вшая/ и ико́ну исто́чник чуде́с показа́вшая,/ Боголюби́вая Ма́ти пе́сненно дне́сь да почти́тся. Слава: Тя Предста́тельницу и́мамы, гре́шнии, о Пресвята́я Де́во:/ Ты благопреме́нна сотвори́ Сы́на Твоего́ и Бо́га на́шего/ ма́терними Твои́ми моли́твами. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Те́плое заступле́ние в беда́х, и Помо́щницу на́шу,/ и к Бо́гу примире́ние,/ Е́юже тли изба́вихомся, Богоро́дицу, ве́рнии, ублажа́ем.

 глас 4 Творение преподобного Иоанна Дамаскина Минея, 29 Июня, Пе́рвый кано́н свята́го апо́стола Петра́ Глас 4 Песнь 1 Ирмос: Не́сть Тебе́ подо́бен,/ препросла́вленный Го́споди,/ руко́ю бо кре́пкою изба́вил еси́ лю́ди,/ я́же стяжа́л еси́, Человеколю́бче. Припев: Святы́й апо́столе Пéтре, моли́ Бо́га о на́с. Верхо́внейшаго апо́столов дне́сь, я́ко первозва́ннаго Христо́ва,/ богодохнове́нными пе́сньми досто́йно воспои́м. Припев: Святы́й апо́столе Пéтре, моли́ Бо́га о на́с. Тя предве́чный проуве́дев, предуста́ви, всеблаже́нне Пе́тре,/ я́ко предста́теля Своея́ Це́ркве и первопресто́льника. Сла́ва Отцу́ и Сы́ну и Свято́му Ду́ху. Ни пло́ть, ниже́ кро́вь тебе́, но Оте́ц вдохну́/ Христа́ богосло́вити, Сы́на и́стиннаго Бо́га Вы́шняго, апо́столе. И ны́не и при́сно и во ве́ки веко́в. Ами́нь. Богородичен: Го́ру святу́ю, превы́шнее носи́ло,/ Ма́терь Бо́жию и Де́ву и́стинную по рождестве́ воспое́м. Песнь 3 Ирмос: Не му́дростию, и си́лою, и бога́тством хва́лимся,/ но Тобо́ю, О́тчею Ипоста́сною му́дростию, Христе́:/ несть бо свят, па́че Тебе́, Человеколю́бче. Припев: Святы́й апо́столе Пéтре, моли́ Бо́га о на́с. Тя, блаже́нна, сла́дкая уста́ Христа́ Бо́га и сокро́вище тве́рдо Ца́рствия показа́ша./ Те́мже воспева́ем тя, Пе́тре апо́столе. Припев: Святы́й апо́столе Пéтре, моли́ Бо́га о на́с. На ка́мени твоего́ Богосло́вия водрузи́ Влады́ка Иису́с Це́рковь непрекло́нну,/ в не́йже тя, апо́столе Пе́тре, сла́вим. Сла́ва Отцу́ и Сы́ну и Свято́му Ду́ху. Я́ко пребо́льши А́нгел Петр в телеси́:/ во све́тлом бо прише́ствии сего́/ Христо́с Бог судию́ же и соседа́теля бы́ти рече́. И ны́не и при́сно и во ве́ки веко́в. Ами́нь. Богородичен: Неискусобра́чная, Бо́га пло́тию ро́ждшая,/ стра́стными прило́ги преклоне́нна мя утверди́:/ не́сть бо, Чи́стая, ра́зве Тебе́, помо́щницы. Седален, глас 8 Ка́я темни́ца не име́ тебе́ ю́зника?/ Ка́я же Це́рковь не и́мать тя вити́ю?/ Дама́ск великому́дрствует о тебе́, Па́вле, ве́де бо тя запя́та све́том;/ Рим, твою́ кро́вь прие́мый, и той хва́лится,/ но и Тарс мно́жае ра́дуется и лю́бит, почита́я твои́ пелены́./ Пе́тре, ве́ры ка́меню, Па́вле, похвало́ вселе́нныя,/ от Ри́ма соше́дшеся, утверди́те нас. Песнь 4 Ирмос: Сей Бог наш, от Де́вы вопло́щся/ и естество́ обожи́в,/ Его́же воспева́юще, вопие́м:/ сла́ва си́ле Твое́й, Го́споди. Припев: Святы́й апо́столе Пéтре, моли́ Бо́га о на́с. Челове́ком ловца́ тя, я́коже обеща́ Христо́с, соде́ла Боже́ственна Своея́ Це́ркве,/ пе́рвому вручи́в корми́ла. Припев: Святы́й апо́столе Пéтре, моли́ Бо́га о на́с. Тобо́ю умоля́емь Жизнода́вец Иису́с,/ вяза́ти же и реши́ти да́вый тебе́ вла́сть, Пе́тре, да бу́дет ми ми́лостив. Сла́ва Отцу́ и Сы́ну и Свято́му Ду́ху. Христо́во Ца́рствие отве́рсти приле́жно моли́ся, Пе́тре,/ Боже́ственную твою́ па́мять ве́рою несумне́нною чту́щим. И ны́не и при́сно и во ве́ки веко́в. Ами́нь. Богородичен: Госпоже́ Всепе́тая, Богороди́тельнице,/ моя́ помышле́ния Твои́ми моли́твами очи́стивши,/ покажи́ мя благопло́дна, Ма́ти всех Бо́га. Песнь 5 Ирмос: Стяжа́вый ны, избра́нныя лю́ди/ Кро́вию Твое́ю, Го́споди,/ Твой мир да́ждь нам,/ во единомы́слии сохраня́я ста́до Твое́. Припев: Святы́й апо́столе Пéтре, моли́ Бо́га о на́с. И́же от любве́ прии́м дерзнове́ние к Бо́гу,/ досто́йно чуди́м быва́ше лове́ц и неве́жда,/ чудоде́йствуя пресла́вно благода́тию. Припев: Святы́й апо́столе Пéтре, моли́ Бо́га о на́с. Не зла́то Тебе́ ра́ди, ни сребро́, Христе́,/ Боже́ственный Твой апо́стол, но доброде́тель стяжа́в,/ чуде́с обогати́ся си́лою. Сла́ва Отцу́ и Сы́ну и Свято́му Ду́ху. Исправля́хуся стопы́ и гле́зне хромы́х, де́йственным твои́м глаго́лом:/ Боже́ственным бо Ду́хом соверша́хуся пресла́вныя ве́щи. И ны́не и при́сно и во ве́ки веко́в. Ами́нь. Богородичен: Воплоти́ся Бог по ипоста́си, Чи́стая, из Тебе́ пло́тию соединя́емь,/ пребы́в неизме́нен, по Боже́ственному существу́ безпло́тен. Песнь 6 Ирмос: В ки́те, Христе́, тридне́вновав, Ио́на/ прописа́ Тя, Безсме́ртнаго, я́ко ме́ртва во́лею/ в се́рдце земне́м тридне́вновавша. Припев: Святы́й апо́столе Пéтре, моли́ Бо́га о на́с. Я́коже дре́вле, Христе́, десни́цею Твое́ю по воде́ пе́ша ходя́ща Петра́ спасл еси́,/ и мене́, потопля́ема бу́рею лю́тых напа́стей, спаси́, я́ко Милосе́рд. Припев: Святы́й апо́столе Пéтре, моли́ Бо́га о на́с. Оста́вил еси́, о Пе́тре, не су́щая,/ и су́щая дости́гл еси́, я́коже не́кий купе́ц,/ и я́ве улови́л еси́ би́сер, Христа́, многоце́нный. Сла́ва Отцу́ и Сы́ну и Свято́му Ду́ху. Искуша́ти безу́мно покуси́вшияся Ду́ха Пресвята́го, Пе́тре, умертви́л еси́:/ Его́же богосло́вил еси́ ты пе́рвее,/ я́ве испове́дав Бо́га, всеблаже́нне. И ны́не и при́сно и во ве́ки веко́в. Ами́нь. Богородичен: Вся́каго вы́шша существа́ Сло́во Бо́жие родила́ еси́, воплоще́нно нам,/ те́мже Богоро́дицу Тя устна́ми же и душе́ю пропове́даем. Кондак, глас 2 Тве́рдыя и Боговеща́нныя пропове́датели,/ верх апо́столов Твои́х, Го́споди,/ прия́л еси́ в наслажде́ние благи́х Твои́х и поко́й:/ боле́зни бо о́нех и сме́рть прия́л еси́ па́че вся́каго всепло́дия,/ Еди́не, све́дый серде́чная. Икос Уясни́ мои́ язы́к, Спа́се мои́, разшири́в моя́ уста́/ и испо́лнив я, умили́ се́рдце мое́,/ да, я́же глаго́лю, после́дую и, я́же у́бо учу́, сотворю́ пе́рвее:/ всяк бо творя́ и уча́, рече́, сей вели́к е́сть./ А́ще бо глаго́лю, и не творю́, я́ко ме́дь звеня́щая вменю́ся;/ те́мже рещи́ ми подо́бная и твори́ти поле́зная да́руй,/ Еди́не, све́дый серде́чная. Песнь 7 Ирмос: В нача́ле Безнача́льное Сло́во,/ со Отце́м и Ду́хом, Сын Единоро́дный,/ благослове́н еси́, и превозноси́мый/ Бо́же оте́ц на́ших. Припев: Святы́й апо́столе Пéтре, моли́ Бо́га о на́с. Ми́лостивному, Боже́ственным про́мыслом Христо́вым наказу́емь,/ подо́битися попуще́н был еси́, пре́жде стра́сти, Пе́тре,/ отверже́ния подпа́сти волне́нию. Припев: Святы́й апо́столе Пéтре, моли́ Бо́га о на́с. Тебе́ Христо́с, первозва́нному и зело́ возлю́бленному,/ я́ко председа́телю благосла́вну апо́столов, пе́рвому явля́ется, воскре́с от гро́ба. Припев: Святы́й апо́столе Пéтре, моли́ Бо́га о на́с. Твое́ трикра́тное, е́же пре́жде стра́сти, исцеля́я отверже́ние, Влады́ка/ трикра́тным боговеща́нным, Пе́тре, вопроше́нием утвержда́ет любо́вь. Сла́ва Отцу́ и Сы́ну и Свято́му Ду́ху. Е́же ко Христу́, Пе́тре, любле́ния,/ предлага́л еси́ свиде́теля и Всеви́дящаго я́ко Бо́га Сло́ва,/ те́мже и люби́мое вруча́ет тебе́ ста́до. И ны́не и при́сно и во ве́ки веко́в. Ами́нь. Богородичен: Я́же во утро́бе Преве́чное,/ от Отца́ возсия́вшее Бо́га Сло́во пло́тию заче́ншую,/ вси ублажа́ем, я́ко Ма́терь всех Бо́га. Песнь 8 Ирмос: Вся́ческая нося́й непристу́пною Твое́ю си́лою, Христе́,/ преподо́бныя Твоя́ о́троки в пла́мени ороси́л еси́, зову́щия:/ благослови́те, вся дела́ Госпо́дня, Го́спода. Припев: Святы́й апо́столе Пéтре, моли́ Бо́га о на́с. Возде́жут твои́ ру́це и ко кресту́ тя препоя́шут, –/ Влады́ка предре́к, Пе́тре, повелева́ет после́довати зову́щу:/ благослови́те, вся дела́ Госпо́дня, Го́спода. Припев: Святы́й апо́столе Пéтре, моли́ Бо́га о на́с. Благода́ти сло́вом Ене́я, у́бо разсла́бленна лю́те,/ Тави́фу же уме́ршую, чудоде́йствуя, воскреси́л еси́, зову́щия:/ благослови́те, вся дела́ Госпо́дня, Го́спода. Сла́ва Отцу́ и Сы́ну и Свято́му Ду́ху. И́же Петру́ язы́ки очище́ны пове́дав, Христе́,/ духо́вною заре́ю и мне помышле́ния очи́сти, зову́щу:/ благослови́те, вся дела́ Госпо́дня, Го́спода. И ны́не и при́сно и во ве́ки веко́в. Ами́нь. Богородичен: Всесвята́я Де́во, Я́же Бо́га Сло́ва ро́ждшая пло́тию,/ души́ моея́ мрак Твои́ми моли́твами отгна́вши, просвети́, взыва́юща:/ благослови́те, вся дела́ Госпо́дня, Го́спода. Песнь 9 Ирмос: Тя, пресла́вную Неве́сту и Всесвяту́ю Богоро́дицу,/ Зижди́теля ро́ждшую неви́димых же и всех ви́димых,/ пе́сньми велича́ем. Припев: Святы́й апо́столе Пéтре, моли́ Бо́га о на́с. Твоя́ преизя́щная благода́ть сла́вится досто́йно,/ се́ни бо твое́й стра́сти немощны́х, Пе́тре, отгоня́ющая,/ те́мже тя велича́ем. Припев: Святы́й апо́столе Пéтре, моли́ Бо́га о на́с. Мечта́ньми Си́мона волхва́ богобо́рца взята́ к возду́шней высоте́,/ низложи́в неизглаго́ланною Боже́ственною си́лою,/ Петр ублажа́ется. Припев: Святы́й апо́столе Пéтре, моли́ Бо́га о на́с. Согреше́нии разреше́ние моли́твами твои́ми пода́ждь,/ просвеще́ние же се́рдца и весе́лие ду́ха пою́щим па́мять твою́, апо́столе. Сла́ва Отцу́ и Сы́ну и Свято́му Ду́ху. Твоя́ вся испо́лнена сла́вы, освяще́ния же и чуде́с:/ словеса́, мо́щи, пе́рсть и ве́рою, Пе́тре, покланя́емыя и любо́вию Боже́ственныя вери́ги. И ны́не и при́сно и во ве́ки веко́в. Ами́нь. Богородичен: Твое́ и́мя Плод чре́ва соде́я лико́вника пе́снь пе́ти Тебе́,/ И́же ра́дость ро́ждши,/ велегла́сно – ра́дуйся – провещава́юща. Светилен Апо́столов вси верх воспое́м, Петра́ и Па́вла Боже́ственныя,/ вселе́нныя свети́льники, пропове́дники ве́ры, богосло́вныя трубы́, уче́ний сказа́тели,/ церко́вныя столпы́ и разори́тели ле́сти. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Вели́ко и пресла́вно рождества́ Твоего́ та́инство, Богора́дованная Отрокови́це и Богома́ти Де́во,/ проро́цы пропове́даша, апо́столи научи́ша, му́ченицы испове́даша,/ А́нгели же воспева́ют и челове́цы покланя́ются.