Тропари, кондаки и величания

Страдальчески подвизався добре, со сострадальцы твоими, Феодоте,/ и венцы почести приясте с честными страстотерпицами девами.// Темже Христа Бога молите непрестанно о всех нас.

Вся красная мира сего, яко суетная, презревши/ и тело твое постом и бдением изнуривши,/ непрестанными молитвами Богу угодила еси,/ преподобная Евфросиние,/ и, дар исцелений от Него прияти сподобльшися,/ слепому прозрение и многим недужным иcцеление даровала еси./ Темже радостно взываем, глаголюще:// слава Богу, прославляющему святыя Своя.

По земнем вдовстве Небесному Жениху себе уневестивши/ и в княжестем чертозе подвижнически поживши,/ послежде и чертог, и чад твоих/ Бога ради оставила еси, преподобная Евфросиние,/ и вшедши во обитель, тобою созданную,/ и во иночестем образе многи подвиги показала еси,/ и святое твое житие по благодати Божией блаженною кончиною увенчала еси./ И ныне предстоящи Христу Богу,// моли спастися душам нашим.

Звезду пресветлую,/ богоразумия светом просвещшаго языки/ апостола Христова Андроника восхвалим/ и с ним во благовестии потрудившуюся Иунию премудрую, вопиюще:// молите Христа Бога непрестанно о всех нас.

Апостоли святии,/ молите Милостиваго Бога,/ да прегрешений оставление// подаст душам нашим.

В дому Божии, яко финикс, процвел еси,/ плоды же добродетелей Господеви принесл пощением изрядным,/ отче преподобне,/ темже и ублажаешися,// яко Безплотных равностоятелен.

Пустынный житель, и в телеси Ангел,/ и чудотворец явился еси, богоносе отче наш Феодоре:/ постом, бдением, молитвою небесная дарования приим,/ исцеляеши недужныя и души верою притекающих ти./ Слава Давшему тебе крепость,/ слава Венчавшему тя,// слава Действующему тобою всем исцеления.

Ангельскому житию поревновав, преподобне,/ вся земная оставив, ко Христу притекл еси/ и, Того заповедьми ограждся,/ явился еси столп непоколебим от вражиих нападаний./ Тем зовем ти:/ радуйся, Ефреме, светило пресветлое.

От юности твоей весь Богови поработился еси, блаженне,/ и Того ради любве отечество и род оставил еси,/ в пустыню вселився,/ в нейже жестокое житие показав,/ и чудес дарования от Бога приял еси,/ Ефреме преподобне./ Моли Христа Бога, да спасет души наша.

От высокоумия искус прийм смиренномудрия,/ благодатию Божиею явился еси рачитель, Богоносне Серапионе./ Желанием бо Божественный любве вжигаем,/ житейския молвы оставль,/ ревнитель учителю твоему Евфросину был еси,/ безмолвием и жестоким пребыванием последуя Христу:/ бдением же, и молитвою, и постом образ был еси спостником твоим;/ ныне же молися Господеви, Богоблаженне,/ спастися душам нашим.

Изрядством жития чистоту девства приим, Серапионе,/ и вся красная мира сего возненавидев,/ Христа Единаго возлюбил еси./ Сего ради во внутреннюю пустыню вселився и со зверьми живый,/ весь Христов спостник и друг Евфросина учителя твоего был еси,/ тем же и молим тя, поминай нас, чтущих святую память твою, да зовем ти:/ радуйся, пустынныя похвало, преподобне отче наш.

В пустыни безмолвствуя,/ единствующу тя, Богоносе, взыскующу ти Господа,/ Богу же тебе не оставльшу единому быти в пустыни,/ и Того повелением снидошася к тебе неколико братии,/ с нимиже ти молящуся Господеви,/ Троице пречестен храм воздвиже,/ в немже предстояще, преподобне Пахомие,/ молися о спасении душ наших.

Житейских молв, преподобне, отвергся/ и, яко птищ, обрете себе в пустыни безмолвие,/ в молитвах и бдении прилежа Богови,/ преподобне отче Пахомие,/ и остави древнее пребывание,/ и отыде в пустыню, и в ней водворися,/ и состави обитель во Имя Пресвятыя Троицы,/ и процвел еси, аки финикс,/ и бысть образ утешения духовнаго./ Темже, преподобне Пахомие,/ моли Пресвятую Троицу спастися душам нашим.

Светильник светел показался еси в концех,/ пустыню же грады сотворил еси множествы монашескими,/ сам себе распен, крест твой на рамо взем,/ и воздержанием тело изнурил еси,/ моля непрестанно о всех нас.

Слез твоих теченьми пустыни безплодное возделал еси,/ и иже из глубины воздыханьми во сто трудов уплодоносил еси,/ и был еси светильник вселенней, сияя чудесы, Пахомие отче наш,/ моли Христа Бога спастися душам нашим.

Своего епископска сана тезоименство храня,/ сирых, вдовиц и всех, зле страждущих,/ сам собою посещал еси любезне/ и, милостынею довольне тех ущедряя, яко отец,/ сподобился еси Ангелы на освящение церкве Печерския, святителю Исаие,/ принесен быти чудне,/ с нимиже молися Господеви о душах наших.

Новаго Завета Бога с человеки хранителие,/ евангельских заповедей исполнителие,/ в добрых делех совершеннии,/ святителие мудрии, преподобнии и праведнии Богоноснии,/ землю Ростовскую и Ярославскую/ облагоухавшии молитвами,/ именуемии вси и неименуемии,/ явленнии и сокровеннии,/ предстояще Живоначальней Троице,/ не отступайте от нас духом/ и Божественное милосердие преклоните к нам,/ да с дерзновением славу в Вышних Богу вси приносим,/ да пребудет на земли мир нерушимый,/ любовь же и благоволение/ посреде всех человек.

Яко во вселенней трие велицыи святителие,/ бысте вы благочестием и добродетелию наставницы Ростову/ и, благоверием приимше паству, стадо Христово упасосте/ и вечный покой наследовасте./ Молим вас, святии чудотворцы,/ подати добродетелем исправление,/ и болезнем нашим исцеление, и соблазном избавление,/ и душам спасение, да зовем вам:/ радуйтеся, граду нашему Ростову похвала и утверждение.

Яко гром, возгремел еси Божественными твоими учении в Российстей земли/ и явился еси светильник пресветел,/ осияя светом Богоразумия, Исаие блаженне./ Темже вопием тй:/ Христа Бога моли непрестанно о всех нас.

В иноцех святыя лавры Печерския/ благоискусен показавыйся/ и во архиерейстем сане добр пастырь/ своему стаду, Боголюбезне Исаие, бывый,/ моли о нас Пастыреначальника Христа Бога/ да помилует и спасет души наша.