Молитвы

Минея, 19 Июля, Кано́н свята́го Глас 6 Песнь 1 Ирмос: Я́ко по су́ху, пешеше́ствовав Изра́иль/ по бе́здне стопа́ми,/ гони́теля фарао́на/ видя потопля́ема,/ Бо́гу побе́дную песнь пои́м, вопия́ше. Припев: Святы́й благове́рный кня́же Рома́не, моли́ Бо́га о на́с. Я́ко по су́ху, прете́кл еси́, пресла́вне кня́же,/ волну́ющееся бу́рею бед и скорбе́й мо́ре жития́ сего́,/ окормля́емь благода́тию Пресвята́го Ду́ха,/ и к ти́хому приста́нищу жи́зни ве́чныя дости́гл еси́. Припев: Святы́й благове́рный кня́же Рома́не, моли́ Бо́га о на́с. Су́щу ти еще́ во младе́нчестве,/ егда́ нача́л еси́ познава́ти ве́щи, о́крест тебе́ су́щия,/ ум твой явля́ше смысл здра́вый, се́рдце же блага́я чу́вствия/ на утеше́ние роди́телей и сро́дников твои́х. Сла́ва Отцу́ и Сы́ну и Свято́му Ду́ху. Наставля́емый от благочести́выя твоея́ ма́тере/ в позна́нии уче́ния ве́ры и благоче́стия христиа́нскаго,/ всеусе́рдно тому́ внима́л еси́,/ в уме́ же и се́рдце твое́м то написова́л еси́/ и в житии́ твое́м то исполня́ти тща́лся еси́. И ны́не и при́сно и во ве́ки веко́в. Ами́нь. Богородичен: Пронарече́нная от ве́ка и родо́в Творцо́м вся́ческих в Ма́терь по пло́ти Бо́га Сло́ва,/ моли́ Того́, Всеблага́го, да просвети́т нас, омраче́нных грехи́ мно́гими,/ да упра́вит нас к ве́чней жи́зни и спасе́нию. Песнь 3 Ирмос: Несть свят,/ я́коже Ты, Го́споди Бо́же мой,/ вознесы́й рог ве́рных Твои́х, Бла́же,/ и утверди́вый нас на ка́мени/ испове́дания Твоего́. Припев: Святы́й благове́рный кня́же Рома́не, моли́ Бо́га о на́с. Несть ин бог, ра́зве Творца́ не́бу и земли́,/ в Его́же пресвято́е И́мя крести́лся еси́,/ Его́же позна́л еси́, блаже́нне, приходя́ в во́зраст о́троческий,/ в Него́же и пра́во ве́ровал еси́ и Ему́же благоче́стно покланя́лся еси́. Припев: Святы́й благове́рный кня́же Рома́не, моли́ Бо́га о на́с. От ю́ности твоея́ посвяще́н быв Бо́гу,/ Того́ благода́тию просвеща́емь и укрепля́емь был еси́/ и ми́лостию Его́ от напра́сныя сме́рти сохране́н был еси́. Сла́ва Отцу́ и Сы́ну и Свято́му Ду́ху. Обогаща́я ум твой позна́нием и́стины/ и напоева́я се́рдце твое́ благи́ми чу́вствовании и жела́нии,/ непреста́нно устремля́лся еси́ к исполне́нию за́поведей и оправда́ний Госпо́дних. И ны́не и при́сно и во ве́ки веко́в. Ами́нь. Богородичен: Воспита́вшася в хра́ме Госпо́днем, Пресвята́я Де́во Богоро́дице,/ возбуди́ в нас, гре́шных, любо́вь к усе́рдному посеще́нию хра́мов Бо́жиих,/ ко псалмо́м и пе́снем духо́вным. Седален, глас 4 Тече́ние соверши́в и́стинное, мучи́телей всю кре́пость победи́л еси́,/ и прия́л еси́ вене́ц от руки́ Вседержи́теля, Рома́не, кня́же всече́стне,/ и соде́лался еси́ а́нгелов соприча́стник. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Сло́во О́тчее, Христа́ Бо́га на́шего,/ от Тебе́ воплоти́вшагося, позна́хом, Богоро́дице Де́во,/ Еди́на Чи́стая, Еди́на Благослове́нная./ Тем непреста́нно Тя, воспева́юще, велича́ем. Песнь 4 Ирмос: Христо́с моя́ си́ла,/ Бог и Госпо́дь,/ честна́я Це́рковь/ боголе́пно пое́т, взыва́ющи,/ от смы́сла чи́ста, о Го́споде пра́зднующи. Припев: Святы́й благове́рный кня́же Рома́не, моли́ Бо́га о на́с. Христо́с моя́ си́ла, кре́пость и утвержде́ние, – взыва́л еси́, Боголюби́вый кня́же,/ и сего́ ра́ди всегда́ устремля́л еси́ ум твой и се́рдце к Нему́,/ в ско́рбех же и беда́х всегда́ прибега́л еси́ к Нему́. Припев: Святы́й благове́рный кня́же Рома́не, моли́ Бо́га о на́с. Возлюби́в все́ю душе́ю твое́ю и все́ю кре́постию твое́ю Го́спода Иису́са,/ воспламеня́л еси́ себе́ жела́нием всегда́ твори́ти уго́дное Ему́/ и не прогневля́ти Его́ де́лы и словесы́ неподо́бными. Сла́ва Отцу́ и Сы́ну и Свято́му Ду́ху. Ходя́ во всех за́поведех Бо́жиих непоро́чно,/ неукло́нно и всеусе́рдно соблюда́л еси́ пра́вила святы́х апо́стол и отце́в Це́ркве/ и явля́л еси́ в себе́ достоподража́тельный о́браз жития́ благоче́стнаго. И ны́не и при́сно и во ве́ки веко́в. Ами́нь. Богородичен: Удиви́ла еси́, Богоневе́сто, чистото́ю души́ Твоея́/ и свя́тостию жития́ Твоего́ чи́ны а́нгельския/ и соде́лалася еси́ благоприя́тное вмести́лище Невмести́маго;/ те́мже вси ро́ди челове́честии и вся си́лы Небе́сныя непреста́нно прославля́ют Тя. Песнь 5 Ирмос: Бо́жиим све́том Твои́м, Бла́же,/ у́тренюющих Ти ду́ши любо́вию озари́, молю́ся,/ Тя ве́дети, Сло́ве Бо́жий,/ и́стиннаго Бо́га,/ от мра́ка грехо́внаго взыва́юща. Припев: Святы́й благове́рный кня́же Рома́не, моли́ Бо́га о на́с. Боже́ственным све́том озаре́н быв, благоче́стне кня́же,/ мрак грехо́вный от себе́ отгна́л еси́ и в млады́х еще́ ле́тех суету́ благ ми́ра сего́ узре́л еси́,/ всегда́ же к Го́рнему Ца́рствию умо́м твои́м взира́л еси́/ и се́рдцем устремля́лся еси́. Припев: Святы́й благове́рный кня́же Рома́не, моли́ Бо́га о на́с. Устремля́я непреста́нно дух твой ко Го́споду и горя́ любо́вию к Нему́,/ возлюби́л еси́ все́ю душе́ю и бли́жния твоя́, я́ко себе́,/ я́коже запове́да Госпо́дь. Сла́ва Отцу́ и Сы́ну и Свято́му Ду́ху. Имы́й нелицеме́рную и кре́пкую любо́вь к бли́жним,/ явля́л еси́ им, благосе́рде кня́же, всегда́ сострада́ние и по́мощь,/ утеша́я печа́льныя и ободря́я стра́ждущия. И ны́не и при́сно и во ве́ки веко́в. Ами́нь. Богородичен: Презе́льную любо́вь иму́щи ко Го́споду/ и ве́лие милосе́рдие к ро́ду челове́ческому, Пресвята́я Влады́чице,/ моли́ Того́, Всеблага́го,/ да поми́лует и спасе́т нас по вели́цей ми́лости Свое́й. Песнь 6 Ирмос: Жите́йское мо́ре,/ воздвиза́емое зря напа́стей бу́рею,/ к ти́хому приста́нищу Твоему́ прите́к, вопию́ Ти:/ возведи́ от тли живо́т мой, Многоми́лостиве. Припев: Святы́й благове́рный кня́же Рома́не, моли́ Бо́га о на́с. Жите́йское мо́ре страны́ Ряза́нския/ зело́ волнова́шеся бу́рею нападе́ний на ню злочести́вых супоста́т с огне́м и мече́м,/ ты же, Боголюби́вый кня́же, сохране́н быв от зло́бы враго́в Десни́цею Всевы́шняго,/ пре́дал еси́ себе́ святе́й во́ли Его́. Припев: Святы́й благове́рный кня́же Рома́не, моли́ Бо́га о на́с. Кровожа́днии монго́ли, наше́дше на зе́млю Ру́сскую, проли́ша пото́ки кро́ве христиа́нския,/ опустоши́ша гра́ды и ве́си Ряза́нския,/ ты же усе́рдно моли́л еси́ Го́спода,/ да укрепи́т страда́ющия лю́ди Своя́. Сла́ва Отцу́ и Сы́ну и Свято́му Ду́ху. Имы́й любвеоби́льное се́рдце,/ ты, благосе́рде кня́же, явля́л еси́ си́рым и вдови́цам и про́чим бе́дствующим лю́дем,/ ели́ко мо́щно бя́ше, потре́бную по́мощь. И ны́не и при́сно и во ве́ки веко́в. Ами́нь. Богородичен: Премилосе́рдая Влады́чице, Защи́тнице и Утеше́ние непра́ведно гони́мых,/ защити́ и уте́ши рабы́ Твоя́, озлобля́емыя от нечести́вых челове́к,/ те́плыми Твои́ми к Бо́гу моли́твами. Кондак, глас 2 Оклеве́танный пред ха́ном в хуле́нии злове́рия его́,/ дерзнове́нно предста́л еси́ суди́щу нечести́вому;/ убоя́вся же Стра́шнаго Суда́ Христо́ва,/ ха́нское повеле́ние и страх поплева́л еси́, святы́й Рома́не./ Те́лом, я́ко розга́, ре́жемый,/ в страда́ниих уподо́бился еси́ Иа́кову Пе́рсянину/ и яви́лся еси́ великому́ченик изря́дный,/ столп и утвержде́ние Це́ркви Ряза́нстей,/ засту́пник и воево́да Росси́йский пресла́вный. Икос От ю́ности твоея́ вседуше́вно возлюби́в Го́спода,/ всеусе́рдно исполня́л еси́ Его́ святы́я за́поведи,/ ку́пно же име́л еси́ вели́кую любо́вь к бли́жним,/ благотворя́ бе́дствующим, состра́жда стра́ждущим./ Егда́ же прельща́емь и ну́дим был еси́ к отступле́нию от ве́ры Христо́вы/ и прия́тию злове́рия сту́днаго лжепроро́ка Магоме́та,/ яви́л еси́ непоколеби́мую тве́рдость и ди́вное му́жество в самолюте́йших муче́ниих за Христа́/ и яви́лся еси́ великому́ченик изря́дный, столп и утвержде́ние Це́ркви Ряза́нстей,/ засту́пник и воево́да Росси́йский пресла́вный. Песнь 7 Ирмос: Росода́тельну у́бо пещь/ соде́ла А́нгел/ преподо́бным отроко́м,/ халде́и же опаля́ющее/ веле́ние Бо́жие мучи́теля увеща́ вопи́ти:/ благослове́н еси́, Бо́же оте́ц на́ших. Припев: Святы́й благове́рный кня́же Рома́не, моли́ Бо́га о на́с. Я́коже благочести́вии трие́ евре́йстии о́троцы/ ну́дими бя́ху от злочести́ваго царя́ вавило́нскаго к поклоне́нию безду́шному истука́ну,/ та́ко и тя, благоче́стне кня́же, сано́вник царя́ монго́льскаго/ преклоня́ше к прия́тию сту́дныя ве́ры магомета́нския. Припев: Святы́й благове́рный кня́же Рома́не, моли́ Бо́га о на́с. Я́коже о́нии трие́ о́троцы не повину́шася безбо́жному веле́нию царя́,/ та́ко и ты, кня́же, отве́ргл еси́ сове́ты злове́рнаго сано́вника монго́льскаго, глаго́ля:/ христиани́н есмь, и ве́ра Правосла́вная и́стинна есть. Сла́ва Отцу́ и Сы́ну и Свято́му Ду́ху. Ви́дя тя, доблему́дре кня́же, непрекло́нна своему́ сове́ту,/ надме́нный вла́стию свое́ю сано́вник воскипе́ на тя гне́вом и зло́бою/ и посла́ лжи́вое и клеветно́е писа́ние царю́ своему́,/ я́ко ты зело́ поно́сиши его́ и богоху́льствуеши. И ны́не и при́сно и во ве́ки веко́в. Ами́нь. Богородичен: Не опали́лася еси́, Пренепоро́чная Де́во, все́льшимся в Тя Огне́м Божества́,/ но я́коже огнеопа́льная пещь вавило́нская яви́лася еси́/ и источа́еши усе́рдно чту́щим Тя ро́су Боже́ственныя благода́ти. Песнь 8 Ирмос: Из пламене преподо́бным ро́су источи́л еси́/ и пра́веднаго же́ртву водо́ю попали́л еси́:/ вся бо твори́ши, Христе́, то́кмо е́же хоте́ти./ Тя превозно́сим во вся ве́ки. Припев: Святы́й благове́рный кня́же Рома́не, моли́ Бо́га о на́с. Егда́ злове́рный царь Теми́р получи́ клеветно́е писа́ние своего́ сано́вника,/ зело́ воскипе́ гне́вом/ и, егда́ по повеле́нию его́ яви́лся еси́ к нему́,/ именова́ тя оскорби́теля его́ че́сти и богоху́льника. Припев: Святы́й благове́рный кня́же Рома́не, моли́ Бо́га о на́с. Непови́нен сый в клевете́, егда́ возвеща́л еси́ царю́ и́стину,/ но яви́шася лжесвиде́телие, а́ки бы слы́шавшии твое́ злохуле́ние,/ и а́ще свиде́тельствовал еси́ Бо́гом Всеве́дущим твою́ непови́нность,/ злочести́вый царь не хотя́ше ве́ровати словесе́м твои́м. Сла́ва Отцу́ и Сы́ну и Свято́му Ду́ху. Ослепле́н сый свои́м злове́рием,/ царь Теми́р повеле́ тебе́, кня́же, отрещи́ся еди́ныя и́стинныя ве́ры Правосла́вныя,/ прия́ти же сту́дную ве́ру лжепроро́ка Магоме́та,/ ты же, пресла́вне, непоколеби́м пребы́л еси́ и сту́дную ве́ру лжепроро́ка отве́ргл еси́. И ны́не и при́сно и во ве́ки веко́в. Ами́нь. Богородичен: Пресвята́я Влады́чице Богоро́дице,/ тве́рдая и ско́рая Помо́щнице борю́щихся со страстьми́ и прило́ги вра́жиими,/ утверди́ Твое́ю благода́тною по́мощию нас, немощны́х,/ в борьбе́ с лю́тыми и злокова́рными враги́ душ на́ших. Песнь 9 Ирмос: Бо́га/ челове́ком невозмо́жно ви́дети,/ на Него́же не сме́ют чи́ни а́нгельстии взира́ти;/ Тобо́ю бо, Всечи́стая, яви́ся челове́ком/ Сло́во воплоще́нно,/ Его́же велича́юще,/ с Небе́сными во́и Тя ублажа́ем. Припев: Святы́й благове́рный кня́же Рома́не, моли́ Бо́га о на́с. Ви́дев тя, пресла́вне кня́же, непрекло́нна в исполне́нии ве́ры Христо́вы,/ злове́рный царь зело́ разгне́вася и угрожа́ше лиши́ти тя престо́ла кня́жескаго,/ заключи́ в темни́цу, осуди́ на изгна́ние и предаде́ му́кам и сме́рти. Припев: Святы́й благове́рный кня́же Рома́не, моли́ Бо́га о на́с. Услы́шав таковы́я неи́стовыя глаго́лы царя́, кня́же,/ дерзнове́нно рекл еси́ ему́, я́ко ника́коже страши́шися сих угроже́ний./ Тогда́ злове́рный царь разсвирепе́, а́ки разъяре́нный зверь,/ и повеле́ преда́ти тя лю́тым муче́нием и сме́рти. Сла́ва Отцу́ и Сы́ну и Свято́му Ду́ху. Егда́, по темни́чнем заключе́нии, приведе́н быв на ме́сто ка́зни, облича́л еси́ злове́рие монго́л,/ тогда́ слузи́ ца́рстии, не терпя́ще обличе́ния, отре́заша язы́к твой,/ та́же избодо́ша очеса́ твоя́ и отъя́ша еди́н по еди́ному уста́ и ушеса́, персты́ рук твои́х,/ та́же ру́це и но́зе, последи́ же, сне́мше ко́жу с главы́ твоея́,/ усеко́ша ю и вонзо́ша на ко́пия на позо́рище лю́дем. И ны́не и при́сно и во ве́ки веко́в. Ами́нь. Богородичен: Омраче́ннии мгло́ю мирски́я суеты́/ и боговре́дных обы́чаев ми́ра и плотски́х наслажде́ний,/ блужда́ем, окая́ннии, во тьме нече́стия и заблужде́ний,/ но просвети́, Ма́ти Бо́жия, о́чи ума́ на́шего/ и наста́ви нас на стезю́ спасе́ния. Светилен Просвеще́н быв, кня́же, благода́тию Пресвята́го Ду́ха,/ соде́лался еси́ благоприя́тная оби́тель Е́го́/ и в све́те за́поведей Боже́ственных всегда́ ходи́л еси́;/ те́мже ны́не в све́тлостех святы́х предстои́ши лицу́ Бо́жию/ и непреста́нно славосло́виши Его́. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Пресвята́я Де́во, ро́ждшая Преве́чный Свет, просвеща́ющий вся́каго гряду́щаго в мир челове́ка,/ Того́ моли́, Преблага́я, да просвети́т ду́ши на́ша,/ омраче́нныя сту́дными страстьми́ и похотьми́ на́шими.

Минея, 7 Февраля, Ин канон Глас 6 Песнь 1 Ирмос: Я́ко по су́ху, пешеше́ствовав Изра́иль по бе́здне стопа́ми, гони́теля фарао́на ви́дя потопля́ема, Бо́гу, побе́дную пе́снь пои́м, вопия́ше. Припев: Святи́телю, о́тче Парфéние, моли́ Бо́га о на́с. Моле́бное тебе́ пе́ние предначина́я, смуща́юся, о́тче, ка́ко досто́йно е́сть воспева́ти тя́. Оба́че е́же от любве́ приноше́ние мое́ приими́ и устне́ моя́ отве́рзи, я́ко да возвещу́ хвалу́ твою́, Парфе́ние святи́телю. Припев: Святи́телю, о́тче Парфéние, моли́ Бо́га о на́с. Мо́ре страсте́й ты́ немо́кренно мину́л еси́, сла́вне, от вра́г невреди́вся, и́хже ополче́ния во глубину́ преиспо́дния низве́ргл еси́, поя́ Го́сподеви, сла́вно бо просла́вися. Сла́ва Отцу́ и Сы́ну и Свято́му Ду́ху. Погуби́ супоста́ты, гоня́щия мя́, чудоно́сче, се́ бо настиза́ют уже́, и не́сть ми́ избавле́ния, а́ще кто́ не защити́т мя́ от ни́х или́ а́бие не погря́знут, я́коже дре́вле еги́птянов полцы́. И ны́не и при́сно и во ве́ки веко́в. Ами́нь. Богородичен: Рождество́м Твои́м ле́сть бесо́вскую упраздни́вшая, Многомо́щная Всемогу́щаго Ма́ти, и мене́, враго́м прельща́ема, при́сно на бре́г спасе́ния возведи́, пою́щаго Го́сподеви, сла́вно бо просла́вися. Песнь 3 Ирмос: Не́сть свя́т, я́коже Ты́, Го́споди Бо́же мо́й, вознесы́й ро́г ве́рных Твои́х, Бла́же, и утверди́вый на́с на ка́мени испове́дания Твоего́. Припев: Святи́телю, о́тче Парфéние, моли́ Бо́га о на́с. Обнища́вшее лю́те се́рдце мое́ предста́тельством твои́м обогати́, свя́те, и́маши бо вои́стину ве́лие к Бо́гу дерзнове́ние, я́ко Иису́сов подви́жник до́блий, Парфе́ние. Припев: Святи́телю, о́тче Парфéние, моли́ Бо́га о на́с. Душа́ моя́ изнемо́же в боре́ниих и напа́стех и на гно́ищи стра́стнем ны́не низлежи́т, но да возведе́тся от а́да преиспо́дняго, си́лою же Бо́жиею да препоя́шется, моли́ся, святи́телю. Сла́ва Отцу́ и Сы́ну и Свято́му Ду́ху. Расшири́шася уста́ твоя́ на враги́ ро́да челове́ча, моли́тв бо твои́х не терпя́ще, я́ко огне́м опаля́еми, стеня́ще, от тебе́ бежа́ху. Те́м и е́же на на́с неи́стовство и́х упраздни́. И ны́не и при́сно и во ве́ки веко́в. Ами́нь. Богородичен: Тебе́ Симео́н ду́шу ору́жию пройти́ глаго́лаше, е́же и сбы́стся при Кресте́ Сы́на Твоего́. Ско́рбем у́бо на́шим спострада́ти могу́щи, я́ко Сама́ те́х вкуси́вшая го́речи, услади́ и́х на́м, Пречи́стая. Седален, глас 3 Исполнь Ду́ха Божественнаго сый, делы просия благоче́стия,/ священне чудотворче Парфение,/ от ле́сти челове́ки обрати́л еси́,/ боля́щих стра́сти исцеля́я./ О́тче преподо́бне, Христа́ Бо́га моли́/ спасти́ся ду́шам на́шим. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Роди́лся еси́ на земли́, Собезначальный Отцу́,/ принеслся еси́ в це́рковь, Непостижи́мый./ Ра́дуяся же, ста́рец на ру́ки Тя восприят, зовый:/ ны́не отпущаеши, егоже посети́л еси́, по глаго́лу Твоему́,/ благоизволивый спасти́ я́ко Бог род человеческий. Песнь 4 Ирмос: Христо́с моя́ си́ла, Бо́г и Госпо́дь, честна́я Це́рковь Боголе́пно пое́т, взыва́ющи, от смы́сла чи́ста о Го́споде пра́зднующи. Припев: Святи́телю, о́тче Парфéние, моли́ Бо́га о на́с. На стра́жи па́стырстей стоя́л еси́, иера́рше, бо́дрым о́ком ста́до твое́ озира́я, во уны́нии спя́щих возбужда́я, заблужда́ющия возвраща́я, хи́щники же дале́че отгоня́я устраше́нием Боже́ственных глаго́л. Припев: Святи́телю, о́тче Парфéние, моли́ Бо́га о на́с. О пи́ще теле́сней небре́гл еси́, Бо́жия любве́ насыща́яся при́сно жела́нием ненасы́тным. Моя́ бо пи́ща е́сть, вопия́л еси́, досточу́дне, е́же твори́ти во́лю Го́спода моего́ и де́ло Его́ соверши́ти. Сла́ва Отцу́ и Сы́ну и Свято́му Ду́ху. Огра́да ми́ бу́ди от вся́каго прило́га и напа́сти сопроти́вныя, да ника́ко лука́ваго сне́дию бу́ду, но да же́ртва сотворю́ся Бо́гови прия́тная твои́ми, свя́те, моли́твами. И ны́не и при́сно и во ве́ки веко́в. Ами́нь. Богородичен: Очище́ния не тре́бующая, дне́сь по зако́ну очища́ешися и, Сы́на нося́щи, во хра́м вхо́диши. Срета́ет же Тебе́ Симео́н, вели́чие Тебе́ возвеща́я и ско́рбь несказа́нную. Песнь 5 Ирмос: Бо́жиим све́том Твои́м, Бла́же, у́тренюющих Ти́ ду́ши любо́вию озари́, молю́ся, Тя́ ве́дети, Сло́ве Бо́жий, и́стиннаго Бо́га, от мра́ка грехо́внаго взыва́юща. Припев: Святи́телю, о́тче Парфéние, моли́ Бо́га о на́с. Но́щь глубока́ грехо́внаго помраче́ния на мя́ нападе́, но твои́ми, светоно́сче, моли́твами све́т невече́рний да возсия́ет ми́, стопы́ моя́ на и́стинный пу́ть направля́я. Припев: Святи́телю, о́тче Парфéние, моли́ Бо́га о на́с. Стра́ха ра́ди Бо́жия ду́х любве́ в се́рдце твое́ прия́л еси́, па́стве твое́й спасе́ние породи́в, а́ще же и мно́го боле́зновал еси́, оба́че сугу́бо и возвесели́ тя́ всесладча́йший Иису́с, Госпо́дь на́ш. Сла́ва Отцу́ и Сы́ну и Свято́му Ду́ху. Ме́ртвыя воскреси́л еси́, бе́сы изгна́л еси́ и вся́ челове́ков неду́ги цели́л еси́ в житии́ твое́м, чудотво́рче, но и ны́не притека́ющих к тебе́ спаса́еши от вся́каго озлобле́ния. И ны́не и при́сно и во ве́ки веко́в. Ами́нь. Богородичен: Безболе́зненно Христа́ Бо́га пло́тию ро́ждшая, но и ма́терних скорбе́й не избе́гшая, на́ша, я́же в совлече́нии дре́вняго челове́ка, боле́зни утиши́ и в но́ваго облещи́ся помози́ на́м, Всепе́тая. Песнь 6 Ирмос: Жите́йское мо́ре, воздвиза́емое зря́ напа́стей бу́рею, к ти́хому приста́нищу Твоему́ прите́к, вопию́ Ти́: возведи́ от тли́ живо́т мо́й, Многоми́лостиве. Припев: Святи́телю, о́тче Парфéние, моли́ Бо́га о на́с. Бе́здну милосе́рдия Бо́жия беззако́ний мои́х бе́здною преогорчи́х, и покры́ мя́ се́нь сме́ртная, ко Го́споду же воззре́ти отню́д не могу́, но моли́твами твои́ми, о́тче, ко исправле́нию жития́ да возведу́ся. Припев: Святи́телю, о́тче Парфéние, моли́ Бо́га о на́с. Смуще́ние по́мысл мои́х укроти́, святи́телю, тишину́ Боже́ственную, я́же в се́рдцы твое́м почива́ше, и мне́ низводя́ в ду́шу, пребога́те. Сла́ва Отцу́ и Сы́ну и Свято́му Ду́ху. В тиме́ние страсте́й преслуша́нием я́коже низверго́хся иногда́, та́ко, лю́те смири́выйся ны́не, на спасе́ния стези́ да возставля́юся, о́тче Парфе́ние, предста́тельством твои́м. И ны́не и при́сно и во ве́ки веко́в. Ами́нь. Богородичен: Поноше́ние нападе́ на ду́шу мою́, и жда́х соскорбя́щаго, и не бе́, и утеша́ющих и не обрето́х, у́бо к Тебе́ притека́ю, Богома́ти, да всеси́льным Твои́м умири́ши лю́те мя́, обурева́ема, в приста́нище безстра́стия наставля́ющи. Кондак, глас 3 Чуде́с прия́л еси́ Боже́ственную благода́ть, Богому́дре свяще́нне Парфе́ние, чудотво́рче Богоно́се, вся́ ве́рных стра́сти очища́я, ду́хи лука́вства, о́тче, изгоня́я. Сего́ ра́ди тя́ воспева́ем, я́ко вели́каго таи́нника Бо́жия благода́ти. Песнь 7 Ирмос: Росода́тельну у́бо пе́щь соде́ла А́нгел преподо́бным отроко́м, халде́и же опаля́ющее веле́ние Бо́жие мучи́теля увеща́ вопи́ти: благослове́н еси́, Бо́же, оте́ц на́ших. Припев: Святи́телю, о́тче Парфéние, моли́ Бо́га о на́с. После́довал еси́ Христо́ви все́м се́рдцем твои́м по все́м путе́м Его́ ско́рбным и за́поведи Его́ преступи́ти па́че вся́каго зла́ убоя́лся еси́. Те́мже и яви́ тебе́ лице́ Свое́ возлюби́вый Тя́, благослове́нный Бо́г оте́ц на́ших. Припев: Святи́телю, о́тче Парфéние, моли́ Бо́га о на́с. В седмери́цею разжже́нной пе́щи искуше́ний неврежде́н сохрани́выйся, о́тче Парфе́ние, и мене́ из пла́мене грехо́внаго неопа́льна изми́, да па́ки в чудесе́х твои́х просла́вится благослове́нный Бо́г оте́ц на́ших. Сла́ва Отцу́ и Сы́ну и Свято́му Ду́ху. Душе́ю сокруше́нною и се́рдцем смире́нным Иису́сови моли́твы принося́ в житии́ твое́м, до́бре услы́шан бы́л еси́, у́бо и о мне́ ны́не помоли́ся, да уще́дрит тя́ благослове́нный Бо́г оте́ц на́ших. И ны́не и при́сно и во ве́ки веко́в. Ами́нь. Богородичен: О́гнь Божества́ во чре́ве неопа́льно прие́мшая, Де́во, и мене́ приима́ти Сего́ Пло́ти и Кро́ви сподобля́й при́сно, да стра́сти моя́ попали́т благослове́нный Бо́г оте́ц на́ших. Песнь 8 Ирмос: Из пла́мене преподо́бным ро́су источи́л еси́ и пра́веднаго же́ртву водо́ю попали́л еси́: вся́ бо твори́ши, Христе́, то́кмо, е́же хоте́ти. Тя́ превозно́сим во вся́ ве́ки. Припев: Святи́телю, о́тче Парфéние, моли́ Бо́га о на́с. Зла́та и бога́тства не поклони́лся еси́ куми́ру, сокро́вище се́рдца твоего́ в Бо́зе полага́я, нестяжа́ние же возлюби́в, кро́тостию и нищелю́бием преукраси́лся еси́, сла́вне. Припев: Святи́телю, о́тче Парфéние, моли́ Бо́га о на́с. А́ще и препя́тия вы́ну полага́ше тебе́ в до́брых твои́х де́лех кня́зь тьмы́, оба́че ника́коже тебе́ вреди́в, са́м посрамля́емь быва́ше, всезло́бный, и твое́ю, о́тче, моли́твою опаля́емь. Сла́ва Отцу́ и Сы́ну и Свято́му Ду́ху. Пу́ть жития́ простра́нный, сла́достию прельща́ющий на́с, облича́й, му́дре, я́ко лжи́вый и ско́рбь вели́кую нанося́щий душа́м, я́ко да ра́достно сотвори́м у́зкаго пути́ терно́вное ше́ствие. И ны́не и при́сно и во ве́ки веко́в. Ами́нь. Богородичен: Две́ре Благослове́нная, Е́юже спасе́ние в ми́р вни́де, Цари́це Блага́я, отве́рзи ми́ вхо́ды Небе́снаго жи́тельства, преступле́нием заключе́нныя иногда́. Песнь 9 Ирмос: Бо́га челове́ком невозмо́жно ви́дети на Него́ же не сме́ют чи́ни А́нгельстии взира́ти; Тобо́ю бо, Всечи́стая, яви́ся челове́ком Сло́во воплоще́нно, Его́же велича́юще, с Небе́сными во́и Тя́ ублажа́ем. Припев: Святи́телю, о́тче Парфéние, моли́ Бо́га о на́с. Святи́телей сла́во, о́тче Парфе́ние, уче́ньми твои́ми низложи́вый иногда́ злосла́вия вознесе́нную горды́ню, и мои́х страсте́й воста́ние укроти́, смире́ние ми́ подая́ и се́рдце сокруше́нное. Припев: Святи́телю, о́тче Парфéние, моли́ Бо́га о на́с. Поще́нием кре́пким и моли́твою ору́жие, бесо́м стра́шное, восприя́л еси́, о́тче, ро́д бо се́й ничи́м же, кроме́ си́х, побежда́ется. Те́мже и мне́ в доброде́телех преуспева́ти пода́ждь. Сла́ва Отцу́ и Сы́ну и Свято́му Ду́ху. Тро́ицы бо́дрый служи́телю и покая́ния пропове́дниче, уны́ния моего́ дрема́ние отжени́ и бо́дрствовати помози́ ми́, свя́те Парфе́ние, сего́ же прося́, моле́ние мое́ убо́гое скончава́ю. И ны́не и при́сно и во ве́ки веко́в. Ами́нь. Богородичен: Всеблаже́нная Де́во и но́выя благода́ти свяще́нный киво́те, заве́т Тво́й и обетова́ние ро́ду христиа́нскому помяни́ и ско́ро помощи́ мне́ потщи́ся, моля́щу Ти́ ся́.

Минея, 12 Февраля, Канон Глас 8 Песнь 1 Ирмос: Колесницегони́теля фарао́ня погрузи́,/ чудотворя́й иногда́/ Моисе́йский жезл, крестообра́зно порази́в/ и раздели́в мо́ре,/ Изра́иля же, беглеца́, пешехо́дца спа́се,/ песнь Бо́гови воспева́юща. Припев: Святи́телю, о́тче Меле́тие, моли́ Бо́га о на́с. Светода́вцу предстоя́ весь све́тел,/ све́том ра́зума омраче́нное о́ко души́ моея просвети́/ и мглу отжени́ страсте́й твои́ми моли́твами,/ я́ко святи́тель бо, преподо́бне, имаши дерзнове́ние, Меле́тие. Припев: Святи́телю, о́тче Меле́тие, моли́ Бо́га о на́с. В не́дрех Отца́ седяй,/ Соприсносу́щное и Соесте́ственное Сло́во ро́ждшему,/ пропове́дника Своего́ Божества́ поставля́ет еди́н, я́ко апо́столом единонра́вна тя ны́не,/ о Богоявле́нее Меле́тие. Сла́ва Отцу́ и Сы́ну и Свято́му Ду́ху. Боже́ственным просвети́вся сия́нием,/ от Безнача́льнаго Отца́ единоро́дна Сло́ва, несозда́нна, ве́чна, Богосло́вил еси́, преподо́бне,/ А́риевы же побо́рники единомы́сленныя разгна́л еси́,/ Бо́жественным всеору́жием огражда́емь. И ны́не и при́сно и во ве́ки веко́в. Ами́нь. Богородичен: Воплоще́ннаго, Пресвята́я, родила́ еси́, пре́жде безпло́тнаго, Богонача́льнаго Сло́ва:/ Еди́на бо от ве́ка луча́ми чистоты́,/ де́вства же добро́тою/ и всенепоро́чными дарова́нии была́ еси́ досто́йна, Всенепоро́чная. Песнь 3 Ирмос: Утвержде́й в нача́ле Небеса́ ра́зумом/ и зе́млю на вода́х основа́вый,/ на ка́мени мя, Христе́, за́поведей Твои́х утверди́,/ я́ко несть свят, па́че Тебе́, Еди́не Человеколю́бче. Припев: Святи́телю, о́тче Меле́тие, моли́ Бо́га о на́с. Тверде́йшу ду́шу адама́нта имеяй,/ гнило́е ересе́й мне́ние ты, уче́ньми благоче́стия просве́щься, всеблаже́нне, оплева́л еси́./ Те́мже, вернии, тя вси пе́сньми, Богому́дре, почита́ем. Припев: Святи́телю, о́тче Меле́тие, моли́ Бо́га о на́с. Уподо́бився доброде́тельми Христо́вым апо́столом,/ онех власть и престо́л насле́довал еси́ я́вственно, Меле́тие всесла́вне,/ правосла́вия столп и благоче́стия побо́рниче быв. Сла́ва Отцу́ и Сы́ну и Свято́му Ду́ху. Всыновле́н Бо́гу,/ и́же от Бо́га Бо́га Сло́ва не низвел еси́ в тварь безу́мно,/ но просла́вил еси́, Отцу́ Собезнача́льна и Сопресто́льна,/ Соде́теля и Зижди́теля всех веко́в, Богоприя́тне. И ны́не и при́сно и во ве́ки веко́в. Ами́нь. Богородичен: В Твою́ святу́ю Бог утро́бу всели́вся,/ воплотися, я́коже весть, Богома́ти,/ и спасе́ нас живоно́сными Свои́ми страстьми́,/ Те́мже Тя спасе́ния дверь, Де́во, зна́ем. Седален, глас 8 Поучи́вся день же и нощь в зако́не Госпо́дни, о́тче му́дре,/ я́ко дре́во плодови́то, на во́дах духо́вных насажде́но, яви́лся еси;/ Те́мже, свяще́нствовав Бо́гу непоро́чно,/ А́риева хуле́ния и Саве́ллиева злосла́внаго нра́ва я́ве возгнуша́вся,/ правосла́вною мы́слию, святи́телю Меле́тие,/ моли́ Христа́ Бо́га грехо́в оставле́ние дарова́ти/ пра́зднующим любо́вию святу́ю па́мять твою́. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Пло́тским неду́гом многови́дным и душе́вным страсте́м многообра́зным/ исцеле́ние обре́т Тобо́ю, Пренепоро́чная,/ печа́лем же разреше́ние, бе́дам и ско́рбем премене́ние гото́во и ско́ро избавле́ние,/ ве́рою несомне́нною и те́плым се́рдцем испове́даю Твоя́ ми́лости, Влады́чице,/ сы́ном же челове́ческим мно́гая Твоя́ чудеса́;/ и молю́ся, кро́вом крил Твои́х при́сно соблюсти́ и сохрани́ти мя всегда́. Песнь 4 Ирмос: Ты моя́ кре́пость, Го́споди,/ Ты моя́ и си́ла,/ Ты мой Бог, Ты мое́ ра́дование,/ не оставлъ не́дра О́тча/ и на́шу нищету́ посети́в./ Тем с проро́ком Авва́кумом зову́ Ти:/ си́ле Твое́й сла́ва, Человеколю́бче. Припев: Святи́телю, о́тче Меле́тие, моли́ Бо́га о на́с. Я́вственно, священнотаи́нниче, преизя́ществовав, Петра́ престо́л насле́довал еси́ верхо́внаго,/ от Христа́ рукоположе́ннаго,/ его́же и нра́ву поревнова́в,/ Сы́на Бо́га жива́го Спа́са просла́вил еси́,/ уче́нием О́наго после́дуя. Припев: Святи́телю, о́тче Меле́тие, моли́ Бо́га о на́с. Всеразли́чными укра́шен дарова́ньми, единонача́лия пропове́дник был еси́,/ во Отце́ и Единоро́днем Сло́ве познава́емаго и Боже́ственнем Дусе, всему́дре,/ Едини́цу у́бо существо́м, в Тре́х Ли́цех су́щу,/ научи́л еси́, преподо́бне. Сла́ва Отцу́ и Сы́ну и Свято́му Ду́ху. Воспита́вся добро́тами, Богоуче́нне, и заре́ю то́я вообража́емь,/ и просвети́вся Боже́ственными блиста́ньми по прича́стию,/ це́ркви свет вторы́й был еси́, Богоявле́нне,/ просвеще́ние благоче́стия явля́я ве́рою притека́ющим. И ны́не и при́сно и во ве́ки веко́в. Ами́нь. Богородичен: Да о́браз, погребе́нный страстьми́, взы́щеши бога́тством бла́гости,/ в Деви́ческую всели́лся еси́ утро́бу/ и из нея́же Ты, Прему́дрость Бо́жия, храм созда́л еси́,/ и́мже пожи́л еси́ с челове́ки, Ще́дре,/ и спасл еси́ ми́ра концы́. Песнь 5 Ирмос: Вску́ю мя отри́нул еси́/ от лица́ Твоего́, Све́те Незаходи́мый,/ и покры́ла мя есть чу́ждая тьма, окая́ннаго?/ но обрати́ мя и к све́ту за́поведей Твои́х/ пути́ моя́ напра́ви, молю́ся. Припев: Святи́телю, о́тче Меле́тие, моли́ Бо́га о на́с. Жиру́юще безме́стно вся́кой е́реси, злоде́монстей,/ превше́л еси́, о́тче, благоро́дием души́,/ и све́тлостию, и всесвяты́м нра́вом, и тве́рдым благоче́стием,/ Богоявле́нне преблаже́нне Меле́тие. Припев: Святи́телю, о́тче Меле́тие, моли́ Бо́га о на́с. Вся́ким усе́рдием А́риевы единому́дренники отвраща́я,/ Правосла́вною ве́рою, Богоно́се, держа́ву утверди́л еси́/ в Тро́ице Еди́наго Бо́га нам пропове́дуя,/ всеблаже́нне о́тче Меле́тие. Сла́ва Отцу́ и Сы́ну и Свято́му Ду́ху. Пребоже́ственныя Тро́ицы таи́нник был еси́ всеи́стиннейший,/ Отцу́ Сло́во Единосу́щно честву́я и сопресто́льно/ и Боже́ственный Дух, единоесте́ствен Отцу́ и Сло́ву,/ всечестны́й о́тче Меле́тие. И ны́не и при́сно и во ве́ки веко́в. Ами́нь. Богородичен: Во́инства вы́шних, Всечи́стая, сил Тя ублажа́ют,/ ро́дове же вси челове́честии досто́йно сла́вят,/ Тебе́ бо ра́ди еди́ныя, су́щии на земли́, с Небе́сными совоку́пльшеся,/ пою́т, Де́во Рождество́ Твое́. Песнь 6 Ирмос: Очи́сти мя, Спа́се,/ мно́га бо беззако́ния моя́/ и из глубины́ зол возведи́, молю́ся:/ к Тебе́ бо возопи́х, и услыши мя,/ Бо́же спасе́ния моего́. Припев: Святи́телю, о́тче Меле́тие, моли́ Бо́га о на́с. Изсуши́л еси́ пото́ки, Богому́дре, ерети́ческия,/ отверзл же еси́ исто́чники догма́тов пра́вости,/ непобеди́м побо́рник Правосла́вия быв, Богоблаже́нне. Припев: Святи́телю, о́тче Меле́тие, моли́ Бо́га о на́с. Изсуши́в му́тный А́риев ток и безбо́жный,/ напои́л еси́ бога́тно благода́тными вода́ми ве́рных собо́ры/ и церко́вное благоле́пие украси́л еси́. Сла́ва Отцу́ и Сы́ну и Свято́му Ду́ху. Живы́й подо́бно Боже́ственными начина́ньми,/ был еси́ пресве́тел, о́тче, де́латель,/ неукло́нно забра́ло благоче́стия и па́стырей наста́вник. И ны́не и при́сно и во ве́ки веко́в. Ами́нь. Богородичен: Просвеща́ют ду́ши правосла́вно пою́щих Тя рече́ния проро́ческая,/ Твое́ провозвеща́юще пречи́стое зача́тие/ и е́же вы́ше Сло́ва, Богоневе́сто, Твое́ Рождество́. Кондак, глас 6 Духо́внаго твоего́ дерзнове́ния у́боявся,/ отсту́пник бе́гает Македо́нии,/ моли́твенное же служе́ние соверша́юще, твои́ раби́,/ любо́вию притека́ем,/ А́нгелом собесе́дниче, Меле́тие,/ о́гненный мечу́ Христа́ Бо́га на́шего,/ вся безбо́жныя закала́яй:/ воспева́ем тя, свети́льника, просвети́вшаго вся. Песнь 7 Ирмос: Бо́жия снизхожде́ния/ огнь устыде́ся в Вавило́не иногда́,/ сего́ ра́ди о́троцы в пе́щи ра́дованною ного́ю,/ я́ко во цве́тнице, лику́юще, поя́ху:/ благослове́н еси́, Бо́же оте́ц на́ших. Припев: Святи́телю, о́тче Меле́тие, моли́ Бо́га о на́с. Святы́й тя собо́р первостоя́теля имя́ше, Богоприя́тне,/ его́же Святы́й Дух от коне́ц во еди́но собра́,/ песносло́вящия Того́ Божество́:/ благослове́н еси́, Бо́же оте́ц на́ших. Припев: Святи́телю, о́тче Меле́тие, моли́ Бо́га о на́с. Равноче́стно получи́л еси́ председа́тельство апо́столов Христо́вых,/ и Боже́ственное сих уче́ние насле́довал еси́ и, житию́ подо́бяся, пел еси́:/ благослове́н еси́, Бо́же оте́ц на́ших. Сла́ва Отцу́ и Сы́ну и Свято́му Ду́ху. Ум име́я остре́йш, к Боговиде́нию просте́рт,/ ерети́чествующих тупозре́нию поруга́лся еси́,/ благочести́выя же уча́, взыва́л еси́:/ благослове́н еси́, Бо́же оте́ц на́ших. И ны́не и при́сно и во ве́ки веко́в. Ами́нь. Богородичен: Я́ко зерца́ло чи́сто, Твое́я чистоты́ блиста́ющося благода́тию,/ Светороди́тельница, Де́во, и Богоро́дица Всечи́стая была́ еси́./ Те́мже согла́сно Рождеству́ Твоему́ пое́м:/ благослове́н еси́, Бо́же оте́ц на́ших. Песнь 8 Ирмос: Седмери́цею пещь/ халде́йский мучи́тель,/ Богочести́вым неи́стовно разжже́,/ си́лою же лу́чшею спасе́ны, сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки. Припев: Святи́телю, о́тче Меле́тие, моли́ Бо́га о на́с. Пресве́тло научи́л еси́ Еди́но чти́ти Божество́, е́же во Отце́, и Сы́не, и Дусе,/ и си́лу безме́рну, и ца́рство еди́но я́ве/ сво́йством, кре́пко соблюда́емым ко́ейждо Ипоста́си./ Ему́же и поя́, вопия́л еси́: лю́дие, превозноси́те во вся ве́ки. Припев: Святи́телю, о́тче Меле́тие, моли́ Бо́га о на́с. Святы́ни храм, святи́телю, быв,/ вся освяща́еши, твое́ и́мя нарица́ти тща́щияся,/ и о́браз, о́тче, твой, любовию я́же к тебе́ напису́ющия, блаже́нне, и ве́рою пою́щия:/ благослови́те, вся дела́ Госпо́дня, Го́спода,/ по́йте и превозноси́те Его́ во ве́ки. Сла́ва Отцу́ и Сы́ну и Свято́му Ду́ху. Тайнонаставле́ньми изря́днейшее твое́ ста́до просвети́л еси́,/ ны́не же перворо́дных Це́рковь возрасти́л еси́,/ приложе́ние быв от ве́ка просия́вшим святи́тельскими и та́йными слу́жбами./ С ни́миже вопие́ши непреста́нно:/ свяще́ннии, по́йте, лю́дие, превозноси́те Го́спода во ве́ки. И ны́не и при́сно и во ве́ки веко́в. Ами́нь. Богородичен: Науча́еми, Всечи́стая, е́же на Тебе́ та́инством/ и бы́вшее Тобо́ю пожина́юще душа́м избавле́ние и спасе́ние,/ зове́м со Арха́нгелом Гаврии́лом Тебе́:/ ра́дуйся, – вопию́ще, – Богоро́дице, – и ве́рно песнопо́юще Тя,/ и превознося́ще, Чи́стая, во ве́ки. Песнь 9 Ирмос: Ужасе́ся о се́м Не́бо,/ и земли́ удиви́шася концы́,/ я́ко Бог яви́ся челове́ком пло́тски и чре́во Твое́ быстъ простра́ннейшее Небе́с./ Тем Тя, Богоро́дицу,/ А́нгелов и челове́к чинонача́лия велича́ют. Припев: Святи́телю, о́тче Меле́тие, моли́ Бо́га о на́с. Невеще́ственно невеще́ственному предстоя́,/ Его́же, и Зижди́теля всех и Го́спода, и О́тчее Сло́во, и Му́дрость,/ су́щественне и соесте́ственне су́ща, ты Богосло́вил еси́ све́тло,/ моля́, не преста́й спасти́/ и́же ве́рою тя, Богоглаго́ливе, хва́лящия. Припев: Святи́телю, о́тче Меле́тие, моли́ Бо́га о на́с. Труды́ потя́щася духо́вными/ и усе́рдно еще́ борю́щася за него́ с духобо́рцы,/ тя зря Благи́й и Святы́й Дух, венча́в/ я́ко победи́теля, прия́т досто́йно,/ и с Вы́шними, всеблаже́нне, ликостоя́нии счисли́ тя. Сла́ва Отцу́ и Сы́ну и Свято́му Ду́ху. По́двиги соверши́в благочести́вы,/ и тече́ние сконча́в добре́йшее,/ и пра́вей ве́ре научи́в всеблагоче́стно,/ пра́ведный вене́ц от всех Соде́теля прия́л еси́, Богоглаго́ливе,/ собо́ра учи́телей песнь от пе́сней предпосыла́я. И ны́не и при́сно и во ве́ки веко́в. Ами́нь. Богородичен: Удо́бно, Богоро́дице, преити́ жития́ пода́ждь ми бу́рю,/ напа́стей настоя́ния и страсте́й, я́ко блага́ укротя́щи/ и наставля́ющи к доброде́тели, и стези́ пра́вости,/ да я́ко Благоде́тельницу непреста́нно велича́ю Тя.

Минея, 16 Ноября, Канон апостола Глас 4 Песнь 1 Ирмос: Отве́рзу уста́ моя́,/ и напо́лнятся Духа,/ и сло́во отры́гну Цари́це Ма́тери,/ и явлю́ся, све́тло торжествуя́,/ и воспою́, ра́дуяся, Тоя́ чудеса́. Припев: Святы́й апо́столе Матфе́е, моли́ Бо́га о на́с. Бога́тно пода́ждь ми все́льшуюся в тя благода́ть, Матфе́е всесла́вне и слуго́ Христо́в,/ да вопию́, све́тло пропове́дая,/ и воспою́, ра́дуяся, твоя́ чудеса́. Припев: Святы́й апо́столе Матфе́е, моли́ Бо́га о на́с. Весьма́ оста́вил еси́ земны́х смуще́ние,/ Сло́ва бо я́ко услы́шав вопло́щшагося глас,/ и благода́ти яви́лся еси́ строи́тель/ и пропове́датель Богоприя́тен, Богоблаже́нне. Сла́ва Отцу́ и Сы́ну и Свято́му Ду́ху. Самови́дец быв и слуга́ возсия́вшаго Сло́ва, апо́столе, Преве́чнаго Отца́,/ и проте́кл еси́, Того́ прише́ствие благовеству́я всем язы́ком. И ны́не и при́сно и во ве́ки веко́в. Ами́нь. Богородичен: Сме́рти потребле́ние и тли разруше́ние,/ Жи́зни же явле́ние благовести́л еси́, му́дре,/ Де́ва бо во утро́бе заче́нши Непости́жнаго и мир обнови́. Песнь 3 Ирмос: Твоя́ песносло́вцы, Богоро́дице,/ живы́й и незави́стный исто́чниче,/ лик себе́ совоку́пльшия, духо́вно утверди́,/ в Боже́ственней Твое́й сла́ве/ венце́в сла́вы сподо́би. Припев: Святы́й апо́столе Матфе́е, моли́ Бо́га о на́с. Твоя́ апо́столы, Сло́ве Бо́жий, свети́льники показа́л еси́ жи́зни,/ мрак отгоня́ющия безбо́жия, Влады́ко,/ и Боже́ственною Твое́ю сла́вою мир весь просвеща́ющия. Припев: Святы́й апо́столе Матфе́е, моли́ Бо́га о на́с. Твои́м вооружи́в всеору́жием Матфе́я храбре́йшаго, Спа́се,/ мучи́телей крепча́йша сего́ соде́ял еси́, Влады́ко,/ и потреби́теля показа́л еси́ и́дольския ле́сти, Человеколю́бче. Сла́ва Отцу́ и Сы́ну и Свято́му Ду́ху. Язы́ка твоего́ о́гненнаго веща́ние/ де́монская пожже́ ка́пища, Матфе́е Богодохнове́нне, Паракли́тов орга́не,/ чрез Его́же Христо́с пропове́дается, всех Жизнь Ипоста́сная. И ны́не и при́сно и во ве́ки веко́в. Ами́нь. Богородичен: Труба́ Богосло́вная, веща́ющая кре́пко,/ просвети́ лю́ди, Матфе́я Богому́драго,/ Тро́ицы сия́ние, па́че ума́ же воплоще́ние Сло́ва из Тебе́, Пречи́стая. Седален, глас 8 Во вся концы́ протече́ му́дрых твои́х глаго́л я́ко вои́стинну веща́ние,/ всехва́льне Госпо́день апо́столе,/ Боговиде́ние всем я́сно пропове́дал еси́/ и язы́ков неразу́мие в ра́зум приве́л еси́./ Те́мже, и́дольское омраче́ние отгна́в,/ свет зна́ния во тьме су́щим возсия́л еси́,/ Матфе́е всехва́льне,/ моли́ Христа́ Бо́га грехо́в оставле́ние дарова́ти/ чту́щим любо́вию святу́ю па́мять твою́. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Я́ко Всенепоро́чная Неве́сто Творца́,/ я́ко Неискусому́жная Ма́ти Изба́вителя,/ прия́телище я́ко су́щи Уте́шителя, Препе́тая,/ беззако́нию мя су́ща скве́рное оби́телище/ и де́моном игра́лище в ра́зуме бы́вша,/ потщи́ся от тех злоде́йства мя изба́вити/ и све́тлое жили́ще доброде́телей соверши́, Светоно́сная, Нетле́нная,/ отжени́ о́блак страсте́й, и Вы́шняго прича́стия сподо́би,/ и све́та невече́рняго моли́твами Твои́ми. Песнь 4 Ирмос: Неизсле́дный Бо́жий сове́т,/ е́же от Де́вы воплоще́ния/ Тебе́, Вы́шняго,/ проро́к Авваку́м, усмотря́я, зовя́ше:/ сла́ва си́ле Твое́й, Го́споди. Припев: Святы́й апо́столе Матфе́е, моли́ Бо́га о на́с. Ипоста́сному Твоему́ Сло́ву, Бо́же, науче́н,/ мирску́ю му́дрость разруши́ Богови́дец учени́к, велегла́сно зовя́ Тебе́:/ сла́ва си́ле Твое́й, Го́споди. Припев: Святы́й апо́столе Матфе́е, моли́ Бо́га о на́с. Ублаже́ному от Христа́,/ ко́е благохвале́ние принесе́м тебе́, Богоглаго́ливе?/ не мо́жет бо челове́к цветя́щия на тебе́ благода́ти сло́вом изрещи́, досточу́дне. Сла́ва Отцу́ и Сы́ну и Свято́му Ду́ху. Нескве́рный твой и чи́стый ум ви́дев Высоча́йший,/ я́коже свещу́ на све́щник высо́кий,/ су́щим во тьме светя́щую, всем, Богоявле́нне, предложи́. И ны́не и при́сно и во ве́ки веко́в. Ами́нь. Богородичен: Умерщвле́ное естество́ челове́ческое, Благослове́нная, возвы́сила еси́,/ я́ко Высоча́йшаго ро́ждшая кре́пость па́че естества́, всепе́тая Отрокови́це,/ я́коже Матфе́й научи́. Песнь 5 Ирмос: Ужасо́шася вся́ческая/ о Боже́ственней сла́ве Твое́й:/ Ты бо, Неискусобра́чная Де́во,/ име́ла еси́ во утро́бе над все́ми Бо́га/ и родила́ еси́ безле́тнаго Сы́на,/ всем воспева́ющим Тя/ мир подава́ющая. Припев: Святы́й апо́столе Матфе́е, моли́ Бо́га о на́с. Благода́ть прие́м Всесвята́го Ду́ха,/ Боже́ственное оби́телище показа́лся еси́;/ Боже́ственно научи́в Богозна́ния све́ту,/ вве́рен был догма́ты Христо́вы пи́смены изложи́ти,/ я́ко самови́дец Богоизбра́нный. Припев: Святы́й апо́столе Матфе́е, моли́ Бо́га о на́с. Язы́к твой трость Паракли́та бысть,/ ско́рое избавле́ние даю́щаго позна́вшим влады́чество Его́/ и му́дрых вды́шущаго душа́м ра́зум Небе́сный,/ о Матфе́е всече́стне. Сла́ва Отцу́ и Сы́ну и Свято́му Ду́ху. Сия́юща чудесы́ и исцеле́ний благода́тьми,/ тя Христо́с посла́ ми́ру, де́монскую попира́юща кре́пость/ и ду́ши просвеща́юща ве́рных, всех пою́щих тя, ми́ра пропове́дника. И ны́не и при́сно и во ве́ки веко́в. Ами́нь. Богородичен: Де́ва родила́ еси́ Сы́на Преве́чнаго,/ в естество́ обле́кшася челове́ческое,/ я́коже науча́я, Богоглаго́ливый рече́,/ и спа́сшаго сие́ от тли коне́чною благосты́нею,/ и Де́ва пребыла́ еси́. Песнь 6 Ирмос: Приидо́х во глубины́ морски́я,/ и потопи́ла мя есть бу́ря мно́гих грехо́в,/ но, я́ко Бог, из глубины́ возведи́ живо́т мой,/ Многоми́лостиве. Припев: Святы́й апо́столе Матфе́е, моли́ Бо́га о на́с. Евангели́ст от мыта́рства я́ко после́дова Тебе́,/ претвори́ся Богоглаго́ливый всеси́льною Твое́ю, Вседе́телю, кре́постию,/ Матфе́й всеизря́днейший. Припев: Святы́й апо́столе Матфе́е, моли́ Бо́га о на́с. Управля́ется твоего́ благове́стия душепита́тельными словесы́ язы́ков мно́жество,/ возвыша́емо к доброде́телей высо́кому верху́,/ о Матфе́е всеблаже́нне. Сла́ва Отцу́ и Сы́ну и Свято́му Ду́ху. Матфе́я уловля́ются Богоплете́нными ученика́ мре́жами/ собо́ры ве́рующих всегда́,/ к Твоему́ позна́нию, Благоде́телю, наставля́еми. И ны́не и при́сно и во ве́ки веко́в. Ами́нь. Богородичен: Де́ву ро́ждшую воспису́я,/ благовеству́ет Тя, вся́ческая Сотво́ршаго,/ без се́мене и тли, Всенепоро́чная, Матфе́й всеизя́щнейший. Кондак, глас 4 Мыта́рства и́го отве́рг,/ пра́вды и́гу притя́глся еси́/ и яви́лся еси́ купе́ц всеизря́днейший,/ бога́тство прине́с ю́же с высоты́ прему́дрость./ Отону́дуже пропове́дал еси́ и́стины сло́во/ и уны́лых воздви́гл еси́ ду́ши,/ написа́в час су́дный. Икос Вра́жие мучи́тельство ну́дит мя несы́тно/ и души́ мое́й все се́мя восхища́ет,/ Матфе́е, дру́же Христо́в./ Но сам, се́мя моли́тв твои́х дав,/ уплоди́ к твоему́ служе́нию/ и покажи́ мя песнопе́вца твоего́ мале́йшаго/ и сказа́теля мно́гих твои́х и вели́ких исправле́ний;/ и ко Христо́ве любви́ ка́ко, вся а́бие оставив,/ после́довал еси́ те́пле Зва́вшему,/ пе́рвый быв благове́стник в ми́ре,/ написа́в час су́дный. Песнь 7 Ирмос: Не послужи́ша тва́ри Богому́дрии/ па́че Созда́вшего,/ но о́гненное преще́ние му́жески попра́вше,/ ра́довахуся, пою́ще:/ препе́тый отце́в Госпо́дь и Бог, благослове́н еси́. Припев: Святы́й апо́столе Матфе́е, моли́ Бо́га о на́с. Был еси́ пе́рваго осия́ния Боже́ственное изображе́ние,/ я́ко учени́к Того́ светлостьми́ распаля́емь,/ Ему́же, поя́, глаго́лал еси́:/ препе́тый отце́в Госпо́дь и Бог, благослове́н еси́. Припев: Святы́й апо́столе Матфе́е, моли́ Бо́га о на́с. Я́ко слуга́ Сло́ва, всеблаже́нне,/ в Боже́ственныя оби́тели, иде́же Христо́с обита́ет, ты всели́лся еси́,/ я́коже тебе́ обеща́ Пребоже́ственный отце́в Госпо́дь и Бог еди́н всех. Сла́ва Отцу́ и Сы́ну и Свято́му Ду́ху. Неду́зи, Матфе́е, отго́нятся,/ и отбегае́т мно́жество де́монов/ су́щими в тебе́ дарова́ньми Боже́ственнаго Ду́ха,/ в ни́хже пел еси́:/ препе́тый отце́в Госпо́дь и Бог, благослове́н еси́. И ны́не и при́сно и во ве́ки веко́в. Ами́нь. Богородичен: Всепе́тую Де́ву написа́л еси́ Боже́ственными твои́ми словесы́,/ Творца́ всех ро́ждшую, апо́столе,/ Ему́же вси пое́м:/ препе́тый отце́в Госпо́дь и Бог, благослове́н еси́. Песнь 8 Ирмос: О́троки благочести́выя в пещи́/ Рождество́ Богоро́дичо спасло́ есть,/ тогда́ у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте дела́/ и превозноси́те Его́ во вся ве́ки. Припев: Святы́й апо́столе Матфе́е, моли́ Бо́га о на́с. Манове́ньми, я́же в Тебе́ неосла́бными, Матфе́й свяще́ннейший обожа́емь,/ положе́нием же быв, естество́м е́же был еси́,/ вселе́нную, Влады́ко, привлече́ пе́ти Тебе́:/ Го́спода по́йте дела́ и превозноси́те во вся ве́ки. Припев: Святы́й апо́столе Матфе́е, моли́ Бо́га о на́с. Я́коже мо́лнию вселе́нней, Сло́во Богосло́ва посла́,/ мрак у́бо отгоня́юща, язы́ки же просвеща́юща Богосло́вия догма́ты./ Те́мже и поя́ше:/ Го́спода по́йте дела́ и превозноси́те Его́ во вся ве́ки. Сла́ва Отцу́ и Сы́ну и Свято́му Ду́ху. Сло́вом чи́стым и умо́м Бог с тобою́ бесе́довал есть,/ ти́ну бо я́ко изсе́кл еси́, Тому́ прибли́жился еси́/ и примеси́лся еси́, сла́вне./ Те́мже и пое́ши:/ Го́спода по́йте дела́ и превозноси́те Его́ во вся ве́ки. И ны́не и при́сно и во ве́ки веко́в. Ами́нь. Богородичен: На благодея́ние челове́ков Сло́во воплоти́тися изво́ли:/ дверь бо де́вства про́йде Госпо́дь и Богоро́дицу показа́./ Те́мже зове́м:/ Го́спода по́йте дела́ и превозноси́те Его́ во вся ве́ки. Песнь 9 Ирмос: Всяк земноро́дный/ да взыгра́ется, Ду́хом просвеща́емь,/ да торжеству́ет же Безпло́тных умо́в естество́,/ почита́ющее свяще́нное торжество́ Богома́тере,/ и да вопие́т:/ ра́дуйся, всеблаже́нная/ Богоро́дице, чи́стая Присноде́во. Припев: Святы́й апо́столе Матфе́е, моли́ Бо́га о на́с. Добро́ты у́мныя прия́л еси́ диади́му Боже́ственную, апо́столе,/ и Ца́рствия же благоле́пнейшим венце́м украси́лся еси́ десни́цею Вседержи́телевою,/ и све́тишися, му́дре, со Ангелы Престо́лу предстоя́ Влады́ки Христа́, всеблаже́нне. Припев: Святы́й апо́столе Матфе́е, моли́ Бо́га о на́с. Дре́ва жи́зни досто́йно получи́л еси́, пропове́дник Жива́го Бо́га,/ благовествова́в жизнь ми́ру Боже́ственное посеще́ние:/ са́дом бо зна́ния не растли́л еси́ ум,/ пребы́в незы́блен и неколе́блен Це́ркве степе́нь, всеблаже́нне. Сла́ва Отцу́ и Сы́ну и Свято́му Ду́ху. Неве́сту Христо́ву Боже́ственно украси́л еси́ Ева́нгелием твои́м,/ яко диади́мою, Це́рковь, Богоблаже́нне,/ и ны́не Боже́ственную твою́ па́мять торжеству́ет све́тло,/ ю́же изба́вити вся́каго обстоя́ния и бед лю́тых моли́, Матфе́е апо́столе. И ны́не и при́сно и во ве́ки веко́в. Ами́нь. Богородичен: Недр не отступи́в Безнача́льнаго Роди́теля, Сло́во Безнача́льное,/ я́коже благовеству́ет Матфе́й, пиша́,/ Бог воплоти́ся из Тебе́, Чи́стая, Всепе́тая,/ в челове́чь о́браз всеобра́зно весь оде́явся/ и того́ прие́м сво́йства. Светилен Сказа́ нам Боже́ственная чудодея́ния, сла́вный Христо́ва Ева́нгелия списа́тель,/ Матфе́й Богоприя́тный,/ его́же, любо́вию чту́ще, благосочета́нно воспои́м. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Мыта́рства и́го отве́рг разу́мно,/ Христу́ после́довал еси́, о Матфе́е Богому́дре!/ Следо́м же Того́ чу́дно после́дуя,/ в прича́стии был еси́ Того́ Ца́рствия/ и сла́вы о́бщник, и таи́нник неизрече́нных.

Минея, 11 Апреля, Кано́н, его́же краегране́сие: Све́тлаго в му́ченицех Анти́пу честву́ю. Творе́ние Ио́сифово Глас 4 Песнь 1 Ирмос: Мо́ря че́рмную пучи́ну/ невла́жными стопа́ми/ дре́вний пешеше́ствовав Изра́иль,/ крестообра́зныма Моисе́овыма рука́ма/ Амали́кову си́лу в пусты́ни победи́л есть. Припев: Священному́чениче Анти́по, моли́ Бо́га о на́с. Заре́ю трисо́лнечныя благода́ти осия́емь,/ све́тлый твой сей пра́здник соверша́ющия озари́,/ страстна́го избавля́я, му́чениче Анти́по, омраче́ния. Припев: Священному́чениче Анти́по, моли́ Бо́га о на́с. Сло́во Бо́жие тя, всему́дре,/ свиде́теля и́стинна свои́х показа́ страсте́й,/ злоче́стие потребля́ющаго и де́монов вся́кое лука́вство побежда́ющаго. Сла́ва Отцу́ и Сы́ну и Свято́му Ду́ху. Умертви́в плотска́я мудрова́ния мно́гими поще́нии,/ свяще́нства Боже́ственнаго свяще́нною украси́лся еси́ оде́ждею/ и безкро́вно поже́рл еси́ тебе́ ра́ди ме́ртва Бы́вшаго. И ны́не и при́сно и во ве́ки веко́в. Ами́нь. Богородичен: Све́та Твоего́ блиста́ньми озари́, Отрокови́це Всенепоро́чная,/ в нощи́ страсте́й и искуше́ний одержи́мое се́рдце мое́,/ Пра́вды Со́лнце всем неизрече́нно возсия́вшая. Песнь 3 Ирмос: Весели́тся о Тебе́ Це́рковь Твоя́, Христе́, зову́щи:/ Ты моя́ кре́пость, Го́споди,/ и прибе́жище, и утвержде́ние. Припев: Священному́чениче Анти́по, моли́ Бо́га о на́с. Источи́л еси́ ре́ки уче́ния, ве́рных напоя́ющия,/ и му́тныя во́ды многобо́жия изсуши́л еси́. Припев: Священному́чениче Анти́по, моли́ Бо́га о на́с. Кре́постию, блаже́нне, Христо́вою, гоня́щих кре́пость ссекл еси́,/ и терпели́вно пострада́л еси́,/ и му́ченически венча́лся еси́. Сла́ва Отцу́ и Сы́ну и Свято́му Ду́ху. Де́моном служа́щия чествова́ти Бо́га и́стиннаго уве́рил еси́,/ плоть ме́ртвенную, преподо́бне,/ бога́тством благоутро́бия поне́сшаго. И ны́не и при́сно и во ве́ки веко́в. Ами́нь. Богородичен: Избавля́ющаго челове́ки плене́ния вра́жия, Чи́стая,/ Изба́вителя родила́ еси́,/ те́мже благоче́стно Тя сла́вим. Седален, глас 3 Боже́ственными у́гльми Боже́ственныя любве́ разжже́н, му́чениче Анти́по,/ безбо́жия пла́мень угаси́л еси́/ и, в разжже́н вложе́н быв коно́б, к Невече́рнему Све́ту отше́л еси́./ О́тче преподо́бне, Христа́ Бо́га моли́/ грехо́в оставле́ние дарова́ти нам. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Боже́ственнаго естества́ не отлу́чься, плоть быв во чре́ве Твое́м,/ но Бог вочелове́чься и пребы́сть,/ И́же по рождестве́ Ма́терь Тя Де́ву, я́ко пре́жде рождества́,/ сохрани́в Всенепоро́чную, еди́н Госпо́дь:/ Того́ приле́жно моли́ дарова́ти нам ве́лию ми́лость. Песнь 4 Ирмос: Вознесе́на Тя ви́девши Це́рковь на Кресте́,/ Со́лнце Пра́ведное,/ ста в чи́не свое́му/ досто́йно взыва́ющи:/ сла́ва си́ле Твое́й, Го́споди. Припев: Священному́чениче Анти́по, моли́ Бо́га о на́с. Не поколеба́ столпа́ твоего́ се́рдца/ пребеззако́ннующих противле́ние, му́чениче страстоте́рпче;/ те́мже, распаля́емь ре́вностию ве́ры,/ яви́лся еси́ огня́ си́льнейши. Припев: Священному́чениче Анти́по, моли́ Бо́га о на́с. Дрема́нием нече́стия одержи́мыя возбужда́я, прехва́льне, уче́нии Свята́го Ду́ха,/ к ра́зуму воздви́гл еси́ и́стиннаго позна́ния. Сла́ва Отцу́ и Сы́ну и Свято́му Ду́ху. Смири́л еси́ вы́сость де́монскую,/ к Бо́гу возвыше́ньми, Анти́по, прилежа́,/ и восхожде́ньми Боже́ственными обожа́емь, и Богови́ден познава́емь. И ны́не и при́сно и во ве́ки веко́в. Ами́нь. Богородичен: По рождестве́, я́ко пре́жде рождества́,/ сохрани́лася еси́, Де́во Ма́ти нетле́нная,/ Зижди́теля бо всех родила́ еси́,/ из Тебе́ челове́ческое те́ло во́лею поне́сшаго. Песнь 5 Ирмос: Ты, Го́споди, мой Свет,/ в мир прише́л еси́,/ Свет Святы́й, обраща́яй из мра́чна неве́дения/ ве́рою воспева́ющия Тя. Припев: Священному́чениче Анти́по, моли́ Бо́га о на́с. Возше́л еси́ на го́ру доброде́телей, блаже́нне,/ и в ра́зум вшел еси́ кра́йнейшаго мра́ка,/ и Бо́гу бесе́довал еси́. Припев: Священному́чениче Анти́по, моли́ Бо́га о на́с. Глаго́л твои́х плени́цами/ из глубины́ безбо́жия улови́л еси́, святи́телю, заблу́ждшия челове́ки/ и благода́тию спасл еси́. Сла́ва Отцу́ и Сы́ну и Свято́му Ду́ху. Те́ло огню́ на снедь преда́л еси́,/ свы́ше, святи́телю, от Бо́га Боже́ственную ро́су бога́тно прие́мля. И ны́не и при́сно и во ве́ки веко́в. Ами́нь. Богородичен: Сый в зра́це Бо́жии Пребоже́ственный всели́ся во чре́во Твое́,/ зрак мой понесы́й Госпо́дь, Всенепоро́чная. Песнь 6 Ирмос: Пожру́ Ти со гла́сом хвале́ния, Го́споди,/ Це́рковь вопие́т Ти,/ от бесо́вския кро́ве очи́щшися/ ра́ди ми́лости от ребр Твои́х/ исте́кшею Кро́вию. Припев: Священному́чениче Анти́по, моли́ Бо́га о на́с. Распе́н воздержа́нием удеса́, блаже́нне, в поще́нии подвиза́вся,/ му́ченическими венча́лся еси́ по́двиги,/ я́же подъя́л еси́ ума́, Анти́по, тве́рдостию. Припев: Священному́чениче Анти́по, моли́ Бо́га о на́с. Стоя́л еси́ пред суди́щем,/ пропове́дуя воплоще́ние тебе́ ра́ди Истощи́вшагося,/ и Пила́тову суди́щу Предста́вшаго, страстоте́рпче,/ и Кресто́м врага́ умори́вшаго. Сла́ва Отцу́ и Сы́ну и Свято́му Ду́ху. Боля́щим врачевство́ есть це́рковь,/ в не́йже, блаже́нне му́чениче, терпели́вое твое́ лежи́т те́ло,/ Боже́ственную зарю́ дарова́ний испуща́ет Ду́ха. И ны́не и при́сно и во ве́ки веко́в. Ами́нь. Богородичен: Святы́й Иису́с, всели́выйся во утро́бу Твою́,/ И́же во святы́х, Де́во, почива́яй/ и прославля́яй ве́рою и́стинною Сего́, Отрокови́це, сла́вящия. Кондак, глас 4 Апо́столов сопресто́льник и святи́телей украше́ние/ был еси́, блаже́нне,/ му́ченически просла́вився,/ возсия́л еси́, я́коже со́лнце, всех просвеща́я,/ Анти́по свяще́нне,/ разруши́л еси́ безбо́жия нощь глубо́кую./ Сего́ ра́ди тя почита́ем,/ я́ко Боже́ственнаго су́ща священному́ченика/ и целе́б пода́теля. Икос Ве́рно любо́вию совоку́пльшеся в па́мять свяще́ннаго страда́льца,/ сего́ пе́сньми восхва́лим днесь,/ я́ко да благода́ти от него́ наслади́мся:/ ду́ши бо спаса́ет от страсте́й и бед, я́ко му́ченик и я́ко ве́рен святи́тель и побо́рник моля́щим его́ от души́./ Те́мже вопие́м ему́:/ от бед изба́ви ны при́сно свои́ми мольба́ми, о́тче наш Анти́по. Песнь 7 Ирмос: В пещи́ Авраа́мстии о́троцы перси́дстей,/ любо́вию благоче́стия па́че,/ не́жели пла́менем, опаля́еми, взыва́ху:/ благослове́н еси́ в хра́ме сла́вы Твоея́, Го́споди. Припев: Священному́чениче Анти́по, моли́ Бо́га о на́с. Ю́ныя три о́троки изобразу́я, Анти́по му́дре,/ я́коже посреди́ пе́щи, стал еси́ лю́то разжже́ннаго ме́днаго сосу́да, взыва́я:/ благослове́н еси́ в хра́ме сла́вы Твоея́, Го́споди. Припев: Священному́чениче Анти́по, моли́ Бо́га о на́с. Да Све́та непристу́пнаго яви́шися прича́стник,/ тьму лука́вых духо́в, Бо́гом просвеще́н, мимоте́кл еси́,/ благослове́н еси́, Бо́же мой, – зовы́й, – Го́споди. Сла́ва Отцу́ и Сы́ну и Свято́му Ду́ху. Стра́сти разли́чны рукоде́йством, Анти́по, ду́ха утоля́еши челове́ков, му́чениче,/ Христо́вым подо́бяся страсте́м,/ благослове́н еси́, Бо́же мой, – зовы́й, – Го́споди. И ны́не и при́сно и во ве́ки веко́в. Ами́нь. Богородичен: От крове́й, Отроко́вице, деви́ческих Твои́х/ вои́стинну вопло́щся Сло́во, Отцу́ Собезнача́льное,/ на́ше сокруше́ние исправля́я./ Благослове́на Ты в жена́х еси́, Пренепоро́чная Влады́чице. Песнь 8 Ирмос: Ру́це распросте́р, Дании́л/ львов зия́ния в ро́ве затче́:/ о́гненную же си́лу угаси́ша,/ доброде́телию препоя́савшеся,/ благоче́стия рачи́тели о́троцы, взыва́юще:/ благослови́те, вся дела́ Госпо́дня, Го́спода. Припев: Священному́чениче Анти́по, моли́ Бо́га о на́с. Ны́не не в зерца́лех зри́ши, ни в гада́ниих до́брых после́днее,/ лице́м же па́че к лицу́, преше́дшим се́нем, вопия́ ра́достно тя Просла́вльшему:/ благослови́те, вся дела́ Госпо́дня, Го́спода. Припев: Священному́чениче Анти́по, моли́ Бо́га о на́с. Тя, Началопа́стыря Христа́ Боже́ственное овча́ до́бре упа́сшаго Того́ ста́да, прему́дре,/ я́ко а́гнца, беззако́ннии всесожига́ют огне́м, Анти́по, пою́ща:/ благослови́те, вся дела́ Госпо́дня, Го́спода. Сла́ва Отцу́ и Сы́ну и Свято́му Ду́ху. На ка́мени Боже́ственных за́поведей се́рдца твоего́ утверди́л еси́ стопы́,/ лю́тых мук ве́тры, ласка́тельными же бу́рями не поколеба́лся еси́,/ песнопоя́, Анти́по прему́дре:/ благослови́те, вся дела́ Госпо́дня, Го́спода. И ны́не и при́сно и во ве́ки веко́в. Ами́нь. Богородичен: Я́ко Ма́ти всех Творца́, я́ко Боже́ственный храм Вседержи́теля,/ я́ко земля́ неора́нная, неде́ланный клас прозя́бшая,/ Де́во Ма́ти, ве́рны вопию́щия сохрани́:/ благослови́те, вся дела́ Госпо́дня, Го́спода. Песнь 9 Ирмос: Ка́мень нерукосе́чный/ от несеко́мыя горы́, Тебе́, Де́во,/ краеуго́льный отсече́ся,/ Христо́с, совокупи́вый разстоя́щаяся естества́./ Тем, веселя́щеся, Тя, Богоро́дице, велича́ем. Припев: Священному́чениче Анти́по, моли́ Бо́га о на́с. Иера́ршески, святи́телю, свяще́нное сконча́л еси́ тече́ние,/ свяще́ннейшую жизнь твою́ свяще́ннейше соверши́в,/ ра́дуяся, поте́кл еси́, к тебе́ Люби́мому, Анти́по му́чениче свяще́ннейше. Припев: Священному́чениче Анти́по, моли́ Бо́га о на́с. Я́ко доброде́тельными ви́ды удобре́н быв,/ сла́вою муче́ния, всеблаже́нне, освяти́ся/ и преше́л еси́ к кра́сному Го́споду, прича́стием обожа́емь, Богоприя́тне. Припев: Священному́чениче Анти́по, моли́ Бо́га о на́с. Ты Госпо́днею любо́вию разжже́гся, му́чениче Анти́по,/ в разжже́н усе́рдно вшел еси́ сосу́д, всесожига́емь,/ и Бо́гу прия́тна, о́тче, же́ртва прине́слся еси́. Сла́ва Отцу́ и Сы́ну и Свято́му Ду́ху. Свяще́нных твои́х моще́й свяще́нная, блаже́нне, ра́ка ми́ро исцеле́ний то́чит,/ злосмра́дныя стра́сти отгоня́щи/ и твою́ сла́вящия па́мять я́ве благоуха́ющи. И ны́не и при́сно и во ве́ки веко́в. Ами́нь. Богородичен: Нося́щая Христа́ на руку́, манове́нием нося́щаго вся,/ Сего́, я́ко Бо́га и Влады́ку, Чи́стая, моли́ уще́дрити ны,/ Богоро́дицу Чи́стую испове́дающия Тя всегда́, Непоро́чная.

Минея, 28 Января, Ин канон Глас 6 Песнь 1 Ирмос: Се́ченое, сече́тся/мо́ре Чермнно́е,/ волнопита́емая же изсуша́ется глубина́,/ та́яжде ку́пно безору́жным бы́вши проходи́ма/ и всеору́жным гроб./ Песнь же Богокра́сная воспева́юща:/ сла́вно просла́вися Христо́с, Бог наш. Припев: Преподо́бне о́тче Феодо́сие, моли́ Бо́га о на́с. А́гнче Пречи́сте, Бо́жий Сло́ве,/ низпосли́ мне сло́во, недосто́йному, воспе́ти чудеса́ преподо́бнаго Твоего́ Феодо́сия,/ его́же в по́двизех просла́вил еси́, усе́рдно к Тебе́ воспева́юща:/ сла́вно просла́вися Христо́с Бог наш. Припев: Преподо́бне о́тче Феодо́сие, моли́ Бо́га о на́с. Весь возло́жся Зижди́телеви/ и сла́ву вре́менную презре́ти жела́я,/ желе́зы те́ло твое́ стягну́в, к по́двигу устреми́лся еси́,/ Боже́ственною разже́гся ре́вностию, в моли́твах же к Бо́гу воспева́я:/ сла́вно просла́вися Христо́с Бог наш. Сла́ва Отцу́ и Сы́ну и Свято́му Ду́ху. Го́рдаго зми́я смире́нием твои́м попра́в,/ плотска́я взыгра́ния умертви́л еси́,/ и жите́йския сла́сти терпе́нием, а́ки мече́м, посе́кл еси́,/ преподо́бне Феодо́сие, Го́сподеви вопия́:/ сла́вно просла́вися Христо́с Бог наш. И ны́не и при́сно и во ве́ки веко́в. Ами́нь. Богородичен: Де́вство сохрани́вши некра́домо,/ от Ду́ха Свя́та заче́нши, родила́ еси́ Бо́га Сло́ва/ и по Рождестве́ пребыла́ еси́, я́коже и пре́жде, Богоневе́сто Влады́чице./ Те́мже спаси́ нас, вопию́щих:/ сла́вно просла́вися Христо́с Бог наш. Песнь 3 Ирмос: Госпо́дь Сый всех и Зижди́тель Бог,/ созда́нное Безстра́стный, обнища́в, Себе́ соедини́,/ и Па́сха, за я́же хотя́ше умре́ти,/ Сам Сый, Себе́ предпожре́:/ яди́те, – вопия́, – Те́ло Мое́/ и ве́рою утверди́теся. Припев: Преподо́бне о́тче Феодо́сие, моли́ Бо́га о на́с. Еди́наго возлюби́л еси́ Христа́, преподо́бне Феодо́сие,/ во пло́ти безпло́тных полки́ посрами́л еси́/ и по преставле́нии твое́м чудеса́ то́чиши:/ явле́нием бо со ико́ною Пречи́стыя Богома́тере деви́цу разсла́бленную от одра́ возста́вил еси́. Припев: Преподо́бне о́тче Феодо́сие, моли́ Бо́га о на́с. Житие́ непоро́чно на земли́ соверши́л еси́, преподо́бне,/ ны́не же стра́сти неду́жных исцеля́еши:/ стра́ждущему бо на но́вый ме́сяц от лука́ваго ду́ха триле́тное вре́мя здра́вие по́дал еси́,/ прише́дшу ко свято́му гро́бу твоему́. Сла́ва Отцу́ и Сы́ну и Свято́му Ду́ху. Зижди́телю предстои́ши к Нему́ дерзнове́ние и́маши, о́тче./ К ра́це бо твое́й прише́дшая жена́,/ шум, и дво́ицы глаго́лание, и пе́ния у́бо слы́шавши, ужасе́ся;/ ма́нием же каса́ния оче́с прозре́ние пода́л еси́ ей,/ назна́менуя святы́я воды́ кропле́ние. И ны́не и при́сно и во ве́ки веко́в. Ами́нь. Богородичен: Из ко́рене Иессе́ова изра́стши жезл, цвет нося́щий – Христа́, Соде́теля вся́кия тва́ри,/ увяди́вшаго сады́ непло́днаго ра́зума,/ Де́во Богоро́дице, спаси́ ны от грехо́вных страсте́й,/ прибега́ющия в кров Твой с ве́рою. Седален, глас 8 Премно́жеством доброде́телей от младе́нства житие́ украси́л еси́,/ помы́слив от зе́мных на Небе́сная,/ и, де́лом соверши́в, о́тче Феодо́сие, сла́ву и бога́тство тле́нное ни во что же вмени́л еси́;/ посто́м и власяны́м одея́нием плоть твою́ изнуря́л еси́,/ всено́щным же стоя́нием и моли́твами собесе́дник а́нгельским лико́м показа́лся еси́./ Моли́ Христа́ Бо́га согреше́ний оставле́ние дарова́ти/ чту́щим любо́вию святу́ю па́мять твою́. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Я́ко Де́ву и еди́ну в жена́х, Тя, без се́мене ро́ждшую Бо́га пло́тию,/ вси ублажа́ем, ро́ди челове́честии:/ Огнь бо всели́ся в Тя Божества́/ и я́ко Младе́нца млеко́м пита́еши Зижди́теля и Го́спода./ Тем, А́нгельский и челове́ческий род, досто́йно сла́вим Пресвято́е Рождество́ Твое́/ и согла́сно вопие́м Ти:/ моли́ Христа́ Бо́га согреше́ний оставле́ние дарова́ти/ покланя́ющимся ве́рою Пресвято́му Рождеству́ Твоему́. Песнь 4 Ирмос: Удиви́ся Твой ра́зум от мене́,/ услы́шавшу пресла́вная веле́ния смотре́ния Твоего́,/ укрепи́ся же возлюбле́нием Твоего́ схожде́ния,/ Ты бо моея́ нищеты́ не отве́рглся еси́. Припев: Преподо́бне о́тче Феодо́сие, моли́ Бо́га о на́с. Феодо́сие блаже́нне, воздержа́нием во пло́ти/ стра́сти чу́вственный умертви́л еси́/ и по успе́нии твое́м стра́сти неду́жных разреша́еши:/ одержи́маго бо тряса́вицею свободи́л еси́ от неду́га. Припев: Преподо́бне о́тче Феодо́сие, моли́ Бо́га о на́с. Исто́чники сле́зными напои́в ни́ву души́ твоея́, о́тче,/ чудесы́ просия́л еси́, я́ко звезда́, многосве́тлая:/ боле́знующаго очи́ма уврачева́л еси́,/ младе́нца же спасл еси́, му́чима от лука́ваго ду́ха. Сла́ва Отцу́ и Сы́ну и Свято́му Ду́ху. Ко Творцу́ о нас мо́лишися, преподо́бне,/ и да́руеши цельбы́ неоску́дно припада́ющим к ра́це твое́й:/ хрома́го от боле́зни уврачева́л еси́/ и ходи́ти непреткнове́нно устро́ил еси́. И ны́не и при́сно и во ве́ки веко́в. Ами́нь. Богородичен: Лю́дем яви́ся обновле́ние, Влады́чице:/ Ты бо родила́ еси́ во вре́мени от Отца́ рожде́ннаго пре́жде век,/ нас же ра́ди от Тебе́ воплоти́вшегося/ и спа́сшаго от пе́рвыя кля́твы род челове́ческий. Песнь 5 Ирмос: Богоя́вления Твоего́, Христе́,/ к нам ми́лостивно бы́вшего,/ Иса́ия Свет ви́дев Невече́рний,/ из но́щи у́треневав, взыва́ше:/ воскре́снут ме́ртвии,/ и воста́нут су́щии во гробе́х,/ и вси земноро́днии возра́дуются. Припев: Преподо́бне о́тче Феодо́сие, моли́ Бо́га о на́с. Мно́гое име́я дерзнове́ние к Зижди́телю, о́тче Феодо́сие,/ мно́гими мя, лю́тыми страстьми́ содержи́маго, исцели́,/ я́коже и деви́цу, все́ми у́ды разсла́бленную,/ прикосну́вшуюся ра́це твое́й, исцели́л еси́. Припев: Преподо́бне о́тче Феодо́сие, моли́ Бо́га о на́с. Недрема́нно после́дуя Христу́,/ плоть нас ра́ди прие́мшу и о́чи слепа́го отве́рзшу, Феодо́сие,/ жене́ слепе́й и о́ком неви́дящему прозре́ние по́дал еси́,/ и нас просвети́, пою́щих тя. Сла́ва Отцу́ и Сы́ну и Свято́му Ду́ху. К Серафи́мом приобщи́вся, преподо́бне Феодо́сие,/ вся́ческих Творца́ и Влады́ку преклони́л еси́ на милосе́рдие:/ седмоле́тное вре́мя не слы́шавшему уши́ма, дарова́л еси́ здра́вие. И ны́не и при́сно и во ве́ки веко́в. Ами́нь. Богородичен: Огнь Боже́ственный во утро́бе поне́сши, Богоневе́сто Пречи́стая,/ попали́ на́ша стра́сти душетле́нныя/ и просвети́ сердца́ пою́щих,/ да вси Тебе́ прославля́ем, ро́ждшую Го́спода, всю тварь содержа́щего. Песнь 6 Ирмос: Зве́рю бе́здны предае́тся проро́к Ио́на,/ глубине́ морско́й,/ прообразу́я Твое́, Сло́ве, тридне́вное воста́ние./ Тем и взыва́ше:/ из глубины́ преиспо́дния возведи́ живо́т мой,/ Благоутро́бне. Припев: Преподо́бне о́тче Феодо́сие, моли́ Бо́га о на́с. Пресвяте́й Тро́ице дом себе́ устро́ив,/ пусты́ню возлюби́л еси́/ и по преселе́нии твое́м к Бо́гу посеща́еши ученики́ твоя́,/ ста́рца разсла́бленнаго укрепи́л еси́/ и младе́нцу разреши́л еси́ слепоту́. Припев: Преподо́бне о́тче Феодо́сие, моли́ Бо́га о на́с. Ра́ка моще́й твои́х, о́тче Феодо́сие, неоску́дно исцеле́ния источа́ет приходя́щим с ве́рою:/ глазну́ю боле́знь и разслабле́ние те́ла жене́ разреши́л еси́,/ челове́ка же одержи́маго от лука́ваго ду́ха свободи́л еси́. Сла́ва Отцу́ и Сы́ну и Свято́му Ду́ху. Све́том Боже́ственным озаря́емь свы́ше,/ чудесы́ просия́л еси́/ и мрак де́монский разруша́еши;/ нас же, прегреше́ньми объюроде́вших, уцелому́дри,/ я́коже изсту́пльших ума́ уцелому́дрил еси́. И ны́не и при́сно и во ве́ки веко́в. Ами́нь. Богородичен: Тя прови́де Дании́л несе́ченную го́ру,/ из нея́же отто́ржеся ка́мень без руку́,/ прообразу́я от Тебе́ воплоще́ние Безле́тнаго в ле́то./ Нас же, во глубине́ злых прегреше́ний тружда́ющихся, спаса́еши, Богоро́дице,/ еди́на земны́м прибе́жище. Кондак, глас 8 Воздержа́нием плоть изнури́л еси́/ и непреста́нными моли́твами, я́ко А́нгел, возвы́сился еси́,/ струя́ми же сле́зными бесо́вския полки́ погрузи́л еси́./ И ны́не во Све́те невече́рнем лику́еши у Христа́ Бо́га/ и приходя́щим ко свято́му твоему́ гро́бу неоску́дно исцеле́ние подае́ши,/ ве́рою вопию́щим тебе́:/ ра́дуйся, о́тче Феодо́сие Богому́дре. Икос Возревнова́в о Боже́ственных бде́ниих/ и те́сным на земли́ ше́ствовав путе́м,/ Небе́сных простра́нствия ра́достне дости́гл еси́,/ иде́же зри́ши Пресвяту́ю Тро́ицу,/ дарова́ньми чуде́с обогаща́емь./ Мы же, терпе́нию твоему́ дивя́щеся, си́це вопие́м:/ ра́дуйся, чи́стое Свята́го Ду́ха прия́телище;/ ра́дуйся, земны́й А́нгеле и Небе́сный челове́че;/ ра́дуйся, любве́ ра́ди Христо́вы град оте́чества земна́го оста́вивый/ и в междоре́чии жи́ти изво́ливый;/ ра́дуйся, дре́во доброде́телей, при вода́х насажде́нное;/ ра́дуйся, я́ко плод прине́сл еси́ благоцвету́щ послуша́ния;/ ра́дуйся, я́ко терпе́нием твои́м стра́сти плотски́я умертви́л еси́;/ ра́дуйся, я́ко ору́жием кре́стным мы́сленнаго Амали́ка посе́кл еси́;/ ра́дуйся, сто́лпе, непоколеби́мый жите́йскими ве́тры;/ ра́дуйся, лука́вых духо́в прогони́телю;/ ра́дуйся, я́ко исцеле́ний источа́еши реку́;/ ра́дуйся, я́ко стра́ждущих от бед избавля́еши;/ ра́дуйся, и́ноком исправле́ние;/ ра́дуйся, о́тче Феодо́сие Богому́дре. Песнь 7 Ирмос: Три ю́ноши не опали́ дре́вле возвыша́емый пла́мень,/ неща́дно мя зной к тле́нию положи́./ Но, я́ко о́ныя изба́вил еси́ сия́нием Твои́м,/ пою́щаго с ни́ми спаси́ мя:/ благослове́н еси́, Бо́же оте́ц на́ших. Припев: Преподо́бне о́тче Феодо́сие, моли́ Бо́га о на́с. У Влады́ки Творца́ предстоя́ в Вы́шнем Ца́рствии, Феодо́сие преподо́бне,/ боле́знующую очи́ма исцели́л еси́;/ просвети́ и на́ша серде́чная очеса́ све́том Богоразу́мия/ и научи́ к Нему́ пе́ти:/ благослове́н еси́, Бо́же оте́ц на́ших. Припев: Преподо́бне о́тче Феодо́сие, моли́ Бо́га о на́с. Фарисе́йское киче́ние отве́ргше,/ усе́рдно присту́пим вси ко гро́бу Богому́драго Феодо́сия:/ источа́ет бо нам неоску́дную струю́ исцеле́ний./ О́троку страсть телесе́ и соу́з язы́ка разреши́в,/ да отве́рзет и на́ши устне́ пе́ти Христу́:/ благослове́н еси́, Бо́же оте́ц на́ших. Сла́ва Отцу́ и Сы́ну и Свято́му Ду́ху. Излия́нием чуде́с от Бо́га обогати́лся еси́, о́тче,/ те́мже приходя́щих облегча́еши боле́зни,/ расте́ния утро́бы, и струп ноги́, и кро́ви тече́ние уста́вил еси́./ Утверди́ у́бо и на́ша мы́сли зва́ти Христу́:/ благослове́н еси́, Бо́же оте́ц на́ших. И ны́не и при́сно и во ве́ки веко́в. Ами́нь. Богородичен: Христа́ ро́ждши, Влады́ку и Врача́ вся́ческих, Богоро́дице,/ ра́нами грехо́вными нас, уя́звленных лю́те от душетле́ннаго стрельца́/ и неисце́льно боля́щих, исцели́, Влады́чице, моли́твами Твои́ми/ и пла́стырь приложи́ покая́ния Сы́ну Твоему́ зову́щим:/ благослове́н еси́, Бо́же оте́ц на́ших. Песнь 8 Ирмос: За зако́ны оте́ческая/ блаже́ннии в Вавило́не ю́ноши, предбе́дствующе,/ царю́ющаго оплева́ша повеле́ние безу́мное/ и, совоку́плени и́мже, не свари́шася огне́м,/ Держа́вствующему досто́йную воспева́ху песнь:/ Го́спода по́йте, дела́,/ и превозноси́те во вся ве́ки. Припев: Преподо́бне о́тче Феодо́сие, моли́ Бо́га о на́с. Псало́мски процве́л еси́, я́ко фи́никс, в посте́ и по́двизех,/ и бесо́вския полки́ прогоня́еши, и да́руеши цель бы незави́стно./ Жите́йскими помышле́ньми мой ум мяту́щийся уцелому́дри, да воспою́:/ Го́спода по́йте, дела́, и превозноси́те во вся ве́ки. Припев: Преподо́бне о́тче Феодо́сие, моли́ Бо́га о на́с. Царе́ви всех и Бо́гу предстоя́, о́тче Феодо́сие,/ нам испроси́ одоле́ние на враги́ ви́димыя и неви́димыя/ и дви́жимая сердца́ на́ша утверди́, да в ра́дости душе́вней воспое́м:/ Го́спода по́йте, дела́, и превозноси́те во вся ве́ки. Сла́ва Отцу́ и Сы́ну и Свято́му Ду́ху. Чи́сте зре́ти сподо́бився Пресвяту́ю Тро́ицу,/ до конца́ чи́сто житие́ сохрани́л еси́/ и чистото́ю А́нгелы удиви́л еси́./ Мене́ же, жите́йскими сластьми́ оскверне́ннаго,/ очи́сти моли́твами твои́ми, да воспою́:/ Го́спода по́йте, дела́, и превозноси́те во вся ве́ки. И ны́не и при́сно и во ве́ки веко́в. Ами́нь. Богородичен: О Све́та прия́телище, пресве́тлаго Со́лнца о́блаче, Богора́дованная Влады́чице,/ ле́ствице мы́сленная, Небе́сная врата́, спасе́ния две́ри!/ Бог бо из Твои́х ложе́сн про́йде неизрече́нно,/ Его́же прославля́ем во ве́ки. Песнь 9 Ирмос: Стра́нствия Влады́чня/ и Безсме́ртныя Тра́пезы/на Го́рнем ме́сте высо́кими умы́,/ ве́рнии, прииди́те, наслади́мся,/ возше́дша Сло́ва,/ от Сло́ва научи́вшеся, Его́же велича́ем. Припев: Преподо́бне о́тче Феодо́сие, моли́ Бо́га о на́с. Граждани́н Вы́шний жела́я бы́ти,/ земна́го оте́чества град оста́вил еси́, пресе́льник яви́вся, о́тче Феодо́сие,/ к Го́рним легко́ преше́л еси́, во све́те пра́ведных водворя́яся,/ ду́хом же неотсту́пно с на́ми пребыва́еши,/ сохраня́й у́бо нас, тя воспева́ющих. Припев: Преподо́бне о́тче Феодо́сие, моли́ Бо́га о на́с. Распросте́р преподо́бнии твои́ ру́це,/ принеси́ моле́ние ко Всеще́дрому Бо́гу, о́тче Богому́дре Феодо́сие,/ сохрани́ти град твой невреди́м от ва́рварскаго наше́ствия и междоусо́бныя бра́ни/ и спасти́ нас, тебе́ велича́ющих. Сла́ва Отцу́ и Сы́ну и Свято́му Ду́ху. Глаго́л мои́х недосто́йных гру́бое веща́ние,/ е́же по си́ле принесо́х тебе́, преподо́бне Феодо́сие,/ приими́ и не пре́зри,/ но Творца́ на́шего, Влады́ку и Го́спода, моли́ за мя,/ в день стра́шнаго испыта́ния ми́лость обрести́/ и та́мошняго муче́ния изба́витися. И ны́не и при́сно и во ве́ки веко́в. Ами́нь. Богородичен: Ря́сны златы́ми преукра́шена,/ одесну́ю Царя́ Бо́га предстои́ши, Богоро́дице Де́во,/ моли́ у́бо Сы́на Твоего́ и Влады́ку/ ми́лость обрести́ нам в день после́дняго испыта́ния,/ и стоя́ния сподо́би нас со избра́нными,/ и стра́шнаго муче́ния свободи́, да вси Тебе́ велича́ем. Светилен Умертви́л еси́ до́лу влеку́щая мудрова́ния,/ и, мирска́го пристра́стия удали́вся, я́ко скве́рны,/ процве́л еси́, я́ко фи́никс, дави́дски, о́тче Феодо́сие,/ и Небе́сною сла́вою со А́нгелы обогати́лся еси́ от Бо́га,/ Его́же в пе́снех восхваля́ем. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Честне́йши еси́ всея́ тва́ри, Богоро́дице Де́во, Христа́ ро́ждшая,/ Того́ у́бо моли́ сохрани́тися ста́ду Твоему́ невреди́му/ от вся́каго наве́та сопроти́внаго.

Минея, 25 Октября, Канон святой Глас 4 Песнь 1 Ирмос: Несть Тебе подобен, препрославленный Господи,/ рукою бо крепкою избавил еси люди,/ яже стяжал еси, Человеколюбче. Припев: Свята́я пра́ведная Тави́фо, моли́ Бо́га о на́с. Приспе́ светоносный днесь праздник,/ радости исполняяй вселенную,/ Тавифа от смертнаго сна востает к жизни сей,/ указу́ющи путь ко спасению. Припев: Свята́я пра́ведная Тави́фо, моли́ Бо́га о на́с. Аще, возшед на Небо, и царствует одесную Отца Низложитель смерти и ада,/ но неразлучно пребывает и в Церкви Своей по неложному обещанию,/ ныне ученицу, добродетельми украшенную,/ здравою возставляет посреде́ от мертвых словом апостола,/ верным Своим указуя путь ко спасению. Сла́ва Отцу́ и Сы́ну и Свято́му Ду́ху. Милости источник сый,/ обещавый помиловати благосерда,/ возлюбившую ближния Тавифу блаженную/ в назидание всем воскреси от нетления,/ житием тоя указуя путь ко спасению. И ны́не и при́сно и во ве́ки веко́в. Ами́нь. Богородичен: Яже принесшая во вселенную радость, мир и спасение,/ Дево Всепетая, моли Сына Своего Вседержителя с Тавифою милосердною,/ да помилует люди Своя,/ Сам бо есть верным Своим путь ко спасению. Песнь 3 Ирмос: С высоты снизшел еси волею на землю/ превышше всякаго начала/ и смиренное вознесл еси/ из ада преисподняго естество человеческое;/ несть бо свят, паче Тебе, Человеколюбче. Припев: Свята́я пра́ведная Тави́фо, моли́ Бо́га о на́с. Творец всея твари, обнищав нас ра́ди,/ сниде даже до Креста и погребения,/ но воскресе Боголепно, со славою, возставляя сущия во гробе́х,/ Той и ныне воздви́же Тавифу от мертвых словом верховнаго Апостола,/ темже славно прославися. Припев: Свята́я пра́ведная Тави́фо, моли́ Бо́га о на́с. Исполнив все смотрение, еже о нас,/ посла Неботаи́нники апостолы Своя всем язы́ком,/ возвещати спасение всех земнородных,/ Владыка жизни и смерти рече́нием камене веры воскрешает Тавифу умершую,/ темже славно прославися. Сла́ва Отцу́ и Сы́ну и Свято́му Ду́ху. Искус смертный прие́мшую Тавифу милосердную/ воздвиза́ет от тления Животворя́й вся,/ утверждая веру ученик Своих чудом благовестника,/ в немже славно прославися. И ны́не и при́сно и во ве́ки веко́в. Ами́нь. Богородичен: Вышшую небес и чистшую всея твари,/ явльшую в мир Еммануила,/ Иже спасе́ нас и приусво́и, и соедини с Собою, и воздви́же от смерти вечныя,/ благодарно вси и славно прославим. Седален, глас 3 О, чуда преестественнаго!/ О, величества Божия!/ Воскресением Содетеля жизнь утвердися и смерть низложися./ И Той во апостолех вся чудодействует,/ якоже и ныне зрим востание Тавифы от мертвых словом Петровым. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Божественнаго естества́ не отлу́чся,/ плоть быв во чреве твое́м,/ но Бог вочеловечся и пребысть,/ Иже по рождестве, Матерь, Тя Деву,/ я́ко прежде рождества,/ сохранив Всенепоро́чну Един Господь./ Того прилежно моли дарова́ти нам велию милость. Песнь 4 Ирмос: Сей Бог наш от Девы воплощься/и естество обожив,/ Егоже воспевающе, вопием:/ слава силе Твоей, Господи. Припев: Свята́я пра́ведная Тави́фо, моли́ Бо́га о на́с. Зна́мение всемирнаго воскресения в день оный ныне зрим в Иоппи́и,/ апостол повелевает, и мертвая паки обретает жизнь, назидающи всех в добродетели,/ к нейже, припа́дающе, воззовем:/ Тавифо блаженная, моли спастися всем нам. Припев: Свята́я пра́ведная Тави́фо, моли́ Бо́га о на́с. Силою Воскресшаго Спаса,/ Петровым гласом возбуди́лася еси от сна смертнаго,/ да паки поживе́ши в правде по заповеди Милосерднаго Спаса,/ Егоже моли, Тавифо блаженная, спастися всем нам. Сла́ва Отцу́ и Сы́ну и Свято́му Ду́ху. Таинство смертное токмо коснуся тебе, Тавифо блаженная,/ повеле́ бо Спас глаголом ученика воскре́снути тебе от мертвых,/ да знают вси земнороднии, яко входы и исходы жизни нашея в деснице Вседержителя,/ Егоже моли спастися всем нам. И ны́не и при́сно и во ве́ки веко́в. Ами́нь. Богородичен: Архангел Гавриил благовести́ тебе, Дево, вопияше,/ яко низложи́ Сын Твой смерть и воскресе боголепно,/ подая избавление людем Своим, вопиющим к Тебе усердно:/ Владычице, упование наше, моли спастися всем нам. Песнь 5 Ирмос: Ныне востану, пророчески рече Бог,/ ныне прославлюся, ныне вознесуся,/ падшаго прием от Девы,/ и к свету умному возносяй Моего Божества. Припев: Свята́я пра́ведная Тави́фо, моли́ Бо́га о на́с. Никтоже поставляет под спудом светильник горящий,/ но на свещнице, да светит всем./ Тако и ныне, Тавифо блаженная, Человеколюбец Господь воздвизает тя,/ елеем милости исполненную и светом Христовым сияющую, глаголом первоверховнаго./ Моли Жизнодавца Спаса, да просветит души наша. Припев: Свята́я пра́ведная Тави́фо, моли́ Бо́га о на́с. Имеяй власть судити живым и мертвым/ посылает ученики воскрешати мертвыя во утверждение Евангельскаго благовестия./ Сего ради и Тавифа возбуждается паки от смертнаго сна,/ к нейже припаде́м вопиюще:/ моли Воскресшаго нас ради, да просветит души наша. Сла́ва Отцу́ и Сы́ну и Свято́му Ду́ху. Юже воздви́же от гроба первопрестольник апостолов,/ восхвалим вси песньми достодо́лжными:/ Тавифо блаженная, милости Божия сосуде избра́нный,/ моли Благосердаго Человеколюбца, да просветит души наша. И ны́не и при́сно и во ве́ки веко́в. Ами́нь. Богородичен: Тя величаем, Богородице Дево,/ Ты еси свеще́ умная, явльшая миру Свет неприступный,/ Имже вси озари́хомся в купели Крещения, оба́че помрачи́хомся прегреше́ньми,/ умоли Его, плоть от Тебе Приемшаго, да просветит души наша. Песнь 6 Ирмос: Приидо́х во глубины морския/ и потопила мя есть буря многих грехов,/ но яко Бог из глубины возведи живот мой,/ Многомилостиве. Припев: Свята́я пра́ведная Тави́фо, моли́ Бо́га о на́с. Вся тварь ныне ужаса и радости исполняется,/ ви́дящи смерть низлагаему воскрешением Тавифы человеком, приемшим повеление Богочеловека,/ Низложи́теля ада и смерти, к Немуже воззовем:/ Твой мир даждь нам, Всесильне. Припев: Свята́я пра́ведная Тави́фо, моли́ Бо́га о на́с. О Тавифо блаженная!/ Воставши от мертвых веща́нием гласа апостольскаго,/ егоже Господь посла чудеса совершати во умножение веры,/ воззови, Емуже предстои́ши и Егоже зриши непрестанно по втором твоем успении:/ мир Твой, Всесильне, даруй людем Твоим. Сла́ва Отцу́ и Сы́ну и Свято́му Ду́ху. Егда апостольский глас в слух уха твоего прия́ла еси, блаженная,/ востала еси от смертнаго ложа/ и, поживши благочестно, паки преставилася еси к Горней Славе,/ идеже помолися, Тавифо, Господу всяческих,/ да дарует всем нам мир, яко Всесилен. И ны́не и при́сно и во ве́ки веко́в. Ами́нь. Богородичен: Мати Божия, Радосте наша и Прибежище спасения!/ Обурева́еми есмы прегрешеньми и напа́стьми житейскими, к Тебе припа́даем,/ приносяще сокрушения сердечная, и Тя на помощь призываем:/ мир подаждь мирови Твоими молитвами. Кондак, глас 4 Ужасахуся Иоппи́йстии людие, и дивля́хуся Ангели Божии,/ егда исцеливый Еннея воззва от мертвых серну нарицаемую, милосердием преукрашенную,/ о нейже к нему взываху вдовицы неиму́щыя./ И ныне, Тавифо блаженная, услыши молитвы наша, к тебе приноси́мыя,/ и испроси у всяческих благ Подателя милости и щедроты верным Его,/ да, блажаще тя, вопием ти:/ радуйся, добродетели нас научающая. Икос Ты еси прибежище сирым и вдовицам, Тавифо, рабо Господня./ Сотворила еси блага́я людей, законы Евангельския исполнила еси/ и научила еси человеки не себе жи́ти, но ближнему угождати во благое./ Сего ради насле́дница Царствия Небеснаго явилася еси/ и пребыла́ еси на земли, иму́щи любовь Небесную,/ ейже причастники сотвори молитвою твоею и нас, чтущих тя верно и вопиющих:/ радуйся, добродетели нас научающая. Песнь 7 Ирмос: В начале Безначальное Слово/со Отцем и Духом, Сын Единородный, благословен еси,/ и превозноси́мый, Боже отец наших. Припев: Свята́я пра́ведная Тави́фо, моли́ Бо́га о на́с. Апостольский лик разсе́яся в поднебесней, словом Евангельским вся концы земли́ просвеща́я./ Петр убо воздви́жением Тавифы от мертвых вселенную утверди исповедати воскресение Христа Жизнодавца,/ Егоже превозносим во веки. Припев: Свята́я пра́ведная Тави́фо, моли́ Бо́га о на́с. Воскреснут мертвии, и востанут сущии во гробе́х,/ глаголаше древле пророк, прови́дяй духом попрание ада./ Сие же явле́но бысть и твоим успением и востанием, Тавифо;/ темже и мы, чтуще верно память твою,/ Христа Жизнодавца превозносим во веки. Сла́ва Отцу́ и Сы́ну и Свято́му Ду́ху. Испове́дающи Господа Иисуса усты твоими, блаженная Тавифо,/ сердце твое отдала́ еси Тому́, и заповеди Его потщилася еси исполнити,/ и служила еси де́лы рук твоих неимущым./ Добродетелию же, яко лествицею, взошла еси в чертоги Небесныя./ Мы же, видяще тя сияющую светом Евангельским,/ Христа Жизнодавца поем и превозносим во веки. И ны́не и при́сно и во ве́ки веко́в. Ами́нь. Богородичен: Фома иногда прии́де на гроб Твой, Владычице,/ видев пояс един, уразуме́, яко воскре́сла еси от гроба благодатию и силою Сына Твоего./ Тогда убо апостоли прославиша Господа и Тебе, Заступницу нашу./ Теми убо науче́ни, и мы веруем, яко присно с нами еси неотступна,/ сподоби ны грешныя, не имущыя елея милости,/ предстояти Престолу Христа Жизнодавца, якоже Тавифа, с лики избра́нных,/ да превозносим Его во веки. Песнь 8 Ирмос: Изба́вителю всех, Всесильне,/ посреде́ пламене благоче́ствовавшия,/ снизшед, ороси́л еси/ и научил еси пети:/ вся дела благословите, пойте Господа. Припев: Свята́я пра́ведная Тави́фо, моли́ Бо́га о на́с. Обиталище Духа Всесвятаго явилася еси, досточудная,/ исто́ргла бо еси от сердца твоего вся мудрования греховная,/ наипаче же страх Господень стяжала еси/ и воздвигла еси в души твоей храмину благочестия, Богове́дения же и человеколюбия,/ и ныне, радующися в Небесных чертозех,/ молися о нас, чтущих тя верно. Припев: Свята́я пра́ведная Тави́фо, моли́ Бо́га о на́с. Плод мира и радости о Дусе Святе духовен есть,/ и любы, яже есть союз совершенства,/ долготерпение же с благостию и милосердием./ Иму́щи же вся сия,/ сотворила еси в себе пребывалище благодати Божия, Тавифо достохва́льная,/ и была еси образ добродетели,/ житием твоим благовеству́ющи Евангелие Царствия Небеснаго./ Молися убо о нас, чтущих тя верно. Сла́ва Отцу́ и Сы́ну и Свято́му Ду́ху. Образ и утешения и долготерпения, блаженная Тавифо, явила еси в житии о Господе,/ вся бо дела твоя растворила еси милостию,/ яже излияся от сердца твоего, в немже благодать вселися./ Даждь убо и нам от елея сего, яко да светильницы наши не угаснут,/ чтущим тя верно. И ны́не и при́сно и во ве́ки веко́в. Ами́нь. Богородичен: Еже, Дево, от века та́инство открыся,/ егда в сбытие́ Сове́та Превечнаго благовести Тебе Гавриил рождество Еммануила – Бога Истиннаго и Человека,/ Иже совоскреси́ всех с Собою и обожи́./ Того моли, Преблагословенная Заступнице наша,/ даровати радость вечную чтущим Тя верно. Песнь 9 Ирмос: Сокровенное Божие неизрече́нное/ в Тебе совершается явственное таинство,/ Дево Пречистая,/ ибо Бог из Тебе воплотися за милосердие./ Темже тя яко Богородицу величаем. Припев: Свята́я пра́ведная Тави́фо, моли́ Бо́га о на́с. Милость, о Тавифо, возлюбила еси по слову Господню/ и принесла еси Ему в жертву чи́сту сердце твое, блаженная,/ еже очистила еси огне́м любве Божественныя,/ и, взирающи на люди, разумела еси в тех образ Божий/ и творила еси им такожде, якоже запове́да Спас мира./ Даждь убо и нам от любве твоея и моли, Егоже возлюбила еси,/ даровати нам жизнь безконечную. Припев: Свята́я пра́ведная Тави́фо, моли́ Бо́га о на́с. Веселятся концы земли и радуется Иоппи́я, ныне свершаемо зря́ще чудо преславное,/ яко воста́ от гроба жена блаженная и праведная сущи,/ ученица Поправшаго силу смерти и врата ада,/ Того убо моли, Тавифо, о всех нас. Сла́ва Отцу́ и Сы́ну и Свято́му Ду́ху. Славословие и песни, Тавифо блаженная, приносим Единому Источнику безсмертия,/ воскресившему тя Апостола Своего рече́нием и веру утвердившему/ и научившему нас, како вни́ти в Его чертоги Небесныя стезе́ю милости, еюже востекла́ еси./ О сем, радости испо́лнени,/ приносим Ему песни усердныя и молитвы:/ светом Твоим просвети всех нас. И ны́не и при́сно и во ве́ки веко́в. Ами́нь. Богородичен: И Небесная и земна́я поют Тебе, Богомати, гласы хваления,/ яко Тобою Бога позна́хом и обрето́хом жизнь вечную:/ Твой бо Сын Божественный узы смертныя разори́ Своею смертию и воскресением./ Темже востание Тавифы от смертнаго сна гласом первоверховнаго апостола почитающе, молим Тя, Владычице:/ мир Церкви и миру Твоему, Богородице, даруй,/ утоли́ церковныя собла́зны и постави ны с лики избра́нных Твоих. Светилен Свет, из гроба Воплотившагося Превечнаго Слова возсиявый,/ озари́ всю вселенную блиста́ньми воскресения, имже попрася смерть./ Апостол же, нося́й сияние сего Света живоноснаго, воззва от мертвых Тавифу во Иоппи́и,/ утвердив исповедание Воскресшаго,/ Емуже взываем:/ просвети нас Твоею истиною. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Троице Трисия́нная,/ света Твоего зарями просвети омраченныя прегрешеньми/ и воздвигни до́лу поверженныя и земли преклоньшияся,/ да не у́мрем во веки, но востанем от греховнаго тления, якоже Тавифа от гроба,/ вси бо аще и согрешаем, но несумне́нно православно исповедаем Отца и Сына и Духа Святаго.

Минея, 14 Мая, Канон святого Глас 3 Песнь 1 Ирмос: Су́шу глубороди́тельную зе́млю/ со́лнце наше́ствова иногда́:/ я́ко стена́ бо, огусте́ обапо́лы вода́/ лю́дем пешемореходя́щим/ и богоуго́дно пою́щим:/ пои́м Го́сподеви, сла́вно бо просла́вися. Припев: Святи́телю, о́тче Ники́то, моли́ Бо́га о на́с. А́гнче непоро́чный, Бо́жий Сло́ве,/ отве́рзи моя́ недосто́йная уста́,/ да возмогу́ воспе́ти святи́теля Ники́ту, Твоего́ уго́дника. Припев: Святи́телю, о́тче Ники́то, моли́ Бо́га о на́с. Боле́зньми по́стническими ду́шу просвети́в, преподо́бне,/ я́ко чи́сту же́ртву Христу́ предста́вил еси́, ра́дуяся, поя́:/ сла́вно бо просла́вися. Сла́ва Отцу́ и Сы́ну и Свято́му Ду́ху. Воздержа́нием те́ло ду́ху порабо́тил еси́,/ ду́шу же равноа́нгельну сотвори́л еси́./ Помина́й ве́рою чту́щия тя, поя́ Бо́гу:/ сла́вно бо просла́вися. И ны́не и при́сно и во ве́ки веко́в. Ами́нь. Богородичен: Господороди́тельнице Влады́чице Мари́е,/ моли́, Его́же родила́ еси́, Бо́га и Царя́ на́шего,/ да ми́лостив бу́дет нам в день Су́дный. Песнь 3 Ирмос: Непло́дная душе́ и безча́дная,/ стяжи́ плод благосла́вный,/ веселя́щися, возопи́ти:/ утверди́хся Тобо́ю, Бо́же,/ несть свят, несть пра́веден, па́че Тебе́, Го́споди. Припев: Святи́телю, о́тче Ники́то, моли́ Бо́га о на́с. Де́латель быв за́поведей Госпо́дних,/ непреста́нно в них поуча́яся, о́тче Ники́то,/ сего́ ра́ди вшел еси́ в Небе́сная, вопия́ ра́достно:/ несть свят и несть пра́веден, па́че Тебе́, Го́споди. Припев: Святи́телю, о́тче Ники́то, моли́ Бо́га о на́с. Егда́, зави́дев тебе́, прелука́вый хотя́ше запя́ти от доброде́телей,/ сопротивоста́в, преподо́бне, без ве́сти того́ сотвори́л еси́, Христу́ вопия́:/ несть свят и несть пра́веден, па́че Тебе́, Го́споди. Сла́ва Отцу́ и Сы́ну и Свято́му Ду́ху. Житие́м доброде́тельным Бо́гу угоди́л еси́, велиа́ра посрами́в,/ и Христу́ возопи́л еси́:/ несть свят и несть пра́веден, па́че Тебе́, Го́споди. И ны́не и при́сно и во ве́ки веко́в. Ами́нь. Богородичен: Зачала́ еси́ О́тчее Сло́во Ипоста́сное,/ Его́же моли́, Богоро́дице, изба́вити от бед рабы́ Твоя́,/ вои́стинну призыва́ющия Тя. Седален, глас 1 Я́ко сад присноцвету́щ, лю́ди твоя́ сотвори́л еси́,/ сия́ во благоче́стии возрасти́в, умно́жил еси́,/ и от сего́ ве́рен раб и де́латель виногра́да Христо́ва показа́лся еси́,/ и трудо́м возме́здие досто́йно восприя́л еси́, святи́телю,/ моли́ Христа́ Бо́га, да спасе́т ду́ши на́ша. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Всех Творца́, Бо́га же и Соде́теля, Всенепоро́чная Чи́стая,/ Ду́хом Боже́ственным в ложесна́х Твои́х заче́нши,/ без истле́ния родила́ еси́./ Его́же сла́вяще, Тя воспева́ем, Де́во,/ я́ко пала́ту Царя́ всех и ми́ра заступле́ние. Песнь 4 Ирмос: Положи́л еси́ к нам тве́рдую любо́вь, Го́споди,/ Единоро́днаго бо Твоего́ Сы́на за ны на смерть дал еси́./ Те́мже Ти зове́м, благодаря́ще:/ сла́ва си́ле Твое́й, Го́споди. Припев: Святи́телю, о́тче Ники́то, моли́ Бо́га о на́с. Зако́ном оте́ческим после́дуя и сих житие́ подража́я,/ непреста́нно Христу́ взыва́л еси́: сла́ва си́ле Твое́й. Припев: Святи́телю, о́тче Ники́то, моли́ Бо́га о на́с. Из мла́да Христа́ возлюби́л еси́,/ сего́ ра́ди я́ко рачи́теля Своего́ возлюби́ тя,/ к Нему́же вопие́ши:/ сла́ва си́ле Твое́й. Сла́ва Отцу́ и Сы́ну и Свято́му Ду́ху. Исполня́я зако́ны Боже́ственныя,/ преиспо́лнился еси́ дарова́ний Боже́ственных, святи́телю Ники́то, ве́рно взыва́я:/ сла́ва си́ле Твое́й, Го́споди. И ны́не и при́сно и во ве́ки веко́в. Ами́нь. Богородичен: Кади́льнице всезлата́я, Мари́е Всенепоро́чная,/ Христа́ моли́, Его́же родила́ еси́,/ изба́вится нам от бед и огня́ ве́чнующаго. Песнь 5 Ирмос: К Тебе́ у́тренюю, всех Творцу́,/ преиму́щему всяк ум ми́рови:/ зане́ свет повеле́ния Твоя́,/ в ни́хже наста́ви мя. Припев: Святи́телю, о́тче Ники́то, моли́ Бо́га о на́с. Лук врага́ сокруши́л еси́,/ и брань его́ до конца́ разори́л еси́,/ и соверше́ния доброде́телей, преподо́бне, дости́гл еси́. Припев: Святи́телю, о́тче Ники́то, моли́ Бо́га о на́с. Моли́твою возше́л еси́ на Небе́сная,/ иде́же с ли́ки оте́ц пребыва́я, весели́шися./ Помина́й, преподо́бне, па́мять твою́ све́тло торжеству́ющия. Сла́ва Отцу́ и Сы́ну и Свято́му Ду́ху. Неизрече́нных та́ин Христо́вых служи́тель бы́ти сподо́бился еси́/ и, сия́ принося́ Бо́гу, за мир приле́жно моли́лся еси́. И ны́не и при́сно и во ве́ки веко́в. Ами́нь. Богородичен: Упова́ние и наде́жда на́ша Ты еси́, Пречи́стая Влады́чице,/ спаси́ лю́ди Твоя́, моля́щиися и и́мя Твое́ призыва́ющия. Песнь 6 Ирмос: Бе́здна после́дняя грехо́в обы́де мя,/ и исчеза́ет дух мой,/ но простры́й, Влады́ко,/ высо́кую Твою́ мы́шцу,/ я́ко Петра́, мя, Упра́вителю, спаси́. Припев: Святи́телю, о́тче Ники́то, моли́ Бо́га о на́с. Предызбра́н быв Боже́ственною благода́тию, во е́же па́ствити ста́до христоимени́то,/ ты же, преподо́бне, я́ко па́стырь и́стинен,/ приле́жно о ста́де попече́ние име́л еси́. Припев: Святи́телю, о́тче Ники́то, моли́ Бо́га о на́с. Разу́мне разсужда́я, ча́да твоя́ ча́сто нака́зовал еси́ духо́вными словесы́,/ да пребу́дут тве́рдо соблюда́юще ве́ру правосла́вную. Сла́ва Отцу́ и Сы́ну и Свято́му Ду́ху. Святи́тельства че́стию почте́н, приле́жно моле́ние за лю́ди твоя́ приноси́л еси́:/ да ми́лостива Бо́га обря́щут в день Су́дный. И ны́не и при́сно и во ве́ки веко́в. Ами́нь. Богородичен: Ты еси́, Пречи́стая Богоро́дице, прибе́жище на́ше и утвержде́ние,/ моли́ Сы́на Твоего́ и Бо́га на́шего пода́ти нам спасе́ние и грехо́в оставле́ние. Кондак, глас 6 Архиере́йства са́ном почти́вся/ и чи́сте Чисте́йшему предстоя́,/ приле́жно моле́ние за лю́ди твоя́ приноси́л еси́,/ я́ко и дождь моли́твою све́л еси́,/ овогда́ же и гра́да запале́ния угаси́л еси́./ И ны́не, святи́телю Ники́то,/ моли́ Христа́ Бо́га/ спасти́ лю́ди твоя́ моля́щияся,/ да вси вопие́м ти:/ ра́дуйся, святи́телю о́тче предивный. Икос Кто не почуди́тся, кто не просла́вит/ неизсле́димую и несказа́нную глубину́ милосе́рдия Твоего́, Христе́ Бо́же?/ Я́ко просла́вил еси́ в после́днем ро́де уго́дника Твоего́, святи́теля Ники́ту,/ его́же обрето́шася честны́я мо́щи це́лы и неразруши́мы./ Ему́же рече́м:/ егда́ во пло́ти был еси́, преподо́бне,/ де́лании Боже́ственными ду́шу предочи́стил еси́,/ святи́тельства па́ству восприи́м,/ сосу́д избра́н Боже́ственнаго Ду́ха показа́лся еси́/ и ста́до твое́ до конца́ в ве́ре утверди́л еси́./ Тем ра́дуйся, о́тче преди́вный. Песнь 7 Ирмос: Трие́ о́троцы в пещи́, Тро́ицу прообрази́вше,/ преще́ние о́гненное попра́ша/ и, пою́ще, вопия́ху:/ благослове́н еси́, Бо́же оте́ц на́ших. Припев: Святи́телю, о́тче Ники́то, моли́ Бо́га о на́с. Уясня́ют, воспева́юще, А́нгельстии чи́ни па́мять твою́, Ники́то святи́телю,/ и мы, земни́и, уми́льно вопие́м:/ испроси́ нам оставле́ние согреше́ний и благи́х наслажде́ние. Припев: Святи́телю, о́тче Ники́то, моли́ Бо́га о на́с. Фарао́на мы́сленнаго победи́л еси́, от Христа́ дерзнове́ние прии́м,/ и ве́лие ра́дование святы́м А́нгелом сотвори́л еси́, поя́:/ оте́ц на́ших Бо́же, благослове́н еси́. Сла́ва Отцу́ и Сы́ну и Свято́му Ду́ху. Херуви́му подо́бяся, легко́ на высоту́ возше́л еси́/ и ны́не со безпло́тными водворя́ешися, Христу́ вопия́:/ оте́ц на́ших Бо́же, благослове́н еси́. И ны́не и при́сно и во ве́ки веко́в. Ами́нь. Богородичен: От утро́бы Твоея́ про́йде у́мное, Богоро́дице, Со́лнце,/ Сего́ моли́, я́ко Сы́на Твоего́ и Го́спода,/ пода́ти нам скорбе́й разреше́ние и боле́зней облегче́ние,/ да ра́достно от души́ вопие́м Христу́:/ отце́в на́ших Бо́же, благослове́н еси́. Песнь 8 Ирмос: Веще́ственнаго огня́ пла́мень/ невеще́ственным увяди́ша Богозри́мии о́троцы и поя́ху:/ благослови́те, вся дела́ Госпо́дня, Го́спода. Припев: Святи́телю, о́тче Ники́то, моли́ Бо́га о на́с. Лю́дем Росси́йским испроси́, Ники́то святи́телю, мир, здра́вие, спасе́ние и на враги́ одоле́ние,/ да в ра́дости душе́вней возопие́м:/ благослови́те, вся дела́ Госпо́дня, Го́спода. Припев: Святи́телю, о́тче Ники́то, моли́ Бо́га о на́с. Чу́вственныя стра́сти победи́в, чистото́ю, я́ко со́лнце, возсия́л еси́,/ чи́сто житие́ до конца́ сохрани́л еси́ и Бо́гу тем угоди́л еси́./ Ему́же вопие́м:/ благослови́те, вся дела́ Госпо́дня, Го́спода. Сла́ва Отцу́ и Сы́ну и Свято́му Ду́ху. Шум пра́зднующих слы́шати, святи́телю, сподо́бился еси́:/ шу́ияго стоя́ния изба́ви мя и страсте́й треволне́ния/ и к приста́нищу покая́ния наста́ви мя,/ да тя сла́влю во вся ве́ки. И ны́не и при́сно и во ве́ки веко́в. Ами́нь. Богородичен: Ще́драго и человеколюби́ваго Бо́га роди́ти, Богоро́дице, сподо́билася еси́,/ Того́ моли́, Неискусобра́чная Отрокови́це,/ низпосла́ти нам, ве́рным, ве́лию ми́лость. Песнь 9 Ирмос: В зако́не се́ни и писа́ний/ о́браз ви́дим, ве́рнии:/ всяк му́жеский пол, ложесна́ разверза́я,/ свят Бо́гу./ Тем. перворожде́нное Сло́во Отца́ Безнача́льна,/ Сы́на, первородя́щася Ма́терию неискусому́жно,/ велича́ем. Припев: Святи́телю, о́тче Ники́то, моли́ Бо́га о на́с. Мо́ре жите́йское преплы́в воздержа́нием, дости́гл еси́ широты́ ра́йския,/ иде́же со А́нгелы при́сно весели́шися. Припев: Святи́телю, о́тче Ники́то, моли́ Бо́га о на́с. Ра́ка моще́й твои́х, святи́телю, дража́йши сапфи́ра показа́ся,/ чудотвори́ва бо бе и исцеле́ния источа́ющи./ Е́яже облобыза́юще с ве́рою, приходя́щии ра́достно от души́ вопию́т:/ сон че́стен пред Го́сподем смерть преподо́бных Его́. Сла́ва Отцу́ и Сы́ну и Свято́му Ду́ху. Крестоно́сно предстои́ши престо́лу Вседержи́теля, сла́вою осиява́емь Све́та Присносу́щнаго./ Моли́ся, Ники́то святи́телю, о чту́щих ве́рно па́мять твою́. И ны́не и при́сно и во ве́ки веко́в. Ами́нь. Богородичен: Лук сокруши́ся лука́ваго одоле́нием Сы́на Твоего́ и Бо́га на́шего,/ чудна́ побе́да, Богоро́дице, и ди́вно одоле́ние соде́яся, Влады́чице,/ во спасе́ние душ на́ших. Светилен Плотска́я мудрова́ния ду́ху повину́л еси́/ и, я́ко зла́то, огне́м искуси́вся,/ прия́телище был еси́ Ду́ху Пресвято́му,/ о́тче Ники́то святи́телю. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Тя пе́сньми ублажа́ем, Де́во,/ Бо́га бо роди́вши, на руку́ носи́ла еси́,/ Того́ моли́ за ду́ши на́ша.

Минея, 17 Июля, Кано́на святы́я Глас 8 Песнь 1 Ирмос: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:/ Изба́вителю и Бо́гу на́шему пои́м. Припев: Свята́я великому́ченице Мари́но, моли́ Бо́га о на́с. Лику́ющи, му́ченице, о Бо́зе и луча́ми исполня́ема от Него́,/ зарю́ мне пода́ждь светоно́сну твои́ми моли́твами, до́брая де́во. Припев: Свята́я великому́ченице Мари́но, моли́ Бо́га о на́с. Теку́щих и нестоя́тельное и тле́нное,/ му́дрым умо́м обложе́на, му́ченице Христо́ва, презре́ла еси́ разу́мно/ и пра́ведных сподо́билася еси́ вышния све́тлости. Припев: Свята́я великому́ченице Мари́но, моли́ Бо́га о на́с. Ра́бски прихожду́ к тебе́, честна́я,/ твои́ми мольба́ми жите́йских мя бед спаси́, му́ченице страстоно́сице,/ и страсте́й мои́х утиши́ смуще́ние. Сла́ва Отцу́ и Сы́ну и Свято́му Ду́ху. Му́дростию и благода́тию просве́щся ум твой, Мари́но,/ мучи́телей преще́ния не устраши́лася еси́, му́ченице Спа́сова,/ Боже́ственною си́лою укрепля́ема. И ны́не и при́сно и во ве́ки веко́в. Ами́нь. Богородичен: Стезю́ показа́ла еси́ жи́зни, Жизнь су́щую заче́нши/ и пло́тски ро́ждши Сию́, Богома́ти,/ и у́зы сме́ртныя расто́ргла еси́. Песнь 3 Ирмос: Несть свят я́ко Госпо́дь,/ и несть пра́веден, я́ко Бог наш,/ Его́же пое́т вся тварь:/ несть пра́веден, па́че Тебе́, Го́споди. Припев: Свята́я великому́ченице Мари́но, моли́ Бо́га о на́с. Ни огнь, ниже́ ра́ны, ни ме́чное сече́ние,/ ни мучи́телей суровство́, ни смерть же, ни звере́й свире́пство/ Боже́ственныя отлучи́ тя любве́, прехва́льная. Припев: Свята́я великому́ченице Мари́но, моли́ Бо́га о на́с. Была́ еси́ непоколеби́м и непреклони́м во вре́мя обстоя́ния столп, всесла́вная,/ благоче́стия основа́ние положе́но ве́ры на ка́мени, преблаже́нная. Припев: Свята́я великому́ченице Мари́но, моли́ Бо́га о на́с. Де́ва в му́ченицах была́ еси́,/ в де́вах непобеди́ма му́ченица была́ еси́ ты, Христу́ уневе́стившися,/ сугу́б тебе́ подаю́щу вене́ц, всенепоро́чная. Сла́ва Отцу́ и Сы́ну и Свято́му Ду́ху. Святы́х крове́й твои́х, до́брая де́во, то́ки излива́емы всю угаси́ша и́дольскую лесть,/ и собо́р привела́ еси́ му́ченик Жениху́ твоему́. И ны́не и при́сно и во ве́ки веко́в. Ами́нь. Богородичен: Укре́пльшеся благода́тию, Богоро́дицу Тя единому́дренно сла́вим,/ плоть бы́вшаго, е́же бы́ти всем Даю́щаго, родила́ еси́/ и мир обнови́ла еси́. Седален, глас 4 Наста́, празднолю́бцы, све́тло торжество́, па́мять сла́вныя страстоно́сицы Христо́вы,/ веселя́щи вся́ческая, сия́ющи заря́ми чуде́с в ми́ре,/ нося́щи челове́ком непреста́нную благода́ть,/ тоя́ моли́твами, Христе́, спаси́ ду́ши на́ша. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Де́во Всенепоро́чная, Я́же Пресу́щнаго Бо́га ро́ждшая,/ со Безпло́тными Того́ непреста́нно моли́/ оставле́ние прегреше́ний и исправле́ние жития́ дати нам пре́жде конца́,/ ве́рою и любо́вию пою́щим Тя по до́лгу, еди́на Всепе́тая. Песнь 4 Ирмос: Ты моя́ кре́пость, Го́споди,/ Ты моя́ и си́ла,/ Ты мой Бог, Ты мое́ ра́дование,/ не оста́вль не́дра О́тча/ и на́шу нищету́ посети́в./ Тем с проро́ком Авваку́мом зову́ Ти:/ си́ле Твоея́ сла́ва, Человеколю́бче. Припев: Свята́я великому́ченице Мари́но, моли́ Бо́га о на́с. Боголе́пно бысть вои́стинну житие́ твое́, А́нгелом яви́ся любе́зно,/ де́монскому же во́инству и слуга́м их свире́пству непристу́пно показа́ся./ Христу́ бо вопия́ла еси́:/ си́ле Твое́й сла́ва, Человеколю́бче. Припев: Свята́я великому́ченице Мари́но, моли́ Бо́га о на́с. На земли́ подвиза́вшися, всебога́тая, и вре́менныя боле́зни претерпе́вши,/ на Небесе́х ны́не воздая́ния от Влады́ки прие́млеши, му́ченице непобеди́мая,/ во ве́ки безконе́чныя, со А́нгелы вопию́щи:/ си́ле Твое́й сла́ва, Человеколю́бче. Припев: Свята́я великому́ченице Мари́но, моли́ Бо́га о на́с. Ны́не о тебе́ ра́дуется деви́ческий лик, ны́не му́ченик собо́р весели́тся,/ ны́не и мно́жество благочести́вых, собра́вшеся, лику́ют, ра́дующеся,/ Влады́це вопию́ще гла́сы немо́лчными:/ си́ле Твое́й сла́ва, Человеколю́бче. Сла́ва Отцу́ и Сы́ну и Свято́му Ду́ху. Вся добра́ еси́, де́во, и нескве́рная,/ яви́лася еси́ неве́ста всенепоро́чная, душа́м добро́ты рачи́тельна,/ мучи́тельными разжже́нии, всеблаже́нная, яви́лася еси́ светле́йши, Христу́ пою́щи:/ си́ле Твое́й сла́ва, Человеколю́бче. И ны́не и при́сно и во ве́ки веко́в. Ами́нь. Богородичен: Еди́на чиста́ и по рождестве́ пребыла́ еси́:/ Ты бо еди́на Сло́во, Ипоста́сное Отцу́, Сопресто́льна Сы́на, из Тебе́ воплоще́нна, родила́ еси́, Богоневе́сто,/ и но́сиши на руку́ Невмести́маго все́ми и вся концы́ Содержа́щаго. Песнь 5 Ирмос: Вску́ю мя отри́нул еси́/ от лица́ Твоего́, Све́те Незаходи́мый,/ и покры́ла мя есть чужда́я тьма, окая́ннаго?/ Но обрати́ мя и к све́ту за́поведей Твои́х/ пути́ моя́ напра́ви, молю́ся. Припев: Свята́я великому́ченице Мари́но, моли́ Бо́га о на́с. На суди́щи страда́лец тече́ние кре́пко, отрокови́це, прешла́ еси́./ Боже́ственное бо жела́ние же́нскую не́мощь укрепи́,/ проявле́нно показу́я, промышле́нием страда́ния самодержа́вна му́ченица су́щи. Припев: Свята́я великому́ченице Мари́но, моли́ Бо́га о на́с. Ка́пли твои́х крове́й, му́ченице, иска́пающе, багряни́цу многоце́нну/ и нетле́ннаго весе́лия ри́зу истка́ша,/ е́юже ны́не, Богому́драя, на Небесе́х оде́яна, у́мно Жениху́ предстои́ши. Припев: Свята́я великому́ченице Мари́но, моли́ Бо́га о на́с. У́зами моли́тв твои́х, отрокови́це, всехва́льнаго зми́я связа́вши,/ горды́ню пе́рвее превознесе́нную к земли́ смири́ла еси́:/ испо́лнити бо весть, я́ко Благ Всеве́дец, Того́ боя́щихся во́лю. Сла́ва Отцу́ и Сы́ну и Свято́му Ду́ху. Превозноси́мыя тя сла́вы Боже́ственными венцы́ вои́стинну украси́ Жени́х, Сло́во,/ Его́ ра́ди страда́вшую обожа́я и огня́ пла́мень/ и бие́ния ран терпели́вно претерпе́вшую, сла́вная. И ны́не и при́сно и во ве́ки веко́в. Ами́нь. Богородичен: Очища́емо зря́ще де́вства Твоего́ рождество́м, Всенепоро́чная,/ земны́х естество́ от пе́рвыя кля́твы, сла́вим из Тебе́ Рожде́ннаго, единоча́даго за милосе́рдие,/ Его́же моли́, Де́во, спасти́ нас. Песнь 6 Ирмос: Очи́сти мя, Спа́се,/ мно́га бо беззако́ния моя́,/ и из глубины́ зол возведи́, молю́ся,/ к Тебе́ бо возопи́х, и услы́ши мя,/ Бо́же спасе́ния моего́. Припев: Свята́я великому́ченице Мари́но, моли́ Бо́га о на́с. Возложе́на Христу́, яви́лася еси́ добра́ и нескве́рна, и я́ко исто́чник чист,/ и вертогра́д многопло́ден, Мари́но всесла́вная,/ и бли́жняя неве́сто, и рай неокра́дом. Припев: Свята́я великому́ченице Мари́но, моли́ Бо́га о на́с. Отрокови́ца всеблаголе́пна вслед Тебе́ после́дова,/ теку́щи ко благово́нию ми́ра Твоего́, Влады́ко,/ пречи́стей стра́сти Твое́й терпе́нием подо́бящися и пречестне́й. Сла́ва Отцу́ и Сы́ну и Свято́му Ду́ху. Претерпе́ла еси́ му́жески по́двиги, му́ченице многострада́льная,/ и пе́рвее умовре́дно вельми́ хва́лящагося с шу́мом погуби́ла еси́ кре́стною си́лою,/ о Мари́но господоимени́тая! И ны́не и при́сно и во ве́ки веко́в. Ами́нь. Богородичен: Мари́е, чи́стый и пречи́стый сосу́де всех Соде́теля,/ души́ очисти́лище, пода́ждь ми сле́зы/ и услы́ши мольбу́ мою́, Всенепоро́чная. Кондак, глас 3 Де́вства добро́тами преиспещре́нна, де́во,/ нетле́нными венцы́ венча́лася еси́, Мари́но,/ кровьми́ же му́ченичества обагре́на,/ чудесы́ просвети́вшися исцеле́ний,/ благоче́стно, му́ченице, прия́ла еси́ по́честь побе́ды твоего́ страда́ния. Икос Жениху́ Христу́ раче́нием се́рдца твоего́ от младе́нства, честна́я, разже́гшися,/ потекла́ еси́, я́ко еле́нь, жа́ждущи исто́чником приснотеку́щим, девому́ченица,/ страда́нием же тебе́ саму́ю соблю́дша,/ в нетле́нном су́щно Зижди́теля твоего́, неве́сто благосла́вная, черто́зе дости́гла еси́,/ укра́шена и упещре́нна, венцено́сица победи́тельная, свещено́сица благоцвету́щая,/ нетле́ннаго неве́стника получи́вши и прие́мши, я́ко зла́то,/ по́честь побе́ды твоего́ страда́ния. Песнь 7 Ирмос: О́троцы евре́йстии в пещи́/ попра́ша пла́мень дерзнове́нно/ и на ро́су огнь преложи́ша, вопию́ще:/ благослове́н еси́, Го́споди Бо́же, во ве́ки. Припев: Свята́я великому́ченице Мари́но, моли́ Бо́га о на́с. Свет непристу́пный, Мари́но, просвети́ досто́йно ду́шу твою́ / и свеща́ми све́тлыми озари́ пою́щия:/ благослове́н еси́, Го́споди Бо́же, во ве́ки. Припев: Свята́я великому́ченице Мари́но, моли́ Бо́га о на́с. Взя́тся к Боже́ственней вои́стинну высоте́, высо́к бо ты стяжа́ла еси́ ра́зум/ и в черто́г све́тел всели́лася еси́, вопию́щи:/ благослове́н еси́, Го́споди Бо́же, во ве́ки. Сла́ва Отцу́ и Сы́ну и Свято́му Ду́ху. Неве́ста бли́жняя Влады́це показа́лася еси́, Мари́но Богоно́сная,/ и я́ко му́ченица непобеди́ма Тому́ зове́ши:/ благослове́н еси́, Го́споди Бо́же, во ве́ки. И ны́не и при́сно и во ве́ки веко́в. Ами́нь. Богородичен: Князь не ктому́ от Иу́ды оскуде́,/ из Тебе́ бо Влады́ка, язы́ков наде́жда, возсия́ несказа́нно:/ благослове́н, Пречи́стая, Плод Твоего́ чре́ва. Песнь 8 Ирмос: Мусики́йским орга́ном согласу́ющим/ и лю́дем безчи́сленным, покланя́ющимся о́бразу в Деи́ре,/ три о́троцы не повину́вшеся,/ Го́спода воспева́ху/ и славосло́вяху во вся ве́ки. Припев: Свята́я великому́ченице Мари́но, моли́ Бо́га о на́с. Тверд нрав стяжа́вши, тве́рдо страда́ния терпи́ше,/ и венцы́ побе́дными венча́ся, пою́щи:/ Го́спода по́йте и превозноси́те Его́ во ве́ки. Припев: Свята́я великому́ченице Мари́но, моли́ Бо́га о на́с. Та́йный, Мари́но, тебе́ черто́г душ Жени́х, Бог сло́во, угото́ва на Небесе́х,/ Его́же ви́дящи, зове́ши:/ Го́спода по́йте и превозноси́те Его́ во ве́ки. Припев: Свята́я великому́ченице Мари́но, моли́ Бо́га о на́с. Доброде́тельми разли́чными укра́шена, даро́в мно́жайших сподо́бися,/ кра́йнее жела́ний зри́щи и вопию́щи:/ Го́спода по́йте и превозноси́те Его́ во ве́ки. Сла́ва Отцу́ и Сы́ну и Свято́му Ду́ху. Спасе́ния яви́лася еси́, страстоте́рпице, мно́гим вина́/ и му́ченик собо́ры Христу́ привела́ еси́, согла́сно вопию́щи:/ Го́спода по́йте и превозноси́те Его́ во ве́ки. И ны́не и при́сно и во ве́ки веко́в. Ами́нь. Богородичен: Очище́ние нам, Богороди́тельнице, Тобо́ю даде́ся:/ Ты бо еди́на отдала́ еси долг, всех заче́нши Го́спода, Де́во,/ Его́же превозно́сим во ве́ки. Песнь 9 Ирмос: Устраши́ся всяк слух/ неизрече́нна Бо́жия снизхожде́ния,/ я́ко Вы́шний во́лею сни́де да́же и до пло́ти,/ от деви́ческаго чре́ва быв Челове́к./ Те́мже Пречи́стую Богоро́дицу, ве́рнии, велича́ем. Припев: Свята́я великому́ченице Мари́но, моли́ Бо́га о на́с. Мари́но, му́ченице Христо́ва,/ жизнь ве́чную и неги́бнущую в ра́йстей пи́щи приле́жно вои́стинну объя́ла еси́,/ обраща́ющееся бо без вре́да ору́жие премину́ла еси́,/ му́ченическими кровьми́ сия́ющи издале́ча, до́брая де́во. Припев: Свята́я великому́ченице Мари́но, моли́ Бо́га о на́с. Попали́ всеве́щную и любомирску́ю, де́во, мысль жела́ние Боже́ственное/ и тверде́йшу показа́ му́ченицу,/ де́вственными сия́ньми пе́рвее сия́ющую, Мари́но всему́драя./ Те́мже вси тя, ве́рнии, ублажа́ем. Припев: Свята́я великому́ченице Мари́но, моли́ Бо́га о на́с. Разреши́ ми, неве́сто избра́нная, согреше́ний плени́цы моли́твами твои́ми,/ и рукописа́ние грехо́вное расто́ргни, му́ченице,/ предстоя́щи благоле́пно Христу́, Жениху́ твоему́ Всеще́дрому,/ и страсте́й мои́х мглу разори́. Сла́ва Отцу́ и Сы́ну и Свято́му Ду́ху. Преста́ шата́ние лю́тое льсти́ваго:/ се бо отрокови́ца, забыва́ющи же́нское естество́, пострада́,/ и на него́ све́тло побе́ду взе́мши, и ны́не прама́тернее назда́ я́ве паде́ние. И ны́не и при́сно и во ве́ки веко́в. Ами́нь. Богородичен: Зре́лу пожина́ю жизнь, невреди́м дре́вом ра́зума:/ Ты бо, Пресвята́я, жи́зни дре́во, Христа́ прозябла́ еси́, вхо́ды жи́зни всем показа́вшаго./ Те́мже Тя, Всечи́стая, благоче́стно Богоро́дицу пропове́даем. Светилен Укре́пльшися, до́брая де́во, Кресто́м Го́спода твоего́,/ мучи́телей погуби́ла еси́ горды́ню, пострада́вши, му́ченице, му́жески,/ и от Христа́ прия́ла еси́ по́чести побе́ды, всему́драя Мари́но господоимени́тая,/ о нас моля́щи, тя почита́ющих любо́вию. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Стоя́ще о́крест Тебе́ де́вы Богому́дрыя, Богороди́тельнице Мари́е,/ я́ко Цари́це ро́да, Твоему́ Сы́ну приведо́шася,/ женихоле́пно, Пречи́стая, я́ко Царю́ вся́ческих,/ Его́же, Ма́ти Де́во Отрокови́це, о нас умоли́.

Минея, 4 Апреля, Канон Глас 2 Песнь 1 Ирмос: Гряди́те лю́дие, пои́м пе́снь Христу́ Бо́гу, разде́льшему мо́ре и наста́вльшему лю́ди, я́же изведе́ из рабо́ты еги́петския, я́ко просла́вися. Припев: Преподо́бне о́тче Ио́сифе, моли́ Бо́га о на́с. Пе́сненно песнопи́сца почти́м, и́же того́ медото́чныя пе́сни пою́ще, Ио́сифа, я́ко от пе́ний в пе́сни ве́чныя преста́вльшася. Припев: Преподо́бне о́тче Ио́сифе, моли́ Бо́га о на́с. Я́коже проро́к и апо́стол пропове́дание всю́ зе́млю освети́, та́ко и пе́ние твои́х усте́н, ми́р к сла́ве все́х Бо́га возставля́ет. Сла́ва Отцу́ и Сы́ну и Свято́му Ду́ху. От младе́нства возложи́вся, Ио́сифе, Христу́, по́стнически пожи́л еси́, отону́дуже и дарова́ньми тя́ обогати́ боже́ственными, наде́ждею, и любо́вию, и ве́рою чи́стою. И ны́не и при́сно и во ве́ки веко́в. Ами́нь. Богородичен: Тя́ проро́ческое дре́вле боже́ственное сло́во две́рь Бо́жию провозвести́ и го́ру святу́ю, Богоро́дице Де́во, боже́ственных страда́льцев удобре́ние. Песнь 3 Ирмос: Утверди́ на́с в Тебе́, Го́споди, дре́вом умерщвле́й гре́х, и стра́х Тво́й всади́ в сердца́ на́с, пою́щих Тя́. Припев: Преподо́бне о́тче Ио́сифе, моли́ Бо́га о на́с. Чистоты́ любле́нием Бо́га умоли́л еси́ пода́ти помо́щники и, прие́м неоску́дныя отцы́ твоя́, получи́л еси́, о́тче, наде́жду твою́. Припев: Преподо́бне о́тче Ио́сифе, моли́ Бо́га о на́с. Любве́ и́стинныя показу́я позна́ние, и до́м, и дея́ние, и му́дрость, от Бо́га дарова́нная тебе́, я́коже две́рь Иов, все́м отве́рзл еси́. Сла́ва Отцу́ и Сы́ну и Свято́му Ду́ху. Ва́рварскими рука́ми я́т бы́в, пребога́те, я́коже дре́вле во Еги́пет до́блий Ио́сиф, с ве́рою и чистото́ю да́р соблю́л еси́. И ны́не и при́сно и во ве́ки веко́в. Ами́нь. Богородичен: Ра́й кра́сный, посреде́ име́яй Дре́во, Де́во, нетле́ния, Иису́са Христа́ Го́спода, позна́лася еси́, те́мже Тя́ ублажа́ем. Седален, глас 4 Яви́лся еси́ кро́ток и молчали́в, смиренному́др, трепе́ща боже́ственных слове́с, твоего́ Влады́ки сло́во исполня́я, И́же на тя́, о́тче, призре́ и в вы́шнюю оби́тель всели́. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Я́ко невозде́ланная, Де́во, лоза́, красне́йший Гро́зд прозябла́ еси́, источа́ющ на́м вино́ спасе́ния, все́х веселя́щее ду́ши же и телеса́. Те́мже я́ко вину́ Тя́ до́брых блажа́ще при́сно, со а́нгелом вопие́м Ти́: ра́дуйся, Благода́тная. Песнь 4 Ирмос: Услы́шах, Го́споди, слу́х Твоего́ смотре́ния, и просла́вих Тя́, Еди́не Человеколю́бче. Припев: Преподо́бне о́тче Ио́сифе, моли́ Бо́га о на́с. Разсужде́ние разу́мно и мона́хов уме́ренное пра́вило Христо́с показа́ тя́, о́тче преподо́бне. Припев: Преподо́бне о́тче Ио́сифе, моли́ Бо́га о на́с. Смире́ния мо́ст твое́ показа́л еси́, богому́дре, житие́, преводя́щ ко и́стинней жи́зни. Сла́ва Отцу́ и Сы́ну и Свято́му Ду́ху. Предвари́в, ублажи́ тя́ Влады́ка, о́тче, я́ко даю́ща во вре́мя сло́ва пшени́чное ме́рение. И ны́не и при́сно и во ве́ки веко́в. Ами́нь. Богородичен: Све́т возсия́л еси́, Го́споди, су́щим в нощи́ и тме́ прегреше́ний, от Чи́стыя Де́вы во чре́ве носи́мь. Песнь 5 Ирмос: Све́та Пода́телю и веко́в Тво́рче, Го́споди, во све́те Твои́х повеле́ний наста́ви на́с: ра́зве бо Тебе́, ино́го Бо́га не зна́ем. Припев: Преподо́бне о́тче Ио́сифе, моли́ Бо́га о на́с. И́хже на земли́ сы́й, святы́х воспе́л еси́ ве́рно, преподо́бне, с ни́ми сы́й ны́не, слы́ша пе́ния, ра́дуешися, сла́вя непреста́нно Го́спода. Припев: Преподо́бне о́тче Ио́сифе, моли́ Бо́га о на́с. К покая́нию и испове́данию, му́дре, вся́ привлача́, себе́ написа́л еси́ вся́ку вину́, моли́твы Бо́гу принося́ улучи́ти проще́ние. Сла́ва Отцу́ и Сы́ну и Свято́му Ду́ху. Все́ житие́ твое́, святы́ми упражня́яся дея́ньми, я́ко и́стинен купе́ц, бы́л еси́, я́ко ка́мение че́стно, и словеса́, и дея́ния себе́ собира́я. И ны́не и при́сно и во ве́ки веко́в. Ами́нь. Богородичен: Изба́ви ны́ от искуше́ний и бу́ри помышле́ний, Чи́стая, вся́каго гне́ва, вся́каго греха́, гла́да же, и па́губы, и ве́чнаго, Де́во, муче́ния. Песнь 6 Ирмос: В бе́здне грехо́вней валя́яся, неизсле́дную милосе́рдия Твоего́ призыва́ю бе́здну: от тли́, Бо́же, мя́ возведи́. Припев: Преподо́бне о́тче Ио́сифе, моли́ Бо́га о на́с. Пестро́тным мно́жеством пе́сней твои́х, я́ко на тве́рди, Це́рковь Христо́ва, звездоявле́нно просия́вши, дрема́ние отгоня́ет душегу́бное. Припев: Преподо́бне о́тче Ио́сифе, моли́ Бо́га о на́с. Словесе́ твоего́ мольба́, преподо́бне, душе́ю скорбя́щим и те́лом, я́коже не́кая гу́ба, вся́кую очища́я печа́ль, яви́ся. Сла́ва Отцу́ и Сы́ну и Свято́му Ду́ху. А́лчущим сло́ва спаси́тельнаго и теле́сными упита́вшимся озлобле́нии, сугу́бо, преподо́бне, исцеле́ние незави́стно пода́л еси́. И ны́не и при́сно и во ве́ки веко́в. Ами́нь. Богородичен: На пути́ мя́ жития́ блудя́ща и в безпу́тия ча́сто впа́дающа грехми́, Влады́чице, на покая́ния стезю́ наста́ви. Кондак, глас 4 Покая́ния исто́чник неисчерпа́емый, утеше́ния пода́тель неконча́емаго и умиле́ния пучи́на еси́, Ио́сифе, сле́зы на́м пода́ждь покая́ния боже́ственнаго, и́миже утеше́ние, зде́ пла́чущеся, обря́щем от Бо́га, твоея́ по́мощи прося́ще, свя́те. Песнь 7 Ирмос: Вети́и яви́шася о́троцы любому́дрейшии дре́вле, от богоприя́тныя бо души́, богосло́вяще устна́ми, поя́ху: Пребоже́ственный отце́в и на́ш Бо́же, благослове́н еси́. Припев: Преподо́бне о́тче Ио́сифе, моли́ Бо́га о на́с. Потща́лся еси́ и по сне́ сме́ртнем затворе́ны душе́вныя о́чи твоя́ не име́ти, пое́ши бо пе́сни с пою́щими: Пребоже́ственный оте́ц на́ших Бо́же, благослове́н еси́. Припев: Преподо́бне о́тче Ио́сифе, моли́ Бо́га о на́с. Вене́ц муче́ния прия́л еси́, я́ко ублажи́в приле́жно ли́ки му́ченик неисче́тных. И немо́лчно, о́тче, пое́ши с ни́ми: Пребоже́ственный оте́ц на́ших Бо́же, благослове́н еси́. Сла́ва Отцу́ и Сы́ну и Свято́му Ду́ху. Исцеле́ние грехо́в вели́ких я́ко сы́й, е́же, прему́дре, испове́дание положи́ пою́щим, о́тче, пе́сни твоя́: Пребоже́ственный оте́ц на́ших Бо́же, благослове́н еси́. И ны́не и при́сно и во ве́ки веко́в. Ами́нь. Богородичен: Све́та Твоего́, Богоро́дице Де́во, чи́стыми облиста́нии омрачи́вшуюся ду́шу мою́ лука́выми лю́те преступле́ньми све́том наста́ви, две́рь су́щи Све́та, я́ко да песносло́влю Тя́. Песнь 8 Ирмос: В пе́щь о́гненную ко отроко́м евре́йским снизше́дшаго, и пла́мень в ро́су прело́жшаго Бо́га, по́йте, дела́, я́ко Го́спода, и превозноси́те во вся́ ве́ки. Припев: Преподо́бне о́тче Ио́сифе, моли́ Бо́га о на́с. Я́коже мимотеку́щую се́нь, ны́нешнюю пои́стинне жи́знь ве́дый, нетле́нную прия́ти подвиза́лся еси́, му́дре; сего́ ра́ди честны́я монастыри́ мно́жества назда́л еси́ душа́м на спасе́ние. Припев: Преподо́бне о́тче Ио́сифе, моли́ Бо́га о на́с. Кро́тким правоту́ и ду́хом ни́щаго име́яй, му́жество показа́л еси́ вся́ко, я́коже не еди́наго себе́ утвержда́ти, рабо́тати Зижди́телю, о́тче, но все́х, тебе́ зря́щих. Сла́ва Отцу́ и Сы́ну и Свято́му Ду́ху. Незло́бие твое́ и излия́ние любве́ твоея́, треблаже́нне, о́браз поста́ви Человеколю́бца Христа́, к Нему́же непреста́нно пе́л еси́: превозно́сим во вся́ ве́ки. И ны́не и при́сно и во ве́ки веко́в. Ами́нь. Богородичен: О, та́инства стра́шна! О, слы́шания ужа́снаго! Ка́ко Де́ва несказа́нным соедине́нием уподо́бльшагося на́м Сло́ва ражда́ет, пребыва́ющи, я́коже пре́жде рождества́, Чиста́ во ве́ки. Песнь 9 Ирмос: От Бо́га Бо́га Сло́ва, неизрече́нною му́дростию прише́дшаго обнови́ти Ада́ма, я́дию в тле́ние па́дшаго лю́те, от Святы́я Де́вы неизрече́нно воплоти́вшагося на́с ра́ди, ве́рнии, единому́дренно пе́сньми велича́ем. Припев: Преподо́бне о́тче Ио́сифе, моли́ Бо́га о на́с. Доброде́телей о́бразы, я́ко на скрижа́ли, написа́в чи́стей души́ твое́й, де́тельне все́м святы́м прине́сл еси́, сугу́бо ко́ейждо от доброде́телей пе́ния вне́с, достоприя́тно принося́ от де́л и похвале́ние. Припев: Преподо́бне о́тче Ио́сифе, моли́ Бо́га о на́с. А́нгельстии ли́цы, апо́стольский собо́р, Богоро́дица со Крести́телем, проро́ческое сосло́вие, свяще́нник чи́нове с по́стники, му́ченическая во́инства, Ио́сифе, противоме́рными похвала́ми тя́ ны́не венча́ют. Сла́ва Отцу́ и Сы́ну и Свято́му Ду́ху. Слове́сное твое́ ста́до помина́ти не преста́й, но, я́коже жи́в, предста́тельствовал еси́, му́дре, си́це жи́знь нетле́нную подая́ бу́ди, теле́сных страсте́й и душе́вных изыма́я, о́тче, ко Христу́ моли́твами твои́ми. И ны́не и при́сно и во ве́ки веко́в. Ами́нь. Богородичен: О на́с моля́щи Сы́на Твоего́ не преста́й, Де́во, Человеколю́бца Бо́га: Тя́ бо наде́жду стяжа́хом и Твои́м заступле́нием избавля́емся бе́д, и страсте́й, и прегреше́ний, и боле́зней, ве́рою Тя́ сла́вящии.

глас 4 Песнь 1 Ирмос: Отверзу уста моя, и наполнятся Духа, и слово отрыгну Царице Матери, и явлюся, светло торжествуя, и воспою, радуяся, Тоя чудеса. Откуду начну похвалы или кое положу начало нынешняго песнопения Царице Матери? Недоумением содержуся, обаче, языку умолкшу, вся кости моя рекут Тоя преславная чудеса. Милосердия ради Бог Человек бывает, Имже и преестественная вся содеяшася; тем, Дево, и наше приими с любовию приносимое песнопение, воспевающих Твоя преславная чудеса. Гряди к славословию, Небо, и радуйся, земле, свет бо велий возсия на вы от лица Матере Господни, освящаяй и просвещаяй всю тварь преславными чудесы. Собираются пред иконою Твоею, Богородице, чинове святых невидимо, предстоят же и ангельская вся воинства, трепетно благоговеюще. Приими же с ними и нас, воспевающих радостно чудеса Твоя. Песнь 3 Ирмос: Твоя песнословцы, Богородице, живый и независтный Источниче, лик себе совокупльшия, духовно утверди, в Божественней Твоей славе венцев славы сподоби. Из начала великая о Тебе прообразоваше и в последняя преславная совершаше от всех родов предызбравый в Матерь Себе Тебе Владыка, Чистая. Синайская гора, огнепалимая иногда, и разделяющаяся воды Чермнаго моря, егда наставляхуся людие, супостатом потопляемым, точию быша проображение, Чистая, чудес Твоих. Пламенем купины в Синаи и росою пещи халдейския Девы рождество прообразивый, из Неяже воплотитися благоизволи, спасаяй тварь премудростию, Иисусе, и закон и пророки исполняя. Радуйся, храме Господень, радуйся, кивоте, радуйся, стамно, радуйся, горо приосененная, радуйся, лествице и двере Небесная, пророки проповеданная, и всея святыни вместилище и носило, Пречистая. Седален Блажим Тя, вси роди, Богородице Дево, в Тя бо Невместимый Христос Бог наш вместитися благоволи. Блажени есмы и мы, предстательство Тя имуще, день бо и нощь молишися о нас, и роди христианстии Твоими молитвами утверждаются. Тем, воспевающе, вопием Ти: радуйся, Благодатная, Господь с Тобою. Песнь 4 Ирмос: Седяй в славе на Престоле Божества во облаце легце, прииде Иисус Пребожественный Нетленною Дланию и спасе зовущия: слава, Христе, силе Твоей. Седяй на Престоле славы Царствия Твоего, Царю высокий, от смиреннаго естества земнородных престол свят Себе предуготовал еси, утробу Девы Матере. Слава неизреченному Твоему совету. Превознесеннаго именем паче всякаго имене, Егоже всяк язык исповедает, Божию Силу и Премудрость, Единороднаго Сына в славе Бога Отца, Дево, плотию родила еси, Бога и Человека. Смирившаго Себе даже до рабия образа послушанием Богу Отцу и даже до страстей и Креста преклонившагося, Того за ны смотрению, о Дево, и непостижимым тайнам послужила еси. Дает Тебе преестественная, Богородице, Иже паче естества Сын Твой, рождеством бо Твоим от тли яко воззва человечество, и ныне Тобою призывает люди отриновенныя во язык избранный и именитый по всей земли. Песнь 5 Ирмос: Ужасошася всяческая о Божественней славе Твоей: Ты бо, Неискусобрачная Дево, имела еси во утробе над всеми Бога и родила еси Безлетнаго Сына, всем воспевающим Тя мир подавающая. Блаженно чрево, носившее Тя, Спасе, и честнейшая воистину сосца, воздоившая Тя, нас ради младенствовавшаго. Темже молим Тя: слышащим слово Твое и хранящим е блаженство уготови безконечное Рождшия Тя молитвами. Марие Преблагословенная, благую истинно часть избрала еси и Едина Благодатная явилася еси. В Тебе Отец благоволи, Слово Всевиновное в Тя вселися, и Дух осени Святый, пребываеши нетленная и нам, любовию поющим Тя, спасение подавающая. Единородный Сын Божий, снизшедый на землю за человеколюбие избавити человечество, единое на земли покоище обрет Тя, Чистую и Пренепорочную, вселитися и жити в Тебе благоволи, освятив, украсив и прославив. И нас ходатайствы Твоими храмы чистыя Тому, Богородице, соделай. Храме всеосвященный Бога нашего, в храме Твоем ныне торжествующая, Богоневесто, с высоты призри и осени Божественною иконою Твоею, верою кланяющиися ей освящающи: с нею бо Твоя благодать во веки пребывает, спасительная всем подающи. Песнь 6 Ирмос: Божественное сие и всечестное совершающе празднество, Богомудрии, Богоматере, приидите, руками восплещим, от Нея рождшагося Бога славим. Праздник празднуем, празднолюбцы, Девы и Богоматере, благодаряще за велие милосердие Ея, и в нас действуемая преславная чудеса прославим. Благодарственная приносим Тебе, Дево, и молимся: да не оскудеет вера чтущих Тя, и да не похвалятся врази, глаголюще: где есть Бог их? Твоя бо чудесная икона и всесвятая помощь с нами есть. Устнами воспеваем Тя, умом же и языком моление приносим и сердца с колены преклоняем пред чудотворным образом Твоим, Пречистая, да милость Твою низпослеши на град и люди Твоя. Ты еси пророков главизна, Ты еси святых похвала, Богоотроковице, и всех христиан упование, к Тебе прибегающе, спасаемся, уповающе же, не посрамимся, Тобою бо хвалится, Богородице, всякое дыхание. Кондак, глас 2 В Небесныя обители преселившаяся с плотию, сущия на земли никакоже оставила еси, Богородице, образ Божественный и многочудесный Пречистаго Лица Твоего зрети любящим Тя и покланятися даровала еси, яко знамение Твоея благодати; чтим его, лобызающе. Икос Являющи человеком Пречистая неизглаголаннаго Своего милосердия сокровище, любящим Ю независтныя дары подавает, благословение, и молитвы, и мир, всяк ум превосходящий. И еже преславное от пречистыя Своея иконы, яко от источника, источает миру оставления воды, в Божественнейшем Ея храме. Тамо бо очи Ея отверсте день и нощь и уши, внемлющии молитве всех. Сего ради покланяемся сей всечестней иконе и чтим ю, лобызающе. Песнь 7 Ирмос: Не послужиша твари Богомудрии паче Создавшаго, но, огненное прещение мужески поправше, радовахуся, поюще: препетый отцев Господь и Бог, благословен еси. Тварь вся празднует, и стихии Тебе повинуются, Матери всяческих Содетеля, радуются Ангели в Божественнем торжестве Твоем, мы же из Тебе Рождшемуся зовем: препетый отцев Боже, благословен еси. Дивная чудеса, Благая, слышана сотворила еси по всей земли, мы же, благолепие красоты Твоея от Сиона зряще, доброте дивимся и из Тебе Рождшемуся зовем: препетый Боже, благословен еси. Монашествующих собори Наставницу Тя ублажают, Дево, множества же немощствующих излиянием милосердия Твоего благодать приемлют и, общницы бывше чудес Твоих, вопиют: Пречистая, благословенна еси. Источник еси умный, живоприемный и приснотекущий, струи жизни источивший человеком, даждь ми от воды Твоея, Дево, во изсушение моих согрешений и ороси, молюся, мой ум, сердце и помысл, Едина Всепетая и Благословенная. Песнь 8 Ирмос: Отроки благочестивыя в пещи Рождество Богородичо спасло есть; тогда убо образуемое, ныне же действуемое, вселенную всю воздвизает пети Тебе: Господа пойте, дела, и превозносите Его во вся веки. Ужасу обдержащу иногда Российскую страну нашествием агарян, печали умножившейся людем Твоим, тогда, не на лук уповающе, ниже оружием спасаеми, но на Тя Едину надеющеся, с рыданием моляхуся: виждь бед належание и востани, Богородице, в помощь нашу. Обыдоша иногда, яко пси мнози, стадо Твое, Чистая, оскверниша жилище имене Твоего и совещаху на ны лукавная; мы же возведохом очи наши на икону Твою, да ущедриши ны; и разумеша языцы, яко Ты, Госпоже, с нами еси во вся веки. Взбранная Воевода явилася еси царствующаго града Москвы, языки побеждающая, христолюбивое же воинство укрепляющая, военачальники силою Твоею препоясующая; темже Твоя торжествующе победительная, раби Твои, воспеваем Сына Твоего во вся веки. Богородице, теплая христианом Предстательнице, приими моление недостойных раб Твоих, призри милостивно на немощи наша и всем полезная даруй, немощствующим исцеление, грешным спасение, вся бо можеши, Мати сущи Зиждителя Всемилостивая. Песнь 9 Ирмос: Всяк земнородный да взыграется, Духом просвещаемь, да торжествует же Безплотных умов естество, почитающее священное торжество Богоматере, и да вопиет: радуйся, Всеблаженная Богородице, Чистая Приснодево. Величит Тя душа моя, и радуется дух мой о Тебе, Мати Господа нашего, яко призрела еси на смирение раб Твоих, сильныя со престолов низложила еси, смиренныя вознесла еси и Россию всю Твоих даров исполнила еси. Се ныне ублажаем Тя, вси народи великороссийстии, Дево, с нами бо величие сотворила еси и славу Твою показала еси всем языком; свято имя Твое, Богородице, велия и неизреченная милость Твоя на всех, призывающих Тя. Восприят ны от падения нашего Господь, помянув милость Свою от века, и древняя чудеса отец наших обнови нам, чадом их, иконою Твоею, Богомати; еюже хвалимся, спасшиися, и живота неразрушимаго наследие приемлем. Богородице Владычице, Приснодево, неложно спребывати с нами обещавшая до скончания века, испроси нам на будущем Суде Сына Твоего деснаго Ему предстояния верою и любовию Тебе поющих, умильно припадающих и со страхом тепле молящихся. Светилен Торжествуем днесь, правовернии, во храме Твоем, Владычице, и Ты, Пречистая, приими любовию приносимыя Тебе песни благодарственныя.

Радостный возсия день светлаго торжества:/ днесь церковная расширяются недра,/ приемлюще духовных даров неоскудеемо боготворное сокровище,/ струю благодатей неисчерпаемую,/ источника чудесем обильна,/ чудотворивыя и священныя мощи твоя,/ святителю Филиппе./ Темже моли прославившаго тя Дародателя Христа Бога/ о воспевающих тя/ и кланяющихся священным мощем твоим.

Конда́к 1 Избра́нный чудотво́рче и изря́дный уго́дниче Христо́в, Арсе́ние преподо́бне, восхваля́ем тя́, безмо́лвия, терпе́ния и нищеты́ духо́вныя учи́теля. Ты́ же, я́ко име́яй дерзнове́ние ко Го́споду, моли́ Его́ изба́вити оби́тель твою́ и на́с, гре́шных, от все́х бе́д и ско́рбных обстоя́ний, да со умиле́нием зове́м ти́: Ра́дуйся, Арсе́ние, Коме́льский чудотво́рче. Икос 1. Ангела земна́го и небе́снаго челове́ка зри́м тя́, преподо́бне: ты́ бо измла́да Отца́ Небе́снаго возлюби́л еси́ и Тому́ Еди́ному во́лю твою́ порабо́тил еси́. Сего́ ра́ди ублажа́ем тя́ си́це: Ра́дуйся, измла́да гла́су Бо́жию в со́вести внима́вый; ра́дуйся, о́браз Бо́жий в души́ твое́й в чистоте́ храни́вый. Ра́дуйся, земно́е вели́чие твое́ по ро́ду ни во что́ вмени́вый; ра́дуйся, от ю́ности нищету́ духо́вную возлюби́вый. Ра́дуйся, смире́ния учи́телю; ра́дуйся, де́вства ревни́телю. Ра́дуйся, оби́тель преподо́бнаго Се́ргия, я́ко ти́хое приста́нище, избра́вый; ра́дуйся, житию́ Се́ргиеву ре́вностне подража́вый. Ра́дуйся, Арсе́ние, Коме́льский чудотво́рче. Конда́к 2. Ви́дев в и́ночестве опло́т и огражде́ние от суеты́ мирскíя и душевре́дных по́мыслов, преподо́бне, в ю́ных ле́тех, потща́лся еси́ прия́ти на ся́ а́нгельский о́браз, смире́нне взыва́я всеви́дящему Храни́телю ду́ш и теле́с: Аллилу́ия. Икос 2. Ра́зум тво́й, преподо́бне о́тче, Христо́вым све́том просвети́ти возжела́в, вда́лся еси́ чте́нию Боже́ственных Писа́ний: узре́в же по́льзу от сего́ души́ твое́й, прия́л еси́ тру́д списова́ти свяще́нныя кни́ги и те́ми бли́жних твои́х умудря́ти. Сицево́му твоему́ усе́рдию дивя́щеся, взыва́ем ти́: Ра́дуйся, пи́щи духо́вныя, па́че теле́сныя рачи́телю; ра́дуйся, свяще́нных кни́г списа́телю. Ра́дуйся, о душе́вней по́льзе собра́тий твои́х ревнова́вый; ра́дуйся, молвы́ жите́йския избежа́вый. Ра́дуйся, труды́ душеполе́зныя че́стне почита́вый; ра́дуйся, и́стиною Христо́вою, а́ки мече́м проти́ву врага́ душе́внаго спасе́ния вооруже́нный. Ра́дуйся, сло́вом Госпо́дним, я́ко хле́бом небе́сным насыще́нный; ра́дуйся, в разли́чных послуша́ниях испыта́нный. Ра́дуйся, Арсе́ние, Коме́льский чудотво́рче. Конда́к 3. Си́лою свы́ше преумудре́нный, ты́ свя́те Арсе́ние, избра́н бы́л еси́ во игу́мена оби́тели богоно́снаго Се́ргия, и возлага́я наде́жду на его́ многомо́щное предста́тельство пред престо́лом Пресвяты́я Тро́ицы, в смире́нии и поко́рности Ея́ святе́й во́ли, со стра́хом и тре́петом взыва́л еси́: Аллилу́ия. Икос 3. Име́я непреста́нное попече́ние о вве́ренных твоему́ води́телству и́ноцех оби́тели Се́ргиевы, ты́, преподо́бне, пе́рвее умно́жил еси́ по́двиги твоя́, прилага́я труды́ ко трудо́м. Сего́ ра́ди возглаша́ем тебе́: Ра́дуйся, соверше́ннаго терпе́ния наста́вниче; ра́дуйся, смиренному́дрия пропове́дниче. Ра́дуйся, наде́жный и́ночествующих руководи́телю; ра́дуйся, преподо́бных Се́ргия, Ни́кона, Са́ввы и про́чих святы́х игу́менов Ла́вры Се́ргиевы досто́йный прее́мниче. Ра́дуйся, свеще́ на све́щнице Це́ркве Россíйския поста́вленная; ра́дуйся, и́ноков до́брых о́браз и украше́ние. Ра́дуйся, Бо́гови ве́рный служи́телю; ра́дуйся, преподо́бных Его́ небе́сный сожи́телю. Ра́дуйся, Арсе́ние, Коме́льский чудотво́рче. Конда́к 4. Бу́рю вну́трь име́я помышле́ний сумни́тельных, вели́кий кня́зь Васи́лий смути́ся, узре́в тя́, преподо́бне, игу́мена вели́кия Ла́вры в ве́тсей и многошве́нней оде́жди; уве́дев же от бра́тии о твое́м вели́цем смире́нии и нелицеме́рней простоте́, просла́ви смири́вшаго Себе́ до кре́стныя сме́рти Го́спода, зовы́й: Аллилу́ия. Икос 4. Слы́шаша и́ноцы и мирстíи лю́дие о по́двизех твои́х, пресла́вне Арсе́ние, прославля́ху Го́спода и тебе́, я́ко Его́ уго́дника. Ты́ же, пребыва́я в Ла́вре послуша́ния ра́ди и бе́гая сла́вы мирскíя, поча́сту удаля́лся еси́ во оби́тель Ма́хрищскую, иде́же удосто́ился еси́ явле́ния сла́вы Бо́жией на моще́х преподо́бнаго Стефа́на и па́мять его́ твори́ти уста́вил еси́. Последи́ же по сло́ву Писа́ния, взыску́я гряду́щаго гра́да, преподо́бне, взе́м святы́й кре́ст и ико́ну Пречи́стыя Богоро́дицы, та́йно удали́лся еси́ в пусты́ню, ча́я Бо́га спаса́ющаго. Сего́ ра́ди приими́ благосе́рдне похвалы́ сия́: Ра́дуйся, самоотверже́ния учи́телю; ра́дуйся, простоты́ христиа́нския храни́телю. Ра́дуйся, прославле́ния преподо́бнаго Стефа́на свиде́телю; ра́дуйся, па́мяти его́ установи́телю. Ра́дуйся, води́тельству про́мысла Бо́жия поко́рный; ра́дуйся, бу́им себе́ почита́вый. Ра́дуйся, гра́да гряду́щаго иска́вый; ра́дуйся, го́рлице пустыннолю́бная, от мíра в пусты́ню возлете́вшая. Ра́дуйся, Арсе́ние, Коме́льский чудотво́рче. Конда́к 5. Боготе́чною звездо́ю яви́лся еси́, богому́дре Арсе́ние, стране́ Волого́дстей, и посели́лся еси́ в ве́си Ма́сленстей, иде́же пред си́м просла́вися явле́нием ико́на Пресвяты́я Богоро́дицы Одиги́трии, к не́й же я́ко благо́й путеводи́льнице прите́кл еси́, зовы́й в восхище́нии духо́внем Бо́гу: Аллилу́ия. Икос 5. Ви́дяще вси́ окре́стнии и проходя́щии лю́дие пусты́нное твое́ житие́ и твоя́ по́двиги, прославля́ху Го́спода, яви́вшаго мíру сицева́го уго́дника. Мы́ же, гре́шнии, прино́сим ти́ похвалы́ сия́: Ра́дуйся, звездо́, страну́ Волого́дскую осия́вшая; ра́дуйся, лозо́ вертогра́да Се́ргиева. Ра́дуйся, го́рдости прогони́телю; ра́дуйся, и́га Христо́ва носи́телю. Ра́дуйся, темноты́ наро́дныя просвети́телю; ра́дуйся, пусты́ни Ма́сленския пе́рвый насе́льниче. Ра́дуйся, обурева́емых страстьми́ приста́нище благоути́шное; ра́дуйся, оби́димых прибе́жище наде́жное. Ра́дуйся, Арсе́ние, Коме́льский чудотво́рче. Конда́к 6. Пропове́дник несумне́ннаго пути́ ко спасе́нию яви́лся еси́, прему́дре Арсе́ние, твои́ми труды́, безкоры́стием и терпе́нием, на ни́хже взира́юще, усе́рдне сла́вим да́вшаго ти́ си́лу и кре́пость Го́спода, вопию́ще Ему́: Аллилу́ия. Икос 6. Возсия́, я́ко со́лнце в пусты́ни Ма́сленстей, но бе́гая молвы́ челове́ческия, преподо́бне, отше́л еси́ в непрохо́дныя де́бри Коме́льския, нося́ смире́ния ра́ди древя́ный кре́ст, и ту́ при реце́ Ко́хтоши, иде́же но́ша с раме́н твои́х спаде́ и све́т небе́сный осия́ тя́, поста́вил еси́ кре́ст и посели́лся еси́, ча́я в безмо́лвии рабо́тати Го́сподеви со стра́хом. Сего́ ра́ди приими́ похвалы́ сия́: Ра́дуйся, промышле́нием Бо́жиим в пусты́ню Коме́льскую приведе́нный; ра́дуйся, све́том небе́сным зде́ осия́нный. Ра́дуйся, пусты́ню сию́ от всея́ души́ возлюби́вый; ра́дуйся, от ко́зней вра́жеских святы́м кресто́м себе́ огради́вый. Ра́дуйся, покро́ву Пресвяты́я Богоро́дицы ся́ преда́вый; ра́дуйся, еди́наго на потре́бу непреста́нне иска́вый. Ра́дуйся, славолю́бия искорени́телю; ра́дуйся, соиме́нному тебе́ вели́кому Арсе́нию ве́рный подража́телю. Ра́дуйся, Арсе́ние, Коме́льский чудотво́рче. Конда́к 7. Хотя́ вра́г ро́да челове́ча изгна́ти тя́, преподо́бне, из пусты́ни Коме́льския, мно́га искуше́ния тебе́ де́яше; но ты́ я́ко тве́рдый адама́нт неизме́нен пребыва́л еси́ в любви́ к пусты́ни, взыва́я к распя́тому за ны́ Го́споду: Аллилу́ия. Икос 7. Но́выя труды́ подъя́л еси́, блаже́нне Арсе́ние, егда́, по внуше́нию Бо́жию, устро́ити оби́тель в пусты́ни Коме́льстей восхоте́л еси́ и сея́ ра́ди вины́ ше́д неле́ностне во гра́д Москву́ и смире́нне пред о́чи царя́ Васи́лия Іоа́нновича предста́в, моли́л еси́ огради́ти устроя́емую оби́тель от оби́д и утесне́ний, я́же науще́нием вра́жеским де́яша окре́стнии лю́дие. Ца́рь же, ве́дая тя́ я́ко уго́дника Бо́жия, и исполня́я Писа́ние, — толку́щему отве́рзется, — повеле́ да́ти тебе́ гра́моту во огражде́ние оби́тели. За сицевы́я твоя́ труды́ и по́двиги вопие́м ти́ со умиле́нием: Ра́дуйся, зла́то в горни́ле терпе́ния искуше́нное; ра́дуйся, би́сере честны́й, от скве́рны грехо́вныя безмо́лвием очище́нный. Ра́дуйся, пусты́нных оби́телей основа́телю; ра́дуйся, вражды́ и нестрое́ния устрани́телю. Ра́дуйся, се́рдце царе́во на ми́лость преклони́вый; ра́дуйся, безмо́лвие твое́ ра́ди спасе́ния бли́жних нару́шивый. Ра́дуйся, прибега́ющим к тебе́ в ну́ждех усе́рдный помо́щниче; ра́дуйся, су́щим в напа́стех ско́рый засту́пниче. Ра́дуйся, Арсе́ние, Коме́льский чудотво́рче. Конда́к 8. Стра́нным твои́м житие́м, преподо́бне, пусты́ня Коме́льская озари́ся, ему́же внима́юще, устрани́мся мíра, у́м на небеса́ возло́жше, а́ще бо спасе́ния душе́внаго ра́ди и удали́лся еси́ в пусты́ню, но мно́зи пустыннолю́бцы сокро́вищами души́ твоея́ привле́кл еси́, с ни́миже ны́не в невече́рнем све́те сла́дко воспева́еши Светопода́телю Христу́: Аллилу́ия. Икос 8. Ве́сь испо́лнен бы́л еси́ любве́ к Бо́гу и бли́жним твои́м, свя́те Арсе́ние, и сего́ ра́ди безро́потне принима́л еси́ неисче́тныя оби́ды от гоня́щих тя́ из пусты́ни. Егда́ же вре́менне отше́дшу ти́ из ке́лии твое́й, лю́дие нечести́вии нападо́ша на ню́ и келе́йнаго твоего́ ста́рца уби́ша, ты́, преподо́бне, в вели́цей ско́рби о поте́ри бра́та и о духо́вней поги́бели те́х бу́иих люде́й, да́л еси́ ме́сто гне́ву и удали́лся еси́ за три́десять по́прищ в де́брь Шилего́дскую, иде́же пожи́л еси́ в соверше́ннем безмо́лвии, до́ндеже откры́т бы́л еси́ ловце́м звере́й. Сицево́му терпе́нию дивя́щеся, возглаша́ем ти́: Ра́дуйся, любве́ Христо́вы ве́рный носи́телю; ра́дуйся, спаси́тельнаго долготерпе́ния учи́телю. Ра́дуйся, оби́ды, я́ко воздая́ние за грехи́, принима́вый; ра́дуйся, соде́янное тебе́ зло́ незло́бием покры́вый. Ра́дуйся, пусты́ню Шилего́дскую житие́м твои́м освяти́вый; ра́дуйся, явле́нием твои́м звере́й дубра́вных удиви́вый. Ра́дуйся, неви́нно стра́ждущих твои́м приме́ром укрепи́вый; ра́дуйся, си́рых и убо́гих покрови́телю. Ра́дуйся, Арсе́ние, Коме́льский чудотво́рче. Конда́к 9. Вся́кую на́шу ско́рбь утоли́ твое́ю многомо́щную по́мощию, преподо́бне Арсе́ние, и испроси́ на́м у Го́спода си́лу и кре́пость понести́ кре́ст сво́й до конца́ живота́, взыва́я Влады́це все́х: Аллилу́ия. Икос 9. Ветíя многовеща́нныя, я́ко ры́бы безгла́сныя, ви́дим о тебе́, богому́дре Арсе́ние: недоуме́ют бо досто́йне восхвали́ти твоя́ по́двиги. Мы́ же, гре́шнии, любо́вию к тебе́ подвиза́емии, дерза́ем ублажа́ти тя́ си́це: Ра́дуйся, пусты́нников дре́вних, Анто́ния, Па́вла, Гера́сима нелицеме́рный подража́телю; ра́дуйся, Христа́, не име́вшаго где́ главы́ преклони́ти, тве́рдый после́дователю. Ра́дуйся, от звере́й лю́тых почита́емый; ра́дуйся, от люде́й зверонра́вных гони́мый. Ра́дуйся, ловцу́ звере́й себе́ яви́вый; ра́дуйся, безкоры́стием и прозорли́востию ловца́ того́ порази́вый. Ра́дуйся, но́вую оби́тель в де́бри Шилего́дстей основа́вый; ра́дуйся, я́ко си́лою моли́тв твои́х оби́тель та́ со все́ми прите́кшими к не́й от наше́ствия тата́р спасе́ся. Ра́дуйся, Арсе́ние, Коме́льский чудотво́рче. Конда́к 10. Спасти́ хотя́ ду́шу твою́ на ме́сте, Бо́гом ука́занном ти́, свя́те Арсе́ние, вознаме́рился еси́ возврати́тися в любе́зную тебе́ пусты́ню Коме́льскую и зде́ оби́тель устро́ити: пе́рвее же ты́ напра́вил еси́ стопы́ твоя́ во гра́д Москву́ к царю́ Васи́лию Іоа́нновичу; испроси́в же от него́ но́вую гра́моту ра́ди пусты́ни Коме́льския, со ученико́м Гера́симом отше́л еси́ из оби́тели Шилего́дския на пре́жнее ме́сто в пусты́ню Коме́льскую и нача́л еси́ устроя́ти оби́тель во сла́ву и че́сть Пресвяты́я Богоро́дицы, Юже, я́ко непреста́нную Помо́щницу и ско́рую Засту́пницу прославля́я, с ве́рою и наде́ждою взыва́л еси́ Бо́гу: Аллилу́ия. Икос 10. Стена́ еси́ кре́пкая оби́тели твое́й и все́м к тебе́ прибега́ющим, преподо́бне Арсе́ние, твои́м бо святы́м житие́м мно́гия в пусты́ню привле́кл еси́, сего́ ра́ди вопие́м ти́: Ра́дуйся, жития́ и́ноческаго му́дрый устрои́телю; ра́дуйся, смире́ния, целому́дрия и нестяжа́тельности ре́вностный насади́телю. Ра́дуйся, земны́й а́нгеле и небе́сный челове́че; ра́дуйся, к тебе́ бо, я́ко му́дрому наста́внику, иска́вшии соверше́нства прибега́ху. Ра́дуйся, я́ко сло́ву твоему́ и зве́ри дубра́внии внима́ху; ра́дуйся, злы́х серде́ц умягче́ние. Ра́дуйся, оби́тели твое́й неусы́пный попечи́телю; ра́дуйся, Пречи́стыя Богоро́дицы ве́рный служи́телю. Ра́дуйся, Арсе́ние, Коме́льский чудотво́рче. Конда́к 11. Пе́ние умиле́нное а́ще и прино́сим ти́, достохва́льне Арсе́ние, ничто́же соверша́ем досто́йно, но ты́, преподо́бне, покры́й на́ше недосто́инство твои́м снисхожде́нием и научи́ ны чи́стым се́рдцем воспева́ти просла́вившему тя́ Го́споду: Аллилу́ия. Икос 11. Светоза́рным свети́лом возсия́л еси́, преподо́бне Арсе́ние, в пусты́нях Шилего́дстей и Коме́льстей, а́ще и пресели́лся еси́ в после́днюю, но не забы́л еси́ посеща́ти и пе́рвую, облича́я окре́стныя лю́ди в наруше́нии и́ми за́поведей и уста́вов церко́вных. Пред конце́м же живота́ твоего́ ты́, преподо́бне, затвори́лся еси́ в ке́лии твое́й и нача́л еси́ гото́витися; последи́ же собра́л еси́ бра́тию к сме́ртному одру́ твоему́, моля́ и́х име́ти любо́вь между́ собо́ю, благослови́в же и́х, ми́рно пре́дал еси́ ду́х тво́й Бо́гу, и погребе́н бы́л еси́ во оби́тели Коме́льстей, иде́же мо́щи твоя́ то́ки чуде́с излива́ют, подвиза́я взыва́ти тебе́: Ра́дуйся, свети́ло, све́т сво́й от Христа́ восприя́вшее; ра́дуйся, я́ко све́том те́м пусты́ни освети́шася. Ра́дуйся, за́поведей Госпо́дних стро́гий исполни́телю; ра́дуйся, наруши́телей о́ных ско́рый обличи́телю. Ра́дуйся, кончи́ну твою́ предузна́вый; ра́дуйся, мо́щи твоя́ во благослове́ние оби́тели да́вый. Ра́дуйся, я́ко мо́щи сия́ то́ки чуде́с источа́ютъ; ра́дуйся, я́ко чудеса́ ты́я восхваля́ти тя́ благода́рне подвиза́ют. Ра́дуйся, Арсе́ние, Коме́льский чудотво́рче. Конда́к 12. Благода́ти исто́чник — святы́я мо́щи твоя́, и́мамы и до дне́сь, блаже́нне Арсе́ние, а́ще бо и оби́тель твоя́ убе́жищем и́нокинь ны́не соде́лана бы́сть: в Ца́рствии бо небе́снем не́сть му́жеск по́л, ни же́нск, но вси́ ро́ди, еди́ным се́рдцем и еди́ными усты́, немо́лчне славосло́вят Пода́теля все́х бла́г Свята́го Ду́ха Уте́шителя, пою́ще Ему́: Аллилу́ия. Икос 12. Пою́ще твоя́ по́двиги и чудеса́, славосло́вим просла́вльшаго тя́ Го́спода и про́сим тя́, преподо́бне Арсе́ние, освяти́, вразуми́ и научи́ ны, гре́шныя, со умиле́нием взыва́ти тебе́: Ра́дуйся, бу́иих вразуми́телю; ра́дуйся, разсла́бленных возстанови́телю. Ра́дуйся, слепы́м зре́ние, глухи́м слы́шание, немы́м разреше́ние язы́ка дарова́вый; ра́дуйся, тре́звости утверди́телю. Ра́дуйся, вражду́ющих примири́телю; ра́дуйся, со́вести пробуди́телю. Ра́дуйся, душеполе́зных бла́г пода́телю; ра́дуйся, не то́чию оби́тели твоея́, но и всея́ о́бласти Волого́дския покрови́телю. Ра́дуйся, Арсе́ние, Коме́льский чудотво́рче. Конда́к 13 О, преподо́бне и богоно́сне о́тче на́ш Арсе́ние, приими́ от на́с, недосто́йных, ма́лое сие́ моле́ние и богоприя́тным хода́тайством твои́м умоли́ Го́спода изба́вити Це́рковь Правосла́вную от безве́рия, ересе́й и раско́лов, оте́чество на́ше от наше́ствия иноплеме́нных, от неду́га и гла́да, от вся́кия ско́рби и смертоно́сныя ра́ны, оби́тель же твою́ и на́с все́х от вра́г ви́димых и неви́димых. Да твои́м всемо́щным заступле́нием укрепля́еми и твое́ю любо́вию согрева́еми с ве́рою и наде́ждою благода́рне вопие́м Творцу́ небесе́ и земли́: Аллилу́ия.[Се́й конда́к глаго́лется три́жды.][Далее повторяем 1‑е икос и кондак:]Икос 1. Ангела земна́го и небе́снаго челове́ка зри́м тя́, преподо́бне: ты́ бо измла́да Отца́ Небе́снаго возлюби́л еси́ и Тому́ Еди́ному во́лю твою́ порабо́тил еси́. Сего́ ра́ди ублажа́ем тя́ си́це: Ра́дуйся, измла́да гла́су Бо́жию в со́вести внима́вый; ра́дуйся, о́браз Бо́жий в души́ твое́й в чистоте́ храни́вый. Ра́дуйся, земно́е вели́чие твое́ по ро́ду ни во что́ вмени́вый; ра́дуйся, от ю́ности нищету́ духо́вную возлюби́вый. Ра́дуйся, смире́ния учи́телю; ра́дуйся, де́вства ревни́телю. Ра́дуйся, оби́тель преподо́бнаго Се́ргия, я́ко ти́хое приста́нище, избра́вый; ра́дуйся, житию́ Се́ргиеву ре́вностне подража́вый. Ра́дуйся, Арсе́ние, Коме́льский чудотво́рче. Конда́к 1 Избра́нный чудотво́рче и изря́дный уго́дниче Христо́в, Арсе́ние преподо́бне, восхваля́ем тя́, безмо́лвия, терпе́ния и нищеты́ духо́вныя учи́теля. Ты́ же, я́ко име́яй дерзнове́ние ко Го́споду, моли́ Его́ изба́вити оби́тель твою́ и на́с, гре́шных, от все́х бе́д и ско́рбных обстоя́ний, да со умиле́нием зове́м ти́: Ра́дуйся, Арсе́ние, Коме́льский чудотво́рче.

Текст утвержден Священным Синодом Русской Православной Церкви 8 декабря 2020 года (журнал № 99) Конда́к 1 Избра́нней от всех родо́в Цари́це и Влады́чице/ похва́льныя пе́сни принесе́м, яќо Хода́таице и Засту́пнице ро́да христиа́нскаго,/ Ты же, яко блага́я Предста́тельница пред Го́сподем,/ умоли́ Сы́на Твоего́ и Бо́га на́шего/ дарова́ти нам насле́дие благ ве́чных,/ да ра́дующеся о Тебе́ взыва́ем:// Ра́дуйся, премилосе́рдая Влады́чице, предста́тельство на́ше и всера́достное заступле́ние. И́кос 1 Арха́нгел Гаврии́л, с Небесе́ по́сланный к Тебе́, Де́во Чи́стая, веща́ Ти: Ра́дуйся, Благода́тная, Госпо́дь с Тобо́ю! Мы же, благода́тию Бо́жиею чрез Тебе́ озаре́ннии, восхваля́ем Тя пе́сньми сицевы́ми: Ра́дуйся, пре́жде веко́в Сове́том Бо́жиим предызбра́нная; ра́дуйся, А́гнице, А́гнца Бо́жия ро́ждшая. Ра́дуйся, сокро́вищнице спасе́ния на́шего, превы́шшая сил А́нгельских; ра́дуйся, Отрокови́це пренепоро́чная и Ма́ти Све́та. Ра́дуйся, горо́ несеко́мая, исто́чник воды́ живы́я источи́вшая; ра́дуйся, раю́ цветоно́сный, Боже́ственное Дре́во жи́зни произрасти́вшая. Ра́дуйся, богообра́дованная Ма́ти, ра́дость Не́бу и земли́ ро́ждшая; ра́дуйся, си́лою Всевы́шняго осене́нная, Боже́ственный Клас прозя́бшая. Ра́дуйся, премилосе́рдая Влады́чице, предста́тельство на́ше и всера́достное заступле́ние. Конда́к 2 Ви́дящи ве́рная ча́да Твоя́, в беда́х жите́йских уныва́ющая и по́мощи Небе́сныя от Тебе́ тре́бующая, Ты, Богома́ти, наде́ждо христиа́ном, чуде́сным явле́нием близ ве́си Жиро́вицкия святы́я ико́ны Твоея́ испо́лнила еси́ ра́дости и весе́лия сердца́ всех, в ско́рби припа́дающих к Тебе́, да благода́рственно вопию́т о Тебе́ Бо́гу: Аллилу́ия. И́кос 2 Ра́зумом не уразуме́в та́йны чуде́снаго явле́ния на дре́ве ико́ны Твоея́, Пречи́стая Влады́чице, скры боля́рин Со́лтан в ковче́жце явле́нный Тобо́ю о́браз. Ты же, Де́во Богоро́дице, сугу́бым явле́нием на том же дре́ве ико́ны сея́ вразуми́ла еси́ его́, да вси позна́ют дар милосе́рдия, лю́дем Тобо́ю низпосыла́емый, и в весе́лии возопию́т: Ра́дуйся, кла́дезю живы́й неисчерпа́емыя ра́дости; ра́дуйся, цве́те благоуха́нный неизрече́нныя сла́дости. Ра́дуйся, явле́нием ико́ны Твоея́ на дре́ве нас кре́пко огражда́ющая; ра́дуйся, благода́тию от нея́, а́ки от Дре́ва жи́зни, нас сладкопита́ющая. Ра́дуйся, ми́лости заблу́ждших не лиша́ющая; ра́дуйся, покро́вом Твои́м всех осеня́ющая. Ра́дуйся, гла́су моле́ния скорбя́щих послу́шная; ра́дуйся, Ма́ти милосе́рдия неоску́днаго. Ра́дуйся, премилосе́рдая Влады́чице, предста́тельство на́ше и всера́достное заступле́ние. Конда́к 3 Си́лою вразумле́ния о явле́нии чудотво́рныя ико́ны Твоея́ просвеще́нный, позна́ боля́рин Со́лтан, я́ко ико́на сия́ стра́ждущим во утеше́ние Тобо́ю свы́ше низпо́слана бысть, и, сле́зно сокруша́яся о неразу́мии свое́м, воздви́же храм на ме́сте явле́ния ея́, да вси лю́дие Бо́гу воздаю́т непреста́нную о Тебе́ хвалу́: Аллилу́ия. И́кос 3 Иму́щи бога́тство милосе́рдия неизрече́нное, не отри́нула еси́ промышле́нием избра́нных Твои́х, в ско́рби ве́лией су́щих. Егда́ бо храм, иде́же бе ико́на Твоя́ пречестна́я, огне́м попале́н бысть, Ты, всеблага́я Уте́шительнице, сохрани́ла еси́ о́браз Твой от огня́ неврежде́н, па́ки яви́ла еси́ на ка́мени близ хра́ма, огне́м сожже́ннаго. Лю́дие же, узре́вше таково́е чу́до, воспе́ша Ти хвале́бную песнь сицеву́ю: Ра́дуйся, купино́ неопали́мая, во огни́ пречестны́й Свой о́браз сохра́ньшая; ра́дуйся, ско́рбныя лю́ди Твоя́ чудотво́рныя ико́ны не лиши́вшая. Ра́дуйся, кро́вом крилу́ Твое́ю христиа́н покрыва́ющая; ра́дуйся, предста́тельством Твои́м святы́ни охраня́ющая. Ра́дуйся, на ка́мени пречестны́й Твой о́браз па́ки яви́вшая; ра́дуйся, вразумле́нием Твои́м на ка́мени ве́ры стопы́ на́ша утверди́вшая. Ра́дуйся, я́ко сте́ну неруши́мую Тебе́ стяжа́хом; ра́дуйся, я́ко благомо́щную Покрови́тельницу Тя позна́хом. Ра́дуйся, премилосе́рдая Влады́чице, предста́тельство на́ше и всера́достное заступле́ние. Конда́к 4 Бу́рею страсте́й и искуше́ний одержи́мии ве́рнии Твои́, моля́щеся пред чудотво́рною ико́ною Твое́ю, поко́й и душе́вную ра́дость обрета́ют. Ты бо, Де́во Чи́стая, христиа́н Путеводи́тельнице, му́дро и пра́во путь жития́ ше́ствовати наставля́еши, да вси богокра́сною пе́снию восхваля́ют Бо́га, пою́ще: Аллилу́ия. И́кос 4 Слы́шавше лю́дие, я́ко явле́нная Тобо́ю ико́на да́ром чуде́с преизбы́точествует, с ве́рою и упова́нием на милосе́рдие Твое́ к ней притека́ют и, бога́тством щедро́т Твои́х обогати́вшеся, воспева́ют Ти хвалу́ такову́ю: Ра́дуйся, мо́ре щедро́т христиа́ном излива́ющая; ра́дуйся, ра́дость всему́ ми́ру принося́щая. Ра́дуйся, свяще́нное прибе́жище ве́рных; ра́дуйся, Пода́тельнице благ ве́чных. Ра́дуйся, Услади́тельнице го́рестей на́ших; ра́дуйся, кре́пкое воста́ние па́дших. Ра́дуйся, изнемога́ющих Засту́пнице и укрепле́ние; ра́дуйся, в страда́ниих на́ших при́сное утеше́ние. Ра́дуйся, премилосе́рдая Влады́чице, предста́тельство на́ше и всера́достное заступле́ние. Конда́к 5 Боготе́чней звезде́, с восто́ка возсия́вшей, подо́бна бы́ла еси́, Пресвята́я Де́во, егда́ в лучеза́рнем сия́нии а́ки Жена́ красоты́ неизрече́нныя яви́лася еси́ де́тем, указу́ющи ме́сто явле́ния пречестны́я ико́ны Твоея́, чуде́сно Тобо́ю от огня́ сохране́нныя. Не лиши́ла еси́ и ма́лых сих Твоея́ благосты́ни, поуча́ющи их о вели́цем милосе́рдии Твое́м, да, подража́юще де́тем изра́илевым, восклица́вшим Христу́: «Оса́нна», – воспою́т хвалу́ Бо́гу: Аллилу́ия. И́кос 5 Ви́деша вси стра́нное и пресла́вное чу́до, ико́ною Твое́ю явля́емое, Пречи́стая: деви́ца не́кая Ири́на, боле́знию подви́гшися к поклоне́нию святы́ни Твое́й, на пути́ у́мре, и егда́ и́ноцы нача́ша сверша́ти отпева́ние ея́ пред ико́ною Твое́ю, ди́вно воскре́се, и вси лю́дие со тре́петом восклица́ху: Ра́дуйся, Сло́во жи́зни пло́тию роди́вшая; ра́дуйся, ме́ртвую рабу́ Твою́ воскреси́вшая. Ра́дуйся, ковче́же жи́зни на́шея, от пото́па сме́ртнаго нас сохраня́яй; ра́дуйся, ра́зуме пресве́тлый, жи́зни ве́чныя позна́ние нам да́руяй. Ра́дуйся, ико́ною Твое́ю исто́чники чуде́с ве́лиих нам явля́ющая; ра́дуйся, тьму лю́тых обстоя́ний от почита́ющих ю́ отгоня́ющая. Ра́дуйся, зна́меньми непостижи́мыми моля́щихся Ти ободря́ющая; ра́дуйся, ма́терними щедро́тами всех прибега́ющих к Тебе́ посеща́ющая. Ра́дуйся, премилосе́рдая Влады́чице, предста́тельство на́ше и всера́достное заступле́ние. Конда́к 6 Пропове́дницы благосты́ни Твоея́ яви́шася вси, притека́ющии к цельбоно́сней ико́не Твое́й, Влады́чице. Не отри́нула бо еси́ никого́же, в те́плей моли́тве ру́це свои́ к ней простира́юща, да позна́вшии си́лу да́ра чуде́снаго Бо́гу благода́рственную песнь возопию́т: Аллилу́ия. И́кос 6 Возсия́вшая луча́ светоза́рная яви́ся всечестна́я оби́тель Жиро́вицкая, под кро́вом святы́ни Твоея́, Богома́ти, воздви́гнутая и путь жития́ благонра́внаго озаря́ющая. Сей бо дом по́двигов и́ноческих и учи́лище боже́ственнаго разуме́ния освети́ зе́млю на́шу луча́ми и́стиннаго богове́дения, да вси Тебе́, о до́ме Прему́дрости седмисто́лпный, та́ко воспою́т в пе́снех достохва́льных: Ра́дуйся, заре́ Со́лнца незаходи́маго; ра́дуйся, Богороди́тельнице Све́та непостижи́маго. Ра́дуйся, ле́ствице, к Небеси́ возводя́щая; ра́дуйся, нему́дрых ра́зумом Боже́ственным умудря́ющая. Ра́дуйся, учи́лищ благоче́стия в стране́ на́шей Насади́тельнице; ра́дуйся, в позна́нии за́поведей Христо́вых прему́драя Руководи́тельнице. Ра́дуйся, ду́ши ве́рных благода́тно насыща́ющая; ра́дуйся, ве́рныя млеко́м прему́дрости пита́ющая. Ра́дуйся, премилосе́рдая Влады́чице, предста́тельство на́ше и всера́достное заступле́ние. Конда́к 7 Хотя́ще возда́ти поклоне́ние ико́не Твое́й, мно́гими чудесы́ просия́вшей, посеща́ху оби́тель Жиро́вицкую не то́кмо худоро́днии, но и ца́рие зе́мстии, припа́дающе к пречи́стому Твоему́ о́бразу, Влады́чице, и, ча́юще от Тебе́ вели́кия и бога́тыя ми́лости, приноша́ху Ти песнь хвале́бную и Бо́гови воспева́ху: Аллилу́ия. И́кос 7 Ди́вное вои́стину промышле́ние яви́ла еси́, Влады́чице, ве́рным Твои́м; егда́ бо оби́тель Жиро́вицкая ле́стию и наси́лием от Правосла́вия отто́ржена бысть, заступле́нием Твои́м па́ки возврати́ся лю́дем правосла́вным. Сего́ ра́ди вси пра́выя ве́ры покло́нницы притеко́ша к пречи́стому о́бразу Твоему́, и с весе́лием воспе́ша: Ра́дуйся, в ско́рбных обстоя́ниих наде́жное прибе́жище; ра́дуйся, и́щущим спасе́ния ти́хое приста́нище. Ра́дуйся, со апо́столы ве́ры Христо́вы Насади́тельнице; ра́дуйся, глубине́ сло́ва Бо́жия прему́драя Учи́тельнице. Ра́дуйся, свети́льниче Трисо́лнечнаго Све́та, и́стиною нас озаря́яй; ра́дуйся, сто́лпе о́гненный, путь пра́выя ве́ры нам показу́яй. Ра́дуйся, от па́губных уче́ний на́ше охране́ние; ра́дуйся, душевре́дных уче́ний посрамле́ние. Ра́дуйся, премилосе́рдая Влады́чице, предста́тельство на́ше и всера́достное заступле́ние. Конда́к 8 Стра́нная и пресла́вная чудеса́ позна́ша о Тебе́, Богома́ти, ве́рнии Твои́, я́ко не то́кмо ико́ною Твое́ю благода́ть им явля́еши, но и вода́м исто́чника, на ме́сте явле́ния происте́кшаго, дар неду́ги исцеля́ти подае́ши, да вси, вели́кую и бога́тую ми́лость от Тебе́ восприи́мше, воспою́т хвале́бную песнь Бо́гови: Аллилу́ия. И́кос 8 Вси, к покро́ву Твоему́ прибега́ющии, ско́рое услы́шание и те́плое заступле́ние обрета́ют: Ты бо, Богома́ти, ско́рби ма́терния при Кресте́ Сы́на Твоего́ восприи́мшая, ве́си тяготу́ скорбе́й на́ших. Те́мже к Тебе́, Ма́ти, в ско́рби искуше́нней, я́ко о́бщницы ско́рби и страда́ний Сы́на Твоего́, та́ко взыва́ем: Ра́дуйся, ненаде́янных наде́яние; ра́дуйся, ско́рбных утеше́ние. Ра́дуйся, печа́ли на́ша утоля́ющая; ра́дуйся, всему́ ми́ру ра́дость да́рующая. Ра́дуйся, в беда́х су́щим ру́ку по́мощи ско́ро подаю́щая; ра́дуйся, ма́тернюю любо́вь и милосе́рдие нам явля́ющая. Ра́дуйся, пред Бо́гом на́ша Моли́твеннице и Засту́пнице; ра́дуйся, в напа́стех превели́кая Защи́тнице. Ра́дуйся, премилосе́рдая Влады́чице, предста́тельство на́ше и всера́достное заступле́ние. Конда́к 9 Вся А́нгельская во́инства Тебе́, Богома́ти, я́ко вы́шшую Небе́с и чи́стшую све́тлостей со́лнечных, ублажа́ют: Бо́га бо зачала́ еси́ пло́тию и Све́та све́тов родила́ еси́. Те́мже и мы, земноро́днии, я́ко честне́йшую Херуви́м и сла́внейшую без сравне́ния Серафи́м, велича́юще Тя, вопие́м о Тебе́ Бо́гови: Аллилу́ия. И́кос 9 Вети́йство вся́кое земноро́дных не довле́ет к прославле́нию ико́ны, Тобо́ю явле́нныя, от нея́же, я́ко от приснотеку́щаго исто́чника, прибега́ющии оби́лие благ почерпа́ют. Те́мже, недоумева́юще восхвали́ти Тя по достоя́нию, яко первоисто́чник благ сих, со умиле́нием се́рдца взыва́ем си́це: Ра́дуйся, Домострои́тельнице на́шего спасе́ния, житие́ на́ше до́бре устроя́ющая; ра́дуйся, Путеводи́тельнице, к Небе́сному Оте́честву нас возводя́щая. Ра́дуйся, благи́х вино́вная, гре́шники благ ве́чных не лиша́ющая; ра́дуйся, Предста́тельнице на́ша пред Бо́гом, пра́ведный гнев Бо́жий на ми́лость претворя́ющая. Ра́дуйся, су́етная ми́ра сего́ презира́ти нас науча́ющая; ра́дуйся, к любви́ Боже́ственней нас привлека́ющая. Ра́дуйся, от всех бед ско́рое избавле́ние; ра́дуйся, отча́янных наде́жное спасе́ние. Ра́дуйся, премилосе́рдая Влады́чице, предста́тельство на́ше и всера́достное заступле́ние. Конда́к 10 Спасти́ся хотя́щим нам и под кров Твой прибега́ющим, бу́ди, Пресвята́я Де́во, Помо́щница неоску́дная. Сохрани́ нас от бед и напа́стей, наипа́че же от паде́ния грехо́внаго и отча́яния, да, преуспева́юще в доброде́телех Христо́вых, с ра́достию о преди́внем Твое́м заступле́нии благода́рственно возопие́м: Аллилу́ия. И́кос 10 Стена́ кре́пкая Це́ркви Правосла́вней была́ еси́, Пресвята́я Де́во, во дни тя́жких испыта́ний ея́; те́мже мо́лим Тя: заступи́, покры́й и соблюди́ ю́ во вся дни от враг злоко́зненных, возстаю́щих на ню́, да вси ра́достно о Тебе́ возопие́м: Ра́дуйся, Це́ркве Христо́вы огражде́ние и Правосла́вия Побо́рнице; ра́дуйся, я́ко заступле́нием Твои́м Це́рковь Христо́ва све́тло красу́ется. Ра́дуйся, я́ко отсту́пницы ве́ры оте́ческия Тобо́ю вразумля́ются; ра́дуйся, я́ко Тобо́ю ко́зни враго́в Правосла́вия посрамля́ются. Ра́дуйся, я́ко вразумле́нием Твои́м и́стинная ве́ра в стране́ на́шей насажда́ется; ра́дуйся, я́ко распыха́ющаяся на ню́ зло́ба вра́жия утиша́ется. Ра́дуйся, тве́рдое Правосла́вия укрепле́ние; ра́дуйся, ерети́чествующих посрамле́ние. Ра́дуйся, премилосе́рдая Влады́чице, предста́тельство на́ше и всера́достное заступле́ние. Конда́к 11 Пе́ние сладча́йшее не довле́ет восхвали́ти по достоя́нию щедро́ты Твоя́, Пречи́стая, несть бо ра́зума, могу́ща позна́ти глубину́ милосе́рдия Твоего́, ниже́ сло́ва, досто́йно воспева́юща Тя. Оба́че, Блага́я су́щи, приими́ и на́ша убо́гая хвале́ния, да и мы, вели́чие Твое́ прославля́юще, воспое́м о Тебе́ песнь Бо́гу: Аллилу́ия. И́кос 11 Светоза́рными луча́ми, пречи́стому о́бразу Твоему́ прису́щими, озари́, Влады́чице, путь жития́ на́шего приско́рбный, да вси от бед и лю́тых напа́стей Тобо́ю изба́вленнии, возмо́жем пра́во ходи́ти в зако́не Госпо́дни, благодаря́ще Тя и пою́ще си́це: Ра́дуйся, чудесы́ Твои́ми, я́ко омофо́ром, нас покрыва́ющая; ра́дуйся, безчи́сленныя щедро́ты всем подава́ющая. Ра́дуйся, стра́сти на́ша и по́мыслы утиша́ющая; ра́дуйся, боле́зни теле́сныя и душе́вныя исцеля́ющая. Ра́дуйся, Твои́м хода́тайством от всех бед избавля́ющая; ра́дуйся, от ско́рби и печа́ли ско́ро нас изыма́ющая. Ра́дуйся, вдов заступле́ние и си́рых призре́ние; ра́дуйся, ю́ных исправле́ние и ста́рцев утеше́ние. Ра́дуйся, премилосе́рдая Влады́чице, предста́тельство на́ше и всера́достное заступле́ние. Конда́к 12 Благода́ть с Небесе́ от Бо́га испроси́ нам, Влады́чице, к пречи́стому о́бразу Твоему́ притека́ющим и Тебе́, Ма́терь Све́та, в пе́снех велича́ющим, да, осеня́еми покро́вом Твои́м, во вся́ком благоче́стии и чистоте́ поживе́м и Престо́лу Царя́ Сла́вы неосужде́нно предста́нем, пою́ще о Тебе́ хвале́бную песнь: Аллилу́ия. И́кос 12 Пою́ще вели́чия Твоя́, Пресвята́я Де́во, восхваля́ем Тя вси и, я́ко тве́рдую Предста́тельницу спасе́ния на́шего, усе́рдно мо́лим: бу́ди нам во вся́ком де́ле бла́зе Помо́щница и услы́ши нас, уми́льно взыва́ющих Ти: Ра́дуйся, пра́ваго пути́ ко Христу́ прему́драя Указа́тельнице; ра́дуйся, чистоты́ и целому́дрия преди́вная Охрани́тельнице. Ра́дуйся, а́лчущих и жа́ждущих пра́вды Пита́тельнице; ра́дуйся, и́щущим предста́тельства Твоего́ неусы́пная Засту́пнице. Ра́дуйся, изнемога́ющим поможе́ние; ра́дуйся, всему́ ми́ру защище́ние. Ра́дуйся, на всех путе́х жи́зни нас огражда́ющая; ра́дуйся, при исхо́де на́шем от духо́в зло́бы защища́ющая. Ра́дуйся, премилосе́рдая Влады́чице, предста́тельство на́ше и всера́достное заступле́ние. Конда́к 13 О Пресвята́я Влады́чице, Де́во Богоро́дице, А́нгельскими чи́нми на Небеси́ песносло́вимая, приими́ и от нас, недосто́йных раб Твои́х, сие́ ма́лое моле́ние, в похвалу́ Тебе́ приноси́мое, и, от паде́ний грехо́вных избавля́ющи, насле́дники ны Ца́рствия Небе́снаго соде́лай, да с Тобо́ю во ве́ки пое́м Бо́гу: Аллилу́ия.[Се́й конда́к глаго́лется три́жды.][Далее повторяем 1‑е икос и кондак:]И́кос 1 Арха́нгел Гаврии́л, с Небесе́ по́сланный к Тебе́, Де́во Чи́стая, веща́ Ти: Ра́дуйся, Благода́тная, Госпо́дь с Тобо́ю! Мы же, благода́тию Бо́жиею чрез Тебе́ озаре́ннии, восхваля́ем Тя пе́сньми сицевы́ми: Ра́дуйся, пре́жде веко́в Сове́том Бо́жиим предызбра́нная; ра́дуйся, А́гнице, А́гнца Бо́жия ро́ждшая. Ра́дуйся, сокро́вищнице спасе́ния на́шего, превы́шшая сил А́нгельских; ра́дуйся, Отрокови́це пренепоро́чная и Ма́ти Све́та. Ра́дуйся, горо́ несеко́мая, исто́чник воды́ живы́я источи́вшая; ра́дуйся, раю́ цветоно́сный, Боже́ственное Дре́во жи́зни произрасти́вшая. Ра́дуйся, богообра́дованная Ма́ти, ра́дость Не́бу и земли́ ро́ждшая; ра́дуйся, си́лою Всевы́шняго осене́нная, Боже́ственный Клас прозя́бшая. Ра́дуйся, премилосе́рдая Влады́чице, предста́тельство на́ше и всера́достное заступле́ние. Конда́к 1 Избра́нней от всех родо́в Цари́це и Влады́чице/ похва́льныя пе́сни принесе́м, яќо Хода́таице и Засту́пнице ро́да христиа́нскаго,/ Ты же, яко блага́я Предста́тельница пред Го́сподем,/ умоли́ Сы́на Твоего́ и Бо́га на́шего/ дарова́ти нам насле́дие благ ве́чных,/ да ра́дующеся о Тебе́ взыва́ем:// Ра́дуйся, премилосе́рдая Влады́чице, предста́тельство на́ше и всера́достное заступле́ние. Моли́тва О премилосе́рдая Госпоже́, Де́во Богоро́дице! Ки́има устна́ма прикосну́ся ко святы́ни Твое́й или́ ки́ими словесы́ испове́м щедро́ты Твоя́, лю́дем явля́емыя; никто́же бо, притека́яй к Тебе́, отхо́дит тощ и не услы́шан. От ю́ности моея́ взыска́х по́мощи и заступле́ния Твоего́ и николи́же лише́н бых милосе́рдия Твоего́. Зри́ши, Госпоже́, ско́рби се́рдца моего́ и я́звы души́ моея́ ве́си. И ны́не коленопреклоне́нно предстоя́ пред пречи́стым Твои́м о́бразом, моле́ния моя́ приношу́ Ти. Не лиши́ мя всеси́льнаго хода́тайства Твоего́ в день ско́рби моея́, и в день печа́ли моея́ заступи́ мя. То́ка слез мои́х не отврати́ся, Влады́чице, и ра́дости мое́ се́рдце испо́лни. Прибе́жище и предста́тельство бу́ди мне, Ми́лостивая, и све́та Твоего́ заря́ми ум мой просвети́. И не то́кмо о себе́ молю́ Тя, но и о лю́дех, притека́ющих к заступле́нию Твоему́. Це́рковь Сы́на Твоего́ во бла́гости соблюди́, и огради́ ю́ от злоко́зненных наве́тов враг, возстаю́щих на ню́. Архипа́стырем на́шим посли́ по́мощь Твою́ во апо́стольстве и сохрани́ их здра́вы, долгоде́нствующа, пра́во пра́вяща сло́во и́стины Госпо́дни. Па́стырем испроси́ у Бо́га Сы́на Твоего́ ре́вность и бде́ние о душа́х вруче́ннаго им ста́да слове́снаго, дух ра́зума и благоче́стия, чистоты́ и пра́вды боже́ственныя им низпосли́. Испроси́ та́кожде, Влады́чице, у Го́спода власте́м предержа́щим и градоправи́телем му́дрость и си́лу, судия́м пра́вду и нелицеприя́тие, всем же притека́ющим к Тебе́ дух целому́дрия, смиренному́дрия, терпе́ния и любве́. Еще́ же молю́ Тя, Премилосе́рдая, осени́ страну́ на́шу кро́вом Твоея́ благосты́ни и изба́ви ю́ от бе́дствий стихи́йных, наше́ствия иноплеме́нников и междоу́собных нестрое́ний, да вси живу́щии в ней, в любви́ и ми́ре пребыва́юще, ти́хое и безмяте́жное житие́ поживу́т и, благ ве́чных моли́твами Твои́ми сподо́бившеся, возмо́гут ку́пно с Тобо́ю и все́ми святы́ми восхваля́ти Бо́га на Небеси́ во ве́ки. Ами́нь. И́на моли́тва О всепе́тая и преблагослове́нная Де́во, Ма́ти Христа́ Бо́га на́шего, приими́ моле́ния нас, Тебе́ прославля́ющих, Тебе́ благодаре́ния принося́щих и почита́ющих честну́ю ико́ну сию́, от лет дре́вних в ве́си Жиро́вицтей явле́нную. Не таи́м благодея́ния Твоя́, Богоро́дице, и па́ки испове́дуем, я́ко сия́ ико́на Твое́ю благода́тною си́лою всем, с ве́рою приходя́щим к ней, источа́ет неоску́дныя ми́лости: просвеща́ет сердца́ благоче́стием, укрепля́ет си́лы осла́бленныя и исцеля́ет не́мощи душе́вныя и теле́сныя. О всепе́тая Цари́це Небе́сная, приими́ благода́рственное пе́ние и никогда́же лиши́ нас Твоего́ Небе́снаго покро́ва и заступле́ния: вся бо мо́жет моли́тва Ма́тере к Милосе́рдному Боже́ственному Сы́ну, о сем бо вели́ком заступле́нии возвеща́ет нам сия́ ма́лая ико́на, я́ко безце́нное сокро́вище, на сем ме́сте обре́тенное. Благода́тная Ма́ти Бо́жия, Ты и во огни́ о́браз сей сохра́ньшая, па́ки да́руеши его́ в зало́г Твоея́ бли́зости к нам и всегда́шняго заступле́ния. О Пречи́стая Влады́чице, умягчи́ сердца́ на́ша, окамене́нная грехо́м, да, ожи́вше благода́тными Твои́ми моли́твами, испо́лним Боже́ственныя за́поведи Сы́на Твоего́, Го́спода на́шего Иису́са Христа́, и та́ко дости́гнем несконча́емаго дне Ца́рствия Бо́жия, в не́же и зва́ни есмы́ со все́ми святы́ми. Ами́нь.

Минея, 10 Апреля, Кано́н, его́же краегране́сие: Мно́жество мя спаси́ добропобе́дных му́чеников. Творе́ние Ио́сифа Глас 8 Песнь 1 Ирмос: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:/ Изба́вителю и Бо́гу на́шему пои́м. Припев: Святи́и му́ченицы, моли́те Бо́га о на́с. Мно́жество страда́лец сла́вных,/ Христа́ умоли́те, мно́жество иму́щаго щедро́т,/ мно́жества ума́лити зол мои́х,/ я́ко да восхваля́ю ва́ше торжество́. Припев: Святи́и му́ченицы, моли́те Бо́га о на́с. Служа́ще живо́му и и́стинному Бо́гу, страстоно́сцы,/ безду́шным че́сти бого́м ника́коже принесо́сте/ и жива́я Жизнода́вцу же́ртва принесо́стеся. Сла́ва Отцу́ и Сы́ну и Свято́му Ду́ху. Пропове́даша безбо́жнии повеле́ние богоме́рзкое,/ и посреди́ суди́ща четы́редесять страда́лец пропове́даша Сло́во воплоще́нное,/ безслове́сия мир изба́вльшее. И ны́не и при́сно и во ве́ки веко́в. Ами́нь. Богородичен: Пою́ Тя, Де́во, я́ко Бо́га, Всепе́тая,/ воплоти́ла еси́ еди́на от Твои́х честны́х крове́й, Пресвята́я,/ и па́че сло́ва стра́шно породила́ еси́. Песнь 3 Ирмос: Ты еси́ утвержде́ние/ притека́ющих к Тебе́, Го́споди,/ Ты еси́ Свет омраче́нных,/ и пое́т Тя дух мой. Припев: Святи́и му́ченицы, моли́те Бо́га о на́с. Усты́ пропове́даша свяще́нными свои́ми Го́спода страда́льцы пред мучи́тели,/ стра́ждуще терпели́вно. Припев: Святи́и му́ченицы, моли́те Бо́га о на́с. На у́ды ссещи́ся за Христа́ я́ве преда́шася страда́льцы,/ стра́стию разжже́нием Того́ возлюби́вше. Сла́ва Отцу́ и Сы́ну и Свято́му Ду́ху. Разреши́ша соу́з суеты́ свя́заннии за Христа́,/ и́же с Боже́ственным бы́вше Тере́нтием. И ны́не и при́сно и во ве́ки веко́в. Ами́нь. Богородичен: Спаси́ мя, ро́ждшая Преблага́го Го́спода Ма́ти Чи́стая,/ утиши́ души́ моея́ многомяте́жную бу́рю. Седален, глас 4 Четы́редесять Христо́вы страстоте́рпцы,/ си́лою Христо́вою вооруже́ни,/ бесо́вския полки́ низложи́вше ве́рою,/ уме́рше же, к безсме́ртному концу́, ра́дующеся, преидо́ша/ и нам испроша́ют прегреше́ний оставле́ние,/ при́сно творя́щим тех торжество́. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Грехолюби́в сый, молю́ Тя, Безгре́шнаго Бо́га ро́ждшую,/ взе́млющаго грехи́ ми́ра, Пречи́стая,/ многогре́шную ду́шу мою́ уще́дрити и грехи́ моя́ мно́гия очи́стити:/ гре́шным бо Ты еси́ очище́ние,/ и спасе́ние ве́рных, и заступле́ние. Песнь 4 Ирмос: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́. Припев: Святи́и му́ченицы, моли́те Бо́га о на́с. Украси́стеся, му́ченицы, вдая́нием боле́зней,/ сия́юще па́че сапфи́ра и зла́та тве́рдых подвиго́в показа́ньми. Припев: Святи́и му́ченицы, моли́те Бо́га о на́с. Живоно́сное де́йство от Живонача́льныя Тро́ицы прие́мше,/ вся́ку боле́знь, вся́ку ме́ртвость душ и теле́с отго́ните. Сла́ва Отцу́ и Сы́ну и Свято́му Ду́ху. Не отве́ржемся Го́спода/ и де́моном безу́мным не пожре́м, – Богому́дрии вопия́ху,/ истязу́еми боле́зньми и му́ками. И ны́не и при́сно и во ве́ки веко́в. Ами́нь. Богородичен: Тя, Всенепоро́чная Влады́чице,/ напа́стьми обстои́м, на по́мощь призыва́ю:/ ускори́ и спаси́ мя, Я́же Спа́са Сло́ва ро́ждшая. Песнь 5 Ирмос: У́тренююще вопие́м Ти,/ Го́споди: спаси́ ны,/ Ты бо еси́ Бог наш,/ ра́зве Тебе́, ино́го не ве́мы. Припев: Святи́и му́ченицы, моли́те Бо́га о на́с. Низложи́сте пре́лести тве́рдость, страстоте́рпцы,/ растерза́ньми терпе́ния, всехва́льнии. Припев: Святи́и му́ченицы, моли́те Бо́га о на́с. Крове́й тече́ньми изсуши́вше пре́лести глубину́, блаже́ннии,/ вся́ку ду́шу напои́сте. Сла́ва Отцу́ и Сы́ну и Свято́му Ду́ху. Па́жить многоцве́тна показа́стеся,/ благово́ние Свята́го Ду́ха, Боже́ственнии, испуща́юще, му́ченицы. И ны́не и при́сно и во ве́ки веко́в. Ами́нь. Богородичен: Избавля́я, яви́ся, Пречи́стая, Сын Твой, род челове́ческий,/ из Тебе́ ро́ждься Человеколю́бец. Песнь 6 Ирмос: Моли́тву пролию́ ко Го́споду/ и Тому́ возвещу́ печа́ли моя́,/ я́ко зол душа́ моя́ испо́лнися/ и живо́т мой а́ду прибли́жися,/ и молю́ся, я́ко Ио́на:/ от тли, Бо́же, возведи́ мя. Припев: Святи́и му́ченицы, моли́те Бо́га о на́с. Кре́постию Твое́ю, Иису́се, утвержде́ни, низложи́ша вра́жию си́лу/ и си́льни яви́шася вои́стинну, не́мощию плотско́ю бра́вшеся и пове́ргше кре́пкаго, честни́и и добропобе́днии му́ченицы. Припев: Святи́и му́ченицы, моли́те Бо́га о на́с. Победи́в многообра́знаго зми́я,/ и сего́ нога́ми твои́ми сокруши́л еси́ я́ко вои́стинну главу́,/ победоно́сен на верх твой вене́ц прия́л еси́, Тере́нтие, му́чениче Христо́в,/ святы́х А́нгел соприча́стниче. Сла́ва Отцу́ и Сы́ну и Свято́му Ду́ху. Цельбы́ ра́ка му́ченик источа́ет, и стра́сти очища́ет,/ и душ омыва́ет скве́рну, и де́монов погружа́ет полки́,/ всех же благочести́вых сердца́ напая́ет благода́тию. И ны́не и при́сно и во ве́ки веко́в. Ами́нь. Богородичен: Присе́нну прозря́ше Тя го́ру проро́к Авваку́м, Богоро́дице,/ из нея́же Бог па́че сло́ва про́йде, воплоща́емь,/ и мир спасе́, бу́рею лю́таго греха́ тя́жко одержи́мый. Кондак, глас 2 Му́ченическая честна́я па́мять прии́де днесь,/ веселя́щи вся́ческая,/ Тере́нтия прему́драго и дружи́ны его́./ Те́мже у́бо стеце́мся, да прии́мем исцеле́ния,/ си́и бо благода́ть от Бо́га прия́ша Ду́ха Свята́го/ исцеля́ти неду́ги душ на́ших. Песнь 7 Ирмос: О́троцы евре́йстии в пещи́/ попра́ша пла́мень дерзнове́нно/ и на ро́су огнь преложи́ша, вопию́ще:/ благослове́н еси́, Го́споди Бо́же, во ве́ки. Припев: Святи́и му́ченицы, моли́те Бо́га о на́с. У́ши, благопослушли́вы к Боже́ственному исполне́нию,/ Боже́ственная повеле́ния стяжа́вше, му́дрии, поя́сте преусе́рдно:/ благослове́н еси́, Го́споди Бо́же, во ве́ки. Припев: Святи́и му́ченицы, моли́те Бо́га о на́с. Зако́ны, Боже́ственныя страстоте́рпцы, противоположи́сте повеле́нием беззако́нных,/ веля́щих Христа́ отврещи́ся,/ Ему́же вопие́м:/ благослове́н еси́, Го́споди Бо́же, во ве́ки. Сла́ва Отцу́ и Сы́ну и Свято́му Ду́ху. Удеса́ ка́знем отда́вше, отверго́стеся те́ла/ любве́ ра́ди я́вльшагося на земли́ и плоть взе́мша,/ Ему́же песнопое́те, му́ченицы:/ Бо́же, благослове́н еси́. И ны́не и при́сно и во ве́ки веко́в. Ами́нь. Богородичен: Истле́вшия дре́вле родонача́льники преступле́нием безме́стнаго согреше́ния,/ во утро́бе Христа́ неизрече́нно заче́нши,/ исправля́еши, Пренепоро́чная, Плодо́м чре́ва Твоего́. Песнь 8 Ирмос: Седмери́цею пещь/ халде́йский мучи́тель/ Богочести́вым неи́стовно разжже́,/ си́лою же лу́чшею спасе́ны, сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки. Припев: Святи́и му́ченицы, моли́те Бо́га о на́с. На суди́щи мучи́тельстем, Богому́дрый Тере́нтий и Африка́н,/ Макси́м же и Помпии́й,/ Алекса́ндр, и Зифо́н, и сла́вный Фео́дор,/ вку́пе трегу́бицею спострада́вшая десяти́ца и трегу́бица еди́ницы,/ Спа́са всех Христа́ испове́давше, до́блественно пострада́ша. Припев: Святи́и му́ченицы, моли́те Бо́га о на́с. За Христа́ му́чими, и волу́ями жи́лами бие́ми,/ и неми́лостивно страда́льцы стру́жеми,/ трезу́бцы сре́чеми, и звере́м поверга́еми,/ и разжже́нными рожны́ в ре́бра опаля́еми, вопия́ху:/ свяще́нницы, благослови́те, лю́дие, превозноси́те Его́ во ве́ки. Сла́ва Отцу́ и Сы́ну и Свято́му Ду́ху. Глаго́л жи́зни нося́ще,/ добропобе́днии му́ченицы умерщвле́нныя в пре́лести спасо́ша, враги́ умори́ша/ и, Христо́ву смерть и светоза́рныя изобража́юще стра́сти,/ му́ками многообра́зными блаже́нную кончи́ну прия́ша,/ пою́ще Его́ во вся ве́ки. И ны́не и при́сно и во ве́ки веко́в. Ами́нь. Богородичен: Умерщвле́нную оживи́, па́дшую возста́ви,/ уя́звенную ду́шу мою́ исцели́/ копие́м, Всенепоро́чная, пробо́дшим Боже́ственная ре́бра/ из утро́бы Твоея́ вопло́щшагося Спа́са,/ Его́же о́т роды благословя́т, свяще́нницы пою́т,/ лю́дие превозно́сят во вся ве́ки. Песнь 9 Ирмос: Устраши́ся всяк слух/ неизрече́нна Бо́жия снизхожде́ния,/ я́ко Вы́шний во́лею сни́де да́же и до пло́ти,/ от Деви́ческаго чре́ва быв Челове́к:/ те́мже Пречи́стую Богоро́дицу, ве́рнии, велича́ем. Припев: Святи́и му́ченицы, моли́те Бо́га о на́с. Целе́ние точи́т ра́ка му́ченик,/ от исто́чника Боже́ственнаго Ду́ха напая́ема при́сно./ Преусе́рдно, прииди́те, почерпе́м, те́ло, се́рдце и ду́шу освяща́юще/ и Спа́са Христа́ велича́юще ве́рно, мучениколю́бцы. Припев: Святи́и му́ченицы, моли́те Бо́га о на́с. Я́ко цве́ти Боже́ственнаго села́,/ я́коже шипцы́ та́йнии, процвето́сте/ и благово́ния честна́го Це́рковь напо́лнисте,/ пре́лесть злосмра́дную вра́жию дале́че отгна́вше/ Боже́ственною благода́тию, му́ченицы Христо́вы четы́редесяте. Припев: Святи́и му́ченицы, моли́те Бо́га о на́с. Днесь Макси́ма, ве́рнии,/ и Алекса́ндра вку́пе, и Фео́дора,/ Зифо́на и Помпии́я,/ Африка́на же и Тере́нтия/ с про́чими страда́льцы ве́рно восхва́лим и ублажи́м,/ воспева́юще тех по́двиги. Сла́ва Отцу́ и Сы́ну и Свято́му Ду́ху. Земля́ у́бо кровь ва́шу и телеса́ пострада́вшая в себе́ прия́т,/ Не́бо же – Боже́ственныя ду́хи,/ А́нгельская во́инства, че́стно собра́вшеся в побе́де, му́дрии,/ и Христо́с я́ко победи́тели венча́. И ны́не и при́сно и во ве́ки веко́в. Ами́нь. Богородичен: Просвети́, две́ре све́та, ду́шу мою́,/ лю́тыми помраче́нную преступле́ньми,/ омраче́нную и бе́дствующую,/ и дне прича́стника Боже́ственнаго покажи́,/ я́ко да сла́влю Тя, Предста́тельницу ве́рных непосты́дную.

Глас 6 Песнь 1 Ирмос: Жезло́м проро́ка разсече́ся/ дре́вле мо́ре Чермно́е,/ прехожде́ние волн разделя́я та́инственно/ в поги́бель во́инству мучи́телеву, ве́рным же во спасе́ние,/ песнь богокра́сную воспева́ющим:// сла́вно просла́вися Христо́с Бог наш. Припев: Святи́и отцы́ на́ши, моли́те Бо́га о нас. Мгло́ю безбо́жия помрачи́ся Русь Правосла́вная, отступи́ша бо мно́зи от ве́ры оте́ческия и отпадо́ша Небе́снаго Ца́рствия. Оба́че Госпо́дь украси́ Це́рковь на́шу, и́менем Патриа́рха Ти́хона нарица́емую, со́нмом му́чеников и испове́дников Свои́х. Припев: Святи́и отцы́ на́ши, моли́те Бо́га о нас. Смотре́ние Бо́жие утаи́ся от люде́й, умо́м помраче́нных, ю́зником ца́рственным руга́ющихся; егда́ же слух убие́ния царе́ва ве́рных дости́же, Патриа́рх со отцы́ Свяще́ннаго Собо́ра моли́тву сотвори́ша, со дерзнове́нием злоде́йство облича́юще. Припев: Святи́и отцы́ на́ши, моли́те Бо́га о нас. О святи́телю Влади́мире, пра́ведный и тве́рдый душе́ю, ве́рный сы́не Це́ркве Ру́сския! Убие́ние твое́ у стен оби́тели Киево-Пече́рския положи́ нача́ло поминове́ния собо́рнаго но́вых му́ченик. Ны́не же, Престо́лу Бо́жию предстоя́, моли́ся Го́сподеви спасти́ и просвети́ти ду́ши на́ша. Припев: Святи́и отцы́ на́ши, моли́те Бо́га о нас. Святи́тель Пе́рмский Андрони́к да почти́тся, ве́ры Христо́вы свети́льник горя́й, самоде́ржцу отве́рженну сострада́лец ве́рный, па́ствы своея́ учи́тель усе́рдный, му́ченик, еще́ жив сый, в земли́ погребе́нный, и, я́ко зе́рно пшени́чное, плод стори́цею принесы́й. Припев: Святи́и отцы́ на́ши, моли́те Бо́га о нас. Заключе́ние темни́чное Андрони́ково слы́шавше, мучениколю́бцы святи́тель Васи́лий Черни́говский, и Матфе́й, пе́рмских па́стырей воспита́тель, и Алекси́й, ве́ры Христо́вы побо́рник, повеле́ние собо́рное потща́шася испо́лнити об изъявле́нии убие́ния священному́ченика Пе́рмскаго. Последи́ же за ве́рность и любо́вь к собра́ту своему́ му́ченических венце́в сподо́бишася. Припев: Святи́и отцы́ на́ши, моли́те Бо́га о нас. Святи́телю Христо́в Гермоге́не, гра́да Сара́това в ве́ре утвержде́ние, тобо́льския па́ствы му́дрый наста́вниче, безбо́жных преда́телей же и крамо́льников обличи́телю. Ты, ца́рственныя ю́зники кресто́м на страда́ния проро́чески благослови́в, сам смерть му́ченическую чрез утопле́ние прия́л еси́. Сла́ва Отцу́ и Сы́ну и Свято́му Ду́ху: Варлаа́ме пречу́дне, и́ноков похвало́ и благочи́ния церко́внаго ревни́телю! Ты я́ко Афо́н други́й Бе́лую го́ру показа́л еси́, и преде́лы Ура́льския по́двиги твои́ми благода́тно освяти́л еси́. Му́ченический же вене́ц прие́м, ны́не моли́твами твои́ми оби́тель твою́ укрепля́еши. И ны́не и при́сно и во ве́ки веко́в. Ами́нь. Богородичен: Я́ко апо́столов иногда́, успе́ние Твое́ чад Це́ркве Ру́сския собра́, Введе́ние же Твое́ богоизбра́ннаго Патриа́рха во храм Госпо́день введе́, от всех воспева́емая, Преблага́я Ма́ти Бо́га на́шего. Песнь 3 Ирмос: На тве́рдем ве́ры Твоея́ ка́мени/ помышле́ние утверди́в души́ моея́, утверди́, Го́споди:/ Тя бо и́мам, Бла́же,// прибе́жище и утвержде́ние. Припев: Святи́и отцы́ на́ши, моли́те Бо́га о нас. Благоче́стие на Руси́ погуби́ти возжеле́вше, сло́ву гро́зному Патриа́рха гони́телие не внима́ху и но́вых му́ченик кровь пролива́ху, оба́че сия́ яви́ся Це́ркве Ру́сския утвержде́ние. Припев: Святи́и отцы́ на́ши, моли́те Бо́га о нас. Да почти́м, ве́рнии, святи́теля Ти́хона, печа́льника гони́мых и па́ствы ру́сския утвержде́ние, и́же, власти́тели злы́я облича́я и поги́бель тем предрека́я, за стра́ждущих и во у́зах су́щих небоя́зненно предста́тельствует. Припев: Святи́и отцы́ на́ши, моли́те Бо́га о нас. Тща́ние и благонра́вие твое́ в де́лех церко́вных уве́дев, священному́чениче сла́вне Лавре́нтие, архиере́я тя святи́тель Ти́хон поставля́ет, оба́че же без ми́лости гони́ма тебе́ ви́дя, судия́м непра́ведным возопи́: за ку́ю вину́ чи́стаго на смерть осуди́сте? Припев: Святи́и отцы́ на́ши, моли́те Бо́га о нас. Христо́ви свиде́телие и пропове́дницы святи́телие Ефре́м со Никола́ем, му́ки прие́мше, ра́дуются ны́не на Небеси́, с ни́миже и ты́сящи ве́рных сликовству́ют, я́ко не убоя́шася заступи́ти отцы́ своя́ пред гони́тели. Припев: Святи́и отцы́ на́ши, моли́те Бо́га о нас. Му́жество и кре́пость почти́м, бра́тие, святи́телей Митрофа́на Астраха́нскаго и Плато́на Ре́вельскаго, и́же лю́тых страда́ний не уклони́шася, но муче́ние и убие́ние му́жественно претерпе́ша. Припев: Святи́и отцы́ на́ши, моли́те Бо́га о нас. Прича́стницы Страсте́й Христо́вых яви́стеся, святи́и Ти́хоне Воро́нежский и Сильве́стре О́мский, я́ко даде́ся вам благода́ть, не то́чию во Христа́ ве́ровати, но и по Нем страда́ти. Сла́ва Отцу́ и Сы́ну и Свято́му Ду́ху: О священному́чениче Си́моне, благоле́пия дре́вняго ревни́телю, единове́рия дру́же и еди́нства Це́ркве Ру́сския побо́рниче! Дерзнове́нною твое́ю моли́твою, я́ко друг Христо́в, ра́ны церко́вныя уврачу́й. И ны́не и при́сно и во ве́ки веко́в. Ами́нь. Богородичен: Братоуби́йство крова́вое слы́шавше, не́цыи, я́ко безу́мнии, реко́ша: несть Бог. Оба́че попече́нием Христа́ Жизнода́вца и моли́твами Ма́тере Его́ Пресвяты́я врата́ а́дова Це́рковь Ру́сскую не одоле́ша. Седа́лен, глас 2: Но́вии страстоте́рпцы Це́ркве Ру́сския,/ му́ченически по́прище земно́е сконча́вшии и страда́ньми дерзнове́ние ко Го́споду приобре́тшии,/ моли́теся Ему́, вас укре́пльшему,/ да и мы, егда́ на́йдет на ны испыта́ния час,/ му́жества дар Бо́жий восприи́мем. Сла́ва, и ны́не, Богоро́дичен, глас 4: Не премолчи́м при́сно, Богоро́дице Де́во,/ благода́рственно воспева́ти от се́рдца Твоя́ ми́лости, Влады́чице, раби́ Твои́,/ вопию́ще и глаго́люще:/ Пресвята́я Де́во, предвари́, и изба́ви нас от враг ви́димых и неви́димых,/ и от ну́жды и вся́каго преще́ния,/ Ты бо еси́ на́ше заступле́ние. Песнь 4 Ирмос: Удиви́ся Твой ра́зум от мене́,/ услы́шавшу пресла́вная вели́чия смотре́ния Твоего́,/ укрепи́ся же возлюбле́нием Твоего́ схожде́ния:// Ты бо моея́ нищеты́ не отве́рглся еси́. Припев: Святи́и отцы́ на́ши, моли́те Бо́га о нас. О свя́те Патриа́рше наш Ти́хоне! Ка́ко досто́йно ублажи́м ве́рность тебе́ сохра́ньших, егда́ лжепа́стырие, гони́тельми науща́емии, я́ко власти́телие зако́ннии в Це́ркви, твоего́ отрече́ния иска́ху? Припев: Святи́и отцы́ на́ши, моли́те Бо́га о нас. Гла́ду бы́вшу во Оте́честве на́шем, от братоуби́йства погиба́ющем, па́стыри увещава́л еси́, святи́телю Ти́хоне, Го́спода умоля́ти, да омы́ется земля́ Ру́сская слеза́ми покая́ния и Святы́ми Та́йнами да обнови́тся. Припев: Святи́и отцы́ на́ши, моли́те Бо́га о нас. У́зы и суди́ще, заплева́ние и клеветы́, преда́тельство и суде́й лука́вых сме́ртное изрече́ние претерпе́в, о Це́ркви и па́стве боле́зновал еси́, святи́телю Петрогра́дский Вениами́не, му́ченики возлюби́вый изде́тска. С ни́миже ны́не Бо́га прославля́еши. Припев: Святи́и отцы́ на́ши, моли́те Бо́га о нас. Мона́шество и свяще́нство в час испыта́ния Це́ркве Ру́сския прия́ти не убоя́вся, о́тче богому́дре Се́ргие, священному́ченика Вениами́на сподви́жник ве́рный яви́лся еси́. С ни́мже и осужде́ние непра́ведное и смерть му́ченическую претерпе́л еси́. Припев: Святи́и отцы́ на́ши, моли́те Бо́га о нас. Похвало́ Солове́цкая, священному́чениче Иларио́не, Це́ркве Ру́сския свети́льниче, Патриа́рха Ти́хона ве́рный спобо́рниче, крамолы́ лжеобнови́телей ре́вностный обличи́телю, исцели́ и ны́не ра́ны церко́вныя. Припев: Святи́и отцы́ на́ши, моли́те Бо́га о нас. Преподо́бне о́тче Алекси́е, наста́вников духо́вных насле́дниче, уче́ний святооте́ческих сокро́вищнице и мно́гих му́ченик воспита́телю! Не преста́й Зоси́мову пу́стынь храни́ти и мона́шество правосла́вное в по́двизех духо́вных утвержда́ти. Сла́ва Отцу́ и Сы́ну и Свято́му Ду́ху: Не солга́ся проро́чество преподо́бнаго Амвро́сия, ста́рца оби́тели О́птинския: прее́мник бо его́ Исаа́кий разоре́ния тоя́ самови́дец быва́ет и, крест свой му́жественне прие́м, в годи́ну лю́тую сме́рти за Христа́ сподобля́ется. И ны́не и при́сно и во ве́ки веко́в. Ами́нь. Богородичен: Кня́зю ми́ра, порабо́тити Це́рковь тща́щуся, да́же до уз и сме́рти противоста́ша отцы́ святи́и и все упова́ние свое́ по Бо́зе на Де́ву Пречи́стую возложи́ша. Пе́снь 5 Ирмос: Свет и мир Твой, Христе́,/ рабо́м Твои́м пода́ждь, Бла́же:/ Ты бо еси́ всех мир,/ и сою́з любве́, Человеколю́бче,/ Тя позна́вшим у́тро све́тлое,// и Влады́ку вои́стину, и Го́спода. Припев: Святи́и отцы́ на́ши, моли́те Бо́га о нас. Собо́рное веле́ние исполня́я, святы́й Патриа́рх прее́мники себе́ указу́ет, в та́йне завеща́ние храня́ да́же до вре́мене преставле́ния своего́, и сим показу́ет лжесобо́ров бе́гати, созыва́емых веле́нием вла́сти безбо́жныя. Припев: Святи́и отцы́ на́ши, моли́те Бо́га о нас. Умира́ние тя́жкое за Це́рковь Ру́сскую на всяк день претерпева́л еси́, Патриа́рше Ти́хоне, мно́гажды от безбо́жных искуша́емь, но чист от греха́ яви́лся еси́, па́ству от волко́в соблюды́й непоро́чно. Припев: Святи́и отцы́ на́ши, моли́те Бо́га о нас. Пра́ведно и благоче́стно жити́е твое́ бысть, святи́телю Кири́лле. А́ще и во изгна́нии мно́гая ле́та пребы́л еси́, оба́че собра́тий твои́х утверди́л еси́ на ка́мени ве́ры Христо́вы, смерть же твоя́ в земли́ пусты́нней му́ченичество за ве́ру правосла́вную яви́ся. Припев: Святи́и отцы́ на́ши, моли́те Бо́га о нас. Ле́стию и нече́стием тща́щимся премени́ти ве́ру святу́ю оте́ческую противуста́л еси́ небоя́зненно, свя́те Агафа́нгеле, сего́ ра́ди изгна́н был еси́, да уве́дят ве́рнии, я́ко вре́мя приспе́ за пра́вду Христо́ву страда́ти. Припев: Святи́и отцы́ на́ши, моли́те Бо́га о нас. О кре́посте несокруши́мая, святи́телю о́тче Пе́тре! Страда́нием бо лю́тым Це́рковь Ру́сскую от раско́ла храни́л еси́, я́ко ве́рный до сме́рти Патриа́рха Ти́хона послу́шник, не вне́мля глаго́лом мучи́телевым зову́щим, е́же сни́ти со креста́. Припев: Святи́и отцы́ на́ши, моли́те Бо́га о нас. О вели́кая оби́теле Солове́цкая, коли́ко новому́ченик в стена́х твои́х по́двиг понесо́ша и страда́ния прия́ша! От ни́хже святы́х отце́в Собо́ра ны́не восхва́лим: после́дняго настоя́теля Вениами́на, в пустынножи́тельстве от злоде́ев убие́ннаго, архиере́и Евге́ния и Васи́лия, еще́ же Михаи́ла пресви́тера и ины́я, и в богосло́вцех изря́дна, сим спострада́вша, му́ченика Иоа́нна. Сла́ва Отцу́ и Сы́ну и Свято́му Ду́ху: Колькра́ты беззако́ннии иска́ху уби́ти тя, святи́телю Иоа́нне, чистоты́ Правосла́вия ревни́теля, раско́ла ху́льнаго пе́нзенскаго обличи́теля, земли́ Латви́йския те́плаго моли́твенника, в не́йже му́ченичества венце́м украси́лся еси́. И ны́не и при́сно и во ве́ки веко́в. Ами́нь. Богородичен: Слу́жбу Бо́жию в ме́стех потае́нных и́же за ве́ру страда́льцы соверша́юще, о́браз Твой, на дщи́цах и ка́менех ма́лых пи́санный и на холсте́х истка́нный, о Богома́ти, я́ко зе́ницу о́ка храня́ху и благогове́йне Тя почита́ху. Песнь 6 Ирмос: Зве́рю бе́здны предае́тся/ проро́к Ио́на, глубине́ морско́й,/ прообразу́я Твое́, Сло́ве, тридне́вное воста́ние,/ тем и взыва́ше:/ из глубины́ преиспо́дния// возведи́ живот мой, Благоутро́бне. Припев: Святи́и отцы́ на́ши, моли́те Бо́га о нас. В ле́то три́десять седьмо́е ве́ка го́рькаго ве́лие губи́тельство на Руси́ бысть, и о́ви лю́дие наси́льством умро́ша, о́ви же в го́рьких рабо́тах погибо́ша. Те́мже, ве́рнии, моли́твенно просла́вим та́ко уму́ченныя сподви́жники святи́теля Ти́хона Патриа́рха. Припев: Святи́и отцы́ на́ши, моли́те Бо́га о нас. Дре́вле в ко́емждо гра́де Руси́ едва́ еди́н мучи́тель обрета́шеся. Ка́ко же в ле́та гоне́ния безбо́жнаго толи́ка тьма душегу́бцев во́льных воста́? Ка́ко сы́нове а́довы сме́рти преда́ти святы́я во́ины Христо́вы не устраши́шася? Припев: Святи́и отцы́ на́ши, моли́те Бо́га о нас. В земли́ Зыря́нстей, во гра́де скорбе́й зе́льных, го́рьких рабо́т, гла́да и уничиже́ния, мно́гия му́ки претерпе́л еси́, священному́чениче Анато́лие, архиере́ю Оде́сский, о ни́хже по́слежде самови́дцы с пла́чем пове́даша, ве́рность твою́ Ева́нгелию свиде́тельствующе. Припев: Святи́и отцы́ на́ши, моли́те Бо́га о нас. Сама́рския преде́лы, в ни́хже до́бльственно потруди́лся еси́, ны́не с на́ми сла́вят мно́гая страда́ния твоя́, архипа́стырю Алекса́ндре, засту́пниче и прибе́жище гони́мых, я́ко Христа́ ра́ди и смерть прия́л еси́ за дру́ги своя́. Припев: Святи́и отцы́ на́ши, моли́те Бо́га о нас. Житие́м и словесы́ Христа́ пропове́дал еси́, Серафи́ме священному́чениче преди́вный, в преде́лех Хо́лмских, Орло́вских и Смоле́нских му́дростию и любо́вию па́ству уча́ и от собла́зн огражда́я. Те́мже вене́ц тебе́ терно́вен исплете́ся. Припев: Святи́и отцы́ на́ши, моли́те Бо́га о нас. Градо́в Росси́и Вели́кия и Ма́лыя пропове́дницы, Патриа́рха же Ти́хона сы́нове ве́рнии, святи́телие Никоди́м и Проко́пий досто́йно да почту́тся, и́же по́двиг служе́ния архиере́йскаго, сугу́бейший по́двига, всем ве́рным о́бщаго, му́ченичеством увенча́ша, я́ко богому́дрии. Сла́ва Отцу́ и Сы́ну и Свято́му Ду́ху: Священноиспове́дника пресви́тера Василия почти́м, во изгна́нии в преде́лех Арха́нгельских живо́т сконча́вша, свяще́нники же Госпо́дни просла́вим, Илию́, сострада́льца Фадде́ю, Тверско́му архипа́стырю, Константи́на же, Во́логды моли́твенника, убие́нныя в годи́ну, крове́й испо́лнену. И ны́не и при́сно и во ве́ки веко́в. Ами́нь. Богородичен: Законопресту́пен и сме́рти пови́нен, реко́ша на Сы́на Твоего́ челове́цы нечести́вии, Ему́же сострада́ла еси́, Богороди́тельнице Пречи́стая, та́кожде и оклевета́нныя служи́тели Его́, я́ко Ма́ти Благоутро́бная, утеша́ла еси́. Конда́к, глас 3: Гоне́ния и страда́ния да́же до сме́рти претерпева́юще/ и правосла́внаго ца́рства Ру́сскаго разоре́ние облича́юще,/ отцы́ Собо́ра Це́ркве на́шея/ к покая́нию ча́да ве́рная призыва́ют// и стоя́ти тве́рдо за ве́ру Христо́ву благословля́ют. Ин конда́к, свято́му Патриа́рху Ти́хону, глас 5: Служе́ние твое́ испо́лнено сто́на и го́ря,/ священному́чениче Ти́хоне, Патриа́рше наш,/ но был еси́ пра́вило ве́ры и о́браз кро́тости,/ побежда́я ра́спри и разделе́ния;/ си́лою смире́ния и любве́ Христо́вы противоста́л еси́ зло́бе сатани́нстей,/ возгла́вил еси́ до́брое во́инство но́вых му́чеников,// Це́рковь Ру́сскую утверди́вших во ве́ки. И́кос: Хотя́й Госпо́дь ве́рныя подви́гнути к прославле́нию по́двига святы́х новому́чеников и испове́дников Це́ркве Ру́сския, дом Бо́жий, святи́телем Влади́миром созда́нный и от безбо́жных в годи́ну лю́тых гоне́ний пору́ганный, благоле́пно па́ки возставля́ет, подвиза́я в нем ико́ну святы́х отце́в Свяще́ннаго Собо́ра изобрази́ти, я́ко да ли́ки их ви́дяще, поуча́ются в по́вестех дея́ний сла́вных и страда́ний безме́рных всех, свято́му Патриа́рху Ти́хону после́дующих и и́менем того́ в годи́ну гоне́ний нарица́емых. И́хже по́двигом мир в Це́ркви на́шей утверди́ся. Песнь 7 Ирмос: О́троцы в Вавило́не дре́вле/ во огни́ не опали́шася,/ на му́ки бо дерзну́вше за ве́ру оте́ческую,/ в о́ней непоколе́блеми пребы́ша,/ и зре́ти Го́спода и пе́ти Тому́ сподо́бишася:// Изба́вителю Бо́же, благослове́н еси́. Припев: Святи́и отцы́ на́ши, моли́те Бо́га о нас. На ме́сте, иде́же ны́не храм новому́чеников Бу́товских устро́ися, три́десять ты́сящ ю́зник в ле́та зла́я убие́ни бы́ша, и́же, на смерть за Христа́ ведо́ми, ве́рою взыва́ху: Бо́же, благослове́н еси́. Припев: Святи́и отцы́ на́ши, моли́те Бо́га о нас. Списа́теля жития́ Саро́вскаго чудотво́рца священному́ченика Серафи́ма днесь восхва́лим, и́же, в боле́зни сый и ста́рости масти́тей, вскрай ро́ва Бу́товскаго мучи́тели приво́дится и убие́ние неви́нно прие́млет, воспева́я: Изба́вителю Бо́же, благослове́н еси́. Припев: Святи́и отцы́ на́ши, моли́те Бо́га о нас. Ве́рность храня́ святи́телю Петру́, в скита́нии нево́льнем су́щему, страда́ния мно́гая претерпе́л еси́, архипа́стырю гра́да Влади́мира, свя́те Нико́лае, те́мже и виде́ние ли́ка твоего́ ве́рным бысть утвержде́ние. Ты же, смерть за Христа́ до́блественне прия́ти угото́вився, взыва́л еси́: Бо́же, благослове́н еси́. Припев: Святи́и отцы́ на́ши, моли́те Бо́га о нас. Днесь почти́тся и пресви́тер Се́ргий, слу́жбы Бо́жия усе́рдный рачи́тель, на путь свяще́нства Патриа́рхом Ти́хоном благословле́нный, и́же, красото́ю слове́с церко́вных окриля́емь, посреде́ гоне́ния лю́таго до́бре ше́ствова и, му́ченичества дости́гнув, благода́рственно Христу́ воззва́: Изба́вителю Бо́же, благослове́н еси́. Припев: Святи́и отцы́ на́ши, моли́те Бо́га о нас. В прему́дрости кни́жней ум изостри́в, некни́жному ученику́ Петру́, верхо́вному апо́столу, подража́ти потща́лся еси́, Иоа́нне, служи́телю престо́ла Бо́жия, глас же ева́нгельский, е́же отве́ргнутися себе́ и взя́ти крест свой, услы́шав, со дерзнове́нием на по́двиг му́ченический устреми́лся еси́, зовы́й: Христе́, Спа́се ми́ра, благослове́н еси́. Припев: Святи́и отцы́ на́ши, моли́те Бо́га о нас. Се́ргия преподо́бнаго от ю́ности послу́шник изря́ден был еси́, а́вво Крони́де богому́дре! Ты бо, попече́ние усе́рдное о оби́тели Тро́ицтей, я́ко игу́мен, явля́я, о и́ноцех ея́ во благоде́нствии и злоде́нствии ру́це моли́твенно воздвиза́л еси́, с ни́миже ны́не во Ца́рствии Бо́жии взыва́еши: О́тче, Сы́не и Святы́й Ду́ше, благослове́н еси́. Сла́ва Отцу́ и Сы́ну и Свято́му Ду́ху: Во Аме́рице да́льней и в первопресто́льнем гра́де Москве́ святи́телю Ти́хону помо́щника ве́рнаго, Алекса́ндра пресви́тера почти́м, близ гро́ба патриа́ршаго к му́ченичестей кончи́не при́званнаго, свинце́м устреле́ннаго и огне́м сожже́ннаго, ны́не же пою́щаго: Бо́же, благослове́н еси́. И ны́не и при́сно и во ве́ки веко́в. Ами́нь. Богородичен: О Ма́ти Бо́жия, Преми́лостивая! Кто бы возмо́гл есть из люде́й ве́рных у́зы, бие́ния, уничиже́ния и лю́тую смерть претерпе́ти, а́ще бы не Ты предстоя́ла еси́ стра́ждущим, ско́рби и страда́ния му́ченическая утоля́ющи и науча́ющи пе́ти: Спаси́телю, Христе́ Бо́же, благослове́н еси́. Песнь 8 Ирмос: Преподо́бнии Твои́ о́троцы/ в пещи́ Херуви́мы подража́ху,/ Трисвяту́ю песнь воспева́юще:/ благослови́те, по́йте// и превозноси́те во вся ве́ки. Припев: Святи́и отцы́ на́ши, моли́те Бо́га о нас. Ве́лия страда́ния претерпе́ли есте́, Оте́чества на́шего церко́внии избра́нницы, вы бо вои́стину яви́лися есте́ я́ко соль земли́ Ру́сския и утвержде́ние ве́ры правосла́вныя в ней во ве́ки. Припев: Святи́и отцы́ на́ши, моли́те Бо́га о нас. Се́рдце твое́, о Русь Свята́я, про́йде ору́жие во́ев герма́нских, твоя́ преде́лы плени́ти восхоте́вших, оба́че сы́нове твои́, жизнь за тебе́ положи́вшии, вку́пе со страда́льцы, во у́зах уму́ченными, Христу́ песнь но́ву воспева́ют во ве́ки. Припев: Святи́и отцы́ на́ши, моли́те Бо́га о нас. Исчи́слил еси́ дни страда́ний и сострада́льцев имена́, суды́ Бо́жия благослови́в, святи́телю Афана́сие, зане́, во у́зах сый, святы́х ру́сских иску́сный песносло́вец яви́лся еси́, о новому́ченицех же почи́вших моли́твенник усе́рдный, с ни́ми Бо́га сла́виши во вся ве́ки. Припев: Святи́и отцы́ на́ши, моли́те Бо́га о нас. Юне́йший от отце́в Собо́ра Це́ркве Ру́сския в пещи́ гоне́ний искуша́емь быва́ет и я́ко исто́чник богому́дрых уче́ний в земли́ Влади́мирстей явля́ется, священноиспове́дник Великодво́рский Петр, любве́ Христо́вы испо́лненный, я́же не изся́кнет во ве́ки. Припев: Святи́и отцы́ на́ши, моли́те Бо́га о нас. Вся по и́мени помяну́вше отцы́ святы́я, в ли́це новому́ченик просла́вленныя, и о про́чих моли́твы вознесе́м ко Го́споду, и́хже жития́ и по́двизи безве́стни суть, да ми́лость улуча́т от Бо́га, созда́вшаго ве́ки. Сла́ва Отцу́ и Сы́ну и Свято́му Ду́ху: Мо́щи твоя́ огне́м откры́шася, святи́телю о́тче Ти́хоне, Патриа́рше святы́й, оба́че обря́щем ли мо́щи мно́гих сподви́жник твои́х, в ме́стех безве́стных и непрохо́дных погребе́нных, и́хже па́мять нетле́нна во ве́ки? И ны́не и при́сно и во ве́ки веко́в. Ами́нь. Богородичен: И́мже пе́ние надгро́бное никто́же принесе́, Сама́ предста́ла еси́, Чи́стая, с ли́ки а́нгельскими; и́мже беззако́нное мучи́тельство безве́стну кончи́ну угото́ва, Сама́ отве́рзла еси́, Препе́тая, ра́йския вхо́ды, да ца́рствуют со Христо́м во ве́ки. Песнь 9 Ирмос: Сло́вом Сло́во Еди́на Ро́ждшая,/ ерети́ческая уста́ загради́ злоре́чивая./ И́но но́во не́бо, некра́домый рай, Пречи́стая,// Тя велича́ем. Припев: Святи́и отцы́ на́ши, моли́те Бо́га о нас. В па́мять святи́теля Ти́хона Патриа́рха соше́дшеся, ве́рнии, и вся сподви́жники его́, и́же от Собо́ра святы́х отце́в, помяну́вше, на ме́сте, иде́же ти́и бя́ху со́брани, Христа́ велича́ем. Припев: Святи́и отцы́ на́ши, моли́те Бо́га о нас. Ерети́ческая злоре́чивая уста́ загради́вшии, святи́и отцы́ новому́ченицы, Собо́ров вселе́нских догма́ты в сердца́х ва́ших сохрани́ли есте́, те́мже вас велича́ем. Припев: Святи́и отцы́ на́ши, моли́те Бо́га о нас. Святы́я Руси́ собо́ри преста́ша иногда́, с патриа́ршеством упраздни́вшеся вку́пе, но глас собо́рный, я́ко крин, посреде́ ка́мене прозя́бший, в годи́ну бе́дствия возвести́ся. Припев: Святи́и отцы́ на́ши, моли́те Бо́га о нас. Уста́ми проро́к, Го́споди, Изра́иля наставля́я, лю́дем, проро́ки изби́вшим, царя́ поставля́еши; лю́дем же, правосла́внаго царя́ отве́ргшим, гоне́ния посыла́еши, да во́ли Твоея́ позна́ние покая́нием обря́щут. Припев: Святи́и отцы́ на́ши, моли́те Бо́га о нас. Це́ркве уста́вы собо́рне определи́вше, по́слежде же сию́ гони́му ви́девше, судьба́м Бо́жиим непостижи́мым удиви́стеся, о святи́и отцы́ новому́ченицы, по́двиги свои́ми Христа́ возвели́чившии. Припев: Святи́и отцы́ на́ши, моли́те Бо́га о нас. Нарекли́ есте́ прозорли́во, святи́и отцы́, страда́льцы за ве́ру Христо́ву новому́ченики и испове́дники Це́ркве Ру́сския и па́мять ежеле́тную сим уста́вили есте́. Ны́не же с ни́ми вку́пе велича́етеся. Сла́ва Отцу́ и Сы́ну и Свято́му Ду́ху: О́тче, Сы́не и Ду́ше Всесвяты́й, при́зри с Небесе́ на Це́рковь Ру́сскую, в пра́вой ве́ре сию́ соблюди́, да и мы, ча́да ея́, вои́стину Тя велича́ем. И ны́не и при́сно и во ве́ки веко́в. Ами́нь. Богородичен: Догма́ты храни́ти и за́поведи Христо́вы с любо́вию твори́ти наста́ви нас, Богоневе́сто Влады́чице, да и мы, ве́ру непоро́чно соблю́дше, в Ца́рствие Бо́жие вход улучи́ти возмо́жем. Свети́лен: Свет Отца́, и Сы́на, и Ду́ха Свята́го/ всели́ся в ду́шы ва́ша, о святи́и отцы́ Свяще́ннаго собо́ра, новому́ченицы и испове́дницы,/ сего́ ра́ди па́мять ва́шу со святи́телем Патриа́рхом Ти́хоном вку́пе прославля́ем. Сла́ва, и ны́не, Богородичен: Свет Христо́в яви́ся всем Тобо́ю, Ма́ти Де́во,/ всели́ся бо во утро́бу Твою́ Сло́во па́че сло́ва,/ сего́ ра́ди род наш пе́сньми немо́лчными Тя велича́ет. Моли́тва святы́м отце́м, на Собо́ре Це́ркве Ру́сския потруди́вшимся О святи́и уго́дницы Бо́жии, со́нма но́вых му́чеников и испове́дников Це́ркве Ру́сския прича́стницы, на Собо́ре Це́ркве Ру́сския в годи́ну ско́рби до́бре потруди́вшиися и му́жески за ве́ру Христо́ву в ле́та гоне́ния лю́таго пострада́вшии! Помина́юще труды́ на ни́ве Бо́жией, ва́ми подъя́тыя, и по́двиги во страда́нии за ве́ру сверше́нныя, славосло́вим доброде́тели ва́ша, воспева́ем братолю́бие, прославля́ем любо́вь ко Спаси́телю Христу́ и Це́ркви Его́ Святе́й, и, я́ко ча́да ва́ша по ду́ху, мо́лим: научи́те нас ра́зум ева́нгельский приле́жне стяжа́ти, на вся́кое де́ло благо́е потре́бен, помози́те во испыта́ниих кре́пость ве́ры име́ти, сподо́бите нас насле́дники по́двига ва́шего бы́ти, да неосужде́нно Ца́рствия Бо́жия дости́гнем, иде́же ку́пно с ва́ми просла́вим Тро́ицу Единосу́щную во ве́ки веко́в. Ами́нь.

Минея, 6 Мая, Ин канон Глас 6 Песнь 1 Ирмос: Чу́вственный фарао́н потопле́н бысть со всево́инством,/ Изра́иль же, проше́д посреде́ мо́ря, вопия́ше:/ Го́сподеви Бо́гу на́шему/ пои́м, я́ко просла́вися. Припев: Святи́телю, о́тче Са́вво, моли́ Бо́га о на́с. Земля́ лику́ет и не́бо с челове́ки ра́дуется боголе́пно/ в твой, му́дре, святы́й пра́здник,/ в о́ньже свяще́нное твое́ те́ло от гра́да Ты́рнова к твоему́ ста́ду дои́де,/ сла́вне святи́телю, Ду́ху честно́е жили́ще. Припев: Святи́телю, о́тче Са́вво, моли́ Бо́га о на́с. Распя́в плоть свою́ стра́хом Влады́чним,/ умертви́ся ми́рови, прему́дре святи́телю Са́вво,/ и ны́не преи́де ве́село к животу́ ве́чному, преблаже́нне. Сла́ва Отцу́ и Сы́ну и Свято́му Ду́ху. Мертв ми́рови бысть, Са́вво, Боже́ственным вселе́нием,/ и по святе́м преставле́нии и по погребе́нии твое́м в оте́чество твое́ пренесе́н бысть све́тло,/ его́же облагоуха́еши, чу́дне. И ны́не и при́сно и во ве́ки веко́в. Ами́нь. Богородичен: И́же Сый со Отце́м Соприсносу́щный Сын,/ напосле́док восхоте́в, всели́ся в ложесна́ Твоя́ на на́ше, Богоро́дице, ве́рных отрожде́ние:/ те́мже воспева́ем Тя. Песнь 3 Ирмос: На тве́рдем ве́ры Твоея́ ка́мени/ помышле́ние утверди́в души́ моея́,/ утверди́, Го́споди,/ Тя бо и́мам, Бла́же,/ прибе́жище и утвержде́ние. Припев: Святи́телю, о́тче Са́вво, моли́ Бо́га о на́с. Лю́дие оте́чества твоего́,/ ви́девше тя, преблаже́нне, приноси́ма, срето́ша со святи́тели,/ и́хже укра́си десни́ца твоя́,/ и́же и просте́ртыми рука́ми приима́ху твое́ свято́е те́ло,/ я́ко вели́каго граждани́на и засту́пника те́плаго. Припев: Святи́телю, о́тче Са́вво, моли́ Бо́га о на́с. Святи́телю блаже́нне Христо́в Са́вво,/ иногда́ во Иерусали́м и в Сина́й ше́ствовав,/ а ны́не во оте́чество свое́ прише́л еси́,/ чудеса́ творя́ ди́вная на спасе́ние ми́ру всему́. Сла́ва Отцу́ и Сы́ну и Свято́му Ду́ху. Был еси́ жили́ще чи́сто и уче́нием испыта́л еси́ глубину́, святи́телю,/ зломы́слящих потопля́я умы́, ве́рных же напая́я сердца́,/ те́мже твое́ честно́е пра́зднуем пренесе́ние. И ны́не и при́сно и во ве́ки веко́в. Ами́нь. Богородичен: Разреше́ние нам грехо́в да́ти, Чи́стая, Изба́вителя умоли́,/ помраче́ние все от душ на́ших при́сно Твои́ми моли́твами разгоня́ющи. Седален, глас 4 Удиви́ся, святи́тельство па́че есте́ственнаго прие́мля,/ возше́д бо на высоту́, прия́л еси́ дар дава́ти исцеле́ния притека́ющим тебе́ с ве́рою,/ сего́ ра́ди вопие́м ти, преподо́бне Са́вво:/ непреста́нно моли́ о творя́щих па́мять твою́. Песнь 4 Ирмос: Услы́шах слух Твой/ и убоя́хся,/ разуме́х дела́ Твоя́ и ужасо́хся:/ сла́ва си́ле Твое́й, Го́споди. Припев: Святи́телю, о́тче Са́вво, моли́ Бо́га о на́с. Твои́ ученицы́, похва́льныя ти венцы́ прино́сим, свя́те Са́вво,/ приими́ и заступи́ душе́вныя на́ша не́мощи,/ изле́й на ны ми́лостивное твое́, о́тче, изволе́ние/ и твои́ми моли́твами от напа́сти спаси́. Припев: Святи́телю, о́тче Са́вво, моли́ Бо́га о на́с. На Небесе́ Бо́гу и Влады́це всех предстоя́, Богому́дре,/ на земли́ в Боже́ственней Того́ Це́ркви му́дро веели́ся,/ прему́дре святи́телю Са́вво,/ Ему́же помоли́ся от душе́вных боле́зней и скорбе́й изба́вится пою́щим тя. Сла́ва Отцу́ и Сы́ну и Свято́му Ду́ху. Пропове́дник неизрече́ннаго, да возвели́чится ны́не святи́тель,/ се бо по вре́менней сме́рти до́бре Бо́жиим манове́нием/ па́ки прихо́дит во свое́ оте́чество,/ того́ свяще́нно пе́сньми Боже́ственными почти́м. И ны́не и при́сно и во ве́ки веко́в. Ами́нь. Богородичен: Безневе́стная Влады́чице, Благослове́нная Богороди́тельнице,/ пою́щия Тя спаса́й от вся́каго вре́да,/ еди́на челове́ков Помо́щнице. Песнь 5 Ирмос: Свет возсия́й ми́ру, Христе́,/ просвети́ се́рдце мое́,/ от но́щи Тебе́ зову́ща,/ и спаси́ мя. Припев: Святи́телю, о́тче Са́вво, моли́ Бо́га о на́с. Со слеза́ми вопие́м ти, Са́вво преблаже́нне:/ изба́ви свою́ па́ству от огня́, и меча́, и иноплеме́нников,/ и междоусо́бицы, и гла́да, и вся́каго зла. Припев: Святи́телю, о́тче Са́вво, моли́ Бо́га о на́с. Твори́т ны́не всебога́тно пра́здник Бо́жия Це́рковь/ твои́х моще́й, о́тче, пренесе́нием, сла́вящи всех Творца́,/ возвели́чившаго тя, Са́вво преблаже́нне. Сла́ва Отцу́ и Сы́ну и Свято́му Ду́ху. Честна́, преблаже́нне, смерть твоя́ пред Бо́гом на́шим яви́ся,/ ея́же ра́ди прославля́ешися прише́ствием твои́м, о́тче,/ ко оте́честву твоему́, свя́те. И ны́не и при́сно и во ве́ки веко́в. Ами́нь. Богородичен: Е́же бы́ти нам подава́яй/ в Твою́ утро́бу всели́ся, Богоро́дице,/ Его́же моли́ спасти́ нас. Песнь 6 Ирмос: Ки́том пожре́н грехо́вным,/ вопию́ Тебе́, Христе́:/ я́ко проро́ка,/ из истле́ния мя свободи́. Припев: Святи́телю, о́тче Са́вво, моли́ Бо́га о на́с. Творе́ц Бог тебе́ засту́пника нам даде́,/ тем зове́м ти:/ потщи́ся, Са́вво свя́те, и зло́бы изба́ви ны,/ ско́рби бо вели́кия и ра́тныя,23 теле́сныя и душе́вныя, рабы́ твоя́ обдержа́т,/ от ни́хже изба́ви ны, иера́рше Христо́в. Припев: Святи́телю, о́тче Са́вво, моли́ Бо́га о на́с. Ме́ртвенное те́ло твое́ Се́рбская земля́ восприя́ла есть,/ живоно́сную све́тлость испуща́ющее, преблаже́нне Са́вво,/ и умерщвле́нных страстьми́ смертоно́сными исцеля́ющее Ду́хом Боже́ственным. Сла́ва Отцу́ и Сы́ну и Свято́му Ду́ху. Преподо́бне возврати́вся в свое́ оте́чество, неми́рная умири́л еси́,/ и положе́н бысть в ра́це в дому́ Спа́сове, святи́телю,/ Его́же ра́ди обогати́лся еси́ вла́стию, прехва́льне. И ны́не и при́сно и во ве́ки веко́в. Ами́нь. Богородичен: Де́во еди́на Чи́стая Обра́дованная, помози́ ми,/ при́сно обурева́ему жите́йскими напа́стьми. Кондак, глас 6 Засту́пниче скорбя́щим,/ в напа́стех помо́щниче,/ ко Влады́це моле́бниче,/ не пре́зри нас, смире́нных, обремене́нных грехи́,/ но предвари́ и исхи́ти от мук ве́чных с ве́рою моля́щихтися,/ ускори́ на заступле́ние и потщи́ся на по́мощь,/ заступи́, святи́телю Христо́в Са́вво, пою́щия тя. Икос Приими́ мольбы́ на́ша, иера́рше Госпо́день, и́миже недоуме́нно припа́даем ти, недосто́йнии,/ мно́жеством заступле́ний твои́х при́зри нас всегда, припа́дающих ти,/ неусы́пною свое́ю моли́твою и неизрече́нною по́мощию не оста́ви нас/ и пода́ждь рабо́м твои́м избавле́ние от всех нападе́ний лю́тых,/ тебе́ бо засту́пника и́мамы, святи́телю, иера́рше Христо́в Са́вво,/ от стужа́ющих нас бед лю́тых,/ но я́ко име́я дерзнове́ние ко Влады́це всех,/ лю́ди заступа́й, святи́телю Христо́в Са́вво, при́сно пою́щия тя. Песнь 7 Ирмос: Преподо́бных Твои́х отроко́в песнь услы́шавый/ и пещь горя́щую ороси́вый,/ благослове́н еси́, Го́споди,/ Бо́же оте́ц на́ших. Припев: Святи́телю, о́тче Са́вво, моли́ Бо́га о на́с. Престо́лу Бо́жию предстоя́, святи́телю блаже́нне,/ о ве́рных свои́х рабе́х моле́ния непреста́нно твори́,/ ве́рою вопию́щих Христу́:/ благослове́н Бог оте́ц на́ших. Припев: Святи́телю, о́тче Са́вво, моли́ Бо́га о на́с. Ра́дуется днесь Богоно́сных святи́телей собо́р,/ и́хже ты породи́ Ду́хом, честны́м пренесе́нием твои́х моще́й,/ и пра́зднуют лю́дие Се́рбския земли́, священнотаи́нниче му́дре Са́вво, зову́ще:/ благослове́н Бог оте́ц на́ших. Сла́ва Отцу́ и Сы́ну и Свято́му Ду́ху. Обстои́м, лику́юще, Богоно́сне о́тче, свяще́нную твою́ ра́ку/ и бога́тно от нея́ почерпа́ем ве́рою, блаже́нне Са́вво, исцеле́ний благода́ть, зову́ще:/ благослове́н Бог оте́ц на́ших. И ны́не и при́сно и во ве́ки веко́в. Ами́нь. Богородичен: Влады́чице всех челове́к, Свята́я Богоро́дице,/ рабо́ты мя страстны́я Твои́ми моли́твами до конца́ свободи́. Песнь 8 Ирмос: Преподо́бнии Твои́ о́троцы/ в пещи́ Херуви́мы подража́ху,/ трисвяту́ю песнь воспева́юще:/ благослови́те, по́йте/ и превозноси́те во вся ве́ки. Припев: Святи́телю, о́тче Са́вво, моли́ Бо́га о на́с. Земля́ от свои́х недр предаде́ тя священноле́пна, це́ла же и неразруши́ма,/ благоуха́нием чуде́с удивля́юща гра́да жи́телей пе́рстию гро́ба твоего́, проро́чески вопию́щих:/ пра́ведницы во ве́ки живу́т. Припев: Святи́телю, о́тче Са́вво, моли́ Бо́га о на́с. Персть, облежа́щая многострада́льное твое́ те́ло, о́тче,/ показа́ся дража́йши ка́мене сапфи́ра, целе́бна бо и чудотвори́ва,/ и па́че зла́та ве́рными цени́ма, пою́щими досто́йно:/ честна́ пред Го́сподам смерть преподо́бных Его́. Сла́ва Отцу́ и Сы́ну и Свято́му Ду́ху. Царя́ благочести́ваго, держа́ща святы́ню и благослове́ние,/ твое́ свято́е и честно́е те́ло,/ со́нным явле́нием пренести́ убежда́еши,/ его́же ча́да твоя́ со святи́тели и свяще́нники, я́ко пребога́тое сокро́вище, во своя́ пренесо́ша. И ны́не и при́сно и во ве́ки веко́в. Ами́нь. Богородичен: Пое́м Тя, Де́во Богороди́тельнице,/ Ея́же ра́ди кля́тва непло́дна бысть и благослове́ние всем прии́де,/ ве́дущим Тя еди́ну Ма́терь Бо́га на́шего безму́жную. Песнь 9 Ирмос: Е́же ра́дуйся от А́нгела прии́мшая/ и ро́ждшая Созда́теля Своего́,/ Де́во, спаси́ Тя велича́ющия. Припев: Святи́телю, о́тче Са́вво, моли́ Бо́га о на́с. Яви́ся чу́до стра́шное в са́мый час успе́ния:/ па́че со́лнца твое́ лице́, о́тче, заблиста́,/ внегда́ приидо́ша ли́цы святы́х, дух твой восприе́млюще/ и Бо́гу Творцу́ принося́ще. Припев: Святи́телю, о́тче Са́вво, моли́ Бо́га о на́с. Стека́ются лю́дие па́ствы твоея́,/ краль же благочести́вый и свяще́нных служи́телей мно́жество/ и возложи́ша твое́ честно́е те́ло на вы́и богоприя́тныя,/ я́ко киво́т, пресвяты́й дар принося́ще, тебе́ велича́ху. Сла́ва Отцу́ и Сы́ну и Свято́му Ду́ху. Днесь пра́зднственно лику́им вси,/ созыва́ет бо Са́вва святи́телей собо́р и честны́я чернори́зцы на ликова́ние духо́вное/ и на трапе́зу безсме́ртныя жи́зни. И ны́не и при́сно и во ве́ки веко́в. Ами́нь. Богородичен: Все́ми владе́ющи тва́рьми,/ лю́дем Твои́м да́руй побе́ды на враго́в моли́твами святи́теля,/ да Тя я́ко Богоро́дицу велича́ем. Светилен Святи́теля Христо́ва да восхва́лим, па́мять его́ че́стно торжеству́юще,/ той бо нам подае́т трапе́зу духо́вную,/ ея́же ду́хом насыща́ющеся, наслажде́ние Боже́ственное получа́ем,/ Светода́вца прославя́юще. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Твое́ пречи́стое те́ло, во гро́бе лежа́щее, не растле́ся отню́д,/ но це́ло обре́теся, преблаже́нне святи́телю Са́вво,/ его́же со тща́нием принесо́ша, ра́довахуся боже́ственная твоя́ ча́да,/ благове́рна пита́теля богосла́вно тя и богому́дра ублажа́ем,/ Христу́ моля́щегося о душа́х на́ших.

Глас 2 Пе́снь 1. Ирмо́с: Гряди́те, лю́дие, пои́м пе́снь Христу́ Бо́гу, разде́льшему мо́ре и наста́вльшему лю́ди, я́же изведе́ из рабо́ты Еги́петския, я́ко просла́вися. Припев: Преподо́бне о́тче Пéтре, моли́ Бо́га о на́с. Друга́го тя́ на́м Петра́ предлага́ет Це́рковь дне́сь, просвеща́юща на́ша мы́сли па́мятию твое́ю боже́ственною, о́тче пребога́те. Ка́ла страсте́й очи́щ о́чи у́мныя, преподо́бне, я́сно ви́дел еси́ безме́рную добро́ту Христа́ Царя́, тя́ просла́вльшаго. Просия́в тебе́, Трисо́лнечнаго Божества́, преблаже́нне, невече́рний све́т, соде́ла тя́ чи́сто прия́телище боже́ственных дарова́ний, о́тче богому́дре. Богоро́дичен: И́же на́с ра́ди из Тебе́, Де́во, в челове́ка премно́гою бла́гостию обо́лкся, преподо́бных собо́ры Того́ возлю́бльших препросла́влен е́сть. Пе́снь 3. Ирмо́с: Утверди́ на́с в Тебе́, Го́споди, дре́вом умерщве́й гре́х, стра́х Тво́й всади́ в сердца́ на́с, пою́щих Тя́. Умертви́в я́же на земли́ у́ды, преподо́бне, поуче́нии оживи́л еси́ ду́шу боже́ственными и получи́л еси́ ве́чную жи́знь и све́тлость. Совокупи́лся еси́, я́ко до́бре пожи́в, с вы́шними, преблаже́нне, ликостоя́нии, в безмо́лвии пребыва́я и на добро́ту боже́ственную взира́я. В гора́х я́ве скрыва́емь, челове́к совокупле́ния удали́лся еси́ и у́м ве́сь впери́л еси́ к небе́сней добро́те, веселя́ся. Богоро́дичен: Пала́ту красну́ неизрече́ннаго бога́тства, Де́во, зна́юще, по до́лгу Тя́ сла́вим, спа́сшиися Рождество́м Твои́м, Всенепоро́чная. Седа́лен, гла́с 1. Погре́бл еси́ страсте́й всевоста́ние умерщвле́нием пло́ти, свяще́нный о́тче, и жи́знь безконе́чную по сме́рти прия́л еси́. Те́мже дне́сь Христо́ва Це́рковь пра́зднует твою́ досточу́дную па́мять, преподо́бных украше́ние. Богоро́дичен: Наста́ви на́с на пу́ть покая́ния, укло́ншияся при́сно к безпу́тием зо́л и Преблага́го прогне́вавшия Го́спода, Неискусобра́чная благослове́нная Мари́е, прибе́жище отча́янных челове́ков, Бо́жие жили́ще. Крестобогоро́дичен: Зря́щи Тя́, Христе́, Всенепоро́чная Ма́ти ме́ртва, на Кресте́ просте́рта, вопия́ше: Сы́не Мо́й, собезнача́льне Отцу́ и Ду́ху, что́ неизрече́нное Твое́ сие́ смотре́ние, и́мже спа́сл еси́ пречи́стых ру́к Твои́х, Ще́дре, созда́ние? Пе́снь 4. Ирмо́с: Прише́л еси́ от Де́вы не хода́тай, ни а́нгел, но Са́м Го́споди вопло́щся, и спа́сл еси́ всего́ мя челове́ка; те́м зову́ ти: сла́ва си́ле Твое́й, Го́споди. В гора́х и пеще́рах, му́дре, быва́я, боже́ственное восхожде́ние в се́рдцы поло́жь, вся́ изсуши́л еси́ страсте́й то́ки Боже́ственною благода́тию. Стреля́ния де́монов, и стре́л, и ловле́ния до конца́ отбе́гл еси́, щито́м ве́ры, преподо́бне, покрыва́емь. Пове́ржена при ногу́ твое́ю льсти́ваго зми́я и сме́х ви́дяще, су́рово свире́пеющагося, Пе́тре всесла́вне, вели́чие Го́сподеви возсыла́ем. Богоро́дичен: Госпо́дь, из Тебе́ роди́вся, Госпоже́ Всенепоро́чная, облада́юща врага́ ми́ром изба́ви вся́, преподо́бныя же, я́ко возлю́бльшия Сего́, возвели́чи. Пе́снь 5. Ирмо́с: Све́та Пода́телю и веко́в Тво́рче, Го́споди, во све́те Твои́х повеле́ний наста́ви на́с: ра́зве бо Тебе́, ино́го Бо́га не зна́ем. На го́ры честны́х за́поведей восте́к, я́коже Моисе́й, преподо́бне, ви́дел еси́ Бо́га я́ве, я́коже вмеща́л еси́, и, все́ми просве́щся душе́вными чу́вствы, вельми́ просла́вился еси́. Манове́нии боже́ственными при́сно удобря́емь, му́дре, пребы́л еси́ стра́сти вся́кия неприча́стен, Пе́тре, и безстра́стием, я́ко оде́ждею, обле́клся еси́, преподо́бне. Ле́ты мно́гими сокрыва́емо те́ло твое́ в просвеще́ние на́ше яви́ся, источа́я ре́ки на́м исцеле́ний и ми́ро благода́ти. Богоро́дичен: Свяще́нными гла́сы Тя́, добро́ту Иа́ковлю, пое́м, пло́тски ро́ждшую ми́рови Све́т, И́же от Све́та, просвеща́ющь преподо́бных собо́р. Пе́снь 6. Ирмо́с: В бе́здне грехо́вней валя́яся, неизсле́дную милосе́рдия Твоего́ призыва́ю бе́здну: от тли́, Бо́же, мя́ возведи́. Утве́рждся кре́постию Ду́ха, всю́ вра́жию кре́пость смири́л еси́ и, победи́тель бы́в, ко Христу́ венцено́сец восте́кл еси́. Стопа́м после́дуя бы́л еси́, преподо́бне, Петру́ верхо́вному, ка́меню ве́ры, его́же и зва́ние име́л еси́ и ве́рою бога́тно обогати́лся еси́. По́двигом боже́ственным подвиза́лся еси́, о́тче, и ве́ру подо́бно соблю́л еси́, про́чее тебе́ предлежи́т до́браго де́лания вене́ц. Богоро́дичен: Во утро́бу Твою́ всели́ся, и все́ челове́ческое существо́ обожи́, и преподо́бных, Чи́стая, мно́жество свяще́нно привлече́. Конда́к, гла́с 2. Удали́в себе́ челове́ческаго сожи́тельства, в пеще́рах ка́менных и разсе́линах пожи́л еси́, жела́нием боже́ственным и любо́вию, Пе́тре, Го́спода твоего́, от Него́же вене́ц прия́л еси́. Моли́ непреста́нно спасти́ся на́м. И́кос: Мирски́х мо́лв избе́г и бу́ри жите́йския, я́ко бе́гательны и уко́рны, непроходи́мая места́ дости́гл еси́ и осо́бь, я́коже пти́ца, еди́н ле́та мно́га пожи́л еси́, в пеще́рах и про́пастех, и разсе́линах кры́яся, ко Го́споду взира́я и Того́ исполня́я повеле́ния; от Него́же прия́т благода́ть, преподо́бне, я́ко со́лнце, о́тче, возсия́л еси́, моля́ непреста́нно о все́х на́с. Пе́снь 7. Ирмо́с: Те́лу злато́му прему́дрыя де́ти не послужи́ша, и в пла́мень са́ми поидо́ша, и бо́ги и́х обруга́ша, среди́ пла́мене возопи́ша и ороси́ я́ а́нгел: услы́шася уже́ у́ст ва́ших моли́тва. Тве́рдым по́мыслом на ра́мо кре́ст взе́м, Распе́ншемуся после́довал еси́, я́ко мона́х освяще́н, опаля́я, я́ко хвра́стие, стра́сти и вопия́, преблаже́нне: благослове́н еси́, Го́споди, Бо́же оте́ц на́ших. Тя́, ле́ты мно́гими сокрове́на, я́ко сокро́вище, явля́ет та́йно Боже́ственное Сло́во, Пе́тре преподо́бне, в явле́нно снабде́ние все́м, вта́йне стяжа́вшим грехо́вныя скве́рны, явле́нна тя́ моли́твенника, ка́ющимся я́сно. Благово́нно Христу́ обе́том доброде́телей яви́ся кажде́ние, ми́ро излива́емо благово́нно от честны́х моще́й твои́х все́м зря́щим во удивле́ние излива́я: с пло́тию бо а́нгельское житие́ пожи́л еси́. Богоро́дичен: Красну́ обре́т и добру́ в жена́х Тя́, Пресвята́я, прекра́сное Сло́во всели́ся в пресвято́е чре́во Твое́, вся́ ли́ки преподо́бных осве́щь, зову́щия: благослове́н еси́, Го́споди, Бо́же оте́ц на́ших. Пе́снь 8. Ирмо́с: В пе́щь о́гненную ко отроко́м евре́йским снизше́дшаго и пла́мень в ро́су прело́жшаго Бо́га, по́йте дела́ я́ко Го́спода, и превозноси́те во вся́ ве́ки. Блаже́нства боже́ственнаго сподо́бился еси́ вои́стинну, Пе́тре богому́дре, во́лею обнища́в и всегда́, му́дре, пла́кав, и, кро́ток бы́в, насле́дил еси́ зе́млю кро́тких. Бо́др име́я по́мысл, успи́л еси́ страсте́й воста́ния и, усну́в, со́н до́лжный ны́не пра́ведным, все́м, пребога́те, неусыпа́ющь яви́лся еси́, тя́ чту́щим моли́твенник. Зимо́ю и ва́ром, му́дре, победи́в зи́му де́монскую, духо́вною теплото́ю потребля́еши я́ве и стра́сти умерщвля́еши теле́сныя, безстра́стия облиста́я сия́нием. В горе́ Афо́нстей всели́лся еси́, я́коже на Карми́льстей иногда́, Пе́тре богому́дре, Фесви́тянин Илия́, в безмо́лвии Бо́га усе́рдно ища́й, досточу́дне, и Сего́ зре́ния, я́ко преподо́бен, сподо́бился еси́. Богоро́дичен: Уны́л име́я по́мысл и ду́шу, сластьми́ отягче́ну, к Тебе́ прибега́я, Богороди́тельнице Чи́стая, вопию́ Ти: воздви́гни и спаси́ мя, отча́яннаго и осужде́ннаго. Пе́снь 9. Ирмо́с: От Бо́га Бо́га Сло́ва, неизрече́нною му́дростию прише́дшаго обнови́ти Ада́ма, я́дию в тле́ние па́дшаго лю́те, от Святы́я Де́вы неизрече́нно воплоти́вшагося на́с ра́ди, ве́рнии, единому́дренно пе́сньми велича́ем. Кре́постию и держа́вою Христо́с Бо́г тя́ препоя́сав, укрепи́ победи́ти хи́трости де́монския, пребога́те, я́ко возлю́бльша Сего́ от всего́ се́рдца и души́. Сего́ ра́ди тя́ ве́рою ублажа́ем и любо́вию. Яви́лся еси́ в дому́ Госпо́дни, я́ко ма́слина, богому́дре, еле́ем по́тов твои́х на́ша умаща́я ли́ца, творя́щих тво́й се́й сла́вный и боже́ственный пра́здник, мона́хов украше́ние, преподо́бных верхо́вник. Твое́ пресла́вное, источи́вшее, всесла́вный Пе́тре, те́ло благово́нно и красно́ ми́ро, ве́рныя благово́ния испо́лни, благово́ние бо Бо́гу и жи́в, и по кончи́не я́ве показа́лся еси́. Те́мже тя́ досто́йно ублажа́ем. Освяще́нный Го́споду Бо́гу на́шему сосу́де, му́чеником, и апо́столом, и а́нгелом собесе́дниче, о все́х моли́, ве́рою тя́ чту́щих на земли́, да обря́щем вси́ согреше́ний оставле́ние. Богоро́дичен: Пощади́ мя, Го́споди, пощади́, егда́ хо́щеши ми́ суди́ти, и не осуди́ мене́ во о́гнь, ниже́ я́ростию обличи́ши мене́, мо́лит Тя́ Де́ва, Тебе́ ро́ждшая, Христе́, и а́нгельстии собо́ри, и преподо́бных совокупле́ния. Свети́лен. Петру́ тезоимени́таго верхо́вному вси́, по́стников похвалу́ и преподо́бных сла́ву, столпа́ небе́снаго, цве́та афо́нскаго велегла́сно пе́сньми почти́м по до́лгу, я́ко моли́твенника на́м все́м. Богоро́дичен: Богоро́дицу Тя́ вои́стинну испове́дуем, Влады́чице, Тебе́ ра́ди спа́сшиися, и́бо Бо́га неизрече́нно родила́ еси́, разру́шшаго кресто́м сме́рть и к Себе́ привле́кша преподо́бных собо́ры, с ни́миже Тя́ восхваля́ем, Де́во.

Минея, 24 Мая, Канон преподобного Глас 4 Песнь 1 Ирмос: Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,/ и воспою́, ра́дуяся, Тоя́ чудеса́. Припев: Преподо́бне о́тче Ники́то, моли́ Бо́га о на́с. Све́том благода́ти озаря́емь, преподо́бне,/ ве́рою па́мять твою́ торжеству́ющия светови́дную/ тьмы́ грехо́вныя моли́твами твои́ми изба́ви,/ Ники́то пресла́вне. Припев: Преподо́бне о́тче Ники́то, моли́ Бо́га о на́с. К Бо́гу вводя́щ несовра́тно ше́ствовал еси́ пу́ть,/ ко гра́ду Небе́сному, Ники́то, дости́гл еси́,/ и́бо Святы́й наста́ви тя Дух, почива́яй в се́рдцы твое́м. Сла́ва Отцу́ и Сы́ну и Свято́му Ду́ху. Вознося́щее смире́ние, Ники́то, име́л еси́, тем мо́лимся тебе́:/ уще́дри, преподо́бне, смире́ние на́ше/ и боле́зни вся облегчи́ серде́ц на́ших. И ны́не и при́сно и во ве́ки веко́в. Ами́нь. Богородичен: Ра́дости нам Хода́таица,/ я́ко прие́мши исполне́ние всего́ Божества́, яви́лася еси́, Всенепоро́чная,/ тем вси Тебе́, ра́дуйся, А́нгелово согла́сно зове́м, Богора́дованная. Песнь 3 Ирмос: Не му́дростию, и си́лою, и бога́тством хва́лимся,/ но Тобо́ю, О́тчею Ипоста́сною Му́дростию, Христе́,/ не́сть бо свят, па́че Тебе́, Человеколю́бче. Припев: Преподо́бне о́тче Ники́то, моли́ Бо́га о на́с. Пре́жднее весе́лие измени́л еси́/ бу́дущих ра́ди благи́х же́стостию, доброде́тельно пожи́в, блаже́нне,/ на исто́чнице в гора́х, я́ко вели́кий Илия́, пребыва́я. Припев: Преподо́бне о́тче Ники́то, моли́ Бо́га о на́с. Пу́ть пра́вый, его́же возжеле́в поще́ния ра́ди,/ удивле́нием бра́шен тебе́ показа́ Бог,/ его́же обре́л еси́ безме́здно я́коже приста́нище, му́дре. Сла́ва Отцу́ и Сы́ну и Свято́му Ду́ху. Ко́леблемых разли́чными страстьми́ ко твоему́ столпу́, Ники́то, приходя́щих,/ честны́м твои́м хода́тайством всех нас посети́,/ моля́ Человеколю́бца. И ны́не и при́сно и во ве́ки веко́в. Ами́нь. Богородичен: Тя Му́дрость Бо́жия всечестны́й орга́н обре́тши,/ от Твои́х чи́стых крове́й воплоща́ется/ и по рождестве́ нетле́нну показа́. Седален, глас 5 Те́лом возше́д на столп, ум же возвы́сив на преми́рная,/ труды́ ко трудо́м прилага́еши, жела́я дости́гнути угото́ванных тебе́ благ на Небесе́х,/ и́хже получи́в, помина́й нас, почита́ющих свяще́нную па́мять твою́. Песнь 4 Ирмос: Седя́й в Сла́ве на Престо́ле Божества́,/ во о́блаце ле́гце/ прии́де Иису́с Пребоже́ственный/ Нетле́нною Дла́нию и спасе́ зову́щия:/ сла́ва, Христе́, си́ле Твое́й. Припев: Преподо́бне о́тче Ники́то, моли́ Бо́га о на́с. Столпу́, Богоно́се, согражда́ему непоколе́блемою душе́ю/ сам ся пре́дал еси́, бу́дущую жи́знь предзря́,/ ея́же улучи́ти жела́я, я́ко храбр во́ин. Припев: Преподо́бне о́тче Ники́то, моли́ Бо́га о на́с. Ла́вры честны́я дости́гл еси́, му́дре,/ возвы́сився смире́нием, верхи́ де́монския смири́л еси́/ и в ней до́блествовал еси́, сла́ва мона́хов и утвержде́ние. Припев: Преподо́бне о́тче Ники́то, моли́ Бо́га о на́с. Моли́твами и посто́м вооружи́вся/ и стра́хом себе́ умертви́в Госпо́дним, блаже́нне,/ отсту́пника изсека́еши, неви́димаго зми́я, о́тче, побе́дник был еси́. Сла́ва Отцу́ и Сы́ну и Свято́му Ду́ху. Ве́сь Боже́ственным Ду́хом разжже́н быв, о́тче,/ труды́ подъя́л еси́ на мно́га ле́та, в хлеви́не у́зце терпя́,/ взыска́я Го́спода, благода́тию тя Боже́ственною укрепля́ющаго. И ны́не и при́сно и во ве́ки веко́в. Ами́нь. Богородичен: На престо́ле высо́це стра́шно седя́й/ на ма́тернюю ру́ку, Младе́нец быв, седи́т,/ низпа́дший о́браз возводя́ и обоже́ние су́щим подава́я. Песнь 5 Ирмос: Ужасо́шася вся́ческая/ о Боже́ственней сла́ве Твое́й:/ Ты бо, Неискусобра́чная Де́во,/ име́ла еси́ во утро́бе над все́ми Бо́га/ и родила́ еси́ Безле́тнаго Сы́на,/ всем воспева́ющим Тя/ мир подава́ющая. Припев: Преподо́бне о́тче Ники́то, моли́ Бо́га о на́с. Ходи́л еси́, преподо́бне, по у́зкому пути́,/ Боже́ственными восхожде́нии се́рдца распространя́яся/ и прича́стием обожа́яся, всему́дре./ Тем был еси́ мона́хом све́тлость. Припев: Преподо́бне о́тче Ники́то, моли́ Бо́га о на́с. О́ко очи́стившу у́мное, преподо́бне,/ благода́ть даде́ся тебе́, а́ки проро́ку,/ е́же пре́дняя предзре́ти и предглаго́лати я́ко су́щая да́льняя и безве́стная. Сла́ва Отцу́ и Сы́ну и Свято́му Ду́ху. Боле́знь облегчи́ ми грехо́в и скорбе́й,/ и преста́ви се́рдца моего́ боле́зни,/ и согреше́ний разреше́ние да́руй, Благоде́теля Бо́га име́я,/ послу́шающаго честны́х твои́х моли́тв. И ны́не и при́сно и во ве́ки веко́в. Ами́нь. Богородичен: Ума́ моего́ исцели́ превраще́ние, Пречи́стая,/ уврачу́й стра́сти души́ моея́ и ле́ностную тьму́ отжени́,/ я́ко да хвала́ми Тя при́сно ублажа́ем, Всенепоро́чная. Песнь 6 Ирмос: Боже́ственное сие́ и всечестно́е/ соверша́юще пра́зднество,/ Богому́дрии, Богома́тере,/ прииди́те, рука́ми воспле́щим,/ от Нея́ ро́ждшагося Бо́га сла́вим. Припев: Преподо́бне о́тче Ники́то, моли́ Бо́га о на́с. Умертви́л еси́ стра́сти теле́сныя,/ я́ко дре́во ви́деся высокове́рхо, плоды́ чуде́с принося́,/ Ники́то, Богоблаже́нне. Припев: Преподо́бне о́тче Ники́то, моли́ Бо́га о на́с. И́же безчи́сленным боле́знем прибли́жихся,/ те́лом не́мощен пребы́в, преподо́бне./ Тем зову́ ти верою:/ боле́зни уста́ви се́рдца моего́. Сла́ва Отцу́ и Сы́ну и Свято́му Ду́ху. От душе́вных не́мощей, о́тче, коле́блемых, ве́рою тя призыва́ющих ны́не посети́/ моли́твами твои́ми, я́же к Бо́гу,/ я́ко да благоче́стно тя сла́вим. И ны́не и при́сно и во ве́ки веко́в. Ами́нь. Богородичен: Еди́на Помо́щнице, помози́ ми, погиба́ющу,/ и ру́ку ми простри́, и ко приста́нищу наведи́ покая́ния,/ Де́во Богора́дованная. Кондак, глас 8 Христа́ ра́ди от твои́х рабо́в ну́ждную сме́рть претерпе́л еси́/ и вене́ц нетле́ния от Него́ восприя́л еси́,/ приходя́щим же с ве́рою от честна́го твоего́ гро́ба подае́ши цельбы́,/ о Ники́то преподо́бне,/ моли́твенниче о душа́х на́ших. Икос Земны́й А́нгел, Небе́сный челове́к был еси́, преподо́бне,/ посто́м и бде́нием ду́шу просвети́в,/ алка́нием, и жа́ждею, и на земли́ лега́нием Бо́гу угоди́л еси́/ и вся́ку доброде́тель мона́шескаго жития́ испра́вил еси́,/ к сим же и ну́ждную сме́рть от твои́х рабо́в восприи́м,/ возше́л еси́ к жела́емому Христу́, ра́дуяся, о Ники́то преподо́бне,/ моли́твенниче о душа́х на́ших. Песнь 7 Ирмос: Не послужи́ша тва́ри Богому́дрии/ па́че Созда́вшаго,/ но, о́гненное преще́ние му́жески попра́вше,/ ра́довахуся, пою́ще:/ препе́тый отце́в Госпо́дь и Бог, благослове́н еси́. Припев: Преподо́бне о́тче Ники́то, моли́ Бо́га о на́с. Се́рдце твое́ Тро́ическое жили́ще соде́лав,/ три кресты́ и тя́жкая желе́за, Ники́то, на себе́ поне́с,/ от ни́хже Боже́ственною благода́тию цельбы́ истека́ют/ на просвеще́ние и очище́ние ве́рно притека́ющим ти. Припев: Преподо́бне о́тче Ники́то, моли́ Бо́га о на́с. Душа́ твоя́ светозаре́нием Боже́ственнаго Ду́ха сия́ющи при́сно,/ ду́ши ви́дяще притека́ющих ти ве́рою све́тло, блаже́нне, проро́ческими прорече́нии,/ тем тя ублажа́ем. Сла́ва Отцу́ и Сы́ну и Свято́му Ду́ху. Неду́гов тружда́ющих, блаже́нне, ду́ши и телеса́/ твои́ми святы́ми моли́твами вско́ре измени́ и пе́ти сотвори́:/ препе́тый отце́в Госпо́дь и Бог, благослове́н еси́. И ны́не и при́сно и во ве́ки веко́в. Ами́нь. Богородичен: Непреме́ннаго ро́ждши, еди́на Богора́дованная,/ десни́цею Его́, Чи́стая, премени́ти ми ум на лу́чшее молю́ Ти ся,/ лю́те превраща́емый жите́йскими упраждне́нии. Песнь 8 Ирмос: О́троки благочести́выя в пещи́/ Рождество́ Богоро́дичо спасло́ е́сть;/ тогда́ у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте, дела́,/ и превозноси́те Его́ во вся ве́ки. Припев: Преподо́бне о́тче Ники́то, моли́ Бо́га о на́с. Стоя́ на сто́лпе вы́спрь,/ я́ко на све́щнице свеща́, преподо́бне, светя́щи,/ всем ра́зумы ве́рным просвеща́я,/ пока́зовал еси́ до́бре словесы́ и дея́нии стезю́ живота́/ и возводи́л еси́ сия́ Боже́ственным смы́слом к высоте́ безстра́стия. Припев: Преподо́бне о́тче Ники́то, моли́ Бо́га о на́с. Ум безстра́стием очи́щ, бесе́довал еси́ ко Го́споду Вседержи́телю,/ от Него́же неизрече́нным, преподо́бне, навыка́я,/ проро́чески предглаго́лал еси́,/ просвеща́я ду́ши, я́ко вели́кий, преблаже́нне, проро́к;/ тем тя согла́сно ве́рою воспева́ем. Припев: Преподо́бне о́тче Ники́то, моли́ Бо́га о на́с. Наидо́ша ми ра́ны тя́жкия, и неду́зи ча́сто тружда́ют,/ тех мя измени́, о́тче, молю́ ти ся,/ я́ко от Бо́га прии́м, Ники́то,/ благода́ть исцеля́ти стра́сти и боле́зни облегча́ти. Сла́ва Отцу́ и Сы́ну и Свято́му Ду́ху. Троичен: Со все́ми Го́рними во́инствы Отца́ и Сы́на и Свята́го Ду́ха,/ Тро́ицу Неразде́льну, Несозда́нно Божество́, песносло́вяще,/ Свят, Свят, Свят, возопие́м ра́достно,/ Еди́на Вла́сть, Нача́ло и Ца́рство. И ны́не и при́сно и во ве́ки веко́в. Ами́нь. Богородичен: И́же все́ми непристу́пен Сый Зижди́тель Го́рними, Отрокови́це, чи́нми,/ всели́вся в ложесна́ Твоя́, неопа́льну соблюде́ Тя и по рождестве́ нетле́нну./ Ему́же ны́не при́сно пое́м:/ Го́спода воспева́йте дела́ и превозноси́те Его́ во вся ве́ки. Песнь 9 Ирмос: Всяк земноро́дный/ да взыгра́ется, Ду́хом просвеща́емь,/ да торжеству́ет же Безпло́тных умо́в естество́,/ почита́ющее свяще́нное торжество́ Богома́тере,/ и да вопие́т:/ ра́дуйся, Всеблаже́нная Богоро́дице,/ Чи́стая Присноде́во. Припев: Преподо́бне о́тче Ники́то, моли́ Бо́га о на́с. Воздвиза́я ру́ки твоя́ к Бо́гу, моли́лся еси́,/ крепя ум твой удержа́ти от страсте́й,/ а́ки А́нгел, в телеси́, о́тче, ты был еси́./ Тем со А́нгелы всегда́ на Небесе́х живе́ши, сла́вному престо́лу предстоя́,/ Све́та невече́рняго исполня́емь. Припев: Преподо́бне о́тче Ники́то, моли́ Бо́га о на́с. Я́ко на Небеси́, в хлеви́не у́зце пожи́л еси́, преподо́бне:/ тем ти умири́шася ди́вии зве́рие,/ покори́вшему стра́сти теле́сныя и злостремле́ния, Ники́то преподо́бне./ Сего́ ра́ди ве́рою тя почита́ем. Припев: Преподо́бне о́тче Ники́то, моли́ Бо́га о на́с. Твоя́ честны́я и святы́я мо́щи, во гро́бе лежа́ще, погружа́ют неду́ги,/ и попаля́ют толпы́ де́монския всегда́,/ преподо́бне Ники́то, Боже́ственною благода́тию,/ и источа́ют всем исцеле́ния, ве́рно тя блажа́щим. Сла́ва Отцу́ и Сы́ну и Свято́му Ду́ху. Уже́ к Бо́гу приближа́яся я́сне и чи́сте,/ помяни́ ве́рою тя, Ники́то, помина́ющих,/ грехо́в оставле́ние нам испроси́, и неду́гов всех избавле́ние,/ и Бо́жия Ца́рства селе́ние. И ны́не и при́сно и во ве́ки веко́в. Ами́нь. Богородичен: Све́том мя озари́ Твои́м, Непоро́чная, ро́ждшая Свет непристу́пный,/ разжени́ о́блак страсте́й души́ моея́,/ и от тьмы́ изми́, молю́ Ти ся,/ и Боже́ственнаго спасе́ния сподо́би, Чи́стая, еди́на Присноде́ва. Светилен Вся жития́ оста́вль, Христа́ приобре́л еси́,/ трудополо́жно пожи́в/ и сме́рть ну́ждную восприе́мь;/ тем па́мять твою́, Ники́то, почита́ем. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Бо́га нам, Пречи́стая, родила́ еси́,/ и вси, прароди́тельныя кля́твы изба́вльшеся,/ воспева́ем Тя, Препе́тая.

Минея, 3 Апреля, Канон преподобного Глас 2 Песнь 1 Ирмос: Во глубине́ постла́ иногда́/ фараони́тское всево́инство преоруже́нная си́ла,/ вопло́щшееся же Сло́во всезло́бный грех потреби́ло е́сть,/ препросла́вленный Госпо́дь, сла́вно бо просла́вися. Припев: Преподо́бне о́тче Ники́то, моли́ Бо́га о на́с. Све́том Боже́ственнаго блиста́ния, о́тче, озаря́емь,/ твою́ жи́знь Бо́гу освяти́л еси́,/ изде́тска избра́в де́вства светоно́сную све́тлость,/ е́юже уподо́бился еси́ безпло́тных чистоте́. Припев: Преподо́бне о́тче Ники́то, моли́ Бо́га о на́с. Наста́вником Боже́ственным и Честны́м Ду́хом пома́зан Богови́дным,/ мона́шествующих о́бразом чи́сто бесе́довал еси́/ и пребы́л еси́ многосве́тлою осия́емь заре́ю, Богоно́се,/ житие́ чисте́йшо стяжа́в. Припев: Преподо́бне о́тче Ники́то, моли́ Бо́га о на́с. Укрепи́вся си́лою Креста́, стра́сти увяди́л еси́ плотски́я/ и ум просвети́л еси́, о Ники́то всему́дре, прилежа́нием уче́ний духо́вных,/ Боже́ственнаго зре́ния бога́тство неиждива́емо пло́дствовав. Сла́ва Отцу́ и Сы́ну и Свято́му Ду́ху. Целому́дрием, блаже́нне, просве́щся и чистото́ю,/ ко свяще́нному возведе́н был еси́ нача́льству:/ свяще́нства бо светле́йшею украси́лся еси́ оде́ждею,/ Боже́ственных та́инств, преподо́бне, хода́тай познава́емь. И ны́не и при́сно и во ве́ки веко́в. Ами́нь. Богородичен: Превы́шши яви́лася еси́, Чи́стая,/ вся́кия ви́димыя и неви́димыя, Присноде́во, тва́ри,/ Зижди́теля бо родила́ еси́, я́ко благоволи́ воплоти́тися во утро́бе Твое́й,/ Его́же со дерзнове́нием моли́ спасти́ пою́щия Тя. Песнь 3 Ирмос: Процвела́ е́сть пусты́ня, я́ко крин, Го́споди,/ язы́ческая неплодя́щая, Це́рковь/ прише́ствием Твои́м,/ в не́йже утверди́ся мое́ се́рдце. Припев: Преподо́бне о́тче Ники́то, моли́ Бо́га о на́с. Небе́сное стяжа́в жи́тельство, преподо́бне,/ светови́ден и све́тел, благоче́стия, о Ники́то, был еси́ свети́льник,/ мно́гими укра́шен дарова́ньми. Припев: Преподо́бне о́тче Ники́то, моли́ Бо́га о на́с. Умертви́в мудрова́ния пло́ти твое́й, преподо́бне,/ доброде́телию оживи́л еси́ богому́дренно души́ Боже́ственное/ и жи́зни нетле́нныя сподо́бился еси́. Припев: Преподо́бне о́тче Ники́то, моли́ Бо́га о на́с. Ра́дуяся, препроводи́л еси́ твое́ житие́, сла́вне,/ преиспещре́н добро́тами и кра́сными богате́я дарова́ньми,/ в ни́хже утверди́ся се́рдце твое́. Сла́ва Отцу́ и Сы́ну и Свято́му Ду́ху. Возсия́л еси́, я́ко со́лнце, мона́шествующих чино́м,/ доброде́тельми украша́емь, о Ники́то Богому́дре преподо́бне!/ Тем тя, ра́дующеся, ублажа́ем. И ны́не и при́сно и во ве́ки веко́в. Ами́нь. Богородичен: Просвеща́ющаго концы́, Пресвята́я, родила́ еси́, пло́тию несозда́ннаго/ и пре́жде всех Отцу́ Собезнача́льнаго,/ те́мже Тя, Богоро́дицу, ве́рою чтим. Седален, глас 4 Водвори́лся еси́ в гора́х безмо́лвия, му́дре,/ воспита́лся еси́ во граде́х воздержа́ния я́ве,/ возвы́сився обою́ду, оста́вил еси́ долере́тныя 1 сла́сти,/ жи́знь дости́гл еси́ Небе́сную, во оби́тель всели́вся,/ в ней же мо́лиши о нас Бо́га. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Де́во Всенепоро́чная, я́же Пресу́щнаго Бо́га ро́ждшая,/ со безпло́тными Того́ непреста́нно моли́/ оставле́ние прегреше́ний и исправле́ния жития́ да́ти нам пре́жде конца́,/ ве́рою и любо́вию пою́щим Тя по до́лгу,/ еди́на Всепе́тая. Песнь 4 Ирмос: Прише́л еси́ от Де́вы не хода́тай, ни А́нгел,/ но Сам, Го́споди, вопло́щся,/ и спасл еси́ всего́ мя, челове́ка./ Тем зову́ Ти: сла́ва си́ле Твое́й, Го́споди. Припев: Преподо́бне о́тче Ники́то, моли́ Бо́га о на́с. Кореносе́чец страсте́й, Богоно́се, показу́емь,/ души́ чистото́ю богобо́рных исто́ргнул еси́ вся́кую душегу́бную пре́лесть,/ священнотаи́нниче прече́стне. Припев: Преподо́бне о́тче Ники́то, моли́ Бо́га о на́с. Взем побе́ды, пребога́те, вене́ц,/ в се́лех Небе́сных ны́не почива́еши, блаже́нне,/ стра́сти оттря́с и в безстра́стие, о́тче, оде́явся. Припев: Преподо́бне о́тче Ники́то, моли́ Бо́га о на́с. Же́ртву я́ко непоро́чну, о́тче, житие́ твое́ Христу́ прине́сл еси́,/ Боже́ственныя любве́ испо́лнен/ и по́стничества украша́емь добро́тою, преблаже́нне. Сла́ва Отцу́ и Сы́ну и Свято́му Ду́ху. Вити́йства душетле́нныя, Богому́дре, е́реси я́сно изобличи́л еси́,/ Христо́ву чтущ Боже́ственную ико́ну, и Богома́тере, и святы́х всех,/ свяще́ннейший. И ны́не и при́сно и во ве́ки веко́в. Ами́нь. Богородичен: Я́ко похвалу́, я́ко держа́ву ми́ра и утвержде́ние,/ я́ко приста́нище благоути́шно, я́ко весе́лию вино́вну,/ Тя, Пречи́стая, сла́вим,/ крася́щиися вси в сла́ве Твое́й. Песнь 5 Ирмос: Хода́тай Бо́гу и челове́ком был еси́, Христе́ Бо́же:/ Тобо́ю бо, Влады́ко, к Светонача́льнику Отцу́ Твоему́/ от но́щи неве́дения/ приведе́ние и́мамы. Припев: Преподо́бне о́тче Ники́то, моли́ Бо́га о на́с. Я́ко кро́ток, в земли́ кро́тких всели́лся еси́, Ники́то му́дре,/ побо́рник быв по и́стине, всеприснопа́мятне,/ и испове́дания венце́м све́тло украша́емь. Припев: Преподо́бне о́тче Ники́то, моли́ Бо́га о на́с. К Боже́ственному Све́ту ны́не преста́вился еси́, преподо́бне,/ Све́та быв сын возлю́блен,/ в ра́дости и красоте́ с ли́ки А́нгельскими ра́достно веселя́ся. Сла́ва Отцу́ и Сы́ну и Свято́му Ду́ху. Неизрече́нныя сла́дости ра́йския был еси́ ны́не прича́стник,/ приста́нище бо всеблагоути́шное обурева́емым показа́лся еси́/ и а́лчущих, блаже́нне, препита́тель был еси́. И ны́не и при́сно и во ве́ки веко́в. Ами́нь. Богородичен: Глаго́лы Твои́ помина́юще, ны́не Тя ублажа́ем:/ Тобо́ю, Пренепоро́чная, блаже́нство несказа́нное/ и жи́знь нестаре́емую и́стинно восприя́хом. Песнь 6 Ирмос: В бе́здне грехо́вней валя́яся,/ неизсле́дную милосе́рдия Твоего́ призыва́ю бе́здну:/ от тли, Бо́же, мя возведи́. Припев: Преподо́бне о́тче Ники́то, моли́ Бо́га о на́с. Блаже́нных наде́жд получи́л еси́, о́тче всеблаже́нне,/ блаже́нства Влады́чня быв насле́дник и Боже́ственнаго осия́ния. Припев: Преподо́бне о́тче Ники́то, моли́ Бо́га о на́с. Светоно́сныя свещи́ име́я сугу́бы испове́дания твоего́ и по́стничества,/ в Небеса́ вмести́лся еси́,/ Богоно́се Ники́то пребога́те. Сла́ва Отцу́ и Сы́ну и Свято́му Ду́ху. Наслажда́яся безконе́чныя и Боже́ственныя сла́дости/ в Небе́сных ны́не, о́тче, ски́ниих,/ о нас моли́ всех Влады́ку и Го́спода. И ны́не и при́сно и во ве́ки веко́в. Ами́нь. Богородичен: Ны́не к Тебе́ прибега́ю, Пречи́стая,/ спаси́ мя мольба́ми Твои́ми и соблюди́,/ ели́ка бо хо́щеши, мо́жеши, я́ко Ма́ти Всемогу́щаго. Кондак, глас 2 Небе́сный ум и житие́ стяжа́в,/ сия́еши я́сно, я́коже со́лнце, све́тлостию дел,/ просвеща́еши су́щия во тьме́ жите́йстей, о́тче Ники́то,/ и, приводя́ всех к Бо́гу,/ моли́ непреста́нно о всех нас. Песнь 7 Ирмос: Богопроти́вное веле́ние/ беззако́ннующаго мучи́теля, высо́к пла́мень вознесло́ е́сть:/ Христо́с же простре́ Богочести́вым отроко́м ро́су духо́вную,/ Сый благослове́н и препросла́влен. Припев: Преподо́бне о́тче Ники́то, моли́ Бо́га о на́с. Твоя́ кро́тость вельми́ в пе́рсть смири́ мучи́теля суровство́,/ ча́стыми мольба́ми сего́ умори́вши,/ ве́сть бо во́лю твори́ти боя́щихся Его́ Госпо́дь. Припев: Преподо́бне о́тче Ники́то, моли́ Бо́га о на́с. Гром догма́тов твои́х/ и светоно́сная мо́лния жития́ твоего́ мир уясни́,/ ве́рныя озаря́ющи Боговеща́нными сия́ньми, словесы́ же и дея́нии све́тло,/ священнотаи́нниче Богоблаже́нне. Сла́ва Отцу́ и Сы́ну и Свято́му Ду́ху. Кре́постию вжиля́емь Уте́шителя,/ де́монских полко́в и се́тей ерети́ческих, Богому́дре, избежа́л еси́/ и к Небе́сней высоте́ возше́л еси́,/ с ли́ки безпло́тных ны́не водворя́йся. И ны́не и при́сно и во ве́ки веко́в. Ами́нь. Богородичен: Храм была́ еси́ свяще́н вся хоте́нием, Де́во, Созда́вшего,/ Того́ бо вмести́ла еси́, все́ми Невмести́маго, мир обновля́юща./ Те́мже Тя, Богоро́дицу, пропове́дуем. Песнь 8 Ирмос: Пе́щь иногда́ о́гненная в Вавило́не де́йства разделя́ше,/ Бо́жиим веле́нием халде́и опаля́ющая,/ ве́рныя же ороша́ющая, пою́щия:/ благослови́те, вся дела́ Госпо́дня, Го́спода. Припев: Преподо́бне о́тче Ники́то, моли́ Бо́га о на́с. Вся́ко превзоше́д чу́вство, треблаже́нне,/ мы́сленному ны́не прибли́жился еси́ Све́ту, всече́стне,/ Боговиде́ния сподобля́емь и просвеще́ния исполня́емь, зовы́й:/ благослови́те, вся дела́ Госпо́дня, Го́спода. Припев: Преподо́бне о́тче Ники́то, моли́ Бо́га о на́с. Ме́ртвостию страсте́й я́ве облече́н,/ к живоно́сному возше́л еси́ ликова́нию, всеблаже́нне,/ благоче́стием разжиза́емь и доброде́тельми осия́емь, зовы́й:/ превозноси́те, вся дела́ Госпо́дня, Го́спода. Припев: Преподо́бне о́тче Ники́то, моли́ Бо́га о на́с. Вся́ку доброде́тель, Богому́дре, от младе́нства извы́к,/ при кончи́не по́двиг твои́х венце́м украша́емь благода́тным показа́лся еси́/ и по́честь прия́л еси́, поя́:/ превозноси́те, вся дела́ Госпо́дня, Го́спода. Сла́ва Отцу́ и Сы́ну и Свято́му Ду́ху. Свы́ше нас ны́не назира́еши, о́тче, твоему́ Влады́це предстоя́,/ побе́ды, тезоимени́те, дерзнове́ние мно́го име́я/ и душе́внаго прося́, сла́вне, спасе́ния, священноявле́нне, ста́ду твоему́. И ны́не и при́сно и во ве́ки веко́в. Ами́нь. Богородичен: Ты Отцу́ неразлу́чнаго, в ложесна́х богому́жно пожи́вша,/ безсе́менно зачала́ еси́ и несказа́нно родила́ еси́, Богороди́тельнице Пречи́стая:/ те́мже Тя, спасе́ние всех нас, познава́ем. Песнь 9 Ирмос: Безнача́льна Роди́теля Сын, Бог и Госпо́дь,/ вопло́щся от Де́вы, нам яви́ся,/ омраче́нная просвети́ти, собра́ти расточе́нная./ Тем Всепе́тую Богоро́дицу велича́ем. Припев: Преподо́бне о́тче Ники́то, моли́ Бо́га о на́с. Боже́ственныя све́тлости, я́ко чист, сподо́бился еси́,/ доброде́телей ви́ды облиста́яся/ и испове́дания венце́м я́ве украша́емь,/ те́мже всепра́зднственный пра́здник твой ублажа́ем. Припев: Преподо́бне о́тче Ники́то, моли́ Бо́га о на́с. Смы́сленно, блаже́нне, твою́ жи́знь соверши́л еси́, повеле́ньми Спа́са управля́емь,/ ны́не же, се́ни преше́дшей,/ прера́достно жи́знь ве́чную досто́йно получи́л еси́,/ богоявле́нно, свяще́ннейше. Сла́ва Отцу́ и Сы́ну и Свято́му Ду́ху. Теку́щих бы́стро прете́кл еси́ мяте́ж,/ к ти́хому же, Ники́то, Ца́рства Христо́ва, ра́дуяся, устреми́лся еси́ приста́нищу,/ к нему́же нас наста́ви, о́тче,/ тя блажа́щия и твою́ па́мять почита́ющия. И ны́не и при́сно и во ве́ки веко́в. Ами́нь. Тя свиде́ния се́нь прообразова́,/ в не́йже скрижа́ли, и ста́мна, и златы́й ковче́г,/ я́коже бо она́ о́ныя,/ та́ко и Ты Безнача́льнаго Сло́ва во утро́бе вмести́ла еси́,/ Богоро́дице, воплоща́ема.