Молитвы

Минея, 7 Сентября, Канон святителя Иоанна Глас 8 Песнь 1 Ирмос: Во́ду проше́д я́ко су́шу,/ и еги́петскаго зла избежа́в,/ изра́ильтянин вопия́ше:// Изба́вителю и Бо́гу на́шему пои́м. Припев: Святи́телю о́тче Иоáнне, моли́ Бо́га о на́с. Богозва́нне, я́ко вои́стину ми́лостив и кро́ток был еси́, о́тче,/ и вои́стину тих ду́хом,/ и одесну́ю Престо́ла Бо́жия стоя́ния сподо́бился еси́, блаже́нне;/ и ны́не, на Небесе́х сый, тишину́ пода́ждь се́рдцу моему́. Припев: Святи́телю о́тче Иоáнне, моли́ Бо́га о на́с. От млады́х ногте́й, святи́телю Иоа́нне,/ впери́лся еси́ умо́м к Бо́гу/ и стра́сти теле́сныя зо́льным воздержа́нием увяди́л еси́,/ вся́кими доброде́тельми украша́яся, прему́дре. Сла́ва Отцу́ и Сы́ну и Свято́му Ду́ху. Егда́ иере́йский сан восприя́т,/ и Госпо́дня оправда́ния внима́я умо́м, святи́телю Иоа́нне,/ и от среды́ молвы́ удаля́лся, прему́дре,/ нечистоте́ не прикаса́лся еси́./ Та́ко, святи́телю, нечи́стая помышле́ния отжени́ от се́рдца моего́. И ны́не и при́сно и во ве́ки веко́в. Ами́нь. Богородичен: Правосла́вия был еси́ учи́тель и́стинный и к Богоро́дице ве́лий моле́бник./ Но и ны́не, святи́телю, при́сно не преста́й посеща́я чад твои́х,/ я́ко к Бо́гу дерзнове́ние име́яй ве́лие. Песнь 3 Ирмос: Ты еси́ утвержде́ние/ притека́ющих к Тебе́, Го́споди,/ Ты еси́ Свет омраче́нных,// и пое́т Тя дух мой. Припев: Святи́телю о́тче Иоáнне, моли́ Бо́га о на́с. Я́ко у́бо со́лнце взы́де на восто́це,/ ты же, святи́телю Иоа́нне, на се́вере, на престо́ле седя́ Вели́каго Нова́града, возсия́л еси́ све́тлыми дея́ньми,/ и лю́ди вся просвети́л еси́ уче́нии,/ и еретико́в уста́ и́стинным сло́вом загради́л еси́. Припев: Святи́телю о́тче Иоáнне, моли́ Бо́га о на́с. Благообра́зен обы́чай име́я/ и ко всем любо́вь Боже́ственную притяжа́в, прему́дре Иоа́нне,/ ва́рваром остроту́ притупи́, святи́телю, и до конца́ их низложи́. Сла́ва Отцу́ и Сы́ну и Свято́му Ду́ху. Предочи́стив се́рдце твое́, моля́щуся тебе́ Бо́гу о по́льзе людсте́й,/ слы́шал еси́ глас Боже́ственный, глаго́лющ ти, е́же о поле́зных:/ моли́тва бо твоя́ услы́шана бысть,/ я́коже вели́каго о ста́де твое́м к Бо́гу моле́бника, святи́телю Иоа́нне. И ны́не и при́сно и во ве́ки веко́в. Ами́нь. Богородичен: Совокупи́, Пречи́стая, вся правосла́вныя,/ е́же просла́вити Тя, Цари́це, Царя́ Христа́ ро́ждшую;/ дале́че же от нас отжени́ ва́рварское негодова́ние;/ рабу́ же Твоему́ пода́ждь сло́во,/ да возмогу́ воспе́ти Твоя́ пресла́вная чудеса́. Седален, глас 4 Егда́ моля́щуся тебе́ в вели́цей це́ркви Прему́дрости Бо́жия,/ преблаже́нне Иоа́нне,/ предочище́нный душо́ю и те́лом,/ гла́су же Боже́ственному явле́нно тебе́ возгласи́вшу,/ е́же о чудеси́ Богоро́дицы, и о избавле́нии гра́да,/ и о украше́нии Це́ркве Христо́вы,/ и прия́т от слове́с чуднаго о́наго гла́са и́стинных зна́мений и чуде́с дарова́ния,/ и Боже́ственная уче́ния излива́еши всем./ Те́мже и с любо́вию, о́тче, пра́зднуем святу́ю па́мять твою́. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Де́ва Мари́я и Богоро́дица вои́стину,/ я́ко о́блак све́та, днесь возсия́ нам/ и от пра́веднику происхо́дит в сла́ву на́шу;/ не ктому́ Ада́м осужда́ется,/ и Е́ва от уз свободи́ся./ И сего́ ра́ди зове́м, вопию́ще со дерзнове́нием еди́ней Чи́стей:/ ра́дость возвеща́ет рождество́ Твое́ всей вселе́нней. Песнь 4 Ирмос: Услы́шах, Го́споди,/ смотре́ния Твоего́ та́инство,/ разуме́х дела́ Твоя́// и просла́вих Твое́ Божество́. Припев: Святи́телю о́тче Иоáнне, моли́ Бо́га о на́с. Законополо́жника вели́ка, я́ко Моисе́я тя и Дави́да,/ вои́стину стяжа́вше, о́тче, ча́да твоя́,/ я́ко чадолюби́ва отца́, сы́нове Росси́йстии ублажа́ем. Припев: Святи́телю о́тче Иоáнне, моли́ Бо́га о на́с. Мно́ги у́бо це́ркви в сла́ву Бо́жию воздви́гшу ти, святи́телю,/ показа́лся еси́ сам храм Бо́гу соверше́н и нескве́рнен,/ чист душо́ю и те́лом, прему́дре,/ те́мже и нас сотвори́ хра́мы Ду́ха Пресвята́го, преблаже́нне. Сла́ва Отцу́ и Сы́ну и Свято́му Ду́ху. Дне сын яви́лся еси́, в нощи́ же моля́щуся тебе́ Бо́гу/ в просвеще́нии слове́с Бо́жиих, о́тче Иоа́нне./ Враг ненави́димый хотя́ше постраши́ти тя,/ не терпя́ себе́ надо́лзе досажда́ема,/ но моли́твою твое́ю связа́ся вселука́вый. И ны́не и при́сно и во ве́ки веко́в. Ами́нь. Богородичен: Влады́чице Богоро́дице, уста́ви церко́вное смуще́ние,/ во благостоя́нии же учини́ во ве́ки веко́в,/ и еретико́в уста́ загради́, возлюби́вших огнь негаси́мый,/ от него́же изба́ви нас, рабо́в Твои́х,/ и послужи́ти небла́зненно сподо́би/ И́же под ле́том бы́вшу и от Отца́ безле́тно возсия́вшу, Богома́ти:/ Того́ бо нам родила́ еси́. Песнь 5 Ирмос: У́тренюет дух мой к Тебе́, Бо́же,/ зане́ свет повеле́ния прише́ствия Твоего́:/ и́миже у́бо озари́ ум наш, Влады́ко,// и наста́ви на стезю́ жи́зни. Припев: Святи́телю о́тче Иоáнне, моли́ Бо́га о на́с. Честно́е Воскресе́ние и Гроб Живоно́сный и́скренно узре́л еси́ во Иерусали́ме,/ две́рем церко́вным о себе́ тебе́ отве́рзшимся манове́нием Свята́го Ду́ха,/ и сподо́бился еси́ боговиде́ния почерпсти́, святи́телю Иоа́нне,/ искуси́теля же вся́чески победи́л еси́./ И ны́не моли́ся Христу́ Бо́гу,/ е́же победи́ти вся иноплеме́нныя и неве́рныя правосла́вному наро́ду на́шему. Припев: Святи́телю о́тче Иоáнне, моли́ Бо́га о на́с. Вели́каго Нова́града насто́льник и архиепи́скоп был еси́/ и в Дому́ Прему́дрости Бо́жия, я́ко фи́никс, процве́л еси́,/ словесы́ благопло́дными и непоро́чным житие́м наслажда́я сердца́,/ прему́дре и богодухнове́нне./ И мы у́бо, ча́да твоя́, мо́лим тя, блаже́нне,/ да моли́твами твои́ми ми́лость получи́м от Спа́са Христа́,/ и я́ко на чадолюби́ва отца́ наде́емся. Сла́ва Отцу́ и Сы́ну и Свято́му Ду́ху. Бо́жия Це́рковь жива́ и одушевле́на бысть, святи́телю вели́кий Иоа́нне,/ в Це́ркви Бо́жией простира́лся во дни и в нощи́, прему́дре,/ к Прему́дрости Бо́жии прилежа́:/ служи́тель бо и собесе́дник Бо́жий я́вственнейший был еси́,/ и Вели́каго Нова́града похвала́, и всея́ Росси́йския земли́ удобре́ние,/ правосла́вным лю́дем моли́твами твои́ми здра́вие да́руй и на пога́ныя побе́ды и одоле́ния. И ны́не и при́сно и во ве́ки веко́в. Ами́нь. Богородичен: Це́рковь Тя Бо́жию, и пала́ту одушевле́нну,/ и ру́чку, в не́йже ма́нна, и жезл прозя́бший, и го́ру несеко́мую,/ и вся я́же о Тебе́ сбы́вшаяся проро́чества, Богоро́дице,/ служи́тель Твой, вели́кий святи́тель Иоа́нн славосло́вляше,/ и мо́лим Тя, еди́ну челове́ческаго ро́да отъе́мшую поноше́ние. Песнь 6 Ирмос: К могу́щему мя спасти́ Го́споду/ из глубины́ грехо́вныя возопи́х,/ и от тли возведе́ живо́т мой,// я́ко Человеколю́бец. Припев: Святи́телю о́тче Иоáнне, моли́ Бо́га о на́с. К могу́щему Бо́гу ру́це простира́я иногда́, и спасе́ние обре́л еси́,/ вода́м же послужи́вшим тебе́ чрез естество́ Бо́жиим повеле́нием,/ искуси́тель же посрами́ся, и возрыда́, и до конца́ поги́бе/ твои́ми моли́твами, Иоа́нне святи́телю. Припев: Святи́телю о́тче Иоáнне, моли́ Бо́га о на́с. Бо́гу тя просла́вльшу, я́коже дре́вле Моисе́я, прему́дре Иоа́нне,/ предста́ви бо тя па́стыря и вожда́,/ мо́ре жите́йское преводя́ща небла́зненно лю́ди,/ и́хже Христо́с искупи́ Свое́ю Кро́вию. Сла́ва Отцу́ и Сы́ну и Свято́му Ду́ху. Самоде́ржца ума́ страсте́й сотвори́в,/ я́ве ца́рствовал еси́, я́ко изря́дный победи́тель,/ и ра́тных де́рзость покори́л еси́ моле́нием к Бо́гу и к Пречи́стей Богома́тери./ Ны́не же спосо́бствуй ве́рным твои́м на проти́вныя,/ Иоа́нне, вели́кий святи́телю. И ны́не и при́сно и во ве́ки веко́в. Ами́нь. Богородичен: Кре́пость ве́рным, и стена́, и утвержде́ние Ты еси́, Пречи́стая,/ даде́ся от пра́ведных Иоаки́ма и А́нны;/ и по Гаврии́лову благове́щению Бог роди́ся из Тебе́./ Тобо́ю, Пречи́стая, всем истека́ют лу́чшая/ и на земли́ живу́щии к Небеси́ восхо́дят. Кондак, глас 4 Возвесели́ся явле́нно честна́я Це́рковь Христо́ва/ в па́мять днесь приснослову́щаго святи́теля Иоа́нна,/ от Вели́каго Нова́града возсия́вшаго,/ и всю страну́ удиви́вшаго пресла́вными чудодея́нии,/ и все́ми доброде́тельми украси́вшагося./ И по преставле́нии бо честно́е те́ло его́ обре́теся нетле́нно,/ источа́ющее ве́лия чудеса́./ Те́мже зове́м ему́: о всеблаже́нне!/ Моли́ Христа́ Бо́га непреста́нно о всех нас. Икос Пра́зднуем све́тло днесь, к це́ркви теку́ще, весь свяще́нный собо́р, и мона́си, и мно́жество наро́да, и все христоимени́тое ста́до,/ в па́мять отца́ на́шего святи́теля Иоа́нна./ Прославля́ем бо просла́вленнаго от Бо́га,/ его́же житию́ А́нгели удиви́шася,/ и ненака́занным в наказа́ние бысть,/ и огражде́ние помышле́нием челове́ческим,/ и Це́ркви основа́ние,/ непа́дающий бо столп Прему́дрости Бо́жия,/ и Вели́каго Нова́града стена́ и утвержде́ние,/ и всея́ Росси́йския земли́ удобре́ние,/ и вселе́нную удиви́вшаго пресла́вными чудодея́нии,/ и все́ми доброде́тельми украси́вшагося./ Те́мже по достоя́нию блажи́м его́,/ мо́лит бо Христа́ о всех нас. Песнь 7 Ирмос: Халде́йския пе́щи всепа́губную си́лу угаси́вше/ о́бразом А́нгела снизше́дшаго,/ Зижди́телю ю́ноши взыва́ху:// благослове́н еси́ и хва́льный, Бо́же оте́ц на́ших. Припев: Святи́телю о́тче Иоáнне, моли́ Бо́га о на́с. Изнемо́гше иногда́ лю́дие, ору́жия проти́вных ви́дяще;/ ты же тогда́, Иоа́нне блаже́нне, я́рость на грех вооружи́л еси́,/ на моли́тву обрати́вся к ми́лостивому Бо́гу,/ и услы́шана бысть моли́тва твоя́,/ и лю́ди научи́л еси́ взыва́ти: благослове́н Бог отце́в на́ших. Сла́ва Отцу́ и Сы́ну и Свято́му Ду́ху. Не се́ни у́бо послужи́л еси́, но но́вей благода́ти и и́стине,/ зако́н бо богопи́сан внутрь скрижа́ли се́рдца твоего́ от Бо́га прие́м, святи́телю Иоа́нне пребога́те./ Те́мже зако́н нам Полага́ющему научи́л еси́ взыва́ти: благослове́н Бог отце́в на́ших. И ны́не и при́сно и во ве́ки веко́в. Ами́нь. Богородичен: Во све́те Госпо́дни ходя́ще,/ прииди́те, воспои́м Боже́ственную дверь Царя́ ца́рствующим, Мари́ю, Чи́стую Богоро́дицу,/ я́ко вои́стину наде́жду душ на́ших, зову́щим:/ благослове́н Бог отце́в на́ших. Песнь 8 Ирмос: На горе́ святе́й просла́вльшася/ и в купине́ огне́м Присноде́вы/ Моисе́ови та́йну я́вльшаго/ Го́спода по́йте// и превозноси́те во вся ве́ки. Припев: Святи́телю о́тче Иоáнне, моли́ Бо́га о на́с. С Небе́сными чи́нми водворя́яся во дво́рех Госпо́дних,/ во гра́де Жива́го Бо́га, святи́телю Иоа́нне равноа́нгельный,/ всено́щными стоя́нии вопи́л еси́ во бде́ниих:/ хвали́те и превозноси́те Его́ во ве́ки. Припев: Святи́телю о́тче Иоáнне, моли́ Бо́га о на́с. Днесь све́тло пра́зднует Вели́кий Но́вград па́мять твою́,/ красу́ется житие́м твои́м преди́вным, Иоа́нне святи́телю./ Не помяни́ согреше́ний чад твои́х, о́тче,/ но, я́ко чадолюби́вый оте́ц, на ми́лость обрати́ся,/ моля́ ми́лостиваго Бо́га, Ему́же пое́м:/ хвали́те и превозноси́те Его́ во ве́ки. Сла́ва Отцу́ и Сы́ну и Свято́му Ду́ху. Храм свяще́нная душа́ твоя́ показа́ся Бо́жий,/ в не́йже Отец и Сын и Святы́й Дух па́че естества́ всели́ся,/ ты же, святи́телю, пога́ных нахожде́ния отжени́ от достоя́ния твоего́,/ правосла́вным лю́дем мир и здра́вие да́руй, зову́щим:/ хвали́те, по́йте и превозноси́те Его́ во ве́ки. И ны́не и при́сно и во ве́ки веко́в. Ами́нь. Богородичен: Пои́стине вели́ким да́ром от Бо́га почте́н быв, святи́телю Иоа́нне,/ я́ко сподо́бился еси́ послужи́ти чудеси́ Святы́я Богоро́дицы,/ преди́вному Ея́ зна́мению./ Моли́тва бо твоя́ поспешеству́ема к Бо́гу и к Пречи́стей Его́ Богома́тере:/ пои́стине бо моли́тва пра́веднаго поспешеству́ема. Песнь 9 Ирмос: Ужасе́ся о сем Не́бо,/ и земли́ удиви́шася концы́,/ я́ко Бог яви́ся челове́ком пло́тски/ и чре́во Твое́ бысть простра́ннейшее Небе́с./ Тем Тя, Богоро́дицу,// А́нгелов и челове́к чинонача́лия велича́ют. Припев: Святи́телю о́тче Иоáнне, моли́ Бо́га о на́с. Удиви́л еси́ челове́ки в животе́ твое́м, преди́вный Иоа́нне,/ и по преставле́нии твое́м к Бо́гу/ вы́ше обы́чая вся чудеса́ соверши́шася в тебе́,/ Христу́ тя та́ко просла́вльшу,/ я́ко и́стинна служи́теля Своего́./ Мы же тя, я́ко кре́пка, свя́те, помо́щника во бране́х, ублажа́ем. Припев: Святи́телю о́тче Иоáнне, моли́ Бо́га о на́с. Мир Це́рквам пода́ждь, святи́телю, твои́ми моли́твами/ и хору́гви правосла́вной по́мощь на враги́ вся проти́вныя/ и рог Росси́йския земли́ возвы́си, блаже́нне,/ предстоя́ Престо́лу Святы́я Тро́ицы./ И от нас неотсту́пен бу́ди, неотсту́пный к Бо́гу моли́твенниче,/ те́мже тя ублажа́ем. Сла́ва Отцу́ и Сы́ну и Свято́му Ду́ху. Ма́лое сие́ и смире́нное хвале́ние приими́, святи́телю,/ от недосто́йных усте́н, и ме́рзкаго моего́ язы́ка,/ и от се́рдца нечи́ста:/ ты бо, вели́кий святи́телю Иоа́нне, преочище́нный душе́ю и те́лом,/ па́че со́лнечных луч облиста́л еси́, Бо́жия за́поведи соверша́в,/ и к Све́ту Невече́рнему преста́вился еси́./ Ве́рно тя чту́щим моли́ся пода́ти оставле́ние грехо́в, Иоа́нне блаже́нне. И ны́не и при́сно и во ве́ки веко́в. Ами́нь. Богородичен: Свята́я Блаже́нная Ма́ти Бо́жия, пою́щия Тя любо́вию спаса́,/ искуше́ний молву́ разоря́ющи ми́лостивно:/ я́ко Бо́га ро́ждши, вся, ели́ка хо́щеши, твори́ти мо́жеши, Де́во,/ те́мже Тя велича́ем. Светилен От Све́та Трисия́ннаго глас услы́шал еси́ Боже́ственный, святи́телю Иоа́нне,/ и Тро́ицу просла́вил еси́ во Еди́нице и Еди́ницу в Тро́ице,/ и лю́ди та́кожде научи́л еси́,/ и просвети́л еси́ мирски́я концы́ твои́м уче́нием./ Те́мже тя досто́йно почита́ем,/ творя́ще честну́ю па́мять твою́.

Минея, 8 Мая, Канон апостола Глас 8 Песнь 1 Ирмос: Колесницегони́теля фарао́ня погрузи́/ чудотворя́й иногда́/ Моисе́йский жезл, крестообра́зно порази́в/ и раздели́в мо́ре,/ Изра́иля же беглеца́, пешехо́дца спасе́,/ песнь Бо́гови воспева́юща. Припев: Святы́й апо́столе и евангели́сте Иоа́нне, моли́ Бо́га о на́с. Яко чист и возлю́блен был еси́ нетле́нному Све́ту,/ и на пе́рсех Сего́ возле́г, упоко́ився,/ дерзнове́нною душе́ю, из бе́здны прему́дрости Свет ра́зума извле́кл еси́,/ блаже́нне Иоа́нне апо́столе. Сла́ва Отцу́ и Сы́ну и Свято́му Ду́ху. Преесте́ственне богосло́вя, возгреме́л еси́, возлю́бленне, Христу́:/ в нача́ле бе Сло́во, жи́во и воипоста́сно ко Своему́ Роди́телю,/ и Бог бе Сло́во, и плоть Сло́во бысть,/ и Бог пребы́сть непрело́жен. И ны́не и при́сно и во ве́ки веко́в. Ами́нь. Богородичен: Под Кров Твой, Чи́стая, прибега́юще,/ огреба́емся напа́стей вся́ких находя́щих, Пречи́стая,/ тем и ны́не мо́лим: па́дшия из глубины́ прегреше́ний возведи́/ Боже́ственными Твои́ми, Чи́стая, мольба́ми. Песнь 3 Ирмос: Утвержде́й в нача́ле небеса́ ра́зумом/ и зе́млю на вода́х основа́вши,/ на ка́мени мя, Христе́, за́поведей Твои́х утверди́,/ я́ко несть свят, па́че Тебе́, Еди́не Человеколю́бче. Припев: Святы́й апо́столе и евангели́сте Иоа́нне, моли́ Бо́га о на́с. От ры́барей лове́ц челове́ков и Богосло́в был еси́, му́дре Иоа́нне,/ пренебре́г оте́ческую и мирску́ю любо́вь/ и Влады́це Сло́ву жела́нием Боже́ственным после́дуя. Сла́ва Отцу́ и Сы́ну и Свято́му Ду́ху. Очище́н душе́вным о́ком, о Богосло́ве,/ узре́л еси́ неизрече́нную сла́ву, от Отца́ единоро́днаго Сло́ва и Сы́на Бо́жия,/ И́мже му́дре вся Боже́ственным бы́ша Ду́хом. И ны́не и при́сно и во ве́ки веко́в. Ами́нь. Богородичен: Под Твое́ спаси́тельное прибе́жище притека́ем, Богоро́дице Де́во,/ и спаса́емся наве́та вра́жия моли́твами Твои́ми/ и бу́дущаго, Чи́стая, избавля́емся муче́ния. Седален, глас 8 Прему́дрости на пе́рси возле́г и ра́зума су́щих навы́к,/ боже́ственно возгреме́л еси́:/ в нача́ле бе Сло́во./ До́бре написа́в пе́рвее безнача́льное рождество́, пропове́дал еси́ всем Сло́ва воплоще́ние./ Те́мже и язы́ком, я́ко мре́жею, улови́в язы́ки,/ по благода́ти Ду́ха изуча́еши концы́, и просвеща́еши чудесы́, Богосло́ве апо́столе,/ моли́ Христа́ Бо́га грехо́в оставле́ние дарова́ти/ пра́зднующим любо́вию святу́ю па́мять твою́. Песнь 4 Ирмос: Ты моя́ кре́пость, Го́споди,/ Ты моя́ и си́ла,/ Ты мой Бог, Ты мое́ ра́дование,/ не оста́вль не́дра О́тча/ и на́шу нищету́ посети́в./ Тем с проро́ком Авваку́мом зову́ Ти:/ си́ле Твое́й сла́ва, Человеколю́бче. Припев: Святы́й апо́столе и евангели́сте Иоа́нне, моли́ Бо́га о на́с. Тя Гро́мова сы́на Госпо́дь нарече́, тя греме́ти Ду́хом сподо́би/ Своего́ от Отца́ Боже́ственнаго и непостижи́маго рожде́ния неизрече́нное./ Тем твою́, Богосло́ве, всепра́зднственную па́мять пе́сньми досто́йно сла́вим. Сла́ва Отцу́ и Сы́ну и Свято́му Ду́ху. Ты доброде́тельми возше́л еси́, апо́столе, на высоту́,/ ты узре́л еси́ сла́вою блиста́ющее единоро́дное Сло́во во пло́ти,/ во Оте́ческих безнача́льно не́дрех седя́щее,/ гла́са же услы́шати Оте́ческаго сподо́бился еси́, свиде́тельствующа Того́ Сыновство́. И ны́не и при́сно и во ве́ки веко́в. Ами́нь. Богородичен: Под Твое́ ны́не прибега́я заступле́ние,/ непотре́бный раб Твой, Всенепоро́чная, да не постыжу́ся:/ Тя бо к Бо́гу и́мам Предста́тельницу и сте́ну нера́тну,/ о Тебе́ и бу́дущия да наслажду́ся тишины́ и Боже́ственныя жи́зни, молю́ся. Песнь 5 Ирмос: Вскую мя отри́нул еси́/ от лица́ Твоего́, Све́те незаходи́мый,/ и покры́ла мя есть чужда́я тьма, окая́ннаго?/ Но обрати́ мя и к све́ту за́поведей Твои́х/ пути́ моя́ напра́ви, молю́ся. Припев: Святы́й апо́столе и евангели́сте Иоа́нне, моли́ Бо́га о на́с. Во тьме ми́ра просия́вший, ви́дев Свет Пречи́ст, раствори́лся еси́ любо́вию/ и, свети́льник благоче́стия быв, многосе́мейных ро́ды язы́к/ Богосло́вия, Иоа́нне, све́том осия́л еси́. Сла́ва Отцу́ и Сы́ну и Свято́му Ду́ху. Уве́дев, я́ко зако́н Моисе́ом се́нный дан бысть,/ Боже́ственная же благода́ть Христо́м Бо́гом на́шим бысть,/ богосло́вным язы́ком, сы́не гро́мов возлю́бленне, благовести́л еси́ Его́ Божество́. И ны́не и при́сно и во ве́ки веко́в. Ами́нь. Богородичен: Ты ми покро́в и держа́ва, Пречи́стая,/ и утвержде́ние, и стена́ неруши́ма, и Тя призыва́ю:/ в нощи́ и во дни мя соблюда́й от вся́каго вре́да велиа́ра находя́щаго,/ да ве́рою и любо́вию сла́влю Тя. Песнь 6 Ирмос: Бе́здна грехо́в и прегреше́ний бу́ря мя смуща́ет/ и во глубину́ ну́жднаго ре́ет мя отча́яния,/ но Твою́ кре́пкую ру́ку мне простри́, я́ко Петро́ви,/ о Упра́вителю, и спаси́. Припев: Святы́й апо́столе и евангели́сте Иоа́нне, моли́ Бо́га о на́с. Угль Боже́ственнаго огня́ прови́де обра́зно Иса́ия,/ очи́стив устне́, проро́чества сподо́бися;/ воплоти́вшагося же Бо́га Сло́ва, блаже́нне Иоа́нне, ты яви́лся еси́ напе́рсник. Сла́ва Отцу́ и Сы́ну и Свято́му Ду́ху. Сло́во Сый единоро́дное, Еже в не́дрех Оте́ческих седя́щее,/ воплоще́нно узре́ся, Иоа́нне блаже́нне,/ и я́ко таи́ннику возлю́бленну тебе́ сказа́,/ безпло́тне Бо́га никому́же ви́дети когда́. И ны́не и при́сно и во ве́ки веко́в. Ами́нь. Богородичен: Просвети́ мою́ ду́шу, ро́ждшая озаре́ние сла́вы О́тчи,/ Де́во Богоро́дице Всепе́тая,/ Твою́ бо и́стинную благода́ть иму́ще, бесе́ды языковре́дия возбраня́емся. Кондак, глас 2 Вели́чия твоя́, де́вственниче, кто пове́сть?/ То́чиши бо чудеса́, и излива́еши исцеле́ния,/ и мо́лишися о душа́х на́ших,/ я́ко Богосло́в и друг Христо́в. Икос Высоты́ Небе́сныя уве́дети и мо́ря глубины́ испыта́ти де́рзостно есть и непостижи́мо./ Я́коже бо зве́зды исчести́ и морски́й песо́к невозмо́жно отню́д,/ си́це и Богосло́ва исправле́ния изрещи́ недово́льно есть./ Толи́цеми того́ венцы́ Христо́с, Его́же возлюби́, венча́,/ Ему́же и на пе́рси возле́г,/ и на та́йней ве́чери с Ним яде́,/ я́ко Богосло́в и друг Христо́в. Песнь 7 Ирмос: Бо́жия снизхожде́ния/ огнь устыде́ся в Вавило́не иногда́,/ сего́ ра́ди о́троцы в пещи́, ра́дованною ного́ю,/ я́ко во цве́тнице, лику́юще, поя́ху:/ благослове́н еси́, Бо́же оте́ц на́ших. Припев: Святы́й апо́столе и евангели́сте Иоа́нне, моли́ Бо́га о на́с. Усе́рдно изше́л еси́ уз ве́щи, о всеблаже́нне, я́ко Бо́жий предста́тель,/ и, Богодухнове́ннаго быв ве́стник Богосло́вия, вопи́ти научи́л еси́:/ благослове́н еси́, Бо́же оте́ц на́ших. Припев: Святы́й апо́столе и евангели́сте Иоа́нне, моли́ Бо́га о на́с. Я́ко траву́ вмени́л еси́ зла́то и бога́тство, о всеблаже́нне,/ и се́но, я́ко зла́то, тебе́ де́йством Боже́ственным бысть,/ богосло́вящу Соде́теля и Го́спода:/ благослове́н еси́, Бо́же оте́ц на́ших. Сла́ва Отцу́ и Сы́ну и Свято́му Ду́ху. Дух Святы́й, от Отца́ Безнача́льнаго исходя́щ/ и от Тебе́ неразде́льне прие́млемь, Сло́ве Единоро́дне Бо́жий,/ апо́столом зва́ти возвести́л еси́:/ благослове́н еси́, Бо́же оте́ц на́ших. И ны́не и при́сно и во ве́ки веко́в. Ами́нь. Богородичен: Храм и пала́та Царя́ Христа́ была́ еси́ и одр еди́на Соломо́нов,/ Его́же, я́коже рече́ Писа́ние, окружа́ют си́льнии шестьдеся́т,/ с Тобо́ю ны́не, Де́во, зову́т и пою́т:/ благослове́н еси́, Бо́же оте́ц на́ших. Песнь 8 Ирмос: Седмери́цею пещь/ халде́йский мучи́тель/ Богочести́вым неи́стовно разжже́,/ си́лою же лу́чшею спасе́ны, сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки. Припев: Святы́й апо́столе и евангели́сте Иоа́нне, моли́ Бо́га о на́с. Я́ко благоле́пна и благознамени́та пресла́вная па́мять твоя́,/ благове́стниче Иису́сова Божества́,/ Боже́ственная, благоуха́ющи, Це́ркви возсия́./ Тем, ра́дующеся, ве́рнии, пое́м:/ о́троцы, благослови́те, свяще́нницы, воспо́йте,/ лю́дие, превозноси́те во вся ве́ки. Сла́ва Отцу́ и Сы́ну и Свято́му Ду́ху. Богосло́ва иму́ще ли́ку чинонача́льника, Тя от него́, Христе́, богосло́вима,/ Бо́га возвеща́ем со Отце́м и Ду́хом и, единонача́льственне песносло́вяще, вопие́м:/ о́троцы, благосло́вите, свяще́нницы, воспо́йте,/ лю́дие, превозноси́те во вся ве́ки. И ны́не и при́сно и во ве́ки веко́в. Ами́нь. Богородичен: Воплоще́ннаго родила́ еси́ Бо́га Сло́ва, Всенепоро́чная,/ Сего́ умоли́ огня́ мя изба́вити:/ се бо житие́ мое́ все отягчи́ся, все порабо́тися лю́тыми греха́ми./ Тем к Тебе́, Де́во, прибега́ю и Тя призыва́ю, Обра́дованную. Песнь 9 Ирмос: Ужасе́ся о сем Не́бо,/ и земли́ удиви́шася концы́,/ я́ко Бог яви́ся челове́ком пло́тски/ и чре́во Твое́ бысть простра́ннейшее небе́с./ Тем Тя, Богоро́дицу,/ А́нгелов и челове́к чинонача́лия велича́ют. Припев: Святы́й апо́столе и евангели́сте Иоа́нне, моли́ Бо́га о на́с. Кресту́ Влады́чню предстоя́й, Де́ве же и Богоро́дице Чи́стей,/ учени́к возлю́бленный, чи́стый Богосло́вия орга́н,/ я́коже де́вственник вруче́ние прия́т и, храни́тель Непоро́чныя быв Богоро́дицы,/ ны́не досто́йно ублажа́ется. Сла́ва Отцу́ и Сы́ну и Свято́му Ду́ху. Досто́йно возлю́бль Пречи́стый честно́е и непоро́чное житие́ твое́,/ а́нгельски пожи́вша на земли́, тя в бра́та ме́сто прия́т, блаже́нне Иоа́нне,/ Свое́й сы́на тя возвести́ Ма́тери Богоро́дице,/ с Не́юже тя вси ублажа́ем. И ны́не и при́сно и во ве́ки веко́в. Ами́нь. Богородичен: Спаси́тельный бу́ди ми столп, Чи́стая,/ де́монов безде́льны сотвори́ полки́, искуше́ний молву́ и бед отрева́ющи,/ и страсте́й нахо́ды дале́че отгоня́ющи, и чи́стое даю́щи свобожде́ние,/ и Боже́ственная дарова́ния незави́стне мне преподаю́щи. Светилен Гро́мов сын быв, к челове́ком богосло́вил еси́,/ е́же: в нача́ле бе Сло́во, – апо́столе Иоа́нне,/ возлеги́й бо на пе́рси ве́рно Влады́ки твоего́/ и отту́ду поче́рп Богосло́вия струи́, тварь всю напоя́еши.

Минея, 30 Января, Канон Глас 2 Песнь 1 Ирмос: Гряди́те, лю́дие, пои́м пе́снь Христу́ Бо́гу, разде́льшему мо́ре и наста́вльшему лю́ди, я́же изведе́ из рабо́ты еги́петския, я́ко просла́вися. Припев: Святи́телие Христо́ви, моли́те Бо́га о на́с. Ко́е благодаре́ние, ко́е противовоздая́ние, подоба́ющее на́шим, челове́цы, принесе́тся от на́с благоде́телем, и́миже ко е́же до́бре бы́ти наставля́емся? Припев: Святи́телие Христо́ви, моли́те Бо́га о на́с. Вити́йстии язы́цы, и хи́трости, и кова́рства, и вся́ слове́с си́ла ны́не в вину́ да сподви́гнутся еди́ну и, честву́юще взаи́м, да почту́т. Сла́ва Отцу́ и Сы́ну и Свято́му Ду́ху. Сво́йственнаго у́бо и́м не терпя́ху, дабы́ что́ стяжа́ти на земли́, небому́дреннии, храни́телие же яви́шася о́бщества и предста́телие, о́бщих у́бо и похва́л да сподо́бятся. И ны́не и при́сно и во ве́ки веко́в. Ами́нь. Богородичен: Тя́, о́бщее любоче́стие, Всенепоро́чная, на́шего естества́, вси́ сла́вим, уста́ еди́ны бы́вше и еди́но согла́сие соверши́вше. Песнь 3 Ирмос: На ка́мени мя́ ве́ры утверди́в, разшири́л еси́ уста́ моя́ на враги́ моя́, возвесели́бося ду́х мо́й, внегда́ пе́ти: не́сть свя́т, я́коже Бо́г на́ш, и не́сть пра́веден, па́че Тебе́, Го́споди. Припев: Святи́телие Христо́ви, моли́те Бо́га о на́с. Труба́ вели́кая Це́ркве, свети́льник, просвеща́яй вселе́нную, пропове́дник, веща́нием объе́мляй вся́ концы́, великоимени́тый Васи́лий сподвиза́ет собра́ние сие́. Припев: Святи́телие Христо́ви, моли́те Бо́га о на́с. Све́тел от жития́ и веще́й, све́тел от слове́с и уче́ний, во все́х пресиява́я па́че все́х, я́коже друго́е па́че зве́зд со́лнце, многопе́тый Богосло́в дне́сь блажи́тся. Сла́ва Отцу́ и Сы́ну и Свято́му Ду́ху. Се́ све́т ми́ра ми́ру све́тит, се́ земли́ со́ль зе́млю услажда́ет, се́ дре́во жи́зни безсме́ртия плоды́ предлага́ет, Златоу́стый святы́й. И́же умре́ти не хотя́щии, прииди́те, наслажда́йтеся. И ны́не и при́сно и во ве́ки веко́в. Ами́нь. Богородичен: Вся́ от небытия́ в бытие́ Сотвори́вый и естество́ Да́вый коему́ждо бы́вших, То́йже и да́нная естества́ прелага́ти ве́сть, я́коже хо́щет. Отону́дуже и слы́шимо е́сть, я́ко и Де́ва ро́ждши, — кто́ не удиви́тся? Седален, глас 8 Вели́кия свети́льники светоза́рныя, Це́ркве столпы́ неразори́мыя согла́сно да восхва́лим, и́же до́брых наслажда́ющиися и слове́с те́х, ку́пно и благода́ти: прему́драго Златоглаго́лива и Вели́каго Васи́лия с Григо́рием све́тлым Богосло́вом. К ни́мже и возопии́м, от се́рдца зову́ще: святи́телие тревелича́йшии, моли́теся Христу́ Бо́гу прегреше́ний оставле́ние дарова́ти пра́зднующим любо́вию святу́ю па́мять ва́шу. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Ду́шу мою́, Де́во, смире́нную, бу́рею жития́ искуше́ний ны́не я́ко кроме́ управле́ния бы́вшую, потопля́емую волна́ми, грехо́в бре́менем я́вльшуся преиспо́лнену и во дно́ а́дово приити́ бе́дствующу, предвари́, Богоро́дице, моли́тв Твои́х ми́лостию, тишину́ подаю́щи и бе́д изыма́ющи. Приста́нище бо Ты́ еси́ небу́рное, моля́щися Сы́ну Твоему́ и Бо́гу прегреше́ний оставле́ние дарова́ти ми́: Тя́ бо и́мам наде́жду, недосто́йный ра́б Тво́й. Песнь 4 Ирмос: Прише́л еси́ от Де́вы не хода́тай, ни а́нгел, но Са́м Го́споди вопло́щся, и спа́сл еси́ всего́ мя челове́ка; те́м зову́ ти́: сла́ва си́ле Твое́й, Го́споди. Припев: Святи́телие Христо́ви, моли́те Бо́га о на́с. Разу́мливы от ни́жния му́дрости бы́вше, правле́ние, пресла́внии, от Боже́ственныя стяжа́сте, те́мже, я́ко рабы́ню, сию́ о́ной всему́дре покори́сте. Сла́ва Отцу́ и Сы́ну и Свято́му Ду́ху. Любому́дрии, му́дрыя а́ще лю́бите, умудри́теся и глаго́лати научи́теся вси́, и́же словесе́м чудя́щиися, дея́ния опа́сству и виде́ния отту́ду обуча́ющеся. И ны́не и при́сно и во ве́ки веко́в. Ами́нь. Богородичен: Я́ко по́зден до́ждь, напоследи́ бы́вый, у́тренний, во́д и веко́в Соде́тель, во чре́во Твое́ ука́нув, Всенепоро́чная, во вре́мя прохлажда́яй оскудева́ющия. Песнь 5 Ирмос: Просвеще́ние во тме́ лежа́щих, спасе́ние отча́янных, Христе́ Спа́се мо́й, к Тебе́ у́тренюю, Царю́ ми́ра, просвети́ мя сия́нием Твои́м, ино́го бо ра́зве Тебе́ Бо́га не зна́ю. Припев: Святи́телие Христо́ви, моли́те Бо́га о на́с. Ты́ исто́чник Твои́х дарова́ний испи́ти весьма́, Человеколю́бче, да́л еси́ святы́м, ума́лен ника́коже истоща́нием, ми́р же ве́сь упои́в и́же от чре́ва и́х боже́ственными пото́ки. Припев: Святи́телие Христо́ви, моли́те Бо́га о на́с. Что́ ми зла́то? Что́ ми бога́тство, и сла́ва, и могу́тство? Ды́мове, расходя́щиися по возду́ху: вся́ да исче́знут, вся́ да прено́сит ве́тр. Мне́ бога́тство еди́но многорачи́тельно — учи́телей тро́ица вити́йствующая. Сла́ва Отцу́ и Сы́ну и Свято́му Ду́ху. То́чит река́ нетле́нную пи́щу и Боже́ственное питие́, то́чит а́лчущим безсме́ртное бра́шно и жа́ждущим нетле́нное питие́, вода́ жива́ во ве́ки и содержа́щая жи́вы пию́щия: вси́ многотеку́щия жи́зни насы́титеся. И ны́не и при́сно и во ве́ки веко́в. Ами́нь. Богородичен: Име́яше кре́пость на ны́ зло́ба, но не в коне́ц: изнемо́же бо по Де́ве, в кре́пости Си́льнаго ро́ждшей, подъе́мшаго плотску́ю не́мощь и си́льнаго в зло́бе умертви́вша. Песнь 6 Ирмос: Бе́здна мя́ мно́га грехо́вная окружа́ет, и вопию́ Ти, проро́ка подража́яй: от тли́ мя́, Го́споди, возведи́. Припев: Святи́телие Христо́ви, моли́те Бо́га о на́с. Сво́йства в Тро́ице три́ сбогосло́вите: нерожде́ние Отца́, Сло́ва же рожде́ние и Ду́ха исхожде́ние Сама́го. Припев: Святи́телие Христо́ви, моли́те Бо́га о на́с. Дне́сь до́му сему́ светоявле́нное спасе́ние: два́ бо и три́ со́бранныя Христо́с, во и́мя Свое́ почеству́яй, посреде́ прису́тствует си́х. Сла́ва Отцу́ и Сы́ну и Свято́му Ду́ху. Неиспы́танна земна́я глубина́ к небе́сной высоте́, но от земли́ святы́я вознесе́ вы́шше небе́с небе́сное жела́ние. И ны́не и при́сно и во ве́ки веко́в. Ами́нь. Богородичен: Но́в Тя́ исто́чник, Де́во, и вину́ та́ин иму́ще, трие́ богоглаго́льницы но́выми предложе́ньми новоле́пное прили́чествует нарече́ние. Кондак, глас 2 Свяще́нныя и боговеща́нныя пропове́дники, ве́рх учи́телей, Го́споди, прия́л еси́ в наслажде́ние благи́х Твои́х и упокое́ние: труды́ бо о́нех и сме́рть прия́л еси́ па́че вся́каго всепло́дия, Еди́не, прославля́яй святы́я Твоя́. Икос Кто́ дово́лен своя́ устне́ разве́рзти и подви́гнути язы́к к ды́шущим огне́м си́лою Сло́ва и Ду́ха? Оба́че толи́ко рещи́ дерзну́: я́ко все́ преидо́ша челове́ческое естество́ си́и трие́ мно́гими и вели́кими дарова́ньми, дея́нием же и виде́нием, по обоему́ све́тлы превозше́дше. Те́мже зело́ вели́ких даро́в ты́я сподо́бил еси́, я́ко ве́рныя Твоя́ служи́тели, Еди́не, прославля́яй святы́я Твоя́. Песнь 7 Ирмос: Богопроти́вное веле́ние беззако́ннующаго мучи́теля высо́к пла́мень вознесло́ е́сть: Христо́с же простре́ Богочести́вым отроко́м ро́су духо́вную, Сы́й Благослове́н и Препросла́влен. Припев: Святи́телие Христо́ви, моли́те Бо́га о на́с. Побежда́ется, блаже́ннии, и отбега́ет я́же пре́жде непостоя́нная де́рзость ересе́й: во́ск же, растаява́емый от лица́ огня́, любоде́ичное же вся́кое уче́ние показу́ется, ва́шим приража́ющееся огнедохнове́нным веща́нием. Сла́ва Отцу́ и Сы́ну и Свято́му Ду́ху. Лжи́вых у́бо уклони́шася е́ллинских буесло́вий, увеще́ние же томи́тельство, е́же в челове́цех, еди́но избра́ша, под ни́мже и́стину си́и трие́ утверди́вше, си́це ве́сь со́нм ве́рных побежда́ют словесы́ и увещева́ют. И ны́не и при́сно и во ве́ки веко́в. Ами́нь. Богородичен: В Тебе́ вся́ко прорече́ние воспочи́ и коне́ц прия́ше удивля́ющее глаго́лющия: из Тебе́ же светле́е и прорече́ний чудеса́ то́чат, Чи́стая, му́дрыя явля́юща сказа́тели. Песнь 8 Ирмос: В пе́щь о́гненную ко отроко́м евре́йским снизше́дшаго и пла́мень в ро́су прело́жшаго Бо́га, по́йте дела́ я́ко Го́спода, и превозноси́те во вся́ ве́ки. Припев: Святи́телие Христо́ви, моли́те Бо́га о на́с. Разумева́ем благоче́стно и прославля́ем единоче́стно Еди́но Естество́, безмерномо́щную Еди́ницу же и Тро́ицу, вся́ сия́ словесы́ пра́вящую лу́чшими. Та́ко бо сла́вити трие́ богоно́снии преда́ша, с ни́миже покланя́емся Ей во ве́ки. Сла́ва Отцу́ и Сы́ну и Свято́му Ду́ху. Соедини́шася трие́ богопропове́дницы, соедини́вшии Тро́ицу и Неразде́льное во все́х соблю́дшии, Боже́ственным естество́м: еди́ну от Тоя́ восприя́ша неразде́льную сла́ву, в похвале́ние еди́но созыва́ющую превознося́щия Ю во ве́ки. И ны́не и при́сно и во ве́ки веко́в. Ами́нь. Богородичен: Прие́м, е́же по на́м, возда́в же Свое́ Благоде́тель, соде́я то́кмо, не пострада́ же, Де́во: твори́т бо, но не в тле́ние устроя́ет, па́че же и стражда́ во́лею, стра́стию стра́сти реши́т, я́коже трие́ отцы́ на́с тайноуча́т. Песнь 9 Ирмос: Безнача́льна Роди́теля Сы́н, Бо́г и Госпо́дь, вопло́щься от Де́вы, на́м яви́ся, омраче́нная просвети́ти, собра́ти расточе́нная, те́м Всепе́тую Богоро́дицу, велича́ем. Припев: Святи́телие Христо́ви, моли́те Бо́га о на́с. Се́ ва́ше де́лание и па́ства, за ю́же велича́йшия боле́зни претерпе́сте, во еди́но соше́дшеся, ку́пно же три́ вы́ соприе́мше, о́бщую и́мать похвалу́ ва́ше сладча́йшее соедине́ние. Припев: Святи́телие Христо́ви, моли́те Бо́га о на́с. Не обоюдоо́стрый ме́чь благода́ть, но трео́стрый на ра́тников тоя́ предлага́ет: еди́н небокова́нен ме́чь, треми́ крепостьми́ изощре́н, при́сно побо́рствуяй по Трисия́нном Еди́ном Божестве́. Припев: Святи́телие Христо́ви, моли́те Бо́га о на́с. Ва́ше жи́тельство на небесе́х бя́ше, пресла́внии, и пло́ть нося́щих во ве́ки нескве́рну, в ни́хже всесоверше́нне ны́не живу́ще, су́щим на земли́ на́м пребыва́ющим вы́шняя моли́те и мы́слити, и де́яти. Припев: Святи́телие Христо́ви, моли́те Бо́га о на́с. Богородичен: Тесни́т мя́ широта́ Твои́х вели́чий, Влады́чице, подавля́ющи сло́во от ча́стости, и пресла́вно ми́ случа́ется е́же недоумева́тися от благомо́щества, те́мже толи́ко Тя́ Возвели́чившаго сла́вим. Светилен Три́ светоза́рныя свети́льники, па́че со́лнечных лу́чь от Светонача́льныя Тро́ицы и Трисо́лнечныя Еди́ницы, преесте́ственно сме́шены, богоно́сныя восхва́лим отцы́. Сла́ва Отцу́ и Сы́ну и Свято́му Ду́ху. Све́та прия́телища, светолу́чныя мо́лнии, Васи́лия ны́не Вели́каго, Григо́рия Богосло́ва, Златоу́стаго Иоа́нна, да восхва́лим вси́. И ны́не и при́сно и во ве́ки веко́в. Ами́нь. Богородичен: Еди́нственное Божество́, О́тче, Сы́не и Ду́ше, мольба́ми Васи́лия, Григо́рия и Иоа́нна и Пречи́стыя Богоро́дицы да не отлучу́ся Твоея́ сла́вы.

Минея, 20 Октября, Канон праведнаго отрока Артемия Глас 8 Песнь 1 Ирмос: Посе́ченный несеко́маго пресече́,/ и ви́де со́лнце зе́млю, ю́же не ви́де,/ лю́таго врага́ вода́ потопи́,/ и непроходи́мое про́йде Изра́иль./ Пе́снь же воспева́шеся:/ Го́сподеви пои́м, сла́вно бо просла́вися. Припев: Святы́й пра́ведный Артéмие, моли́ Бо́га о на́с. Пречестна́я твоя́ па́мять просия́,/ и ра́ка твоя́ мно́гая исцеле́ния прояви́,/ Богому́дре Арте́мие, приходя́щим к тебе́,/ пе́снь же воспева́шеся:/ Го́сподеви пои́м, сла́вно бо просла́вися. Припев: Святы́й пра́ведный Артéмие, моли́ Бо́га о на́с. Посече́ся враг от Влады́ки всех,/ И́же прия́т ду́шу твою́ в пречи́стыя ру́це;/ ты же благода́ть прия́л еси́, блаже́нне, неду́жныя исцеля́ти./ Сего́ ра́ди пе́снь воспева́ем:/ Го́сподеви пои́м, сла́вно бо просла́вися. Сла́ва Отцу́ и Сы́ну и Свято́му Ду́ху. Преди́вный Госпо́дь,/ ви́дя врага́ и устраша́я того́ преще́нием гро́зным,/ и мо́лниею паля́, и водо́ю потопля́я,/ ду́шу твою́ прия́л е́сть, Арте́мие,/ те́ло же твое́ в чудесе́х просия́, и́миже исцеля́емии вопию́т:/ Го́сподеви пои́м, сла́вно бо просла́вися. И ны́не и при́сно и во ве́ки веко́в. Ами́нь. Богородичен: Пречи́стая Де́во, ро́ждшая Преве́чнаго Бо́га,/ Того́ моли́, да изба́вит ны от напа́стей, и бед лю́тых, и от лука́ваго врага́,/ мо́лим Тя, вопию́ще:/ пои́м Го́сподеви, сла́вно бо просла́вися. Песнь 3 Ирмос: Страх Твой, Го́споди,/ всади́ в сердца́ раб Твои́х,/ и бу́ди нам утвержде́ние,/ Тя во и́стине призыва́ющим. Припев: Святы́й пра́ведный Артéмие, моли́ Бо́га о на́с. Страх Твой, Го́споди, возгреме́,/ и страстоте́рпец Твой дух испусти́ и прия́т Ца́рствие Небе́сное,/ ны́не же мо́лится о всех, призыва́ющих Тя. Припев: Святы́й пра́ведный Артéмие, моли́ Бо́га о на́с. Престо́лу Влады́чню предстоя́, Богому́дре Арте́мие,/ не преста́й моля́ся о и́же ве́рою приходя́щих к тебе́/ и тя призыва́ющих. Сла́ва Отцу́ и Сы́ну и Свято́му Ду́ху. Исцеле́ния струи́ источа́еши ко гро́бу твоему́ приходя́щим, Арте́мие,/ вои́стинну тя призыва́ющим. И ны́не и при́сно и во ве́ки веко́в. Ами́нь. Богородичен: Мари́е, Ма́ти Христа́ Бо́га,/ поми́луй моля́щихся Тебе́,/ несумне́нною ве́рою вои́стинну Тя призыва́ющих. Седален, глас 4 От младе́нства душе́ю Бо́гу прилепи́вся,/ двоюна́десяти лет к Бо́гу преста́вился еси́/ и, в ве́чное Ца́рство всели́вся,/ прия́л еси́ дар от Бо́га/ неду́жныя исцеля́ти, прокаже́нныя очища́ти,/ слепы́м о́чи отверза́ти, лука́выя ду́хи прогоня́ти/ и от трясави́ц избавля́ти с ве́рою тя призыва́ющих;/ непреста́нную благода́ть у Христа́ испроси́, Богоуго́дне Арте́мие,/ и душа́м на́шим ве́лию ми́лость. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Удиви́ся Ио́сиф, е́же па́че естества́ зря,/ и внима́ше мы́слию руно́вному дождю́,/ в безсе́меннем зача́тии Твое́м, Богоро́дице./ Ты бо и купина́ еси́, огне́м неопаля́ема,/ и жезл Ааро́нов прозя́бший,/ и свиде́тельствует обру́чник Твой и храни́тель, свяще́нником вопия́:/ Де́ва ражда́ет, и по рождестве́ па́ки Де́вою пребу́дет. Песнь 4 Ирмос: Услы́шах, Го́споди, слух Твой и убоя́хся,/ я́ко неизрече́нным Сове́том,/ Бог сый Присносу́щный,/ от Де́вы прише́л еси́, вопло́щся./ Сла́ва снизхожде́нию Твоему́, Христе́,/ сла́ва си́ле Твое́й. Припев: Святы́й пра́ведный Артéмие, моли́ Бо́га о на́с. Услы́ша, Го́споди, слух Твоего́ смотре́ния, и убоя́ся пра́ведный Арте́мий,/ егда́ неизрече́нным све́том мо́лния возсия́ из тучено́снаго о́блака, и вопия́ше:/ сла́ва снизхожде́нию Твоему́, Христе́, сла́ва си́ле Твое́й. Припев: Святы́й пра́ведный Артéмие, моли́ Бо́га о на́с. Услы́шим и мы слух чудоде́йствия твоего́, пра́ведниче Бо́жий Арте́мие,/ и притеце́м к гро́бу твоему́, с ве́рою вопию́ще Го́сподеви:/ сла́ва снизхожде́нию Твоему́, Христе́, сла́ва си́ле Твое́й. Сла́ва Отцу́ и Сы́ну и Свято́му Ду́ху. Услы́ши нас, гре́шных,/ призыва́ющих тя в ско́рбех и в неду́зех,/ и да́руй исцеле́ние, свя́те Арте́мие,/ покланя́ющимся о́бразу твоему́ и вопию́щим Влады́це всех:/ сла́ва снизхожде́нию Твоему́, Христе́, сла́ва си́ле Твое́й. И ны́не и при́сно и во ве́ки веко́в. Ами́нь. Богородичен: Услы́ши ны, Пречи́стая Богоро́дице Де́во, моля́щияся Тебе́,/ и изба́ви нас от враг ви́димых и неви́димых,/ я́ко да вопие́м Го́сподеви:/ сла́ва снизхожде́нию Твоему́, Христе́, сла́ва си́ле Твое́й. Песнь 5 Ирмос: Страсте́й мя мглы,/ я́ко от глубо́кия но́щи избавля́яй,/ у́треневати сподо́би дух мой, молю́ся,/ во све́те дне повеле́ний Твои́х, Христе́. Припев: Святы́й пра́ведный Артéмие, моли́ Бо́га о на́с. Стра́шныя мглы и те́мнаго о́блака устраши́ся Богому́дрый Арте́мий/ и преста́вися в ве́чный живо́т,/ во све́те дне повеле́ний Твои́х, Христе́. Припев: Святы́й пра́ведный Артéмие, моли́ Бо́га о на́с. Стра́шныя мглы изба́ви нас/ и одержа́щия боле́зни исцели́, прему́дре Арте́мие,/ предстоя́й во све́те дне повеле́ний Христо́вых. Сла́ва Отцу́ и Сы́ну и Свято́му Ду́ху. Страстьми́ мно́гими одержи́м е́сть/ и стремле́нием грехо́вным погруже́н;/ изба́ви мя, Го́споди, от прегреше́ний/ моле́нием уго́дника Твоего́ Арте́мия. И ны́не и при́сно и во ве́ки веко́в. Ами́нь. Богородичен: Стра́шными Херуви́мы сла́вима еси́, Пречи́стая Де́во,/ изба́ви нас от напа́сти/ и возведи́ во свет дне повеле́ний Сы́на Твоего́. Песнь 6 Ирмос: Бе́здна грехо́в и прегреше́ний бу́ря мя смуща́ет/ и во глубину́ ну́жднаго ре́ет мя отча́яния,/ но Твою́ кре́пкую ру́ку мне простри́, я́ко Петро́ви,/ о Упра́вителю, и спаси́. Припев: Святы́й пра́ведный Артéмие, моли́ Бо́га о на́с. Две́ри Небе́сныя отверзо́шася тебе́,/ и ра́йския пи́щи наслади́лся еси́, водвори́вся в жи́зни ве́чней,/ и со святы́ми пребыва́еши, Арте́мие;/ моли́ся у́бо о нас Бо́гу и от тли ны возведи́. Припев: Святы́й пра́ведный Артéмие, моли́ Бо́га о на́с. Со А́нгелы ликовству́еши, у Престо́ла Влады́чня предстоя́/ и благода́ть име́я исцеля́ти неду́ги любо́вию приступа́ющих к тебе́,/ прему́дре Арте́мие. Сла́ва Отцу́ и Сы́ну и Свято́му Ду́ху. Име́я к Бо́гу Боже́ственное дерзнове́ние, преблаже́нне Арте́мие,/ ве́рою чи́стою хва́лящих тя помина́й,/ от бу́рей и от напа́стей спаса́й и от тли возведи́. И ны́не и при́сно и во ве́ки веко́в. Ами́нь. Богородичен: Дании́л Тя го́ру мы́сленную прови́де,/ от нея́же Ка́мень отсече́ся, Пренепоро́чная,/ и сни́де от Небеси́ роса́ во чре́во Твое́, Богоразу́мием напои́в зе́млю:/ Ты бо израсти́ла еси́ Изба́вителя всех Творца́. Кондак, глас 8 Возсия́ дне́сь пресве́тлая па́мять прему́драго Арте́мия;/ Богода́нная благода́ть, я́ко ре́ки, излива́ет от целе́бных моще́й его́ ди́вная исцеле́ния,/ и́миже от многоразли́чных неду́г избавля́емся,/ с ве́рою прие́млюще я и взыва́юще:/ ра́дуйся, Арте́мие Богому́дре. Икос От ю́ности возлюби́в Бо́га и незло́бив сый,/ в де́тстве яви́лся еси́, я́ко муж смы́слен,/ от гро́мнаго же преще́ния сме́рть вкуси́л еси́/ и уго́дник яви́лся Влады́це, пречу́дне Арте́мие,/ положе́но же бы́сть те́ло твое́ на пу́сте ме́сте,/ иде́же обрето́шася мо́щи по три́десять тре́тием ле́те преставле́ния твоего́,/ чудеса́ творя́ща пресла́вная и исцеле́ния мно́га неду́жным,/ с ве́рою приходя́щим ко гро́бу твоему́ и вопию́щим:/ ра́дуйся, Арте́мие Богому́дре. Песнь 7 Ирмос: А́нгелом о́троки из огня́ спасы́й/ и гремя́щую пе́щь преложи́вый на ро́су,/ благослове́н еси́, Бо́же оте́ц на́ших. Припев: Святы́й пра́ведный Артéмие, моли́ Бо́га о на́с. А́нгели слу́жат Вседержи́телю Бо́гу/ быва́ющим мо́лниям и о́блаком гро́мным;/ ты же, свя́те Арте́мие, коне́ц жития́ от сего́ прие́мля, взыва́л еси́:/ благослове́н Госпо́дь, Бог оте́ц на́ших. Припев: Святы́й пра́ведный Артéмие, моли́ Бо́га о на́с. Пресели́вся в жи́знь Небе́сную,/ предстои́ши Го́сподеви, пребога́те Арте́мие, вопия́:/ благослове́н Госпо́дь, Бог оте́ц на́ших. Сла́ва Отцу́ и Сы́ну и Свято́му Ду́ху. Чудоде́йствия дар прии́м от Бо́га неду́ги исцеля́ти, прему́дре Арте́мие,/ воспева́л еси́ Го́сподеви:/ благослове́н Бог оте́ц на́ших. И ны́не и при́сно и во ве́ки веко́в. Ами́нь. Богородичен: Пресвята́я Де́во, Христа́ ро́ждши,/ непреста́нно моли́ о рабе́х Свои́х,/ да вопие́м Го́сподеви:/ благослове́н еси́, Го́споди, Бо́же оте́ц на́ших. Песнь 8 Ирмос: Покрыва́яй вода́ми превы́спренняя Своя́,/ полага́яй мо́рю преде́л песо́к/ и содержа́й вся,/ Тя пое́т со́лнце, Тя сла́вит луна́,/ Тебе́ прино́сит пе́снь вся тва́рь,/ я́ко Соде́телю всех во ве́ки. Припев: Святы́й пра́ведный Артéмие, моли́ Бо́га о на́с. Покрыва́яй во́дными о́блаки небеса́/ и пролива́яй во́ды на зе́млю,/ прия́т ду́шу пра́веднаго Арте́мия, возвеселя́я ю чудоде́йствы;/ Ему́же вопие́м, я́ко Соде́телю всех во ве́ки. Припев: Святы́й пра́ведный Артéмие, моли́ Бо́га о на́с. Пречестны́я мо́щи твоя́ источа́ют чудеса́, блаже́нне Арте́мие,/ мы же, здра́вие прие́млюще, прино́сим хвалу́ Го́сподеви,/ я́ко Соде́телю всех во ве́ки. Сла́ва Отцу́ и Сы́ну и Свято́му Ду́ху. Пребоже́ственное селе́ние име́яй,/ чудотворе́ния благода́ть прия́л еси́ от Вседержи́телевы руки́,/ и притека́ющии к тебе́ ве́рою мо́щи твоя́ лобыза́ют, пресла́вне Арте́мие,/ и моли́твенно вопию́т Бо́гу, я́ко Соде́телю вся́ческих во ве́ки. И ны́не и при́сно и во ве́ки веко́в. Ами́нь. Богородичен: Еди́наго от Тро́ицы родила́ еси́, Препе́тая Де́во, Преве́чнаго Бо́га,/ Его́же моли́ о воспева́ющих Ти,/ да изведе́т ны от обдержа́щих напа́стей и бед,/ я́ко да вопие́м Творцу́ и Соде́телю всех во ве́ки. Песнь 9 Ирмос: Устраши́ся всяк слух/ неизрече́нна Бо́жия снизхожде́ния,/ я́ко Вы́шний во́лею сни́де да́же и до пло́ти,/ от деви́ческаго чре́ва быв Челове́к./ Те́мже Пречи́стую Богоро́дицу, ве́рнии, велича́ем. Припев: Святы́й пра́ведный Артéмие, моли́ Бо́га о на́с. Устраши́ся слух пра́веднаго о́трока Арте́мия,/ от гла́са гро́ма Твоего́, Го́споди,/ и преставле́ние прия́т пречу́дный Арте́мий по Боже́ственней Твое́й во́ли, Влады́ко,/ те́мже Тя велича́ем. Припев: Святы́й пра́ведный Артéмие, моли́ Бо́га о на́с. Вопие́м ти, Богому́дре Арте́мие, страстоте́рпче:/ не оста́ви нас, си́рых,/ но да́руй нам душе́вное спасе́ние, и теле́сное здра́вие, и по́мощь неосла́бну,/ да тя ве́рою велича́ем. Сла́ва Отцу́ и Сы́ну и Свято́му Ду́ху. Притеце́м, лю́дие, к пречестно́му о́бразу Арте́мия/ и, припа́дающе, возопии́м ему́:/ бу́ди нам стена́ неруши́ма от супоста́т на́ших/ и изба́ви от враго́в ви́димых и неви́димых,/ да тя, ве́рнии, велича́ем. И ны́не и при́сно и во ве́ки веко́в. Ами́нь. Богородичен: Гора́ неруши́мая и две́рь Небе́сная,/ ковче́же златы́й, Влады́чице Де́во,/ покры́й нас кро́вом крилу́ Твое́ю и соблюди́ ны от всех зол,/ да Тя, Пречи́стую Богоро́дицу, ве́рнии, велича́ем. Светилен Я́ко све́тлая звезда́, возсия́ша мо́щи твоя́, Арте́мие прехва́льне,/ и, я́ко многоце́нный би́сер, обрето́шася/ многоразли́чная подаю́ще исцеле́ния и чуде́с зарю́ испуща́юще,/ те́мже ны́не предстои́ши Влады́це всех,/ во све́те ра́дуяся. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Пресве́тлая Цари́це Богоро́дице,/ ро́ждшая Христа́ Спа́са без се́мене от Свята́го Ду́ха,/ от Отца́ исходя́щаго и просвети́вшаго вся ве́рныя,/ да́руй нам во Све́те присносу́щнем водвори́тися/ и Ду́хом Бо́жиим освяти́тися,/ я́ко да Тя, Богоро́дице, сла́вим.

Минея, 25 Июля, Кано́ны святы́я Глас 4 Песнь 1 Ирмос: Отве́рзу уста́ моя́/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,/ и воспою́, ра́дуяся, Тоя́ чудеса́. Припев: Свята́я прáведная Áнно, моли́ Бо́га о на́с. Согреше́ний проще́ние, и злых избавле́ние,/ и житии́ исправле́ние ны́не ми испроси́,/ твою́ светоно́сную па́мять почита́ющему днесь, А́нно всехва́льная. Припев: Свята́я прáведная Áнно, моли́ Бо́га о на́с. Живо́т ро́ждшую боголе́пно родила́ еси́,/ те́мже к присножи́зненней жи́зни преста́вилася еси́,/ наслажда́ющися ра́дости неизглаго́ланныя и Све́та невече́рняго, А́нно Богозва́нная. Припев: Свята́я прáведная Áнно, моли́ Бо́га о на́с. Благода́ть Боже́ственная к ра́дости преста́ви,/ без се́мене ю́же роди́ Дщи сея́ Чи́стая,/ и предстои́т со мно́гим дерзнове́нием,/ Го́сподеви моля́щися спасти́ся всем. Сла́ва Отцу́ и Сы́ну и Свято́му Ду́ху. Пра́ведно и преподо́бно пожи́вши, всехва́льная,/ к Пра́ведному Го́споду ны́не преста́вилася еси́/ ра́доватися с пра́ведными, и́же от ве́ка,/ те́мже, соше́дшеся, тя ве́рою почита́ем. И ны́не и при́сно и во ве́ки веко́в. Ами́нь. Богородичен: Из Тебе́ нам возсия́ Со́лнце пра́ведное,/ и всю озари́ Богоразу́мием зе́млю,/ и разори́ мглу неразу́мия, Чи́стая, Всенепоро́чная, и Всеблаже́нная. Песнь 3 Ирмос: Не му́дростию, и си́лою, и бога́тством хва́лимся,/ но Тобо́ю, О́тчею Ипоста́сною Му́дростию, Христе́,/ несть бо свят, па́че Тебе́, Человеколю́бче. Припев: Свята́я прáведная Áнно, моли́ Бо́га о на́с. Заче́ншую Содержа́щаго вся зачала́ еси́/ и родила́ еси́ па́че сло́ва Христа́ ро́ждшую,/ те́мже твое́ успе́ние, А́нно, почита́ем. Припев: Свята́я прáведная Áнно, моли́ Бо́га о на́с. С похвала́ми соверша́ется сла́вная па́мять твоя́,/ я́ко родила́ еси́ нам хвале́ний превы́шшую,/ Чи́стую Богома́терь, А́нно Богоприя́тная. Припев: Свята́я прáведная Áнно, моли́ Бо́га о на́с. Я́коже со́лнце с луно́ю, А́нне совокупля́яся,/ сла́вный Иоаки́м, де́вства зарю́ ражда́ет,/ Ея́же ра́ди Божества́ луча́ просия́. Сла́ва Отцу́ и Сы́ну и Свято́му Ду́ху. Го́ру Боже́ственную из чресл твои́х родила́ еси́/ и к гора́м мы́сленным и рая́ селе́нием, А́нно, премину́ла еси́, Богоблаже́нная. И ны́не и при́сно и во ве́ки веко́в. Ами́нь. Богородичен: Тя Предста́тельницу тве́рдую, Богороди́тельнице, стяжа́хом,/ упова́ние на Тя возложи́вше, спаса́емся/ и, к Тебе́ бо прибега́юще, огражда́емся. Седален, глас 8 Ма́тере Влады́ки и Творца́/ ма́ти была́ еси́, А́нно всехва́льная, Того́ повеле́ния при́сно храня́щи,/ сего́ ра́ди, уме́рши, к жи́зни безсме́ртней преста́вилася еси́ вои́стинну/ и к Све́ту невече́рнему./ Те́мже светоно́сную и святу́ю твою́ па́мять соверша́ем,/ ду́хом просвеща́еми всегда́, и согла́сно вопие́м ти:/ моли́ Христа́ Бо́га грехо́в оставле́ние дарова́ти/ чту́щим любо́вию святу́ю па́мять твою́. Песнь 4 Ирмос: Седя́й в Сла́ве на Престо́ле Божества́/ во о́блаце ле́гце,/ прии́де Иису́с Пребоже́ственный/ Нетле́нною Дла́нию и спасе́ зову́щия:/ сла́ва, Христе́, си́ле Твое́й. Припев: Свята́я прáведная Áнно, моли́ Бо́га о на́с. Я́же в зако́не пи́саная, поуча́ющися, соверши́ла еси́/ и Законода́вца Ма́тере ма́ти была́ еси́,/ те́мже тебе́ вся тварь по до́лгу ны́не сотворя́ет твою́ ра́достно па́мять. Припев: Свята́я прáведная Áнно, моли́ Бо́га о на́с. Блаже́нное чре́во твое́ вои́стинну,/ носи́вшее Свет ми́ра внутрь во чре́ве носи́вшую,/ и сосца́ твоя́ кра́сная,/ я́ко дои́вшая дои́вшую, А́нно, Христа́, Пита́теля на́шего. Сла́ва Отцу́ и Сы́ну и Свято́му Ду́ху. Я́ко пожи́вши непоро́чно, Ю́же непоро́чно родила́ еси́, Богоро́дицу Отрокови́цу,/ Сло́во О́тчее породи́вшую,/ и к Нему́ со сла́вою всели́лася еси́,/ обожена́ честны́ми вои́стинну прича́стии. И ны́не и при́сно и во ве́ки веко́в. Ами́нь. Богородичен: Де́вы чре́во – стог, я́коже на гумне́, вои́стинну яви́ся,/ клас неде́ланен иму́щи, и́мже пита́ется вся́кое естество́, зову́щее:/ Всеси́льне, сла́ва, Христе́, си́ле Твое́й. Песнь 5 Ирмос: Нечести́вии не у́зрят сла́вы Твоея́, Христе́,/ но мы Тя, Единоро́дне,/ Оте́ческия Сла́вы Сия́ние Божества́,/ от но́щи у́тренююще,/ воспева́ем Тя, Человеколю́бче. Припев: Свята́я прáведная Áнно, моли́ Бо́га о на́с. Не́бо родила́ еси́ на земли́ вои́стинну, ро́ждшую Небесе́ Творца́,/ днесь тя преставля́юща к Небе́сным со сла́вою, А́нно пресла́вная. Припев: Свята́я прáведная Áнно, моли́ Бо́га о на́с. С невеще́ственными чи́нми невеще́ственным умо́м лику́еши ра́достно,/ исполня́ема сия́ния Богатода́вца,/ но нас помина́й, ве́рою хва́лящих тя. Сла́ва Отцу́ и Сы́ну и Свято́му Ду́ху. От ко́рене Иессе́ева прозя́бшая я́ве,/ благоцвету́щий жезл, Чи́стую, израсти́ла еси́, сла́вная,/ израсти́вшую цвет неувяда́ющий, Иису́са, Изба́вителя на́шего. И ны́не и при́сно и во ве́ки веко́в. Ами́нь. Богородичен: К Тебе́ прибега́ю еди́ней держа́вней, ве́рных покро́ву,/ на Тя наде́жду возлага́ю спасе́ния моего́,/ Пресвята́я Влады́чице Богоро́дице, не пре́зри мене́. Песнь 6 Ирмос: Пожру́ Ти со гла́сом хвале́ния, Го́споди,/ Це́рковь вопие́т Ти,/ от бесо́вския кро́ве очи́щшися/ ра́ди ми́лости от ребр Твои́х/ исте́кшею Кро́вию. Припев: Свята́я прáведная Áнно, моли́ Бо́га о на́с. Го́спода Иису́са Бо́га пра́отцы,/ Иоаки́м же и А́нна, пра́вдою укра́шени,/ по достоя́нию в пе́снех да восхва́лятся днесь. Припев: Свята́я прáведная Áнно, моли́ Бо́га о на́с. Вся́ческих похва́л А́нна превзы́де,/ я́ко вся́кия похвалы́ превозше́дшую родила́ есть,/ сего́ ра́ди в ли́це пра́ведных водворя́ется. Припев: Свята́я прáведная Áнно, моли́ Бо́га о на́с. Светоно́сия и све́тлости испо́лнена па́мять твоя́,/ сия́ния же в ми́ре спаси́тельная испуща́ющи,/ целому́дренная А́нно, дарова́ний вся́ческих испо́лни. Сла́ва Отцу́ и Сы́ну и Свято́му Ду́ху. Ру́чку, ма́нну Боже́ственную вмести́вшую, во чре́ве носи́ла еси́, А́нно,/ и, с Не́ю ны́не на Небесе́х живу́щи,/ о всех мо́лишися, прехва́льная. И ны́не и при́сно и во ве́ки веко́в. Ами́нь. Богородичен: От А́нны ми́рови роди́лася еси́,/ Цари́це, всех Царя́ ро́ждшая,/ и, де́вствующи по Рождестве́, Херуви́м превы́шши, Пренепоро́чная. Кондак, глас 2 Прароди́телей Христо́вых па́мять пра́зднуем,/ тех ве́рно прося́ще по́мощи/ изба́витися всем от вся́кия ско́рби, зову́щим:/ Бог наш с на́ми, сих прославле́й, я́коже благоволи́. Икос Проро́чески сни́демся вси досто́йно пе́ти прама́тере Христо́вы блаже́нное преставле́ние:/ днесь бо от вре́менныя преста́вися жи́зни,/ на Небесе́х с ра́достию ше́ствие творя́щи, ра́дуется,/ я́ко су́щи ма́ти и́стинныя су́щия Богоро́дицы, и взыва́ет ве́рно:/ вели́чит душа́ моя́ Го́спода, я́ко роди́х Сего́ Ма́терь на земли́,/ И́же Сию́ прославле́й, я́коже благоволи́. Песнь 7 Ирмос: Спасы́й во огни́ авраа́мския Твоя́ о́троки/ и халде́и уби́в,/ я́же Пра́вда пра́ведно уловля́ше,/ препе́тый Го́споди,/ Бо́же оте́ц на́ших благослове́н еси́. Припев: Свята́я прáведная Áнно, моли́ Бо́га о на́с. Я́ко жи́зни и́стинныя, А́нно, Ма́терь ро́ждши,/ к жи́зни и́стинней преста́вилася еси́ ко све́ту, взыва́ющи:/ препе́тый Го́споди, Бо́же оте́ц на́ших, благослове́н еси́. Припев: Свята́я прáведная Áнно, моли́ Бо́га о на́с. И́же Ма́тери Изба́вителя ма́ти су́щи, А́нно,/ от земли́ к Небеси́, доброде́тельми укра́шена, востече́, во хвале́нии зову́щи:/ Бо́же оте́ц на́ших, благослове́н еси́. Припев: Свята́я прáведная Áнно, моли́ Бо́га о на́с. К несконча́емей жи́зни, к простра́нней широте́ ра́йския пи́щи,/ к невече́рнему све́ту отшла́ еси́, Богоно́сице, зову́щи:/ Бо́же оте́ц на́ших, благослове́н еси́. Сла́ва Отцу́ и Сы́ну и Свято́му Ду́ху. Испещре́на доброде́тельми, добро́тою Боже́ственных дарова́ний укра́шена,/ к Бо́гу преложи́ся, непреста́нно зову́щи:/ препе́тый Го́споди, Бо́же оте́ц на́ших, благослове́н еси́. И ны́не и при́сно и во ве́ки веко́в. Ами́нь. Богородичен: Укра́шена добро́тами доброде́телей,/ кра́снаго па́че сыно́в челове́ческих и родила́ еси́ Сло́во, Пренепоро́чная,/ кра́сными ле́потами украша́ющаго Тебе́ песносло́вящих. Песнь 8 Ирмос: О́троки благочести́выя в пещи́/ Рождество́ Богоро́дичо спасло́ есть;/ тогда́ у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте, дела́,/ и превозноси́те Его́ во вся ве́ки. Припев: Свята́я прáведная Áнно, моли́ Бо́га о на́с. Ма́ти еди́ныя Богоро́дицы, я́же непло́ды пре́жде, ны́не же прама́ти Христо́ва,/ я́коже непло́дства, си́це и ме́ртвости, совле́кши оде́жду, во стране́ живу́щих вопие́т:/ Го́спода по́йте, дела́, и превозноси́те Его́ во вся ве́ки. Припев: Свята́я прáведная Áнно, моли́ Бо́га о на́с. Христо́с тебе́ две́ри Вы́шния отве́рзе, ра́достно тя прия́т,/ я́ко дверь родила́ еси́, Еюже Сам про́йде и затворе́ну яви́ по исхожде́нии,/ Богому́драя достойнопе́тая А́нно,/ те́мже тя почита́ем, ве́рнии, во ве́ки. Сла́ва Отцу́ и Сы́ну и Свято́му Ду́ху. Свя́то житие́ сконча́вши, Святы́я Присноде́вы ма́ти была́ еси́,/ Я́же Пресвято́е Сло́во породи́, освяще́ние и избавле́ние нам подаю́ща,/ Богому́драя и досточу́дная А́нно,/ те́мже тя пое́м при́сно, ве́рнии, во ве́ки. И ны́не и при́сно и во ве́ки веко́в. Ами́нь. Богородичен: Мно́гими мя содержи́ма беда́ми и бу́рею грехо́вною бе́дствующаго,/ ко приста́нищу невла́емому дыха́ний Ду́ха, Богороди́тельнице Влады́чице, ны́не наста́ви:/ приста́нище бо еси́ христиа́н./ Те́мже Тя пое́м во вся ве́ки. Песнь 9 Ирмос: Е́ва у́бо неду́гом преслуша́ния/ кля́тву всели́ла есть;/ Ты же, Де́во Богоро́дице,/ прозябе́нием чревоноше́ния ми́рови Благослове́ние процвела́ еси́./ Тем Тя вси велича́ем. Припев: Свята́я прáведная Áнно, моли́ Бо́га о на́с. От земли́ чре́ва твоего́ вои́стинну роди́ся земля́ свята́я,/ неде́ланен клас прозя́бши безсе́менно, ми́рови Пита́теля и Го́спода,/ тебе́ к пи́щи неиждива́емой, А́нно, прему́дро преста́вльшаго. Припев: Свята́я прáведная Áнно, моли́ Бо́га о на́с. Па́мять твоя́ днесь нам возсия́, со́лнца светле́йши,/ сия́нием бога́тых даро́в нас просвеща́ющи, всечестна́я, и мрак страсте́й изыма́ющи,/ ю́же соверша́ющих сохрани́. Сла́ва Отцу́ и Сы́ну и Свято́му Ду́ху. Боже́ственный нас Иоаки́м и А́нна Богому́драя и всесла́вная,/ супру́г честны́й и светоно́сный, созыва́ют боже́ственне весели́тися сих пра́здником,/ его́же уясни́ Светода́вец всех Госпо́дь. И ны́не и при́сно и во ве́ки веко́в. Ами́нь. Богородичен: Мари́е Госпоже́ всех, вся́кими мя порабоще́на согреше́нии ны́не свободи́:/ Сама́ бо Свободи́теля родила́ еси́ всех,/ рабо́ты нас изба́вльшаго грехо́вныя, Боже́ственным манове́нием. Светилен Достодо́лжно воспое́м Богозва́нную А́нну:/ Богоро́дицу бо та Де́ву Мари́ю ро́ждши па́че наде́жды,/ сро́дница по пло́ти Христа́, Изба́вителя на́шего, яви́ся,/ сию́ боголе́пно прие́мшаго днесь в Вы́шних, о нас моля́щуюся и о умире́нии ми́ра. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Не́бо ро́ждши, А́нно, но́вое, Мари́ю, Е́юже возсия́ сла́вы Со́лнце,/ днесь от земли́ к Небе́сным прехо́диши,/ Христу́ сра́дующися, пресла́вная.

Минея, 8 Октября, Ин канон преподобному Глас 4 Песнь 1 Ирмос: Мо́ря чермну́ю пучи́ну/ невла́жными стопа́ми/ древний пешеше́ствовав Изра́иль,/ крестообра́зныма Моисе́овыма рука́ма/ Амали́кову силу в пустыни победи́л есть. Припев: Преподо́бне о́тче Три́фоне, моли́ Бо́га о на́с. Боже́ственнаго Пресвятаго Духа блиста́яся благодатию,/ светоно́сное и честно́е твое успение пра́зднующих, Трифоне преподобне,/ светлою молитвою твоею от страсте́й мглы очисти. Припев: Преподо́бне о́тче Три́фоне, моли́ Бо́га о на́с. Преподобне отче, крест свой взем,/ последовал еси Слову, распе́ншемуся нас ради,/ и плотския стра́сти воздержа́нием, преподобне, и низу лега́нием умертви́л еси. Сла́ва Отцу́ и Сы́ну и Свято́му Ду́ху. Поще́нием, молитвами и слеза́ми Бо́гови приближа́яся,/ приял еси от Него благодать цели́ти неду́ги и отгоня́ти лукавыя ду́хи,/ Трифоне Богомудре преблаженне. И ны́не и при́сно и во ве́ки веко́в. Ами́нь. Богородичен: Облече́ся из Тебе, Чистая Дево, Бог в Человека,/ спасения ра́ди человеков,/ егоже моли́ просвети́ти пою́щия Тя. Песнь 3 Ирмос: Веселя́тся о Тебе Церковь Твоя, Христе, зову́щи:/ Ты моя кре́пость, Господи,/ и прибе́жище, и утвержде́ние. Припев: Преподо́бне о́тче Три́фоне, моли́ Бо́га о на́с. Яко же солнце на земли, светом добродетелей просия́л еси,/ всех ду́ши, преподобне, благодатию просвеща́я духо́вною. Припев: Преподо́бне о́тче Три́фоне, моли́ Бо́га о на́с. Железом чре́сла своя препоя́сана имел еси страсте́й на умерщвле́ние,/ и телесе́ озлобление претерпе́л еси, Трифоне преподобне,/ безстра́стием я́ве оде́лся. Сла́ва Отцу́ и Сы́ну и Свято́му Ду́ху. Человеколюби́в быв немощны́м в житии твоем,/ сего ради прия́л еси от Бога многую благодать, преподобне,/ цели́ти стра́сти неисце́льныя. И ны́не и при́сно и во ве́ки веко́в. Ами́нь. Богородичен: Слово Божие во утробу Твою, Приснодево, всели́ся,/ и земноро́дных вся́кия грехи́ отъя́ло есть Своею бла́гостию. Седален, глас 8 Отре́кся плоти сладостра́стия Христа ради,/ духо́вный пастырь людем явился еси,/ словеса́ учения Христова сказу́я и́ноком и собою явля́я правды правило,/ стра́сти же вся крепко попра́л еси, тем и вра́жия кова́рства до конца потребил еси,/ к Богу взира́я всегда, блаженне Трифоне./ егоже моли грехо́в оставле́ние пода́ти чту́щим любовию святую па́мять твою. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Солнца о́блаче светле́йший,/ Боже́ственнаго Света све́щниче златокова́нный, Непорочная Пречистая Владычице,/ омраче́нную душу мою слепото́ю страсте́й безстра́стия заре́ю просвети́, молюся,/ и оскверне́нное сердце мое омы́й умиле́нием покая́ния,/ пла́чем же от скверных мя очисти дел моих, да любовию зову́ Ти:/ Богородице Приснодево, моли Христа Бога,/ прегреше́ний оставле́ние дарова́ти ми, к Тебе бо и́мам надежду, раб Твой. Песнь 4 Ирмос: Вознесе́на Тя ви́девши Церковь на Кресте́,/ Солнце праведное,/ ста в чи́не своем,/ достойно взыва́ющи:/ слава силе Твоей, Господи. Припев: Преподо́бне о́тче Три́фоне, моли́ Бо́га о на́с. Струя́ми сле́зными сердце свое очищая,/ молитвами твоими на безво́днем месте воде истека́ти устро́ил еси,/ Богу тя прославля́ющу, Трифоне преподобне, яко Своего угодника. Припев: Преподо́бне о́тче Три́фоне, моли́ Бо́га о на́с. Пресла́вным житием твоим, яко звезда, сия́я,/ священными чудесы, яко другое Небо, показа́ся, блаженне, ве́рою зову́щим:/ слава силе Твоей, Господи. Сла́ва Отцу́ и Сы́ну и Свято́му Ду́ху. Законом повину́яся, преподобне, Владычним,/ яже в па́стве твоей су́щия наставил еси к свету Богоразумия,/ усугу́бив данный ти талант, яко раб послушли́в своему Владыце Христу. И ны́не и при́сно и во ве́ки веко́в. Ами́нь. Богородичен: Привлече́нный ум мой, Богородительнице, к теле́сным сла́достем,/ Твоим хода́тайством, молюся, утверди́,/ Яже Едина рождшая Благодетеля Бога нашего в Вы́шних. Песнь 5 Ирмос: Ты, Господи, мой свет/ в мир прише́л еси,/ Свет Святый, обраща́яй из мра́чна неве́дения/ верою воспева́ющия Тя. Припев: Преподо́бне о́тче Три́фоне, моли́ Бо́га о на́с. Ум твой, преподобне, чи́стыми к Богу манове́нии весь укрепля́ем явися/ и плотски́х сладостра́стии́ превы́шши показа́ся. Припев: Преподо́бне о́тче Три́фоне, моли́ Бо́га о на́с. Сый врач душа́м и телесе́м, пребога́те,/ отжени плотски́я и душевре́дныя болезни благодатию Божественнаго Духа. Сла́ва Отцу́ и Сы́ну и Свято́му Ду́ху. Блажен еси, преподобне, яко всю зло́бу вра́жию победил еси/ и теле́сныя стра́сти до конца умертви́л еси. И ны́не и при́сно и во ве́ки веко́в. Ами́нь. Богородичен: Родила́ еси Преблага́го Бога и по рождестве Де́вая пребысть, Богоневесто,/ сего ра́ди Тя вси ро́ди челове́честии ублажа́ют. Песнь 6 Ирмос: Пожру́ Ти со гла́сом хвале́ния, Господи,/ Церковь вопие́т Ти,/ от бесо́вския кро́ве очищшися,/ ради милости от ребр Твоих/ исте́кшею Кровию. Припев: Преподо́бне о́тче Три́фоне, моли́ Бо́га о на́с. Единым то́чию призыванием святаго твоего и́мене/ и омы́тием воды́, исходя́щия во обители твоей,/ тряса́вичная болезнь от человек отгоня́ется и вред бесо́вский молитвами твоими потребля́ется. Припев: Преподо́бне о́тче Три́фоне, моли́ Бо́га о на́с. Победи́в плотскаго наве́та мудрование,/ Духа Святаго благодать прия́л еси/ отгоня́ти плотски́я неду́ги и цели́ти душевныя стра́сти, Трифоне преблаженне. Сла́ва Отцу́ и Сы́ну и Свято́му Ду́ху. О, чудо преди́вное,/ ка́ко от еди́наго то́кмо призыва́ния боля́щии прие́млют исцеление твоим явлением, преславне Трифоне,/ и бед и напа́стей свобожда́ются твоими к Богу молитвами. И ны́не и при́сно и во ве́ки веко́в. Ами́нь. Богородичен: Умертви́ пло́ти моея мудрова́ние, Приснодево,/ Умертви́теля смерти заче́ншая/ и ро́ждшая Жизнодавца паче сло́ва и разума. Кондак, глас 8 Днесь в начале основания добродетелей, блаженне,/ положил еси в души́ своей страх Божий,/ от юности взем крест свой,/ благоче́стно Христови последовал еси,/ А́нгельским о́бразом облече́ся и быст монах преди́вен,/ в добродетелех цветяше, к будущим Бо́гови простира́лся./ И своей пло́ти, яко врагу, немилостив, отче, был еси,/ терпением явися, блаженне, яко зла́то искуше́но в горни́ле,/ но и ныне не забуди посещати чад своих,/ поминай нас, чтущих пресвятую память твою,/ да вси благода́рне вопие́м ти:/ радуйся, прему́дре Трифоне, наставниче мона́хом. Икос Отве́рзи ми устне́ Богоприя́тными твоими к Богу молитвами, преблаженне,/ да воспою́ равноа́нгельное житие твое и возглаго́лю достойно вся добродетели твоя,/ столп бо и забра́ло явися и́ноком и правды пра́вило пресветлое,/ темже и просла́вльшему тя Господу молися непреста́нно о всех нас. Песнь 7 Ирмос: В пещи́ Авраа́мстии о́троцы перси́дстей,/ любовию благоче́стия па́че,/ не́жели пла́менем, опаля́еми, взыва́ху:/ благословен еси в храме славы Твоея, Господи. Припев: Преподо́бне о́тче Три́фоне, моли́ Бо́га о на́с. Сле́зными тучами пла́мень страсте́й погаси́л еси,/ ныне же огне́м молитв твоих, блаженне, и Божественною благодатию/ попаляеши вся душетле́нныя неду́ги. Припев: Преподо́бне о́тче Три́фоне, моли́ Бо́га о на́с. Всеусе́рдно Творца твоего, блаженне, возлюби́л еси,/ Емуже сам служа́ и и́ны науча́я, Трифоне мудре, взыва́л еси:/ благословен еси в храме славы Твоея, Господи. Сла́ва Отцу́ и Сы́ну и Свято́му Ду́ху. Якоже древо при исхо́дищах вод, воздержанием, отче, насажде́н быв,/ воздал еси плоды́ чудес действо от честна́го ти о́браза, Трифоне пребогате,/ благовре́менно всегда изоби́луяся. И ны́не и при́сно и во ве́ки веко́в. Ами́нь. Богородичен: Бу́ри безме́рных моих прегрешений, Отроковице, избави мя,/ едина смире́нных помощь кре́пкая и грешных очищение, зовущих:/ благословенна Ты в жена́х еси, Всенепоро́чная Владычице. Песнь 8 Ирмос: Ру́це распросте́р Дании́л,/ львов зия́ния в ро́ве затче́,/ огненную же силу угаси́ша, доброде́телию препоя́савшеся,/ благоче́стия рачи́тели/ о́троцы, взыва́юще:/ благословите вся дела Господня Господа. Припев: Преподо́бне о́тче Три́фоне, моли́ Бо́га о на́с. Яко пресве́тлое у́тро, просия́л еси,/ яко светоза́рная звезда, и яко вели́кое солнце, озари́л еси верных сердца́ чудесы́ твоими, Трифоне Богодухнове́нне,/ и души всех просвети́л еси Божественною благодатию, вопию́щих:/ вся дела благослови́те Господня Господа. Припев: Преподо́бне о́тче Три́фоне, моли́ Бо́га о на́с. Глубоку я́зву врагу, ражда́ющу смерть, преблаженне, дал еси,/ егда благодатию Святаго Духа смиренну стяжа́л еси мудрость,/ высокому́дрый того нрав в землю смиря́я и се́ти душетле́нныя его попира́я. Припев: Преподо́бне о́тче Три́фоне, моли́ Бо́га о на́с. Ви́дети ра́йскаго блаженства и ве́чнующаго наслаждения, святе, сподо́бився,/ святых све́тлости зри́ши и радостно с ними всегда пое́ши:/ вся дела благослови́те Господня Господа. Сла́ва Отцу́ и Сы́ну и Свято́му Ду́ху. Место во обители твоей безво́дное, якоже вторы́й Моисе́й, молитвами твоими многово́дно сотвори́л еси/ и цельбоно́сно показал еси приходя́щим с верою, че́рплющим, пию́щим и Христу зову́щим:/ вся дела благословите Господня Господа. И ны́не и при́сно и во ве́ки веко́в. Ами́нь. Богородичен: Неду́говавшую тягото́ю лю́тых, смире́нную мою душу жаждою пали́му,/ Богоблагода́тная Владычице Чистая, напо́й водою спасения и здраву до конца покажи́, зову́щу:/ вся дела благословите Господня Господа. Песнь 9 Ирмос: Ка́мень нерукосе́чный/ от несеко́мыя горы́, Тебе, Дево,/ краеуго́льный отсече́ся, Христос,/ совокупи́вый разстоя́щаяся естества́,/ тем, веселя́щеся, Тя, Богородице, велича́ем. Припев: Преподо́бне о́тче Три́фоне, моли́ Бо́га о на́с. Возмо́гл еси о укрепля́ющем тя Господе, Трифоне Богомудре,/ вся вра́жия силы попра́ти и неверныя посрами́ти,/ темже и венец яко победоно́сец прия́л еси,/ и дерзнове́ние моли́тися Господу о нас, чтущих память твою че́стно. Припев: Преподо́бне о́тче Три́фоне, моли́ Бо́га о на́с. Якоже от неистощи́маго источника, струи́ исцелений источа́еши, преподобне,/ и всякия болезни плотски́я и душе́вныя скве́рны силою Божественнаго Духа очищаеши,/ и благоче́стно наша напая́еши сердца и помышления, почита́ющих Тя. Припев: Преподо́бне о́тче Три́фоне, моли́ Бо́га о на́с. Днесь всечестну́ю твою память, отче преподобне Трифоне, соверша́юще,/ соше́дшеся всяк во́зраст, тре́бующе твоея помощи и заступления, усе́рдно просим:/ поминай нас у Престола Господа Славы, чтущих священную память твою. Сла́ва Отцу́ и Сы́ну и Свято́му Ду́ху. Троичен: Взят еси ко оби́телем вечным Единосущныя Троицы, преподобне отче,/ и, взира́я у́мныма очи́ма, по достоя́нию к лико́м преподобных причте́ся,/ с ними же нас поминай, иже на земли тебе поминающих и пе́сньми всегда почита́ющих. И ны́не и при́сно и во ве́ки веко́в. Ами́нь. Богородичен: Глас Арха́нгельский вопие́м Ти, Чи́стая Де́во:/ радуйся, клятвы разрушение, преподобных славо и мучеником похвало,/ пророков проповедание и человеков спасе́ние. Светилен Мирска́го сладостра́стия яко многомяте́жна избе́г, и неяде́нием плоть свою увядив,/ обнови́в же душе́вную кре́пость и славою Небесною обогати́вся, приснопа́мятне Трифоне,/ моли́ся о нас непреста́нно ко Господу. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Кре́пкое Твое предстательство, Марие Богоукра́шенная,/ и све́тлая Твоя сла́ва по всей земли показася,/ о Тебе ныне хва́лимся и весели́мся, иму́ще Тя к Сыну и Богу Твоему Хода́таицу неусы́пную,/ молитвами Твоими спасемся.

Минея, 10 Апреля, Кано́н, его́же краегране́сие: Мно́жество мя спаси́ добропобе́дных му́чеников. Творе́ние Ио́сифа Глас 8 Песнь 1 Ирмос: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:/ Изба́вителю и Бо́гу на́шему пои́м. Припев: Святи́и му́ченицы, моли́те Бо́га о на́с. Мно́жество страда́лец сла́вных,/ Христа́ умоли́те, мно́жество иму́щаго щедро́т,/ мно́жества ума́лити зол мои́х,/ я́ко да восхваля́ю ва́ше торжество́. Припев: Святи́и му́ченицы, моли́те Бо́га о на́с. Служа́ще живо́му и и́стинному Бо́гу, страстоно́сцы,/ безду́шным че́сти бого́м ника́коже принесо́сте/ и жива́я Жизнода́вцу же́ртва принесо́стеся. Сла́ва Отцу́ и Сы́ну и Свято́му Ду́ху. Пропове́даша безбо́жнии повеле́ние богоме́рзкое,/ и посреди́ суди́ща четы́редесять страда́лец пропове́даша Сло́во воплоще́нное,/ безслове́сия мир изба́вльшее. И ны́не и при́сно и во ве́ки веко́в. Ами́нь. Богородичен: Пою́ Тя, Де́во, я́ко Бо́га, Всепе́тая,/ воплоти́ла еси́ еди́на от Твои́х честны́х крове́й, Пресвята́я,/ и па́че сло́ва стра́шно породила́ еси́. Песнь 3 Ирмос: Ты еси́ утвержде́ние/ притека́ющих к Тебе́, Го́споди,/ Ты еси́ Свет омраче́нных,/ и пое́т Тя дух мой. Припев: Святи́и му́ченицы, моли́те Бо́га о на́с. Усты́ пропове́даша свяще́нными свои́ми Го́спода страда́льцы пред мучи́тели,/ стра́ждуще терпели́вно. Припев: Святи́и му́ченицы, моли́те Бо́га о на́с. На у́ды ссещи́ся за Христа́ я́ве преда́шася страда́льцы,/ стра́стию разжже́нием Того́ возлюби́вше. Сла́ва Отцу́ и Сы́ну и Свято́му Ду́ху. Разреши́ша соу́з суеты́ свя́заннии за Христа́,/ и́же с Боже́ственным бы́вше Тере́нтием. И ны́не и при́сно и во ве́ки веко́в. Ами́нь. Богородичен: Спаси́ мя, ро́ждшая Преблага́го Го́спода Ма́ти Чи́стая,/ утиши́ души́ моея́ многомяте́жную бу́рю. Седален, глас 4 Четы́редесять Христо́вы страстоте́рпцы,/ си́лою Христо́вою вооруже́ни,/ бесо́вския полки́ низложи́вше ве́рою,/ уме́рше же, к безсме́ртному концу́, ра́дующеся, преидо́ша/ и нам испроша́ют прегреше́ний оставле́ние,/ при́сно творя́щим тех торжество́. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Грехолюби́в сый, молю́ Тя, Безгре́шнаго Бо́га ро́ждшую,/ взе́млющаго грехи́ ми́ра, Пречи́стая,/ многогре́шную ду́шу мою́ уще́дрити и грехи́ моя́ мно́гия очи́стити:/ гре́шным бо Ты еси́ очище́ние,/ и спасе́ние ве́рных, и заступле́ние. Песнь 4 Ирмос: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́. Припев: Святи́и му́ченицы, моли́те Бо́га о на́с. Украси́стеся, му́ченицы, вдая́нием боле́зней,/ сия́юще па́че сапфи́ра и зла́та тве́рдых подвиго́в показа́ньми. Припев: Святи́и му́ченицы, моли́те Бо́га о на́с. Живоно́сное де́йство от Живонача́льныя Тро́ицы прие́мше,/ вся́ку боле́знь, вся́ку ме́ртвость душ и теле́с отго́ните. Сла́ва Отцу́ и Сы́ну и Свято́му Ду́ху. Не отве́ржемся Го́спода/ и де́моном безу́мным не пожре́м, – Богому́дрии вопия́ху,/ истязу́еми боле́зньми и му́ками. И ны́не и при́сно и во ве́ки веко́в. Ами́нь. Богородичен: Тя, Всенепоро́чная Влады́чице,/ напа́стьми обстои́м, на по́мощь призыва́ю:/ ускори́ и спаси́ мя, Я́же Спа́са Сло́ва ро́ждшая. Песнь 5 Ирмос: У́тренююще вопие́м Ти,/ Го́споди: спаси́ ны,/ Ты бо еси́ Бог наш,/ ра́зве Тебе́, ино́го не ве́мы. Припев: Святи́и му́ченицы, моли́те Бо́га о на́с. Низложи́сте пре́лести тве́рдость, страстоте́рпцы,/ растерза́ньми терпе́ния, всехва́льнии. Припев: Святи́и му́ченицы, моли́те Бо́га о на́с. Крове́й тече́ньми изсуши́вше пре́лести глубину́, блаже́ннии,/ вся́ку ду́шу напои́сте. Сла́ва Отцу́ и Сы́ну и Свято́му Ду́ху. Па́жить многоцве́тна показа́стеся,/ благово́ние Свята́го Ду́ха, Боже́ственнии, испуща́юще, му́ченицы. И ны́не и при́сно и во ве́ки веко́в. Ами́нь. Богородичен: Избавля́я, яви́ся, Пречи́стая, Сын Твой, род челове́ческий,/ из Тебе́ ро́ждься Человеколю́бец. Песнь 6 Ирмос: Моли́тву пролию́ ко Го́споду/ и Тому́ возвещу́ печа́ли моя́,/ я́ко зол душа́ моя́ испо́лнися/ и живо́т мой а́ду прибли́жися,/ и молю́ся, я́ко Ио́на:/ от тли, Бо́же, возведи́ мя. Припев: Святи́и му́ченицы, моли́те Бо́га о на́с. Кре́постию Твое́ю, Иису́се, утвержде́ни, низложи́ша вра́жию си́лу/ и си́льни яви́шася вои́стинну, не́мощию плотско́ю бра́вшеся и пове́ргше кре́пкаго, честни́и и добропобе́днии му́ченицы. Припев: Святи́и му́ченицы, моли́те Бо́га о на́с. Победи́в многообра́знаго зми́я,/ и сего́ нога́ми твои́ми сокруши́л еси́ я́ко вои́стинну главу́,/ победоно́сен на верх твой вене́ц прия́л еси́, Тере́нтие, му́чениче Христо́в,/ святы́х А́нгел соприча́стниче. Сла́ва Отцу́ и Сы́ну и Свято́му Ду́ху. Цельбы́ ра́ка му́ченик источа́ет, и стра́сти очища́ет,/ и душ омыва́ет скве́рну, и де́монов погружа́ет полки́,/ всех же благочести́вых сердца́ напая́ет благода́тию. И ны́не и при́сно и во ве́ки веко́в. Ами́нь. Богородичен: Присе́нну прозря́ше Тя го́ру проро́к Авваку́м, Богоро́дице,/ из нея́же Бог па́че сло́ва про́йде, воплоща́емь,/ и мир спасе́, бу́рею лю́таго греха́ тя́жко одержи́мый. Кондак, глас 2 Му́ченическая честна́я па́мять прии́де днесь,/ веселя́щи вся́ческая,/ Тере́нтия прему́драго и дружи́ны его́./ Те́мже у́бо стеце́мся, да прии́мем исцеле́ния,/ си́и бо благода́ть от Бо́га прия́ша Ду́ха Свята́го/ исцеля́ти неду́ги душ на́ших. Песнь 7 Ирмос: О́троцы евре́йстии в пещи́/ попра́ша пла́мень дерзнове́нно/ и на ро́су огнь преложи́ша, вопию́ще:/ благослове́н еси́, Го́споди Бо́же, во ве́ки. Припев: Святи́и му́ченицы, моли́те Бо́га о на́с. У́ши, благопослушли́вы к Боже́ственному исполне́нию,/ Боже́ственная повеле́ния стяжа́вше, му́дрии, поя́сте преусе́рдно:/ благослове́н еси́, Го́споди Бо́же, во ве́ки. Припев: Святи́и му́ченицы, моли́те Бо́га о на́с. Зако́ны, Боже́ственныя страстоте́рпцы, противоположи́сте повеле́нием беззако́нных,/ веля́щих Христа́ отврещи́ся,/ Ему́же вопие́м:/ благослове́н еси́, Го́споди Бо́же, во ве́ки. Сла́ва Отцу́ и Сы́ну и Свято́му Ду́ху. Удеса́ ка́знем отда́вше, отверго́стеся те́ла/ любве́ ра́ди я́вльшагося на земли́ и плоть взе́мша,/ Ему́же песнопое́те, му́ченицы:/ Бо́же, благослове́н еси́. И ны́не и при́сно и во ве́ки веко́в. Ами́нь. Богородичен: Истле́вшия дре́вле родонача́льники преступле́нием безме́стнаго согреше́ния,/ во утро́бе Христа́ неизрече́нно заче́нши,/ исправля́еши, Пренепоро́чная, Плодо́м чре́ва Твоего́. Песнь 8 Ирмос: Седмери́цею пещь/ халде́йский мучи́тель/ Богочести́вым неи́стовно разжже́,/ си́лою же лу́чшею спасе́ны, сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки. Припев: Святи́и му́ченицы, моли́те Бо́га о на́с. На суди́щи мучи́тельстем, Богому́дрый Тере́нтий и Африка́н,/ Макси́м же и Помпии́й,/ Алекса́ндр, и Зифо́н, и сла́вный Фео́дор,/ вку́пе трегу́бицею спострада́вшая десяти́ца и трегу́бица еди́ницы,/ Спа́са всех Христа́ испове́давше, до́блественно пострада́ша. Припев: Святи́и му́ченицы, моли́те Бо́га о на́с. За Христа́ му́чими, и волу́ями жи́лами бие́ми,/ и неми́лостивно страда́льцы стру́жеми,/ трезу́бцы сре́чеми, и звере́м поверга́еми,/ и разжже́нными рожны́ в ре́бра опаля́еми, вопия́ху:/ свяще́нницы, благослови́те, лю́дие, превозноси́те Его́ во ве́ки. Сла́ва Отцу́ и Сы́ну и Свято́му Ду́ху. Глаго́л жи́зни нося́ще,/ добропобе́днии му́ченицы умерщвле́нныя в пре́лести спасо́ша, враги́ умори́ша/ и, Христо́ву смерть и светоза́рныя изобража́юще стра́сти,/ му́ками многообра́зными блаже́нную кончи́ну прия́ша,/ пою́ще Его́ во вся ве́ки. И ны́не и при́сно и во ве́ки веко́в. Ами́нь. Богородичен: Умерщвле́нную оживи́, па́дшую возста́ви,/ уя́звенную ду́шу мою́ исцели́/ копие́м, Всенепоро́чная, пробо́дшим Боже́ственная ре́бра/ из утро́бы Твоея́ вопло́щшагося Спа́са,/ Его́же о́т роды благословя́т, свяще́нницы пою́т,/ лю́дие превозно́сят во вся ве́ки. Песнь 9 Ирмос: Устраши́ся всяк слух/ неизрече́нна Бо́жия снизхожде́ния,/ я́ко Вы́шний во́лею сни́де да́же и до пло́ти,/ от Деви́ческаго чре́ва быв Челове́к:/ те́мже Пречи́стую Богоро́дицу, ве́рнии, велича́ем. Припев: Святи́и му́ченицы, моли́те Бо́га о на́с. Целе́ние точи́т ра́ка му́ченик,/ от исто́чника Боже́ственнаго Ду́ха напая́ема при́сно./ Преусе́рдно, прииди́те, почерпе́м, те́ло, се́рдце и ду́шу освяща́юще/ и Спа́са Христа́ велича́юще ве́рно, мучениколю́бцы. Припев: Святи́и му́ченицы, моли́те Бо́га о на́с. Я́ко цве́ти Боже́ственнаго села́,/ я́коже шипцы́ та́йнии, процвето́сте/ и благово́ния честна́го Це́рковь напо́лнисте,/ пре́лесть злосмра́дную вра́жию дале́че отгна́вше/ Боже́ственною благода́тию, му́ченицы Христо́вы четы́редесяте. Припев: Святи́и му́ченицы, моли́те Бо́га о на́с. Днесь Макси́ма, ве́рнии,/ и Алекса́ндра вку́пе, и Фео́дора,/ Зифо́на и Помпии́я,/ Африка́на же и Тере́нтия/ с про́чими страда́льцы ве́рно восхва́лим и ублажи́м,/ воспева́юще тех по́двиги. Сла́ва Отцу́ и Сы́ну и Свято́му Ду́ху. Земля́ у́бо кровь ва́шу и телеса́ пострада́вшая в себе́ прия́т,/ Не́бо же – Боже́ственныя ду́хи,/ А́нгельская во́инства, че́стно собра́вшеся в побе́де, му́дрии,/ и Христо́с я́ко победи́тели венча́. И ны́не и при́сно и во ве́ки веко́в. Ами́нь. Богородичен: Просвети́, две́ре све́та, ду́шу мою́,/ лю́тыми помраче́нную преступле́ньми,/ омраче́нную и бе́дствующую,/ и дне прича́стника Боже́ственнаго покажи́,/ я́ко да сла́влю Тя, Предста́тельницу ве́рных непосты́дную.

Минея, 11 Сентября, Кано́н свята́го Глас 5 Песнь 1 Ирмос: Спаси́телю Бо́гу,/ в мо́ри лю́ди немо́крыми нога́ми наста́вльшему/ и фарао́на со всево́инством пото́пльшему,// Тому́ Еди́ному пои́м, я́ко просла́вися. Припев: Преподо́бне о́тче Силуа́не, моли́ Бо́га о на́с. Ума́ чистото́ю зо́ву Ма́тере Го́спода Сил вне́мляй,/ зми́я, грех поражда́ющаго, изрыгну́л еси́,/ и взыгра́ся дух твой о Бо́зе Спа́се твое́м, боголюби́ве о́тче Силуа́не,/ Его́же моли́ о чту́щих па́мять твою́. Припев: Преподо́бне о́тче Силуа́не, моли́ Бо́га о на́с. К тебе́, крест твой взе́мшему и на го́ру безстра́стия возше́дшему,/ припа́дающе, мо́лимся, всеблаже́нне:/ воспламени́ сердца́ на́ша ко всех лю́бящему Бо́гу,/ пла́менем любве́ твоея́, в горе́нии неугаса́ющем. Припев: Преподо́бне о́тче Силуа́не, моли́ Бо́га о на́с. Его́же возлюби́ душа́ твоя́, Сему́ уве́рился еси́,/ и к Нему́ Еди́ному прилепи́лся еси́, боголю́бче,/ и си́це искуси́теля злолука́ваго души́ твоея́ покори́л еси́,/ трудо́м, бде́нием, смире́нием и сле́зною моли́твою сего́ посрамля́я. Сла́ва Отцу́ и Сы́ну и Свято́му Ду́ху. Го́споди Сил, освяща́яй вся́каго челове́ка, гряду́щаго в мир,/ даждь сло́во хвале́ния усто́м мои́м,/ да превознесу́ Трисвято́е и́мя Твое́, ди́вно во святы́х Твои́х почива́ющее,/ с ни́миже и Силуа́н, возлю́бленный Твой, мо́лит Тя о душа́х на́ших. И ны́не и при́сно и во ве́ки веко́в. Ами́нь. Богородичен: Ско́рбных наведе́ния обурева́ют убо́гую мою́ ду́шу,/ и напа́стей о́блацы мое́ покрыва́ют се́рдце, Богоневе́сто,/ но, Свет ро́ждшая Боже́ственный и преве́чный,/ возсия́й мне свет ра́дости, моли́твами Силуа́на, уго́дника Твоего́. Песнь 3 Ирмос: Си́лою Креста́ Твоего́, Христе́,/ утверди́ мое́ помышле́ние,/ во е́же пе́ти и сла́вити// спаси́тельное Твое́ Воскресе́ние. Припев: Преподо́бне о́тче Силуа́не, моли́ Бо́га о на́с. Кто испове́сть страда́ния души́ твоея́, преподо́бне Силуа́не,/ егда́ дух зло́бы поднебе́сныя претя́ше ти,/ от Го́спода удали́ти ду́шу твою́ зложела́я?/ Сете́й сего́ лука́ваго изба́ви и нас, моли́твенниче о всей вселе́нней. Припев: Преподо́бне о́тче Силуа́не, моли́ Бо́га о на́с. Си́лою терпе́ния и красото́ю смире́ния душа́ твоя́, всеблаже́нне,/ хра́мина Ду́ху Свято́му устро́ися, сего́ ра́ди взыва́л еси́:/ о лю́дие, творе́ние Бо́жие, позна́йте Творца́/ и любо́вию к Нему́ прилепи́теся. Припев: Преподо́бне о́тче Силуа́не, моли́ Бо́га о на́с. Исто́чник ра́достей твои́х и средото́чие мы́слей твои́х/ и́мя Бо́га Вы́шняго бысть, о́тче Силуа́не,/ к Нему́ прилепи́тися и в Нем утверди́тися/ моли́твами твои́ми помози́ нам, к тебе́ прибега́ющим. Сла́ва Отцу́ и Сы́ну и Свято́му Ду́ху. Го́споди, Го́споди, да́руй си́лу Твоея́ благода́ти,/ да позна́ют Тебе́ вси лю́дие Ду́хом Святы́м,/ взыва́ем к Тебе́ уми́льно, я́коже возлю́бленный Твой,/ любо́вию к Тебе́ распаля́емый, Силуа́н преди́вный. И ны́не и при́сно и во ве́ки веко́в. Ами́нь. Богородичен: Не умолчу́ вопи́ти ясне́йше вели́чия Твоя́:/ а́ще бо не Ты, Отрокови́це,/ всегда́ предстоя́ла, моля́щи о мне Сы́на Твоего́,/ кто бы толи́кия бу́ри и лю́тых бед изба́вил мя? Седален, глас 4 Жа́ждею по Бо́зе возревнова́в, о́тче наш Силуа́не, зе́млю оте́ческую оста́вил еси́,/ и со пустыннолю́бцы Горы́ Афо́нския/ дла́ни твоя́ порабо́тати Го́сподеви всеусе́рднейше распросте́рл еси́,/ иде́же равноа́нгельскими труды́ твои́ми вертогра́д Влады́чицы ми́ра преукра́сил еси́/ и, я́ко благово́ние, Це́ркви Вселе́нстей возблагоуха́л еси́,/ лозо́ виногра́да но́ваго, Ду́хом Святы́м облагода́тствованная. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Несть возмо́жно исчи́слити вели́чия Твоя́, Богоро́дице,/ ниже́ изрещи́ неизсле́димую па́че ума́ си́лу чуде́с Твои́х, соверша́емых вы́ну,/ любо́вию Тя чту́щим и ве́рою покланя́ющимся,/ я́ко вои́стину Бо́га ро́ждшей. Песнь 4 Ирмос: Услы́шах слух си́лы Креста́,/ я́ко рай отве́рзеся им,/ и возопи́х:// сла́ва си́ле Твое́й, Го́споди. Припев: Преподо́бне о́тче Силуа́не, моли́ Бо́га о на́с. Я́ко пчела́ трудолю́бная, посто́м и моли́твою к Бо́гу прилежа́л еси́/ и Богоро́дицу Пречи́стую мир не оставля́ти сле́зно умоля́л еси́,/ о́тче преподо́бне, не преста́й и ны́не о нас моли́тися,/ я́ко и́маши дерзнове́ние ве́лие. Припев: Преподо́бне о́тче Силуа́не, моли́ Бо́га о на́с. Кла́дязь но́вый благода́ти неисчерпа́емыя в Горе́ Афо́нстей яви́лся еси́, всеблаже́нне,/ из него́же, па́че ме́да и со́та,/ сла́дость любве́ Христо́вы Ду́хом Святы́м источа́ется,/ е́юже в го́рести грехо́вней услади́ сердца́ на́ша. Припев: Преподо́бне о́тче Силуа́не, моли́ Бо́га о на́с. Го́споду, ре́кшу: иде́же есть сокро́вище ва́ше, ту бу́дет и се́рдце ва́ше,-/ благоволи́ у́бо, о всеблаже́нне, с тобо́ю Тому́ взыва́ти:/ Го́споди, Ду́хом Твои́м Святы́м даждь се́рдцу моему́ жа́жду,/ да никогда́же Тобо́ю насы́щуся. Сла́ва Отцу́ и Сы́ну и Свято́му Ду́ху. Я́ко же́ртву благово́нную и непоро́чную,/ принеси́ моли́твы твоя́ за ны ко Пресвято́й Тро́ице, преподо́бне о́тче наш,/ и ми́лости испроси́ ненави́дящим и вражду́ющим на нас,/ и их и нас изба́ви от вся́кия ско́рби и печа́ли. И ны́не и при́сно и во ве́ки веко́в. Ами́нь. Богородичен: Тя, Чи́стую, Тя, Де́ву Нескве́рную, еди́ну и́мам сте́ну необори́мую,/ прибе́жище, покро́в кре́пок, ору́жие спасе́ния,/ не пре́зри мене́, блу́днаго, наде́ждо ненаде́емых,/ немощству́ющих по́моще, ра́досте оскорбля́емых и заступле́ние. Песнь 5 Ирмос: Утренююще, вопие́м Ти:/ Го́споди, спаси́ ны,/ Ты бо еси́ Бог наш,// ра́зве бо Тебе́, ино́го не зна́ем. Припев: Преподо́бне о́тче Силуа́не, моли́ Бо́га о на́с. Ты, Го́споди, созда́л мя еси́ и святы́м Креще́нием просвети́л мя еси́,/ Ты проща́еши грехи́ моя́ и да́руеши причаща́тися Те́ла Твоего́ и Кро́ве,/ да́руй ми си́лу всегда́ пребыва́ти в Тебе́,/ Силуа́ново рыда́ние приношу́ Ти, Бо́же наш. Припев: Преподо́бне о́тче Силуа́не, моли́ Бо́га о на́с. Ума́ моего́ омраче́ние и страсте́й теле́сных обурева́ние/ твои́ми моли́твами, всеблаже́нне, просвети́ и ути́ши,/ я́коже дерзну́л еси́ укроти́ти во́лны морски́я,/ не терпя́ ви́дети ры́бари ги́бельными ве́тры обурева́емы. Припев: Преподо́бне о́тче Силуа́не, моли́ Бо́га о на́с. Недосто́йными усты́ приноси́мое тебе́ убо́гое хвале́ние на́ше, преподо́бне, не пре́зри,/ но приими́ и воспева́ющих па́мять твою́ моли́твою посети́,/ бед и напа́стей и ве́чнаго муче́ния изба́ви,/ да не постыди́мся, на тя упова́юще. Сла́ва Отцу́ и Сы́ну и Свято́му Ду́ху. Я́коже го́рлица пустыннолю́бная, от стра́жи у́тренния до но́щи/ воспева́ти Тро́ицу Единосу́щную и Неразде́льную/ со пустыннолю́бцы Горы́ Святы́я прилежа́л еси́, о́тче Силуа́не,/ умилостивле́ния ме́ртвым, живы́м и гряду́щим хода́тайствуя. И ны́не и при́сно и во ве́ки веко́в. Ами́нь. Богородичен: Кий дар благодаре́ния принесу́ Ти, Богоро́дице,/ я́ко наслади́хся Твои́х дарова́ний и Твоея́ безме́рныя бла́гости?/ Те́мже у́бо песносло́влю и велича́ю/ Твою́ неизрече́нную ко мне ми́лость. Песнь 6 Ирмос: Обы́де мя бе́здна,/ гроб мне кит бысть,/ аз же возопи́х к Тебе́, Человеколю́бцу,// и спасе́ мя десни́ца Твоя́, Го́споди. Припев: Преподо́бне о́тче Силуа́не, моли́ Бо́га о на́с. Святи́телие и свяще́нницы, и́ноцы и вси лю́дие,/ ра́дующеся, вку́пе просла́вите Бо́га и Пречи́стую Ма́терь Его́,/ кади́ло но́вое, моли́тву чи́стую Силуа́на, пла́менем Ду́ха Свята́го горя́ща,/ у Престо́ла Небе́снаго за нас прия́вших. Припев: Преподо́бне о́тче Силуа́не, моли́ Бо́га о на́с. Возвесели́ся, Горо́ Афо́нская, со пустыннолю́бцы твои́ми/ и во псалме́х и пе́ниих и песнех духо́вных воскли́кни Бо́гу:/ да уго́ден бу́дет пред Лицо́м Твои́м ве́рный слуга́ Твой,/ его́же моли́твами благода́ть но́вая Це́ркви Святе́й дарова́ся. Припев: Преподо́бне о́тче Силуа́не, моли́ Бо́га о на́с. Прииди́те, вси ве́рнии, со пустыннолю́бцы Горы́ Святы́я,/ па́мять пра́веднаго с похвала́ми почти́м, взыва́юще:/ возноси́те Го́спода Бо́га на́шего и покланя́йтеся в горе́ святе́й Его́/ ди́вно во святы́х Свои́х Почива́ющему. Сла́ва Отцу́ и Сы́ну и Свято́му Ду́ху. Бо́же, кто уподо́бится Тебе́?/ Ты Еди́н Вы́шний по всей земли́./ Мы же, равноа́нгельному смире́нию раба́ Твоего́ вне́млюще,/ о́бразу и подо́бию Твоему́ Ду́хом Святы́м ча́ем обнови́тися. И ны́не и при́сно и во ве́ки веко́в. Ами́нь. Богородичен: Не скры́ю глубины́ Твои́х щедро́т, и то́ка безме́рных чуде́с,/ и исто́чника приснотеку́щаго вои́стину е́же ко мне ми́лости Твоея́, Богоро́дице:/ но всем испове́дую, и вопию́, и веща́ю. Кондак, глас 2 Смиренному́дрия испове́дниче преди́вный/ и человеколю́бия Ду́хом Святы́м согрева́емая добро́то,/ Бо́гу возлю́бленне Силуа́не,/ о по́двизе твое́м Це́рковь Росси́йская ра́дуется,/ и́ноцы же Горы́ Афо́нския и вси христиа́нстии лю́дие,/ веселя́щеся, сыно́внею любо́вию к Бо́гу устремля́ются./ Его́же моли́ о нас, равноа́нгельне богове́дче,// во е́же спасти́ся нам, в горе́нии любве́ тебе́ подража́ющим. Икос Име́я бога́тство благода́ти, во е́же ду́хом на Небеса́ возведе́ну бы́ти,/ вои́стину ра́дости неизрече́нныя сподо́бился еси́, о́тче преблаже́нне Силуа́не./ Егда́ бо, вне образо́в ми́ра, в созерца́нии безме́рно лю́бящаго Христа́ Бо́га Лице́ ви́дети сподо́бился еси́,/ тогда́, Ду́хом Святы́м укрепля́емь,/ в вертогра́де Преблагослове́нныя Богома́тере Тому́ всеусе́рднейше послужи́л еси́./ Его́же моли́, равноа́нгельне богове́дче,/ во е́же спасти́ся нам, в горе́нии любве́ тебе́ подража́ющим. Песнь 7 Ирмос: В пещи́ о́гненней/ песносло́вцы спасы́й о́троки,// благослове́н Бог оте́ц на́ших. Припев: Преподо́бне о́тче Силуа́не, моли́ Бо́га о на́с. И́го благо́е, бре́мя ле́гкое Христа́ Спа́са взем,/ и ветри́лом Ду́ха Свята́го, в стра́се боже́ственнем,/ к приста́нищу благооти́шному кора́бль душе́вный твой упра́вил еси́, о́тче Силуа́не,/ мона́хом, в по́двизе изнемога́ющим, о́бразе преди́вный. Припев: Преподо́бне о́тче Силуа́не, моли́ Бо́га о на́с. Ка́ко не диви́мся смире́нию и человеколю́бию твоему́, Силуа́не предо́бре,/ ви́дяще тя сле́зы источа́юща/ и о су́щих во а́де и нераска́янных гре́шницех рыда́ньми сраспина́ющася,/ враго́м же свои́м проще́ния прося́ща, всепроще́нию Христо́ву подража́юща? Припев: Преподо́бне о́тче Силуа́не, моли́ Бо́га о на́с. Псало́мски восклица́я: ви́дена бы́ша ше́ствия Твоя́, Бо́же,/ ше́ствия Бо́га моего́ и Царя́, Иже во свято́м,/ Сего́ вои́стину в лице́ отца́ духо́внаго Авраа́мия зре́ти сподо́бился еси́,/ чти́ти наста́вники на́ша благода́тне нас наставля́я, Силуа́не богове́дче. Сла́ва Отцу́ и Сы́ну и Свято́му Ду́ху. О́браз начерта́ний доброде́тельных дея́ний сый,/ смире́н же, и кро́ток, и наста́вник до́брый мона́шествующим в Горе́ Афо́нстей показа́лся еси́, Силуа́не,/ сего́ ра́ди мона́си и мирсти́и/ предста́тельству твоему́ пред Бо́гом вверя́ются. И ны́не и при́сно и во ве́ки веко́в. Ами́нь. Богородичен: Покро́в бу́ди, и предста́тельство, и заступле́ние, и похвала́, Де́во,/ обнаже́ну мне ны́не вся́кия по́мощи,/ безпо́мощных си́ло и наде́ждо ненаде́емых,/ Силуа́на моли́твами, со́лнца тепле́йшими. Песнь 8 Ирмос: Из Отца́ пре́жде век рожде́ннаго Сы́на и Бо́га/ и в после́дняя ле́та воплоще́ннаго от Де́вы Ма́тере, / свяще́нницы, по́йте,// лю́дие, превозноси́те во вся ве́ки. Припев: Преподо́бне о́тче Силуа́не, моли́ Бо́га о на́с. Воздея́ние рук на́ших приими́, преподо́бне,/ Влады́чней бла́гости подо́бяся, прегреше́ния на́ша презира́я,/ ты бо ду́шу твою́ уязви́л еси́ Христо́вою любо́вию и Пречи́стыя Его́ Ма́тере,/ Е́юже умоли́ спасти́ ду́ши на́ша. Припев: Преподо́бне о́тче Силуа́не, моли́ Бо́га о на́с. Я́ко крин преди́вный и сапфи́р пречу́дный,/ в вертогра́де Пречи́стыя процве́л еси́, преподо́бне Силуа́не,/ Влады́це твоему́ Христу́ смире́нно ревну́я, вы́ше бо челове́ка восприе́м житие́,/ и́мже мно́гих ду́ши Го́споду приво́диши. Припев: Преподо́бне о́тче Силуа́не, моли́ Бо́га о на́с. Вои́стину носи́тель даро́в Свята́го Ду́ха был еси́/ и, разли́чными доброде́тельми укра́шен, Силуа́не,/ смире́нием го́рнюю высоту́ насле́див, нището́ю Небе́сное бога́тство изря́дно прия́л еси́./ Насле́дники сего́ покажи́ ны, моли́твами твои́ми. Сла́ва Отцу́ и Сы́ну и Свято́му Ду́ху. Сия́ния Боже́ственнаго и Ду́ха Свята́го сла́дости прича́стника показа́ тя Госпо́дь, о́тче Силуа́не,/ егда́ в неизрече́ннем Фаво́рстем сия́нии тя посети́л есть./ Зре́ти сла́ву Сего́ в све́те блиста́ния Божества́ Его́/ сподо́би и нас, мо́лимтися. И ны́не и при́сно и во ве́ки веко́в. Ами́нь. Богородичен: Пречи́стая Влады́чице, Небе́сных Сил превы́шшая,/ ро́ждшая Спа́са, всех Соде́теля, Единосу́щна Отцу́ и Ду́ху,/ даждь нам сло́во, Препе́тая, я́ко да возмо́жем пе́ти Тя,/ су́щую Засту́пницу ро́да на́шего. Песнь 9 Ирмос: Тя, па́че ума́ и словесе́ Ма́терь Бо́жию,/ в ле́то Безле́тнаго/ неизрече́нно ро́ждшую,// ве́рнии, единому́дренно велича́ем. Припев: Преподо́бне о́тче Силуа́не, моли́ Бо́га о на́с. В житии́ подви́жника преди́вна, по сме́рти же моли́твенника/ и сострада́теля за ны пред Бо́гом изря́дна позна́хом тя, преподо́бне,/ егда́ иеродиа́кона Дави́да, смерте́льне отра́влена, посеще́нием твои́м внеза́пу исцели́л еси́,/ покая́ния вре́мя сему́ исхода́тайствовав усе́рдно. Припев: Преподо́бне о́тче Силуа́не, моли́ Бо́га о на́с. Земли́ Росси́йския сосу́де избра́нный и Горы́ Афо́нския подви́жниче но́вый,/ уго́дниче Бо́жий Силуа́не, простри́ дла́ни твоя́ за ны ко Го́споду/ и, я́ко ми́ро благово́нное, моли́твы вознеси́,/ да спасе́т от сме́рти ду́ши на́ша. Припев: Преподо́бне о́тче Силуа́не, моли́ Бо́га о на́с. А́нгелом единонра́вна и святы́м соприча́стна/ к го́рнему Сио́ну призва́ тя Госпо́дь, преподо́бне,/ иде́же вознеси́ моли́твы твоя́ за ны ко всех Влады́це,/ хода́тайствуя о Святе́й Це́ркви и о нас, чту́щих па́мять твою́ сладкопе́сненно. Сла́ва Отцу́ и Сы́ну и Свято́му Ду́ху. Огне́м купину́ не опали́вшаго и пла́менными язы́ки Це́рковь Христо́ву освяти́вшаго,/ смире́ния твоего́ ра́ди, Ду́хом Святы́м возжже́н был еси́, о́тче преди́вне,/ да житие́м нескве́рным научи́ши ны покланя́тися Тро́ице, всех Бо́гу,/ пла́менем любве́ твоея́ к Нему́ приближа́ющихся. И ны́не и при́сно и во ве́ки веко́в. Ами́нь. Богородичен: Яко всех Цари́цу и Влады́чицу на́шу,/ Тя любо́вию сла́вим, Пречи́стая Де́во,/ просве́щшиися Страстьми́ Сы́на Твоего́ и позна́вшии Сего́ всем Благоде́теля./ Сла́ва благода́ти Его́ во вся ве́ки. Светилен Све́та неме́ркнущаго блиста́нием украси́лся еси́, преподо́бне о́тче наш Силуа́не,/ и предстои́ши ве́чно престо́лу сла́вы Триеди́наго Божества́, о Ду́се Свято́м ликовству́яй./ Благода́ти сея́ испроси́ и нам,/ да моли́твами твои́ми прича́стницы жи́зни ве́чныя бу́дем. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Осия́нием Твои́м просвети́ на́ша помышле́ния, и сердца́, и ра́зум, Ма́ти Безневе́стная,/ я́ко да стезя́ми жи́зни пра́во ходя́ще, ми́лость приобря́щем,/ возвеща́юще при́сно хвалы́ Твоя́.

Глас 4 Пе́снь 1. Ирмо́с: Мо́ря чермну́ю пучи́ну, невла́жными стопа́ми, дре́вний пешеше́ствовав Изра́иль, крестообра́зными Моисе́овыма рука́ма Амали́кову си́лу в пусты́ни победи́л е́сть. Припев: Священному́чениче Ромáне, моли́ Бо́га о на́с. Незаходи́мыми луча́ми сия́я Тро́ичными я́сно и со страстоте́рпческими ли́ки просвеща́емь, просвеще́ние ми́ посли́, тму́ стра́стную отгоня́я богоприя́тными твои́ми, Рома́не, моли́твами. Мо́ря и́дольскаго волне́нием не обурева́емь, я́ко на Христо́ве ка́мени утверди́вся, треволне́ния разреши́л еси́ тишино́ю Боже́ственнаго Ду́ха многомяте́жнаго безбо́жия. Цветни́к я́ко благосла́вный и благопло́дный, Це́рковь Христо́ву, гобзу́ющу все́ми благи́ми, Рома́не, соблю́л еси́ от волко́в непристу́пну, твои́м уче́нием утвержда́я сию́. Богоро́дичен: Поми́ловася Тобо́ю, Всенепоро́чная, естество́ челове́ческое и́стинно: Творе́ц бо, из Тебе́ воплоти́вся па́че сло́ва и смы́сла, за ны́ на сме́рть приведе́ся, избавля́я от а́да на́с. Пе́снь 3. Ирмо́с: Весели́тся о Тебе́ Це́рковь Твоя́, Христе́, зову́щи: Ты́ моя́ кре́пость, Го́споди, и прибе́жище, и утвержде́ние. Зве́ря разу́мнаго пра́щею уби́в, Рома́не, словесы́ твои́ми па́ству Христо́ву спа́сл еси́ от и́дольскаго вре́да нетле́нну. Возмога́я ору́жием кре́стным, прило́ги вра́жия возврати́л еси́ и не́мощь и́х обличи́л еси́, Рома́не му́дре достоблаже́нне. Низложи́л еси́ вра́жия, сокруши́в, че́люсти Рома́не сла́вне, за Христа́, блаже́нне, лани́те стру́жеме, приснопа́мятне. Богоро́дичен: Естество́м еди́н Бо́г Сло́во О́тчее и соесте́ственное Ду́ху, пло́тию из Тебе́ оде́явся, земны́я обожи́, Богома́ти. Седа́лен, гла́с 4. По́стнически лука́ваго попра́в и страда́льчески, му́чениче Христо́в, просла́вился еси́, претерпе́в му́жески соверше́нным умо́м. Те́мже причта́лся еси́ лико́м му́ченическим и ве́чнующее Ца́рство стяжа́л еси́; в не́мже лику́я, помяни́ на́с, соверша́ющия ве́рою па́мять твою́. Богоро́дичен: По Бо́зе в Тво́й, Богоро́дице, прибега́ю, смире́нный, покро́в боже́ственный, припа́дая, молю́ся: поми́луй, Пречи́стая, я́ко превзыдо́ша главу́ мою́ греси́, и бою́ся, Влады́чице, му́ки, и трепе́щу, моле́ние сотвори́, Чи́стая, к Сы́ну Твоему́ от си́х изба́вити мя́. Крестобогоро́дичен: Из Безнача́льнаго Отца́ Рожде́ннаго, напосле́док Тя́ пло́тию Ро́ждшая, на Кресте́ ви́сяща зря́щи, Христе́, — увы́ Мне́, любе́знейший Иису́се! — вопия́ше, — ка́ко сла́вимый я́ко Бо́г от а́нгел, от беззако́нных ны́не челове́к, Сы́не, хотя́, распина́ешися? Пою́ Тя́, Долготерпели́ве. Пе́снь 4. Ирмо́с: Вознесе́на Тя́ ви́девши Це́рковь на Кресте́, Со́лнце пра́ведное, ста́ в чи́не свое́м, досто́йно взыва́ющи: сла́ва си́ле Твое́й, Го́споди. Направля́емь, я́ко ле́ствицею, на дре́во возне́слся еси́, блаже́нне, неизглаго́ланною добро́тою и пребыва́ющий ли́к пости́гл еси́, му́чениче Рома́не достосла́вне. Совле́кся ме́ртвенныя оде́жды в му́ках, блаже́нне, и спасе́ния в све́тлую ри́зу све́тло, всесла́вне му́чениче Рома́не, обле́клся еси́. Умудри́вся вдохнове́нием Уте́шителя, о́трочища язы́к Тя́, Го́спода сла́вы, Творца́ пропове́да все́х, Человеколю́бче, и Бо́га, спасти́ могу́щаго. Богоро́дичен: Благослове́н, Де́во, Пло́д Твоего́ чре́ва, И́мже изба́вихомся кля́твы сме́ртныя, вся́ оте́чествия язы́ков, и Тобо́ю благослове́ннии я́ко жи́зни пое́м Тя́ Хода́таицу. Пе́снь 5. Ирмо́с: Ты́, Го́споди, мо́й све́т, в ми́р прише́л еси́, Све́т Святы́й, обраща́яй из мра́чна неве́дения ве́рою воспева́ющия Тя́. Струя́ми страда́льческими крове́й твои́х потопи́л еси́ мо́ре безбо́жия, ре́ки же исцеле́ния, Рома́не, источи́л еси́. Я́ко да́р избра́нный, же́ртву я́ко непоро́чну, прине́сл еси́ Влады́це, Рома́не, богосло́вствующаго младе́нца закала́ема. Юро́дство вра́жие му́дростию Свята́го Ду́ха уязви́л еси́, уязви́в твое́ те́ло ра́нами, Рома́не всесла́вне. Богоро́дичен: Потреби́ла еси́ кля́тву, я́ко ра́дость ро́ждши, и обнови́ла еси́ челове́ки Твои́м Рождество́м, Де́во Мари́е Неискусобра́чная. Пе́снь 6. Ирмо́с: Пожру́ Ти со гла́сом хвале́ния, Го́споди, Це́рковь вопие́т Ти́, от бесо́вския кро́ве очи́щшися, ра́ди ми́лости от ре́бр Твои́х исте́кшею кро́вию. Ме́ртвость и тлю́ строга́нием отложи́в, жи́зни нетле́нныя в добро́ту оде́явся, му́чениче, укра́шен светлостьми́, Рома́не, духо́вными, незаходя́щими. Источи́в я́ко кро́вныя то́ки уче́ния отре́занный тво́й язы́к, и́миже непогиба́ющее насле́довал еси́, страстоте́рпче, блаже́нство, при́сно пребыва́ющее. Прему́дрости пото́к жажда́в, испи́л еси́ сове́том ро́ждшия уста́ богосло́вна младе́нца, мече́м к жи́зни прише́дша неконча́емей. Богоро́дичен: Ско́рое прибе́жище бу́ди мне́, Пречи́стая, наси́лия избавля́ющи мя́, и стра́стнаго студа́ изыма́ющи, и к Боже́ственней стези́ направля́ющи, Богома́ти. Пе́снь 7. Ирмо́с: В пещи́ Авраа́мстии о́троцы перси́дстей, любо́вию благоче́стия па́че, не́жели пла́менем опаля́еми, взыва́ху: благослове́н еси́ в хра́ме сла́вы Твоея́, Го́споди. Удавле́нием твои́м, страстоте́рпче, удави́в зми́я, обре́л еси́ жи́знь и́стинно, пресла́вне Рома́не, зовы́й всегда́: благослове́н еси́ в хра́ме сла́ве Твоея́, Го́споди. Све́та незаходи́маго луча́ми озаря́емь, пла́мень высо́кий угаси́л еси́, Рома́не, проро́ческим дарова́нием украша́емь, и с му́ченическими ли́ки сочета́емь, зовы́й: благослове́н еси́ в хра́ме сла́вы Твоея́, Го́споди. Я́ко от са́да многоцве́тнаго, ма́терними уче́нии, ши́пок благово́нный младе́нческий во́зраст, му́ченическою кро́вию напая́емь, Христу́ нетле́нно прино́сится. Богоро́дичен: Впа́дшыя во глубину́ грехо́вную, Всепе́тая, еди́на Бо́га ро́ждшая без се́мене, изведи́ ны, пою́щыя Тя́: благослове́нна Ты́ в жена́х, Всенепоро́чная Влады́чице. Пе́снь 8. Ирмо́с: Ру́це распросте́р, Дании́л, льво́в зия́ния в ро́ве затче́; о́гненную же си́лу угаси́ша, доброде́телию препоя́савшеся, благоче́стия рачи́тели, о́троцы, взыва́юще: благослови́те, вся́ дела́ Госпо́дня, Го́спода. Глаго́лов послу́шник Христо́вых бы́л еси́, сла́вне, ду́шу твою́ положи́в за па́ству твою́, усе́рдно за Него́ удавля́емь, му́чимь, и стру́жемь, и ураня́емь, вопия́л еси́: благослови́те вся́ дела́ Госпо́дня Го́спода. Вои́стинну уста́ твоя́ и язы́к ра́дости и весе́лия испо́лнися, благословя́ Бо́га непреста́нно: отре́зан бо и кро́вию ка́пля, зако́н ве́ры на́м, Рома́не, полага́ет, вопия́: благослови́те вся́ дела́ Госпо́дня Го́спода. Богоро́дичен: Сло́во ро́ждши О́тчее Боже́ственным Ду́хом, Де́ва пребыла́ еси́, Богороди́тельнице безму́жная, превозше́дши есте́ственныя зако́ны рождество́м Твои́м. Те́мже, ра́дующеся, пое́м: благослови́те вся́ дела́ Госпо́дня Го́спода. Пе́снь 9. Ирмо́с: Ка́мень нерукосе́чный от несеко́мыя горы́, Тебе́, Де́во, краеуго́льный отсече́ся — Христо́с, совокупи́вый разстоя́щаяся естества́. Те́м, веселя́щеся, Тя́, Богоро́дице, велича́ем. Все́ твое́ жела́ние, му́чениче, ко Влады́це просте́рл еси́ и, многови́дныя ра́ны претерпе́в, Рома́не сла́вне, сла́вы неизглаго́ланныя получи́л еси́ и блаже́ннаго наслажде́ния. Се́ вме́сто боле́зни сла́дость тебе́ пото́ка даде́ся, му́чениче, вене́ц нося́щу ти́, Рома́не, и от кро́ве багряни́цу иму́щу: я́ко ши́пок благоуха́ющ и неувяда́ющ, младе́нец закла́н бы́л еси́ Христа́ ра́ди. Богоро́дичен: Ты́ началороди́тельныя кля́твы, земны́я, Де́во, изба́вила еси́ и отве́рзла еси́ на́м жи́знь Еде́ма Рождество́м Твои́м па́че естества́. Те́мже, веселя́щеся, Тя́, Богоро́дице, велича́ем.

Минея, 7 Мая, Канон преподобного Глас 4 Песнь 1 Ирмос: Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,/ и воспою́, ра́дуяся, Тоя́ чудеса́. Припев: Преподо́бне о́тче Ни́ле, моли́ Бо́га о нас. Грехо́вною тьмо́ю покрыва́емь,/ не могу́ я́сно зре́ти к высоте́ исправле́ний твои́х, о́тче,/ но ты, я́ко сострада́телен и ми́лостив,/ помози́ ми, возсиява́я спаси́тельный в души́ мое́й свет,/ да пою́, ра́дуяся, све́тлая твоя́ исправле́ния и пресла́вная чудеса́. Припев: Преподо́бне о́тче Ни́ле, моли́ Бо́га о нас. Мы́сленный рай показа́лся еси́, о́тче,/ произраща́я разли́чных доброде́телей цве́ты,/ плоды́ кра́сны своему́ Влады́це прине́сл еси́,/ украси́вшему тя чудесы́. Припев: Преподо́бне о́тче Ни́ле, моли́ Бо́га о нас. Еди́ну преступи́в за́поведь, первозда́нный из ра́я изгна́н бысть;/ ты же, преподо́бне, за́поведей Влады́чних соблюде́нием насле́дник сего́ показа́лся еси́,/ дре́ва живо́тнаго наслажда́яся при́сно/ и, в весе́лии чи́стаго се́рдца твоего́ зря Го́спода,/ Боже́ственнаго све́та Его́ причаща́ешися. Сла́ва Отцу́ и Сы́ну и Свято́му Ду́ху. Неукло́нно ше́ствуя по стопа́м за́поведей,/ жезл си́лы, Крест Христо́в в рука́х держа́,/ в приста́нище безстра́стия дости́гл еси́, о́тче,/ тем и благода́ть прия́л еси́ цели́ти неду́ги челове́ков/ и пресла́вная твори́ти чудеса́. И ны́не и при́сно и во ве́ки веко́в. Ами́нь. Богородичен: Ны́не вре́мя по́мощи Твоея́, Влады́чице,/ при́зри ми́лостивно на озлобле́ние Твоего́ раба́, Чи́стая,/ подаю́щи утеше́ние мне,/ я́ко да и аз воспою́, ра́дуяся, Боже́ственная Твоя́ чудеса́. Песнь 3 Ирмос: Твоя́ песносло́вцы, Богоро́дице,/ живы́й и незави́стный исто́чниче,/ лик себе́ совоку́пльшия, духо́вно утверди́,/ в Боже́ственней Твое́й сла́ве/ венце́в сла́вы сподо́би. Припев: Преподо́бне о́тче Ни́ле, моли́ Бо́га о нас. Не гордя́ся, дерзну́х песнь приноси́ти твое́й свяще́нной па́мяти, о́тче,/ но любо́вию твое́ю дви́жим, Боголюбе́зне,/ приими́ у́бо сию́ от твоего́ раба́/ и ко Го́споду хода́тайствы твои́ми спасе́ния сподо́би мя. Припев: Преподо́бне о́тче Ни́ле, моли́ Бо́га о нас. Любо́вию тя чту́щия, о́тче, спаса́й от бед и обстоя́ний,/ в честне́й твое́й па́мяти лик себе́ совоку́пльшия,/ и коле́блемыя ны страсте́й бу́рею утверди́ твои́ми мольба́ми/ и во приста́нище спасе́ния дости́гнути сподо́би. Припев: Преподо́бне о́тче Ни́ле, моли́ Бо́га о нас. Кто изрече́т твоя́ по́двиги, о́тче,/ и смире́ния твоего́ высоту́ кто ска́жет?/ Вои́стинну Христо́в учени́к был еси́, о Боголюбе́зне,/ и снасле́дник Того́ Ца́рствия./ Помина́й у́бо чад твои́х, о́тче, моля́ся Христу́,/ да и нас ча́сти спаса́емых сподо́бит. Сла́ва Отцу́ и Сы́ну и Свято́му Ду́ху. Неключи́м аз есмь и вся́чески непотре́бен/ и недоуме́ю по достоя́нию воспе́ти твоя́, я́же к Бо́гу, исправле́ния,/ но, о́тче благосе́рде, любо́вь и ве́ру приими́/ и твои́ми свяще́нными хода́тайствы спасе́ния мя сподо́би. И ны́не и при́сно и во ве́ки веко́в. Ами́нь. Богородичен: Недоуме́ет вои́стинну всяк язык челове́ческий/ досто́йно славосло́вити Тя, о Влады́чице, по достоя́нию;/ аз же, неве́жествием и грехи́ мно́гими одержи́м,/ что и́мам принести́ Тебе́, Блага́я?/ оба́че любо́вь и ве́ру Твоего́ раба́ приими́/ и спасе́ния сподо́би мя. Седален, глас 8 От дея́ния на высоту́ Боже́ственнаго восте́кл еси́, о́тче, виде́ния/ и, молча́ние коне́чное облобыза́в,/ безмяте́жным умо́м Бо́гу при́сно бесе́довал еси́,/ сего́ ра́ди разуме́нии Боже́ственными отту́ду обогати́лся еси́, блаже́нне,/ и был еси́ па́стырь и наста́вник после́дующим равноа́нгельному житию́ твоему́./ Тем, Богоно́се о́тче наш Ни́ле,/ моли́ Христа́ Бо́га грехо́в оставле́ние дарова́ти/ пра́зднующим любо́вию святу́ю па́мять твою́. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: В пучи́ну лю́те впав уны́ния/ от мно́жества грехопаде́ний мои́х, Чи́стая,/ приидо́х в недоуме́ние и отча́янием ны́не одержу́ся./ Влады́чице Богоро́дице, Ты мя спаси́, Ты ми помози́,/ гре́шным бо Ты еси́ очище́ние,/ я́ко да и аз, со все́ми, получи́вшими Тобо́ю спасе́ние,/ веселя́ся, воспою́ непости́жное та́инство рождества́ Твоего́ и безме́рную Твою́ ми́лость. Песнь 4 Ирмос: Седя́й в Сла́ве на Престо́ле Божества́/ во о́блаце ле́гце,/ прии́де Иису́с Пребоже́ственный/ Нетле́нною Дла́нию и спасе́ зову́щия:/ сла́ва, Христе́, си́ле Твое́й. Припев: Преподо́бне о́тче Ни́ле, моли́ Бо́га о нас. Низве́ргл еси́ вся вра́жия, о́тче, ополче́ния,/ стоя́ бо́дренно на стра́жи внима́ния/ и издале́ча предзря́ сих кова́рныя се́ти,/ моли́твою же и посто́м безбе́дно прелета́я, победи́тельно пел еси́:/ сла́ва, Христе́, си́ле Твое́й. Припев: Преподо́бне о́тче Ни́ле, моли́ Бо́га о нас. Всегда́ во уме́ име́я страда́ния Спа́са на́шего и во́льное на Кресте́ распя́тие,/ сраспя́лся еси́ Тому́ умерщвле́нием пло́ти, преподо́бне,/ и, Того́ Боже́ственною любо́вию уязви́в твое́ се́рдце, Боголюбе́зне,/ показа́лся еси́ умиле́ния исто́чник, слезоточа́ при́сно и поя́:/ сла́ва, Христе́, благоутро́бному снизхожде́нию Твоему́. Припев: Преподо́бне о́тче Ни́ле, моли́ Бо́га о нас. Христо́вою уя́звлен любо́вию,/ сле́зныя то́ки непреста́нно из оче́с излива́л еси́, Ни́ле, о́тче наш приснопа́мятне,/ и в пусты́ни, я́ко в раи́, водворя́йся,/ непреста́нныя приноси́л еси́ моли́твы, поя́ при́сно:/ сла́ва, Христе́, си́ле Твое́й. Сла́ва Отцу́ и Сы́ну и Свято́му Ду́ху. Увы́, коли́ким нечу́вствием содержи́м есмь, окая́нный аз:/ ни сме́рти бою́ся, ни стра́шнаго суди́ща трепе́щу,/ вся́кому злу пови́нен сый./ Но, о душе́ всестра́стная,/ поне́ отны́не воспряни́ в покая́нии, Христу́ зову́щи:/ Твоего́ ра́ди уго́дника Ни́ла, пощади́ мя, Спа́се,/ и испра́ви стопы́ моя́, Влады́ко, всемогу́щею си́лою Твое́ю. И ны́не и при́сно и во ве́ки веко́в. Ами́нь. Богородичен: Богоро́дице Де́во, христиа́н всех всенаде́жное упова́ние,/ спаси́ мя, отча́яннаго, о Ма́ти Милосе́рдая,/ оживи́ душе́ю уме́ршаго, Жизнь всех ро́ждшая;/ Живоно́сный Исто́чниче, напо́й мя умиле́ния вода́ми,/ зно́ем страсте́й лю́те опаля́емаго,/ да, покая́ния слеза́ми прохлажда́емь, благода́рно воззову́:/ сла́ва, Владычице, всемо́щней си́ле Твое́й. Песнь 5 Ирмос: Ужасо́шася вся́ческая/ о Боже́ственней сла́ве Твое́й:/ Ты бо, Неискусобра́чная Де́во,/ име́ла еси́ во утро́бе над все́ми Бо́га/ и родила́ еси́ Безле́тнаго Сы́на,/ всем воспева́ющим Тя/ мир подава́ющая./ Припев: Преподо́бне о́тче Ни́ле, моли́ Бо́га о нас. Отце́в дре́вних Святы́я Горы́ житию́ подража́я,/ Богоно́се о́тче наш, Ни́ле приснопа́мятне,/ во оти́шие пусты́ннаго безмо́лвия поте́кл еси́, ра́дуйся,/ и, та́мо во смире́нии плоды́ принося́ ду́ха,/ по премно́гу благоугоди́л еси́ сла́вою чуде́с тя Обогати́вшему. Припев: Преподо́бне о́тче Ни́ле, моли́ Бо́га о нас. Госпо́дни за́поведи исполня́я,/ кро́ток и незло́бив, о́тче, был еси́,/ смире́н и прост, и во всех доброде́телех благоиску́сен,/ тем и Свята́го Ду́ха орга́н яви́лся еси́, прему́дре,/ науча́я и вразумля́я ча́да твоя́ досто́йно ходи́ти во след Христу́,/ во смире́нии Тому́ служа́щим, спасе́ние подаю́щаго. Припев: Преподо́бне о́тче Ни́ле, моли́ Бо́га о нас. Ны́не, преподо́бне, прие́мля на Небесе́х по́чести трудо́в твои́х,/ не забу́ди нас, твой пра́здник ра́достно пра́зднующих,/ но испроси́ грехо́в разреше́ние, моля́щи Христа́,/ просла́вльших Его́ сла́вящим, спасе́ние подаю́щаго. Сла́ва Отцу́ и Сы́ну и Свято́му Ду́ху. Обле́клся еси́ во Христа́, Богому́дре, безстра́стия оде́ждою украси́вся,/ сострада́телен и ми́лостив, о́тче, был еси́ согреша́ющим,/ смиренному́дро поуча́я и возбужда́я к покая́нию и ко Христу́ приводя́,/ всем, во смире́нии прося́щим, спасе́ние подаю́щему. И ны́не и при́сно и во ве́ки веко́в. Ами́нь. Богородичен: Оде́ждою студа́ облеко́хся окая́нный аз,/ совлече́н боготка́нныя, ю́же во Креще́нии прия́х, оде́жды, о Де́во Всенепоро́чная!/ Но молю́ Тя, Всеми́лостивая,/ во оде́жду мя спасе́ния па́ки облеки́,/ да досто́ин бу́ду бра́ка А́гнча,/ Ему́же от чи́стых крове́й Твои́х багряни́цу пло́ти истка́ла еси́,/ всем, воспева́ющим Тя, спасе́ние подаю́щему. Песнь 6 Ирмос: Боже́ственное сие́ и всечестно́е/ соверша́юще пра́зднество,/ Богому́дрии, Богома́тере,/ прииди́те, рука́ми воспле́щим,/ от Нея́ ро́ждшагося Бо́га сла́вим. Припев: Преподо́бне о́тче Ни́ле, моли́ Бо́га о нас. С ли́ки святы́х в Небе́сных ны́не водворя́яся селе́ниих, о Ни́ле Богоно́се,/ и со дерзнове́нием предстоя́ Пресвяте́й Тро́ице,/ нас, твои́х чад, не забу́ди, о́тче,/ но испроси́ грехо́в разреше́ние твой пра́здник ра́достно пра́зднующим,/ да благода́рно тя просла́вльшаго Бо́га сла́вим. Припев: Преподо́бне о́тче Ни́ле, моли́ Бо́га о нас. Но́вый благоте́чный в Росси́йстей земли́ исто́чник яви́лся еси́, Богоно́се,/ струи́ исцеле́ний излива́я от свята́го твоего́ гро́ба/ ве́рою несумне́нною притека́ющим к тебе́, Ни́ле, о́тче наш,/ мы же, весе́лия исполня́еми, тя прославля́ющего Бо́га сла́вим. Припев: Преподо́бне о́тче Ни́ле, моли́ Бо́га о нас. Усе́рдно от ю́ности твоея́ да́же до честна́го преставле́ния/ со́вестию чи́стою Христу́ послужи́л еси́, преподо́бне,/ Того́ храня́ Боже́ственныя за́поведи,/ нестяжа́нием бо и нището́ю себе́ огради́в,/ на ка́мени терпе́ния твоя́ стопы́, му́дре, утверди́л еси́, Ни́ле, о́тче наш. Сла́ва Отцу́ и Сы́ну и Свято́му Ду́ху. Мно́гая твоя́, о, о́тче, исправле́ния и я́же в Бо́зе труды́ и по́двиги твоя́,/ поще́ние и бде́ние, до́лу лега́ния и злострада́ния,/ нищету́ и соверше́нное нестяжа́ние кто изрещи́ возмо́жет?/ Вои́стинну бо и́стинен мона́х показа́лся еси́, Боголюбе́зне,/ тем и мы, любе́зно твою́ па́мять чту́ще, тя укре́пльшаго Бо́га сла́вим. И ны́не и при́сно и во ве́ки веко́в. Ами́нь. Богородичен: Утро́ба Твоя́, о Де́во Пренепоро́чная, простра́ннейшая небе́с показа́ся,/ вмести́вшая Невмести́маго Бо́га./ О, пресла́вных веще́й!/ О, непостижи́маго А́нгелом и челове́ком, на Тебе́ соверши́вшагося та́инства!/ Тем Тя, Богоро́дицу, вои́стинну испове́дающе,/ от Тебе́ ро́ждшагося Бо́га сла́вим. Кондак, глас 8 Любве́ ра́ди Христо́вы удали́вся мирски́х смуще́ний,/ ра́достною душе́ю всели́лся еси́ в пусты́ни,/ в не́йже подвиза́вся до́бре,/ я́ко А́нгел на земли́, о́тче Ни́ле, пожи́л еси́:/ бде́нием бо и посто́м те́ло свое́ изнури́л еси́ ве́чныя ра́ди жи́зни./ Ея́же ны́не сподо́бився,/ во све́те неизрече́нныя ра́дости Пресвяте́й Тро́ице со святы́ми предстоя́,/ моли́, мо́лимтися, припа́дающе, ча́да твоя́,/ сохрани́тися нам от вся́каго наве́та и злых обстоя́ний/ ви́димых и неви́димых враг/ и спасти́ся душа́м на́шим. Икос А́нгельскому поревнова́в житию́ и вели́ким во отце́х подо́бяся,/ всего́ себе́ отреши́л еси́ мирска́го сплете́ния,/ к по́двигам же по́стничества му́жески вооружи́вся,/ опа́сно путе́м Бо́жиих за́поведей ше́ствовал еси́, блаже́нне./ Те́мже и мы, верно чту́щии твою́ свяще́нную па́мять,/ похвала́ми ублажа́ем тя си́ми:/ ра́дуйся, а́нгельскаго жития́ подража́телю;/ ра́дуйся, дре́вних вели́ких оте́ц житию́ прее́мниче./ Ра́дуйся, неви́димых враго́в му́жественный победи́телю;/ ра́дуйся, за́поведей Бо́жиих храни́телю усе́рдный./ Ра́дуйся, оте́ческих Богодухнове́нных преда́ний опа́сный ревни́телю;/ ра́дуйся, мона́шескаго по́стническаго жи́тельства законоположи́телю./ Ра́дуйся, доброде́телей чисте́йшее зерца́ло;/ ра́дуйся, Ду́ха Свята́го сладкогла́сный орга́н./ Ра́дуйся, о́бразе глубо́каго смире́ния;/ ра́дуйся, ре́вностный исполни́телю Боже́ственных де́телей./ Ра́дуйся, я́ко тобо́ю научи́хомся непреле́стным путе́м жития́ ходи́ти;/ ра́дуйся, я́ко твои́м за ны хода́тайством спасе́ние получи́ти наде́емся./ Ра́дуйся, Ни́ле чудотво́рче, о́тче наш. Песнь 7 Ирмос: Не послужи́ша тва́ри Богому́дрии/ па́че Созда́вшаго,/ но, о́гненное преще́ние му́жески попра́вше,/ ра́довахуся, пою́ще:/ препе́тый отце́в Госпо́дь и Бог, благослове́н еси́. Припев: Преподо́бне о́тче Ни́ле, моли́ Бо́га о нас. Песнь препро́сту усе́рдно приношу́ ти, о́тче:/ приими́ у́бо сию́ от недосто́йнаго/ и не возгнуша́йся мене́, па́че всех грешне́йшаго, о преблаже́нне,/ но, ми́лостивно прекло́нься, спасе́ние улучи́ти твои́м предста́тельством сподо́би,/ да, ра́дуяся, пою́:/ препе́тый отце́в Го́споди и Бо́же, благослове́н еси́. Припев: Преподо́бне о́тче Ни́ле, моли́ Бо́га о нас. Еди́н с еди́ным Бо́гом непреста́нно бесе́довал еси́, о́тче,/ чи́стыя моли́твы чи́стым и немяте́жным умо́м Тому́ принося́/ и со́вестию чи́стою, о Богому́дре,/ от дея́ния бо к виде́нию восте́к, весь богови́ден соде́ялся еси́, блаже́нне, при́сно поя́:/ препе́тый отце́в Го́споди и Бо́же, благослове́н еси́. Припев: Преподо́бне о́тче Ни́ле, моли́ Бо́га о нас. Плодоно́сен сад показа́лся еси́, о́тче, принося́щ плоды́ ду́ха,/ любве́ бо и ра́дости преиспо́лнен был еси́,/ ми́ра, долготерпе́ния, кро́тости и воздержа́ния,/ и, я́ко Христо́в вои́стинну, плоть распина́я со страстьми́ и похотьми́, и при́сно поя́:/ препе́тый отце́в Го́споди и Бо́же, благослове́н еси́. Сла́ва Отцу́ и Сы́ну и Свято́му Ду́ху. Не му́дростию, но любо́вию тебе́ пою́щаго приими́, о о́тче,/ и, светосия́нною твое́ю моли́твою забве́ния и неве́дения тьму разгна́в,/ помози́ ми вопи́ти при́сно:/ препе́тый отце́в Го́споди и Бо́же, благослове́н еси́. И ны́не и при́сно и во ве́ки веко́в. Ами́нь. Богородичен: Под кров Твой, Влады́чице, прибега́ющего не отри́ни,/ но, я́ко Всеми́лостивая, спаси́ убо́гаго раба́ Твоего́,/ от безме́рных согреше́ний мои́х избавля́ющи мя, да, ра́дуяся, пою́:/ препе́таго отце́в Го́спода и Бо́га Ма́ти, во ве́ки благослове́нна еси́. Песнь 8 Ирмос: О́троки благочести́выя в пещи́/ Рождество́ Богоро́дичо спасло́ есть;/ тогда́ у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте, дела́,/ и превозноси́те Его́ во вся ве́ки. Припев: Преподо́бне о́тче Ни́ле, моли́ Бо́га о нас. О́тче наш Ни́ле приснопа́мятне,/ красно́ и добро́ вои́стинну житие́ препроводи́л еси́, о Боголюбе́зне:/ мирски́я бо молвы́ избежа́в и в пусты́ню уедини́вся,/ ско́рби по́стныя се́ял еси́ со слеза́ми,/ но ны́не, ра́дуяся, жне́ши присноживо́тия кла́сы. Припев: Преподо́бне о́тче Ни́ле, моли́ Бо́га о нас. Еди́ному та́йная ве́дущему Бо́гу вта́йне порабо́тал еси́, о́тче,/ во смире́нии проходя́ доброде́телей по́прище, о блаже́нне,/ по преставле́нии же твое́м явле́н и све́тел еси́ чудесы́, пе́ти воздвиза́я ве́рныя:/ Го́спода по́йте, дела́, и превозноси́те Его́ во вся ве́ки. Сла́ва Отцу́ и Сы́ну и Свято́му Ду́ху. Боже́ственною благода́тию, су́щею в тебе́,/ источа́еши исцеле́ния и прогоня́еши ду́хи лука́вствия/ от приходя́щих к тебе́ ве́рно, Ни́ле всеблаже́нне./ Тем и мы любе́зно чтим твою́ всесвяще́нную па́мять, ве́село пою́ще:/ Го́спода по́йте, дела́, и превозноси́те Его́ во вся ве́ки. И ны́не и при́сно и во ве́ки веко́в. Ами́нь. Богородичен: Услы́ши, Влады́чице, боле́зненное воздыха́ние Твоего́ раба́,/ разреши́вши вери́ги мои́х согреше́ний,/ печа́ль на ра́дость преложи́ и боле́зни премени́ вско́ре,/ да, ра́дуяся, пою́ Тя, Де́во,/ и превозношу́, Чи́стая, во вся ве́ки. Песнь 9 Ирмос: Всяк земноро́дный/ да взыгра́ется, Ду́хом просвеща́емь,/ да торжеству́ет же Безпло́тных умо́в естество́,/ почита́ющее свяще́нное торжество́ Богома́тере,/ и да вопие́т:/ ра́дуйся, Всеблаже́нная Богоро́дице,/ Чи́стая Присноде́во. Припев: Преподо́бне о́тче Ни́ле, моли́ Бо́га о нас. Пресве́тел свети́льник оте́честву твоему́ яви́лся еси́, преподо́бне,/ осиява́я све́тлостию твое́ю жи́тельства на́ша и чуде́с сия́ньми,/ и́миже по преставле́нии твое́м просла́вился еси́, о блаже́нне./ Тем, твою́ светоно́сную па́мять чту́ще,/ Христа́ сла́вим, све́тло тя прославля́ющаго. Припев: Преподо́бне о́тче Ни́ле, моли́ Бо́га о нас. Егда́ кра́снии твои́ но́зе, до́бре по спасе́ния пути́ те́кшия,/ на одре́ сме́ртном просте́рл еси́, блаже́нне,/ тогда́ ученицы́ твои́, сле́зы точа́ще, глаго́лаху:/ ка́мо отхо́диши, па́стырю наш,/ и кому́ оставля́еши ча́да твоя́, о́тче,/ и́хже духо́вне породи́в, воспита́л еси́ млеко́м твоего́ му́драго наставле́ния? Припев: Преподо́бне о́тче Ни́ле, моли́ Бо́га о нас. Пла́чем моея́ ра́дости не растворя́йте, о ча́да, –/ ты рекл еси́ им, о Богоблаже́нне, –/ аз бо, веселя́ся, отхожду́ прия́ти вене́ц пра́вды,/ его́же обеща́ Христо́с Того́ лю́бящим,/ иде́же и вы потщи́теся пости́гнути, соблю́дше Того́, вку́пе и моя́ за́поведи. Припев: Преподо́бне о́тче Ни́ле, моли́ Бо́га о нас. Да воспла́чет вку́пе с на́ми пусты́ня сия́, о о́тче,/ а́ще бо и процвете́, я́ко крин,/ красу́ющися богоуго́дным жи́тельством твои́м,/ но не име́я по тебе́ до́браго де́лателя,/ те́рние и волче́ц и́мать возрасти́ти./ Оба́че не оста́ви посеща́ти ста́до твое́, о́тче,/ и сам ты упаси́ тебе́ велича́ющия. Сла́ва Отцу́ и Сы́ну и Свято́му Ду́ху. Не забу́ди и ны́не нас, обита́ющих на ме́сте твоего́ трудополо́жнаго жи́тельства,/ о Ни́ле Богоно́се, о́тче наш,/ и песнь усе́рдно тебе́ принося́щим хода́тайствуй спасе́ние:/ тя бо, о всеблаже́нне, моли́твенника и предста́теля ко Го́споду стяжа́вше,/ наде́жды да не отщети́мся, ве́рно тя чту́щии. И ны́не и при́сно и во ве́ки веко́в. Ами́нь. Богородичен: Оде́ждою спасе́ния оде́й мя,/ о всенаде́жное спасе́ния моего́ упова́ние, Ма́ти Бо́жия,/ на Тебе́ наде́юся, Всеми́лостивая:/ сокро́вищница бо еси́ ми́лости и вся спаса́еши, к Тебе́ прибега́ющия./ Спаси́ у́бо и мене́, отча́яннаго, да благода́рно пою́:/ ра́дуйся, Всеблаже́нная Богоро́дице, Чи́стая Присноде́во. Светилен По́двиги твои́ми, о Богоблаже́нне, удиви́л еси́ А́нгелы и челове́ки,/ Бо́га же возвесели́л еси́,/ тем тя чтим ве́рно, твою́ торжеству́юще па́мять,/ Ни́ле Богоно́се, о́тче наш. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Вели́чия Твоя́, о Де́во и Богоро́дице Чи́стая,/ превосхо́дят вся́кое челове́ков разуме́ние,/ оба́че дерза́ем, бре́ннии, любе́зно Тебе вопи́ти:/ ра́дуйся, А́нгелом и челове́ком превожделе́нная Ра́досте.

Глас 4Пе́снь 1. Ирмо́с: Ли́цы изра́ильтестии, невла́жными стопа́ми по́нт Чермны́й и вла́жную глубину́ прогна́вше, вса́дники триста́ты враги́ ви́дяще в не́й погруже́ны, с весе́лием поя́ху: пои́м Бо́гу на́шему, я́ко просла́вися. Припев: Святи́и священному́ченицы Ника́ндро и Ерме́е, моли́те Бо́га о на́с. Честны́й пра́здник честны́х страда́лец священному́чеников, свяще́нную па́мять дне́сь свяще́нными песнопе́ньми ны́не свяще́ннейшая Христо́ва Це́рковь, священноле́пно соверша́ющи, пе́сньми украша́ется, сия́ почита́ющи. Честно́ю пома́зан ма́стию свяще́нничества ве́рно, священнонача́льниче Ника́ндре, честне́йшу сию́ от крове́й твои́х обагре́ньми соде́лал еси́, в ра́дости зовя́: воспои́м Бо́гу на́шему, я́ко просла́вися. Пу́ть муче́ния теку́ще, весе́лие и́стинное в не́м я́ве показу́юще, обогати́стеся благода́тию чуде́с и дарова́ний небе́сных, му́ченицы, согла́сно вопию́ще: воспои́м Бо́гу на́шему, я́ко просла́вися. Богоро́дичен: Неопи́санный в не́дрех Оте́ческих, в не́дрех Ма́терних пло́тски Христо́с опису́ется, по рождестве́ Сию́ и́стинно Де́ву па́че ума́ сохрани́в, Ему́же велегла́сно вопие́м: воспои́м Бо́гу на́шему, я́ко просла́вися. Пе́снь 3. Ирмо́с: Я́ко непло́ды роди́ от язы́к Це́рковь, и мно́гое в ча́дех изнемо́же со́нмище, чу́дному Бо́гу на́шему возопии́м: Свя́т еси́, Го́споди. Слове́сныя мре́жи простира́я, су́щия в пре́лести, чудоде́йствуя, уловля́л еси́, обро́к многообра́зен от Де́вы, Ника́ндре, Возсия́вшему сия́ принося́. Розга́ благопло́днейшая Ти́това са́да бы́л еси́ Кри́тскаго свети́льника, гро́зды нося́ слове́сныя, сла́дость на́м точа́щая спаси́тельную, Ника́ндре блаже́нне. Со Ерме́ем боже́ственным олядене́вшая сердца́ Креста́ ра́лом возде́ласте, му́дрии, и плодоно́сны благода́ти яви́сте: те́м блажи́ми есте́. Богоро́дичен: Ниже́ небе́сный у́м мо́жет па́че ума́ рождество́ Твое́ сказа́ти, Отрокови́це, Ума́ бо пе́рваго во чре́ве, Сло́во, Чи́стая зачала́ еси́, вся́ческая сло́вом соста́вившее. Седа́лен, гла́с 4. Святи́тельства и́стины Боже́ственным пома́занием и муче́ния свяще́нною и́стинно кро́вию просвеще́ни, сла́внии, совокупи́стеся чино́м, ра́дующеся, безпло́тных а́нгел. Те́м пра́зднуем честну́ю ва́шу па́мять, моля́щеся все́м очище́ние пода́ти моли́твами ва́шими, святи́и. Богоро́дичен: Обнови́ла еси́, Чи́стая, Боже́ственным рождество́м Твои́м истле́вшее во страсте́х земноро́дных ме́ртвенное существо́ и воздви́гла еси́ вся́ от сме́рти к животу́ нетле́ния. Те́мже Тя́ по до́лгу блажи́м вси́, Де́во Препросла́вленная, я́коже прорекла́ еси́. Крестобогоро́дичен: Де́во Пренепоро́чная, Ма́ти Христа́ Бо́га, ору́жие про́йде Твою́ пресвяту́ю ду́шу, егда́ распина́ема ви́дела еси́ во́лею Сы́на и Бо́га Твоего́. Его́же, Благослове́нная, моля́щи не преста́й проще́ние прегреше́ний на́м дарова́ти. Пе́снь 4. Ирмо́с: Седя́й в сла́ве на Престо́ле Божества́ во о́блаце ле́гце, прии́де Иису́с Пребоже́ственный, Нетле́нною Дла́нию и спасе́ зову́щия: сла́ва, Христе́, си́ле Твое́й. Колесни́ца яви́стеся Сло́ва, у́мно Сего́ нося́ще, те́м привя́зани к ко́нем, лю́те же влачи́ми, не отверго́стеся Сего́, ни победи́стеся, к небе́сней стезе́ я́ве подвиза́еми. Темни́цам приближа́ющеся и у́зами облага́еми, от у́з льсти́ гра́д и лю́ди спасо́сте и ю́зою любве́ связа́стеся Свя́заннаго пло́тию на́с ра́ди, всеблаже́ннии. Со а́нгелы Влады́ку заключе́ни сла́вляху, небе́сным хле́бом, всесла́внии, пита́еми. Те́м пло́ти боле́зней небрего́сте, си́льнейшии ра́н бы́вше. Богоро́дичен: На престо́ле высо́цем стра́шно седя́й, на Ма́терних объя́тиях, Младе́нец бы́в, седи́т, па́дший о́браз исправля́я и обоже́ние су́щим из Ада́ма да́руя. Пе́снь 5. Ирмо́с: Просвеще́ние Твое́, Го́споди, низпосли́ на́м и от мглы́ прегреше́ний разреши́ ны, Бла́же, Тво́й ми́р да́руяй. В просвеще́ние ве́ры путево́ждствовал еси́ лю́ди, и, оста́вльше тму́ идолонеи́стовства, ча́да Све́та бы́ша хода́тайством твои́м, Ника́ндре. Просвети́тельными Ду́ха блиста́юще заря́ми, муче́ний но́щь преидо́сте безвре́дно, реша́ще мглу́ безбо́жия, свети́льницы сла́внии. Па́вловых во́д испо́лнен Ти́т бы́в, тя́ напая́ше, показу́я реку́, струи́ му́тныя безбо́жия потопля́ющу, Ника́ндре. Богоро́дичен: А́гнца и Го́спода ро́ждшая пло́тию, Де́во, еди́на нескве́рная ски́ние, Боже́ственный ковче́же, честны́й свети́льниче, ду́шу мою́ озари́. Пе́снь 6. Ирмо́с: Возопи́, прообразу́я погребе́ние тридне́вное, проро́к Ио́на, в ки́те моля́ся: от тли́ изба́ви мя́, Иису́се, Царю́ си́л. Пригвожда́ема гвоздьми́ телеса́ му́чеников, Страсте́й подража́теле Спа́са явля́хуся, пригвозди́вшагося на Кресте́ и от тли́ ми́р спа́сшаго. Пучи́ну му́к преидо́сте, му́ченицы, окормле́нием Свята́го Всеси́льнаго Ду́ха и к Боже́ственному приста́нищу приста́сте, сла́вы исполня́еми. Победи́л еси́, тезоимени́тне, муже́й вся́кое противле́ние уби́йц, святи́телю приснопа́мятне Ника́ндре, и венцы́ сла́вы прия́л еси́, Бо́гу предстоя́. Богоро́дичен: Погуби́ла еси́ прама́тере, Отрокови́це, укори́зну, благослове́ньми на́с Венча́вшаго пло́тию ро́ждши, и ско́рбь тоя́ в ра́дость и́стинную преложи́ла еси́. Пе́снь 7. Ирмо́с: Авраа́мстии иногда́ в Вавило́не о́троцы пе́щный пла́мень попра́ша, пе́сньми взыва́юще: оте́ц на́ших Бо́же, благослове́н еси́. Свяще́нную твою́ оде́жду обагри́в, блаже́нне, обагре́ньми крове́й, соверши́л еси́ све́тльшую, Ника́ндре, — отце́в, — вопия́, — Бо́же, благослове́н еси́. Приближа́ющеся огню́, несомне́нною любо́вию к Творцу́ не опали́стеся, вопию́ще, блаже́ннии: оте́ц на́ших Бо́же, благослове́н еси́. Пе́щи пла́мень, ва́м угото́ванный на муче́ние, преврати́сте на ро́су Ду́хом Вседе́тельным, вопию́ще: оте́ц на́ших Бо́же, благослове́н еси́. Богоро́дичен: Воплоще́нное Сло́во ражда́еши несказа́нно, Чи́стая Де́во, зову́щия от сме́рти избавля́юща: оте́ц на́ших Бо́же, благослове́н еси́. Пе́снь 8. Ирмо́с: Изба́вителю все́х Всеси́льне, посреде́ пла́мене благоче́ствовавшия, снизше́д, ороси́л еси́ и научи́л еси́ пе́ти: вся́ дела́, благослови́те, по́йте Го́спода. Иера́рх че́стен бы́л еси́, ника́коже чужде́ю кро́вию, свое́ю же, Ника́ндре, вше́д в го́рний хра́м и поя́: благослови́те вся́ дела́ Госпо́дня Го́спода. На седа́лищи, восхвали́в Го́спода, пресви́теров Ерме́й сла́вный, удобри́вся кро́вию муче́ния, зове́т: благослови́те вся́ дела́ Госпо́дня Го́спода. Свяще́нно предсоверша́юще свята́я, же́ртвы честны́я яви́стеся и в воню́ принесо́стеся благово́ния Го́споду, вопию́ще: благослови́те вся́ дела́ Госпо́дня Го́спода. Богоро́дичен: Зо́л мои́х пучи́ну изсуши́, благоутро́бия пучи́ну ро́ждшая, Изба́вителя и Го́спода, Ему́же вопие́м, Де́во: вся́ дела́ благослови́те Госпо́дня Го́спода. Пе́снь 9. Ирмо́с: Е́ва у́бо неду́гом преслуша́ния кля́тву всели́ла е́сть, Ты́ же, Де́во Богоро́дице, прозябе́нием чревоноше́ния ми́рови благослове́ние процвела́ еси́. Те́м Тя́ вси́ велича́ем. На дре́ве, му́дре, терпели́вно растяга́емь и свеща́ми опаля́емь, ро́су небе́сную прия́л еси́ руко́ю а́нгельскою, му́чениче Ника́ндре, паля́щия же ме́ртвы показа́л еси́ живоно́сными твои́ми моли́твами. Ви́дестеся виде́ние стра́шно: обнажа́еми, и безслове́сным привязу́еми, и на мно́жайше, страстоте́рпцы, влеко́ми, и це́ли явля́еми, огню́ приближа́ющеся, и неопаля́еми, Ду́хом Боже́ственным соблюда́еми. Дне́сь Ми́рская свяще́нная митропо́лия пра́зднует велегла́сно, гра́д вся́к на весе́лие созыва́ющи, в па́мяти ва́шей се́й, всехва́льнии, в не́йже свяще́нное ва́ше страда́ние соверши́сте. Отве́рзеся ва́м не́бо, и а́нгели восхожде́нию восплеска́вше, чи́ни преподо́бных и пра́ведных возвесели́шася, взыгра́шася му́ченицы. С ни́миже все́льшеся, помяни́те помина́ющия ва́с, святи́и. Богоро́дичен: Све́том мя́ озари́ Твои́м, Всенепоро́чная, ро́ждшая Све́т непристу́пный, разжени́ о́блаки души́ моея́, и тмы́ мя исхити́, молю́ся, и Боже́ственнаго спасе́ния сподо́би, Пречи́стая, Еди́на Присноде́во.

Минея, 16 Ноября, Канон апостола Глас 4 Песнь 1 Ирмос: Отве́рзу уста́ моя́,/ и напо́лнятся Духа,/ и сло́во отры́гну Цари́це Ма́тери,/ и явлю́ся, све́тло торжествуя́,/ и воспою́, ра́дуяся, Тоя́ чудеса́. Припев: Святы́й апо́столе Матфе́е, моли́ Бо́га о на́с. Бога́тно пода́ждь ми все́льшуюся в тя благода́ть, Матфе́е всесла́вне и слуго́ Христо́в,/ да вопию́, све́тло пропове́дая,/ и воспою́, ра́дуяся, твоя́ чудеса́. Припев: Святы́й апо́столе Матфе́е, моли́ Бо́га о на́с. Весьма́ оста́вил еси́ земны́х смуще́ние,/ Сло́ва бо я́ко услы́шав вопло́щшагося глас,/ и благода́ти яви́лся еси́ строи́тель/ и пропове́датель Богоприя́тен, Богоблаже́нне. Сла́ва Отцу́ и Сы́ну и Свято́му Ду́ху. Самови́дец быв и слуга́ возсия́вшаго Сло́ва, апо́столе, Преве́чнаго Отца́,/ и проте́кл еси́, Того́ прише́ствие благовеству́я всем язы́ком. И ны́не и при́сно и во ве́ки веко́в. Ами́нь. Богородичен: Сме́рти потребле́ние и тли разруше́ние,/ Жи́зни же явле́ние благовести́л еси́, му́дре,/ Де́ва бо во утро́бе заче́нши Непости́жнаго и мир обнови́. Песнь 3 Ирмос: Твоя́ песносло́вцы, Богоро́дице,/ живы́й и незави́стный исто́чниче,/ лик себе́ совоку́пльшия, духо́вно утверди́,/ в Боже́ственней Твое́й сла́ве/ венце́в сла́вы сподо́би. Припев: Святы́й апо́столе Матфе́е, моли́ Бо́га о на́с. Твоя́ апо́столы, Сло́ве Бо́жий, свети́льники показа́л еси́ жи́зни,/ мрак отгоня́ющия безбо́жия, Влады́ко,/ и Боже́ственною Твое́ю сла́вою мир весь просвеща́ющия. Припев: Святы́й апо́столе Матфе́е, моли́ Бо́га о на́с. Твои́м вооружи́в всеору́жием Матфе́я храбре́йшаго, Спа́се,/ мучи́телей крепча́йша сего́ соде́ял еси́, Влады́ко,/ и потреби́теля показа́л еси́ и́дольския ле́сти, Человеколю́бче. Сла́ва Отцу́ и Сы́ну и Свято́му Ду́ху. Язы́ка твоего́ о́гненнаго веща́ние/ де́монская пожже́ ка́пища, Матфе́е Богодохнове́нне, Паракли́тов орга́не,/ чрез Его́же Христо́с пропове́дается, всех Жизнь Ипоста́сная. И ны́не и при́сно и во ве́ки веко́в. Ами́нь. Богородичен: Труба́ Богосло́вная, веща́ющая кре́пко,/ просвети́ лю́ди, Матфе́я Богому́драго,/ Тро́ицы сия́ние, па́че ума́ же воплоще́ние Сло́ва из Тебе́, Пречи́стая. Седален, глас 8 Во вся концы́ протече́ му́дрых твои́х глаго́л я́ко вои́стинну веща́ние,/ всехва́льне Госпо́день апо́столе,/ Боговиде́ние всем я́сно пропове́дал еси́/ и язы́ков неразу́мие в ра́зум приве́л еси́./ Те́мже, и́дольское омраче́ние отгна́в,/ свет зна́ния во тьме су́щим возсия́л еси́,/ Матфе́е всехва́льне,/ моли́ Христа́ Бо́га грехо́в оставле́ние дарова́ти/ чту́щим любо́вию святу́ю па́мять твою́. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Я́ко Всенепоро́чная Неве́сто Творца́,/ я́ко Неискусому́жная Ма́ти Изба́вителя,/ прия́телище я́ко су́щи Уте́шителя, Препе́тая,/ беззако́нию мя су́ща скве́рное оби́телище/ и де́моном игра́лище в ра́зуме бы́вша,/ потщи́ся от тех злоде́йства мя изба́вити/ и све́тлое жили́ще доброде́телей соверши́, Светоно́сная, Нетле́нная,/ отжени́ о́блак страсте́й, и Вы́шняго прича́стия сподо́би,/ и све́та невече́рняго моли́твами Твои́ми. Песнь 4 Ирмос: Неизсле́дный Бо́жий сове́т,/ е́же от Де́вы воплоще́ния/ Тебе́, Вы́шняго,/ проро́к Авваку́м, усмотря́я, зовя́ше:/ сла́ва си́ле Твое́й, Го́споди. Припев: Святы́й апо́столе Матфе́е, моли́ Бо́га о на́с. Ипоста́сному Твоему́ Сло́ву, Бо́же, науче́н,/ мирску́ю му́дрость разруши́ Богови́дец учени́к, велегла́сно зовя́ Тебе́:/ сла́ва си́ле Твое́й, Го́споди. Припев: Святы́й апо́столе Матфе́е, моли́ Бо́га о на́с. Ублаже́ному от Христа́,/ ко́е благохвале́ние принесе́м тебе́, Богоглаго́ливе?/ не мо́жет бо челове́к цветя́щия на тебе́ благода́ти сло́вом изрещи́, досточу́дне. Сла́ва Отцу́ и Сы́ну и Свято́му Ду́ху. Нескве́рный твой и чи́стый ум ви́дев Высоча́йший,/ я́коже свещу́ на све́щник высо́кий,/ су́щим во тьме светя́щую, всем, Богоявле́нне, предложи́. И ны́не и при́сно и во ве́ки веко́в. Ами́нь. Богородичен: Умерщвле́ное естество́ челове́ческое, Благослове́нная, возвы́сила еси́,/ я́ко Высоча́йшаго ро́ждшая кре́пость па́че естества́, всепе́тая Отрокови́це,/ я́коже Матфе́й научи́. Песнь 5 Ирмос: Ужасо́шася вся́ческая/ о Боже́ственней сла́ве Твое́й:/ Ты бо, Неискусобра́чная Де́во,/ име́ла еси́ во утро́бе над все́ми Бо́га/ и родила́ еси́ безле́тнаго Сы́на,/ всем воспева́ющим Тя/ мир подава́ющая. Припев: Святы́й апо́столе Матфе́е, моли́ Бо́га о на́с. Благода́ть прие́м Всесвята́го Ду́ха,/ Боже́ственное оби́телище показа́лся еси́;/ Боже́ственно научи́в Богозна́ния све́ту,/ вве́рен был догма́ты Христо́вы пи́смены изложи́ти,/ я́ко самови́дец Богоизбра́нный. Припев: Святы́й апо́столе Матфе́е, моли́ Бо́га о на́с. Язы́к твой трость Паракли́та бысть,/ ско́рое избавле́ние даю́щаго позна́вшим влады́чество Его́/ и му́дрых вды́шущаго душа́м ра́зум Небе́сный,/ о Матфе́е всече́стне. Сла́ва Отцу́ и Сы́ну и Свято́му Ду́ху. Сия́юща чудесы́ и исцеле́ний благода́тьми,/ тя Христо́с посла́ ми́ру, де́монскую попира́юща кре́пость/ и ду́ши просвеща́юща ве́рных, всех пою́щих тя, ми́ра пропове́дника. И ны́не и при́сно и во ве́ки веко́в. Ами́нь. Богородичен: Де́ва родила́ еси́ Сы́на Преве́чнаго,/ в естество́ обле́кшася челове́ческое,/ я́коже науча́я, Богоглаго́ливый рече́,/ и спа́сшаго сие́ от тли коне́чною благосты́нею,/ и Де́ва пребыла́ еси́. Песнь 6 Ирмос: Приидо́х во глубины́ морски́я,/ и потопи́ла мя есть бу́ря мно́гих грехо́в,/ но, я́ко Бог, из глубины́ возведи́ живо́т мой,/ Многоми́лостиве. Припев: Святы́й апо́столе Матфе́е, моли́ Бо́га о на́с. Евангели́ст от мыта́рства я́ко после́дова Тебе́,/ претвори́ся Богоглаго́ливый всеси́льною Твое́ю, Вседе́телю, кре́постию,/ Матфе́й всеизря́днейший. Припев: Святы́й апо́столе Матфе́е, моли́ Бо́га о на́с. Управля́ется твоего́ благове́стия душепита́тельными словесы́ язы́ков мно́жество,/ возвыша́емо к доброде́телей высо́кому верху́,/ о Матфе́е всеблаже́нне. Сла́ва Отцу́ и Сы́ну и Свято́му Ду́ху. Матфе́я уловля́ются Богоплете́нными ученика́ мре́жами/ собо́ры ве́рующих всегда́,/ к Твоему́ позна́нию, Благоде́телю, наставля́еми. И ны́не и при́сно и во ве́ки веко́в. Ами́нь. Богородичен: Де́ву ро́ждшую воспису́я,/ благовеству́ет Тя, вся́ческая Сотво́ршаго,/ без се́мене и тли, Всенепоро́чная, Матфе́й всеизя́щнейший. Кондак, глас 4 Мыта́рства и́го отве́рг,/ пра́вды и́гу притя́глся еси́/ и яви́лся еси́ купе́ц всеизря́днейший,/ бога́тство прине́с ю́же с высоты́ прему́дрость./ Отону́дуже пропове́дал еси́ и́стины сло́во/ и уны́лых воздви́гл еси́ ду́ши,/ написа́в час су́дный. Икос Вра́жие мучи́тельство ну́дит мя несы́тно/ и души́ мое́й все се́мя восхища́ет,/ Матфе́е, дру́же Христо́в./ Но сам, се́мя моли́тв твои́х дав,/ уплоди́ к твоему́ служе́нию/ и покажи́ мя песнопе́вца твоего́ мале́йшаго/ и сказа́теля мно́гих твои́х и вели́ких исправле́ний;/ и ко Христо́ве любви́ ка́ко, вся а́бие оставив,/ после́довал еси́ те́пле Зва́вшему,/ пе́рвый быв благове́стник в ми́ре,/ написа́в час су́дный. Песнь 7 Ирмос: Не послужи́ша тва́ри Богому́дрии/ па́че Созда́вшего,/ но о́гненное преще́ние му́жески попра́вше,/ ра́довахуся, пою́ще:/ препе́тый отце́в Госпо́дь и Бог, благослове́н еси́. Припев: Святы́й апо́столе Матфе́е, моли́ Бо́га о на́с. Был еси́ пе́рваго осия́ния Боже́ственное изображе́ние,/ я́ко учени́к Того́ светлостьми́ распаля́емь,/ Ему́же, поя́, глаго́лал еси́:/ препе́тый отце́в Госпо́дь и Бог, благослове́н еси́. Припев: Святы́й апо́столе Матфе́е, моли́ Бо́га о на́с. Я́ко слуга́ Сло́ва, всеблаже́нне,/ в Боже́ственныя оби́тели, иде́же Христо́с обита́ет, ты всели́лся еси́,/ я́коже тебе́ обеща́ Пребоже́ственный отце́в Госпо́дь и Бог еди́н всех. Сла́ва Отцу́ и Сы́ну и Свято́му Ду́ху. Неду́зи, Матфе́е, отго́нятся,/ и отбегае́т мно́жество де́монов/ су́щими в тебе́ дарова́ньми Боже́ственнаго Ду́ха,/ в ни́хже пел еси́:/ препе́тый отце́в Госпо́дь и Бог, благослове́н еси́. И ны́не и при́сно и во ве́ки веко́в. Ами́нь. Богородичен: Всепе́тую Де́ву написа́л еси́ Боже́ственными твои́ми словесы́,/ Творца́ всех ро́ждшую, апо́столе,/ Ему́же вси пое́м:/ препе́тый отце́в Госпо́дь и Бог, благослове́н еси́. Песнь 8 Ирмос: О́троки благочести́выя в пещи́/ Рождество́ Богоро́дичо спасло́ есть,/ тогда́ у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте дела́/ и превозноси́те Его́ во вся ве́ки. Припев: Святы́й апо́столе Матфе́е, моли́ Бо́га о на́с. Манове́ньми, я́же в Тебе́ неосла́бными, Матфе́й свяще́ннейший обожа́емь,/ положе́нием же быв, естество́м е́же был еси́,/ вселе́нную, Влады́ко, привлече́ пе́ти Тебе́:/ Го́спода по́йте дела́ и превозноси́те во вся ве́ки. Припев: Святы́й апо́столе Матфе́е, моли́ Бо́га о на́с. Я́коже мо́лнию вселе́нней, Сло́во Богосло́ва посла́,/ мрак у́бо отгоня́юща, язы́ки же просвеща́юща Богосло́вия догма́ты./ Те́мже и поя́ше:/ Го́спода по́йте дела́ и превозноси́те Его́ во вся ве́ки. Сла́ва Отцу́ и Сы́ну и Свято́му Ду́ху. Сло́вом чи́стым и умо́м Бог с тобою́ бесе́довал есть,/ ти́ну бо я́ко изсе́кл еси́, Тому́ прибли́жился еси́/ и примеси́лся еси́, сла́вне./ Те́мже и пое́ши:/ Го́спода по́йте дела́ и превозноси́те Его́ во вся ве́ки. И ны́не и при́сно и во ве́ки веко́в. Ами́нь. Богородичен: На благодея́ние челове́ков Сло́во воплоти́тися изво́ли:/ дверь бо де́вства про́йде Госпо́дь и Богоро́дицу показа́./ Те́мже зове́м:/ Го́спода по́йте дела́ и превозноси́те Его́ во вся ве́ки. Песнь 9 Ирмос: Всяк земноро́дный/ да взыгра́ется, Ду́хом просвеща́емь,/ да торжеству́ет же Безпло́тных умо́в естество́,/ почита́ющее свяще́нное торжество́ Богома́тере,/ и да вопие́т:/ ра́дуйся, всеблаже́нная/ Богоро́дице, чи́стая Присноде́во. Припев: Святы́й апо́столе Матфе́е, моли́ Бо́га о на́с. Добро́ты у́мныя прия́л еси́ диади́му Боже́ственную, апо́столе,/ и Ца́рствия же благоле́пнейшим венце́м украси́лся еси́ десни́цею Вседержи́телевою,/ и све́тишися, му́дре, со Ангелы Престо́лу предстоя́ Влады́ки Христа́, всеблаже́нне. Припев: Святы́й апо́столе Матфе́е, моли́ Бо́га о на́с. Дре́ва жи́зни досто́йно получи́л еси́, пропове́дник Жива́го Бо́га,/ благовествова́в жизнь ми́ру Боже́ственное посеще́ние:/ са́дом бо зна́ния не растли́л еси́ ум,/ пребы́в незы́блен и неколе́блен Це́ркве степе́нь, всеблаже́нне. Сла́ва Отцу́ и Сы́ну и Свято́му Ду́ху. Неве́сту Христо́ву Боже́ственно украси́л еси́ Ева́нгелием твои́м,/ яко диади́мою, Це́рковь, Богоблаже́нне,/ и ны́не Боже́ственную твою́ па́мять торжеству́ет све́тло,/ ю́же изба́вити вся́каго обстоя́ния и бед лю́тых моли́, Матфе́е апо́столе. И ны́не и при́сно и во ве́ки веко́в. Ами́нь. Богородичен: Недр не отступи́в Безнача́льнаго Роди́теля, Сло́во Безнача́льное,/ я́коже благовеству́ет Матфе́й, пиша́,/ Бог воплоти́ся из Тебе́, Чи́стая, Всепе́тая,/ в челове́чь о́браз всеобра́зно весь оде́явся/ и того́ прие́м сво́йства. Светилен Сказа́ нам Боже́ственная чудодея́ния, сла́вный Христо́ва Ева́нгелия списа́тель,/ Матфе́й Богоприя́тный,/ его́же, любо́вию чту́ще, благосочета́нно воспои́м. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Мыта́рства и́го отве́рг разу́мно,/ Христу́ после́довал еси́, о Матфе́е Богому́дре!/ Следо́м же Того́ чу́дно после́дуя,/ в прича́стии был еси́ Того́ Ца́рствия/ и сла́вы о́бщник, и таи́нник неизрече́нных.

Минея, 22 Января, Кано́н свято́му Глас 2 Песнь 1 Ирмос: Во глубине́ постла́ иногда́/ фараони́тское всево́инство преоруже́нная си́ла,/ вопло́щщееся же Сло́во всезло́бный грех потреби́ло есть:/ Препросла́вленный Госпо́дь сла́вно бо просла́вися. Припев: Преподо́бне о́тче Мака́рие, моли́ Бо́га о на́с. Госпо́дь, Царь Сла́вы, прославля́ющия Его́ просла́вити обетова́,/ на тебе́ же, преподо́бне, обоя́ устрои́шася,/ я́коже бо ты просла́вил еси́ Го́спода в житии́ твое́м,/ си́це и тя просла́ви тобо́ю просла́вленный Госпо́дь. Припев: Преподо́бне о́тче Мака́рие, моли́ Бо́га о на́с. Вели́кий а́нгельский о́браз прия́л еси́,/ кра́йняго смире́ния не оста́вль в житии́ твое́м,/ с ли́ки же а́нгельскими на Небеси́ ны́не лику́еши./ За ны у́бо помоли́ся, о́тче,/ а́нгельскими хвала́ми Препросла́вленному Го́споду. Сла́ва Отцу́ и Сы́ну и Свято́му Ду́ху. Труда́ми насади́л еси́,/ слеза́ми моли́твенными ороси́в, я́ко сад Бо́жий, оби́тель твою́, преподо́бне./ Приими́ у́бо и на́ша сле́зы умиле́ния/ и ходата́йственно вознеси́ я к Престо́лу Препросла́вленнаго Го́спода. И ны́не и при́сно и во ве́ки веко́в. Ами́нь. Богородичен: К Богоро́дице о нас помоли́ся, о́тче преподо́бне,/ да умоли́т Сы́на Своего́ поми́ловати нас,/ сла́вно да просла́вися в ми́лости Свое́й Препросла́вленный Госпо́дь. Песнь 3 Ирмос: Процвела́ есть пусты́ня, я́ко крин, Го́споди,/язы́ческая неплодя́щая, Це́рковь/прише́ствием Твои́м,/ в не́йже утверди́ся мое́ се́рдце. Припев: Преподо́бне о́тче Мака́рие, моли́ Бо́га о на́с. Процвела́ есть Жабы́нская пусты́ня/ за моли́твы избра́нника Твоего́, Го́споди, преподо́бнаго пустынножи́теля Мака́рия,/ в не́йже да обря́щем утеше́ние,/ здра́вие же и спасе́ние заступле́нием преподо́бнаго. Припев: Преподо́бне о́тче Мака́рие, моли́ Бо́га о на́с. Чуде́с дарова́нием благоволи́ Госпо́дь тя просла́вити, смире́ннаго/ и мно́го лет я́ко бы забве́ннаго,/ да немощны́м нам пода́ст благовре́менную по́мощь/ и ве́ре на́шей оскудева́ющей укрепле́ние. Сла́ва Отцу́ и Сы́ну и Свято́му Ду́ху. Богоно́се о́тче Мака́рие,/ Бо́гу непреста́нный о нас был еси́ моли́твенник/ и Пресвята́го Уте́шителя Ду́ха в се́рдце твое́м носи́л еси́./ Но у́бо воздви́гни от сна грехо́внаго/ и от искуше́ния диа́вольскаго огради́ ны, моля́щияся тебе́. И ны́не и при́сно и во ве́ки веко́в. Ами́нь. Богородичен: Богороди́тельнице Блага́я, моли́ о нас/ и на́ша недосто́йныя моли́твы принеси́ ко Престо́лу Блага́го Сы́на Твоего́,/ и Твои́м да бу́дет сомоли́твенником о нас Мака́рий преподо́бный. Седален, глас 4 На тве́рдем ве́ры ка́мени утвержде́н сый,/ в безмо́лвии подвиза́яся, тече́ние по́стничества до́бре сконча́л еси́/ и мздовоздая́ние от Христа́ прия́л еси́,/ Ему́же ны́не моли́ся, всеблаже́нне,/ в ве́ре и доброде́телех нас утверди́ти. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Ты покро́в мой от напа́стей вра́жиих, Влады́чице,/ Ты свет се́рдцу моему́,/ печа́льми жите́йскими омраче́нному, при́сно буди́, Богоро́дице, и спаси́ мя. Песнь 4 Ирмос: Прише́л еси́ от Де́вы, не хода́таи, ни А́нгел,/ но Сам, Го́споди, вопло́щся,/ и спасл еси́ всего́ мя, челове́ка./ Тем зову́ Ти: сла́ва си́ле Твое́й, Го́споди. Припев: Преподо́бне о́тче Мака́рие, моли́ Бо́га о на́с. От Де́вы Пречи́стыя на зе́млю прише́л еси́, во е́же спасти́ нас, Го́споди,/ и от спасе́нных вели́кое мно́жество просла́вил еси́,/ да не то́кмо Тя у Престо́ла Твоего́ славосло́вят,/ но и о нас хода́тайствуют./ Ве́руем убо, я́ко в со́нме том пресве́тлом/ предста́тельствует о нас преподо́бный оте́ц наш Мака́рий. Припев: Преподо́бне о́тче Мака́рие, моли́ Бо́га о на́с. От оте́чества на́шего взят был еси́ в Небе́сное Ца́рствие, о́тче преподо́бне./ Не забу́ди у́бо чад твои́х, избра́нниче Бо́жий Мака́рие,/ еще́ прише́льствующих на земли́. Сла́ва Отцу́ и Сы́ну и Свято́му Ду́ху. Буди́ с на́ми, о́тче наш Мака́рие,/ да с тобо́ю дерзнове́нно Бо́га Отца́ просла́вим,/ Сы́на превознесе́м и Свято́му Ду́ху покло́нимся. И ны́не и при́сно и во ве́ки веко́в. Ами́нь. Богородичен: С Богоро́дицею, вслед Ея́, мы́слию во свята́я вни́дем/ и к Ней во смире́нии притеце́м, в покая́нии зову́ще:/ Спаси́тельнице, спаси́ нас. Песнь 5 Ирмос: Хода́тай Бо́гу и челове́ком был еси́, Христе́ Бо́же:/ Тобо́ю бо, Влады́ко, к Светонача́льнику, Отцу́ Твоему́,/ от но́щи неве́дения/приведе́ние и́мамы. Припев: Преподо́бне о́тче Мака́рие, моли́ Бо́га о на́с. Но́щи неве́дения преше́дшей прибли́жися день спасе́ния,/ и Свет ми́ру возсия́ – Христо́с Госпо́дь./ К Сему́ у́бо ны́не, моли́твами преподо́бнаго Мака́рия,/ от грехо́вныя но́щи приведе́ние и́мамы. Припев: Преподо́бне о́тче Мака́рие, моли́ Бо́га о на́с. Но́щию в петлоглаше́ние,/ и́мже Госпо́дь прише́ствие Свое́ второ́е назна́менова,/ к тебе́ Госпо́дь прии́де ду́шу твою́ прия́ти, преподо́бне,/ моли́твами же твои́ми вложи́ в ду́ши на́ша па́мять сме́ртную. Сла́ва Отцу́ и Сы́ну и Свято́му Ду́ху. Нощь многоле́тняя пре́йде,/ в ню́же бе под спу́дом па́мять твоя́, о́тче наш,/ но сия́ ны́не яви́ся, светя́щи всем,/ я́же в твое́й хра́мине суть,/ в ню́же мы, ве́рою и любо́вию влеко́ми, приведе́ние и́мамы. И ны́не и при́сно и во ве́ки веко́в. Ами́нь. Богородичен: Не бо́йся, ма́лое ста́до,/ я́ко благоизво́ли Оте́ц ваш да́ти вам Ца́рство, глаго́лет Госпо́дь./ И не изнемо́же глаго́л сей у Го́спода,/ уже́ бо дости́же заве́щаннаго Ца́рства па́стырь наш,/ да привлече́т с собо́ю все ста́до свое́ моли́твами Богоро́дицы. Песнь 6 Ирмос: В бе́здне грехо́вней валя́лся,/ неизсле́дную милосе́рдия Твоего́ призыва́ю бе́здну:/ от тли, Бо́же, мя возведи́. Припев: Преподо́бне о́тче Мака́рие, моли́ Бо́га о на́с. Бе́здна милосе́рдия Бо́жия бе́здну грехо́в на́ших да превозмо́жет,/ ничесо́же от нас взыску́ющи, ра́зве слез покая́ния умиле́ннаго,/ о сем помоли́ся за ны, преподо́бне о́тче наш. Припев: Преподо́бне о́тче Мака́рие, моли́ Бо́га о на́с. От бе́здны грехо́вной помози́ нам, Бо́же, возни́кнути,/ моли́твами преподо́бнаго Мака́рия сподо́би ны пре́жде конца́ пока́ятися/ и Твои́х Боже́ственных Тайн прича́стником бы́ти. Сла́ва Отцу́ и Сы́ну и Свято́му Ду́ху. Сла́вим Тя, Свята́я Тро́ице,/ и диви́мся бе́здне милосе́рдия Твоего́ к нам, мно́го согреша́ющим./ Но еще́ долготерпи́ о нас, Бо́же наш,/ до́ндеже пока́емся со слеза́ми,/ при́сно помина́юще после́дняя своя́. И ны́не и при́сно и во ве́ки веко́в. Ами́нь. Богородичен: Чи́стую чи́сто почти́м/ и устыди́мся пред лице́м Ея́ скве́рнаго жития́ на́шего, о́тче преподо́бне!/ Ты у́бо наста́ви ны досто́йно чти́ти Ма́терь Бо́жию Пречи́стую. Кондак, глас 8 Житие́ чи́стое, терпе́ние, кро́тость и любо́вь нелицеме́рну,/ воздержа́ние соверше́нное,/ умиле́ние Боже́ственное,/ ве́ру же и наде́жду и́стинну и милосе́рдие стяжа́в,/ равноа́нгельно, Мака́рие, на земли́ пожи́л еси́/ и на Небеси́ Бо́гови с ли́ки Безпло́тных предстои́ши./ С ни́ми же, свя́те, моли́ся/ мир Росси́стей Це́ркви дарова́ти/ и душа́м на́шим ве́лию ми́лость. Икос А́нгельски на земли́ пожи́вша,/ преподо́бнаго отца́ на́шего Мака́рия, прииди́те, лю́дие, соше́дшеся, восхва́лим,/ си́це к нему́ реку́ще:/ ра́дуйся, на земли́ пожи́вый небе́сно; ра́дуйся, во пло́ти, а́ки безпло́тен, подвиза́выйся./ Ра́дуйся, стра́сти до конца́ умертви́вый и безстра́стия дости́гнувый;/ ра́дуйся, ду́шу твою́ дарова́ньми Ду́ха Свята́го испо́лнивый./ Ра́дуйся, оби́тель возгради́вый и и́ноков собра́вый;/ ра́дуйся, па́стырским жезло́м твои́м во огра́ду Небе́сную ты́я упра́вивый./ Ра́дуйся, гра́да Беле́ва похвало́;/ ра́дуйся, пусты́ни твоея́ непоколеби́мое утвержде́ние./ Ра́дуйся, при́сно моля́щийся Господеви мир Росси́йстей Це́ркви дарова́ти/ и душа́м на́шим ве́лию ми́лость. Песнь 7 Ирмос: Богопроти́вное веле́ние беззако́ннующаго мучи́теля/ высо́к пла́мень вознесло́ есть./ Христо́с же простре́ Богочести́вым о́троком ро́су духо́вную,/ Сый благослове́н и препросла́влен. Припев: Преподо́бне о́тче Мака́рие, моли́ Бо́га о на́с. Сый благослове́нный Христо́с Бог наш/ да изба́вит нас огня́ гее́нскаго,/ со слеза́ми покая́нными о сем помо́лимся./ Кто же ны́не даст очесе́м на́шим исто́чник слез,/ а́ще не ты, о́тче, блаже́нство пла́ча позна́вый в житии́ твое́м. Припев: Преподо́бне о́тче Мака́рие, моли́ Бо́га о на́с. Высо́кий пла́мень неве́рия и нече́стия возно́сит беззако́ннующий./ Но мы сохрани́ти ве́ру потщи́мся,/ убежи́м нече́стия, убои́мся пла́мене гее́нскаго,/ ко Христу́ притеце́м и у Него́ с Мака́рием блаже́нство улучи́м. Сла́ва Отцу́ и Сы́ну и Свято́му Ду́ху. Еди́н Сый Святы́я Тро́ицы, Христе́ Бо́же наш!/ Сотвори́ в нас оби́тель, по обетова́нию Твоему́,/ с Преблагослове́нным и Препросла́вленным Твои́м Отце́м и со Святы́м Ду́хом,/ жи́зни и утеше́ния Пода́телем. И ны́не и при́сно и во ве́ки веко́в. Ами́нь. Богородичен: Ра́дуйся, Влады́чице, и ра́дость нам пода́ждь, от бед спаси́,/ в ми́ре Це́рковь Сы́на Твоего́ сохрани́/ и умоли́, да благослови́т я́ко достоя́ние Свое́. Песнь 8 Ирмос: Пещь иногда́ о́гненная в Вавило́не де́йства разделя́ше,/ Бо́жиим веле́нием халде́и опаля́ющая,/ ве́рныя же ороша́ющая, пою́щия:/ благослови́те, вся, дела́ Госпо́дня, Го́спода. Припев: Преподо́бне о́тче Мака́рие, моли́ Бо́га о на́с. В телеси́ А́нгела, почти́м Мака́рия, блаже́нству тезоимени́таго,/ и, подража́я его́ житию́ во Христе́,/ поне́ еди́наго от блаже́нств Ева́нгельских дости́гнути потщи́мся. Припев: Преподо́бне о́тче Мака́рие, моли́ Бо́га о на́с. Огнь искуше́ний грехо́вных пали́т мя,/ но стра́ждущую мою́ ду́шу ороси́ росо́ю благода́ти Христо́вой/ и твои́ми моли́твами, блаже́нне. Сла́ва Отцу́ и Сы́ну и Свято́му Ду́ху. Да пребу́дет благослове́ние твое́ Богоуго́дное во И́мя Пресвяты́я Тро́ицы/ на оби́тели твое́й, и на земли́ оте́чествия твоего́,/ и на всех, тебе́ усе́рдно призыва́ющих, о́тче преподо́бне. И ны́не и при́сно и во ве́ки веко́в. Ами́нь. Богородичен: Доны́не и во ве́ки блажи́м Тя, вси ро́ди, Свята́я Богороди́тельнице./ Спаси́ нас, я́ко Спа́са родила́ еси́ душ на́ших. Песнь 9 Ирмос: Безнача́льна Роди́теля Сын, Бог и Госпо́дь,/ вопло́щся от Де́вы, нам яви́ся,/ омраче́нная просвети́ти, собра́ти расточе́нная./ Тем Всепе́тую Богоро́дицу велича́ем. Припев: Преподо́бне о́тче Мака́рие, моли́ Бо́га о на́с. Со а́нгельскими чи́нми, хва́лящими Го́спода,/ и с Богоро́дицею Того́ хвали́ти сподо́бился еси́,/ сподо́би же и нас, преподо́бне о́тче наш,/ да с тобо́ю Го́спода сла́вим и Богоро́дицу велича́ем. Припев: Преподо́бне о́тче Мака́рие, моли́ Бо́га о на́с. А́нгели, вхожде́ние Пречи́стыя во свята́я святы́х зря́ще, удиви́шася./ Мы же диви́мся,/ ка́ко во святы́й храм, труда́ми твои́ми созда́нный на ме́сте, ва́рвары разоре́нном,/ чудотво́рною ико́ною Свое́ю вни́де Пречи́стая,/ Ю́же, я́ко Всепе́тую Богоро́дицу, велича́ем. Сла́ва Отцу́ и Сы́ну и Свято́му Ду́ху. Бо́га Отца́ просла́вим, тебе́, Богоно́сному отцу́ на́шему, после́дующе,/ Боже́ственнаго Сы́на возвели́чим,/ да с Ним и всыновле́ние О́тчее прии́мем,/ Свято́му Ду́ху поклони́мся, да научи́т ны моли́тися, я́коже подоба́ет,/ да и Сам, вопия́ в душа́х на́ших,/ укрепи́т нас к Бо́гу сыно́вне вопи́ти: А́вво, О́тче! И ны́не и при́сно и во ве́ки веко́в. Ами́нь. Богородичен: Ра́дуйся, Ра́досте на́ша!/ Пребу́ди с на́ми, я́ко да и Госпо́дь, И́же с Тобо́ю, в нас пребу́дет./ Собери́ во двор церко́вный о́вцы расточе́нныя,/ отпа́дшия возврати́ к соедине́нию,/ просвети́ омраче́нных неве́рием,/ да вси вку́пе Тя, Всепе́тую Богоро́дицу, велича́ем. Светилен Светоза́рна свети́льника ве́ры, во стране́ на́шей возсия́вша/ и со́лнца светле́йше чудесы́ свои́ми нас просве́щша,/ Мака́рия преподо́бнаго, блаже́нству тезоиме́ннаго, пе́сньми восхва́лим. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Богоро́дице Де́во, ра́дуйся,/ от А́нгела ра́дость прии́мшая,/ ра́дуйся, Влады́чице, и спаси́ на Тя упова́ющия.

Минея, 19 Января, Канон Глас 4 Песнь 1 Ирмос: Ли́цы изра́ильтестии, невла́жными стопа́ми по́нт Чермны́й и вла́жную глубину́ прогна́вше, вса́дники триста́ты враги́ ви́дяще в не́й погруже́ны, с весе́лием поя́ху: пои́м Бо́гу на́шему, я́ко просла́вися. Припев: Преподо́бне о́тче Мака́рие, моли́ Бо́га о на́с. Боже́ственным све́том сия́я и со а́нгелы, о́тче, ны́не водворя́яся, моли́твами твои́ми спаса́й соверша́ющия всесвяще́нную твою́ па́мять и в ра́дости вопию́щия: пои́м Бо́гу на́шему, я́ко просла́вися. Припев: Преподо́бне о́тче Мака́рие, моли́ Бо́га о на́с. Пу́ть, к жи́зни веду́щий, неукло́нно, преблаже́нне, ше́ствуяй, соверши́л еси́, избе́г мяте́жей, и бесо́вская смуще́ния разори́л еси́, ра́достно взыва́я: пои́м Бо́гу на́шему, я́ко просла́вися. Припев: Преподо́бне о́тче Мака́рие, моли́ Бо́га о на́с. Умертви́в плотско́е мудрова́ние по́стническими твои́ми боре́нии, Боже́ственному Ду́ху покори́л еси́, о́тче, и, Сего́ управля́емь Боже́ственною си́лою, в ра́дости вопия́л еси́: пои́м Бо́гу на́шему, я́ко просла́вися. Сла́ва Отцу́ и Сы́ну и Свято́му Ду́ху. Вся́ кра́сная оста́вил еси́, непреста́нную возлюби́в, о́тче, красоту́ в дому́ Госпо́дни, иде́же шу́м чи́сте пра́зднующих, в ра́дости вопию́щих: пои́м Бо́гу на́шему, я́ко просла́вися. И ны́не и при́сно и во ве́ки веко́в. Ами́нь. Богородичен: Безле́тнаго Сы́на Безнача́льнаго Отца́, пло́ть на́с ра́ди, челове́ков, бы́вша, Чи́стая, во утро́бе заче́нши, под ле́том Сего́ родила́ еси́ несказа́нно. Ему́же и, ра́дующеся, вопие́м: пои́м Бо́гу на́шему, я́ко просла́вися. Песнь 3 Ирмос: Лу́к си́льных изнемо́же, и немощству́ющии препоя́сашася си́лою, сего́ ра́ди утверди́ся в Го́споде се́рдце мое́. Припев: Преподо́бне о́тче Мака́рие, моли́ Бо́га о на́с. Зако́ну повину́лся еси́ Ду́ха, Его́же всеору́жием препоя́сався, преподо́бне, не зако́ну греха́ произволе́ние подклони́л еси́. Припев: Преподо́бне о́тче Мака́рие, моли́ Бо́га о на́с. Горе́ к Бо́гу мудрова́ние име́я, богоно́се, я́же на земли́ оста́вил еси́, боле́зньми воздержа́ния непреста́нно облегча́емь. Припев: Преподо́бне о́тче Мака́рие, моли́ Бо́га о на́с. Расто́рг у́зы естества́, преесте́ственным и чи́стым твои́м житие́м, богоно́се, су́щих па́че естества́ прия́л еси́ де́йство. Сла́ва Отцу́ и Сы́ну и Свято́му Ду́ху. Да Бо́гу, блаже́нне, в безмяте́жии бесе́дуеши, в пусты́ни, о́тче, жи́ти изво́лил еси́, от мо́лв удаля́яся. И ны́не и при́сно и во ве́ки веко́в. Ами́нь. Богородичен: Спасти́ хотя́ челове́ка на поле́зное, я́ко Благоде́тель Человеколю́бец, в Твою́ утро́бу неопи́санно, Богома́ти, всели́ся. Седален, глас 1 Воздержа́ния огне́м, я́ко зла́то в пещи́, му́дре, искуси́вся, светле́йший яви́лся еси́, сего́ ра́ди к небе́сному преста́вился еси́ Ца́рствию. Те́мже, ве́рою восхваля́юще тя́, вопие́м: благода́ть, ми́лость и очище́ние прегреше́ний на́ших, о́тче, испроси́. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Напра́ви ны́ на пу́ть покая́ния, укло́ньшияся при́сно к безпу́тием зо́л и Преблага́го прогне́вавшия Го́спода, Неискусобра́чная, Благослове́нная Мари́е, прибе́жище отча́янных челове́ков, Бо́жие жили́ще. Песнь 4 Ирмос: Седя́й в сла́ве на Престо́ле Божества́ во о́блаце ле́гце, прии́де Иису́с Пребоже́ственный, Нетле́нною Дла́нию и спасе́ зову́щия: сла́ва, Христе́, си́ле Твое́й. Припев: Преподо́бне о́тче Мака́рие, моли́ Бо́га о на́с. Тле́емаго а́бие ве́тхаго челове́ка совле́клся еси́, о́тче, с грехо́вными страстьми́ воздержа́нием незави́стным, обле́клся же еси́ в но́ваго по Христе́, всече́стне. Припев: Преподо́бне о́тче Мака́рие, моли́ Бо́га о на́с. Светле́йшее твое́ житие́ я́ко пра́вило изве́стнейшее вся́кия, о́тче, боже́ственныя доброде́тели показа́ся в моли́твах и посте́х, бде́ниих же и мольба́х ко Христу́ Человеколю́бцу. Припев: Преподо́бне о́тче Мака́рие, моли́ Бо́га о на́с. Дрема́ния твои́м ве́ждом, богому́дре, не да́л еси́, до́ндеже, о́тче, до́м себе́ сотвори́л еси́ красне́йший Всеви́дцу Влады́це, к Нему́же взыва́л еси́: сла́ва, Христе́, си́ле Твое́й. Сла́ва Отцу́ и Сы́ну и Свято́му Ду́ху. В ю́ности целому́дрие, в ста́рости ра́зум, во все́м же житии́ пожда́ние и долготерпе́ние и ко все́м любо́вь показа́л еси́, взыва́ющим: сла́ва, Христе́, си́ле Твое́й. И ны́не и при́сно и во ве́ки веко́в. Ами́нь. Богородичен: Умерщвле́нныя, Всечи́стая, челове́ки оживи́ла еси́, па́дшия сия́ к тле́нию возста́вила еси́, Жизнода́вца ро́ждши, избавля́ющаго взыва́ющия: сла́ва, Христе́, си́ле Твое́й. Песнь 5 Ирмос: Просвеще́ние Твое́, Го́споди, низпосли́ на́м и от мглы́ прегреше́ний разреши́ ны, Бла́же, Тво́й ми́р да́руяй. Припев: Преподо́бне о́тче Мака́рие, моли́ Бо́га о на́с. Просте́р, сла́вне, души́ у́мное и чу́вства, му́дре, упра́вив, бы́л еси́ хра́м освяще́н Бо́гу и всече́стен. Припев: Преподо́бне о́тче Мака́рие, моли́ Бо́га о на́с. Стропти́вейшаго зми́я увяди́в кова́рства и того́ го́рькия ко́зни притупи́л еси́, при́сно в Боже́ственном зако́не ду́шу устроя́я. Сла́ва Отцу́ и Сы́ну и Свято́му Ду́ху. Украси́л еси́, преподо́бне, души́ трича́стное и, влады́ку у́м поста́вив, име́л еси́ Христа́, наставля́ющаго к ше́ствию небе́сному. И ны́не и при́сно и во ве́ки веко́в. Ами́нь. Богородичен: Де́ва роди́ Пречи́стаго Бо́га, законополага́юща все́м чистоту́ и святы́ню благоче́стия су́щим на земли́ возвеща́юща. Песнь 6 Ирмос: Возопи́, прообразу́я погребе́ние тридне́вное, проро́к Ио́на, в ки́те моля́ся: от тли́ изба́ви мя́, Иису́се, Царю́ си́л. Припев: Преподо́бне о́тче Мака́рие, моли́ Бо́га о на́с. В пусты́ни жи́ти усе́рдно возлюби́л еси́, богоно́се, в не́й Бо́га прие́мля, избавля́ющаго тя́ и соблюда́юща твоя́ стопы́. Припев: Преподо́бне о́тче Мака́рие, моли́ Бо́га о на́с. Непрекло́нен в поще́нии, богому́дре, пребы́л еси́ да́же до конца́, храня́ сие́ опасе́ние, и́мже нетле́ннаго сподо́бился еси́ я́ве наслажде́ния. Сла́ва Отцу́ и Сы́ну и Свято́му Ду́ху. Равноа́нгельно на земли́ житие́ пожи́л еси́, равноа́нгельную и че́сть досто́йно получи́л еси́, со а́нгелы все́х Бо́гу предстоя́. И ны́не и при́сно и во ве́ки веко́в. Ами́нь. Богородичен: Зачала́ еси́ во утро́бе, Богома́ти, Безнача́льнаго Бо́га Сло́ва, на́с ра́ди, челове́ков, бы́вша непрело́жна по на́м, во двою́ зна́емаго естеству́. Кондак, глас 1 Блаже́нную жизнь сконча́в в житии́ с му́ченическими ли́ки,/ в земли́ кро́тких досто́йно водворя́ешися, Богоно́сне Мака́рие,/ и пусты́ню, я́коже град, насели́в, благода́ть прия́л еси́ от Бо́га чуде́с,/ те́мже тя почита́ем. Икос Богоно́снаго быв убо Анто́ния учени́к, о́тче, и́скренний,/ я́коже воск, изобразу́я,/ вся́кую изобрази́л еси́ того́ пои́стинне доброде́тель и страда́ния./ Тем и, я́ко Илия́ сугу́бо,/ я́коже ино́му Елиссе́ю, тебе́ чуде́с благода́ть даде́ся,/ и предве́дения осия́ние и́стины получи́вшему,/ ве́лие положи́ся во всем ми́ре дея́ние жития́ твоего́,/ воздвиза́я спя́щия в поги́бельней про́пасти,/ те́мже тя почита́ем. Песнь 7 Ирмос: Спасы́й во огни́ авраа́мския Твоя́ о́троки и халде́и уби́в, я́же Пра́вда пра́ведно уловля́ше, препе́тый Го́споди, Бо́же оте́ц на́ших, благослове́н еси́. Припев: Преподо́бне о́тче Мака́рие, моли́ Бо́га о на́с. Свы́ше манове́нием и Бо́жиею по́мощию враги́ низложи́в, победоно́сец, зовы́й, бы́л еси́: препе́тый Го́споди, Бо́же отце́в на́ших, благослове́н еси́. Припев: Преподо́бне о́тче Мака́рие, моли́ Бо́га о на́с. Очи́стив мглу́, от страсте́й бы́вшую, безстра́стия просвеще́нием озари́лся еси́, зовы́й, блаже́нне: препе́тый Го́споди, Бо́же отце́в на́ших, благослове́н еси́. Сла́ва Отцу́ и Сы́ну и Свято́му Ду́ху. Уясни́в ду́шу доброде́тельными благоле́потами, красе́н добро́тою Бо́гу бы́в, песнопе́л еси́, ра́дуяся: препе́тый Го́споди, Бо́же отце́в на́ших, благослове́н еси́. И ны́не и при́сно и во ве́ки веко́в. Ами́нь. Богородичен: Призыва́я ны́, плене́нныя, Де́во, во е́же бе́хом в нача́лех, во чре́во Твое́ всели́вся, воплоти́ся Человеколю́бец Госпо́дь, Бо́г отце́в на́ших Благослове́нный. Песнь 8 Ирмос: О́троки благочести́выя в пещи́ Рождество́ Богоро́дичо спасло́ е́сть, тогда́ у́бо образу́емое, ны́не же де́йствуемое, вселе́нную всю́ воздвиза́ет пе́ти Тебе́: Го́спода по́йте, дела́, и превозноси́те Его́ во вся́ ве́ки. Припев: Преподо́бне о́тче Мака́рие, моли́ Бо́га о на́с. Глаго́лы жи́зни ве́чныя, всеблаже́нне, в се́рдцы твое́м прие́м, пло́ть увяди́л еси́, ми́ру же умертви́лся еси́ и, в живоно́сную ме́ртвость оде́явся, — Го́спода по́йте, — взыва́еши, — и превозноси́те Его́ во вся́ ве́ки. Припев: Преподо́бне о́тче Мака́рие, моли́ Бо́га о на́с. Ми́лостива бы́ти, богоно́сне, еди́наго Благода́теля моли́ твою́ всесвяще́нную па́мять пра́зднующим, согреше́ний оставле́ние си́м испроша́я: Го́спода по́йте, дела́, и превозноси́те Его́ во вся́ ве́ки. Припев: Преподо́бне о́тче Мака́рие, моли́ Бо́га о на́с. Ма́нием к Бо́гу непреста́нным внима́я и отону́днаго осия́ния зарю́ прие́мля, све́т противосия́ющий проза́рный, я́ко зерца́ло, посыла́еши пою́щим: Го́спода по́йте, дела́, и превозноси́те Его́ во вся́ ве́ки. Сла́ва Отцу́ и Сы́ну и Свято́му Ду́ху. На ле́ствицу, к небеси́ просте́ртую, на не́йже утвержде́н яви́ся Госпо́дь, о́тче, возше́л еси́, боже́ственными восхожде́ньми при́сно предуспева́я, преподо́бне, до́ндеже дости́гл еси́ пою́щих: Го́спода по́йте, дела́, и превозноси́те Его́ во вся́ ве́ки. И ны́не и при́сно и во ве́ки веко́в. Ами́нь. Богородичен: Пое́м Тя́, Обра́дованная, Бо́га бо воплоще́нна на́м родила́ еси́. Те́мже Богоро́дицу Тя́ вси́ имену́ем, богоприя́тную трапе́зу, добро́ту Иа́ковлю, — Го́спода по́йте, дела́, — вопию́ще, — и превозноси́те Его́ во вся́ ве́ки. Песнь 9 Ирмос: Е́ва у́бо неду́гом преслуша́ния кля́тву всели́ла е́сть, Ты́ же, Де́во Богоро́дице, прозябе́нием чревоноше́ния ми́рови благослове́ние процвела́ еси́. Те́м Тя́ вси́ велича́ем. Припев: Преподо́бне о́тче Мака́рие, моли́ Бо́га о на́с. Слеза́ми у́бо по́стническими ни́ву се́рдца твоего́ напои́л еси́, ра́дуяся же, о́тче богоно́се, ны́не в ра́дости рукоя́ти собира́еши подвиго́в по́чести, те́мже тя́ вси́ ублажа́ем. Припев: Преподо́бне о́тче Мака́рие, моли́ Бо́га о на́с. Незаходи́мый возсия́ тебе́ све́т, и присносу́щное весе́лие восприя́, иде́же, лику́я со а́нгелы о́крест Царя́ и Го́спода, ве́рою соверша́ющия па́мять твою́ помина́й, о́тче всеблаже́нне. Припев: Преподо́бне о́тче Мака́рие, моли́ Бо́га о на́с. Возмо́гл еси́ избежа́ти де́монов стреля́ния и кова́рствий лука́вых, спасе́ся, блаже́нне, душа́ твоя́, свята́, чиста́ и нескве́рна, насле́дия небе́снаго сподо́бися, помина́й у́бо пою́щия тя́. Сла́ва Отцу́ и Сы́ну и Свято́му Ду́ху. Зако́ном, о́тче, страда́льческим подвиза́лся еси́ досто́йне и победи́л еси́. Те́мже тя́ сла́вы венце́м еди́н Благоде́тель почте́ и боже́ственнаго светоявле́ния сподо́би и блаже́нных наслажде́ний. И ны́не и при́сно и во ве́ки веко́в. Ами́нь. Богородичен: Я́ко все́х тва́рей Творца́ ро́ждши, Богома́ти, превозшла́ еси́ всю́ тва́рь боже́ственною сла́вою, и святы́нею, и благода́тию, и вся́кими доброде́тели пе́рвшествы. Те́мже Тя́ вси́ велича́ем. Светилен А́нгельскаго жития́ жела́я, удали́л еси́ тебе́ сама́го в пусты́нях и, стра́сти покори́в плотски́я, равноа́нгелен показа́лся еси́, о́тче на́ш богоно́сне. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Держа́вным Твои́м покро́вом от враго́в наве́та Твоя́ рабы́, Чи́стая, соблюди́ вся́ ны́ невре́дны: Тя́ бо и́мамы Еди́ну прибе́жище в ну́ждах.

Минея, 11 Августа, Кано́н свята́го, его́же краегране́сие: Сла́внаго Е́впла благоче́стно восхваля́ю Глас 4 Песнь 1 Ирмос: Триста́ты кре́пкия, Рожде́йся от Де́вы, безстра́стия во глубине́, души́ трича́стное потопи́, молю́ся, да Тебе́, я́ко в тимпа́не, во умерщвле́нии телесе́ побе́дное воспою́ пе́ние. Припев: Святы́й архидиа́коне Éвпле, моли́ Бо́га о на́с. Ору́жием Креста́ до́бре преплы́в, вше́л еси́ в приста́нище жи́зни, в не́мже ра́достно водворя́яся, сла́вне, уста́ви се́рдца моего́ многомяте́жное волне́ние, ти́хо сла́вити па́мять твою́. Припев: Святы́й архидиа́коне Éвпле, моли́ Бо́га о на́с. Всесве́тлая звезда́, доброде́тельными уче́нии озаря́я ве́рныя, возсия́л еси́, му́дре, честне́й тве́рди, Е́впле, церко́вней и мра́к отгна́л еси́ де́монский си́лою духо́вною. Припев: Святы́й архидиа́коне Éвпле, моли́ Бо́га о на́с. Вжиля́емь, му́дре, Боже́ственною си́лою, дерзнове́нным по́мыслом, Бо́га, от Бо́га рожде́ннаго, пропове́дал еси́, распя́тие во́лею претерпе́вшаго и сме́ртию сме́рть разо́ршаго. Сла́ва Отцу́ и Сы́ну и Свято́му Ду́ху. Да подви́жатся к твоему́ хвале́нию вся́ка уста́, я́ко из у́ст вра́жиих Боже́ственными уче́нии, богоно́се, исхи́тил еси́, вся́, благопоко́рно прие́мшия словеса́ твоя́, страстоно́сче Христо́в до́блественне. И ны́не и при́сно и во ве́ки веко́в. Ами́нь. Богородичен: Уясни́в Твою́ Христо́с утро́бу светоно́сную сни́тием стра́шным, я́ко со́лнце, Чи́стая, су́щим в ми́ре возсия́, реша́ многобо́жия мглу́ те́мную и просвеща́я ми́ра концы́. Песнь 3 Ирмос: Я́ко непло́ды роди́ от язы́к Це́рковь, и мно́гое в ча́дех изнемо́же со́нмище, чу́дному Бо́гу на́шему возопии́м: Свя́т еси́, Го́споди. Припев: Святы́й архидиа́коне Éвпле, моли́ Бо́га о на́с. Себе́ сама́го изда́л еси́, я́ко а́гнец, во́лею закла́тися хотя́ за Христа́, тебе́ ра́ди во́лею обнища́вшаго и закла́вшася, Е́впле всеблаже́нне. Припев: Святы́й архидиа́коне Éвпле, моли́ Бо́га о на́с. Заколе́ние непоро́чно, благово́нна же́ртва и приноше́ние соверше́нно прине́слся еси́ Бо́гу, ра́достно, блаже́нне, вопия́: Свя́т еси́, Го́споди. Сла́ва Отцу́ и Сы́ну и Свято́му Ду́ху. Зако́ны утвержда́емь ева́нгельскими, богому́дре, посреди́ муже́й беззако́нных предста́л еси́, зовы́й я́ве: не и́щущим обрето́хся, обличи́ти си́х злоче́стие. И ны́не и при́сно и во ве́ки веко́в. Ами́нь. Богородичен: Бо́г, посреди́ Тебе́ всели́вся, ника́ко де́вства Твоего́ ключа́ поколеба́, Чи́стая, Его́же приле́жно моли́, утверди́ти вся́, пою́щия Тя́. Седален, глас 1 Ору́жием Креста́ до́бре преплы́в,/ вшел еси́ в приста́нище ти́хо Небе́сных жили́щ,/ в не́мже водворя́яся,/ творя́щим твою́ па́мять моле́бную твои́х по́двиг днесь, моли́ся Зижди́телю,/ изба́витися от вся́кия нужды и скорбе́й. Песнь 4 Ирмос: Любве́ ра́ди, Ще́дре, Твоего́ о́браза, на Кресте́ Твое́м ста́л еси́, и раста́яшася язы́цы: Ты́ бо еси́, Человеколю́бче, кре́пость моя́ и хвале́ние. Припев: Святы́й архидиа́коне Éвпле, моли́ Бо́га о на́с. Хра́м одушевле́н Тро́ицы Пресвяты́я я́ко вои́стинну яви́лся еси́ и хра́мы и́дольския, Е́впле, низложи́л еси́ ору́жием ве́ры. Припев: Святы́й архидиа́коне Éвпле, моли́ Бо́га о на́с. Наслажда́яся добро́тою Боже́ственною, Е́впле, ра́ны, и боле́зни, и вся́кия му́ки, блаже́нне, преоби́дел еси́ и, ра́дуяся, пострада́л еси́. Припев: Святы́й архидиа́коне Éвпле, моли́ Бо́га о на́с. Высокому́дренное се́рдце Паламни́ово, смири́вся, богому́дре, смири́л еси́, му́чениче, и к Возне́сшему челове́ки возше́л еси́. Сла́ва Отцу́ и Сы́ну и Свято́му Ду́ху. Распаля́емь ре́вностию Влады́ки, вся́ку ле́сть, му́чениче, запали́л еси́ вои́стинну и к муче́нию усе́рдно отлучи́лся еси́. И ны́не и при́сно и во ве́ки веко́в. Ами́нь. Богородичен: Мо́лят бога́тии лю́дие Твои́ Тя́ ро́ждшую Отрокови́цу, обогати́вшаго все́х Боже́ственными разуме́нии, Христа́ Бо́га на́шего. Песнь 5 Ирмос: Нечести́вии не у́зрят сла́вы Твоея́, Христе́, но мы́ Тя́, Единоро́дне, Оте́ческия сла́вы Сия́ние Божества́, от но́щи у́тренююще, воспева́ем Тя́, Человеколю́бче. Припев: Святы́й архидиа́коне Éвпле, моли́ Бо́га о на́с. Ве́сь манове́нии Боже́ственными просве́щся и му́жеством укре́плься, я́ко ле́в изря́ден, ты́ к суди́щу, наде́яся, поте́кл еси́, злоче́стие побежда́я. Припев: Святы́й архидиа́коне Éвпле, моли́ Бо́га о на́с. Дае́т тебе́ безпеча́льную жи́знь Изба́витель, за Него́же сме́рть го́рькую, страстоно́сче сла́вне, претерпе́вшему, и с ли́ки причита́ет тя́ му́ченик до́бльствовавша. Сла́ва Отцу́ и Сы́ну и Свято́му Ду́ху. Преклони́л еси́ вы́ю твою́ усе́рдным по́мыслом и, во главу́ усе́чен, Христу́ ясне́е и чисте́е прибли́жился еси́, преподо́бне, наслажда́яся обоже́ния. И ны́не и при́сно и во ве́ки веко́в. Ами́нь. Богородичен: Вы́шши яви́лася еси́ а́нгел вои́стинну, а́нгелов Творца́ па́че ума́ ро́ждши, просла́вльшаго святы́я му́ченики, Пресвята́я Ма́ти Де́во. Песнь 6 Ирмос: Приидо́х во глубины́ морски́я, и потопи́ла мя́ е́сть бу́ря мно́гих грехо́в, но я́ко Бо́г из глубины́ возведи́ живо́т мо́й, Многоми́лостиве. Припев: Святы́й архидиа́коне Éвпле, моли́ Бо́га о на́с. Точа́ кро́вь, предста́л еси́ твоему́ Подвигополо́жнику, до́блий Е́впле богому́дре, и от Него́ венцы́ прия́л еси́ побе́ды, ра́дуяся. Припев: Святы́й архидиа́коне Éвпле, моли́ Бо́га о на́с. Ста́л еси́ пред суди́щем му́жески, Влады́чния зако́ны рука́ми твои́ми, Е́впле, держа́ и я́вственно беззако́нныя, преподо́бне, облича́я усе́рдно. Сла́ва Отцу́ и Сы́ну и Свято́му Ду́ху. Му́к мно́жества не убоя́вся, ни ужа́сся меча́, и́стину ты́ на суди́щи мучи́телей благоче́стно пропове́дал еси́ и ле́сть умертви́л еси́. И ны́не и при́сно и во ве́ки веко́в. Ами́нь. Богородичен: О, чу́до пресла́вно! Ка́ко ражда́еши, иску́са му́жеска не позна́вши? Ка́ко же пита́еши, Де́во Ма́ти, Пода́теля вои́стинну млека́ и Пита́теля всея́ тва́ри? Кондак, глас 1 Зако́ны Христо́вы в руку́ обнося́, предста́л еси́, вопия́ враго́м, в по́двизе: самозва́н е́смь страда́льчествовати тверде́йши. Те́мже, приклони́в ра́достно вы́ю твою́, подъя́л еси́ усече́ние мече́м, сконча́вый тече́ние твое́. Песнь 7 Ирмос: Ю́ноши три́ в Вавило́не, веле́ние мучи́телево на бу́йство прело́жше, посреде́ пла́мене вопия́ху: благослове́н еси́, Го́споди, Бо́же оте́ц на́ших. Припев: Святы́й архидиа́коне Éвпле, моли́ Бо́га о на́с. Ка́плющи твоя́ кро́вь на зе́млю, угаси́ о́гнь пре́лести, всеблаже́нне, Христо́ву же Це́рковь бога́тно напои́ла е́сть, благоче́стно воспева́ющую тя́. Припев: Святы́й архидиа́коне Éвпле, моли́ Бо́га о на́с. Име́я му́дрость кре́пку и непоколеби́мь по́мысл, пре́лесть потря́сл еси́ и предстоя́щия лжи́ нело́жными обличи́л еси́ уче́нии, Е́впле всему́дре. Припев: Святы́й архидиа́коне Éвпле, моли́ Бо́га о на́с. Две́рь тебе́ ра́йская, Е́впле, му́чениче Христо́в, отве́рзеся, блаже́нне, укра́шена ви́девши боже́ственным страда́нием и побе́дным венце́м. Сла́ва Отцу́ и Сы́ну и Свято́му Ду́ху. У́глем Боже́ственным очи́стив, му́чениче, ду́шу, у́глие погаси́л еси́ многобо́жия, зовы́й: благослове́н еси́, Го́споди, Бо́же оте́ц на́ших. И ны́не и при́сно и во ве́ки веко́в. Ами́нь. Богородичен: Твою́ боже́ственную утро́бу пе́щь пе́рсская вообрази́, Пренепоро́чная, спаса́ет ю́ноши неопа́льны, взыва́ющи: Го́споди, Бо́же оте́ц на́ших, благослове́н еси́. Песнь 8 Ирмос: Изба́вителю все́х Всеси́льне, посреде́ пла́мене благоче́ствовавшия, снизше́д, ороси́л еси́ и научи́л еси́ пе́ти: вся́ дела́, благослови́те, по́йте Го́спода. Припев: Святы́й архидиа́коне Éвпле, моли́ Бо́га о на́с. Неду́гов вся́ческих очище́ние и духо́в лю́тых прогоне́ние твоя́ су́ть мо́щи, я́же обступи́вше, вопие́м: благослови́те, вся́ дела́ Госпо́дня, Го́спода. Припев: Святы́й архидиа́коне Éвпле, моли́ Бо́га о на́с. О тебе́ ве́рных собо́р возра́довася, ко Христу́ тя хода́тая стяжа́в, и моли́твенника те́пла, и предста́теля, всеблаже́нне Е́впле диа́коне, святы́х а́нгел собесе́дниче. Сла́ва Отцу́ и Сы́ну и Свято́му Ду́ху. Соше́дшеся, почерпи́те, челове́цы, неду́гов разли́чных исцеле́ние от ра́ки му́ченика и возопи́йте ве́рою: благослови́те, вся́ дела́ Госпо́дня, Го́спода. И ны́не и при́сно и во ве́ки веко́в. Ами́нь. Богородичен: Украси́ся, Чи́стая Всенепоро́чная, па́че вся́каго а́нгельскаго благоле́пия, Творца́ ро́ждши челове́ков и а́нгелов. Ему́же пое́м: благослови́те, вся́ дела́ Госпо́дня, Го́спода. Песнь 9 Ирмос: Е́ва у́бо неду́гом преслуша́ния кля́тву всели́ла е́сть, Ты́ же, Де́во Богоро́дице, прозябе́нием чревоноше́ния ми́рови благослове́ние процвела́ еси́. Те́м Тя́ вси́ велича́ем. Припев: Святы́й архидиа́коне Éвпле, моли́ Бо́га о на́с. Ви́дети сподо́бився вои́стинну, пребога́те, да́льная, тебе́ жела́емое стяжа́л еси́ жела́ние, я́ко дости́г са́мое жела́нных соверше́ние, жела́ния твоего́ я́ве прехо́д, Е́впле, диа́коне досточу́дне. Припев: Святы́й архидиа́коне Éвпле, моли́ Бо́га о на́с. Я́ко ски́петр, держа́ Кре́ст, блаже́нне, руко́ю твое́ю, багряни́цу, ю́же от крове́й свяще́нных твои́х омочи́л еси́, све́тло обложе́н, Христу́ Царю́ ны́не предстои́ши, Е́впле, диа́коне досточу́дне. Припев: Святы́й архидиа́коне Éвпле, моли́ Бо́га о на́с. Дне́сь Ката́нии честна́я митропо́лия, храни́теля тоя́ изря́дна тя́ стяжа́вши, пра́зднует, боже́ственное соверша́ющи твое́ страда́ние, со все́ми епа́рхиями и гра́ды, ю́же снабди́ши твои́ми мольба́ми. Сла́ва Отцу́ и Сы́ну и Свято́му Ду́ху. Со́лнце всесве́тло я́ве бы́л еси́ и к сия́нию пресели́лся еси́, му́чениче, Боже́ственному, прича́стием обожа́емь Боже́ственным, блаже́нне, и ны́не просвеща́еши пою́щия твое́ светоно́сное страда́ние. И ны́не и при́сно и во ве́ки веко́в. Ами́нь. Богородичен: Све́та луча́ми, е́же в Тебе́, Богоневе́сто, ду́шу мою́ просвети́, лежа́щую в ро́ве поги́бели возста́ви, враги́ разража́ющи, оскорбля́ющия при́сно се́рдце мое́ и к страсте́м порева́ющия мя́.

глас 1 Пе́снь 1. Ирмо́с: Христо́с ражда́ется – сла́вите! Христо́с с Небе́с – сря́щите! Христо́с на земли́ – возноси́теся! По́йте Го́сподеви, вся́ земля́, и весе́лием воспо́йте, лю́дие, я́ко просла́вися. Истле́вша преступле́нием, по Бо́жию о́бразу бы́вшаго, всего́ тле́ния су́ща, лу́чшия отпа́дша Боже́ственныя жи́зни, па́ки обновля́ет му́дрый Соде́тель, я́ко просла́вися. Ви́дев Зижди́тель ги́блема челове́ка, рука́ми его́же созда́, приклони́в Небеса́, схо́дит; сего́ же от Де́вы Боже́ственныя Чи́стыя всего́ осуществу́ет, вои́стинну вопло́щся, я́ко просла́вися. Му́дрость, Сло́во и си́ла, Сы́н Сы́й О́тчий и сия́ние, Христо́с Бо́г, си́л утаи́вся, ели́ко преми́рных и ели́ко на земли́, и, вочелове́чся, обнови́л е́сть на́с, я́ко просла́вися. Пе́снь 3. Ирмо́с: Пре́жде ве́к от Отца́ рожде́нному нетле́нно Сы́ну и в после́дняя от Де́вы воплоще́нному безсе́менно, Христу́ Бо́гу возопии́м: вознесы́й ро́г на́ш, Свя́т еси́, Го́споди. И́же дохнове́ния прича́щся лу́чшаго Ада́м пе́рстный и к тле́нию попо́лзся же́нскою ле́стию, Христа́ от Жены́ ви́дя, вопие́т: и́же мене́ ра́ди по мне́ бы́в, Свя́т еси́, Го́споди. Сообра́зен бре́нному умале́нию растворе́нием, Христе́, бы́в и прича́стием пло́ти го́ршия, пода́в Боже́ственнаго естества́, зе́млен бы́в, и пребы́в Бо́г, и возвы́сивый ро́г на́ш, Свя́т еси́, Го́споди. Вифлее́ме, весели́ся, князе́й Иу́довых Сы́й Ца́рь: Изра́иля бо пасы́й на ра́мех Херуви́мских, из тебе́ про́йде Христо́с я́ве и вознесы́й ро́г на́ш над все́ми воцари́ся. Седален: Нача́ток язы́ков Не́бо Тебе́ принесе́, лежа́щему Младе́нцу во я́слех, звездо́ю волхвы́ призва́вый, я́же и ужаса́ше не ски́птры и престо́ли, но после́дняя нищета́: что́ бо ху́ждше верте́па? Что́ же смире́ншее пеле́н? в ни́хже просия́ Божества́ Твоего́ бога́тство. Го́споди, сла́ва Тебе́. Пе́снь 4. Ирмо́с: Же́зл из ко́рене Иессе́ова и цве́т от него́, Христе́, от Де́вы прозя́бл еси́, из горы́, Хва́льный, приосене́нныя ча́щи прише́л еси́, вопло́щся от Неискусому́жныя, Невеще́ственный и Бо́же, сла́ва си́ле Твое́й, Го́споди. Его́же дре́вле прорече́ Иа́ков, язы́ков ожида́ние, Христе́, от коле́на Иу́дова возсия́л еси́ и си́лу Дама́скову, Самари́йскую же коры́сть прише́л еси́ испроврещи́, ле́сть пременя́я в ве́ру боголе́пну: сла́ва си́ле Твое́й, Го́споди. Волхва́ дре́вле Валаа́ма слове́с ученики́, му́дрыя звездоблюсти́тели, ра́дости испо́лнил еси́, звезда́ от Иа́кова, возсия́в, Влады́ко, язы́ков нача́ток вводи́мый прия́л же еси́ я́ве: сла́ва си́ле Твое́й, Го́споди. Я́ко на руно́, во чре́во Де́вы сше́л еси́ до́ждь, Христе́, и я́ко ка́пли, на зе́млю ка́плющия. Ефио́пия, и Фарси́с, и Арави́тстии о́строви же, Сава́, Ми́дов всю́ зе́млю держа́щии, припадо́ша Тебе́, Спа́се: сла́ва си́ле Твое́й, Го́споди. Пе́снь 5. Ирмо́с: Бо́г Сы́й ми́ра, Оте́ц щедро́т, Вели́каго Сове́та Твоего́ А́нгела, ми́р подава́юща, посла́л еси́ на́м; те́м, Богоразу́мия к све́ту наста́вльшеся, от но́щи у́тренююще, славосло́вим Тя́, Человеколю́бче. В рабе́х ке́саревым повеле́нием написа́тися поко́рься, и на́с, рабы́ су́щия, врага́ и греха́ свободи́л еси́, Христе́, ве́сь же по на́м обнища́в, и пе́рстнаго от самаго́ едине́ния и обще́ния богосоде́лал еси́. Се́ Де́ва, я́коже дре́вле рече́, во чре́ве прие́мши, родила́ е́сть Бо́га вочелове́чшася и пребыва́ет Де́ва. Ея́же ра́ди примири́вшеся Бо́гу, гре́шнии, Богоро́дицу су́щую вои́стинну, ве́рнии, воспои́м. Пе́снь 6. Ирмо́с: Из утро́бы Ио́ну младе́нца изблева́ морски́й зве́рь, якова́ прия́т; в Де́ву же все́льшееся Сло́во и пло́ть прие́мшее про́йде, сохра́ншее нетле́нну: его́же, бо не пострада́ истле́ния, Ро́ждшую сохрани́ неврежде́нну. Прии́де, вопло́щся, Христо́с Бо́г на́ш из чре́ва, его́же Оте́ц пре́жде денни́цы ражда́ет; правле́ния же держа́ Пречи́стых си́л, в я́слех ско́тиих возлежи́т и пелена́ми повива́ется, разреша́ет же многоплете́нныя плени́цы прегреше́ний. Ю́но из Ада́ма отроча́ смеше́ния, роди́ся Сы́н и ве́рным даде́ся, бу́дущаго ве́ка Се́й е́сть Оте́ц и Нача́льник и нарица́ется Вели́каго Сове́та А́нгел. Се́й кре́пок Бо́г е́сть и держа́й о́бластию всю́ тва́рь. Конда́к. Де́ва дне́сь Пресу́щественнаго ражда́ет, и земля́ верте́п Непристу́пному прино́сит. А́нгели с па́стырьми славосло́вят, волсви́ же со звездо́ю путеше́ствуют: на́с бо ра́ди роди́ся Отроча́ мла́до, Преве́чный Бо́г. И́кос: Еде́м Вифлее́м отве́рзе, прииди́те, ви́дим, пи́щу в та́йне обрето́хом; прииди́те, прии́мем су́щая ра́йская вну́трь верте́па: та́мо яви́ся ко́рень ненапое́н, прозяба́я отпуще́ние, та́мо обре́теся кла́дязь неиско́пан, из него́же Дави́д пи́ти дре́вле возжада́ся. Та́мо Де́ва ро́ждши Младе́нца, жа́жду уста́ви а́бие Ада́мову и Дави́дову. Сего́ ра́ди к Нему́ и́дем, где́ роди́ся Отроча́ мла́до, Преве́чный Бо́г. Пе́снь 7. Ирмо́с: О́троцы, благоче́стию совоспита́ни, злочести́ваго веле́ния небре́гше, о́гненнаго преще́ния не убоя́шася, но, посреде́ пла́мене стоя́ще, поя́ху: отце́в Бо́же, благослове́н еси́. Па́стырие, свиря́юще, ужа́сно светоявле́ние получи́ша: сла́ва бо Госпо́дня облиста́ и́х, и А́нгел, воспо́йте, – вопия́, – я́ко роди́ся Христо́с, отце́в Бо́г благослове́нный. Внеза́пу с сло́вом А́нгеловым Небе́сная во́инства, сла́ва, – вопия́ху, – Бо́гу в Вы́шних, на земли́ ми́р, в челове́цех благоволе́ние: Христо́с возсия́, отце́в Бо́г благослове́нный. Глаго́л что́ се́й? – реко́ша па́стырие, – прише́дше, уви́дим бы́вшее, Боже́ственнаго Христа́. Вифлее́ма же доше́дше, с Ро́ждшею покланя́хуся, воспева́юще: отце́в Бо́же, благослове́н еси́. Пе́снь 8. Ирмо́с: Чу́да преесте́ственнаго росода́тельная изобрази́ пе́щь о́браз: не бо, я́же прия́т, пали́т ю́ныя, я́ко ниже́ о́гнь Божества́ – Де́вы, в Ню́же вни́де утро́бу. Те́м, воспева́юще, воспое́м: да благослови́т тва́рь вся́ Го́спода и превозно́сит во вся́ ве́ки. Влече́т Вавило́ня дщи́ о́троки плене́нныя Дави́довы от Сио́на к себе́, дароно́сцы же сле́т волхвы́ де́ти, Дави́дове Богоприя́тней дще́ри моля́щияся. Те́м, воспева́юще, воспои́м: да благослови́т тва́рь вся́ Го́спода и превозно́сит во вся́ ве́ки. Орга́ны уклони́ша плаче́вныя пе́сни, не поя́ху бо в земли́ чужде́й о́троцы Сио́новы, Вавило́нскую же разреша́ет ле́сть всю́ и мусики́йския соста́вы, в Вифлее́ме возсия́в, Христо́с. Те́м, воспева́юще, воспои́м: да благослови́т тва́рь вся́ Го́спода и превозно́сит во вся́ ве́ки. Коры́сти Вавило́н ца́рства Сио́ня и плене́нное бога́тство прия́т, сокро́вища же Христо́с в Сио́н сего́, и цари́ звездо́ю наставля́я, звездоблюсти́тели влече́т. Те́м, воспева́юще, воспои́м: да благослови́т тва́рь вся́ Го́спода и превозно́сит во вся́ ве́ки. Пе́снь 9. Ирмо́с: Та́инство стра́нное ви́жу и пресла́вное: Не́бо – верте́п, престо́л Херуви́мский – Де́ву, я́сли – вмести́лище, в ни́хже возлеже́ Невмести́мый – Христо́с Бо́г, его́же, воспева́юще, велича́ем. Припе́в: Велича́й, душе́ моя́, Честне́йшую и Сла́внейшую Го́рних во́инств, Де́ву Пречи́стую, Богоро́дицу. Ирмо́с: Та́инство стра́нное ви́жу и пресла́вное: Не́бо – верте́п, престо́л Херуви́мский – Де́ву, я́сли – вмести́лище, в ни́хже возлеже́ Невмести́мый – Христо́с Бо́г, его́же, воспева́юще, велича́ем. Припе́в: Велича́й, душе́ моя́, от Де́вы Бо́га, пло́тию ро́ждшагося. Изря́дное тече́ние зря́ще волсви́ необы́чныя но́выя звезды́ новосия́ющия, Небеса́ просвеща́ющия, Христа́ Царя́ зна́менующия на земли́, ро́ждшагося в Вифлее́ме на спасе́ние на́ше. Припе́в: Велича́й, душе́ моя́, в верте́пе ро́ждшагося Царя́. Изря́дное тече́ние зря́ще волсви́ необы́чныя но́выя звезды́ новосия́ющия, Небеса́ просвеща́ющия, Христа́ Царя́ зна́менующия на земли́, ро́ждшагося в Вифлее́ме на спасе́ние на́ше. Припе́в: Велича́й, душе́ моя́, от волхво́в Бо́га покланя́емаго. Новорожде́нное, – волхво́м, глаго́лющим, – Отроча́ Ца́рь, Его́же звезда́ яви́, где́ есть? Тому́ бо поклони́тися приидо́хом. Яря́ся, И́род смуща́шеся, Христа́ уби́ти богобо́рец шата́яся. Припе́в: Велича́й, душе́ моя́, от звезды́ волхво́м Возвеще́ннаго. Новорожде́нное, – волхво́м, глаго́лющим, – Отроча́ Ца́рь, Его́же звезда́ яви́, где́ есть? Тому́ бо поклони́тися приидо́хом. Яря́ся, И́род смуща́шеся, Христа́ уби́ти богобо́рец шата́яся. Припе́в: Велича́й, душе́ моя́, Чи́стую Де́ву и Еди́ну Богоро́дицу, ро́ждшую Христа́ Царя́. Испыта́ И́род вре́мя звезды́, ея́же вожде́нием волсви́ в Вифлее́ме покланя́хуся Христу́ с да́ры; е́юже, ко оте́честву наставля́еми, лю́таго детоуби́йцу оста́виша пору́гана. Припе́в: Волсви́ и па́стырие приидо́ша поклони́тися Христу́, ро́ждшемуся во Вифлее́ме гра́де. Испыта́ И́род вре́мя звезды́, ея́же вожде́нием волсви́ в Вифлее́ме покланя́хуся Христу́ с да́ры; е́юже, ко оте́честву наставля́еми, лю́таго детоуби́йцу оста́виша пору́гана. Свети́лен: Посети́л ны́ е́сть свы́ше Спа́с на́ш, Восто́к восто́ков, и су́щии во тьме́ и се́ни обрето́хом и́стину, и́бо от Де́вы роди́ся Госпо́дь. (Трижды)

Минея, 28 Января, Ин канон Глас 6 Песнь 1 Ирмос: Се́ченое, сече́тся/мо́ре Чермнно́е,/ волнопита́емая же изсуша́ется глубина́,/ та́яжде ку́пно безору́жным бы́вши проходи́ма/ и всеору́жным гроб./ Песнь же Богокра́сная воспева́юща:/ сла́вно просла́вися Христо́с, Бог наш. Припев: Преподо́бне о́тче Феодо́сие, моли́ Бо́га о на́с. А́гнче Пречи́сте, Бо́жий Сло́ве,/ низпосли́ мне сло́во, недосто́йному, воспе́ти чудеса́ преподо́бнаго Твоего́ Феодо́сия,/ его́же в по́двизех просла́вил еси́, усе́рдно к Тебе́ воспева́юща:/ сла́вно просла́вися Христо́с Бог наш. Припев: Преподо́бне о́тче Феодо́сие, моли́ Бо́га о на́с. Весь возло́жся Зижди́телеви/ и сла́ву вре́менную презре́ти жела́я,/ желе́зы те́ло твое́ стягну́в, к по́двигу устреми́лся еси́,/ Боже́ственною разже́гся ре́вностию, в моли́твах же к Бо́гу воспева́я:/ сла́вно просла́вися Христо́с Бог наш. Сла́ва Отцу́ и Сы́ну и Свято́му Ду́ху. Го́рдаго зми́я смире́нием твои́м попра́в,/ плотска́я взыгра́ния умертви́л еси́,/ и жите́йския сла́сти терпе́нием, а́ки мече́м, посе́кл еси́,/ преподо́бне Феодо́сие, Го́сподеви вопия́:/ сла́вно просла́вися Христо́с Бог наш. И ны́не и при́сно и во ве́ки веко́в. Ами́нь. Богородичен: Де́вство сохрани́вши некра́домо,/ от Ду́ха Свя́та заче́нши, родила́ еси́ Бо́га Сло́ва/ и по Рождестве́ пребыла́ еси́, я́коже и пре́жде, Богоневе́сто Влады́чице./ Те́мже спаси́ нас, вопию́щих:/ сла́вно просла́вися Христо́с Бог наш. Песнь 3 Ирмос: Госпо́дь Сый всех и Зижди́тель Бог,/ созда́нное Безстра́стный, обнища́в, Себе́ соедини́,/ и Па́сха, за я́же хотя́ше умре́ти,/ Сам Сый, Себе́ предпожре́:/ яди́те, – вопия́, – Те́ло Мое́/ и ве́рою утверди́теся. Припев: Преподо́бне о́тче Феодо́сие, моли́ Бо́га о на́с. Еди́наго возлюби́л еси́ Христа́, преподо́бне Феодо́сие,/ во пло́ти безпло́тных полки́ посрами́л еси́/ и по преставле́нии твое́м чудеса́ то́чиши:/ явле́нием бо со ико́ною Пречи́стыя Богома́тере деви́цу разсла́бленную от одра́ возста́вил еси́. Припев: Преподо́бне о́тче Феодо́сие, моли́ Бо́га о на́с. Житие́ непоро́чно на земли́ соверши́л еси́, преподо́бне,/ ны́не же стра́сти неду́жных исцеля́еши:/ стра́ждущему бо на но́вый ме́сяц от лука́ваго ду́ха триле́тное вре́мя здра́вие по́дал еси́,/ прише́дшу ко свято́му гро́бу твоему́. Сла́ва Отцу́ и Сы́ну и Свято́му Ду́ху. Зижди́телю предстои́ши к Нему́ дерзнове́ние и́маши, о́тче./ К ра́це бо твое́й прише́дшая жена́,/ шум, и дво́ицы глаго́лание, и пе́ния у́бо слы́шавши, ужасе́ся;/ ма́нием же каса́ния оче́с прозре́ние пода́л еси́ ей,/ назна́менуя святы́я воды́ кропле́ние. И ны́не и при́сно и во ве́ки веко́в. Ами́нь. Богородичен: Из ко́рене Иессе́ова изра́стши жезл, цвет нося́щий – Христа́, Соде́теля вся́кия тва́ри,/ увяди́вшаго сады́ непло́днаго ра́зума,/ Де́во Богоро́дице, спаси́ ны от грехо́вных страсте́й,/ прибега́ющия в кров Твой с ве́рою. Седален, глас 8 Премно́жеством доброде́телей от младе́нства житие́ украси́л еси́,/ помы́слив от зе́мных на Небе́сная,/ и, де́лом соверши́в, о́тче Феодо́сие, сла́ву и бога́тство тле́нное ни во что же вмени́л еси́;/ посто́м и власяны́м одея́нием плоть твою́ изнуря́л еси́,/ всено́щным же стоя́нием и моли́твами собесе́дник а́нгельским лико́м показа́лся еси́./ Моли́ Христа́ Бо́га согреше́ний оставле́ние дарова́ти/ чту́щим любо́вию святу́ю па́мять твою́. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Я́ко Де́ву и еди́ну в жена́х, Тя, без се́мене ро́ждшую Бо́га пло́тию,/ вси ублажа́ем, ро́ди челове́честии:/ Огнь бо всели́ся в Тя Божества́/ и я́ко Младе́нца млеко́м пита́еши Зижди́теля и Го́спода./ Тем, А́нгельский и челове́ческий род, досто́йно сла́вим Пресвято́е Рождество́ Твое́/ и согла́сно вопие́м Ти:/ моли́ Христа́ Бо́га согреше́ний оставле́ние дарова́ти/ покланя́ющимся ве́рою Пресвято́му Рождеству́ Твоему́. Песнь 4 Ирмос: Удиви́ся Твой ра́зум от мене́,/ услы́шавшу пресла́вная веле́ния смотре́ния Твоего́,/ укрепи́ся же возлюбле́нием Твоего́ схожде́ния,/ Ты бо моея́ нищеты́ не отве́рглся еси́. Припев: Преподо́бне о́тче Феодо́сие, моли́ Бо́га о на́с. Феодо́сие блаже́нне, воздержа́нием во пло́ти/ стра́сти чу́вственный умертви́л еси́/ и по успе́нии твое́м стра́сти неду́жных разреша́еши:/ одержи́маго бо тряса́вицею свободи́л еси́ от неду́га. Припев: Преподо́бне о́тче Феодо́сие, моли́ Бо́га о на́с. Исто́чники сле́зными напои́в ни́ву души́ твоея́, о́тче,/ чудесы́ просия́л еси́, я́ко звезда́, многосве́тлая:/ боле́знующаго очи́ма уврачева́л еси́,/ младе́нца же спасл еси́, му́чима от лука́ваго ду́ха. Сла́ва Отцу́ и Сы́ну и Свято́му Ду́ху. Ко Творцу́ о нас мо́лишися, преподо́бне,/ и да́руеши цельбы́ неоску́дно припада́ющим к ра́це твое́й:/ хрома́го от боле́зни уврачева́л еси́/ и ходи́ти непреткнове́нно устро́ил еси́. И ны́не и при́сно и во ве́ки веко́в. Ами́нь. Богородичен: Лю́дем яви́ся обновле́ние, Влады́чице:/ Ты бо родила́ еси́ во вре́мени от Отца́ рожде́ннаго пре́жде век,/ нас же ра́ди от Тебе́ воплоти́вшегося/ и спа́сшаго от пе́рвыя кля́твы род челове́ческий. Песнь 5 Ирмос: Богоя́вления Твоего́, Христе́,/ к нам ми́лостивно бы́вшего,/ Иса́ия Свет ви́дев Невече́рний,/ из но́щи у́треневав, взыва́ше:/ воскре́снут ме́ртвии,/ и воста́нут су́щии во гробе́х,/ и вси земноро́днии возра́дуются. Припев: Преподо́бне о́тче Феодо́сие, моли́ Бо́га о на́с. Мно́гое име́я дерзнове́ние к Зижди́телю, о́тче Феодо́сие,/ мно́гими мя, лю́тыми страстьми́ содержи́маго, исцели́,/ я́коже и деви́цу, все́ми у́ды разсла́бленную,/ прикосну́вшуюся ра́це твое́й, исцели́л еси́. Припев: Преподо́бне о́тче Феодо́сие, моли́ Бо́га о на́с. Недрема́нно после́дуя Христу́,/ плоть нас ра́ди прие́мшу и о́чи слепа́го отве́рзшу, Феодо́сие,/ жене́ слепе́й и о́ком неви́дящему прозре́ние по́дал еси́,/ и нас просвети́, пою́щих тя. Сла́ва Отцу́ и Сы́ну и Свято́му Ду́ху. К Серафи́мом приобщи́вся, преподо́бне Феодо́сие,/ вся́ческих Творца́ и Влады́ку преклони́л еси́ на милосе́рдие:/ седмоле́тное вре́мя не слы́шавшему уши́ма, дарова́л еси́ здра́вие. И ны́не и при́сно и во ве́ки веко́в. Ами́нь. Богородичен: Огнь Боже́ственный во утро́бе поне́сши, Богоневе́сто Пречи́стая,/ попали́ на́ша стра́сти душетле́нныя/ и просвети́ сердца́ пою́щих,/ да вси Тебе́ прославля́ем, ро́ждшую Го́спода, всю тварь содержа́щего. Песнь 6 Ирмос: Зве́рю бе́здны предае́тся проро́к Ио́на,/ глубине́ морско́й,/ прообразу́я Твое́, Сло́ве, тридне́вное воста́ние./ Тем и взыва́ше:/ из глубины́ преиспо́дния возведи́ живо́т мой,/ Благоутро́бне. Припев: Преподо́бне о́тче Феодо́сие, моли́ Бо́га о на́с. Пресвяте́й Тро́ице дом себе́ устро́ив,/ пусты́ню возлюби́л еси́/ и по преселе́нии твое́м к Бо́гу посеща́еши ученики́ твоя́,/ ста́рца разсла́бленнаго укрепи́л еси́/ и младе́нцу разреши́л еси́ слепоту́. Припев: Преподо́бне о́тче Феодо́сие, моли́ Бо́га о на́с. Ра́ка моще́й твои́х, о́тче Феодо́сие, неоску́дно исцеле́ния источа́ет приходя́щим с ве́рою:/ глазну́ю боле́знь и разслабле́ние те́ла жене́ разреши́л еси́,/ челове́ка же одержи́маго от лука́ваго ду́ха свободи́л еси́. Сла́ва Отцу́ и Сы́ну и Свято́му Ду́ху. Све́том Боже́ственным озаря́емь свы́ше,/ чудесы́ просия́л еси́/ и мрак де́монский разруша́еши;/ нас же, прегреше́ньми объюроде́вших, уцелому́дри,/ я́коже изсту́пльших ума́ уцелому́дрил еси́. И ны́не и при́сно и во ве́ки веко́в. Ами́нь. Богородичен: Тя прови́де Дании́л несе́ченную го́ру,/ из нея́же отто́ржеся ка́мень без руку́,/ прообразу́я от Тебе́ воплоще́ние Безле́тнаго в ле́то./ Нас же, во глубине́ злых прегреше́ний тружда́ющихся, спаса́еши, Богоро́дице,/ еди́на земны́м прибе́жище. Кондак, глас 8 Воздержа́нием плоть изнури́л еси́/ и непреста́нными моли́твами, я́ко А́нгел, возвы́сился еси́,/ струя́ми же сле́зными бесо́вския полки́ погрузи́л еси́./ И ны́не во Све́те невече́рнем лику́еши у Христа́ Бо́га/ и приходя́щим ко свято́му твоему́ гро́бу неоску́дно исцеле́ние подае́ши,/ ве́рою вопию́щим тебе́:/ ра́дуйся, о́тче Феодо́сие Богому́дре. Икос Возревнова́в о Боже́ственных бде́ниих/ и те́сным на земли́ ше́ствовав путе́м,/ Небе́сных простра́нствия ра́достне дости́гл еси́,/ иде́же зри́ши Пресвяту́ю Тро́ицу,/ дарова́ньми чуде́с обогаща́емь./ Мы же, терпе́нию твоему́ дивя́щеся, си́це вопие́м:/ ра́дуйся, чи́стое Свята́го Ду́ха прия́телище;/ ра́дуйся, земны́й А́нгеле и Небе́сный челове́че;/ ра́дуйся, любве́ ра́ди Христо́вы град оте́чества земна́го оста́вивый/ и в междоре́чии жи́ти изво́ливый;/ ра́дуйся, дре́во доброде́телей, при вода́х насажде́нное;/ ра́дуйся, я́ко плод прине́сл еси́ благоцвету́щ послуша́ния;/ ра́дуйся, я́ко терпе́нием твои́м стра́сти плотски́я умертви́л еси́;/ ра́дуйся, я́ко ору́жием кре́стным мы́сленнаго Амали́ка посе́кл еси́;/ ра́дуйся, сто́лпе, непоколеби́мый жите́йскими ве́тры;/ ра́дуйся, лука́вых духо́в прогони́телю;/ ра́дуйся, я́ко исцеле́ний источа́еши реку́;/ ра́дуйся, я́ко стра́ждущих от бед избавля́еши;/ ра́дуйся, и́ноком исправле́ние;/ ра́дуйся, о́тче Феодо́сие Богому́дре. Песнь 7 Ирмос: Три ю́ноши не опали́ дре́вле возвыша́емый пла́мень,/ неща́дно мя зной к тле́нию положи́./ Но, я́ко о́ныя изба́вил еси́ сия́нием Твои́м,/ пою́щаго с ни́ми спаси́ мя:/ благослове́н еси́, Бо́же оте́ц на́ших. Припев: Преподо́бне о́тче Феодо́сие, моли́ Бо́га о на́с. У Влады́ки Творца́ предстоя́ в Вы́шнем Ца́рствии, Феодо́сие преподо́бне,/ боле́знующую очи́ма исцели́л еси́;/ просвети́ и на́ша серде́чная очеса́ све́том Богоразу́мия/ и научи́ к Нему́ пе́ти:/ благослове́н еси́, Бо́же оте́ц на́ших. Припев: Преподо́бне о́тче Феодо́сие, моли́ Бо́га о на́с. Фарисе́йское киче́ние отве́ргше,/ усе́рдно присту́пим вси ко гро́бу Богому́драго Феодо́сия:/ источа́ет бо нам неоску́дную струю́ исцеле́ний./ О́троку страсть телесе́ и соу́з язы́ка разреши́в,/ да отве́рзет и на́ши устне́ пе́ти Христу́:/ благослове́н еси́, Бо́же оте́ц на́ших. Сла́ва Отцу́ и Сы́ну и Свято́му Ду́ху. Излия́нием чуде́с от Бо́га обогати́лся еси́, о́тче,/ те́мже приходя́щих облегча́еши боле́зни,/ расте́ния утро́бы, и струп ноги́, и кро́ви тече́ние уста́вил еси́./ Утверди́ у́бо и на́ша мы́сли зва́ти Христу́:/ благослове́н еси́, Бо́же оте́ц на́ших. И ны́не и при́сно и во ве́ки веко́в. Ами́нь. Богородичен: Христа́ ро́ждши, Влады́ку и Врача́ вся́ческих, Богоро́дице,/ ра́нами грехо́вными нас, уя́звленных лю́те от душетле́ннаго стрельца́/ и неисце́льно боля́щих, исцели́, Влады́чице, моли́твами Твои́ми/ и пла́стырь приложи́ покая́ния Сы́ну Твоему́ зову́щим:/ благослове́н еси́, Бо́же оте́ц на́ших. Песнь 8 Ирмос: За зако́ны оте́ческая/ блаже́ннии в Вавило́не ю́ноши, предбе́дствующе,/ царю́ющаго оплева́ша повеле́ние безу́мное/ и, совоку́плени и́мже, не свари́шася огне́м,/ Держа́вствующему досто́йную воспева́ху песнь:/ Го́спода по́йте, дела́,/ и превозноси́те во вся ве́ки. Припев: Преподо́бне о́тче Феодо́сие, моли́ Бо́га о на́с. Псало́мски процве́л еси́, я́ко фи́никс, в посте́ и по́двизех,/ и бесо́вския полки́ прогоня́еши, и да́руеши цель бы незави́стно./ Жите́йскими помышле́ньми мой ум мяту́щийся уцелому́дри, да воспою́:/ Го́спода по́йте, дела́, и превозноси́те во вся ве́ки. Припев: Преподо́бне о́тче Феодо́сие, моли́ Бо́га о на́с. Царе́ви всех и Бо́гу предстоя́, о́тче Феодо́сие,/ нам испроси́ одоле́ние на враги́ ви́димыя и неви́димыя/ и дви́жимая сердца́ на́ша утверди́, да в ра́дости душе́вней воспое́м:/ Го́спода по́йте, дела́, и превозноси́те во вся ве́ки. Сла́ва Отцу́ и Сы́ну и Свято́му Ду́ху. Чи́сте зре́ти сподо́бився Пресвяту́ю Тро́ицу,/ до конца́ чи́сто житие́ сохрани́л еси́/ и чистото́ю А́нгелы удиви́л еси́./ Мене́ же, жите́йскими сластьми́ оскверне́ннаго,/ очи́сти моли́твами твои́ми, да воспою́:/ Го́спода по́йте, дела́, и превозноси́те во вся ве́ки. И ны́не и при́сно и во ве́ки веко́в. Ами́нь. Богородичен: О Све́та прия́телище, пресве́тлаго Со́лнца о́блаче, Богора́дованная Влады́чице,/ ле́ствице мы́сленная, Небе́сная врата́, спасе́ния две́ри!/ Бог бо из Твои́х ложе́сн про́йде неизрече́нно,/ Его́же прославля́ем во ве́ки. Песнь 9 Ирмос: Стра́нствия Влады́чня/ и Безсме́ртныя Тра́пезы/на Го́рнем ме́сте высо́кими умы́,/ ве́рнии, прииди́те, наслади́мся,/ возше́дша Сло́ва,/ от Сло́ва научи́вшеся, Его́же велича́ем. Припев: Преподо́бне о́тче Феодо́сие, моли́ Бо́га о на́с. Граждани́н Вы́шний жела́я бы́ти,/ земна́го оте́чества град оста́вил еси́, пресе́льник яви́вся, о́тче Феодо́сие,/ к Го́рним легко́ преше́л еси́, во све́те пра́ведных водворя́яся,/ ду́хом же неотсту́пно с на́ми пребыва́еши,/ сохраня́й у́бо нас, тя воспева́ющих. Припев: Преподо́бне о́тче Феодо́сие, моли́ Бо́га о на́с. Распросте́р преподо́бнии твои́ ру́це,/ принеси́ моле́ние ко Всеще́дрому Бо́гу, о́тче Богому́дре Феодо́сие,/ сохрани́ти град твой невреди́м от ва́рварскаго наше́ствия и междоусо́бныя бра́ни/ и спасти́ нас, тебе́ велича́ющих. Сла́ва Отцу́ и Сы́ну и Свято́му Ду́ху. Глаго́л мои́х недосто́йных гру́бое веща́ние,/ е́же по си́ле принесо́х тебе́, преподо́бне Феодо́сие,/ приими́ и не пре́зри,/ но Творца́ на́шего, Влады́ку и Го́спода, моли́ за мя,/ в день стра́шнаго испыта́ния ми́лость обрести́/ и та́мошняго муче́ния изба́витися. И ны́не и при́сно и во ве́ки веко́в. Ами́нь. Богородичен: Ря́сны златы́ми преукра́шена,/ одесну́ю Царя́ Бо́га предстои́ши, Богоро́дице Де́во,/ моли́ у́бо Сы́на Твоего́ и Влады́ку/ ми́лость обрести́ нам в день после́дняго испыта́ния,/ и стоя́ния сподо́би нас со избра́нными,/ и стра́шнаго муче́ния свободи́, да вси Тебе́ велича́ем. Светилен Умертви́л еси́ до́лу влеку́щая мудрова́ния,/ и, мирска́го пристра́стия удали́вся, я́ко скве́рны,/ процве́л еси́, я́ко фи́никс, дави́дски, о́тче Феодо́сие,/ и Небе́сною сла́вою со А́нгелы обогати́лся еси́ от Бо́га,/ Его́же в пе́снех восхваля́ем. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Честне́йши еси́ всея́ тва́ри, Богоро́дице Де́во, Христа́ ро́ждшая,/ Того́ у́бо моли́ сохрани́тися ста́ду Твоему́ невреди́му/ от вся́каго наве́та сопроти́внаго.

Минея, 13 Августа, Кано́н святителя Глас 8 Песнь 1 Ирмос: Во́ду проше́д, я́ко су́шу,/ и еги́петскаго зла избежа́в,/ Изра́ильтянин вопия́ше:/Изба́вителю и Бо́гу на́шему пои́м. Припев: Святи́телю о́тче Ти́хоне, моли́ Бо́га о на́с. Святи́телю Христо́в Ти́хоне!/ Сам да́руй ми ум и язы́к,/ да воспою́ по достоя́нию сла́ву,/ е́юже сла́вно просла́ви тя Христо́с Госпо́дь. Припев: Святи́телю о́тче Ти́хоне, моли́ Бо́га о на́с. Луча́ Боже́ственнаго све́та возсия́ нам,/ прииди́те, ча́да све́та, да озари́мся е́ю,/ да возгори́мся Ду́хом, пе́сньми святи́теля велича́юще. Сла́ва Отцу́ и Сы́ну и Свято́му Ду́ху. Апо́столов прее́мника, святи́телей сопресто́льника, преподо́бных сожи́теля,/ просла́вим блаже́ннаго Ти́хона,/ его́же предста́тельством спасе́ние улуча́ем. И ны́не и при́сно и во ве́ки веко́в. Ами́нь. Богородичен: Воплоти́вся неизрече́нно Влады́ка всех из Тебе́, Богороди́тельнице Мари́е,/ соверше́н бы́сть челове́к/ и, роди́вся, я́коже пре́жде рождества́, сохрани́ Тя чи́сту,/ Его́же моли́ спасти́ от бед ду́ши на́ша. Песнь 3 Ирмос: Небе́снаго кру́га Верхотво́рче, Го́споди,/ и Це́ркве Зижди́телю,/ Ты мене́ утверди́ в любви́ Твое́й,/ жела́ний кра́ю, ве́рных утвержде́ние,/ Еди́не Человеколю́бче. Припев: Святи́телю о́тче Ти́хоне, моли́ Бо́га о на́с. Любо́вию Христо́вою уязви́вся, блаже́нне,/ тому́ от ю́ности невозвра́тным жела́нием после́довал еси́,/ вся́кое плотско́е наслажде́ние возненави́дев. Припев: Святи́телю о́тче Ти́хоне, моли́ Бо́га о на́с. Ю́ношеския стра́сти, пло́ть томя́щия, любому́дрия мече́м посе́кл еси́,/ же́ртву себе́ Влады́це Христу́ принося́. Сла́ва Отцу́ и Сы́ну и Свято́му Ду́ху. Стра́хом Госпо́дним утвержда́емь, нача́ло бо Прему́дрости сей е́сть,/ любо́вию лу́чшею прилепи́лся еси́ Прему́дрости, о Ти́хоне. И ны́не и при́сно и во ве́ки веко́в. Ами́нь. Богородичен: Воспои́м боже́ственный храм Бо́жий,/ ублажи́м Святу́ю Де́ву, обоже́ни бы́вше Е́ю и от бед избавля́еми. Седален, глас 8 Храм Свята́го Ду́ха от ю́ности был еси́:/ Уте́шителева бо благода́ть, по ве́ре твое́й очи́стивши ду́шу твою́ от страсте́й,/ я́ве в ней вселя́ется,/ сего́ ра́ди и по преставле́нии соблюде́ся те́ло твое́ нетле́нно./ Моли́ Христа́ Бо́га от тлетво́рных страсте́й изба́витися/ чту́щим любо́вию па́мять твою́. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Ма́ти сла́дкаго ми Иису́са, Чи́стая Богоотрокови́це, прия́телище Ду́ха Свята́го,/ очи́сти мою́ ду́шу, беззако́нии оскверне́нную,/ и све́тлое жили́ще доброде́телей соде́лай,/ Светоно́сная Нетле́нная, отжени́ о́блак страсте́й,/ да и мене́ Твои́ми моли́твами осени́т Уте́шителева благода́ть. Песнь 4 Ирмос: Ты моя́ кре́пость, Го́споди,/ Ты моя́ и си́ла,/ Ты мой Бог, Ты мое́ ра́дование,/ не оста́вль не́дра О́тча/ и на́шу нищету́ посети́в./ Тем с проро́ком Авваку́мом зову́ Ти:/ си́ле Твое́й сла́ва, Человеколю́бче. Припев: Святи́телю о́тче Ти́хоне, моли́ Бо́га о на́с. Я́ко овча́, от Христа́ упа́слся еси́,/ я́коже па́стырь, упа́сл еси́ ста́до,/ изводя́ на па́жити живоно́сных твои́х уче́ний. Припев: Святи́телю о́тче Ти́хоне, моли́ Бо́га о на́с. Таи́нник быв Христо́ва уче́ния,/ сего́ ве́дением просвети́л еси́ лю́ди,/ де́лы и словесы́ явля́я и́стину его́. Сла́ва Отцу́ и Сы́ну и Свято́му Ду́ху. И́стинен и ве́рен страж до́му Бо́жия был еси́,/ стреги́й его́ де́лом, я́ко о́браз явля́я житие́м,/ сло́вом, я́ко уча́ усе́рдно,/ помышле́нием, я́ко пеки́йся о бла́зе его́. И ны́не и при́сно и во ве́ки веко́в. Ами́нь. Богородичен: Тя приста́нище, и сте́ну, и прибе́жище, и наде́жду, и покро́в,/ и Предста́тельницу те́плую обре́тше, ве́рнии,/ к Тебе́ прибега́ем и вопие́м приле́жно,/ я́коже научи́ нас взыва́ти к тебе́ блаже́нный Ти́хон:/ Пресвята́я Богоро́дице, спаси́ нас. Песнь 5 Ирмос: Вску́ю мя отри́нул еси́/ от лица́ Твоего́, Све́те Незаходи́мый,/ и покры́ла мя е́сть чужда́я тьма́, окая́ннаго?/ Но обрати́ мя и к све́ту за́поведей Твои́х/ пути́ моя́ напра́ви, молю́ся. Припев: Святи́телю о́тче Ти́хоне, моли́ Бо́га о на́с. Его́же возлюби́л еси́, Его́же возжеле́л еси́,/ Его́же ра́ди подвиза́лся еси́, святи́телю,/ моли́ ны́не Христа́ о рабе́х,/ да, ми́лостив быв, всем нам ми́рное состоя́ние да́рует,/ почита́ющим па́мять твою́. Припев: Святи́телю о́тче Ти́хоне, моли́ Бо́га о на́с. Любо́вию и ве́рою Христо́вою испо́лнен сый,/ яви́лся еси́ я́ко река́, оби́льно всю зе́млю Росси́йскую напоя́я/ сло́вом уче́ния, блаже́нне Ти́хоне. Сла́ва Отцу́ и Сы́ну и Свято́му Ду́ху. Я́ко пчела́ сла́дкий мед от цвето́в, ско́ро увяда́ющих,/ собра́л еси́, о́тче, от тле́ннаго ми́ра духо́вное сокро́вище,/ и́мже всех нас услажда́еши. И ны́не и при́сно и во ве́ки веко́в. Ами́нь. Богородичен: Испо́лни весе́лия се́рдце на́ше, Пречи́стая Богоотрокови́це,/ весе́лия ро́ждшая Вино́внаго,/ грехо́вную печа́ль вся́кую потребля́ющи. Песнь 6 Ирмос: Очи́сти мя, Спа́се,/ мно́га бо беззако́ния моя́,/ и из глубины́ зол возведи́, молю́ся,/ к Тебе́ бо возопи́х, и услы́ши мя,/ Бо́же спасе́ния моего́. Припев: Святи́телю о́тче Ти́хоне, моли́ Бо́га о на́с. Чист быв се́рдцем,/ чи́стому Христу́ прилепи́лся еси́, святы́й Свято́му,/ люби́тель Люби́тельному, кро́ткий Кро́ткому, взыва́я непреста́нно:/ мне прилепля́тися Бо́гови бла́го е́сть. Припев: Святи́телю о́тче Ти́хоне, моли́ Бо́га о на́с. Уте́ху, ро́скошь, че́сть, бога́тство, сла́ву/ и все сокро́вище ми́ра презре́л еси́,/ воспаря́я к Го́рнему Иерусали́му, к до́му Отца́ Небе́снаго,/ иде́же оби́тели мно́ги су́ть. Сла́ва Отцу́ и Сы́ну и Свято́му Ду́ху. Доса́ды, ско́рби, оби́ды ра́достно терпе́л еси́, помышля́я,/ я́ко вене́ц без побе́ды, побе́да без по́двига,/ по́двиг без бра́ни, бра́нь без враго́в не быва́ет. И ны́не и при́сно и во ве́ки веко́в. Ами́нь. Богородичен: О Де́во Госпоже́, Ма́ти Зижди́телева!/ Небе́сных еси́ чино́в ра́дование/ и челове́ческому ро́ду благослове́нная Помо́щнице,/ моли́ спасти́ся душа́м на́шим. Кондак, глас 8 Апо́столов прее́мниче,/ святи́телей украше́ние,/ Правосла́вный Це́ркве учи́телю,/ Влады́це всех моли́ся/ мир вселе́нней дарова́ти/ и душа́м на́шим ве́лию ми́лость. Икос Ду́шу твою́ украси́в доброде́телию,/ ум просвети́в любому́дрием,/ па́стырь до́брый яви́лся еси́ ста́ду Христо́ву,/ сло́вом и писа́нием уча́, наказу́я и вразумля́я,/ житие́м свои́м о́браз слове́с явля́я,/ Те́мже на Небеси́ венце́м сла́вы украси́лся еси́ от Пастыренача́льника Христа́,/ на земли́ сия́я нетле́нием моще́й/ и источа́я оби́льныя то́ки чуде́с ве́рою призыва́ющим тя,/ досточу́дне и Богому́дре Ти́хоне./ Моли́ся ко Го́споду дарова́ти душа́м на́шим ве́лию ми́лость. Песнь 7 Ирмос: Бо́жия снизхожде́ния/ о́гнь устыде́ся в Вавило́не иногда́,/ сего́ ра́ди о́троцы в пещи́, ра́дованною ного́ю,/ я́ко во цве́тнице, лику́юще, поя́ху:/ благослове́н еси́, Бо́же оте́ц на́ших. Припев: Святи́телю о́тче Ти́хоне, моли́ Бо́га о на́с. Терпе́нием стяжа́л еси́ ду́шу твою́, блаже́нне,/ путе́м те́сным, еди́ным веду́щим в жи́знь ве́чную, шел еси́,/ вы́ну взира́я на кре́стный пу́ть подвигополо́жника Христа́/ и сего́ о́браз житию́ твоему́ полага́я. Припев: Святи́телю о́тче Ти́хоне, моли́ Бо́га о на́с. Всего́ себе́ любви́ Бо́жией пре́дал еси́,/ ду́шу и те́ло, се́рдце и ра́зум,/ па́мять и во́лю, наме́рение, начина́ние,/ сло́во, де́ло и помышле́ние Бо́гу в любо́вь посвяти́л еси́. Сла́ва Отцу́ и Сы́ну и Свято́му Ду́ху. Оте́ц сиро́т, и вдов защи́тник, и бога́тство ни́щих,/ боля́щих утеше́ние, и су́щих в бога́тстве наста́вник,/ ста́рости жезл, и наказа́ние ю́ности,/ и мона́шествующим доброде́телей пра́вило яви́лся еси́, блаже́нне Ти́хоне. И ны́не и при́сно и во ве́ки веко́в. Ами́нь. Богородичен: Ра́дуйся, Мари́е, ра́дуйся, Спаси́теля ми́ру ро́ждшая,/ приста́нище бу́ди нам, жите́йскою бу́рею волну́емым,/ и оти́шие в пучи́не скорбе́й,/ и води́тельство к Небе́сным селе́нием. Песнь 8 Ирмос: Седмери́цею пе́щь/ халде́йский мучи́тель/ Богочести́вым неи́стовно разжже́,/ си́лою же лу́чшею спасе́ны, сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки. Припев: Святи́телю о́тче Ти́хоне, моли́ Бо́га о на́с. Ца́рствия Небе́снаго еще́ на земли́ сын быв,/ вы́ну воздыха́л еси́ к Сы́ну Бо́жию, вопия́ Ему́:/ бу́ди ми пи́щи и питие́, бу́ди свет души́ мое́й,/ бу́ди отра́да в ско́рби, бу́ди жи́знь ве́чная по воскресе́нии,/ да превозношу́ Тя во ве́ки. Припев: Святи́телю о́тче Ти́хоне, моли́ Бо́га о на́с. Ада́ма паде́ние, Христо́выми страстьми́ искупле́ние,/ час сме́ртный, Стра́шный Суд, муче́ния гре́шных,/ блаже́нство пра́ведных всегда́ помышля́я, рыда́л еси́,/ нам умиле́ния о́браз показу́я,/ себе́ же предочища́я к бу́дущей сла́ве. Сла́ва Отцу́ и Сы́ну и Свято́му Ду́ху. Труды́ по ве́ре и благоче́стию подъе́м в жи́зни сей,/ сла́дце по труде́х почи́л и упоко́ился еси́:/ соше́л бо еси́ во гроб,/ я́ко пшени́ца, для жи́тницы Бо́жия созре́лая, во вре́мя пожа́тая. И ны́не и при́сно и во ве́ки веко́в. Ами́нь. Богородичен: Иссо́пом Животворя́щия Кро́ве за спасе́ние ми́ра закла́ннаго А́гнца,/ из Твои́х пречи́стых крове́й пло́ть прие́мшаго,/ окропи́ мя, оскверне́ннаго, Влады́чице, и очи́сти мя,/ да Твои́м ма́терним заступле́нием па́че сне́га убелю́ся. Песнь 9 Ирмос: Ужасе́ся о сем Не́бо,/ и земли́ удиви́шася концы́,/ я́ко Бог яви́ся челове́ком пло́тски/ и чре́во Твое́ бы́сть простра́ннейшее Небе́с./ Тем Тя, Богоро́дицу,/ А́нгелов и челове́к чинонача́лия велича́ют. Припев: Святи́телю о́тче Ти́хоне, моли́ Бо́га о на́с. Хода́тай яви́лся еси́ и моли́твенник те́плый о нас к Бо́гу, святи́телю,/ ми́лостива у́бо моли́твами твои́ми соде́лай Влады́ку,/ испроси́, о́тче, прегреше́ний оставле́ние ве́рою свяще́нную па́мять твою́ пра́зднующим/ и серде́чною любо́вию тя велича́ющим. Припев: Святи́телю о́тче Ти́хоне, моли́ Бо́га о на́с. От Бо́га Све́та Небе́сным све́том осия́нный,/ просвети́ нас, помраче́нных страстьми́ жите́йскими,/ реши́ти же и вяза́ти вла́сть от Него́ прие́мый,/ разреши́ прегреше́ния на́ша и Ца́рствия Небе́снаго сподо́би/ па́мять твою́ пра́зднующих и досто́йно тя велича́ющих. Сла́ва Отцу́ и Сы́ну и Свято́му Ду́ху. На́ше хвале́ние сие́, от недосто́йныя и окая́нныя души́,/ от усе́рдия же бога́таго приноси́мое Тебе́, приими́ ми́лостивно, святи́телю,/ благода́ть проти́ву воздая́ нам щедрооби́льную. И ны́не и при́сно и во ве́ки веко́в. Ами́нь. Богородичен: Ада́ма па́дшаго возста́вила еси́, Богома́ти, ро́ждши Но́ваго Ада́ма,/ возста́ви и нас, па́дших по подо́бию дре́вняго,/ но благода́ти Но́ваго зри́ши ве́рующих. Светилен Пло́тию а́ще и почи́л еси́, святи́телю Ти́хоне,/ но Ду́хом жив сый, в Ца́рствии Невече́рнем со Христо́м Ца́рствуеши/ и мо́лишися Ему́ о призыва́ющих тя ве́рою и любо́вию. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. В черто́зе Жениха́ Христа́ помышля́я тя, святи́телю, неизрече́нным све́том сия́юща,/ Ца́рствия Небе́снаго приобщи́тися жела́ю,/ но от сна грехо́внаго объюроде́ мой ум, угасе́ свети́льник, я́ко безъеле́ен,/ и души́ моея́ оскверне́на е́сть оде́жда,/ и ви́жду две́ри Ца́рствия мне заключе́нныя,/ но, твои́ми моли́твами возбуди́в мя от сна грехо́внаго,/ еле́й покая́ния ми да́руй и, ри́зою заслу́г Христо́вых прикры́в мою́ наготу́,/ досто́йна мя сотвори́ Невече́рняго Ца́рствия.

Минея, 25 Октября, Канон святой Глас 4 Песнь 1 Ирмос: Несть Тебе подобен, препрославленный Господи,/ рукою бо крепкою избавил еси люди,/ яже стяжал еси, Человеколюбче. Припев: Свята́я пра́ведная Тави́фо, моли́ Бо́га о на́с. Приспе́ светоносный днесь праздник,/ радости исполняяй вселенную,/ Тавифа от смертнаго сна востает к жизни сей,/ указу́ющи путь ко спасению. Припев: Свята́я пра́ведная Тави́фо, моли́ Бо́га о на́с. Аще, возшед на Небо, и царствует одесную Отца Низложитель смерти и ада,/ но неразлучно пребывает и в Церкви Своей по неложному обещанию,/ ныне ученицу, добродетельми украшенную,/ здравою возставляет посреде́ от мертвых словом апостола,/ верным Своим указуя путь ко спасению. Сла́ва Отцу́ и Сы́ну и Свято́му Ду́ху. Милости источник сый,/ обещавый помиловати благосерда,/ возлюбившую ближния Тавифу блаженную/ в назидание всем воскреси от нетления,/ житием тоя указуя путь ко спасению. И ны́не и при́сно и во ве́ки веко́в. Ами́нь. Богородичен: Яже принесшая во вселенную радость, мир и спасение,/ Дево Всепетая, моли Сына Своего Вседержителя с Тавифою милосердною,/ да помилует люди Своя,/ Сам бо есть верным Своим путь ко спасению. Песнь 3 Ирмос: С высоты снизшел еси волею на землю/ превышше всякаго начала/ и смиренное вознесл еси/ из ада преисподняго естество человеческое;/ несть бо свят, паче Тебе, Человеколюбче. Припев: Свята́я пра́ведная Тави́фо, моли́ Бо́га о на́с. Творец всея твари, обнищав нас ра́ди,/ сниде даже до Креста и погребения,/ но воскресе Боголепно, со славою, возставляя сущия во гробе́х,/ Той и ныне воздви́же Тавифу от мертвых словом верховнаго Апостола,/ темже славно прославися. Припев: Свята́я пра́ведная Тави́фо, моли́ Бо́га о на́с. Исполнив все смотрение, еже о нас,/ посла Неботаи́нники апостолы Своя всем язы́ком,/ возвещати спасение всех земнородных,/ Владыка жизни и смерти рече́нием камене веры воскрешает Тавифу умершую,/ темже славно прославися. Сла́ва Отцу́ и Сы́ну и Свято́му Ду́ху. Искус смертный прие́мшую Тавифу милосердную/ воздвиза́ет от тления Животворя́й вся,/ утверждая веру ученик Своих чудом благовестника,/ в немже славно прославися. И ны́не и при́сно и во ве́ки веко́в. Ами́нь. Богородичен: Вышшую небес и чистшую всея твари,/ явльшую в мир Еммануила,/ Иже спасе́ нас и приусво́и, и соедини с Собою, и воздви́же от смерти вечныя,/ благодарно вси и славно прославим. Седален, глас 3 О, чуда преестественнаго!/ О, величества Божия!/ Воскресением Содетеля жизнь утвердися и смерть низложися./ И Той во апостолех вся чудодействует,/ якоже и ныне зрим востание Тавифы от мертвых словом Петровым. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Божественнаго естества́ не отлу́чся,/ плоть быв во чреве твое́м,/ но Бог вочеловечся и пребысть,/ Иже по рождестве, Матерь, Тя Деву,/ я́ко прежде рождества,/ сохранив Всенепоро́чну Един Господь./ Того прилежно моли дарова́ти нам велию милость. Песнь 4 Ирмос: Сей Бог наш от Девы воплощься/и естество обожив,/ Егоже воспевающе, вопием:/ слава силе Твоей, Господи. Припев: Свята́я пра́ведная Тави́фо, моли́ Бо́га о на́с. Зна́мение всемирнаго воскресения в день оный ныне зрим в Иоппи́и,/ апостол повелевает, и мертвая паки обретает жизнь, назидающи всех в добродетели,/ к нейже, припа́дающе, воззовем:/ Тавифо блаженная, моли спастися всем нам. Припев: Свята́я пра́ведная Тави́фо, моли́ Бо́га о на́с. Силою Воскресшаго Спаса,/ Петровым гласом возбуди́лася еси от сна смертнаго,/ да паки поживе́ши в правде по заповеди Милосерднаго Спаса,/ Егоже моли, Тавифо блаженная, спастися всем нам. Сла́ва Отцу́ и Сы́ну и Свято́му Ду́ху. Таинство смертное токмо коснуся тебе, Тавифо блаженная,/ повеле́ бо Спас глаголом ученика воскре́снути тебе от мертвых,/ да знают вси земнороднии, яко входы и исходы жизни нашея в деснице Вседержителя,/ Егоже моли спастися всем нам. И ны́не и при́сно и во ве́ки веко́в. Ами́нь. Богородичен: Архангел Гавриил благовести́ тебе, Дево, вопияше,/ яко низложи́ Сын Твой смерть и воскресе боголепно,/ подая избавление людем Своим, вопиющим к Тебе усердно:/ Владычице, упование наше, моли спастися всем нам. Песнь 5 Ирмос: Ныне востану, пророчески рече Бог,/ ныне прославлюся, ныне вознесуся,/ падшаго прием от Девы,/ и к свету умному возносяй Моего Божества. Припев: Свята́я пра́ведная Тави́фо, моли́ Бо́га о на́с. Никтоже поставляет под спудом светильник горящий,/ но на свещнице, да светит всем./ Тако и ныне, Тавифо блаженная, Человеколюбец Господь воздвизает тя,/ елеем милости исполненную и светом Христовым сияющую, глаголом первоверховнаго./ Моли Жизнодавца Спаса, да просветит души наша. Припев: Свята́я пра́ведная Тави́фо, моли́ Бо́га о на́с. Имеяй власть судити живым и мертвым/ посылает ученики воскрешати мертвыя во утверждение Евангельскаго благовестия./ Сего ради и Тавифа возбуждается паки от смертнаго сна,/ к нейже припаде́м вопиюще:/ моли Воскресшаго нас ради, да просветит души наша. Сла́ва Отцу́ и Сы́ну и Свято́му Ду́ху. Юже воздви́же от гроба первопрестольник апостолов,/ восхвалим вси песньми достодо́лжными:/ Тавифо блаженная, милости Божия сосуде избра́нный,/ моли Благосердаго Человеколюбца, да просветит души наша. И ны́не и при́сно и во ве́ки веко́в. Ами́нь. Богородичен: Тя величаем, Богородице Дево,/ Ты еси свеще́ умная, явльшая миру Свет неприступный,/ Имже вси озари́хомся в купели Крещения, оба́че помрачи́хомся прегреше́ньми,/ умоли Его, плоть от Тебе Приемшаго, да просветит души наша. Песнь 6 Ирмос: Приидо́х во глубины морския/ и потопила мя есть буря многих грехов,/ но яко Бог из глубины возведи живот мой,/ Многомилостиве. Припев: Свята́я пра́ведная Тави́фо, моли́ Бо́га о на́с. Вся тварь ныне ужаса и радости исполняется,/ ви́дящи смерть низлагаему воскрешением Тавифы человеком, приемшим повеление Богочеловека,/ Низложи́теля ада и смерти, к Немуже воззовем:/ Твой мир даждь нам, Всесильне. Припев: Свята́я пра́ведная Тави́фо, моли́ Бо́га о на́с. О Тавифо блаженная!/ Воставши от мертвых веща́нием гласа апостольскаго,/ егоже Господь посла чудеса совершати во умножение веры,/ воззови, Емуже предстои́ши и Егоже зриши непрестанно по втором твоем успении:/ мир Твой, Всесильне, даруй людем Твоим. Сла́ва Отцу́ и Сы́ну и Свято́му Ду́ху. Егда апостольский глас в слух уха твоего прия́ла еси, блаженная,/ востала еси от смертнаго ложа/ и, поживши благочестно, паки преставилася еси к Горней Славе,/ идеже помолися, Тавифо, Господу всяческих,/ да дарует всем нам мир, яко Всесилен. И ны́не и при́сно и во ве́ки веко́в. Ами́нь. Богородичен: Мати Божия, Радосте наша и Прибежище спасения!/ Обурева́еми есмы прегрешеньми и напа́стьми житейскими, к Тебе припа́даем,/ приносяще сокрушения сердечная, и Тя на помощь призываем:/ мир подаждь мирови Твоими молитвами. Кондак, глас 4 Ужасахуся Иоппи́йстии людие, и дивля́хуся Ангели Божии,/ егда исцеливый Еннея воззва от мертвых серну нарицаемую, милосердием преукрашенную,/ о нейже к нему взываху вдовицы неиму́щыя./ И ныне, Тавифо блаженная, услыши молитвы наша, к тебе приноси́мыя,/ и испроси у всяческих благ Подателя милости и щедроты верным Его,/ да, блажаще тя, вопием ти:/ радуйся, добродетели нас научающая. Икос Ты еси прибежище сирым и вдовицам, Тавифо, рабо Господня./ Сотворила еси блага́я людей, законы Евангельския исполнила еси/ и научила еси человеки не себе жи́ти, но ближнему угождати во благое./ Сего ради насле́дница Царствия Небеснаго явилася еси/ и пребыла́ еси на земли, иму́щи любовь Небесную,/ ейже причастники сотвори молитвою твоею и нас, чтущих тя верно и вопиющих:/ радуйся, добродетели нас научающая. Песнь 7 Ирмос: В начале Безначальное Слово/со Отцем и Духом, Сын Единородный, благословен еси,/ и превозноси́мый, Боже отец наших. Припев: Свята́я пра́ведная Тави́фо, моли́ Бо́га о на́с. Апостольский лик разсе́яся в поднебесней, словом Евангельским вся концы земли́ просвеща́я./ Петр убо воздви́жением Тавифы от мертвых вселенную утверди исповедати воскресение Христа Жизнодавца,/ Егоже превозносим во веки. Припев: Свята́я пра́ведная Тави́фо, моли́ Бо́га о на́с. Воскреснут мертвии, и востанут сущии во гробе́х,/ глаголаше древле пророк, прови́дяй духом попрание ада./ Сие же явле́но бысть и твоим успением и востанием, Тавифо;/ темже и мы, чтуще верно память твою,/ Христа Жизнодавца превозносим во веки. Сла́ва Отцу́ и Сы́ну и Свято́му Ду́ху. Испове́дающи Господа Иисуса усты твоими, блаженная Тавифо,/ сердце твое отдала́ еси Тому́, и заповеди Его потщилася еси исполнити,/ и служила еси де́лы рук твоих неимущым./ Добродетелию же, яко лествицею, взошла еси в чертоги Небесныя./ Мы же, видяще тя сияющую светом Евангельским,/ Христа Жизнодавца поем и превозносим во веки. И ны́не и при́сно и во ве́ки веко́в. Ами́нь. Богородичен: Фома иногда прии́де на гроб Твой, Владычице,/ видев пояс един, уразуме́, яко воскре́сла еси от гроба благодатию и силою Сына Твоего./ Тогда убо апостоли прославиша Господа и Тебе, Заступницу нашу./ Теми убо науче́ни, и мы веруем, яко присно с нами еси неотступна,/ сподоби ны грешныя, не имущыя елея милости,/ предстояти Престолу Христа Жизнодавца, якоже Тавифа, с лики избра́нных,/ да превозносим Его во веки. Песнь 8 Ирмос: Изба́вителю всех, Всесильне,/ посреде́ пламене благоче́ствовавшия,/ снизшед, ороси́л еси/ и научил еси пети:/ вся дела благословите, пойте Господа. Припев: Свята́я пра́ведная Тави́фо, моли́ Бо́га о на́с. Обиталище Духа Всесвятаго явилася еси, досточудная,/ исто́ргла бо еси от сердца твоего вся мудрования греховная,/ наипаче же страх Господень стяжала еси/ и воздвигла еси в души твоей храмину благочестия, Богове́дения же и человеколюбия,/ и ныне, радующися в Небесных чертозех,/ молися о нас, чтущих тя верно. Припев: Свята́я пра́ведная Тави́фо, моли́ Бо́га о на́с. Плод мира и радости о Дусе Святе духовен есть,/ и любы, яже есть союз совершенства,/ долготерпение же с благостию и милосердием./ Иму́щи же вся сия,/ сотворила еси в себе пребывалище благодати Божия, Тавифо достохва́льная,/ и была еси образ добродетели,/ житием твоим благовеству́ющи Евангелие Царствия Небеснаго./ Молися убо о нас, чтущих тя верно. Сла́ва Отцу́ и Сы́ну и Свято́му Ду́ху. Образ и утешения и долготерпения, блаженная Тавифо, явила еси в житии о Господе,/ вся бо дела твоя растворила еси милостию,/ яже излияся от сердца твоего, в немже благодать вселися./ Даждь убо и нам от елея сего, яко да светильницы наши не угаснут,/ чтущим тя верно. И ны́не и при́сно и во ве́ки веко́в. Ами́нь. Богородичен: Еже, Дево, от века та́инство открыся,/ егда в сбытие́ Сове́та Превечнаго благовести Тебе Гавриил рождество Еммануила – Бога Истиннаго и Человека,/ Иже совоскреси́ всех с Собою и обожи́./ Того моли, Преблагословенная Заступнице наша,/ даровати радость вечную чтущим Тя верно. Песнь 9 Ирмос: Сокровенное Божие неизрече́нное/ в Тебе совершается явственное таинство,/ Дево Пречистая,/ ибо Бог из Тебе воплотися за милосердие./ Темже тя яко Богородицу величаем. Припев: Свята́я пра́ведная Тави́фо, моли́ Бо́га о на́с. Милость, о Тавифо, возлюбила еси по слову Господню/ и принесла еси Ему в жертву чи́сту сердце твое, блаженная,/ еже очистила еси огне́м любве Божественныя,/ и, взирающи на люди, разумела еси в тех образ Божий/ и творила еси им такожде, якоже запове́да Спас мира./ Даждь убо и нам от любве твоея и моли, Егоже возлюбила еси,/ даровати нам жизнь безконечную. Припев: Свята́я пра́ведная Тави́фо, моли́ Бо́га о на́с. Веселятся концы земли и радуется Иоппи́я, ныне свершаемо зря́ще чудо преславное,/ яко воста́ от гроба жена блаженная и праведная сущи,/ ученица Поправшаго силу смерти и врата ада,/ Того убо моли, Тавифо, о всех нас. Сла́ва Отцу́ и Сы́ну и Свято́му Ду́ху. Славословие и песни, Тавифо блаженная, приносим Единому Источнику безсмертия,/ воскресившему тя Апостола Своего рече́нием и веру утвердившему/ и научившему нас, како вни́ти в Его чертоги Небесныя стезе́ю милости, еюже востекла́ еси./ О сем, радости испо́лнени,/ приносим Ему песни усердныя и молитвы:/ светом Твоим просвети всех нас. И ны́не и при́сно и во ве́ки веко́в. Ами́нь. Богородичен: И Небесная и земна́я поют Тебе, Богомати, гласы хваления,/ яко Тобою Бога позна́хом и обрето́хом жизнь вечную:/ Твой бо Сын Божественный узы смертныя разори́ Своею смертию и воскресением./ Темже востание Тавифы от смертнаго сна гласом первоверховнаго апостола почитающе, молим Тя, Владычице:/ мир Церкви и миру Твоему, Богородице, даруй,/ утоли́ церковныя собла́зны и постави ны с лики избра́нных Твоих. Светилен Свет, из гроба Воплотившагося Превечнаго Слова возсиявый,/ озари́ всю вселенную блиста́ньми воскресения, имже попрася смерть./ Апостол же, нося́й сияние сего Света живоноснаго, воззва от мертвых Тавифу во Иоппи́и,/ утвердив исповедание Воскресшаго,/ Емуже взываем:/ просвети нас Твоею истиною. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Троице Трисия́нная,/ света Твоего зарями просвети омраченныя прегрешеньми/ и воздвигни до́лу поверженныя и земли преклоньшияся,/ да не у́мрем во веки, но востанем от греховнаго тления, якоже Тавифа от гроба,/ вси бо аще и согрешаем, но несумне́нно православно исповедаем Отца и Сына и Духа Святаго.

Глас 2 Пе́снь 1. Ирмо́с: Гряди́те, лю́дие, пои́м пе́снь Христу́ Бо́гу, разде́льшему мо́ре и наста́вльшему лю́ди, я́же изведе́ из рабо́ты Еги́петския, я́ко просла́вися. Припев: Преподо́бне о́тче Пéтре, моли́ Бо́га о на́с. Друга́го тя́ на́м Петра́ предлага́ет Це́рковь дне́сь, просвеща́юща на́ша мы́сли па́мятию твое́ю боже́ственною, о́тче пребога́те. Ка́ла страсте́й очи́щ о́чи у́мныя, преподо́бне, я́сно ви́дел еси́ безме́рную добро́ту Христа́ Царя́, тя́ просла́вльшаго. Просия́в тебе́, Трисо́лнечнаго Божества́, преблаже́нне, невече́рний све́т, соде́ла тя́ чи́сто прия́телище боже́ственных дарова́ний, о́тче богому́дре. Богоро́дичен: И́же на́с ра́ди из Тебе́, Де́во, в челове́ка премно́гою бла́гостию обо́лкся, преподо́бных собо́ры Того́ возлю́бльших препросла́влен е́сть. Пе́снь 3. Ирмо́с: Утверди́ на́с в Тебе́, Го́споди, дре́вом умерщве́й гре́х, стра́х Тво́й всади́ в сердца́ на́с, пою́щих Тя́. Умертви́в я́же на земли́ у́ды, преподо́бне, поуче́нии оживи́л еси́ ду́шу боже́ственными и получи́л еси́ ве́чную жи́знь и све́тлость. Совокупи́лся еси́, я́ко до́бре пожи́в, с вы́шними, преблаже́нне, ликостоя́нии, в безмо́лвии пребыва́я и на добро́ту боже́ственную взира́я. В гора́х я́ве скрыва́емь, челове́к совокупле́ния удали́лся еси́ и у́м ве́сь впери́л еси́ к небе́сней добро́те, веселя́ся. Богоро́дичен: Пала́ту красну́ неизрече́ннаго бога́тства, Де́во, зна́юще, по до́лгу Тя́ сла́вим, спа́сшиися Рождество́м Твои́м, Всенепоро́чная. Седа́лен, гла́с 1. Погре́бл еси́ страсте́й всевоста́ние умерщвле́нием пло́ти, свяще́нный о́тче, и жи́знь безконе́чную по сме́рти прия́л еси́. Те́мже дне́сь Христо́ва Це́рковь пра́зднует твою́ досточу́дную па́мять, преподо́бных украше́ние. Богоро́дичен: Наста́ви на́с на пу́ть покая́ния, укло́ншияся при́сно к безпу́тием зо́л и Преблага́го прогне́вавшия Го́спода, Неискусобра́чная благослове́нная Мари́е, прибе́жище отча́янных челове́ков, Бо́жие жили́ще. Крестобогоро́дичен: Зря́щи Тя́, Христе́, Всенепоро́чная Ма́ти ме́ртва, на Кресте́ просте́рта, вопия́ше: Сы́не Мо́й, собезнача́льне Отцу́ и Ду́ху, что́ неизрече́нное Твое́ сие́ смотре́ние, и́мже спа́сл еси́ пречи́стых ру́к Твои́х, Ще́дре, созда́ние? Пе́снь 4. Ирмо́с: Прише́л еси́ от Де́вы не хода́тай, ни а́нгел, но Са́м Го́споди вопло́щся, и спа́сл еси́ всего́ мя челове́ка; те́м зову́ ти: сла́ва си́ле Твое́й, Го́споди. В гора́х и пеще́рах, му́дре, быва́я, боже́ственное восхожде́ние в се́рдцы поло́жь, вся́ изсуши́л еси́ страсте́й то́ки Боже́ственною благода́тию. Стреля́ния де́монов, и стре́л, и ловле́ния до конца́ отбе́гл еси́, щито́м ве́ры, преподо́бне, покрыва́емь. Пове́ржена при ногу́ твое́ю льсти́ваго зми́я и сме́х ви́дяще, су́рово свире́пеющагося, Пе́тре всесла́вне, вели́чие Го́сподеви возсыла́ем. Богоро́дичен: Госпо́дь, из Тебе́ роди́вся, Госпоже́ Всенепоро́чная, облада́юща врага́ ми́ром изба́ви вся́, преподо́бныя же, я́ко возлю́бльшия Сего́, возвели́чи. Пе́снь 5. Ирмо́с: Све́та Пода́телю и веко́в Тво́рче, Го́споди, во све́те Твои́х повеле́ний наста́ви на́с: ра́зве бо Тебе́, ино́го Бо́га не зна́ем. На го́ры честны́х за́поведей восте́к, я́коже Моисе́й, преподо́бне, ви́дел еси́ Бо́га я́ве, я́коже вмеща́л еси́, и, все́ми просве́щся душе́вными чу́вствы, вельми́ просла́вился еси́. Манове́нии боже́ственными при́сно удобря́емь, му́дре, пребы́л еси́ стра́сти вся́кия неприча́стен, Пе́тре, и безстра́стием, я́ко оде́ждею, обле́клся еси́, преподо́бне. Ле́ты мно́гими сокрыва́емо те́ло твое́ в просвеще́ние на́ше яви́ся, источа́я ре́ки на́м исцеле́ний и ми́ро благода́ти. Богоро́дичен: Свяще́нными гла́сы Тя́, добро́ту Иа́ковлю, пое́м, пло́тски ро́ждшую ми́рови Све́т, И́же от Све́та, просвеща́ющь преподо́бных собо́р. Пе́снь 6. Ирмо́с: В бе́здне грехо́вней валя́яся, неизсле́дную милосе́рдия Твоего́ призыва́ю бе́здну: от тли́, Бо́же, мя́ возведи́. Утве́рждся кре́постию Ду́ха, всю́ вра́жию кре́пость смири́л еси́ и, победи́тель бы́в, ко Христу́ венцено́сец восте́кл еси́. Стопа́м после́дуя бы́л еси́, преподо́бне, Петру́ верхо́вному, ка́меню ве́ры, его́же и зва́ние име́л еси́ и ве́рою бога́тно обогати́лся еси́. По́двигом боже́ственным подвиза́лся еси́, о́тче, и ве́ру подо́бно соблю́л еси́, про́чее тебе́ предлежи́т до́браго де́лания вене́ц. Богоро́дичен: Во утро́бу Твою́ всели́ся, и все́ челове́ческое существо́ обожи́, и преподо́бных, Чи́стая, мно́жество свяще́нно привлече́. Конда́к, гла́с 2. Удали́в себе́ челове́ческаго сожи́тельства, в пеще́рах ка́менных и разсе́линах пожи́л еси́, жела́нием боже́ственным и любо́вию, Пе́тре, Го́спода твоего́, от Него́же вене́ц прия́л еси́. Моли́ непреста́нно спасти́ся на́м. И́кос: Мирски́х мо́лв избе́г и бу́ри жите́йския, я́ко бе́гательны и уко́рны, непроходи́мая места́ дости́гл еси́ и осо́бь, я́коже пти́ца, еди́н ле́та мно́га пожи́л еси́, в пеще́рах и про́пастех, и разсе́линах кры́яся, ко Го́споду взира́я и Того́ исполня́я повеле́ния; от Него́же прия́т благода́ть, преподо́бне, я́ко со́лнце, о́тче, возсия́л еси́, моля́ непреста́нно о все́х на́с. Пе́снь 7. Ирмо́с: Те́лу злато́му прему́дрыя де́ти не послужи́ша, и в пла́мень са́ми поидо́ша, и бо́ги и́х обруга́ша, среди́ пла́мене возопи́ша и ороси́ я́ а́нгел: услы́шася уже́ у́ст ва́ших моли́тва. Тве́рдым по́мыслом на ра́мо кре́ст взе́м, Распе́ншемуся после́довал еси́, я́ко мона́х освяще́н, опаля́я, я́ко хвра́стие, стра́сти и вопия́, преблаже́нне: благослове́н еси́, Го́споди, Бо́же оте́ц на́ших. Тя́, ле́ты мно́гими сокрове́на, я́ко сокро́вище, явля́ет та́йно Боже́ственное Сло́во, Пе́тре преподо́бне, в явле́нно снабде́ние все́м, вта́йне стяжа́вшим грехо́вныя скве́рны, явле́нна тя́ моли́твенника, ка́ющимся я́сно. Благово́нно Христу́ обе́том доброде́телей яви́ся кажде́ние, ми́ро излива́емо благово́нно от честны́х моще́й твои́х все́м зря́щим во удивле́ние излива́я: с пло́тию бо а́нгельское житие́ пожи́л еси́. Богоро́дичен: Красну́ обре́т и добру́ в жена́х Тя́, Пресвята́я, прекра́сное Сло́во всели́ся в пресвято́е чре́во Твое́, вся́ ли́ки преподо́бных осве́щь, зову́щия: благослове́н еси́, Го́споди, Бо́же оте́ц на́ших. Пе́снь 8. Ирмо́с: В пе́щь о́гненную ко отроко́м евре́йским снизше́дшаго и пла́мень в ро́су прело́жшаго Бо́га, по́йте дела́ я́ко Го́спода, и превозноси́те во вся́ ве́ки. Блаже́нства боже́ственнаго сподо́бился еси́ вои́стинну, Пе́тре богому́дре, во́лею обнища́в и всегда́, му́дре, пла́кав, и, кро́ток бы́в, насле́дил еси́ зе́млю кро́тких. Бо́др име́я по́мысл, успи́л еси́ страсте́й воста́ния и, усну́в, со́н до́лжный ны́не пра́ведным, все́м, пребога́те, неусыпа́ющь яви́лся еси́, тя́ чту́щим моли́твенник. Зимо́ю и ва́ром, му́дре, победи́в зи́му де́монскую, духо́вною теплото́ю потребля́еши я́ве и стра́сти умерщвля́еши теле́сныя, безстра́стия облиста́я сия́нием. В горе́ Афо́нстей всели́лся еси́, я́коже на Карми́льстей иногда́, Пе́тре богому́дре, Фесви́тянин Илия́, в безмо́лвии Бо́га усе́рдно ища́й, досточу́дне, и Сего́ зре́ния, я́ко преподо́бен, сподо́бился еси́. Богоро́дичен: Уны́л име́я по́мысл и ду́шу, сластьми́ отягче́ну, к Тебе́ прибега́я, Богороди́тельнице Чи́стая, вопию́ Ти: воздви́гни и спаси́ мя, отча́яннаго и осужде́ннаго. Пе́снь 9. Ирмо́с: От Бо́га Бо́га Сло́ва, неизрече́нною му́дростию прише́дшаго обнови́ти Ада́ма, я́дию в тле́ние па́дшаго лю́те, от Святы́я Де́вы неизрече́нно воплоти́вшагося на́с ра́ди, ве́рнии, единому́дренно пе́сньми велича́ем. Кре́постию и держа́вою Христо́с Бо́г тя́ препоя́сав, укрепи́ победи́ти хи́трости де́монския, пребога́те, я́ко возлю́бльша Сего́ от всего́ се́рдца и души́. Сего́ ра́ди тя́ ве́рою ублажа́ем и любо́вию. Яви́лся еси́ в дому́ Госпо́дни, я́ко ма́слина, богому́дре, еле́ем по́тов твои́х на́ша умаща́я ли́ца, творя́щих тво́й се́й сла́вный и боже́ственный пра́здник, мона́хов украше́ние, преподо́бных верхо́вник. Твое́ пресла́вное, источи́вшее, всесла́вный Пе́тре, те́ло благово́нно и красно́ ми́ро, ве́рныя благово́ния испо́лни, благово́ние бо Бо́гу и жи́в, и по кончи́не я́ве показа́лся еси́. Те́мже тя́ досто́йно ублажа́ем. Освяще́нный Го́споду Бо́гу на́шему сосу́де, му́чеником, и апо́столом, и а́нгелом собесе́дниче, о все́х моли́, ве́рою тя́ чту́щих на земли́, да обря́щем вси́ согреше́ний оставле́ние. Богоро́дичен: Пощади́ мя, Го́споди, пощади́, егда́ хо́щеши ми́ суди́ти, и не осуди́ мене́ во о́гнь, ниже́ я́ростию обличи́ши мене́, мо́лит Тя́ Де́ва, Тебе́ ро́ждшая, Христе́, и а́нгельстии собо́ри, и преподо́бных совокупле́ния. Свети́лен. Петру́ тезоимени́таго верхо́вному вси́, по́стников похвалу́ и преподо́бных сла́ву, столпа́ небе́снаго, цве́та афо́нскаго велегла́сно пе́сньми почти́м по до́лгу, я́ко моли́твенника на́м все́м. Богоро́дичен: Богоро́дицу Тя́ вои́стинну испове́дуем, Влады́чице, Тебе́ ра́ди спа́сшиися, и́бо Бо́га неизрече́нно родила́ еси́, разру́шшаго кресто́м сме́рть и к Себе́ привле́кша преподо́бных собо́ры, с ни́миже Тя́ восхваля́ем, Де́во.