Молитвы

За молитв святых отец наших, Господи Исусе Христе, Сыне Божии, помилуй нас. Аминь. Трисвятое. И по Отче наш… Молитва Исусова. Аминь. Господи помилуй, 12. Слава, и ныне. Приидите, поклонимся… (трижды с поклонами). Псалом 19 Услышит тя Господь в день печали, защитит тя имя Бога Ияковля. Послет ти помощь от Святаго, и от Сиона заступит тя. Помянет всяку жертву твою, и вся сожжения твоя тучна буди. Даст ти Господь по сердцу твоему, и весь совет твой исполнит. Возрадуемся о спасении твоем, и во имя Господа Бога нашего возвеличимся. Исполнит Господь вся прошения твоя, ныне познах, яко спасл есть Господь христа Своего. Услышит его с Небесе святаго Своего, в силах спасение десница Его. Сии на колесницах и сии на конех, мы же во имя Господа Бога нашего призовем. Тии спяти быша и падоша, мы же востахом и исправихомся. Господи, спаси царя и услыши ны, вонь же день аще призовем Тя. Псалом 20 Господи, силою Твоею возвеселится царь, и о спасении Твоем возрадуется зело. Желание сердца его дал еси ему, и хотения устну его неси лишил его. Яко предварил еси его благословением благостынным, положил еси на главе его венец от камене честна. Живота просил есть у Тебе, и дал еси ему долготу дний, в век века. Велия слава его спасением Твоим, славу и велелепие возложиши нань. Яко даси ему благословение в век века, возвеселиши его радостию с лицем Твоим. Яко царь уповает на Господа, и милостию Вышняго не подвижится. Обрящется рука Твоя всем врагом Твоим, десница Твоя обрящет вся ненавидящия Тебе. Яко положиши их яко пещь огненую во время лица Твоего, Господь гневом Своим смутит я, и снесть их огнь. Плод их от земли погубиши, и семя их от сынов человеческих. Яко уклониша на Тя злая, помыслиша советы, их же не возмогоша составити. Яко положиши я хребет во избытцех Своих, уготоваеши лице их. Вознесися, Господи, силою Твоею, воспоем и поем силы Твоя. Слава, и ныне. Трисвятое. И по Отче наш… Тропари сия, глас 1. Спаси Господи, люди Своя и благослови достояние Свое, победы державе Российстей на сопротивныя даруй, и Своя сохраняя Крестом люди. Слава: Вознесыися на Крест волею, тезоименитому ныне граду Твоему, щедроты Твоя даруй, Христе Боже. Возвесели силою Своею державу Российскую, победы дая ей на сопостаты, пособие имущу Твое оружие, миру непобедимую победу. И ныне: Предстательнице страшная и непостыдная, не презри Благая молитв наших. Всепетая Богородице, утверди православных житие и спаси державу Российскую, подай же ей небесную победу Богом, Его же родила еси, едина Благословенная. Господи помилуй 12. Слава Отцу и Сыну и Святому Духу, и ныне, и присно, и во веки веком. Аминь. Слава в вышних Богу, и на земли мир, в человецех благоволение (трижды без поклонов). Таже: Господи, устне мои отверзеши и уста моя возвестят хвалу Твою (дважды). И глаголет екса псалмы, легко, с тихостию и со всяким вниманием и страхом Божиим, яко к самому Богу беседуя невидимо, и о своих гресех умоляя Его. Братия же стоят руце имуше согбени к персем, главы же мало преклонены. Псалом 3 Господи, чтося умножиша стужающии ми, мнози востают на мя. Мнози глаголют души моей: несть спасения ему о Бозе его. Ты же Господи, заступник мой еси, слава моя, и вознося главу мою. Гласом моим ко Господу возвах, и услыша мя от горы святыя Своея, Аз уснух и спах; востах, яко Господь заступит мя. Не убоюся от тем людей, окрест нападающих на мя. Воскресни Господи, спаси мя, Боже мой. Яко Ты порази вся враждующия ми всуе, зубы грешником сокрушил еси. Господне есть спасение, и на людех Твоих благословение Твое. Аз уснух и спах; востах, яко Господь заступит мя. Псалом 37 Господи, не яростию Твоею обличи мене, ни гневом Твоим покажи мене. Яко стрелы Твоя унзоша ми, и утвердил еси на мне руку Твою. Несть исцеления в плоти моей, от лица гнева Твоего; несть мира в костех моих, от лица грех моих. Яко беззакония моя превзыдоша главу мою, яко бремя тяжко отяготеша на мне, возсмердеша и согнишася раны моя, от лица безумия моего. Пострадах и смирихся до конца, весь день сетуя хождах. Яко лядвия моя наполнишася поругании, и несть исцеления в плоти моей. Озлоблен бых и смирихся до зела, рыках от воздыхания сердца моего. Господи, пред Тобою все желание мое, и воздыхание мое от Тебе не утаися. Сердце мое смутися, остави мя сила моя, и свет очию моею, и той несть со мною. Друзи мои, и искрении мои, прямо мне приближишася, и сташа. И ближнии мои отдалече мене сташа, и нуждахуся, ищущии душу мою, и ищущии злая мне: глаголаху суетная и льстивная, весь день поучахуся. Аз же яко глух: не слышах; и яко нем: не отверзая уст своих. И бых яко человек не слыша, и не имыи во устех своих обличения. Яко на Тя Господи, уповах, Ты услышиши, Господи Боже мой. Яко рех: да некогда порадуютмися врази мои, и внегда подвижатися ногам моим, на мя велеречеваша. Яко аз на раны готов, и болезнь моя предо мною есть выну. Яко беззаконие мое аз возвещу, и попекуся о гресе моем. Врази же мои живут, и укрепишася паче мене, и умножишася ненавидящии мя без правды. Воздающии ми зла возблагая, оболгаху мя: зане гонях благостыню. Не остави мене Господи Боже мой, не отступи от мене. Воньми в помощь мою, Господи спасения моего. Не остави мене, Господи Боже мои, не отступи от мене. Воньми в помощь мою, Господи спасения моего. Не остави мене, Господи Боже мои, не отступи от мене. Воньми в помощь мою, Господи спасения моего. Псалом 62 Боже, Боже мой, к Тебе утренюю, возжада Тебе душа моя, коль множицею Тебе плоть моя, в земли пусте и непроходне и безводне. Тако во святем явихся Тебе, видети силу Твою и славу Твою. Яко лучши милость Твоя паче живот, устне мои похвалите Тя. Тако благословлю Тя в животе моем, о имени Твоем воздежу руце мои. Яко от тука и масти исполнися душа моя, и устне радости восхвалят Тя уста моя. аще поминах Тя на постели моей, на утрених поучахся в Тя. Яко бысть Помощник мой, и в крове крилу Твоею возрадуюся. Прильпе душа моя по Тебе, мене же прият десница Твоя. Тии же всуе искаша душу мою, внидут в преисподняя земли. Предадятся в руки оружию, части лисовом будут. Царь же возвеселится о Бозе, похвалится всяк кленыися Им. Яко заградишася уста глаголющих неправду. На утрених поучахся в Тя. Яко бысть Помощник мой, и в крове крилу Твоею возрадуюся. Прильпе душа моя по Тебе, мене же прият десница Твоя. Слава, и ныне. Аллилуия, Аллилуия, слава Тебе, Боже (трижды, без поклонов). Господи помилуй (трижды). Слава, и ныне. Псалом 87 Господи Боже спасения моего, во дни возвах и в нощи пред Тобою. Да внидет пред Тя молитва моя, приклони ухо Твое к молению моему. Яко исполнися зол душа моя, и живот мой аду приближися. Привменен бых с низходящими в ров, бых яко человек без помощи в мертвых свободь. Яко язвении спящии во гробех, их же не помянул еси к тому и тии от руки Твоея отриновени быша. Положиша мя в рове преисподнем, в темных и сени смертней. На мне утвердися ярость Твоя, и вся волны Твоя наведе на мя. Удалил еси знаемых моих от мене, положиша мя мерзость себе, предан бых и не исхождах. Очи мои изнемогосте от нищеты. Возвах к Тебе Господи, весь день, воздех к Тебе руце мои. Еда мертвыми твориши чудеса? ли врачеве воскресят и исповедятся Тебе? Еда повесть кто во гробе милость Твою, и истину Твою в погибели? Еда познана будут во тме чудеса Твоя, и правда Твоя в земли забвенней? Аз к Тебе Господи, возвах и утро молитва моя предварит Тя. Вскую Господи, отрееши душу мою? отвращаеши лице Свое от мене. Нищь есмь аз, и в трудех от юности моея, вознес же смирихся и изнемогох. На мне преидоша гневи Твои, устрашения Твоя возмутиша мя. Обыдоша мя яко вода, весь день одержаша мя вкупе. Удалил еси от мене друга и искреняго, и знаемых моих от страстей. Господи Боже спасения моего, во дни возвах и в нощи пред Тобою. Да внидет пред Тя молитва моя, приклони ухо Твое к молению моему. Псалом 102 Благослови, душе моя, Господа, и вся внутреняя моя имя святое Его. Благослови, душе моя, Господа, и не забывай всех воздаянии Его. Очищающаго вся беззакония твоя, исцеляющаго вся недуги твоя. Избавляющаго от истления живот твой, венчающаго тя милостию и щедротами. Исполняющаго во благих желание твое, обновится яко орлу юность твоя. Творяи милостыню Господь, и судьбу всем обидимым. Сказа пути Своя Моисеови, сыновом израилевым хотения Своя. Щедр и милостив Господь, долготерпелив, и многомилостив. Не до конца прогневается, ни в век враждует. Не по беззаконием нашим сотворил есть нам, ни по грехом нашим воздал есть нам. Яко по высоте небесней от земли, утвердил есть Господь милость Свою на боящихся Его. Елико отстоят востоцы от запад, удалил есть от нас беззакония наша. Яко же щедрит отец сыны, ущедрит Господь боящихся Его. Яко Той позна создание наше, помяну яко персть есмы. Человек, яко трава, дние его, яко цвет сельныи, тако оцветет. Яко дух пройдет в нем и не будет, и не познает к тому места своего. Милость же Господня от века и до века, на боящихся Его. И правда Его на сынех сынов, хранящих завет Его, и помнящих заповеди Его творити я. Господь на небеси уготова престол Свой, и царство Его всеми обладает. Благословите Господа вси ангели Его, сильнии крепостию творящии слово Его, услышати глас словес Его. Благословите Господа вся силы Его, слуги Его, творящии волю Его. Благословите Господа вся дела Его, на всяком месте владычества Его, благослови, душе моя Господа. На всяком месте владычествия Его, благослови душе моя Господа. Псалом 142 Господи, услыши молитву мою, внуши моление мое воистине Твоей, услыши мя в правде Твоей. И не вниди в суд с рабом Твоим, яко не оправдится пред Тобою всяк живыи. Яко погна враг душу мою, и смирил есть в земли живот мой. Посадил мя есть в темных, яко мертвыя веку и уны во мне дух мой, во Мне смутися сердце мое. Помянух дни древния, поучихся во всех делех Твоих, и в делех руку Твоею поучахся, воздех к Тебе руце мои, душа моя, яко земля безводная Тебе. Скоро услыши мя Господи, исчезе дух мой. Не отврати лица Твоего от мене, и уподоблюся низходящим в ров. Слышану сотвори мне заутра милость Твою, яко на Тя уповах. Скажи мне Господи, путь, воньже пойду, яко к Тебе взях душу мою. Изми мя от враг моих, Господи, к Тебе прибегох. Научи мя творити волю Твою, яко Ты еси Бог мой. Дух Твой благии наставит мя на землю праву. Имене Твоего ради Господи, живиши мя, правдою Твоею изведеши от печали душу мою. И милостию Твоею потребиши враги моя, и погубиши вся стужающия души моей, яко аз раб Твой есмь. Услыши мя в правде Твоей Господи, услыши, и не вниди в суд с рабом Твоим. Дух Твой Благии наставит мя на землю праву. Слава, и ныне. Аллилуия, Аллилуия, слава Тебе, Боже (трижды, с поклонами). Господи помилуй 12. Слава, и ныне. Таже, Бог Господь и явися нам, благословен грядыи во имя Господне. Стих 1. Исповедайтеся Господеви, яко благ, яко в век милость Его. Стих 2. Обышедше обыдоша мя, и именем Господним противляхся им. Стих 3. Не умру, но жив буду, и повем дела Господня. Стих 4. Камень, Его же небрегоша зиждущии, Сей бысть во главу углу, от Господа бысть Сей, и есть дивна во очию нашею. Таже тропарь дню, или святому, или празднику. Аще ли пост, поется Аллилуия, на глас октая. Стихи же глаголем: Стих 1. От нощи утренюет дух мой к Тебе, Боже. Стих 2. Правде научитеся живущии на земли. Стих 3. Господи Боже наш, мир даждь нам, вся бо воздал еси нам. Стих 4. Тако быхом возлюбленному Твоему. Таже троичны во октаи, и обычная стихология, и седальны, и прочая по уставу. Таже, псалом 50 Помилуй мя Боже… Посем песни пророческия и каноны. На 9 песни канона поем песнь Пресвятей Богородице (от Луки, зачало 4): Величит душа моя Господа, и возрадовася дух мой о Бозе Спасе моем (правый лик). И по коемждо стисе припеваем: Честнейшую херувим, и славнейшую воистину серафим, без истления Бога Слова рождьшую, сущую Богородицу Тя величаем. И поклон до земли. Аще ли неделя, или празднество, поклоны творим малыя, токмо последнии поклон земныи. Яко призре на смирение Рабы Своея, се бо от ныне блажат Мя вси роди (левый лик). Яко сотвори мне величие Сильныи, и свято имя Его, и милость Его в род и род на боящихся Его (правый лик). Сотвори державу мышцею Своею, расточи гордыя мысли сердца их (левый лик). Низложи сильныя со престол и вознесе смиренныя, алчущия исполни благ, и богатящияся отпусти тща (правый лик). Восприят Израиля отрока Своего, помянути милости, якоже глагола ко отцем нашим, Аврааму и семени его до века (левыи лик). Таже, песнь 9-я канонов. По 9-й песни оба лика совокупльшеся поем: Достойно есть… и творим поклон вси вкупе до земли. Таже, ектения малая. Аще ли неделя; поем на глас октая: Свят Господь Бог наш (трижды), таже светилен. Посем, псалом 148 Хвалите Господа с небес, хвалите Его в вышних. Хвалите Его вси ангели Его. Хвалите Его вся силы Его. Хвалите Его солнце и луна, хвалите Его вся звезды и свет. Хвалите Его небеса небес и вода яже превыше небес, да восхвалят имя Господне. Яко Той рече, и быша; Той повеле, и создашася. Постави я в век и в век века. Повеление положи, и не мимо идет. Хвалите Господа от земли, змиеве и вся бездны. Огнь, град, снег, голоть, дух бурен, творящая слово Его. Горы и вси холми, древа плодоносна и вси кедри. Зверие и вси скоти, гади и птицы пернаты. Царие земстии и вси людие, князи и вси судии земстии. Юноши и девы, старцы с юнотами, да восхвалят имя Господне. Яко вознесеся имя Того единаго. Исповедание Его на земли и на небеси, и вознесет рог людей Своих. Песнь всем преподобным Его, сыновом израилевом, людем приближающимся Ему. Псалом 149 Воспойте Господеви песнь нову, хваления Его в церкви преподобных. Да возвеселится Израиль о сотворшем Его, и сынове Сиони возрадуются о Цари своем. Да восхвалят имя Его в лице, в тимпане и псалтыри да поют Ему. Яко благоволит Господь в людех Своих, и вознесет кроткия во спасение. Восхвалятся преподобнии во славе, и возрадуются на ложах своих. Возношения Божия в гортани их, и мечи обоюду остры в руках их. Сотворити отмщение во языцех, обличение в людех. Связати царя их путы, и славныя их ручными оковы железными. Сотворити в них суд написан, слава си есть всем преподобным Его. Псалом 150 Хвалите Бога во святых Его, хвалите Его во утвержении сил Его. Хвалите Его на силах Его, хвалите Его по премногому величествию Его. Хвалите Его во гласе трубнем, хвалите Его во псалтыри и гуслех. Хвалите Его в тимпане и лице, хвалите Его во струнах и органех. Хвалите Его в кимвалех доброгласных, хвалите Его в кимвалех восклицания. Всяко дыхание да хвалит Господа. Таже, стихеры хвалитныя, и Слава, и И ныне по уставу. Посем глаголем: Слава показавшему нам свет… и прочая. Аще ли на хвалитех стихер нет и мы глаголем: Тебе слава подобает, Господи Боже наш, и Тебе славу возсылаем, Отцу и Сыну и Святому Духу, и ныне и присно и во веки веком, аминь. Слава показавшему нам свет. Слава в вышних Богу, и на земли мир, в человецех благоволение. Хвалим Тя, благословим Тя (поклон), кланяемтися, славословим Тя (поклон), благодарим Тя великия ради славы Твоея (поклон). Господи Царю небесныи, Боже Отче Вседержителю, и Господи Сыне Единородныи Исусе Христе, и Святыи Душе: Господи Боже, Агньче Божии, Сыне Отечь, вземляи грехи мира, помилуй нас. Вземляи грехи мира, приими молитвы наша. Седяи одесную Отца, помилуй нас. Яко Ты един свят, Ты един Господь Исус Христос, в славу Богу Отцу, аминь. На всяку нощь благословлю Тя, и восхвалю имя Твое во веки, и в век века. Господи, Прибежище бысть нам, в род и род. Аз рех: Господи, помилуи мя и исцели душу мою, яко согреших Тебе. Господи, к Тебе прибегох, научи мя творити волю Твою, яко Ты еси Бог мой, яко от Тебе есть источник живота, во свете Твоем узрим свет. Пробави милость Твою ведущим Тя. Сподоби Господи, в нощь сию без греха сохранитися нам. Благословен еси, Господи Боже отец наших, и хвально и прославлено имя Твое во веки, аминь. Буди Господи, милость Твоя на нас, якоже уповахом на Тя. Благословен еси Господи, научи нас оправданием Твоим. Благословен еси Владыко, вразуми нас оправданием Твоим. Благословен еси Святыи, просвети нас оправданием Твоим. Господи, милость Твоя во веки, и дела руку Твоею не презри. Тебе подобает хвала, Тебе подобает пение. Тебе слава подобает: Отцу и Сыну и Святому Духу, ныне и присно и во веки веком, аминь. Посем ектения. Исполним заутрения… Таже, на стиховне стихеры. Посем: Слава, и ныне, Богородичен. Таже: Благо есть исповедатися Господеви, и пети имени Твоему, Вышнии, возвещати заутра милость Твою, и истину Твою на всяку нощь. Аще есть пост, глаголем дважды. Таже, Трисвятое. И по Отче наш… тропарь дню, или святому по уставу, и ектения и по возгласе глаголет псаломщик: Аминь. Приидите, поклонимся… трижды. И псалмы Перваго часа. И прочее. И отпуст. Аще ли пост, то глаголем по Отче наш тропари сии: В церкви стояще славы Твоея, на небеси стояти мнимся, Богородице дверь небесная, отверзи нам двери милости Твоея. Господи помилуй 40. Господи благослови. Господи Исусе Христе Сыне Божии, помилуй нас. Глаголем: Аминь. Небесныи Царю, державу нашу укрепи, веру утверди, языки укроти, мир умири, и святыи храм сей добре сохрани, и прежде отшедшия отцы и братию нашу в кровех с праведными учини и нас в православней вере и в покаянии, Господи, приими и помилуй, яко Благ и Человеколюбец. Таже, Господи помилуй (трижды). Слава, и ныне. Честнейшую херувим, и славнейшую воистину серафим, без истления Бога Слова рождьшую, сущую Богородицу Тя величаем (поклон великий). Именем Господним благослови, отче. И творим великия поклоны, с молитвою святаго Ефрема, якоже предуказася на вседневней полунощнице. И абие начинаем первый час.

1Ве́рую во еди́наго Бо́га Отца́, Вседержи́теля, Творца́ не́бу и земли́, ви́димым же всем и неви́димым. 2И во еди́наго Го́спода Иису́са Христа́, Сы́на Бо́жия, Единоро́днаго, И́же от Отца́ рожде́ннаго пре́жде всех век; Све́та от Све́та, Бо́га и́стинна от Бо́га и́стинна, рожде́нна, несотворе́нна, единосу́щна Отцу́, И́мже вся бы́ша. 3Нас ра́ди челове́к и на́шего ра́ди спасе́ния сше́дшаго с небе́с и воплоти́вшагося от Ду́ха Свя́та и Мари́и Де́вы, и вочелове́чшася. 4Распя́таго же за ны при Понти́йстем Пила́те, и страда́вша, и погребе́нна. 5И воскре́сшаго в тре́тий день по Писа́нием. 6И возше́дшаго на небеса́, и седя́ща одесну́ю Отца́. 7И па́ки гряду́щаго со сла́вою суди́ти живы́м и ме́ртвым, Его́же Ца́рствию не бу́дет конца́. 8И в Ду́ха Свята́го, Го́спода, Животворя́щаго, И́же от Отца́ исходя́щаго, И́же со Отце́м и Сы́ном спокланя́ема и ссла́вима, глаго́лавшаго проро́ки. 9Во еди́ну Святу́ю, Собо́рную и Апо́стольскую Це́рковь. 10Испове́дую еди́но креще́ние во оставле́ние грехо́в. 11Ча́ю воскресе́ния ме́ртвых, 12и жи́зни бу́дущаго ве́ка. Ами́нь.

p> О, архиерею Божий, святителю Никито! Услыши нас грешных, днесь во священный храм сей стекшихся, и честному образу твоему поклоняющихся, и ко священней твоей раце припадающих, и умиленно вопиющих: якоже сидя на престоле святительства в Великом Новеграде сем, и единою належащу бездождию, дождь молитвою свел еси, и паки граду сему огненным пламенем обдержиму, молитвою избаву подал еси, тако и ныне молим тя, о святителю Христов Никито: молися ко Господу, еже избавити царствующий грады, Великий Новград сей и вся грады и страны христианские от труса, потопа, глада, огня, града, меча и от всех врагов видимых к невидимых, яко да изрядных ради молитв твоих спасаеми, славим Пресвятую Троицу, Отца и Сына и Святаго Духа, и твое милостивное предстательство, ныне и присно, и во веки веков. Аминь.

О, преподобне отче Макарие! Молим тя мы, недостойные, испроси предстательством твоим у Всемилостиваго Бога нашего нам здравие душевное и телесное, тихое и богоугодное житие и добрый ответ на Страшнем Суде Христове. Угаси молитвами твоими разжжены стрелы диавольския, да не прекоснется нам злоба греховная, да благочестно скончавше временное житие, сподобимся наследовати Царствие Небесное и купно с тобою славити Отца и Сына и Святаго Духа во веки веков. Аминь.

(преподобного Симеона Нового Богослова) Не попусти на меня, Владыко, Господи, искушение, или скорби, или болезнь свыше силы моей, но избавь от них или даруй мне крепость перенести их с благодарностью.

Господи Иисусе Христе Боже наш! Ты заповедал еси нам воздавати всем должное, егда рекл еси: "Якоже хощете да творят вам человецы, и вы творите им такожде". Что убо сотворю, Господи, что воздам ныне, во мнозе благотворившему(-шей) мне, но уже отшедшему (-шей) от земли живых рабу Твоему (рабе Твоей)! У Тебе, Господи, у Тебе, богатый в милостех Боже наш, всякое воздаяние есть. Сего ради молю Тя, Подателю благих, приими от мене сие малое моление мое, вкупе же и благодарение за все благодеяния Твои, дарованныя мне в приснопоминаемом(-мой) усопшем(-шей) рабе Твоем (Твоей). Молю Тя, Боже, Спасителю мой призри с высоты Святаго жилища Твоего на молитву мою и помяни милостию Твоею отшедшаго(-ую) к Тебе раба Твоего (рабу Твою) (имя), толико благодеявшаго(-ую) ми; яви ему (ей) силу благости Твоей и неизреченное Твое милосердие в прощении и оставлении грехов и покрый его (ю) оправданием Твоим; подаждь ему, Господи, Царство Небесное и вечный покой, яко помогавшему(-шей) ми и ближним моим в нуждех и лишениях, в скорбех и болезнех и подававшему (-шей) ми благая от избытков даров Твоих. Молюся убо Тебе, Благость вечная, воздай ему (ей) за благотворения его (ея) сторицею - за земныя блага небесными, за временныя вечными, и подаждь ему (ей) вечный покой; и яко научавшему(-шей) мя делам милосердия, кротости, смиренномудрию, терпению, воздержанию, вселявшему (-шей) в мя дух мира и любви христианской, подававшему (-шей) ми благие советы и благие образы христианскаго жития, даруй, Премилосердый Господи, достойно узрети невечерний свет Твоего Царствия и насыти его (ю) от небесныя трапезы Твоея, яко во имя Твое препитавшаго(-ую) жаждущую и алчущую мою душу. Помяни, Господи, и всех отшедших к Тебе, в вере и добродетельном житии подвизавшихся во славу Пресвятаго Имени Твоего, добро творивших сирым, нищим и убогим; упокой в лоне Авраама, Исаака, Иакова, посещавших недугующих, страждущих и в темнице заключенных; приими в чертог Твой принимавших в дому своем странна и пришельца. Помяни, Господи, во Царствии Твоем усопших рабов Твоих, выну предстоявших и молившихся Тебе теплою молитвою о нашем душевном спасении и благоденствии, о сохранении и благостоянии святых Твоих церквей, о мире и спасении всего мира; упокой со святыми Твоими рабов Твоих, молившихся о обращении к Тебе заблудших и отпадших от веры и о спасении погибающих во грехах. Молю Тя, Христе Боже наш, молю Тя, яко Судию, имущаго судити мирови, воздай им по человеколюбию Твоему, и сподоби их услышати вожделенный оный глас: "Приидите, благословеннии Отца Моего, и наследуйте уготованное вам Царствие от сложения мира", и да внидут в онь, хваля и прославляя Твое великолепое имя в безконечные веки. Аминь.

Молитва первая Господи Иисусе Христе, Боже мой, покрый мя и раб твоих (имена) от злобы супостата нашего, зане сила его крепка, естество же наше страстно и сила наша немощна. Ты убо, о Благий, сохрани мя от смущения помыслов и потопа страстей. Господи, Пресладкий мой Иисусе, помилуй и спаси мя и рабов Твоих (имена). Молитва вторая О, Господи, Иисусе Христе! Не отврати лица Твоего от нас, рабов твоих (имена) и уклонися гневом от рабов Твоих: помошник нам буди, не отрини нас и не остави нас. Молитва третья Помилуй мя, Господи, и не даждь мне погибнуть! Помилуй мя, Господи, яко немощен есмь! посрами, Господи, борющаго мя беса. Упование мое, осени над главою моею в день брани бесовския! борющаго мя врага побори, Господи, и обуревающия мя помыслы укроти тишиною Твоею, Слове Божий! Молитва четвертая Господи! Се сосуд Твой есмь: наполни мя дарованиями Духа Твоего Святого, без Тебя я пуст всякого блага, или паче полн всякого греха. Господи! Се корабль Твой есмь: исполни мя грузом добрых дел. Господи! Се ковчег Твой: исполни его не прелестью сребролюбия и сластей, а любовию к Тебе и к одушевленному образу Твоему — человеку.

Крести́телю Христо́в, пропове́дниче покая́ния, ка́ющагося не пре́зри мене́, но совокупля́яся с во́и Небе́сными, моли́ся ко Влады́це за мене́, недосто́йнаго, уны́лаго, немощна́го и печа́льнаго, во мно́гия бе́ды впа́дшаго, утружде́ннаго бу́рными по́мыслы ума́ моего́. Аз бо есмь верте́п злых дел, отню́дь не име́яй конца́ грехо́вному обы́чаю, пригвожде́н бо есть ум мой земны́м веще́м. Что сотворю́? Не вем. И к кому́ прибе́гну, да спасе́на бу́дет ду́ша моя́? То́кмо к тебе́, святы́й Иоа́нне, благода́ти тезоимени́те, я́ко тя пред Го́сподем по Богоро́дице вем бо́льша бы́ти рожде́нных всех, ты бо сподо́бился еси́ косну́тися верху́ Царя́ Христа́, взе́млющаго грехи́ ми́ра, А́гнца Бо́жия. Его́же моли́ за гре́шную мою́ ду́шу, да поне́ отны́не, в пе́рвый на́десять час, понесу́ тяготу́ благу́ю и прииму́ мзду с после́дними. Ей, Крести́телю Христо́в, честны́й Предте́че, кра́йний Проро́че, пе́рвый во благода́ти му́чениче, по́стников и пусты́нников наста́вниче, чистоты́ учи́телю и бли́жний дру́же Христо́в! Тя молю́, к тебе́ прибега́ю: не отри́ни мене́ от твоего́ заступле́ния, но возста́ви мя, низве́рженнаго мно́гими грехи́. Обнови́ ду́шу мою́ покая́нием, я́ко вторы́м креще́нием, поне́же обоего́ нача́льник еси́: креще́нием омыва́яй прароди́тельный грех, покая́нием же очища́яй коего́ждо де́ло скве́рно. Очи́сти мя, греха́ми оскверне́ннаго, и пону́ди вни́ти, а́може ничто́же скве́рно вхо́дит, в Ца́рствие Небе́сное.  Ами́нь.

О, преславнии мученицы Гурие, Самоне и Авиве! К вам, яко скорым помощникам и теплым молитвенникам, мы, немощнии и недостойнии, прибегаем, усердно моляще: не презрите ны, во многая беззакония впадшия и по вся дни и часы согрешающия; наставите на путь правый заблудшия, исцелите страждущия и скорбящия; соблюдите ны в непорочнем и целомудреннем житии; и якоже древле, тако и ныне покровители супружеств пребудите, в любве и единомыслии сия утверждающе и от всех злых и бедственных обстояний избавляюще. Защитите, о многомощныя исповедницы, вся православныя христианы от напастей, злых человек и козней демонских; оградите я от нечаянныя смерти, умоляюще Всеблагаго Господа, да великия и богатыя милости нам, смиренным рабом Своим, пробавит. Несмы бо достойни нечистыми устами призывати великолепое имя Создателя нашего, аще не вы, святии мученицы, за ны ходатаи будете; сего ради к вам прибегаем и предстательства вашего пред Господем о нас просим. Такожде избавите нас от глада, потопа, огня, меча, нашествия иноплеменных, междоусобныя брани, смертоносныя язвы и всякаго душепагубнаго обстояния. Ей, страстотерпцы Христовы, устройте нам молитвами вашими вся благая и полезная, да благочестно житие временное прешедше и кончину непостыдну стяжавше, удостоимся теплым заступлением вашим со всеми святыми одесную Правосуднаго Бога Судии стати, и Того непрестанно славити со Отцем и Святым Духом во веки. Аминь.

Го́споди Иису́се Христе́, Сы́не Бо́жий, поми́луй мя гре́шнаго.

О святии Ксенофонте и Марие со чадами вашими Аркадием и Иоанном! Се, мы недостойнии и грешнии к вам усердно прибегаем и с упованием крепким молимся: милостивно услышите ныне глас наш молебный и потщитеся на помощь нашу, и ныне любовь вашу к нам, рабам Божиим (имена), явите благодатным действом богоприятных молитв ваших, низпошлите и нам великую и богатую милость Господню, да воспоем и прославим дивнаго во святых Своих Бога, Отца и Сына и Святаго Духа, ныне и присно и во веки веков.

Преподобнии отцы Феодоре и Василие! Воззрите на нас милостивно и к земли приверженных возведите к высоте небесней. Вы горе на небеси, мы на земли низу, удалены от вас, не толико местом, елико грехми своими и беззаконии, но к вам прибегаем и взываем: наставите нас ходити путем вашим, вразумите и руководствуйте. Вся ваша святая жизнь бысть зерцалом всякия добродетели. Не престаните, угодницы Божии, о нас вопия ко Господу. Испросите предстательством своим у Всемилостиваго Бога нашего мир Церкви Его, под знамением креста воинствующей, согласие в вере и единомудрие, суемудрия же и расколов истребление, утверждение во благих делех, больным исцеление, печальным утешение, обиженным заступление, бедствующим помощь. Не посрамите нас, к вам с верою притекающих. Вси православнии христиане, вашими чудесы исполненнии и милостями облагодетельствованнии, исповедуют вас быти своих покровителей и заступников. Явите древния милости ваша, и ихже отцем всепомоществовали есте, не отрините и нас, чад их, стопами их к вам шествующих. Предстояще всечестней иконе вашей, яко вам живым сущим, припадаем и молимся: приимите моления наша и вознесите их на жертвенник благоутробия Божия, да приимем вами благодать и благовременную в нуждех наших помощь. Укрепите наше малодушие и утвердите нас в вере, да несомненно уповаем получити вся благая от благосердия Владыки молитвами вашими. О, превеликие угодницы Божии! Всем нам, с верою притекающим к вам, помозите предстательством вашим ко Господу, и всех нас управите в мире и покаянии скончати живот наш и преселитися со упованием в блаженныя недра Авраамова, идеже вы радостно во трудех и подвизех ныне почиваете, прославляя со всеми святыми Бога, в Троице славимаго, Отца и Сына и Святаго Духа, ныне и присно и во веки веков. Аминь.

О, чудотворцы славнии, врачеве безмезднии, Космо и Дамиане! Вы, от юности Христа Бога возлюбивше, не врачевания токмо искусство, но паче неоскудную благодать исцеления всяких недугов от Бога прияли есте. Темже и нас, пред честною иконою вашею припадающих, скоро услышите. Юныя дети, вашея помощи во учении книжнем просящия, молитвами своими наставите, да вашему житию ревнующе, не земное точию приобрящут, и паче во благочестии и правей вере непрестанно да преспевают. На одре болезни лежащим, в человечестей помощи отчаявшимся, к вам же тепле с верою и усердною молитвою прибегающим, исцеление болезней вашим милостивым чудодейственным посещением даруйте: такожде и от лютых недуг во уныние, малодушие и роптание пришедшия, данною вам от Бога благодатию в терпении утвердите и наставите, да уразумеют волю от них Божию святую и совершенную, и причастницы соделаются Божия спасительныя благодати. Всех, к вам усердно прибегающих, от болезней лютых невредимы сохраните, и от внезапныя смерти оградите, и мощным ходатайством вашим к Богу в праве вере тверды соблюдите, во благочестии же преспевающия, да с вами вкупе сподобятся в будущем веце присно воспевати и славити Всесвятое и великолепое Имя Отца и Сына и Святаго Духа, во веки веков. Аминь. Святым Косме и Дамиану молятся также о здоровье детей.

О, Пресвятая Госпоже Владычице Богородице, высши еси всех Ангел и Архангел и всея твари честнейши. Помощница еси обидимых, ненадеющихся надение, убогих Заступница, печальных утешение, алчущих Кормительница, нагих одеяние, больных исцеление, грешных спасение, христиан всех поможение и заступление. О, Всемилостивая Госпоже, Дево Богородице, Владычице, милостию Твоею спаси и помилуй раб Твоих, Великого Господина и отца нашего Святейшаго Патриарха (имя), и преосвященныя митрополиты, архиепископы и епископы, и весь священнический и иноческий чин, богохранимую страну нашу, военачальники, градоначальники и христолюбивое воинство и доброхоты, и вся православныя христианы ризою Твоею честною защити, и умоли, Госпоже, из Тебе без Семене воплотившагося Христа Бога нашего, да препояшет нас силою Своею свыше на невидимыя и видимыя враги наша. О, Всемилостивая Госпоже Владычице Богородице, воздвигни нас из глубины греховныя и избави нас от глада, губительства, от труса и потопа, от огня и меча, от нахождения иноплеменных и междоусобныя брани, и от напрасныя смерти, и от нападения вражия, и от тлетворных ветр, и от смертоносныя язвы, и от всякаго зла. Подаждь, Госпоже, мир и здравие рабом Твоим, всем православным христианом, и просвети им ум и очи сердечныя, еже ко спасению, и сподоби ны, грешныя рабы Твоя, Царствия Сына Твоего, Христа Бога нашего, яко держава Его благословена и препрославлена, со Безначальным Его Отцем и с Пресвятым и Благим и Животворящим Его Духом, ныне и присно и во веки веков. Аминь.

(Читаются по благословению духовника) Творение святителя Димитрия Ростовского Один старец от Богоносных Отцев, стоя на молитве и быв в восторзе, слышал глас Господа нашего Иисуса Христа, глаголющий с Пречистою и Пресвятою Богородицею, Материю Своею, рекши к Ней: — Рцы Мне, Мати Моя, колико болезней наибольших, живущи на свете, претерпела еси Мене ради? И рече Пресвятая: — Сыне и Боже Мой! Наибольших пять болезней Тебе ради претерпела: первая — егда услышала от Симеона Пророка, еже имел еси убиен быти; вторая — еща, ищущи Тебе во Иерусалиме через три дня, Тя не видела есмь; третья — егда Тя поймана и связана от жидов услышала; четвертая — егда Тя на кресте между разбойниками Распятаго видела; пятая — егда Тя видела во гробе полагаема. И рече к Ней Господь: — Глаголю Тебе, Мати Моя: аще кто каждую болезнь Твою на кийждо день прочтет с молитвою Моею, сие есть «Отче наш» и Архангельское обрадование, сие есть «Богородице Дево, радуйся» — за первую болезнь дам ему познание грехов и жаление о них; за вторую — дам ему всех грехов прощение; за третию — возвращу ему добродетели его, через грехи изгибшия; за четвертую — напитаю его, при смерти его, Телом и Кровию Моею Божественною; за пятую — явлюся ему Сам при смерти его и прииму душу его в живот вечный. Аминь. По видению этого Богоносного старца, святителем Димитрием Ростовским было сложено далее следующее молитвословие. Начало к сим молитвам: Слава Тебе, Христу Богу моему, не погубившему мя грешнаго со беззаконьми моими, но даже доселе грехом моим потерпевшему. (Поклон) Сподоби, Господи, в день сей без греха сохранится нам; даруй ми, Господи, да ни словом, ни делом, ни помышлением прогневаю Тя, Создателя моего, но вся дела моя, советы и помышления да будут во славу Пресвятаго имени Твоего. (Поклон) Боже, милостив буди мне, грешному, во всей жизни моей: во исходе моем и по кончине моей не остави мене. (Поклон) Сие, падши ниц на земли, глаголи: Господи Иисусе Христе, Сыне Божий, приими умершаго мя душею и умом. Приими мя грешнаго, блудника, сквернаго душею и телом. Отыми неприязнь безстудную и не отврати лица Твоего от мене, не рцы, Владыко: не вем, кто еси, но вонми гласу моления моего; спаси мя, яко имеяй множество щедрот и не хощеши смерти грешника, не оставлю же Тя, Создателя моего, и не отступлю от Тебе, дондеже послушаеши мя и даси всем грехом моим прощение, молитв ради Пречистыя Матери Твоея, предстательства честных Небесных Сил безплотных, святаго славнаго Ангела хранителя моего, пророка же и предтечи Твоего Крестителя Иоанна, богоглаголивых Апостол, святых и добропобедных мученик, Преподобных и Богоносных отец наших и всех Твоих святых, помилуй и спаси мя грешнаго. Аминь. Царю Небесный... Трисвятое... Отче наш... Яко Твое есть Царство и Сила и Слава во веки. Аминь. Богородице Дево, радуйся... По сем: МОЛИТВА 1 О, Мати Милосердая, Дево Марие, аз грешный и непотребный раб Твой, воспоминаючи Твоя болезни, егда Ты услышала от Симеона пророка о немилостивном убиении Сына Твоего, Господа нашего Иисуса Христа, приношу сию тебе молитву и Архангельское обрадование, приими в честь и память болезней Твоих и умоли Сына Твоего, — Господа нашего Иисуса Христа, да дарует ми познание грехов и жаление о них. (Поклон) МОЛИТВА 2 Отче наш... Яко Твое есть Царство... Богородице Дево, радуйся... О, Богоблаженная и Пренепорочная Отроковице, Мати и Дево, приими от мене, грешнаго и непотребнаго раба Твоего, сию молитву и Архангельское обрадование в честь памяти болезни Твоея, егда позабыла Сына Твоего, Господа нашего Иисуса Христа, в церкви и через три дни Его не видела еси; умоли Его и испроси у Него всех грехов моих прощение и оставление, Едина Благословенная. (Поклон) МОЛИТВА 3 Отче наш... Яко Твое есть Царство... Богородице Дево, радуйся. .. О, Мати света, Преблагословенная Дево Богородице, приими от мене, грешнаго и непотребнаго раба Твоего, сию молитву и Архангельское обрадование, в честь и память болезни Твоея, егда Сына Твоего, Господа нашего Иисуса Христа, поймана и связана слышала еси. Умоли Его, да возвратит мне добродетели, через грех изгибшия, да Тя, Пречистая, во веки величаю. (Поклон) МОЛИТВА 4 Отче наш... Яко Твое есть Царство... Богородице Дево, радуйся... О, Милосердия Источниче, Дево Богородице, приими от мене, грешнаго и непотребнаго раба Твоего, сию молитву и Архангельское обрадование в честь и память болезни Твоея, егда на кресте между разбойники видела еси Сына Твоего, Господа нашего Иисуса Христа, Егоже умоли, Владычице, да подаст ми дар милосердия Своего в час смерти моея и да напитает мя Телом и Кровию Своею Божественною, да Тя, Заступницу, славлю во веки. (Поклон) МОЛИТВА 5 Отче наш... Яко Твое есть Царство... Богородице Дево, радуйся... О, Надеждо моя, Пречистая Дево Богородице, приими от мене, грешнаго и непотребнаго раба Твоего, сию молитву и Архангельское обрадование в честь и память болезни Твоея, егда видела еси Сына Твоего, Господа нашего Иисуса Христа, во гробе полагаема, Егоже умоли, Владычице, да явится мне в час смерти моея и да приимет душу мою в живот вечный. Аминь. (Поклон) О, Премилостивая Дево, Госпоже Богородице, чадолюбивая Горлице, небесе и земли Самодержавная Царице, любезная Приемнице всех, простирающих к Тебе свои мольбы, печальных Утешительнице, приими от мене, грешнаго и непотребнаго раба Твоего, пяточисленное сие моление, в нем же воспоминаю земные и небесныя Твоя радости, умильно вопиюща к Тебе сице: (Земные радости) Радуйся, заченшая во чреве без семене Христа Бога нашего. Радуйся, во чреве без болезни носившая Того. Радуйся, порождшая чудным смотрением. Радуйся, восприимшая от волхвов-царей дары и поклонение. Радуйся, яко обрела еси посреди учителей Своего Сына и Бога. Радуйся, яко рождество Твое преславно из мертвых воста. Радуйся, видевшая возносящагося Своего Создателя, к Нему же сама душею и телом возшла еси. (Небесные радости) Радуйся, девства ради Своего, паче ангел и всех святых Преславная. Радуйся, близ Пресвятыя Троицы просияющая. Радуйся, Миротворице наша. Радуйся, Властительнице, обладающая всеми небесными силами. Радуйся, паче всех дерзновение к Сыну и Богу Своему имущая. Радуйся, милосердая Мати всем, к Тебе прибегающим. Радуйся, яко Твое веселие во веки не скончается! И мне недостойному, по неложному обещанию Твоему, в день исхода моего милостива предстани, да Твоим руководством управлен буду к горнему Иерусалиму, в нем же прославленно царствуеши с Сыном Твоим и Богом нашим. Ему же подобает всякая слава, честь и поклонение со Отцем и с Пресвятым Духом в безконечныя веки веков. Аминь. От скверных устен моих, от мерзкаго сердца, от нечистаго языка и от души оскверненной приими, Госпоже Царице, сие похваление, Радосте моя. Приими, якоже вдовий прияла сии две лепты, и даруй ми принести Твоей благости дар достоин. О, Владычице моя, Пречистая Дево, Небесная Царице, якоже хощеши и волиши, паче же научи мя, что ми подобает Тебе, Матери Божией, глаголати к Тебе единой грешных прибежищу и утешению. Радуйся, Владычице, да и аз, многогрешный раб Твой, радостно зову Тебе, воспетой Матери Христа Бога нашего. Аминь. На Твой Пресвятый образ взирая, яко истинную самую Тя зрю Богородицу, верою сердечною от души припадаю и поклоняюся с Предвечным на руку Твоею держимым Младенцем, Господом нашим Иисусом Христом, боголепно почитаю и молю Тя со слезами, покрый мя покровом Твоим, от враг видимых и невидимых, Ты бо род человеческий ввела еси в Царство Небесное. Аминь. По сем: Достойно есть, яко воистину... Слава и Благодарение Господу за все!

О, святый Феодоре, исповедник Православия, закона Божия ревнитель, наставник правой веры, помози нам и призри на нас, с верою и усердием прибегающих к тебе! От царей иконоборцев за почитание святых икон оковы, изгнание, заточение претерпел ты, преподобный, и множество тяжких ран и жестоких ударов, от которых и болезнь нестерпимую получил. Великий и досточудный Феодоре, до конца в скорбех претерпевый, и нам, обуреваемым напастями и треволнениями житейскими, подай крепость душевную и телесную для борьбы с бедами и для одоления страстей и козней вражиих. Моли о нас Милосерднаго Господа, верный раб Божий, Феодоре, да избавит Он нас от ожесточения и хладности сердечной, и дарует нам кротость, безгневие, незлобие, смирение и любовь. Видя помощь Твою, прославим мы Господа и Спаса нашего Иисуса Христа, и тебя, благодетеля нашего, возблагодарим, с благоговением почитая память твою. О, всехвальне, преподобне Феодоре, учением и песньми своими Церковь Божию напоивший и обрадовавший, и нас, ослепленных умом от соблазнов и суеты мира сего, просвети познанием истины и избавь от заблуждений и сомнений, чтобы не сообразоваться нам веку сему. О, угодниче Христов, Феодоре, получивший от Бога благодать исцеления недугующих, а наипаче страждущих желудком, уврачуй и нас, одержимых различными недугами и исцели болящих желудком и подай нам здравие, бодрость и мир душевный. Не отрини нас, притекающих к тебе, но заступи и помози нам. Предстательствуй за нас пред Спасителем нашим, внемли мольбам нашим и исполни прошения наши, да тобою укрепляемы, в трудах и добрых делах совершим мы течение жизни нашей и сподобимся войти в Царствие Небесное, Да вместе с тобою восхвалим и прославим Господа и Спаса нашего Иисуса Христа, со Безначальным Его Отцем и с Пресвятым Духом, ныне, и присно, и во веки веков. Аминь.

Господи Иисусе Христе Боже наш, вселивыйся в сердца двунадесятых апостолов нелицемерно, благодатию Всесвятаго Духа, сошедшаго в виде огненных язык, и сих устне отверзый, и начаша глаголати иными языки: Сам Господи Иисусе Христе Боже наш, ниспосли Того Духа Твоего Святаго на отроча сие (имя): и насади во ушеса сердца его Священныя Писания, яже рука Твоя пречистая на скрижалех начерта законоположнику Моисею, ныне и присно и во веки веков. Аминь.

Тропарь, глас 5. Царства земнаго лишение, узы и страдания многоразличныя кротко претерпел еси, свидетельствовав о Христе даже до смерти от богоборцев,страстотерпче великий Боговенчанный царю Николае, сего ради мученическим венцем на Небесех венча тя с царицею, и чады, и слуги твоими Христос Бог, Егоже моли помиловати страну Российскую и спасти души наша.

О, теплый молитвенниче, благостный отче, преподобне Сампсоне! Моли Бога о мне, грешнем, и низпосли от Всеблагаго Владыки помощь ми и избавление, привременна бо есть жизнь моя и исполнена труда, скорбей и болезней. Укрепи сердце мое, да возмогу понести тяготу мою, и не попусти, да превозмогут искушения многая моя малыя силы, но споспешествуй мне заступлением твоим и посреде обстояний и бед управи путь мой в Царство Небесное, да славлю Прославльшагося в тебе Господа во веки. Аминь.

О, преславный священномучениче Антипо и скорый помощниче христианом в болезнех! Верую от всея души и помышления, яко дадеся тебе от Господа дар болящия врачевати и разслабленныя укрепляти, сего ради к тебе, яко благодатному врачу болезней, аз немощный (или немощная) прибегаю и, твой досточтимый образ со благоговением лобызая (или лобызающи), молюся: твоим предстательством у Царя Небеснаго испроси мне болящему (или болящей) исцеление от удручающия мя зубныя болезни, аще бо и недостоин (или недостойна) есмь тебе благостнейшаго отца и приснаго заступника моего: но ты, быв подражатель человеколюбия Божия, сотвори мя достойна (или достойну) твоего заступления чрез мое обращение от злых дел к благому житию: уврачуй обильно дарованною тебе благодатию язвы и струпы души и тела моего, даруй ми здравие и спасение и во всем благое поспешение, да тако тихое и безмолвное житие пожив (или поживши) во всяком благочестии и чистоте, сподоблюся со всеми святыми славити Всесвятое имя Отца и Сына и Святаго Духа. Аминь.