Молитвы

Кондак 1 Избраннаго от Бога на высоту святительскаго служения, молитвенника изряднаго и чистоты православныя веры ревнителя, Твери града и всея земли Российския небеснаго заступника, новаго чудотворца предивнаго вси воспоим: Радуйся, священномучениче Фаддее, молитвенниче о душах наших! Икос 1 Ангел пресветлый явился еси на земли, преблаженне Фаддее, тихостию нрава и смирением украшен, издетска Господеви угождати желая, сего ради вопием ти: Радуйся, иерейскаго корене ветвь пречестная, Радуйся, от святыя купели славным именем Иоанна Дамаскина нареченный; Радуйся, благочестивых родителей кроткое утешение, Радуйся, благоговейное верных удивление; Радуйся, чадо послушания, в страсе Божием возращенное, Радуйся, отроча чистое, во храме Господнем воспитанное; Радуйся, от сродников и знаемых благочестию наученный, Радуйся, благим нравам, вере и любви оных подражателю; Радуйся, священномучениче Фаддее, молитвенниче о душах наших. Кондак 2 Видяще твое по Бозе усердие, удивляхуся вси, како вмале премудрость Божию познавши, возжада душа твоя источника приснотекущаго, от негоже верных сердца благодатию наполняются и немолчно восхваляют Бога: Аллилуиа! Икос 2 Разум неуразуменный уразумети потщався, востекл еси, блаженне, под кров преподобнаго Сергия, не в суетных и тленных поучатися, но Господа лицем к Лицу узрети желая, сего ради вопием ти: Радуйся, от пелен архиереем пророчески нареченный, Радуйся, несумнительно путь служения Господеви избравый; Радуйся, неуклонное шествие ко Христу от юности в сердце своем положивый, Радуйся, душу свою невредиму от ветров безбожных учений сохранивый; Радуйся, в терниих и волчцех пшеницу веры Христовы возрастивый, Радуйся, плод сторичный Владыце Христу принесый; Радуйся, ближним поработати пламенне вожделевый, Радуйся, о души бессмертней присно попечение имевый. Радуйся, священномучениче Фаддее, молитвенниче о душах наших! Кондак 3 Силою свыше укрепляем, выну болезнуя о спасении души своея, добрых учителей искал еси, по слову святых отец, яко неудобь спасается без наставника к Богу шествуяй, и обрел еси оных, яко многоценное сокровище. Тех богомудрым поучением прилежно внимал еси, Богу благодарственно поя: Аллилуиа! Икос 3 Имеяй непрестающую болезнь в сердцы своем, в кий бо час услышиши глас «Се Жених грядет» недоумея, светильник свой присно горящий уготовал еси, елеем благодати преисполнив сего. Мы же, части мудрых дев улучити желая, воспеваем ти сице: Радуйся, постниче, себе Христа ради утеснивый, Радуйся, вина от юности никакоже вкусивый; Радуйся, древним отцем пустынным измлада подражавый; Радуйся, противу страстей душепагубных подвизавыйся; Радуйся, любве исполнение стяжавый, Радуйся, семена греха непрестанно из сердца своего исторгавый; Радуйся, помысел возношения самоукорением низложивый, Радуйся, смирением гордую выю помыслов суетных сокрушивый. Радуйся, священномучениче Фаддее, молитвенниче о душах наших! Кондак 4 Бури помышлений сумнительных возмущаша душу твою, о, доблий воине Христов, егда служити Богу и ближним всем сердцем возжелал еси, о стези же монашестей недоумевая, молился еси Богу со слезами: «Скажи мне, Господи, путь, в онь же пойду, яко к Тебе взях душу мою», — поя Ему с надеждою: Аллилуиа! Икос 4 Слышавше от праведника Кронштадтскаго, егоже яко ангела земнаго узрел еси, словеса Христовы: «Аще любиши Мя, паси овцы Моя…», уразумел еси волю Божию спасительную. Сим предречена бысть и мученическая кончина твоя, еюже увенча тя Господь, сего ради вопием ти: Радуйся, в день Успения Пречистыя Владычицы в воинство Ея вчиненный, Радуйся, дивным смотрением Божиим имя апостола, во младости предреченное, получивый; Радуйся, небесное ангельское звание паче всех земных возлюбивый, Радуйся, Бесплотным силам во всем уподобитися возжелавый; Радуйся, благодатию священства почтенный, Радуйся, благоговейный Престола Божия предстоятелю; Радуйся, научение юных аки святое послушание восприявый, Радуйся, в подвизе любве и попечения о пастве твоей пребывый. Радуйся, священномучениче Фаддее, молитвенниче о душах наших! Кондак 5 Яко звезду боготечную, путь верным указующую, воздвиже тя Пастыреначальник на тверди церковней просветити мрак неведения и привести Господеви люди совершенны, да радостно вси воспоют с тобою Богу: Аллилуиа! Икос 5 Видеша людие талант пастырства добраго, дарованный ти от Господа, егоже не яко бремя тяжкое восприял еси, но яко иго легкое понесл еси, любовию вся покрывая, ничимже смущаяся, на Господа твердое упование имый; мы же, дивящеся, вопием: Радуйся, Пастыря кроткаго дивный подражателю, Радуйся, небесному покровителю твоему подобниче; Радуйся, апостольское дерзновение имевый, Радуйся, об Отечестве твоем, тьмою неверия покрывающемся, скорбевый; Радуйся, о рассеянных по путем погибельным присно болезновавый, Радуйся, на зов твой текущих с любовию приимавый; Радуйся, яко обида и памятозлобие от тебе далече быша, Радуйся, яко превыше немощей человеческих пребыл еси. Радуйся, священномучениче Фаддее, молитвенниче о душах наших! Кондак 6 Проповедует земля Волынская подвиги и труды твоя, святителю Фаддее, яко истинною смертию для мира и гробом себялюбию архиерейское служение почел еси, неуклонно шествие ко Христу творя и воспевая Ему присно: Аллилуиа! Икос 6 Воссия свет святительскаго служения твоего, о пастырю неусыпный, снедаше бо тя огнь любве ко Христу. Возжада душа твоя благодати Божией, о Господе хвалитися научающей: «Пшеница Божия есмь», — яко Богоносец восклицая. Мы же, видяще таковое усердие твое, воспеваем сице: Радуйся, наречение в день священномученика Игнатия приявый, Радуйся, сему Богоносцу любовию ко Христу уподобивыйся; Радуйся, славы суетныя на земли не взыскавый, Радуйся, совершенный образе чистоты и смиренномудрия; Радуйся, омофор яко крест на рамена своя возложивый; Радуйся, Архиерею Великому, небеса прошедшему, последовавый, Радуйся, благочестие свое, яко жезл для овец словесных, имевый, Радуйся, яко глава твоя увенчана бысть венцем долготерпения. Радуйся, священномучениче Фаддее, молитвенниче о душах наших! Кондак 7 Хотя явити всем красоту веры Православныя, неустанно трудился еси, да люди новы Христу приобрящеши, кротостию и тихостию нрава к себе привлекая, выну поя Богу: Аллилуиа! Икос 7 Новаго тя Златоуста показа Человеколюбец Христос, неусыпно бо вертоград Господень, зноем безбожия иссушаемый, животворною влагою словес твоих напоял еси. Сего ради вопием ти: Радуйся, от Источника воды живыя верных напояющий, Радуйся, светильниче светлый, путь спасения нам озаряющий; Радуйся, плотскаго мудрования до конца отвративыйся, Радуйся, Писаний Божественных изъяснителю; Радуйся, о просвещении истиннем радевый, Радуйся, очи сердечныя отроком учением твоим отверзаяй; Радуйся, юныя души на путь спасения наставляяй, Радуйся, добрый соработниче Христов и верный Того учениче. Радуйся, священномучениче Фаддее, молитвенниче о душах наших! Кондак 8 Странное чудо является притекающим к тебе, блаженне Фаддее, ибо данною тебе Божиею благодатию во дни печали и скорбных обстояний светлым лицем радость пасхальную всем возвещал еси, воспевая Богу: Аллилуиа! Икос 8 Весь хвала Богу и жертва живая был еси, святе Фаддее, глаголал бо еси, яко крестный путь спасения благодать Божия радостию преисполняет, юже мир не позна. Сего ради от святителя Тихона святость твоя известися, юже похваляюще, воспеваем ти сицевая: Радуйся, странствия Владычня возследователю, Радуйся, бессмертныя трапезы Христовы насладивыйся; Радуйся, яко во страданиях Господеви уподобился еси, Радуйся, яко клеветы, осуждение и заточение понесл еси; Радуйся, яко во узилищи с тобою сущия утешал еси, Радуйся, яко уныние и скорбь далече от них отревал еси; Радуйся, дар прозорливости от Господа получивый, Радуйся, и в темнице милостыню творивый. Радуйся, священномучениче Фаддее, молитвенниче о душах наших! Кондак 9 Всякия утоляя печали, безмездник предивный явился еси, сирым и нищим вся раздавая, да обет нестяжания совершенне исполниши. О сем же людие земли астраханския зело чудишася, егда вольную нищету твою узрели суть, умиленным сердцем воспевая Богу: Аллилуиа! Икос 9 Ветия суемудренныя нечестивыя видим твоим житием посрамляемыя, богомудре Фаддее; поправшия бо каноны церковныя и отеческия предания ко Христу привел еси, не словесы грозными заблудшия обличая, но богоподражательными своими нравы. Сего ради вопием ти: Радуйся, на всяк день у Престола Господня молитвы возносивый, Радуйся, словом богоносным паству свою неустанно учивый; Радуйся, вся покрывающую любовь имевый, Радуйся, светом Христовым заблуждшия просветивый; Радуйся, отцев Вселенских соборов верный последователю, Радуйся, еще в житии земном за святость почитаемый; Радуйся, зерно Божественныя истины возрастивый, Радуйся, преславное Российския земли заступление. Радуйся, священномучениче Фаддее, молитвенниче о душах наших! Кондак 10 Спастися хотя всякому, притекающему к тебе, наставниче добрый, страждущих яко слуга Христов приимал еси, раны греховныя тех исцеляя и волю Божию им открывая, воспевая Богу: Аллилуиа! Икос 10 Стена еси всем прибегающим к тебе, богопросвещенне Фаддее, во дни бо лютых гонений Тверь град молитвою твоею ограждая, призывал еси люди твоя верными быти Христу даже до смерти, да жительствуют по словеси Евангельскому: «Не убойтеся от убивающих тело, души же не могущих убити». Укрепи же и нас, малодушных и унылых, зовущих ти таковая: Радуйся, всяческия поношения смиренно претерпевый, Радуйся, тя бо ни скорбь, ни теснота, ни глад, ни нагота, ни меч не устрашиша; Радуйся, яко сия вся от любве Христовы тя не отлучиша, Радуйся, ветве лозы Христовы, сторичный плод принесшая; Радуйся, душу твою молитвою и любовию окриливый, Радуйся, в мире многомятежнем, яко в тишей пустыни поживый; Радуйся, святителей пресветлое украшение, Радуйся, всем верным прерадостное утешение. Радуйся, священномучениче Фаддее, молитвенниче о душах наших! Кондак 11 Пение хвалебное возносим ти, священномучениче Фаддее; течение скончав, веру соблюл еси, тесным путем в житии твоем шествуя, душу твою молитвою и постом предуготовал еси и безкровным самозакланием венец мученический прежде кончины твоея стяжал еси, воспевая Богу: Аллилуиа! Икос 11 Светом небесныя благодати зримо, святе, просиял еси, заушения и оплевания в темнице претерпевая, егда Владычица Пречистая за тя заступися и мучителей к покаянию приведе. Темже юдоль плача в гору святую претворися, мы же воспеваем ти сицевая: Радуйся, светом Фаворским пред кончиною своею возблиставый, Радуйся, всецело себе Богу предавый; Радуйся, возвеселивый ангелы своими подвиги, Радуйся, яко скорбь твоя в радость преложися; Радуйся, ты бо соделал еси душу свою храмом Бога Живаго, Радуйся, яко венца трегубаго в преподобничестве, святительстве и мученичестве, сподобился еси; Радуйся наставниче и учителю, душу свою за други своя положивый, Радуйся, и за враги своя смиренно Господа моливый. Радуйся, священномучениче Фаддее, молитвенниче о душах наших! Кондак 12 Благодать свыше ти данную сведуще, восхваляем мученическую кончину твою, преблаженне Фаддее, ты бо прослави Христа на земли жизнию, паче же смертию своею, по кончине же своей славою небесною осиянный, токи исцелений нам присно источаеши. Мы же, прославляя Бога, дивнаго во святых своих, воззовем Ему: Аллилуиа! Икос 12 Воспеваем тя, чудотворца новаго и преславнаго, достохвальне Фаддее, за Христа бо страданием твоим в радость вечную вшел еси, и ныне во свете неприступнем пребываеши, лицезрения Троицы Присносущныя наслаждаяся и со ангелы и всеми святыми у Престола Божия ликуя, идеже и нас помяни, вопиющих ти таковая: Радуйся, от мученик древних ничимже умаленный, Радуйся, святче Божий, возсиявый силою и духом древних отцев; Радуйся, в сонм новомучеников российских вчиненный, Радуйся, мощи твоя святыя нам, недостойным, явивый; Радуйся, яко честныя мощи твоя всем исцеления источают, Радуйся, яко мощи твоя граду Твери и всей Российстей земли крепкое заступление; Радуйся, присно радование всем возглашати призывающий, Радуйся, яко по имени твоему и житие твое бысть. Радуйся, священномучениче Фаддее, молитвенниче о душах наших! Кондак 13 О, заступниче наш у престола Царя Небеснаго, священномучениче славный Фаддее, веры православныя твердый поборниче и за Отечество наше присный молитвенниче! Нынешнее наше приими приношение, да молитвами твоими вечныя муки избавимся, и Небесныя радости сподобимся, воспевая Богу: Аллилуиа![Се́й конда́к глаго́лется три́жды.][Далее повторяем 1‑е икос и кондак:]Икос 1 Ангел пресветлый явился еси на земли, преблаженне Фаддее, тихостию нрава и смирением украшен, издетска Господеви угождати желая, сего ради вопием ти: Радуйся, иерейскаго корене ветвь пречестная, Радуйся, от святыя купели славным именем Иоанна Дамаскина нареченный; Радуйся, благочестивых родителей кроткое утешение, Радуйся, благоговейное верных удивление; Радуйся, чадо послушания, в страсе Божием возращенное, Радуйся, отроча чистое, во храме Господнем воспитанное; Радуйся, от сродников и знаемых благочестию наученный, Радуйся, благим нравам, вере и любви оных подражателю; Радуйся, священномучениче Фаддее, молитвенниче о душах наших. Кондак 1 Избраннаго от Бога на высоту святительскаго служения, молитвенника изряднаго и чистоты православныя веры ревнителя, Твери града и всея земли Российския небеснаго заступника, новаго чудотворца предивнаго вси воспоим: Радуйся, священномучениче Фаддее, молитвенниче о душах наших! Молитва О, великий и преславный угодниче Христов, священномучениче Фаддее! Светильниче пресветлый, на свещнице Церкви Православныя возженный, сосуде чистоты и избранное селение Духа Святаго! Молим убо тя: сохрани под кровом молитвенных крил твоих Православное Отечество наше и паству, юже собрал еси, да не закоснеем в окаменении сердец и нерадении о спасении нашем. О, пастырю добрый и ближний друже Христов! Сподоби и нас, путем покаяния шествуя, возлюбити Бога всем сердцем и помышлением нашим и ближняго яко себе, и тако по неложному слову апостола: приближитесь Господу, и приближится вам, — сподобитися вожделенных селений райских, идеже ты с лики святых пребываеши, прославляя в Троице славимаго Бога, Отца и Сына и Святаго Духа, ныне и присно и во веки веков. Аминь.

Кондак 1 Избранный подвижниче и земный ангеле Христов, Божественными добродетельми Духа измлада украсився, Романе премудре, пением прекрасным Церкве Христовы служитель был еси, яко да вопием ти: Радуйся, сладкопевче Романе, красото церковная. Икос 1 Ангельское житие возлюбил еси от юности, ум на Божественная возвел, временная и земная пренебрегл еси, тем убо вселися в тя Святый Дух, Егоже благодатию украшен еси, сего ради с любовию вопием ти сице: Радуйся, чистотою Ангелом уподобился еси. Радуйся, постом и бдением безстрастия достигл еси. Радуйся, светильниче Божественнаго света. Радуйся, молитв благовонное кадило. Радуйся, грамоте необученный, разумом стремивыйся к Богу. Радуйся, добрыми делы премудрыя превосходивый. Радуйся, сладкопевче Романе, красото церковная. Кондак 2 Видя сердца твоего благое намерение, Господь предначерта узкий и тернистый путь твоего спасения. Темже иго Христово благое и легкое усердне восприяв, смирен и послушлив был еси, воспевая всех Творцу и Богу: Аллилуиа. Икос 2 Разум Божественных Писаний истинною премудростию стяжав, что по апостолу первее чиста есть, потом же мирна, кротка, благопокорлива, исполнися милости и плодов благих, несумненно и нелицемерно. Мы же, дивящеся чистоте твоей, воспеваем: Радуйся, на Бога Промыслителя всю надежду возложивый. Радуйся, токмо Его благоволения взыскавый. Радуйся, в послушании усердно трудивыйся. Радуйся, в сердце имевый страх Божий. Радуйся, житием добродетельным на земли просветивыйся. Радуйся, за сие любовь Божию на небесех снискавый. Радуйся, сладкопевче Романе, красото церковная. Кондак 3 Силою любве утверждаяся, поревновал еси евангельское житие стяжати по образу преподобных отцев. Егда же даде ти Господь разумение сего благоугождения, воспел еси со умилением: Аллилуиа. Икос 3 Имея крепкую веру во благое промышление Божие о спасении человека, притекл еси к честному образу Пресвятыя Богородицы, сопредсташа в церкви Влахернстей, и смиренно молил еси Владычицу, да управит путь твой. Мы же, видяще твое неотступное упование на милость Царицы Небесныя, поем ти: Радуйся, Божия Матере верное и возлюбленное чадо. Радуйся, силы Ея священнаго покрова тайное постижение. Радуйся, Заступницы Усердныя благоговейный почитателю. Радуйся, теплыя в нощи молитвы к Ней слезно возносивый. Радуйся, тако утешение в сердце своем обретый. Радуйся, сладкопевче Романе, красото церковная. Кондак 4 Бурю многих бед, зависти ради за усердие к послушанию претерпел еси, благий. Обаче за поношение и уничижение воздавал еси кротостию и смирением, мы же мнозе дивящеся незлобию и терпению твоему взываем: Аллилуиа. Икос 4 Слыша и видя премногую добродетель твою, возлюби тя святейший патриарх, даде с клиром ти равную часть, мы же о сем веселящеся глаголем сице: Радуйся, всем сердцем Господа возлюбивый. Радуйся, посрамление завистное приемый в навечерие Рождества Христова. Радуйся, пред иконою Пресвятыя Богородицы утешение взыскавый. Радуйся, кротостию уничижение победивый. Радуйся, явивый сердечныя простоты образ светлый. Радуйся, умягчивый сердца обидчиков твоих. Радуйся, сладкопевче Романе, красото церковная. Кондак 5 Богопесненную любовь и сердце чистое к достижению небеснаго отечества, яко светильник, во уме твоем выну содержа, тою прославил еси Небеснаго Отца, воспевая Ему: Аллилуиа. Икос 5 Видяще, о пречудне Романе, любовь твою к Богу, юже в сердце твоем выну храниму, сию созерцающе сице рцем вси: Радуйся, трость песнописца послушная, в руце Христове содержимая. Радуйся, единаго Христа от сердца возлюбивый. Радуйся, в радость Господа вшедый. Радуйся, Тому единому всею душею прилепивыйся. Радуйся, сладостьми духовными нас насыщаяй. Радуйся, возлюбленный к Богу о нас предстателю. Радуйся, сладкопевче Романе, красото церковная. Кондак 6 Проповедник неоскудеваемыя благодати и милости Божия явился еси ты, блаженне, егда от Царицы Небесныя во сне приял свиток книжный на снедение: тем убо умудрен, нача разумно пети во славу Божию, святым же писати похвальная,взывая с верою: Аллилуиа. Икос 6 Возсиял еси аки звезда многосветлая, исполнившись премудрости великия, ибо Владычица, яко некогда Сын Ея Своим апостолом, отверзла тебе ум к разумению Писаний, сего ради ублажаем тя, зовуще: Радуйся, любве евангельския сокровище. Радуйся, Духа Святаго вместилище. Радуйся, от Девы Богоблагодатныя дерзновение приемый. Радуйся, благодарение от сердца чистаго Наставнице своей возносивый. Радуйся, сладость отречения воли своея познавый. Радуйся, за кротость и смирение великий дар Божий приявый. Радуйся, сладкопевче Романе, красото церковная. Кондак 7 Хотяще вознести достойное благодарение Царице Небесней, возшел еси, Романе блаженне, на амвон церковный и воспел гласом сладким кондак свой, глаголя: Дева днесь Пресущественнаго рождает. Тем и мы Пречистей воспеваем: Аллилуиа. Икос 7 Дивная звезда явился еси ты, сладкопевче преблагий, украшение изящное Церкве Христовы. Давидову кротость, Иаковле беззлобие и терпение Иовле стяжал еси, мы же вопием ти: Радуйся, милости Божия стяжателю. Радуйся, к Богу присный о нас предстателю. Радуйся, ангельским пением просветивыйся. Радуйся, лучезарный светильниче. Радуйся, непоколебимый столпе веры Христовы. Радуйся, сладкопевче Романе, красото церковная. Кондак 8 Вси же видяще и слышаще, удивишася, яко течаше от уст твоих, аки река, премудрость. Постыдишася же клирицы, оскорбившие тя, досаждаху о простоте и невежествии, и покаявшеся припадоша к ногам твоим, прощения просяще и славяще Бога, поя Ему: Аллилуиа. Икос 8 Весь огнем Божественныя любве исполненный, в терпении стяжав Дух Святый, по слову Евангелия Христова. Мы же, любовию твоею побеждаеми, дерзаем звати тебе таковая: Радуйся, яко дивный образ Отца Небеснаго в себе явивый. Радуйся, братию враждовавшу на тя, любовию Христовою возлюбивый. Радуйся, благая за злая воздававый. Радуйся, пример братолюбия христианскаго всем нам оставивый. Радуйся, злых приводяй к постыжению. Радуйся, скорбящим подаяй утешение. Радуйся, сладкопевче Романе, красото церковная. Кондак 9 Все естество человеческое и лики Ангелов восхваляют тя, премудре отче, яко послушник, смирения исполненный, приял еси блаженный путь Христов, водворися в Царстви Небеснем, поюще: Аллилуиа. Икос 9 Вития многовещанныя не довлеют изглаголати чистоту духовную, юже имел ты, блаженне Романе; и нас научи вере крепцей и безропотному послушанию, с любовию зовущих ти: Радуйся, паствы твоея изрядный послушниче. Радуйся, Ангелов собеседниче. Радуйся, алчущих жизни вечныя питателю. Радуйся, мудрых словес насадителю. Радуйся, умильно Божию славу воспевый. Радуйся, сладкогласную струну Божественнаго дара приемый. Радуйся, сладкопевче Романе, красото церковная. Кондак 10 Спасти хотя род человеческий, верный путеводитель явился еси, дивно возглашая славу Божию. Мы же, внимая слову мудрости твоея, с веселием прославляем Господа, воспевая: Аллилуиа. Икос 10 Царя Небеснаго, Егоже славословят Херувимы и Серафимы, житием, верою и любовию всеусерднейший служитель был еси, преподобне, яко крин благоуханный, со всеми избранниками Пречистыя Богородицы у Престола Всесвятыя Троицы предстал еси, тем радостно зовем ти: Радуйся, благий ходатаю о нас ко Господу. Радуйся, молитвенниче пресветлый и прелюбимый. Радуйся, яко равноангельную красоту стяжал еси. Радуйся, яко нищетою духовною обогатился еси. Радуйся, яко разум свой ко Господу отверзл еси. Радуйся, сладкопевче Романе, красото церковная. Кондак 11 Пение умиленное приносим ти, скорому помощнику в нуждах и печалех всем, к тебе с верою и любовию притекающих. Тем же твоими песнопеньми в Церкви Божией прославляется Бог, Дивный во святых Своих, зовущих непрестанно: Аллилуиа. Икос 11 Яко светлейший светильник и молитвенник явился еси, Романе богоблаженне. Ныне Владыце всех предстоя и дерзновение к Нему стяжав, моли о нас, совершающих светлую память твою, зовуще: Радуйся, Богу единому послуживый. Радуйся, вся заповеди Божия исполнивый. Радуйся, обителей Небесных удостоивыйся. Радуйся, горния славы приобщивыйся. Радуйся, гласе благознаменитых словес. Радуйся, в песнопениях богослове сладкозвучный. Радуйся, сладкопевче Романе, красото церковная. Кондак 12 Благодати Божия сокровища наследовал еси, Богородицу Марию богомудра имел еси Учителя, вразумляющу тя и научающу пети: Аллилуиа. Икос 12 Поюще твое достохвальное житие на земли, радостно славим Дивнаго во святых Своих Царя Небеснаго. Того благодатию в селениих праведных ныне ликуеши, идеже зриши славу Божию нескончаемую. Мы же умильно воспеваем ти: Радуйся, яко красоту и славу мира сего отрясл еси. Радуйся, яко душу твою вперил еси к горнему званию. Радуйся, яко твоих глагол вещание Вселенную исполни. Радуйся, научаяй знанию спасительному всех. Радуйся, златокованная трубо, славу Божию со ангелы возвещающая. Радуйся, Богом увенчанный, в молитвах своих нас не оставляющий. Радуйся, сладкопевче Романе, красото церковная. Кондак 13 О, преблаженне и Богоносне отче Романе! Приими сие малое молитвенное приношение наше, и с Пресвятою Владычицею принеси молитву ко Господу Богу, да избавит нас от всякого вреда и скорби, и сподобит Своего Небеснаго Царствия, идеже вси, присно торжествующе, немолчно воспевают: Аллилуиа.[Се́й конда́к глаго́лется три́жды.][Далее повторяем 1‑е икос и кондак:]Икос 1 Ангельское житие возлюбил еси от юности, ум на Божественная возвел, временная и земная пренебрегл еси, тем убо вселися в тя Святый Дух, Егоже благодатию украшен еси, сего ради с любовию вопием ти сице: Радуйся, чистотою Ангелом уподобился еси. Радуйся, постом и бдением безстрастия достигл еси. Радуйся, светильниче Божественнаго света. Радуйся, молитв благовонное кадило. Радуйся, грамоте необученный, разумом стремивыйся к Богу. Радуйся, добрыми делы премудрыя превосходивый. Радуйся, сладкопевче Романе, красото церковная. Кондак 1 Избранный подвижниче и земный ангеле Христов, Божественными добродетельми Духа измлада украсився, Романе премудре, пением прекрасным Церкве Христовы служитель был еси, яко да вопием ти: Радуйся, сладкопевче Романе, красото церковная. Молитва преподобному Роману Сладкопевцу О, преблаженне отче наш, Романе Сладкопевче! Призри от горния славы на нас, смиренных и немощных, твоея помощи и утешения просящих. Приникни к нам благосердием твоим и помози заповеди Господни непорочно сохраняти, веру православную крепко содержати, покаяние во гресех наших усердно Богу приносити. Научи нас, уневестившихся Христу, работати Ему со страхом и радоватися с трепетом. Избави нас от печали и уныния, отжени от нас гордость и славолюбие, да воспоем славу Божию, да восхощем токмо славы небесныя. О, святый отче, всели в нас любовь нелицемерную к ближним, послушание безропотное начальником и страх Божий в сердца наша. Даруй познати сладость отречения воли своея, верой крепкой во благое Промышление Божие о спасении человека освяти души наша. Низпосли нам благословение от Господа, да понесем благое иго Христово в долготерпении до конца дней наших, да сподобимся с мудрыми девами внити во брачный чертог Жениха своего Небеснаго и купно со Ангелами воспевати славу величия Его, Отца и Сына и Святаго Духа во веки веков. Аминь.

Мученик Твой, Господи, Нестор/ во страдании своем венец прият нетленный от Тебе, Бога нашего,/ имеяй бо крепость Твою,/ мучителей низложи,/ сокруши и демонов немощныя дерзости:/ того молитвами// спаси души наша.

Твоего предстательства уверение/ и милосердия Твоего явление/ икона Иерусалимская нам, Владычице, показася/ пред нею же души наша в молитве изливаем/ и верою Тебе вопием:/ воззри, Милосердая, на люди Твоя,/ вся скорби наша и печали утоли,/ утешение благое в сердца наша низпосли/ и спасение вечное душам нашим, Пречистая, испроси.

Апостоле святый Анание,/ моли Милостиваго Бога/ да прегрешений оставление// подаст душам нашим.

Яко священноначальника честна и страдальца твердейша,/ вселенная приносит Тебе, Господи, Кодрата апостола/ и песньми почитает честную его память,/ просящи всегда прегрешений оставления// тем дароватися поющим его, Благоутробне.

Препрославленная Вышняго Матерь/ созывает к песнопению нас Своего образа пришествием от Царьграда/ и возбуждает зрением того на подвиг,/ побеждати сопротивных силу,/ и к Ней, яко нашея радости виновней, пети:/ радуйся, Невесто Неневестная.

Княжеских дароношений и всего суетствия мирскаго спешне отвергся,/ Божиих же дарований, премудре Феодоре, преискренне сподобитися желая,/ приял еси иноческий образ/ и, в нем смиренным послушанием и безмолвным житием Царю Небесному благоугождая,/ получил еси от Него безсмертныя дары,/ ихже и нам, чтущим тя,/ получити молися.

Духом Божиим водим, преблаженне Василие,/ оттрясл еси мирский мятеж,/ и жития треволнения возгнушался еси,/ и, совлекся одеяний тленных и облекся в ризу безстрастия,/ убежал еси ловления льстиваго миродержца,/ и был еси странен во твоем языце,/ и, паче земнаго богатства избрав богатство Небесное,/ увязлся еси венцем терпения./ И ныне, преблаженне Василие, моли Христа Бога/ о творящих святую память твою, да зовем ти:/ радуйся, преблаженне Василие.

Троицы провозвестницы,/ троице мучеников честная,/ идольское нечестие обличившии/ и тьмочисленнаго врага сокрушившии,/ ныне, со Христом царствующе, молите,/ священный Ермолае со Ермиппом и Ермократом славным,/ яко да и наша враги победим/ и приимем от Царя всех, Бога, вечный живот/ и венец нетленный.

Богатство благодати и сыноположения/ стяжавше многими подвиги и добродетельми,/ ихже ради Христос всели души ваша в Небесная селения Своя,/ даровав благодать нетления и чудес мощем вашим,/ к нимже притекающе, вопием:/ радуйтеся, Онуфрие и Онисиме, отцы наши,/ ликов иночествующих похвало и удобрение.

Святая равноапостольная избраннице Христова, княгине Ольго,/ народ твой словесным и чистым Христовым млеком напоившая,/ молися Милостиву Богу,/ да прегрешений оставление/ подаст душам нашим.

Явися днесь пресветлая память твоя,/ святителю преблаженне Игнатие,/ в мире светло сияющи и являющи всем Божественное сияние.

Яко апостолом единонравнии/ и словенских стран учителие,/ Кирилле и Мефодие богомудрии,/ Владыку всех молите,/ вся языки словенския утвердити в Православии и единомыслии,// умирити мир и спасти души наша.

Агница Твоя, Иисусе, Ирина/ зовет велиим гласом:/ Тебе, Женише мой, люблю,/ и, Тебе ищущи, страдальчествую,/ и сраспинаюся, и спогребаюся Крещению Твоему,/ и стражду Тебе ради,/ яко да царствую в Тебе, и умираю за Тя,/ да и живу с Тобою,/ но яко жертву непорочную приими мя,/ с любовию пожершуюся Тебе.// Тоя молитвами, яко Милостив, спаси души наша.

Днесь вера Христова утверждается камнем веры,/ и ликовствует в веселии Иоппия,/ псаломски славословят Жизнодавца Сына Божия вернии,/ видяще совершаемо велие чудо:/ первоверховный апостол глаголет,/ и умершая востает от гроба,/ юже Низложитель смерти дарует Церкви,/ да украшаются во образ ея добродетельми люди./ Приидите убо, христиане,/ принесем ко святей моления наша:/ блаженная Тавифо и милосердная,/ вознеси наша воздыхания Пресвятей Троице/ и молися со дерзновением,/ да сынове Света Превечнаго будем,/ да сподобимся Божия милости,/ да пребываем в любви Божественней,/ и да царствует мир во вселенней.

Волнений множество невлажно преходя,/ безплотныя враги струями слез твоих погрузил еси,/ Богомудре Евфимие преподобне,/ тем и чудес дар приял еси,/ моли непрестанно о всех нас.

Отечества, преподобне, и всего мирскаго мятежа уклонитися возжелел еси,/ и, в пустыню вселився,/ тамо во блаженнем безмолвии жестокое житие показал еси,/ и чада послушания и смирения в нем возрастил еси./ Сего ради, дерзновение стяжав ко Святей Троице,/ еже молитися, Богоблаженне, о нас, чадех своих, ихже собрал еси,/ и о всех правоверных, да зовем ти:/ радуйся, отче Мартирие, безмолвия пустыннаго любитель.

Блага Небесная ради дел твоих стяжавый,/ благости тезоимените, Агафоне,/ моли Благаго Господа, молим тя тепле,/ яко да не лишит нас вечных благ Своих.

Агнцу Пречистому и Пастырю последуя,/ агнице словесная Татиано,/ мысленных зверей не убоялася еси, / но знамением крестным вооружившися,/ до конца тех низложила еси,/ и вошла еси в Небесную ограду,/ идеже помяни и нас, мученице Христова многомудрая.