Текст акафиста утвержден решением
Священного Синода от 26 декабря 2019 года (журнал № 163).
Конда́к 1
Избра́нный прее́мниче благода́ти ста́рчества О́птинскаго, в годи́ну гоне́ний лю́тых кро́ткий за ве́ру Правосла́вную стра́дальче, гра́ду Караганде́ богодарова́нный свети́льниче и всея́ страны́ Казахста́нския неусы́пный храни́телю, Це́ркве Ру́сския похвало́ и всех христоимени́тых люде́й ра́дование, ублажа́ем по́двиги твоя́ и с любо́вию вопие́м ти: Ра́дуйся, преподо́бне о́тче Севастиа́не, ве́ры Правосла́вныя испове́дниче.
И́кос 1
А́нгелов Творе́ц в после́дняя времена́ показа́ тя, преподо́бне о́тче, ра́вна А́нгелом невеще́ственным твои́м житие́м, священнотаи́нника же благода́ти, бу́дущая я́ко настоя́щая прозира́юща, и испове́дника тве́рда, гоне́ния бо и муче́ния за Христа́ претерпе́л еси́; те́мже воспева́ем тебе́ сицева́я:
Ра́дуйся, роди́телей благочести́вых о́трасле благоуха́нная;
ра́дуйся, изде́тска благода́тию Ду́ха Свята́го просвеще́нный.
Ра́дуйся, благоче́стию роди́тельскому измла́да поревнова́вый;
ра́дуйся, во о́трочестве ко ста́рцу О́птинскому Амвро́сию на благослове́ние приведе́нный.
Ра́дуйся, притру́дное и́ноческое житие́ вседу́шне возлюби́вый;
ра́дуйся, храни́ти чи́сте за́поведи Бо́жия измла́да себе́ положи́вый.
Ра́дуйся, от ю́ности твоея́ вся ми́ра сего́ кра́сная Бо́га ра́ди презре́вый;
ра́дуйся, во оби́тель О́птинскую ста́рческаго ра́ди наставле́ния прише́дый.
Ра́дуйся, во́ли своя́ всесоверше́нное отверже́ние показа́вый;
ра́дуйся, наста́вником духо́вным смире́нно себе́ покори́вый.
Ра́дуйся, преподо́бнаго Ио́сифа кро́ткий учениче́ и послу́шниче;
ра́дуйся, ста́рца богоно́снаго Некта́рия сподви́жниче и сотаи́нниче.
Ра́дуйся, преподо́бне о́тче Севастиа́не, ве́ры Правосла́вныя испове́дниче.
Конда́к 2
Ви́дя преди́вный Некта́рий, я́ко кро́тости ра́ди твоея́ и смире́ния дарова́ ти Небе́сный Дарода́тель благо́дать прозре́ния духо́внаго, прее́мника своего́ тя нарече́, «ле́то» имену́я, милосе́рден бо к стра́ждущим яви́лся еси́; те́мже науча́емся всех благи́х Промысли́телю пе́ти: Аллилу́иа.
И́кос 2
Ра́зум благода́тию Ду́ха Свята́го просвеще́н име́я, ева́нгельски Бо́га возлюби́л еси́, су́етную же сла́ву мирску́ю оста́вль, О́птинския при́стани дости́гл еси́, иде́же после́довал еси́ Христу́ со духо́вными наста́вники твои́ми, житию́ по́стническому прилежа́ во смире́нии; сего́ ра́ди ве́рнии воспева́ем ти:
Ра́дуйся, те́сный и приско́рбный путь па́че простра́ннаго возлюби́вый;
ра́дуйся, многомяте́жие ми́ра ле́стнаго презре́вый.
Ра́дуйся, я́ко боголюбе́зную чистоту́ душе́вную и теле́сную сохрани́л еси́;
ра́дуйся, я́ко посто́м и моли́твою тле́нная на нетле́нная премени́л еси́.
Ра́дуйся, я́ко по́стным воздержа́нием плоть твою́ ду́хови покори́л еси́;
ра́дуйся, я́ко послуша́нием и безмо́лвием стра́сти душе́вныя умертви́л еси́.
Ра́дуйся, я́ко слеза́ми покая́ния зе́млю се́рдца твоего́ напои́л еси́;
ра́дуйся, я́ко земна́я отри́нув, ум твой к Небе́сным возве́л еси́.
Ра́дуйся, я́ко сладча́йшее и́мя Иису́сово во уме́ твое́м при́сно носи́л еси́;
ра́дуйся, я́ко Святы́х Святе́йшим Сло́вом, Христо́м, Преве́чнаго Бо́га Отца́ позна́л еси́.
Ра́дуйся, я́ко благода́ть Уте́шителя чистото́ю се́рдца твоего́ стяжа́л еси́;
ра́дуйся, я́ко си́лу прозре́ния и ста́рчества от Бо́га прия́л еси́.
Ра́дуйся, преподо́бне о́тче Севастиа́не, ве́ры Правосла́вныя испове́дниче.
Конда́к 3
Си́лою благода́ти Бо́жия ста́рцы святи́и О́птинстии вожда́ху тя те́сным путе́м жития́ и́ноческаго, да и жре́бий па́стырский и по́двиг испове́дания Христа́ Распя́таго и Воскре́сшаго по́слежде восприи́меши, Ему́же во всем житии́ твое́м воспева́л еси́: Аллилу́иа.
И́кос 3
Имы́й в се́рдце твое́м ве́ру тве́рду, наде́жду же несумне́нну и любо́вь и́стинну ко Христу́ Бо́гу на́шему, егда́ воздвиго́ша богобо́рнии гоне́ние на Це́рковь Госпо́дню, смире́нне и со тре́петом свяще́нства дар чрез возложе́ние рук архиере́йских прия́л еси́, да спасу́тся от злосмра́днаго безбо́жия ги́бнущии; те́мже воспису́ем ти такова́я:
Ра́дуйся, Христу́, До́брому Па́стырю, усе́рдне послужи́вый;
ра́дуйся, священнотаи́нниче Христо́в, дара́ми Ду́ха Свята́го просия́вый.
Ра́дуйся, ду́шу твою́ за слове́сныя о́вцы Госпо́дни полага́вый;
ра́дуйся, путь спаси́тельный взыску́ющим Ца́рствия пропове́давый.
Ра́дуйся, к го́рнему Иерусали́му лю́дем вождю́ богому́дрый;
ра́дуйся, во благоче́стии тружда́ющимся наста́вниче богодарова́нный.
Ра́дуйся, обурева́емым страстьми́ грехо́вными до́брый ко́рмчий;
ра́дуйся, немощны́м и неиску́сным учи́телю терпели́вый.
Ра́дуйся, изнемога́ющим от уны́ния и печа́ли благода́тное утеше́ние;
ра́дуйся, безпо́мощным скоропослу́шливый помо́щниче.
Ра́дуйся, чернори́зцем преди́вный оте́ц и ста́рец прозорли́вый;
ра́дуйся, уста́вов О́птинских храни́телю ре́вностный.
Ра́дуйся, преподо́бне о́тче Севастиа́не, ве́ры Правосла́вныя испове́дниче.
Конда́к 4
Бу́ри гоне́ний лю́тых, безбо́жною вла́стию воздвиза́емыя, не убоя́вся, со все́ми новому́ченики и испове́дники Це́ркве Ру́сския и́го на себе́ благо́е Христо́во подъя́л еси́ и суро́вых степе́й Казахста́нских дости́гл еси́, иде́же безчи́сленное мно́жество страда́лец безви́нных го́рькою сме́ртию сконча́шася; о и́хже упокое́нии А́гнцу Бо́жию, о́тче благосе́рде, моли́твы приноси́л еси́, надгро́бное рыда́ние творя́ песнь: Аллилу́иа.
И́кос 4
Слы́ша, я́ко по всей земли́ Ру́сстей ча́да церко́вная за ве́ру оте́ческую Православную смерть лю́тую и жесто́кая гоне́ния прие́млют, смире́нне в путь ско́рбный поте́кл еси́ и зи́му го́рькую, и пусты́нную тяготу́ ле́тнюю, и я́рость о́гненную муче́ний узи́лищных терпе́нием твои́м препобеди́л еси́, сла́дости духо́внаго блаже́нства ве́чнаго вкуси́в; сего́ ра́ди вопие́м ти сицева́я:
Ра́дуйся, нището́ю духо́вною Ца́рства Небе́снаго насле́дивый;
ра́дуйся, пла́чем о гресе́х утеше́ние Христо́во прие́мый.
Ра́дуйся, я́ко а́лчбою и жа́ждею пра́вды Бо́жия нетле́нныя пи́щи Небе́сныя насы́тился еси́;
ра́дуйся, я́ко ми́лостию е́же к бли́жним сострада́ния ми́лость Бо́жию восприя́л еси́.
Ра́дуйся, во страда́ниих твои́х чи́стым се́рдцем Бо́га узре́вый;
ра́дуйся, вражду́ющия умиротворя́яй, те́мже и сын Бо́жий нарече́нный.
Ра́дуйся, изгна́нием пра́вды ра́ди Ца́рства Небе́снаго приобщи́выйся;
ра́дуйся, в поноше́нии и злосло́вии от нечести́вых во Христа́ облеки́йся.
Ра́дуйся, Боже́ственному Промышле́нию себе́ коне́чне вручи́вый;
ра́дуйся, во изгна́нии от земна́го Оте́чества Ио́сифу прекра́сному подража́вый.
Ра́дуйся, в терпе́нии боле́зней и скорбе́й И́овлеву кре́пость показа́вый;
ра́дуйся, в кро́тком терпе́нии гоне́ний Дави́дово смире́ние яви́вый.
Ра́дуйся, преподо́бне о́тче Севастиа́не, ве́ры Правосла́вныя испове́дниче.
Конда́к 5
Боготе́чная звезда́, О́птинскими ста́рцы возжже́нная, яви́лся еси́, о́тче Севастиа́не досточу́дне: умо́м бо чи́стым, се́рдцем же смире́нным и душе́ю кро́ткою слу́жбу Бо́гу принося́, бе́ды претерпе́л еси́, и гоне́ния, и боле́зни испове́дания ра́ди Боже́ственныя И́стины, ю́же житие́м и словесы́ твои́ми всем во у́зах и изгна́нии су́щим явля́л еси́, немощны́я укрепля́я и ве́рныя воздвиза́я благода́рне пе́ти Бо́гу: Аллилу́иа.
И́кос 5
Ви́девше у́зницы кро́тость и любо́вь твою́, удивля́хуся кра́йнему терпе́нию твоему́. Мы же, ве́дяще многотру́дная стра́дания твоя́ и боле́зни, ублажа́ем тя, апо́стольски во узи́лищи благовести́вшаго, и помраче́нныя смы́слы челове́ков просвети́вшаго, и и́же пре́жде диа́волом уловле́нныя ко Христу́ приве́дшаго, и благода́рне зове́м ти:
Ра́дуйся, кри́не благоуха́нный, в пусты́нех Караганди́нских процветы́й;
ра́дуйся, христоподража́тельными доброде́тельми изсо́хшия ду́ши исцели́вый.
Ра́дуйся, неяде́нием и жа́ждею надо́лзе в темни́це томи́мый;
ра́дуйся, в лише́ниих сих Христа́ тебе́ посо́бствующа обреты́й.
Ра́дуйся, николи́же по́стнаго воздержа́ния оста́вивый;
ра́дуйся, моли́твою к Бо́гу при́сно пламене́яй.
Ра́дуйся, благода́тию Ду́ха Свята́го неви́димо укрепля́емый;
ра́дуйся, си́лою ея́ лю́ди заблу́дшия от диа́вольския се́ти изыма́яй.
Ра́дуйся, ко еди́ней, Святе́й, Собо́рней и Апосто́льстей Це́ркви заблужда́ющия приводя́й;
ра́дуйся, покая́нию и́стинному и благочести́вой жи́зни их науча́яй.
Ра́дуйся, пре́жде бесово́м служи́вшия ко Христу́ обрати́вый и спасы́й;
ра́дуйся, тем плач неуте́шный духово́м зло́бы поднебе́сныя наведы́й.
Ра́дуйся, преподо́бне о́тче Севастиа́не, ве́ры Правосла́вныя испове́дниче.
Конда́к 6
Пропове́дует страна́ Казахста́нская, прие́мши в зе́млю свою́ то́ки крове́й новому́чеников Це́ркве Ру́сския, равноа́нгельное твое́ житие́, равноапо́стольныя тру́ды твоя́ и чуде́с мно́жество, преподо́бне ста́рче Севастиа́не испове́дниче, науча́ющи ве́рных Подвигополо́жнику Христу́ Иису́су пе́ти: Аллилу́иа.
И́кос 6
Возсия́ всем лю́дем казахста́нским от гра́да Караганды́ свети́льник доброде́телей твои́х, о́тче Севастиа́не: ты бо, я́ко о́блак све́тел и росоно́сен яви́лся еси́, пла́мень пра́ведно дви́жимаго на ны за грехи́ на́ша гне́ва небе́снаго утиша́я, изсо́хшая сердца́ на́ша оживля́я и плоды́ доброде́телей приноси́ти помога́я всем воспева́ющим ти такова́я:
Ра́дуйся, безпло́дную пусты́ню Казахста́нскую плода́ми доброде́телей твои́х облагоуха́вый;
ра́дуйся, град Караганду́, я́ко ме́сто страда́ний благочести́вых христиа́н се́рдцем возлюби́вый.
Ра́дуйся, во и́мя Пресвяты́я Богоро́дицы пречу́дный храм та́мо устро́ивый;
ра́дуйся, в том в па́мять скита́ О́птинскаго приде́л Крести́телю Иоа́нну воздви́гнувый.
Ра́дуйся, в хра́ме сем, я́ко в но́вей оби́тели О́птиной, вся благоле́пно учини́вый;
ра́дуйся, в моли́тве и ста́рчестем о душа́х попече́нии неле́стно подвиза́выйся.
Ра́дуйся, я́ко во дни и в нощи́ во бде́нии при́снем пребыва́л еси́;
ра́дуйся, я́ко мно́гия и́ноки и иере́и, от гони́телей разсе́янныя, на ме́сте сем собра́л еси́.
Ра́дуйся, я́ко миря́н мно́жество под благода́тный кров Цари́цы Небе́сныя приве́л еси́;
ра́дуйся, я́ко мона́хом наста́вник прему́дрый яви́лся еси́.
Ра́дуйся, я́ко и всему́ ста́ду твоему́ па́стырь и учи́тель предо́брый был еси́;
ра́дуйся, не я́ко госпо́дствуяй, но я́ко служа́й со обраще́нными тобо́ю пожи́л еси́.
Ра́дуйся, преподо́бне о́тче Севастиа́не, ве́ры Правосла́вныя испове́дниче.
Конда́к 7
Хотя́ Оте́чества Небе́снаго дости́гнути, а́ще и пе́рстною пло́тию обложе́н, оба́че дух твой моли́твою воскриля́л еси́ и, к Бо́гу умо́м твои́м восходя́, го́рния добро́ты зрел еси́ сла́ву, со все́ми А́нгельскими си́лами воспева́я Бо́гу: Аллилу́иа.
И́кос 7
Но́ваго тя граждани́на Иерусали́ма Го́рняго Вы́шний Царь показа́, ми́ра бо кра́сная вся, я́ко тле́нная, ни во что же вмени́л еси́, пусты́нное житие́ со ста́рцы равноа́нгельными предпочита́юща, и души́ одея́ние чистото́ю убели́в, и в ри́зу свяще́нства обле́кся, поноше́ния и гоне́ния Христа́ ра́ди с ра́достию претерпе́л еси́, зане́же украси́лся еси́ дара́ми Ду́ха преди́вными; отню́дуже ве́рнии научи́шася пе́ти ти:
Ра́дуйся, от ю́ности в зако́не Госпо́дни поуча́выйся;
ра́дуйся, во и́ночестем жити́и невеще́ственным чино́м уподо́бивыйся.
Ра́дуйся, духоно́сных ста́рцев О́птинских и всех преподо́бных слико́вниче;
ра́дуйся, добропобе́дным му́чеником и испове́дником Христо́вым соприча́стниче.
Ра́дуйся, Бо́жиих священнотаи́нников благогове́йный сослужи́телю;
ра́дуйся, страда́льцев безви́нных му́жественный предста́телю.
Ра́дуйся, па́стырю, ду́шу за ста́до твое́ положи́ти гото́вый;
ра́дуйся, мно́гия му́ки и злохуле́ния за Христа́ претерпе́вый.
Ра́дуйся, тве́рдое ве́ры испове́дание непрекло́нне яви́вый;
ра́дуйся, вся ве́рныя во благоче́стии изря́дне укрепи́вый.
Ра́дуйся, скорбьми́ мно́гими в ра́дость Го́спода вше́дый;
Ра́дуйся, ра́дость о́ную всем приходя́щим к тебе́ оби́льно подая́й.
Ра́дуйся, преподо́бне о́тче Севастиа́не, ве́ры Правосла́вныя испове́дниче.
Конда́к 8
Стра́нно чу́до бе, преподо́бне о́тче Севастиа́не, моли́тва твоя́, кро́тости и смире́ния испо́лнена: тоя́ бо све́том вы́ну озаря́емь, Христо́в ум стяжа́л еси́, неизглаго́ланная та́инства познава́я и бу́дущая прозира́я, всех же притека́ющих к тебе́ от бесо́вских нападе́ний свобожда́я и на путь и́стины наставля́я, вопию́щих к Бо́гу: Аллилу́иа.
И́кос 8
Весь жела́нием боже́ственным объя́т был еси́, свяще́нне, и в светоза́рныя дни Пасха́льнаго торжества́ богоно́сною душе́ю твое́ю в небе́сныя оби́тели возше́л еси́, иде́же Престо́лу Пресвяты́я Тро́ицы со все́ми святы́ми предстои́ши и слы́шиши от нас похва́льная сия́:
Ра́дуйся, от земна́го торжества́ Пасха́льнаго в ра́дость Па́схи ве́чныя восше́дый;
ра́дуйся, на земли́ всеконе́чне греху́ уме́рый и на Небеси́ нетле́нней жи́зни приобщи́выйся.
Ра́дуйся, я́ко Святы́х Святе́йшему Иису́су Сладча́йшему во сла́ве ве́чней предстои́ши;
ра́дуйся, я́ко о всех чту́щих па́мять твою́ пред Ним хода́тайствуеши.
Ра́дуйся, сугу́бую благода́ть от Христа́ прие́мый и́щущим спасе́ния помога́ти;
ра́дуйся, да́ра сподо́бивыйся неду́ги душе́вныя и теле́сныя врачева́ти.
Ра́дуйся, ми́лости Бо́жия струя́ неизсяка́емая;
ра́дуйся, ра́дости духо́вныя, тишины́ же и ми́ра исто́чниче неисчерпа́емый.
Ра́дуйся, све́тлый о́блаче, зной страсте́й грехо́вных утоля́яй;
ра́дуйся, росо́ благода́тная, сердца́ ве́рных ороша́ющая и веселя́щая.
Ра́дуйся, свети́льниче, све́том доброде́телей в нощи́ ми́ра сего́ нам при́сно сияя́й;
ра́дуйся, гро́зде виногра́да Христо́ва, благода́тию Ду́ха Всесвята́го пита́яй нас и веселя́й.
Ра́дуйся, преподо́бне о́тче Севастиа́не, ве́ры Правосла́вныя испове́дниче.
Конда́к 9
Вся́кое естество́ А́нгельское удиви́ся твоему́ пресла́вному в Го́рняя восхожде́нию, пресве́тлыя бо оби́тели небе́сныя прия́ша тя, Севастиа́не прозорли́ве, я́ко но́ваго насе́льника, иде́же с безпло́тными Силами и всеми святы́ми водворя́ешися и лику́еши, ко Го́споду взыва́я: Аллилу́иа.
И́кос 9
Вети́и суему́дреннии послу́шаша гла́са человекоуби́йцы су́ща искони́ и отца́ лжи вся́кия диа́вола, и звере́м ди́виим подо́бяся, устреми́шася на Неве́сту чи́стую Христо́ву, Це́рковь Правосла́вную, ея́же яви́ тя Подвигополо́жник тогда́ свети́льника и изря́дна испове́дника; те́мже воспева́ем ти любо́вию:
Ра́дуйся, муче́ний за испове́дание и́стиннаго Бо́га не устраши́выйся;
ра́дуйся, ду́шу твою́ за ве́ру Правосла́вную положи́ти не отреки́йся.
Ра́дуйся, преще́ний безбо́жныя вла́сти не убоя́выйся;
ра́дуйся, к позна́нию Бо́га во изгна́нии твое́м и мучи́телей привести́ потща́выйся.
Ра́дуйся, изсо́хшую серде́ц их пусты́ню сле́зною моли́твою твое́ю напои́вый;
ра́дуйся, кро́тостию и терпе́нием семена́ Ева́нгельская в ду́ши их посе́явый.
Ра́дуйся, гро́зныя ту́чи те́мных их помысло́в си́лою моли́тв твои́х разсе́явый;
ра́дуйся, к покая́нию и сокруше́нию серде́чному тех приводи́вый.
Ра́дуйся, врата́ Ца́рствия Небе́снаго тем отверза́вый;
ра́дуйся, водо́ю от кла́дязя тех напоя́я, во́ду нетле́нную им подава́вый.
Ра́дуйся, от него́же у́зницы пи́щу и оде́жду щед́ре приима́ху;
ра́дуйся, его́же и ско́ти в зи́мний мраз тепло́м свои́м изря́дне согрева́ху.
Ра́дуйся, преподо́бне о́тче Севастиа́не, ве́ры Правосла́вныя испове́дниче.
Конда́к 10
Спасе́ния иски́й, после́довал еси́ Влады́це Христу́, испове́дниче святы́й Севастиа́не, отве́ргся себе́ и взем кре́ст свой, я́коже Госпо́дь рече́; те́мже смире́ния путе́м пости́гл еси́ высоту́ Небе́сную, Бо́гови любо́вию поя́: Аллилу́иа.
И́кос 10
Сте́ну несокруши́му обрето́ша тя христоимени́тии лю́дие земли Русския, по кончи́не бо сла́вней твое́й повсю́ду чудеса́ соверша́еши изря́дна, я́ко от Бо́га прие́мь вене́ц нетле́нен и сла́ву ве́чну; те́мже вси ве́рнии благода́рне воспева́ют тебе́ си́це:
Ра́дуйся, Христа́, Бо́жию Си́лу и Прему́дрость, тве́рдо пред челове́ки испове́давый;
ра́дуйся, я́ко и Госпо́дь испове́да тя пред Отце́м Свои́м Небе́сным и святы́ми А́нгелы.
Ра́дуйся, блиста́нием Трисо́лнечнаго Све́та ны́не осия́нный;
ра́дуйся, сокро́вище моще́й твои́х в насле́дие ча́дом оста́вивый.
Ра́дуйся, я́ко мо́щи твоя́ вся́кия ско́рби и боле́зни исцеля́ют;
ра́дуйся, я́ко ты́я в печа́ли су́щим и смуще́нии весе́лие прети́хое быва́ют.
Ра́дуйся, я́ко ты́я Воскресе́ние всео́бщее немо́лчно возвеща́ют;
ра́дуйся, я́ко от моще́й твои́х уя́звленнии беси́ отбега́ют.
Ра́дуйся, ча́ше, дары́ Бо́жия преизоби́льно излива́ющая;
ра́дуйся, сосу́де, ми́ро цельбоно́сное боля́щим источа́яй.
Ра́дуйся, свети́льниче, су́щих во тьме и се́ни сме́ртней све́том Христо́вым озаря́ющий;
ра́дуйся, кади́ло, фимиа́м моли́тв богоприя́тных при́сно вознося́щее.
Ра́дуйся, преподо́бне о́тче Севастиа́не, ве́ры Правосла́вныя испове́дниче.
Конда́к 11
Пе́ние благода́рственно Зижди́телю прино́сим, я́ко дарова́ тя всем и́щущим спасе́ния тве́рда засту́пника; те́мже, препо́добне Севастиа́не, ру́ку по́мощи нам ско́ро ниспосли́, и грехми́ при́сно погружа́емых из глубины́ губи́тельныя изведи́, и про́чее вре́мя жития́ в покая́нии сконча́ти сподо́би, да при́сно Бо́гови пое́м: Аллилу́иа.
И́кос 11
Светоза́рное свети́ло, заря́ми немерца́ющаго све́та Пресвяты́я Тро́ицы сия́ющее, всей земли́ Казахста́нстей яви́лся еси́, преди́вне, луча́ми доброде́телей твои́х тьму поги́бельную разгоня́я и теплото́ю богоприя́тных моли́тв твои́х сердца́ ве́рных согрева́я, и́же с любо́вию воспису́ют ти сицева́я:
Ра́дуйся, Казахста́нския страны́ благода́тное сокро́вище и украше́ние;
ра́дуйся, Руси́ Правосла́вныя ра́дование и утеше́ние.
Ра́дуйся, пу́стыни О́птинския благопло́дное прозябе́ние;
Ра́дуйся, гра́да Караганды́ покро́ве и удобре́ние.
Ра́дуйся, многотеку́щая реко́, сердца́ на́ша спаси́тельным уче́нием напоя́ющая;
ра́дуйся, в мо́ри многоразли́чных напа́стей погиба́ющим наде́жное приста́нище.
Ра́дуйся, злосмра́дие страсте́й от приходя́щих к тебе́ прогоня́яй;
ра́дуйся, от искуше́ний ми́ра, пло́ти и диа́вола хода́тайством твои́м свобожда́яй.
Ра́дуйся, нераска́янных гре́шников к соверше́нному покая́нию воздвиза́яй;
ра́дуйся, лука́вая по́лчища бесо́вская пресла́вне побежда́яй.
Ра́дуйся, ран грехо́вных врачу́ благоиску́снейший;
ра́дуйся, сия́нием благода́ти Бо́жия ду́ши на́ша озаря́ющий.
Ра́дуйся, преподо́бне о́тче Севастиа́не, ве́ры Правосла́вныя испове́дниче.
Конда́к 12
Благода́ть, от Бо́га ти да́нную, све́дуще, о́тче ми́лостивый, я́ко скоропослу́шлива тя приле́жно умоля́ем: вознеси́ дерзнове́нное моле́ние твое́ ко Престо́лу Тро́ицы Живонача́льныя, да сподо́бимся безпреткнове́нно преити́ от земли́ на Не́бо; моли́ же, свя́те, Всеблага́го Бо́га и о гра́де твое́м, и о святе́м хра́ме, его́же преподо́бническима рука́ма твои́ма созда́л еси́, и о хра́ме, в не́мже чудото́чныя мо́щи твоя́ почива́ют, да вси ве́рою, благогове́нием и стра́хом Бо́жиим воспева́ют Бо́гу: Аллилу́иа.
И́кос 12
Пою́ще ди́вная дела́ Бо́жия и промышле́ние Его́ о Це́ркви Ру́сстей, зрим О́птину пу́стынь, мно́гая ле́та в поруга́нии и разоре́нии бы́вшу, па́ки ны́не украси́вшуся и мо́щи цельбоно́сныя ста́рцев свои́х обре́тшу; град Караганда́ оби́тели сей свесели́тся, стяжа́ бо сокро́вище себе́, мо́щи еди́наго от собо́ра О́птинскаго; те́мже, чудя́щеся, с любо́вию тебе́, испове́дниче, вопие́м:
Ра́дуйся, Бо́га Отца́ Безнача́льнаго служи́телю избра́нный;
ра́дуйся, А́гнца Бо́жия Христа́ му́жественный испове́дниче.
Ра́дуйся, Бо́га Ду́ха Всесвята́го хра́ме нерукотво́рный;
ра́дуйся, честно́е Пресвяты́я Трои́цы носи́ло и похвале́ние.
Ра́дуйся, в невече́рнем дни Ца́рствия Бо́жия почива́яй;
ра́дуйся, трисвяту́ю песнь со А́нгелы и все́ми святы́ми воспева́яй.
Ра́дуйся, заря́ми о́гненными благода́ти Бо́жия сия́яй;
ра́дуйся, я́ко свети́ло светоза́рное Го́рняго Ца́рствия блиста́яй.
Ра́дуйся, све́том благода́ти всех чту́щих па́мять твою́ просвеща́яй;
ра́дуйся, рая́ Иису́сова дре́во чудото́чное, мног плод на по́льзу правосла́вным творя́щее.
Ра́дуйся, Виногра́да Христо́ва розго́ благопло́дная, пита́ющая нас и веселя́щая;
ра́дуйся, Свята́го Правосла́вия непоколеби́мый сто́лпе и кре́пкое утвержде́ние.
Ра́дуйся, преподо́бне о́тче Севастиа́не, ве́ры Правосла́вныя испове́дниче.
Конда́к 13
О́, преподо́бне о́тче Севастиа́не, ве́ры благочести́выя испове́дниче и кро́тости преди́вныя сокро́вище! Приими́ ны́не сие́ в похвалу́ твою́ от усе́рдия на́шего приноси́мое благодаре́ние, и дерзнове́нным твои́м хода́тайством испроси́ нам ве́ры непоро́чны соблюде́ние, ми́ра умире́ние, от гла́да и па́губы избавле́ние, грехо́в оставле́ние и блаже́нныя ве́чныя жи́зни насле́дие, да с тобо́ю и со все́ми святы́ми пое́м ра́достно: Аллилу́иа.[Се́й конда́к глаго́лется три́жды.][Далее повторяем 1‑е икос и кондак:]И́кос 1
А́нгелов Творе́ц в после́дняя времена́ показа́ тя, преподо́бне о́тче, ра́вна А́нгелом невеще́ственным твои́м житие́м, священнотаи́нника же благода́ти, бу́дущая я́ко настоя́щая прозира́юща, и испове́дника тве́рда, гоне́ния бо и муче́ния за Христа́ претерпе́л еси́; те́мже воспева́ем тебе́ сицева́я:
Ра́дуйся, роди́телей благочести́вых о́трасле благоуха́нная;
ра́дуйся, изде́тска благода́тию Ду́ха Свята́го просвеще́нный.
Ра́дуйся, благоче́стию роди́тельскому измла́да поревнова́вый;
ра́дуйся, во о́трочестве ко ста́рцу О́птинскому Амвро́сию на благослове́ние приведе́нный.
Ра́дуйся, притру́дное и́ноческое житие́ вседу́шне возлюби́вый;
ра́дуйся, храни́ти чи́сте за́поведи Бо́жия измла́да себе́ положи́вый.
Ра́дуйся, от ю́ности твоея́ вся ми́ра сего́ кра́сная Бо́га ра́ди презре́вый;
ра́дуйся, во оби́тель О́птинскую ста́рческаго ра́ди наставле́ния прише́дый.
Ра́дуйся, во́ли своя́ всесоверше́нное отверже́ние показа́вый;
ра́дуйся, наста́вником духо́вным смире́нно себе́ покори́вый.
Ра́дуйся, преподо́бнаго Ио́сифа кро́ткий учениче́ и послу́шниче;
ра́дуйся, ста́рца богоно́снаго Некта́рия сподви́жниче и сотаи́нниче.
Ра́дуйся, преподо́бне о́тче Севастиа́не, ве́ры Правосла́вныя испове́дниче.
Конда́к 1
Избра́нный прее́мниче благода́ти ста́рчества О́птинскаго, в годи́ну гоне́ний лю́тых кро́ткий за ве́ру Правосла́вную стра́дальче, гра́ду Караганде́ богодарова́нный свети́льниче и всея́ страны́ Казахста́нския неусы́пный храни́телю, Це́ркве Ру́сския похвало́ и всех христоимени́тых люде́й ра́дование, ублажа́ем по́двиги твоя́ и с любо́вию вопие́м ти: Ра́дуйся, преподо́бне о́тче Севастиа́не, ве́ры Правосла́вныя испове́дниче.
Моли́тва
О́, пречестна́я и свяще́нная главо́ и благода́ти Свята́го Ду́ха испо́лненная, Спа́сoво со Отце́м обита́лище, ста́рцев О́птинских учениче́ и прее́мниче, гра́да Караганды́ светле́йшее украше́ние, Казахста́нския страны́ бoгодарова́нный моли́твенниче, Це́ркви Ру́сския па́стырю богопросла́вленный, си́рым и вдови́цам засту́пниче, немощны́м врачу́ безме́здный, пра́вило ве́ры и благоче́стия, преподо́бных сожи́телю и му́чеников соприча́стниче, богоно́сне о́тче наш Севастиа́не досточу́дне! К тебе́ усе́рдно прибега́юще, моле́ние те́плое прино́сим: от сокро́вищницы твоея́ пода́ждь и на́шему убо́жеству; смире́нием твои́м на́шу горды́ню низложи́; безстра́стием на́ша стра́сти попали́; бо́дрствованием на́вык ле́ности от нас отжени́; сле́зными то́ки на́ше нечу́вствие пробуди́; бде́нием от нераде́ния нас возста́ви; моли́твами и в нас пла́мень моли́твы возжзи́; любо́вию нас братолю́бны сотвори́; пода́ждь же нам дух кро́тости и смире́ния, дух чистоты́ и благоче́стия; от страсте́й многонеду́жия нас свободи́ и ко и́стинному покая́нию приведи́. Ты бо во уме́ твое́м непреста́нно име́л еси́ на Кресте́ Распе́ншагося за нас Сы́на Бо́жия, Того́ сладча́йшее И́мя во уме́ и в се́рдце непреста́нно име́ти и нас научи́, да любо́вию Тому́ пламене́юще, стра́шный о́ный день Су́дный сре́тити угото́вимся, и в Ца́рствие Небе́сное вни́ти с тобо́ю сподо́бимся, сла́вити и воспева́ти Триеди́ную держа́ву Бо́га на́шего: Отца́ и Сы́на и Ду́ха Свята́го во ве́ки. Ами́нь.