Конда́к 1.
Избра́нный Бо́гом на служе́ние проро́ческое, по́двигами твои́ми Творца́ и Го́спода просла́вивый, про́мысл благи́й о спасе́нии ро́да челове́ческаго яви́вый, свя́тостию жития́ твоего́ просия́вый; псалмы́ твои́ми хвалу́ Царю́ Небе́сному возда́вый; похва́льная воспису́ем ти́, пресла́вный царю́ Дави́де. Ты́ же, я́ко име́яй дерзнове́ние ве́лие у Милосе́рдаго Го́спода, предста́тельством твои́м небе́сным вы́ну помога́й на́м, да зове́м ти́:
Ра́дуйся, свя́те Дави́де, богоизбра́нный царю́ и всесла́вный проро́че.
И́кос 1.
А́нгелов Творе́ц избра́ тя́ от коле́на Иу́дина и до́ма Иесе́ова в цари́ наро́ду своему́ и благода́тию проро́ческою напо́лни тя́, да воспое́ши во псалме́х вели́чие, милосе́рдие и прему́дрость Созда́теля на́шего и про́мысла Его́ блага́го о спасе́нии на́шем о́браз и обетова́ние яви́ши. Мы́ же, дивя́щеся таково́му о тебе́ благоизволе́нию Бо́жиему, вопие́м ти́ си́це:
Ра́дуйся, избра́нниче Бо́жий, при́сный о душа́х на́ших моли́твенниче преди́вный; ра́дуйся, по Сло́ву Вседержи́теля в прароди́тели по пло́ти Сы́ну Бо́жию приугото́ванный.
Ра́дуйся, Изра́иля ве́тхаго благослове́ние; ра́дуйся, Це́ркви Христо́вой, Изра́иля но́ваго, моли́твенное предста́тельство.
Ра́дуйся, все́х приходя́щих к тебе́ благода́тию озаря́ющий; ра́дуйся, благи́я жела́ния на́ша исполня́ющий.
Ра́дуйся, вся́кую печа́ль от на́с удаля́ющий; ра́дуйся, все́х чту́щих па́мять твою́ пред Бо́гом помина́ющий.
Ра́дуйся, свя́те Дави́де, богоизбра́нный царю́ и всесла́вный проро́че.
Конда́к 2.
Ви́дя Прему́дрый Госпо́дь на́ш нече́стия царя́ Сау́ла, повеле́ проро́ку своему́ Саму́илу пойти́ в до́м отца́ твоего́ Иесе́я и пома́зати еди́наго от осьми́ сыно́в его́ в но́вые ца́рие Изра́ильстии; те́м же, свя́те Дави́де, пома́зания еле́я от руки́ Провозве́стника Бо́жия восприя́вше, воспе́л еси́ Всеми́лостивому Бо́гу на́шему: Аллилу́иа.
И́кос 2.
Ра́зумом богоблагода́тным просвеще́н бы́л еси́, прехва́льне Дави́де, от ю́ности твоея́, я́ко зако́н Госпо́день от проро́ка Моисе́я Изра́илю да́нный усе́рдно исполня́л еси́, дни́ о́трочества твоего́ во труде́х и моли́твах проводи́л еси́, созерца́я вели́чие творе́ния Бо́жия, хвалу́ Созда́телю возноси́л еси́. Мы́ же, воспева́я ны́не таково́е благоче́стие и благоразуме́ние твое́, взыва́ем ти́ си́це:
Ра́дуйся, от младе́нчества се́рдце твое́ Го́сподеви преда́вый; ра́дуйся, от ю́ности ра́зум тво́й Бо́жиею прему́дростию напита́вый.
Ра́дуйся, от созерца́ния творе́ния у́м тво́й ко Творцу́ возноси́вый; ра́дуйся, красоту́ и вели́чие Бо́жия творе́ния воспе́вый.
Ра́дуйся, отцу́ земно́му доброче́стно послужи́вый; ра́дуйся, от дне́й о́трочества твоего́ Царю́ Небе́сному угоди́вый.
Ра́дуйся, о ча́дех на́ших ко Го́споду те́плое моле́ние; ра́дуйся, роди́телей и наста́вников в благоче́стии утвержде́ние.
Ра́дуйся, свя́те Дави́де, богоизбра́нный царю́ и всесла́вный проро́че.
Конда́к 3.
Си́ла и благода́ть Всесвята́го Ду́ха чуде́сно помога́ше ти́, всехва́льне Дави́де, во все́х благи́х начина́ниях твои́х; мно́гое вели́кое и сла́вное дарова́но бы́сть тебе́ от Всемогу́щаго Бо́га: да́р пе́сенный, высо́кия доброде́тели, земно́е вели́чие и небе́сное увенча́ние, на враги́ и супоста́ты одоле́ние, и любы́ ве́лия наро́да к тебе́; ты́ же за вся́ сия́ благодея́ния воспева́л еси́ Вседержи́телю: Аллилу́иа.
И́кос 3.
Иму́ще смуще́ние ве́лие от ду́ха зла́го воздвиза́емое, Сау́л ца́рь повеле́ отыска́ти му́жа в игре́ на гу́слех иску́снаго, дабы́ о́ный умири́л е́сть ду́х царе́в, благода́ти не иму́щий. Ты́ же, уго́дниче Бо́жий, по повеле́нию царе́ву ста́да своя́ оста́вил еси́, в черто́зи ца́рстии всели́лся еси́ и утеше́ние игро́ю свое́ю царю́ изра́ильскому приноси́л еси́. Мы́ же, таково́е твое́ благоче́стие и иску́сство похваля́юще, зове́м ти́ такова́я:
Ра́дуйся, во́ле царя́ земна́го вня́вый и ве́рно ему́ послужи́вый; ра́дуйся, ско́рби и неду́ги его́ душе́вныя благода́тно исцеля́вый.
Ра́дуйся, послуша́нию и́стинному на́с науча́яй; ра́дуйся, ду́ха зло́бы и бу́йства от на́с удаля́яй.
Ра́дуйся, страстьми́ одержи́мых от поги́бели спаса́ющий; ра́дуйся, от искуше́ний бесо́вских и паде́ний грехо́вных избавля́ющий.
Ра́дуйся, сострада́ти стра́ждущим на́с науча́ющий; ра́дуйся, теплото́ю любви́ твоея́ на́с согрева́ющий.
Ра́дуйся, свя́те Дави́де, богоизбра́нный царю́ и всесла́вный проро́че.
Конда́к 4.
Бу́ря превели́каго наше́ствия филистимля́нскаго потрясе́ зе́млю Изра́илеву, оба́че не возмо́же поколеба́ти ве́ры твоея́, свя́те Дави́де, во Всемогу́щаго Го́спода. Те́м же, ве́рою ве́лиею твое́ю укрепля́ем, не убоя́лся еси́ идти́ супроти́в Голиа́фа, гро́знаго воево́ды филистимля́нскаго, и победи́вши о́наго, возблагодари́л еси́ Творца́ на́шего. Лю́дие же изра́ильстии о побе́де твое́й ра́дующеся, воспе́ша Бо́гу: Аллилу́иа.
И́кос 4.
Слы́ша, прему́дре Дави́де, от люде́й изра́илевых пе́ние хвале́бное: “Сау́л ты́сячи победи́, Дави́д же деся́тки ты́сяч” смути́лся еси́ зело́ и в смире́нии се́рдца твоего́ гла́сом вну́тренним возноси́л еси́ хвалу́ Вседержи́телю. Мы́ же, побе́ду твою́, ве́рою соверше́нную, и смире́ние твое́ восхваля́юще, вопие́м ти́ си́це:
Ра́дуйся, все́ упова́ние твое́ на Го́спода возлага́вый; ра́дуйся, я́ко вы́ну Го́спода пред собо́ю зре́вый.
Ра́дуйся, земли́ своея́ му́жественный защи́тителю; ра́дуйся, наве́тов вра́жиих му́дрый разори́телю.
Ра́дуйся, любо́вию и благодаре́нием от наро́да твоего́ почте́нный; ра́дуйся, от сы́на царе́ва, Ионафа́на благочести́ваго, дру́жбою одаре́нный.
Ра́дуйся, от царя́ Сау́ла, за́висти ра́ди, гоне́ния претерпе́вый; ра́дуйся, от Го́спода си́л вене́ц за ве́ру и благоче́стие прие́мый.
Ра́дуйся, свя́те Дави́де, богоизбра́нный царю́ и всесла́вный проро́че.
Конда́к 5.
Боже́ственным Ду́хом просвети́ся се́рдце твое́, свя́те Дави́де, егда́ в гоне́нии Сау́ловом супроти́в тебя́ воздви́гнутом, мно́гия ско́рби с кро́тостию и смире́нием претерпе́л еси́, миролю́бия и любви́ ко враго́м свои́м преиспо́лнился еси́ и все́ упова́ние твое́ на всеблага́го Го́спода возложи́вши, непреста́нно воспева́л еси́ Вседержи́телю: Аллилу́иа.
И́кос 5.
Ви́дя оча́ми ве́ры се́рдце Сау́лово супроти́в тебя́ вся́ческих зо́л испо́лненное, не возропта́л еси́, свя́те Дави́де, на царя́ неразу́мнаго, но все́ упова́ние свое́ на Го́спода Бо́га Твоего́ возлага́я, невреди́м пребы́л еси́. Мы́ же, доброде́тели твоя́ высо́кия и ве́лию ве́ру твою́ похваля́юще, зове́м ти́:
Ра́дуйся, живы́й в по́мощи Вы́шняго, Десни́цею Его́ сохраня́емый; ра́дуйся, крила́ми а́нгельскими на все́х путе́х твои́х огражда́емый.
Ра́дуйся, Бо́гом вразумля́емый и вспомоществу́емый; ра́дуйся, ско́рби и испыта́ния в бога́тстве ду́ха претерпе́вый.
Ра́дуйся, в терпе́нии и смире́нии на́с укрепля́ющий; ра́дуйся, дру́г дру́га тяготы́ носи́ти на́с науча́ющий.
Ра́дуйся, на ми́лость Госпо́дню упова́ти наставля́ющий; ра́дуйся, за вся́ Творца́ благодари́ти подвиза́ющий.
Ра́дуйся, свя́те Дави́де, богоизбра́нный царю́ и всесла́вный проро́че.
Конда́к 6.
Пропове́дника до́брых де́л яви́л еси́ себе́, богоблаже́нне проро́че Дави́де, ты́ бо ревну́я о чистоте́ ве́ры, потща́лся еси́ труды́ мно́гими лука́выя нра́вы и обы́чаи нечести́вых сыно́в испра́вити, богове́дению и благоче́стию науча́л еси́ бли́жних твои́х, па́че же о́бразом жития́ своего́ наставля́я на пу́ть спасе́ния, да вопию́т вси́ Спаси́телю Бо́гу: Аллилу́иа.
И́кос 6
Возсия́л еси́ па́че со́лнца не то́кмо земли́ изра́илевой, но и вре́менем гряду́щим, егда́ во гра́де Хевро́не при стече́нии двана́десяти коле́н изра́илевых пома́зан бы́л еси́ на ца́рство и сла́вою ве́лиею и оби́льным Бо́жиим благослове́нием преукраси́лся еси́. Мы́ же, сему́ дивя́щеся, воспева́ем ти́ си́це:
Ра́дуйся, пома́занниче Госпо́день благогове́йный; ра́дуйся, Бо́гом на служе́ние ца́рское призва́нный.
Ра́дуйся, служе́ние сие́ со стра́хом Бо́жиим соверши́вый; ра́дуйся, могу́щество и сла́ву держа́вы твоея́ укрепи́вый.
Ра́дуйся, о бла́ге наро́да попече́ние ве́лие име́вый; ра́дуйся, мно́гия ско́рби за лю́ди своя́ претерпе́вый.
Ра́дуйся, ми́лостивый и кро́ткий повели́телю; ра́дуйся, стра́н и наро́дов христиа́нских небе́сный покрови́телю.
Ра́дуйся, свя́те Дави́де, богоизбра́нный царю́ и всесла́вный проро́че.
Конда́к 7.
Хотя́й благоче́стно и пра́ведно управля́ти наро́дом изра́ильским, разуме́л еси́, я́ко не то́кмо путие́ держа́вы твоея́ но и “се́рдце царе́во в ру́це Госпо́дней е́сть”, во все́м вы́ну упова́ние на Бо́га возлага́л еси́, ве́дая, я́ко то́кмо Бо́гом “ца́рие ца́рствуют и прави́телие узаконя́ют пра́вду”. Сего́ ра́ди возвели́чи тя́ Госпо́дь па́че ины́х сыно́в изра́илевых и сопричте́ к ли́ку ве́лиих святы́х Свои́х. Мы́ же, сия́ помина́юще, вопие́м Просла́вльшему тя́ Го́споду: Аллилу́иа.
И́кос 7.
Но́ваго Но́я, строи́теля спасе́ния и созида́теля ца́рствия изра́ильскаго, яви́ тя́ Госпо́дь, егда́ по во́ле Бо́жией, собра́л еси́ во́йско на го́ру Сио́нскую и гра́д Иерусали́м присовокупи́л еси́ к держа́ве твое́й. И бы́сть гра́д се́й сто́льным градо́м ца́рствия твоего́ и со дне́й те́х почи́ла ве́лия благода́ть Бо́жия на ме́сте се́м. Мы́ же, тебе́, царю́ боголюби́вому, таковы́я похвалы́ от усе́рдия на́шего прино́сим:
Ра́дуйся, царю́ святы́й, вы́ну во́лю Госпо́дню твори́вый; ра́дуйся, сосу́де домострои́тельства Бо́жия преди́вный.
Ра́дуйся, Бо́гом зва́нный на дела́ вели́кия и пресла́вныя; ра́дуйся, во́ине всечестны́й и воево́до доброхва́льный.
Ра́дуйся, досто́йно покланя́тися Творцу́ науча́ющий; ра́дуйся, Бо́га люби́ти и во́лю Его́ твори́ти на́с подвиза́ющий.
Ра́дуйся, ходи́ти в за́поведех Госпо́дних наставля́ющий; ра́дуйся, от сете́й вра́жиих ве́рных избавля́ющий.
Ра́дуйся, свя́те Дави́де, богоизбра́нный царю́ и всесла́вный проро́че.
Конда́к 8.
Стра́нствие земно́е соверша́я, на Созда́теля упова́ние твое́ возложи́л еси́, а́ще и прикосну́лся еси́ к скве́рне грехо́вней, покая́нием ду́шу твою́ обнови́л и воскреси́л еси́. Мы́ же мо́лим тя́, свя́те Дави́де, моли́ся и ны́не Всеще́дрому Бо́гу, да ниспо́слет благода́ть покая́ния все́м заблу́ждшим ча́дом Небе́снаго Отца́ и от греха́ к оте́ческому до́му восте́кших, сподо́бит ку́пно с тобо́ю во ве́ки благода́рственно пе́ти Ему́: Аллилу́иа.
И́кос 8.
Ве́сь испо́лнен бы́сть Ду́ха Свята́го проро́к Нафа́н, егда́ прише́дши в черто́ги твоя́, во гресе́х твои́х тя́ обличи́л е́сть. Ты́ же, богодухо́вным его́ словесе́м внима́я, го́рькими слеза́ми твои́ми опла́кал еси́ злы́я дея́ния твоя́, вопия́: “Поми́луй мя́, Бо́же, по вели́цей ми́лости Твое́й и по мно́жеству щедро́т Твои́х очи́сти беззако́ние мое́”. Госпо́дь, ви́дя ве́лие и соверше́нное покая́ние твое́, прости́ тя и да́ры благода́ти Своея́ па́ки ти́ возврати́. Мы́ же, Го́спода на́шего, ди́внаго в милосе́рдии Свое́м, славосло́вим и тебе́ таковы́я похвалы́ воспису́ем:
Ра́дуйся, богоуго́дному покая́нию на́с прему́дро науча́ющий; ра́дуйся, от пристра́стий грехо́вных на́с исцеля́ющий.
Ра́дуйся, от похоте́й и страсте́й плотски́х на́с отвраща́ющий; ра́дуйся, в ве́ре и благоче́стии на́с утвержда́ющий.
Ра́дуйся, ка́ющихся гре́шников со Христо́м примиря́ющий; ра́дуйся, приходя́щих к тебе́ от ра́бства диа́волу свобожда́ющий.
Ра́дуйся, ду́х любви́ к бли́жним в сердца́х на́ших воскреша́ющий; ра́дуйся, милосе́рдие Бо́жие к на́м приклоня́ющий.
Ра́дуйся, свя́те Дави́де, богоизбра́нный царю́ и всесла́вный проро́че.
Конда́к 9.
Все́м тре́бующим по́мощи твоея́ усе́рдно благотвори́л еси́, царю́ святы́й, и зело́ милосе́рдовал еси́ о ни́щих и убо́гих, и никто́ же отхожда́ше от лица́ твоего́ не уте́шенным. При́зри же и на на́с, проро́че пресла́вный Дави́де, благосе́рдием твои́м, и от ра́н грехо́вных исцеле́ние пода́ждь на́м моли́твами твои́ми, да благода́рственно пое́м Го́сподеви: Аллилу́иа.
И́кос 9.
Вити́я многовеща́нныя не возмо́гут по достоя́нию воспе́ти по́двиги и труды́ твоя́, всехва́льный проро́че Бо́жий Дави́де, я́же подъя́л еси́ сла́вы Бо́жия и на́шего спасе́ния ра́ди: Боже́ственною и́стиною просвети́л еси́ наро́д тво́й; гра́д Иерусали́м во исполне́ние гряду́щаго Про́мысла Бо́жиего воздви́гл и преукра́сил еси́ и собра́ние псалмо́в твои́х оста́вил на́м еси́, и́миже и мы́ ны́не просвеща́еми, благодари́м тя́ за ве́лия труды́ твоя́ и прино́сим ти́ похвалы́ сия́:
Ра́дуйся, о гряду́щем воплоще́нии Христа́ возвести́вый; ра́дуйся, об искупи́тельных страда́ниях Его́ веща́вый.
Ра́дуйся, сокро́вище прему́дрости ча́дом Бо́жиим яви́вый; ра́дуйся, и́м ро́д христиа́нский во и́стине Боже́ственней утверди́вый.
Ра́дуйся, в неизрече́нной сла́ве Творца́ ми́ра созерца́ющий; ра́дуйся, во благоуха́нии святы́ни при́сно почива́ющий.
Ра́дуйся, о Спасе́нии на́шем Спаси́теля умоля́ющий; ра́дуйся, ми́лость Богоро́дицы к на́м преклоня́ющий.
Ра́дуйся, свя́те Дави́де, богоизбра́нный царю́ и всесла́вный проро́че.
Конда́к 10.
Спасе́ние ро́да челове́ческаго устроя́я Всемилосе́рдый Созда́тель на́ш возвести́ ти́, свя́те Дави́де, я́ко из до́ма твоего́ Месси́я изы́дет. Мы́ же, ве́дуще исполне́ние обетова́ния сего́, я́ко чрез Преблагослове́нную Богоро́дицу и Присноде́ву Мари́ю, дщи́ твою́, воплоти́лся е́сть Спаси́тель на́ш, со умиле́нием серде́ц во благодаре́нии су́ще, Всему́дрому Бо́гу воспева́ем: Аллилу́иа.
И́кос 10.
Стено́ю моли́тв твои́х небе́сных, святы́й царю́ и проро́че Дави́де, сохрани́ и огради́ на́с от искуше́ний врага́ ро́да челове́ческаго, и́щущаго ве́чной поги́бели на́шей, ве́мы бо ве́мы, я́ко мно́го мо́жет моли́тва твоя́ пред лице́м Христа́ Бо́га на́шего, Его́ же моли́ти не преста́й о все́х на́с, с любо́вию тя́ почита́ющих и вопию́щих:
Ра́дуйся, с Богоро́дицею Мари́ею и Предте́чею Иоа́нном у престо́ла Христо́ва ве́чно предстоя́щий; ра́дуйся, ку́пно с пра́ведными богоотцы́ Иоаки́мом и А́нною сла́ву Бо́гу воспева́ющий.
Ра́дуйся, бе́дным отра́ду и вспоможе́ние да́рующий; ра́дуйся, бога́тых к милосе́рдию и благотворе́нию подвиза́ющий.
Ра́дуйся, от пристра́стия к земны́м бога́тством на́с отвраща́ющий; ра́дуйся, бога́тства нетле́нныя иска́ти на́с побужда́ющий.
Ра́дуйся, нечести́вых и душетле́нных обы́чаев неукло́нный искорени́телю; ра́дуйся, кро́тких и благи́х нра́вов благоиску́сный насади́телю.
Ра́дуйся, свя́те Дави́де, богоизбра́нный царю́ и всесла́вный проро́че.
Конда́к 11.
Пе́ние всеумиле́нное прино́сим ти́, царю́ и проро́че Дави́де. Ты́ же, со А́нгельскими ли́ки сла́ву Бо́жию воспева́я, не забу́ди и на́с недосто́йных, дабы́ и на́м спасе́ние ду́ш на́ших улучи́вше, с тобо́ю вку́пе пе́ти Бо́гу: Аллилу́иа.
И́кос 11.
Светоза́рный свети́льник души́ твоея́ име́я вы́ну горя́щим, за вся́, и́же ниспосла́ ти́ Госпо́дь, благодари́л еси́ Созда́теля на́шего, в испыта́ниях и печа́лех укрепи́вшаго и ми́лостию Свое́ю оби́льно тя́ одари́вшаго. Те́м же, и ско́рби ста́рости твоея́, неразу́мными сына́ми и по́ддаными твои́ми супроти́в тя́ воздви́гнутыя, со смире́нием и упова́нием на Влады́ку вся́ческих претерпе́л еси́. Ны́не же мо́лим тя́, уго́дниче Бо́жий, научи́ на́с за вся́ Творца́ на́шего благодари́ти и приими́ от на́с славосло́вия сия́:
Ра́дуйся, зла́то, в горни́ле скорбе́й очище́нное; ра́дуйся, дре́во, при исто́чницех во́д насажде́нное.
Ра́дуйся, тле́нную сла́ву земну́ю ни во что́ же вмени́вый; ра́дуйся, во́лю свою́ всеце́ло в во́лю Бо́жию преда́вый.
Ра́дуйся, от пле́вел не́нависти сердца́ на́ша очища́ющий; ра́дуйся, све́том любве́ нелицеме́рныя на́с озаря́ющий.
Ра́дуйся, от уны́ния и отча́яния на́с избавля́ющий; ра́дуйся, от малоду́шия и малове́рия на́с исцеля́ющий.
Ра́дуйся, свя́те Дави́де, богоизбра́нный царю́ и всесла́вный проро́че.
Конда́к 12.
Благода́тию Бо́жиею укрепля́ем и подвиза́ем, пу́ть жития́ земна́го соверши́в, свя́те Дави́де, сно́м сме́ртным почи́л еси́ и к Бо́гу со упова́нием преста́вился еси́, те́м же свято́е успе́ние твое́ сла́вяще, мо́лим тя́, проро́че святы́й, егда́ же и мы́ сно́м сме́ртным усыпа́ти начне́м, умоли́ Го́спода кро́тко ду́шу на́шу от те́ла отдели́ти и бесо́вския вла́сти ю́ изба́вити, спасе́ния ве́чнаго на́с удосто́ити, да зове́м Го́сподеви в ра́дости святы́х: Аллилу́иа.
И́кос 12.
Пою́ще Бо́гу пе́снь благодаре́ния, ра́дуемся о тебе́, богоблаже́нне царю́ Дави́де, я́ко вся́ поле́зная на́м да́руеши, тобо́ю бо па́губа отгоня́ется, здра́вие улуча́ется, ми́р и благострое́ние водворя́ется, поне́же бо на небесе́х при́сно хода́тайствуеши о на́с, взыва́ющих ти́ си́це:
Ра́дуйся, все́х приходя́щих к тебе́ благода́тию Бо́жиею озаря́ющий; ра́дуйся, теле́с на́ших богодарова́нное врачева́ние.
Ра́дуйся, о душа́х на́ших благоприя́тное предста́тельство; ра́дуйся, моли́твами твои́ми от напра́сныя сме́рти на́с избавля́ющий.
Ра́дуйся, труды́ на́ша на пути́ спасе́ния облегча́ющий; ра́дуйся, ко творе́нию де́л благи́х все́х на́с подвиза́ющий.
Ра́дуйся, на земны́я ско́рби и печа́ли на́ша призира́ющий; ра́дуйся, ра́дости духо́вныя на́с исполня́ющий.
Ра́дуйся, свя́те Дави́де, богоизбра́нный царю́ и всесла́вный проро́че.
Конда́к 13.
О,святы́й уго́дниче Бо́жий, царю́ и проро́че Дави́де, приими́ ма́лое сие́ моле́ние на́ше, от любве́ душе́вныя тебе́ возноси́мое и умоли́ Всеблага́го и Всеми́лостиваго Творца́ на́шего изба́вити на́с от вся́каго зла́ и напа́сти, да благоче́стне в ве́це ны́нешнем поживе́м и блаже́нство живота́ ве́чнаго моли́твами твои́ми обря́щем, о тебе́ благода́рственно воспева́юще Го́сподеви: Аллилу́иа.
Этот конда́к читается трижды, затем и́кос 1-й и конда́к 1-й.
И́кос 1.
А́нгелов Творе́ц избра́ тя́ от коле́на Иу́дина и до́ма Иесе́ова в цари́ наро́ду своему́ и благода́тию проро́ческою напо́лни тя́, да воспое́ши во псалме́х вели́чие, милосе́рдие и прему́дрость Созда́теля на́шего и про́мысла Его́ блага́го о спасе́нии на́шем о́браз и обетова́ние яви́ши. Мы́ же, дивя́щеся таково́му о тебе́ благоизволе́нию Бо́жиему, вопие́м ти́ си́це:
Ра́дуйся, избра́нниче Бо́жий, при́сный о душа́х на́ших моли́твенниче преди́вный; ра́дуйся, по Сло́ву Вседержи́теля в прароди́тели по пло́ти Сы́ну Бо́жию приугото́ванный.
Ра́дуйся, Изра́иля ве́тхаго благослове́ние; ра́дуйся, Це́ркви Христо́вой, Изра́иля но́ваго, моли́твенное предста́тельство.
Ра́дуйся, все́х приходя́щих к тебе́ благода́тию озаря́ющий; ра́дуйся, благи́я жела́ния на́ша исполня́ющий.
Ра́дуйся, вся́кую печа́ль от на́с удаля́ющий; ра́дуйся, все́х чту́щих па́мять твою́ пред Бо́гом помина́ющий.
Ра́дуйся, свя́те Дави́де, богоизбра́нный царю́ и всесла́вный проро́че.
Конда́к 1.
Избра́нный Бо́гом на служе́ние проро́ческое, по́двигами твои́ми Творца́ и Го́спода просла́вивый, про́мысл благи́й о спасе́нии ро́да челове́ческаго яви́вый, свя́тостию жития́ твоего́ просия́вый; псалмы́ твои́ми хвалу́ Царю́ Небе́сному возда́вый; похва́льная воспису́ем ти́, пресла́вный царю́ Дави́де. Ты́ же, я́ко име́яй дерзнове́ние ве́лие у Милосе́рдаго Го́спода, предста́тельством твои́м небе́сным вы́ну помога́й на́м, да зове́м ти́:
Ра́дуйся, свя́те Дави́де, богоизбра́нный царю́ и всесла́вный проро́че.
Моли́тва пе́рвая.
Освяты́й уго́дниче Бо́жий, царю́ и проро́че Дави́де! По́двигом до́брым подвиза́вся на земли́, восприя́л еси́ на Небесе́х вене́ц пра́вды, его́же угото́вал е́сть Госпо́дь все́м лю́бящим Его́. Те́мже взира́юще на святы́й тво́й о́браз, ра́дуемся о пресла́внем сконча́нии жи́тельства твоего́ и чте́м святу́ю па́мять твою́. Ты́ же, предстоя́ Престо́лу Бо́жию, приими́ моле́ния на́ша и ко Всеми́лостивому Бо́гу принеси́, о е́же прости́ти на́м вся́кое прегреше́ние и по́мощи на́м ста́ти проти́ву ко́знем диа́вольским, да изба́вльшеся от скорбе́й, боле́зней, бе́д и напа́стей и вся́каго зла́, благоче́стно и пра́ведно поживе́м в ны́нешнем ве́це и сподо́бимся предста́тельством твои́м, а́ще и недосто́йни есмы́, ви́дети блага́я на земли́ живы́х, сла́вяще Еди́наго во святы́х Свои́х сла́вимаго Бо́га, Отца́ и Сы́на и Свята́го Ду́ха, ны́не и во ве́ки веко́в. Ами́нь.
Моли́тва втора́я.
Помяни́, Го́споди, царя́ Дави́да и всю́ кро́тость его́, и святы́ми того́ моли́твами поми́луй на́с, гре́шных. Ами́нь.