Молитвы

Мученик Твой, Господи, Лонгин,/ во страдании своем венец прият нетленный от Тебе, Бога нашего:/ имеяй бо крепость Твою,/ мучителей низложи,/ сокруши и демонов немощныя дерзости./ Того молитвами// спаси души наша.

Светозарное, яко солнце,/ во весь мир изшедшее/ вещание твое/ просвещает языческую Церковь благодатию,// чудоносче Матфие апостоле.

Вознесыйся на Крест волею,/ тезоименитому Твоему новому жительству/ щедроты Твоя даруй, Христе Боже,/ возвесели нас силою Твоею,/ победы дая нам на супостаты,/ пособие имущим Твое оружие мира// непобедимую победу.

Вторый Моисей явился еси, преподобне:/ он бо жезлом море раздели,/ ты же страсти, яко Амалика, победил еси/ и непроходную пустыню немятежным умом прошел еси,/ в нейже молитвами твоими велие чудо сотворил еси:/ гладныя люди до изобилия прекормил еси./ И ныне молися Господеви/ подати всем печальным утешение,/ Макарие, отче приснопамятне,/ иже Галичестей стране и всей Российстей земли/ похвала и утверждение.

Слез твоих теченьми пустыни безплодное возделал еси,/ и иже из глубины воздыханьми во сто трудов уплодоносил еси,/ и был еси светильник вселенней, сияя чудесы, Арсение отче наш,/ моли Христа Бога спастися душам нашим.

Подражая житию древних отцев,/ Богомудре отче Евфросине,/ красоту мира сего возненавидел еси,/ и, в пустыню вселився,/ веру Христову, якоже щит, в сердце твое приял еси,/ с неюже изшел еси, яко добр воин Царя Небеснаго,/ не на брань противу плоти и крове,/ но на брань противу козней невидимаго врага,/ и сего вознесенную гордыню,/ по данней тебе от Духа Святаго благодати,/ глубоким смирением твоим низложил еси,/ и от Небеснаго Мздовоздателя неувядаемым венцем победы венчался еси./ Сего ради, сошедшеся любовию, вопием ти:/ радуйся, отче Евфросине, пустынное украшение.

Да украсится днесь Церковь порфирою славною, омоченою от чистых кровей Агафии мученицы:/ радуйся, вопиющи, Катанская похвало.

Добродетелей ревнителю, / пустынный житель, / подвижник веры Христа Бога нашего, / пощением и труды умертвивый плотская вожделения, / тезоимените великому Антонию, / егоже житию поревновал еси / и во егоже имя Божественный храм воздвигл еси, / купно с ним, преподобне Антоние, моли Спасителя всех, / да и нас сотворит победители плотских похотей / и храмы Духа Святаго, / по велицей Его милости.

Насажден во дворех Господа твоего,/ преподобными твоими добродетельми красно процвел еси/ и умножил еси чада твоя в пустыни,/ слез твоих тучами напаяемая,/ стадоначальниче Божий Божественных дворов.// Темже зовем: радуйся, отче Феодосие.

Рождество Твое, Христе Боже наш,/ возсия мирови свет разума,/ в нем бо звездам служащии/ звездою учахуся/ Тебе кланятися, Солнцу Правды,/ и Тебе ведети с высоты Востока.// Господи, слава Тебе!

Помазателю царский,/ паче же святаго боговидца Давида,/ великий Самуиле,/ потщися умолити о нас,/ да помажемся Святаго Духа мастию/ и будем странни неприязни,/ якоже Давид нечистому духу Саулову.

Просветившееся Духом чистое твое сердце/ пророчества бысть светлейшаго приятелище:/ зриши бо, яко настоящая, далече сущая,/ сего ради тя почитаем,// пророче блаженне, Науме славне.

Го́споди, Го́споди! Положи́вый ду́шу Свою́ за спасе́ние все́х челове́к! Я́ко Господи́н жа́твы Твоея́, изведи́ мно́гих де́лателей на жа́тву Твою́! Изведе́нным же да́ждь ду́х моли́твы, ду́х любви́ Твоея́, ду́х смире́ния, терпе́ния и ра́зума. Да́ждь и́м благовествова́ти си́лою мно́гою во исполне́ние Ева́нгелия Твоего́. Да укрепи́тся и возрасте́т жела́ние возжела́вших вспомоществова́ти на́м дела́ми любви́ благотворящей, да умно́жатся подо́бныя посо́бники на́ши. Благоде́ющим на́м возда́ждь Твои́ми благослове́ньми: живы́м пода́ждь здра́вие и благоде́нствие, усо́пших со святы́ми твои́ми в ве́чных селе́ниях упоко́й. Ненави́дящих и оби́дящих на́с прости́, Влады́ко Человеколю́бче, просвети́ и́х се́рдца, вразуми́ и́х умы́. Все́м же на́м, кро́вию Твое́ю искупле́нным, веду́щим и еще́ не веду́щим Тя́, да́руй све́т ра́зума свята́го Ева́нгелия Твоего́. Ускори́ призва́ти и соедини́ти все́х во еди́но ста́до Твое́ зде́сь на земле́ и пребы́ти с Тобо́ю во ве́ки неразлучны во све́те Отца́ Твоего́ и Бо́га на́шего, Ему́ же с Тобо́ю и Святы́м Ду́хом сла́ва и держа́ва вове́ки. Ами́нь. См.: МИССИОНЕРСТВО См. также: Свт. Николай Сербский. Молитвы миссионера, или как молиться за неправославных?

Христов ярем на рамо взем,/ усердно Тому последова,/ чистотою Богови приближився,/ отче преподобне Кирилле,/ молим тя, посещай милостивно чад своих,/ и моли непрестанно о всех нас.

Премудрая и всехвальная Христова мученица Параскева,/ мужескую крепость приимши,/ женскую же немощь отвергши,/ диавола победи и мучителя посрами,/ вопиющи и глаголющи:/ приидите, тело мое мечем ссецыте и огнем сожгите,/ аз бо, радующися, иду ко Христу, Жениху моему./ Тоя молитвами, Христе Боже,/ спаси души наша.

Девства чистотою возмогла еси свещу своего разума/ и просветила еси душевную чистоту,/ лощением же и бдением плоть поработила еси духу,/ темже, преподобная Евфросиние,/ почитающе подвиги трудов твоих, молимся,/ моли Христа Бога спастися душам нашим.

Оставльша тьму идолослужения / и с горячей любовию прияв свет Православныя веры Христовы, / явися ты, святая Людмило, яко звезда утренняя, / и светом святости твоея / истинный день Богопочитания в Честей земли начав.

От юности, Богомудре, желанием духовным в пустыню вселився,/ единаго Христа возжелал еси усердно стопам в след ходити,/ темже и ангельстии чини зряще тя, удивишася,/ како с плотию к невидимым кознем подвизався, премудре,/ победил еси полки страстей воздержанием/ и явился еси равноангелен на земли,/ Александре преподобне,/ моли Христа Бога,/ да спасет души наша.

Православия наставниче, благочестия учителю,/ покаяния проповедниче, Златоустаго ревнителю,/ пастырю предобрый,/ новый России светильниче и чудотворче,/ паству твою добре упасл еси/ и писаньми твоими вся ны наставил еси,/ темже венцем нетления/ украшен от Пастыреначальника,/ моли Его спастися душам нашим.

Священный Богу Афиноген, в жертве служитель,/ священное ученик своих принесе Христу заколение,/ пастырь со словесными овцами иде в Небесную ограду,/ победив сверепеющия неверием языки./ Мученик Твоих молитвами, Христе Боже,/ спаси стадо Твое от волков, губящих е.