Молитвы

Молитвами твоими ко Господу/ от зол, бед, напастей свободи/ верно к тебе прибегающих/ и сетей избави вражиих,/ велий страстотерпче Харалампие.

Духом горя путешествия к святым местом, / странствовал еси в Греческую землю, / святителю Ефреме, / отнюдуже со многою пользою возвращаяся, / устав святаго Студийскаго монастыря списав, / аки некий многочестен дар, семо принесл еси, / имже и днесь Церковь Российская управляема / славит тебе, истиннаго о ней промысленника.

Скоропослушливую помощницу вси, сущии в бедах и болезнех, воспоем Иулианию святую, та бо в мире богоугодно поживе и милос­тыню к нищим безмерну показа, сего ради обрете благодать чудес Божиим ведением.

От матере умоленный, тезоимените дания Божия,/ от Бога звания во младенчестве сподобися,/ честный пророче Самуиле,/ добре пасый непокоривыя люди/ и царем явивыйся устроитель,/ и о нас, верно чтущих тя, моли Истиннаго Бога,/ да спасет души наша.

Вышних ища и земную славу презрев,/ Церковь Божию обагрил еси твоею кровию,/ за Нюже и пострадал еси, святе Михаиле,/ заколение неправедное прием, веселяся./ Темже со Ангелы предстоя Христу Богу,/ моли непрестанно за вся ны.

Молитва св. Иоанна Кронштадтского Преподобному Серафиму Саровскому Преподобному Силуану Афонскому Молитва св. Иоанна Кронштадтского1 Го́споди, просвети́ у́м и се́рдце раба́ Твоего́ сего́ к позна́нию вели́ких, безчи́сленных неизсле́димых даро́в Твои́х, и́хже прия́т от неисче́тных щедро́т Твои́х. В ослепле́нии бо стра́сти своея́ забы́ Тебя́ и да́ры Твои́ бога́тыя, и ни́ща себя́ бы́ти вмени́, бога́т сы́й бла́гами Твои́ми, и сего́ ра́ди зри́т преле́стне на блага́я рабо́в Твои́х, и́миже, о, пренеизглаго́ланная Благосты́ня, ущедря́еши все́х, коего́ждо проти́ву си́лы его́ и по наме́рению во́ли Твоея́. Отыми́, Всеблаги́й Влады́ко, покрыва́ло диа́вола от о́чию се́рдца раба́ Твоего́ и да́руй ему́ серде́чное сокруше́ние и сле́зы покая́ния и благодаре́ния, да не возра́дуется вра́г о не́м, заживо уловле́нном от него́ в свою́ во́лю, и да не отто́ргнет его́ от руки́ Твоея́. * * * Преподобному Серафиму Саровскому2 О, преподо́бне о́тче Серафи́ме! Вознеси́ о нас, рабе́х Бо́жиих (имена), благомо́щную твою́ моли́тву ко Го́споду сил, да да́рует нам вся благопотре́бная в жи́зни сей и вся к душе́вному спасе́нию поле́зная, да огради́т нас от паде́ний грехо́вных и и́стинному покая́нию да нау́чит нас, во е́же безпреткнове́нно вни́ти нам в ве́чное Небе́сное Ца́рство, иде́же ты ны́не в незаходи́мей сия́еши сла́ве, и та́мо воспева́ти со все́ми святы́ми Живонача́льную Тро́ицу во ве́ки веко́в. * * * Преподобному Силуану Афонскому О, преди́вный уго́дниче Бо́жий, о́тче Силуа́не! По благода́ти, тебе́ от Бо́га да́нной, сле́зно моли́тися о все́й вселе́нней – ме́ртвых, живы́х и гряду́щих – не премолчи́ за на́с ко Го́споду, к тебе́ усе́рдно припа́дающих и твоего́ предста́тельства уми́льно прося́щих (имена́). Подви́гни, о всеблаже́нне, на моли́тву Усе́рдную Засту́пницу ро́да христиа́нскаго, Преблагослове́нную Богоро́дицу и Присноде́ву Мари́ю, чу́дно призва́вшую тя́ бы́ти ве́рным де́лателем в Ея́ земно́м вертогра́де, иде́же избра́нницы Бо́жии о гресе́х на́ших ми́лостива и долготерпели́ва бы́ти Бо́га умоля́ют, во е́же не помяну́ша непра́вд и беззако́ний на́ших, но по неизрече́нной бла́гости Го́спода на́шего Иису́са Христа́ уще́дрити и спасти́ на́с по вели́цей Его́ ми́лости. Е́й, уго́дниче Бо́жий, с Преблагослове́нною Влады́чицею ми́ра – Святейшею Игумениею Афо́на и святы́ми подвижниками Ея́ земна́го жре́бия испроси́ у святы́х святе́йшего Сло́ва святе́й горе́ Афо́нской и боголюби́вым пустынножителем ея́ от все́х бе́д и наве́тов вра́жиих в ми́ре сохрани́тися. Да А́нгелы святы́ми от зо́л избавля́еми и Ду́хом Святы́м в ве́ре и братолю́бии укрепля́еми, до сконча́ния ве́ка о Еди́ней, Святе́й, Собо́рней и Апо́стольстей Це́ркви моли́твы творя́т и все́м спаси́тельный пу́ть указу́ют, да Це́рковь Земна́я и Небе́сная непреста́нно славосло́вит Творца́ и Отца́ Све́тов, просвеща́ющи и освеща́ющи ми́р в ве́чной пра́вде и бла́гости Бо́жией. Наро́дом земли́ все́й испроси́ благоде́нственное и ми́рное житие́, ду́х смиренному́дрия и братолю́бия, добронра́вия и спасе́ния, ду́х стра́ха Бо́жия. Да не зло́ба и беззако́ние ожесточают се́рдца людски́я, могущие истреби́ти любо́вь Бо́жию в челове́цех и низвергнуть и́х в богопроти́вную вражду́ и братоубийство, но в си́ле Боже́ственныя любве́ и пра́вды, я́коже на небеси́ и на земли́ да святи́тся и́мя Бо́жие, да бу́дет во́ля Его́ свята́я в челове́цех, и да воцари́тся ми́р и Ца́рствие Бо́жие на земли́. Та́кожде и земно́му Оте́честву твоему́ – земли́ Росси́йстей испроси́, уго́дниче Бо́жий, вожделе́нный ми́р и небе́сное благослове́ние, во е́же всемо́щным омофо́ром Ма́тере Бо́жия покрыва́ему, изба́витися ему́ от гла́да, губи́тельства, тру́са, огня́, меча́, наше́ствия иноплеме́нников и междоусо́бныя бра́ни и от все́х вра́г ви́димых и неви́димых, и та́ко святе́йшим домо́м Преблагослове́нныя Богоро́дицы до сконча́ния ве́ка ему́ пребы́ти, Креста́ Животворя́щаго си́лою, и в любви́ Бо́жией неоскудева́ему утверди́тися. На́м же все́м, во тьму́ грехо́в погружа́емым и покая́ния те́пла, ниже́ стра́ха Бо́жия не иму́щим и си́це безме́рно лю́бящаго на́с Го́спода непреста́нно оскорбляющим, испроси́, о всеблаже́нне, у Всеще́драго Бо́га на́шего, да Свое́ю Всеси́льною благода́тию боже́ственне посети́т и оживотвори́т души́ на́ша, и вся́ку зло́бу и го́рдость жите́йскую, уны́ние и нераде́ние в сердца́х на́ших да упраздни́т. Еще́ мо́лимся, о е́же и на́м, благода́тию Всесвята́го Ду́ха укрепля́емым и любо́вию Бо́жию согреваемым, в человеколю́бии и братолю́бии, смиренномудренном сраспинании дру́г за дру́га и за все́х, в пра́вде Бо́жией утверди́тися и в благодатной любви́ Бо́жией благонравно укрепи́тися, и сынолюбне Тому́ прибли́житися. Да та́ко, творя́ще Его́ всясвятую во́лю, во вся́ком благоче́стии и чистоте́ вре́меннаго жития́ пу́ть непосты́дно пре́йдем и со все́ми святы́ми Небе́снаго Ца́рствия и Его́ Агнчаго бра́ка сподо́бимся. Ему́ же от все́х земны́х и небе́сных да бу́дет сла́ва, че́сть и поклоне́ние, со Безнача́льным Его́ Отце́м, Пресвяты́м и Благи́м и Животворя́щим Его́ Ду́хом, ны́не и при́сно и во ве́ки веко́в. Ами́нь. 1 Праведный Иоанн Кронштадтский. Моя жизнь во Христе. Том 1. 171. 2 Канонник. Канон преподобному Серафиму Саровскому. См. ЗАВИСТЬ

Тропарь, глас 4* Княже́ния твоего́ сла́ву отложи́в,/ озаря́емый Боже́ственною благода́тию,/ Богому́дре кня́же Дании́ле, весь ра́зум в се́рдце от су́етнаго ми́ра сего́/ к Зижди́телю неукло́нно возложи́л еси́/ и, я́ко звезда́ на восто́це Росси́йскаго госуда́рства просия́л еси́,/ целому́дрием же и равноа́нгельным твои́м житие́м/ тече́ние до́брое соверша́я,/ ве́ру соблю́л еси́ непоро́чну,/ тем и по сме́рти просла́ви тя Бог в чудесе́х,/ я́ко источа́еши исцеле́ния ве́рно притека́ющим к честне́й ра́це твое́й;/ сего́ ра́ди днесь пра́зднуем успе́ние твое́, лю́дие твои́./ Ты же, я́ко и́маши дерзнове́ние ко Христу́,/ моли́ спасти́ оте́чество твое́// и ми́рней бы́ти держа́ве на́шей. Перевод: От княжеской славы отказавшись, просвещаемый Божественной благодатью, Богомудрый князь Даниил, весь разум и сердце от суетного мира этого ты без уклонений вверил Творцу и, как звезда, на востоке Российского государства ты просиял, целомудренно и подобно ангелу совершая прекрасный жизненный путь, сохранил непорочную веру, поэтому после смерти прославил тебя Бог в чудесах, так как ты изливаешь исцеление всем с верой приходящим к чтимой раке твоей. Поэтому сегодня празднуем успение твоё, люди твои. Ты же, как имеющий благоговейную смелость обращаться ко Христу, моли спасти Отечество твоё и в мире быть государству нашему. Кондак, глас 4* Избра́нный Бо́гом от чресл роди́тельских/ и воспита́нный от младе́нчества в зако́не Госпо́дни в му́жа соверше́нна/ и Про́мыслом Вы́шняго, имени́таго гра́да Москвы́ насле́дие кня́жества прие́м,/ ве́рен строи́тель благочести́вым лю́дем твои́м показа́лся еси́, Богоблаже́нне Дании́ле,/ и́хже о́бразом свои́м наставля́я/ и поуча́я за́поведем Госпо́дним вы́ну,/ путе́м, веду́щим в живо́т ве́чный, при́сно ше́ствуя,/ Небе́снаго Ца́рства дости́гл еси́,// иде́же со а́нгельскими водворя́яся ли́ки, пое́ши Бо́гу: Аллилу́ия. Перевод: Избранный Богом от рождения и воспитанный с младенчества в законе Господнем до зрелости мужа совершенного (Еф.) и Промыслом Всевышнего Бога получивший наследство княжения славного города Москвы, ты оказался верным управителем благочестивым людям твоим, в Боге блаженствующий Даниил, их же образом своим воспитывая и поучая всегда заповедям Господним, путем, ведущим в жизнь вечную, непрестанно идя, Небесного Царства ты достиг, где с ангельским пребывая хором, поёшь Богу: «Аллилуия». Молитва 1-я* О, уго́дниче Бо́жий, святы́й благове́рный кня́же Дании́ле, са́да Христо́ва благово́нный цве́те, не́ба церко́внаго кро́ткая звездо́, земли́ на́шея небе́сный у́ме, гра́да Москвы́ и держа́вы на́шея му́дрый зда́телю. Те́плый к Бо́гу моли́твенниче, ско́рый в по́мощи, ми́лостивый в ну́ждах, к тебе́ припа́даем и тебе́ мо́лимся: бу́ди предста́тель наш пред Престо́лом Бо́жией сла́вы неусы́пный. Собери́ нас друг ко дру́гу, да печа́ли бли́жняго своего́ ки́йждо любо́вию нелицеме́рною приобща́ется. Онебеси́ ум наш, да, и́го тя́жкое земны́х попече́ний отве́ргше, бре́мя ле́гкое Христо́ва Ева́нгелия возлю́бим. Откры́й о́чи на́ши, да у́зрим нетле́нную красоту́ Госпо́дню и да не отчужде́ни бу́дем жи́зни Бо́жией. Ти́хость Ду́ха Бо́жия да соблюде́т се́рдце на́ше. Весна́ покая́ния да укра́сит дела́ на́ша. Кня́же ми́лостивый и ще́дрый, сохрани́ страну́ на́шу, град твой и зде моля́щихся тебе́ от вся́кия напа́сти, от враг ви́димых и неви́димых, от губи́тельства и гла́да, от междоусо́бныя ра́спри и внеза́пныя сме́рти. Отве́рзи нам две́ри милосе́рдия Бо́жия и изба́ви нас от вся́каго зла. Под кре́пкий покро́в благосты́ни твоея́ прибега́юще, мо́лим: бу́ди нам ти́хое приста́нище в ско́рбех. Остени́ нас моли́твами твои́ми. Соблюди́ нас от паде́ний грехо́вных и заблужде́ний, да се́рдцем сокруше́нным, ду́хом смире́нным в печа́ли и ра́дости вы́ну зове́м: Го́споди, предста́тельством преподо́бнаго Твоего́ поми́луй нас. Ами́нь. Молитва 2-я* Це́ркве Христо́вы похвало́ высо́кая, гра́да Москвы́ стено́ необори́мая, держа́вы Росси́йския Боже́ственное утвержде́ние, преподо́бне кня́же Дании́ле. К ра́це моще́й твои́х притека́юще, усе́рдно мо́лим тя: при́зри на нас, па́мять твою́ воспева́ющих и с ве́рою под кров моли́тв твои́х прибега́ющих. Проле́й те́плое твое́ хода́тайство ко Спа́су всех, я́ко да утверди́т ми́ром страну́ на́шу, гра́ды и ве́си ея́ и оби́тель сию́ до́бре да сохрани́т, благоче́стие и любо́вь в лю́дех твои́х насажда́я, зло́бу же, междоусо́бие и нра́вов развраще́ние искореня́я; всем же нам вся блага́я ко вре́менному животу́ и ве́чному спасе́нию да́руй моли́твами твои́ми, я́ко да прославля́ем ди́внаго во святы́х Свои́х Христа́ Бо́га на́шего во ве́ки веко́в. Ами́нь. Молитва 3-я О, преподо́бне кня́же Дании́ле, к ико́не твое́й притека́юще, усе́рдно мо́лим тя: при́зри на нас (имена), с ве́рою под кров моли́тв твои́х прибега́ющих. Проле́й те́плое твое хода́тайство ко Спа́су всех, я́ко да утверди́т ми́ром прихо́д сей и храм сей до́бре да сохрани́т, благоче́стие и любо́вь в лю́дех правосла́вных насажда́я, зло́бу же, междоусо́бие и нра́вов развраще́ние искореня́я; всем же нам вся блага́я ко вре́менному животу́ и ве́чному спасе́нию да́руй моли́твами твои́ми, я́ко да прославля́ем ди́внаго во святы́х свои́х Христа́ Бо́га на́шего вку́пе со Отце́м и Святы́м Ду́хом во ве́ки веко́в. Ами́нь. Краткое житие Дни памяти 4/17 марта и 30 августа /12 сентября Любовью и братолюбием положил начало объединению Руси в мощную державу — Московское царство. Св. князю Даниилу молятся о спасении России, о добром нраве властей и правителей, об избавлении от пагубных разделений и междоусобной брани. * Минея. 4-е марта. Глас в Словаре.

Мученик Твой, Господи, Епимах/ во страдании своем венец прият нетленный от Тебе, Бога нашего,/ имеяй бо крепость Твою,/ мучителей низложи,/ сокруши и демонов немощныя дерзости./ Того молитвами// спаси души наша.

Преподобне отче наш Елиссее,/ с Лаврентием чудным подвизался еси, учителю своему подражая,/ земную славу и честь стопам Христа повергли есте,/ темже Господь увенча вас/ нетленным венцем славы Своея.

Светлых подвиг твоих, преподобне отче,/ наста днесь святая память твоя,/ души благочестивых веселящи,/ Пимене богомудре,// отче наш преподобне.

Слез твоих теченьми пустыни безплодное возделал еси,/ и иже из глубины воздыханьми во сто трудов уплодоносил еси,/ и был еси светильник вселенней, сияя чудесы, Пимене, отче наш,// моли Христа Бога спастися душам нашим.

Красоты ризныя возгнушавшагося/ и богатства тленнаго со благодарением отвершагося,/ в ризу же безстрастия облекшагося/ и богатому в щедротах Христу возследовавшаго,/ приидите, вернии, восхвалим Феодора достославна,/ яко молящася непрестанно/ о душах наших.

Неволею паству святительскую приим,/ но волею подвигнувся о Божий Церкви,/ и перстию Христова гроба невернаго Моавия царя уверив,/ и с телесною слепотою вкупе и душевную ему исцелив, благоверна показа,/ с нимже и еретики от Божия Церкве, яко волки, отгнав,/ честный святителю Феодоре,/ моли спастися душам нашим.

Свет Трисиянный, вселивыйся в душу твою,/ сосуд избран показа тя,/ вещающа Божественная людем,/ исповедник Божия Слова явился еси,/ и прилагающих Божеству вещественный огнь/ явственно обличил еси,/ и злославных смыслы, яко паучинное прядение, растерзал еси,/ благочестия столп и забрало твердое мирови показался еси/ и сего ради от Вселенскаго Патриарха дивне похвален был еси./ Мы же благодарными гласы, веселящеся, вопием ти:/ радуйся, отче наш, Дионисие преподобне.

Земных и тленных наслаждение/презревше яве, преблаженнии,/ пустынное житие изволивше,/ мира же краснейшее, и пищи временный возненавидевше,/ отонудуже сподобистеся Небеснаго Царствия,/ с лики мученик и постник веселящеся./ Темже, чтуще память вашу,/ вопием вам прилежно:/ от бед нас, отцы, избавите.

Языком твоим, мудре,/ Божественными вдохновеньми просветил еси твоя люди/ едину чести Троицу,/ Естеством нераздельну, разделяему же Лицы./ Темже, радующеся, всесвятую твою память празднуем,/ иже к Богу молитвенника тя предлагающий.

Пришествием честныя Твоей иконы, Богоотроковице,/ обрадованный днесь Богохранимый град Кострома,/ якоже древний Израиль к кивоту Завета,/ притекает ко изображению лица Твоего/и воплотившагося от Тебе Бога нашего,/ да Твоим Матерним к Нему предстательством/ присно ходатайствуеши всем,/ под сень крова Твоего прибегающим,/ мир и велию милость.

Земли Тульския прозябение, / града Москвы ангелоподобная воительнице / блаженная старице Матроно. / От рождения в слепоте телесней до конца своих дней пребывшая. / Но от Бога щедро духовное зрение приявшая, / прозорливице и молитвеннице. / Наипаче дар исцеления болезней стяжавшая. / Помогай всем с верою к тебе притекающим и просящим в болезнех душевных и телесных, / радосте наша.

Странника и пришельца прият тя страна Японская,/ равноапостолъне святителю Николае,/ в ней же исперва познал еси себе яко чуждаго,/ обаче теплоту и свет Христов источая,/ прелагал еси враги твоя в сыны духовныя,/ имже раздай благодать Божию, созидал еси Церковь Христову,/ о ней же ныне молися,/ и тебе бо сынове ея и дщери взывают:/ радуйся, пастырю добрый наш.

Архиерейское украшение,/ Великому Новуграду Богодухновенное удобрение,/ сущия бо в нем люди на пажитех живоноснаго закона Господня упасл еси,/ и сего ради в лице святых водворятися сподобися,/ и святую твою память многими леты сотвори неоскверненну,/ в нейже, тя почитающе,— радуйся,— от души вопием ти,/ святителю отче Феоктисте,/ Великому Новуграду похвала и утверждение.