Кондак 1
Избранный чудотворче и скорый пред Богом заступниче, предивный наставниче наш, старче Леонтие, прославляюще смиренное и духоносное житие твое, похвальное приносим ти пение. Ты же, яко имея дерзновение ко Господу сил, от всяких нас бед свободи, зовущих:
Радуйся, преподобне Леонтие, веры православныя крепкий поборниче.
Икос 1
Ангелов Творец, предуведый, юже в тебе измлада чистоту равноангельскую, избра тя на служение людем. Ты же, яко доброплодовитая маслина возросл еси в дому отчем, елеем добродетелей всех возвеселяяй: тем убо научаеши нас глаголати тебе сицевая:
Радуйся, честное Христово избрание.
Радуйся, Духа Святаго жилище преславное.
Радуйся, от юности Господем возлюбленный.
Радуйся, сосуде, милосердия исполненный.
Радуйся, на земли токмо Господа Единаго взыскавый.
Радуйся, в Нем Единем сердцем выну пребывавый.
Радуйся, дивное чистоты селение.
Радуйся, благочестия утверждение.
Радуйся, преподобне Леонтие, веры православныя крепкий поборниче.
Кондак 2
Видя сердца твоего невозвратное желание, еже ко иноческому жительству, сподоби тя Господь образа ангельского, да возсияет свет Трисиянныя Троицы в душе твоей. Мы же, дивящеся распалению духа твоего к горним, радостно поем Всеблагому Богу: Аллилуия.
Икос 2
Разум твой всецело к небесным вперив, благопоспешное начало премирному шествию положил еси: якоже бо вышних взыскатель, мирския молвы и пагубы отверглся еси, да горняя и негибнущая приобрящеши. Темже услыши от нас похвалы сия:
Радуйся, Евангелия Христова добрый послушниче.
Радуйся, ревностный безмолвия подвижниче.
Радуйся, знамение Креста Господня не токмо на перси, но и в душу приемый.
Радуйся, чресла своя воздержанием препоясавый.
Радуйся, теплое приятелище богоразумия.
Радуйся, сокровище мудрости некрадомыя.
Радуйся, пустынным отцем подражателю.
Радуйся, святых ангел равностоятелю.
Радуйся, преподобне Леонтие, веры православныя крепкий поборниче.
Кондак 3
Силою неугасимыя любве в житии иночестем утверждаяся, паче всех подражал еси Онуфрию, пустынножителю великому, учителя и покровителя его нарицая. Потщался еси, святе, хуждшее покорити лучшему, и плоть поработити духу, да со преподобными отцы воспоеши Христу Богу: Аллилуия.
Икос 3
Имея тя, отче Леонтие, ревнителя добра веры православныя, первосвятитель московский Тихон постави тя пастырем обители Спасо-Евфимиевы. Смиренне же претерпев поношения лютыя и избиения, явился еси Христолюбец, мучеником по духу подобен. Сего ради вопием ти:
Радуйся, служителю олтаря Божия усердный.
Радуйся, рабе Христов непорочный и верный.
Радуйся, в скорбех долготерпению нас научаяй.
Радуйся, в бедах пети Богу хвалебно нас призываяй.
Радуйся, вражия козни молитвою твоею расточивый.
Радуйся, злыя начинания богопротивных посрамивый.
Радуйся, заповедей Христовых хранителю.
Радуйся, разума нашего просветителю.
Радуйся, преподобне Леонтие, веры православныя крепкий поборниче.
Кондак 4
Бурю ложных начинаний утишая, был еси верным земли Суждальския пристанищем богоприятным. Непорочне сохраняя чистоту веры правыя, не убоялся еси брани к духовом злобы падшим, но, яко истинный воин Христов, непрестанно вожделел еси величати Бога: Аллилуия.
Икос 4
Слышавше людие нечестивии твое усердие о спасении чад твоих, свирепствуя, хотяху отлучити тя от олтаря Господня. Ты же, духом предуведев грядущие скорби, с веселием приял еси страданий узы, на милость Спаса тепле уповая. Сия ведущее, и мы зовем ти таковая:
Радуйся, Церкви единства блюстителю.
Радуйся, лести лукавыя обличителю.
Радуйся, слово Божие дерзновенно проповедавый.
Радуйся, звоном колокольным Творца прославивый.
Радуйся, о земли Российстей молитвенниче.
Радуйся, о злонравии мира печальниче.
Радуйся, в кротости Спасителю уподобивыйся.
Радуйся, служити Богу добре сподобивыйся.
Радуйся, преподобне Леонтие, веры православныя крепкий поборниче.
Кондак 5
Богодейственную имея крепость в сердце твоем, преподобне, явился еси людем во юзилище светило путоводное: день бо и нощь моляшеся, пламенем веры твоея показал еси многим путь ко спасению. Темже, видя чудная дела твоя, прославляем и мы Отца Небеснаго, поюще: Аллилуия.
Икос 5
Видя враг рода человеча попечение твое о правоверных, и яростию жегом, паки ополчи на тя люди безбожныя. Ты же, в подобие Христу, вселукавое глумление их претерпел еси, за обидящих тя Господеви моляся. Мы же, незлобию твоему дивящеся, вопием ти тако:
Радуйся, смирением демонския полки победивый.
Радуйся, ангелом Небеснаго Царя сослуживый.
Радуйся, скорбящим сладкогласная отрадо.
Радуйся, страдальцем тихая усладо.
Радуйся, исповедниче, сердце свое горе выну имевый.
Радуйся, светильниче, ближния своя светом Христовым просветивый.
Радуйся,благосердием хитрости мучителей нивочтоже вменивый.
Радуйся, в истощани утешение нетленное обретый.
Радуйся, преподобне Леонтие, веры православныя крепкий поборниче.
Кондак 6
Проповеда мир буесловно Бога не быти, но ты, отче Леонтие, сокровенная от начала мира постигнув, и свыше родився духом, возвеличил еси Христа, из мертвых воставшаго. Темже не мудростию плоти, но благодатию Духа Святаго, научаеши нас пети боголепно: Аллилуия.
Икос 6
Возсиял еси молитвенник теплейший, преподобне, егда молитвою твоею соузники во мразе лютем согревал еси, сладчайшим именем Иисусовым тыя укрепляя. Согрей ныне и нас теплотою веры святых, да услышиши от нас глаголы сия:
Радуйся, благоверия мудрый наставниче.
Радуйся, в обстояниих необоримый заступниче.
Радуйся, в телеси горняго мира жителю.
Радуйся, небесныя чистоты рачителю.
Радуйся, росо, сердца унылыя орошающая.
Радуйся, теплото, греховную зиму растопляющая.
Радуйся, яко о Христе распятом торжествуеши.
Радуйся, яко во Христе воскресшем ликуеши.
Радуйся, преподобне Леонтие, веры православныя крепкий поборниче.
Кондак 7
Хотя во Христа облещися воистину, ангельским чином неустанным славословием уподобился еси, и яко благий пастырь Церкви Воинствующия, восходил еси от силы в силу. Людие же, зряще непобедимую твердость твою, притекаху ти, и купно с тобою воспеваху Вседержителю Богу: Аллилуия.
Икос 7
Новаго угодника показа тя Господь во дни безбожия людем православным, премирною мудростию тя обогащая. С Богом быти выну желая, преславне, страдания паки облобызал еси: темже приял еси от Господа велию благодать, во еже молитися за нас, взывающих тебе сице:
Радуйся, в странствии земнем Богу и ближнему послуживый.
Радуйся, в темнице тесней свободу духа улучивый.
Радуйся, грешных к покаянию призываяй.
Радуйся, заблудших чистоте научаяй.
Радуйся, образе послушания непорочнаго.
Радуйся, ходатае спасения вечнаго.
Радуйся, душу свою страданьми украсивый.
Радуйся, тело свое в подвизе освятивый.
Радуйся, преподобне Леонтие, веры православный крепкий поборниче.
Кондак 8
Странноявленное житие твое видяще, премудре, недоумеваем, како величати подобает тя по достоянию. Кто бо исповесть подвиги твоя; бдение и пост; слезы и коленопреклонения; любы наша скудна, и греси велики суть. Но мы, ходатайством твоим выну покрываеми, венчавшаго тя Христа прославляем велегласно: Алилуия.
Икос 8
Вся силы небесныя дивляхуся деланию твоему, понеже взем крест свой, Христу тепле последовал еси, и еще в веце настоящем, якоже мощно, душу твою ко сретению Жениха Христа предуготовил еси. Сего ради приими от нас хвалебныя песни сия:
Радуйся, пастырем правило священнолепное.
Радуйся, верным удобрение всеблаженное.
Радуйся, слезными потоки врага потопивый.
Радуйся, моленьми естества обычаи победивый.
Радуйся, ангелом присный собеседниче.
Радуйся, священныя трапезы неотступный причастниче.
Радуйся, монашествующим истинное украшение.
Радуйся, живущим в мире надежное поможение.
Радуйся, преподобне Леонтие, веры православныя крепкий поборниче.
Кондак 9
Вся прилоги борителей демонов побеждая, люботрудно сеял еси всюду семена добродетели. Слезами теплыми труды своя орошая, яко крин краснейший, дивно процвел еси: возрадовася бо сердце твое о Бозе живе, внегда пети ти: Аллилуия.
Икос 9
Витийствующий язык наш по достоянию изрещи не может, еже о людех твоея печали, зане божественным исполнися рачением дух твой. Любви Христовой всех наставляя, в покаянии к тебе притекавших Создателю паки сочетавал еси: темже множицею тебе глаголем:
Радуйся, земнородных к небеси путеводителю.
Радуйся, делам милосердия изрядный учителю.
Радуйся, яко от смрада греховнаго нас отвращаеши.
Радуйся, яко души миром благовонным исполняеши.
Радуйся, в напастех скорое заступление.
Радуйся, в печалех надмирное утешение.
Радуйся, милости пучино, чудес струи источающая.
Радуйся, житнице веры, глад духовный утоляющая.
Радуйся, преподобне Леонтие, веры православныя крепкий поборниче.
Кондак 10
Спастися хотяй всем человеком, Премилосердый Господь, паки призва тя ко просвещению людей Своих. Во Архангельстем храме неослабне служив, горняго звания достоин показался еси, отче, и множество чад добре привел еси ко Творцу, в кротости зовуще Ему: Аллилуия.
Икос 10
Стена еси чадом твоим непобедимая, и радование пресветлое, ибо чистотою вооружився, ныне Желанию предстоиши Крайнему. Грядущая на земли, яко настоящая, провидев, ныне зриши Бога и Творца всяческих, и пребогатно изливаеши помощь твою на нас, во всякое время славящих тя сице:
Радуйся, новосиянная звездо земли Ивановския.
Радуйся, священная главо веси Михайловския.
Радуйся, Церкви краснейшее прозябение.
Радуйся, миру сладчайшее просвещение.
Радуйся, постничества столпе достославный.
Радуйся, наследниче благодати прехвальный.
Радуйся, яко тобою от мирския лести избавляемся.
Радуйся, яко тобою к небесному отечеству возвращаемся.
Радуйся, преподобне Леонтие, веры православныя крепкий поборниче.
Кондак 11
Пение немолчное Господеви возносяй, всем чадом твоим премилостивый отец явился еси. Подвиги постническия необинуяся совершив, свыше благодатию освятился еси, да вси, верою тебе молящиися, и к раце мощей твоих прибегающии, приимут кийждо ко спасению потребное, и во гласе радования прославят Бога: Аллилуия.
Икос 11
Светильника богосветлаго во тьме неверия показа тя Господь, дарующий тебе неиждиваемую крепость Свою. По блаженней же кончине твоей, открыся источник воды целебныя, знаменуя, яко, угодна бе Господеви душа твоя. Мы же, о тебе благоволению сему радующеся, присно зовем ти:
Радуйся, старче, в единомыслии нас утверждаяй.
Радуйся, богоносче, к любве Троичестей нас приводяяй.
Радуйся, яко любостяжание из сердца нашего изгоняеши.
Радуйся, яко вечная взыскати присно нас призываеши.
Радуйся, ревность безплотных на земли показавый.
Радуйся, землю кротких на небесех унаследовавый.
Радуйся, божественных селений красование.
Радуйся, земли Российския благоухание.
Радуйся, преподобне Леонтие, веры православныя крепкий поборниче.
Кондак 12
Благодати исполненнаго песньми тя величаем, ибо доселе не престаеши болезновати о нас, прибегающих под кров твоея благости: недуги бо наша туне исцеляеши, и водою живою жаждущия жизни напаяеши. Сего ради и моленьми твоими укрепляеми, чада твоя нареченная, дерзаем и мы воспевати Богу: Аллилуия.
Икос 12
Поем твоя подвиги, почитаем страдания, хвалим твое долготерпение и славим в немощнем телеси непобедимое мужество. Ублажаем святую кончину твою, и чудеса бывшая и настоящая, и прибегаем милостивому твоему, старче, о нас заступлению, умилением взывая сице:
Радуйся, предстателю, невидимо с нами пребываяй.
Радуйся, покрове, с небесе нас осеняяй.
Радуйся, сожителю ликов ангельских прелюбезный.
Радуйся, священниче престола горняго пречудесный.
Радуйся, заблудшим кроткое вразумление.
Радуйся, болящим щедрое исцеление.
Радуйся, насадителю веры спасительныя.
Радуйся, пастырем правило учительное.
Радуйся, преподобне Леонтие, веры православныя крепкий поборниче.
Кондак 13
О предивный старче Леонтие, в бедах и напастех скорый помощниче, твое житие видяще, славим Бога, дивнаго во святых Своих, и просим и молим ти ся: сподоби нас ходатайством твоим получити прегрешений прощение, и по исходе души, от мук свобождение, да со всеми небесными силами прославим Бога: Аллилуия.[Се́й конда́к глаго́лется три́жды.][Далее повторяем 1‑е икос и кондак:]Икос 1
Ангелов Творец, предуведый, юже в тебе измлада чистоту равноангельскую, избра тя на служение людем. Ты же, яко доброплодовитая маслина возросл еси в дому отчем, елеем добродетелей всех возвеселяяй: тем убо научаеши нас глаголати тебе сицевая:
Радуйся, честное Христово избрание.
Радуйся, Духа Святаго жилище преславное.
Радуйся, от юности Господем возлюбленный.
Радуйся, сосуде, милосердия исполненный.
Радуйся, на земли токмо Господа Единаго взыскавый.
Радуйся, в Нем Единем сердцем выну пребывавый.
Радуйся, дивное чистоты селение.
Радуйся, благочестия утверждение.
Радуйся, преподобне Леонтие, веры православныя крепкий поборниче.
Кондак 1
Избранный чудотворче и скорый пред Богом заступниче, предивный наставниче наш, старче Леонтие, прославляюще смиренное и духоносное житие твое, похвальное приносим ти пение. Ты же, яко имея дерзновение ко Господу сил, от всяких нас бед свободи, зовущих:
Радуйся, преподобне Леонтие, веры православныя крепкий поборниче.
Молитва преподобному Леонтию Михайловскому
О священная главо, преподобне отче, преблаженне авво Леонтие! Не забуди убогих твоих до конца, но поминай нас всегда во святых твоих благоприятных молитвах к Богу. Помяни стадо, твое еже сам упасл еси, и не забуди посещати чад твоих. Моли за ны, отче священный, за дети твоя духовная, яко имея дерзновение к Небесному Царю: не премолчи за ны ко Господу, и не презри нас, верою и любовию чтущих тя. Поминай нас недостойных у престола Вседержителева и не престай моляся о нас ко Христу Богу: ибо дана тебе бысть благодать за ны молитися. Не мним бо тя суща мертва: аще бо телом и преставился еси от нас, но и по смерти жив сый пребываеши. Не отступай от нас духом, сохраняя нас от стрел вражиих и всякия прелести бесовския и козней диавольских, пастырю наш добрый. Аще бо и мощей твоих рака пред очима нашима видима есть всегда, но святая твоя душа со ангельскими воинствы, со бесплотными лики, с небесными силами, у престола Вседержителева предстоящи, достойно веселится. Ведуще убо тя воистину и по смерти жива суща, тебе припадаем и тебе молимся: молися о нас всесильному Богу, о пользе душ наших, и испроси нам время на покаяние, да невозбранно прейдем от земли на небо, от мытарств же горьких, бесов воздушных князей и от вечныя муки да избавимся, и небеснаго царствия наследницы да будем со всеми праведными, от века угодившими Господу нашему Иисусу Христу: Емуже подобает всякая слава, честь и поклонение, со Безначальным Его Отцем, и с Пресвятым и Благим и Животворящим Его Духом, ныне и присно и во веки веков. Аминь.