Минея, 2 Января, Канон
Глас 6
Песнь 1
Ирмос: Я́ко по су́ху пешеше́ствовав Изра́иль по бе́здне стопа́ми, гони́теля фарао́на ви́дя потопля́ема, Бо́гу побе́дную пе́снь пои́м, вопия́ше.
Припев: Преподо́бне о́тче Серафи́ме, моли́ Бо́га о на́с.
Го́споди, отве́рзи мои́ недосто́йнии устне́ и да́ждь ми́ сло́во ра́зума воспе́ти досто́йно па́мять блаже́ннаго Серафи́ма, ны́не со а́нгелы моля́щагося Тебе́, изба́вити на́с от вся́каго лю́таго обстоя́ния.
Припев: Преподо́бне о́тче Серафи́ме, моли́ Бо́га о на́с.
К Богоро́дице вели́кий моли́твенник бы́л еси́, преподо́бне, Ю́же ви́дети со апо́столы сподо́бился еси́, и ны́не не преста́й моли́твами твои́ми посеща́ти ча́д твои́х.
Сла́ва Отцу́ и Сы́ну и Свято́му Ду́ху.
От ю́ности твоея́, преподо́бне, преда́лся еси́ умо́м Бо́гови, и стра́сти теле́сныя кре́пким воздержа́нием укроти́в, вся́кими доброде́тельми украси́лся еси́, прему́дре.
И ны́не и при́сно и во ве́ки веко́в. Ами́нь.
Богородичен: Всеблага́я Влады́чице, Я́же Преблага́го Бо́га пло́тию ро́ждши, озло́бленное страстьми́ мое́ се́рдце очи́сти, да ве́рою и любо́вию велича́ю Тя́.
Песнь 3
Ирмос: Не́сть свя́т, я́коже Ты́, Го́споди Бо́же мо́й, вознесы́й ро́г ве́рных Твои́х, Бла́же, и утверди́вый на́с на ка́мени испове́дания Твоего́.
Припев: Преподо́бне о́тче Серафи́ме, моли́ Бо́га о на́с.
Моли́твами твои́ми, преподо́бне, предстоя́ Бо́гу со а́нгелы, за ве́сь ми́р моли́ся, бра́ни вра́жия потреби́ти и побе́ду на супоста́ты дарова́ти.
Припев: Преподо́бне о́тче Серафи́ме, моли́ Бо́га о на́с.
От ю́ности ве́рою и любо́вию прилепи́лся еси́ Влады́це вы́шних си́л, преподо́бне Серафи́ме, и, возсия́в в пусты́ни Саро́встей, я́ко со́лнце, в ско́рбех приходя́щим к тебе́ уте́шитель бы́л еси́; моли́ спасти́ся на́м.
Сла́ва Отцу́ и Сы́ну и Свято́му Ду́ху.
Яви́лся еси́, преподо́бне, моля́щимся тебе́ сто́лп непоколеби́мь и прибе́жище все́м притека́ющим во оби́тель Саро́вскую и прие́млющим исцеле́ния благода́ть неоску́дную.
И ны́не и при́сно и во ве́ки веко́в. Ами́нь.
Богородичен: Услы́ша Е́ва прама́терь: в печа́лех роди́ши ча́да; Ты́ же, Чи́стая Де́во, услы́шавши: Госпо́дь с Тобо́ю, ра́дуйся, — ра́дованным гла́сом печа́ль прама́тере потреби́ла еси́.
Седален, глас 4
Жите́йское мо́ре страсте́й воздержа́нием препобеди́в и в приста́нище безстра́стия прите́к, сосу́д воздержа́ния яви́лся еси́, преподо́бне Серафи́ме, моли́ Христа́ Бо́га дарова́ти на́м ве́лию ми́лость.
Песнь 4
Ирмос: Христо́с моя́ си́ла, Бо́г и Госпо́дь, честна́я Це́рковь боголе́пно пое́т, взыва́ющи, от смы́сла чи́ста, о Го́споде пра́зднующи.
Припев: Преподо́бне о́тче Серафи́ме, моли́ Бо́га о на́с.
Дне́сь све́тло пра́зднует Саро́вская оби́тель па́мять твою́, преподо́бне, и мо́лит тя́: испроси́ у Го́спода вселе́нней ми́р и душа́м на́шим ве́лию ми́лость.
Припев: Преподо́бне о́тче Серафи́ме, моли́ Бо́га о на́с.
Вели́кими по́двиги твои́ми, преподо́бне, я́ко фи́никс, процве́л еси́, словесы́ благопло́дными и непоро́чным житие́м сердца́ притека́ющих к тебе́ услажда́я, и ны́не у́бо моли́ся, да обря́щем ми́лость у Христа́, Спа́са на́шего.
Сла́ва Отцу́ и Сы́ну и Свято́му Ду́ху.
Твои́ми моли́твами о на́с умоли́ Бо́га, преподо́бне Серафи́ме, и грехо́вный мра́к печа́ли на́шея разори́, безстра́стием, ве́рою и любо́вию украси́ все́х, пресла́вную па́мять твою́ чту́щих.
И ны́не и при́сно и во ве́ки веко́в. Ами́нь.
Богородичен: Ра́дуйся, Влады́чице Де́во, Це́рквам красото́, благочести́вым лю́дем держа́во и похвало́, непреста́нно моли́ся Христу́ Бо́гу, да сохрани́т на́с от бе́д моли́твами Твои́ми.
Песнь 5
Ирмос: Бо́жиим све́том Твои́м, Бла́же, у́тренюющих Ти́ ду́ши любо́вию озари́, молю́ся, Тя́ ве́дети, Сло́ве Бо́жий, и́стиннаго Бо́га, от мра́ка грехо́внаго взыва́юща.
Припев: Преподо́бне о́тче Серафи́ме, моли́ Бо́га о на́с.
Все́м приходя́щим к тебе́ бы́л еси́ учи́тель и́стинный и к Богоро́дице вели́кий моли́твенник, и ны́не, преподо́бне, не преста́й моля́ся о ча́дех твои́х, я́ко и́маши дерзнове́ние ве́лие.
Припев: Преподо́бне о́тче Серафи́ме, моли́ Бо́га о на́с.
Да вни́дут ны́не христоимени́тии лю́дие во хра́м оби́тели Саро́вския, к честны́м моще́м твои́м, преподо́бне Серафи́ме, припа́дающе, и да про́сят от тебе́ исцеле́ния, здра́вия и спасе́ния, Христа́ велича́юще.
Сла́ва Отцу́ и Сы́ну и Свято́му Ду́ху.
В нощи́ моля́щу ти ся Бо́гу, преподо́бне, вра́г неви́димый хотя́ше устраши́ти тя́, но, моли́твою твое́ю посра́млен, исчезе́ вселука́вый.
И ны́не и при́сно и во ве́ки веко́в. Ами́нь.
Богородичен: Бо́га, Его́же родила́ еси́, Пречи́стая Мари́е, моли́ рабо́м Твои́м пода́ти прегреше́ний оставле́ние.
Песнь 6
Ирмос: Жите́йское мо́ре, воздвиза́емое зря́ напа́стей бу́рею, к ти́хому приста́нищу Твоему́ прите́к, вопию́ Ти́: возведи́ от тли́ живо́т мо́й, Многоми́лостиве.
Припев: Преподо́бне о́тче Серафи́ме, моли́ Бо́га о на́с.
Свята́я душа́ твоя́ оби́тель бы́сть Бо́гу, в не́йже Оте́ц, Сы́н и Святы́й Ду́х всели́ся, те́мже мо́лим тя́, преподо́бне, наважде́ния вра́жия от чту́щих тя́ отжени́ и ве́рным лю́дем ми́р и здра́вие да́руй.
Припев: Преподо́бне о́тче Серафи́ме, моли́ Бо́га о на́с.
Вели́кия твоя́ пусты́нныя по́двиги и труды́ и сла́дость уче́ния твоего́ почита́ем, преподо́бне Серафи́ме, и́миже мно́гия приходя́щия к тебе́ просвети́л еси́ и научи́л еси́ воспева́ти Единосу́щную Тро́ицу.
Сла́ва Отцу́ и Сы́ну и Свято́му Ду́ху.
Житие́м чи́стым после́довав Влады́це Христу́, тече́ние до́брое сконча́л еси́, преподо́бне, к ве́чным же оби́телем возше́д, блаже́нне, зри́ши та́мо, я́же а́нгели ви́дят. Те́мже, чту́ще па́мять твою́, Христа́ велича́ем.
И ны́не и при́сно и во ве́ки веко́в. Ами́нь.
Богородичен: Ны́не к Тебе́ прибега́ю, Пречи́стая, спаси́ мя́ моли́твами Твои́ми и соблюди́: ели́ка бо хо́щеши, мо́жеши, я́ко Ма́ти Всемогу́щаго.
Кондак, глас 2
Ми́ра красоту́ и я́же в не́м тле́нная оста́вив, преподо́бне, в Саро́вскую оби́тель всели́лся еси́, и та́мо а́нгельски пожи́в, мно́гим пу́ть бы́л еси́ ко спасе́нию, сего́ ра́ди и Христо́с тебе́, о́тче Серафи́ме, просла́ви и да́ром исцеле́ний и чуде́с обогати́. Те́мже вопие́м ти́: ра́дуйся, Серафи́ме, преподо́бне о́тче на́ш.
Икос
Оста́вив ро́д и дру́ги, бога́тство, я́ко пра́х, вмени́в, в пусты́ни Саро́встей водвори́лся еси́, и на стра́сти, я́ко безпло́тен, подвиза́вся, а́нгелов ликостоя́ния сподо́бился еси́. Те́мже духо́вная разуме́ния прии́м, пода́ждь и на́м, преподо́бне, разу́мно пе́сньми воспе́ти тя́, си́це глаго́лющим: ра́дуйся, Серафи́ме блаже́нне, небе́сный челове́че и земны́й а́нгеле; ра́дуйся, в любви́ Христу́ подража́телю; ра́дуйся, Свята́го Ду́ха оби́тель; ра́дуйся, уныва́ющим ве́лие ра́дование; ра́дуйся, исто́чниче исцеле́ний; ра́дуйся, скорбя́щим душа́м сла́дкое утеше́ние; ра́дуйся, и́ноком ти́хое приста́нище и учи́телю прему́дрый; ра́дуйся, похвало́ земли́ Росси́йския; ра́дуйся, Серафи́ме, преподо́бне о́тче на́ш.
Песнь 7
Ирмос: Росода́тельну у́бо пе́щь соде́ла А́нгел преподо́бным отроко́м, халде́и же опаля́ющее веле́ние Бо́жие, мучи́теля увеща́ вопи́ти: благослове́н еси́, Бо́же оте́ц на́ших.
Припев: Преподо́бне о́тче Серафи́ме, моли́ Бо́га о на́с.
Чу́дно житие́ твое́ яви́ся, преподо́бне, благода́тию Боже́ственнаго Ду́ха испо́лнено, блаже́нну вои́стинну кончи́ну преподо́бных прия́л еси́, о Христе́ ра́дуяся. Мы́ же к Просла́вльшему тя́ взыва́ем: оте́ц на́ших Бо́же, благослове́н еси́.
Припев: Преподо́бне о́тче Серафи́ме, моли́ Бо́га о на́с.
Мно́жество люде́й, во святу́ю оби́тель соше́дшеся дне́сь, преподо́бне Серафи́ме, честны́м моще́м твои́м покланя́ется, от ни́хже исцеле́ния вси́ почерпа́ем, непреста́нно зову́ще: оте́ц на́ших Бо́же, благослове́н еси́.
Сла́ва Отцу́ и Сы́ну и Свято́му Ду́ху.
Во всю́ зе́млю изы́де веща́ние сие́, я́ко в Саро́ве чудотво́рец пресла́вен яви́ся, исцеле́ний мно́жество источа́я все́м, с ве́рою приходя́щим и вопию́щим: оте́ц на́ших Бо́же, благослове́н еси́.
И ны́не и при́сно и во ве́ки веко́в. Ами́нь.
Богородичен: Богоро́дице Де́во, ро́ждшая Сло́во па́че сло́ва, Зижди́теля Твоего́, Того́ моли́ с преподо́бным Серафи́мом поми́ловати ду́ши на́ша.
Песнь 8
Ирмос: Из пла́мене преподо́бным ро́су источи́л еси́ и пра́веднаго же́ртву водо́ю попали́л еси́: вся́ бо твори́ши, Христе́, то́кмо е́же хоте́ти. Тя́ превозно́сим во вся́ ве́ки.
Припев: Преподо́бне о́тче Серафи́ме, моли́ Бо́га о на́с.
Плотски́я стра́сти укроти́в и ми́рови умертви́вся, глаго́лы жи́зни ве́чныя се́рдцем твои́м, блаже́нне, прия́л еси́, науча́я все́х, к тебе́ притека́вших, взыва́ти: Го́спода по́йте, дела́, и превозноси́те Его́ во ве́ки.
Припев: Преподо́бне о́тче Серафи́ме, моли́ Бо́га о на́с.
В прославле́нии честны́х моще́й твои́х, преподо́бне, оби́тель Саро́вская ра́дости испо́лнися. Лю́дие же вси́ ди́вному во святы́х Свои́х Бо́гу взыва́ху: Го́спода по́йте, дела́, и превозноси́те Его́ во ве́ки.
Сла́ва Отцу́ и Сы́ну и Свято́му Ду́ху.
Благода́тию Боже́ственнаго Ду́ха испо́лнен сы́й, преподо́бне Серафи́ме, ве́рным лю́дем, творя́щим святу́ю па́мять твою́, моли́твами твои́ми испроси́ грехо́в проще́ние, вопию́щим: де́ти, благослови́те, свяще́нницы, воспо́йте, лю́дие, превозноси́те Го́спода во ве́ки.
И ны́не и при́сно и во ве́ки веко́в. Ами́нь.
Богородичен: Спасе́ния Хода́таица на́м яви́лася еси́, Богоро́дице, ро́ждшая Спа́са и Влады́ку все́х, те́мже мо́лим Тя́: спасе́ния сподо́би все́х, песносло́вящих Тя́ ве́рно во вся́ ве́ки.
Песнь 9
Ирмос: Бо́га челове́ком невозмо́жно ви́дети, на Него́же не сме́ют чи́ни а́нгельстии взира́ти; Тобо́ю же, Всечи́стая, яви́ся челове́ком Сло́во воплоще́нно, Его́же велича́юще, с небе́сными во́и, Тя́ ублажа́ем.
Припев: Преподо́бне о́тче Серафи́ме, моли́ Бо́га о на́с.
Недосто́йными усты́ воспева́емое тебе́ ма́лое хвале́ние на́ше, преподо́бне, не пре́зри, но приими́ и все́х, прославля́ющих тя́, освяти́, бе́д, и напа́стей, и ве́чнаго муче́ния изба́ви, да тя́ при́сно воспева́ем.
Припев: Преподо́бне о́тче Серафи́ме, моли́ Бо́га о на́с.
Мра́з нощны́й и ва́р дневны́й во уедине́нии пусты́ннем до́блественне претерпе́в, до́м Прему́дрости Бо́жия бы́л еси́ и к сия́нию невече́рнему восте́кл еси́; моли́ спасти́ся на́м.
Сла́ва Отцу́ и Сы́ну и Свято́му Ду́ху.
Сла́вится дне́сь оби́тель, в не́йже яре́м Христо́в прия́ти изво́лил еси́: та́мо бо, в пусты́ни, дни́ твоя́ пребы́л еси́, и твои́ми уче́ньми мно́ги приходя́щия к тебе́ вразуми́в, научи́л еси́ бы́ти ча́да Це́ркве Христо́вы.
И ны́не и при́сно и во ве́ки веко́в. Ами́нь.
Богородичен: Ты́ еси́ кре́пость на́ша, Ты́ еси́ похвала́ и ра́дование, Храни́тельница на́ша, заступле́ние, прибе́жище и Предста́тельница непобеди́мая, Пречи́стая Богоро́дице, спаси́ рабы́ Твоя́.
Светилен
Прииди́те, вси́ ве́рнии, свяще́нными пе́сньми восхва́лим ди́внаго в чудесе́х преподо́бнаго Серафи́ма, но́ваго свети́льника Росси́йския земли́, а́нгелом собесе́дника и те́плаго моли́твенника к Бо́гу о чту́щих святу́ю па́мять его́.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Богородичен: По Бо́зе упова́ние иму́ще на Тя́, Пречи́стая Богоро́дице, мо́лим Ти ся: Ро́ждшагося из Тебе́ умоли́ дарова́ти ми́р вселе́нней и ве́лию ми́лость.