Молитвы

Минея, 11 Мая, Кано́н святи́телю Ио́сифу Глас 8 Песнь 1 Ирмос: Колесницегони́теля фарао́ня погрузи́/ чудотворя́й иногда́/ Моисе́йский жезл, крестообра́зно порази́в/ и раздели́в мо́ре,/ Изра́иля же беглеца́, пешехо́дца спасе́,/ песнь Бо́гови воспева́юща. Припев: Священному́чениче Ио́сифе, моли́ Бо́га о на́с. Воспои́м све́тло и восхва́лим пе́сньми честну́ю па́мять святи́теля Христо́ва,/ возлюби́в бо Па́стыря овца́м – вели́каго Христа́,/ не убоя́ся разбо́йник,/ но ду́шу за о́вцы своя́ положи́. Припев: Священному́чениче Ио́сифе, моли́ Бо́га о на́с. Егда́ разбо́йницы и престу́пницы вступи́ша во град А́страхань,/ тогда́ злоде́йства и у́жасы ве́лии соверша́хуся./ Ты же, архипа́стырю до́брый,/ укры́л еси́ ми́рныя лю́ди в до́ме твое́м. Сла́ва Отцу́ и Сы́ну и Свято́му Ду́ху. К жи́зни нестаре́ющей и присносу́щней преста́вился еси́,/ Богому́дре святи́телю Ио́сифе,/ ея́же и нас, моля́щихся тебе́, твои́ми моли́твами сподо́би. И ны́не и при́сно и во ве́ки веко́в. Ами́нь. Богородичен: Наде́жда, и предста́тельство, и покро́в бу́ди, Де́во, рабо́м Твои́м,/ да, Тобо́ю изба́вленнии от бед, возвели́чим Тя све́тло,/ я́ко И́стинную Ма́терь И́стиннаго Све́та. Песнь 3 Ирмос: Утвержде́й в нача́ле Небеса́ ра́зумом/ и зе́млю на вода́х основа́вый,/ на ка́мени мя, Христе́, за́поведей Твои́х утверди́,/ я́ко несть свят, па́че Тебе́, Еди́не Человеколю́бче. Припев: Священному́чениче Ио́сифе, моли́ Бо́га о на́с. Добр во́ин Христо́в яви́лся еси́, святи́телю:/ взем бо меч духо́вный – сло́во Бо́жие,/ мяте́жники от Боже́ственнаго Писа́ния увещева́л еси́,/ привести́ хотя́ их ко Христу́ Бо́гу. Припев: Священному́чениче Ио́сифе, моли́ Бо́га о на́с. Утвержде́н на ка́мени за́поведей Христо́вых, святи́телю,/ разбо́йником и мяте́жником дерзнове́нно веща́л еси́:/ преста́ните от зол ва́ших и покори́теся Бо́гу и вла́сти зако́нней,/ да обря́щете проще́ние, и ми́лость, и поко́й душа́м ва́шим. Сла́ва Отцу́ и Сы́ну и Свято́му Ду́ху. Лю́дие беззако́ннии и жесто́кии се́рдцем/ не послу́шаша слове́с любве́ твоея́/ и на му́ки огня́ осуди́ша тя, зло́бою горя́ще,/ не лю́бит бо законопресту́пный облича́ющих его́. И ны́не и при́сно и во ве́ки веко́в. Ами́нь. Богородичен: Не́бо небе́с и свята́я святы́х яви́лася еси́, Присноде́во,/ Творе́ц бо и Вседержи́тель Небесе́ и земли́/ в Тебе́ таи́нственно всели́ся. Седален, глас 1 Ио́сифе священному́чениче, от мяте́жник убие́нный,/ в ми́ре и поко́и пра́ведных ны́не пребыва́еши, я́коже пи́сано есть:/ пра́ведных ду́ши в руце́ Бо́жией и не прико́снется их му́ка./ Да́руй мир и на́шим душа́м, страсте́й возста́ние укроти́в,/ да в присносу́щный дости́гнем поко́й моли́твами твои́ми. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Чу́до чуде́с, Благода́тная, в Тебе́ зря́щи, тварь ра́дуется:/ зачала́ бо еси́ безсе́менно, и родила́ еси́ неизрече́нно,/ Его́же чинонача́лия А́нгелов ви́дети не мо́гут;/ Того́ моли́ о душа́х на́ших. Песнь 4 Ирмос: Ты моя́ кре́пость, Го́споди,/ Ты моя́ и си́ла,/ Ты мое́ Бог, Ты мое́ ра́дование,/ не оста́вль не́дра О́тча/ и на́шу нищету́ посети́в./ Тем с проро́ком Авваку́мом зову́ Ти:/ си́ле Твое́й сла́ва, Человеколю́бче. Припев: Священному́чениче Ио́сифе, моли́ Бо́га о на́с. Егда́ сверго́ша тя со стен гра́да,/ шум бысть ве́лий, и злоде́и от стра́ха омертве́ша,/ на ме́сте же, иде́же пове́ржено бысть те́ло твое́,/ ви́деша мно́зи три свещи́ горя́щия:/ преста́вился бо еси́ от сме́рти к жи́зни,/ иде́же сия́ет незаходи́мый свет Святы́я Тро́ицы. Припев: Священному́чениче Ио́сифе, моли́ Бо́га о на́с. Препоя́сався си́лою свы́ше, священному́чениче,/ по́двигом до́брым подвиза́лся еси́, блаже́нне,/ оби́димых защища́я, печа́льных утеша́я,/ упо́рных же и злых с кро́тостию облича́я и вразумля́я./ И ны́не ра́дуешися све́тло,/ иде́же пра́вда и мир и ра́дость о Го́споде на́шем. Сла́ва Отцу́ и Сы́ну и Свято́му Ду́ху. Красу́йся све́тло и лику́й, гра́де А́страхань,/ име́я Небе́снаго засту́пника и покрови́теля, святи́теля Ио́сифа,/ во сла́ве Небе́сней предстоя́ща вели́кому Царю́ и моля́щася,/ да чту́щий па́мять его́, избе́гше грехо́вныя тьмы,/ сы́нове Све́та бу́дут. И ны́не и при́сно и во ве́ки веко́в. Ами́нь. Богородичен: Жили́ще Све́та яви́ла еси́, Богома́ти,/ Со́лнце бо сла́вы – Госпо́дь из Тебе́ возсия́/ и нам отве́рзе врата́ к Незаходи́мому Све́ту. Песнь 5 Ирмос: Вску́ю мя отри́нул еси́/ от лица́ Твоего́, Све́те Незаходи́мый,/ и покры́ла мя есть чужда́я тьма, окая́ннаго,/ но обрати́ мя и к све́ту за́поведей Твои́х/ пути́ моя́ напра́ви, молю́ся. Припев: Священному́чениче Ио́сифе, моли́ Бо́га о на́с. Приско́рбна бысть душа́ твоя́, священному́чениче,/ егда́ прии́де час твой взя́ту тебе́ бы́ти мяте́жники,/ но, моли́твою во хра́ме укрепи́вся,/ му́жественно к ним изше́л еси́. Припев: Священному́чениче Ио́сифе, моли́ Бо́га о на́с. В ри́зах святи́тельских и со святы́м кресто́м безбоя́зненно вшед в собо́рище мяте́жников,/ дерзнове́нно, я́ко проро́к Бо́жий, глаго́лал еси́:/ почто́ зва́сте мене́, та́тие и клятвопресту́пницы?/ Оста́вите упо́рство ва́ше и зло́бу,/ поми́лует вы благове́рный царь, и́стину глаго́лю, на мя положи́теся. Сла́ва Отцу́ и Сы́ну и Свято́му Ду́ху. Я́ко а́спиды глуси́и, слове́с твои́х не слу́шаша врази́ твои́, святи́телю Ио́сифе,/ и, е́мше тя, огне́м пыта́ху и вся́кими муче́нии и с высоты́ сверго́ша тя./ Ты же, к высоте́ Небе́сней возше́д,/ в Вы́шний град святы́х направля́еши всех, чту́щих тя, священному́чениче. И ны́не и при́сно и во ве́ки веко́в. Ами́нь. Богородичен: Всесвята́я Де́во, Ма́ти всех Царя́,/ Жизнь и воскресе́ние всех из Тебе́ возсия́,/ да, сме́ртную си́лу сокруши́в, спасе́т я́ко Бог пою́щия Тя. Песнь 6 Ирмос: Очи́сти мя, Спа́се,/ мно́га бо беззако́ния моя́,/ и из глубины́ зол возведи́, молю́ся,/ к Тебе́ бо возопи́х, и услы́ши мя,/ Бо́же спасе́ния моего́. Припев: Священному́чениче Ио́сифе, моли́ Бо́га о на́с. Исцели́ неду́ги и боле́зни на́ша, Спа́се, моли́твами святи́теля Твоего́,/ Тобо́ю бо просла́влен быв,/ всем исцеле́ния подае́т возложе́нием честны́я власяни́цы его́. Припев: Священному́чениче Ио́сифе, моли́ Бо́га о на́с. Чудотворе́ния дар подаде́ тебе́ Христо́с, святи́телю;/ те́мже немо́му уста́ си́лою Госпо́дней отве́рзл еси́,/ и той просла́ви тя и возблагодари́ Го́спода,/ да́вшаго такову́ю власть избра́нником Свои́м. Сла́ва Отцу́ и Сы́ну и Свято́му Ду́ху. Жена́ кровоточи́ва, вотще́ ижди́вшая име́ние свое́ на врачева́ние земно́е,/ косну́вся кра́я риз Госпо́дних, исцеле́ние прия́т./ И в тебе́, священному́чениче, всели́ся си́ла Христо́ва:/ власяни́ца бо твоя́ честна́я, с моли́твою на боля́щия возлага́емая,/ ско́рое исцеле́ние подае́т. И ны́не и при́сно и во ве́ки веко́в. Ами́нь. Богородичен: Спасе́ние упова́ющим на Тя бу́ди, Пречи́стая Де́во./ Мно́го бо мо́жет моли́тва Твоя́, о Ма́ти Милосе́рдая./ Ты бо избавля́еши от бед и страсте́й ду́ши на́ша. Кондак, глас 2 Я́ко звезда́ пресве́тлая,/ возсия́л еси́, святи́телю Ио́сифе, во А́страхани,/ иде́же роди́лся и воспита́лся еси́/ и за ве́рность Бо́гу и власте́м зако́нным му́ченическую смерть прия́л еси́./ Мы же, чту́ще страда́ния твоя́, зове́м ти:/ святи́телю Ио́сифе, от мяте́жников убие́нный,/ моли́ Христа́ Бо́га о душа́х на́ших. Икос Возлюби́в, святи́телю, Христо́вы Боже́ственныя за́поведи/ и возненави́дев ми́ра сего́ наслажде́ние,/ прише́л еси́ усе́рдно к Тому́/ и был еси́ свети́льник, просвеща́яй вся пово́лжския страны́ блиста́нием духо́вным./ Тем, припа́дая, мо́лим тя:/ просвети́ на́ша о́чи душе́вныя воспе́ти твоя́ по́двиги,/ поще́ние, и бде́ние, и му́ченическую кончи́ну,/ и́хже ра́ди блаже́нныя жи́зни ны́не наслажда́ешися;/ мы же, чту́ще тя, вопие́м:/ святи́телю Ио́сифе, от мяте́жников убие́нный,/ моли́ Христа́ Бо́га о душа́х на́ших. Песнь 7 Ирмос: Бо́жия снизхожде́ния/ огнь устыде́ся в Вавило́не иногда́./ Сего́ ра́ди о́троцы в пещи́, ра́дованною ного́ю,/ я́ко во цве́тнице, лику́юще, поя́ху:/ благослове́н еси́, Бо́же оте́ц на́ших. Припев: Священному́чениче Ио́сифе, моли́ Бо́га о на́с. О́троцы, огня́ изба́вленни, ра́достно воспева́ху Спа́са и Изба́вителя;/ ты же, священному́чениче, опале́нный огне́м веще́ственным,/ пла́мене ве́чнаго изба́вился еси́, вопия́:/ благослове́н еси́, Го́споди, Бо́же оте́ц на́ших. Припев: Священному́чениче Ио́сифе, моли́ Бо́га о на́с. Ум и се́рдце твое́, святи́телю,/ посреде́ о́гненнаго муче́ния ко Го́споду устремля́л еси́, я́ко трие́ о́троцы, взыва́я:/ благослове́н еси́, Бо́же оте́ц на́ших. Сла́ва Отцу́ и Сы́ну и Свято́му Ду́ху. Со о́троки и все́ми святы́ми лику́еши, блаже́нне, во Ца́рствии Небе́снем/ и ра́достно пое́ши Невече́рнему Све́ту:/ благослове́н еси́, Го́споди, Бо́же оте́ц на́ших. И ны́не и при́сно и во ве́ки веко́в. Ами́нь. Богородичен: Благослове́нна и препросла́влена еси́ во ве́ки, Похвало́ христиа́н,/ весе́лие всех и ра́дость, Мари́е Богоневе́сто,/ ра́дость бо источа́еши всем, к Сы́ну Твоему́ вопию́щим:/ благослове́н еси́, Бо́же оте́ц на́ших. Песнь 8 Ирмос: Седмери́цею пещь/ халде́йский мучи́тель/ Богочести́вым неи́стовно разжже́,/ си́лою же лу́чшею спасе́ны, сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки. Припев: Священному́чениче Ио́сифе, моли́ Бо́га о на́с. Ра́дости неизрече́нныя прича́стник яви́лся еси́, священному́чениче,/ при́сно в Бо́зе пребыва́я/ и в час муче́ния из глубины́ души́ твоея́ вопия́ ко Го́споду:/ о́троцы, благослови́те, свяще́нницы, воспо́йте,/ лю́дие, превозноси́те Христа́ во ве́ки. Припев: Священному́чениче Ио́сифе, моли́ Бо́га о на́с. Егда́ ведо́ша тя беззако́ннии на сте́ну гра́да,/ я́ко подража́тель Христу́, возве́д о́чи на не́бо, моли́лся еси́ о оби́дящих тя, блаже́нне:/ Го́споди, не помяни́ им греха́ сего́./ Свяще́нницы же гра́дстии, к нога́м твои́м со слеза́ми припа́дающе,/ да́ша ты после́днее целова́ние,/ отходи́л бо еси́ ко Го́споду, вопия́:/ о́троцы, благослови́те, свяще́нницы, воспо́йте,/ лю́дие, превозноси́те Христа́ во ве́ки. Сла́ва Отцу́ и Сы́ну и Свято́му Ду́ху. А́нгельски на земли́ пожи́л еси́, Ио́сифе,/ и по преставле́нии твое́м вку́пе со а́нгельскими ли́ки во оби́тели Небе́сныя водвори́лся еси́, вопия́:/ о́троцы, благослови́те, свяще́нницы, воспо́йте,/ лю́дие, превозноси́те Христа́ во ве́ки. И ны́не и при́сно и во ве́ки веко́в. Ами́нь. Богородичен: Три о́троки от пещи́ свободи́вый,/ всех от пещи́ напа́стей избавля́ет хода́тайством Твои́м, Пречи́стая,/ Сын Твой и Бог наш, Ему́же вопие́м:/ о́троцы, благослови́те, свяще́нницы, воспо́йте,/ лю́дие, превозноси́те Его́ во ве́ки. Песнь 9 Ирмос: Ужасе́ся о сем Не́бо,/ и земли́ удиви́шася концы́,/ я́ко Бог яви́ся челове́ком пло́тски/ и чре́во Твое́ бысть простра́ннейшее Небе́с/ Тем Тя, Богоро́дицу,/ А́нгелов и челове́к чинонача́лия велича́ют. Припев: Священному́чениче Ио́сифе, моли́ Бо́га о на́с. Пи́щи нетле́нныя, све́та Боже́ственнаго/ и сла́вы присносу́щныя ны́не наслажда́ешися, священному́чениче,/ вку́пе со а́нгельскими чинонача́лии и все́ми святы́ми Го́спода велича́я. Припев: Священному́чениче Ио́сифе, моли́ Бо́га о на́с. Я́ко церко́вное свети́ло, святи́телю,/ в пе́снех и пе́ниих почита́ем тя вей,/ досто́йно велича́юще. Сла́ва Отцу́ и Сы́ну и Свято́му Ду́ху. Предстоя́ во сла́ве Царю́ и Бо́гу, священному́чениче Ио́сифе,/ храни́ зе́млю Росси́йскую и град наш от всех бед моли́твами твои́ми. И ны́не и при́сно и во ве́ки веко́в. Ами́нь. Богородичен: Сла́ва Тебе́, Преблагослове́нная Мари́е,/ Ма́ти Го́спода на́шего и Творца́./ Да сподо́бимся и мы моли́твами Твои́ми ве́чныя сла́вы Его́. Светилен Свети́льниче Це́ркве Астраха́нския, святи́телю Ио́сифе,/ предстоя́ ны́не Преве́чному Све́ту,/ и нас наста́ви во све́те за́поведей Бо́жиих ходи́ти,/ да прии́дем и мы в оби́тели све́та. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Пречи́стая Де́во, ро́ждшая Свет Непристу́пный,/ озари́ нас све́том Боже́ственнаго ли́ка Твоего́,/ да возра́дуемся о Тебе́, Ра́досте на́ша.

Минея, 20 Апреля, Кано́н преподо́бнаго, его́же краегране́сие: Пою́ и сла́влю Иоаса́фа му́драго Глас 2 Песнь 1 Ирмос: Во глубине́ постла́ иногда́/ фараони́тское всево́инство преоруже́нная си́ла,/ вопло́щшееся же Сло́во всезло́бный грех потреби́ло е́сть:/ препросла́вленный Госпо́дь сла́вно бо просла́вися. Припев: Преподо́бне о́тче Иоаса́фе, моли́ Бо́га о на́с. Преподо́бне о́тче Иоаса́фе,/ да́ждь ми сло́во, недосто́йному рабу́ твоему́,/ да возмогу́ досто́йно воспе́ти святу́ю па́мять твою́. Припев: Преподо́бне о́тче Иоаса́фе, моли́ Бо́га о на́с. О́тче Иоаса́фе,/ ты на земли́ равноа́нгельно пожи́л еси́,/ равноа́нгельную же че́сть досто́йно получи́л еси́/ и ны́не со все́ми А́нгелы Бо́гу предстои́ши. Сла́ва Отцу́ и Сы́ну и Свято́му Ду́ху. Ю́ность твоя́ чи́ста, житие́ же твое́ све́тло,/ я́ко пра́вило изве́стно в тебе́, о́тче, Боже́ственныя доброде́тели показа́ся. И ны́не и при́сно и во ве́ки веко́в. Ами́нь. Богородичен: Покро́в Боже́ственный, ти́хое приста́нище,/ Пречи́стую Де́ву Мари́ю, ве́рнии, пе́сньми похва́лим, Богома́терь обра́дованную,/ всех же ве́рных Предста́тельницу. Песнь 3 Ирмос: Процвела́ е́сть пусты́ня, я́ко крин, Го́споди,/ язы́ческая неплодя́щая, Це́рковь/ прише́ствием, Твои́м,/ в не́йже утверди́ся мое́ се́рдце. Припев: Преподо́бне о́тче Иоаса́фе, моли́ Бо́га о на́с. И́хже о́ко не ви́де, ни у́хо слы́ша,/ ни на се́рдце челове́ка взыдо́ша,/ я́же угото́вана Бо́гом Того́ возлю́бльшим,/ сих ты возжеле́л еси́, Иоаса́фе Богодохнове́нне. Припев: Преподо́бне о́тче Иоаса́фе, моли́ Бо́га о на́с. Соше́дшеся дне́сь, чту́ще любо́вию па́мять твою́, Иоаса́фе прему́дре,/ мо́лим тя приле́жно:/ моли́ о нас, ве́рно пра́зднующих честну́ю па́мять твою́. Сла́ва Отцу́ и Сы́ну и Свято́му Ду́ху. Лику́я со А́нгелы на Небесе́х, не забу́ди нас, преподо́бне о́тче,/ но при́сно моли́ся ко Го́споду/ дарова́ти ми́ру мир и всем скорбя́щим утеше́ние. И ны́не и при́сно и во ве́ки веко́в. Ами́нь. Богородичен: Ря́сны златы́ми укра́шена, Влады́чице,/ я́ко Цари́ца предстои́ши ны́не одесну́ю Царя́ и Бо́га,/ моля́щи о рабе́х Твои́х. Седален, глас 8 О́тче Богоно́сне Иоаса́фе,/ житие́ свое́ украси́л еси́ воздержа́нием/ и, попра́в вся прило́ги вра́жия,/ присво́ился еси́ Бо́гу еди́ному./ Тем ны́не в ве́чней сла́ве со А́нгелы лику́я,/ с ни́миже моли́ непреста́нно поми́ловатися всем нам. Песнь 4 Ирмос: Прише́л еси́ от Де́вы, не хода́тай, ни А́нгел,/ но Сам, Го́споди, вопло́щся/ и спасл еси́ всего́ мя, челове́ка./ Тем зову́ Ти: сла́ва си́ле Твое́й, Го́споди. Припев: Преподо́бне о́тче Иоаса́фе, моли́ Бо́га о на́с. А́ще и владе́тель на земли́ был еси́,/ но, после́дуя уче́нию преподо́бнаго ста́рца Афана́сия,/ сочта́лся еси́ преподо́бным./ Тем с ни́ми тя почита́ем. Припев: Преподо́бне о́тче Иоаса́фе, моли́ Бо́га о на́с. Возсия́в, я́ко со́лнце, и сын све́та быв,/ свя́то твое́ проводи́л еси́ житие́./ Тем ны́не весели́шися со все́ми святы́ми. Сла́ва Отцу́ и Сы́ну и Свято́му Ду́ху. Ле́потственно возсия́ нам дне́сь па́мять твоя́ свята́я, преподо́бне о́тче Иоаса́фе./ Тем мо́лим тя:/ проси́ нам от Христа́ благода́ти, и ми́лости,/ и согреше́ний избавле́ние. И ны́не и при́сно и во ве́ки веко́в. Ами́нь. Богородичен: А́дова сокро́вища упраздни́шася/ и сме́ртное мучи́тельство преста́ воста́нием Ро́ждшагося из Тебе́,/ и жи́зни сокро́вища напо́лнишася. Песнь 5 Ирмос: Све́та Пода́телю и веко́в Тво́рче, Го́споди,/ во све́те Твои́х повеле́ний наста́ви нас:/ ра́зве бо Тебе́, ино́го бо́га не зна́ем. Припев: Преподо́бне о́тче Иоаса́фе, моли́ Бо́га о на́с. Ю́нии и ста́рцы, мона́си и свяще́нницы,/ славосло́вят ку́пно блаже́нную па́мять твою́,/ Богодохнове́нне о́тче Иоаса́фе. Припев: Преподо́бне о́тче Иоаса́фе, моли́ Бо́га о на́с. Иоаса́фе Богоблаже́нне,/ ты яви́лся еси́ безсме́ртия прича́стник/ и о́бщник Боже́ственнаго Ца́рствия/ и с высоты́ бде́еши над певцы́ твои́ми./ Проси́ у Бо́га проще́ние грехо́в их/ и прича́стие в сла́ве Его́. Сла́ва Отцу́ и Сы́ну и Свято́му Ду́ху. О Иоаса́фе, равноа́нгельне,/ име́ющу ти жили́ще на высоте́ Метео́рстей, возсия́ тебе́ с высоты́ Госпо́дь от Де́вы,/ Его́же ты возжеле́л еси́. И ны́не и при́сно и во ве́ки веко́в. Ами́нь. Богородичен: Моего́ ума́ стра́сти лю́тыя утоли́, Ма́ти Бо́жия,/ и испра́ви мя, заблу́ждшаго,/ я́ко да сла́влю Тя. Песнь 6 Ирмос: В бе́здне грехо́вней валя́яся,/ неизсле́дную милосе́рдия Твоего́ призыва́ю бе́здну:/ от тли, Бо́же, мя возведи́. Припев: Преподо́бне о́тче Иоаса́фе, моли́ Бо́га о на́с. А́нгела на земли́ и на Небеси́ челове́ка вем тя, преподо́бне,/ насажде́н бо в до́му Госпо́дни,/ процве́л еси́ пра́ведно, я́ко кедр в пусты́ни,/ умно́жив Христо́во ста́до слове́сных ове́ц в преподо́бии и пра́вде. Припев: Преподо́бне о́тче Иоаса́фе, моли́ Бо́га о на́с. Соде́лав ду́шу твою́ храм Ду́ха Свята́го,/ премину́л еси́ зе́млю до́льную,/ Небе́сную же жи́знь стяжа́л еси́/ и со Безпло́тными ли́ки смеси́лся еси́./ Тем и кро́тких зе́млю насле́довал еси́. Сла́ва Отцу́ и Сы́ну и Свято́му Ду́ху. А́нгельски на земли́, я́ко Безпло́тен, пожи́в,/ мир преоби́дел еси́, сла́вне,/ обветша́вшаго челове́ка я́ве, о́тче, совле́клся еси́/ и, я́ко скве́рну ри́зу отве́рг с грехо́вными страстьми́,/ в но́ваго обле́клся еси́,/ е́же по подо́бию о Христе́, преподо́бне. И ны́не и при́сно и во ве́ки веко́в. Ами́нь. Богородичен: Из Тебе́ прозябе́ Цвет неувяда́емый,/ облагово́нствуя все челове́чество Боже́ственным ми́ром естества́ Своего́,/ и И́же Отцу́ Собезнача́льный из Тебе́ бы́сть ле́том, Де́во Всенепоро́чная. Кондак, глас 4 Ве́дый прехва́льное житие́ твое́ и чистоту́/ и безме́рное смиренному́дрие,/ преподо́бный Афана́сий наименова́ тя прее́мника своего́,/ ты же показа́лся еси́ досто́ин сего́ нарече́ния/ и, служа́ Триипоста́сному Бо́гу,/ соблю́л еси́ вве́ренную ти оби́тель Метео́рскую./ Те́мже мо́лим тя, о́тче Иоаса́фе,/ не забу́ди оте́чество твое́ и ве́сь се́рбский род,/ но моли́ся всегда́ о всех нас. Икос Утверди́вся стра́хом Христо́вым,/ ве́сь распя́лся еси́ ми́рови, Богоно́се о́тче Иоаса́фе,/ и, возвы́сив к Бо́гу серде́чное жела́ние, нищету́ возлюби́л еси́,/ в нищете́ же пожи́в, доброде́тельми обогати́лся еси́,/ испо́лнен же быв све́тлостию жития́,/ хра́мы благоле́пныя на Метео́рах Бо́гу воздви́гл еси́/ и вся оби́тели Метеори́тския ку́пно со сестро́ю свое́ю Мари́ею бога́тно снабде́л еси́./ Сего́ ра́ди и мы, ве́дуще тя храм Свята́го Ду́ха, приле́жно мо́лим тя:/ не забу́ди оте́чество твое́ и ве́сь се́рбский род,/ но моли́ся всегда́ о всех нас. Песнь 7 Ирмос: Богопроти́вное веле́ние беззако́ннующаго мучи́теля/ высо́к пла́мень вознесло́ е́сть./ Христо́с же простре́ Богочести́вым отроко́м ро́су духо́вную,/ Сый благослове́н и препросла́влен. Припев: Преподо́бне о́тче Иоаса́фе, моли́ Бо́га о на́с. Фи́никс, насажде́нный в дому́ Госпо́дни, яви́лся еси́,/ мно́жеством бо мона́хов процве́л еси́/ и, я́ко кедр, и́же в Лива́не, доброде́тель умно́жил еси́. Припев: Преподо́бне о́тче Иоаса́фе, моли́ Бо́га о на́с. А́ще и владе́тель был еси́,/ но, презре́в сла́дости привре́менныя,/ благослове́нное целому́дрие соблю́л еси́. Сла́ва Отцу́ и Сы́ну и Свято́му Ду́ху. Метеори́тская похвала́ яви́лся еси́,/ поревнова́в блаже́нному Афана́сию – Метеори́ту,/ нра́вом и житие́м после́дуя ему́,/ страх бо Бо́жий восприи́м в се́рдцы свое́м,/ де́лы свои́ми ве́сь род се́рбский возвесели́л еси́. И ны́не и при́сно и во ве́ки веко́в. Ами́нь. Богородичен: Родила́ еси́ па́че смы́сла и естества́, Богоро́дице Де́во, Свята́го святы́х,/ подаю́щи хода́тайством Твои́м освяще́ние и избавле́ние и оставле́ние грехо́в/ всем ве́рным, сла́вящим Его́ воскресе́ние. Песнь 8 Ирмос: В пе́щь о́гненную ко отроко́м евре́йским снизше́дшаго/ и пла́мень в ро́су прело́жшаго Бо́га,/ по́йте, дела́, я́ко Го́спода и превозноси́те во вся ве́ки. Припев: Преподо́бне о́тче Иоаса́фе, моли́ Бо́га о на́с. Удаля́яся пути́ простра́ннаго,/ те́сный же предпочита́я,/ и́нок и́стинен был еси́/ и, дости́г широты́ ра́йския, ра́достно о Христе́ взыва́еши:/ по́йте и превозноси́те во вся ве́ки. Припев: Преподо́бне о́тче Иоаса́фе, моли́ Бо́га о на́с. Да́ры мно́гими вся оби́тели Метеорския ще́дро снабдева́л еси́,/ сим же ду́шу свою́ обогати́л еси́./ Те́мже ны́не со все́ми пра́ведными, ра́дуяся, о Христе́ пое́ши:/ по́йте и превозноси́те во вся ве́ки. Сла́ва Отцу́ и Сы́ну и Свято́му Ду́ху. Ре́вность Боже́ственнаго жития́ твоего́/ яви́ тя и́стиннаго наста́вника мно́жества мона́хов,/ и́бо стяжа́л еси́ Христа́ соде́тельствующа./ Ему́же ны́не со все́ми святы́ми восклица́еши:/ по́йте и превозноси́те во вся ве́ки. И ны́не и при́сно и во ве́ки веко́в. Ами́нь. Богородичен: Красне́йшаго добро́тою родила́ еси́, Всенепоро́чная,/ Сего́ умоли́ изба́вити мя огня́,/ и́бо житие́ мое́ все отягчи́ся,/ все порабо́тися лю́тыми греха́ми,/ аз же воспою́ к Нему́:/ по́йте и превозноси́те во вся ве́ки. Песнь 9 Ирмос: Безнача́льна Роди́теля Сын, Бог и Госпо́дь,/ вопло́щся от Де́вы, нам яви́ся,/ омраче́нная просвети́ти, собра́ти расточе́нная./ Тем Всепе́тую Богоро́дицу велича́ем. Припев: Преподо́бне о́тче Иоаса́фе, моли́ Бо́га о на́с. А́нгелом сожи́тель быв,/ я́ко в раи́ воздержа́ния процве́л еси́/ и, я́ко ма́слина, псало́мски яви́лся еси́,/ помазу́я сердца́ на́ша еле́ем трудо́в твои́х,/ благоче́стно чту́щих свяще́нную па́мять твою́. Припев: Преподо́бне о́тче Иоаса́фе, моли́ Бо́га о на́с. Глас Христа́ твоего́ послу́шав, зако́н Бо́жий сохраня́я невреди́мо,/ чистоту́ и смиренному́дрие от младе́нства име́л еси́,/ и житие́ нескве́рно, и нрав ми́лостивей, Иоаса́фе, о́тче досточу́дне. Сла́ва Отцу́ и Сы́ну и Свято́му Ду́ху. О́тче Иоаса́фе блаже́нне,/ доброде́тельми бога́т быв,/ испо́лнился еси́ све́тлостию жития́/ и преста́вился еси́ к Вы́шнему гра́ду,/ сего́ ра́ди мо́лим тя:/ моли́ся ко Го́споду изба́витися от бед ро́ду се́рбскому. И ны́не и при́сно и во ве́ки веко́в. Ами́нь. Богородичен: Отрокови́це Богоневе́сто,/ из ко́рене Иессе́ова Ты прозябла́ еси́/ и родила́ еси́ Ко́рень, всех Царя́, Христа́ Бо́га на́шего,/ от Него́же вси ве́рнии прозяба́ют и получа́ют спасе́ние./ Тем непреста́нно моли́ Его́,/ да спасе́т правосла́вный род се́рбский. Светилен Све́том Единосу́щныя Тро́ицы озаря́ем,/ возсия́л еси́ све́тлыми заря́ми доброде́тельных по́двигов твои́х,/ озари́ све́тлостию и ве́сь правосла́вный род се́рбский, да вси взыва́ем ти:/ ра́дуйся, о́тче Иоаса́фе, метеоритов похвале́.

Минея, 10 Сентября, Канон преподобнаго Иоасафа Глас 4 Песнь 1 Ирмос: Отве́рзу уста́ моя́, и напо́лнятся Ду́ха, и сло́во отры́гну Цари́це Ма́тери, и явлю́ся, све́тло торжеству́я, и воспою́, ра́дуяся, Тоя́ чудеса́. Припев: Преподо́бне о́тче Иоасáфе, моли́ Бо́га о на́с. Ве́сь освяще́н ты́ Творцу́ возложи́в себе́, все́ душе́вное жела́ние излия́в к Нему́, сего́ ра́ди духо́вную благода́ть восприя́л еси́; све́том благода́ти озаря́яся, блаже́нне Иоаса́фе пресла́вне, ве́рою па́мять твою́ торжеству́ющия просвети́ и от тьмы́ грехо́вныя моли́твами свои́ми изба́ви. Припев: Преподо́бне о́тче Иоасáфе, моли́ Бо́га о на́с. Измла́да Христа́ возлюби́л еси́, всеблаже́нне Иоаса́фе, явле́ние чудотво́рче, и Пречи́стую Его́ Ма́терь; ны́не же просвеща́еши чудесы́, я́ко мо́лния, всю́ вселе́нную. Сла́ва Отцу́ и Сы́ну и Свято́му Ду́ху. Ны́не, преблаже́нне Иоаса́фе, душа́ твоя́ почива́ет на Небесе́х со Христо́м во Ца́рствии Небе́снем, зде́ же честна́я благода́ть твоя́ да́рует исцеле́ние приходя́щим с ве́рою. И ны́не и при́сно и во ве́ки веко́в. Ами́нь. Богородичен: Ра́дуйся, Пречи́стая Богоро́дице, А́нгельское удивле́ние, проро́ческая про́поведь, апо́столов немо́лчная уста́, моли́ся Сы́ну Твоему́ и Бо́гу на́шему, да сохрани́т ме́сто сие́ и люде́й правосла́вных блаже́ннаго Иоаса́фа моле́нием. Песнь 3 Ирмос: Твоя́ песносло́вцы, Богоро́дице, живы́й и незави́стный исто́чниче, ли́к себе́ совоку́пльшия, духо́вно утверди́, в Боже́ственней Твое́й сла́ве венце́в сла́вы сподо́би. Припев: Преподо́бне о́тче Иоасáфе, моли́ Бо́га о на́с. Я́ко златоза́рное со́лнце яви́лся еси́ Ипоста́снаго Божества́, Иоаса́фе блаже́нне, и омраче́нных ду́ши просвеща́еши моли́твами твои́ми. Припев: Преподо́бне о́тче Иоасáфе, моли́ Бо́га о на́с. Из мла́да во́зраста Бо́га возлюби́л еси́, преподо́бне блаже́нне, и ничто́же предпоче́л еси́ па́че любве́ Его́, и ны́не сия́еши, я́ко со́лнце Триипоста́снаго Божества́, преблаже́нне Иоаса́фе. Сла́ва Отцу́ и Сы́ну и Свято́му Ду́ху. Креста́ Госпо́дня си́лою укрепля́емь, блаже́нне Иоаса́фе, поще́нием и моли́твою стремле́ния бесо́вская на земли́ победи́л еси́ Бо́жиею си́лою. И ны́не и при́сно и во ве́ки веко́в. Ами́нь. Богородичен: Ра́дуйся, Влады́чице Де́во, це́рквам бо еси́ красота́, святи́телем утвержде́ние, все́м лю́дем похвала́. Непреста́нно моли́ся Христу́ Бо́гу сохрани́ти ме́сто сие́ и лю́ди моли́твами всеблаже́ннаго Иоаса́фа. Седален, глас 4 Тве́рдостию ра́зума украша́лся и плотски́я тяготы́ отве́рг,/ горды́ню попра́л еси́, оби́телище быв избра́нно Пресвято́му Ду́ху,/ неукло́нным ра́зумом простира́лся Христу́ Бо́гу,/ многоко́зненнаго стре́лы притупи́л еси́ и лук сокруши́л еси́,/ всеблаже́нне Иоаса́фе, моли́ Христа́ Бо́га оставле́ние пода́ти грехо́в/ чту́щим любо́вию святу́ю па́мять твою́. Песнь 4 Ирмос: Седя́й в сла́ве на Престо́ле Божества́, во о́блаце ле́гце, прии́де Иису́с Пребоже́ственный, нетле́нною дла́нию, и спасе́ зову́щия: сла́ва, Христе́, си́ле Твое́й. Припев: Преподо́бне о́тче Иоасáфе, моли́ Бо́га о на́с. На земли́ сте́пень име́л еси́, всеблаже́нне Иоаса́фе, но свои́ми моли́твами Го́рнее Ца́рство восприя́л еси́, и ны́не на Небесе́х со Христо́м ца́рствуеши. Припев: Преподо́бне о́тче Иоасáфе, моли́ Бо́га о на́с. Исцеле́ние соде́лывает боже́ственная благода́ть твоя́, Иоаса́фе блаже́нне, отгоня́еши бо ду́хи лука́выя от челове́к, и укрепля́еши, и премудря́еши мудрова́ния и́х, я́ко да восхва́лим труды́ твоя́, всече́стне. Сла́ва Отцу́ и Сы́ну и Свято́му Ду́ху. Со враго́м кре́пко бра́вшися воздержа́нием, ны́не кре́постию одержа́л еси́ побе́ду, блаже́нне Иоаса́фе, пресла́вне новоя́вленне чудотво́рче, му́жески бра́нь претерпе́л еси́ и низложи́л еси́ бесо́вская ополче́ния. И ны́не и при́сно и во ве́ки веко́в. Ами́нь. Богородичен: Христа́ на́м родила́ еси́, Пречи́стая Богора́дованная Де́во, спаси́ ме́сто сие́ и лю́ди, и́же на Тя́ упова́ющия, Богоро́дице Пренепоро́чная. Песнь 5 Ирмос: Ужасо́шася вся́ческая о Боже́ственней сла́ве Твое́й: Ты́ бо, Неискусобра́чная Де́во, име́ла еси́ во утро́бе над все́ми Бо́га и родила́ еси́ Безле́тнаго Сы́на, все́м воспева́ющим Тя́ ми́р подава́ющая. Припев: Преподо́бне о́тче Иоасáфе, моли́ Бо́га о на́с. Зако́нными моли́твами и посто́м подвиза́лся еси́, блаже́нне Иоаса́фе, и в безсме́ртие оде́ялся еси́, плотски́й ра́зум смири́в кре́постию Боже́ственнаго Ду́ха. Припев: Преподо́бне о́тче Иоасáфе, моли́ Бо́га о на́с. От ю́ности возжада́л еси́ мона́шескаго о́браза и от Христа́ восприя́л еси́ вене́ц златы́й и ри́зу нетле́нную, и ны́не, блаже́нне Иоаса́фе, со А́нгелы ра́дуется, преподо́бне, ду́х тво́й. Сла́ва Отцу́ и Сы́ну и Свято́му Ду́ху. О́тче богому́дре Иоаса́фе, дае́ши ве́рным лю́дем душа́м очище́ние и просвеще́ние, и телесе́м исцеле́ние и от страсте́й избавле́ние от твоея́ благода́ти почерпа́ем. И ны́не и при́сно и во ве́ки веко́в. Ами́нь. Богородичен: Всесве́тлым укра́шена еси́ Све́том, Богора́дованная, Ты́ бо породи́, Честне́йшая все́х, Христа́ Бо́га на́шего, Его́же моли́, да изба́вит ны́ от все́х напа́стей. Песнь 6 Ирмос: Боже́ственное сие́ и всечестно́е соверша́юще пра́зднество, Богому́дрии, Богома́тере, прииди́те, рука́ми воспле́щим, от Нея́ ро́ждшагося Бо́га сла́вим. Припев: Преподо́бне о́тче Иоасáфе, моли́ Бо́га о на́с. Удиви́ся, боже́ственный Иоаса́фе, чудесе́м твои́м ве́сь ми́р, и восприя́л еси́ от Христа́ вене́ц Небе́сный, его́же моли́ сподо́бити на́с причасти́тися твои́ми моли́твами, всече́стне. Припев: Преподо́бне о́тче Иоасáфе, моли́ Бо́га о на́с. Лу́к си́льных сокруши́л еси́ и бра́нь всю́ неприя́зненну потреби́л еси́, всеблаже́нне Иоаса́фе, веща́ния испусти́л еси́ во всю́ вселе́нную чуде́с твои́х. Сла́ва Отцу́ и Сы́ну и Свято́му Ду́ху. Всеблаже́нне Иоаса́фе, уго́дниче Христо́в, на Небесе́х предста́л еси́, Христу́ моля́ся, зде́ же честна́я твоя́ благода́ть боля́щих исцеля́ет и греха́ изыма́ет. И ны́не и при́сно и во ве́ки веко́в. Ами́нь. Богородичен: Изсуши́ла еси́ сады́ безбо́жных люде́й, Пренепоро́чная Де́во, Свои́м Прозябе́нием, прозя́бшу во мне́ зло́бу вся́кую искорени́, Богоневе́сто. Кондак, глас 4 Яви́лся еси́ ве́лие со́лнце Христо́ве Це́ркви,/ просвеща́я всех житие́м свои́м, всече́стне,/ я́ко черпа́лом златы́м от кла́дезя неиско́паннаго,/ чуде́с мно́жество поче́рпл еси́ от исто́чника неистощи́маго,/ на успе́ние свое́ прише́л еси́ ми́рно,/ всеблаже́нне Иоаса́фе,// и ны́не всем дае́ши грехо́м проще́ние. Икос На высоте́ Госпо́дь воздержа́нием и́стинным тя положи́,/ я́ко звезду́ небла́зненну,/ просвеща́ющу страны́, чудотво́рче, быстрина́ми слове́с твои́х./ Источи́в боже́ственная чудеса́ ми́рови, ду́ши ве́рных напита́л еси́,/ ерети́ческия полки́ победи́л еси́, я́ко други́я еги́птяны,/ поклоне́ние Тро́ическое во Еди́ном Божестве́ чтил еси́./ Темже соблюди́ ны от враг ви́димых и неви́димых, всеблаже́нне Иоаса́фе,/ я́ко ны́не всем дае́ши грехо́м проще́ние. Песнь 7 Ирмос: Не послужи́ша тва́ри Богому́дрии, па́че Созда́вшаго, но о́гненное преще́ние му́жески попра́вше, ра́довахуся, пою́ще: препе́тый отце́в Госпо́дь и Бо́г благослове́н еси́. Припев: Преподо́бне о́тче Иоасáфе, моли́ Бо́га о на́с. Блаже́нно житие́ твое́ и кончи́на безсме́ртна, блаже́нне Иоаса́фе, сего́ ра́ди тя́ Христо́с свы́ше венце́м украси́, и просвеща́еши ве́сь ми́р чудесы́ свои́ми, всече́стне. Припев: Преподо́бне о́тче Иоасáфе, моли́ Бо́га о на́с. Яви́лся еси́ ны́не, Иоаса́фе богоблаже́нне, сто́лп непоколеби́м, стена́ неруши́мая, вели́кое прибе́жище от тебе́ прие́млющим исцеле́ний благода́ть неоску́дну. Бо́же, благослове́н еси́! Сла́ва Отцу́ и Сы́ну и Свято́му Ду́ху. Восхоте́л еси́, от мирски́х сла́достей отлучи́вся, стра́нно челове́ком я́вльшемуся Пло́тию присво́итися, бу́дущая и нетле́нная те́м стяжа́в, воспева́я: благослове́н еси́, Го́споди, Бо́же оте́ц на́ших. И ны́не и при́сно и во ве́ки веко́в. Ами́нь. Богородичен: Без се́мене заче́нши Творца́ все́х, Христа́ Бо́га, неизрече́нно родила́ еси́, Его́же моли́, дерзнове́ние иму́щи к Нему́, да ны́ спасе́т, пою́щих: Бо́же, благослове́н еси́. Песнь 8 Ирмос: О́троки благочести́выя в пещи́ Рождество́ Богоро́дично спасло́ е́сть, тогда́ у́бо образу́емое, ны́не же де́йствуемое, вселе́нную всю́ воздвиза́ет пе́ти Тебе́: Го́спода по́йте дела́ и превозноси́те Его́ во вся́ ве́ки. Припев: Преподо́бне о́тче Иоасáфе, моли́ Бо́га о на́с. Лику́ют на Небесе́х чи́нове а́нгельстии, всеблаже́нне Иоаса́фе, ви́дяще чуде́с твои́х мно́жество, ве́рных же собо́ри на земли́, твою́ па́мять похваля́юще, Христа́ пое́м и превозно́сим во ве́ки. Припев: Преподо́бне о́тче Иоасáфе, моли́ Бо́га о на́с. Помоли́ся, всеблаже́нне Иоаса́фе, Христу́ Бо́гу о приходя́щих ти́ с ве́рою, хотя́щих от тебе́ почерпсти́ исцеле́ния неоску́дную благода́ть. Го́спода же пое́м и превозно́сим во ве́ки. Сла́ва Отцу́ и Сы́ну и Свято́му Ду́ху. Всемо́щными, свя́те, твои́ми моли́твами душе́вныя ми́ боле́зни исцели́, Иоаса́фе сла́вне, прося́ отпу́ста зо́л мои́х, со безпло́тными бо Си́лами Христо́ви предстои́ши, с ни́миже пое́ши непреста́нно: Го́спода по́йте и превозноси́те Его́ во ве́ки. И ны́не и при́сно и во ве́ки веко́в. Ами́нь. Богородичен: Из пречи́стаго Ти́ чре́ва, Богома́ти, Небе́снаго Дождя́ ка́пля на́м ука́ну на умове́ние скве́рнам, на здра́вие телеси́, на прогна́ние лука́ваго. Те́мже Тя́ блажи́м, Чи́стую, во ве́ки. Песнь 9 Ирмос: Вся́к земноро́дный да взыгра́ется, Ду́хом просвеща́емь, да торжеству́ет же Безпло́тных умо́в естество́, почита́ющее свяще́нное торжество́ Богома́тере, и да вопие́т: ра́дуйся, Всеблаже́нная, Богоро́дице Чи́стая Присноде́во. Припев: Преподо́бне о́тче Иоасáфе, моли́ Бо́га о на́с. Удиви́ся во все́м ми́ре, Иоаса́фе, твоя́ па́мять, чудесы́ сия́ющи, я́ко со́лнце, злы́я боле́зни исцеля́ющи все́м. Те́мже моя́ стра́сти разжени́, молю́тися, прося́ ны́не отпу́ста, чудотво́рче Христо́в Иоаса́фе, просвети́ на́с твои́ми моли́твами, тебе́ вси́ велича́ем. Припев: Преподо́бне о́тче Иоасáфе, моли́ Бо́га о на́с. Ны́не моли́ся Го́сподеви, всечу́дне Иоаса́фе блаже́нне, твоя́ бо честна́я благода́ть подае́т всегда́ слепы́м прозре́ние и хромы́м хожде́ние, больны́м все́м здра́вие и исцеле́ние, те́мже тя́ вси́ велича́ем. Сла́ва Отцу́ и Сы́ну и Свято́му Ду́ху. Да вхо́дят ны́не во святы́й хра́м тво́й, блаже́нне Иоаса́фе, вси́ лю́дие правове́рнии и, припа́дающе, про́сят от тебе́ почерпсти́ исцеле́ние, здра́вие и спасе́ние, те́мже тя́ вси́ велича́ем. И ны́не и при́сно и во ве́ки веко́в. Ами́нь. Богородичен: А́нгели, Арха́нгели, проро́цы и апо́столи и ве́сь ли́к преподо́бных оте́ц и свяще́нных му́ченик, с преблаже́нным Иоаса́фом ко Христу́ приле́жно моли́теся, и с Пречи́стою Ма́терию помоли́теся, да изба́вит ны́ от все́х бе́д, Его́же велича́ем вси́. Светилен Госпо́дь тя просла́ви в чудесе́х твои́х, блаже́нне Иоаса́фе,/ я́ко Своего́ уго́дника, преста́вльшагося от сме́рти в живо́т,/ сего́ ра́ди чуде́с твои́х па́мять восхваля́ем. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Из чре́ва Ти пречи́стаго, Богома́ти,/ Небе́снаго Дождя́ ка́пля нам ука́ну,/ на омове́ние скве́рнам, на здра́вие телеси́, на прогна́ние лука́ваго./ Те́мже Тя ублажа́ем, Чи́стая.

Минея, 10 Июля, Други́й кано́н преподо́бнаго Глас 2 Песнь 1 Ирмос: Во глубине́ постла́ иногда́/ фараони́тское всевоинство преоруже́нная си́ла,/ вопло́щшееся же Сло́во всезло́бный грех потреби́ло есть:/ препросла́вленный Госпо́дь сла́вно бо просла́вися. Припев: Преподо́бне о́тче Анто́ние, моли́ Бо́га о на́с. Еще́ от ма́лыя версты́, преподо́бне Анто́ние, вели́ку любо́вь стяжа́л еси́ к Бо́гу,/ и сего́ ра́ди плотска́я взыгра́ния и стра́сти до конца́ умертви́л еси́,/ и чистото́ю, я́коже кри́лы, впери́вся пресла́вно,/ к Небесе́м возлете́л еси́, о́тче. Припев: Преподо́бне о́тче Анто́ние, моли́ Бо́га о на́с. Влады́чнему любостра́нству, преподо́бне, подо́бяся,/ сам стра́нство́вати изво́лил еси́, Анто́ние,/ те́мже Всеви́дящее Око, ви́дя твое́ благо́е произволе́ние,/ да́ром чуде́с обогати́ тя, я́ко пресла́вна. Сла́ва Отцу́ и Сы́ну и Свято́му Ду́ху. Душе́вную ти́хость и любо́вь, я́же к Бо́гу,/ нра́вы и обы́чаи благи́ми укра́шена тя ви́дев,/ твой духо́вный настоя́тель, преподо́бне,/ проро́чески всем пропове́дует хотя́щая напосле́док тобо́ю бы́ти пресла́вная, Анто́ние. И ны́не и при́сно и во ве́ки веко́в. Ами́нь. Богородичен: Мои́х прегреше́ний, Влады́чице, плени́цы расто́ргни,/ Твоего́ Сы́на и Бо́га моля́щи, и томя́щий мя грех, Присноде́во, низложи́,/ я́ко да воспева́ю Тя, всегда́, Пренепоро́чная, Тобо́ю спаса́емь. Песнь 3 Ирмос: На ка́мени мя ве́ры утверди́в,/ разшири́л еси́ уста́ мои́ на враги́ моя́,/ возвесели́ бо ся дух мой, внегда́ пе́ти:/ несть свят, я́коже Бог наш,/ и несть пра́веден, па́че Тебе́, Го́споди. Припев: Преподо́бне о́тче Анто́ние, моли́ Бо́га о на́с. Прозре́в бу́дущая воздая́ния, зде маловре́менная, я́ко не су́щая, о́тче, оста́вил еси́/ и сего ра́ди сугу́бая воздая́ния прия́л еси́, преподо́бне./ Те́мже со А́нгелы непреста́нно пое́ши Влады́ку твоего́. Припев: Преподо́бне о́тче Анто́ние, моли́ Бо́га о на́с. Моли́тися, о́тче, не преста́й о ста́де твое́м,/ е́же мно́гими по́ты и труды́ стяжа́л еси́,/ изба́вити всех обстоя́ний, бед же и скорбе́й,/ да вси тебе́, я́ко чадолюби́ва отца́, воспева́ем. Сла́ва Отцу́ и Сы́ну и Свято́му Ду́ху. Весе́лием, преподо́бне, с чи́нми святы́х Бо́гу предстои́ши,/ я́же та́мо весе́лия и ра́дости насыща́яся,/ сподо́би и нас та́мошняя ра́дования получи́ти,/ да, веселя́щеся, тебе́ велича́ем, о́тче Анто́ние. И ны́не и при́сно и во ве́ки веко́в. Ами́нь. Богородичен: Просте́рши ру́ку благоутро́бия, Богороди́тельнице,/ вся́каго мя изми́ осужде́ния, к Тебе́ прибега́ющаго, и Тебе́ припа́дающа,/ и призыва́юща Твою́ по́мощь. Седален, глас 4 Удиви́ся твой духо́вный настоя́тель, в тебе́ вели́ко воздержа́ние зря,/ и внима́ше мы́слию хотя́щая о тебе́ напосле́док бы́ти, Анто́ние,/ ви́де бо по Бо́зе твое́ вели́кое житие́ и вра́жиими прило́ги ника́коже поколеби́ма./ Те́мже и свиде́тельствует, я́ко оте́ц и храни́тель твоего́ жития́,/ отце́м Святы́я Горы́ вопия́ше:/ сей, и́же посреде́ нас ви́дится ме́ньший/ но последи́ в Росси́и вели́кий свети́льник бу́дет. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Удиви́ся Ио́сиф, е́же па́че естества́ зря,/ и внима́ше мы́слию, и́же на руно́ дождь,/ в безсе́меннем зача́тии Твое́м, Богоро́дице,/ купину́, огне́м неопали́мую, жезл Ааро́нов проза́бший/ и, свиде́тельствуя, обру́чник Твой и храни́тель свяще́нником взыва́ше:/ Де́ва ражда́ет, и по рождестве́ па́ки Де́ва пребыва́ет. Песнь 4 Ирмос: Пою́ Тя, слу́хом бо, Го́споди, услы́шах и ужасо́хся:/ до мене́ бо и́деши, мене́ ища́, заблу́ждшаго./ Тем мно́гое Твое́ снизхожде́ние, е́же на мя,/ прославля́ю, Многоми́лостиве. Припев: Преподо́бне о́тче Анто́ние, моли́ Бо́га о на́с. Про́мыслом Бо́жиим па́ки ко оте́честву твоему́, блаже́нне, посыла́емь быва́еши,/ я́ко да и та́мо мно́гих ко спаси́тельному пути́ наста́виши, Творцу́ воспева́ти:/ сла́ва си́ле Твое́й, Го́споди. Припев: Преподо́бне о́тче Анто́ние, моли́ Бо́га о на́с. Упова́нием бу́дущих благ, Анто́ние, укрепля́емь,/ плотско́е стремле́ние обузда́л еси́/ и твое́й пло́ти враг неми́лостив, о́тче, был еси́,/ сего́ ра́ди и по́мощь свы́ше стяжа́л еси́. Сла́ва Отцу́ и Сы́ну и Свято́му Ду́ху. В целому́дрии жизнь твою препроводи́в, преподо́бне,/ земна́я Небе́сными измени́л еси́ и нетле́нная тле́нными искупи́л еси́./ Те́мже Христу́ пое́ши:/ сла́ва си́ле Твое́й, Го́споди. И ны́не и при́сно и во ве́ки веко́в. Ами́нь. Богородичен: До́брых всех обнажи́хся и лежу́ в зло́бе:/ оболки́й всех, дре́вле па́дших, и ны́не мя пре́ждними украси́,/ и вторы́х изба́ви, Богоневе́сто. Песнь 5 Ирмос: Хода́тай Бо́гу и челове́ком был еси́, Христе́ Бо́же:/ Тобо́ю бо, Влады́ко, к Светонача́льнику, Отцу́ Твоему́,/ от но́щи неве́дения/ приведе́ние и́мамы. Припев: Преподо́бне о́тче Анто́ние, моли́ Бо́га о на́с. Стра́нно твое́ житие́, преподо́бне ; / ку́пно же и смире́ние, е́же стяжа́л еси́, Анто́ние,/ я́ко ни сама́го све́та того́, и́же в ми́ре,/ ниже́ со́лнечнаго сия́ния, досто́йна тебе́ того́ вмени́л еси́ зре́ния,/ но в те́мне ме́сте еди́н тебе́ затвори́л еси́. Припев: Преподо́бне о́тче Анто́ние, моли́ Бо́га о на́с. Це́рковь и дом Пресвята́го Ду́ха, о́тче Анто́ние, был еси́,/ разли́чными доброде́тельми укра́шен быв,/ смире́нием Го́рнюю высоту́ насле́див,/ нището́ю Небе́сное бога́тство прия́л еси́, преподо́бне. Сла́ва Отцу́ и Сы́ну и Свято́му Ду́ху. Па́мять твою́ творя́щих свяще́нную от вся́ких спаси́ прегреше́ний, и печа́лей, и напа́стей,/ твое́ Боже́ственное да́руй заступле́ние,/ всех Царю́ предстоя́й, о́тче Анто́ние. И ны́не и при́сно и во ве́ки веко́в. Ами́нь. Богородичен: Я́ко невече́рний Свет, от чре́ва Твоеге́ су́щий возсия́вший,/ отемне́нную ду́шу мою́ озари́, Влады́чице Чи́стая,/ и отжени́ вся́ку мглу се́рдца моего́. Песнь 6 Ирмос: В бе́здне грехо́вией валя́яся,/ неизсле́дную милосе́рдия Твоего́ призыва́ю бе́здну:/ от тли, Бо́же, мя возведи́. Припев: Преподо́бне о́тче Анто́ние, моли́ Бо́га о на́с. Я́ко свобожде́на бы́вши блаже́нная твоя́ душа́ от тя́жести плотски́я/ и от го́рькаго фарао́на мучи́теля, ми́ра сего́ изше́дши,/ в зе́млю обетова́ния ра́йскаго пре́йде немяте́жно,/ со святы́ми пребыва́ет, веселя́щися. Припев: Преподо́бне о́тче Анто́ние, моли́ Бо́га о на́с. Ны́не свяще́нное те́ло твое́, преподо́бне, в пеще́ре лежа́щее,/ исцеле́ния мно́гая источа́ет ве́рою приходя́щим./ Те́мже мо́лим тя:/ и душе́вная здра́вия мольба́ми твои́ми пода́ждь тебе́ сла́вящим. Сла́ва Отцу́ и Сы́ну и Свято́му Ду́ху. Светле́йши со́лнца возсия́ пречестна́я па́мять твоя́, Анто́ние,/ в ню́же соше́дшеся, прославля́ем твое́ успе́ние и труды́,/ я́же претерпе́л еси́ в жи́зни сей,/ прося́ще от Христа́ тобо́ю прия́ти грехо́в оставле́ние. И ны́не и при́сно и во ве́ки веко́в. Ами́нь. Богородичен: Красоты́ мя ви́дети сла́вы Твоея́ сподо́би,/ егда́ от пло́ти моея́ хощу́ разлучи́тися,/ я́ко утвержде́ние мое́ еси́, Влады́чице:/ да отсю́ду прииму́ избавле́ние. Кондак, глас 8 Возложи́в себе́ Бо́гу, па́че всех возлю́бленному от ю́ности, преподо́бне,/ Тому́ от всея́ души́ любо́вию после́довал еси́,/ ми́ра же тле́нная ни во что́же вмени́в,/ в земли́ пеще́ру соде́лал еси́/ и, в ней до́бре проти́ву неви́димаго врага́ ко́зней подвиза́вся,/ я́ко светоза́рное со́лнце, во вся концы́ земли́ возсия́л еси́,/ отону́дуже, веселя́ся, преше́л еси́ к Небе́сным черто́гом./ И ны́не со А́нгелы Влады́чню престо́лу предстоя́,/ помина́й нас, чту́щих пя́мять твою́, да зове́м ти:/ ра́дуйся, Анто́ние, о́тче наш. Икос Присносу́щнаго немерца́ющаго све́та Святы́я Тро́ицы наслади́тися жела́я/ и сего́ ра́ди четыредесятоле́тное вре́мя в еди́ной пеще́ре те́мне тебе́ затвори́в,/ отту́ду неисхо́ден, о́тче, пребы́л еси́,/ до́ндеже те́ло твое́ чи́сто с душе́ю Бо́гу предста́вил еси́./ Отону́дуже и по преставле́нии, я́ко жив, от Го́спода дарова́ния чуде́с прия́л еси́,/ исцеля́ти разли́чныя боле́зни зле стра́ждущих/ и бе́сы от челове́к приходя́щих изгони́ти./ Те́мже мо́лим тя:/ моли́ся, о́тче, сохрани́ти без вре́да оте́чество твое́, град же и лю́ди, да зове́м ти:/ ра́дуйся, Анто́ние, о́тче наш. Песнь 7 Ирмос: Богопроти́вное веле́ние беззако́ннующаго мучи́теля/ высо́к пла́мень вознесло́ есть./ Христо́с же простре́ богочести́вым отроко́м ро́су духо́вную,/ Сый благослове́н и препросла́влен. Припев: Преподо́бне о́тче Анто́ние, моли́ Бо́га о на́с. Вели́каго трудополо́жника и ревни́теля/ твоему́ житию́, преподо́бне Анто́ние, Феодо́сия блаже́ннаго, стяжа́л еси́,/ а́нгельскому твоему́ житию́ после́дующа,/ с ни́мже в Вы́шних водворя́яся, нас помина́й. Припев: Преподо́бне о́тче Анто́ние, моли́ Бо́га о на́с. Но́ваго тя Моисе́я, о́тче, позна́хом, страсте́й победи́теля:/ я́коже бо он, дре́вле Амали́ка победи́в, лю́ди изведе́,/ ты же, о́тче, мно́жество мона́шествующих в зе́млю обетова́ния ра́йскаго приве́л еси́. Сла́ва Отцу́ и Сы́ну и Свято́му Ду́ху. Гра́да и оте́чества твоего́ пресе́льник, о́тче, был еси́,/ но па́ки Бо́жиим промышле́нием ко оте́честву твоему́ сла́вно свиде́тельствован возвраща́ешися,/ иде́же благода́ть от Го́спода, о́тче, прия́л еси́. И ны́не и при́сно и во ве́ки веко́в. Ами́нь. Богородичен: Пещь прообразова́ше Твое́ рождество́, Пренепоро́чная:/ о́троки бо не опали́, я́коже ни ложесна́ Твоя́ Огнь нестерпи́мый./ Те́мже мо́лим Тя: огня́ ве́чнаго изба́ви рабы́ Твоя́. Песнь 8 Ирмос: Пещь иногда́ о́гненная в Вавило́не де́йства разделя́ше/ Бо́жиим веле́нием халде́и опаля́ющая,/ ве́рныя же ороша́ющая, пою́щия:/ благослови́те, вся дела́ Госпо́дня, Го́спода. Припев: Преподо́бне о́тче Анто́ние, моли́ Бо́га о на́с. Исцеле́ния оби́льна, преподо́бне, ве́рою приходя́щим ко хра́му твоему́/ и су́щим в ско́рбех утеше́ние подава́й, да вси с тобо́ю Христу́ вопие́м:/ благослови́те, вся дела́ Госпо́дня, Го́спода. Припев: Преподо́бне о́тче Анто́ние, моли́ Бо́га о на́с. Благода́рное сие́ пе́ние принося́щия ти, о́тче, свы́ше ми́лостивно назира́й/ и моли́ Христа́ Изба́вителя спасти́ всех, вопию́щих Ему́:/ благослови́те, вся дела́ Госпо́дня, Го́спода. Сла́ва Отцу́ и Сы́ну и Свято́му Ду́ху. Принесе́ся дар Вседержи́телю – тобо́ю мно́жество спаса́емых,/ твоему́ житию́ после́дующих, Анто́ние./ Те́мже моли́ спасти́ся всем, с тобо́ю Христу́ вопию́щим:/ благослови́те, вся дела́ Госпо́дня, Го́спода. И ны́не и при́сно и во ве́ки веко́в. Ами́нь. Богородичен: Вели́кому та́инству рождества́ Твоего́ кто не удиви́тся, Богоро́дице?/ Или́ кий язы́к зе́мен или́ ум безпло́тен изрещи́ возмо́жет?/ Па́че естества́ бо и смы́сла, Богоро́дице, Зижди́теля родила́ еси́. Песнь 9 Ирмос: Безнача́льна Роди́теля Сын, Бог и Госпо́дь,/ вопло́щся от Де́вы, нам яви́ся,/ омраче́нная просвети́ти, собра́ти расточе́нная./ Тем Всепе́тую Богоро́дицу велича́ем. Припев: Преподо́бне о́тче Анто́ние, моли́ Бо́га о на́с. Пахо́мия Вели́каго, а́нгельскаго виде́ния сподо́бльшагося, житию́, о́тче, подража́в,/ равноа́нгельно в пеще́ре пожи́л еси́./ Те́мже и равноа́нгельную по́честь сподо́бился еси́ прия́ти, Анто́ние. Сла́ва Отцу́ и Сы́ну и Свято́му Ду́ху. Иже от Святы́я Горы́ путе́м веду́щим, о́тче, ме́ста Ки́евскаго дости́гл еси́,/ иде́же бя́ше уго́дно Влады́чицы Ма́тере Бо́жия хра́му воздви́гнутися,/ и та́мо храм прече́стен в сла́ву Богома́тере, ку́пно со блаже́нным Феодо́сием, воздви́гл еси́./ Те́мже тя вси с ним велича́ем. И ны́не и при́сно и во ве́ки веко́в. Ами́нь. Богородичен: Светороди́тельнице Де́во, души́ моея́ о́блак отжени́/ и дава́й чи́сто зре́ти, Влады́чице, спаси́тельную добро́ту,/ возсия́вшую неизглаго́ланно из Твоея́ пречи́стыя утро́бы,/ во свет язы́ков, Препе́тая. Светилен Жите́йское сладостра́стие умертви́л еси́, Анто́ние,/ сла́ву же маловре́менную позна́в, сея́ вско́ре отступи́л еси́,/ те́сным путе́м изво́лив ходи́ти,/ веду́щим к ра́йскому простра́нству./ Те́мже моли́ся, Анто́ние, спасти́ся тебе́ почита́ющим. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Богоро́дицу Тя вои́стинну испове́дающе, Влады́чице, и́же Тобо́ю спаса́емии:/ Ты бо Бо́га родила́ еси́,/ разо́ршаго Кресто́м смерть и к Себе́ привле́кша преподо́бных собо́ры,/ с ни́миже Тя восхваля́ем, Де́во.

Минея, 2 Июля, Ин канон Глас 4 Песнь 1 Ирмос: Мо́ря чермну́ю пучи́ну/ невла́жными стопа́ми/ дре́внии́ пешеше́ствовав, Изра́иль,/ крестообра́зныма Моисе́овыма рука́ма/ Амали́кову си́лу в пусты́ни победи́л есть. Припев: Пресвята́я Богоро́дице, спаси́ на́с. Свеща́ светоявле́нная и незаходи́мая,/ Пречи́стыя храм, я́коже не́бо све́тлое, обре́т честну́ю ри́зу Ея́,/ вселе́нную днесь благода́тей просвеща́ет заря́ми. Сла́ва Отцу́ и Сы́ну и Свято́му Ду́ху. Кре́пость и утвержде́ния сою́з, Твою́, Пречи́стая, ри́зу Боже́ственную/ вои́стинну стяжа́в, град Твой держа́ву непобеди́мую и́мать,/ тем и хва́лится о Тебе́. И ны́не и при́сно и во ве́ки веко́в. Ами́нь. Дре́вняго я́ко вои́стинну киво́та честне́йшая Твоя́ ра́ка, Богороди́тельнице, яви́ся на земли́,/ его́же зна́мения нося́щи, но и ве́рных во и́стине позна́ния сохраня́ющи. Песнь 3 Ирмос: Весели́тся о Тебе́ Це́рковь Твоя́, Христе́, зову́щи:/ Тя моя́ кре́пость, Го́споди,/ и прибе́жище, и утвержде́ние. Припев: Пресвята́я Богоро́дице, спаси́ на́с. Почита́ем, ве́рнии, я́ко совокупле́ния к Бо́гу сою́з,/ Чи́стыя днесь ри́зы, ве́рно гове́юще. Сла́ва Отцу́ и Сы́ну и Свято́му Ду́ху. Исцеле́ния ве́рным многочестна́я нам днесь/ прече́стно Чи́стыя ри́за источа́ет благода́тию. И ны́не и при́сно и во ве́ки веко́в. Ами́нь. Я́ко роса́ у́тренняя, ра́дость Твоя́ приснотеку́щая/ пещь страсте́й Тя воспева́ющих уставля́ет при́сно. Седален, глас 4 Чуде́с ре́ки, Богоро́дице, от всечестны́я Твоея́ ра́ки происходя́щия,/ я́ко из Еде́ма, напая́ют лице́ земли́,/ благода́ти пролива́ющия ве́рно Тя чту́щим,/ те́мже Тя воспева́ем, и ве́рно восхваля́ем, и благода́рно всегда́ взыва́ем:/ ра́дуйся, еди́на Наде́жде пою́щих Тя. Песнь 4 Ирмос: Вознесе́на Тя ви́девши Це́рковь на Кресте́,/ Со́лнце Пра́ведное,/ ста в чи́не свое́м,/ досто́йно взыва́ющи:/ сла́ва си́ле Твое́й, Го́споди. Припев: Пресвята́я Богоро́дице, спаси́ на́с. Я́ко пречестну́ю твердь, Богоро́дице, Творе́ц и Зижди́тель Тя водрузи́вый,/ я́коже звезда́ми, украси́ Тя Боже́ственными сия́нии,/ и́миже украша́еши концы́. Сла́ва Отцу́ и Сы́ну и Свято́му Ду́ху. От земли́ нас возвлачи́т к Небеси́, Богороди́тельнице,/ Боже́ственная Твоя́ ри́за, Чи́стая, любо́вию сея́ распале́нных те́пле,/ те́мже Тя сла́вим, я́ко лу́чшаго вину́. И ны́не и при́сно и во ве́ки веко́в. Ами́нь. Се благода́ть неисчерпа́емая, прииди́те вси сокруше́нным се́рдцем,/ почерпи́те Боже́ственныя то́ки, источа́ющия незави́стно, о празднолю́бцы,/ от честны́я ра́ки Твоея́, Всепе́тая. Песнь 5 Ирмос: Ты, Го́споди, мой Свет,/ в мир прише́л еси́,/ Свет Святы́й, обраща́яй из мра́чна неве́дения/ ве́рою воспева́ющия Тя. Припев: Пресвята́я Богоро́дице, спаси́ на́с. Ты, Го́споди, Твою́ Ма́терь возвели́чил еси́,/ Ты возне́сл еси́ над вся вла́сти мы́сленныя без сравне́ния сла́ву Ея́. Сла́ва Отцу́ и Сы́ну и Свято́му Ду́ху. Благода́ть Бо́жию незави́стно точа́щая Ты еси́, Пречи́стая Богоро́дице,/ от честны́я ра́ки Твоея́ любо́вию покланя́ющимся. И ны́не и при́сно и во ве́ки веко́в. Ами́нь. Твое́ю си́лою ве́рнии лю́дие опоясу́ются,/ Тя сою́з, Богоро́дице, Твой име́яй град/ ри́зою Твое́ю почита́ется. Песнь 6 Ирмос: Пожру́ Ти со гла́сом хвале́ния, Го́споди,/ Це́рковь вопие́т Ти,/ от бесо́вския кро́ве очи́щшися/ ра́ди ми́лости от ребр Твои́х/ исте́кшею Кро́вию. Припев: Пресвята́я Богоро́дице, спаси́ на́с. Всю Тя па́че естества́ просла́ви Госпо́дь, всю украси́в, Отрокови́це,/ всю Тя почте́ па́че сло́ва, Богоро́дице,/ с по́ясом, ри́зою и Боже́ственною ра́кою. Сла́ва Отцу́ и Сы́ну и Свято́му Ду́ху. Кре́пость Тя ве́рнии стяжа́вше и похвалу́,/ одева́ются сла́вою, честно́ю Твое́ю ри́зою, Богороди́тельнице,/ я́коже пресве́тлое украше́ние и честно́е Тя стяжа́вше. И ны́не и при́сно и во ве́ки веко́в. Ами́нь. Ви́дети Твою́, Богоро́дице, сла́ву неизрече́нную/ дре́вле боле́зноваху боже́ственне проро́цы вси,/ но в после́дняя дни нам яви́ся и́же лет Превы́шший. Кондак, глас 4 Одея́ние всем ве́рным нетле́ния, Богоблагода́тная Чи́стая, дарова́ла еси́,/ свяще́нную ри́зу Твою́,/ е́юже свяще́нное те́ло Твое́ покрыва́ла еси́,/ покро́ве всех челове́ков,/ ея́же положе́ние пра́зднуем любо́вию/ и вопие́м со стра́хом Ти, Чи́стая:/ ра́дуйся, Де́во, христиа́н похвало́. Икос Чи́стое одея́ние и ски́нию Бо́жия Сло́ва,/ одушевле́нный о́блак и ста́мну ма́нны, Богоро́дицу Мари́ю/ вси, спа́сшиися Рождество́м Ея́, ве́рою ублажи́м/ и честне́й ри́зе прико́снемся,/ е́юже Влады́ку объе́мши, я́ко Отроча́ носи́ла есть, в плоть обо́лкшагося,/ Его́же ра́ди челове́ческое естество́ взя́тся к превысоча́йшей жи́зни и Ца́рствию./ Те́мже с ра́достию вопие́м велегла́сно:/ ра́дуйся, Де́во, христиа́н похвало́. Песнь 7 Ирмос: В пещи́ авраа́мстии о́троцы перси́дстей,/ любо́вию благоче́стия па́че,/ не́жели пла́менем, опаля́еми, взыва́ху:/ благослове́н еси́ в хра́ме сла́вы Твоея́, Го́споди. Припев: Пресвята́я Богоро́дице, спаси́ на́с. Ты, я́коже со́нце пра́вды еди́н сый, Бла́же,/ Боже́ственно украси́л еси́ храм Чи́стыя разли́чными Твои́ми дарова́нии,/ в не́мже возсия́вшая лучи́ испуща́ет от Своея́ ри́зы. Припев: Пресвята́я Богоро́дице, спаси́ на́с. Излива́ют чудеса́, Пречи́стая, Боже́ственныя ча́ши Твоя́ благода́ть вои́стинну ве́рным,/ и незави́стно чту́щим Тя от Твоея́ ра́ки пролива́ются,/ я́ко из друга́го Еде́ма, мы́сленныя ре́ки. Сла́ва Отцу́ и Сы́ну и Свято́му Ду́ху. От скве́рны вся́кия душе́вныя,/ чисти́тельна есть Твоя́, Всенепоро́чная Де́во, ра́ка,/ покрыва́ющая честно́е Твое́ те́ло покры́вшую ри́зу. И ны́не и при́сно и во ве́ки веко́в. Ами́нь. Ны́не приступи́те с весе́лием вси, и́же на земли́,/ прииди́те, ра́ка призыва́ет та́йне,/ объя́ти Госпожи́ пресла́вную во мне сокро́виществованную ри́зу Ея́. Песнь 8 Ирмос: Ру́це распросте́р, Дании́л/ львов зия́ния в ро́ве затче́;/ о́гненную же си́лу угаси́ша,/ доброде́телию препоя́савшеся,/ благоче́стия рачи́тели о́троцы, взыва́юще:/ благослови́те, вся дела́ Госпо́дня, Го́спода. Припев: Пресвята́я Богоро́дице, спаси́ на́с. А́нгели, Пречи́стая, ны́не сликовству́ют в честне́м хра́ме Твое́м, Чи́стая,/ и окружа́ют, Влады́чице, честну́ю и святу́ю Твою́ ри́зу любо́вию и ра́достию,/ мы же весе́лием мно́гим покланя́емся,/ воспева́юще Тя, сла́ву ро́да на́шего. Сла́ва Отцу́ и Сы́ну и Свято́му Ду́ху. Жезл, я́же цвет жи́зни прозя́бшая,/ Ты еси́ всех ра́дость многочестна́я, Пречи́стая,/ мирополо́жница Ду́ха, сокро́вище благи́х, арома́т исто́чник,/ из него́же ми́ра исцеле́ний источа́ет Боже́ственная ра́ка. И ны́не и при́сно и во ве́ки веко́в. Ами́нь. Воспева́ют, Пречи́стая, вели́чия Твоя́, Чи́стая, мы́сленная во́инства,/ пропове́дают вси патриа́рси и проро́цы я́сно,/ и апо́столи сия́, и му́чеников лик, и преподо́бных все исполне́ние,/ с ни́миже покланя́ем Ти ся. Песнь 9 Ирмос: Ка́мень нерукосе́чный/ от несеко́мыя горы, Тебе́, Де́во,/ краеуго́льный отсече́ся,/ Христо́с, совокупи́вый разстоя́щаяся естества́./ Тем, веселя́щеся, Тя, Богоро́дице, велича́ем. Припев: Пресвята́я Богоро́дице, спаси́ на́с. Черто́г пречестны́й сей, Богороди́тельнице, яви́ся ра́ка Твоя́,/ честну́ю Твою́ ри́зу, де́вственное же одея́ние и неве́стническое я́ко иму́щи/ и я́ко жи́зни сокро́вище соблюда́ющи. Припев: Пресвята́я Богоро́дице, спаси́ на́с. Храм, изобража́ющий вся́ко Небе́сное благоукраше́ние Де́вы, днесь, ве́рнии, дости́гше,/ чуде́с заря́ми, я́коже звезда́ми, сия́ем, и озаря́емся благода́тию. Сла́ва Отцу́ и Сы́ну и Свято́му Ду́ху. И́мать святы́й Твой по́яс/ и честну́ю Твою́ ри́зу, Богороди́тельнице, Твой град, я́ко сте́ну,/ и уче́ний Боже́ственных соедине́ние, и правосла́вных похвалу́,/ и во́инству победи́тельная. И ны́не и при́сно и во ве́ки веко́в. Ами́нь. Пое́м неизрече́нную сла́ву и безчи́сленную Твою́ благода́ты/ Ты бо еси́ исто́чник прему́дрости, из него́же Сло́во всем происхо́дит,/ чту́щим Тя, Пречи́стая, и велича́ющим рождество́ Твое́. Светилен Окрили́вшую Христа́/ ри́зу Богоотрокови́цы и Богоро́дицы Мари́и,/ днесь прииди́те, земноро́днии, почти́м пе́сньми,/ я́ко да благода́тию Сея́ при́сно ублажа́емся. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Еди́на и естество́ и вре́мя обнови́ла еси́, Богома́ти:/ нетле́нно бо Твое́ рождество́, нетле́нная и ри́за,/ е́юже град Твой покрыва́еши/ и е́юже ски́петры благоче́стия содержи́ши.

Укрепляемь силою Креста и благодатию,/ преобидев тленная и долу влекущая мудрования, отче,/ бесов посрамил еси,/ к Вышнему течение получил еси,/ устремился еси в Хозьюгу пустыню,/ Пресвятей Троице жилище был еси,/ Ейже предстоя, моли о нас, почитающих тя,/ да возопиим ти:/ радуйся, преблаженне Никодиме, отче наш.

Явистеся светильницы всесветлии, во плоти ангели,/ яко Живота древо райское,/ пощением, и бдением, и верою возращаеми, процвели есте./ Молитвами своими Небесную благодать приемше,/ врачеве же крепцыи явльшеся,/ исцеляете недужныя и души с верою прибегающих к раце мощей ваших,/ чудотворцы славнии, Иоанне и Лонгине,/ сего ради вси верою и любовию вопием:/ радуйтеся, поморстей стране похвало и утверждение.

Минея, 19 Января, Ин канон Глас 8 Песнь 1 Ирмос: Колесницегони́теля фарао́ня погрузи́ чудотворя́й иногда́ Моисе́йский же́зл, крестообра́зно порази́в и раздели́в мо́ре, Изра́иля же беглеца́, пешехо́дца спасе́, пе́снь Бо́гови воспева́юща. Припев: Святи́телю о́тче Ма́рко, моли́ Бо́га о на́с. Добро́ты ра́ди доброде́телей сия́ния Вы́шняго прия́телище бы́в, па́ству Христо́ву, Ма́рко, просвети́л еси́, сего́ ра́ди к Све́ту невече́рнему преста́влься, воспева́ющим боже́ственную па́мять твою́ вдохни́ сло́ву озаря́ющую благода́ть, сла́вне. Припев: Святи́телю о́тче Ма́рко, моли́ Бо́га о на́с. Тща́щемуся ми́ досто́йно дости́гнути похва́л твои́х, блаже́нне, глубоча́йший зри́тся бы́ти исто́чник слове́с боже́ственных твои́х исправле́ний, но, о́тче, моли́твами твои́ми любви́ ра́вную благода́ть и си́лу ми́ да́ждь. Сла́ва Отцу́ и Сы́ну и Свято́му Ду́ху. Благода́тей Боже́ственных всесвяты́й хра́м, от него́же благово́ния та́инственная все́м, благоче́стно живу́щим, раскры́шася во сла́ву и хвалу́ Несозда́нныя Тро́ицы, Еди́наго естество́м Бо́га на́шего, да восхва́лится Ма́рк всечестны́й. И ны́не и при́сно и во ве́ки веко́в. Ами́нь. Богородичен: Дре́вле проро́ков свя́щенныя прови́деша взо́ры, Чи́стая, Тя́ у́мную го́ру, купину́ неопали́мую и врата́ непроходи́мая, ста́мну и манноприе́мницу, мы́ же ве́рою возвеща́ем Тя́ Богоро́дицу вои́стинну, Богоневе́сто. Песнь 3 Ирмос: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ в любви́ Твое́й, жела́ний кра́ю, ве́рных утвержде́ние, еди́не Человеколю́бче. Припев: Святи́телю о́тче Ма́рко, моли́ Бо́га о на́с. Зерца́ло сия́ний Всетво́рческаго Ду́ха, блаже́нне, показа́лся еси́, просвеща́я ве́рных исполне́ния незаблу́дными твои́ми уче́нии и уверя́я воспева́ти Тро́ицу Несозда́нную. Припев: Святи́телю о́тче Ма́рко, моли́ Бо́га о на́с. Ри́торствуя посреде́ собо́рнаго ря́да, утверди́л еси́ бытие́ Ду́ха Свята́го, от Оте́ческия Ипоста́си происходя́щее, и ве́рных составле́ния, Ма́рко, возвесели́л еси́. Сла́ва Отцу́ и Сы́ну и Свято́му Ду́ху. Всесли́чная труба́, мусики́йский орга́н, духодви́жимый язы́к и сладкозву́чный, испо́лненный благода́ти исто́чник и́стинныя прему́дрости, да похва́лится дне́сь Ма́рк всечестны́й. И ны́не и при́сно и во ве́ки веко́в. Ами́нь. Богородичен: Неизъясни́мое чу́до, е́же на Тебе́, Всечи́стая! Яко все́х Бо́га неизрече́нно родила́ еси́ и по рождестве́ Де́ва су́щи яви́лася еси́, сего́ ра́ди Богоро́дицу Тя́ и́стинную почита́ем. Седален, глас 8 Облета́я лу́г свяще́нный и ра́й, вои́стинну благоцвету́щий, я́ко не́кая пчела́, от писа́ний Ду́ха и святы́х оте́ц пе́рвых, ве́ры основа́ний возвести́телей и учи́телей, преподо́бне, ро́су поче́рпл еси́ прия́тную и благово́нную, от нея́же соде́лал еси́ со́ты ве́ры и ме́д ве́дения, его́же ца́рие и простецы́ во здра́вие прие́млюще, благода́рственная вси́ воспису́ют тебе́, всему́дре: моли́ Христа́ Бо́га прегреше́ний да́ти оставле́ние пра́зднующим любо́вию святу́ю па́мять твою́. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: В напа́сти многоплете́нныя впа́д от вра́г ви́димых и неви́димых, бу́рею одержи́мь безчи́сленных согреше́ний мои́х; и я́ко к те́плому Твоему́ заступле́нию и покро́ву моему́, Чи́стая, ко приста́нищу притека́ю Твоея́ бла́гости. Те́мже, Пречи́стая, из Тебе́ Воплоще́нному безсе́менно моли́ся приле́жно о все́х рабе́х Твои́х, непреста́нно моля́щих Ти ся, Богоро́дице Пречи́стая, моля́щи Его́ при́сно, согреше́ний оставле́ние дарова́ти воспева́ющим досто́йно сла́ву Твою́. Песнь 4 Ирмос: Услы́шах, Го́споди, смотре́ния Твоего́ та́инство, разуме́х дела́ Твоя́ и просла́вих Твое́ Божество́. Припев: Святи́телю о́тче Ма́рко, моли́ Бо́га о на́с. В твои́х, всеблаже́нне, устна́х благода́ть излия́ся и просвети́ Це́ркве тве́рдь сла́достию разсужде́ний боже́ственных. Припев: Святи́телю о́тче Ма́рко, моли́ Бо́га о на́с. Свяще́ннейший хра́м Свята́го Ду́ха бы́л еси́, боже́ственное благоуха́ние богосло́вия все́м испуска́я, свяще́ннейший. Сла́ва Отцу́ и Сы́ну и Свято́му Ду́ху. Све́тлая твоя́ возсия́ па́мять и просвети́ мы́сли любо́вию восхваля́ющих твоего́ богосло́вия соверше́нство. И ны́не и при́сно и во ве́ки веко́в. Ами́нь. Богородичен: Во́инство невеще́ственных умо́в превзошла́ еси́, Чи́стая, ро́ждши вся́ Осуществова́вшаго и на́с от пре́лести Изба́вившаго. Песнь 5 Ирмос: Вску́ю мя́ отри́нул еси́ от лица́ Твоего́, Све́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и к све́ту за́поведей Твои́х пути́ моя́ напра́ви, молю́ся. Припев: Святи́телю о́тче Ма́рко, моли́ Бо́га о на́с. Посреде́ Це́ркве пе́снь богодухнове́нную сла́дко воспе́л еси́, Отца́ то́чию Божества́ уча́ Вино́вника бы́ти, Роди́теля у́бо Сы́на и Изводи́теля Свята́го, всесла́вне, Ду́ха. Сла́ва Отцу́ и Сы́ну и Свято́му Ду́ху. Словесе́м оте́ц и Боже́ственным разсужде́нием, блаже́нне, после́дуя, Сы́на и Ду́ха, Отцу́ равноче́стна бы́ти, возгласи́л еси́, я́ко бытие́ и́ма от Отца́, я́ко от Вины́, от Него́же вку́пе и происхо́дят Обоя́. И ны́не и при́сно и во ве́ки веко́в. Ами́нь. Богородичен: Ра́дуйся, ле́ствице Иа́ковля, е́юже сни́де Бо́г и привлече́ сме́ртное естество́ в небе́сную сла́ву, Богоневе́сто; ра́дуйся, Ангелов ра́досте, ве́рных же все́х упова́ние и тве́рдое прибе́жище. Песнь 6 Ирмос: Очи́сти мя́, Спа́се, мно́га бо беззако́ния моя́, и из глубины́ зо́л возведи́, молю́ся, к Тебе́ бо возопи́х, и услы́ши мя́, Бо́же спасе́ния моего́. Припев: Святи́телю о́тче Ма́рко, моли́ Бо́га о на́с. Пропове́дателей Христо́вых ве́ру насле́довав неума́ленную, невре́дну соблю́л еси́, сла́вне, пред власти́тели, ничто́же страша́ся итали́йских ко́зней. Припев: Святи́телю о́тче Ма́рко, моли́ Бо́га о на́с. Удали́в себе́ скве́рнаго смеше́ния, всеблаже́нне, к духо́вному и ра́достному отше́л еси́ стоя́нию, иде́же Трисо́лнечный зри́ши Све́т, на́м благода́ть прося́. Сла́ва Отцу́ и Сы́ну и Свято́му Ду́ху. Догма́тов благочести́вых смы́сл на́м изъясни́л еси́ и мня́щих то́ежде бы́ти Существо́ и де́йство до́блестно отгна́л еси́, я́ко Су́щаго прису́щее е́сть, блаже́нне, разли́чие. И ны́не и при́сно и во ве́ки веко́в. Ами́нь. Богородичен: Сотвори́ Тебе́ вели́чия Си́льный, Всечи́стая, посреде́ те́рний кри́н обре́т Тя́, и́мже испо́лни всю́ тва́рь благоуха́нии Божества́. Кондак, глас 8 Богосло́вов Богому́драя писа́ния,/ я́ко Богоглаго́льник и́стинен, прие́м в се́рдцы,/ исхожде́ние Ду́ха Свята́го возвести́л еси́, я́ко до́лжно есть, приснохва́льне,/ и всесвяты́й запечатле́л еси́ Си́мвол,/ сего́ ра́ди пое́м:/ ра́дуйся, Ма́рко Богоглаго́ливе. Икос А́нгел убо, предста́в, ра́доватися благовести́ иногда́ Богоро́дице со стра́хом,/ аз же еди́н от зря́щих тя, вы́ше естества́ я́вльшася, я́ко А́нгела,/ я́ко челове́к удивля́юся и пою́ ти с любо́вию такова́я:/ ра́дуйся, чистоты́ святы́я прия́телище;/ ра́дуйся, прему́дрости Бо́жия сокро́вищнице./ Ра́дуйся, Богосло́вов святы́х печа́те;/ ра́дуйся, учи́телей отце́в преде́ле./ Ра́дуйся, пучи́но неизмери́мая мышле́ний духо́вных;/ ра́дуйся, мо́ре простра́нное та́инственных писа́ний./ Ра́дуйся, я́ко показа́лся еси́ Це́ркве свет ве́лий;/ ра́дуйся, я́ко до ны́не постыжда́еши противомы́слящия./ Ра́дуйся, исто́чниче догма́тов ве́ры;/ ра́дуйся, закола́телю но́вшеских ухищре́ний./ Ра́дуйся, и́мже утверди́хомся вси;/ ра́дуйся, и́мже и́стина сия́ет./ Ра́дуйся, Ма́рко Богоглаго́ливе. Песнь 7 Ирмос: Бо́жия снизхожде́ния о́гнь устыде́ся в Вавило́не иногда́, сего́ ра́ди о́троцы в пещи́, ра́дованною ного́ю, я́ко во цве́тнице лику́юще, поя́ху: благослове́н еси́ Бо́же, оте́ц на́ших. Припев: Святи́телю о́тче Ма́рко, моли́ Бо́га о на́с. Возше́л еси́, ра́дуяся, к Трисо́лнечному Све́ту и прича́стием Того́ наслажда́ешися, я́ко правосла́вно на земли́, уча́, явля́л еси́ все́м: благослове́н Бо́г оте́ц на́ших. Припев: Святи́телю о́тче Ма́рко, моли́ Бо́га о на́с. От еди́ныя Ипоста́си Оте́ческия безвре́менно возсия́ша Сы́н и Ду́х, Ов у́бо рожде́нием, Се́й же исхожде́нием, — догма́тствовал еси́ и ве́рныя пе́ти утверди́л еси́: благослове́н Бо́г оте́ц на́ших. Сла́ва Отцу́ и Сы́ну и Свято́му Ду́ху. Возвести́л еси́ все́м Уте́шителя Боже́ственное исхожде́ние, су́щее то́кмо от Отца́, я́ко от Вины́, му́дре, и постыди́л еси́ богоку́пцев гнила́я мне́ния, не ве́дущих вопи́ти: благослове́н Бо́г оте́ц на́ших. И ны́не и при́сно и во ве́ки веко́в. Ами́нь. Богородичен: Свободи́ся Плодо́м Твои́м, Богороди́тельнице, естество́ сме́ртное от дре́вния кля́твы и благослове́ния удосто́ися свята́го, сего́ ра́ди сла́вит и воспева́ет, зову́ще: благослове́н Бо́г оте́ц на́ших. Песнь 8 Ирмос: Седмери́цею пе́щь халде́йский мучи́тель, Богочести́вым неи́стовно разжже́; си́лою же лу́чшею спасе́ны сия́ ви́дев, Творцу́ и Изба́вителю вопия́ше: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки. Припев: Святи́телю о́тче Ма́рко, моли́ Бо́га о на́с. От главы́ до сто́п озаря́емь, богоно́сче блаже́нне, святи́тельства честно́е и свято́е Ева́нгелие чи́сто священноде́йствовал еси́ и, ве́рныя уча́ ему́, уверя́л еси́ пе́ти: де́ти, благослови́те, свяще́нницы, воспо́йте, лю́дие, превозноси́те во вся́ ве́ки. Припев: Святи́телю о́тче Ма́рко, моли́ Бо́га о на́с. Яко со́лнце от восто́ка, возсия́л еси́, преподо́бне, и богосло́вия блиста́нии осия́л, и просвети́л еси́ вселе́нную, и ве́рныя научи́л еси́ Тро́ице воспева́ти со стра́хом: де́ти, благослови́те, свяще́нницы, воспо́йте, лю́дие, превозноси́те во вся́ ве́ки. Сла́ва Отцу́ и Сы́ну и Свято́му Ду́ху. Не Дру́г от Дру́га име́ют бытие́, Яже от Еди́ныя Вины́ происхо́дят, сла́вне, все́м возвеща́л еси́, я́ко Сы́н и Ду́х я́ве Обоя́ от Отца́, не Дру́г от Дру́га вся́ко, я́коже о́трасли от ко́рене еди́наго неувяда́емаго; сего́ ра́ди у́бо па́мять твою́ че́ствуем во ве́ки. И ны́не и при́сно и во ве́ки веко́в. Ами́нь. Богородичен: Всесве́тлая Пала́то все́х Влады́чествующаго, омраче́нную страстьми́ ду́шу мою́ испра́ви к доброде́тельным стезя́м, Чи́стая, да, спасе́н бы́в ми́лостию Твое́ю, пою́: де́ти, благослови́те, свяще́нницы, воспо́йте, лю́дие, превозноси́те во вся́ ве́ки. Песнь 9 Ирмос: Вои́стинну Богоро́дицу, Тя́ испове́дуем, спасе́ннии Тобо́ю, Де́во Чи́стая, с безпло́тными ли́ки Тя́ велича́юще. Припев: Святи́телю о́тче Ма́рко, моли́ Бо́га о на́с. Благода́ть слове́с и богосло́вия твоего́ Це́рковь Христо́ву возвесели́, е́йже сохрани́тися в ми́ре не преста́й моли́тися всегда́. Припев: Святи́телю о́тче Ма́рко, моли́ Бо́га о на́с. До́бре ны́не наслажда́ешися жела́ннаго, всеблаже́нне, кра́йняго и боже́ственнаго просвеще́ния, его́же уча́стники моли́твами твои́ми и на́с сотвори́. Сла́ва Отцу́ и Сы́ну и Свято́му Ду́ху. Ре́вность Правосла́вия, воспыла́в в твое́й чи́стей души́, испепели́ еретико́в языкобо́лия, Ма́рко блаже́нне. И ны́не и при́сно и во ве́ки веко́в. Ами́нь. Богородичен: Яко вы́сшая умо́в и Бо́гу бли́жняя, Деви́це Чи́стая, у́м мо́й просвети́, из глубины́ многови́дных ну́жд изыма́ющи мя́. Светилен Уте́шителева благода́ть в тебе́ обита́вши, Ма́рко, боже́ственнейших догма́тов яви́ тя́ реку́, еретико́в потопля́ющую полки́, ве́рныя же вся́ веселя́щую. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Тя́, Госпожу́ все́х, я́ве воспева́я, мо́лим, Богоро́дице: бу́ди на́м боже́ственный покро́в, отгоня́ющи дале́че от на́с мра́чныя стре́лы велиа́ра.

Минея, 5 Сентября, Канон святаго Глас 8 Песнь 1 Ирмос: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:// Изба́вителю и Бо́гу на́шему пои́м. Припев: Святы́й проро́че Заха́рие, моли́ Бо́га о на́с. Па́мять, проро́че, твою́ восхвали́ти/ Ду́ха благода́ть молю́ помощи́ мне твои́м хода́тайством, взыва́я:/ Изба́вителю Бо́гу на́шему воспои́м. Припев: Святы́й проро́че Заха́рие, моли́ Бо́га о на́с. Житие́ твое́ непоро́чно обре́теся,/ свяще́нства украси́ся оде́ждею и проро́чества светоно́сными сия́нии,/ богоглаго́ливе, блаже́нне. Сла́ва Отцу́ и Сы́ну и Свято́му Ду́ху. Зако́нным венце́м главу́ украси́в, Заха́рие,/ яви́лся еси́ священноявле́нен, вопия́:/ Изба́вителю Бо́гу на́шему пои́м. И ны́не и при́сно и во ве́ки веко́в. Ами́нь. Богородичен: Поди́ра оде́ждею, я́ко Ааро́н, оде́ян,/ ю́же от ко́рене Иессе́ева прозя́бшую Отрокови́цу прия́л есй,/ Изба́вителя во чре́ве носи́вшую. Песнь 3 Ирмос: Ты еси́ Утвержде́ние/ притека́ющих к Тебе́, Го́споди,/ Ты еси́ Свет омраче́нных,// и пое́т Тя дух мой. Припев: Святы́й проро́че Заха́рие, моли́ Бо́га о на́с. Егда́ кади́ло сложе́ния приноси́л еси́, архиере́е,/ тогда́ Предте́чи прия́л еси́ провозвеще́ние. Припев: Святы́й проро́че Заха́рие, моли́ Бо́га о на́с. Ми́ром свяще́ния свяще́нствовати тя пома́за, я́ко Ааро́на,/ тем виде́ния Ангелова сподо́бился еси́. Сла́ва Отцу́ и Сы́ну и Свято́му Ду́ху. У́тро, провозвеща́ющее вселе́нней Тя, Со́лнца Разу́мнаго, Спа́се,/ Заха́рия Иоа́нна роди́л есть. И ны́не и при́сно и во ве́ки веко́в. Ами́нь. Богородичен: Упра́ви житие́ мое́, Богороди́тельнице Всечи́стая и жизнь,/ я́же Заха́риин дом уясни́вшая. Седален, глас 8 Свяще́нствовав Бо́гу по зако́ну/ и проро́чествовав Христа́ из Де́вы, Заха́рие, воплоще́нна от Ду́ха Свя́та,/ яви́лся еси́ вселе́нней столп све́тел,/ с высоты́ Пра́вды Восто́ка, весь мир осия́юща и в путь ми́рен направля́юща но́ги на́ша,/ ре́кл еси́, спаса́юща род наш. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Я́же Непреме́ннаго Бо́га поро́ждшая,/ пременя́емое при́сно се́рдце мое́ грехо́м и ле́ностию, прило́гми льсти́ваго,/ утверди́, Блага́я, моли́твами Ма́терними Твои́ми,/ я́ко да и аз благода́рно сла́влю Тя, Богороди́тельнице Мари́е,/ поми́луй ста́до Твое́, е́же стяжа́ла еси́, Всенепоро́чная. Песнь 4 Ирмос: Услы́шах, Го́споди,/ смотре́ния Твоего́ та́инство,/ разуме́х дела́ Твоя́// и просла́вих Твое́ Божество́. Припев: Святы́й проро́че Заха́рие, моли́ Бо́га о на́с. Проро́к Твой, Влады́ко, о́бразы зако́нными ве́рно служа́ше Тебе́/ и благода́ти сподо́бися усмотри́ти Твою́ и́стину. Припев: Святы́й проро́че Заха́рие, моли́ Бо́га о на́с. Све́том Свет прия́л еси́, мра́чнейшим ты ясне́йший, преблаже́нне:/ зако́ном бо и благода́ть ны́не тебе́ приложи́ся. Сла́ва Отцу́ и Сы́ну и Свято́му Ду́ху. Бо́гу предстоя́й, боже́ственный Гаврии́л,/ благовеству́я, яви́ тебе́, блаже́нне, глас Сло́ва и Предте́чу. И ны́не и при́сно и во ве́ки веко́в. Ами́нь. Богородичен: Чи́стое жили́ще Соде́тель, Де́во, тва́ри обре́т Тя, всели́ся,/ Елисаве́тино разреши́вый непло́дство. Песнь 5 Ирмос: У́тренююще, вопия́м Ти:/ Го́споди, спаси́ ны,/ Ты бо еси́ Бог наш,// ра́зве Теба́ ино́го не ве́мы. Припев: Святы́й проро́че Заха́рие, моли́ Бо́га о на́с. Кида́рь положи́ся на главе́ твое́й, о проро́че,/ в начерта́нии имущ и́стинное Боже́ственное свяще́ние. Припев: Святы́й проро́че Заха́рие, моли́ Бо́га о на́с. Ра́дуется тварь рождество́м твои́м, архиере́е,/ ты бо прозя́бл еси́ покая́ния пропове́дника. Сла́ва Отцу́ и Сы́ну и Свято́му Ду́ху. Укра́шено твое́ житие́ препроводи́в,/ за́поведи бо вся Госпо́дня с Елисаве́тою соверши́л еси́. И ны́не и при́сно и во ве́ки веко́в. Ами́нь. Богородичен: Направля́ется к пе́нию язы́к твой, богоглаго́ливе,/ Неискусобра́чную бо во чре́ве нося́щу ви́дел еси́. Песнь 6 Ирмос: Ри́зу мне пода́ждь све́тлу,/ одея́йся све́том, я́ко ри́зою,// Многоми́лостиве Христе́ Бо́же наш. Припев: Святы́й проро́че Заха́рие, моли́ Бо́га о на́с. Зако́на служа́й се́ни,/ яви́ся и благода́ти пропове́дник,/ Спа́се наш, сподо́бися бо ви́дети Твое́ воплоще́ние. Припев: Святы́й проро́че Заха́рие, моли́ Бо́га о на́с. Су́дными словесы́ укра́шься,/ Сло́во присносу́щное, Плоть нося́що,/ Заха́рие свяще́нне, прия́л еси́. Сла́ва Отцу́ и Сы́ну и Свято́му Ду́ху. Яви́лся еси́ внутрь хра́ма, служа́ Бо́гу,/ тайнниче богодухнове́нне,/ иере́й быв досточу́ден. И ны́не и при́сно и во ве́ки веко́в. Ами́нь. Богородичен: Спа́са, Богома́ти, во утро́бе, Де́во, носи́щи, Сло́ва Безнача́льнаго,/ Елисаве́ти позна́лася еси́ проро́чице. Кондак, глас 3 Проро́к днесь и свяще́нник Вы́шняго,/ Заха́рия предложи́, Предте́чев роди́тель,/ трапе́зу своей па́мяти,/ ве́рный пита́я, питие́ бо пра́вды всем раствори́в,/ сего́ ра́ди скончава́ется,// я́ко боже́ственный таи́нник Бо́жия благода́ти. Икос Зако́на молча́нием иера́рх связа́ся Ангела гла́сом,/ А́нгела прие́м Христо́ва прише́ствия, проро́ка и таи́нника,/ с Елисаве́тию непло́дною и целому́дренною,/ и Того́ Рождество́м обнови́ся благода́ть и избавле́ние/ и примире́ние на́ше всеми́рное./ Сего́ пропове́да А́гнца, и Соде́теля,/ и естеству́ Обнови́теля, от неплодныя утро́бы плод подаю́ща,/ Сы́на же, я́вльшася из Де́вы,/ я́ко боже́ственный таи́нник Бо́жия благода́ти. Песнь 7 Ирмос: О́троцы евре́йстии в пещи́/ попра́ша пла́мень дерзнове́нно/ и на ро́су огнь преложи́ша, вопию́ще:// благослове́н еси́, Го́споди Бо́же, во ве́ки. Припев: Святы́й проро́че Заха́рие, моли́ Бо́га о на́с. Егда́ глас вопию́щаго прии́де от непло́дныя,/ па́че естества́ твоего́ язы́ка у́зы разреши́, зва́ти:/ благослове́н еси́, Го́споди Бо́же, во ве́ки. Припев: Святы́й проро́че Заха́рие, моли́ Бо́га о на́с. Люби́мичь роди́ся Женихо́в от непло́дове,/ Рождество́ Де́вы провозвеща́я Я́ве Предте́ча ве́рою зову́щим:/ благослове́н еси́, Го́споди Бо́же, во ве́ки. Сла́ва Отцу́ и Сы́ну и Свято́му Ду́ху. Весь был еси́, Заха́рие, боже́ственный орга́н Ду́ха, треблаже́нне,/ и проро́ка твое́ провозвеща́ше отроча́,/ благослове́н еси́, зову́ща, Го́споди Бо́же, во ве́ки. И ны́не и при́сно и во ве́ки веко́в. Ами́нь. Богородичен: Зако́на исполне́ние Тя, Отроковце,/ глави́зну всего́ проро́чествия Заха́рия зря, позна́ше, вопия́:/ благослове́н, Пречи́стая, Плод Твоего́ чре́ва. Песнь 8 Ирмос: На горе́ святе́й просла́вльшася/ и в купине́ огне́м При́сно де́вы/ Моисе́ови та́йну я́вльшаго/ Го́спода по́йте// и превозноси́те во вся ве́ки. Припев: Святы́й проро́че Заха́рие, моли́ Бо́га о на́с. И́стины показа́ся проро́к,/ Христо́вы бо стези́ Иоа́нн предгряды́й угото́ва Предте́ча,/ блаже́нне иера́рше,/ Его́же превозно́сим во вся ве́ки. Припев: Святы́й проро́че Заха́рие, моли́ Бо́га о на́с. Вити́йствуя, благослови́л еси́ Влады́ку, спасе́ние нам пода́вшаго,/ от Дави́да возсия́вшаго нам пло́тию Го́спода сла́вы,/ Его́же превозно́сим во вся ве́ки. Сла́ва Отцу́ и Сы́ну и Свято́му Ду́ху. Дарова́ний вели́ких сподо́бися, богоявле́ние,/ Предте́чу роди́в, проро́ков всех вы́шшаго,/ Го́спода пою́ща и превознося́ща во вся ве́ки. И ны́не и при́сно и во ве́ки веко́в. Ами́нь. Богородичен: Иера́рх ку́пно и богопропове́дник, Заха́рия/ Де́ве и Ма́тери, Го́спода нося́щей тва́ри, ра́дуяся, поклони́ся,/ Юже превозно́сим во вся ве́ки. Песнь 9 Ирмос: Вои́стину Богоро́дицу/ Тя испове́дуем,/ спасе́ннии Тобо́ю, Де́во Чи́стая,// с безпло́тными ли́ки Тя велича́юще. Припев: Святы́й проро́че Заха́рие, моли́ Бо́га о на́с. Испо́лнился еси́ вдохнове́ния Уте́шителева / и благослови́ти нача́т Го́спода,/ священнотаи́нниче богому́дре и богоблаже́нне. Припев: Святы́й проро́че Заха́рие, моли́ Бо́га о на́с. Глаго́лов исхожде́ния Арха́нгеловых узре́в,/ богоглаго́ливе прехва́льне,/ к благослове́нию язы́к а́бие подви́гнул еси́. Сла́ва Отцу́ и Сы́ну и Свято́му Ду́ху. Страда́ния венцы́ и свяще́нства/ и просвеще́нием проро́чества украси́лся еси́,/ о Заха́рие преблаже́нне и богоглаго́ливе! И ны́не и при́сно и во ве́ки веко́в. Ами́нь. Богородичен: Све́та су́щи прия́телище,/ просвети́, Де́во, помраче́нную ду́шу мою́ страстьми́/ и кроме́шния мя тьмы изба́ви моли́твами Твои́ми. Светилен Пе́рвее гла́сом Ангела умолча́л еси́ в невхо́дных/ за хотя́щее бы́ти прозябе́ние из тебе́ гла́са вопию́щаго/ и ны́не молчи́ши о́наго ра́ди,/ пред невхо́дными заколе́н быв, Заха́рие. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Свет из Све́та возсия́в, Сло́ве, пре́жде денни́цы безле́тно,/ Свет из Ма́тере под ле́том непреме́нно проше́л еси́,/ сия́нии светолу́чными концы́ ми́ра просвеща́я, я́ко Свет ми́ра.

Минея, 3 Марта, Канон мучеников Глас 1 Песнь 1 Ирмос: Твоя́ победи́тельная десни́ца/ боголе́пно в кре́пости просла́вися:/ та бо, Безсме́ртне,/ я́ко всемогу́щая, проти́вныя сотре́,/ изра́ильтяном пу́ть глубины́ новосоде́лавшая. Припев: Святи́и му́ченицы, моли́те Бо́га о на́с. Преми́рными блиста́ньми трисо́лнечныя зари́ озаря́еми, му́ченицы всехва́льнии,/ благоче́стно вас ны́не блажа́щия во светоно́снем ва́шем страда́нии просвети́те. Припев: Святи́и му́ченицы, моли́те Бо́га о на́с. Глаго́лы, я́ко стрела́ми, прему́дрии, пребеззако́нных сердца́ уязви́сте,/ те́мже претерпе́сте пожда́нно я́звы и ра́ны,/ испове́дающе Бо́жие свято́е И́мя. Сла́ва Отцу́ и Сы́ну и Свято́му Ду́ху. Священносло́вии свяще́нными пред мучи́тельскими суди́щи пропове́давше, му́ченицы приснопа́мятнии,/ нас ра́ди пострада́ти Изво́лившаго, наноси́мыя тве́рдо му́ки претерпе́сте. И ны́не и при́сно и во ве́ки веко́в. Ами́нь. Богородичен: Яви́лася еси́ ши́рши Небе́с, нигде́же вмести́маго вопло́щши,/ Того́ у́бо моли́ вся́кия нас тесноты́ изба́вити/ и ве́чнаго, Де́во Ма́ти, муче́ния. Песнь 3 Ирмос: Еди́не, ве́дый челове́ческаго существа́ не́мощь/ и ми́лостивно в не вообра́жься,/ препоя́ши мя с высоты́ си́лою,/ е́же вопи́ти Тебе́, Святы́й,/ одушевле́нный хра́ме неизрече́нныя сла́вы Твоея́, Человеколю́бче. Припев: Святи́и му́ченицы, моли́те Бо́га о на́с. Ума́ чи́стыми прило́ги Боже́ственная зря́ще,/ му́жеским нра́вом, блаже́ннии, к му́кам устреми́стеся,/ вражде́бнаго безпло́тнаго страда́льца побежда́юще с те́лом;/ те́мже прославля́етеся. Припев: Святи́и му́ченицы, моли́те Бо́га о на́с. Уде́с отсече́ния за Христа́, му́дрии, претерпе́вше,/ крове́й Боже́ственными проли́тии зе́млю преподо́бно освяти́сте/ и на тре́бищныя де́моном приноси́мыя уста́висте, му́ченицы, кро́ви. Сла́ва Отцу́ и Сы́ну и Свято́му Ду́ху. Положе́ни бы́сте, я́коже светоза́рнии, на высоте́ страда́ния,/ я́ко вои́стинну зве́зды, озаря́юще вселе́нную незаходи́мыми сия́ньми/ и тьму́ реша́ще ле́сти, святи́и;/ сего́ ра́ди ве́рно ублажа́етеся. И ны́не и при́сно и во ве́ки веко́в. Ами́нь. Богородичен: Во чре́ве прия́ла еси́ Христа́,/ чре́во истощи́вшаго а́дово вседе́йственным сове́том:/ Того́ моли́, Богора́дованная,/ от рабо́ты изба́вити грехо́вныя вся, ве́рно при́сно блажа́щия Тя. Седален, глас 1 Тро́ицу Честну́ю тро́ица му́чеников пред мно́гими испове́да наро́ды/ и лико́м причто́шася безпло́тных, страда́вше./ Сих дне́сь восхва́лим ве́рою,/ пра́зднующе свяще́нную их па́мять и мироспаси́тельную. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Упова́ние христиа́н, Пресвята́я Де́во,/ Его́же родила́ еси́, Бо́га, па́че ума́ же и сло́ва,/ непреста́нно моли́ с Вы́шними си́лами/ пода́ти оставле́ние грехо́в на́ших всех/ и исправле́ние жития́ ве́рою и любо́вию при́сно Тя сла́вящим. Песнь 4 Ирмос: Го́ру Тя, благода́тию Бо́жиею приосене́нную,/ прозорли́выма Авваку́м усмотри́в очи́ма,/ из Тебе́ изы́ти Изра́илеву провозглаша́ше Свято́му/ во спасе́ние на́ше и обновле́ние. Припев: Святи́и му́ченицы, моли́те Бо́га о на́с. Стоя́ху трие́ на три́знищи, пропове́дающе Еди́наго Трисо́лнечна Бо́га/ и ран разжже́ние кре́пко терпя́ще,/ столпы́ о́гненны Це́ркве яви́шася,/ благочести́вых о Христе́ предводя́щии. Припев: Святи́и му́ченицы, моли́те Бо́га о на́с. Поста́вльше но́зе на ка́мени ве́ры, не поколеба́стеся мно́гих искуше́ний кова́рствии,/ но яви́стеся непоколеби́ми, злочести́выя запина́юще, му́ченицы,/ и вся́чески охужда́юще благода́тию. Сла́ва Отцу́ и Сы́ну и Свято́му Ду́ху. Я́ко честно́е ка́мение, на земли́ валя́ющеся,/ зда́ние лука́вное многобо́жия вои́стинну, прему́дрии, разори́сте,/ и себе́ са́мыя Бо́жия хра́мы созда́сте,/ и ко хра́му Небе́сному взя́стеся. И ны́не и при́сно и во ве́ки веко́в. Ами́нь. Богородичен: Яви́ся Твоя́ утро́ба Богоно́сная пала́та,/ в не́йже всех Ца́рь почи́, Христо́с,/ хра́мы содева́я, Ма́ти Чи́стая, и светоза́рная жили́ща благочести́выя/ непристу́пнаго Божества́. Песнь 5 Ирмос: Просвети́вый сия́нием прише́ствия Твоего́, Христе́,/ и освети́вый Кресто́м Твои́м ми́ра концы́,/ сердца́ просвети́ све́том Твоего́ Богоразу́мия/ правосла́вно пою́щих Тя. Припев: Святи́и му́ченицы, моли́те Бо́га о на́с. Зако́н Боже́ственный соблюда́юще, добропобе́днии му́ченицы,/ беззако́нным му́жеским нра́вом противоста́сте/ и, уязвля́еми и растерза́еми телесы́, побе́ду ве́чную взя́сте. Припев: Святи́и му́ченицы, моли́те Бо́га о на́с. Восхва́лим Васили́ска и ве́рою почти́м Клеони́ка и Евтро́пия велему́дрыя,/ ве́рою пострада́вшия за Тро́ицу Всесвяту́ю/ и па́че со́лнца просия́вшия. Сла́ва Отцу́ и Сы́ну и Свято́му Ду́ху. Чудеса́ соверша́юще в сла́ву Бо́га на́шего,/ привлеко́сте зря́щия к ве́ре Спа́сове, му́ченицы многострада́льнии,/ цве́ти кра́снии ра́йстии, церко́вная утвержде́ния. И ны́не и при́сно и во ве́ки веко́в. Ами́нь. Богородичен: Сия́нием от Тебе́ па́че ума́ возсия́вшаго озари́ на́ша мы́сли, Всенепоро́чная,/ и тьму́ ума́ли помысло́в душетле́нных,/ я́ко да пое́м Тя, Влады́чице. Песнь 6 Ирмос: Обы́де нас после́дняя бе́здна,/ не́сть избавля́яй,/ вмени́хомся, я́ко о́вцы заколе́ния,/ спаси́ лю́ди Твоя́, Бо́же наш:/ Ты бо кре́пость немощству́ющих и исправле́ние. Припев: Святи́и му́ченицы, моли́те Бо́га о на́с. Ра́дуется земля́ и Небе́сная,/ лику́ют челове́цы, ле́тний соверша́юще пра́здник,/ е́же за Христа́ страда́ния блаже́нная до́блественно претерпе́вших ума́ тве́рдостию. Припев: Святи́и му́ченицы, моли́те Бо́га о на́с. Почти́л еси́ до́брыми твои́ми нра́вы, Евтро́пие, Бо́га Преблага́го,/ победи́л еси́ хи́трости вра́жия./ Те́мже тя почита́ют вси челове́цы,/ тобо́ю прегреше́ний разреше́ние прия́ти наде́ющиися. Сла́ва Отцу́ и Сы́ну и Свято́му Ду́ху. Исцеле́ний исто́чники излива́юще,/ зной отгна́сте неду́гов и скорбе́й, му́дрии,/ всем благоздра́вие посыла́юще,/ благоче́стно ва́шему покро́ву при́сно притека́ющим. И ны́не и при́сно и во ве́ки веко́в. Ами́нь. Богородичен: Увяди́вшая Твои́м прозябе́нием, Всенепоро́чная,/ дре́вле прозя́бшую преступле́нием зло́бу вра́жию,/ в души́ мое́й прозяба́ющия душетле́нныя и терно́вныя по́мыслы исто́ргни. Песнь 7 Ирмос: Тебе́, у́мную, Богоро́дице, пе́щь,/ разсмотря́ем, ве́рнии:/ я́коже бо о́троки спасе́ три Превозноси́мый,/ мир обнови́, во чре́ве Твое́м всеце́л,/ хва́льный отце́в Бог и препросла́влен. Припев: Святи́и му́ченицы, моли́те Бо́га о на́с. Я́коже наслажде́ние Боже́ственное вменя́юще удо́в отсече́ние,/ зауше́ния, строга́ния и сме́рть ну́жную,/ му́ченицы веселя́щеся и Бо́гу усе́рдно пою́ще:/ хва́льных отце́в Бог и препросла́влен. Припев: Святи́и му́ченицы, моли́те Бо́га о на́с. По мно́гих томле́ниих телесе́/ крест претерпе́сте кре́пко в подо́бии Изба́вителя,/ сла́вне Евтро́пие, вели́кий Клеони́че,/ и блаже́нную кончи́ну получи́сте,/ хва́льнаго воспева́юще Бо́га и препросла́вленнаго. Сла́ва Отцу́ и Сы́ну и Свято́му Ду́ху. Взира́ти вам предповелева́я к безсме́ртным воздая́нием,/ в темни́це яви́ся Христо́с,/ Его́же ви́девше, дерзнове́ния испо́лнистеся,/ взыва́юще, му́ченицы сла́внии:/ хва́льный отце́в Бог и препросла́влен. И ны́не и при́сно и во ве́ки веко́в. Ами́нь. Богородичен: Изба́ви ны, Пресвята́я Влады́чице, от язы́ческаго наше́ствия,/ сре́тения лука́ваго, вся́каго обстоя́ния/ и осужде́ния ве́чнаго, ве́рою зову́щия:/ хва́льный отце́в Бог и препросла́влен. Песнь 8 Ирмос: В пещи́ о́троцы Изра́илевы,/ я́коже в горни́ле,/ добро́тою благоче́стия чисте́е зла́та блеща́хуся, глаго́люще:/ благослови́те, вся дела́ Госпо́дня, Го́спода,/ по́йте и превозноси́те во вся ве́ки. Припев: Святи́и му́ченицы, моли́те Бо́га о на́с. Просте́рт иму́ще ум,/ ко Еди́ному Влады́це простро́стеся, уязвля́еми, всехва́льнии, зе́льне/ и му́чими, вопию́ще:/ вся дела́ Госпо́дня, Го́спода по́йте и превозноси́те во вся ве́ки. Припев: Святи́и му́ченицы, моли́те Бо́га о на́с. Возвы́сившеся на кресте́, я́коже дре́вле Влады́ка,/ вели́каго сподо́бистеся благосла́вия, страда́льцы, вопию́ще и глаго́люще:/ благослови́те, вся дела́ Госпо́дня, Го́спода,/ по́йте и превозноси́те во вся ве́ки. Припев: Святи́и му́ченицы, моли́те Бо́га о на́с. Си́лою Боже́ственною, всеблагосла́внии, укре́пльшеся, страстоте́рпцы,/ беззако́нных ополче́ния победи́ша кре́пко, пою́ще и глаго́люще:/ благослови́те, вся дела́ Госпо́дня, Го́спода,/ по́йте и превозноси́те во вся ве́ки. Сла́ва Отцу́ и Сы́ну и Свято́му Ду́ху. Троичен: Я́ко Еди́ницу естество́м, Тя пою́, Божество́ Всесвято́е,/ Треми́ же Ипоста́сьми несе́чно разделя́я, зову́, ра́дуяся:/ благослови́те, вся дела́ Госпо́дня, Го́спода,/ по́йте и превозноси́те во вся ве́ки. И ны́не и при́сно и во ве́ки веко́в. Ами́нь. Богородичен: Храм яви́лася еси́ Емману́ила и две́рь,/ Е́юже Еди́н вни́де и изы́де,/ я́коже Сам ве́сть, Чи́стая, спаса́я зову́щия:/ благослови́те, вся дела́ Госпо́дня, Го́спода,/ по́йте и превозноси́те во вся ве́ки. Песнь 9 Ирмос: О́браз чи́стаго Рождества́ Твоего́/ огнепали́мая купина́ показа́ неопа́льная,/ и ны́не на нас напа́стей свире́пеющую угаси́ти, мо́лимся, пе́щь,/ да Тя, Богоро́дице,/ непреста́нно велича́ем. Припев: Святи́и му́ченицы, моли́те Бо́га о на́с. Да Иису́са приобря́щете, насу́щаго жития́ вся вмени́сте уме́ты,/ я́коже Па́вел Боже́ственный научи́;/ сего́ ра́ди до́бре пострада́вше, на Небесе́х обита́ете,/ венцено́сцы великоимени́тии. Припев: Святи́и му́ченицы, моли́те Бо́га о на́с. Яви́ся, я́коже столп треуго́льный, свяще́нных му́ченик Боже́ственное собра́ние,/ сте́ны лука́ваго безбо́жия низложи́ша благода́тию,/ и ны́не живу́т во гра́де Бо́га Жива́го, перворо́дных в ски́ниих. Припев: Святи́и му́ченицы, моли́те Бо́га о на́с. Вене́ц нетле́ния, святи́и, от Христа́ прие́мше,/ багряни́цу же омочи́вше от му́ченических ва́ших крове́й,/ предстоите́ Царю́ веко́в, осия́еми све́тлыми светоли́тии/ и всебога́тными раздая́нии. Сла́ва Отцу́ и Сы́ну и Свято́му Ду́ху. Уже́ Бо́гу прибли́жившеся и со Безпло́тными собо́ры пра́зднующе,/ на земли́ вас при́сно блажа́щия и па́мять ва́шу пра́зднующия, му́ченицы,/ Небе́сную получи́ти све́тлость испроси́те. И ны́не и при́сно и во ве́ки веко́в. Ами́нь. Богородичен: Ужаса́ются А́нгельстии чи́ни от Твои́х ложе́сн Возсия́вшаго,/ Его́же о нас, Де́во Ма́ти, моли́,/ я́ко да стра́шныя вся изба́вит му́ки и тьмы́ кроме́шныя, пою́щия Тя.

Минея, 30 Апреля, Кано́н свято́му иера́рху Дона́ту Глас 4 Песнь 1 Ирмос: Боже́ственным покрове́н/ медленноязы́чный мра́ком,/ извити́йствова Богопи́санный зако́н:/ ти́ну бо оттря́с очесе́ у́мнаго,/ ви́дит Су́щаго/ и науча́ется Ду́ха ра́зуму,/ хваля́ Боже́ственными пе́сньми. Припев: Святи́телю о́тче Дона́те, моли́ Бо́га о на́с. Боже́ственное Твое́, Всецарю́, о ро́де челове́ческом промышле́ние:/ воздви́гл бо еси́, я́ко друга́го Моисе́я,/ руково́дствити лю́ди Твоя́ иера́рха, блаже́ннаго Дона́та,/ и́же в Твое́й благода́ти воспе́ Тебе́ благода́рныя пе́сни. Припев: Святи́телю о́тче Дона́те, моли́ Бо́га о на́с. Боже́ственному Престо́лу при́сно со избра́нными предстоя́,/ невече́рния зари́, о́тче преподо́бне, исполня́емь,/ нам, ве́рно честву́ющим тя, испроси́ у Христа́ Го́спода све́та,/ от мракоро́дныя грехо́в тьмы просвети́тися и воспе́ти, я́ко Бог просла́вися. Сла́ва Отцу́ и Сы́ну и Свято́му Ду́ху. Боже́ственных слове́с ева́нгельскаго Богопропове́дания измла́да научи́вся, блаже́нне,/ впери́л еси́ о́ная кре́пце, я́ко коры́сть мно́гу в тых обреты́й,/ удо́бь огорсти́л 20 еси́ всяк путь доброде́тели во спасе́ние,/ учи́л бо еси́ вся умнослове́сныя воспева́ти Бо́гу, я́ко просла́вися. И ны́не и при́сно и во ве́ки веко́в. Ами́нь. Богородичен: Боже́ственная багряни́це Небе́снаго Царя́ сла́вы, Пречи́стая Де́во Мари́е,/ Твои́ми бо кровьми́ Ипоста́сное Бо́га Отца́ Сло́во/ в на́ше челове́чество обагри́ся и злоро́дную истреби́ кля́тву, пострада́в за нас пло́тию./ Ему́же чрез Тебе́ верно вопие́м:/ в щедро́тах безме́рных Бог Иису́с сла́вно просла́вися. Песнь 3 Ирмос: Разве́рзе утро́бы неча́дствовавшия у́зы,/ доса́ду же неудоботерпи́му благоча́дствующия,/ еди́на моли́тва проро́чицы дре́вле А́нны,/ нося́щий дух сокруше́н,/ к Си́льному и Бо́гу ра́зумов. Припев: Святи́телю о́тче Дона́те, моли́ Бо́га о на́с. Разве́рзл еси́ бде́нными твои́ми к Бо́гу моли́твами мрак страсте́й, Богоно́се о́тче,/ вся вра́жия досажда́ющий тебе́ прило́ги сокруше́нным ду́хом до конца́ отрази́в,/ церко́вную па́ству до́бре упа́сл еси́,/ при́сно, Всеси́льне, – зовя́, – Го́споди. Припев: Святи́телю о́тче Дона́те, моли́ Бо́га о на́с. Разве́рзи нам, всеблаже́нне святи́телю,/ всеще́дрыя хля́би Всеще́драго Бо́га на́шего предста́тельством твои́м,/ я́коже жа́ждою изнемо́гшия в ме́сте безво́дне,/ сухо́й земле́ исто́чник разве́рзл еси́,/ да наводни́мся его́ благода́тию, в разуме́ пою́ще:/ Всеси́льне Бо́же. Сла́ва Отцу́ и Сы́ну и Свято́му Ду́ху. Разве́рзеся иногда́ ми́лость твоя́, о́тче, ко жи́телем страны́,/ в не́йже во исто́чнице злоя́дный змий угнезди́ся, вреди́ сме́ртно во́ды пи́ти./ Его́же, я́ко челове́к Бо́жий, безбоя́зненно уби́в,/ во́ду пи́ти всем сотвори́л еси́,/ напо́й и нас исто́чником во спасе́ние ми́лости твоея́, да зове́м:/ Всеси́льне Го́споди. И ны́не и при́сно и во ве́ки веко́в. Ами́нь. Богородичен: Разве́рзе утро́бу Твою́, Пречи́стая Де́во, Единоро́дный Сын Бо́жий,/ преесте́ственно из Пречи́стою боку́ Твое́ю проше́д,/ во избавле́ние всех люде́й от вра́жиих ко́зней./ Те́мже, Благода́тная Мари́е, разжени́ ви́димыя и неви́димыя враги́ на́ши/ и разве́рзенныя их на ны че́люсти сокруши́, да ра́достно вопие́м:/ Всеси́льне Го́споди. Седален, глас 8 Вели́каго свети́льника светоза́рнаго, Це́ркве столпа́ неразори́маго,/ преизя́щнаго чудотво́рца Дона́та восхва́лим,/ и́же благода́тию воплоти́вшагося Христа́, Сы́на Бо́жия,/ я́ко Его́ сотвори́тельный орга́н, соде́я преве́лия чудеса́ в ми́ре,/ и́хже самоде́ржец царь и Константи́нова гра́да весь наро́д зри́тели бы́ша/ и па́ствы его́ архиере́йскаго престо́ла лю́дие, у них бы́вшая, ви́деша./ К нему́ же возопие́м усе́рдно, зову́ще:/ архиере́ю, благода́ти Бо́жия испо́лненный,/ всем тре́бующим исполня́еши проше́ния,/ моли́ся Христу́ Бо́гу прегреше́ний оставле́ние дарова́ти/ пра́зднующим с любо́вию святу́ю па́мять твою́. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Ра́дуйся, престо́ле огнезра́чный Бо́жий,/ ра́дуйся, Отрокови́це, седа́лище ца́рское,/ о́дре, упещре́нно по́стланный,/ златопорфи́рный черто́зе, хлами́до червленожа́ркая,/ укра́шенный хра́ме, молниено́сная колесни́це, свети́льниче многосве́тлый./ Ра́дуйся, Богоро́дице, дванадесятосте́нный гра́де,/ и дверь златокова́нная, и черто́же светоза́рный,/ светлопозлаще́нная трапе́зо, Богоукра́шенная ски́ние,/ ра́дуйся, сла́вная Неве́сто, Со́лнце ка́плющая./ Ра́дуйся, еди́на души́ моея́ благоле́пие. Песнь 4 Ирмос: Царю́ царе́й,/ Яковы́й от Якова́го,/ Еди́н, Сло́ве, произше́дый,/ от Отца́ Безвино́внаго Равномо́щнаго Твоего́ Ду́ха/ апо́столом и́стинно посла́л еси́/ я́ко Благоде́теля, пою́щим:/ сла́ва держа́ве Твое́й, Го́споди. Припев: Святи́телю о́тче Дона́те, моли́ Бо́га о на́с. Царю́ царе́й в пресве́тлых Небесе́х ны́не предстоя́щий,/ зре́ния Единосу́щнаго в Трие́х Ипоста́сех Божества́ сподо́бивыйся,/ Боже́ственный иера́рше Дона́те,/ моли́ся, о́тче, о призыва́ющих тя,/ да, спа́сшеся от вся́ких зде скорбе́й, пое́м:/ сла́ва си́ле Твое́й, Го́споди. Припев: Святи́телю о́тче Дона́те, моли́ Бо́га о на́с. Царя́ Христа́ Бо́га на́шего, слове́сному Его́ ста́ду и́стинный архиере́й быв,/ труды́ и по́двиги во уче́нии ева́нгельскаго жития́ в позо́р всем предложи́л еси́, о́тче,/ твои́ми у́бо уче́нии и благоприя́тством вселе́нную воздви́гл еси́ гласи́ти:/ сла́ва си́ле Твое́й, Го́споди. Сла́ва Отцу́ и Сы́ну и Свято́му Ду́ху. Царь Небе́сный, за человеколю́бие Свое́ яви́выйся нам,/ прозре́ тя досто́йна благода́ти Своея́ сосу́да,/ очи́стившагося вся́каго мирска́го пристра́стия и плотски́х по́хотей./ Его́же, Бо́га и́стинна, ты, блаже́нне, словесы́ и чудодея́нием воспе́л еси́:/ сла́ва си́ле Твое́й, Го́споди. И ны́не и при́сно и во ве́ки веко́в. Ами́нь. Богородичен: Цари́це Небесе́ и земли́, Богома́ти Влады́чице Де́во,/ воспита́вшая пресладча́йшаго Сы́на Перворо́днаго, Иису́са Го́спода пречи́стыми сосцы́ Твои́ми,/ во избавле́ние от грех всего́ ми́ра,/ моли́ Его́, Человеколю́бца, да пода́ст нам чи́сте взыва́ти:/ сла́ва си́ле Твое́й, Го́споди. Песнь 5 Ирмос: Реши́тельное очище́ние грехо́в,/ огнедохнове́нную приими́те Ду́ха ро́су,/ о ча́да снегообра́зная, церко́вная!/ Ны́не от Сио́на бо изы́де Зако́н –/ языкоогнеобра́зная Ду́ха благода́ть. Припев: Святи́телю о́тче Дона́те, моли́ Бо́га о на́с. Разреши́вшаго у́зы сме́ртныя Го́спода Иису́са благода́тию,/ разреши́л еси́, о́тче блаже́нне, заимода́тельное рукописа́ние, воскреси́в ме́ртва,/ и́же поноси́ злоде́телю, хотя́щему взя́ти второ́е до́лжное,/ разреши́ и на нас востаю́щия враго́в ко́зни,/ подая́ нам Ду́ха благода́ть. Припев: Святи́телю о́тче Дона́те, моли́ Бо́га о на́с. Реше́ние грехо́вных плени́ц/ мно́гим, испове́дающимся чи́сте от се́рдца, сотвори́л еси́, всече́стне,/ в ча́да церко́вная приве́д, напои́л еси́ о́ныя из Сио́на исше́дшим зако́ном, Богоразу́мне,/ уча́ вся ве́рныя мольба́ми и посто́м приима́ти Ду́ха благода́ть. Сла́ва Отцу́ и Сы́ну и Свято́му Ду́ху. Реши́л еси́, преподо́бне, зе́льную печа́ль/ царя́ и цари́цы благочести́вых, и́же моли́ли тя,/ отгна́в от дще́ри их царе́вны му́чащаго ю де́мона,/ благодари́ша бо Бо́га, ра́достне диви́шася живу́щей в тебе́ Ду́ха благода́ти. И ны́не и при́сно и во ве́ки веко́в. Ами́нь. Богородичен: По рождестве́ Твое́м стра́ннем пребыла́ еси́ Де́вою,/ я́коже пре́жде: Бог бо бе рожде́йся, и претворя́яй вся во́лею,/ Безму́жная Мари́е Богоневе́стная. Песнь 6 Ирмос: Очище́ние нам, Христе́,/ и спасе́ние, Влады́ко,/ возсия́л еси́ от Де́вы,/ да, я́ко проро́ка от зве́ря морска́го пе́рсей Ио́ну,/ от тли исхити́ши/ всего́ Ада́ма всеро́дна па́дшаго. Припев: Святи́телю о́тче Дона́те, моли́ Бо́га о на́с. Очище́ние Це́ркве твоея́ бо́дрым пасо́мством от ерети́ческаго злове́рства/ и от вся́каго собла́зна сотвори́в, Богоно́се о́тче,/ зве́ря, челове́ческих душ губи́теля, уби́л еси́ моли́твами твои́ми. Припев: Святи́телю о́тче Дона́те, моли́ Бо́га о на́с. Очище́ние душе́внаго твоего́ Богозри́тельнаго смы́сла, о́тче Дона́те, соде́ловая,/ от пристра́стнаго жития́ и царе́вых трудо́в за труд не восхоте́л еси́ взя́ти,/ да от тлеро́дныя земли́ удо́бь исхити́шися. Сла́ва Отцу́ и Сы́ну и Свято́му Ду́ху. Очище́ние чу́дно бе́дствующей жене́/ от напра́снаго заимоистяза́тельнаго до́лга сотвори́л еси́, преподо́бне:/ ми́лостивно бо, ея́ скорбь услы́шав, воздви́гл му́жа уме́рша,/ и́же обличи́ оби́ду творя́щаго. И ны́не и при́сно и во ве́ки веко́в. Ами́нь. Богородичен: Очище́ние, Богороди́тельнице Де́во, тлеро́днаго сладостра́стия правове́рным подала́ еси́,/ из Тебе́ бо произше́д, Влады́ка Христо́с возста́ви ны, па́дшия,/ же́ртву хвале́ния Ему́ при́сно возноси́ти. Кондак, глас 8 Красото́ Це́ркве, утверди́вшияся на ка́мени – Боговоплоще́нном Спа́се Христе́,/ Богоправи́мое доброде́телей прави́ло,/ Дона́те, досточу́дный чудотво́рче,/ я́ко иера́рх име́еши дерзнове́ние всетворя́щему Бо́гу о лю́дех моли́тися,/ враго́в ви́димых и неви́димых предста́тельством твои́м свободи́ вопию́щия:/ сла́ва в Тро́ице Еди́ному Бо́гу. Икос Досто́йно в ми́ре жи́тельствуя,/ Боже́ственным любви́ Бо́жия пла́менем Боголюби́вое се́рдце твое́ распаля́я/ и Небе́сным духо́внаго исправле́ния огне́м умовре́дныя прегреше́ний людски́х пле́велы пожига́я,/ богомы́сленно Триипоста́снаго Бо́га пропове́дал еси́,/ Его́же Боже́ственным дарова́нием чуде́с ре́ки, Дона́те всехва́льне, источи́л еси́./ Те́мже вопие́м ти:/ ра́дуйся, от ю́ности воздержа́нию научи́вся;/ ра́дуйся, в мла́дости седи́нами ума́ благоукраси́вся./ Ра́дуйся, чи́стое житие́ в достосла́вном де́встве соверши́вый;/ ра́дуйся, посто́м и моли́твами Всеблаго́му Бо́гу на́шему угоди́вый./ Ра́дуйся, победи́в вся преле́стнаго сего́ земна́го ми́ра сла́сти;/ ра́дуйся, от лука́ваго де́мона приснонаноси́мыя отрази́в стра́сти./ Ра́дуйся, я́ко досто́ин па́стырь, на престо́л архиере́йский возведе́нный;/ ра́дуйся, па́ству твою́ на па́жити ева́нгельской до́бре пасы́й, ублаже́нный./ Ра́дуйся, испо́лнен я́влься ми́лостивых ко всем благотворе́нии;/ ра́дуйся, Богопоста́вленный столп архиере́йских удобре́ний./ Ра́дуйся, чуде́с во Христе́ пресла́вных в по́льзе сотвори́тель;/ ра́дуйся, в любо́вь Христо́ву мно́гих научи́тель./ Ра́дуйся, тебе́, приве́тствующе, вопие́м:/ сла́ва в Тро́ице Еди́ному Бо́гу. Песнь 7 Ирмос: Согла́сная возшуме́ орга́нская песнь/ почита́ти златосотворе́нный безду́шный истука́н;/ Уте́шителева же светоно́сная благода́ть повеству́ет,/ е́же вопи́ти:/ Тро́ице Еди́ная, Равноси́льная, Безнача́льная, благослове́нна еси́. Припев: Святи́телю о́тче Дона́те, моли́ Бо́га о на́с. Согла́сно покори́в те́ло ду́ху,/ Пренача́льней Боже́ственней Тро́ице боготворе́нным тобо́ю орга́ном/ воспе́л еси́, блаже́нне Дона́те, досто́йную песнь: аллилу́ия,/ Ю́же моли́, мо́лим тя, да благода́ть Ду́ха научи́т ны зва́ти ве́чно:/ Тро́ице Свята́я, благослове́нна еси́. Припев: Святи́телю о́тче Дона́те, моли́ Бо́га о на́с. Согла́сно отце́в святы́х догма́ты о Тро́йческом Богонача́лии,/ е́же ве́ровати, е́же сла́вити Еди́но Божество́ в Трие́х Ипоста́сех, кре́пце содержа́в,/ я́сно во вселе́нную пропове́дал еси́, всехва́льне,/ Ю́же ны́не несре́дственно на Небе́сных гора́х зри́ши, поя́ сла́дце:/ Тро́ице Безнача́льная, благослове́нна еси́. Сла́ва Отцу́ и Сы́ну и Свято́му Ду́ху. Согла́сно друголю́бием пода́ждь нам, иера́рше Христо́в,/ почита́ти во псалме́х и пе́нии Всеси́льнаго Бо́га и Творца́ на́шего/ и велича́ти Боговлады́чицу Де́ву Мари́ю,/ да безме́рная Его́ ми́лость предста́тельством Всечи́стыя Ма́тере/ возста́вит па́дшия ны́не ра́достне глаго́лати:/ Тро́ице Еди́ная, благослове́нна еси́. И ны́не и при́сно и во ве́ки веко́в. Ами́нь. Богородичен: Согла́сно прореко́ша святи́и проро́цы о Тебе́, Де́во Всечи́стая,/ я́ко роди́ши Бо́га воплоще́нна,/ мы же, сбытие́ в соверше́нстве ви́дяще,/ велича́ем Тя, Ма́терь Бо́га Вы́шняго,/ и сла́вим неизрече́нное Твое́ рождество́, моля́ще же Тя, глаго́лем:/ спаси́ ны, Влады́чице, от бед и скорбе́й, благослове́нна еси́. Песнь 8 Ирмос: Разреша́ет у́зы и ороша́ет пла́мень/ Трисве́тлый Богонача́лия о́браз, пою́т о́троцы:/ благослови́т же Еди́наго Спа́са и Вседе́теля,/ я́ко Благоде́теля,/ сотворе́нная вся́ческая тварь. Припев: Святи́телю о́тче Дона́те, моли́ Бо́га о на́с. Разреши́вшаго смерть Кресто́м Свои́м/ и пла́мене пагубоно́сных страсте́й богоподража́тельныя избавля́ющаго,/ Небе́снаго Царя́ богомы́сленне благослови́л еси́, о́тче, зовы́й:/ благослови́ Вседе́теля, вся́ческая тварь. Припев: Святи́телю о́тче Дона́те, моли́ Бо́га о на́с. Разреше́ние в ско́рбех и печа́лех наде́ждою на Всемо́щнаго Бо́га мно́гим пешехо́дцем/ волновоздвиза́емаго сего́ мо́ря по́дал еси́, досточу́дне Дона́те,/ уче́нии бо твои́ми уте́шены, вопие́м:/ благослови́ Го́спода, вся́ческая тварь. Сла́ва Отцу́ и Сы́ну и Свято́му Ду́ху. Разреши́л еси́ тучено́сныя небе́сныя о́блаки излия́ти дождь мно́гий/ мольба́ми твои́ми лити́йными, преподо́бне,/ царь бо самоде́ржец и вси Константино́поля гра́ждане,/ богоуго́дную твою́ по́мощь ви́девше, любо́вне глаго́лаша:/ благослови́ Го́спода, вся́ческая тварь. И ны́не и при́сно и во ве́ки веко́в. Ами́нь. Богородичен: Разреши́ла еси́, Богора́дованная Де́во, прама́терния кля́твы весь род челове́ч:/ воплоще́нный бо Твой Сын и Бог наш пострада́ за ны и умири́ Кро́вию Свое́ю Бо́га Отца́,/ да в животе́ ве́чнем спасе́мся, воспева́юще:/ благослови́ Святу́ю Тро́ицу и велича́й Богоро́дицу, вся́ческая тварь. Песнь 9 Ирмос: Ра́дуйся, Цари́це,/ матероде́вственная Сла́во,/ вся́ка бо удобообраща́тельная благоглаго́ливая уста́/ вити́йствовати не мо́гут,/ Тебе́ пе́ти досто́йно,/ изумева́ет же ум всяк Твое́ рождество́ разумети,/ те́мже Тя согла́сно сла́вим. Припев: Святи́телю о́тче Дона́те, моли́ Бо́га о на́с. Ра́дуйся, Богоизбра́нное христиа́нское свети́ло,/ просвети́вшее Богоразу́мия све́том вселе́нную, архиере́е Дона́те,/ незы́блемая Правосла́вия твердь,/ утверди́ ду́ши на́ша в ве́ре и любви́ пребыва́ти/ и присносу́щнаго Бо́га при́сно и согла́сно сла́вити. Припев: Святи́телю о́тче Дона́те, моли́ Бо́га о на́с. Ра́дуйся, всехва́льне Дона́те, боготка́нная правосла́внаго благоче́стия ри́зо,/ многоце́нными превели́ких доброде́телей би́серми боголе́пно удобре́нная,/ моли́ све́том оде́яющася Бо́га/ в све́тлую ве́чныя жи́зни ри́зу оде́ятися нам,/ да Его́ Творца́ согла́сно сла́вим. Сла́ва Отцу́ и Сы́ну и Свято́му Ду́ху. Ра́дуйся, богонасажде́ннаго са́да прему́дрый де́лателю,/ созда́вый храм че́стен и украси́вший той преизя́ществом во сла́ву Христа́, Безсме́ртнаго Царя́,/ и, испо́лнив те дни жи́зни и успну́в, ны́не чи́сте зри́ши в Небесе́х Бо́га,/ у Него́ же испроси́ нам во благоду́шии повсю́ду Его́ согла́сно сла́вити. И ны́не и при́сно и во ве́ки веко́в. Ами́нь. Богородичен: Ра́дуйся, Богома́ти, Де́во Мари́е, наде́ждо и предста́тельство христиа́нское,/ воплоти́вшемуся из Тебе́ Сы́ну Иису́су Христу́ и Тебе́, Влады́чице,/ в па́мять уго́дника ва́шего, Дона́та святи́теля, во усе́рдии моле́ние прино́сим:/ подади́те нам в Небе́сном жили́ще Тро́ицу со А́нгелы сла́вити. Светилен Богоявле́ния све́том свы́ше просвеще́нный/ и окропле́нный и́стины благода́тию, Богому́дре о́тче Дона́те,/ смире́ния Богочелове́ка Иису́са ревни́тель был еси́,/ благоугоди́в Ему́ архиере́йскою пра́востию и чудесы́ просвети́вся,/ те́мже, соверша́юще твою́ па́мять, сла́вим Го́спода Бо́га. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Златоте́чная Бо́жия реко́, небе́сными наводне́нная даро́в Ду́ха,/ неботе́чную ра́дости небе́сныя струю́ источа́й на скорбя́щия ду́ши на́ша/ и да́руй нам Твою́ по́мощь, да зове́м Ти:/ ра́дуйся, Ма́ти Госпо́дня.

Минея, 1 Июня, Канон преподобного Глас 8 Песнь 1 Ирмос: Колесницегоние́теля фарао́ня погрузи́/ чудотворя́й иногда́/ Моисе́йский жезл, крестообра́зно порази́в/ и раздели́в мо́ре,/ Изра́иля же беглеца́, пешехо́дца спасе́,/ песнь Бо́гови воспева́юща. Припев: Преподо́бне о́тче Диони́сие, моли́ Бо́га о на́с. Озаре́нием Свята́го Ду́ха озари́ благоче́стно любо́вию пе́сньми восхваля́ющих тя,/ по́стников похвало́, мона́шествующих сла́во, пусты́ни украси́телю,/ благоче́стия учи́телю, Диони́сие. Припев: Преподо́бне о́тче Диони́сие, моли́ Бо́га о на́с. От ю́ности жела́ние к Бо́гу возложи́в,/ и к Не́му, ра́дуяся, возше́л еси́, име́я все твое́ помышле́ние,/ взыгра́ние пло́ти и страсте́й нахожде́ние воздержа́нием умертви́л еси́,/ Диони́сие прехва́льне. Сла́ва Отцу́ и Сы́ну и Свято́му Ду́ху. Попра́в зми́я, того́ се́ти легко́ прелете́л еси́,/ кри́лы благоче́стия впери́вся, о́тче:/ живо́т бо, ра́дуяся, объя́л еси́ от са́да кре́стнаго, блаже́нне Диони́сие. И ны́не и при́сно и во ве́ки веко́в. Ами́нь. Богородичен: Уста́ви неуста́вное помышле́ние смуще́ния,/ Пречи́стая Де́во, Ма́ти Бо́жия,/ к Сы́ну Твоему́ направля́ющи движе́ния. Песнь 3 Ирмос: Ты еси́ утвержде́ние/ притека́ющих к Тебе́, Го́споди,/ Ты еси́ свет омраче́нных,/ и пое́т Тя дух мой. Припев: Преподо́бне о́тче Диони́сие, моли́ Бо́га о на́с. Во све́те невеще́ственне и мы́сленне,/ от печа́лей веще́ственных восте́к к Небе́сным невеще́ственным чино́м,/ преподо́бне, моли́твами твои́ми нас просвети́. Припев: Преподо́бне о́тче Диони́сие, моли́ Бо́га о на́с. Воздержа́ния сла́дость иска́пав, отри́нул еси́ го́ресть страсте́й,/ те́мже па́че ме́да и со́та наслади́л еси́, о́тче, чу́вствия на́ша. Сла́ва Отцу́ и Сы́ну и Свято́му Ду́ху. Возше́д на высоту́ доброде́телей, до́лу влеку́щия оплева́л еси́ сла́сти,/ сла́дость показа́вся спасе́ния, о́тче преподо́бне,/ ста́ду твоему́ проси́ грехо́в оставле́ния. И ны́не и при́сно и во ве́ки веко́в. Ами́нь. Богородичен: Прему́дрость и Сло́во О́тчее несказа́нно родила́ еси́,/ души́ моея́ лю́тую исцели́ я́зву и серде́чную боле́знь утоли́. Седален, глас 8 Красоты́ мирски́я от млады́х ногте́й, преподо́бне, возненави́дев,/ еди́наго Христа́ от се́рдца возлюби́л еси́ и, Тому́ все́ю душе́ю прилепи́вся,/ я́ко безпло́тен, на земли́ пожи́л еси́ с пло́тию,/ сла́ву же мимотеку́щую и бога́тство нивочто́же вмени́в,/ Небе́сное бога́тство восприя́л еси́ и сла́ву ве́чную./ Те́мже и ублажа́ем свято́е твое́ успе́ние/ и, в нем торжеству́юще, вопие́м ти:/ Богоблаже́нне о́тче наш Диони́сие,/ моли́ Христа́ Бо́га согреше́ний оставле́ние дарова́ти/ чту́щим любо́вию святу́ю па́мять твою́. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Я́ко Де́ву и еди́ну в жена́х, Тя, без се́мене ро́ждшую Бо́га пло́тию,/ вси ублажа́ем, ро́ди челове́честии:/ Огнь бо всели́ся в Тя Божества́,/ и я́ко Младе́нца млеко́м пита́еши Зижди́теля и Го́спода./ Тем, А́нгельский и челове́ческий род, досто́йно сла́вим пресвято́е рождество́ Твое́/ и согла́сно вопие́м Ти:/ моли́ Христа́ Бо́га согреше́ний оставле́ние дарова́ти/ покланя́ющимся ве́рою пресвято́му рождеству́ Твоему́. Песнь 4 Ирмос: Ты моя кре́пость, Го́споди,/ Ты моя́ и си́ла,/ Ты мой Бог, Ты мое́ ра́дование,/ не оста́вль не́дра Отча/ и на́шу нищету́ посети́в./ Тем с проро́ком Авваку́мом зову́ Ти:/ си́ле Твое́й сла́ва, Человеколюбче. Припев: Преподо́бне о́тче Диони́сие, моли́ Бо́га о на́с. Душе́вное очища́я чу́вство и разширя́я Боже́ственными виде́нии,/ Боже́ственных дарова́ний сподо́бился еси́, Богоблаже́нне,/ к ра́це моще́й Твои́х притека́ющим, Диони́сие преподо́бне, подае́ши ско́рое исцеле́ние. Припев: Преподо́бне о́тче Диони́сие, моли́ Бо́га о на́с. Зако́ном Бо́жиим повину́яся, преподо́бне,/ к смотре́нию безпло́тных и мы́сленных твое́ худо́жество упра́вил еси́,/ преходя́ вы́ну от сла́вы в сла́ву, от си́лы, о́тче, в си́лу. Сла́ва Отцу́ и Сы́ну и Свято́му Ду́ху. Богоуго́дно пожи́в,/ пусты́ни, я́ко гра́ды, сотвори́л еси́ потре́бны и душеполе́зны,/ исто́чник исцеле́ний пролива́я ве́рою покланя́ющимся ра́це моще́й твои́х. И ны́не и при́сно и во ве́ки веко́в. Ами́нь. Богородичен: Новора́сленный безсме́ртия рай и красе́н вои́стинну показа́лася еси́, Де́во:/ дре́во бо жи́зни в Тебе́ насади́ся богонача́льно,/ е́же, во чре́ве Твое́м нося́щи, родила́ еси́,/ всем иска́пающее спасе́ния наде́жду, ве́рно, Богоро́дице, испове́дающим Тя. Песнь 5 Ирмос: Вскую мя отри́нул еси́/ от лица́ Твоего́, Све́те незаходи́мый,/ и покры́ла мя есть чужда́я тьма, окая́ннаго?/ Но обрати́мя и к све́ту за́поведей Твои́х/ пути́ моя́ напра́ви, молю́ся. Припев: Преподо́бне о́тче Диони́сие, моли́ Бо́га о на́с. Угаси́в пла́мень страсте́й росо́ю подвиго́в твои́х,/ о́тче блаже́нне Диони́сие,/ бога́тно вжегл еси́ огне́м любве́ ве́ры воздержа́ния свети́льник,/ просвеще́ние безстра́стия, и сын дне яви́лся еси́. Припев: Преподо́бне о́тче Диони́сие, моли́ Бо́га о на́с. Ве́ры грозд Боже́ственным де́ланием, о́тче, воспита́л еси́,/ и, в точи́лех поста́вив, изгне́л еси́ боле́зньми поще́ния,/ и ча́шу напо́лнил еси́ духо́вную воздержа́ния,/ весели́ши сердца́ ста́да твоего́. Сла́ва Отцу́ и Сы́ну и Свято́му Ду́ху. До́блественне претерпе́в бие́ния неви́димых враго́в,/ показа́лся еси́ столп непоколеби́мь,/ утвержда́я ста́до твое́ па́лицею Боже́ственною, словесы́ медото́чными,/ блаже́нне Диони́сие преподо́бне. И ны́не и при́сно и во ве́ки веко́в. Ами́нь. Богородичен: Еди́на ро́ждши де́вою, едина муженеиску́сная яви́лася еси́, Всенепоро́чная,/ во утро́бе Сло́во О́тчее прие́мши Безнача́льное,/ млеко́м дои́ши, Чи́стая, чу́до стра́шно!/ Де́вствуеши и зако́ны обновля́еши естества́. Песнь 6 Ирмос: Очи́́сти мя, Спа́се,/ мно́га бо беззако́ния моя́,/ и из глубины́ зол возведи́, молю́ся,/ к Тебе́ бо возопи́х, и услы́ши мя,/ Бо́же спасе́ния моего́. Припев: Преподо́бне о́тче Диони́сие, моли́ Бо́га о на́с. Исцеле́ний ре́ки источа́еши, стра́сти земноро́дных боже́ственно очища́еши,/ ра́дующеся ве́рою,/ восхваля́ем твоя́ по́двиги, чу́дне. Припев: Преподо́бне о́тче Диони́сие, моли́ Бо́га о на́с. Зако́нно от всех Соде́теля десни́цею венча́лся еси́, преподо́бне Диони́сие,/ Небе́сный граждани́не, А́нгелом равностоя́телю. Сла́ва Отцу́ и Сы́ну и Свято́му Ду́ху. Нетле́ннаго и Боже́ственнаго пребыва́ния и непости́жных наслажда́яся ны́не благи́х,/ А́нгелом собеседниче, Диони́сие Богому́дре, восхваля́ющие тя спаса́й. И ны́не и при́сно и во ве́ки веко́в. Ами́нь. Богородичен: Бо́га ро́ждши, вся́кия тва́ри, Влады́чице,/ я́ко вои́стинну еди́на, Богоро́дице, превы́шши яви́лася еси́. Кондак, глас 8 Все твое́ у́мное жела́ние к Бо́гу впери́в,/ Тому́ невозвра́тно от души́ после́довал еси́, в пусты́ню всели́вся,/ и, та́мо а́нгельски пожи́в, мно́гим путь был еси́ ко спасе́нию;/ сего́ ра́ди и Христо́с тебе́ просла́ви и да́ром чуде́с обогати́./ Те́мже вси вопие́м ти:/ ра́дуйся, Диони́сие преподо́бне, пусты́нный жи́телю. Икос Храм Бо́гу я́ко вои́стинну себе́ соде́лав, о́тче,/ и Вы́шнего Иерусали́ма яви́вся граждани́н,/ Боже́ственными доброде́тельми твои́ми безпло́тных че́сти сподо́бился еси́./ Те́мже и мы зря́ще чудеса́, похвале́нию досто́йная,/ я́же удивля́ют нас и науча́ют тебе́ зва́ти такова́я:/ ра́дуйся, благочести́ваго отца́ о́трасль и ма́тере благогове́йный ветвь./ Ра́дуйся, целому́дрия сто́лпе,/ и́мже бесо́вская шата́ния искорени́шася./ Ра́дуйся, свети́льниче многосве́тлый./ Ра́дуйся, я́ко увяди́л еси́ плотска́я мудрова́ния./ Ра́дуйся, пусты́ни до́брое прозябе́ние./ Ра́дуйся, пра́ведных Боже́ственное наслажде́ние./ Ра́дуйся, я́ко презре́л еси́ теку́щая и тле́нная./ Ра́дуйся, я́ко на Небесе́х со А́нгелы живе́ши./ Ра́дуйся, я́ко мона́шествующих изве́стное пра́вило./ Ра́дуйся, леня́щихся к Бо́гу дерзнове́ние./ Ра́дуйся, исто́чниче чуде́с богото́чный./ Ра́дуйся, честны́й Ду́ха сосу́де, наста́вниче на́шего спасе́ния./ Ра́дуйся, Диони́сие преподо́бне, пусты́нный жи́телю. Песнь 7 Ирмос: От Иуде́и доше́дше, о́троцы/ в Вавило́не иногда́/ ве́рою Тро́йческою пла́мень пе́щный попра́ша, пою́ще:/ отце́в Бо́же, благослове́н еси́. Припев: Преподо́бне о́тче Диони́сие, моли́ Бо́га о на́с. Вре́менная отложи́в, ве́чными украси́лся еси́,/ со А́нгелы лику́еши, я́ко а́нгельское пожи́в житие́, с ни́миже пое́ши:/ благослове́н Бог оте́ц на́ших. Припев: Преподо́бне о́тче Диони́сие, моли́ Бо́га о на́с. Непреста́нно мо́лим, Диони́сие Богому́дре,/ о ста́де твое́м приле́жно моли́ся,/ тебе́ на моли́тву призыва́ющих, и плоды́ принося́щих, и любо́вию пою́щих:/ благослове́н Бог оте́ц на́ших. Сла́ва Отцу́ и Сы́ну и Свято́му Ду́ху. В зла́це Вы́шнего Ца́рствия ста́до твое́, о́тче, воспита́л еси́/ и жезло́м уче́ний упа́сл еси́ ве́рно пою́щия:/ благослове́н Бог оте́ц на́ших. И ны́не и при́сно и во ве́ки веко́в. Ами́нь. Богородичен: Изба́ви нас, Христе́, от страсте́й, и бед, и обстоя́ний, и неду́гов многообра́зных/ моли́твами Пречи́стыя Твоея́ Ма́тере и преподо́бнаго Диони́сия, взыва́ющих:/ благослове́н Бог оте́ц на́ших. Песнь 8 Ирмос: Царя́ Небе́снаго,/ Его́же пою́т во́и А́нгельстии,/ хвали́те и превозноси́те во вся ве́ки. Припев: Преподо́бне о́тче Диони́сие, моли́ Бо́га о на́с. Столп тя одушевле́н я́ко вои́стинну и о́браз воздержа́ния, о́тче, стяжа́вшее,/ вси твою́, Диони́сие, па́мять почита́ем. Припев: Преподо́бне о́тче Диони́сие, моли́ Бо́га о на́с. Собо́р ра́дуется мона́шеский, и лику́ет преподо́бных сонм,/ с ни́миже пра́ведных вене́ц досто́йно восприя́л еси́. Сла́ва Отцу́ и Сы́ну и Свято́му Ду́ху. Укра́шен доброде́тельми, в неве́стнице неизре́ченныя сла́вы возле́гл еси́,/ песнь воспева́я Христу́ во ве́ки вся. И ны́не и при́сно и во ве́ки веко́в. Ами́нь. Богородичен: Поглоще́на боле́зньми и па́дша возста́ви, Богома́ти,/ я́ко да Тя сла́влю во вся ве́ки. Песнь 9 Ирмос: Чи́стую сла́вно почти́м,/ лю́дие, Богоро́дицу,/ Огнь Божества́ прии́мшую во чре́ве неопа́льно,/ пе́сньми велича́ем. Припев: Преподо́бне о́тче Диони́сие, моли́ Бо́га о на́с. Неду́гующих в паде́нии врач от Бо́га показа́лся еси́, и очи́стник, блаже́нне,/ и прогони́тель лука́вых духо́в, Богоно́се Диони́сие,/ тем тя вси велича́ем. Припев: Преподо́бне о́тче Диони́сие, моли́ Бо́га о на́с. Яко тле́нно жили́ще, зе́млю оста́вив, о́тче, всели́лся еси́в зе́млю кро́тких/ и с ни́ми ра́дуешися, Боже́ственнаго наслажда́яся, о́тче, сия́ния. Сла́ва Отцу́ и Сы́ну и Свято́му Ду́ху. Неукло́нен к ве́ре преде́л/ и образ воздержа́ния иму́ще по́двиги твоя́к Зижди́телю вои́стинну,/ пе́сньми тя велича́ем. И ны́не и при́сно и во ве́ки веко́в. Ами́нь. Богородичен: В Тя всели́вся, Всенепоро́чная,/ пе́рвее родонача́льныя злообра́зно запе́ншаго/ человекоуби́йцу низложи́ Роди́выйся и всех нас спасе́. Светилен Пристра́стия мирска́го, я́ко от скве́рны, уклони́лся еси́,/ разу́мнаго Со́лнца светоза́рная луча́возсия́,/ свети́льник многосве́тлый, пусты́нное воспита́ние и чистоты́ оби́телище,/ Христо́вы добро́ты я́сно зря,/ Его́же сия́нием ум твой озари́л еси́/ и сла́вою обогати́лся еси́ Небе́сною, Диони́сие сла́вне./ Мо́лим тя, в ми́ре сохране́ным бы́ти па́мять твою́ почита́ющим. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Я́ко иму́щи милосе́рдие и ми́лость ве́лию,/ при́зри, Препе́тая Богоро́дице Де́во, на мое́ смире́ние,/ и страсте́й молву́, и собла́зн жития́ разори́, Отрокови́це,/ и огня́ гее́нскаго изба́ви мя моли́твами Твои́ми.

Минея, 7 Апреля, Кано́н преподо́бному Глас 2 Песнь 1 Ирмос: Во глубине́ постла́ иногда́/ фараони́тское всево́инство преоруже́нная си́ла,/ вопло́щшееся же Сло́во всезло́бныи́ грех потреби́ло есть:/ препросла́вленный Госпо́дь, сла́вно бо просла́вися. Припев: Преподо́бне о́тче Дании́ле, моли́ Бо́га о на́с. Распали́лся еси́ к Бо́гу жела́нием/ и на вся́кое вре́мя ум име́л еси́ к Нему́ впере́н, преподо́бне,/ вы́ну 4 возводи́л еси́ к Тому́ о́чи твои́, поя́:/ препросла́вленный Госпо́дь, сла́вно бо просла́вися. Припев: Преподо́бне о́тче Дании́ле, моли́ Бо́га о на́с. Поревнова́в Симео́ну Сто́лпнику,/ у́жем влася́ным те́ло обви́/ и от него́ че́рвие, я́ко би́серие, вмени́,/ наде́ждою же бу́дущих благ укрепля́яся, к Бо́гу вы́ну взыва́ше:/ препросла́вленный Госпо́дь, я́ко просла́вися. Припев: Преподо́бне о́тче Дании́ле, моли́ Бо́га о на́с. Страстьми́ содержи́ми, мо́лим тя, преподо́бне,/ сокруши́ти ты́я помози́ нам/ и от бед изба́ви ны. Припев: Преподо́бне о́тче Дании́ле, моли́ Бо́га о на́с. Ду́хом горя́ще, ча́да твоя́, мо́лим тя:/ к ти́хому приста́нищу нас возведи́/ и лю́тых обстоя́ний свободи́. Сла́ва Отцу́ и Сы́ну и Свято́му Ду́ху. Напра́ви ны на путь покая́ния/ и на стези́ жи́зни Богоуго́дныя наста́ви,/ мо́лим тя, о́тче Дании́ле. И ны́не и при́сно и во ве́ки веко́в. Ами́нь. Богородичен: Пречи́стая Богоро́дице,/ утиши́ боле́зни се́рдца моего́,/ Христа́ безболе́зненно па́че ума́ и сло́ва ро́ждшая. Песнь 3 Ирмос: Процвела́ есть пусты́ня, я́ко крин, Го́споди,/ язы́ческая неплодя́щая, Це́рковь/ прише́ствием Твои́м,/ в не́йже утверди́ся мое́ се́рдце. Припев: Преподо́бне о́тче Дании́ле, моли́ Бо́га о на́с. Просвети́ся житие́ твое́, блаже́нне,/ и посреде́ оте́ц преподо́бных, я́ко со́лнце, возсия́л еси́,/ ревнова́в их чу́дным подвиго́м. Припев: Преподо́бне о́тче Дании́ле, моли́ Бо́га о на́с. По двоюна́десяте ле́ту послуша́ния твоего́/ па́ки град Пересла́вль прише́ствием твои́м освяти́л еси́/ и был еси́ ему́ во утвержде́ние. Припев: Преподо́бне о́тче Дании́ле, моли́ Бо́га о на́с. Ты на́ше утвержде́ние, о́тче Дании́ле,/ утверди́ у́бо нас в де́лании за́поведей Христо́вых,/ да пое́т тя дух наш. Припев: Преподо́бне о́тче Дании́ле, моли́ Бо́га о на́с. Мо́лим тя, о́тче Дании́ле,/ озло́бленных нас от бед свободи́/ и ми́рное житие́ на́ше устро́й моли́твами твои́ми. Сла́ва Отцу́ и Сы́ну и Свято́му Ду́ху. Ско́рый нам помо́щниче и до́брый наш врачу́,/ преподо́бне о́тче,/ теле́сныя же и душе́вныя на́ша неду́ги уврачу́й. И ны́не и при́сно и во ве́ки веко́в. Ами́нь. Богородичен: Укроти́ неуста́вное 5 мои́х помышле́ний, Де́во Влады́чице Чи́стая,/ и отыми́ от души́ печа́ль,/ Я́же всех Ра́дость ро́ждшая. Седален, глас 3 При́сно пеки́йся о доброде́телех,/ жела́ние имел еси́, преподо́бне, е́же Безкро́вней Же́ртве вы́ну соверша́тися/ над погребе́нными тобо́ю мощми́ стра́нных;/ трие́ же и́ноцы совеща́ша ти о триле́тнем отложе́нии того́,/ и́хже сове́та любе́зно послу́шав,/ воздви́гл еси́ це́рковь, при́сно Бо́гу моля́ся./ Моли́ у́бо и о нас,/ да спасе́т Госпо́дь ду́ши на́ша. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Прибе́жище и си́ла нам еси́, Богоро́дице,/ кре́пкая ми́ру Помо́щнице,/ моли́твами Твои́ми спаси́ рабы́ Твоя́. Песнь 4 Ирмос: Прише́л еси́ от Де́вы, не хода́тай, ни А́нгел,/ но Сам, Го́споди, вопло́щся,/ и спасл еси́ всего́ мя, челове́ка./ Тем зову́ Ти: сла́ва си́ле Твое́й, Го́споди. Припев: Преподо́бне о́тче Дании́ле, моли́ Бо́га о на́с. Пеку́щу ти ся, преподо́бние, о зда́нии це́ркве,/ Боже́ственный свет, а́ки от мно́жества свещ, над мощми́ стра́нных ви́дел еси́ и взыва́л еси́:/ сла́ва си́ле Твое́й, Го́споди. Припев: Преподо́бне о́тче Дании́ле, моли́ Бо́га о на́с. Боже́ственнаго светоявле́ния сподо́бився,/ благо́е наме́рение и жела́ние о зда́нии це́ркве/ ди́вным трие́м стра́нником откры́л еси́, преподо́бне,/ ти́и же три ле́та пожда́ти совеща́ша./ По сих же наде́ждою на Бо́га утверди́вся,/ во благовре́мении храм созда́л еси́, вопия́:/ сла́ва си́ле Твое́й, Го́споди. Припев: Преподо́бне о́тче Дании́ле, моли́ Бо́га о на́с. Стра́нных прие́мля и сам взыску́я Небе́снаго Иерусали́ма,/ о́нех ди́вных стра́нников во исхо́де души́ от те́ла твоего́ ви́дел еси́, преподо́бне о́тче, и вопия́ше:/ сла́ва си́ле Твое́й, Го́споди. Припев: Преподо́бне о́тче Дании́ле, моли́ Бо́га о на́с. Страсте́й на́ших смуще́ние и бу́рю прегреше́ний утиши́, преподо́бне о́тче,/ да послу́жим Бо́гу в преподо́бии и и́стине. Припев: Преподо́бне о́тче Дании́ле, моли́ Бо́га о на́с. Услы́ши нас, преподо́бне, уми́льно призыва́ющих тя,/ и подража́тели сотвори́ доброде́телей твои́х,/ да, спаса́еми тобо́ю, вни́дем в ра́дость Го́спода на́шего. Сла́ва Отцу́ и Сы́ну и Свято́му Ду́ху. Стена́ и утвержде́ние бу́ди нам, о́тче Дании́ле,/ вся́ких враг избавля́я нас и богоуго́дно пожи́ти наставля́я,/ в насле́дие жи́зни ве́чныя. И ны́не и при́сно и во ве́ки веко́в. Ами́нь. Богородичен: Пречи́стая Богоневе́сто, Влады́чице ми́ра,/ Ты мя спаси́, от бед пременя́ющи/ и страсте́й молву́ отгоня́ющи. Песнь 5 Ирмос: Просвеще́ние во тьме лежа́щих,/ спасе́ние отча́янных, Христе́, Спа́се мой,/ к Тебе́ у́тренюю, Царю́ ми́ра,/ просвети́ мя сия́нием Твои́м,/ ино́го бо, ра́зве Тебе́, бо́га не зна́ю. Припев: Преподо́бне о́тче Дании́ле, моли́ Бо́га о на́с. Просвеще́ния от Боже́ственныя благода́ти ища́й/ и чи́сто имы́й душе́вное о́ко,/ к Отцу́ све́тов вопия́ше:/ просвети́ мя сия́нием Твои́м,/ ино́го бо, ра́зве Тебе́, бо́га не зна́ю. Припев: Преподо́бне о́тче Дании́ле, моли́ Бо́га о на́с. Священнои́нок не́кий, слы́шав пречу́ден звон/ на ме́сте, иде́же оби́тель хотя́ше бы́ти,/ и ви́дев у́мныма очи́ма мно́гия служб монасты́рских сосу́ды,/ пове́да ти сия́;/ ты же, ра́дуяся, блаже́нне, Царю́ сил вопия́ше:/ ино́го, ра́зве Тебе́, бо́га не зна́ю. Припев: Преподо́бне о́тче Дании́ле, моли́ Бо́га о на́с. Вельмо́жа при́сная обои́ бра́та, во опа́ле ца́рстей бы́вша,/ моли́твами твои́ми, блаже́нне, па́ки ми́лостивно от царя́ честь получи́ста/ и наказу́ема от Тебе́ доброде́тельному житию́, к Бо́гу зовя́ста:/ ино́го, ра́зве Тебе́, бо́га не зна́ем. Припев: Преподо́бне о́тче Дании́ле, моли́ Бо́га о на́с. Имы́й дерзнове́ние к Бо́гу,/ умоли́, преподо́бне о́тче,/ от наве́т вра́жиих изба́витися нам. Припев: Преподо́бне о́тче Дании́ле, моли́ Бо́га о на́с. Благ быва́я живы́м, и над мертвеца́ми не возбрани́л еси́ благода́ти:/ тех бо собира́я, че́стне погреба́л еси́,/ я́ко у́ды Христо́вы. Сла́ва Отцу́ и Сы́ну и Свято́му Ду́ху. Благ и ми́лостив сый, преподо́бне,/ благода́ть и ми́лость у Бо́га обре́л еси́,/ и́хже и нас о́бщники соде́лай твои́ми, блаже́нне, моли́твами. И ны́не и при́сно и во ве́ки веко́в. Ами́нь. Богородичен: Неду́гующую ду́шу мою́ исцели́,/ ро́ждшая всех Взе́млющаго неду́ги,/ Пресвята́я Влады́чице. Песнь 6 Ирмос: В бе́здне грехо́вней валя́яся,/ неизсле́дную милосе́рдия Твоего́ призыва́ю бе́здну:/ от тли, Бо́же, мя возведи́. Припев: Преподо́бне о́тче Дании́ле, моли́ Бо́га о на́с. Человеколю́бию Тови́та подража́яй,/ о погребе́нии стра́нных промышля́ше/ и на свою́ ра́му ты́я ноша́ше. Припев: Преподо́бне о́тче Дании́ле, моли́ Бо́га о на́с. От сподо́бльшейся светоявле́ния/ и в скуде́льницу прише́дшей жены́,/ слы́шав о виде́нии е́ю мно́жества горя́щих свещ,/ уразуме́л еси́, преподо́бне,/ я́ко Бог благоволи́т о ме́сте,/ иде́же оби́тель твою́ созда́л еси́. Припев: Преподо́бне о́тче Дании́ле, моли́ Бо́га о на́с. Я́ко Богосве́тлое свети́ло, на тве́рди це́ркве сия́ющее,/ ве́рных сердца́ озари́л еси́, преподо́бне, све́том Богоразу́мия. Припев: Преподо́бне о́тче Дании́ле, моли́ Бо́га о на́с. Ми́лостивно при́зри на предстоя́щия ти, о́тче Дании́ле,/ и от напа́стей и печа́лей сохрани́ нас. Припев: Преподо́бне о́тче Дании́ле, моли́ Бо́га о на́с. Ум наш освяти́ и просвети́ све́том за́поведей Христо́вых/ и мы́слити поле́зная всегда́ наста́ви ны. Сла́ва Отцу́ и Сы́ну и Свято́му Ду́ху. К тебе́ припа́дающе, усе́рдно и со слеза́ми вопие́м, блаже́нне:/ умоли́ Влады́ку Христа́ мир ста́ду твоему́ дарова́ти. И ны́не и при́сно и во ве́ки веко́в. Ами́нь. Богородичен: Вопие́м Ти вси, и́стинней Богома́тери:/ прогне́вавшия Бо́га рабы́ Твоя́ гее́нны изба́ви,/ ма́тернее дерзнове́ние к Сы́ну Твоему́ иму́щая. Кондак, глас 8 Невече́рняго Све́та пресве́тлое свети́ло,/ жития́ чистото́ю просвеща́ющее всех,/ яви́лся еси́, о́тче Дании́ле:/ о́браз бо и пра́вило и́ноком был еси́,/ сирота́м же оте́ц и пита́тель вдови́цам./ Сего́ ра́ди и мы, ча́да твоя́, вопие́м ти:/ ра́дуйся, ра́досте и ве́нче наш;/ ра́дуйся, мно́гое имы́й к Бо́гу дерзнове́ние;/ ра́дуйся, гра́ду на́шему ве́лие утвержде́ние. Икос Ди́вен на земли́ А́нгелом показа́лся еси́/ и челове́ком пресве́тлое свети́ло, блаже́нне, был еси́./ Те́мже, ра́дуйся, и мы тебе́ усе́рдно зове́м:/ ра́дуйся, бесо́вския полки́ до конца́ низри́нувый и стра́шен тем бы́вый;/ ра́дуйся, над страстьми́ воцари́выйся./ Ра́дуйся, прекра́сный до́ме Святы́я Тро́ицы;/ ра́дуйся, неукло́нно ше́ствовавый стезе́ю к Безсме́ртному животу́./ Ра́дуйся, вдови́цам, и сирота́м, и всем, су́щим в напа́стех, помо́щниче;/ ра́дуйся, и́стинный вождю́, духо́вных твои́х чад направля́яй на путь спасе́ния./ Ра́дуйся, до́брый па́стырю, подража́вый Пастыренача́льнику Спа́су Христу́;/ ра́дуйся, предста́телю за ны Христу́ Бо́гу на́шему./ Ра́дуйся, Росси́йстей стране́ и гра́ду на́шему утвержде́ние. Песнь 7 Ирмос: О́бразу злато́му, на по́ле Деи́ре служи́му,/ трие́ Твои́ о́троцы небрего́ша безбо́жнаго веле́ния,/ посреде́ же огня́ вве́ржени, ороша́ема, поя́ху:/ благослове́н еси́, Бо́же оте́ц на́ших. Припев: Преподо́бне о́тче Дании́ле, моли́ Бо́га о на́с. В по́двизех по́стных просия́вый, преподо́бне,/ безстра́стие стяжа́л еси́, поя́:/ благослове́н Бог оте́ц на́ших. Припев: Преподо́бне о́тче Дании́ле, моли́ Бо́га о на́с. Кре́пкаго подви́жника огнь страсте́й не опали́,/ но Боже́ственная благода́ть ороси́ и све́тла житие́м показа́, зову́ща:/ благослове́н Бог оте́ц на́ших. Припев: Преподо́бне о́тче Дании́ле, моли́ Бо́га о на́с. Не на песце́ суеты́ мирски́я,/ но на ка́мени ве́ры основа́ние положи́в, блаже́нне,/ во сла́ву Святы́я Тро́ицы оби́тель созда́/ и духо́вная твоя́ ча́да зва́ти научи́:/ благослове́н Бог оте́ц на́ших. Припев: Преподо́бне о́тче Дании́ле, моли́ Бо́га о на́с. Послуша́нием и милосе́рдием, посто́м же и моли́твою Бо́гу благоугоди́л еси́:/ сего́ ра́ди просла́ви тя пред А́нгелы и челове́ки благослове́нный Бог оте́ц на́ших. Припев: Преподо́бне о́тче Дании́ле, моли́ Бо́га о на́с. Услы́ши нас, чад твои́х, моля́щих ти ся,/ и ви́димых и неви́димых враг изба́ви,/ да моли́твами твои́ми дерзнове́ния сподо́бимся, е́же зва́ти:/ оте́ц на́ших Бо́же, благослове́н еси́. Сла́ва Отцу́ и Сы́ну и Свято́му Ду́ху. Теле́сныя и душе́вныя на́ша не́мощи, любо́вию притека́ющих к тебе́,/ исцели́ти сподо́би, преподо́бне о́тче, да с тобо́ю зове́м:/ оте́ц на́ших Бо́же, благослове́н еси́. И ны́не и при́сно и во ве́ки веко́в. Ами́нь. Богородичен: Прему́дрости испо́лни всех и кре́пости Боже́ственныя,/ Ипоста́сная прему́дросте Вы́шняго,/ Богоро́дицы ра́ди, ве́рою вопию́щих:/ оте́ц на́ших Бо́же, благослове́н еси́. Песнь 8 Ирмос: В пе́щь о́гненную ко отроко́м евре́йским снизше́дшаго,/ и пла́мень в ро́су прело́жшаго Бо́га/ по́йте, дела́, я́ко Го́спода/ и превозноси́те во вся ве́ки. Припев: Преподо́бне о́тче Дании́ле, моли́ Бо́га о на́с. Огне́м Боже́ственныя любве́ попали́л еси́ плотски́я стра́сти/ и обрати́л еси́ в бе́гство де́монская ополче́ния, зовы́й:/ по́йте, вся дела́, Го́спода и превозноси́те Его́ во ве́ки. Припев: Преподо́бне о́тче Дании́ле, моли́ Бо́га о на́с. Прославля́яй избра́нныя Своя́, Бог/ просла́ви и тебе́, преподо́бне,/ чи́стаго ра́ди жития́ твоего́,/ и, я́ко свети́ло, показа́л еси́, при́сно осиява́ющее ве́рою зову́щих:/ по́йте, вся дела́, Го́спода и превозноси́те Его́ во ве́ки. Припев: Преподо́бне о́тче Дании́ле, моли́ Бо́га о на́с. Дале́че изы́де свята́го и́мене твоего́ сла́ва, преподо́бне,/ и всем на по́льзу был еси, зря́щим тя:/ всех бо науча́л усе́рдно воспева́ти Го́спода/ и превозноси́ти Его́ во ве́ки. Припев: Преподо́бне о́тче Дании́ле, моли́ Бо́га о на́с. Моле́бно притека́ющии к моще́м твои́м, преподо́бне,/ по́мощи от Тебе́ про́сим,/ пою́ще и превознося́ще Христа́ во ве́ки. Припев: Преподо́бне о́тче Дании́ле, моли́ Бо́га о на́с. Неможе́ние душ на́ших и теле́сныя боле́зни исцели́, преподо́бне,/ и научи́ нас прославля́ти Христа́ во ве́ки. Сла́ва Отцу́ и Сы́ну и Свято́му Ду́ху. От Всесвята́го Ду́ха, блаже́нне, бога́тую благода́ть прие́мь,/ исцеля́еши ве́рою пою́щия и превознося́щия Христа́ во ве́ки. И ны́не и при́сно и во ве́ки веко́в. Ами́нь. Богородичен: Напа́стей Ты прило́ги отгоня́еши/ и страсте́й нахо́ды, Де́во,/ те́мже Тя пое́м во вся ве́ки. Песнь 9 Ирмос: Безнача́льна Роди́теля Сын, Бог и Госпо́дь,/ вопло́щся от Де́вы, нам яви́ся,/ омраче́нная просвети́ти, собра́ти расточе́нная./ Тем Всепе́тую Богоро́дицу велича́ем. Припев: Преподо́бне о́тче Дании́ле, моли́ Бо́га о на́с. Христу́, Сыну Бо́жию, ве́рою послужи́л еси́, преподо́бне,/ сего́ ра́ди Оте́ц Небе́сный оби́тель у тебе́ сотвори́л есть,/ с Ним и Пресвяты́м Свои́м Ду́хом. Припев: Преподо́бне о́тче Дании́ле, моли́ Бо́га о на́с. Аще и почте́н был еси́, преподо́бне, от вели́каго кня́зя, я́ко восприе́мник чад его́,/ оба́че кро́ток и смире́н был еси́,/ коего́ждо че́стию бо́льша себе́ творя́. Припев: Преподо́бне о́тче Дании́ле, моли́ Бо́га о на́с. И́стинный учени́к был еси́ Спа́са Христа́,/ нищету́ духо́вную возлюби́в,/ сла́ву же ве́ка сего́ нивочтоже вмени́в,/ тем тя при́сно ублажа́ем. Припев: Преподо́бне о́тче Дании́ле, моли́ Бо́га о на́с. То́ка слез на́ших не отврати́ся, о́тче Дании́ле,/ всегда́ к Бо́гу моля́ся о чту́щих тя. Припев: Преподо́бне о́тче Дании́ле, моли́ Бо́га о на́с. Ра́дости испо́лни сердца́ на́ша и грехо́вныя печа́ли потреби́,/ я́ко да сла́вим тя. Сла́ва Отцу́ и Сы́ну и Свято́му Ду́ху. Благода́тными заря́ми просвети́, преподо́бне о́тче, ве́рных сердца́,/ мрак неве́дения отгоня́я от нас,/ любо́вию тя сла́вящих. И ны́не и при́сно и во ве́ки веко́в. Ами́нь. Богородичен: Твоего́ несказа́ннаго рождества́ пропису́я проро́к,/ кни́гу запечатле́нну прови́де,/ ея́же никто́же разуме́/ и не пости́же та́инства вочелове́чения от Тебе́ Бо́га Сло́ва. Светилен Воздержа́нием плоть твою́ умертви́л еси́, о́тче преподо́бне,/ труды́ же и по́двиги святу́ю твою́ жизнь украси́л еси́,/ и ны́не во све́те Святы́я Тро́ицы пребыва́я,/ разжени́ мрак душ на́ших моли́твами твои́ми. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Сия́нием, Де́во, из Тебе́ возсия́вшаго Све́та/ ум мой озари́, се́рдце просвети́, тьму грехо́вную отгоня́ющи/ и мглу ле́ности моея́ потребля́ющи.

Минея, 11 Февраля, Канон Глас 1 Песнь 1 Ирмос: Твоя́ победи́тельная десни́ца Боголе́пно в кре́пости просла́вися, та́ бо, Безсме́ртне, я́ко всемогу́щая, проти́вныя сотре́, изра́ильтяном пу́ть глубины́ новосоде́лавшая. Припев: Святы́й му́чениче Геóргие, моли́ Бо́га о на́с. Сло́ве Бо́жий, во святы́х препросла́вленный, сло́во ми́ вдохни́ и у́м просвети́ воспе́ти по достоя́нию но́ваго му́ченика Гео́ргия и Тебе́, того́ укре́пльшаго. Припев: Святы́й му́чениче Геóргие, моли́ Бо́га о на́с. Ве́м любо́вь твою́, му́чениче, и на тя́ наде́яся потща́хся принести́ тебе́ пе́ние; а́ще и не по достоя́нию скудоу́мия ра́ди, но от усе́рдия приими́, я́коже и Христо́с вдови́цы две́ ле́пте. Сла́ва Отцу́ и Сы́ну и Свято́му Ду́ху. Я́т бы́в от нечести́вых, муче́ния по́прище преплы́л еси́ и Еде́ма Небе́снаго приста́нище дости́гл еси́, в не́мже ны́не водворя́яся, Влады́це все́х моли́ся ду́ш на́ших помраче́ние отъя́ти, я́ко да досто́йно па́мять твою́ воспое́м. И ны́не и при́сно и во ве́ки веко́в. Ами́нь. Богородичен: Щедролюби́вый Бо́г Сло́во, сотвори́вый руко́ю Ада́ма и от ребра́ его́ Е́ву возсозда́вый, из Тебе́ воплоти́ся, Пречи́стая, на Кресте́ пригвозди́ся и в ре́бра прободе́ся, я́ко да те́х поползнове́ние ми́лостивно испра́вит. Песнь 3 Ирмос: Еди́не ве́дый челове́ческаго естества́ не́мощь и ми́лостивно в не вообра́жься, препоя́ши мя́ с высоты́ си́лою, е́же вопи́ти Тебе́, Святы́й, одушевле́нный хра́ме неизрече́нныя сла́вы Твоея́, Человеколю́бче. Припев: Святы́й му́чениче Геóргие, моли́ Бо́га о на́с. Еще́ в ю́ности ста́рческий ра́зум стяжа́в, сла́вне Гео́ргие, и вся́ све́рстники своя́ превозше́д му́дростию, незло́бием же и смире́нием, от все́х ве́рных ублажа́ешися. Припев: Святы́й му́чениче Геóргие, моли́ Бо́га о на́с. Но́вое бы́л еси́ Правосла́вия утвержде́ние, сла́вне Гео́ргие, степе́нь же благоче́стия и чистоты́ снабде́ние ве́рным лю́дем, его́же ра́ди пе́сньми тя́ восхваля́ем. Сла́ва Отцу́ и Сы́ну и Свято́му Ду́ху. Ны́не стяжа́ тя́ я́ко ве́лие сокро́вище и Це́ркве благоле́пие Сердики́йский гра́д, блаже́нне Гео́ргие, но и вселе́нная вся́ слы́шавши твоя́ боре́ния весели́тся и по́двигу твоему́ дивя́щися, ублажа́ет тя́. И ны́не и при́сно и во ве́ки веко́в. Ами́нь. Богородичен: Исцели́ся преслуша́ние Е́вы прама́тере послуша́нием Твои́м, Пречи́стая: глаго́лы бо Гаврии́ла послу́шавши, Ма́ти была́ еси́ Сы́на Бо́жия, И́же тоя́ печа́ль Кресто́м в ра́дость преложи́. Седален, глас 3 Красна́ тя́ лице́м Творе́ц показа́ и душе́вною добро́тою вну́трь снабде́, вра́г же не терпя́ си́х, хотя́ща тя́ прельсти́ти и в сне́дь себе́ сотвори́ти. Но Созда́тель Благи́й неви́димо тя́ укрепи́ и льстеца́ тобо́ю посрами́. Те́мже ны́не на Небесе́х лику́я, свя́те Гео́ргие, моли́ся Го́сподеви о прославля́ющих тя́. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Недомы́сленно и непостижи́мо е́сть, Влады́чице Богора́дованная, соде́ланное о Тебе́ стра́шное Бо́жие та́инство, необыме́ннаго бо заче́нши родила́ еси́, пло́тию обложе́нна от Пречи́стых крове́й Твои́х; Его́же всегда́, Пречи́стая, с му́ченики моли́ спасти́ся душа́м на́шим. Песнь 4 Ирмос: Го́ру Тя́ благода́тию Бо́жиею приосене́нную прозорли́выма Авваку́м усмотри́в очи́ма, из Тебе́ изы́ти Изра́илеву провозглаша́ше Свято́му во спасе́ние на́ше и обновле́ние. Припев: Святы́й му́чениче Геóргие, моли́ Бо́га о на́с. К бу́дущей сла́ве взира́я, страда́льче всече́стне, маловре́менную ни во что́же вмени́л еси́; те́мже тя́ ничто́же возмо́же разлучи́ти от любве́ Христо́вы: ни темни́чная затворе́ния, ни судиина́ преще́ния, ни огня́ разгоре́ние, ниже́ па́ки тле́нныя сла́вы обеща́ние. Припев: Святы́й му́чениче Геóргие, моли́ Бо́га о на́с. Претерпе́л еси́ му́ки до́блественно, любве́ Боже́ственныя испо́лнен сы́й, и Бо́гу себе́ от ю́ности возложи́в, умре́ти за Него́ не отве́рглся еси́, повеле́ния Того́ послу́шая и стопа́м спаси́тельным после́дуя. Сла́ва Отцу́ и Сы́ну и Свято́му Ду́ху. Люде́й сро́дных оста́вив, в Сердики́йский гра́д прише́л еси́; доброде́тель же в себе́ нося́, му́ченик Христо́в изря́ден показа́лся еси́: ве́сть бо та́ че́сть дарова́ти сугу́бую стяжа́вшим ю́. И ны́не и при́сно и во ве́ки веко́в. Ами́нь. Богородичен: Е́вы прама́тере кля́тву упраздни́ла еси́ Рождество́м Твои́м, Богоблагода́тная; ми́рови же благослове́ние процвела́ еси́, цветонося́щи Христа́; темже́, ра́дующеся, Тя́, Богоро́дицу, испове́дуем. Песнь 5 Ирмос: Просвети́вый сия́нием прише́ствия Твоего́, Христе́, и освети́вый Кресто́м Твои́м ми́ра концы́, сердца́ просвети́ све́том Твоего́ Богоразу́мия правосла́вно пою́щих Тя́. Припев: Святы́й му́чениче Геóргие, моли́ Бо́га о на́с. Твои́ми до́блестьми попра́ся и в преиспо́дняя низложи́ся, и́же безме́рно дре́вле хваля́йся зе́млю и мо́ре погуби́ти; погуби́ его́ Христо́с Кресто́м Свои́м и побе́ду ве́рным дарова́. Припев: Святы́й му́чениче Геóргие, моли́ Бо́га о на́с. Егда́ предумышля́хуся го́рдаго денни́цы служи́телие ле́стными словесы́ улови́ти до́бляго и к свое́й слу́жбе удо́бь привлещи́, тогда́ посрами́шася вселука́вии вку́пе с посла́вшим я́. Сла́ва Отцу́ и Сы́ну и Свято́му Ду́ху. Твою́ не стерпе́ укори́зну, млада́го ю́ноши, велича́вый бе́с и попра́ние, но пону́ди слуги́ своя́ к судии́ ити́, наде́яся стра́хом тебе́ одоле́ти: устраши́шася преиспо́днии, зря́ще тя́ ви́димых посра́мльшаго. И ны́не и при́сно и во ве́ки веко́в. Ами́нь. Богородичен: Та́инство провозгласи́ша несказа́ннаго Твоего́ зача́тия, е́же из Тебе́ Бо́жия Сло́ва, Всепе́тая Ма́ти Де́во, ве́сь ли́к проро́ческий, Бо́гом я́ве науче́нный: Ты́ бо вои́стину Безнача́льный Све́т породила́ еси́, Богоблагода́тная. Песнь 6 Ирмос: Обы́де на́с после́дняя бе́здна: не́сть избавля́яй. Вмени́хомся я́ко о́вцы заколе́ния: спаси́ лю́ди Твоя́, Бо́же на́ш, Ты́ бо кре́пость немощству́ющих и исправле́ние. Припев: Святы́й му́чениче Геóргие, моли́ Бо́га о на́с. Е́же на тя́ скрежета́ния зубо́в не убоя́лся еси́, ниже́ устраши́лся еси́, ста́в на суди́щи мучи́телей, я́ко а́гнец незло́бивый посреде́ волко́в. Сего́ ра́ди тя́ ублажа́ем, помина́юще до́блесть твою́. Припев: Святы́й му́чениче Геóргие, моли́ Бо́га о на́с. Блаже́нне Гео́ргие, разгара́шеся на тя́ я́ростию мучи́тель, зря́ тя́ непрекло́нна и повеле́ния его́ ни во что́ же вменя́юща, и желе́зы тя́ окова́в, в темни́цу вве́рже, устраши́ти тя́ хотя́, но яви́ся посра́млен. Сла́ва Отцу́ и Сы́ну и Свято́му Ду́ху. Егда́ тя́ в темни́цу вверго́ша, бо́льшими к Бо́гу наде́ждами впери́лся еси́, блаже́нне, и наставля́ющаго тя́ к муче́нию послу́шав, словесы́ му́дрыми незатыка́емая уста́ го́рдых заткну́л еси́. И ны́не и при́сно и во ве́ки веко́в. Ами́нь. Богородичен: Прише́д с Небесе́ Архистрати́г, Чи́стая, я́ве Тебе́ ра́дость благовести́ ре́к: из Тебе́ произы́дет Бо́г пло́тию, Де́во Пречи́стая, во спасе́ние ве́рою пою́щих Тя́. Кондак, глас 2 Вы́шния сла́вы жела́я, многострада́льне Гео́ргие, ага́рянскую пре́лесть поплева́в, попра́л еси́ и побе́ды вене́ц прия́л еси́, А́нгелом ны́не свеселя́ся и му́чеником соводворя́яся, с ни́миже Христу́ Бо́гу моли́ся непреста́нно о все́х на́с. Икос Со́лнце мно́жае возсия́ моле́бное твое́ торжество́, блаже́нне Гео́ргие, ве́рныя лю́ди просвеща́я и бесо́в темнозра́чную си́лу отгоня́я. Те́мже припа́даю и а́з, окая́нный, к ра́це моще́й твои́х и молю́ся от боле́зненнаго се́рдца, да прииму́ печа́лем премене́ние и житию́ безмо́лвие, согреше́нием проще́ние и скве́рному уму́ моему́ исправле́ние, во е́же по достоя́нию пе́ти тя́ всегда́, я́ко су́ща ны́не на Небесе́х со А́нгелы и му́ченики, с ни́миже Христу́ Бо́гу моли́ся непреста́нно о все́х на́с. Песнь 7 Ирмос: Су́щим в пещи́ отроко́м Твои́м, Спа́се, не прикосну́ся, ниже́ стужи́ о́гнь; тогда́ трие́, я́ко еди́неми усты́ поя́ху и благословля́ху, глаго́люще: благослове́н Бо́г оте́ц на́ших. Припев: Святы́й му́чениче Геóргие, моли́ Бо́га о на́с. От вся́ких бе́д и напа́стей лю́тых всегда́ ны́ избавля́й, блаже́нне му́чениче Гео́ргие, Боже́ственную благода́ть на́м подава́я, мольбу́ тебе́ принося́щим и Христу́ воспева́ющим: благослове́н Бо́г оте́ц на́ших. Припев: Святы́й му́чениче Геóргие, моли́ Бо́га о на́с. Христа́ Бо́га су́щаго и́стинно возлюби́в, есте́ственныя пло́ти отве́рглся еси́ и на о́гнь му́жески дерзну́л еси́; вене́ц же побе́ды прие́м, воспева́еши при́сно: благослове́н Бо́г оте́ц на́ших. Сла́ва Отцу́ и Сы́ну и Свято́му Ду́ху. Возноше́ния го́рдых пла́мень угаси́л еси́, пла́менем огня́ земна́го опаля́ем, всеблаже́нне, и све́том ра́зума благочести́вых просвети́л еси́; те́м, веселя́щеся, укре́пльшему тя́ Христу́ воспева́ем: благослове́н Бо́г оте́ц на́ших. И ны́не и при́сно и во ве́ки веко́в. Ами́нь. Богородичен: А́може Влады́ка, душе́, Горе́ взира́й, не к земли́ ни́чущи, я́ко безслове́сная: но воспряни́ от помраче́ния и уны́ния, вопию́щи: Го́споди, моли́твами Ро́ждшия Тя́ и му́ченика Твоего́ Гео́ргия сподо́би мя́ Ца́рствия Твоего́. Песнь 8 Ирмос: В пещи́ о́троцы Изра́илеви, я́коже в горни́ле, добро́тою благоче́стия чисте́е зла́та блеща́хуся, глаго́люще: благослови́те, вся́ дела́ Госпо́дня, Го́спода, по́йте и превозноси́те во вся́ ве́ки. Припев: Святы́й му́чениче Геóргие, моли́ Бо́га о на́с. Люде́й правосла́вных утвержде́ние, Церкве́й Бо́жиих благоле́пие, прибега́ющих те́плое заступле́ние яви́лся еси́, всеблаже́нне Гео́ргие, воспева́ющих: благослови́те, вся́ дела́ Госпо́дня, Го́спода, по́йте и превозноси́те во вся́ ве́ки. Припев: Святы́й му́чениче Геóргие, моли́ Бо́га о на́с. У́мную мольбу́ приношу́ тебе́, Гео́ргие: от лю́тых мя́ бе́д изба́ви моли́твами твои́ми, и све́том Богоразу́мия просвети́, и к Боже́ственным стезя́м наста́ви, вопию́ща: благослови́те, вся́ дела́ Госпо́дня, Го́спода, по́йте и превозноси́те во вся́ ве́ки. Сла́ва Отцу́ и Сы́ну и Свято́му Ду́ху. Гра́д на горе́ и све́т на све́щнице, сия́я, яви́лся еси́ вои́стину, му́чениче сла́вне, просвеща́я в нощи́ жития́ ходя́щих и на стезю́ спасе́ния наставля́я вопию́щих: благослови́те, вся́ дела́ Госпо́дня, Го́спода, по́йте и превозноси́те во вся́ ве́ки. И ны́не и при́сно и во ве́ки веко́в. Ами́нь. Богородичен: Ели́цы в пучи́не греха́ вла́емся, к небу́рному приста́нищу притеце́м Бо́жия Ма́тере, я́же Боже́ственною си́лою Сы́на Своего́ все́х ко спасе́нию наставля́ет, зову́щих: благослови́те, вся́ дела́ Госпо́дня, Го́спода, по́йте и превозноси́те во вся́ ве́ки. Песнь 9 Ирмос: О́браз чи́стаго рождества́ Твоего́ огнепали́мая купина́ показа́ неопа́льная. И ны́не на на́с напа́стей свирепе́ющую угаси́ти, мо́лимся, пе́щь, да Тя́, Богоро́дице, непреста́нно велича́ем. Припев: Святы́й му́чениче Геóргие, моли́ Бо́га о на́с. Окре́стнии вси́ Сердики́йскаго гра́да собира́ющеся, пе́сненными гла́сы благоле́пно свяще́нную твою́ па́мять прославля́ем: приими́ у́бо сия́, а́ще и не по достоя́нию, иму́ще бо тя́ хода́тая ко Спа́су Христу́, пе́снь сию́ тебе́ принести́ потща́хомся. Припев: Святы́й му́чениче Геóргие, моли́ Бо́га о на́с. Рабо́в твои́х моле́ния к Бо́гу напра́ви, му́чениче, я́же от жела́ния всея́ души́ тебе́ принесо́хом, и твою́ па́мять почита́ющих пресве́тлую от бе́д и напа́стей избавля́й твои́ми к Бо́гу моли́твами. Припев: Святы́й му́чениче Геóргие, моли́ Бо́га о на́с. Горе́ние о́гненное благоду́шно претерпе́л еси́ Христа́ ра́ди, Его́же любо́вию огради́вся, в се́рдцы твое́м утвержде́ние кре́пкое прия́л еси́ и Ца́рствие получи́л еси́. Те́мже не забыва́й на́с, тя́ любо́вию почита́ющих, венцено́сче Богому́дре Гео́ргие. Сла́ва Отцу́ и Сы́ну и Свято́му Ду́ху. И́же му́дростию Бо́жия Ду́ха ага́рян посрами́вый и терпе́нием о́гненныя сме́рти Христа́ просла́вивый – и о оте́чествии свое́м при́сно Бо́гу моля́щийся, Гео́ргий му́ченик пресла́вный, пе́сньми Боже́ственными от на́с да воспое́тся досто́йно. И ны́не и при́сно и во ве́ки веко́в. Ами́нь. Богородичен: Богоро́дичен: Его́же Оте́ц пре́жде денни́цы роди́ и из Тебе́ напосле́док за ны́, неблагода́рныя, вопло́щься я́ко Младе́нца на руку́ носи́ла еси́, Де́во Богоро́дице, Того́ с му́ченики моли́, о и́же ве́рою восхваля́ющих Тя́. Светилен Я́ко благово́нный цве́т в удо́лиях и я́ко дре́во при исто́чницех во́д, све́тло возсия́ доброде́тельми и страда́ньми му́ченик Гео́ргий. Те́мже облагоуха́вшеся душе́ю, све́тлым лице́м к нему́ воззове́м: ра́дуйся, страда́льцев печа́ть и ве́рных заступле́ние. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Тя́ Дании́л преднапису́ет го́ру несеко́мую, из нея́же пречестны́й ка́мень отсече́ся кроме́ ру́к челове́ческих и сокруши́ и́дольскую пре́лесть всю́. И приведо́шася всле́д Тебе́ в воню́ ми́ра Твоего́ му́чеников ли́цы, с ни́миже о на́с моли́ся, Пречи́стая Де́во, Ма́ти Мари́е.

глас 2 Творение Феофаново Пе́снь 1 Ирмо́с: Во глубине́ постла́ иногда́ фараони́тское всево́инство преоруже́нная си́ла, вопло́щшееся же Сло́во всезло́бный гре́х потреби́ло е́сть, препросла́вленный Госпо́дь, сла́вно бо просла́вися. Припев: Святы́й апо́столе Варна́во, моли́ Бо́га о на́с. Яко му́ж сы́й бла́г и утеше́ния сы́н я́влься, души́ моея́ озлобле́ние и греха́ душегу́бную печа́ль отжени́, я́ко да, весе́лия испо́лнен бы́в, воспою́ тя. Одержи́мь, блаже́нне, чи́стым сия́нием, прозя́бшаго от коле́на Иу́дова, пребога́те, Христа́ Всецаря́, от леви́тска сро́дства прише́дша свяще́нна, зако́на же преложе́ние пропове́дал еси́. Све́тлая твоя́, прему́дре, жи́знь, пе́рвыя бла́гости и есте́ственнаго существа́ показа́ бо́га тя́ втора́го, е́же отту́ду ублажа́ема благода́тьми, сла́вне Варна́во, порожде́ние боже́ственнаго утеше́ния. Богоро́дичен: Отрокови́ц боже́ственный ли́к боже́ственно в жена́х Тя́ до́брую воспева́ет, Богоро́дице Влады́чице, добро́тами укра́шену Божества́: добротвори́тельное бо Сло́во па́че сло́ва родила́ еси́. Пе́снь 3 Ирмо́с: Процвела́ е́сть пусты́ня, я́ко кри́н, Го́споди, язы́ческая неплодя́щая це́рковь, прише́ствием Твои́м, в не́йже утверди́ся мое́ се́рдце. Облак во́льный, на́м до́ждь нося́щий от исто́чника благода́ти, ви́ден бы́л еси́, Варна́во сла́вне, и пи́щный пото́к напая́ющий. Разли́чными одарова́на сия́нии ви́дящи Всеси́льнаго Ду́ха вла́сть, та́йнам Христо́вым служи́теля, отлучи́ тя́, прехва́льне. Просвеща́еми благода́тию Креста́ Твоего́, Влады́ко, благосла́внии апо́столи тебе́ язы́ки ве́рою приведо́ша, Варна́ва и Па́вел богому́дрии. Богоро́дичен: Яви́лася еси́ чистото́ю, я́ко кри́н, Влады́чице, посреде́ те́рния возсия́вши заря́ми де́вства Твоего́, Богоро́дице Всечи́стая. Седа́лен, Варна́вы, гла́с 4: Слове́сен показа́лся еси́, я́ко небе́сную пове́дуя сла́ву Бо́жию чуде́с све́тлостию и си́лы луча́ми, неразу́мия но́щь отгоня́ благода́тию, богоразу́мия же лучи́ облиста́я конце́м. Те́мже светоно́сную и святу́ю твою́ па́мять сла́вим дне́сь, ве́рнии, и вопие́м ти́: Варна́во всехва́льне, моли́ Христа́ Бо́га грехо́в оставле́ние дарова́ти чту́щим любо́вию святу́ю па́мять твою́. Пе́снь 4 Ирмо́с: Прише́л еси́ от Де́вы, не хода́тай, ни Ангел, но Са́м, Го́споди, вопло́щся, и спа́сл еси́ всего́ мя челове́ка. Те́м зову́ Ти́: сла́ва си́ле Твое́й, Го́споди. После́дуя повеле́нием Влады́ки, апо́столе Варна́во прехва́льне, ни́щим разда́л еси́ все́ твое́ име́ние, и Христо́в пропове́дник бы́в велегла́сен. Дости́гл еси́ доброде́телей све́тлость коне́чную и, Па́вла обре́т, богогла́снаго апо́стола, с ни́мже все́м возвести́л еси́ та́инства глубину́ неизрече́нную. Яко со́лнце, претека́я ми́ра концы́, Варна́во всече́стне, зарелу́чными сия́нии, Па́влу после́дуя, просвеща́еши сло́вом благода́ти. Соприча́стник страсте́й Спа́са бы́в, Варна́во прехва́льне, в небе́сных се́лех с Ни́м прославля́ешися, па́че ума́ весе́лия насыща́яся. Богоро́дичен: Евы прама́тере кля́тва упраздни́ся Тобо́ю, Всенепоро́чная: воплоще́ннаго бо Сло́ва родила́ еси́ Присносу́щнаго, благослове́ньми ми́р венча́вшаго. Пе́снь 5 Ирмо́с: Хода́тай Бо́гу и челове́ком бы́л еси́, Христе́ Бо́же: Тобо́ю бо Влады́ко, к светонача́льнику Отцу́ Твоему́, от но́щи неве́дения, приведе́ние и́мамы. Зако́на се́нь преше́д и благода́тию сия́я, язы́ком исполне́ние благовеству́я, просвети́л еси́, богому́дрый Варна́во, Христо́вым пропове́данием. Кре́постию держа́вною Свята́го Ду́ха, апо́столе, я́ве обложе́н, лука́вствия ду́хи низложи́в, от те́х злоде́йства ми́р изба́вил еси́. Вопию́щаго гла́с в пусты́х язы́цех бы́л еси́, му́дре, боже́ственнаго воплоще́ния непостижи́мое та́инство возвеща́я все́м, Варна́во пребога́те. Богоро́дичен: Се́ во утро́бе, Богоро́дице Пречи́стая, Христа́ Бо́га па́че сло́ва име́ла еси́, я́коже Иса́ия предрече́, вы́ше естества́ же Сего́, Богороди́тельнице, родила́ еси́. Пе́снь 6 Ирмо́с: В бе́здне грехо́вней валя́яся, неизсле́дную милосе́рдия Твоего́ призыва́ю бе́здну: от тли́, Бо́же мя́ возведи́. Возсия́в ми́ру, Христе́ Бо́же, Пра́вды Со́лнце, Влады́ко, я́коже лучи́ сия́ющия, Варна́ву и Па́вла возблиста́л еси́. Кореносе́чна секи́ра бы́л еси́, олядене́вшую пре́лесть секу́щи па́че сло́ва чудесы́, богоглаго́ливе Варна́во чу́дне. Законополо́жник показа́лся еси́ благода́ти, я́ко ве́тхаго заве́та о́бразы ко и́стинному явле́нию прелага́я, Варна́во богоприя́тне. Богоро́дичен: Небеса́ Простры́й во́лею, не́бо земно́е друго́е показа́ Тя́, Богома́ти Пречи́стая, и, из Тебе́ возсия́в, яви́ся. Конда́к, гла́с 3 Госпо́день бы́л еси́ всеи́стинный служи́тель, апо́столов же яви́лся еси́ седми́десятих пе́рвый, озари́л еси́ и с Па́влом про́поведь твою́, все́м возвеща́яй Христа́ Спа́са, сего́ ра́ди песнопе́нии боже́ственную па́мять твою́, Варна́во, соверша́ем. Икос: Сы́н Бо́жий, соприсносу́щный Ду́ху, благоволе́нием на земли́ пло́ть прие́мь, я́ко Челове́к, и стра́стию честно́ю безстра́стие да́в, тя́ полага́ет, блаже́нне, апо́стола и вити́я ве́ры, му́дра в сло́ве и досточу́дна, пропове́дника че́стна, язы́ков учи́теля, Варна́во блаже́нне, и Тро́ицы и́стинна покло́нника. Те́мже возсия́ ве́рным честна́я денни́ца све́тлая, озаря́ющая твою́ боже́ственную па́мять, ю́же досто́йно соверша́ем. Пе́снь 7 Ирмо́с: Богопроти́вное веле́ние беззако́ннующаго мучи́теля высо́к пла́мень вознесло́ е́сть: Христо́с же простре́ Богочести́вым отроко́м ро́су духо́вную, Сы́й Благослове́н и Препросла́влен. Свя́то Свята́го, во святы́х почива́ющаго, Варна́во, пропове́дал еси́ Сы́на, собезнача́льна Отцу́ и сопресто́льна, Челове́ка бы́вша, на́м спасе́ние содева́юща. Лучи́, блиста́ющия боже́ственное сия́ние, Варна́ва всечестны́й и Па́вел богоприя́тный, я́ко све́т, исхо́дят, просвеща́ющия сло́вом благода́ти язы́к всенасле́дие, христопропове́дницы. Ра́дуется дне́сь воспита́вый тя́, Варна́во, цвету́щаго сло́во благода́тное, Христо́ви тя́ прозя́бши, богоблаже́нне. Его́же измени́в, ны́нешняго плене́ния изба́ви моли́твами твои́ми. Богоро́дичен: Направля́ющи, Всечи́стая, мою́ жи́знь, ко Твоему́ благоути́шному приста́нищу наста́ви, Бо́га ро́ждшая, благи́х исто́чника, все́м подаю́ща ве́рным незави́стную бла́гость. Пе́снь 8 Ирмо́с: Пе́щь иногда́ о́гненная в Вавило́не де́йства разделя́ше, Бо́жиим веле́нием халде́и опаля́ющая, ве́рныя же ороша́ющая, пою́щия: благослови́те вся́ дела́ Госпо́дня Го́спода. Мо́ре язы́ческое возмути́ти Твоя́ ко́ни, я́ко Благоде́тель, наве́л еси́ — Варна́ву сла́внаго и Па́вла чу́днаго, пре́лесть многобо́жную уче́ньми, Живода́вче, благоче́стия отгоня́щия. Положи́, я́ко Бо́г, Уте́шителю Ду́ше вседе́тельный, в Це́ркви Твое́й свети́ла сия́ющая, Твою́ си́лу пропове́дающая, Сы́ну же и Роди́телю зову́щая: благослови́те, вся́ дела́ Госпо́дня, Го́спода. Облиста́л еси́ све́тло, я́ко со́лнце, в ми́ре, мы́сленному бесе́довав я́ве Со́лнцу, богоприя́тне: разже́гся бо сия́нием, све́т вторы́й бы́л еси́, все́м явля́я та́инства си́лу. Зе́млю всю́ уче́ньми просвети́в, е́же па́че ума́ блаже́нство досто́йно улучи́л еси́, в небе́сных се́лех, Варна́во всече́стне, вене́ц благоле́пия от Влады́ки прие́м. Богоро́дичен: Да кля́тву пе́рвую погуби́ши и сме́рти осужде́ние дре́вния прама́тере, от Де́вы Богома́тере Сло́во Бо́жие роди́ся, все́м дарова́ безсме́ртие неги́блющее. Пе́снь 9 Ирмо́с: Безнача́льна Роди́теля Сы́н, Бо́г и Госпо́дь, вопло́щься от Де́вы, на́м яви́ся, омраче́нная просвети́ти, собра́ти расточе́нная, те́м Всепе́тую Богоро́дицу, велича́ем. Све́т бы́вше доброде́телию, апо́столи, и Све́ту вели́кому ны́не предстоя́ще, ми́ру ми́р пода́ти и на́шу спасти́ Це́рковь, ю́же соста́висте, Влады́ку умоли́те. Вити́йскую лю́тость прему́дрости твоея́ пла́менем, богоявле́нне Варна́во, я́ве погаси́л еси́, сия́ний боже́ственных, я́ко исто́чник, вну́трь име́я. Те́мже всесвяще́нный пра́здник тво́й почита́ем. Ве́рою па́мять твою́ соверша́юще ны́не, апо́столе, моли́твенника ко Влады́це тя́ предлага́ем, разреше́ния прося́ще согреше́ний твои́м прия́ти хода́тайством, Варна́во всече́стне, богопропове́дниче свяще́нне. Богоро́дичен: Яко у́тро обре́теся у́треннее, в жите́йстей но́щи де́вства заря́ми сия́ющи, восто́к Со́лнца разу́мнаго пра́вды на́м я́вльши, Богома́ти Всечи́стая. Свети́лен Апо́столы Христо́вы прииди́те, лю́дие, воспои́м, боже́ственнаго Варфоломе́я и Варна́ву му́драго, пропове́дники ве́ры, я́ко моля́щияся Христу́ о душа́х на́ших.

Глас 1 Пе́снь 1. Ирмо́с: Пе́снь побе́дную пои́м вси́ Бо́гу, сотво́ршему ди́вная чудеса́ мы́шцею высо́кою и спа́сшему Изра́иля, я́ко просла́вися. Припев: Преподо́бне о́тче Афана́сие, моли́ Бо́га о на́с. Бре́нными усты́ пе́ти сугу́бое твое́ успе́ние хотя́ща мя́ ны́не, о́тче, не пре́зри, но уще́дри, молю́тися, зовы́й ны́не в де́нь торжества́ твоего́, в о́ньже па́мять твоя́ просла́вися. Сме́ртною секи́рою посека́емь, в ми́ре се́м живо́т челове́ческий разуме́в, преподо́бне, да сокруши́ши ту́ собо́ю, к тве́рдому Ка́мени прите́кл еси́, и притупи́в доброде́тельми сме́ртныя прило́ги, пое́ши Бо́гу, я́ко просла́вися. У́мер пе́рвее ми́ру отверже́нием того́ многостра́стных ловле́ний, стопы́ ше́ствий твои́х упра́вил еси́, свя́те, к Животу́ непозы́блемому: те́мже ны́не, сы́н Живота́ су́щи, при́зри на ны́, пою́щия в па́мяти твое́й Бо́гу, я́ко просла́вися. Богоро́дичен: Умерщвле́нную мою́ ду́шу самохо́тными страстьми́, оживотвори́ти потщи́ся, Чи́стая Де́во: Ты́ бо еси́ Ма́ти Живота́ и подае́ши уме́ршим воста́ние. Пе́снь 3. Ирмо́с: Ка́мень, его́же небрего́ша зи́ждущии, се́й бы́сть во главу́ у́гла: то́й е́сть Ка́мень, на не́мже утверди́ Це́рковь Христо́с, ю́же от язы́к искупи́. Связа́лся еси́, преблаже́нне, Богоуго́днаго жития́ ве́рвию, сме́рть у́бо плени́ся, не иму́щи на тебе́ вла́сти: а́ще бо и похи́ти тя́, но па́ки возврати́ти повеле́л е́сть мно́гим в по́льзу, И́же сме́ртию Свое́ю все́х от сме́рти искупи́. Ме́ртв свя́зан лежа́л еси́, о́тче, ма́нтии укро́ем на одре́, и Вы́шняго Про́мысл чудотвори́ти тща́шеся тобо́ю: по двою́ бо дню́ возврати́ ду́шу твою́, и жи́в обре́лся еси́ во удивле́ние все́м зря́щим, и́же ви́дяху твое́ успе́ние. Боле́знь твоя́ не бя́ше, преподо́бне, к сме́рти, но к сла́ве Бо́жией: у́мерл бо, сме́рть, а́ки со́н, прия́л еси́ во отра́ду боле́зни твоея́, и по двою́ дню́, а́ки от сна́, воспряну́в, лице́ твое́ умыва́л еси́ струя́ми сле́зными. Богоро́дичен: Боле́знь сме́ртную пресе́кшая Святы́м Рождество́м Твои́м и Живо́т да́вшая всему́ ми́ру, а́з еди́н оста́х, умерщвле́н скве́рными де́лы, Ма́ти Бо́жия, возложи́ на мя́ ру́ку, и живо́т лу́чший обря́щу. Седа́лен, гла́с 8: На безсме́ртие взира́я, да сме́рти ве́чныя избе́гнеши, живо́т те́сный избра́л еси́, Афана́сие преблаже́нне, во умерщвле́нном ти́ телеси́. Сего́ ра́ди, удивля́ющеся ди́вному на тебе́ смотре́нию, сла́вим Еди́наго Человеколю́бца, И́же даде́ все́м живо́т и нетле́ние. Богоро́дичен: Сме́ртной повину́вшихся рабо́те свободи́ла еси́ Рождество́м Твои́м, Богоневе́сто Де́во, те́м Тя́ пе́сньми сла́вят христиа́нстии ро́ди, я́ко дала́ еси́ и́м живо́т и нетле́ние. Пе́снь 4. Ирмо́с: Взя́тся со́лнце, и луна́ ста́ в чи́не свое́м, возне́слся еси́, Долготерпели́ве, на Дре́во и водрузи́л еси́ на не́м Це́рковь Твою́. Лежа́ безду́шен, воздви́глся еси́, и дыха́ние прие́мь, па́ки на бытие́ прише́л еси́, о́тче, е́же ви́девше, предстоя́щии со стра́хом славосло́виша Бо́жию си́лу. Ко́ль стра́шен ча́с сме́рти и Суда́, ви́дев, блаже́нне, го́рце рыда́я, молча́нием и воздыха́нием изъяви́л еси́, и бы́ша сле́зы твоя́ мно́гим написа́ние Суда́ Стра́шнаго. При́сно исхо́д сво́й помина́я, свя́те, пла́кал еси́ в жи́зни се́й боле́зненной, и бо́льшая прибыва́ху ти́ рыда́ния, чу́вственне ви́девшу, како́в отходя́щии и́мут стра́х и тре́пет, его́же да убежи́м и мы́, моли́ся, о́тче преподо́бне. Богоро́дичен: Суда́ Стра́шнаго не бою́ся, ни страшу́ся го́рькия гее́нны, я́ко от мно́гих страсте́й окамене́ мое́ се́рдце. Се́чивом благоутро́бия Твоего́, Чи́стая Де́во Ма́ти, порази́ е́, да очувстви́тся па́мятию му́к стра́шных. Пе́снь 5. Ирмо́с: Тво́й ми́р да́ждь на́м, Сы́не Бо́жий: ино́го бо, ра́зве Тебе́, Бо́га не зна́ем, и́мя Твое́ имену́ем, я́ко Бо́г живы́х и ме́ртвых еси́. Тво́й пла́ч и неуте́шное рыда́ние предстоя́щии ви́девше, ужа́сни прося́ху, да ска́жеши и́м сло́во на по́льзу. Ты́ же три́ поле́зная сказа́л еси́ и́м: да храня́т послуша́ние, покая́ние и моли́тву, я́ко бо́льшия доброде́телей ине́х, в ни́хже и мы́ да утверди́мся, моли́ся, о́тче Афана́сие. Са́м послушли́в сы́й за́поведем Христо́вым, послуша́ние вы́ше все́х доброде́телей бы́ти бра́тии сказа́л еси́, преподо́бне, то́ бо и по сме́рти не умира́ет, но снабдева́ет живо́т с Бо́гом, И́же е́сть стра́шен Судия́ живы́м и ме́ртвым. Покая́ние и моли́тва — две́ криле́ о́гненне, и си́ми прехо́д неудержи́мь от мыта́рств возду́шных извести́л еси́, блаже́нне, молча́ния яви́л еси́ пути́, и́миже поте́кл еси́ на бо́льшая, наказа́ние оста́вль вопроси́вшим. И на́м да́ждь исправле́ние, де́нь весе́лия твоего́ соверша́ющим. Богоро́дичен: Моли́твеннице ско́рая о христиа́нстем ро́де, Мари́е Де́во, моли́твы певе́ц Твои́х прие́мши в пречи́стыя дла́ни, принеси́ к Твоему́ Сы́ну и испроси́ на́м грехо́в проще́ние и тишину́ да́ждь су́щим в страсте́х. Пе́снь 6. Ирмо́с: Отве́ргл мя́ еси́ во глубины́ се́рдца морска́го, и спа́сл еси́ мя́, Спа́се, от рабо́ты сме́ртныя, и разреши́л еси́ у́зы беззако́ний мои́х. Отве́ргся коне́чнее живота́ и чу́вственнаго све́та ви́дети, в те́мен затво́р вше́л еси́, пременя́я чу́вственное на мы́сленнаго Све́та зре́ние, его́же и мы́ да улучи́м моли́твами твои́ми, о́тче, отве́ргшеся беззако́ний на́ших. Умерщвле́нную пло́ть по́стническими труды́ да оживи́ши, свя́те, струя́ми сле́з твои́х напая́л еси́ вы́ну, двана́десять ле́т пребы́в в пеще́ре, жи́в погребе́н, наде́ждою живота́ безсме́ртнаго оживля́емь. Дре́во жи́зненное пло́ть твоя́, Афана́сие преподо́бне, израсти́ покая́ния все́м плоды́, от ни́хже вкуси́ти да́ждь и мне́ любо́вию твое́ю, да укреплю́ся разреши́ти у́зы беззако́ний мои́х. Богоро́дичен: Дре́во присноцвету́щее Ты́ еси́, Пречи́стая Де́во, пали́мых зно́ем беззако́ний покрыва́ющее се́нию Твое́ю. Се́ю и на́с покры́й, страстьми́ жего́мых, и воспое́м: ра́дуйся, Дре́во благосенноли́ственное, и́мже покрыва́ются мно́зи. Конда́к, гла́с 5: Я́ко безсме́ртия тезоимени́т, по уме́ртвии свое́м воста́л еси́ жи́в; показу́я же, я́ко зело́ люта́ е́сть сме́рть, пла́кался еси́ го́рько. Ны́не, обре́тши неконча́емую ра́дость, моли́ся о на́с, я́ко да пла́ча ве́чнаго избу́дем. Пе́снь 7. Ирмо́с: Су́щим в пещи́ отроко́м Твои́м, Спа́се, не прикосну́ся, ниже́ стужи́, о́гнь. Тогда́ трие́, я́ко еди́неми усты́, поя́ху и благословля́ху, глаго́люще: благослове́н Бо́г оте́ц на́ших. Жи́знь твою́ в пла́че и воздыха́нии проводи́в и струя́ми сле́з твои́х убели́в а́нгельскаго о́браза ри́зу, отше́л еси́ в безплаче́вныя страны́, ра́дующися и пою́щи: благослове́н Бо́г оте́ц на́ших. Чи́ни А́нгельстии в де́нь успе́ния твоего́ приспе́ша, и ду́х тво́й ми́рно прие́мше, проводи́ша в ра́йския оби́тели, иде́же живы́й, помяни́ на́с, о́тче преподо́бне, пою́щих: благослове́н Бо́г оте́ц на́ших. Мертве́ц два́жды в жи́зни се́й бы́л еси́, свя́те, и пе́рвее у́бо возвраща́ющася вси́ ви́деша тя́ па́ки в плотски́х соста́вах, от ни́хже втори́цею разре́шся, ны́не живе́ши со А́нгельскими чи́нми, иде́же и на́с не забу́ди, пою́щих: благослове́н Бо́г оте́ц на́ших. Богоро́дичен: Уме́ршаго мя́ злы́ми дея́нии оживотвори́ти потщи́ся, Влады́чице: на Тя́ бо упова́ние возложи́х несумне́нно, я́ко ро́ждшую Безсме́ртнаго Царя́, и ми́ру всему́ Живода́вца. Пе́снь 8. Ирмо́с: Небеса́ небе́с и вода́, я́же превы́ше небе́с, благослови́те, по́йте Го́спода и превозноси́те Его́ во ве́ки. Небеса́ ра́дуются, прие́мше ду́х тво́й в не́дра своя́, и мы́ весели́мся, кла́няющеся моще́м твои́м, преподо́бне, от ни́хже пода́ждь тре́бующим благода́ть и сподо́би пе́ти Го́спода во ве́ки. А́нгели торжеству́ют, сожи́теля тя́ иму́ще, весели́тся и гора́ Пече́рская, содержа́щи ра́ку моще́й твои́х, а́ки би́сер многосве́тлый, си́м просвети́ на́с, мра́ком страсте́й одержи́мых, и да́ждь пе́ти Го́спода во ве́ки. Благоугоди́л еси́, о́тче, в жи́зни се́й Влады́це своему́ и прия́л еси́ да́р неду́ги исцеля́ти. На́с, страстьми́ одержи́мых, посети́, я́коже ля́двиями боля́ща Вави́лу, и сподо́би Го́спода пе́ти во ве́ки. Богоро́дичен: В печа́ли и тузе́ е́смь, скве́рное мое́ житие́ помышля́я, и не и́мам наде́жды. К Тебе́ Еди́ной прибега́ю, ра́дости всеми́рной, Чи́стая Де́во, и молю́, да ра́дость возсия́ет души́ мое́й во ве́ки. Пе́снь 9. Ирмо́с: Сотвори́ держа́ву мы́шцею Свое́ю, низложи́ бо си́льныя со престо́л и вознесе́ смире́нныя Бо́г Изра́илев, в ни́хже посети́ на́с Восто́к с высоты́ и напра́вил ны́ е́сть на пу́ть ми́ра. Сотвори́ любо́вь моля́щимся тебе́, о́тче, и моли́твою твое́ю да́ждь цельбу́ стра́ждущим неду́ги душе́вными, па́че же ра́туемых вра́жиими наве́ты напра́ви на пу́ть ми́рен. Пое́т Вели́кая Ла́вра труды́ и по́двиги твоя́, преподо́бне, сла́вит вы́ну пеще́ра, храня́щая чудотво́рныя мо́щи твоя́, и́мже и мы́ покланя́ющеся, мо́лим тя́: напра́ви стопы́ на́ша на пу́ть ми́рен. Воста́ни ско́ро и прииди́, а́з исцелю́ тя́,— рцы́, Афана́сие преблаже́нне; се́ бо от мно́гия боле́зни душе́вныя вопию́ ти́, не имы́й отра́ды, па́че же молю́: наста́ви мя́ на спасе́ния пу́ть ми́рен. Сла́влю Тя́, Тро́ице Пресвята́я, О́тче Безнача́льне с Сы́ном Безле́тным, и пою́ Ду́ха Твоего́ Свята́го, Его́же да́ждь се́рдцу моему́ хода́тайством уго́дника Твоего́, да обря́щу пу́ть ми́рен. Богоро́дичен: А́ще кто́ не сла́вит чи́стаго зача́тия и не пое́т несказа́ннаго Рождества́ Твоего́, Мари́е Богоневе́сто, да отпаде́т ве́чныя Сла́вы и не бу́дет соо́бщник Све́та и сы́н присносу́щнаго ми́ра. Свети́лен: В преподо́бных ди́внаго Афана́сия пе́сньми, лю́дие, восхва́лим: то́й бо жи́в у́мре, и по двою́ дню́ воскре́се, и па́ки преста́вися, живе́т, не ктому́ сме́ртию облада́емь, но присносу́щную нача́ жи́знь, я́ко сы́н су́щи Живота́, и Воскресе́ния пра́ведных насле́дник. Сла́ва, и ны́не: Ди́вны Твоя́ та́йны, Чи́стая, кто́ испове́сть? или́ кто́ возвести́т на Тебе́ сбытие́ неизрече́нных? Родила́ бо еси́ в ле́то Сы́на, пре́жде ве́к от Отца́ рожде́нна, Живота́ и Воскресе́ния Пе́рвенца, моли́ у́бо Его́, да и а́з Воскресе́ния бу́ду и Живота́ насле́дник.

Минея, 3 Августа, Кано́н преподо́бнаго Глас 2 Песнь 1 Ирмос: Грядите, лю́дие,/ пои́м песнь Христу́ Бо́гу,/ разде́льшему мо́ре и наста́вльшему люди,/ я́же изведе́ из рабо́ты еги́петския,/ я́ко просла́вися. Припев: Преподо́бне о́тче Анто́ние, моли́ Бо́га о на́с. А́гнче незло́бивый, отве́рзи ми устне́ недосто́йнии,/ язы́к мой уясни́, и се́рдце мое́ просвети́,/ и ум мой озари́ све́том Твоего́ Богоразу́мия,/ да возмогу́ воспева́ти па́мять преподо́бнаго Анто́ния,/ его́же на земли́ удиви́л еси́. Припев: Преподо́бне о́тче Анто́ние, моли́ Бо́га о на́с. Мно́гим милосе́рдием и щедро́тами,/ Соде́телю тва́ри и веко́в Тво́рче, моле́бное пе́ние приими́,/ и проще́ние на́ших согреше́ний да́руй/ Твоего́ уго́дника преподо́бнаго Анто́ния моле́нием,/ и тишину́ се́рдцу моему́. Сла́ва Отцу́ и Сы́ну и Свято́му Ду́ху. Све́тлое и богоуго́дное житие́ твое́, я́ко свет, вои́стинну на земли́ пока́зася,/ Боже́ственную бо ви́дети све́тлость, Анто́ние, сподо́бился еси́./ Те́мже и, ви́димая вся оста́вив, Непостижи́маго зре́ти сподо́бился еси́. И ны́не и при́сно и во ве́ки веко́в. Ами́нь. Богородичен: Мои́х прегреше́ний, Влады́чице, плени́цу расто́ргни,/ Твоего́ Сы́на и Го́спода моля́щи,/ и томя́щий мя грех, Присноде́во, низложи́,/ я́ко да воспева́ю Тя всегда́, Всенепоро́чная, Тобо́ю спаса́емь. Песнь 3 Ирмос: На ка́мени мя ве́ры утверди́в,/ разшири́л еси́ уста́ моя́ на враги́ моя́,/ возвесели́ бо ся дух мой, внегда́ пе́ти:/ несть свят, я́коже Бог наш,/ и несть пра́веден, па́че Тебе́, Го́споди. Припев: Преподо́бне о́тче Анто́ние, моли́ Бо́га о на́с. Жезло́м доброде́телей стра́стное мо́ре пресе́к/ и го́рдаго врага́, я́коже друга́го фарао́на, моли́твою твое́ю погрузи́в,/ избра́нное твое́ ста́до но́ваго Изра́иля невре́дно соблюди́, Анто́ние преподо́бне. Припев: Преподо́бне о́тче Анто́ние, моли́ Бо́га о на́с. Возлюби́л еси́, блаже́нне, всено́щное бде́ние,/ и моли́тву непреста́нну, и любо́вь нелицеме́рну,/ си́ми очища́я ум твой, ду́шу же просвеща́я, те́ло твое́ смиря́л еси́/ и ко дневны́м трудо́м благопоко́рно устроя́л еси́. Сла́ва Отцу́ и Сы́ну и Свято́му Ду́ху. Храм тя, вси ве́рнии, Ду́ха Пресвята́го ве́мы,/ храм боголе́пен Бо́жии Ма́тери воздви́гл еси́, и огра́ду ве́лию устро́ил еси́,/ и мона́хов мно́жества совокупи́л еси́,/ в не́мже ны́не всяк неду́г моли́твами твои́ми отгоня́ется. И ны́не и при́сно и во ве́ки веко́в. Ами́нь. Богородичен: Во ины́х жена́х ма́ти, донде́же де́ва, не позна́ся,/ ни ма́ти по рождестве́ де́вствовати сподо́бися,/ на Тебе́ же, Девома́ти, обоя́ устро́ишася./ Тем весе́лием ду́ха воспева́ю:/ несть непоро́чны, па́че Тебе́, Влады́чице. Седален, глас 8 А́нгельски на земли́ пожи́в, Богому́дре Анто́ние,/ ли́ком по́стническим счи́слился еси́:/ Крест бо на ра́мена твоя́ взем, после́довал еси́ Влады́це Христу́,/ и стра́сти душетле́нныя воздержа́нием, преподо́бне, увяди́л еси́,/ и был еси́ духо́вно прия́телище и сосу́д чи́ст Го́сподеви./ Те́мже вопие́м ти:/ моли́ Христа́ Бо́га грехо́в оставле́ние дарова́ти/ пра́зднующим любо́вию пречестну́ю и святу́ю па́мять твою́. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Я́ко Всенепоро́чная Неве́ста Творцу́,/ я́ко Неискусобра́чная Ма́ти Изба́вителя,/ прия́телище я́ко су́щи Уте́шителя, Препе́тая,/ беззако́нию мя су́ща скве́рное оби́телище и бесо́м игра́лище в ра́зуме бы́вша,/ потщи́ся от тех злоде́йства мя изба́вити/ и све́тлое жили́ще доброде́телей соверши́, Светоно́сная Нетле́нная,/ отжени́ о́блак страсте́й и вы́шняго прича́стия сподо́би/ и све́та невече́рняго моли́твами Твои́ми. Песнь 4 Ирмос: Прише́л еси́ от Де́вы, не хода́тай, ни А́нгел,/ но Сам, Го́споди, вопло́щся,/ и спасл еси́ всего́ мя, челове́ка./ Тем зову́ Ти: сла́ва си́ле Твое́й, Го́споди. Припев: Преподо́бне о́тче Анто́ние, моли́ Бо́га о на́с. Умертви́в себе́ ми́рови, жизнь равноа́нгельну на земли́ пожи́л еси́, пресла́вне,/ и, я́ко дар освяще́н, Влады́це, Анто́ние, твою́ ду́шу чи́сту предста́вил еси́,/ и Боже́ственнаго Ца́рствия досто́йно, о́тче, получи́л еси́. Припев: Преподо́бне о́тче Анто́ние, моли́ Бо́га о на́с. Ве́трилом, о́тче, воздержа́ния окриля́емь, стра́стныя тьмы отбежа́в/ и к безстра́стия путе́м наставля́емь, к Све́ту невече́рнему́ восте́кл еси́/ и, от сего́ озари́вся, нетле́ния бога́тство насле́довал еси́, Анто́ние преподо́бне. Сла́ва Отцу́ и Сы́ну и Свято́му Ду́ху. Вели́кий Но́вград ны́не весе́лием, о́тче, красу́ется,/ име́я мо́щи твоя́ в себе́, преподо́бне Анто́ние,/ ученицы́ же твои́, твоему́ житию́ ревну́юще,/ о твое́й па́мяти ра́дующеся, Го́сподеви пою́т:/ сла́ва си́ле Твое́й, Го́споди. И ны́не и при́сно и во ве́ки веко́в. Ами́нь. Богородичен: И́стинную Тя сень свиде́тельствоваша многоразли́чными о́бразы,/ я́ве показу́юще воплоще́ннаго из Тебе́ Еди́наго от Тро́ицы, Пречи́стая,/ неизме́нно, Богома́ти Чи́стая, и мир обно́вльша. Песнь 5 Ирмос: Све́та Пода́телю и веко́в Тво́рче, Го́споди,/ во све́те Твои́х повеле́ний наста́ви нас:/ ра́зве бо Тебе́ ино́го Бо́га не зна́ем. Припев: Преподо́бне о́тче Анто́ние, моли́ Бо́га о на́с. Возше́д на высоту́ доброде́телей, до́лу влеку́щия стра́сти оплева́л еси́,/ сла́дость показу́я спасе́ния,/ о́тче преподо́бне Анто́ние, ста́ду твоему́ проси́ грехо́в проще́ния. Припев: Преподо́бне о́тче Анто́ние, моли́ Бо́га о на́с. Место проше́ния, о́тче, со тща́нием исполня́я,/ храм боголе́пен Бо́жия Ма́тере воздви́гл еси́,/ в не́мже ны́не пра́здничною ра́достию мона́хов мно́жества веселя́тся,/ па́мять твою́ прославля́юще. Сла́ва Отцу́ и Сы́ну и Свято́му Ду́ху. Не забу́ди ста́да твоего́, е́же, му́дре, собра́л еси́/ и в жи́зни сей упасл еси́ благоче́стно,/ и ны́не потщи́ся, о́тче наш Анто́ние, да привлече́ши во огра́ду Небе́сную. И ны́не и при́сно и во ве́ки веко́в. Ами́нь. Богородичен: Упра́ви ум мой, Влады́чице, тружда́ющийся в пучи́не скорбе́й/ и потопля́емый наше́ствием тлетво́рных страсте́й./ Спаси́ к Тебе́ прибега́ющаго,/ ины́я бо по́мощи, Чи́стая, ра́зве Тебе́, не зна́ем. Песнь 6 Ирмос: В бе́здне грехо́вней валя́яся,/ неизсле́дную милосе́рдия Твоего́ призыва́ю бе́здну:/ от тли, Бо́же, мя возведи́. Припев: Преподо́бне о́тче Анто́ние, моли́ Бо́га о на́с. От земны́х к Небе́сным оби́телем пресла́вно возше́л еси́, Богому́дре Анто́ние,/ и та́мо зре́ти неизрече́нных сподо́бился еси́,/ и́хже о́ко не ви́де, и у́хо не слы́ша, и на се́рдце челове́ку не взы́де,/ и́же угото́ва Бог лю́бящим его́. Припев: Преподо́бне о́тче Анто́ние, моли́ Бо́га о на́с. Дрема́ния очи́ма твои́ма отню́д не дал еси́, к Бо́гу все твое́ жела́ние впери́в/ и тому́ невозвра́тно от души́ после́довав,/ нощь жития́ непреткнове́нно преми́нул еси́,/ виде́нии Боже́ственными окормля́емь, блаже́нне Анто́ние,/ в Боже́ственную жизнь всели́лся еси́. Сла́ва Отцу́ и Сы́ну и Свято́му Ду́ху. Вели́каго святи́теля Ники́ты, блаже́нне Анто́ние, благослове́ния сподо́бився,/ духо́внаго нака́зания поуче́ние от него́ восприя́л еси́,/ бу́рею бо греха́ не погрузи́лся еси́, и в ти́хо приста́нище дости́гл еси́ Небе́снаго Ца́рствия,/ и та́мо я́сне наслажда́ешися Боже́ственнаго виде́ния. И ны́не и при́сно и во ве́ки веко́в. Ами́нь. Богородичен: Обетша́вшия ны го́рьким дре́ва пре́жде вкуше́нием/ и па́дшияся поползе́нием, Пречи́стая, обнови́ла еси́,/ Зижди́теля ро́ждши, Сло́во Ипоста́сное, Де́во Ма́ти Влады́чице. Кондак, глас 8 Ри́мское воспита́ние, Вели́кому же Нову́гра́ду благода́тное процвете́ние,/ мно́гими бо труды́ и по́двиги в нем Бо́гу угоди́л еси́./ Сего́ ра́ди чуде́с дарова́ний от Него́ сподо́бился еси́,/ и те́ло твое́ мно́гими ле́ты соблюде́ нетле́нно./ Мы же, сие́ лобыза́юще, ра́достно от души́ вопие́м ти:/ ра́дуйся, о́тче Анто́ние. Икос Ка́ко возмогу́ исчести́ премно́гая твоя́ чудеса́?/ Или́ ка́ко изрещи́ жесто́кое твое́ житие́?/ Не и́мам бо се́рдца чи́ста, я́ко сие́ сра́мными дея́ньми оскверни́х/ и ду́шу мою́ лука́выми по́мыслы осмради́х./ Но оба́че дерза́ю воспева́ти, а́ще ты ми пода́си сло́во, недосто́йному твоему́ рабу́,/ ты бо земны́й А́нгел и Небе́сный челове́к во пло́ти обре́лся еси́, преподо́бне./ На земли́ бо о тле́нных небре́гл еси́/ и Христу́ от души́ после́довал еси́/ боле́зньми, и труды́, и зе́льным воздержа́нием, и злострада́нием, и на земли́ лега́нием./ Посто́м, и бде́нием, и моли́твами о́браз был еси́ твои́м ученико́м/ и сего́ ра́ди сосу́д чист и оби́тель Ду́ха Пресвята́го яви́лся еси́./ Тем тя чтим, ра́дуйся, о́тче Анто́ние. Песнь 7 Ирмос: О́бразу злато́му, на по́ле Деи́ре служи́му,/ трие́ Твои́ о́троцы небрего́ша безбо́жнаго веле́ния,/ посреде́ же огня́ вве́ржени, ороша́еми, поя́ху:/ благослове́н еси́, Бо́же оте́ц на́ших. Припев: Преподо́бне о́тче Анто́ние, моли́ Бо́га о на́с. От гра́да и оте́че́ства твоего́ пресе́льник был еси́,/ к Бо́гу ру́це простира́я, спасе́ние обре́т;/ вода́м же послужи́вшим Тебе́ Бо́жиим манове́нием, Вели́каго Нова́гра́да дости́гл еси́,/ иде́же бя́ше уго́дно Влады́це./ Ему́же ны́не ра́достно пое́ши:/ благослове́н Бог оте́ц на́ших. Припев: Преподо́бне о́тче Анто́ние, моли́ Бо́га о на́с. Вели́каго Нова́гра́да архиере́я, и христолюби́вых люде́й,/ и мона́хов мно́жества ра́дости испо́лнил еси́ и духо́внаго весе́лия/ твои́м ди́вным и чрезъесте́ственным прехожде́нием:/ на ка́мени бо, я́ко на корабли́, прише́л еси́, Спу́тника, о́тче, Христа́ обре́т./ К Нему́же ны́не ра́достно зове́ши:/ благослове́н Бог оте́ц на́ших. Сла́ва Отцу́ и Сы́ну и Свято́му Ду́ху. Лику́ют собра́ния мона́шествующих/ и веселя́тся наро́дов мно́жества Вели́каго Нова́гра́да/ в честне́м преставле́нии Анто́ния всеблаже́ннаго,/ моле́бный соверша́юще пра́здник, ра́достно от души́ вопию́т:/ благослове́н Бог оте́ц на́ших. И ны́не и при́сно и во ве́ки веко́в. Ами́нь. Богородичен: Пещь проо́бразова́шеТвое́ рождество́, Всенепоро́чная:/ о́троки бо не опали́, я́коже ложесна́ Твоя́, огнь непостоя́нный./ Те́мже мо́лим Тя: огня́ ве́чнаго изба́ви рабы́ Твоя́. Песнь 8 Ирмос: В пещь о́гненную ко отроко́м евре́йским снизше́дшаго/ и пла́мень в ро́су прело́жшаго Бо́га,/ по́йте, дела, я́ко Го́спода,/ и превозноси́те во вся ве́ки. Припев: Преподо́бне о́тче Анто́ние, моли́ Бо́га о на́с. Авраа́мский стяжа́в нрав, прему́дре,/ от страны́ Ри́мския пресе́льник был еси́ Вели́каго Нова́гра́да/ и та́мо Бо́га узре́л еси́, обещава́юща Тебе́ воздая́ние бога́тно./ Тем, весели́ся, усе́рдно Христу́ вопие́ши:/ благослови́те, вся дела́, Го́спода и превозноси́те его́ во ве́ки. Припев: Преподо́бне о́тче Анто́ние, моли́ Бо́га о на́с. На земли́ пожи́в, я́ко А́нгел, с пло́тию, я́ко безпло́тен,/ безпло́тныя враги́ под но́ги покори́л еси́,/ чистоту́ стяжа́л еси́ посто́м, и бде́нием, и моли́твами./ Те́мже со А́нгелы на Небесе́х све́тло ликуя, Христу́ вопие́ши:/ благослови́те, вся, Го́спода и превозноси́те его́ во ве́ки. Сла́ва Отцу́ и Сы́ну и Свято́му Ду́ху. Рим оте́чество твое́ пропове́дует, преподо́бне,/ Вели́кий же Но́вгра́д хва́лится тобо́ю, прие́м от Го́спода сокро́вище некра́домое:/ помо́щника бо вели́каго, блаже́нне Анто́ние, тя восприе́м,/ с ли́ки мона́шескими ны́не весели́тся./ Те́мже, па́мять твою́ пра́зднующе, ра́достно вопие́м:/ благослови́те, вся дела́, Го́спода и превозноси́те его́ во ве́ки. И ны́не и при́сно и во ве́ки веко́в. Ами́нь. Богородичен: Вели́кому та́инству рождества́ Твоего́ кто не удиви́тся, Богоро́дице?/ Или́ кий язы́к земны́й или́ ум безпло́тных изрещи́ возмо́жет?/ Па́че бо естества́ и смы́сла, Богоро́дице, Зижди́теля роди́ла еси́. Песнь 9 Ирмос: От Бо́га Бо́га Сло́ва,/ неизрече́нною му́дростию прише́дшаго обнови́ти Ада́ма,/ я́дию в тле́ние па́дшаго лю́те,/ от Святы́я Де́вы неизрече́нно воплоти́вшагося нас ра́ди,/ ве́рнии, еди́ному́дренно пе́сньми велича́ем. Припев: Преподо́бне о́тче Анто́ние, моли́ Бо́га о на́с. Всегда́ к ра́це моще́й твои́х приступа́юще, любе́зно целу́ем и от души́ вопие́м:/ о́тче преподо́бне Анто́ние, моли́ся приле́жно Христу́ Бо́гу за град и лю́ди,/ скорбь нашу на ра́дость премени́ти и грехо́в проще́ние испроси́ти,/ да тя непреста́нно велича́ем. Припев: Преподо́бне о́тче Анто́ние, моли́ Бо́га о на́с. Вели́кому Анто́нию тезоимени́т был еси́, блаже́нне Анто́ние,/ и того́ житию́ подража́л еси́, равноа́нгельно во оби́тели Пресвять́ія Богоро́дицы пожи́л еси́,/ те́мже и ра́вну по́честь от Бо́га сподо́бился еси́ прия́ти,/ с ни́мже ны́не на Небесе́х весели́шися./ И нас помина́й, пра́зднующих па́мять твою́,/ да тя непреста́нно велича́ем. Сла́ва Отцу́ и Сы́ну и Свято́му Ду́ху. Ны́не на Тебе́ чу́до ве́лие ви́дится и у́жаса испо́лнено:/ ка́ко погребе́но вои́стинну мно́го лет соблюде́ся невреди́мо, преподо́бне Анто́ние,/ твое́ многотру́дное те́ло, во гро́бе лежа́щее Бо́жиим мановением?/ Я́коже Сам весть, сла́вящия его́ прославля́ет. И ны́не и при́сно и во ве́ки веко́в. Ами́нь. Богородичен: Исцели́ла еси́ сокруше́ние, Всенепоро́чная, и ве́тхое страда́ние земны́х,/ Бо́га ро́ждши, Царя́ Христа́, поне́сшаго пло́тию неду́ги на́ша./ Те́мже Тя, вси ро́ди, Де́во Влады́чице, ублажа́юще, Богоневе́сто, велича́ем. Светилен Христо́ву ны́не престо́лу предстоя́, преподо́бне,/ с Богома́терию, Пречи́стою Де́вою, моля́ся не преста́й/ побе́ды на ва́рвары христолюби́вому во́инству на́шему дарова́ти,/ и душе́вное спасе́ние, и ми́ру смире́ние, Анто́ние Богому́дре.

Минея, 17 Января, Кано́н преподо́бнаго Глас 8 Песнь 1 Ирмос: Колесницегони́теля фарао́ня погрузи́/ чудотворя́й иногда́/ Моисе́йский жезл, крестообра́зно порази́в/ и раздели́в мо́ре, Изра́иля же беглеца́, пешехо́дца спа́се,/ песнь Бо́гови воспева́юща. Припев: Преподо́бне о́тче Анто́ние, моли́ Бо́га о на́с. Безсме́ртия и жи́зни е́мься ве́чныя я́ве/ и Трисия́нныя зари́, о́тче, насыща́яся,/ просвеще́нием благода́ти омраче́нную ду́шу мою́ озари́ти помоли́ся,/ я́ко да досто́йно воспою́ тя. Припев: Преподо́бне о́тче Анто́ние, моли́ Бо́га о на́с. Млад сый во́зрастом телесе́,/ нов путь доброде́тели восприе́м, сим безбе́дно ше́ствовал еси́,/ зако́ну но́вому повину́яся Спа́сову, треблаже́нне,/ и живоно́сным повеле́нием Ева́нгелия после́дуя. Сла́ва Отцу́ и Сы́ну и Свято́му Ду́ху. Трисо́лнечным сия́нием, всему́дре, озаря́емь,/ злоу́мное, блаже́нне, де́монов свере́пство, и звере́й зия́ния,/ и ран боле́зни, я́коже паучи́ну, разори́л еси́,/ Боже́ственным разжиза́емь жела́нием. И ны́не и при́сно и во ве́ки веко́в. Ами́нь. Богородичен: Я́ко Бо́жия Ма́ти,/ дерзнове́ние иму́щи к ро́ждшемуся из Тебе́ Единоро́дному Сло́ву,/ и Отцу́ Собезнача́льному, и Соесте́ственному Ду́ху,/ моля́щи не преста́й от бед спасти́, Всенепоро́чная,/ Тя, Богоро́дицу, сла́вящия. Песнь 3 Ирмос: Утвержде́й в нача́ле Небеса́ ра́зумом/ и зе́млю на вода́х основа́вый,/ на ка́мени мя, Христе́, за́поведей Твои́х утверди́,/ я́ко несть свят, па́че Тебе́, Еди́не Человеколю́бче. Припев: Преподо́бне о́тче Анто́ние, моли́ Бо́га о на́с. Утвержде́нным по́мыслом и кре́пким терпе́нием страсте́й увяди́л еси́ пла́мень,/ в безстра́стия све́тлую оде́жду, Анто́ние, оде́ялся еси́, о́тче, и спасе́ния ри́зу. Припев: Преподо́бне о́тче Анто́ние, моли́ Бо́га о на́с. Крепчашия прило́ги де́монов дерза́ющих/ и зве́рскими о́бразы подо́бящихся,/ пренебре́гл еси́ тех не́мощную си́лу,/ кре́пкаго бо име́л еси́ во бране́х Спомо́щника. Сла́ва Отцу́ и Сы́ну и Свято́му Ду́ху. Богоно́сец, нача́ла тьмы и вла́сти обличи́в воздержа́нием кре́пким,/ до́блественный победи́тель, Анто́ние, был еси́,/ по́стников сла́ва, мона́шествующих похвала́. И ны́не и при́сно и во ве́ки веко́в. Ами́нь. Богородичен: Умерщвле́нный мой ум живо́тным де́йством,/ из Тебе́ я́вльшимся ми́ру, воздви́гни, Чи́стая, и к жи́зни наста́ви,/ я́же сме́рти две́ри разо́ршая еди́на Рождество́м Твои́м. Седален, глас 8 Ду́шу твою́ связа́в любо́вию Христо́вою,/ земна́я возненави́дев вся му́дре,/ водвори́лся еси́, о́тче преподо́бне, в пусты́нях и гора́х,/ разу́мнаго бо дре́ва вкуси́в, сла́вне,/ я́ко от незаходи́мых, таи́нниче, а́нгельски просия́л еси́./ Те́мже и, мрак проше́д пло́ти твоея́,/ тьму отгна́л еси́ де́монов, Анто́ние,/ и, мона́шествующих предызбра́нный,/ моли́ Христа́ Бо́га прегреше́ний оставле́ние пода́ти/ чту́щим любо́вию святу́ю па́мять твою́. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Я́ко Всенепоро́чная Неве́сто Творца́,/ я́ко Неискусому́жная Ма́ти Изба́вителя,/ прия́телище я́ко су́щи Уте́шителя, Всепе́тая,/ беззако́ния мя су́ща скве́рное оби́телище и де́монов игра́лище в ра́зуме бы́вша,/ потщи́ся от тех злоде́йства мя изба́вити/ и све́тлое жили́ще доброде́телей соверши́, Светоно́сная Нетле́нная./ Отжени́ о́блак страсте́й, и Вы́шняго прича́стия сподо́би,/ и Све́та Невече́рняго моли́твами Твои́ми. Песнь 4 Ирмос: Ты моя́ кре́пость, Го́споди,/ Ты моя́ и си́ла,/ Ты мой Бог, Ты мое́ ра́дование,/ не оста́вль не́дра О́тча/ и на́шу нищету́ посети́в./ Тем с проро́ком Авваку́мом зову́ Ти:/ си́ле Твое́й сла́ва, Человеколю́бче. Припев: Преподо́бне о́тче Анто́ние, моли́ Бо́га о на́с. Доброде́телей ле́ствицу Боже́ственную употреби́в,/ к высоте́, о́тче, возше́л еси́/ и Бо́га ви́дел еси́, на ней утвержде́на/ и да́ры раздава́юща руко́ю богате́йшею ве́рно пою́щим:/ си́ле Твое́й сла́ва, Человеколю́бче. Припев: Преподо́бне о́тче Анто́ние, моли́ Бо́га о на́с. Весь Бо́гу освяти́лся еси́, Анто́ние,/ еди́н Еди́ному, всему́дре, единя́яся доброде́телию и бесе́дами/ и Богоявле́ния, я́ко чист, сподобля́емь/ земли́ бо и земны́х отступи́в,/ досто́йно Небе́сное обре́л еси́ наслажде́ние. Сла́ва Отцу́ и Сы́ну и Свято́му Ду́ху. Ум и ду́шу очи́стив, Анто́ние, пре́лесть, о́тче, душегу́бную,/ и кова́рствия, и ле́сти го́рькия, и мечта́ния враго́в обличи́л еси́,/ пострада́в бо, навы́кл еси́/ и, научи́вся, учи́ши мона́шествующих мно́жества, всеблаже́нне. И ны́не и при́сно и во ве́ки веко́в. Ами́нь. Богородичен: Бо́га, из Тебе́ воплоще́ннаго, моли́, непрело́жно, еже́ бе, пребы́вша/ и есте́ственно равна́ Отцу́, и Тебе́, Ро́ждшей, бы́вша Единосу́щна,/ проще́ние прегреше́ний и душ спасе́ние пою́щим Тя ве́рою дарова́ти. Песнь 5 Ирмос: Вску́ю мя отри́нул еси́/ от лица́ Твоего́, Све́те Незаходи́мый,/ и покры́ла мя есть чужда́я тьма, окая́ннаго?/ Но обрати́ мя и к све́ту за́поведей Твои́х/ пути́ моя́ напра́ви, молю́ся. Припев: Преподо́бне о́тче Анто́ние, моли́ Бо́га о на́с. Живу́ща в тебе́ име́я вся ви́дящаго Бо́га, блаже́нне,/ науча́юща тя, и просвеща́юща, и умудря́юща,/ душ, треблаже́нне, чи́стых и блаже́нных восхо́ды зре́ти сподо́бился еси́. Сла́ва Отцу́ и Сы́ну и Свято́му Ду́ху. Исцеле́ний тебе́ благода́ть на неду́ги разли́чныя дарова́/ и на ду́хи нечи́стыя Христо́с власть, му́дре:/ естество́ бо, о́тче, победи́в,/ па́че естества́ даро́в причасти́лся еси́ Ду́ха. И ны́не и при́сно и во ве́ки веко́в. Ами́нь. Богородичен: Тя сте́ну иму́ще и предста́тельством Твои́м соблюда́еми,/ Твое́ю Боже́ственною сла́вою хваля́щеся, Тя блажи́м:/ Ты бо, Всечи́стая, душа́м на́шим источа́еши весе́лие и ра́дование. Песнь 6 Ирмос: Бе́здна грехо́в и прегреше́ний бу́ря мя смуща́ет/ и во глубину́ ну́жднаго ре́ет мя отча́яния,/ но Твою́ кре́пкую ру́ку мне простри́, я́ко Петро́ви,/ о Управи́телю! и спаси́. Припев: Преподо́бне о́тче Анто́ние, моли́ Бо́га о на́с. Зако́нное страда́льчески житие́ от мя́гких ногте́й восприи́м, Богому́дре,/ да́же до конца́ соблю́л еси́/ и, я́ко Боже́ствен до́блественник,/ вене́ц прия́л еси́ побе́ды от всех Ца́рствующаго. Сла́ва Отцу́ и Сы́ну и Свято́му Ду́ху. Иму́ще тя к Бо́гу моли́твенника крепча́йша, блаже́нне,/ и о́бщника попече́ний, и предста́теля, и побо́рника, и хода́тая благоче́стна,/ от вся́ких спаса́емся бед, и напа́стей, и обстоя́ний. И ны́не и при́сно и во ве́ки веко́в. Ами́нь. Богородичен: Вознесла́ еси́ всеи́стинно па́дшееся челове́ческое существо́, во зра́це Боже́ственнем/ и Отца́ в ра́венстве, ви́димаго Сы́на неизме́ннаго, Богома́ти,/ без се́мене во чре́ве поноси́вши. Кондак, глас 2 Жите́йския молвы́ отри́нув,/ безмо́лвно житие́ сконча́л еси́,/ Крести́теля подража́яй вся́ким о́бразом, преподо́бнейший,/ с ним у́бо тя почита́ем,/ отце́в нача́льниче, Анто́ние. Икос Христо́в глас услы́шав, ше́ствовал еси́ в след Того́ за́поведей,/ наг жития́ быв, и отве́ргл еси́ попече́ния вся/ стяжа́ний, име́ний и рабо́в твои́х,/ и сестры́ любле́ние, Богоно́се Анто́ние,/ и, еди́н в пусты́нях Бо́гу бесе́дуя чисте́йше, ра́зума благода́ть прия́л еси́,/ ю́же ми посли́, в пе́снех тя пою́щему,/ отце́в нача́льниче, Анто́ние. Песнь 7 Ирмос: Бо́жия снизхожде́ния/ огнь устыде́ся в Вавило́не иногда́,/ сего́ ра́ди о́троцы в пещи́, ра́дованною ного́ю,/ я́ко во цве́тнице, лику́юще, поя́ху:/ благослове́н еси́, Бо́же оте́ц на́ших. Припев: Преподо́бне о́тче Анто́ние, моли́ Бо́га о на́с. Ча́ши бы́ша арома́т лани́ты твоя́,/ доброде́телей благово́ние и спасе́ние благоуха́ющий, я́ко от цве́тника, ве́рою зову́щим:/ благослове́н Бог оте́ц на́ших. Сла́ва Отцу́ и Сы́ну и Свято́му Ду́ху. Благода́ть Ду́ха Всесвята́го, в тя все́льшися,/ духо́в гони́теля лука́вствия, о́тче, соде́ла/ и мона́шествующих обучи́теля, зову́ща:/ благослове́н Бог оте́ц на́ших. И ны́не и при́сно и во ве́ки веко́в. Ами́нь. Богородичен: Мари́ю Пречи́стую и Всесвяту́ю восхва́лим:/ То́ю бо благода́ть нам источа́ется па́че ума́ даро́в,/ я́ко от пото́ка Боже́ственныя бла́гости,/ Ю́же благочести́вым по́мыслом ны́не ублажи́м. Песнь 8 Ирмос: Седмери́цею пещь/ халде́йский мучи́тель/ Богочести́вым неи́стовно разжже́./ Си́лою же лу́чшею спасе́ны, сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки. Припев: Преподо́бне о́тче Анто́ние, моли́ Бо́га о на́с. В моли́твах бо́дрое, в поще́ниих благомо́щное, терпели́вное в напа́стех, Анто́ние,/ ума́ чистото́ю на земли́, я́ко А́нгел, показу́я, Бо́гу вопия́л еси́:/ о́троцы, благослови́те, свяще́нницы, воспо́йте,/ лю́дие, превозноси́те во вся ве́ки. Припев: Преподо́бне о́тче Анто́ние, моли́ Бо́га о на́с. Моли́твами, преподо́бне, и мольба́ми приближа́яся ты непреста́нно к Бо́гу,/ восте́кл еси́ к высоте́ превзя́тей, де́монских сете́й избе́гл,/ свободи́вся же тех мучи́тельства, Богому́дре, воспева́еши:/ свяще́нницы, по́йте,/ лю́дие, превозноси́те во вся ве́ки. Сла́ва Отцу́ и Сы́ну и Свято́му Ду́ху. Но́вый Моисе́й быв, в пусты́ни побе́ду на враги́ и бори́тели поста́вил еси́,/ лю́ди предводя́, по́стников собо́р в весе́лии и но́вом жи́тельстве,/ вопию́щих Влады́це:/ свяще́нницы, благослови́те, лю́дие, превозноси́те во вся ве́ки. И ны́не и при́сно и во ве́ки веко́в. Ами́нь. Богородичен: Богороди́тельнице Всечи́стая,/ души́ моея́ я́звы и грехо́вныя стру́пы очи́сти,/ исто́чниками омыва́ющи, су́щими из боку́ Рождества́ Твоего́/ и су́щими из того́ очища́ющи струя́ми,/ к Тебе́ бо взыва́ю, и к Тебе́ прибега́ю,/ и Тя призыва́ю, Богоблагода́тную. Песнь 9 Ирмос: Ужасе́ся о сем Не́бо,/ и земли́ удиви́шася концы́,/ я́ко Бог яви́ся челове́ком пло́тски/ и чре́во Твое́ бысть простра́ннейшее Небе́с/ Тем Тя, Богоро́дицу,/ А́нгелов и челове́к чинонача́лия велича́ют. Припев: Преподо́бне о́тче Анто́ние, моли́ Бо́га о на́с. Наста́ светоно́сный твой пра́здник, всеблаже́нне о́тче Анто́ние,/ испо́лнь ра́дости, испо́лнь весе́лия духо́внаго,/ испо́лнь Свята́го Ду́ха, испо́лнь благоуха́ния и просвеще́ния,/ и ны́не, иму́ще тя поще́ния пра́вило и законополо́жника, ра́дуемся. Припев: Преподо́бне о́тче Анто́ние, моли́ Бо́га о на́с. Не преста́й моля́ Изба́вителя, всечестны́й о́тче,/ дарова́ти благогове́йно па́мять твою́ соверша́ющим свяще́нную прегреше́ний оставле́ние,/ дарова́ний раздая́ние, Боже́ственное предста́тельство,/ душ спасе́ние, ве́чное ра́дование. Сла́ва Отцу́ и Сы́ну и Свято́му Ду́ху. Равноа́нгелен пожи́в на земли́, равноа́нгельну обре́л еси́ све́тлость,/ тех бо Богови́днейшим сия́нием в прича́стии был еси́./ С ни́миже и ра́дуешися всегда́, я́ко Боже́ственный проро́к,/ я́ко му́ченик венцено́сец,/ я́ко мона́шествующих верхо́вник. И ны́не и при́сно и во ве́ки веко́в. Ами́нь. Богородичен: Зачала́ еси́, Де́во, без се́мене/ вся́ческая созда́вшаго Сло́во Бо́жие, кроме́ хоте́ний плотски́х,/ и без истле́ния родила́ еси́, без боле́зней ма́терних./ Тем Тя, Богоро́дицу, и язы́ком, и се́рдцем испове́дующе, велича́ем. Светилен Свет единонра́вных показа́лся еси́,/ Све́та ходи́ти стезя́ми благочести́выя научи́в,/ Анто́ние, отце́в о́тче,/ и пла́мень мо́лнии па́ки огнь испуща́я и попаля́я де́монов полки́. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Тя песньми немо́лчными ублажа́ем, Дево,/ я́ко от Тро́ицы Еди́наго родила́ еси́, Богоро́дице,/ и носи́ла еси́ на Боже́ственных объятиих Пресущественное Сло́во,/ невращно и неизме́нно.

Минея, 22 Июня, Канон святого Глас 8 Песнь 1 Ирмос: Посе́ченный несеко́маго пресече́,/ и ви́де со́лнце зе́млю, ю́же не ви́де,/ лю́таго врага́, вода́ потопи́,/ и непроходи́мое про́йде Изра́иль,/ пе́снь же воспева́шеся:/ Го́сподеви пои́м, сла́вно бо просла́вися. Припев: Святы́й священному́чениче Евсéвие, моли́ Бо́га о на́с. Соверше́нным све́том осия́емь, и свяще́нным лико́м, блаже́нне, сочиня́емь,/ и му́ченическим благосла́вием украша́емь,/ ве́рою пра́зднующия твою́, Евсе́вие блаже́нне, па́мять сохраня́й,/ Христа́ ми́лостива творя́. Припев: Святы́й священному́чениче Евсéвие, моли́ Бо́га о на́с. Сла́достне жела́нием Христо́вым разжига́емь от ю́ности,/ пло́ть покори́л еси́, преблаже́нне, души́ свяще́нными си́лами/ и, сосу́д свяще́н показа́вся,/ лю́ди в преподо́бии, преподо́бне, упа́сл еси́, пома́зався ми́ром благода́ти. Сла́ва Отцу́ и Сы́ну и Свято́му Ду́ху. Тя пастыренача́льника Дух Святы́й предлага́ет,/ ерети́чествующих мглу словесы́ светоно́сными твои́ми разоря́юща, му́дре,/ и я́ве показу́юща стезю́ пра́вую в ню преподо́бно входя́щим,/ вели́кий Евсе́вие, свети́ло серде́ц на́ших. И ны́не и при́сно и во ве́ки веко́в. Ами́нь. Богородичен: Благослове́нная, Бо́га ро́ждшая,/ благословя́щия Тя ны́не, Пречи́стая, благослови́,/ к благи́м вхо́дом руководи́, и испо́лни Боже́ственных благ, и пе́ти укрепи́:/ Го́сподеви пое́м, сла́вно бо просла́вися. Песнь 3 Ирмос: Страх Твой, Го́споди,/ всади́ в се́рдца раб Твои́х/ и бу́ди нам утвержде́ние,/ Тя во и́стине призыва́ющим. Припев: Святы́й священному́чениче Евсéвие, моли́ Бо́га о на́с. Был еси́ кро́ток и незло́бив, смиренному́др же и тих/ и любве́ Боже́ственныя испо́лнен,/ му́ченическими при кончи́не украси́лся еси́ венцы́. Припев: Святы́й священному́чениче Евсéвие, моли́ Бо́га о на́с. Оде́ждами, и́же от кро́ве, Евсе́вие свяще́нне, сия́я,/ во свята́я восте́кл еси́,/ све́тло святы́х сла́вою венча́емь. Сла́ва Отцу́ и Сы́ну и Свято́му Ду́ху. Облича́я А́риевы единомы́сленники,/ гоне́ния, блаже́нне, подъя́л еси́ и ну́ждную сме́рть,/ те́мже безсме́ртныя сла́вы сподо́бился еси́. И ны́не и при́сно и во ве́ки веко́в. Ами́нь. Богородичен: Во́лею О́тчею Сло́во родила́ еси́, наи́тием Боже́ственнаго Ду́ха,/ Пресвята́я Де́во Ма́ти, архиере́ев сла́во,/ те́мже Тя пое́м. Седален, глас 4 Уясни́в житие́ твое́ доброде́телей красота́ми,/ па́стырь наре́клся еси́, святи́тель че́стен, преблаже́нне Евсе́вие,/ кро́вию же муче́ния себе́ украси́в,/ горе́ к Невеще́ственным преста́вился еси́ лико́м./ С ни́миже о нас Христа́, о́тче, моли́ поми́ловати ду́ши на́ша. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Чи́стая, Всенепоро́чная Неискусому́жная,/ Я́же еди́на Безле́тнаго Сы́на и Сло́ва Бо́жия в ле́то ро́ждши,/ Сего́ со святы́ми и честны́ми патриа́рхи, и му́ченики, и проро́ки, и преподо́бными моли́/ дарова́ти нам очище́ние и ве́лию ми́лость. Песнь 4 Ирмос: Из го́ры приосене́нныя, Сло́ве, проро́к,/ еди́ныя Богоро́дицы,/ хотя́ща воплоти́тися богови́дно усмотри́/ и со стра́хом славосло́вяще си́лу Твою́. Припев: Святы́й священному́чениче Евсéвие, моли́ Бо́га о на́с. Уста́вил еси́, му́дре, пре́лести гное́ние со́лию твои́х изря́дных уче́ний/ и неду́гующия е́ресию злове́рия, блаже́нне, исцели́л еси́, Евсе́вие. Припев: Святы́й священному́чениче Евсéвие, моли́ Бо́га о на́с. Напра́вив лю́ди к приста́нищу спасе́ния,/ А́риево погрузи́л еси́ неве́рие кро́вным наводне́нием,/ па́стырю и му́чениче, святи́телей удобре́ние. Сла́ва Отцу́ и Сы́ну и Свято́му Ду́ху. Звезда́ све́тла возсия́л еси́ в ми́ре,/ сия́нием свяще́нным озаря́я мы́сли, преблаже́нне, правосла́вных,/ те́мже тя ве́рно ублажа́ем. И ны́не и при́сно и во ве́ки веко́в. Ами́нь. Богородичен: Усты́, Чи́стая, и язы́ком, и се́рдцем/ испове́даю Тя, Зижди́теля Ма́терь, и молю́ Тя:/ озари́ ду́шу мою́, омраче́нную согреше́ньми. Песнь 5 Ирмос: От но́щи неве́дения,/ Богове́дением просвети́вый концы́,/ просвети́ мя у́тром человеколю́бия Твоего́, Го́споди. Припев: Святы́й священному́чениче Евсéвие, моли́ Бо́га о на́с. Уче́нии твои́ми, блаже́нне, правосла́вных утвержда́я мудрова́ние,/ за благоче́стие заточе́ние претерпе́л еси́. Припев: Святы́й священному́чениче Евсéвие, моли́ Бо́га о на́с. Правосла́вия столпа́, и исцеле́ний исто́чника тя ве́мы, прему́дре святи́телю,/ и Це́ркве утвержде́ние. Сла́ва Отцу́ и Сы́ну и Свято́му Ду́ху. Законоположе́нии Боже́ственными беззако́ннующия утвержда́я, Евсе́вие,/ от руки́ беззако́ннующих непра́ведну претерпе́л еси́ сме́рть. И ны́не и при́сно и во ве́ки веко́в. Ами́нь. Богородичен: Све́тел све́щник, Богороди́тельнице,/ Боже́ственную свещу́ нося́щи, позна́лася еси́,/ вся озаря́ющую концы́. Песнь 6 Ирмос: Моли́тву пролию́ ко Го́споду/ и Тому́ возвещу́ печа́ли моя́,/ я́ко зол душа́ моя́ испо́лнися/ и живо́т мой а́ду прибли́жися,/ и молю́ся, я́ко Ио́на:/ от тли, Бо́же, возведи́ мя. Припев: Святы́й священному́чениче Евсéвие, моли́ Бо́га о на́с. Пропове́дал еси́ Единосу́щное Сло́во и Собезнача́льнаго Отцу́ Сы́на,/ ме́рзкаго А́риева неи́стовства потреби́л еси́ су́етное мудрова́ние, Евсе́вие,/ благочести́вых неразсе́дное и тве́рдое огражде́ние. Припев: Святы́й священному́чениче Евсéвие, моли́ Бо́га о на́с. Кропле́нием честны́х твои́х крове́й порфи́ру себе́ обагри́л еси́ ца́рску/ и вмести́лся еси́, о́тче, с весе́лием в Боже́ственное Ца́рствие,/ предстоя́ти Царю́ веко́в, всеблаже́нне Евсе́вие. Сла́ва Отцу́ и Сы́ну и Свято́му Ду́ху. Я́ко ши́пок, я́ко благово́нен крин, я́ко рай Бо́жий, показа́лся еси́,/ посреде́ жи́зни име́я дре́во, Самоде́теля всех и Го́спода, Евсе́вие./ Ны́не нас благово́ния исполня́еши Боже́ственнаго Ду́ха. И ны́не и при́сно и во ве́ки веко́в. Ами́нь. Богородичен: Разуме́вше Богоглаго́ливии проро́цы та́инства Твоего́ безме́рную глубину́,/ сие́ я́ве провозвести́ша, Отрокови́це, гада́ньми и Боже́ственными прорече́нии:/ Сло́во бо О́тчее па́че сло́ва, Чи́стая, воплоти́ла еси́. Кондак, глас 4 Благоче́стно во святи́тельстве пожи́в/ и муче́ния пу́ть проше́д,/ и́дольския угаси́л еси́ же́ртвы, святи́телю Евсе́вие,/ но я́ко име́яй дерзнове́ние ко Христу́ Бо́гу,/ моли́ спасти́ся душа́м на́шим. Песнь 7 Ирмос: О́троцы евре́йстии в пещи́/ попра́ша пла́мень дерзнове́нно/ и на ро́су о́гнь преложи́ша, вопию́ще:/ благослове́н еси́, Го́споди Бо́же, во ве́ки. Припев: Святы́й священному́чениче Евсéвие, моли́ Бо́га о на́с. Пе́сньми упражня́яся, святи́телю, и мольба́ми, успи́л еси́ стра́сти/ и нам, ве́рным, бодр яви́лся еси́ храни́тель,/ благоче́стно пою́щим тя и творя́щим твою́ па́мять. Припев: Святы́й священному́чениче Евсéвие, моли́ Бо́га о на́с. Му́ченик я́влься и святи́тель, Небе́сная боже́ственне насле́довал еси́/ и престо́лу предстои́ши Зижди́теля, вопия́:/ благослове́н еси́, Го́споди Бо́же, во ве́ки. Сла́ва Отцу́ и Сы́ну и Свято́му Ду́ху. У́тро возсия́л еси́, пропове́дая возсия́вшаго от Отца́ пре́жде денни́цы, Иису́са Христа́,/ свети́льниче церко́вный, святи́телей украше́ние, страда́льцев удобре́ние. И ны́не и при́сно и во ве́ки веко́в. Ами́нь. Богородичен: Зако́ны естества́, Де́во, рождество́м Твои́м обновля́еши пресла́вно/ и истле́вшия ны злым преступле́нием очища́еши./ Те́мже Тя по до́лгу восхваля́ем. Песнь 8 Ирмос: Богоглаго́ливии о́троцы в пещи́,/ со огне́м пла́мень попира́юще, поя́ху;/ благослови́те, дела́ Госпо́дня, Го́спода. Припев: Святы́й священному́чениче Евсéвие, моли́ Бо́га о на́с. Со святи́тели и му́ченики моли́,/ я́ко святи́тель и му́ченик, священнопропове́дниче Евсе́вие, Спа́са всех/ обрести́ нам ми́лость. Припев: Святы́й священному́чениче Евсéвие, моли́ Бо́га о на́с. Благи́м нра́вом пожи́в,/ слове́сною па́лицею свяще́нное твое́ ста́до упа́сл еси́/ и ерети́ческия зве́ри, всеблаже́нне, отгна́л еси́. Сла́ва Отцу́ и Сы́ну и Свято́му Ду́ху. Отягче́нныя пия́нством пре́лести, ерети́чествующия всу́е ты облича́я, Евсе́вие,/ от тех убие́н был еси́, страда́в тве́рдо. И ны́не и при́сно и во ве́ки веко́в. Ами́нь. Богородичен: Я́ко вы́шши небе́сных высо́т,/ вы́шнее пролила́ еси́ Сло́во,/ от земли́ возне́сшее па́дшее существо́ челове́ческое, Всепе́тая. Песнь 9 Ирмос: Вои́стинну Богоро́дицу/ Тя испове́дуем,/ спасе́ннии Тобо́ю, Де́во Чи́стая,/ с Безпло́тными ли́ки Тя велича́юще. Припев: Святы́й священному́чениче Евсéвие, моли́ Бо́га о на́с. Ви́дети сподо́бился еси́, о́тче, да́льняя,/ свяще́нней твое́й души́ наде́емая,/ и к невече́рнему сия́нию, ра́дуяся, всели́лся еси́. Припев: Святы́й священному́чениче Евсéвие, моли́ Бо́га о на́с. Красе́н яви́лся еси́ богоглаго́ланием, и благи́ми дея́нии, Евсе́вие,/ и всечестны́ми страда́ний, блаже́нне, светлостьми́. Припев: Святы́й священному́чениче Евсéвие, моли́ Бо́га о на́с. Соста́вим лик ра́достен, свяще́ннаго восхваля́юще Евсе́вия,/ благоче́стия добро́тою укра́шена. Сла́ва Отцу́ и Сы́ну и Свято́му Ду́ху. Ра́ка твоя́ дае́т благода́ть исцеле́ний,/ свята́я же па́мять твоя́, Евсе́вие, просвеща́ет мир,/ я́ко вели́кое со́лнце. И ны́не и при́сно и во ве́ки веко́в. Ами́нь. Богородичен: Благолюби́вая Де́во, озло́бленную грехми́ ду́шу мою́ ублажи́,/ Я́же Преблага́го Бо́га пло́тию ро́ждшая.

Минея, 11 Февраля, Канон Глас 2 Песнь 1 Ирмос: Во глубине́ постла́ иногда́/ фараони́тское всево́инство преоруже́нная си́ла,/ вопло́щшееся же Сло́во всезло́бный грех потреби́ло есть,/ препросла́вленный Госпо́дь сла́вно бо просла́вися. Припев: Преподо́бне о́тче Дими́трие, моли́ Бо́га о на́с. Тебе́ твоего́ блаже́нне, уче́ния долг принося́ще,/ возда́ния простира́ем, вене́ц похвала́ми плету́ще;/ ты же ми́лостив яви́ся, пребога́те,/ твои́ми мольба́ми благода́ть нам пода́ждь духо́вную. Припев: Преподо́бне о́тче Дими́трие, моли́ Бо́га о на́с. Всегуби́тельное стремле́ние страсте́й, о́тче, увяди́л еси́,/ слове́сным объят Богому́дрием,/ благопребы́тен бо был еси́ и благогла́сен,/ кро́ток же и смире́н,/ сло́вом прему́дрости, Дими́трие, и ра́зума венча́н. Припев: Преподо́бне о́тче Дими́трие, моли́ Бо́га о на́с. Священноукраси́л еси́ себе́, о́тче, ра́зумом и де́тельным виде́нием благода́ти,/ Богоглаго́ливе Дими́трие, жела́я венца́ сла́вы Христо́вы,/ и тво́ю наде́жду изря́дно, преблаже́нне, не погреши́л еси́. Сла́ва Отцу́ и Сы́ну и Свято́му Ду́ху. Целому́дрие удержа́л еси́ я́ве,/ кра́йнюю же кро́тость и высо́кое, Богоно́се, смире́ние,/ и́миже возвыша́ем,/ трудо́в твои́х де́йством и виде́нием, ра́дуяся, принесе́ся,/ вене́ц неувяда́емый прие́м. И ны́не и при́сно и во ве́ки веко́в. Ами́нь. Богородичен: Тва́рей яви́лася еси́, Чи́стая, всех ви́димых и неви́димых превы́шши, Всенепоро́чная:/ Зижди́теля бо родила́ еси́,/ я́коже изво́ли воплоти́тися во утро́бе Твое́й./ Его́же со дерзнове́нием моли́ спасти́ пою́щия Тя. Песнь 3 Ирмос: Ирмо́с: Процвела́ есть пусты́ня, я́ко крин, Господи,/ язы́ческая неплодя́щая це́рковь/ прише́ствием Твои́м,/ в не́йже утверди́ся мое́ се́рдце. Припев: Преподо́бне о́тче Дими́трие, моли́ Бо́га о на́с. Просия́л еси́ в житии́ твое́м, Богоно́се Дими́трие,/ я́коже всесве́тлое со́лнце в ми́ре,/ и просвети́ и́же к тебе́ ве́рою и любо́вию приходя́щия/ и пою́щия тя. Припев: Преподо́бне о́тче Дими́трие, моли́ Бо́га о на́с. Просвеща́ются концы́ уче́нии твои́ми, преподо́бне,/ я́коже бо свети́льник просвети́л еси́, Богоно́се, Це́рковь Христо́ву,/ о Не́йже утверди́ся мое́ се́рдце. Сла́ва Отцу́ и Сы́ну и Свято́му Ду́ху. Непорабоще́ну соблю́л еси́ ду́шу твою́ страстьми́/ и сластьми́ теле́сными, Богоно́се Дими́трие всече́стне,/ те́мже ны́не по достоя́нию восхваля́ем тя. И ны́не и при́сно и во ве́ки веко́в. Ами́нь. Богородичен: Сказу́я иногда́ сокрове́нное та́инство, Отрокови́це, Тебе́ дре́вле Гаврии́л зовя́ше:/ ра́дуйся, Божия пала́то, в то́же всели́ся вся челове́ки обожи́, я́ко Милосе́рд. Седален, глас 3 Исправле́ние жития́ твоего́ всем просвеща́ет стопы́, Дими́трие о́тче,/ вои́стинну ве́рою подо́бящим ти ся;/ те́мже, и́же любо́вию блажа́т тя всегда́,/ спаса́й моли́твами твои́ми от вся́кия тесноты́,/ Христа́ Преблага́го моля́,/ преподо́бне блаже́нне досточу́дне. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Я́ко невозде́ланная, Де́во, Лоза́, красне́йший грозд прозябла́ еси́,/ источа́ющ нам вино́ спасе́ния,/ всех веселя́щее ду́ши же и телеса́./ Те́мже я́ко вину́ Тя до́брых блажа́ще при́сно,/ со А́нгелом вопие́м Ти:/ ра́дуйся, Благода́тная. Песнь 4 Ирмос: Прише́л еси́ от Де́вы не хода́тай, ни А́нгел,/ но Сам, Го́споди, вопло́щься,/ и спасл еси́ всего́ мя, челове́ка./ Тем зову́ Ти: сла́ва си́ле Твое́й, Го́споди. Припев: Преподо́бне о́тче Дими́трие, моли́ Бо́га о на́с. Ты, Дими́трие, и́нокующим бысть вене́ц,/ не ка́мением многоце́нным укра́шен, но доброде́телию обло́жен,/ яви́лся еси́, блаже́нне, Богорадова́нное вои́стинну украше́ние. Припев: Преподо́бне о́тче Дими́трие, моли́ Бо́га о на́с. Боже́ственную, Богому́дре, поче́л еси́ прему́дрость:/ те́мже дарова́нии тя сия́ одари́,/ сла́ву ве́чную тебе́ хода́тайствовавши,/ о́тче Дими́трие всече́стне. Сла́ва Отцу́ и Сы́ну и Свято́му Ду́ху. Све́тлостию нрав твои́х и о́бразы бла́гости,/ преподо́бне Дими́трие, подо́бне пожи́л еси́,/ те́мже присту́пен ты всем бысть,/ всеблаже́нне и пречу́дне. И ны́не и при́сно и во ве́ки веко́в. Ами́нь. Богородичен: Умерщвле́ния плод нам Е́ва принесе́,/ Ты же, Жизнь ро́ждши Ипоста́сную,/ а́бие испра́вила еси́ род наш, Богоневе́сто Пречи́стая. Песнь 5 Ирмос: Хода́тай Бо́гу и челове́ком был еси́, Христе́ Бо́же:/ Тобо́ю бо, Владыко, к Светонача́льнику, Отцу́ Твоему́,/ от но́щи неве́дения/ приведе́ние има́мы. Припев: Преподо́бне о́тче Дими́трие, моли́ Бо́га о на́с. Стремле́ние страсте́й безстра́стием удержа́л еси́,/ Богоно́се Дими́трие,/ виде́нии и дея́нии просвети́л еси́, о́тче, душе́вное устрое́ние. Припев: Преподо́бне о́тче Дими́трие, моли́ Бо́га о на́с. Умо́м чи́стым и писа́нии духо́вными бесе́довал еси́,/ Богоглаго́ливе Дими́трие,/ виде́ния и дея́ния собра́в бога́тство, о́тче преподо́бне. Сла́ва Отцу́ и Сы́ну и Свято́му Ду́ху. Прему́дрости глубину́ испыта́в, Дими́трие,/ дости́гл еси́ обрести́, ели́ко благопотре́бно,/ и би́сер многоце́нный боле́зньми стяжа́л еси́, преблаже́нне, ра́зума. И ны́не и при́сно и во ве́ки веко́в. Ами́нь. Богородичен: Се во чре́ве, Богоро́дице Пречиста́я, Христа́ Бо́га па́че сло́ва име́ла еси́,/ я́коже Иса́ия провозгласи́,/ и вы́ше естества́ Сего́, Богороди́тельнице, родила́ еси́. Песнь 6 Ирмос: В бе́здне грехо́вней валя́яся,/ неизсле́дную милосе́рдия Твоего́ призыва́ю бе́здну:/ от тли, Бо́же, мя возведи́. Припев: Преподо́бне о́тче Дими́трие, моли́ Бо́га о на́с. Вселе́нней свети́ло пресве́тлое, о́тче, яви́лся еси́, Дими́трие,/ слове́с све́тлостию просвеща́я/ ве́рою и любовию к тебе́ притека́ющия. Припев: Преподо́бне о́тче Дими́трие, моли́ Бо́га о на́с. Блаже́нное житие́ проше́л еси́,/ назда́в у́бо чу́вства, вне был еси́ мирска́го мятежа́/ и Бо́гу прибли́жился еси́, Дими́трие. Сла́ва Отцу́ и Сы́ну и Свято́му Ду́ху. Я́ко добр, я́ко красе́н вене́ц,/ и́мже ны́не венча́лся еси́, прему́дре Дими́трие,/ доброде́тельми венча́ем,/ и над страстьми́ ца́рствовал преизря́дне. И ны́не и при́сно и во ве́ки веко́в. Ами́нь. Богородичен: Вы́ше естества́ родила́ еси́, Де́во, и ве́чнуеши Де́ва,/ я́вльши и́стиннаго Божества́ Сы́на и Бо́га Твоего́ о́бразы. Кондак, глас 8 От ю́ности, преподо́бне, крест твой взем, Христу́ после́довал еси́,/ в моли́твах и поще́ниих, во бде́ниих же и злострада́ниих плоть твою́ изнуря́я;/ те́мже и Всеви́дящее О́ко, твоя́ труды́ ви́дев,/ чудесы́ тя прославля́ет и всех зва́ти тебе́ науча́ет:/ ра́дуйся, преподо́бне о́тче Дими́трие, по́стников удобре́ние. Икос Боже́ственными доброде́тельми твои́ми себе́, му́дре, украси́л еси́,/ Спа́су Христу́ жили́ще со́делав, о́тче, му́жественне:/ я́коже зла́то, искуси́лся еси́ ве́рою к Бо́гу и, наде́ждею и любо́вию обе́ты полага́я,/ воздержа́нием пости́вся, я́ко безпло́тен,/ в целому́дрии и во смире́нии возне́слся еси́./ Те́мже и мы, моли́твами твои́ми просве́щшеся,/ преподо́бне Дими́трие, вопие́м ти:/ ра́дуйся, я́ко из млада́ Бо́гу послужи́л еси́;/ ра́дуйся, притека́ющим к тебе́ спасе́ния хода́таю;/ ра́дуйся, христоимени́тым лю́дем похвала́ и утвержде́ние;/ ра́дуйся, я́ко твои́ми моли́твами сопроти́внии побежда́ются;/ ра́дуйся, я́ко всем прося́щим дае́ши дар, от Господа дарова́нный ти, исцеле́ний;/ ра́дуйся, я́ко и чудесы́ тя Бог прославля́ет и всех зва́ти тебе́ науча́ет;/ ра́дуйся, преподо́бне о́тче Дими́трие, по́стников удобре́ние. Песнь 7 Ирмос: Богопроти́вное веле́ние беззако́ннующаго мучи́теля/ высо́к пла́мень вознесло́ есть;/ Христо́с же простре́ Богочести́вым отроко́м ро́су духо́вную,/ Сын благослове́н и препросла́влен. Припев: Преподо́бне о́тче Дими́трие, моли́ Бо́га о на́с. Благоуха́ют, преподо́бне, твои́х уче́ний словеса́, благода́тию Ду́ха сия́юще,/ Божество́ бо Еди́но чтый в Тре́х Ли́цех, Сло́ва же воплоще́ние поя́,/ благоуха́еши нас, пребога́те. Припев: Преподо́бне о́тче Дими́трие, моли́ Бо́га о на́с. Ума́ чистото́ю и по́мысла, Богоразу́мия све́тлостию житие́ преше́л еси́,/ чистото́ю же телесе́ и де́вства сия́нием/ изря́дно возложе́ние я́влься Всеви́дцу и Вседержи́телю. Сла́ва Отцу́ и Сы́ну и Свято́му Ду́ху. Сло́во твое́, со́лию раство́рено, и житие́ твое́, благода́тию, преблаже́нне, сия́я, яви́ся, пречу́дне;/ те́мже в вы́шния оби́тели, ра́дуяся, всели́лся еси́,/ Христу́ со дерзнове́нием ны́не предстоя́. И ны́не и при́сно и во ве́ки веко́в. Ами́нь. Богородичен: Управля́ющи, Пречи́стая, мое́ житие́, к Твоему́ всети́хому приста́нищу напра́ви,/ Бо́га ро́ждши, благи́х исто́чника,/ всем подаю́ща ве́рным нетле́ния благода́ти. Песнь 8 Ирмос: Пещь иногда́ о́гненная в Вавило́не де́йства разделя́ше,/ Бо́жиим веле́нием халде́и опаля́ющая,/ ве́рныя же ороша́ющая, пою́щия:/ благослови́те, вся дела́ Госпо́дня, Го́спода. Припев: Преподо́бне о́тче Дими́трие, моли́ Бо́га о на́с. Вене́ц благоле́пен Христо́с Живода́вец на верх твой положи́, тезоимени́те Дими́трие,/ и́бо дея́ньми просия́л еси́ и виде́нии яви́лся еси́, зовы́й:/ благослови́те, вся дела́ Госпо́дня, Го́спода. Припев: Преподо́бне о́тче Дими́трие, моли́ Бо́га о на́с. Все преше́д чу́вство, преблаже́нне,/ уму́ пе́рвому прибли́жился еси́/ души́ твоея́ чистото́ю, жития́ же све́тлостию,/ венцено́сче Дими́трие, зовы́й:/ благослови́те, вся дела́ Госпо́дня, Го́спода. Сла́ва Отцу́ и Сы́ну и Свято́му Ду́ху. Жела́нием зе́льным, преблаже́нне,/ изсле́дил еси́ Богоно́снаго Се́ргия вели́каго житие́ Божественно́е,/ жи́зни све́тлостию поревнова́л еси́, прехва́льне,/ быв у́бо и собесе́дник сего́ изря́ден вои́стинну. И ны́не и при́сно и во ве́ки веко́в. Ами́нь. Богородичен: Ум безстра́стен во утро́бе Твое́й соединя́ется челове́ческому уму́, Пречи́стая,/ пло́ти же дебельство́м под ле́том быв лет превы́шший./ Тем Тя, Богоро́дице, ве́рою и любо́вию сла́вим. Песнь 9 Ирмос: Безнача́льна Роди́теля Сын, Бог и Господь,/ вопло́щься от Де́вы, нам яви́ся/ омраче́нная просвети́ти, собра́ти расточе́нная./ Тем Всепе́тую Богоро́дицу велича́ем. Припев: Преподо́бне о́тче Дими́трие, моли́ Бо́га о на́с. Пречестны́й Дими́трие,/ ны́не чи́сто услажда́яся и пи́щу прие́мля па́че у́мныя,/ иде́же собо́ри святы́х о́крест Го́спода лику́ют, блаже́нне,/ и́же тя ны́не чту́щия, хода́тайствуя, к себе́ привлецы́. Припев: Преподо́бне о́тче Дими́трие, моли́ Бо́га о на́с. Преше́л еси́, ра́дуяся, жела́нием в рай,/ к еди́ному вои́стинну блаже́нству, к пребо́льшей добро́те,/ и к жи́зни вои́стинну нестаре́ющейся, и Све́ту Невече́рнему,/ Богоно́сне о́тче Дими́трие. Сла́ва Отцу́ и Сы́ну и Свято́му Ду́ху. Я́ко Со́лнце просия́л еси́ в мона́шеских собо́рех,/ от млады́х ногте́й освяще́н был еси́,/ я́коже зарю́, испуща́я доброде́тели твоего́ жития́,/ пресла́дкий Дими́трие, Богоно́се о́тче преподо́бне. И ны́не и при́сно и во ве́ки веко́в. Ами́нь. Богородичен: Разуме́вше издале́ча прозорли́выма очи́ма, проро́цы/ Тя я́ве провозвести́ша, хотя́щую Ма́терь бы́ти Вседе́телю, Владыце всех,/ тем Тя, Всепе́тая, Богоро́дицу испове́дуем. Светилен Мирска́го пристра́стия я́ко от скве́рны уклони́лся еси́,/ и а́лчбою плоть увяди́л еси́, о́тче,/ и Небе́сною сла́вою со А́нгелы обогати́лся еси́./ Те́мже непреста́нно моли́ о нас Христа́ Бо́га, преподо́бне Дими́трие. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Тя предста́тельницу и́мамы вси гре́шнии,/ о Пресвята́я Де́во!/ Ты благопреме́нна сотвори́ Сына Твоего́ Ма́терними Твои́ми моли́твами.