Молитвы

Яко безплотен, отче, пожил еси на земли,/ смирением и в яме пребыванием с молитвами превозносящегося врага смирил еси,/ яко крин, воистинну процвел еси,/ избранный кинамон, и высокий кипарис,/ и плодовитая маслина, и финике сладкий,/ и кедр благоуханный, и валсам чистый,/ терние злострастия искоренил еси/ и жилище Всесвятаго Духа был еси,/ темже поминай память твою днесь празднующих, Никодиме чудотворче,/ да вси радостными гласы воспеваем Христа Бога нашего,/ Иже тебе даровавшаго исцелений благодать.

Явистеся светильницы всесветлии, во плоти ангели,/ яко Живота древо райское,/ пощением, и бдением, и верою возращаеми, процвели есте./ Молитвами своими Небесную благодать приемше,/ врачеве же крепцыи явльшеся,/ исцеляете недужныя и души с верою прибегающих к раце мощей ваших,/ чудотворцы славнии, Иоанне и Лонгине,/ сего ради вси верою и любовию вопием:/ радуйтеся, поморстей стране похвало и утверждение.

Минея, 11 Апреля, Кано́н преподо́бному Глас 8 Песнь 1 Ирмос: Пои́м Го́сподеви,/ прове́дшему лю́ди Своя́ сквозе́ Чермно́е море,/ я́ко Еди́н сла́вно просла́вися. Припев: Преподо́бне о́тче Иáкове, моли́ Бо́га о на́с. Я́ко Безпло́тен, блаже́нне Иа́кове, на земли́ поживе́/ и ны́не с ли́ки преподо́бных сочета́лся еси́,/ с ни́миже ра́дуяся, нас, чту́щих тя, помина́й, приснопа́мятне. Припев: Преподо́бне о́тче Иáкове, моли́ Бо́га о на́с. Греха́ми мно́гими помраче́нное мое́ се́рдце просвети́, блаже́нне Иа́кове,/ те́плыми моли́твами твои́ми. Сла́ва Отцу́ и Сы́ну и Свято́му Ду́ху. Умо́м очище́нным Бо́гови порабо́тился еси́,/ целому́дрием теле́сным и чистото́ю/ ду́шу и те́ло свое́ просвети́л еси́, блаже́нне Иа́кове. И ны́не и при́сно и во ве́ки веко́в. Ами́нь. Богородичен: Прему́дрость и Сло́во О́тчее несказа́нно ро́ждшая,/ души́ моея́ лю́тую исцели́ я́зву/ и серде́чную укроти́ боле́знь. Песнь 3 Ирмос: Ты еси́ утвержде́ние/ притека́ющих к Тебе́, Го́споди,/ Ты еси́ Свет омраче́нных,/ и пое́т Тя дух мой. Припев: Преподо́бне о́тче Иáкове, моли́ Бо́га о на́с. Ду́хом разжже́н быв, Иа́кове о́тче, труды́ подъя́л еси́,/ возвы́сився смире́нием, горды́ню бесо́вскую смири́л еси́, преподо́бне,/ сла́ва и́ноком и утвержде́ние. Припев: Преподо́бне о́тче Иáкове, моли́ Бо́га о на́с. По у́зкому пути́ ходи́л еси́ в житии́ свое́м,/ простра́ннаго пути́ удаля́яся, о́тче,/ неви́димаго зми́я посрами́л еси́, смире́нием огражда́яся. Сла́ва Отцу́ и Сы́ну и Свято́му Ду́ху. Моле́бный глас мой услы́ши, о́тче Иа́кове преблаже́нне,/ не забу́ди раба́ твоего́,/ воспева́ющаго честны́я твоя́ по́двиги. И ны́не и при́сно и во ве́ки веко́в. Ами́нь. Богородичен: Уста́ви неуста́вное се́рдце мое́, Чи́стая Ма́ти Бо́жия,/ Сы́ну Твоему́ моля́щися при́сно о рабе́ Твое́м. Седален, глас 8 Ра́зума тве́рдостию украша́яся, плотски́я тя́гости отве́рг,/ зми́еву горды́ню попра́л еси́/ и, оби́тель быв избра́нная Свято́му Ду́ху,/ неукло́нным ра́зумом порабо́тился еси́ Христу́, всеблаже́нне Иа́кове./ Того́ моли́ грехо́в оставле́ние дарова́ти/ чту́щим любо́вию святу́ю па́мять твою́. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Я́ко еди́ну в жена́х Де́ву Тя обре́тше, без се́мени ро́ждшую Бо́га пло́тию,/ вся блажи́м Тя, ро́ди челове́честии:/ Сло́во бо всели́ся в Тя Боже́ственное,/ Его́же, я́ко Младе́нца, пита́ла еси́, Зижди́теля и Го́спода;/ те́мже А́нгельский собо́р и челове́ческий род досто́йно сла́вим пречи́стое рождество́ Твое́,/ и мы вси согла́сно вопие́м Ти:/ моли́ Христа́ Бо́га согреше́нием на́шим оставле́ние дарова́ти восхваля́ющим Тя. Песнь 4 Ирмос: Всел еси́ на ко́ни, апо́столы Твоя́, Го́споди,/ и прия́л еси́ рука́ма Твои́ма узды́ их,/ и спасе́ние бысть ежде́ние Твое́/ ве́рно пою́щим:/ сла́ва си́ле Твое́й, Го́споди. Припев: Преподо́бне о́тче Иáкове, моли́ Бо́га о на́с. Ходи́л еси́ в путя́х пра́вых,/ и, та́ко неукло́нно ше́ствуя, дости́гл еси́, блаже́нне, широты́ ра́йския,/ и А́нгельским лико́м сочета́лся еси́. Припев: Преподо́бне о́тче Иáкове, моли́ Бо́га о на́с. В пусты́ню жела́нием, преподо́бне, всели́вся,/ подвиза́лся еси́ кре́пкими по́двиги, поще́нием/ и моли́твами день и нощь ко Го́споду,/ научи́ ны вопи́ти:/ сла́ва си́ле Твое́й, Го́споди. Сла́ва Отцу́ и Сы́ну и Свято́му Ду́ху. Храм Бо́гови боголе́пен воздви́гл еси́/ и той во и́мя рождества́ Предте́чи именова́л еси́,/ в не́мже сла́вится при́сно честно́е и́мя твое́, Иа́кове преподо́бне. И ны́не и при́сно и во ве́ки веко́в. Ами́нь. Богородичен: Ра́дуйся, Влады́чице Де́во,/ це́рквам еси́ красо́та и ве́рным похвала́ и держа́ва,/ непреста́нно моли́ся, Богоро́дице, Сы́ну Своему́/ сохрани́ти правосла́вныя лю́ди от вся́каго зла́го обстоя́ния. Песнь 5 Ирмос: Просвети́ нас повеле́нии Твои́ми, Го́споди,/ и мы́шцею Твое́ю высо́кою/ Твой мир пода́ждь нам,/ Человеколю́бче. Припев: Преподо́бне о́тче Иáкове, моли́ Бо́га о на́с. Просвеща́я ум свой Боже́ственными словесы́,/ теле́сных страсте́й устрани́лся еси́/ и, превы́ше быв земны́х,/ соблю́л еси́ о́браз в себе́ Боже́ственный не омраче́н. Припев: Преподо́бне о́тче Иáкове, моли́ Бо́га о на́с. Не забу́ди, блаже́нне Иа́кове, посеща́ти чад твои́х,/ соверша́ющих свяще́нную па́мять твою́,/ я́ко да твои́ми моли́твами изба́вимся вся́кия ну́жды и печа́ли. Сла́ва Отцу́ и Сы́ну и Свято́му Ду́ху. Нощь грехо́вная покры́ла мя есть,/ но озари́ мя покая́нием, преподо́бне,/ да омы́ю скве́рну грехо́вную окая́нныя моея́ души́. И ны́не и при́сно и во ве́ки веко́в. Ами́нь. Богородичен: Всесве́тлым озарена́ еси́ све́том, Богора́дованная Ма́ти:/ Ты бо честне́йши родила́ еси́ Христа́ всех Бо́га,/ Его́же моли́, да изба́вит ны от вся́ких напа́стей. Песнь 6 Ирмос: Ри́зу мне пода́ждь све́тлу,/ одея́йся све́том, я́ко ри́зою,/ Многоми́лостиве Христе́ Бо́же наш. Припев: Преподо́бне о́тче Иáкове, моли́ Бо́га о на́с. Ма́слина вои́стинну Бо́жия плодови́та быв труды́ твои́ми,/ моли́ся, Иа́кове преподо́бне,/ за ве́рно на по́мощь призыва́ющих тя. Припев: Преподо́бне о́тче Иáкове, моли́ Бо́га о на́с. Земны́й А́нгел и Небе́сный челове́к был еси́, преподо́бне,/ и учи́тель умиле́ния, ми́лования струя́, и исто́чник чудесе́м. Сла́ва Отцу́ и Сы́ну и Свято́му Ду́ху. Сле́зными пото́ки и тру́дными по́ты у́глия сла́дости грехо́вныя погаси́л еси́./ Те́мже в чудесе́х сла́вна тя показа́ Госпо́дь, Иа́кове блаже́нне,/ и украси́ вы́шними дарова́нии. И ны́не и при́сно и во ве́ки веко́в. Ами́нь. Богородичен: Умертви́ся смерть Тобо́ю/ и а́дово жа́ло притупи́ся, Ма́ти Чи́стая:/ Ты бо Безсме́ртнаго Влады́ку Христа́ пло́тию ми́рови родила́ еси́. Кондак, глас 8 Серде́чная о́чи, досточу́дне, ко Го́споду впери́в/ и теле́сныя стра́сти из ко́рене исторга́я,/ неболе́зненную жизнь в боле́знех восприя́л еси́, преподо́бне,/ боле́знем же лю́тым дае́ши исцеле́ние прося́щим с ве́рою у тебе́,/ те́мже мо́лим тя, досточу́дне,/ исцели́ на́ша боле́зни душе́вныя и теле́сныя, да зове́м ти:/ ра́дуйся, Иа́кове Богому́дре, о́тче наш. Икос Покая́ния две́ри отве́рзи ми, всеблаже́нне,/ да омы́ю скве́рну окая́нныя моея́ души́/ и те́ла моего́ вся чу́вства очи́сти, да зову́ ти благода́рственная:/ ра́дуйся, по́стником вои́стинну преди́вное удобре́ние;/ ра́дуйся, исто́чниче пресла́дкий, напая́ющий ве́рных сердца́ уче́ньми./ Ра́дуйся, нощь на́шего неразу́мия отгна́вый смиренному́дрием;/ ра́дуйся, прелюби́мая весно́, израсти́вшая нам нелицеме́рную любо́вь./ Ра́дуйся, прекра́сный кри́не, любвеоби́льным взо́ром ко Господу влеки́й;/ ра́дуйся, чудесы́ свои́ми мно́гих удивля́яй./ Ра́дуйся, возжеле́нная соверши́вый;/ ра́дуйся, ве́рным по Бо́зе кре́пкая наде́ждо./ Ра́дуйся, се́рдцем свои́м прилепля́яйся ко Христу́ день и нощь;/ ра́дуйся, оби́тели своея́ храни́телю./ Ра́дуйся, па́стырю и нача́льниче слове́сных ове́ц./ Ра́дуйся, Иа́кове Богому́дре о́тче наш. Песнь 7 Ирмос: А́нгелом о́троки из огня́ спасы́й/ и гремя́щую пещь преложи́вый на ро́су,/ благослове́н еси́, Бо́же оте́ц на́ших. Припев: Преподо́бне о́тче Иáкове, моли́ Бо́га о на́с. А́нгельским житие́м, блаже́нне Иа́кове, пожи́л еси́,/ труды́ подвиго́в твои́х умно́жил еси́/ и процве́л еси́, я́ко фи́никс, воспева́я:/ благослове́н еси́, Го́споди, Бо́же оте́ц на́ших. Припев: Преподо́бне о́тче Иáкове, моли́ Бо́га о на́с. Восхваля́я тя, о́тче Иа́кове преподо́бне, взыва́ем ти:/ моли́ Христа́ Бо́га лука́вства диа́воля изба́вити нас, воспева́ющих:/ благослове́н еси́, Го́споди, Бо́же оте́ц на́ших. Сла́ва Отцу́ и Сы́ну и Свято́му Ду́ху. В путе́х жития́ заблу́ждшаго и зимо́ю грехо́вною олядене́вшаго,/ согре́й мя, Иа́кове преподо́бне, и научи́ вопи́ти:/ благослове́н еси́, Бо́же оте́ц на́ших. И ны́не и при́сно и во ве́ки веко́в. Ами́нь. Богородичен: Прия́ла еси́ вои́стинну Боже́ственное Сло́во во чре́во Свое́/ и Сие́ па́че естества́, Пречи́стая, родила́ еси́./ Его́же моли́ изба́вити от бед раб Твои́х, вопию́щих:/ благослове́н Бог оте́ц на́ших. Песнь 8 Ирмос: От Отца́ пре́жде век Рожде́ннаго/ и от Ма́тере в после́дняя Воплоще́ннаго,/ свяще́нницы, благослови́те,/ лю́дие, превозноси́те во вся ве́ки. Припев: Преподо́бне о́тче Иáкове, моли́ Бо́га о на́с. И́нок и́стинен был еси́,/ простра́ннаго пути́ удаля́яся, широты́ ра́йския дости́гл еси́/ и та́мо дре́ву живо́тному причаща́ешися во ве́ки. Припев: Преподо́бне о́тче Иáкове, моли́ Бо́га о на́с. Дом духо́вный доброде́тели был еси́,/ и правоты́ пра́вило испра́вил еси́, Иа́кове пречу́дне,/ и бу́дущих благ сподо́бился,/ дре́ву живо́тному причаща́ешися во ве́ки. Сла́ва Отцу́ и Сы́ну и Свято́му Ду́ху. Лико́м преподо́бных сочета́лся еси́,/ и по́стническим житие́м украси́лся еси́, Иа́кове преподо́бне,/ и ны́не в ра́йских оби́телех дре́ву живо́тному причаща́ешися во ве́ки. И ны́не и при́сно и во ве́ки веко́в. Ами́нь. Богородичен: В ле́тех бы́вша, от Отца́ же безле́тно возсия́вшаго,/ Богома́ти, нам родила́ еси́./ Его́же моли́ спасти́ пою́щия Тя во ве́ки. Песнь 9 Ирмос: Чи́стую сла́вно почти́м, лю́дие, Богоро́дицу,/ огнь Божества́ прии́мшую во чре́ве неопа́льно,/ пе́сньми велича́ем. Припев: Преподо́бне о́тче Иáкове, моли́ Бо́га о на́с. Чи́стое и кра́сное храни́лище доброде́телей был еси́, Иа́кове блаже́нне,/ те́мже тя непреста́нно велича́ем. Припев: Преподо́бне о́тче Иáкове, моли́ Бо́га о на́с. От се́рдца боле́знь, от о́чию сле́зы,/ от души́ покая́ние приими́, преподо́бне,/ и ко Го́споду те́пле принеси́,/ я́ко да непреста́нно тя велича́ем. Сла́ва Отцу́ и Сы́ну и Свято́му Ду́ху. Всече́стне о́тче Иа́кове,/ сохрани́ певца́ своего́ неви́димою си́лою от находя́щих бед и скорбе́й,/ изба́ви же и всех, почита́ющих свяще́нную па́мять твою́,/ и наста́ви на путь покая́ния,/ я́ко да получи́м у Го́спода ве́лию ми́лость/ и тя непреста́нно велича́ем. И ны́не и при́сно и во ве́ки веко́в. Ами́нь. Богородичен: А́нгели и Арха́нгели, проро́цы и апо́столи/ и весь лик преподо́бных с блаже́нным Иа́ковом/ ко Христу́ приле́жно и с Пречи́стою Его Ма́терию, за весь мир моли́теся,/ да вас при́сно велича́ем. Светилен Дух Святы́й тя, преподо́бне Иа́кове, оби́тель Себе́ сотвори́,/ и, на тебе́ почива́яй, насле́дника тя Ца́рствию учини́ Небе́сному/ и ли́ку преподо́бническому причте́,/ и по успе́нии твое́м сла́вна тя показа́, преподо́бне,/ моли́ся о спасе́нии душ на́ших. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Еди́н Чи́стый, Еди́н Госпо́дь, Тя еди́ну избра́,/ честне́йшу всея́ тва́ри, Пренепоро́чная,/ от чи́стых крове́й Твои́х воплоти́тися.

Минея, 8 Января, Канон Глас 2 Песнь 1 Ирмос: Во глубине́ постла́ иногда́ фараони́тское всево́инство преоруже́нная си́ла, вопло́щшееся же Сло́во всезло́бный гре́х потреби́ло е́сть, препросла́вленный Госпо́дь, сла́вно бо просла́вися. Припев: Преподо́бная ма́ти Домни́ко, моли́ Бо́га о на́с. Боже́ственным жела́нием ду́шу, сла́вная, впери́вши, плотска́я ловле́ния прелете́ла еси́. Те́мже молю́ тя́: уловле́на мя́ сетьми́ змии́ными твои́ми моли́твами, всему́драя Домни́ко, изба́ви. Припев: Преподо́бная ма́ти Домни́ко, моли́ Бо́га о на́с. После́довала еси́, ра́дующися, Христу́, в сле́д Сего́ ходи́вши свяще́ннаго законоположе́ния, всечестна́я, и де́в чино́м сочи́слилася еси́, я́ко де́ва и непоро́чная. Те́мже тя́ почита́ем, ве́рою соше́дшеся, досточу́дная. Сла́ва Отцу́ и Сы́ну и Свято́му Ду́ху. Дрема́нием зло́бы ника́коже, сла́вная, воздрема́вшися побде́ла еси́ светоза́рными дея́ньми и к Све́ту невече́рнему отшла́ еси́, отону́дными светлостьми́ облия́на, и просвеща́еши пою́щия тя́. И ны́не и при́сно и во ве́ки веко́в. Ами́нь. Богородичен: И пре́жде рождества́ нетле́нна, Чи́стая, и по рождестве́, Ма́ти Бо́жия, преесте́ственно пребыла́ еси́. Те́мже, Тя́ пожела́вши, Боже́ственным Ду́хом Домни́ка в сле́д Тебе́ нетле́нна приведе́ся, Всецарю́, Сы́ну Твоему́, Чи́стая. Песнь 3 Ирмос: Процвела́ е́сть пусты́ня я́ко кри́н Го́споди, язы́ческая неплодя́щая це́рковь, прише́ствием Твои́м, в не́йже утверди́ся мое́ се́рдце. Припев: Преподо́бная ма́ти Домни́ко, моли́ Бо́га о на́с. Пла́ватели, в мо́ри обурева́емыя, спасла́ еси́, еле́й со благослове́нием пусти́вши в мо́ре и преложи́вши в тишину́, Домни́ко, обурева́ние. Припев: Преподо́бная ма́ти Домни́ко, моли́ Бо́га о на́с. Невеще́ственными сия́ющую тя́ луча́ми а́нгел светови́ден возвести́ иера́рху, прише́дшую к Ца́рскому гра́ду Боже́ственным манове́нием. Сла́ва Отцу́ и Сы́ну и Свято́му Ду́ху. Ве́трилом окриле́на воздержа́ния, дости́гла еси́ в безстра́стия, сла́вная, приста́нища. Приста́нище же была́ еси́ во глубина́х зло́бы попо́лзшимся. И ны́не и при́сно и во ве́ки веко́в. Ами́нь. Богородичен: Укрепи́, Де́во, не́мощь мою́, си́лу, Вы́шняго ро́ждшая, е́же бы́ти все́м, подаю́щую и Домни́ки па́мять возвели́чившую. Седален, глас 4 Пло́ть распя́ла еси́ со страстьми́ и все́ любле́ние ко Христу́ име́ла еси́, Домни́ко, Жениху́ твоему́ нетле́нному. Сего́ ра́ди прия́ла еси́ вене́ц и а́нгельским лико́м сочи́слилася еси́, преподо́бная, моля́щися Тому́ приле́жно о чту́щих тя́. Песнь 4 Ирмос: Прише́л еси́ от Де́вы не хода́тай, ни а́нгел, но Са́м Го́споди вопло́щся, и спа́сл еси́ всего́ мя́ челове́ка; те́м зову́ ти́: сла́ва си́ле Твое́й, Го́споди. Припев: Преподо́бная ма́ти Домни́ко, моли́ Бо́га о на́с. Облиста́ла еси́ просвеще́ние врачева́ний, отгоня́щи страсте́й омраче́ние и де́монов полки́, вся́ же просвети́ла еси́, благоче́стно к тебе́, Домни́ко, приходя́щия. Припев: Преподо́бная ма́ти Домни́ко, моли́ Бо́га о на́с. Жени́х тя́, Ца́рь Небе́сный, сла́вная, прославля́ет пред ца́рствующим на земли́, удивля́ющимся твоему́ нескве́рному житию́ и чудесе́м. Сла́ва Отцу́ и Сы́ну и Свято́му Ду́ху. Услы́шатель моли́тв твои́х сы́й, Госпо́дь, я́ве прозна́менует твое́ ме́сто, в не́мже учи́лище воздви́гла еси́, ду́хи лука́вствия, Домни́ко, отгна́вши. И ны́не и при́сно и во ве́ки веко́в. Ами́нь. Богородичен: Умерщвле́ния ри́з Ада́м совлече́ся Боже́ственным Рождество́м Твои́м и во оде́жду облече́ся, Еди́но, ю́же истка́ во утро́бе Твое́й, Сло́во воплоща́емо. Песнь 5 Ирмос: Све́та Пода́телю и веко́в Тво́рче, Го́споди, во све́те Твои́х повеле́ний наста́ви на́с: ра́зве бо Тебе́, ино́го Бо́га не зна́ем. Припев: Преподо́бная ма́ти Домни́ко, моли́ Бо́га о на́с. Зе́млю возде́лавши и ра́лом моли́тв секу́щи душе́вную бразду́ многопло́дну, пожа́ла еси́ пло́д в Боже́ственных жи́тницах, чи́стая, соблюда́емь. Припев: Преподо́бная ма́ти Домни́ко, моли́ Бо́га о на́с. Просвеща́ющи чи́стый тво́й по́мысл, сия́ние Вседе́тельнаго Ду́ха показу́ет да́льная, я́ко бли́з, и бу́дущих предглаго́лет сбытие́. Сла́ва Отцу́ и Сы́ну и Свято́му Ду́ху. Си́ла Ду́ха священнодействи́теля тя́ сотворя́ет ма́стию богоде́тельною служе́ния, па́ствити свяще́нныя ду́ши повелева́я, Домни́ко богому́драя. И ны́не и при́сно и во ве́ки веко́в. Ами́нь. Богородичен: Свята́го Го́спода, Господороди́тельнице, все́х родила́ еси́, Его́же от души́ Домни́ка жела́ющи, страстьми́ тлетво́рными облада́вши, Де́во, пою́щи Тя́. Песнь 6 Ирмос: В бе́здне грехо́вней валя́яся, неизсле́дную милосе́рдия Твоего́ призыва́ю бе́здну: от тли́, Бо́же мя́ возведи́. Припев: Преподо́бная ма́ти Домни́ко, моли́ Бо́га о на́с. Свяще́нное проро́чество воздви́гла еси́ Боже́ственнаго Заха́рии, проро́ка богому́драго, с ни́мже во хра́ме святе́м лику́еши, Домни́ко богому́драя. Припев: Преподо́бная ма́ти Домни́ко, моли́ Бо́га о на́с. Струя́ яви́лася еси́ исцеле́ний оби́льна, отмыва́ющи пла́мень страсте́й и источа́ющи свяще́ние спаси́тельное, господоиме́нная де́во всехва́льная. Сла́ва Отцу́ и Сы́ну и Свято́му Ду́ху. Я́ко добру́, я́ко красну́, я́ко че́стну, я́ко де́вства заря́ми сия́ющую, тя́ Жени́х Госпо́дь Себе́ совво́дит, сла́вная. И ны́не и при́сно и во ве́ки веко́в. Ами́нь. Богородичен: Мене́ ра́ди по мне́ бы́сть Младе́нец Всесоверше́нный, обновля́я мя́, обветша́вшаго страстьми́, Тебе́ ра́ди, Всесвята́я Богоневе́сто. Кондак, глас 2 Чистотою душевною божественно вооружився, / и непрестанные молитвы, яко копие, вручив крепко, / пробола еси бесовская ополчения, / Домнико, мати наша, / моли непрестанно о всех нас. Песнь 7 Ирмос: Богопроти́вное веле́ние беззако́ннующаго мучи́теля высо́к пла́мень вознесло́ е́сть: Христо́с же простре́ Богочести́вым отроко́м ро́су духо́вную, Сы́й Благослове́н и Препросла́влен. Припев: Преподо́бная ма́ти Домни́ко, моли́ Бо́га о на́с. У́м тво́й, воззре́ньми су́щими к Бо́гу обожа́емь всегда́, богови́ден бы́сть. Отсю́ду уклони́лася еси́ ми́лования плотска́го, пою́щи, богому́драя: Сы́й благослове́н и препросла́влен. Припев: Преподо́бная ма́ти Домни́ко, моли́ Бо́га о на́с. Та́инства Боже́ственная тебе́ открыва́ет Бо́г Пресу́щный, в тебе́ почива́яй: ви́дела бо еси́ прише́дша свята́го а́нгела и освяти́вша, честна́я, во́д естество́ Ду́хом. Сла́ва Отцу́ и Сы́ну и Свято́му Ду́ху. Хра́м Боже́ственнаго Ду́ха бы́вши, во хра́ме святе́м су́щи, услы́шала еси́ гла́с, уча́щий тя́ Боже́ственным та́йнам, и е́же от телесе́, честна́я, отше́ствие ца́рствующаго. И ны́не и при́сно и во ве́ки веко́в. Ами́нь. Богородичен: Кре́пость моя́, и пе́ние, и спасе́ние е́сть Госпо́дь, И́же Тя́, Ма́терь Всечи́сту и Неве́сту неневе́стну предызбра́в. Его́же о рабе́х Твои́х при́сно не преста́й моли́ти, Чи́стая. Песнь 8 Ирмос: В пе́щь о́гненную ко отроко́м евре́йским снизше́дшаго и пла́мень в ро́су прело́жшаго Бо́га, по́йте дела́ я́ко Го́спода, и превозноси́те во вся́ ве́ки. Припев: Преподо́бная ма́ти Домни́ко, моли́ Бо́га о на́с. Укра́шена доброде́тельми и чуде́с ря́снами упещре́на, к кра́сному черто́гу Царя́ Христа́, Домни́ко, востекла́ еси́, пою́щи и превознося́щи Его́ во ве́ки. Припев: Преподо́бная ма́ти Домни́ко, моли́ Бо́га о на́с. После́довавши Христу́, я́ко Па́стырю чи́сту, а́гнице свята́я, к небе́сней огра́де, в не́йже назнамена́нных ове́ц соводворе́ние е́сть, с ра́достию всели́лася еси́, преподо́бная. Сла́ва Отцу́ и Сы́ну и Свято́му Ду́ху. Манове́нием Бо́га вседе́тельным отложе́ние уве́девши твоего́ телесе́, ра́достну хвалу́ чисте́йшею душе́ю все́х вино́вному приноси́ла еси́, Ему́же тво́й, чи́стая, в ру́ки преложи́ла еси́ ду́х. И ны́не и при́сно и во ве́ки веко́в. Ами́нь. Богородичен: Пресу́щественный Бо́г существу́ется на́с ра́ди от Твои́х крове́й, истле́вшее существо́ обнови́ти хотя́ за милосе́рдие, Де́во, и ми́лость, препросла́вленный во вся́ ве́ки. Песнь 9 Ирмос: От Бо́га Бо́га Сло́ва, неизрече́нною му́дростию прише́дшаго обнови́ти Ада́ма, я́дию в тле́ние па́дшаго лю́те, от Святы́я Де́вы неизрече́нно воплоти́вшагося на́с ра́ди, ве́рнии, единому́дренно пе́сньми велича́ем. Припев: Преподо́бная ма́ти Домни́ко, моли́ Бо́га о на́с. Свяще́ннейшии ли́цы, в честне́м твое́м успе́нии начина́юще, Боже́ственней твое́й души́, зря́щим яви́шася свяще́нными песнопе́нии, в ме́сто, путеводя́ще тя́ селе́ния чу́днаго, иде́же шу́м пра́зднующих, сла́вная. Припев: Преподо́бная ма́ти Домни́ко, моли́ Бо́га о на́с. Я́ко лозы́ Боже́ственныя благора́сленнейшая розга́ я́вльшися, умиле́ния на́м Боже́ственныя израсти́ла еси́ гро́зды, источа́ющия вино́ исцеле́ний, Домни́ко, и ду́ши, и сердца́ ве́рно чту́щих тя́ веселя́щее. Припев: Преподо́бная ма́ти Домни́ко, моли́ Бо́га о на́с. Теле́сных страсте́й, и душе́вных скве́рн, и вся́каго вра́жия наве́та изба́ви ны́ моли́твами твои́ми, к покро́ву твоему́ любо́вию прибега́ющия, Домни́ко, и тво́й пра́здник соверша́ющия, боже́ственный и честны́й. Сла́ва Отцу́ и Сы́ну и Свято́му Ду́ху. Я́ко со́лнечную лучу́, озаря́ющую ми́р, я́ко неве́сту Христо́ву предо́бру и я́ко го́рлицу любоче́стну, я́ко ма́слину, я́ко ке́др, я́ко су́щу избра́нну голуби́цу, восхваля́ем тя́ вси́, Домни́ко господоимени́тая. И ны́не и при́сно и во ве́ки веко́в. Ами́нь. Богородичен: Пощади́ мя́, Го́споди, пощади́, егда́ хо́щеши ми́ суди́ти, и не осуди́ мене́ во о́гнь, ни я́ростию Твое́ю обличи́ мене́. Мо́лит Тя́ Де́ва, Тя́ ро́ждшая, Христе́, и а́нгел мно́жества, и преподо́бных чи́ни.

глас 8 Песнь 1 Ирмос: Поим Господеви, проведшему люди Своя сквозе Чермное море, яко Един славно прославися. О Царстве Небеснем выну помышляя, земную оставил еси власть, Единаго всех Царя Бога возлюбив, с Нимже ныне водворяяся в Небесных обителех, моли Его о чтущих тя, досточудне Данииле. От самых пелен матерних избра тя Владыка, и, яко храм честный и непорочный, душу твою освяти, и предуготова в жилище Себе, и прослави тя в чудесех, Богоблаженне угодниче Христов Данииле. Младенец по Божественном родителе твоем оставлься, Богом воспитан и наставлен еси, всех родительских дел истинное зерцало показался еси, блаженне. Богородичен: Яко Деву Едину в женах, Тя, без семене рождшую Бога плотию, вси ублажаем, роди человечестии, и, надежду на Тя возложивше, спасаемся, и, к Тебе прибегающе, от всяких бед свобождаемся. Песнь 3 Ирмос: Ты еси утверждение притекающих к Тебе, Господи, Ты еси Свет омраченных, и поет Тя дух мой. Плодными добродетельми украшаемь, всяку тлеемую сладость житейскую яве отразил еси, к Божией доброте непрестанно взирая. Яко украшением чудес одеян всегда, чудотворец явился еси, мирскаго убо вреда и нас избави, блаженне, да поем выну Бога, прославльшаго тя. Целомудрие соблюд и евангельским украшен разумом, смиренномудрствовал еси о Христе и ныне с Ним вечно радуешися. Богородичен: Родила еси, Мати Дево Чистая, Свет неприступный, Иже весь мир просвещает ясносиятельными зарями Своего Божества. Седален, глас 4 От корене благаго прекрасная ветвь израсл еси и, аки благоуханный крин, добродетельми украшен был еси, призирая милостию на нища и убога и на вся подвластныя тебе люди, блаженне и приснопамятне княже Данииле, зловерныя же и враждебныя в любовь и смирение преклонив, в бдениих и трудех богоугодно пожил еси и достойную мзду от Господа твоего приял еси. Того убо моли даровати душам нашим мир и велию милость. Песнь 4 Ирмос: Пророк Аввакум умныма очима провиде, Господи, пришествие Твое, тем и вопияше: от юга приидет Бог. Слава силе Твоей, слава снизхождению Твоему. Умертвил еси вся плоти смертоносныя страсти благодатию Христовою, тем животворными твоих чудес приложеньми страждущия оживи и врат смертных избави. Щитом оградився благочестия, был еси, блаженне, образ людем Господним в начальстве княжения и в пребывании монашества, тем вси тебе ублажаем. Источник чудес явился еси, Богоблаженне княже Данииле: к тебе верою приходящии и кланяющиися честней твоей раке, желаемая приемлют исцеления. Богородичен: Матерь Тя Божию вемы вси и по рождестве явльшуюся нетленну Деву. Тем моли из Тебе Рождшагося, да избавит вечнаго тления всех, верою воспевающих Тя. Песнь 5 Ирмос: Утренююще, вопием Ти: Господи, спаси ны, Ты бо еси Бог наш, разве Тебе, иного не вемы. Текущая и тленная презрев, нетленная сподобился еси зрети, идеже выну Христа прославляя, моли Его, да нас вечныя Своея славы наследники покажет. Благонравно и добродетельно в княжестве пожил еси, и, ангельскому подражав житию, во обитель вселился еси, юже сам еси создал, и, в ней чистым пожив житием, ныне в Небесных водворяешися обителех. Яко предстателя тя и заступника граду твоему и обители твоей и всем людем российским показа Бог, защищай убо град твой, мирну же и во всем довольну соделай обитель и людем твоим спасение исходатайствуй. Богородичен: Пренепорочная Нетленная Отроковице, Богомати Владычице, призри на рабы Твоя, верно прибегающая под кров Твой, и моли Сына Своего от всяких бед избавити нас. Песнь 6 Ирмос: Ризу мне подаждь светлу, одеяйся светом, яко ризою, Многомилостиве Христе Боже наше. Дар Божий желаемый дался еси России, богатыми чудес дарами сияющ, тем, выну Троичными озарении осияваем, множеству святых лик сликовствовати сподобился еси. Рака, идеже лежат честныя твоя и святыя мощи, Богоблаженне Данииле, источник чудес изливает с верою приходящим и покланяющимся тебе. Блажен град, блаженна и обитель, в нейже в житии твоем подвизатися изволил еси, и по смерти твоей, яко многоценный дар, мощи твоя оставив, призираеши на всех, живущих в ней. Богородичен: Во многия беды и напасти впад, бурею одержим безчисленных согрешений, сего ради к Тебе, яко к теплому предстательству, прибегаю, Дево: моли из Тебе воплощшагося Бога, да прегрешений оставление подаст рабу Твоему. Кондак, глас 4 Избранный Богом от чресл родительских и воспитанный от младенчества в законе Господни в мужа совершенна и Промыслом Вышняго, именитаго града Москвы наследие княжества прием, верен строитель благочестивым людем твоим показался еси, Богоблаженне Данииле, ихже образом своим наставляя и поучая заповедем Господним выну, путем, ведущим в живот вечный, присно шествуя, Небеснаго Царства достигл еси, идеже со ангельскими водворяяся лики, поеши Богу: Аллилуиа. Икос Ангел во плоти на земли показался еси, Богомудре княже Данииле, славя непрестанно Творца небу и земли, всяким бо образом волю Его чрез всю твою жизнь исполнити потщался еси, всем благотворя, приял еси от Христа дар чудотворения, темже зовем ти: радуйся, яко от младенчества Богом избранный; радуйся, яко Темже в гражданство Небесное званный. Радуйся, яко державу власти твоея благочестием и правдою украсил еси; радуйся, яко на враги зловерцы и враждотворцы от Бога получивый победы. Радуйся, яко, оставив мир прелестный, к тихому пристанищу равноангельскаго жития притекл еси, в немже показал еси всем образ воздержания; радуйся, яко за толикия подвиги твоя сподобивыйся от Христа благодати и чудес дарования. Радуйся, яко в Небе со всеми святыми Живоначальную Троицу зриши и Той выну поеши: Аллилуиа. Песнь 7 Ирмос: Отроцы еврейстии в пещи попраша пламень дерзновенно и на росу огнь преложиша, вопиюще: благословен еси, Господи Боже, во веки. Стопам последуя яве всеблаженнаго родителя твоего Александра, Богомудре приснопамятне Данииле, наследие княжества Московскаго восприял еси, последи же иноческим житием прешел еси в Горняя обители, идеже выну поеши отцев Бога Благословеннаго. В постничестве и бденных молитвах богомудренно пожил еси и непрестанно славил Творца твоего, воспевая Ему: отцев Боже, благословен еси. Богородичен: Яко Красная, Краснаго родила еси, безобразие наше обратившаго в первый образ, Отроковице Всенепорочная, Емуже поем: отцев Боже, благословен еси. Песнь 8 Ирмос: Богоглаголивии отроцы, в пещи со огнем пламень попирающе, пояху: благословите, дела Господня, Господа. Днесь великаго града Москвы народи, стекшеся отвсюду в честную обитель благовернаго князя Даниила, в день празднственный памяти его, Творцу воспоем: благословите, дела Господня, Господа. Приидите, вси святители и вси священных собори, в храм Бога нашего, идеже лежат мощи великаго князя Даниила, ихже облобызающе, Творцу вопием: благословите, дела Господня, Господа. Днесь Церковь Христова, празднующи Даниилово торжество, сущее о Бозе, всех созывает верных к похвале угодника Христова, иже исцеление источает верою приходящих к нему и поющим Творцу: благословите, дела Господня, Господа. Богородичен: Глаголом Исаии пророка последующе, Богородицу Тя исповедуем: родила бо еси Отроча, всех древнейшее, нарицаемое Еммануил, Емуже зовем: благословите, дела Господня, Господа. Песнь 9 Ирмос: Чистую славно почтим, людие, Богородицу, огнь Божества приимшую во чреве неопально, песньми величаем. Едино Божество в Триех Ипостасех, Богоначальную и Всетворящую Вину в житии твоем присно величал еси, предстоя Ему, моли о людех твоих, во еже от всяких бед и напастей спастися им. Ревность великую показал еси к благочестию, Данииле блаженне, преизряден образ быв всем людем твоим, тем ныне предстоя всех Творцу, молися, да от всех бед и искушений избавит и наследники Царствия Своего покажет ны. Елико велик в православном княжении твоем, Богомудре княже Данииле, был еси, толико смирил еси себе, темже Всеблагий Бог тя превознесе и дарова тебе Небесное наследие и чудес благодать, юже верным людем твоим милостивно подаваяй, ко Господу о нас помолися. Богородичен: Избавителя и Спаса нашего родила еси, Всенепорочная Дево, Сего убо моли избавити нас прегрешений наших и наследники Царствия Своего сотворити, да Тя, Предстательницу нашу, присно величаем. Светилен Богоначальныя и Всебожественныя Троицы Светом озарився, свет, добросияющий благодатию Иисус Христовою, всей России явился еси, благородный Данииле, озаритися убо и нам Пребожественным светом Живоначальную Троицу моли, да, с тобою вечныя радости наслаждающеся, воспоем Бога, прославльшаго тя.

Минея, 28 Апреля, Кано́н му́чеников. Ио́сифово Глас 1 Песнь 1 Ирмос: Пе́снь побе́дную пои́м вси́ Бо́гу, сотво́ршему ди́вная чудеса́ мы́шцею высо́кою и спа́сшему Изра́иля, я́ко просла́вися. Припев: Святи́и му́ченицы, моли́те Бо́га о на́с. Бо́гу Вседержи́телю со дерзнове́нием, добропобе́днии му́ченицы, предстоя́ще всегда́, моли́те согреше́ний очище́ние посла́ти на́м. Припев: Святи́и му́ченицы, моли́те Бо́га о на́с. Венча́стеся, му́ченицы, добро́тою боже́ственною, по́двиг сконча́вше и многоко́зненнаго врага́ победи́вше. Те́мже ва́с обра́дованно пе́сненно славосло́вим при́сно. Сла́ва Отцу́ и Сы́ну и Свято́му Ду́ху. Кре́постию Ду́ха Пресвята́го, кре́пость погуби́сте льсти́ваго зми́я, богоблаже́ннии, и безсме́ртных даро́в ны́не наслажда́етеся. И ны́не и при́сно и во ве́ки веко́в. Ами́нь. Богородичен: По́лный истощи́ся за милосе́рдие и пло́ть бы́сть, возводя́, Чи́стая, к пе́рвой на́с добро́те, и́же ве́рою на земли́ восхваля́ющия Тя́. Песнь 3 Ирмос: Да утверди́тся се́рдце мое́ в во́ли Твое́й, Христе́ Бо́же, И́же над вода́ми не́бо утвержде́й второ́е и основа́вый на вода́х зе́млю, Всеси́льне. Припев: Святи́и му́ченицы, моли́те Бо́га о на́с. Веде́нием ну́ждным, святи́и, за Христа́ у́зницы бы́вше, соу́зу пре́лести злу́ю разреши́сте благода́тию, разре́шше же ся от пло́ти, к жи́зни преста́вистеся. Припев: Святи́и му́ченицы, моли́те Бо́га о на́с. Ви́дети Бо́жию красоту́, страда́льцы, жела́юще, прехва́льнии, ра́ны, и вяза́ния, и ну́ждную сме́рть претерпе́сте, тве́рдостию ума́ крася́щеся. Сла́ва Отцу́ и Сы́ну и Свято́му Ду́ху. Зако́нно, му́ченицы прехва́льнии, стра́ждуще нра́ва кре́постию, оде́ястеся, вку́пе побе́дным венце́м, и Тро́ице Честне́й ра́достно ны́не предстоите́. И ны́не и при́сно и во ве́ки веко́в. Ами́нь. Богородичен: И́же естество́м неопи́санный, вопло́щся из Тебе́, опису́ется, Богора́дованная Чи́стая, Его́же непреста́нно моли́ уще́дрити и спасти́ пою́щия Тя́. Седален, глас 1 Тве́рдостию души́ прибли́жившеся боле́знем, непобеди́ми мно́гими козньми́ льсти́ваго, яви́стеся, му́ченицы, а́нгелом равноче́стни. Те́мже вся́ вселе́нная почита́ет боре́ния и честна́я ва́ша страда́ния, и́миже просла́вистеся. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Упова́ние христиа́н, Пресвята́я Де́во, Его́же родила́ еси́, Бо́га, па́че ума́ же и сло́ва, непреста́нно моли́ с вы́шними си́лами пода́ти оставле́ние грехо́в на́ших все́х и исправле́ние жития́ ве́рою и любо́вию при́сно Тя́ сла́вящим. Песнь 4 Ирмос: Услы́шах, Го́споди, слу́х Тво́й и убоя́хся, разуме́х дела́ Твоя́, проро́к глаго́лаше, и просла́вих си́лу Твою́. Припев: Святи́и му́ченицы, моли́те Бо́га о на́с. Зако́н Боже́ственный утвержда́юще, беззако́ние страда́льцы безбо́жных отри́нуша, благоче́стно пострада́вше и Го́сподеви благоугоди́вше. Припев: Святи́и му́ченицы, моли́те Бо́га о на́с. Ублажи́м дне́сь Да́да и Макси́ма до́блия, зако́нно пострада́вшия, и хвала́ми венча́ем Кинтилиа́на всечестна́го. Сла́ва Отцу́ и Сы́ну и Свято́му Ду́ху. Непрело́жни, святи́и, во вре́мя страда́ния бы́вше, вся́ку ле́сть низложи́сте и побе́дный вене́ц от Бо́га Спа́са прия́сте. И ны́не и при́сно и во ве́ки веко́в. Ами́нь. Богородичен: Уны́нием одержи́маго, Богороди́тельнице, воздви́гни мя́ твори́ти боже́ственное хоте́ние, я́ко да ублажу́ Тя, Предста́тельнице все́х неусы́пная. Песнь 5 Ирмос: Све́тлый на́м возсия́й Све́т Присносу́щный, у́тренюющим о судьба́х за́поведей Твои́х, Влады́ко Человеколю́бче, Христе́, Бо́же на́ш. Припев: Святи́и му́ченицы, моли́те Бо́га о на́с. Боже́ственное и́мя и спаси́тельное испове́давше пред мучи́тели, святи́и, мно́гих му́к иску́с претерпе́сте, и сме́рть непра́ведную. Припев: Святи́и му́ченицы, моли́те Бо́га о на́с. Благода́тию укрепля́еми Боже́ственнаго Ду́ха, не убоя́стеся муче́ний теле́сных, ни истука́нным че́сти принесо́сте, добропобе́днии му́ченицы. Сла́ва Отцу́ и Сы́ну и Свято́му Ду́ху. Вене́ц неувяда́емый прие́мше, святи́и му́ченицы, Тро́ице ны́не предстоите́ трие́, незаходи́мому сия́нию сподо́блени, и ны́не ублажа́етеся. И ны́не и при́сно и во ве́ки веко́в. Ами́нь. Богородичен: Исцели́, Влады́чице Всенепоро́чная, се́рдца моего́, молю́ Тя́, стра́сти неисце́льныя и ума́ моего́ тму́ тя́жкую отжени́, Пречи́стая. Песнь 6 Ирмос: Я́ко Ио́ну проро́ка, возведи́, Христе́ Бо́же, живо́т мо́й от тли́, вопию́ Ти, Человеколю́бче, я́ко жи́знь у Тебе́ е́сть, и нетле́ние, и си́ла. Припев: Святи́и му́ченицы, моли́те Бо́га о на́с. Новоявле́нно, я́коже зве́зды, зри́ми, просвеща́ете земны́й ми́р, всехва́льнии му́ченицы, помраче́ние отгоня́ще безбо́жия благода́тию. Припев: Святи́и му́ченицы, моли́те Бо́га о на́с. Законоположе́ния безбо́жных до конца́ отри́нувше, и зако́ном Госпо́дним я́ве утвержда́еми, зако́нно, святи́и му́ченицы, за Христа́ пострада́сте. Сла́ва Отцу́ и Сы́ну и Свято́му Ду́ху. Высоча́йшими ра́зумы и де́лы пока́зани до́бре, с высоты́ спа́дшаго под но́ги покори́сте, укра́шеныя в добро́тах муче́ния, прехва́льнии. И ны́не и при́сно и во ве́ки веко́в. Ами́нь. Богородичен: Зако́н есте́ственных кроме́, Творца́ естеству́ воплоти́ла еси́, Отрокови́це, па́че ума́, Всенепоро́чная, Его́же добропобе́днии му́ченицы испове́дающе, пострада́ша. Кондак, глас 2 Светильницы светлии явльшеся, божественнии мученицы, / тварь всю светлостию чудес озаряете, / недуги разрешающе и глубокую тьму всегда отгоняюще, / Христу Богу молящеся непрестанно о всех нас. Песнь 7 Ирмос: Су́щим в пещи́ отроко́м Твои́м, Спа́се, не прикосну́ся, ниже́ стужи́ о́гнь. Тогда́ трие́, я́ко еди́неми усты́, поя́ху и благословля́ху, глаго́люще: благослове́н Бо́г оте́ц на́ших. Припев: Святи́и му́ченицы, моли́те Бо́га о на́с. Огне́м Боже́ственнаго стра́ха ду́шу распала́юще, вся́ку попали́сте, му́дрии, ве́щь го́рькую многобо́жия и к сия́нию взя́стеся невече́рнему, согреше́нием на́шим разреше́ние подаю́ще. Припев: Святи́и му́ченицы, моли́те Бо́га о на́с. Струя́ми крове́й угаси́вше запале́ние, блаже́ннии, многобо́жия вои́стинну, ту́чу на́м источа́ете чуде́с, ве́рою притека́ющим к ра́це моще́й ва́ших всегда́. Сла́ва Отцу́ и Сы́ну и Свято́му Ду́ху. До́м я́вльшеся Ду́ха, му́дрии добропобе́днии му́ченицы, хра́м, в не́мже ны́не лежите́, исто́чник содева́ет чуде́с: в о́ньже прибега́юще, от вся́кия скве́рны страсте́й избавля́емся. И ны́не и при́сно и во ве́ки веко́в. Ами́нь. Богородичен: Воплоще́нно родила́ еси́ на́м, Пренепоро́чная, Сло́во, Единосу́щно Отцу́ и Ду́ху, Богороди́тельнице, Его́же моли́ спасти́ пою́щия Тя́ от все́х страсте́й и обстоя́ния. Песнь 8 Ирмос: Его́же ужаса́ются а́нгели и вся́ во́инства, я́ко Творца́ и Го́спода, по́йте, свяще́нницы, просла́вите, о́троцы, благослови́те, лю́дие, и превозноси́те во вся́ ве́ки. Припев: Святи́и му́ченицы, моли́те Бо́га о на́с. Лю́бяще Го́спода от всея́ души́, я́ко а́гнцы, закла́ни бы́сте, па́стырю слове́сному и боже́ственней трапе́зе принесо́стеся и в кро́вех пе́рвенец живете́. Припев: Святи́и му́ченицы, моли́те Бо́га о на́с. Ве́рою почти́м Кинтилиа́на, и Да́ду, и Макси́ма, му́ченики Христо́вы, боже́ственныя зве́зды, просвеща́ющия все́х сердца́ чуде́сными луча́ми. Сла́ва Отцу́ и Сы́ну и Свято́му Ду́ху. Глаго́лы преоби́деша безбо́жных и злочести́вых и, ра́дующеся, пострада́вше, му́ченицы Христо́вы, и су́щим от ве́ка причто́шася боже́ственным страстоте́рпцем, с ни́миже при́сно почита́ются. И ны́не и при́сно и во ве́ки веко́в. Ами́нь. Богородичен: Я́ко престо́л огнезра́чен носи́ла еси́ Христа́, на́м приме́шшася дебельство́м пло́ти. Того́ моли́, Богоро́дице Чи́стая, уще́дрити и спасти́ любо́вию чту́щия Тя́. Песнь 9 Ирмос: Светоно́сный о́блак, в о́ньже все́х Влады́ка, я́ко до́ждь с небесе́ на руно́, сни́де и воплоти́ся на́с ра́ди, бы́в Челове́к, Безнача́льный, велича́ем вси́ я́ко Ма́терь Бо́га на́шего Чи́стую. Припев: Святи́и му́ченицы, моли́те Бо́га о на́с. После́дующе стра́сти Безстра́стнаго, страстоте́рпцы, искуше́ние подъя́сте вку́пе многоплете́нных му́к и сме́ртию жи́знь насле́довасте, пребыва́юще в ве́к ве́ка; сего́ ра́ди блажи́ми есте́ при́сно. Припев: Святи́и му́ченицы, моли́те Бо́га о на́с. Красно́ стезю́ муче́ния уве́девше и ше́ствовавше до́бре в пути́, веду́щия к поко́ищем у́мным, сла́внии му́ченицы, прия́сте кончи́ну мече́м и со а́нгелы лику́ете при́сно. Припев: Святи́и му́ченицы, моли́те Бо́га о на́с. Ста́нем во хра́ме Госпо́дни и ублажи́м Да́ду, Макси́ма и Кинтилиа́на, до́блия ору́жники и погуби́вшия враги́, и ве́рою вопие́м: Человеколю́бче, те́х моли́твами изба́ви все́х многоплете́нныя напа́сти. Сла́ва Отцу́ и Сы́ну и Свято́му Ду́ху. Свяще́нная ва́ша па́мять, пресла́внии победоно́сцы, я́коже со́лнце, све́тло озаря́ет тва́рь, ю́же творя́щия, омраче́ния страсте́й ны́ изба́вите, мо́лимся, свяще́нными хода́тайствы, страстоте́рпцы Спа́са и Бо́га. И ны́не и при́сно и во ве́ки веко́в. Ами́нь. Богородичен: Грехолюби́в сы́й, покая́нием припа́даю щедро́там Твои́м, Бо́же, и ве́рно взыва́ю: мольба́ми чи́сто ро́ждшия Тя́ на земли́, уще́дри мя́ и му́к изба́ви ве́чных, Преблаги́й Христе́.

глас 2 Творение Феофаново Пе́снь 1 Ирмо́с: Во глубине́ постла́ иногда́ фараони́тское всево́инство преоруже́нная си́ла, вопло́щшееся же Сло́во всезло́бный гре́х потреби́ло е́сть, препросла́вленный Госпо́дь, сла́вно бо просла́вися. Припев: Святы́й апо́столе Варна́во, моли́ Бо́га о на́с. Яко му́ж сы́й бла́г и утеше́ния сы́н я́влься, души́ моея́ озлобле́ние и греха́ душегу́бную печа́ль отжени́, я́ко да, весе́лия испо́лнен бы́в, воспою́ тя. Одержи́мь, блаже́нне, чи́стым сия́нием, прозя́бшаго от коле́на Иу́дова, пребога́те, Христа́ Всецаря́, от леви́тска сро́дства прише́дша свяще́нна, зако́на же преложе́ние пропове́дал еси́. Све́тлая твоя́, прему́дре, жи́знь, пе́рвыя бла́гости и есте́ственнаго существа́ показа́ бо́га тя́ втора́го, е́же отту́ду ублажа́ема благода́тьми, сла́вне Варна́во, порожде́ние боже́ственнаго утеше́ния. Богоро́дичен: Отрокови́ц боже́ственный ли́к боже́ственно в жена́х Тя́ до́брую воспева́ет, Богоро́дице Влады́чице, добро́тами укра́шену Божества́: добротвори́тельное бо Сло́во па́че сло́ва родила́ еси́. Пе́снь 3 Ирмо́с: Процвела́ е́сть пусты́ня, я́ко кри́н, Го́споди, язы́ческая неплодя́щая це́рковь, прише́ствием Твои́м, в не́йже утверди́ся мое́ се́рдце. Облак во́льный, на́м до́ждь нося́щий от исто́чника благода́ти, ви́ден бы́л еси́, Варна́во сла́вне, и пи́щный пото́к напая́ющий. Разли́чными одарова́на сия́нии ви́дящи Всеси́льнаго Ду́ха вла́сть, та́йнам Христо́вым служи́теля, отлучи́ тя́, прехва́льне. Просвеща́еми благода́тию Креста́ Твоего́, Влады́ко, благосла́внии апо́столи тебе́ язы́ки ве́рою приведо́ша, Варна́ва и Па́вел богому́дрии. Богоро́дичен: Яви́лася еси́ чистото́ю, я́ко кри́н, Влады́чице, посреде́ те́рния возсия́вши заря́ми де́вства Твоего́, Богоро́дице Всечи́стая. Седа́лен, Варна́вы, гла́с 4: Слове́сен показа́лся еси́, я́ко небе́сную пове́дуя сла́ву Бо́жию чуде́с све́тлостию и си́лы луча́ми, неразу́мия но́щь отгоня́ благода́тию, богоразу́мия же лучи́ облиста́я конце́м. Те́мже светоно́сную и святу́ю твою́ па́мять сла́вим дне́сь, ве́рнии, и вопие́м ти́: Варна́во всехва́льне, моли́ Христа́ Бо́га грехо́в оставле́ние дарова́ти чту́щим любо́вию святу́ю па́мять твою́. Пе́снь 4 Ирмо́с: Прише́л еси́ от Де́вы, не хода́тай, ни Ангел, но Са́м, Го́споди, вопло́щся, и спа́сл еси́ всего́ мя челове́ка. Те́м зову́ Ти́: сла́ва си́ле Твое́й, Го́споди. После́дуя повеле́нием Влады́ки, апо́столе Варна́во прехва́льне, ни́щим разда́л еси́ все́ твое́ име́ние, и Христо́в пропове́дник бы́в велегла́сен. Дости́гл еси́ доброде́телей све́тлость коне́чную и, Па́вла обре́т, богогла́снаго апо́стола, с ни́мже все́м возвести́л еси́ та́инства глубину́ неизрече́нную. Яко со́лнце, претека́я ми́ра концы́, Варна́во всече́стне, зарелу́чными сия́нии, Па́влу после́дуя, просвеща́еши сло́вом благода́ти. Соприча́стник страсте́й Спа́са бы́в, Варна́во прехва́льне, в небе́сных се́лех с Ни́м прославля́ешися, па́че ума́ весе́лия насыща́яся. Богоро́дичен: Евы прама́тере кля́тва упраздни́ся Тобо́ю, Всенепоро́чная: воплоще́ннаго бо Сло́ва родила́ еси́ Присносу́щнаго, благослове́ньми ми́р венча́вшаго. Пе́снь 5 Ирмо́с: Хода́тай Бо́гу и челове́ком бы́л еси́, Христе́ Бо́же: Тобо́ю бо Влады́ко, к светонача́льнику Отцу́ Твоему́, от но́щи неве́дения, приведе́ние и́мамы. Зако́на се́нь преше́д и благода́тию сия́я, язы́ком исполне́ние благовеству́я, просвети́л еси́, богому́дрый Варна́во, Христо́вым пропове́данием. Кре́постию держа́вною Свята́го Ду́ха, апо́столе, я́ве обложе́н, лука́вствия ду́хи низложи́в, от те́х злоде́йства ми́р изба́вил еси́. Вопию́щаго гла́с в пусты́х язы́цех бы́л еси́, му́дре, боже́ственнаго воплоще́ния непостижи́мое та́инство возвеща́я все́м, Варна́во пребога́те. Богоро́дичен: Се́ во утро́бе, Богоро́дице Пречи́стая, Христа́ Бо́га па́че сло́ва име́ла еси́, я́коже Иса́ия предрече́, вы́ше естества́ же Сего́, Богороди́тельнице, родила́ еси́. Пе́снь 6 Ирмо́с: В бе́здне грехо́вней валя́яся, неизсле́дную милосе́рдия Твоего́ призыва́ю бе́здну: от тли́, Бо́же мя́ возведи́. Возсия́в ми́ру, Христе́ Бо́же, Пра́вды Со́лнце, Влады́ко, я́коже лучи́ сия́ющия, Варна́ву и Па́вла возблиста́л еси́. Кореносе́чна секи́ра бы́л еси́, олядене́вшую пре́лесть секу́щи па́че сло́ва чудесы́, богоглаго́ливе Варна́во чу́дне. Законополо́жник показа́лся еси́ благода́ти, я́ко ве́тхаго заве́та о́бразы ко и́стинному явле́нию прелага́я, Варна́во богоприя́тне. Богоро́дичен: Небеса́ Простры́й во́лею, не́бо земно́е друго́е показа́ Тя́, Богома́ти Пречи́стая, и, из Тебе́ возсия́в, яви́ся. Конда́к, гла́с 3 Госпо́день бы́л еси́ всеи́стинный служи́тель, апо́столов же яви́лся еси́ седми́десятих пе́рвый, озари́л еси́ и с Па́влом про́поведь твою́, все́м возвеща́яй Христа́ Спа́са, сего́ ра́ди песнопе́нии боже́ственную па́мять твою́, Варна́во, соверша́ем. Икос: Сы́н Бо́жий, соприсносу́щный Ду́ху, благоволе́нием на земли́ пло́ть прие́мь, я́ко Челове́к, и стра́стию честно́ю безстра́стие да́в, тя́ полага́ет, блаже́нне, апо́стола и вити́я ве́ры, му́дра в сло́ве и досточу́дна, пропове́дника че́стна, язы́ков учи́теля, Варна́во блаже́нне, и Тро́ицы и́стинна покло́нника. Те́мже возсия́ ве́рным честна́я денни́ца све́тлая, озаря́ющая твою́ боже́ственную па́мять, ю́же досто́йно соверша́ем. Пе́снь 7 Ирмо́с: Богопроти́вное веле́ние беззако́ннующаго мучи́теля высо́к пла́мень вознесло́ е́сть: Христо́с же простре́ Богочести́вым отроко́м ро́су духо́вную, Сы́й Благослове́н и Препросла́влен. Свя́то Свята́го, во святы́х почива́ющаго, Варна́во, пропове́дал еси́ Сы́на, собезнача́льна Отцу́ и сопресто́льна, Челове́ка бы́вша, на́м спасе́ние содева́юща. Лучи́, блиста́ющия боже́ственное сия́ние, Варна́ва всечестны́й и Па́вел богоприя́тный, я́ко све́т, исхо́дят, просвеща́ющия сло́вом благода́ти язы́к всенасле́дие, христопропове́дницы. Ра́дуется дне́сь воспита́вый тя́, Варна́во, цвету́щаго сло́во благода́тное, Христо́ви тя́ прозя́бши, богоблаже́нне. Его́же измени́в, ны́нешняго плене́ния изба́ви моли́твами твои́ми. Богоро́дичен: Направля́ющи, Всечи́стая, мою́ жи́знь, ко Твоему́ благоути́шному приста́нищу наста́ви, Бо́га ро́ждшая, благи́х исто́чника, все́м подаю́ща ве́рным незави́стную бла́гость. Пе́снь 8 Ирмо́с: Пе́щь иногда́ о́гненная в Вавило́не де́йства разделя́ше, Бо́жиим веле́нием халде́и опаля́ющая, ве́рныя же ороша́ющая, пою́щия: благослови́те вся́ дела́ Госпо́дня Го́спода. Мо́ре язы́ческое возмути́ти Твоя́ ко́ни, я́ко Благоде́тель, наве́л еси́ — Варна́ву сла́внаго и Па́вла чу́днаго, пре́лесть многобо́жную уче́ньми, Живода́вче, благоче́стия отгоня́щия. Положи́, я́ко Бо́г, Уте́шителю Ду́ше вседе́тельный, в Це́ркви Твое́й свети́ла сия́ющая, Твою́ си́лу пропове́дающая, Сы́ну же и Роди́телю зову́щая: благослови́те, вся́ дела́ Госпо́дня, Го́спода. Облиста́л еси́ све́тло, я́ко со́лнце, в ми́ре, мы́сленному бесе́довав я́ве Со́лнцу, богоприя́тне: разже́гся бо сия́нием, све́т вторы́й бы́л еси́, все́м явля́я та́инства си́лу. Зе́млю всю́ уче́ньми просвети́в, е́же па́че ума́ блаже́нство досто́йно улучи́л еси́, в небе́сных се́лех, Варна́во всече́стне, вене́ц благоле́пия от Влады́ки прие́м. Богоро́дичен: Да кля́тву пе́рвую погуби́ши и сме́рти осужде́ние дре́вния прама́тере, от Де́вы Богома́тере Сло́во Бо́жие роди́ся, все́м дарова́ безсме́ртие неги́блющее. Пе́снь 9 Ирмо́с: Безнача́льна Роди́теля Сы́н, Бо́г и Госпо́дь, вопло́щься от Де́вы, на́м яви́ся, омраче́нная просвети́ти, собра́ти расточе́нная, те́м Всепе́тую Богоро́дицу, велича́ем. Све́т бы́вше доброде́телию, апо́столи, и Све́ту вели́кому ны́не предстоя́ще, ми́ру ми́р пода́ти и на́шу спасти́ Це́рковь, ю́же соста́висте, Влады́ку умоли́те. Вити́йскую лю́тость прему́дрости твоея́ пла́менем, богоявле́нне Варна́во, я́ве погаси́л еси́, сия́ний боже́ственных, я́ко исто́чник, вну́трь име́я. Те́мже всесвяще́нный пра́здник тво́й почита́ем. Ве́рою па́мять твою́ соверша́юще ны́не, апо́столе, моли́твенника ко Влады́це тя́ предлага́ем, разреше́ния прося́ще согреше́ний твои́м прия́ти хода́тайством, Варна́во всече́стне, богопропове́дниче свяще́нне. Богоро́дичен: Яко у́тро обре́теся у́треннее, в жите́йстей но́щи де́вства заря́ми сия́ющи, восто́к Со́лнца разу́мнаго пра́вды на́м я́вльши, Богома́ти Всечи́стая. Свети́лен Апо́столы Христо́вы прииди́те, лю́дие, воспои́м, боже́ственнаго Варфоломе́я и Варна́ву му́драго, пропове́дники ве́ры, я́ко моля́щияся Христу́ о душа́х на́ших.

Минея, 19 Февраля, Кано́н, егоже краегране́сие: Архи́ппа пою́ му́драго, Богоглаго́ливаго. Творе́ние Ио́сифово Глас 4 Песнь 1 Ирмос: Мо́ря че́рмную пучи́ну/ невла́жными стопа́ми/ дре́вний пешеше́ствовав Изра́иль,/ крестообра́зныма Моисе́овыма рука́ма/ Амали́кову си́лу в пусты́ни победи́л есть. Припев: Святы́й апо́столе Архи́ппе, моли́ Бо́га о на́с. Облиста́в просвеще́нием благода́ти,/ Па́вел прему́дрый, я́коже зарю́, блаже́нне, тя све́тлу испусти́,/ отгоня́щу многобо́жия, Архи́ппе, тьму глу́боча́йшую ду́хом. Припев: Святы́й апо́столе Архи́ппе, моли́ Бо́га о на́с. Глаго́л Боже́ственными плени́цами уло́влен был еси́ Па́вла пропове́дника,/ и из глубины́ зло́бы вра́жия лю́ди пресла́вно улови́л еси́,/ и слове́сно бра́шно на Боже́ственную тра́пезу прине́сл еси́. Сла́ва Отцу́ и Сы́ну и Свято́му Ду́ху. В ри́зу оде́ян, Архи́ппе, Боже́ственныя благода́ти,/ обнажи́вшияся сла́вы Боже́ственныя,/ в нетле́ния ри́зу и спасе́ния, сла́вне, оде́жду Боже́ственную одея́л еси́. И ны́не и при́сно и во ве́ки веко́в. Ами́нь. Богородичен: Ви́девше проро́ческими оче́сы издале́ча, Всечи́стая,/ е́же па́че ума́ Твоего́ Бо́жественнаго Рождества́ стра́шное та́инство,/ Богоглаго́ливии, Пречи́стая, разли́чными о́бразы уясни́ша. Песнь 3 Ирмос: Весели́тся о Тебе́ Це́рковь Твоя́, Христе́, зовущи:/ Ты моя́ кре́пость, Го́споди,/ и прибе́жище, и утвержде́ние. Припев: Святы́й апо́столе Архи́ппе, моли́ Бо́га о на́с. Верна́ тя раба́ Христо́ва Па́вел Боже́ственный свиде́тельствует, Архи́ппе,/ и свяще́нна проповедни́ка, и сво́ина, блаже́нне. Припев: Святы́й апо́столе Архи́ппе, моли́ Бо́га о на́с. Распаля́емь мы́сленно Утеши́теля огне́м,/ попа́лил еси́ вещь го́рькую, Архи́ппе, идолонеи́стовства, всехва́льне. Сла́ва Отцу́ и Сы́ну и Свято́му Ду́ху. Житие́ твое́ светоза́рно доброде́тельными мо́лниями просия́,/ просвеща́я, Архи́ппе, благоче́стно тя почита́ющия. И ны́не и при́сно и во ве́ки веко́в. Ами́нь. Богородичен: Храм показа́лася еси́ Бо́жий вмести́телен преявле́нно, Всечи́стая,/ и чи́сто селе́ние, и Богоподо́бно жили́ще. Седален, глас 1 Па́влов учени́к быв, Богоно́се,/ просвети́л еси́ лю́ди воспева́ти Тро́ицу,/ хра́мы же разори́л еси́ па́губныя благода́тию,/ пострада́в же терпели́вно, венцы́, ра́дуяся, прия́л еси́,/ о нас моля́ся, блаже́нне Архи́ппе. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Безневе́стная Чи́стая Богоро́дице Де́во,/ Еди́на ве́рных Предста́тельнице и Покро́ве,/ бед, и скорбе́й, и лю́тых обстоя́вши всех изба́ви,/ и́же на Тя упова́ние, Отрокови́це, иму́щия,/ и ду́ши на́ша спаси́ Боже́ственными моли́твами Твои́ми. Песнь 4 Ирмос: Вознесе́на Тя ви́девши Це́рковь на Кресте́,/ Со́лнце пра́ведное,/ ста в чи́не свое́м,/ досто́йно взыва́ющи:/ сла́ва си́ле Твое́й, Го́споди. Припев: Святы́й апо́столе Архи́ппе, моли́ Бо́га о на́с. Повеству́юща Боже́ственная и безбо́жныя явле́ние облича́юща,/ беззако́нный гони́тель бие́нием предаде́ тя, и ра́нам, Архи́ппе,/ и различнообра́зным му́кам. Припев: Святы́й апо́столе Архи́ппе, моли́ Бо́га о на́с. До́бре проходя́ житие́, блаже́нне,/ кончи́ну обрести́ блаже́нну вои́стинну сподо́бился еси́:/ му́ченик бо был еси́ Христо́в,/ до́блественнейше боле́зни претерпе́в теле́сныя. Сла́ва Отцу́ и Сы́ну и Свято́му Ду́ху. Жиру́ющую безбо́жия гни́лость, благочести́вых исполне́ние, уста́вил еси́ сла́дкою со́лию слове́с твои́х/ и, ра́дуяся, взыва́л еси́:/ сла́ва си́ле Твое́й, Го́споди. И ны́не и при́сно и во ве́ки веко́в. Ами́нь. Богородичен: Я́ко присе́нну прови́дя Тя дре́вле го́ру Авва́кум, Всенепоро́чная, нося́щу Сло́во,/ вся осеня́ющее от пла́мене преступле́ния и грехо́в,/ Отрокови́це, жже́ния. Песнь 5 Ирмос: Ты, Го́споди, мой Свет,/ в мир прише́л еси́,/ Свет Святы́й, обраща́яй из мрачна́ неве́дения/ ве́рою воспева́ющия Тя. Припев: Святы́й апо́столе Архи́ппе, моли́ Бо́га о на́с. Боже́ственными мо́лниями всему́драго проповеда́ния/ просвети́л еси́ неве́дения но́щию одержи́мыя,/ Богому́дре всеблаже́нне. Припев: Святы́й апо́столе Архи́ппе, моли́ Бо́га о на́с. Боже́ственная река́, проше́дши из се́рдца твоего́,/ потопи́ пото́ки ле́стныя и ра́зумы ве́рных, преблаже́нне, напои́. Сла́ва Отцу́ и Сы́ну и Свято́му Ду́ху. Вжиля́емь благи́ми наде́ждами,/ претерпе́л еси́, влеко́мь четы́рми/ и зе́млю освяща́я кровьми́, Богоприя́тне. И ны́не и при́сно и во ве́ки веко́в. Ами́нь. Богородичен: Тя, Еди́ну от всех родо́в, избра́ Госпо́дь, Богоро́дице,/ и из Тебе́ воплоти́ся, обожи́в челове́чество. Песнь 6 Ирмос: Пожру́ Ти со гла́сом хвале́ния, Го́споди,/ Це́рковь вопие́т Ти,/ от бесо́вския кро́ве очи́щшися/ ра́ди ми́лости от ребр Твои́х/ исте́кшею Кро́вию. Припев: Святы́й апо́столе Архи́ппе, моли́ Бо́га о на́с. Ника́коже прельще́ньми ослабе́вша,/ льсти́вый неми́лостивно тя ссеца́ет ра́нами, Богому́дре,/ смотря́юща к сла́ве,/ ю́же ти Христо́с пода́ст, прославля́я тя. Припев: Святы́й апо́столе Архи́ппе, моли́ Бо́га о на́с. Полки́ враго́в неви́димых я́звами уязви́л еси́, блаже́нне, пло́ти твое́й, Архи́ппе,/ и, облича́я, се́рдце мучи́телево терзаньми расто́ргл еси́. Сла́ва Отцу́ и Сы́ну и Свято́му Ду́ху. И́же каме́нию нечу́вственным се́рдцем служа́щий,/ ка́мением побива́ют тя, блаже́нне, живота́ ка́мень испове́дающа/ и пре́лести утвержде́ние, му́чениче, сокруша́юща. И ны́не и при́сно и во ве́ки веко́в. Ами́нь. Богородичен: Умерщвле́ния совле́кся, в жизнь облече́ся в рай, Де́во, Ада́м,/ Твои́м же обезсме́ртвися живоно́сным Рождество́м, Всесвята́я Богоневе́сто. Кондак, глас 4 Я́ко звезду́ вели́кую, тя Це́рковь иму́щи, Архи́ппе,/ чуде́с твои́х луча́ми просвеща́ема, зове́т тебе́:/ спаси́ ве́рою почита́ющия па́мять твою́. Песнь 7 Ирмос: В пе́щи Авраа́мстии о́троцы перси́дстей,/ любо́вию благоче́стия па́че,/ не́жели пла́менем, опаля́еми, взыва́ху:/ благослове́н еси́ в хра́ме сла́вы Твое́й, Го́споди. Припев: Святы́й апо́столе Архи́ппе, моли́ Бо́га о на́с. Богоглаго́ланьми Богому́дрыми, всеблаже́нне, свиде́тельствован, ра́зумом и́стинным,/ тьму неве́дения от душ отгна́л еси́ му́дрости благода́тию/ че́стному сло́ву твоему́ повину́вшияся. Припев: Святы́й апо́столе Архи́ппе, моли́ Бо́га о на́с. В ро́ве тя, му́чениче, до́льнейшем погреба́ют народи́ злочести́вых/ и ка́мением неми́лостивно умерщвля́ют, воспева́ющаго:/ благослове́н еси́ в хра́ме сла́вы Твое́й, Го́споди. Сла́ва Отцу́ и Сы́ну и Свято́му Ду́ху. Земля́ те́ло погребе́ное, му́чениче, показу́ет и́сточа́я исцеле́ний во́ды ве́рным,/ Не́бо же, блаже́нный Архи́ппе, дух твой страстоте́рпческим ду́шам причита́ет. И ны́не и при́сно и во ве́ки веко́в. Ами́нь. Богородичен: Зе́млю у́бо мгло́ю, не́бо же о́блаки Госпо́дь, Отрокови́це, одева́я,/ во́лею в плоть ме́ртвенную от крове́й Твои́х одева́ется,/ во оде́жду сла́вы безсме́ртныя одева́я челове́ка. Песнь 8 Ирмос: Ру́це распросте́р, Дании́л/ львов зия́ния в рове затче́:/ о́гненную же си́лу угаси́ша,/ доброде́телию препоя́савшеся,/ благоче́стия рачи́тели, о́троцы, взыва́юще:/ благослови́те, вся дела́ Госпо́дня, Го́спода. Припев: Святы́й апо́столе Архи́ппе, моли́ Бо́га о на́с. Па́вел, похвала́ми свяще́нными похваля́я тя, Архи́ппе сла́вне,/ сво́ина тя, свя́те, написа́, соверши́теля Боже́ственных дея́ний,/ слу́жаща Ему́ и ве́рою пою́ща:/ благослови́те, вся дела́ Госпо́дня, Го́спода. Припев: Святы́й апо́столе Архи́ппе, моли́ Бо́га о на́с. Глаго́лы пома́зася че́стными к муче́нию досточу́дная Апфи́я,/ лю́бящи, прему́дре, я́ко сы́на тя и́скреннейшаго,/ с не́юже в Вы́шних живе́ши Ца́рствиих, вопия́:/ благослови́те, вся дела́ Госпо́дня, Го́спода. Сла́ва Отцу́ и Сы́ну и Свято́му Ду́ху. Младе́нцы су́щий ра́зумом, тя, иму́щаго смысл,/ младе́нцем во игра́ние преда́ша, Архи́ппе, стра́ждуща, терпели́внейше,/ и от них неми́лостивно пробода́ема и вопию́ща:/ вся дела́, благослови́те, Госпо́дня, Го́спода. И ны́не и при́сно и во ве́ки веко́в. Ами́нь. Богородичен: Ме́ртв сне́ди ра́ди еди́ныя Ада́м бысть,/ объемь смерть са́да разу́мнаго, Чи́стая,/ Тебе́ же ра́ди оживле́н,/ и ра́я пи́щу па́ки восприя́т, воспева́я:/ благослови́те, вся дела́ Госпо́дня, Го́спода. Песнь 9 Ирмос: Ка́мень нерукосе́чный/ от несеко́мыя горы́, Тебе́, Де́во,/ краеуго́льный отсече́ся,/ Христо́с, совокупи́вый разстоя́щаяся естества́./ Тем, веселя́щеся, Тя, Богоро́дице, велича́ем. Припев: Святы́й апо́столе Архи́ппе, моли́ Бо́га о на́с. Да ве́чную сла́ву насле́диши, страстоте́рпче,/ сла́ву земну́ю презре́л еси́, непостоя́нную же и преходя́щую,/ и ко Христу́ приступи́л еси́, сла́вою Сего́ украша́емь. Припев: Святы́й апо́столе Архи́ппе, моли́ Бо́га о на́с. Венце́м увязе́ся, Богому́дре, побе́дным верх твой,/ и оде́ялся еси́ в багряни́цу, твои́ми кровьми́ омоче́ную, Архи́ппе,/ и со Христо́м, ра́дуяся, ца́рствуеши, преблаже́нне. Припев: Святы́й апо́столе Архи́ппе, моли́ Бо́га о на́с. Я́ко верхо́внаго, всеблаже́нне, апо́столов быв учени́к, Па́вла му́драго Богоглаго́ливаго,/ с тем ра́дуешися,/ ве́чнующее насле́дуеши наслажде́ние,/ Колосса́ев удобре́ние. Сла́ва Отцу́ и Сы́ну и Свято́му Ду́ху. Собра́шася лю́дие в па́мяти светоно́сней твое́й воспе́ти Благода́вца Спа́са/ и до́блия, Архи́ппе, боле́зни твоя́, я́же му́жески претерпе́л еси́,/ низложи́в многоко́зненнаго. И ны́не и при́сно и во ве́ки веко́в. Ами́нь. Богородичен: Нося́щи Христа́ на объя́тиих, ма́нием нося́щаго вся,/ Сего́, я́ко Сы́на Твоего́, моли́, от рук врага́ мя, Пречи́стая, изба́вити/ и за милосе́рдия бе́здну объя́ти и спасти́ мя.

Минея, 17 Января, Кано́н преподо́бнаго Глас 8 Песнь 1 Ирмос: Колесницегони́теля фарао́ня погрузи́/ чудотворя́й иногда́/ Моисе́йский жезл, крестообра́зно порази́в/ и раздели́в мо́ре, Изра́иля же беглеца́, пешехо́дца спа́се,/ песнь Бо́гови воспева́юща. Припев: Преподо́бне о́тче Анто́ние, моли́ Бо́га о на́с. Безсме́ртия и жи́зни е́мься ве́чныя я́ве/ и Трисия́нныя зари́, о́тче, насыща́яся,/ просвеще́нием благода́ти омраче́нную ду́шу мою́ озари́ти помоли́ся,/ я́ко да досто́йно воспою́ тя. Припев: Преподо́бне о́тче Анто́ние, моли́ Бо́га о на́с. Млад сый во́зрастом телесе́,/ нов путь доброде́тели восприе́м, сим безбе́дно ше́ствовал еси́,/ зако́ну но́вому повину́яся Спа́сову, треблаже́нне,/ и живоно́сным повеле́нием Ева́нгелия после́дуя. Сла́ва Отцу́ и Сы́ну и Свято́му Ду́ху. Трисо́лнечным сия́нием, всему́дре, озаря́емь,/ злоу́мное, блаже́нне, де́монов свере́пство, и звере́й зия́ния,/ и ран боле́зни, я́коже паучи́ну, разори́л еси́,/ Боже́ственным разжиза́емь жела́нием. И ны́не и при́сно и во ве́ки веко́в. Ами́нь. Богородичен: Я́ко Бо́жия Ма́ти,/ дерзнове́ние иму́щи к ро́ждшемуся из Тебе́ Единоро́дному Сло́ву,/ и Отцу́ Собезнача́льному, и Соесте́ственному Ду́ху,/ моля́щи не преста́й от бед спасти́, Всенепоро́чная,/ Тя, Богоро́дицу, сла́вящия. Песнь 3 Ирмос: Утвержде́й в нача́ле Небеса́ ра́зумом/ и зе́млю на вода́х основа́вый,/ на ка́мени мя, Христе́, за́поведей Твои́х утверди́,/ я́ко несть свят, па́че Тебе́, Еди́не Человеколю́бче. Припев: Преподо́бне о́тче Анто́ние, моли́ Бо́га о на́с. Утвержде́нным по́мыслом и кре́пким терпе́нием страсте́й увяди́л еси́ пла́мень,/ в безстра́стия све́тлую оде́жду, Анто́ние, оде́ялся еси́, о́тче, и спасе́ния ри́зу. Припев: Преподо́бне о́тче Анто́ние, моли́ Бо́га о на́с. Крепчашия прило́ги де́монов дерза́ющих/ и зве́рскими о́бразы подо́бящихся,/ пренебре́гл еси́ тех не́мощную си́лу,/ кре́пкаго бо име́л еси́ во бране́х Спомо́щника. Сла́ва Отцу́ и Сы́ну и Свято́му Ду́ху. Богоно́сец, нача́ла тьмы и вла́сти обличи́в воздержа́нием кре́пким,/ до́блественный победи́тель, Анто́ние, был еси́,/ по́стников сла́ва, мона́шествующих похвала́. И ны́не и при́сно и во ве́ки веко́в. Ами́нь. Богородичен: Умерщвле́нный мой ум живо́тным де́йством,/ из Тебе́ я́вльшимся ми́ру, воздви́гни, Чи́стая, и к жи́зни наста́ви,/ я́же сме́рти две́ри разо́ршая еди́на Рождество́м Твои́м. Седален, глас 8 Ду́шу твою́ связа́в любо́вию Христо́вою,/ земна́я возненави́дев вся му́дре,/ водвори́лся еси́, о́тче преподо́бне, в пусты́нях и гора́х,/ разу́мнаго бо дре́ва вкуси́в, сла́вне,/ я́ко от незаходи́мых, таи́нниче, а́нгельски просия́л еси́./ Те́мже и, мрак проше́д пло́ти твоея́,/ тьму отгна́л еси́ де́монов, Анто́ние,/ и, мона́шествующих предызбра́нный,/ моли́ Христа́ Бо́га прегреше́ний оставле́ние пода́ти/ чту́щим любо́вию святу́ю па́мять твою́. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Я́ко Всенепоро́чная Неве́сто Творца́,/ я́ко Неискусому́жная Ма́ти Изба́вителя,/ прия́телище я́ко су́щи Уте́шителя, Всепе́тая,/ беззако́ния мя су́ща скве́рное оби́телище и де́монов игра́лище в ра́зуме бы́вша,/ потщи́ся от тех злоде́йства мя изба́вити/ и све́тлое жили́ще доброде́телей соверши́, Светоно́сная Нетле́нная./ Отжени́ о́блак страсте́й, и Вы́шняго прича́стия сподо́би,/ и Све́та Невече́рняго моли́твами Твои́ми. Песнь 4 Ирмос: Ты моя́ кре́пость, Го́споди,/ Ты моя́ и си́ла,/ Ты мой Бог, Ты мое́ ра́дование,/ не оста́вль не́дра О́тча/ и на́шу нищету́ посети́в./ Тем с проро́ком Авваку́мом зову́ Ти:/ си́ле Твое́й сла́ва, Человеколю́бче. Припев: Преподо́бне о́тче Анто́ние, моли́ Бо́га о на́с. Доброде́телей ле́ствицу Боже́ственную употреби́в,/ к высоте́, о́тче, возше́л еси́/ и Бо́га ви́дел еси́, на ней утвержде́на/ и да́ры раздава́юща руко́ю богате́йшею ве́рно пою́щим:/ си́ле Твое́й сла́ва, Человеколю́бче. Припев: Преподо́бне о́тче Анто́ние, моли́ Бо́га о на́с. Весь Бо́гу освяти́лся еси́, Анто́ние,/ еди́н Еди́ному, всему́дре, единя́яся доброде́телию и бесе́дами/ и Богоявле́ния, я́ко чист, сподобля́емь/ земли́ бо и земны́х отступи́в,/ досто́йно Небе́сное обре́л еси́ наслажде́ние. Сла́ва Отцу́ и Сы́ну и Свято́му Ду́ху. Ум и ду́шу очи́стив, Анто́ние, пре́лесть, о́тче, душегу́бную,/ и кова́рствия, и ле́сти го́рькия, и мечта́ния враго́в обличи́л еси́,/ пострада́в бо, навы́кл еси́/ и, научи́вся, учи́ши мона́шествующих мно́жества, всеблаже́нне. И ны́не и при́сно и во ве́ки веко́в. Ами́нь. Богородичен: Бо́га, из Тебе́ воплоще́ннаго, моли́, непрело́жно, еже́ бе, пребы́вша/ и есте́ственно равна́ Отцу́, и Тебе́, Ро́ждшей, бы́вша Единосу́щна,/ проще́ние прегреше́ний и душ спасе́ние пою́щим Тя ве́рою дарова́ти. Песнь 5 Ирмос: Вску́ю мя отри́нул еси́/ от лица́ Твоего́, Све́те Незаходи́мый,/ и покры́ла мя есть чужда́я тьма, окая́ннаго?/ Но обрати́ мя и к све́ту за́поведей Твои́х/ пути́ моя́ напра́ви, молю́ся. Припев: Преподо́бне о́тче Анто́ние, моли́ Бо́га о на́с. Живу́ща в тебе́ име́я вся ви́дящаго Бо́га, блаже́нне,/ науча́юща тя, и просвеща́юща, и умудря́юща,/ душ, треблаже́нне, чи́стых и блаже́нных восхо́ды зре́ти сподо́бился еси́. Сла́ва Отцу́ и Сы́ну и Свято́му Ду́ху. Исцеле́ний тебе́ благода́ть на неду́ги разли́чныя дарова́/ и на ду́хи нечи́стыя Христо́с власть, му́дре:/ естество́ бо, о́тче, победи́в,/ па́че естества́ даро́в причасти́лся еси́ Ду́ха. И ны́не и при́сно и во ве́ки веко́в. Ами́нь. Богородичен: Тя сте́ну иму́ще и предста́тельством Твои́м соблюда́еми,/ Твое́ю Боже́ственною сла́вою хваля́щеся, Тя блажи́м:/ Ты бо, Всечи́стая, душа́м на́шим источа́еши весе́лие и ра́дование. Песнь 6 Ирмос: Бе́здна грехо́в и прегреше́ний бу́ря мя смуща́ет/ и во глубину́ ну́жднаго ре́ет мя отча́яния,/ но Твою́ кре́пкую ру́ку мне простри́, я́ко Петро́ви,/ о Управи́телю! и спаси́. Припев: Преподо́бне о́тче Анто́ние, моли́ Бо́га о на́с. Зако́нное страда́льчески житие́ от мя́гких ногте́й восприи́м, Богому́дре,/ да́же до конца́ соблю́л еси́/ и, я́ко Боже́ствен до́блественник,/ вене́ц прия́л еси́ побе́ды от всех Ца́рствующаго. Сла́ва Отцу́ и Сы́ну и Свято́му Ду́ху. Иму́ще тя к Бо́гу моли́твенника крепча́йша, блаже́нне,/ и о́бщника попече́ний, и предста́теля, и побо́рника, и хода́тая благоче́стна,/ от вся́ких спаса́емся бед, и напа́стей, и обстоя́ний. И ны́не и при́сно и во ве́ки веко́в. Ами́нь. Богородичен: Вознесла́ еси́ всеи́стинно па́дшееся челове́ческое существо́, во зра́це Боже́ственнем/ и Отца́ в ра́венстве, ви́димаго Сы́на неизме́ннаго, Богома́ти,/ без се́мене во чре́ве поноси́вши. Кондак, глас 2 Жите́йския молвы́ отри́нув,/ безмо́лвно житие́ сконча́л еси́,/ Крести́теля подража́яй вся́ким о́бразом, преподо́бнейший,/ с ним у́бо тя почита́ем,/ отце́в нача́льниче, Анто́ние. Икос Христо́в глас услы́шав, ше́ствовал еси́ в след Того́ за́поведей,/ наг жития́ быв, и отве́ргл еси́ попече́ния вся/ стяжа́ний, име́ний и рабо́в твои́х,/ и сестры́ любле́ние, Богоно́се Анто́ние,/ и, еди́н в пусты́нях Бо́гу бесе́дуя чисте́йше, ра́зума благода́ть прия́л еси́,/ ю́же ми посли́, в пе́снех тя пою́щему,/ отце́в нача́льниче, Анто́ние. Песнь 7 Ирмос: Бо́жия снизхожде́ния/ огнь устыде́ся в Вавило́не иногда́,/ сего́ ра́ди о́троцы в пещи́, ра́дованною ного́ю,/ я́ко во цве́тнице, лику́юще, поя́ху:/ благослове́н еси́, Бо́же оте́ц на́ших. Припев: Преподо́бне о́тче Анто́ние, моли́ Бо́га о на́с. Ча́ши бы́ша арома́т лани́ты твоя́,/ доброде́телей благово́ние и спасе́ние благоуха́ющий, я́ко от цве́тника, ве́рою зову́щим:/ благослове́н Бог оте́ц на́ших. Сла́ва Отцу́ и Сы́ну и Свято́му Ду́ху. Благода́ть Ду́ха Всесвята́го, в тя все́льшися,/ духо́в гони́теля лука́вствия, о́тче, соде́ла/ и мона́шествующих обучи́теля, зову́ща:/ благослове́н Бог оте́ц на́ших. И ны́не и при́сно и во ве́ки веко́в. Ами́нь. Богородичен: Мари́ю Пречи́стую и Всесвяту́ю восхва́лим:/ То́ю бо благода́ть нам источа́ется па́че ума́ даро́в,/ я́ко от пото́ка Боже́ственныя бла́гости,/ Ю́же благочести́вым по́мыслом ны́не ублажи́м. Песнь 8 Ирмос: Седмери́цею пещь/ халде́йский мучи́тель/ Богочести́вым неи́стовно разжже́./ Си́лою же лу́чшею спасе́ны, сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки. Припев: Преподо́бне о́тче Анто́ние, моли́ Бо́га о на́с. В моли́твах бо́дрое, в поще́ниих благомо́щное, терпели́вное в напа́стех, Анто́ние,/ ума́ чистото́ю на земли́, я́ко А́нгел, показу́я, Бо́гу вопия́л еси́:/ о́троцы, благослови́те, свяще́нницы, воспо́йте,/ лю́дие, превозноси́те во вся ве́ки. Припев: Преподо́бне о́тче Анто́ние, моли́ Бо́га о на́с. Моли́твами, преподо́бне, и мольба́ми приближа́яся ты непреста́нно к Бо́гу,/ восте́кл еси́ к высоте́ превзя́тей, де́монских сете́й избе́гл,/ свободи́вся же тех мучи́тельства, Богому́дре, воспева́еши:/ свяще́нницы, по́йте,/ лю́дие, превозноси́те во вся ве́ки. Сла́ва Отцу́ и Сы́ну и Свято́му Ду́ху. Но́вый Моисе́й быв, в пусты́ни побе́ду на враги́ и бори́тели поста́вил еси́,/ лю́ди предводя́, по́стников собо́р в весе́лии и но́вом жи́тельстве,/ вопию́щих Влады́це:/ свяще́нницы, благослови́те, лю́дие, превозноси́те во вся ве́ки. И ны́не и при́сно и во ве́ки веко́в. Ами́нь. Богородичен: Богороди́тельнице Всечи́стая,/ души́ моея́ я́звы и грехо́вныя стру́пы очи́сти,/ исто́чниками омыва́ющи, су́щими из боку́ Рождества́ Твоего́/ и су́щими из того́ очища́ющи струя́ми,/ к Тебе́ бо взыва́ю, и к Тебе́ прибега́ю,/ и Тя призыва́ю, Богоблагода́тную. Песнь 9 Ирмос: Ужасе́ся о сем Не́бо,/ и земли́ удиви́шася концы́,/ я́ко Бог яви́ся челове́ком пло́тски/ и чре́во Твое́ бысть простра́ннейшее Небе́с/ Тем Тя, Богоро́дицу,/ А́нгелов и челове́к чинонача́лия велича́ют. Припев: Преподо́бне о́тче Анто́ние, моли́ Бо́га о на́с. Наста́ светоно́сный твой пра́здник, всеблаже́нне о́тче Анто́ние,/ испо́лнь ра́дости, испо́лнь весе́лия духо́внаго,/ испо́лнь Свята́го Ду́ха, испо́лнь благоуха́ния и просвеще́ния,/ и ны́не, иму́ще тя поще́ния пра́вило и законополо́жника, ра́дуемся. Припев: Преподо́бне о́тче Анто́ние, моли́ Бо́га о на́с. Не преста́й моля́ Изба́вителя, всечестны́й о́тче,/ дарова́ти благогове́йно па́мять твою́ соверша́ющим свяще́нную прегреше́ний оставле́ние,/ дарова́ний раздая́ние, Боже́ственное предста́тельство,/ душ спасе́ние, ве́чное ра́дование. Сла́ва Отцу́ и Сы́ну и Свято́му Ду́ху. Равноа́нгелен пожи́в на земли́, равноа́нгельну обре́л еси́ све́тлость,/ тех бо Богови́днейшим сия́нием в прича́стии был еси́./ С ни́миже и ра́дуешися всегда́, я́ко Боже́ственный проро́к,/ я́ко му́ченик венцено́сец,/ я́ко мона́шествующих верхо́вник. И ны́не и при́сно и во ве́ки веко́в. Ами́нь. Богородичен: Зачала́ еси́, Де́во, без се́мене/ вся́ческая созда́вшаго Сло́во Бо́жие, кроме́ хоте́ний плотски́х,/ и без истле́ния родила́ еси́, без боле́зней ма́терних./ Тем Тя, Богоро́дицу, и язы́ком, и се́рдцем испове́дующе, велича́ем. Светилен Свет единонра́вных показа́лся еси́,/ Све́та ходи́ти стезя́ми благочести́выя научи́в,/ Анто́ние, отце́в о́тче,/ и пла́мень мо́лнии па́ки огнь испуща́я и попаля́я де́монов полки́. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Тя песньми немо́лчными ублажа́ем, Дево,/ я́ко от Тро́ицы Еди́наго родила́ еси́, Богоро́дице,/ и носи́ла еси́ на Боже́ственных объятиих Пресущественное Сло́во,/ невращно и неизме́нно.

Минея, 19 Мая, Кано́н свята́го Глас 8 Песнь 1 Ирмос: Колесницегони́теля фарао́ня погрузи́/ чудотворя́й иногда́/ Моисе́йский жезл, крестообра́зно порази́в/ и раздели́в мо́ре,/ Изра́иля же беглеца́, пешехо́дца спасе́,/ песнь Бо́гови воспева́юща. Припев: Преподо́бне о́тче Корни́лие, моли́ Бо́га о на́с. Сло́во ми даждь, Сло́ве Бо́жий, Светода́вче Христе́,/ воспе́ти све́тлое и светоно́сное житие́ Твоего́ уго́дника, преподо́бнаго Корни́лия./ Моли́твами его́ разори́ мрак сердца́ моего́/ и Твои́м све́том души́ озари́тися, молю́ся. Припев: Преподо́бне о́тче Корни́лие, моли́ Бо́га о на́с. Влады́чнему любостра́нству, преподо́бне, подо́бяся,/ сам стра́нствовати изво́лил еси́./ Те́мже и Всеви́дящее О́ко, ви́дев твое́ благо́е изволе́ние,/ да́ром чуде́с обогати́ тя, Корни́лие, я́ко пресла́вно. Сла́ва Отцу́ и Сы́ну и Свято́му Ду́ху. Трисо́лнечным сия́нием, Богому́дре, озаря́ем,/ зло́е, блаже́нне, бесо́в шата́ние и вра́жия преще́ния/ ра́нами боле́зней, я́коже паучи́ну, разори́л еси́,/ Бо́жиим Ду́хом разжига́емь, Корни́лие блаже́нне. И ны́не и при́сно и во ве́ки веко́в. Ами́нь. Богородичен: Я́ко Бо́жия Ма́ти, дерзнове́ние иму́щи/ к ро́ждшемуся из Тебе́ Единоро́дному Сло́ву,/ и Отцу́ Собезнача́льному, и Соесте́ственному Ду́ху Свято́му,/ моля́щися не преста́й от бед спасти́, Всенепоро́чная,/ Тя, Богоро́дицу, сла́вящия. Песнь 3 Ирмос: Утвержде́й в нача́ле небеса́ ра́зумом/ и зе́млю на вода́х основа́вый,/ на ка́мени мя, Христе́, за́поведей Твои́х утверди́,/ я́ко несть свят, па́че Тебе́, еди́не Человеколю́бче. Припев: Преподо́бне о́тче Корни́лие, моли́ Бо́га о на́с. Кто изрещи́ мо́жет зе́млен твоя́ боле́зни, о́тче, и по́двиги,/ и́хже ра́ди досто́йну мзду стяжа́л еси́ от Бо́га?/ и был еси́ прия́телище Боже́ственнаго Ду́ха,/ преподо́бен и и́стинен, пра́веден и непоро́чен. Припев: Преподо́бне о́тче Корни́лие, моли́ Бо́га о на́с. Укре́пль ум ра́зумом Боже́ственным, о́тче Корни́лие,/ и прему́дростию духо́вною и сло́вом укра́шен,/ тем привле́кл еси́ мно́гих ду́ши во спасе́ние,/ яви́в мона́хом изве́стно жития́ прописа́ние. Сла́ва Отцу́ и Сы́ну и Свято́му Ду́ху. Зло́бы нача́льник враг, хотя́ тебе́ па́кость сотвори́ти, преподо́бне Корни́лие,/ лука́вых челове́к на тя вооружа́ет:/ тебе́ прирази́вся, постыде́ся, Христу́ бо тя соблюда́ющу. И ны́не и при́сно и во ве́ки веко́в. Ами́нь. Богородичен: Херуви́м и Серафи́м превы́шши яви́лася еси́, Богоро́дице:/ Ты бо прия́ла еси́ невмести́маго Бо́га во Твое́м чре́ве, Нескве́рная./ Те́мже Тя, вси ве́рнии, пе́сньми, Чи́стая, ублажа́ем. Седален, глас 8 Христо́вою любо́вию связа́в твою́ ду́шу/ и поще́ния страда́ньми утверди́вся,/ зла́та светле́йши, благоче́стием облиста́л еси́/ и, чи́стое прия́телище быв Ду́ху, лука́вых духо́в тьму разгна́л еси́;/ тем собра́в и́ночествующих мно́жества,/ па́стырь им был еси́ и свети́льник све́тел, Корни́лие преподо́бне./ Моли́ Христа́ Бо́га грехо́в оставле́ние дарова́ти/ чту́щим любо́вию святу́ю па́мять твою́. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Я́ко Всенепоро́чная Неве́сто Творцу́,/ я́ко Неискусому́жная Ма́ти Изба́вителю,/ прия́телище я́ко су́щи Уте́шителя, Препе́тая,/ беззако́нию мя су́ща скве́рное оби́телище и бесо́м игра́лище, в ра́зуме бы́вша,/ потщи́ся от тех злоде́йства мя изба́вити/ и све́тлое жили́ще доброде́телей соверши́, Светоно́сная Нетле́нная,/ отжени́ о́блак страсте́й и Вы́шняго прича́стия сподо́би/ и Све́та невече́рняго моли́твами Твои́ми. Песнь 4 Ирмос: Ты моя́ кре́пость, Го́споди,/ Ты моя́ и си́ла,/ Ты мой Бог, Ты мое́ ра́дование,/ не оста́вль не́дра О́тча/ и на́шу нищету́ посети́в./ Тем с проро́ком Авваку́мом зову́ Ти:/ си́ле Твое́й сла́ва, Человеколю́бче. Припев: Преподо́бне о́тче Корни́лие, моли́ Бо́га о на́с. Све́тлое твое́ житие́ я́ко пра́вило изве́стно вся́кия, о́тче, доброде́тели показа́ся/ в моли́твах и поще́ниих, бде́ниих же и мольба́х,/ я́же ко Христу́ Человеколю́бцу. Припев: Преподо́бне о́тче Корни́лие, моли́ Бо́га о на́с. Сна твои́ма очи́ма не дал еси́, блаже́нне Корни́лие,/ ни ве́ждома дрема́ния, до́ндеже сподо́бился еси́ пра́ведных селе́ния,/ е́же угото́ва Бог, преподо́бне, лю́бящим Его́. Сла́ва Отцу́ и Сы́ну и Свято́му Ду́ху. Стеня́, и пла́ча, и се́туя, умиле́нием и слеза́ми кропя́ зе́млю,/ при́сно, о́тче Богому́дре, моли́тву соверша́л еси́,/ до́ндеже обре́л еси́ Боже́ственное утеше́ние во гра́де Бо́жии/ и со все́ми святы́ми, преподо́бне, всели́лся еси́. И ны́не и при́сно и во ве́ки веко́в. Ами́нь. Богородичен: Бога, из Тебе́ воплоще́ннаго непрело́жно, единосу́щна Отцу́,/ и Тебе́, ро́ждшей, ра́вна по челове́честву, моли́/ проще́ние согреше́ний и душа́м спасе́ние/ пою́щим Тя ве́рою дарова́ти. Песнь 5 Ирмос: Вску́ю мя отри́нул еси́/ от лица́ Твоего́, Све́те незаходи́мый,/ и покры́ла мя есть чужда́я тьма, окая́ннаго?/ Но обрати́ мя и к све́ту за́поведей Твои́х/ пути́ моя́ напра́ви, молю́ся. Припев: Преподо́бне о́тче Корни́лие, моли́ Бо́га о на́с. Погаси́в стра́сти росо́ю подвиго́в твои́х, о́тче блаже́нне,/ бога́тно возже́гл еси́ огне́м любве́ и ве́ры воздержа́ния свети́льник,/ и просвеще́ние безстра́стия, и дне сын яви́лся еси́. Припев: Преподо́бне о́тче Корни́лие, моли́ Бо́га о на́с. Исцеле́ний тебе́ благода́ть Христо́с в неду́зех разли́чных дарова́/ и на ду́хи нечи́стыя власть, му́дре:/ естество́ бо, о́тче, победи́в, па́че естества́/ дарова́ний сподо́бился еси́ Ду́ха. Сла́ва Отцу́ и Сы́ну и Свято́му Ду́ху. Ра́йския добро́ты жела́я, преподо́бне Корни́лие,/ в слеза́х, и воздыха́ниих, и бде́ниих и моли́твах твою́ жизнь препроводи́л еси́/ и сего́ ра́ди по сме́рти от Христа́ чудесы́ просла́вился еси́. И ны́не и при́сно и во ве́ки веко́в. Ами́нь. Богородичен: Тя сте́ну иму́щии и заступле́нием Твои́м соблюда́емии,/ Твое́ю Боже́ственною сла́вою хва́лящеся, Тя ублажа́ем:/ Ты бо, Пречи́стая, душа́м на́шим источа́еши весе́лие и ра́дование. Песнь 6 Ирмос: О́чи́сти мя, Спа́се,/ мно́га бо беззако́ния моя́,/ и из глубины́ зол возведи́, молю́ся,/ к Тебе́ бо возопи́х, и услы́ши мя,/ Бо́же спасе́ния моего́. Припев: Преподо́бне о́тче Корни́лие, моли́ Бо́га о на́с. Главы́ враго́в мы́сленных сокруши́ти мо́лимся/ и ви́димыя под но́зе на́ша покори́ти, моли́ся, преподо́бне,/ чту́щим любо́вию святу́ю па́мять твою́. Припев: Преподо́бне о́тче Корни́лие, моли́ Бо́га о на́с. Жития́ твоего́ исправле́ния и веща́ния, о́тче,/ всю обтеко́ша отню́д вселе́нную,/ и́бо в пресла́вную дости́гл еси́ высоту́:/ Бог бо тя просла́ви и сла́вна всем сотвори́. Сла́ва Отцу́ и Сы́ну и Свято́му Ду́ху. Ни́щих строи́тель, вдов предста́тель, промы́сленник си́рых,/ печа́льных утеше́ние, па́дших исправле́ние,/ оби́димых засту́пник скор был еси́,/ твоему́, о́тче, подо́бяся учи́телю. И ны́не и при́сно и во ве́ки веко́в. Ами́нь. Богородичен: Вознесла́ еси́ вои́стинну па́дшее челове́ческое существо́,/ о́браз Боже́ственный и Отцу́ ра́венство иму́ща,/ ви́димаго Сы́на неизме́нна, Богома́ти, без се́мене во чре́ве поноси́вши. Кондак, глас 8 Го́сподеви, от Святы́я Де́вы возсия́вшу ми́рови,/ и Тому́ измла́да, я́ко А́нгел, послужи́л еси́, блаже́нне,/ и си́лою Его́ пусты́ню, я́ко град, сотвори́л еси́,/ мно́жество же учени́к в ней собра́л еси́,/ и́хже Богодохнове́нными уче́ньми просвети́л еси́./ Тем вопие́м ти:/ ра́дуйся, о́тче наш Корни́лие, и́ноком Боже́ственное удобре́ние. Икос Зва́нию Го́спода твоего́ после́довал еси́ приле́жно, блаже́нне,/ вся, я́же в ми́ре кра́сная, Его́ ра́ди преоби́дев./ Те́мже вопие́м ти:/ ра́дуйся, я́ко, измла́да Христа́ возлюби́в,/ си́лою Его́ претерпе́л еси́ пусты́нное озлобле́ние усе́рдно;/ ра́дуйся, я́ко Вы́шняго по́мощию бесо́вскую пре́лесть попра́л еси́./ Ра́дуйся, я́ко прече́стен храм Бо́жия Ма́тере воздви́гл еси́;/ ра́дуйся, я́ко в нем тобо́ю Бог прославля́ется./ Ра́дуйся, я́ко собра́л еси́ учени́к мно́жество;/ ра́дуйся, я́ко с те́ми приле́жно Го́сподеви рабо́тал еси́./ Ра́дуйся, я́ко удиви́л еси́ А́нгелы житие́м твои́м;/ ра́дуйся, я́ко тобо́ю челове́цы по́льзовашася./ Ра́дуйся, правосла́вному наро́ду похвала́;/ ра́дуйся, христолюби́вому во́инству утвержде́ние./ Ра́дуйся, я́ко моли́твами твои́ми сопроти́внии побежда́ются;/ ра́дуйся, о́тче наш Корни́лие, и́ноком Боже́ственное удобре́ние. Песнь 7 Ирмос: Бо́жия снизхожде́ния/ огнь устыде́ся в Вавило́не иногда́,/ сего́ ра́ди о́троцы в пещи́, ра́дованною ного́ю,/ я́ко во цве́тнице, лику́юще, поя́ху:/ благослове́н еси́, Бо́же оте́ц на́ших. Припев: Преподо́бне о́тче Корни́лие, моли́ Бо́га о на́с. Истощи́в тул стрел, враг вселука́вый устраши́ти тя не возмо́же,/ си́лою бо Вы́шняго укрепля́емь и Того́ по́мощию вооружа́емь, преподо́бне, пел еси́:/ благослове́н еси́, Бо́же оте́ц на́ших. Припев: Преподо́бне о́тче Корни́лие, моли́ Бо́га о на́с. Бу́дущия жи́зни взыска́в, сла́ву маловре́менную небре́гл еси́/ и, в пусты́ню всели́вся, блаже́нне, со зверьми́ жи́ти изво́лил еси́, поя́:/ благослове́н еси́, Бо́же оте́ц на́ших. Сла́ва Отцу́ и Сы́ну и Свято́му Ду́ху. Враг, прирази́вся тебе́, преподо́бне, разбо́йники на тя посыла́ет,/ постыде́в же ся, душе́внаго твоего́ хра́ма не поколеба́,/ утвержде́н бо бе на ка́мени. И ны́не и при́сно и во ве́ки веко́в. Ами́нь. Богородичен: Го́ру Тя проро́к Дании́л Боже́ственным Ду́хом нарече́, Де́во,/ из нея́же ка́мень без рук отсече́ся/ и сокруше́ние соде́я истука́нней пре́лести. Песнь 8 Ирмос: Седмери́цею пещь/ халде́йский мучи́тель/ Богочести́вым неи́стовно разжже́,/ си́лою же лу́чшею спасе́ны, сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́и́те,/ лю́дие, превозноси́те во вся ве́ки. Припев: Преподо́бне о́тче Корни́лие, моли́ Бо́га о на́с. Царю́ всех и Бо́гу со святы́ми предстоя́,/ с ни́миже, Корни́лие, моли́ся вои́нству на́шему побе́ды на ва́рвары дарова́ти/ и грехо́в оставле́ние твою́ па́мять почита́ющим и пою́щим вы́ну:/ свяще́нницы, воспо́йте, лю́дие, превозноси́те во вся ве́ки. Припев: Преподо́бне о́тче Корни́лие, моли́ Бо́га о на́с. Госпо́дних за́поведей изве́стен храни́тель был еси́,/ раздробля́я а́лчущим хлеб тво́й, преподо́бне,/ та́ющую гла́дом доброде́телей ду́шу мою́ насы́ти, блаже́нне, пою́ща любо́вию:/ свяще́нницы, воспо́йте, лю́дие, превозноси́те во вся ве́ки. Сла́ва Отцу́ и Сы́ну и Свято́му Ду́ху. Ва́рвар иногда́ наше́ствие, и ко оби́тели твое́й устреми́вшихся, Боже́ственною си́лою устраши́л еси́./ И ны́не на нас мы́сленных враг устремле́ние моли́твами твои́ми разори́, пою́щих:/ свяще́нницы, воспо́йте, лю́дие, превозноси́те во вся ве́ки. И ны́не и при́сно и во ве́ки веко́в. Ами́нь. Богородичен: К Богоро́дице все твое́ упова́ние име́л еси́, Корни́лие,/ и Тоя́ призыва́нием вра́жия се́ти вся расто́ргл еси́ и лю́тых воста́ние,/ с Не́юже, преподо́бне, моли́ся о и́же любо́вию честну́ю твою́ па́мять чту́щих и вопию́щих:/ свяще́нницы, воспо́йте, лю́дие, превозноси́те во вся ве́ки. Песнь 9 Ирмос: Ужасе́ся о сем Не́бо/ и земли́ удиви́шася концы́,/ я́ко Бог яви́ся челове́ком пло́тски/ и чре́во Твое́ бысть простра́инейшее небе́с./ Тем Тя, Богоро́дицу,/ А́нгелов и челове́к чинонача́лия велича́ют. Припев: Преподо́бне о́тче Корни́лие, моли́ Бо́га о на́с. Бе́гая сла́вы от челове́к, в пусты́ню всели́лся еси́,/ вся уме́ты вмени́в, да Христа́ еди́наго приобря́щеши,/ Его́же ра́ди пусты́нная озлобле́ния претерпе́л еси́,/ да тле́нными нетле́нная измени́ши, Корни́лие. Припев: Преподо́бне о́тче Корни́лие, моли́ Бо́га о на́с. От ме́ста отгони́ти тя враг покуша́вся,/ мона́хи на убие́ние твое́ поощря́ше, Корни́лие преподо́бне,/ я́же до́бре уче́нием твои́м наказа́л еси́/ и, я́коже твоя́ ча́да, при́сно тех возлюби́л еси́. Сла́ва Отцу́ и Сы́ну и Свято́му Ду́ху. Не забу́ди, посеща́я чад твои́х, Корни́лие преподо́бне,/ к ра́це моще́й твои́х притека́ющих и любо́вию па́мять твою́ торжеству́ющих,/ от вся́ких искуше́ний вра́жиих изба́витися,/ всех Влады́це моли́ся, блаже́нне. И ны́не и при́сно и во ве́ки веко́в. Ами́нь. Богородичен: Зачала́ еси́, Де́во, без се́мене, вся́ческая созда́вшаго Сло́во Бо́жие,/ кроме́ хоте́ния пло́ти,/ и без истле́ния родила́ еси́, без боле́зней ма́терских./ Тем Тя, Богоро́дице, язы́ком и се́рдцем испове́дающе, велича́ем. Светилен Страстна́го омраче́ния ду́шу очи́стив, преподо́бне,/ честны́м поще́нием и моли́твами непреста́нными,/ зерца́ло был еси́ Боже́ственных сия́ний,/ свети́льниче мона́хов, Корни́лие Богому́дре.

Минея, 5 Сентября, Канон святаго Глас 8 Песнь 1 Ирмос: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:// Изба́вителю и Бо́гу на́шему пои́м. Припев: Святы́й проро́че Заха́рие, моли́ Бо́га о на́с. Па́мять, проро́че, твою́ восхвали́ти/ Ду́ха благода́ть молю́ помощи́ мне твои́м хода́тайством, взыва́я:/ Изба́вителю Бо́гу на́шему воспои́м. Припев: Святы́й проро́че Заха́рие, моли́ Бо́га о на́с. Житие́ твое́ непоро́чно обре́теся,/ свяще́нства украси́ся оде́ждею и проро́чества светоно́сными сия́нии,/ богоглаго́ливе, блаже́нне. Сла́ва Отцу́ и Сы́ну и Свято́му Ду́ху. Зако́нным венце́м главу́ украси́в, Заха́рие,/ яви́лся еси́ священноявле́нен, вопия́:/ Изба́вителю Бо́гу на́шему пои́м. И ны́не и при́сно и во ве́ки веко́в. Ами́нь. Богородичен: Поди́ра оде́ждею, я́ко Ааро́н, оде́ян,/ ю́же от ко́рене Иессе́ева прозя́бшую Отрокови́цу прия́л есй,/ Изба́вителя во чре́ве носи́вшую. Песнь 3 Ирмос: Ты еси́ Утвержде́ние/ притека́ющих к Тебе́, Го́споди,/ Ты еси́ Свет омраче́нных,// и пое́т Тя дух мой. Припев: Святы́й проро́че Заха́рие, моли́ Бо́га о на́с. Егда́ кади́ло сложе́ния приноси́л еси́, архиере́е,/ тогда́ Предте́чи прия́л еси́ провозвеще́ние. Припев: Святы́й проро́че Заха́рие, моли́ Бо́га о на́с. Ми́ром свяще́ния свяще́нствовати тя пома́за, я́ко Ааро́на,/ тем виде́ния Ангелова сподо́бился еси́. Сла́ва Отцу́ и Сы́ну и Свято́му Ду́ху. У́тро, провозвеща́ющее вселе́нней Тя, Со́лнца Разу́мнаго, Спа́се,/ Заха́рия Иоа́нна роди́л есть. И ны́не и при́сно и во ве́ки веко́в. Ами́нь. Богородичен: Упра́ви житие́ мое́, Богороди́тельнице Всечи́стая и жизнь,/ я́же Заха́риин дом уясни́вшая. Седален, глас 8 Свяще́нствовав Бо́гу по зако́ну/ и проро́чествовав Христа́ из Де́вы, Заха́рие, воплоще́нна от Ду́ха Свя́та,/ яви́лся еси́ вселе́нней столп све́тел,/ с высоты́ Пра́вды Восто́ка, весь мир осия́юща и в путь ми́рен направля́юща но́ги на́ша,/ ре́кл еси́, спаса́юща род наш. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Я́же Непреме́ннаго Бо́га поро́ждшая,/ пременя́емое при́сно се́рдце мое́ грехо́м и ле́ностию, прило́гми льсти́ваго,/ утверди́, Блага́я, моли́твами Ма́терними Твои́ми,/ я́ко да и аз благода́рно сла́влю Тя, Богороди́тельнице Мари́е,/ поми́луй ста́до Твое́, е́же стяжа́ла еси́, Всенепоро́чная. Песнь 4 Ирмос: Услы́шах, Го́споди,/ смотре́ния Твоего́ та́инство,/ разуме́х дела́ Твоя́// и просла́вих Твое́ Божество́. Припев: Святы́й проро́че Заха́рие, моли́ Бо́га о на́с. Проро́к Твой, Влады́ко, о́бразы зако́нными ве́рно служа́ше Тебе́/ и благода́ти сподо́бися усмотри́ти Твою́ и́стину. Припев: Святы́й проро́че Заха́рие, моли́ Бо́га о на́с. Све́том Свет прия́л еси́, мра́чнейшим ты ясне́йший, преблаже́нне:/ зако́ном бо и благода́ть ны́не тебе́ приложи́ся. Сла́ва Отцу́ и Сы́ну и Свято́му Ду́ху. Бо́гу предстоя́й, боже́ственный Гаврии́л,/ благовеству́я, яви́ тебе́, блаже́нне, глас Сло́ва и Предте́чу. И ны́не и при́сно и во ве́ки веко́в. Ами́нь. Богородичен: Чи́стое жили́ще Соде́тель, Де́во, тва́ри обре́т Тя, всели́ся,/ Елисаве́тино разреши́вый непло́дство. Песнь 5 Ирмос: У́тренююще, вопия́м Ти:/ Го́споди, спаси́ ны,/ Ты бо еси́ Бог наш,// ра́зве Теба́ ино́го не ве́мы. Припев: Святы́й проро́че Заха́рие, моли́ Бо́га о на́с. Кида́рь положи́ся на главе́ твое́й, о проро́че,/ в начерта́нии имущ и́стинное Боже́ственное свяще́ние. Припев: Святы́й проро́че Заха́рие, моли́ Бо́га о на́с. Ра́дуется тварь рождество́м твои́м, архиере́е,/ ты бо прозя́бл еси́ покая́ния пропове́дника. Сла́ва Отцу́ и Сы́ну и Свято́му Ду́ху. Укра́шено твое́ житие́ препроводи́в,/ за́поведи бо вся Госпо́дня с Елисаве́тою соверши́л еси́. И ны́не и при́сно и во ве́ки веко́в. Ами́нь. Богородичен: Направля́ется к пе́нию язы́к твой, богоглаго́ливе,/ Неискусобра́чную бо во чре́ве нося́щу ви́дел еси́. Песнь 6 Ирмос: Ри́зу мне пода́ждь све́тлу,/ одея́йся све́том, я́ко ри́зою,// Многоми́лостиве Христе́ Бо́же наш. Припев: Святы́й проро́че Заха́рие, моли́ Бо́га о на́с. Зако́на служа́й се́ни,/ яви́ся и благода́ти пропове́дник,/ Спа́се наш, сподо́бися бо ви́дети Твое́ воплоще́ние. Припев: Святы́й проро́че Заха́рие, моли́ Бо́га о на́с. Су́дными словесы́ укра́шься,/ Сло́во присносу́щное, Плоть нося́що,/ Заха́рие свяще́нне, прия́л еси́. Сла́ва Отцу́ и Сы́ну и Свято́му Ду́ху. Яви́лся еси́ внутрь хра́ма, служа́ Бо́гу,/ тайнниче богодухнове́нне,/ иере́й быв досточу́ден. И ны́не и при́сно и во ве́ки веко́в. Ами́нь. Богородичен: Спа́са, Богома́ти, во утро́бе, Де́во, носи́щи, Сло́ва Безнача́льнаго,/ Елисаве́ти позна́лася еси́ проро́чице. Кондак, глас 3 Проро́к днесь и свяще́нник Вы́шняго,/ Заха́рия предложи́, Предте́чев роди́тель,/ трапе́зу своей па́мяти,/ ве́рный пита́я, питие́ бо пра́вды всем раствори́в,/ сего́ ра́ди скончава́ется,// я́ко боже́ственный таи́нник Бо́жия благода́ти. Икос Зако́на молча́нием иера́рх связа́ся Ангела гла́сом,/ А́нгела прие́м Христо́ва прише́ствия, проро́ка и таи́нника,/ с Елисаве́тию непло́дною и целому́дренною,/ и Того́ Рождество́м обнови́ся благода́ть и избавле́ние/ и примире́ние на́ше всеми́рное./ Сего́ пропове́да А́гнца, и Соде́теля,/ и естеству́ Обнови́теля, от неплодныя утро́бы плод подаю́ща,/ Сы́на же, я́вльшася из Де́вы,/ я́ко боже́ственный таи́нник Бо́жия благода́ти. Песнь 7 Ирмос: О́троцы евре́йстии в пещи́/ попра́ша пла́мень дерзнове́нно/ и на ро́су огнь преложи́ша, вопию́ще:// благослове́н еси́, Го́споди Бо́же, во ве́ки. Припев: Святы́й проро́че Заха́рие, моли́ Бо́га о на́с. Егда́ глас вопию́щаго прии́де от непло́дныя,/ па́че естества́ твоего́ язы́ка у́зы разреши́, зва́ти:/ благослове́н еси́, Го́споди Бо́же, во ве́ки. Припев: Святы́й проро́че Заха́рие, моли́ Бо́га о на́с. Люби́мичь роди́ся Женихо́в от непло́дове,/ Рождество́ Де́вы провозвеща́я Я́ве Предте́ча ве́рою зову́щим:/ благослове́н еси́, Го́споди Бо́же, во ве́ки. Сла́ва Отцу́ и Сы́ну и Свято́му Ду́ху. Весь был еси́, Заха́рие, боже́ственный орга́н Ду́ха, треблаже́нне,/ и проро́ка твое́ провозвеща́ше отроча́,/ благослове́н еси́, зову́ща, Го́споди Бо́же, во ве́ки. И ны́не и при́сно и во ве́ки веко́в. Ами́нь. Богородичен: Зако́на исполне́ние Тя, Отроковце,/ глави́зну всего́ проро́чествия Заха́рия зря, позна́ше, вопия́:/ благослове́н, Пречи́стая, Плод Твоего́ чре́ва. Песнь 8 Ирмос: На горе́ святе́й просла́вльшася/ и в купине́ огне́м При́сно де́вы/ Моисе́ови та́йну я́вльшаго/ Го́спода по́йте// и превозноси́те во вся ве́ки. Припев: Святы́й проро́че Заха́рие, моли́ Бо́га о на́с. И́стины показа́ся проро́к,/ Христо́вы бо стези́ Иоа́нн предгряды́й угото́ва Предте́ча,/ блаже́нне иера́рше,/ Его́же превозно́сим во вся ве́ки. Припев: Святы́й проро́че Заха́рие, моли́ Бо́га о на́с. Вити́йствуя, благослови́л еси́ Влады́ку, спасе́ние нам пода́вшаго,/ от Дави́да возсия́вшаго нам пло́тию Го́спода сла́вы,/ Его́же превозно́сим во вся ве́ки. Сла́ва Отцу́ и Сы́ну и Свято́му Ду́ху. Дарова́ний вели́ких сподо́бися, богоявле́ние,/ Предте́чу роди́в, проро́ков всех вы́шшаго,/ Го́спода пою́ща и превознося́ща во вся ве́ки. И ны́не и при́сно и во ве́ки веко́в. Ами́нь. Богородичен: Иера́рх ку́пно и богопропове́дник, Заха́рия/ Де́ве и Ма́тери, Го́спода нося́щей тва́ри, ра́дуяся, поклони́ся,/ Юже превозно́сим во вся ве́ки. Песнь 9 Ирмос: Вои́стину Богоро́дицу/ Тя испове́дуем,/ спасе́ннии Тобо́ю, Де́во Чи́стая,// с безпло́тными ли́ки Тя велича́юще. Припев: Святы́й проро́че Заха́рие, моли́ Бо́га о на́с. Испо́лнился еси́ вдохнове́ния Уте́шителева / и благослови́ти нача́т Го́спода,/ священнотаи́нниче богому́дре и богоблаже́нне. Припев: Святы́й проро́че Заха́рие, моли́ Бо́га о на́с. Глаго́лов исхожде́ния Арха́нгеловых узре́в,/ богоглаго́ливе прехва́льне,/ к благослове́нию язы́к а́бие подви́гнул еси́. Сла́ва Отцу́ и Сы́ну и Свято́му Ду́ху. Страда́ния венцы́ и свяще́нства/ и просвеще́нием проро́чества украси́лся еси́,/ о Заха́рие преблаже́нне и богоглаго́ливе! И ны́не и при́сно и во ве́ки веко́в. Ами́нь. Богородичен: Све́та су́щи прия́телище,/ просвети́, Де́во, помраче́нную ду́шу мою́ страстьми́/ и кроме́шния мя тьмы изба́ви моли́твами Твои́ми. Светилен Пе́рвее гла́сом Ангела умолча́л еси́ в невхо́дных/ за хотя́щее бы́ти прозябе́ние из тебе́ гла́са вопию́щаго/ и ны́не молчи́ши о́наго ра́ди,/ пред невхо́дными заколе́н быв, Заха́рие. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Свет из Све́та возсия́в, Сло́ве, пре́жде денни́цы безле́тно,/ Свет из Ма́тере под ле́том непреме́нно проше́л еси́,/ сия́нии светолу́чными концы́ ми́ра просвеща́я, я́ко Свет ми́ра.

Минея, 10 Января, Канон Глас 5 Песнь 1 Ирмос: Коня́ и вса́дника в мо́ре Чермно́е сокруша́яй бра́ни, мы́шцею высо́кою, Христо́с истрясе́, Изра́иля же спасе́, побе́дную пе́снь пою́ща. Припев: Святи́телю, о́тче Григо́рие, моли́ Бо́га о на́с. Бе́здна сы́й прему́дрости, и ра́зума сокро́вище, и самобла́гости Исто́чник сы́й, дае́ши ми́, Христе́, сла́вныя Твоея́ Це́ркве пе́сньми свети́льника пе́ти Григо́рия. Припев: Святи́телю, о́тче Григо́рие, моли́ Бо́га о на́с. Приими́ учи́телей, Григо́рие, све́тлое удобре́ние, о́тче, убо́гое пе́ние твое́й приноси́мое от любве́ па́мяти, в не́йже Христа́ на́м уми́лостиви. Припев: Святи́телю, о́тче Григо́рие, моли́ Бо́га о на́с. Обре́те очище́ну свяще́нную твою́ ду́шу от страсте́й тиме́ния Сия́ние непристу́пное. Те́мже, я́ко всели́вся в тя́, о́тче, све́т тя́ показа́, науча́юща земны́я концы́. Сла́ва Отцу́ и Сы́ну и Свято́му Ду́ху. Сло́вом, священнотаи́нниче, бога́тым же и му́дрым, честну́ю Це́рковь богосло́вити научи́л еси́ Еди́ницу Тричи́сленную и Тро́ицу Сопресто́льну и Единоче́стну, о Григо́рие! И ны́не и при́сно и во ве́ки веко́в. Ами́нь. Богородичен: Ве́ра да вменя́ется еди́на, а не показа́ние су́щих па́че ума́ чуде́с, Богороди́тельнице Де́во, Твои́х, и́бо Непостижи́маго Бо́га Сло́ва родила́ еси́, обле́кшася в челове́чество. Песнь 3 Ирмос: Водрузи́вый на ничесо́мже зе́млю повеле́нием Твои́м, и пове́сивый неодержи́мо тяготе́ющую, на недви́жимем, Христе́, ка́мени за́поведей Твои́х, Це́рковь Твою́ утверди́, Еди́не Бла́же и Человеколю́бче. Припев: Святи́телю, о́тче Григо́рие, моли́ Бо́га о на́с. Пло́ти у́бо влады́це уму́ взыгра́ния, Всецарю́ же у́м покори́л еси́. Те́мже, непреткнове́нно пу́ть за́поведей проше́д, ты́ Тро́ицы оби́телище бы́л еси́ ле́потно, Григо́рие. Припев: Святи́телю, о́тче Григо́рие, моли́ Бо́га о на́с. Подо́бно я́ростное у́бо на зми́я души́ вооружи́л еси́, всеблаже́нне, жела́ние же Бо́гу все́ ку́пно просте́р, к недомы́сленней и неизме́нней добро́те впери́л еси́, преподо́бне. Припев: Святи́телю, о́тче Григо́рие, моли́ Бо́га о на́с. Дея́нию виде́ние, о́тче, приложи́л еси́, те́мже о́бласть Це́ркве тебе́ принося́, вруча́ет Христо́с, ю́же у́бо непоро́чно я́ко неботаи́нник упра́вил еси́ изря́днейший, всеблаже́нне Григо́рие. Сла́ва Отцу́ и Сы́ну и Свято́му Ду́ху. Проходя́ доброде́телей преде́л, Григо́рие, и восхожде́ния в се́рдцы твое́м ты́ полага́я, от земли́ взя́лся еси́ непреста́нным тече́нием к небе́сному жи́тельству пре́жде от пло́ти изше́ствия твоего́. И ны́не и при́сно и во ве́ки веко́в. Ами́нь. Богородичен: Ты́, Ма́ти Бо́жия, несочта́нно родила́ еси́ из нетле́ннаго Отца́ Возсия́вшаго без боле́зней ма́терних. Те́мже Тя́, Богоро́дицу, воплоще́ннаго ро́ждшую Сло́ва, правосла́вно пропове́дуем. Седален, глас 3 Боже́ственное осия́ние насле́довал еси́, житие́ невеще́ственно пожи́в, тезоимени́тным свяще́нством просия́л еси́, преесте́ственно бо уясни́в уче́ньми, правосла́вием ми́р утверди́л еси́, о́тче преподо́бне. Христа́ Бо́га моли́ дарова́ти на́м ве́лию ми́лость. Песнь 4 Ирмос: Боже́ственное Твое́ разуме́в истоща́ние прозорли́во, Авваку́м, Христе́, со тре́петом вопия́ше Тебе́: во спасе́ние люде́й Твои́х, спасти́ пома́занныя Твоя́ прише́л еси́. Припев: Святи́телю, о́тче Григо́рие, моли́ Бо́га о на́с. Я́ко сто́лп, ви́ден бы́л еси́ всесве́тел житие́м же и сло́вом, те́плою правосла́вия, Григо́рие, разжже́н ре́вностию, Но́ваго Изра́иля предводя́. Припев: Святи́телю, о́тче Григо́рие, моли́ Бо́га о на́с. Благода́ть прии́м духо́вную, ве́тхаго зако́на раздра́л еси́ оде́жду писа́ния и сокрове́нную добро́ту на́м ра́зума откры́л еси́. Сла́ва Отцу́ и Сы́ну и Свято́му Ду́ху. Все́х доброде́телей ви́ды Христо́с показу́я блаже́нствы, Григо́рие, тебе́ вве́ри, я́ко служи́телю Сло́ва, простра́нно сказа́ти конце́м. И ны́не и при́сно и во ве́ки веко́в. Ами́нь. Богородичен: Без смеше́ния у́бо зачала́ еси́ нерастле́нно во утро́бе, и пре́жде боле́зни родила́ еси́, и по рождестве́ Де́ва, Бо́га пло́тию ро́ждши, сохрани́лася еси́. Песнь 5 Ирмос: Одея́йся све́том, я́ко ри́зою, к Тебе́ у́тренюю и Тебе́ зову́: ду́шу мою́ просвети́ омраче́нную, Христе́, я́ко Еди́н Благоутро́бен. Припев: Святи́телю, о́тче Григо́рие, моли́ Бо́га о на́с. Ты́, я́ко о́гнь, попали́л еси́ ересе́й терноно́сная плете́ния слове́с, ве́рных же умы́ просвети́л еси́, блаже́нне, тайново́дче Григо́рие. Припев: Святи́телю, о́тче Григо́рие, моли́ Бо́га о на́с. Евно́миево ты́ изобличи́л еси́ беззако́ние и сего́ словеса́ неудобоизбе́жная, сете́й же пру́гла зе́льная, я́ко паучи́нная тка́ния, разори́л еси́. Сла́ва Отцу́ и Сы́ну и Свято́му Ду́ху. Обличи́л еси́, всеизря́днейше, безбо́жнейшаго Македо́ния, Боже́ственный Ду́х безсту́дно укори́вшаго, я́ко неприча́стна сему́ су́ща, Григо́рие. И ны́не и при́сно и во ве́ки веко́в. Ами́нь. Богородичен: Ты́, пра́вду же и избавле́ние на́м ро́ждши — Христа́ — безсе́менно, свобо́дно соде́яла еси́ от кля́твы, Богоро́дице, естество́ пра́отца. Песнь 6 Ирмос: Неи́стовствующееся бу́рею душетле́нною, Влады́ко Христе́, страсте́й мо́ре укроти́ и от тли́ возведи́ мя́, я́ко Благоутро́бен. Припев: Святи́телю, о́тче Григо́рие, моли́ Бо́га о на́с. Смире́нное мудрова́ние стяжа́в, все́м же кро́ток боре́ц показа́лся еси́, Григо́рие, проти́ву тща́щимся, ума́лити сла́ву Христо́ву. Припев: Святи́телю, о́тче Григо́рие, моли́ Бо́га о на́с. А́риево отчужде́ние Тро́ицы, сло́вом бога́тным де́рзостное разделе́ние, Григо́рие, и всеконе́чно низложи́л еси́ мудрова́ния. Сла́ва Отцу́ и Сы́ну и Свято́му Ду́ху. Неуче́нно соедине́ние Тро́ическое смеше́ние му́дрствуя, тобо́ю Саве́ллий обличи́ся богобо́рец, Григо́рие всеблаже́нне. И ны́не и при́сно и во ве́ки веко́в. Ами́нь. Богородичен: Де́ва роди́ и, ро́ждши, пребы́сть чиста́, на рука́х Нося́щаго вся́ческая я́ко вои́стинну, Де́во Ма́ти, носи́вши. Кондак, глас 1 О́ком душе́вным бо́дрствуя, святи́телю,/ бодр па́стырь яви́лся еси́ ми́ру,/ и жезло́м му́дрости твоея́, и те́плым предста́тельством твои́м,/ вся отгна́л еси́ злосла́вныя я́ко во́лки,/ невре́дно соблю́д ста́до,/ Григо́рие всему́дре. Икос Ле́ностию окая́нный отпадо́х, и к сме́рти усну́х,/ но я́ко па́стырь бо́дрейший воздви́гни мя, о́тче, и стра́сти моя́ успи́, зле му́чащия мя,/ я́ко да воста́в, чи́сте воспою́ твое́ светоно́сное преставле́ние,/ е́же Влады́ка вселе́нныя просла́ви досто́йно,/ я́ко раба́ ве́рнейшаго, я́ко учи́теля всему́драго,/ я́ко дру́га и таи́нника, и я́ко строи́теля Свои́х преда́ний,/ и́хже до́бре сохрани́л еси́ пома́зание нескве́рно, Григо́рие всему́дре. Песнь 7 Ирмос: Превозноси́мый отце́в Госпо́дь, пла́мень угаси́, о́троки ороси́, согла́сно пою́щия: Бо́же, благослове́н еси́. Припев: Святи́телю, о́тче Григо́рие, моли́ Бо́га о на́с. Жела́нием соедини́вся Трисо́лнечнаго Божества́ сия́нию, Григо́рие, все́м, я́ко зерца́ло, сия́я, блиста́еши све́та зари́. Припев: Святи́телю, о́тче Григо́рие, моли́ Бо́га о на́с. Сокро́вище — словеса́ твоя́ оте́чески оста́вил еси́, обы́чай души́ очище́ние и ра́зума исполне́ние ве́рою песнопою́щим: Бо́же, благослове́н еси́. Сла́ва Отцу́ и Сы́ну и Свято́му Ду́ху. Пе́рваго Ума́ и вино́вна, Отца́ возвести́л еси́, Сло́ва у́бо Роди́теля, ку́пно же Производи́теля Ду́ха, Тро́ицу песнопоя́: Бо́же, благослове́н еси́. И ны́не и при́сно и во ве́ки веко́в. Ами́нь. Богородичен: Еди́ну у́бо Ипоста́сь во двою́ естеству́, Всенепоро́чная, родила́ еси́ воплоще́нна Бо́га, Ему́же вси́ песнопое́м: Бо́же, благослове́н еси́. Песнь 8 Ирмос: Тебе́, Вседе́телю, в пещи́ о́троцы, всеми́рный ли́к спле́тше, поя́ху: дела́ вся́кая, Го́спода по́йте и превозноси́те во вся́ ве́ки. Припев: Святи́телю, о́тче Григо́рие, моли́ Бо́га о на́с. Всю́ зарю́ Уте́шителеву, блаже́нне, прия́л еси́ наше́дшую, зовя́, преподо́бне: вся́ дела́, Го́спода по́йте и превозноси́те во вся́ ве́ки. Припев: Святи́телю, о́тче Григо́рие, моли́ Бо́га о на́с. Истека́ют на́м по Боже́ственному сло́ву Христо́ву из чре́ва твоего́ ре́ки ра́зума: вои́стинну бо исто́чника непреста́нна благода́ть показа́ ми́ру тя́, о́тче, во ве́ки. Припев: Святи́телю, о́тче Григо́рие, моли́ Бо́га о на́с. О, чу́дныя бра́тския дво́ицы, пло́тию же сро́дныя и боже́ственныя мудрова́нием! Сию́ чту́ще, Васи́лия досто́йно вку́пе с Григо́рием почти́м во ве́ки. Сла́ва Отцу́ и Сы́ну и Свято́му Ду́ху. Све́т мы́сленный, в тя́ всели́вся, о́тче, свещу́ тя́ негаси́му ми́рови поста́вил е́сть, Еди́наго Све́та пою́ща, Трисо́лнечна и Боже́ственна, Его́же превозно́сим во вся́ ве́ки. И ны́не и при́сно и во ве́ки веко́в. Ами́нь. Богородичен: Тебе́, па́че ума́ Богому́жным сло́вом ро́ждшую Го́спода и де́вствующую, вся́ дела́, досто́йно благослови́м и превозно́сим во вся́ ве́ки. Песнь 9 Ирмос: Иса́ие, лику́й, Де́ва име́ во чре́ве и роди́ Сы́на Емману́ила, Бо́га же и Челове́ка, Восто́к и́мя Ему́, Его́же велича́юще, Де́ву ублажа́ем. Припев: Святи́телю, о́тче Григо́рие, моли́ Бо́га о на́с. Исправле́ний же и слове́с твои́х блиста́ния, Григо́рие, восхвали́ти у́м не моги́й я́ве на́ш, испове́дует побежде́ние благопохва́льно, твое́ же возвеща́ет па́че си́лы похвале́ние. Припев: Святи́телю, о́тче Григо́рие, моли́ Бо́га о на́с. Таи́нниче небе́сных изря́днейше, Тро́ице ны́не предстоя́ со апо́стольским ли́ком и проро́ческим, му́чеников же, и пра́ведных, и патриа́рхов, помяни́ на́с, воспева́ющих твою́ па́мять, Григо́рие. Сла́ва Отцу́ и Сы́ну и Свято́му Ду́ху. Назира́еши свы́ше, защища́я ны́не, святи́телю Це́ркви Христо́вы, побе́ды да́руя ве́рным лю́дем, и рабо́тное сокруши́ и́го, твоя́ спаса́я певцы́ моли́твами твои́ми, Григо́рие. И ны́не и при́сно и во ве́ки веко́в. Ами́нь. Богородичен: Я́ко ро́ждши, Всечи́стая, тва́ри Соде́теля, по всему́ Рожде́ннаго но́сиши нача́ло, неоску́дное иму́щи вели́чие и преесте́ственное. Те́мже, Рождеству́ Твоему́ покланя́ющеся, Тя́ сла́вим. Светилен Па́стыря до́браго, Григо́рия всему́драго, Ниссе́ев председа́теля, Васи́лия прему́драго единонра́внаго бра́та по пло́ти, пра́зднственными пе́сньми просла́вим вси́.

Минея, 20 Апреля, Кано́н свята́го, его́же краегране́сие: Младе́нца моли́твами спаси́ мя Глас 4 Песнь 1 Ирмос: Ли́цы изра́ильтестии/ невла́жными стопа́ми/ понт Чермны́й и вла́жную глубину́ прогна́вше,/ вса́дники триста́ты, враги́, ви́дяще в ней погруже́ны,/ с весе́лием поя́ху:/ пои́м Бо́гу на́шему, я́ко просла́вися. Припев: Святы́й му́чениче Гаврии́ле, моли́ Бо́га о на́с. Младе́нче и му́чениче, чудотво́рче и боле́зней цели́телю, Гаврии́ле, уго́дниче Христо́в,/ досто́йными словесы́ твоя́ по́двиги восхвали́ти недоуме́ю,/ оба́че твоего́ терпе́ния и незло́бия красото́ю умиля́юся,/ сих дарова́ний прича́стника и мене́ покажи́, твоего́ моли́твенника. Припев: Святы́й му́чениче Гаврии́ле, моли́ Бо́га о на́с. Лю́дие росси́йстии от иуде́й уму́ченнаго младе́нца ви́девше,/ от псов же несмы́сленных, я́ко сокро́вище, охраня́ема, взыва́ху:/ Го́споди, того́ моли́твами поми́луй нас. Сла́ва Отцу́ и Сы́ну и Свято́му Ду́ху. А́нна смиренному́дренная, Гаврии́ла му́ченика ма́ти,/ со отце́м его́ Петро́м трудолюби́вым сле́зы на ра́дость преложи́ша,/ своего́ отроча́те уве́девше неувяда́емую сла́ву. И ны́не и при́сно и во ве́ки веко́в. Ами́нь. Богородичен: Жезл Ааро́нов прозя́бший, и́же от Иессе́я прообража́ше изра́стший ко́рень,/ Тя, Пречи́стую, цвет ми́ру возсия́вшую, Бо́га воплоще́нна,/ Его́же о нас моля́щи не преста́й, Присноде́во, прибега́ющих к Тебе́. Песнь 3 Ирмос: Я́ко непло́ды роди́ от язы́к Це́рковь,/ и мно́гое в ча́дех изнемо́же со́нмище,/ чу́дному Бо́гу на́шему возопии́м:/ Свят еси́, Го́споди. Припев: Святы́й му́чениче Гаврии́ле, моли́ Бо́га о на́с. Добро́ бы́ло бы́сть вам не роди́тися, нечести́вии мучи́телие,/ зане́ отра́днее бу́дет Содо́му и Гомо́рру в Де́нь Су́дный,/ не́же Христо́ва испове́дника уби́йцам./ Того́ моли́твами, Го́споди, утверди́ правосла́вных ве́ру. Припев: Святы́й му́чениче Гаврии́ле, моли́ Бо́га о на́с. Егда́ подписа́ние, е́же о твое́м муче́нии, от иуде́ев бы́вшем, му́чениче,/ сотвори́ша судии́ заблу́довстии,/ тогда́ исте́рзанное те́ло твое́ земле́ благоче́стно преда́ша лю́дие./ Но проше́дшим три́десятим ле́том то́ежде тле́нию неприча́стно обрето́ша/ и Госпо́дне о тебе́ промышле́ние просла́виша. Сла́ва Отцу́ и Сы́ну и Свято́му Ду́ху. Ни́щим и оби́димым близ е́сть Госпо́дь:/ Той бо, от ни́щих роди́телей отъя́ти ча́до попусти́в нечести́вым,/ па́че царе́й земны́х безча́дныя прославля́ет,/ зане́ и ца́рие и святи́телие тех отроча́ти моли́твенно преклоня́ют коле́на. И ны́не и при́сно и во ве́ки веко́в. Ами́нь. Богородичен: Я́ко но́сиши на руку́, Мари́е,/ и от сосцу́ пита́еши Пита́ющаго вся́кое дыха́ние,/ Его́же, Богоро́дице, чту́ще, пропове́даем:/ моли́ся Ему́, Чи́стая, о всех нас. Седален, глас 8 О, какова́я муче́ния твоя́, отроча́, Бо́гу возлю́бленное!/ О, какова́я терпе́ния твоего́ кре́пость,/ избоде́ние бо, и ме́дленное кро́ве испуща́ние,/ и пло́ти твоея́ раздира́ние за Христа́ прия́л еси́,/ но Того́ ра́ди засту́пник о стра́ждущих младе́нцех у Христа́ Бо́га явля́ешися,/ ма́тери твоея́, обезча́дствованней бы́вшей,/ всем ма́терем, о ча́дех моля́щимся, уте́шитель быва́еши/ и мо́лишися при́сно о спасе́нии душ на́ших. Песнь 4 Ирмос: Услы́шах Твое́, Христе́, вои́стинну пресла́вное,/ я́ко безсме́ртен сын Бог/ уподо́бися сме́ртным челове́ком/ и пребы́сть, е́же бе,/ и того́ ра́ди Твою́ сла́влю си́лу. Припев: Святы́й му́чениче Гаврии́ле, моли́ Бо́га о на́с. Царе́м и мучи́телем преклони́ша вы́и своя́ на убие́ние дре́внии му́ченицы,/ тех подо́бник бы́сть Гаврии́л младе́нец,/ кро́вь свою́ непови́нную на истерза́ние отда́в иуде́ом жестокосе́рдым./ Го́споди, того́ моли́твами вложи́ ре́вность о сла́ве Твое́й в ду́ши на́ша. Припев: Святы́й му́чениче Гаврии́ле, моли́ Бо́га о на́с. А́ще и в те́мней погребни́це заключи́ша тебе́ иуде́е, о му́чениче,/ а́ще и стра́шными му́ками тебе́ умертви́ша,/ но а́бие во све́тлый черто́г Госпо́день дух твой, ра́дуяся, всели́ся,/ иде́же со А́нгелы о сла́ве Госпо́дней дне́сь лику́ет. Сла́ва Отцу́ и Сы́ну и Свято́му Ду́ху. Ми́лостив бу́ди к мои́м не́мощем, му́чениче святы́й Гаврии́ле,/ моего́ малоду́шия не возгнуша́вся, проще́ние ми от Го́спода испроси́,/ и́же себе́ за ве́ру Его́ не пощади́вый/ и в младе́нчестем телеси́ Того́ просла́вивый. И ны́не и при́сно и во ве́ки веко́в. Ами́нь. Богородичен: Присноде́ву и вои́стинну еди́ну Богоро́дицу, сла́вим,/ Ю́же прообразова́ше Богови́дцу Моисе́ю неопа́льно, Пречи́стая,/ купина́, огню́ примеси́вшаяся. Песнь 5 Ирмос: Просвеще́ние Твое́, Го́споди, низпосли́ нам/ и от мглы прегреше́ний разреши́ ны, Бла́же,/ Твой мир да́руяй. Припев: Святы́й му́чениче Гаврии́ле, моли́ Бо́га о на́с. О́браз злострада́ния Гаврии́лова прии́мем, бра́тие,/ и своего́ о ве́ре нераде́ния устыди́мся,/ от убива́ющих те́ло не убои́мся,/ но Иму́щему вла́сть по убие́нии в гее́нну о́гненную вве́ргнути,/ Тому́ со стра́хом повини́мся,/ страстоте́рпца свята́го в по́мощь призыва́юще. Припев: Святы́й му́чениче Гаврии́ле, моли́ Бо́га о на́с. Лю́та е́сть му́ка, но сла́док рай,/ боле́зненно на земли́ безча́дие, но неисчерпа́емо утеше́ние на́ше, –/ роди́теля Гаврии́лова взыва́ху, –/ от земны́х бо печа́лей ча́до на́ше к ве́чной ра́дости пресели́ся. Сла́ва Отцу́ и Сы́ну и Свято́му Ду́ху. И́же о боле́знех и му́ках чад свои́х скорбя́ще, роди́телие,/ с ве́рою ко гро́бу Гаврии́лову припади́те,/ е́сть бо засту́пник о них пред Христо́м,/ я́ко кро́вь свою́ за испове́дание и́стинныя ве́ры излия́вый. И ны́не и при́сно и во ве́ки веко́в. Ами́нь. Богородичен: Мучи́телей ра́зум де́вственное посрами́ чре́во:/ Младе́нец бо я́зву а́спидную душегу́бную испыта́ руко́ю/ и, отсту́пника го́рдаго низложи́в, ве́рным под но́зе покори́. Песнь 6 Ирмос: Возопи́, прообразу́я погребе́ние тридне́вное,/ проро́к Ио́на, в ки́те моля́ся:/ от тли изба́ви мя, Иису́се, Царю́ сил. Припев: Святы́й му́чениче Гаврии́ле, моли́ Бо́га о на́с. Твои́х раб моле́ния не отве́ржи, младе́нче прему́дре,/ твое́ю сла́вою умиля́ющихся и твоя́ по́двиги со умиле́нным се́рдцем воспева́ющих,/ а́ще терпе́ния твоего́ не стяжа́вших,/ но испра́вити житие́ свое́ жела́ющих. Припев: Святы́й му́чениче Гаврии́ле, моли́ Бо́га о на́с. Вся́ческих сокро́вищ, и́миже земля́ украша́ется:/ зла́та, и би́сера, и ка́мений многоце́нных,/ честне́йша су́ть святы́х уго́дников нетле́нныя мо́щи,/ и́ми бо благода́тная си́ла Бо́жия де́йствует,/ сию́ у́бо нам испроси́, уго́дниче Христо́в,/ во исцеле́ние душ и теле́с на́ших. Сла́ва Отцу́ и Сы́ну и Свято́му Ду́ху. А́ще и мно́гая гоне́ния правосла́внии христиа́не от иуде́й и от ерети́к прия́ша,/ о́крест сла́вныя оби́тели твоея́ живу́щии,/ оба́че стоя́ние твое́ о и́стинней ве́ре вспомина́юще,/ от прославле́ния и́стиннаго Бо́га и твоего́ предста́тельства ника́коже отпадо́ша. И ны́не и при́сно и во ве́ки веко́в. Ами́нь. Богородичен: Дре́вле у́бо прельсти́ мя змий/ и умори́ мя прама́терию мое́ю Е́вою,/ ны́не же, Чи́стая, Тобо́ю Созда́вый мя из истле́ния воззва́л е́сть. Кондак, глас 6 Оте́чество твое́ Зверки́ бы́сть,/ му́чениче Христо́в Гаврии́ле,/ иде́же от и́стых звере́й – иуде́ев восхище́н:/ а́бие роди́телей лише́н еси́,/ та́же вся поря́ду лю́те претерпе́в,/ в оте́чество Небе́сное пресели́лся еси́./ Восхища́й и нас зде от вся́ких напа́стей и скорбе́й/ и умоли́, мо́лим тя,/ улучи́ти ве́чное насле́дие твое́. Икос Просла́вим, бра́тие, Гаврии́ла младе́нца, о Христе́ злострада́ния прия́вшаго,/ той бо, я́ко ягня́ незло́бивое, льсти́вому иуде́ю после́довав,/ из до́ма о́тча восхище́н бы́сть/ и в те́мную погребни́цу вве́ржен,/ ужа́сная же терза́ния и избоде́ние пло́ти своея́ претерпе́в надо́лзе,/ я́ко же́ртва чи́стая Тро́ице принесе́ся/ и мно́гая заступле́ния о моля́щихся ему́ чрез мно́гая ле́та показу́ет,/ вся приходя́щия в це́рковь его́ зра́ком нетле́ннаго телесе́ своего́ умиля́я./ Тому́ у́бо возопии́м:/ умоли́, мо́лим тя, улучи́ти и нам ве́чное насле́дие твое́. Песнь 7 Ирмос: Авраа́мстии иногда́ в Вавило́не о́троцы/ пе́щный пла́мень попра́ша,/ пе́сньми взыва́юще:/ оте́ц на́ших Бо́же, благослове́н еси́. Припев: Святы́й му́чениче Гаврии́ле, моли́ Бо́га о на́с. Ма́терей скорбя́щих уте́шителю,/ младе́нцев боля́щих цели́телю, Гаврии́ле, уго́дниче Христо́в,/ ду́шу мою́, скорбя́щую о гресе́х свои́х, уте́ши и исцели́/ и сию́ над пло́тию госпожу́ моли́твою твое́ю соде́лай,/ своея́ пло́ти Христа́ ра́ди не пощади́вый. Припев: Святы́й му́чениче Гаврии́ле, моли́ Бо́га о на́с. Или́ не разуме́ете, нечести́вии иуде́и,/ я́ко Бо́га оте́ц ва́ших врага́ себе́ соде́ловаете,/ Того́ созда́ние непови́нное лю́те терза́юще/ и сицевы́м дея́нием приноси́ти ему́ слу́жбу мня́ще, безу́мнии./ Го́споди, Гаврии́ла моли́твами чад их сердца́ умягчи́/ и се́рдца на́ша от сицевы́я лю́тости изба́ви. Сла́ва Отцу́ и Сы́ну и Свято́му Ду́ху. Слуцк град вои́стинну блаже́н е́сть,/ та́мо бо проше́дшим пяти́десятим шести́м ле́том положи́ся му́ченика Гаврии́ла нетле́нное те́ло,/ та́мо до дне́сь сле́зы, моли́твы и благодаре́ния пред гро́бом его́/ от ма́терей о ча́дех свои́х излива́ются/ и всех ве́рующих прие́млются моле́ния. И ны́не и при́сно и во ве́ки веко́в. Ами́нь. Богородичен: Превы́шши тва́рей всех еси́,/ я́ко Творца́ ро́ждши и Го́спода./ Те́мже Ти вопию́, Богоро́дице:/ Благослове́нная, Госпо́дь сил с Тобо́ю. Песнь 8 Ирмос: Ра́дующеся по осужде́нии мучи́тельстем о́троцы,/ я́ко да не бого́м скве́рным послу́жат всем,/ но Живо́му Бо́гу,/ на о́гнь дерзну́ша,/ от А́нгела же ороша́еми, пе́снь поя́ху:/ дела́ Госпо́дня, Го́спода по́йте/ и превозноси́те во вся ве́ки. Припев: Святы́й му́чениче Гаврии́ле, моли́ Бо́га о на́с. Пти́цы сыроя́дцы, над исте́рзанным те́лом му́ченика ре́юще,/ и пси гла́днии, сия́ отража́юще и те́ло му́ченика храня́ще,/ обличи́телие злодея́ния иуде́йскаго яви́шася,/ сла́вы же свята́го неми́и пропове́дницы. Припев: Святы́й му́чениче Гаврии́ле, моли́ Бо́га о на́с. А́ще и зве́рие гла́да своего́ о свято́м телесе́ утоли́ти не дерзну́ша,/ ка́ко у́бо зло́ба иуде́ев тем насыща́шеся?/ Ка́ко ти́и, чу́до зря́ще, не пока́яшася?/ Зри, о душе́ моя́, сих ожесточе́ние, и ужасни́ся,/ и свято́му сему́ помоли́ся, да от вся́кия зло́бы тебе́ вы́ну огражда́ет. Сла́ва Отцу́ и Сы́ну и Свято́му Ду́ху. Сле́зы умиле́ния о по́двизе и о сла́ве младе́нца и му́ченика пролива́юще, бра́тие,/ своего́ окая́нства воспла́чим и своего́ нераде́ния устыди́мся:/ а́ще бо та́ко Бо́гу угоди́ младе́нец ма́лый,/ почто́ мы, му́жие, су́ще о сем небрего́хом? И ны́не и при́сно и во ве́ки веко́в. Ами́нь. Богородичен: От ре́бра Ада́мова созда́вый Тя,/ от Твоего́ де́вства воплоти́ся, И́же всех Госпо́дь,/ Его́же пою́ще, вопие́м:/ вся дела́, благослови́те, по́йте Го́спода/ и превозноси́те во вся ве́ки. Песнь 9 Ирмос: От земноро́дных ро́ждшися и Творца́ ро́ждшая,/ на́ша похвало́, Богоро́дице Чи́стая,/ Тя, я́ко влады́чествующую тва́рьми, велича́ем. Припев: Святы́й му́чениче Гаврии́ле, моли́ Бо́га о на́с. И ны́не, уго́дниче Бо́жий Гаврии́ле,/ о наро́де росси́йстем бу́ди пред Го́сподом предста́тель, я́коже дре́вле:/ тогда́ бо от иуде́й и ерети́к муче́ния христиа́не приима́ху,/ ны́не же от обою́ собла́зном вдаю́тся лю́те,/ те́мже твоего́ стоя́ния да́руй нам па́мять/ и о подража́нии тебе́ ре́вность благу́ю. Припев: Святы́й му́чениче Гаврии́ле, моли́ Бо́га о на́с. Мы́сленнаго уби́йцу души́ моея́, сию́ поглоти́ти и́щуща,/ побежда́ти помози́ ми, Бо́жий уго́дниче,/ те́ло свое́ на истерза́ние преда́вый,/ но ду́шу свою́ непоро́чну от тех устраше́ния сохрани́вый/ и Христу́, а́ки дар че́стен, страда́ния своя́ принесы́й/ и сего́ ра́ди от Него́ благода́ть прия́вый,/ во е́же моли́твы на́ша Престо́лу сла́вы Его́ при́сно возноси́ти. Сла́ва Отцу́ и Сы́ну и Свято́му Ду́ху. Я́звы, на твое́ младе́нческое те́ло от иуде́й возложе́нныя,/ я́звы врагу́ спасе́ния на́шего яви́шася,/ де́монов победи́телю, Гаврии́ле блаже́нне,/ от и́хже мучи́тельства изба́ви души́ на́ша/ и над тех искуше́ний победи́тели предста́тельством твои́м яви́ нас. И ны́не и при́сно и во ве́ки веко́в. Ами́нь. Богородичен: От земноро́дных возра́стши и Зижди́теля ро́ждши,/ ра́дуйся, на́ша похвало́, Богоро́дице Чи́стая,/ Тя, я́ко облада́ющую тва́рьми, велича́ем. Светилен Пло́ть на растерза́ние иуде́ом вда́вшаго,/ дух же свой Бо́гу преда́вшаго,/ дне́сь воспои́м во младе́нцех му́ченика,/ того́ приводя́ще в моли́тву о умире́нии Це́ркви и о спасе́нии душ на́ших.

Минея, 20 Апреля, Кано́н преподо́бнаго, его́же краегране́сие: Пою́ и сла́влю Иоаса́фа му́драго Глас 2 Песнь 1 Ирмос: Во глубине́ постла́ иногда́/ фараони́тское всево́инство преоруже́нная си́ла,/ вопло́щшееся же Сло́во всезло́бный грех потреби́ло е́сть:/ препросла́вленный Госпо́дь сла́вно бо просла́вися. Припев: Преподо́бне о́тче Иоаса́фе, моли́ Бо́га о на́с. Преподо́бне о́тче Иоаса́фе,/ да́ждь ми сло́во, недосто́йному рабу́ твоему́,/ да возмогу́ досто́йно воспе́ти святу́ю па́мять твою́. Припев: Преподо́бне о́тче Иоаса́фе, моли́ Бо́га о на́с. О́тче Иоаса́фе,/ ты на земли́ равноа́нгельно пожи́л еси́,/ равноа́нгельную же че́сть досто́йно получи́л еси́/ и ны́не со все́ми А́нгелы Бо́гу предстои́ши. Сла́ва Отцу́ и Сы́ну и Свято́му Ду́ху. Ю́ность твоя́ чи́ста, житие́ же твое́ све́тло,/ я́ко пра́вило изве́стно в тебе́, о́тче, Боже́ственныя доброде́тели показа́ся. И ны́не и при́сно и во ве́ки веко́в. Ами́нь. Богородичен: Покро́в Боже́ственный, ти́хое приста́нище,/ Пречи́стую Де́ву Мари́ю, ве́рнии, пе́сньми похва́лим, Богома́терь обра́дованную,/ всех же ве́рных Предста́тельницу. Песнь 3 Ирмос: Процвела́ е́сть пусты́ня, я́ко крин, Го́споди,/ язы́ческая неплодя́щая, Це́рковь/ прише́ствием, Твои́м,/ в не́йже утверди́ся мое́ се́рдце. Припев: Преподо́бне о́тче Иоаса́фе, моли́ Бо́га о на́с. И́хже о́ко не ви́де, ни у́хо слы́ша,/ ни на се́рдце челове́ка взыдо́ша,/ я́же угото́вана Бо́гом Того́ возлю́бльшим,/ сих ты возжеле́л еси́, Иоаса́фе Богодохнове́нне. Припев: Преподо́бне о́тче Иоаса́фе, моли́ Бо́га о на́с. Соше́дшеся дне́сь, чту́ще любо́вию па́мять твою́, Иоаса́фе прему́дре,/ мо́лим тя приле́жно:/ моли́ о нас, ве́рно пра́зднующих честну́ю па́мять твою́. Сла́ва Отцу́ и Сы́ну и Свято́му Ду́ху. Лику́я со А́нгелы на Небесе́х, не забу́ди нас, преподо́бне о́тче,/ но при́сно моли́ся ко Го́споду/ дарова́ти ми́ру мир и всем скорбя́щим утеше́ние. И ны́не и при́сно и во ве́ки веко́в. Ами́нь. Богородичен: Ря́сны златы́ми укра́шена, Влады́чице,/ я́ко Цари́ца предстои́ши ны́не одесну́ю Царя́ и Бо́га,/ моля́щи о рабе́х Твои́х. Седален, глас 8 О́тче Богоно́сне Иоаса́фе,/ житие́ свое́ украси́л еси́ воздержа́нием/ и, попра́в вся прило́ги вра́жия,/ присво́ился еси́ Бо́гу еди́ному./ Тем ны́не в ве́чней сла́ве со А́нгелы лику́я,/ с ни́миже моли́ непреста́нно поми́ловатися всем нам. Песнь 4 Ирмос: Прише́л еси́ от Де́вы, не хода́тай, ни А́нгел,/ но Сам, Го́споди, вопло́щся/ и спасл еси́ всего́ мя, челове́ка./ Тем зову́ Ти: сла́ва си́ле Твое́й, Го́споди. Припев: Преподо́бне о́тче Иоаса́фе, моли́ Бо́га о на́с. А́ще и владе́тель на земли́ был еси́,/ но, после́дуя уче́нию преподо́бнаго ста́рца Афана́сия,/ сочта́лся еси́ преподо́бным./ Тем с ни́ми тя почита́ем. Припев: Преподо́бне о́тче Иоаса́фе, моли́ Бо́га о на́с. Возсия́в, я́ко со́лнце, и сын све́та быв,/ свя́то твое́ проводи́л еси́ житие́./ Тем ны́не весели́шися со все́ми святы́ми. Сла́ва Отцу́ и Сы́ну и Свято́му Ду́ху. Ле́потственно возсия́ нам дне́сь па́мять твоя́ свята́я, преподо́бне о́тче Иоаса́фе./ Тем мо́лим тя:/ проси́ нам от Христа́ благода́ти, и ми́лости,/ и согреше́ний избавле́ние. И ны́не и при́сно и во ве́ки веко́в. Ами́нь. Богородичен: А́дова сокро́вища упраздни́шася/ и сме́ртное мучи́тельство преста́ воста́нием Ро́ждшагося из Тебе́,/ и жи́зни сокро́вища напо́лнишася. Песнь 5 Ирмос: Све́та Пода́телю и веко́в Тво́рче, Го́споди,/ во све́те Твои́х повеле́ний наста́ви нас:/ ра́зве бо Тебе́, ино́го бо́га не зна́ем. Припев: Преподо́бне о́тче Иоаса́фе, моли́ Бо́га о на́с. Ю́нии и ста́рцы, мона́си и свяще́нницы,/ славосло́вят ку́пно блаже́нную па́мять твою́,/ Богодохнове́нне о́тче Иоаса́фе. Припев: Преподо́бне о́тче Иоаса́фе, моли́ Бо́га о на́с. Иоаса́фе Богоблаже́нне,/ ты яви́лся еси́ безсме́ртия прича́стник/ и о́бщник Боже́ственнаго Ца́рствия/ и с высоты́ бде́еши над певцы́ твои́ми./ Проси́ у Бо́га проще́ние грехо́в их/ и прича́стие в сла́ве Его́. Сла́ва Отцу́ и Сы́ну и Свято́му Ду́ху. О Иоаса́фе, равноа́нгельне,/ име́ющу ти жили́ще на высоте́ Метео́рстей, возсия́ тебе́ с высоты́ Госпо́дь от Де́вы,/ Его́же ты возжеле́л еси́. И ны́не и при́сно и во ве́ки веко́в. Ами́нь. Богородичен: Моего́ ума́ стра́сти лю́тыя утоли́, Ма́ти Бо́жия,/ и испра́ви мя, заблу́ждшаго,/ я́ко да сла́влю Тя. Песнь 6 Ирмос: В бе́здне грехо́вней валя́яся,/ неизсле́дную милосе́рдия Твоего́ призыва́ю бе́здну:/ от тли, Бо́же, мя возведи́. Припев: Преподо́бне о́тче Иоаса́фе, моли́ Бо́га о на́с. А́нгела на земли́ и на Небеси́ челове́ка вем тя, преподо́бне,/ насажде́н бо в до́му Госпо́дни,/ процве́л еси́ пра́ведно, я́ко кедр в пусты́ни,/ умно́жив Христо́во ста́до слове́сных ове́ц в преподо́бии и пра́вде. Припев: Преподо́бне о́тче Иоаса́фе, моли́ Бо́га о на́с. Соде́лав ду́шу твою́ храм Ду́ха Свята́го,/ премину́л еси́ зе́млю до́льную,/ Небе́сную же жи́знь стяжа́л еси́/ и со Безпло́тными ли́ки смеси́лся еси́./ Тем и кро́тких зе́млю насле́довал еси́. Сла́ва Отцу́ и Сы́ну и Свято́му Ду́ху. А́нгельски на земли́, я́ко Безпло́тен, пожи́в,/ мир преоби́дел еси́, сла́вне,/ обветша́вшаго челове́ка я́ве, о́тче, совле́клся еси́/ и, я́ко скве́рну ри́зу отве́рг с грехо́вными страстьми́,/ в но́ваго обле́клся еси́,/ е́же по подо́бию о Христе́, преподо́бне. И ны́не и при́сно и во ве́ки веко́в. Ами́нь. Богородичен: Из Тебе́ прозябе́ Цвет неувяда́емый,/ облагово́нствуя все челове́чество Боже́ственным ми́ром естества́ Своего́,/ и И́же Отцу́ Собезнача́льный из Тебе́ бы́сть ле́том, Де́во Всенепоро́чная. Кондак, глас 4 Ве́дый прехва́льное житие́ твое́ и чистоту́/ и безме́рное смиренному́дрие,/ преподо́бный Афана́сий наименова́ тя прее́мника своего́,/ ты же показа́лся еси́ досто́ин сего́ нарече́ния/ и, служа́ Триипоста́сному Бо́гу,/ соблю́л еси́ вве́ренную ти оби́тель Метео́рскую./ Те́мже мо́лим тя, о́тче Иоаса́фе,/ не забу́ди оте́чество твое́ и ве́сь се́рбский род,/ но моли́ся всегда́ о всех нас. Икос Утверди́вся стра́хом Христо́вым,/ ве́сь распя́лся еси́ ми́рови, Богоно́се о́тче Иоаса́фе,/ и, возвы́сив к Бо́гу серде́чное жела́ние, нищету́ возлюби́л еси́,/ в нищете́ же пожи́в, доброде́тельми обогати́лся еси́,/ испо́лнен же быв све́тлостию жития́,/ хра́мы благоле́пныя на Метео́рах Бо́гу воздви́гл еси́/ и вся оби́тели Метеори́тския ку́пно со сестро́ю свое́ю Мари́ею бога́тно снабде́л еси́./ Сего́ ра́ди и мы, ве́дуще тя храм Свята́го Ду́ха, приле́жно мо́лим тя:/ не забу́ди оте́чество твое́ и ве́сь се́рбский род,/ но моли́ся всегда́ о всех нас. Песнь 7 Ирмос: Богопроти́вное веле́ние беззако́ннующаго мучи́теля/ высо́к пла́мень вознесло́ е́сть./ Христо́с же простре́ Богочести́вым отроко́м ро́су духо́вную,/ Сый благослове́н и препросла́влен. Припев: Преподо́бне о́тче Иоаса́фе, моли́ Бо́га о на́с. Фи́никс, насажде́нный в дому́ Госпо́дни, яви́лся еси́,/ мно́жеством бо мона́хов процве́л еси́/ и, я́ко кедр, и́же в Лива́не, доброде́тель умно́жил еси́. Припев: Преподо́бне о́тче Иоаса́фе, моли́ Бо́га о на́с. А́ще и владе́тель был еси́,/ но, презре́в сла́дости привре́менныя,/ благослове́нное целому́дрие соблю́л еси́. Сла́ва Отцу́ и Сы́ну и Свято́му Ду́ху. Метеори́тская похвала́ яви́лся еси́,/ поревнова́в блаже́нному Афана́сию – Метеори́ту,/ нра́вом и житие́м после́дуя ему́,/ страх бо Бо́жий восприи́м в се́рдцы свое́м,/ де́лы свои́ми ве́сь род се́рбский возвесели́л еси́. И ны́не и при́сно и во ве́ки веко́в. Ами́нь. Богородичен: Родила́ еси́ па́че смы́сла и естества́, Богоро́дице Де́во, Свята́го святы́х,/ подаю́щи хода́тайством Твои́м освяще́ние и избавле́ние и оставле́ние грехо́в/ всем ве́рным, сла́вящим Его́ воскресе́ние. Песнь 8 Ирмос: В пе́щь о́гненную ко отроко́м евре́йским снизше́дшаго/ и пла́мень в ро́су прело́жшаго Бо́га,/ по́йте, дела́, я́ко Го́спода и превозноси́те во вся ве́ки. Припев: Преподо́бне о́тче Иоаса́фе, моли́ Бо́га о на́с. Удаля́яся пути́ простра́ннаго,/ те́сный же предпочита́я,/ и́нок и́стинен был еси́/ и, дости́г широты́ ра́йския, ра́достно о Христе́ взыва́еши:/ по́йте и превозноси́те во вся ве́ки. Припев: Преподо́бне о́тче Иоаса́фе, моли́ Бо́га о на́с. Да́ры мно́гими вся оби́тели Метеорския ще́дро снабдева́л еси́,/ сим же ду́шу свою́ обогати́л еси́./ Те́мже ны́не со все́ми пра́ведными, ра́дуяся, о Христе́ пое́ши:/ по́йте и превозноси́те во вся ве́ки. Сла́ва Отцу́ и Сы́ну и Свято́му Ду́ху. Ре́вность Боже́ственнаго жития́ твоего́/ яви́ тя и́стиннаго наста́вника мно́жества мона́хов,/ и́бо стяжа́л еси́ Христа́ соде́тельствующа./ Ему́же ны́не со все́ми святы́ми восклица́еши:/ по́йте и превозноси́те во вся ве́ки. И ны́не и при́сно и во ве́ки веко́в. Ами́нь. Богородичен: Красне́йшаго добро́тою родила́ еси́, Всенепоро́чная,/ Сего́ умоли́ изба́вити мя огня́,/ и́бо житие́ мое́ все отягчи́ся,/ все порабо́тися лю́тыми греха́ми,/ аз же воспою́ к Нему́:/ по́йте и превозноси́те во вся ве́ки. Песнь 9 Ирмос: Безнача́льна Роди́теля Сын, Бог и Госпо́дь,/ вопло́щся от Де́вы, нам яви́ся,/ омраче́нная просвети́ти, собра́ти расточе́нная./ Тем Всепе́тую Богоро́дицу велича́ем. Припев: Преподо́бне о́тче Иоаса́фе, моли́ Бо́га о на́с. А́нгелом сожи́тель быв,/ я́ко в раи́ воздержа́ния процве́л еси́/ и, я́ко ма́слина, псало́мски яви́лся еси́,/ помазу́я сердца́ на́ша еле́ем трудо́в твои́х,/ благоче́стно чту́щих свяще́нную па́мять твою́. Припев: Преподо́бне о́тче Иоаса́фе, моли́ Бо́га о на́с. Глас Христа́ твоего́ послу́шав, зако́н Бо́жий сохраня́я невреди́мо,/ чистоту́ и смиренному́дрие от младе́нства име́л еси́,/ и житие́ нескве́рно, и нрав ми́лостивей, Иоаса́фе, о́тче досточу́дне. Сла́ва Отцу́ и Сы́ну и Свято́му Ду́ху. О́тче Иоаса́фе блаже́нне,/ доброде́тельми бога́т быв,/ испо́лнился еси́ све́тлостию жития́/ и преста́вился еси́ к Вы́шнему гра́ду,/ сего́ ра́ди мо́лим тя:/ моли́ся ко Го́споду изба́витися от бед ро́ду се́рбскому. И ны́не и при́сно и во ве́ки веко́в. Ами́нь. Богородичен: Отрокови́це Богоневе́сто,/ из ко́рене Иессе́ова Ты прозябла́ еси́/ и родила́ еси́ Ко́рень, всех Царя́, Христа́ Бо́га на́шего,/ от Него́же вси ве́рнии прозяба́ют и получа́ют спасе́ние./ Тем непреста́нно моли́ Его́,/ да спасе́т правосла́вный род се́рбский. Светилен Све́том Единосу́щныя Тро́ицы озаря́ем,/ возсия́л еси́ све́тлыми заря́ми доброде́тельных по́двигов твои́х,/ озари́ све́тлостию и ве́сь правосла́вный род се́рбский, да вси взыва́ем ти:/ ра́дуйся, о́тче Иоаса́фе, метеоритов похвале́.

Минея, 21 Апреля, Кано́н свята́го Ианнуа́рия Глас 4 Песнь 1 Ирмос: Триста́ты кре́пкия,/ рожде́йся от Де́вы,/ безстра́стия во глубине́, души́ трича́стное потопи́, молю́ся,/ да Тебе́, я́ко в тимпа́не,/ во умерщвле́нии телесе́ побе́дное воспою́ пе́ние. Припев: Священному́чениче Ианнуа́рие, моли́ Бо́га о на́с. Сый с во́инствы невеще́ственных А́нгел,/ и прича́стием све́та незаходи́маго ду́шу свяще́нно просвеща́я,/ просвети́ ми се́рдце,/ светоно́сный твой дне́сь пра́здник восхваля́ющу, блаже́нне. Припев: Священному́чениче Ианнуа́рие, моли́ Бо́га о на́с. Во́инство светови́дно, свяще́нный собо́р пострада́ с тобо́ю терпели́вно,/ му́дре священноде́йственне,/ с ни́миже вся́ко разори́л еси́ зми́ево кова́рство,/ претерпе́в многоплете́нныя смы́слом му́ки. Сла́ва Отцу́ и Сы́ну и Свято́му Ду́ху. Стопа́м Христа́, вели́каго и пе́рваго Па́стыря, му́дре, после́дуя,/ обагре́нии муче́ния уясни́л еси́ твоего́ святи́тельства оде́жду,/ сего́ ра́ди тя почита́ем ума́ пра́востию. И ны́не и при́сно и во ве́ки веко́в. Ами́нь. Богородичен: Блаже́ни су́ть лю́дие, Богоро́дице, сла́вящии Тя, Ма́терь Бо́жию нело́жную,/ и при́сно блажа́щии Тя, Чи́стая,/ я́коже прорекла́ еси́, свяще́нно прорица́ющи,/ егда́ Христа́ вну́трь носи́ла еси́. Песнь 3 Ирмос: Лук си́льных изнемо́же,/ и немощству́ющии препоя́сашася си́лою,/ сего́ ра́ди утверди́ся в Го́споде се́рдце мое́. Припев: Священному́чениче Ианнуа́рие, моли́ Бо́га о на́с. Заре́ю Свята́го Ду́ха огражде́н,/ посреде́ пе́щи ликова́л еси́,/ ю́ношам и́же пе́рвее преподо́бным, преблаже́нне, подо́бяся. Припев: Священному́чениче Ианнуа́рие, моли́ Бо́га о на́с. Чи́ни свяще́нных сил посреде́ пе́щи/ с тобо́ю, Богому́дре, ликова́ху,/ с ни́миже пое́ши Благоде́теля, пребыва́я неопали́м. Сла́ва Отцу́ и Сы́ну и Свято́му Ду́ху. Река́, ме́двена уче́ний медото́чных твои́х, Ианнуа́рие прему́дре,/ вои́стинну язы́к твой бы́сть,/ мы́сли зря́щих тя наслажда́ющи. И ны́не и при́сно и во ве́ки веко́в. Ами́нь. Богородичен: Расто́ргни плени́цы, Богоневе́сто, грехо́в мои́х,/ я́же у́зы расто́ргши а́довы рождество́м Твои́м/ и ра́дости вся испо́лньши. Седален, глас 4 Свяще́ния оде́жду обагри́в крове́й твои́х омоче́нии,/ светле́йшу я́ве показа́л еси́, уго́дниче Христо́в./ Те́мже вшел еси́ во оби́тели ве́чныя,/ источа́я чту́щим тя исцеле́ний пучи́ну/ и моля́ всегда́ Бо́га всем да́ти прегреше́ний проще́ние. Песнь 4 Ирмос: Любве́ ра́ди, Ще́дре, Твоего́ о́браза/ на Кресте́ Твое́м стал еси́,/ и раста́яшася язы́цы,/ Ты бо еси́, Человеколю́бче,/ кре́пость моя́ и хвале́ние. Припев: Священному́чениче Ианнуа́рие, моли́ Бо́га о на́с. Вси Со́сса диа́кона и страда́льца и свяще́ннаго Фа́вста,/ Проку́ла же вели́каго и Дисиде́рия же согла́сно почти́м. Припев: Священному́чениче Ианнуа́рие, моли́ Бо́га о на́с. Дрема́нием нече́стия, Проку́ле му́чениче,/ ты ника́коже воздрема́лся еси́,/ бодростьми́ Боже́ственными все успи́л еси́ безбо́жных зломы́слие. Сла́ва Отцу́ и Сы́ну и Свято́му Ду́ху. Но́ва я́ко Дании́ла тя, звере́й посреде́ сострада́льцы спаса́ет,/ невре́дна изводи́ма, о Ианнуа́рие,/ Христо́с Бог наш. И ны́не и при́сно и во ве́ки веко́в. Ами́нь. Богородичен: Возвели́чим еди́ну Благослове́нную,/ Ея́же ра́ди вельми́ всех благослови́ вои́стинну Всепреблаги́й,/ от Сея́ воплоща́емь. Песнь 5 Ирмос: Ты, Го́споди, мой свет,/ в мир прише́л еси́,/ Свет Святы́й, обраща́яй из мра́чна неве́дения/ ве́рою воспева́ющия Тя. Припев: Священному́чениче Ианнуа́рие, моли́ Бо́га о на́с. Кро́вию свяще́нною оде́жду твою́, пребога́те, соверши́л еси́ светле́йшу/ и к Це́ркви Вы́шней я́ко свяще́нник прише́л еси́. Припев: Священному́чениче Ианнуа́рие, моли́ Бо́га о на́с. Исте́кши на земли́ многочестне́й кро́ви твое́й,/ был еси́ исцеле́ний река́,/ страсте́й изсуша́я пото́ки. Сла́ва Отцу́ и Сы́ну и Свято́му Ду́ху. Непра́веднаго судию́ ослепле́на моли́твою твое́ю просвети́л еси́,/ милосе́рдию Влады́ки всех подо́бяся, пребога́те. И ны́не и при́сно и во ве́ки веко́в. Ами́нь. Богородичен: Пое́м Тя, Ея́же ра́ди су́щим во тьме́/ Свет незаходи́мый возсия́, Богоро́дице, всех Влады́ка,/ и любо́вию ублажа́ем. Песнь 6 Ирмос: Приидо́х во глубины́ морски́я,/ и потопи́ла мя е́сть бу́ря мно́гих грехо́в,/ но, я́ко Бог, из глубины́ возведи́ живо́т мой,/ Многоми́лостиве. Припев: Священному́чениче Ианнуа́рие, моли́ Бо́га о на́с. Глаго́лы зна́мения ви́дя тя, собо́р беззако́нных, де́юща, священнотаи́нниче,/ ко Творцу́ от души́ прихо́дит, пресла́вно просвеща́емь. Припев: Священному́чениче Ианнуа́рие, моли́ Бо́га о на́с. Яви́лся еси́ пре́жде конца́, святи́телю,/ и по Боже́ственней кончи́не, творя́ мно́жество чуде́с,/ дар Свята́го Ду́ха от младе́нства прие́м. Сла́ва Отцу́ и Сы́ну и Свято́му Ду́ху. Ны́не свяще́нным согла́сием Фа́вста и Со́сса вси,/ Дисиде́рия с Евти́хием и му́драго Акути́она воспое́м,/ и с Проку́лом Богоно́сным. И ны́не и при́сно и во ве́ки веко́в. Ами́нь. Богородичен: Во благодея́ние челове́ком от Твои́х Чи́стых крове́й воплоща́ется Бог Сло́во./ Его́же приле́жно, Богома́ти, моли́/ спасти́ся душа́м на́шим. Кондак, глас 3 Свяще́ния пома́занием и муче́ния кро́вию украси́стеся,/ сла́вне Ианнуа́рие и Фео́доре,/ и сия́ете всю́ду, в Вы́шних лику́юще,/ и нас назира́йте, в храм ваш прише́дшия/ и в нем непреста́нно зову́щия:/ всех нас соблюди́те, моля́ще Человеколю́бца Бо́га. Песнь 7 Ирмос: Ю́ноши три в Вавило́не,/ веле́ние мучи́телево на бу́йство прело́жше,/ посреде́ пла́мене вопия́ху:/ благослове́н еси́, Го́споди, Бо́же оте́ц на́ших. Припев: Священному́чениче Ианнуа́рие, моли́ Бо́га о на́с. Отроко́м Боже́ственным уподо́бился еси́ посреде́ пла́мене, о Ианнуа́рие!/ Соше́ствием А́нгела, лику́я о́крест и пе́сньми та́йными Спа́са поя́:/ благослове́н еси́, Го́споди, Бо́же оте́ц на́ших. Припев: Священному́чениче Ианнуа́рие, моли́ Бо́га о на́с. Безболе́знен по́мысл твой благода́тию Боже́ственною соблюда́я,/ и пре́жде страда́ния неду́ги исцели́л еси́ вся́кия,/ па́стырь, и му́ченик, и вели́к чудотво́рец познава́емь. Сла́ва Отцу́ и Сы́ну и Свято́му Ду́ху. Стоя́л еси́ пред суди́щем, му́чениче, мучи́телей,/ стражда́ терпели́вно, и злочести́выя посрамля́я,/ и прельще́нным всем показу́я и́стину. И ны́не и при́сно и во ве́ки веко́в. Ами́нь. Богородичен: Умертви́ моя́ движе́ния, Пречи́стая, плотска́я,/ я́же Живо́т ро́ждшая,/ оживи́, Чи́стая, ду́шу мою́, умерщвле́нную страстьми́ и мно́гими грехи́. Песнь 8 Ирмос: Изба́вителю всех Всеси́льне,/ посреде́ пла́мене благоче́ствовавшия,/ снизше́д, ороси́л еси́/ и научи́л еси́ пе́ти:/ вся дела́, благослови́те, по́йте Го́спода. Припев: Священному́чениче Ианнуа́рие, моли́ Бо́га о на́с. Да восхва́лится вели́кий Проку́л со Аку́тием, и Евтихи́й,/ и Боже́ственный Дисиде́рий,/ Фавст же и Сосс доблему́дреннии,/ Спа́са сла́внии му́ченицы. Припев: Священному́чениче Ианнуа́рие, моли́ Бо́га о на́с. Тя лик страда́лец блаже́нный верхо́вника притяжа́,/ попра́, священнотаи́нниче сла́вне, верх де́монов,/ и безбо́жия вознесе́нную горды́ню потреби́. Сла́ва Отцу́ и Сы́ну и Свято́му Ду́ху. Я́коже о́троцы, о́гнь попра́л еси́ и звере́й стремле́ния обузда́л еси́,/ я́коже Дании́л, всеизря́дне, и я́ко Па́вел, во главу́ усе́клся еси́,/ благоче́стно сконча́в тече́ние твое́. И ны́не и при́сно и во ве́ки веко́в. Ами́нь. Богородичен: Всели́выйся несказа́нно во чре́во Твое́,/ Себе́ жили́ще показа́ Тя, Пречи́стая Богоневе́сто,/ Ему́же непреста́нно вопие́м:/ вся дела́, благослови́те Госпо́дня Го́спода. Песнь 9 Ирмос: Е́ва у́бо неду́гом преслуша́ния кля́тву всели́ла е́сть:/ Ты же, Де́во Богоро́дице,/ прозябе́нием чревоноше́ния/ ми́рови благослове́ние процвела́ еси́./ Тем Тя вси велича́ем. Припев: Священному́чениче Ианнуа́рие, моли́ Бо́га о на́с. Ианнуа́рия честна́я боре́ния, по́двиги и бие́ния,/ е́же до кро́ве, му́жество, боле́зни и ну́ждную сме́рть,/ чуде́с же неизме́рную пучи́ну с весе́лием возвели́чим. Припев: Священному́чениче Ианнуа́рие, моли́ Бо́га о на́с. Ви́ден был еси́ на высоте́ честна́го, сла́вне, муче́ния, я́коже незаходи́мое со́лнце;/ я́ко Боже́ственныя зве́зды, му́ченик мно́жество веды́й/ и ны́не просвеща́ет концы́ страда́ний вели́ких све́тлостию. Сла́ва Отцу́ и Сы́ну и Свято́му Ду́ху. Па́мять твоя́ светоно́сная возсия́,/ лучи́ Бо́жественного Ду́ха ве́сь мир озаря́ющи,/ омраче́ние зол отгоня́щи,/ в не́йже тя мо́лим, Богодухнове́нне, просвети́ вся, пою́щия тя. И ны́не и при́сно и во ве́ки веко́в. Ами́нь. Богородичен: Све́та, и́же в тебе́, сия́нии, ослепле́нную ду́шу мою́ просвети́,/ и руко́ю наста́ви, Отрокови́це, в пути́ спасе́нных ходи́ти,/ и преле́стна отбе́гнути преткнове́ния,/ я́ко да ве́рою ублажа́ю тя.

Минея, 9 Октября, Канон апостола Глас 6 Песнь 1 Ирмос: Яко по су́ху пешеше́ствовав Израилъ/ по бездне стопами,/ гони́теля фарао́на/ ви́дя потопляема,/ Богу победную песнь/ поим, вопияше. Припев: Святы́й апо́столе Иа́кове, моли́ Бо́га о на́с. Ру́ку ми даждь, Богови́дче и учениче Христов, Иакове,/ честны́й твой праздник похвали́ти устремившуся,/ и свет се́рдцу моему твоими молитвами возсия́й. Припев: Святы́й апо́столе Иа́кове, моли́ Бо́га о на́с. Струя́ми Божественныя мудрости напое́н,/ река истекл еси от рая́ сладости/ и земное лице теченьми благочестия истинно я́ве напоил еси. Сла́ва Отцу́ и Сы́ну и Свято́му Ду́ху. Священнейшему ли́ку ученик Христовых счета́лся еси, Иакове,/ исполняя число двонадеся́тных;/ с нимиже, Владыце предстоя́, нас поминай. И ны́не и при́сно и во ве́ки веко́в. Ами́нь. Богородичен: Тя, Пречистая Дево, небо прострый Господь/ и землю основавый,/ небо земное нам явил есть,/ из Тебе прошед плотию. Песнь 3 Ирмос: Несть свят,/ якоже Ты, Господи Боже мой,/ вознесы́й рог верных Твоих, Блаже,/ и утверди́вый нас на ка́мени/ испове́дания Твоего. Припев: Святы́й апо́столе Иа́кове, моли́ Бо́га о на́с. Божественнаго Духа я́ве прие́м зарю́,/ во тьме су́щим, яко утро, показался еси све́тло,/ Солнца мысленнаго возвещая всем явле́ние. Припев: Святы́й апо́столе Иа́кове, моли́ Бо́га о на́с. Нога твоя ста явственно в правости, блаженне,/ у Царя Праваго же и Благаго,/ ликующи Боголепно и ше́ствующи стезю́ Небесную. Сла́ва Отцу́ и Сы́ну и Свято́му Ду́ху. Сына Безначальна Божия, вся творящаго Божественною властию,/ неле́стна Тайноучи́теля, знания истины тя науча́юща, имел еси, Иакове. И ны́не и при́сно и во ве́ки веко́в. Ами́нь. Богородичен: Марие, всех надеждо на Тя надеющихся,/ рождши Слово, воплощенное нас ради,/ различных мя напа́стей и бед, Пречистая, избави. Седален, глас 8 Мудрость истинно учителя имев,/ тя научающую сущим паче ума,/ мудрость объюро́дил еси е́ллинскую, Богодухнове́нне;/ и язы́ком был еси светильник Божественный,/ благочестия словесы́ направляя безумныя./ Тем изба́вленнии тобою от пре́лести,/ достойно поем тя и верно ублажаем, Богоглаго́ливе Иакове:/ моли Христа Бога грехов оставление подати/ чтущим любовию святую память твою. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Солнца о́блаче разумнаго,/ Божественнаго Света Светильниче златокова́нный,/ Нескверная, Неблазная, Всенепорочная Владычице,/ омраченную душу мою ослеплением страстей,/ безстрастна зарею просвети, молюся;/ и оскверненное мое сердце омый пото́ки умиления, покаяния же слезами,/ и от тиме́ния мя очисти дел моих,/ да любовию зову Ти:/ Богородице Приснодево, моли Христа Бога прегрешений оставление подати ми,/ Тебе бо имею надежду, раб Твой. Песнь 4 Ирмос: Христос моя сила,/ Бог и Господь,/ Честна́я Церковь/ Боголепно поет, взывающи,/ от смысла чи́ста о Господе празднующи. Припев: Святы́й апо́столе Иа́кове, моли́ Бо́га о на́с. Сам тя Господь, Един Святый,/ честно́му лику учеников, блаженне, сочете́,/ честно́е и светлое жития́ твоего прови́девый. Припев: Святы́й апо́столе Иа́кове, моли́ Бо́га о на́с. Чудес испо́лнен Божественнаго Духа быв, Богопропове́дниче,/ чудотвори́ши бо, неду́ги отгоняя,/ и лукавства духо́в человеки свободи́л еси. Сла́ва Отцу́ и Сы́ну и Свято́му Ду́ху. Божественное сияние, нашедшее сердцу твоему, блаженне,/ Богосветло сие соде́ла/ и приятно паче ума дарований сотвори́. И ны́не и при́сно и во ве́ки веко́в. Ами́нь. Богородичен: Божественным Твоим Рождеством, Дево Всечистая,/ Ангельстии чи́ни и земных собо́ри совокупишася;/ миронача́льника бо Христа и Спаса всех родила еси. Песнь 5 Ирмос: Божиим све́том Твоим, Блаже,/ у́тренюющих Ти ду́ши любовию озари́, молюся,/ Тя ве́дети, Слове Божий,/ Истиннаго Бога,/ от мрака греховнаго взывающа. Припев: Святы́й апо́столе Иа́кове, моли́ Бо́га о на́с. Солнцу, блаженне, у́мному собеседник быв, лучи́ ты оттуду приемля,/ еже по существу первый Той есть, вторый по благодати был еси, славне. Припев: Святы́й апо́столе Иа́кове, моли́ Бо́га о на́с. Ум чисте́йший имев, све́тло же и чисто сердце ты стяжав,/ воплощшагося Бога видел еси, непостижимаго разумом. Сла́ва Отцу́ и Сы́ну и Свято́му Ду́ху. Уступает ти, учениче́, всяко пророчество, и всяко законоположе́ние, пребога́те;/ те́ми бо древле Пропове́даемаго самови́дно сподобился еси, блаженне, ви́дети. И ны́не и при́сно и во ве́ки веко́в. Ами́нь. Богородичен: Се, Дево, проро́чески имела еси во чреве Твоем, Сущаго над всеми Владыку и Господа,/ и неизреченно Сего, Чистая, родила́ еси, Дево, по рождестве нетле́нна пребы́вши. Песнь 6 Ирмос: Житейское море,/ воздвизаемое зря напастей бурею,/ к тихому пристанищу твое́му прите́к, вопию Ти:/ возведи́ от тли живот мой,/ Многомилостиве. Припев: Святы́й апо́столе Иа́кове, моли́ Бо́га о на́с. Ноги твоя красныя мир неле́стно яко благовеству́юще,/ мир су́що преестественный, и ум преимущий, учениче́ Христов всече́стне. Припев: Святы́й апо́столе Иа́кове, моли́ Бо́га о на́с. Разумети та́инство/ и проповедати страшное Божия воплощения сподобился еси, Иакове,/ перводе́льныя лучи прие́мый от Самаго Высочайшаго, приснопамятне. Сла́ва Отцу́ и Сы́ну и Свято́му Ду́ху. Неизрече́ннаго света сияя светлостьми достойно,/ верховный Христов апостоле, прилежно моли́ся о творящих память твою, славне, пречестну́ю. И ны́не и при́сно и во ве́ки веко́в. Ами́нь. Богородичен: Всеми влады́чествующа тва́рьми яко Бога Благаго рождши,/ согрешений моих, Пречистая, стру́пы до конца потреби́,/ благоутробна содева́ющи Рождшагося из Тебе. Кондак, глас 2 Твердо мудрости догма́ты в ду́ши благочести́вых вложившаго/ похвалами да ублажи́м яко Боговещателя вси Иакова:/ Престолу бо славы Владычню предстоя/ и со всеми Ангелы радуется,/ моля́ непрестанно о всех нас. Икос Яко ученик Христов и друг Невещественным лико́м спребываяй присно,/ и, Светом озаряем невечерняго светодая́ния, ума моего тьму разреши, всеблаженне:/ яко да твою светоносную память воспою,/ юже поет вся тварь, благочестно празднующи днесь;/ всех бо верных наставник и светильник был еси, Иакове,/ моля́ непрестанно о всех нас. Песнь 7 Ирмос: О́троцы в Вавилоне,/ пе́щнаго пла́мене не убоя́шася,/ но посреде́ пламене вве́ржени, ороша́еми, поя́ху:/ благословен еси, Господи, Боже отец наших. Припев: Святы́й апо́столе Иа́кове, моли́ Бо́га о на́с. Све́тлостьми и сияньми Духа просвещеннаго,/ язы́к множество семя Божественное тя именует, зовуще:/ благословен еси, Господи, Боже отец наших. Припев: Святы́й апо́столе Иа́кове, моли́ Бо́га о на́с. Мудростию укра́шен Богодарова́нною ти/ разорил еси мирскую мудрость,/ Богомудренно зовы́й, апостоле:/ благословен еси, Господи, Боже отец наших. Сла́ва Отцу́ и Сы́ну и Свято́му Ду́ху. Во всю землю изы́де вещание твое, апостоле Иакове,/ еже возвестил еси, яко гром, всем страна́м, премудре,/ Воплощенное Слово достойно пропове́дая. И ны́не и при́сно и во ве́ки веко́в. Ами́нь. Богородичен: Святых святе́йши, Дево Мати, Ты была еси,/ яко рождши Бога несказа́нно,/ егоже воспевающе, непрестанно зовем:/ благословен еси, Господи, Боже отец наших. Песнь 8 Ирмос: За зако́ны оте́ческия/ блаженнии в Вавилоне юноши, предбе́дствующе,/ царю́ющаго оплева́ша повеле́ние безу́мное/ и, совоку́плени имже, не сваришася огнем,/ Держа́вствующему достойную воспева́ху песнь:/ Господа пойте дела/ и превозноси́те во вся веки. Припев: Святы́й апо́столе Иа́кове, моли́ Бо́га о на́с. Священноученик, Небесным науче́н истинно, блаженне, та́инством,/ прошел еси всю вселенную, апостоле,/ проповедая велегла́сно слово веры Христо́вы/ и научая неизреченною благодатию:/ Господа воспевайте дела и превозноси́те во вся веки. Припев: Святы́й апо́столе Иа́кове, моли́ Бо́га о на́с. Богат был еси и блаже́н, сподобле́н всякаго блаженства,/ яко собеседник и сообита́тель быв Владыце,/ и конечное истинно жребием до́бре обога́щся,/ и Слову, свеселя́ся, воспева́ше:/ Господа пойте дела и превозноси́те во вся веки. Сла́ва Отцу́ и Сы́ну и Свято́му Ду́ху. За мир молитвенник изя́щнейший ко Спасу ста́ни, блаженне апостоле,/ прося свыше богатнаго мира Це́рквам,/ и хва́лящим тя верно прегрешений оставление,/ и/ душам спасение, вопиющим:/ Господа пойте дела и превозноси́те во вся веки. И ны́не и при́сно и во ве́ки веко́в. Ами́нь. Богородичен: Ты спасения всем Хода́таица, Богомати,/ явилася еси, Едина Всепетая, Спаса рождши Божия,/ Бога Слова, избавльшаго нас древния клятвы/ и благословение даровавшаго верою зовущим:/ Господа пойте дела и превозноси́те во вся веки. Песнь 9 Ирмос: Не рыда́й Мене, Мати,/ зря́щи во гробе,/ егоже во чре́ве без Се́мене зачала́ еси, Сына:/ востану бо, и прославлюся/ и вознесу́ со славою непрестанно яко Бог/ верою и любовию Тя величающия. Припев: Святы́й апо́столе Иа́кове, моли́ Бо́га о на́с. Явился еси миру, якоже молния претека́я,/ во тьме древле и сени неведения седящия,/ влеки́й ко Свету незаходимому Воплощшагося Единороднаго Сына,/ егоже самовидец и действенный слуга был еси, блаженне;/ егоже величаем. Припев: Святы́й апо́столе Иа́кове, моли́ Бо́га о на́с. Бурное, блаженне, от небесе носимое дыхание прием/ и язы́ком огнедохнове́нным обога́щся,/ пожига́еши, яко терние, безбожную мирскую мудрость,/ свеща́тельными зарями проповедают Христова сияя/ и мра́к разоря́я, Богоблаженне. Сла́ва Отцу́ и Сы́ну и Свято́му Ду́ху. Приими́, Богогла́се апостоле Иакове, молебную песнь,/ юже ти прино́сим, твою празднующе пречестну́ю и пресветлую память;/ избави от грехов рабы твоя, верховный Христов апостоле,/ прилежно моля́ся,/ да достойно тя величаем. И ны́не и при́сно и во ве́ки веко́в. Ами́нь. Богородичен: Яко неискусому́жно во чреве Твоем прие́мши Слово,/ пребыла́ еси Нетленна, Пречистая Дево,/ и рождши нам Еммануила, сущаго вку́пе Бога и Человека./ Сего сугуба естеством ве́дуще, Тя величаем. Светилен Не яко сына Алфеева, но яко ученика Слова,/ разумеем тя, Иакове, апостолов славо:/ ибо Божественное сияние явственно приял еси/ и благодать чудес отгоня́ти неду́ги от человек,/ верою совершающих всесвященную память твою. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Яко имущи благоутробие и милость великую,/ Богородице Дево,/ при́зри, Пренепорочная, на мое смирение/ и страстну́ю бурю и печалей нахождения разжени́, Чистая,/ и огня геенскаго избави мя Твоими молитвами.

Минея, 3 Марта, Канон мучеников Глас 1 Песнь 1 Ирмос: Твоя́ победи́тельная десни́ца/ боголе́пно в кре́пости просла́вися:/ та бо, Безсме́ртне,/ я́ко всемогу́щая, проти́вныя сотре́,/ изра́ильтяном пу́ть глубины́ новосоде́лавшая. Припев: Святи́и му́ченицы, моли́те Бо́га о на́с. Преми́рными блиста́ньми трисо́лнечныя зари́ озаря́еми, му́ченицы всехва́льнии,/ благоче́стно вас ны́не блажа́щия во светоно́снем ва́шем страда́нии просвети́те. Припев: Святи́и му́ченицы, моли́те Бо́га о на́с. Глаго́лы, я́ко стрела́ми, прему́дрии, пребеззако́нных сердца́ уязви́сте,/ те́мже претерпе́сте пожда́нно я́звы и ра́ны,/ испове́дающе Бо́жие свято́е И́мя. Сла́ва Отцу́ и Сы́ну и Свято́му Ду́ху. Священносло́вии свяще́нными пред мучи́тельскими суди́щи пропове́давше, му́ченицы приснопа́мятнии,/ нас ра́ди пострада́ти Изво́лившаго, наноси́мыя тве́рдо му́ки претерпе́сте. И ны́не и при́сно и во ве́ки веко́в. Ами́нь. Богородичен: Яви́лася еси́ ши́рши Небе́с, нигде́же вмести́маго вопло́щши,/ Того́ у́бо моли́ вся́кия нас тесноты́ изба́вити/ и ве́чнаго, Де́во Ма́ти, муче́ния. Песнь 3 Ирмос: Еди́не, ве́дый челове́ческаго существа́ не́мощь/ и ми́лостивно в не вообра́жься,/ препоя́ши мя с высоты́ си́лою,/ е́же вопи́ти Тебе́, Святы́й,/ одушевле́нный хра́ме неизрече́нныя сла́вы Твоея́, Человеколю́бче. Припев: Святи́и му́ченицы, моли́те Бо́га о на́с. Ума́ чи́стыми прило́ги Боже́ственная зря́ще,/ му́жеским нра́вом, блаже́ннии, к му́кам устреми́стеся,/ вражде́бнаго безпло́тнаго страда́льца побежда́юще с те́лом;/ те́мже прославля́етеся. Припев: Святи́и му́ченицы, моли́те Бо́га о на́с. Уде́с отсече́ния за Христа́, му́дрии, претерпе́вше,/ крове́й Боже́ственными проли́тии зе́млю преподо́бно освяти́сте/ и на тре́бищныя де́моном приноси́мыя уста́висте, му́ченицы, кро́ви. Сла́ва Отцу́ и Сы́ну и Свято́му Ду́ху. Положе́ни бы́сте, я́коже светоза́рнии, на высоте́ страда́ния,/ я́ко вои́стинну зве́зды, озаря́юще вселе́нную незаходи́мыми сия́ньми/ и тьму́ реша́ще ле́сти, святи́и;/ сего́ ра́ди ве́рно ублажа́етеся. И ны́не и при́сно и во ве́ки веко́в. Ами́нь. Богородичен: Во чре́ве прия́ла еси́ Христа́,/ чре́во истощи́вшаго а́дово вседе́йственным сове́том:/ Того́ моли́, Богора́дованная,/ от рабо́ты изба́вити грехо́вныя вся, ве́рно при́сно блажа́щия Тя. Седален, глас 1 Тро́ицу Честну́ю тро́ица му́чеников пред мно́гими испове́да наро́ды/ и лико́м причто́шася безпло́тных, страда́вше./ Сих дне́сь восхва́лим ве́рою,/ пра́зднующе свяще́нную их па́мять и мироспаси́тельную. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Упова́ние христиа́н, Пресвята́я Де́во,/ Его́же родила́ еси́, Бо́га, па́че ума́ же и сло́ва,/ непреста́нно моли́ с Вы́шними си́лами/ пода́ти оставле́ние грехо́в на́ших всех/ и исправле́ние жития́ ве́рою и любо́вию при́сно Тя сла́вящим. Песнь 4 Ирмос: Го́ру Тя, благода́тию Бо́жиею приосене́нную,/ прозорли́выма Авваку́м усмотри́в очи́ма,/ из Тебе́ изы́ти Изра́илеву провозглаша́ше Свято́му/ во спасе́ние на́ше и обновле́ние. Припев: Святи́и му́ченицы, моли́те Бо́га о на́с. Стоя́ху трие́ на три́знищи, пропове́дающе Еди́наго Трисо́лнечна Бо́га/ и ран разжже́ние кре́пко терпя́ще,/ столпы́ о́гненны Це́ркве яви́шася,/ благочести́вых о Христе́ предводя́щии. Припев: Святи́и му́ченицы, моли́те Бо́га о на́с. Поста́вльше но́зе на ка́мени ве́ры, не поколеба́стеся мно́гих искуше́ний кова́рствии,/ но яви́стеся непоколеби́ми, злочести́выя запина́юще, му́ченицы,/ и вся́чески охужда́юще благода́тию. Сла́ва Отцу́ и Сы́ну и Свято́му Ду́ху. Я́ко честно́е ка́мение, на земли́ валя́ющеся,/ зда́ние лука́вное многобо́жия вои́стинну, прему́дрии, разори́сте,/ и себе́ са́мыя Бо́жия хра́мы созда́сте,/ и ко хра́му Небе́сному взя́стеся. И ны́не и при́сно и во ве́ки веко́в. Ами́нь. Богородичен: Яви́ся Твоя́ утро́ба Богоно́сная пала́та,/ в не́йже всех Ца́рь почи́, Христо́с,/ хра́мы содева́я, Ма́ти Чи́стая, и светоза́рная жили́ща благочести́выя/ непристу́пнаго Божества́. Песнь 5 Ирмос: Просвети́вый сия́нием прише́ствия Твоего́, Христе́,/ и освети́вый Кресто́м Твои́м ми́ра концы́,/ сердца́ просвети́ све́том Твоего́ Богоразу́мия/ правосла́вно пою́щих Тя. Припев: Святи́и му́ченицы, моли́те Бо́га о на́с. Зако́н Боже́ственный соблюда́юще, добропобе́днии му́ченицы,/ беззако́нным му́жеским нра́вом противоста́сте/ и, уязвля́еми и растерза́еми телесы́, побе́ду ве́чную взя́сте. Припев: Святи́и му́ченицы, моли́те Бо́га о на́с. Восхва́лим Васили́ска и ве́рою почти́м Клеони́ка и Евтро́пия велему́дрыя,/ ве́рою пострада́вшия за Тро́ицу Всесвяту́ю/ и па́че со́лнца просия́вшия. Сла́ва Отцу́ и Сы́ну и Свято́му Ду́ху. Чудеса́ соверша́юще в сла́ву Бо́га на́шего,/ привлеко́сте зря́щия к ве́ре Спа́сове, му́ченицы многострада́льнии,/ цве́ти кра́снии ра́йстии, церко́вная утвержде́ния. И ны́не и при́сно и во ве́ки веко́в. Ами́нь. Богородичен: Сия́нием от Тебе́ па́че ума́ возсия́вшаго озари́ на́ша мы́сли, Всенепоро́чная,/ и тьму́ ума́ли помысло́в душетле́нных,/ я́ко да пое́м Тя, Влады́чице. Песнь 6 Ирмос: Обы́де нас после́дняя бе́здна,/ не́сть избавля́яй,/ вмени́хомся, я́ко о́вцы заколе́ния,/ спаси́ лю́ди Твоя́, Бо́же наш:/ Ты бо кре́пость немощству́ющих и исправле́ние. Припев: Святи́и му́ченицы, моли́те Бо́га о на́с. Ра́дуется земля́ и Небе́сная,/ лику́ют челове́цы, ле́тний соверша́юще пра́здник,/ е́же за Христа́ страда́ния блаже́нная до́блественно претерпе́вших ума́ тве́рдостию. Припев: Святи́и му́ченицы, моли́те Бо́га о на́с. Почти́л еси́ до́брыми твои́ми нра́вы, Евтро́пие, Бо́га Преблага́го,/ победи́л еси́ хи́трости вра́жия./ Те́мже тя почита́ют вси челове́цы,/ тобо́ю прегреше́ний разреше́ние прия́ти наде́ющиися. Сла́ва Отцу́ и Сы́ну и Свято́му Ду́ху. Исцеле́ний исто́чники излива́юще,/ зной отгна́сте неду́гов и скорбе́й, му́дрии,/ всем благоздра́вие посыла́юще,/ благоче́стно ва́шему покро́ву при́сно притека́ющим. И ны́не и при́сно и во ве́ки веко́в. Ами́нь. Богородичен: Увяди́вшая Твои́м прозябе́нием, Всенепоро́чная,/ дре́вле прозя́бшую преступле́нием зло́бу вра́жию,/ в души́ мое́й прозяба́ющия душетле́нныя и терно́вныя по́мыслы исто́ргни. Песнь 7 Ирмос: Тебе́, у́мную, Богоро́дице, пе́щь,/ разсмотря́ем, ве́рнии:/ я́коже бо о́троки спасе́ три Превозноси́мый,/ мир обнови́, во чре́ве Твое́м всеце́л,/ хва́льный отце́в Бог и препросла́влен. Припев: Святи́и му́ченицы, моли́те Бо́га о на́с. Я́коже наслажде́ние Боже́ственное вменя́юще удо́в отсече́ние,/ зауше́ния, строга́ния и сме́рть ну́жную,/ му́ченицы веселя́щеся и Бо́гу усе́рдно пою́ще:/ хва́льных отце́в Бог и препросла́влен. Припев: Святи́и му́ченицы, моли́те Бо́га о на́с. По мно́гих томле́ниих телесе́/ крест претерпе́сте кре́пко в подо́бии Изба́вителя,/ сла́вне Евтро́пие, вели́кий Клеони́че,/ и блаже́нную кончи́ну получи́сте,/ хва́льнаго воспева́юще Бо́га и препросла́вленнаго. Сла́ва Отцу́ и Сы́ну и Свято́му Ду́ху. Взира́ти вам предповелева́я к безсме́ртным воздая́нием,/ в темни́це яви́ся Христо́с,/ Его́же ви́девше, дерзнове́ния испо́лнистеся,/ взыва́юще, му́ченицы сла́внии:/ хва́льный отце́в Бог и препросла́влен. И ны́не и при́сно и во ве́ки веко́в. Ами́нь. Богородичен: Изба́ви ны, Пресвята́я Влады́чице, от язы́ческаго наше́ствия,/ сре́тения лука́ваго, вся́каго обстоя́ния/ и осужде́ния ве́чнаго, ве́рою зову́щия:/ хва́льный отце́в Бог и препросла́влен. Песнь 8 Ирмос: В пещи́ о́троцы Изра́илевы,/ я́коже в горни́ле,/ добро́тою благоче́стия чисте́е зла́та блеща́хуся, глаго́люще:/ благослови́те, вся дела́ Госпо́дня, Го́спода,/ по́йте и превозноси́те во вся ве́ки. Припев: Святи́и му́ченицы, моли́те Бо́га о на́с. Просте́рт иму́ще ум,/ ко Еди́ному Влады́це простро́стеся, уязвля́еми, всехва́льнии, зе́льне/ и му́чими, вопию́ще:/ вся дела́ Госпо́дня, Го́спода по́йте и превозноси́те во вся ве́ки. Припев: Святи́и му́ченицы, моли́те Бо́га о на́с. Возвы́сившеся на кресте́, я́коже дре́вле Влады́ка,/ вели́каго сподо́бистеся благосла́вия, страда́льцы, вопию́ще и глаго́люще:/ благослови́те, вся дела́ Госпо́дня, Го́спода,/ по́йте и превозноси́те во вся ве́ки. Припев: Святи́и му́ченицы, моли́те Бо́га о на́с. Си́лою Боже́ственною, всеблагосла́внии, укре́пльшеся, страстоте́рпцы,/ беззако́нных ополче́ния победи́ша кре́пко, пою́ще и глаго́люще:/ благослови́те, вся дела́ Госпо́дня, Го́спода,/ по́йте и превозноси́те во вся ве́ки. Сла́ва Отцу́ и Сы́ну и Свято́му Ду́ху. Троичен: Я́ко Еди́ницу естество́м, Тя пою́, Божество́ Всесвято́е,/ Треми́ же Ипоста́сьми несе́чно разделя́я, зову́, ра́дуяся:/ благослови́те, вся дела́ Госпо́дня, Го́спода,/ по́йте и превозноси́те во вся ве́ки. И ны́не и при́сно и во ве́ки веко́в. Ами́нь. Богородичен: Храм яви́лася еси́ Емману́ила и две́рь,/ Е́юже Еди́н вни́де и изы́де,/ я́коже Сам ве́сть, Чи́стая, спаса́я зову́щия:/ благослови́те, вся дела́ Госпо́дня, Го́спода,/ по́йте и превозноси́те во вся ве́ки. Песнь 9 Ирмос: О́браз чи́стаго Рождества́ Твоего́/ огнепали́мая купина́ показа́ неопа́льная,/ и ны́не на нас напа́стей свире́пеющую угаси́ти, мо́лимся, пе́щь,/ да Тя, Богоро́дице,/ непреста́нно велича́ем. Припев: Святи́и му́ченицы, моли́те Бо́га о на́с. Да Иису́са приобря́щете, насу́щаго жития́ вся вмени́сте уме́ты,/ я́коже Па́вел Боже́ственный научи́;/ сего́ ра́ди до́бре пострада́вше, на Небесе́х обита́ете,/ венцено́сцы великоимени́тии. Припев: Святи́и му́ченицы, моли́те Бо́га о на́с. Яви́ся, я́коже столп треуго́льный, свяще́нных му́ченик Боже́ственное собра́ние,/ сте́ны лука́ваго безбо́жия низложи́ша благода́тию,/ и ны́не живу́т во гра́де Бо́га Жива́го, перворо́дных в ски́ниих. Припев: Святи́и му́ченицы, моли́те Бо́га о на́с. Вене́ц нетле́ния, святи́и, от Христа́ прие́мше,/ багряни́цу же омочи́вше от му́ченических ва́ших крове́й,/ предстоите́ Царю́ веко́в, осия́еми све́тлыми светоли́тии/ и всебога́тными раздая́нии. Сла́ва Отцу́ и Сы́ну и Свято́му Ду́ху. Уже́ Бо́гу прибли́жившеся и со Безпло́тными собо́ры пра́зднующе,/ на земли́ вас при́сно блажа́щия и па́мять ва́шу пра́зднующия, му́ченицы,/ Небе́сную получи́ти све́тлость испроси́те. И ны́не и при́сно и во ве́ки веко́в. Ами́нь. Богородичен: Ужаса́ются А́нгельстии чи́ни от Твои́х ложе́сн Возсия́вшаго,/ Его́же о нас, Де́во Ма́ти, моли́,/ я́ко да стра́шныя вся изба́вит му́ки и тьмы́ кроме́шныя, пою́щия Тя.

Минея, 7 Августа, Кано́н свята́го. Творе́ние Феофа́ново Глас 6 Песнь 1 Ирмос: Я́ко по су́ху пешеше́ствовав Изра́иль по бе́здне стопа́ми, гони́теля фарао́на ви́дя потопля́ема, Бо́гу побе́дную пе́снь пои́м, вопия́ше. Припев: Преподобному́чениче Домети́е, моли́ Бо́га о на́с. К Бо́гу отше́д, му́ченическою сия́я благода́тию, пою́щим тя́ ве́рно светоно́сную вдохни́ зарю́, моля́ Христа́, богоблаже́нне. Припев: Преподобному́чениче Домети́е, моли́ Бо́га о на́с. Расто́рг мре́жи пре́лести, и́стинно Христу́ прите́кл еси́, мы́слию чи́стою пе́рсская служе́ния оста́вль и волше́бнаго избе́г безбо́жия. Сла́ва Отцу́ и Сы́ну и Свято́му Ду́ху. Хи́тре усмотри́л еси́, я́ко не Бо́г, я́ко созда́нное со́лнце, но ни еди́наго от ви́димых над неви́димаго Бо́га, наста́влен бы́л еси́, по́мыслом му́дрым объе́мся. И ны́не и при́сно и во ве́ки веко́в. Ами́нь. Богородичен: Тя́, Всесвята́я Де́во, Сы́на Бо́жия ро́ждшую, бы́вшаго по на́м ра́ди на́с, пропове́дуем Чи́стую Богома́терь, ве́рнии, и ублажа́ем. Песнь 3 Ирмос: Не́сть свя́т, я́коже Ты́, Го́споди Бо́же мо́й, вознесы́й ро́г ве́рных Твои́х, Бла́же, и утверди́вый на́с на ка́мени испове́дания Твоего́. Припев: Преподобному́чениче Домети́е, моли́ Бо́га о на́с. Изве́стною ве́рою утве́рждся, я́коже непрекло́нен сто́лп, непрело́жен яви́лся еси́, ни словесы́ волше́бными, ни ра́зумом пе́рсскаго бая́ния прельще́н. Припев: Преподобному́чениче Домети́е, моли́ Бо́га о на́с. Я́да душегу́бнаго бежа́л еси́, е́же тва́ри служи́ти и со́лнце почита́ти, су́щаго же вои́стинну Бо́га, я́ко все́х Зижди́теля, благоче́стия любо́вию взыска́л еси́. Сла́ва Отцу́ и Сы́ну и Свято́му Ду́ху. Вода́м боже́ственным прича́щся пакибытия́, ду́шу озари́л еси́ и бы́л еси́ вои́стинну сы́н благода́ти Бо́жия, насле́дник боже́ственных наслажде́ний. И ны́не и при́сно и во ве́ки веко́в. Ами́нь. Богородичен: Прему́дрость хра́м себе́ созда́ боже́ствен па́че ума́ же и сло́ва, все́льшися в чи́стую утро́бу Твою́, ю́же че́стне очи́щши Ду́хом, Всенепоро́чная. Седален, глас 8 Пе́рсское служе́ние оста́вль, ко Влады́це прише́л еси́, ба́нею креще́ния, сла́вне, просве́щся мы́слию, и, мона́шествовав преподо́бно, посто́м умертви́л еси́ плотски́я стра́сти, богому́дре Домети́е. Те́мже пострада́в и пре́лесть победи́в, сугу́б вене́ц побе́ды восприя́л еси́. Сего́ ра́ди вопие́м тебе́: моли́ Христа́ Бо́га грехо́в оставле́ние пода́ти чту́щим любо́вию святу́ю па́мять твою́. Песнь 4 Ирмос: Христо́с моя́ си́ла, Бо́г и Госпо́дь, честна́я Це́рковь боголе́пно пое́т, взыва́ющи, от смы́сла чи́ста, о Го́споде пра́зднующи. Припев: Преподобному́чениче Домети́е, моли́ Бо́га о на́с. Позна́л еси́, сла́вне, естество́м Неве́домаго, слове́сно взыска́л еси́ и, обре́т Сего́, возжела́в, поклони́лся еси́, ра́дуяся, Того́ вели́чествию. Припев: Преподобному́чениче Домети́е, моли́ Бо́га о на́с. Ли́ку целому́дрому те́пле прите́кл еси́ мона́шествующих святы́х и, доброде́телей ре́вностию распала́емь, по́жил еси́ чи́сте в посте́х и моли́твах. Сла́ва Отцу́ и Сы́ну и Свято́му Ду́ху. Удо́бь разреши́ соу́зы естества́ богому́дренное твое́ жела́ние, о́тче, и страсте́й угаси́ пе́щь росода́тельным просвеще́нием Свята́го Ду́ха. И ны́не и при́сно и во ве́ки веко́в. Ами́нь. Богородичен: Кре́пость моя́ е́сть Бо́г и Госпо́дь, Богоро́дице Де́во, вопло́щшееся Сло́во Пребоже́ственно из нетле́ннаго Твоего́ чре́ва и живо́т на́м дарова́. Песнь 5 Ирмос: Бо́жиим све́том Твои́м, Бла́же, у́тренюющих Ти́ ду́ши любо́вию озари́, молю́ся, Тя́ ве́дети, Сло́ве Бо́жий, и́стиннаго Бо́га, от мра́ка грехо́внаго взыва́юща. Припев: Преподобному́чениче Домети́е, моли́ Бо́га о на́с. Ра́зумом боже́ственным сия́я, блаже́нне, ви́димых все́х проразсуди́л еси́ неви́димых присносу́ществие, сия́нием чистоты́ просвеща́емь. Припев: Преподобному́чениче Домети́е, моли́ Бо́га о на́с. Боже́ственныя вкуси́в доброде́тели, безмо́лвия и отше́льствия, утверди́л еси́ мы́сль нему́тну, устрое́ние храня́, о́тче Домети́е. Сла́ва Отцу́ и Сы́ну и Свято́му Ду́ху. Я́ко вои́стинну ве́лие и чу́дно, е́же к лу́чшему преложе́ние твое́ и всему́дрый ра́зум, Вы́шняго бо руки́ изме́на и благода́ти Боже́ственныя де́ло бы́сть. И ны́не и при́сно и во ве́ки веко́в. Ами́нь. Богородичен: Де́ва пребыла́ еси́ без вре́да и ма́терская показу́еши, Всенепоро́чная Влады́чице: де́вству бо рождество́ счета́ла еси́ и но́сиши обои́х сво́йства. Песнь 6 Ирмос: Жите́йское мо́ре, воздвиза́емое зря́ напа́стей бу́рею, к ти́хому приста́нищу Твоему́ прите́к, вопию́ Ти: возведи́ от тли́ живо́т мо́й, Многоми́лостиве. Припев: Преподобному́чениче Домети́е, моли́ Бо́га о на́с. Тве́рдо наноси́мое врага́ и супоста́та искуше́ние претерпе́л еси́ и, разли́чно, преблаже́нне, искуше́н бы́в, за́вистию бори́мь, победи́тель яви́лся еси́, достосла́вне. Припев: Преподобному́чениче Домети́е, моли́ Бо́га о на́с. Житие́ твое́ боже́ственное, жи́знь богови́дна и светоно́сна бы́сть: ми́ра бо кра́сная оста́вль, боже́ственное благоле́пие уплоди́л еси́, богому́дре, и красоту́. Сла́ва Отцу́ и Сы́ну и Свято́му Ду́ху. Зна́мения и чудеса́ сподо́бился еси́ соверша́ти па́че естества́, сла́вне, си́лою Боже́ственною воору́жся, имы́й свы́ше споспешеству́ющую тебе́ благода́ть, достосла́вне. И ны́не и при́сно и во ве́ки веко́в. Ами́нь. Богородичен: Све́та жили́ще, и черто́г боголе́пен па́че ума́ воплоще́ния все́х, Де́во, Соде́теля: Ты́ бо еди́на яви́лася еси́ достоблаже́нное Тому́ поко́ище. Кондак, глас 6 Я́ко преоби́дев тле́нная и до́лу влеку́щая мудрова́ния, преподобному́чениче Домети́е, вели́к наста́вник мона́хом показа́лся еси́, не устраши́вся я́рости царя́, не хотя́ща чти́ти Христа́, и́стиннаго Бо́га. Сего́ ра́ди и сконча́лся еси́, воспева́я пе́снь: Бо́г е́сть со мно́ю, и никто́же на мя́. Песнь 7 Ирмос: Росода́тельну у́бо пе́щь соде́ла а́нгел преподо́бным отроко́м, халде́и же опаля́ющее веле́ние Бо́жие, мучи́теля увеща́ вопи́ти: благослове́н еси́, Бо́же оте́ц на́ших. Припев: Преподобному́чениче Домети́е, моли́ Бо́га о на́с. На тебе́, о́тче, пресве́тлая Ду́ха благода́ть почи́ и де́йствия пресла́вна показа́ тебе́, вопию́щему и пою́щему ве́рно: благослове́н еси́, Бо́же оте́ц на́ших. Припев: Преподобному́чениче Домети́е, моли́ Бо́га о на́с. Тве́рдым умо́м проше́л еси́ стезю́ поще́ния и при кончи́не подвиго́в му́ченик и́стинен бы́л еси́, зовы́й Христу́: благослове́н еси́, Бо́же оте́ц на́ших. Сла́ва Отцу́ и Сы́ну и Свято́му Ду́ху. Я́ко ро́ждшеся моли́твами твои́ми, де́ти тебе́, отцу́, сподвиза́шася и, в пеще́ре терпя́ще, страда́ша с тобо́ю, согла́сно зову́ще Христу́: благослове́н еси́, Бо́же оте́ц на́ших. И ны́не и при́сно и во ве́ки веко́в. Ами́нь. Богородичен: Спасе́ния приста́нище Тя́ стяжа́вше, от бу́ри спаса́емся и, наде́жду, ю́же к Тебе́, я́ко основа́ние ду́ш держа́ще, зове́м Христу́: благослове́н еси́, Бо́же оте́ц на́ших. Песнь 8 Ирмос: Из пла́мене преподо́бным ро́су источи́л еси́ и пра́веднаго же́ртву водо́ю попали́л еси́: вся́ бо твори́ши, Христе́, то́кмо е́же хоте́ти. Тя́ превозно́сим во вся́ ве́ки. Припев: Преподобному́чениче Домети́е, моли́ Бо́га о на́с. Снеда́емь любо́вию, о́тче, Зижди́теля, зда́ний отри́нул еси́ вся́кое пристра́стие, Ду́хом Бо́жиим я́ве направля́емь, Его́же превозно́сим во вся́ ве́ки. Припев: Преподобному́чениче Домети́е, моли́ Бо́га о на́с. Земна́я попече́ния оттря́с, небе́сными наде́ждами, о́тче, обогати́лся еси́ и е́же о Христе́ блаже́нством, Его́же ны́не наслажда́ешися во вся́ ве́ки. Сла́ва Отцу́ и Сы́ну и Свято́му Ду́ху. Светолу́чныя зари́, о́тче, прие́м, Свята́го и Боже́ственнаго, прему́дре, Ду́ха, очи́ма я́ве Сего́, блаже́нне, ви́дел еси́, Боже́ственных та́ин стра́шно науча́юща тя́. И ны́не и при́сно и во ве́ки веко́в. Ами́нь. Богородичен: Боговеща́нная цевни́ца Твоего́ пра́отца ковче́г Тя́ свя́т прообрази́, нося́щ Бо́га, в пло́ть обле́кшася, Его́же превозно́сим во вся́ ве́ки. Песнь 9 Ирмос: Бо́га челове́ком невозмо́жно ви́дети, на Него́же не сме́ют чи́ни а́нгельстии взира́ти; Тобо́ю бо, Всечи́стая, яви́ся челове́ком Сло́во воплоще́нно, Его́же велича́юще, с небе́сными во́и, Тя́ ублажа́ем. Припев: Преподобному́чениче Домети́е, моли́ Бо́га о на́с. Све́том невеще́ственным озаря́емь, светови́ден досто́йно, богоно́се, бы́л еси́, житие́ непоро́чно стяжа́в, о́тче, и всесвя́то, ны́не же предстои́ши моли́твенник Влады́це и Бо́гу о ста́де твое́м. Припев: Преподобному́чениче Домети́е, моли́ Бо́га о на́с. Твои́ по́двизи воздержа́ния му́ченическими по́двиги по достоя́нию венча́шася, и сугу́бо страда́ние показа́л еси́ благому́жеством, и́хже прия́л еси́, и ве́чных бла́г обре́л еси́ наслажде́ние. Сла́ва Отцу́ и Сы́ну и Свято́му Ду́ху. Укре́плься си́лою Боже́ственною и благода́тию, я́влься все́м благоче́стия учи́тель, показа́лся еси́, чудесы́ украша́емь, вся́ утвержда́я, вся́ исцеля́я, приходя́щия к тебе́ ве́рно, богоблаже́нне. И ны́не и при́сно и во ве́ки веко́в. Ами́нь. Богородичен: В Тебе́ соде́яся вы́ше челове́ка, па́че естества́, Де́во Богоро́дице, та́инство: Бо́жия бо была́ еси́ Роди́тельница, нося́щи на объя́тиих и пита́ющи небе́сными во́инствы песносло́вимаго.

Минея, 12 Марта, Канон святителя Глас 2 Песнь 1 Ирмос: Гряди́те, лю́дие,/ пои́м пе́снь Христу́ Бо́гу,/ разде́льшему мо́ре и наста́вльшему лю́ди,/ я́же изведе́ из рабо́ты еги́петския,/ я́ко просла́вися. Припев: Святи́телю, о́тче Григо́рие, моли́ Бо́га о на́с. Христе́ Спа́се, Све́те ми́ра Незаходи́мый,/ свет у́мный ниспосли́ ра́зуму моему́ озаря́ющ,/ воспе́ти Ри́ма предста́теля, Боже́ственнаго Григо́рия. Припев: Святи́телю, о́тче Григо́рие, моли́ Бо́га о на́с. Да твою́ ми́ру пока́жет доброде́тель Предве́дый вся́ческая, всему́дре,/ на ви́димую отвсю́ду высоту́ святи́тельства возведе́ тя. Сла́ва Отцу́ и Сы́ну и Свято́му Ду́ху. Я́ко честно́е и чисте́йшее селе́ние, обре́тши тебе́, Богому́дре,/ всели́ся в тя Тро́ица Пресвята́я/ и дарова́ний испо́лни Боже́ственных, свя́те Григо́рие. И ны́не и при́сно и во ве́ки веко́в. Ами́нь. Богородичен: Чи́стое де́вства сокро́вище, Бо́жию Роди́тельницу,/ избавле́ние челове́ческаго ро́да и ра́дость А́нгелов пе́сньми прославля́ем. Песнь 3 Ирмос: Утверди́ нас в Тебе́, Го́споди,/ Дре́вом умерщвле́й грех,/ и страх Твой всади́/ в се́рдца нас, пою́щих Тя. Припев: Святи́телю, о́тче Григо́рие, моли́ Бо́га о на́с. Житие́ твое́ свя́то, о́браз Боже́ствен,/ нрав тих, ра́зумом укра́шен,/ сло́во же твое́, Богому́дре,/ растворе́но бы́сть со́лию благода́ти. Припев: Святи́телю, о́тче Григо́рие, моли́ Бо́га о на́с. Возжже́ тя Христо́с, я́коже свети́льник, Григо́рие светя́й на высоте́ Це́ркве, всеблаже́нне,/ и озаря́яй ю луча́ми твои́ми. Сла́ва Отцу́ и Сы́ну и Свято́му Ду́ху. Отто́ргнул еси́ ум от ми́ра всеце́ло/ и, все жела́ние ко Влады́це просте́р,/ благода́ть Ду́ха привле́кл еси́, иера́рше Григо́рие. И ны́не и при́сно и во ве́ки веко́в. Ами́нь. Богородичен: Вити́й велегласие умолче́,/ мудреце́в же остроу́мие обуя́ рождество́м Твои́м, Богоневе́сто,/ недоумевающих разуме́ти Твое́ та́инство. Седален, глас 4 Госпо́дня благосла́внаго иера́рха в пе́снех свяще́нных восхваля́ем,/ соше́дшиися вси, вопию́ще к нему́:/ спаса́й моли́твами твои́ми почита́ющия тя,/ сокруши́ шата́ние злосла́вных папистов/ и ми́рное испроси́ житие́ правосла́вным,/ Григо́рие всему́дре. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Те́плое заступле́ние су́щим в беда́х/ и Помо́щницу на́шу и к Бо́гу премене́ние,/ Е́юже тли изба́вихомся,/ Богоро́дицу, ве́рнии, ублажа́ем. Песнь 4 Ирмос: Услы́шах, Го́споди,/ сла́вное Твое́ смотре́ние/ и просла́вих, Человеколю́бче,/ непостижи́мую Твою́ си́лу. Припев: Святи́телю, о́тче Григо́рие, моли́ Бо́га о на́с. Блиста́еши, му́дре, чудесы́/ и тьму́ страсте́й отгоня́еши дале́че Боже́ственными моли́твами. Припев: Святи́телю, о́тче Григо́рие, моли́ Бо́га о на́с. Пропове́дуя воплоще́ние Христо́во, Богогла́се, и Божество́ Его́,/ пле́мя лонгоба́рдов посрами́л еси́. Сла́ва Отцу́ и Сы́ну и Свято́му Ду́ху. Я́ко Моисе́й, в незаходи́мый мрак вшед,/ скрижа́ли прия́л еси́ Ева́нгелия, блаже́нне Григо́рие. И ны́не и при́сно и во ве́ки веко́в. Ами́нь. Богородичен: Небе́сную Ле́ствицу,/ Е́юже Бог сни́де и естество́ челове́к возвы́си,/ Де́ву ублажа́ем. Песнь 5 Ирмос: Све́та Пода́телю и веко́в Тво́рче, Го́споди,/ во све́те Твои́х повеле́ний наста́ви нас,/ ра́зве бо Тебе́, ино́го бо́га не зна́ем. Припев: Святи́телю, о́тче Григо́рие, моли́ Бо́га о на́с. Подража́тель Христо́в, иера́рхов удобре́ние,/ дне́сь ве́рных призыва́ет Григо́рий/ соверши́ти его́ честну́ю па́мять и благода́ти приити́. Припев: Святи́телю, о́тче Григо́рие, моли́ Бо́га о на́с. Вели́чие Бо́гови воздава́я вы́ну, достосла́вне,/ возвели́чен еси́ досто́йно от Него́,/ ве́сть бо сла́вити Госпо́дь сла́вящия Его́. Сла́ва Отцу́ и Сы́ну и Свято́му Ду́ху. Ми́рно житие́ проше́д,/ к ми́рным дости́гл еси́, Богоприя́тне, селе́нием,/ мир бо, всяк ум превосходя́щ, Христа́, прия́л еси́. И ны́не и при́сно и во ве́ки веко́в. Ами́нь. Богородичен: Земля́ неора́нная свята́я,/ прозя́бшая Клас живота́, показа́лася еси́, Мари́е,/ Его́же яды́й благоче́стно, я́ко жи́зни причаща́яйся,/ не у́зрит сме́рти. Песнь 6 Ирмос: В бе́здне грехо́вней валя́яся,/ неизсле́дную милосе́рдия Твоего́ призыва́ю бе́здну:/ от тли, Бо́же, мя возведи́. Припев: Святи́телю, о́тче Григо́рие, моли́ Бо́га о на́с. Неосла́бно Бо́гу сопребыва́я,/ озаре́ньми отту́ду яви́лся еси́ столп о́гнен, досточу́дне,/ лю́ди ве́рныя предводя́й. Припев: Святи́телю, о́тче Григо́рие, моли́ Бо́га о на́с. Мы́сленно невеще́ственным А́нгелом совокупля́лся, преподо́бне,/ с ни́ми спросла́вился еси́, преста́вився,/ я́коже и пре́жде кончи́ны был еси́ Небе́сный. Сла́ва Отцу́ и Сы́ну и Свято́му Ду́ху. Устне́ твои́, священнопропове́дниче,/ я́ко во́ду живу́ю, источи́ша словеса́ Ду́ха/ и се́рдца веселя́т ве́рно после́дующих тебе́. И ны́не и при́сно и во ве́ки веко́в. Ами́нь. Богородичен: Долгореши́тельница Е́вы была́ еси́, Чи́стая,/ Ты бо долг сея́ из Тебе́ возсия́вшим Но́вым Ада́мом/ бога́тно воздала́ еси́. Кондак, глас 3 Подобонача́льник показа́лся еси́ Нача́льника па́стырем Христа́,/ и́ноков чреды́, о́тче Григо́рие ко огра́де Небе́сней наставля́я,/ и отту́ду научи́л еси́ ста́до Христо́во за́поведей Его́,/ ны́не же с ни́ми ра́дуешися и лику́еши в Небе́сных кро́вех. Икос Име́я Вели́каго Архиере́я, о иера́рше Григо́рие,/ проше́дшаго Небеса́, Иису́са, Сы́на Бо́жия,/ благочести́ваго держа́лся еси́ испове́дания,/ апо́стольски пра́во пра́вя сло́во и́стины./ Ева́нгельски у́бо пожи́в и да́нный тебе́ тала́нт до́бре возрасти́в,/ прише́л еси́ с дерзнове́нием к Вы́шнему Престо́лу благода́ти/ и, неизрече́нныя ра́дости сподобля́емь, лику́еши в Небе́сных кро́вех. Песнь 7 Ирмос: Богопроти́вное веле́ние беззако́ннующаго мучи́теля/ высо́к пла́мень вознесло́ е́сть,/ Христо́с же простре́ Богочести́вым отроко́м ро́су духо́вную,/ Сый благослове́н и препросла́влен. Припев: Святи́телю, о́тче Григо́рие, моли́ Бо́га о на́с. Кре́пость дарова́ся тебе́ от Бо́га, я́ко ве́рному Его́ служи́телю,/ сокруша́ти неви́димаго борца́ и спаса́ти ста́до Христо́во невре́дно. Припев: Святи́телю, о́тче Григо́рие, моли́ Бо́га о на́с. Же́ртву Безкро́вную Всеви́дцу принося́,/ Ааро́на вы́сший яви́лся еси́, Богоприя́тне,/ не в кро́ви тельчей и козлей,/ но Кро́вию Христо́вою освяща́я лю́ди. Сла́ва Отцу́ и Сы́ну и Свято́му Ду́ху. Сла́вившу ти во всем животе́ твое́м Тро́ицу Несозда́нную,/ ны́не со А́нгелы пое́ши Той и все́ми святы́ми пе́снь Трисвяту́ю, му́дре Григо́рие. И ны́не и при́сно и во ве́ки веко́в. Ами́нь. Богородичен: Прибе́жище на́ше непосты́дное еси́, Богороди́тельнице,/ тем мо́лим Тя приле́жно:/ покрыва́й и храни́ от зол сла́вящия Тебе́ рабы́ Твоя́. Песнь 8 Ирмос: Пе́щь иногда́ о́гненная/ в Вавило́не де́йства разделя́ше,/ Бо́жиим веле́нием халде́и опаля́ющая,/ ве́рныя же ороша́ющая, пою́щия:/ благослови́те, вся дела́ Госпо́дня, Го́спода. Припев: Святи́телю, о́тче Григо́рие, моли́ Бо́га о на́с. Боле́зней и страсте́й врач показа́лся еси́/ и духо́в лука́вых прогони́тель, преподо́бне,/ сый А́нгелов прее́мник, и престо́ла, и благода́ти,/ ве́ры же и чистоты́. Припев: Святи́телю, о́тче Григо́рие, моли́ Бо́га о на́с. Стра́сти и се́ятелей тех победи́л еси́ воздержа́нием/ и, безстра́стия дости́г, Григо́рие,/ Влады́це своему́ пел еси́:/ благослови́те, вся дела́ Госпо́дня, Го́спода. Сла́ва Отцу́ и Сы́ну и Свято́му Ду́ху. Ми́ром у́мным пома́зан, свя́те,/ ми́ра источи́л еси́ чу́вственная же и мы́сленная/ от слове́с твои́х Богодухнове́нных и от ра́ки моще́й твои́х,/ чуде́с соверши́тель быв. И ны́не и при́сно и во ве́ки веко́в. Ами́нь. Богородичен: Други́й ковче́г заве́та и дом, полн сла́вы Бо́жией, Тя ве́мы, Де́во,/ Тебе́ бо избра́ от всех родо́в Пребоже́ственный/ и в Тя всели́тися боголе́пно изво́ли. Песнь 9 Ирмос: Безнача́льна Роди́теля Сын, Бог и Госпо́дь,/ вопло́щся от Де́вы, нам яви́ся,/ омраче́нная просвети́ти, собра́ти расточе́нная./ Тем Всепе́тую Богоро́дицу велича́ем. Припев: Святи́телю, о́тче Григо́рие, моли́ Бо́га о на́с. Со́нмы, собери́теся, благочести́вых,/ соверши́ти торжество́ Боже́ственнаго Григо́рия,/ подае́т бо здра́вие телесе́м и душа́м свяще́ние,/ любо́вию почита́ющим его́. Припев: Святи́телю, о́тче Григо́рие, моли́ Бо́га о на́с. Плени́цами содержи́м безме́рных согреше́ний мои́х,/ к тебе́ прибега́ю, о́тче, ве́рою моля́ся,/ да прииму́ свобожде́ние от сих хода́тайством твои́м, Богоприя́тне. Сла́ва Отцу́ и Сы́ну и Свято́му Ду́ху. Возрасти́в тала́нт благода́ти, ра́достно преста́вился еси́, глаго́ля Влады́це:/ се принесо́х Ти дарова́нное приумно́жено./ Те́мже, я́ко благи́й и ве́рный раб,/ вшел еси́ в ра́дость Го́спода своего́. И ны́не и при́сно и во ве́ки веко́в. Ами́нь. Богородичен: Ски́ние Богопросла́вленная,/ ра́дуйся, Богоневе́сто,/ ра́досте А́нгелов и святи́телей красото́,/ ра́дуйся, ве́рных удобре́ние и челове́к всех похвале́, Всепе́тая. Светилен Столп о́гнен, с Небесе́ сходя́щ на тя, Григо́рие,/ яви́ тя ри́мляном архипа́стыря досто́йнейша:/ ты бо, Боже́ственною любо́вию огнепали́м,/ яви́лся еси́ свети́льник Це́ркве в просвеще́ние мно́гих и спасе́ние. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: К Тебе́, о Ма́ти Све́та, прибега́ем, вопию́ще:/ светоза́рным благода́ти Твое́й сия́нием разреши́ темнозра́чен о́блак страсте́й на́ших,/ да Све́та яви́мся о́бщники невече́рняго/ Твои́ми, Богоро́дице, моли́твами.

глас 8 Песнь 1 Ирмос: Воду прошед, яко сушу, и египетскаго зла избежав, израильтянин волияше: Избавителю и Богу нашему поим. Воды мирскаго мятежа, аки Моисей с Аароном Чермное море, преподобный Антоний с Феодосием блаженным немокренно преидоста и, без вреда пристанища Небеснаго достигше, радостно возгласиста: Избавителю и Богу нашему поим. Волнами житейскими влаяйся аз, окаянный, и, да не погрязну фараонитски в глубине зол, бояся, к вам вопию: о отцы преподобнии, Избавителю и Богу нашему о мне помолитеся. Водами слез твоих фараона мысленнаго потопил еси, Антоние, во умерщвленном же телеси, аки в тимпане, победная воспел еси, Феодосие, оба же о ны моление Избавителю и Богу нашему принесите. Богородичен: Воды страстей моих изсуши, рождшая Незаходимое Солнце, Христа, и на сух путь безстрастия настави мя, добрая Путеводительнице, да благодарственная Избавителю Богу нашему и Тебе воспою во веки. Песнь 3 Ирмос: Небеснаго круга Верхотворче, Господи, и Церкве Зиждителю, Ты мене утверди в любви Твоей, желаний Краю, верных Утверждение, Едине Человеколюбче. Небесное житие в пещерах земных показасте, отцы преподобнии, утверждающеся же в любви Божией, желаемаго горняго края достигосте и зрети сподобистеся Единаго Человеколюбца. На Небесный круг востекл еси, святе Антоние, к Небесным обителем преставился еси, преподобне Феодосие: тамо оба мольбу о нас, грешных, принесите к Единому Человеколюбцу. Небесных благ лишився аз, окаянный, к вам притекаю, о Небеснии граждане: да не в конец отчужден буду части спасаемых, умолите о мне Единаго Человеколюбца. Богородичен: Небес пространнейшая Богородительнице, Невместимаго вместившая в пречистых ложеснах Твоих, сподоби мя, грешнаго, получити место в селениих праведных и с теми наслаждатися лицезрения Единаго рожденнаго от Тебе Человеколюбца. Седален Моление твое теплое, Антоние преблаженне, огнь с небесе сведе на место, идеже ныне основася Богородична церковь, твоя же прилежная мольба, богоносе Феодосие, на то же место благодать Божию образом дуги от ветхия церкве преведе: оба бысте чудотворцы, оба теплии к Богу молебницы, оба велицыи Того угодницы; и ныне молитвами вашими попалите хврастие грехов наших, и благодати Божией приобщите ны, и от бед избавляйте нас, вскоре предстательствующе. Песнь 4 Ирмос: Услышах, Господи, смотрения Твоего таинство, разумех дела Твоя и прославих Твое Божество. Услышав глас Господень в Афоне к игумену, глаголющ: посли Ми Антония в Россию, яко тамо его требую, и прииде Антоний в новопросвещенную страну повелением Господа своего, и прослави Того Божество. Услышав Феодосий глас Христа, во Евангелии глаголюща: грядите по Мне и возьмите иго Мое на себе, абие, вся яко уметы вменив, во след Его пойде и прослави Того Божество. Услышавше равноангельное двою тою отцу в пещерах пребывание, мнози стекошася к нима подражати постнических подвигов и, образом добродетельнаго ею жития наставльшеся угождати Богу, прославиша Того Божество. Богородичен: Услыши, Владычице, стенание и мольбы христоименитых людей, призри на озлобление и горесть утесняемых отвсюду, виждь слезы и рыдания сущих в бедах и скорбех и умилосердися на рабы Твоя, да Тя, Богородицу, прославляем. Песнь 5 Ирмос: Просвети нас повелении Твоими, Господи, и мышцею Твоею высокою Твой мир подаждь нам, Человеколюбче. Просветишася, яко небеса двема светилами, горы Киевския двема начальнейшими отцы преподобными, Антонием, аки солнцем, Феодосием, аки луною, и свет святыни их во тьме пещерной светяше, и тьма не объят их: людие же, на свет добрых дел ею взирающе, прославляху Отца Небеснаго. Просветися вся Россия лучами чудес ваю, сынове немерцающаго Света, отцы преподобнии, аще и под спудом пещерным скрыстеся: творимая бо вами богоугождения втайне показа Бог яве и прослави прославляющих Его. Просвещаетеся ныне, аки солнце, во Царствии Небеснем, о богоблаженнии: просветите помраченную мою душу и на светлую заповедей Божиих стезю наставите мя. Богородичен: Просвети лице Твое на рабы Твоя, Христе, Свете истинный, и, отгнав тьму прегрешений наших, света присносущнаго общники сотвори ны, ради Рождшия Тя и преподобных Твоих, Человеколюбче. Песнь 6 Ирмос: Молитву пролию ко Господу и Тому возвещу печали моя, яко зол душа моя исполнися и живот мой аду приближися, и молюся, яко Иона: от тли, Боже, возведи мя. Молитву излиял еси ко Господу, преподобне Антоние: да будет по всей земли роса, на месте же имевшия быти церкве суша; и паки: по всей земли суша, на месте же святем роса, и услышан был еси вскоре. Молю, и о мне помолися, да влаги моя изсушит страстныя, изсохшее же сердце мое росою благодати да оросит и от тли да возведет мя Бог мой. Молитвами твоими, преподобне Феодосие, обитель твоя во оскудениих наполняшеся земных благ; душе моей скудной, не имущей добрых дел, исходатайствуй спасительная благая, и от тли да возведет мя Бог мой. Молитвами преподобных Твоих угодников, Антония и Феодосия Печерских, излиявших пред Тобою сердца своя и молящихся к Тебе о всем мире выну, от тли, Боже мой, возведи мя. Богородичен: Молитву мою по Господе Бозе к Тебе, Госпоже Богородице, проливаю и возвещаю моя душевныя печали: яко злыми моими делы в погибель влекомь есмь и не исправляюся, греховным оружием уязвляемь есмь и не чувствую, кит преисподняго ада пожрети мя хощет, и не бежу от него; обаче к Твоему милосердию вопию: от тли, Владычице моя, возведи мя. Кондак, глас 2 Твердыя столпы благочестия, недвижимая иноческих законоположений основания и необоримыя стены Российския восхвалим: Антония, возлюбльшаго Бога, и Феодосия, возлюбленнаго Богом: труды бо онех и постническия подвиги прият паче всякаго всеплодия Един во святых прославляемый. Икос Кое похваление принесем двоице великих угодников Божиих: Антонию, обретшему благодать пред Господем, Феодосию, сподобльшемуся благодати от Господа, обема же послужившима Богоблагодатней Пречистей Деве? Якоже бо древле два Херувима славы бяху стояще у кивота завета, сице кивоту одушевленному, Божией Матери, сии два отцы преподобнии предстояста выну, хваляще воплощшагося от Нея Бога, и ныне предстоят с Херувимы Престолу неприступныя славы, аможе предста Царица одесную, крилами же непрестанных своих молений осеняют Россию, и умилостивляемый ими бывает с Богородицею Христос Бог, Един во святых прославляемый. Песнь 7 Ирмос: От Иудеи дошедше, отроцы в Вавилоне иногда верою Троическою пламень пещный попраша, поюще: отцев Боже, благословен еси. От горы Афонския блаженный Антоний в Россию пришед и, да будет на месте сем Святыя Горы благословение, рек, пояше: отец наших Боже, благословен еси. От дому родительню преподобный Феодосий к Иерусалиму тещи желая, на горы Киевския прииде и сотвори я своею святынею, яко Сиона; труды же своими распространив обитель, яко Иерусалима, пояше: отец наших Боже, благословен еси. От мирских любосластных страстей, аки от вавилонскаго пламене, неопальни соблюдшеся, отцы святии ныне в Церкви торжествующих с радостию вопиют: Единый в Троице Боже отец наших, благословен еси. Богородичен: От Христа Бога посылахуся на проповедь два два, аможе Сам идти хотяше; Пречистая же Дева Богородица, хотящи Сама новопросвещенныя люди российския посетити и сотворити Себе посреде их селение, посла в Россию, аки апостольскую двоицу, сия два избранныя рабы Своя, Антония и Феодосия, поющия: воплощенный от Девы Христе Боже, со Отцем и Духом благословен еси. Песнь 8 Ирмос: Царя Небеснаго, Егоже поют вои ангельстии, хвалите и превозносите во вся веки. Царя Небеснаго в ангельском чину прославити хотя, пещеру житием твоим равноангельным соделал еси аки Небо, Антоние святе, и, земных Ангелов лик собрав, глаголал еси к ним: Егоже поют на Небеси вои ангельстии, Того мы на земли хвалим и превозносим выну. Царю Небесному ввоинитися хотя, железом приковался еси, аки воинским поясом препоясуяся, Феодосие терпеливодушне, и подвизался еси, яко добр воин Иисус Христов, дондеже, мир и плоть одолев, врага диавола победил еси, торжественно хваля и превознося укреплявшаго тя Господа. Царю Небесному с вои ангельскими ныне на Небеси предстояще, не забудите нас, притекающих к вам, о отцы преблаженнии, да и мы сподобимся с вами в будущей жизни хвалити и превозносити Христа во веки. Богородичен: Царя Небеснаго рождшая, Богоневесто Владычице, сподоби ны части праведных, да с ними купно восхвалим рождшагося от Тебе Владыку и прославим во веки. Песнь 9 Ирмос: Воистину Богородицу Тя исповедуем, спасеннии Тобою, Дево Чистая, с безплотными лики Тя величающе. Воистину мертвы показастеся мирови, прежде погребения в пещеры, недра земная, аки во гроб, всельшеся, но Богови живы бесте, богомысленными вашими умы к Небеси паряще и со безплотными лики Того и купно Рождшую Его величающе. Воистину житие ваше ангельско бысть: во плоти бо суще, нерадисте о плоти, но, аки пленника, ту, умерщвленьми смиривше, покористе духови и безплотных подражасте, неусыпно Господа и Госпожу Богородицу величающе. Воистину наследницы Царствия Небеснаго сотвористеся, земная наследия презревше и отчуждившеся суетнаго мира, присвоистеся Богови и, разрешшеся союзов плоти, со Христом ныне жительствуете, со безплотными лики Тому и Пренепорочней Того Матери предстояще и о нас молящеся. Богородичен: Воистину Тобою человеческий род получи спасение, о Пренепорочная Дево Марие! Ты бо соединила еси с человеком Бога, в пречистей Твоей утробе воплотивши неизреченное Отчее Слово, Ты и нас, грешных, удалившихся от Господа, паки к Господу приближи, и примири, и присоедини Ему, да со безплотными лики, купно и с теми, иже во плоти ангельски пожиша, и Тебе, и рождшагося от Тебе Христа Владыку величаем во веки. Светилен Света суще вышняго ближайшии граждане и прекраснаго Иерусалима насельницы святии, нижних, выну ратуемых, посетите и подавайте помощь вашу честную память ныне восхваляющим.