Молитвы

Минея, 21 Мая, Кано́н, творе́ние господи́на мона́ха Михаи́ла Но́ваго Глас 4 Песнь 1 Ирмос: Воспою́ Тебе́, Го́споди Бо́же мой,/ я́ко изве́л еси́ лю́ди из рабо́ты еги́петския,/ покры́л же еси́ колесни́цы фарао́новы и си́лу. Припев: Святи́и благове́рнии кня́зие Константи́не, Михаи́ле и Фео́доре, моли́те Бо́га о на́с. Воспою́ Ти, Го́споди Бо́же мой, пе́снь духо́вную,/ сла́вя кня́зя Константи́на Му́ромскаго с ча́ды,/ Михаи́лом и Фео́дором вку́пе. Припев: Святи́и благове́рнии кня́зие Константи́не, Михаи́ле и Фео́доре, моли́те Бо́га о на́с. И́же да́руя се́мена се́ющему, Ты мне да́руй благода́ти ра́зум,/ и, разреши́в сою́з язы́ка, обнови́ мя, Спа́се,/ к славосло́вию блаже́нных Твои́х. Сла́ва Отцу́ и Сы́ну и Свято́му Ду́ху. Избра́л е́сть Влады́ка Своему́ ста́ду Христо́с кро́ткаго царя́ Изра́илю:/ То́йже и тебе́ избра́л е́сть, ве́рнаго кня́зя но́вому Изра́илю. И ны́не и при́сно и во ве́ки веко́в. Ами́нь. Богородичен: Неве́стник светови́ден показа́ся, чре́во Твое́, Отрокови́це,/ за милосе́рдие из Тебе́ Вопло́щшагося/ и всех Богоразу́мия заре́ю просвети́вшаго. Песнь 3 Ирмос: Лук си́льных изнемо́же,/ и немощству́ющии препоя́сашася си́лою,/ сего́ ра́ди утверди́ся в Го́споде се́рдце мое́. Припев: Святи́и благове́рнии кня́зие Константи́не, Михаи́ле и Фео́доре, моли́те Бо́га о на́с. Прииди́те, целому́дрия рачи́тели, честну́ю тро́ицу почти́м,/ Михаи́ла и Фео́дора, с Константи́ном вку́пе,/ Святу́ю Тро́ицу возлюби́вшия чи́стым се́рдцем и душе́ю соверше́нною. Припев: Святи́и благове́рнии кня́зие Константи́не, Михаи́ле и Фео́доре, моли́те Бо́га о на́с. От ко́рене че́стна изра́стше, сла́внии, бра́тия благоро́днии, Михаи́ле и Фео́доре,/ помоли́теся со отце́м ва́шим, князе́м Константи́ном, Христу́ Бо́гу/ о творя́щих па́мять ва́шу. Сла́ва Отцу́ и Сы́ну и Свято́му Ду́ху. Прииди́те, новокреще́ннии Росси́йстии собо́ри,/ целу́йте любе́зно честну́ю ра́ку блаже́ннаго Константи́на кня́зя,/ пе́рваго просвети́теля пресла́внаго гра́да Му́рома. И ны́не и при́сно и во ве́ки веко́в. Ами́нь. Богородичен: Тя Предста́тельницу тве́рду, Богороди́тельнице, стяжа́хом,/ и, упова́ние на Тя возло́жше, спаса́емся,/ и, к Тебе́ прибега́юще, огражда́емся. Седален, глас 2 Спаса́я пре́жде Госпо́дь Изра́иля от рабо́ты,/ То́йже и ны́не руко́ю кня́зя Константи́на с ча́ды/ всех нас от пре́лести и́дольския изба́ви./ Те́мже, моля́щеся, вопие́м к ним си́це:/ моли́те, блаже́ннии, спасти́ся нам. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Ма́ти Свята́я Неизрече́ннаго Све́та,/ а́нгельскими Тя пе́сньми почита́юще, благоче́стно велича́ем. Песнь 4 Ирмос: Услы́шах сла́вное смотре́ние Твое́, Христе́ Бо́же,/ я́ко роди́лся еси́ от Де́вы,/ да от ле́сти изба́виши зову́щия:/ сла́ва си́ле Твое́й, Го́споди. Припев: Святи́и благове́рнии кня́зие Константи́не, Михаи́ле и Фео́доре, моли́те Бо́га о на́с. Еле́ны ты но́выя, и Константи́на правове́рнаго,/ и Влади́мира прехва́льнаго вожделе́в доброде́тели,/ Константи́не кня́же досточу́дне, ны́не зове́ши с ча́ды твои́ми:/ сла́ва си́ле Твое́й, Го́споди. Припев: Святи́и благове́рнии кня́зие Константи́не, Михаи́ле и Фео́доре, моли́те Бо́га о на́с. Лю́то двиза́шеся льсте́ц христиа́ны воева́ти,/ превели́кий же Госпо́дь показа́ тя сла́вна святы́м Креще́нием:/ тобо́ю бо оте́чество твое́ просвети́вся от Него́,/ И́же тебе́ Ца́рство Свое́ подаде́. Сла́ва Отцу́ и Сы́ну и Свято́му Ду́ху. Всеусе́рдно после́дуя оте́ческим стопа́м,/ ревни́теля иму́ща до́брому, Михаи́ле сла́вне, Фео́дора, при́снаго бра́та твоего́:/ благоче́стием бо совоку́плени душа́ми и телесы́ яви́стеся. И ны́не и при́сно и во ве́ки веко́в. Ами́нь. Богородичен: Воплоще́нна Тя, Го́споди, от Неискусобра́чныя Отрокови́цы возжеле́вше,/ в воню́ ми́ра Твоего́ потеко́ша оте́ц с ча́ды,/ Твои́м снеда́еми Боже́ственным любле́нием. Песнь 5 Ирмос: От све́та пресеки́й перворо́дный свет,/ я́ко во све́те дела́ пою́т Тя, Христе́, Соде́теля,/ во све́те Твое́м пути́ на́ша напра́ви. Припев: Святи́и благове́рнии кня́зие Константи́не, Михаи́ле и Фео́доре, моли́те Бо́га о на́с. От безбо́жных и́дол вся изба́вил еси́/ и ко Христу́ Бо́гу приве́л еси́, о́тче,/ ве́рныя кня́зи, ча́да твоя́, Михаи́ла и Фео́дора,/ и вся лю́ди но́выя гра́да Му́рома, Константи́не. Припев: Святи́и благове́рнии кня́зие Константи́не, Михаи́ле и Фео́доре, моли́те Бо́га о на́с. Я́ко отца́ благочести́ва любо́вию свя́зани и того́ лю́бяще благоче́стно,/ све́тлостию в ва́шем оте́чествии сия́ете, я́ко со́лнце,/ Михаи́ле вку́пе и Фео́доре. Сла́ва Отцу́ и Сы́ну и Свято́му Ду́ху. Константи́н ты но́вый яви́лся еси́, Влади́миру подо́бяся,/ извести́лся еси́ вселе́нней:/ от всех бо родо́в тя Бог избра́в пре́жде век в после́дния дни, княже. И ны́не и при́сно и во ве́ки веко́в. Ами́нь. Богородичен: Тя ору́жие непобеди́мое на враги́ предлага́ем,/ Тя, основа́ние и наде́жду на́шего спасе́ния, Богоневе́стная, и́мамы. Песнь 6 Ирмос: Внегда́ скорбе́ти ми,/ возопи́х ко Го́споду,/ и услы́ша мя Бог спасе́ния моего́. Припев: Святи́и благове́рнии кня́зие Константи́не, Михаи́ле и Фео́доре, моли́те Бо́га о на́с. Царю́ ве́чному ны́не ты предстои́ши, кня́же Константи́не,/ десни́цею Его́ венча́н еси́,/ помоли́ся, Ему́ за ны, недосто́йныя. Припев: Святи́и благове́рнии кня́зие Константи́не, Михаи́ле и Фео́доре, моли́те Бо́га о на́с. Ю́ношески хра́бровавше, му́жески пре́лесть возненави́десте мра́чных и́долов,/ о́тчее наказа́ние прии́мше, весели́теся ны́не. Сла́ва Отцу́ и Сы́ну и Свято́му Ду́ху. Константи́н кня́зь пет да бу́дет с Михаи́лом сла́вным и с Фео́дором чу́дным:/ яви́шася бо просвети́тели и храни́тели гра́ду на́шему. И ны́не и при́сно и во ве́ки веко́в. Ами́нь. Богородичен: Всю Тя, голуби́цу предобру́,/ и све́тел крин, обре́т, и удо́льный цвет, о Богома́ти,/ Жени́х мы́сленный в Тя всели́ся. Кондак, глас 8 Изря́дному воево́де и правове́рному кня́зю Константи́ну с сыно́ма его́ вку́пе/ оте́чество его́, хваля́ся, вопие́т,/ име́ющее его́ нача́льника и засту́пника,/ я́ко изба́вльшееся им от пре́лести и скве́рны и́дольския./ Сего́ ра́ди вопие́м ему́ си́це:/ ра́дуйся, кня́же Константи́не преблаже́нне. Икос А́нгел, пло́тию оде́ян, на земли́ яви́ся,/ по́слан от Бо́га угото́вати Боже́ственный пра́вый пу́ть,/ и́же соверши́ си́лою Госпо́днею./ Дивля́хуся бо и ра́довахуся Небе́снии чи́нове/ и вопия́ху с земны́ми си́це:/ ра́дуйся, его́же ра́ди ве́ра Госпо́дня провозсия́./ Ра́дуйся, пра́выя ве́ры укрепи́телю./ Ра́дуйся, беззако́нныя ле́сти потреби́телю./ Ра́дуйся, высото́ доброде́тели, до Небесе́ досяза́ющая./ Ра́дуйся, позна́вый Святу́ю Богоро́дицу Мари́ю./ Ра́дуйся, я́ко еси́ ве́рным кня́зь./ Ра́дуйся, ми́лостынею Бо́га одолжи́вый./Ра́дуйся, свеще́, тьму́ просвеща́ющая./ Ра́дуйся, со́лнце, осуша́ющо неве́рие./ Ра́дуйся, я́ко, тобо́ю наставля́еми, покланя́емся своему́ Творцу́./ Ра́дуйся, кня́же Константи́не преблаже́нне. Песнь 7 Ирмос: Авраа́мстии иногда́ в Вавило́не о́троцы/ пе́щный пла́мень попра́ша, пе́сньми взыва́юще:/ оте́ц на́ших Бо́же, благослове́н еси́. Припев: Святи́и благове́рнии кня́зие Константи́не, Михаи́ле и Фео́доре, моли́те Бо́га о на́с. Я́сныя зве́зды, на тве́рди небе́сней водрузи́вшеся,/ Тро́ицы равночи́сленнии,/ кня́зь Константи́н с ча́ды, зе́млю чудесы́ неле́стно просвеща́ют. Припев: Святи́и благове́рнии кня́зие Константи́не, Михаи́ле и Фео́доре, моли́те Бо́га о на́с. Я́ко но́вая ве́твь ко́рене богонасажде́нна, кня́зь Константи́н но́вый Влади́мир яви́ся:/ я́коже бо он, израсти́ две о́трасли, Рома́на и Дави́да,/ сей же – Михаи́ла и Фео́дора. Сла́ва Отцу́ и Сы́ну и Свято́му Ду́ху. Пресла́вно просла́вися Бо́жия благода́ть самобра́тнею любо́вию Михаи́ла и Фео́дора,/ я́ко и по сме́рти неразлу́чни бе́ху,/ но и ду́ши и телеса́ вку́пе иму́ща, лежа́т. И ны́не и при́сно и во ве́ки веко́в. Ами́нь. Богородичен: Преукра́шена Бо́жиею сла́вою яви́лася еси́, Чи́стая, еди́на от ве́ка,/ Сло́во Бо́жие прие́мши, Де́во Ма́ти./ Те́мже благослове́нна Ты в жена́х, Пренепоро́чная Влады́чице. Песнь 8 Ирмос: Во о́бразе А́нгела,/ я́вльшагося в пещи́ о́гненней песносло́вцем,/ Христа́ Бо́га по́йте, о́троцы,/ свяще́нницы, благослови́те,/ лю́дие, превозноси́те во вся ве́ки. Припев: Святи́и благове́рнии кня́зие Константи́не, Михаи́ле и Фео́доре, моли́те Бо́га о на́с. Разу́мно житие́ соверша́я,/ ца́рским венце́м от ю́ности укра́шен, всесла́вный кня́же Константи́не,/ ве́лия сла́ва еси́ твоему́ оте́честву и похвала́. Припев: Святи́и благове́рнии кня́зие Константи́не, Михаи́ле и Фео́доре, моли́те Бо́га о на́с. Со́лнца светле́йши яви́ся па́мять ва́ша, блаже́ннии,/ блиста́ющи благода́тию Свята́го Ду́ха,/ вас пою́щих, Михаи́ле и Фео́доре, со отце́м Константи́ном вку́пе. Сла́ва Отцу́ и Сы́ну и Свято́му Ду́ху. На земли́ у́бо положе́ни бы́сте, я́ко ме́ртви,/ но на Небеси́ ликовству́ете со А́нгелы,/ вели́ких даро́в от Христа́ сподо́бльшеся, ду́хи нечи́стыя и боле́зни прогони́ти. И ны́не и при́сно и во ве́ки веко́в. Ами́нь. Богородичен: Изба́ви страсте́й душепа́губных/ и плени́цы прегреше́ний расто́ргни, и́миже соплето́хомся:/ вси бо, согре́шшии, очище́ния про́сим,/ пода́ти, Богоро́дице, мольба́ми Твои́ми свобо́ду. Песнь 9 Ирмос: Рождество́ Твое́ нетле́нно яви́ся:/ Бог из боку́ Твое́ю про́йде,/ я́ко плотоно́сец яви́ся на земли́/ и с челове́ки поживе́./ Тя, Богоро́дице, тем вси велича́ем. Припев: Святи́и благове́рнии кня́зие Константи́не, Михаи́ле и Фео́доре, моли́те Бо́га о на́с. Ли́цы люде́й росси́йских предстоя́т ти ны́не, моля́щеся приле́жно,/ кня́же Константи́не прему́дре, помоли́ся о всех нас Вседержи́телю Бо́гу,/ в Тро́ице Того́ велича́ющих. Припев: Святи́и благове́рнии кня́зие Константи́не, Михаи́ле и Фео́доре, моли́те Бо́га о на́с. Сы́нове Росси́йстии, прииди́те, стеце́мся к пречестне́й це́ркви но́вых чудотво́рцев,/ кня́зя Константи́на, уго́дника Христо́ва, и сыно́в его́, Михаи́ла и Фео́дора,/ и похва́льными пе́сньми сих возвели́чите. Сла́ва Отцу́ и Сы́ну и Свято́му Ду́ху. Возше́д ны́не, к Нему́же возжеле́л еси́,/ очи́стив лю́ди твоя́ от идолослуже́ния и просвети́в святы́м Креще́нием,/ хваля́ся, пое́ши, кня́же Константи́не, с ча́ды, си́це глаго́ля:/ се аз, Го́споди, и де́ти моя́. И ны́не и при́сно и во ве́ки веко́в. Ами́нь. Богородичен: Пло́тию приити́ восхоте́в, украси́вый сло́вом вся,/ и Тя, еди́ну Святе́йшу всех обре́т, Богоро́дицу показа́ и́стинную, Ма́ти Де́во,/ Его́же с Тобо́ю вси велича́ем. Светилен Прииди́те, вси ве́рнии, похвала́ми, соше́дшеся,/ возвели́чим кня́зя Константи́на с Михаи́лом и Фео́дором./ Си́и бо яви́шася Тро́ицы равночи́сленнии и А́нгелом ссе́льницы,/ с ни́миже мо́лятся ны́не Ей о душа́х на́ших.

Минея, 11 Мая, Кано́н святи́телю Ио́сифу Глас 8 Песнь 1 Ирмос: Колесницегони́теля фарао́ня погрузи́/ чудотворя́й иногда́/ Моисе́йский жезл, крестообра́зно порази́в/ и раздели́в мо́ре,/ Изра́иля же беглеца́, пешехо́дца спасе́,/ песнь Бо́гови воспева́юща. Припев: Священному́чениче Ио́сифе, моли́ Бо́га о на́с. Воспои́м све́тло и восхва́лим пе́сньми честну́ю па́мять святи́теля Христо́ва,/ возлюби́в бо Па́стыря овца́м – вели́каго Христа́,/ не убоя́ся разбо́йник,/ но ду́шу за о́вцы своя́ положи́. Припев: Священному́чениче Ио́сифе, моли́ Бо́га о на́с. Егда́ разбо́йницы и престу́пницы вступи́ша во град А́страхань,/ тогда́ злоде́йства и у́жасы ве́лии соверша́хуся./ Ты же, архипа́стырю до́брый,/ укры́л еси́ ми́рныя лю́ди в до́ме твое́м. Сла́ва Отцу́ и Сы́ну и Свято́му Ду́ху. К жи́зни нестаре́ющей и присносу́щней преста́вился еси́,/ Богому́дре святи́телю Ио́сифе,/ ея́же и нас, моля́щихся тебе́, твои́ми моли́твами сподо́би. И ны́не и при́сно и во ве́ки веко́в. Ами́нь. Богородичен: Наде́жда, и предста́тельство, и покро́в бу́ди, Де́во, рабо́м Твои́м,/ да, Тобо́ю изба́вленнии от бед, возвели́чим Тя све́тло,/ я́ко И́стинную Ма́терь И́стиннаго Све́та. Песнь 3 Ирмос: Утвержде́й в нача́ле Небеса́ ра́зумом/ и зе́млю на вода́х основа́вый,/ на ка́мени мя, Христе́, за́поведей Твои́х утверди́,/ я́ко несть свят, па́че Тебе́, Еди́не Человеколю́бче. Припев: Священному́чениче Ио́сифе, моли́ Бо́га о на́с. Добр во́ин Христо́в яви́лся еси́, святи́телю:/ взем бо меч духо́вный – сло́во Бо́жие,/ мяте́жники от Боже́ственнаго Писа́ния увещева́л еси́,/ привести́ хотя́ их ко Христу́ Бо́гу. Припев: Священному́чениче Ио́сифе, моли́ Бо́га о на́с. Утвержде́н на ка́мени за́поведей Христо́вых, святи́телю,/ разбо́йником и мяте́жником дерзнове́нно веща́л еси́:/ преста́ните от зол ва́ших и покори́теся Бо́гу и вла́сти зако́нней,/ да обря́щете проще́ние, и ми́лость, и поко́й душа́м ва́шим. Сла́ва Отцу́ и Сы́ну и Свято́му Ду́ху. Лю́дие беззако́ннии и жесто́кии се́рдцем/ не послу́шаша слове́с любве́ твоея́/ и на му́ки огня́ осуди́ша тя, зло́бою горя́ще,/ не лю́бит бо законопресту́пный облича́ющих его́. И ны́не и при́сно и во ве́ки веко́в. Ами́нь. Богородичен: Не́бо небе́с и свята́я святы́х яви́лася еси́, Присноде́во,/ Творе́ц бо и Вседержи́тель Небесе́ и земли́/ в Тебе́ таи́нственно всели́ся. Седален, глас 1 Ио́сифе священному́чениче, от мяте́жник убие́нный,/ в ми́ре и поко́и пра́ведных ны́не пребыва́еши, я́коже пи́сано есть:/ пра́ведных ду́ши в руце́ Бо́жией и не прико́снется их му́ка./ Да́руй мир и на́шим душа́м, страсте́й возста́ние укроти́в,/ да в присносу́щный дости́гнем поко́й моли́твами твои́ми. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Чу́до чуде́с, Благода́тная, в Тебе́ зря́щи, тварь ра́дуется:/ зачала́ бо еси́ безсе́менно, и родила́ еси́ неизрече́нно,/ Его́же чинонача́лия А́нгелов ви́дети не мо́гут;/ Того́ моли́ о душа́х на́ших. Песнь 4 Ирмос: Ты моя́ кре́пость, Го́споди,/ Ты моя́ и си́ла,/ Ты мое́ Бог, Ты мое́ ра́дование,/ не оста́вль не́дра О́тча/ и на́шу нищету́ посети́в./ Тем с проро́ком Авваку́мом зову́ Ти:/ си́ле Твое́й сла́ва, Человеколю́бче. Припев: Священному́чениче Ио́сифе, моли́ Бо́га о на́с. Егда́ сверго́ша тя со стен гра́да,/ шум бысть ве́лий, и злоде́и от стра́ха омертве́ша,/ на ме́сте же, иде́же пове́ржено бысть те́ло твое́,/ ви́деша мно́зи три свещи́ горя́щия:/ преста́вился бо еси́ от сме́рти к жи́зни,/ иде́же сия́ет незаходи́мый свет Святы́я Тро́ицы. Припев: Священному́чениче Ио́сифе, моли́ Бо́га о на́с. Препоя́сався си́лою свы́ше, священному́чениче,/ по́двигом до́брым подвиза́лся еси́, блаже́нне,/ оби́димых защища́я, печа́льных утеша́я,/ упо́рных же и злых с кро́тостию облича́я и вразумля́я./ И ны́не ра́дуешися све́тло,/ иде́же пра́вда и мир и ра́дость о Го́споде на́шем. Сла́ва Отцу́ и Сы́ну и Свято́му Ду́ху. Красу́йся све́тло и лику́й, гра́де А́страхань,/ име́я Небе́снаго засту́пника и покрови́теля, святи́теля Ио́сифа,/ во сла́ве Небе́сней предстоя́ща вели́кому Царю́ и моля́щася,/ да чту́щий па́мять его́, избе́гше грехо́вныя тьмы,/ сы́нове Све́та бу́дут. И ны́не и при́сно и во ве́ки веко́в. Ами́нь. Богородичен: Жили́ще Све́та яви́ла еси́, Богома́ти,/ Со́лнце бо сла́вы – Госпо́дь из Тебе́ возсия́/ и нам отве́рзе врата́ к Незаходи́мому Све́ту. Песнь 5 Ирмос: Вску́ю мя отри́нул еси́/ от лица́ Твоего́, Све́те Незаходи́мый,/ и покры́ла мя есть чужда́я тьма, окая́ннаго,/ но обрати́ мя и к све́ту за́поведей Твои́х/ пути́ моя́ напра́ви, молю́ся. Припев: Священному́чениче Ио́сифе, моли́ Бо́га о на́с. Приско́рбна бысть душа́ твоя́, священному́чениче,/ егда́ прии́де час твой взя́ту тебе́ бы́ти мяте́жники,/ но, моли́твою во хра́ме укрепи́вся,/ му́жественно к ним изше́л еси́. Припев: Священному́чениче Ио́сифе, моли́ Бо́га о на́с. В ри́зах святи́тельских и со святы́м кресто́м безбоя́зненно вшед в собо́рище мяте́жников,/ дерзнове́нно, я́ко проро́к Бо́жий, глаго́лал еси́:/ почто́ зва́сте мене́, та́тие и клятвопресту́пницы?/ Оста́вите упо́рство ва́ше и зло́бу,/ поми́лует вы благове́рный царь, и́стину глаго́лю, на мя положи́теся. Сла́ва Отцу́ и Сы́ну и Свято́му Ду́ху. Я́ко а́спиды глуси́и, слове́с твои́х не слу́шаша врази́ твои́, святи́телю Ио́сифе,/ и, е́мше тя, огне́м пыта́ху и вся́кими муче́нии и с высоты́ сверго́ша тя./ Ты же, к высоте́ Небе́сней возше́д,/ в Вы́шний град святы́х направля́еши всех, чту́щих тя, священному́чениче. И ны́не и при́сно и во ве́ки веко́в. Ами́нь. Богородичен: Всесвята́я Де́во, Ма́ти всех Царя́,/ Жизнь и воскресе́ние всех из Тебе́ возсия́,/ да, сме́ртную си́лу сокруши́в, спасе́т я́ко Бог пою́щия Тя. Песнь 6 Ирмос: Очи́сти мя, Спа́се,/ мно́га бо беззако́ния моя́,/ и из глубины́ зол возведи́, молю́ся,/ к Тебе́ бо возопи́х, и услы́ши мя,/ Бо́же спасе́ния моего́. Припев: Священному́чениче Ио́сифе, моли́ Бо́га о на́с. Исцели́ неду́ги и боле́зни на́ша, Спа́се, моли́твами святи́теля Твоего́,/ Тобо́ю бо просла́влен быв,/ всем исцеле́ния подае́т возложе́нием честны́я власяни́цы его́. Припев: Священному́чениче Ио́сифе, моли́ Бо́га о на́с. Чудотворе́ния дар подаде́ тебе́ Христо́с, святи́телю;/ те́мже немо́му уста́ си́лою Госпо́дней отве́рзл еси́,/ и той просла́ви тя и возблагодари́ Го́спода,/ да́вшаго такову́ю власть избра́нником Свои́м. Сла́ва Отцу́ и Сы́ну и Свято́му Ду́ху. Жена́ кровоточи́ва, вотще́ ижди́вшая име́ние свое́ на врачева́ние земно́е,/ косну́вся кра́я риз Госпо́дних, исцеле́ние прия́т./ И в тебе́, священному́чениче, всели́ся си́ла Христо́ва:/ власяни́ца бо твоя́ честна́я, с моли́твою на боля́щия возлага́емая,/ ско́рое исцеле́ние подае́т. И ны́не и при́сно и во ве́ки веко́в. Ами́нь. Богородичен: Спасе́ние упова́ющим на Тя бу́ди, Пречи́стая Де́во./ Мно́го бо мо́жет моли́тва Твоя́, о Ма́ти Милосе́рдая./ Ты бо избавля́еши от бед и страсте́й ду́ши на́ша. Кондак, глас 2 Я́ко звезда́ пресве́тлая,/ возсия́л еси́, святи́телю Ио́сифе, во А́страхани,/ иде́же роди́лся и воспита́лся еси́/ и за ве́рность Бо́гу и власте́м зако́нным му́ченическую смерть прия́л еси́./ Мы же, чту́ще страда́ния твоя́, зове́м ти:/ святи́телю Ио́сифе, от мяте́жников убие́нный,/ моли́ Христа́ Бо́га о душа́х на́ших. Икос Возлюби́в, святи́телю, Христо́вы Боже́ственныя за́поведи/ и возненави́дев ми́ра сего́ наслажде́ние,/ прише́л еси́ усе́рдно к Тому́/ и был еси́ свети́льник, просвеща́яй вся пово́лжския страны́ блиста́нием духо́вным./ Тем, припа́дая, мо́лим тя:/ просвети́ на́ша о́чи душе́вныя воспе́ти твоя́ по́двиги,/ поще́ние, и бде́ние, и му́ченическую кончи́ну,/ и́хже ра́ди блаже́нныя жи́зни ны́не наслажда́ешися;/ мы же, чту́ще тя, вопие́м:/ святи́телю Ио́сифе, от мяте́жников убие́нный,/ моли́ Христа́ Бо́га о душа́х на́ших. Песнь 7 Ирмос: Бо́жия снизхожде́ния/ огнь устыде́ся в Вавило́не иногда́./ Сего́ ра́ди о́троцы в пещи́, ра́дованною ного́ю,/ я́ко во цве́тнице, лику́юще, поя́ху:/ благослове́н еси́, Бо́же оте́ц на́ших. Припев: Священному́чениче Ио́сифе, моли́ Бо́га о на́с. О́троцы, огня́ изба́вленни, ра́достно воспева́ху Спа́са и Изба́вителя;/ ты же, священному́чениче, опале́нный огне́м веще́ственным,/ пла́мене ве́чнаго изба́вился еси́, вопия́:/ благослове́н еси́, Го́споди, Бо́же оте́ц на́ших. Припев: Священному́чениче Ио́сифе, моли́ Бо́га о на́с. Ум и се́рдце твое́, святи́телю,/ посреде́ о́гненнаго муче́ния ко Го́споду устремля́л еси́, я́ко трие́ о́троцы, взыва́я:/ благослове́н еси́, Бо́же оте́ц на́ших. Сла́ва Отцу́ и Сы́ну и Свято́му Ду́ху. Со о́троки и все́ми святы́ми лику́еши, блаже́нне, во Ца́рствии Небе́снем/ и ра́достно пое́ши Невече́рнему Све́ту:/ благослове́н еси́, Го́споди, Бо́же оте́ц на́ших. И ны́не и при́сно и во ве́ки веко́в. Ами́нь. Богородичен: Благослове́нна и препросла́влена еси́ во ве́ки, Похвало́ христиа́н,/ весе́лие всех и ра́дость, Мари́е Богоневе́сто,/ ра́дость бо источа́еши всем, к Сы́ну Твоему́ вопию́щим:/ благослове́н еси́, Бо́же оте́ц на́ших. Песнь 8 Ирмос: Седмери́цею пещь/ халде́йский мучи́тель/ Богочести́вым неи́стовно разжже́,/ си́лою же лу́чшею спасе́ны, сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки. Припев: Священному́чениче Ио́сифе, моли́ Бо́га о на́с. Ра́дости неизрече́нныя прича́стник яви́лся еси́, священному́чениче,/ при́сно в Бо́зе пребыва́я/ и в час муче́ния из глубины́ души́ твоея́ вопия́ ко Го́споду:/ о́троцы, благослови́те, свяще́нницы, воспо́йте,/ лю́дие, превозноси́те Христа́ во ве́ки. Припев: Священному́чениче Ио́сифе, моли́ Бо́га о на́с. Егда́ ведо́ша тя беззако́ннии на сте́ну гра́да,/ я́ко подража́тель Христу́, возве́д о́чи на не́бо, моли́лся еси́ о оби́дящих тя, блаже́нне:/ Го́споди, не помяни́ им греха́ сего́./ Свяще́нницы же гра́дстии, к нога́м твои́м со слеза́ми припа́дающе,/ да́ша ты после́днее целова́ние,/ отходи́л бо еси́ ко Го́споду, вопия́:/ о́троцы, благослови́те, свяще́нницы, воспо́йте,/ лю́дие, превозноси́те Христа́ во ве́ки. Сла́ва Отцу́ и Сы́ну и Свято́му Ду́ху. А́нгельски на земли́ пожи́л еси́, Ио́сифе,/ и по преставле́нии твое́м вку́пе со а́нгельскими ли́ки во оби́тели Небе́сныя водвори́лся еси́, вопия́:/ о́троцы, благослови́те, свяще́нницы, воспо́йте,/ лю́дие, превозноси́те Христа́ во ве́ки. И ны́не и при́сно и во ве́ки веко́в. Ами́нь. Богородичен: Три о́троки от пещи́ свободи́вый,/ всех от пещи́ напа́стей избавля́ет хода́тайством Твои́м, Пречи́стая,/ Сын Твой и Бог наш, Ему́же вопие́м:/ о́троцы, благослови́те, свяще́нницы, воспо́йте,/ лю́дие, превозноси́те Его́ во ве́ки. Песнь 9 Ирмос: Ужасе́ся о сем Не́бо,/ и земли́ удиви́шася концы́,/ я́ко Бог яви́ся челове́ком пло́тски/ и чре́во Твое́ бысть простра́ннейшее Небе́с/ Тем Тя, Богоро́дицу,/ А́нгелов и челове́к чинонача́лия велича́ют. Припев: Священному́чениче Ио́сифе, моли́ Бо́га о на́с. Пи́щи нетле́нныя, све́та Боже́ственнаго/ и сла́вы присносу́щныя ны́не наслажда́ешися, священному́чениче,/ вку́пе со а́нгельскими чинонача́лии и все́ми святы́ми Го́спода велича́я. Припев: Священному́чениче Ио́сифе, моли́ Бо́га о на́с. Я́ко церко́вное свети́ло, святи́телю,/ в пе́снех и пе́ниих почита́ем тя вей,/ досто́йно велича́юще. Сла́ва Отцу́ и Сы́ну и Свято́му Ду́ху. Предстоя́ во сла́ве Царю́ и Бо́гу, священному́чениче Ио́сифе,/ храни́ зе́млю Росси́йскую и град наш от всех бед моли́твами твои́ми. И ны́не и при́сно и во ве́ки веко́в. Ами́нь. Богородичен: Сла́ва Тебе́, Преблагослове́нная Мари́е,/ Ма́ти Го́спода на́шего и Творца́./ Да сподо́бимся и мы моли́твами Твои́ми ве́чныя сла́вы Его́. Светилен Свети́льниче Це́ркве Астраха́нския, святи́телю Ио́сифе,/ предстоя́ ны́не Преве́чному Све́ту,/ и нас наста́ви во све́те за́поведей Бо́жиих ходи́ти,/ да прии́дем и мы в оби́тели све́та. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Пречи́стая Де́во, ро́ждшая Свет Непристу́пный,/ озари́ нас све́том Боже́ственнаго ли́ка Твоего́,/ да возра́дуемся о Тебе́, Ра́досте на́ша.

Минея, 30 Октября, Канон святых Глас 8 Песнь 1 Ирмос: Песнь возсле́м, людие,/ чу́дному Богу нашему,/ свободившему Израиля от работы,/ песнь победную поюще и вопиюще:/ поим Тебе, Единому Владыце. Припев: Святи́и му́ченицы, моли́те Бо́га о на́с. Престолу предстоя Христову яко иерей благоприятен и мученик изряднейший,/ Зино́вие треблаженне,/ яже любовию чествующия твою память светоносную,/ житейских избави соблазнов. Припев: Святи́и му́ченицы, моли́те Бо́га о на́с. Зарею просвещаемь, мудре, Трисолнечнаго Сияния,/ мглу разорил еси е́ллинскаго злословия и, светом твоих словес вся просветив,/ ныне прешел еси к незаходимому сиянию. Сла́ва Отцу́ и Сы́ну и Свято́му Ду́ху. Угль явле́н мысленный,/ огне́м вжигаемь Божественнаго Духа, всех сердца вжегл еси к желанию Божественному, священнотаинниче,/ и прелесть попали́л еси вся́ку. И ны́не и при́сно и во ве́ки веко́в. Ами́нь. Богородичен: Радуйся, пресвятый храме, руно Богоросное,/ запечатанный источниче, безсмертия струя./ Паству Твою, Владычице, сохрани от всех сопротивных невоева́ну. Песнь 3 Ирмос: Страх Твой, Господи,/ всади в сердца раб Твоих/ и бу́ди нам утверждение,/ Тя во истине призывающих. Припев: Святи́и му́ченицы, моли́те Бо́га о на́с. Миром пома́зания духовнаго пома́зан, Зиновие,/ священствовал еси, яко Ангел,/ мученическими при кончине украси́вся венцы. Припев: Святи́и му́ченицы, моли́те Бо́га о на́с. Душ прирадение прием,/ возде́ланием Божественным, преподобне, плодоносны сия́ показал еси,/ темже Господни радости сподобился еси. Сла́ва Отцу́ и Сы́ну и Свято́му Ду́ху. Сестра единокровная твоя тебе единомудренна показася,/ Зинови́я священнейшая,/ спострада́ти бо тебе произво́ли и с тобою насладитися славы вечныя. И ны́не и при́сно и во ве́ки веко́в. Ами́нь. Богородичен: Троицы Единаго родила́ еси, в человечество облекшася,/ Пресвятая Мати Дево:/ егоже моли спасти Тя воспевающия. Седален, глас 1 Миром честны́м пома́зан, явился еси, преблаженне, иерей Бога Вышняго,/ Имже укрепляемь, иерарше Зино́вие,/ мученик был еси и сограждани́н Ангелов./ Темже днесь, всесвятую память творяще, поем тя. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Безневестная Чистая Богородице Дево,/ едина верных Предстательнице и покрове,/ бед и скорбе́й, и лю́тых обстояний всех изба́ви,/ на Тя упование, Отроковице, имущих,/ и ду́ши наша спаси Божественными молитвами Твоими. Песнь 4 Ирмос: Всел еси на ко́ни, апостолы Твоя, Господи,/ и приял еси рукама Твоима узды́ их,/ и спасение бысть ежде́ние Твое/ верно поющим:/ слава силе Твоей, Господи. Припев: Святи́и му́ченицы, моли́те Бо́га о на́с. Возвы́шен явился еси страдании честны́ми, священнейше,/ и приял еси венцы победы, мудре, и вечное получил еси радование,/ тем тя почитаем, отче иерарше Зино́вие. Припев: Святи́и му́ченицы, моли́те Бо́га о на́с. На Древе Простершемуся волею подобяся, воздвигся,/ не ужаслся еси, Зиновие, и тления, славне, и умерщвления дебельства́ совлеклся еси, отче,/ священников похвало. Сла́ва Отцу́ и Сы́ну и Свято́му Ду́ху. Душа твоя крепкая де́монская утверждения низложи́,/ ка́пища же разседо́шася, тверде́йшею верою твоею потребляеми,/ Зиновие славне, священномучеников похвало. И ны́не и при́сно и во ве́ки веко́в. Ами́нь. Богородичен: Странным Твоим Рождеством от Бога устранившийся к Нему присвоила еси, Всепетая./ Темже велегласно Тя вси славим и вопием Ти верою:/ радуйся, земнородных воззвание. Песнь 5 Ирмос: Вску́ю мя отринул еси/ от лица Твоего, Свете незаходимый,/ и покрыла мя есть чужда́я тьма, окаяннаго,/ но обрати мя и к свету заповедей Твоих/ пути моя направи, молюся. Припев: Святи́и му́ченицы, моли́те Бо́га о на́с. Женское естество Духом укрепи́ся и попра́, иже в раи́ праматерь древле запе́ншаго,/ и Божественныя славы на Небесех сподобися,/ девством и страданьми сияющи. Припев: Святи́и му́ченицы, моли́те Бо́га о на́с. Тучеро́ден облак быст язык твой,/ яко одождя́ющь благочестия дождь,/ и верных сердца́ напаяющь/ и к благоплодию священнодейственне путеводя́щь добродетельных, Зино́вие, деяний. Сла́ва Отцу́ и Сы́ну и Свято́му Ду́ху. Девства зарями сластолюбия тьму отгна́ла еси/ и светом страданий безбожия нощь потребила еси,/ Зинови́е мученице, Иисусова красная невесто, жилище Божественнаго Духа. И ны́не и при́сно и во ве́ки веко́в. Ами́нь. Богородичен: Греха тяжким всегда обложе́н есмь бре́менем, Пречистая,/ и вопию Ти: сие́ ходатайством Твоим Божественным облегчи́,/ Ты бо еси Предстательница грешников препрославленная,/ Избавителя и Спаса рождши. Песнь 6 Ирмос: Молитву пролию́ ко Господу/ и Тому возвещу печали моя,/ яко зол душа моя исполнися/ и живот мой аду приближися,/ и молюся, яко Иона:/ от тли, Боже, возведи мя. Припев: Святи́и му́ченицы, моли́те Бо́га о на́с. Молитва Божественныя души́ твоея прията бысть, яко кадило, отче:/ в воню бо благовония, преблаженне, страданий, Зино́вие, потекл еси,/ Возсиявшаго от Жены и всю тварь Просвещшаго. Припев: Святи́и му́ченицы, моли́те Бо́га о на́с. Кровию страдания, блаженне, освятил еси зе́млю,/ дух же на Небеса возшед, первородных Церковь Божественне уясни́, Зино́вие,/ иерархов и мучеников светлая похвало. Сла́ва Отцу́ и Сы́ну и Свято́му Ду́ху. Утесни́л еси нечестие, блаженне, пространством истиннаго благочестия/ и пути́, в сие́ ведущия, заблуждшим людем показал еси,/ и спасл еси люте потопляемыя прелести вода́ми. И ны́не и при́сно и во ве́ки веко́в. Ами́нь. Богородичен: Украси́ ду́шу мою, Дево,/ безобразием страсте́й одержимую,/ и помышленьми истиннаго покаяния окаянное сердце мое утверди,/ и спаси мя, на Тя несомненно, Дево, надеющагося. Кондак, глас 8 Истины свидетели и благочестия проповедники,/ двоицу достойно почтим в Богодухновенных песнех,/ Зино́вия вкупе с мудрою Зинови́ею,/ купно жившия и отшедшия/ и мучением приимшия венец нетленный. Икос До́бляго и великаго Зино́вия песньми и пении восхва́лим/ с доброю девою и нескверною Зинови́ею,/ сущею сострадалицею,/ яко низложи́ша вражия свере́пства/ и и́дольское безбожие обличиша,/ веру же Христову уясниша./ Темже радостно прияша ныне венец нетленный. Песнь 7 Ирмос: Отроцы еврейстии в пещи/ попраша пламень дерзновенно/ и на ро́су огнь преложиша, вопиюще:/ благословен еси, Господи Боже, во веки. Припев: Святи́и му́ченицы, моли́те Бо́га о на́с. Течении кровными погаси́в, всеприснопамятне, огнь безбожия,/ чудесы нас всегда орошаеши дожде́м, Зино́вие,/ Владыку благословящия:/ благословен еси, Господи Боже, во веки. Припев: Святи́и му́ченицы, моли́те Бо́га о на́с. В Божественный мрак вшед, Невидимаго, яко мощно, видел еси,/ ду́шу и ум просвещающа твою, мучениче,/ благочестивомудренно поющаго:/ благословен еси, Господи Боже, во веки. Сла́ва Отцу́ и Сы́ну и Свято́му Ду́ху. Дает тебе честь Владыка, пострадавшу твердо/ и низложившу козни вражия, и поющу велегласно:/ благословен еси, Господи Боже, во веки. И ны́не и при́сно и во ве́ки веко́в. Ами́нь. Богородичен: Место, Дево, явилася еси священия,/ из негоже Бог явися, освящая ны верою, песнопоющия:/ благословен, Пречистая, Плод Твоего чрева. Песнь 8 Ирмос: Богоглаголивии отроцы в пещи́,/ со огне́м пламень попирающе, пояху:/ благословите дела Господня Господа. Припев: Святи́и му́ченицы, моли́те Бо́га о на́с. Не убоялся еси меча, иерарше,/ не устрашился еси бед, не ужаслся еси смерти,/ безсмертныя тя славы показующия причастника. Припев: Святи́и му́ченицы, моли́те Бо́га о на́с. Священнодейственник тайн показался еси/ и, себе освятив, жертва благовонна был еси,/ и Вышния трапезы, Зино́вие, достоин. Сла́ва Отцу́ и Сы́ну и Свято́му Ду́ху. Чудодействы сияя, иерарше,/ мученическими лучами светло облистал еси/ и мрак прелести до конца отгнал еси. И ны́не и при́сно и во ве́ки веко́в. Ами́нь. Богородичен: Не земледеланный Грозд заченши,/ источающь вино, Дево Мати,/ оставления страсте́й мя пиянства измени, молюся. Песнь 9 Ирмос: Устрашися всяк слух/ неизреченна Божия снизхождения,/ яко Вышний волею сни́де даже и до плоти,/ от Девическаго чрева быв Человек./ Темже Пречистую Богородицу, вернии, величаем. Припев: Святи́и му́ченицы, моли́те Бо́га о на́с. Стоял еси пред суди́лищи, преславне, мучителей,/ воплощение светлым гласом проповедуя Вседержителя/ и страдания Его, Крест, и смерть, и Воскресение,/ имже спасе ны яко Человеколюбец. Припев: Святи́и му́ченицы, моли́те Бо́га о на́с. О чудесе! како с плотию безплотныя враги́ победи́;/ како низложи́ немощию многокозненнаго;/ како с Небесными служители совокупитися земны́й подвигся;/ егоже чтуще, благочестно величаем. Припев: Святи́и му́ченицы, моли́те Бо́га о на́с. Телеса, мученицы честни́и, ранам различным различие предасте,/ взирающе к вечному блаженству,/ братскою бо любовию друг другу свя́зани, мученическими добро́тами просветистеся,/ темже ублажаетеся. Сла́ва Отцу́ и Сы́ну и Свято́му Ду́ху. Память днесь ваша, светозаре́нием сияющи Духа, всем просия́,/ чудес благодать облистающи и врачеваний ре́ки обильно точа́щи,/ юже празднующе, блажи́м вы, Христовы мученицы. И ны́не и при́сно и во ве́ки веко́в. Ами́нь. Богородичен: Просвети, Двере светла, се́рдца моего очи, молюся,/ далече отгоня́ющи греха́ тьму тяжчайшую от окаянныя моей души́,/ да величаю Тя, да славлю Тя, да любовию Тя пою, Всепетую. Светилен О чудесе! како пе́рстнии, зла́ти естеством, явишася,/ ибо ни огнь, ниже́ меч, ниже звере́й зу́бы,/ ни муки, ни раны сих повредиша,/ но в плоти безплотнаго низложивше,/ Господу о нас мо́лятся. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Страшно предстательство Твое, Марие Богокрасная,/ и страшна́ Твоя слава всей земли, Богородице,/ Тобою бо ныне хвалимся,/ Тя и Ходатаицу имуще к Сыну и Зижди́телю Твоему,/ и неусыпною молитвою Твоею спасаемся вси.

Минея, 5 Августа, Кано́н свята́го Глас 8 Песнь 1 Ирмос: Пои́м Го́сподеви,/ прове́дшему лю́ди Своя́ сквозе́ Чермно́е мо́ре,/ я́ко еди́н сла́вно просла́вися. Припев: Святы́й му́чениче Евсигни́е, моли́ Бо́га о на́с. С пресла́вными чи́нми а́нгельскими, пресла́вне, сый,/ непреста́нно па́мять твою́ сла́вящия спаса́й. Припев: Святы́й му́чениче Евсигни́е, моли́ Бо́га о на́с. Храм Уте́шителев освяще́нный твой ум, страстоте́рпче, показа́ся,/ сего́ ра́ди тя ве́рою почита́ем. Припев: Святы́й му́чениче Евсигни́е, моли́ Бо́га о на́с. Умерщвле́ние живоно́сно пло́тию Пострада́вшаго/ изобрази́л еси́ пло́тию твое́ю, преблаже́нне,/ и и́стинней жи́зни сподо́бился еси́. Сла́ва Отцу́ и Сы́ну и Свято́му Ду́ху. Держа́ву беззако́ннующих, укре́плься Ду́хом, низложи́л еси́/ и зако́ны Госпо́дни, пресла́вне му́чениче, удержа́л еси́. И ны́не и при́сно и во ве́ки веко́в. Ами́нь. Богородичен: Разреши́ся кля́тва,/ преста́ же печа́ль рождество́м Твои́м, Всеблагослове́нная Отрокови́це,/ ве́рных весе́лие, Пренепоро́чная. Песнь 3 Ирмос: Ты еси́ утвержде́ние/ притека́ющих к Тебе́, Го́споди,/ Ты еси́ Свет омраче́нных,/ и пое́т Тя дух мой. Припев: Святы́й му́чениче Евсигни́е, моли́ Бо́га о на́с. Стал еси́ пред суди́щем, испове́дуя Бо́га Царя́, му́чениче му́дре,/ плоть взе́мшаго, и челове́ки назда́вшаго. Припев: Святы́й му́чениче Евсигни́е, моли́ Бо́га о на́с. Же́ртва непоро́чна, всесожже́на у́гльми му́ченическими,/ и́же от Де́вы принесе́ся У́глю. Сла́ва Отцу́ и Сы́ну и Свято́му Ду́ху. Вода́ми духо́вными наводня́ем, сла́вне,/ му́тныя многобо́жия изсуши́л еси́ струи́. И ны́не и при́сно и во ве́ки веко́в. Ами́нь. Богородичен: Все мое́ жела́ние к Тебе́ дви́жу, Чи́стая Влады́чице,/ плотски́х по́хотей мя вско́ре премени́. Седален, глас 4 Му́ченика Евсигни́я похва́лим,/ я́ко всю упраздни́вшаго лесть си́лою Христо́вою и ве́ру уясни́вшаго:/ претерпе́ бо муки пои́стинне, и обличи́ мучи́телей суровство́ все,/ и вене́ц побе́ды десни́цею Бо́жиею прия́т. Песнь 4 Ирмос: Услы́шах, Го́споди,/ смотре́ния Твоего́ та́инство,/ разуме́х дела ́ Твоя́/ и просла́вих твое́ Божество́. Припев: Святы́й му́чениче Евсигни́е, моли́ Бо́га о на́с. Дрема́ние отри́нув уны́ния, му́чениче Евсигни́е,/ бо́дренно к страда́нию несумне́нною ве́рою дерзну́л еси́. Припев: Святы́й му́чениче Евсигни́е, моли́ Бо́га о на́с. О Го́споде Спа́се твое́м, му́чениче, ра́дуяся, досточу́дне,/ му́ки теле́сныя, я́ко пи́щу сла́дку, ты вмени́л еси́. Припев: Святы́й му́чениче Евсигни́е, моли́ Бо́га о на́с. Го́рдое шата́ние за зло́бу попо́лзшагося, страстоте́рпче, низве́ргл еси́,/ Боже́ственными нра́вы смиря́яся. Сла́ва Отцу́ и Сы́ну и Свято́му Ду́ху. Во́ин непобеди́м яви́лся еси́, во бране́х подвиза́яся,/ сконча́в же муче́ние, враги́ безпло́тныя потреби́л еси́. И ны́не и при́сно и во ве́ки веко́в. Ами́нь. Богородичен: Равноси́льна, сопресто́льна роди́ла еси́ Сло́ва Отцу́ и Ду́ху,/ Его́же моли́ спасти́ мя, Пресвята́я Отрокови́це, Присноде́во. Песнь 5 Ирмос: У́тренююще, вопие́м Ти:/ Го́споди, спаси́ ны,/ Ты бо еси́ Бог наш,/ ра́зве Тебе́, ино́го не ве́мы. Припев: Святы́й му́чениче Евсигни́е, моли́ Бо́га о на́с. И́скренно прилепля́яся, прему́дре, Влады́це,/ себе́ удали́л еси́ от лука́вствия, Евсигни́е. Припев: Святы́й му́чениче Евсигни́е, моли́ Бо́га о на́с. Ме́ртвым ка́пищем че́сти не прине́сл еси́, Богоно́се,/ Бо́га жи́ва, Го́спода на Небесе́х ве́дый. Сла́ва Отцу́ и Сы́ну и Свято́му Ду́ху. На дре́ве воздви́жен, му́чениче доблему́дренне,/ страсть изобрази́л еси́ Безстра́стнаго ве́рою. И ны́не и при́сно и во ве́ки веко́в. Ами́нь. Богородичен: Сло́во во утро́бе Твое́й, Чи́стая, воплоща́ется,/ безслове́сных плотски́х страсте́й мир избавля́я. Песнь 6 Ирмос: Моли́тву проли́ю ко Го́споду/ и тому́ возвещу́ печа́ли моя́,/ я́ко зол душа́ моя́ испо́лнися/ и живо́т мой а́ду прибли́жися,/ и молю́ся, я́ко Ио́на:/ от тли, Бо́же, возведи́ мя. Припев: Святы́й му́чениче Евсигни́е, моли́ Бо́га о на́с. Разуме́ния и́стинная в се́рдцы благоро́дными поло́ж о́бразы,/ не неве́дый разуме́ния, блаже́нне, вра́жия, на суди́ще поте́кл еси́/ и погуби́л еси́ кре́стным всеору́жием сего́ во́инство. Припев: Святы́й му́чениче Евсигни́е, моли́ Бо́га о на́с. Де́монов служи́телие, служи́теля тя Тро́ице разуме́вше,/ му́кам, и темни́цам, и непра́ведней сме́рти предаю́т, му́чениче Евсигни́е,/ но побежда́ются твои́м непобеди́мым сопротивле́нием, пребога́те. Сла́ва Отцу́ и Сы́ну и Свято́му Ду́ху. Пото́цы крове́й твои́х, му́чениче, му́тныя беззако́ния пото́ки,/ и ре́ки безбо́жия ле́стныя, и лука́выя изсуши́ша струи́/ исцеле́ний же ве́рным неизчерпа́емая пучи́на яви́шася. И ны́не и при́сно и во ве́ки веко́в. Ами́нь. Богородичен: Изсуши́вши сады́ зло́бы в Тебе́ прозябе́нием Сло́ва, Ма́ти Чи́стая,/ из ко́рене души́ моея́ лука́выя мы́сли отсецы́/ и насади́ доброде́телей кра́сная, Де́во, прозябе́ния. Песнь 7 Ирмос: О́троцы евре́йстии в пещи́/ попра́ша пла́мень дерзнове́нно/ и на ро́су огнь преложи́ша, вопию́ще:/ благослове́н еси́, Го́споди Бо́же, во ве́ки. Припев: Святы́й му́чениче Евсигни́е, моли́ Бо́га о на́с. Кровьми́, му́чениче, излия́нными любве́ ра́ди Христа́ вопло́щшагося,/ просвети́в твою́ ду́шу, к Сему́ преста́вился еси́, вопия́, ра́дуяся:/ Бо́же, благослове́н еси́. Припев: Святы́й му́чениче Евсигни́е, моли́ Бо́га о на́с. Горя́ любо́вию Спа́са, избежа́л еси́ про́пасти нече́стия/ и зи́му лю́тых претерпе́л еси́ мук, взыва́я, Евсигни́е:/ Бо́же, благослове́н еси́. Припев: Святы́й му́чениче Евсигни́е, моли́ Бо́га о на́с. Еще́ теку́щим ка́плям, пресла́вне, Боже́ственных твои́х крове́й,/ Влады́це Христу́ предста́л еси́, воспева́я:/ благослове́н еси́, Го́споди Бо́же, во ве́ки. Сла́ва Отцу́ и Сы́ну и Свято́му Ду́ху. Да Боже́ственнаго Ца́рствия ве́чную жизнь насле́диши,/ вре́меннаго живота́ сла́вы возгнуша́лся еси́, вопия́, Евсигни́е:/ Бо́же, благослове́н еси́. И ны́не и при́сно и во ве́ки веко́в. Ами́нь. Богородичен: Но́во роди́ла еси́ Отроча́,/ Его́же роди́ Оте́ц пре́жде век, Богоро́дице Чи́стая./ Ему́же вси воспева́ем:/ Бо́же, благослове́н еси́. Песнь 8 Ирмос: Победи́тели мучи́теля и пла́мене/ благода́тию твое́ю бы́вше,/ за́поведем Твои́м зело́ прилежа́ще,/ о́троцы вопия́ху:/ благослови́те, вся дела ́Госпо́дня, Го́спода. Припев: Святы́й му́чениче Евсигни́е, моли́ Бо́га о на́с. Щито́м, всеблаже́нне, благоче́стия всю́ду огражда́емь,/ беззако́ннующия победи́л еси́ благода́тию, поя́ непреста́нно:/ благослови́те, вся дела ́ Госпо́дня, Го́спода. Припев: Святы́й му́чениче Евсигни́е, моли́ Бо́га о на́с. Внегда́ скорбе́ти Тебе́, к Бо́гу воззва́л еси́ Благоде́телю,/ и услы́ша Тебе́, и от лю́тых изба́ви тя, вопию́ща:/ благослови́те, вся дела ́ Госпо́дня, Го́спода. Припев: Святы́й му́чениче Евсигни́е, моли́ Бо́га о на́с. Не бого́м безду́шным честь безслове́снейшу, му́чениче, прине́сл,/ чиста́ же́ртва Бо́гу прине́слся еси́, поя́ непреста́нно:/ благослови́те, вся дела ́ Госпо́дня, Го́спода. Сла́ва Отцу́ и Сы́ну и Свято́му Ду́ху. Да бу́дущую получи́ши, прему́дре, жизнь и сла́ву,/ умертви́лся еси́ ми́рови и, вопия, Евсигни́е, уморе́н был еси́:/ благослови́те, вся дела́ ́Госпо́дня, Го́спода. И ны́не и при́сно и во ве́ки веко́в. Ами́нь. Богородичен: Ми́лостивая Де́во, Бо́га Преми́лостиваго поро́ждшая,/ ми́лости Боже́ственныя вся сподо́би, пою́щия:/ благослови́те, вся дела́ ́Госпо́дня, Го́спода. Песнь 9 Ирмос: Устраши́ся всяк слух/ неизрече́нна Бо́жия снизхожде́ния,/ я́ко Вы́шний во́лею сни́де да́же и до пло́ти,/ от деви́ческаго чре́ва быв Челове́к./ Те́мже Пречи́стую Богоро́дицу, ве́рнии, велича́ем. Припев: Святы́й му́чениче Евсигни́е, моли́ Бо́га о на́с. Кре́постию, му́чениче, Христо́вою некре́пкаго врага́ умертви́л еси́, вознося́щагося/ и су́етно вои́стинну ны́не шата́ющагося,/ и ме́чному усече́нию главу́ преклони́л еси́,/ и освяти́л еси́ кро́вным тече́нием зе́млю всю. Припев: Святы́й му́чениче Евсигни́е, моли́ Бо́га о на́с. Я́ко украше́ние всех страда́льцев, я́ко му́ченико́в красота́, Евсигни́е,/ я́ко столп непоколеби́м Це́ркве, я́ко огражде́ние благочести́вых прея́вственно,/ я́ко Боже́ственная ле́пота притека́ющих к Тебе́,/ я́ко всесве́тлая звезда́, ублажи́лся еси́. Припев: Святы́й му́чениче Евсигни́е, моли́ Бо́га о на́с. Иска́пают ми́ро па́ры по́тов твои́х благово́нное, Евсигни́е,/ и сердца́ на́ша, тя чту́щих, благоуха́ют,/ и смрад страсте́й, бед и скорбе́й отгоня́ют, страстоте́рпче Христо́в до́блий. Сла́ва Отцу́ и Сы́ну и Свято́му Ду́ху. Со́лнце сла́вы, Иису́се, уясни́вый па́мять днесь страда́льца Твоего́,/ того́ моли́твами просвети́, молю́ся,/ омрачи́вшуюся мою́ ду́шу пре́лестию змии́ною,/ да сла́влю Тя, я́ко Бо́га и́стинна и Человеколю́бца. И ны́не и при́сно и во ве́ки веко́в. Ами́нь. Богородичен: Просвети́, две́ре Све́та, се́рдца моего́ о́чи, молю́ся,/ тьмо́ю грехо́вною осле́пшия,/ и при́ятны Боже́ственным покажи́ сия́нием,/ да почи́таю Тя, да Боже́ственными гла́сы велича́ю Тя.

Минея, 3 Июня, Кано́н преподо́бному Глас 1 Песнь 1 Ирмос: Твоя́ победи́тельная десни́ца/ боголе́пно в кре́пости просла́вися:/ та бо, Безсме́ртне,/ я́ко всемогу́щая, проти́вныя сотре́,/ изра́ильтяном путь глуби́ны новосоде́лавшая. Припев: Преподо́бне о́тче Дими́трие, моли́ Бо́га о на́с. Трисве́тлаго Божества́ заря́ми просвеща́емь, преподо́бне,/ заре́ю Ду́ха просвети́ моя́ помышле́ния,/ грехо́в оставле́ния проси́ при́сно,/ да с ве́рными воспою́ честна́го твоего́ подо́бия пра́здник. Припев: Преподо́бне о́тче Дими́трие, моли́ Бо́га о на́с. Любо́вию Бо́жиею разгора́яся,/ житие́ свое́ доброде́тельми соверши́л еси́,/ и́миже Небе́снаго прия́тия насле́дник бы́ти сподо́бился еси́,/ ему́же и нас сотвори́ бы́ти прие́мники,/ да тя у́бо воспева́ем. Сла́ва Отцу́ и Сы́ну и Свято́му Ду́ху. В незаходи́мых Све́тех пребыва́я, Дими́трие свя́те,/ при́сно посеща́й чад свои́х,/ ороси́ благода́ть твою́ свы́ше на рабо́в твои́х,/ оставле́ние подая́ от собла́зн на́ших/ непреста́нно воспева́ющим честна́го твоего́ подо́бия пра́здник. И ны́не и при́сно и во ве́ки веко́в. Ами́нь. Богородичен: Еди́наго во двою́ благоче́стно ве́мы естеству́,/ И́же от утро́бы Твоея́ рожде́нна, Пренепоро́чная,/ Бо́га вку́пе па́че естества́ и челове́ка,/ иму́ща соверше́нное ко́ждо сво́йство. Песнь 3 Ирмос: Еди́не, ве́дый челове́ческаго существа́ не́мощь/ и ми́лостивно в не вообра́жся,/ препоя́ши мя с высоты́ си́лою,/ е́же вопи́ти Тебе́, Святы́й,/ одушевле́нный Хра́ме неизрече́нныя сла́вы Твоея́, Человеколю́бче. Припев: Преподо́бне о́тче Дими́трие, моли́ Бо́га о на́с. Вся оста́вив ми́ра сего́ тле́нная,/ Спа́са всех взыска́л еси́,/ соверши́л еси́ за́поведи Его́ боже́ственне и до́бре,/ от Него́же цели́тель показа́ся душа́м на́шим/ и моли́твенник непреста́нный о чту́щих свяще́нное твое́ подо́бие. Припев: Преподо́бне о́тче Дими́трие, моли́ Бо́га о на́с. Маловре́менную сла́ву не восхоте́, блаже́нне,/ но Небе́сную добро́ту получи́л еси́,/ отню́дуже благода́ть прие́м Пресвята́го Ду́ха,/ чудесы́ всех просвеща́еши,/ и́же пресвято́му твоему́ о́бразу пра́зднующих любо́вию. Сла́ва Отцу́ и Сы́ну и Свято́му Ду́ху. Житие́м твои́м доброде́тельным благочести́выя просвети́л еси́,/ чудесы́ же твои́ми Богому́дрыми, свя́те, вся удиви́л еси́,/ ве́рно же пою́щих пресвято́му твоему́ подо́бию освяща́еши при́сно. И ны́не и при́сно и во ве́ки веко́в. Ами́нь. Богородичен: Све́тлым Тя гла́сом и ны́не от души́/ вои́стинну Богома́терь, Бо́га ро́ждшую, пропове́даем,/ и воплоще́нна из Тебе́ Безпло́тнаго, в нас все́льшася 7 ,/ непреложе́ние прии́мша, несмеше́нием сме́шшася, Пренепоро́чная. Седален, глас 4 Возжеле́л еси́ он век присносу́щный,/ измени́в при́сно пребыва́ющая ми́ра сего́ тле́нными,/ те́мже к Небе́сным оби́телем невозбра́нно прите́кл еси́, Богому́дре Дими́трие, о́тче наш,/ Спа́су всех моли́ся/ спасти́ и́же честно́е твое́ сре́тение пе́сньми сла́вящих. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Свет ро́ждшая пречестны́й,/ от Отца́ возсия́вша пре́жде всех век,/ просвети́, Отрокови́це, ду́шу мою́ и ум,/ дале́че от мене́ отгоня́щи тьму страсте́й,/ да Тя ублажа́ю, Присноблаже́нную, ве́рным упова́ние. Песнь 4 Ирмос: Го́ру Тя, благода́тию Бо́жиею приосене́нную,/ прозорли́выма Авваку́м усмотри́в очи́ма,/ из Тебе́ изы́ти Изра́илеву провозглаша́ше Свято́му,/ во спасе́ние на́ше и обновле́ние. Припев: Преподо́бне о́тче Дими́трие, моли́ Бо́га о на́с. Вели́ких доброде́телей де́латель, Богому́дре, был еси́,/ и́миже дости́же ве́чная блага́я,/ иде́же с ли́ки святы́х А́нгел веселя́ся,/ испроси́ нам получи́ти ми́лость,/ и́же пресвято́му твоему́ о́бразу пе́ние принося́щим. Припев: Преподо́бне о́тче Дими́трие, моли́ Бо́га о на́с. Жития́ твоего́ красото́ю богому́дрою красу́ется оби́тель твоя́, свя́те,/ ученицы́ же твои́ боголюбе́знии ра́достно Бо́га воспева́ют,/ тя та́ко просла́вльшаго. Сла́ва Отцу́ и Сы́ну и Свято́му Ду́ху. Уче́нии твои́ми богому́дрыми учени́к ста́до непоро́чно приведе́ Бо́гови,/ с ни́ми же моли́ся и нам сохране́нным бы́ти в Боже́ственней Того́ сла́ве,/ и́же священноле́пную твою́ добро́ту хвала́ми почита́ющих. И ны́не и при́сно и во ве́ки веко́в. Ами́нь. Богородичен: Чуде́с превы́ше вели́кое чу́до, Чи́стая, рождества́ Твоего́ зри́тся,/ ражда́еши бо Христа́, плоть бы́вша,/ кроме́ при́меса и смеше́ния. Песнь 5 Ирмос: Бог Сын ми́ра, Оте́ц Щедро́т,/ Вели́каго Сове́та Твоего́ А́нгела,/ мир подава́юща, посла́л еси́ нам,/ тем, Богоразу́мия к све́ту наста́вльшеся,/ от нощи́ у́тренююще,/ славосло́вим Тя, Человеколю́бче. Припев: Преподо́бне о́тче Дими́трие, моли́ Бо́га о на́с. Земны́х всех небре́гл еси́, блаже́нне,/ Небе́сная блага́я стяжа́, му́дре,/ отню́дуже в чудесе́х изя́щен обре́теся,/ подава́еши приходя́щим к тебе́ ско́рое присеще́ние,/ и сего́ ра́ди тя при́сно хвала́ми почита́ем. Припев: Преподо́бне о́тче Дими́трие, моли́ Бо́га о на́с. Приста́нище невла́емо всем ве́рным в жи́зни сей, блаже́нне, был еси́,/ ни́щим пита́тель, печа́льных уте́шитель,/ те́мже вопие́м ти:/ и нас не забу́ди в моли́твах свои́х к Бо́гу,/ назира́й нас всегда́. Сла́ва Отцу́ и Сы́ну и Свято́му Ду́ху. Миролю́бных душ отвраща́яся,/ Небе́снаго ми́ра – Христа́, взыска́л еси́, о́тче,/ и Того́ обре́те благи́ми де́лы,/ раздава́еши Боже́ственныя да́ры/ свята́го твоего́ подо́бия честны́й о́браз любо́вию почита́ющим. И ны́не и при́сно и во ве́ки веко́в. Ами́нь. Богородичен: И́же естество́м Неопи́санный, вообра́жся из Тебе́,/ на́ше писа́ние пло́тски прия́т, Влады́чице,/ в существе́ и хоте́ниих сугу́бых познава́ем. Песнь 6 Ирмос: Обы́де нас после́дняя бе́здна,/ несть избавля́яй,/ вмени́хомся, я́ко о́вцы заколе́ния,/ спаси́ лю́ди Твоя́, Бо́же наш,/ Ты бо кре́пость немощству́ющих и исправле́ние. Припев: Преподо́бне о́тче Дими́трие, моли́ Бо́га о на́с. Посто́м и моли́твами жизнь свою́ препроводи́л еси́,/ возвесели́л еси́ И́же над все́ми при́сно сла́вимаго Бога,/ пресве́тлыми же чудесы́ твои́ми весь мир озари́л еси́,/ те́мже тебе́, преподо́бне, при́сно в пе́снех почита́ем. Припев: Преподо́бне о́тче Дими́трие, моли́ Бо́га о на́с. Кро́тость и незло́бие в житии́ сем стяжа́л еси́,/ подо́бяся своему́ Влады́це, Прекро́ткому Па́стырю,/ и сего́ ра́ди и́ноком прему́др наста́вник бысть,/ с ни́ми же Спа́су всех угоди́л еси́. Сла́ва Отцу́ и Сы́ну и Свято́му Ду́ху. Житию́ А́нгельскому ревни́тель бысть, свя́те,/ подража́я тех ангелоле́пное подо́бие,/ с ни́ми же, блаже́нне, и нас помина́й,/ и́же святы́й твой о́браз ве́рою сла́вящих. И ны́не и при́сно и во ве́ки веко́в. Ами́нь. Богородичен: Де́вствуеши, я́коже пре́жде, ро́ждши Христа́,/ млеко́м пита́еши всем пи́щу подаю́щаго, Чи́стая,/ пресла́вно ди́вно чу́до и непостижи́мо. Кондак, глас 8 Христа еди́наго в жи́зни сей во след идти́ возжела́л еси́/ и, Того́ любо́вию земна́я отри́нув, премину́в Небе́сными 9 ,/ с ли́ки А́нгел водворя́яся, неотсту́пно предстои́ши Бо́гови,/ тем и ны́не пресвято́му твоему́ о́бразу сре́тения пра́здник ра́достно сотворя́юще,/ от неду́г исцеле́ние прие́млем, благода́рно вопию́ще:/ ра́дуйся, преподо́бне о́тче Дими́трие, по́стников удобре́ние. Икос Боже́ственными доброде́тельми твои́ми, Богому́дре, себе́ украси́л еси́/ и Спа́су Христу́ жили́ще соде́ла, о́тче, му́жественне,/ я́коже зла́то, искуси́ся ве́рою к Бо́гу,/ наде́ждою и любо́вию обе́ты своя́ полага́я,/ воздержа́нием пости́вся, я́коже безпло́тен,/ в целому́дрии и смире́нии вознесе́ся;/ те́мже и мы духо́вная твоя́ ча́да, моли́твами твои́ми просвеща́еми,/ ра́достною душе́ю воспева́ем Боже́ственная твоя́ духо́вная исправле́ния/ и любо́вию пра́зднуем пречу́дному твоему́ пресвято́му о́бразу,/ и благода́рственно вопие́м ти:/ ра́дуйся, я́ко измла́да Бо́гу послужи́л еси́;/ ра́дуйся, притека́ющим к тебе́ ко спасе́нию хода́тай./ Ра́дуйся, лю́дем, правосла́вно ве́рующим, пресла́вная похвало́ и кре́пкое на враги́ одоле́ние;/ ра́дуйся, гра́ду твоему́ вели́кое утвержде́ние./ Ра́дуйся, святе́й оби́тели твое́й благонаде́жное ве́чное весе́лие;/ ра́дуйся, и́ноком пресла́вное украше́ние и наде́ждо спасе́ния./ Ра́дуйся, всем христиа́ном в беда́х прибе́жище и приста́нище спасе́ния;/ ра́дуйся, я́ко твои́ми моли́твами сопроти́вныя ду́хи побежда́ются./ Ра́дуйся, исто́чник чудесе́м неизчерпа́емый,/ да вси, и́же тобо́ю от Бо́га спаса́еми, непреста́нно зове́м ти:/ ра́дуйся, преподо́бне о́тче Дими́трие, по́стников удобре́ние. Песнь 7 Ирмос: Су́щим в пещи́ отроко́м Твои́м, Спа́се,/ не прикосну́ся, ниже́ стужи́ огнь./ Тогда́ трие́, я́ко еди́неми усты́, поя́ху/ и благословля́ху, глаго́люще:/ благослове́н Бог оте́ц на́ших. Припев: Преподо́бне о́тче Дими́трие, моли́ Бо́га о на́с. На земли́, я́ко безпло́тен, блаже́нне, поживе́ с пло́тию,/ к су́щим мира́ не приплета́яся ничи́мже,/ но, я́ко А́нгел, крило́ма твои́х доброде́телей ду́хом на Не́бо возлете́л еси́/ и сего́ ра́ди непреста́нно вопие́ши:/ оте́ц на́ших Бо́же, благослове́н еси́. Припев: Преподо́бне о́тче Дими́трие, моли́ Бо́га о на́с. Удиви́л тя есть Госпо́дь, блаже́нне, во всех де́лех Свои́х/ и стра́шна показа́ тя безпло́тным враго́м,/ и сего́ ра́ди пресвято́му твоему́ о́бразу гове́ют вси челове́цы,/ непреста́нно пе́ние вопию́ще при́сно:/ моли́твами твои́ми, свя́те, испроси́ нам у Христа́ ве́лию ми́лость. Сла́ва Отцу́ и Сы́ну и Свято́му Ду́ху. Земна́я измени́в Небе́сными, свя́те,/ блага́я ве́чная восприя́л еси́/ и со А́нгельскими ли́ки све́тле весели́шися,/ неизрече́нныя добро́ты с ни́ми наслажда́яся,/ ея́же в слеза́х стяжа́л еси́,/ помина́й чад свои́х при́сно. И ны́не и при́сно и во ве́ки веко́в. Ами́нь. Богородичен: Бог из Тебе́ бысть Челове́к,/ смеше́ние, Чи́стая, обожи́в челове́ческое/ и о́бщницы сотвори́в ны естества́ Боже́ственнаго/ в Тебе́, Блаже́нная в жена́х, вои́стинну Благослове́нная, Чи́стая. Песнь 8 Ирмос: В пещи́ о́троцы изра́илевы,/ я́коже в горни́ле,/ добро́тою благоче́стия чисте́е зла́та блеща́хуся, глаго́люще:/ благослови́те, вся дела́ Госпо́дня, Го́спода,/ по́йте и превозноси́те во вся ве́ки. Припев: Преподо́бне о́тче Дими́трие, моли́ Бо́га о на́с. Исто́чник исцеле́ний яви́лся еси́, преподо́бне,/ духо́вная твоя́ ча́да напая́еши Боже́ственныя сла́дости,/ река́ми же чуде́с твои́х весь мир облагоуха́л еси́,/ те́мже днесь, любо́вию соше́дшеся,/ непреста́нное тебе́ благодаре́ние прино́сим. Припев: Преподо́бне о́тче Дими́трие, моли́ Бо́га о на́с. Звезда́ пресве́тлая вселе́нней дарова́ся,/ уясни́ на́ша сердца́, благоче́стне тебе́ пе́ние принося́щих,/ душе́вная на́ша чу́вства в поле́зная испра́ви,/ да непреста́нное благодаре́ние всегда́, свя́те, прино́сим Тебе́. Сла́ва Отцу́ и Сы́ну и Свято́му Ду́ху. Жития́ мо́ре немяте́жно преплы́л еси́,/ приста́нища о́наго Небе́снаго соверше́нне дости́гл еси́,/ иде́же пребыва́еши с преподо́бными все́ми,/ сла́вяще с ни́ми Творца́, всех Бо́га. И ны́не и при́сно и во ве́ки веко́в. Ами́нь. Богородичен: Сень Тя, и трапе́зу, и Боже́ственный ковче́г,/ и ру́чку, вмести́вшую ма́нну, и жизнь, и свя́тую го́ру имену́ем,/ Де́во Мари́е, при́сно Благослове́нная. Песнь 9 Ирмос: Та́инство стра́нное ви́жу и пресла́вное:/ Не́бо – верте́п, престо́л Херуви́мский – Де́ву,/ я́сли – вмести́лище,/ в ни́хже возлеже́ Невмести́мый – Христо́с Бог,/ Его́же, воспева́юще, велича́ем. Припев: Преподо́бне о́тче Дими́трие, моли́ Бо́га о на́с. На земли́, я́ко А́нгел, блаже́нне, стяжа́л жизнь а́нгельскую,/ Творцу́ всех, Бо́гу Спа́су, угоди́л еси́,/ Его́же Престо́лу с ли́ки святы́х ны́не предстои́ши,/ непреста́нно моли́ся всем христиа́ном на враги́ побе́ду и грехо́в оставле́ние дарова́ти,/ ве́рно чту́щим священноле́пный твой о́браз. Припев: Преподо́бне о́тче Дими́трие, моли́ Бо́га о на́с. Кро́тость с незло́бием в жи́зни сей, преподо́бне, стяжа́л еси́,/ тем и зе́млю кро́тких насле́дова,/ с ни́ми же испроси́ нам грехо́в оставле́ние,/ и́же священнообра́зное твое́ подо́бие непреста́нно ублажа́ющим. Сла́ва Отцу́ и Сы́ну и Свято́му Ду́ху. Вступль на ле́ствицу доброде́телей,/ до́лу влеку́щее мудрова́ние, о́тче прему́дре, оплева́л еси́/ и, яко пресве́тлое свети́ло, вселе́нней от Бо́га дарова́ся,/ просвеща́я всех ангелоле́пнаго твоего́ подо́бия Боже́ственными твои́ми дарова́нии. И ны́не и при́сно и во ве́ки веко́в. Ами́нь. Богородичен: Грехолюбе́зный нрав и неиспра́влено житие́ зело́ иму́щаго,/ и те́ло, оскверне́но вся́чески, и гре́шну ду́шу,/ Де́во Влады́чице, спаси́ мя, раба́ Твоего́,/ и́же худогла́сное сие́ пе́ние в хвале́нии Твоего́ преподо́бнаго уго́дника воспе́вшаго. Светилен Ду́ху Пресвято́му в жили́ще от чресл ма́терних избра́н бысть,/ столп светоза́рен всему́ ми́ру дарова́ся,/ пресве́тлыми заря́ми твои́х исправле́ний ста́ду твоему́ ду́ши просвети́л еси́,/ мрак страсте́й на́ших дале́че прогоня́я,/ те́мже, и́же пресвяты́й твой священноле́пный о́браз хвала́ми почита́ющих,/ непреста́нну моли́тву сотвори́ о нас к Бо́гу. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Соединя́ется с пло́тию по соста́ву Пресу́щное Сло́во/ и еди́н от двою́ происхо́дит из Тебе́ несме́сно, Пречи́стая,/ обожи́в, я́же прия́т,/ те́мже прославля́ем вои́стинну Тя, Богоро́дицу.

Минея, 11 Февраля, Канон Глас 2 Песнь 1 Ирмос: Во глубине́ постла́ иногда́/ фараони́тское всево́инство преоруже́нная си́ла,/ вопло́щшееся же Сло́во всезло́бный грех потреби́ло есть,/ препросла́вленный Госпо́дь сла́вно бо просла́вися. Припев: Преподо́бне о́тче Дими́трие, моли́ Бо́га о на́с. Тебе́ твоего́ блаже́нне, уче́ния долг принося́ще,/ возда́ния простира́ем, вене́ц похвала́ми плету́ще;/ ты же ми́лостив яви́ся, пребога́те,/ твои́ми мольба́ми благода́ть нам пода́ждь духо́вную. Припев: Преподо́бне о́тче Дими́трие, моли́ Бо́га о на́с. Всегуби́тельное стремле́ние страсте́й, о́тче, увяди́л еси́,/ слове́сным объят Богому́дрием,/ благопребы́тен бо был еси́ и благогла́сен,/ кро́ток же и смире́н,/ сло́вом прему́дрости, Дими́трие, и ра́зума венча́н. Припев: Преподо́бне о́тче Дими́трие, моли́ Бо́га о на́с. Священноукраси́л еси́ себе́, о́тче, ра́зумом и де́тельным виде́нием благода́ти,/ Богоглаго́ливе Дими́трие, жела́я венца́ сла́вы Христо́вы,/ и тво́ю наде́жду изря́дно, преблаже́нне, не погреши́л еси́. Сла́ва Отцу́ и Сы́ну и Свято́му Ду́ху. Целому́дрие удержа́л еси́ я́ве,/ кра́йнюю же кро́тость и высо́кое, Богоно́се, смире́ние,/ и́миже возвыша́ем,/ трудо́в твои́х де́йством и виде́нием, ра́дуяся, принесе́ся,/ вене́ц неувяда́емый прие́м. И ны́не и при́сно и во ве́ки веко́в. Ами́нь. Богородичен: Тва́рей яви́лася еси́, Чи́стая, всех ви́димых и неви́димых превы́шши, Всенепоро́чная:/ Зижди́теля бо родила́ еси́,/ я́коже изво́ли воплоти́тися во утро́бе Твое́й./ Его́же со дерзнове́нием моли́ спасти́ пою́щия Тя. Песнь 3 Ирмос: Ирмо́с: Процвела́ есть пусты́ня, я́ко крин, Господи,/ язы́ческая неплодя́щая це́рковь/ прише́ствием Твои́м,/ в не́йже утверди́ся мое́ се́рдце. Припев: Преподо́бне о́тче Дими́трие, моли́ Бо́га о на́с. Просия́л еси́ в житии́ твое́м, Богоно́се Дими́трие,/ я́коже всесве́тлое со́лнце в ми́ре,/ и просвети́ и́же к тебе́ ве́рою и любо́вию приходя́щия/ и пою́щия тя. Припев: Преподо́бне о́тче Дими́трие, моли́ Бо́га о на́с. Просвеща́ются концы́ уче́нии твои́ми, преподо́бне,/ я́коже бо свети́льник просвети́л еси́, Богоно́се, Це́рковь Христо́ву,/ о Не́йже утверди́ся мое́ се́рдце. Сла́ва Отцу́ и Сы́ну и Свято́му Ду́ху. Непорабоще́ну соблю́л еси́ ду́шу твою́ страстьми́/ и сластьми́ теле́сными, Богоно́се Дими́трие всече́стне,/ те́мже ны́не по достоя́нию восхваля́ем тя. И ны́не и при́сно и во ве́ки веко́в. Ами́нь. Богородичен: Сказу́я иногда́ сокрове́нное та́инство, Отрокови́це, Тебе́ дре́вле Гаврии́л зовя́ше:/ ра́дуйся, Божия пала́то, в то́же всели́ся вся челове́ки обожи́, я́ко Милосе́рд. Седален, глас 3 Исправле́ние жития́ твоего́ всем просвеща́ет стопы́, Дими́трие о́тче,/ вои́стинну ве́рою подо́бящим ти ся;/ те́мже, и́же любо́вию блажа́т тя всегда́,/ спаса́й моли́твами твои́ми от вся́кия тесноты́,/ Христа́ Преблага́го моля́,/ преподо́бне блаже́нне досточу́дне. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Я́ко невозде́ланная, Де́во, Лоза́, красне́йший грозд прозябла́ еси́,/ источа́ющ нам вино́ спасе́ния,/ всех веселя́щее ду́ши же и телеса́./ Те́мже я́ко вину́ Тя до́брых блажа́ще при́сно,/ со А́нгелом вопие́м Ти:/ ра́дуйся, Благода́тная. Песнь 4 Ирмос: Прише́л еси́ от Де́вы не хода́тай, ни А́нгел,/ но Сам, Го́споди, вопло́щься,/ и спасл еси́ всего́ мя, челове́ка./ Тем зову́ Ти: сла́ва си́ле Твое́й, Го́споди. Припев: Преподо́бне о́тче Дими́трие, моли́ Бо́га о на́с. Ты, Дими́трие, и́нокующим бысть вене́ц,/ не ка́мением многоце́нным укра́шен, но доброде́телию обло́жен,/ яви́лся еси́, блаже́нне, Богорадова́нное вои́стинну украше́ние. Припев: Преподо́бне о́тче Дими́трие, моли́ Бо́га о на́с. Боже́ственную, Богому́дре, поче́л еси́ прему́дрость:/ те́мже дарова́нии тя сия́ одари́,/ сла́ву ве́чную тебе́ хода́тайствовавши,/ о́тче Дими́трие всече́стне. Сла́ва Отцу́ и Сы́ну и Свято́му Ду́ху. Све́тлостию нрав твои́х и о́бразы бла́гости,/ преподо́бне Дими́трие, подо́бне пожи́л еси́,/ те́мже присту́пен ты всем бысть,/ всеблаже́нне и пречу́дне. И ны́не и при́сно и во ве́ки веко́в. Ами́нь. Богородичен: Умерщвле́ния плод нам Е́ва принесе́,/ Ты же, Жизнь ро́ждши Ипоста́сную,/ а́бие испра́вила еси́ род наш, Богоневе́сто Пречи́стая. Песнь 5 Ирмос: Хода́тай Бо́гу и челове́ком был еси́, Христе́ Бо́же:/ Тобо́ю бо, Владыко, к Светонача́льнику, Отцу́ Твоему́,/ от но́щи неве́дения/ приведе́ние има́мы. Припев: Преподо́бне о́тче Дими́трие, моли́ Бо́га о на́с. Стремле́ние страсте́й безстра́стием удержа́л еси́,/ Богоно́се Дими́трие,/ виде́нии и дея́нии просвети́л еси́, о́тче, душе́вное устрое́ние. Припев: Преподо́бне о́тче Дими́трие, моли́ Бо́га о на́с. Умо́м чи́стым и писа́нии духо́вными бесе́довал еси́,/ Богоглаго́ливе Дими́трие,/ виде́ния и дея́ния собра́в бога́тство, о́тче преподо́бне. Сла́ва Отцу́ и Сы́ну и Свято́му Ду́ху. Прему́дрости глубину́ испыта́в, Дими́трие,/ дости́гл еси́ обрести́, ели́ко благопотре́бно,/ и би́сер многоце́нный боле́зньми стяжа́л еси́, преблаже́нне, ра́зума. И ны́не и при́сно и во ве́ки веко́в. Ами́нь. Богородичен: Се во чре́ве, Богоро́дице Пречиста́я, Христа́ Бо́га па́че сло́ва име́ла еси́,/ я́коже Иса́ия провозгласи́,/ и вы́ше естества́ Сего́, Богороди́тельнице, родила́ еси́. Песнь 6 Ирмос: В бе́здне грехо́вней валя́яся,/ неизсле́дную милосе́рдия Твоего́ призыва́ю бе́здну:/ от тли, Бо́же, мя возведи́. Припев: Преподо́бне о́тче Дими́трие, моли́ Бо́га о на́с. Вселе́нней свети́ло пресве́тлое, о́тче, яви́лся еси́, Дими́трие,/ слове́с све́тлостию просвеща́я/ ве́рою и любовию к тебе́ притека́ющия. Припев: Преподо́бне о́тче Дими́трие, моли́ Бо́га о на́с. Блаже́нное житие́ проше́л еси́,/ назда́в у́бо чу́вства, вне был еси́ мирска́го мятежа́/ и Бо́гу прибли́жился еси́, Дими́трие. Сла́ва Отцу́ и Сы́ну и Свято́му Ду́ху. Я́ко добр, я́ко красе́н вене́ц,/ и́мже ны́не венча́лся еси́, прему́дре Дими́трие,/ доброде́тельми венча́ем,/ и над страстьми́ ца́рствовал преизря́дне. И ны́не и при́сно и во ве́ки веко́в. Ами́нь. Богородичен: Вы́ше естества́ родила́ еси́, Де́во, и ве́чнуеши Де́ва,/ я́вльши и́стиннаго Божества́ Сы́на и Бо́га Твоего́ о́бразы. Кондак, глас 8 От ю́ности, преподо́бне, крест твой взем, Христу́ после́довал еси́,/ в моли́твах и поще́ниих, во бде́ниих же и злострада́ниих плоть твою́ изнуря́я;/ те́мже и Всеви́дящее О́ко, твоя́ труды́ ви́дев,/ чудесы́ тя прославля́ет и всех зва́ти тебе́ науча́ет:/ ра́дуйся, преподо́бне о́тче Дими́трие, по́стников удобре́ние. Икос Боже́ственными доброде́тельми твои́ми себе́, му́дре, украси́л еси́,/ Спа́су Христу́ жили́ще со́делав, о́тче, му́жественне:/ я́коже зла́то, искуси́лся еси́ ве́рою к Бо́гу и, наде́ждею и любо́вию обе́ты полага́я,/ воздержа́нием пости́вся, я́ко безпло́тен,/ в целому́дрии и во смире́нии возне́слся еси́./ Те́мже и мы, моли́твами твои́ми просве́щшеся,/ преподо́бне Дими́трие, вопие́м ти:/ ра́дуйся, я́ко из млада́ Бо́гу послужи́л еси́;/ ра́дуйся, притека́ющим к тебе́ спасе́ния хода́таю;/ ра́дуйся, христоимени́тым лю́дем похвала́ и утвержде́ние;/ ра́дуйся, я́ко твои́ми моли́твами сопроти́внии побежда́ются;/ ра́дуйся, я́ко всем прося́щим дае́ши дар, от Господа дарова́нный ти, исцеле́ний;/ ра́дуйся, я́ко и чудесы́ тя Бог прославля́ет и всех зва́ти тебе́ науча́ет;/ ра́дуйся, преподо́бне о́тче Дими́трие, по́стников удобре́ние. Песнь 7 Ирмос: Богопроти́вное веле́ние беззако́ннующаго мучи́теля/ высо́к пла́мень вознесло́ есть;/ Христо́с же простре́ Богочести́вым отроко́м ро́су духо́вную,/ Сын благослове́н и препросла́влен. Припев: Преподо́бне о́тче Дими́трие, моли́ Бо́га о на́с. Благоуха́ют, преподо́бне, твои́х уче́ний словеса́, благода́тию Ду́ха сия́юще,/ Божество́ бо Еди́но чтый в Тре́х Ли́цех, Сло́ва же воплоще́ние поя́,/ благоуха́еши нас, пребога́те. Припев: Преподо́бне о́тче Дими́трие, моли́ Бо́га о на́с. Ума́ чистото́ю и по́мысла, Богоразу́мия све́тлостию житие́ преше́л еси́,/ чистото́ю же телесе́ и де́вства сия́нием/ изря́дно возложе́ние я́влься Всеви́дцу и Вседержи́телю. Сла́ва Отцу́ и Сы́ну и Свято́му Ду́ху. Сло́во твое́, со́лию раство́рено, и житие́ твое́, благода́тию, преблаже́нне, сия́я, яви́ся, пречу́дне;/ те́мже в вы́шния оби́тели, ра́дуяся, всели́лся еси́,/ Христу́ со дерзнове́нием ны́не предстоя́. И ны́не и при́сно и во ве́ки веко́в. Ами́нь. Богородичен: Управля́ющи, Пречи́стая, мое́ житие́, к Твоему́ всети́хому приста́нищу напра́ви,/ Бо́га ро́ждши, благи́х исто́чника,/ всем подаю́ща ве́рным нетле́ния благода́ти. Песнь 8 Ирмос: Пещь иногда́ о́гненная в Вавило́не де́йства разделя́ше,/ Бо́жиим веле́нием халде́и опаля́ющая,/ ве́рныя же ороша́ющая, пою́щия:/ благослови́те, вся дела́ Госпо́дня, Го́спода. Припев: Преподо́бне о́тче Дими́трие, моли́ Бо́га о на́с. Вене́ц благоле́пен Христо́с Живода́вец на верх твой положи́, тезоимени́те Дими́трие,/ и́бо дея́ньми просия́л еси́ и виде́нии яви́лся еси́, зовы́й:/ благослови́те, вся дела́ Госпо́дня, Го́спода. Припев: Преподо́бне о́тче Дими́трие, моли́ Бо́га о на́с. Все преше́д чу́вство, преблаже́нне,/ уму́ пе́рвому прибли́жился еси́/ души́ твоея́ чистото́ю, жития́ же све́тлостию,/ венцено́сче Дими́трие, зовы́й:/ благослови́те, вся дела́ Госпо́дня, Го́спода. Сла́ва Отцу́ и Сы́ну и Свято́му Ду́ху. Жела́нием зе́льным, преблаже́нне,/ изсле́дил еси́ Богоно́снаго Се́ргия вели́каго житие́ Божественно́е,/ жи́зни све́тлостию поревнова́л еси́, прехва́льне,/ быв у́бо и собесе́дник сего́ изря́ден вои́стинну. И ны́не и при́сно и во ве́ки веко́в. Ами́нь. Богородичен: Ум безстра́стен во утро́бе Твое́й соединя́ется челове́ческому уму́, Пречи́стая,/ пло́ти же дебельство́м под ле́том быв лет превы́шший./ Тем Тя, Богоро́дице, ве́рою и любо́вию сла́вим. Песнь 9 Ирмос: Безнача́льна Роди́теля Сын, Бог и Господь,/ вопло́щься от Де́вы, нам яви́ся/ омраче́нная просвети́ти, собра́ти расточе́нная./ Тем Всепе́тую Богоро́дицу велича́ем. Припев: Преподо́бне о́тче Дими́трие, моли́ Бо́га о на́с. Пречестны́й Дими́трие,/ ны́не чи́сто услажда́яся и пи́щу прие́мля па́че у́мныя,/ иде́же собо́ри святы́х о́крест Го́спода лику́ют, блаже́нне,/ и́же тя ны́не чту́щия, хода́тайствуя, к себе́ привлецы́. Припев: Преподо́бне о́тче Дими́трие, моли́ Бо́га о на́с. Преше́л еси́, ра́дуяся, жела́нием в рай,/ к еди́ному вои́стинну блаже́нству, к пребо́льшей добро́те,/ и к жи́зни вои́стинну нестаре́ющейся, и Све́ту Невече́рнему,/ Богоно́сне о́тче Дими́трие. Сла́ва Отцу́ и Сы́ну и Свято́му Ду́ху. Я́ко Со́лнце просия́л еси́ в мона́шеских собо́рех,/ от млады́х ногте́й освяще́н был еси́,/ я́коже зарю́, испуща́я доброде́тели твоего́ жития́,/ пресла́дкий Дими́трие, Богоно́се о́тче преподо́бне. И ны́не и при́сно и во ве́ки веко́в. Ами́нь. Богородичен: Разуме́вше издале́ча прозорли́выма очи́ма, проро́цы/ Тя я́ве провозвести́ша, хотя́щую Ма́терь бы́ти Вседе́телю, Владыце всех,/ тем Тя, Всепе́тая, Богоро́дицу испове́дуем. Светилен Мирска́го пристра́стия я́ко от скве́рны уклони́лся еси́,/ и а́лчбою плоть увяди́л еси́, о́тче,/ и Небе́сною сла́вою со А́нгелы обогати́лся еси́./ Те́мже непреста́нно моли́ о нас Христа́ Бо́га, преподо́бне Дими́трие. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Тя предста́тельницу и́мамы вси гре́шнии,/ о Пресвята́я Де́во!/ Ты благопреме́нна сотвори́ Сына Твоего́ Ма́терними Твои́ми моли́твами.

Минея, 28 Февраля, Канон преподобного Глас 4 Песнь 1 Ирмос: Моря чермну́ю пучин́у/ невлажными стопа́ми/ древний пешеше́ствовав Израиль,/ крестообра́зныма Моисе́овыма рука́ма/ Амали́кову силу в пусты́ни победи́л есть. Припев: Преподо́бне о́тче Васи́лие, моли́ Бо́га о нас. Восхожде́ние на ка́мени положи́в, о́тче, веры,/ напа́стей не убоя́лся еси́ стремле́ния,/ но непоколеби́м пребыл еси́, я́ко доброде́тели побо́рник/ и я́ко царствия тезоимени́т. Припев: Преподо́бне о́тче Васи́лие, моли́ Бо́га о нас. Благода́ть Пресвятаго Духа тя укрепи́вши,/ боле́зненныя ра́ны претерпе́ти утверди́/ и победоно́сца показа́ на мучи́теля суему́дреннаго. Сла́ва Отцу́ и Сы́ну и Свято́му Ду́ху. Сострада́льца и своина му́дра, о́тче, получи́л еси́, доброде́тельми преспева́юща присно,/ с ни́мже, ра́дуяся, пребога́те, по́двиг страда́ния проше́л еси́ мучением. И ны́не и при́сно и во ве́ки веко́в. Ами́нь. Богородичен: Предстата́льницу, и спасе́ния Хода́таицу, и сте́ну необориму,/ Тя предлагаю моея жизни, Богородице Всепе́тая,/ Бога ро́ждшую, Благоде́теля всея́ твари. Песнь 3 Ирмос: Весели́тся о Тебе Церковь Твоя, Христе, зову́щи:/ Ты моя кре́пость, Господи,/ и прибе́жище, и утвержде́ние. Припев: Преподо́бне о́тче Васи́лие, моли́ Бо́га о нас. Напра́вил еси́ усердно твое́ сердце к Богу, преподо́бне,/ постною благода́тию и испове́данием просия́л еси́. Припев: Преподо́бне о́тче Васи́лие, моли́ Бо́га о нас. Во́инство восприи́м и всеору́жие Креста́,/ победи́л еси́ мы́сленнаго змия и чувственнаго, о́тче, льва. Сла́ва Отцу́ и Сы́ну и Свято́му Ду́ху. Соблю́дше благочести́ве, еже по образу души́, преподо́бнии,/ Христов пречистый чтуще образ, пострада́сте. И ны́не и при́сно и во ве́ки веко́в. Ами́нь. Богородичен: Благослови́ся Тобою пе́рвая клятва,/ и тле́нием держи́мое естество́ наше, Чистая, нетле́ние прия́т. Седален, глас 3 Бо́гатство тле́нное и славу теку́щую оста́вив,/ Небесное бога́тство восприя́л еси́/ и славу, о́тче, вои́стинну, блаже́нне, вечную./ Те́мже блажи́м свято́е твое успе́ние/ и, торжествующе, в нем вопие́м ти:/ помина́й нас, к Богу име́я дерзнове́ние, Васи́лие. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Недомы́сленно и непостижи́мо есть, Владычице Богора́дованная,/ е́же соде́ланное о Тебе́ стра́шное Божие та́инство,/ ибо, необыме́ннаго заче́нши, родила́ еси́/ пло́тию обложе́нна от пречистых крове́й Твоих./ егоже всегда, Чистая, я́ко Сына Твоего́ моли́/ спасти́ся душам на́шим. Песнь 4 Ирмос: Вознесе́на Тя ви́девши Церковь на Кресте,/ Солнце Пра́ведное,/ ста в чи́не своем,/ досто́йно взыва́ющи:/ сла́ва си́ле Твоей, Господи. Припев: Преподо́бне о́тче Васи́лие, моли́ Бо́га о нас. Яко красно́ твое, всеблаже́нне, терпе́ние,/ в ста́рости ю́ностную показу́я, преподо́бне, тве́рдость,/ в не́йже взыва́л еси́:/ сла́ва силе Твоей, Господи. Припев: Преподо́бне о́тче Васи́лие, моли́ Бо́га о нас. Соедине́н любовию твоему́ Владыце и Того по́мощию оде́явся,/ боле́зни не чу́вствовал еси́ плотски́я,/ взыва́я же, пел еси́:/ слава силе Твоей, Господи. Сла́ва Отцу́ и Сы́ну и Свято́му Ду́ху. Ца́рства я́ко тезоимени́т Небеснаго, иже к нему веду́щим путем ше́ствовал еси́,/ спу́тника обрет Проко́пия, зовуща:/ сла́ва силе Твоей, Господи. И ны́не и при́сно и во ве́ки веко́в. Ами́нь. Богородичен: Неискусобра́чно родила́ еси́, о Дево,/ и по Рождестве́ яви́лася еси́ девствующи па́ки./ Те́мже немо́лчными гласы, – радуйся,– Тебе, Владычице,/ ве́рою несумне́нною зове́м. Песнь 5 Ирмос: Ты, Господи, мо́й Свет,/ в мир прише́л еси́,/ Свет Святы́и, обраща́яй из мра́чна неве́дения/ верою воспева́ющий Тя. Припев: Преподо́бне о́тче Васи́лие, моли́ Бо́га о нас. Ты, преподо́бне, све́тло подвиза́лся еси́, Васи́лие,/ льво́ву укори́в неукроти́мую де́рзость, и нрав неразу́мный. Припев: Преподо́бне о́тче Васи́лие, моли́ Бо́га о нас. Равномо́щна обре́т Проко́пия в труде́х,/ соверша́еши страда́ние пре́спеянии многообра́зными,/ Божественне венча́емь. Сла́ва Отцу́ и Сы́ну и Свято́му Ду́ху. Ны́не ви́диши мы́сленно Христа, Его́же возжела́л еси́/ и Его́же издалеча явле́ния де́йственно видел еси́,/ преблаже́нне свяще́ннейше. И ны́не и при́сно и во ве́ки веко́в. Ами́нь. Богородичен: Тя, ору́жие непобеди́мое на враги предлага́ем,/ Тя, утвержде́ние и надежду нашего спасе́ния, Богоневесто, стяжа́хом. Песнь 6 Ирмос: Пожру́ Ти со гласом хвале́ния, Господи,/Церковь вопие́т Ти,/ от бесо́вския крове очи́щшися/ ради ми́лости от ре́бр Твоих/ исте́кшею Кровию. Припев: Преподо́бне о́тче Васи́лие, моли́ Бо́га о нас. Раче́нием Царствие Вы́шнее восприе́м,/ земна́го царя несмы́сленный нрав, и повеле́ния, и заповеди, Богоно́се,/ до́блественне пренебре́гл еси́. Сла́ва Отцу́ и Сы́ну и Свято́му Ду́ху. Наг убо су́щих на земли́, му́дростне подвиза́лся еси́,/ оде́ян же Боже́ственною силою,/ яви́лся еси́ венцено́сец,/ я́ко победи́в безбо́жных мучи́телей противле́ние. И ны́не и при́сно и во ве́ки веко́в. Ами́нь. Богородичен: Се ны́не проро́ков исполня́ются пропове́дания/ Тебе́, Деве, ро́ждшей проро́ки дре́вле пропове́даннаго/ и исполня́ющаго прорече́нная Духа благода́тию. Кондак, глас 2 С высоты́ прии́м Боже́ственное открове́ние,/ изше́л еси́, му́дре, от среды́ молв/ и, мона́шествовав преподобно,/ чуде́с прия́л еси́ де́йство/ и неду́ги исцеля́ти благода́тию,/ Васи́лие всеблаже́нне свяще́ннейший. Песнь 7 Ирмос: В пещи́ Авраамстии о́троцы перси́дстей,/ любо́вию благоче́стия па́че,/ не́жели пла́менем, опаля́еми, взыва́ху:/ благослове́н еси́ в храме славы Твое́я, Господи. Припев: Преподо́бне о́тче Васи́лие, моли́ Бо́га о нас. Укрепле́н Боже́ственною си́лою, о́тче,/ обличи́л еси́ вся, честна́го образа Христо́ва отмета́ющияся, я́ко пребезу́мны,/ благослове́н еси́, вопия, в храме славы Твоея, Господи. Сла́ва Отцу́ и Сы́ну и Свято́му Ду́ху. Возделанна и очищена воздержанием, о́тче,/ и пощением возсиявша терпеливно, Христос тя прият,/ благословен еси́, зовуща, в храме славы Твоея, Господи. И ны́не и при́сно и во ве́ки веко́в. Ами́нь. Богородичен: Яко Богородицу и Царицу всея́ тва́ри, вси ве́рнии, поем Тя, Чи́стую,/ и –еже радуйся,– Тебе́ взываем:/ благослове́на Ты в жена́х еси́, Всенепоро́чная Владычице. Песнь 8 Ирмос: Ру́це распросте́р, Дании́л/ львов зия́ния в рове затче́:/ о́гненную же силу угаси́ша,/ доброде́телию препоя́савшеся, / благоче́стия рачи́тели, о́троцы, взыва́юще:/ благослови́те, вся дела Господня, Господа. Припев: Преподо́бне о́тче Васи́лие, моли́ Бо́га о нас. Те́ло, Богоно́се, и ум во всепло́дие Христу прине́сл еси́,/ я́ко всесожже́ние соверше́но огне́м сведе́ния, и пла́менем ран всесожега́емь, и зовы́й:/ благослови́те, вся дела Господня, Господа. Припев: Преподо́бне о́тче Васи́лие, моли́ Бо́га о нас. Погна́в твоя́ враги́ и гони́м, отче, низложил еси́/ и попра́л еси́, преподобне, безу́мие высокому́дреннаго,/ неукроти́мы ви́дя тебе́ му́чащия, взыва́я:/ благослови́те, вся дела Господня, Господа. Сла́ва Отцу́ и Сы́ну и Свято́му Ду́ху. Я́коже не́кий худо́жник, нам уче́ньми изря́ден яви́лся еси́, пребога́те:/ пе́рвее бо воздержа́ние к страда́нием му́жественнейше предложи́л еси́,/ сострада́льца име́я ученика́ Проко́пия, и вопию́ща:/ благослови́те, вся дела Господня, Господа. И ны́не и при́сно и во ве́ки веко́в. Ами́нь. Богородичен: Две́рь светоно́сну Небесную Тя имену́ем,/ е́юже про́йде Бог и воплоти́ся, Пречи́стая, безпло́тный пе́рвее,/ я́ко Бог и Отцу Сый Единосу́щен,/ Ему́же вопи́ем:/ благослови́те, вся дела Господня, Господа. Песнь 9 Ирмос: Камень нерукосе́чный/ от несеко́мыя горы́ Тебе, Дево, I краеуго́льный отсече́ся,/ Христос, совокупи́вый разстоя́щаяся естества́./ Тем, веселя́щеся, Тя, Богородице, велича́ем. Припев: Преподо́бне о́тче Васи́лие, моли́ Бо́га о нас. Вся́ко чу́вство, отче, ныне превозше́д, ко Владыце, радуяся, преше́л еси́ любо́вию,/ твоих подвиго́в бога́тство собра́в,/ а́нгельскую красоту и рая́ сладость непреста́нную. Припев: Преподо́бне о́тче Васи́лие, моли́ Бо́га о нас. С твои́м ученико́м и сострада́льцем восприе́мля, Богоно́се,/ блаже́нных наде́жду и ве́чнующее весе́лие,/ ва́ше торжество́ творя́щих назира́йте. Сла́ва Отцу́ и Сы́ну и Свято́му Ду́ху. От земли́ к Небе́сному наслажде́нию, венцено́сцы, преста́вльшеся,/ иде́же святы́х собо́ри, и Ангел Боже́ственная во́инства,/ учени́к сосло́вие ва́шими моли́твами спаса́йте. И ны́не и при́сно и во ве́ки веко́в. Ами́нь. Богородичен: Расто́ргни плени́цы прегреше́ний Тя поющих, Богома́ти,/ уста́ви стремле́ния напа́стей, греховную ути́ши молву́,/ бу́рю сокруши́ бед, Мати Дево.

Минея, 24 Августа, Кано́н преподо́бному Глас 2 Песнь 1 Ирмос: Гряди́те, лю́дие,/ пои́м песнь Христу́ Бо́гу,/ разде́льшему мо́ре и наставльшему лю́ди,/ я́же изведе́ из рабо́ты еги́петския,/ я́ко просла́вися. Припев: Преподо́бне о́тче Арсéние, моли́ Бо́га о на́с. Го́споди Иису́се Христе́, отве́рзи ми устне́ недосто́йнеи/ и даждь ми орга́н све́тлогласен/ досто́йно воспе́ти све́тлую па́мять уго́дника Твоего́, Арсе́ния преподо́бна. Припев: Преподо́бне о́тче Арсéние, моли́ Бо́га о на́с. Госпо́дня словеса́ услы́шав,/ тогда́ су́щая вся оста́вль, и во ум свой прия́т сло́во Бо́жие,/ и бысть сосу́д избра́н Свята́го Ду́ха,/ того́ ра́ди обре́л еси́ спасе́ние души́ свое́й. Сла́ва Отцу́ и Сы́ну и Свято́му Ду́ху. Госпо́дню зако́ну повину́яся, о́тче,/ усе́рдно к мы́сленным влече́ся дея́нием,/ побежда́я бесо́вская ополче́ния и де́йства всегда́шним Боже́ственным посо́бием. И ны́не и при́сно и во ве́ки веко́в. Ами́нь. Богородичен: Госпо́дню Ма́терь воспева́ем Тя, Пречи́стая Богоро́дице Де́во./ От враг наве́та нас, Чи́стая, Своя́ рабы́, сохрани́ вся невре́дно,/ ве́рно сла́вящия Тя. Песнь 3 Ирмос: Процвела́ есть пусты́ня, я́ко крин, Го́споди,/ язы́ческая неплодя́щая Це́рковь/ прише́ствием Твои́м,/ в не́йже утверди́ся мое́ се́рдце. Припев: Преподо́бне о́тче Арсéние, моли́ Бо́га о на́с. Процве́л еси́, преподо́бне Арсе́ние, о́тче наш,/ в по́стнических труде́х и во бде́ниих, я́ко фи́никс Дави́дский,/ ду́шу свою́ с те́лом очи́стив,/ и до конца́ подвиза́ся благи́м житие́м свои́м, всеблаже́нне. Припев: Преподо́бне о́тче Арсéние, моли́ Бо́га о на́с. Процве́л еси́, Арсе́ние преподо́бне, восприя́тием Свята́го Ду́ха,/ и, роди́телей любве́ возгнуша́вся, сла́дкую пи́щу от себе́ отри́нул еси́,/ и еди́ну за́поведь Христо́ву возлюби́л еси́, блаже́нне и Богому́дре. Сла́ва Отцу́ и Сы́ну и Свято́му Ду́ху. Процве́л еси́ житие́м свои́м светосия́нно,/ и яви́ся пресве́тло пребыва́ние твое́,/ Святы́м Ду́хом бесо́вское кова́рство до конца́ посрами́л еси́,/ преблаже́нне Арсе́ние и пусты́нником украше́ние. И ны́не и при́сно и во ве́ки веко́в. Ами́нь. Богородичен: Пе́сньми Боже́ственными почти́м Тя, ро́ждшую Бо́га,/ вопло́щшагося из Тебе́ и па́че со́лнечных луч возсия́вшаго,/ жи́ти бо с челове́ки благоизво́лил есть. Седален, глас 8 Простри́ дла́ни свои́ ко Всеми́лостивому Спа́су Христу́, преподо́бне о́тче Арсе́ние,/ Ему́же, от ю́ности до́бре потруди́вся, и угоди́,/ и тре́бующим твое́й по́мощи пода́й неоску́дное утеше́ние,/ и устне́ свои́ простри́ на моли́тву, и́миже Бо́га хвали́,/ и нас, чад свои́х, на благора́зумие наста́ви, и ускори́ на по́мощь на́шу,/ и изба́ви нас от находя́щих бед и зол и вся́кия ну́жды,/ и моли́ Христа́ Бо́га дарова́ти чту́щим пресла́вную святу́ю па́мять твою́/ спасти́ся душа́м на́шим. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Яко Всенепоро́чная Неве́ста Творца́,/ я́ко Неискусому́жная Ма́ти Изба́вителя,/ прия́телище я́ко су́щи Уте́шителя, Всепе́тая,/ беззако́нию мя су́ща скве́рно жили́ще и де́монов игра́лище в ра́зуме бы́вша,/ потщи́ся от сих злоде́йствия мя изба́вити,/ све́тло жили́ще доброде́тельми соде́лавши,/ Светода́тельная и Нетле́нная, разжени́ о́блак страсте́й и Вы́шняго прича́стия сподо́би/ и све́та невече́рняго моли́твами Твои́ми. Песнь 4 Ирмос: Прише́л еси́ от Де́вы не хода́тай, ни А́нгел,/ но Сам, Го́споди, вопло́щся,/ и спасл еси́ всего́ мя, челове́ка./ Тем зову́ Ти: Сла́ва си́ле Твое́й, Го́споди. Припев: Преподо́бне о́тче Арсéние, моли́ Бо́га о на́с. Преподо́бне о́тче Арсе́ние,/ ше́ствия твоя́ напра́вишася ко спасе́ния пути́/ наставлени́ем Боже́ственнаго Ду́ха, И́же в тя все́льшагося, блаже́нне. Припев: Преподо́бне о́тче Арсéние, моли́ Бо́га о на́с. Преподо́бне о́тче Арсе́ние,/ ты храм Пресвяты́я Богоро́дицы воздви́гл еси́,/ и уго́дно Ей послужи́л еси́,/ и огра́ду и́ночествующим во спасе́ние созда́. Сла́ва Отцу́ и Сы́ну и Свято́му Ду́ху. Преподо́бне о́тче Арсе́ние,/ ты бысть и́ноком наста́вник,/ име́л бо еси́ ра́зум, му́дростию устро́ен,/ и кра́сно чистото́ю сия́я, благи́м смире́нием. И ны́не и при́сно и во ве́ки веко́в. Ами́нь. Богородичен: Прииди́те, вси воспои́м Богоро́дицу Чи́стую/ и, ве́рно моля́щеся, возопии́м Ей:/ не преда́ждь нас враго́м во изможде́ние/ и моли́твами Свои́ми спаси́ нас. Песнь 5 Ирмос: Xодатай Бо́гу и челове́ком был еси́, Христе́ Бо́же:/ Тобо́ю бо, Влады́ко, к Светонача́льнику, Отцу́ Твоему́,/ от но́щи неве́дения/приведе́ние и́мамы. Припев: Преподо́бне о́тче Арсéние, моли́ Бо́га о на́с. Xода́тай ты к Бо́гу, преподо́бне, быв,/ Живоно́сный Крест на ра́мо свое́ взем,/ после́довал еси́ ему́ ти́хим и безмо́лвным житие́м,/ того́ ра́ди всели́ся душа́ твоя́ в се́ла Небе́сная. Припев: Преподо́бне о́тче Арсéние, моли́ Бо́га о на́с. Xода́тай ты, блаже́нне Арсе́ние, до конца́ быв,/ возлюби́л еси́ еди́наго Бо́га,/ разже́гся заре́ю мы́сленною,/ ревну́я житие́м свои́м в чудесе́х свои́х вели́кому Се́ргию преподо́бному. Сла́ва Отцу́ и Сы́ну и Свято́му Ду́ху. Хоте́вше тя окая́ннии бе́сове от сего́ свята́го ме́ста отлучи́ти,/ иногда́ же на тя люде́й вооружи́вша,/ ты же, блаже́нне, оты́де в да́льную пусты́ню,/ Бог же тебе́ возврати́ в пребыва́ние твое́. И ны́не и при́сно и во ве́ки веко́в. Ами́нь. Богородичен: Христиа́ном Засту́пницу, ве́рнии, ублажа́ем:/ укрепи́ нас, Влады́чице, недосто́йных раб Свои́х,/ и град наш соблюди́ и жи́тельство сие́/ моли́твами уго́дника Твоего́ Арсе́ния преподо́бнаго. Песнь 6 Ирмос: В бе́здне грехо́вней валя́яся,/ неизсле́дную милосе́рдия Твоего́ призыва́ю бе́здну:/ от тли, Бо́же, мя возведи́. Припев: Преподо́бне о́тче Арсéние, моли́ Бо́га о на́с. В пусты́ни, я́ко во огра́де, поживе́, блаже́нне,/ моли́твы непреста́нныя, я́ко меч в руце́, име́л еси́/ и всю бесо́вскую я́рость до конца́ сокруши́л еси́. Припев: Преподо́бне о́тче Арсéние, моли́ Бо́га о на́с. Влады́це своему́ подо́бяся,/ воздержа́ние и терпе́ние стяжа́, ве́ру и любо́вь и́стинну/ и всено́щное стоя́ние возлю́би,/ моли́твы, и сле́зы, и воздыха́ние в се́рдцы име́я, блаже́нне. Сла́ва Отцу́ и Сы́ну и Свято́му Ду́ху. В па́мять твою́ ра́достно веселя́тся и лику́ют и́ноческая собра́ния, вопию́ще тебе́:/ помина́й нас всегда́,/ почита́ющих тя, преблаже́нне Арсе́ние. И ны́не и при́сно и во ве́ки веко́в. Ами́нь. Богородичен: В бе́здне грехо́вней одержи́м есмь аз, окая́нный,/ и припа́даю к Тебе́, Влады́чице:/ приими́ моли́твы на́ша,/ и сохрани́ нас от вся́каго наве́та вра́жия, и спаси́ нас. Кондак, глас 8 Жите́йския молвы́ отбе́г,/ и в пусты́ню всели́лся еси́,/ и та́мо житие́м жесто́ким пожи́л еси́,/ и зве́ря свире́паго а́ркуда моли́твами укроти́л еси́,/ и мно́гим был еси́ наста́вник ко спасе́нию,/ и того́ ра́ди получи́л еси́ жи́знь ве́чную на Небесе́х./ Всегда́ зря Святу́ю Тро́ицу,/ моли́ изба́витися нам от бед, да зове́м ти:/ ра́дуйся, о́тче наш Арсе́ние, пусты́нный жи́телю. Икос Ева́нгельский глас услы́шав,/ мир оста́вль, возлю́би́л еси́ Христо́вы Боже́ственныя за́поведи/ и, сла́дкия пи́щи оша́явся , му́дре,/ поще́ние и воздержа́ние изве́стно показа́,/ пусты́нное житие́ возлюби́л еси́,/ мы же вопие́м ти:/ ра́дуйся, ра́зума дарова́ние прия́л еси́;/ ра́дуйся, Арсе́ние преподо́бне, Небе́сный челове́че и земны́й а́нгеле;/ ра́дуйся, притека́ющим к тебе́ хода́тай быв ко спасе́нию;/ ра́дуйся, стране́ на́шей похвало́ и утвержде́ние;/ ра́дуйся, я́ко твои́х ра́ди моли́тв бе́сове сопроти́внии побежда́ются;/ ра́дуйся, я́ко с ве́рою прося́щим да́руеши дар, от Го́спода дарова́нный ти, исцеле́ния;/ ра́дуйся, Арсе́ние преподо́бне, пусты́нный жи́телю. Песнь 7 Ирмос: Богопроти́вное веле́ние беззако́ннующаго мучи́теля/ высо́к пла́мень вознесло́ есть,/ Христо́с же простре́ Богочести́вым о́троком ро́су духо́вную,/ Сый благослове́н и препросла́влен. Припев: Преподо́бне о́тче Арсéние, моли́ Бо́га о на́с. Блаже́нне Арсе́ние,/ ты ми́лованием безме́рным укра́шаемь,/ и нищелю́бием мно́гим удобря́емь,/ и тих ду́хом был еси́, о́тче, поя́ Христо́ви:/ благосло́вен Бог оте́ц на́ших. Припев: Преподо́бне о́тче Арсéние, моли́ Бо́га о на́с. Блаже́нне Арсе́ние,/ ты, всем жела́нием ко Христу́ иды́й,/ доса́ды, и безче́стия, и я́звы, преподо́бне, терпе́л еси́,/ Христу́ Бо́гу песнь непреста́нную поя́:/ благослове́н Бог оте́ц на́ших. Сла́ва Отцу́ и Сы́ну и Свято́му Ду́ху. Блаже́нне Арсе́ние,/ безмо́лвно свою́ сконча́л еси́ отече́скую жи́знь,/ не стяжа́в, просвеща́лся и воздержа́нием украша́яся, поя́ Христо́ви:/ благослове́н Бог оте́ц на́ших. И ны́не и при́сно и во ве́ки веко́в. Ами́нь. Богородичен: Без се́мене, Всенепоро́чная, родила́ еси́ Христа́ Бо́га на́шего,/ освяще́ние, и избавле́ние, и оставле́ние грехо́в ве́рным хода́тайством Твои́м подаю́щаго,/ мольба́ми Пречи́стыя Своея́ Ма́тере, я́ко еди́н Многоми́лостив. Песнь 8 Ирмос: Пещь иногда́ о́гненная в Вавило́не де́йства разделя́ше,/ Бо́жиим веле́нием халде́и опаля́ющая,/ ве́рныя же ороша́ющая, пою́щия:/ благослови́те, вся дела́ Госпо́дня, Го́спода. Припев: Преподо́бне о́тче Арсéние, моли́ Бо́га о на́с. Преблаже́нне о́тче Арсе́ние,/ тече́нием твои́х усте́н медото́чных слове́с, я́коже Боже́ственным исцеле́нием,/ напая́еши хваля́щия тя, поя́ Бо́гови:/ благослови́те, вся дела́ Госпо́дня, Го́спода. Припев: Преподо́бне о́тче Арсéние, моли́ Бо́га о на́с. Преблаже́нне о́тче Арсе́ние,/ я́ко со́лнце многосве́тло от восто́ка, возсия́л еси́ заря́ми доброде́телей/ и чуде́с твои́х сия́ние бога́тно просте́рл еси́, поя́ Бо́гови:/ благослови́те, вся дела́ Госпо́дня, Го́спода. Сла́ва Отцу́ и Сы́ну и Свято́му Ду́ху. Преблаже́нне о́тче Арсе́ние,/ ты зве́ря свире́паго моли́твами укроти́л еси́,/ он же смире́н быва́ше, ничто́же ти ско́рбная показу́я,/ но и повеле́нию твоему́ повину́яся./ Те́мже вопие́м:/ благослови́те, вся дела́ Госпо́дня, Го́спода. И ны́не и при́сно и во ве́ки веко́в. Ами́нь. Богородичен: Просвеще́ние нам, рабо́м Свои́м, испроси́, Препе́тая Богоро́дице Де́во,/ мольбы́ всех прие́млющи,/ тем вси а́нгельски зове́м Ти, Богора́дованная, всех Влады́чице. Песнь 9 Ирмос: Безнача́льна Роди́теля Сын, Бог и Госпо́дь,/ вопло́щся от Де́вы, нам яви́ся,/ омраче́нная просвети́ти, собра́ти расточе́нная./ Тем Всепе́тую Богоро́дицу велича́ем. Припев: Преподо́бне о́тче Арсéние, моли́ Бо́га о на́с. Боже́ственными блиста́яся сия́нии, свети́льник был еси́,/ наставля́я с ве́рою к тебе́ приходя́щих, блаже́нне и Богому́дре Арсе́ние,/ плотски́я стра́сти Влады́чнею си́лою умертви́л еси́. Припев: Преподо́бне о́тче Арсéние, моли́ Бо́га о на́с. Богому́дре свяще́нниче, к све́ту незаходи́мому преше́л еси́,/ светови́ден быв доброде́тельми,/ всели́лся еси́, ра́дуяся, иде́же преподо́бных ду́си,/ и о ста́де свое́м моли́ся. Сла́ва Отцу́ и Сы́ну и Свято́му Ду́ху. Благода́тию Боже́ственнаго Ду́ха напая́ема,/ приноша́ет честна́я ра́ка твоя́ исцеле́ние./ Прииди́те и почерпи́те, вси ве́рнии лю́дие, и освяти́те ду́ши,/ и от неду́г очи́ститеся моли́твами преподо́бнаго. И ны́не и при́сно и во ве́ки веко́в. Ами́нь. Богородичен: Богоро́дице Де́во, упова́ние нам, гре́шным,/ Ты бо породи́ красне́йша па́че всех сыно́в челове́ческих и и́стиннаго Бо́га,/ се уже ви́дима на́шим существо́м, я́ко Челове́к, спаса́я челове́ки. Светилен А́нгельское житие́ поживе́,/ удали́л еси́ себе́ всех кра́сных жития́,/ водвори́ся во дво́рех за́поведей Госпо́дних/ и со А́нгелы всегда́ ра́дуешися. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Богоро́дицу пе́сньми почти́м немо́лчными,/ благоче́стно пое́м, вопию́ще:/ ра́дуйся, А́нгелом ра́досте и преподо́бным похвало́.

Глас 8 Пе́снь 1. Ирмос: Песнь возсле́м, лю́дие,/ чу́дному Бо́гу на́шему,/ свободи́вшему Изра́иля от рабо́ты,/ песнь побе́дную пою́ще и вопию́ще,/ пои́м Тебе́, Еди́ному Влады́це. Припев: Преподо́бне о́тче Авраа́мие, моли́ Бо́га о нас. Песнь тебе́ моле́бную предначина́я, Авраа́мие, молю́ тя, блаже́нне:/ ум мой от тьмы грехо́вныя и се́рдце от омраче́ния страсте́й моли́твами твои́ми очи́сти,/ я́ко да возмогу́ неосужде́нно восхвали́ти по́двиги твоя́. Припев: Преподо́бне о́тче Авраа́мие, моли́ Бо́га о нас. Пе́сненныя да́ры со смире́нием и любо́вию прино́сим ти, блаже́нне,/ я́же прие́м благосе́рдно,/ оставле́ние согреше́ний у Христа́ Бо́га испроси́ нам моли́твами твои́ми, Авраа́мие. Сла́ва Отцу́ и Сы́ну и Свято́му Ду́ху. Си́лою Влады́чнею укрепля́емь, кня́зя тьмы победи́л еси́/ и, стопа́м Христо́вым после́дуя неотсту́пно, вы́шшаго соверше́нства дости́гл еси́;/ но моли́ Бо́га о нас, преподо́бне, любо́вию чту́щих святу́ю па́мять твою́. И ны́не и при́сно и во ве́ки веко́в. Ами́нь. Богоро́дичен: Пе́сньми Пречи́стую Ма́терь Бо́жию, вси ве́рнии, восхва́лим:/ Та бо есть приста́нище на́ше, покро́в и спасе́ние. Пе́снь 3. Ирмос: Несть свят, я́ко Госпо́дь,/ и несть пра́веден, я́ко Бог наш,/ Его́же пое́т вся тварь:/ несть пра́веден, па́че Тебе́, Го́споди. Припев: Преподо́бне о́тче Авраа́мие, моли́ Бо́га о нас. От ю́ности Христа́ возлюби́в, за́поведи Его́ святы́я ве́рно храни́л еси́/ и, я́ко еле́нь, в дубра́ве пусты́нней обита́л еси́,/ усе́рдно рабо́тая Тому́ посто́м и моли́твою,/ и та́мо на горе́ ико́ну Ма́тере Его́ обре́л еси́ преди́вно. Припев: Преподо́бне о́тче Авраа́мие, моли́ Бо́га о нас. Я́же в ми́ре кра́сная преоби́дев, преми́рная и нетле́нная стяжа́л еси́, Авраа́мие,/ и ны́не обита́еши в преми́рных селе́ниих,/ иде́же глас чист пра́зднующих и превознося́щих Христа́ во ве́ки. Сла́ва Отцу́ и Сы́ну и Свято́му Ду́ху. Пресла́вное житие́ твое́, преподо́бне,/ обуче́ние ко благоче́стию нам показа́ся и достодо́лжно прославля́ется днесь,/ чудеса́ же твоя́ в конце́х земли́ пропове́даются, я́ве всем возвеща́юща,/ я́ко вели́кую благода́ть от Бо́га прия́л еси́. И ны́не и при́сно и во ве́ки веко́в. Ами́нь. Богоро́дичен: Де́ва родила́ еси́ Неискусобра́чная/ и Де́ва пребыла́ еси́, Ма́ти Безневе́стная,/ Богоро́дице Мари́е, Христа́ Бо́га на́шего моли́ спасти́ся нам. Седа́лен, глас 6: Воздержа́нием у́ды умертви́в пло́ти твоея́, безстра́стие духо́вное стяжа́л еси́/ и вся ловле́ния и ко́зни лука́ваго му́жественно отрази́л еси́;/ пусты́нный жи́тель и в телеси́ а́нгел быв, пусты́ню, я́ко град, и́ноки насели́л еси́/ и орга́н живы́й благода́ти Боже́ственныя яви́лся еси́, Авраа́мие Богому́дре;/ те́мже моли́ся Го́сподеви о восхваля́ющих тя и почита́ющих и́мя твое́. Сла́ва, и ны́не, Богоро́дичен: Милосе́рдия су́щи исто́чник,/ ми́лости сподо́би нас, Богоро́дице,/ при́зри на лю́ди согреши́вшия,/ яви́, я́ко при́сно, си́лу Твою́:/ на Тя бо упова́юще, ра́дуйся, вопие́м Ти,/ я́коже иногда́ Гаврии́л, Безпло́тных Архистрати́г. Пе́снь 4. Ирмос: Ты моя́ кре́пость, Го́споди,/ Ты моя́ и си́ла,/ Ты мой Бог, Ты мое́ ра́дование,/ не оста́вль не́дра О́тча/ и на́шу нищету́ посети́в./ Тем с проро́ком Авваку́мом зову́ Ти:/ си́ле Твое́й сла́ва, Человеколю́бче. Припев: Преподо́бне о́тче Авраа́мие, моли́ Бо́га о нас. Диви́шася твоему́ житию́ а́нгельстии чи́ни,/ я́ко во пло́ти, а́ки безпло́тен, в пусты́ни пребыва́л еси́, Авраа́мие,/ во а́лчбе и жа́жди, мра́зе же и зно́и живы́й, и вопия́ху:/ си́ле Твое́й сла́ва, Человеколю́бче. Припев: Преподо́бне о́тче Авраа́мие, моли́ Бо́га о нас. Бога́тство и сла́дость, похвала́ и ра́дость/ был еси́, Христе́, ве́рному рабу́ Твоему́ Авраа́мию:/ Тебе́ бо еди́наго возлюби́ и, вся, я́же в ми́ре сем, ни во что́же вмени́в,/ в пусты́нях непроходи́мых пребыва́ше, зовы́й Тебе́ непреста́нно:/ си́ле Твое́й сла́ва, Человеколю́бче. Сла́ва Отцу́ и Сы́ну и Свято́му Ду́ху. Сна очи́ма твои́ма не дал еси́, ни ве́ждома твои́ма дрема́ния,/ до́ндеже сподо́бился еси́ улучи́ти селе́ния пра́ведных, Авраа́мие,/ я́же угото́ва Бог лю́бящим Его́. И ны́не и при́сно и во ве́ки веко́в. Ами́нь. Богоро́дичен: Ты ве́рным похвала́ еси́, Безневе́стная,/ Ты и стена́ и приста́нище:/ к Сы́ну бо Твоему́ мольбы́ прино́сиши, Всенепоро́чная, и от бед спаса́еши/ и́же ве́рою и любо́вию Богоро́дицу Чи́стую Тебе́ сла́вящия. Пе́снь 5 Ирмос: Вску́ю мя отри́нул еси́/ от лица́ Твоего́, Све́те Незаходи́мый,/ и покры́ла мя есть чужда́я тьма, окая́ннаго,/ но обрати́ мя и к све́ту за́поведей Твои́х/ пути́ моя́ напра́ви, молю́ся. Припев: Преподо́бне о́тче Авраа́мие, моли́ Бо́га о нас. От Христа́ прие́м благода́ть духо́вную,/ низложи́л еси́ лю́таго мироде́ржца ко́зни/ и, душе́вныя стра́сти обузда́в, безстра́стия венце́м венча́лся еси́, Авраа́мие. Припев: Преподо́бне о́тче Авраа́мие, моли́ Бо́га о нас. Всено́щными бде́нии и моли́твами приле́жными/ и сле́зными излия́нии и серде́чными стена́нии/ Бо́гу то́щно порабо́тал еси́/ и, премно́го Тому́ угоди́в, чудотво́рец ди́вен показа́лся еси́. Сла́ва Отцу́ и Сы́ну и Свято́му Ду́ху. Наста́, преподо́бне, све́тлый твоего́ пра́здника день,/ веселя́й сердца́ на́ша воспомина́нием по́двигов твои́х;/ но мо́лим тя, о́тче наш:/ соверша́ющим ве́рно па́мять твою́ пода́ждь свы́ше, моли́твами твои́ми,/ спасе́ние и от бед и скорбе́й избавле́ние. И ны́не и при́сно и во ве́ки веко́в. Ами́нь. Богоро́дичен: Небе́сную Тя дверь показа́ Влады́ка Христо́с, Богороди́тельнице Чи́стая:/ из Тебе́ бо проше́д, на земли́ яви́ся,/ да челове́ки на Небеса́ возведе́т. Пе́снь 6. Ирмос: Очи́сти мя, Спа́се,/ мно́га бо беззако́ния моя́,/ и из глубнны́ зол возведи́, молю́ся,/ к Тебе́ бо возопи́х, и услы́ши мя,/ Бо́же спасе́ния моего́. Припев: Преподо́бне о́тче Авраа́мие, моли́ Бо́га о нас. Ум влады́ку над страстьми́ поста́вив, Богому́дре,/ Свята́го Ду́ха селе́ние соде́лался еси́,/ Его́же Боже́ственным де́йством и нам очи́ститися от вся́кия скве́рны пло́ти и ду́ха/ моли́ Человеколю́бца Христа́. Припев: Преподо́бне о́тче Авраа́мие, моли́ Бо́га о нас. Я́ко победи́вый кня́зя тьмы ве́ка сего́, вшел еси́ в ра́дость Го́спода твоего́,/ побе́ды вене́ц на главе́ твое́й нося́;/ но, я́ко име́яй дерзнове́ние ко Спа́су,/ Того́ моли́, Авраа́мие, от страсте́й и нужд изба́витися тя почита́ющим. Сла́ва Отцу́ и Сы́ну и Свято́му Ду́ху. Плотско́е мудрова́ние отложи́в, во Христа́ обле́клся еси́/ и, вся́кое стремле́ние грехо́вное в себе́ умертви́в,/ на Небесе́х ны́не живе́ши и со все́ми святы́ми лику́еши,/ воспева́я с ни́ми Бо́га спасе́ний на́ших. И ны́не и при́сно и во ве́ки веко́в. Ами́нь. Богоро́дичен: Пресвята́я Влады́чице, ро́ждшая Искупи́теля па́дшим челове́ком,/ страсте́й мои́х утоли́ лю́тое смуще́ние/ и тишину́ пода́ждь мяту́щемуся се́рдцу моему́. Конда́к, гла́с 8: Во оби́тели Се́ргия преподо́бнаго житию́ и́ноческому до́бре навы́к,/ вя́щшаго ра́ди безмо́лвия и по́двига/ в пусты́ню удали́тися возжеле́л еси́,/ и, Ду́хом Бо́жиим води́мь,/ в преде́лы земли́ Га́личския прише́л еси́,/ и та́мо в пусты́ни ико́ну Ма́тере Госпо́дни чуде́сно обре́л еси́,/ с Не́юже вели́кая и сла́вная соверши́в,/ да́же до преде́л Чу́хломских дости́гл еси́/ и отсю́ду в ра́йския оби́тели всели́лся еси́,/ Авраа́мие Богоно́сне, о́тче наш. Пе́снь 7. Ирмос: О́троцы евре́йстии в пещи́/ попра́ша пла́мень дерзнове́нно/ и на ро́су огнь преложи́ша, вопию́ще:/ благослове́н еси́, Го́споди Бо́же, во ве́ки. Припев: Преподо́бне о́тче Авраа́мие, моли́ Бо́га о нас. Зако́н Бо́га твоего́ па́че ме́да и со́та сла́док бысть тебе́,/ и словесы́ его́ богодухнове́нными напита́л еси́ ду́шу твою́ во спасе́ние,/ те́мже и твоя́ словеса́ бы́ша на по́льзу душе́вную всем послу́шающим,/ и́хже при́сно поуча́л еси́ пе́ти:/ благослове́н Бог оте́ц на́ших. Припев: Преподо́бне о́тче Авраа́мие, моли́ Бо́га о нас. Блаже́нство чи́стых се́рдцем насле́довал еси́/ и, я́ко зряй Бога, зри́ши в нем вся на́ша беды́, ско́рби же и ну́жды;/ но моли́ Просла́вльшаго тя от сих всех изба́вити ны, да пое́м Ему́ ра́достно:/ благослове́н Бог оте́ц на́ших. Сла́ва Отцу́ и Сы́ну и Свято́му Ду́ху. Посто́м и страсте́й воздержа́нием себе́ украси́в,/ светле́йший па́че пита́ющихся сла́дкими бра́шны яви́лся еси́,/ те́мже и нас к воздержа́нию подви́гни, Авраа́мие,/ да неосужде́нно возмо́жем пе́ти с тобо́ю:/ благослове́н Бог оте́ц на́ших. И ны́не и при́сно и во ве́ки веко́в. Ами́нь. Богоро́дичен: Тя, Ма́ти и Де́во, спасе́ния на́шего Хода́таицу позна́хом, земноро́днии:/ в не́дрех бо Отца́ неразлу́чно живы́й из Тебе́ воплоти́ся, Ему́же зове́м:/ благослове́н Бог оте́ц на́ших. Пе́снь 8. Ирмос: Седмери́цею пещь/ халде́йский мучи́тель/ Богочести́вым неи́стовно разжже́,/ си́лою же лу́чшею спасе́ны, сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки. Припев: Преподо́бне о́тче Авраа́мие, моли́ Бо́га о нас. Гроб, иде́же положе́но бысть честно́е те́ло твое́, исто́чник исцеле́ний яви́ся лю́дем:/ всяк бо, приходя́й к нему́ с ве́рою и любо́вию, прие́млет здра́вие души́ и те́лу./ Тем у́бо сла́вяще тя, чудотво́рца сла́внаго,/ Христа́ превозно́сим во вся ве́ки. Припев: Преподо́бне о́тче Авраа́мие, моли́ Бо́га о нас. Страх Бо́жий стяжа́в, и́же есть нача́ло му́дрости духо́вныя,/ покори́л еси́ ху́ждшее лу́чшему,/ и любве́ ра́ди Влады́чни греху́ мертв был еси́, и пел еси́ непреста́нно:/ превозноси́те Христа́ во вся ве́ки. Сла́ва Отцу́ и Сы́ну и Свято́му Ду́ху. Зве́рие ди́вии в пусты́нях кро́тцы бы́ша пред тобо́ю, Авраа́мие,/ и ничи́мже врежда́ху ти, Бо́жией благода́ти в тебе́ де́йствующей, е́йже и безслове́снии повину́ются./ Те́мже немо́лчно взыва́л еси́:/ превозноси́те Христа́ во вся ве́ки. И ны́не и при́сно и во ве́ки веко́в. Ами́нь. Богоро́дичен: Ты Ада́ма па́дшаго была́ еси́ Дщи/ и Изба́вителя Бо́га на́шего яви́лася еси́ Ма́ти,/ И́же обнови́ Тобо́ю истле́вшее челове́ческое естество́,/ тем Тя пое́м, Де́во, и превозно́сим во вся ве́ки. Песнь 9 Ирмос: Ужасе́ся о сем Не́бо,/ и земли́ удиви́шася концы́,/ я́ко Богяви́ся челове́ком пло́тски/ и чре́во Твое́ бысть простра́ннейшее небе́с./ Тем Тя, Богоро́днцу,/ А́нгелов и челове́к чинонача́лия велича́ют. Припев: Преподо́бне о́тче Авраа́мие, моли́ Бо́га о нас. Струя́ми слез твои́х одея́ние души́ твоея́ па́че сне́га убели́в,/ Све́та Трисия́ннаго ны́не наслажда́ешися, предстоя́ со А́нгелы Престо́лу Вседержи́теля,/ отону́дуже и на́ша мра́чныя ду́ши луча́ми благода́ти Боже́ственныя озари́, Авраа́мие. Припев: Преподо́бне о́тче Авраа́мие, моли́ Бо́га о нас. Ве́ры, наде́жды же и любве́ христиа́нския преиспо́лнен сый,/ Бо́гу благоугоди́л еси́ и Пречи́стую Ма́терь Христо́ву в житии́ твое́м просла́вил еси́,/ Ея́же и ико́ну чудотво́рную в пусты́ни ди́вно обре́л еси́, Авраа́мие. Сла́ва Отцу́ и Сы́ну и Свято́му Ду́ху. Целому́дренно, и пра́ведно, и благоче́стно на земли́ с челове́ки пожи́в,/ ны́не на Небесе́х со А́нгелы водворя́ешися и, я́ко звезда́ богосве́тлая, сия́еши,/ но назира́й свы́ше певцы́ твоя́, любо́вию пою́щия тя, блаже́нне Авраа́мие. И ны́не и при́сно и во ве́ки веко́в. Ами́нь. Богоро́дичен: Богоро́дице Де́во,/ не пре́зри мене́, гре́шнаго, тре́бующа Твоея́ по́мощи и Твоего́ заступле́ния,/ на Тя бо упова́ душа́ моя́, и поми́луй мя. Свети́лен Све́том Трисо́лнечнаго Божества́ просвеща́емь,/ Того́ сия́нием и нас просвети́, благоприя́тными твои́ми хода́тайствы к Безнача́льному Све́ту и Бо́гу све́тов,/ от мра́ка грехо́внаго изыма́я нас, Авраа́мие блаже́нне, мона́хов свети́льниче. Сла́ва: И ны́не, Богоро́дичен: Свет и ра́дость ми́рови неизрече́нно ро́ждшая,/ ду́ши на́ша омраче́нныя просвети́ и ко све́ту и́стиннаго богове́дения и благоче́стия напра́ви,/ да Тя пое́м непреста́нно, я́ко су́щую Ма́терь Све́та. Молитва преподобному Авраамию Галичскому, Чухломскому О, пречестна́я и свяще́нная главо́, о́тче преблаже́нне а́вво Авраа́мие! Не забу́ди ни́щих свои́х до конца́, но помина́й нас во святы́х свои́х и благоприя́тных моли́твах к Бо́гу. Помяни́ ста́до свое́, е́же сам упа́сл еси́, и не забу́ди посеща́ти нас, чад свои́х. Моли́ за ны, о́тче свяще́нный, за де́ти своя́ духо́вныя, я́ко име́я дерзнове́ние к Небе́сному Царю́: не премолчи́ за ны, вопия́ ко Го́споду, и не пре́зри нас, ве́рою и любо́вию чту́щих тя, но помина́й недосто́йных у престо́ла Вседержи́телева, и не преста́й моля́ся о нас ко Христу́ Бо́гу, я́ко дана́ тебе́ бысть благода́ть моли́тися за ны. Не мним бо тя ме́ртва су́ща: а́ще бо и те́лом преста́вился еси́ от нас, но и по сме́рти у́бо жив сый, пребыва́еши неотсту́пно от нас ду́хом, сохраня́я нас от стрел вра́жиих и вся́кия пре́лести бесо́вския и ко́зней диа́вольских, па́стырю наш до́брый. А́ще бо и моще́й твои́х ра́ка пред очи́ма на́шима ви́дима есть, но свята́я твоя́ душа́ со а́нгельскими во́инствы, со безпло́тными ли́ки и с Небе́сными си́лами у Престо́ла Вседержи́телева предстоя́щи, досто́йно весели́тся. Нам бо тя ве́дущим вои́стинну и по сме́рти я́ко жи́ву ти су́щу, тебе́ припа́даем и тебе́ мо́лимся, е́же моли́тися о нас всеси́льному Бо́гу о по́льзе душ на́ших и испроси́ти вре́мя на покая́ние и невозбра́нно преити́ от земли́ на Не́бо, мыта́рств же го́рьких, бесо́в, возду́шных князе́й и ве́чныя му́ки изба́витися и Небе́сному Ца́рствию насле́дником бы́ти со все́ми пра́ведными, от ве́ка угоди́вшими Го́споду на́шему Иису́су Христу́, Ему́же подоба́ет вся́кая сла́ва, честь и поклоне́ние со безнача́льным Его́ Отце́м и с пресвяты́м и животворя́щим Его́ Ду́хом, ны́не и при́сно и во ве́ки веко́в. Ами́нь.

Минея, 3 Мая, Кано́н Богоро́дице ра́ди ико́ны Ея́, имену́емыя Пече́рская-Нерукотворе́нная Глас 4 Песнь 1 Ирмос: Отве́рзу уста́ моя́, и напо́лнятся Ду́ха, и сло́во отры́гну Цари́це Ма́тери, и явлю́ся, све́тло торжеству́я, и воспою́, ра́дуяся, Тоя́ чудеса́. Припев: Пресвята́я Богоро́дице, спаси́ на́с. Сло́во ми́ да́ждь, Пречи́стая, да ве́рою и любо́вию воспою́ е́же к на́м Твое́ безме́рное снизхожде́ние. Припев: Пресвята́я Богоро́дице, спаси́ на́с. Покро́в Тво́й, Богороди́тельнице, ви́дяще над на́ми в явле́нии чу́днаго о́браза Твоего́, благода́рственная от души́ воспева́ем. Припев: Пресвята́я Богоро́дице, спаси́ на́с. А́нгельстии ли́цы удиви́шася, зря́ще Твое́ промышле́ние, е́же о на́с, и с тре́петом окружи́ша Тво́й пречи́стый ли́к. Сла́ва Отцу́ и Сы́ну и Свято́му Ду́ху. Си́лою Бо́жиею украша́ющии Тво́й хра́м, Богоро́дице, иконопи́сцы вку́пе с Али́пием преподо́бным со мно́гою хвало́ю воспе́ша Тя́, чу́дно и́м я́вльшуюся. И ны́не и при́сно и во ве́ки веко́в. Ами́нь. Из у́ст Твои́х, Пречи́стая, явля́я благода́тное освяще́ние це́ркви Пече́рской, излете́ го́лубь, я́ко о́браз Ду́ха Свята́го, все́льшагося зде́. Песнь 3 Ирмос: Твоя́ песносло́вцы, Богоро́дице, Живы́й и Незави́стный Исто́чниче, ли́к Себе́ совоку́пльшия, духо́вно утверди́, в Боже́ственней Твое́й сла́ве, венце́в сла́вы сподо́би. Припев: Пресвята́я Богоро́дице, спаси́ на́с. Просвети́ся ве́сь о́браз Тво́й, Богоро́дице, и, све́том Небе́сным осиява́еми, иконопи́сцы падо́ша ни́ц, ужаса́ющеся. Припев: Пресвята́я Богоро́дице, спаси́ на́с. Ра́достию одержи́м бе́ явле́нием Ду́ха Свята́го в виде́нии голуби́не преподо́бный Али́пий, с ве́рою и любо́вию зря́ща Тя́, Богома́ти. Припев: Пресвята́я Богоро́дице, спаси́ на́с. Егда́ узре́ша го́лубя, восходя́ща из у́ст Богома́тере ко о́бразу Спа́сову, ви́девшии его́ хотя́ху поима́ти, но не можа́ху. Сла́ва Отцу́ и Сы́ну и Свято́му Ду́ху. Чи́ст и бе́л, а́ки сне́г, го́лубь, бя́ше во о́браз Всесвята́го и Пречи́стаго Ду́ха Бо́жия, лета́ше по це́ркви, на ли́ки святы́х возседа́я. И ны́не и при́сно и во ве́ки веко́в. Ами́нь. Излета́ше многокра́тно се́й го́лубь из у́ст Богома́тере к лико́м Спа́сову и святы́х, облета́я всю́ це́рковь, показу́я многосугу́бую благода́ть Ду́ха Свята́го, в хра́ме Пече́рском пребыва́ющую. Седален, глас 4 Егда́ яви́ся о́браз Тво́й, Пречи́стая, в це́ркви Пече́рстей, тогда́ воспе́ша Ти́ вси́, ви́девшии чу́до сие́, с ни́ми же и мы́, ве́дуще в явле́нии се́м сугу́бую благода́ть в оби́тели на́шей, ра́достно взыва́ем Ти́ и любо́вию чти́м ли́к Пречи́стый Тво́й, Богообра́дованная, при́сно на́с снабдева́ющая любо́вию Свое́ю. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Све́тлое дне́сь Госпожи́ на́шея Пресвяты́я наста́ торжество́, весели́ся, пречу́дный Али́пие со и́ноки Пече́рстими, и да ликовству́ют вси́ боголюби́вии собо́ри: созыва́ет бо на́с Пресвята́я Богоро́дица просла́вити чу́дную Свою́ ико́ну, луча́ми ми́лости не то́кмо оби́тель Пече́рскую, но и зе́млю Бря́нскую просвеща́ющую, те́мже, ра́дующеся, вси́ вопие́м: спаси́ ны́, Де́во Чи́стая. Песнь 4 Ирмос: Седя́й в сла́ве на Престо́ле Божества́ во о́блаце ле́гце, прии́де Иису́с Пребоже́ственный, Нетле́нною Дла́нию и спасе́ зову́щия: сла́ва, Христе́, си́ле Твое́й. Припев: Пресвята́я Богоро́дице, спаси́ на́с. Сия́ние о́браза Твоего́, Богома́ти, просвети́ всю́ це́рковь и ослепи́ у́жасом испо́лненный иконописа́телей ли́к. Сла́ва Отцу́ и Сы́ну и Свято́му Ду́ху. То́нко и непостижи́мо бы́сть сие́ сия́ние, я́ко снизше́ствие Ду́ха Преве́чнаго, небеса́м отве́рстым в небеси́ подо́бную це́рковь. И ны́не и при́сно и во ве́ки веко́в. Ами́нь. Али́пий бо преподо́бный та́ко и разуме́ сие́ явле́ние, а́ки о́браз благода́ти Ду́ха Свята́го в це́ркви Пече́рстей. Песнь 5 Ирмос: Ужасо́шася вся́ческая о Боже́ственней сла́ве Твое́й: Ты́ бо, неискусобра́чная Де́во, име́ла еси́ во утро́бе над все́ми Бо́га, и родила́ еси́ Безле́тнаго Сы́на, все́м, воспева́ющим Тя́, ми́р подава́ющая. Припев: Пресвята́я Богоро́дице, спаси́ на́с. Я́ве узре́ша в се́м чу́де непостижи́мую ми́лость Богома́тере, вси́, су́щии в це́ркви, просла́виша Го́спода, такову́ю благода́ть на́м дарова́вшаго. Припев: Пресвята́я Богоро́дице, спаси́ на́с. Удивля́ет на́ш у́м и разжига́ет се́рдце воспе́ти сие́ пресла́вное чу́до — явле́ние ли́ка Богома́тере в це́ркви Пече́рстей. Сла́ва Отцу́ и Сы́ну и Свято́му Ду́ху. Безу́мный то́кмо не разуме́ет в се́м безме́рную ми́лость Присноде́вы и благода́ть Бо́жию к уде́лу Пече́рскому Пречи́стыя. И ны́не и при́сно и во ве́ки веко́в. Ами́нь. Отсю́ду разуме́вше незри́мый покро́в Влады́чицы над си́м благода́тным уде́лом, устна́ми и се́рдцем принесе́м хвалу́ Пречи́стей. Песнь 6 Ирмос: Боже́ственное сие́ и всечестно́е соверша́юще пра́зднество, богому́дрии, Богома́тере, прииди́те, рука́ми воспле́щим, от Нея́ ро́ждшагося Бо́га сла́вим. Припев: Пресвята́я Богоро́дице, спаси́ на́с. Горе́ вознесе́м сердца́, ве́рою и любо́вию притеце́м под всемо́щный покро́в Богоро́дицы, дела́ подража́ния Е́й принося́ще. Припев: Пресвята́я Богоро́дице, спаси́ на́с. А́нгельски воспева́я Обра́дованную, потщи́мся яви́ти хвалу́ Е́й ве́рою, кро́тостию и милосе́рдием. Сла́ва Отцу́ и Сы́ну и Свято́му Ду́ху. Госпо́дни ве́дуще за́поведи, просла́вим Пречи́стую Ма́терь Спа́сову, исполня́юще зако́н Христо́в. И ны́не и при́сно и во ве́ки веко́в. Ами́нь. Омыва́я грехи́ и беззако́ния жи́зни своя́ слеза́ми покая́ния, потщи́мся чи́стою душе́ю облобыза́ти Пече́рский о́браз Богома́тере. Кондак, глас 3 Де́ва дне́сь неви́димо предстои́т в це́ркви и с ли́ки Пече́рских отце́в мо́лится о на́с, благогове́йно велича́ющих Ея́ безме́рную ми́лость к ро́ду на́шему, я́вльшуюся в чу́дном о́бразе Ея́, оби́тель Пече́рскую украша́ющем. Икос Огради́ моя́ помышле́ния, Пречи́стая, и Небе́сным Твои́м благослове́нием подви́гни мя́ досто́йно воспе́ти сла́ву Твою́ на ме́сте святе́м се́м, да, наде́яся на ми́лость Твою́, дерзну́ убо́гим язы́ком воззва́ти к Тебе́: ра́дуйся, Пече́рская сла́во, от ле́т дре́вних на́с освяща́ющая; ра́дуйся, Небе́сная Игу́мения оби́тели на́шей, при́сно зде́ пребыва́ющая любо́вию и милосе́рдием; ра́дуйся, упова́ние и кре́пость рабо́в Твои́х, на ме́сте се́м служа́щих Ти́; ра́дуйся, незри́мо на́с благода́тию осеня́ющая в о́бразе Твое́м, оби́тель Пече́рскую украша́ющем. Песнь 7 Ирмос: Не послужи́ша тва́ри богому́дрии, па́че Созда́вшаго, но, о́гненное преще́ние му́жески попра́вше, ра́довахуся, пою́ще: препе́тый отце́в Госпо́дь и Бо́г, благослове́н еси́. Припев: Пресвята́я Богоро́дице, спаси́ на́с. Мно́жество соде́янных лю́тых помышля́я, окая́нный, трепе́щу и с ве́рою взыва́ю Ти́, Богороди́тельнице, я́ко Ма́ти милосе́рдия, проще́ния ища́. Припев: Пресвята́я Богоро́дице, спаси́ на́с. Освети́тся и на́ша душа́ све́том благода́ти Христо́вой, егда́ в покая́нии и моли́тве притеце́м к неусыпа́ющей о на́с в заступле́нии Богоро́дице. Припев: Пресвята́я Богоро́дице, спаси́ на́с. Наде́яся на ми́лость Обра́дованной, с ве́рою воззове́м Сы́ну Ея́: поми́луй на́с, Бо́же, по моли́тве Ма́тери Свое́й. Сла́ва Отцу́ и Сы́ну и Свято́му Ду́ху. А́ще и не́мощни ду́хом и те́лом, но да посети́т на́с благода́ть Бо́жия, в не́мощех соверша́ющаяся. И ны́не и при́сно и во ве́ки веко́в. Ами́нь. Хотя́ще восприя́ти Ду́ха Всесвята́го, принесе́м в се́й хра́м Богома́тери чи́стую ду́шу и ве́ру в любви́. Песнь 8 Ирмос: О́троки благочести́выя в пещи́ Рождество́ Богоро́дичо спасло́ е́сть, тогда́ у́бо образу́емое, ны́не же де́йствуемое, вселе́нную всю́ воздвиза́ет пе́ти Тебе́: Го́спода по́йте, дела́, и превозноси́те Его́ во вся́ ве́ки. Припев: Пресвята́я Богоро́дице, спаси́ на́с. Анто́ния и Феодо́сия преподо́бных с со́нмом Пече́рских отце́в дви́жа на моли́тву о на́с, просла́вим Пречи́стую усе́рдием к оби́тели Ея́. Припев: Пресвята́я Богоро́дице, спаси́ на́с. Анто́ний преподо́бный вку́пе с Феодо́сием единонра́вным предстоя́т у ли́ка Богома́тере и мо́лятся Е́й о покрове́нии ме́ста сего́ и ве́рою чту́щих его́. Сла́ва Отцу́ и Сы́ну и Свято́му Ду́ху. Ны́не, взира́я на милосе́рдный ли́к Присноде́вы, испро́сим у Нея́ и Предве́чнаго Сы́на Ея́, в объя́тиих держи́маго Е́ю, ми́лость к на́м, гре́шным. И ны́не и при́сно и во ве́ки веко́в. Ами́нь. Твои́м матери́нским покро́вом, Пречи́стая, да защища́еши и ны́не се́й уде́л Тво́й и ве́рою служа́щих Ти́ в не́м. Песнь 9 Ирмос: Вся́к земноро́дный да взыгра́ется, Ду́хом просвеща́емь, да торжеству́ет же Безпло́тных умо́в естество́, почита́ющее свяще́нное торжество́ Богома́тере, и да вопие́т: ра́дуйся, Всеблаже́нная Богоро́дице, Чи́стая Присноде́во. Припев: Пресвята́я Богоро́дице, спаси́ на́с. Одержи́ми ра́достию в се́й све́тлый де́нь пра́здника Богома́тере, все́ упова́ние на Ню́ возложи́м в ско́рбех и печа́лех жи́зни на́шея. Припев: Пресвята́я Богоро́дице, спаси́ на́с. Не усыпа́ет о на́с в моли́твах Пречи́стая Ма́терь Спа́сова и явля́ет чу́дное Свое́ милосе́рдие ко все́м, ве́рою чту́щим Ея́ о́браз святы́й. Сла́ва Отцу́ и Сы́ну и Свято́му Ду́ху. Иису́са Христа́ светле́йшее и́мя призыва́юще, ве́рою просла́вим безсме́ртную Ма́терь Его́, спаса́ющеся в жи́зни се́й. И ны́не и при́сно и во ве́ки веко́в. Ами́нь. Я́ко Ма́ти все́х на́с милосе́рдно приими́, Преблагослове́нная, сие́ убо́гое сло́во Твоего́ после́дняго раба́, и сохрани́ его́ и все́х на́с в уде́ле Твое́м во ве́ки веко́в. Светилен Све́том озари́вшая це́рковь Пече́рскую от пречу́днаго ли́ка Твоего́, Богоро́дице, возсия́й ми́ све́т спасе́ния огне́м покая́ния, да ве́рою и любо́вию сла́влю Тя́, Приснопрославля́емую.

Минея, 31 Июля, Кано́н Креста́ Глас 1 Песнь 1 Ирмос: Песнь побе́дную пои́м вси Бо́гу,/ сотво́ршему ди́вная чудеса́ мы́шцею высо́кою/ и спа́сшему Изра́иля,/ я́ко просла́вися. Припев: Сла́ва, Го́споди, Кресту́ Твоему́ честно́му. Крест предгряды́й Боже́ственный испуща́ет зарю́ благода́ти/ и просвеща́ет вся, покланя́ющияся ему́/ и воспева́ющия благоче́стно распе́ншагося Христа́. Припев: Сла́ва, Го́споди, Кресту́ Твоему́ честно́му. Креста́ поклоня́ние возвыша́ет любо́вию и ве́рою сла́вящия/ я́ко Бо́га и Го́спода, пострада́вшаго пло́тию/ и назда́вшаго нас Боже́ственными страда́нии. Сла́ва Отцу́ и Сы́ну и Свято́му Ду́ху. Креста́ поклоня́ние источа́ет благово́ние дарова́ний,/ и вся, я́же Христа́ сла́вящия, объюха́ет при́сно,/ и смрад душ отъе́млет весь. И ны́не и при́сно и во ве́ки веко́в. Ами́нь. Богородичен: Позна́вше Го́спода, вопло́щшагося из Тебе́, Богоневе́сто,/ и Крест и смерть прие́мша,/ пое́м Его́, Изба́вителя, Тя ублажа́юще. Песнь 3 Ирмос: Да утверди́тся се́рдце мое́ в во́ли Твое́й, Христе́ Бо́же,/ И́же над вода́ми не́бо утвержде́й второ́е/ и основа́вый на вода́х зе́млю, Всеси́льне. Припев: Сла́ва, Го́споди, Кресту́ Твоему́ честно́му. И́же во о́бразех проначерта́емый, соверша́я пресла́вная чудеса́,/ ны́не покланя́емый Крест де́йствует чу́днейшая,/ освяща́я и просвеща́я Зижди́теля сла́вящия. Припев: Сла́ва, Го́споди, Кресту́ Твоему́ честно́му. И́же во бране́х Боже́ственная побе́да, Крест Христо́в покланя́емь,/ ополче́ния враго́в побежда́яй,/ подава́ет лю́дем правосла́вным кре́пкия побе́ды. Припев: Сла́ва, Го́споди, Кресту́ Твоему́ честно́му. Жезл Госпо́день предположе́нный,/ Крест во хра́мех и жили́щах основа́ния незы́блема сих соблюда́ет/ и всяк прило́г и кова́рство сопроти́вных побежда́ет. Сла́ва Отцу́ и Сы́ну и Свято́му Ду́ху. И́же Госпо́день покланя́емый Крест благоче́стно/ Боже́ственныя благода́ти и каже́ния мы́сленна исполня́ет покланя́ющияся ему́/ и о́блаки напа́стей отъе́млет и скорбе́й. И ны́не и при́сно и во ве́ки веко́в. Ами́нь. Богородичен: От глубины́ ле́стныя извлече́ челове́чество/ из Тебе́ Рожде́йся Дре́вом Кре́стным, Богоро́дице,/ и возвы́си к разуме́нию Своему́ благоче́стно Тя сла́вящия. Седален, глас 4 Све́тло не́бо показу́ется па́че со́лнца све́том Кре́стным,/ просвеща́ет вся́ческая заре́ю свое́ю./ Те́мже Ты, Человеколю́бче, Спа́се вся́ческих,/ просвети́ ум наш его́ ра́ди и чу́вства:/ мы бо и́мамы того́ ору́жие ми́ру, непобеди́мую побе́ду. Песнь 4 Ирмос: Ду́хом прови́дя, проро́че Авваку́ме, Словесе́ воплоще́ние,/ пропове́дал еси́, вопия́:/ внегда́ прибли́житися ле́том– позна́ешися,/ внегда́ приити́ вре́мени – пока́жешися./ Сла́ва си́ле Твое́й, Го́споди. Припев: Сла́ва, Го́споди, Кресту́ Твоему́ честно́му. Вообража́емь, Боже́ственный и Честны́й Крест тьмы нача́льника отгоня́ет тве́рдо от возду́ха,/ и благода́ти лучи́ вообража́ющим простира́ет,/ и озаря́ет сих, пою́щия Христа́ Бо́га. Припев: Сла́ва, Го́споди, Кресту́ Твоему́ честно́му. Вообража́емь, Боже́ственный и пречестны́й Крест в сердца́х/ мо́ре утиша́ет страсте́й, и уставля́ет бед треволне́ния,/ и в тишину́ прево́дит пра́вости вся, любо́вию вообража́ющия того́. Припев: Сла́ва, Го́споди, Кресту́ Твоему́ честно́му. Я́коже у́глие, испуща́я, Честны́й Крест де́йствия вся попаля́ет вра́жия,/ и отго́нит си́лу, и облегча́ет мно́гия в ве́ре,/ хва́лящия и пою́щия любо́вию на нем пригво́ждшагося Христа́. Сла́ва Отцу́ и Сы́ну и Свято́му Ду́ху. Всечестны́й и Боже́ственный Крест, ве́рою покланя́емь,/ источа́ет струи́ мы́сленныя дарова́ний и во́ды исцеле́ний/ и напая́ет непреста́нно сему́ покланя́ющияся и чту́щия. И ны́не и при́сно и во ве́ки веко́в. Ами́нь. Богородичен: Я́ко всех Цари́цу и Влады́чицу на́шу Тя любо́вию сла́вим, Пресвята́я Чи́стая,/ просве́щшиися страстьми́ Сы́на Твоего́ и позна́вшии Сего́ всем Благоде́теля:/ сла́ва благода́ти Его́. Песнь 5 Ирмос: Све́тлый нам возсия́й Свет Присносу́щный,/ у́тренюющим о судьба́х за́поведей Твои́х,/ Влады́ко Человеколю́бче, Христе́, Бо́же наш. Припев: Сла́ва, Го́споди, Кресту́ Твоему́ честно́му. Держа́вному на́шему и недви́жимому ору́жию предлежа́щу,/ ны́не покланя́ющеся пресвято́му Кресту́ ве́рою,/ си́лу непобеди́му на враги́ прие́млем. Припев: Сла́ва, Го́споди, Кресту́ Твоему́ честно́му. Вообража́емаго и несеко́маго ка́мене сотво́рша во́ду источи́ти/ ны́не держа́ще и покланя́ющеся Честно́му Кресту́,/ исто́чник дарова́ний прие́млем. Сла́ва Отцу́ и Сы́ну и Свято́му Ду́ху. Златосия́нен нам Крест Христо́в явля́яся,/ дарова́ния душа́м подава́ет благода́тию,/ покланя́ющимся ему́ и Го́спода и Бо́га пою́щим при́сно. И ны́не и при́сно и во ве́ки веко́в. Ами́нь. Богородичен: Жезл си́лы, Богоневе́сто, ве́рою держа́ще,/ Сы́на Твоего́ и Бо́га на́шего Крест,/ пое́м Тя, Цари́цу всех, ублажа́юще. Песнь 6 Ирмос: Проро́ка Ио́ну подража́я, вопию́:/ живо́т мой, Бла́же, свободи́ из тли/ и спаси́ мя, Спа́се ми́ра, зову́ща: сла́ва Тебе́. Припев: Сла́ва, Го́споди, Кресту́ Твоему́ честно́му. Пречестны́й Крест, покланя́емый ны́не,/ воскресе́ния ра́дость провозвеща́ет Христо́ва,/ и смерть злонача́льника благовеству́ется. Припев: Сла́ва, Го́споди, Кресту́ Твоему́ честно́му. Водрузи́л еси́ на земли́ Честны́й Крест,/ ле́ствица быва́ет ве́рным мы́сленна к Небеси́/ и возше́ствие покланя́ющимся ему́ и чту́щим. Припев: Сла́ва, Го́споди, Кресту́ Твоему́ честно́му. И́же посреде́ земли́ насади́выйся, Честны́й Крест/ и ны́не ве́тви простира́ет дарова́ний в себе́/ и вся осеня́ет, покланя́ющияся ему́. Сла́ва Отцу́ и Сы́ну и Свято́му Ду́ху. Пресеки́й Чермно́е, пропису́емь, Крест, покланя́емь ны́не,/ бед и страсте́й мо́ре пресека́ет,/ и спаса́ет покланя́ющияся ему́. И ны́не и при́сно и во ве́ки веко́в. Ами́нь. Богородичен: От земли́ привлече́ нас Сын Твой и Бог к Небе́сней жи́зни, возше́д на Крест,/ любо́вию Тя, Ма́терь Сего́, вои́стинну чту́щих. Песнь 7 Ирмос: Су́щим в пещи́ отроко́м Твои́м, Спа́се,/ не прикосну́ся, ниже́ стужи́, огнь./ Тогда́ трие́, я́коо еди́неми усты́, поя́ху/ и благословля́ху, глаго́люще:/ благослове́н Бог оте́ц на́ших. Припев: Сла́ва, Го́споди, Кресту́ Твоему́ честно́му. И́же честно́ю кро́вию Христо́вою Крест Его́ напои́вся,/ источа́ет ре́ки сия́нии мы́сленных дарова́ний/ и напая́ет вся, покланя́ющияся и воспева́ющия его́ ве́рно. Припев: Сла́ва, Го́споди, Кресту́ Твоему́ честно́му. И́же смерть и враги́ низло́ж Крест Христо́в и вереи́ сокруши́ мы́сленныя,/ и ны́не тому́ чи́стою ве́рою и любо́вию покланя́ющимся/ всем две́ри отверза́ет жи́зни и нетле́нныя пи́щи. Сла́ва Отцу́ и Сы́ну и Свято́му Ду́ху. И́же покланя́ющеся любо́вию Кресту́, огражда́ются си́лою сего́,/ и враги́ мы́сленныя и ви́димыя отго́нят,/ и невреди́мы соблюда́ются песносло́вящии Христа́. И ны́не и при́сно и во ве́ки веко́в. Ами́нь. Богородичен: Кре́пость нам и держа́ва на враги́ даровася –/ Крест Христа́, Сы́на Твоего́, прия́тным и ма́терним Твои́м дерзнове́нием,/ и́мже, Богоневе́сто, прило́ги вра́жия побежда́ем. Песнь 8 Ирмос: Его́же ужаса́ются А́нгели и вся во́инства,/ я́ко Творца́ и Го́спода,/ по́йте, свяще́нницы, просла́вите, о́троцы,/ благослови́те, лю́дие,/ и превозноси́те во вся ве́ки. Припев: Сла́ва, Го́споди, Кресту́ Твоему́ честно́му. Его́же водрузи́ смерть, поста́вленный Крест, ны́не покланя́ема зря́ще,/ мы́сленная вра́жия ополче́ния скрыва́ются под земле́ю,/ и покланя́ющиися ему́ обновля́ются. Припев: Сла́ва, Го́споди, Кресту́ Твоему́ честно́му. Его́же, дре́вле прообразу́ема, на высоте́ Небе́сней Христо́с показа́, пресве́тлаго Креста́,/ тому́ ны́не покланя́ющеся, благоче́стно ве́рнии возвыша́ются/ и сего́ уясня́ются заре́ю. Сла́ва Отцу́ и Сы́ну и Свято́му Ду́ху. Его́же дре́вле пропове́даша проро́цы нело́жно, е́же Христо́ву подно́жию яви́тися Креста́,/ ему́же ны́не мы и́стинно покланя́ющеся ве́рно,/ того́ бога́тых даро́в наслажда́емся. И ны́не и при́сно и во ве́ки веко́в. Ами́нь. Богородичен: И́же стра́стию безстра́стие источи́в земны́м, Сын Твой и Госпо́дь, Де́во,/ Тобо́ю нас, Тя любо́вию пою́щия, при́сно обновля́ет,/ я́ко Благоде́тель. Песнь 9 Ирмос: Светоно́сный о́блак,/ в о́ньже всех Влады́ка,/ я́ко дождь с Небесе́ на руно́, сни́де/ и воплоти́ся нас ра́ди,/ быв Челове́к, Безнача́льный,/ велича́ем вси я́ко Ма́терь Бо́га на́шего Чи́стую. Припев: Сла́ва, Го́споди, Кресту́ Твоему́ честно́му. Безсме́ртия то́чит и нетле́ния незави́стны ка́пли Честны́й Крест кла́няющимся ему́,/ оживля́ет, очища́ет, и обновля́ет, и сла́вы лу́чшия и благодати сподобля́ет/ воспева́ющия на том пригво́здшагося Иису́са. Припев: Сла́ва, Го́споди, Кресту́ Твоему́ честно́му. Де́йства испуща́я, я́коже пресве́тлы зари́, всечестны́й Крест/ тому́ покланя́ющияся любо́вию и ве́рою чи́стою/ к све́ту непристу́пному и невеще́ственному, озаря́я, направля́ет,/ воспева́ющия всех Творца́. Сла́ва Отцу́ и Сы́ну и Свято́му Ду́ху. Освяти́вый Дре́во пресвята́го Креста́ Твоего́ честно́ю кро́вию Твое́ю, Преблаги́й Сло́ве,/ де́йством его́ нас просвети́ и освяти́, тому́ кла́няющияся/ и воспева́ющия Влады́ку вся́ческих. И ны́не и при́сно и во ве́ки веко́в. Ами́нь. Богородичен: Па́че со́лнца всем просия́вшая благода́ть о́блаки бед и страсте́й отго́нит, Де́во,/ и Богоразу́мия све́том просвеща́ет любо́вию Тя сла́вящия/ и пою́щия непреста́нно Сы́на Твоего́, я́ко Влады́ку всех. Светилен Крест предпра́зднуется, и мир освяща́ется,/ чи́ни А́нгельстии пою́т нас ра́ди распе́ншагося,/ и торжеству́ют с на́ми, и сра́дуются, дави́дски зову́ще:/ соде́ла спасе́ние посреде́ земли́, Влады́ко.

Минея, 20 Марта, Канон преподобномученика Глас 6 Песнь 1 Ирмос: Я́ко по су́ху, пешеше́ствовав Изра́иль/ по бе́здне стопа́ми,/ гони́теля фарао́на/ ви́дя потопля́ема,/ Бо́гу побе́дную пе́снь пои́м, вопия́ше. Припев: Преподобному́чениче Ефроси́не, моли́ Бо́га о на́с. Страда́льче преподо́бне Евфроси́не,/ моли́твами твои́ми умири́ на́ша души́/ и сподо́би воспе́ти по́стническия по́двиги твоя́, страда́ния и чудеса́,/ и́миже Госпо́дь наш сла́вно просла́вися. Припев: Преподобному́чениче Ефроси́не, моли́ Бо́га о на́с. Изше́д в са́не и́ночестем от Ти́хвинския оби́тели, преподо́бне о́тче наш,/ ты, я́ко пти́ца, прелете́л еси́ в гнездо́ свое́,/ во излю́бленное тобо́ю ме́сто пусты́нное,/ и зде, на о́строве, во бла́тех непроходи́мых,/ при мно́гих е́зерех всели́лся еси́,/ направля́емь руко́ю Живонача́льнаго. Припев: Преподобному́чениче Ефроси́не, моли́ Бо́га о на́с. Водрузи́в на ме́сте твоего́ вселе́ния Животворя́щий Крест/ и ископа́в себе́ ма́лую пеще́ру,/ вручи́л еси́ себе́ Бо́жию промышле́нию, страда́льче преподо́бне,/ пребыва́я же та́мо в по́двизех, бы́лием тра́вным пита́лся еси́,/ до́ндеже обрето́ша тя веле́нием Бо́жии и́щущии спасе́ния. Припев: Преподобному́чениче Ефроси́не, моли́ Бо́га о на́с. Глаго́лов и зако́нов Бо́жиих испо́лнитель быв,/ испо́лнился еси́ в пусты́ни мно́гих дарова́ний Ду́ха,/ о ни́хже рече́ Боже́ственный Па́вел Апо́стол во свои́х писа́ниих. Сла́ва Отцу́ и Сы́ну и Свято́му Ду́ху. Кре́постию Христа́, Его́же возлюби́л еси́ изде́тства все́ю кре́постию се́рдца твоего́,/ возмо́гл еси́ низложи́ти си́лу вра́жию,/ сего́ ра́ди дарова́ ти Бог дар прозорли́вства/ и си́лу твори́ти чудеса́. И ны́не и при́сно и во ве́ки веко́в. Ами́нь. Богородичен: Стра́сти пло́ти моея́ и непостоя́ние ума́ моего́/ отжени́ от Мене́, Пречи́стая Де́во,/ и наста́ви мя на стезю́ спасе́ния. Песнь 3 Ирмос: Не́сть свят,/ я́коже Ты, Го́споди Бо́же мой,/ вознесы́й рог ве́рных Твои́х, Бли́же,/ и утверди́вый нас на ка́мени/ испове́дания Твоего́. Припев: Преподобному́чениче Ефроси́не, моли́ Бо́га о на́с. Благи́ми нра́вы украси́вся,/ плотски́я стра́сти умертви́л еси́ ве́лиим воздержа́нием/ и к ве́чней жи́зни му́ченически преста́вился еси́, прехва́льне о́тче наш. Припев: Преподобному́чениче Ефроси́не, моли́ Бо́га о на́с. Ве́сь прилежа́ Вседержи́телю, прему́дре о́тче Евфроси́не,/ ве́лиими по́двиги отгна́л еси́ от себе́ диа́вола,/ смири́в горды́ню его́ твои́м преподо́бническим смире́нием. Припев: Преподобному́чениче Ефроси́не, моли́ Бо́га о на́с. А́нгельски пожи́в на земли́,/ возвы́сился еси́, о́тче, к лицезре́нию красоты́ Небе́сныя,/ и́мже ны́не наслажда́яся, мо́лишися о спасе́нии на́шем. Припев: Преподобному́чениче Ефроси́не, моли́ Бо́га о на́с. Име́я споспешеству́ющую тебе́ Бо́жию си́лу, преподо́бному́чениче,/ по сме́рти твое́й оби́льно источа́еши чудеса́/ прибега́ющим к тебе́ с ве́рою. Сла́ва Отцу́ и Сы́ну и Свято́му Ду́ху. Ско́ро прише́л еси́ на по́мощь, я́ко бы́вый сам чтец,/ ко чтецу́ пусты́нныя це́ркве Иоа́нну,/ тя́жко страда́вшему от нападе́ния лю́таго зве́ря лесна́го,/ и, прикосну́вся боле́зненней его́ главе́, яви́л еси́ на нем дела́ Бо́жия./ Моли́, чудотво́рче, Христа́ Бо́га на́шего,/ да исцели́т от мра́ка грехо́внаго духо́вная на́ша очеса́. И ны́не и при́сно и во ве́ки веко́в. Ами́нь. Богородичен: Тве́рдое упова́ние на Тя возлага́юще, Богороди́тельнице,/ Тебе́ усе́рдно мо́лимся:/ сохрани́ ве́сь сию́ и вся ве́си и гра́ды страны́ Росси́йския/ от вся́ких бед, находя́щих челове́ком согреша́ющим. Седален, глас 4 Покори́л еси́ ду́хови, пресла́вне о́тче наш, вся плотска́я мудрова́ния,/ ве́лиим же воздержа́нием и те́плыми ко Христу́ моли́твами/ возсия́л еси́ в пусты́ни, я́ко луча́ со́лнечная./ Сего́ ра́ди воспева́ем хвалу́ тебе́,/ по достоя́нию тя ублажа́юще. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Стена́ необори́мая христиа́ном еси́, Богоро́дице Де́во,/ к Тебе́ бо прибега́юще, невреди́ми пребыва́ем/ и, согреша́юще, и́мамы тя моли́твенницу./ Те́мже благода́рственно вопие́м Ти:/ ра́дуйся, Благода́тная, Госпо́дь с Тобо́ю. Песнь 4 Ирмос: Христо́с моя́ си́ла,/ Бог и Госпо́дь,/ честна́я Це́рковь/ боголе́пно пое́т, взыва́ющи,/ от смы́сла чи́ста о Го́споде пра́зднующи. Припев: Преподобному́чениче Ефроси́не, моли́ Бо́га о на́с. Процвела́ е́сть, я́ко крин, пусты́ня Синеезе́рская,/ егда́ преподо́бнии ру́це твои́ и притека́ющих к тебе́ бра́тии/ сотвори́сте в ней храм Бо́жий,/ тобо́ю же, о́тче, основа́на бы́сть та́мо и оби́тель и́ноческая,/ в не́йже и́щущия спасе́ния на пу́ть пра́вый наставля́л еси́. Припев: Преподобному́чениче Ефроси́не, моли́ Бо́га о на́с. Ве́льми му́дрый путево́ждь к Ца́рствию Бо́жию, о́тче, был еси́,/ не то́кмо бо и́ноцы, но и вси, приходи́вшии к тебе́,/ а́ки от исто́чника, почерпа́ху от Тебе́ свято́е уче́ние:/ вели́к бо ра́зум име́л еси́, све́дущ в Боже́ственных догма́тех,/ зане́ изде́тства к науче́нию в Боже́ственных Пи́саниих попремно́гу прилежа́л еси́. Припев: Преподобному́чениче Ефроси́не, моли́ Бо́га о на́с. Оби́тель твоя́, о́тче,/ в годи́ну сму́ты в Росси́йстей земли́/ яви́ся убе́жище мно́зем правосла́вным христиа́ном:/ тогда́ бо Росси́йстии лю́дие мече́м злове́рных ля́хов;/ а́ки кла́сы серпо́м, пожина́хуся,/ сего́ ра́ди укрыва́хуся во твое́й оби́тели,/ обрета́юще та́мо душ и теле́с спасе́ние. Припев: Преподобному́чениче Ефроси́не, моли́ Бо́га о на́с. Соде́яв ду́шу твою́ храм Свята́го Ду́ха, пресла́вне о́тче наш,/ насле́дник Го́рняго Ца́рствия и сожи́тель Вы́шних сил яви́лся еси́/ и прия́л еси́ от Бо́га дар содева́ти зна́мения и чудеса́. Сла́ва Отцу́ и Сы́ну и Свято́му Ду́ху. Я́коже Госпо́дь наш прикосну́ся ру́це те́щи Петро́вы,/ огне́м жего́мыя, и а́бие исцели́ ю,/ та́ко и ты, уго́дниче Христо́в,/ предста́тельством твои́м пред Го́сподем/ укроти́л еси́ огневи́цу отрокови́цы Мари́и,/ на одре́ сме́рти лежа́вшия,/ внегда́ призва́ тя на по́мощь иере́й Проко́пий в моли́тве свое́й. И ны́не и при́сно и во ве́ки веко́в. Ами́нь. Богородичен: Де́ва пребыла́ еси́ по рождестве́,/ я́коже и пре́жде рождества́ была́ еси́,/ зане́ Бо́га Сло́ва родила́ еси́,/ изба́вльшаго нас от тле́ния кре́стною сме́ртию Свое́ю,/ Де́во Пренепоро́чная. Песнь 5 Ирмос: Бо́жиим све́том Твои́м, Бла́же,/ у́тренюющих Ти души́ любо́вию озари́, молю́ся,/ Тя ве́дети, Сло́ве Бо́жий,/ и́стиннаго Бо́га,/ от мра́ка грехо́внаго взыва́юща. Припев: Преподобному́чениче Ефроси́не, моли́ Бо́га о на́с. У́мныма очи́ма, я́ко прозорливец,/ предзре́л еси́ кончи́ну твою́ от иноплеме́нных/ и истребле́ние и́ми твоея́ оби́тели,/ те́мже умоля́л еси́, о́тче, укрыва́вшияся в ней прише́льцы и са́мыя и́ноки/ ра́ди сохране́ния жи́зни изы́ти из оби́тели./ Сам же ты, си́лою Свята́го Ду́ха огради́вся,/ я́ко началово́ждь, в сре́тение супоста́том изше́л еси́,/ и безтре́петно стал еси́ у креста́,/ водруже́ннаго тобо́ю при основа́нии оби́тели,/ и та́ко приве́л еси́ сам себе́, я́коже овча́, на закла́ние. Припев: Преподобному́чениче Ефроси́не, моли́ Бо́га о на́с. Бе́снии ля́хове, ви́девше тя, о́тче, безтре́петно стоя́ща у креста́/ и разуме́вше, я́ко ты еси́ нача́льник оби́тели, ре́ша ти де́рзостно:/ да́ждь нам име́ние монастыря́ твоего́./ Ты же со смире́нием и́ноческим отве́тствовал еси́,/ указу́я на созда́нный тобо́ю храм:/ все име́ние мое́ обрета́ется в сем хра́ме Пречи́стыя Богоро́дицы. Припев: Преподобному́чениче Ефроси́не, моли́ Бо́га о на́с. Услы́шавше безбоя́зненный отве́т твой о име́нии,/ дерзостнии ля́хове разъяри́шася,/ и се еди́н от во́ин вы́ю твою́ пресече́ мече́м до полу́,/ други́й же раздроби́ честну́ю главу́ твою́,/ и та́ко пре́дал еси́ чи́стую ду́шу твою́ в ру́це Го́сподеви. Припев: Преподобному́чениче Ефроси́не, моли́ Бо́га о на́с. На уби́йцы укрепи́вый тя, о́тче, Подвигополо́жник Христо́с,/ прии́м твой дух в Небе́сная селе́ния по сконча́нии твое́м,/ сотвори́ тя исто́чник чуде́с/ с любо́вию и ве́рою к тебе́ прибега́ющим. Сла́ва Отцу́ и Сы́ну и Свято́му Ду́ху. От нанесе́ния главотя́жей и убру́сцев апо́стола Па́вла ве́рующий исцеля́хуся,/ я́коже Богоглаго́ливый Лука́ повеству́ет./ Не про́сты же си́лы твори́т Госпо́дь прикоснове́нием и твои́х веще́й:/ нагла́вник бо твой, о́тче,/ и пе́рсть от гро́ба твоего́,/ и еле́й от лампа́ды у ра́ки моще́й твои́х/ источа́ют, твои́ми моли́твами о нас, исцеле́ния боля́щим. И ны́не и при́сно и во ве́ки веко́в. Ами́нь. Богородичен: Исцели́, Пречи́стая, неду́гующаго ума́ моего́ помраче́ние,/ Врача́ ро́ждшая, Христа́, Всенепоро́чная Де́во. Песнь 6 Ирмос: Жите́йское мо́ре,/ воздвиза́емое зря напа́стей бу́рею,/ к ти́хому приста́нищу Твоему́ прите́к, вопию́ Ти:/ возведи́ от тли живо́т мой, Многоми́лостиве. Припев: Преподобному́чениче Ефроси́не, моли́ Бо́га о на́с. Прии́м му́ченическую теле́сную кончи́ну, о́тче,/ возне́слся еси́ ду́хом твои́м в Го́рняя селе́ния моли́тися о нас Вседержи́телю,/ моща́ми же твои́ми с на́ми пребыва́еши,/ явля́я те́ми мно́гая зна́мения и чудеса́. Припев: Преподобному́чениче Ефроси́не, моли́ Бо́га о на́с. Глаго́лом Бо́жиим свиде́тельствована бы́сть си́ла чуде́с твои́х, о́тче Евфроси́не:/ одержи́ма бо су́щи ве́лиим бесо́вским пла́чем,/ раба́ Бо́жия Ага́фия, егда́ бы́сть в ра́зуме, слы́ша глас свы́ше:/ гряди́ в пусты́ню Синеезе́рскую,/ помоли́ся чудотво́рцу Евфроси́ну и исцеле́еши./ Та́яже прии́де, и помоли́ся, и исцеле́. Припев: Преподобному́чениче Ефроси́не, моли́ Бо́га о на́с. Ели́цы притека́ху с ве́рою к моще́м твои́м, ско́рый помо́щниче и моли́твенниче, вси исцеля́хуся,/ мо́лим тя у́бо:/ по́мощию твое́ю посети́ и ны,/ те́лом и душе́ю немощству́ющих. Припев: Преподобному́чениче Ефроси́не, моли́ Бо́га о на́с. Умиле́нно призыва́юще свято́е и просла́вленное и́мя твое́, о́тче,/ кре́пость и исцеле́ние приима́ху от Тебе́ немощству́ющии пло́тию и ду́хом,/ ско́рбнии же и удруче́ннии печа́льми жите́йскими/ обрета́ху от Тебе́ ско́рую по́мощь и утеше́ние. Сла́ва Отцу́ и Сы́ну и Свято́му Ду́ху. Невозмо́жно е́сть исчи́слити мно́гое мно́жество чуде́с твои́х,/ цели́телю душ и теле́с на́ших, о́тче Евфроси́не,/ сего́ ра́ди творя́ще па́мять твою́,/ благода́рственно благословля́ем просла́вльшаго тя,/ отце́в Бо́га благослове́ннаго. И ны́не и при́сно и во ве́ки веко́в. Ами́нь. Богородичен: Отцу́ Собезнача́льнаго Сы́на пло́тию родила́ еси́, Пренепоро́чная Де́во,/ Его́же моли́ со преподобному́чеником Евфроси́ном,/ да сотвори́т ны сы́ны Своего́ Ца́рствия/ и насле́дники обетова́ния ве́чнаго. Кондак, глас 8 Подража́я житию́ дре́вних отце́в,/ Богому́дре о́тче Евфроси́не,/ красоту́ ми́ра сего́ возненави́дел еси́,/ и, в пусты́ню всели́вся,/ ве́ру Христо́ву, я́коже щит, в се́рдце твое́ прия́л еси́,/ с не́юже изше́л еси́, я́ко добр во́ин Царя́ Небе́снаго,/ не на бра́нь проти́ву пло́ти и кро́ве,/ но на бра́нь проти́ву ко́зней неви́димаго врага́,/ и сего́ вознесе́нную горды́ню,/ по да́нней тебе́ от Ду́ха Свята́го благода́ти,/ глубо́ким смире́нием твои́м низложи́л еси́,/ и от Небе́снаго Мздовозда́теля неувяда́емым венце́м побе́ды венча́лся еси́./ Сего́ ра́ди, соше́дшеся любо́вию, вопие́м ти:/ ра́дуйся, о́тче Евфроси́не, пусты́нное украше́ние. Икос А́нгельски пожи́в на земли́,/ дости́гл еси́, о́тче, лицезре́ния красоты́ Бо́жия,/ и́мже наслажда́яся на Небеси́, мо́лишися о спасе́нии на́шем./ Сего́ ра́ди мы, земни́и, дне́сь па́мять твою́ пра́зднующе, любо́вию вопие́м ти:/ ра́дуйся, благочести́ваго ко́рене правосла́вных роди́телей пречестна́я о́трасле;/ ра́дуйся, от младе́нства Христа́ возлюби́вый./ Ра́дуйся, в де́тстве и ю́ности и́ноческим подвиго́м научи́выйся;/ ра́дуйся, дре́вним пусты́нником подража́телю./ Ра́дуйся, Новгоро́дстей Це́ркви в чи́не чтеца́ церко́внаго послужи́вый;/ ра́дуйся, кри́не, посреде́ блат пусты́нных процветы́й./ Ра́дуйся, му́дрый наста́вниче и́щущим душе́внаго спасе́ния;/ ра́дуйся, цели́телю душ и теле́с прося́щим твоего́ пред Бо́гом заступле́ния./ Ра́дуйся, похвало́ мона́шествующих;/ ра́дуйся, дар прозорли́вства и си́лу чуде́с от Бо́га прие́мый./ Ра́дуйся, о́тче Евфроси́не, пусты́нное украше́ние. Песнь 7 Ирмос: Росода́тельну у́бо пе́щь/ соде́ла А́нгел/ преподо́бным отроко́м,/ халде́и же опаля́ющее/ веле́ние Бо́жие мучи́теля увеща́ вопи́ти:/ благослове́н еси́, Бо́же оте́ц на́ших. Припев: Преподобному́чениче Ефроси́не, моли́ Бо́га о на́с. Распали́в се́рдце твое́ любо́вию кре́пкою ко Христу́, о́тче,/ пла́мень по́хоти плотски́я и о́гнь я́рости ея́ претвори́л еси́ в ро́су/ и всю си́лу их угаси́л еси́, поя́ Бо́гу в безмо́лвии пусты́ннем:/ благослове́н еси́, Го́споди Бо́же оте́ц на́ших. Припев: Преподобному́чениче Ефроси́не, моли́ Бо́га о на́с. Пло́ти твое́й не послужи́л еси́,/ но, апо́стольски распина́я ю со страстьми́ и похотьми́, покори́л еси́ ду́ху/ и че́стен храм Ду́ху Свято́му себе́ сотвори́л еси́, взыва́я:/ благослове́н еси́, Го́споди Бо́же оте́ц на́ших. Припев: Преподобному́чениче Ефроси́не, моли́ Бо́га о на́с. Просвети́в твое́ се́рдце смиренному́дрием,/ ве́рен был еси́ нача́льник собо́ра и́ноков,/ наставля́я, и уча́, и вся приводя́ к Бо́жией во́ли, пою́щия:/ благослове́н еси́, Го́споди Бо́же оте́ц на́ших. Припев: Преподобному́чениче Ефроси́не, моли́ Бо́га о на́с. Ве́лиим благоразу́мием, о́тче наш Евфроси́не,/ покори́л еси́ ду́хови го́рдость ума́ жите́йскаго, со смире́нием поя́:/ благослове́н еси́, Го́споди Бо́же оте́ц на́ших. Сла́ва Отцу́ и Сы́ну и Свято́му Ду́ху. Прекра́сный цвет, о́тче, в до́му Бо́жий произра́сл еси́,/ мно́гими доброде́тельми красу́яйся/ и арома́ты чуде́с благоуха́яй. И ны́не и при́сно и во ве́ки веко́в. Ами́нь. Богородичен: Ум наш плени́ в послуша́ние ве́ры,/ дух и ду́шу всесоверше́нны сотвори́/ и те́ло в прише́ствие Го́спода на́шего Иису́са Христа́/ соблюди́ непоро́чно моли́твами Твои́ми, Всенепоро́чная Богороди́тельнице. Песнь 8 Ирмос: Из пла́мене преподо́бным ро́су источи́л еси́/ и пра́веднаго же́ртву водо́ю попали́л еси́:/ вся бо твори́ши, Христе́, то́кмо е́же хоте́ти./ Тя превозно́сим во вся ве́ки. Припев: Преподобному́чениче Ефроси́не, моли́ Бо́га о на́с. Широ́кий пу́ть, вводя́щий в па́губу, презре́л еси́, страда́льче преподо́бне,/ и те́сными враты́ вшел еси́ в Небе́сное Ца́рствие./ Те́мже мо́лим тя:/ укрепи́ нас моли́твами твои́ми понести́ благо́е и ле́гкое и́го креста́,/ да и мы во вре́мя благопотре́бное/ вни́дем в поко́й Бо́га благослове́ннаго. Припев: Преподобному́чениче Ефроси́не, моли́ Бо́га о на́с. Бо́дренным ума́ трезве́нием и те́плым ко Христу́ моле́нием/ диа́вола посрами́л еси́, прехва́льне страстоте́рпче,/ стра́стныя же того́ прило́ги отгна́л еси́,/ кре́пкою ве́рою во Христа́ вооружи́вся,/ и та́ко вшел еси́ в поко́й Бо́га благослове́ннаго. Припев: Преподобному́чениче Ефроси́не, моли́ Бо́га о на́с. А́нгельски, о́тче, на земли́ пожи́л еси́,/ те́мже ны́не со А́нгелы лику́ет на Небеси́ дух твой,/ моли́ у́бо о нас, чту́щих па́мять твою́, Небе́сный жи́телю,/ да всели́т Христо́с и нас в поко́й Бо́га благослове́ннаго. Припев: Преподобному́чениче Ефроси́не, моли́ Бо́га о на́с. Во вся дни жития́ твоего́/ неукло́нно ше́ствовал еси́, прему́дре о́тче наш, стезя́ми Боже́ственными к Небеси́,/ иде́же ны́не пребыва́я,/ с ли́ки А́нгельскими ра́достно воспева́еши отце́в Бо́га благослове́ннаго. Сла́ва Отцу́ и Сы́ну и Свято́му Ду́ху. Предстои́ши ны́не Престо́лу Вседержи́теля, преблаже́нне о́тче Евфроси́не,/ нам же, на земли́ су́щим, явля́ешися вои́стинну А́нгел храни́тель,/ утвержда́я ны в ве́ре уче́ньми твои́ми и зна́меньми чуде́сными/ и соблюда́я ны в чи́стем испове́дании отце́в Бо́га благослове́ннаго. И ны́не и при́сно и во ве́ки веко́в. Ами́нь. Богородичен: Богоуго́дне пожи́вшему и страда́льчески житие́ сконча́вшему/ преподо́бному́ченику Евфроси́ну после́довати наста́ви нас, Всенепоро́чная,/ потребля́ющи от душ на́ших прило́ги лука́вых де́монов/ и возводя́щи при́сно умы́ на́ша к зре́нию и исполне́нию за́поведей Сы́на Твоего́, Бо́га на́шего. Песнь 9 Ирмос: Бо́га/ челове́ком невозмо́жно ви́дети,/ на Него́же не сме́ют чи́ни А́нгельстии взира́ти,/ Тобо́ю же, Всечи́стая, яви́ся челове́ком/ Сло́во воплоще́нно,/ Его́же велича́юще,/ с Небе́сными во́и Тя ублажа́ем. Припев: Преподобному́чениче Ефроси́не, моли́ Бо́га о на́с. Изба́вився от сете́й ловя́щих тя,/ почи́л еси́ во благоуха́нии святы́ни/ и Го́сподеви ны́не предстои́ши, поя́ со Безпло́тными:/ Свят, Свят, Свят еси́, Бо́же, Тро́ице Вседе́тельная. Припев: Преподобному́чениче Ефроси́не, моли́ Бо́га о на́с. Я́ко победи́тель мы́сленных враго́в, прехва́льне о́тче,/ венце́м побе́ды неувяда́емым увенча́лся еси́ от Царя́ всех./ Сего́ ра́ди мо́лим тя усе́рдно:/ моли́ бла́гость Вседержи́теля/ дарова́ти правосла́вным лю́дем на супоста́ты побе́ду. Припев: Преподобному́чениче Ефроси́не, моли́ Бо́га о на́с. Я́ко предста́телю на́шему и ско́рому помо́щнику,/ су́щему в Небе́сных оби́телех, мо́лимся тебе́:/ Влады́ку всех моли́/ сохрани́т от гла́да, тру́са, пото́па, огня́, меча́,/ от наше́ствия иноплеме́нников и междоусо́бныя бра́ни ве́сь сию́/ и вся ве́си, гра́ды и страны́ христиа́нския/ и вся ны спасти́, благоче́стно тя почита́ющия. Припев: Преподобному́чениче Ефроси́не, моли́ Бо́га о на́с. Честна́я ра́ка святы́х моще́й твои́х, о́тче пречу́дне,/ бога́тно источа́ет исцеле́ния приходя́щим к тебе́ с ве́рою/ и воздвиза́ет ве́рныя сла́вити ве́лия твоя́ по́двиги и чудеса́. Сла́ва Отцу́ и Сы́ну и Свято́му Ду́ху. Приими́, преблаже́нне о́тче наш Евфроси́не,/ хвале́бная на́ша песнопе́ния, любо́вию тебе́ возноси́мая,/ осеня́й нас твои́ми моли́твами/ и ускори́ на по́мощь благода́тным заступле́нием твои́м во вре́мя благопотре́бное. И ны́не и при́сно и во ве́ки веко́в. Ами́нь. Богородичен: Ка́мень краеуго́льный – Христо́с – ве́рным е́сть основа́ние,/ неве́рным же ка́мень претыка́ния и собла́зна;/ на ве́рнем ка́мени, Влады́чице, утверди́ мое́ помышле́ние/ и спаси́ мя Ма́терним Твои́м дерзнове́нием к Сы́ну Твоему́, Бо́гу на́шему. Светилен Све́та Пода́тель, Госпо́дь,/ поста́ви тя свети́льника све́тла Це́ркви Свое́й, о́тче пресла́вне Евфроси́не,/ озари́ у́бо све́том твои́м и вся ны,/ почита́ющия святу́ю па́мять твою́. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Свеще́ та́инственная, Богоневе́сто,/ возсия́й свет ра́зума су́щим во тьме́ неразу́мия/ и спаси́ вся ны, благоче́стно пою́щия Тя/ и я́ко Ма́терь Бо́жию велича́ющия.

Минея, 1 Апреля, Канон преподобного Глас 2 Песнь 1 Ирмос: Гряди́те, лю́дие,/ пои́м пе́снь Христу́ Бо́гу,/ разде́льшему мо́ре и наста́вльшему лю́ди,/ и́же изведе́ из рабо́ты еги́петския,/ я́ко просла́вися. Припев: Преподо́бне о́тче Евфи́мие, моли́ Бо́га о на́с. Ра́дуйся, исто́чниче, точа́щий струю́ оби́льную,/ от нея́же почерпа́ем целе́б благода́ть, прегреше́ний избавля́емся,/ любо́вию приходя́щии к тебе́, приснопа́мятне. Припев: Преподо́бне о́тче Евфи́мие, моли́ Бо́га о на́с. Святы́ню прие́м от Христа́ Бо́га от утро́бы, сла́вне,/ и яви́лся еси́ избра́нный сосу́д,/ духо́вную благода́ть всю прие́мый. Сла́ва Отцу́ и Сы́ну и Свято́му Ду́ху. Да жи́зни прича́стник нетле́нныя яви́шися,/ привре́менная, о́тче му́дре, пренебре́гл еси́/ и, к Бо́гу преше́д, непреста́нно мо́лиши спасти́ся всем нам. И ны́не и при́сно и во ве́ки веко́в. Ами́нь. Богородичен: Словесе́м прему́дрым Твои́х усте́н после́дующе,/ ра́дующеся, Пренепоро́чная, Тя ублажа́ем,/ бы́вшую нам вину́ неизрече́ннаго блаже́нства. Песнь 3 Ирмос: На ка́мени мя ве́ры утверди́в,/ разшири́л еси́ уста́ моя́ на враги́ моя́,/ возвесели́ бо ся дух мой, внегда́ пе́ти:/ не́сть свят, я́коже Бог наш,/ и не́сть пра́веден, па́че Тебе́, Го́споди. Припев: Преподо́бне о́тче Евфи́мие, моли́ Бо́га о на́с. Всесве́тлый, Богому́дре, показа́лся еси́ столп, путево́ждствуя чи́ны мона́хов,/ о́блак же, осеня́ющ жре́бий Бо́жий и ли́ца неви́димых враг помрача́ющ/ благода́тию всех Царя́. Припев: Преподо́бне о́тче Евфи́мие, моли́ Бо́га о на́с. Стои́ши пред лице́м твоего́ Влады́ки, неосла́бным манове́нием моля́ся/ изба́витися ста́ду твоему́ от рабо́ты тьмы́, преподо́бне, и мучи́тельства страсте́й,/ твои́х бо моли́тв послу́шает Бог. Сла́ва Отцу́ и Сы́ну и Свято́му Ду́ху. Пло́ти твоея́ двиза́ния умертви́в кре́пким поще́нием, Богоглаго́льниче,/ был еси́ оби́телище Влады́чне,/ Его́же умоли́ изба́витися скорбе́й и страсте́й смуще́ния/ к тебе́ прибега́ющим. И ны́не и при́сно и во ве́ки веко́в. Ами́нь. Богородичен: Сви́ток Тя прови́де Иса́ия, в не́мже пло́тски Сло́во зна́менася,/ раздра́в рукописа́ние первозда́ннаго, е́же преступле́нием подписа́,/ и подаде́ оставле́ние рабо́ты нам. Седален, глас 8 Отре́кся пло́ти Христа́ ра́ди и духо́вный яви́вся лю́дем води́тель,/ услы́шал еси́ словеса́ Боже́ственных та́йных уче́ний,/ мона́хов же яви́лся еси́ пра́вило пра́вости/ и стра́сти вся кре́пко попра́л еси́./ Тем и де́монская кова́рства до конца́ изгуби́л еси́,/ ко Христу́ зря всегда́, Богоно́се Евфи́мие,/ Его́же моли́ грехо́в оставле́ние пода́ти/ честву́ющим любо́вию святу́ю па́мять твою́. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Со́лнца о́блаче разу́мнаго,/ Боже́ственнаго Све́та свети́льниче златокова́нный,/ нескве́рная, небла́зная, всенепоро́чная Влады́чице,/ омраче́нную ду́шу мою́ ослепле́нием страсте́й/ безстра́стия заре́ю просвети́, молю́ся,/ и оскверне́ное ми се́рдце омы́й пото́ки умиле́ния, покая́ния же слеза́ми,/ и от тиме́ния мя очи́сти дел мои́х, да любо́вию зову́ Ти:/ Богоро́дице Присноде́во,/ моли́ Христа́ Бо́га прегреше́ний оставле́ние пода́ти ми,/ Тебе́ бо име́ю наде́жду, раб Твой. Песнь 4 Ирмос: Пою́ Тя, слу́хом бо, Го́споди, услы́шах и ужасо́хся:/ до мене́ бо и́деши, мене́ ища́, заблу́ждшаго./ Тем мно́гое Твое́ снизхожде́ние, е́же на мя,/ прославля́ю, Многоми́лостиве. Припев: Преподо́бне о́тче Евфи́мие, моли́ Бо́га о на́с. Жела́нием Боже́ственным распали́вся,/ разгре́яв твое́ се́рдце, жела́нная пости́гл еси́ до конца́, Богому́дре о́тче,/ оста́вив землены́х пристра́стие,/ единосе́льник Вы́шних был еси́ служи́телей. Припев: Преподо́бне о́тче Евфи́мие, моли́ Бо́га о на́с. Ласка́ния све́рстников, преподо́бне, попра́л еси́ всеобра́зно,/ вни́де бо раче́ние Соде́теля в тя, Богому́дре, те́пле,/ и до́льних мра́чная жела́ния до конца́ отри́нул еси́. Сла́ва Отцу́ и Сы́ну и Свято́му Ду́ху. На па́жить чи́сту возгна́в воздержа́ния ста́до твое́, о́тче,/ ко исто́чнику приве́л еси́ нему́тному безстра́стия,/ разу́мныя зве́ри побежда́я,/ е́же ны́не моли́твами твои́ми спаса́й. И ны́не и при́сно и во ве́ки веко́в. Ами́нь. Богородичен: Се Тя ро́ди сла́вят родо́в, я́коже прорекла́ еси́, Отрокови́це:/ Созда́теля бо была́ еси́ пала́та и Боже́ственный храм,/ в не́мже всели́ся Высоча́йший, пло́тию обло́жся да спасе́т нас. Песнь 5 Ирмос: Просвеще́ние во тьме́ лежа́щих,/ спасе́ние отча́янных, Христе́ Спа́се мой,/ к Тебе́ у́тренюю, Царю́ ми́ра,/ просвети́ мя сия́нием Твои́м:/ ино́го бо, ра́зве Тебе́, бо́га не зна́ю. Припев: Преподо́бне о́тче Евфи́мие, моли́ Бо́га о на́с. Ве́сь Бо́гу прилежа́, о́тче, в пусты́нях мраз зи́мный терпе́л еси́ до́блественно, и ле́тний нося́ вар,/ и был еси́ дом му́дрости Бо́жия,/ доброде́тельным сия́нием многообра́зно украша́емь. Припев: Преподо́бне о́тче Евфи́мие, моли́ Бо́га о на́с. Му́жески наступи́л еси́ на поще́ние, чревонеи́стовства зми́я не прие́м сове́тника, о́тче,/ но а́лчбою, и моли́твами непреста́нными, и чистото́ю соедини́вся Бо́гу,/ прича́стник был еси́ пи́щи безсме́ртныя. Сла́ва Отцу́ и Сы́ну и Свято́му Ду́ху. Доброде́телей вшед во о́блак,/ скрижа́ли прия́л еси́, блаже́нне, я́ко Моисе́й, Богоначерта́нныя:/ мона́шествующих мно́жества научи́л еси́ от веще́ственных всех ошаява́тися,/ возводя́ на го́ру Боже́ственнаго зна́ния. И ны́не и при́сно и во ве́ки веко́в. Ами́нь. Богородичен: Яви́ся, Чи́стая, пра́отцу ле́ствица, Небе́с вы́шши,/ иму́щи тве́рдое водруже́ние:/ из Тебе́ бо Бог, вопло́щся, показа́ся и совокупи́ разстоя́щаяся пре́жде./ Тем Тя, Богоро́дицу, ве́рнии, сла́вим. Песнь 6 Ирмос: Ко Го́споду от ки́та Ио́на возопи́:/ Ты мя возведи́ из глубины́ а́да, молю́ся,/ да я́ко Изба́вителю во гла́се хвале́ния,/ и́стины же ду́хом пожру́ Тебе́. Припев: Преподо́бне о́тче Евфи́мие, моли́ Бо́га о на́с. Пострека́емь Влады́чнею любо́вию, оста́вил еси́ вся до́льная/ и Тому́ после́довал еси́, на ра́мо и́го ле́гкое взем му́жески,/ благоду́шия тезоимени́те. Припев: Преподо́бне о́тче Евфи́мие, моли́ Бо́га о на́с. Нака́зан неизрече́нных ра́зуму, блаже́нне,/ науча́л еси́ твое́ ста́до Небе́сная разумева́ти/ и страсте́й наше́ствия отгоня́ти твои́ми поуче́ньми. Сла́ва Отцу́ и Сы́ну и Свято́му Ду́ху. Житие́ твое́ равноа́нгельно, о́тче, бы́сть,/ дерзнове́ние тебе́ даде́ держа́й вся Госпо́дь/ страсте́й изба́вити твое́ ста́до./ Те́мже Христа́ о всех нас умоли́. И ны́не и при́сно и во ве́ки веко́в. Ами́нь. Богородичен: Разуме́в Твое́ неизрече́нное, Чи́стая, та́инство,/ го́ру присе́нную Авваку́м Тя провозвести́:/ из Тебе́ бо Соде́тель, за милосе́рдие вопло́щся,/ дре́вняя отъя́т изрече́ния. Кондак, глас 2 Волне́ний мно́жество невла́жно преходя́,/ безпло́тныя враги́ струя́ми слез твои́х погрузи́л еси́,/ Богому́дре Евфи́мие преподо́бне,/ тем и чуде́с дар прия́л еси́,/ моли́ непреста́нно о всех нас. Икос Отве́рзи моя́ устна́, преблаже́нне, Богоприя́тными твои́ми моли́твами,/ Бо́гу предстоя́, всесла́вне Евфи́мие,/ да воспою́ Боже́ственное твое́ житие́/ и возглаго́лю досто́йно доброде́тели твоя́,/ я́же на земли́ Христа́ Бо́га ра́ди соверша́л еси́,/ столп бо яви́лся еси́ и пра́вило мона́хов све́тло,/ равноа́нгельно стяжа́в житие́,/ в незаходи́мая вои́стинну всели́лся еси́,/ моли́ непреста́нно о всех нас. Песнь 7 Ирмос: Купина́ в горе́ огненеопа́льная/ и росоно́сная пе́щь халде́йская я́ве предписа́ Тя, Богоневе́сто:/ Боже́ственный бо, Невеще́ственный в веще́ственнем чре́ве, о́гнь неопа́льно прия́ла еси́./ Те́мже из Тебе́ ро́ждшемуся пое́м:/ благослове́н еси́, Бо́же оте́ц на́ших. Припев: Преподо́бне о́тче Евфи́мие, моли́ Бо́га о на́с. Авраа́мский стяжа́в нрав, прему́дре,/ от земли́ изше́д Ни́жняго Нова́града, пресе́льник был еси́ Су́ждалю,/ и Бо́га узре́л еси́, обещава́юща ти возда́ние бога́тно./ Тем, веселя́ся, усе́рдно пел еси́:/ благослове́н Бог оте́ц на́ших. Припев: Преподо́бне о́тче Евфи́мие, моли́ Бо́га о на́с. Распаля́емь ду́хом, преподо́бне, ко́зни вра́жия разори́л еси́,/ ору́жием огра́ждься нас ра́ди пригво́ждшагося на Кресте́./ Тем, веселя́ся, усе́рдно пел еси́:/ благослове́н Бог оте́ц на́ших. Сла́ва Отцу́ и Сы́ну и Свято́му Ду́ху. К горе́ моли́твы приступи́л еси́,/ и, вшед во о́блак Ду́ха, Бо́жия за́дняя ви́дел еси́,/ и, сла́ву прие́мь разсужде́ния,/ был еси́, о́тче, столп непоколе́блен./ Тем приле́жно моли́ изба́витися искуше́ния вра́жия пою́щим тя. И ны́не и при́сно и во ве́ки веко́в. Ами́нь. Богородичен: Зако́на Испо́лнителя чревоноси́ла еси́, пре́жде век су́ща Го́спода вся́ческих,/ Сы́на, Прему́дрость же и Си́лу,/ напосле́док, Пречи́стая, па́че естества́ на обновле́ние земны́м./ Тем благоче́стно, Чи́стая, из Тебе́ ро́ждшемуся зове́м:/ благослове́н Бог оте́ц на́ших. Песнь 8 Ирмос: В пе́щь о́гненную ко отроко́м евре́йским снизше́дшаго/ и пла́мень в ро́су прело́жшаго Бо́га,/ по́йте, дела́, я́ко Го́спода,/ и превозноси́те во вся ве́ки. Припев: Преподо́бне о́тче Евфи́мие, моли́ Бо́га о на́с. Сле́зными твои́ми тече́нии огнепа́льныя стра́сти поже́гл еси́,/ гее́нскаго пла́мене страх отгна́л еси́, о́тче му́дре,/ соверше́нною любо́вию Созда́теля своего́,/ примеси́вся стра́хом во вся ве́ки. Припев: Преподо́бне о́тче Евфи́мие, моли́ Бо́га о на́с. Я́коже Ено́х, к Бо́гу преста́вився, от Него́ прия́т был еси́, о́тче,/ и с вы́шними ликостоя́нии водворя́ешися, и пое́ши:/ вся дела́ Госпо́дня, Го́спода по́йте и превозноси́те во вся ве́ки. Сла́ва Отцу́ и Сы́ну и Свято́му Ду́ху. Ны́не нетле́нных даро́в наслажда́яся/ и трисо́лнечныя све́тлости исполня́яся, блаже́нне,/ певцы́ твоя́ страсте́й тьмы́ моли́твами твои́ми изба́ви,/ да досто́йно Христа́ славосло́вим. И ны́не и при́сно и во ве́ки веко́в. Ами́нь. Богородичен: Кля́тву разруши́ла еси́ дре́внюю, Пречи́стая, земны́х,/ неизрече́нным сло́вом Бо́га заче́нши,/ воплоще́нна из Тебе́ за милосе́рдие, Пренепоро́чная Влады́чице,/ Его́же превозно́сим во ве́ки. Песнь 9 Ирмос: От Бо́га Бо́га Сло́ва,/ неизрече́нною му́дростию прише́дшаго обнови́ти Ада́ма,/ я́дию в тле́ние па́дшаго лю́те,/ от Святы́я Де́вы неизрече́нно воплоти́вшагося нас ра́ди,/ ве́рнии, единому́дренно пе́сньми велича́ем. Припев: Преподо́бне о́тче Евфи́мие, моли́ Бо́га о на́с. Просвеще́н добро́тою по́стническою, о́тче,/ и оде́ян ри́зою нетле́ния, Евфи́мие, и венце́м даро́в укра́шен,/ Влады́це всех предстои́ши, ра́дуяся. Припев: Преподо́бне о́тче Евфи́мие, моли́ Бо́га о на́с. В пребыва́лища присноживу́щая всели́лся еси́, блаже́нне,/ иде́же апо́столов собо́р и мно́жество му́ченик,/ преподо́бных собра́ние, проро́ков ликова́ния,/ воздая́ния боле́зней от Бо́га прии́м досто́йно, Богому́дре достосла́вне. Сла́ва Отцу́ и Сы́ну и Свято́му Ду́ху. Всесве́тел, Богоглаго́льниче, был еси́,/ заря́ми све́та трисо́лнечнаго све́тло озаря́емь,/ испроси́ прегреше́ний разреше́ние,/ и лю́тых избавле́ние, и злых отчужде́ние/ всем, любо́вию к тебе́ притека́ющим. И ны́не и при́сно и во ве́ки веко́в. Ами́нь. Богородичен: Воплоти́вся неизрече́нно Влады́ка всех из Тебе́, Богороди́тельнице Мари́е,/ соверше́н бы́сть челове́к, поро́ждься,/ я́ко пре́жде рождества́ Де́ву сохрани́ Тя чи́сту,/ Его́же моли́ спасти́ от бед ду́ши на́ша. Светилен Мирска́го злостра́стия, я́ко тру́дна, избе́гл еси́/ и воздержа́нием пло́ть увяди́л еси́,/ обнови́л же еси́ душе́вную кре́пость, преподо́бне,/ и сла́вою обогати́лся еси́ Небе́сною, приснопа́мятне,/ тем моля́ся не преста́й о нас ко Го́споду. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Ужа́сное Твое́ предста́тельство, Мари́е Богоукраше́нная,/ и стра́шная Твоя́ сла́ва по всей земли́./ О Тебе́ вси ны́не хва́лимся,/ Тя Хода́таицу иму́ще к Сы́ну и Созда́телю Твоему́,/ неусы́пною Твое́ю моли́твою да спасе́мся вси.

Минея, 30 Апреля, Кано́н свято́му иера́рху Дона́ту Глас 4 Песнь 1 Ирмос: Боже́ственным покрове́н/ медленноязы́чный мра́ком,/ извити́йствова Богопи́санный зако́н:/ ти́ну бо оттря́с очесе́ у́мнаго,/ ви́дит Су́щаго/ и науча́ется Ду́ха ра́зуму,/ хваля́ Боже́ственными пе́сньми. Припев: Святи́телю о́тче Дона́те, моли́ Бо́га о на́с. Боже́ственное Твое́, Всецарю́, о ро́де челове́ческом промышле́ние:/ воздви́гл бо еси́, я́ко друга́го Моисе́я,/ руково́дствити лю́ди Твоя́ иера́рха, блаже́ннаго Дона́та,/ и́же в Твое́й благода́ти воспе́ Тебе́ благода́рныя пе́сни. Припев: Святи́телю о́тче Дона́те, моли́ Бо́га о на́с. Боже́ственному Престо́лу при́сно со избра́нными предстоя́,/ невече́рния зари́, о́тче преподо́бне, исполня́емь,/ нам, ве́рно честву́ющим тя, испроси́ у Христа́ Го́спода све́та,/ от мракоро́дныя грехо́в тьмы просвети́тися и воспе́ти, я́ко Бог просла́вися. Сла́ва Отцу́ и Сы́ну и Свято́му Ду́ху. Боже́ственных слове́с ева́нгельскаго Богопропове́дания измла́да научи́вся, блаже́нне,/ впери́л еси́ о́ная кре́пце, я́ко коры́сть мно́гу в тых обреты́й,/ удо́бь огорсти́л 20 еси́ всяк путь доброде́тели во спасе́ние,/ учи́л бо еси́ вся умнослове́сныя воспева́ти Бо́гу, я́ко просла́вися. И ны́не и при́сно и во ве́ки веко́в. Ами́нь. Богородичен: Боже́ственная багряни́це Небе́снаго Царя́ сла́вы, Пречи́стая Де́во Мари́е,/ Твои́ми бо кровьми́ Ипоста́сное Бо́га Отца́ Сло́во/ в на́ше челове́чество обагри́ся и злоро́дную истреби́ кля́тву, пострада́в за нас пло́тию./ Ему́же чрез Тебе́ верно вопие́м:/ в щедро́тах безме́рных Бог Иису́с сла́вно просла́вися. Песнь 3 Ирмос: Разве́рзе утро́бы неча́дствовавшия у́зы,/ доса́ду же неудоботерпи́му благоча́дствующия,/ еди́на моли́тва проро́чицы дре́вле А́нны,/ нося́щий дух сокруше́н,/ к Си́льному и Бо́гу ра́зумов. Припев: Святи́телю о́тче Дона́те, моли́ Бо́га о на́с. Разве́рзл еси́ бде́нными твои́ми к Бо́гу моли́твами мрак страсте́й, Богоно́се о́тче,/ вся вра́жия досажда́ющий тебе́ прило́ги сокруше́нным ду́хом до конца́ отрази́в,/ церко́вную па́ству до́бре упа́сл еси́,/ при́сно, Всеси́льне, – зовя́, – Го́споди. Припев: Святи́телю о́тче Дона́те, моли́ Бо́га о на́с. Разве́рзи нам, всеблаже́нне святи́телю,/ всеще́дрыя хля́би Всеще́драго Бо́га на́шего предста́тельством твои́м,/ я́коже жа́ждою изнемо́гшия в ме́сте безво́дне,/ сухо́й земле́ исто́чник разве́рзл еси́,/ да наводни́мся его́ благода́тию, в разуме́ пою́ще:/ Всеси́льне Бо́же. Сла́ва Отцу́ и Сы́ну и Свято́му Ду́ху. Разве́рзеся иногда́ ми́лость твоя́, о́тче, ко жи́телем страны́,/ в не́йже во исто́чнице злоя́дный змий угнезди́ся, вреди́ сме́ртно во́ды пи́ти./ Его́же, я́ко челове́к Бо́жий, безбоя́зненно уби́в,/ во́ду пи́ти всем сотвори́л еси́,/ напо́й и нас исто́чником во спасе́ние ми́лости твоея́, да зове́м:/ Всеси́льне Го́споди. И ны́не и при́сно и во ве́ки веко́в. Ами́нь. Богородичен: Разве́рзе утро́бу Твою́, Пречи́стая Де́во, Единоро́дный Сын Бо́жий,/ преесте́ственно из Пречи́стою боку́ Твое́ю проше́д,/ во избавле́ние всех люде́й от вра́жиих ко́зней./ Те́мже, Благода́тная Мари́е, разжени́ ви́димыя и неви́димыя враги́ на́ши/ и разве́рзенныя их на ны че́люсти сокруши́, да ра́достно вопие́м:/ Всеси́льне Го́споди. Седален, глас 8 Вели́каго свети́льника светоза́рнаго, Це́ркве столпа́ неразори́маго,/ преизя́щнаго чудотво́рца Дона́та восхва́лим,/ и́же благода́тию воплоти́вшагося Христа́, Сы́на Бо́жия,/ я́ко Его́ сотвори́тельный орга́н, соде́я преве́лия чудеса́ в ми́ре,/ и́хже самоде́ржец царь и Константи́нова гра́да весь наро́д зри́тели бы́ша/ и па́ствы его́ архиере́йскаго престо́ла лю́дие, у них бы́вшая, ви́деша./ К нему́ же возопие́м усе́рдно, зову́ще:/ архиере́ю, благода́ти Бо́жия испо́лненный,/ всем тре́бующим исполня́еши проше́ния,/ моли́ся Христу́ Бо́гу прегреше́ний оставле́ние дарова́ти/ пра́зднующим с любо́вию святу́ю па́мять твою́. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Ра́дуйся, престо́ле огнезра́чный Бо́жий,/ ра́дуйся, Отрокови́це, седа́лище ца́рское,/ о́дре, упещре́нно по́стланный,/ златопорфи́рный черто́зе, хлами́до червленожа́ркая,/ укра́шенный хра́ме, молниено́сная колесни́це, свети́льниче многосве́тлый./ Ра́дуйся, Богоро́дице, дванадесятосте́нный гра́де,/ и дверь златокова́нная, и черто́же светоза́рный,/ светлопозлаще́нная трапе́зо, Богоукра́шенная ски́ние,/ ра́дуйся, сла́вная Неве́сто, Со́лнце ка́плющая./ Ра́дуйся, еди́на души́ моея́ благоле́пие. Песнь 4 Ирмос: Царю́ царе́й,/ Яковы́й от Якова́го,/ Еди́н, Сло́ве, произше́дый,/ от Отца́ Безвино́внаго Равномо́щнаго Твоего́ Ду́ха/ апо́столом и́стинно посла́л еси́/ я́ко Благоде́теля, пою́щим:/ сла́ва держа́ве Твое́й, Го́споди. Припев: Святи́телю о́тче Дона́те, моли́ Бо́га о на́с. Царю́ царе́й в пресве́тлых Небесе́х ны́не предстоя́щий,/ зре́ния Единосу́щнаго в Трие́х Ипоста́сех Божества́ сподо́бивыйся,/ Боже́ственный иера́рше Дона́те,/ моли́ся, о́тче, о призыва́ющих тя,/ да, спа́сшеся от вся́ких зде скорбе́й, пое́м:/ сла́ва си́ле Твое́й, Го́споди. Припев: Святи́телю о́тче Дона́те, моли́ Бо́га о на́с. Царя́ Христа́ Бо́га на́шего, слове́сному Его́ ста́ду и́стинный архиере́й быв,/ труды́ и по́двиги во уче́нии ева́нгельскаго жития́ в позо́р всем предложи́л еси́, о́тче,/ твои́ми у́бо уче́нии и благоприя́тством вселе́нную воздви́гл еси́ гласи́ти:/ сла́ва си́ле Твое́й, Го́споди. Сла́ва Отцу́ и Сы́ну и Свято́му Ду́ху. Царь Небе́сный, за человеколю́бие Свое́ яви́выйся нам,/ прозре́ тя досто́йна благода́ти Своея́ сосу́да,/ очи́стившагося вся́каго мирска́го пристра́стия и плотски́х по́хотей./ Его́же, Бо́га и́стинна, ты, блаже́нне, словесы́ и чудодея́нием воспе́л еси́:/ сла́ва си́ле Твое́й, Го́споди. И ны́не и при́сно и во ве́ки веко́в. Ами́нь. Богородичен: Цари́це Небесе́ и земли́, Богома́ти Влады́чице Де́во,/ воспита́вшая пресладча́йшаго Сы́на Перворо́днаго, Иису́са Го́спода пречи́стыми сосцы́ Твои́ми,/ во избавле́ние от грех всего́ ми́ра,/ моли́ Его́, Человеколю́бца, да пода́ст нам чи́сте взыва́ти:/ сла́ва си́ле Твое́й, Го́споди. Песнь 5 Ирмос: Реши́тельное очище́ние грехо́в,/ огнедохнове́нную приими́те Ду́ха ро́су,/ о ча́да снегообра́зная, церко́вная!/ Ны́не от Сио́на бо изы́де Зако́н –/ языкоогнеобра́зная Ду́ха благода́ть. Припев: Святи́телю о́тче Дона́те, моли́ Бо́га о на́с. Разреши́вшаго у́зы сме́ртныя Го́спода Иису́са благода́тию,/ разреши́л еси́, о́тче блаже́нне, заимода́тельное рукописа́ние, воскреси́в ме́ртва,/ и́же поноси́ злоде́телю, хотя́щему взя́ти второ́е до́лжное,/ разреши́ и на нас востаю́щия враго́в ко́зни,/ подая́ нам Ду́ха благода́ть. Припев: Святи́телю о́тче Дона́те, моли́ Бо́га о на́с. Реше́ние грехо́вных плени́ц/ мно́гим, испове́дающимся чи́сте от се́рдца, сотвори́л еси́, всече́стне,/ в ча́да церко́вная приве́д, напои́л еси́ о́ныя из Сио́на исше́дшим зако́ном, Богоразу́мне,/ уча́ вся ве́рныя мольба́ми и посто́м приима́ти Ду́ха благода́ть. Сла́ва Отцу́ и Сы́ну и Свято́му Ду́ху. Реши́л еси́, преподо́бне, зе́льную печа́ль/ царя́ и цари́цы благочести́вых, и́же моли́ли тя,/ отгна́в от дще́ри их царе́вны му́чащаго ю де́мона,/ благодари́ша бо Бо́га, ра́достне диви́шася живу́щей в тебе́ Ду́ха благода́ти. И ны́не и при́сно и во ве́ки веко́в. Ами́нь. Богородичен: По рождестве́ Твое́м стра́ннем пребыла́ еси́ Де́вою,/ я́коже пре́жде: Бог бо бе рожде́йся, и претворя́яй вся во́лею,/ Безму́жная Мари́е Богоневе́стная. Песнь 6 Ирмос: Очище́ние нам, Христе́,/ и спасе́ние, Влады́ко,/ возсия́л еси́ от Де́вы,/ да, я́ко проро́ка от зве́ря морска́го пе́рсей Ио́ну,/ от тли исхити́ши/ всего́ Ада́ма всеро́дна па́дшаго. Припев: Святи́телю о́тче Дона́те, моли́ Бо́га о на́с. Очище́ние Це́ркве твоея́ бо́дрым пасо́мством от ерети́ческаго злове́рства/ и от вся́каго собла́зна сотвори́в, Богоно́се о́тче,/ зве́ря, челове́ческих душ губи́теля, уби́л еси́ моли́твами твои́ми. Припев: Святи́телю о́тче Дона́те, моли́ Бо́га о на́с. Очище́ние душе́внаго твоего́ Богозри́тельнаго смы́сла, о́тче Дона́те, соде́ловая,/ от пристра́стнаго жития́ и царе́вых трудо́в за труд не восхоте́л еси́ взя́ти,/ да от тлеро́дныя земли́ удо́бь исхити́шися. Сла́ва Отцу́ и Сы́ну и Свято́му Ду́ху. Очище́ние чу́дно бе́дствующей жене́/ от напра́снаго заимоистяза́тельнаго до́лга сотвори́л еси́, преподо́бне:/ ми́лостивно бо, ея́ скорбь услы́шав, воздви́гл му́жа уме́рша,/ и́же обличи́ оби́ду творя́щаго. И ны́не и при́сно и во ве́ки веко́в. Ами́нь. Богородичен: Очище́ние, Богороди́тельнице Де́во, тлеро́днаго сладостра́стия правове́рным подала́ еси́,/ из Тебе́ бо произше́д, Влады́ка Христо́с возста́ви ны, па́дшия,/ же́ртву хвале́ния Ему́ при́сно возноси́ти. Кондак, глас 8 Красото́ Це́ркве, утверди́вшияся на ка́мени – Боговоплоще́нном Спа́се Христе́,/ Богоправи́мое доброде́телей прави́ло,/ Дона́те, досточу́дный чудотво́рче,/ я́ко иера́рх име́еши дерзнове́ние всетворя́щему Бо́гу о лю́дех моли́тися,/ враго́в ви́димых и неви́димых предста́тельством твои́м свободи́ вопию́щия:/ сла́ва в Тро́ице Еди́ному Бо́гу. Икос Досто́йно в ми́ре жи́тельствуя,/ Боже́ственным любви́ Бо́жия пла́менем Боголюби́вое се́рдце твое́ распаля́я/ и Небе́сным духо́внаго исправле́ния огне́м умовре́дныя прегреше́ний людски́х пле́велы пожига́я,/ богомы́сленно Триипоста́снаго Бо́га пропове́дал еси́,/ Его́же Боже́ственным дарова́нием чуде́с ре́ки, Дона́те всехва́льне, источи́л еси́./ Те́мже вопие́м ти:/ ра́дуйся, от ю́ности воздержа́нию научи́вся;/ ра́дуйся, в мла́дости седи́нами ума́ благоукраси́вся./ Ра́дуйся, чи́стое житие́ в достосла́вном де́встве соверши́вый;/ ра́дуйся, посто́м и моли́твами Всеблаго́му Бо́гу на́шему угоди́вый./ Ра́дуйся, победи́в вся преле́стнаго сего́ земна́го ми́ра сла́сти;/ ра́дуйся, от лука́ваго де́мона приснонаноси́мыя отрази́в стра́сти./ Ра́дуйся, я́ко досто́ин па́стырь, на престо́л архиере́йский возведе́нный;/ ра́дуйся, па́ству твою́ на па́жити ева́нгельской до́бре пасы́й, ублаже́нный./ Ра́дуйся, испо́лнен я́влься ми́лостивых ко всем благотворе́нии;/ ра́дуйся, Богопоста́вленный столп архиере́йских удобре́ний./ Ра́дуйся, чуде́с во Христе́ пресла́вных в по́льзе сотвори́тель;/ ра́дуйся, в любо́вь Христо́ву мно́гих научи́тель./ Ра́дуйся, тебе́, приве́тствующе, вопие́м:/ сла́ва в Тро́ице Еди́ному Бо́гу. Песнь 7 Ирмос: Согла́сная возшуме́ орга́нская песнь/ почита́ти златосотворе́нный безду́шный истука́н;/ Уте́шителева же светоно́сная благода́ть повеству́ет,/ е́же вопи́ти:/ Тро́ице Еди́ная, Равноси́льная, Безнача́льная, благослове́нна еси́. Припев: Святи́телю о́тче Дона́те, моли́ Бо́га о на́с. Согла́сно покори́в те́ло ду́ху,/ Пренача́льней Боже́ственней Тро́ице боготворе́нным тобо́ю орга́ном/ воспе́л еси́, блаже́нне Дона́те, досто́йную песнь: аллилу́ия,/ Ю́же моли́, мо́лим тя, да благода́ть Ду́ха научи́т ны зва́ти ве́чно:/ Тро́ице Свята́я, благослове́нна еси́. Припев: Святи́телю о́тче Дона́те, моли́ Бо́га о на́с. Согла́сно отце́в святы́х догма́ты о Тро́йческом Богонача́лии,/ е́же ве́ровати, е́же сла́вити Еди́но Божество́ в Трие́х Ипоста́сех, кре́пце содержа́в,/ я́сно во вселе́нную пропове́дал еси́, всехва́льне,/ Ю́же ны́не несре́дственно на Небе́сных гора́х зри́ши, поя́ сла́дце:/ Тро́ице Безнача́льная, благослове́нна еси́. Сла́ва Отцу́ и Сы́ну и Свято́му Ду́ху. Согла́сно друголю́бием пода́ждь нам, иера́рше Христо́в,/ почита́ти во псалме́х и пе́нии Всеси́льнаго Бо́га и Творца́ на́шего/ и велича́ти Боговлады́чицу Де́ву Мари́ю,/ да безме́рная Его́ ми́лость предста́тельством Всечи́стыя Ма́тере/ возста́вит па́дшия ны́не ра́достне глаго́лати:/ Тро́ице Еди́ная, благослове́нна еси́. И ны́не и при́сно и во ве́ки веко́в. Ами́нь. Богородичен: Согла́сно прореко́ша святи́и проро́цы о Тебе́, Де́во Всечи́стая,/ я́ко роди́ши Бо́га воплоще́нна,/ мы же, сбытие́ в соверше́нстве ви́дяще,/ велича́ем Тя, Ма́терь Бо́га Вы́шняго,/ и сла́вим неизрече́нное Твое́ рождество́, моля́ще же Тя, глаго́лем:/ спаси́ ны, Влады́чице, от бед и скорбе́й, благослове́нна еси́. Песнь 8 Ирмос: Разреша́ет у́зы и ороша́ет пла́мень/ Трисве́тлый Богонача́лия о́браз, пою́т о́троцы:/ благослови́т же Еди́наго Спа́са и Вседе́теля,/ я́ко Благоде́теля,/ сотворе́нная вся́ческая тварь. Припев: Святи́телю о́тче Дона́те, моли́ Бо́га о на́с. Разреши́вшаго смерть Кресто́м Свои́м/ и пла́мене пагубоно́сных страсте́й богоподража́тельныя избавля́ющаго,/ Небе́снаго Царя́ богомы́сленне благослови́л еси́, о́тче, зовы́й:/ благослови́ Вседе́теля, вся́ческая тварь. Припев: Святи́телю о́тче Дона́те, моли́ Бо́га о на́с. Разреше́ние в ско́рбех и печа́лех наде́ждою на Всемо́щнаго Бо́га мно́гим пешехо́дцем/ волновоздвиза́емаго сего́ мо́ря по́дал еси́, досточу́дне Дона́те,/ уче́нии бо твои́ми уте́шены, вопие́м:/ благослови́ Го́спода, вся́ческая тварь. Сла́ва Отцу́ и Сы́ну и Свято́му Ду́ху. Разреши́л еси́ тучено́сныя небе́сныя о́блаки излия́ти дождь мно́гий/ мольба́ми твои́ми лити́йными, преподо́бне,/ царь бо самоде́ржец и вси Константино́поля гра́ждане,/ богоуго́дную твою́ по́мощь ви́девше, любо́вне глаго́лаша:/ благослови́ Го́спода, вся́ческая тварь. И ны́не и при́сно и во ве́ки веко́в. Ами́нь. Богородичен: Разреши́ла еси́, Богора́дованная Де́во, прама́терния кля́твы весь род челове́ч:/ воплоще́нный бо Твой Сын и Бог наш пострада́ за ны и умири́ Кро́вию Свое́ю Бо́га Отца́,/ да в животе́ ве́чнем спасе́мся, воспева́юще:/ благослови́ Святу́ю Тро́ицу и велича́й Богоро́дицу, вся́ческая тварь. Песнь 9 Ирмос: Ра́дуйся, Цари́це,/ матероде́вственная Сла́во,/ вся́ка бо удобообраща́тельная благоглаго́ливая уста́/ вити́йствовати не мо́гут,/ Тебе́ пе́ти досто́йно,/ изумева́ет же ум всяк Твое́ рождество́ разумети,/ те́мже Тя согла́сно сла́вим. Припев: Святи́телю о́тче Дона́те, моли́ Бо́га о на́с. Ра́дуйся, Богоизбра́нное христиа́нское свети́ло,/ просвети́вшее Богоразу́мия све́том вселе́нную, архиере́е Дона́те,/ незы́блемая Правосла́вия твердь,/ утверди́ ду́ши на́ша в ве́ре и любви́ пребыва́ти/ и присносу́щнаго Бо́га при́сно и согла́сно сла́вити. Припев: Святи́телю о́тче Дона́те, моли́ Бо́га о на́с. Ра́дуйся, всехва́льне Дона́те, боготка́нная правосла́внаго благоче́стия ри́зо,/ многоце́нными превели́ких доброде́телей би́серми боголе́пно удобре́нная,/ моли́ све́том оде́яющася Бо́га/ в све́тлую ве́чныя жи́зни ри́зу оде́ятися нам,/ да Его́ Творца́ согла́сно сла́вим. Сла́ва Отцу́ и Сы́ну и Свято́му Ду́ху. Ра́дуйся, богонасажде́ннаго са́да прему́дрый де́лателю,/ созда́вый храм че́стен и украси́вший той преизя́ществом во сла́ву Христа́, Безсме́ртнаго Царя́,/ и, испо́лнив те дни жи́зни и успну́в, ны́не чи́сте зри́ши в Небесе́х Бо́га,/ у Него́ же испроси́ нам во благоду́шии повсю́ду Его́ согла́сно сла́вити. И ны́не и при́сно и во ве́ки веко́в. Ами́нь. Богородичен: Ра́дуйся, Богома́ти, Де́во Мари́е, наде́ждо и предста́тельство христиа́нское,/ воплоти́вшемуся из Тебе́ Сы́ну Иису́су Христу́ и Тебе́, Влады́чице,/ в па́мять уго́дника ва́шего, Дона́та святи́теля, во усе́рдии моле́ние прино́сим:/ подади́те нам в Небе́сном жили́ще Тро́ицу со А́нгелы сла́вити. Светилен Богоявле́ния све́том свы́ше просвеще́нный/ и окропле́нный и́стины благода́тию, Богому́дре о́тче Дона́те,/ смире́ния Богочелове́ка Иису́са ревни́тель был еси́,/ благоугоди́в Ему́ архиере́йскою пра́востию и чудесы́ просвети́вся,/ те́мже, соверша́юще твою́ па́мять, сла́вим Го́спода Бо́га. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Златоте́чная Бо́жия реко́, небе́сными наводне́нная даро́в Ду́ха,/ неботе́чную ра́дости небе́сныя струю́ источа́й на скорбя́щия ду́ши на́ша/ и да́руй нам Твою́ по́мощь, да зове́м Ти:/ ра́дуйся, Ма́ти Госпо́дня.

Минея, 3 Июня, Канон святому Димитрию Глас 8 Песнь 1 Ирмос: Воду прошед, яко сушу,/ и египетскаго зла избежав,/ израильтя́нин вопияше:/ Изба́вителю и Богу нашему пои́м. Припев: Святы́й благове́рный кня́же Дими́трие, моли́ Бо́га о на́с. Многомилостивыя Твоея, Христе, помощи прошу,/ страстотерпца Твоего Дими́трия молитвами/ отве́рзи ми устне и просвети разум,/ да воспою светоносную его память че́стно. Припев: Святы́й благове́рный кня́же Дими́трие, моли́ Бо́га о на́с. Пое́м Христа Бога нашего, просла́вльшаго благороднаго Своего угодника,/ Емуже, Дими́трие, молися/ помиловати нас, рабы твоя. Сла́ва Отцу́ и Сы́ну и Свято́му Ду́ху. За́клан бысть в изгна́нии, идеже и венец прият от Бога,/ но паки возвратил еси многоцелебныя ти мощи в природное твое отечество,/ идеже струи́ исцелений неоскудно источаеши нам. И ны́не и при́сно и во ве́ки веко́в. Ами́нь. Богородичен: Заступнице христианом, Помощнице скорбящим,/ Богородице Препетая, спаси Тебе почитающих. Песнь 3 Ирмос: Несть свят, яко Господь,/ и несть праведен, яко Бог наш,/ егоже поет вся тварь:/ несть праведен, паче Тебе, Господи. Припев: Святы́й благове́рный кня́же Дими́трие, моли́ Бо́га о на́с. От младых ногтей житие стяжа непорочно, добре преочи́стив свою душу,/ на высоту востече отроческих добро дея́ний,/ тем, благородне, со Христом царствуеши во веки. Припев: Святы́й благове́рный кня́же Дими́трие, моли́ Бо́га о на́с. От враждебнаго раба и безчеловечнаго пролиял еси кровь свою неповинно, благоверный Димитрие,/ и сего ради вселися в вечная благая,/ яже уготова Бог любящим Его. Сла́ва Отцу́ и Сы́ну и Свято́му Ду́ху. Кровь свою, яко алава́стр мира, принесе Тебе угодник Твой Димитрий,/ егоже молитвами, Христе,/ возвыси рог христианский и стране нашей победы на враги даруй. И ны́не и при́сно и во ве́ки веко́в. Ами́нь. Богородичен: Тебе вси и́мамы прибежище, стену и помощь христиане,/ и Тебе славим немолчно, Безневестная. Седален, глас 8 Вседушно измлада Христа возлюбив, Того премудростию наставляем,/ уступил еси земное царство заклавшему тя неправедно властолюбцу и губителю,/ и сего ради ныне на лоне Авраа́мле почиваеши, со Ангелы веселяся, Дими́трие благородне,/ моли Христа Бога грехом оставление даровати, чтущим любовию святую память твою. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Безневестная Чистая Дево Богородице, Едина верным Предста́тельнице и покрове,/ бед, и скорбей, и лютых обстоя́ний всех нас избави,/ иже на Тя надежду имущих,/ и спаси души наша Божественными Своими молитвами. Песнь 4 Ирмос: Услышах, Господи,/ смотре́ния Твоего таинство,/ разумех дела Твоя/ и прославих Твое Божество. Припев: Святы́й благове́рный кня́же Дими́трие, моли́ Бо́га о на́с. Во цвете ю́ностном, во младенческом незлобии мира красоту́ оставил еси,/ пролия́ кровь свою неповинно,/ и ныне Небесных благ наслаждаешися с первородными множествы, Димитрие. Припев: Святы́й благове́рный кня́же Дими́трие, моли́ Бо́га о на́с. Всемы́сленно последуя сродником своим,/ Роману и Давиду, самобра́тным по плоти,/ неправедно заклан бысть, якоже и о́на,/ с ними же молися благостроину быти отечеству твоему. Сла́ва Отцу́ и Сы́ну и Свято́му Ду́ху. Завистию властолю́бною разжен бысть раб, убийца твой,/ закала́ет тя, яко а́гня незлобиво,/ сам же праведнаго возмездия не убежа́. И ны́не и при́сно и во ве́ки веко́в. Ами́нь. Богородичен: Вышшу Тя всех и святейшу Небесных чинов прославляем/ и велегласно вопием:/ о Мати Божия, певцы Своя сохрани и поганых нашествия разру́ши. Песнь 5 Ирмос: Господи Боже наш, мир даждь нам,/ Господи Боже наш, стяжи́ ны,/ Господи, разве Тебе иного не вемы,/ Имя Твое именуем. Припев: Святы́й благове́рный кня́же Дими́трие, моли́ Бо́га о на́с. Господь и Бог наш услыша воздыхание твое и слезы,/ прият кровь твою, якоже Авеля праведнаго,/ сего ради с ним безконечно царствуеши. Припев: Святы́й благове́рный кня́же Дими́трие, моли́ Бо́га о на́с. Тезоименитно мирото́чцу, Димитрие, от Бога стяжа́ именова́ние,/ с ним же молися покорити под нозе стране нашей варварская стремления. Сла́ва Отцу́ и Сы́ну и Свято́му Ду́ху. Яко крин, мученическою светлостию процвел еси,/ действием Пресвятаго Духа благовонную благодать изцелений источаеши верным/ от цельбоноснаго ти гроба. И ны́не и при́сно и во ве́ки веко́в. Ами́нь. Богородичен: Укрепи, Владычице, присносла́вящих Тя, на супротивныя враги,/ яко праведнаго царя Давида на Голиафа,/ да Тебе славяще воспеваем:/ радуйся, покрове и Заступнице Христианом. Песнь 6 Ирмос: Очисти мя, Спа́се,/ многа бо беззакония моя,/ и из глубины зол возведи, молюся:/ к Тебе бо возопих и услыша мя,/ Боже спасения моего. Припев: Святы́й благове́рный кня́же Дими́трие, моли́ Бо́га о на́с. Всеоружством духа благодати вооруже́н быв,/ и непобедим заступник отечеству своему показался еси,/ егоже, благоверне, сохраняй от враг ненаветно. Припев: Святы́й благове́рный кня́же Дими́трие, моли́ Бо́га о на́с. В непорочну жертву принесе́ себе,/ в неправедно вда себе заколе́ние, яко а́гня незлобиво,/ и сего ради со Ангелы ликуеши, Небесных благ наслаждаяся. Сла́ва Отцу́ и Сы́ну и Свято́му Ду́ху. Иже светлый твой праздник совершающих, Богомудре,/ моли град твой необорим сохранити,/ и отечеству на враги одоление даровати. И ны́не и при́сно и во ве́ки веко́в. Ами́нь. Богородичен: Душевныя ми страсти, Богородице, исцели,/ Иже безстрастия бывши источник и просветивши лики благоверных Рождеством Своим. Кондак, глас 8 Светило явися пресветлое днесь Божественная память твоя,/ Богодарованная ти чудеса от всяких многоразличных недуг подают исцеления/ с верою призывающим тя,/ созывающи нас к похвалению прославльшаго тя Бога,/ егоже моли, страстотерпче благоверный Димитрие,/ мир мирови даровати/ и от видимых враг люди невредны сохранити, да зовем ти:/ радуйся, ты бо еси утверждение граду нашему. Икос Славу земную, яко истле́ющую оставль, нетленную на Небесех наследовал еси,/ чистый бо сосуд Святому Духу от младых ногтей быв,/ и закла́н бысть, яко непорочное а́гня,/ отнюду же Мздовозда́тель Бог, видев кротость твою, незлобие, да́ром чудес обогати тя,/ тем ныне пребываеши со Ангельскими лики и с перворо́дными множествы в неизглаголанней радости, Богомудре Дими́трие страстоте́рпче,/ моли непрестанно без вреда сохранити отечество твое и люди твоя, да зовем ти:/ радуйся, ты бо еси утверждение граду нашему. Песнь 7 Ирмос: Божия снизхождения/ огнь устыде́ся в Вавило́не иногда́,/ сего ради о́троцы в пещи́ ра́дованною ногою,/ яко во цве́тнице, ликующе, поя́ху:/ благословен еси, Боже отец наших. Припев: Святы́й благове́рный кня́же Дими́трие, моли́ Бо́га о на́с. Ни земнаго царства благородием, ни материя разлучения яко младенец не внимаше,/ но мужеу́мным смыслом вся сия предал еси в руце Богови,/ сам же на заколе́ние вдаде себе, вопия́ше:/ отец наших Боже, благослове́н еси. Припев: Святы́й благове́рный кня́же Дими́трие, моли́ Бо́га о на́с. Всенародный глас ти приносим и мольбу, к тебе припа́дающе, благоверный Дими́трие,/ просим мира и грехом оставление поющим:/ отец наших Боже, благослове́н еси. Сла́ва Отцу́ и Сы́ну и Свято́му Ду́ху. Лучею крови твоея ту́чу бесо́вскаго озлобле́ния изсушил еси,/ чудоде́йственным дея́нием потопил еси пламень недуг и страсте́й наших, Богоблаженне. И ны́не и при́сно и во ве́ки веко́в. Ами́нь. Богородичен: Закона, Дево, пременила еси естество Божественным Своим зачатием,/ паче естества родила еси Бога, вопиющим:/ благослове́н Бог отец наших. Песнь 8 Ирмос: Седмери́цею пещь/ халде́йский мучи́телъ/ Богочести́вым неи́стовно разжже́,/ силою же лу́чшею спасе́ны сия видев,/ Творцу и Изба́вителю вопия́ше:/ отроцы, благословите,/ священницы, воспойте,/ людие, превозносите во вся веки. Припев: Святы́й благове́рный кня́же Дими́трие, моли́ Бо́га о на́с. Волнующеся море заклания твоего Божественным окормлением невредно преплыл еси,/ зависть тлетворнаго змия глубиною кро́ве твоея, Дими́трие, потопил еси,/ тем райская небурная пристанища достигл еси, вопиюще:/ отроцы, благословите, священницы, воспойте, людие, превозносите во вся веки. Припев: Святы́й благове́рный кня́же Дими́трие, моли́ Бо́га о на́с. Не доволен бяше убийца твой о закла́нии твоем,/ но тщашеся от всех утаити злое умышление свое,/ но бысть всем я́ве,/ праведнаго же Суда Божия не може́ избежати. Сла́ва Отцу́ и Сы́ну и Свято́му Ду́ху. Псаломския песни, яко венец, в память твою приносим ти, блаженне,/ молим тя подви́гнутися на мольбу́ к общему Владыце всех,/ просити мира мирови, град же и люди твоя избавити от всяких бед и напастей. И ны́не и при́сно и во ве́ки веко́в. Ами́нь. Богородичен: Гордыню и шата́ния, Богородице, низложи и советы неправедных разори,/ и зачина́ющих ра́ти погуби, и благове́рных десницу возвыси,/ да Твой, Пресвятая Дево, праздник славим. Песнь 9 Ирмос: Вои́стинну Богородицу/ Тя исповедуем,/ спасе́ннии Тобою, Дево Чистая,/ с Бесплотными лики Тя велича́юще. Припев: Святы́й благове́рный кня́же Дими́трие, моли́ Бо́га о на́с. Удо́брен добро́тою страданий твоих,/ победы на главе венец нося, на Небо востече яко преудо́брен победитель,/ тем нас всегда поминай, да тя непрестанно величаем. Припев: Святы́й благове́рный кня́же Дими́трие, моли́ Бо́га о на́с. Удо́брен добро́тою страданий твоих,/ победы на главе венец нося, на Небо востече яко преудо́брен победитель,/ тем нас всегда поминай, да тя непрестанно величаем. Сла́ва Отцу́ и Сы́ну и Свято́му Ду́ху. О Троице Пресвятая, благоприятно малое сие песнословие сотвори,/ и шу́яго мя стояния на Суде избави, и плени́цу согрешений моих расто́ргни/ молитвами благовернаго Дими́трия, да Тя непрестанно величаем. И ны́не и при́сно и во ве́ки веко́в. Ами́нь. Богородичен: Бога рождшая, Дево,/ уязвленную грехми душу мою/ и вечнаго мя пламени избави молитвами Своими. Светилен Яко цвет краснейший, от благовернаго прозябл еси корене, благочестне Дими́трие,/ обагрением страдания твоего, яко царскою порфирою, обагрился еси кровию,/ тем Божественную ти память любовию творящих от бед спасай. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Стоящи окрест Тебе, девы Богомудрыя, Богороди́тельнице Мари́е,/ якоже царевы дщери, Сыну Твоему приведо́шася, Невесто Лепопречи́стая, яко Царю всяческих, егоже, Мати Дево Отрокови́це, о нас моли.

Минея, 4 Октября, Канон святителя Варсонофия Глас 8 Песнь 1 Ирмос: Во́ду проше́д, яко су́шу,/ и еги́петскаго зла избежа́в,/ изра́ильтянин вопия́ше:/ Изба́вителю и Богу нашему пои́м. Припев: Святи́телю о́тче Варсоно́фие, моли́ Бо́га о на́с. Иже пресла́вную память пра́зднующих святи́теля Твоего Варсоно́фия,/ Слово Божие Единоро́дное,/ слове́сную же́ртву принести́ к Тебе сподо́би нас/ и уго́дника Твоего верно восхвали́ти пода́ждь нам. Припев: Святи́телю о́тче Варсоно́фие, моли́ Бо́га о на́с. Святи́телю отче наш Варсоно́фие,/ моли́ся Христу Богу,/ да по достоя́нию возмо́жем принести́ тебе пение во хвале́ние/ и Христа просла́вим. Сла́ва Отцу́ и Сы́ну и Свято́му Ду́ху. Неусы́пными моли́твами твоими, свя́те,/ страстны́я наша неду́ги уврачу́й,/ душе́вныя наша болезни исцели́/ и прегреше́ний оставле́ние у Христа нам испроси́. И ны́не и при́сно и во ве́ки веко́в. Ами́нь. Богородичен: Прииди́те, де́вы и ма́тери,/ воспо́йте Пречи́стей Божией Матери глас Гаврии́ла Архангела:/ радуйся, Обра́дованная, ра́досте всего мира,/ и ра́достию Твоею обра́дуй души всех, пою́щих Тя. Песнь 3 Ирмос: Ты еси утвержде́ние/ притека́ющих к Тебе, Господи,/ Ты еси свет омраче́нных,/ и поет Тя дух мой. Припев: Святи́телю о́тче Варсоно́фие, моли́ Бо́га о на́с. Царе́вым повеле́нием первую обитель прекра́сну в новопросвеще́нном граде Каза́ни воздви́гл еси/и в той многотру́дне подви́глся еси,/ и многих ду́ши ко Христу привел еси. Припев: Святи́телю о́тче Варсоно́фие, моли́ Бо́га о на́с. Ви́дехом и почуди́хомся, па́че же стра́хом и радостною бы́хом одержи́ми,/ це́лы бо и неразруши́мы обрето́шася честны́я твоя мощи, святителю Варсоно́фие,/ и вси единогла́сно возопие́м:/ слава Христу Богу. Сла́ва Отцу́ и Сы́ну и Свято́му Ду́ху. Ча́емаго, еже в будущем ве́це, наслажде́ния, преподо́бне, дости́гл еси,/ и ныне во свете Святыя Троицы лику́еши поя́ со Ангелы:/ Свят еси, Господи. И ны́не и при́сно и во ве́ки веко́в. Ами́нь. Богородичен: Ублажи́м Божию Матерь Боже́ственными пе́сньми:/ иде́же бо сла́вится Преблагослове́нная Богородица,/ та́мо де́моном стра́шное исчезнове́ние, Христи́аном же кре́пость и утвержде́ние. Седален, глас 4 От земли́ Воззва́вый ва́с к ве́чным оби́телем соблюда́ет и по сме́рти телеса́ ва́ша, отцы́ преподо́бнии: вы́ бо в целому́дрии и чистоте́ житие́ по́жили есте́, Гу́рие богому́дре и Варсоно́фие преди́вне. Того́ ра́ди любо́вию почита́ем святу́ю па́мять ва́шу и мо́лим: моли́те Христа́ Бо́га спасти́ся на́м. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Егда́ хощу́ предста́ти пред лице́м Созда́теля моего́ в де́нь пра́веднаго Суда́ Его́, тогда́, Влады́чице, предста́ни ми́ и му́ки изба́ви мя́ ве́чныя, моли́тву сотвори́вши о упова́ющем на Тя́, Свята́я Богоро́дице, да не сни́ду во а́д, но да спасу́ся Твои́м заступле́нием. Песнь 4 Ирмос: Ты моя кре́пость, Господи,/ Ты моя и си́ла,/ Ты мой Бог, Ты мое ра́дование,/ не оста́вль не́дра О́тча/ и нашу нищету́ посети́в./ Тем с проро́ком Авваку́мом зову́ Ти:/ си́ле Твоей сла́ва, Человеколю́бче. Припев: Святи́телю о́тче Варсоно́фие, моли́ Бо́га о на́с. Патриа́рха Авраа́ма до́блесть восприи́м, святи́телю Варсоно́фие,/ а́лчныя кормя́ и жадныя напая́я,/ и не иму́щим неску́дна тре́бования подава́я,/ душе́вным и теле́сным хле́бом кормя́ вся приходя́щия/ и вруче́ное тебе ста́до. Припев: Святи́телю о́тче Варсоно́фие, моли́ Бо́га о на́с. Му́жественне терпя́ от неве́рных, в пле́не сый,/ и смире́ния ра́ди нра́ва/ в кро́тость преложи́л еси неве́рных,/ и сего́ ра́ди от Бога мзду́ восприи́м, святи́телю Варсоно́фие. Сла́ва Отцу́ и Сы́ну и Свято́му Ду́ху. Пресла́вными чудотворе́нии от Бога одарова́ни быша святи́и чудотво́рцы,/ исцеля́юще неду́ги и отгоня́юще де́моны,/ моли́те изба́витися нам от бед вашими моли́твами. И ны́не и при́сно и во ве́ки веко́в. Ами́нь. Богородичен: К Преблаже́нней Де́ве и Богоро́дице, о преподо́бнии,/ припади́те и моли́твы простри́те,/ да умо́лит Сына Своего, Христа Бога нашего,/ пода́ти христолюби́вому наро́ду нашему здра́вие и на враги́ побе́ду. Песнь 5 Ирмос: Вску́ю мя отри́нул еси́/ от лица́ Твоего, Све́те незаходи́мый,/ и покры́ла мя есть чу́ждая тьма, окая́ннаго;/ но обрати́ мя и к све́ту за́поведей Твои́х/ пути́ моя напра́ви, молю́ся. Припев: Святи́телю о́тче Варсоно́фие, моли́ Бо́га о на́с. Му́драя уче́ния всем показа́л еси/ и душе́вное естество́ чи́сто стя́жал еси,/ презира́я плоть, прехо́дит бо:/ и сего ра́ди со А́нгелы Престо́лу Влады́чню предстои́ши, святи́телю,/ моля́ Христа Бога спасти́ся нам. Припев: Святи́телю о́тче Варсоно́фие, моли́ Бо́га о на́с. Воспева́ющих тя и при́сно блажа́щих,/ и па́мять твою ве́рно прославля́ющих, святи́телю Варсоно́фие,/ освяти́ и просла́ви,/ и от напа́стей и бед изба́ви. Сла́ва Отцу́ и Сы́ну и Свято́му Ду́ху. Боже́ственным манове́нием, о́тче,/ плотско́е жела́ние отри́нув,/ и после́довал еси любо́вию зову́щему тя Христу,/ блаже́нне Варсоно́фие, святи́телю всече́стне. И ны́не и при́сно и во ве́ки веко́в. Ами́нь. Богородичен: Правове́рно чту́щия Тя лю́ди/ и ико́не Твоей святе́й любе́зно покланя́ющияся,/ о Бо́жия Ма́ти, спаси́/ и от клеветы́ злых челове́к изба́ви. Песнь 6 Ирмос: Моли́тву пролию́ ко Го́споду/ и Тому́ возвещу́ печа́ли моя,/ яко зол душа́ моя испо́лнися,/ и живо́т мой а́ду прибли́жися,/ и молю́ся, яко Ио́на:/ от тли, Бо́же, возведи́ мя. Припев: Святи́телю о́тче Варсоно́фие, моли́ Бо́га о на́с. Ки́ими похвала́ми возмо́жем тебе́ похвали́ти,/ преподо́бне святи́телю Варсоно́фие?/ По преставле́нии бо твое́м це́лы и нетле́нны обрето́шася цельбоно́сныя твоя мо́щи. Припев: Святи́телю о́тче Варсоно́фие, моли́ Бо́га о на́с. Вся сотво́ршаго, и всю вселе́нную кормя́щаго Сы́на Бо́жия/ и А́нгельскаго Царя́ Преве́чнаго, Спа́са Христа́/ умоли́, святи́телю Варсоно́фие, да пода́ст лю́дем нашим здра́вие,/ и земны́я плоды́ умно́жит, и гре́хи отпу́стит. Сла́ва Отцу́ и Сы́ну и Свято́му Ду́ху. И́стиннаго всех Па́стыря Христа́, святи́телю Варсоно́фие,/ моли́ со все́ми освяще́нными ли́ки,/ да спасе́т лю́ди по вели́цей Его ми́лости,/ и сохране́ни бу́дем от диа́вольских кова́рств, чту́щии тя. И ны́не и при́сно и во ве́ки веко́в. Ами́нь. Богородичен: Боже́ственней Твое́й покланя́емся ико́не, Богоро́дице,/ прося́ще от Тебе́ вели́кия ми́лости:/ да́руй, Влады́чице, согреше́ний оставле́ние рабо́м Твои́м,/ Еди́на Благослове́нная. Кондак, глас 4 Чу́вственныя стра́сти победи́в, чистото́ю, я́ко со́лнце, возсия́л еси,/ чи́сто житие́ до конца́ сохрани́в, и от неве́рия в ве́ру мно́гих ко Христу́ приве́л еси,/ и Того ра́ди от Бо́га нетле́нием почте́н был еси и чудесы́ удивля́ем./ Мо́лим тя, святи́телю Гу́рие, моли́твами твои́ми от бед изба́ви нас, да зове́м ти:/ ра́дуйся, о́тче преди́вный, гра́ду Каза́ни похвала́ и утвержде́ние. Икос Пе́рвый се́ятель был еси духо́вных доброде́телей и пе́рвый па́стырь и Це́ркви нача́льник,/ пе́рвый архиере́й и учи́тель христиа́нскому зако́ну в новопросвеще́нном гра́де Каза́ни,/ ве́рныя лю́ди кормя́ хле́бом уче́ния благода́тнаго зако́на, напая́я пи́вом духо́вныя благода́ти,/ неве́рный же уча́ позна́ти и́стину и крести́тися святы́м Креще́нием,/ и мно́жество наро́да от неве́рия в ве́ру ко Хри́сту приве́л еси, и чи́стым житие́м Бо́гу угоди́ти наста́вив их./ Сего́ ради Христо́с свято́му и трудолюбе́зному твое́му́ те́лу дарова́ нетле́ние и дар чудотворе́ния./ Приходя́щии бо с ве́рою к цельбоно́сным твоим моще́м прие́млют неоску́дная страсте́й премене́ния/ и боле́зней исцеле́ние, и грехо́в проще́ние/ твои́ми, свя́те, ко Христу́ моли́твами, да зове́м ти:/ ра́дуйся, о́тче преди́вный, гра́ду Каза́ни похвала́ и утвержде́ние. Песнь 7 Ирмос: В нача́ле зе́млю основа́вый/ и небе́са сло́вом утверди́вый,/ благослове́н еси во ве́ки, Го́споди, Бо́же оте́ц на́ших. Припев: Святи́телю о́тче Варсоно́фие, моли́ Бо́га о на́с. Всех благи́х о́браз был еси, к вы́шнему житию́ веду́щ смире́нием и кро́тостию./ Те́мже и Христос па́стыря тя лю́дем Свои́м устроя́ет, пою́щим:/ благослове́н Бог оте́ц на́ших. Припев: Святи́телю о́тче Варсоно́фие, моли́ Бо́га о на́с. Не преста́й, Варсоно́фие, моля́ся о духо́вных твои́х ча́дех,/ и́хже духо́вным уче́нием породи́л еси, да пое́м:/ благослове́н Бог оте́ц на́ших. Сла́ва Отцу́ и Сы́ну и Свято́му Ду́ху. Иже твою́ пресла́вную па́мять пра́зднующим, святи́телю Варсоно́фие,/ моли́ изба́витися всем от разли́чных бед и напа́стей,/ да вси зове́м:/ благослове́н Бог оте́ц на́ших. И ны́не и при́сно и во ве́ки веко́в. Ами́нь. Богородичен: Вопло́щся от пречи́стых Твои́х ложе́сн Бо́жие Сло́во, Де́во Пречи́стая,/ всех к Богоразу́мию наста́ви, да пое́м Ему:/ благослове́н Бог оте́ц на́ших. Песнь 8 Ирмос: На горе́ святе́й просла́вльшася/ и в купине́ огне́м/ Присно де́вы Моисе́ови та́йну я́вльшаго,/ Го́спода по́йте/ и превозноси́те во вся ве́ки. Припев: Святи́телю о́тче Варсоно́фие, моли́ Бо́га о на́с. Любому́дрства душе́внаго не премо́же теле́сная твоя́ боле́знь, о́тче:/ о Бо́зе бо ре́вность восприи́м, в ничто́же вменя́еши мимоходя́щую скорбь,/ Того́ ра́ди ве́чныя боле́зни избе́гл еси. Припев: Святи́телю о́тче Варсоно́фие, моли́ Бо́га о на́с. Боле́ у́бо боле́знию боле́зненне, да мимотече́щи су́етных боле́зней/ и ны́не на Небесе́х со А́нгельскими ли́ки предстои́ши Святе́й Тро́ице, зовы́й:/ вся дела́ Госпо́дня Го́спода по́йте и превозноси́те Его во ве́ки. Сла́ва Отцу́ и Сы́ну и Свято́му Ду́ху. Яко бо ино́ю пи́щею пита́яся,/ зо́льным поще́нием и всено́щным стоя́нием изнуря́я плоть твою́,/ поя́ непреста́нно:/ вся дела́ Госпо́дня Го́спода по́йте и превозноси́те Его во ве́ки. И ны́не и при́сно и во ве́ки веко́в. Ами́нь. Богородичен: Пречи́стая Богоро́дице, приими́ недосто́йную моли́тву мою/ и сохрани́ мя от клеветы́ злых челове́ков/ и от напра́сныя сме́рти,/ и да́руй мне пре́жде конца́ покая́ние. Песнь 9 Ирмос: Проя́вленное на горе́ законополо́жнику во огни́ и купине́/ Рождество́ Присноде́вы,/ в на́ше ве́рных спасе́ние/ пе́сньми немо́лчными велича́ем. Припев: Святи́телю о́тче Варсоно́фие, моли́ Бо́га о на́с. Пра́зднующим све́тло па́мять обре́тения честны́х моще́й твои́х лю́дем на́шим мир испроси́/ и усо́бныя бра́ни укроти́, и изба́ви нас от нахожде́ния пога́ных,/ и клеветнико́в че́люсти сокруши́. Припев: Святи́телю о́тче Варсоно́фие, моли́ Бо́га о на́с. Свобо́ден твой ум от страсте́й соблю́д, и сосу́д освяще́н Ду́ху Пресвято́му был еси,/ и Христа́ прии́м в се́рдцы твое́м,/ и чудотво́рец яви́лся еси, прогоня́я де́моны./ Сего́ ра́ди мо́лим тя изба́витися нам от сете́й их твои́ми, свя́те, моли́твами. Сла́ва Отцу́ и Сы́ну и Свято́му Ду́ху. Царю́ сил Вы́шних, Христе́, кре́постию десни́цы Твоея́ покори́ враги́ нечести́выя,/ и лю́ди Твоя́ спаси́, и земны́я плоды́ умно́жи. И ны́не и при́сно и во ве́ки веко́в. Ами́нь. Богородичен: На моле́ние мое умилосе́рдися и ра́дость ми в печа́ли ме́сто да́руй, Влады́чице,/ и от клеветы́ злых челове́к изба́ви мя, да пою́ Ти:/ ра́дуйся, Обра́дованная, с Тобо́ю Госпо́дь. Светилен Егда́ у́бо честны́я ва́ша и святы́я мо́щи нетле́нны обрето́шася, тогда́ благоуха́ние от гробо́в ва́ших изноша́шеся, исцеля́ющее неду́ги и отгоня́ющее ду́хи лука́выя. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Вознеси́, Богоро́дице, ро́г Це́ркви, и наро́ду на́шему пода́ждь на враги́ одоле́ние и кре́пость, и це́рковь, Чи́стая, утверди́, и лю́ди Твоя́ поми́луй, да Тя́ вся́к язы́к христиа́нский велича́ет.

Минея, 17 Февраля, Канон Глас 1 Песнь 1 Ирмос: Твоя́ победи́тельная десни́ца/ боголе́пно в кре́пости просла́вися:/ та бо, Бессме́ртне,/ я́ко всемогу́щая, проти́вныя сотре́,/ изра́ильтяном путь глубины́ новосоде́лавшая. Припев: Преподо́бне о́тче Варнáво, моли́ Бо́га о на́с. Благода́тную по́мощь Твою́, Го́споди, ниспосли́ нам,/ воспе́ти уго́дника Твоего́, Варна́ву Гефсима́нского,/ благоче́стия подви́жника и оби́тели Се́ргиевы украше́ние. Припев: Преподо́бне о́тче Варнáво, моли́ Бо́га о на́с. Ча́до ми́лости Госпо́дни роди́телем твои́м был еси́, свя́те./ Те́мже и лю́ди, о́крест су́щий, ви́дяще сие́,/ зело́ ра́довахуся, благодаря́ще Бога. Сла́ва Отцу́ и Сы́ну и Свято́му Ду́ху. Аще и на́йде на тя боле́знь тя́жкая во ю́ности твое́й, о́тче,/ оба́че десни́цею Госпо́днею охраня́ем, я́ко избра́нник Бо́жий,/ здрав яви́лся еси́. И ны́не и при́сно и во ве́ки веко́в. Ами́нь. Богородичен: Ма́ти Де́во, Всеми́лостивая Вла́дычице,/ ве́дущая на́ша не́мощи душе́вныя и теле́сныя,/ сохрани́ нас под кро́вом Твои́м. Песнь 3 Ирмос: Еди́не ве́дый челове́ческого существа́ не́мощь/ и ми́лостивно в не вообра́жься,/ препоя́ши мя с высоты́ си́лою,/ е́же вопи́ти Тебе́, Святы́й:/ одушевле́нный Хра́ме неизрече́нный сла́вы Твоея́, Человеколю́бче. Припев: Преподо́бне о́тче Варнáво, моли́ Бо́га о на́с. Призва́ние ко и́ночеству предзре́ся в тебе́, блаже́нне, еще́ о́троку су́щу,/ егда́ пе́рвее у гро́ба преподо́бного Се́ргия моли́лся еси́. Припев: Преподо́бне о́тче Варнáво, моли́ Бо́га о на́с. Жела́ние послужи́ти Бо́гу име́я, о́тче,/ во оби́тель Святы́я Тро́ицы прише́л еси́,/ иде́же нача́ло спасе́ния твоего́ положи́. Сла́ва Отцу́ и Сы́ну и Свято́му Ду́ху. Ви́дяще любо́вь твою́ к уедине́нному житию́, преподо́бне,/ и предзря́ще служе́ние твое́ наро́ду Бо́жию,/ а́вва Анто́ний со ста́рцы посла́ша тя во оби́тель Пресвяты́я Богоро́дицы,/ Гефсима́ния нарица́емую. И ны́не и при́сно и во ве́ки веко́в. Ами́нь. Богородичен: О Пресвята́я Де́во, Путеводи́тельнице ве́рных!/ Ко стези́ покая́ния нас напра́ви/ и спаси́ ду́ши на́ша. Седален, глас 2 Любо́вь Христо́ву ве́лиим смире́нием стяжа́л еси́,/ преподо́бне о́тче Варна́во,/ тече́ние живота́ твоего́ Бо́гу вверя́я/ и при́сно смотре́нию Госпо́дню ра́дуяся. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Ма́ти Бо́жия, благослове́нная Мари́е,/ лю́ди Твоя́, во ско́рби су́щия,/ ми́лостию Твое́ю не оста́ви. Песнь 4 Ирмос: Го́ру Тя, благода́тию Бо́жиею приосене́нную,/ прозорли́выма Авваку́м усмотри́в очи́ма,/ из Тебе́ изы́ти Изра́илеву провозглаша́ше Свято́му/ во спасе́ние на́ше и обновле́ние. Припев: Преподо́бне о́тче Варнáво, моли́ Бо́га о на́с. В ми́ре ско́рбни бу́дете, но дерза́йте, я́ко Аз победи́х мир,/ рекл еси́, Го́споди, Твои́м ученико́м./ Сего́ ра́ди скорбя́щим уте́шители ди́вныя от избра́нных твои́х да́руеши. Припев: Преподо́бне о́тче Варнáво, моли́ Бо́га о на́с. Ско́рби наро́да Бо́жия позна́в,/ уте́шитель при́сный и ско́рый лю́дем яви́лся еси́,/ о́тче Варна́во преми́лостиве,/ те́мже тя любо́вию ублажа́ем. Сла́ва Отцу́ и Сы́ну и Свято́му Ду́ху. Мно́го боле́зновал еси́ о приходя́щих к тебе́, преподо́бне о́тче,/ те́мже и сих призыва́л еси́ непра́вды и прегреше́ния своя́ слеза́ми покая́ния омыва́ти/ и во вся́цем благоче́стии и чистоте́ пребыва́ти. И ны́не и при́сно и во ве́ки веко́в. Ами́нь. Богородичен: Ма́ти Пречи́стая, Огнь Боже́ственный во чре́ве прии́мшая несказа́нно,/ непра́вды и прегреше́ния на́ша попали́ благода́тию Сы́на Твоего́. Песнь 5 Ирмос: Твой мир даждь нам, Сы́не Бо́жий,/ ино́го бо, ра́зве Тебе́, бо́га не зна́ем,/ и́мя Твое́ имену́ем,/ я́ко Бог живы́х и ме́ртвых еси́. Припев: Преподо́бне о́тче Варнáво, моли́ Бо́га о на́с. Ева́нгельская словеса́ о до́бром па́стыре в се́рдце твое́м слага́я, преподо́бне,/ мно́гое попече́ние о приходя́щих к тебе́ име́л еси́/ и, я́ко чадолюби́вый оте́ц, сих утеша́л еси́. Припев: Преподо́бне о́тче Варнáво, моли́ Бо́га о на́с. Си́рых, боле́знуюшкх и о гресе́х свои́х скорбя́щих/ во мно́жестве привле́кл еси́, о́тче пресла́вне Варна́во,/ и сих сло́вом кро́тким твои́м врачева́л еси́. Сла́ва Отцу́ и Сы́ну и Свято́му Ду́ху. Та́йная челове́ков прозрева́л еси́, о́тче преподо́бне,/ и я́звы грехо́вныя цели́л еси́ да́нною тебе́ благода́тию,/ та́же, бу́дущая прови́дя, лю́ди ко и́стине направля́л еси́. И ны́не и при́сно и во ве́ки веко́в. Ами́нь. Богородичен: Ско́рби и печа́ли челове́ков ве́си, Ма́ти Пресвята́я,/ те́мже и Небе́сною любо́вию Твое́ю ве́рно сия́ врачу́еши. Песнь 6 Ирмос: Обы́де нас после́дняя бе́здна,/ несть избавля́яй,/ вмени́хомся я́ко о́вцы заколе́ния./ Спаси́ лю́ди Твоя́, Бо́же наш,/ Ты бо Кре́пость немотству́ющих и исправле́ние. Припев: Преподо́бне о́тче Варнáво, моли́ Бо́га о на́с. Обы́дет бе́здна беззако́ния Росси́йскую зе́млю,/ несть избавля́яй и мно́зи ве́рнии вменя́тся я́ко о́вцы заколе́ния,/ оба́че даст Госпо́дь кре́пость немощству́ющим и избавле́ние, –/ проро́чески рекл еси, преподо́бне. Припев: Преподо́бне о́тче Варнáво, моли́ Бо́га о на́с. Дни́е гряду́т, егда́ напа́стьми тьмы безбо́жия Це́рковь Росси́йская обурева́ема бу́дет,/ но, Сама́го Христа́ иму́щи Ко́рмчого,/ ти́хое приста́нище обря́щет, возсия́вшу со́лнцу ве́ры, –/ проро́чески утеша́л еси́ ве́рныя, блаже́нне Варна́во. Сла́ва Отцу́ и Сы́ну и Свято́му Ду́ху. Гряду́щее губи́тельство Це́ркве Христо́вы преста́нет, –/ веща́л еси́, о́тче, –/ ме́рзость и запусте́ние во хра́мех Бо́жиих истоща́тся,/ го́ре и мрак в сердца́х люде́й, я́ко дым, исче́знут,/ егда́ ти́и к Бо́гу с покая́нием обратя́тся,/ зане́ Госпо́дь, Кре́пость немощству́ющих, да́рует им избавле́ние. И ны́не и при́сно и во ве́ки веко́в. Ами́нь. Богородичен: Це́рковь на́шу во дни го́нений/ и страну́ Росси́йскую во дни нестрое́ний/ держа́вою Твое́ю сохрани́ла еси, Ма́ти Де́во./ Сего́ ра́ди и на бу́дущее вре́мя от враг ви́димых и неви́димых/ бу́ди нам при́сная Засту́пница. Кондак, глас 2 Печа́льнику земли́ Росси́йский, преподо́бному Се́ргию,/ от ю́ности после́довал еси́, свя́те Варна́во,/ и заве́т ста́рца твоего́, си́це ре́кшего:/ тако хо́щет Бог:/ сло́вом и хле́бом пита́й а́лчущих, –/ пои́стине до конца́ испо́лнил еси́./ Сего́ ра́ди и ны́не мо́лим тя,/ не оста́ви нас, уте́шительный о́тче,/ Небе́сною любо́вию твое́ю. Икос Возлюби́в, преподо́бне, Христо́вы Боже́ственныя за́поведи/ и возненави́дев ми́ра сего́ наслажде́ние,/ прише́л еси́ усе́рдно к Тому́/ и был еси свети́льник, просвеща́я концы́ блиста́нием духо́вным./ Тем припа́дая молю́ тя:/ просвети́ мои́ о́чи душе́вней/ воспе́ти твоя́ по́двиги, поще́ние, и бде́ние, и сле́зы, боле́зни, и изможде́ние те́ла,/ блаже́нныя ра́ди бу́дущия жи́зни,/ ея́же ны́не наслажда́ешися;/ моли́ непреста́нно о всех нас. Песнь 7 Ирмос: Тебе́ у́мную, Богоро́дице, пещь рассмотря́ем ве́рнии:/ я́коже бо о́троки спасе́ три Превозноси́мый,/ мир обнови́ во чре́ве Твое́м всеце́л/ хва́льный отце́в Бог и препросла́влен. Припев: Преподо́бне о́тче Варнáво, моли́ Бо́га о на́с. Ду́хом кро́тости врачу́я душе́вныя неду́ги, преподо́бне,/ приходя́щия к тебе́ приводи́л еси́ к покая́нию/ и ева́нгельским за́поведем науча́л еси́. Припев: Преподо́бне о́тче Варнáво, моли́ Бо́га о на́с. Словесе́м твои́м и наставле́нием после́дующе, преподо́бне о́тче Варна́во,/ ве́рнии лю́дие Оте́чества твоего́ мир мног стяжава́ху/ и та́ко житие́ свое́ во сла́ву Бо́жию устроя́ху. Сла́ва Отцу́ и Сы́ну и Свято́му Ду́ху. Да́ром врачева́ния обогати́ тя Госпо́дь, преподо́бне о́тче Варна́во,/ те́мже и сло́вом твои́м смире́нным во сла́ву Бо́жию неду́жныя цели́л еси́. И ны́не и при́сно и во ве́ки веко́в. Ами́нь. Богородичен: Боле́зни на́ша душе́вныя и теле́сныя заступле́нием Твои́м уврачу́й, Пречи́стая,/ и от сме́рти духо́вныя изба́ви нас. Песнь 8 Ирмос: В пещи́ о́троцы Изра́илевы,/ я́коже в горни́ле,/ добро́тою благоче́стия чисте́е зла́та блеща́хуся, глаго́люще:/ благослови́те, вся дела́ Госпо́дня, Го́спода,/ по́йте и превозноси́те во вся ве́ки. Припев: Преподо́бне о́тче Варнáво, моли́ Бо́га о на́с. Ве́ра кре́пкая, любы́ нелице́мерная и упова́ние тве́рдое/ чисте́е зла́та блеща́хуся в тебе́, преподо́бне о́тче./ Сего́ ра́ди от Бо́га дар рассужде́ния и прозре́ния прия́ти сподо́бился еси́./ Те́мже мно́зи, взыску́ющий во́лю Бо́жию, к тебе́ притека́ху. Припев: Преподо́бне о́тче Варнáво, моли́ Бо́га о на́с. Печа́льник и наста́вник был еси́, преподо́бне о́тче,/ не то́чию просты́м, но и во вла́сти су́щим./ Те́мже и Вели́кого Госуда́ря Всеросси́йского в ке́ллии твое́й духо́вне утеша́л еси́,/ гряду́щая страда́ния и смерть му́ченическую того́ предузрева́я. Сла́ва Отцу́ и Сы́ну и Свято́му Ду́ху. Помаза́ннику Бо́жию проре́кл еси́, преподо́бне Варна́во,/ претерпе́ти страда́ния во сла́ву Бо́жию:/ той бо яви́ся же́ртва за грехи́ на́ша,/ посрамле́ние губи́телей земли́ Росси́йския и сла́ва Це́ркве. И ны́не и при́сно и во ве́ки веко́в. Ами́нь. Богородичен: Оби́тели мно́ги, во и́мя Твое́, Пречи́стая, на Святе́й Руси́ воздви́гнутыя,/ оба́че за грехи́ на́ша от безбо́жных поруга́нныя,/ ны́не же со усе́рдием ве́рными восставля́емыя,/ ми́лостию Твое́ю не оста́ви/ и в них живу́щия от вся́ческих напа́стей и злых обстоя́ний сохрани́. Песнь 9 Ирмос: О́браз чи́стого Рождества́ Твоего́/ огнепали́мая купина́ показа́ неопа́льная;/ и ны́не на нас напа́стей свире́пеющую угаси́ти мо́лимся пещь,/ да Тя, Богоро́дице,/ непреста́нно велича́ем. Припев: Преподо́бне о́тче Варнáво, моли́ Бо́га о на́с. Веле́ние ста́рца, е́же пита́ти ча́да Бо́жия хле́бом и сло́вом,/ да́же до часа́ сме́ртного со тща́нием соблюда́я,/ во́лю Бо́жию испо́лнил еси, о́тче Варна́во./ Те́мже и сподо́бися у олтаря́ ми́рне дух твой Го́споду преда́ти. Припев: Преподо́бне о́тче Варнáво, моли́ Бо́га о на́с. За́поведь Христо́ву, – да лю́бите друг дру́га, –/ потща́лся еси́ испо́лнити до конца́, преподо́бне Варна́во,/ и сего́ ра́ди в черто́ги Небе́сныя я́ко возлю́бленный и благослове́нный Бо́гом возше́л еси́. Сла́ва Отцу́ и Сы́ну и Свято́му Ду́ху. Живя́ во сла́ву Бо́жию, моли́твою я́ко Серафи́м, дея́нием я́ко Херуви́м,/ служе́нием же я́ко А́нгел был еси́, преподо́бне о́тче Варна́во./ Сего́ ра́ди и ны́не с ли́ки Небе́сными Бо́га ра́достне прославля́вши. И ны́не и при́сно и во ве́ки веко́в. Ами́нь. Богородичен: Строи́теля оби́тели И́верския, преподо́бного Варна́ву,/ хода́тая пред Тобо́ю и́мамы, Пречи́стая Ма́ти Де́во,/ с ни́мже сподо́би и нас досто́йно взыва́ти Тебе́:/ ра́дуйся, Блага́я Врата́рнице, две́ри ра́йския ве́рным отверза́ющая. Светилен Свети́льника ве́ры и о́браз благоче́стия яви́л еси́ нам, Го́споди, Варна́ву преподо́бного./ Сей бо, пра́ведно пожи́в, мно́гия лю́ди к покая́нию приведе́/ и све́том ева́нгельским просвети́./ Его́же моли́твами, Христе́ Бо́же, да́руй нам ве́лию ми́лость. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Просвети́ нас све́том Сы́на Твоего́, благослове́нная Влады́чице,/ к не́мощем на́шим милосе́рдна бу́ди,/ про́чее вре́мя живота́ на́шего в ми́ре и покая́нии сподо́би сконча́ти/ и на Стра́шнем Суди́щи Христо́ве Хода́таица неотсту́пна яви́ся.

Пустыню, яко царский чертог,/ усердно возлюбил еси,/ в нейже жестокое показа житие много летным пребыванием,/ очистив свою душу и ум от страстей,/ и сего ради Святаго Духа предивно приятелище бысть, Никодиме преподобне,/ Егоже действием и чудесы обогатился еси,/ темже и мы почитаем подвиги твоя, всеблаженне,/ но, яко имеяй дерзновение ко Пресвятей Троице,/ молися непрестанно о всех нас.

Глас 1 Пе́снь 1. Ирмо́с: Го́рькия рабо́ты изба́влься Изра́иль, непроходи́мое про́йде, я́ко су́шу, врага́ зря́ потопля́ема, пе́снь я́ко Благоде́телю пое́т Бо́гу, чудоде́ющему мы́шцею высо́кою, я́ко просла́вися. Припев: Святи́и му́ченицы, моли́те Бо́га о на́с. Венцы́ сла́вы украша́емии, и престо́лу Бо́жию предстоя́щии, и Боже́ственнаго све́та исполня́емии, любо́вию светоно́сную па́мять ва́шу соверша́ющия, омраче́ния страсте́й, му́ченицы, изба́вите. Боже́ственное лю́бяще благосла́вие, Бо́жия добро́ты жела́юще, жития́ кра́сная отри́нусте и всю́ си́лу прея́вственно и сме́ртию безконе́чную жи́знь, му́ченицы, обрето́сте. Боже́ственною ре́вностию распаля́еми, о́гнь нече́стия угаси́ша, и свети́льницы, све́т сия́юще все́м благоче́стия пресве́тло, яви́шася ве́рою, Ермоге́н и Ми́на велему́дреннии. Богоро́дичен: Изба́витися, Отрокови́це Всенепоро́чная, страсте́й одержа́ния рабо́м Твои́м, Твоего́ приле́жно моли́ Го́спода и Влады́ку, Его́же из Твои́х, Пречи́стая, крове́й воплоти́ла еси́, на́м приобщи́вшагося. Пе́снь 3. Ирмо́с: Пре́жде ве́к от Отца́ рожде́нному нетле́нно Сы́ну и в после́дняя от Де́вы воплоще́нному безсе́менно, Христу́ Бо́гу возопии́м: вознесы́й ро́г на́ш, Свя́т еси́, Го́споди. Заре́ю небе́сною я́сно просвети́вшеся му́ченицы, тму́ разори́ша и́дольския ле́сти и сия́ние на́м исцеле́ний облиста́ша, песнопою́щим все́х Бо́гу: свя́т еси́, Го́споди. Ме́ртвости жива́го после́дуя Влады́ки, Ми́но чу́дне, плесна́ми сокруша́ешися и главу́ мучи́теля сокруша́еши врага́, утвержда́я но́ги твоя́ на тве́рдем муче́ния пути́, му́чениче му́жественнейше. Пое́т Спа́са Ермоге́н, рука́ми усека́емь, свяще́нства оде́жду светле́йшу крове́й омоче́ньми я́сно соде́лав и подража́тель Страда́вшаго пло́тию благода́тию явля́емь. Богоро́дичен: Еди́ну в жена́х Тя́ Кра́сный Кра́сную обре́т, Плотоно́сец из чре́ва Твоего́ произы́де, Отрокови́це, Христо́с, Боже́ственными красота́ми просвеща́я ро́д на́ш: те́м Тя́ почита́ем. Конда́к, гла́с 1. Ми́ну чу́днаго, Ермоге́на боже́ственнаго и Евгра́фа ку́пно свяще́нными сладкопе́нии почти́м вси́, я́ко почествова́вшия Го́спода, и страда́льчествовавшия за Него́, и ли́ка безпло́тных на небесе́х дости́гшия, и чудеса́ точа́щия. Седа́лен, гла́с 8. Презре́вше сла́ву мирску́ю, окрили́вшеся сла́вою Боже́ственною, Ми́на, Ермоге́н же и сла́вный Евгра́ф и усе́рдным нра́вом тя́гость претерпе́ша лю́тых муче́ний, пло́ти не пощаде́вше. Те́мже, по кончи́не во глубину́ морску́ю вве́ржени бы́вше, напра́вишася к Боже́ственному хоте́нию. И́мже ве́рою возопие́м: моли́те Христа́ Бо́га грехо́в оставле́ние дарова́ти чту́щим любо́вию святу́ю па́мять ва́шу. Богоро́дичен: В напа́сти многоплете́нныя впа́д от вра́г ви́димых и неви́димых, бу́рею одержи́мь безчи́сленных согреше́ний мои́х, и я́ко к те́плому заступле́нию и покро́ву моему́, Чи́стая, ко приста́нищу притека́ю Твоея́ бла́гости. Те́мже, Пречи́стая, из Тебе́ воплоще́нному безсе́менно моли́ся приле́жно о все́х рабе́х Твои́х, непреста́нно моля́щих Ти ся, Богоро́дице Пречи́стая, моля́щи Его́ при́сно согреше́ний оставле́ние дарова́ти воспева́ющим досто́йно сла́ву Твою́. Крестобогоро́дичен: А́гнца, и Па́стыря, и Изба́вителя А́гница зря́щи на Кресте́, восклица́ше, пла́чущи, и, го́рько рыда́ющи, вопия́ше: ми́р у́бо ра́дуется, прие́мляй Тобо́ю избавле́ние, утро́ба же моя́ гори́т, зря́щи Твое́ распя́тие, е́же терпи́ши за милосе́рдие ми́лости. Долготерпели́ве, Го́споди, ми́лости бе́здно и исто́чниче неисчерпа́емый, умилосе́рдися и да́руй согреше́ний оставле́ние ве́рою пою́щим Боже́ственныя стра́сти Твоя́. Пе́снь 4. Ирмо́с: Же́зл из ко́рене Иессе́ова и цве́т от него́, Христе́, от Де́вы прозя́бл еси́, из горы́, Хва́льный, приосене́нныя ча́щи прише́л еси́, вопло́щся от Неискусому́жныя, Невеще́ственный и Бо́же. Сла́ва си́ле Твое́й, Го́споди. Зако́ны возвеща́я светоза́рныя, беззако́нно твои́х оче́с избоде́ние, Ми́но, претерпе́л еси́, се́рдца очеса́ к Све́ту незаходи́мому име́я приле́жно смотря́ющая и поя́ ра́достно: сла́ва си́ле Твое́й, Го́споди. Яви́ся язы́к тво́й огне́м Ду́ха мудре́йше изощре́н, внегда́ отсещи́ся: глаго́лаше бо, поя́ Бо́жия чудеса́, и мучи́теля безгла́сие преводя́ во благочести́вую сла́ву я́ве Сотво́ршаго. Вельми́ стра́сть терпя́, нога́ми отсеца́ется Ермоге́н, змии́ную попира́я главу́ и пу́ть гото́вя нра́вом неукло́нным свиде́тельства, вводя́щь к жи́зни небе́сныя све́тлости. Неуя́звлену соблюда́ющу ду́шу, Христо́с тебе́ явля́ется, твоя́ я́звы, Ми́но, исцеля́я, му́жески же терпе́ти тебе́ повелева́я: я́ко да тебе́ ра́ди спасе́ние ми́лости хоти́тель все́х зря́щих соде́лает. Богоро́дичен: Же́зл из ко́рене Иессе́ева израсти́ла еси́, процве́тшая Садоде́лателя всея́ тва́ри, увяди́вшаго сады́ непло́днаго зна́ния, ве́ру же на́м и́стиннейшую всади́вшаго благоче́стно, Чи́стая Де́во Всепе́тая. Пе́снь 5. Ирмо́с: Бо́г Сы́й ми́ра, Оте́ц щедро́т, Вели́каго Сове́та Твоего́ А́нгела, ми́р подава́юща, посла́л еси́ на́м; те́м, богоразу́мия к све́ту наста́вльшеся, от но́щи у́тренююще, славосло́вим Тя́, Человеколю́бче. Что́ всу́е мяте́шися? — вопия́ху ку́пно судии́ пребеззако́нному му́ченицы, — си́лу Подая́й предстои́т на́м, Еди́н в кре́пости непобеди́мь Сы́й, Его́же ра́ди ра́ны терпи́м крепча́йше. Бя́ше внеза́пное преложе́ние чу́днаго Ермоге́на ко Го́споду: ба́нею бо очища́ется и судо́м Боже́ственным архиере́йства све́т восприе́млет, уче́ньми озаря́яй в нощи́ лю́тых су́щия. Вити́й оста́вльше неиску́сный у́м, непи́смяников плете́ньми улови́стеся, умудри́вшу Ду́ху вы́, я́ко и́стинно му́ченицы, и ко вся́кой му́к бу́ри си́льны в кре́пости соде́лавшу ве́рою. Богоро́дичен: Святы́х а́нгел, Де́во Чи́стая, преиму́щи яви́лася еси́, ро́ждшая Сове́та Вели́каго А́нгела — Бо́га Емману́ила, челове́ки небе́сными Свои́м сни́тием соде́лавша, Отрокови́це, за благоутро́бие неисповеди́мое. Пе́снь 6. Ирмо́с: Из утро́бы Ио́ну младе́нца изблева́ морски́й зве́рь, якова́ прия́т; в Де́ву же все́льшееся Сло́во и пло́ть прие́мшее про́йде, сохра́ншее нетле́нну: Его́же, бо не пострада́ истле́ния, Ро́ждшую сохрани́ неврежде́нну. Спа́сл еси́ Ио́ну от зве́ря тридне́внаго, образу́юща погребе́ние твое́, Всеси́льне; телеса́ же му́ченик, в пучи́ну вве́ржена, напра́вил еси́ к тиша́йшему приста́нищу погребе́ния, иде́же твое́ Боже́ственное хоте́ние, в на́ше ве́рных снабде́ние. Телеса́ ва́ша, непобеди́мии му́ченицы, глубина́ невре́дно су́ши подае́т, предводя́щим небе́сным а́нгелом, блаже́ннии, и все́м положе́ние пове́дающим ва́ше, су́щее исцеле́ний источе́ние и страсте́й душе́вных избавле́ние. Чи́ни а́нгельстии ва́шему удиви́шася терпе́нию, ка́ко безпло́тнаго с те́лом победи́сте, му́ченицы, зми́я и побе́ды венцы́ увязо́стеся, Престо́лу Бо́жию предстоя́ще и Боже́ственными заря́ми освеща́еми. Богоро́дичен: Преста́ Тобо́ю, Де́во, сме́рть, Жи́знь бо — Христа́ — родила́ еси́, да́рующаго чи́сте ве́рующим в Того́ безсме́ртие и боже́ственное ра́дование; Сему́, Всесвята́я, моли́ся изба́вити от бе́д рабы́ Твоя́. Конда́к, гла́с 4. Добропе́сненный гла́с твои́х слове́с, Ермоге́на из глубины́ поги́бели возве́д, поста́ви на ка́мени жи́зни, отону́дуже и Евгра́ф, царя́ обличи́в, ра́дуяся, посека́ется в сла́вную главу́, но приле́жно моли́, Ми́но, спасти́ся все́м, любо́вию чту́щим тя́. И́кос: Житие́ твое́ боголе́пно, и сла́дко твое́ сло́во, мно́гое дерзнове́ние, Ми́но, и уче́ние твое́, и му́жество чу́дно бя́ше к беззако́нником, показу́яся тве́рдо, ника́коже убоя́вся; но, наказу́я, вся́ научи́л еси́ в Тре́х Ли́цех покланя́тися Бо́гу Еди́ному и служи́ти несомне́нною мы́слию, и, па́ки на́с ра́ди ны́не в после́дняя Сы́на Бо́жия пло́ть прие́мша, Его́же испове́дуя, улови́л еси́ Ермоге́на. Те́м с ни́м моли́ спасти́ся все́м, любо́вию чту́щим тя́. Пе́снь 7. Ирмо́с: О́троцы, благоче́стию совоспита́ни, злочести́ваго веле́ния небре́гше, о́гненнаго преще́ния не убоя́шася, но, посреди́ пла́мене стоя́ще, поя́ху: отце́в Бо́же, благослове́н еси́. Гла́с пра́зднующих чи́сте, иде́же и шу́м слы́шится, ра́достною душе́ю, страда́льцы, всели́стеся, весе́лия исполня́еми и пою́ще: отце́в Бо́же, благослове́н еси́. Сладка́ мне́, вопия́ше Ермоге́н, е́юже умира́ю, сме́рть: мне́ е́же жи́ти е́сть Христо́с, е́же умре́ти же — приобре́тение безме́рно; да отсеку́тся мои́ у́ды, любо́вию пою́щу: отце́в Бо́же, благослове́н еси́. Му́дростию тверде́йшею в живу́щих тебе́ сама́го написа́л еси́ кни́зе, о Евгра́фе му́дре, главе́ бо отсе́ченей, я́коже на колесни́цу, твое́ю все́л еси́ кро́вию и к невече́рнему Све́ту преста́вился еси́. Богоро́дичен: Не опали́в Твоего́ чре́ва, не поколеба́в де́вства зна́мений, вопло́щшееся Сло́во из Тебе́ про́йде, подая́ нетле́ние и жи́знь на́м, Отрокови́це, пою́щим: отце́в Бо́же, благослове́н еси́. Пе́снь 8. Ирмо́с: Чу́да преесте́ственнаго росода́тельная изобрази́ пе́щь о́браз: не бо́, я́же прия́т, пали́т ю́ныя, я́ко ниже́ о́гнь Божества́ — Де́вы, в Ню́же вни́де утро́бу. Те́м, воспева́юще, воспое́м: да благослови́т тва́рь вся́ Го́спода и превозно́сит во вся́ ве́ки. Па́дает пред нога́ми твои́ми суему́дренный, попира́емь, Ми́но богому́дре, оче́с бо лиши́в тя́ и язы́ка, твоего́ по́мысла не поколеба́ стоя́ния лу́чшаго. Те́мже ра́достно взыва́л еси́: да благослови́т тва́рь вся́ Го́спода и превозно́сит во вся́ ве́ки. Егда́ суро́вейшим произволе́нием обои́х ру́к и но́г тя́ мучи́тель лиши́ пребезу́мный, тогда́, му́дре, натрижне́ния жела́я, Ермоге́не, Христу́ песнопе́л еси́, ра́дуяся: да благослови́т тва́рь вся́ Го́спода и превозно́сит во вся́ ве́ки. Пою́ твоя́, Ми́но, боже́ственная страда́ния, чту́ Ермоге́новы по́двиги, покланя́юся моще́м, воспева́ю ра́ны, ю́зы, гоне́ния и сме́рть, и́миже к жи́зни взя́стеся, вопию́ще: да благослови́т тва́рь вся́ Го́спода и превозно́сит во вся́ ве́ки. Богоро́дичен: Ста́мну Тя́, ма́нну иму́щую Божества́, позна́хом, Отрокови́це, киво́т, и трапе́зу, и све́щник, Престо́л Бо́жий, и пала́ту, и мо́ст, преводя́щь к Боже́ственней жи́зни воспева́ющия: да благослови́т тва́рь вся́ Го́спода и превозно́сит во вся́ ве́ки. Пе́снь 9. Ирмо́с: О́браз чи́стаго рождества́ Твоего́ огнепали́мая купина́ показа́ неопа́льная; и ны́не на на́с напа́стей свире́пеющую угаси́ти, мо́лимся, пе́щь, да Тя́, Богоро́дице, непреста́нно велича́ем. Се́ светоза́рное торжество́ светови́дных му́чеников все́м просия́, озаря́ющее вселе́нныя концы́ и ду́ш слепоту́ отъе́млющее; стеце́мся преусе́рдно, свяще́ние почерпе́м. И́хже бла́г получи́сте небе́сныя сла́вы, ея́же сподо́бистеся, ве́рою све́тлую па́мять ва́шу чту́щим, я́ко Бо́гу предстоя́ще всегда́, получи́ти моли́теся, великому́ченицы, мо́лимся. Те́ло и ду́шу принесо́сте Творцу́ все́х, же́ртву непоро́чну, всесожже́гшеся огне́м муче́ний, и му́чеников лико́м причи́слистеся, Све́том чисте́йшим просвеща́еми, всехва́льнии. Взя́тся, ко оби́телем вселя́яся, светови́дный му́чеников ли́к боже́ственный и предстои́т Отцу́, Сы́ну же и Ду́ху, наслажда́яся я́сно обоже́ния, Ми́на со Ермоге́ном и Евгра́фом, богому́дрии. Богоро́дичен: Сия́ние блиста́ния Рождества́ Твоего́ отри́нувшееся естество́ на́ше, Всенепоро́чная, ви́де и из но́щи неве́дения изба́вися и страсте́й те́мнаго смуще́ния. Те́м Тя́ я́ко вино́вну спасе́ния на́шего чти́м. Свети́лен. Вити́йскими твои́ми словесы́ и боже́ственными чудесы́, Ми́но, сострада́льца привле́кл еси́ свяще́ннаго Ермоге́на, с ни́мже тя́ и со Евгра́фом ны́не прера́достно благохва́лим. Богоро́дичен: Гора́, ю́же прови́де дре́вле боже́ственный Авваку́м, присе́нная и часта́ Ты́ показа́лася еси́, Де́во, и Тя́ Дави́д имену́ет усыре́нную и ту́чную.

Глас 1 Минея, 10 Января, Канон Глас 1 Песнь 1 Ирмос: Пе́снь побе́дную пои́м вси́ Бо́гу, сотво́ршему ди́вная чудеса́ мы́шцею высо́кою и спа́сшему Изра́иля, я́ко просла́вися. Припев: Преподо́бне о́тче Маркиа́не, моли́ Бо́га о на́с. Струя́ми погре́бшему гре́х Христу́ прилепля́яся, неосла́бными манове́нии изсуши́л еси́ пото́ки страсте́й, богому́дре Маркиа́не. Сла́ва Отцу́ и Сы́ну и Свято́му Ду́ху. Христо́с, креща́яся, очища́ет истле́вшее страстьми́ на́ше неможе́ние, Ему́же угоди́л еси́, Маркиа́не, приле́жным, о́тче, воздержа́нием. И ны́не и при́сно и во ве́ки веко́в. Ами́нь. Богородичен: Де́ва пребыла́ еси́ по рождестве́, Бо́га бо родила́ еси́, Его́же вели́кий Предте́ча во Иорда́нских струя́х крести́ с тре́петом мно́гим, Пречи́стая Влады́чице. Песнь 3 Ирмос: Да утверди́тся се́рдце мое́ в во́ли Твое́й, Христе́ Бо́же, И́же над вода́ми не́бо утвержде́й второ́е и основа́вый на вода́х зе́млю, Всеси́льне. Припев: Преподо́бне о́тче Маркиа́не, моли́ Бо́га о на́с. Иорда́нския струи́, Го́споди, низше́д, освяти́л еси́ дне́сь и, я́коже да́р и честно́е и кра́сное приноше́ние, прия́л еси́ сла́внаго Маркиа́на сла́вити Тя́. Припев: Преподо́бне о́тче Маркиа́не, моли́ Бо́га о на́с. Облага́яй не́бо о́блаки, Госпо́дь оде́ждею облече́ тя́ свяще́нною, священноде́йствующа, и а́нгелом гове́йною, я́ко а́нгела, на земли́ с пло́тию пожи́вшаго. Сла́ва Отцу́ и Сы́ну и Свято́му Ду́ху. Анастаси́и богому́дрыя свяще́нен хра́м созда́л еси́, украси́в свяще́нными и честны́ми возложе́ньми, сего́ ра́ди с не́ю, Маркиа́не, всели́лся еси́. И ны́не и при́сно и во ве́ки веко́в. Ами́нь. Богородичен: Гре́х пра́отца И́же из Тебе́ рожде́йся, Присноде́во, во Иорда́нстей реце́ потопля́ет, я́ко Благоутро́бен. Его́же Предте́ча крести́ти повеле́н бы́в, спря́ташеся. Седален, глас 8 Писа́ния от младе́нства свяще́нная испыту́я, богоно́се Маркиа́не, боже́ственне просия́л еси́ благоче́стия, Сы́на бо и Сло́ва, Отцу́ Единосу́щна и Боже́ственному Ду́ху, пропове́дал еси́, Сопресто́льна. Те́мже А́риево и Македо́ниево нече́стие обличи́л еси́ и ве́ру уясни́л еси́, правосла́вно сла́витися. Моли́ Христа́ Бо́га грехо́в оставле́ние пода́ти чту́щим с любо́вию па́мять твою́. Песнь 4 Ирмос: Ду́хом прови́дя, проро́че Авваку́ме, Словесе́ воплоще́ние, пропове́дал еси́, вопия́: внегда́ прибли́житися ле́том — позна́ешися, внегда́ приити́ вре́мени — пока́жешися. Сла́ва си́ле Твое́й, Го́споди. Припев: Преподо́бне о́тче Маркиа́не, моли́ Бо́га о на́с. Игра́йте, го́ры, лику́йте, хо́лми: Иису́с креща́ется, Еди́н чи́стый, преподо́бнаго па́мять уясни́вый, И́мже де́монов вся́ ле́сть омрачи́ся и вселе́нная просвети́ся. Припев: Преподо́бне о́тче Маркиа́не, моли́ Бо́га о на́с. Умертви́в воздержа́нием плотски́я сла́сти, боже́ственным твои́м проглаго́ланием оживи́л еси́ мертвецы́, в погребе́ние облобыза́я, о́тче, и а́бие умре́ти повелева́я, до́ндеже прии́дет все́х о́бщее воскресе́ние. Сла́ва Отцу́ и Сы́ну и Свято́му Ду́ху. Житие́ твое́, добро́тою Боже́ственных доброде́телей укра́шено, уясня́ет ве́рныя, моще́й же твои́х ра́ка облиста́ет лучи́ чуде́с ве́рою приступа́ющим, о́тче, и ве́рою восхваля́ющим тя́. И ны́не и при́сно и во ве́ки веко́в. Ами́нь. Богородичен: Исто́чник Ты́ спасе́ния родила́ еси́, Христа́, освяща́ющаго исто́чники креще́нием, Его́же Иорда́н ви́дев, возврати́ся стра́хом, Иоа́нн креща́яй ужасе́ся, Чи́стая Де́во Всепе́тая. Песнь 5 Ирмос: Тво́й ми́р да́ждь на́м, Сы́не Бо́жий, ино́го бо, ра́зве Тебе́, Бо́га не зна́ем, и́мя Твое́ имену́ем, я́ко Бо́г живы́х и ме́ртвых еси́. Припев: Преподо́бне о́тче Маркиа́не, моли́ Бо́га о на́с. Змие́в ты́ сокруши́л еси́ главы́ креще́нием, Го́споди Бо́же Всеси́льне, вла́сть да́вый и си́лу Маркиа́ну боже́ственному на де́монския ле́сти. Припев: Преподо́бне о́тче Маркиа́не, моли́ Бо́га о на́с. Расточи́л еси́, разда́в ни́щим твое́ име́ние, богому́дре всеблаже́нне, те́мже твоя́ пребыва́ет па́мять во ве́ки и пра́вда. Сла́ва Отцу́ и Сы́ну и Свято́му Ду́ху. Умири́л еси́ смуще́ния страсте́й по́мысл, преподо́бне, хра́м же созда́л еси́ Боже́ственнаго ми́ра, имену́емый в хвалу́ Госпо́дню, И́же все́х ми́ра. И ны́не и при́сно и во ве́ки веко́в. Ами́нь. Богородичен: Де́ва по Рождестве́ яви́лася еси́ вои́стинну, Чи́стая, Бо́га бо родила́ еси́, Его́же Иоа́нн в вода́х Иорда́нских омыва́ет на обновле́ние ми́ра. Песнь 6 Ирмос: Проро́ка Ио́ну подража́я, вопию́: живо́т мо́й, Бла́же, свободи́ из тли́ и спаси́ мя́, Спа́се ми́ра, зову́ща: сла́ва Тебе́. Припев: Преподо́бне о́тче Маркиа́не, моли́ Бо́га о на́с. Пото́к сла́дости подая́ на́м, Иорда́нскими струя́ми крести́ся Христо́с, И́же дне́сь преподо́бнаго просвети́ успе́ние. Припев: Преподо́бне о́тче Маркиа́не, моли́ Бо́га о на́с. Мирополо́жница мы́сленная моще́й ра́ка яви́ся твои́х, свяще́нне Маркиа́не, источа́ющи чуде́с ми́ро к тебе́ притека́ющим. Сла́ва Отцу́ и Сы́ну и Свято́му Ду́ху. Миродохнове́нными моли́твами отгна́л еси́ огня́ клоко́чущаго стремле́ние, спа́сл еси́ хра́м невреди́мь, его́же созда́л еси́, богоблаже́нне. И ны́не и при́сно и во ве́ки веко́в. Ами́нь. Богородичен: Де́ва дои́ши Пита́теля все́х, Его́же Предте́ча ви́дев, взыгра́ся, вопия́: Избавле́ние и Спасе́ние все́х яви́ся. Песнь 7 Ирмос: Су́щим в пещи́ отроко́м Твои́м, Спа́се, не прикосну́ся, ниже́ стужи́ о́гнь. Тогда́ трие́ я́ко еди́неми усты́ поя́ху и благословля́ху, глаго́люще: благослове́н Бо́г оте́ц на́ших. Припев: Преподо́бне о́тче Маркиа́не, моли́ Бо́га о на́с. Жи́зни наста́ исто́чник, вода́ми омыва́ющий прегреше́ния на́ша, Бо́жие Единоро́дное Безнача́льное Сло́во, Ему́же благоугоди́ Маркиа́н сла́вный, прело́жься к Нему́. Припев: Преподо́бне о́тче Маркиа́не, моли́ Бо́га о на́с. Благомо́щными бде́нии вои́стинну успи́л еси́ стра́сти неудободе́ржныя души́ и, усну́в во глубоча́йшей ста́рости, блаже́нне, к Све́ту отше́л еси́, я́ко дне́ сы́н и Христо́в служи́тель. Сла́ва Отцу́ и Сы́ну и Свято́му Ду́ху. Ору́жие, е́же дре́во жи́зни храня́щее, плещи́ тебе́ да́рует, му́дре. Те́мже ра́дости ра́йския наслажда́ешися, воспева́я Вино́внаго спасе́ния на́шего, Маркиа́не свяще́нне. И ны́не и при́сно и во ве́ки веко́в. Ами́нь. Богородичен: Не опали́в Твои́х ложе́сн, Христо́с ражда́ется, Чи́стая, из Тебе́ боголе́пно, Его́же ви́дев, Иоа́нн вопия́ше: Иису́с креща́ется, спасе́ние ве́рных и избавле́ние. Песнь 8 Ирмос: Его́же ужаса́ются а́нгели и вся́ во́инства, я́ко Творца́ и Го́спода, по́йте, свяще́нницы, просла́вите, о́троцы, благослови́те, лю́дие, и превозноси́те во вся́ ве́ки. Припев: Преподо́бне о́тче Маркиа́не, моли́ Бо́га о на́с. Челове́ки породи́л еси́ креще́нием Твои́м, Бо́же Многоми́лостиве, дне́сь от земли́ к неизрече́нней сла́ве прие́мый уго́дника Твоего́, Маркиа́на боже́ственнаго. Припев: Преподо́бне о́тче Маркиа́не, моли́ Бо́га о на́с. Ца́рскою ви́дяще тя́ лю́дие свяще́ннии оде́ждею облече́на, внегда́ священноде́йствовати, удиви́шася, о́тче, и согла́сно Христа́, все́х Царя́, воспе́ша, всеблаже́нне. Сла́ва Отцу́ и Сы́ну и Свято́му Ду́ху. Воздержа́ние стяжа́л еси́ и непреста́нную моли́тву, вознося́щее смире́ние, и любо́вь и́стинную, и безстра́стие, о́тче, сего́ ра́ди Христо́с благода́ть тебе́ подаде́ чуде́с во ве́ки. И ны́не и при́сно и во ве́ки веко́в. Ами́нь. Богородичен: Вмеща́еши Невмести́маго, Де́во, па́че ума́, Его́же име́я Предте́ча крести́ти, ужаса́яся и трепе́ща, вопия́ше: О́гнь сы́й, Христе́, не опали́ мене́, любо́вию пою́ща Тя́. Песнь 9 Ирмос: Живоприе́мный исто́чник приснотеку́щий, светоно́сный свети́льник благода́ти, хра́м одушевле́нный, се́нь пречи́стую, небесе́ и земли́ простра́ннейшую, Богоро́дицу, ве́рнии, велича́ем. Припев: Преподо́бне о́тче Маркиа́не, моли́ Бо́га о на́с. Торжеству́йте дне́сь, челове́цы, ре́ки и го́ры, игра́йте: Иису́с креща́ется, Спа́с яви́ся и спрославля́ет Свои́м явле́нием Маркиа́на свято́е преставле́ние. Сла́ва Отцу́ и Сы́ну и Свято́му Ду́ху. Жела́ний кра́йнейшее дости́гл еси́, отреши́вся у́з теле́сных, богоно́сне преподо́бне, зря́ све́тлости святи́телей, проро́ков и апо́столов, с ни́миже на́с, чту́щих тя́, помина́й. И ны́не и при́сно и во ве́ки веко́в. Ами́нь. Богородичен: Но́сиши Бо́га на руку́, пита́ющаго Богоде́льною си́лою вся́ческая, Его́же ви́дев Предте́ча, креще́ния прося́ща, недоумева́ет у́жасом, Богороди́тельнице, и исполня́ет со стра́хом повеле́нное.