Молитвы

Минея, 19 Мая, Кано́н Глас 8 Песнь 1 Ирмос: Пои́м Го́сподеви,/ прове́дшему лю́ди Своя́ сквозе́ Чермно́е мо́ре,/ я́ко Еди́н сла́вно просла́вися. Припев: Преподо́бне о́тче Игна́тие, моли́ Бо́га о на́с. Го́споди, Бо́же спасе́ния моего́,/ упра́ви ум мой и просвети́ о́чи се́рдца моего́,/ да воспою́ све́тло Твоего́ рачи́теля торжество́,/ в па́мяти его́ зове́м, веселя́щеся, сла́вно бо просла́вися. Припев: Преподо́бне о́тче Игна́тие, моли́ Бо́га о на́с. Услы́шав, преподо́бне, Ева́нгельская словеса́ и сия́ насади́ в души́ свое́й,/ крест Хри́стов на ра́мо взем, после́дова Ему́ невозвра́тным по́мыслом, поя́:/ сла́вно бо просла́вися. Сла́ва Отцу́ и Сы́ну и Свято́му Ду́ху. Сподо́бися от Бо́га возлю́блен бы́ши чистоты́ ра́ди се́рдца твоего́ и нра́ва пра́ваго,/ в ско́рбех и беда́х неосла́бнаго терпе́ния,/ и сих ра́ди венча́ тя Небе́сными венцы́, пою́щу ти:/ сла́вно бо просла́вися. И ны́не и при́сно и во ве́ки веко́в. Ами́нь. Богородичен: Я́ко ло́жницу Боже́ственную и ле́ствицу Небе́сную,/ кади́льницу же невеще́ственную, во светоно́сных ложесна́х Свои́х поне́сшую Христа́,/ Богоизбра́нную Отрокови́цу Мари́ю вси ублажи́м. Песнь 3 Ирмос: Утверди́ся се́рдце мое во Го́споде,/ вознесе́ся рог мой в Бо́зе мое́м,/ разшири́шася на враги́ моя́ уста́ моя́,/ возвесели́хся о спасе́нии Твое́м. Припев: Преподо́бне о́тче Игна́тие, моли́ Бо́га о на́с. Подо́бен бысть А́нгелом, преподо́бне, жития́ чистото́ю укра́шен,/ поревнова́л еси́ пра́отцем: И́ову – во страсте́х, Ио́сифу – во искуше́ниих,/ терпе́ния ве́лий столп показа́ся, те́мже вопие́ши:/ утверди́ся се́рдце мое́ о Го́споде. Припев: Преподо́бне о́тче Игна́тие, моли́ Бо́га о на́с. Укорени́ся в души́ твое́й, преподо́бне Игна́тие,/ моли́тва непреста́нна, разсужде́ние доброразсу́дное, па́мять сме́ртная,/ и сих ра́ди житие́ сие́ пре́йде без преткнове́ния от вра́жиих наве́т, вопия́:/ утверди́ся се́рдце мое́ о Го́споде. Сла́ва Отцу́ и Сы́ну и Свято́му Ду́ху. Де́вственно те́ло стяжа́в от младе́нства, преподо́бне Игна́тие,/ не умокри́вся вода́ми страсте́й,/ не возбуя́ся се́рдце твое́ ласкосе́рдыми сластолю́бии,/ весь возложи́ себе́ Бо́гови, вопия́:/ утверди́ся се́рдце мое́ о Го́споде. И ны́не и при́сно и во ве́ки веко́в. Ами́нь. Богородичен: Святы́х А́нгел су́щи святе́йши,/ сих Соде́теля во Свое́й утро́бе поне́сшая, родила́ еси́,/ Богоотрокови́це Чи́стая, Изба́вителя челове́ком,/ те́мже Ти согла́сно вопие́м:/ утверди́ся се́рдце мое́ о Го́споде. Седален, глас 4 Приспе́ честна́го твоего́ успе́ния светоно́сная па́мять, блаже́нне Игна́тие,/ просвеща́я ду́ши на́ша, пра́зднующих све́тло,/ и, в па́мяти твое́й веселя́щеся, Христа́ непреста́нно сла́вим. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: И́же на Престо́ле херуви́мстем седя́й, в не́дрех Оте́ческих пребыва́яй,/ я́ко на престо́ле святе́м Свое́м седи́т, Влады́чице, на ло́ну Твое́ю пло́тию,/ Бог бо вои́стинну воцари́ся над все́ми язы́ки, и разу́мно пое́м Ему́,/ Его́же моли́ спасти́ся рабо́м Твои́м. Песнь 4 Ирмос: Ты моя́ кре́пость, Го́споди,/ Ты моя́ и си́ла,/ Ты мой Бог, Ты мое́ ра́дование,/ не оста́вль не́дра О́тча/ и на́шу нищету́ посети́в./ Тем с проро́ком Авваку́мом зову́ Ти:/ си́ле Твое́й сла́ва, Человеколю́бче. Припев: Преподо́бне о́тче Игна́тие, моли́ Бо́га о на́с. И́же на земли́ Христа́ ра́ди смири́вся от млады́х ногте́й, преподо́бне Игна́тие,/ высоту́ благоро́дия оста́вль, те́сным путе́м и ско́рбным ше́ствуя в житии́ сем,/ сего́ ра́ди Небе́сных венце́в сподо́бися от Бо́га, зову́щу ти:/ си́ле Твое́й сла́ва, Человеколю́бче. Припев: Преподо́бне о́тче Игна́тие, моли́ Бо́га о на́с. Бу́дущих благ жела́я наслади́тися, преподо́бне,/ плоть свою́ поработи́в ду́хови,/ и тем вы́ше всех мудрова́ний ми́ра сего́ бысть,/ освяще́нно Бо́жие жили́ще показа́ся,/ но и по святе́м твое́м преставле́нии с ли́ки безпло́тных вопие́ши Христо́ви:/ си́ле Твое́й сла́ва, Человеколю́бче. Сла́ва Отцу́ и Сы́ну и Свято́му Ду́ху. Украси́ся, блаже́нне, де́йством Свята́го Ду́ха,/ взыска́л еси́ пре́жнее оте́чество, погубле́нное родонача́льники дре́вле,/ и дарова́ния терпе́ния ра́ди прия́т от Христа́ Бо́га – чуде́с де́йство,/ сего́ ра́ди пое́м непреста́нно:/ си́ле Твое́й сла́ва, Человеколю́бче. И ны́не и при́сно и во ве́ки веко́в. Ами́нь. Богородичен: Преукраше́нна Боже́ственною сла́вою/ И́же вся́ческая от не су́щих соста́вльшаго сло́вом,/ Бо́га сло́во родила́ еси́, Челове́ка вои́стинну бы́вша,/ Его́же о нас моли́ти не преста́й, Богоро́дице, Ма́ти Присноде́во, ве́рою Ти зову́щих:/ си́ле Твое́й сла́ва, Человеколю́бче. Песнь 5 Ирмос: Вску́ю мя отри́нул еси́/ от лица́ Твоего́, Све́те Незаходи́мый,/ и покры́ла мя есть чужда́я тьма, окая́ннаго,/ но обрати́ мя и к све́ту за́поведей Твои́х/ пути́ моя́ напра́ви, молю́ся. Припев: Преподо́бне о́тче Игна́тие, моли́ Бо́га о на́с. Жела́нием, блаже́нне, Христу́ после́довав и Того́ любо́вию па́че огня́ распали́вся,/ в целому́дрии и незло́бии пре́йде жития́ сего́ пучи́ну,/ ко приста́нищу приста́л еси́ а́нгельскаго пребыва́ния, сего́ ра́ди и мы вопие́м:/ пути́ на́ша напра́ви, мо́лимся. Припев: Преподо́бне о́тче Игна́тие, моли́ Бо́га о на́с. Естество́м, преподо́бне Игна́тие, кро́ток и ми́лостив,/ не оста́ви нас, чад свои́х, предстоя́щих святе́й твое́й ра́це и моля́щихся тебе́,/ покры́й нас от наве́т вра́жиих святы́ми твои́ми моли́твами и пути́ на́ша напра́ви. Сла́ва Отцу́ и Сы́ну и Свято́му Ду́ху. Поуча́яся, блаже́нне, во псалме́х, и пе́ниих, и в пе́снех духо́вных день и нощь,/ тем и без поро́ка му́ченически жизнь свою́ препроводи́л еси́ в затво́ре темни́чнем./ Сего́ ра́ди и по сме́рти свята́я твоя́ ра́ка исцеле́ние подае́т с ве́рою зову́щим:/ пути́ на́ша напра́ви, мо́лимся. И ны́не и при́сно и во ве́ки веко́в. Ами́нь. Богородичен: Моли́ И́же из Тебе́ ро́ждшагося Го́спода, Де́во Отрокови́це Чи́стая,/ сохрани́ рабы́ Твоя́ от сопроти́вных обстоя́ний и бесо́вскаго озлобле́ния,/ и́же Тя и́стинную Ма́терь Бо́жию испове́дающих, Влады́чице,/ и пути́ на́ша напра́ви, мо́лимся. Песнь 6 Ирмос: Очи́сти мя, Спа́се, / мно́га бо беззако́ния моя́,/ и из глубины́ зол возведи́, молю́ся,/ к Тебе́ бо возопи́х, и услы́ши мя,/ Бо́же спасе́ния моего́. Припев: Преподо́бне о́тче Игна́тие, моли́ Бо́га о на́с. Основа́ние непоколеби́мое в души́ свое́й страх Бо́жий положи́в, преподо́бне,/ посто́м, и бде́нием, и моли́твами простира́яся,/ вся ско́рбная Его́ ра́ди в жи́зни сей претерпе́л еси́,/ тем и святу́ю ду́шу свою́ в ру́це Его́ чи́сте преда́, вопия́ше:/ к Тебе́, Го́споди, воззва́х, и услы́ша мя. Сла́ва Отцу́ и Сы́ну и Свято́му Ду́ху. Мно́гими труды́ и по́ты, преподо́бне, зе́млю се́рдца своего́ обнови́в/ и сию́ насе́яв се́менем благоче́стия, прекра́сная Сло́ву пшени́ца яви́ся,/ плод принесе́ Ему́ себе́ стори́чный, вопия́:/ к Тебе́ воззва́х, и услы́ша мя. И ны́не и при́сно и во ве́ки веко́в. Ами́нь. Богородичен: Избра́ Тебе́ Госпо́дь во всех ро́дех,/ Благослове́нная в жена́х, Непоро́чная Де́во Богоро́дице,/ я́ко прекра́сное Бо́гу селе́ние, простра́нную Боже́ственную ло́жницу,/ и киво́т святы́ни, и све́щник, и трапе́зу, Чи́стая, и сего́ ра́ди аз вопию́:/ услы́ши мя, Влады́чице, спасе́ние мое́. Кондак, глас 8 Изря́дная о́трасле благочести́ваго ко́рене,/ ди́вный благоро́дный цве́те,/ избра́нный от пеле́н благода́тию Христо́вою,/ возлю́бленный от ю́ности Ду́хом Святы́м,/ де́вственное процвете́ние, Игна́тие блаже́нне,/ днесь, соше́дшеся, ве́рнии, в па́мять твою́,/ похва́льными венцы́ честну́ю твою́ главу́ венча́юще, зове́м:/ ра́дуйся, преподо́бне, сосу́де Свята́го Ду́ха, всея́ Росси́йской земли́ удобре́ние. Икос Си́лою укрепи́вся Всеси́льнаго Бо́га, блаже́нне,/ на стра́сти па́губныя, я́ко безпло́тен, подвиза́вся,/ и ра́вно А́нгелом житие́ пожи́л еси́, благоро́дия высоту́ оста́вль,/ и вся, я́же в ми́ре сла́дкая и кра́сная, возненави́де, чи́стым се́рдцем после́дова Христу́,/ те́мже от всех слы́шиши:/ ра́дуйся, преподо́бне Игна́тие, о́трасле от ко́рене свята́го царя́ Васи́лия,/ просвети́вшаго святы́м Креще́нием Ру́сскую зе́млю;/ ра́дуйся, отца́ благове́рна плод и ма́тере благочести́выя прозябе́ние;/ ра́дуйся, Христа́ ра́ди претерпе́вый темни́чный затво́р до́блественне;/ ра́дуйся, я́ко твоему́ терпе́нию А́нгели удиви́шася и челове́цы по́льзовашася твои́м незло́бием;/ ра́дуйся, Небе́сный челове́че и земны́й А́нгеле, Свята́го Ду́ха жили́ще;/ ра́дуйся, Го́рняго Иерусали́ма граждани́не и соприча́стниче преподо́бным;/ ра́дуйся, я́ко Тро́ице предстоя́, о нас мо́лишися непреста́нно;/ ра́дуйся, оте́честву на́шему похвало́ и утвержде́ние,/ его́же соблюди́ моли́твами твои́ми от враг ненаве́тно, да вси вопие́м ти:/ ра́дуйся, Игна́тие Богому́дре, всея́ Росси́йския земли́ удобре́ние. Песнь 7 Ирмос: Бо́жия снизхожде́ния/ огнь устыде́ся в Вавило́не иногда́./ Сего́ ра́ди о́троцы в пещи́, ра́дованною ного́ю,/ я́ко во цве́тнице, лику́юще, поя́ху:/ благослове́н еси́, Бо́же оте́ц на́ших. Припев: Преподо́бне о́тче Игна́тие, моли́ Бо́га о на́с. Иму́ще тя к Бо́гу христоимени́тии лю́дие кре́пка моли́твенника, блаже́нне,/ и в печа́лех засту́пника, побо́рника же нера́тна к проти́вных ополче́нию,/ от всех бед спаса́еми моли́твами твои́ми, свя́те, непреста́нно вопие́м:/ благослове́н Бог оте́ц на́ших. Припев: Преподо́бне о́тче Игна́тие, моли́ Бо́га о на́с. Любо́вию Христо́вою, Богому́дре Игна́тие, просвети́вся,/ доброде́телей ве́лий храм Бо́жий показа́ся, не оскверни́в души́ своея́ добро́ты,/ тем и по честне́м твое́м преставле́нии, Святе́й Тро́ице со А́нгелы предстоя́, вопие́ши:/ благослове́н Бог оте́ц на́ших. Сла́ва Отцу́ и Сы́ну и Свято́му Ду́ху. Услы́ши моле́ние раб твои́х, преподо́бне Игна́тие,/ хода́тайствуй Святе́й Тро́ице моли́твами твои́ми,/ да́руй правосла́вным лю́дем побе́ду и одоле́ние на вся враги́/ и вознеси́ рог ве́рных, вра́жия возноше́ния уничижи́ и возвесели́ пою́щия:/ благослове́н Бог оте́ц на́ших. И ны́не и при́сно и во ве́ки веко́в. Ами́нь. Богородичен: Его́же родила́ еси́, Го́спода, Влады́чице Чи́стая,/ не преста́й моля́щи изъя́ти мя при́сно от враг, оскорбля́ющих ду́шу мою́,/ и тя́жкое бре́мя грехо́в мои́х расточи́, Богоневе́стная,/ я́ко да, ра́дуяся, вопию́:/ благослове́н Плод чре́ва Твоего́. Песнь 8 Ирмос: Победи́тели мучи́теля и пла́мене/ благода́тию Твое́ю бы́вше,/ за́поведем Твои́м зело́ прилежа́ще,/ о́троцы вопия́ху:/ благослови́те, вся дела́ Госпо́дня, Го́спода. Припев: Преподо́бне о́тче Игна́тие, моли́ Бо́га о на́с. И́же весь Бо́гови от ю́ности освяти́вся, преподо́бне Игна́тие, и к Нему доброде́тельми прибли́жився,/ тле́нная бо вся, я́ко ме́рзость вмени́ и Небе́сное бога́тство насле́дова, вопия́:/ благослове́н Бог оте́ц на́ших. Припев: Преподо́бне о́тче Игна́тие, моли́ Бо́га о на́с. Любо́вию приими́, блаже́нне, хвалу́ недосто́йных усте́н и скве́рнаго моего́ язы́ка,/ вем бо, о́тче, я́ко Святу́ю Тро́ицу чи́сте зри́ши, а́нгельская прие́мля хвале́ния,/ не пре́зри дете́й немова́ние, я́ко оте́ц чадолюби́в, вопия́:/ благослови́те, вся дела́ Госпо́дня, Го́спода. Сла́ва Отцу́ и Сы́ну и Свято́му Ду́ху. Исцеле́ний благода́ть Христо́с тебе́ дарова́:/ больны́я исцеля́ти, слепы́м прозре́ние дарова́ти,/ хромы́м хожде́ние, сухи́м исправле́ние,/ и вся́ческая от Го́спода прия́т, я́ко че́стен до́бльственник, и венце́м от Него́ венча́ся, вопия́:/ благослови́те, вся дела́ Госпо́дня Го́спода. И ны́не и при́сно и во ве́ки веко́в. Ами́нь. Богородичен: И́же Ада́ма Соде́тель в ложесна́х Твои́х зи́ждится, Чи́стая,/ и млеко́м пита́ется Пита́яй вся́кое дыха́ние, Де́во Богоро́дице,/ те́мже Тя, я́ко Ма́терь Бо́жию, ве́рнии, прославля́ем и превозно́сим Чи́стую во ве́ки. Песнь 9 Ирмос: Чи́стую сла́вно почти́м, лю́дие, Богоро́дицу,/ огнь Божества́ прии́мшую во чре́ве неопа́льно,/ пе́сньми велича́ем. Припев: Преподо́бне о́тче Игна́тие, моли́ Бо́га о на́с. И́же не в гада́нии, ни в се́ни, но чи́сто зри́ши Святу́ю Тро́ицу, преподо́бне Игна́тие,/ моли́, мо́лим ти ся, с Богома́терию, чи́сто ро́ждшею Христа́ Бо́га,/ дарова́ти правосла́вным лю́дем побе́ду на враги́ и грехо́в отпуще́ние. Припев: Преподо́бне о́тче Игна́тие, моли́ Бо́га о на́с. Жития́ сего́ многому́тное мо́ре безпреткнове́нно преше́л еси́, преподо́бне,/ корми́тельницу Ма́терь Бо́жию име́я себе́, наставля́ющу тя,/ те́мже ны́не с ли́ки святы́х веселя́ся, моли́ Христа́ Бо́га,/ да пода́ст це́рквам благоле́пие, и ми́ру умире́ние, и душа́м на́шим ослабле́ние. Сла́ва Отцу́ и Сы́ну и Свято́му Ду́ху. Потщи́ся на моли́тву ко Христу́, блаже́нне, с преподо́бным Дими́трием,/ смоле́бники прии́м А́нгельския ли́ки,/ да оте́чество твое́ це́ло и невреди́мо сохрани́т, от враг ви́димых ненаве́тно,/ да тя вы́ну ублажа́ем. И ны́не и при́сно и во ве́ки веко́в. Ами́нь. Богородичен: Све́та Боже́ственнаго прия́телище, и́же луча́ми Божества́ мир озари́вшаго,/ на руку́ поноси́вши, Богоблагода́тная,/ мост же и ле́ствица, на высоту́ возводя́щи земны́я, Де́во./ Те́мже, ве́рнии, ублажа́юще, Тя велича́ем. Светилен Я́ко заря́ у́тренняя и я́ко пресве́тлое со́лнце, возсия́ па́мять твоя́, преподо́бне,/ я́же в ми́ре су́щим сердца́ озаря́ющи Боже́ственною све́тлостию,/ ты бо терпе́ния ра́ди све́та и дне сын вои́стинну показа́ся./ Те́мже, в па́мяти твое́й соше́дшеся, тебе́ велича́ем. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Му́дрость соста́вную и Сло́во Пресу́щное,/ Врача́ всем – Христа́ ро́ждши, Де́во,/ стру́пы и я́звы души́ моея́ исцели́, лю́тыя и мно́го небрего́мыя,/ и се́рдца моего́ мно́гая стра́стная уста́ви помышле́ния.

глас 2 Песнь 1 Ирмос: Грядите, людие, поим песнь Христу Богу, раздельшему море и наставльшему люди, яже изведе из работы египетския, яко прославися. Просвещением Трисолнечнаго Божества озарившеся, премудрии, светильницы явистеся, просвещающе верных, страстей темностию омраченнаго мя обновите молитвами вашими, святии, к Человеколюбцу, светоносную вашу память чтуща. Совесть имеюще к Богу неоскудно и око сердечное взирающе к Богоначальному Свету, в молитвах предстояще, Зосимо преподобне и Савватие пребогате, страстей наших тьму молитвами вашими отгоните. Храм бысте Святому Духу и Тому душевное возложисте желание, преподобнии отцы, сего ради кротких землю наследовасте. Укротите настоящую бурю сердец наших, да, в тишине Божественней бывше, песнословим ваша подвиги и жизнь некончаемую. Богородичен: Плотию рождши Безплотнаго, Богородице Пречистая, страсти лютыя ума моего утоли, Дево, и исправи мя, заблуждшаго, Мати Божия, яко да славлю Тя. Песнь 3 Ирмос: На камени мя веры утвердив, разширил еси уста моя на враги моя, возвесели бо ся дух мой, внегда пети: несть свят, якоже Бог наш, и несть праведен, паче Тебе, Господи. Исполнивше сердца своя слезными потоки, преподобне Савватие и Зосимо Богомудре, и плоти своя умертвивше постом и воздержанием, святии, души же Божественными даровании просветивше, плодоносну износите раку чудес ваших явлении, преблаженнии. Высотою смирения украшаеми, преподобнии, все убо желание ко Владыце своему простросте, ярость же на бесы, Богоноснии, показасте изрядными делы своими, постом и молитвами. Образ бысте своим учеником, к добродетелем и к высоте их возводяще Божественнаго желания, и исцеления источают безчисленная гроби ваши, преподобнии отцы, и отгоняют от человек болезни телесныя и душевныя, страсти врачуют подвиги вашими, всечестнии. Богородичен: Из ложесн Твоих возсия преславно Великое Солнце, Христос Бог, Богородице Дево, и, вся земныя концы просветив, преподобных лики честно венчал есть. Седален, глас 4 Житейское море воздержанием безбедно преплысте и ко пристанищу мысленному безстрастия, радующеся, доидосте, преподобнии отцы Зосимо и Савватие, Богомудрии и преблаженнии; молите Христа Бога спастися душам нашим. Песнь 4 Ирмос: Пришел еси от Девы не ходатай, ни Ангел, но Сам, Господи, воплощся, и спасл еси всего мя, человека. Тем зову Ти: слава силе Твоей, Господи. Землю дольную преминувше, Небесную стяжасте жизнь и со Безплотными лики смесистеся, преподобнии, премудрости рачителие явистеся пребогатии, житие бо непорочно поживше, храми Святому Духу бысте, очищени душею и телом, и землю кротких наследовасте, согласно взывающе: слава силе Твоей, Господи. Очистивше ум свой от страстныя молвы, славнии, и Христову смирению подражавше, преподобне Савватие и Зосимо чудне, безстрастие стяжавше, и гордыню бесовскую до конца низложивше и на землю повергше, к небурному пристанищу устремистеся, в морский остров, согласно воспевающе: слава силе Твоей, Господи. Возсиявше, яко солнце от востока, чудес лучами и ангельскому житию поревновавше, преподобнии, непрестанными молитвами, земныя печали отложивше, Небесныя надежды стяжати сподобистеся, усердно поюще: слава силе Твоей, Господи. Богородичен: Блажит Тя, Пречистая Богородице, всяк возраст и всяка душа верных, Божие бо Слово паче ума и слова родила еси, Препетая. Песнь 5 Ирмос: Света Подателю и веков Творче, Господи, во свете Твоих повелений настави нас, разве бо Тебе, иного бога не знаем. Возсия в вас Господь, Егоже от души возжелели есте видети, преподобне Савватие и Зосимо прехвальне, внутреннима очима зрите доброту неизреченную Христа Бога нашего, любве ради Его в морский остров вселистеся и Того славы наслаждаетеся непрестанно и пищи неизреченныя. Единой Христове любви присвоистеся, преподобнии, и всею душею потщастеся умертвити плотская взыграния богоприятными вашими молитвами, и исполнителие заповедем Божиим бысте, и многих чудес обретосте благодать. Беззлобив и кроток бысть, Зосимо, вся злобы и стрелы вражия погубль, милостив же до конца явися, Савватие, милость душевную стяжав от Единаго Бога. Благодать и милость приемше, свыше нас посещайте, преблаженнии. Богородичен: Воспойте Господеви, вся земля, и пойте вси Явльшемуся из чрева Девы, неизреченно и боголепно из Неискусобрачныя, и Сию верным Показавшу тверду надежду и похвалу. Песнь 6 Ирмос: В бездне греховней валяяся, неизследную милосердия Твоего призываю бездну: от тли, Боже, мя возведи. Силою Христовою укрепляеми, преподобнии Савватие и Зосимо, вся коварства лукаваго низвергли есте на землю священными молитвами, Богоблаженнии, и ныне безстрастия умом очищенным предстоите Богу Вседержителю, от Негоже знамения и чудеса испросивше, угодницы Христови, пресветли явистеся. Богомудренными помыслы украсившеся, и яже на земли преобидесте тленная, и Небесное богатство восприясте, блаженнии супрузи Христови, Савватие премудре и Зосимо преподобне, и ныне на Небесех, радующеся, живете. Иже с верою к раке мощей ваших притекающим подавайте исцеления неоскудно, полки прогоняюще бесовския. Божественных повелений, отцы святии, нравы стяжасте, смирение и любовь, кротость же и незлобие. И сего ради, лукаваго змия умертвивше священными вашими молитвами, Богоблаженнии, от Христа Бога дарование богатно прияли есте, исцелений же дары требующим подаваете. Богородичен: Душевныя моя страсти, Пречистая, исцели, Яже безстрастия бывши источник, Мати Божия, и просвети мя Рождеством Своим, преподобных молитвы приемлющи. Кондак, глас 2 Христовою любовию уязвившеся, преподобнии, и Того крест, на рамо вземше, понесли есте, божественне вооружившеся на невидимыя враги и непрестанныя молитвы, яко копие в руках, имуще, крепко победили есте бесовская ополчения; благодать Господню приемше целити недуги душ и телес притекающих к ракам честных мощей ваших, чудес лучи испущаете всюду. Тем зовем вам: радуйтеся, преподобнии отцы Зосимо и Савватие, монахов удобрение. Стихира, глас 6 Преподобнии отцы, слух свой смиренно Евангелию Христову приклонивше, призывание от Вышняго во обители Небесныя приясте и, Тому верно последующе, мира красная во уметы вменивше, единыя доброты вожделесте Христа; Емуже прилежно молитеся низпослати мирови мир и Церквам единомыслие, стране нашей на враги одоление и душам нашим велию милость. Песнь 7 Ирмос: Образу златому, на поле Деире служиму, трие Твои отроцы небрегоша безбожнаго веления, посреде же огня ввержени, орошаеми, пояху: благословен еси, Боже отец наших. Всех текущих и временных страстей свободися, преподобне Савватие, всю бо надежду стяжав к Богу. Ты же, блаженне Зосимо, всем желанием прилепися воздержанием твердым своему Владыце. Сего ради действуете преславная чудеса поющим: отец наших Боже, благословен еси. Просветивше своя сердца оружием молитв ваших, начальницы бысте морскаго острова обители, учаще и наказующе дети своя и вся возводяще к Свету Богоразумия, с Небес приемше благодать недуги целити, и прокаженныя очищати, и бесы изгоняти, и от морских бед избавляти взывающих верно: благословен Бог отец наших. Плод духовный и жертву непорочную, преблаженне Зосимо, житие свое Владыце принесл еси. Ты же, Савватие Богомудре, плоть свою духови повинув, в воздержании всяком пожил еси, в трудех и во бдениих, прехвальне, имея совесть чисту и житие непорочно, воспевая: благословен Бог отец наших. Богородичен: Оружие, Чистая, хранящее прежде врата Едемская, плещи, Девице, всем дает, низложившим врага — губителя постническими борении и всегда взывающим верно: благословен, Пречистая, Плод чрева Твоего. Песнь 8 Ирмос: В пещь огненную ко отроком еврейским снизшедшаго и пламень в росу преложшаго Бога пойте, дела, яко Господа и превозносите во вся веки. Мыслию очищенною, премудре Савватие, к Богу приближашеся и всем всяк бысть, да Христа приобрящеши. Ты же, преподобне Зосимо, праведен явися, и нищим питатель, и убогим заступник, мужества, и мудрости, и целомудрия рачитель. Сего ради с похвалами бывает память ваша, Содетелю и Избавителю взывающии: благословите, вся дела Господня, Господа, пойте и превозносите Его во вся веки. Слез твоих капли погасиша огнь греховный, преподобне Савватие, реку же чудес твоих показал еси всем зрящим, всякия страсти потопляющу притекающих к тебе, прехвальне. Невозвратно же шествовал еси путь ведущими стезями к Небеси, Зосимо досточудне, от злых и плотских до конца удалился еси, поя: благословите, вся дела Господня, Господа, пойте и превозносите Его во вся веки. Богоноснаго Зосиму похвалами вси почтим, яко благодати Божественныя исполнена и сиянии духовными просвещена изрядно; Савватия же, яко веру, и надежду, и любовь стяжавша неразориму и яко пресветлу звезду, сияющу в духовных добродетелех изрядно, Содетелю и Избавителю вопиюща: дети, благословите, священницы, пойте и превозносите Его во вся веки. Богородичен: Спаси мя, Мати Божия, спасению начало мирови явльшися, избавляющи мя молвы нечистых страстей и всякия противныя скорби, да славлю Тя, Богородице. Песнь 9 Ирмос: Безначальна Родителя Сын, Бог и Господь, воплощся от Девы, нам явися, омраченная просветити, собрати расточенная, тем Всепетую Богородицу величаем. Процвел еси в подвизех постнических, прехвальне Савватие, яко шипок благовонен, и, яко кедр благоуханен, верных сердца облагоухал еси. Струями же слез твоих, преподобне Зосимо, очищся, ныне Света Трисолнечнаго наслаждаешися, отче Богомудре, Троичному предстоя Престолу, светозарными зарями просвещен. Яко велие солнце, провозсия нам величием подвиг страданий твоих, преподобне Зосимо, вся концы просвещая светом Богоразумия, темже, и умер, яко жив являешися. Савватие премудре, отверзеся тебе Царствие Небесное, скончавшу ти доброе течение, видеша же Ангели подвиги трудов твоих и удивишася, темже и Христос тебе воздаяние почести, яко угоднику Своему, дарует. Сего ради вас, преподобнии, ублажаем. Слез твоих тучами греховный огнь погасил еси и своему Владыце Христу угодил еси, преподобне Савватие, крепко сокрушил еси бесовския полки. В постнических же подвизех и трудех процвел еси, блаженне Зосимо, яко шипок благоуханен, и, яко кедр в Ливане, умножил еси чада твоя добродетельми и чудесы. Темже покланяемся раце мощей ваших и верно ублажаем вас, отцы досточуднии. Богородичен: Пощади мя, Господи, пощади, егда хощеши судити, и не осуди мене во огнь, ни яростию Твоею обличи мене. Молит Тя Дева, чисто рождшая Тя, Христе, и ангельстии собори, и преподобных ликове. Молитва О преподобнии и Богоноснии отцы наши Зосимо и Савватие, земнии ангели и Небеснии человецы, ближнии друзи Христови и угодницы Божии, обители вашея славо и украшение, всея же северныя страны, паче и всего Православнаго отечества нашего, необоримая стено и великое заступление! Се мы, недостойнии и многогрешнии, с благоговейною любовию к ракам честных мощей ваших припадающе, духом сокрушенным и смиренным прилежно вас молим: молите непрестанно Благосердаго Владыку и Господа нашего Иисуса Христа, яко дерзновение велие к Тому имущии, да не отступит от нас Его вседействующая благодать, покров же и заступление Пресвятыя Владычицы нашея Богородицы на месте сем да пребудет, и да не оскудеют никогдаже истиннии ревнители ангельскаго жития во святей обители сей, идеже вы, Богоноснии отцы и начальницы, безмерными труды и пощении, токи же слезными и всенощными бдении, непрестанными молитвами и молении начало иноческому житию положисте. Ей, угодницы святии, молитвенницы к Богу благоприятнейшии, теплыми вашими к Нему мольбами оградите и сохраните ны и святое селение сие ваше от труса, потопа, огня и меча, нашествия иноплеменных и смертоносныя язвы, от вражды и всяких нестроений, от всякия беды и скорби и от всякаго зла, да непрестанно на месте сем в мире и безмолвии благочестно славится пресвятое Имя Господа и Бога, и обретают вечное спасение ищущии Его. О преблаженнии отцы наши Зосимо и Савватие! Услышите ны, грешныя, во святей обители вашей и под кровом вашего защищения недостойно жительствующия, и благомощными вашими к Богу ходатайствы испросите душам нашим грехов оставление, жития исправление и вечных благ восприятие в Небеснем Царствии; всем же верующим, иже на всяком месте и во всякой нужде призывают вас в помощь и заступление и иже с благоговейною любовию во обитель вашу притекают, не престаните изливати всякую благодать и милость, сохраняюще их от всякия сопротивныя силы, от всякия напасти и от всякаго злаго обстояния и подающе им вся потребная к душевней и телесней пользе. Наипаче же молите Премилосердаго Бога, да утвердит и укрепит Церковь Свою святую и все наше Православное отечество в мире и тишине, в любви и единомыслии, в правоверии и благочестии да сохранит и соблюдет во веки веков. Аминь. Ина молитва О преподобнии отцы, велицыи заступницы в скорби и услышателие молитв, угодницы Божии и чудотворцы Зосимо и Савватие! Не забудите, якоже обещастеся, посещати чада ваша. Аще бо и отыдосте от нас телом, но духом присно с нами пребываете. Молим убо вы, о преподобнии: избавите ны от огня и меча, от нашествия иноплеменников и междоусобныя брани, от тлетворных ветров, и от напрасныя смерти, и от всех прилогов бесовских, находящих на ны. Услышите нас, грешных, и приимите молитву сию и моление наше, яко кадило благовонное, яко жертву благоугодну, и души наша, злыми делы и советы и помыслы умерщвленныя, оживите, и, якоже умершую отроковицу востависте, якоже неисцельныя раны многих исцелисте, от духов нечистых зле мучимых избависте, тако и нас, содержимых в узах вражиих, измите, и от сетей диавола избавите, из глубины прегрешений изведите, и милостивым вашим посещением и ходатайством от врагов видимых и невидимых оградите ны благодатию и силою Всесвятыя Троицы, всегда, ныне, и присно, и во веки веков. Аминь.

Минея, 12 Марта, Кано́н, его́же краегране́сие: Преподо́бнаго пою́ Феокти́ста Глас 7 Песнь 1 Ирмос: От струй Чермна́го/ сте́ну сотво́ршему лю́дем/ и покры́вшему глубино́ю фарао́на со всево́инством,/ пои́м Го́сподеви, сла́вно бо просла́вися. Припев: Преподо́бне о́тче Феокти́сте, моли́ Бо́га о на́с. Преподо́бнаго Феокти́ста, уго́дника Твоего́,/ пе́ти отве́рзи ми, Христе́, устне́/ и разори́ о́блак неве́дения моего́. Припев: Преподо́бне о́тче Феокти́сте, моли́ Бо́га о на́с. Разу́мно в коне́ц уклони́вся бесо́вския тьмы́ и мглы страсте́й,/ сочета́лся еси́ ли́ку мона́шествующих,/ соверши́в тече́ние твоего́ му́жества. Сла́ва Отцу́ и Сы́ну и Свято́му Ду́ху. Ему́же служи́л еси́, Христу́, моли́ся вы́ну,/ да изба́вит от зла и просвети́т вся, пою́щия тя. И ны́не и при́сно и во ве́ки веко́в. Ами́нь. Богородичен: Превы́шшую Херуви́м, высочайшу Небе́с,/ лу́чшую тва́ри, му́дрых му́чеников огражде́ние,/ еди́ну Богоро́дицу пе́сньми почти́м. Песнь 3 Ирмос: На вода́х зе́млю основа́вый,/ Сло́ве, Христе́ Бо́же,/ и на́ша се́рдца сла́вити Тя утверди́. Припев: Преподо́бне о́тче Феокти́сте, моли́ Бо́га о на́с. Пронза́емь жела́нием чистоты́,/ ца́рское владение премени́л еси́,/ возлюби́в па́че сладча́йшее А́нгельское подо́бие. Припев: Преподо́бне о́тче Феокти́сте, моли́ Бо́га о на́с. Оте́честву своему́ ве́рен блюсти́тель был еси́,/ отгоня́я от него́ вся ересе́й па́губная уче́ния. Сла́ва Отцу́ и Сы́ну и Свято́му Ду́ху. Достохва́льне Феокти́сте блаже́нне,/ моли́ Христа́ Бо́га исцеле́ние и спасе́ние да́ти всем,/ с ве́рою к тебе́ притека́ющим и в по́мощь тя призыва́ющим. И ны́не и при́сно и во ве́ки веко́в. Ами́нь. Богородичен: Родила́ еси́ без се́мене Бо́га Спа́са/ и пребыла́ еси́ па́ки Де́ва, стра́нно чу́до./ Тем Тя, Ма́терь Емману́илеву, благоче́стно испове́дуем. Седален, глас 2 О́браз быв и́стиннаго покая́ния и смире́ния,/ совокупи́лся еси́ ли́ку преподо́бных оте́ц,/ с ни́миже помина́й, мо́лим тя, и нас,/ и вся пою́щия и хвалящия тя. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Ты же́нское поползнове́ние испра́вила еси́,/ ро́ждши Сло́ва Христа́, исправля́юща низве́рженныя,/ и ве́рных утвержде́ние Ты еси́,/ мы же наде́ждею Твое́ю крепи́мся и любо́вию Тя непреста́нно сла́вим. Песнь 4 Ирмос: Услы́шах слух Твой, Го́споди,/ я́ко яви́лся еси́ на земли́,/ за е́же спасти́ ны,/ тем вопие́м: Сла́ва си́ле Твое́й, Го́споди. Припев: Преподо́бне о́тче Феокти́сте, моли́ Бо́га о на́с. О́тче Феокти́сте приснопа́мятне,/ не преста́й приле́жно моли́ти о нас,/ да изба́вимся от вся́кия ско́рби твои́ми моли́твами. Припев: Преподо́бне о́тче Феокти́сте, моли́ Бо́га о на́с. Боголе́пно сконча́в житие́ твое́ на земли́, восприи́м а́нгельское подо́бие,/ жене́ же и сы́ну своему́ Владиславу советовал еси́/ разу́мно жи́ти и оте́чество блюсти́. Сла́ва Отцу́ и Сы́ну и Свято́му Ду́ху. Неподви́жима и кре́пка тя столпа́ ве́дуще,/ се дне́сь, вси лю́дие, му́жи и жены́, ста́рцы со младе́нцы,/ всяк во́зраст и вся́ко состоя́ние,/ све́тло тя пра́зднуем. И ны́не и при́сно и во ве́ки веко́в. Ами́нь. Богородичен: Апо́столов ра́дость, преподо́бных же удобре́ние/ Тя, Богоро́дице, мо́лим ве́рно:/ ра́дости ве́чныя сподо́би ны, пою́щия Тя непреста́нно. Песнь 5 Ирмос: У́тренюет дух мой к Тебе́, Бо́же,/ зане́ Свет еси́/ и Твоя́ повеле́ния бы́ша исцеле́ния рабо́м Твои́м,/ Человеколю́бче. Припев: Преподо́бне о́тче Феокти́сте, моли́ Бо́га о на́с. А́ще и во бра́ке был еси́,/ но благослове́нное целому́дрие соблю́л еси́,/ отбегав сла́дости привре́менныя. Припев: Преподо́бне о́тче Феокти́сте, моли́ Бо́га о на́с. Глаго́л Бо́жий нося́ в се́рдцы свое́м,/ и́мже жил еси́,/ и́мже и благосла́вно тече́ние преподо́бно сконча́л еси́. Сла́ва Отцу́ и Сы́ну и Свято́му Ду́ху. Огня́, и му́ки, и вся́каго искуше́ния/ изба́ви мольба́ми твои́ми вся,/ светоно́сную па́мять твою́ соверша́ющия и благоче́стно тя блажа́щия. И ны́не и при́сно и во ве́ки веко́в. Ами́нь. Богородичен: Мно́гими беда́ми содержи́маго и молво́ю греха́ бе́дствуемаго,/ наста́ви мя к безво́лненному стремле́нию тишины́ Ду́ха,/ Ты бо еси́ приста́нище христиа́н,/ тем Тя пое́м во вся ве́ки. Песнь 6 Ирмос: Возопи́х, Го́споди,/ внегда́ скорбе́ти ми к Тебе́,/ углебо́х бо в тиме́нии глубины́ прегреше́ний мно́гих,/ и, я́влься, возведи́ мя от тли. Припев: Преподо́бне о́тче Феокти́сте, моли́ Бо́га о на́с. Па́мять твоя́ возсия́ нам дне́сь,/ све́том невеще́ственным просвеща́ющая се́рдца на́ша,/ моле́бно тя ве́рою восхваля́ющих. Припев: Преподо́бне о́тче Феокти́сте, моли́ Бо́га о на́с. Отце́в преподо́бных ли́ку сопричасти́вся,/ сконча́л еси́ ми́рно житие́ свое́,/ тем ны́не с ни́ми на Небесе́х сликовству́еши. Сла́ва Отцу́ и Сы́ну и Свято́му Ду́ху. Ю́ностныя преступле́ния и́стинным покая́нием упраздни́л еси́,/ слеза́ми же ду́шу очи́стив,/ преподо́бно усну́л еси́. И ны́не и при́сно и во ве́ки веко́в. Ами́нь. Богородичен: Изба́ви мя вся́каго сопроти́внаго прило́га змии́на,/ Ма́ти Де́во Чи́стая,/ и се́рдце мое́ просвети́ ве́рою Тя сла́вящаго, Всенепоро́чную. Кондак, глас 7 Ве́рою и́стинною укра́шен быв,/ просия́л еси́ доброде́тельми,/ хра́мы и оби́тели ще́дро помога́л еси́,/ богоми́лов же душетли́тельную е́ресь искорени́л еси́,/ сего́ ра́ди вопие́м ти:/ преподо́бне Феокти́сте, блаже́нне,/ со все́ми преподо́бными предстоя́ Христу́,/ моли́ся о всех нас. Икос Зако́н Бо́жий от души́ возлюби́в,/ зрел еси́ к жи́зни гряду́щей,/ сосу́д был еси́ доброде́тели,/ о че́сти земне́й и сла́сти небре́г,/ пло́ть же свою́, я́коже рабы́ню, ду́ху покори́л еси́,/ отста́вив тле́ную и мимотеку́щую сла́ву,/ восприя́л еси́ ца́рство нетле́нное,/ сего́ ра́ди вопие́м ти:/ преподо́бне Феокти́сте, блаже́нне,/ со все́ми преподо́бными предстоя́ Христу́,/ моли́ся о всех нас. Песнь 7 Ирмос: А́нгелом о́троки в пещи́ спасы́й/ и пла́мень в ро́су им проложи́вый,/ благослове́н еси́, Го́споди,/ Бо́же оте́ц на́ших. Припев: Преподо́бне о́тче Феокти́сте, моли́ Бо́га о на́с. Фимиа́м благоуха́нен ты еси́,/ отгоня́яй злосмра́дие е́реси богоми́льския,/ тя велича́ем и приле́жно мо́лим:/ при́зри и ны́не на лю́ди вопию́щия:/ благослове́н еси́, Го́споди, Бо́же оте́ц на́ших. Припев: Преподо́бне о́тче Феокти́сте, моли́ Бо́га о на́с. Единонра́вен преподо́бным яви́лся еси́,/ не пощаде́в пло́ти свое́й любве́ ра́ди Боже́ственныя,/ ны́не же моли́ся за ны песнопою́щия:/ благослове́н еси́, Го́споди, Бо́же оте́ц на́ших. Сла́ва Отцу́ и Сы́ну и Свято́му Ду́ху. Одр име́л еси́ гроб, ка́мением и те́рнием постланый,/ изнуря́я пло́ть свою́ любве́ ра́ди Бо́жия,/ душе́ю же всегда́ взыва́л еси́:/ благослове́н еси́, Го́споди, Бо́же оте́ц на́ших. И ны́не и при́сно и во ве́ки веко́в. Ами́нь. Богородичен: Ро́ждшая Жи́знь, умертви́вшую сме́рть,/ живу́щий мой грех умертви́, Де́во Ма́ти Пречи́стая,/ да вы́ну Тя вси велича́ем. Песнь 8 Ирмос: Пе́щь, дре́вле огне́м опаляемую,/ Богочести́вии попра́ша о́троцы,/ не бо стра́ху мучи́телеву покори́шася,/ но, любо́вию же па́че Богоче́стия пали́ми, глаго́лаху:/ благослови́те, вся дела́ Госпо́дня, Го́спода. Припев: Преподо́бне о́тче Феокти́сте, моли́ Бо́га о на́с. Ко́ль вели́ко отечестволю́бие твое́, ве́ми вси,/ и́бо пре́жде сме́рти свое́й жене́ и сы́ну Владиславу глаго́лал еси́:/ разу́мно жи́ти и оте́чество блюсти́,/ сла́ву же Бо́гу возноси́ти, вопию́ще:/ благослови́те, вся дела́ Госпо́дня, Го́спода. Припев: Преподо́бне о́тче Феокти́сте, моли́ Бо́га о на́с. Ты еси́ вели́чие на́ше и похвала́, Богому́дре Феокти́сте,/ от скве́рны богоми́льския тобо́ю свободи́хомся и научи́хомся пе́ти:/ благослови́те, вся дела́ Госпо́дня, Го́спода. Сла́ва Отцу́ и Сы́ну и Свято́му Ду́ху. Иа́спис ду́хом был еси́, просиява́ющий мно́гими доброде́тельми,/ ны́не же на Небесе́х непреста́нно вопие́ши:/ благослови́те, вся дела́ Госпо́дня, Го́спода. И ны́не и при́сно и во ве́ки веко́в. Ами́нь. Богородичен: Красну́ и избра́нну всечи́стую разуме́в Тя Сын Бо́жий, Всенепоро́чная,/ Сын Твой бы́сть,/ сы́ны сотвори́ благода́тию, Богоро́дицу Тя чту́щия. Песнь 9 Ирмос: Воплоще́ннаго Сло́ва безсе́менно от Тебе́/ боголе́пно родила́ еси́,/ Де́во Богоро́дице,/ и Тя велича́ем. Припев: Преподо́бне о́тче Феокти́сте, моли́ Бо́га о на́с. Столп доброде́телей яви́лся еси́,/ та́йно подвиза́лся и ко всем милосе́рдствуя,/ помина́й нас, твоя́ певцы́,/ да тя непреста́нно велича́ем. Припев: Преподо́бне о́тче Феокти́сте, моли́ Бо́га о на́с. Твой све́тлый пра́здник соверша́юще, мо́лим тя, преподо́бне:/ моли́ся Христу́ Бо́гу, оте́чество твое́ сохрани́ти/ и мир дарова́ти ро́ду се́рбскому,/ да тя всегда́ велича́ем. Сла́ва Отцу́ и Сы́ну и Свято́му Ду́ху. А́нгели дне́сь сликовству́ют с на́ми, в песнопе́нии па́мяти твое́й,/ ты же не забу́ди нас,/ но твои́ми моле́нии от напа́стей, бед и скорбе́й спаси́ нас,/ да тя вси велича́ем. И ны́не и при́сно и во ве́ки веко́в. Ами́нь. Богородичен: Ору́жие на́ше и стена́ Ты еси́, Богоро́дице,/ и заступле́ние к Тебе́ прибега́ющим,/ Тебе́ и ны́не на моли́тву подвиза́ем,/ изба́ви нас от враг на́ших,/ да Тя вси велича́ем. Светилен Свы́ше озаря́ем Боже́ственным све́том,/ просия́л еси́ доброде́тельми, еще́ в ми́ре быв,/ мона́шески подвиза́лся еси́,/ напосле́док восприи́м а́нгельский о́браз,/ к Све́ту невече́рнему преше́л еси́. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Свет ро́ждшая, Чи́стая,/ просвети́ о́чи души́ моея́,/ да не пости́гнет мя глубоча́йшая тьма́ грехо́вная,/ ниже́ глубина́ отча́яния да покры́ет мя,/ но спаси́ мя и окорми́ ко приста́нищу Боже́ственнаго хоте́ния.

Минея, 23 Апреля, Другий канон великомученика Глас 4 Песнь 1 Ирмос: Ли́цы изра́ильтестии,/ невла́жными стопа́ми/ понт Чермны́й и вла́жную глубину́ прогна́вше,/ вса́дники триста́ты, враги́, ви́дяще в ней погруже́ны,/ с весе́лием поя́ху:/ пои́м Бо́гу на́шему, я́ко просла́вися. Припев: Святы́й великому́чениче Гео́ргие, моли́ Бо́га о на́с. Страда́ний свяще́нных сконча́л еси́ тече́ние,/ и, к Небеси́ иды́й, нетле́нен венцено́сец показа́лся еси́,/ благоцвету́щ, Гео́ргие, я́влься пу́тник,/ и со А́нгелы лику́еши:/ пои́м Бо́гу на́шему, я́ко просла́вися. Сла́ва Отцу́ и Сы́ну и Свято́му Ду́ху. По́том благи́х еще́ боля́, преми́рным яви́лся еси́ лико́м, иска́пая,/ Безпло́тных чи́ны плотски́ми, Гео́ргие, удиви́л еси́ Боже́ственными страда́нии./ С си́ми лику́я, зове́ши:/ пои́м Бо́гу на́шему, я́ко просла́вися. И ны́не и при́сно и во ве́ки веко́в. Ами́нь. Богородичен: Жезл Ааро́нов прозя́бший,/ и́же от Иессе́я прообража́ше изра́стший ко́рень, Тя, Пречи́стую,/ цвет ми́ру возсия́вшую, Бо́га воплоще́нна,/ Его́же о нас моля́щи не преста́й, Присноде́во,/ прибега́ющих к Тебе́. Песнь 3 Ирмос: Я́ко непло́ды, роди́ от язы́к Це́рковь,/ и мно́гое в ча́дех изнемо́же со́нмище,/ чу́дному Бо́гу на́шему возопии́м:/ Свят еси́, Го́споди. Припев: Святы́й великому́чениче Гео́ргие, моли́ Бо́га о на́с. Ти́хо разда́л еси́ ни́щим бога́тство/ и, умасти́вся еле́ем любве́,/ те́лом и душе́ю страда́льчески, Гео́ргие, мучи́теля вку́пе победи́л еси́. Сла́ва Отцу́ и Сы́ну и Свято́му Ду́ху. Утверди́вся благода́тию и огне́м распала́емь ре́вности,/ не вопроша́ющим яви́лся еси́, обре́лся еси́ не и́щущим,/ по Христе́, Гео́ргие, гне́ваяся на ле́сть и́дольскую. И ны́не и при́сно и во ве́ки веко́в. Ами́нь. Богородичен: Я́ко но́сиши на ру́ку, Мари́е,/ и от сосцу́ пита́еши пита́ющаго вся́кое дыха́ние,/ Его́же, Богоро́дице, чту́ще, пропове́даем./ Моли́ся Ему́, Чи́стая, о всех нас. Седален, глас 8 Благоче́стия о́бразы му́жески хра́брствуя,/ нече́стия пре́лесть низложи́в, му́чениче, попра́л еси́ врага́ шата́ния/ и, Боже́ственным жела́нием при́сно разгара́емь,/ мучи́телей угаси́л еси́ безбо́жное свере́пство./ Те́мже досто́йно возме́здие мук прия́л еси́ вене́ц/ и подае́ши исцеле́ния ве́рою притека́ющим./ Страстоте́рпче Гео́ргие, моли́ Христа́ Бо́га согреше́ний оставле́ние дарова́ти/ пра́зднующим любо́вию святу́ю па́мять твою́. Песнь 4 Ирмос: Услы́шах Твое́, Христе́, вои́стинну пресла́вное:/ я́ко Безсме́ртен сый Бог/ уподо́бися сме́ртным челове́ком и пребы́сть, е́же бе,/ и того́ ра́ди Твою́ сла́влю си́лу. Припев: Святы́й великому́чениче Гео́ргие, моли́ Бо́га о на́с. У́жас пред суди́ща мучи́телей изве́ствоваше/ неразсу́дна сказа́ния слове́с твоея́ му́дрости, Гео́ргие,/ Христо́с же неве́дущим Бог познава́шеся. Припев: Святы́й великому́чениче Гео́ргие, моли́ Бо́га о на́с. Сло́вом ве́ры Христо́вы, Гео́ргие прему́дре,/ мудреце́м сплете́ния разреши́л еси́ ба́сней скве́рных,/ страсте́й же бо́ги де́латели поруга́л еси́, Тро́ице побо́рниче. Сла́ва Отцу́ и Сы́ну и Свято́му Ду́ху. Услы́шавше, слу́хом слове́с твои́х мучи́телие посрами́шася,/ ты бо, бого́м их руга́яся, смех пока́зовал еси́,/ Христа́ Бо́га пропове́дуя, пло́тию ра́спята,/ и упраздни́вша пре́лесть душегу́бную. И ны́не и при́сно и во ве́ки веко́в. Ами́нь. Богородичен: Тебе́, Присноде́вую и вои́стинну еди́ну Богоро́дицу, сла́вим,/ Ю́же прообразова́ше Богови́дцу Моисе́ю/ неопа́льно, Пречи́стая, купина́, огню́ примеси́вшаяся. Песнь 5 Ирмос: Просвеще́ние Твое́, Го́споди, низпосли́ нам/ и от мглы прегреше́ний разреши́ ны, Бла́же,/ Твой мир да́руяй. Припев: Святы́й великому́чениче Гео́ргие, моли́ Бо́га о на́с. Страда́льчески, Гео́ргие, сплета́яся,/ вина́м разли́чныя пре́лести му́жески проти́вяся,/ ми́ра же наг, держа́ву отъя́л еси́ лю́таго мироде́ржца. Сла́ва Отцу́ и Сы́ну и Свято́му Ду́ху. Огради́вся, Гео́ргие, ору́жием Креста́,/ наде́ждею ве́ры, любо́вию держа́вною/ притупи́л еси́ остроту́ и все ору́жие лю́таго борца́. И ны́не и при́сно и во ве́ки веко́в. Ами́нь. Богородичен: Мучи́телей ра́зум де́вственное посрами́ чре́во:/ Младе́нец бо я́зву а́спидную душегу́бную испыта́ руко́ю/ и, отсту́пника го́рдаго низложи́в, ве́рным под но́зе покори́. Песнь 6 Ирмос: Возопи́, прообразу́я погребе́ние тридне́вное,/ проро́к Ио́на, в ки́те моля́ся:/ от тли изба́ви мя, Иису́се, Царю́ сил. Припев: Святы́й великому́чениче Гео́ргие, моли́ Бо́га о на́с. Возопи́л еси́ со дерзнове́нием к Зижди́телю, Гео́ргие:/ не преда́ждь беззако́нным раба́ Твоего́,/ но кре́пость ми пода́ждь разори́ти их шата́ние. Припев: Святы́й великому́чениче Гео́ргие, моли́ Бо́га о на́с. Небре́г о мучи́тельных сосу́дех, Гео́ргие, на по́двиги во́лею му́жески прите́кл еси́/ и по́честными побе́дами от Христа́ Бо́га венча́лся еси́. Сла́ва Отцу́ и Сы́ну и Свято́му Ду́ху. По искуше́нии доброде́тели твоея́,/ к чудеси́, Гео́ргие, прело́жше преще́ние, льсти́внии мучи́тели,/ Его́же пропове́дал еси́, Животода́вца Христа́, удиви́шася. И ны́не и при́сно и во ве́ки веко́в. Ами́нь. Богородичен: Дре́вле у́бо прельсти́ мя змий и умори́ мя прама́терию мое́ю Е́вою;/ ны́не же, Чи́стая, Тобо́ю Созда́вый мя из и́стления воззва́. Кондак, глас 4 Возде́лан от Бо́га, показа́лся еси́ благоче́стия де́латель честне́йший,/ доброде́телей рукоя́ти собра́в себе́:/ се́яв бо в слеза́х, весе́лием жне́ши,/ страда́льчествовав же кро́вию, Христа́ прия́л еси́/ и моли́твами, свя́те, твои́ми всем подае́ши прегреше́ний проще́ние. Икос За мирски́й живо́т ду́шу свою́ положи́вшаго,/ Христа́ Царя́ жела́я, во́ин тщи́тся умре́ти за Него́,/ ре́вность же ве́лию Боже́ственную в се́рдцы име́я,/ себе́ самого́ приведе́./ Того́ у́бо и мы вси, Боже́ственнаго Гео́ргия,/ я́ко те́пла предста́теля воспои́м ве́рою,/ я́ко сла́внаго су́ща Христо́ва раба́, подо́бящася я́ве своему́ Влады́це/ и вся́кому моля́щуся приходя́ща:/ спеши́т бо при́сно и мо́лит Спа́са/ всем пода́ти согреше́ний проще́ние. Песнь 7 Ирмос: Авраа́мстии иногда́ в Вавило́не о́троцы/ пе́щный пла́мень попра́ша, пе́сньми взыва́юще:/ оте́ц на́ших Бо́же, благослове́н еси́. Припев: Святы́й великому́чениче Гео́ргие, моли́ Бо́га о на́с. Одержа́щую ви́дя и́дольскую ле́сть, благоче́стия распала́емь ре́вностию, Гео́ргие,/ к по́двигом тебе́ отда́л еси́, преблаже́нне, вопия́:/ оте́ц на́ших Бо́же, благослове́н еси́. Припев: Святы́й великому́чениче Гео́ргие, моли́ Бо́га о на́с. Пропове́дуя яви́лся еси́ гони́мую ве́ру,/ мглу же пре́лести облича́я, Гео́ргие, глаго́лал еси́:/ оте́ц на́ших Бо́же, благослове́н еси́. Сла́ва Отцу́ и Сы́ну и Свято́му Ду́ху. Из ко́рене посе́кл еси́ пре́лесть/ и возде́лал еси́ ве́ру, благоче́стием бо́льшую, Гео́ргие,/ ра́довался еси́, глаго́ля:/ оте́ц на́ших Бо́же, благослове́н еси́. И ны́не и при́сно и во ве́ки веко́в. Ами́нь. Богородичен: Превы́шши тва́рей всех еси́, я́ко Творца́ ро́ждши и Го́спода./ Те́мже Ти вопию́, Богоро́дице:/ Благослове́нная, Госпо́дь сил с Тобо́ю. Песнь 8 Ирмос: Ра́дующеся по осужде́нии мучи́тельском о́троцы,/ я́ко да не бо́гом скве́рным послу́жат всем, но живо́му Бо́гу,/ на о́гнь дерзну́ша,/ от А́нгела же ороша́еми, пе́снь поя́ху:/ дела́ Госпо́дня, Го́спода по́йте и превозноси́те во вся ве́ки. Припев: Святы́й великому́чениче Гео́ргие, моли́ Бо́га о на́с. Ду́хом укрепля́емь, о ору́жных боле́знех небре́гл еси́,/ я́ко не глухи́м и́долом хвалу́ посыла́еши, но Христу́ Бо́гу,/ к Нему́же любе́зну стяжа́в, Гео́ргие, ве́ру, глаго́лал еси́:/ дела́ Госпо́дня, Го́спода по́йте и превозноси́те во вся ве́ки. Припев: Святы́й великому́чениче Гео́ргие, моли́ Бо́га о на́с. Я́ко не су́щу вре́менную непщу́я красоту́,/ разли́чная озлобле́ния подъя́л еси́, Гео́ргие,/ ра́дуяся наде́ждею Боже́ственныя жи́зни,/ о стра́шнем же раздробле́нии небре́г, тве́рдостию души́ глаго́лал еси́:/ дела́ Госпо́дня, Го́спода по́йте и превозноси́те во вся ве́ки. Сла́ва Отцу́ и Сы́ну и Свято́му Ду́ху. Разсека́емо ме́дными сосу́ды твое́ те́ло,/ о́стрыми ножи́ по еди́ному у́ду раздробля́емо ви́дя,/ вжиля́емь душе́ю:/ бу́дущей сла́ве недосто́йны ны́нешния му́ки, – глаго́лал еси́:/ дела́ Госпо́дня, Го́спода по́йте и превозноси́те во вся ве́ки. И ны́не и при́сно и во ве́ки веко́в. Ами́нь. Богородичен: От ре́бра Ада́мова Созда́вый Тя от Твоего́ де́вства воплоти́ся,/ И́же всех Госпо́дь, Его́же пою́ще, вопие́м:/ вся дела́, благослови́те, по́йте Го́спода и превозноси́те во вся ве́ки. Песнь 9 Ирмос: От земноро́дных ро́ждшися/ и Творца́ ро́ждшая,/ на́ша похвало́, Богоро́дице Чи́стая,/ Тя, я́ко влады́чествующую тва́рьми, велича́ем. Припев: Святы́й великому́чениче Гео́ргие, моли́ Бо́га о на́с. Свяще́ннии воспева́ют, ца́рие восхваля́ют,/ и лю́дие твои́х страда́ний хвалу́ возвеща́ют, му́чениче Гео́ргие./ Те́мже тя вси ублажа́ем. Сла́ва Отцу́ и Сы́ну и Свято́му Ду́ху. Воспе́ша вся Небе́сныя си́лы по́двиги твоя́,/ ты бо, поже́рся, Бо́гу благоугоди́л еси́, му́чениче Гео́ргие./ Те́мже тя вси ублажа́ем. И ны́не и при́сно и во ве́ки веко́в. Ами́нь. Богородичен: От земноро́дных возра́стши и Зижди́теля ро́ждши,/ ра́дуйся, на́ша похвало́, Богоро́дице Чи́стая,/ Тя, я́ко облада́ющую тва́рьми, велича́ем. Светилен Весна́ нам возсия́, све́тлое Влады́чнее и Боже́ственное Воскресе́ние,/ к Небе́сней па́сце от земли́ нас пресыла́я,/ с не́юже просиява́ет всесла́внаго му́ченика Гео́ргия па́мять светоза́рная,/ ю́же све́тло соверши́м,/ да Боже́ственныя сподо́бимся благода́ти от Христа́ Спа́са. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Я́ко со́лнце светоно́сное,/ чуде́сными заря́ми просвеща́еши всю тва́рь, Гео́ргие страстоте́рпче./ Те́мже, твою́ соверша́юще па́мять,/ пое́м Воскре́сшаго из гро́ба.

Минея, 2 Мая, Канон святителя Глас 8 Песнь 1 Ирмос: Колесницегони́теля фарао́ня погрузи́/ чудотворя́й иногда́/ Моисе́йский жезл, крестообра́зно порази́в/ и раздели́в мо́ре,/ Изра́иля же беглеца́, пешехо́дца спасе́,/ песнь Бо́гови воспева́юща. Припев: Святи́телю о́тче Афана́сие, моли́ Бо́га о на́с. Афана́сию приноша́ю похвалу́,/ я́ко доброде́тель восхваля́я, к Бо́гу приноша́ю па́че похвале́ние,/ от Него́же челове́ком дае́тся достохва́льно дарова́ние доброде́тели,/ е́йже бысть одушевле́н о́браз и печа́ть. Припев: Святи́телю о́тче Афана́сие, моли́ Бо́га о на́с. Богому́дрия был еси́ испо́лнен/ и, па́че со́лнца а́нгельским, блаже́нне, житие́м облиста́в ны́не, преподо́бне,/ превозше́л еси́ похва́л зако́ны, и́же от нас,/ но приими́, о́тче, а́ще и не по достоя́нию похвале́ние. Припев: Святи́телю о́тче Афана́сие, моли́ Бо́га о на́с. Достодо́лжно у́бо песнь плете́м, во сла́вней твое́й па́мяти,/ но лиша́емся бо́льших, Афана́сие, по достоя́нию пе́сней твои́х,/ про́сим проще́ние нам да́ти и незави́стную благода́ть тобо́ю Ду́ха. Сла́ва Отцу́ и Сы́ну и Свято́му Ду́ху. Ю́ношески плотски́х страсте́й игра́ние умертви́л еси́,/ в ю́ности твое́й стяжа́в му́дрость ста́рческую и благоуста́вно, Афана́сие блаже́нне,/ жела́нием бо прему́дрости вся чу́вства испра́вил еси́. И ны́не и при́сно и во ве́ки веко́в. Ами́нь. Богородичен: Вопло́щшагося нас ра́ди, Всенепоро́чная,/ И́же пре́жде Безпло́тнаго, Богонача́льнаго Сло́ва О́тча родила́ еси́,/ о де́вственная похвало́, и прия́телище чистоты́, и храм очище́ния,/ Влады́чице ми́ра, Богоневе́сто. Песнь 3 Ирмос: Утвержде́й в нача́ле Небеса́ ра́зумом/ и зе́млю на вода́х основа́вый,/ на ка́мени мя, Христе́, за́поведей Твои́х утверди́,/ я́ко несть свят, па́че Тебе́,/ еди́не Человеколю́бче. Припев: Святи́телю о́тче Афана́сие, моли́ Бо́га о на́с. Очи́стив от вся́кия скве́рны ду́шу же и те́ло, Афана́сие,/ храм яви́лся еси́, досто́ин Бо́гу,/ те́мже Тро́ицы исполне́ние почи́ в тебе́, священнотаи́нниче пребога́те. Припев: Святи́телю о́тче Афана́сие, моли́ Бо́га о на́с. Твою́ ду́шу, я́коже жела́ше, Уте́шителева благода́ть от страсте́й очище́ну обре́тши,/ я́ве в ней де́йственная показу́ет/ и пресве́тло свети́ло, о́тче, ми́ру тя полага́ет. Сла́ва Отцу́ и Сы́ну и Свято́му Ду́ху. Святи́тельства у́бо пра́вило святи́телем показа́лся еси́,/ де́тельнаго же подписа́ние жития́;/ сло́во же твое́ я́сно, виде́ния о́браз, прему́дре,/ Богосло́вия же твоего́ преде́л уче́ние яви́ся. И ны́не и при́сно и во ве́ки веко́в. Ами́нь. Богородичен: Херуви́м и Серафи́м превы́шши яви́лася еси́, Богоро́дице:/ Ты бо еди́на прия́ла еси́ Невмести́маго Бо́га во Твое́м чре́ве, Нескве́рная./ Те́мже, ве́рнии, Тя вси пе́сньми, Чи́стая, ублажа́ем. Седален, глас 8 Прему́дрости сло́ва навы́к,/ А́риеву лесть низложи́в, ми́рови пропове́дал еси́ правосла́вную ве́ру:/ Отца́ бо Сло́во, Христа́, жизнь на́шу,/ вои́стинну бы́ти уясни́л еси́ сопресто́льна./ Те́мже единому́дренно Це́рковь сла́вит Тро́ицу Единосу́щную,/ во Еди́нице Божества́, Богоно́се Афана́сие./ Моли́ Христа́ Бо́га согреше́ний оставле́ние дарова́ти/ чту́щим любо́вию святу́ю па́мять твою́. Песнь 4 Ирмос: Ты моя́ кре́пость, Го́споди,/ Ты моя́ и си́ла,/ Ты мой Бог, Ты мое́ ра́дование,/ не оста́вль не́дра О́тча/ и на́шу нищету́ посети́в./ Тем с проро́ком Авваку́мом зову́ Ти:/ си́ле Твое́й сла́ва, Человеколю́бче. Припев: Святи́телю о́тче Афана́сие, моли́ Бо́га о на́с. Все тебе́ вдохну́ живоно́сное дыха́ние свы́ше,/ пе́рвее прише́дшее боголе́пно, Дух Христов в го́рнице, и ученики́ насы́щшее,/ апо́стола тя показа́ тринадеся́таго, о́тче, правосла́вную ве́ру пропове́дающаго. Припев: Святи́телю о́тче Афана́сие, моли́ Бо́га о на́с. Ты, Боже́ственною ре́вностию зело́ распаля́емь, собо́ру споспе́шествовал еси́/ и пре́жде, е́же соверши́ти тя председа́теля, в Нике́и пропове́дал еси́ Единосу́щное./ Те́мже Це́ркве Христо́с пастыренача́льника и учи́теля тя поставля́ет. Припев: Святи́телю о́тче Афана́сие, моли́ Бо́га о на́с. Вруче́на име́я церко́вная корми́ла от промышле́ния Боже́ственнаго, Афана́сие,/ еретико́в душевре́дная вся языкобо́лия, я́коже не́кая секи́ра, посе́кл еси́,/ искореня́я, я́коже те́рние, и се́мя слове́сное напая́я, му́дре воздела́л еси́. Сла́ва Отцу́ и Сы́ну и Свято́му Ду́ху. От твоего́ язы́ка о́гненнаго сожже́ся А́риево сро́дное разделе́ние и слия́ние Саве́ллиево,/ я́же от безме́рия зла, и к нече́стию единоче́стна,/ и вся с ни́ми хуле́ния ерети́ческая, о Афана́сие! И ны́не и при́сно и во ве́ки веко́в. Ами́нь. Богородичен: Нов Ада́м за пе́рваго Ты был еси́ от Де́вы,/ за прама́терь – Изба́витель всех и Спас,/ за смерть – и́стинная Жизнь безсме́ртная./ Те́мже Тя ро́ждшую Богоро́дицу ве́дуще, по достоя́нию, Чи́стая, ублажа́ем. Песнь 5 Ирмос: Вску́ю мя отри́нул еси́/ от лица́ Твоего́, Све́те незаходи́мый,/ и покры́ла мя есть чужда́я тьма, окая́ннаго?/ Но обрати́ мя и к све́ту за́поведей Твои́х/ пути́ моя́ напра́ви, молю́ся. Припев: Святи́телю о́тче Афана́сие, моли́ Бо́га о на́с. Христа́ име́я, глаго́люща, о́тче, во орга́не доброгла́снем язы́ка твоего́,/ посрами́л еси́ у́бо и́долов напи́сание е́ресь,/ заблужде́нныя наставля́я и обраща́я ко и́стинному Бо́гу, Афана́сие. Припев: Святи́телю о́тче Афана́сие, моли́ Бо́га о на́с. Губи́тельныя е́реси вся, о́тче, изобличи́л еси́ словесы́ и писа́ньми,/ разли́чную лесть изгоня́я му́дрыми показа́ньми из вселе́нныя,/ уясня́я невоспротивосло́вне правосла́вную ве́ру, блаже́нне. Сла́ва Отцу́ и Сы́ну и Свято́му Ду́ху. Тя учи́теля вои́стинну вели́ка учи́телей му́дрых, Афана́сие, нело́жно сказу́ет/ и со апо́столы причте́ Це́рковь Христо́ва, о́тче,/ изъявля́юща сло́во ве́ры непоро́чное. И ны́не и при́сно и во ве́ки веко́в. Ами́нь. Богородичен: Ма́тернее дерзнове́ние к Сы́ну Твоему́ стяжа́вши, Всечи́стая,/ сро́днаго промышле́ния, е́же о нас не пре́зри, мо́лимся:/ я́ко Тя и еди́ну христиа́не ко Влады́це очище́ние ми́лостивно предлага́ем. Песнь 6 Ирмос: Очи́сти мя, Спа́се,/ мно́га бо беззако́ния моя́,/ и из глубины́ зол возведи́, молю́ся,/ к Тебе́ бо возопи́х, и услы́ши мя,/ Бо́же спасе́ния моего́. Припев: Святи́телю о́тче Афана́сие, моли́ Бо́га о на́с. Чужда́го се́мене се́ятель яви́вся Аполлина́рий,/ земна́го словесе́ и ума́ Христо́во вочелове́чение,/ кре́пко изобличи́ся от Тебе́, преблаже́нне, я́коже несмы́слен и умовре́ден. Припев: Святи́телю о́тче Афана́сие, моли́ Бо́га о на́с. Глаго́л твои́х, блаже́нне, Богодухнове́нных си́ла, я́ко глас гро́ма,/ во у́ши, Богоприя́тне, я́ве возгреме́ ерети́чествующих/ и ли́ца их очерни́. Сла́ва Отцу́ и Сы́ну и Свято́му Ду́ху. Диви́тся всяк твои́м, о́тче, вле́поту списа́ниям му́дрым,/ любе́зно вмеща́я, хотя́щая бы́ти прозябе́ния ересе́й/ прови́дя, отвраща́емая от Тебе́ проро́чески. И ны́не и при́сно и во ве́ки веко́в. Ами́нь. Богородичен: Сын Единоро́дный и пре́жде век неви́димый,/ в после́дния дни Пе́рвенец бысть, зрим в телеси́ из Тебе́, Богома́ти,/ Бог спасе́ния моего́. Кондак, глас 2 Правосла́вия насади́в уче́ния,/ злосла́вия те́рния изсе́кл еси́,/ умно́жив се́мя ве́ры одожде́нием Ду́ха, преподо́бне,/ те́мже тя пое́м, Афана́сие. Икос Быстрины́ слове́с твои́х источи́в Боже́ственнаго уче́ния ми́рови,/ ду́ши ве́рных напои́л еси́, Афана́сие,/ и ерети́ческия предста́тели потопи́л еси́, я́ко други́я еги́птяны,/ зако́н нам богоначерта́нный дав правосла́вия,/ покланя́ние Тро́ицы во Еди́ном Божестве́ чти́ти,/ Е́юже нас соблюди́, от враг неви́димых избавля́я,/ те́мже тя пое́м, Афана́сие. Песнь 7 Ирмос: Бо́жия снизхожде́ния/ огнь устыде́ся в Вавило́не иногда́,/ сего́ ра́ди о́троцы в пещи́, ра́дованною ного́ю,/ я́ко во цве́тнице, лику́юще, поя́ху:/ благослове́н еси́, Бо́же оте́ц на́ших. Припев: Святи́телю о́тче Афана́сие, моли́ Бо́га о на́с. Единоче́стное, Сопресто́льное Отцу́ Сло́во,/ Единоро́дна же Сы́на правосла́вно пропове́дав,/ безсме́ртия, о́тче тезоимени́те, а́бие науча́еши, Ду́ху Сопресто́льна,/ и Единосу́щна, и Соприсносу́щна. Припев: Святи́телю о́тче Афана́сие, моли́ Бо́га о на́с. Учи́теля тя и пропове́дника священноявле́нна Трисо́лнечнаго Све́та,/ возвеща́юща ве́ру правосла́вия да́же до коне́ц земли́,/ нече́стия зря роди́тель, изгна́ния на тя воздвиза́ет. Припев: Святи́телю о́тче Афана́сие, моли́ Бо́га о на́с. Беды́ безме́рныя я́же подъя́л еси́, блаже́нне, подвиза́яся по благоче́стию,/ венцы́ же, та́кожде све́тлии,/ и́бо адама́нт был еси́ бию́щим,/ к себе́ же, я́ко магни́т, привлача́л еси́ вся. Сла́ва Отцу́ и Сы́ну и Свято́му Ду́ху. Стра́нныя догма́ты, чу́ждия же Це́ркве Христо́вы, изгна́л еси́,/ Тро́ицу богосло́вив Ипоста́сьми, Божество́м же Еди́ницу, Ю́же пел еси́:/ благослове́н Бог оте́ц на́ших. И ны́не и при́сно и во ве́ки веко́в. Ами́нь. Богородичен: В ле́то Безле́тнаго, Неискусобра́чна еди́на бы́вши,/ Я́же пе́рвее Безпло́тное Сло́во, пло́ти прия́тием, Де́во, родила́ еси́,/ Ему́же пое́м, согла́сно зову́ще:/ благослове́н Бог оте́ц на́ших. Песнь 8 Ирмос: Седмери́цею пещь/ халде́йский мучи́тель/ Богочести́вым неи́стовно разжже, ́/ си́лою же луч́шею спасе́ны, сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки. Припев: Святи́телю о́тче Афана́сие, моли́ Бо́га о на́с. Святи́телей украше́ние благосла́вное, Афана́сие,/ сто́лпе све́та и Це́ркве утвержде́ние,/ Тро́ицы побо́рниче, Богосло́вия трубо́ злата́я,/ жития́ же мона́шескаго изве́стный законописа́телю, с на́ми пра́зднуеши,/ иере́и соверша́я, лю́ди ве́рныя приводя́ Христу́ во ве́ки. Припев: Святи́телю о́тче Афана́сие, моли́ Бо́га о на́с. Безсме́ртия был еси́ вои́стинну тезоимени́т, де́тельныя бо сло́вом превозше́л еси́,/ иску́сных же в сло́ве изве́стием жития́ побежда́я,/ во обои́х преше́л еси́ край./ Те́мже, непрело́жною доброде́телию просия́в,/ безсме́ртную стяжа́л еси́ па́мять во ве́ки. Сла́ва Отцу́ и Сы́ну и Свято́му Ду́ху. Ты све́тлейшее показа́л еси́, тайнонебе́сниче Богоприя́тне, святи́тельство/ до́блими страда́ньми твои́ми,/ пре́лесть изгна́л еси́ твои́ми изгна́нии ча́стыми по Тро́ице, Ю́же пропове́дуя, вопие́ши:/ Отцу́ поклони́теся, Сы́на богосло́вите, Ду́ха воспо́йте во вся ве́ки. И ны́не и при́сно и во ве́ки веко́в. Ами́нь. Богородичен: Све́та незаходи́маго была́ еси́ прия́телище, Пречи́стая,/ Свет бо су́щим во тьме и се́ни бысть,/ просвеща́я вся́ческая Богоразу́мия благода́тию,/ Его́же непреста́нно, ве́рнии, во вся ве́ки пое́м. Песнь 9 Ирмос: Ужасе́ся о сем не́бо,/ и земли́ удиви́шася концы́,/ я́ко Бог яви́ся челове́ком пло́тски/ и чре́во Твое́ бысть простра́ннейшее небе́с./ Тем Тя, Богоро́дицу,/ А́нгелов и челове́к чинонача́лия велича́ют. Припев: Святи́телю о́тче Афана́сие, моли́ Бо́га о на́с. Просия́ жити́ем, я́ко мо́лния,/ излия́ся же, о́тче, всем веща́ние твое́, я́коже гром,/ и́хже со́лнце назира́ет,/ с Небесе́ бо име́л еси́ свы́ше вдохнове́ние и́стинно./ Те́мже не угаси́ твоея́ па́мяти хода́тай забве́ния гроб, Афана́сие. Припев: Святи́телю о́тче Афана́сие, моли́ Бо́га о на́с. Све́том трисо́лнечным и трисия́нным яснейше ны́не осия́емь,/ певце́м твои́м осия́ние зареви́дное явля́еши,/ я́ко зерца́лом, свы́ше испуща́я со́лнечне,/ и ты соста́ви, блаже́нне, а́ще вели́ко и ма́ло па́че досто́инства проси́мое. Сла́ва Отцу́ и Сы́ну и Свято́му Ду́ху. Пою́ще, мо́лим тя приле́жно: о Це́ркви помоли́ся,/ кресто́м побе́ды дарова́ти во́инству,/ правосла́вней же ве́ре кре́пость на е́реси враго́в,/ нам же спасе́ние, мир же ми́ру в твое́й па́мяти, Афана́сие. И ны́не и при́сно и во ве́ки веко́в. Ами́нь. Богородичен: Всех Предста́тельнице христиа́н, Богома́ти Де́во Пренепоро́чная,/ я́ко Ми́лостива, изба́ви от бед и напа́стей оскорбле́нныя рабы́ Твоя́,/ и неду́гующия лю́тых струп я́звами, и боле́зньми ран боля́щия изврачу́й. Светилен Река́ златото́чная яви́лся еси́,/ уче́ний вода́ми напая́я,/ служи́тель Тро́ицы, святи́телей украше́ние,/ ты бо А́риево уче́ние, Афана́сие, разори́л еси́ уче́нии твои́ми. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Архиере́ев сла́ву и Еги́пта воспита́ние, безсме́ртия украше́ние,/ воспои́м во хвале́нии Афана́сия вели́каго,/ я́ко низложи́теля А́риева и ве́рных засту́пника.

Минея, 2 Июля, Ин канон Глас 4 Песнь 1 Ирмос: Мо́ря чермну́ю пучи́ну/ невла́жными стопа́ми/ дре́внии́ пешеше́ствовав, Изра́иль,/ крестообра́зныма Моисе́овыма рука́ма/ Амали́кову си́лу в пусты́ни победи́л есть. Припев: Пресвята́я Богоро́дице, спаси́ на́с. Свеща́ светоявле́нная и незаходи́мая,/ Пречи́стыя храм, я́коже не́бо све́тлое, обре́т честну́ю ри́зу Ея́,/ вселе́нную днесь благода́тей просвеща́ет заря́ми. Сла́ва Отцу́ и Сы́ну и Свято́му Ду́ху. Кре́пость и утвержде́ния сою́з, Твою́, Пречи́стая, ри́зу Боже́ственную/ вои́стинну стяжа́в, град Твой держа́ву непобеди́мую и́мать,/ тем и хва́лится о Тебе́. И ны́не и при́сно и во ве́ки веко́в. Ами́нь. Дре́вняго я́ко вои́стинну киво́та честне́йшая Твоя́ ра́ка, Богороди́тельнице, яви́ся на земли́,/ его́же зна́мения нося́щи, но и ве́рных во и́стине позна́ния сохраня́ющи. Песнь 3 Ирмос: Весели́тся о Тебе́ Це́рковь Твоя́, Христе́, зову́щи:/ Тя моя́ кре́пость, Го́споди,/ и прибе́жище, и утвержде́ние. Припев: Пресвята́я Богоро́дице, спаси́ на́с. Почита́ем, ве́рнии, я́ко совокупле́ния к Бо́гу сою́з,/ Чи́стыя днесь ри́зы, ве́рно гове́юще. Сла́ва Отцу́ и Сы́ну и Свято́му Ду́ху. Исцеле́ния ве́рным многочестна́я нам днесь/ прече́стно Чи́стыя ри́за источа́ет благода́тию. И ны́не и при́сно и во ве́ки веко́в. Ами́нь. Я́ко роса́ у́тренняя, ра́дость Твоя́ приснотеку́щая/ пещь страсте́й Тя воспева́ющих уставля́ет при́сно. Седален, глас 4 Чуде́с ре́ки, Богоро́дице, от всечестны́я Твоея́ ра́ки происходя́щия,/ я́ко из Еде́ма, напая́ют лице́ земли́,/ благода́ти пролива́ющия ве́рно Тя чту́щим,/ те́мже Тя воспева́ем, и ве́рно восхваля́ем, и благода́рно всегда́ взыва́ем:/ ра́дуйся, еди́на Наде́жде пою́щих Тя. Песнь 4 Ирмос: Вознесе́на Тя ви́девши Це́рковь на Кресте́,/ Со́лнце Пра́ведное,/ ста в чи́не свое́м,/ досто́йно взыва́ющи:/ сла́ва си́ле Твое́й, Го́споди. Припев: Пресвята́я Богоро́дице, спаси́ на́с. Я́ко пречестну́ю твердь, Богоро́дице, Творе́ц и Зижди́тель Тя водрузи́вый,/ я́коже звезда́ми, украси́ Тя Боже́ственными сия́нии,/ и́миже украша́еши концы́. Сла́ва Отцу́ и Сы́ну и Свято́му Ду́ху. От земли́ нас возвлачи́т к Небеси́, Богороди́тельнице,/ Боже́ственная Твоя́ ри́за, Чи́стая, любо́вию сея́ распале́нных те́пле,/ те́мже Тя сла́вим, я́ко лу́чшаго вину́. И ны́не и при́сно и во ве́ки веко́в. Ами́нь. Се благода́ть неисчерпа́емая, прииди́те вси сокруше́нным се́рдцем,/ почерпи́те Боже́ственныя то́ки, источа́ющия незави́стно, о празднолю́бцы,/ от честны́я ра́ки Твоея́, Всепе́тая. Песнь 5 Ирмос: Ты, Го́споди, мой Свет,/ в мир прише́л еси́,/ Свет Святы́й, обраща́яй из мра́чна неве́дения/ ве́рою воспева́ющия Тя. Припев: Пресвята́я Богоро́дице, спаси́ на́с. Ты, Го́споди, Твою́ Ма́терь возвели́чил еси́,/ Ты возне́сл еси́ над вся вла́сти мы́сленныя без сравне́ния сла́ву Ея́. Сла́ва Отцу́ и Сы́ну и Свято́му Ду́ху. Благода́ть Бо́жию незави́стно точа́щая Ты еси́, Пречи́стая Богоро́дице,/ от честны́я ра́ки Твоея́ любо́вию покланя́ющимся. И ны́не и при́сно и во ве́ки веко́в. Ами́нь. Твое́ю си́лою ве́рнии лю́дие опоясу́ются,/ Тя сою́з, Богоро́дице, Твой име́яй град/ ри́зою Твое́ю почита́ется. Песнь 6 Ирмос: Пожру́ Ти со гла́сом хвале́ния, Го́споди,/ Це́рковь вопие́т Ти,/ от бесо́вския кро́ве очи́щшися/ ра́ди ми́лости от ребр Твои́х/ исте́кшею Кро́вию. Припев: Пресвята́я Богоро́дице, спаси́ на́с. Всю Тя па́че естества́ просла́ви Госпо́дь, всю украси́в, Отрокови́це,/ всю Тя почте́ па́че сло́ва, Богоро́дице,/ с по́ясом, ри́зою и Боже́ственною ра́кою. Сла́ва Отцу́ и Сы́ну и Свято́му Ду́ху. Кре́пость Тя ве́рнии стяжа́вше и похвалу́,/ одева́ются сла́вою, честно́ю Твое́ю ри́зою, Богороди́тельнице,/ я́коже пресве́тлое украше́ние и честно́е Тя стяжа́вше. И ны́не и при́сно и во ве́ки веко́в. Ами́нь. Ви́дети Твою́, Богоро́дице, сла́ву неизрече́нную/ дре́вле боле́зноваху боже́ственне проро́цы вси,/ но в после́дняя дни нам яви́ся и́же лет Превы́шший. Кондак, глас 4 Одея́ние всем ве́рным нетле́ния, Богоблагода́тная Чи́стая, дарова́ла еси́,/ свяще́нную ри́зу Твою́,/ е́юже свяще́нное те́ло Твое́ покрыва́ла еси́,/ покро́ве всех челове́ков,/ ея́же положе́ние пра́зднуем любо́вию/ и вопие́м со стра́хом Ти, Чи́стая:/ ра́дуйся, Де́во, христиа́н похвало́. Икос Чи́стое одея́ние и ски́нию Бо́жия Сло́ва,/ одушевле́нный о́блак и ста́мну ма́нны, Богоро́дицу Мари́ю/ вси, спа́сшиися Рождество́м Ея́, ве́рою ублажи́м/ и честне́й ри́зе прико́снемся,/ е́юже Влады́ку объе́мши, я́ко Отроча́ носи́ла есть, в плоть обо́лкшагося,/ Его́же ра́ди челове́ческое естество́ взя́тся к превысоча́йшей жи́зни и Ца́рствию./ Те́мже с ра́достию вопие́м велегла́сно:/ ра́дуйся, Де́во, христиа́н похвало́. Песнь 7 Ирмос: В пещи́ авраа́мстии о́троцы перси́дстей,/ любо́вию благоче́стия па́че,/ не́жели пла́менем, опаля́еми, взыва́ху:/ благослове́н еси́ в хра́ме сла́вы Твоея́, Го́споди. Припев: Пресвята́я Богоро́дице, спаси́ на́с. Ты, я́коже со́нце пра́вды еди́н сый, Бла́же,/ Боже́ственно украси́л еси́ храм Чи́стыя разли́чными Твои́ми дарова́нии,/ в не́мже возсия́вшая лучи́ испуща́ет от Своея́ ри́зы. Припев: Пресвята́я Богоро́дице, спаси́ на́с. Излива́ют чудеса́, Пречи́стая, Боже́ственныя ча́ши Твоя́ благода́ть вои́стинну ве́рным,/ и незави́стно чту́щим Тя от Твоея́ ра́ки пролива́ются,/ я́ко из друга́го Еде́ма, мы́сленныя ре́ки. Сла́ва Отцу́ и Сы́ну и Свято́му Ду́ху. От скве́рны вся́кия душе́вныя,/ чисти́тельна есть Твоя́, Всенепоро́чная Де́во, ра́ка,/ покрыва́ющая честно́е Твое́ те́ло покры́вшую ри́зу. И ны́не и при́сно и во ве́ки веко́в. Ами́нь. Ны́не приступи́те с весе́лием вси, и́же на земли́,/ прииди́те, ра́ка призыва́ет та́йне,/ объя́ти Госпожи́ пресла́вную во мне сокро́виществованную ри́зу Ея́. Песнь 8 Ирмос: Ру́це распросте́р, Дании́л/ львов зия́ния в ро́ве затче́;/ о́гненную же си́лу угаси́ша,/ доброде́телию препоя́савшеся,/ благоче́стия рачи́тели о́троцы, взыва́юще:/ благослови́те, вся дела́ Госпо́дня, Го́спода. Припев: Пресвята́я Богоро́дице, спаси́ на́с. А́нгели, Пречи́стая, ны́не сликовству́ют в честне́м хра́ме Твое́м, Чи́стая,/ и окружа́ют, Влады́чице, честну́ю и святу́ю Твою́ ри́зу любо́вию и ра́достию,/ мы же весе́лием мно́гим покланя́емся,/ воспева́юще Тя, сла́ву ро́да на́шего. Сла́ва Отцу́ и Сы́ну и Свято́му Ду́ху. Жезл, я́же цвет жи́зни прозя́бшая,/ Ты еси́ всех ра́дость многочестна́я, Пречи́стая,/ мирополо́жница Ду́ха, сокро́вище благи́х, арома́т исто́чник,/ из него́же ми́ра исцеле́ний источа́ет Боже́ственная ра́ка. И ны́не и при́сно и во ве́ки веко́в. Ами́нь. Воспева́ют, Пречи́стая, вели́чия Твоя́, Чи́стая, мы́сленная во́инства,/ пропове́дают вси патриа́рси и проро́цы я́сно,/ и апо́столи сия́, и му́чеников лик, и преподо́бных все исполне́ние,/ с ни́миже покланя́ем Ти ся. Песнь 9 Ирмос: Ка́мень нерукосе́чный/ от несеко́мыя горы, Тебе́, Де́во,/ краеуго́льный отсече́ся,/ Христо́с, совокупи́вый разстоя́щаяся естества́./ Тем, веселя́щеся, Тя, Богоро́дице, велича́ем. Припев: Пресвята́я Богоро́дице, спаси́ на́с. Черто́г пречестны́й сей, Богороди́тельнице, яви́ся ра́ка Твоя́,/ честну́ю Твою́ ри́зу, де́вственное же одея́ние и неве́стническое я́ко иму́щи/ и я́ко жи́зни сокро́вище соблюда́ющи. Припев: Пресвята́я Богоро́дице, спаси́ на́с. Храм, изобража́ющий вся́ко Небе́сное благоукраше́ние Де́вы, днесь, ве́рнии, дости́гше,/ чуде́с заря́ми, я́коже звезда́ми, сия́ем, и озаря́емся благода́тию. Сла́ва Отцу́ и Сы́ну и Свято́му Ду́ху. И́мать святы́й Твой по́яс/ и честну́ю Твою́ ри́зу, Богороди́тельнице, Твой град, я́ко сте́ну,/ и уче́ний Боже́ственных соедине́ние, и правосла́вных похвалу́,/ и во́инству победи́тельная. И ны́не и при́сно и во ве́ки веко́в. Ами́нь. Пое́м неизрече́нную сла́ву и безчи́сленную Твою́ благода́ты/ Ты бо еси́ исто́чник прему́дрости, из него́же Сло́во всем происхо́дит,/ чту́щим Тя, Пречи́стая, и велича́ющим рождество́ Твое́. Светилен Окрили́вшую Христа́/ ри́зу Богоотрокови́цы и Богоро́дицы Мари́и,/ днесь прииди́те, земноро́днии, почти́м пе́сньми,/ я́ко да благода́тию Сея́ при́сно ублажа́емся. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Еди́на и естество́ и вре́мя обнови́ла еси́, Богома́ти:/ нетле́нно бо Твое́ рождество́, нетле́нная и ри́за,/ е́юже град Твой покрыва́еши/ и е́юже ски́петры благоче́стия содержи́ши.

Минея, 18 Марта, Канон святителя Глас 4 Песнь 1 Ирмос: Триста́ты кре́пкия,/ Рожде́йся от Де́вы,/ безстра́стия во глубине́/ души́ трича́стное потопи́, молю́ся,/ да Тебе́, я́ко в тимпа́не,/ во умерщвле́нии телесе́/ побе́дное воспою́ пе́ние. Припев: Святи́телю, о́тче Кири́лле, моли́ Бо́га о на́с. Украси́в ду́шу доброде́телей ви́ды,/ благода́тей прия́тельну Ду́ха сию́ Свята́го соверши́л еси́,/ отню́дуже бе́здну прему́дрости отры́гнул еси́,/ ересе́й пучи́ны изсуша́ющу, Кири́лле. Припев: Святи́телю, о́тче Кири́лле, моли́ Бо́га о на́с. Превы́шший ум ве́щных соде́лал еси́, невеще́ственных служи́телей соо́бщник показа́вся,/ огне́м же слове́с твои́х всю попали́л еси́ ве́щь ересе́й, Кири́лле,/ церко́вное свети́ло неусыпа́ющее. Сла́ва Отцу́ и Сы́ну и Свято́му Ду́ху. Глаго́л твои́х воня́ми сладкодыха́тельными неи́стовства тезоимени́тнаго, прему́дре,/ ересе́й всех нестерпи́мый кал отгна́в,/ дале́че сотвори́л еси́, я́ко па́стырь и́стиннейший,/ я́ко Христо́во благово́ние быв. И ны́не и при́сно и во ве́ки веко́в. Ами́нь. Богородичен: От тиме́ния страсте́й, помышле́ний треволне́ния,/ от стрел лука́ваго, от вся́каго прило́га сопроти́внаго спаси́, Чи́стая Богороди́тельнице,/ ду́ши воспева́ющих Твое́ несказа́нное рождество́, Всенепоро́чная. Песнь 3 Ирмос: Я́ко непло́ды, ро́ди от язы́к Це́рковь,/ и мно́гое в ча́дех изнемо́же со́нмище,/ чу́дному Бо́гу на́шему возопии́м:/ свят еси́, Го́споди. Припев: Святи́телю, о́тче Кири́лле, моли́ Бо́га о на́с. Сия́я светлостьми́ духо́вныя прему́дрости,/ трисия́нное Божество́ Тро́ицы, о́тче, све́тло су́щим на земли́ уясни́л еси́,/ и́мже тьмы́ пре́лести изба́вихомся. Припев: Святи́телю, о́тче Кири́лле, моли́ Бо́га о на́с. Цевни́ца яви́лся еси́ Всесвята́го Ду́ха, Богому́дре,/ возглаша́ющи пе́снь явле́ния Христо́ва,/ Его́же во дву естества́х пропове́дал еси́, услажда́я ду́ши на́ша. Сла́ва Отцу́ и Сы́ну и Свято́му Ду́ху. Дом святы́ни твоя́ душа́ показа́ся,/ в него́же Оте́ц, и Сын, и Дух Живонача́льный преесте́ственно всели́ся,/ Ему́же пое́м:/ Свят еси́, Го́споди. И ны́не и при́сно и во ве́ки веко́в. Ами́нь. Богородичен: Ниже́ ум Небе́сный па́че ума́ рождества́ Твоего́ мо́жет сказа́ти, Отрокови́це,/ Ума́ бо Пе́рваго во утро́бе Сло́во, Чи́стая, зачала́ еси́,/ вся́ческая сло́вом соста́вльшаго. Седален, глас 8 Прему́дростию Сло́ва обогате́в, отры́гнул еси́ уче́ний ре́ки живо́тныя,/ и вся́ку напои́л еси́ благочести́вых мы́сль,/ и па́лицею Боже́ственною упа́сл еси́ ста́до на зла́це,/ Боже́ственнаго напита́л еси́ ра́зума./ Те́мже я́ко па́стыря и учи́теля вели́ка и ве́рных засту́пника/ восхваля́ем тя, Кири́лле святи́телю, зову́ще:/ моли́ Христа́ Бо́га грехо́в оставле́ние пода́ти/ честву́ющим любо́вию святу́ю па́мять твою́. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Я́ко Де́ву и еди́ну в жена́х, Тя, без се́мене ро́ждшую Бо́га пло́тию,/ вси ублажа́ем, ро́ди челове́честии,/ О́гнь бо всели́ся в Тя Божества́,/ и я́ко Младе́нца дои́ши Зижди́теля и Го́спода./ Тем, А́нгельский и челове́ческий род, досто́йно сла́вим пресвято́е рождество́ Твое́/ и согла́сно вопие́м Ти:/ моли́ Христа́ Бо́га согреше́ний оставле́ние дарова́ти/ покланя́ющимся ве́рою пресвято́му рождеству́ Твоему́. Песнь 4 Ирмос: Небеса́ доброде́тель Твоя́ покры́ла е́сть,/ и земля́ испо́лнися сла́вы Твоея́, Христе́./ Те́мже ве́рно вопие́м:/ сла́ва си́ле Твое́й, Го́споди. Припев: Святи́телю, о́тче Кири́лле, моли́ Бо́га о на́с. Преми́рныя му́дрости струю́, преподо́бне, твое́ се́рдце прие́мшо,/ отры́гну уче́ния бе́здну, умы́ нече́ствующих погружа́ющую. Припев: Святи́телю, о́тче Кири́лле, моли́ Бо́га о на́с. Еди́ну кре́пость, еди́но Существо́, еди́ну во́лю Триипоста́снаго Божества́ пропове́дал еси́/ и многобо́жия, Кири́лле, пре́лести пото́к изсуши́л еси́. Сла́ва Отцу́ и Сы́ну и Свято́му Ду́ху. Ум ка́льный и пребезу́мный Ма́нентов,/ я́ко ум имы́й и Богонауче́н, блаже́нне, блиста́нии слове́с твои́х попали́в,/ я́ве обличи́л еси́. И ны́не и при́сно и во ве́ки веко́в. Ами́нь. Богородичен: Я́ко вы́шши всех тва́рей, Чи́стая, Творца́ тва́ри зачала́ еси́/ и па́че естества́ ро́ждши, естество́ на́ше обно́вльшаго. Песнь 5 Ирмос: Ты, Го́споди, мой свет,/ в мир прише́л еси́,/ Свет Святы́й, обраща́яй из мра́чна неве́дения/ ве́рою воспева́ющия Тя. Припев: Святи́телю, о́тче Кири́лле, моли́ Бо́га о на́с. Жезло́м честны́я, святи́телю, прему́дрости твоея́/ упа́сл еси́ на воде́ правосла́внаго служе́ния па́ству твою́, блаже́нне. Сла́ва Отцу́ и Сы́ну и Свято́му Ду́ху. Сло́во твое́ све́том Боже́ственным облиста́емо, о Кири́лле!/ просвеще́нных во Иерусали́ме мглу неразу́мия разруши́л еси́. И ны́не и при́сно и во ве́ки веко́в. Ами́нь. Богородичен: Но́щь, Пречи́стая, страсте́й и злых очерне́ния покрыва́ет ду́шу мою́,/ Светода́вца ро́ждшая, озари́ мя, молю́ся. Песнь 6 Ирмос: Возопи́, прообразу́я погребе́ние тридне́вное,/ проро́к Ио́на, в ки́те моля́ся:/ от тли изба́ви мя, Иису́се, Царю́ сил. Припев: Святи́телю, о́тче Кири́лле, моли́ Бо́га о на́с. Река́ ты я́ко, из ино́го Еде́ма изше́л еси́,/ жизното́чных испо́лнена вод Ду́ха,/ и церко́вныя, святи́телю, напоя́еши бразды́. Сла́ва Отцу́ и Сы́ну и Свято́му Ду́ху. Глаго́л твои́х луче́м, я́ко от бу́ри морски́я нече́стия спаса́еши лю́ди, освяще́ннейше,/ к ти́хому приста́нищу правосла́вия тех призыва́я. И ны́не и при́сно и во ве́ки веко́в. Ами́нь. Богородичен: Онебеси́ла еси́ озе́мльствованное естество́, Всенепоро́чная, челове́ческое/ и истле́вшее сие́ новосоде́лала еси́,/ сего́ ра́ди, Отрокови́це, вси немо́лчными гла́сы Тя сла́вим. Кондак, глас 4 Язы́ком твои́м, му́дре,/ Боже́ственными вдохнове́ньми просвети́л еси́ твоя́ лю́ди/ еди́ну че́сти Тро́ицу,/ Естество́м неразде́льну, разделя́ему же Ли́цы./ Те́мже, ра́дующеся, всесвяту́ю твою́ па́мять пра́зднуем,/ и́же к Бо́гу моли́твенника тя предлага́ющии. Песнь 7 Ирмос: Ю́ноши три в Вавило́не,/ веле́ние мучи́телево на бу́йство прело́жше,/ посреде́ пла́мене вопия́ху:/ благослове́н еси́, Го́споди,/ Бо́же оте́ц на́ших. Припев: Святи́телю, о́тче Кири́лле, моли́ Бо́га о на́с. Име́я о́гнь во уме́, о́тче, стра́ха Бо́жия,/ ве́щь испепели́л еси́ сласте́й, воспева́я:/ благослове́н еси́, Го́споди, Бо́же оте́ц на́ших. Припев: Святи́телю, о́тче Кири́лле, моли́ Бо́га о на́с. Слеза́ми страсте́й пла́мень погаси́в, блаже́нне,/ све́тлость сохрани́л еси́ неугаси́му твоея́ души́, взыва́я:/ благослове́н еси́, Го́споди, Бо́же оте́ц на́ших. Сла́ва Отцу́ и Сы́ну и Свято́му Ду́ху. Струю́ живу́ю име́я лия́нием Ду́ха, в души́, Богому́дре,/ источи́л еси́, о́тче, ре́ки уче́ний, Це́рковь напоя́ющия,/ благоче́стно тя честву́ющую. И ны́не и при́сно и во ве́ки веко́в. Ами́нь. Богородичен: Всю Тя освяща́ет Святы́й,/ от Твоея́ пло́ти заи́мствовавый пло́ть Себе́, Богоро́дице,/ во святы́х Госпо́дь живы́й, Бог наш. Песнь 8 Ирмос: Изба́вителю всех, Всеси́льне,/ посреде́ пла́мене благоче́ствовавшия,/ снизше́д, ороси́л еси́/ и научи́л еси́ пе́ти:/ вся дела́, благослови́те, по́йте Го́спода. Припев: Святи́телю, о́тче Кири́лле, моли́ Бо́га о на́с. Дрема́ние небреже́ния, блаже́нне, от ве́ждей душе́вных отри́нув,/ пра́ведным прили́чным ны́не усну́л еси́ сном/ и ко дню невече́рняго Све́та преше́л еси́. Припев: Святи́телю, о́тче Кири́лле, моли́ Бо́га о на́с. Мо́лниями слове́с твои́х попали́л еси́ хвра́стную е́ресь, приснопа́мятне,/ и ве́рныя просвети́л еси́ еди́ну че́сти Тро́ицу начерта́ньми,/ во Еди́нице су́щую Естества́. Сла́ва Отцу́ и Сы́ну и Свято́му Ду́ху. Освяти́в себе́ поще́ньми, ме́ртву тебе́ ра́ди Бы́вшу/ ты безкро́вно же́ртвовал еси́, я́ко святи́тель Боже́ственный,/ я́ко та́ин неизрече́нных служи́тель, Кири́лле. И ны́не и при́сно и во ве́ки веко́в. Ами́нь. Богородичен: Изба́вльшеся кля́твы прама́терния Тобо́ю, Чи́стая Богома́ти,/ Благослове́нная Влады́чице,/ благослови́м, Деви́це препросла́вленная, пресвято́е рождество́ Твое́, Всечи́стая. Песнь 9 Ирмос: Е́ва у́бо неду́гом преслуша́ния/ кля́тву всели́ла е́сть,/ Ты же, Де́во Богоро́дице,/ прозябе́нием чревоноше́ния ми́рови благослове́ние процвела́ еси́./ Тем Тя вси велича́ем. Припев: Святи́телю, о́тче Кири́лле, моли́ Бо́га о на́с. Ви́дети жела́я Христо́ву неизрече́нную, святи́телю, сла́ву,/ потща́лся еси́ стра́сти умертви́ти душетле́нныя,/ прия́телище се́рдце сотвори́ти прему́дрости бо́льшия и лу́чшия./ Те́мже тя ве́рою ублажа́ем. Припев: Святи́телю, о́тче Кири́лле, моли́ Бо́га о на́с. Звезду́ многосве́тлую, Христо́с Со́лнце, на церко́вней высоте́ положи́ тя, Кири́лле,/ луча́ми уче́ний свяще́нных озаря́юща се́рдца/ ве́рно соверша́ющих твою́ светоно́сную па́мять, преподо́бне. Сла́ва Отцу́ и Сы́ну и Свято́му Ду́ху. Собесе́дник и сослужи́тель был еси́ А́нгелом,/ я́ко бо безпло́тен, о́тче, на земли́ пожи́в,/ преподо́бным яви́лся еси́ соприча́стник и святи́телем равностоя́тель;/ с ни́миже лику́я, нас помина́й. И ны́не и при́сно и во ве́ки веко́в. Ами́нь. Богородичен: Непло́дствующее Боже́ственных доброде́телей, Пречи́стая Богоро́дице,/ се́рдце мое́ покажи́, Де́во, плодоно́сно,/ я́же от непло́дове ро́ждшаяся/ во́лею вся претворя́ющего манове́нием,/ да Тя пою́, Всепе́тую.

Минея, 17 Февраля, Святителя канон, егоже краегране́сие: Вонми́, земле́, гла́су святи́теля Ермоге́на: свята́я и Богом люби́мая Русь не поги́бнет. Глас 8 Песнь 1 Ирмос: Песнь возсле́м, лю́дие,/ чу́дному Бо́гу на́шему,/ свободи́вшему Изра́иля от рабо́ты,/ песнь побе́дную пою́ще и вопию́ще:/ пои́м Тебе́, Еди́ному Влады́це. Припев: Священному́чениче Ермоге́не, моли́ Бо́га о на́с. Ве́дущии воскликнове́ние, по́йте и велича́йте святи́теля вели́каго/ и, взира́юще на кончи́ну его́, подража́йте ве́ре его́. Припев: Священному́чениче Ермоге́не, моли́ Бо́га о на́с. Оби́лие благода́ти обита́ет в раце моще́й твои́х, святи́телю Ермоге́не,/ ея́же ра́ди прославля́ем тя, я́ко новоя́вленна чудотво́рца, и про́сим исцеле́ний. Припев: Священному́чениче Ермоге́не, моли́ Бо́га о на́с. Нача́ло прему́дрости – страх Госпо́день, научи́вый и тя, святи́телю,/ рабо́тати Го́сподеви с тре́петом и ра́доватися пред лице́м Его́./ Даждь и нам по моли́тве твое́й положи́ти сие́ нача́ло благо́е. Припев: Священному́чениче Ермоге́не, моли́ Бо́га о на́с. Многи ско́рби пра́ведным, и от всех их изба́вит я Госпо́дь./ По словеси́ сему́ бысть житие́ твое́, святи́телю./ И се ны́не ра́дуешися на Небесе́х/ и ра́дуеши всех, чту́щих па́мять твою́. Припев: Священному́чениче Ермоге́не, моли́ Бо́га о на́с. Испыта́яй свиде́ния Бо́жия был еси́, святи́телю,/ в зако́не бо Христо́ве поуча́лся еси́ день и нощь,/ и оправда́ния Госпо́дня пра́ва суть,/ в селе́ния бо пра́ведных всели́ тя Госпо́дь. Припев: Священному́чениче Ермоге́не, моли́ Бо́га о на́с. За́поведи Госпо́дни от ю́ности возлюби́л еси́/ и преда́ния святы́х оте́ц да́же до сме́рти соблю́л еси́, святи́телю,/ и ны́не с ни́ми сопрославля́еши Бо́га,/ егоже моли́, да спасе́т тобо́ю ду́ши на́ша. Сла́ва Отцу́ и Сы́ну и Свято́му Ду́ху. Егоже возлюби́л еси́ и Ему́же ре́вностно порабо́тал еси́,/ ны́не с ли́ки святы́х воспева́вши и мо́лишися за ны. И ны́не и при́сно и во ве́ки веко́в. Ами́нь. Богородичен: Моли́твеннице те́плая, Засту́пнице ро́да христиа́нскаго,/ приими́ мольбы́ от нас, приле́жно призыва́ющих и моля́щихся Тебе́:/ покры́й страну́ на́шу Правосла́вную покро́вом Твое́я бла́гости. Песнь 3 Ирмос: Ты еси́ утвержде́ние/ притека́ющих к Тебе́, Го́споди,/ Ты еси́ свет омраче́нных,/ и пое́т Тя дух мой. Припев: Священному́чениче Ермоге́не, моли́ Бо́га о на́с. Ле́та дре́вняя помяну́х, и поучи́хся во всех де́лех твои́х, святи́телю,/ и обрето́х ве́дение, ка́ко жити в ми́ре сем,/ от святы́х оте́ц и от жити́й святы́х вразумля́лся. Припев: Священному́чениче Ермоге́не, моли́ Бо́га о на́с. Епи́скоп му́дрый лю́дем был еси́, святи́телю,/ уподо́бился еси́ му́жу, смотря́щу лице́ бытия стра́ны Правосла́вныя/ в ле́тописех дре́вних, я́коже в зерца́ле,/ поуча́ющуся прему́дрости Правосла́вия во днех дре́вних. Припев: Священному́чениче Ермоге́не, моли́ Бо́га о на́с. Го́споди, Госпо́дь наш, я́ко чу́дно И́мя Твое́ по всей Руси́./ Госпо́дь посмее́тся враго́м на́шим./ Госпо́дь засту́пник наш./ Сию́ пра́вду живописа́л еси́, святи́телю,/ поуча́я ро́ды родо́в, я́ко летопи́сец Правосла́вныя Руси́. Припев: Священному́чениче Ермоге́не, моли́ Бо́га о на́с. Лю́дие, поучи́теся, лю́дие, умили́теся,/ вразумля́юще себе́ самех в пе́ниих и пе́снех духо́вных,/ ими́же просла́вил есть святи́тель Ермоге́н За́ступницу ро́да на́шего. Припев: Священному́чениче Ермоге́не, моли́ Бо́га о на́с. Аще не Госпо́дь сози́ждет дом, всу́е труди́шася зи́ждущии./ Сию́ и́стину внуша́л еси́, святи́телю, стра́жем земли́ на́шея,/ да не осуетя́тся помышле́нии свои́ми и да не всу́е мяту́тся. Припев: Священному́чениче Ермоге́не, моли́ Бо́га о на́с. Свяще́нник це́ркве Святи́теля Никола́я был еси́, Ермоге́не,/ и, возгрева́я дар, живы́й в тебе́,/ ве́лию любо́вь Богома́тере стяжа́л еси́,/ Е́юже от сла́вы в сла́ву да́же до Небесе́ влеко́м был еси́/ и в селе́ниих пра́ведных всели́лся еси́. Сла́ва Отцу́ и Сы́ну и Свято́му Ду́ху. Уподо́бился еси́ купцу́, многоце́нен би́сер обре́тшу,/ егда́ ико́ну Богома́тере от земли́ подъя́л еси́, я́ко сокро́вище благода́ти,/ ни́щия ду́хом обогаща́ющее. И ны́не и при́сно и во ве́ки веко́в. Ами́нь. Богородичен: Сказа́ние чуде́с Твои́х, Богоро́дице,/ е́же написа́ святи́тель Ермоге́н во сла́ву ико́ны Твое́я Каза́нския,/ воздвиза́ет всю Русь Правосла́вную при́сно прибега́ти к Тебе́ во всех обстоя́ниих и приле́жно моли́ти:/ Пресвята́я Богоро́дице, помога́й нам. Седален, глас 8 Возше́д на высоту́ Небе́сную и Боже́ственными отту́ду, о́тче, озари́вся сия́нии чуде́с,/ пресве́тел вои́стину яви́лся еси́ Правосла́вней Ру́си па́стырь, нам в напа́стех сый предста́тель непобеди́м./ Те́мже пресла́вно враги́ победи́в, лжу иносла́вия отгна́л еси́/ и страну́ Правосла́вную спасл еси́ от поги́бели, Ермоге́не./ Моли́ Христа́ Бо́га грехо́в оставле́ние дарова́ти/ чту́щим любо́вию святу́ю па́мять твою́. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Святи́телю Ермоге́ну подража́юще,/ почти́м пресве́тлую ико́ну Богома́тере, я́ко исто́чник неисче́рпаемый исцеле́ний,/ и ублажи́м Ма́терь Бо́га Вы́шняго я́ко Де́ву и Еди́ну в же́нах, без семе́не ро́ждшую Бо́га пло́тию. Песнь 4 Ирмос: Услышах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́. Припев: Священному́чениче Ермоге́не, моли́ Бо́га о на́с. Возвести́те во языцех дела́ Бо́жия,/ я́же яви́л нам есть Госпо́дь Вседержи́тель от ико́ны Свое́я Ма́тере, –/ рекл еси́, святи́телю, –/ да не реку́т язы́цы: где есть Бог их, в Него́же ве́руют?/ и да заградя́тся уста́ их. Припев: Священному́чениче Ермоге́не, моли́ Бо́га о на́с. Я́та бысть земле́ю, но не удержа́нна, ико́на Пречи́стыя,/ да бу́дет во утвержде́ние новопросвеще́нным, блужда́ющим же во тьме неве́дения, во открове́ние све́та И́стины,/ я́коже му́дрствует о сем святи́тель Ермоге́н. Припев: Священному́чениче Ермоге́не, моли́ Бо́га о на́с. Ты еси́ изря́дное пе́ние чуде́с Пренепоро́чныя,/ ты еси́ утвержде́ние немощствующих в ве́ре,/ ты еси́ просвеще́ние омраче́нных тьмо́ю неве́рия, и пое́т тя дух мой. Припев: Священному́чениче Ермоге́не, моли́ Бо́га о на́с. И́го благо́е и бре́мя ле́гкое подъя́л еси́, Ермоге́не,/ егда́ о́браз А́нгельский восприя́л еси́,/ да прииде́ши в во́зраст му́жа соверше́нна. Припев: Священному́чениче Ермоге́не, моли́ Бо́га о на́с. Тебе́, оде́ющагося моли́твою, я́ко ри́зою,/ добро́детелей подви́жника, Спа́сова оби́тель ви́дя, зело́ ра́довася:/ гряде́т бо священноархимандри́т обнови́ти оби́тель и утверди́ти благоче́стие. Припев: Священному́чениче Ермоге́не, моли́ Бо́га о на́с. Ермола́ю тезоимени́тый, усоверши́лся еси́,/ Ермоге́ну же, сожи́тельствуя, уподо́бился еси́/ и се, я́ко свети́льник немерца́яй, поставля́ешися на све́щнице Каза́нския це́ркве. Сла́ва Отцу́ и Сы́ну и Свято́му Ду́ху. Лепо есть прему́дрому нему́дрыя просвеща́ти,/ си́льному о Го́споде не́мощныя укрепля́ти,/ лепо есть святи́тельствовати Ермоге́ну, вся мо́гущему о Христе́ Иису́се. И ны́не и при́сно и во ве́ки веко́в. Ами́нь. Богородичен: Я́ко Госпожу́, Цари́цу и Влады́чицу,/ заступа́ющу всех нас, в держа́вный Твой покро́в прибега́ющих,/ пое́т Тя святы́й Ермоге́н,/ с ни́мже приими́ и на́ша моле́ния и спаси́ ду́ши на́ша. Песнь 5 Ирмос: У́тренююще вопие́м Ти:/ Го́споди, спаси́ ны,/ Ты бо еси́ Бог наш,/ра́зве Тебе́, ино́го не вемы. Припев: Священному́чениче Ермоге́не, моли́ Бо́га о на́с. Егда́ был еси́ в Каза́ни, неве́дущия и́стиннаго Бо́га просвеща́л еси́/ и рабо́тати Еди́ному Бо́гу науча́л еси́./ Сего́ ра́ди со апо́столы ра́дуешися, прие́мля награ́ду благове́стника Христо́ва. Припев: Священному́чениче Ермоге́не, моли́ Бо́га о на́с. Ре́вностию Бо́жиею по сла́ве ди́вных во святы́х Гу́рия, Варсоно́фия и Ге́рмана поревнова́л еси́, Ермоге́не,/ и, тех моли́твами вспомоществу́емый, в оби́тели святи́телей пресели́лся еси́,/ предстоя́ Еди́ному Пастыренача́льнику, Его́же моли́ спасти́ся всем нам. Припев: Священному́чениче Ермоге́не, моли́ Бо́га о на́с. Ми́луя, нака́зывал еси́ и, наказу́я, ми́ловал еси́, святи́телю,/ и се́ю му́дростию огражда́л еси́ от волко́в хи́щных/ новопросвеще́нная ча́да твоя́ и вся о́вцы твоя́. Припев: Священному́чениче Ермоге́не, моли́ Бо́га о на́с. Опло́том был еси́ Правосла́вию,/ немощны́я в ве́ре огражда́л еси́/ и к попече́нию о спасе́нии страны́ во Христе́ Иису́се царя́ Фео́дора призы́вал еси́,/ указу́я стране́ спаси́тельное преображе́ние. Припев: Священному́чениче Ермоге́не, моли́ Бо́га о на́с. Град Москва́ и с ним вся Русь пла́кася го́рько,/ самозва́нну повели́телю воцари́вшуся и в нече́стие обле́кшуся,/ ты же еди́н, я́ко кре́пкий побо́рник, сему́ нече́стию противоста́л еси́/ и ве́ру Правосла́вную со дерзнове́нием испове́дал еси́. Припев: Священному́чениче Ермоге́не, моли́ Бо́га о на́с. Ермоге́на испове́дника,/ и́же не у́боя́ся преще́ния сме́ртнаго и слове́с жесто́ких от нечести́ваго врага́,/ пе́сньми ублажа́ем. Сла́ва Отцу́ и Сы́ну и Свято́му Ду́ху. На Него́же, ра́дующеся, взира́ют чини́ А́нгельстии и вси святи́и,/ Тому́ предстои́ши ны́не, Ермоге́не,/ и я́ко испове́дник хода́тайствуеши при́сно за Русь Правосла́вную. И ны́не и при́сно и во ве́ки веко́в. Ами́нь. Богородичен: Ада́мово воззва́ние, Пренепоро́чная Де́во,/ с Тобо́ю Госпо́дь и Тобо́ю с на́ми Бог,/ разуме́йте сие́, язы́цы, и покаря́йтеся. Песнь 6 Ирмос: Ри́зу мне пода́ждь све́тлу,/ одея́йся све́том, я́ко ри́зою,/ Многоми́лостиве Христе́ Бо́же наш. Припев: Священному́чениче Ермоге́не, моли́ Бо́га о на́с. Собо́ра освяще́ннаго избра́нием и Бо́жией во́лею/ возше́л еси́, святи́телю, на престо́л патриа́ршия вла́сти,/ да спасе́ши Русь, напа́стьми мно́гими обурева́ему. Припев: Священному́чениче Ермоге́не, моли́ Бо́га о на́с. Ве́ры нелицеме́рныя испове́дание непоколеблемое/ начерта́л еси́, святи́телю, руко́ю твое́ю/ и сию́ ве́ру пред лицем всея Це́ркве в собо́ре Успе́ния Пречи́стыя испове́дал еси́,/ да узрит вся Русь ка́мень и́стинныя ве́ры,/ на не́мже сози́ждется и утверди́тся в Правосла́вии. Припев: Священному́чениче Ермоге́не, моли́ Бо́га о на́с. Язы́к твой – трость кни́жника скоропи́сца,/ имже загради́шася уста́ гре́шнича и уста́ льстиваго,/ и усмири́ся мяте́ж нечести́вых. Припев: Священному́чениче Ермоге́не, моли́ Бо́га о на́с. Тьму лжи разгоня́я сло́вом и́стины/ и на борьбу́ с изме́нниками Правосла́вное во́инство благословля́я,/ изне́сл еси́ на сто́гна гра́да Москвы́ покро́в от чудото́чных моще́й царе́вича Дими́трия,/ да возвести́тся пра́вда Бо́жия, и да укрепи́тся страна́ Правосла́вная. Припев: Священному́чениче Ермоге́не, моли́ Бо́га о на́с. Аще покаетеся, – рекл еси́, святи́телю, – спасе́ни бу́дете,/ и укрепи́тся си́лою Бо́жиею страна́ Российская. Припев: Священному́чениче Ермоге́не, моли́ Бо́га о на́с. Я́ко дре́во при исхо́дищих вод,/ был еси́ у Престо́ла благода́ти, святи́телю,/ осеня́я прохладою́ утеше́ния и многопло́дием пра́вды Правосла́вную Русь. Сла́ва Отцу́ и Сы́ну и Свято́му Ду́ху. И пропове́дуеши, и облича́еши, и призыва́еши,/ и мо́лишися, и моли́тися во всех хра́мех повелева́еши, святи́телю,/ о спасе́нии и о умире́нии страны́ Правосла́вныя. И ны́не и при́сно и во ве́ки веко́в. Ами́нь. Богородичен: Богоро́дице Де́во, Упова́ние христиа́ном,/ покры́й, соблюди́, сохрани́ и спаси́ Русь,/ прибега́ющу ко Твоему́ заступле́нию. Кондак, глас 6 Темни́цею и гла́дом изнуря́емь,/ да́же до сме́рти ве́рен пребы́л еси́, блаже́нне Ермоге́не,/ мало́душие от серде́ц люде́й твои́х отгоня́я/ и на о́бщий по́двиг вся призыва́я./ Те́мже и нечести́вых мяте́ж низложи́л еси́ и страну́ на́шу утверди́л еси́,/ да вси зове́м ти:/ ра́дуйся, засту́пниче Росси́йския земли́. Икос Прииди́те, правосла́внии людие,/ пе́сньми ублажи́м пресве́тла свети́льника Це́ркве Росси́йския,/ непоколеби́ма столпа́ ве́ры Православныя,/ тепла́ моли́твенника и предста́теля за зе́млю на́шу,/ крепка́ стоятеля проти́ву враго́в,/ стро́гаго обличи́теля на преда́телей и разори́телей Правосла́вныя страны́,/ добраго па́стыря, ду́шу свою́ за о́вцы своя́ положи́вша/ и сего́ ра́ди венце́м сла́вы от Го́спода венча́нна,/ к нему́же припа́даем, ве́рою и любо́вию зову́ще си́це:/ ра́дуйся, вели́кий в иера́рсех Росси́йских святи́телю Христо́в о́тче наш Ермоге́не. Песнь 7 Ирмос: О́троцы Богочести́вии в Вавило́не/ о́бразу злато́му не поклони́шася,/ но посреде́ пе́щи о́гненней, ороша́еми,/ песнь воспева́ху, глаго́люще:/ превозноси́мый отце́в и нас Бо́же, благослове́н еси́. Припев: Священному́чениче Ермоге́не, моли́ Бо́га о на́с. Огне́м лю́тыя зло́бы опаля́ема,/ пе́щи о́гненней уподо́билася есть Правосла́вная Русь во дни разоре́ния и мятежа́ лю́таго,/ си́лою же слове́с твои́х, святи́телю, ороша́ема,/ и до днесь пое́т правосла́вно:/ отце́в и нас Бо́же, благослове́н еси́. Припев: Священному́чениче Ермоге́не, моли́ Бо́га о на́с. Оте́ц всея Руси́ в дни ско́рби и обстоя́ний яви́ся святи́тель Бо́жий Ермоге́н,/ сего́ ра́ди призыва́йте его́ и по́йте с ним И́мени Всевы́шняго:/ отце́в и нас Бо́же, благослове́н еси́. Припев: Священному́чениче Ермоге́не, моли́ Бо́га о на́с. Моли́теся, и пости́теся, и измени́теся в но́ваго челове́ка,/ оде́яна в доброде́тели Боголю́бия и благоче́стия,/ да пода́ст всем нам Госпо́дь мир и любо́вь,/ земли́ на́шей кре́пкое едине́ние, стране́ побе́ду на враги́ и одоле́ние. Припев: Священному́чениче Ермоге́не, моли́ Бо́га о на́с. Любо́вию к оте́честву согрева́яйся и ре́вностию по ве́ре па́че огня́ разгора́яйся,/ попаля́л еси́, святи́телю, те́рния грехолюби́ваго мятежа́,/ обновля́я и утвержда́я обветша́вшее житие́. Припев: Священному́чениче Ермоге́не, моли́ Бо́га о на́с. Юнцы́ ту́чнии, самозва́нцы мяте́жнии,/ ца́рие инозе́мнии и изме́нницы нечести́вии одержа́ша Русь,/ пред лице́м же твое́я пра́вды, святи́телю, исчезо́ша, я́ко дым от огня́,/ да весели́тся Пра́восла́вная Русь о Го́споде, и да торжеству́ет Пра́вославие. Сла́ва Отцу́ и Сы́ну и Свято́му Ду́ху. Бо́гови рабо́тницы и тебе́ помо́щницы бы́ша святи́тели Христо́вы:/ Филаре́т Росто́вский, Ефре́м Каза́нский, Феокти́ст Тверски́й и Галактио́н Су́ждальский,/ и́миже во всю зе́млю изы́де сло́во твое́, Ермоге́не святи́телю, и в концы́ Руси́ ве́щание твое́. И ны́не и при́сно и во ве́ки веко́в. Ами́нь. Богородичен: И́же в напа́стех, и в ско́рбех, и в боле́знех, обремене́ннии грехи́ мно́гими,/ прииди́те к Засту́пнице Усе́рдней, Ма́тери Го́спода Вы́шняго,/ Та бо исцели́т вы, и уте́шит, и упоко́ит. Песнь 8 Ирмос: Богоглаго́ливии о́троцы в пе́щи,/ со огне́м пламень попира́юще, поя́ху:/ благослови́те, дела́ Госпо́дня, Го́спода. Припев: Священному́чениче Ермоге́не, моли́ Бо́га о на́с. Ми́лостыни мно́ги твори́л еси́ лю́дем, святи́телю,/ егда́ бога́тии обнища́ша ми́лостию и сребролю́бия ра́ди не внима́ху, е́же помощи́ неиму́щим,/ ты же рекл еси́ ке́ларю Се́ргиевой оби́тели Авраа́мию,/ и жи́тницы отверзо́шася, и а́лчущии насы́тишася, и благослови́ша Го́спода. Припев: Священному́чениче Ермоге́не, моли́ Бо́га о на́с. А́ще и пе́нится жите́йское мо́ре,/ аще и бесну́ется, воздвиза́емо напа́стей бу́рею,/ не потопи́ти ему́ корабля́ Иису́сова:/ на ка́мени бо ве́ры и пра́вды стои́м./ Та́ко рекл еси́, святи́телю, и бысть та́ко,/ и се торжеству́ют правосла́внии и благословя́т Го́спода. Припев: Священному́чениче Ермоге́не, моли́ Бо́га о на́с. Я́ко до́брый ко́рмчий, приве́л еси́, святи́телю, кора́бль Росси́йский к ти́хой при́стани Правосла́вныя Це́ркве,/ и се страна́ на́ша осоля́ется благода́тию Свята́го Ду́ха и благословля́ет Го́спода. Припев: Священному́чениче Ермоге́не, моли́ Бо́га о на́с. Рекл еси́, святи́телю, боя́щимся Го́спода:/ не бо́йся, ма́лое ста́до, я́ко благоизво́лил есть Оте́ц Небе́сный дарова́ти нам одоле́ние враго́в и мир./ Та́ко ве́ровал еси́ и та́ко по ве́ре восприял еси́./ И се Свята́я Це́рковь ра́дуется о правосла́вии страны́ на́шея и благословля́ет Го́спода. Припев: Священному́чениче Ермоге́не, моли́ Бо́га о на́с. Уничижи́ша тя возстаю́щии на тя,/ мета́юще прах и песо́к в лице́ твое́, да не преща́еши изме́нником и мяте́жником./ Ты же вся претерпе́л еси́ пра́вды ра́ди, благословля́я Го́спода. Припев: Священному́чениче Ермоге́не, моли́ Бо́га о на́с. Свята́я и Бо́гом люби́мая Русь не поги́бнет, –/ рекл еси́, святи́телю, изме́нником, и преда́телем, и всем враго́м на́шим:/ всу́е тружда́етеся, аще не Госпо́дь созида́ет,/ пока́йтеся и благослови́те Го́спода. Сла́ва Отцу́ и Сы́ну и Свято́му Ду́ху. Не ве́даем, ка́ко и нарещи́ вас,/ – рекл еси́, святи́телю, мяте́жником и изме́нником,/ отступи́ли бо есте́ от Бо́га, отпа́ли от Собо́рныя и Апо́стольския Це́ркве,/ забы́ли есте обе́ты Правосла́вныя ве́ры на́шея:/ стоя́ти до сме́рти за дом Пресвяты́я Богоро́дицы, за ве́ру Правосла́вную и Оте́чество./ Пока́йтеся, и обрати́теся, и благослови́те Го́спода. И ны́не и при́сно и во ве́ки веко́в. Ами́нь. Богородичен: Е́же о нас испо́лнив смотре́ние Бо́жие/ и я́же на земли́ соедини́в Небе́сным,/ носи́ла еси́ во чре́ве от Ду́ха Свята́, Пренепоро́чная, и родила́ еси́ нам всех Бо́га,/ Его́же вся дела́ Госпо́дня пою́т и превозно́сят во вся ве́ки. Песнь 9 Ирмос: Вои́стину Богоро́дицу,/ Тя испове́дуем,/ спасе́ннии Тобо́ю, Де́во Чи́стая,/ с Безпло́тными ли́ки Тя велича́юще. Припев: Священному́чениче Ермоге́не, моли́ Бо́га о на́с. Пречи́стей Влады́чице вве́рил еси́, святи́телю, Правосла́вное во́инство,/ и стоя́ти за ве́ру неподви́жно да́же до сме́рти благослови́л еси́,/ и боя́тися Еди́наго, на Небесе́х Живу́щаго, научи́л еси́,/ сего́ ра́ди со испове́дники правосла́вныя пра́вды ра́дуешися. Припев: Священному́чениче Ермоге́не, моли́ Бо́га о на́с. Окая́нныя изме́нники анафема́тствовал еси́,/ правосла́вным же во́ином и всем ревни́телем Правосла́вия/ ми́лость от Го́спода Бо́га и от своего́ смире́ния благослове́ние препода́л еси́, святи́телю,/ и́мже бысть побе́да и одоле́ние на враги́ и всея Руси́ спасе́ние,/ тебе́ же вене́ц от Бо́га, я́ко строи́телю святы́я жи́зни. Припев: Священному́чениче Ермоге́не, моли́ Бо́га о на́с. Глас о́гненныя ре́вности о спасе́нии Оте́чества не вя́жется,/ аще и заключа́ется во хра́мине пусте, я́ко во гро́бе,/ сего́ ра́ди и запове́дал еси́ ученику́ твоему́, Диони́сию игу́мену,/ и и́ноком оби́тели свята́го Се́ргия огласи́ти всю Русь Правосла́вную,/ да воздви́жется спаси́тельная брань во сла́ву Святы́я Це́ркве/ и во утвержде́ние страны́ Росси́йския,/ ю́же возлюби́л еси́ и о нейже мо́лишися Бо́гу. Припев: Священному́чениче Ермоге́не, моли́ Бо́га о на́с. И первопресто́льник Апо́стольския Це́ркве, и испове́дник Правосла́вныя ве́ры,/ и вторы́й Златоу́ст во обличе́ние грехолюби́вых и мяте́жных,/ и строи́тель Правосла́вныя страны́ был еси́, святи́телю,/ и за сие́ произволе́ние темни́цею и гла́дом му́чим был еси́,/ и, прия́в от Бо́га неувяда́емый вене́ц, с му́ченики весели́шися. Припев: Священному́чениче Ермоге́не, моли́ Бо́га о на́с. Бо́гу на́шему тобо́ю сла́ва,/ Тебе́ же, священному́чениче Ермоге́не, довле́ет ра́доватися во све́те лица́ Его́/ и непреста́нно моли́тися, да не поги́бнет Русь Свята́я, но да бу́дет да́же до конца́/ свет во открове́ние язы́ков Правосла́вныя пра́вды. Припев: Священному́чениче Ермоге́не, моли́ Бо́га о на́с. Нищ и боля́й есмь аз, святи́телю,/ и во смире́нии свое́м припада́ю к цельбоно́сным моще́м твои́м, исцеле́ния тре́буя. Сла́ва Отцу́ и Сы́ну и Свято́му Ду́ху. Его́же возлюби́л еси́, Ему́же ду́шу пре́дал свою́ еси́,/ и ны́не предстои́ши со дерзнове́нием я́ко му́ченик./ Моли́ Бо́га о нас, свя́тый священному́чениче Ермоге́не. И ны́не и при́сно и во ве́ки веко́в. Ами́нь. Богородичен: Тя испове́дуем, я́ко Ма́терь Го́спода Вы́шняго,/ и, невозвра́тну наде́жду иму́ще на Тя,/ мо́лимся Тебе́ умиле́нною душею и сокруше́нным се́рдцем:/ всем поле́зная дару́й, и вся спаси́, Богоро́дице Де́во,/ Ты бо еси́ Боже́ственный покро́в рабо́м Твои́м. Светилен Во све́те Правосла́вия, его́же ревни́тель был еси́, святи́телю Ермоге́не,/ зрим Свет И́стины, в немже полнота́ дарова́ний Ду́ха,/ ра́дуемся о Го́споде и велича́ем озари́вшаго тя Све́том присноживо́тным. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Ма́терь Незаходи́маго Све́та,/ осиява́ющую Русь покро́вом Матерняго заступле́ния,/ пе́сньми велича́ем я́ко светле́йшую Го́рних во́инств.

Минея, 13 Января, Канон Глас 8 Песнь 1 Ирмос: Пои́м Го́сподеви, вси́ лю́дие, в мо́ри Чермне́м фарао́на погрузи́вшему, побе́дную пе́снь пою́ще, я́ко просла́вися. Припев: Святи́и му́ченицы Ерми́ле и Стратони́че, моли́те Бо́га о на́с. Честны́я я́коже зве́зды богосия́нныя, тве́рди, му́дрии, Це́ркве яви́стеся, озаря́юще ны́ Боже́ственными светлостьми́, му́ченицы. Припев: Святи́и му́ченицы Ерми́ле и Стратони́че, моли́те Бо́га о на́с. Яви́стеся, я́коже у́глие мы́сленное, возжже́ни огне́м Ду́ха, сла́внии, и и́дольское огни́ще струя́ми крове́й угаси́сте. Сла́ва Отцу́ и Сы́ну и Свято́му Ду́ху. Вода́ми потопля́еми Христа́ ра́ди, в вода́х на́ше нече́стие погрузи́вшаго, безбо́жия ре́ки, му́ченицы, изсуши́сте. И ны́не и при́сно и во ве́ки веко́в. Ами́нь. Богородичен: Уста́ви моя́ грехо́вныя пото́ки, я́же сме́ртную тлю́ Рождество́м Твои́м увяди́вши, и умиле́ние ми́ да́ждь, Богороди́тельнице Всенепоро́чная. Песнь 3 Ирмос: Стра́х Тво́й, Го́споди, всади́ в сердца́ ра́б Твои́х, и бу́ди на́м утвержде́ние, Тя́ во и́стине призыва́ющим. Припев: Святи́и му́ченицы Ерми́ле и Стратони́че, моли́те Бо́га о на́с. Теку́щих непостоя́тельное возненави́девше, бу́дущих возжела́сте нетле́нное наслажде́ние, до́блии страда́льцы Христа́ Всецаря́. Припев: Святи́и му́ченицы Ерми́ле и Стратони́че, моли́те Бо́га о на́с. Му́жески проти́вистеся, богому́дрии, пребеззако́нно повелева́ющему нече́стию покори́тися и побе́ды с небесе́ прия́сте венцы́. Сла́ва Отцу́ и Сы́ну и Свято́му Ду́ху. Тре́бища пре́лести низложи́сте, неле́стны же, Христо́вы му́ченицы, себе́ воздвиго́сте хра́мы че́стны и столпы́ богоразу́мия. И ны́не и при́сно и во ве́ки веко́в. Ами́нь. Богородичен: Ору́жие, пре́жде обраща́емо, вхо́ды мне́ дае́т, стыдя́щися пробо́дшаго, Де́во Ма́ти, копия́, из Тебе́ рожде́ннаго. Седален, глас 1 В вода́х ку́пно блаже́нный коне́ц прия́сте, му́дрии, и в ни́х велиа́ра погрузи́вше благода́тию Бо́га на́шего, му́ченицы. Те́мже венцы́, я́ко победоно́сцы, прие́мше, ра́дуетеся со а́нгельскими ли́ки, с ни́миже на́с помина́йте. Песнь 4 Ирмос: Услы́шах, Го́споди, смотре́ния Твоего́ та́инство, разуме́х дела́ Твоя́ и просла́вих Твое́ Божество́. Припев: Святи́и му́ченицы Ерми́ле и Стратони́че, моли́те Бо́га о на́с. Я́ко Сло́ва служи́тель, словесы́ твои́ми безслове́сное обличи́л еси́, му́чениче Ерми́ле, неразу́мие беззако́ннующих усе́рднейше. Припев: Святи́и му́ченицы Ерми́ле и Стратони́че, моли́те Бо́га о на́с. Еди́но естество́ Божества́, еди́ну вла́сть и госпо́дство, богому́дрии, пропове́давше, многобо́жную ле́сть преоби́десте. Сла́ва Отцу́ и Сы́ну и Свято́му Ду́ху. Пове́шен, и стро́ган, и ра́нами озлобля́емь, непрекло́нен пребы́л еси́, страстоте́рпче, богому́дре му́чениче Ерми́ле. И ны́не и при́сно и во ве́ки веко́в. Ами́нь. Богородичен: Уны́нием дре́млюща и грехо́м спокрыва́ема, к покая́нию мя́, Пречи́стая, я́ко Сло́ва Ма́ти, воззови́. Песнь 5 Ирмос: Вску́ю мя́ отри́нул еси́ от лица́ Твоего́, Све́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и к све́ту за́поведей Твои́х пути́ моя́ напра́ви, молю́ся. Припев: Святи́и му́ченицы Ерми́ле и Стратони́че, моли́те Бо́га о на́с. Му́к о́блацы, му́ченицы всехва́льнии, не покры́ша ва́шего му́жества: па́че со́лнца бо яви́ся благоче́стия сия́нием, благочести́выя световодя́щее и де́монский мра́к отъе́млющее. Припев: Святи́и му́ченицы Ерми́ле и Стратони́че, моли́те Бо́га о на́с. Преше́дше преде́лы челове́чества, богоблаже́ннии, и па́че есте́ственному соедини́вшеся соверше́нными чище́ньми, го́рькия му́ки, и строга́ния и ра́ны претерпе́сте ума́ тве́рдостию. Сла́ва Отцу́ и Сы́ну и Свято́му Ду́ху. Кре́пко сопроти́вился еси́, му́чениче, судя́щему, сла́вне Ерми́ле, и гла́с слы́шати с небесе́, преблаже́нне, сподо́бился еси́, зову́щему любо́вию прибли́житися я́ко Подвигополо́жнику и Сего́ укрепля́ющему му́ченики. И ны́не и при́сно и во ве́ки веко́в. Ами́нь. Богородичен: Я́ко добра́, я́ко красна́, я́ко чистото́ю облиста́ющи, Кра́снаго добро́тою воплоти́ла еси́ Сло́ва и родила́ еси́, е́же бы́ти все́м богоде́льно, Де́во Ма́ти, подаю́щаго бога́тством бла́гости. Песнь 6 Ирмос: Моли́тву пролию́ ко Го́споду и Тому́ возвещу́ печа́ли моя́, я́ко зо́л душа́ моя́ испо́лнися и живо́т мо́й а́ду прибли́жися, и молю́ся, я́ко Ио́на: от тли́, Бо́же, возведи́ мя. Припев: Святи́и му́ченицы Ерми́ле и Стратони́че, моли́те Бо́га о на́с. Во́д животво́рных испо́лнившеся, в ре́чныя вве́ржени бы́сте струи́ и, в ни́х прие́мше кончи́ну, зло́бы предста́теля удави́сте, всехва́льнии, и ны́не на́м исцеле́ний пото́ки источа́ете. Припев: Святи́и му́ченицы Ерми́ле и Стратони́че, моли́те Бо́га о на́с. В ко́шницу вве́ржени бы́вше, усе́рдно преда́стеся глубине́, страстоте́рпцы, и к жи́зни вознесо́стеся боже́ственней, я́же от ве́ка ва́ми наде́емая обре́тше ра́достно, велему́дрии святи́и му́ченицы. Сла́ва Отцу́ и Сы́ну и Свято́му Ду́ху. Яви́лся еси́, в го́рцей му́це му́чимь и па́лицами бие́мь, Стратони́че му́чениче, терпе́ния необори́мь сто́лп, возвы́шен степе́нем ве́ры, сопротивле́ние гони́телей потребля́я и словесы́, и дея́ньми. И ны́не и при́сно и во ве́ки веко́в. Ами́нь. Богородичен: Стра́сти немощны́я души́ моея́, и боле́знь се́рдца, Де́во, и ума́ преложе́ния многообра́зная, я́ко ми́лостива, Пресвята́я, исцели́ и ути́ши лю́тое зо́л мои́х волне́ние, молю́ся. Песнь 7 Ирмос: О́троцы евре́йстии в пещи́ попра́ша пла́мень дерзнове́нно и на ро́су о́гнь преложи́ша, вопию́ще: благослове́н еси́, Го́споди Бо́же, во ве́ки. Припев: Святи́и му́ченицы Ерми́ле и Стратони́че, моли́те Бо́га о на́с. Теча́ше медото́чное от у́ст твои́х сло́во, го́ресть уны́ния Стратони́ка, твоего́ сострада́льца, укроща́ющее, вопию́щаго, Ерми́ле: Бо́же, благослове́н еси́. Припев: Святи́и му́ченицы Ерми́ле и Стратони́че, моли́те Бо́га о на́с. Же́зл си́лы держа́, спаси́тельный кре́ст, до́блий му́чениче, жезло́м бие́ния терпи́ши усе́рдно, воспева́я Творцу́ твоему́, Ерми́ле: Бо́же, благослове́н еси́. Сла́ва Отцу́ и Сы́ну и Свято́му Ду́ху. Спасы́й от чре́ва ки́това содержи́маго проро́ка пресла́вно, от ре́чных во́д ва́ша спаса́ет победоно́сныя мо́щи по кончи́не, страда́льцы. И ны́не и при́сно и во ве́ки веко́в. Ами́нь. Богородичен: Разреша́я Е́вину кля́тву, во Всенепоро́чную всели́лся еси́ Де́ву, благослове́ния исто́чники источа́я вопию́щим: благослове́н еси́, Го́споди Бо́же, во ве́ки. Песнь 8 Ирмос: Седмери́цею пе́щь халде́йский мучи́тель богочести́вым неи́стовно разжже́, си́лою же лу́чшею спасе́ны сия́ ви́дев, Творцу́ и Изба́вителю вопия́ше: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки. Припев: Святи́и му́ченицы Ерми́ле и Стратони́че, моли́те Бо́га о на́с. Терпи́ши, бие́мь и лю́те стру́жемь, слота́ми боле́зней окружа́емь, сла́вный Ерми́ле, Стратони́ка же наста́вник бо благоче́стия подвиго́м бы́л еси́, с ни́мже и вопия́л еси́: свяще́нницы, благослови́те, лю́дие, превозноси́те Го́спода во ве́ки. Припев: Святи́и му́ченицы Ерми́ле и Стратони́че, моли́те Бо́га о на́с. Непрекло́ннии мудрова́нием, и до́блии страда́нием, и небе́сных даро́в досто́йнии, ка́мение честно́е и ве́рных предсто́лпия, ка́мению, повеле́ни бы́вше, не принесо́ша че́сти, Бо́гу же все́х вопия́ху, Влады́це: лю́дие, превозноси́те Его́ во ве́ки. Сла́ва Отцу́ и Сы́ну и Свято́му Ду́ху. Твоя́ ре́бра ноготьми́ стружа́ мучи́тель и мечи́ неми́лостивно ссека́я тя́, ума́ не укра́де, укрепле́на Боже́ственною любо́вию и Изба́вителя насмотря́юща добро́ту. Ему́же ны́не со дерзнове́нием предстоя́, взыва́еши: лю́дие, превозноси́те Го́спода во ве́ки. И ны́не и при́сно и во ве́ки веко́в. Ами́нь. Богородичен: Сы́й, по всему́ соверше́н и естество́м Непристу́пный, яви́ся присту́пен мне́, пло́тию обложе́н из Тебе́, Неискусобра́чная, Его́же приле́жно моли́ беззако́ний мои́х бре́мя расточи́ти и спасти́ песнопою́ща: свяще́нницы, благослови́те, лю́дие, превозноси́те Го́спода во ве́ки. Песнь 9 Ирмос: Устраши́ся вся́к слу́х неизрече́нна Бо́жия снизхожде́ния, я́ко Вы́шний во́лею сни́де да́же и до пло́ти, от деви́ческаго чре́ва бы́в Челове́к. Те́мже Пречи́стую Богоро́дицу, ве́рнии, велича́ем. Припев: Святи́и му́ченицы Ерми́ле и Стратони́че, моли́те Бо́га о на́с. Ве́трилом, му́ченицы Христо́вы, му́к преплы́вше пучи́ну, устреми́стеся ко приста́нищем поко́я, иде́же му́чеников ли́ки, пра́ведных собо́ри, иде́же незаходи́мый Све́т и ра́дость пра́зднующих в Ду́се. Припев: Святи́и му́ченицы Ерми́ле и Стратони́че, моли́те Бо́га о на́с. Дне́сь па́мять свяще́нную страда́ния ва́шего, всеблаже́ннии, Це́рковь Христо́ва соверша́ющи, пра́зднует ра́достный и светоно́сный пра́здник, Бо́га велича́ющи, Венцеда́вца ва́шего, велича́ющаго ва́с я́ко уго́дники. Сла́ва Отцу́ и Сы́ну и Свято́му Ду́ху. Взя́стеся к пресве́тлей свиде́тельства и́стинно высоте́, святи́и, и восприя́сте жела́ния кра́й, и́стинно, блаже́ннии, Ца́рствие Бо́жие прие́мше недви́жимое, му́чениче Стратони́че с Ерми́лом му́дрым и богоразу́мным. И ны́не и при́сно и во ве́ки веко́в. Ами́нь. Богородичен: Пощади́ мя, Спа́се, рожде́йся и сохрани́вый Ро́ждшую Тя́ нетле́нну по рождестве́, егда́ ся́деши суди́ти дела́ моя́, беззако́ния презира́я и грехи́ моя́, я́ко Безгре́шен, я́ко Бо́г Ми́лостив и Человеколю́бец.

Минея, 6 Апреля, Кано́н, его́же краегране́сие: Чудоде́тельному Евтихи́ю удивля́юся. Творе́ние Феофа́ново Глас 6 Песнь 1 Ирмос: Я́ко по су́ху, пешеше́ствовав Изра́иль/ по бе́здне стопа́ми,/ гони́теля фарао́на/ ви́дя потопля́ема,/ Бо́гу, побе́дную песнь пои́м, вопия́ше. Припев: Святи́телю о́тче Евтихи́е, моли́ Бо́га о на́с. Доброде́тельми благополу́чествовав и просве́щся светолу́чными сия́ньми даро́в Бо́жиих,/ злополуче́ния изба́ви мя страсте́й моли́твами твои́ми, му́дре,/ я́ко да воспою́ тя. Припев: Святи́телю о́тче Евтихи́е, моли́ Бо́га о на́с. Небосажде́нна розга́ во дво́рех Бо́жиих,/ прозя́бл еси́ гобзова́нныя плоды́ доброде́тельных дея́ний, вку́пе и чуде́с/ пои́стинне, блаже́нне Евтихи́е. Сла́ва Отцу́ и Сы́ну и Свято́му Ду́ху. Ум влады́ку сотвори́в, страсте́й томи́тельство, преподо́бне, удержа́л еси́,/ те́мже, безстра́стия кри́лы возвы́сився,/ к са́мым Бо́жиим приве́лся еси́ селе́нием. И ны́не и при́сно и во ве́ки веко́в. Ами́нь. Богородичен: Твоего́ прие́мше Соде́теля, я́ко Сам восхоте́,/ из безсе́меннаго Твоего́ чре́ва, па́че ума́ воплоща́ема, Чи́стая,/ тва́рей вои́стинну яви́лася еси́ Влады́чица. Песнь 3 Ирмос: Несть свят,/ я́коже Ты, Го́споди Бо́же мой,/ вознесы́й рог ве́рных Твои́х, Бла́же,/ и утверди́вый нас на ка́мени/ испове́дания Твоего́. Припев: Святи́телю о́тче Евтихи́е, моли́ Бо́га о на́с. Свята́го Ду́ха был еси́ храм, Богоно́се,/ тебе́ сама́го очи́стив от тиме́ния страсте́й прилежа́нием мно́гим,/ святи́телю сла́вне Евтихи́е. Припев: Святи́телю о́тче Евтихи́е, моли́ Бо́га о на́с. Сын дне прича́стием све́тлости невеще́ственныя показа́лся еси́/ и све́том врачева́ний нело́жных/ мглу страсте́й отго́ниши вре́да, всеприснопа́мятне. Сла́ва Отцу́ и Сы́ну и Свято́му Ду́ху. Сосца́ ссав изде́тска воздержа́ния,/ в ме́ру моли́твами непреста́нными во́зраста Христо́ва дости́гл еси́ вои́стинну,/ святи́телю сла́вне Евтихи́е. И ны́не и при́сно и во ве́ки веко́в. Ами́нь. Богородичен: Боже́ственнаго рождества́ Твоего́, Чи́стая, вся́кий естества́ чин превосхо́дит чу́до:/ Бо́га бо преесте́ственне зачала́ еси́ во чре́ве/ и, ро́ждши, пребыва́еши Присноде́ва. Седален, глас 3 Боже́ственною си́лою оде́явся, обнажи́л еси́ кре́пость льсти́ваго,/ чудоде́йствуя, Богоно́се, изря́дная./ Отгна́н же непра́ведно ста́да твоего́, па́ки возврати́лся еси́ в не,/ прославля́ем, о́тче преподо́бне:/ Христа́ Бо́га моли́ дарова́ти нам ве́лию ми́лость. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Боже́ственная ски́ния была́ еси́ Сло́ва,/ еди́на Пречи́стая Ма́ти Де́во, чистото́ю А́нгелы превозше́дшая,/ па́че всех мене́, персть бы́вша, оскверне́на плотски́ми прегреше́ньми,/ очи́сти моли́тв Твои́х Боже́ственными вода́ми,/ подаю́щи, Чи́стая, ве́лию ми́лость. Песнь 4 Ирмос: Христо́с моя́ си́ла,/ Бог и Госпо́дь,/ честна́я Це́рковь/ боголе́пно пое́т, взыва́ющи,/ от смы́сла чи́ста о Го́споде пра́зднующи. Припев: Святи́телю о́тче Евтихи́е, моли́ Бо́га о на́с. Заре́ю, всему́дре, Боже́ственныя благода́ти осиява́емь,/ вся́кое ерети́ческое мне́ние омрачи́л еси́/ и уясни́л еси́ люде́й правосла́вных собо́ры. Припев: Святи́телю о́тче Евтихи́е, моли́ Бо́га о на́с. Не стужи́л еси́, за ве́ру гоне́ния терпя́,/ и́бо Того́ име́л еси́, спобора́юща тебе́,/ гони́маго Христа́, святи́телю всече́стне. Сла́ва Отцу́ и Сы́ну и Свято́му Ду́ху. Возвы́сив, поста́ви на ка́мени Христо́с Своея́ и́стины/ твоея́ душа́, блаже́нне, стопы́/ и запя́т враго́в вознесе́нная мудрова́ния. И ны́не и при́сно и во ве́ки веко́в. Ами́нь. Богородичен: Яко вои́стинну невеща́нна и непости́жна Твоего́ боголе́пнаго, Богоро́дице, суть рождества́/ су́щим на земли́ и на Небеси́, Присноде́во, та́инства. Песнь 5 Ирмос: Бо́жиим све́том Твои́м, Бла́же,/ у́тренюющих Ти ду́ши любо́вию озари́, молю́ся,/ Тя ве́дети, Сло́ве Бо́жий,/ и́стиннаго Бо́га,/ от мра́ка грехо́внаго взыва́юща. Припев: Святи́телю о́тче Евтихи́е, моли́ Бо́га о на́с. До́блественне терпя́ разлуче́ние вруче́ннаго ти ста́да, о́тче,/ непра́ведно изгна́н был еси́;/ а́бие же к сему́ па́ки тече́ши ра́достно,/ вельми́ от всех восхваля́емый. Припев: Святи́телю о́тче Евтихи́е, моли́ Бо́га о на́с. Не в гада́ниих зри́ши сла́ву,/ и́же возжела́л еси́ Бо́жию от младе́нства, блаже́нне Евтихи́е,/ лице́м же па́че ны́не к лицу́ разре́шшимся зерца́лом плотски́м, о́тче наш. Сла́ва Отцу́ и Сы́ну и Свято́му Ду́ху. Вод Боже́ственных твоя́ душа́, о́тче, испо́лньшися,/ ре́ки Це́ркви вои́стинну источи́ уче́ний, му́дре Евтихи́е,/ и сея́ напая́еши, блаже́нне, бразды́. И ны́не и при́сно и во ве́ки веко́в. Ами́нь. Богородичен: И́же Богоро́дицу Тя от души́, Влады́чице ми́ра Блага́я, испове́дающия спаса́й:/ Тя бо предста́тельство непобори́мое стяжа́хом,/ су́щую Богороди́тельницу. Песнь 6 Ирмос: Жите́йское мо́ре,/ воздвиза́емое зря напа́стей бу́рею,/ к ти́хому приста́нищу Твоему́ прите́к, вопию́ Ти:/ возведи́ от тли живо́т мой,/ Многоми́лостиве. Припев: Святи́телю о́тче Евтихи́е, моли́ Бо́га о на́с. В тебе́ всели́ся Тро́ица я́ко в чи́стом от страсте́й слия́ния/ и дарова́ний испо́лни вои́стинну, Богому́дре Евтихи́е,/ и́миже всяк неду́г отго́ниши при́сно. Припев: Святи́телю о́тче Евтихи́е, моли́ Бо́га о на́с. Возвы́сился еси́, стяжа́в в се́рдцы твое́м нело́жне высокотво́рное смире́ние,/ и де́монския вся ко́зни до конца́ смири́л еси́,/ святи́телю Госпо́день пресла́вне. Сла́ва Отцу́ и Сы́ну и Свято́му Ду́ху. Жите́йское мо́ре безво́лненне преше́д,/ к приста́нищем дости́гл еси́ Ца́рствия, о́тче, Небе́снаго,/ Бо́гу бре́мя души́ спасл еси́, досточу́дне. И ны́не и при́сно и во ве́ки веко́в. Ами́нь. Богородичен: Пречи́стая Влады́чице, ро́ждшая челове́ком Ко́рмчию и Го́спода,/ страсте́й мои́х нестоя́нное и лю́тое утоли́ смуще́ние/ и тишину́ пода́ждь се́рдцу моему́. Кондак, глас 8 Боже́ственнаго ве́рно Евтихи́я вси пою́ще, лю́дие,/ любо́вию да ублажи́м, я́ко па́стыря вели́ка и служи́теля,/ и учи́теля прему́дра, и прогони́теля ересе́й,/ мо́лит бо Го́спода о всех нас. Песнь 7 Ирмос: Росода́тельну у́бо пещь/ соде́ла А́нгел/ преподо́бным отроко́м,/ халде́и же опаля́ющее/ веле́ние Бо́жие мучи́теля увеща́ вопи́ти:/ благослове́н еси́, Бо́же оте́ц на́ших. Припев: Святи́телю о́тче Евтихи́е, моли́ Бо́га о на́с. Снегови́дну, о́тче, ду́шу стяжа́в,/ доброде́телей бе́лостию уподо́бился еси́ А́нгелом./ Те́мже с ни́ми лику́еши и, ра́дуяся, вопие́ши:/ благослове́н еси́, Бо́же оте́ц на́ших. Припев: Святи́телю о́тче Евтихи́е, моли́ Бо́га о на́с. Же́ртву я́ко непоро́чну,/ прине́сл еси́ тя сама́го от младе́нства, преподо́бне, Влады́це твоему́/ сласте́й умерщвле́нием я́ко вои́стинну./ Те́мже, ра́дуяся, вопие́ши:/ благослове́н еси́, Бо́же оте́ц на́ших. Сла́ва Отцу́ и Сы́ну и Свято́му Ду́ху. То́ки твои́х слез, о́тче, угаси́ша о́гненное пале́ние плотски́х сласте́й/ и бы́ша исцеле́ний роса́ ве́рно зову́щим всегда́ Христу́:/ благослове́н е́си, Бо́же оте́ц на́ших. И ны́не и при́сно и во ве́ки веко́в. Ами́нь. Богородичен: Тя, Всенепоро́чная и Ма́ти Присноде́во, позна́хом спасе́ние, челове́цы,/ и́бо в не́дрех Отца́ неразлу́чный Сын из Тебе́ воплоти́ся./ Те́мже Благослове́на еси́ в ро́ды родо́в. Песнь 8 Ирмос: Из пла́мене преподо́бным ро́су источи́л еси́/ и пра́веднаго же́ртву водо́ю попали́л еси́:/ вся бо твори́ши, Христе́, то́кмо е́же хоте́ти./ Тя превозно́сим во вся ве́ки. Припев: Святи́телю о́тче Евтихи́е, моли́ Бо́га о на́с. Дрема́ние уны́ния оттря́с доброде́телей попече́нием, о́тче,/ бдел еси́, до́ндеже Бо́га Иа́ковля яви́лся еси́ селе́ние,/ Его́же превозно́сим во вся ве́ки. Припев: Святи́телю о́тче Евтихи́е, моли́ Бо́га о на́с. Щито́м благоче́стия защища́яся, и, я́ко обоюдоо́стр меч, восприи́м повеле́ние честно́е,/ тве́рдо вся ссекл еси́ ерети́ческия полки́, Богому́дре. Припев: Святи́телю о́тче Евтихи́е, моли́ Бо́га о на́с. Безкро́вныя же́ртвы Бо́гу прине́сл еси́,/ смире́нием се́рдца, о́тче Евтихи́е,/ же́ртвуя тебе́ ра́ди пожре́нному, я́ко овча́ти,/ Его́же превозно́сим во вся ве́ки. Сла́ва Отцу́ и Сы́ну и Свято́му Ду́ху. Троичен: Еди́но естество́ Тро́ицы,/ неисче́тную си́лу, превозше́дшую времена́ вся и естества́ по́мысл,/ при́сно правосла́вно пропове́даем и превозно́сим во вся ве́ки. И ны́не и при́сно и во ве́ки веко́в. Ами́нь. Богородичен: В рождестве́ избежа́ла еси́ боле́зни, Чи́стая,/ и, ро́ждши, Де́ва па́ки пребыла́ еси́: вся бо твори́т Иису́с Бог и Челове́к,/ Его́же превозно́сим во вся ве́ки. Песнь 9 Ирмос: Бо́га/ челове́ком невозмо́жно ви́дети,/ на Него́же не сме́ют чи́ни Ангельстии взира́ти;/ Тобо́ю бо, Всечи́стая, яви́ся челове́ком/ Сло́во воплоще́нно,/ Его́же велича́юще,/ с Небе́сными во́и Тя ублажа́ем. Припев: Святи́телю о́тче Евтихи́е, моли́ Бо́га о на́с. Ма́лыми велича́йшая стяжа́в и тле́нными нетле́нная до́бре искупи́в,/ Ца́рство недви́жимое прия́л еси́, немимоходя́щую сла́ву получи́л еси́,/ доброде́телей твои́х добро́тами украша́емь. Припев: Святи́телю о́тче Евтихи́е, моли́ Бо́га о на́с. Чи́сто житие́ твое́ соверши́л еси́/ и Чи́стыя Де́вы служи́тель яви́лся еси́, Евтихи́е,/ иера́рх Бо́жий и́стиннейший, столп правосла́вия, твердь ве́ры,/ стена́ лю́дей избра́нных, Богоблаже́нне. Припев: Святи́телю о́тче Евтихи́е, моли́ Бо́га о на́с. Плотско́е мудрова́ние повину́л еси́ по́мыслу/ и, я́коже безпло́тен, во пло́ти на земли́ пожи́л еси́, Евтихи́е,/ те́мже со Безпло́тными Боже́ственными си́лами/ Влады́це всех и Бо́гу, ра́дуяся, предстои́щи. Сла́ва Отцу́ и Сы́ну и Свято́му Ду́ху. Я́ко А́нгелом ны́не купножи́тель,/ патриа́рхом, му́чеником и преподо́бным равносе́льник,/ с ни́ми моли́ся Го́сподеви реше́ние грехо́в всем дарова́ти,/ свяще́нную твою́ на земли́ па́мять творя́щим, му́дре. И ны́не и при́сно и во ве́ки веко́в. Ами́нь. Богородичен: Сы́на, безле́тно от Отца́ возсия́вшаго,/ Ты, во чре́ве несказа́нно заче́нши,/ родила́ еси́, Богома́ти Чи́стая, Де́во нескве́рная./ Моли́, Пресвята́я, о рабе́х Твои́х Того́, я́ко Человеколю́бца Бо́га,/ спасти́ род наш.

Минея, 25 Января, Кано́н свята́го Глас 1 Песнь 1 Ирмос: Христо́с ражда́ется – сла́вите!/ Христо́с с Небе́с – сря́щите!/ Христо́с на земли́ – возноси́теся!/ По́йте Го́сподеви, вся земля́,/ и весе́лием воспо́йте, лю́дие,/ я́ко просла́вися. Припев: Святи́телю, о́тче Григо́рие, моли́ Бо́га о на́с. Богосло́ва втора́го, столпа́ Све́та Небе́снаго,/ му́дрости Бо́жия трубу́,/ прииди́те, сего́ слове́с рачи́телие, любо́вию соше́дшеся,/ восхва́лим того́, я́ко Богопропове́дника. Припев: Святи́телю, о́тче Григо́рие, моли́ Бо́га о на́с. Сло́во О́тчее Безнача́льное,/ всех я́ко Бог промы́сленник, промысли́тельною си́лою тя, блаже́нне, Це́ркви,/ я́коже ма́тери, сло́вом и му́дростию облагодати́в твой ум, дар да́рует. Сла́ва Отцу́ и Сы́ну и Свято́му Ду́ху. Ум влады́ку творя́, стра́сти плотски́я удержа́л еси́/ и, вмести́телен быв Боже́ственных озаре́ний,/ Еди́наго Бо́га в Трие́х Ли́цех просвети́л еси́ ны чествова́ти, Григо́рие. И ны́не и при́сно и во ве́ки веко́в. Ами́нь. Богородичен: Бо́жия му́дрость храм Себе́ созда́,/ в Твое́й всенепоро́чней утро́бе всели́вшися,/ Благода́тная,/ и па́че ума́ Сему́ соедини́вшися по Ипоста́си, Чи́стая,/ яви́ся я́ко Челове́к. Песнь 3 Ирмос: Пре́жде век от Отца́ рожде́нному нетле́нно Сы́ну/ и в после́дняя от Де́вы воплоще́нному безсе́менно, Христу́ Бо́гу возопии́м:/ вознесы́й рог наш,/ Свят еси́, Го́споди. Припев: Святи́телю, о́тче Григо́рие, моли́ Бо́га о на́с. Име́я прему́дрости исто́чник, непреста́нно источа́ющ твои́х всему́дрых уче́ний,/ Христо́ву Це́рковь, всеблаже́нне, испо́лнил еси́,/ над все́ми вопию́щую Бо́гу:/ Свят еси́, Го́споди. Припев: Святи́телю, о́тче Григо́рие, моли́ Бо́га о на́с. Благоче́стия велегла́сен пропове́дник и благознамени́т Богосло́вия Богосло́в,/ сокро́вище Боговиде́ния оби́льно предлага́ется/ и раздае́т бога́тно нам бога́тство неотъе́млемо. Сла́ва Отцу́ и Сы́ну и Свято́му Ду́ху. Ри́тор огнедухнове́нный, Боговеща́нная цевни́ца благода́ти,/ Богосло́вным вдохнове́нием и веща́нием Богодухо́вным благознамени́те возшуме́в,/ Триипоста́снаго Существа́ нам песнь воспе́. И ны́не и при́сно и во ве́ки веко́в. Ами́нь. Богородичен: Богороди́тельнице, Цари́це всея́ тва́ри,/ Царя́ вся́ческих моля́щи не преста́й, Христа́,/ Его́же нам родила́ еси́ на спасе́ние су́щих на земли́,/ спасти́ пою́щия Тя. Седален, глас 8 Отве́рз уста́ сло́вом Бо́жиим,/ отры́гнул еси́ прему́дрость, пропове́дниче Све́та,/ и мудрова́ние Боже́ственное вселе́нней все́ял еси́,/ отце́в вои́стинну утверди́л еси́ догма́ты,/ по Па́влу яви́лся еси́ ве́ры побо́рник./ Тем и А́нгелов сограждани́н еси́ и сих собесе́дник яви́вся, блаже́нне,/ Богосло́ве Григо́рие, моли́ Христа́ Бо́га прегреше́ний оставле́ние дарова́ти/ пра́зднующим любо́вию святу́ю па́мять твою́. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Помышле́ньми попо́лзся лука́выми, во глубину́ впадо́х грехо́вную/ и, стеня́, зову́ Ти от се́рдца, Всечи́стая:/ на мне удиви́ бога́тую ми́лость,/ и Твоего́ благоутро́бия безме́рную пучи́ну,/ и щедро́т Твои́х неисчи́сленное бога́тство/ и даждь ми покая́ние и прегреше́ний проще́ние, да любо́вию зову́ Тебе́:/ моли́ Христа́ Бо́га прегреше́ний оставле́ние дарова́ти мне,/ Тя бо наде́жду име́ю, раб Твой. Песнь 4 Ирмос: Жезл из ко́рене Иессе́ева/ и цвет от него́, Христе́,/ от Де́вы прозя́бл еси́,/ из горы́, Хва́льный, приосене́нныя ча́щи/ прише́л еси́, вопло́щься от Неискусому́жныя, Невеще́ственный и Бо́же,/ сла́ва си́ле Твое́й, Го́споди. Припев: Святи́телю, о́тче Григо́рие, моли́ Бо́га о на́с. Таи́нник Тро́ицы быв, Сея́ просвети́л еси́ вселе́нную ра́зумом, му́дре, догма́тов лучи́ изблиста́я, преподо́бне, твоего́ изве́стнаго учи́тельства,/ емуже поуча́ющеся при́сно, вси благоче́стно восхваля́ем тя. Припев: Святи́телю, о́тче Григо́рие, моли́ Бо́га о на́с. У́тро благоче́стия све́тлое, зарю́ трисо́лнечную в себе́ прие́м, возсия́л еси́,/ и нощь мра́чную злочести́вых ересе́й заре́ю твои́х догма́тов му́дрых отгна́л еси́,/ и ду́ши, о́тче, ве́рных уясни́л еси́. Припев: Святи́телю, о́тче Григо́рие, моли́ Бо́га о на́с. Ум Пресу́щный, исто́чник Сло́ва и Ду́ха, из Присносу́щнаго Богосло́вным гро́мом, всеблаженне, Богосло́вствуя,/ благоче́стно научи́л еси́, сему́ от Него́ науча́емь,/ я́ко предочи́стив твой ум ве́щных, о́тче, прия́тии. Сла́ва Отцу́ и Сы́ну и Свято́му Ду́ху. Возше́л еси́ на го́ру доброде́телей,/ от до́льных пресели́вся и ме́ртвых дел отступи́в,/ и скрижа́ли, руко́ю Бо́жиею напи́санныя,/ догма́ты твоего́ чи́стаго Богосло́вия прия́л еси́,/ тайноводи́телю Боже́ственных та́инств, Григо́рие. И ны́не и при́сно и во ве́ки веко́в. Ами́нь. Богородичен: Ра́зумом па́дшаго Ада́ма возста́вила еси́, Всенепоро́чная,/ Ипоста́сную ро́ждши Жизнь из ложе́сн деви́ческих, очище́нных Ду́хом,/ и к безстра́стней, и Боже́ственнейшей, и нетле́нней пи́щи/ сего́ возвела́ еси́, Влады́чице. Песнь 5 Ирмос: Бог Сый ми́ра, Оте́ц щедро́т,/ Вели́каго Сове́та Твоего́ А́нгела,/ мир подава́юща, посла́л еси́ нам./ Тем Богоразу́мия к све́ту наста́вльшеся,/ от но́щи у́тренююще,/ славосло́вим Тя, Человеколю́бче. Припев: Святи́телю, о́тче Григо́рие, моли́ Бо́га о на́с. Глаго́л твои́х Боже́ственное веща́ние и догма́тов благода́ть Боже́ственная,/ я́ко ско́рость мо́лнии, всю обтече́ зе́млю,/ Тро́ице во Едини́це, Еди́нице в Тро́ице, покланя́тися, Богосло́ве,/ Богосло́вствуя и науча́я нас. Припев: Святи́телю, о́тче Григо́рие, моли́ Бо́га о на́с. Возжела́л еси́ и́стинно му́дрости Бо́жия, и слове́с добро́ту возлюби́л еси́,/ и всех предпочти́л еси́ кра́сных, су́щих на земли́,/ те́мже тя венце́м, всеблаже́нне, дарова́ний благоле́пно украси́ и Богосло́ва соде́ла. Сла́ва Отцу́ и Сы́ну и Свято́му Ду́ху. Разу́мно ты Су́щаго, я́ко дре́вле Моисе́й, ви́дети, Богоглаго́ливе, вожделе́л еси́,/ и Сего́ за́дняя, ка́менем покры́вся, ви́дети сподо́бился еси́,/ и пучи́ны научи́лся еси́ Боже́ственныя му́дрости, непости́жно явля́емыя. И ны́не и при́сно и во ве́ки веко́в. Ами́нь. Богородичен: И́же дре́вле Е́ву, прама́терь Твою́, Созда́вый из Тебе́ зи́ждется,/ тоя́ осужде́ние и преслуша́ние я́ве исцеля́я и разреша́я,/ я́ко Щедр и Влады́ка всех,/ Богороди́тельнице Ма́ти Де́во. Песнь 6 Ирмос: Из утро́бы Ио́ну мла́денца изблева́ морски́й зверь,/ якова́ прия́т./ В Де́ву же все́льшееся Сло́во/ и плоть прие́мшее про́йде, сохра́ншее нетле́нну,/ Его́же бо, не пострада́ нетле́ния,/ Ро́ждшую сохрани́ неврежде́нну. Припев: Святи́телю, о́тче Григо́рие, моли́ Бо́га о на́с. Струя́ми му́дрых уче́ний твои́х, всему́дре, А́риев ум му́тнейший изсуши́л еси́,/ в тишине́ храня́ па́ству твою́ непотопле́ну, я́коже слове́сный ковче́г,/ в не́мже благоче́стия се́мена положи́л еси́ добро́тою слове́с твои́х. Припев: Святи́телю, о́тче Григо́рие, моли́ Бо́га о на́с. Да Честны́я Тро́ицы осия́нием обогати́ши ум, о́тче, уясни́л еси́,/ я́коже нескве́рное и новоочище́нное зерца́ло, воздержа́нием изря́дным соде́лав./ Те́мже и Богови́днейший показа́лся еси́ Боже́ственными явле́ньми. Припев: Святи́телю, о́тче Григо́рие, моли́ Бо́га о на́с. Весь сраствори́вся заре́ю Ду́ха, был еси́ свети́льник, о́тче, всесве́тел,/ све́тлостию твои́х слове́с просвеща́яй концы́/ и Богосло́вия чистото́ю украша́яй кра́сное торжество́ ве́рных, Богосло́ве Григо́рие. Сла́ва Отцу́ и Сы́ну и Свято́му Ду́ху. Нов Саму́ил Богода́нен яви́лся еси́, дан Бо́гу,/ и пре́жде зача́тия, всеблаже́нне, целому́дрием и чистото́ю украша́емь/ и свяще́нства всесвято́ю оде́ждею, о́тче, удобре́н,/ хода́тайствуя Зижди́телю и зда́нию. И ны́не и при́сно и во ве́ки веко́в. Ами́нь. Богородичен: Сви́ток чист, Сло́во прие́мый напи́санное, пре́жде неопи́санное, Божество́м,/ предзна́лася еси́ проро́ки и пе́рвее, Ма́ти Де́во, Мари́е Богоневе́сто:/ Ты бо Неодержи́маго во утро́бе Твое́й неска́занно вмести́ла еси́. Кондак, глас 3 Богосло́вным язы́ком твои́м сплете́ния ри́торская разруши́вый, сла́вне,/ правосла́вия оде́ждею, свы́ше истка́нною, Це́рковь украси́л еси́,/ ю́же и нося́щи, с на́ми зове́т, твои́ми ча́ды:/ ра́дуйся, о́тче,/ Богосло́вия у́ме кра́йнейший. Икос От Богосло́вныя и высо́кия му́дрости твоея́/ испо́лни мой ум, убо́гий и стра́стный,/ я́ко да воспою́ житие́ твое́, о́тче:/ не могу́ бо сло́ва принести́ тебе́, а́ще не ты пода́си ми кре́пость сло́ва,/ и ра́зум, и му́дрость, я́ко да от твои́х твоя́ принесу́ тебе́,/ и от бога́тства доброде́телей твои́х отту́ду обря́щу вину́,/ и увенча́ю честну́ю и святу́ю твою́ главу́, с ве́рными взыва́я:/ ра́дуйся, о́тче, Богосло́вия у́ме кра́йнейший. Песнь 7 Ирмос: О́троцы, благоче́стию совоспита́ни,/ злочести́ваго веле́ния небре́гше,/ о́гненнаго преще́ния не убоя́шася,/ но, посреди́ пла́мене стоя́ще, поя́ху:/ отце́в Бо́же, благослове́н еси́. Припев: Святи́телю, о́тче Григо́рие, моли́ Бо́га о на́с. Все жела́ние и сла́дость я́ве сло́во твое́,/ все, Григо́рие, по́лно весе́лия и све́тлости,/ благоуха́ния насыща́я ве́рою пою́щия:/ отце́в Бо́же, благослове́н еси́. Припев: Святи́телю, о́тче Григо́рие, моли́ Бо́га о на́с. Умо́м просвеще́нным Исто́чника просвеще́нии дости́гл еси́/ и, отону́дными мо́лниями распаля́емь,/ опали́л еси́ Евно́миево языкобо́лие, Тро́ице вопия́:/ отце́в Бо́же, благослове́н еси́. Сла́ва Отцу́ и Сы́ну и Свято́му Ду́ху. Отве́рз хля́би бе́здны му́дрых догма́тов твои́х,/ заусти́в же Исто́чника му́дрости, покры́л еси́ пре́лести началовожди́,/ облиста́емь ве́чным Све́том и Трисо́лнечным. И ны́не и при́сно и во ве́ки веко́в. Ами́нь. Богородичен: Я́ко дождь на руно́, низше́д, в Твою́ всели́ся утро́бу/ ми́ра река́, исто́чник бла́гости, и́же ка́пли дожде́вныя исчита́я,/ отце́в Бо́же, благослове́н еси́. Песнь 8 Ирмос: Чу́да преесте́ственнаго/ росода́тельная изобрази́ пещь о́браз:/ не бо, я́же прия́т, пали́т ю́ныя,/ я́ко ниже́ огнь Божества́ Де́вы,/ в Ню́же вни́де утро́бу./ Тем, воспева́юще, воспое́м:/ да благослови́т тварь вся Го́спода/ и превозно́сит во вся ве́ки. Припев: Святи́телю, о́тче Григо́рие, моли́ Бо́га о на́с. Ра́вно Отцу́ Сло́во и Дух бла́гостию и ца́рством,/ благочести́во научи́л еси́,/ су́щественно и есте́ственно то́ждество зна́я и едине́ние./ Те́мже вопие́ши, ра́дуяся:/ да благослови́т тварь вся Го́спода и превозно́сит во вся ве́ки. Припев: Святи́телю, о́тче Григо́рие, моли́ Бо́га о на́с. Сла́вы А́нгельския удосто́ился еси́, я́ко бо А́нгел, просия́л еси́ ми́ру,/ Тро́ице, всему́дре, очи́стив приле́жно ду́шу же, и те́ло, и мысль./ Е́йже ны́не воспева́еши, веселя́ся:/ да благослови́т тварь вся Го́спода и превозно́сит во вся ве́ки. Припев: Святи́телю, о́тче Григо́рие, моли́ Бо́га о на́с. Ми́лостива моли́твами твои́ми Влады́ку соде́лав,/ испроси́, о́тче, прегреше́ний оставле́ние/ ве́рою свяще́нную и всепра́зднственную твою́ па́мять пра́зднующим./ В не́йже, веселя́щеся, воспева́ем:/ да благослови́т тварь вся Го́спода и превозно́сит во вся ве́ки. Сла́ва Отцу́ и Сы́ну и Свято́му Ду́ху. Таи́нник Триипоста́снаго Единонача́лия и Божества́, су́щаго в Тро́ице,/ доброде́телей обуче́ньми быв,/ Тро́йческий Богосло́в показа́лся еси́, всеблаже́нне./ И ны́не воспева́еши, ра́дуяся:/ да благослови́т тварь вся Го́спода и превозно́сит во вся ве́ки. И ны́не и при́сно и во ве́ки веко́в. Ами́нь. Богородичен: И́же Арха́нгельскими песносло́вии сла́вимое бога́тное Сло́во нас ра́ди обнища́,/ Тя Ма́терь, добро́ту Иа́ковлю благослове́нную, избра́в./ Те́мже, воспева́юще, пое́м:/ да благослови́т тварь вся Го́спода и превозно́сит во вся ве́ки. Песнь 9 Ирмос: О́браз чи́стаго рождества́ Твоего́/ огнепали́мая купина́ показа́ неопа́льная,/ И ны́не на нас напа́стей свире́пеющую угаси́ти, мо́лимся, пещь,/да Тя, Богоро́дице,/ непреста́нно велича́ем. Припев: Святи́телю, о́тче Григо́рие, моли́ Бо́га о на́с. Дае́т тебе́ жизнь нетле́нную Нача́льная Тро́ица,/ Ю́же богосло́вил еси́,/ прие́мши Ея́ ра́ди по́двиги твоя́, и уче́ния, и боре́ния,/ Е́йже ны́не, о́тче, предстои́ши, о ми́ре моли́твенник изя́щнейший. Припев: Святи́телю, о́тче Григо́рие, моли́ Бо́га о на́с. Заре́ю Трисия́нныя све́тлости, от Еди́наго происходя́щею Божества́,/ осия́емь, священнотаи́нниче Григо́рие,/ пою́щия тя ве́рою спаса́й/ и твои́х догма́тов Богосло́вием светово́ждствуй. Сла́ва Отцу́ и Сы́ну и Свято́му Ду́ху. Тече́ние до́брое соверши́л еси́, за Нача́льную Тро́ицу подвиза́вся,/ и обоже́ние я́ко Богосло́в получи́л еси́,/ и Боже́ственнаго твоего́ жела́ния исполне́ние прия́л еси́ досто́йно,/ Це́рквей благоукраше́ние. И ны́не и при́сно и во ве́ки веко́в. Ами́нь. Богородичен: О, стра́шнаго Твоего́ чудесе́! Ты бо, Богоро́дице, та́инство, пре́жде родо́в/ и пре́жде веко́в сокрове́нное в Бо́зе, вся́ческая Созда́вшем,/ ро́ждши Бо́га Сло́ва, несказа́нно яви́ла еси́. Светилен Меч слове́с твои́х и си́ла сего́ язы́ки отсече́ неве́рных до конца́,/ я́ко вещь бо терно́вную, тех попали́л еси́ безбо́жная новосече́ния,/ Тро́ице научи́л еси́ покланя́тися боголе́пно,/ Григо́рие Богосло́ве. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Еди́нице Триипоста́сней и Тро́ице соверше́нней в Еди́ном Божестве́,/ всему́дре Богосло́ве, научи́л еси́ покланя́тися:/ Свет, реки́й, Отца́ и Сы́на Свет,/ па́ки же Свет Ду́ха Свята́го./ Но Еди́н Свет, Неразде́лен, Неслия́нен,/ Еди́н бо Бог, уясня́яй Единосу́щное, о Григо́рие блаже́нне.

Минея, 11 Февраля, Канон Глас 1 Песнь 1 Ирмос: Твоя́ победи́тельная десни́ца Боголе́пно в кре́пости просла́вися, та́ бо, Безсме́ртне, я́ко всемогу́щая, проти́вныя сотре́, изра́ильтяном пу́ть глубины́ новосоде́лавшая. Припев: Святы́й му́чениче Геóргие, моли́ Бо́га о на́с. Сло́ве Бо́жий, во святы́х препросла́вленный, сло́во ми́ вдохни́ и у́м просвети́ воспе́ти по достоя́нию но́ваго му́ченика Гео́ргия и Тебе́, того́ укре́пльшаго. Припев: Святы́й му́чениче Геóргие, моли́ Бо́га о на́с. Ве́м любо́вь твою́, му́чениче, и на тя́ наде́яся потща́хся принести́ тебе́ пе́ние; а́ще и не по достоя́нию скудоу́мия ра́ди, но от усе́рдия приими́, я́коже и Христо́с вдови́цы две́ ле́пте. Сла́ва Отцу́ и Сы́ну и Свято́му Ду́ху. Я́т бы́в от нечести́вых, муче́ния по́прище преплы́л еси́ и Еде́ма Небе́снаго приста́нище дости́гл еси́, в не́мже ны́не водворя́яся, Влады́це все́х моли́ся ду́ш на́ших помраче́ние отъя́ти, я́ко да досто́йно па́мять твою́ воспое́м. И ны́не и при́сно и во ве́ки веко́в. Ами́нь. Богородичен: Щедролюби́вый Бо́г Сло́во, сотвори́вый руко́ю Ада́ма и от ребра́ его́ Е́ву возсозда́вый, из Тебе́ воплоти́ся, Пречи́стая, на Кресте́ пригвозди́ся и в ре́бра прободе́ся, я́ко да те́х поползнове́ние ми́лостивно испра́вит. Песнь 3 Ирмос: Еди́не ве́дый челове́ческаго естества́ не́мощь и ми́лостивно в не вообра́жься, препоя́ши мя́ с высоты́ си́лою, е́же вопи́ти Тебе́, Святы́й, одушевле́нный хра́ме неизрече́нныя сла́вы Твоея́, Человеколю́бче. Припев: Святы́й му́чениче Геóргие, моли́ Бо́га о на́с. Еще́ в ю́ности ста́рческий ра́зум стяжа́в, сла́вне Гео́ргие, и вся́ све́рстники своя́ превозше́д му́дростию, незло́бием же и смире́нием, от все́х ве́рных ублажа́ешися. Припев: Святы́й му́чениче Геóргие, моли́ Бо́га о на́с. Но́вое бы́л еси́ Правосла́вия утвержде́ние, сла́вне Гео́ргие, степе́нь же благоче́стия и чистоты́ снабде́ние ве́рным лю́дем, его́же ра́ди пе́сньми тя́ восхваля́ем. Сла́ва Отцу́ и Сы́ну и Свято́му Ду́ху. Ны́не стяжа́ тя́ я́ко ве́лие сокро́вище и Це́ркве благоле́пие Сердики́йский гра́д, блаже́нне Гео́ргие, но и вселе́нная вся́ слы́шавши твоя́ боре́ния весели́тся и по́двигу твоему́ дивя́щися, ублажа́ет тя́. И ны́не и при́сно и во ве́ки веко́в. Ами́нь. Богородичен: Исцели́ся преслуша́ние Е́вы прама́тере послуша́нием Твои́м, Пречи́стая: глаго́лы бо Гаврии́ла послу́шавши, Ма́ти была́ еси́ Сы́на Бо́жия, И́же тоя́ печа́ль Кресто́м в ра́дость преложи́. Седален, глас 3 Красна́ тя́ лице́м Творе́ц показа́ и душе́вною добро́тою вну́трь снабде́, вра́г же не терпя́ си́х, хотя́ща тя́ прельсти́ти и в сне́дь себе́ сотвори́ти. Но Созда́тель Благи́й неви́димо тя́ укрепи́ и льстеца́ тобо́ю посрами́. Те́мже ны́не на Небесе́х лику́я, свя́те Гео́ргие, моли́ся Го́сподеви о прославля́ющих тя́. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Недомы́сленно и непостижи́мо е́сть, Влады́чице Богора́дованная, соде́ланное о Тебе́ стра́шное Бо́жие та́инство, необыме́ннаго бо заче́нши родила́ еси́, пло́тию обложе́нна от Пречи́стых крове́й Твои́х; Его́же всегда́, Пречи́стая, с му́ченики моли́ спасти́ся душа́м на́шим. Песнь 4 Ирмос: Го́ру Тя́ благода́тию Бо́жиею приосене́нную прозорли́выма Авваку́м усмотри́в очи́ма, из Тебе́ изы́ти Изра́илеву провозглаша́ше Свято́му во спасе́ние на́ше и обновле́ние. Припев: Святы́й му́чениче Геóргие, моли́ Бо́га о на́с. К бу́дущей сла́ве взира́я, страда́льче всече́стне, маловре́менную ни во что́же вмени́л еси́; те́мже тя́ ничто́же возмо́же разлучи́ти от любве́ Христо́вы: ни темни́чная затворе́ния, ни судиина́ преще́ния, ни огня́ разгоре́ние, ниже́ па́ки тле́нныя сла́вы обеща́ние. Припев: Святы́й му́чениче Геóргие, моли́ Бо́га о на́с. Претерпе́л еси́ му́ки до́блественно, любве́ Боже́ственныя испо́лнен сы́й, и Бо́гу себе́ от ю́ности возложи́в, умре́ти за Него́ не отве́рглся еси́, повеле́ния Того́ послу́шая и стопа́м спаси́тельным после́дуя. Сла́ва Отцу́ и Сы́ну и Свято́му Ду́ху. Люде́й сро́дных оста́вив, в Сердики́йский гра́д прише́л еси́; доброде́тель же в себе́ нося́, му́ченик Христо́в изря́ден показа́лся еси́: ве́сть бо та́ че́сть дарова́ти сугу́бую стяжа́вшим ю́. И ны́не и при́сно и во ве́ки веко́в. Ами́нь. Богородичен: Е́вы прама́тере кля́тву упраздни́ла еси́ Рождество́м Твои́м, Богоблагода́тная; ми́рови же благослове́ние процвела́ еси́, цветонося́щи Христа́; темже́, ра́дующеся, Тя́, Богоро́дицу, испове́дуем. Песнь 5 Ирмос: Просвети́вый сия́нием прише́ствия Твоего́, Христе́, и освети́вый Кресто́м Твои́м ми́ра концы́, сердца́ просвети́ све́том Твоего́ Богоразу́мия правосла́вно пою́щих Тя́. Припев: Святы́й му́чениче Геóргие, моли́ Бо́га о на́с. Твои́ми до́блестьми попра́ся и в преиспо́дняя низложи́ся, и́же безме́рно дре́вле хваля́йся зе́млю и мо́ре погуби́ти; погуби́ его́ Христо́с Кресто́м Свои́м и побе́ду ве́рным дарова́. Припев: Святы́й му́чениче Геóргие, моли́ Бо́га о на́с. Егда́ предумышля́хуся го́рдаго денни́цы служи́телие ле́стными словесы́ улови́ти до́бляго и к свое́й слу́жбе удо́бь привлещи́, тогда́ посрами́шася вселука́вии вку́пе с посла́вшим я́. Сла́ва Отцу́ и Сы́ну и Свято́му Ду́ху. Твою́ не стерпе́ укори́зну, млада́го ю́ноши, велича́вый бе́с и попра́ние, но пону́ди слуги́ своя́ к судии́ ити́, наде́яся стра́хом тебе́ одоле́ти: устраши́шася преиспо́днии, зря́ще тя́ ви́димых посра́мльшаго. И ны́не и при́сно и во ве́ки веко́в. Ами́нь. Богородичен: Та́инство провозгласи́ша несказа́ннаго Твоего́ зача́тия, е́же из Тебе́ Бо́жия Сло́ва, Всепе́тая Ма́ти Де́во, ве́сь ли́к проро́ческий, Бо́гом я́ве науче́нный: Ты́ бо вои́стину Безнача́льный Све́т породила́ еси́, Богоблагода́тная. Песнь 6 Ирмос: Обы́де на́с после́дняя бе́здна: не́сть избавля́яй. Вмени́хомся я́ко о́вцы заколе́ния: спаси́ лю́ди Твоя́, Бо́же на́ш, Ты́ бо кре́пость немощству́ющих и исправле́ние. Припев: Святы́й му́чениче Геóргие, моли́ Бо́га о на́с. Е́же на тя́ скрежета́ния зубо́в не убоя́лся еси́, ниже́ устраши́лся еси́, ста́в на суди́щи мучи́телей, я́ко а́гнец незло́бивый посреде́ волко́в. Сего́ ра́ди тя́ ублажа́ем, помина́юще до́блесть твою́. Припев: Святы́й му́чениче Геóргие, моли́ Бо́га о на́с. Блаже́нне Гео́ргие, разгара́шеся на тя́ я́ростию мучи́тель, зря́ тя́ непрекло́нна и повеле́ния его́ ни во что́ же вменя́юща, и желе́зы тя́ окова́в, в темни́цу вве́рже, устраши́ти тя́ хотя́, но яви́ся посра́млен. Сла́ва Отцу́ и Сы́ну и Свято́му Ду́ху. Егда́ тя́ в темни́цу вверго́ша, бо́льшими к Бо́гу наде́ждами впери́лся еси́, блаже́нне, и наставля́ющаго тя́ к муче́нию послу́шав, словесы́ му́дрыми незатыка́емая уста́ го́рдых заткну́л еси́. И ны́не и при́сно и во ве́ки веко́в. Ами́нь. Богородичен: Прише́д с Небесе́ Архистрати́г, Чи́стая, я́ве Тебе́ ра́дость благовести́ ре́к: из Тебе́ произы́дет Бо́г пло́тию, Де́во Пречи́стая, во спасе́ние ве́рою пою́щих Тя́. Кондак, глас 2 Вы́шния сла́вы жела́я, многострада́льне Гео́ргие, ага́рянскую пре́лесть поплева́в, попра́л еси́ и побе́ды вене́ц прия́л еси́, А́нгелом ны́не свеселя́ся и му́чеником соводворя́яся, с ни́миже Христу́ Бо́гу моли́ся непреста́нно о все́х на́с. Икос Со́лнце мно́жае возсия́ моле́бное твое́ торжество́, блаже́нне Гео́ргие, ве́рныя лю́ди просвеща́я и бесо́в темнозра́чную си́лу отгоня́я. Те́мже припа́даю и а́з, окая́нный, к ра́це моще́й твои́х и молю́ся от боле́зненнаго се́рдца, да прииму́ печа́лем премене́ние и житию́ безмо́лвие, согреше́нием проще́ние и скве́рному уму́ моему́ исправле́ние, во е́же по достоя́нию пе́ти тя́ всегда́, я́ко су́ща ны́не на Небесе́х со А́нгелы и му́ченики, с ни́миже Христу́ Бо́гу моли́ся непреста́нно о все́х на́с. Песнь 7 Ирмос: Су́щим в пещи́ отроко́м Твои́м, Спа́се, не прикосну́ся, ниже́ стужи́ о́гнь; тогда́ трие́, я́ко еди́неми усты́ поя́ху и благословля́ху, глаго́люще: благослове́н Бо́г оте́ц на́ших. Припев: Святы́й му́чениче Геóргие, моли́ Бо́га о на́с. От вся́ких бе́д и напа́стей лю́тых всегда́ ны́ избавля́й, блаже́нне му́чениче Гео́ргие, Боже́ственную благода́ть на́м подава́я, мольбу́ тебе́ принося́щим и Христу́ воспева́ющим: благослове́н Бо́г оте́ц на́ших. Припев: Святы́й му́чениче Геóргие, моли́ Бо́га о на́с. Христа́ Бо́га су́щаго и́стинно возлюби́в, есте́ственныя пло́ти отве́рглся еси́ и на о́гнь му́жески дерзну́л еси́; вене́ц же побе́ды прие́м, воспева́еши при́сно: благослове́н Бо́г оте́ц на́ших. Сла́ва Отцу́ и Сы́ну и Свято́му Ду́ху. Возноше́ния го́рдых пла́мень угаси́л еси́, пла́менем огня́ земна́го опаля́ем, всеблаже́нне, и све́том ра́зума благочести́вых просвети́л еси́; те́м, веселя́щеся, укре́пльшему тя́ Христу́ воспева́ем: благослове́н Бо́г оте́ц на́ших. И ны́не и при́сно и во ве́ки веко́в. Ами́нь. Богородичен: А́може Влады́ка, душе́, Горе́ взира́й, не к земли́ ни́чущи, я́ко безслове́сная: но воспряни́ от помраче́ния и уны́ния, вопию́щи: Го́споди, моли́твами Ро́ждшия Тя́ и му́ченика Твоего́ Гео́ргия сподо́би мя́ Ца́рствия Твоего́. Песнь 8 Ирмос: В пещи́ о́троцы Изра́илеви, я́коже в горни́ле, добро́тою благоче́стия чисте́е зла́та блеща́хуся, глаго́люще: благослови́те, вся́ дела́ Госпо́дня, Го́спода, по́йте и превозноси́те во вся́ ве́ки. Припев: Святы́й му́чениче Геóргие, моли́ Бо́га о на́с. Люде́й правосла́вных утвержде́ние, Церкве́й Бо́жиих благоле́пие, прибега́ющих те́плое заступле́ние яви́лся еси́, всеблаже́нне Гео́ргие, воспева́ющих: благослови́те, вся́ дела́ Госпо́дня, Го́спода, по́йте и превозноси́те во вся́ ве́ки. Припев: Святы́й му́чениче Геóргие, моли́ Бо́га о на́с. У́мную мольбу́ приношу́ тебе́, Гео́ргие: от лю́тых мя́ бе́д изба́ви моли́твами твои́ми, и све́том Богоразу́мия просвети́, и к Боже́ственным стезя́м наста́ви, вопию́ща: благослови́те, вся́ дела́ Госпо́дня, Го́спода, по́йте и превозноси́те во вся́ ве́ки. Сла́ва Отцу́ и Сы́ну и Свято́му Ду́ху. Гра́д на горе́ и све́т на све́щнице, сия́я, яви́лся еси́ вои́стину, му́чениче сла́вне, просвеща́я в нощи́ жития́ ходя́щих и на стезю́ спасе́ния наставля́я вопию́щих: благослови́те, вся́ дела́ Госпо́дня, Го́спода, по́йте и превозноси́те во вся́ ве́ки. И ны́не и при́сно и во ве́ки веко́в. Ами́нь. Богородичен: Ели́цы в пучи́не греха́ вла́емся, к небу́рному приста́нищу притеце́м Бо́жия Ма́тере, я́же Боже́ственною си́лою Сы́на Своего́ все́х ко спасе́нию наставля́ет, зову́щих: благослови́те, вся́ дела́ Госпо́дня, Го́спода, по́йте и превозноси́те во вся́ ве́ки. Песнь 9 Ирмос: О́браз чи́стаго рождества́ Твоего́ огнепали́мая купина́ показа́ неопа́льная. И ны́не на на́с напа́стей свирепе́ющую угаси́ти, мо́лимся, пе́щь, да Тя́, Богоро́дице, непреста́нно велича́ем. Припев: Святы́й му́чениче Геóргие, моли́ Бо́га о на́с. Окре́стнии вси́ Сердики́йскаго гра́да собира́ющеся, пе́сненными гла́сы благоле́пно свяще́нную твою́ па́мять прославля́ем: приими́ у́бо сия́, а́ще и не по достоя́нию, иму́ще бо тя́ хода́тая ко Спа́су Христу́, пе́снь сию́ тебе́ принести́ потща́хомся. Припев: Святы́й му́чениче Геóргие, моли́ Бо́га о на́с. Рабо́в твои́х моле́ния к Бо́гу напра́ви, му́чениче, я́же от жела́ния всея́ души́ тебе́ принесо́хом, и твою́ па́мять почита́ющих пресве́тлую от бе́д и напа́стей избавля́й твои́ми к Бо́гу моли́твами. Припев: Святы́й му́чениче Геóргие, моли́ Бо́га о на́с. Горе́ние о́гненное благоду́шно претерпе́л еси́ Христа́ ра́ди, Его́же любо́вию огради́вся, в се́рдцы твое́м утвержде́ние кре́пкое прия́л еси́ и Ца́рствие получи́л еси́. Те́мже не забыва́й на́с, тя́ любо́вию почита́ющих, венцено́сче Богому́дре Гео́ргие. Сла́ва Отцу́ и Сы́ну и Свято́му Ду́ху. И́же му́дростию Бо́жия Ду́ха ага́рян посрами́вый и терпе́нием о́гненныя сме́рти Христа́ просла́вивый – и о оте́чествии свое́м при́сно Бо́гу моля́щийся, Гео́ргий му́ченик пресла́вный, пе́сньми Боже́ственными от на́с да воспое́тся досто́йно. И ны́не и при́сно и во ве́ки веко́в. Ами́нь. Богородичен: Богоро́дичен: Его́же Оте́ц пре́жде денни́цы роди́ и из Тебе́ напосле́док за ны́, неблагода́рныя, вопло́щься я́ко Младе́нца на руку́ носи́ла еси́, Де́во Богоро́дице, Того́ с му́ченики моли́, о и́же ве́рою восхваля́ющих Тя́. Светилен Я́ко благово́нный цве́т в удо́лиях и я́ко дре́во при исто́чницех во́д, све́тло возсия́ доброде́тельми и страда́ньми му́ченик Гео́ргий. Те́мже облагоуха́вшеся душе́ю, све́тлым лице́м к нему́ воззове́м: ра́дуйся, страда́льцев печа́ть и ве́рных заступле́ние. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Тя́ Дании́л преднапису́ет го́ру несеко́мую, из нея́же пречестны́й ка́мень отсече́ся кроме́ ру́к челове́ческих и сокруши́ и́дольскую пре́лесть всю́. И приведо́шася всле́д Тебе́ в воню́ ми́ра Твоего́ му́чеников ли́цы, с ни́миже о на́с моли́ся, Пречи́стая Де́во, Ма́ти Мари́е.

Минея, 25 Января, Канон Глас 6 Песнь 1 Ирмос: Я́ко по су́ху пешеше́ствовав Изра́иль по бе́здне стопа́ми, гони́теля фарао́на ви́дя потопля́ема, Бо́гу побе́дную пе́снь пои́м, вопия́ше. Припев: Святы́й священному́чениче Влади́мире, моли́ Бо́га о на́с Прииди́те, ве́рнии, пе́сньми благоле́пными Влади́мира, пе́рваго новому́ченика, восхва́лим, то́й бо в со́нме Росси́йских святы́х всели́лся е́сть. Припев: Святы́й священному́чениче Влади́мире, моли́ Бо́га о на́с Кро́тостию и смире́нием, добро́тою и чистото́ю серде́чною укра́шен, николи́же иски́й свои́х си́, до́бре служе́ние твое́ соверши́л еси́, святи́телю. Сла́ва Отцу́ и Сы́ну и Свято́му Ду́ху. Сме́рть не разлучи́ тя от любве́ Бо́жия, святи́телю, му́жественне бо претерпе́л еси́ сию́ ра́ди возлюби́вшаго тя́ Христа́. И ны́не и при́сно и во ве́ки веко́в. Ами́нь. Богородичен: О Ма́ти Де́во, неизрече́нно Сы́на Твоего́ и Бо́га на́шего ро́ждшая, моли́ся приле́жно спасти́ся на́м. Песнь 3 Ирмос: Не́сть свя́т, я́коже Ты́, Го́споди Бо́же мо́й, вознесы́й ро́г ве́рных Твои́х, Бла́же, и утверди́вый на́с на ка́мени испове́дания Твоего́. Припев: Святы́й священному́чениче Влади́мире, моли́ Бо́га о на́с Помяни́ на́с, свя́тче Бо́жий, и́мя твое́ в ско́рбех и печа́лех призыва́ющих и ча́ющих от тебе́ по́мощи во обстоя́ниих тя́жких, находя́щих на ны́. Припев: Святы́й священному́чениче Влади́мире, моли́ Бо́га о на́с О́браз неусы́пнаго стра́жа Це́ркве Христо́вы яви́л еси́ себе́, святи́телю, и небоя́зненно предста́л еси́ пред беззако́нными, сме́рти твоея́ иска́вшими. Сла́ва Отцу́ и Сы́ну и Свято́му Ду́ху. Жестокосе́рдие, неразу́мие и грехо́вное ослепле́ние мучи́телей твои́х препобеди́л еси́, святи́телю, кро́тостию и смире́нием, та́же и к Бо́гу моли́твенным призыва́нием о проще́нии и́х. И ны́не и при́сно и во ве́ки веко́в. Ами́нь. Богородичен: Кре́пкое утвержде́ние на Тя́ наде́ющихся, Богоро́дице Де́во, кре́пость и си́лу подава́й на́м ра́ди Ро́ждшагося от Тебе́, Влады́чице. Седален, глас 8 Ка́я по́льза челове́ку, а́ще ми́р ве́сь приобря́щет, ду́шу же свою́ погуби́т, или́ что́ да́ст челове́к в изме́ну за ду́шу свою́, — рече́ Госпо́дь. Си́ми словесы́ от ю́ности наставля́емь, те́ло твое́ на сме́рть угото́вал еси́, святи́телю, да ду́шу жи́ву сохрани́в, со Христо́м пребыва́еши. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Ве́лия ра́дость быва́ет на Небеси́, Влады́чице, егда́ обраща́ем се́рдца своя́ сокруше́нная к Сы́ну Твоему́ и Бо́гу на́шему. То́й бо да́рует на́м прегреше́ний проще́ние моли́твами Твои́ми и прелага́ет Сво́й пра́ведный гне́в на милосе́рдие. Сего́ ра́ди вопие́м Ти́: ра́дуйся, Ра́досте на́ша, гре́шников ка́ющихся упова́ние. Песнь 4 Ирмос: Христо́с моя́ си́ла, Бо́г и Госпо́дь, честна́я Це́рковь боголе́пно пое́т, взыва́ющи, от смы́сла чи́ста, о Го́споде пра́зднующи. Припев: Святы́й священному́чениче Влади́мире, моли́ Бо́га о на́с Вои́стинну апо́стольский прее́мник бы́л еси́, святи́телю, егда́ в годи́ну тя́жких испыта́ний, му́жество и тве́рдую ве́ру яви́в, безбоя́зненно за Го́спода ду́шу свою́ пре́дал еси́. Припев: Святы́й священному́чениче Влади́мире, моли́ Бо́га о на́с Егда́ лю́тии уби́йцы, сме́рти преда́ти тя́ хотя́ще, вне́ святы́х вра́т ведо́ша тя́, воспева́л еси́, святи́телю: Госпо́дь мне́ прибе́жище и си́ла. Сла́ва Отцу́ и Сы́ну и Свято́му Ду́ху. Пе́рвенствующий иера́рх Це́ркве Росси́йския бы́в, пе́рвый и нра́вом и дея́нием в по́двизе иера́ршаго служе́ния яви́лся еси́, пе́рвый же в годи́ну лихоле́тий му́ченически пострада́л еси́, святи́телю. И ны́не и при́сно и во ве́ки веко́в. Ами́нь. Богородичен: Ты́ еси́ по́мощь и заступле́ние моля́щимся Тебе́, Влады́чице Держа́вная, бу́ди и на́м предста́тельство и покро́в егда́ предста́нем Сы́ну Твоему́, нелицеприя́тному Судии́. Песнь 5 Ирмос: Бо́жиим све́том Твои́м, Бла́же, у́тренюющих Ти́ ду́ши любо́вию озари́, молю́ся, Тя́ ве́дети, Сло́ве Бо́жий, и́стиннаго Бо́га, от мра́ка грехо́внаго взыва́юща. Припев: Святы́й священному́чениче Влади́мире, моли́ Бо́га о на́с Ско́рби и разлуче́ние с па́ствою первопресто́льнаго гра́да му́жественне восприя́л еси́, святи́телю. Оба́че и но́вей па́стве твое́й Богоспаса́емаго гра́да Ки́ева сокро́вище и приобре́тение безце́нное яви́лся еси́. Припев: Святы́й священному́чениче Влади́мире, моли́ Бо́га о на́с Тезоимени́тому ти́ равноапо́столу в ре́вности по Бо́зе уподобля́яся, па́ству твою́ в правосла́вней ве́ре утвержда́л еси́, святи́телю, и я́ко но́вое кра́сное со́лнце на гора́х ки́евских возсия́л еси́. Сла́ва Отцу́ и Сы́ну и Свято́му Ду́ху. Ру́сь свята́я, вода́ми Креще́ния омы́тая, све́том Христо́ва уче́ния равноапо́стольным кня́зем Влади́миром просвеще́нная и кро́вию страстоте́рпец и новому́ченика святи́теля Влади́мира ороше́нная, храни́ ве́ру Правосла́вную, в не́йже тебе́ утвержде́ние. И ны́не и при́сно и во ве́ки веко́в. Ами́нь. Богородичен: К кому́ возопии́м, Влады́чице, в напа́стех на́ших и лю́тых обстоя́ниих, а́ще не к Тебе́, Цари́це Не́ба и земли́, по́мощь твою́ при́сно на́м подава́й, те́пле Тебе́ моля́щимся. Песнь 6 Ирмос: Жите́йское мо́ре, воздвиза́емое зря́ напа́стей бу́рею, к ти́хому приста́нищу Твоему́ прите́к, вопию́ Ти: возведи́ от тли́ живо́т мо́й, Многоми́лостиве. Припев: Святы́й священному́чениче Влади́мире, моли́ Бо́га о на́с Жесто́кая глумле́ния, поруга́ния и сме́рть не возмого́ша отлучи́ти тя́ от любве́ Христо́вы, но́вый испове́дниче ки́евский и всеросси́йский за Христа́ му́чениче. Сего́ ра́ди мо́лим тя́: в тве́рдей ве́ре и на́с укрепи́, пра́зднующих любо́вию святу́ю па́мять твою́. Припев: Святы́й священному́чениче Влади́мире, моли́ Бо́га о на́с Мно́гими ра́нами уя́звленное честно́е те́ло твое́, кро́вию исте́кшее, я́ко свиде́тельство любве́ же́ртвенныя ко Христу́ яви́л еси́, святи́телю, и, бы́в ве́рен Ему́ да́же до сме́рти, вене́ц жи́зни от Него́ прия́л еси́. Сла́ва Отцу́ и Сы́ну и Свято́му Ду́ху. Согреше́ния моя́ прости́, Го́споди, и в ми́ре ду́х мо́й приими́, та́же не вмени́ греха́ предаю́щим мя́ сме́рти, — сле́зно моли́лся еси́, священному́чениче достохва́льне. И ны́не и при́сно и во ве́ки веко́в. Ами́нь. Богородичен: Что́ Тя́ нарече́м, о Благода́тная? Засту́пницу ли на́шу, я́ко ру́це Твои́ вы́ну к Сы́ну Твоему́ просте́рты о на́с и́маши?Кре́пость ли и си́лу, я́ко ро́ди христиа́нстии в ве́ре и любви́ к Сы́ну Твоему́ утвержда́ются. Вся́ бо мо́жеши, я́ко Ма́ти Творца́ и Влады́ки Не́ба и земли́. Кондак, глас 2 О́браз Христо́ва милосе́рдия явля́я, покро́в и защище́ние па́стве твое́й бы́л еси́, святи́телю о́тче Влади́мире, в кро́тости и незло́бии страда́ния прие́мля, безбо́жных мучи́телей, благословля́я, прости́л еси́. Те́мже и на́м испроси́ у Христа́ Бо́га ду́х ми́рен и ве́лию ми́лость. Икос Име́яй вы́ну попече́ние о ча́дех Бо́жиих, сия́ оте́чески к богоуго́дней жи́зни направля́л еси́, святи́телю Влади́мире, глаго́лы му́дрыми и пра́ведными де́лы, посто́м, моли́твою и сме́ртию честно́ю преди́вный по́двиг в подража́ние святы́м Христо́вым показа́вый. Мы́ же твоя́ па́стырския доброде́тели хва́ляще, тя́ ублажа́ем, боголю́бче, и взыва́ем си́це: испроси́ на́м у Христа́ Бо́га ду́х ми́рен и ве́лию ми́лость. Песнь 7 Ирмос: Росода́тельну у́бо пе́щь соде́ла а́нгел преподо́бным отроко́м, халде́и же опаля́ющее веле́ние Бо́жие, мучи́теля увеща́ вопи́ти: благослове́н еси́, Бо́же оте́ц на́ших. Припев: Святы́й священному́чениче Влади́мире, моли́ Бо́га о на́с Мно́гая беды́ и напа́сти беззако́ннии отсту́пницы воздвиго́ша на тя́, испове́дниче, оба́че в кро́тости и смире́нии чистоту́ ве́ры храни́те и в ло́не еди́ныя Правосла́вныя Росси́йския Це́ркве пребыва́ти ве́рныя призыва́л еси́. Припев: Святы́й священному́чениче Влади́мире, моли́ Бо́га о на́с Глумле́ния и поруга́ния, и́мже подверго́ша тя́ гони́телие твои́, не возмого́ша пону́дити тя́ в жесто́кия дни́ оста́вити возлю́бленную па́ству, сего́ ра́ди и яви́лся еси́ па́стырь до́брый, полага́яй ду́шу за о́вцы Христо́вы. Сла́ва Отцу́ и Сы́ну и Свято́му Ду́ху. Ве́рныя непреста́нно науча́л еси́ пребыва́ти в сою́зе любве́, и́мже связу́еми бы́ша во Христе́ апо́столи, па́стырю до́брый. Сего́ ра́ди ны́не ти́ взыва́ем: и на́с соблюди́ моли́твами твои́ми в любви́ Христо́ве. И ны́не и при́сно и во ве́ки веко́в. Ами́нь. Богородичен: В любви́ кре́пцей к Сы́ну Твоему́ и Бо́гу на́шему соблюди́ на́с, Де́во Богоро́дице, и проще́ние грехо́в и беззако́ний на́ших испроси́, при́сно Тя́ блажа́щим. Песнь 8 Ирмос: Из пла́мене преподо́бным ро́су источи́л еси́ и пра́веднаго же́ртву водо́ю попали́л еси́: вся́ бо твори́ши, Христе́, то́кмо е́же хоте́ти, Тя́ превозно́сим во вся́ ве́ки. Припев: Святы́й священному́чениче Влади́мире, моли́ Бо́га о на́с Стра́ха не иму́, гото́во се́рдце мое́, гото́во сме́рть прия́ти на вся́кое вре́мя Це́ркве ра́ди Христо́вы, да утверди́тся ве́ра правосла́вная во оте́честве на́шем, — ре́кл еси́ во дни́ испыта́ний твои́х, па́стырю му́жественнейший. Припев: Святы́й священному́чениче Влади́мире, моли́ Бо́га о на́с До́брый де́латель бы́в в вертогра́де Госпо́дни, святи́телю Христо́в, ду́шу твою́ положи́л еси́, во е́же це́ло и неврежде́нно соблюсти́ достоя́ние Его́. Сего́ ра́ди и досто́ин яви́лся еси́ услы́шати гла́с, зову́щий ти́: благи́й и ве́рный ра́бе, вни́ди в ра́дость Го́спода твоего́. Сла́ва Отцу́ и Сы́ну и Свято́му Ду́ху. Пра́во пра́вил еси́ сло́во Боже́ственныя и́стины, те́мже и Ца́рствия Бо́жия сподо́бился еси́, святи́телю, в не́мже пребыва́я во сла́ве со все́ми святы́ми, не преста́й моли́тися Влады́це, да и мы́ насле́дники сего́ бу́дем. И ны́не и при́сно и во ве́ки веко́в. Ами́нь. Богородичен: Ра́дуйся, Благода́тная Богоро́дице Де́во, — приле́жно вопие́м Ти́, Влады́чице, изба́ви на́с от пле́на грехо́внаго и вся́каго прило́га вра́жия, сохрани́ от злы́х челове́к, востаю́щих на ны́; на Тебе́ кре́пце наде́емся и пред враги́ на́шими хва́лимся, Ты́ бо еси́ Засту́пница ро́да христиа́нскаго. Песнь 9 Ирмос: Бо́га челове́ком невозмо́жно ви́дети, на Него́же не сме́ют чи́ни а́нгельстии взира́ти; Тобо́ю бо, Всечи́стая, яви́ся челове́ком Сло́во воплоще́нно, Его́же велича́юще, с небе́сными во́и, Тя́ ублажа́ем. Припев: Святы́й священному́чениче Влади́мире, моли́ Бо́га о на́с Пра́вило ве́ры и благоче́стия яви́лся еси́, святи́телю. Сию́ бо ве́ру, любо́вию ко Христу́ и лю́дем споспешеству́ему, до́бре свиде́тельствовал еси́ пред враги́ твои́ми, та́же и благоче́стие, во е́же умре́ти тоя́ ра́ди любве́, изря́дно показа́л еси́. Припев: Святы́й священному́чениче Влади́мире, моли́ Бо́га о на́с У́м на́ш просвети́, святи́телю, моли́твами твои́ми к Бо́гу, да, пра́вый пу́ть избра́вше, Христа́ обря́щем и в черто́зех Его́ водвори́мся. Сла́ва Отцу́ и Сы́ну и Свято́му Ду́ху. Стра́стию озлобле́ния обурева́емии, злочести́вии лю́дие сме́рти лю́тей преда́ша тя́, та́же телеси́ твоему́ глумля́хуся, и честно́му погребе́нию его́ претя́ху. Оба́че, не имя́ху вла́сти над душе́ю твое́ю, непобеди́мый страда́льче, оста́влени бы́ша тщи́ во зло́бе свое́й. И ны́не и при́сно и во ве́ки веко́в. Ами́нь. Богородичен: Преукраше́нна еси́ Боже́ственною сла́вою, Ма́ти Безневе́стная, Бо́г бо Сло́во из Твои́х ложе́сн изы́де, во е́же угото́вати на́м спасе́ние. Ему́же не преста́й моли́тися, Влады́чице, да свободи́т на́с от рабо́ты вра́жия, я́ко Милосе́рд. Светилен Во тьме́ беззако́ний су́щии све́том Христо́вым просвеща́ются и любы́ Христо́ва в сердца́х гре́шных возжига́ется, егда́ па́стырие попече́ние изря́дное о лю́дех и́мут, та́ко поуча́л еси́, святи́телю, жре́бий па́стырскаго служе́ния прие́млющих. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Преблагослове́нна еси́, Богоро́дице Де́во, ма́ти Неизрече́ннаго Све́та, Тя́ велича́ем и предста́тельства о на́с пред Сы́ном Твои́м всеусе́рдно про́сим, Тя́ бо еди́ну наде́жду и́мамы.

Минея, 31 Июля, Кано́н святы́х Глас 8 Песнь 1 Ирмос: Воду прошед, яко сушу,/ и египетскаго зла избежав,/ израильтянин вопияше:/ Избавителю и Богу нашему поим. Припев: Священному́чениче Вениами́не, моли́ Бо́га о нас. От ю́ности Христа всем сердцем возлюбив,/ ше́ствовати а́нгельским путе́м изво́лил еси́,/ в моли́твах же неустанных пребыва́я,/ жертву духовную Бо́гови принесл еси, святителю Вениамине. Припев: Священному́чениче Вениами́не, моли́ Бо́га о нас. Якоже оте́ц чадолюбивый яви́лся еси́ многим:/ ни́щим и си́рым, стра́нным и убогим, грехми обремене́нным и в беда́х и болезнех сущим,/ сокруше́ния и ра́ны их исцеля́яй,/ Вениами́не сострада́тельне и пресла́вне. Сла́ва Отцу́ и Сы́ну и Свято́му Ду́ху. Простира́л еси десни́цу по́мощи одержи́мым неду́гом пия́нства,/ воздержание тем пропове́дуя и жи́знь во Христе тех устроя́я,/ наипаче же о́браз кро́тости и милосердия являя, Вениами́не всехва́льне. И ны́не и при́сно и во ве́ки веко́в. Ами́нь. Богородичен: Обре́т Тя, Всечи́стая, честнейшую всея́ тва́ри,/ воплоти́тися из Тебе́ благоволи́ Зижди́тель и Бог всех,/ падшаго Адама восставити промы́сливый. Песнь 3 Ирмос: Небесного круга Верхотворче, Господи,/ и Церкве Зиждителю,/ Ты мене утверди в любви Твоей,/ желаний краю, верных утверждение,/ Едине Человеколюбче. Припев: Священному́чениче Вениами́не, моли́ Бо́га о нас. Словом евангельским паству твою неленостно наставляя, святи́телю Вениами́не,/ душу твою за люди по вся дни полагал еси./ Сего́ ра́ди Богом прославлен бысть,/ яко достойный архиерей гра́да свята́го Петра́. Припев: Священному́чениче Вениами́не, моли́ Бо́га о нас. Любве ради к Богу вольней нищете покорился еси, архипа́стырю Петроградский,/ темже во дни испытаний лютых Христос дарова ти благодать не токмо веровати в Него,/ но и за Него пострадати. Сла́ва Отцу́ и Сы́ну и Свято́му Ду́ху. О слу́жбах Бо́жиих тща́ние явля́я,/ в моли́твах и бде́ниих с па́ствою присно пребыва́л еси,/ хра́мы же Господни от поруга́ния защища́я,/ православная бра́тства устроял еси, Вениами́не пресла́вне. И ны́не и при́сно и во ве́ки веко́в. Ами́нь. Богородичен: Чистоты́ и де́вства Сосуде избранный/ и Сына Божия честно́е Селе́ние,/ Пренепоро́чную Влады́чицу, прииди́те, ве́рнии, пе́сньми достойно почтим. Седален, глас 4 Не поставля́ют свещу́ зажже́нную под спу́дом,/ но на све́щнице, рече Господь./ Та́ко просвети́шася све́том добродетелей твоих, о́тче Вениами́не,/ людие Церкве Русския,/ соверша́ющия дне́сь преславно святу́ю па́мять твою́. Песнь 4 Ирмос: Ты моя Крепость, Господи,/ Ты моя и сила,/ Ты мой Бог, Ты мое радование,/ не оставль недра Отча/ и нашу нищету посетив./ Тем с пророком Аввакумом зову Ти:/ силе Твоей слава, Человеколюбче. Припев: Священному́чениче Вениами́не, моли́ Бо́га о нас. Гони́мыя и мучимыя небоязненно укреплял еси,/ гони́тели же с мучители кротко вразумля́л еси,/ преще́ний тех не страша́ся, святи́телю Христо́в Вениами́не,/ тверд пребыва́я посреде́ все́х наве́т вра́жиих. Припев: Священному́чениче Вениами́не, моли́ Бо́га о нас. Стезе́ю пра́вды Христо́вой неукло́нно ше́ствовал еси́/ и паству твою, богомудре Вениамине, на путь спасения направлял еси, глаголя:/ подоба́ет душу свою полагати за Христа́ даже до сме́рти. Сла́ва Отцу́ и Сы́ну и Свято́му Ду́ху. Не возмогоша нечести́вии крепость души твоея одоле́ти/ и твердость исповедания твоего победити, священномучениче досточудне,/ ты бо, в сердце своем побе́дное Креста́ зна́мение нося,/ веру Христову дерзновенно утверждал еси. И ны́не и при́сно и во ве́ки веко́в. Ами́нь. Богородичен: О, Де́во Неискусобра́чная!/ Ты в рождестве Девою пребыла еси/ и по рождестве́ Приснодевою яви́лася еси́./ Тем немо́лчными гла́сы Тя, Влады́чице, величаем. Песнь 5 Ирмос: Просвети нас повелении Твоими, Господи,/ и мышцею Твоею высокою/ Твой мир подаждь нам,/ Человеколюбче. Припев: Священному́чениче Вениами́не, моли́ Бо́га о нас. Ще́драго дая́теля лю́бит Господь,/ вопиял еси в сердце твоем, святителю нищелюбче,/ темже, непрестанное попечение о страждущих имея,/ верных милостыню неоскудно подавати научал еси. Припев: Священному́чениче Вениами́не, моли́ Бо́га о нас. Любо́вию ко алчущим болезнуя,/ молитву теплую ко Пречистей Богородице принесл еси/ и ризу от честнаго образа Ея,/ яко жертву добровольную, нуждающимся подал еси. Сла́ва Отцу́ и Сы́ну и Свято́му Ду́ху. Егда́ прии́де вре́мя смуты лютыя и востания безбожных,/ люди от кровопроли́тия прему́дре удержал еси./ Нечести́вии же оболга́ху тя, исповедниче Христов,/ злом за добро тебе воздавая. И ны́не и при́сно и во ве́ки веко́в. Ами́нь. Богородичен: О, Ма́ти Бо́жия, ро́ждшая Всеблаго́е Сло́во!/ Души́ моея́ озлобле́ние исцели́/ и на путь покаяния направи. Песнь 6 Ирмос: Молитву пролию ко Господу/ и Тому возвещу печали моя,/ яко зол душа моя исполнися/ и живот мой аду приближися,/ и молюся, яко Иона:/ от тли, Боже, возведи мя. Припев: Священному́чениче Вениами́не, моли́ Бо́га о нас. Егда отступницы нечестивии,/ предания церковная отвергающия и нововведения льстивно вводящия, ополчишася на тя,/ тогда ты, богомудре Вениамине, неложно учил еси,/ како подобает в дому Божием жити,/ яже есть Церковь Бога Жива, столп и утверждение Истины. Припев: Священному́чениче Вениами́не, моли́ Бо́га о нас. Егда отступницы от веры лжа́ми и клевета́ми оболгаху тя/ и в ру́це гре́шников преда́ша,/ ты, святи́телю, яко истинный раб Христо́в, в вере пребыва́я, кротце рекл еси:/ ра́достне ми есть Христа́ ра́ди вся терпе́ти от свои́х и чу́ждих. Сла́ва Отцу́ и Сы́ну и Свято́му Ду́ху. Пред мучители на суди́щи предстоя́,/ о пра́вде Бо́жией свиде́тельствовал еси, святителю, глаголя:/ не вем, яко возвести́те ми,/ еже жи́ти или умрети./ Обаче о́чи свои горе́ возведу́ и реку́:/ за вся, Го́споди, сла́ва Тебе́. И ны́не и при́сно и во ве́ки веко́в. Ами́нь. Богородичен: Гла́с архангела Гаврии́ла, Де́во Всенепоро́чная, ны́не Тебе приносим:/ ра́дуйся, Благодатная, Господь с Тобою. Кондак, глас 6 От ю́ности кре́ст Христо́в на ра́мо взе́м,/ и́стинный стра́ж Правосла́вныя Це́ркве яви́лся еси́,/ священному́чениче Вениами́не./ Клевету́, у́зы, оплевания, и суд непра́ведный/ от беззако́нных му́жественне претерпева́я,/ святы́ню церко́вную на поруга́ние не пре́дал еси́./ Те́мже и Христо́с да́ром терпе́ния и любве́ тя испо́лни,/ во е́же пред му́ченическою кончи́ною/ со благодаре́нием взыва́ти:/ за вся, Го́споди, сла́ва Тебе́. Икос Яви́ тя Госпо́дь, святи́телю о́тче Вениами́не,/ украше́ние гра́ду на́шему ве́лие,/ ди́внаго предста́теля о лю́дех твои́х,/ и́стиннаго свиде́теля пра́вды Бо́жия,/ наста́вника заблу́ждшим,/ любве́ и кро́тости пра́вило,/ свети́льника во тьме грехо́вней сия́юща,/ му́ченика дерзнове́ннаго,/ испове́дника тве́рдаго,/ столпа неколеби́маго Це́ркве на́шея,/ и ве́рнаго служи́теля Своего́, рекшаго:/ за вся, Го́споди, сла́ва Тебе́. Песнь 7 Ирмос: От Иудеи дошедше отроцы/ в Вавилоне иногда,/ верою Тройческою пламень пещный попраша, поюще:/ отцев Боже, благословен еси. Припев: Священному́чениче Вениами́не, моли́ Бо́га о нас. От ю́ности по́двигом святы́х страстоте́рпцев приобщи́тися жела́я,/ ча́шу страданий испил еси́, святи́телю Вениами́не./ Темже увенча́ тя Господь венце́м му́ченическим, взыва́юща:/ благослове́н еси, Го́споди, Бо́же, во веки. Припев: Священному́чениче Вениами́не, моли́ Бо́га о нас. Боре́нием вну́тренним в темни́це томи́мь,/ во́ли Бо́жией всеце́ло преда́лся еси́, му́чениче добропобе́дный,/ и, поко́ем Небе́сным испо́лнився, яко отроцы в пещи Вавилонстей воспевал еси:/ благословен еси, Господи, Боже, во веки. Сла́ва Отцу́ и Сы́ну и Свято́му Ду́ху. Во узи́лищи сый,/ ча́шу страда́ний, предугото́ванную тебе́, до конца́ испи́л еси́, му́чениче пресла́вне,/ и, ве́лиих утеше́ний и ра́дости неизрече́нныя от Ду́ха Свята́го удосто́ився,/ добропобедне взывал еси:/ благословен еси, Господи, Боже, во веки. И ны́не и при́сно и во ве́ки веко́в. Ами́нь. Богородичен: Вы́шшая Небе́сных сил, Еди́на от веко́в Ты явилася еси́, Богороди́тельнице,/ Зижди́теля бо и Творца всяческих родила́ еси́ несказа́нно,/ Всечи́стая Влады́чице. Песнь 8 Ирмос: Царя Небеснаго,/ Егоже поют вои Ангельстии/ хвалите и превозносите во вся веки. Припев: Священному́чениче Вениами́не, моли́ Бо́га о нас. Па́стырей Церкве Христовой назида́л еси́, му́дре архиере́ю,/ да все упова́ние на Бо́га возложат и ве́рою неколе́блемою вооружа́тся,/ Спаси́тель бо наш сохрани́т Це́рковь Свою́ неруши́му до сконча́ния ве́ка. Припев: Священному́чениче Вениами́не, моли́ Бо́га о нас. Христо́с наша Жи́знь, Свет и Поко́й,/ с Нимже и в темнице добро́ есть бы́ти,/ сице наставля́л еси́ па́ству твою́, святи́телю Вениами́не,/ и предуготовля́л еси ю́ к страданием, взывая:/ Го́спода пойте и превозноси́те во вся веки. Сла́ва Отцу́ и Сы́ну и Свято́му Ду́ху. Не аз спаса́ю Це́рковь, но Е́ю сам спаса́юся,/ та́ко смире́нно помышля́л еси́, священному́чениче Вениами́не./ Сего́ ради нима́ло страши́лся еси́ о судьбе́ Неве́сты Христо́вы, взывая:/ Го́спода пойте и превозноси́те во вся веки. И ны́не и при́сно и во ве́ки веко́в. Ами́нь. Богородичен: Жезл из ко́рене Иессе́ева, Де́во, была́ еси́,/ Цвет возрасти́вши, Христа Жизнодавца,/ благода́ть всем подаю́щаго, взывающим:/ благослови́те, вся дела́ Госпо́дня, Го́спода. Песнь 9 Ирмос: Воистинну Богородицу,/ Тя исповедуем,/ спасеннии Тобою, Дево Чистая,/ с Безплотными лики Тя величающе. Припев: Священному́чениче Вениами́не, моли́ Бо́га о нас. Не посрами́м ве́ры Правосла́вныя и упова́ния на́шего,/ я́же есть наде́жда благ ве́чных,/ сими словесы́ в гонениих укрепля́л еси́ паству твою́, святи́телю Вениами́не,/ исполня́я служе́ние свое́ да́же до смерти. Припев: Священному́чениче Вениами́не, моли́ Бо́га о нас. Мужественне сме́рть прияти уготовляяся,/ сострада́льцы твоя укреплял еси/ и, вся благодарне претерпевая,/ мучи́тели твоя благослови́л еси, Вениами́не терпеливодушне. Сла́ва Отцу́ и Сы́ну и Свято́му Ду́ху. Испо́лнися слово апо́стольское во страдании ва́шем, му́ченицы четверочи́сленнии,/ я́ко ни скорбь, ни гоне́ния, ни настоя́щая, ни гряду́щая/ не возмо́гут ве́рныя отлучи́ти от любве́ Бо́жия./ Сего́ ра́ди вас ублажа́ем. И ны́не и при́сно и во ве́ки веко́в. Ами́нь. Богородичен: Тя, неискусому́жно ро́ждшую Жизнода́вца и Спа́са,/ Богоро́дицу воистину испове́дуем и мо́лим приле́жно,/ изба́ви нас от вся́кия ско́рби и болезни моли́твами Твоими, Ма́ти Де́во. Светилен В ми́ре ско́рбни бу́дете,/ но дерза́йте, я́ко Аз победи́х мир, глаго́ла Госпо́дь ученико́м Свои́м./ Сей заве́т Христов до́бре храни́л еси́, архиере́ю пра́ведный,/ и побе́дно восше́л еси́ во све́тлыя черто́ги Ца́рства Небе́снаго.

Минея, 3 Мая, Кано́н Богоро́дице ра́ди ико́ны Ея́, имену́емыя Све́нская-Пече́рская Глас 8 Песнь 1 Ирмос: Колесницегони́теля фарао́ня погрузи́/ чудотворя́й иногда́/ Моисе́йский жезл, крестообра́зно порази́в/ и раздели́в мо́ре,/ Изра́иля же беглеца́, пешехо́дца спасе́,/ песнь Бо́гови воспева́юща. Припев: Пресвята́я Богоро́дице, спаси́ на́с. Помо́щница и Покрови́тельница еси́ оби́тели Пече́рския, Де́во Чи́стая,/ помози́ нам вы́ну просла́вити Тя/ и разреше́ние прегреше́ний пода́ждь, мо́лимся, Всенепоро́чная. Припев: Пресвята́я Богоро́дице, спаси́ на́с. Владе́тель земли́ Черни́говския Рома́н зре́ния лиши́ся/ и, уве́дев о чудесе́х, от ико́ны Твоея́ Пече́рския бы́вших,/ приле́жно моля́шеся Тебе́. Сла́ва Отцу́ и Сы́ну и Свято́му Ду́ху. Архимандри́т Пече́рский, вне́мля проше́нию боголюби́ваго Рома́на,/ совеща́шеся с бра́тиею/ и отпусти́ святу́ю Твою́ ико́ну со иере́ем в ладии́ по Десне́ реце́. И ны́не и при́сно и во ве́ки веко́в. Ами́нь. А́нгельское пе́ние подоба́ше приноси́ти Тебе́, Ма́тери Бо́жией,/ Тво́рца бо всех родила́ еси́ стра́нно,/ но и от нас приими́, Влады́чице, смире́нныя сия́ похвалы́. Песнь 3 Ирмос: Утвержде́й в нача́ле Небеса́ ра́зумом/ и зе́млю на вода́х основа́вый,/ на ка́мени мя, Христе́, за́поведей Твои́х утверди́,/ я́ко несть свят, па́че Тебе́, Еди́не Человеколю́бче. Припев: Пресвята́я Богоро́дице, спаси́ на́с. Утверди́ сердца́ на́ша во упова́нии на Тя, Пречи́стая Госпоже́,/ я́ко утверди́ша ве́ру Рома́на, раба́ Твоего́, да вопие́м:/ несть свят, я́ко Госпо́дь, и несть пра́веден, я́ко Бог наш. Припев: Пресвята́я Богоро́дице, спаси́ на́с. У́тру бы́вшу, ико́ны Твое́й не обре́теся в ладии́,/ и, обре́тше ю на дре́ве, вверху́ бре́га, ра́довашеся. Сла́ва Отцу́ и Сы́ну и Свято́му Ду́ху. О сем ди́вном Твое́м смотре́нии возвести́ша боголюби́вому Рома́ну,/ и сей, ра́дости и умиле́ния испо́лненный,/ от глубины́ серде́чныя со слеза́ми моля́шеся Тебе́,/ те́мже и на́ша во умиле́нии приноси́мыя похвалы́ и проше́ния не пре́зри. И ны́не и при́сно и во ве́ки веко́в. Ами́нь. О Пречу́дная Влады́чице Богоро́дице, Ма́ти Христа́ Бо́га на́шего, –/ рече́ слепы́й владе́тель, –/ да́руй ми прозре́ти,/ да ви́жу свет и лицезре́ю чу́дный о́браз Твой. Седален, глас 4 Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Предвари́вшии у́тро свяще́нницы, провожда́вшии от оби́тели Ки́ево-Пече́рския/ в преде́лы Бря́нския ико́ну Твою́, Всепе́тая Влады́чице,/ не в ладии́, но на ду́бе близ Све́ны реки́ обрето́ша ю́,/ слы́шав же сия́, князь Рома́н со слеза́ми вопия́ше:/ О Пресвята́я Де́во! да́руй ми зре́ти чу́дный о́браз Твой/ и свет Сы́на Твоего́, спаса́ющаго род челове́ческий. Песнь 4 Ирмос: Ты моя́ кре́пость, Го́споди,/ Ты моя́ и си́ла,/ Ты мой Бог, Ты мое́ ра́дование,/ не оста́вль не́дра О́тча/ и на́шу нищету́ посети́в./ Тем с проро́ком Авваку́мом зову́ Ти:/ си́ле Твое́й сла́ва, Человеколю́бче. Припев: Пресвята́я Богоро́дице, спаси́ на́с. Боголюби́вый Рома́н, я́коже иногда́ Закхе́й,/ ра́дости испо́лнь, вопия́ше Тебе́, Пречи́стая;/ ели́ка и до́ле узрю́ с ме́ста сего́ на все четы́ре страны́,/ толи́ко прида́м к до́му Твоему́ и сози́жду храм и оби́тель,/ иде́же Ты возлюби́ла ме́сто сие́. Припев: Пресвята́я Богоро́дице, спаси́ на́с. Егда́ прибли́жися к дре́ву, иде́же бе ико́на Твоя́,/ па́ки сей раб Твой вопия́ше Тебе́:/ Пресвята́я Влады́чице, услы́ши глас моли́твы моея́/ и да́руй свет оча́м мои́м. Сла́ва Отцу́ и Сы́ну и Свято́му Ду́ху. Услы́шавши сие́ приле́жное моле́ние раба́ Твоего́, Пречи́стая Влады́чице,/ а́бие испо́лнила еси́ проше́ние его́;/ та́ко внемли́ мольба́м и нас, смире́нных и недосто́йных. И ны́не и при́сно и во ве́ки веко́в. Ами́нь. Зря́ше сие́ ди́вное зна́мение ми́лости Твоея́,/ архиере́й земли́ тоя́, и́ноцы и вси лю́дие ра́дости испо́лнишася/ и восхвали́ша Тя. Песнь 5 Ирмос: Вску́ю мя отри́нул еси́/ от лица́ Твоего́, Све́те Незаходи́мый,/ и покры́ла мя есть чужда́я тьма, окая́ннаго,/ но обрати́ мя и к све́ту за́поведей Твои́х/ пути́ моя́ напра́ви, молю́ся. Припев: Пресвята́я Богоро́дице, спаси́ на́с. Виждь, Преблагослове́нная, от но́щи у́тренюющих чад па́ствы Твоея́,/ ны́не окружа́ющих честну́ю и достохва́льную ико́ну Твою́,/ велича́ющих безме́рную Твою́ ми́лость/ и прося́щих разреше́ние грехо́в и жития́ исправле́ние,/ не отри́ни нас от светоно́снаго ли́ка Твоего́. Припев: Пресвята́я Богоро́дице, спаси́ на́с. Архиере́й земли́ Бря́нския,/ прие́м в ру́це свои́ от дре́ва чу́дную ико́ну Твою́,/ благогове́йно облобыза́ ю и моле́бныя пе́ния воспе́ Тебе́. Сла́ва Отцу́ и Сы́ну и Свято́му Ду́ху. Сия́ честна́я ико́на Твоя́, от Пече́рския оби́тели принесе́нная/ и от руки́ преподо́бнаго Али́пия начерта́нная,/ благослове́ние святы́я Ла́вры – до́ма Твоего́, на зе́млю Бря́нскую излия́ша,/ и мы, сему́ ра́дующеся, благода́рственными словесы́ воспева́ем Тя. И ны́не и при́сно и во ве́ки веко́в. Ами́нь. Боголюби́вый князь Рома́н, благодаре́ния Тебе́, Всечи́стая, испо́лнь,/ храм во имя́ Успе́ния Твоего́ сооруди́/ и оби́тель и́ноческую учреди́,/ да непреста́нно славосло́вится вели́чие Твое́. Песнь 6 Ирмос: Очисти́ мя, Спа́се,/ мно́га бо беззако́ния моя́,/ и из глубины́ зол возведи́, молю́ся,/ к Тебе́ бо возопи́х, и услы́ши мя,/ Бо́же спасе́ния моего́. Припев: Пресвята́я Богоро́дице, спаси́ на́с. Сла́ва ико́ны Твоея́, от оби́тели Пече́рския принесе́нная,/ озаря́ше не то́кмо зе́млю Бря́нскую,/ но и до гра́да Москвы́ достиго́ше,/ сего́ ра́ди вопие́м Ти:/ ра́дуйся, всея́ зе́мли на́шея похвало́. Припев: Пресвята́я Богоро́дице, спаси́ на́с. Три ле́та ико́на Твоя́, Влады́чице, пребыва́ше во гра́де Москве́/ и а́бие со сла́вою принесе́на бысть во оби́тель Све́нскую,/ мы же ны́не прославля́ем Тя,/ сего́ ра́ди невреди́мы нас сотвори́. Сла́ва Отцу́ и Сы́ну и Свято́му Ду́ху. Честна́я Твоя́ ико́на яви́ся вои́стинну покро́в держа́вный лю́дем Твои́м,/ я́ко не то́кмо и́ноцы Пече́рстии,/ но и лю́дие да́льнии обрето́ша Твою́ по́мощь и заступле́ние. И ны́не и при́сно и во ве́ки веко́в. Ами́нь. В лю́тое ле́то наше́ствия двана́десяте язы́к/ лю́дие гра́да Бря́нска изнесо́ша честну́ю ико́ну Твою́ Пече́рскую/ и со слеза́ми мно́гими моля́хуся,/ Твоего́ заступле́ния и́щуще. Кондак, глас 3 Я́ко цвет неувяда́емый/ Ла́вры Ки́ево-Пече́рския/ чу́дная ико́на Твоя́, Влады́чице Богоро́дице,/ на дре́ве близ Све́ны реки́ обре́теся,/ явля́ющи ме́сто но́ваго вертогра́да духо́внаго/ и благоуха́нием чуде́с исполня́ющи притека́ющих к ней,/ те́мже и на пре́дняя проба́ви ми́лости Твоя́, Пречи́стая,// правосла́вно Тя велича́ющим. Икос Земна́я на земли́ оста́вльше,/ и мы́сли от страсте́й очи́стивше,/ впери́м зре́ние вку́пе и чу́вства к Пречи́стей Богома́тери,/ Све́нскаго о́браза Ея́ ди́вное вознесе́ние на дре́во/ и чудеса́ его́ благода́рно прославля́юще,/ и умиле́нно возопии́м:/ не оста́ви рабы́ Твоя́, Влады́чице,/ и́ноков, подвиза́ющихся на ме́сте, Тобо́ю избра́ннем, укрепи́,/ град Брянск и всю ру́сскую зе́млю благода́тию Твое́ю покры́й,/ уте́ши нас, я́ко Ма́ти, наста́ви, я́ко сыно́в,/ правосла́вно Тя велича́ющих. Песнь 7 Ирмос: Бо́жия снизхожде́ния/ огнь устыде́ся в Вавило́не иногда́./ Сего́ ра́ди о́троцы в пещи́, ра́дованною ного́ю,/ я́ко во цве́тнице, лику́юще, поя́ху:/ благослове́н еси́, Бо́же оте́ц на́ших. Припев: Пресвята́я Богоро́дице, спаси́ на́с. Лю́дие, обре́тше ди́вное заступле́ние от Твоея́ пречи́стыя ико́ны, Пече́рскою имену́емыя,/ хвале́бными гла́сы воспева́ху:/ оте́ц на́ших Бо́же, благослове́н еси́. Припев: Пресвята́я Богоро́дице, спаси́ на́с. В пещи́ искуше́ний и бед опаля́емых ороси́, Богома́ти, струя́ми Твои́х щедро́т,/ я́коже дре́вле яви́ла еси́ по́мощь рабо́м Твои́м,/ внегда́ врази́ ослепле́ни бы́ша/ и вся сокро́вища во оби́тель возврати́ша, да зове́м велегла́сно:/ оте́ц на́ших Бо́же, благослове́н еси́. Сла́ва Отцу́ и Сы́ну и Свято́му Ду́ху. Я́коже изба́вила еси́ не́когда игу́мена Мартиниа́на с бра́тиею от сме́рти внеза́пныя,/ та́ко и нас, гре́шных, в покая́нии зову́щих, услы́ши/ и уми́лостиви Сы́на Твоего́, да зове́м Ему́:/ оте́ц на́ших Бо́же, благослове́н еси́. И ны́не и при́сно и во ве́ки веко́в. Ами́нь. Ты – весе́лие в оби́телех Твои́х живу́щих/ и градо́в дре́вних утеше́ние и похвала́, Де́во Мари́е,/ Препе́тая и Превозноси́мая во ве́ки. Песнь 8 Ирмос: Седмери́цею пещь/ халде́йский мучи́тель/ Богочести́вым неи́стовно разжже́,/ си́лою же лу́чшею спасе́ны, сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки. Припев: Пресвята́я Богоро́дице, спаси́ на́с. По́йте, и́ноцы Пече́рстии вку́пе с бра́тиею Све́нскою,/ прославля́й, земле́ Ки́евская и Бря́нская, Благу́ю Влады́чицу,/ ико́ною Свое́ю источа́ющую струи́ чуде́с и благодея́ний,/ мы же хва́лим, благослови́м, покланя́емся Ти, Богоро́дице,/ пою́ще и превознося́ще во вся ве́ки. Сла́ва Отцу́ и Сы́ну и Свято́му Ду́ху. Ди́вныя зна́мения ми́лости от ико́ны Твоея́ Пече́рския источи́ла еси́, Влады́чице:/ духо́в злых отгна́ла еси́,/ отрокови́це Екатери́не, я́коже Рома́ну, зре́ние дарова́ла еси́,/ сего́ ра́ди превозно́сим Тя во вся ве́ки. И ны́не и при́сно и во ве́ки веко́в. Ами́нь. Явле́ние ико́ны Твоея́/ сердца́ и́ноков, в посте́ и моли́тве подвиза́ющихся, возвесели́ло есть,/ и тем го́ршее устремле́ние к Небе́сному Ца́рствию им внуши́ло есть,/ та́ко и нас, немощны́х, ускори́ на по́двиги,/ да превозно́сим Тя во вся ве́ки. Песнь 9 Ирмос: Ужасе́ся о сем Не́бо,/ и земли́ удиви́шася концы́,/ я́ко Бог яви́ся челове́ком пло́тски/ и чре́во Твое́ бысть простра́ннейшее Небе́с./ Тем Тя, Богоро́дицу,/ А́нгелов и челове́к чинонача́лия велича́ют. Припев: Пресвята́я Богоро́дице, спаси́ на́с. Прииди́те вси, благода́рственными пе́сньми возвели́чим Ма́терь Бо́жию/ и к ди́вному Ея́ о́бразу благогове́йно припаде́м,/ положи́вшую с на́ми заве́т ми́лости,/ просла́вим Обра́дованную воскресе́нием Сы́на Своего́. Припев: Пресвята́я Богоро́дице, спаси́ на́с. Богоро́дице Де́во, упова́ние христиа́ном,/ проба́ви и на́шему ро́ду ми́лости Твоя́,/ бы́вшия отце́м на́шим во оби́тели сей,/ разори́ сове́т нечести́вых, возстаю́щих на ны,/ и сей дом Твой пресла́вно соблюди́. Сла́ва Отцу́ и Сы́ну и Свято́му Ду́ху. Пресвята́я Госпоже́ на́ша, помина́я неисче́тная Твоя́ благодея́ния,/ и́миже удиви́ла еси́ оби́тель сию́ от лет дре́вних,/ Тя, Ма́терь Бо́жию, велича́ем. И ны́не и при́сно и во ве́ки веко́в. Ами́нь. Свята́я оби́тель Пече́рская ку́пно с дще́рию свое́ю по ду́ху оби́телию Све́нскою,/ днесь сою́зом любве́ совоку́плени,/ я́ко всея́ тва́ри честне́йшую и земны́х всех сла́внейшую Тя, Богоотрокови́це,/ зря́ще на ико́не Твое́й Пече́рстей, ублажа́ем. Светилен Све́том озари́вшая це́рковь Пече́рскую от пречу́днаго ли́ка Твоего́, Богоро́дице,/ возсия́й ми свет спасе́ния огне́м покая́ния,/ да ве́рою и любо́вию сла́влю Тя, Приснопрославля́емую. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Я́коже дре́вле просвети́ла еси́ теле́сныя о́чи благове́рнаго кня́зя Рома́на/ благода́тию Све́нския ико́ны Твоея́, Всепе́тая Богоро́дице,/ та́ко и ны́не омраче́нныя злове́рием, Боже́ственною луче́ю Сы́на Твоего́ просвети́,// правосла́вныя же во све́те Лица́ Его́ ходи́ти утверди́.

Минея, 20 Сентября, Ин кано́н святы́х Глас 8 Песнь 1 Ирмос: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:// Изба́вителю и Бо́гу на́шему пои́м. Припев: Святи́и му́ченицы, моли́те Бо́га о на́с. Посли́ мне, Го́споди, оставле́ние мно́гих мои́х согреше́ний/ и сло́во мне да́руй,/ да с ра́достию возмогу́ похвали́ти Тя,/ просла́вльшаго святы́я Твоя́ му́ченики. Припев: Святи́и му́ченицы, моли́те Бо́га о на́с. Песнь возсле́м, благочести́вии,/ целому́дренным смы́слом/ Михаи́ла сла́внаго и Фео́дора благочести́ваго,/ ку́пно о́ба, сла́вяще. Сла́ва Отцу́ и Сы́ну и Свято́му Ду́ху. Благоро́дства дар от Бо́га прие́м,/ благоче́стие душе́вное возлюби́в,/ па́че же и целому́дрие,/ и доброде́тельми удобря́яся, Михаи́ле. И ны́не и при́сно и во ве́ки веко́в. Ами́нь. Богородичен: Прокля́ся смерть Тобо́ю/ и а́дово жа́ло притупи́ся, Ма́ти Чи́стая,/ Ты бо Безсме́ртнаго Влады́ку/ пло́тию ми́ру родила́ еси́. Песнь 3 Ирмос: Ты еси́ утвержде́ние/ притека́ющих к Тебе́, Го́споди,/ Ты еси́ Свет омраче́нных,// и пое́т Тя дух мой. Припев: Святи́и му́ченицы, моли́те Бо́га о на́с. Всю мысль ва́шу ко Христу́, му́дрии, возложи́сте/ и, я́ко бра́тнею совоку́пльшеся любо́вию,/ благоче́стно сконча́ете тече́ние. Припев: Святи́и му́ченицы, моли́те Бо́га о на́с. Многоле́тни у́бо те́лом, душа́ми же соверше́ни, святи́и,/ я́ко благочести́вии о́ба,/ Бо́га возлюби́ли есте́ и и́долом не поклони́стеся. Сла́ва Отцу́ и Сы́ну и Свято́му Ду́ху. Сла́ву возненави́десте мимотеку́щую и тле́нную/ и доброде́тельни яви́стеся сосу́ди, сла́внии, в житии́ ва́шем. И ны́не и при́сно и во ве́ки веко́в. Ами́нь. Богородичен: Тя вси и́мамы прибе́жище и сте́ну на́шу, христиа́не,/ и Тя сла́вим немо́лчно, Ма́ти Безневе́стная. Седален, глас 1 Ка́мение тве́рдо яви́стеся/ и непребори́ми бы́сте мучи́телей преще́нием,/ Михаи́ле сла́вне и Фео́доре прему́дре./ Сего́ ра́ди росси́йстии собо́ри вопию́т ра́достно:/ сла́ва Укре́пльшему вы,/ сла́ва Венча́вшему вы,/ сла́ва Просве́щшему ва́ми весь мир. Песнь 4 Ирмос: Услы́шах, Го́споди,/ смотре́ния Твоего́ та́инство,/ разуме́х дела́ Твоя́// и просла́вих Твое́ Божество́. Припев: Святи́и му́ченицы, моли́те Бо́га о на́с. В немра́чнем зерца́ле,/ Боже́ственных умо́в си́лою Бо́жиею укрепи́вшеся,/ я́ко со́лнце просвети́стеся, Михаи́ле с Фео́дором. Припев: Святи́и му́ченицы, моли́те Бо́га о на́с. Мра́чным не принесо́сте же́ртвы де́моном, му́ченицы непобеди́мии,/ Светода́вца же Бо́га возлюби́сте,/ по благоче́стии изво́ливше смерть. Сла́ва Отцу́ и Сы́ну и Свято́му Ду́ху. Исцели́те, прехва́льнии, души́ моея́ боле́зни,/ Христу́ Бо́гу моля́щеся,/ и утиши́те моли́твами ва́шими души́ моея́ мяте́ж. И ны́не и при́сно и во ве́ки веко́в. Ами́нь. Богородичен: Бо́гу, Его́же родила́ еси́, Пречи́стая Мари́е,/ Тому́ помоли́ся,/ е́же рабо́м Твои́м пода́ти прегреше́ний оставле́ние. Песнь 5 Ирмос: У́тренююще, вопие́м Ти:/ Го́споди, спаси́ ны,/ Ты бо еси́ Бог наш,// ра́зве Тебе́ ино́го не ве́мы. Припев: Святи́и му́ченицы, моли́те Бо́га о на́с. Па́че живота́ за Христа́ пострада́ти изво́листе,/ му́чениче Михаи́ле с блаже́нным Фео́дором,/ и с Ним ца́рствуете присно. Припев: Святи́и му́ченицы, моли́те Бо́га о на́с. Помышля́ше мучи́тель увеща́ти вас,/ прельсти́ти хотя́ тле́нною сла́вою,/ но, Бо́жиею си́лою укрепи́вшеся, посрами́сте его́. Сла́ва Отцу́ и Сы́ну и Свято́му Ду́ху. Да́руйте просвеще́ние и мир, прехва́льнии, ми́ру/ и разреши́те моли́твами ва́шими грехопаде́ния на́ша. И ны́не и при́сно и во ве́ки веко́в. Ами́нь. Богородичен: Де́ву по Рождестве́ пое́м Тя, Богоро́дице,/ Ты бо Бо́жие Сло́во пло́тию ми́ру родила́ еси́. Песнь 6 Ирмос: Очи́сти мя, Спа́се,/ мно́га бо беззако́ния моя́,/ и из глубины́ зол возведи́, молю́ся,/ к Тебе́ бо возопи́х, и услы́ши мя,// Бо́же спасе́ния моего́. Припев: Святи́и му́ченицы, моли́те Бо́га о на́с. Тьма нареко́шася сы́нове Ага́рины,/ моле́ния к Бо́гу вам принося́щим,/ ноже́м главы́ ва́ша отре́заша,/ хода́таи венце́м ва́шим, Михаи́ле, Боже́ственным бы́вше. Припев: Святи́и му́ченицы, моли́те Бо́га о на́с. Победи́ли есте́ мучи́телеву горды́ню, преблаже́ннии:/ того́ ра́ди псом на снедь/ помета́ема бы́ша телеса́ ва́ша,/ но сохране́на бы́ша Бо́жиею благода́тию невре́дна. Сла́ва Отцу́ и Сы́ну и Свято́му Ду́ху. Единогла́сно, соше́дшеся, воспои́м/ па́мять благочести́ваго кня́зя, в Росси́и возсия́вшаго:/ ра́дуйся, глаго́люще, обра́дованный от Го́спода,/ Его́же непреста́нно моли́ от тли изба́вити жизнь на́шу. И ны́не и при́сно и во ве́ки веко́в. Ами́нь. Богородичен: Уясня́ют проро́честии гла́си Бо́жию Роди́тельницу,/ пое́м же Тя и мы и мо́лим,/ ви́дяще сбытие́ честны́х прорица́ний,/ Бо́га бо и́стинно и чистоты́ вмести́лище была́ еси́. Кондак, глас 8 Ца́рство земно́е в ничто́же вмени́в,/ сла́ву, я́ко преходя́щую, оста́вил еси́,/ самозва́н прише́д к подвиго́м,/ Тро́ицу пропове́дал еси́ пред нечести́вым мучи́телем,/ страстоте́рпче Михаи́ле с до́блим Фео́дором,/ Царю́ Сил предстоя́ще,/ моли́те без вре́да сохрани́ти Оте́чество ва́ше, град же и лю́ди,// да вас непреста́нно почита́ем. Икос Кто по́двиги ва́ша и боле́зни возмо́жет извеща́ти, страстоте́рпцы,/ я́же му́жески претерпе́сте за ве́ру Госпо́дню?/ и́ дарова́ний, и́хже сподо́бистеся, не довле́ют уста́ челове́ческая испове́дати./ Прему́дростию бо укра́шени и му́жеством,/ бога́тство и сла́ву привре́менную возненави́десте,/ Михаи́ле сла́вный, и с пострада́вшим с тобо́ю ди́вным Фео́дором,/ с ним не разлучи́стеся на земли́ и на Небеси́./ Тем моли́те без вре́да сохрани́ти Оте́чество ва́ше, град же и лю́ди,/ да вас непреста́нно почита́ем. Песнь 7 Ирмос: От Иуде́и доше́дше, о́троцы/ в Вавило́не иногда́/ ве́рою тро́ическою пла́мень пе́щный попра́ша, пою́ще:// отце́в Бо́же, благослове́н еси́. Припев: Святи́и му́ченицы, моли́те Бо́га о на́с. Прииди́те, росси́йстии собо́ри,/ богоизбра́нное ста́до днесь воспои́м пе́сньми,/ похваля́юще му́ченики Христо́вы, Михаи́ла с Фео́дором, благоче́стно пою́ще:/ отце́в на́ших Бо́же, благослове́н еси́. Припев: Святи́и му́ченицы, моли́те Бо́га о на́с. Оста́вил еси́ земно́е ца́рство и любве́ жены́ отврати́лся еси́/ и дете́й ласка́ния, му́чениче Михаи́ле,/ взира́я на высоту́ к Творцу́ твоему́, вопия́л еси́:/ отце́в на́ших Бо́же, благослове́н еси́. Сла́ва Отцу́ и Сы́ну и Свято́му Ду́ху. Во́инством духо́вным препоя́савшеся, Михаи́ле всече́стне и Фео́доре прехва́льне,/ земно́е бога́тство оста́вльше,/ на Небесе́х побе́дныя венцы́ от Христа́ прия́сте, зову́ще: / отце́в на́ших Бо́же, благослове́н еси́. И ны́не и при́сно и во ве́ки веко́в. Ами́нь. Богородичен: Черто́г Тя, Пречи́стая, Сло́ва воплоще́ния/ и престо́л и ло́жницу правому́дрствующе имену́ем/ и веселя́щеся пои́м:/ отце́в и нас Бо́же, благослове́н еси́. Песнь 8 Ирмос: Седмери́цею пещь/ халде́йский мучи́тель/ богочести́вым неи́стовно разжже́,/ си́лою же лу́чшею спасе́ны сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,// лю́дие, превозноси́те во вся ве́ки. Припев: Святи́и му́ченицы, моли́те Бо́га о на́с. Не насы́тишася кро́ве ва́шея пога́нии,/ но и главы́ ва́ша ноже́м отре́заша,/ не устыде́вшеся, Михаи́ле, благоро́дия́ и воспита́нных во благоче́стии,/ но благода́ть Бо́жия храня́ше вас чрез А́нгела./ Тем с Фео́дором лику́еши, вопия́:/ де́ти, благослови́те, свяще́нницы, воспо́йте,/ лю́дие, превозноси́те Его́ во ве́ки. Припев: Святи́и му́ченицы, моли́те Бо́га о на́с. Прославля́я святы́я Своя́ му́ченики, Госпо́дь/ столп о́гнен яви́ над телесы́ их, я́ве сия́ющь но́щию./ Того́ ви́девшии к друг дру́гу глаго́лаху: что сие́ пресла́вное виде́ние?/ И пропове́даша всем Христа́, сохра́ньшаго Своя́ уго́дники, вопию́ще:/ де́ти, благослови́те, свяще́нницы, воспо́йте,/ лю́дие, превозноси́те Его́ во ве́ки. Сла́ва Отцу́ и Сы́ну и Свято́му Ду́ху. Прославля́ем Тя, Отче и Сы́не и Святы́й Ду́ше, со А́нгелы зову́ще трисвяты́ми гла́сы, Трисо́лнечное Божество́:/ приими́ за ны моля́щую Тя святу́ю дво́ицу, Михаи́ла с Фео́дором,/ пою́щую Тебе́ непреста́нно:/ де́ти, благослови́те, свяще́нницы, воспо́йте,/ лю́дие, превозноси́те Его́ во ве́ки. И ны́не и при́сно и во ве́ки веко́в. Ами́нь. Богородичен: Све́та сосу́д яви́вшися, Чи́стая, просвети́ мя/ и в повеле́нии Све́та ходи́ти ми поспеши́, Чи́стая,/ от чре́ва Твоего́ возсия́вша, просвети́вша ве́рных сердца́, пою́щих:/ де́ти, благослови́те, свяще́нницы, воспо́йте,/ лю́дие, превозноси́те Его́ во ве́ки. Песнь 9 Ирмос: Ужасе́ся о сем Не́бо,/ и земли́ удиви́шася концы́,/ я́ко Бог яви́ся челове́ком пло́тски,/ и чре́во Твое́ бы́сть простра́ннейшее Небе́с./ Тем Тя, Богоро́дицу,// А́нгелов и челове́к чинонача́лия велича́ют. Припев: Святи́и му́ченицы, моли́те Бо́га о на́с. Положе́ни бы́сте на земли́, я́ко ме́ртвии, но в Небе́сная пресели́стеся./ Тем дерзнове́ния испо́лнистеся, сла́внии,/ врагу́ пога́ному восхоте́вшу поруга́тися телесе́м ва́шим,/ но стра́хом Госпо́дним отгна́сте, блаже́ннии. Припев: Святи́и му́ченицы, моли́те Бо́га о на́с. Торжество́ у́бо Михаи́ла па́че со́лнца просвети́ся во всех страна́х,/ и Фео́дора предо́бляго,/ Церкве́й украше́ние страда́ния ва́ша, му́чеников сла́ва,/ и архиере́ев похвала́, и христиа́н утвержде́ние. Сла́ва Отцу́ и Сы́ну и Свято́му Ду́ху. Шу́яго мя стоя́ния изба́ви на Суде́, о Тро́ице Свята́я,/ и облегчи́ ми страсте́й волне́ния,/ и к приста́нищу непотопле́на приведи́ мя, моли́твами святы́х му́ченик,/ да Тя непреста́нно велича́ем. И ны́не и при́сно и во ве́ки веко́в. Ами́нь. Богородичен: О, чудесе́, пребо́льша ума́! / Чу́до ве́лие и́стинно и пресла́вно,/ ка́ко вмести́ся во утро́бу Твою́ Бог, ника́коже вмести́мый?/ Его́же о хва́лящих Тя умоли́, Де́во,/ от бед избавля́ющи и от беззако́нных враг всегда́. Светилен Да просла́вим вси Бо́га,/ просла́вльшаго святы́я Своя́ великому́ченики,/ Михаи́ла ку́пно с Фео́дором,/ ти́и бо пострада́ша за Христа́, и венцы́ от Него́ прия́ша,/ и ны́не, в вы́шних предстоя́ще, о ми́ре мо́лятся.

Минея, 19 Января, Ин канон Глас 8 Песнь 1 Ирмос: Колесницегони́теля фарао́ня погрузи́ чудотворя́й иногда́ Моисе́йский же́зл, крестообра́зно порази́в и раздели́в мо́ре, Изра́иля же беглеца́, пешехо́дца спасе́, пе́снь Бо́гови воспева́юща. Припев: Святи́телю о́тче Ма́рко, моли́ Бо́га о на́с. Добро́ты ра́ди доброде́телей сия́ния Вы́шняго прия́телище бы́в, па́ству Христо́ву, Ма́рко, просвети́л еси́, сего́ ра́ди к Све́ту невече́рнему преста́влься, воспева́ющим боже́ственную па́мять твою́ вдохни́ сло́ву озаря́ющую благода́ть, сла́вне. Припев: Святи́телю о́тче Ма́рко, моли́ Бо́га о на́с. Тща́щемуся ми́ досто́йно дости́гнути похва́л твои́х, блаже́нне, глубоча́йший зри́тся бы́ти исто́чник слове́с боже́ственных твои́х исправле́ний, но, о́тче, моли́твами твои́ми любви́ ра́вную благода́ть и си́лу ми́ да́ждь. Сла́ва Отцу́ и Сы́ну и Свято́му Ду́ху. Благода́тей Боже́ственных всесвяты́й хра́м, от него́же благово́ния та́инственная все́м, благоче́стно живу́щим, раскры́шася во сла́ву и хвалу́ Несозда́нныя Тро́ицы, Еди́наго естество́м Бо́га на́шего, да восхва́лится Ма́рк всечестны́й. И ны́не и при́сно и во ве́ки веко́в. Ами́нь. Богородичен: Дре́вле проро́ков свя́щенныя прови́деша взо́ры, Чи́стая, Тя́ у́мную го́ру, купину́ неопали́мую и врата́ непроходи́мая, ста́мну и манноприе́мницу, мы́ же ве́рою возвеща́ем Тя́ Богоро́дицу вои́стинну, Богоневе́сто. Песнь 3 Ирмос: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ в любви́ Твое́й, жела́ний кра́ю, ве́рных утвержде́ние, еди́не Человеколю́бче. Припев: Святи́телю о́тче Ма́рко, моли́ Бо́га о на́с. Зерца́ло сия́ний Всетво́рческаго Ду́ха, блаже́нне, показа́лся еси́, просвеща́я ве́рных исполне́ния незаблу́дными твои́ми уче́нии и уверя́я воспева́ти Тро́ицу Несозда́нную. Припев: Святи́телю о́тче Ма́рко, моли́ Бо́га о на́с. Ри́торствуя посреде́ собо́рнаго ря́да, утверди́л еси́ бытие́ Ду́ха Свята́го, от Оте́ческия Ипоста́си происходя́щее, и ве́рных составле́ния, Ма́рко, возвесели́л еси́. Сла́ва Отцу́ и Сы́ну и Свято́му Ду́ху. Всесли́чная труба́, мусики́йский орга́н, духодви́жимый язы́к и сладкозву́чный, испо́лненный благода́ти исто́чник и́стинныя прему́дрости, да похва́лится дне́сь Ма́рк всечестны́й. И ны́не и при́сно и во ве́ки веко́в. Ами́нь. Богородичен: Неизъясни́мое чу́до, е́же на Тебе́, Всечи́стая! Яко все́х Бо́га неизрече́нно родила́ еси́ и по рождестве́ Де́ва су́щи яви́лася еси́, сего́ ра́ди Богоро́дицу Тя́ и́стинную почита́ем. Седален, глас 8 Облета́я лу́г свяще́нный и ра́й, вои́стинну благоцвету́щий, я́ко не́кая пчела́, от писа́ний Ду́ха и святы́х оте́ц пе́рвых, ве́ры основа́ний возвести́телей и учи́телей, преподо́бне, ро́су поче́рпл еси́ прия́тную и благово́нную, от нея́же соде́лал еси́ со́ты ве́ры и ме́д ве́дения, его́же ца́рие и простецы́ во здра́вие прие́млюще, благода́рственная вси́ воспису́ют тебе́, всему́дре: моли́ Христа́ Бо́га прегреше́ний да́ти оставле́ние пра́зднующим любо́вию святу́ю па́мять твою́. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: В напа́сти многоплете́нныя впа́д от вра́г ви́димых и неви́димых, бу́рею одержи́мь безчи́сленных согреше́ний мои́х; и я́ко к те́плому Твоему́ заступле́нию и покро́ву моему́, Чи́стая, ко приста́нищу притека́ю Твоея́ бла́гости. Те́мже, Пречи́стая, из Тебе́ Воплоще́нному безсе́менно моли́ся приле́жно о все́х рабе́х Твои́х, непреста́нно моля́щих Ти ся, Богоро́дице Пречи́стая, моля́щи Его́ при́сно, согреше́ний оставле́ние дарова́ти воспева́ющим досто́йно сла́ву Твою́. Песнь 4 Ирмос: Услы́шах, Го́споди, смотре́ния Твоего́ та́инство, разуме́х дела́ Твоя́ и просла́вих Твое́ Божество́. Припев: Святи́телю о́тче Ма́рко, моли́ Бо́га о на́с. В твои́х, всеблаже́нне, устна́х благода́ть излия́ся и просвети́ Це́ркве тве́рдь сла́достию разсужде́ний боже́ственных. Припев: Святи́телю о́тче Ма́рко, моли́ Бо́га о на́с. Свяще́ннейший хра́м Свята́го Ду́ха бы́л еси́, боже́ственное благоуха́ние богосло́вия все́м испуска́я, свяще́ннейший. Сла́ва Отцу́ и Сы́ну и Свято́му Ду́ху. Све́тлая твоя́ возсия́ па́мять и просвети́ мы́сли любо́вию восхваля́ющих твоего́ богосло́вия соверше́нство. И ны́не и при́сно и во ве́ки веко́в. Ами́нь. Богородичен: Во́инство невеще́ственных умо́в превзошла́ еси́, Чи́стая, ро́ждши вся́ Осуществова́вшаго и на́с от пре́лести Изба́вившаго. Песнь 5 Ирмос: Вску́ю мя́ отри́нул еси́ от лица́ Твоего́, Све́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и к све́ту за́поведей Твои́х пути́ моя́ напра́ви, молю́ся. Припев: Святи́телю о́тче Ма́рко, моли́ Бо́га о на́с. Посреде́ Це́ркве пе́снь богодухнове́нную сла́дко воспе́л еси́, Отца́ то́чию Божества́ уча́ Вино́вника бы́ти, Роди́теля у́бо Сы́на и Изводи́теля Свята́го, всесла́вне, Ду́ха. Сла́ва Отцу́ и Сы́ну и Свято́му Ду́ху. Словесе́м оте́ц и Боже́ственным разсужде́нием, блаже́нне, после́дуя, Сы́на и Ду́ха, Отцу́ равноче́стна бы́ти, возгласи́л еси́, я́ко бытие́ и́ма от Отца́, я́ко от Вины́, от Него́же вку́пе и происхо́дят Обоя́. И ны́не и при́сно и во ве́ки веко́в. Ами́нь. Богородичен: Ра́дуйся, ле́ствице Иа́ковля, е́юже сни́де Бо́г и привлече́ сме́ртное естество́ в небе́сную сла́ву, Богоневе́сто; ра́дуйся, Ангелов ра́досте, ве́рных же все́х упова́ние и тве́рдое прибе́жище. Песнь 6 Ирмос: Очи́сти мя́, Спа́се, мно́га бо беззако́ния моя́, и из глубины́ зо́л возведи́, молю́ся, к Тебе́ бо возопи́х, и услы́ши мя́, Бо́же спасе́ния моего́. Припев: Святи́телю о́тче Ма́рко, моли́ Бо́га о на́с. Пропове́дателей Христо́вых ве́ру насле́довав неума́ленную, невре́дну соблю́л еси́, сла́вне, пред власти́тели, ничто́же страша́ся итали́йских ко́зней. Припев: Святи́телю о́тче Ма́рко, моли́ Бо́га о на́с. Удали́в себе́ скве́рнаго смеше́ния, всеблаже́нне, к духо́вному и ра́достному отше́л еси́ стоя́нию, иде́же Трисо́лнечный зри́ши Све́т, на́м благода́ть прося́. Сла́ва Отцу́ и Сы́ну и Свято́му Ду́ху. Догма́тов благочести́вых смы́сл на́м изъясни́л еси́ и мня́щих то́ежде бы́ти Существо́ и де́йство до́блестно отгна́л еси́, я́ко Су́щаго прису́щее е́сть, блаже́нне, разли́чие. И ны́не и при́сно и во ве́ки веко́в. Ами́нь. Богородичен: Сотвори́ Тебе́ вели́чия Си́льный, Всечи́стая, посреде́ те́рний кри́н обре́т Тя́, и́мже испо́лни всю́ тва́рь благоуха́нии Божества́. Кондак, глас 8 Богосло́вов Богому́драя писа́ния,/ я́ко Богоглаго́льник и́стинен, прие́м в се́рдцы,/ исхожде́ние Ду́ха Свята́го возвести́л еси́, я́ко до́лжно есть, приснохва́льне,/ и всесвяты́й запечатле́л еси́ Си́мвол,/ сего́ ра́ди пое́м:/ ра́дуйся, Ма́рко Богоглаго́ливе. Икос А́нгел убо, предста́в, ра́доватися благовести́ иногда́ Богоро́дице со стра́хом,/ аз же еди́н от зря́щих тя, вы́ше естества́ я́вльшася, я́ко А́нгела,/ я́ко челове́к удивля́юся и пою́ ти с любо́вию такова́я:/ ра́дуйся, чистоты́ святы́я прия́телище;/ ра́дуйся, прему́дрости Бо́жия сокро́вищнице./ Ра́дуйся, Богосло́вов святы́х печа́те;/ ра́дуйся, учи́телей отце́в преде́ле./ Ра́дуйся, пучи́но неизмери́мая мышле́ний духо́вных;/ ра́дуйся, мо́ре простра́нное та́инственных писа́ний./ Ра́дуйся, я́ко показа́лся еси́ Це́ркве свет ве́лий;/ ра́дуйся, я́ко до ны́не постыжда́еши противомы́слящия./ Ра́дуйся, исто́чниче догма́тов ве́ры;/ ра́дуйся, закола́телю но́вшеских ухищре́ний./ Ра́дуйся, и́мже утверди́хомся вси;/ ра́дуйся, и́мже и́стина сия́ет./ Ра́дуйся, Ма́рко Богоглаго́ливе. Песнь 7 Ирмос: Бо́жия снизхожде́ния о́гнь устыде́ся в Вавило́не иногда́, сего́ ра́ди о́троцы в пещи́, ра́дованною ного́ю, я́ко во цве́тнице лику́юще, поя́ху: благослове́н еси́ Бо́же, оте́ц на́ших. Припев: Святи́телю о́тче Ма́рко, моли́ Бо́га о на́с. Возше́л еси́, ра́дуяся, к Трисо́лнечному Све́ту и прича́стием Того́ наслажда́ешися, я́ко правосла́вно на земли́, уча́, явля́л еси́ все́м: благослове́н Бо́г оте́ц на́ших. Припев: Святи́телю о́тче Ма́рко, моли́ Бо́га о на́с. От еди́ныя Ипоста́си Оте́ческия безвре́менно возсия́ша Сы́н и Ду́х, Ов у́бо рожде́нием, Се́й же исхожде́нием, — догма́тствовал еси́ и ве́рныя пе́ти утверди́л еси́: благослове́н Бо́г оте́ц на́ших. Сла́ва Отцу́ и Сы́ну и Свято́му Ду́ху. Возвести́л еси́ все́м Уте́шителя Боже́ственное исхожде́ние, су́щее то́кмо от Отца́, я́ко от Вины́, му́дре, и постыди́л еси́ богоку́пцев гнила́я мне́ния, не ве́дущих вопи́ти: благослове́н Бо́г оте́ц на́ших. И ны́не и при́сно и во ве́ки веко́в. Ами́нь. Богородичен: Свободи́ся Плодо́м Твои́м, Богороди́тельнице, естество́ сме́ртное от дре́вния кля́твы и благослове́ния удосто́ися свята́го, сего́ ра́ди сла́вит и воспева́ет, зову́ще: благослове́н Бо́г оте́ц на́ших. Песнь 8 Ирмос: Седмери́цею пе́щь халде́йский мучи́тель, Богочести́вым неи́стовно разжже́; си́лою же лу́чшею спасе́ны сия́ ви́дев, Творцу́ и Изба́вителю вопия́ше: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки. Припев: Святи́телю о́тче Ма́рко, моли́ Бо́га о на́с. От главы́ до сто́п озаря́емь, богоно́сче блаже́нне, святи́тельства честно́е и свято́е Ева́нгелие чи́сто священноде́йствовал еси́ и, ве́рныя уча́ ему́, уверя́л еси́ пе́ти: де́ти, благослови́те, свяще́нницы, воспо́йте, лю́дие, превозноси́те во вся́ ве́ки. Припев: Святи́телю о́тче Ма́рко, моли́ Бо́га о на́с. Яко со́лнце от восто́ка, возсия́л еси́, преподо́бне, и богосло́вия блиста́нии осия́л, и просвети́л еси́ вселе́нную, и ве́рныя научи́л еси́ Тро́ице воспева́ти со стра́хом: де́ти, благослови́те, свяще́нницы, воспо́йте, лю́дие, превозноси́те во вся́ ве́ки. Сла́ва Отцу́ и Сы́ну и Свято́му Ду́ху. Не Дру́г от Дру́га име́ют бытие́, Яже от Еди́ныя Вины́ происхо́дят, сла́вне, все́м возвеща́л еси́, я́ко Сы́н и Ду́х я́ве Обоя́ от Отца́, не Дру́г от Дру́га вся́ко, я́коже о́трасли от ко́рене еди́наго неувяда́емаго; сего́ ра́ди у́бо па́мять твою́ че́ствуем во ве́ки. И ны́не и при́сно и во ве́ки веко́в. Ами́нь. Богородичен: Всесве́тлая Пала́то все́х Влады́чествующаго, омраче́нную страстьми́ ду́шу мою́ испра́ви к доброде́тельным стезя́м, Чи́стая, да, спасе́н бы́в ми́лостию Твое́ю, пою́: де́ти, благослови́те, свяще́нницы, воспо́йте, лю́дие, превозноси́те во вся́ ве́ки. Песнь 9 Ирмос: Вои́стинну Богоро́дицу, Тя́ испове́дуем, спасе́ннии Тобо́ю, Де́во Чи́стая, с безпло́тными ли́ки Тя́ велича́юще. Припев: Святи́телю о́тче Ма́рко, моли́ Бо́га о на́с. Благода́ть слове́с и богосло́вия твоего́ Це́рковь Христо́ву возвесели́, е́йже сохрани́тися в ми́ре не преста́й моли́тися всегда́. Припев: Святи́телю о́тче Ма́рко, моли́ Бо́га о на́с. До́бре ны́не наслажда́ешися жела́ннаго, всеблаже́нне, кра́йняго и боже́ственнаго просвеще́ния, его́же уча́стники моли́твами твои́ми и на́с сотвори́. Сла́ва Отцу́ и Сы́ну и Свято́му Ду́ху. Ре́вность Правосла́вия, воспыла́в в твое́й чи́стей души́, испепели́ еретико́в языкобо́лия, Ма́рко блаже́нне. И ны́не и при́сно и во ве́ки веко́в. Ами́нь. Богородичен: Яко вы́сшая умо́в и Бо́гу бли́жняя, Деви́це Чи́стая, у́м мо́й просвети́, из глубины́ многови́дных ну́жд изыма́ющи мя́. Светилен Уте́шителева благода́ть в тебе́ обита́вши, Ма́рко, боже́ственнейших догма́тов яви́ тя́ реку́, еретико́в потопля́ющую полки́, ве́рныя же вся́ веселя́щую. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Тя́, Госпожу́ все́х, я́ве воспева́я, мо́лим, Богоро́дице: бу́ди на́м боже́ственный покро́в, отгоня́ющи дале́че от на́с мра́чныя стре́лы велиа́ра.

Минея, 12 Мая, Канон святаго Глас 6 Песнь 1 Ирмос: Я́ко по су́ху, пешеше́ствовав Изра́иль/ по бе́здне стопа́ми,/ гони́теля фарао́на/ ви́дя потопля́ема,/ Бо́гу побе́дную песнь пои́м, вопия́ше. Припев: Преподо́бне о́тче Диони́сие, моли́ Бо́га о на́с. От млады́х ногте́й, Богоно́сне Диони́сие, кро́тость ве́лию возъиме́л еси́:/ де́тская глумле́ния презре́в, смиренному́дрие серде́чно яви́л еси́,/ усе́рдно стра́ху Бо́жию внима́я. Припев: Преподо́бне о́тче Диони́сие, моли́ Бо́га о на́с. Я́коже Симео́н, Ду́хом прови́дя,/ прия́в на ру́ки Предве́чнаго Младе́нца, предрече́ спасе́ние челове́ков,/ та́кожде вну́треннима очи́ма прозре́в оте́ц твой духо́вный/ бы́ти име́ющее твое́ житие́, глаго́лаше:/ сей сын наш бу́дет нам оте́ц. Припев: Преподо́бне о́тче Диони́сие, моли́ Бо́га о на́с. Не козлогласова́нием и ины́м язы́ком поуча́шеся,/ я́коже обы́чай есть де́тем имени́тых, мирска́я внима́ющих,/ но страх Бо́жий всади́л еси́ в се́рдце твое́м, ве́дяй,/ я́ко теле́сное обуче́ние вма́ле поле́зно,/ а благоче́стие на все поле́зно есть. Сла́ва Отцу́ и Сы́ну и Свято́му Ду́ху. Я́ко от чре́ва ма́тери твоея́ утверди́ся се́рдце твое́ во Го́споде,/ и измла́да приме́р доброде́тели показа́л еси́./ Тем тя благоче́стно восхваля́юще,/ велича́ем дарова́вшаго ти душе́вный ра́зум/ и просвети́вшаго тя све́том И́стины Христа́ Жизнода́вца. И ны́не и при́сно и во ве́ки веко́в. Ами́нь. Богородичен: Досто́йно есть блажи́ти Тя, Пренепоро́чную и Честне́йшую Херуви́м,/ я́ко чрез Тя соде́лася спасе́ние ми́ру/ и свет благода́ти облиста́ седя́щих во тьме сме́ртней. Песнь 3 Ирмос: Несть свят,/ я́коже Ты, Го́споди Бо́же мой,/ вознесы́й рог ве́рных Твои́х, Бла́же,/ и утверди́вый нас на ка́мени/ испове́дания Твоего́. Припев: Преподо́бне о́тче Диони́сие, моли́ Бо́га о на́с. Прича́стен соде́лавшися бра́ку,/ искуше́ние прия́л еси́ от Бо́га/ лише́нием други́ни твоея́, я́коже И́ов,/ но сласте́м ми́ра сего́ не поработи́л еси́ себе́/ и, плотска́я жела́ния победи́в, яви́лся еси́ дово́лен бы́ти к несе́нию бре́мени Ева́нгельскаго,/ е́же тебе́ бысть легко́ и бла́го. Припев: Преподо́бне о́тче Диони́сие, моли́ Бо́га о на́с. Вои́стинну ти бла́го бысть,/ я́ко да не преткне́ши но́гу твою́ о ка́мень собла́знов ми́ра сего́:/ прия́в щит ве́ры, обле́клся еси́ в шлем спасе́ния/ и, возложи́в на ся броню́ пра́вды,/ соприче́л еси́ себе́ ли́ку подви́жников духо́вных. Припев: Преподо́бне о́тче Диони́сие, моли́ Бо́га о на́с. Да красу́ется град Ста́рица/ не ди́вными и восхища́ющими зре́ние оче́с вещми́,/ но зрев ю́наго ста́рца Диони́сия. Сла́ва Отцу́ и Сы́ну и Свято́му Ду́ху. Не быва́ет свети́льник под спу́дом,/ но на све́щнице поставля́ют его́, да все́ми ви́дим бу́дет;/ та́кожде и ты, о́тче Диони́сие, благоуго́ден быв Бо́гови,/ получи́л еси́ посеще́ние во избра́нных Его́,/ соде́лавшися наста́вником и назида́телем ста́да духо́внаго. И ны́не и при́сно и во ве́ки веко́в. Ами́нь. Неистощи́ма есть си́ла Бо́жия чудоде́йствующая:/ прославля́ет Бог святы́х Свои́х,/ да по́здний пото́мцы, не прилепля́яся к тле́нным и скороги́бнущим веще́м,/ па́че всего́ пеку́тся о свое́м преселе́нии на Не́бо./ Те́мже и дарова́ на сем пути́ свети́льники, уже́ возне́сшияся,/ в ни́хже све́тит нам и Диони́сий святы́й. Седален, глас 3 Все житие́ мое́ в ле́ности мно́зей преидо́х,/ и ны́не прибли́жихся к вре́мени исхо́да моего́,/ и от враг мои́х устраша́юся,/ да не исто́ргнут ду́шу мою́ и во глубину́ поги́бели сведу́т./ Но к тебе́ прибега́ю, па́стырю своему́, преподо́бне Диони́сие:/ уще́дри мя, раба́ твоего́,/ и изба́ви мя от озлобле́ния сих моли́твами твои́ми. Сла́ва Отцу́, и Сы́ну, и Свято́му Ду́ху: Прииди́те к сему́ гро́бу, глаго́лющийся бы́ти мудры́ и объюроде́вши,/ ослепи́вшися помышле́нии ве́ка сего́,/ зри́те чу́до Ева́нгелия,/ я́ко мы с ме́ртвым глаго́лем, и той нам отвещава́ет:/ о́тче Диони́сие, рцы нам сло́во утеше́ния./ Не услы́шите, краснозлоглаго́льствующии мудрецы́ ве́ка сего́, слове́с пра́веднаго,/ но правове́рнии, прини́кнув к его́ гро́бу, к святы́м его́ оста́нкам, я́вственно слы́шат,/ я́ко смерть ве́рных суть Па́сха/ и тле́нное их соде́лывается нетле́нными. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Мно́гими прегреше́нии аз, блу́дный, ум помрачи́в,/ вопию́ к Твоему́ кре́пкому заступле́нию, Богоро́дице:/ просвети́ души́ моея́ зе́ницы,/ и возсия́й ми покая́ния све́тлую зарю́,/ и облецы́ мя во ору́жие све́та, Богороди́тельнице Чи́стая. Песнь 4 Ирмос: Христо́с моя́ си́ла,/ Бог и Госпо́дь,/ честна́я Це́рковь/ боголе́пно пое́т, взыва́ющи,/ от смы́сла чи́ста о Го́споде пра́зднующи. Припев: Преподо́бне о́тче Диони́сие, моли́ Бо́га о на́с. Удиви́л еси́, Го́споди, пути́ Твоя́ в путе́х пра́ведных,/ просвеща́я нас чрез возлю́бленных Твои́х/ и соде́ловая нам в них спасе́ние,/ е́же яви́л еси и во уго́днице Твое́м Диони́сии. Припев: Преподо́бне о́тче Диони́сие, моли́ Бо́га о на́с. Вну́тренними смяте́нии егда́ напа́ствуема бе Росси́я, та́кожде и вне́шними,/ воздви́гл еси́, Го́споди, подвигополо́жников духо́вных,/ и́же без меча́ и стрел и не кова́рством укроти́ша де́рзость враго́в,/ но си́лою смире́ния и свя́тости,/ в ли́ке ко́их воспева́ем и тя, о́тче Диони́сие. Припев: Преподо́бне о́тче Диони́сие, моли́ Бо́га о на́с. Ни я́рость зве́рская,/ ни муче́ния злоны́рливых враго́в не устраши́ша тебе́,/ но, испове́дник быв Бо́жия сло́ва, увеща́я наро́д,/ и царю́, и Патриа́рху, бди́тельному оте́чества па́стырю,/ мно́гу сотвори́л еси́ по́льзу. Сла́ва Отцу́ и Сы́ну и Свято́му Ду́ху. Удивля́яся, ве́рнии росси́яне, всеблаже́нному Патриа́рху Гермоге́ну,/ почти́те днесь па́мять воспева́емаго на́ми Диони́сия,/ и́же, с ним вку́пе побо́рствуя о ве́ре,/ я́ко наде́жде спасе́ния оте́чества, мно́гая подъя́т озлобле́ния. И ны́не и при́сно и во ве́ки веко́в. Ами́нь. Богородичен: А́ще зря́ще то́кмо о́браз царя́, на земли́ су́ща благоде́тельна и благочести́ва,/ на пе́рси своя́ восхити́тельне его́ взима́ют,/ я́ко изобразу́юща Христа́ Го́спода;/ возвели́чим у́бо, правосла́внии,/ носи́вшую во утро́бе Свое́й Царя́ царе́й, Благоде́теля всему́ ми́ру,/ Ея́же моли́твами, при и́скреннем взыва́нии на́шем,/ Бог, ми́ра Оте́ц, вознесе́т рог правосла́вных люде́й. Песнь 5 Ирмос: Бо́жиим све́том Твои́м, Бла́же,/ у́тренюющих Ти ду́ши любо́вию озари́, молю́ся,/ Тя ве́дети, Сло́ве Бо́жий,/ и́стиннаго Бо́га,/ от мра́ка грехо́внаго взыва́юща. Припев: Преподо́бне о́тче Диони́сие, моли́ Бо́га о на́с. И́стинным сло́ва Бо́жия разуме́нием одаре́н был еси́ свы́ше, Богому́дре Диони́сие,/ и сего́ ра́ди па́че други́х поручено́ тебе́ испра́вити погре́шности,/ в церко́вныя кни́ги по неве́дению вше́дшия. Припев: Преподо́бне о́тче Диони́сие, моли́ Бо́га о на́с. Подража́я блаже́нному Макси́му Гре́ку,/ и́же быв истре́бован испра́вити преведе́нныя кни́ги,/ но от неве́жествующих пострада́ за и́стину,/ и ты, святы́й Диони́сие, быв ему́ после́дователь,/ сей же жре́бий име́в, и́стину отщепи́вшимся показу́еши. Сла́ва Отцу́ и Сы́ну и Свято́му Ду́ху. А́ще бы́хом име́ли дар такова́го ве́дения,/ я́коже сла́вимый ны́не Диони́сий,/ согла́сие водвори́лося бы в нас;/ но, о Пресвяты́й Бо́же,/ ве́руем, я́ко и сих, неве́дущих Писа́ния,/ приведе́ши во двор Твой моли́твами и приме́ром Богому́драго Диони́сия. И ны́не и при́сно и во ве́ки веко́в. Ами́нь. Богородичен: Твоя́ песносло́вцы, Богоро́дице,/ духо́вно утверди́шася и испо́лнишася Ду́ха,/ не усты́, но се́рдцем испове́дающе Тя, Честне́йшую Херуви́м/ и Благослове́ннейшую в челове́цех. Песнь 6 Ирмос: Твоя́ песносло́вцы, Богоро́дице,/ духо́вно утверди́шася и испо́лнишася Ду́ха,/ не усты́, но се́рдцем испове́дающе Тя, Честне́йшую Херуви́м/ и Благослове́ннейшую в челове́цех. Припев: Преподо́бне о́тче Диони́сие, моли́ Бо́га о на́с. Кто испове́сть благонра́вие и ще́дрость твою́, о́тче Диони́сие,/ никто́ бо не исхожда́ше тощ от Тебе́,/ не прия́в ми́лости и слове́с, назида́ющих и́стинное бога́тство. Припев: Преподо́бне о́тче Диони́сие, моли́ Бо́га о на́с. Я́ко жела́ет еле́нь на исто́чники водны́я,/ си́це но́зе твои́ теча́сте на песносло́вия Бо́жия;/ коле́не твои́ изнемого́сте от бде́ния,/ и плоть твоя́ измени́ся от поще́ния,/ но не́мощь твоя́ пре́йде от си́лы в си́лу. Припев: Преподо́бне о́тче Диони́сие, моли́ Бо́га о на́с. Искони́ враг челове́ков, узре́в тя, в ми́ре сем не от ми́ра бы́вша,/ поскрежета́ зубы́ свои́ми и рече́: гнав, пости́гну./ Но ты, откры́в путь твой ко Го́споду, глаго́лал еси́:/ а́ще и сонм враго́в обы́дет мя, не убою́ся,/ упова́я на Тя, Бо́же оте́ц на́ших, И́же благослове́н во век. Сла́ва Отцу́ и Сы́ну и Свято́му Ду́ху. Я́коже иногда́ три о́троцы сла́вляху среди́ огня́ ве́домаго Бо́га,/ та́кожде и ты, горя́ во огни́ озлобле́ний,/ огне́м Боже́ственныя любве́ попали́л еси́ лука́внующих,/ воспева́я ми́лость в ро́ды родо́в боя́щимся Го́спода. И ны́не и при́сно и во ве́ки веко́в. Ами́нь. Богородичен: Змий, уязви́вый пя́ту благослове́ннаго, притупи́л есть свое́ жа́ло,/ те́мже у́бо Тебе́, ро́ждшую Сте́ршаго главу́ его́,/ Уме́ршаго за грехи́ на́ша и Воста́вшаго за оправда́ния на́ша,/ досто́йно велича́ем. Кондак, глас 6 Свет Трисия́нный, всели́выйся в ду́шу твою́,/ сосу́д избра́н показа́ тя,/ веща́юща Боже́ственная лю́дем,/ испове́дник Бо́жия Сло́ва яви́лся еси́,/ и прилага́ющих Божеству́ веще́ственный огнь/ я́вственно обличи́л еси́,/ и злосла́вных смы́слы, я́ко паучи́нное пряде́ние, растерза́л еси́,/ благоче́стия столп и забра́ло тве́рдое ми́рови показа́лся еси́/ и сего́ ра́ди от Вселе́нскаго Патриа́рха ди́вне похвале́н был еси́./ Мы же благода́рными гла́сы, веселя́щеся, вопие́м ти:/ ра́дуйся, о́тче наш, Диони́сие преподо́бне. Икос Грехо́в ми разреше́ние пода́ждь/ и е́же пе́ти по достоя́нию по́двиги твоя́, Диони́сие преподо́бне,/ в ров бо глубо́к вве́ржен есмь неразу́мия,/ а́ще не ты ми пода́си, недосто́йному, сло́во и язы́к непосты́ден,/ воспе́ти со дерзнове́нием си́це:/ ра́дуйся, Небе́сный челове́че и земны́й А́нгеле,/ я́ко с пло́тию на земли́ Безпло́тных житие́ показа́л еси́./ Ра́дуйся, па́стырю всеизря́дный,/ я́ко после́довал еси́ стопа́м преподо́бнаго Се́ргия,/ ста́до твое́ упа́сл еси́ и и́нок мно́жество до́бре упра́вил еси́./ Ра́дуйся, терпе́ния сто́лпе и смире́нныя кро́тости высото́./ Ра́дуйся, стра́нным прибе́жище и безнаде́жным неча́емое упова́ние./ Ра́дуйся, скорбя́щих утеше́ние и безпомо́щных помо́щниче./ Ра́дуйся, духодви́жимая уста́ и язы́че богоглаго́ливый,/ я́ко во вре́мя всеми́рных напа́стей наро́ду веща́л еси́/ и царю́ и Патриа́рху мно́гу по́льзу сотвори́л еси́./ Ра́дуйся, врачу́ прему́дрый я́звенным,/ я́ко при́сный оте́ц о них промышля́я,/ о́вых врачу́я, о́вых же с пе́нием подоба́ющим и с напу́таем ве́чнаго живота́ отпуща́я./ Ра́дуйся, пита́телю благи́й си́рым и больны́м промы́шленниче/ и упокое́ние в до́брей пи́щи и пити́и,/ сам же, благодаря́ Бо́га, овся́ным хле́бом и водо́ю дово́льствовавыйся./ Ра́дуйся, свы́ше от Бо́га дар восприи́мый умноже́нием хле́ба,/ я́ко и мал сосу́дец не оскуде́ на пи́щу бра́тии и наро́ду мно́гу./ Ра́дуйся, пропове́дниче Бо́жия Сло́ва,/ Правосла́вия догма́ты утвержда́я,/ злосла́вных же смы́слы из ко́рене исторга́я./ Ра́дуйся, страда́льче предо́брый,/ изгна́ния и ра́ны на телеси́ му́жески претерпе́в, по и́стине побора́я./ Ра́дуйся, церко́вное утвержде́ние и умире́ние ми́ру./ Ра́дуйся, наста́вниче спасе́ния на́шего, Диони́сие преподо́бне. Песнь 7 Ирмос: Росода́тельну у́бо пещь/ соде́ла А́нгел/ преподо́бным отроко́м,/ халде́и же опаля́ющее/ веле́ние Бо́жие мучи́теля увеща́ вопи́ти:/ благослове́н еси́, Боже оте́ц на́ших. Припев: Преподо́бне о́тче Диони́сие, моли́ Бо́га о на́с. Златолюби́ваго эконо́ма, дерзну́вшаго оболга́ти тя царю́ и Патриа́рху,/ во е́же свято́е оби́тели стяжа́ние непра́ведно отъя́ти,/ претерпе́в темни́цу и ра́ны, де́лы свои́ми низложи́в,/ яви́лся еси́ и́стинный до́лжнаго назида́ния строи́тель. Припев: Преподо́бне о́тче Диони́сие, моли́ Бо́га о на́с. Хитросплете́нныя ко́зни сокруши́в,/ не убоя́лся еси́ гне́ва царе́ва и Патриа́рхова,/ показа́в озлобле́нии свои́ми обстоя́щую их лесть и кова́рство,/ сказа́л еси́ пути́ пра́вды Ева́нгельския. Припев: Преподо́бне о́тче Диони́сие, моли́ Бо́га о на́с. Егда́ па́ки бе́здна беззако́ний на́ших призва́ бе́здну гне́ва правосу́дия Бо́жия/ и егда́ не бысть ни гра́да, ни ве́си, ни де́бри, е́же бы укры́тися христиа́ном,/ восхоте́ Бог показа́ти си́лу Свою́ не в си́ле ко́нстей, но в небра́нных во́инех:/ проти́вныя сотре́,/ препоя́сав си́лою Свое́ю подви́жники Ла́вры Се́ргиевы. Сла́ва Отцу́ и Сы́ну и Свято́му Ду́ху. Преста́ волне́ний оте́чества на́шего бу́ря,/ егда́ яви́шася ве́рнии по ве́ре ко́рмчии:/ му́дрый Иоаса́ф, ре́вностный Авраа́мий и усе́рдный по Бо́зе Диони́сий,/ его́же ны́не чту́ще па́мять, благословля́ем Тя, Бо́же Росси́и. И ны́не и при́сно и во ве́ки веко́в. Ами́нь. Богородичен: Благослове́н Христо́с,/ Плод чре́ва Твоего́, Богоро́дице Де́во,/ я́ко под Его́ зна́менем ополча́ющиися побежда́ют ви́димых враго́в. Песнь 8 Ирмос: Из пла́мене преподо́бным ро́су источи́л еси́/ и пра́веднаго же́ртву водо́ю попали́л еси́/ вся бо твори́ши, Христе́, то́кмо е́же хоте́ти./ Тя превозно́сим во вся ве́ки. Припев: Преподо́бне о́тче Диони́сие, моли́ Бо́га о на́с. Па́ки ты в озлобле́ниих и му́ках от враго́в и́стины,/ тебе́, я́ко правдолю́бцу соде́янных,/ быв це́лый год,/ подвиза́яся о сохране́нии Бо́жия сло́ва, в спасе́ние на́ше пре́даннаго,/ показа́л еси́ нам приме́р,/ да и мы, в жите́йстем мо́ре бу́рею, проти́ву нас ды́шущею, напа́ствуеми,/ та́кожде ополчи́вшеся, противоста́нем ко́знем/ и дости́гнем ти́хаго ве́чнаго приста́нища. Припев: Преподо́бне о́тче Диони́сие, моли́ Бо́га о на́с. Преста́ша иногда́ дыша́ти зло́бою бра́тия на Ио́сифа,/ егда́ бе во спасе́ние им,/ и он, преда́в забве́нию оби́ду,/ прообразова́л есть кро́тость Ева́нгелия;/ се но́вый Ио́сиф,/ быв и́стинно усе́рдный житоме́ритель благослове́нному гра́ду Москве́/ и о́крестным ве́сем, ги́бнущим от гла́да,/ но мудре́йший сы́нове ве́ка сего́ не преста́ша от зло́бы на пра́вду,/ за ню же стоя́л еси́, Диони́сие блаже́нне. Припев: Преподо́бне о́тче Диони́сие, моли́ Бо́га о на́с. И́стинно рек воспроси́вшим тя,/ ка́ко бысть толи́кое твое́ бе́дствование, глаго́лав:/ беды́ и напа́сти в ве́це сем/ не суть беды́ и напа́сти, но суть иску́с Бо́жий./ Вои́стинну та́ко:/ я́ко бо зла́то, в горни́ле искуша́емое, быва́ет светле́е,/ та́кожде и ты, быв искуше́н,/ избе́гнув и́стинныя беды́ гее́нския,/ яви́лся еси́ светле́е во све́тлостех святы́х./ Те́мже и нас, искуша́емых, убежда́еши ревнова́ти сла́ве твое́й. Сла́ва Отцу́ и Сы́ну и Свято́му Ду́ху. Терпя́, потерпе́л еси́, и ти внят Госпо́дь,/ и поста́ви но́зе твои́ на ка́мени Це́ркве Своея́,/ и исчезо́ша врази́ твои́,/ и вложи́ во уста́ твоя́ песнь, во е́же с ве́рными глаго́лати:/ а́ще есть Бог, судя́й на земли́,/ у́бо есть плод пра́веднику, и путие́ его́ пра́ви суть. И ны́не и при́сно и во ве́ки веко́в. Ами́нь. Богородичен: Вся на́ша до́брая дела́ была́ бы́ша вменена́ за ничто́,/ а́ще бы не чрез Воплоти́вшагося от Тя/ соде́лася спасе́ние челове́ков. Песнь 9 Ирмос: Бо́га/ челове́ком невозмо́жно ви́дети,/ на Него́же не сме́ют чи́ни а́нгельстии взира́ти;/ Тобо́ю бо, Всечи́стая, яви́ся челове́ком/ Сло́во воплоще́нно,/ Его́же велича́юще,/ с Небе́сными во́и Тя ублажа́ем. Припев: Преподо́бне о́тче Диони́сие, моли́ Бо́га о на́с. Не умолчи́м и сего́, чтя па́мять преподо́бнаго,/ коль ве́лие име́ он попече́ние, подража́я пра́ведному Тови́и,/ о погребе́нии ме́ртвых, изби́тых от враго́в оте́чества на́шего,/ и како́в бе его по́двиг в лече́нии от ни́хже изму́ченных ра́нами:/ сам исхожда́ше с бра́тиею но́щию/ и врачева́ше я́звы их, ели́ко мо́щно бе. Припев: Преподо́бне о́тче Диони́сие, моли́ Бо́га о на́с. Тре́тие яви́ся оби́тель ди́внаго Се́ргия щит и огражде́ние ве́рныя Росси́и,/ же́ртвуя пра́ведными свои́ми стяжа́нии./ Сим приме́ром возжего́шася и́стинная ча́да Росси́и,/ и, умили́вшеся ея́ гра́матами, Пожа́рский и Ми́нин ско́ро потеко́ша на избавле́ние оте́чества./ Те́мже и ны́не, блаже́нне Диони́сие, моли́ Бо́га,/ да оте́чество и кинови́я сия́ бу́дут непреодоли́мы. Сла́ва Отцу́ и Сы́ну и Свято́му Ду́ху. Глаго́лют нечести́вии, я́ко во вре́мени вся ги́бнут, пра́во глаго́лют:/ поги́бнут бо с помышле́нии свои́ми,/ но в па́мять ве́чную бу́дет пра́ведник,/ и пра́вда его́ пребу́дет во век./ Те́мже и мы ублажа́ем тя, о́тче Диони́сие, и чтим святу́ю па́мять твою́,/ ты бо свои́м приме́ром и нас руково́дствуеши к Небеси́. И ны́не и при́сно и во ве́ки веко́в. Ами́нь. Богородичен: За вся сия́ почте́н быв во вре́мени,/ похвале́н и от Вселе́нских Патриа́рх,/ из ни́хже от Иерусали́мскаго получи́л еси́ клобу́к его патриа́ршеский,/ но блаже́ннее яви́лся еси́, егда́ умира́я о Го́споде, воспева́л еси́ Па́сху твою́, глаго́ля:/ умре́ти ми приобрете́ние есть,/ тече́ние соверши́х, ве́ру соблюдо́х./ Те́мже и воспева́ем тя, сподо́бившагося венца́ Небе́снаго. Светилен Све́тлым житие́м твои́м свет ста́ду твоему́ был еси́, преподо́бне Диони́сие,/ те́мже и на́ша омраче́нная грехо́м сердца́ све́том покая́ния просвети́/ и на путь за́поведей Госпо́дних напра́ви. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Свет ро́ждшая ми́ру, Пречи́стая Влады́чице,/ просвети́ у́мныя о́чи души́ моея́/ и спаси́тельных слез исто́чники да́руй ми, рабу́ Твоему́,/ я́ко да по до́лгу Тя ублажа́ю.

Минея, 1 Июня, Канон преподобного Глас 8 Песнь 1 Ирмос: Колесницегоние́теля фарао́ня погрузи́/ чудотворя́й иногда́/ Моисе́йский жезл, крестообра́зно порази́в/ и раздели́в мо́ре,/ Изра́иля же беглеца́, пешехо́дца спасе́,/ песнь Бо́гови воспева́юща. Припев: Преподо́бне о́тче Диони́сие, моли́ Бо́га о на́с. Озаре́нием Свята́го Ду́ха озари́ благоче́стно любо́вию пе́сньми восхваля́ющих тя,/ по́стников похвало́, мона́шествующих сла́во, пусты́ни украси́телю,/ благоче́стия учи́телю, Диони́сие. Припев: Преподо́бне о́тче Диони́сие, моли́ Бо́га о на́с. От ю́ности жела́ние к Бо́гу возложи́в,/ и к Не́му, ра́дуяся, возше́л еси́, име́я все твое́ помышле́ние,/ взыгра́ние пло́ти и страсте́й нахожде́ние воздержа́нием умертви́л еси́,/ Диони́сие прехва́льне. Сла́ва Отцу́ и Сы́ну и Свято́му Ду́ху. Попра́в зми́я, того́ се́ти легко́ прелете́л еси́,/ кри́лы благоче́стия впери́вся, о́тче:/ живо́т бо, ра́дуяся, объя́л еси́ от са́да кре́стнаго, блаже́нне Диони́сие. И ны́не и при́сно и во ве́ки веко́в. Ами́нь. Богородичен: Уста́ви неуста́вное помышле́ние смуще́ния,/ Пречи́стая Де́во, Ма́ти Бо́жия,/ к Сы́ну Твоему́ направля́ющи движе́ния. Песнь 3 Ирмос: Ты еси́ утвержде́ние/ притека́ющих к Тебе́, Го́споди,/ Ты еси́ свет омраче́нных,/ и пое́т Тя дух мой. Припев: Преподо́бне о́тче Диони́сие, моли́ Бо́га о на́с. Во све́те невеще́ственне и мы́сленне,/ от печа́лей веще́ственных восте́к к Небе́сным невеще́ственным чино́м,/ преподо́бне, моли́твами твои́ми нас просвети́. Припев: Преподо́бне о́тче Диони́сие, моли́ Бо́га о на́с. Воздержа́ния сла́дость иска́пав, отри́нул еси́ го́ресть страсте́й,/ те́мже па́че ме́да и со́та наслади́л еси́, о́тче, чу́вствия на́ша. Сла́ва Отцу́ и Сы́ну и Свято́му Ду́ху. Возше́д на высоту́ доброде́телей, до́лу влеку́щия оплева́л еси́ сла́сти,/ сла́дость показа́вся спасе́ния, о́тче преподо́бне,/ ста́ду твоему́ проси́ грехо́в оставле́ния. И ны́не и при́сно и во ве́ки веко́в. Ами́нь. Богородичен: Прему́дрость и Сло́во О́тчее несказа́нно родила́ еси́,/ души́ моея́ лю́тую исцели́ я́зву и серде́чную боле́знь утоли́. Седален, глас 8 Красоты́ мирски́я от млады́х ногте́й, преподо́бне, возненави́дев,/ еди́наго Христа́ от се́рдца возлюби́л еси́ и, Тому́ все́ю душе́ю прилепи́вся,/ я́ко безпло́тен, на земли́ пожи́л еси́ с пло́тию,/ сла́ву же мимотеку́щую и бога́тство нивочто́же вмени́в,/ Небе́сное бога́тство восприя́л еси́ и сла́ву ве́чную./ Те́мже и ублажа́ем свято́е твое́ успе́ние/ и, в нем торжеству́юще, вопие́м ти:/ Богоблаже́нне о́тче наш Диони́сие,/ моли́ Христа́ Бо́га согреше́ний оставле́ние дарова́ти/ чту́щим любо́вию святу́ю па́мять твою́. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Я́ко Де́ву и еди́ну в жена́х, Тя, без се́мене ро́ждшую Бо́га пло́тию,/ вси ублажа́ем, ро́ди челове́честии:/ Огнь бо всели́ся в Тя Божества́,/ и я́ко Младе́нца млеко́м пита́еши Зижди́теля и Го́спода./ Тем, А́нгельский и челове́ческий род, досто́йно сла́вим пресвято́е рождество́ Твое́/ и согла́сно вопие́м Ти:/ моли́ Христа́ Бо́га согреше́ний оставле́ние дарова́ти/ покланя́ющимся ве́рою пресвято́му рождеству́ Твоему́. Песнь 4 Ирмос: Ты моя кре́пость, Го́споди,/ Ты моя́ и си́ла,/ Ты мой Бог, Ты мое́ ра́дование,/ не оста́вль не́дра Отча/ и на́шу нищету́ посети́в./ Тем с проро́ком Авваку́мом зову́ Ти:/ си́ле Твое́й сла́ва, Человеколюбче. Припев: Преподо́бне о́тче Диони́сие, моли́ Бо́га о на́с. Душе́вное очища́я чу́вство и разширя́я Боже́ственными виде́нии,/ Боже́ственных дарова́ний сподо́бился еси́, Богоблаже́нне,/ к ра́це моще́й Твои́х притека́ющим, Диони́сие преподо́бне, подае́ши ско́рое исцеле́ние. Припев: Преподо́бне о́тче Диони́сие, моли́ Бо́га о на́с. Зако́ном Бо́жиим повину́яся, преподо́бне,/ к смотре́нию безпло́тных и мы́сленных твое́ худо́жество упра́вил еси́,/ преходя́ вы́ну от сла́вы в сла́ву, от си́лы, о́тче, в си́лу. Сла́ва Отцу́ и Сы́ну и Свято́му Ду́ху. Богоуго́дно пожи́в,/ пусты́ни, я́ко гра́ды, сотвори́л еси́ потре́бны и душеполе́зны,/ исто́чник исцеле́ний пролива́я ве́рою покланя́ющимся ра́це моще́й твои́х. И ны́не и при́сно и во ве́ки веко́в. Ами́нь. Богородичен: Новора́сленный безсме́ртия рай и красе́н вои́стинну показа́лася еси́, Де́во:/ дре́во бо жи́зни в Тебе́ насади́ся богонача́льно,/ е́же, во чре́ве Твое́м нося́щи, родила́ еси́,/ всем иска́пающее спасе́ния наде́жду, ве́рно, Богоро́дице, испове́дающим Тя. Песнь 5 Ирмос: Вскую мя отри́нул еси́/ от лица́ Твоего́, Све́те незаходи́мый,/ и покры́ла мя есть чужда́я тьма, окая́ннаго?/ Но обрати́мя и к све́ту за́поведей Твои́х/ пути́ моя́ напра́ви, молю́ся. Припев: Преподо́бне о́тче Диони́сие, моли́ Бо́га о на́с. Угаси́в пла́мень страсте́й росо́ю подвиго́в твои́х,/ о́тче блаже́нне Диони́сие,/ бога́тно вжегл еси́ огне́м любве́ ве́ры воздержа́ния свети́льник,/ просвеще́ние безстра́стия, и сын дне яви́лся еси́. Припев: Преподо́бне о́тче Диони́сие, моли́ Бо́га о на́с. Ве́ры грозд Боже́ственным де́ланием, о́тче, воспита́л еси́,/ и, в точи́лех поста́вив, изгне́л еси́ боле́зньми поще́ния,/ и ча́шу напо́лнил еси́ духо́вную воздержа́ния,/ весели́ши сердца́ ста́да твоего́. Сла́ва Отцу́ и Сы́ну и Свято́му Ду́ху. До́блественне претерпе́в бие́ния неви́димых враго́в,/ показа́лся еси́ столп непоколеби́мь,/ утвержда́я ста́до твое́ па́лицею Боже́ственною, словесы́ медото́чными,/ блаже́нне Диони́сие преподо́бне. И ны́не и при́сно и во ве́ки веко́в. Ами́нь. Богородичен: Еди́на ро́ждши де́вою, едина муженеиску́сная яви́лася еси́, Всенепоро́чная,/ во утро́бе Сло́во О́тчее прие́мши Безнача́льное,/ млеко́м дои́ши, Чи́стая, чу́до стра́шно!/ Де́вствуеши и зако́ны обновля́еши естества́. Песнь 6 Ирмос: Очи́́сти мя, Спа́се,/ мно́га бо беззако́ния моя́,/ и из глубины́ зол возведи́, молю́ся,/ к Тебе́ бо возопи́х, и услы́ши мя,/ Бо́же спасе́ния моего́. Припев: Преподо́бне о́тче Диони́сие, моли́ Бо́га о на́с. Исцеле́ний ре́ки источа́еши, стра́сти земноро́дных боже́ственно очища́еши,/ ра́дующеся ве́рою,/ восхваля́ем твоя́ по́двиги, чу́дне. Припев: Преподо́бне о́тче Диони́сие, моли́ Бо́га о на́с. Зако́нно от всех Соде́теля десни́цею венча́лся еси́, преподо́бне Диони́сие,/ Небе́сный граждани́не, А́нгелом равностоя́телю. Сла́ва Отцу́ и Сы́ну и Свято́му Ду́ху. Нетле́ннаго и Боже́ственнаго пребыва́ния и непости́жных наслажда́яся ны́не благи́х,/ А́нгелом собеседниче, Диони́сие Богому́дре, восхваля́ющие тя спаса́й. И ны́не и при́сно и во ве́ки веко́в. Ами́нь. Богородичен: Бо́га ро́ждши, вся́кия тва́ри, Влады́чице,/ я́ко вои́стинну еди́на, Богоро́дице, превы́шши яви́лася еси́. Кондак, глас 8 Все твое́ у́мное жела́ние к Бо́гу впери́в,/ Тому́ невозвра́тно от души́ после́довал еси́, в пусты́ню всели́вся,/ и, та́мо а́нгельски пожи́в, мно́гим путь был еси́ ко спасе́нию;/ сего́ ра́ди и Христо́с тебе́ просла́ви и да́ром чуде́с обогати́./ Те́мже вси вопие́м ти:/ ра́дуйся, Диони́сие преподо́бне, пусты́нный жи́телю. Икос Храм Бо́гу я́ко вои́стинну себе́ соде́лав, о́тче,/ и Вы́шнего Иерусали́ма яви́вся граждани́н,/ Боже́ственными доброде́тельми твои́ми безпло́тных че́сти сподо́бился еси́./ Те́мже и мы зря́ще чудеса́, похвале́нию досто́йная,/ я́же удивля́ют нас и науча́ют тебе́ зва́ти такова́я:/ ра́дуйся, благочести́ваго отца́ о́трасль и ма́тере благогове́йный ветвь./ Ра́дуйся, целому́дрия сто́лпе,/ и́мже бесо́вская шата́ния искорени́шася./ Ра́дуйся, свети́льниче многосве́тлый./ Ра́дуйся, я́ко увяди́л еси́ плотска́я мудрова́ния./ Ра́дуйся, пусты́ни до́брое прозябе́ние./ Ра́дуйся, пра́ведных Боже́ственное наслажде́ние./ Ра́дуйся, я́ко презре́л еси́ теку́щая и тле́нная./ Ра́дуйся, я́ко на Небесе́х со А́нгелы живе́ши./ Ра́дуйся, я́ко мона́шествующих изве́стное пра́вило./ Ра́дуйся, леня́щихся к Бо́гу дерзнове́ние./ Ра́дуйся, исто́чниче чуде́с богото́чный./ Ра́дуйся, честны́й Ду́ха сосу́де, наста́вниче на́шего спасе́ния./ Ра́дуйся, Диони́сие преподо́бне, пусты́нный жи́телю. Песнь 7 Ирмос: От Иуде́и доше́дше, о́троцы/ в Вавило́не иногда́/ ве́рою Тро́йческою пла́мень пе́щный попра́ша, пою́ще:/ отце́в Бо́же, благослове́н еси́. Припев: Преподо́бне о́тче Диони́сие, моли́ Бо́га о на́с. Вре́менная отложи́в, ве́чными украси́лся еси́,/ со А́нгелы лику́еши, я́ко а́нгельское пожи́в житие́, с ни́миже пое́ши:/ благослове́н Бог оте́ц на́ших. Припев: Преподо́бне о́тче Диони́сие, моли́ Бо́га о на́с. Непреста́нно мо́лим, Диони́сие Богому́дре,/ о ста́де твое́м приле́жно моли́ся,/ тебе́ на моли́тву призыва́ющих, и плоды́ принося́щих, и любо́вию пою́щих:/ благослове́н Бог оте́ц на́ших. Сла́ва Отцу́ и Сы́ну и Свято́му Ду́ху. В зла́це Вы́шнего Ца́рствия ста́до твое́, о́тче, воспита́л еси́/ и жезло́м уче́ний упа́сл еси́ ве́рно пою́щия:/ благослове́н Бог оте́ц на́ших. И ны́не и при́сно и во ве́ки веко́в. Ами́нь. Богородичен: Изба́ви нас, Христе́, от страсте́й, и бед, и обстоя́ний, и неду́гов многообра́зных/ моли́твами Пречи́стыя Твоея́ Ма́тере и преподо́бнаго Диони́сия, взыва́ющих:/ благослове́н Бог оте́ц на́ших. Песнь 8 Ирмос: Царя́ Небе́снаго,/ Его́же пою́т во́и А́нгельстии,/ хвали́те и превозноси́те во вся ве́ки. Припев: Преподо́бне о́тче Диони́сие, моли́ Бо́га о на́с. Столп тя одушевле́н я́ко вои́стинну и о́браз воздержа́ния, о́тче, стяжа́вшее,/ вси твою́, Диони́сие, па́мять почита́ем. Припев: Преподо́бне о́тче Диони́сие, моли́ Бо́га о на́с. Собо́р ра́дуется мона́шеский, и лику́ет преподо́бных сонм,/ с ни́миже пра́ведных вене́ц досто́йно восприя́л еси́. Сла́ва Отцу́ и Сы́ну и Свято́му Ду́ху. Укра́шен доброде́тельми, в неве́стнице неизре́ченныя сла́вы возле́гл еси́,/ песнь воспева́я Христу́ во ве́ки вся. И ны́не и при́сно и во ве́ки веко́в. Ами́нь. Богородичен: Поглоще́на боле́зньми и па́дша возста́ви, Богома́ти,/ я́ко да Тя сла́влю во вся ве́ки. Песнь 9 Ирмос: Чи́стую сла́вно почти́м,/ лю́дие, Богоро́дицу,/ Огнь Божества́ прии́мшую во чре́ве неопа́льно,/ пе́сньми велича́ем. Припев: Преподо́бне о́тче Диони́сие, моли́ Бо́га о на́с. Неду́гующих в паде́нии врач от Бо́га показа́лся еси́, и очи́стник, блаже́нне,/ и прогони́тель лука́вых духо́в, Богоно́се Диони́сие,/ тем тя вси велича́ем. Припев: Преподо́бне о́тче Диони́сие, моли́ Бо́га о на́с. Яко тле́нно жили́ще, зе́млю оста́вив, о́тче, всели́лся еси́в зе́млю кро́тких/ и с ни́ми ра́дуешися, Боже́ственнаго наслажда́яся, о́тче, сия́ния. Сла́ва Отцу́ и Сы́ну и Свято́му Ду́ху. Неукло́нен к ве́ре преде́л/ и образ воздержа́ния иму́ще по́двиги твоя́к Зижди́телю вои́стинну,/ пе́сньми тя велича́ем. И ны́не и при́сно и во ве́ки веко́в. Ами́нь. Богородичен: В Тя всели́вся, Всенепоро́чная,/ пе́рвее родонача́льныя злообра́зно запе́ншаго/ человекоуби́йцу низложи́ Роди́выйся и всех нас спасе́. Светилен Пристра́стия мирска́го, я́ко от скве́рны, уклони́лся еси́,/ разу́мнаго Со́лнца светоза́рная луча́возсия́,/ свети́льник многосве́тлый, пусты́нное воспита́ние и чистоты́ оби́телище,/ Христо́вы добро́ты я́сно зря,/ Его́же сия́нием ум твой озари́л еси́/ и сла́вою обогати́лся еси́ Небе́сною, Диони́сие сла́вне./ Мо́лим тя, в ми́ре сохране́ным бы́ти па́мять твою́ почита́ющим. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Я́ко иму́щи милосе́рдие и ми́лость ве́лию,/ при́зри, Препе́тая Богоро́дице Де́во, на мое́ смире́ние,/ и страсте́й молву́, и собла́зн жития́ разори́, Отрокови́це,/ и огня́ гее́нскаго изба́ви мя моли́твами Твои́ми.

Минея, 26 Апреля, Кано́н Глас 4 Песнь 1 Ирмос: Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,/ и воспою́, ра́дуяся, Тоя́ чудеса́. Припев: Священному́чениче Васи́лие, моли́ Бо́га о на́с. Пе́ти тя, сла́вне, усе́рдствующу,/ прему́дрость ми пода́ждь и ра́зума сло́во/ моли́твами твои́ми Боже́ственныя по́двиги твоя́ восхвали́ти/ Христо́вы ра́ди любве́, ю́же показа́л еси́ кре́пко. Припев: Священному́чениче Васи́лие, моли́ Бо́га о на́с. Ми́ром благода́ти святи́тель яви́лся еси́, пома́зався, свяще́нне,/ Христу́ досто́йно сам ся, я́ко же́ртва, муче́нием чиста́,/ и безкро́вныя же́ртвы принося́. Сла́ва Отцу́ и Сы́ну и Свято́му Ду́ху. Побе́дною укра́шен багряни́цею страда́ний твои́х/ и кро́ви венце́м удобре́н, царь страсте́й показа́лся еси́, святи́телю,/ разгна́в же пре́лесть, ца́рствуеши со Христо́м. И ны́не и при́сно и во ве́ки веко́в. Ами́нь. Богородичен: Созда́вый челове́ка пе́рвее от земли́/ во чре́ве Твое́м воплоща́ется/ и Челове́к соверше́н быва́ет./ Те́мже во двою́ существу́, Богоро́дице, соверше́нна зна́ем Его́, Пренепоро́чная. Песнь 3 Ирмос: Не му́дростию, и си́лою,/ и бога́тством хва́лимся,/ но Тобо́ю, О́тчею Ипоста́сною Му́дростию, Христе́:/ несть бо свят, па́че Тебе́,/ Человеколю́бче. Припев: Священному́чениче Васи́лие, моли́ Бо́га о на́с. Же́ртва ты Христу́ сам приве́лся еси́ я́коже непоро́чна,/ огне́м твоея́, му́дре, со́вести страда́нием всесожже́н. Сла́ва Отцу́ и Сы́ну и Свято́му Ду́ху. Прему́дрости сло́вом, основа́нием Христо́с утверди́ на ка́мени,/ непрекло́нно возведе́ тя, Васи́лие сла́вне,/ я́коже па́стыря му́дра. И ны́не и при́сно и во ве́ки веко́в. Ами́нь. Богородичен: Род земны́й рождество́м Твои́м, Пречи́стая, разреши́ся дре́вния вои́стинну кля́твы,/ те́мже Боже́ственнаго Твоего́ зра́ка подо́бие почита́ем, Влады́чице. Седален, глас 3 Боже́ственным Ду́хом просвеще́н,/ горды́ню мучи́теля со дерзнове́нием па́стырским велему́дренно посрами́л еси́/ и, преше́д пре́лести пучи́ну, ко приста́нищу Боже́ственному дости́гл еси́./ О́тче преподо́бне, Христа́ Бо́га моли́ дарова́ти нам ве́лию ми́лость. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Боже́ственная ски́ния была́ еси́, Сло́ва, еди́на Пречи́стая Ма́ти Де́во,/ чистото́ю А́нгелы превозше́дшая,/ па́че всех мене́, персть бы́вша, оскверне́на плотски́ми прегреше́ньми,/ очи́сти моли́тв Твои́х Боже́ственными вода́ми,/ подаю́щи, Чи́стая, ве́лию ми́лость. Песнь 4 Ирмос: Неизсле́дный Бо́жий сове́т,/ е́же от Де́вы воплоще́ния, Тебе́, Вы́шняго,/ проро́к Авваку́м усмотря́я, зовя́ше:/ сла́ва си́ле Твое́й, Го́споди. Припев: Священному́чениче Васи́лие, моли́ Бо́га о на́с. На жи́зненней воде́ Боже́ственных исто́чник, о́тче,/ на траве́ же ве́ры па́лицею уче́ний твои́х, му́дре,/ Христо́во наста́вил еси́ ста́до, Васи́лие преблаже́нне. Припев: Священному́чениче Васи́лие, моли́ Бо́га о на́с. Глаго́лы Богому́дрыми, му́чениче Христо́в, беззако́ннаго обличи́л еси́/ и злоимени́таго Ликини́я благодерзнове́ние богоме́рзское безу́мие,/ побе́дою же по́чести венча́лся еси́. Сла́ва Отцу́ и Сы́ну и Свято́му Ду́ху. Неразседа́емое основа́ние водрузи́л еси́, му́дре, ты на ка́мени ве́ры,/ треволне́ния, священному́чениче, кре́пко ле́сти и́дольския претерпе́л еси́,/ сию разоря́я си́лою Христо́вою. И ны́не и при́сно и во ве́ки веко́в. Ами́нь. Богородичен: Исцели́ сокруше́ние, Ма́ти Бо́жия, естества́ челове́ческаго,/ Безнача́льное Сло́во во двою́ ро́ждши существу́ неразде́льно, Всенепоро́чная,/ пло́ти почита́ем подо́бие. Песнь 5 Ирмос: Ужасо́шася вся́ческая/ о Боже́ственней сла́ве Твое́й:/ Ты бо, Неискусобра́чная Де́во,/ имела еси́ во утро́бе над все́ми Бо́га/ и родила́ еси́ Безле́тнаго Сы́на,/ всем воспева́ющим Тя/ мир подава́ющая. Припев: Священному́чениче Васи́лие, моли́ Бо́га о на́с. Укрепля́емь, сла́вне, от Христа́ обличи́л еси́ лесть и́дольскую, святи́телю,/ нача́льнику же сея́, я́коже худе́й пти́це, наруга́лся еси́,/ кре́пко, му́чениче, ве́ры тече́ние преше́д, му́дре. Сла́ва Отцу́ и Сы́ну и Свято́му Ду́ху. Я́коже други́й Моисе́й, мо́ре нече́стия я́ве ве́ры жезло́м раздели́л еси́,/ но́ваго, преблаже́нне Васи́лие, Изра́иля, я́ко во обетова́нную зе́млю,/ прове́л еси́ к све́ту Богоразу́мия. И ны́не и при́сно и во ве́ки веко́в. Ами́нь. Богородичен: Боже́ственное подо́бие зра́ка Твоего́, Богоро́дице Чи́стая,/ вси о́бразно в поклоне́ние иму́ще, собо́р ерети́чествующих при́сно слове́сно отгоня́ем,/ и́же Твои́ми богатя́щиися мольба́ми и по́мощию, Пренепоро́чная. Песнь 6 Ирмос: Возопи́, прообразу́я погребе́ние тридне́вное,/ проро́к Ио́на, в ки́те моля́ся:/ от тли изба́ви мя, Иису́се Царю́ сил. Припев: Священному́чениче Васи́лие, моли́ Бо́га о на́с. Не терпя́ше лю́тый и беззако́нный мучи́тель/ е́же в словесе́х дерзнове́ния твоего́, му́чениче,/ и диа́вол лю́то вооружа́ет на тя Ликини́я, сла́вне. Сла́ва Отцу́ и Сы́ну и Свято́му Ду́ху. Мнев твою́ тве́рдость и де́рзость, свя́те, умягчи́ти ласка́ньми,/ злоде́й томи́тель наде́жды, му́чениче, погреши́,/ нога́ми твои́ми сокруши́вся держа́вно. И ны́не и при́сно и во ве́ки веко́в. Ами́нь. Богородичен: Твои́м рождество́м боле́зней Е́ва изба́вися, Богоро́дице,/ Изба́вителя бо ро́ду родила́ еси́ челове́ческому,/ еди́на удобре́ние, Пречи́стая Влады́чице. Кондак, глас 4 Царе́во повеле́ние преоби́дев,/ Ца́рство Небе́сное получи́л еси́, Васи́лие,/ в не́мже лику́я,/ помина́й нас, чту́щих па́мять твою́,/ священному́чениче. Песнь 7 Ирмос: Спасы́й во огни́ Авраа́мския Твоя́ о́троки/ и халде́и уби́в,/ я́же пра́вда пра́ведно уловля́ше,/ препе́тый Го́споди, Бо́же оте́ц на́ших,/ благослове́н еси́. Припев: Священному́чениче Васи́лие, моли́ Бо́га о на́с. Го́рдый враг и вельми́ хваля́йся, я́ко птенца́, разори́ти зе́млю,/ сопротивле́нием твои́м победи́ся держа́вно/ и я́ве ни́зу паде́ся под но́зе твои́ свяще́ннеи, священному́чениче. Припев: Священному́чениче Васи́лие, моли́ Бо́га о на́с. Све́том ве́ры я́ве и́дольское омраче́ние ты отгна́л еси́, му́дре,/ Христу́ хвала́ми, блаже́нне,/ поя́, я́коже о́троцы пе́рвее:/ Бо́же оте́ц на́ших, благослове́н еси́. Сла́ва Отцу́ и Сы́ну и Свято́му Ду́ху. Ни ласка́нии тве́рдость, ни проще́нии, святи́телю, мучи́телей, Васи́лие,/ не осла́бил еси́ отню́д, сла́вне, душе́вную кре́пость,/ но не уя́звен, я́коже цве́ты, искуше́ния ты претерпе́л еси́. И ны́не и при́сно и во ве́ки веко́в. Ами́нь. Богородичен: Зако́ны, Чи́стая, рождества́ превозшла́ еси́,/ Зижди́теля ро́ждши я́ве всея́ тва́ри./ Те́мже и́стинную Тя Богоро́дицу, Всепе́тая, ве́рнии,/ преблагоче́стно ны́не испове́дуем. Песнь 8 Ирмос: О́троки благочести́выя в пещи́/ Рождество́ Богоро́дичо спасло́ есть./ Тогда́ у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте, дела́,/ и превозноси́те Его́ во вся ве́ки. Припев: Священному́чениче Васи́лие, моли́ Бо́га о на́с. Стрела́ми прему́дрости, святи́телю, низло́ж под но́зе лесть, преблаже́нне,/ венцы́ венча́лся еси́ побе́дными я́ко побо́рник пресла́вен ве́ры Боже́ственным Ду́хом,/ Го́спода, – зовы́й, – воспева́йте, дела́, и превозноси́те Его́ во вся ве́ки. Припев: Священному́чениче Васи́лие, моли́ Бо́га о на́с. Вы́ю пре́лести, святи́телю, мече́м ве́ры посе́кл еси́,/ усе́чен быв во главу́ твою́, сла́вне,/ и от Христа́ вене́ц побе́ды прия́л еси́, вопия́:/ благослови́те, вся дела́, Го́спода и превозноси́те Его́ во вся ве́ки. Сла́ва Отцу́ и Сы́ну и Свято́му Ду́ху. Совокупи́ся телеси́ твоему́, блаже́нне, глава́ по отсече́нии,/ е́же пресла́вно и безме́рная пучи́на принесе́ окормле́нием, свя́те, Боже́ственнаго Ду́ха./ И ны́не, со А́нгелы лику́я, со Отце́м сла́виши Сы́на и Боже́ственнаго Ду́ха. И ны́не и при́сно и во ве́ки веко́в. Ами́нь. Богородичен: Яд змии́н, Де́во, Е́вин отсе́кла еси́ рождество́м Твои́м,/ Сло́во я́ко ро́ждши пло́тию Ипоста́сное,/ во утро́бе, Пречи́стая, Твое́й совокупле́на стра́шно Отцу́ Ипоста́сное Сло́во,/ Его́же плотско́е подо́бие почита́ем. Песнь 9 Ирмос: Е́ва у́бо неду́гом преслуша́ния кля́тву всели́ла есть;/ Ты же, Де́во Богоро́дице,/ прозябе́нием чревоноше́ния/ ми́рови благослове́ние процвела́ еси́./ Тем Тя вси велича́ем. Припев: Священному́чениче Васи́лие, моли́ Бо́га о на́с. В приста́нище я́ве устреми́вся, пресла́вне,/ треволне́ния бу́ри и́дольския преше́л еси́ Боже́ственным окормле́нием Ду́ха,/ с Вы́шними лику́я си́лами./ Помяни́, блаже́нне, чту́щия тя. Сла́ва Отцу́ и Сы́ну и Свято́му Ду́ху. Боже́ственне лику́я, Васи́лие сла́вне, со А́нгелы/ побе́дная у Престо́ла всех Бо́га же и Влады́ки,/ ра́дуяся, ми́лостивно назира́еши нас/ я́ко па́стырь и святи́тель, пою́щия тя. И ны́не и при́сно и во ве́ки веко́в. Ами́нь. Богородичен: Безсе́менно Безнача́льнаго Сы́на ро́ждши, Бо́га Сло́ва, Ма́ти Де́во,/ все обнови́ла еси́ естество́ на́ше, обетша́вшее прегреше́нием преступле́ния./ Те́мже Тя, Влады́чице, непреста́нно велича́ем.