Молитвы

Минея, 27 Марта, Кано́н, его́же краегране́сие: Се Ирине́а песносло́вит Ми́рко Глас 8 Песнь 1 Ирмос: Ди́вному Бо́гу вели́чия принесе́м,/ и великоле́пно с на́ми/ да воспое́т земля́ и не́бо/ я́сно сла́ву Его́. Припев: Священному́чениче Ирине́е, моли́ Бо́га о на́с. С Небесе́ благода́ть исхода́тайствуй ми, свя́те Ирине́е,/ я́ко да возмогу́ достодо́лжно восхвали́ти твое́ на земли́ светоно́сное торжество́. Припев: Священному́чениче Ирине́е, моли́ Бо́га о на́с. Егда́ предста́л еси́ суди́щу Про́ва беззако́ннаго,/ не убоя́вся претя́щаго муче́ния, возопи́л еси́ к нему́:/ Го́спода Иису́са не отве́ргуся/ и де́моном безу́мным не пожру́,/ ты же твори́, что ти го́де быва́ет. Сла́ва Отцу́ и Сы́ну и Свято́му Ду́ху. Иринее о́тче Богоно́се,/ стоя́л еси́ до́блественно пред суди́щем, испове́дуя Христа́ Го́спода,/ Его́же Престо́лу ны́не предстоя́,/ моли́ о спасе́нии душ на́ших. И ны́не и при́сно и во ве́ки веко́в. Ами́нь. Богородичен: Прече́стно вои́стинну и Боже́ственно Бо́жие селе́ние,/ воспое́м благоче́стно Мари́ю Пречи́стую,/ прие́мшую Невмести́маго и Непостижи́маго. Песнь 3 Ирмос: Утверди́ мя, Го́споди, си́лою Кре́стною/ и да́руй мне се́рдце чи́стое,/ да о Тебе́ хвалю́ся, Бла́же. Припев: Священному́чениче Ирине́е, моли́ Бо́га о на́с. Ре́вностию Бо́жиею дыха́я,/ оде́ялся еси́ Ду́ха си́лою, Ирине́е преблаже́нне,/ и победи́л еси́ вся ополче́ния, ю́же на Христа́ воздвиго́шася. Припев: Священному́чениче Ирине́е, моли́ Бо́га о на́с. Име́я основа́ние Христа́, Ка́меня незы́блема,/ доброде́тельными же ви́ды удобре́н быв,/ сла́вою муче́ния, всеблаже́нне, освяти́вся,/ преше́л еси́ к люби́мому Го́споду, прича́стием обожа́ем, Богоприя́тне. Сла́ва Отцу́ и Сы́ну и Свято́му Ду́ху. Не повину́вся веле́нию мучи́телеву,/ богоме́рзским и́долом не поже́рл еси́,/ но Христа́ до́блественно испове́дал еси́,/ Богоблаже́нне Ирине́е сла́вне. И ны́не и при́сно и во ве́ки веко́в. Ами́нь. Богородичен: Рождество́м Твои́м, Пречи́стая Богоро́дице,/ мы, земноро́днии, от земли́ к высоте́ Небе́сней вои́стинну вознесо́хомся/ и а́нгельским ликостоя́нием причто́хомся. Седален, глас 4 О́тче Ирине́е Богоблаже́нне,/ доброде́тельми твои́ми возсия́л еси́ в Сре́мстей стране́, я́ко вели́кое со́лнце,/ и, просвети́в ве́рных составле́ния,/ потреби́л еси́ страсте́й омраче́ние,/ и ны́не моли́ Христа́ Бо́га дарова́ти нам ве́лию ми́лость. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Ты была́ еси́ Сло́ва Боже́ственная ски́ния,/ чистото́ю А́нгелы превозше́дшая,/ и мене́, пе́рсть бы́вша, па́че всех оскверне́на плотски́ми прегреше́ньми,/ очи́сти моли́тв Твои́х Боже́ственными вода́ми,/ подаю́щи, Чи́стая, ве́лию ми́лость. Песнь 4 Ирмос: Услы́шах слух си́лы Твоея́,/ и возвесели́ся се́рдце мое́ о Го́споде. Припев: Священному́чениче Ирине́е, моли́ Бо́га о на́с. Еди́н Человеколю́бец Христо́с Госпо́дь/ прия́т тя, я́ко Боже́ственное всесожже́ние,/ тем со А́нгелы ны́не лику́еши, Ирине́е, сла́вне му́чениче. Припев: Священному́чениче Ирине́е, моли́ Бо́га о на́с. А́нгелом равносе́льник быв,/ усе́рдно вшел еси́ на суди́лище, любо́вию Христо́вою разжига́ем,/ тем и терпели́вно пострада́в, Ирине́е преблаже́нне,/ му́ченически венча́лся еси́. Сла́ва Отцу́ и Сы́ну и Свято́му Ду́ху. Просвеще́н быв Све́том Тро́ическим,/ служа́щия де́моном уве́рил еси́/ чествова́ти Бо́га и́стиннаго,/ кре́постию же Христо́вою укрепля́ем, яви́лся еси́ всех си́льнейши. И ны́не и при́сно и во ве́ки веко́в. Ами́нь. Богородичен: А́довы у́зы расто́ргши рождество́м Твои́м,/ расто́ргни плени́цы грехо́в мои́х, Богоневе́сто,/ и ра́дости вся испо́лни. Песнь 5 Ирмос: Твои́м Све́том озари́ мой ум, Бо́же,/ молю́ся Тебе́,/ да мно́гую Твою́ воспою́,/ от но́щи у́треневав, благосты́ню. Припев: Священному́чениче Ирине́е, моли́ Бо́га о на́с. Е́здя по пути́ за́поведей Христо́вых/ и кипя́ Боже́ственным раче́нием, о́тче Ирине́е,/ вся плотски́я боле́зни и муче́ния ра́достно претерпе́л еси́. Припев: Священному́чениче Ирине́е, моли́ Бо́га о на́с. Светолу́чными Ева́нгелия сия́нии просвеще́н,/ не поколеба́лся еси́ мук волна́ми,/ ниже́ претя́щей сме́рти, му́чениче Христо́в Ирине́е,/ тем неизрече́нныя сла́вы Боже́ственныя сподо́бился еси́. Сла́ва Отцу́ и Сы́ну и Свято́му Ду́ху. Непоколеби́мыя ве́ры огне́м/ изсуши́в му́тныя пото́ки злочести́вых веле́ний Про́ва беззако́ннаго,/ вшел еси́ в незаходи́мый же́ртвенник та́ин,/ я́ко таи́нник неизрече́нных. И ны́не и при́сно и во ве́ки веко́в. Ами́нь. Богородичен: Млеко́м пита́еши Пита́теля всех,/ рожде́ннаго без тли из пречи́стаго Твоего́ чре́ва/ и челове́ки, тле́ю сокруше́нныя, па́ки назида́юща. Песнь 6 Ирмос: Из чре́ва а́дова/ во́пля моего́ услы́шал еси́ глас мой/ и изба́вил еси́ от тли живо́т мой, Многоми́лостиве. Припев: Священному́чениче Ирине́е, моли́ Бо́га о на́с. О́тче Ирине́е всеблаже́нне,/ целому́дренно житие́ твое́ соверши́л еси́/ и, врага́ победи́в, ко Христу́ преше́л еси́,/ Его́же моли́ изба́вити от страсте́й безче́стия челове́ки. Припев: Священному́чениче Ирине́е, моли́ Бо́га о на́с. Священнотаи́нниче, Ирине́е му́чениче,/ ты священноде́йствовал еси́ Бо́жие Ева́нгелие/ и Боже́ственная уче́ния све́тло запеча́тствовал еси́ му́ченическою свое́ю кро́вию. Сла́ва Отцу́ и Сы́ну и Свято́му Ду́ху. Ле́потный Христо́в таи́нник неизрече́нных та́ин был еси́,/ себе́ же сама́го страда́нием лепоподо́бно прине́сл еси́ Тому́ же́ртву прия́тну,/ и же́ртва твоя́, сла́вне, на же́ртвенник Небе́сный вознесе́ся. И ны́не и при́сно и во ве́ки веко́в. Ами́нь. Богородичен: Иста́явшую мою́ мы́сль пла́менем греха́/ кропле́нием ми́лости Твоея́ напо́й, Де́во Ма́ти, и возжжи́ се́рдца моего́ уга́сший свети́льник. Кондак, глас 1 Многоболе́зненных мук искуше́ния претерпе́л еси́,/ но непрекло́нен умо́м пребы́л еси́,/ мече́м же усече́н и в реку́ вве́ржен,/ ре́чныя струи́ освяти́л еси́,/ сего́ ра́ди восхваля́ем тя, о́тче Ирине́е,/ воспева́юще свяще́нную и мироспаси́тельную па́мять твою́. Песнь 7 Ирмос: О́троки ороси́вый в пещи́/ и Де́ву сохрани́вши ро́ждшую Тя по рождестве́,/ благослове́н еси́, Бо́же оте́ц на́ших. Припев: Священному́чениче Ирине́е, моли́ Бо́га о на́с. Ору́жник Христо́в яви́лся еси́, блаже́нне,/ отри́нув тве́рдостне мучи́теля нече́стие,/ тем и Христо́с возмзди́ тя за терпе́ние,/ угото́вав тебе́ жили́ще Небе́сное, иде́же ны́не воспева́еши:/ благослове́н еси́, Бо́же оте́ц на́ших. Припев: Священному́чениче Ирине́е, моли́ Бо́га о на́с. Влады́ки твоего́ раче́нием насла́ждся,/ мирску́ю любо́вь пренебре́гл еси́/ и муче́ния венце́м, о́тче, украси́лся еси́, те́мже взыва́еши:/ благослове́н еси́, Бо́же оте́ц на́ших. Сла́ва Отцу́ и Сы́ну и Свято́му Ду́ху. И́го Христо́во на ра́ме твое́м усе́рдно нося́,/ поко́й обре́л еси́ в души́ свое́й,/ и вме́сто тесноты́ обре́л еси́ широту́ ра́дования,/ и в ра́йстей сла́дости с му́ченики восклица́еши:/ благослове́н еси́, Бо́же оте́ц на́ших. И ны́не и при́сно и во ве́ки веко́в. Ами́нь. Богородичен: Ра́дуйся, Благода́тная Богоро́дице Де́во,/ храм и свяще́нное жили́ще Сло́ва су́щи,/ и бу́ди нам прегреше́ний очище́ние. Песнь 8 Ирмос: Преподо́бнии Твои́ о́троцы,/ в пе́щь вве́ржени, поя́ху:/ благослови́те, дела́ Госпо́дня, Го́спода. Припев: Священному́чениче Ирине́е, моли́ Бо́га о на́с. Ты ничто́же предпоче́т на земли́, о́тче Ирине́е,/ Христу́ после́довал еси́, злочести́вому Про́ву сопротивля́яся,/ и, за и́стину пострада́в, вопия́л еси́:/ благослови́те, дела́ Госпо́дня, Го́спода. Припев: Священному́чениче Ирине́е, моли́ Бо́га о на́с. Моли́твами и посто́м плотска́я мудрова́ния умертви́в,/ ре́вностию же ве́ры распаля́ем,/ прине́слся еси́, о́тче, Бо́гу же́ртва прия́тна, воспева́я:/ благослови́те, дела́ Госпо́дня, Го́спода. Сла́ва Отцу́ и Сы́ну и Свято́му Ду́ху. Испове́данием Христа́ показа́лся еси́ адама́нта тверде́йший/ и к мучи́телю взыва́л еси́:/ не устраша́юся сме́рти, ни мук ви́да, ниже́ жру де́моном,/ Бо́га Еди́наго, в Тро́ице познава́емаго, чту,/ Ему́же всегда́ песносло́влю:/ благослови́те, дела́ Госпо́дня, Го́спода. И ны́не и при́сно и во ве́ки веко́в. Ами́нь. Богородичен: Кля́твы прароди́тельныя изба́вльшеся, Пречи́стая,/ благослове́ние Тобо́ю получи́хом./ Те́мже Тя благослови́м, и велича́ем, и любо́вию ублажа́ем. Песнь 9 Ирмос: Тя, ши́ршую Небе́с, Богоро́дице,/ и све́тлшую со́лнца,/ пе́сньми велича́ем. Припев: Священному́чениче Ирине́е, моли́ Бо́га о на́с. Ра́достно пое́м по́двиги твоя́, о́тче Ирине́е,/ ю́же за Христа́ па́че естества́ претерпе́л еси́,/ тве́рдым по́мыслом проти́вяся Про́ву злочести́вому./ Те́мже тя в пе́снех велича́ем. Припев: Священному́чениче Ирине́е, моли́ Бо́га о на́с. Ко Го́споду любо́вь огнепа́льную име́л еси́,/ добро́тою же Боже́ственною наслажда́ем,/ ра́дуяся, соверши́л еси́ по́двиг твоего́ муче́ния,/ сего́ ра́ди в пе́снех тя велича́ем. Сла́ва Отцу́ и Сы́ну и Свято́му Ду́ху. Огне́м Боже́ственным распаля́ем,/ ю́зи и многоплете́нныя му́ки до́блественно претерпе́л еси́/ и не прине́сл еси́ че́сти истука́нным,/ тем тя ве́рою ублажа́ем и в пе́снех велича́ем. И ны́не и при́сно и во ве́ки веко́в. Ами́нь. Богородичен: О́тчее Сло́во и прему́дрость несказа́нно ро́ждшая, Де́во Всенепоро́чная,/ души́ моея́ лю́тую я́зву уврачу́й и се́рдца боле́знь укроти́. Светилен Сия́нием Небе́сным озаря́ем,/ Христо́вою си́лою укрепля́ем,/ му́жеским нра́вом к му́кам устреми́лся еси́,/ испове́дая Бо́жие свято́е И́мя. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Сия́нием от Тебе́ па́че ума́ Возсия́вшаго/ озари́ на́ша мы́сли, Всенепоро́чная,/ и по́мыслов душетле́нных ума́ли тьму́,/ я́ко да пое́м Тя, Влады́чице.

Минея, 20 Января, Канон Глас 2 Песнь 1 Ирмос: Во глубине́ постла́ иногда́ фараони́тское всево́инство преоруже́нная си́ла, вопло́щшееся же Сло́во всезло́бный гре́х потреби́ло е́сть, препросла́вленный Госпо́дь, сла́вно бо просла́вися. Припев: Святи́телю, о́тче Евфи́мие, моли́ Бо́га о на́с. Стопа́м и́стинных изра́ильтян после́дуя, преше́л еси́ те́мную пучи́ну мирску́ю, ника́коже омочи́в но́ги твоя́ ти́ною страсте́й, Го́сподеви поя́: сла́вно бо просла́вися. Припев: Святи́телю, о́тче Евфи́мие, моли́ Бо́га о на́с. Еди́ножды на Сина́и зако́н дре́вний даде́ся иногда́, в Сио́не же но́вая благода́ть возсия́, я́же ты́, блаже́нне, обоя́ богопросвеще́нным умо́м но́во пре́дал еси́ наро́ду твоему́ в чисте́йшем блиста́нии Правосла́вия, Го́сподеви поя́: сла́вно бо просла́вися. Сла́ва Отцу́ и Сы́ну и Свято́му Ду́ху. Ю́ный ле́в изра́ильтеский при Моисе́и дре́вле Амали́ка победи́, ты́ же ага́ряны устраши́л еси́ и диа́вола посрами́л еси́ си́лою креста́, чу́дом сохра́ншаго тя́ от меча́ и заколе́ния, Го́сподеви пою́ща: сла́вно бо просла́вися. И ны́не и при́сно и во ве́ки веко́в. Ами́нь. Богородичен: Щедро́т Бо́жиих, Ма́ти Всенепоро́чная, благослове́нна бу́ди, Христа́ бо поро́ждши, на́с привела́ еси́ от сме́рти к животу́ и от ги́бели грехо́вныя к ве́чному блаже́нству, Го́сподеви пою́щих: сла́вно бо просла́вися. Песнь 3 Ирмос: На ка́мени мя́ ве́ры утверди́в, разшири́л еси́ уста́ моя́ на враги́ моя́, возвесели́бося ду́х мо́й, внегда́ пе́ти: не́сть свя́т, я́коже Бо́г на́ш, и не́сть пра́веден, па́че Тебе́, Го́споди. Припев: Святи́телю, о́тче Евфи́мие, моли́ Бо́га о на́с. Иису́са Сладча́йшаго Боже́ственное и́мя непреста́нно се́рдцем глаго́ля в безмо́лвии усте́н, во у́ши Бо́га Савао́фа моли́тву твою́ возноси́л еси́ и пе́л еси́: не́сть свя́т, я́коже Бо́г на́ш, и не́сть пра́веден, па́че Тебе́, Го́споди. Припев: Святи́телю, о́тче Евфи́мие, моли́ Бо́га о на́с. Изве́стным прикоснове́нием благода́ти Ду́ха к се́рдцу твоему́ коне́чне умили́лся еси́ и, избы́в о́бласти проти́внаго, всегда́ пе́л еси́: не́сть свя́т, я́коже Бо́г на́ш, и не́сть пра́веден, па́че Тебе́, Го́споди. Сла́ва Отцу́ и Сы́ну и Свято́му Ду́ху. Се́рдце твое́ по́двигом утверди́в в Го́споде и в опияне́нии Ду́ха при́сно пребыва́я, си́лою свы́ше чудеса́ мно́га соверши́л еси́ и пе́л еси́: не́сть свя́т, я́коже Бо́г на́ш, и не́сть пра́веден, па́че Тебе́, Го́споди. И ны́не и при́сно и во ве́ки веко́в. Ами́нь. Богородичен: Лу́к си́льных изнемо́же, я́ко низложи́ Госпо́дь си́льныя со престо́л, и немотству́ющии препоя́сашася си́лою, вознесе́ бо Бо́г смире́нныя, Де́во Ма́ти Госпо́дня, пою́щия: не́сть свя́т, я́коже Бо́г на́ш, и не́сть пра́веден, па́че Тебе́, Го́споди. Седален, глас 8 Повеле́ние восприи́м глубино́ю души́ ученика́ возлю́бленнаго и апо́стола, е́же не люби́ти ми́ра, ни вся́, я́же в не́м, оста́вил еси́ кра́сная и сла́дкая вся́, восприя́л же еси́ кре́ст тво́й, после́довав Христу́, от Него́же и восприе́млеши мзду́ ве́чнующую, я́же на се́рдце челове́ка не взы́де, и наслажда́ешися зре́нием сла́вы Его́ чи́стыя и невече́рния. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Повеле́ние любве́ О́тчия исполня́я, послу́шлив быв да́же до сме́рти,/ я́коже в глави́зне кни́жней писа́ся о Нем,/ Сын Бо́жий, Чи́стая, всели́ся во утро́бу Твою́,/ Тя ши́ршую содева́я Небе́с и спосажда́я на Престо́ле Ца́рствия Своего́,/ отонуду́же раздаю́щи бога́тно ми́лости Твоя́,/ не забу́ди и нас, Цари́це Небе́сная и Ма́ти Де́во. Песнь 4 Ирмос: Прише́л еси́ от Де́вы не хода́тай, ни а́нгел, но Са́м Го́споди вопло́щся, и спа́сл еси́ всего́ мя́ челове́ка; те́м зову́ ти́: сла́ва си́ле Твое́й, Го́споди. Припев: Святи́телю, о́тче Евфи́мие, моли́ Бо́га о на́с. Еще́ в ю́ности услы́шав Бо́га, снизше́дшаго спасти́ кре́постию ро́д челове́ческий и сокруши́ти си́лу вра́жию, Того́ неукло́нно после́довал еси́ спаси́тельным стопа́м, на плеща́х нося́ благо́е и́го и немо́лчно взыва́я: сла́ва си́ле Твое́й, Го́споди. Припев: Святи́телю, о́тче Евфи́мие, моли́ Бо́га о на́с. Зижди́тельную ми́лость Бо́жию вкуси́в, е́юже в черто́г введе́н бы́л еси́ благода́ти, Бо́га зре́л еси́ неви́димое очище́нныма очи́ма и при́сно со умиле́нием взыва́л еси́: сла́ва си́ле Твое́й, Го́споди. Сла́ва Отцу́ и Сы́ну и Свято́му Ду́ху. А́ще и любо́вию Свое́ю Бо́г стра́сти ве́лия на тя́ наведе́ и да́же до сме́рти, наказу́я тя́, наказа́, искуси́ти тя́ па́че восхоте́в, но ты́ благода́рственно всегда́ взыва́л еси́: сла́ва си́ле Твое́й, Го́споди. И ны́не и при́сно и во ве́ки веко́в. Ами́нь. Богородичен: Ма́ти Де́во Богоро́дице, горо́, прообразова́нная и приосене́нная, из Тебе́ Святы́й прии́де, доброде́телию покрыва́яй небеса́ и спаса́яй зову́щия: сла́ва си́ле Твое́й, Го́споди. Песнь 5 Ирмос: Просвеще́ние во тме́ лежа́щих, спасе́ние отча́янных, Христе́ Спа́се мо́й, к Тебе́ у́тренюю, Царю́ ми́ра, просвети́ мя́ сия́нием Твои́м, ино́го бо ра́зве Тебе́ Бо́га не зна́ю. Припев: Святи́телю, о́тче Евфи́мие, моли́ Бо́га о на́с. Иса́ия ви́де проро́ческима очи́ма на престо́ле превознесе́нне Бо́га, ты́ же, в но́вей благода́ти священноде́йствуя, А́гнца Бо́жия, за все́х закла́ннаго, жре́л еси́, и воскре́сшаго, и одесну́ю Отца́ седя́щаго. Припев: Святи́телю, о́тче Евфи́мие, моли́ Бо́га о на́с. Раздира́я ду́шу свою́ ско́рбию кре́пкою, наро́д тво́й Тро́ице преда́л еси́ на ве́ки, и у́бо взя́т бы́сть нечести́вый от среды́ мы́шцею высо́кою, и благоче́стие па́ки процвете́ на земли́ Бо́лгарстей моли́твами твои́ми. Сла́ва Отцу́ и Сы́ну и Свято́му Ду́ху. Ага́ряном нечести́вым, ча́да твоя́ мече́м убива́ющим, боле́л еси́ утро́бою, но па́ки ра́довался еси́ душе́ю, благоче́стию процвета́ющу на земли́ скорбе́й, слеза́ми ороша́емой. И ны́не и при́сно и во ве́ки веко́в. Ами́нь. Богородичен: Дре́вле Тя́ прови́де Иса́ия, Богороди́тельнице, — я́ко Де́ва, — вопия́, — во чре́ве прии́мет, и Де́ва роди́т, и по рождестве́ па́ки Де́ва пребу́дет, Ма́ти Емману́илева. Песнь 6 Ирмос: В бе́здне грехо́вней валя́яся, неизсле́дную милосе́рдия Твоего́ призыва́ю бе́здну: от тли́, Бо́же мя́ возведи́. Припев: Святи́телю, о́тче Евфи́мие, моли́ Бо́га о на́с. О́бщник сы́й ада́мскаго ро́да и порожде́ние, бе́здну греха́ избе́гл еси́, не оскверни́вся ниже́ в ю́ности, кре́ст бо на ра́мо взе́м, не в мо́ри погря́з, но на го́ру преображе́ния возше́л еси́. Припев: Святи́телю, о́тче Евфи́мие, моли́ Бо́га о на́с. С печа́лию се́рдца, я́коже Ио́на, ко Го́споду воззва́в, услы́шан бы́л еси́ и вла́сти звере́й а́бие изба́влен злочести́вых у́бо, ку́пно же и преиспо́дних. Сла́ва Отцу́ и Сы́ну и Свято́му Ду́ху. То́чию по изше́ствии из сме́ртныя утро́бы ки́товы проро́к де́ло Бо́жияго зва́ния соверши́, ты́ же по избавле́нии ме́чнаго усече́ния усугу́бил еси́ труды́ по́двига твоего́ и про́поведи си́лы Бо́жия. И ны́не и при́сно и во ве́ки веко́в. Ами́нь. Богородичен: Иису́са моего́ Ма́ти Богоблагода́тная, в мо́ри страсте́й обурева́емых спаси́ ны́, да све́тло воспое́м си́лы Твоя́ и Сы́нови Твоему́ благода́рственная воздади́м, Пречи́стая. Кондак, глас 8 Во бра́ни неви́димой бы́в победи́тель, от Вы́шния десни́цы вене́ц прия́л еси́, Евфи́мие, преподо́бне о́тче на́ш, во бра́ни же с злочести́выми неодоле́нный, усугу́бил еси́ мзду́ твою́ в кро́вех небе́сных. Те́мже воспева́ем ти́ такова́я: ра́дуйся, страда́льче безкро́вный земли́ Бо́лгарския. Икос Ника́коже вои́стинну бы́сть бра́нь твоя́, по вели́кому Па́влу, проти́ву кро́ве и пло́ти, но к нача́лом, и ко власте́м, и к миродержи́телем тмы́ ве́ка сего́, к духово́м зло́бы поднебе́сным, и, побежда́я, победи́л еси́ лука́ваго пре́жде на по́прищи души́ твоея́ пустыннолю́бныя, последи́ же на суди́щи ага́рян злочести́вых. Сего́ ра́ди воспева́ем ти́ такова́я: ра́дуйся, страда́льче безкро́вный земли́ Бо́лгарския! Песнь 7 Ирмос: О́бразу злато́му на по́ле Деи́ре служи́му, трие́ Твои́ о́троцы небрего́ша безбо́жнаго веле́ния, посреде́ же огня́ вве́ржени, ороша́еми, поя́ху: благослове́н еси́, Бо́же оте́ц на́ших. Припев: Святи́телю, о́тче Евфи́мие, моли́ Бо́га о на́с. Иу́диным уя́звлен сребролю́бием, ца́рь гре́ческий в заточе́ние тя́ посла́, тре́буя зла́та и сребра́, но ты́ раздая́нием свои́х си́ и нестяжа́нием обре́л бя́ше безце́нный би́сер — Христа́, И́же благослове́нный Бо́г оте́ц на́ших. Припев: Святи́телю, о́тче Евфи́мие, моли́ Бо́га о на́с. Па́ки ца́рь Ту́рский от па́ствы тя́ разлучи́, хотя́ загради́ти богоглаго́ливых усте́н твои́х про́поведь благоче́стия, но и на ме́сте заточе́ния твоего́ собра́ ти́ ста́до слове́сное Па́стырь Христо́с, благослове́нный Бо́г оте́ц на́ших. Сла́ва Отцу́ и Сы́ну и Свято́му Ду́ху. Обы́чно соверши́в де́ло свое́ на земли́ мно́гими ле́ты, я́ко кла́с зре́лый, пожа́ тя́ рука́ а́нгела Бо́жия, и прия́ тя́, я́ко стори́чный пло́д, в жи́тницу ве́чнаго воздая́ния Христо́с, благослове́нный Бо́г оте́ц на́ших. И ны́не и при́сно и во ве́ки веко́в. Ами́нь. Богородичен: Же́н лу́чших избра́ние, блажи́м Тя́, Богоро́дице Чи́стая, горо́ усыре́нная, из нея́же ка́мень отсече́ся — Христо́с, И́же истука́н столпотворе́ний челове́ческих до конца́ сокруши́, благослове́нный Бо́г оте́ц на́ших. Песнь 8 Ирмос: В пе́щь о́гненную ко отроко́м евре́йским снизше́дшаго и пла́мень в ро́су прело́жшаго Бо́га, по́йте дела́ я́ко Го́спода, и превозноси́те во вся́ ве́ки. Припев: Святи́телю, о́тче Евфи́мие, моли́ Бо́га о на́с. Ну́ждно в разжже́нную пе́щь страсте́й бе́с хотя́ше тя́ ври́нути, но не возмо́же вселука́вый, от ю́ности бо ты́ благо́му по́двигу навы́к, ду́шу слеза́ми всегда́ ороша́я, прохлажда́л еси́, поя́ и превознося́ Бо́га во вся́ ве́ки. Припев: Святи́телю, о́тче Евфи́мие, моли́ Бо́га о на́с. Ужа́сен, ста́рца твоего́, Феодо́сия чу́днаго, ви́дев всего́, я́ко о́гненна, ве́сь устреми́лся еси́ ко огню́ Ду́ха, попаля́ющему грехо́в те́рние, ду́шу же согрева́ющу теплото́ю жи́зни, поя́ и превознося́ Бо́га во вся́ ве́ки. Сла́ва Отцу́ и Сы́ну и Свято́му Ду́ху. Твои́ми моли́твами, я́коже други́й Илия́, огне́м со́лнечным изсо́хшую зе́млю бога́тно дожде́м напои́л еси́, люде́й же обдари́л еси́ гобзова́нием плодо́в земны́х же и небе́сных, поя́ и превознося́ Бо́га во вся́ ве́ки. И ны́не и при́сно и во ве́ки веко́в. Ами́нь. Богородичен: Дерза́юще, и мы́, — ра́дуйся, — вопие́м Ти́, Чи́стая, чистото́ю а́нгелов превозше́дшая и Бо́га во утро́бу Твою́ все́льшая, Ма́ти Бо́жия, изба́ви ны́ от па́губы грехо́вныя. Песнь 9 Ирмос: От Бо́га Бо́га Сло́ва, неизрече́нною му́дростию прише́дшаго обнови́ти Ада́ма, я́дию в тле́ние па́дшаго лю́те, от Святы́я Де́вы неизрече́нно воплоти́вшагося на́с ра́ди, ве́рнии, единому́дренно пе́сньми велича́ем. Припев: Святи́телю, о́тче Евфи́мие, моли́ Бо́га о на́с. Ева́нгелие еди́но сокро́вище име́л еси́, нищенству́я пло́тию на земли́, но, я́коже вели́кий апо́стол, ничесо́же содержа́, мно́гих обогати́л еси́ сокро́вищи Ду́ха, к десне́й гряду́щаго Судии́ лю́ди предуготовля́я. Припев: Святи́телю, о́тче Евфи́мие, моли́ Бо́га о на́с. Вознося́й смире́нныя Госпо́дь вознесе́ тя́ из глубины́ и́ноческаго смире́ния на престо́л первосвяти́тельства, отту́ду же на не́бо небесе́ и венча́ тя́ венцы́ преподо́бия и безкро́внаго му́ченичества. Сла́ва Отцу́ и Сы́ну и Свято́му Ду́ху. Иера́рше Христо́в и учи́телю Правосла́вия, Евфи́мие, святе́йший о́тче, его́же веща́ния сла́дце послу́шаше ве́сь христоимени́тый Изра́иль, утверди́ ны́ в благоче́стии моли́твами твои́ми. И ны́не и при́сно и во ве́ки веко́в. Ами́нь. Богородичен: И мы́ Тебе́ вопие́м, я́коже дре́вле Предте́чева ма́ти, Де́во Всечестна́я: отку́ду на́м сие́, я́ко к многогре́шным прихо́диши и все́м помога́еши неистощи́мою ми́лостию Твое́ю. Светилен Душа́ твоя́, Евфи́мие, досто́йно снабде́ся к Бо́гу с дерзнове́нием, се́рдце же твое́, святи́телю, не те́сно вмеща́ет люде́й твои́х. Не преста́й у́бо моля́ся о на́с, да изба́вимся сете́й врага́ лука́ваго. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Мари́е Богоневе́стная,/ христиа́ном Предста́тельнице,/ А́нгелом же Цари́це и всем святы́м Первостоя́тельнице,/ не преста́й моля́щи Го́спода о правосла́вно воспева́ющих Тя.

Error: Нет такого канона в БД.

Минея, 14 Апреля, Кано́н му́чеником Глас 4 Песнь 1 Ирмос: Мо́ря чермну́ю пучи́ну/ невла́жными стопа́ми/ дре́вний пешеше́ствовав Изра́иль,/ крестообра́зными Моисе́овыми рука́ми/ Амали́кову си́лу в пусты́ни победи́л есть. Припев: Святи́и му́ченицы Антóние, Иоа́нне и Евста́фие, моли́те Бо́га о на́с. Добро́тою муче́ния, сла́внии, удобря́еми/ и Боже́ственнаго све́та па́че естества́ исполня́еми, му́ченицы,/ и́же ва́шу чту́щих па́мять отону́ду осиява́ете. Припев: Святи́и му́ченицы Антóние, Иоа́нне и Евста́фие, моли́те Бо́га о на́с. Глаго́лы мучи́теля небрего́ша, Боже́ственнии му́ченицы,/ я́рость, гнев и горды́ню нивочто́же вмени́ша/ и благохва́льно смерть, веселя́щеся, претерпе́ша. Сла́ва Отцу́ и Сы́ну и Свято́му Ду́ху. Кре́постию утверди́вшеся, святи́и, Вседержи́телевою,/ и́стиною во чре́сла держа́вно препоя́савшеся,/ вои́стинну лука́ваго си́лу и кова́рство разруши́сте. И ны́не и при́сно и во ве́ки веко́в. Ами́нь. Богородичен: Си́лы па́че есте́ственных соде́лаша, Боже́ственнии му́ченицы,/ укрепля́еми си́лою Твое́ю, Иису́се Всеси́льне,/ И́же в на́шу не́мощь пе́рвее от Де́вы оболки́йся. Песнь 3 Ирмос: Весели́тся о Тебе́ Це́рковь Твоя́, Христе́, зову́щи:/ Ты моя́ кре́пость, Го́споди,/ и прибе́жище, и утвержде́ние. Припев: Святи́и му́ченицы Антóние, Иоа́нне и Евста́фие, моли́те Бо́га о на́с. Любо́вь ко Го́споду восприе́мше, и́стиннии му́ченицы,/ о Нем ра́дующеся, вои́стинну ду́ши преда́ша. Припев: Святи́и му́ченицы Антóние, Иоа́нне и Евста́фие, моли́те Бо́га о на́с. Телесе́м и душа́м цели́тели вас, прему́дрии, показа́,/ И́же ва́ше страда́ние и терпе́ние Прие́мый. Сла́ва Отцу́ и Сы́ну и Свято́му Ду́ху. Пре́лесть дре́внюю оттря́сше, тве́рдии му́ченицы,/ но́вую изво́листе жизнь,/ живу́ще о Христе́ па́че челове́ка. И ны́не и при́сно и во ве́ки веко́в. Ами́нь. Богородичен: Дне мя Све́та невече́рняго прича́стника сотвори́,/ Ма́ти Бо́жия Всечи́стая,/ тьмы избавля́ющи бу́дущия. Седален, глас 1 Огню́ чу́вственному не принесо́сте че́сти,/ изба́вистеся огня́ гее́нскаго, Богоглаго́ливии,/ огню́ и му́кам приобщи́вшеся, святи́и,/ не отверго́стеся И́же всех Влады́ки,/ но, ра́дующеся, до сме́рти храни́ти ве́ру потща́стеся. Песнь 4 Ирмос: Вознесе́на Тя ви́девши Це́рковь на Кресте́,/ Со́лнце Пра́ведное,/ ста в чи́не свое́м,/ досто́йно взыва́ющи:/ сла́ва си́ле Твое́й, Го́споди. Припев: Святи́и му́ченицы Антóние, Иоа́нне и Евста́фие, моли́те Бо́га о на́с. Крепча́йшим противле́нием до́блии и стремле́нием неотло́жнии,/ друзи́и Маккаве́и яви́стеся,/ повелева́ющих я́рости не убоя́стеся, скве́рная я́сти не изво́ливше. Припев: Святи́и му́ченицы Антóние, Иоа́нне и Евста́фие, моли́те Бо́га о на́с. С Го́рними си́лами предсто́яще все́ми Владе́ющему, му́ченицы до́блии,/ вас почита́ющих напа́стей изба́вите и ве́чнаго муче́ния. Припев: Святи́и му́ченицы Антóние, Иоа́нне и Евста́фие, моли́те Бо́га о на́с. Нескве́рно дарова́ние соблю́дше всечестна́го креще́ния,/ Твои́ страстоте́рпцы сие́ честне́йше соде́лаша,/ сла́дко сме́рти Твое́й поревнова́вше. Сла́ва Отцу́ и Сы́ну и Свято́му Ду́ху. Твое́й сме́рти му́ченицы до́блии, Влады́ко Христе́, подо́бящеся,/ пове́шени на дре́ве, ра́дующеся,/ ду́ши преда́ша Ти, – сла́ва си́ле Твое́й, – пою́ще. И ны́не и при́сно и во ве́ки веко́в. Ами́нь. Богородичен: Вели́чия Ти сотвори́ Влады́ка,/ Еди́н Сый, Влады́чице, си́лен кре́постию, я́коже прорекла́ еси́,/ и́бо блажа́т Тя вси ро́ди, Непоро́чная. Песнь 5 Ирмос: Ты, Го́споди, мой Свет,/ в мир прише́л еси́,/ Свет Святы́й, обраща́яй из мра́чна неве́дения/ ве́рою воспева́ющия Тя. Припев: Святи́и му́ченицы Антóние, Иоа́нне и Евста́фие, моли́те Бо́га о на́с. Черто́г вмени́сте пе́рвый темни́цу, блаже́ннии,/ та́мо бо Жениху́ Кра́сному, ра́дующеся, му́ченицы, обручи́стеся,/ Его́же ра́ди уя́звлени душа́ми,/ неудержи́мым жела́нием к Нему́ устреми́стеся. Припев: Святи́и му́ченицы Антóние, Иоа́нне и Евста́фие, моли́те Бо́га о на́с. Красе́н еси́, Влады́ко, и в след Тебе́ тече́м чи́стыми душа́ми, Женише́,/ – тро́ица му́ченик вопия́ше, ра́дующеся, –/ Твое́ю любо́вию, я́коже зри́ши, связа́хомся и Боже́ственным Ти раче́нием. Сла́ва Отцу́ и Сы́ну и Свято́му Ду́ху. Ходи́сте по Влады́це, святи́и, иму́ще во́ду жи́ву бию́щу,/ сла́дко подви́жущую вас к подвиго́м муче́ния,/ Христо́ву ча́шу ве́село испи́сте. И ны́не и при́сно и во ве́ки веко́в. Ами́нь. Богородичен: Твоея́, Богоневе́сто, сла́вы земля́ испо́лнися,/ и к Себе́ святы́х вся ли́ки све́тло привлече́,/ ми́ра сла́дкая оста́вити сих повину́ющи/ и получи́ти Твоея́ све́тлости. Песнь 6 Ирмос: Пожру́ Ти со гла́сом хвале́ния, Го́споди,/ Це́рковь вопие́т Ти,/ от бесо́вския кро́ве очи́щшися/ ра́ди ми́лости от ребр Твои́х/ исте́кшею Кро́вию. Припев: Святи́и му́ченицы Антóние, Иоа́нне и Евста́фие, моли́те Бо́га о на́с. Жезлы́ неми́лостивно му́ченик Евста́фий приклоня́емь,/ вся́чески стена́ние или́ сле́зу не испусти́:/ кре́пкаго бо адама́нта бя́ше тверде́йший. Припев: Святи́и му́ченицы Антóние, Иоа́нне и Евста́фие, моли́те Бо́га о на́с. Возмо́гл еси́, си́лою Боже́ственною укрепля́емь, му́чениче Евста́фие,/ терпе́ти му́ки нестерпи́мыя, блаже́нне,/ сего́ ра́ди Боже́ственнаго весе́лия сподо́бился еси́. Сла́ва Отцу́ и Сы́ну и Свято́му Ду́ху. Полцы́ лука́вых бесо́в побежде́ни бы́ша му́ченик мно́жеством крове́й,/ и крепи́тся Твоя́ Це́рковь, Жизнода́вче,/ воспева́ющи Твое́й си́ле сла́ву. И ны́не и при́сно и во ве́ки веко́в. Ами́нь. Богородичен: Добро́тою де́вства сия́ющи, Влады́чице,/ Царе́ви веко́в избра́на была́ еси́ в жили́ще,/ Его́же ражда́еши, по рождестве́ соблюда́ющаго Тя нетле́нну. Кондак, глас 3 Оте́ческую пре́лесть оста́вльше, святи́и,/ приведо́стеся Христо́ви,/ всем души́ усе́рдием ста́сте мужему́дренно до сме́рти./ Те́мже и взя́сте побе́ды по́честь вои́стинну,/ о всех Влады́ку на́шего непреста́нно моля́ще. Икос Му́ченик по́двиг любопра́зднственне ви́дяще,/ му́жеству их досто́йно почуди́мся,/ и со безпло́тными враги́ сих боре́нию А́нгелов ли́кове ра́дующеся, сих ублажи́ша./ Та́мо бесо́встии полцы́, побежда́еми, ли́ца отвраща́ху,/ та́мо бо всех Влады́ка венцы́ сла́вно украша́ет му́ченик главы́./ Сего́ ра́ди возопие́м к ним:/ о всех, му́ченицы Христо́вы блаже́ннии, моли́теся. Песнь 7 Ирмос: Спасы́й во огни́ авраа́мския Твоя́ о́троки/ и халде́и уби́в,/ я́же Пра́вда пра́ведно уловля́ше,/ препе́тый Го́споди,/ Бо́же оте́ц на́ших, благослове́н еси́. Припев: Святи́и му́ченицы Антóние, Иоа́нне и Евста́фие, моли́те Бо́га о на́с. Иска́пающи ра́дость и духо́вное весе́лие,/ яви́ся нам честна́я ва́ша па́мять, блаже́ннии,/ сердца́ услажда́я, исполня́ющи ра́дости премно́гия. Припев: Святи́и му́ченицы Антóние, Иоа́нне и Евста́фие, моли́те Бо́га о на́с. Ум впери́л еси́, блаже́нне, па́че чу́вства добро́тами плене́нный,/ и сокруше́ния бедро́м не ощуща́л еси́, блаже́нне Евста́фие,/ и власо́м с пло́тию отре́занным ти терпе́л еси́, я́ко адама́нт, в му́ках. Припев: Святи́и му́ченицы Антóние, Иоа́нне и Евста́фие, моли́те Бо́га о на́с. Красота́ теле́сная, му́дре му́чениче, и ю́ности цвет возра́стный,/ лик и жела́ние нивочто́же вмени́ся,/ сего́ ра́ди, Евста́фие, сла́дости ны́не Боже́ственныя восприе́млеши. Сла́ва Отцу́ и Сы́ну и Свято́му Ду́ху. Но́са и у́шию Тебе́ ра́ди, Спа́се, обре́зан, му́ченик Евста́фий/ Твою́, Влады́ко, велича́ше си́лу и воплоще́ние Твое́ поя́ше,/ сподобля́юща того́ па́че есте́ственных терпе́ний. И ны́не и при́сно и во ве́ки веко́в. Ами́нь. Богородичен: Я́ко спасе́ние на́ше Тя, Богоро́дице, мо́лим:/ моли́ за ны вопло́щшагося из Тебе́. Песнь 8 Ирмос: Изба́вителю всех, Всеси́льне,/ посреде́ пла́мене благоче́ствовавшия,/ снизше́д, ороси́л еси́/ и научи́л еси́ пе́ти:/ вся дела́, благослови́те, по́йте Го́спода. Припев: Святи́и му́ченицы Антóние, Иоа́нне и Евста́фие, моли́те Бо́га о на́с. Исте́кшая, преблаже́ннии, кровь ва́ша честна́я всю освяти́ тварь,/ мно́жеством тече́ния му́ченики соде́лавшая вас,/ и́бо све́тло Бо́га пропове́дасте, вас ра́ди уме́рша. Припев: Святи́и му́ченицы Антóние, Иоа́нне и Евста́фие, моли́те Бо́га о на́с. Неруши́мая Це́ркви основа́ния, ве́рным же кре́пкое предгра́дие,/ стены́ тверде́йше, яви́стеся, му́ченицы Богоглаго́ливии,/ и нас всех кре́пко заступа́юще. Сла́ва Отцу́ и Сы́ну и Свято́му Ду́ху. Земля́ соде́ржит честна́я телеса́ ва́ша, Богоно́снии, Не́бо же – ду́ши,/ тем весели́теся, му́ченицы, со А́нгелы, Го́сподеви трисвяту́ю песнь пою́ще:/ благослови́те, вся дела́ Госпо́дня, Го́спода. И ны́не и при́сно и во ве́ки веко́в. Ами́нь. Богородичен: Страшна́ челове́ком смерть пре́жде рождества́ Твоего́, Богоро́дице,/ по сих же игра́лище святы́м вмени́ся,/ хода́тайствуя живо́т ве́чный. Песнь 9 Ирмос: Ка́мень нерукосе́чный/ от несеко́мыя горы́, Тебе́, Де́во,/ краеуго́льный отсече́ся,/ Христо́с, совокупи́вый разстоя́щаяся естества́./ Тем, веселя́щеся, Тя, Богоро́дице, велича́ем. Припев: Святи́и му́ченицы Антóние, Иоа́нне и Евста́фие, моли́те Бо́га о на́с. Возде́лан быв, я́ко ра́лом, сло́вом твои́м, Богому́дре Анто́ние, чу́дный Евста́фий,/ се́мя же прие́м, я́ко блага́я земля́, Иоа́нн Богому́дрый,/ и́же муче́ния клас возрасти́. Припев: Святи́и му́ченицы Антóние, Иоа́нне и Евста́фие, моли́те Бо́га о на́с. Вели́ким по́двигом, прему́дрии, по́чести взе́мше,/ воздая́ния трудо́м и боле́знем от Бо́га прия́сте, му́ченицы,/ о нас Того́ моли́те, и́же вас помина́ющих, святи́и. Сла́ва Отцу́ и Сы́ну и Свято́му Ду́ху. Ны́не у Престо́ла предстоя́ще Царе́ви всех/ и бу́дущих благ наслажда́ющеся, Богоблаже́ннии,/ чту́щих помина́йте ва́шу па́мять свяще́нную. И ны́не и при́сно и во ве́ки веко́в. Ами́нь. Богородичен: Во́ды живы́я испо́лнь весе́лия,/ благода́ти дарова́ния пролива́еши, всем сия́ незави́стно источа́я,/ Тебе́ бо ра́ди дарова́ся вся́ко бла́го ми́рови, Влады́чице. Светилен Муче́ния добро́тами осия́вшеся,/ от Бо́га воздая́ние трудо́м ны́не прия́сте вои́стинну,/ о нас, му́ченицы, Благода́теля моли́те. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Вели́ка Сове́та А́нгела родила́ еси́ – Христа́, Препе́тая Отрокови́це, Царя́ Сла́вы,/ Его́же Крест му́ченицы взе́мше, во след Сего́ потеко́ша,/ с ни́миже непреста́нно о нас моли́ся.

Минея, 7 Октября, Канон преподобному Глас 8 Песнь 1 Ирмос: Воду прошед яко сушу/ и египетскаго зла избежав,/ изра́ильтянин вопия́ше:/ Изба́вителю и Богу нашему пои́м. Припев: Преподо́бне о́тче Се́ргие, моли́ Бо́га о на́с. Воду страсте́й моих изсуши, Боже,/ источник безстрастия излия души моей,/ и дай же пети чистою душею и устнами Твоего преподобнаго Сергия,/ яко да пою присно:/ Изба́вителю Богу нашему пое́м, яко прославися. Припев: Преподо́бне о́тче Се́ргие, моли́ Бо́га о на́с. Любовию Христовою уязвися, Сергие преподобне,/ вслед Того усердно от души последовал еси,/ восприя житие Ангельское, поя Богу:/ Изба́вителю Богу нашему пое́м, яко прославися. Сла́ва Отцу́ и Сы́ну и Свято́му Ду́ху. Утверди весь помысл в Божественная запове́дания,/ житейских молв отвергся, в пустынех скитался,/ преподобному Павлу собеседник, блаженне, бысть,/ с ним пояше:/ Изба́вителю Богу нашему пое́м, яко прославися. И ны́не и при́сно и во ве́ки веко́в. Ами́нь. Богородичен: Уста́ви неуста́вное смуще́ние помышле́ний моих, Богородице Дево,/ иже Сыну Твоему направля́ющих движения, и сердечную болезнь утоли́ воспевающих:/ Изба́вителю Богу нашему поем, яко прославися. Песнь 3 Ирмос: Ты еси утвержде́ние/ притека́ющих к Тебе, Господи,/ Ты еси Свет омраче́нных,/ и пое́т Тя дух мой. Припев: Преподо́бне о́тче Се́ргие, моли́ Бо́га о на́с. Ты, преподобне, нача́ло премудрости прием, страх Божий,/ и сего ради положи́ в души своей основание добродетели/ и на сем основании утверди́ вся помышления, Го́сподеви вопия́ше:/ поет Тя дух мой. Припев: Преподо́бне о́тче Се́ргие, моли́ Бо́га о на́с. Мудрованием до́льним высоту и смирение возлюбил еси/ и на гору безстрастия взыде,/ умертвив душетленныя страсти. Сла́ва Отцу́ и Сы́ну и Свято́му Ду́ху. В предстоянии ти молитвеннем бодро имея душевное свое око,/ во еже прозирати грядущая, яко настоящая,/ сего ради сказова́ше собеседнику своему, преподобному Павлу, хотящая ему по́слежде быти. И ны́не и при́сно и во ве́ки веко́в. Ами́нь. Богородичен: Премудрость и Слово о́тчее несказанно родила еси, Богородице,/ души моей лютую язву исцели/ и сердечную болезнь утоли. Седален, глас 4 Житейских молв удалися в пустыню, Господа, избавльшаго тя от лют, преподобне, присно чая,/ и Тому прилепися, жизнь Ангельскую на земли поживе́ с плотию/ и сего ради приял еси нестареющееся блаженство,/ в немже ныне водворяяся, поминай нас, чтущих пресвятую память твою. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Пречи́стей руце Твои, Богородице, Дево Мати, просте́рши,/ покрый уповающия на Тя, Сыну Твоему зовущия,/ всем же подай милости Твоя. Песнь 4 Ирмос: Услы́шах, Господи,/ смотре́ния Твоего та́инство,/ разуме́х дела́ Твоя/ и просла́вих Твое Божество. Припев: Преподо́бне о́тче Се́ргие, моли́ Бо́га о на́с. Вменя́ше в се́рдцы́ своем, еже присно прилепля́тися Бо́гови благо есть,/ и сего ради на безмолвия по́прище прии́де,/ в немже присно с Богом пребывая, вопияше:/ силе Твоей слава, Человеколюбче. Припев: Преподо́бне о́тче Се́ргие, моли́ Бо́га о на́с. В пустынном озлобле́нии и скорбех зело обрета́яся, прибежище и силу имеяше Бога,/ темже на Того возложи́ упование,/ вся победил еси творя́щая ти напасти, блаженне. Сла́ва Отцу́ и Сы́ну и Свято́му Ду́ху. Желающу ти, преподобне, во дворы́ Господни скончати жизнь свою,/ день и нощь в молитвах и во бдениих не даде покоя телеси своему,/ дóндеже достиже присножелаемаго ти блаженства. И ны́не и при́сно и во ве́ки веко́в. Ами́нь. Богородичен: Просвети мя, Владычице, заря́ми милости Твоея,/ иже во тьме прегрешений моих сущи, Деви́це,/ и к свету покаяния настави мя, молюся,/ и спасение жизни испроси у Христа Бога нашего. Песнь 5 Ирмос: Просвети нас повелении Твоими, Господи,/ и мышцею Твоею высокою,/ Твой мир подаждь нам,/ Человеколюбче. Припев: Преподо́бне о́тче Се́ргие, моли́ Бо́га о на́с. В молитвах и во бдениих прилежа́ Богови/ и сле́зными источники тело с душею Чистому представил еси,/ тем и по смерти твоей сподобися Небесных дарований. Припев: Преподо́бне о́тче Се́ргие, моли́ Бо́га о на́с. Обре́т тя равноангельна, преподобне Павле,/ во внутренней пустыни кры́ющася, сподру́г твой и собеседник Сергий преподобный,/ тем вкупе и подвиза́стася, и клевре́та быста ближняя. Сла́ва Отцу́ и Сы́ну и Свято́му Ду́ху. Облекся во Христово смирение и, яко я́гня незлобиво, Тому принесе себе,/ тем и землю кротких наследова,/ идеже водворяйся, сла́виши Господа. И ны́не и при́сно и во ве́ки веко́в. Ами́нь. Богородичен: Спасение Тя на всяко время и место призываю,/ не пре́зри мене, Всенепорочная,/ Яже Бога рождшая, Избавителя вкупе и Спаса моего. Песнь 6 Ирмос: Моли́тву пролию́ ко Господу/ и Тому возвещу́ печа́ли моя,/ яко зол душа моя испо́лнися,/ и живо́т мой а́ду прибли́жися,/ и молю́ся, яко Иона:/ от тли, Боже, возведи́ мя. Припев: Преподо́бне о́тче Се́ргие, моли́ Бо́га о на́с. Званию Христову после́дова и, Того святое иго на себе взем,/ вечный покой постиже,/ иде́же празднующих глас безконечный и непрестающая радость,/ еже уготова Бог любящим Его повеления. Припев: Преподо́бне о́тче Се́ргие, моли́ Бо́га о на́с. Го́рлица пустыннолю́бная был еси в жизни сей, блаженне,/ безпрестанныя слезы точа́щи, взыскал Господа своего день и нощь,/ егоже обрете, ныне всякаго вреда лукаваго избавля́й поющих тя. Сла́ва Отцу́ и Сы́ну и Свято́му Ду́ху. Благодать твоя, преподобне Се́ргие,/ благоухает арома́ты Божественных дарований,/ свет благочестия испущает верным. И ны́не и при́сно и во ве́ки веко́в. Ами́нь. Богородичен: Без семени заче́нши Бога,/ Зиждителя естеству нетленно родила еси,/ Того моли, Богомати, спастися нам. Кондак, глас 8 Яко звезда пресветлая, от Святыя Горы провозшедши,/ добро́ты чудес твоих весь просветил мир,/ Христов бо крест взем, последова Ему,/ в пустынном озлобле́нии, в молитвах же и пощениих,/ во бдениих же и злостраданиих изнурив плоть свою,/ тем и Христос даром чудес одари́ тебе,/ Емуже о нас моля́ся, посещай чад своих, да зовем ти:/ радуйся, Сергие отче наш, пустынный жителю. Икос Закону Божию повину́йся, от младе́нства путем прискорбным, блаженне, шествовал еси,/ вся бо, яже в мире сладкая и красная, преобидев, вселися в пустыню,/ в ней же крест свой взят, распя себе ми́рови, и мир тебе бысть ра́спят./ Темже от всех слышаще:/ радуйся, яко презрел еси текущая и тленная;/ радуйся, яко, Богом наставляем, пустыню достигл еси;/ радуйся, яко в Нем подвизався, Богу угодил еси и врага победил еси;/ радуйся, яко собра ученик ста́до, имиже и доныне Бог прославляем есть;/ радуйся, яко пресветлым житием своим святых Ангел удиви́ и человек по́льзова;/ радуйся, яко на Небеси со Ангелы ликовствуе́ши, Троице предстоя, и о нас мо́лишися;/ радуйся, источниче чудесем неисчерпаемым;/ радуйся, Сергие отче наш, пустынный жителю. Песнь 7 Ирмос: Божия снизхожде́ния/ огнь устыде́ся в Вавилоне иногда́,/ сего ради о́троцы в пещи́ ра́дованною ного́ю,/ яко во цве́тнице, лику́юще, поя́ху:/ благословен еси, Боже отец наших. Припев: Преподо́бне о́тче Се́ргие, моли́ Бо́га о на́с. В черто́зех Небесных водворяяся,/ одежду светови́дну нося́ и многими добродетельми преукрашену,/ моли обрести нам милость, поющим:/ отец наших Боже, благословен еси. Припев: Преподо́бне о́тче Се́ргие, моли́ Бо́га о на́с. Лучших по́мыслом плоти вне быв, преподобне,/ страсти удержав и бе́сом шата́ния разори́,/ и ныне, с преподобными всеми в Небесных селех живый,/ вся чтущая тя спасай. Сла́ва Отцу́ и Сы́ну и Свято́му Ду́ху. На горах добродетелей, яко еле́нь, пребывая,/ ко Христу Камени неотторжено прирази́ся,/ у Него же ро́су прие́м устуже́ний духовных желаний. И ны́не и при́сно и во ве́ки веко́в. Ами́нь. Богородичен: Телесныя болезни и душевныя грехи, Богороди́тельнице,/ прилежно приступающим к крову Твоему исцели́ти сподоби,/ Яже нам Спаса Христа рождшая. Песнь 8 Ирмос: Седмери́цею пещь/ халде́йский мучи́тель/ Богочести́вым неи́стовно разжже́,/ силою же лучшею спасе́ны сия видев,/ Творцу и Изба́вителю вопия́ше:/ о́троцы, благословите,/ священницы, воспо́йте,/ лю́дие, превозноси́те во вся веки. Припев: Преподо́бне о́тче Се́ргие, моли́ Бо́га о на́с. Любовию, еже ко Христу, распала́емь,/ усердно вся, яже в пустыни сей, скорбная ше́ствия претерпел еси/ и бесо́в лю́тая устремле́ния вся победив,/ тем и достойным венце́м от Бога венча́ся,/ с преподобными ликовству́я, пое́ши:/ Го́сподеви пойте и превозноси́те Его во веки. Припев: Преподо́бне о́тче Се́ргие, моли́ Бо́га о на́с. Плотско́е мудрова́ние, отче Сергие, умертви́л еси/ и сего ради на Небесех со Ангелы жи́ти сподо́бился еси,/ идеже святых собо́ри ликовству́ют, непрестанно поюще с тобою:/ Господа пойте и превозноси́те Его во веки. Сла́ва Отцу́ и Сы́ну и Свято́му Ду́ху. Сле́зным тече́нием просвети́л еси душу,/ очистив ум свой от страстных приложений,/ Пресвятыя Троицы дом показа́ся, с ли́ки святых вопие́ши:/ Господа пойте и превозноси́те Его во веки. И ны́не и при́сно и во ве́ки веко́в. Ами́нь. Богородичен: Умертве́ния ми плод, иже дре́вле естеством рай,/ Жизни Ты Плод, Божественный рай, Богородице, процвела́ еси,/ имже пита́яся, не ктому́ смерти порабоще́н буду. Песнь 9 Ирмос: Ужасе́ся о сем Небо,/ и земли́ удиви́шася концы́,/ яко Бог яви́ся челове́ком пло́тски,/ и чре́во Твое бысть простра́ннейшее Небе́с,/ тем Тя, Богородицу,/ Ангелов и челове́к чинонача́лия велича́ют. Припев: Преподо́бне о́тче Се́ргие, моли́ Бо́га о на́с. Взирании непрестанными, отче, иже к Богу, умертвил еси плоть, победил еси врага/ и ныне преставися к Небесным обителем,/ идеже со Ангелы Бо́гови предстоя, сла́виши Сего присно. Припев: Преподо́бне о́тче Се́ргие, моли́ Бо́га о на́с. Стопам последовал еси преподобнаго Сергия,/ яко солнце возсиявшаго в России,/ егоже от Бога избавление стяжал еси,/ с нимже ныне Христови предстоиши, приемля богатыя дары. Сла́ва Отцу́ и Сы́ну и Свято́му Ду́ху. Блаженства Божественнаго воистину сподобися, Богомудре,/ волею бо Обнищавшему нас ради последова,/ егоже ради вся сущая в мире преобидел еси,/ и сего ради Той прослави тя Божественными прославлении. И ны́не и при́сно и во ве́ки веко́в. Ами́нь. Богородичен: Спаси мя, Мати Божия, Яже ми́рови Спасение рождшая,/ от многообразных ми нахождений,/ на Тя бо надежду спасения моего возложих верно, раб Твой. Светилен Мирско́го веселия яко от скверны уклонился еси,/ постом и молитвами плоть увя́дил,/ души своей крепость, преподобне, обновил еси,/ славою обогатился еси Небесною, славне,/ темже моля не престай о нас Господа. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Воистину Тя, Богородице, исповедуем, Владычице,/ иже Тобою спасшиися,/ и Бога неизреченно родила еси, разоршаго Крестом смерть,/ к Себе же привлекши преподобных соборы,/ с ними же Тя восхваляем, Дево.

Минея, 29 Марта, Канон мучеников Глас 8 Песнь 1 Ирмос: Посе́ченый несеко́маго пресече́,/ и ви́де со́лнце зе́млю, ю́же не ви́де,/ лю́таго врага́ вода́ потопи́,/ и непроходи́мое про́йде Изра́иль,/ пе́снь же воспева́шеся:/ Го́сподеви пои́м, сла́вно бо просла́вися. Припев: Святи́и му́ченицы, моли́те Бо́га о на́с. Со А́нгелы Бо́гу предстоя́ще, Царю́ всех, му́ченицы всеблаже́ннии,/ проси́те нам прегреше́ний избавле́ния,/ любо́вию блажа́щим вы и во хвале́нии пою́щим:/ Го́сподеви воспои́м, сла́вно бо просла́вися. Припев: Святи́и му́ченицы, моли́те Бо́га о на́с. Архиере́я Дух Святы́й тя предста́ви, Ма́рко, оби́льны па́ствити лю́ди/ во вся́ком преподо́бии догма́тов па́лицею слове́сною./ С ни́миже, блаже́нне, пел еси́:/ Го́сподеви воспои́м, сла́вно бо просла́вися. Сла́ва Отцу́ и Сы́ну и Свято́му Ду́ху. Струя́ми крове́й пла́мень многобо́жия угаси́вше, му́дрии,/ ра́дующеся, пострада́сте, е́ллинския мудрецы́ коне́чно посра́мльше,/ и ны́не с му́ченики Христу́ предстоите́, зову́ще:/ Го́сподеви воспои́м, сла́вно бо просла́вися. И ны́не и при́сно и во ве́ки веко́в. Ами́нь. Богородичен: Из Отрокови́цы нетле́нный Бог воплоща́ется,/ Его́же безпло́тных ли́цы, трепе́щуще, сла́вят,/ я́ко всех Творца́ и Еди́наго непреме́ннаго,/ и челове́цы на земли́ всегда́ пою́т, воспева́юще:/ Го́сподеви пое́м, сла́вно бо просла́вися. Песнь 3 Ирмос: Страх Твой, Го́споди,/ всади́ в се́рдца раб Твои́х/ и бу́ди нам утвержде́ние,/ Тя во и́стине призыва́ющих. Припев: Святи́и му́ченицы, моли́те Бо́га о на́с. Не прине́сл еси́ че́сти безслове́сным истука́нным, всеблаже́нне,/ но претерпе́л еси́ крепча́йше му́ки многообра́зныя,/ Ма́рко доблему́дренне. Припев: Святи́и му́ченицы, моли́те Бо́га о на́с. Ума́ до́блестию претерпе́л еси́, пресла́вне Кири́лле,/ наруга́ния же и му́ки муже́й пребеззако́ннующих,/ му́чениче страстоте́рпче. Сла́ва Отцу́ и Сы́ну и Свято́му Ду́ху. Обнажа́емы, му́ченицы многострада́льнии,/ и ра́нами сокруша́емы, непрело́жни пребы́сте,/ па́че Христо́вы любве́ ничто́же предпочита́юще. И ны́не и при́сно и во ве́ки веко́в. Ами́нь. Богородичен: Из Тебе́ возсия́, Всенепоро́чная,/ озаря́яй подсо́лнечную пресла́вными осия́нии/ Пра́вды Со́лнце, Де́во. Седален, глас 4 Просве́щшеся благода́тию и́стинною,/ земны́я концы́ све́тло наставля́ете благоче́стно, священному́ченицы сла́внии./ Те́мже ве́рою вас ублажа́ем. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Пречи́стей ру́це Твои́, Де́во Ма́ти, просте́рши,/ покры́й упова́ющия на Тя и Сы́ну Твоему́ зову́щия:/ всем пода́ждь, Христе́, ми́лости Твой. Песнь 4 Ирмос: Из го́ры приосене́нныя, Сло́ве, проро́к,/ еди́ныя Богоро́дицы,/ хотя́ща воплоти́тися богови́дно усмотри́/ и со стра́хом славосло́вяше си́лу Твою́. Припев: Святи́и му́ченицы, моли́те Бо́га о на́с. Исте́кшая на зе́млю кро́вь твоя́, Богому́дре,/ сию́ пои́стинне освяти́ досто́йно и души́ напои́ благоче́ствующих,/ к ре́вности Боже́ственней воздвизающи. Припев: Святи́и му́ченицы, моли́те Бо́га о на́с. 3арею мы́сленною я́ве просвеща́еми,/ но́щь злу́ю безбо́жнаго злосла́вия отгна́сте, му́ченицы, пресла́вно,/ Ма́рко и Кири́лле всеблаже́ннии. Припев: Святи́и му́ченицы, моли́те Бо́га о на́с. Исцели́ на́ша неду́ги, Благоде́телю,/ Ма́рка моли́твами и Кири́лла Боже́ственнаго/ и ми́лости Твоя́, Благоутро́бне, на вся воспева́ющия Тя низпосли́. Сла́ва Отцу́ и Сы́ну и Свято́му Ду́ху. Си́лою Боже́ственною и благода́тию сло́ва, му́ченицы Христо́вы,/ хра́мы и́дольския низлага́юще,/ Ду́ха Свята́го храм ве́рою показа́стеся. И ны́не и при́сно и во ве́ки веко́в. Ами́нь. Богородичен: Яви́лася еси́ Бо́жие простра́нное вмести́лище,/ престо́л высо́к и две́рь, Богоро́дице,/ е́юже про́йде неизрече́нным рождество́м, от тли ны воззыва́я. Песнь 5 Ирмос: От но́щи неве́дения/ Богове́дением просвети́вши концы́,/ просвети́ мя у́тром человеколю́бия Твоего́, Го́споди. Припев: Святи́и му́ченицы, моли́те Бо́га о на́с. Мироявле́ннии свети́льницы, священному́ченицы Боже́ственнии бы́вше,/ вся просвеща́ете Боже́ственными светлостьми́ Ду́ха. Припев: Святи́и му́ченицы, моли́те Бо́га о на́с. Усмотря́я, всеблаже́нне, воздая́ния Боже́ственная,/ терпе́л еси́, Ма́рко, нестерпи́мыя ра́ны и боле́зни крепча́йше. Сла́ва Отцу́ и Сы́ну и Свято́му Ду́ху. Священноде́тель сый и, безкро́вныя же́ртвы принося́ Христу́,/ же́ртву, блаже́нне, благово́нную –/ тебе́ сама́го – Го́сподеви прине́сл еси́. И ны́не и при́сно и во ве́ки веко́в. Ами́нь. Богородичен: Рождество́м стра́нным Царя́ всех родила́ еси́, Пречи́стая Богоро́дице,/ на благодея́ние тва́ри. Песнь 6 Ирмос: Ио́ну в ки́те, Го́споди,/ еди́наго всели́л еси́,/ мене́ же, свя́заннаго мре́жами вра́жиими,/ я́ко от тли о́наго спаси́. Припев: Святи́и му́ченицы, моли́те Бо́га о на́с. Претерпе́в му́ки многоплете́нныя и сме́рть хода́тайственную, Богому́дре,/ в сла́ве присносу́щней лику́еши на Небесе́х,/ о нас, Кири́лле, моля́ся. Припев: Святи́и му́ченицы, моли́те Бо́га о на́с. Глаго́л Бо́жий жив в се́рдцы твое́м я́ко име́я, Ма́рко сла́вне,/ к ве́ре Боже́ственней привле́кл еси́ лю́ди и наро́ды, му́дре,/ и благосла́вно тече́ние сконча́л еси́. Сла́ва Отцу́ и Сы́ну и Свято́му Ду́ху. Священноде́теле и же́ртвы соверше́ны, Го́сподеви принесо́стеся, му́ками всесоже́гшеся,/ и в Вы́шних све́тли Царю́ всех предстоите́. И ны́не и при́сно и во ве́ки веко́в. Ами́нь. Богородичен: Разреше́ние нам долго́в испроси́ и жития́ исправле́ние, Де́во,/ песносло́вящим вели́чия Твоя́/ и благочести́вым ра́зумом Тя сла́вящим. Песнь 7 Ирмос: От Иуде́и доше́дше, о́троцы/ в Вавило́не иногда́/ ве́рою тро́йческою пла́мень пе́щный попра́ша, пою́ще:/ отце́в Бо́же, благослове́н еси́. Припев: Святи́и му́ченицы, моли́те Бо́га о на́с. Просве́щшеся заре́ю Святы́я Тро́ицы, Богоблаже́ннии,/ тьму́ пре́лести изгна́сте и сла́ву улучи́сте, песнопою́ще:/ оте́ц на́ших Бо́же, благослове́н еси́. Припев: Святи́и му́ченицы, моли́те Бо́га о на́с. Ни́жняя оста́вльшии и Вы́шняя насле́довавшии,/ Богоно́сный Ма́рко и Кири́лл Боже́ственный/ да чту́тся, песнопою́ще:/ оте́ц на́ших Бо́же, благослове́н еси́. Сла́ва Отцу́ и Сы́ну и Свято́му Ду́ху. Дрема́ние нераде́ния во вре́мя по́двигов оттря́сше,/ соверши́сте тече́ние и собо́ром страстоте́рпец, песнопою́ще, совокупи́стеся:/ оте́ц на́ших Бо́же, благослове́н еси́. И ны́не и при́сно и во ве́ки веко́в. Ами́нь. Богородичен: Из Тебе́ спасе́ние па́че ума́ же и сло́ва, Де́во,/ возсия́ во тьме́ седя́щим сме́ртней/ и до́ле су́щия Небе́сны соде́ла, вопию́щия:/ оте́ц на́ших Бо́же, благослове́н еси́. Песнь 8 Ирмос: Победи́тели мучи́теля и пла́мене/ благода́тию Твое́ю бы́вше,/ за́поведей Твои́м зело́ прилежа́ще,/ о́троцы вопия́ху:/ благослови́те, вся дела́ Госпо́дня, Го́спода. Припев: Святи́и му́ченицы, моли́те Бо́га о на́с. Победи́тели мучи́теля, свере́по судя́щаго, показа́вшеся,/ нетле́нныя венцы́, му́ченицы, прия́сте, вопию́ще:/ благослови́те, вся дела́ Госпо́дня, Го́спода. Припев: Святи́и му́ченицы, моли́те Бо́га о на́с. Щито́м любве́, страда́льцы, и ве́ры вооруже́ни,/ вра́жия ополче́ния мече́м посеко́сте Боже́ственныя до́блести, вопию́ще:/ благослови́те, вся дела́ Госпо́дня, Го́спода. Припев: Святи́и му́ченицы, моли́те Бо́га о на́с. На земли́ пострада́вше, в Вы́шних святи́и, пра́вды вене́ц от руки́ Христо́вы прия́сте, вопию́ще:/ благослови́те, вся дела́ Госпо́дня, Го́спода. Сла́ва Отцу́ и Сы́ну и Свято́му Ду́ху. Троичен: Я́ко Еди́ницу Естество́м, я́ко Тро́ицу Тя честву́ю начерта́ньми,/ О́тче Вседержи́телю, и Сы́не, и Душе́ Святы́й, взыва́я:/ благослови́те, вся дела́ Госпо́дня, Го́спода. И ны́не и при́сно и во ве́ки веко́в. Ами́нь. Богородичен: Ста́мну Тя ма́нны жи́зненныя пропове́дуем, Благослове́нная,/ трапе́зу, и жезл, и кади́льницу,/ златы́й све́щник, го́ру же и две́рь,/ купину́ неопали́му, престо́л Вы́шняго и ми́ра спасе́ние. Песнь 9 Ирмос: Устраши́ся всяк слух/ неизрече́нна Бо́жия снизхожде́ния,/ я́ко Вы́шний во́лею сни́де да́же и до пло́ти/ от Деви́ческаго чре́ва быв Челове́к./ Те́мже Пречи́стую Богоро́дицу, ве́рнии, велича́ем. Припев: Святи́и му́ченицы, моли́те Бо́га о на́с. Стопа́м, му́ченицы, Христа́, пострада́вшаго и стра́сти умертви́вшаго, после́довавше,/ мно́гих ран искуше́ние прия́сте,/ и, обличи́вше враго́в безбо́жных служе́ния, возвели́чистеся,/ и А́нгелом я́ве уподо́бистеся. Припев: Святи́и му́ченицы, моли́те Бо́га о на́с. Яви́стеся у́глие о́гненно, приобщи́вшеся Бо́гу, всеблаже́ннии,/ и попали́сте многобо́жия ве́щь благода́тию,/ и к све́ту у́мному, ра́дующеся, преидо́сте, Богоблаже́ннии,/ озаря́юще на́ша разуме́ния. Припев: Святи́и му́ченицы, моли́те Бо́га о на́с. Поста́вльше на ка́мени мы́сленнем душ ва́ших стопы́, всехва́льнии,/ не поколеба́стеся мно́гих мук приложе́ньми./ Те́мже утвержда́йте на́ша при́сно мы́сли, кова́рствы вра́жиими коле́блемыя,/ добропобе́днии му́ченицы. Сла́ва Отцу́ и Сы́ну и Свято́му Ду́ху. Взя́стеся к пресве́тлому свиде́тельства, страстоте́рпцы, краегра́дию, к высоте́ вели́цей,/ и Ца́рство Бо́жие непоколеби́мое сподо́бистеся прия́ти,/ Ма́рко свяще́ннейший, Кири́лле сла́вне,/ его́же получи́ти всем нам моли́теся. И ны́не и при́сно и во ве́ки веко́в. Ами́нь. Богородичен: Сия́нием Твои́м, Отрокови́це, мы́сленным/ просвети́ на́ша мы́сли, Богора́дованная, и се́рдца, и мудрова́ния,/ я́ко да по стезя́м жи́зни пра́во ше́ствующе, ми́лость улучи́м,/ возвеща́юще при́сно хвалы́ Твоя́.

Минея, 1 Ноября, Канон святых Глас 6 Песнь 1 Ирмос: Я́ко по су́ху, пешеше́ствовав Изра́иль/ по бе́здне стопа́ми,/ гони́теля фарао́на/ ви́дя потопля́ема,/ Бо́гу побе́дную песнь / пои́м, вопия́ше. Припев: Святи́и безсре́бреницы Космó и Дамиáне, моли́те Бо́га о на́с. Озаря́еми сла́вою Боже́ственною, Богосве́тлии безсре́бреницы,/ озари́те на́ша ду́ши, разоря́юще страстну́ю мглу,/ я́ко да вас ве́рою почита́ем. Припев: Святи́и безсре́бреницы Космó и Дамиáне, моли́те Бо́га о на́с. Тлетво́рных очи́щшеся пе́рвее страсте́й боле́зней преложе́нием,/ очища́ете на́ша лю́тыя неду́ги, му́дрии,/ и боле́зни душе́вныя облегча́ете. Припев: Святи́и безсре́бреницы Космó и Дамиáне, моли́те Бо́га о на́с. От всех Влады́ки дар прия́сте, святи́и, чуде́с дарова́ния,/ на́ша исцели́те мно́гия и неудобьисце́льныя пло́ти стра́сти, моли́мся. Сла́ва Отцу́ и Сы́ну и Свято́му Ду́ху. Моле́ние, безсре́бреницы и вра́чеве, Бо́гу принеси́те,/ я́ко да изба́вит ны искуше́ний и скорбе́й мно́гих/ и тре́петнаго и стра́шнаго тогда́ муче́ния. И ны́не и при́сно и во ве́ки веко́в. Ами́нь. Богородичен: Зако́нов есте́ственных кроме́ ро́ждши, Чи́стая,/ Законода́теля Иису́са Изба́вителя,/ Его́же моли́ изба́вити ны, Богоро́дице, мно́гих беззако́ний на́ших. Песнь 3 Ирмос: Несть свят,/ я́коже Ты, Го́споди, Бо́же мой,/ вознесы́й рог ве́рных Твои́х, Бла́же,/ и утверди́вый нас на ка́мени/ испове́дания Твоего́. Припев: Святи́и безсре́бреницы Космó и Дамиáне, моли́те Бо́га о на́с. Мир пое́т ва́ша, святи́и, мно́гая благодея́ния/ и чуде́с мно́жества, чудотво́рцы и вра́чеве,/ А́нгел всех равностоя́тели. Припев: Святи́и безсре́бреницы Космó и Дамиáне, моли́те Бо́га о на́с. Вас обои́х, светода́телей, мо́лим,/ звезд на высоте́ лежа́щих Це́ркве та́йно, Космо́ и Дамиа́не,/ сердца́ ве́рных озари́те. Припев: Святи́и безсре́бреницы Космó и Дамиáне, моли́те Бо́га о на́с. Ка́пли источа́юще при́сно, святи́и, исцеле́ния,/ омы́йте всех душе́вную скве́рну/ и страстны́я пло́ти то́ки вся уста́вите. Сла́ва Отцу́ и Сы́ну и Свято́му Ду́ху. Се совокупи́вшеся лю́дие, святи́и, отвсю́ду/ ва́ша воспе́ти вели́кия да́ры внутрь це́ркве ва́шея,/ но всех моле́ния испо́лните. И ны́не и при́сно и во ве́ки веко́в. Ами́нь. Богородичен: Свята́я Влады́чице Чи́стая,/ Пресвято́е Сло́во воплоти́вшая сло́вом,/ безслове́сных мя страсте́й, пою́ща Тя благоче́стно/ Боже́ственными словесы́, изба́ви, Пренепоро́чная. Седален, глас 8 От исто́чника бе́здны, Иису́са,/ чуде́с струи́ благоле́пно поче́рпше, святи́и,/ та́йными ту́чами страсте́й мра́чныя о́блаки отгоня́ете/ и неду́гующим челове́ком исцеле́ния подае́те./ Тем, получи́вше здра́вое весе́лие,/ ва́ми, пресла́внии, удивля́еми, зове́м:/ Богоно́снии безсре́бреницы, моли́те Христа́ Бо́га/ согреше́ний оставле́ние дарова́ти/ пра́зднующим любо́вию святу́ю па́мять ва́шу. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Я́ко Всенепоро́чная Неве́сто Творца́,/ я́ко Неискусому́жная Ма́ти Изба́вителя,/ прия́телище я́ко су́щи Уте́шителя, Препе́тая,/ беззако́нию мя су́ща скве́рное оби́телище/ и бесо́м игра́лище в ра́зуме бы́вша,/ потщи́ся от тех злоде́йства мя изба́вити/ и све́тлое жили́ще доброде́телей соверши́, Светоно́сная, Нетле́нная,/ отжени́ о́блак страсте́й, и Вы́шняго прича́стия сподо́би,/ и Све́та невече́рняго моли́твами Твои́ми. Песнь 4 Ирмос: Христо́с моя́ Си́ла,/ Бог и Госпо́дь,/ честна́я Це́рковь/ Боголе́пно пое́т, взыва́ющи/ от смы́сла чи́ста, о Госпо́де пра́зднующи. Припев: Святи́и безсре́бреницы Космó и Дамиáне, моли́те Бо́га о на́с. Боже́ственное ро́ждие вои́стинну благопло́дно,/ ло́зы Боже́ственныя, та́йное вино́ иска́пающия,/ в весе́лии му́дрыя безсре́бреники ублажи́м. Припев: Святи́и безсре́бреницы Космó и Дамиáне, моли́те Бо́га о на́с. Ору́жие яви́стеся, устреля́ющее враги́ неви́димыя,/ и́хже и нас стрел изба́вите, заступа́юще на́шу жизнь,/ му́дрии безсре́бреницы. Припев: Святи́и безсре́бреницы Космó и Дамиáне, моли́те Бо́га о на́с. Не есть челове́к, и́же кто не стяжа́ благи́я вас моли́твенники ко Христу́,/ святи́и безсре́бреницы,/ Его́же моли́те огня́ ве́чнаго нас изба́вити. Сла́ва Отцу́ и Сы́ну и Свято́му Ду́ху. Вас, блаже́ннии, и́же призыва́ет,/ и на земли́, и в мо́ри бед вся́ких свобожда́ется,/ тем изба́вите нас сопроти́внаго обстоя́ния. И ны́не и при́сно и во ве́ки веко́в. Ами́нь. Богородичен: Всели́вся Госпо́дь, Чи́стая, посреде́ Тебе́, вмести́лище свято́е,/ исто́чник мно́гих явля́ет исцеле́ний и очище́ние страсте́й,/ Богоро́дице Присноде́во. Песнь 5 Ирмос: Бо́жиим Све́том Твои́м, Бла́же,/ у́тренюющих Ти ду́ши любо́вию озари́, молю́ся,/ Тя ве́дети, Сло́ве Бо́жий,/ и́стиннаго Бо́га,/ от мра́ка грехо́внаго взыва́юща. Припев: Святи́и безсре́бреницы Космó и Дамиáне, моли́те Бо́га о на́с. Боже́ственное привлеко́ша просвеще́ние,/ сия́ния исто́чник всеусе́рдне возлюби́вше,/ и просвеща́ют нас всегда́ чуде́с заря́ми великоимени́тии. Припев: Святи́и безсре́бреницы Космó и Дамиáне, моли́те Бо́га о на́с. Кра́сный сопру́г су́ще, му́дрии,/ бразды́ возде́лавше душ Богозна́меньми,/ при́сно пожина́юще стра́сти, я́коже пле́велы,/ и здра́вия клас стори́чествующе. Припев: Святи́и безсре́бреницы Космó и Дамиáне, моли́те Бо́га о на́с. Вжиля́еми кре́постию Христо́вою,/ в зло́бе си́льнаго всю кре́пость погуби́сте,/ его́же мучи́тельства нас изба́вите,/ неусы́пнии предста́тели на́ши, безсре́бреницы. Сла́ва Отцу́ и Сы́ну и Свято́му Ду́ху. Ше́ствовати стези́ нам пра́выя/ и твори́ти во́лю Бо́жию укрепи́те, святи́и,/ уставляю́ще стра́сти серде́ц на́ших/ и теле́с неду́ги облегчева́юще. И ны́не и при́сно и во ве́ки веко́в. Ами́нь. Богородичен: Изба́ви мя, Влады́чице Блага́я, искуше́ний врага́,/ и гее́нны муче́ния, и обдержа́щаго мя плене́ния/ и не посрами́ мене́, песносло́вящаго Тя. Песнь 6 Ирмос: Жите́йское мо́ре,/ воздвиза́емое зря напа́стей бу́рею,/ к ти́хому приста́нищу Твоему́ прите́к, вопию́ Ти:/ возведи́ от тли живо́т мой,/ Многоми́лостиве. Припев: Святи́и безсре́бреницы Космó и Дамиáне, моли́те Бо́га о на́с. Живу́ще, му́ченицы, ра́достно на Небесе́х,/ в честны́й храм ваш приити́ потщи́теся/ и на́ша неду́ги теле́сныя и серде́чныя стра́сти исцели́те. Припев: Святи́и безсре́бреницы Космó и Дамиáне, моли́те Бо́га о на́с. В Боже́ственное благоле́пие оде́явшеся кра́сно, я́ко в сугу́бицу, святи́и,/ на́ги ны су́ща доброде́телей Боже́ственно оде́йте/ и страсте́й безче́стия ны́не обнажи́те. Припев: Святи́и безсре́бреницы Космó и Дамиáне, моли́те Бо́га о на́с. Я́ко украше́нием чуде́с оде́яни всегда́,/ спаси́телие ми́ру яви́стеся,/ мирска́го у́бо вре́да вся ны изба́вите, святи́и,/ и страсте́й нече́стия и муче́ния. Сла́ва Отцу́ и Сы́ну и Свято́му Ду́ху. Умертви́вше, святи́и, стра́сти вся пло́ти смертоно́сныя благода́тию,/ животво́рными чуде́с приложе́ньми оживли́ете стра́ждущия/ и врат сме́рти избавля́ете. И ны́не и при́сно и во ве́ки веко́в. Ами́нь. Богородичен: Не опали́в утро́бы Твоея́, Огнь сый, Иису́с,/ из Тебе́ пло́тию происхо́дит;/ Сего́, Чи́стая, моли́ огни́ и вся́ких мук изба́вити/ ве́рою воспева́ющия Тя. Кондак, глас 2 Благода́ть прии́мше исцеле́ний,/ простира́ете здра́вие су́щим в ну́ждах,/ вра́чеве, чудотво́рцы пресла́внии,/ но ва́шим посеще́нием ра́тников де́рзости низложи́те,/ мир исцеля́юще чудесы́. Икос Вся́каго ра́зума и му́дрости прехо́дит сло́во му́дрых враче́в,/ и всем зна́ние подаю́т:/ Высоча́йшаго бо благода́ть прие́мше,/ неви́димо здра́вие да́руют всем./ Отню́дуже и мне по́вести благода́ть дарова́ся пе́ти,/ я́ко Богоно́сныя уго́дники Христо́вы и служи́тели,/ исцеле́ний мно́жество подаю́щия,/ боле́зней бо вся избавля́ют,/ мир исцеля́юще чудесы́. Песнь 7 Ирмос: Росода́тельну у́бо пещь/ соде́ла А́нгел/ преподо́бным отроко́м,/ халде́и же опаля́ющее веле́ние Бо́жие мучи́теля увеща́ вопи́ти:/ благослове́н еси́, Бо́же оте́ц на́ших. Припев: Святи́и безсре́бреницы Космó и Дамиáне, моли́те Бо́га о на́с. Впери́сте ум на Небе́сная до́брых приложе́ньми/ и бы́сте о́бщницы Боже́ственных даро́в,/ крила́ти су́ще орли́, всю прохо́дите зе́млю, чудоде́йствующе при́сно. Припев: Святи́и безсре́бреницы Космó и Дамиáне, моли́те Бо́га о на́с. Просвети́стеся, я́коже добросия́нное, безсре́бреницы, зла́то,/ Боже́ственною благода́тию исцеле́ний обогати́сте мно́жества./ Тем уще́дрите ны, обурева́емыя лю́тых нахожде́ний искуше́ньми. Припев: Святи́и безсре́бреницы Космó и Дамиáне, моли́те Бо́га о на́с. Преложи́вше Го́споду чи́сты ва́ша ду́хи, безсре́бреницы,/ дар от Него́ прия́сте нечи́стыя ду́хи прогони́ти всегда́,/ и́хже зло́бы го́рькия изба́вите всех нас. Сла́ва Отцу́ и Сы́ну и Свято́му Ду́ху. Усну́сте пра́ведно до́лжным сном, му́дрии безсре́бреницы,/ и неусы́пнии моли́твенницы есте́ о ве́рных;/ тем душ на́ших при́сно и теле́с лю́тыя стра́сти успи́те. И ны́не и при́сно и во ве́ки веко́в. Ами́нь. Богородичен: Моля́щи не преста́й Человеколю́бца, Бо́га на́шего, Всенепоро́чная,/ я́ко да прии́мем всеконе́чне отпуще́ние злых/ и полу́чим на Небесе́х угото́ванная блага́я любя́щим Его́. Песнь 8 Ирмос: Из пла́мене преподо́бным ро́су источи́л еси́/ и пра́веднаго же́ртву водо́ю попали́л еси́,/вся бо твори́ши, Христе́, то́кмо е́же хоте́ти:/ Тя превозно́сим во вся ве́ки. Припев: Святи́и безсре́бреницы Космó и Дамиáне, моли́те Бо́га о на́с. Неду́гов вся́ческих су́ще ра́тницы , посо́бием Боже́ственнаго Ду́ха, святи́и, утоли́те на́ших душ неду́гования/ и теле́с облегчи́те боле́зни. Припев: Святи́и безсре́бреницы Космó и Дамиáне, моли́те Бо́га о на́с. Ви́дителие Госпо́дни ны́не красоты́ су́ще и́стинно,/ присеща́йте сей кра́сный Богоно́сный храм ваш/ и исто́чник чуде́с мно́гих соверша́йте. Припев: Святи́и безсре́бреницы Космó и Дамиáне, моли́те Бо́га о на́с. От исто́чника ра́йска исходя́ще, я́ко ре́ки две,/ все напая́ете лице́ земли́ исцеле́ний струя́ми,/ неду́гов изсуша́юще ту́чи. Припев: Святи́и безсре́бреницы Космó и Дамиáне, моли́те Бо́га о на́с. Блаже́нныя наде́жды прии́мше, от всех досто́йно блажите́ся/ я́ко испо́лнителие, блаже́ннии, Бо́га на́шего Боже́ственных хоте́ний,/ безсре́бреницы я́вльшеся. Сла́ва Отцу́ и Сы́ну и Свято́му Ду́ху. Вра́чеве неисце́льных страсте́й, безсре́бреницы,/ неисце́льныя стра́сти на́ша исцели́те,/ и искуше́ний бу́рю утоли́те, и уны́ния разжени́те о́блаки. И ны́не и при́сно и во ве́ки веко́в. Ами́нь. Троичен: Со А́нгелы святы́ми песносло́вим Отца́, и Сло́ва, и Ду́ха Свята́го,/ Еди́но в Трех Ипоста́сех Божество́,/ Еди́но Ца́рство и Еди́ну Власть. Песнь 9 Ирмос: Бо́га/ челове́ком невозмо́жно ви́дети,/ на Него́ же не сме́ют чи́ни А́нгельстии взира́ти;/ Тобо́ю бо, Всечи́стая, яви́ся челове́ком/ Сло́во воплоще́нно,/ Его́же велича́юще,/ с Небе́сными во́и Тя ублажа́ем. Припев: Святи́и безсре́бреницы Космó и Дамиáне, моли́те Бо́га о на́с. Сей храм ваш чудесы́ всеблаголе́пно, я́ко звезда́ми све́тлыми, украша́ется/ и, согла́сно веселя́ся, всегда́ блажи́т/ и честну́ю ва́шу па́мять пра́зднует благоче́стно,/ честни́и безсре́бреницы. Припев: Святи́и безсре́бреницы Космó и Дамиáне, моли́те Бо́га о на́с. Я́ко свет, я́ко два вели́ка со́лнца,/ разу́мную твердь украша́ете, безсре́бреницы,/ и зна́мений заря́ми просвеща́ете всех ве́рных сердца́./ Тем зове́м: разреши́те тьму страсте́й на́ших, моли́мся. Припев: Святи́и безсре́бреницы Космó и Дамиáне, моли́те Бо́га о на́с. В се́ла Вы́шняя вселя́еми, святи́и,/ посреде́ нас бы́ти неви́димо милосе́рдуйте,/ и́же посреде́ Боже́ственнаго хра́ма ва́шего/ пе́сни возсыла́ющих Вседержи́телю/ и блажа́щих приле́жно вас, всехва́льнии. Сла́ва Отцу́ и Сы́ну и Свято́му Ду́ху. Земля́ с Вы́шними весели́тся в све́тлый Боже́ственный пра́здник ваш, святи́и:/ его́же соверша́ющих, нас изба́вите тьмы, и боле́зней, и вся́кия тесноты́,/ и е́же во а́де лю́таго, му́дрии, муче́ния. И ны́не и при́сно и во ве́ки веко́в. Ами́нь. Богородичен: Тре́петное рожде́ние иму́щи, Всечи́стая,/ в Стра́шный день испыта́ния, молю́ся, стра́шнаго отве́та изба́ви мя/ и спаса́емых стоя́ния прича́стника сотвори́, ве́рно пою́ща Тя, Богора́дованная. Светилен Благода́ть врачева́ний от Бо́га прие́мше, безсре́бреницы блаже́ннии,/ е́же врачева́ти неду́жныя/ и исцеля́ти вся ве́рно притека́ющия к Боже́ственному ва́шему хра́му./ Сего́ ра́ди согла́сно ублажа́ем досто́йне честну́ю ва́шу па́мять. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Родила́ еси́, Пречи́стая, Бо́жие Бо́га Сло́во,/ ми́рови спаси́тельное соверша́ющаго всему́дре строе́ние изря́дное./ Сего́ ра́ди Тя вси песносло́вим досто́йне,/ я́ко моля́щуюся к Нему́, изба́витися нам неду́гов и вся́ких бед.

Минея, 22 Сентября, Кано́н апо́стола Глас 2 Песнь 1 Ирмос: Гряди́те, лю́дие,/ пои́м песнь Христу́ Бо́гу,/ разде́льшему мо́ре и наста́вльшему лю́ди,/ я́же изведе́ из рабо́ты еги́петския,// я́ко просла́вися. Припев: Святы́й апо́столе Кодрáте, моли́ Бо́га о нас. Венценося́ Царю́ Сил предста́в,/ моли́ озари́ти соверша́ющия па́мять твою́ сию́ све́тло,/ блаже́нне апо́столе. Припев: Святы́й апо́столе Кодрáте, моли́ Бо́га о нас. Назида́я на основа́нии ве́ры благочести́вых исполне́ние/ крепча́йшими твои́ми уче́нии, богоглаго́льниче,/ и́дольскую всю лесть низврати́л еси́. Сла́ва Отцу́ и Сы́ну и Свято́му Ду́ху. Священноде́йствуя Свяще́нное Ева́нгелие свяще́ннейшими словесы́ твои́ми,/ ду́ши Творцу́ твоему́ освяти́л еси́ ве́рою, приснопа́мятне Кодра́те,/ кре́постию Ду́ха. И ны́не и при́сно и во ве́ки веко́в. Ами́нь. Богородичен: От Отрокови́цы пло́тию Неискусобра́чныя Творе́ц тва́ри ражда́емь,/ по Рождестве́, я́ко пре́жде Рождества́, Де́ву храни́т Ю,/ я́коже благоволи́. Песнь 3 Ирмос: Утверди́ нас в Тебе́, Го́споди,/ Дре́вом умерщвле́й грех,/ и страх Твой всади́// в сердца́ нас, пою́щих Тя. Припев: Святы́й апо́столе Кодрáте, моли́ Бо́га о нас. Соверша́я стра́шная, Кодра́те, чудеса́,/ неве́рных в ве́ру Боже́ственную приве́л еси́,/ я́ко апо́стол богоприя́тен, я́ко че́стен иера́рх, свяще́ннейше. Припев: Святы́й апо́столе Кодрáте, моли́ Бо́га о нас. Боже́ственными уче́нии мно́гия просвети́л еси́,/ Све́та бо слуга́ яви́лся еси́, просвети́вшаго концы́,/ священнонача́льниче Кодра́те, боже́ственными сия́ньми. Сла́ва Отцу́ и Сы́ну и Свято́му Ду́ху. Велича́йших благи́х хода́тай был еси́ па́стве,/ изыма́я сию́ тьмы неве́дения/ и просвеща́я ту пресла́вных чуде́с показа́ньми. И ны́не и при́сно и во ве́ки веко́в. Ами́нь. Богородичен: Всели́ся в Тя Огнь нестерпи́мый,/ не опали́в утро́бы Твоея́, Богоро́дице,/ и попали́ стра́сти на́ша, и ти́ну пре́лести испепели́. Седален, глас 3 Красне́йшаго добро́тою су́ща па́че сыно́в челове́ческих,/ Сло́во Пребезнача́льное, воплоще́нное па́че ума́, Кодра́те, пропове́дал еси́,/ тем просвети́л еси́ во тьме су́щия,/ свет язы́ком быв я́ко иера́рх боже́ствен./ Тем твое́ светоно́сное торжество́ ве́рою соверша́юще, пое́м тя. Песнь 4 Ирмос: Услы́шах, Го́споди,/ слух Твоего́ смотре́ния/ и просла́вих Тя,// Еди́не Человеколю́бче. Припев: Святы́й апо́столе Кодрáте, моли́ Бо́га о нас. Земледе́лав ни́ву серде́чную,/ серпо́м слове́с твои́х зло́бы те́рние все искорени́л еси́. Припев: Святы́й апо́столе Кодрáте, моли́ Бо́га о нас. Исцеле́ний да́ры всем нам гроб твой то́чит,/ свяще́нне Кодра́те, хва́лящим тя. Припев: Святы́й апо́столе Кодрáте, моли́ Бо́га о нас. Ми́лостивно преклоня́яся, от злолю́тых изыма́еши бед,/ свяще́нне Кодра́те, моля́щих тя. Сла́ва Отцу́ и Сы́ну и Свято́му Ду́ху. Свеща́ми слове́с твои́х просвеща́я пре́лестию омраче́нныя,/ и хвра́стную пре́лесть всю попали́л еси́. И ны́не и при́сно и во ве́ки веко́в. Ами́нь. Богородичен: От чи́стых Твои́х воплоти́ся крове́й Соде́тель, Богоро́дице,/ и истле́вшая вся обнови́л есть. Песнь 5 Ирмос: Све́та Пода́телю/ и веко́в Тво́рче, Го́споди,/ во све́те Твои́х повеле́ний наста́ви нас,// ра́зве бо Тебе́, ино́го бо́га не зна́ем. Припев: Святы́й апо́столе Кодрáте, моли́ Бо́га о нас. Чи́стую твою́ ду́шу чисте́йший Бог селе́ние Своея́ сла́вы обре́т,/ очища́ет тобо́ю ду́ши, оскве́рншияся лю́тыми грехопаде́ньми. Припев: Святы́й апо́столе Кодрáте, моли́ Бо́га о нас. Е́ллинстии мудрецы́, твои́ми побежде́ни му́дрыми догма́ты,/ испове́дати покори́шася, блаже́нне, Христа́ Соде́теля,/ Отца́ Безнача́льнаго Му́дрость и Си́лу. Сла́ва Отцу́ и Сы́ну и Свято́му Ду́ху. Провозглаша́я свяще́нно су́щую челове́ком све́тлость/ от Отца́ све́тов, Кодра́те,/ просвети́л еси́ лю́ди чествова́ти и сла́вити Тро́ицу Неразде́льную. И ны́не и при́сно и во ве́ки веко́в. Ами́нь. Богородичен: Воплоще́нна нам во дву естества́х Сы́на родила́ еси́,/ из Отца́ пре́жде всех веко́в, Чи́стая, рожде́ннаго безсе́менно,/ безле́тно, я́ко Еди́н весть. Песнь 6 Ирмос: В бе́здне грехо́вней валя́яся,/ неизсле́дную милосе́рдия Твоего́ призыва́ю бе́здну:// от тли, Бо́же, мя возведи́. Припев: Святы́й апо́столе Кодрáте, моли́ Бо́га о нас. Высо́кое не́бо был еси́, сла́ву пове́дающее Бо́жию спаси́тельную,/ я́ко иера́рх боже́ственный,/ я́ко сла́вен ты, Кодра́те, апо́стол. Припев: Святы́й апо́столе Кодрáте, моли́ Бо́га о нас. Еди́но естество́ Божества́ безнача́льное,/ еди́но Госпо́дство пропове́дуя, всему́дре,/ многобо́жия разруши́л еси́, Кодра́те, мра́чное безу́мие. Сла́ва Отцу́ и Сы́ну и Свято́му Ду́ху. Зако́ном естества́ во гро́бе твое́ те́ло, блаже́нне, свяще́ннейше ны́не лежа́що,/ чудоде́йствует пресла́вная па́че естества́, Кодра́те приснопа́мятне. И ны́не и при́сно и во ве́ки веко́в. Ами́нь. Богородичен: Не́бо простры́й хоте́нием,/ ино́е Не́бо на земли́ Тя показа́, Богороди́тельнице Влады́чице,/ и Тобо́ю су́щия во тьме просвети́. Кондак, глас 8 Я́ко священнонача́льника че́стна и страда́льца тверде́йша,/ вселе́нная прино́сит Тебе́, Го́споди, Кодра́та апо́стола/ и пе́сньми почита́ет честну́ю его́ па́мять,/ прося́щи всегда́ прегреше́ний оставле́ния// тем дарова́тися пою́щим его́, Благоутро́бне. Икос Му́драго иера́рха почти́м, я́ко па́стыря ве́рна и учи́теля,/ я́ко во цве́тнице страда́ния процвете́ ши́пок свяще́ннейший/ и ве́рныя ны облагово́ни,/ чуде́с же луча́ми и дея́нии доброде́тельными,/ просвеще́ния испо́лнив всю зе́млю исцеле́ний све́тлостьми,/ удиви́ бо его́ Бог всем почита́ющим пе́сньми честну́ю его́ па́мять,/ я́ко Благоутро́бен. Песнь 7 Ирмос: О́бразу злато́му на по́ле Деи́ре служи́мую трие́ твои́ о́троцы небрего́ша безбо́жнаго веле́ния,/ посреде́ же огня́ вве́ржени,/ ороша́еми, поя́ху:// благослове́н еси́, Бо́же оте́ц на́ших. Припев: Святы́й апо́столе Кодрáте, моли́ Бо́га о нас. Возвы́сив ум к Пе́рвому Бла́гу,/ богови́днейший храм Тро́ицы был еси́/ и сущия во глубине́ озлобле́ния возвы́сил еси́ высоча́йшими твои́ми уче́нии, зову́щия:/ благослове́н еси́, Бо́же отце́в на́ших. Припев: Святы́й апо́столе Кодрáте, моли́ Бо́га о нас. Сокруши́в хра́мы и́дольския моли́тв раскопа́ньми,/ созда́л еси́ Боже́ственным Ду́хом хра́мы Бо́жия, свяще́ннейше о́тче,/ и спаса́емых мно́жества приве́л еси́, зову́щия:/ благослове́н еси́, Бо́же отце́в на́ших. Сла́ва Отцу́ и Сы́ну и Свято́му Ду́ху. Огнедохнове́н сый,/ я́ко духо́вный огнь Боже́ственный, всему́дре, в се́рдцы твое́м име́я всегда́,/ свеща́ ви́делся еси́, паля́щая всю хвра́стную лесть и вопию́щия просвеща́ющая:/ благослове́н еси́, Бо́же отце́в на́ших. И ны́не и при́сно и во ве́ки веко́в. Ами́нь. Богородичен: Изба́вльшеся Тобо́ю кля́твы пра́дедния, Богора́дованная,/ до́брых вину́ Тя ве́мы, я́ко всевино́вное ро́ждшую Сло́во,/ па́че ума́ же и чудесе́,/ и вопие́м Ти, Пречи́стая, Благослове́нная, Бо́га пло́тию ро́ждшая. Песнь 8 Ирмос: В пещь о́гненную ко отроко́м евре́йским снизше́дшаго/ и пла́мень в ро́су прело́жшаго Бо́га,/ по́йте, дела́, я́ко Го́спода,// и превозноси́те во вся ве́ки. Припев: Святы́й апо́столе Кодрáте, моли́ Бо́га о нас. Утвержде́ны на у́мнем Ка́мени душе́вныя име́я стопы́,/ запя́л еси́, блаже́нне, Госпо́дни враги́/ и вся, Кодра́те, утверди́л еси́ пою́щия/ и превознося́щия Христа́ во вся ве́ки. Припев: Святы́й апо́столе Кодрáте, моли́ Бо́га о нас. Укра́шену доброде́тельми име́я ду́шу и се́рдце,/ украси́л еси́ сло́вом уче́ния ду́ши,/ избавля́я неле́поты вся́каго идолонеи́стовства,/ Кодра́те богоглаго́ливе. Сла́ва Отцу́ и Сы́ну и Свято́му Ду́ху. Я́ко учени́к Иису́сов, я́ко апо́стол све́тел,/ я́ко Со́лнца Пра́вды светови́дная мо́лния, Кодра́те,/ просвети́, освяти́ соверша́ющия святу́ю твою́ па́мять. И ны́не и при́сно и во ве́ки веко́в. Ами́нь. Богородичен: Свяще́ннейшими Тя гла́сы свяще́ннейшии Бо́жии, Чи́стая, проро́цы/ бу́дущую Ма́терь провозгласи́ша я́сно/ все́ми Влады́чествующаго, Пречи́стая,/ Его́же благослови́м во вся ве́ки. Песнь 9 Ирмос: От Бо́га Бо́га Сло́ва неизрече́нною му́дростию/ прише́дшаго обнови́ти Ада́ма,/ я́дию в тле́ние па́дшаго лю́те,/ от Святы́я Де́вы неизрече́нно воплоти́вшагося нас ра́ди,// ве́рнии, единому́дренно пе́сньми велича́ем. Припев: Святы́й апо́столе Кодрáте, моли́ Бо́га о нас. Укра́шен ра́зумом кра́сному Влады́це предстои́ши,/ светле́йш при́сно, я́ко иера́рх богоприя́тен, я́ко апо́стол боже́ствен,/ со все́ми апо́столы и́стинно мир ми́ру, Кодра́те, испроша́я. Припев: Святы́й апо́столе Кодрáте, моли́ Бо́га о нас. Твои́х Магниси́я иму́щи ра́ку моще́й, я́ко боже́ственный киво́т,/ и от него́ вся́ку, Кодра́те, по́льзу исчерпа́ет любо́вию,/ оби́тели же Небе́сныя, твою́ ду́шу име́ющия,/ со все́ми святы́ми веселя́тся. Сла́ва Отцу́ и Сы́ну и Свято́му Ду́ху. Светоза́рный твой день, светоно́сная твоя́ па́мять,/ и́стинно благосла́вный твой пра́здник всем, я́ко со́лнце, возсия́,/ ю́же ве́рно соверша́ем, Кодра́те,/ очище́ние грехо́в моля́щеся моли́твами твои́ми обрести́ и ве́лию ми́лость. И ны́не и при́сно и во ве́ки веко́в. Ами́нь. Богородичен: Пощади́ мя, Го́споди, пощади́, егда́ хо́щеши суди́ти ми,/ и не осуди́ мене́ во огнь, ни я́ростию Твое́ю обличи́ мене́:/ мо́лит Тя Де́ва, Тебе́ ро́ждшая, Христе́,/ апо́столов мно́жество и с проро́ки му́ченицы. Светилен Тече́ние кра́сных твои́х ног, Кодра́те апо́столе, возврати́в,/ к ше́ствию Небе́сному возше́л еси́ ра́дуяся,/ и, Тро́ице предста́в, во Отце́ ви́диши Сы́на и Ду́ха Боже́ственнаго,/ сего́ ра́ди ве́рою пресвяще́нную твою́ и боже́ственную пра́зднуем па́мять.

Минея, 28 Мая, Канон святителя Глас 8 Песнь 1 Ирмос: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:/ Изба́вителю и Бо́гу на́шему пои́м. Припев: Святи́телю о́тче Игна́тие, моли́ Бо́га о на́с. О́тче Богому́дре, святи́телю Игна́тие,/ отве́рзи ми, недосто́йному, устне́ воспе́ти тя/ и приими́, я́ко кади́ло, от убо́жества моего́,/ е́же ти принесо́х, недосто́йный. Припев: Святи́телю о́тче Игна́тие, моли́ Бо́га о на́с. Воспое́м вси свяще́ннаго святи́теля Игна́тия,/ почти́м засту́пника, и утвержде́ние гра́ду на́шему Росто́ву,/ и храни́теля неусы́пна. Сла́ва Отцу́ и Сы́ну и Свято́му Ду́ху. Спаси́тельным Христо́вым за́поведем после́довал еси́, прему́дре святи́телю Игна́тие:/ вдови́цам и си́рым был еси́ засту́пник/ и гра́ду на́шему вели́кое защище́ние. И ны́не и при́сно и во ве́ки веко́в. Ами́нь. Богородичен: Пречи́стая Богоро́дице, Соде́теля и Спа́са поро́ждши всем, пою́щим Тя,/ спаси́ от бед град Твой Росто́в,/ непреста́нно моля́щи Сы́на Твоего́ за ны и Бо́га на́шего. Песнь 3 Ирмос: Небе́снаго кру́га Верхотво́рче, Го́споди,/ и Це́ркве Зижди́телю,/ Ты мене́ утверди́ в любви́ Твое́й,/ жела́ний кра́ю ве́рных утвержде́ние,/ еди́не Человеколю́бче. Припев: Святи́телю о́тче Игна́тие, моли́ Бо́га о на́с. Сокруши́ супоста́ты безбо́жныя, преподо́бне, моле́нием твои́м к Творцу́ и Бо́гу/ и си́лу их, вооруже́нную на ны,/ пога́нская наше́ствия покори́ под но́ги ве́рному во́инству на́шему. Припев: Святи́телю о́тче Игна́тие, моли́ Бо́га о на́с. Ты прояви́л еси́, Влады́ко, после́днему ро́ду на́шему чудотво́рца святи́теля Игна́тия,/ гра́ду Росто́ву утвержде́ние,/ Це́ркви Твое́й и́стовое пра́вило,/ иере́йскому же чи́ну наста́вника. Сла́ва Отцу́ и Сы́ну и Свято́му Ду́ху. Прикосну́вшуся, свя́те, пречестна́го те́ла твоего́ Стефа́ну архимандри́ту,/ пе́рсту ручно́му, к дла́ни прико́рчившуся от рожде́ния,/ Бо́жиею благода́тию дал еси́ простира́тися. И ны́не и при́сно и во ве́ки веко́в. Ами́нь. Богородичен: Бу́ди ми, Де́во, прибе́жище, и приста́нище,/ и стена́ необори́ма, и Засту́пница,/ Я́же Бо́га поро́ждши пло́тию, Пречи́стая,/ Изба́вителя всеще́драго и Спа́са пою́щим Тя, Богоневе́стная. Седален, глас 8 Украша́яся прему́дростию ра́зума,/ горды́ню низложи́л еси́ плотски́я тяготы́/ и был еси́ оби́телище Ду́ха Пресвята́го,/ непреме́нным простира́яся ра́зумом к Лю́бящему тя./ Тем, ре́вностию Боже́ственною разгара́яся, сла́вне,/ си́рых, и убо́гих, и вдови́ц был еси́ засту́пник,/ гра́да же Росто́ва утвержде́ние,/ яви́вся А́нгелом собесе́дник, святи́телю Игна́тие,/ моли́ Христа́ Бо́га грехо́в оставле́ние дарова́ти,/ чту́щим любо́вию святу́ю па́мять твою́. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Небе́сную дверь и киво́т,/ пресвяту́ю го́ру, све́тлый о́блак воспои́м,/ неопали́мую купину́, слове́сный рай, Е́вы воззва́ние,/ вселе́нныя всея́ вели́кое сокро́вище,/ я́ко спасе́ние в Ней соде́лася ми́рови и оставле́ние дре́вних согреше́ний./ Сего́ ра́ди вопие́м Ей:/ моли́ся Сы́ну Твоему́ прегреше́ний оставле́ние дарова́ти/ благоче́стно покланя́ющимся Всесвято́му Рождеству́ Твоему́. Песнь 4 Ирмос: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́. Припев: Святи́телю о́тче Игна́тие, моли́ Бо́га о на́с. Благода́тию Богоно́сец нарица́емь вои́стинну, Игна́тие,/ во Христа́ обле́клся еси́ жития́ ра́ди чистоты́/ и научи́л еси́ сла́вити в Тро́ице Еди́наго Бо́га. Припев: Святи́телю о́тче Игна́тие, моли́ Бо́га о на́с. Изба́ви ста́до твое́ от грехо́вныя бу́ри, Игна́тие святи́телю, бед же и скорбе́й,/ приводя́ в приста́нище Боже́ственныя́ во́ли Его́. Сла́ва Отцу́ и Сы́ну и Свято́му Ду́ху. Яви́лся еси́ вои́стинну Христо́в уго́дник, о́тче Игна́тие:/ моля́ся не преста́й от напа́стей, и бед, и скорбе́й изба́вити ста́до твое́,/ от ну́жды и печа́ли. И ны́не и при́сно и во ве́ки веко́в. Ами́нь. Богородичен: Свяще́нно сла́вят Тя святи́тельстии собо́ри и всех преподо́бных ли́цы:/ Зижди́теля бо их я́ко Младе́нца на руку́ Твое́ю понесла́ еси́, Богоро́дице. Песнь 5 Ирмос: Вcку́ю мя отри́нул еси́/ от лица́ Твоего́, Све́те незаходи́мый,/ и покры́ла мя есть чужда́я тьма, окая́ннаго?/ Но обрати́ мя и к све́ту за́поведей Твои́х/ пути́ моя́ напра́ви, молю́ся. Припев: Святи́телю о́тче Игна́тие, моли́ Бо́га о на́с. О́крест стоя́ще ра́ки твоея́ святи́телю Игна́тие,/ тя име́ем к Бо́гу хода́тая, и заступле́ние гра́да твоего́ Росто́ва,/ и утвержде́ние необори́мо. Припев: Святи́телю о́тче Игна́тие, моли́ Бо́га о на́с. Ми́лостив быв убо́гим, ми́лость душе́вную испроси́, прехва́льне,/ ми́лостыню стяжа́в, о́тче Игна́тие,/ свешу́ све́тлу устро́ил еси́. Сла́ва Отцу́ и Сы́ну и Свято́му Ду́ху. Жили́ще быв Пресвята́го Ду́ха вои́стинну, блаже́нне Игна́тие,/ Того́ явле́нными Боже́ственными дарми́ до́бре обогати́лся еси́. И ны́не и при́сно и во ве́ки веко́в. Ами́нь. Богородичен: Ми́ро та́йное Тя имену́ем, Пречи́стая,/ я́ко ро́ждши Бо́га пло́тию,/ источа́ющаго Боже́ственное ми́ро всем, притека́ющим под кров Твой. Песнь 6 Ирмос: Очи́сти мя, Спа́се,/ мно́га бо беззако́ния моя́,/ и из глубины́ зол возведи́, молю́ся,/ к Тебе́ бо возопи́х, и услы́ши мя,/ Бо́же спасе́ния моего́. Припев: Святи́телю о́тче Игна́тие, моли́ Бо́га о на́с. Житие́ твое́ целому́дренно, священноявле́нне, соверши́в, пра́вдою украси́лся еси́,/ и му́жеством смы́сла доброде́тели сочта́в себе́,/ преблаже́нне святи́телю Игна́тие. Припев: Святи́телю о́тче Игна́тие, моли́ Бо́га о на́с. Сохрани́ град твой Росто́в, преблаже́нне святи́телю Игна́тие,/ от безбо́жных и чужеве́рных нахожде́ний и усо́бныя ра́ти,/ моля́ся не преста́й Влады́це Христу́ о ста́де твое́м. Сла́ва Отцу́ и Сы́ну и Свято́му Ду́ху. Ты у́бо по сме́рти, я́ко жив,/ на погребе́нии твое́м прие́м сви́тки твои́ма рука́ма,/ и́хже свяще́нники в животе́ твое́м освяти́л еси́ Бо́гу,/ рече́ бо Госпо́дь:/ прославля́ющаго Мя просла́влю. И ны́не и при́сно и во ве́ки веко́в. Ами́нь. Богородичен: Превы́шши бысть Вы́шних сил, Богоблагода́тная,/ заче́ншая Сло́во Бо́жие неизрече́нно, вся́ческая сло́вом сотво́ршее,/ от Отца́ пре́жде век ро́ждшееся,/ Того́, Чи́стая, ро́ждшая неизрече́нно. Кондак, глас 4 Яви́ся днесь пресве́тлая па́мять твоя́,/ святи́телю преблаже́нне Игна́тие,/ в ми́ре све́тло сия́ющи и явля́ющи всем Боже́ственное сия́ние. Икос Из чре́ва ма́терня освяще́ннаго святи́теля Госпо́дня/ похва́лим ны́не вси, преподо́бнаго Игна́тия,/ гра́да Росто́ва утвержде́ние,/ благода́тныя да́ры прии́мша Боже́ственныя сла́вы и в чудесе́х сла́внаго,/ вси, ве́рою те́плою притека́юще к ра́це моще́й его́./ Тем и аз, недосто́йный и гре́шный, наде́юся/ моли́твами его́ ко Влады́це и Пречи́стей Его́ Ма́тери ми́лость прия́ти в День су́дный/ соде́янных мно́ю зол и проще́ние получи́ти,/ явля́ющи всем Боже́ственное сия́ние. Песнь 7 Ирмос: От Иуде́и доше́дше, о́троцы/ в Вавило́не иногда́/ ве́рою Тро́ическою пла́мень пе́щный попра́ша, пою́ще:/ отце́в Бо́же, благослове́н еси́. Припев: Святи́телю о́тче Игна́тие, моли́ Бо́га о на́с. Отве́рзи ми дверь покая́ния, святи́телю Игна́тие,/ да омы́ю скве́рну окая́нныя моея́ души́/ и те́ла моего́ вся чу́вства,/ да приношу́ песнь Го́сподеви, све́тло зовя́:/ оте́ц на́ших Бо́же, благослове́н еси́. Припев: Святи́телю о́тче Игна́тие, моли́ Бо́га о на́с. Иму́ще тя твои́ раби́ засту́пника те́пла/ и сте́ну необори́му, гра́да Росто́ва утвержде́ние,/ не убои́мся супоста́тных враго́в,/ но побежда́ем си́лою Христо́вою, взыва́юще:/ оте́ц на́ших Бо́же, благослове́н еси́. Сла́ва Отцу́ и Сы́ну и Свято́му Ду́ху. Уста́вы оте́ческими утверди́л еси́, му́дре,/ це́рковь Пречи́стыя Ма́тере Бо́жия,/ и свяще́нства ле́потою преукра́шенно сохрани́л еси́,/ и уче́ньми твои́ми наказа́л еси́ взыва́ти:/ оте́ц на́ших Бо́же, благослове́н еси́. И ны́не и при́сно и во ве́ки веко́в. Ами́нь. Богородичен: Спаси́тельное приста́нище, Богоро́дице Де́во, Тя иму́ще,/ жите́йских бед и бу́ри избе́гаем,/ к приста́нищу тишины́ Твоея́ приходя́ще и Сы́ну Твоему́ вопию́ще:/ оте́ц на́ших Бо́же, благослове́н еси́. Песнь 8 Ирмос: На горе́ святе́й просла́вльшася/ и в купине́ огне́м Приноде́вы/ Моисе́ови та́йну я́вльшаго,/ Го́спода по́йте/ и превозноси́те во вся ве́ки. Припев: Святи́телю о́тче Игна́тие, моли́ Бо́га о на́с. Побежде́н быв враго́м прегреше́ньми мно́гими молв жите́йских,/ ве́рою прихожду́ и, я́ко Манасси́я, вопию́ Ти, Христе́,/ святи́теля моле́нием спаса́емь, зову́:/ Го́спода по́йте и превозноси́те Его́ во ве́ки. Припев: Святи́телю о́тче Игна́тие, моли́ Бо́га о на́с. Вооружа́ются на ны, смире́нныя лю́ди твоя́,/ святи́телю пречестны́й Игна́тие, сы́нове Ага́рины,/ но сокруши́ их неви́димою си́лою,/ моле́нием твои́м ко Влады́це за при́сныя рабы́, пою́щия:/ Го́спода по́йте и превозноси́те Его́ во ве́ки. Сла́ва Отцу́ и Сы́ну и Свято́му Ду́ху. Моли́твы, преблаже́нне, и моле́ния творя́ща тебе́/ приле́жно к Бо́гу при́сно за рабы́ твоя́,/ в печа́лех засту́пника и побо́рника имуще тя к Бо́гу, от всех бед спаса́емся,/ Го́спода пою́ще и превознося́ще Его́ во ве́ки. И ны́не и при́сно и во ве́ки веко́в. Ами́нь. Богородичен: Влады́чице, Де́во Чи́стая Препросла́вленная,/ со святи́телем к Сы́ну Твоему́, Царю́, моли́ся приле́жно,/ от вся́кия ну́жды и беды́ изба́вится гра́ду Твоему́ Росто́ву,/ Тебе́, Госпоже́, ве́рою блажа́щу, и пою́щу,/ и превознося́щу во вся ве́ки. Песнь 9 Ирмос: Ужасе́ся о сем Не́бо,/ и земли́ удиви́шася концы́,/ я́ко Бог яви́ся челове́ком пло́тски/ и чре́во Твое́ бысть простра́ннейшее небе́с./ Тем Тя, Богоро́дицу,/ А́нгелов и челове́к чинонача́лия велича́ют. Припев: Святи́телю о́тче Игна́тие, моли́ Бо́га о на́с. Вельми́ ра́дуется о тебе́, честны́й о́тче, святи́телю Игна́тие, при́сный твой град Росто́в,/ име́я тя на вся́ко вре́мя помо́щника и засту́пника,/ и ны́не не отходи́ от нас, моли́твы творя́ за ны к Бо́гу,/ я́ко да от безбо́жных ва́рвар нас изба́виши, тя велича́ющих. Припев: Святи́телю о́тче Игна́тие, моли́ Бо́га о на́с. Я́ко блудни́ца, и мыта́рь, и разбо́йник вопию́ ти от се́рдца:/ согреши́х, прости́ мя, Влады́ко, мно́гих мои́х злых прегреше́ний/ и изба́ви от вся́каго зла святи́теля моле́нием Игна́тия,/ я́ко да Твою́ ми́лость непреста́нно велича́ем. Сла́ва Отцу́ и Сы́ну и Свято́му Ду́ху. Прииди́те, собере́мся, вси росто́встии наро́ди,/ к блаже́нней ра́це преподо́бнаго Игна́тия/ и со слеза́ми возопие́м к Бо́гу моля́щеся:/ изба́ви, Го́споди, лю́ди Твоя́/ и не даждь достоя́ния Твоего́ ро́ду исма́ильтескому,/ я́ко да возвели́чим ми́лость Твою́ во ве́ки. И ны́не и при́сно и во ве́ки веко́в. Ами́нь. Богородичен: Мари́е Богоневе́сто, Влады́чице,/ омраче́нное мое́ се́рдце с душе́ю мольба́ми Твои́ми просвети́/ и жи́зни ве́чныя сподо́би мя, Госпоже́,/ не помина́ющи мои́х безчи́сленных зол,/ Сы́на и Бо́га Твоего́ моли́ за мя, окая́ннаго,/ и певцы́ Твоя́ сохрани́, Пречи́стая. Светилен Чу́днаго и сла́внаго святи́теля, Игна́тия вели́каго,/ прииди́те, пе́сньми свяще́нными да похва́лим,/ я́ко росто́вцем па́стыря и а́нгельским чино́м сослуже́бника бы́вша.

Минея, 15 Июля, Канон равноапостольного Глас 8 Песнь 1 Ирмос: Посе́ченый несеко́маго пресече́,/ и ви́де со́лнце зе́млю, ю́же не ви́де;/ лю́таго врага́ вода́ потопи́,/ и непроходи́мое про́йде Изра́иль./ Песнь же воспева́шеся:/ Го́сподеви пои́м, сла́вно бо просла́вися. Припев: Святы́й равноапо́стольный кня́же Влади́мире, моли́ Бо́га о на́с. Собезнача́льное Сло́во Бо́жие, И́же дре́вле четы́рем стихи́ям Творе́ц/ и те́ми весь мир сотвори́вый, свя́занную страстьмя́ ду́шу мою́ разреши́,/ я́ко да воспою́, лику́я, сла́внаго кня́зя Васи́лия. Сла́ва Отцу́ и Сы́ну и Свято́му Ду́ху. От выспрь соше́д, Влады́ко, невеще́ственно на духо́вную го́ру,/ свы́шше прося́щим от Тебе́ оби́льну све́тлость душа́м посли́/ достодо́лжно похваля́ти чу́днаго кня́зя Васи́лия. И ны́не и при́сно и во ве́ки веко́в. Ами́нь. Богородичен: Ма́терем и де́вам похвала́ Ты, Влады́чице,/ ро́ждшая Жизнь, Творца́ ми́рови, ма́терских же боле́зней не ощути́ла еси́,/ но Ма́ти у́бо и Де́ва пребыла́ еси́./ Те́мже, хва́ляще Тя, ра́дуйся, вопие́м Ти. Песнь 3 Ирмос: Утверди́ся се́рдце мое́ во Го́споде,/ вознесе́ся рог мой в Бо́зе мое́м,/ разширя́шася на враги́ моя́ уста́ моя́,/ возвеселя́хся о спасе́нии Твое́м. Припев: Святы́й равноапо́стольный кня́же Влади́мире, моли́ Бо́га о на́с. Я́ко труба́ богогла́сная, возгласи́ язы́к твой, блаже́нне, духо́вный,/ провозглаша́яй всем конце́м земли́ Росси́йския Христо́во правове́рное Креще́ние,/ и́мже просвеще́н быв, мир весь просвети́л еси́. Сла́ва Отцу́ и Сы́ну и Свято́му Ду́ху. Сия́ет днесь, Васи́лие, пресла́вная па́мять твоя́,/ ю́же пра́зднуют христоимени́тии лю́дие,/ тебе́ похваля́юще, своего́ пра́отца,/ и́хже к све́ту разу́мному приве́л еси́. И ны́не и при́сно и во ве́ки веко́в. Ами́нь. Богородичен: Сень зако́на пре́йде рождество́м Твои́м, Богоро́дице, благода́ти прише́дши,/ О́тчу Сло́ву, Христу́ Бо́гу на́шему,/ Его́же позна́в, сла́вный князь Це́рковь Твою́ све́тло украси́л есть. Седален, глас 2 В моли́твах бдяй при́сно ра́достною душе́ю, Васи́лие,/ того́ ра́ди поче́рпл еси́ Ду́ха прему́дрости от исто́чника, сходя́щаго свы́ше./ Тем ве́рою просия́в, я́ко со́лнце, моля́ся Христу́ непреста́нно,/ ускори́, Ще́дрый, и потщи́ся спасти́ от прегреше́ний мир. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Богоро́дице Безневе́стная Чи́стая, я́же без се́мене ро́ждшая всех Влады́ку,/ Того́ со А́нгелы моли́ изба́витися нам от вся́каго недоуме́ния/ и да́ти умиле́ние и свет душа́м на́шим/ и согреше́ний очище́ние, я́же еди́на вско́ре заступа́ющи. Песнь 4 Ирмос: Проро́к Авваку́м у́мныма очи́ма/ прови́де, Го́споди, прише́ствие Твое́,/ тем и вопия́ше:/ от ю́га прии́дет Бог./ Сла́ва си́ле Твое́й, сла́ва снизхожде́нию Твоему́. Припев: Святы́й равноапо́стольный кня́же Влади́мире, моли́ Бо́га о на́с. Све́тло бысть и сла́дко по о́блаце, и́мже покрыва́шеся Небе́сное со́лнце;/ весела́ же и ра́достна весна́ по зи́мней ско́рби;/ ты же по о́блаце и́дольскаго мра́ка/ Креще́нием, я́ко со́лнце све́тлое, возсия́л еси́ нам, Васи́лие. Сла́ва Отцу́ и Сы́ну и Свято́му Ду́ху. Па́вел фарисе́й, к Дама́ску грядый,/ ма́лым блеща́нием вели́каго Све́та ослепле́н, Креще́нием же просвети́ся,/ ему́же ты подо́бник был еси́, сла́вне,/ Корсу́ня доше́д, очны́й мрак отгна́л еси́. И ны́не и при́сно и во ве́ки веко́в. Ами́нь. Богородичен: Ты яви́лася еси́, Де́во, ко́рень ненапое́н, прозяба́я отпуще́ние,/ плод светоно́сный ро́ждши, Христа́ Бо́га на́шего;/ дря́хлующую страстьми́ ду́шу мою́ просвети́/ и испроси́ грехо́в оставле́ние. Песнь 5 Ирмос: Го́споди Бо́же наш, мир даждь нам,/ Го́споди Бо́же наш, стяжи́ ны,/ Го́споди, ра́зве Тебе́, ино́го не ве́мы,/ и́мя Твое́ имену́ем. Припев: Святы́й равноапо́стольный кня́же Влади́мире, моли́ Бо́га о на́с. Ра́дуйся и красу́йся ду́хом, Росси́йский царю́ Васи́лие,/ изря́дныя бо ве́тви богоса́дныя ко Христу́ прине́сл еси́,/ богоизря́дный твой плод, Бори́са сла́внаго и Гле́ба благочести́ваго,/ с ни́миже предстоя́ Христу́, о нас моли́ся. Сла́ва Отцу́ и Сы́ну и Свято́му Ду́ху. Ди́вный прорече́ Иса́ия на Иерусали́м:/ бу́дет я́ве гора́ Госпо́дня и дом на верх гор./ Пра́ведне же на тебе́ разуме́хом благода́ть Ду́ха:/ дом бо Влады́це созда́л еси́ на версе́х гор. И ны́не и при́сно и во ве́ки веко́в. Ами́нь. Богородичен: Пропове́дует о Тебе́ чу́дный Иса́ия Ду́хом,/ Де́вою хотя́щу роди́ти Христа́ без се́мене,/ Дави́д же, Твой пра́дед, ди́вно провозвести́ Твоя́ вели́чествия:/ спасе́ бо нас, я́ко Ми́лостив. Песнь 6 Ирмос: Я́ко во́ды морски́я, Человеколю́бче,/ волна́ми жите́йскими обурева́юся./ Те́мже, я́ко Ио́на, та́ко вопию́ Ти:/ возведя́ от тли живо́т мой, Благоутро́бне Го́споди. Припев: Святы́й равноапо́стольный кня́же Влади́мире, моли́ Бо́га о на́с. Благоче́стия ревни́тель сла́внаго царя́ Константи́на ты был еси́, Васи́лие,/ просвети́вшаго Креще́нием е́ллинский род,/ ты же духо́вною ба́нею лю́ди твоя́ пресве́тло обнови́л еси́. Сла́ва Отцу́ и Сы́ну и Свято́му Ду́ху. Ослади́в любо́вию Христо́вою ду́шу и разу́мныя прие́м криле́,/ прелете́л еси́ и́дольский мрак и разгна́л еси́ тьму злове́рия, блаже́нне,/ всели́вся в черто́г Спа́са всех Бо́га. И ны́не и при́сно и во ве́ки веко́в. Ами́нь. Богородичен: Благоду́шствует Це́рковь Росси́йская днесь и правове́рных собо́ри/ в па́мять пресве́тлую Васи́лия, ублажа́юще Твое́ безсе́менное рождество́, Де́во,/ и, приле́жно Сы́ну Твоему́ моля́щеся, зову́т:/ Тя велича́ем. Кондак, глас 8 Подо́бствовав вели́кому апо́столу Па́влу, в седи́нах, всесла́вне Влади́мире,/ вся, я́ко младе́нческая, мудрова́ния, я́же о и́долех тща́ния, оста́вль,/ я́ко муж соверше́нный, украси́лся еси́ Боже́ственнаго Креще́ния багряни́цею,/ и ны́не, Спа́су Христу́ в весе́лии предстоя́,/ моли́ спасти́ся держа́вы Росси́йския нача́льником и мно́жеству владо́мых. Икос Просвети́вый дре́вле Изра́иля Моисе́йским зако́ном,/ просвети́л же еси́ мир явле́нием Твоего́ прише́ствия, Христе́ Бо́же,/ богогла́сныя Твоя́ ученики́ посла́л еси́ пропове́дати по страна́м/ е́же от Де́вы безсе́менное рождество́ Твое́/ и тем повеле́л еси́ крести́ти во И́мя Отца́, и Сы́на, и Свята́го Ду́ха./ Обветша́вшу же ви́дя страну́ Росси́йскую грехо́м,/ Дух Твой посла́л еси́ в крепкоразу́мнаго ду́шу сла́внаго Влади́мира,/ позна́ти Тебе́, Еди́наго от Тро́ицы Христа́ Бо́га,/ и Твои́м Креще́нием просвети́ти избра́нныя Твоя́/ и от Тебе́ поруче́нныя ему́ лю́ди, и привести́ к Тебе́ ве́рою вопию́щия:/ изба́ви Твое́ достоя́ние от сопроти́вных пога́н,/ росси́йския нача́льники и мно́жество владо́мых. Песнь 7 Ирмос: Халде́йския пе́щи/ всепа́губную си́лу угаси́вше/ о́бразом А́нгела снизше́дшаго,/ Зижди́телю ю́ноши взыва́ху:/ благослове́н еси́ и хва́льный, Бо́же оте́ц на́ших. Припев: Святы́й равноапо́стольный кня́же Влади́мире, моли́ Бо́га о на́с. Пра́отчи богоистка́нныя мя ри́зы враг душегу́бец обнажи́л есть,/ Иису́с же Безнача́льный, явле́йся пло́тию, очи́стив водо́ю Ду́ха, па́ки мне подаде́ ю,/ Его́же позна́в, сла́вне Влади́мире, весели́шися, вопия́:/ благослове́н Бог оте́ц на́ших. Сла́ва Отцу́ и Сы́ну и Свято́му Ду́ху. Моисе́йский сохрани́в зако́н, Дании́л Боговиде́ния сподо́бися;/ пра́отеческия же ты попра́в и́долы,/ не я́ко во мра́це, но в бо́льшей сла́ве, разу́мно узре́л еси́ Христа́ со Отце́м и Ду́хом,/ Креще́нием же просвеще́н, весели́шися, вопия́:/ благослове́н Бог оте́ц на́ших. И ны́не и при́сно и во ве́ки веко́в. Ами́нь. Богородичен: Боже́ственныя обнажи́ оде́жды враг, прельсти́в первозда́ннаго пра́деда Твоего́, Де́во,/ из боку же Твое́ю чи́стою и неискусобра́чною прише́д Спас, сла́дкий мой Иису́с,/ на Него́же поте́к, а́ки на Ада́ма, но о Бо́га образи́ся и сокруши́ся лю́те./ Мы же Сы́ну Твоему́ зове́м:/ благослове́н Бог оте́ц на́ших. Песнь 8 Ирмос: Покрыва́яй вода́ми превы́спренняя Своя́,/ полага́яй мо́рю преде́л песо́к/ и содержа́й вся,/ Тя пое́т со́лнце, Тя сла́вит луна́,/ Тебе́ прино́сит песнь вся тварь,/ я́ко Соде́телю всех во ве́ки. Припев: Святы́й равноапо́стольный кня́же Влади́мире, моли́ Бо́га о на́с. Род пра́ведных благослови́тся, Боже́ственная веща́ша уста́, е́же на тебе́ сбы́стся, блаже́нне:/ се́мя бо святоле́пное и богоизбра́нное прине́сл еси́ Христу́,/ непобеди́мыя му́ченики, и́згаже просвети́л еси́ зе́млю Росси́йскую,/ и́хже похваля́юще с тобо́ю, превозно́сим Христа́ во ве́ки. Сла́ва Отцу́ и Сы́ну и Свято́му Ду́ху. Ма́ти всех градо́в вои́стинну ца́рства твоего́ град яви́ся Ки́ев,/ в не́мже Христо́с пре́жде со Отце́м и Ду́хом просла́вися/ твое́ю прама́терию и тобо́ю, блаже́нне,/ иде́же му́жественное твое́ те́ло лежи́т све́тло в це́ркви Влады́чицы,/ мы же, лю́дие твои́, хва́ляще, пое́м Христа́ во ве́ки. И ны́не и при́сно и во ве́ки веко́в. Ами́нь. Богородичен: Безнача́льное сия́ние и Сло́во О́тчее пропове́даша нело́жно проро́честии гла́си,/ из Тебе́ хотя́щаго без тли роди́тися Емману́ила,/ Бо́га же и Челове́ка, кре́пкое язы́ков ча́яние,/ Ему́же я́ко Ма́ти моли́ся спасти́ся нам. Песнь 9 Ирмос: Ужасе́ся о сем Не́бо,/ и земли́ удиви́шася концы́,/ я́ко Богяви́ся челове́ком пло́тски/ и чре́во Твое́ бысть простра́ннейшее Небе́с./ Тем Тя, Богоро́дицу,/ А́нгелов и челове́к чинонача́лия велича́ют. Припев: Святы́й равноапо́стольный кня́же Влади́мире, моли́ Бо́га о на́с. Дави́д обре́теся пре́жде Изра́илю держа́вный царь и лю́ди спасе́,/ бо́ги иноязы́чныя низложи́в, Ду́хом Бо́жия Сы́на пропове́да;/ ты же в Тро́ице позна́л еси́ Бо́га, блаже́нне Васи́лие, Его́же велича́ем. Сла́ва Отцу́ и Сы́ну и Свято́му Ду́ху. Да торжеству́ют днесь ве́село па́мять твою́/ святоле́пно в це́ркви Бо́жия Ма́тере богоизбра́ннии лю́дие, ю́же любе́зно украси́л еси́,/ в па́мять ве́чную твоего́ преставле́ния, не́бо земно́е,/ в не́мже почива́я, ожида́еши всестра́стныя трубы́ Арха́нгеловы, блаже́нне./ Тем тя при́сно велича́ем. И ны́не и при́сно и во ве́ки веко́в. Ами́нь. Богородичен: Ду́хом Боже́ственным распала́еми, вси ро́ди, любо́вию блажи́м Тя, Богоро́дице:/ Ты бо кля́тву прама́тере разруши́ла еси́./ Приле́жно же пое́м Бо́жия Сло́ва,/ Того́ бо, неопа́льно во чре́ве Твое́м прие́мши, родила́ еси́ пло́тию./ К Нему́же моли́ся,/ изба́витися ве́рному Твоему́ ста́ду от вся́кия ну́жды и печа́ли. Светилен Свети́льницы, просвети́вше вселе́нную всю благоче́стием и ве́рою,/ вы яви́стеся вои́стинну, боговенча́нне Влади́мире с прама́терию Еле́ною сла́вною./ Вас возлюби́вшаго Христа́ и мы славосло́вим, ди́внаго во святы́х. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Во двою́ во́лю и естеству́, Пренепоро́чная,/ во еди́ной же Ипоста́си ражда́еши Бо́га неизрече́нно,/ нас ра́ди обнища́вшаго до распя́тия хоте́нием/ и дарова́вшаго нам бога́тство Боже́ственное, Богома́ти Де́во.

глас 8 Песнь 1 Ирмос: Воду прошед, яко сушу, и египетскаго зла избежав, израильтянин вопияше: Избавителю и Богу нашему поим. Приидите, благочестия рачителие, согласно воспоим вси священнаго иерарха Василия и похвальными песньми почтим память его, яко молитвенника о душах наших и хранителя граду Рязани. Ангельски на земли пожив, Богомудре Василие, ликом избранных рабов Божих вчинился еси, темже молим тя: моли Христа Бога избавитися нам от бед и огня вечнующаго. Молитвами твоими, святителю Василие, сохрани стадо твое духовное от напастей чувственных и мысленных и даже до конца невреждены нас соблюди. Богородичен: Яко стену и прибежище стяжахом Тя, Богомати: спаси нас от бед и скорбей и от мук будущих избави молитвами Твоими. Песнь 3 Ирмос: Ты еси утверждение притекающих к Тебе, Господи, Ты еси Свет омраченных, и поет Тя дух мой. Треволнения житейскаго пучину преплавая и не имея управителя помышлений, к тебе, святителю Василие, прибегаю и от тебе ожидаю скорыя помощи. В мори мя плавающа и на пути шествующа соблюди, святителю, и настави творити волю Господню, яко да обрящу в День судный содеянных мною согрешений разрешение. Аз, любострастный, яко ладия, обуреваюся от прегрешений моих, но во благоутишное пристанище покаяния настави мя молитвами твоими, пречудне святителю. Богородичен: Страсти моего сердца исцели, Мати Всеблагая, ум мой умири и просвети и направи мя ходити непреткновенно путем спасения, яко да присно Тя ублажаю. Седален, глас 2 Окрилив ум верою и любовию к Богу, мирскаго смешения возгнушался еси, святителю Василие, и, крест на рамена твоя взем, последовал еси Владыце Христу, и был еси храм Духа Святаго. Темже вопием ти: моли Христа Бога грехов оставление даровати празднующим любовию святую память твою. Песнь 4 Ирмос: Ты моя крепость, Господи, Ты моя и сила, Tы мой Бог, Ты мое радование, не оставль недра Отча и нашу нищету посетив. Тем с пророком Аввакумом зову Ти: силе Твоей слава, Человеколюбче. Иовли крепости во искушениих не стяжах, и враг спасения поглотити мя тщится, но ты, святителю, помози мне сети лукаваго сокрушити молитвами твоими ко Владыце Христу, да зову Ему: силе Твоей слава, Человеколюбче. Любовию сочетався Христу, святитель богоприятен и пастырь истинен явился еси, отче Василие. Темже тя благочестно ублажающе, молим: молися Христу Богу, да явит нам силу Свою во благовременную помощь. Иерарха тя, яков нам подобаше, стяжавше, тобою хвалимся и, в заступлении твоем помощь обретающе на видимыя и невидимыя враги, вопием к Богу Спасителю: силе Твоей слава, Человеколюбче. , Богородичен: Ангельских чинов превышшая, Мати Божия, буди ми скорая в бедах Помощница, крепость моя и утверждение и от врагов защищение, да не убоюся вражия прещения, но присно пою Тя и славлю, Всепетая. Песнь 5 Ирмос: Вскую мя отринул еси от лица Твоего, Свете Незаходимый, и покрыла мя есть чуждая тьма, окаяннаго? Но обрати мя и к свету заповедей Твоих пути моя направи, молюся. Святолепным житием и учением твоим, Богомудре Василие, многия ко Христу привел еси; темже и мы, чада твоя, ныне молим тя помощь нам даровати, да ходим непреткновенно в путех заповедей Господних. Во стране пришельствия течение добре совершив, ко Свету невечернему восхождение обрел еси, преблаженне, и венец светел приял еси от Царя Славы Христа, к Немуже ныне молися, от помрачения и уныния душевнаго нас свободити и на стези спасения стопы наша направити. Яко первопрестольника и святителя нашего чтуще тя, молим, чада твоя, блаженне: от тьмы греховныя избави и светом благодати просвети души наша. Богородичен: Ты еси просвещение и избавление мое, Мати Незаходимаго Света, на Тя по Бозе надежду спасения моего возлагаю и молю Тя: избави мя от належащих бед и скорбей, да славлю Тя во веки. Песнь 6 Ирмос: Молитву пролию ко Господу и Тому возвещу печали моя, яко зол душа моя исполнися и живот мой аду приближися, и молюся, яко Иона: от тли, Боже, возведи мя. Избавитися нам от бури страстей и от потопления в пучине зол молися, святителю отче Василие, да, молитвами Твоими направляемы, достигнем во пристанища тихая Божественныя воли. Тя, досточудне Василие, от воднаго потопления, якоже Иону во чреве китове, Господь сохранил есть. О, чудесе новаго и преславнаго! Темже молим тя: твоими ко Христу молитвами избави нас от потопления в молве житейских попечений и тлетворных страстей. Ежечасно волнами житейскими погружаюся, и буря искушений потопляет мя. К тебе, отче Василие, чудно по водам шествовавшему, ныне прибегая, вопию: молися Христу Богу, да изведет из глубины греховныя жизнь мою, яко Человеколюбец. Богородичен: Лютыми страстьми одержимым скорая Помощница и готовое обуреваемым пристанище сущи, Мати Божия, сохрани мя от злобы и клеветы человеческия и не даждь ми разбитися о камень маловерия и отчаяния, да не погублю вконец душу мою. Кондак, глас 8 Яко многосветлая звезда, от града Мурома возсиял еси, святителю Василие, по водам же дошед до града нашего Рязани, Церковь Божию добре упасл еси, просвещая люди учением и житием твоим. Поминай и ныне чада твоя, молим тя, наставниче наш добрый, и за ны Христу Богу и Пречистей Его Матери молися, да благодарною душею зовем ти: радуйся, угодниче Христов и теплый к Богу о нас молитвенниче. Икос Умная очеса всегда к Вышним возводя, Небесных непрестанно желал еси, святаго же ради жития твоего архиерейства саном украшен быв, Церковь и люди твоими учении обогатил еси и, течение благочестно совершив, к Богу преславно духом прешел еси, нам святыя мощи твоя в память и освящение оставив, имже ныне со умилением покланяющеся, молимся от страстей треволнения нас сохранити, яко да в тишине богоугодно поживше, тебе благодарно вопием, глаголюще: радуйся, отче Василие, скорый помощниче и теплый к Богу о нас молитвенниче. Песнь 7 Ирмос: В начале землю основавый и Небеса словом утвердивый, благословен еси во веки, Господи, Боже отец наших. Якоже пресельник от града Мурома быв, к Богоматери руце простирая, спасение обрел еси, святителю отче Василие: водам бо, послужившим тебе Божиим мановением, града Рязани достигл еси и, тамо Христу Богу угодив, Тому ныне радостно поеши: благословен еси, Господи Боже, во веки. Рязанския области благовернаго князя и христоименитыя люди радости исполнил еси твоим дивным по водам пришествием, сопутника и хранителя Христа обрет, к Немуже ныне радостно зовеши: благословен еси, Господи Боже, во веки. Якоже трие отроцы в пещи Вавилонстей огненную силу угасиша молитвою, тако и ты, святый отче, огнь злобы вражия и клеветы человеческия верою и молитвою угасил еси, поя Богу Спасителю: благословен еси, Господи Боже, во веки. Богородичен: Земле святая, безсеменно произрастившая Спасение мира, Христа Бога нашего, от бури сопротивныя и искушений избави мя и из глубины зол возведи, да пою непрестанно милости и щедроты Твоя, Мати Всеблагая. Песнь 8 Ирмос: Покрываяй водами превыспренняя Своя, полагаяй морю предел песок и содержаяй вся, Тя поет солнце, Тя славит луна, Тебе приносит песнь вся тварь, яко Содетелю всех во веки. Ангелоподобным житием возсиял еси, святителю отче Василие, благочестия рачитель быв неусыпаемь, темже со Ангелы предстоя ныне Престолу Владыки всяческих, моли избавитися нам от всякаго прилога вражия, поющим верно: благословите, вся дела Господня, Господа и превозносите Его во веки. На земли пожив, яко Ангел, с плотию, яко безплотен, безплотныя враги под ноги покорил еси. Темже ныне со Ангелы на Небесех светло ликуя, Христу вопиеши: благословите, вся дела Господня, Господа и превозносите Его во веки. Источник благодатных дарований стяжав, Богоблаженне, подаждь ми источник умиления и слез, да омыю душевныя моя страсти и светом покаяния убелю очерневшую мою душу, радостно поя: благословите, вся дела Господня, Господа и превозносите Его во веки. Богородичен: Христа нам родившая, радость вечную, горестных слез моих не забуди и стенания души моея не презри, Всеблагая, но яви на мне милость и человеколюбие Сына и Бога Твоего. Песнь 9 Ирмос: Воистину Богородицу, Тя исповедуем, спасеннии Тобою, Дево Чистая, с Безплотными лики Тя величающе. Велие чудо на тебе видится, преблаженне Василие, яко блаженное тело твое чрез многа лета соблюдеся невредимо мановением Бога, дивнаго во святых Своих, Егоже моли грехов прощение нам даровати. Адамант крепкий явился еси, святителю Василие, веру яко основание непоколебимо в души твоей имея: многи бо враги видимыя и невидимыя победил еси, яко добр воин Владыки Христа, Емуже молися, да спасет тебе ради души наша. Любовию чтуще твою память, молим тя, святителю и предстателю наш: моли прилежно Христа Бога о граде твоем и людех, избавити нас от всякия скорби и напасти, да тя сердцем и усты непрестанно ублажаем. Богородичен: Юже поют ангельстии чини и славят патриарси со архиереи яко Матерь Божию, Тебе, Дево Богородице, и мы, грешнии, припадающе, молим: пристанище тихое буди нам, обуреваемым страстьми, и от всех бед сохрани нас матерними Твоими молитвами ко Христу, Сыну Твоему и Богу нашему. Светилен Царственное имя нося, Всецарю Христу житием твоим последовал еси, Емуже ныне в чертозе Небеснем соцарствуеши, преблаженне Василие, Того моли и нас облистати славою Его Божественною.

Минея, 29 Апреля, Канон Глас 6 Песнь 1 Ирмос: Я́ко по су́ху, пешеше́ствовав Изра́иль/ по бе́здне стопа́ми,/ гони́теля фарао́на/ ви́дя потопля́ема,/ Бо́гу побе́дную песнь пои́м, вопия́ше. Припев: Святи́телю о́тче Васи́лие, моли́ Бо́га о на́с. С Вы́шними ли́ки, яко святи́тель и служи́тель Бо́жий,/ предста́л еси́, па́стырю до́брый Захо́лмии,/ до́бре упа́сши вруче́нное ти ста́до,/ о нас приле́жно моли́ся, получи́ти ве́чных благ моли́твами твои́ми, о́тче Васи́лие. Припев: Святи́телю о́тче Васи́лие, моли́ Бо́га о на́с. Избра́н был от Го́спода служи́ти свято́му Ева́нгелию че́стно, преблаже́нне,/ захолми́йстии лю́дие, стяжа́в тя па́стыря,/ вразумля́хуся уче́нии твои́ми, свя́те Васи́лие. Припев: Святи́телю о́тче Васи́лие, моли́ Бо́га о на́с. Ра́зумом Бо́жиим обогаща́емь,/ сло́во живо́тно от се́рдца источи́л еси́,/ напая́я ду́ши и сердца́ ве́рных, олядене́вшия страстьми́,/ чуде́с заря́ми твои́ми, Богоблаже́нне Васи́лие. Припев: Святи́телю о́тче Васи́лие, моли́ Бо́га о на́с. Просвети́ ду́шу и се́рдце мое́, молю́ся Ти, Светода́вче, тва́ри Соде́телю,/ пода́ждь мне дар пе́ния воспева́ти Твоего́ уго́дника, пресла́внаго Васи́лия,/ научи́вшаго нас твори́ти во́лю Твою́, Бо́же мой. Припев: Святи́телю о́тче Васи́лие, моли́ Бо́га о на́с. Обре́л еси́ Небе́сную прему́дрость, я́ко вруче́нный ти тала́нт,/ иже умножа́я, Богоно́сне Васи́лие, разори́л еси́ де́монов ле́сти/ и умудри́л лю́ди Боже́ственным уче́нием. Сла́ва Отцу́ и Сы́ну и Свято́му Ду́ху. Зачина́ется Преве́чный, и обновля́ется естество́ на́ше,/ рожде́ннаго от Отрокови́цы пропове́дуя,/ име́ющаго два естества́ во Еди́ней Ипоста́си. И ны́не и при́сно и во ве́ки веко́в. Ами́нь. Богородичен: Свяще́ннейший лик проро́чески проявля́ше издале́ча/ хотя́щей Ти бы́ти и́стинней Ма́тери Бо́жией,/ те́мже и мы, сла́вяще Тя, воспева́ем, яко Вы́шшую Херуви́м и всея́ тва́ри, Богома́ти. Песнь 3 Ирмос: Да утверди́тся се́рдце мое́ в во́ли Твое́й, Христе́ Бо́же,/ И́же над вода́ми Не́бо утвержде́й второ́е/ и основа́вый на вода́х зе́млю, Всеси́льне. Припев: Святи́телю о́тче Васи́лие, моли́ Бо́га о на́с. Иска́пает Боже́ственная сла́дость из уст твои́х, о́тче Васи́лие,/ па́ству твою́ напои́л еси́,/ христоимени́тыя лю́ди, блаже́нне Васи́лие. Припев: Святи́телю о́тче Васи́лие, моли́ Бо́га о на́с. Гроб, иде́же лежи́т честно́е те́ло твое,/ благово́ние источа́ет, я́коже рай Бо́жий,/ облагоуха́я ве́рныя и служа́щия в оби́тели твое́й,/ те́мже, ра́дуяся, пресла́вне, не забу́ди и нас, о́тче Васи́лие. Припев: Святи́телю о́тче Васи́лие, моли́ Бо́га о на́с. Скендери́йская убо страна́ прие́млет те́ло твое́,/ дух же твой отхо́дит в Вы́шний Иерусали́м,/ иде́же лику́ет с проро́ки, апо́столы и все́ми святы́ми,/ с ни́ми же ку́пно моли́ся о нас Человеколю́бцу Бо́гу, Богоблаже́нне Васи́лие. Припев: Святи́телю о́тче Васи́лие, моли́ Бо́га о на́с. Святи́телю Васи́лие, уче́ньми свои́х святы́х уст/ из уст неприя́зненных волко́в лю́ди своя́ изба́вил еси́ и приве́л Творцу́,/ подава́я всем дар исцеле́ния. Сла́ва Отцу́ и Сы́ну и Свято́му Ду́ху. Сло́во Безнача́льное, во пло́ти явле́нное,/ дарова́вшее нам па́стыря и учи́теля,/ я́коже просла́вил еси́, Христе́, Своего́ слугу́,/ не забу́ди па́ству его́,/ я́же прославля́ет своего́ иера́рха, ди́внаго во святы́х Твои́х, блаже́ннаго Васи́лия. И ны́не и при́сно и во ве́ки веко́в. Ами́нь. Богородичен: Разуме́ти, Чи́стая, рождества́ Твоего́ неизрече́нныя глуби́ны/ недоуме́ет ум челове́ческий,/ Бог бо, Себе́ смири́в щедро́ты ра́ди во чре́ве Твое́м, всего́ мя обнови́. Седален, глас 4 Правосла́вно, свя́те Васи́лие, Це́рковь Христо́ву упа́сл еси́,/ ерети́ческия отгоня́я го́рькия пле́велы,/ сего́ ра́ди в Вы́шних водворя́ешися, блаже́нне. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Сло́во О́тчее, Христа́ Бо́га на́шего,/ из Тебе́ воплоти́вшагося, Богоро́дице Де́во, велича́я,/ ублажа́ем Тя, Чи́стая Богоневе́сто. Песнь 4 Ирмос: Христо́с моя́ си́ла,/ Бог и Госпо́дь,/ честна́я Це́рковь/ боголе́пно пое́т, взыва́ющи,/ от смы́сла чи́ста о Го́споде пра́зднующие. Припев: Святи́телю о́тче Васи́лие, моли́ Бо́га о на́с. Ты, о́тче свяще́нне Васи́лие, испо́лнен Свята́го Ду́ха,/ лука́выя ду́хи отгна́л еси́,/ духо́вными ве́ры уче́ньми твои́ми просвеща́я ста́до твое́. Припев: Святи́телю о́тче Васи́лие, моли́ Бо́га о на́с. Еди́ницу Несозда́нную богосло́вствуя,/ в Трие́х Ли́цы разделя́ему, несеко́мую и несме́сну,/ просвеща́еши свяще́нным Богосло́вием ста́до твое́, блаже́нне Васи́лие. Припев: Святи́телю о́тче Васи́лие, моли́ Бо́га о на́с. Нача́льный богогла́сен Бо́жиим прича́стием яви́лся еси́, о́тче Васи́лие,/ просвеща́еши омраче́нныя, я́ко рачи́тель доброде́тели,/ науча́я сла́вящия па́мять твою́. Припев: Святи́телю о́тче Васи́лие, моли́ Бо́га о на́с. Возше́л еси́ на ле́ствицу доброде́телей, блаже́нне,/ показу́я путь спасе́ния своему́ ста́ду,/ сего́ ра́ди правосла́внии лю́дие от Захо́лмии, Скенде́рии и Че́рныя Горы́,/ почита́я тя, лобыза́ют святы́я мо́щи твоя́, о́тче Васи́лие. Сла́ва Отцу́ и Сы́ну и Свято́му Ду́ху. Естество́м несказа́ннаго, милосе́рдием пребога́таго,/ Христа́ просла́вил еси́ на земли́, пребога́те о́тче,/ те́мже и просла́влен, наслажда́ешися блаже́нства, свя́те Васи́лие. И ны́не и при́сно и во ве́ки веко́в. Ами́нь. Богородичен: Кля́тва прама́тере на́шея Е́вы разори́ся Тобо́ю, Богома́ти,/ Ты бо нам Исто́чника спасе́ния родила́ еси́,/ И́стины присносу́щаго Живота́. Песнь 5 Ирмос: Бо́жиим све́том Твои́м, Бла́же,/ у́тренюющих Ти ду́ши любо́вию озари́, молю́ся,/ Тя ве́дети, Сло́ве Бо́жий,/ и́стиннаго Бо́га,/ от мра́ка грехо́внаго взыва́юща. Припев: Святи́телю о́тче Васи́лие, моли́ Бо́га о на́с. Бо́жиим све́том озаря́емь,/ лю́бящих Бо́га ду́ши озари́л еси́, свя́те,/ просвеща́я их богове́дением сло́ва открове́нна,/ и́мже просвети́ и нас, чту́щих святоле́пную па́мять твою́, Васи́лие. Припев: Святи́телю о́тче Васи́лие, моли́ Бо́га о на́с. Боже́ственным све́том и чи́стым по́мыслом возвыша́яся,/ непоро́чен яви́лся еси́ слуга́ Христа́ Спа́са, о́тче Васи́лие,/ сего́ ра́ди моли́ся и о ста́де свое́м,/ спасти́ся ему́ от злых наве́тов ага́рянских. Припев: Святи́телю о́тче Васи́лие, моли́ Бо́га о на́с. Благода́тию призыва́емь, разруши́л еси́ и́дольския безбо́жия словесы́ Ева́нгельскими;/ я́коже име́я дерзнове́ние, защити́ и нас моли́твами твои́ми, блаже́нне Васи́лие,/ от злых обстоя́ний, наве́тующих на ны. Припев: Святи́телю о́тче Васи́лие, моли́ Бо́га о на́с. Мно́гим чудотворе́нием утеша́я ста́до свое́ правосла́вное,/ ше́ствовал еси́ ко Афо́нстей горе́/ и, отту́ду возвраща́яся, благовести́л еси́ лю́дем свято́е уче́ние Христо́во,/ и́мже просвеща́й и нас, священнотаи́нниче Васи́лие. Припев: Святи́телю о́тче Васи́лие, моли́ Бо́га о на́с. Бо́жиим определе́нием прише́л еси́ в Остро́жскую страну́,/ пото́м же посети́л еси́ Скендери́йскую о́бласть, поучи́в ю зако́ну Бо́жию,/ те́мже и лю́дие ве́рнии, живу́щии в них, прие́мше тя,/ хва́лят тя и велича́ют яко своего́ предста́теля, о́тче Васи́лие. Сла́ва Отцу́ и Сы́ну и Свято́му Ду́ху. Щито́м Правосла́вия охраня́еши лю́ди своя́/ от па́губных е́ресей, блаже́нне Васи́лие,/ огражда́я их от злово́ния благоуха́нием Богоно́сных моще́й твои́х,/ до́брый па́стырю Васи́лие. И ны́не и при́сно и во ве́ки веко́в. Ами́нь. Богородичен: По стра́ннем рождестве́ Твое́м, пребыла́ еси́ Де́вою, Мари́е Богоневе́сто,/ мо́лимся Ти:/ чу́дным покро́вом Твои́м спаси́ неду́гующия/ и защити́ правосла́вныя лю́ди Твоя́. Песнь 6 Ирмос: Проро́ка Ио́ну подража́я, вопию́:/ живо́т мой, Бла́же, свободи́ из тли/ и спаси́ мя, Спа́се ми́ра, зову́ща: сла́ва Тебе́. Припев: Святи́телю о́тче Васи́лие, моли́ Бо́га о на́с. Язы́к твой, Ду́хом изощре́н разу́мно,/ я́ко трость скоропи́сца,/ написа́ в сердца́ благочести́вых сло́во бога́тное и всесвяще́нное/ Бо́жиим манове́нием, о́тче блаже́ннейший Васи́лие. Припев: Святи́телю о́тче Васи́лие, моли́ Бо́га о на́с. Поуча́яся Боже́ственным, вшел еси́ во Свята́я Святы́х,/ просвеща́я Ду́хом ве́рныя,/ я́ко Тро́ическою заре́ю освяще́н, о́тче Васи́лие. Припев: Святи́телю о́тче Васи́лие, моли́ Бо́га о на́с. Ко спасе́нию устроя́я люде́й Бо́жиих,/ Явльшагося во пло́ти пропове́дуеши, па́стырю,/ и, я́ко учи́тель Захолми́йский и Черного́рский, наставля́еши ста́до твое́,/ Те́мже, уго́дниче Бо́жий, спаси́ служа́щия и приходя́щия в оби́тели твое́й,/ и́же усе́рдно лобыза́ют честну́ю ра́ку моще́й твои́х. Припев: Святи́телю о́тче Васи́лие, моли́ Бо́га о на́с. От напа́стей и разли́чных бед и скорбе́й,/ наноси́мых ве́рным от лука́вых,/ изба́ви ны, о́тче, я́ко уго́дник Христо́в,/ чту́щия свято́е твое́ успе́ние, блаже́нне Васи́лие. Сла́ва Отцу́ и Сы́ну и Свято́му Ду́ху. Заступле́ние ве́рным и весе́лие ра́достное печа́льным,/ обогати́ ны духо́вною ра́достию,/ жела́ющий и прося́щия твоего́ заступле́ния, новоявле́нне Васи́лие. И ны́не и при́сно и во ве́ки веко́в. Ами́нь. Богородичен: Ты была́ еси́, Де́во Всепе́тая,/ дверь Царя́ Небе́снаго и храм сла́вы Его́,/ отве́рзи и нам две́ри милосе́рдия/ и введи́ нас моли́твами Твои́ми в жили́ще сла́вы Небе́сныя. Кондак, глас 8 Я́ко от младе́нства себе́ порабо́тив Го́сподеви,/ посто́м и бде́нием свое́ те́ло удруча́я, му́дре,/ сосу́д че́стен Ду́ху Пресвято́му яви́лся еси́,/ сего́ ра́ди поставля́ет тя па́стырем Своея́ Це́ркви,/ юже до́бре пасл еси́./ Те́мже ко Го́споду отхо́диши, Его́же возлюби́л еси́./ Мо́лимся ти, помяни́ и нас, ве́рою чту́щих святу́ю па́мять твою́, да вси зове́м ти:/ ра́дуйся, всече́стне о́тче Васи́лие. Икос Воспое́м ны́не хвала́ми святи́теля, па́стыря и учи́теля/ Захолми́йскаго, Скендери́йскаго, Че́рныя Го́ры и Примо́рия,/ я́ко да моли́твами его́ изба́вимся нече́стия и наве́тов лука́ваго,/ и́бо он яви́ся лю́дем свои́м нескве́рнен и нетле́нен,/ прине́сши Христу́ себе́ в непоро́чную же́ртву, Бо́гу благоприя́тну,/ я́ко святи́тель, освяще́н те́лом и душе́ю,/ те́мже, ве́рнии лю́дие, прииди́те и восхвали́те Це́ркви и́стиннаго предста́теля,/ до́бляго побо́рника ве́ры Правосла́вныя, преди́внаго чудотво́рца,/ ми́лостиваго моли́твенника о душа́х на́ших, пресла́внаго Васи́лия. Песнь 7 Ирмос: Росода́тельну у́бо пещь/ соде́ла А́нгел/ преподо́бным отроко́м,/ халде́и же опаля́ющее/ веле́ние Бо́жие мучи́теля увеща́ вопи́ти:/ благослове́н еси́, Бо́же оте́ц на́ших. Припев: Святи́телю о́тче Васи́лие, моли́ Бо́га о на́с. Просвеща́емь благода́тию по Боже́ственному манове́нию,/ был еси́ светода́тельная звезда́,/ в после́днее вре́мя просия́в заря́ми, му́дре, пою́щим:/ благослове́н Бог оте́ц на́ших. Припев: Святи́телю о́тче Васи́лие, моли́ Бо́га о на́с. Святе́йшая Це́рковь озари́ тя,/ во е́же украси́ти ю доброде́тельными дея́ньми,/ живу́щей в тебе́ Неразде́льней Тро́ице, Е́йже вопие́м:/ благослове́н Бог оте́ц на́ших. Припев: Святи́телю о́тче Васи́лие, моли́ Бо́га о на́с. Вещми́ су́етными весь ум челове́ческий обуя́,/ ему́же даждь цельбу́ сло́вом твои́м, Васи́лие, науча́я лю́ди пе́ти:/ благослове́н Бог оте́ц на́ших. Припев: Святи́телю о́тче Васи́лие, моли́ Бо́га о на́с. Диви́мся пресла́вным чудесе́м твои́м, блаже́нне Васи́лие,/ и́миже неду́ги исцеля́еши и от бед избавля́еши,/ те́мже, повину́яся веле́нию твоему́, вопие́м Го́сподеви:/ благослове́н Бог оте́ц на́ших. Сла́ва Отцу́ и Сы́ну и Свято́му Ду́ху. На́шему смире́нию бу́ди засту́пник, о́тче Васи́лие,/ и науча́й нас всегда́ пе́ти:/ благослове́н еси́, Бо́же оте́ц на́ших. И ны́не и при́сно и во ве́ки веко́в. Ами́нь. Богородичен: Седя́й в не́дрех неопи́санно Бо́га Отца́/ ны́не, Пречи́стая, почи́ в не́дрех Твои́х опи́санно,/ Твои́м обложе́н зра́ком спасе́ния ра́ди на́шего,/ Ему́же усе́рдно вопие́м:/ Препе́тый и Превозноси́мый во ве́ки. Песнь 8 Ирмос: Из пла́мене преподо́бным ро́су источи́л еси́/ и пра́веднаго же́ртву водо́ю попали́л еси́:/ вся бо твори́ши, Христе́, то́кмо е́же хоте́ти./ Тя превозно́сим во вся ве́ки. Припев: Святи́телю о́тче Васи́лие, моли́ Бо́га о на́с. Го́рдаго зми́я твои́м смире́нием стерл еси́, блаже́нне Васи́лие,/ возвыша́яся Бо́гу свои́м честны́м ра́зумом;/ те́мже тя чтим, Христа́ превознося́ще во ве́ки. Припев: Святи́телю о́тче Васи́лие, моли́ Бо́га о на́с. Богосло́вствуя о воплоще́нном Сло́ве,/ лю́ди своя́ от рабо́ты и ле́сти спасл еси́,/ отгони́вый ага́рянская безбо́жия, о́тче Васи́лие. Припев: Святи́телю о́тче Васи́лие, моли́ Бо́га о на́с. Возра́сл еси́, я́ко цвет благоуха́ния, в Захо́лмии, о́тче Богоно́сне,/ Скенде́рия же, тя прие́мля,/ всем прино́сит, яко во́ни, целе́бныя да́ры. Припев: Святи́телю о́тче Васи́лие, моли́ Бо́га о на́с. Иска́павый Бо́жия благода́ти сла́дость, я́ко гора́ ма́слина,/ те́ло твое́ слу́жит оби́тели твое́й,/ е́юже хва́лимся, воспева́юще дела́ Бо́жия. Сла́ва Отцу́ и Сы́ну и Свято́му Ду́ху. Лико́в преми́рных приснотеку́щий светоно́сный исто́чник,/ благода́ти храм, Пречи́стая Де́во,/ сохрани́ нас моли́твами уго́дника Бо́жия Васи́лия. И ны́не и при́сно и во ве́ки веко́в. Ами́нь. Богородичен: Избавля́еши нас пе́рвыя кля́твы Твои́м рождество́м, Благослове́нная Отрокови́це,/ се́го ра́ди вопие́м Ти гла́сом Гаврии́ла:/ ра́дуйся, Вино́вная всех спасе́нию. Песнь 9 Ирмос: Бо́га/ челове́ком невозмо́жно ви́дети,/ на Него́же не сме́ют чи́ни А́нгельстии взира́ти;/ Тобо́ю бо, Всечи́стая, яви́ся челове́ком/ Сло́во воплоще́нно,/ Его́же велича́юще,/ с Небе́сными во́и Тя ублажа́ем. Припев: Святи́телю о́тче Васи́лие, моли́ Бо́га о на́с. В земли́ кро́тких яви́лся еси́, о́тче Васи́лие, кро́ток,/ и незло́бив быв, с Вы́шними совокупля́яся во́инствы,/ я́ко доброде́тельными́ светлостьми́ укра́шен, блаже́нне. Припев: Святи́телю о́тче Васи́лие, моли́ Бо́га о на́с. Престо́л украша́я све́тло во всех, даже посреде́ злочести́вых градо́в,/ в нихже пожи́в, яко А́нгел,/ святи́тельством пома́зан, о́тче Богому́дре. Припев: Святи́телю о́тче Васи́лие, моли́ Бо́га о на́с. Па́мять твоя́ днесь составля́ет пра́здник,/ апо́стольский лик и му́ченический собо́р ра́дуется,/ пра́ведных похвало́, свети́ло Черного́рское,/ е́же ве́рнии, пе́сньми восхваля́юще, вопию́т ти:/ изба́ви нас от вся́ких напа́стей и бед, блаже́нне Василие. Припев: Святи́телю о́тче Васи́лие, моли́ Бо́га о на́с. Пресла́вная па́мять твоя́ нам возсия́,/ просвеща́ющи ве́рных, и́же мо́лятся ти, да помяне́ши их/ и моли́твами твои́ми изба́виши вся лю́ди твоя́, о́тче му́дре Васи́лие. Сла́ва Отцу́ и Сы́ну и Свято́му Ду́ху. Умертви́ на́ша плотски́я стра́сти и по́хоти,/ уста́ви бу́рю душе́вных волне́ний,/ укрепи́ же всех нас, и́же ве́рою и любо́вию почита́ют/ блаже́нную па́мять твою́, новоявле́нне Васи́лие. И ны́не и при́сно и во ве́ки веко́в. Ами́нь. Богородичен: Я́коже ка́пля небе́сная, во Твое́ чре́во, о Пресвята́я Де́во, дождь сни́де,/ изсуша́я пото́ки льсти́выя,/ и всем ве́рующим избавле́ние Тобо́ю, Пречи́стая, дарова́ся. Светилен Сла́вно красу́ется днесь светоза́рное торжество́ во святе́й сла́ве лица́ Бо́жия,/ я́ко прии́де день па́мяти святи́теля, его́же велича́юще, мо́лим:/ да помяне́т по и́мени служа́щих во оби́тели его́/ и всех нас, хва́лящих па́мять его́. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: На Тя, Пречи́стая, упова́ние к Бо́гу возлага́ем: моля́щеся Ти:/ да от Христа́ Го́спода испро́сиши нам невреди́мым до конца́ сохрани́тися.

Минея, 2 Марта, Канон святителя Глас 2 Песнь 1 Ирмос: Гряди́те, лю́дие,/ пои́м пе́снь Христу́ Бо́гу,/ разде́льшему мо́ре и наста́вльшему лю́ди,/ я́же изведе́ из рабо́ты еги́петския,/ я́ко просла́вися. Припев: Святи́телю о́тче на́ш Арсе́ние, моли́ Бо́га о на́с. Све́те от Све́та, Христе́ Бо́же, от Отца́ пре́жде век рожде́йся/ и искони́ Сый со Отце́м и Ду́хом,/ мрак души́ моея́ отгна́в, озари́ ум мой, молю́ся,/ я́ко да возмогу́ пе́ти Твоего́ уго́дника, Арсе́ния свяще́ннаго. Припев: Святи́телю о́тче на́ш Арсе́ние, моли́ Бо́га о на́с. А́ще и челове́к еси́ естество́м, о́тче,/ но а́нгельски на земли́ пожи́л еси́,/ десна́го пути́ от ю́ности е́мься 13, целому́дрия рачи́тель быв,/ Ду́ха Свята́го честно́е оби́телище, Арсе́ние свяще́нне, яви́лся еси́. Сла́ва Отцу́ и Сы́ну и Свято́му Ду́ху. Му́дрости глави́зну, страх Бо́жий возлюби́в/ и за́поведей Его́ при́сно поуча́яся,/ дре́во насади́ся при исхо́дищах вод духо́вных,/ от ни́хже, о́тче, напоя́емь, плод Христу́, Арсе́ние, прине́слся еси́. И ны́не и при́сно и во ве́ки веко́в. Ами́нь. Богородичен: Услы́ша Е́ва прама́ти, Чи́стая:/ в печа́лех роди́ши ча́да./ Ты же, Де́во, услы́шала еси́:/ Госпо́дь с Тобо́ю, ра́дуйся,/ и ра́дованным гла́сом, Богоневе́сто, печа́ль прама́тере потре́бльши. Песнь 3 Ирмос: На ка́мени мя ве́ры утверди́в,/ разшири́л еси́ уста́ моя́ на враги́ моя́,/ возвесели́ бо ся дух мой, внегда́ пе́ти:/ не́сть свят, я́коже Бог наш,/ и не́сть пра́веден, па́че Тебе́, Го́споди. Припев: Святи́телю о́тче на́ш Арсе́ние, моли́ Бо́га о на́с. Презре́в ни́жняя, я́ко попира́ема,/ и любо́вь роди́телей преоби́дев, Христа́ взыска́л еси́,/ Его́же любо́вию ду́шу твою́ уязви́л еси́,/ Того́ любя́ и Того́ ища́ красоты́. Припев: Святи́телю о́тче на́ш Арсе́ние, моли́ Бо́га о на́с. Свети́льник сый, твою́ ду́шу украша́я слеза́ми,/ ра́но ко Христу́ у́тренюя,/ ру́ку же просте́ртием в моли́твах, Амали́ка те́ло умертви́л еси́/ и на го́ру безстра́стия возше́л еси́. Сла́ва Отцу́ и Сы́ну и Свято́му Ду́ху. Благоро́дием высо́к и благоду́шием изя́щен,/ ра́зума му́дростию удивле́н был еси́,/ цвет я́ко прекра́сный, чистото́ю сия́я,/ и све́тлым смире́нием, Арсе́ние о́тче, украси́лся еси́. И ны́не и при́сно и во ве́ки веко́в. Ами́нь. Богородичен: Ма́ти Бо́жия, Пречи́стая, Благослове́нная и Пренепоро́чная,/ души́ моея́ стру́пы исцели́ и стра́сти плотски́я умертви́,/ умири́ ум мой, от вся́каго вре́да/ и вра́жия напа́сти изми́ мя, Влады́чице. Седален, глас 8 Ле́сть ми́ра, и бога́тства све́тлость,/ и высо́кую любо́вь роди́телей преоби́дев,/ смире́нием же к нищете́ уча́щему Влады́це Христу́ после́довал еси́,/ от Него́же поще́нием и моли́твами и́стинное бога́тство,/ и су́щую све́тлость, и Ца́рство недви́жимо, святи́телю Арсе́ние, насле́довал еси́./ К Нему́же ны́не моли́ся/ грехо́в оставле́ние пода́ти/ чту́щим любо́вию святу́ю па́мять твою́. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Да Свой па́ки сози́ждеши о́браз, Спа́се, истле́вший страстьми́,/ Небе́сных утаи́вся суще́ств, воплоти́лся еси́ от Де́вы,/ Е́йже со стра́хом вопие́м: ра́дуйся, Обра́дованная, Госпо́дь с Тобо́ю. Песнь 4 Ирмос: Пою́ Тя, слу́хом бо, Го́споди, услы́шах и ужасо́хся:/ до мене́ бо и́деши, мене́ ища́, заблу́ждшаго./ Тем мно́гое Твое́ снизхожде́ние, е́же на мя,/ прославля́ю, Многоми́лостиве. Припев: Святи́телю о́тче на́ш Арсе́ние, моли́ Бо́га о на́с. Вельми́ украси́л еси́ престо́л твой, святи́телю Арсе́ние,/ вели́кими бо чудесы́ преспе́л еси́ и житие́м све́тлым,/ сего́ ра́ди превели́кий Бог наш вельми́ тя просла́ви. Припев: Святи́телю о́тче на́ш Арсе́ние, моли́ Бо́га о на́с. Ми́лости Пода́теля Го́спода ве́дый, блаже́нне,/ те́пле Его́ умоли́л еси́/ на исцеле́ние и спасе́ние мно́гим, с ве́рою к тебе́ притека́ющим/ и в по́мощь тя призыва́ющим. Сла́ва Отцу́ и Сы́ну и Свято́му Ду́ху. Врача́ изря́дна разли́чно неду́гующим/ и наставле́ние всем, прельще́ным злым сове́том,/ Христо́с тя дарова́, чудотво́рца земли́ на́шей, святи́теля Арсе́ния,/ те́мже тя ублажа́ем. И ны́не и при́сно и во ве́ки веко́в. Ами́нь. Богородичен: Исцели́ла еси́ сокруше́ние, Всенепоро́чная, дре́вняго окая́нства землены́х,/ поро́ждшая Го́спода и Царя́ Христа́, поне́сшаго неду́ги на́ша/ за благосе́рдие неизглаго́ланное, Де́во Ма́ти. Песнь 5 Ирмос: Просвеще́ние во тьме́ лежа́щих,/ спасе́ние отча́янных,/ Христе́, Спа́се мой,/ к Тебе́ у́тренюю, Царю́ ми́ра,/ просвети́ мя сия́нием Твои́м,/ ино́го бо, ра́зве Тебе́, бо́га не зна́ю. Припев: Святи́телю о́тче на́ш Арсе́ние, моли́ Бо́га о на́с. Сла́вный па́стырь,/ неистощи́мый исто́чник исцеле́ния,/ церко́вный столп, ве́рных утвержде́ние,/ вели́кий свети́льник многосве́тлый, святи́телю Арсе́ние. Припев: Святи́телю о́тче на́ш Арсе́ние, моли́ Бо́га о на́с. Я́ко светоза́рно житие́, я́ко зело́ чу́дно,/ я́ко красни́ тру́дове твои́,/ я́ко вели́ка благода́ть свы́ше дана́ ти, му́дре,/ сего́ ра́ди ве́рою почита́ем тя, святи́телю Арсе́ние. Сла́ва Отцу́ и Сы́ну и Свято́му Ду́ху. Пресве́тлая твоя́ па́мять простира́ется в ми́ре/ и просвеща́ет челове́ческия души́ све́том благода́ти;/ ю́же соверша́ющих любо́вию,/ от бед нас изба́ви, мо́лимся, святи́телю Арсе́ние. И ны́не и при́сно и во ве́ки веко́в. Ами́нь. Богородичен: Се одр Соломо́нов, его́же обстоя́т си́льнии,/ Богодухнове́нных писа́ний ны́не прорица́ния,/ на не́мже Христо́с Бог воплоще́нием почи́л е́сть,/ Благослове́нная и Обра́дованная. Песнь 6 Ирмос: В бе́здне грехо́вней валя́яся,/ неизсле́дную милосе́рдия Твоего́ призыва́ю бе́здну:/ от тли, Бо́же, мя возведи́. Припев: Святи́телю о́тче на́ш Арсе́ние, моли́ Бо́га о на́с. Свети́льника тя су́щии во тьме́ пре́лести,/ неле́стно наставля́юща, обре́тше, к путе́м живота́, Богоблаже́нне Арсе́ние./ И ны́не по сме́рти врач яви́лся еси́ боля́щим/ Ду́ха Боже́ственною благода́тию. Припев: Святи́телю о́тче на́ш Арсе́ние, моли́ Бо́га о на́с. Зако́ном повину́яся Влады́чним, заблу́ждшия взыска́л еси́/ и во огра́ду покая́ния приве́л еси́,/ я́ко па́стырь и́стинен показа́вся ста́ду твоему́,/ о́тче святи́телю Арсе́ние. Сла́ва Отцу́ и Сы́ну и Свято́му Ду́ху. Свяще́ния храм, о́тче, Боже́ственнаго Ду́ха ве́рою быв,/ созда́л еси́ храм Пречи́стыя Ма́тере Бо́жия и Ея́ уго́дников, Анто́ния и Феодо́сия,/ и оби́тель пречу́дну сотвори́л и украси́л еси́,/ в не́йже те́ло твое́ положе́но бы́сть. И ны́не и при́сно и во ве́ки веко́в. Ами́нь. Зако́ни о Тебе́ пресла́вно, Де́во, обновля́ются:/ ражда́еши бо без се́мене Бо́га Спа́са/ и пребыва́еши, де́вствующи па́ки, стра́нно чу́до./ Тем Тя, Ма́терь Емману́илеву, благоче́стно испове́дуем. Кондак, глас 8 Восприе́мши ра́достно честны́я твоя́ мо́щи пречи́стая це́рковь,/ в ню́же че́стно вноси́мы мно́жеством священномона́хов и кня́зи благове́рными,/ и я́же прие́мши, я́ко сокро́вище многоце́нное./ Те́мже и мы ны́не, твоея́ огра́ды слове́сныя о́вцы,/ о́крест ра́ки твоея́ предстоя́ще,/ любе́зно вопие́м ти:/ не забу́ди чад твои́х, о́тче,/ и́хже му́дре собра́л и возлюби́л еси́,/ я́ко да зове́м ти:/ ра́дуйся, святи́телю Арсе́ние, па́стырю и учи́телю наш. Икос От скве́рных усте́н, от нечи́ста се́рдца,/ ка́ко ти принесу́ хвале́ния, окая́нный?/ Ужаса́юся и трепе́щу,/ но, наде́яся на твой благосе́рдный нрав, о́тче,/ хвалу́ ти прино́сим, глаго́люще:/ ра́дуйся, па́стырю наш до́брый, святи́телю Арсе́ние,/ упасы́й ста́до Христо́во;/ ра́дуйся, ди́вный чудотво́рче,/ притека́ющим к тебе́ с ве́рою неоску́дно исцеле́ние подава́я;/ ра́дуйся, це́рквам воздви́жение и и́ноков люби́телю,/ си́рым и ни́щим пода́телю;/ ра́дуйся и ты, Богохрани́мый гра́де Тве́рь,/ я́ко такова́ име́ в себе́ пожи́вша святи́теля;/ ра́дуйся и весели́ся, Бо́жия Ма́тере це́рковь,/ я́ко люби́мый Тобо́ю в тебе́ почи́л е́сть Богому́дрый Арсе́ний./ Но, о Богоблаже́нне о́тче!/ А́ще и те́лом преше́л еси́ от нас,/ но ду́хом пребыва́я с на́ми,/ и моли́ся за ны Христу́ и Пречи́стей Его́ Ма́тери/ с Ея́ уго́дники, Анто́нием и Феодо́сием,/ и спаса́й пою́щих тя, да зове́м ти:/ ра́дуйся, святи́телю Арсе́ние, па́стырю и учи́телю наш. Песнь 7 Ирмос: Богопроти́вное веле́ние беззако́ннующаго мучи́теля/ высо́к пла́мень вознесло́ е́сть;/ Христо́с же простре́ Богочести́вым отроко́м ро́су духо́вную,/ Сый благослове́н и препросла́влен. Припев: Святи́телю о́тче на́ш Арсе́ние, моли́ Бо́га о на́с. Вы́шний Царю́ и Вседержи́телю,/ моли́твами Твоего́ уго́дника жи́знь умири́ всем, Сло́ве, христиа́ном,/ посо́бствуя на ва́рвары благове́рным,/ да Тебе́, Христе́, зове́м:/ благослове́н Бог оте́ц на́ших. Припев: Святи́телю о́тче на́ш Арсе́ние, моли́ Бо́га о на́с. Престо́лу предстоя́ Бо́жию, святи́телю Христо́в Арсе́ние,/ моли́ти приле́жно не преста́й о нас, твои́х рабе́х,/ да огня́ ве́чнаго изба́вимся/ и вся́каго озлобле́ния, от враг находя́щаго, твои́ми моли́твами. Сла́ва Отцу́ и Сы́ну и Свято́му Ду́ху. Исцеле́ния подава́еши всю́ду ве́рою к тебе́ притека́ющим, святи́телю Арсе́ние./ Те́мже мо́лим тя, твои́ раби́:/ печа́ль на́шу в ра́дость преложи́/ и от вся́кия изба́ви ско́рби твои́ми моли́твами. И ны́не и при́сно и во ве́ки веко́в. Ами́нь. Богородичен: Стра́сти моего́ се́рдца исцели́ ми́лостию Твое́ю, Всепе́тая,/ ум мой умири́, и ду́шу мою́ просвети́,/ и ходи́ти мя напра́ви на стезю́ спаси́тельную,/ я́ко да пою́ Тя, Препе́тая. Песнь 8 Ирмос: В пе́щь о́гненную ко отроко́м евре́йским снизше́дшаго/ и пла́мень в ро́су прело́жшаго Бо́га,/ по́йте, дела́, я́ко Го́спода/ и превозноси́те во вся ве́ки. Припев: Святи́телю о́тче на́ш Арсе́ние, моли́ Бо́га о на́с. Устро́ив твою́ жи́знь боголе́пно, святи́телю Арсе́ние,/ строи́тель изря́ден показа́лся еси́ твое́й оби́тели/ и све́тло прия́телище Бо́жие. Припев: Святи́телю о́тче на́ш Арсе́ние, моли́ Бо́га о на́с. Чуде́с глубина́ и исцеле́ний река́,/ исто́чник непреста́нен, струя́, ника́коже оскудева́ема,/ твоя́ ра́ка показа́ся, о́тче. Сла́ва Отцу́ и Сы́ну и Свято́му Ду́ху. И́же к Бо́гу моли́твами твои́ми те́плыми/ очи́сти нас от вся́кия скве́рны, и скорбе́й, и боле́зней/ и вся́кия ну́жды, святи́телю Арсе́ние, изба́ви. И ны́не и при́сно и во ве́ки веко́в. Ами́нь. Богородичен: Пресвята́я Де́во, Ты мя спаси́/ и не́мощи мое́й бу́ди по́мощь,/ скорбе́й мно́гих и лю́тых мя изба́ви,/ да Тя сла́влю, Еди́ну Богоро́дицу. Песнь 9 Ирмос: Безнача́льна Роди́теля Сын, Бог и Госпо́дь,/ вопло́щся от Де́вы, нам яви́ся,/ омраче́нная просвети́ти, собра́ти расточе́нная./ Тем Всепе́тую Богоро́дицу велича́ем. Припев: Святи́телю о́тче на́ш Арсе́ние, моли́ Бо́га о на́с. Чудеса́ бо твоя́ мно́га и исцеле́ния безчи́сленна/ незави́стно подава́еши с те́плою ве́рою приходя́щим,/ Арсе́ние святи́телю, похвала́ земли́ на́шей. Припев: Святи́телю о́тче на́ш Арсе́ние, моли́ Бо́га о на́с. Поста́ви тебе́ Христо́с Ма́тере Своея́ це́ркве/ столпа́ кре́пка и неподви́жима,/ соблюда́юща и назира́юща град твой неподви́жим/ и святу́ю оби́тель Свою́. Сла́ва Отцу́ и Сы́ну и Свято́му Ду́ху. Святи́тели у́бо и кня́зи благочести́вии,/ свяще́нницы и и́ноцы и вси лю́дие,/ му́жи и жены́, и ста́рцы со младе́нцы,/ и всяк во́зраст, и вся́ко состоя́ние,/ святи́телю на́шему Арсе́нию све́тло пра́зднуем. И ны́не и при́сно и во ве́ки веко́в. Ами́нь. Богородичен: Моли́ Твоего́ Сы́на, Госпоже́ Пречи́стая Богоро́дице,/ изба́вити мя в де́нь стра́шнаго осужде́ния,/ да, ра́дуяся, пе́сньми велича́ю Тя. Светилен Восхва́лим дне́сь пе́сньми вели́каго па́стыря и учи́теля, Арсе́ния Богому́драго:/ сей бо измла́да возлюби́ Христа́ и Пречи́стую Его́ Ма́терь,/ с Не́юже ны́не мо́лит Христа́ Бо́га поми́ловати ду́ши на́ша. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: И́же от Бо́га ми́ру по́даным благи́м Ты вина́ была́ еси́, Богоро́дице,/ но и ны́не ми́лостива сотвори́ о о́бщем спасе́нии благопреме́ннаго Бо́га.

Минея, 2 Сентября, Канон святы́х Глас 4 Песнь 1 Ирмос: Отве́рзу уста́ моя́, / и напо́лнятся Ду́ха, / и сло́во отры́гну Цари́це Ма́тери, / и явлю́ся, све́тло торжеству́я, // и воспою́, ра́дуяся, Тоя́ чудеса́. Припев: Преподо́бнии отцы́ Анто́ние и Феодо́сие, моли́те Бо́га о на́с. Я́ко грубосло́вен и косноязы́чен,/ недоуме́я вам, преподо́бнии отцы́, хвале́ние принести́, молю́ся:/ да́рствуйте моли́тву о мне,/ е́же да́тися отсвы́ше да́ру воспе́ти па́мять ва́шу,/ сла́вна бо есть ми́ру и сла́вно просла́вися. Припев: Преподо́бнии отцы́ Анто́ние и Феодо́сие, моли́те Бо́га о на́с. От млады́х ногте́й в дар принесо́сте себе́ Бо́гови,/ о преблаже́ннии отцы́,/ те́мже, прие́м ва́ше благо́е предприя́тие,/ благода́тию Ду́ха наста́вил вы есть на путь пра́вый. Припев: Преподо́бнии отцы́ Анто́ние и Феодо́сие, моли́те Бо́га о на́с. За́поведей спасе́нных послу́шавше,/ жизнь вре́менную преоби́десте/ и, Крест Госпо́день на ра́мо взе́мше, мра́чный мир непреткнове́нно преидо́сте,/ Небе́сным жела́нием води́ми. Припев: Преподо́бнии отцы́ Анто́ние и Феодо́сие, моли́те Бо́га о на́с. Оте́чество, роди́тели, дру́ги и бога́тство, а́ки пре́лесть, отве́ргше,/ го́рний Иерусали́м Бо́га же Отца́,/ не стыдя́щагося вас бра́тию нарица́ти, Христа́,/ еди́н би́сер взыска́ти те́сным путе́м изво́листе,/ Анто́ние свободоимени́те и Феодо́сия богодарова́нне. Припев: Преподо́бнии отцы́ Анто́ние и Феодо́сие, моли́те Бо́га о на́с. Я́ко пустыннолю́бныя го́рлицы, гор Пече́рских дости́гше, богоно́снии отцы́,/ во подзе́мная места́ всели́стеся/ и, на тве́рдом духо́внаго жела́ния основа́нии гнездо́ свое́ поло́жше,/ богопе́снивыя породи́сте птенцы́, и́ночествующих ли́ки. Сла́ва Отцу́ и Сы́ну и Свято́му Ду́ху. Троичен: Сла́ва Ти, сла́ва, Тро́ице Пресвята́я,/ тихообра́зно подаю́щая благода́ть в сердца́ ве́рных,/ да сконча́ем хвале́ния святы́х де́ло и возвесели́мся зело́,/ честни́и дру́зи Твои́, Го́споди. И ны́не и при́сно и во ве́ки веко́в. Ами́нь. Богородичен: Упра́ви ум мой, Пречи́стая, во хвале́нии преподо́бных Твои́х,/ да не укло́нься в неподо́бная, плени́тся в рабо́ту лука́вства,/ и бу́ду ра́дование чужде́му. Песнь 3 Ирмос: Твоя́ песносло́вцы, Богоро́дице, / живы́й и незави́стный исто́чниче, / лик Себе́ совоку́пльшия духо́вно, утверди́, / в Боже́ственней Твое́й сла́ве // венце́в сла́вы сподо́би. Припев: Преподо́бнии отцы́ Анто́ние и Феодо́сие, моли́те Бо́га о на́с. Я́ко еле́нь, возжа́ждав духо́внаго пития́, о́тче Анто́ние,/ от Пече́рския горы́ на Афо́нскую го́ру, скача́, прише́д,/ обре́те струи́ ангелови́дных оте́ц жития́,/ и сим поревнова́в, от пото́ка уче́ния их испи́в, и утверди́ся. Припев: Преподо́бнии отцы́ Анто́ние и Феодо́сие, моли́те Бо́га о на́с. Втора́го тя Моисе́я, Анто́ние, скрижа́ли доброде́телей на Пече́рскую го́ру прине́сшаго,/ слы́шав, Феодо́сий, прите́к, глаго́ля:/ вчини́ мя в сих любо́вь, утверди́ мя в них, а́ки в ми́рех,/ уя́звен бо есмь любо́вию сопосле́довати христоподража́нному житию́ твоему́. Припев: Преподо́бнии отцы́ Анто́ние и Феодо́сие, моли́те Бо́га о на́с. Любо́вию и жела́нием ко Бо́гу/ единоу́мне сопря́гшеся, отцы́ преподо́бнии,/ на колесни́цу смире́ния, нищеты́, терпе́ния и чистоты́ вседо́сте/ и превысо́ких достига́ете святы́х селе́ний. Припев: Преподо́бнии отцы́ Анто́ние и Феодо́сие, моли́те Бо́га о на́с. Кто не удивится ва́шему житию́, о преблаже́ннии отцы́?/ Кто не почуди́тся ре́вности по Бо́зе?/ я́ко во пло́ти су́ще, Ангелом весьма́ уподо́бистеся,/ и́хже и сожи́телие су́ще ны́не, не забу́дите и нас,/ пе́сньми вас ублажа́ющих. Сла́ва Отцу́ и Сы́ну и Свято́му Ду́ху. Троичен: Непостижи́мая бла́гость и де́йство Твое́, во Тро́ице Еди́ный Бо́же:/ я́ко бре́нных воскриля́еши горе́/ и от миродержа́вныя но́щи вы́спре ко све́ту возвыша́еши, приводи́мый и устроя́еши,/ Бог бо еси́ и твори́ши, ели́ка хо́щеши. И ны́не и при́сно и во ве́ки веко́в. Ами́нь. Богородичен: По вели́чию Твоему́, Пречи́стая, блажа́т Тя вси ро́ди,/ и мы с ни́ми блажи́м пе́сньми, чту́ще Тя раболе́пным поклоне́нием, и велича́ем. Седален, глас 4 Небе́сное бога́тство и присносу́щную сла́ву тща́щеся восприя́ти,/ нищету́ и смире́ние смири́вшагося Влады́ки восприя́ете/ и ми́ру себе́ распя́сте со похотьми́ и страстьми́,/ тем, блажа́ще па́мять ва́шу, преподо́бнии отцы́ на́ши Анто́ние и Феодо́сие, мо́лим:/ моли́те Христа́ Бо́га дарова́ти нам ве́лию ми́лость. Песнь 4 Ирмос: Седя́й в сла́ве на Престо́ле Божества́, / во о́блаце ле́гце, / прии́де Иису́с Пребоже́ственный, / нетле́нною дла́нию, и спасе́ зову́щия: // сла́ва, Христе́, си́ле Твое́й. Припев: Преподо́бнии отцы́ Анто́ние и Феодо́сие, моли́те Бо́га о на́с. Самовла́стная ума́, о́тче Анто́ние, оста́вль,/ под и́го Влады́чне преклони́лся еси́, ему́же и до́блественный Феодо́сий припря́гся:/ плени́стеся в послуша́ние Христо́во и бы́сте до́брии де́лателие,/ единонра́вны се́рдцем и ду́хом. Припев: Преподо́бнии отцы́ Анто́ние и Феодо́сие, моли́те Бо́га о на́с. Не устраши́ша вас в те́мных пеще́рах де́монская страхова́ния,/ доблему́дреннии во́ини, преподо́бнии отцы́,/ но паде́ся ра́туяй вас под нога́ми ва́шими,/ низве́ржен ору́жием: те́плыя ко Бо́гу молитвы. Припев: Преподо́бнии отцы́ Анто́ние и Феодо́сие, моли́те Бо́га о на́с. Тве́рдое ва́ше и жесто́кое житие́ ви́дев, Всеблаги́й Бог/ от те́мных мест просвети́ вас дарова́нием чуде́с/ и сла́вны сотвори́ ми́ру, и́хже недосто́ин бе мир,/ в гора́х и верте́пах кры́ющихся толи́ких свети́л. Припев: Преподо́бнии отцы́ Анто́ние и Феодо́сие, моли́те Бо́га о на́с. Я́ко пресве́тлая свети́ла/ поста́ви вас Бог, преподо́бнии отцы́, на све́щницы с под спу́да,/ и просвети́сте жития́ доброде́тельми и́ночествующих ли́ки,/ и́же, со́брани, до́бре пожи́ша ва́шим наставле́нием. Сла́ва Отцу́ и Сы́ну и Свято́му Ду́ху. Троичен: Царю́ царе́м, Всемогу́щая Тро́ице,/ бре́ния не́мощию обложе́нным нам, рабо́м Твои́м, даждь благода́ть/ я́сно пе́ти па́мять преподо́бных Твои́х,/ в ни́хже удиви́л еси́ вся хоте́ния Своя́, Бо́же. И ны́не и при́сно и во ве́ки веко́в. Ами́нь. Богородичен: Всеси́льная Влады́чице, нас, немощны́х,/ препоя́ши си́лою на сопроти́вных,/ подаю́щи не́мощней пло́ти кре́пость:/ о Тебе́ бо и немощни́и кре́пкия враги́ побежда́ют/ и победи́тельная в пе́снех дароно́сят. Песнь 5 Ирмос: Ужасо́шася вся́ческая / о Боже́ственней сла́ве Твое́й: / Ты бо, Неискусобра́чная Де́во, / име́ла еси́ во утро́бе над все́ми Бо́га / и родила́ еси́ Безле́тнаго Сы́на, / всем воспева́ющим Тя // мир подава́ющая. Припев: Преподо́бнии отцы́ Анто́ние и Феодо́сие, моли́те Бо́га о на́с. Уче́нием и творе́нием бы́сте о́браз и́ночествующим,/ отцы́ треблаже́ннии,/ и ва́шим наставле́нием мно́зи успе́ша в за́поведи Госпо́дни/ и сих исполне́нием ко го́рнему ше́ствию благи́й путь улучи́ша. Припев: Преподо́бнии отцы́ Анто́ние и Феодо́сие, моли́те Бо́га о на́с. Проро́ческим сподо́бльшеся да́ром, достохва́льнии отцы́,/ ов бо огнь указа́тельный на ме́сто с небеси́ упа́сти сотвори́,/ ов же ску́дную жи́тницу моли́твою муки́ испо́лни,/ от тех даро́в крупи́цами насы́тити ду́ши на́ша мо́лимся. Припев: Преподо́бнии отцы́ Анто́ние и Феодо́сие, моли́те Бо́га о на́с. Я́ко законода́вцы, по́стническим лико́м предтеко́сте:/ ты, о́тче Анто́ние, скрижа́ли дея́ния и виде́ния предлага́я,/ богода́нный же Феодо́сий жезло́м правле́ния мо́ре страсте́й пресе́к,/ предхожде́ние тем показу́я во обетова́нную зе́млю. Припев: Преподо́бнии отцы́ Анто́ние и Феодо́сие, моли́те Бо́га о на́с. Упова́нием бу́дущих благ себе́ вооружи́вше/ и Креста́ меч в рука́х иму́ще,/ победи́сте мысленнаго Амали́ка,/ и на́ша враги́ пособи́те победи́ти,/ я́ко предводи́телей на́ших, мо́лим вы, отцы́ преподо́бнии. Сла́ва Отцу́ и Сы́ну и Свято́му Ду́ху. Троичен: Мирода́тельная Тро́ице, Единоче́стный Бо́же,/ мир огради́, правосла́вныя лю́ди, предстоя́щия в честне́м хра́ме преподо́бных Твои́х,/ храм Себе́ сотворя́я сердца́ принося́щих Ти песнь хвале́ния. И ны́не и при́сно и во ве́ки веко́в. Ами́нь. Богородичен: Мирополо́жнице и ски́ние Пресвята́я Бо́га Сло́ва,/ нам сло́во даждь и мысль упра́ви,/ во е́же пе́ти Тя, я́ко Благу́ю Благо́му Роди́тельницу. Песнь 6 Ирмос: Боже́ственное сие́ и всечестно́е / соверша́юще пра́зднество, / Богому́дрии, Богома́тере, / прииди́те, рука́ми воспле́щим, // от Нея́ ро́ждшагося Бо́га сла́вим. Припев: Преподо́бнии отцы́ Анто́ние и Феодо́сие, моли́те Бо́га о на́с. Вы́шше естества́ челове́ческаго подви́гшеся, преподо́бнии,/ уподо́бистеся безпло́тных чино́м,/ те́мже и по́честь сих улучи́сте;/ сея́ богодароова́нныя вам благода́ти и нас, ча́да ва́ша, не лиши́те/ хода́тайством свои́м ко Бо́гу, мо́лимся. Припев: Преподо́бнии отцы́ Анто́ние и Феодо́сие, моли́те Бо́га о на́с. Вам, а́ки неусы́пным стра́жем,/ Де́ва и Богома́ти вве́ри дом Свой, его́же пасо́сте,/ от волко́в мы́сленных стрегу́ще в нем собра́нное ва́ми ста́до, о преблаже́ннии. Припев: Преподо́бнии отцы́ Анто́ние и Феодо́сие, моли́те Бо́га о на́с. Всегда́шним я́же к Бо́гу ума́ воскри́лием/ и воздея́нием рук, преподо́бнии отцы́, ста́вше,/ Ду́ху Пресвято́му селе́ние себе́ сотвори́сте,/ те́мже вас, а́ки дом Бо́жий преукра́шен, хвала́ми украша́ем. Припев: Преподо́бнии отцы́ Анто́ние и Феодо́сие, моли́те Бо́га о на́с. Сия́ еста́ преудобренная отца́, а́ки Херуви́ми, осеня́ющии дом Богома́тере,/ и а́ки прему́дрии вожди́ и́ноческому ли́ку,/ и́хже не удали́теся заступа́ти во вся́ких ну́ждах и ско́рбех. Сла́ва Отцу́ и Сы́ну и Свято́му Ду́ху. Троичен: Тро́ице Пресвята́я,/ жела́тельное достоя́ние да́вшая во ски́ниях святы́х богоно́сным первонача́льником на́шим,/ сих ра́ди и нас того́ сподо́би,/ в жи́зни сей сохраня́ющей от язы́ческих нахожде́ний. И ны́не и при́сно и во ве́ки веко́в. Ами́нь. Богородичен: Тя, Засту́пницу ми́ра и Богома́терь, всего́ живота́ моего́ спасе́ние предлага́ю,/ Ты бо, Бо́га ро́ждши, спасти́ мо́жеши пою́щия Тя/ и в заступле́ние кро́ва Твоего́ прибега́ющии. Кондак, глас 8 Дво́ицу вели́ких оте́ц и пра́вило и́ноков све́тлое,/ умныя зари́, онебе́сившия Росси́йскую Це́рковь,/ кто по достоя́нию хвала́ми воспое́т?/ Ти́и бо Престо́лу Бо́жию предстоя́т./ Но, я́ко иму́щии дерзнове́ние ко Святе́й Тро́ице,/ Анто́ние преблаже́нне и Феодо́сие приснопа́мятне,/ моли́теся о моле́бная вам принося́щих// и любо́вию пе́сньми вас ублажа́ющих. Икос В присносу́щнем Пресвяты́я Тро́ицы Боже́ственнем све́те/ да восприи́мете селе́ние, преподо́бнии отцы́,/ вся ле́та жи́зни сея́ в те́сной пеще́ре пожи́вшии;/ те́мже и, преста́вльшеся от вре́менных, вели́ким чуде́с дарова́нием от Го́спода сподо́бистеся:/ боле́зни исцеля́ти, бе́сы от челове́к прогоня́ти/ и без вре́да оби́тель свою́ сохраня́ти, заступа́юще в ско́рбех;/ моли́теся о моле́бная к вам принося́щих/ и пе́сньми любо́вию вас ублажа́ющих. Песнь 7 Ирмос: Не послужи́ша тва́ри Богому́дрии, / па́че Созда́вшаго, / но о́гненное преще́ние му́жески попра́вше, / ра́довахуся, пою́ще: // препе́тый отце́в Госпо́дь и Бог благослове́н еси. Припев: Преподо́бнии отцы́ Анто́ние и Феодо́сие, моли́те Бо́га о на́с. Благу́ю жизнь зде пожи́вше, блаже́нныя кончи́ны сподо́бистеся, отцы́ святи́и,/ преста́висте бо ся от вре́менных к ве́чным честно́ю сме́ртию,/ я́же быва́ет честна́ преподо́бных Твои́х,/ Го́споди Бо́же оте́ц на́ших. Припев: Преподо́бнии отцы́ Анто́ние и Феодо́сие, моли́те Бо́га о на́с. Ра́вными труды́ ни́ву душ ва́ших возде́лавше, преподо́бнии,/ ра́вная семена́ доброде́телей посе́ясте/ и по кончи́не ра́вных воздая́ний пожина́ете радостотво́рныя рукоя́ти, пою́ще:/ Го́споди Бо́же оте́ц на́ших. Припев: Преподо́бнии отцы́ Анто́ние и Феодо́сие, моли́те Бо́га о на́с. На воде́ поко́йне при исто́чнице вод пресла́дких,/ на ло́жах преподо́бных упокоя́ющеся, преблаже́ннии отцы́,/ от пото́ка сла́достнаго поне́ ка́плею ва́шея благода́ти/ ча́да ва́ша обда́рствите, пою́щия в день па́мяти ва́шея:/ Бо́же оте́ц на́ших. Сла́ва Отцу́ и Сы́ну и Свято́му Ду́ху. Троичен: Тро́ическое неразде́льне, разде́льне же Ли́цы, оба́че Еди́но чтем Божество́,/ Безнача́льна Отца́, Собезнача́льна Сы́на и Преблагослове́ннаго, от Отца́ исходящаго Ду́ха. И ны́не и при́сно и во ве́ки веко́в. Ами́нь. Богородичен: По Боже́ственному существу́ Отцу́ Своему́ Единосу́щественный Бог Сло́во/ от Де́вы единоесте́ствен челове́ком яви́ся,/ плоть прие́м из пречестны́х крове́й/ и благослове́нную наре́к Свою́ Ма́терь. Песнь 8 Ирмос: Отроки благочести́выя в пещи́ / Рождество́ Богоро́дичо спасло́ есть, / тогда́ у́бо образу́емое, / ны́не же де́йствуемое, / вселе́нную всю воздвиза́ет пе́ти Тебе́: / Го́спода по́йте дела́ // и превозноси́те Его́ во вся ве́ки. Припев: Преподо́бнии отцы́ Анто́ние и Феодо́сие, моли́те Бо́га о на́с. Гра́ды и оте́чества своя́, я́коже Авраа́м, оста́висте,/ вы́шняго гра́да со Авраа́мом жи́телие ны́не, богоно́снии отцы́, су́ще,/ отту́ду посети́те нас в день па́мяти ва́шея/ и умоли́те Христа́ с ва́ми нам пе́ти во ве́ки. Припев: Преподо́бнии отцы́ Анто́ние и Феодо́сие, моли́те Бо́га о на́с. И́же ва́ше торжество́ пра́зднующим днесь, о святи́и уго́дницы,/ моли́теся изба́витися вся́каго вра́жия наве́та, от ва́рварских нахожде́ний,/ на сопроти́вных возвыша́юще рог христиа́н правосла́вных,/ пою́щих Го́спода во ве́ки. Припев: Преподо́бнии отцы́ Анто́ние и Феодо́сие, моли́те Бо́га о на́с. Ми́лостивно о нас простира́йте ру́це свои́ ко Влады́це, святи́и первонача́льницы на́ши,/ и неотлу́чно назира́йте ста́до ва́ше, я́коже обеща́стеся,/ сохраня́юще то от волко́в мы́сленных,/ сподо́бите же с ва́ма пе́ти Го́спода во ве́ки. Припев: Преподо́бнии отцы́ Анто́ние и Феодо́сие, моли́те Бо́га о на́с. Сла́вити ва́шу па́мять кто не восхо́щет,/ той да не улучи́т ве́чныя сла́вы,/ нам же, сла́вящим, умоли́те Го́спода, иде́же ли́цы святы́х, иде́же собо́р преподо́бных со А́нгелы,/ пе́сньми превозноси́ти Го́спода во ве́ки. Сла́ва Отцу́ и Сы́ну и Свято́му Ду́ху. Троичен: Яко на превознесе́нную возше́дше го́ру, прииди́те, лю́дие,/ ста́нем во хра́ме преподо́бных первонача́льников Пече́рских и просла́вим Тро́ицу Пресвяту́ю,/ я́же нас собра́ во дне́шний день просла́вити па́мять святы́х Свои́х. И ны́не и при́сно и во ве́ки веко́в. Ами́нь. Богородичен: Святу́ю го́ру Бо́жию и селе́ние Вьшняго му́дрствующе Тя, Де́во Чи́стая, зове́м:/ сла́ва Ти, ма́терем и де́вам сла́во и похвало́ челове́ческаго ро́да. Песнь 9 Ирмос: Всяк земноро́дный / да взыгра́ется, Ду́хом просвеща́емь, / да торжеству́ет же Безпло́тных умо́в естество́, / почита́ющее свяще́нное торжество́ Богома́тере, / и да вопие́т: // ра́дуйся, Всеблаже́нная, Богоро́дице Чи́стая Присноде́во. Припев: Преподо́бнии отцы́ Анто́ние и Феодо́сие, моли́те Бо́га о на́с. И́же ве́рою приходя́щим ко хра́му ва́шему, святи́и отцы́,/ утеше́ние подава́йте в ско́рбех,/ сохраня́юще сих разли́чных озлобле́ний,/ я́ко да вас, засту́пников на́ших, при́сно велича́ем. Припев: Преподо́бнии отцы́ Анто́ние и Феодо́сие, моли́те Бо́га о на́с. А́ки десятистру́нная гусль и велегла́сная труба́,/ Пече́рская ва́ми согражде́нная Ла́вра пропове́дует ва́шу па́мять,/ Анто́ние богому́дре и Феодо́сие достохва́льне,/ созыва́ющи лю́ди на хвалу́ и по́честь,/ и́хже и мы велича́ем. Припев: Преподо́бнии отцы́ Анто́ние и Феодо́сие, моли́те Бо́га о на́с. Принесе́нное в дар благода́рственное на́ше пе́ние на́зрите, преподо́бнии отцы́,/ и тихосмотри́тельным о́ком и́же грубогранесло́вное испра́вите,/ прие́млюще не я́ко в дар, но я́ко во серде́ц на́ших к вам раче́ние,/ и́мже вас днесь велича́ем. Припев: Преподо́бнии отцы́ Анто́ние и Феодо́сие, моли́те Бо́га о на́с. Влады́чней подо́бящеся бла́гости,/ а́ки две ле́пте, пе́ние и де́лание сие́ от нас прие́мше, треблаже́ннии отцы,/ испроси́те грехо́м оставле́ние,/ в час же коне́чный предста́ните нам, обнаде́ждующе упова́нием доити́,/ иде́же святи́и Христа́ Царя́ велича́ют. Сла́ва Отцу́ и Сы́ну и Свято́му Ду́ху. Ели́ко духо́вную благода́ть Пресвята́го Ду́ха во гру́бый ра́зум,/ толи́ко воспе́ти дерзну́х па́мять ва́шу, Анто́ние свя́те и Феодо́сие блаже́нне, сим наверша́я:/ даю́щему моли́тву моля́щемуся и пе́ние хотя́щему/ Бо́гу Еди́ному сла́ва бу́ди, бу́ди. И ны́не и при́сно и во ве́ки веко́в. Ами́нь. Богородичен: Хоте́нием смотре́ния Своего́ вся сотвори́вый, Пречи́стая,/ из Тебе́ воплоти́выйся Бог И́стинный и Челове́к Соверше́нный. Светилен Све́та су́ще вы́шняго ближа́йшии гра́ждане/ и прекраснаго Иерусали́ма насе́льницы святи́и,/ ни́жних, вы́ну ра́туемых, посети́те и подава́йте по́мощь/ ва́шу честну́ю па́мять ны́не восхваля́ющим. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Све́та Тричи́сленнаго Де́ва су́щи и Ма́ти,/ во све́те вчини́ жи́ти вы́шнем/ пою́щих нетле́нное Рождество́ Твое́, Обра́дованная.

Минея, 30 Ноября, Други́й кано́н апо́стола Глас 1 Песнь 1 Ирмос: Столпо́м о́гненным и о́блачным/ Изра́иля наставле́й я́ко Бог,/ мо́ре разве́рже, колесни́цы же фарао́новы глубино́ю покры́,/ пои́м песнь побе́дную, я́ко еди́н просла́вися. Припев: Святы́й апо́столе Андре́е, моли́ Бо́га о на́с. Тро́стию Ева́нгелия из глубины́ ле́сти изъе́мь, Андре́е многопе́тый,/ ты улови́л еси́ лю́ди,/ я́ко обеща́ Христо́с, научи́вый тя челове́ки, я́ко ры́бы, лови́ти. Припев: Святы́й апо́столе Андре́е, моли́ Бо́га о на́с. И́же ве́ры столп, седа́лище и́стинных догма́т Христо́вых, Андре́й Богодохнове́нный/ вся днесь призыва́ет земны́я концы́ пра́зднество ле́тное соста́вити,/ стеце́мся у́бо, вси ве́рнии. Припев: Святы́й апо́столе Андре́е, моли́ Бо́га о на́с. Морска́го ки́та мре́жами испыту́я,/ худо́жеством лове́ц мре́жею Ду́ха язы́ки, племена́ и лю́ди уловля́еши Ду́хом я́вственнее/ и вы́шнюю глубину́, многочу́дне, я́ве открыва́еши нам. Припев: Святы́й апо́столе Андре́е, моли́ Бо́га о на́с. Тайногра́дче Небе́сный, самови́дче и ри́торе неизрече́ннаго позна́ния Христо́ва,/ прие́мый свы́ше Ду́ха Свята́го, глаго́люща в язы́цех Седя́щаго,/ огне́м разделя́юща дарова́ния, моли́ спасти́ся нам. Сла́ва Отцу́ и Сы́ну и Свято́му Ду́ху. Троичен: Пребезнача́льныя Тро́ицы Еди́нице Пресу́щественней/ ве́рою покланя́юся, не разсеца́я Божества́,/ есть бо Единови́дна, Проста́, Неразде́льна,/ совокупля́ю же сию́ Существо́м, Ли́цы же ве́рне разделя́ю. И ны́не и при́сно и во ве́ки веко́в. Ами́нь. Богородичен: Младе́нствует Бог из Де́вы и обновля́ет растле́вшияся из Ада́ма,/ разруша́ет же средосте́ние и вражды́ прегражде́ние пло́тию Свое́ю,/ кля́тву благословля́ет прама́тернюю, из Пречи́стыя Ма́тере проше́д. Песнь 3 Ирмос: Да утверди́тся се́рдце мое́ в во́ли Твое́й, Христе́ Бо́же,/ и́же над вода́ми Не́бо утвержде́й второ́е/ и основа́вый на вода́х зе́млю, Всеси́льне. Припев: Святы́й апо́столе Андре́е, моли́ Бо́га о на́с. Сло́вом призыва́ющему,– гряди́ во след Мене́,– Христу́ а́бие после́дова со Андре́ем и Ки́фа,/ роди́теля оста́вивше, и ладию́, и мре́жи,/ я́ко ве́ры предусмотри́телие. Припев: Святы́й апо́столе Андре́е, моли́ Бо́га о на́с. Ка́пища претвори́в в хра́мы Бо́жия, всече́стне,/ освяти́л еси́ в них сы́ны Креще́ния,/ я́же благода́ть обнови́ водо́ю и Ду́хом. Припев: Святы́й апо́столе Андре́е, моли́ Бо́га о на́с. Би́сер многоце́нный та́инственне ми́ру предложи́л еси́,/ в селе́ се́рдца твоего́ сокрове́нный, апо́столе,/ его́же ве́рою сокро́вищствоваша язы́цы обре́тшии. Припев: Святы́й апо́столе Андре́е, моли́ Бо́га о на́с. Я́ко сокро́вище, Ева́нгелие в ру́ки прии́м, многопе́те,/ всю обогати́л еси́ зе́млю Боже́ственныя про́поведи,/ те́мже и па́мять твою́ почита́ет со страда́нии твои́ми. Сла́ва Отцу́ и Сы́ну и Свято́му Ду́ху. Троичен: В Тро́ице Еди́ну Си́лу правосла́вне вси воспои́м,–/ Безнача́льнаго, Несозда́ннаго Бо́га, Единосу́щнаго,/ Сопресто́льнаго, Триипоста́снаго, Трисо́лнечнаго, –/ Сию́ воспева́юще. И ны́не и при́сно и во ве́ки веко́в. Ами́нь. Богородичен: Вся́ка у́бо ма́ти, ча́до ро́ждши, не ктому́ де́вствовати мо́жет,/ Ты же, ро́ждши Христа́, Де́во Ма́ти,/ пребыла́ еси́, млекопита́ющи Жизнь на́шу и чиста́ пребы́вши. Седален, глас 8 Я́ко первозва́ннаго всех ученико́в, и самови́дца Сло́ва, и служи́теля,/ Андре́е апо́столе, по до́лгу чтим тя,/ А́гнцу бо, взе́млющему грехи́ ми́ра,/ несомне́нною ве́рою те́пле после́довал еси́,/ отону́дуже и стра́сти Его́ о́бщник показа́лся еси́,/ пло́тию претерпе́вшаго нас ра́ди во́льно смерть./ Сего́ ра́ди вопие́м ти:/ моли́ся Христу́ Бо́гу грехо́в оставле́ние пода́ти/ пра́зднующим любо́вию святую па́мять твою́. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Ра́дуйся, престо́ле огнезра́чный Бо́жий;/ ра́дуйся, Отрокови́це, седа́лище ца́рское, о́дре упещренопостла́нный,/ златопорфи́рный черто́же, хлами́до червленоша́рная,/ украше́нный хра́ме, молнено́сная колесни́це, свети́льниче многосве́тлый;/ ра́дуйся, Богоро́дице, двонадесятосте́нный гра́де, и дверь златокова́нная,/ и черто́же светообра́зный, светлопозлаще́нная трапе́зо, Богоукраше́нная ски́ние;/ ра́дуйся, сла́вная Неве́сто солнцека́плющая;/ ра́дуйся, еди́на души́ моей благоле́пие. Песнь 4 Ирмос: Ду́хом прови́дя, проро́че Авваку́ме,/ Словесе́ воплоще́ние, пропове́дал еси́, вопия́:/ внегда́ прибли́житися ле́том, позна́ешися,/ внегда́ приити́ вре́мени, пока́жешися./ Сла́ва си́ле Твое́й, Го́споди. Припев: Святы́й апо́столе Андре́е, моли́ Бо́га о на́с. Мре́жи твоя пове́рг и взем Кре́ст, путе́м после́довал еси́ зову́щему Христу́/ и, мре́жу Ду́ха распросте́р, вме́сто рыб челове́ки ло́виши./ Сла́ва да́вшему ти Ду́ху. Припев: Святы́й апо́столе Андре́е, моли́ Бо́га о на́с. Ду́ха пла́мень язы́ком прии́м,/ был еси́, апо́столе, Богоприя́тен муж,/ небе́сныя красоты́ обходя́, и я́же в тех у́мная познава́я добро́ты,/ и нам открыва́яй сия́. Припев: Святы́й апо́столе Андре́е, моли́ Бо́га о на́с. Пусты́ню жа́ждущую напои́л еси́, му́дре, Боже́ственными словесы́ твои́ми/ и показа́л сию́ многопло́дну,/ ча́да церко́вная плодонося́щую про́поведи се́мя./ Сла́ва да́вшему ти Ду́ху. Припев: Святы́й апо́столе Андре́е, моли́ Бо́га о на́с. Неизрече́нную твою́ добро́ту Андре́й предуви́дев, Иису́се,/ сро́дника призва́ све́тле:/ Пе́тре единокро́вне, обрето́хом Месси́ю, в зако́не и проро́цех пропове́даннаго,/ гряди́, прилепи́мся и́стинно жи́зни. Сла́ва Отцу́ и Сы́ну и Свято́му Ду́ху. Троичен: Тро́ицу во Еди́нице воспои́м, ве́рнии,/ во Еди́ном Божестве́ Отца́, и Сы́на, и Ду́ха Боже́ственнаго,/ Существо́ Еди́но и Естество́ Неразде́льне, Неразлу́чне, Неча́стне:/ Еди́н бо в Трех Ли́цех Бог. И ны́не и при́сно и во ве́ки веко́в. Ами́нь. Богородичен: Еди́наго от Тро́ицы неизрече́нно во чре́ве заче́нши,/ родила́ еси́ нетле́нно я́ко Сы́на,/ и Тро́ица у́бо прило́га отню́д не возыме́,/ и чиста́, я́коже бе и пре́жде рождества́, цела́, Богома́ти, пребы́вши. Песнь 5 Ирмос: Озари́ наш ум, Бо́же,/ све́том за́поведей Твои́х,/ и све́тлостию благода́ти Твоея́,/ да́руя нам, Бла́же, Твоя́ ми́лости,/ зане́ свет и мир повеле́ния Твоя́. Припев: Святы́й апо́столе Андре́е, моли́ Бо́га о на́с. Вожделе́вый Креста́, Христо́в учениче́,/ получи́л еси́ кресто́м твои́м Нетле́нное Ца́рство,/ к нему́же вся привле́кл еси́ Кресто́м Боготаи́нники,/ насле́дство подая́й Богосло́вом того́. Припев: Святы́й апо́столе Андре́е, моли́ Бо́га о на́с. Поиска́л еси́ Христа́, и́стинно Живота́,/ и, взыска́в, пе́рвый обре́л еси́,/ обре́т же, та́йне прия́л еси́,/ и прие́м Сего́ в само́м да́вшем, и был еси́ сокро́вище жи́зни нетле́нныя. Припев: Святы́й апо́столе Андре́е, моли́ Бо́га о на́с. Глаго́лы твои́х Боже́ственных греме́ний излия́шася в ми́ре/ и от крае́в до крае́в земли́ проидо́ша,/ окружи́ша бо, яко́же колесо́, и яви́шася твоя́ мо́лния,/ я́ко глаго́лет Дави́д, вселе́нней. Припев: Святы́й апо́столе Андре́е, моли́ Бо́га о на́с. Помина́й нас, Христо́в учениче́, соверша́ющих твою́ па́мять и чту́щих мо́щи твоя́,/ моли́ся при́сно приле́жно о па́стве,/ ея́же был еси́ изнача́ла храни́тель и спасе́ние. Сла́ва Отцу́ и Сы́ну и Свято́му Ду́ху. Троичен: Отца́ и Сы́на и Ду́ха – Бо́га,/ Неразде́льную Тро́ицу, Триипоста́сное Ца́рство просла́вим согла́сно, ве́рнии,/ безпреста́нными Богосло́вии, Сию́ ве́рно песносло́вяще. И ны́не и при́сно и во ве́ки веко́в. Ами́нь. Богородичен: Родила́ еси́ Свет, не ве́дущи ка́ко,/ всесве́тлый све́щниче Со́лнца светонося́щая,/ и была́ еси́ невеще́ственнаго Све́та но́вое прия́телище,/ точа́щее всей земли́ Богозна́ния зари́. Песнь 6 Ирмос: Проро́ка Ио́ну подража́я, вопию́:/ живо́т мой, Бла́же, свободи́ из тли/ и спаси́ мя, Спа́се ми́ра, зову́ща: сла́ва Тебе́. Припев: Святы́й апо́столе Андре́е, моли́ Бо́га о на́с. И́же из Вифсаи́ды изводи́мый,/ нас пра́здновати созыва́ет,/ торжество́ свое́ предложи́в нам изря́дства боре́ний свои́х. Припев: Святы́й апо́столе Андре́е, моли́ Бо́га о на́с. Худо́жеством ры́барь, ве́рою же учени́к,/ я́ко глубину́ испыту́я сердца́ ве́рных,/ у́дицу низпуща́ет сло́ва и уловля́ет нас. Припев: Святы́й апо́столе Андре́е, моли́ Бо́га о на́с. Любве́ Христо́вы в се́рдцы твое́м огнь обнося́, учениче́, вопия́л еси́ язы́ком:/ пла́мень ваш угасе́, и́стинно я́вльшуся Христу́. Припев: Святы́й апо́столе Андре́е, моли́ Бо́га о на́с. Со́лию ум осоли́вше Христо́вою./ я́ди ва́ша услади́ша вам догма́ты небе́сныя и нетле́нныя сла́дости. Сла́ва Отцу́ и Сы́ну и Свято́му Ду́ху. Троичен: Отцу́ и Сы́ну и Ду́ху Пра́вому поклони́мся, ве́рнии, –/ Триипоста́сному Естеству́ Неразде́льному, – вопию́ще:/ сла́ва в Тро́ице Бо́гу. И ны́не и при́сно и во ве́ки веко́в. Ами́нь. Богородичен: Благоволе́нием Отца́ воплоти́ся Сын,/ Ду́хом Бо́жиим во утро́бе Твое́й, Чи́стая,/ и спасе́ пре́жний о́браз, Богороди́тельнице, я́ве. Кондак, глас 2 Му́жества тезоимени́таго Богоглаго́льника/ и Це́ркве возсле́дователя верхо́внаго,/ Петро́ва сро́дника восхва́лим,/ зане́ я́коже дре́вле сему́ и ны́не нам воззва́:/ прииди́те, обрето́хом Жела́емаго. Икос Дре́вле у́бо Дави́д востяга́ет гре́шнаго, я́ко мене́,/ пове́дати Бо́жия благосло́вне оправда́ния,/ оба́че к ве́ре учи́т па́ки/ и слеза́ми мно́жайшими изглаго́льствует:/ днесь бо глас Его́ а́ще услы́шите,/ серде́ц не ожесточи́те, я́ко не́когда Изра́иль преогорчи́./ Наво́дит же про́чее во псалме́:/ Го́сподеви вся земля́ воспо́йте,/ прииди́те, обрето́хом Жела́емаго. Песнь 7 Ирмос: Су́щим в пещи́ отроко́м Твои́м, Спа́се,/ не прикосну́ся, ниже́ стужи́ огнь./ Тогда́ трие́, я́ко еди́неми усты́, поя́ху/ и благословля́ху, глаго́люще:/ благослове́н Бог оте́ц на́ших. Припев: Святы́й апо́столе Андре́е, моли́ Бо́га о на́с. Всесвята́го Ду́ха огнь, соше́дый свы́ше, апо́столе Христо́в,/ язы́ки но́вы, и́миже никогда́ же веща́л еси́ ми́ра конце́м,/ повеле́ тебе́ глаго́лати вели́чия Его́. Припев: Святы́й апо́столе Андре́е, моли́ Бо́га о на́с. Преудивля́ет вся́ку мысль про́поведь,/ ю́же воструби́сте земли́, таи́нницы Христо́вы и зри́теле вы́шних,/ я́ко еди́ни двана́десяте, тьмы земли́ просвети́сте. Припев: Святы́й апо́столе Андре́е, моли́ Бо́га о на́с. Удивле́на бысть, Влады́ко Христе́, благода́ть Твоя́ в Богому́дрых ученице́х,/ я́ко ма́лии и простцы́ су́ще, всю зе́млю протеко́ша/ от коне́ц ея́ да́же до коне́ц всех. Припев: Святы́й апо́столе Андре́е, моли́ Бо́га о на́с. Кто научи́ тя та́ко глаго́лати, апо́столе?/ Кто просвети́ твой ум, зре́ти я́сно непристу́пныя сла́вы зарю́,/ возсия́вшую и́стины свет в сердца́х на́ших? Сла́ва Отцу́ и Сы́ну и Свято́му Ду́ху. Троичен: Тро́ически воспои́м, ве́рнии,/ сла́вяще Безнача́льнаго Отца́ и Сы́на и Ду́ха Пра́ваго, –/ Еди́нственное Существо́ Еди́но, – Ю́же трегу́бо да воспои́м:/ Свят, Свят, Свят еси́ во ве́ки, ами́нь. И ны́не и при́сно и во ве́ки веко́в. Ами́нь. Богородичен: Я́ко от Тро́ицы Еди́наго Тя, Христе́, сла́вим,/ я́ко из Де́вы воплоти́выйся кроме́ враще́ния,/ челове́чески вся поне́сл еси́, не отступи́в Естества́ Оте́ческаго, И́исусе,/ а́ще и соедини́лся еси́ нам. Песнь 8 Ирмос: На Сина́и купину́ горя́щу/ неопа́льну сохра́ншаго/ и о́троки посреде́ горя́щаго пла́мене изба́вльшаго,/ Бо́га по́йте, благослови́те/ и превозноси́те Его́ во ве́ки. Припев: Святы́й апо́столе Андре́е, моли́ Бо́га о на́с. Худо́жеством ры́барства из мо́ря улови́л еси́ ры́бы, всему́дре,/ ны́не же ве́рою челове́ки ло́виши Христу́ от ле́сти вра́жия,/ глубина́ бо бе лесть иногда́, погружа́ющая язы́ки бу́рею неве́дения. Припев: Святы́й апо́столе Андре́е, моли́ Бо́га о на́с. У́мную жития́ нево́лненно преплы́л еси́ глубину́, апо́столе,/ прелете́в ве́трилом Ду́ха, ве́рою Христо́вою./ Те́мже и в приста́нище жи́зни дости́гл еси́, ра́дуяся, во вся ве́ки. Припев: Святы́й апо́столе Андре́е, моли́ Бо́га о на́с. У́мному Со́лнцу, на Дре́ве заше́дшу самовла́стною во́лею,/ и́же Со́лнца свети́льник сразреши́тися ища́й заити́ во Христа́,/ на дре́ве пове́шен бысть кре́стнем Андре́й вели́кий, свети́ло церко́вное. Припев: Святы́й апо́столе Андре́е, моли́ Бо́га о на́с. О учениче́ и люби́миче Христо́в и сочи́сленне апо́столов Его!/ Егда́ на Престо́ле ся́дет Судия́ с ва́ми двана́десятьми суди́ти, я́ко обеща́ние глаго́лет,/ бу́дите тогда́ нам человеколю́бия стена́. Сла́ва Отцу́ и Сы́ну и Свято́му Ду́ху. Троичен: Трисве́тлую Еди́ницу и Тро́ицу Сопресто́льную/ возславосло́вим неразделя́юще, соединя́юще же Ю соесте́ственно,/ я́ко Еди́но и́стинно Существо́, соедине́нно в Ли́цех Трех неслива́емо. И ны́не и при́сно и во ве́ки веко́в. Ами́нь. Богородичен: Су́ща от Тро́ицы Еди́наго заче́нши, родила́ еси́,/ воплоще́ннаго из Тебе́ и обновля́ющаго зако́ны естества́ Рождество́м Твои́м, Чи́стая,/ Того́ о нас я́ко Бо́га при́сно моля́щи не преста́й, Богоро́дице. Песнь 9 Ирмос: Светоно́сный о́блак, в о́ньже всех Влады́ка,/ я́ко дождь с небесе́ на руно́, сни́де/ и воплоти́ся нас ра́ди,/ быв Челове́к, Безнача́льный,/ велича́ем вси я́ко Ма́терь Бо́га на́шего Чи́стую. Припев: Святы́й апо́столе Андре́е, моли́ Бо́га о на́с. И́же мре́жу распростры́й та́инственнаго Боговиде́ния/ и я́ко ры́бы в ней улови́вый добро́тами небе́сных разуме́ний,/ моли́, свя́те, Святу́ю Тро́ицу источи́ти и нам очище́ние. Припев: Святы́й апо́столе Андре́е, моли́ Бо́га о на́с. Благодари́м язы́цы, тобо́ю просве́щшиися и от земли́ на Небеса́ тобо́ю возведе́ннии,/ служе́ния бо вра́жия отсту́пльше, бы́хом соприча́стницы святы́х А́нгел,/ Госпо́дния же сла́вы о́бщницы. Припев: Святы́й апо́столе Андре́е, моли́ Бо́га о на́с. Неизрече́нных самови́дцы и служи́телие Сло́ва,/ таинственново́дцы и зри́телие неизсле́дных,/ снасле́дником и нам бы́ти моли́теся, апо́столи, Христо́ва ца́рствия/ и прича́стником Божества́ Его́. Припев: Святы́й апо́столе Андре́е, моли́ Бо́га о на́с. Вяза́ти и реши́ти прие́мше от Христа́ власть,/ разреши́те вся от уз мно́гих прегреше́ний,/ егда́ прии́дет Христо́с и вси ся́дите двана́десять на престо́лех толи́цех/ суди́ти вся племена́ Изра́илева. Сла́ва Отцу́ и Сы́ну и Свято́му Ду́ху. Троичен: Триипоста́сное Естество́ и Неразде́льную Сла́ву, в Божестве́ Еди́ном пева́емую,/ непреста́нно на Небеси́ и на земли́ Тро́ицу неразлу́чную просла́вим,/ с Сы́ном Отцу́ и Ду́ху покланя́ющеся благоче́стно. И ны́не и при́сно и во ве́ки веко́в. Ами́нь. Богородичен: Под Твое́ благоутро́бие прибега́ющия ве́рою/ и покланя́ющияся благоче́стно Сы́ну Твоему́, Де́во Богороди́тельнице,/ Того́ я́ко Бо́га ми́ра и Го́спода моли́/ от тле́ния и бед изба́вити и вся́ких напа́стей. Светилен Сло́во Пребезнача́льное обре́т тя, всеблаже́нне,/ первозва́нна показа́ всех апо́столов, Андре́е приснопа́мятне,/ и, Сего́ стопа́м возсле́дуя, показа́лся еси́ путево́ждь заблу́ждших,/ к Небе́сному сия́ возводя́ Боже́ственному ше́ствию. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Петро́ва скро́вника, ученико́в пе́рвейшаго,/ самови́дца и слугу́ бы́вшаго Сло́ва, Андре́я апо́стола пресла́вно восхва́лим,/ язы́ки бо просвети́ и, ра́спят быв,/ кончи́ну подъе́млет, я́ко учени́к Влады́ки.

Минея, 22 Января, Канон Глас 1 Песнь 1 Ирмос: Твоя́ победи́тельная десни́ца боголе́пно в кре́пости просла́вися: та́ бо, Безсме́ртне, я́ко всемогу́щая проти́вныя сотре́, изра́ильтяном пу́ть глубины́ новосоде́лавшая. Припев: Святы́й му́чениче Анастáсие, моли́ Бо́га о на́с. У́тром светле́йшим Твоего́, Христе́, воста́ния осиява́емь, сего́ тезоимени́тый, от восто́ка устреми́вся, я́ко со́лнце, ны́не Це́рковь озаря́ет чудесы́. Сла́ва Отцу́ и Сы́ну и Свято́му Ду́ху. Боже́ственныя любве́ испо́лнен, терпели́вно му́ки претерпе́л еси́, му́чениче Анаста́сие, и Христу́, по́стническими укра́шен добро́тами, ра́дуяся, приве́лся еси́, благово́нная же́ртва, блаже́нне. И ны́не и при́сно и во ве́ки веко́в. Ами́нь. Богородичен: Ра́дуйся, благода́ти исто́чниче, ра́дуйся, ле́ствице и две́ре небе́сная, ра́дуйся, све́щниче, и ста́мно злата́я, и горо́ несеко́мая, Я́же Жизнода́вца Христа́ ми́ру Ро́ждшая. Песнь 3 Ирмос: Еди́не, ве́дый челове́ческаго существа́ не́мощь и ми́лостивно в не́ вообра́жся, препоя́ши мя́ с высоты́ си́лою, е́же вопи́ти Тебе́, Святы́й, одушевле́нный хра́ме неизрече́нныя сла́вы Твоея́, Человеколю́бче. Припев: Святы́й му́чениче Анастáсие, моли́ Бо́га о на́с. Стезю́ ше́ствовав те́сную, пе́рвее у́бо поще́нием к му́ченической сла́ве предуспе́л еси́, муче́ния ра́ди наслажде́ние обре́т боле́зньми, сла́вне му́чениче Анаста́сие, небе́сную красоту́ прие́мля. Сла́ва Отцу́ и Сы́ну и Свято́му Ду́ху. Боле́знь страда́ния твоего́ во всю́ изы́де вселе́нную, му́чениче непобеди́ме: проти́ву бо греха́ да́же до кро́ве сопроти́вився, победоно́сец бы́л еси́ и венце́м побе́ды украси́лся еси́. И ны́не и при́сно и во ве́ки веко́в. Ами́нь. Богородичен: Из Тебе́ прозябе́, Чи́стая, Цве́т неувяда́емый, благоуха́ющий все́ челове́чество Боже́ственным ми́ром естества́ Своего́, И́же Отцу́ Собезнача́льный, и из Тебе́ бы́в под ле́том, Де́во Всенепоро́чная. Седален, глас 4 Сла́вою соверше́нства яви́лся еси́ прече́стен, я́ко Боже́ственными просвети́в светозаре́нии у́м и позна́в Креста́ кре́пость, преподо́бен посто́м и кровьми́ му́ченик бы́л еси́, богому́дренне, Анаста́сие блаже́нне. Те́мже и чуде́с тобо́ю то́чит да́р Христо́с. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Де́во Всенепоро́чная, я́же Пресу́щнаго Бо́га ро́ждшая, со безпло́тными Того́ непреста́нно моли́ оставле́ние прегреше́ний, и исправле́ние жития́ да́ти на́м пре́жде конца́, ве́рою и любо́вию пою́щим Тя́ по до́лгу, Еди́на Всепе́тая. Песнь 4 Ирмос: Го́ру Тя́, благода́тию Бо́жиею приосене́нную, прозорли́выма Авваку́м усмотри́в очи́ма, из Тебе́ изы́ти Изра́илеву провозглаша́ше Свято́му, во спасе́ние на́ше и обновле́ние. Припев: Святы́й му́чениче Анастáсие, моли́ Бо́га о на́с. Ничто́же тя́ су́щия ко Христу́ любве́ отлучи́: ни удо́в отсече́ние, ни ра́н преще́ние, ни ме́чь, ни сме́рть, но ниже́ о́гнь, ниже́ гла́д, Анаста́сие, небе́снаго ликова́ния купносе́льниче. Сла́ва Отцу́ и Сы́ну и Свято́му Ду́ху. Со усе́рдием на ра́мо кре́ст тво́й взе́м, после́довал еси́ Христо́вым спаси́тельным за́поведем и, Сего́ бы́в подража́тель да́же до сме́рти, всеизря́днейше, ны́не наслажда́ешися Того́ све́тлости. И ны́не и при́сно и во ве́ки веко́в. Ами́нь. Богородичен: Ра́дость Тебе́ я́ве с небесе́ прише́д, архистрати́г, Чи́стая, благовести́, ре́к: Бо́г изы́дет с пло́тию из Тебе́, Де́во Всечи́стая, во спасе́ние любо́вию пою́щих Тя́. Песнь 5 Ирмос: Бо́г Сы́й ми́ра, Оте́ц щедро́т, вели́каго Сове́та Твоего́ А́нгела, ми́р подава́юща, посла́л еси́ на́м; те́м, богоразу́мия к све́ту наста́вльшеся, от но́щи у́тренююще, славосло́вим Тя́, Человеколю́бче. Припев: Святы́й му́чениче Анастáсие, моли́ Бо́га о на́с. Дре́вле хваля́йся безме́рно, и зе́млю претя́ объя́ти, и всу́е гордя́ся, мо́ре, му́дре, все́ потреби́ти, твои́ми благому́жествы, Анаста́сие му́чениче, попира́ется богопроти́вный. Сла́ва Отцу́ и Сы́ну и Свято́му Ду́ху. Зако́нно пострада́в му́ченик Христо́в и победи́в, страда́нии возме́здия, чуде́с де́йство прие́млет я́ве: неду́ги бо цели́т и де́моны отгоня́ет, Христо́вою си́лою чудоде́йствуя, Анаста́сий. И ны́не и при́сно и во ве́ки веко́в. Ами́нь. Богородичен: Прокля́тие Е́вы, все́х ма́тере, Твои́м Рождество́м, Де́во, упраздни́ла еси́, ми́ру благослове́ние израсти́вши, Христа́: те́м Тя́, ра́дующеся, и усты́, и язы́ком, Богоро́дицу вои́стинну испове́дающе, велича́ем. Песнь 6 Ирмос: Из утро́бы Ио́ну младе́нца изблева́ морски́й зве́рь, якова́ прия́т; в Де́ву же все́льшееся Сло́во и пло́ть прие́мшее про́йде, сохра́ншее нетле́нну: Его́же, бо не пострада́ истле́ния, Ро́ждшую сохрани́ неврежде́нну. Сла́ва Отцу́ и Сы́ну и Свято́му Ду́ху. Заре́ю Кре́стною я́ве просвеща́емь, пре́лести мра́к разреши́л еси́ и победи́л еси́, спле́тся с мучи́телем, всесла́вне, и, ра́дуяся, прия́л еси́ твоя́ победи́тельная, му́чениче Христо́в Анаста́сие, лику́я с му́ченическими во́инствы. И ны́не и при́сно и во ве́ки веко́в. Ами́нь. Богородичен: Ве́сь ли́к от Бо́га науче́н проро́ческий Твое́ прорече́ та́инство несказа́ннаго и боже́ственнаго зача́тия, е́же из Тебе́ Боже́ственнаго Сло́ва, Ма́ти Де́во: Ты́ бо и́стиннейший и дре́вний сове́т яви́ла еси́. Песнь 7 Ирмос: Тебе́, у́мную, Богоро́дице, пе́щь, разсмотря́ем, ве́рнии, я́коже бо о́троки спасе́ три́ Превозноси́мый, ми́р обнови́, во чре́ве Твое́м всеце́л, хва́льный отце́в Бо́г и препросла́влен. Припев: Святы́й му́чениче Анастáсие, моли́ Бо́га о на́с. Страда́лец ве́рныя поуща́ет, я́ве о́браз показа́в му́жество свое́ Боже́ственней ны́не подража́ти стра́сти во́льней, ю́же за ны́ претерпе́ хва́льный отце́в Бо́г и препросла́влен. Сла́ва Отцу́ и Сы́ну и Свято́му Ду́ху. Равномо́щная Тро́ица ве́руется благоче́стия рачи́телем: до́блии бо страда́льцы за Сию́ пострада́ша, кро́ви излива́юще, му́ченически борю́щеся, и ду́ши предаю́ще я́ве, и убива́еми. И ны́не и при́сно и во ве́ки веко́в. Ами́нь. Богородичен: Ра́дуйся, Чи́стая, из Тебе́ про́йде Па́стырь, И́же во Ада́мову ко́жу оде́явся, вои́стинну превозноси́мый во всего́ мя́, челове́ка, за благоутро́бие непости́жное, хва́льный отце́в Бо́г и препросла́влен. Песнь 8 Ирмос: Чу́да преесте́ственнаго росода́тельная изобрази́ пе́щь о́браз: не бо́, я́же прия́т, пали́т ю́ныя, я́ко ниже́ о́гнь Божества́ — Де́вы, в Ню́же вни́де утро́бу. Те́м, воспева́юще, воспое́м: да благослови́т тва́рь вся́ Го́спода и превозно́сит во вся́ ве́ки. Припев: Святы́й му́чениче Анастáсие, моли́ Бо́га о на́с. От земли́ ты́ к небесе́м венцено́сец, му́чениче Анаста́сие, возлете́л еси́, ле́сти вся́кия де́монския избе́г, и попра́л еси́ и́дольская чти́лища. Те́мже и зове́ши ны́не, ра́дуяся: да благослови́т тва́рь вся́ Го́спода и превозно́сит во вся́ ве́ки. Сла́ва Отцу́ и Сы́ну и Свято́му Ду́ху. Омочи́л еси́ му́ченическими твои́ми кровьми́ твою́ оде́жду, пребога́те му́чениче, кре́ст же, я́ко ски́птр, нося́, со Христо́м ца́рствуеши во ве́ки, Анаста́сие, Ему́же ны́не воспева́еши, ра́дуяся: да благослови́т тва́рь вся́ Го́спода и превозно́сит во вся́ ве́ки. И ны́не и при́сно и во ве́ки веко́в. Ами́нь. Богородичен: Арха́нгельскими песносло́вии сла́вимый, Бога́тное Сло́во на́с ра́ди обнища́, Тя́ Ма́терь, добро́ту Иа́ковлю, Благослове́нная, избра́в. Те́мже, воспева́юще, пое́м: да благослови́т тва́рь вся́ Го́спода и превозно́сит во вся́ ве́ки. Песнь 9 Ирмос: О́браз чи́стаго рождества́ Твоего́ огнепали́мая купина́ показа́ неопа́льная; и ны́не на на́с напа́стей свире́пеющую угаси́ти, мо́лимся, пе́щь, да Тя́, Богоро́дице, непреста́нно велича́ем. Припев: Святы́й му́чениче Анастáсие, моли́ Бо́га о на́с. Струя́ми твои́х крове́й, сла́вне, и́дольскую ле́сть всю́ погаси́л еси́, исполне́ние же Це́ркве уясни́л еси́, о не́йже моля́ся, всеизря́днейше, не преста́й Влады́це, да тя́ вси́ блажи́м. Сла́ва Отцу́ и Сы́ну и Свято́му Ду́ху. О, па́че сло́ва сла́вы твоея́ и неизрече́ннаго Боже́ственнаго вои́стинну осия́ния! Его́же причасти́лся еси́ я́ко победи́тель, Анаста́сие, Влады́це Христу́ предстоя́, Его́же и ны́не моли́ о на́с, воспева́ющих тя́. И ны́не и при́сно и во ве́ки веко́в. Ами́нь. Богородичен: О, стра́шнаго Твоего́ чудесе́! Ты́ бо, Де́во Богоро́дице, та́инство, пре́жде родо́в и пре́жде веко́в сокрове́нное в Бо́зе, вся́ созда́вшем, ро́ждши Бо́га Сло́ва несказа́нно, яви́ла еси́.

Ин канон святителя Глас 4 Песнь 1 Ирмос: Пои́м, лю́дие, ди́вно чудоде́йствовавшему/ в Чермне́м мо́ри Христу́ Бо́гу,/ я́ко дре́вле Изра́иля всевооруже́на/ стопа́ми пешеше́ствовати непрохо́дную сотвори́/ и зло́бы делода́теля фарао́на во глубине́ потопи́. Припев: Святи́телю, о́тче Алекси́е, моли́ Бо́га о на́с. Богосия́тельными Триипоста́снаго Све́та зарями Богови́дно озаре́нный,/ златоза́рный свети́льниче церко́вный, Богому́дре Алекси́е, мо́лим тя:/ светоно́сными твои́х моли́тв луча́ми в достоле́пую твою́ похвалу́/ просвети́ ум тя хва́лящих. Припев: Святи́телю, о́тче Алекси́е, моли́ Бо́га о на́с. Христоподража́тельный а́нгеле земны́й,/ Богомы́сленный Небе́сным А́нгелом собесе́дниче,/ Боговенча́нный а́дских а́нгел победи́телю,/ удосто́ивыйся зрети вели́каго сове́та А́нгела, Бо́га воплоще́нна,/ треблаже́нне Алекси́е, мо́лим тя:/ твои́ми Боговнуша́емыми мольба́ми изба́ви ны от душевре́дных прилог а́дских. Сла́ва Отцу́ и Сы́ну и Свято́му Ду́ху. Горьково́дною душетле́нных прегреше́ний буре́ю потопля́еми,/ к тебе́, я́ко досточу́дну вла́ющагося мо́ря утиши́телю, прибега́юще, вопием:/ свя́те Алекси́е, твои́ми Богоуго́дными моли́твами утиши́ волну́ющееся страсте́й на́ших мо́ре. И ны́не и при́сно и во ве́ки веко́в. Ами́нь. Богородичен: Светоно́сный облаче, одожди́вый нам дождь Небе́сный, воплоще́нное Сло́во Божие,/ Богороди́тельнице Де́во, небото́чною Твоего́ благоутро́бия водо́ю/ погаси́ огнепа́льный вредоно́сных страсте́й на́ших пламень. Песнь 3 Ирмос: Да не хва́лится мудр хваля́йся,/ но о се́м е́же разумева́ти,/ я́ко несть свят, я́ко Бог наш,/ вознося́й рог наш,/ дая́й кре́пость царе́м на́шим. Припев: Святи́телю, о́тче Алекси́е, моли́ Бо́га о на́с. Тя, Богому́дра ко́рмчия,/ Небе́сным сло́ва Бо́жияго корми́лом Богохрани́мый кора́бль Росси́йския Це́ркве/ к благоти́шному ве́чныя жи́зни при́станищу пра́ве корми́льствовавша, блажа́ще, мо́лим:/ всече́стне Алекси́е,/ к благове́дрой покая́ния тиши́не корми́льствуй ду́ши на́ша. Припев: Святи́телю, о́тче Алекси́е, моли́ Бо́га о на́с. Душеспаси́тельну всемо́щнаго мо́ря Творца́ за́поведь благопоспе́шно сохра́ньша/ и бу́рная вла́ющагося мо́ря треволне́ния моли́твою́ утиши́вша,/ твои́м чудодействи́тельным предста́тельством утиши́ волну́ющуюся скорбе́й на́ших бу́рю. Сла́ва Отцу́ и Сы́ну и Свято́му Ду́ху. Златото́чная реко́ Бо́жия, Небе́сными Ева́нгельскаго уче́ния вода́ми/ Богосажде́нный Це́ркве Росси́йския рай наводни́вшая оби́льно,/ досточу́дне Алекси́е,/ небото́чною духо́вный ра́дости струе́ю напая́й скорбя́щия ду́ши на́ша. И ны́не и при́сно и во ве́ки веко́в. Ами́нь. Богородичен: В Богозда́нном Богосло́вяще Це́ркве апо́стольския Не́бе,/ к Тебе́, светоно́сному незаходи́маго Со́лнца Не́бу, прибега́ем, вопию́ще:/ Всепе́тая Де́во, Твое́ю Небе́сною по́мощию помози́ нам,/ Тя блажа́щим, в Небе́сная всели́тися жили́ща. Песнь 4 Ирмос: Гла́сом благоглаго́ливым предразуме́в, Авваку́м/ зря́ще Сло́ва воплоще́ние и взыва́ше я́ве:/ слух услы́шах Бо́жия сове́та,/ Бог бо непрело́жно Челове́ком возбесе́дует,/ из горы́ гряды́й Де́вственнаго чре́ва/ и мир избавля́я/ началоро́дныя кля́твы. Припев: Святи́телю, о́тче Алекси́е, моли́ Бо́га о на́с. Богосоде́янною смиренному́драго исправле́ния мре́жею/ неисче́тное рыб слове́сных мно́жество Богопоспе́шно уловле́й,/ Богому́дрый ло́вче, досточу́дный Алекси́е,/ Богокова́нною предста́тельства твоего́ у́дицею извлецы́ ны из глу́бокия зол мно́гих пучи́ны. Припев: Святи́телю, о́тче Алекси́е, моли́ Бо́га о на́с. Небе́сным сло́ва Бо́жия врачевство́м/ душетле́нныя уврачевствова́вый людски́х грехопаде́ний язи́/ и Богоустро́енным кро́ткаго наказа́ния пла́стырем умовре́дныя исцели́вый ра́ны,/ безме́здный цели́телю, досточу́дный Алекси́е, мо́лим тя,/ исцели́ душевре́дныя грехо́в на́ших стру́пы. Сла́ва Отцу́ и Сы́ну и Свято́му Ду́ху. Благоплодови́тое Богонасажде́ннаго са́да дре́во,/ благово́нныя прозя́бшее достохва́льных исправле́ний плоды́/ и плодоно́сныя просте́ршее к Не́бу Боговнуши́мых моле́ний ве́тви,/ всечу́дне Алекси́е, мо́лим тя:/ Богора́сленным твоего́ покрова ли́ствием/ осени́ ны от вредоно́снаго лю́тых бед же́га. И ны́не и при́сно и во ве́ки веко́в. Ами́нь. Богородичен: К Тебе́, златоза́рная Све́та Неве́черняго заре́, Богороди́тельнице Де́во, прибега́ем, вопию́ще:/ светоза́рным Твоего́ защище́ния сия́нием разреши́ темнозра́чен о́блак печа́лей на́ших. Песнь 5 Ирмос: Нощебори́мых страсте́й тиме́нием/ к Тебе́ у́тренюю, Еди́ному Благоутро́бному,/ души́ моея́ мглу просвети́ и у́зы пресеки́ долго́в мои́х,/ я́ко да Твои́м Соприсносу́щным Ду́хом просвеща́емь,/ пра́вды путь нетле́нный обря́щу повеле́ний Твои́х. Припев: Святи́телю, о́тче Алекси́е, моли́ Бо́га о на́с. Слове́сную па́ству Христо́ву благово́нным Ева́нгельскаго уче́ния зла́ком Богоуго́дно воспита́вый/ и на пра́вый Христоподража́тельнаго жития́ путь Боголе́пно наставле́й, па́стырю до́брый,/ всеблаже́нне Алекси́е, мо́лим тя:/ твои́ми моли́твами наста́ви ны на пра́вую за́поведей Божиих стезю́. Припев: Святи́телю, о́тче Алекси́е, моли́ Бо́га о на́с. Богозда́нный Ду́ха Свята́го сосу́де, чи́стым любве́ Бо́жия зла́том Боголе́пно позлаще́нный,/ Богому́дре о́тче Алекси́е,/ раждеже́нным сло́ва Божия сребро́м ча́да твоя́ обогаще́й оби́льно, мо́лим тя:/ твои́ми моли́твами пода́ждь нам Небе́сное Бо́жия благода́ти бога́тство. Сла́ва Отцу́ и Сы́ну и Свято́му Ду́ху. Богонача́льному преми́рных умо́в ли́ку сообще́нный/ и Богосия́тельными Триипоста́снаго Све́та заря́ми Богови́дно озаре́нный,/ у́ме Богому́дрый, священнонача́льниче Алекси́е,/ Небе́сною Богооткрове́нныя ти му́дрости луче́ю просвеща́й свы́ше мра́чныя умы́ на́ша. И ны́не и при́сно и во ве́ки веко́в. Ами́нь. Богородичен: Богора́сленный грозд, воплоще́нное Сло́во Бо́жие прозя́бшая,/ Богосажде́нная лозо́, Всенепоро́чная Де́во, мо́лим Тя:/ благово́нным Бо́жия благода́ти вино́м напая́й жа́ждущия ду́ши на́ша. Песнь 6 Ирмос: Из чре́ва а́дова во́пля моего́ услы́шал еси́ глас мой/ и возве́л еси́ от тли бу́ри прегреше́ний,/ обдержи́т бо, Спа́се,/ и погружа́ти искуша́ет, Бла́же:/ но я́коже пре́жде Ио́ну возве́л еси́ от тли́,/ и ме́не, молю́ся, Го́споди,/ предвари́в, спаси́. Припев: Святи́телю, о́тче Алекси́е, моли́ Бо́га о на́с. Златоза́рная Росси́йская звездо́,/ светоно́сными равноапо́стольских исправле́ний заря́ми/ Богозда́нное Це́ркве Бо́жия Не́бо озари́вшая светло́/ и темномра́чну ва́рварских наве́тов мглу разре́шшая Богопоспе́шно,/ всеблаже́нне Алекси́е,/ разреши́ те́мен напа́стей вра́жиих о́блак. Припев: Святи́телю, о́тче Алекси́е, моли́ Бо́га о на́с. В Боголе́пную Невеще́ственнаго Бо́га сла́ву/ веще́ственныя хра́мы Бо́жия Боготща́тельно созда́вый,/ мы́сленный хра́ме Бо́жий, Богоносе Алекси́е, мо́лим тя,/ Богоуго́дными твои́ми мольба́ми Богоприе́мный храм Бо́жий сози́жди сердца́ на́ша. Сла́ва Отцу́ и Сы́ну и Свято́му Ду́ху. Пагуборо́дное го́рдаго киче́ния те́рние исто́ргнувый/ и доброра́сленныя смиреному́драго Богомы́слия ле́торасли Богопоспе́шно возрасти́вый,/ благоплодови́тый Небе́снаго сада́ ко́реню, всечу́дне Алекси́е,/ насади́ в сердца́х на́ших Богорасти́тельный Богоуго́днаго смире́ния ко́рень. И ны́не и при́сно и во ве́ки веко́в. Ами́нь. Богородичен: Всемо́щнаго морски́х треволне́ний утиши́теля,/ воплоще́нное Сло́во Бо́жие ро́ждшая,/ Богоро́дице Де́во,/ Небе́сною Твоего́ засту́пничества тишино́ю/ многобу́рную утиши́ скорбе́й на́ших молву́. Песнь 7 Ирмос: Тя живопису́ющий ассири́йский пла́мень/ ю́ноши три спа́се, Го́споди,/ я́коже и Де́ву не опали́ Отрокови́цу,/ в Боже́ственном Рождестве́ Твое́м Боже́ственная искра́:/ препе́тый отцев Бо́же, благослове́н еси́. Припев: Святи́телю, о́тче Алекси́е, моли́ Бо́га о на́с. Тя, я́ко от Небе́снаго врача́ дар исцеле́ния ту́не прие́мша,/ та́ко вредоно́сныя к тебе́ прибега́ющих язи́ ту́не исцели́вша,/ усе́рдно мо́лим, врачу́ безмездный, архиере́е Алекси́е:/ Небе́сною твои́х мольб цельбо́ю исцели́ лю́тыя неду́ги душ и теле́с на́ших. Припев: Святи́телю, о́тче Алекси́е, моли́ Бо́га о на́с. Боготка́нная правосла́внаго благоче́стия ри́зо,/ многоце́нными превели́ких доброде́телей би́серми Боголе́пно удобре́ная,/ всехвальне Алекси́е, моли́ све́том одеяющася Бо́га/ в све́тлую ве́чныя жи́зни рйзу одеятися ду́шам на́шим. Сла́ва Отцу́ и Сы́ну и Свято́му Ду́ху. Трудолюбный Богосажденнаго са́да де́лателю,/ благово́нную досточу́дных исправле́ний ка́ссию насади́вши/ и Богора́сленную постническаго воздержа́ния сми́рну в Боголюби́вом сердцы твое́м вкорени́вый,/ святе Алекси́е,/ Неботочную защищения твоего́ стакту изли́ на лю́бящая тя сердца́ на́ша. И ны́не и при́сно и во ве́ки веко́в. Ами́нь. Богородичен: От Богосиятельнаго Пра́вды Со́лнца/ Богооткровенно па́че умо́в преми́рных озаря́ема,/ светоза́рная луно,/ Всенепорочная Дево,/ светоно́сною Твоея благода́ти лучею мра́чная просвети́ сердца́ на́ша. Песнь 8 Ирмос: Находя́щия в пла́мени/ беззако́ннаго мучи́теля веле́нием о́троки подража́юще,/ немо́лчными устна́ми/ в Вы́шних похва́льно возопии́м:/ Бла́же, преесте́ственно Сый Пресвяты́й,/ пою́щия Тя/ Све́том у́мным Твои́м озари́. Припев: Святи́телю, о́тче Алекси́е, моли́ Бо́га о на́с. Небе́сною Богоприя́тныя моли́твы цельбо́ю/ телесну́ю ва́рварския цари́цы слепоту́ преесте́ственно исцели́вый,/ Богому́дрый, душе́вных и теле́сных неду́г цели́телю,/ всеблаже́нне Алекси́е, мо́лим тя:/ душе́вную исцели́ слепоту́ вредоно́сных прегреше́ний на́ших. Припев: Святи́телю, о́тче Алекси́е, моли́ Бо́га о на́с. Церко́вная красото́,/ преосвяще́нная главо́,/ непоколе́бленный благоче́стия столпе́,/ Богозда́нный ве́ры степе́ню,/ неисчерпа́емая Боже́ственных чуде́с пучи́но, всече́стне Алекси́е,/ златото́чными твои́х мо́льб вода́ми вредоно́сен погаси́ огнь печа́лей на́ших. Сла́ва Отцу́ и Сы́ну и Свято́му Ду́ху. Пагу́боносное грехопаде́ний ство́лие Боже́ственным любве́ Бо́жия огне́м Богоуго́дно соже́г/ и Богозда́нным ве́ры степе́нем/ к невеще́ственну огню́ преесте́ственну,/ в Живонача́льной Тро́ице Бо́гу, приступи́в благогове́йно, преподо́бне о́тче Алекси́е,/ от гее́нскаго огня́ изба́ви ду́ши чад твои́х, тя блажа́щих. И ны́не и при́сно и во ве́ки веко́в. Ами́нь. Богородичен: Присносу́щную Жизнь,/ воплоще́нное Сло́во Божие па́че сло́ва челове́ча и́стинно ро́ждшая,/ Всепе́тая Богоро́дице Де́во, мо́лим Тя:/ изба́ви ны, рабы́ Твоя́, от ве́чныя сме́рти. Песнь 9 Ирмос: В Тебе́, Богоро́дице, на́ше умале́ние преста́,/ неви́димое бо Сло́во/ во утро́бе Твое́й прие́мшая,/ сугу́ба Того́ родила́ еси́,/ Бо́га вку́пе и Челове́ка,/ на Него́же Херуви́ми воззре́ти не дерза́ют./ Те́мже Тя велича́ем, Пречи́стая. Припев: Святи́телю, о́тче Алекси́е, моли́ Бо́га о на́с. Благови́дною архиере́йских исправле́ний красото́ю/ Богопоста́вленный престо́л твой Боголе́пно украси́вый, первопресто́льный иера́рше, всече́стне Алекси́е,/ моли́ седя́щаго на преми́рных престо́лех Бо́га/ удосто́итися нам, тя блажа́щим, в Ца́рствии Небе́сном предста́ти Бо́жию престо́лу. Припев: Святи́телю, о́тче Алекси́е, моли́ Бо́га о на́с. К чудотво́рным твои́м моще́м притека́юще усе́рдно,/ мо́лим тя, чудото́чный исто́чниче, досточу́дне Алекси́е:/ Богото́чною Боже́ственных чуде́с твои́х струе́ю/ угаси́ раждеже́ное бед и печа́лей на́ших горни́ло. Сла́ва Отцу́ и Сы́ну и Свято́му Ду́ху. С ца́рствуемым ми́ром правосла́вныя лю́ди на́ша от вся́ких бед защити́/ Богозда́нный правосла́вия щи́те/ и Це́ркви Ру́сския первопресто́льный иера́рше, всеблаже́нне Алекси́е,/ в Боголе́пое церкве́й Божиих благострое́ние даждь свы́ше Небе́сную по́мощь. И ны́не и при́сно и во ве́ки веко́в. Ами́нь. Богородичен: Богови́дцем Моисе́ем ви́денная в Сина́и купино́ неопа́льная,/ огнь Боже́ственный, воплоще́нное Сло́во Бо́жие ро́ждшая, Всесвята́я Де́во,/ Небе́сным любве́ Бо́жия огне́м разжзи́ оледе́вшая сердца́ на́ша.

Минея, 26 Марта, Канон Богородицы Глас 6 Песнь 1 Ирмос: Я́ко по су́ху, пешеше́ствовав Изра́иль/ по бе́здне стопа́ми,/ гони́теля фарао́на/ ви́дя потопля́ема,/ Бо́гу побе́дную пе́снь пои́м, вопия́ше. Припев: Пресвята́я Богоро́дице, спаси́ нас. А́нгел возопи́: Нача́льник Вы́шних чино́в светови́ден,/ к Де́ве по́слан бы́сть дне́сь Гаврии́л,/ ра́дуйся, Неве́сто непоро́чная, – вопия́, –/ с Тобо́ю Зижди́тель всех и Госпо́дь. Сла́ва Отцу́ и Сы́ну и Свято́му Ду́ху. Богоро́дица рече́: Хощу́ уве́дети стра́нное твое́ лобза́ние, –/ Де́ва рече́, –/ челове́честву бо е́сть необы́чна рече́ния,/ ра́дость, ку́ю рекл еси́, рцы я́сно, науча́я Мя. И ны́не и при́сно и во ве́ки веко́в. Ами́нь. А́нгел возопи́: Явле́ннейше Тебе́ реку́, всеблагогове́йно предстоя́, Пречи́стая,/ Ты же приклони́ у́хо Твое́, Вы́шняго си́ла на Тя на́йдет/ и вседе́тельным всели́тся Ду́хом. Песнь 3 Ирмос: Не́сть свят,/ я́коже Ты, Го́споди Бо́же мой,/ вознесы́й рог ве́рных Твои́х, Бла́же,/ и утверди́вый нас на ка́мени/ испове́дания Твоего́. Припев: Пресвята́я Богоро́дице, спаси́ нас. Богоро́дица рече́: Че́стно веща́ти тя ны́не, А́нгеле, смотря́ю,/ ве́щно бо существо́, и тле́нно, и зе́млено/ Невеще́ственнаго ка́ко вмести́т,/ нетле́ния Све́том одева́емаго? Сла́ва Отцу́ и Сы́ну и Свято́му Ду́ху. А́нгел возопи́: Смы́сленно обличи́ла еси́, Чи́стая, но благоволи́ си́це,/ и да уве́рит Тя купина́, воспа́льшися, ника́коже сожже́на огне́м,/ и прообража́ющи Твое́ рождество́ несказа́нное. И ны́не и при́сно и во ве́ки веко́в. Ами́нь. Богоро́дица рече́: Жи́зни Мне глаго́лы вопие́ши,/ но уверя́ет Мя гора́, дымя́щаяся дре́вле, прие́мшая Бо́га,/ не мо́щи ве́щному естеству́ отню́д Невеще́ственнаго прия́ти. Песнь 4 Ирмос: Христо́с моя́ си́ла,/ Бог и Госпо́дь, честна́я Це́рковь/ боголе́пно пое́т, взыва́ющи,/ от смы́сла чи́ста о Го́споде пра́зднующи. Припев: Пресвята́я Богоро́дице, спаси́ нас. А́нгел возопи́: Со́лнца носи́ло Твое́ бы́сть, Пречи́стая, чре́во,/ и челове́ком роди́ши Свет Невече́рний, –/ Гаврии́л прера́достно Де́ве провещава́ше. Сла́ва Отцу́ и Сы́ну и Свято́му Ду́ху. Богоро́дица рече́: Двере́й Мои́х отступи́,/ не веща́й глаго́лов, и́хже сбытия́ ника́коже мо́жеши показа́ти, Архистрати́же,/ что Мой ум и ду́шу смуща́еши, сия́ глаго́ля Ми? И ны́не и при́сно и во ве́ки веко́в. Ами́нь. А́нгел возопи́: Ве́дети издале́че сподо́бишася/ та́инства глубину́ проро́ческия трубы́, Всенепоро́чная,/ Его́же слуга́ е́смь, пред дверьми́ Твои́ми предстою́. Песнь 5 Ирмос: Бо́жиим све́том Твои́м, Бла́же,/ у́тренюющих Ти ду́ши любо́вию озари́, молю́ся,/ Тя ве́дети, Сло́ве Бо́жий,/ и́стиннаго Бо́га,/ от мра́ка грехо́внаго взыва́юща. Припев: Пресвята́я Богоро́дице, спаси́ нас. Богоро́дица рече́: Облиста́ема тя зрю, А́нгеле, а́нгельскими светлостьми́, – Пренепоро́чная рече́, –/ оба́че стыжду́ся ско́ро ве́ровати,/ не пе́рвее уве́девши вся́кую изве́стность. Сла́ва Отцу́ и Сы́ну и Свято́му Ду́ху. А́нгел возопи́: Истле́вшее Зижди́тель естество́ челове́ческое зря,/ в Тя всели́тися благоизво́лил е́сть,/ сокрове́нное от веко́в, Чи́стая, стра́шне ны́не открыва́я та́инство. И ны́не и при́сно и во ве́ки веко́в. Ами́нь. Богоро́дица рече́: Обручена́ Ио́сифу бых Аз,/ да́же до ны́не не совокуплена́, Арха́нгеле,/ иску́са у бо не позна́вши му́жеска, ка́ко рожду́?/ Естества́ сопроти́вныя глаго́леши Мне глаго́лы. Песнь 6 Ирмос: Жите́йское мо́ре,/ воздвиза́емое зря напа́стей бу́рею,/ к ти́хому приста́нищу Твоему́ прите́к, вопию́ Ти:/ возведи́ от тли живо́т мой,/ Многоми́лостиве. Припев: Пресвята́я Богоро́дице, спаси́ нас. А́нгел возопи́: Зако́ном, Отрокови́це, естества́ не рабо́тает Иису́с, Соде́тель естества́,/ и Тя да уве́рит жезл Ааро́нов, невла́жно прора́стший,/ Тя роди́ти неискусому́жно образова́вший. Сла́ва Отцу́ и Сы́ну и Свято́му Ду́ху. Богоро́дица рече́: Дивлю́ся, твоя́ сия́ стра́шныя и честны́я поразумева́ющи глаго́лы,/ и, ве́ровати хотя́щи, помышля́ю высоты́ вели́чество,/ и стыжу́ся вся, Архистрати́же. И ны́не и при́сно и во ве́ки веко́в. Ами́нь. А́нгел возопи́: Не повину́ешися ли словесе́м мои́м?/ Тя прови́де Дании́л го́ру,/ от нея́же усече́ся без руки́ челове́ческия ка́мень, Чи́стая,/ хра́мы и тре́бища и́дольская истня́я крепча́йше. Песнь 7 Ирмос: Росода́тельну у́бо пе́щь/ соде́ла А́нгел/ преподо́бным отроко́м,/ халде́и же опаля́ющее/ веле́ние Бо́жие мучи́теля увеща́ вопи́ти:/ благослове́н еси́, Бо́же оте́ц на́ших. Припев: Пресвята́я Богоро́дице, спаси́ нас. Богоро́дица рече́: Пресла́вно я́ко прии́дет с те́лом в мир Безпло́тный, сказа́л еси́, Гаврии́ле,/ рцы же све́тло, ка́ко Сего́ вмести́т Мое́ чре́во,/ Его́же вели́чества Небеса́ вмести́ти не мо́гут? Сла́ва Отцу́ и Сы́ну и Свято́му Ду́ху. А́нгел возопи́: Пове́даю Тебе́, и разуме́й, о Всенепоро́чная!/ ка́ко ски́ния иногда́ Авраа́мова прия́т и Бо́га вмести́, Пречи́стая,/ те́мже не сумни́ся ны́не,/ но любе́зно целова́ние приими́, челове́ком ра́дость. И ны́не и при́сно и во ве́ки веко́в. Ами́нь. Богоро́дица рече́: Смуща́ет Мя ве́щи вели́чество,/ но у́бо поне́же благоволи́ Всеблаги́й в Мя всели́тися па́че ума́,/ се и душе́ю, и пло́тию храм е́смь чист, соблюде́н Ему́. Песнь 8 Ирмос: Из пла́мене преподо́бным ро́су источи́л еси́/ и пра́веднаго же́ртву водо́ю попали́л еси́:/ вся бо твори́ши, Христе́, то́кмо е́же хоте́ти,/ Тя превозно́сим во вся ве́ки. Припев: Пресвята́я Богоро́дице, спаси́ нас. Гла́сом А́нгеловым Свет зачала́ еси́./ Сего́ ра́ди Тебе́ – ра́дуйся! – вси взыва́ем,/ две́ре Све́та, неудобозри́мое виде́ние,/ престо́ле Вы́шняго, Де́во Богоро́дице. Сла́ва Отцу́ и Сы́ну и Свято́му Ду́ху. Высо́каго та́инства, ра́дуйся, соверше́ние;/ недоуме́нных веще́й, ра́дуйся, явле́ние;/ ра́дуйся, к Бо́гу челове́ков присвое́ние;/ ра́дуйся, Де́во, па́дших воззва́ние. И ны́не и при́сно и во ве́ки веко́в. Ами́нь. Светода́теля Влады́ки, ра́дуйся, Роди́тельнице;/ приста́нище су́щим в бу́ри, ра́дуйся, Всенепоро́чная;/ и́стинная и плодови́тая лозо́, ра́дуйся, возрасти́вшая безсме́ртия Грозд. Песнь 9 Ирмос: Бо́га/ челове́ком невозмо́жно ви́дети,/ на Него́же не сме́ют чи́ни А́нгельстии взира́ти;/ Тобо́ю же, Всечи́стая, яви́ся челове́ком/ Сло́во воплоще́нно,/ Его́же велича́юще,/ с Небе́сными во́и/ Тя ублажа́ем. Припев: Пресвята́я Богоро́дице, спаси́ нас. Ра́дости вина́ всеблагослове́нная, ра́дуйся,/ честна́я добропло́дная и благора́сленная браздо́, Пита́теля всего́ нося́щи;/ ра́дуйся, исто́чниче живы́я во́ды, Пречи́стая, ста́мно и раю́ Бо́жий,/ ра́дуйся, Всенепоро́чная. Сла́ва Отцу́ и Сы́ну и Свято́му Ду́ху. Душа́м же и те́лом очище́ние, ра́дуйся,/ Е́юже истека́ют челове́ком лу́чшая, вина́ всех обоже́ния;/ ра́дуйся, о́блаче ле́гкий, Со́лнца нося́щий,/ мир светолу́чными сия́ньми озаря́юща. И ны́не и при́сно и во ве́ки веко́в. Ами́нь. Пе́снь вопие́м Ти ра́достную:/ ра́дуйся, Чи́стая, му́чеников, апо́столов похвало́,/ проро́ков пресла́вное рече́ние, архиере́ев и преподо́бных;/ ра́дуйся, удобре́ние, Ея́же ра́ди Небе́сная со земны́ми ра́дуются.

Минея, 28 Сентября, Кано́н преподо́бных Глас 8 Песнь 1 Ирмос: Колесницегони́теля фарао́ня погрузи́/ чудотворя́й иногда́/ Моисе́йский жезл, крестообра́зно порази́в/ и раздели́в мо́ре,/ Изра́иля же беглеца́, пешехо́дца спасе́,// песнь Бо́гови воспева́юща. Припев: Преподо́бнии Кири́лле и Мари́е, моли́те Бо́га о на́с. Преподо́бнаго Се́ргия, игу́мена земли́ Ру́сския,/ све́тлостьми доброде́телей возсия́вшаго,/ роди́телие сподо́бистеся бы́ти, Кири́лле и Мари́е присноблаже́ннии. Припев: Преподо́бнии Кири́лле и Мари́е, моли́те Бо́га о на́с. Ре́вностно храня́ще за́поведь апо́стола, страннолю́бия не забыва́ти,/ любо́вию к бли́жним распала́еми,/ вои́стину удосто́истеся, блаже́ннии, А́нгела Бо́жия странноприя́ти. Сла́ва Отцу́ и Сы́ну и Свято́му Ду́ху. О́бразу ва́шего благочести́ваго супру́жескаго жития́ мно́зи лю́дие удиви́шася, преподо́бнии./ Сего́ бо ра́ди Бог вас просла́ви и дарова́ плод благосла́вный,/ его́же Варфоломе́я, сы́на ра́дости, нареко́сте. И ны́не и при́сно и во ве́ки веко́в. Ами́нь. Богородичен: Сла́вим Тя, Богоневе́сто, ро́ждшую Христа́, Бо́га на́шего,/ Его́же моли́ поми́ловати и спасти́ ду́ши на́ша. Песнь 3 Ирмос: Утвержде́й в нача́ле Небеса́ ра́зумом/ и зе́млю на вода́х основа́вый,/ на ка́мени мя, Христе́, за́поведей Твои́х утверди́,// я́ко несть свят па́че Тебе́, Еди́не Человеколю́бче. Припев: Преподо́бнии Кири́лле и Мари́е, моли́те Бо́га о на́с. Лю́дие чудя́хуся, егда́ услы́шаша/ трикра́тное возглаше́ние младе́нца во чре́ве твое́м, Мари́е приснопа́мятная./ Что у́бо отроча́ сие́ бу́дет?/ недоумева́юще друг дру́га вопроша́ху. Припев: Преподо́бнии Кири́лле и Мари́е, моли́те Бо́га о на́с. Аще роди́тся младе́нец му́жеска по́ла,/ да́руем его́ Це́ркви, да послу́жит Благоде́телю всех Бо́гу,/ си́це рекли́ есте́, боголюби́вии супру́зи,/ испо́лненнии ве́ры сла́вныя и любве́ благи́я. Сла́ва Отцу́ и Сы́ну и Свято́му Ду́ху. Вели́кия ми́лости сподо́бистеся от Бо́га добронра́вным житие́м ва́шим, блаже́ннии,/ те́мже и нам испроси́те богоприя́тными ва́шими моли́твами/ оставле́ние грехо́в, ми́лости Бо́жия и Ца́рства Небе́снаго. И ны́не и при́сно и во ве́ки веко́в. Ами́нь. Богородичен: Лю́таго мироде́ржца сете́й изба́ви нас, о Богома́ти,/ несть бо те́плыя Засту́пницы, ра́зве Тебе́, Влады́чице. Седален, глас 2 Прииди́те, ве́рнии, ра́достными пе́сньми просла́вим преподо́бных Кири́лла и Мари́ю/ и, с любо́вию лобыза́юще честны́я мо́щи их, си́це возопии́м:/ ра́дуйтеся, блаже́ннии, в боголю́бии пожи́вшии, милосе́рдие к бли́жним име́вшии,/ о́браз честна́го супру́жества и попече́ния о ча́дех яви́вшии,/ смире́ние стяжа́вшии и в по́стничестве пребы́вшии./ Ны́не же, предстоя́ще Святе́й Тро́ице, моли́твами ва́шими, святи́и,/ оте́чество на́ше от сопроти́вных защити́те,/ боле́зни исцели́те и вся́ких искуше́ний изба́вите/ ве́рою чту́щих па́мять ва́шу. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Не и́мамы ины́я по́мощи и наде́жды,/ ра́зве Тебе́, Пречи́стая Ма́ти Бо́жия,/ Ты бо Бо́га пло́тию родила́ еси́ па́че сло́ва и ра́зума,/ Его́же моли́, Безневе́стная, с преподо́бными Кири́ллом и Мари́ею,/ пода́ти нам мир и ве́лию ми́лость. Песнь 4 Ирмос: Ты моя́ кре́пость, Го́споди,/ Ты моя́ и си́ла,/ Ты мой Бог, Ты мое́ ра́дование,/ не оста́вль не́дра О́тча и на́шу нищету́ посети́в./ Тем с проро́ком Авваку́мом зову́ Ти:// си́ле Твое́й сла́ва, Человеколю́бче. Припев: Преподо́бнии Кири́лле и Мари́е, моли́те Бо́га о на́с. Я́ко святы́й Предте́ча взыгра́ся ра́дощами во чре́ве ма́тере своея́,/ та́ко и сын твой, Мари́е преподо́бная, взыгра́ся во утро́бе моля́щейся ти Го́споду в це́ркви./ Ты же, уразуме́вши зна́мение сие́,/ стра́хом и тре́петом объя́та бы́вши, взыва́ла еси́:/ си́ле Твое́й сла́ва, Человеколю́бче. Припев: Преподо́бнии Кири́лле и Мари́е, моли́те Бо́га о на́с. Юдо́ли плаче́вней прича́стницы бы́вше,/ оба́че по́двиг супру́жества пресла́вне соверши́вше и во и́ночестве до́бре пожи́вше, преподо́бнии,/ ны́не наслажда́етеся Небе́сныя трапе́зы./ Моли́теся ко Го́споду, да умудри́т правосла́вныя супру́ги во благоче́стии пребыва́ти,/ и́ночествующия же ре́вностно обе́ты соблюда́ти. Сла́ва Отцу́ и Сы́ну и Свято́му Ду́ху. Ра́дости исполня́ются днесь росси́йстии собо́ри,/ иму́ще вас, блаже́ннии, те́плыя моли́твенники/ и усе́рдныя засту́пники своему́ земно́му оте́честву. И ны́не и при́сно и во ве́ки веко́в. Ами́нь. Богородичен: О Всепе́тая Ма́ти, ми́ра спасе́ние!/ Не оста́ви ве́рою Тя призывающих,/ Ты бо еси́ Засту́пница усе́рдная ро́да христиа́нскаго. Песнь 5 Ирмос: Вску́ю мя отри́нул еси́/ от лица́ Твоего́, Све́те Незаходи́мый,/ и покры́ла мя есть чужда́я тьма, окая́ннаго,/ но обрати́ мя и к све́ту за́поведей Твои́х// пути́ моя́ напра́ви, молю́ся. Припев: Преподо́бнии Кири́лле и Мари́е, моли́те Бо́га о на́с. Днесь па́мять ва́ша, блаже́ннии, созыва́ет лю́ди на духо́вную трапе́зу./ Те́мже сподо́бите и нас досто́йно сея́ вкуси́ти,/ и пи́щи ра́йския во оби́телех Отца́ Небе́снаго вку́пе с ва́ми наслажда́тися. Припев: Преподо́бнии Кири́лле и Мари́е, моли́те Бо́га о на́с. Иму́ще житие́ благоче́стием сия́ющее, достосла́внии роди́телие,/ вои́стину дре́во благослове́нное яви́стеся,/ плод Бо́гу уго́дный израсти́вше. Сла́ва Отцу́ и Сы́ну и Свято́му Ду́ху. Теплоту́ ва́шея любве́ к Бо́гу, пра́ведная чето́, и ре́вность ко и́ноческому житию́/ от ю́ности восприя́т Се́ргий достохва́льный:/ вы бо яви́стеся пе́рвии учи́телие сы́на ва́шего доброде́тельному житию́. И ны́не и при́сно и во ве́ки веко́в. Ами́нь. Богородичен: Еди́ну Чи́стую, еди́ну Благослове́нную, ве́рнии, ублажи́м,/ к Сы́ну бо Своему́ ми́лостивно ру́це простира́ет,/ да обрати́мся к све́ту за́поведей Его́ и Той пути́ на́ша испра́вит. Песнь 6 Ирмос: Очи́сти мя, Спа́се,/ мно́га бо беззако́ния моя́,/ и из глубины́ зол возведи́, молю́ся, / к Тебе́ бо возопи́х, и услы́ши мя,// Бо́же спасе́ния моего́. Припев: Преподо́бнии Кири́лле и Мари́е, моли́те Бо́га о на́с. Ле́тняя ва́ша па́мять весели́т сосло́вие и́ноков, преподо́бнии Кири́лле и Мари́е./ Вои́стину блаже́ни есте́, я́ко имена́ ва́ша прославля́ются с сы́ном ва́шим, Се́ргием преподо́бным,/ его́же велича́ют игу́мена земли́ Ру́сския. Припев: Преподо́бнии Кири́лле и Мари́е, моли́те Бо́га о на́с. И́стину в житии́ взыску́юще, преподо́бнии,/ о теле́сных небрего́сте и земна́я преоби́десте,/ те́мже, ми́ра отре́кшеся, во оби́тель Хотько́вскую всели́стеся,/ иде́же в по́двизе и́ночества к Небе́сным востеко́сте. Сла́ва Отцу́ и Сы́ну и Свято́му Ду́ху. Сохрани́те от зол ва́шими те́плыми к Бо́гу моли́твами, преподо́бнии,/ всех жи́тельствующих во оби́тели Хотько́встей,/ е́йже вы нача́льницы и покрови́телие. И ны́не и при́сно и во ве́ки веко́в. Ами́нь. Богородичен: Его́же родила́ еси́, Сы́на Твоего́ и Бо́га,/ моли́ти не преста́й, Богоневе́сто,/ да изба́вит оби́тель Твою́ от вся́каго зла и спасе́т ду́ши на́ша. Кондак, глас 4 Днесь, ве́рнии, соше́дшеся,/ восхва́лим дво́ицу блаже́нную, благове́рнаго Кири́лла и Мари́ю добронра́вную,/ ти́и бо мо́лятся вку́пе со возлю́бленным сы́ном свои́м, преподо́бным Се́ргием,/ ко Еди́ному во Свято́й Тро́ице Бо́гу,/ оте́чество на́ше в правове́рии утверди́ти,/ до́мы ми́ром огради́ти,/ ю́ныя от напа́стей и собла́знов изба́вити,/ ста́рость укрепи́ти// и спасти́ ду́ши на́ша. Икос А́нгели земни́и и челове́цы Небе́снии вои́стину яви́стеся, преподо́бнии Кири́лле и Мари́е, от ю́ности ва́шея чи́стую со́весть пред Бо́гом иму́щии и до́бре во благоче́стии вку́пе пожи́вшии. Мы же, таково́е богоуго́дное житие́ ва́ше прославля́юще, гла́сы хвале́бными взыва́ем си́це: ра́дуйтеся, от ю́ности ва́шея Христа́ возлюби́вшии и Тому́ еди́ному порабо́тавшии; ра́дуйтеся, целому́дрия храни́телие и душе́вныя и теле́сныя чистоты́ рачи́телие; ра́дуйтеся, ду́ши и телеса́ ва́ша в обита́лище Ду́ха Свята́го угото́вившии; ра́дуйтеся, испо́лненнии прему́дрости и ра́зума Боже́ственнаго; ра́дуйтеся, я́ко от земли́ на Не́бо преидо́сте и та́мо со А́нгелы Тро́ице предстои́те; ра́дуйтеся, я́ко со безпло́тными ли́ки трисвяту́ю песнь Ей воспева́ете; ра́дуйтеся, на Небеси́ и на земли́ от Го́спода просла́вленнии; ра́дуйтеся, обре́тшии ме́сто ве́чнаго всесве́тлаго упокое́ния. Ра́дуйтеся, преподо́бнии Кири́лле и Мари́е, усе́рднии о нас пред Бо́гом моли́твенницы. Песнь 7 Ирмос: Бо́жия снизхожде́ния/ огнь устыде́ся в Вавило́не иногда́./ Сего́ ра́ди о́троцы в пещи́, ра́дованною ного́ю,/ я́ко во цве́тнице, лику́юще, поя́ху:// благослове́н еси́, Бо́же оте́ц на́ших. Припев: Преподо́бнии Кири́лле и Мари́е, моли́те Бо́га о на́с. Ра́ка моще́й ва́ших днесь чудеса́ источа́ет/ ве́рою притека́ющим к вам, блаже́ннии, и́же и воспева́ют:/ благослове́н еси́, Бо́же оте́ц на́ших. Припев: Преподо́бнии Кири́лле и Мари́е, моли́те Бо́га о на́с. Град Москва́ и окре́стнии гра́ды и ве́си/ прославля́ют вас своя́ изба́вители и цели́тели от смертоносныя я́звы./ Сего́ ра́ди днесь, я́коже пре́жде, спаса́йте почита́ющих вас, преподо́бнии,/ да благода́рственно воспева́ют:/благослове́н еси́, Бо́же оте́ц на́ших. Сла́ва Отцу́ и Сы́ну и Свято́му Ду́ху. Измла́да тя́жкою боле́знию одержи́ма,/ деви́ца не́кая внеза́пное исцеле́ние прия́т ва́шими и сы́на ва́шего к Бо́гу моли́твами./ С не́юже и мы благода́рственно взыва́ем:/ благослове́н еси́, Бо́же оте́ц на́ших. И ны́не и при́сно и во ве́ки веко́в. Ами́нь. Богородичен: Яко Де́ву и еди́ну в жена́х, безсе́менно ро́ждшую Бо́га плотию,/ прославля́ем Тя, о Богома́ти,/ и таково́му Бо́жию смотре́нию уди́вльшеся, взыва́ем:/ благослове́н еси́, Бо́же оте́ц на́ших. Песнь 8 Ирмос: Седмери́цею пещь/ халде́йский мучи́тель/ богочести́вым неи́стовно разжже́,/ си́лою же лу́чшею спасе́ны сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,// лю́дие, превозноси́те во вся ве́ки. Припев: Преподо́бнии Кири́лле и Мари́е, моли́те Бо́га о на́с. Воспои́м, ве́рнии, всечестную дво́ицу, Кири́лла и Мари́ю богоблаже́нных,/ от них бо возсия́ нам Се́ргий досточудный,/ украше́ние Це́ркве Правосла́вныя и мона́шествующих утвержде́ние. Припев: Преподо́бнии Кири́лле и Мари́е, моли́те Бо́га о на́с. Единому́дренни и единоду́шни доброде́тельми бы́сте, целому́дреннии супру́зи,/ помози́те и нам в чистоте́ и свя́тости житие́ провожда́ти,/ вас бо те́плыя хода́таи к Бо́гу стяжа́хом. Сла́ва Отцу́ и Сы́ну и Свято́му Ду́ху. Любо́вь Христо́ву, я́же есть тве́рдое основа́ние супру́жеския жи́зни,/ со тща́нием, блаже́ннии, храни́ли есте́./ Сего́ ра́ди мо́лим вас:/ помози́те супру́гом правосла́вным в любви́ сей пребыва́ти/ и домо́м их благослове́ние Бо́жие стяжа́ти. И ны́не и при́сно и во ве́ки веко́в. Ами́нь. Богородичен: Изба́ви нас от бед и мно́гих собла́знов, Всенепоро́чная,/ Тебе́ бо вси стяжа́хом прибе́жище и утвержде́ние/ и спасе́ние душ на́ших. Песнь 9 Ирмос: Ужасе́ся о сем Не́бо,/ и земли́ удиви́шася концы́, / я́ко Бог яви́ся челове́ком пло́тски/ и чре́во Твое́ бысть простра́ннейшее Небе́с./ Тем Тя, Богоро́дицу,// А́нгелов и челове́к чинонача́лия велича́ют. Припев: Преподо́бнии Кири́лле и Мари́е, моли́те Бо́га о на́с. Ка́ко ублажи́м вы, предо́брая дво́ице? Ка́ко просла́вим благо́е единоду́шие?/ Аще и земни́и бы́сте, но Небе́сных достиго́сте, блаже́ннии,/ иде́же Святе́й Тро́ице предстои́те и мо́лите спасти́ся любо́вию вас почита́ющим. Припев: Преподо́бнии Кири́лле и Мари́е, моли́те Бо́га о на́с. А́нгельски на земли́ пожи́вше,/ А́нгела земна́го и челове́ка Небе́снаго, преподо́бнаго Се́ргия, ми́ру яви́сте, святи́и,/ ны́не же со А́нгелы вку́пе водворя́етеся/ и с ни́ми Трисвяту́ю песнь в вы́шних Бо́гови воспева́ете. Сла́ва Отцу́ и Сы́ну и Свято́му Ду́ху. Госпо́дь оби́тель Хотько́вскую ва́ми просла́ви, преподо́бнии и́ноцы,/ е́юже Це́рковь Ру́сская украша́ется и вам си́це вопие́т:/ ра́дуйтеся, всехва́льнии, оте́чества на́шего при́снии моли́твенницы. И ны́не и при́сно и во ве́ки веко́в. Ами́нь. Богородичен: О Всепе́тая Ма́ти! / Все упова́ние на Тя возлага́ем,/ сохрани́ нас под кро́вом Твои́м. Светилен Ра́дуется днесь све́тло Це́рковь Ру́сская,/ почита́ющи па́мять ва́шу пречестну́ю, Кири́лле блаже́нный и Мари́е достохва́льная,/ ва́ми бо о́браз ве́ры и благоче́стия показа́ся/ и свети́льник оте́честву на́шему, Се́ргий преподо́бный, яви́ся. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Я́же Свет Боже́ственный неизрече́нно ро́ждшая,/ нас, омраче́нных прило́гами лука́ваго и в ле́ности живу́щих, просвети́, Всенепоро́чная,/ и к доброде́телем наста́ви.

Минея, 18 Апреля, Кано́н Глас 8 Песнь 1 Ирмос: Колесницегони́теля фарао́ня погрузи́/ чудотворя́й иногда́/ Моисе́йский жезл, крестообра́зно порази́в/ и раздели́в мо́ре,/ Изра́иля же беглеца́, пешехо́дца, спасе́,/ песнь Бо́гови воспева́юща. Припев: Преподо́бне о́тче Иоа́нне, моли́ Бо́га о на́с. Страсте́й мя треволне́нием всегда́ смуща́ема/ и молво́ю помышле́ний ны́не потопля́ема,/ твое́ю моли́твою, преподо́бне, к безстра́стия устремле́нию/ и к спаси́тельному приста́нищу, блаже́нне Иоа́нне, упра́ви. Припев: Преподо́бне о́тче Иоа́нне, моли́ Бо́га о на́с. Прело́жься произволе́нием, преподо́бне, к Небеси́ вои́стинну,/ а́нгельски, о́тче, на земли́ пожи́л еси́,/ умертви́в твое́ мудрова́ние плотско́е воздержа́нием,/ те́мже Бо́жие жили́ще яви́лся еси́, Иоа́нне чу́дне. Сла́ва Отцу́ и Сы́ну и Свято́му Ду́ху. Я́же па́че у́ма получи́ти, блаже́нне, возжеле́в кра́сных,/ наста́вника обре́л еси́, к подвиго́м тя Боже́ственным воздвиза́юща,/ Иоа́нне Богому́дре, Григо́рия сла́внаго,/ его́же стопа́м после́довал еси́. И ны́не и при́сно и во ве́ки веко́в. Ами́нь. Богородичен: Сый со Отце́м и Ду́хом, Соприсносу́щное и Единоро́дное Сло́во/ из Тебе́ яви́ся на земли́ я́ко Челове́к, Богоро́дице Мари́е,/ и мир весь спасе́, песнь Го́сподеви воспева́ющий. Песнь 3 Ирмос: Утвержде́й в нача́ле Небеса́ ра́зумом/ и зе́млю на вода́х основа́вый,/ на ка́мени мя, Христе́, за́поведей Твои́х утверди́,/ я́ко несть свят, па́че Тебе́,/ Еди́не Человеколю́бче. Припев: Преподо́бне о́тче Иоа́нне, моли́ Бо́га о на́с. Трезве́нием ума́ Небе́сныя добро́ты зря,/ и ника́коже печа́льми взя́лся еси́ ве́щными,/ крилы́ же облегчава́емь нестяжа́ния, о́тче, весь преложе́н был еси́. Припев: Преподо́бне о́тче Иоа́нне, моли́ Бо́га о на́с. Безмо́лвия рачи́тель быв,/ любомолча́ннаго па́стыря Григо́рия, Иоа́нне треблаже́нне,/ я́же в житии́ смуще́ния усе́рдно оста́вил еси́/ и моли́твами непреста́нными Боже́ственную тишину́ улучи́л еси́. Сла́ва Отцу́ и Сы́ну и Свято́му Ду́ху. Зако́ну Ду́ха себе́, Богому́дре, повину́л еси́,/ проти́ву Сему́ борю́щийся зако́н умертви́в тве́рдыми воздержа́нии, и поще́нием,/ и моли́твами приле́жными, и бде́нии, блаже́нне. И ны́не и при́сно и во ве́ки веко́в. Ами́нь. Богородичен: Я́же к нам све́тлая Царю́ющаго все́ми ве́ки/ непроходи́мая дверь Ты показа́лася еси́ вои́стинну,/ е́юже Сам про́йде, запеча́тану па́ки оста́вль Тя, Пренепоро́чная. Седален, глас 1 Погре́б лука́вая де́монов ловле́ния воздержа́нии мно́гими и мольба́ми, о́тче,/ мертв во гро́бе лежа́, нетле́нен пребы́л еси́./ Те́мже, ра́дующеся, всесвяту́ю твою́ па́мять пра́зднуем,/ с весе́лием се́рдца Христа́ велича́юще. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Безневе́стная Чи́стая Богоро́дице Де́во,/ еди́на ве́рных Предста́тельнице и покро́ве,/ бед, и скорбе́й, и лю́тых обстоя́ний вся изба́ви,/ на Тя упова́ние, Отрокови́це, иму́щия,/ и ду́ши на́ша спаси́ Боже́ственными моли́твами Твои́ми. Песнь 4 Ирмос: Ты моя́ кре́пость, Го́споди,/ Ты моя́ и си́ла,/ Ты мой Бог, Ты мое́ ра́дование,/ не оста́вль не́дра о́тча/ и на́шу нищету́ посети́в./ Тем с проро́ком Авваку́мом зову́ Ти:/ си́ле Твое́й сла́ва, Человеколю́бче. Припев: Преподо́бне о́тче Иоа́нне, моли́ Бо́га о на́с. Терпе́ния ка́мень показа́лся еси́, блаже́нне, сопроти́вными волна́ми всегда́ бие́мь,/ ника́коже благоче́стия коле́бля мы́сли./ Те́мже тя Влады́ка, я́коже прече́стен ка́мень,/ в сокро́вищах ве́чных положи́. Припев: Преподо́бне о́тче Иоа́нне, моли́ Бо́га о на́с. Тя Оте́ц щедро́т прия́т, я́ко и́скренно Сего́ возлюби́вша/ и в за́поведех Его́, о́тче, пребыва́юща/ и, сы́на прича́стника благода́тию сотвори́в,/ присносу́щныя тя сла́вы, Иоа́нне Богому́дре, сподо́би. Сла́ва Отцу́ и Сы́ну и Свято́му Ду́ху. Я́ко ми́лостив и смиреному́др,/ я́ко кро́ток, я́ко любве́ испо́лнен и ве́ры,/ и наде́ждею твою́ ду́шу име́я, Иоа́нне, утвержде́нну,/ просия́л еси́ и сло́вом, и де́лы посреди́ мона́хов,/ ходя́ в жи́зни, приснопа́мятне. И ны́не и при́сно и во ве́ки веко́в. Ами́нь. Богородичен: Ты ве́рным похвала́ еси́, Безневе́стная,/ Ты заступле́ние, Ты прибе́жище христиа́н, стена́ и приста́нище,/ к Сы́ну бо Твоему́ мольбы́ но́сиши, Всенепоро́чная,/ и спаса́еши от бед ве́рою и любо́вию Богоро́дицу чи́сту Тя зна́ющих. Песнь 5 Ирмос: Вску́ю мя отри́нул еси́/ от лица́ Твоего́, Све́те Незаходи́мый,/ и покры́ла мя есть чужда́я тьма, окая́ннаго?/ Но обрати́ мя и к све́ту за́поведей Твои́х/ пути́ моя́ напра́ви, молю́ся. Припев: Преподо́бне о́тче Иоа́нне, моли́ Бо́га о на́с. Я́коже незло́бива а́гнца, на зла́це воздержа́ния воспита́ема,/ тя Па́стырь Вели́кий во дворы́ ве́чныя всели́, Иоа́нне блаже́нне,/ и десны́м свои́м овца́м соприча́стника, преподо́бне, показа́. Припев: Преподо́бне о́тче Иоа́нне, моли́ Бо́га о на́с. Дневну́ю тяготу́, о́тче, и вар кре́пко поне́сл еси́,/ доброде́телей Боже́ственных виногра́д до́бре де́лав./ Те́мже в ве́чер жите́йскаго отше́ствия мзду прия́л еси́ досто́йну. Сла́ва Отцу́ и Сы́ну и Свято́му Ду́ху. С по́стническим со́нмом, о́тче, всели́тися вои́стинну сподо́бился еси́/ и с пра́ведных ли́ком ра́доватися тебе́ прибы́сть,/ виде́нием и де́льным любому́дрием, отбе́гшу ве́щи, прехва́льне. И ны́не и при́сно и во ве́ки веко́в. Ами́нь. Богородичен: Умерщвле́ннаго, Де́во, жа́лом сме́рти и преступле́ния, воскреси́ мя,/ жизнь заче́ншая несозда́нную и ро́ждшая ми́ру Изба́вителя и Царя́,/ и к све́ту наста́ви, Чи́стая. Песнь 6 Ирмос: Очи́сти мя, Спа́се,/ мно́га бо беззако́ния моя́,/ и из глубины́ зол возведи́, молю́ся,/ к Тебе́ бо возопи́х, и услы́ши мя,/ Бо́же спасе́ния моего́. Припев: Преподо́бне о́тче Иоа́нне, моли́ Бо́га о на́с. Слез твои́х ка́плями страсте́й изсуши́л еси́ пучи́ну/ и всю мы́сленнаго врага́ попра́л еси́ некре́пкую си́лу, Иоа́нне блаже́нне,/ от Христа́ укрепля́емь. Припев: Преподо́бне о́тче Иоа́нне, моли́ Бо́га о на́с. Я́ко светлосия́нно тя зла́то искуше́но, пресла́вне,/ воздержа́ния огне́м Христо́с положи́, Царь нетле́нный,/ в нетле́нных, о́тче, сокро́вищах ве́чныя жи́зни. Сла́ва Отцу́ и Сы́ну и Свято́му Ду́ху. Я́ко со́лнце, на земли́ доброде́тельми сия́юща, Григо́рия обре́т,/ души́ твоея́ о́чи того́ сия́ньми просве́щ слове́сными,/ светле́йша показа́лся еси́ звезда́. И ны́не и при́сно и во ве́ки веко́в. Ами́нь. Богородичен: Селе́ние Бо́жие Боже́ственно вои́стинну и прече́стно,/ воспое́м благоче́стно Мари́ю Пречи́стую:/ Бо́га бо вмести́, прие́мши Невмести́маго и Непостижи́маго. Кондак, глас 4 Воздержа́нием, о́тче, житие́ украси́в, и плоть умертви́л еси́,/ те́мже и победи́л еси́ вра́жия прило́ги, преблаже́нне,/ и преше́л еси́ к Бо́гу в безско́рбный и ве́чный живо́т,/ я́ко досто́ин насле́дник, Иоа́нне,/ Ему́же моли́ся спасти́ся нам. Песнь 7 Ирмос: От Иуде́и, доше́дше, о́троцы/ в Вавило́не иногда́/ ве́рою Тро́йческою пла́мень пе́щный попра́ша, пою́ще:/ отце́в Бо́же, благослове́н еси́. Припев: Преподо́бне о́тче Иоа́нне, моли́ Бо́га о на́с. Судии́ второ́е помышля́я прише́ствие,/ от о́чию души́ сон отлага́л еси́, му́дре, уны́ния и, спаса́емь, пел еси́:/ оте́ц на́ших Бо́же, благослове́н еси́. Припев: Преподо́бне о́тче Иоа́нне, моли́ Бо́га о на́с. От млады́х ногте́й благу́ю часть избра́л еси́, о́тче му́дре,/ рабо́тати Го́сподеви со стра́хом и Сего́ соверша́ти оправда́ния:/ оте́ц на́ших Бо́же, благослове́н еси́. Сла́ва Отцу́ и Сы́ну и Свято́му Ду́ху. Духо́вных испо́лнена дней бы́вша,/ я́ко пшени́цу зре́лу, в Вы́шних жи́тницах/ Бог Тя, Богоно́сне, положи́, пою́ща:/ оте́ц на́ших Бо́же, благослове́н еси́. И ны́не и при́сно и во ве́ки веко́в. Ами́нь. Богородичен: Я́же еси́ ми́ру Госпожа́, Я́же Бо́га воплоще́нна поро́ждши,/ безу́мно порабо́тившуюся безме́стными грехи́ ду́шу мою́/ спаси́, благослове́нная Чи́стая, да славосло́влю Тя. Песнь 8 Ирмос: Седмери́цею пещь/ халде́йский мучи́тель/ Богочести́вым неи́стовно разжже́,/ си́лою же лу́чшею спасе́ны, сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы воспо́йте,/ лю́дие, превозноси́те во вся ве́ки. Припев: Преподо́бне о́тче Иоа́нне, моли́ Бо́га о на́с. Я́ко ми́лоть Илиину́ благода́ть благора́сленно насле́довав,/ о́тче Иоа́нне, сла́внаго па́стыря твоего́,/ се́ю расто́ргнул еси́ сла́достей пучи́ну и, спасе́н быв, непотопле́н,/ яви́лся еси́ А́нгелом сограждани́н, с ни́ми взыва́я:/ лю́дие, превозноси́те Го́спода во ве́ки. Припев: Преподо́бне о́тче Иоа́нне, моли́ Бо́га о на́с. Нас ра́ди обнища́вшему Преблаго́му Го́споду, о́тче Иоа́нне, благоче́стно уподо́бился еси́,/ пти́цам равно́ нестяжа́ние содержа́л еси́/ и благ ве́чных бога́тство стяжа́л еси́, воспева́я:/ свяще́нницы, благослови́те, лю́дие, превозноси́те Его́ во ве́ки. Сла́ва Отцу́ и Сы́ну и Свято́му Ду́ху. К животу́ непреста́нному, к ра́дости нетле́нней,/ к весе́лию па́че ума́, пребога́те, преста́вился еси́, ра́дуяся,/ и к кра́сному благоле́пию, ко А́нгельскому пребыва́нию, вопия́:/ о́троцы, благослови́те, свяще́нницы, воспо́йте,/ лю́дие, превозноси́те Го́спода во ве́ки. И ны́не и при́сно и во ве́ки веко́в. Ами́нь. Богородичен: Освя́щшися Ду́хом, Богоро́дице Пренепоро́чная,/ вои́стинну прия́ла еси́ во чре́ве Безнача́льнаго Сы́на и Присносу́щнаго,/ в Тебе́, Чи́стая, воплоща́ема на благодея́ние ве́рно пою́щим:/ о́троцы, благослови́те, свяще́нницы, воспо́йте,/ лю́дие, превозноси́те Его́ во ве́ки. Песнь 9 Ирмос: Ужасе́ся о сем Не́бо,/ и земли́ удиви́шася концы́,/ я́ко Бог яви́ся челове́ком пло́тски,/ и чре́во Твое́ бысть простра́ннейшее Небе́с./ Тем Тя, Богоро́дицу,/ А́нгелов и челове́к чинонача́лия велича́ют. Припев: Преподо́бне о́тче Иоа́нне, моли́ Бо́га о на́с. Обнови́в ра́лом моли́твы, Иоа́нне, души́ твоея́ бразду́,/ доброде́телей сию́ насе́ял еси́ благоче́стия и живоно́сная се́мена./ Те́мже исцеле́ний Богоподо́бных и Боже́ственных дарова́ний пожа́л еси́ клас,/ и́мже пита́еши пою́щия тя. Припев: Преподо́бне о́тче Иоа́нне, моли́ Бо́га о на́с. Тече́ние сконча́в по́стное и ве́ру соблю́д, блаже́нне,/ я́ко вои́стинну испо́лнен во́зраста духо́внаго,/ пра́ведный вене́ц прия́т, Богому́дре, от Христа́,/ и ны́не почи́л еси́ в жили́щах све́тлых с пра́ведными, пресла́вне. Сла́ва Отцу́ и Сы́ну и Свято́му Ду́ху. Пожа́л еси́ твои́х боле́зней воздая́ния,/ преста́влься к соверше́нию неболе́зненному и чи́стому,/ вся́каго измене́ния и претворе́ния, несме́сну го́ршаго и сопроти́внаго преложе́ния:/ в не́мже всели́лся еси́, ве́рно тя пою́щих ко Влады́це, о́тче, помяни́. И ны́не и при́сно и во ве́ки веко́в. Ами́нь. Богородичен: Отве́рженныя Небе́снаго жития́ и па́дшия окая́нно в смерть,/ па́ки нас, Ма́ти бы́вши Изба́вителя, призва́ла еси́, Пречи́стая,/ и к пе́рвому тещи́ сподо́била еси́ оте́честву./ Те́мже Тя, Богома́ти, непреста́нно велича́ем.