Молитвы

Минея, 28 Марта, Канон преподобного Глас 2 Песнь 1 Ирмос: Во глубине́ постла́ иногда́/ фараони́тское всево́инство преоруже́нная си́ла,/ вопло́щшееся же Сло́во всезло́бный грех потреби́ло е́сть,/ препросла́вленный Госпо́дь, сла́вно бо просла́вися. Припев: Преподо́бне о́тче Иларио́не, моли́ Бо́га о на́с. Сострада́телен, и кро́ток быв, о́тче,/ и цел, и тих я́ко вои́стинну ду́хом,/ сострада́ния Боже́ственнаго мя хода́тайством твои́м, Иларио́не, сподо́би,/ я́ко да воспою́ тя ны́не, в тишине́ се́рдца моего́. Припев: Преподо́бне о́тче Иларио́не, моли́ Бо́га о на́с. Очи́стився, о́тче, от де́тства и взем крест твой, Го́сподеви после́довал еси́,/ стра́сти теле́сныя воздержа́нием же и ча́стыми моли́твами увяди́л еси́/ и безстра́стием украша́яся. Сла́ва Отцу́ и Сы́ну и Свято́му Ду́ху. Восприе́м ты Госпо́дне и́го ле́гкое,/ и, Того́ послу́шая оправда́ний, Иларио́не преподо́бне,/ тяжча́йшее грехо́вное отве́ргл еси́, всему́дре, бре́мя, святы́ню пристяжа́в. И ны́не и при́сно и во ве́ки веко́в. Ами́нь. Богородичен: Мои́х прегреше́ний плени́цы, Влады́чице, расто́ргни,/ Твоего́ Сы́на и Бо́га моля́щи,/ и му́чащий мя, Присноде́во, грех низложи́,/ я́ко да восхвалю́ Тя при́сно, Всенепоро́чная, спаса́емь. Песнь 3 Ирмос: Процвела́ е́сть пусты́ня, я́ко крин, Го́споди,/ язы́ческая неплодя́щая, Це́рковь/ прише́ствием Твои́м,/ в не́йже утверди́ся мое́ се́рдце. Припев: Преподо́бне о́тче Иларио́не, моли́ Бо́га о на́с. Житие́ твое́, я́ко со́лнце, возсия́, преподо́бне, све́тлыми дея́нии,/ мона́шествующих ли́ки просвети́/ и де́монскую тьму́ отгна́. Припев: Преподо́бне о́тче Иларио́не, моли́ Бо́га о на́с. Был еси́ тиша́йш се́рдцем, преподо́бне, и смире́н ду́хом,/ и любве́ Боже́ственныя испо́лнен,/ благоприве́тлив обы́чай име́яй всегда́. Сла́ва Отцу́ и Сы́ну и Свято́му Ду́ху. Ка́плями твои́х слез угаси́л еси́ у́гли грехо́вныя, то́чиши же, я́ко пре́жде конца́/ и по конце́, му́дре, исцеле́ний пучи́ну притека́ющим. И ны́не и при́сно и во ве́ки веко́в. Ами́нь. Богородичен: Исцели́ я́звы души́ моея́, Влады́чице,/ и ума́ испра́ви движе́ния/ к во́лям из Тебе́ вопло́щшагося Сло́ва, молю́ся. Седален, глас 4 Бо́гу освяти́л еси́ твою́, всеблаже́нне, жи́знь,/ быв изря́днейш священноде́тель, и́стинно Христо́в, свяще́ннейше./ Те́мже, по мно́гих и по́тех, и боле́знех ра́дуяся,/ к невеще́ственным преста́вился еси́ ски́нием/ и ны́не источа́еши нам струи́ врачева́ний. Песнь 4 Ирмос: Прише́л еси́ от Де́вы не хода́тай, ни А́нгел,/ но Сам, Го́споди, вопло́щся,/ и спасл еси́ всего́ мя, челове́ка./ Тем зову́ Ти: сла́ва си́ле Твое́й, Го́споди. Припев: Преподо́бне о́тче Иларио́не, моли́ Бо́га о на́с. Очи́стив твое́ се́рдце,/ честны́ми восхожде́ньми ум впери́л еси́ Еди́наго Бо́га зре́ти добро́ту недомы́сленную/ и отону́дными светлостьми́ озаря́тися. Припев: Преподо́бне о́тче Иларио́не, моли́ Бо́га о на́с. Сказа́ние слове́с Боже́ственных творя́,/ ра́зум Боже́ственный, о́тче, отту́ду поче́рпл еси́,/ всем же преда́л еси́ благоче́стно, Иларио́не, к тебе́ притека́ющим. Сла́ва Отцу́ и Сы́ну и Свято́му Ду́ху. Глаго́л твои́х сла́достию сердца́ ути́ши притека́ющих к тебе́,/ творя́ бо я́же учи́л еси́ сло́вом благоприя́тным,/ в сострада́нии любо́вь име́л еси́, преподо́бне. И ны́не и при́сно и во ве́ки веко́в. Ами́нь. Богородичен: Госпо́дь Тя Госпожу́ и Влады́чицу всех соде́ла, Пречи́стая:/ из Твои́х бо ложе́сн воплоти́ся,/ от о́бласти вра́жия Свое́ созда́ние изба́вив. Песнь 5 Ирмос: Хода́тай Бо́гу и челове́ком был еси́, Христе́ Бо́же:/ Тобо́ю бо, Влады́ко, к Светонача́льнику, Отцу́ Твоему́,/ от но́щи неве́дения/ приведе́ние и́мамы. Припев: Преподо́бне о́тче Иларио́не, моли́ Бо́га о на́с. Истка́л еси́ себе́ спасе́ния, преподо́бне, ри́зу/ от сво́йственных боле́зней твои́х,/ се́ю оде́явся, и кня́зя тьмы́ в студ ве́чный обле́кл еси́. Припев: Преподо́бне о́тче Иларио́не, моли́ Бо́га о на́с. Пло́ти сла́сти воздержа́нием, преподо́бне, увяди́л еси́/ и благода́ть Небе́сную, о́тче, восприя́л еси́, Иларио́не,/ врачева́ти вся́кия челове́ков неду́ги. Сла́ва Отцу́ и Сы́ну и Свято́му Ду́ху. Твои́ к Бо́гу непреста́нно ру́це воздева́еме/ руки́ льсти́ваго, о́тче, благочести́выя изба́виша/ и вся́кому боля́щему здра́вие пода́ша. И ны́не и при́сно и во ве́ки веко́в. Ами́нь. Богородичен: Кре́пость ве́рных и преподо́бных была́ еси́ держа́ва,/ Тобо́ю бо, Чи́стая, всем истеко́ша лу́чшая/ и на земли́ живу́щии к Небеси́ восхо́дят. Песнь 6 Ирмос: В бе́здне грехо́вней валя́яся,/ неизсле́дную милосе́рдия Твоего́ призыва́ю бе́здну:/ от тли, Бо́же, мя возведи́. Припев: Преподо́бне о́тче Иларио́не, моли́ Бо́га о на́с. Умертви́вся, Иларио́не, ми́ру всему́,/ ны́не живе́ши, преста́вився в Небе́сныя хра́мы/ и живоно́сное всегда́ исцеле́ний источа́еши де́йство. Припев: Преподо́бне о́тче Иларио́не, моли́ Бо́га о на́с. Благозва́нен, кро́ток, незло́бив, непоро́чен,/ и преподо́бен, и благоумиле́н, и тих ду́хом/ был еси́, о́тче пребога́те. Припев: Преподо́бне о́тче Иларио́не, моли́ Бо́га о на́с. Сострада́нием безме́рным украша́емь/ и нищелю́бия добро́тою честву́емь,/ Бо́жий уго́дник бли́жний, Иларио́не, показа́лся еси́, всеизря́дне. Сла́ва Отцу́ и Сы́ну и Свято́му Ду́ху. Я́ко че́стно твое́ житие́ и непоро́чно,/ я́ко предо́бр и красе́н нрав твой,/ я́ко стра́шна чуде́са, я́же соверша́еши всегда́, всечу́дне. И ны́не и при́сно и во ве́ки веко́в. Ами́нь. Богородичен: Черто́г Бо́жий нескве́рный,/ престо́л огнеобра́зный Вседержи́теля,/ Богоро́дицу, вси ро́ди родо́в, ублажа́ем. Песнь 7 Богородичен: Богопроти́вное веле́ние беззако́ннующаго мучи́теля/ высо́к пла́мень вознесло́ е́сть,/ Христо́с же простре́ Богочести́вым отроко́м ро́су духо́вную,/ Сый благослове́н и препросла́влен. Припев: Преподо́бне о́тче Иларио́не, моли́ Бо́га о на́с. Ору́жии уязви́л еси́ твои́х подвиго́в безпло́тнаго зми́я/ и всеконе́чно истреби́л еси́./ Те́мже чуде́с по́честь восприя́л еси́,/ стра́сти люте́йшия душ же и теле́с исцеля́ти, преподо́бне. Припев: Преподо́бне о́тче Иларио́не, моли́ Бо́га о на́с. Сло́во твое́ происхо́дит, я́коже роса́, отгоня́ зной уны́ния, преподо́бне,/ приходя́щих тебе́ ве́рою, о́тче наш,/ и доброде́тельными твои́ми при́сно просвеща́я нра́вы ду́хом. Припев: Преподо́бне о́тче Иларио́не, моли́ Бо́га о на́с. Страсте́й самоде́ржца ум сотвори́в, я́ве ца́рствовал еси́, я́ко победи́тель изря́ден,/ и язы́ки иноплеме́нныя побори́л еси́,/ и изгуби́л еси́, му́дре, де́монов стра́сти всепа́губныя. Припев: Преподо́бне о́тче Иларио́не, моли́ Бо́га о на́с. Не поколеба́ша, преподо́бне, твоего́ се́рдца столпа́ недви́жимаго искуше́ний ве́тры,/ на ка́мени бо утверди́ся Госпо́дни любве́,/ е́юже укрепля́емь, мно́гим был еси́ Боже́ственное, о́тче, утвержде́ние. Сла́ва Отцу́ и Сы́ну и Свято́му Ду́ху. Троичен: Пою́ Тя, Тричи́сленную Ли́цы, Тро́ице Пресу́щественная,/ неразде́льну, неслия́нну Еди́ницу, естество́м же недомы́сленну,/ Еди́наго Вседержи́теля Бо́га – О́тче, Сло́ве и Ду́ше Святы́й. И ны́не и при́сно и во ве́ки веко́в. Ами́нь. Богородичен: О́бразы Тя издале́ча прообразова́ше/ благода́ть Ду́ха проро́ческими пропове́дании,/ го́ру ту́чну свя́ту, две́рь спаси́тельную, сви́ток же нове́йший, Чи́стая,/ и киво́т Тя имену́ющи. Песнь 8 Ирмос: Пе́щь иногда́ о́гненная в Вавило́не де́йства разделя́ше,/ Бо́жиим веле́нием халде́и опаля́ющая,/ ве́рныя же ороша́ющая, пою́щия:/ благослови́те, вся дела́ Госпо́дня, Го́спода. Припев: Преподо́бне о́тче Иларио́не, моли́ Бо́га о на́с. Привре́менную оста́вив жития́ сла́ву, о́тче, и претека́ющее наслажде́ние,/ сла́ву же неотъе́млему и пи́щу немимотеку́щую на Небесе́х восприя́л еси́, всему́дре,/ со все́ми, боя́щимися Го́спода. Припев: Преподо́бне о́тче Иларио́не, моли́ Бо́га о на́с. Все твое́, се́туя, проше́л еси́ житие́,/ тем блаже́нства сподо́бился еси́ и утеше́ния, ему́же причаща́ются святи́и,/ в земли́ кро́тких, ра́дуяся, ны́не, преподо́бне, всели́лся еси́,/ я́ко смы́слен же и разу́мен. Припев: Преподо́бне о́тче Иларио́не, моли́ Бо́га о на́с. Честна́ твоя́ пред Бо́гом яви́ся сме́рть, о́тче свяще́ннейше:/ Того́ бо почти́л еси́ ико́ну и гоне́ния претерпе́л еси́,/ оскорбля́емь от мучи́телей, преподо́бне,/ му́ченик всем показу́яся. Сла́ва Отцу́ и Сы́ну и Свято́му Ду́ху. Уста́вил еси́ я́ве ловце́в, о́тче, негодова́ние/ и умно́жил еси́ сих ловле́ния, и́же пре́жде не получи́ша,/ Бо́гу послу́шавшу, преподо́бне, моли́тв твои́х, священноде́йственне всеблаже́нне. И ны́не и при́сно и во ве́ки веко́в. Ами́нь. Богородичен: Скве́рны мя страсте́й и ка́ла грехо́внаго, Богора́дованная, отмы́й/ и две́рь мне отве́рзи покая́ния, попо́лзшемуся,/ и соде́ржно прегреше́ньми, Чи́стая, срета́ющемуся, и Бо́га прогне́вающему. Песнь 9 Ирмос: Безнача́льна Роди́теля Сын, Бог и Госпо́дь,/ вопло́щся от Де́вы, нам яви́ся,/ омраче́нная просвети́ти, собра́ти расточе́нная./ Тем всепе́тую Богоро́дицу велича́ем. Припев: Преподо́бне о́тче Иларио́не, моли́ Бо́га о на́с. Врачева́ния гроб твой Ду́ха благода́тию источа́я,/ изсуша́ет страсте́й ту́чи, ду́хи отго́нит пре́лести/ и просвеща́ет всех сердца́, Иларио́не преподо́бне,/ ве́рно блажа́щих тя. Припев: Преподо́бне о́тче Иларио́не, моли́ Бо́га о на́с. Я́ко ши́пок, процве́л еси́ в цве́тнице поще́ния,/ я́ко сладково́нный крин, я́ко я́блоко благово́нно,/ и облагоуха́л еси́ всех благочести́вых души́ и се́рдца, Иларио́не сла́вне,/ моли́твенниче о благохва́лящих тя. Припев: Преподо́бне о́тче Иларио́не, моли́ Бо́га о на́с. Сострада́ние име́л еси́, любо́вь, и смире́ние, и ми́лостыню,/ и обы́чай прост, ве́ру и́стинну и наде́жду,/ житие́ че́стно и нрав прав, Иларио́не преподо́бне, мона́шествующих удобре́ние. Сла́ва Отцу́ и Сы́ну и Свято́му Ду́ху. Па́мять твоя́ дне́сь, я́ко со́лнце, возсия́,/ благочести́вых сердца́ све́тлостию боле́зней твои́х/ и чуде́с сия́ньми я́ко вои́стинну просвеща́ющи, о́тче,/ в ню́же вся помяни́, ве́рно чту́щия тя. И ны́не и при́сно и во ве́ки веко́в. Ами́нь. Богородичен: Глас Тебе́ прино́сим Гаврии́лов, ра́дующеся:/ ра́дуйся, глаго́люще, ме́сто свяще́ния;/ ра́дуйся, преподо́бных сла́во и всех ве́рных спасе́ние,/ Ея́же ра́ди обожи́хомся, Богоро́дице Присноде́во.

Минея, 15 Мая, Кано́н преподо́бному. Его́же краегране́сие сицево́: Евфроси́на похвали́ти ра́зум, Бо́же мой, да́руй ми. Творе́ние Васи́лиево Глас 1 Песнь 1 Ирмос: Песнь побе́дную пои́м вси Бо́гу,/ сотво́ршему ди́вная чудеса́ мы́шцею высо́кою/ и спа́сшему Изра́иля,/ я́ко просла́вися. Припев: Преподо́бне о́тче Евфроси́не, моли́ Бо́га о на́с. Но́во тебе́ пе́ние приношу́ моле́бно,/ во отверзе́ние уст мои́х, Евфроси́не Богому́дре,/ пода́ждь ми твои́ми моли́твами благода́ть, я́ко да воспою́ тя. Припев: Преподо́бне о́тче Евфроси́не, моли́ Бо́га о на́с. Страсте́й омраче́нием порабоще́на,/ све́тлыми моли́твами твои́ми, преподо́бне Евфроси́не, ны́не свободи́,/ да я́ко Христо́ва раба́ тя Боже́ственными воспою́ пе́сньми. Припев: Преподо́бне о́тче Евфроси́не, моли́ Бо́га о на́с. Авраа́мову страннолю́бному о́бразу ты уподо́бився, преподо́бне,/ всем оби́тели своея́ врата́ отве́рзл еси́,/ и всем всяк был еси́, утеша́я су́щия в печа́лех,/ и оби́тель твоя́, о́тче Евфроси́не, я́коже не́кое и́мя,/ че́стно ноша́шеся и во ины́х оби́телех, блаже́нне. Сла́ва Отцу́ и Сы́ну и Свято́му Ду́ху. Христо́ви прилепля́яся от ю́ности, о́тче Евфроси́не,/ чи́стым умо́м и целому́дрием теле́сным ду́шу просвети́л еси́,/ я́ко безпло́тен, на земли́ пожи́в,/ ны́не в Вы́шних Бо́гови предстоя́, нас помина́й. И ны́не и при́сно и во ве́ки веко́в. Ами́нь. Богородичен: Богоро́дичен: Яви́ся вы́шши А́нгел, Бо́га вопло́щши ро́ждшагося, и погребе́на,/ и ме́ртвым нетле́ние, Де́во Чи́стая, пода́вшаго,/ Его́же моли́ спасти́ся ве́рно сла́вящим Тя. Песнь 3 Ирмос: Да утверди́тся се́рдце мое́ в во́ли Твое́й, Христе́ Бо́же,/ И́же над вода́ми не́бо утвержде́й второ́е/ и основа́вый на вода́х зе́млю, Всеси́льне. Припев: Преподо́бне о́тче Евфроси́не, моли́ Бо́га о на́с. Боже́ственным светоли́тием, Богому́дре, просвеща́емь/ о́тче преблаже́нне Евфроси́не,/ све́тлое и светоно́сное честно́е успе́ние твое́ любо́вию чту́щих,/ преподо́бне, твои́ми моли́твами просвети́. Припев: Преподо́бне о́тче Евфроси́не, моли́ Бо́га о на́с. Ума́ твоего́ о́ко, преподо́бне о́тче, от страсте́й мглы очи́стив,/ Пресвято́му Ду́ху прия́тно селе́ние яви́ся,/ чи́стым блиста́нием соде́лал еси́, Богоблаже́нне Евфроси́не. Припев: Преподо́бне о́тче Евфроси́не, моли́ Бо́га о на́с. Тве́рдостию ра́зума укрепля́емь, всеблаже́нне Евфроси́не,/ разли́чная мечта́ния враго́в обличи́л еси́, му́дре,/ и горды́ню тех возвы́шенную низложи́л еси́, преподо́бне. Сла́ва Отцу́ и Сы́ну и Свято́му Ду́ху. Рачи́тель сый ми́лостиваго Христа́ своего́, о́тче Евфроси́не,/ не́коему и́ноку, в раска́яние впа́дшу о да́ннем сребре́ на сооруже́ние оби́тели твоея́,/ ты же повеле́л еси́ отда́ти,/ и, взем, отъи́де в и́ну оби́тель, и ослепе́, и приводи́м с ве́рою./ Ты же, о́тче, ми́лостивно наказу́я, Бо́жиею благода́тию да́руеши ему́ прозре́ние, я́коже при купе́ли. И ны́не и при́сно и во ве́ки веко́в. Ами́нь. Богородичен: И́же пре́жде век рожде́йся от Отца́/ напосле́док неизрече́нно из утро́бы Твоея́ про́йде/ и обожи́ на́ше естество́, Ма́ти Де́во,/ И́же преподо́бных ли́ки я́ве изводя́й. Седален, глас 8 От ю́ности, блаже́нне, вся оста́вль кра́сная же и ле́потная,/ усе́рдно после́довал еси́ Христу́, зва́вшему тя, со све́рстником свои́м./ Посто́м, отцы́ преподо́бнии, те́ло свое изнури́ли есте́,/ в моли́твах безпреста́ни бдя́ще./ Те́мже тя, о́тче, Всеве́дый Госпо́дь до́бре устроя́ет па́стыря Свои́м овца́м слове́сным./ Евфроси́не и Серапио́не, отцы́ Богоно́снии,/ моли́те Христа́ Бо́га грехо́в оставле́ние пода́ти/ чту́щим любо́вию святу́ю па́мять ва́шу. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Я́ко де́ву и еди́ну в жена́х, Тя́, без се́мене ро́ждшую Бо́га пло́тию, вси́ ублажа́ем, ро́ди челове́честии: о́гнь бо всели́ся в Тя́ Божества́, и я́ко Младе́нца млеко́м пита́еши Зижди́теля и Го́спода. Те́м, а́нгельский и челове́ческий ро́д, досто́йно сла́вим пресвято́е Рождество́ Твое́ и согла́сно вопие́м Ти́: моли́ Христа́ Бо́га согреше́ний оставле́ние дарова́ти покланя́ющимся ве́рою пресвято́му Рождеству́ Твоему́. Песнь 4 Ирмос: Ду́хом прови́дя, проро́че Авваку́ме, Словесе́ воплоще́ние,/ пропове́дал еси́, вопия́:/ внегда́ прибли́житися ле́том – позна́ешися,/ внегда́ приити́ вре́мени – пока́жешися./ Сла́ва си́ле Твое́й, Го́споди. Припев: Преподо́бне о́тче Евфроси́не, моли́ Бо́га о на́с. Зако́н Бо́жий сохраня́я невре́дно, преподо́бне,/ чистоту́ и смире́ние ты от младе́нства име́л еси́,/ и житие́ нескве́рно, и нрав ми́лостивый, о́тче досточу́дне Евфроси́не. Припев: Преподо́бне о́тче Евфроси́не, моли́ Бо́га о на́с. Возвы́сил еси́ к Бо́гу серде́чное жела́ние, и смири́л еси́ па́губныя стра́сти,/ и лука́вствия бесо́в низложи́л еси́, преподо́бне Евфроси́не,/ и́ночествующим недви́жимое основа́ние. Припев: Преподо́бне о́тче Евфроси́не, моли́ Бо́га о на́с. Звезда́ све́тлая яви́ся в конце́х, пусты́ню же град сотвори́л еси́/ и мно́жество учени́к собра́л еси́,/ Христу́ сраспя́лся еси́, крест свой на ра́мо взем,/ воздержа́нием сам себе́ изнури́л еси́, свя́те Евфроси́не,/ моли́ непреста́нно о всех нас. Сла́ва Отцу́ и Сы́ну и Свято́му Ду́ху. В нищете́ пожи́в, преподо́бне, доброде́тельми обогати́лся еси́/ и, жития́ све́тлостию быв испо́лнен, преста́вися к Вы́шнему гра́ду, о́тче Евфроси́не,/ и мо́лишися изба́витися от бед ста́ду твоему́. И ны́не и при́сно и во ве́ки веко́в. Ами́нь. Богородичен: Святы́х Свята́го па́че смы́сла и естества́ породила́ еси́, Богоро́дице,/ освяще́ние, и избавле́ние, и оставле́ние грехо́в ве́рным хода́тайством Твои́м подаю́ща/ и́же Его́ сла́вящим воскресе́ние. Песнь 5 Ирмос: Твой мир даждь нам,/ Сы́не Бо́жий:/ ино́го бо, ра́зве Тебе́, бо́га не зна́ем,/ И́мя Твое́ имену́ем,/ я́ко Бог живы́х и ме́ртвых еси́. Припев: Преподо́бне о́тче Евфроси́не, моли́ Бо́га о на́с. Оте́ц си́рым был еси́ и пита́тель вдови́цам,/ скорбя́щим утеше́ние, оби́димым помо́щник,/ па́стырь и наста́вник ста́ду своему́, преподо́бне Евфроси́не,/ и ны́не приле́жно моли́ся Влады́це о нас. Припев: Преподо́бне о́тче Евфроси́не, моли́ Бо́га о на́с. И́нок и́стинен был еси́, простра́ннаго пути́ удаля́яся, те́сный предпочита́я;/ дости́гл еси́ широты́ ра́йския и дре́ву жи́зненному причаща́ешися,/ но и нас, ве́рою чту́щих тя, помина́й. Припев: Преподо́бне о́тче Евфроси́не, моли́ Бо́га о на́с. Се́рдце твое́ скрижа́ль чи́сту наше́д,/ Святы́й Дух, о́тче Евфроси́не, обре́те,/ дарова́ тебе́ сверше́ное безстра́стие, ве́ру тве́рду и любо́вь нелицеме́рну. Сла́ва Отцу́ и Сы́ну и Свято́му Ду́ху. Ме́сто, е́же сподо́бися прия́ти честны́я мо́щи твоя́, преподо́бне Евфроси́не, освяти́ся/ и по мно́гим страна́м прославля́емо есть,/ я́ко в себе́ мо́щи твоя́ иму́ще. И ны́не и при́сно и во ве́ки веко́в. Ами́нь. Богородичен: Свяще́ния сень я́вльшися, Мари́е,/ оскверне́нную сластьми́ окая́нную мою́ ду́шу освяти́/ и Боже́ственныя сла́вы прича́стника мя сотвори́. Песнь 6 Ирмос: Проро́ка Ио́ну подража́я, вопию́:/ живо́т мой, Бла́же, свободи́ из тли/ и спаси́ мя, Спа́се ми́ра, зову́ща: сла́ва Тебе́. Припев: Преподо́бне о́тче Евфроси́не, моли́ Бо́га о на́с. Стра́хом Христо́вым утверди́ся, преподо́бне,/ те́ло, и ум, и ду́шу очи́стив от вся́кия скве́рны,/ и́миже зарю́ прия́т, Богому́дре, трисо́лнечную, Евфроси́не, о́тче всеблаже́нне. Припев: Преподо́бне о́тче Евфроси́не, моли́ Бо́га о на́с. Весь распя́лся еси́ ми́рови, о́тче Евфроси́не,/ крест Христо́в на рамо взем, блаже́нне,/ и, Того́ страсте́м подо́бяся, прича́стник бысть воскресе́нию и сла́ве лу́чшей,/ в не́йже нас помина́й. Припев: Преподо́бне о́тче Евфроси́не, моли́ Бо́га о на́с. Стягну́в те́ло твое́ воздержа́нием и чистото́ю,/ в Вы́шняя селе́ния к широте́, о́тче, дости́гл еси́. Сла́ва Отцу́ и Сы́ну и Свято́му Ду́ху. Храм тя, вси ве́рнии, Свято́му Ду́ху све́мы,/ храм бо благоле́пен воздви́гл еси́ Бо́гови,/ в том вселе́нских учи́телей именова́л еси́ и и́нок мно́жества совокупи́л еси́./ И ны́не моли́твами твои́ми всяк неду́г отгоня́ется. И ны́не и при́сно и во ве́ки веко́в. Ами́нь. Богородичен: Ви́девши, Его́же родила́ еси́, Бо́га, от ме́ртвых воста́вша,/ ра́дости испо́лнена яви́ся, Де́во Ма́ти Мари́е./ Того́ у́бо моли́ вся́ку печа́ль, Чи́стая, на́шего се́рдца до конца́ потреби́ти. Кондак, глас 8 Бо́жиим светоли́тием просвеще́н, о́тче,/ по́стническое стяжа́в жи́тельство, преподо́бне,/ и́ноком предо́брый наста́вниче и по́стником благо́е украше́ние./ Сего́ ра́ди Госпо́дь, труды́ твоя́ ви́дев, да́ром чуде́с обогати́ тя,/ источа́еши бо исцеле́ния./ Мы же, ра́дующеся, вопие́м ти:/ ра́дуйся, о́тче Евфроси́не, и́ноком удобре́ние. Икос Ева́нгельский глас услы́шав, о́тче,/ вся оста́вил еси́ плотска́я мудрова́ния,/ бога́тство же и сла́ву, я́ко прах, нивочто́же вмени́в,/ и на стра́сти, я́ко безпло́тен, подвиза́ся,/ и безпло́тных ликостоя́ний чистоте́ уподо́бися,/ ра́зума дарова́ние от Го́спода прия́л еси́./ Те́мже и аз, недосто́йный и гре́шный, наде́юся прия́ти моли́твами твои́ми, преподо́бне, ми́лость в День су́дный/ и соде́янных мно́ю зол проще́ние получи́ти,/ но ты пода́ждь ми сло́во свято́е воспе́ти житие́ твое́, преблаже́нне:/ ра́дуйся, Евфроси́не, преподо́бне и Богоно́се,/ Небе́сный челове́че и земны́й А́нгеле./ Ра́дуйся, я́ко кроме́ ми́ра су́етнаго пусты́ню сотвори́л еси́,/ и оби́тель в ней соста́вив, и храм прече́стен трем святи́телем воздви́гл еси́,/ и в нем тобо́ю Бог сла́вится./ Ра́дуйся, я́ко измла́да Бо́гу послужи́л еси́/ и, мно́жество и́нок собра́в, от ни́хже слы́шиши сицева́я тебе́ глаго́лющих:/ ра́дуйся, спасе́нию на́шему хода́таю,/ и́же до́бре пасы́й ста́до свое́ от наве́т вра́жиих;/ ра́дуйся, посрами́вый бесо́в полки́./ Ра́дуйся, и́ночествующим пресве́тлый свети́льниче и сто́лпе терпе́ния;/ ра́дуйся, оте́честву своему́, гра́ду Пско́ву, похвало́ и утвержде́ние./ Ра́дуйся, всем скорбя́щим ми́лость и благоутро́бие отве́рзл еси́/ и ни́щим засту́пниче и корми́телю и уныва́ющим утеше́ние;/ ра́дуйся, приходя́щим с ве́рою к ра́це твое́й от наве́т вра́жиих изба́вителю,/ и помысло́в злых от них отгони́телю, и скорбя́щим сла́дкое утеше́ние./ Ра́дуйся, ра́дости Боже́ственныя пода́телю и чуде́с исто́чниче к тебе́ притека́ющим./ Ра́дуйся, предста́телю наш, о́тче Евфроси́не, и́ночествующим удобре́ние. Песнь 7 Ирмос: Су́щим в пещи́ отроко́м Твои́м, Спа́се,/ не прикосну́ся, ниже́ стужи́, огнь./ Тогда́ трие́, я́ко еди́неми усты́, поя́ху/ и благословля́ху, глаго́люще:/ благослове́н Бог оте́ц на́ших. Припев: Преподо́бне о́тче Евфроси́не, моли́ Бо́га о на́с. Смотря́я бу́дущую жизнь, блаже́нне Евфроси́не,/ ми́рови умертви́ся вои́стинну, я́ко со́лнце, возсия́в,/ страх Бо́жий восприи́м в се́рдцы свое́м,/ вселе́нную всю возвесели́л еси́ уче́ньми, вопия́:/ благослове́н Бог оте́ц на́ших. Припев: Преподо́бне о́тче Евфроси́не, моли́ Бо́га о на́с. Зря́ще муче́ния та́мошняя мы́сленными очи́ма и се́рдцем боле́знуя вы́ну,/ чи́сто житие́ пожи́в, Богоблаже́нне, к нестаре́ющейся пи́щи преста́вися;/ в не́йже чту́щия тя помина́й, о́тче Евфроси́не, вопия́:/ благослове́н Бог оте́ц на́ших. Припев: Преподо́бне о́тче Евфроси́не, моли́ Бо́га о на́с. Украси́в доброде́тельми свое́ житие́ и свя́то сконча́в свою́ жизнь,/ усну́л еси́, преподо́бне, сном ми́рным./ Те́мже спаса́й ста́до свое́ всегда́, твою́ па́мять пра́зднующих, вопию́щих:/ благослове́н Бог оте́ц на́ших. Сла́ва Отцу́ и Сы́ну и Свято́му Ду́ху. По Боже́ственнем твое́м преставле́нии, о́тче Евфроси́не,/ чудеса́ сотвори́л еси́ о Христе́ и лю́дем по́мощь по́дал еси́, вопию́щим:/ благослове́н Бог оте́ц на́ших. И ны́не и при́сно и во ве́ки веко́в. Ами́нь. Богородичен: Прему́дрость Соста́вную и Сло́во Присносу́щное,/ Вра́ча душа́м и те́лом поро́ждшая,/ я́звы и гное́ния души́ моея́ уврачу́й лю́тыя/ и ле́тныя се́рдца моего́ исцели́ боле́зни, Де́во. Песнь 8 Ирмос: Его́же ужаса́ются А́нгели и вся во́инства,/ я́ко Творца́ и Го́спода,/ по́йте, свяще́нницы, просла́вите, о́троцы,/ благослови́те, лю́дие,/ и превозноси́те во вся ве́ки. Припев: Преподо́бне о́тче Евфроси́не, моли́ Бо́га о на́с. Подвиза́вся зако́нно на земли́,/ ны́не ра́дуешися, преподо́бне Евфроси́не, со святы́ми, Небе́сный обре́те поко́й,/ соприча́стник бысть весе́лию тех и ра́дости, взыва́я:/ благослови́те, лю́дие, Го́спода и превозноси́те Его́ во ве́ки. Припев: Преподо́бне о́тче Евфроси́не, моли́ Бо́га о на́с. Слеза́ми свои́ми, о́тче Евфроси́не, лице́ свое́ умыва́я,/ житие́ проше́л еси́ и те́ми мно́жество бесо́в потопи́л еси́;/ ве́рных же мы́сли возвесели́, пою́щих:/ благослови́те, лю́дие, Го́спода и превозноси́те Его́ во ве́ки. Припев: Преподо́бне о́тче Евфроси́не, моли́ Бо́га о на́с. Богохрани́мый град Псков, и́же тебе́ стяжа́вый,/ ра́достию ра́дуется, преподо́бне Евфроси́не,/ тебе́ бо, я́ко сте́ну име́я тве́рду и столп необори́м,/ Христа́ воспева́ет, И́же тебе́ сему́ дарова́вшаго, поя́:/ благослови́те, лю́дие, Го́спода и превозноси́те Его́ во ве́ки. Сла́ва Отцу́ и Сы́ну и Свято́му Ду́ху. Посто́м ум очища́я, кро́ток и незло́бив я́влься,/ на земли́ кро́тких живе́ши, Богому́дре Евфроси́не,/ со все́ми преподо́бными и избра́нными поя́:/ Го́спода благослови́те, лю́дие, и превозноси́те Его́ во ве́ки. И ны́не и при́сно и во ве́ки веко́в. Ами́нь. Богородичен: Пощади́ нас, пою́щих Твое́, Го́споди, и́же от Де́вы неизрече́нное рождество́,/ изба́ви от стра́стных бед и скорбе́й рабы́ Своя́ мольба́ми Пречи́стыя Твоея́ Ма́тере,/ я́ко Милосе́рд и Человеколю́бец. Песнь 9 Ирмос: Живоприе́мный исто́чник приснотеку́щий,/ светоно́сный свети́льник благода́ти,/ храм одушевле́нный, сень пречи́стую,/ Небесе́ и земли́ простра́ннейшую,/ Богоро́дицу, ве́рнии, велича́ем. Припев: Преподо́бне о́тче Евфроси́не, моли́ Бо́га о на́с. Я́ко у́тро, я́ко со́лнце, возсия́ па́мять твоя́,/ тьму отгоня́я душетле́нных страсте́й,/ ю́же соверша́юще, благоче́стно восхваля́ем тя ра́достными пе́сньми. Припев: Преподо́бне о́тче Евфроси́не, моли́ Бо́га о на́с. Я́ко в раи́, о́тче, воздержа́ния процве́л еси́,/ я́ко ма́слина, псало́мски яви́ся,/ ли́ца и сердца́ на́ша помазу́я ма́слом трудо́в твои́х, о́тче Евфроси́не,/ благоче́стно чту́щих свяще́нную па́мять твою́. Припев: Преподо́бне о́тче Евфроси́не, моли́ Бо́га о на́с. Днесь нам возсия́ честна́я па́мять твоя́, преблаже́нне,/ просвеща́я ду́ши и телеса́ и страсте́й мглу отгоня́я, преподо́бне./ Пода́ждь по́мощь моли́твами твои́ми, Евфроси́не о́тче,/ и наста́ви на стезю́ жи́зни,/ те́мже, досто́йно чту́ще тя, велича́ем. Припев: Преподо́бне о́тче Евфроси́не, моли́ Бо́га о на́с. Руко́ю мое́ю недосто́йною приноси́мое тебе́ с трудо́м хвале́ние,/ о́тче Евфроси́не, не пре́зри, но приими́/ и моли́ Творца́ своего́, Влады́ку и Го́спода, та́мошняго изба́вити ве́чнаго муче́ния/ тебе́ ве́рою почита́юща. Сла́ва Отцу́ и Сы́ну и Свято́му Ду́ху. Певце́в, и́же тебе́, блаже́нне, и́скренно воспева́ющих/ и твою́ па́мять честну́ю, преподо́бне Евфроси́не, ве́рою прославля́ющих,/ освяти́, и просла́ви, и от бед избавля́й и напа́стей/ и и́же та́мо ве́чнаго, о́тче, муче́ния,/ да тебе́ всегда́ воспева́ют. И ны́не и при́сно и во ве́ки веко́в. Ами́нь. Богородичен: Приими́, Пречи́стая Отрокови́це, Боже́ственную песнь,/ воздаю́щи благода́ть на Тя наде́ющимся,/ и мир испроси́ Це́рквам при́сно пода́ти/ и ве́рным посла́ти на враги́ одоле́ния и побе́ды,/ да, всяк язы́к христиа́нский, Тя велича́ем. Светилен Пусты́ню град сотвори́л еси́ прему́дрыми о́бразы,/ отце́м украше́ние, Евфроси́не Богому́дре,/ и сию́ соверши́л еси́, я́ко мы́сленный рай, принося́щ цве́ты Боже́ственныя,/ единообра́зных мно́жества, досто́йно твою́ творя́щих па́мять успе́ния. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Я́ко иму́щи милосе́рдие и ми́лость ве́лию,/ при́зри, Препе́тая Богоро́дице Де́во, на мое́ смире́ние,/ и страсте́й мглу и собла́зн жития́ разори́, Отрокови́це,/ и огня́ гее́нскаго изба́ви моли́твами Свои́ми.

Минея, 4 Марта, Кано́н, его́же краегране́сие: Гера́сима хвалю́, я́ко вене́ц плету́ Глас 8 Песнь 1 Ирмос: Пои́м Го́сподеви,/ прове́дшему лю́ди Своя́ сквозе́ Чермно́е мо́ре,/ я́ко Еди́н сла́вно просла́вися. Припев: Преподо́бне о́тче Гера́симе, моли́ Бо́га о на́с. Сла́ву безсме́ртия и нетле́ния Боже́ственный вене́ц/ до́бре подви́гшемуся Христо́с тебе́ подаде́, Гера́симе. Припев: Преподо́бне о́тче Гера́симе, моли́ Бо́га о на́с. Име́я Светода́теля, твои́х послу́шающа моле́ний,/ де́монов тьму́ ума́лил еси́, о́тче Гера́симе. Сла́ва Отцу́ и Сы́ну и Свято́му Ду́ху. Струя́ми твои́х слез, я́коже дре́во, о́тче, тучня́емое,/ плоды́ безсме́ртия произне́сл еси́, Богому́дре Гера́симе. И ны́не и при́сно и во ве́ки веко́в. Ами́нь. Богородичен: Пречи́стая Богоро́дице, уста́ви боле́зни се́рдца моего́,/ я́же Христа́ безболе́зненно, па́че ума́ же и сло́ва ро́ждшая. Песнь 3 Ирмос: Ты еси́ утвержде́ние/ притека́ющих к Тебе́, Го́споди,/ Ты еси́ свет омраче́нных,/ и пое́т Тя дух мой. Припев: Преподо́бне о́тче Гера́симе, моли́ Бо́га о на́с. Распя́тие во́льное Претерпе́вшему, преподо́бне, после́дуя,/ ве́сь распя́лся еси́ житию́ и страсте́м. Припев: Преподо́бне о́тче Гера́симе, моли́ Бо́га о на́с. Возмо́гл еси́, укрепля́емь вседе́тельным, му́дре, манове́нием,/ кре́пкаго вся се́ти попра́ти, Гера́симе. Припев: Преподо́бне о́тче Гера́симе, моли́ Бо́га о на́с. Смире́нным мудрова́нием и смире́нным, му́дре, ду́хом, ты укре́плься,/ стра́сти душетле́нныя всеконе́чно смири́л еси́. Сла́ва Отцу́ и Сы́ну и Свято́му Ду́ху. Я́коже вели́кое со́лнце, чуде́с твои́х сия́ньми просвеща́еши всех сердца́,/ ве́рно восхваля́ющих тя. И ны́не и при́сно и во ве́ки веко́в. Ами́нь. Богородичен: Родила́ еси́, Всенепоро́чная, Отцу́ Сы́на сопресто́льна и соесте́ственна,/ всем вхо́ды жи́зненныя показа́вшаго. Седален, глас 4 Де́монов, преподо́бне, кова́рства кре́стною благода́тию и де́йством преше́д,/ положе́нием бог был еси́./ Те́мже тя ве́рно почита́ем, Гера́симе. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Пречи́стыя ру́ки Твоя́, Де́во Ма́ти, просте́рши,/ покры́й упова́ющия на Тя и Сы́ну Твоему́ зову́щия:/ всем пода́ждь, Христе́, ми́лости Твоя́. Песнь 4 Ирмос: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́. Припев: Преподо́бне о́тче Гера́симе, моли́ Бо́га о на́с. Храм бы́сть Ду́ха просвеще́нное, о́тче, се́рдце твое́,/ тем то́чит дарова́ния,/ исцеля́я неду́ги Боже́ственною благода́тию. Припев: Преподо́бне о́тче Гера́симе, моли́ Бо́га о на́с. Зако́ну Боже́ственному повину́яся, о́тче,/ от ю́ности после́довал еси́ Го́споду,/ облобыза́я безпло́тных житие́ с те́лом. Сла́ва Отцу́ и Сы́ну и Свято́му Ду́ху. Ше́ствия твоя́, преподо́бне, к спаси́тельней стези́ испра́вишася/ наставле́нием Боже́ственнаго Ду́ха, в тя, преподо́бне, все́льшагося. И ны́не и при́сно и во ве́ки веко́в. Ами́нь. Богородичен: Иису́са Человеколю́бца,/ Его́же несказа́нно чревоноси́ла еси́,/ умоли́, Всенепоро́чная, спасти́ вся, пою́щия Тя. Песнь 5 Ирмос: У́тренююще, вопие́м Ти:/ Го́споди, спаси́ ны,/ Ты бо еси́ Бог наш,/ ра́зве Тебе́, ино́го не ве́мы. Припев: Преподо́бне о́тче Гера́симе, моли́ Бо́га о на́с. Умо́м очище́нным прие́м лучи́ Свята́го Ду́ха,/ свет мона́шествующих был еси́. Припев: Преподо́бне о́тче Гера́симе, моли́ Бо́га о на́с. Житие́ твое́, ну́ждею естества́ сия́я,/ а́нгела земна́го с пло́тию тя показа́. Сла́ва Отцу́ и Сы́ну и Свято́му Ду́ху. Вод живото́чных Ду́ха испо́лнен,/ ре́ки источи́л еси́ чуде́с, о́тче Гера́симе. И ны́не и при́сно и во ве́ки веко́в. Ами́нь. Богородичен: Я́ко ту́ча, на Тя сни́де, Богоро́дице,/ Сло́во, воплоща́емое в просвеще́ние душ на́ших. Песнь 6 Ирмос: Очи́сти мя, Спа́се,/ мно́га бо беззако́ния моя́,/ и из глубины́ зол возведи́, молю́ся,/ к Тебе́ бо возопи́х, и услы́ши мя,/ Бо́же спасе́ния моего́. Припев: Преподо́бне о́тче Гера́симе, моли́ Бо́га о на́с. Пло́ти твоея́ немощно́е, си́лою укрепля́емо/ от Де́вы нам Чи́стыя возсия́вшаго,/ всю смири́ си́лу, о́тче, вражде́бных безпло́тных, преподо́бне. Припев: Преподо́бне о́тче Гера́симе, моли́ Бо́га о на́с. Сокруши́в мы́сленных льво́в че́люсти благода́тию,/ покори́л еси́ чу́вственных стремле́ния, преподо́бне;/ тем повину́ется тебе́ лев,/ я́ко па́стырю благопоко́рно служа́. Сла́ва Отцу́ и Сы́ну и Свято́му Ду́ху. Житие́ а́нгельское, мудрова́ние, о́тче, смире́нно стяжа́в о Христе́,/ кро́ток был еси́/ и ны́не всели́лся еси́ в земли́ кро́тких,/ ра́дости Боже́ственныя исполня́емь. И ны́не и при́сно и во ве́ки веко́в. Ами́нь. Богородичен: Всели́ся в Тя О́тчее, Чи́стая, озаре́ние/ и, ро́ждься пло́тию, мир просвети́, и тьмы́ изба́ви многобо́жия./ Сего́ ра́ди воспева́ем Тя. Кондак, глас 4 Возгоре́вся раче́нием Го́рним,/ же́стость пусты́ни Иорда́новы па́че всех ми́ра сла́дких предпоче́л еси́;/ отону́дуже повину́ся тебе́ зве́рь да́же до сме́рти, о́тче,/ послу́шне и жа́лостне на гро́бе твое́м сконча́ся,/ просла́вльшу тя та́ко Бо́гу,/ к Нему́же моля́ся, и о нас,/ о́тче Гера́симе, помина́й. Песнь 7 Ирмос: О́троцы евре́йстии в пещи́/ попра́ша пла́мень дерзнове́нно/ и на ро́су о́гнь преложи́ша, вопию́ще:/ благослове́н еси́, Го́споди Бо́же, во ве́ки. Припев: Преподо́бне о́тче Гера́симе, моли́ Бо́га о на́с. Свет возсия́ тебе́, о́тче, и сопру́г сего́ весе́лие,/ в Небе́сных кро́вех при́сно водворя́ему и песнопою́щу:/ благослове́н еси́, Го́споди Бо́же, во ве́ки. Припев: Преподо́бне о́тче Гера́симе, моли́ Бо́га о на́с. Ту́чами слез напои́в твое́, Богоно́се, се́рдце,/ доброде́тельныя прозяба́еши плоды́,/ и́миже сла́дость Го́рнюю во ве́ки прия́л еси́ со все́ми преподо́бными. Сла́ва Отцу́ и Сы́ну и Свято́му Ду́ху. Во усте́х нося́ пе́ние в подража́нии непреста́нно А́нгельстем,/ бде́нным умо́м, Гера́симе, вопия́л еси́:/ благослове́н еси́, Го́споди Бо́же, во ве́ки. И ны́не и при́сно и во ве́ки веко́в. Ами́нь. Богородичен: О́гнь ника́коже Тя, Богоро́дице, Божества́ опали́, Де́во,/ Тя бо купина́ иногда́ образова́ше в горе́,/ опаля́ема, Пречи́стая, и ника́коже сгара́ющи. Песнь 8 Ирмос: Богоглаго́ливии о́троцы в пещи́,/ со огне́м пла́мень попира́юще, поя́ху:/ благослови́те, дела́ Госпо́дня, Го́спода. Припев: Преподо́бне о́тче Гера́симе, моли́ Бо́га о на́с. Просвеще́н предста́л еси́ Влады́це/ по́стническими сия́ньми, чудоно́сче Гера́симе,/ и Безпло́тных лико́м счи́слился еси́. Припев: Преподо́бне о́тче Гера́симе, моли́ Бо́га о на́с. В беззло́бии житие́ проводи́в,/ лука́ваго седа́лище отню́д охуди́л еси́,/ по́стников красото́, Богому́дре Гера́симе. Сла́ва Отцу́ и Сы́ну и Свято́му Ду́ху. Во оде́жду нетле́ния оде́ялся еси́/ страсте́й совлече́нием, о́тче Богому́дре Гера́симе,/ и черто́г Боже́ственный досто́йно получи́л еси́. И ны́не и при́сно и во ве́ки веко́в. Ами́нь. Богородичен: Я́ко благоуха́нный крин, обре́т Тя во удо́лиих жития́ Пресу́щественный, Всечи́стая,/ Тобо́ю благоуха́ние ми́рови вдохну́. Песнь 9 Ирмос: Устраши́ся всяк слух/ неизрече́нна Бо́жия снизхожде́ния,/ я́ко Вы́шний во́лею сни́де да́же и до пло́ти,/ от деви́ческаго чре́ва быв Челове́к./ Те́мже Пречи́стую Богоро́дицу, ве́рнии, велича́ем. Припев: Преподо́бне о́тче Гера́симе, моли́ Бо́га о на́с. Стопа́м всех, до́бре на земли́ ходи́вших, после́дуя,/ любо́вь име́л еси́, ве́ру, наде́жду,/ ме́рность, му́дрость и неоску́дную моли́тву,/ воздержа́ние неизрече́нное, о́тче Гера́симе,/ наслажда́яся чи́стыми восхожде́нии. Припев: Преподо́бне о́тче Гера́симе, моли́ Бо́га о на́с. О, чу́до! ка́ко, я́ко слове́сен, повинова́шеся тебе́ зве́рь/ повеле́нию твоему́, Гера́симе, со усе́рдием служа́,/ Бо́гу прославля́ющу твое́ житие́ равноа́нгельное,/ зна́мении, преподо́бне, и безчи́сленными дивесы́ и чудесы́? Припев: Преподо́бне о́тче Гера́симе, моли́ Бо́га о на́с. Утвержде́ние яви́лся еси́ мона́шествующих и молча́щих, Богоно́се, наказа́ние,/ тесне́йшую бо воздержа́ния стезю́ ше́ствовал еси́,/ Боже́ственными наде́ждами ду́шу при́сно разширя́я./ Те́мже простра́нно в се́лех избра́нных обре́л еси́ селе́ние. Сла́ва Отцу́ и Сы́ну и Свято́му Ду́ху. Процве́л еси́, о́тче, во дво́рех Бо́га на́шего, я́ко фи́никс высокора́сленный,/ я́ко кипари́с, возвели́чился еси́ Боже́ственными возноше́нии./ Отону́дуже па́мять твою́ ве́рно вси пра́зднуем,/ в ню́же мо́лимся: искуше́ний ны вся́ких спаси́. И ны́не и при́сно и во ве́ки веко́в. Ами́нь. Богородичен: Нося́щи Емману́ила на ру́ку Твое́ю, Чи́стая,/ я́коже Младе́нца, Богора́дованная, вопия́ла еси́:/ Ча́до Мое́ сладча́йшее,/ ка́ко пода́м Тебе́ сосе́ц, пита́ющему вся́ческая?/ ка́ко повию́ Тя пелена́ми, мгло́ю повива́ющаго мо́ре?

Минея, 20 Мая, Кано́н. Творе́ние Питири́ма, епи́скопа Пе́рмскаго Глас 6 Песнь 1 Ирмос: Я́ко по су́ху, пешеше́ствовав Изра́иль/ по бе́здне стопа́ми,/ гони́теля фарао́на/ ви́дя потопля́ема,/ Бо́гу побе́дную пе́снь/ пои́м, вопия́ше. Припев: Святи́телю о́тче Алекси́е, моли́ Бо́га о на́с. Отве́рзи ми устне́ благода́тию Твоего́ Божества́, Христе́,/ и, озари́в, просвети́ ду́шу же и се́рдце несумне́нною ве́рою воспе́ти/ обре́тение честны́х моще́й святи́теля Твоего́ Алекси́я. Припев: Святи́телю о́тче Алекси́е, моли́ Бо́га о на́с. От уст недосто́йных, и от се́рдца нечи́ста,/ и от недости́жнаго ума́ на́шего/ приими́ ма́лое хвале́ние, святи́телю Алекси́е,/ воспе́ти обре́тение честны́х моще́й твои́х. Сла́ва Отцу́ и Сы́ну и Свято́му Ду́ху. Тро́ицу Ли́цы, Еди́ницу же Существо́м пропове́дал еси́, святи́телю,/ и от Тоя́ незави́стныя да́ры прия́л еси́,/ и исцеле́ния разли́чная подава́еши ве́рою приходя́щим к ра́це моще́й твои́х. И ны́не и при́сно и во ве́ки веко́в. Ами́нь. Богородичен: Язы́ков ча́яние дре́вле Тобо́ю дарова́ся, Пречи́стая Богоро́дице:/ Ты бо Христа́ родила́ еси́, от рова прегреше́ний возводя́ща во тлю попо́лзшияся/ и от бед избавля́юща Тя велича́ющия. Песнь 3 Ирмос: Не́сть свят,/ я́коже Ты, Го́споди Бо́же мой,/ вознесы́й рог ве́рных Твои́х, Бла́же,/ и утверди́вый нас на ка́мени/ испове́дания Твоего́. Припев: Святи́телю о́тче Алекси́е, моли́ Бо́га о на́с. Смиреному́дрия нра́вом и о́браза кро́тостию А́нгельскому житию́ подо́бяся,/ нескве́рно и непоро́чно те́ло твое́ соблю́л еси́,/ преосвяще́нный о́тче, святи́телю Алекси́е. Припев: Святи́телю о́тче Алекси́е, моли́ Бо́га о на́с. Я́ко звезда́ многосве́тлаго со́лнца, от гро́ба возсия́ша,/ от мно́гих лет сокрове́ны, честны́я мо́щи святи́теля Алекси́я,/ чуде́с лучи́ испуща́юще и исцеле́ния всем подаю́ще. Сла́ва Отцу́ и Сы́ну и Свято́му Ду́ху. Ра́достию у́бо возра́довашася вси моско́встии наро́ди,/ архиере́й вели́кий со святи́тели, и христолюби́вии кня́зи,/ и церко́вное все совокупле́ние,/ егда́ обрето́шася честны́я твоя́ мо́щи, ничи́мже вреди́мы, святи́телю Алекси́е. И ны́не и при́сно и во ве́ки веко́в. Ами́нь. Богородичен: Ро́ждшая Свет всему́ ми́ру,/ просвети́ на́ша помышле́ния, Пречи́стая Влады́чице,/ и неразу́мия мглу дале́че отжени́, еди́на Богоблаже́нная. Седален, глас 1 Па́мять обре́тения честны́х моще́й твои́х наста́ нам све́тло пра́зднество,/ пречу́дный святи́телю Христо́в, Алекси́е прехва́льне,/ в ню́же чуде́с благода́ть прия́л еси́ от всех Царя́, Христа́ Бо́га,/ разли́чныя неду́ги от челове́к отгони́ти, и от уз избавля́ти,/ и оби́димых от лют изыма́ти./ Те́мже зове́м: изба́ви нас от враг на́ших. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Гаврии́лу веща́вшу Тебе́, Де́во, ра́дуйся,/ со гла́сом воплоща́шеся всех Влады́ка/ в Тебе́, святе́м киво́те, я́коже рече́ пра́ведный Дави́д,/ яви́лася еси́, ши́ршая Небе́с, поноси́вши Зижди́теля Твоего́./ Сла́ва Все́льшемуся в Тя, сла́ва Проше́дшему из Тебе́,/ сла́ва Свободи́вшему нас рождество́м Твои́м. Песнь 4 Ирмос: Христо́с моя́ си́ла,/ Бог и Госпо́дь, честна́я Це́рковь/ боголе́пно пое́т, взыва́ющи,/ от смы́сла чи́ста о Го́споде пра́зднующи. Припев: Святи́телю о́тче Алекси́е, моли́ Бо́га о на́с. Благода́рственныя пе́сни принесе́м Христу́ Бо́гу на́шему,/ такова́го святи́теля дарова́вшему Це́ркви Свое́й,/ пречестно́е удобре́ние и гра́ду Москве́ вели́кое утвержде́ние. Припев: Святи́телю о́тче Алекси́е, моли́ Бо́га о на́с. Я́ко Ааро́н незло́бием, Ду́ха благода́тию, сла́вне,/ в ри́зу свы́ше обле́клся еси́ преподо́бия и пра́вды/ и, предстоя́ престо́лу Христо́ву, моли́ о нас непреста́нно,/ святи́телю Алекси́е. Сла́ва Отцу́ и Сы́ну и Свято́му Ду́ху. Я́ко лу́ча светоза́рнаго со́лнца, от гро́ба нам взы́де, святи́телю,/ озаря́я всех, ве́рою почита́ющих обре́тение честны́х моще́й твои́х,/ Богоблаже́нне Алекси́е. И ны́не и при́сно и во ве́ки веко́в. Ами́нь. Богородичен: Ра́дости нам хода́таица яви́лася еси́,/ я́ко прие́мши исполне́ние всего́ Божества́, Всенепоро́чная./ Тем вси, ра́дуйся, А́нгелово велегла́сно зове́м, Богора́дованная. Песнь 5 Ирмос: Бо́жиим све́том Твои́м, Бла́же,/ у́тренюющих Ти ду́ши любо́вию озари́, молю́ся,/ Тя ве́дети, Сло́ве Бо́жий,/ и́стиннаго Бо́га,/ от мра́ка грехо́внаго взыва́юща. Припев: Святи́телю о́тче Алекси́е, моли́ Бо́га о на́с. Благода́тию Боже́ственнаго Ду́ха моли́тва твоя́ поспешеству́ема:/ егда́ у́бо це́рковь паде́ся, образо́в, и́же в ней, святы́х ничи́мже вреди́,/ я́ко ни пра́ху прикосну́тися им,/ та́ко и ны́не сохраня́й град твой от сопроти́вных враг. Припев: Святи́телю о́тче Алекси́е, моли́ Бо́га о на́с. Всем христиа́ном в беда́х помо́щник и гра́ду Москве́ ве́лий засту́пник,/ неду́гующим врач безме́здный,/ и су́щим в ну́ждах и ско́рбех гото́вейший уте́шитель,/ и хода́тай те́плый ко всех Царю́, Христу́ Бо́гу. Сла́ва Отцу́ и Сы́ну и Свято́му Ду́ху. На земли́ положе́но бы́сть честно́е те́ло твое́, святи́телю Алекси́е,/ дух же возлете́ на Небеса́, со апо́столы же и святи́тели и со А́нгелы ликовству́я,/ Святе́й Тро́ице предстои́ши:/ моли́ся приле́жно за град и лю́ди твоя́, свя́те. И ны́не и при́сно и во ве́ки веко́в. Ами́нь. Богородичен: Та́йны Твоея́ глубина́, Пречи́стая Богоро́дице, А́нгельския чи́ны удивля́ет,/ и честна́я Твоя́ ико́на бе́сы смуща́ет и прогоня́ет,/ мы же покланя́ем Ти ся, ве́дуще Тя, Бо́жию Ма́терь. Песнь 6 Ирмос: Жите́йское мо́ре,/ воздвиза́емое зря напа́стей бу́рею,/ к ти́хому приста́нищу Твоему́ прите́к, вопию́ Ти:/ возведи́ от тли живо́т мой, Многоми́лостиве. Припев: Святи́телю о́тче Алекси́е, моли́ Бо́га о на́с. Христо́вою си́лою обле́клся еси́, Алекси́е прему́дре,/ и священноде́тель и́стинен показа́лся еси́, Бо́жиим сия́нием просвети́вся,/ я́ко от окри́на, честны́я твоея́ ра́ки исцеле́ния разли́чна неоску́дно подае́ши/ пра́зднующим ве́рно честны́х твои́х моще́й обре́тение. Припев: Святи́телю о́тче Алекси́е, моли́ Бо́га о на́с. Вседе́тельнаго Ду́ха пресве́тлыми луча́ми осия́емь при́сно,/ от разли́чных искуше́ний, и бед, и скорбе́й, обдержа́щих нас,/ я́ко Христо́в уго́дник, о́тче, изба́ви рабы́ твоя́,/ светоно́сное твое́ торжество́ всегда́ соверша́ющих ве́рно, святи́телю Алекси́е. Сла́ва Отцу́ и Сы́ну и Свято́му Ду́ху. Я́сно пропове́дал еси́ еди́нство Тро́ицы,/ и нему́дрых сердца́ в ра́зум приве́л еси́,/ и ро́ждшему Сло́во сопресто́льно/ Богоразу́мием и́стинным ра́вно славосло́вив./ Тем, в Небе́сных селе́ниях водворя́яся, от бед нас избавля́й. И ны́не и при́сно и во ве́ки веко́в. Ами́нь. Богородичен: Ро́ждшая сия́ние сла́вы О́тчи, Де́во Богоро́дице Всепе́тая,/ просвети́ ду́ши пою́щих Тя:/ Твое́ю бо благода́тию нетле́нны сохране́ны бы́ша честны́я мо́щи святи́теля Алекси́я,/ разли́чныя дарова́ния источа́юща ве́рою чту́щим па́мять его́. Кондак, глас 8 Я́ко со́лнце незаходи́мое, от гро́ба возсия́ нам/ от мног лет сокрове́ны честны́я твоя́ мо́щи нетле́нны,/ святи́телю Алекси́е,/ тобо́ю благода́ть прие́млем:/ всю бо страну́ сию́ и вся ны чудесы́ и добро́тою обогаща́еши,/ де́йством благода́ти, да пое́м ти:/ ра́дуйся, о́тче, свети́ло Росси́и. Икос Похва́лим ны́не святи́теля пе́сньми, Росси́йскаго па́стыря и учи́теля,/ и благоче́стно притеце́м к ра́це моще́й его́,/ и почерпе́м дарова́ния, я́ко от исто́чника исцеле́ний./ Ю́же обстоя́ще ны́не, ра́достно весели́мся/ и, усе́рдно обше́дше, светоно́сными пе́сньми просла́вим, глаго́люще:/ чудотво́рче святи́телю Алекси́е,/ чудесы́ обогаща́й всех нас соде́янием благода́ти, да пое́м ти:/ ра́дуйся, о́тче, свети́ло Росси́и. Песнь 7 Ирмос: Росода́тельну у́бо пе́щь/ соде́ла А́нгел/ преподо́бным отроко́м,/ халде́и же опаля́ющее/ веле́ние Бо́жие мучи́теля увеща́ вопи́ти:/ благослове́н еси́, Бо́же оте́ц на́ших. Припев: Святи́телю о́тче Алекси́е, моли́ Бо́га о на́с. От светоно́сныя десни́цы прие́м благода́ть чуде́с,/ ве́рою прося́щим, о́тче, исцеле́ния разли́чная подава́еши,/ святи́телю Христо́в Алекси́е, благоче́стно пою́щим:/ благослове́н Бог оте́ц на́ших. Припев: Святи́телю о́тче Алекси́е, моли́ Бо́га о на́с. Гроб, иде́же положе́но бы́сть честно́е те́ло твое́,/ сокруше́н бы́сть от мно́гаго ка́мения, егда́ распаде́ся це́рковь,/ моще́м же твои́м ника́коже прикосну́ся./ И́хже мы зря́ще, неизрече́нно светя́щихся, ра́достно зове́м:/ благослове́н Бог оте́ц на́ших. Сла́ва Отцу́ и Сы́ну и Свято́му Ду́ху. В Трие́х Ипоста́сех Богонача́льных/ держа́ву Отца́, равноде́тельна Сы́на и Ду́ха богосло́вил еси́,/ и Той тя просла́ви, и засту́пника тя показа́ нам, зову́щим ти:/ изба́ви нас, свя́те, от всех зол, находя́щих на ны. И ны́не и при́сно и во ве́ки веко́в. Ами́нь. Богородичен: Тя Засту́пницу, Чи́стая Богоро́дице, стяжа́хом,/ и на Тя вси наде́жду возложи́хом,/ и к Тебе́ прибега́ем:/ спаси́ нас, Всенепоро́чная, и изба́ви моли́твами Твои́ми от обдержа́щия ско́рби и мяте́жа/ и лю́тых напа́стей и бед. Песнь 8 Ирмос: Из пла́мене преподо́бным ро́су источи́л еси́/ и пра́веднаго же́ртву водо́ю попали́л еси́:/ вся бо твори́ши, Христе́, то́кмо е́же хоте́ти./ Тя превозно́сим во вся ве́ки. Припев: Святи́телю о́тче Алекси́е, моли́ Бо́га о на́с. На Небесе́х чи́ни А́нгельстии лику́ют,/ и на земли́ ве́рных собо́ри све́тло пра́зднуют/ обре́тение честна́го твоего́ телесе́, святи́телю Алекси́е,/ пе́сньми сла́вяще Христа́ во ве́ки. Припев: Святи́телю о́тче Алекси́е, моли́ Бо́га о на́с. Вонми́ и услы́ши глаго́лы на́ша, святи́телю Христо́в Алекси́е,/ и спаси́ Святе́йшаго Патриа́рха на́шего,/ град же и лю́ди изми́ от вся́каго зла,/ пою́щия и превознося́щия Христа́ во ве́ки вся. Сла́ва Отцу́ и Сы́ну и Свято́му Ду́ху. Единонача́льная Тро́ица, все́ми влады́чествующая, Я́же тобо́ю воспева́емая,/ сим одари́ тя манове́нием Боже́ственным,/ це́ло и нетле́нно свяще́нное твое́ те́ло сохрани́,/ сла́вящих бо Ю прославля́ет во ве́ки. И ны́не и при́сно и во ве́ки веко́в. Ами́нь. Богородичен: Не умолчи́м никогда́же велича́ти и глаго́лати заступле́ние Твое́, е́же твори́ши,/ утиша́ющи мяте́ж, прибега́ющим к покро́ву Твоему́, Богома́ти,/ и наде́жду тве́рду иму́щим Тя во ве́ки. Песнь 9 Ирмос: Бо́га/ челове́ком невозмо́жно ви́дети,/ на Него́же не сме́ют чи́ни А́нгельстии взира́ти;/ Тобо́ю же, Всечи́стая, яви́ся челове́ком/ Сло́во воплоще́нно,/ Его́же велича́юще,/ с Небе́сными вой Тя ублажа́ем. Припев: Святи́телю о́тче Алекси́е, моли́ Бо́га о на́с. Со апо́столы и святи́тели Влады́чню престо́лу и с ли́ки А́нгельскими предстоя́,/ моли́ изба́вити нас от печа́лей, находя́щих на ны:/ я́ко бо о́гнь, паля́щ и разжизающ, лю́тый пла́мень, обходя́щий нас,/ от него́же изба́ви ны, святи́телю Алекси́е прему́дре, да тя ублажа́ем. Припев: Святи́телю о́тче Алекси́е, моли́ Бо́га о на́с. Яви́ся звезде́ подо́бно, светоно́сивей подо́бие о́браза твоего́,/ духо́вными луча́ми просвеща́я се́рдца ве́рных,/ Богоразу́мия же све́том лучи́ чуде́с испуща́еши/ и исцеле́ния подава́еши, святи́телю,/ пра́зднующим любо́вию обре́тение честны́х моще́й твои́х. Сла́ва Отцу́ и Сы́ну и Свято́му Ду́ху. В Трие́х Богонача́льных Ипоста́сех Еди́н Сый Бог, сла́вимый всегда́/ и ца́рство име́яй непреме́нно,/ всемо́щною твое́ю десни́цею шата́ния враг нечести́вых, и братоуби́йц вы́и низве́рзи/ под но́зе во́инству на́шему. И ны́не и при́сно и во ве́ки веко́в. Ами́нь. Богородичен: Ро́ди вси Тя ублажа́ют ны́не, Пречи́стая Богоро́дице, и всяк град и страна́,/ ору́жие, и заступле́ние, и забра́ло Тя иму́ще,/ хва́лятся Тобо́ю, я́ко кре́пость их ро́ждшую, Влады́ку всех, Христа́ Бо́га,/ си́лу иму́щаго непобеди́мую. Светилен Прииди́те вси, ди́внаго и сла́внаго в чудесе́х,/ вели́каго святи́теля Алекси́я пе́сньми свяще́нными похва́лим,/ Росси́йскаго свети́льника и учи́теля, и А́нгельским чино́м ссе́льника,/ и моли́твенника те́пла ко Го́споду о чту́щих па́мять его́. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: По Бо́зе упова́ние на́ше иму́ще на Тя,/ Пречи́стая Богоро́дице, мо́лим Ти ся:/ моли́ся о нас ко из Тебе́ ро́ждшемуся/ невре́дны нас да́же до конца́ сохрани́ти,/ прири́щущих к покро́ву Твоему́.

Минея, 4 Января, Кано́н предпра́зднства Глас 6 Песнь 1 Ирмос: Я́ко по су́ху, пешеше́ствовав Изра́иль/ по бе́здне стопа́ми,/ гони́теля фарао́на ви́дя потопля́ема,/ Бо́гу побе́дную песнь пои́м, вопия́ше. Припев: Сла́ва Тебе́, Бо́же на́ш, сла́ва Тебе́. Да ра́дуется тварь, оте́чествия язы́ков да пою́т:/ Иису́с, Царь всея́ земли́, предгряде́т/ струя́ми Иорда́нскими на́ше сотвори́ти очище́ние. Сла́ва Отцу́ и Сы́ну и Свято́му Ду́ху. В ца́рскую багряни́цу из де́вственных крове́й, Го́споди, оде́явся пло́тию,/ к речны́м тече́нием наг прихо́диши, мою́ одева́я наготу́. И ны́не и при́сно и во ве́ки веко́в. Ами́нь. Сын Отца́ Пребезнача́льнаго Ты сый,/ к сы́ну, Благоутро́бне, Заха́риину смире́нно прихо́диши, Креще́ния прося́,/ я́ко да благода́тию сы́ны Бо́жия сотвори́ши ны. Песнь 3 Ирмос: Несть свят,/ я́коже Ты, Го́споди Бо́же мой,/ вознесы́й рог ве́рных Твои́х, Бла́же,/ и утверди́вый нас на ка́мени/ испове́дания Твоего́. Припев: Сла́ва Тебе́, Бо́же на́ш, сла́ва Тебе́. Влады́чествуяй все́ми я́ко Бог, раба́ но́сиши о́браз/ и к рабу́, Ще́дре, прихо́диши пло́тски,/ Креще́нием Богоде́льным от рабо́ты вра́жия изымая ны. Сла́ва Отцу́ и Сы́ну и Свято́му Ду́ху. Прише́л еси́ на струи́, чесо́ ра́ди?/ Ко́е очище́ние хотя́?/ Ку́ю скве́рну отмы́ти, Преблаги́й, ища́й?/ Пою́ Твое́, е́же па́че ума́, за милосе́рдие, Сло́ве, снизхожде́ние. И ны́не и при́сно и во ве́ки веко́в. Ами́нь. Ища́ овча́, Христе́, е́же ди́вий волк расто́ргне ле́стию,/ на Иорда́нских струя́х стои́ши, взыва́я Предте́чи:/ гряди́, крести́ Мя ты. Седален, глас 1 Иису́су ро́ждшуся от Де́вы Мари́и/ и во Иорда́не кре́щщуся от Иоа́нна,/ Дух сни́де на Него́, зри́мый в ви́де голуби́не./ Сего́ ра́ди проро́к со А́нгелы глаго́лаше, зовы́й:/ сла́ва прише́ствию Твоему́, Христе́,/ сла́ва Ца́рствию Твоему́,/ сла́ва смотре́нию Твоему́, Еди́не Человеколю́бче. Песнь 4 Ирмос: Христо́с моя́ си́ла,/ Бог и Госпо́дь, честна́я Це́рковь/ боголе́пно пое́т, взыва́ющи,/ от смы́сла чи́ста о Го́споде пра́зднующи. Припев: Сла́ва Тебе́, Бо́же на́ш, сла́ва Тебе́. Егда́ ви́де Тя, струя́, Го́споди, Иорда́нская возврати́ся;/ мно́гими же страстьми́ низложе́нное естество́ на́ше к Небесе́м обрати́ся,/ поклони́вся Тебе́. Сла́ва Отцу́ и Сы́ну и Свято́му Ду́ху. Ужаса́ется со́лнце, зря Тебе́, Со́лнца, пло́тски обна́жшася/ и та́инственно все озаря́юща,/ обна́жшееся мра́чным преступле́нием естество́, Влады́ко. И ны́не и при́сно и во ве́ки веко́в. Ами́нь. Се Очище́ние, се Избавле́ние и Обновле́ние всех,/ Просвеще́ние прии́де во своя́,/ да присво́имся у́бо Ему́ жития́ чистото́ю. Песнь 5 Ирмос: Бо́жиим све́том твои́м, Блаже,/ у́тренюющих Ти ду́ши любо́вию озари́, молю́ся,/ Тя ве́дети, Сло́ве Бо́жий,/ И́стиннаго Бо́га,/ от мра́ка грехо́внаго взыва́юща. Припев: Сла́ва Тебе́, Бо́же на́ш, сла́ва Тебе́. Плодопринесе́м Христу́ житие́ чи́стое:/ гряде́т бо Очища́яй вода́ми грехо́в скве́рну благода́тию,/ Еди́н Благоде́тель и Безгре́шный. Сла́ва Отцу́ и Сы́ну и Свято́му Ду́ху. Лю́дие, во тьме скорбе́й дре́вле седя́щии,/ Свет яви́ся вам незаходя́щий,/ ви́дите, и Боже́ственными заря́ми просвети́теся,/ и Я́вльшагося благода́ть воспо́йте. И ны́не и при́сно и во ве́ки веко́в. Ами́нь. Ве́лие та́инство соверша́я,/ к вели́кому Предте́чи Твоему́, о Великодарови́те Го́споди, гряде́ши,/ ума́лившееся челове́чество неизглаго́ланно велича́я Креще́нием. Песнь 6 Ирмос: Жите́йское мо́ре,/воздвиза́емое зря напа́стей бу́рею,/к ти́хому приста́нищу Твоему́ прите́к, вопию Ти;/ возведи́ от тли живо́т мои́,/ Многоми́лостиве. Припев: Сла́ва Тебе́, Бо́же на́ш, сла́ва Тебе́. Вод сый испо́лнен та́йных,/ я́ко река́ ми́ра, Еди́не Го́споди, к реце́ прише́л еси́,/ от ма́лыя ка́пли прося́ крести́тися, Еди́не Безгре́шне. Сла́ва Отцу́ и Сы́ну и Свято́му Ду́ху. Диви́тся свы́ше А́нгельский лик,/ смотря́я обнаже́на о́блаки покрыва́ющаго Не́бо, и взыва́ет:/ что сие́ Твое́ мно́гое к челове́ком снизше́ствие? И ны́не и при́сно и во ве́ки веко́в. Ами́нь. По́лный истощи́ся, Неви́димый се, вопло́щся, яви́ся./ Иорда́не реко́, возвесели́ся, струи́ твоя́ испо́лни,/ я́ко да омы́еши всех Возрожде́ние. Кондак, глас 4 Во струя́х днесь Иорда́нских быв, Госпо́дь/ Иоа́нну вопие́т:/ не убо́йся крести́ти Мя,/ Спасти́ бо приидо́х/ Ада́ма первозда́ннаго. Икос Не истязу́ю тя, Крести́телю, преде́лы преходи́ти,/ не глаго́лю тебе́:/ рцы Ми, я́же глаго́леши беззако́нным и учи́ши гре́шники./ То́чию крести́ Мя молча́ и ча́я, я́же от Креще́ния,/ прии́меши бо сего́ ра́ди досто́инство, е́же не бысть А́нгелом,/ и́бо всех проро́ков бо́льша тя сотворю́./ От онех у́бо ни един яве Мя виде,/ но во образех, и се́нех, и гаданиих,/ ты же пред тобо́ю стоя́ща ви́дел еси́,/ спасти́ бо приидо́х Ада́ма первозда́ннаго. Песнь 7 Ирмос: Росода́тельну у́бо пещь соде́ла А́нгел/ преподо́бным отроко́м,/ халде́и же опаля́ющее/ веле́ние Бо́жие мучи́теля увеща́ вопи́ти:/ благослове́н еси́. Бо́же оте́ц на́ших. Припев: Сла́ва Тебе́, Бо́же на́ш, сла́ва Тебе́. Ка́ко Тя струи́ поды́мут ре́чныя, сла́дости су́ща пото́ка, Христе́?/ Ка́ко Предте́ча простре́т ру́ку на Тя, руко́ю созда́вшего его́/ и от руки́ льсти́ваго изба́вльшаго ны? Сла́ва Отцу́ и Сы́ну и Свято́му Ду́ху. Струя́, Го́споди сый, бла́гости, ко струя́м Иорда́нским ка́ко прихо́диши,/ нетле́ния вода́ми ища́ напои́ти/ вкуше́нием лука́вым низложе́нныя во тлю за́вистию зми́я? И ны́не и при́сно и во ве́ки веко́в. Ами́нь. Да ка́плют го́ры ра́дование,/ и холми́ да взыгра́ют, веселя́щеся,/ ре́ки да воспле́щут руко́ю:/ яви́ся, гряде́т Христо́с в реце́ челове́ческая погрузи́ти прегреше́ния. Песнь 8 Ирмос: Из пла́мене преподо́бным ро́су источи́л еси́/ и пра́веднаго же́ртву водо́ю попали́л еси:/ вся бо твори́ши, Христе́, то́кмо еже́ хоте́ти./ Тя превозно́сим во вся ве́ки. Припев: Сла́ва Тебе́, Бо́же на́ш, сла́ва Тебе́. Ре́чныя струи́ ми́лотию разсека́ше Елиссе́й, благода́ть Креще́ния предсеннопиша́,/ ю́же Христо́с соде́лает, на сия́ восходя́, Еди́н Благоде́тель. Сла́ва Отцу́ и Сы́ну и Свято́му Ду́ху. Назна́меноваше иногда́ проро́к сла́вный Креще́ния благода́ть,/ со́лию во́ды безпло́дныя пе́рвее соде́лав многопло́дны,/ я́вльшагося Бо́га на́шего си́лою. И ны́не и при́сно и во ве́ки веко́в. Ами́нь. Дебрь вся́ка Боже́ственных даро́в испо́лнится,/ и холм проти́вный смири́тся, и стро́потная в пра́вая обратя́тся/ воплоще́ннаго Бо́га явле́нием. Песнь 9 Ирмос: Бо́га челове́ком невозмо́жно ви́дети,/ на Него́же не сме́ют чи́ни Ангельстии взира́ти./ Тобо́ю же, Всечи́стая, яви́ся челове́ком Сло́во воплоще́нно,/ Его́же велича́юще,/ с Небе́сными во́и Тя ублажа́ем. Припев: Сла́ва Тебе́, Бо́же на́ш, сла́ва Тебе́. Рука́ми созда́вый, Христе́, челове́ка,/ по́д руку́ Предте́чеву подклоня́ешися, я́ко Челове́к смиря́яся,/ я́ко да возвы́сиши мя, дре́вле смири́вшася и поги́бша./ Сла́ва сла́вному и стра́шному строе́нию Твоему́. Сла́ва Отцу́ и Сы́ну и Свято́му Ду́ху. Душ очище́ние гото́вится, просвеще́ние, реше́ние лю́тых прии́де./ Иорда́не реко́, возвеселися,/ возлику́й, вся тварь, земля́ же и мо́ре, восплещи́,/ сла́вящи Христа́ Преблаго́го. И ны́не и при́сно и во ве́ки веко́в. Ами́нь. Я́ко Сый всех до́брых исполне́ние,/ грядеши, вопия́, испо́лненному святы́ни рабу́ Твоему́,/ уди́вльшуся Твоему́ снизхожде́нию:/ прибли́жися, крести́ Мя,/ хощу́ бо испо́лнити естество́ земны́х освяще́ния и очище́ния. Светилен Гото́вися, Завуло́не,/ Неффали́ме, украси́ся,/ подыми́, Иорда́не, Зижди́теля всех и Бо́га, плотию́ к тебе́ гряду́ща,/ на́ша грехи́ измы́ти хотя́щаго.

Минея, 24 Марта, Канон предпразднства Глас 4 Песнь 1 Ирмос: Мо́ря чермну́ю пучи́ну/ невла́жными стопа́ми/ дре́вний пешеше́ствовав Изра́иль,/ крестообра́зныма Моисе́овыма рука́ма/ Амали́кову си́лу в пусты́ни победи́л е́сть. Припев: Пресвята́я Богоро́дице, спаси́ нас. Мир обра́дованно весели́тся, я́ко ощути́в Госпо́дне соше́ствие на Тя:/ за милосе́рдие бо ми́лости с Небе́с схо́дит во утро́бу Де́вы всели́тися. Припев: Пресвята́я Богоро́дице, спаси́ нас. Се Тебе́, Цари́це, посыла́ется Боже́ственный Арха́нгел/ Царя́ всех и Бо́га провозвести́ти прише́ствие и возгласи́те Тебе́:/ ра́дуйся, воззва́ние пра́отца. Сла́ва Отцу́ и Сы́ну и Свято́му Ду́ху. Ста́мна светоза́рная и всезлата́я, угото́вися на прия́тие, ма́нны живо́тныя:/ на Тя бо прии́дет гла́сом А́нгеловым,/ в Тя па́че естества́ вселя́яся. И ны́не и при́сно и во ве́ки веко́в. Ами́нь. Во утро́бу Твою́ чи́стую всели́тися хо́щет Госпо́дь, живы́й при́сно на Небеси́,/ онебеси́ти бо гряде́т земноро́дных смеше́ние, в сие́ му́дре обо́лкся. Песнь 3 Ирмос: Не му́дростию, и си́лою, и бога́тством хва́лимся,/ но Тобо́ю, О́тчею Ипоста́сною Му́дростию, Христе́:/ не́сть бо свят, па́че Тебе́, Человеколю́бче. Припев: Пресвята́я Богоро́дице, спаси́ нас. Земля́, я́же те́рние страсте́й печа́льне израсти́вшая, взыгра́я, лику́й:/ се бо Земледе́латель Безсме́ртный, кля́твы изыма́я тя, ны́не прихо́дит. Припев: Пресвята́я Богоро́дице, спаси́ нас. Боже́ственное руно́, гото́вися, Де́во нескве́рная:/ на Тя бо Бог, я́ко до́ждь, сни́дет/ изсуши́ти пото́ки преступле́ния. Сла́ва Отцу́ и Сы́ну и Свято́му Ду́ху. Сви́тче Боже́ственный, благоукраси́ся:/ пе́рстом бо О́тчим напи́шется в Тебе́ Боже́ственное Сло́во, вопло́щся,/ безслове́сия моего́ разреша́я преступле́ние. И ны́не и при́сно и во ве́ки веко́в. Ами́нь. Златы́й свети́льниче, подыми́ О́гнь Божества́,/ возсия́ющий Тобо́ю, и свет ми́рови да́руя,/ и́мже зол на́ших тьма́ разори́тся. Седален, глас 4 Наше́ствием Ду́ха Всесвята́го,/ Отцу́ Сопресто́льнаго и Единосу́щнаго,/ гла́сом Арха́нгеловым зачала́ еси́, Богороди́тельнице,/ Ада́мово воззва́ние. Песнь 4 Ирмос: Вознесе́на Тя ви́девши Це́рковь на Кресте́,/ Со́лнце Пра́ведное,/ ста в чи́не свое́м,/ досто́йно взыва́ющи:/ сла́ва си́ле Твое́й, Го́споди. Припев: Пресвята́я Богоро́дице, спаси́ нас. Та́инство, дре́вле пре́жде век предопределе́нное,/ явле́ние начина́ет приима́ти./ Земля́ и Небе́сная, согла́сно возвесели́теся и ра́достно воскли́кните. Припев: Пресвята́я Богоро́дице, спаси́ нас. Пала́та вели́каго Царя́, слу́хов отве́рзи Боже́ственныя вхо́ды,/ уже́ бо прихо́дит Христо́с и́стина/ и всели́тся посреди́ Тебе́. Сла́ва Отцу́ и Сы́ну и Свято́му Ду́ху. Прама́тернее поползнове́ние исправля́яй, Изба́витель яви́тся,/ в неискусобра́чную утро́бу вселя́яся, Тому́ воспои́м:/ сла́ва си́ле Твое́й, Го́споди. И ны́не и при́сно и во ве́ки веко́в. Ами́нь. Авваку́м Тя пронарече́ го́ру дре́вле, доброде́тельми присе́нну,/ из нея́же яви́тися хо́щет Бог наш, Де́во Всенепоро́чная,/ еди́на челове́ком исправле́ние. Песнь 5 Ирмос: Ты, Го́споди, мой Свет,/ в мир прише́л еси́,/ Свет Святы́й, обраща́яй из мра́чна неве́дения,/ ве́рою воспева́ющия Тя. Припев: Пресвята́я Богоро́дице, спаси́ нас. О нескве́рная А́гнице!/ А́гнец бо Бо́га на́шего во утро́бу Твою́ вни́ти тщи́тся,/ взе́мляй на́ша согреше́ния. Припев: Пресвята́я Богоро́дице, спаси́ нас. Жезл та́йный пома́ле процвете́т, я́коже пи́шет,/ Боже́ственный цвет от ко́рене Иессе́ева нам явля́ющися. Сла́ва Отцу́ и Сы́ну и Свято́му Ду́ху. А́нгеловым гла́сом утучни́вшися, я́ко виногра́д,/ к прозябе́нию гото́вися зре́лаго, Де́во, и нетле́ннаго Гро́зда. И ны́не и при́сно и во ве́ки веко́в. Ами́нь. Велича́йший проро́ков Иса́ия, возвесели́ся:/ Де́ва бо, о Не́йже проре́кл еси́,/ во чре́ве зачина́ет Сове́та Вели́каго А́нгела. Песнь 6 Ирмос: Пожру́ Ти со гла́сом хвале́ния, Го́споди,/ Це́рковь вопие́т Ти,/ от бесо́вския кро́ве очи́щшися/ ра́ди ми́лости от ребр Твои́х/ исте́кшею Кро́вию. Припев: Пресвята́я Богоро́дице, спаси́ нас. Ра́дуйся, – Тебе́ Гаврии́л Арха́нгел веща́ет, – ра́дость бо во чре́ве Твое́м прии́меши несказа́нно,/ ю́же Е́ва преступле́нием, Де́во, погуби́. Припев: Пресвята́я Богоро́дице, спаси́ нас. Не опали́т, не ужаса́йся отню́д, утро́бы Твоея́ О́гнь Божества́, Отрокови́це:/ купина́ бо дре́вле Тя вообража́ше, горя́щи,/ ника́коже опаля́ема, Всечи́стая. Сла́ва Отцу́ и Сы́ну и Свято́му Ду́ху. Гора́, ю́же Дании́л прови́де Ду́хом, ра́дуйся, Де́во,/ из Тебе́ бо мы́сленный Ка́мень усече́тся/ и сокруши́т де́монов безду́шная тре́бища. И ны́не и при́сно и во ве́ки веко́в. Ами́нь. Ми́ра Ца́рь к Тебе́ прии́дет/ и Тобо́ю примири́т поборе́нныя и прельще́нныя, Богома́ти,/ лука́вым сове́том змии́ным. Кондак, глас 8 Всем земны́м нача́ло спасе́ния на́шего Ты еси́, Богоро́дице Де́во,/ Бо́жий бо служи́тель с Небе́с по́слан предста́ти Тебе́,/ вели́кий чинонача́льник Гаврии́л,/ ра́дость обра́дованную Ти принесе́./ Тем вси зове́м Ти:/ ра́дуйся, Неве́сто Неневе́стная. Песнь 7 Ирмос: Спасы́й во огни́ авраа́мския Твоя́ о́троки/ и халде́и уби́в,/ я́же пра́вда пра́ведно уловля́ше,/ препе́тый Го́споди,/ Бо́же оте́ц на́ших, благослове́н еси́. Припев: Пресвята́я Богоро́дице, спаси́ нас. Киво́т слове́сный, его́же и́стинный Законополо́жник возлюби́в,/ в Тебе́ хо́щет селе́ние сотвори́ти, благово́ния испо́лнися,/ Тобо́ю бо истле́вшияся обнови́т. Припев: Пресвята́я Богоро́дице, спаси́ нас. Проро́ческий Боже́ственный лик, я́коже ощути́в, Отрокови́це,/ е́же на Тя Изба́вителя ми́рное прише́ствие, зове́т Тебе́:/ ра́дуйся, всех избавле́ние,/ ра́дуйся, Еди́на челове́ков спасе́ние. Сла́ва Отцу́ и Сы́ну и Свято́му Ду́ху. Не ужаса́йся гла́са, не диви́ся глаго́лющему:/ Бо́жий слуга́ е́сть./ Яви́ти Тебе́ прии́де та́инство, А́нгелы неизрече́нное,/ неискусобра́чная Де́во благослове́нная. И ны́не и при́сно и во ве́ки веко́в. Ами́нь. Зри́ши тва́рь всю, враго́м порабоще́ну, Де́во,/ поми́ловати же ю за милосе́рдие ми́лости хотя́ Тобо́ю благоволи́вый,/ да не у́бо словесе́м А́нгела не ве́руеши. Песнь 8 Ирмос: Ру́це распросте́р, Дании́л/ льво́в зия́ния в ро́ве затче́,/ о́гненную же си́лу угаси́ша,/ доброде́телию препоя́савшеся,/ благоче́стия рачи́тели, о́троцы, взыва́ющее/ благослови́те, вся дела́ Госпо́дня, Го́спода. Припев: Пресвята́я Богоро́дице, спаси́ нас. Ле́гкий о́блаче Све́та, Неискусобра́чная, угото́вися:/ се Со́лнце свы́ше превозсия́ет Тебе́ незаходи́мое,/ вма́ле у́бо в Тебе́ кры́емо, ми́ру же явля́емо/ и реша́що зло́бы омраче́ние. Припев: Пресвята́я Богоро́дице, спаси́ нас. А́нгелов пе́рвый служи́тель возопи́ Тебе́ глас ра́достен,/ возвеща́я Тебе́, Чи́стая, Вели́каго Сове́та А́нгела,/ воплоща́ема из Тебе́ за бла́гость, Ему́же вопие́м:/ благослови́те, вся дела́ Госпо́дня, Го́спода. Сла́ва Отцу́ и Сы́ну и Свято́му Ду́ху. Отца́ одесну́ю седя́й,/ в Тебе́ селе́ние хо́щет сотвори́ти Пресу́щественный, Чи́стая,/ я́ко да поста́вит одесну́ю Себе́ Тя, бли́жнюю и до́брую я́ко Цари́цу,/ десни́цу же всем простре́т па́дшим и спасе́т ны. И ны́не и при́сно и во ве́ки веко́в. Ами́нь. Я́ко ши́пок удо́лий чист,/ я́ко крин благово́нен, позна́в Тя, Зижди́тель наш Госпо́дь/ ны́не возжела́ Твоея́ добро́ты, Чи́стая,/ и воплоти́тися из Твои́х крове́й хо́щет,/ я́ко да прожене́т злосмра́дие пре́лести бла́гостию. Песнь 9 Ирмос: Е́ва у́бо неду́гом преслуша́ния/ кля́тву всели́ла е́сть,/ Ты же, Де́во Богоро́дице,/ прозябе́нием чревоноше́ния ми́рови благослове́ние процвела́ еси́/ Тем Тя вси велича́ем. Припев: Пресвята́я Богоро́дице, спаси́ нас. Е́ва у́бо объя́т плод, сме́рть де́лающ всегуби́тельную,/ посреди́ же Тебе́ возрасте́т Плод, безсме́ртия хода́тайствен,/ Христо́с – сла́дость на́ша, Влады́чице,/ Его́же воспева́юще, Тя сла́вим. Припев: Пресвята́я Богоро́дице, спаси́ нас. Преклони́в Небеса́ Твоя́, к нам сни́ди,/ престо́л уже́ угото́вася Тебе́, Сло́ве, утро́ба Деви́ча:/ на не́мже я́ко Ца́рь крепча́йший сед,/ воздви́гнеши от паде́ния десни́цы Твоея́ созда́ние. Сла́ва Отцу́ и Сы́ну и Свято́му Ду́ху. Ни́ва несе́янная, Чи́стая, подыми́ сло́вом Небе́сное Сло́во,/ я́ко пшени́цу плодоно́сну, прозяба́ющу из Тебе́,/ и концы́ пита́ющаго хле́бом ра́зума,/ Ему́же покланя́ющеся, Тя сла́вим. И ны́не и при́сно и во ве́ки веко́в. Ами́нь. Возжела́ добро́ты Твоея́ Христо́с, Всенепоро́чная, и во утро́бу Твою́ всели́ся,/ я́ко да от страсте́й безобра́зия род челове́ческий изба́вит/ и добро́ту дре́внюю да́рует,/ Ему́же покланя́ющеся, Тя сла́вим. Светилен Гаврии́л, с высоты́ слете́в,/ вопия́ше – е́же ра́дуйся, Богоро́дице, я́ко прама́тернюю кля́тву потреби́в всю,/ су́щих из Ада́ма благослови́ из Нея́ прозябы́й.

Минея, 18 Января, Кано́н свята́го Кири́лла Глас 4 Песнь 1 Ирмос: Мо́ря чермну́ю пучи́ну/ невла́жными стопа́ми/ дре́вний пешеше́ствовав Изра́иль,/ крестообра́зныма Моисе́овыма рука́ма/ Амали́кову си́лу в пусты́ни победи́л есть. Припев: Святи́телю, о́тче Кири́лле, моли́ Бо́га о на́с. От Бо́га светода́тельную благода́ть, Кири́лле, прие́м/ и све́тел свети́льник яви́вся,/ слове́сныя облиста́л еси́ нам лучи́ па́мятию твое́ю,/ я́ко да досто́йно тя воспои́м. Припев: Святи́телю, о́тче Кири́лле, моли́ Бо́га о на́с. Испо́лнился еси́ светоявле́ния, Кири́лле му́дре, Ду́ха,/ я́ко за́поведей Христо́вых храни́тель, страсте́й очище́н,/ Пребоже́ственныя был еси́ вои́стинну Тро́ицы жили́ще. Сла́ва Отцу́ и Сы́ну и Свято́му Ду́ху. Я́ко ре́вности и дерзнове́ния испо́лнен, Кири́лле сла́вне,/ богобо́рцы вся нелжи́во языкобо́лия обличи́л еси́ злочести́вых е́ресей,/ Правосла́вие защища́я. И ны́не и при́сно и во ве́ки веко́в. Ами́нь. Богородичен: Тро́ицы Пребоже́ственныя, Всечи́стая, Еди́наго родила́ еси́,/ из Тебе́ пло́тию я́вльшася по нам благоволе́нием Роди́теля/ и соде́йствием Ду́ха Всесвята́го, Богоневе́сто. Песнь 3 Ирмос: Весели́тся о Тебе́ Це́рковь Твоя́, Христе́, зову́щи:/ Ты моя́ кре́пость, Го́споди,/ и прибе́жище, и утвержде́ние. Припев: Святи́телю, о́тче Кири́лле, моли́ Бо́га о на́с. Укрепля́емь о Христе́, ко́зни лука́ваго зми́я тве́рдым умо́м, Кири́лле,/ я́ко тка́ние паучи́нное, расто́ргнул еси́. Припев: Святи́телю, о́тче Кири́лле, моли́ Бо́га о на́с. Ти́ну страсте́й от души́ оттря́сл еси́, Кири́лле,/ низложи́в вся́кое помысло́в возноше́ние, на Христа́ превознося́щееся. Сла́ва Отцу́ и Сы́ну и Свято́му Ду́ху. Я́ко благополу́чен страда́лец, о́тче,/ уклони́лся еси́ тве́рдо вся́каго плотска́го сладостра́стия,/ я́ко тще́тнаго и наве́тнаго. И ны́не и при́сно и во ве́ки веко́в. Ами́нь. Богородичен: Сло́во О́тчее, предочи́стившиея, о Чи́стая, Ду́хом,/ слове́снаго естества́ на благодея́ния родила́ еси́. Седален, глас 3 Е́ресе́й лесть обличи́л еси́ и Правосла́вную ве́ру уясни́л еси́,/ я́ко Богоглаго́лив и благочести́в,/ пропове́дал еси́ в ми́ре Еди́но Божество́ в Тро́ице сла́вити,/ естество́м Единосу́щное и Ли́цы неслия́нное./ Те́мже и, соше́дшеся, всесла́вне Кири́лле, почита́ем па́мять твою́. Песнь 4 Ирмос: Вознесе́на Тя ви́девши Це́рковь на Кресте́,/ Со́лнце пра́ведное,/ ста в чи́не свое́м,/ досто́йно взыва́ющи:/ сла́ва си́ле Твое́й, Го́споди. Припев: Святи́телю, о́тче Кири́лле, моли́ Бо́га о на́с. Победи́вша стра́сти душетле́нныя/ и по́мыслом удержа́вша пло́ти, Богоно́сне Кири́лле, ви́дев,/ Христо́с Боже́ственный тя Це́ркве председа́теля, о́тче, поста́вил есть. Припев: Святи́телю, о́тче Кири́лле, моли́ Бо́га о на́с. Насле́довав, я́ко сын возлю́блен, оте́ческую Ма́ркову доброде́тель,/ и престо́ла был еси́ прее́мник,/ Боже́ственнаго стопа́м Евангели́ста после́дуя. Сла́ва Отцу́ и Сы́ну и Свято́му Ду́ху. От Христа́ убо, я́ко овча́, упа́слся еси́,/ я́коже па́стырь упа́сл еси́ ста́до, о́тче,/ словесы́ душепита́тельными твои́ми, я́ко тра́вами и цветы́,/ оби́льно напитава́я благода́ти. И ны́не и при́сно и во ве́ки веко́в. Ами́нь. Богородичен: Из не су́щих вся Боже́ственною си́лою Соде́лавый/ ражда́ется из Тебе́, Богома́ти,/ мир озаря́я све́тлыми заря́ми Божества́ и Богозна́ния све́тлостию. Песнь 5 Ирмос: Ты, Го́споди, мой свет,/ в мир прише́л еси́,/ Свет Святы́й, обраща́яй из мра́чна неве́дения/ ве́рою воспева́ющий Тя. Припев: Святи́телю, о́тче Кири́лле, моли́ Бо́га о на́с. Ны́не лице́ Христо́во созерца́яй, ты лице́м к лицу́, о Кири́лле!/ Зерца́лом, вои́стинну разре́шишься, соедини́лся еси́ твои́м жела́нием. Припев: Святи́телю, о́тче Кири́лле, моли́ Бо́га о на́с. Тече́нию, вои́стинну зе́льному, наводня́ющему ре́ки,/ твое́, о Кири́лле! Уподо́бися сло́во,/ злосла́вных отвраща́я ухищре́ния. Припев: Святи́телю, о́тче Кири́лле, моли́ Бо́га о на́с. Ра́вне ме́рзское А́риево разделе́ние, о Кири́лле!/ скве́рное же Саве́ллиево слия́ние/ из глубины́ изве́ргл еси́. Сла́ва Отцу́ и Сы́ну и Свято́му Ду́ху. Словеса́ богатотво́рная, я́ко зла́то, оста́вил еси́, о Кири́лле!/ сокро́вища же, я́коже ка́мения честна́я, твоя́ Це́ркви Христо́ве. И ны́не и при́сно и во ве́ки веко́в. Ами́нь. Богородичен: Тя ору́жие непобеди́мое на враги́ предлага́ем:/ Тя утвержде́ние и наде́жду на́шего спасе́ния, Богоневе́сто, стяжа́хом. Песнь 6 Ирмос: Пожру́ Ти со гла́сом хвале́ния, Го́споди,/ Це́рковь вопие́т Ти,/ от бесо́вския кро́ве очи́щшися/ ра́ди ми́лости от ребр Твои́х/ исте́кшею кро́вию. Припев: Святи́телю, о́тче Кири́лле, моли́ Бо́га о на́с. Клеща́ми Серафи́м проро́ку угль,/ Це́ркви же Христо́ве твои́ми рука́ми подае́ши, священнотаи́нниче,/ е́же Боже́ственнаго огня́ у́глие очище́ния. Припев: Святи́телю, о́тче Кири́лле, моли́ Бо́га о на́с. Единопреде́льныя, я́ко Сампсо́н, иноплеме́нники не потреби́л еси́,/ иноро́дныя же вся иносла́вных уче́ния низложи́л еси́/ и держа́ву правосла́вным дал еси́, Кири́лле. Сла́ва Отцу́ и Сы́ну и Свято́му Ду́ху. Собо́ру Богоизбра́нному я́ве предводи́тельствовав,/ злоче́стие Несто́риево, христобо́рную де́рзость, о́тче, низложи́л еси́,/ ре́вностию дыха́я по и́стинней Богома́тери. И ны́не и при́сно и во ве́ки веко́в. Ами́нь. Богородичен: О, чу́до, всех чуде́с нове́йшее!/ Я́ко Де́ва во утро́бе вся́ческая Содержа́щаго, неискусому́жно заче́нши, не тесновмести́. Песнь 7 Ирмос: В пещи́ Авраа́мстии о́троцы перси́дстей,/ любо́вию благоче́стия па́че,/ не́жели пла́менем, опаля́еми, взыва́ху:/ благослове́н еси́ в хра́ме сла́вы Твоея́, Го́споди. Припев: Святи́телю, о́тче Кири́лле, моли́ Бо́га о на́с. В Сина́йстей горе́ во мрак дре́вле вшед,/ зако́н прия́т, блаже́нне Кири́лле, Моисе́й, убива́ющий пле́менем,/ ты же разгну́л еси́ сокрове́нную добро́ту Ду́ха. Припев: Святи́телю, о́тче Кири́лле, моли́ Бо́га о на́с. Законоположе́ния гада́ньми, я́коже младе́нцем пе́рвее, о́тче,/ да́ннаго покрыва́лу покрове́ния, я́коже ши́пки,/ разуме́ния ты откры́л еси́, сказа́в о́бразы я́вственнейше. Припев: Святи́телю, о́тче Кири́лле, моли́ Бо́га о на́с. Богопропове́дников и Богоприя́тных неудобопости́жныя Кни́ги проро́ков,/благода́тию вдохнове́н, о́ныя насы́щшаго Ду́ха, Кири́лле,/ чи́сте нам изъяви́л еси́. Сла́ва Отцу́ и Сы́ну и Свято́му Ду́ху. Богородичен: Вы́шняго освяще́нное Боже́ственное селе́ние, ра́дуйся,/ Тобо́ю бо даде́ся ра́дость, Богоро́дице, зову́щим:/ благослове́на Ты в жена́х еси́, Всенепоро́чная Влады́чице. И ны́не и при́сно и во ве́ки веко́в. Ами́нь. В несли́тном соедине́нии Боже́ственном/ и несеко́мом я́ве, о́тче, разделе́нии/ Три у́бо Богосло́вствуяй Ипоста́си, рекл еси́, Кири́лле,/ непреме́нный же в существе́ Еди́ном и Божестве́. Песнь 8 Ирмос: Ру́це распросте́р, Дании́л/ льво́в зия́ния в ро́ве затче́;/ о́гненную же си́лу угаси́ша,/ доброде́телию препоя́савшеся,/ благоче́стия рачи́тели о́троцы, взыва́юще:/ благослови́те, вся дела́ Госпо́дня, Го́спода. Припев: Святи́телю, о́тче Кири́лле, моли́ Бо́га о на́с. Я́ко волна́ морска́я вои́стинну, в тебе́ истече́ прему́дрости исто́чник,/ и́бо приснотеку́щия потеко́ша ре́ки из чре́ва твоего́, о́тче,/ уче́ний благочести́вых, я́коже прорече́ Христо́с:/ прехо́дят бо песка́ твоя́ словеса́ Богоглаго́ливая. Припев: Святи́телю, о́тче Кири́лле, моли́ Бо́га о на́с. Па́стырь и учи́тель мудр Це́ркве показа́вся,/ два, Кири́лле, я́ве истолкова́л еси́, преподо́бне, заве́ты,/ я́ко бо анки́ру и оте́ческое насле́дие твоя́ иму́щи словеса́, вопие́т:/ благослови́те, вся дела́ Госпо́дня, Го́спода. Сла́ва Отцу́ и Сы́ну и Свято́му Ду́ху. Сло́ва, Вопло́щшагося нас ра́ди, Всехитреца́,/ ты неизрече́нному науча́еши соедине́нию, Кири́лле,/ неразде́льному, неслия́нному,/ по коему́ждо манове́нию ра́вне уклони́л еси́, вопия́:/ благослови́те, вся дела́ Госпо́дня, Го́спода. И ны́не и при́сно и во ве́ки веко́в. Ами́нь. Богородичен: Без ма́тере Сло́во из Отца́ Сый пе́рвее,/ без отца́ бысть из Тебе́ второ́е, Всечи́стая,/ вопло́щся пре́жде Безпло́тный за благоутро́бие,/ восхоте́в спасти́ пою́щия:/ благослови́те, вся дела́ Госпо́дня, Го́спода. Песнь 9 Ирмос: Е́ва у́бо неду́гом преслуша́ния кля́тву всели́ла есть;/ Ты же, Де́во Богоро́дице,/ прозябе́нием чревоноше́ния/ ми́рови благослове́ние процвела́ еси́./ Тем Тя все велича́ем. Припев: Святи́телю, о́тче Кири́лле, моли́ Бо́га о на́с. Возноше́ние на Христо́в взе́млющееся ра́зум и Сего́ Богома́терь, Кири́лле,/ вся́кое кре́пце низложи́л еси́ Несто́рия безбо́жное,/ сыно́в дво́ицу, та́кожде и слия́ние безгла́вных есте́ств. Припев: Святи́телю, о́тче Кири́лле, моли́ Бо́га о на́с. Си́лою ра́зума и просвеще́нием благода́ти/ Тро́ицу Единосу́щную, Сы́на же, воплоще́ннаго Бо́га, богосло́вил еси́, блаже́нне,/ яви́вся же Богоро́дицы побо́рник,/ в Вы́шних ны́не прославля́ешися. Сла́ва Отцу́ и Сы́ну и Свято́му Ду́ху. Свы́ше нас, певцы́, приснопа́мятне, назира́еши, о́тче, ми́лостивно,/ побе́ды крестоно́сным лю́дем подая́/ и возвыша́я моли́твами твои́ми рог правосла́вных,/ уясня́я же твою́ па́мять велича́ющия. И ны́не и при́сно и во ве́ки веко́в. Ами́нь. Богородичен: Непло́дствующее Боже́ственных доброде́телей, Всечи́стая Богоро́дице,/ се́рдце мое́ покажи́, Де́во, плодоно́сно,/ из непло́дове ро́ждшаяся во́лею вся Претворя́ющаго ма́нием,/ да пою́ Тя, Всепе́тую.

Минея, 8 Апреля, Кано́н, его́же краегране́сие: Апо́столом исплете́м Боже́ственную песнь. Творе́ние Ио́сифово Глас 3 Песнь 1 Ирмос: Во́ды дре́вле/ ма́нием Боже́ственным/ во еди́но со́нмище совокупи́вый/ и раздели́вый мо́ре изра́ильтеским лю́дем,/ сей Бог наш препросла́влен есть,/ Тому́ еди́ному пои́м, я́ко просла́вися. Припев: Святи́и апо́столи, моли́те Бо́га о на́с. Апо́столов святы́х всесвяту́ю согла́сно торжеству́им па́мять/ и ты́я воспои́м весе́лием души́:/ Пресвято́е бо мо́лят Сло́во очище́ние дарова́ти нам и ми́лость. Припев: Святи́и апо́столи, моли́те Бо́га о на́с. Многобо́жнаго неи́стовства согни́тие отгна́вше сло́ва со́лию Боже́ственнаго,/ ду́ши, сла́внии, обуя́вшия дре́вле вся, уздра́висте/ и спасе́ны Зижди́телю всех предста́висте:/ тем и прославля́етеся. Сла́ва Отцу́ и Сы́ну и Свято́му Ду́ху. Сла́вный Иродио́н, Руф, и Фле́гонт, и Ага́в,/ и Асинкри́т, вку́пе и Ерм пе́сньми да ублажа́тся,/ бли́жнии бы́вше Изба́вителя на́шего дру́зи,/ и му́дрии апо́столи,/ и Боже́ственнии пропове́дницы. И ны́не и при́сно и во ве́ки веко́в. Ами́нь. Богородичен: Ми́лостивая Богоро́дице, апо́столов похвало́,/ и страстоте́рпцев сла́ва, и ве́рных утвержде́ние,/ утверди́, молю́ся, претворя́емый наве́ты лестца́ ум мой,/ помраче́нный преступле́ньми. Песнь 3 Ирмос: И́же от не су́щих вся приведы́й,/ сло́вом созида́емая,/ соверша́емая Ду́хом,/ Вседержи́телю Вы́шний,/ в любви́ Твое́й утверди́ мене́. Припев: Святи́и апо́столи, моли́те Бо́га о на́с. Церко́вная бы́вше очеса́,/ мно́гим отверзо́сте о́чи ви́дети добро́ту недомы́сленную,/ Богови́днии ученицы́ Боже́ственнаго Сло́ва. Припев: Святи́и апо́столи, моли́те Бо́га о на́с. Дом Тро́ицы показа́лся еси́ светови́ден, Ру́фе пресла́вне,/ и сло́вом благода́ти тре́бища низве́ргл еси́,/ и созда́л еси́ Го́споду Це́ркви. Сла́ва Отцу́ и Сы́ну и Свято́му Ду́ху. Сло́вом твои́м Боже́ственным обнови́в, Ру́фе му́дре, сердца́,/ насе́яв спаси́тельная уче́ния, и многопло́ден клас спа́сшихся пожа́л еси́ спасе́ние. И ны́не и при́сно и во ве́ки веко́в. Ами́нь. Богородичен: По Существу́ Сый Боже́ственному непристу́пен, Пречи́стая,/ присту́пен мне ны́не бысть/ и пло́ти прия́тием весь соедини́ся кра́йняго ра́ди благоутро́бия. Седален, глас 4 Научи́вшеся от исто́чника прему́дрости,/ умудри́сте пре́жде неразу́мием служа́щия умовре́дно истука́нным, му́дрии./ Те́мже блажи́ми есте́ в век ве́ка, престо́лу предстоя́ще Святы́я Тро́ицы,/ но приле́жно моли́теся обрести́ разреше́ние прегреше́ний на́ших, пресла́внии. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: По Бо́зе во Твой, Богоро́дице, прибега́ю смире́нный покро́в Боже́ственный, припа́дая, молю́ся:/ поми́луй, Пречи́стая, я́ко превзыдо́ша главу́ мою́ греси́,/ и бою́ся, Влады́чице, му́ки, и трепе́щу./ Моле́ние сотвори́, Чи́стая, к Сы́ну Твоему́ от сих изба́вити мя. Песнь 4 Ирмос: Положи́л еси́ к нам тве́рдую любо́вь, Го́споди,/ Единоро́днаго бо Твоего́ Сы́на за ны на смерть дал еси́./ Те́мже Ти зове́м, благодаря́ще:/ сла́ва си́ле Твое́й, Го́споди. Припев: Святи́и апо́столи, моли́те Бо́га о на́с. Врачева́ние ве́рным язы́ком Боже́ственное принося́ще,/ зе́млю нече́стия лука́вную, разоре́нию, му́дрии, преда́сте и созда́сте ду́ши в ве́ре,/ сего́ ра́ди ублажа́етеся. Припев: Святи́и апо́столи, моли́те Бо́га о на́с. В си́лу тобо́ю, Иродио́не блаже́нне, облече́ся град Па́трский преявле́нно:/ пе́рвый бо ты престо́л украси́л еси́,/ Боже́ственными просвеща́емь светоли́тии Свята́го Ду́ха. Сла́ва Отцу́ и Сы́ну и Свято́му Ду́ху. Град Па́трский граждани́ном тобо́ю вели́ким обогати́ся,/ блаже́нне Иродио́не, вои́стинну,/ к Сио́ну вы́шнему приводя́щим сий в пра́вду,/ те́мже почита́ет тя Боже́ственными песнопе́ньми. И ны́не и при́сно и во ве́ки веко́в. Ами́нь. Богородичен: Сло́вом свяще́нным О́тчее Сло́во зачала́ еси́,/ вся́каго безслове́сия челове́ки, Богороди́тельнице Де́во, избавля́юща./ Те́мже словесы́ всегда́ велегла́сно Боже́ственными Тя сла́вим. Песнь 5 Ирмос: На земли́ неви́димый яви́лся еси́/ и челове́ком во́лею сожи́л еси́, Непостижи́мый,/ и, к Тебе́ у́тренююще,/ воспева́ем Тя, Человеколю́бче. Припев: Святи́и апо́столи, моли́те Бо́га о на́с. На зе́млю прише́дша, е́же спасти́ заблу́ждшаго,/ пропове́дасте Сло́во, Боже́ственнии апо́столи,/ и от ле́сти вся челове́ки изба́висте. Припев: Святи́и апо́столи, моли́те Бо́га о на́с. Странноле́пно проро́чествия тебе́ благода́ть/ от Бо́га излия́ся бога́тно, Богому́дре Ага́ве,/ провозглаша́еши бо сказа́ние хотя́щих бы́ти явле́нно. Сла́ва Отцу́ и Сы́ну и Свято́му Ду́ху. Яви́лся еси́ иногда́, прозна́менуя Па́влу/ наве́ты, и у́зы, и озлобле́ния, проро́че Ага́ве,/ егда́ ру́ки твоя́ о́наго по́ясом связа́л еси́. И ны́не и при́сно и во ве́ки веко́в. Ами́нь. Богородичен: Еди́на на земли́ рождество́ име́ла еси́ стра́нно,/ еди́нех нас примиря́ющи еди́ному Пребезнача́льному Отцу́./ Сего́ ра́ди еди́ну Тя, я́ко Ма́терь Бо́га, чтим. Песнь 6 Ирмос: Бе́здна после́дняя грехо́в обы́де мя,/ и исчеза́ет дух мой,/ но простры́й, Влады́ко, высо́кую Твою́ мы́шцу,/ я́ко Петра́, мя, Упра́вителю, спаси́. Припев: Святи́и апо́столи, моли́те Бо́га о на́с. Положи́, свещи́ я́ко светоза́рны, вас Сло́во, вселе́нную просвеща́ющия,/ и тьму реша́щия, Богови́дцы апо́столи,/ и показу́ющия путь спаси́тельный. Припев: Святи́и апо́столи, моли́те Бо́га о на́с. Ме́ртвость пропове́дуя Безсме́ртнаго,/ умерщвле́нных к Животу́ преставля́ше му́дрый Асинкри́т,/ апо́столов похвала́, Ирка́нии же тве́рдое огражде́ние. Сла́ва Отцу́ и Сы́ну и Свято́му Ду́ху. Обре́те тя, Асинкри́те, реку́, вод испо́лнену Ирка́ния Ду́ха,/ и, честны́ми напое́нии твои́ми напои́вшися,/ принесе́ красне́йшая Влады́це прозябе́ния. И ны́не и при́сно и во ве́ки веко́в. Ами́нь. Богородичен: Зако́на Тя образова́ше киво́т,/ прие́мшую зако́на Боже́ственнаго исполне́ние,/ и пло́тию ро́ждшую, и по рождестве́ пребы́вшую Присноде́ву,/ я́ко пре́жде рождества́, Богоневе́сто. Кондак, глас 2 Яви́стеся Христо́вы ученицы́ и апо́столи всечестни́и,/ Иродио́не сла́вне, Ага́ве и Ру́фе,/ Асинкри́те, Фле́гонте со Е́рмом,/ при́сно моли́теся Го́сподеви/ пода́ти нам согреше́ний проще́ние, пою́щим вас. Песнь 7 Ирмос: Пре́жде о́бразу злато́му,/ перси́дскому чти́лищу,/ о́троки не поклони́шася трие́,/ пою́ще посреде́ пе́щи:/ отце́в Бо́же, благослове́н еси́. Припев: Святи́и апо́столи, моли́те Бо́га о на́с. Основа́вше до́бре на ка́мени ве́ры язы́ков исполне́ния,/ ка́мение дре́вле чту́щия всу́е/ просвети́сте я́ве, Богоглаго́ливии. Припев: Святи́и апо́столи, моли́те Бо́га о на́с. Попали́л еси́, Фле́гонте свяще́нне,/ огне́м Боже́ственных слове́с твои́х вся́ко ле́стное те́рние/ и сердца́, окая́нно уга́сшая,/ теплото́ю Ду́ха вжегл еси́ явле́нно. Сла́ва Отцу́ и Сы́ну и Свято́му Ду́ху. Марафо́нстии жи́тели, предста́теля тя велича́йша, и учи́теля изря́дна,/ и свети́льника, и наста́вника иму́ще, Фле́гонте сла́вне,/ почита́ют тя непреста́нно. И ны́не и при́сно и во ве́ки веко́в. Ами́нь. Богородичен: Нов рай нам, жи́зни дре́во, Чи́стая, стяжа́вши, была́ еси́,/ его́же снедь сне́дию умерщвле́нныя оживи́,/ Чи́стая Богороди́тельнице. Песнь 8 Ирмос: Вавило́нская пещь о́троки не опали́,/ ниже́ Божества́ Огнь Де́ву растли́./ Тем со о́троки, ве́рнии, возопие́м:/ благослови́те, дела́ Госпо́дня, Го́спода. Припев: Святи́и апо́столи, моли́те Бо́га о на́с. Да ублажи́тся Ага́в, Фле́гонт и Асинкри́т, Руф и Ерм сла́вный и Иродио́н днесь,/ Сло́ва бы́вше Боже́ственнии апо́столи, и свети́ла ми́ра,/ и язы́ков учи́телие. Припев: Святи́и апо́столи, моли́те Бо́га о на́с. Ерм пресла́вный Далма́тии бысть всея́ наста́вник и просвеще́ние:/ на сию́ бо, я́ко со́лнце многосве́тло, на́йде,/ творя́ ди́вная и просвеща́я сердца́, неви́дящая пе́рвее. Сла́ва Отцу́ и Сы́ну и Свято́му Ду́ху. Сло́во, я́ко свети́льник сия́ющ, Е́рме, нося́, сла́вне,/ су́щия в нощи́ лю́тых седя́щия просвети́л еси́,/ исцеле́ния и зна́мения творя́ вели́ка,/ привле́кл еси́ к ве́ре неве́рных исполне́ние. И ны́не и при́сно и во ве́ки веко́в. Ами́нь. Богородичен: Тя предста́тельство и́мамы, Пречи́стая, раби́ Твои́,/ и к Сы́ну Твоему́ и Бо́гу Хода́таицу непосты́дну,/ от бед ны спаси́ и лю́тых напа́стей,/ да ве́рою и любо́вию при́сно Тя сла́вим. Песнь 9 Ирмос: Купино́ю и огне́м пропи́санную/ в Сина́и законополо́жнику Моисе́ю/ и Бо́жий во чре́ве неопа́льно заче́ншую Огнь,/ всесве́тлую и негаси́мую свещу́,/ су́щую Богоро́дицу пе́сньми, чту́ще, велича́ем. Припев: Святи́и апо́столи, моли́те Бо́га о на́с. Свяще́ннейший лик соста́вим ве́рно,/ единомышле́нием души́ блажа́ще те́пло Е́рма и Иродио́на, Ру́фа, Ага́ва,/ Асинкри́та же вели́каго и Фле́гонта Боже́ственнаго,/ я́ко Сло́ва самови́дцы бы́вшия. Припев: Святи́и апо́столи, моли́те Бо́га о на́с. Я́ко ма́слины та́йныя явле́ни вои́стинну, Богоглаго́ливии,/ на́ша умасти́ша ду́ши и ли́ца благода́тию/ и изба́виша от безбо́жнаго наси́лия и тьмы неразу́мия./ Те́мже и досто́йно ублажа́ются. Припев: Святи́и апо́столи, моли́те Бо́га о на́с. Стена́ний ны мно́гих, и рабо́ты вра́жия,/ и ве́тхаго запина́теля изба́висте, му́дрии Изба́вителевы апо́столи,/ и показа́сте стези́, веду́щия Боже́ственною наде́ждею к Ца́рству Небе́сному. Сла́ва Отцу́ и Сы́ну и Свято́му Ду́ху. Шестосве́тная свеще́ святы́х учени́к,/ моли́ приле́жно Трисо́лнечную Зарю́ просвети́ти ду́ши на́ша,/ всесве́тлую соверша́ющих ва́шу па́мять,/ и изба́вити от тьмы и ве́чнаго осужде́ния. И ны́не и при́сно и во ве́ки веко́в. Ами́нь. Богородичен: Я́коже пламеноно́сная клеща́, прия́ла еси́ во утро́бе угль разу́мный,/ попаля́ющ на́ша стра́сти, и просвеща́ющ ду́ши на́ша,/ и реша́щ тьму идолонеи́стовства, Чи́стая Де́во многопе́тая.

Минея, 20 Ноября, Кано́н преподо́бнаго Григо́рия Глас 8 Песнь 1 Ирмос: Колесницегони́теля фарао́ня погрузи́/ чудотворя́й иногда́/ Моисе́йский жезл, крестообра́зно порази́в/ и раздели́в мо́ре,/ Изра́иля же беглеца́, пешехо́дца, спасе́,/ песнь Бо́гови воспева́юща. Припев: Преподо́бне о́тче Григóрие, моли́ Бо́га о на́с. Умерщвле́нную сластьми́ телесе́, смире́нную мою́ ду́шу/ твои́ми моли́твами оживи́, блаже́нне Григо́рие:/ жизнь бо ны́не прия́л еси́ нестаре́ющуюся,/ умертви́в я́же на земли́ у́ды, преподо́бне, по́стническими по́двиги. Припев: Преподо́бне о́тче Григóрие, моли́ Бо́га о на́с. Удержа́в сла́сти теле́сныя ума́ чистото́ю,/ из млада́го, о́тче, во́зраста орга́н Ду́ха был еси́,/ Того́ де́йства све́тло прие́мля и Богови́ден познава́яся. Сла́ва Отцу́ и Сы́ну и Свято́му Ду́ху. Жела́нием Боже́ственным пло́ти жела́ния увяди́л еси́,/ и тебе́ самому́, блаже́нне, обручи́л еси́ супру́жницу чистоту́,/ из нея́же ча́да тебе́ роди́шася вся доброде́тели, присносла́вне,/ ча́до тя Бо́жие соде́ловающия. И ны́не и при́сно и во ве́ки веко́в. Ами́нь. Богородичен: От земли́ до Небе́с дося́жущи ле́ствица Небе́сная,/ е́юже Бог Сло́во земны́м сни́де,/ Благослове́нная Пречи́стая, несказа́нное чу́до, недомы́сленное виде́ние,/ спаси́ к Тебе́ прибега́ющия. Песнь 3 Ирмос: Небе́снаго кру́га верхотво́рче, Го́споди,/ и Це́ркве Зижди́телю,/ Ты мене́ утверди́ в любви́ Твоей,/ жела́ний кра́ю,/ ве́рных утвержде́ние,/ еди́не Человеколю́бче. Припев: Преподо́бне о́тче Григóрие, моли́ Бо́га о на́с. Доброде́телей на го́ру восте́к, преподо́бне,/ во мрак виде́ния вшел еси́/ и, разуме́в, ели́ко вмести́л еси́ Непости́жнаго естество́м,/ просвеще́ния испо́лнен, о́тче, быв. Припев: Преподо́бне о́тче Григóрие, моли́ Бо́га о на́с. Рожде́нный в верте́пе за земны́х избавле́ние,/ дре́вле тя, в верте́пе, всеблаже́нне, живу́ща,/ све́том озари́ Небе́сным, я́ко Па́вла,/ светоза́рна показу́я тя, о́тче Григо́рие. Сла́ва Отцу́ и Сы́ну и Свято́му Ду́ху. Небе́сная дверь, Христо́ва Пречи́стая Ма́ти,/ прило́ги тя де́монскими окружа́ема, о́тче, впери́/ и мо́щна кре́постию на них соде́ла Ду́ха благода́тию. И ны́не и при́сно и во ве́ки веко́в. Ами́нь. Богородичен: Ра́дуйся, еди́на, ро́ждшая вся́ческих Го́спода,/ ра́дуйся, жизнь челове́ком исхода́таившая,/ ра́дуйся, осене́нная и несеко́мая горо́, ве́рных утвержде́ние,/ ра́дуйся, Всенепоро́чная. Седален, глас 4 Боже́ственною све́тлостию озаря́емь,/ мрак изгна́л еси́ душетле́нных страсте́й, Григо́рие прему́дре,/ взя́тся к безстра́стия чисте́йшей высоте́,/ возсия́л еси́ пресла́вно врачева́ний зари́,/ всели́вся в незаходи́мый свет Ца́рствия Христо́ва. Песнь 4 Ирмос: Ты моя́ кре́пость, Го́споди,/ Ты моя́ и си́ла,/ Ты мой Бог, Ты мое́ ра́дование,/ не оста́вль не́дра О́тча, и на́шу нищету́ посети́в./ Тем с проро́ком Авваку́мом зову́ Ти:/ си́ле Твое́й сла́ва, Человеколю́бче. Припев: Преподо́бне о́тче Григóрие, моли́ Бо́га о на́с. Нас ра́ди стра́нным соше́ствием быв, Григо́рие, стра́нен благосты́нею,/ тебе́ Его́ ра́ди стра́нна ви́дев, от оте́чества бы́вша прия́т/ и Боже́ственна насле́дника Своего́ Ца́рства, доброде́тельми укра́шена, соде́ла. Припев: Преподо́бне о́тче Григóрие, моли́ Бо́га о на́с. За Христа́, нас ра́ди младе́нствовавшаго, и О́трока, преподо́бне, бы́вша,/ отроко́в учи́лищу вдал еси́ тебе́ сама́го, младе́нец зло́бою, Богому́дре о́тче, быв,/ и Боже́ственным смире́нием вра́жию зло́бу смири́л еси́, блаже́нне Григо́рие. Сла́ва Отцу́ и Сы́ну и Свято́му Ду́ху. Ту́чами твои́х слез, о́тче Григо́рие, я́коже росо́ю Боже́ственною, напая́емь,/ вся́ку возрасти́л еси́ доброде́тель, вся́кое благопло́дие пра́вды процве́л еси́,/ я́ко дре́во плодоно́сное, при исхо́дищах вод насажде́н соверше́ннаго по́стничества. И ны́не и при́сно и во ве́ки веко́в. Ами́нь. Богородичен: Ма́ти Бо́жия, Благослове́нная, Всенепоро́чная,/ души́ моея́ я́звы исцели́, сла́сти утоли́ плотски́я,/ омраче́нное се́рдце мое́ просвети́, умири́ ум мой/ и вся́каго вре́да, и вра́жиих мя напа́стей изба́ви. Песнь 5 Ирмос: Вску́ю мя отри́нул еси́/ от лица́ Твоего́, Све́те Незаходи́мый,/ и покры́ла мя есть чужда́я тьма, окая́ннаго,/ но обрати́ мя и к све́ту за́поведей Твои́х/ пути́ моя́ напра́ви, молю́ся. Припев: Преподо́бне о́тче Григóрие, моли́ Бо́га о на́с. Де́ланием словесе́ лоза́ показа́лся еси́ плодоно́сна, преподо́бне,/ доброде́телей зре́лыя и велича́йшия принося́щая гро́зды,/ спасе́ния вино́ духо́вное точа́щия, о́тче,/ и ве́рных сердца́ веселя́щее. Припев: Преподо́бне о́тче Григóрие, моли́ Бо́га о на́с. Сла́вный Рим, о́тче, от восто́ка тя свети́льника незаходи́ма прие́м ве́рою,/ просвети́ся честны́ми твои́ми дарова́нии:/ Христа́ бо име́л еси́ в души́ я́ко свет,/ ви́дящия тя, о́тче, озаря́юща. Сла́ва Отцу́ и Сы́ну и Свято́му Ду́ху. Ползя́щаго зми́я и наблюда́ющаго твою́ пя́ту, Григо́рие,/ бо́дростию Боже́ственною в путе́х жи́зни ходи́ я́ко Бо́жий уго́дник,/ я́ко за́поведей Христо́вых де́латель, умертви́л еси́ си́лою Ду́ха. И ны́не и при́сно и во ве́ки веко́в. Ами́нь. Богородичен: Предста́тельнице ми́ра, Ма́ти Присноде́во, Ты мя окорми́,/ и путево́дстви мя на пра́вый путь,/ и напра́ви к пра́вды стезя́м пра́вым помышле́ние мое́,/ души́ ше́ствия исправля́ющи. Песнь 6 Ирмос: Очи́сти мя, Спа́се,/ мно́га бо беззако́ния моя́,/ и из глубины́ зол возведи́, молю́ся:/ к Тебе́ бо возопи́х, и услы́ши мя,/ Бо́же спасе́ния моего́. Припев: Преподо́бне о́тче Григóрие, моли́ Бо́га о на́с. Ма́нием е́же к Бо́гу обожа́емь, свяще́ннейше,/ виде́нии та́инственными и Боже́ственными осия́нии/ я́ко проро́к Боже́ственный, я́ко Бо́жий уго́дник сподо́бился еси́ Бо́жия благода́ти. Припев: Преподо́бне о́тче Григóрие, моли́ Бо́га о на́с. Молчали́во твою́ жизнь соверши́л еси́, Богодухновенне,/ мяте́жей жите́йских яви́лся еси́ бо́льший, и страсте́й вы́шший,/ и земли́ всея́ стра́нен же и пришле́ц. Сла́ва Отцу́ и Сы́ну и Свято́му Ду́ху. Я́ко зерца́ло чи́стое, Боже́ственною заре́ю обогати́лся еси́,/ я́ко сосу́д свяще́нный, храм украси́л еси́, го́рнюю, Григо́рие,/ и перворо́дных Це́рковь просвети́л еси́. И ны́не и при́сно и во ве́ки веко́в. Ами́нь. Богородичен: Мари́е, чи́стая пала́та Царе́ва,/ бы́вша мя разбо́йником нечи́стый верте́п моли́твами Твои́ми очи́стивши,/ из Тебе́ ро́ждшемуся храм свят покажи́. Кондак, глас 3 Све́тлое тя со́лнце Це́рковь познава́ет,/ доброде́телей красота́ми и исцеле́ний луча́ми/ всех просвеща́я, Христо́в уго́дниче:/ те́мже пра́зднуем честну́ю па́мять твою́/ и почита́ем по́двиги твоя́,/ всеблаже́нне о́тче прему́дре Григо́рие. Песнь 7 Ирмос: Бо́жия снизхожде́ния/ огнь устыде́ся в Вавило́не иногда́;/ сего́ ра́ди о́троцы в пещи́ ра́дованною ного́ю,/ я́ко во цве́тнице, лику́юще, поя́ху:/ благослове́н еси́, Бо́же оте́ц на́ших. Припев: Преподо́бне о́тче Григóрие, моли́ Бо́га о на́с. Слез пролия́ньми греха́ огнь погаси́л еси́,/ безстра́стия же во́ду и врачева́ний чи́стое пи́во песнопою́щим то́чиши, Григо́рие:/ благослове́н Бог оте́ц на́ших. Припев: Преподо́бне о́тче Григóрие, моли́ Бо́га о на́с. Пла́менною колесни́цею, честны́я любве́ соверше́нием носи́мь,/ к высоте́ возше́л еси́,/ в не́йже стяжа́л еси́ твое́, Богому́дре, житие́, зовы́й:/ благослове́н Бог оте́ц на́ших. Сла́ва Отцу́ и Сы́ну и Свято́му Ду́ху. Страсте́й успи́л еси́ треволне́ния бо́дренными стоя́нми:/ усну́в же сном, пра́ведным подо́бно,/ к све́ту преше́л еси́ невече́рнему, зовы́й:/ благослове́н Бог оте́ц на́ших. И ны́не и при́сно и во ве́ки веко́в. Ами́нь. Богородичен: Ме́ртва бы́вша грехо́м и погиба́юща,/ Жизнь ро́ждшая, Чи́стая Де́во,/ оживи́ и спаси́ мя и гее́нны исхити́, пою́щаго:/ благослове́н Бог оте́ц на́ших. Песнь 8 Ирмос: Седмери́цею пещь/ халде́йский мучи́тель/ Богочести́вым неи́стовно разжже́,/ си́лою же лу́чшею спасе́ны, сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки. Припев: Преподо́бне о́тче Григóрие, моли́ Бо́га о на́с. Твои́ми к Бо́гу мольба́ми терпели́вно де́я,/ прия́л еси́, всеблаже́нне, ве́рою проси́мое:/ но́щию бо спя́щу, яви́вся тебе́, А́нгел/ меч пла́менный вдаде́, стра́сти се́рдца отсека́ющ,/ и огне́м тя невеще́ственным очища́ющ, и сла́вою просвеща́ющ неизрече́нно. Припев: Преподо́бне о́тче Григóрие, моли́ Бо́га о на́с. Всесве́тлое я́ко со́лнце,/ разу́мно возсия́л еси́ све́том доброде́телей светоза́рно, Григо́рие,/ чуде́с же сия́ньми озаря́я всю зе́млю и просвеща́я благоче́стно песнопою́щия:/ де́ти, благослови́те,/ свяще́нницы, воспо́йте,/ лю́дие, превозноси́те Христа́ во ве́ки. Сла́ва Отцу́ и Сы́ну и Свято́му Ду́ху. А́нгельскаго песнопе́ния слы́шав, Григо́рие,/ еще́ ходя́ в ме́ртвеннем твое́м телеси́,/ от него́же чу́вствия твоя́ душе́вная я́ве наслади́в,/ и Богови́ден, и светоза́рен позна́лся еси́, зовя́ Влады́це:/ де́ти, благослови́те,/ свяще́нницы, воспо́йте,/ лю́дие, превозноси́те Его́ во ве́ки. И ны́не и при́сно и во ве́ки веко́в. Ами́нь. Богородичен: Судию́ и Го́спода па́че сло́ва ро́ждшая,/ Того́ я́ко Сы́на Твоего́, Всесвята́я, умоли́ в час суда́,/ осужде́ния, и огня́, и тьмы несве́тлыя,/ и скре́жета зубо́в изба́вити ве́рою благоче́стно песнопою́щия:/ свяще́нницы, воспо́йте,/ лю́дие, превозноси́те Его́ во ве́ки. Песнь 9 Ирмос: Устраши́ся всяк слух/ неизрече́нна Бо́жия снизхожде́ния,/ я́ко Вы́шний во́лею сни́де да́же и до пло́ти,/ от Деви́ческаго чре́ва быв Челове́к./ Те́мже Пречи́стую Богоро́дицу, ве́рнии, велича́ем. Припев: Преподо́бне о́тче Григóрие, моли́ Бо́га о на́с. По́ты по́стническими греха́ угаси́л еси́ у́глие/ и с Небесе́ я́ве огня́ в ви́де благода́ть прия́л еси́,/ не попаля́ющую, му́дре, но па́че ороша́ющую/ и кре́постию тя си́льна на стра́сти показу́ющую. Припев: Преподо́бне о́тче Григóрие, моли́ Бо́га о на́с. Я́ко ши́пок, в по́стнических, о́тче, процве́л еси́ удо́лиих, Григо́рие,/ и я́ко крин благово́нный./ Сего́ ра́ди то́чиши ми́ро благово́нное, твоя́ ко́сти оби́льно уха́ют жизнь:/ по́лны бо лани́ты твоя́, я́ко ча́ши, арома́т показа́шася. Припев: Преподо́бне о́тче Григóрие, моли́ Бо́га о на́с. Днесь с на́ми собо́р по́стников и преподо́бных весели́тся, патриа́рхов и проро́ков/ в па́мяти твое́й, блаже́нне, спра́зднуют нам апо́столи и му́ченицы,/ с ни́миже помина́й чту́щих тя ве́рно, досточу́дне. Сла́ва Отцу́ и Сы́ну и Свято́му Ду́ху. Ра́ка, иде́же честно́е и многострада́льное те́ло твое́ лежи́т,/ чуде́с благода́ть нам источа́ет, о́тче Григо́рие,/ освяща́ющи на́ша ду́ши и телеса́,/ обогати́вшихся тобо́ю и предста́теля и те́пла тя засту́пника иму́щих. И ны́не и при́сно и во ве́ки веко́в. Ами́нь. Богородичен: Глас Тебе́ Гаврии́лов, ве́рнии, ра́достно привещава́ем:/ ра́дуйся, раю́, Жи́зни дре́во прозя́бший,/ ра́дуйся, реше́ние кля́твы,/ му́чеников венча́ние, преподо́бных похвало́ и челове́ков благочести́вых утвержде́ние. Светилен Святы́ни храм был еси́, иера́рше,/ по Боже́ственному же прича́стию ны́не благ быва́еши и рая́ граждани́н,/ в не́мже напитава́ешися невозбра́нно дре́ва зна́ния и нетле́нныя сла́вы,/ па́мять творя́, Григо́рие му́дре, о и́же от любве́ ве́рою хва́лящих тя, свяще́нный о́тче.

Минея, 4 Февраля, Канон Глас 4 Песнь 1 Ирмос: Отве́рзу уста́ моя́, и напо́лнятся Ду́ха, и сло́во отры́гну Цари́це Ма́тери, и явлю́ся, све́тло торжеству́я, и воспою́, ра́дуяся, Тоя́ чудеса́. Припев: Святы́й благове́рный кня́же Геóргие, моли́ Бо́га о на́с. Новоявле́н му́ченик, блаже́нне Гео́ргие, вселе́нней напосле́док яви́ся; те́мже ми́ пода́ждь сло́во твое́ Бо́жиею благода́тию, твоя́ по́двиги воспе́ти по достоя́нию. Припев: Святы́й благове́рный кня́же Геóргие, моли́ Бо́га о на́с. Во́инством досточу́дным твоего́ сопротивле́ния побе́дная прия́хом на мучи́теля естеству́: соверше́ние бо посра́млен бы́в, не ктому́ мучи́тельская дерза́ти начина́ет. Сла́ва Отцу́ и Сы́ну и Свято́му Ду́ху. Оде́явся во броня́ испове́данием ве́ры и шле́м возложи́в благода́ти светле́йший, и язы́ком же, Гео́ргие, благовеща́нным, я́коже мече́м, ссече́ окая́ннаго Баты́я. И ны́не и при́сно и во ве́ки веко́в. Ами́нь. Богородичен: Гора́ превысо́кая, ю́же ви́де Дании́л, ка́мень горы́ отсече́ся, кроме́ ру́к му́жеских, Тебе́ прообразова́, Богоро́дице: без му́жа бо на́м пло́тию родила́ еси́ Емману́ила. Песнь 3 Ирмос: Твоя́ песносло́вцы, Богоро́дице, живы́й и незави́стный исто́чниче, ли́к себе́ совоку́пльшия, духо́вно утверди́, в Боже́ственней Твое́й сла́ве венце́в сла́вы сподо́би. Припев: Святы́й благове́рный кня́же Геóргие, моли́ Бо́га о на́с. Му́ками, я́ко зла́то честно́е, искуси́лся еси́, страда́льче сла́вне, и Царе́ви Си́л прине́слся еси́, всепло́дие словеси́ и́стинно вме́сто огня́ олта́рнаго мече́м истне́емо. Припев: Святы́й благове́рный кня́же Геóргие, моли́ Бо́га о на́с. С ва́рваром бра́вся, сего́ победи́л еси́ и, от Христа́ дерзнове́ние прии́м, мно́гу печа́ль бесо́м сотвори́л еси́, святы́м же А́нгелом весе́лие и ра́дость, с ни́ми же водворя́ешися. Сла́ва Отцу́ и Сы́ну и Свято́му Ду́ху. Ма́слина плодови́тая в Це́ркви Жива́го Бо́га, твои́х моще́й ра́ка ны́не яви́ся, от нея́же прие́млем разли́чная неду́гов исцеле́ния, и́же тобо́ю обога́щшиися и чудесы́ твои́ми крася́щиися. И ны́не и при́сно и во ве́ки веко́в. Ами́нь. Богородичен: Рече́ Боже́ственный Иезеки́иль: и бу́дет две́рь затворе́на. И сие́ на Тебе́ испо́лнися, Влады́чице: вни́де бо несказа́нно в Тя́ О́тчее Сло́во, и ми́ру яви́ся Плотоно́сец из Тебе́, Де́во, сохрани́в Тя́ во обои́х. Седален, глас 8 Прему́дрости рачи́тель бы́в, сокро́вище доброде́телей, отону́дуже и почерпе́ Боже́ственная разуме́ния; те́мже и вре́мени прише́дшу, к подвиго́м усе́рдно подви́гся, прие́мля му́ченическия ра́ны: главе́ усече́ние, и кро́ви истече́ние. И ны́не живе́ши в неизрече́нне све́те с му́ченики. Те́мже вопие́м ти́: моли́ Христа́ Бо́га грехо́в оставле́ние дарова́ти покланя́ющимся ве́рою святы́м моще́м твои́м. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Помышля́ю су́д и испыта́ния стра́шная, трепе́щу и ужаса́юся му́к, и огня́ боле́зни, и тьму́ же, и та́ртар. Увы́, что́ сотворю́? Сту́д ка́ко претерплю́, егда́ кни́ги разгну́тся, и дея́ния облича́тся? Сего́ ра́ди припа́даю Ти́, Богоро́дице Пречи́стая, тогда́ предста́ни ми́, ну́жды о́ныя изыма́ющи: Тебе́ бо и́мам прибе́жище, Влады́чице. Песнь 4 Ирмос: Седя́й в сла́ве на Престо́ле Божества́ во о́блаце ле́гце, прии́де Иису́с Пребоже́ственный Нетле́нною Дла́нию и спасе́ зову́щия: сла́ва, Христе́, си́ле Твое́й. Припев: Святы́й благове́рный кня́же Геóргие, моли́ Бо́га о на́с. Наступи́в на ва́рварское стремле́ние и попра́в сего́, му́чениче, росо́ю с Небе́с Боже́ственно обогати́ся, взыва́я Христу́: сла́ва си́ле Твое́й, Го́споди. Припев: Святы́й благове́рный кня́же Геóргие, моли́ Бо́га о на́с. Па́че смы́сла страстоте́рпца Твоего́ любы́ превосхо́дит вся́ помышле́ния, Сло́ве, боре́ния, и му́жественныя по́двиги, и натрижне́ния, я́же по́дал еси́ зако́нно ему́ пострада́ти. Сла́ва Отцу́ и Сы́ну и Свято́му Ду́ху. Я́ко до́бр во́ин, я́ко непобеди́мь му́ченик, я́ко Христо́в храбо́рник и я́ко благоче́стия побо́рник, Небе́сная селе́ния насле́довал еси́, лико́м А́нгельским всегда́ свеселя́ся. И ны́не и при́сно и во ве́ки веко́в. Ами́нь. Богородичен: Изобразова́ше в Чермне́м проше́ствие дре́вле Изра́илево безму́жное Твое́ Рождество́, Всецари́це: я́коже бо о́н тогда́ пре́йде немо́кренно, та́ко и Христо́с безсе́менно от Твои́х пречи́стых крове́й произы́де, Де́во. Песнь 5 Ирмос: Ужасо́шася вся́ческая о Боже́ственней сла́ве Твое́й: Ты́ бо, Неискусобра́чная Де́во, име́ла еси́ во утро́бе над все́ми Бо́га и родила́ еси́ Безле́тнаго Сы́на, все́м воспева́ющим Тя́ ми́р подава́ющая. Припев: Святы́й благове́рный кня́же Геóргие, моли́ Бо́га о на́с. Ра́нам те́ло твое́, вели́кий кня́же Гео́ргие, примеси́ся, и у́зами многообра́зных му́к, ми́ро благово́нно те́м источа́ет на́м, благоуха́ющи ду́ши ве́рою несумне́нною тя́ почита́ющим всегда́. Припев: Святы́й благове́рный кня́же Геóргие, моли́ Бо́га о на́с. Кропле́нием кро́ве твоея́ погаси́л еси́ у́глие суровства́ Баты́ева, страстоте́рпче, Боже́ственных чуде́с огне́м, прему́дре, ти́ну страстну́ю лю́тых пожига́я, вели́кою благода́тию Спа́совою, Гео́ргие. Сла́ва Отцу́ и Сы́ну и Свято́му Ду́ху. Ко́ль стра́шно же и сла́вно о Христе́ сопротивле́ние твое́, Ему́же почуди́шася племена́, обре́тшаяся на по́двизе, и похвали́ша терпе́ние; ва́рвари же посрами́шася, студо́м обле́кшеся. И ны́не и при́сно и во ве́ки веко́в. Ами́нь. Богородичен: Горе́ бя́ше, Соприсносу́щен Отцу́ и Бо́гу Бо́г Сло́во и с на́ми Бо́г и Челове́к, Богоро́дице, Тобо́ю сше́д к на́шему смире́нию, свобожда́я от кля́твы пра́дедния. Тебе́ бо ви́де патриа́рх Иа́ков Ле́ствицу Небе́сную. Песнь 6 Ирмос: Боже́ственное сие́ и всечестно́е соверша́юще пра́зднество, Богому́дрии, Богома́тере, прииди́те, рука́ми воспле́щим, от Нея́ ро́ждшагося Бо́га сла́вим. Припев: Святы́й благове́рный кня́же Геóргие, моли́ Бо́га о на́с. Ника́коже поколеба́ столпа́ благоче́стия свире́пство ва́рварское, ниже́ преще́ние Баты́ево, ниже́ ме́чное усече́ние, ни ра́ны, ни сме́рть ну́жнейшая. Припев: Святы́й благове́рный кня́же Геóргие, моли́ Бо́га о на́с. Взыгра́шася све́тло му́ченичестии тогда́ ли́кове, ви́девше твое́ дерзнове́ние, и, прини́кше совоку́пленно со А́нгелы, неви́димо укрепля́ху тя́ в по́двизе. Сла́ва Отцу́ и Сы́ну и Свято́му Ду́ху. Теле́с стра́сти неисце́льныя Бо́жиею благода́тию исцели́л еси́, вели́кий кня́же Гео́ргие, ми́ро благоуха́ющее источа́я у́бо твои́м честны́м моще́м прикаса́ющимся. И ны́не и при́сно и во ве́ки веко́в. Ами́нь. Богородичен: Обра́зне руно́ Гедео́н прия́т ороше́но, Твое́ предвозвеща́я чу́до: сни́де бо, я́ко до́ждь на руно́, Богоро́дице, Еди́ный от Тро́ицы во утро́бу Твою́, воплоща́емь. Кондак, глас 8 Христо́ве сме́рти подо́бяся и Того́ испи́ти ча́шу возжеле́в, я́ко Живота́, за Него́же му́жески подвиза́лся еси́, презре́в земно́е ца́рство, от безбо́жных ва́рвар пострада́в до сме́рти, Гео́ргие Богому́дре. Те́м моли́, спасти́ся ве́рным лю́дем моли́твами твои́ми. Икос Кто́ изглаго́лет си́лы Госпо́дня? или́ кто́ испове́сть страда́ния твоя́ и доброде́тели, му́чениче? или́ ки́й язы́к воспе́ти возмо́жет по досто́инству? Те́мже и а́з, недосто́йный, покуша́юся хвали́ти же и сла́вити Влады́ку Жизнода́вца, да́вшаго тебе́ на ва́рвары де́рзость, злочести́ваго Баты́я не убоя́тися, испове́дающу тебе́ и́стиннаго Бо́га. Сего́ ра́ди тя́ чти́м ве́рою и любо́вию, страстоте́рпче Гео́ргие, те́м моли́ спасти́ся ве́рным лю́дем моли́твами твои́ми. Песнь 7 Ирмос: Не послужи́ша тва́ри Богому́дрии, па́че Созда́вшаго, но, о́гненное преще́ние му́жески попра́вше, ра́довахуся, пою́ще: препе́тый отце́в Госпо́дь и Бо́г, благослове́н еси́. Припев: Святы́й благове́рный кня́же Геóргие, моли́ Бо́га о на́с. На ка́мени Боже́ственнаго ра́зума утверди́в се́рдца своего́ стопы́, сла́вне, враго́в же ухищре́ния не преврати́ша тя́, воспева́юща: оте́ц на́ших Бо́же, благослове́н еси́. Припев: Святы́й благове́рный кня́же Геóргие, моли́ Бо́га о на́с. Све́т Невече́рний страда́вшу кро́вию возсия́ тебе́, и весе́лие я́ве тебе́ прия́т, великому́чениче, воспева́юща: оте́ц на́ших Бо́же, благослове́н еси́. Сла́ва Отцу́ и Сы́ну и Свято́му Ду́ху. И́стинен му́ченик, и́стиннаго Христа́ Бо́га на́шего страда́лец взыва́ше: муче́ния бо цве́ты благово́ния вменя́ю и кро́вныя струи́ ба́нею креще́ния. И ны́не и при́сно и во ве́ки веко́в. Ами́нь. Богородичен: Ри́торствующий язы́к, безгла́сен же и недви́жим о Тебе́ зри́м, Богора́дованная: не и́мать бо пости́гнути непостижи́маго зача́тия неизрече́нное Рожде́ние. Песнь 8 Ирмос: О́троки благочести́вый в пещи́ Рождество́ Богоро́дичо спасло́ е́сть, тогда́ у́бо образу́емое, ны́не же де́йствуемое, вселе́нную всю́ воздвиза́ет пе́ти Тебе́: Го́спода по́йте дела́ и превозноси́те Его́ во вся́ ве́ки. Припев: Святы́й благове́рный кня́же Геóргие, моли́ Бо́га о на́с. Ублажи́ша тя́ ца́рие, благослови́ша святи́телие, слы́шаще твое́ му́жественное терпе́ние и ко Христу́ хода́тая стяжа́вше тя́, и ны́не, приходя́ще честны́м твои́м моще́м, покланя́ются. Припев: Святы́й благове́рный кня́же Геóргие, моли́ Бо́га о на́с. Боже́ственный Гео́ргий источа́ет ми́ро благода́ти, повелева́я ве́рным почерпа́ти на просвеще́ние и чистоту́, взыва́я: Го́спода по́йте дела́ и превозноси́те Его́ во ве́ки. Сла́ва Отцу́ и Сы́ну и Свято́му Ду́ху. Хваля́ся я́звами Христо́выми, к ве́чным оби́телем восте́кл еси́, от кро́ве твоея́ обагри́в пло́ть, и све́тло Царе́ви Си́л предстои́ши, с му́ченики лику́я. И ны́не и при́сно и во ве́ки веко́в. Ами́нь. Богородичен: Исáии у́гль дре́вле бы́сть, клеща́ми носи́м от Серафи́ма и, каса́яся тому́, грехи́ оставля́ет. Клеща́ же Ты́ еси́, Де́во, Боже́ственный у́гль носи́вшая во оставле́ние грехо́в челове́честву. Песнь 9 Ирмос: Вся́к земноро́дный да взыгра́ется, Ду́хом просвеща́емь, да торжеству́ет же Безпло́тных умо́в естество́, почита́ющее свяще́нное торжество́ Богома́тере, и да вопие́т: ра́дуйся, Всеблаже́нная Богоро́дице, Чи́стая Присноде́во. Припев: Святы́й благове́рный кня́же Геóргие, моли́ Бо́га о на́с. Во́ин и́стинный Христо́ва пропове́дания бы́л еси́, Гео́ргие, и ле́сти потреби́тель безбо́жия. Те́мже и ны́не моли́твами твои́ми потреби́ ва́рварское воста́ние, во́инству на́шему под но́зе сла́вне те́х низложи́. Припев: Святы́й благове́рный кня́же Геóргие, моли́ Бо́га о на́с. А́ще и отсе́чена бы́сть глава́ твоя́ и кро́вь излия́ся, но прильпе́ ве́рно, и победи́тельная тобо́ю соверши́шася. Те́мже и на на́с востаю́щих си́лою твое́ю посрами́ и яви́ на́с победи́тели. Сла́ва Отцу́ и Сы́ну и Свято́му Ду́ху. Лу́к сокруши́ нечести́вых, страстоте́рпче непобеди́ме, непра́ведно дви́жимый на твое́ достоя́ние, е́же себе́ избра́л еси́, возлюби́в, и во́инству на́шему си́лу утверди́, да и мы́ ти́хо препрово́дим жи́тельство. И ны́не и при́сно и во ве́ки веко́в. Ами́нь. Богородичен: Его́же проро́цы провозвести́ша вси́ многообра́зне и вопло́щшася на́с ра́ди от Тебе́ ви́дехом, Богоро́дице, Бо́га и Челове́ка соверше́нна, избавля́юща челове́ки от кля́твы пра́дедния Твои́ми моли́твами и ве́чныя муки́ свобожда́юща. Светилен Све́ту Невече́рнему предстоя́, страстоте́рпче, с му́ченическими ли́ки, воспева́ющия тя́ в па́мяти твое́й от искуше́ния спаса́й моли́твами твои́ми. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Незаходи́маго Све́та носи́ло, Присноде́во, просве́щшаго седя́щих во тьме́ неве́дения пре́лести, озари́ и на́м, гре́шным, све́т Сы́на Твоего́.

Минея, 24 Июля, Ин кано́н святы́м Глас 8 Песнь 1 Ирмос: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:/ Изба́вителю и Бо́гу на́шему пои́м. Припев: Святи́и благовéрнии кня́зие Бори́се и Глéбе, моли́те Бо́га о на́с. Даждь ми отпу́ст мно́гих прегреше́ний мои́х, Спа́се, прему́дрость мне подая́,/ я́ко да пе́сньми похвалю́ Тя, просла́вльшаго святы́я Твоя́. Припев: Святи́и благовéрнии кня́зие Бори́се и Глéбе, моли́те Бо́га о на́с. Воспое́м песнь, благочести́вии, просла́вленных целому́дренным смы́слом,/ Рома́на сла́внаго и Дави́да благочести́ваго ку́пно сла́вяще. Сла́ва Отцу́ и Сы́ну и Свято́му Ду́ху. Дар благода́рства от Бо́га прия́ша о́ба,/ благоро́дство душе́вное возлюби́вше па́че,/ целому́дрием и доброде́телию удобря́ющеся. И ны́не и при́сно и во ве́ки веко́в. Ами́нь. Богородичен: Избра́нную от родо́в всех досто́йно похва́лим, ве́рнии, Де́ву,/ вои́стинну па́че сло́ва Бо́га Сло́ва пло́тию ро́ждшую. Песнь 3 Ирмос: Ты еси́ утвержде́ние/ притека́ющих к Тебе́, Го́споди,/ Ты еси́ Свет омраче́нных,/ и пое́т Тя дух мой. Припев: Святи́и благовéрнии кня́зие Бори́се и Глéбе, моли́те Бо́га о на́с. Все помышле́ние к Бо́гу, му́дрии, иму́ще,/ бра́тнею любо́вию совоку́пльшеся, благоче́стно пожи́сте. Припев: Святи́и благовéрнии кня́зие Бори́се и Глéбе, моли́те Бо́га о на́с. Ве́щи возненави́десте тле́нныя и мимотеку́щия/ и доброде́тели яви́стеся сосу́ди, сла́внии, от ю́ности. Сла́ва Отцу́ и Сы́ну и Свято́му Ду́ху. Мла́ди у́бо те́лом, душа́ми же ку́пно свя́ти, я́ко благочести́ви,/ тем и и́скренно Бо́га возлюби́сте. И ны́не и при́сно и во ве́ки веко́в. Ами́нь. Богородичен: Еди́на Ты породила́ еси́ несказа́нно нетле́нная,/ тле́ния вои́стинну Потреби́теля и мир спасла́ еси́. Седален, глас 1 Измла́да Христа́ возлюби́вше ку́пно, бра́тия честна́я,/ жизнь безстра́стную стяжа́вше, сла́внии, целому́дрие изво́листе/ и поще́ние от страсте́й душе́вных и теле́сных,/ поспеше́ние Бо́жиею благода́тию прие́мше, исцеля́ете вас пою́щия. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Безневе́стная, Чи́стая Богоро́дице Де́во,/ еди́на ве́рных Предста́тельнице и покро́ве,/ бед, и скорбе́й, и лю́тых обстоя́ний всех изба́ви,/ на Тя упова́ние, Отрокови́це, иму́щих,/ и ду́ши на́ша спаси́ Боже́ственными моли́твами Твои́ми. Песнь 4 Ирмос: Ты моя́ кре́пость, Го́споди,/ Ты моя́ и си́ла,/ Ты мои́ Бог, Ты мое́ ра́дование,/ не оста́вль не́дра О́тча/ и на́шу нищету́ посети́в./ Тем с проро́ком Авваку́мом зову́ Ти:/ си́ле Твое́й сла́ва, Человеколю́бче. Припев: Святи́и благовéрнии кня́зие Бори́се и Глéбе, моли́те Бо́га о на́с. Ю́ношески подви́гшеся, Богоблаже́ннии, во́зрастом цве́та и ю́ностию,/ о сласте́х любве́ плотски́я попече́ния не име́сте отню́д, Боже́ственныя кни́ги почита́юще,/ тем и просве́щшеся за́поведьми Боже́ственными, те́мнаго погуби́сте кня́зя. Припев: Святи́и благовéрнии кня́зие Бори́се и Глéбе, моли́те Бо́га о на́с. Всемы́сленно оте́ческим после́дуя, я́ко мудр, стопа́м, блаже́нне,/ сревни́теля име́л еси́ до́брым, Рома́не Богому́дре, Дави́да, вои́стинну приснопа́мятнаго:/ бра́тия у́бо вку́пе, благоче́стно совоку́плени душа́ми и те́лом, яви́стеся. Сла́ва Отцу́ и Сы́ну и Свято́му Ду́ху. Зако́ны Бо́жия от души́ возлюби́вше, прозря́ще жизнь гряду́щую,/ смысл простира́юще, святи́и, честь земну́ю и власть возненави́десте/ и нетле́нное ца́рство и сла́ву умному́дрии измени́сте. И ны́не и при́сно и во ве́ки веко́в. Ами́нь. Богородичен: Глаго́лом Твои́м после́дующе, Непоро́чная,/ Блаже́нну Тебе́ имену́ем, христиа́нстии вси ро́ди,/ я́ко Бо́га ро́ждшую вои́стинну, а не мечта́нием,/ соверше́нна обои́ми, Божества́ естество́м и зако́ном челове́чества. Песнь 5 Ирмос: Вску́ю мя отри́нул еси́/ от лица́ Твоего́, Све́те Незаходи́мый,/ и покры́ла мя есть чужда́я тьма, окая́ннаго,/ но обрати́ мя и к све́ту за́поведей Твои́х/ пути́ моя́ напра́ви, молю́ся. Припев: Святи́и благовéрнии кня́зие Бори́се и Глéбе, моли́те Бо́га о на́с. Я́ко отца́ благочести́ва ча́да, любо́вию свя́зана и того́ лю́бяще,/ благоче́стия све́тлостию в Росси́и возсия́вше, бра́тия же па́че возлю́бленнии./ Сего́ ра́ди зави́стными стрела́ми искуше́ни бы́сте. Припев: Святи́и благовéрнии кня́зие Бори́се и Глéбе, моли́те Бо́га о на́с. Разгне́вася братоуби́йца, я́ко Ка́ин пре́жде, Святопо́лк окая́нный,/ явя́ся же законопресту́пник и к за́висти уби́йство приплете́, сла́стию прельсти́вся властолю́бия./ Те́мже отмще́ния пра́веднаго не убеже́. Сла́ва Отцу́ и Сы́ну и Свято́му Ду́ху. От кро́ве своея́ препру́ду нося́ще, пресла́внии,/ и Крест за ски́петр в десну́ю ру́ку ны́не иму́ще,/ сца́рствовати Христу́ сподо́бишася Рома́н и Дави́д,/ во́ини Христо́вы непобеди́мии. И ны́не и при́сно и во ве́ки веко́в. Ами́нь. Богородичен: Вы́шшу Тя всех и святе́йшу чино́в прославля́ем Небе́сных,/ я́ко до́льная с Го́рними совокупи́вшу,/ но, о Ма́ти Бо́жия,/ певцы́ Твоя́ посеща́ющи, пога́ных уставля́й шата́ния. Песнь 6 Ирмос: Очи́сти мя, Спа́се,/ мно́га бо беззако́ния моя́,/ и из глубины́ зол возведи́, молю́ся:/ к Тебе́ бо возопи́х, и услы́ши мя,/ Бо́же спасе́ния моего́. Припев: Святи́и благовéрнии кня́зие Бори́се и Глéбе, моли́те Бо́га о на́с. Но́щи и тьмы сы́нове нареко́шася проти́внии,/ в нощи́ тя, к Бо́гу пе́ние принося́ща, ко́пии сбодо́ша,/ хода́таи твоему́ венцу́, Рома́не, Боже́ственному бы́вше. Припев: Святи́и благовéрнии кня́зие Бори́се и Глéбе, моли́те Бо́га о на́с. Я́ко вои́стинну сый подо́бник Бо́га вопло́щшагося,/ за убива́ющия тя те́пле моли́лся еси́, свя́те,/ я́ко вторы́й му́ченик Христо́в вели́кий Стефа́н,/ сего́ ра́ди и с ним просла́вился еси́. Сла́ва Отцу́ и Сы́ну и Свято́му Ду́ху. Ю́ношески хра́брствовавше, му́жески победи́ша лю́таго ратобо́рца/ свяще́нный Рома́н ку́пно с Дави́дом, де́лом и сло́вом победи́тели показа́шася/ и побе́дный вене́ц от Бо́га прия́ша сла́внии. И ны́не и при́сно и во ве́ки веко́в. Ами́нь. Богородичен: Уясня́ют проро́честии гла́си Бо́жию Роди́тельницу,/ пое́м же Тя и мы, ви́дяще сбытие́ честны́х прорица́ний,/ де́вства вои́стинну и чистоты́ вмести́лище. Кондак, глас 3 Возсия́ днесь пресла́вная па́мять ва́ша,/ благоро́днии страстоте́рпцы Христо́вы, Рома́не и Дави́де,/ созыва́ющи нас к похвале́нию Христа́ Бо́га на́шего./ Тем, притека́юще к ра́це моще́й ва́ших,/ исцеле́ния дар прие́млем моли́твами ва́шими, святи́и:/ вы бо боже́ственнии вра́чеве есте́. Икос Разу́мное житие́ соверша́я, преблаже́нне,/ ца́рским венце́м от ю́ности укра́шен, всебога́тый Рома́не,/ власть ве́лия был еси́ твоему́ оте́честву, во всей земли́ Росси́йстей./ Тем, ви́дя твой успе́х, Христо́с Бог судо́м Свои́м на муче́ние тя призва́,/ кре́пость тебе́ пода́в с Небесе́, да победи́ши врага́ му́жески/ с Дави́дом, бра́том твои́м, пострада́вшим с тобо́ю:/ вы бо Боже́ственнии вра́чеве есте́. Песнь 7 Ирмос: От Иуде́и доше́дше, о́троцы/ в Вавило́не иногда́/ ве́рою Тро́ическою пла́мень пе́щныи́ попра́ша, пою́ще:/ отце́в Бо́же, благослове́н еси́. Припев: Святи́и благовéрнии кня́зие Бори́се и Глéбе, моли́те Бо́га о на́с. Пресла́вно просла́ви Боже́ственная благода́ть вас, прехва́льнии,/ я́ко сою́з вои́стинну братолю́бия и благоче́стия, и све́тло научи́ вопи́ти:/ благослове́н Бог оте́ц на́ших. Припев: Святи́и благовéрнии кня́зие Бори́се и Глéбе, моли́те Бо́га о на́с. О му́жества страстоте́рпец!/ О, чистоты́ кре́пости!/ О, ра́зума непрекло́нна!/ я́ко уязвля́еми вельми́ и закала́еми неми́лостивно/ яви́стеся страстоно́сцы вели́цыи, Рома́не и Дави́де./ И́хже восхва́лим, ве́рнии, вопию́ще:/ благослове́н Бо́г оте́ц на́ших. Сла́ва Отцу́ и Сы́ну и Свято́му Ду́ху. Пострада́ти Христа́ ра́ди изво́листе и сего́ ра́ди возме́здие от Бо́га обрето́сте,/ стра́сти и неду́ги от земны́х отгоня́ти, хва́лящих и вопию́щих:/ благослове́н Бог оте́ц на́ших. И ны́не и при́сно и во ве́ки веко́в. Ами́нь. Богородичен: Ка́пля Богото́чная, И́же от Тебе́ ро́ждшися,/ мир освяти́вша, Богоро́дице Де́во,/ ка́плю ми́лости ми источи́, освяща́ющу ду́ши и помышле́ния земны́х. Песнь 8 Ирмос: Седмери́цею пещь/ халде́йский мучи́тель/ Богочести́вым неи́стовно разжже́,/ си́лою же лу́чшею спасе́ны, сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки. Припев: Святи́и благовéрнии кня́зие Бори́се и Глéбе, моли́те Бо́га о на́с. Не дово́льни бы́вше о уби́йстве окая́ннии,/ но и телеса́ ва́ша небрего́ма пове́ргше, не устыде́шася благоро́дия,/ но благода́ть Бо́жия храня́ше я хране́нием А́нгелов,/ с ни́миже лику́ете во ве́ки. Припев: Святи́и благовéрнии кня́зие Бори́се и Глéбе, моли́те Бо́га о на́с. Челове́цы, и́же тогда́ в гора́х ло́ва и́щуще,/ ви́деша свет, от твоего́ телесе́ сия́ющ, Богодохнове́нне Дави́де,/ что виде́ние? – друг дру́гу глаго́лаху./ Ви́девше же чу́до, пропове́даша всем, Христа́ хва́ляще, тебе́ сохра́ньшаго. Сла́ва Отцу́ и Сы́ну и Свято́му Ду́ху. Пресвята́я ва́ша па́мять, освяща́ющая мир, наста́ ны́не, прехва́льнии страстоно́сцы,/ в ню́же мо́лим получи́ти ва́ше заступле́ние, Рома́не и Дави́де,/ Христа́ пою́щим во ве́ки. И ны́не и при́сно и во ве́ки веко́в. Ами́нь. Богородичен: Све́та сосу́д, Чи́стая, бы́вши, просвети́ мя,/ в повеле́ниих Све́та ходи́ти ми поспеши́, Всечи́стая,/ от чре́ва Твоего́ возсия́вшаго и просвети́вша ве́рных сердца́,/ Его́же превозно́сим во ве́ки. Песнь 9 Ирмос: Ужасе́ся о сем Не́бо,/ и земли́ удиви́шася концы́,/ я́ко Бог яви́ся челове́ком пло́тски/ и чре́во Твое́ бысть простра́инейшее Небе́с./ Тем Тя, Богоро́дицу,/ А́нгелов и челове́к чинонача́лия велича́ют. Припев: Святи́и благовéрнии кня́зие Бори́се и Глéбе, моли́те Бо́га о на́с. А́ще и на земли́ положе́ни бы́сте я́ко ме́ртви, –/ но на Небесе́х прославля́етеся с рабы́ Бо́жиими./ Тем дерзнове́ния от Него́ сподо́бльшеся, сла́внии,/ нечи́стаго, верху́ стоя́ща над гро́бом ва́шим,/ стра́хом о́гненным отгна́сте, блаже́ннии. Припев: Святи́и благовéрнии кня́зие Бори́се и Глéбе, моли́те Бо́га о на́с. Здра́вы творите́ боля́щия благочести́выя и хромы́м тече́ние подае́те,/ и послушеству́ет здрав бы́вый у ва́шея ра́ки, о дво́ице преди́вная!/ Тем и нам всем помо́щницы поспе́шни быва́ете свы́ше,/ уставля́юще боле́зни и пога́ных шата́ния. Сла́ва Отцу́ и Сы́ну и Свято́му Ду́ху. Боже́ственная и светоза́рная вои́стинну верста́/ Рома́не и Дави́де, добропобе́днии страстоно́сцы,/ на Небеси́ ны́не Тро́ице Вседержа́вней предстоите́,/ избавле́ния прося́ще прегреше́ний лю́тых/ ве́рно на земли́ па́мять ва́шу торжеству́ющим. И ны́не и при́сно и во ве́ки веко́в. Ами́нь. Богородичен: О, чудесе́, пребо́льша ума́, чу́до ве́лие вои́стинну и пресла́вно!/ Ка́ко вмести́ся во утро́бу Твою́ Бог, ника́коже вмести́мый?/ Его́же за хва́лящия Тя благочести́вно моли́, Де́во, от бед избавля́ти/ и от беззако́нных язы́к всегда́. Светилен Я́ко вои́стинну пресве́тлии свети́льницы,/ всю вселе́нную просвети́сте ве́рою, Богоприя́тне Рома́не с Дави́дом./ Тем пе́сньми воспое́м возвели́чившаго вас Христа́ Бо́га на́шего. Сла́ва Отцу́ и Сы́ну и Свято́му Ду́ху. Сия́ет днесь страстоте́рпец па́мять, я́ко заря́,/ лик А́нгельский торжеству́ет,/ род челове́ческий пра́зднует./ Те́мже моли́те Христа́ поми́ловати ду́ши на́ша. И ны́не и при́сно и во ве́ки веко́в. Ами́нь. Богородичен: Богоро́дицу пе́сньми немо́лчными благоче́стно пое́м, вопию́ще:/ ра́дуйся, горо́ свята́я, ра́дуйся, престо́ле огнено́сный всех Царя́,/ ра́дуйся, А́нгелов ра́досте и му́чеников сла́во.

Глас 1 Пе́снь 1. Ирмо́с: Пе́снь побе́дную пои́м вси́ Бо́гу, сотво́ршему ди́вная чудеса́ мы́шцею высо́кою и спа́сшему Изра́иля, я́ко просла́вися. Припев: Преподо́бне о́тче Афана́сие, моли́ Бо́га о на́с. Бре́нными усты́ пе́ти сугу́бое твое́ успе́ние хотя́ща мя́ ны́не, о́тче, не пре́зри, но уще́дри, молю́тися, зовы́й ны́не в де́нь торжества́ твоего́, в о́ньже па́мять твоя́ просла́вися. Сме́ртною секи́рою посека́емь, в ми́ре се́м живо́т челове́ческий разуме́в, преподо́бне, да сокруши́ши ту́ собо́ю, к тве́рдому Ка́мени прите́кл еси́, и притупи́в доброде́тельми сме́ртныя прило́ги, пое́ши Бо́гу, я́ко просла́вися. У́мер пе́рвее ми́ру отверже́нием того́ многостра́стных ловле́ний, стопы́ ше́ствий твои́х упра́вил еси́, свя́те, к Животу́ непозы́блемому: те́мже ны́не, сы́н Живота́ су́щи, при́зри на ны́, пою́щия в па́мяти твое́й Бо́гу, я́ко просла́вися. Богоро́дичен: Умерщвле́нную мою́ ду́шу самохо́тными страстьми́, оживотвори́ти потщи́ся, Чи́стая Де́во: Ты́ бо еси́ Ма́ти Живота́ и подае́ши уме́ршим воста́ние. Пе́снь 3. Ирмо́с: Ка́мень, его́же небрего́ша зи́ждущии, се́й бы́сть во главу́ у́гла: то́й е́сть Ка́мень, на не́мже утверди́ Це́рковь Христо́с, ю́же от язы́к искупи́. Связа́лся еси́, преблаже́нне, Богоуго́днаго жития́ ве́рвию, сме́рть у́бо плени́ся, не иму́щи на тебе́ вла́сти: а́ще бо и похи́ти тя́, но па́ки возврати́ти повеле́л е́сть мно́гим в по́льзу, И́же сме́ртию Свое́ю все́х от сме́рти искупи́. Ме́ртв свя́зан лежа́л еси́, о́тче, ма́нтии укро́ем на одре́, и Вы́шняго Про́мысл чудотвори́ти тща́шеся тобо́ю: по двою́ бо дню́ возврати́ ду́шу твою́, и жи́в обре́лся еси́ во удивле́ние все́м зря́щим, и́же ви́дяху твое́ успе́ние. Боле́знь твоя́ не бя́ше, преподо́бне, к сме́рти, но к сла́ве Бо́жией: у́мерл бо, сме́рть, а́ки со́н, прия́л еси́ во отра́ду боле́зни твоея́, и по двою́ дню́, а́ки от сна́, воспряну́в, лице́ твое́ умыва́л еси́ струя́ми сле́зными. Богоро́дичен: Боле́знь сме́ртную пресе́кшая Святы́м Рождество́м Твои́м и Живо́т да́вшая всему́ ми́ру, а́з еди́н оста́х, умерщвле́н скве́рными де́лы, Ма́ти Бо́жия, возложи́ на мя́ ру́ку, и живо́т лу́чший обря́щу. Седа́лен, гла́с 8: На безсме́ртие взира́я, да сме́рти ве́чныя избе́гнеши, живо́т те́сный избра́л еси́, Афана́сие преблаже́нне, во умерщвле́нном ти́ телеси́. Сего́ ра́ди, удивля́ющеся ди́вному на тебе́ смотре́нию, сла́вим Еди́наго Человеколю́бца, И́же даде́ все́м живо́т и нетле́ние. Богоро́дичен: Сме́ртной повину́вшихся рабо́те свободи́ла еси́ Рождество́м Твои́м, Богоневе́сто Де́во, те́м Тя́ пе́сньми сла́вят христиа́нстии ро́ди, я́ко дала́ еси́ и́м живо́т и нетле́ние. Пе́снь 4. Ирмо́с: Взя́тся со́лнце, и луна́ ста́ в чи́не свое́м, возне́слся еси́, Долготерпели́ве, на Дре́во и водрузи́л еси́ на не́м Це́рковь Твою́. Лежа́ безду́шен, воздви́глся еси́, и дыха́ние прие́мь, па́ки на бытие́ прише́л еси́, о́тче, е́же ви́девше, предстоя́щии со стра́хом славосло́виша Бо́жию си́лу. Ко́ль стра́шен ча́с сме́рти и Суда́, ви́дев, блаже́нне, го́рце рыда́я, молча́нием и воздыха́нием изъяви́л еси́, и бы́ша сле́зы твоя́ мно́гим написа́ние Суда́ Стра́шнаго. При́сно исхо́д сво́й помина́я, свя́те, пла́кал еси́ в жи́зни се́й боле́зненной, и бо́льшая прибыва́ху ти́ рыда́ния, чу́вственне ви́девшу, како́в отходя́щии и́мут стра́х и тре́пет, его́же да убежи́м и мы́, моли́ся, о́тче преподо́бне. Богоро́дичен: Суда́ Стра́шнаго не бою́ся, ни страшу́ся го́рькия гее́нны, я́ко от мно́гих страсте́й окамене́ мое́ се́рдце. Се́чивом благоутро́бия Твоего́, Чи́стая Де́во Ма́ти, порази́ е́, да очувстви́тся па́мятию му́к стра́шных. Пе́снь 5. Ирмо́с: Тво́й ми́р да́ждь на́м, Сы́не Бо́жий: ино́го бо, ра́зве Тебе́, Бо́га не зна́ем, и́мя Твое́ имену́ем, я́ко Бо́г живы́х и ме́ртвых еси́. Тво́й пла́ч и неуте́шное рыда́ние предстоя́щии ви́девше, ужа́сни прося́ху, да ска́жеши и́м сло́во на по́льзу. Ты́ же три́ поле́зная сказа́л еси́ и́м: да храня́т послуша́ние, покая́ние и моли́тву, я́ко бо́льшия доброде́телей ине́х, в ни́хже и мы́ да утверди́мся, моли́ся, о́тче Афана́сие. Са́м послушли́в сы́й за́поведем Христо́вым, послуша́ние вы́ше все́х доброде́телей бы́ти бра́тии сказа́л еси́, преподо́бне, то́ бо и по сме́рти не умира́ет, но снабдева́ет живо́т с Бо́гом, И́же е́сть стра́шен Судия́ живы́м и ме́ртвым. Покая́ние и моли́тва — две́ криле́ о́гненне, и си́ми прехо́д неудержи́мь от мыта́рств возду́шных извести́л еси́, блаже́нне, молча́ния яви́л еси́ пути́, и́миже поте́кл еси́ на бо́льшая, наказа́ние оста́вль вопроси́вшим. И на́м да́ждь исправле́ние, де́нь весе́лия твоего́ соверша́ющим. Богоро́дичен: Моли́твеннице ско́рая о христиа́нстем ро́де, Мари́е Де́во, моли́твы певе́ц Твои́х прие́мши в пречи́стыя дла́ни, принеси́ к Твоему́ Сы́ну и испроси́ на́м грехо́в проще́ние и тишину́ да́ждь су́щим в страсте́х. Пе́снь 6. Ирмо́с: Отве́ргл мя́ еси́ во глубины́ се́рдца морска́го, и спа́сл еси́ мя́, Спа́се, от рабо́ты сме́ртныя, и разреши́л еси́ у́зы беззако́ний мои́х. Отве́ргся коне́чнее живота́ и чу́вственнаго све́та ви́дети, в те́мен затво́р вше́л еси́, пременя́я чу́вственное на мы́сленнаго Све́та зре́ние, его́же и мы́ да улучи́м моли́твами твои́ми, о́тче, отве́ргшеся беззако́ний на́ших. Умерщвле́нную пло́ть по́стническими труды́ да оживи́ши, свя́те, струя́ми сле́з твои́х напая́л еси́ вы́ну, двана́десять ле́т пребы́в в пеще́ре, жи́в погребе́н, наде́ждою живота́ безсме́ртнаго оживля́емь. Дре́во жи́зненное пло́ть твоя́, Афана́сие преподо́бне, израсти́ покая́ния все́м плоды́, от ни́хже вкуси́ти да́ждь и мне́ любо́вию твое́ю, да укреплю́ся разреши́ти у́зы беззако́ний мои́х. Богоро́дичен: Дре́во присноцвету́щее Ты́ еси́, Пречи́стая Де́во, пали́мых зно́ем беззако́ний покрыва́ющее се́нию Твое́ю. Се́ю и на́с покры́й, страстьми́ жего́мых, и воспое́м: ра́дуйся, Дре́во благосенноли́ственное, и́мже покрыва́ются мно́зи. Конда́к, гла́с 5: Я́ко безсме́ртия тезоимени́т, по уме́ртвии свое́м воста́л еси́ жи́в; показу́я же, я́ко зело́ люта́ е́сть сме́рть, пла́кался еси́ го́рько. Ны́не, обре́тши неконча́емую ра́дость, моли́ся о на́с, я́ко да пла́ча ве́чнаго избу́дем. Пе́снь 7. Ирмо́с: Су́щим в пещи́ отроко́м Твои́м, Спа́се, не прикосну́ся, ниже́ стужи́, о́гнь. Тогда́ трие́, я́ко еди́неми усты́, поя́ху и благословля́ху, глаго́люще: благослове́н Бо́г оте́ц на́ших. Жи́знь твою́ в пла́че и воздыха́нии проводи́в и струя́ми сле́з твои́х убели́в а́нгельскаго о́браза ри́зу, отше́л еси́ в безплаче́вныя страны́, ра́дующися и пою́щи: благослове́н Бо́г оте́ц на́ших. Чи́ни А́нгельстии в де́нь успе́ния твоего́ приспе́ша, и ду́х тво́й ми́рно прие́мше, проводи́ша в ра́йския оби́тели, иде́же живы́й, помяни́ на́с, о́тче преподо́бне, пою́щих: благослове́н Бо́г оте́ц на́ших. Мертве́ц два́жды в жи́зни се́й бы́л еси́, свя́те, и пе́рвее у́бо возвраща́ющася вси́ ви́деша тя́ па́ки в плотски́х соста́вах, от ни́хже втори́цею разре́шся, ны́не живе́ши со А́нгельскими чи́нми, иде́же и на́с не забу́ди, пою́щих: благослове́н Бо́г оте́ц на́ших. Богоро́дичен: Уме́ршаго мя́ злы́ми дея́нии оживотвори́ти потщи́ся, Влады́чице: на Тя́ бо упова́ние возложи́х несумне́нно, я́ко ро́ждшую Безсме́ртнаго Царя́, и ми́ру всему́ Живода́вца. Пе́снь 8. Ирмо́с: Небеса́ небе́с и вода́, я́же превы́ше небе́с, благослови́те, по́йте Го́спода и превозноси́те Его́ во ве́ки. Небеса́ ра́дуются, прие́мше ду́х тво́й в не́дра своя́, и мы́ весели́мся, кла́няющеся моще́м твои́м, преподо́бне, от ни́хже пода́ждь тре́бующим благода́ть и сподо́би пе́ти Го́спода во ве́ки. А́нгели торжеству́ют, сожи́теля тя́ иму́ще, весели́тся и гора́ Пече́рская, содержа́щи ра́ку моще́й твои́х, а́ки би́сер многосве́тлый, си́м просвети́ на́с, мра́ком страсте́й одержи́мых, и да́ждь пе́ти Го́спода во ве́ки. Благоугоди́л еси́, о́тче, в жи́зни се́й Влады́це своему́ и прия́л еси́ да́р неду́ги исцеля́ти. На́с, страстьми́ одержи́мых, посети́, я́коже ля́двиями боля́ща Вави́лу, и сподо́би Го́спода пе́ти во ве́ки. Богоро́дичен: В печа́ли и тузе́ е́смь, скве́рное мое́ житие́ помышля́я, и не и́мам наде́жды. К Тебе́ Еди́ной прибега́ю, ра́дости всеми́рной, Чи́стая Де́во, и молю́, да ра́дость возсия́ет души́ мое́й во ве́ки. Пе́снь 9. Ирмо́с: Сотвори́ держа́ву мы́шцею Свое́ю, низложи́ бо си́льныя со престо́л и вознесе́ смире́нныя Бо́г Изра́илев, в ни́хже посети́ на́с Восто́к с высоты́ и напра́вил ны́ е́сть на пу́ть ми́ра. Сотвори́ любо́вь моля́щимся тебе́, о́тче, и моли́твою твое́ю да́ждь цельбу́ стра́ждущим неду́ги душе́вными, па́че же ра́туемых вра́жиими наве́ты напра́ви на пу́ть ми́рен. Пое́т Вели́кая Ла́вра труды́ и по́двиги твоя́, преподо́бне, сла́вит вы́ну пеще́ра, храня́щая чудотво́рныя мо́щи твоя́, и́мже и мы́ покланя́ющеся, мо́лим тя́: напра́ви стопы́ на́ша на пу́ть ми́рен. Воста́ни ско́ро и прииди́, а́з исцелю́ тя́,— рцы́, Афана́сие преблаже́нне; се́ бо от мно́гия боле́зни душе́вныя вопию́ ти́, не имы́й отра́ды, па́че же молю́: наста́ви мя́ на спасе́ния пу́ть ми́рен. Сла́влю Тя́, Тро́ице Пресвята́я, О́тче Безнача́льне с Сы́ном Безле́тным, и пою́ Ду́ха Твоего́ Свята́го, Его́же да́ждь се́рдцу моему́ хода́тайством уго́дника Твоего́, да обря́щу пу́ть ми́рен. Богоро́дичен: А́ще кто́ не сла́вит чи́стаго зача́тия и не пое́т несказа́ннаго Рождества́ Твоего́, Мари́е Богоневе́сто, да отпаде́т ве́чныя Сла́вы и не бу́дет соо́бщник Све́та и сы́н присносу́щнаго ми́ра. Свети́лен: В преподо́бных ди́внаго Афана́сия пе́сньми, лю́дие, восхва́лим: то́й бо жи́в у́мре, и по двою́ дню́ воскре́се, и па́ки преста́вися, живе́т, не ктому́ сме́ртию облада́емь, но присносу́щную нача́ жи́знь, я́ко сы́н су́щи Живота́, и Воскресе́ния пра́ведных насле́дник. Сла́ва, и ны́не: Ди́вны Твоя́ та́йны, Чи́стая, кто́ испове́сть? или́ кто́ возвести́т на Тебе́ сбытие́ неизрече́нных? Родила́ бо еси́ в ле́то Сы́на, пре́жде ве́к от Отца́ рожде́нна, Живота́ и Воскресе́ния Пе́рвенца, моли́ у́бо Его́, да и а́з Воскресе́ния бу́ду и Живота́ насле́дник.

глас 6 Пе́снь 1 Ирмо́с: Помо́щник и Покрови́тель бы́сть мне́ во спасе́ние, Се́й мо́й Бо́г, и просла́влю Его́, Бо́г отца́ моего́, и вознесу́ Его́: сла́вно бо просла́вися. Припев: Святи́телю, о́тче Арсéние, моли́ Бо́га о на́с. Бо́же Спа́се мо́й, отве́рзи мои́ устне́ и язы́к мо́й уясни́, я́ко да воспою́ па́мять иера́рха Твоего́, его́же на земли́ удиви́л еси́ сла́вно сла́вити Тя́: сла́вно бо просла́вися. И́же превы́шняя держа́щи, в небе́сная се́ла водворя́ше тя́ му́дрость Бо́жия, де́тели дарова́ний тебе́ воздаю́щи, го́рних все́льника сотворя́ет, Го́споду пою́ща: сла́вно бо просла́вися. Боже́ственная краси́лища, веселя́ще свяще́ннаго твоего́ зра́ка, в вы́шняя вселя́ют поко́ища, к Боже́ственней трапе́зе, Го́споду пою́ща: сла́вно бо просла́вися. Богоро́дичен: Окова́нных Свободи́теля, Богоро́дице, и те́мных Просвети́теля чре́во Твое́ пречи́стое вмести́. Его́же рождество́м и́дольския ле́сти свобо́ждшеся, И́стинную навыко́хом воспева́ти Бо́жию Ма́терь. Пе́снь 3 Ирмо́с: Утверди́, Го́споди, на ка́мени за́поведей Твои́х подви́гшееся се́рдце мое́, я́ко еди́н Свя́т еси́ и Госпо́дь. Просвеще́ние де́тели твоея́ Боже́ственных каса́яся, от земны́х к па́мяти возво́дит вы́шняго жела́ния, преводя́ от тли́ в жи́знь неконе́чную. Па́мять твоя́ пребыва́ет, святи́телю, и кро́тость се́рдца твоего́ в ро́д и ро́д, се́й уподобля́еми, боже́ственныя твоея́ сла́вы насыща́ющеся, досто́йно тя́ воспева́ем. Пре́йде се́нь зако́на, изнемо́гши, де́лом благовествова́ния твоего́, Христо́с И́стина, сия́ющи, вся́ просвеща́ет, ве́рою па́мять твою́, святи́телю, пра́зднующия. Богоро́дичен: Све́та Боже́ственнаго Заря́ из чре́ва Твоего́ просия́, ве́рных благоуха́юща: Сего́ благово́ние получи́вше, омраче́ния свободи́хомся Тобо́ю, Богоро́дице Пречи́стая. Седа́лен, гла́с 4 Дне́сь иера́рха па́мять возсия́ на́м, солнцеобра́зно луча́ми сия́ющи, све́та явле́ние все́м простира́ет, и все́м велегла́сно вопие́т и глаго́лет: прииди́те, жела́емых наслади́мся. Богоро́дичен: Те́плое заступле́ние су́щих в беда́х, и помо́щницу на́шу, и к Бо́гу премене́ние, Е́юже тли́ изба́вихомся, Богоро́дицу, ве́рнии, ублажа́ем. Пе́снь 4 Ирмо́с: Услы́ша проро́к прише́ствие Твое́, Го́споди, и убоя́ся, я́ко хо́щеши от Де́вы роди́тися и челове́ком яви́тися, и глаго́лаше: услы́шах слу́х Тво́й и убоя́хся, сла́ва си́ле Твое́й, Го́споди. Возсия́вый све́т и Просвеще́й у́тро, показа́ тя де́нь, освяще́нне о́тче Арсе́ние, уче́нием Божества́ Его́, вся́ к све́ту Того́ возводя́щаго. И́мже просвеща́ема духо́вная твоя́ ча́да, па́мять твою́ пра́зднуем. Жития́ архиере́йства твоего́ о́бразы, сопе́рника не иму́ще, без свиде́телей облича́ют тя́: плотска́я бо духо́вным покори́в, отхожде́нием свои́м в небе́сная всели́ся, иде́же ликовству́я, преблаже́нне Арсе́ние, све́том Боже́ственным просвети́ любо́вию пою́щия тя́. Чуде́с, и́хже сподо́бился еси́ от Влады́ки твоего́, преподо́бне, зря́ще, боже́ственная твоя́ ча́да, духо́вныя сла́дости насыща́емся, тя́ предста́теля иму́ще к Нему́, прича́стия Боже́ственнаго сподо́би на́с улучи́ти, мо́лимся. Богоро́дичен: Чре́во де́вственное но́сит, Еде́мская две́рь отверза́ется, а́бие ве́рных со́нмы дерза́юще вхо́дят, и́стинную Богоро́дицу ве́рно восхваля́ют, Рожде́нному от Нея́ зову́ще: сла́ва си́ле Твое́й, Го́споди. Пе́снь 5 Ирмо́с: Ми́р мно́г лю́бящим Тя́, Христе́, и но́щь просвеще́ния в пи́щи слове́с Твои́х: сего́ ра́ди от но́щи у́тренююще, про́сим ми́лости от Тебе́, Человеколю́бче. Вседе́тельная и всемогу́щая му́дрость, и си́ла Влады́чня, столпа́ и́стинна тя́ пресвяще́ннаго сотво́рши, до́м создала́ е́сть, Боже́ственныя огра́ды Его́ наполня́ющь и ерети́ческая шата́ния прогоня́ющь, Арсе́ние преблаже́нне, те́м тя́ восхваля́ем. Возсия́в от небе́с благоле́пие Вы́шняго, приме́сом святи́тельства обло́ж тя́, небе́сныя трапе́зы состо́льника сотвори́, ны́нешняго же пода́теля ве́рным показа́, свяще́нне, вопию́ща: про́сим ми́лости от Тебе́, Человеколю́бче. Светоли́тия Боже́ственнаго испо́лнившися, пресвяще́нная твоя́ глава́ сла́дости язы́ка удержа́ти не возмо́же: а́ще бо и в землена́я сни́де, но ду́хом в небе́сная дости́же, о́тче Арсе́ние, ми́р испроси́ душа́м на́шим. Богоро́дичен: Пра́дедняя кля́тва разреши́ся и прама́терняя боле́знь исцели́ся, Пречи́стая, чре́ва Твоего́ Рождество́м: безсе́менно бо заче́нши, Сло́во родила́ еси́. Ему́же приле́жно моли́ся спасти́ ны. Пе́снь 6 Ирмо́с: Возопи́х все́м се́рдцем мои́м к Ще́дрому Бо́гу, и услы́ша мя́ от а́да преиспо́дняго, и возведе́ от тли́ живо́т мо́й. Боже́ственныя сла́вы путеше́ствия де́лы явля́юще, земна́я прово́дят с весе́лием, небе́сная же ра́дуются, прие́млюще ду́хом пресвяще́ннаго Арсе́ния. Благослове́н пло́д богоприя́тный, Боже́ственнаго Ду́ха де́тельми сия́я, и преиспо́дняя мрачи́т, в торжество́ иера́рха собира́ющияся просвеща́ет вои́стину: гряди́те, ве́рнии, просвети́мся. Гра́дняго ше́ствия тече́ние провосхища́я, ве́дяй предстои́т Арсе́ний, зовы́й: гряди́те, ча́да, стра́ху Госпо́дню научи́теся, я́коже рече́ Госпо́дь: я́ко кро́ток е́смь и смире́н се́рдцем, и обря́щете поко́й душа́м ва́шим. Богоро́дичен: Искони́ проро́чествия о Тебе́ прореко́ша, ны́не же на Тебе́ испо́лнишася, Пречи́стая: о́в бо Тя́ руно́ пронарече́, на него́же сни́де Сло́во Бо́жие, ны́не же Ты́, Де́во, родила́ еси́ Го́спода. Конда́к, гла́с 2 В пи́щи слове́с твои́х, богоно́се Арсе́ние, разу́мно ча́да твоя́ пита́я, язы́ком хваля́, устна́ми же пе́ние принося́, веща́нием зовы́й: Христе́, Ты́ еси́ Све́т неизрече́нный. И́кос: Сла́дкое твое́ веща́ние в послушество́ прихо́дит, громо́вными о́бразы простира́яся, в добропослуша́ние ну́дит, неизрече́нныя ра́дости о́бщники увещава́я: прииди́те, ча́да, глаго́ля, возвели́чите Го́спода со мно́ю. Его́же сла́дости насыща́ющеся, в небе́сная се́ла водвори́мся и све́тлости сподо́бимся, веща́нием зову́ще: Христе́, Ты́ еси́ Све́т неизрече́нный. Пе́снь 7 Ирмо́с: Неизрече́нное чу́до, в пещи́ Изба́вивый преподо́бныя о́троки из пла́мене, во гро́бе ме́ртв бездыха́нен полага́ется во спасе́ние на́с пою́щих: Изба́вителю Бо́же, благослове́н еси́. А́ще и земна́я превосхо́дит, вы́шним каса́яся, благода́тию духо́вною с си́ми совокупля́яся, неизрече́нныя ра́дости наполня́ет, сы́ны све́та сотворя́ет, пою́щия: благослове́н Бо́г оте́ц на́ших. Жите́йская уныва́ют и боже́ственная красу́ются, небе́сная торжеству́ют, архиере́йский тво́й ду́х прие́млюще, земна́я попра́вша и в небе́сных лику́юща, с весе́лием поя́ху: оте́ц на́ших Бо́же, благослове́н еси́. Де́тели боже́ственнаго твоего́ ду́ха разширя́юще вхо́ды, боже́ственная ча́да твоя́ веду́т в живо́т. И́хже, жела́юще, про́сим: моли́ о на́с, пресвяще́нне Арсе́ние. Богоро́дичен: Две́рь Тя́ заключе́нную нарече́ проро́к, Чи́стая, ю́же никто́же про́йде, то́кмо Бо́г еди́н, отверза́я на́м па́ки еде́мския вхо́ды, ве́рно сла́вящим Тя́, Богоро́дице. Пе́снь 8 Ирмо́с: За зако́ны оте́ческия блаже́ннии в Вавило́не ю́ноши предбе́дствующе, царю́ющаго оплева́ша повеле́ние безу́мное, и, совоку́плени и́мже, не свари́шася огне́м, Держа́вствующему досто́йную воспева́ху пе́снь: Го́спода по́йте дела́ и превозноси́те во вся́ ве́ки. Све́том Боже́ственным озаря́ема, благоуха́нием цвету́щи, свяще́нная па́мять твоя́, Арсе́ние, просвеща́ет ве́рныя, созыва́ющи вопи́ти: Го́спода воспева́йте дела́ и превозноси́те Его́ во ве́ки. Жела́емых сы́тости боже́ственная твоя́ ча́да напо́лнитися прося́ще, благоукраше́нною твое́ю па́мятию прохлажда́еми, и, веселя́щеся, ве́рно пою́т Просла́вльшаго па́мять твою́, иера́рше, взыва́юще: Го́спода воспева́йте дела́ и превозноси́те Его́ во ве́ки. Па́мять твоя́ ве́чная, архиере́е, кро́тость и смире́ние се́рдца твоего́ возвеща́ющи, в ню́же собира́еми, просвеще́ния Боже́ственнаго хода́тайством твои́м наде́ющеся получи́ти жела́емых, весе́лием зову́ще: Го́спода по́йте дела́ и превозноси́те Его́ во ве́ки. Богоро́дичен: Неоску́дныя то́ки милосе́рдия источа́ющи призыва́ющим Тя́, Влады́чице, и пе́сньми хва́лящих Тя́, Чи́стая, не оста́ви моля́щихся Тебе́, Ца́рствия Сы́на Твоего́ сподо́би, вопию́щия ве́рою: Го́спода воспева́йте дела́ и превозноси́те Его́ во ве́ки. Пе́снь 9 Ирмо́с: Стра́нствия Влады́чня и безсме́ртныя трапе́зы на го́рнем ме́сте, высо́кими умы́, ве́рнии, прииди́те, наслади́мся, возше́дша Сло́ва, от Сло́ва научи́вшеся, Его́же велича́ем. Тече́ньми премине́ землена́я твоя́ жи́знь, и небе́снаго тя́ селе́ния не оста́ви, и́бо не потче́ся нога́ пло́ти твоея́, дрема́ния ду́х тебе́ не одоле́, храня́щу тя́ Бо́гу. Те́мже моли́ за ны́ Го́спода, пресвяще́нне о́тче Арсе́ние. Небе́снии ли́цы ра́дуются, мы́ же, землени́и, славосло́вим: де́монская кре́пость исчезе́, пресвяще́ннаго твоего́ ду́ха вы́спрь ви́дяще водворя́ема в небе́сная селе́ния, о хва́лящих тя́ моли́, свяще́нне Арсе́ние. Тро́ичен: Отцу́, и Сы́ну, и Свято́му Ду́ху ве́рою покланя́емся, Тричи́сленное Еди́нство сла́вяще и с любо́вию воспева́юще, глаго́лем: моли́твами иера́рха Твоего́ Арсе́ния, поми́луй и сохрани́ вся́ ны́. Богоро́дичен: Дре́вним преступле́нием введе́ в па́губу пра́баба естество́ земно́е: Рождества́ же Твоего́ чревоноше́нием, Пречи́стая, па́ки к Бо́гу примири́хомся. Его́же сла́вяще, Тебе́, Де́во, велича́ем. Свети́лен Святи́телю преста́вльшуся, собра́шася наро́ди погребсти́ те́ло его́, а́нгели же веселя́щеся, приима́ху ду́шу его́, вселя́ющуюся во святы́я дворы́. Богоро́дичен: Держа́вным Твои́м покро́вом от вра́г наве́та рабы́ Твоя́ сохрани́, Чи́стая, вся́ ны́ невре́дны, Тя́ бо стяжа́хом еди́ну прибе́жище в ско́рбех.

Минея, 14 Августа, Кано́н преподо́бнаго Арка́дия Глас 2 Песнь 1 Ирмос: Гряди́те, лю́дие,/ пои́м песнь Христу́ Бо́гу,/ разде́льшему мо́ре и наста́вльшему лю́ди,/ я́же изведе́ из рабо́ты еги́петския,/ я́ко просла́вися. Припев: Преподо́бне о́тче Арка́дие, моли́ Бо́га о на́с. Сло́ве Бо́жий, молю́тися:/ даждь ми сло́во и отве́рзи ми устне́, недосто́йному рабу́,/ да восхвалю́ уго́дника Твоего́, преподо́бнаго отца́ Арка́дия,/ я́ко в Тебе́ и Тобо́ю просла́вися. Припев: Преподо́бне о́тче Арка́дие, моли́ Бо́га о на́с. О́тче преподо́бне Арка́дие,/ приими́ от недосто́йнаго, ю́же воспою́, песнь с любо́вию/ и моли́ за мя, гре́шнаго раба́ твоего́,/ от усе́рдия дерзну́вшаго восхва́лити тя,/ его́ же Христо́с просла́ви. Припев: Преподо́бне о́тче Арка́дие, моли́ Бо́га о на́с. Си́лою Христо́вою укрепля́емь, преподо́бне Арка́дие,/ вся кова́рства лука́ваго низве́ргл еси́ сле́зными твои́ми моли́твами,/ Богоблаже́нне Арка́дие преподо́бне. Сла́ва Отцу́ и Сы́ну и Свято́му Ду́ху. Безстра́стия умо́м просвеще́нным предстои́ши Бо́гу Вседержи́телю,/ от него́же знаме́ния и чудотворе́ния испроси́в, уго́дниче Христо́в, о́тче Арка́дие,/ пресве́тлый яви́ся, я́ко просла́вися. И ны́не и при́сно и во ве́ки веко́в. Ами́нь. Богородичен: О, па́че ума́ чуде́с Твои́х, Ма́ти Де́во!/ Бо́жие бо ипоста́сное Сло́во прия́вши во утро́бу твою́,/ родила́ еси́ па́че естества́ Безле́тнаго Сы́на,/ вся́ческая Боже́ственною Свое́ю си́лою прему́дре содержа́ща и окормляюща. Песнь 3 Ирмос: На ка́мени мя ве́ры утверди́в,/ разшири́л еси́ уста́ моя́ на враги́ моя́,/ возвесели́бося дух мой, внегда́ пе́ти:/ несть свят, я́коже Бог наш,/ и несть пра́веден, па́че Тебе́, Го́споди. Припев: Преподо́бне о́тче Арка́дие, моли́ Бо́га о на́с. Совесть име́л еси́ благу́, преподо́бне о́тче,/ и о́ко серде́чное, взира́ющее к Бо́гу,/ и в послуша́нии до́бре пребы́л еси́ отцу́ своему́, наста́внику преподо́бному Ефре́му,/ с ни́мже ны́не предстоя́ у Престо́ла Вседержи́теля,/ о нас Христу́ Бо́гу моли́ся дарова́ти нам ве́лию ми́лость. Припев: Преподо́бне о́тче Арка́дие, моли́ Бо́га о на́с. Стягну́в те́ло свое воздержа́нием и чистото́ю,/ в Вы́шняя селе́ния, о́тче, дости́гл еси́/ и на Небесе́х со А́нгелы лику́еши./ Те́мже о нас Христу́ Бо́гу моли́ся,/ от него́ же испроси́ нам ве́лию ми́лость. Сла́ва Отцу́ и Сы́ну и Свято́му Ду́ху. Нака́зан Боже́ственными уче́ньми, посту́, и воздержа́нию,/ и вся́кой доброде́тели от отца́ своего́, наста́вника духо́внаго, преподо́бнаго Ефре́ма,/ от млады́х ногте́й навы́кл еси́ и тем Бо́гу угоди́л еси́./ О́тче преподо́бне Арка́дие, моли́ся о душа́х на́ших. И ны́не и при́сно и во ве́ки веко́в. Ами́нь. Богородичен: Просвети́, Чи́стая, се́тующее се́рдце мое́,/ при́сно преступле́ньми и жите́йскими мно́гими молва́ми оскверня́емое,/ и не оста́ви мене́ враго́м бы́ти в ра́дость,/ я́ко да просла́влю и любо́вию воспою́ Тя, Всепе́тая. Седален, глас 8 Отре́кся ми́ра и духо́вному наста́внику, преподо́бному Ефре́му, покори́вся,/ а́ще и млад был еси́, о́тче, еди́ны доброде́тели стяжа́в,/ всем и́ноком о́браз был еси́./ Те́мже моли́ся грехо́в оставле́ние пода́ти любо́вию чту́щим тя. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Ле́гкий о́блаче, источи́вый ве́рным ро́су Боже́ственную,/ све́щниче златокова́нный, показа́вый всем Свет немерца́ющий,/ Нескве́рная, Непоро́чная, Пречи́стая Влады́чице,/ омраче́нную ду́шу мою́ слепото́ю страсте́й безстра́стия заре́ю просвети́, молю́ся,/ и ум мой в тишине́ укрепи́,/ да по до́лгу сла́влю Тя и любо́вию пою́, Пречи́стая Всенепоро́чная. Песнь 4 Ирмос: Прише́л еси́ от Де́вы не хода́тай, ни А́нгел,/ но Сам, Го́споди, вопло́щся,/ и спасл еси́ всего́ мя, челове́ка./ Тем зову́ Ти: сла́ва си́ле Твое́й, Го́споди. Припев: Преподо́бне о́тче Арка́дие, моли́ Бо́га о на́с. Поще́нием и бде́нием те́ло свое́ изнури́л еси́, о́тче Арка́дие,/ А́нгелов сожи́тельниче, и по́стником ревни́телю, и всем святы́м подража́телю,/ с ни́ми же моли́ Христа́ Бо́га ве́лию и бога́тую ми́лость пода́ти нам. Припев: Преподо́бне о́тче Арка́дие, моли́ Бо́га о на́с. Чистото́ю и смире́нием Бо́гу угоди́л еси́/ и наста́внику своему́ во всем повину́лся еси́,/ с ни́мже моли́ся, преподо́бне, пода́ти нам ми́р и ве́лию ми́лость. Сла́ва Отцу́ и Сы́ну и Свято́му Ду́ху. Да животу́ прича́стник нетле́нному яви́шися,/ вре́менных и тле́нных, о́тче прему́дре, небре́гл еси́/ и, к Бо́гу присту́пль, со дерзнове́нием мо́лишися спасти́ся нам. И ны́не и при́сно и во ве́ки веко́в. Ами́нь. Богородичен: Ма́ти Бо́жия Чи́стая,/ страсте́й мои́х сою́зы грехо́вныя, молвы́ и неду́ги отжени́:/ и́маши бо к Нему́ дерзнове́ние и благода́ть ми́ловати ны, Госпоже́ Милосе́рдая,/ Спа́са поро́ждши пло́тию,/ Его́ же непреста́нно моли́ спасти́ся нам. Песнь 5 Ирмос: Просвеще́ние во тьме лежа́щих,/ спасе́ние отча́янных, Христе́, Спа́се мой,/ к Тебе́ у́тренюю, Царю́ ми́ра,/ просвети́ мя сия́нием Твои́м,/ ино́го бо, ра́зве Тебе́, Бо́га не знаю. Припев: Преподо́бне о́тче Арка́дие, моли́ Бо́га о на́с. Помоли́ся Христу́ Бо́гу, преподо́бне Арка́дие, о приходя́щих к тебе́ с ве́рою и любо́вию/ и ча́ющих в предста́тельстве твое́м грехо́в разреше́ние и неду́гов исцеле́ние получи́ти,/ е́же моли́твами твои́ми подае́ши всем незави́стно. Припев: Преподо́бне о́тче Арка́дие, моли́ Бо́га о на́с. Измла́да Христу́ после́довав и наста́внику своему́ во всем повину́яся,/ поще́нием и моли́твами проти́ву ко́знем де́монским вооружи́лся еси́/ и сего́ ра́ди был еси́ свети́льник, сия́я чудесы́, Арка́дие,/ испроси́ стране́ на́шей на враги́ побе́ду и душа́м на́шим ве́лию ми́лость. Сла́ва Отцу́ и Сы́ну и Свято́му Ду́ху. Сна очи́ма свои́ма не дал еси́, о́тче Арка́дие,/ ни ве́ждома свои́ма дрема́ния, до́ндеже Бо́гу угоди́л еси́,/ в тве́рдом пребыва́я послуша́нии Богому́дрому учи́телю твоему́,/ с ни́мже моли́ся о хваля́щих тя Христу́ Бо́гу на́шему,/ пода́ти нам ми́р и ве́лию ми́лость. И ны́не и при́сно и во ве́ки веко́в. Ами́нь. Богородичен: Пло́тию ро́ждши Безпло́тнаго, Богороди́тельнице Пречи́стая,/ теле́сных нас и душе́вных скве́рн омы́й/ окропле́нием Боже́ственныя благода́ти Сы́на Твоего́. Песнь 6 Ирмос: Ко Го́споду от ки́та Ио́на возопи́:/ Ты мя возведи́ из глубины́ а́да, молю́ся,/ да я́ко Изба́вителю во гласе хвале́ния/ и́стины же ду́хом пожру́ Тебе́. Припев: Преподо́бне о́тче Арка́дие, моли́ Бо́га о на́с. Земна́я и мимотеку́щая, я́ко уме́ты, вмени́в,/ Христа́ еди́наго вожделе́л еси́,/ к Нему́же сою́зом любве́ прибли́зив ду́шу свою́,/ того́ обрести́ потща́лся еси́ ненасыща́емыя добро́ты. Припев: Преподо́бне о́тче Арка́дие, моли́ Бо́га о на́с. Процве́л в пусты́нных удо́лиях, прехва́льне о́тче наш, я́ко ши́пок благово́нен,/ и, я́коже крин, облагоуха́л еси́ со́вести ве́рных доброде́тельми и чудесы́./ Те́мже, преподо́бне, отжени́ от нас стра́сти смердя́щия. Сла́ва Отцу́ и Сы́ну и Свято́му Ду́ху. Жела́нием зе́льным, преблаже́нне, после́довал еси́ Богоно́снаго отца́ Ефре́ма житию́:/ того́ бо учени́к изря́дный был еси́,/ с ни́мже моли́ся Го́сподеви поми́ловати ду́ши на́ша. И ны́не и при́сно и во ве́ки веко́в. Ами́нь. Богородичен: Христа́ нам родила́ еси́, Пречи́стая Влады́чице, Богора́дованная Де́во./ Те́мже спаси́ град и лю́ди, на Тя упова́ющия. Кондак, глас 2 К глубина́м Боже́ственнаго ра́зума впери́в ум свой,/ в Небе́сныя оби́тели восте́кл еси́/ и равноа́нгельно житие́, о́тче Арка́дие, на земли́ пожи́л еси́,/ и во всем пови́нулся еси́ духо́вному своему́ настоя́телю и наста́внику, преподо́бному отцу́ Ефре́му,/ и ны́не, вку́пе предстоя́ще у Престо́ла Влады́ки Христа́,/ моли́ся непреста́нно о всех нас. Икос Услы́шав Христо́в Ева́нгельский глас,/ оста́вив плотска́я мудрова́ния,/ бога́тство и сла́ву ми́ра сего́, я́ко прах, вмени́в,/ от мла́дости после́довав наста́внику и учи́телю своему́ духо́вному отцу́ Ефре́му/ и от того́ вся́кия доброде́тели навы́к,/ и бысть ему́ учени́к до́брым послуша́нием,/ и над страстьми́, я́ко Безпло́тен, подвиза́вся,/ и Безпло́тных ликостоя́нию сочета́вся,/ и́же пода́й ра́зум мне, недосто́йному рабу́ своему́,/ а́ще не ты ми по́даси и не просвети́ши ми ум,/ ка́ко тя восхвалю́ и воспою́, окая́нный?/ Дерза́ю на твое незло́бие и вопию́ си́це:/ ра́дуйся, Небе́сный челове́че и земны́й А́нгеле;/ ра́дуйся, я́ко после́довал духо́вному наста́внику своему́ во всем, посто́м и моли́твами,/ тем вку́пе с ним угоди́в Бо́гу,/ и бы́сте вели́кия свети́льники, сия́юще чудесы́,/ ны́не предстоя́ще у Престо́ла Христа́, Бо́га на́шего,/ моли́теся непреста́нно о всех нас. Песнь 7 Ирмос: Купина́ в горе́ огненеопа́льная/ и росоно́сная пещь халде́йская/ я́ве предписа́ Тя, Богоневе́сто:/ Боже́ственный бо Невеще́ственный/ в веще́ственнем чре́ве Огнь неопа́льно прия́ла еси́./ Те́мже из Тебе́ Ро́ждшемуся пое́м:/ благослове́н еси́, Бо́же оте́ц на́ших. Припев: Преподо́бне о́тче Арка́дие, моли́ Бо́га о на́с. Я́ко вои́стинну тле́нных оста́вль/ и непостоя́нная ми́ра сего́ за уме́ты вмени́в,/ наста́внику своему́ после́довал еси́,/ те́мже с ним у Престо́ла Бо́жия предстои́ши, моли́ся спасти́ся всем нам. Припев: Преподо́бне о́тче Арка́дие, моли́ Бо́га о на́с. Я́ко добропло́дная ма́слина, в до́ме Бо́жии, преподо́бне, процве́л еси́,/ еле́ем у́бо ра́дования духо́внаго умаща́й ду́ши любо́вию пою́щих тя,/ преподо́бне о́тче Арка́дие. Сла́ва Отцу́ и Сы́ну и Свято́му Ду́ху. Житие́ твое́, о́тче Арка́дие преподо́бне, всече́стне, ди́вно на земли́ показа́л еси́:/ вели́кое бо поще́ние и смире́ние стяжа́л еси́./ Сего́ ра́ди на Небесе́х жи́знь ве́чную со учи́телем свои́м преподо́бным Ефре́мом насле́довал еси́./ Те́мже моли́ся при́сно ко Го́споду, от бед изба́вити ны, пою́щия тя. И ны́не и при́сно и во ве́ки веко́в. Ами́нь. Богородичен: Тя Предста́тельницу и́мамы, гре́шнии, о Пресвята́я Де́во:/ Ты бо благопреме́нна к нам твори́ши Сы́на Своего́ и Бо́га на́шего/ ма́терними Твои́ми моли́твами. Песнь 8 Ирмос: В пещь о́гненную ко отроко́м евре́йским снизше́дшаго/ и пла́мень в ро́су прело́жшаго Бо́га,/ по́йте, дела́, я́ко Го́спода/ и превозноси́те во вся ве́ки. Припев: Преподо́бне о́тче Арка́дие, моли́ Бо́га о на́с. Я́ко свети́льник све́та, ду́шу свою́ сия́ньми доброде́телей украси́в,/ нетле́нный вене́ц от Бо́га прия́л еси́,/ и ны́не со А́нгелы и со учи́телем свои́м Престо́лу его́ предстоя́ще,/ о нас моли́ся, воспева́ющих:/ благослове́н Бог оте́ц на́ших. Припев: Преподо́бне о́тче Арка́дие, моли́ Бо́га о на́с. Весь от ю́ности Бо́гови освяти́лся еси́/ и к Нему́ доброде́телию прибли́жился еси́,/ тле́нная бо, я́же на земли́, оста́вив,/ Небе́сное обре́л еси́ бога́тство. Сла́ва Отцу́ и Сы́ну и Свято́му Ду́ху. Обре́л еси́ возме́здие от Христа́ Бо́га, преподо́бне о́тче Арка́дие,/ ны́не со А́нгелы святы́ми и с наста́вником свои́м, со отце́м Ефре́мом, ликовству́я/ и со все́ми пра́ведными в Небе́сных оби́телех водворя́яся./ моли́ся у́бо ко Го́споду, пода́ти нам ве́лию ми́лость. И ны́не и при́сно и во ве́ки веко́в. Ами́нь. Богородичен: Ма́ти Бо́жия Всенепоро́чная, души́ мое́й я́звы исцели́/ и стремле́ние утоли́ стра́стныя пло́ти моея́,/ омраче́нное се́рдце просвети́, ум мой умири́/ и вра́жиих напа́стей изба́ви. Песнь 9 Ирмос: Я́же пре́жде со́лнца свети́льника Бо́га возсия́вшаго,/ плотски́ к нам прише́дшаго из боку́ Деви́чу,/ неизрече́нно воплоти́вшая, Благослове́нная, Всечи́стая,/ Тя, Богоро́дице, велича́ем. Припев: Преподо́бне о́тче Арка́дие, моли́ Бо́га о на́с. Яви́лся еси́, о́тче Арка́дие, гра́ду на́шему столп непоколеби́м/ и прибе́жище всем, притека́ющим к тебе́:/ исцеле́ния бо благода́ть тобо́ю прие́млем/ и от лю́тых скорбе́й твои́ми моли́твами избавля́емся. Припев: Преподо́бне о́тче Арка́дие, моли́ Бо́га о на́с. Приими́, святы́й преблаже́нне, о́тче досточу́дне Арка́дие, пе́ние сие́ похва́льное/ и твое́ оте́ческое покажи́ о нас ми́лование:/ не можем бо по досто́инству похвали́ти тя,/ но ели́ко можем, от усердия дерзну́хом. Сла́ва Отцу́ и Сы́ну и Свято́му Ду́ху. Еже прино́сим ти, о́тче преподо́бне Арка́дие, пе́ния не пре́зри,/ но приими́ сие́ ми́лостивно/ и моли́ Творца́ на́шего, Влады́ку и Го́спода,/ изба́вити ны от вся́каго преще́ния/ и ми́лость обрести́ в день стра́шнаго его́ испыта́ния. И ны́не и при́сно и во ве́ки веко́в. Ами́нь. Богородичен: Богоро́дице Влады́чице,/ мене́, во глубину́ зла сластьми́ плотски́ми и страстьми́ жития́ впа́дша, возста́ви:/ на Тя бо, я́ко Ма́терь Бо́га на́шего, наде́жду и́мам, раб Твой./ Не пре́зри упова́ния на́шего, но сотвори́ спасти́ся всем нам. Светилен Святы́ни храм был еси́, преподо́бне,/ и по Боже́ственному прича́стию ра́йский граждани́н,/ в не́мже пита́ешися невозбра́нно дре́ва разу́мнаго и нетле́нныя сла́вы./ Те́мже па́мять твою́, Арка́дие преподо́бне, творя́ще/ и ве́рою и любо́вию хва́ляще тя, мо́лимся:/ моли́ся Го́сподеви спасти́ся всем нам. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Ра́дуйся, кля́твы Е́виной разреше́ние;/ ра́дуйся, све́те су́щим во тьме./ Ра́дуйся, хра́ме живы́й жива́го Бо́га;/ ра́дуйся, ве́рным похвало́./ Ра́дуйся, преподо́бным утвержде́ние,/ ра́дуйся, правосла́вным сла́во, Благослове́нная Мари́е.

Минея, 3 Августа, Кано́н преподо́бнаго Глас 2 Песнь 1 Ирмос: Грядите, лю́дие,/ пои́м песнь Христу́ Бо́гу,/ разде́льшему мо́ре и наста́вльшему люди,/ я́же изведе́ из рабо́ты еги́петския,/ я́ко просла́вися. Припев: Преподо́бне о́тче Анто́ние, моли́ Бо́га о на́с. А́гнче незло́бивый, отве́рзи ми устне́ недосто́йнии,/ язы́к мой уясни́, и се́рдце мое́ просвети́,/ и ум мой озари́ све́том Твоего́ Богоразу́мия,/ да возмогу́ воспева́ти па́мять преподо́бнаго Анто́ния,/ его́же на земли́ удиви́л еси́. Припев: Преподо́бне о́тче Анто́ние, моли́ Бо́га о на́с. Мно́гим милосе́рдием и щедро́тами,/ Соде́телю тва́ри и веко́в Тво́рче, моле́бное пе́ние приими́,/ и проще́ние на́ших согреше́ний да́руй/ Твоего́ уго́дника преподо́бнаго Анто́ния моле́нием,/ и тишину́ се́рдцу моему́. Сла́ва Отцу́ и Сы́ну и Свято́му Ду́ху. Све́тлое и богоуго́дное житие́ твое́, я́ко свет, вои́стинну на земли́ пока́зася,/ Боже́ственную бо ви́дети све́тлость, Анто́ние, сподо́бился еси́./ Те́мже и, ви́димая вся оста́вив, Непостижи́маго зре́ти сподо́бился еси́. И ны́не и при́сно и во ве́ки веко́в. Ами́нь. Богородичен: Мои́х прегреше́ний, Влады́чице, плени́цу расто́ргни,/ Твоего́ Сы́на и Го́спода моля́щи,/ и томя́щий мя грех, Присноде́во, низложи́,/ я́ко да воспева́ю Тя всегда́, Всенепоро́чная, Тобо́ю спаса́емь. Песнь 3 Ирмос: На ка́мени мя ве́ры утверди́в,/ разшири́л еси́ уста́ моя́ на враги́ моя́,/ возвесели́ бо ся дух мой, внегда́ пе́ти:/ несть свят, я́коже Бог наш,/ и несть пра́веден, па́че Тебе́, Го́споди. Припев: Преподо́бне о́тче Анто́ние, моли́ Бо́га о на́с. Жезло́м доброде́телей стра́стное мо́ре пресе́к/ и го́рдаго врага́, я́коже друга́го фарао́на, моли́твою твое́ю погрузи́в,/ избра́нное твое́ ста́до но́ваго Изра́иля невре́дно соблюди́, Анто́ние преподо́бне. Припев: Преподо́бне о́тче Анто́ние, моли́ Бо́га о на́с. Возлюби́л еси́, блаже́нне, всено́щное бде́ние,/ и моли́тву непреста́нну, и любо́вь нелицеме́рну,/ си́ми очища́я ум твой, ду́шу же просвеща́я, те́ло твое́ смиря́л еси́/ и ко дневны́м трудо́м благопоко́рно устроя́л еси́. Сла́ва Отцу́ и Сы́ну и Свято́му Ду́ху. Храм тя, вси ве́рнии, Ду́ха Пресвята́го ве́мы,/ храм боголе́пен Бо́жии Ма́тери воздви́гл еси́, и огра́ду ве́лию устро́ил еси́,/ и мона́хов мно́жества совокупи́л еси́,/ в не́мже ны́не всяк неду́г моли́твами твои́ми отгоня́ется. И ны́не и при́сно и во ве́ки веко́в. Ами́нь. Богородичен: Во ины́х жена́х ма́ти, донде́же де́ва, не позна́ся,/ ни ма́ти по рождестве́ де́вствовати сподо́бися,/ на Тебе́ же, Девома́ти, обоя́ устро́ишася./ Тем весе́лием ду́ха воспева́ю:/ несть непоро́чны, па́че Тебе́, Влады́чице. Седален, глас 8 А́нгельски на земли́ пожи́в, Богому́дре Анто́ние,/ ли́ком по́стническим счи́слился еси́:/ Крест бо на ра́мена твоя́ взем, после́довал еси́ Влады́це Христу́,/ и стра́сти душетле́нныя воздержа́нием, преподо́бне, увяди́л еси́,/ и был еси́ духо́вно прия́телище и сосу́д чи́ст Го́сподеви./ Те́мже вопие́м ти:/ моли́ Христа́ Бо́га грехо́в оставле́ние дарова́ти/ пра́зднующим любо́вию пречестну́ю и святу́ю па́мять твою́. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Я́ко Всенепоро́чная Неве́ста Творцу́,/ я́ко Неискусобра́чная Ма́ти Изба́вителя,/ прия́телище я́ко су́щи Уте́шителя, Препе́тая,/ беззако́нию мя су́ща скве́рное оби́телище и бесо́м игра́лище в ра́зуме бы́вша,/ потщи́ся от тех злоде́йства мя изба́вити/ и све́тлое жили́ще доброде́телей соверши́, Светоно́сная Нетле́нная,/ отжени́ о́блак страсте́й и вы́шняго прича́стия сподо́би/ и све́та невече́рняго моли́твами Твои́ми. Песнь 4 Ирмос: Прише́л еси́ от Де́вы, не хода́тай, ни А́нгел,/ но Сам, Го́споди, вопло́щся,/ и спасл еси́ всего́ мя, челове́ка./ Тем зову́ Ти: сла́ва си́ле Твое́й, Го́споди. Припев: Преподо́бне о́тче Анто́ние, моли́ Бо́га о на́с. Умертви́в себе́ ми́рови, жизнь равноа́нгельну на земли́ пожи́л еси́, пресла́вне,/ и, я́ко дар освяще́н, Влады́це, Анто́ние, твою́ ду́шу чи́сту предста́вил еси́,/ и Боже́ственнаго Ца́рствия досто́йно, о́тче, получи́л еси́. Припев: Преподо́бне о́тче Анто́ние, моли́ Бо́га о на́с. Ве́трилом, о́тче, воздержа́ния окриля́емь, стра́стныя тьмы отбежа́в/ и к безстра́стия путе́м наставля́емь, к Све́ту невече́рнему́ восте́кл еси́/ и, от сего́ озари́вся, нетле́ния бога́тство насле́довал еси́, Анто́ние преподо́бне. Сла́ва Отцу́ и Сы́ну и Свято́му Ду́ху. Вели́кий Но́вград ны́не весе́лием, о́тче, красу́ется,/ име́я мо́щи твоя́ в себе́, преподо́бне Анто́ние,/ ученицы́ же твои́, твоему́ житию́ ревну́юще,/ о твое́й па́мяти ра́дующеся, Го́сподеви пою́т:/ сла́ва си́ле Твое́й, Го́споди. И ны́не и при́сно и во ве́ки веко́в. Ами́нь. Богородичен: И́стинную Тя сень свиде́тельствоваша многоразли́чными о́бразы,/ я́ве показу́юще воплоще́ннаго из Тебе́ Еди́наго от Тро́ицы, Пречи́стая,/ неизме́нно, Богома́ти Чи́стая, и мир обно́вльша. Песнь 5 Ирмос: Све́та Пода́телю и веко́в Тво́рче, Го́споди,/ во све́те Твои́х повеле́ний наста́ви нас:/ ра́зве бо Тебе́ ино́го Бо́га не зна́ем. Припев: Преподо́бне о́тче Анто́ние, моли́ Бо́га о на́с. Возше́д на высоту́ доброде́телей, до́лу влеку́щия стра́сти оплева́л еси́,/ сла́дость показу́я спасе́ния,/ о́тче преподо́бне Анто́ние, ста́ду твоему́ проси́ грехо́в проще́ния. Припев: Преподо́бне о́тче Анто́ние, моли́ Бо́га о на́с. Место проше́ния, о́тче, со тща́нием исполня́я,/ храм боголе́пен Бо́жия Ма́тере воздви́гл еси́,/ в не́мже ны́не пра́здничною ра́достию мона́хов мно́жества веселя́тся,/ па́мять твою́ прославля́юще. Сла́ва Отцу́ и Сы́ну и Свято́му Ду́ху. Не забу́ди ста́да твоего́, е́же, му́дре, собра́л еси́/ и в жи́зни сей упасл еси́ благоче́стно,/ и ны́не потщи́ся, о́тче наш Анто́ние, да привлече́ши во огра́ду Небе́сную. И ны́не и при́сно и во ве́ки веко́в. Ами́нь. Богородичен: Упра́ви ум мой, Влады́чице, тружда́ющийся в пучи́не скорбе́й/ и потопля́емый наше́ствием тлетво́рных страсте́й./ Спаси́ к Тебе́ прибега́ющаго,/ ины́я бо по́мощи, Чи́стая, ра́зве Тебе́, не зна́ем. Песнь 6 Ирмос: В бе́здне грехо́вней валя́яся,/ неизсле́дную милосе́рдия Твоего́ призыва́ю бе́здну:/ от тли, Бо́же, мя возведи́. Припев: Преподо́бне о́тче Анто́ние, моли́ Бо́га о на́с. От земны́х к Небе́сным оби́телем пресла́вно возше́л еси́, Богому́дре Анто́ние,/ и та́мо зре́ти неизрече́нных сподо́бился еси́,/ и́хже о́ко не ви́де, и у́хо не слы́ша, и на се́рдце челове́ку не взы́де,/ и́же угото́ва Бог лю́бящим его́. Припев: Преподо́бне о́тче Анто́ние, моли́ Бо́га о на́с. Дрема́ния очи́ма твои́ма отню́д не дал еси́, к Бо́гу все твое́ жела́ние впери́в/ и тому́ невозвра́тно от души́ после́довав,/ нощь жития́ непреткнове́нно преми́нул еси́,/ виде́нии Боже́ственными окормля́емь, блаже́нне Анто́ние,/ в Боже́ственную жизнь всели́лся еси́. Сла́ва Отцу́ и Сы́ну и Свято́му Ду́ху. Вели́каго святи́теля Ники́ты, блаже́нне Анто́ние, благослове́ния сподо́бився,/ духо́внаго нака́зания поуче́ние от него́ восприя́л еси́,/ бу́рею бо греха́ не погрузи́лся еси́, и в ти́хо приста́нище дости́гл еси́ Небе́снаго Ца́рствия,/ и та́мо я́сне наслажда́ешися Боже́ственнаго виде́ния. И ны́не и при́сно и во ве́ки веко́в. Ами́нь. Богородичен: Обетша́вшия ны го́рьким дре́ва пре́жде вкуше́нием/ и па́дшияся поползе́нием, Пречи́стая, обнови́ла еси́,/ Зижди́теля ро́ждши, Сло́во Ипоста́сное, Де́во Ма́ти Влады́чице. Кондак, глас 8 Ри́мское воспита́ние, Вели́кому же Нову́гра́ду благода́тное процвете́ние,/ мно́гими бо труды́ и по́двиги в нем Бо́гу угоди́л еси́./ Сего́ ра́ди чуде́с дарова́ний от Него́ сподо́бился еси́,/ и те́ло твое́ мно́гими ле́ты соблюде́ нетле́нно./ Мы же, сие́ лобыза́юще, ра́достно от души́ вопие́м ти:/ ра́дуйся, о́тче Анто́ние. Икос Ка́ко возмогу́ исчести́ премно́гая твоя́ чудеса́?/ Или́ ка́ко изрещи́ жесто́кое твое́ житие́?/ Не и́мам бо се́рдца чи́ста, я́ко сие́ сра́мными дея́ньми оскверни́х/ и ду́шу мою́ лука́выми по́мыслы осмради́х./ Но оба́че дерза́ю воспева́ти, а́ще ты ми пода́си сло́во, недосто́йному твоему́ рабу́,/ ты бо земны́й А́нгел и Небе́сный челове́к во пло́ти обре́лся еси́, преподо́бне./ На земли́ бо о тле́нных небре́гл еси́/ и Христу́ от души́ после́довал еси́/ боле́зньми, и труды́, и зе́льным воздержа́нием, и злострада́нием, и на земли́ лега́нием./ Посто́м, и бде́нием, и моли́твами о́браз был еси́ твои́м ученико́м/ и сего́ ра́ди сосу́д чист и оби́тель Ду́ха Пресвята́го яви́лся еси́./ Тем тя чтим, ра́дуйся, о́тче Анто́ние. Песнь 7 Ирмос: О́бразу злато́му, на по́ле Деи́ре служи́му,/ трие́ Твои́ о́троцы небрего́ша безбо́жнаго веле́ния,/ посреде́ же огня́ вве́ржени, ороша́еми, поя́ху:/ благослове́н еси́, Бо́же оте́ц на́ших. Припев: Преподо́бне о́тче Анто́ние, моли́ Бо́га о на́с. От гра́да и оте́че́ства твоего́ пресе́льник был еси́,/ к Бо́гу ру́це простира́я, спасе́ние обре́т;/ вода́м же послужи́вшим Тебе́ Бо́жиим манове́нием, Вели́каго Нова́гра́да дости́гл еси́,/ иде́же бя́ше уго́дно Влады́це./ Ему́же ны́не ра́достно пое́ши:/ благослове́н Бог оте́ц на́ших. Припев: Преподо́бне о́тче Анто́ние, моли́ Бо́га о на́с. Вели́каго Нова́гра́да архиере́я, и христолюби́вых люде́й,/ и мона́хов мно́жества ра́дости испо́лнил еси́ и духо́внаго весе́лия/ твои́м ди́вным и чрезъесте́ственным прехожде́нием:/ на ка́мени бо, я́ко на корабли́, прише́л еси́, Спу́тника, о́тче, Христа́ обре́т./ К Нему́же ны́не ра́достно зове́ши:/ благослове́н Бог оте́ц на́ших. Сла́ва Отцу́ и Сы́ну и Свято́му Ду́ху. Лику́ют собра́ния мона́шествующих/ и веселя́тся наро́дов мно́жества Вели́каго Нова́гра́да/ в честне́м преставле́нии Анто́ния всеблаже́ннаго,/ моле́бный соверша́юще пра́здник, ра́достно от души́ вопию́т:/ благослове́н Бог оте́ц на́ших. И ны́не и при́сно и во ве́ки веко́в. Ами́нь. Богородичен: Пещь проо́бразова́шеТвое́ рождество́, Всенепоро́чная:/ о́троки бо не опали́, я́коже ложесна́ Твоя́, огнь непостоя́нный./ Те́мже мо́лим Тя: огня́ ве́чнаго изба́ви рабы́ Твоя́. Песнь 8 Ирмос: В пещь о́гненную ко отроко́м евре́йским снизше́дшаго/ и пла́мень в ро́су прело́жшаго Бо́га,/ по́йте, дела, я́ко Го́спода,/ и превозноси́те во вся ве́ки. Припев: Преподо́бне о́тче Анто́ние, моли́ Бо́га о на́с. Авраа́мский стяжа́в нрав, прему́дре,/ от страны́ Ри́мския пресе́льник был еси́ Вели́каго Нова́гра́да/ и та́мо Бо́га узре́л еси́, обещава́юща Тебе́ воздая́ние бога́тно./ Тем, весели́ся, усе́рдно Христу́ вопие́ши:/ благослови́те, вся дела́, Го́спода и превозноси́те его́ во ве́ки. Припев: Преподо́бне о́тче Анто́ние, моли́ Бо́га о на́с. На земли́ пожи́в, я́ко А́нгел, с пло́тию, я́ко безпло́тен,/ безпло́тныя враги́ под но́ги покори́л еси́,/ чистоту́ стяжа́л еси́ посто́м, и бде́нием, и моли́твами./ Те́мже со А́нгелы на Небесе́х све́тло ликуя, Христу́ вопие́ши:/ благослови́те, вся, Го́спода и превозноси́те его́ во ве́ки. Сла́ва Отцу́ и Сы́ну и Свято́му Ду́ху. Рим оте́чество твое́ пропове́дует, преподо́бне,/ Вели́кий же Но́вгра́д хва́лится тобо́ю, прие́м от Го́спода сокро́вище некра́домое:/ помо́щника бо вели́каго, блаже́нне Анто́ние, тя восприе́м,/ с ли́ки мона́шескими ны́не весели́тся./ Те́мже, па́мять твою́ пра́зднующе, ра́достно вопие́м:/ благослови́те, вся дела́, Го́спода и превозноси́те его́ во ве́ки. И ны́не и при́сно и во ве́ки веко́в. Ами́нь. Богородичен: Вели́кому та́инству рождества́ Твоего́ кто не удиви́тся, Богоро́дице?/ Или́ кий язы́к земны́й или́ ум безпло́тных изрещи́ возмо́жет?/ Па́че бо естества́ и смы́сла, Богоро́дице, Зижди́теля роди́ла еси́. Песнь 9 Ирмос: От Бо́га Бо́га Сло́ва,/ неизрече́нною му́дростию прише́дшаго обнови́ти Ада́ма,/ я́дию в тле́ние па́дшаго лю́те,/ от Святы́я Де́вы неизрече́нно воплоти́вшагося нас ра́ди,/ ве́рнии, еди́ному́дренно пе́сньми велича́ем. Припев: Преподо́бне о́тче Анто́ние, моли́ Бо́га о на́с. Всегда́ к ра́це моще́й твои́х приступа́юще, любе́зно целу́ем и от души́ вопие́м:/ о́тче преподо́бне Анто́ние, моли́ся приле́жно Христу́ Бо́гу за град и лю́ди,/ скорбь нашу на ра́дость премени́ти и грехо́в проще́ние испроси́ти,/ да тя непреста́нно велича́ем. Припев: Преподо́бне о́тче Анто́ние, моли́ Бо́га о на́с. Вели́кому Анто́нию тезоимени́т был еси́, блаже́нне Анто́ние,/ и того́ житию́ подража́л еси́, равноа́нгельно во оби́тели Пресвять́ія Богоро́дицы пожи́л еси́,/ те́мже и ра́вну по́честь от Бо́га сподо́бился еси́ прия́ти,/ с ни́мже ны́не на Небесе́х весели́шися./ И нас помина́й, пра́зднующих па́мять твою́,/ да тя непреста́нно велича́ем. Сла́ва Отцу́ и Сы́ну и Свято́му Ду́ху. Ны́не на Тебе́ чу́до ве́лие ви́дится и у́жаса испо́лнено:/ ка́ко погребе́но вои́стинну мно́го лет соблюде́ся невреди́мо, преподо́бне Анто́ние,/ твое́ многотру́дное те́ло, во гро́бе лежа́щее Бо́жиим мановением?/ Я́коже Сам весть, сла́вящия его́ прославля́ет. И ны́не и при́сно и во ве́ки веко́в. Ами́нь. Богородичен: Исцели́ла еси́ сокруше́ние, Всенепоро́чная, и ве́тхое страда́ние земны́х,/ Бо́га ро́ждши, Царя́ Христа́, поне́сшаго пло́тию неду́ги на́ша./ Те́мже Тя, вси ро́ди, Де́во Влады́чице, ублажа́юще, Богоневе́сто, велича́ем. Светилен Христо́ву ны́не престо́лу предстоя́, преподо́бне,/ с Богома́терию, Пречи́стою Де́вою, моля́ся не преста́й/ побе́ды на ва́рвары христолюби́вому во́инству на́шему дарова́ти,/ и душе́вное спасе́ние, и ми́ру смире́ние, Анто́ние Богому́дре.

Минея, 2 Декабря, Кано́н проро́ка Глас 4 Песнь 1 Ирмос: Воспою́ Тебе́, Го́споди Бо́же мой,/ я́ко изве́л еси́ лю́ди из рабо́ты еги́петския,/ покры́л же еси́ колесни́цы фарао́новы и си́лу. Припев: Святы́й проро́че Аввакýме, моли́ Бо́га о нас. Умудри́ мя, Го́споди Бо́же мой,/ Твоего́ проро́ка Авваку́ма пе́ти Боже́ственнаго/ и благода́тию Твое́ю просвети́, Бла́же, се́рдце мое́. Припев: Святы́й проро́че Аввакýме, моли́ Бо́га о нас. Доко́ле, Го́споди, проро́к глаго́лет, возопию́ к Тебе́, и не услы́шиши?/ Вску́ю же ми показа́л еси́ суде́й нече́стие? Сла́ва Отцу́ и Сы́ну и Свято́му Ду́ху. Честну́ю па́мять твою́, проро́че, соверша́ющим благоче́стно/ твои́ми мольба́ми от бед изба́ви/ и лю́тых обстоя́ний. И ны́не и при́сно и во ве́ки веко́в. Ами́нь. Богородичен: Бог Святы́й яви́ся, внегда́ прибли́житися вре́мени,/ из Тебе́, Богоро́дице, быв Челове́к,/ да спасе́т челове́ка. Песнь 3 Ирмос: Лук си́льных изнемо́же,/ и немощству́ющии препоя́сашася си́лою,/ сего́ ра́ди утверди́ся в Го́споде се́рдце мое́. Припев: Святы́й проро́че Аввакýме, моли́ Бо́га о нас. Воззре́нием к Бо́гу возвыша́емь/ и светодая́нии от него́ просвеща́емь,/ бу́дущих предзре́л еси́, Богоявле́ние, проображе́ние. Припев: Святы́й проро́че Аввакýме, моли́ Бо́га о нас. Вся́ку доброде́тель содержа́л еси́,/ вся́ку же зло́бу от ума́ возненави́дел еси́/ и пра́ведно беззако́ннующих возгнуша́лся еси́, всеблаже́нне. Сла́ва Отцу́ и Сы́ну и Свято́му Ду́ху. Рече́нием Свята́го ду́ха ты, я́ко чист, вве́рился еси́,/ ясне́йше проро́чествуя бу́дущих сбытия́, досточу́дне. И ны́не и при́сно и во ве́ки веко́в. Ами́нь. Богородичен: Гора, доброде́тельми приосене́нная,/ из нея́же Влады́ка рабо́лепно прии́де рабо́ты свободи́ти челове́ки,/ яви́лася еси́, Всечи́стая. Седален, глас 4 На Боже́ственней стра́жи стал еси́, блаже́нне,/ и уразуме́л еси́ Бо́жие прише́ствие проро́ческими очесы́, Богодохнове́нне;/ те́мже и возопи́л еси́, Авваку́ме, со стра́хом:/ Го́споди, услы́шах стра́шное прише́ствие Твое́ и воспева́ю Тя,/ плоть бре́нную от Де́вы понести́ восхоте́вшаго. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: По Бо́зе в Твой, Богоро́дице, прибега́ю, смире́нный, покро́в Боже́ственный,/ припа́дая, молю́ся:/ поми́луй, Пречи́стая, я́ко превзыдо́ша главу́ мою́ греси́,/ и бою́ся, Влады́чице, му́ки, и трепе́щу,/ моле́ние сотвори́, Чи́стая, к Сы́ну Твоему́/ от сих изба́вити мя. Песнь 4 Ирмос: Твоего́ на земли́ явле́ния, Христе́ Бо́же,/ пропове́дая проро́к прише́ствие,/ с весе́лием вопия́ше:/ сла́ва си́ле Твое́й, Го́споди. Припев: Святы́й проро́че Аввакýме, моли́ Бо́га о нас. Светови́ден доброде́телию яви́лся, Богодохнове́нне,/ и Све́т Невече́рний возвести́л еси́,/ ему́же ны́не ве́рою зове́м:/ сла́ва си́ле Твое́й, Го́споди. Припев: Святы́й проро́че Аввакýме, моли́ Бо́га о нас. Всесве́тлая благода́ть ду́ха, оби́льно все́льшися в тя, всему́дре,/ проро́ка соверши́, всем Спа́са возвеща́юща. Сла́ва Отцу́ и Сы́ну и Свято́му Ду́ху. Слу́хом огласи́вся Вседержи́теля,/ благогове́йно убоя́лся еси́, о чу́дне!/ Разуме́в же дела́ сего́, во у́жасе был еси́. И ны́не и при́сно и во ве́ки веко́в. Ами́нь. Богородичен: Киво́т свиде́ния Тя, Де́во, пи́шет,/ Хле́б и́стинно Жи́зни прие́мшую, Чи́стая,/ Сло́во, Отцу́ Соприсносу́щное. Песнь 5 Ирмос: Возсия́вый Све́т,/ и просвети́вый у́тро,/ и показа́вый день,/ сла́ва Тебе́, сла́ва Тебе́,/ Иису́се, Сы́не Бо́жий. Припев: Святы́й проро́че Аввакýме, моли́ Бо́га о нас. Ны́не воздви́жена ви́дит честна́я Це́рковь Со́лнца на Дре́ве,/ я́коже проре́кл еси́, Авваку́ме свяще́ннейше. Припев: Святы́й проро́че Аввакýме, моли́ Бо́га о нас. Впери́в ум, на стра́жи твое́й стал еси́, пребога́те,/ и усмотри́л еси́ Госпо́дне прише́ствие. Сла́ва Отцу́ и Сы́ну и Свято́му Ду́ху. Велегла́сно, му́дре, о Бо́зе Спа́се возра́дуюся, – возопи́л еси́, –/ и возвеселю́ся, Авваку́ме всеблаже́нне. И ны́не и при́сно и во ве́ки веко́в. Ами́нь. Богородичен: Отягче́н плени́цами мно́гих мои́х прегреше́ний, к Тебе́ прибега́ю,/ спаси́ мя, Влады́чице Богоро́дице,/ ве́рных похвало́. Песнь 6 Ирмос: Возопи́, прообразу́я погребе́ние тридне́вное,/ проро́к Ио́на, в ки́те моля́ся:/ от тли изба́ви мя, Иису́се, Царю́ сил. Припев: Святы́й проро́че Аввакýме, моли́ Бо́га о нас. От ю́га Бог, вопло́щся, прии́де, я́ко проре́кл еси́,/ от него́ све́тло просвеща́емь, Авваку́ме треблаже́нне,/ и мир све́том уясни́. Припев: Святы́й проро́че Аввакýме, моли́ Бо́га о нас. Озари́, Бо́же, ду́ши пою́щих Тя/ моли́твами Авваку́ма честна́го и Богому́драго,/ и́же вдохнове́нием Боже́ственным просвеще́й того́ помышле́ние. Сла́ва Отцу́ и Сы́ну и Свято́му Ду́ху. Веща́ние Твое́ и глаго́л Боже́ственных си́ла, Богоглаго́ливе,/ про́йде вся концы́,/ Сло́ва Боже́ственное прише́ствие нам проро́чествуя. И ны́не и при́сно и во ве́ки веко́в. Ами́нь. Богородичен: Су́щаго Отцу́ Сы́на Единосу́щна/ и безнача́льно ро́ждшему я́ве сразуме́ваемаго,/ в после́док плоть бы́вша,/ Де́во, родила́ еси́. Кондак, глас 8 Возгласи́вый вселе́нней от ю́га прише́ствие Бо́жие от Де́вы, Авваку́ме Богоглаго́ливе,/ и на Боже́ственней стра́жи предстоя́нием/ слы́шания от светоно́сна А́нгела/ Христо́во Воскресе́ние возвести́л еси́ ми́ру,/ сего́ ра́ди ве́село зове́м ти:/ ра́дуйся, проро́ков све́тлая добро́то. Песнь 7 Ирмос: Авраа́мстии иногда́ в Вавило́не о́троцы/ пе́щный пла́мень попра́ша,/ пе́сньми взыва́юще:/ оте́ц на́ших Бо́же, благослове́н еси́. Припев: Святы́й проро́че Аввакýме, моли́ Бо́га о нас. Науча́емь, блаже́нне, па́че сло́ва зна́нию/ и проро́чествуя Многосве́тлую Свещу́, взыва́еши ны́не:/ оте́ц на́ших Бо́же, благослове́н еси́. Сла́ва Отцу́ и Сы́ну и Свято́му Ду́ху. Сия́ния Трисве́тлаго и Невече́рния Сла́вы прича́стия тебе́ даде́ Христо́с,/ его́же просла́вил еси́, вопия́:/ оте́ц на́ших Бо́же, благослове́н еси́. И ны́не и при́сно и во ве́ки веко́в. Ами́нь. Богородичен: В ро́дех родо́в Ма́ти Де́ва яви́лася еси́, Благослове́нная,/ па́че ума́ Сло́во ро́ждши воплоще́нное,/ те́мже, Чи́стая, воспева́ем Тя. Песнь 8 Ирмос: Вся дела́ Бо́жия и вся тварь,/ благослови́те Го́спода,/ преподо́бнии и смире́ннии се́рдцем, по́йте его́/ и превозноси́те во вся ве́ки. Припев: Святы́й проро́че Аввакýме, моли́ Бо́га о нас. Просвеще́н Све́том Трисо́лнечным,/ сподо́бился еси́, всеизря́дне, Боже́ственных и преесте́ственных виде́ний, зовы́й:/ превозно́си́те Бо́га во ве́ки вся. Припев: Святы́й проро́че Аввакýме, моли́ Бо́га о нас. Пия́ от пото́ка сла́дости и невеще́ственнаго виде́ния исполня́емь,/ сла́вы же проро́ческия и председа́тельства причаща́яся,/ ра́дуяся, воспева́еши Бо́га во ве́ки. Сла́ва Отцу́ и Сы́ну и Свято́му Ду́ху. О, Боже́ственныя и честны́я проро́ка Авваку́ма красоты́!/ сей бо, со А́нгельскими лику́я си́лами,/ ра́дуяся, Христа́ воспева́ет во ве́ки. И ны́не и при́сно и во ве́ки веко́в. Ами́нь. Богородичен: Ма́ти яви́лася еси́ и́стинно пре́жде век из Отца́ Возсия́вшаго,/ еди́на бо святе́йши всех была́ еси́,/ Тя превозно́си́м, Чи́стую, во ве́ки. Песнь 9 Ирмос: Рождество́ Твое́ нетле́нно яви́ся:/ Бог из боку́ Твое́ю про́йде,/ я́ко Плотоно́сец яви́ся на земли́/ и с челове́ки поживе́./ Тя, Богоро́дице, тем вси велича́ем. Припев: Святы́й проро́че Аввакýме, моли́ Бо́га о нас. Блиста́ет па́мять твоя́, проро́че,/ све́тлу испуща́ющи зарю́ твоего́ Богоглаго́лания/ и твоего́ та́иноуче́ния и проро́чества/ тя чту́щим, Авваку́ме блаже́ннейше. Припев: Святы́й проро́че Аввакýме, моли́ Бо́га о нас. Пропове́дав Го́спода Сла́вы и Сего́ проре́к прише́ствие,/ от Святы́я Де́вы проявле́нно бы́вшее, и показа́нное ви́дя,/ весели́ся, Авваку́ме Богоблаже́нне. Сла́ва Отцу́ и Сы́ну и Свято́му Ду́ху. Ра́дуются вси проро́цы,/ в ра́достный твой день веселя́щеся, Богому́дре,/ ра́дости твоея́ причаща́ющеся и Боже́ственныя сла́вы,/ с ни́миже моля́ся, пою́щия тя спаса́й. И ны́не и при́сно и во ве́ки веко́в. Ами́нь. Богородичен: Кроплением, Чи́стая, щедро́т Твои́х/ души́ моея́ омы́й скве́рну/ и то́ки слез источа́ти мне непреста́нно сотвори́, Отрокови́це,/ страсте́й мои́х пото́ки уставля́ющи.

Пе́снь 1 Ирмо́с: Пои́м Го́сподеви, прове́дшему лю́ди Своя́ сквозе́ Чермно́е мо́ре, я́ко Еди́н сла́вно просла́вися. Бо́жию Ма́терь воспои́м, ве́рнии, моле́ния к Не́й принося́ще и чудотво́рному Ея́ о́бразу покланя́ющеся ве́рою и любо́вию. О, Влады́чице, убо́гия хвалы́ на́шея не отве́ржи и грехо́вныя нищеты́ не возгнуша́йся, но припа́дающия лю́ди приими́, я́ко Блага́я, Блага́го же Роди́тельница. Гора́ Поча́евская, пре́жде те́мная и безве́стная, явле́нием Твои́м, Влады́чице, Сина́ю уподо́бися: та́мо бо о́гнь, купину́ не опаля́яй, Тебе́ прообразова́ше, зде́ же Сама́, во огни́ зри́мая, христиа́ном яви́лася еси́. О́чи ва́ши блаже́ни, о, па́стырие о́вчии, Влады́чицу на горе́ Поча́евстей узре́вшии и те́м ча́сти вифлее́мских па́стырей сподо́бльшиися. Те́мже у́бо блаже́ни су́ть христиа́не, сего́ не ви́девшии, но ве́рою ме́сту тому́ покланя́ющиися. Ро́ди росси́йстии и от вся́каго язы́ка ве́рнии, соше́дшеся к ме́сту явле́ния Влады́чицы, чудотво́рному Ея́ о́бразу поклони́мся и о свои́х согреше́ниих воспла́чем, о милосе́рдии же Госпо́дни возра́дуемся. О́гненный сто́лп, Влады́чице, Тебе́ и́ноком и па́стырем явля́ше, на́м же о́гнь ре́вности вложи́ в ду́шу, е́же ве́ру и́стинную храни́ти, от вся́каго же глаго́ла ерети́ческаго отвраща́тися и грехо́вную отрева́ти пре́лесть от серде́ц на́ших. Пе́снь 3 Ирмо́с: Ты́ еси́ утвержде́ние притека́ющих к Тебе́, Го́споди, Ты́ еси́ Све́т омраче́нных, и пое́т Тя́ ду́х мо́й. Да́р свяще́нный, страннопри́имства мзду́, прия́т христолюби́вая А́нна ико́ну Твою́, Влады́чице, руко́ю святи́теля, от нея́же исцеле́ние бра́ту своему́ сле́пу рожде́ну ви́девши, сию́ во оби́тель Поча́евскую на о́бщую по́льзу да́рствует. Ико́ну Поча́евскую Пречи́стыя Богоро́дицы лобыза́им, ве́рнии, и, покая́ние о гресе́х на́ших прине́сше, здра́вия, и от ну́жд избавле́ния, и во все́х благи́х начина́ниих по́мощи от Влады́чицы воспро́сим. Цве́т прекра́сный на дре́ве благосенноли́ственнем яви́ся чудотво́рная ико́на Богоро́дицы на святе́й горе́ Поча́евстей: проси́те, ве́рнии, и да́стся ва́м, по глаго́лу Христо́ву, милосе́рдия да́р, житию́ ва́шему потре́бный. Е́же вре́менному житию́ потре́бно быва́ет, о, бра́тие, вма́ле поле́зно е́сть, и сия́ да́рствует на́м Госпо́дь, по моли́тве Ма́тере Своея́. Оба́че терпя́щия па́че си́х блажи́т и ве́чною ра́достию на Небеси́ награжда́ет, ю́же на́м дарова́ти, Влады́чице, помоли́ся. Поча́евская це́рковь, чудотво́рный сле́д стопы́ Твоея́, Богоро́дице, покрыва́ющая и ико́ну Твою́ храня́щая, а́ки Небе́сный вхо́д ве́рным явля́ется, в не́йже моля́щимся помози́, о, Влады́чице, земна́я попече́ния отложи́ти, и еди́наго, е́же на потре́бу, жела́ти, и в моли́тве те́пле проси́ти. О́ле безу́мия иконобо́рцев, и́же ико́ну Твою́, Влады́чице, от Поча́евския оби́тели плени́ша и, поруга́нию предаю́ще, ка́ру Бо́жию а́бие на ся́ наведо́ша, беснова́нием же обличе́нней бы́вшей жене́, у́жасом мно́гим содержа́хуся. Седа́лен Река́, оби́льно теку́щая, поко́ю не навы́че, ниже́ преста́ти от тече́ния во́днаго возмо́жет, та́ко и моле́ния Твоя́, Влады́чице, о лю́дех при́сно возноси́мая, не престаю́т, но пра́ведныя от паде́ний храня́т, па́дшия же на покая́ние возставля́ют. На́м же, Твоему́ о́бразу покланя́ющимся, сугу́бую умиле́ния благода́ть да́руют и вопи́ти Тебе́ со Арха́нгелом и Елисаве́тою воздвиза́ют: благослове́на Ты́ еси́ в жена́х, и Твоего́ чре́ва Пло́д благослове́н е́сть. Пе́снь 4 Ирмо́с: Услы́шах, Го́споди, смотре́ния Твоего́ та́инство, разуме́х дела́ Твоя́ и просла́вих Твое́ Божество́. Часу́ и дни́ прише́дшу возвраще́ния ико́ны Твоея́ во оби́тель Поча́евскую от иконобо́рцев, сию́ плени́вших, возра́довася преподо́бный И́ов со бра́тиею, ту́ю лобыза́юще; ны́не же на вся́к де́нь и ча́с приходя́щии во оби́тель Твою́ христиа́не ту́юже ра́дость и ве́ру пред не́ю свиде́тельствуют. А́з, гре́шный, ле́ностию порабоще́н, о, Влады́чице, блага́го Бо́га при́сно грехи́ свои́ми прогневля́ю, ниже́ о́чи свои́ возвести́ к Нему́ дерза́ю, но ко Твоему́ припа́даю чудотво́рному о́бразу, пред ни́мже ка́ющиися проще́ние от Тебе́ прия́ша, и вопию́: Го́спода, Сы́на Твоего́, уми́лостиви и мне́ предста́тельством Твои́м. Еда́ обря́щется толи́ко окамене́нный се́рдцем и безу́мен му́ж, и́же не умили́тся, в це́ркви Поча́евстей предстоя́й и святы́ням Твои́м, Влады́чице, покланя́яйся, чудеса́ же, от ни́х бы́вшая, помышля́яй и ве́рою моля́щияся ви́дяй наро́ды? Ви́дени бы́ша мно́зи, исцеле́ннии пред ико́ною Твое́ю, Влады́чице, слепи́и и хро́мии, слы́шани бы́ша глуси́и и неми́и, возглаго́лавшии: та́мо бе́сныя, во́ды от стопы́ Твоея́ пию́ще, от бесо́в свобожда́хуся. Те́мже и мою́ приими́ моли́тву, е́же от бесо́вских страсте́й свободи́тися и све́т спасе́ния Христо́ва вы́ну созерца́ти. Сы́й во узи́лищи земли́ ту́ркския плене́н, и́нок Твое́ю си́лою, Влады́чице, на возду́се в го́ру Поча́евскую принесе́ся, у́бо и мене́, во у́зах страсте́й су́ща, ны́не, в де́нь сла́вы Твоея́, от те́х свободи́ и ли́ку ве́рою и любо́вию пою́щих Тя́ сопричти́. Ко Твоему́ чудотво́рному о́бразу прите́к, Влады́чице, и водо́ю от сле́да стопы́ Твоея́ омы́вся, сля́ченный неду́гом ю́ноша а́бие исцеле́, слепа́я же отрокови́ца, зде́ принесе́нная, прозре́, и предуме́рый младе́нец воскре́се, у́бо и мене́, припа́дающа, от смертоно́снаго уны́ния воздви́гни и душе́вныя мои́ отве́рзи о́чи. Пе́снь 5 Ирмо́с: У́тренююще, вопие́м Ти́: Го́споди, спаси́ ны́, Ты́ бо еси́ Бо́г на́ш, ра́зве Тебе́, ино́го не ве́мы. А́ще и все́х грешне́йший е́смь от те́м люде́й, ко Твое́й, Влады́чице, ико́не припа́дающих, а́ще и вси́ ве́рою свое́ю мя́ превзыдо́ша, оба́че и мене́, окая́ннаго, не отри́ни от Твоего́ заступле́ния, ми́лостей бе́здну лю́дем во оби́тели Твое́й яви́вшая. Я́коже ко все́м призыва́ющим Тя́ ми́лостива явля́ешися, издале́ча ико́не Твое́й мы́сленно покланя́ющияся слы́шиши, и та́ко о́трочища не́коего, по моли́тве пра́бабы его́, воскреси́ла еси́, и ны́не, о, Влады́чице, ко все́м, от конца́ земли́ Тебе́ моля́щимся, благоуве́тлива бу́ди. Се́, Влады́чице, люде́й мно́гая мно́жества, на святу́ю го́ру Твою́ притека́юще, ми́лости Твоея́ получи́ти и́щут, ве́рнии вку́пе с малове́рными, пра́веднии и гре́шнии, с ни́миже и Це́ркви Святе́й чужди́и примета́ются, все́х у́бо поми́луй, все́м све́т и́стинный ве́ры яви́ во спасе́ние. Почто́ а́з, гре́шный, Пречи́стей Богома́тери покланя́яся и испра́вити житие́ свое́ обещава́я, па́ки на пре́жняя прегреше́ния обраща́юся? Увы́ мне́! Еда́ зле́йший е́смь неве́рных ага́рян, и́же на горе́ Поча́евстей покая́ние прине́сше, до́брии христиа́не соде́яшася? А́ще и лю́ти бы́ша ага́ряне ту́ркстии, святу́ю оби́тель Твою́, Влады́чице, осажда́юще, а́ще и стре́лы в Тя́, на Небеси́ я́вльшуюся, пуща́ти дерзну́ша, но си́м на главы́ и́х возвраща́ющимся, се́рдцем сокруше́нным пока́яшася и си́лу Твою́ испове́даша. Со И́овом преподо́бным на Небесе́х Тебе́ зря́ще, Влады́чице, ага́ряном смяте́нным и бежа́щим, и́ноцы Поча́евстии пе́снь воспе́ша Ти́ досто́йную, со уго́дником Тебе́ благодаря́ще те́пле. Пе́снь 6 Ирмо́с: Ри́зу мне́ пода́ждь све́тлу, одея́йся све́том, я́ко ри́зою, Многоми́лостиве Христе́ Бо́же на́ш. И́же от ага́рян Тя́, Влады́чице, на Небесе́х узре́ша, дру́г дру́га вопроша́ху: что́ е́сть виде́ние сие́ ужа́сное? И о́ви, смяте́ни бы́вше, дру́г дру́га убива́ху, о́ви же, ве́ру в се́рдце свое́ прие́мше, Креще́ния тре́боваху, по си́х же и́ноцы бы́ша чрез все́ житие́, си́лу Твою́ воспева́юще. И́ноки и мирски́я лю́ди, Твоему́ заступле́нию ве́рующия, Влады́чице, обогати́ духо́вными дарова́ньми, малове́рныя же просвети́ и озари́, я́коже тогда́ неве́девшия Христа́ ага́ряны в позна́ние Его́ привела́ еси́. Сохрани́ша па́мять Твоего́ заступле́ния, Влады́чице, ага́ряне, в зе́млю ту́ркскую возвра́щшеся, и ча́дом свои́м о явле́нии Твое́м па́мять преда́ша. Кольми́ па́че на́м, христиа́ном, чудеса́ Твоя́, на горе́ Поча́евстей бы́вшая, па́мятовати подоба́ет? О́бразу Твоему́ мы́сленно припа́дая, во глубо́кий кла́дязь впады́й му́ж от несумне́нныя сме́рти спасе́ся и, невреди́м из глубины́ подъя́т бы́в, Твое́ пропове́даше милосе́рдие. Хоте́л бы́х и а́з, Влады́чице, ве́ре спасе́нных Тобо́ю люде́й подража́ти, хоте́л бы́х и а́з Твое́ заступле́ние в житии́ мое́м улучи́ти, но за мно́жество прегреше́ний мои́х оскудева́ет моя́ ве́ра. Сию́ у́бо укрепи́ во мне́, Влады́чице, вопию́щем: ве́рую, помози́ моему́ неве́рию. Ро́в прельще́ний лати́нских чрез сто́ и де́вять ле́т поглоти́ оби́тель Поча́евскую, но Твои́м, Богоро́дице, заступле́нием па́ки та́я к высоте́ Правосла́вия изъе́млется и ла́вра имену́ется. Сию́ у́бо в Правосла́вней ве́ре непоколеби́му соблюди́ да́же до часа́ втора́го прише́ствия Сы́на Твоего́ и Бо́га. Конда́к, гла́с 1 Исто́чник исцеле́ний и ве́ры Правосла́вныя утвержде́ние Поча́евская Твоя́ ико́на, Богоро́дице, яви́ся, те́мже и на́с, к не́й притека́ющих, от бе́д и искуше́ний свободи́, ла́вру Твою́ невреди́му сохрани́, Правосла́вие во о́крест стоя́щих страна́х утверди́ и грехи́ разреши́ моли́твенник Твои́х: ели́ка бо хо́щеши, мо́жеши. И́кос Воста́ните от гро́б ва́ших, и́ноцы поча́евстии, и рцы́те на́м: коли́ких чуде́с Пресвяты́я Богоро́дицы бы́сте зри́тели и свиде́тели, ка́ко ме́ртвии пред Тоя́ ико́ною воскреса́ху, ка́ко де́мони от му́чимых люде́й отбега́ху, ка́ко неду́жнии та́мо исцеля́хуся, ка́ко неве́рнии ве́роваху, ка́ко хули́тели та́мо ка́яхуся? Сия́ бо ди́вная быва́ху челове́ком и А́нгелом. Мы́ же, вся́ сия́ бы́вшая и додне́сь быва́емая воспомина́юще, со стра́хом и умиле́нием ко святе́й ико́не Пречи́стыя Богома́тере моли́твенно припа́даем и глаго́лем си́це: о, ми́лостей бе́здно и благодея́ний сокро́вище, грехи́ разреши́ моли́твенник Твои́х: ели́ка бо хо́щеши, мо́жеши. Пе́снь 7 Ирмо́с: От Иуде́и доше́дше, о́троцы в Вавило́не иногда́ ве́рою Тро́ическою пла́мень пе́щный попра́ша, пою́ще: отце́в Бо́же, благослове́н еси́. Ака́фистово пе́ние возноша́ху пред ико́ною Твое́ю, Пречи́стая, правосла́внии лю́дие, егда́ оби́тель Поча́евская Це́ркви возвраще́на бы́сть, те́м у́бо оставле́ние грехо́в испроси́, на́м же, моля́щим Ти́ ся́, на враги́ посо́бствуй. Наро́да правосла́внаго ду́ши упоко́ити моли́ся, Влады́чице, вку́пе же и все́х, о возвраще́нии ла́вры Твоея́ из ерети́ческаго пле́на потруди́вшихся, на́м же, к Тебе́ прибега́ющим, пода́ждь единомы́слие и ми́р. И ны́не наро́ду на́шему ми́лостива бу́ди, Влады́чице, и ми́р пода́ждь, покаря́ющи противобо́рствующия враги́ и супоста́ты. Пред Твое́ю ико́ною, Богоро́дице, правосла́вным христиа́ном возвраще́нною, па́ки исцеле́ния приима́ти ве́рнии навыко́ша: не у́ исте́кшу бо еди́ному ле́ту от того́ дне́, уже́ четы́рми чудесы́ Це́рковь Христо́ву просла́вила еси́ во утеше́ние лю́дем. Рая́ Небе́снаго сподо́би ны́, Влады́чице, святу́ю ла́вру Твою́ а́ки земны́й ра́й почита́ющия и Твоя́ ми́лости те́плою ве́рою воспева́ющия. Авраа́м Госпо́день де́нь издале́ча ви́де, и ра́довася, и ча́янием того́ дне́ живя́ше; узре́вши же издале́ча Твою́ Поча́евскую це́рковь не́кая хрома́я жена́ и упова́нием Твоея́ по́мощи испо́лнившися, а́бие исцеле́ и, а́ки еле́нь, воспряну́вши, ко оби́тели Твое́й поспеша́ше. Пе́снь 8 Ирмо́с: Царя́ Небе́снаго, Его́же пою́т во́и А́нгельстии, хвали́те и превозноси́те во вся́ ве́ки. Во гра́д Ки́ев от преде́л ура́льских прише́дшей жене́ бе́сней яви́ся Богоро́дица со преподо́бным И́овом и на го́ру Поча́евскую ту́ю призыва́ше, иде́же здра́вие е́й пода́вши, сла́вити научи́ Свое́ заступле́ние. Омы́в очеса́ свои́ в купе́ли Силоа́мстей, прие́млет слепорожде́нный зре́ние Христо́вым веле́нием; омы́вшися же от воды́ сто́пныя в це́ркви Поча́евстей, исцеле́ слепа́я отрокови́ца. У́бо и на́ше стра́стное ослепле́ние исцели́, Влады́чице, водо́ю от сле́да стопы́ Твоея́ с ве́рою кропя́щихся. Сию́ отрокови́цу исцеле́ну узре́вши, пра́баба ея́ а́бие прельще́ния уни́тскаго отрица́ется и Правосла́вную испове́дует ве́ру, в не́йже утверди́ и ны́, рабы́ Твоя́, о, Влады́чице. Лю́дие Бо́жии, на го́ру Твою́, Влады́чице, притека́ющии, обе́ты по́двиг благочести́вых та́мо прино́сят, я́же де́лы испо́лнити помози́ и́м, Богоро́дице. А́нгели на Небеси́ Твою́ сла́ву непреста́нно воспева́ют, Богоро́дице, на земли́ же челове́цы ко Твоему́ заступле́нию притека́ти не престаю́т, и́хже воздыха́ния не отри́ни, я́ко Блага́я, па́че же на ме́сте явле́ния Твоего́ те́х моле́ния услы́ши. Ве́лия Твоего́ заступле́ния си́ла, о, Влады́чице, его́же ра́ди Сы́н Тво́й и Бо́г на́ш гре́шным проще́ние да́рует, подвиза́ющимся же кре́пость и уныва́ющим утеше́ние. Пе́снь 9 Ирмо́с: Вои́стину Богоро́дицу, Тя́ испове́дуем, спасе́ннии Тобо́ю, Де́во Чи́стая, с Безпло́тными ли́ки Тя́ велича́юще. Не то́чию еди́н по еди́ному подвиза́ются христиа́не на го́ру Поча́евскую, но и от сугу́бо свяще́ннаго гра́да Ки́ева совоку́пльшеся ве́рнии, по́мощь от сея́ чудотво́рныя ико́ны в годи́ну бы́вшаго губи́тельства испове́даша и, подо́бие ея́ написа́вше, во святу́ю ла́вру сие́ принесо́ша. У́бо и во гряду́щая ле́та спаса́й на́с, Влады́чице, от губи́тельства и междоусо́бныя бра́ни, от гла́да же и о́гненнаго запале́ния, зане́ оскуде́вшей кре́пости ду́ш на́ших, уны́ния исполня́емся в беда́х, неразу́миви су́ще. Ю́жский преде́л земли́ росси́йския Поча́евскую ико́ну Влады́чицы и святу́ю ла́вру Ея́, я́ко диади́му ца́рствия, храни́т и си́ми хва́лится; оба́че же и Се́верский, во гра́де тобо́льстем, чудотво́рное подо́бие тоя́жде Поча́евския ико́ны моли́твою и́ноков себе́ испроси́. Ру́сскую зе́млю, о, Влады́чице, я́ко безпреде́льное горы́ Твоея́ подно́жие, от бе́д и искуше́ний свободи́ и во благоче́стии ту́ю сохрани́ до сконча́ния ве́ка. Уже́ несты́дно подня́вшимся ху́льным гла́сом посреде́ христиа́нскаго жи́тельства, не оста́ви, Богоро́дице, ра́б Твои́х в те́х прельще́ния впа́сти, но ве́ру несумне́нну возгрева́й в сердца́х на́ших вы́ну. Се́ вре́мя заступле́ния Пресвяты́я Богоро́дицы прии́де, умно́жившимся собла́зном, се́ вре́мя на́ших к Не́й воздыха́ний. О, бра́тие! Рце́м у́бо от всего́ се́рдца на́шего: Влады́чице! Помози́ лю́дем Твои́м.

Минея, 24 Июня, Други́й кано́н, творе́ние Андре́ево Глас 4 Песнь 1 Ирмос: Наста́вльшему дре́вле Изра́иля,/ бежа́щаго от рабо́ты фарао́новы,/ и в пусты́ни пита́вшему,/ пои́м Изба́вителю, Бо́гу на́шему,/ я́ко просла́вися. Припев: Святы́й вели́кий Иоа́нне, Предте́че Госпо́день, моли́ Бо́га о на́с. Молча́ние ста́рчо зако́ннаго писа́ния о́браз но́сит та́ин./ И́бо, прише́дши благода́ти, Моисе́й умолча́:/ подоба́ше бо, прему́дрости сокро́вищу я́вльшуся, всем молча́ти. Припев: Святы́й вели́кий Иоа́нне, Предте́че Госпо́день, моли́ Бо́га о на́с. В це́ркви кадя́щу свяще́ннику, А́нгел предста́ свы́ше, вопия́:/ стра́нна рождества́ благове́стие, приидо́х, тебе́ нося́, ста́рче:/ прии́меши бо от непло́дове рожде́ния плод, Крести́теля Христо́ва. Припев: Святы́й вели́кий Иоа́нне, Предте́че Госпо́день, моли́ Бо́га о на́с. Что́ удиви́лся еси, ста́рче?/ Что́, не ве́руя, стои́ши, глаго́лющему тебе́ сия́?/ А́нгел бо есть веща́яй, а́ще и о́браз но́сит челове́ч./ Бу́ди нем у́бо на вре́мя, да́же до рождества́ Сло́ва гла́са. Припев: Святы́й вели́кий Иоа́нне, Предте́че Госпо́день, моли́ Бо́га о на́с. И́же молча́ние Заха́риино, молча́ния положи́в о́браз зако́ну напи́санному/ и тем показа́в ми покая́ния пропове́дника зову́ща,/ гла́са вопию́щаго подава́ет, непло́дствующей сы́на. Сла́ва Отцу́ и Сы́ну и Свято́му Ду́ху. О, пресла́вных веще́й Христо́ва Предте́чи!/ И́же, пре́жде пеле́н позна́в плени́цы на́ша Разре́шшаго и наро́ды Освя́щша,/ днесь, от Елисаве́ти роди́вся, разреша́ет отцу́ глас. И ны́не и при́сно и во ве́ки веко́в. Ами́нь. Богородичен: Тя, Бо́жие вмести́лище и мы́сленную ле́ствицу, е́юже сни́де Бог/ и, вообра́жся, на́ше у́бо существо́ на Небеса́ возведе́,/ вси я́ко спасе́нию Хода́таицу восхваля́ем. Песнь 3 Ирмос: Утвержда́яй гром и созида́яй дух,/ утверди́ мене́, Го́споди,/ да Тя пою́ и́стинно/ и творю́ во́лю Твою́,/ я́ко несть свят; я́ко Ты, Бо́же наш. Припев: Святы́й вели́кий Иоа́нне, Предте́че Госпо́день, моли́ Бо́га о на́с. Елисаве́ть, пре́жде непло́ды су́щи, Христе́, Це́рковь Твою́ прообража́ше, я́же от язы́к,/ и, ро́ждши пресла́вно, па́ки показу́ет многоча́дну/ непло́ды я́вльшуюся иногда́. Припев: Святы́й вели́кий Иоа́нне, Предте́че Госпо́день, моли́ Бо́га о на́с. Пути́ у́бо испра́вь Госпо́дни, стезю́ проугото́вав,/ покая́ния же плоды́ показа́л еси́ челове́ком и жи́зненному научи́л еси́ пути́,/ проро́че и пропове́дниче Христо́в. Сла́ва Отцу́ и Сы́ну и Свято́му Ду́ху. Елисаве́ть, днесь игра́ющи, но́сит тя, Предте́че,/ на объя́тиях состаре́вшихся и вопие́т, хва́лящися:/ несть свят, я́коже Ты, Го́споди Бо́же наш. И ны́не и при́сно и во ве́ки веко́в. Ами́нь. Богородичен: Пра́отцев разреши́ла еси́ печа́ль, ра́дость нам ро́ждшая, Животода́вца и Изба́вителя,/ Его́же, Пречи́стая Богоро́дице, приле́жно моли́ спасти́ся ста́ду Твоему́. Седален, глас 8 Заха́риин глас све́тло разреши́ Словесе́ глас ро́ждься, Предте́ча,/ и зако́на непло́дие всем показа́, зовы́й:/ пока́йтеся, су́щии на земли́, се бо прии́де и яви́ся Иису́с,/ вся хотя́ изба́вити от пе́рвыя кля́твы, просвеща́я Креще́нием./ Вои́стинну чу́до пресла́вно! Песнь 4 Ирмос: Услы́шах сла́вное смотре́ние Твое́, Христе́ Бо́же,/ я́ко роди́лся еси́ от Де́вы,/ да от ле́сти изба́виши зову́щия:/ сла́ва си́ле Твое́й, Го́споди. Припев: Святы́й вели́кий Иоа́нне, Предте́че Госпо́день, моли́ Бо́га о на́с. Покая́ние отве́рзеся твои́м рождество́м, Предте́че и пропове́дниче./ Ты бо еди́н пропове́дал еси́, взыва́я:/ пока́йтеся, Ца́рство Небе́сное прибли́жися. Припев: Святы́й вели́кий Иоа́нне, Предте́че Госпо́день, моли́ Бо́га о на́с. Де́вство утвержда́ется и целому́дрие торжеству́ет,/ пусты́ня весели́тся и мир пра́зднует рождество́м твои́м, Предте́че. Сла́ва Отцу́ и Сы́ну и Свято́му Ду́ху. Елисаве́ть ра́дуется, и Заха́рия веща́ет па́ки:/ о́ба у́бо обновля́ются по ста́рости Иоа́нновым а́бие гла́сом и просвеща́ются. И ны́не и при́сно и во ве́ки веко́в. Ами́нь. Богородичен: Неопали́мую купину́ Тя законополо́жник зря́ще дре́вле,/ Дании́л же го́ру святу́ю смотря́ше, еди́на Ма́ти Де́во, Влады́чице. Песнь 5 Ирмос: Возсия́й ми, Го́споди, свет повеле́ний Твои́х,/ я́ко к Тебе́ дух мой у́тренюет и пое́т Тя:/ Ты бо еси́ Бог наш,/ и к Тебе́ прибега́ю, Царю́ ми́ра. Припев: Святы́й вели́кий Иоа́нне, Предте́че Госпо́день, моли́ Бо́га о на́с. Звезду́ проугото́вал еси́, Пра́вды Со́лнце,/ Крести́теля Твоего́ Иоа́нна,/ от обеща́ния рожде́ннаго днесь и ро́ждшаго разре́шша глас. Припев: Святы́й вели́кий Иоа́нне, Предте́че Госпо́день, моли́ Бо́га о на́с. Не веща́й, не сопроти́в глаго́ли, ста́рче освяще́нне,/ Гаврии́л бо глаго́лет ти, пе́рвый во Арха́нгелех,/ Бо́жия та́инства и е́же к нам Того́ сни́тие сказу́я. Припев: Святы́й вели́кий Иоа́нне, Предте́че Госпо́день, моли́ Бо́га о на́с. Ста́рче, не неве́руй, Бог бо обещава́ет,/ я́ко в ста́рости роди́ши сы́на, его́же о рождестве́ мно́зи возра́дуются,/ той бо прии́дет си́лою Илиино́ю. Сла́ва Отцу́ и Сы́ну и Свято́му Ду́ху. Проро́че, пропове́дниче, Предте́че, е́же от непло́ды прозябе́ние,/ возвести́телю покая́ния, пустынное овча́, Све́та свети́льниче,/ о всех моли́, чту́щих тя ве́рно. И ны́не и при́сно и во ве́ки веко́в. Ами́нь. Богородичен: Я́ко дверь непроходи́му, и купину́ неопали́му,/ и несеко́му го́ру, от нея́же ка́мень усече́ся,/ И́же из Тебе́ воплоща́емый, воспева́ем, Влады́чице, Ма́ти всех Творца́. Песнь 6 Ирмос: Бу́ря мя помышле́ний, пости́гши,/ во глубину́ низвлачи́т мя безме́рных грехо́в,/ но Ты, Упра́вителю Благи́й,/ предвари́в, упра́ви,/ я́ко проро́ка, и спаси́ мя. Припев: Святы́й вели́кий Иоа́нне, Предте́че Госпо́день, моли́ Бо́га о на́с. Днесь пусты́нный граждани́н Иоа́нн ражда́ется,/ покая́ния пропове́дник и благода́ти свиде́тель и́стинен,/ Предте́ча Сло́ва и Све́ту предсия́ющая звезда́. Припев: Святы́й вели́кий Иоа́нне, Предте́че Госпо́день, моли́ Бо́га о на́с. Днесь секи́ра, искова́вшися, посече́ние предлагает душа́м непло́дия,/ и насажда́ет плоды́ доброде́тельныя,/ преды́дет тве́рдо в рождестве́ твое́м, Предте́че. Припев: Святы́й вели́кий Иоа́нне, Предте́че Госпо́день, моли́ Бо́га о на́с. Возра́довася Иорда́н пресла́вно и игра́ет, науча́яся,/ Иоа́нна слы́ша, от непло́дна рожде́на чре́ва,/ мо́ре же лику́ет водны́ми игра́нии. Сла́ва Отцу́ и Сы́ну и Свято́му Ду́ху. Свети́льник, Све́та прише́ствие предте́к,/ пропове́да А́гнца Бо́жия, Спа́са,/ свет возсия́вшаго земли́, естества́ же всего́ духо́вне преджре́на. И ны́не и при́сно и во ве́ки веко́в. Ами́нь. Богородичен: Бе́здну ми́лости ро́ждшая,/ страсте́й мои́х бе́здну пучи́ною щедро́т Твои́х потопи́вши,/ ту́чу от души́ пода́ждь ми слез, Богороди́тельнице Всенепоро́чная. Кондак, глас 3 Пре́жде непло́ды днесь Христо́ва Предте́чу ражда́ет,/ и той есть исполне́ние вся́каго проро́чества:/ Его́же бо проро́цы пропове́даша,/ на Сего́ во Иорда́не ру́ку положи́в,/ яви́ся Бо́жия Сло́ва проро́к, пропове́дник, вку́пе и Предте́ча. Икос Восхва́лим ны́не Госпо́дня Предте́чу,/ его́же свяще́ннику Елисаве́ть роди́ из ложе́сн непло́дных, но не без cе́мене:/ Христо́с бо еди́н вмести́лище про́йде непроходи́мо без cе́мене./ Иоа́нна непло́ды роди́, без му́жа же сего́ не роди́,/ Иису́са же, осене́нием Отца́ и Ду́ха Бо́жия, Де́ва роди́ Чи́стая./ Но Безсе́менному яви́ся от непло́дныя проро́к и пропове́дник, вку́пе и Предте́ча. Песнь 7 Ирмос: В пещи́ авраа́мстии о́троцы перси́дстей,/ любо́вию благоче́стия па́че,/ не́жели пла́менем, опаля́еми, взыва́ху:/ благослове́н еси́ в хра́ме сла́вы Твоея́, Го́споди. Припев: Святы́й вели́кий Иоа́нне, Предте́че Госпо́день, моли́ Бо́га о на́с. Заха́рия, умолча́в на вре́мя, возвести́ молча́ние писа́нием/ и, па́ки провеща́в, рождество́м твои́м, Предте́че,/ Ду́ха благода́ть возвеща́ет пресла́вно. Припев: Святы́й вели́кий Иоа́нне, Предте́че Госпо́день, моли́ Бо́га о на́с. Це́ркви подо́бится непло́ды безча́дная, Елисаве́ть всечестна́я,/ я́же пе́рвее у́бо су́щи тре́бами и сква́рами очерне́на,/ ны́не же хва́лящися и добро́тою и рожде́нием. Припев: Святы́й вели́кий Иоа́нне, Предте́че Госпо́день, моли́ Бо́га о на́с. Предте́чи рождество́м остри́тся днесь секи́ра духо́вная,/ е́юже вся посека́ются страсте́й взыгра́ния,/ та́йно же процвета́ют плоды́ покая́ния. Припев: Святы́й вели́кий Иоа́нне, Предте́че Госпо́день, моли́ Бо́га о на́с. Я́ко ве́тхаго и но́ваго хода́тая тя, Предте́че,/ и стези́ исправля́юща Христо́вы,/ очища́ющаго согреше́ний гумно́ духо́вною лопа́тою, почита́ем, Иоа́нне. Сла́ва Отцу́ и Сы́ну и Свято́му Ду́ху. И́же пред Со́лнцем те́кшаго, Христо́м Бо́гом на́шим, Иоа́нна сла́внаго,/ я́ко звезду́, Предте́чу и покая́ния пропове́дника воспое́м вси, от непло́дныя проше́дшаго. И ны́не и при́сно и во ве́ки веко́в. Ами́нь. Богородичен: Во чре́во Твое́, Де́во, безсе́менно все́льшася,/ и ро́ждшася за неизрече́нное и коне́чное смире́ние, и нас ради Обнища́вшаго/ о всех моли́ти не преста́й, Богоро́дице. Песнь 8 Ирмос: Вся́ческая, Влады́ко, прему́дростию Твое́ю соста́вил еси́,/ земли́ же па́ки утверди́л еси́, я́коже ве́си, дно,/ основа́нием водрузи́вый на вода́х безме́рных./ Тем вси вопие́м, воспева́юще:/ благослови́те, дела́ Госпо́дня, непреста́нно Го́спода. Припев: Святы́й вели́кий Иоа́нне, Предте́че Госпо́день, моли́ Бо́га о на́с. Позна́л еси́, Предте́че, Ему́же поклони́лся еси́ пре́жде рождества́/ и пре́жде пеле́н твои́х, Христа́ Жизнода́вца,/ и взыгра́ньми показа́л еси́ Сего́, Го́спода Твоего́ наре́к,/ взаи́м взем ма́терний язы́к к пе́нию Христа́, Бо́га на́шего. Припев: Святы́й вели́кий Иоа́нне, Предте́че Госпо́день, моли́ Бо́га о на́с. Концы́ днесь вселе́нстии предпра́зднуют,/ ра́дуются А́нгели и ду́си пра́ведных,/ живу́щии веселя́тся, уме́ршии же па́ки, Иоа́нну ро́ждшуся,/ прие́мше им про́поведь всех Спа́са Го́спода. Припев: Святы́й вели́кий Иоа́нне, Предте́че Госпо́день, моли́ Бо́га о на́с. Подо́бяся днесь Иоа́нну, Иорда́н мо́крыми быстрина́ми игра́ше пресла́вно,/ слы́ша ражда́ема равноа́нгельнаго житие́м от ста́рицы непло́дны,/ исправля́ющаго пути́ и стези́ Госпо́дни и мир крести́вшаго. Сла́ва Отцу́ и Сы́ну и Свято́му Ду́ху. Начерта́ днесь Заха́рия на дсце/ и́мя богонарече́нное проро́ка и Предте́чи, молча́ же воззва́:/ Иоа́нн да нарече́тся рожде́йся мне на ста́рость./ Подо́бно есть от обеща́ния ро́ждшемуся стра́нное зва́ние. И ны́не и при́сно и во ве́ки веко́в. Ами́нь. Богородичен: Кре́пко утеше́ние и непосты́дну наде́жду,/ сте́ну необори́му и Боже́ственно предста́тельство лю́дие Твои́ и́мут Тя,/ и́же Тя сла́вят, Де́во, и, спаса́еми, зову́т приле́жно:/ благослови́те, вся дела́ Госпо́дня, непреста́нно Го́спода. Песнь 9 Ирмос: Я́ко сотвори́ Мне вели́чие Си́льным,/ и свя́то И́мя Его́,/ и ми́лость Его́/ в род и род боя́щимся Его́. Припев: Святы́й вели́кий Иоа́нне, Предте́че Госпо́день, моли́ Бо́га о на́с. В тебе́ вели́кое се и пресла́вное Бог сотвори́ зна́мение, свяще́нниче:/ по ста́рости бо сы́на и по умерщвле́нии удо́в ражда́еши Предте́чу. Припев: Святы́й вели́кий Иоа́нне, Предте́че Госпо́день, моли́ Бо́га о на́с. Да слы́шат непло́ды и да воспою́т Бо́га,/ се бо Елисаве́ть вопие́т:/ по ста́рости сы́на и по умерщвле́нии удо́в ражда́ю Предте́чу. Припев: Святы́й вели́кий Иоа́нне, Предте́че Госпо́день, моли́ Бо́га о на́с. Весели́ся, Заха́рие, и ра́дуйся ны́не о Бо́зе:/ се бо Елисаве́ть сосцы́ пита́ет по ста́рости сы́на/ и по умерщвле́нии удо́в ражда́ет Предте́чу. Сла́ва Отцу́ и Сы́ну и Свято́му Ду́ху. Сла́ва Да́вшему непло́дней по ста́рости плод, ста́рцу и проро́ку сы́на,/ гото́вяща Ему́ лю́ди соверше́нны,/ Боже́ственнаго Предте́чу. И ны́не и при́сно и во ве́ки веко́в. Ами́нь. Богородичен: В Тя всели́вся, И́же в не́дрех сый Оте́ческих роди́ся без стра́сти и тли/ и приведе́ нас за милосе́рдие Отцу́ и Боже́ственному Ду́ху. Светилен Предте́чево днесь радостотво́рное рожде́ние/ се́тование реши́т о́тча безгла́сия и ро́ждения непло́дство,/ возвеща́ет же настоя́щую ра́дость и весе́лие./ Те́мже и вся тварь све́тло то́е пра́зднует. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Проро́цы пропове́даша, апо́столи научи́ша/ и му́ченицы богому́дренно Твоего́ Сы́на, Богоро́дице, я́сно испове́даша, Бо́га всех, Пречи́стая./ С ни́ми же Тя велича́ем, Тобо́ю изба́вльшеся дре́вняго осужде́ния.

Укрепляемь силою Креста и благодатию,/ преобидев тленная и долу влекущая мудрования, отче,/ бесов посрамил еси,/ к Вышнему течение получил еси,/ устремился еси в Хозьюгу пустыню,/ Пресвятей Троице жилище был еси,/ Ейже предстоя, моли о нас, почитающих тя,/ да возопиим ти:/ радуйся, преблаженне Никодиме, отче наш.

Минея, 12 Января, Ин канон Глас 2 Песнь 1 Ирмос: Во глубине́ постла́ иногда́/ фараони́тское всево́инство преоруже́нная сила́,/ вопло́щшееся же Сло́во всезло́бный грех потреби́ло есть,/ препросла́вленный Госпо́дь сла́вно бо просла́вися. Припев: Преподо́бне о́тче Мартиниа́не, моли́ Бо́га о на́с. В глубине́ зло́бы от неразу́мия погря́знувшаго испра́ви мя, преподо́бне Мартиниа́не,/ и ми́лостив бу́ди дерзну́вшу воспе́ти тя,/ и ра́зум очище́н пода́ждь ми,/ да по достоя́нию хвалу́ принесу́ тебе́. Припев: Преподо́бне о́тче Мартиниа́не, моли́ Бо́га о на́с. В ю́ности, о́тче, зе́льне роди́телей свои́х отлучи́ся,/ и Христа́ Бо́га взыска́л еси́,/ и Того́ от всея́ души́ возлюби́л еси́,/ и горя́щею ве́рою Тому́ порабо́тал еси́,/ и ничто́же ти возбрани́ ю́ность цвету́щая,/ но и многоле́тных превзы́де разу́мною тве́рдостию. Сла́ва Отцу́ и Сы́ну и Свято́му Ду́ху. В посте́х и в моли́твах,/ в терпе́нии и злострада́нии стра́стное взыгра́ние умертви́л еси́/ и плоть свою́ изнури́л еси́ и души́ пови́нну сотвори́л еси́,/ до́ндеже возмо́же бра́тися проти́ву неви́димых боре́ний,/ и кре́пким свои́м противле́нием победи́ всю неприя́зненную си́лу. И ны́не и при́сно и во ве́ки веко́в. Ами́нь. Богородичен: Виждь, Влады́чице Богоро́дице, мно́гое на ны враг на́ших воста́ние/ и непреста́нное душ на́ших ра́тование/ и вонми́ на́шему неможе́нию на их противле́ние,/ умилосе́рдися, Всепе́тая,/ потщи́ся ско́ро свободи́ти нас от всех се́тей неприя́зненных. Песнь 3 Ирмос: Процвела́ есть пусты́ня, я́ко крин, Го́споди,/ язы́ческая неплодя́щая, Це́рковь/ прише́ствием Твои́м,/ в не́йже утверди́ся мое́ се́рдце. Припев: Преподо́бне о́тче Мартиниа́не, моли́ Бо́га о на́с. Просия́ житие́ твое́, Богоно́се, всесве́тло, я́ко со́лнце,/ просвеща́я ду́ши, и́же ве́рою и любо́вию к тебе́ приходя́щия,/ и обраща́ющийся к Бо́гу наставля́еши на путь спасе́ния. Припев: Преподо́бне о́тче Мартиниа́не, моли́ Бо́га о на́с. Просия́ житие́ твое́, Богоно́се, всесве́тло, я́ко со́лнце,/ просвеща́я ду́ши, и́же ве́рою и любо́вию к тебе́ приходя́щия,/ и обраща́ющийся к Бо́гу наставля́еши на путь спасе́ния. Сла́ва Отцу́ и Сы́ну и Свято́му Ду́ху. Просия́ днесь па́мять твоя́, Богоблаже́нне, све́тлыми исцеле́ний луча́ми,/ ея́же ве́рою пра́зднующих духо́вный благода́ти исполня́еши,/ душа́м же и телесе́м здра́вие и спасе́ние подава́еши. И ны́не и при́сно и во ве́ки веко́в. Ами́нь. Богородичен: Преудиви́шася а́нгельстии чи́нове/ и устраши́шася челове́ческа существа́ в пречи́стем рождестве́ Твое́м, Богоро́дице,/ я́ко Безпло́тный Бог плоть от Тебе́ нас ра́ди восприя́т,/ И́мже утверди́шася вся́ческая. Седален, глас 8 От ю́наго во́зраста, преподо́бне, страх Бо́жий всели́ся в тя,/ Его́же любо́вию разгора́ем,/ го́рько душе́вную жизнь сию́ презре́л еси́,/ сла́дкому Влады́це после́довати возжеле́л еси́,/ посто́м, и бде́нием, и зе́льным воздержа́нием у́ды телеси́ своего́ умертви́л еси́,/ несумне́нною же ве́рою и благи́ми де́лы доброде́телей ду́шу свою́ оживотвори́л еси́,/ тем и по преставле́нии твое́м чуде́с дар от Бо́га восприя́л еси́,/ те́мже, о всеблаже́нне Мартиниа́не, о́тче наш преподо́бне,/ моли́ Христа́ Бо́га грехо́м оставле́ние дарова́ти/ пра́зднующим любо́вию святу́ю па́мять твою́. Песнь 4 Ирмос: Прише́л еси́ от Де́вы, не хода́тай, ни А́нгел,/ но Сам, Го́споди, вопло́ще́ся,/ и спасл еси́ всего́ мя, челове́ка./ Тем зову́ Ти: сла́ва си́ле Твое́й, Го́споди. Припев: Преподо́бне о́тче Мартиниа́не, моли́ Бо́га о на́с. Путь жития́ своего́ преше́л еси́ во мно́зе по́двиге,/ воздержа́нием и злострада́нием плоть свою́ истощи́л еси́,/ ду́шу же свою́ благи́ми де́лы обогати́л еси́,/ тем ны́не, в жи́зни ве́чней ра́дуяся, Влады́це пое́ши:/ сла́ва си́ле Твое́й, Го́споди. Припев: Преподо́бне о́тче Мартиниа́не, моли́ Бо́га о на́с. Посто́м и бде́нием, Богому́дре Мартиниа́не,/ и сле́зными исто́чники душе́вныя о́чи просвети́л еси́/ и ум свой над страстьми́ воцари́л еси́ кре́пким воздержа́нием,/ кро́ткаго Ду́ха сосу́д избра́н яви́ся. Сла́ва Отцу́ и Сы́ну и Свято́му Ду́ху. Па́мять сме́ртную и чистоту́ душе́вную при́сно име́л еси́,/ тем и Бо́га зри́ши всегда́,/ непреста́нными же моли́твами, смиренному́дрием и молча́нием на врага́ побе́ду взял еси́, Богоприя́тне. И ны́не и при́сно и во ве́ки веко́в. Ами́нь. Богородичен: Пода́ждь, Влады́чице, свы́ше побе́ду на борю́щая нас лука́выя ду́си,/ и́щущих на́шу поги́бель,/ Тебе́ бо еди́ну Засту́пницу и необори́мую сте́ну и́мамы,/ я́ко да, спасае́ми Тобо́ю, благода́рственно воспева́ем Тя. Песнь 5 Ирмос: Хода́тай Бо́гу и челове́ком был еси́, Христе́ Бо́же:/ Тобо́ю бо, Влады́ко, к Светонача́льнику, Отцу́ Твоему́,/ от но́щи неве́дения/приведе́ние и́мамы. Припев: Преподо́бне о́тче Мартиниа́не, моли́ Бо́га о на́с. Хода́тая тя к Бо́гу стяжа́хом, всеблаже́нне, и моле́бника те́пла,/ моли́, о́тче, многоко́зненных неви́димых кова́рств изба́витися нам/ и на суди́щи Христо́ве предста́ти неосужде́нных сподо́би нас. Припев: Преподо́бне о́тче Мартиниа́не, моли́ Бо́га о на́с. Хода́тай ко Влады́це, о́тче Мартиниа́не, буди́ о нас, воспева́ющих тя/ и ве́рою пра́зднующих че́стную па́мять твою́,/ и наста́ви нас на путь покая́ния,/ и сподо́би избежа́ти му́ки ве́чныя. Сла́ва Отцу́ и Сы́ну и Свято́му Ду́ху. Христа́ изде́тска возлюби́л еси́/ и Тому́ невозвра́тно после́дова, житие́ свое́ непоро́чно сконча́л еси́, пресла́вне,/ и яви́лся еси́ Тро́ицы чи́сто жили́ще,/ Е́йже ны́не предстоя́, помина́й нас, ве́рою почита́ющих тя. И ны́не и при́сно и во ве́ки веко́в. Ами́нь. Богородичен: Хода́таица к Бо́гу и челове́ком Помо́щница Ты еси́, Богоро́дице,/ Тобо́ю бо, Влады́чице, Безле́тнаго Сы́на Твоего́ и Бо́га на́шего уве́дехом/ и от тьмы неве́дения на Богоразу́мие приведо́хомся. Песнь 6 Ирмос: В бе́здне грехо́вней валя́яся,/ неизсле́дную милосе́рдия Твоего́ призыва́ю бе́здну:/ от тли, Бо́же, мя возведи́. Припев: Преподо́бне о́тче Мартиниа́не, моли́ Бо́га о на́с. В глубину́ ста́рости, о́тче, дости́же,/ но ника́коже от духо́внаго по́двига ослабе́,/ не бо дал еси́ сна свои́ма очи́ма,/ но тща́ся до конца́ сохрани́ти душе́вную све́тлость,/ во благи́х же по́двизех сконча́вся, блаже́нней жи́зни сподо́бися. Припев: Преподо́бне о́тче Мартиниа́не, моли́ Бо́га о на́с. Во оби́тели был еси́ преподо́бнаго Се́ргия па́стырь и учи́тель слове́сному ста́ду/ и не оста́ви сея́ оби́тели,/ но па́ки прии́де в дом Пресвяты́я Богоро́дицы/ и втори́цею просвети́л еси́ нас Боже́ственным житие́м свои́м/ и оты́де в ве́чную жизнь. Сла́ва Отцу́ и Сы́ну и Свято́му Ду́ху. Вели́ко дерзнове́ние ко Го́споду и́маши, всеблаже́нне,/ и вели́кому дарова́нию от Него́ сподо́бися,/ я́ко всяк неду́г и вся́ку я́зю исцеля́еши приходя́щим ти с ве́рою,/ да всяк убо, и́же отложи́т сомне́ние, не погреши́т своего́ жела́ния. И ны́не и при́сно и во ве́ки веко́в. Ами́нь. Богородичен: Во оби́тели сей, Пречи́стая Богома́ти, не забу́ди раб Свои́х,/ с ве́рою притека́ющих к це́ркви святе́й Твое́й/ и ми́лости прося́щих и очище́ния своему́ согреше́нию,/ и от вся́кия ско́рби и печа́ли изба́ви нас,/ и из глубины́ страсте́й возведи́, и спаси́ мя. Кондак, глас 8 Благоизво́лив, преподо́бне,/ от ю́наго во́зраста рабо́тати Го́сподеви день и нощь,/ в стра́се Бо́жии и благогове́нии чистоту́ душе́вную соблю́л еси́,/ в моли́твах же и бде́ниих ум твой предочи́стил еси́,/ в по́двизех же, злострада́ниих те́ло твое́ изнури́в,/ вся доброде́тели духо́вныя испра́вил еси́/ и о́браз хотя́щим по тебе́ спасти́ся яви́лся еси́./ Те́мже ны́не, при́сно зря на Небесе́х Пресвяту́ю Тро́ицу,/ моли́ся, всеблаже́нне, дарова́ти душа́м на́шим спасе́ние,/ и житию́ на́шему исправле́ние,/ да вси ве́рою вопие́м ти:/ ра́дуйся, преподо́бне Мартиниа́не, о́тче наш. Икос Ка́ко возмогу́ по достоя́нию восхвали́ти тя, о всеблаже́нне,/ испо́лнен бо есмь вся́кия зло́бы,/ но ве́рою и любо́вию восхваля́ю тя,/ а́ще бо и челове́к бе подо́бием, о́тче,/ но а́нгельски на земли́ пожи́л еси́, я́ко безпло́тен,/ те́мже, преподо́бне, похва́льная тебе́ воспева́ем си́це:/ ра́дуйся, Богоблаже́нне, я́ко от ю́на во́зраста роди́телема свои́ма приведе́ся к преподо́бному Кири́ллу/ и Бо́жиим про́мыслом к нему́ вожделе́ вда́тися./ Возьми́ ме́не, – ре́че,– о честны́й о́тче, и наста́ви на путь спасе́ния./ И от него́ навы́че духо́вному по́двигу./ Ра́дуйся, я́ко испо́лнитель был еси́ Боже́ственным за́поведем;/ ра́дуйся, я́ко Богоуго́дным житие́м свои́м А́нгелы возвесели́л еси́./ Ра́дуйся, я́ко чудесы́ свои́ми челове́цы удиви́л еси́;/ ра́дуйся, по́стником украше́ние и преподо́бным похвала́./ Ра́дуйся, и́ноком предста́тель и засту́пник,/ те́мже и мы согла́сно вопие́м ти:/ ра́дуйся, преподо́бне Мартиниа́не, о́тче наш. Песнь 7 Ирмос: Богопроти́вное веле́ние беззако́ннующаго мучи́теля/ высо́к пла́мень вознесло́ есть./ Христо́с же простре́ Богочести́вым отроко́м ро́су духо́вную,/ Сый благослове́н и препросла́влен. Припев: Преподо́бне о́тче Мартиниа́не, моли́ Бо́га о на́с. Богоподо́бным житие́м свои́м А́нгелы возвесели́л еси́/ и челове́цы по́льзы испо́лнил еси́,/ бе́сов посрами́л еси́ и нам о́браз оста́ви сопротивля́тися кова́рством их./ И ны́не в па́мяти твое́й пода́ждь тре́бующим спаси́тельная проше́ния и от души́ вопию́щим:/ Сый благослове́н Бог и препросла́влен. Припев: Преподо́бне о́тче Мартиниа́не, моли́ Бо́га о на́с. Бу́дущую сла́ву жела́я получи́ти,/ мимоше́дшую презре́л еси́,/ и жите́йския молвы́ отлучи́ся, и к Бо́гу, о́тче, прилепи́ся,/ и, вседу́шно рабо́тав Ему́ день и нощь,/ прославля́л Его́ во псалме́х, и пе́ниих, и пе́снех духо́вных,/ те́мже и Той тя просла́ви в Ца́рствии Небе́снем,/ и ны́не, ра́дуяся, пое́ши:/ Сый благослове́н Бог и препросла́влен. Сла́ва Отцу́ и Сы́ну и Свято́му Ду́ху. Боже́ственною си́лою укрепля́ем,/ посто́м, и моли́твами, и смиренному́дрием вра́жию горды́ню до конца́ смири́л еси́,/ и того́ многоконе́чныя се́ти покры́л еси́,/ и чи́стым житие́м свои́м Бо́гу благоугоди́л еси́,/ и Боже́ственныя сла́вы прича́стник яви́ся,/ и ны́не, с преподо́бными веселя́ся, пое́ши:/ Сый благослове́н Бог и препросла́влен. И ны́не и при́сно и во ве́ки веко́в. Ами́нь. Богородичен: Благослове́нна еси́, Обра́дованная, Богоро́дице Де́во, в род и род,/ я́ко родила́ еси́ Сы́на, И́же пре́жде век Бо́га на́шего, нетле́нным зача́тием и рождество́м неизрече́нным,/ те́мже честне́йши еси́, Богоро́дице, Небе́сных сил и всея́ тва́ри превы́ше и сла́внее,/ и мы, раби́ Твои́, ве́рою вопие́м Ти:/ благослове́н, Пречи́стая, плод Твоего́ чре́ва и препросла́влен. Песнь 8 Ирмос: Пещь иногда́ о́гненная в Вавило́не де́йства разделя́ше,/ Бо́жиим веле́нием халде́и опаля́ющая,/ ве́рный же ороша́ющая, пою́щия:/ благослови́те, вся дела́ Госпо́дня, Го́спода. Припев: Преподо́бне о́тче Мартиниа́не, моли́ Бо́га о на́с. Па́мять твоя́, о́тче Мартиниа́не, иногда́ забве́нию предана́ бысть от неиму́щих к тебе́ от се́рдца те́плыя ве́ры,/ ны́не же, преподо́бне, сия́ет па́мять твоя́ пресве́тлая, я́ко заря́ невече́рняя, испуща́ющи лучи́ исцеле́ния,/ и мы пра́зднуем днесь ве́рою и лю́бовию,/ просвеща́еши бо пою́щих и превознося́щих Христа́,/ просла́вльшаго тя, во вся ве́ки. Припев: Преподо́бне о́тче Мартиниа́не, моли́ Бо́га о на́с. Прииди́те, стеце́мся днесь,/ да пра́зднуем ра́достно пресве́тлую па́мять Христо́ва уго́дника, Мартиниа́на всеблаже́ннаго,/ почита́юще пресве́тлыя его́ по́двиги и мно́гия доброде́тели, и духо́вно возвесели́мся,/ Боже́ственную бо благода́ть подае́т/ ве́рою и любо́вию соверша́ющим святу́ю па́мять его́ во вся ве́ки. Сла́ва Отцу́ и Сы́ну и Свято́му Ду́ху. Просия́ днесь вселе́тная па́мять уго́дника Бо́жия,/ созыва́ющи многочи́сленное христиа́нское со́нмище,/ и притека́ющии к моще́м его́ исцеле́ния оби́льна прие́млют,/ и тьмо́ю грехо́вною омраче́нныя просвеща́ются,/ и духо́вных даро́в исполня́ются,/ и, с ве́рою пра́зднующе святу́ю и светоно́сную па́мять его́,/ сла́вим и превозно́сим Христа́ и Его́ уго́дника во вся ве́ки. И ны́не и при́сно и во ве́ки веко́в. Ами́нь. Богородичен: Пресвята́я Богоро́дице, по до́лгу воспева́ем Тя,/ и́же иногда́ во тьме неве́дения бы́вшая ны,/ ны́не же на свет ве́дения возведо́хомся,/ и от тьмы свободи́хомся пречи́стым Рождество́м Твои́м,/ и Тобо́ю позна́хом, Пренепоро́чная, Бо́га И́стиннаго, Созда́теля и Соверши́теля вся́кой тва́ри,/ Его́же, я́ко Сы́на Своего́ и Зижди́теля, моли́ при́сно за воспева́ющий Тя/ и превознося́щия во вся ве́ки. Песнь 9 Ирмос: Безнача́льна Роди́теля Сын, Бог и Госпо́дь, вопло́щся от Де́вы, нам яви́ся,/ омраче́нная просвети́ти, собра́ти расточе́нная./ Тем Всепе́тую Богоро́дицу велича́ем. Припев: Преподо́бне о́тче Мартиниа́не, моли́ Бо́га о на́с. Безнача́льному Царю́ веко́м послужи́л еси́, преподо́бне, в посте́х, и моли́твах, и бде́ниих день и нощь/ и во сто труды́ уплодоноси́л еси́, от ни́хже восприя́л еси́,/ в не́мже ликоству́я, моли́ся, всеблаже́нне, за пра́зднующий ве́рою и любо́вию святу́ю па́мять твою́. Припев: Преподо́бне о́тче Мартиниа́не, моли́ Бо́га о на́с. Безнача́льный Влады́ка Госпо́дь, ви́дев твоя́ Божественныя по́двиги и труды́,/ Пресвята́го Ду́ха благода́тию обогаща́ет тя/ и по преставле́нии твое́м исто́чник чуде́с дарова́ тебе́,/ а́ще бо и последи́ всех возсия́л еси́, но пе́рвых че́сти сподо́бися,/ те́мже тя вси, уго́дника Христо́ва, велича́ем. Сла́ва Отцу́ и Сы́ну и Свято́му Ду́ху. Боже́ственных и блаже́нных оте́ц на́ших Ферапо́нта и Мартиниа́на в пе́снех и пе́ниих днесь да ублажи́м,/ о́вого убо я́ко нача́льника оби́тели сей,/ о́вого же я́ко соверши́теля,/ и, ве́рою моля́щеся, вопие́м им:/ о всеблаже́ннии Христо́вы уго́дницы,/ о дво́ице пресвята́я!/ А́ще и теле́сне разлуче́ны есте́,/ но, ду́хом вку́пе предстои́те Пресвяте́й Тро́ице,/ Е́йже при́сно о ста́де свое́м моли́теся,/ да вас в пе́снех непреста́нно велича́ем. И ны́не и при́сно и во ве́ки веко́в. Ами́нь. Богородичен: Безнача́льнаго Отца́ Сын Соприсносу́щен, воплоти́вся из Тебе́, Де́во Богоро́дице, нам яви́ся,/ и возведе́ и просвети́ во тьме и се́ни сме́ртней седя́щая,/ и совокупи́ расточе́нный И́мени ра́ди Его́,/ Тебе́ ра́ди, Ма́ти Бо́жия, сме́рти ве́чныя избы́хом и живо́т получи́хом/ и тем Тя, всехва́льную Богоро́дицу, велича́ем. Светилен Просвети́, преподо́бне, на́ши серде́чныя о́чи воззре́ти на Боже́ственную добро́ту/ и освяти́ на́ша ду́ши и телеса́,/ да досто́йными устна́ми песнь хвале́ния ти прино́сим,/ и моли́ся, преподо́бне, за чту́щия тя/ и ве́рою пра́зднующии па́мять твою́ присноблаже́нную.