Молитвы

глас 8 Пе́снь 1. Ирмо́с: Во́ду проше́д, я́ко су́шу, и еги́петскаго зла́ избежа́в, изра́ильтянин вопия́ше: Изба́вителю и Бо́гу на́шему пои́м. Благи́ми нра́вы украси́вся, Христу́ прилепи́лся еси́ от ю́ности, плотски́я стра́сти умертви́в воздержа́нием, и к животу́, преподо́бне, преста́вился еси́. Глаго́лов и зако́нов Бо́жиих исполни́тель бы́в, испо́лнился еси́, о́тче прему́дре, Боже́ственных даро́в и чуде́с все́м лучи́ бога́тно испусти́л еси́. Кре́постию Христа́ возмо́г, держа́ву же и си́лу вра́жию низложи́л еси́ и похвалу́ побе́дныя по́чести, преподо́бне, чуде́сными сия́нии улучи́л еси́. Со́весть име́л еси́ бла́гу, о́ко серде́чное, взира́ющее к Бо́гу, те́мже вня́т моли́тве твое́й, прему́дре, с преподо́бными сочета́ тя́, богоблаже́нне. Богоро́дичен: Стра́сти пло́ти моея́ и ума́ моего́ двиза́ния неподо́бная утоли́, молю́ Тя́, Пречи́стая Де́во, и испра́ви мя́, заблу́ждшаго умо́м. Пе́снь 3. Ирмо́с: Ты́ еси́ утвержде́ние притека́ющих к Тебе́, Го́споди, Ты́ еси́ Све́т омраче́нных, и пое́т Тя́ ду́х мо́й. Ве́сь прилежа́ Вседержи́телю, преподо́бне о́тче прему́дре, всея́ бесо́вския зло́бы избе́гл еси́ досточу́дным водворе́нием в непроходи́мая. Высото́ю смире́ния украша́ем, све́ргл еси́ на зе́млю велехва́льнаго гордели́вца пло́ти своея́ Боже́ственными веле́ньми и до́брыми де́лы твои́ми. Пло́тию обложе́н, о́тче прему́дре, смири́л еси́ надме́нную вы́ю нечести́ваго благи́ми к Бо́гу воздыха́ньми, непоро́чне. Име́я поспешеству́ющую тебе́ Бо́жию си́лу, прему́дре, я́ко чу́ден во пло́ти сы́й бы́в, чудеса́ источи́л еси́ воскресе́нием ме́ртваго, и ны́не отго́ниши неду́ги. Богоро́дичен: В ложесна́ Твоя́ воплоща́ем, Всенепоро́чная, всели́ся Зижди́тель на благодея́ние ве́рно пою́щим Тя́. Седа́лен, гла́с 4: Стра́стное порабо́тил еси́ пло́ти своея́ мудрова́ние и ни́зшее свое́ покори́л еси́ вы́сшему, о́тче пресла́вне, сокруши́л бо вы́и бесо́в смире́нием и посто́м, во всечестны́х дея́ниих су́щи, возсия́л еси́ в ми́ре; те́мже я́ко луча́ светоли́тнаго сия́ния Христо́ва возсия́ на́м, дне́сь воспева́ющим тя́, Марти́рие преподо́бне. Сла́ва, и ны́не, богоро́дичен: Пое́м Тя́, Богоневе́сто, Ма́ти Христа́ Бо́га, сла́вяще Рождество́ Твое́ непостижи́мое, и́мже изба́ви ны́ ле́сти и кова́рствия вра́жия и от вся́ких бе́д, Влады́чице Богоро́дице, и ве́рно Тебе́ вопие́м: поми́луй ста́до Твое́, еди́на Пречи́стая. Пе́снь 4. Ирмо́с: Услы́шах, Го́споди, смотре́ния Твоего́ та́инство, разуме́х дела́ Твоя́ и просла́вих Твое́ Божество́. Соде́яв, пресла́вне, ду́шу твою́ хра́м Свято́му Ду́ху, бы́л еси́ насле́дник го́рняго Ца́рствия, с вы́шними чина́ми водворя́яся, всече́стне о́тче. Многоболе́зненныя стра́сти всегда́ врачу́еши приступа́ющих к тебе́ те́пле: благода́ть бо, преподо́бне, и́маши от Го́спода содева́ти зна́мения и чудеса́, пребога́те. Красне́йшим прозябе́нием, о́тче, в дому́ Бо́жии прозя́бл еси́, доброде́тельми укра́шен и плоды́ чуде́сными облагоуха́ем. Богоро́дичен: Ни́ва духо́вная, я́коже из бразды́ кла́с изнесла́ еси́, всю́ тва́рь пита́ющаго вся́ческих Бо́га, Присноде́во. Пе́снь 5. Ирмо́с: У́тренююще, вопие́м Ти́: Го́споди, спаси́ ны́, Ты́ бо еси́ Бо́г на́ш, ра́зве Тебе́, ино́го не зна́ем. Умо́м очи́щенным пресла́вне зри́ши, преподо́бне, добро́ту неизрече́нную — Христа́, вся́ческих Бо́га на́шего. Я́коже Илия́ на колесни́це, о́тче, доброде́тельми твои́ми возше́л еси́ на не́бо и та́мо чи́сте зри́ши Святу́ю Тро́ицу, к Не́й же ду́хом горя́ и возлета́я. Стягну́в те́ло твое́, чистото́ю опелена́я и воздержа́нием покоря́ его́ ду́ху, стро́потная вся́ оста́вил еси́ любве́ ра́ди Христа́ своего́ и небе́снаго приобре́тения. Богоро́дичен: Исцели́, Милосе́рдная Ма́ти, неду́гующаго ума́ моего́ душевре́дное омраче́ние и озари́ све́том ра́зума Христа́ Твоего́, Всенепоро́чная. Пе́снь 6. Ирмо́с: Моли́тву пролию́ ко Го́споду и Тому́ возвещу́ печа́ли моя́, я́ко зо́л душа́ моя́ испо́лнися и живо́т мо́й а́ду прибли́жися, и молю́ся, я́ко Ио́на: от тли́, Бо́же, возведи́ мя́. Лука́вый умертви́ся зми́й свяще́нными по́двиги твои́ми, преподо́бне Марти́рие, те́мже и моля́щимся тебе́ вспомоществу́еши разреши́тися от его́ зло́бы, блаже́нне. Отсе́кл еси́ приле́жно серпо́м, его́же ви́де Заха́рий серпови́дный, стра́сти от души́ твоея́, те́мже, приобре́т прему́дрости семена́, пожа́л еси́ мно́гих исцеле́ний бога́тныя кла́сы. Кре́постию ду́ха, о́тче, и тве́рдостию постоя́ннаго ума́ твоего́ возмо́гл держа́ву вра́жию и си́лу его́ низложи́ти от себе́ и те́м похвалу́ побе́дныя по́чести прия́л еси́, преподо́бне, ве́рных осиява́я умы́. Богоро́дичен: Пресвята́я Чи́стая, Творе́ц устро́и Тя́ в жили́ще Себе́, Христо́с Бо́г на́ш, те́мже хода́тайствы Твои́ми изба́ви на́с от о́бласти льсти́ваго, я́ко да по до́лгу Тя́ чти́м и ублажа́ем. Конда́к, гла́с 8: Оте́чества, преподо́бне, и всего́ мирска́го мяте́жа уклони́тися возжеле́л еси́, и, в пусты́ню всели́вся, та́мо во блаже́ннем безмо́лвии жесто́кое житие́ показа́л еси́, и ча́да послуша́ния и смире́ния в не́м возрасти́л еси́. Сего́ ра́ди, дерзнове́ние стяжа́в ко Святе́й Тро́ице, е́же моли́тися, богоблаже́нне, о на́с, ча́дех свои́х, и́хже собра́л еси́, и о все́х правове́рных, да зове́м ти́: ра́дуйся, о́тче Марти́рие, безмо́лвия пусты́ннаго люби́телю. И́кос: Возлюби́в, преподо́бне, Христо́вы боже́ственныя за́поведи и возненави́дев пло́ть и я́же по не́й земна́я мудрова́ния, прише́л еси́ усе́рднейше в непроходи́мую пусты́ню бла́тную, и, та́мо всели́вся любве́ ра́ди Христо́вы и душе́внаго обогаще́ния, я́ко свети́льник, просия́л еси́ чуде́с дарова́нии: ца́рскаго бо сы́на я́ко от сна́ возста́вил еси́ и те́м царя́ Симео́на удиви́л еси́. Сия́ облобыза́я, ве́рнии, припа́дая, мо́лимся: просвети́ о́чи на́ша душе́вныя воспева́ти досто́йно по́двиги твоя́: поще́ния, бде́ния, сле́зы и боле́зни, изможде́ние те́ла блаже́нныя ра́ди бу́дущия жи́зни, ея́ же наслажда́яся, моли́ непреста́нно о все́х на́с. Пе́снь 7. Ирмо́с: От Иуде́и доше́дше, о́троцы, в Вавило́не иногда́, ве́рою Тро́ическою пла́мень пе́щный попра́ша, пою́ще: отце́в Бо́же, благослове́н еси́. Проше́д по́двиги по́стныя, о́тче, умо́м кре́пким го́рдую вы́ю смири́л еси́, боже́ственным вдохнове́нием и спаси́тельным богообра́зным подви́жничеством ду́шу твою́ укра́сил еси́, поя́: благослове́н Бо́г оте́ц на́ших. Красне́йшее прозябе́ние, о́тче, в дому́ Бо́жии произра́сл еси́ ве́рою, сугу́бейший пло́д прине́сл еси́ доброде́тельми, те́ми укра́шен, чудесы́ облагоуха́л еси́. Просвети́в твое́ се́рдце умиле́нием, нача́льник бы́л еси́ свяще́ннейшаго собо́ра, о́тче, наказу́я, и уча́, и вся́ к Бо́жией во́ли приводя́, пою́ще: оте́ц на́ших Бо́же, благослове́н еси́. Богоро́дичен: Но́во Отроча́ ро́ждшая, Пребезнача́льнаго Сло́ва, обетша́вшия ны́ зело́ грехо́м, ве́рныя обнови́ла еси́, Де́во, и воспева́ти научи́ла еси́: оте́ц на́ших Бо́же, благослове́н еси́. Пе́снь 8. Ирмо́с: Богоглаго́ливии о́троцы в пещи́, со огне́м пла́мень попира́юще, поя́ху: благослови́те, дела́ Госпо́дня, Го́спода. Насле́дниче боже́ственных селе́ний, а́нгельски, о́тче, пожи́л еси́; те́м, со а́нгелы водворя́яся, лику́ет в черто́гах небе́сных со святы́ми ду́х тво́й. Невозвра́тным умо́м и невозвра́тными стопа́ми, богому́дре о́тче, ше́ствовал еси́, досточу́дне, к небе́сным селе́ниям, ева́нгельскою стезе́ю направля́емь, от стро́потных путе́й до конца́ уклони́лся еси́. Все́льшеюся в тя́ благода́тию Свята́го Ду́ха, о́тче Марти́рие, благоустроя́еши ду́ши притека́ющих к тебе́: лука́вно бо страстьми́ в челове́цех де́йствующии нечи́стии ду́си отгоня́еми быва́ют. Богоро́дичен: Вода́ еси́ неисчерпа́емая, Деви́це, Дще́рь Царя́ Небе́снаго, от Нея́же вси́ ве́рнии, пию́ще, благода́ти исполня́емся, душе́ю и те́лом освяща́еми. Пе́снь 9. Ирмо́с: Устраши́ся вся́к слу́х неизрече́нна Бо́жия снизхожде́ния, я́ко Вы́шний во́лею сни́де да́же и до пло́ти, от деви́ческаго чре́ва бы́в Челове́к. Те́мже Пречи́стую Богоро́дицу, ве́рнии, велича́ем. Исцеле́ние источа́ет бога́тно честна́я твоя́ ра́ка Бо́жиим Ду́хом, и стра́сти многовре́менныя исцеля́ет, о́тче, приходя́щих к тебе́, и прогоня́ет лука́выя ду́хи лю́тыя, и воздвиза́ет ве́рныя восхваля́ти твоя́ све́тлыя по́двиги. Я́ко вели́кое со́лнце, на́м вели́чием по́двиг твои́х возсия́л еси́ в преде́лех страны́ сея́: уме́рый бо, преше́л еси́ от све́та к Све́ту, от гро́ба возсия́вшему. Те́м вопие́м ти́: просвети́ и на́ша помышле́ния, о́тче преподо́бне Марти́рие. Те́ло твое́, блаже́нне, терпели́вое, вяза́вшееся вери́гами, стра́сти неисце́льныя прикоснове́нием исцеля́ет, Бо́гу и Спа́су, тя́ вельми́ просла́вльшу, о́тче прему́дре и досточу́дне Марти́рие, я́ко де́лы твои́ми до́брыми просла́вльшуся, преподо́бне. Процве́л еси́ в по́стнических удо́лиях, прехва́льне о́тче на́ш, я́ко ши́пок многоцве́тен, и, я́ко кри́н, облагоуха́л еси́ со́вести ве́рных доброде́тельми и чудесы́. Те́мже, преподо́бне, отжени́ от на́с стра́сти смердя́щия. Богоро́дичен: Просвети́, Чи́стая Де́во, се́тующее се́рдце мое́ при́сно преступле́ньми и жите́йскими молва́ми, не оста́ви мене́ враго́м бы́ти в ра́дость, я́ко да сла́влю Тя́ и любо́вию пою́, Препе́тая. Свети́лен: Мирска́го пристра́стия, я́ко от скве́рны уклони́лся еси́, и хвра́стие страсте́й веле́нием Бо́жиим я́ко огне́м попали́л еси́, и а́лчбою пло́ть свою́ увяди́л еси́, о́тче, и небе́сною сла́вою со а́нгелы обогати́лся еси́: те́мже непреста́нно моли́ о на́с Христа́ Бо́га, преподо́бне Марти́рие. Сла́ва, и ны́не, богоро́дичен: Тя́ Предста́тельницу и́мамы, вси́ гре́шнии, о, Пресвята́я Де́во, ты́ благопреме́нна сотвори́ Сы́на Твоего́ ма́терними Твои́ми к Нему́ моли́твами.

глас 8 Песнь 1 Ирмос: Воду прошед яко сушу, и египетскаго зла избежав, израильтянин вопияше: Избавителю и Богу нашему поим. Прежде от не сущих привед всяческую тварь, и ведый сердечная сокровища предглаголеши яко Владыка учеником Лазарево успение. Человека естеством осуществовавыйся, Христе, от Девы, Лазарево Ты погребение навыкнути вопрошал еси яко Человек, не неведый яко Бог, идеже лежаше. Уверяя Слове Твое Воскресение, воистину яко от сна, любимаго воскресил еси уже смердяща, четверодневна мертвеца от гроба. Богородичен: Чини Тя ангел и человек, безневестная Мати, хвалят непрестанно: Создателя бо сих якоже Младенца, во объятиих Твоих носила еси. Песнь 3 Ирмос: Небеснаго круга Верхотворче, Господи, и Церкве Зиждителю, Ты мене утверди в любви Твоей, желаний краю, верных утверждение, едине Человеколюбче. Представ Ты гробу, чудотворче Господи, в Вифании над Лазарем прослезился еси, законом естества, плоть Твою уверяя, Иисусе Боже мой, юже восприял еси. Мариин плач Ты абие утолил еси, Спасе, и Марфе показуя самовластное. Ты бо воскресение, Ты и живот, якоже рекл еси, истина бо еси и всех Господь. Обвитаго укройми любимаго Лазаря, Господи, от ада темнаго исхитил еси Ты, словом Твоим всемощным смерти разверг заклепы же и царствия. Богородичен: Вселился еси в Деву плотски, Господи, явился еси человеком, якоже леть бе видену Тебе быти: Юже и показал еси яко истинную Богородицу и верных помощницу, едине Человеколюбче. Седален, глас 4 Вкупе предстасте Христу Лазареве сестре, и слезяще горце, и плачуще его, реша Ему: Господи, умре Лазарь. Он же яко Бог не неведый погребания, вопрошаше яко Человек: где положисте его? И, приступив ко гробу, возглашаше четверодневнаго Лазаря. Он же абие воста, и покланяшеся Воскресившему. Песнь 4 Ирмос: Ты моя крепость, Господи, Ты моя и сила, Ты мой Бог, Ты мое радование, не оставль недра Отча и нашу нищету посетив. Тем с пророком Аввакумом зову Ти: силе Твоей слава, Человеколюбче. Ты яко пастырь исхитил еси, Христе, человека, растлевша уже четверодневна, Зиждителю, от волка лютаго воистину и всеядца: яко всесилен же и Господь, сим проявляя всемирную славу Твоего ныне тридневнаго востания. Тя жизнь видяще сущии с Марфою, Христе, вопияху: аще бы был еси зде, Господи, просвещение всех и жизнь, отнюд не бы умерл, мертв не явился бы Лазарь. Жизнь же умерших, Ты, Человеколюбче сый, в радость плач их прелагаеши. Тя источника боятся, Господи, бездны, Тебе работают воды всяческия: Тебе трепещут, Христе, вереи адовы, и заклепы державою Твоею разрушаются, Лазарю воскресшу из мертвых гласом Твоим, всесильне Спасе Человеколюбче. Богородичен: Ты верным похвала еси, Безневестная, Ты предстательство, Ты и прибежище христианом, стена и пристанище: к Сыну бо Твоему моления приносиши, Всенепорочная, и спасаеши от бед, верою и любовию Богородицу Чистую Тя ведущия. Песнь 5 Ирмос: Вскую мя отринул еси от лица Твоего, Свете Незаходимый, и покрыла мя есть чуждая тьма, окаяннаго? но обрати мя и к свету заповедей Твоих пути моя направи, молюся. Отцу славу подая, яко не богопротивный был еси моляся, предстоящий уверяя народ, Долготерпеливе, и благодарение Твоему Отцу принося, повелением воздвизаеши Лазаря. О, гласа Боговещаннаго, и Божественныя силы, Спасе, державы Твоея! Еюже адова врата всеядныя смерти сокрушил еси, но исхити мя от страстей моих, якоже прежде четверодневна Твоего друга Лазаря. Молитвами Лазаря, Марфы же и Марии нас сподоби зрителей быти Креста и страстей Твоих, Господи, и светоносицы дней и царицы Воскресения Твоего, Человеколюбче. Богородичен: Матернее дерзновение к Сыну Твоему имущи, Пречистая, сроднаго промышления о нас не презри, молимся, яко Тя едину христиане ко Владыце умилостивление благоприятное предлагаем. Песнь 6 Ирмос: Очисти мя, Спасе, многа бо беззакония моя, и из глубины зол возведи, молюся, к Тебе бо возопих, и услыши мя, Боже спасения моего. Бог сый истинный, Лазарево ведал еси успение, и сие учеником Твоим провозвестил еси, уверяя, Владыко, Божества Своего неопредельное действо. Плотию описан сый Неописанный, в Вифанию пришед, яко Человек, Владыко, слезиши над Лазарем, яко Бог же хотя, воскрешаеши четверодневнаго. Кондак, глас 2 Всех радость Христос, истина, свет, живот, и мира воскресение, сущим на земли явися Своею благостию и бысть образ воскресения, всем подая Божественное оставление. Икос Учеником Создатель всех предвеща, глаголя: братия и знаемии, наш друг успе, сими предглаголя и уча, яко вся веси, яко Создатель всех. Идем убо, и увидим странное погребение, и рыдание Мариино, и Лазарев гроб узрим: тамо бо хощу чудодействовати, совершая Креста предначинание и всем подая Божественное оставление. Песнь 7 Ирмос: От Иудеи дошедше, отроцы в Вавилоне иногда верою Троическою пламень пещный попраша, поюще: отцев Боже, благословен еси. Над другом прослезився, Марфины, Щедре, слезы утолил еси и страстию вольною отъял еси от лица людей Твоих всякую слезу, отец наших Боже, благословен еси. Живота сокровище, мертваго яко от сна, Спасе, воздвигл еси и, словом адову утробу расторгнув, воскресил еси поюща: отец наших Боже, благословен еси. Мертвеца смердяща, связана повойми, Владыко, воздвигнул еси, и мене связанаго пленицами прегрешений, возстави поюща: отец наших Боже, благословен еси. Песнь 8 Ирмос: Царя Небеснаго, Егоже поют вои Ангельстии, хвалите и превозносите во вся веки. Вопрошаеши убо яко Человек, яко Бог же воскрешаеши словом четверодневнаго. Темже Тя поем и превозносим во вся веки. Тебе благоразумно, Владыко, якоже должное Мариа приношает миро, воспевающи во вся веки. Призываеши убо яко Человек Отца, яко Бог же Лазаря воздвизаеши. Темже Тя поем, Христе, во веки. Песнь 9 Ирмос: Воистину Богородицу, Тя исповедуем, спасеннии Тобою, Дево Чистая, с Безплотными лики Тя величающе. Почитая Твоего Отца и показуя, яко не богопротивен еси, молитву дееши, Христе, самовластно воздвиг четверодневнаго. Из гроба четверодневнаго Лазаря воздвизаеши, тридневнаго, Христе, Твоего востания всеистинаго всем показуя сведетеля. Ходиши, и слезиши, вещаеши же. Спасе мой, человеческое показуя Твое действо: Божественное же являя, воздвизаеши Лазаря. Содеял еси неизреченно, Владыко Спасе мой, по обою двою Твоею естеству, самовластною волею спасение мое.

Минея, 19 Мая, Кано́н свята́го Глас 4 Песнь 1 Ирмос: Мо́ря чермну́ю пучи́ну/ невла́жными стопа́ми/ дре́вний пешеше́ствовав Изра́иль,/ крестообра́зныма Моисе́овыма рука́ма/ Амали́кову си́лу в пусты́ни победи́л е́сть. Припев: Святы́й благове́рный кня́же Дими́трие, моли́ Бо́га о на́с. Заря́ пресве́тлая в рождестве́ твое́м яви́лся еси́,/ свя́те Дими́трие, Христу́ возлю́бленне,/ сро́дники же твоя́ рожде́нием твои́м возвесели́л еси́. Припев: Святы́й благове́рный кня́же Дими́трие, моли́ Бо́га о на́с. Заря́ у́тренняя был еси́, свя́те Дими́трие,/ во́зраста о́троческа достига́я,/ Христу́ моли́твы усе́рдныя возноси́ти поуча́лся еси́. Сла́ва Отцу́ и Сы́ну и Свято́му Ду́ху. Заря́ кра́сная яви́лся еси́ оте́честву твоему́, свя́те Дими́трие,/ княже́ние прии́м и в Бо́га богате́я,/ в моли́тве и испове́дании ве́ры правосла́вныя укреплялся еси́. И ны́не и при́сно и во ве́ки веко́в. Ами́нь. Богородичен: Отрокови́це Пречи́стая,/ ю́ныя о́троки сохраня́й и в во́зраст прише́дшия наставля́й,/ святы́я на земли́ возраща́й. Песнь 3 Ирмос: Весели́тся о Тебе́ Це́рковь Твоя́, Христе́, зову́щи:/ Ты моя́ кре́пость, Го́споди,/ и прибе́жище, и утвержде́ние. Припев: Святы́й благове́рный кня́же Дими́трие, моли́ Бо́га о на́с. Утеше́ние бога́тое и о́браз богому́дрый име́л еси́, кня́же Дими́трие,/ во отце́ твое́м духо́внем, святи́теле Алекси́и прему́дрем,/ ка́ко упра́вити оте́чество твое́. Припев: Святы́й благове́рный кня́же Дими́трие, моли́ Бо́га о на́с. Утеше́ние оби́льное прия́л еси́ в се́рдце твое́м, свя́те Дими́трие,/ послу́шав словеса́ богому́драго святи́теля,/ к му́жеству укрепля́вшаго тя. Сла́ва Отцу́ и Сы́ну и Свято́му Ду́ху. Утеше́ние ве́лие име́л еси́, богому́дре кня́же Дими́трие,/ ви́дя мно́гия дру́ги твоя́/ во бране́х о Бо́зе гото́выя ве́рно сподвизатися ти. И ны́не и при́сно и во ве́ки веко́в. Ами́нь. Богородичен: Пресвята́я Де́во, Богороди́тельнице,/ Ты му́дре лю́ди Твоя́ ко спасе́нию устроя́еши,/ соблюди́ и нас в по́двизех благи́х. Седален, глас 4 Я́ко свети́льник све́тел в житии́ свое́м лю́дем твои́м яви́лся еси́,/ богому́дре Дими́трие, кня́же приснопа́мятне и боголюбе́зне./ Не оста́ви нас, ме́ньших бра́тии свои́х,/ о оте́честве на́шем моли́тв твои́х те́плых прося́щих. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: При́зри на моли́твы на́ша, Де́во Пресвята́я,/ по́мощь и спасе́ние лю́дем оте́чества на́шего подаю́щи. Песнь 4 Ирмос: Вознесе́на Тя ви́девши Це́рковь на Кресте́,/ Со́лнце пра́ведное,/ ста в чи́не свое́м,/ досто́йно взыва́ющи:/ сла́ва си́ле Твое́й, Го́споди. Припев: Святы́й благове́рный кня́же Дими́трие, моли́ Бо́га о на́с. Терпе́ние ве́лие показа́л еси́, Дими́трие прему́дре, в княже́нии твое́м,/ преде́лы земли́ твоея́ укрепля́я и защища́я. Припев: Святы́й благове́рный кня́же Дими́трие, моли́ Бо́га о на́с. Терпе́ние и му́дрость яви́л еси́, свя́те,/ в похо́дех твои́х на ага́ряны,/ с по́мощию Бо́жиею побежда́я сих. Сла́ва Отцу́ и Сы́ну и Свято́му Ду́ху. Терпе́ние мно́гое име́л еси́, богому́дре Дими́трие,/ кня́зи Росси́йския с полки́ их объединя́я/ во еди́но во́инство христолюби́вое. И ны́не и при́сно и во ве́ки веко́в. Ами́нь. Богородичен: Пресвята́я Богоро́дице, Ма́ти Пречи́стая,/ Сы́на Твоего́ при́сно моли́/ о е́же возраста́ти и в си́лу Бо́жию приити́ избра́нным Твои́м. Песнь 5 Ирмос: Ты, Го́споди, мой свет,/ в мир прише́л еси́,/ свет Святы́й, обраща́яй из мра́чна неве́дения/ ве́рою воспева́ющия Тя. Припев: Святы́й благове́рный кня́же Дими́трие, моли́ Бо́га о на́с. Доброде́тельми богому́дрыми богате́я, Дими́трие всече́стне,/ строи́тель сла́вный гра́да Москвы́ яви́лся еси́,/ те́мже и лю́ди твоя́ возвесели́л еси́. Припев: Святы́й благове́рный кня́же Дими́трие, моли́ Бо́га о на́с. Доброде́тельми христиа́нскими в житии́ твое́м укрепля́яся, свя́те кня́же Дими́трие,/ мно́ги хра́мы Бо́жии пречу́дныя по градо́м княже́ния твоего́ воздви́гл еси́. Сла́ва Отцу́ и Сы́ну и Свято́му Ду́ху. В доброде́телех возраста́я, Дими́трие прему́дре,/ дом и кня́жество твое́ до́бре упра́вил еси́,/ во Христе́ Спа́се обогаща́яся. И ны́не и при́сно и во ве́ки веко́в. Ами́нь. Богородичен: Де́во Пренепоро́чная, Ма́ти Христа́ Бо́га,/ лю́ди и кня́зи Твоя́ в ми́ре соблюди́/ и в доброде́телех многоимени́тых возрасти́. Песнь 6 Ирмос: Пожру́ Ти со гла́сом хвале́ния, Го́споди,/ Це́рковь вопие́т Ти,/ от бесо́вския кро́ве очи́щшися,/ ра́ди ми́лости от ребр Твои́х/ исте́кшею Кро́вию. Припев: Святы́й благове́рный кня́же Дими́трие, моли́ Бо́га о на́с. Смиренному́дрие удоборазсуди́тельное и любо́вь изря́дную к ве́рным лю́дем твои́м показа́л еси́,/ пресла́вне кня́же Дими́трие,/ егда́ ко бра́ни ве́лии на Мама́я ополчи́лся еси́/ со сро́дники и дру́ги свои́ми. Припев: Святы́й благове́рный кня́же Дими́трие, моли́ Бо́га о на́с. Смиренному́дрие ве́лие яви́л еси́, свя́те Дими́трие,/ егда́ к стопа́м Се́ргия преподо́бнаго припа́л еси́,/ того́ благослове́ния на по́двиг ратный испроша́я. Сла́ва Отцу́ и Сы́ну и Свято́му Ду́ху. Смиренному́дрие и послуша́ние яви́л еси́ отцу́ твоему́, Се́ргию вели́кому,/ егда́ благослове́нием того́ два и́нока боголюби́ва, Алекса́ндра и Андре́я,/ в во́инство твое́ прия́л еси́. И ны́не и при́сно и во ве́ки веко́в. Ами́нь. Богородичен: Де́во Пренепоро́чная, Наде́ждо на́ша непосты́дная,/ во дни испыта́ний и скорбе́й ве́лиих не оста́ви моля́щихся Тебе́. Кондак, глас 2 По́двиги твои́ми, свя́те Дими́трие,/ страну́ на́шу Бог сохрани́,/ да́вый тебе́ си́лу непобеди́мую./ И ны́не, предста́телю кре́пкий,/ соблюда́й моли́твами святы́ми/ град твой Москву́ невреди́м/ от всех наве́т вра́жиих. Икос Измла́да за́поведем Госпо́дним поуча́яся/ и любо́вь Христо́ву в се́рдце свое́м стяжава́я, свя́те Дими́трие, кня́же всече́стне,/ словесе́м Госпо́дним и наставле́нию святы́х оте́ц, Алекси́я и Се́ргия, внима́я,/ в му́жа соверше́нна дости́гл еси́,/ та́же побе́ду пресла́вну одержа́л еси́./ И ны́не, предста́телю кре́пкий, соблюда́й моли́твами святы́ми/ град твой Москву́ невреди́м от всех наве́т вра́жиих. Песнь 7 Ирмос: В пещи́ авраа́мстии о́троцы перси́дстей,/ любо́вию благоче́стия па́че/ не́жели пла́менем опаля́еми, взыва́ху:/ благослове́н еси́ в хра́ме сла́вы Твоея́, Го́споди. Припев: Святы́й благове́рный кня́же Дими́трие, моли́ Бо́га о на́с. На избавле́ние Бо́жие упова́я, блаже́нне кня́же Дими́трие,/ пред нача́лом бра́ни благослове́ние отца́ твоего́ Се́ргия прия́т/ и, по́двигом и́нока Алекса́ндра вдохновля́ем,/ в би́тву со враги́ твои́ми вступи́л еси́. Припев: Святы́й благове́рный кня́же Дими́трие, моли́ Бо́га о на́с. Избавле́ния от враг лю́тых не ча́ющи,/ стеня́ше земля́ от кро́ве во́ев твои́х пролива́емыя,/ сам же ты, кня́же Дими́трие, в оде́жди во́ина препро́стаго с враго́м му́жественне сражался еси́. Сла́ва Отцу́ и Сы́ну и Свято́му Ду́ху. Избавле́ния не жда́ху мно́зи пресла́внии кня́зие и во́и твои́,/ ду́ши полага́юще за дру́ги своя́ на по́ле Кулико́ве,/ воево́да же Бренко́ Михаи́л под зна́менем Спа́совым за тя поги́бе. И ны́не и при́сно и во ве́ки веко́в. Ами́нь. Богородичен: Изба́вительнице кре́пкая, Богороди́тельнице Пречи́стая,/ честно́ю ико́ною Твое́ю, я́же Донска́я нарече́ся,/ укрепи́ла еси́ лю́ди Твоя́ в сме́ртней бра́ни вели́цей,/ зе́млю Росси́йскую спаса́ющи. Песнь 8 Ирмос: Ру́це распросте́р Дании́л,/ льво́в зия́ния в ро́ве затче́,/ о́гненную же си́лу угаси́ша,/ доброде́телию препоя́савшеся,/ благоче́стия рачи́тели, о́троцы, взыва́юще:/ благослови́те, вся дела́ Госпо́дня, Го́спода. Припев: Святы́й благове́рный кня́же Дими́трие, моли́ Бо́га о на́с. Чу́до пресла́вное бы́сть побе́да во́инства Росси́йскаго,/ тобо́ю, кня́же Дими́трие, собра́ннаго,/ егда́ полцы́ князе́й Влади́мира и Дими́трия Волынскаго на орду́ ага́рянскую внеза́пу изыдо́ша/ и в бе́гство ту́ю обрати́ша. Припев: Святы́й благове́рный кня́же Дими́трие, моли́ Бо́га о на́с. Чу́до непости́жно бы́сть,/ егда́ земля́ Росси́йская поколеба́ся от шу́ма бе́гства ага́рянскаго./ Ты же, сла́вне Дими́трие, мно́ги ра́ны прие́м, на земли́ сей, я́ко мертв, лежа́л еси́. Сла́ва Отцу́ и Сы́ну и Свято́му Ду́ху. Чу́до стра́шное бы́сть, ве́черу доспе́вшу и би́тве ути́хшей, мно́гое бо мно́жество во́инства Росси́йскаго острие́м меча́ падо́ша,/ и́хже имена́ вели́кий а́вва Се́ргий, открове́нием ди́вным, во оби́тели свое́й на моли́тве возноша́ше. И ны́не и при́сно и во ве́ки веко́в. Ами́нь. Богородичен: Чу́дное зна́мение попече́ния Твоего́, Пречи́стая Де́во Мари́е,/ о ро́де Росси́йстем яви́вши в де́нь пра́зднования Рождества́ Твоего́,/ пресла́вную побе́ду тому́ дарова́ла еси́. Песнь 9 Ирмос: Ка́мень нерукосе́чный/ от несеко́мыя го́ры, Тебе́, Де́во,/ краеуго́льный отсече́ся,/ Христо́с, совокупи́вый разстоя́щаяся естества́./ Тем, веселя́щеся, Тя, Богоро́дице, велича́ем. Припев: Святы́й благове́рный кня́же Дими́трие, моли́ Бо́га о на́с. О, ка́ко пострада́ земля́ Росси́йская в би́тве вели́цей,/ я́ко мно́жество люде́й за оте́чество души́ своя́ положи́ша,/ ты же, свя́те Дими́трие, с моли́твою и любо́вию/ во днех мно́зех телеса́ их земли́ предава́л еси́. Припев: Святы́й благове́рный кня́же Дими́трие, моли́ Бо́га о на́с. О, ка́ко просла́вися и́мя Бо́жие в по́двизе твое́м, кня́же Дими́трие пречу́дне, в сла́вней побе́де сей,/ е́юже лю́ди Росси́йския и́га стра́шнаго свободи́л еси́,/ и, нарече́ние Донска́го прия́в, моли́твенник при́сный о нас явля́ешися. Сла́ва Отцу́ и Сы́ну и Свято́му Ду́ху. О, ка́ко вели́к бы́сть по́двиг сей в лю́дех твои́х, пречу́дне кня́же наш Дими́трие,/ я́ко и на гряду́щая времена́ простре́ся сла́ва побе́ды/ христолюби́ваго во́инства Росси́йскаго на по́ле Кулико́ве. И ны́не и при́сно и во ве́ки веко́в. Ами́нь. Богородичен: О пречу́дная Влады́чице Богороди́тельнице,/ на пути́ люде́й Твои́х и вожде́й их призира́ющи/ и тем побе́ду на супоста́ты да́рующи,/ приими́ моли́твы недосто́йных раб Твои́х,/ к Тебе́ прибега́ющих. Светилен Побе́ду ве́лию во и́мя в Тро́ице сла́вимаго Бо́га,/ по сло́ву пресла́внаго Се́ргия,/ с во́и твои́ми одержа́л еси́, богому́дре кня́же Дими́трие./ Тем тя, я́ко предста́теля пред Бо́гом, вси почита́ем. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Еди́наго от Тро́ицы Бо́га в ложесна́х Твои́х носи́ла еси́, Богома́ти Пречи́стая./ Сего́ Бо́га Сло́ва и Сы́на Твоего́ о лю́дех умоля́ющи,/ покры́й нас предста́тельством Твои́м, Всепе́тая.

Минея, 30 Июля, Канон святаго Глас 8 Песнь 1 Ирмос: Пои́м Бо́гу,/ от го́рькия рабо́ты фарао́новы изба́вльшему Изра́иля/ и о́гненным столпо́м и све́тлым о́блаком наста́вльшему,/ я́ко просла́вися. Припев: Преподо́бне о́тче Ге́рмане, моли́ Бо́га о на́с. Сло́во ми пода́ждь, Сло́ве Бо́жий,/ во отверзе́ние уст мои́х на похвалу́ уго́дника Твоего́, преподо́бнаго Ге́рмана,/ пусты́ннаго жи́теля и мона́хов наста́вника и оби́тели Солове́цкия утвержде́ния. Припев: Преподо́бне о́тче Ге́рмане, моли́ Бо́га о на́с. От ю́ности безмо́лвное житие́ возлюби́в,/ пусты́ннаго пребыва́ния взыска́тель был еси́, преподо́бне,/ те́мже, улучи́в жела́емое со блаже́нным Савва́тием,/ равноа́нгельное жи́тельство показа́л еси́. Сла́ва Отцу́ и Сы́ну и Свято́му Ду́ху. Богоизбра́ннаго во и́ноческое селе́ние пусты́ннаго ме́ста о́строва Солове́цкаго/ пе́рвый насе́льник яви́лся еси́, блаже́нне Ге́рмане,/ и купножи́тель и сподви́жник преподо́бному Зоси́ме,/ с ни́мже оби́тель зде возгради́л еси́. И ны́не и при́сно и во ве́ки веко́в. Ами́нь. Богородичен: Его́же родила́ еси́ во спасе́ние всем ве́рным, Пречи́стая Де́во,/ моли́ приле́жно, я́ко Зижди́теля всех и Бо́га, поми́ловатися нам, рабо́м Твои́м,/ Богоро́дицу вои́стинну Тя испове́дающим. Песнь 3 Ирмос: Утверди́ся се́рдце мое́ во Го́споде,/ вознесе́ся рог мой в Бо́зе мое́м,/ разшири́шася на враги́ моя́ уста́ моя́,/ возвесели́хся о спасе́нии Твое́м. Припев: Преподо́бне о́тче Ге́рмане, моли́ Бо́га о на́с. Кто изрече́т по́двиги и труды́ твоя́, о́тче Ге́рмане?/ Ты бо, в де́бри пусты́нныя вшед, день и нощь тружда́лся еси́,/ посто́м и бде́нием те́ло свое́ удруча́я. Припев: Преподо́бне о́тче Ге́рмане, моли́ Бо́га о на́с. Злострада́нием и моли́твою стра́сти душе́вныя от ко́рене исто́ргл еси́,/ воздержа́нием же и злых удале́нием/ вся плотска́я вожделе́ния потреби́л еси́, блаже́нне. Сла́ва Отцу́ и Сы́ну и Свято́му Ду́ху. Бесо́в боре́ния не возмого́ша одоле́ти тя в до́брем произволе́нии,/ но благо́ю наде́ждею и кре́пким терпе́нием/ вся ко́зни их ничто́жны сотвори́л еси́. И ны́не и при́сно и во ве́ки веко́в. Ами́нь. Богородичен: Влады́чице ми́ра, Блага́я Помо́щнице,/ Твои́м всеси́льным предста́тельством сокруши́ вся востаю́щия на ны си́лы вра́жия/ и вознеси́ рог люди́й Твои́х. Седален, глас 8 Возше́д на высоту́ доброде́телей, о́браз был еси́ ученико́м твои́м,/ воздержа́нию и кро́тости, смире́нию же и послуша́нию тех наставля́я,/ и, я́ко па́стырь, ста́ду своему́ предходя́,/ до́бре ше́ствовати путе́м же́стоким пусты́ннаго жития́ научи́л еси́./ Те́мже ублажа́ем твое́ успе́ние, Ге́рмане преподо́бне,/ моли́ Христа́ Бо́га согреше́ний оставле́ние дарова́ти/ чту́щим любо́вию святу́ю па́мять твою́. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Тя, без се́мене ро́ждшую Бо́га пло́тию,/ вси ублажа́ем, ро́ди челове́честии, Богоро́дице Де́во;/ моли́ Сы́на Твоего́ согреше́ний оставле́ние дарова́ти/ покланя́ющимся ве́рою пресвято́му рождеству́ Твоему́. Песнь 4 Ирмос: Ты моя́ кре́пость, Го́споди,/ Ты моя́ и си́ла,/ Ты мой Бог, Ты мое́ ра́дование,/ не оста́вль не́дра О́тча/ и на́шу нищету́ посети́в./ Тем с проро́ком Авваку́мом зову́ Ти:/ си́ле Твое́й сла́ва, Человеколю́бче. Припев: Преподо́бне о́тче Ге́рмане, моли́ Бо́га о на́с. Напои́в ду́шу твою́ сле́зными пото́ки,/ соде́лал еси́ ю́ плодоно́сну и доброде́тели вся́кия износя́щу,/ те́мже путеводи́тель ко спасе́нию мно́гим был еси́. Припев: Преподо́бне о́тче Ге́рмане, моли́ Бо́га о на́с. А́ще и ку́пно со блаже́нным Савва́тием в безмо́лвие пусты́нное всели́лся еси́,/ оба́че я́ко еди́н Еди́ному Бо́гу/ моли́твою непреста́нною та́мо бесе́довал еси́, преподо́бне. Сла́ва Отцу́ и Сы́ну и Свято́му Ду́ху. Ум просветле́н жития́ чистото́ю имы́й,/ мы́сленныя прило́ги лука́вых де́монов удо́бно низлага́л еси́,/ вся тех ухищре́ния и кова́рства облича́я. И ны́не и при́сно и во ве́ки веко́в. Ами́нь. Богородичен: Блажи́т Тя, Пречи́стая, преподо́бных лик и вся́кое ве́рных совокупле́ние,/ Бо́жие бо Сло́во па́че ума́ и сло́ва родила́ еси́. Песнь 5 Ирмос: У́тренюет дух мой к Тебе́, Бо́же,/ от Отца́ рожде́нному неизрече́нно/ и воздви́гнувшему рог спасе́ния нам. Припев: Преподо́бне о́тче Ге́рмане, моли́ Бо́га о на́с. Во пло́ти сый, безпло́тных жи́тельству поревнова́л еси́, блаже́нне Ге́рмане,/ те́мже побе́ду на враги́ безпло́тныя прия́л еси́ от Бо́га и вене́ц сла́вы. Припев: Преподо́бне о́тче Ге́рмане, моли́ Бо́га о на́с. Во́льную нищету́ возлюби́в,/ в нестяжа́нии безпеча́льное житие́ препроводи́л еси́,/ сокро́вище некра́домое скрыва́я себе́ на Небеси́, по словеси́ ева́нгельскому. Сла́ва Отцу́ и Сы́ну и Свято́му Ду́ху. Очи́стив себе́ от вся́кия скве́рны плотски́я и душе́вныя,/ прия́телище Ду́ху Пресвято́му был еси́, преподо́бне,/ от Него́же дарова́нии духо́вными обогати́лся еси́. И ны́не и при́сно и во ве́ки веко́в. Ами́нь. Богородичен: Тя наде́жду на́шему спасе́нию стяжа́хом, Богома́ти,/ и ору́жие непобеди́мое на враги́ ви́димыя же и неви́димыя. Песнь 6 Ирмос: Очи́сти мя, Спа́се,/ мно́га бо беззако́ния мои́,/ и из глубины́ зол возведи́, молю́ся,/ к Тебе́ бо возопи́х, и услы́ши мя,/ Бо́же спасе́ния моего́. Припев: Преподо́бне о́тче Ге́рмане, моли́ Бо́га о на́с. Пла́кал и се́товал еси́ о разлуче́нии с сожи́телем твои́м, блаже́нным отце́м Савва́тием,/ не обре́т того́ в живы́х, егда́ возврати́лся еси́ во о́стров от путеше́ствия твоего́. Припев: Преподо́бне о́тче Ге́рмане, моли́ Бо́га о на́с. Ра́дости и весе́лия испо́лнился еси́,/ егда́ по разлуче́нии Савва́тиеве обре́л еси́ Зоси́му преподо́бнаго,/ с ни́мже па́ки во о́стров вшел еси́, Бо́жиим смотре́нием направля́емь. Сла́ва Отцу́ и Сы́ну и Свято́му Ду́ху. А́нгельския глаго́лы, к жене́ ры́бареве бы́вшия,/ я́ко недосто́ит жена́м сели́тися во о́строве сем, возвести́л еси́ Зоси́ме,/ це́рковь чу́дну на возду́се узре́вшему. И ны́не и при́сно и во ве́ки веко́в. Ами́нь. Богородичен: Бо́га, Его́же родила́ еси́ пло́тию,/ моли́, Пречи́стая, я́ко Человеколю́бца,/ уще́дрити люди согре́шшия. Кондак, глас 4 Вы́шних жела́я,/ вся до́лу влеку́щая возненави́дел еси́/ и, оте́чество свое́ оста́вль,/ в помо́рие пусты́нное отше́л еси́,/ та́же в морски́й о́стров удали́вся,/ в нем мно́га ле́та Го́сподеви порабо́тал еси́./ Те́мже, па́мять твою́ пра́зднующе,/ любо́вию вопие́м ти:/ ра́дуйся, Ге́рмане Богому́дре, о́тче наш. Икос Ду́ху Свято́му в жили́ще себе́ угото́вав,/ от Него́ все́ми Боже́ственными добро́тами укра́шен был еси́/ и наста́вник мона́хом яви́лся еси́, о́тче, де́лы благи́ми поуча́я ча́да твоя́./ Те́мже, па́мять твою́ пра́зднующе, взыва́ем тебе́ такова́я:/ ра́дуйся, богоизбра́ннаго ме́ста о́строва Солове́цкаго небе́сное насажде́ние;/ ра́дуйся, селе́ний и́ноческих Боже́ственное удобре́ние;/ ра́дуйся, пусты́ннаго жития́ люби́телю;/ ра́дуйся, безмо́лвия до́брый рачи́телю;/ ра́дуйся, преподо́бнаго Савва́тия во о́стров Солове́цкий приведы́й и сожи́тель ему́ бы́вый;/ ра́дуйся, преподо́бному Зоси́ме в созда́нии оби́тели и́ноческия послужи́вый;/ ра́дуйся, от нас ку́пно с си́ми преподо́бными отцы́ ублажа́емый;/ ра́дуйся, на Небесе́х со все́ми святы́ми от Христа́ Бо́га прославля́емый;/ ра́дуйся, Ге́рмане Богому́дре, о́тче наш. Песнь 7 Ирмос: Бо́жия снизхожде́ния/ огнь устыде́ся в Вавило́не иногда́./ Сего́ ра́ди о́троцы в пещи́, ра́дованною ного́ю,/ я́ко во цве́тнице, лику́юще, поя́ху:/ благослове́н еси́, Бо́же оте́ц на́ших. Припев: Преподо́бне о́тче Ге́рмане, моли́ Бо́га о на́с. Ничто́же земно́е предпоче́л еси́ па́че Небе́сных/ и, я́ко зла́то в горни́ле, искуси́лся еси́,/ в послуша́ниих и́ноческих тружда́яся и при́сно взыва́я:/ благослове́н еси́, Бо́же оте́ц на́ших. Припев: Преподо́бне о́тче Ге́рмане, моли́ Бо́га о на́с. Моли́твою непреста́нною Го́сподеви прилепля́яся,/ Тому Еди́ному послужи́л еси́/ и кончи́ною блаже́нною от земны́х удо́лий к Небе́сным оби́телем преше́л еси́, ра́достно поя́:/ благослове́н еси́, Бо́же оте́ц на́ших. Сла́ва Отцу́ и Сы́ну и Свято́му Ду́ху. Гроб твой, преподо́бне, благода́тию Христо́вою цельбопода́телен явля́ется,/ к нему́же с ве́рою притека́юще и исцеле́ния прие́млюще,/ вопие́м Прославля́ющему уго́дники Своя́:/ благослове́н еси́, Бо́же оте́ц на́ших. И ны́не и при́сно и во ве́ки веко́в. Ами́нь. Богородичен: Благослове́н Плод благослове́ннаго чре́ва Твоего́,/ Его́же благосло́вят Небе́сныя си́лы и преподо́бных собо́ри,/ нас изба́вльшаго кля́твы дре́вния, Благослове́нная. Песнь 8 Ирмос: А́нгели и небеса́,/ на Престо́ле Сла́вы седя́щаго/ и я́ко Бо́га непреста́нно сла́вимаго,/ благослови́те, по́йте/ и превозноси́те Его́ во ве́ки. Припев: Преподо́бне о́тче Ге́рмане, моли́ Бо́га о на́с. Подвиза́вся до́бре на земли́ и победи́в вся вра́жия де́йства,/ венча́лся еси́ сла́вою на Небеси́/ и ли́ку преподо́бных сочета́лся еси́. Припев: Преподо́бне о́тче Ге́рмане, моли́ Бо́га о на́с. Нетле́ние моще́й твои́х явля́ет, преподо́бне,/ я́ко обре́л еси́ благода́ть у Бо́га/ и и́маши насле́дие со святы́ми и со А́нгелы ликостоя́ние. Сла́ва Отцу́ и Сы́ну и Свято́му Ду́ху. Я́ко обогати́вшуся все́ми доброде́тельми в житии́,/ благода́ть чуде́с дарова́ся тебе́ по сме́рти,/ и то́чиши исцеле́ния ве́рно тя блажа́щим. И ны́не и при́сно и во ве́ки веко́в. Ами́нь. Богородичен: Спаси́ мя, Ма́ти Бо́жия,/ спасе́нию нача́ло ми́рови я́вльшая,/ избавля́ющи мя треволне́ния страсте́й и вся́кия ско́рби,/ да Тя сла́влю во ве́ки. Песнь 9 Ирмос: Благослове́н Госпо́дь, Бог Изра́илев,/ воздви́гнувый рог спасе́ния нам/ в дому́ Дави́дове, о́трока Своего́,/ в ни́хже посети́ нас Восто́к с высоты́/ и напра́вил ны есть на путь ми́ра. Припев: Преподо́бне о́тче Ге́рмане, моли́ Бо́га о на́с. Иере́ю благогове́йну во оте́чествии твое́м я́влься,/ повеле́л еси́ списа́ти о́браз твой и песнь тебе́ сложи́ти,/ той же со тща́нием сие́ сотвори́,/ в похвалу́ твою́ и во сла́ву Христа́ Бо́га, прославля́ющаго уго́дники Своя́. Припев: Преподо́бне о́тче Ге́рмане, моли́ Бо́га о на́с. Ико́на твоя́,/ на не́йже вку́пе со преподо́бными отцы́ Зоси́мою и Савва́тием изображе́н был еси́,/ чудотво́рна яви́ся,/ е́же бысть во изъявле́ние святы́ни твоея́,/ я́ко да па́мять твоя́ со святы́ми почита́ется. Сла́ва Отцу́ и Сы́ну и Свято́му Ду́ху. А́ще и не на ме́сте подвиго́в твои́х преста́вился еси́, о́тче преподо́бне,/ оба́че честны́я мо́щи твоя́ пренесены́ бы́ша во оби́тель твою́,/ иде́же во хра́ме, име́ни твоему́ созда́ннем, святоле́пно почива́ют. И ны́не и при́сно и во ве́ки веко́в. Ами́нь. Богородичен: О, чудесе́, всех чуде́с превы́шшаго!/ Я́ко Де́ва, во чре́ве вся́ческая Содержа́щаго сло́вом неискусому́жно прии́мши,/ без истле́ния родила́ еси́. Светилен Я́ко вои́стинну звезда́ путево́дная яви́лся еси́, Ге́рмане преподо́бне,/ блаже́нным отце́м на́шим Зоси́ме и Савва́тию и с ни́ми мно́жеству мона́хов,/ приве́дшая их в немяте́жное приста́нище Солове́цкаго о́строва/ и све́тлостию жития́ твоего́ озаря́ющая стези́ пусты́ннаго жи́тельства нам,/ почита́ющим святу́ю па́мять твою́. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Ра́дуйся, Тебе́ зове́м, Благослове́нная Богоро́дице Де́во,/ я́ко Тобо́ю присносу́щныя ра́дости прича́стницы бы́хом,/ Жизнь бо Ипоста́сную родила́ еси́ во спасе́ние всем пою́щим Тя.

Минея, 12 Июня, Канон преподо́бней Глас 3 Песнь 1 Ирмос: Во́ды дре́вле ма́нием Боже́ственным/ во еди́но со́нмище совокупи́вый,/ и раздели́вый мо́ре изра́ильтеским лю́дем,/ Сей Бог наш препросла́влен е́сть,/ Тому́ Еди́ному пои́м, я́ко просла́вися. Припев: Преподо́бная ма́ти А́нно, моли́ Бо́га о на́с. Да́ждь ми, Го́споди, разуме́ние,/ да досто́йно воспою́ и просла́влю благоуго́ждшую Ти преподо́бную ма́терь,/ пре́жде бы́вшую вели́кую княги́ню А́нну,/ и возопию́ Тебе́, Христу́ моему́, я́ко препросла́влен еси́. Припев: Преподо́бная ма́ти А́нно, моли́ Бо́га о на́с. О тебе́, блаже́нная ма́ти А́нно,/ хощу́ ны́не язы́к подви́гнути и сло́во простре́ти:/ споспе́шествуй ми, недосто́йному, моли́твами твои́ми,/ да досто́йно восхвалю́ тя и воспою́ Го́сподеви моему́, я́ко просла́вися. Сла́ва Отцу́ и Сы́ну и Свято́му Ду́ху. Со млады́х ногте́й твои́х страх Бо́жий име́ла еси́ в се́рдце твое́м, блаже́нная,/ его́же до конца́ содержа́ла еси́, укрепля́ема Боже́ственною благода́тию,/ тем и ду́шу твою́ спасла́ еси́, вы́ну пою́щи Христу́, я́ко просла́вися. И ны́не и при́сно и во ве́ки веко́в. Ами́нь. Богородичен: Тобо́ю, Пречи́стая Влады́чице, от всех родо́в предъизбра́нная Де́во,/ ве́сь мир обнови́ся,/ и ве́сь род челове́ческий от ле́сти диа́вольския свободи́ся,/ и вопие́т ко Христу́, я́ко просла́вися. Песнь 3 Ирмос: Непло́дная душе́ и безча́дная,/ стяжи́ плод благосла́вный,/ веселя́щися, возопи́й/ утверди́хся Тобо́ю, Бо́же,/ не́сть свят, не́сть пра́веден,/ па́че Тебе́, Го́споди. Припев: Преподо́бная ма́ти А́нно, моли́ Бо́га о на́с. О́ко душе́вное чи́сто и здра́во име́ла еси́ от ю́ности твое́й, блаже́нная,/ и́мже всегда́ зре́ла еси́ к Го́рнему селе́нию, его́же и дости́гла еси́,/ и ны́не Христу́ воспева́еши:/ не́сть свят и не́сть пра́веден, па́че Тебе́, Го́споди. Припев: Преподо́бная ма́ти А́нно, моли́ Бо́га о на́с. Из благочести́ваго ко́рене произрасла́ еси́, блаже́нная,/ и, во вся дни жития́ твоего́ с супру́гом твои́м чи́сто и непоро́чно пребыва́ющи,/ вопия́ла еси́ ко Христу́:/ не́сть свят и не́сть пра́веден, па́че Тебе́, Го́споди. Сла́ва Отцу́ и Сы́ну и Свято́му Ду́ху. Ничто́же пред Бо́гом вя́щше е́сть добро́ты душе́вныя./ Ты же, преподо́бная ма́ти, соблюла́ еси́ ю непреткнове́нно, вопию́щи ко Христу́:/ не́сть свят и не́сть пра́веден, па́че Тебе́, Го́споди. И ны́не и при́сно и во ве́ки веко́в. Ами́нь. Богородичен: Отрокови́це Чи́стая, Ма́ти Го́спода на́шего,/ помози́ ми, недосто́йному рабу́ Твоему́,/ воспе́ти уго́дницу Сы́на Твоего́ и Бо́га моего́,/ преподо́бную ма́терь А́нну, и рещи́ ко Христу́:/ не́сть свят и не́сть пра́веден, па́че Тебе́, Го́споди. Седален, глас 3 Воспита́на была́ еси́, блаже́нная, от ро́ждших тя в за́поведех Госпо́дних,/ я́ко лоза́ в красноцвету́щих виногра́дех,/ тем тя ублажа́ем и святу́ю па́мять твою́ ве́рно почита́ем./ Моли́ Христа́ Бо́га, да спасе́т ду́ши на́ша. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Све́та Преве́чнаго, от Отца́ пре́жде век рожде́нное Сло́во Бо́жие,/ родила́ еси́ нам, Пресвята́я Влады́чице, Христа́ Бо́га на́шего,/ И́мже вселе́нная от тли сме́ртныя свободи́ся,/ тем Тя непреста́нно с Ним пое́м и велича́ем. Песнь 4 Ирмос: Покры́ла е́сть Небеса́ доброде́тель Твоя́, Христе́,/ из Киво́та бо проше́д святы́ни, Твоея́ Нетле́нныя Ма́тере,/ в хра́ме сла́вы Твоея́ яви́лся еси́,/ я́ко Младе́нец руконоси́м,/ и испо́лнишася вся Твоего́ хвале́ния. Припев: Преподо́бная ма́ти А́нно, моли́ Бо́га о на́с. Преукраше́на была́ еси́, преподо́бная ма́ти, доброде́тельми твои́ми,/ я́ко цве́ты благоуха́нными и я́ко ка́мением драгоце́нным./ Тем и угоди́ла еси́ Нетле́нному Царю́ и Влады́це всех,/ Ему́же и воспе́ла еси́:/ Го́споди, испо́лнишася вся Твоего́ хвале́ния. Припев: Преподо́бная ма́ти А́нно, моли́ Бо́га о на́с. О, тве́рдое основа́ние ве́ры, о, любы́ к Бо́гу кре́пкая!/ В же́нстем бо естестве́ му́жески победи́ла еси́ неви́димаго врага́ супоста́та/ и та́ко угоди́ла еси́ Христу́, вопию́щи:/ Го́споди, испо́лнишася вся Твоего́ хвале́ния. Сла́ва Отцу́ и Сы́ну и Свято́му Ду́ху. Христо́в храм была́ еси́, преподо́бная ма́ти,/ твое́ю чистото́ю и целому́дрием и про́чими доброде́тельми,/ те́мже вмести́ла еси́ в себе́ Свята́го Ду́ха,/ к Нему́же и возопи́ла еси́:/ Го́споди, испо́лнишася вся Твоего́ хвале́ния. И ны́не и при́сно и во ве́ки веко́в. Ами́нь. Богородичен: Вои́стинну всех тва́рей вы́шши яви́лася еси́, Влады́чице,/ и кто дово́лен по достоя́нию изрещи́ вели́чие Твое́?/ Простра́ннее бо небе́с яви́ся чре́во Твое́, в не́мже носи́ла еси́ все́ми Невмести́маго Бо́га,/ к Нему́же и мы вопие́м:/ Го́споди, испо́лнишася вся Твоего́ хвале́ния. Песнь 5 Ирмос: Я́ко ви́де Иса́ия обра́зно/ на Престо́ле превознесе́на Бо́га,/ от А́нгел Сла́вы дориноси́ма,/ о, окая́нный, – вопия́ше, – аз!/ прови́дех бо воплоща́ема Бо́га, Све́та Невече́рня/ и ми́ром влады́чествующа. Припев: Преподо́бная ма́ти А́нно, моли́ Бо́га о на́с. А́ще и во благоде́нствии пребыва́ла еси́, блаже́нная ма́ти,/ и вся́ко изоби́лие близ себе́ име́ла еси́,/ ника́коже вдала́ся еси́ на поко́й и весе́лие пи́щное,/ но, зе́льным трудо́м и воздержа́нием те́ло твое́ удруча́ющи,/ воспева́ла еси́ Жениха́ твоего́, Христа́,/ Све́та Невече́рня и ми́ром влады́чествующа. Припев: Преподо́бная ма́ти А́нно, моли́ Бо́га о на́с. Любо́вию Христо́вою уязви́вшися, блаже́нная ма́ти,/ вели́кая княги́не иноки́не А́нно,/ я́ко добропло́дная лоза́ в виногра́де, процвела́ еси́ во гра́де Ка́шине благи́ми твои́ми дея́нии/ и победи́ла еси́ бесо́вския полки́, воспева́ющи Христа́,/ Све́та Невече́рня и ми́ром влады́чествующа. Сла́ва Отцу́ и Сы́ну и Свято́му Ду́ху. И́стинным све́том Христо́вым осия́на была́ еси́, ма́ти свята́я,/ вели́кая княги́не иноки́не А́нно,/ насыща́ющися ве́лия благода́ти и воспева́ющи Его́,/ Све́та Невече́рня и ми́ром влады́чествующа. И ны́не и при́сно и во ве́ки веко́в. Ами́нь. Богородичен: Ты у́бо, Чи́стая Ма́ти Госпо́дня,/ чистото́ю и де́вством всех превзошла́ еси́,/ те́мже избра́на была́ еси́ в Бо́жие вмести́лище и родила́ еси́ нам Христа́ Бо́га на́шего,/ Све́та Невече́рня и ми́ром влады́чествующа. Песнь 6 Ирмос: Бе́здна после́дняя грехо́в обы́де мя,/ и исчеза́ет дух мой;/ но простры́й, Влады́ко, высо́кую Твою́ мы́шцу,/ я́ко Петра́, мя, Упра́вителю, спаси́. Припев: Преподо́бная ма́ти А́нно, моли́ Бо́га о на́с. Из благочести́ваго ко́рене произрасла́ еси́,/ преподо́бная ма́ти, вели́кая княги́не иноки́не А́нно,/ благоче́стием же и ве́рою, а́ки цвет, процвела́ еси́ во твое́м оте́честве, во гра́де Ка́шине,/ и прешла́ еси́ к Го́рнему жи́тельству, вопию́щи ко Христу́:/ я́ко Петра́, мя, Упра́вителю, спаси́. Припев: Преподо́бная ма́ти А́нно, моли́ Бо́га о на́с. Вои́стинну досто́йна еси́ похвалы́ ве́лия,/ преподо́бная ма́ти, вели́кая княги́не А́нно,/ я́ко в же́нстем естестве́ му́жескую кре́пость име́ла еси́,/ и победи́ла еси́ супоста́та диа́вола, и воспева́ла еси́ ко Влады́це Христу́:/ яко Петра́, мя, Упра́вителю, спаси́. Сла́ва Отцу́ и Сы́ну и Свято́му Ду́ху. Ей, вои́стинну све́тел и тверд ум имела еси́, преподо́бная,/ вся бо кра́сная ми́ра сего́, я́ко уме́ты, вмени́ла еси́, блаже́нная,/ и ничто́же возмо́же поколеба́ти непоро́чную твою́ ду́шу,/ внегда́ воспева́ти ти Христу́:/ я́ко Петра́, мя, Упра́вителю, спаси́. И ны́не и при́сно и во ве́ки веко́в. Ами́нь. Богородичен: Ле́стным у́бо змии́ным преступле́нием низпадо́хом,/ но с Сы́ном Твои́м, Иису́сом Христо́м, Бо́гом на́шим,/ совоста́хом, Ма́ти Госпо́дня,/ Его́же родила́ еси́ нам, Свет, и Живо́т, и Воскресе́ние. Кондак, глас 4 Я́ко пресве́тлая звезда́,/ яви́лася еси́ в Росси́йстей земли́, во гра́де Ка́шине,/ преподо́бная ма́ти А́нно,/ во всех благочести́вых и ве́рных жена́х,/ а́ки крин, процвела́ еси́ чи́стым и непоро́чным твои́м житие́м,/ во и́нокинях же соверше́нными твои́ми труды́ и по́двиги,/ и возшла́ еси́ к Вы́шнему гра́ду, ра́дующися и веселя́щися,/ я́ко до́бре соверши́вши твое́ тече́ние,/ и ны́не честны́я твоя́ мо́щи,/ а́ки би́серие драго́е, яви́шася,/ на исцеле́ние всем, приходя́щим с ве́рою./ Тем и вопие́м ти:/ ра́дуйся, всекра́сная душе́ю,/ и моли́ Христа́ Бо́га/ о спасе́нии душ на́ших. Икос Прииди́те, вси благове́рнии лю́дие,/ воспои́м и просла́вим преподо́бную вели́кую княги́ню и́нокиню А́нну и та́ко к ней возопии́м:/ ра́дуйся, ма́ти свята́я, великоимени́тая княги́не и́нокине А́нно,/ я́ко от ю́ности твоея́ возлюби́ла еси́ Христа́/ и по за́поведем Его́ ше́ствовала еси́;/ ра́дуйся, я́ко зе́льным твои́м воздержа́нием те́ло твое́ удручи́ла еси́./ Ра́дуйся, я́ко сподо́билася еси́ от Бо́га да́ра чудотворе́ний;/ ра́дуйся, яко озари́ Бог се́рдце твое́,/ во е́же восхоте́ти облещи́ся во и́ноческое одея́ние и после́довати Христу́./ Ра́дуйся, ни́щим пита́тельнице и си́рым засту́пнице;/ ра́дуйся, всем росси́йским жена́м похвало́ и утвержде́ние./ Ра́дуйся, всей Росси́йстей стране́ тве́рдое удобре́ние;/ ра́дуйся, я́ко вме́сто земна́го ца́рства Небе́сное обрела́ еси́./ Ра́дуйся, я́ко по сме́рти твое́й те́ло твое́ в не́дрех земли́ не подве́ржеся тле́нию;/ ра́дуйся, я́ко предстои́ши с ли́ки святы́х и преподо́бных жен Невече́рнему Све́ту/ и мо́лишися о спасе́нии душ на́ших. Песнь 7 Ирмос: Я́коже дре́вле/ благочести́выя три о́троки ороси́л еси́ в пла́мени халде́йстем,/ све́тлым Божества́ огне́м и нас озари́,/ благослове́н еси́, взыва́ющия,/ Бо́же оте́ц на́ших. Припев: Преподо́бная ма́ти А́нно, моли́ Бо́га о на́с. И́стинно ве́лие чу́до яви́ся во гра́де Ка́шине,/ я́ко честны́я твоя́ мо́щи мно́га ле́та земле́ю покрове́ны бы́ша,/ ны́не же Бо́жиею благода́тию яви́шася верху́ земли́/ на исцеле́ние всем, приходя́щим с ве́рою и вопию́щим:/ благослове́н Бог оте́ц на́ших. Припев: Преподо́бная ма́ти А́нно, моли́ Бо́га о на́с. Ка́ко возмо́жем не диви́тися тебе́, блаже́нная ма́ти?/ Пребыла́ бо еси́, а́ки свеща́ светя́щи,/ посреде́ росси́йских жен чу́дным твои́м житие́м, вы́ну воспева́ющи:/ благослове́н Бог оте́ц на́ших. Сла́ва Отцу́ и Сы́ну и Свято́му Ду́ху. Утвержде́на была́ еси́, ма́ти преподо́бная,/ а́ки адама́нт кре́пкий, доброде́тельми твои́ми/ и, я́ко неве́ста, укра́шена была́ еси́ мони́сты златы́ми –/ де́лы твои́ми благи́ми, воспева́ющи Христу́:/ благослове́н еси́, Го́споди Бо́же оте́ц на́ших. И ны́не и при́сно и во ве́ки веко́в. Ами́нь. Богородичен: Ю́ницу Тя нескве́рную, Де́ву и Богоро́дицу,/ издале́ча проро́цы имены́ разли́чными нареко́ша:/ ин бо Тя го́ру мы́сленну нарече́,/ други́й же – Роди́тельницу Бо́жию,/ ов же – руно́, ов же – свяще́нную две́рь./ Те́мже и мы вси досто́йно Тя пое́м и славосло́вим во ве́ки. Песнь 8 Ирмос: Служи́ти Живо́му Бо́гу/ в Вавило́не о́троцы претерпе́вше,/ о мусики́йских орга́нех неради́ша/ и, посреде́ пла́мене стоя́ще, боголе́пную пе́снь воспева́ху, глаго́люще:/ благослови́те, вся дела́ Госпо́дня, Го́спода. Припев: Преподо́бная ма́ти А́нно, моли́ Бо́га о на́с. Ка́ко изглаго́лю вели́чие Бо́жие/ на тебе́, преподо́бная ма́ти А́нно, я́вльшееся?/ Я́ко по толи́цех ле́тех обрето́шася мо́щи твоя́ нетле́нны,/ на удивле́ние всем челове́ком, пою́щим:/ благослови́те, вся дела́ Госпо́дня, Го́спода. Припев: Преподо́бная ма́ти А́нно, моли́ Бо́га о на́с. Ничто́же е́сть дража́йше пред Бо́гом доброде́тельныя души́,/ ея́же ве́сь мир недосто́ин./ Те́мже и ты, преподо́бная ма́ти А́нно,/ па́че всего́ прилежа́ла еси́ о сицеве́й безсме́ртней ве́щи, пою́щи:/ благослови́те, вся дела́ Госпо́дня, Го́спода. Сла́ва Отцу́ и Сы́ну и Свято́му Ду́ху. Я́ко свещу́ све́тлу, угото́вала еси́ кро́ткую ду́шу твою́, преподо́бная ма́ти А́нно,/ те́мже по сме́рти твое́й мно́га исцеле́ния неду́жным излия́шася от честны́х моще́й твои́х./ Сего́ ра́ди мы вопие́м:/ благослови́те, вся дела́ Госпо́дня, Го́спода. И ны́не и при́сно и во ве́ки веко́в. Ами́нь. Богородичен: Го́спода моего́ и Бо́га Ро́ждшая, Ма́ти Безневе́стная,/ дерзнове́ние иму́щи к Нему́, заступи́ и сохрани́ мя Твои́м хода́тайством, я́ко да воспою́:/ благослови́те, вся дела́ Госпо́дня, Го́спода. Песнь 9 Ирмос: Сла́дкою Пречи́стаго Твоего́ рождества́/ стрело́ю уя́звлени, Чи́стая,/ Твое́й достожела́нней добро́те дивя́щеся,/ пе́сньми а́нгельскими досто́йно Тя я́ко Ма́терь Бо́жию велича́ем. Припев: Преподо́бная ма́ти А́нно, моли́ Бо́га о на́с. И́миже ве́сть судьба́ми прославля́ет Госпо́дь святы́я Своя́,/ и́хже имена́ напи́сана су́ть на Небеси́ в кни́гах живо́тных,/ То́йже и тя просла́ви Свои́м милосе́рдием, преподо́бная ма́ти А́нно./ Тем тя пое́м и велича́ем. Припев: Преподо́бная ма́ти А́нно, моли́ Бо́га о на́с. Ны́не с ли́ки А́нгельскими на Небесе́х предстои́ши Влады́це всех, преподо́бная ма́ти А́нно,/ моля́щи о гра́де твое́м и о чту́щих ве́рою святу́ю па́мять твою́,/ неду́гующим же подаю́щи исцеле́ние от честны́х моще́й твои́х./ Тем тя пое́м и велича́ем. Сла́ва Отцу́ и Сы́ну и Свято́му Ду́ху. Ю́на еще́ во́зрастом бы́вши, преподо́бная ма́ти А́нно,/ те́сным и приско́рбным путе́м ше́ствовала еси́,/ вся́кия сла́дости, я́ко го́рести, отвраща́ющися,/ ны́не же дости́гла еси́ неизрече́нныя ра́дости./ Тем тя пое́м и велича́ем. И ны́не и при́сно и во ве́ки веко́в. Ами́нь. Богородичен: Ааро́нов жезл прозябе́й, Влады́чице, пре́жде непло́ден быв,/ по́слежде цвет и плод испусти́;/ та́кожде и Ты, Пресвята́я Де́во, безму́жно родила́ еси́ Христа́ Бо́га на́шего./ Тем Тя пое́м и велича́ем. Светилен Стра́хом Бо́жиим огражде́на была́ еси́, преподо́бная,/ и, ника́коже убоя́вшися де́монских сил,/ отшла́ еси́ ко Трисия́нному Вели́кому Све́ту/ и ны́не пребыва́еши в неизрече́нней све́тлости со все́ми святы́ми./ Тем тя мо́лим:/ моли́ся о нас, творя́щих святу́ю па́мять твою́. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Све́та Преве́чнаго родила́ еси́ нам, Христа́ Бо́га на́шего, Пречи́стая Де́во,/ изба́вльшаго ве́сь мир от ле́сти диа́вола./ Те́мже мо́лим Тя:/ не преста́й моля́щи, да пода́ст нам ми́лость Свою́ в Де́нь Су́дный.

Минея, 14 Июля, Канон Святому Апостолу Акиле Глас 2 Песнь 1 Ирмос: Гряди́те, лю́дие,/ пои́м песнь Христу́ Бо́гу,/ разде́льшему мо́ре и наста́вльшему лю́ди,/ я́же изведе́ из рабо́ты еги́петския,/ я́ко просла́вися. Припев: Святы́й апо́столе Аки́ло, моли́ Бо́га о на́с. Свяще́ннаго свяще́нными воспои́м Аки́лу пе́сньми и возопие́м:/ того́ моли́твами, Ще́дре, вся спаси́, я́ко Пребла́г. Припев: Святы́й апо́столе Аки́ло, моли́ Бо́га о на́с. Весь себе́, блаже́нне, прия́телище Ду́ха светови́дно сотвори́л еси́,/ осия́емь Того́ све́тлыми заря́ми,/ тем су́щия во тьме просвети́л еси́. Сла́ва Отцу́ и Сы́ну и Свято́му Ду́ху. Зако́ном Христо́вым огради́в ум твой,/ беззако́нных шата́ние все низложи́л еси́/ и и́дольския хра́мы вся разори́л еси́, пострада́в, Богоблаже́нне. И ны́не и при́сно и во ве́ки веко́в. Ами́нь. Богородичен: Сло́вом, Чи́стая, Сло́во во утро́бе зачала́ еси́, сло́вом вся соде́лавшаго./ Сего́ ра́ди Тя словесы́ Боже́ственными воспева́ем, Богора́дованная. Песнь 3 Ирмос: Утверди́ нас в Тебе́, Го́споди,/ Дре́вом умерщвле́й грех,/ и страх Твой всади́/ в сердца́ нас, пою́щих Тя. Припев: Святы́й апо́столе Аки́ло, моли́ Бо́га о на́с. Возжела́л еси́ Бо́га, я́ко преподо́бен, сла́вне, еди́наго Влады́ку и Царя́,/ и Того́ Боже́ственное хоте́ние несумне́нным се́рдцем испо́лнил еси́. Припев: Святы́й апо́столе Аки́ло, моли́ Бо́га о на́с. Кре́постию Честна́го и Боже́ственнаго Ду́ха, Аки́ло прехва́льне,/ лука́ваго кре́пость всю низложи́л еси́,/ пострада́в до́блественне, свяще́ннейше. Сла́ва Отцу́ и Сы́ну и Свято́му Ду́ху. Умо́м твои́м чи́стым созерца́я сла́ву Госпо́дню,/ тоя́ причасти́лся еси́ соверше́нно, блаже́нне,/ отше́д от вре́менных к пребыва́ющим. И ны́не и при́сно и во ве́ки веко́в. Ами́нь. Богородичен: Еди́н Чи́стый, еди́н Госпо́дь Тя еди́ну я́ко позна́,/ чисте́йшую всея́ тва́ри, Пренепоро́чная,/ от чи́стых Твои́х крове́й воплоти́ся. Седален, глас 4 Па́вла глаго́лы озари́в твою́ ду́шу,/ я́ко со́лнце, просия́л еси́ Богоразу́мия све́том, Аки́ло блаже́нне,/ вене́ц же муче́ния испле́л еси́ зако́нно./ Те́мже источа́еши ре́ки исцеле́ний ве́рою пра́зднующим, блаже́нне, па́мять твою́. Песнь 4 Ирмос: Услы́шах, Го́споди,/ слух Твоего́ смотре́ния,/ и просла́вих Тя,/ Еди́не Человеколю́бче. Припев: Святы́й апо́столе Аки́ло, моли́ Бо́га о на́с. Дрема́нием спя́щия лука́ваго, Аки́ло, злоче́стия/ ко благоче́стия све́ту воздви́гл еси́. Припев: Святы́й апо́столе Аки́ло, моли́ Бо́га о на́с. Го́рдое свире́пство врага́ низложи́л еси́, Аки́ло,/ смире́нием Боже́ственным вооружи́вся. Сла́ва Отцу́ и Сы́ну и Свято́му Ду́ху. Блаже́нно пострада́л еси́ за Христа́, кровь твою́ излия́в,/ свяще́нник и свиде́тель страда́ний Его́. И ны́не и при́сно и во ве́ки веко́в. Ами́нь. Богородичен: Мы́сленну Тя пала́ту и высо́кий престо́л Царя́,/ Богоро́дице Влады́чице, имену́ем. Песнь 5 Ирмос: Све́та Пода́телю и веко́в Тво́рче, Го́споди,/ во све́те Твои́х повеле́ний наста́ви нас:/ ра́зве бо Тебе́, ино́го бо́га не зна́ем. Припев: Святы́й апо́столе Аки́ло, моли́ Бо́га о на́с. Сла́дко сло́во при́сно источа́я благоче́стия, прему́дре,/ го́рькою пре́лестию одебеле́вшия услади́л еси́ ду́ши,/ я́ко священнотаи́нник, Аки́ло прехва́льне. Припев: Святы́й апо́столе Аки́ло, моли́ Бо́га о на́с. Твоя́ похвалы́ Лука́ Богогла́сный вои́стинну написа́,/ свяще́ннаго бо Па́вла учени́к и Боже́ствен странново́дец быв,/ Боже́ственным я́ве наказу́я. Сла́ва Отцу́ и Сы́ну и Свято́му Ду́ху. Я́коже звезду́ я́сну, све́тлы лучи́ испуща́ющу,/ честно́е пропове́дание, свяще́ннаго обре́т Па́вла,/ от того́ зари́ прия́л еси́ словеса́ и свет был еси́. И ны́не и при́сно и во ве́ки веко́в. Ами́нь. Богородичен: Ма́ти и раба́ Христа́, вопло́щшагося нас ра́ди, была́ еси́,/ Его́же приле́жно всегда́ моли́, е́же спасти́ нас,/ Богоро́дицу Тя Чи́стую имену́ющих. Песнь 6 Ирмос: В бе́здне грехо́вней валя́яся,/ неизсле́дную милосе́рдия Твоего́ призывя́ю бе́здну:/ от тли, Бо́же, мя возведи́. Припев: Святы́й апо́столе Аки́ло, моли́ Бо́га о на́с. Излия́ся благода́ть во устну́ твое́ю, блаже́нне свяще́нне,/ те́мже благослови́ тя всех Госпо́дь во ве́ки, Аки́ло Богодохнове́нне. Припев: Святы́й апо́столе Аки́ло, моли́ Бо́га о на́с. Неду́гом разли́чным измене́ние и согреша́ющим душа́м очисти́лище/ твоя́ моли́тва бысть, Богоно́се Аки́ло блаже́нне. Сла́ва Отцу́ и Сы́ну и Свято́му Ду́ху. Ше́ствия твоя́, боже́ственно сотворя́ема и к путе́м Бо́жиим направля́ема,/ блудя́щим яви́шася наставле́ние и стезя́ спаси́тельная. И ны́не и при́сно и во ве́ки веко́в. Ами́нь. Богородичен: Господоиме́нная Де́во Всенепоро́чная,/ Я́же благи́х Пода́теля Бо́га ро́ждшая,/ Тя пою́щия всегда́ от напа́стей многообра́зных спаси́. Кондак, глас 4 Я́ко ве́лие со́лнце, Це́рковь тя стяжа́вши, сла́вне Аки́ло,/ светлостьми́ уче́ния твоего́ просвеща́ет ве́рно чту́щия тя,/ Госпо́день апо́столе. Песнь 7 Ирмос: О́бразу злато́му, на по́ле Деи́ре служи́му,/ трие́ Твои́ о́троцы небрего́ша безбо́жнаго веле́ния,/ посреде́ же огни́ вве́ржени, ороша́еми, поя́ху:/ благослове́н еси́, Бо́же оте́ц на́ших. Припев: Святы́й апо́столе Аки́ло, моли́ Бо́га о на́с. Истка́в себе́ нетле́ния оде́жду Боже́ственным Ду́хом,/ весь красе́н был еси́ и врага́ обнажи́л еси́,/ и́же от него́, Аки́ло, обнаже́нныя оде́ял еси́ во оде́жду светови́дну/ и свет спаси́тельный. Припев: Святы́й апо́столе Аки́ло, моли́ Бо́га о на́с. Гла́дом мы́сленным одержи́мыя лю́ди и бе́дствующия/ хле́бом слове́с, досточу́дне Богому́дре напита́л еси́/ и Небе́сныя трапе́зы прича́стники сотвори́л еси́,/ священнотаи́нник быв Богови́ден. Сла́ва Отцу́ и Сы́ну и Свято́му Ду́ху. Свято́му хра́му твоему́ притека́ющии здра́вие прие́млют,/ и страсте́й разреша́ются, и от неду́г очища́ются,/ воспева́юще тя любо́вию и вопию́ще, прехва́льне:/ благослове́н еси́, Бо́же оте́ц на́ших. И ны́не и при́сно и во ве́ки веко́в. Ами́нь. Богородичен: Умертви́ся пе́рвее Ада́м тлетво́рною сне́дию, Всенепоро́чная,/ Ты же, ро́ждши Живо́т наш, сего́, Де́во, оживи́ла еси́./ Тем я́ко до́брых Тя вино́вну воспева́юще, вопие́м:/ благослове́нна еси́, Я́же Бо́га пло́тию ро́ждши. Песнь 8 Ирмос: В пещь о́гненную ко отроко́м евре́йским снизше́дшаго/ и пла́мень в ро́су прело́жшаго Бо́га/ по́йте, дела́, я́ко Го́спода/ и превозноси́те во вся ве́ки. Припев: Святы́й апо́столе Аки́ло, моли́ Бо́га о на́с. Ра́достно на Небесе́х с Боже́ственными ученики́, и слуги́, и самови́дцы Сло́ва,/ я́ко учени́к живы́й, Аки́ло, и боже́ственне обожа́емь,/ помина́й ве́рою и любо́вию тя пою́щия. Припев: Святы́й апо́столе Аки́ло, моли́ Бо́га о на́с. По́тов твои́х то́ки, ре́ки всем нам Боже́ственных чуде́с источа́ют, блаже́нне,/ и то́ки страсте́й безме́стных изсуша́ют всегда́,/ и ополче́ния погружа́ют льсти́ваго. Сла́ва Отцу́ и Сы́ну и Свято́му Ду́ху. Приступле́нием обожа́емь при́сно, я́ко приближа́яся Бо́гу умо́м невеще́ственным,/ весь свет еси́, отреши́вся от пло́ти,/ и ви́диши, я́же ви́дят А́нгели,/ сла́вне Аки́ло, Христо́в священному́чениче. И ны́не и при́сно и во ве́ки веко́в. Ами́нь. Богородичен: Я́ко всех вино́внаго Бо́га,/ вы́шше вся́кия вои́стинну, Чи́стая, вины́ во утро́бе заче́нши,/ и нас ра́ди по нам я́вльшася, ро́ждшая, Пренепоро́чная,/ Сего́ моли́ о пою́щих Тя. Песнь 9 Ирмос: От Бо́га Бо́га Сло́ва,/ неизрече́нною му́дростию прише́дшаго обнови́ти Ада́ма,/ я́дию в тле́ние па́дшаго лю́те,/ от Святы́я Де́вы неизрече́нно воплоти́вшагося нас ра́ди,/ ве́рнии, единому́дренно пе́сньми велича́ем. Припев: Святы́й апо́столе Аки́ло, моли́ Бо́га о на́с. Свяще́нными тя пе́сньми свяще́нна бы́вша сосу́да Сло́ва/ и че́стна, Сего́ и прему́дра пропове́дника, и ми́ра свети́льника,/ и утвержде́ние ве́ры на́шея, соше́дшеся, Аки́ло, согла́сно ублажа́ем. Припев: Святы́й апо́столе Аки́ло, моли́ Бо́га о на́с. Я́ко потреби́тель ле́сти, и язы́ков наста́вник,/ и Боже́ственный Спа́са страда́лец, и сограждани́н,/ и ссе́льник святы́х А́нгелов, Аки́ло Богогла́се,/ с ни́ми Влады́ку умоли́ спасти́ ду́ши на́ша. Припев: Святы́й апо́столе Аки́ло, моли́ Бо́га о на́с. Тя, ученика́ у́бо Па́влу, уве́девше, Аки́ло, ми́рови же свети́льника неле́стна/ и свяще́ннаго му́ченика, потреби́теля и́долов и ра́зума Бо́жия вводи́теля,/ благоче́стною мы́слию, Богому́дре, ублажа́ем. Сла́ва Отцу́ и Сы́ну и Свято́му Ду́ху. Всесвята́я твоя́ па́мять возсия́вши ми́ру,/ я́ко со́лнце, просвеща́ет ду́ши благоче́стно пою́щих тя,/ в не́йже моли́ся, блаже́нне, да́ти очище́ние грехо́в,/ и мир глубо́к, и ве́лию всем ми́лость. И ны́не и при́сно и во ве́ки веко́в. Ами́нь. Богородичен: Све́тел Тя све́щник прозря́ше проро́к,/ Све́та, возсия́вшаго от Све́та, Де́во Ма́ти, нося́щу,/ просвеща́ющаго бога́тно пе́рвее омраче́нныя/ заря́ми несказа́ннаго Своего́, Пренепоро́чная, Божества́.

Минея, 3 Ноября, Канон мучеников Глас 4 Песнь 1 Ирмос: Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,/ и воспою́, ра́дуяся, Тоя́ чудеса́. Припев: Святи́и священному́ченицы, моли́те Бо́га о на́с. Тро́ицы равночи́сленнии Пресвяты́я, всебога́тии,/ Тоя́ яви́стеся честни́и покло́нницы и предстоите́ Престо́лу Тро́ичному,/ те́плии засту́пницы притека́ющим к вам. Припев: Святи́и священному́ченицы, моли́те Бо́га о на́с. Тро́ицы покло́нницы трисо́лнечныя су́ще,/ многобо́жия лесть, святи́и, разруши́сте,/ претерпе́вше му́ки многообра́зныя и смерть непра́ведную, Богоблаже́ннии. Сла́ва Отцу́ и Сы́ну и Свято́му Ду́ху. Муче́ния пучи́ну без волне́ния преидо́сте ве́рою, блаже́ннии,/ и приста́сте к безпеча́льному животу́,/ к приста́нищу Вы́шния све́тлости,/ в сла́ву неизрече́нную. И ны́не и при́сно и во ве́ки веко́в. Ами́нь. Богородичен: Ра́дости нам Хода́таица,/ я́ко прие́мши исполне́ние всего́ Божества́, яви́лася еси́, Пренепоро́чная./ Тем вси Тебе́ ра́дость А́нгелову согла́сно зове́м, Богора́дованная. Песнь 3 Ирмос: Не му́дростию, и си́лою, и бога́тством хва́лимся,/ но Тобо́ю, О́тчею Ипоста́сною Му́дростию, Христе́:/ несть бо свят, па́че Тебе́,/ Человеколю́бче. Припев: Святи́и священному́ченицы, моли́те Бо́га о на́с. Не в му́дрости е́ллинскаго су́етия, му́дрии,/ но ра́зумом Боже́ственным безбо́жие обличи́сте пе́рсское,/ укори́вше сих безу́мие. Припев: Святи́и священному́ченицы, моли́те Бо́га о на́с. Священнонача́лия просвеще́н Боже́ственным пома́занием, свяще́нный Акепси́мо,/ муче́ния же кро́вию себе́ украси́л еси, Богоблаже́нне. Сла́ва Отцу́ и Сы́ну и Свято́му Ду́ху. Сокруше́ние твои́х удо́в, Ио́сифе приснопа́мятне,/ преле́стныя ко́зни до конца́, му́чениче, сокруши́,/ тебе́ же исхода́таи сла́ву нетле́нную. И ны́не и при́сно и во ве́ки веко́в. Ами́нь. Богородичен: Тя Му́дрость Бо́жия чисте́йшее селе́ние обре́тши,/ от Твои́х чисты́х крове́й воплоти́ся/ и по Рождестве́ нетле́нну яви́. Седален, глас 8 Ио́сиф, до́блий подви́жник, Акепси́ма, пре́лести губи́тель/ и Аифа́л сла́вный, страда́лец непобеди́мый,/ све́тлыя зве́зды, ве́рными в пе́снех досто́йно вои́стинну да восхва́лятся днесь:/ сии́ бо пре́лесть пе́рсов очерни́ша,/ со́лнцу не поже́рше, ни огня́ поче́тше;/ к ни́мже любо́вию возопие́м:/ моли́те Христа́ Бо́га грехо́в оставле́ние дарова́ти/ пра́зднующим любо́вию святу́ю па́мять ва́шу. Песнь 4 Ирмос: Седя́й в сла́ве на Престо́ле Божества́/ во о́блаце ле́гце, / прии́де Иису́с Пребоже́ственный/ нетле́нною дла́нию и спасе́ зову́щия:/ сла́ва, Христе́, си́ле Твое́й. Припев: Святи́и священному́ченицы, моли́те Бо́га о на́с. Ни́жняя презре́вше и ко еди́нем пребыва́ющим смотря́юще,/ тех получи́ша жили́ща,/ Акепси́ма до́блий и сла́внии Ио́сиф и Аифа́л да восхва́лятся. Припев: Святи́и священному́ченицы, моли́те Бо́га о на́с. И́же к еди́ному Влады́це просте́ртое твое́ помышле́ние/ во вре́мя страда́ния, му́чениче,/ облегче́ния тебе́ творя́ше нестерпи́мых мук,/ кре́пкий Ио́сифе, страстоте́рпче Христо́в досточу́дне. Сла́ва Отцу́ и Сы́ну и Свято́му Ду́ху. Честно́е твое́ свиде́тельство, я́ко плодови́та лоза́ объе́млема,/ источа́ет вино́ ве́рным умиле́ния, Аифа́ле страстоте́рпче, веселя́щи зову́щия:/ сла́ва, Христе́, си́ле Твое́й. И ны́не и при́сно и во ве́ки веко́в. Ами́нь. Богородичен: Свята́я Богоро́дица,/ в Ню́же всели́тися благоволи́, я́ко во благово́нный храм,/ Сло́во О́тчее и Равнобоже́ственное,/ не растле́ чистоты́, ни стужи́:/ и́бо роди́ Емману́ила, Бо́га и Челове́ка. Песнь 5 Ирмос: Ты, Го́споди, мой Свет,/ в мир прише́л еси́,/ Свет святы́й, обраща́яй из мра́чна неве́дения/ ве́рою воспева́ющия Тя. Припев: Святи́и священному́ченицы, моли́те Бо́га о на́с. Вели́кое и честно́е призыва́я И́мя Госпо́дне,/ ча́шу спасе́ния страда́ний, ра́дуяся, Акепси́мо, испи́л еси́. Припев: Святи́и священному́ченицы, моли́те Бо́га о на́с. Вы́шняя тя пи́ща, зва́ннаго ра́нами, прия́т/ и ли́цы, Ио́сифе, му́ченичестии/ с ни́ми веселя́щася. Сла́ва Отцу́ и Сы́ну и Свято́му Ду́ху. Сад присноцвету́щий, плоды́ по́двиг твои́х концы́ пита́я,/ и́стинно яви́лся еси́, Аифа́ле блаже́нне. И ны́не и при́сно и во ве́ки веко́в. Ами́нь. Богородичен: Свет безле́тный нам, О́тчее сия́ние, родила́ еси́ под ле́ты,/ благосты́нею бога́тства бы́вша, Пренепоро́чная. Песнь 6 Ирмос: Пожру́ Ти со гла́сом хвале́ния, Го́споди,/ Це́рковь вопие́т Ти,/ от бесо́вския кро́ве очи́щшися/ ра́ди ми́лости от ребр Твои́х/ исте́кшею Кро́вию. Припев: Святи́и священному́ченицы, моли́те Бо́га о на́с. Главе́, Акепси́мо, твое́й, отсе́ченней от телесе́,/ Христу́ совокупи́ ве́рою ду́шу твою́, му́чениче, неотсту́пно,/ та́мо су́щими заря́ми при́сно просвеща́емь. Припев: Святи́и священному́ченицы, моли́те Бо́га о на́с. Ка́мением, я́ко первострада́лец, му́чениче, убива́емь,/ не отве́рглся еси́ ка́мене жи́зненнаго, Христа́,/ преходя́ к та́мо су́щим све́тлым оби́телем. Сла́ва Отцу́ и Сы́ну и Свято́му Ду́ху. Же́злием неми́лостивно ураня́емь, ра́довашеся,/ жезл име́я си́лы, Крест Госпо́день, и похвалу́,/ страстоте́рпче Аифа́ле, Богому́дре всебога́те. И ны́не и при́сно и во ве́ки веко́в. Ами́нь. Богородичен: Купина́ прообразова́ше вели́кую та́йну па́че ума́ Твоего́ Рождества́,/ огне́м отню́д повива́ема и ника́коже опаля́ема, Де́во Всепе́тая. Кондак, глас 2 Боже́ственная, му́дре, непоро́чно тайноводи́л еси́,/ же́ртва прия́тна был еси́, Богоблаже́нне:/ Христо́ву бо пил еси́ ча́шу сла́вно, свя́те Акепси́мо,/ со страда́льцы твои́ми,/ моля́ся непреста́нно о всех нас. Икос Кто от ве́рных возмо́жет отню́д досто́йно воспе́ти/ прему́драго свяще́нника Акепси́ма, свети́льника Христо́ва:/ той бо разруши́ пре́лесть и́дольскую и посрами́ де́монская ухищре́ния/ кре́пкою си́лою Спа́са Христа́ Бо́га,/ Тро́ице Пресвяте́й благоче́стно поклани́тися наказу́я,/ Отца́ и Сы́на и Свята́го Ду́ха во Еди́ном Божестве́ почита́ти,/ моля́ся непреста́нно о всех нас. Песнь 7 Ирмос: Спасы́й во огни́ Авраа́мския Твоя́ о́троки/ и халде́и уби́в,/ я́же пра́вда пра́ведно уловля́ше,/ препе́тый Го́споди, Бо́же оте́ц на́ших,/ благослове́н еси́. Припев: Святи́и священному́ченицы, моли́те Бо́га о на́с. Во огни́ муче́ния ро́су от Бо́га прие́мше,/ сопроти́вных пла́мы ва́шим терпе́нием погаси́сте, страстоте́рпцы, зову́ще:/ Бо́же оте́ц на́ших, благослове́н еси́. Припев: Святи́и священному́ченицы, моли́те Бо́га о на́с. И́же огню́ покло́нницы сему́ насле́дницы яви́шася,/ огню́ служи́ти служа́щия Со́лнцу сла́вы понужда́ху,/ но сии́ взыва́ху:/ Бо́же оте́ц на́ших, благослове́н еси́. Сла́ва Отцу́ и Сы́ну и Свято́му Ду́ху. Акепси́ма, и Ио́сиф, и Аифа́л, Тро́ицы Всечестны́я три свети́ла,/ и́же вся концы́ благоче́стия заря́ми облиста́юще,/ да почту́тся во ве́ки. И ны́не и при́сно и во ве́ки веко́в. Ами́нь. Богородичен: Благослове́н Плод благослове́ннаго Твоего́ чре́ва,/ Его́же благословя́т Небе́сныя си́лы и земны́х составле́ния,/ И́же нас изба́вивый кля́твы пе́рвыя, Благослове́нная. Песнь 8 Ирмос: О́троки благочести́выя в пещи́/ Рождество́ Богоро́дичо спасло́ есть,/ тогда́ у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте дела́/ и превозноси́те Его́ во вся ве́ки. Припев: Святи́и священному́ченицы, моли́те Бо́га о на́с. Сло́ва бы́вше прия́телища и Того́ я́звы нося́ще,/ мучи́телей суровство́м бре́мя, а́ки безду́шно, на безслове́сная возложи́стеся,/ приноси́ми ко искуше́нию мно́жайшим му́кам, му́ченицы до́блии,/ Христа́ превознося́ще во ве́ки. Припев: Святи́и священному́ченицы, моли́те Бо́га о на́с. Хода́таи сла́вы присносу́щныя, приснопа́мятнии му́ченицы,/ украша́еми, ра́достно ше́ствовасте,/ Его́же возлюби́сте свиде́тельства, сла́внии, путь, зову́ще:/ Го́спода по́йте и превозноси́те Его́ во ве́ки. Сла́ва Отцу́ и Сы́ну и Свято́му Ду́ху. Ни огнь, ни ра́ны, ни зве́ри, ни меч,/ ни ров, ни смерть возмо́же му́ченики Твоея́ любве́ отлучи́ти, Го́споди,/ благи́х Исто́чниче, любве́ неистощи́мая Струя́./ И́хже хва́ляще, Христе́, Тебе́ благослови́м во ве́ки. И ны́не и при́сно и во ве́ки веко́в. Ами́нь. Богородичен: Еди́ну неискусому́жную Ма́терь и еди́ну тва́рей преиму́щую,/ го́ру пресвяту́ю, трапе́зу всезлату́ю, Богоро́дицу, пе́сньми воспева́юще, зове́м:/ Го́спода воспева́йте дела́ и превозноси́те Его́ во ве́ки. Песнь 9 Ирмос: Ка́мень нерукосе́чный/ от несеко́мыя горы́, Тебе́, Де́во,/ краеуго́льный отсече́ся –/ Христо́с, совокупи́вый разстоя́щаяся естества́./ Тем, веселя́щеся, Тя, Богоро́дице, велича́ем. Припев: Святи́и священному́ченицы, моли́те Бо́га о на́с. Благочести́выя свети́льники и пре́лести потреби́тели,/ разу́мнаго рая́ благово́нныя цве́ты, сосу́ды честны́я,/ Бо́жия красоты́ зри́тели восхва́лим. Припев: Святи́и священному́ченицы, моли́те Бо́га о на́с. Угль, его́же дре́вле ви́де Иса́ия, в се́рдцы внутрь прие́мше,/ и, того́ блиста́нием озаря́еми,/ мра́чное, му́ченицы, огня́ служе́ние отрази́сте. Сла́ва Отцу́ и Сы́ну и Свято́му Ду́ху. Живонача́льней ны́не Тро́ице укра́шени предстоите́/ и, вене́чными добро́тами просвеща́еми,/ па́мять творите́ о и́же на земли́, блаже́ннии,/ помина́ющих вас всегда́. И ны́не и при́сно и во ве́ки веко́в. Ами́нь. Богородичен: Отча́яннаго мя спаси́, Спа́са заче́ншая и пло́тию ро́ждшая, Де́во,/ грехо́вным бо бре́менем отягча́емь, боле́зненно зову́ Ти:/ потща́вшися, помози́ рабу́ Твоему́. Светилен Подъя́л еси яко безплотен нестерпи́мыя му́ки,/ Акепси́мо всехвальне, священников славо,/ со Ио́сифом чу́дным и дивный Аифа́л диакон, Христов тайнник,/ ихже боле́знем страдания удивляются присно Безплотных чи́ни.

глас 8 Песнь 1 Ирмо́с: Пои́м Го́сподеви вси лю́дие,/ в мо́ри Чермне́м фарао́на погрузи́вшему,/ побе́дную песнь пою́ще,/ я́ко просла́вися. Даждь мне орга́ном язы́ка гнилы́м,/ о, Богоно́се Симео́не,/ песнь тебе́ плету́щему,/ мольба́ми твои́ми, зна́ния свет Богонауче́н. Позна́ша му́дрость, о́тче, твою́,/ перся́не, ефиопля́не, индиа́не, и скифя́не, и ара́вов множество,/ и просла́виша Христа́, тобо́ю прославля́емаго. Благода́ти испо́лнився духо́вныя,/ от пасту́шеских бо ста́нищ я́ко Иа́ков, Дави́д и Моисе́й,/ началово́ждь слове́сных яви́лся еси паств, блаже́нне. Богоро́дичен: Пречи́стая Богоро́дице, ра́дуйся Честна́я,/ Невмести́маго Бо́га во утро́бе Твое́й вмести́вшая,/ изба́витися лю́тых испроси́ пою́щым Тя. Песнь 3 Ирмо́с: Страх Твой, Го́споди, всади́ в сердца́ раб Твои́х,/ и бу́ди нам утвержде́ние,/ Тя во и́стине призыва́ющих. Ско́ро избе́г зи́мныя беды́ духо́в,/ ко спаси́тельней устреми́лся еси́ оби́тели, Симео́не,/ из нея́же и нестаре́емую жизнь прия́л еси́. Приклони́л еси́ ра́дуяся,/ покорли́вый слух твой, всеблаже́нне, Влады́це блажа́шу,/ и блаже́нную обре́л еси́ жизнь. Сло́ва прие́м семена́,/ се́рдца твоего́ бразда́ми, и слез напое́нии,/ Христу́ умно́жен клас доброде́телей пожа́л еси́. Богоро́дичен: Неизрече́нно зачала́ еси́, Богоневе́сто,/ Спа́са и Го́спода, избавля́ющего ны от лю́тых,/ Тя во и́стине призыва́ющия. Седа́лен преподо́бнаго, глас 8: Земна́я вся оста́вив,/ и в ми́ре сый теле́сне,/ ду́хом был еси́ небе́сный а́нгел,/ находя́щыя бо стра́сти умертви́в пло́тию,/ Тро́ицы яви́лся еси́ уго́дник, блаже́нне./ Те́мже неду́гующих исцеля́вши стра́сти,/ и сло́вом ду́хи отгоня́еши благода́тию,/ Симео́не преблаже́нне,/ моли́ Христа́ Бо́га, согреше́ний проще́ние дарова́ти/ че́ствующым любо́вию святу́ю па́мять твою́. Слава и ныне: Наста́ви ны на путь покая́ния,/ уклоня́ющыяся при́сно к злым безпу́тием,/ и Преблага́го прогне́вающыя Го́спода, Неискусобра́чная, Благослове́нная Мари́е,/ прибе́жище отча́янных челове́ков, Бо́жие обита́лище. Песнь 4 Услы́шах, Го́споди, слух Твой, и убоя́хся, /разуме́х дела́ Твоя́,/ и просла́вих держа́ву Твою́, Господи. Не на песце́, преблаже́нне,/ но на глубоча́йших труде́х твои́х положи́в основа́ние воздержа́ния,/ доброде́телей созда́л еси́ столп непоколеби́м. Всели́в те́ло твое́ в жили́ще жесто́ко,/ стра́хом пригвозди́л еси́ ду́ха,/ и жили́ще насле́дия Боже́ственнаго обре́л еси́, преподо́бне. Укроти́л еси́ теле́сныя сокрове́нныя стра́сти, пребога́те,/ в гнои́ лежа́ черве́й, о́тче,/ благово́ние обре́л еси́. По стра́сти во́льней, Жизнотвори́вому Мертвецу́ подо́бяся,/ я́коже гро́бу, ро́ву те́мному,/ сам себе́ жи́ва преда́л еси́. Богоро́дичен: Бо́га, Его́же родила́ еси́ Пречи́стая Мари́е,/ моли́ всегда́ рабо́м Твои́м/ дарова́ти согреше́ний проще́ние. Песнь 5 Ирмо́с: Просвети́ нас повеле́нии Твои́ми, Го́споди,/ и мы́шцею Твое́ю высо́кою,/ Твой мир пода́ждь нам, Человеколю́бче. Но́ваго Дании́ла Симео́не,/ Христо́с тя показа́,/ из ро́ва бо зве́рска тя явле́нием неврежде́на возврати́. Весь сам себе́ Го́споду возложи́в,/ слоте́, и мра́зу, и зно́ю проти́вным озлобле́нием обнажи́лся еси́. Но́вый Моисе́й и Илиа́ показа́лся еси́,/ еди́нощи чрез всю четыредеся́тницу пи́щу прие́мля,/ во всей жи́зни твое́й, преподо́бне. Я́ко златоза́рным, Симео́не, мони́стом преподо́бне, у́жем облага́емь,/ небоше́ственник показа́лся еси́/ Боже́ственными кри́лы. Богоро́дичен: Моли́ при́сно Сы́на Твоего́ и Бо́га на́шего,/ неискусобра́чная Мари́е Чи́стая,/ низпосла́ти нам ве́рным ве́лию ми́лость. Песнь 6 Ирмо́с: Ри́зу мне пода́ждь све́тлу,/ одея́йся све́том я́ко ри́зою,/ Многоми́лостиве Христе́ Бо́же наш. Зна́мений и чуде́с тя Христо́с самоде́теля показа́,/ Боже́ственнаго блаже́нне, де́йства, прия́тно жили́ще. Возне́сл еси́ те́ло твое́, Симео́не,/ я́ко на Крест на столп./ Тем спросла́вился еси,/ на дре́во тебе́ ра́ди Возне́сшемуся Христу́. Вы́шнее ше́ствие обре́т, Симео́не чу́дне,/ к высоте́ небе́сней пою́щыя тя ве́рно возведи́. Богоро́дичен: Го́ру, ю́же прови́де Дании́л,/ из Нея́же несеко́мый Ка́мень ве́ры отсече́ся Христо́с,/ Тя познава́ем. Конда́к преподо́бного Симео́на, глас 2: Вы́шних ища́й, ни́жним совокупля́яйся,/ и колесни́цу о́гненную столп соде́лавый:/ тем собесе́дник а́нгелом был еси́ преподо́бне,/ с ни́ми Христу́ Бо́гу моля́ся/ непреста́нно о всех нас. Икос: Симео́ново непоро́чное житие́,/ кий язы́к челове́чь довле́ет когда́ к похвале́ испове́дати?/ оба́че воспою́, Бо́жиею му́дростию,/ до́бляго сего́ исполи́на страда́ние же и по́двиги, я́же на земли́,/ я́ко свети́льника я́вльшася, всем челове́ком,/ мно́гим терпе́нием, в ли́це а́нгельстем возсия́вша:/ с ни́ми бо поя́ непреста́нно Христу́,/ воздержа́нием чистоту́ стяжа́,/ моля́ся непреста́нно о всех нас. Песнь 7 Ирмо́с: О́троцы благочести́вии в Вавило́не,/ о́бразу злато́му не поклони́шася,/ но посреде́ пе́щи о́гненныя ороша́еми,/ песнь воспева́ху глаго́люще: превозноси́мый отце́в и нас Бо́же, благослове́н еси́. Разреши́л еси́ у́бо сухоту́ недоуме́ющымся,/ и врата́ тем дожде́вныя отве́рзл еси́,/ и зе́млю коле́блющуюся моли́твами уста́вил еси́,/ и лю́ди зва́ти научи́л еси́:/ благослове́н Бог отце́в на́ших. Я́ко велича́йший свети́льник церко́вный,/ и многосве́тлое, Симео́не, со́лнце, всю́ду лучи́ испуща́я просвети́л еси́,/ и лю́ди зва́ти научи́л еси́:/ благослове́н Бог отце́в на́ших. Во́ды отвсю́ду стеко́шася, уго́дниче Христо́в,/ челове́ков пучи́на, во огра́де твоего́ собра́ся воздержа́ния,/ от тебе́ вопи́ти наказу́еми:/ благослове́н Бог отце́в на́ших. Дре́вле у́бо ста́рца объя́тии,/ скрижа́льми же твоего́ се́рдца, преподо́бне, неви́димою си́лою, Христо́с упоко́ися, Симео́не./ Те́мже взыва́л еси́: благослове́н Бог отце́в на́ших. Богоро́дичен: Подоба́ше безсе́менно Вопло́щшемуся из Тебе́ проити́, Де́во Чи́стая: Ты бо яви́лася еси́ чистото́ю всех пребо́льши./ Ему́же вопию́ще пе́сньми зове́м:/ благослове́н Бог отце́в на́ших. Песнь 8 Ирмо́с: На горе́ святе́й просла́вльшася,/ и в купине́ огне́м Присноде́вы Моисе́ови та́йну я́вльшаго,/ Го́спода по́йте,/ и превозноси́те во вся ве́ки. От вся́каго отлучи́вся пристра́стия,/ и ма́терию не́мощь уще́дрив,/ я́ко живе́й я́вился еси́ по сме́рти,/ Го́спода по́йте, и превозноси́те Его́, вопия́, во ве́ки. Ю́ношу стя́гнул еси́ разсла́блена,/ и одр Фи́ларху повелева́еши на ра́ме нести́ свяще́ннейше вопия́:/ Го́спода по́йте, и превозноси́те Его́ во вся ве́ки. Благослови́м Отца́, и Сы́на, и Свята́го Ду́ха, Го́спода. Уясни́вый И́ова стра́стию,/ согни́вшия пло́ти твоея́ гни́лость,/ в би́сер претвори́ многоце́нен, тя, Христо́в уго́дниче, Симео́не,/ сла́вяй во вся ве́ки. И ны́не, Богоро́дичен: От а́нгела ра́дость прие́мшую,/ и Ро́ждшую Го́спода Сла́вы,/ и свет ми́ру возсия́вшую,/ вси Тя пое́м Де́во Богоро́дице, во вся ве́ки. Песнь 9 Ирмо́с: Проявле́нное на горе́ законополо́жнику во огни́ и купине́,/ Рождество́ Присноде́вы,/ в на́ше ве́рных спасе́ние,/ пе́сньми немо́лчными велича́ем. Воцари́вшася над страстми́ терпе́нием,/ Христо́с тя прия́т, Симео́не Богоно́се,/ Своему́ о́бщника ца́рству:/ тем тя пе́сньми почита́ем. Целе́бней благода́ти сподо́бився,/ от некрадо́мых Ду́ха сокро́вищ, Богоно́се Симео́не,/ исцеле́ния пода́вши торжеству́ющим па́мять твою́. Возше́д, преподо́бне, небе́снаго тече́ния на доброде́тельный возду́х,/ страда́нии препоя́сан, возлете́в к ски́ниям небе́сным,/ моли́ спасти́ся душа́м на́шым. Богоро́дичен: Купина́ горя́щая огне́м, и неопаля́ема яви́лася еси́, о, Влады́чице,/ заче́нши безсе́менно Бо́га и Спа́са ми́ра,/ Его́же непреста́нно велича́ем.

Минея, 17 Июня, Кано́н преподо́бным Глас 8 Песнь 1 Ирмос: Песнь возсле́м, лю́дие,/ чу́дному Бо́гу на́шему,/ свободи́вшему Изра́иля от рабо́ты,/ песнь побе́дную пою́ще и вопию́ще,/ пои́м Тебе́, Еди́ному Влады́це. Припев: Святи́и преподо́бнии отцы́, моли́те Бо́га о на́с. Песнь возсле́м, ве́рнии, Творцу́ на́шему,/ свобо́ждшему уго́дник Свои́х от душегу́бных сете́й врага́,/ и напра́вльшему стези́ их на путь ми́рен,/ и поче́тшему я целе́бными да́ры,/ те́мже и моле́бне возглаго́лем:/ моли́твами святы́х Твои́х спаси́ ду́ши на́ша, Христе́ Бо́же наш, Еди́ный Влады́ко. Припев: Святи́и преподо́бнии отцы́, моли́те Бо́га о на́с. Песнь возсыла́ем по́стником Богому́дрым,/ преподо́бным отце́м: Ники́те, побе́де тезоимени́тому,/ и пречестно́му его́ купноро́дному бра́тству, пяточи́сленному ли́ку,/ сии́ бо мо́лят за ны Христа́ Бо́га на́шего, Еди́наго Влады́ку. Сла́ва Отцу́ и Сы́ну и Свято́му Ду́ху. Пе́сненно моле́бная приноше́ния от нас прие́млюще, святи́и,/ моли́ти не преста́йте о поле́зных нам, е́же тре́буем:/ Правосла́вию соедине́ния, и на враги́ побе́ды,/ и от всех лют душе́вных и теле́сных избавле́ния,/ я́ко да во хвале́нии пое́м Христа́ Бо́га на́шего, Еди́наго Влады́ку. И ны́не и при́сно и во ве́ки веко́в. Ами́нь. Богородичен: Песнь возсле́м, ве́рнии, Пресвято́й Де́ве,/ Честне́йшей Херуви́мов, Ма́тери Небе́снаго Царя́, Христа́ Бо́га на́шего,/ Сия́ бо к Нему́ Засту́пница и Моле́бница за ны непосты́дна и Хода́таица непрело́жна,/ я́ко Небе́сным и земны́м еди́на Влады́чица. Песнь 3 Ирмос: Ты еси́ утвержде́ние/ притека́ющих к Тебе́, Го́споди,/ Ты еси́ Свет омраче́нных,/ и пое́т Тя дух мой. Припев: Святи́и преподо́бнии отцы́, моли́те Бо́га о на́с. Ты еси́, Миротво́рче Го́споди, дарова́л гра́ду сему́ святы́х Твои́х,/ моле́бников ве́рных и храни́телей кре́пких,/ боля́щим же целе́бников ско́рых./ Ты же дал еси́ власть сим изгоня́ти ду́хов нечи́стых от всех стра́ждующих,/ сего́ ра́ди пое́т Тя дух мой. Припев: Святи́и преподо́бнии отцы́, моли́те Бо́га о на́с. Ты еси́ утверже́ние дал, Го́споди, гра́ду сему́ – лик пяточи́сленных святы́х бра́тий,/ Ты же дарова́ им подава́ти свет ослепле́нным,/ сего́ ра́ди пое́т Тя дух мой. Сла́ва Отцу́ и Сы́ну и Свято́му Ду́ху. Ты еси́ укрепле́ние хромы́м дарова́л, Го́споди, полк Богому́дрых бра́тий,/ Ты же си́ми подае́ши и разсла́бленным возставле́ние,/ сего́ ра́ди пое́т Тя дух мой. И ны́не и при́сно и во ве́ки веко́в. Ами́нь. Богородичен: Ты еси́, Пречи́стая, заступле́ние притека́ющим Ти, Богоро́дице Де́во,/ Ты же родила́ еси́ Христа́ Бо́га на́шего, Све́та омраче́нным,/ и пое́т Тя дух мой. Седален, глас 4 Я́ко Тро́ицы уго́дницы, и А́нгелом подо́бницы, и святы́м соприча́стницы,/ вели́кому же Новугра́ду свети́льницы,/ преподо́бнии отцы́, святи́и чудотво́рцы,/ пяточи́сленная бра́тия, Ники́то, Кири́лле, Ники́форе, Кли́менте и Исаа́кие,/ Ца́рствие Небе́сное насле́довавше и у Престо́ла Госпо́дня с ли́ки святы́х предстоя́ще,/ моли́те непреста́нно за ду́ши на́ша. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Стена́ непобеди́мая нам, христиа́ном, еси́, Богоро́дице Де́во,/ к Тебе́ бо прибега́юще,/ невреди́ми пребыва́ем/ и, па́ки согреша́юще, и́мамы Тя Моли́твенницу,/ тем, благодаря́ще, вопие́м Ти:/ ра́дуйся, Обра́дованная, Госпо́дь с Тобо́ю. Песнь 4 Ирмос: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́. Припев: Святи́и преподо́бнии отцы́, моли́те Бо́га о на́с. Услы́шаша, Го́споди, святи́и Твои́ пресла́дкий благи́й Твой глас,/ призыва́ющ тружда́ющихся и обремене́нных в поко́й,/ сего́ ра́ди честна́я пяточи́сленная бра́тия, тру́ждшеся, всели́шася во блага́я/ и прия́ша чуде́с да́ры, прославля́ют Твое́ Божество́. Припев: Святи́и преподо́бнии отцы́, моли́те Бо́га о на́с. Услы́шасте, прему́дрии, глас Сы́на Бо́жия,/ повелева́ющ взя́ти и́го Его́ свято́е на ся и бре́мя ле́гкое понести́,/ сего́ ра́ди сие́ подъе́мше, всели́стеся во блага́я,/ сла́вяще Его́ Божество́. Сла́ва Отцу́ и Сы́ну и Свято́му Ду́ху. Услы́шасте, преподо́бнии отцы́, глас Кро́ткаго Учи́теля своего́ – Христа́,/ сего́ ра́ди, ревну́юще Кро́ткому, смире́ни се́рдцы и кро́тцы нра́вы бы́вше,/ насле́дуете зе́млю благи́х, сла́вяще Его́ Божество́. И ны́не и при́сно и во ве́ки веко́в. Ами́нь. Богородичен: Услы́шахом, Госпоже́ Пречи́стая Богоро́дице Де́во,/ от богогла́сных и вои́стинну уразуме́хом и ве́руем благоче́стне,/ я́ко Ты еси́ родила́ Христа́ Бога́, Творца́ на́шего,/ Сему́ у́бо душе́ю и те́лом честь и поклоне́ние прино́сим/ и прославля́ем Его́ Божество́. Песнь 5 Ирмос: Вску́ю мя отри́нул еси́/ от лица́ Твоего́, Све́те Незаходи́мый,/ и покры́ла мя есть чужда́я тьма, окая́ннаго?/ Но обрати́ мя и к све́ту за́поведей Твои́х/ пути́ моя́ напра́ви, молю́ся. Припев: Святи́и преподо́бнии отцы́, моли́те Бо́га о на́с. Вску́ю помышле́ние свое́ соверша́ше и́нок,/ узре́вый вас, святи́и, верху́ земли́, нетле́нно почива́ющих,/ у́бо пе́рстию19 покры́ти дерзну́,/ и́скуса же пи́смене не ве́де, я́ко вели́цы есте́ пред Го́сподем, но моле́бне глаго́ля:/ Све́те Незаходи́мый, пути́ моя́ напра́ви, молю́ся. Припев: Святи́и преподо́бнии отцы́, моли́те Бо́га о на́с. Вску́ю ны, о и́ноче, пе́рстию покрыва́еши?/ Зау́тра телеса́, версе́20 земли́ преподо́бных бра́тий явля́ема, я́ко глаго́лют:/ вонми́ у́бо сим вторы́м явле́нием на́ю и уве́ждь,/ я́ко в жи́зни вре́менней не покры́ ны тьма грехо́вная,/ но обрати́ ны к Себе́ Свет Незаходи́мый и пути́ наши́ испра́ви,/ Ему́же и ны́не о ве́рных мо́лимся. Сла́ва Отцу́ и Сы́ну и Свято́му Ду́ху. Вску́ю у́бо мних челове́ческо внят,/ па́ки свети́ла, под спу́дом покрыва́ема вчера́, от него́ погребе́нная,/ днесь же па́ки версе́ земли́ возсия́вшая, па́ки сокрыва́ет,/ но Свет Незаходи́мый трети́цею вас проявля́ет,/ наставля́я того́ в пока́зание о и́стине,/ он же моле́бне возопи́:/ о Све́те Незаходи́мый, пути́ моя́ испра́ви, молю́ся. И ны́не и при́сно и во ве́ки веко́в. Ами́нь. Богородичен: Вску́ю у́бо отри́нухся беззако́нии аз, окая́нный,/ от лица́ Твоего́, Ма́ти Све́та Незаходи́маго,/ покры́ бо мя чужда́я тьма, скве́рнаго./ Но, о Пресвята́я Деви́це, Ма́ти Бо́жия,/ обрати́ мя к све́ту за́поведей Сы́на Твоего́/ и пути́ моя́ напра́ви, молю́ся. Песнь 6 Ирмос: Моли́тву пролию́ ко Го́споду/ и Тому́ возвещу́ печа́ли моя́,/ я́ко зол душа́ моя́ испо́лнися/ и живо́т мой а́ду прибли́жися,/ и молю́ся, я́ко Ио́на:/ от тли, Бо́же, возведи́ мя. Припев: Святи́и преподо́бнии отцы́, моли́те Бо́га о на́с. Моли́тву пролия́ ко Го́споду,/ прии́де ко святи́телю ста́рец и тому́ возвести́ ви́денная:/ ка́ко у́бо свята́я ва́ю пятиза́рная телеса́/ узре́ версе́ земли́, трегу́бейши возсия́вшая,/ и я́ко сугу́бо покрыва́я вы пе́рстию;/ то́йже, я́ко Боже́ственных таи́нник о ле́пых устрое́ниих, о вас сего́ наказа́в и научи́в вопи́ти:/ я́ко Ио́ну от тли, та́ко и святы́х, от земли́ нетле́нных, Бо́же мой, яви́л еси́. Припев: Святи́и преподо́бнии отцы́, моли́те Бо́га о на́с. Моли́тву пролия́ ко Го́споду в ца́рствующем гра́де разсла́блен сый власти́тель,/ и, услы́шан быв, от вас исцели́ся,/ и, запове́данная ва́ми соверши́в,/ пресла́вным свиде́тель и це́лых теле́с ва́ших зри́тель бысть, па́стырю благовести́,/ сей же о вас досто́йная сотвори́ ко Го́споду, вопия́:/ я́ко Ио́ну, си́це и блаже́нных сих телеса́ от тли, Бо́же, сохрани́л еси́. Сла́ва Отцу́ и Сы́ну и Свято́му Ду́ху. Моли́тву пролива́юща ко Го́споду,/ прите́кшая к честне́й ра́це ва́шей, преподо́бнии,/ у́бо жена́ главоболе́зненная и де́ва беснова́вшаяся,/ зна́менавшася же у святы́х ва́ших моще́й,/ а́бие целе́б сподо́бишася и ко Го́споду возопи́ша:/ я́ко Ио́ну от тли, Бо́же наш,/ та́ко и от боле́зни сея́ святы́х ра́ди Твои́х уздра́вил ны еси́. И ны́не и при́сно и во ве́ки веко́в. Ами́нь. Богородичен: Моли́тву пролива́ю к Тебе́, Пресвяте́й Бо́жии Ма́тери, аз, окая́нный,/ и Тебе́ возвеща́ю печа́ль мою́,/ я́ко зол душа́ моя́ напо́лнися и живо́т мой а́ду прибли́жися,/ но молю́ся, я́ко Ио́на:/ от тли, Бо́же, возведи́ мя. Кондак, глас 8 Благода́ть прие́мше исцеле́нием,/ простира́ете здра́вие су́щим в боле́знех,/ преподо́бнии отцы́ и чудотво́рцы сла́внии,/ Ники́то чу́дне, и Кири́лле блаже́нне,/ и Ники́форе прече́стне, Кли́менте свя́те и Исаа́кие преподо́бне,/ но моли́твами ва́ю проти́вных шата́ние разори́те,/ и боле́зни на́ша исцели́те,/ и грехо́в проще́ние испроси́те,/ да благода́рне воззове́м вам:/ ра́дуйтеся, вели́кому Новугра́ду похвало́ и утвержде́ние. Икос Всечестны́х Бо́жиих уго́дников, единоро́дных бра́тий/ пяточи́сленный лик пе́сньми и пе́нии духо́вными почти́м,/ Ники́ту преподо́бнаго и Кири́лла преблаже́ннаго,/ Ники́фора всехва́льнаго, и Кли́мента прему́драго,/ и Исаа́кия Богодухнове́ннаго, к ним же воззове́м, си́це глаго́люще:/ ра́дуйтеся, непреобори́мии к Бо́гу подви́жницы;/ ра́дуйтеся, за́поведей Его́ кре́пцыи храни́тели;/ ра́дуйтеся, по́стницы, благоче́стия иску́снии./ Ра́дуйтеся, страда́льцы, проти́ву тьмообра́зных произволе́нием честни́и;/ ра́дуйтеся, во́ини Небе́снаго Царя́ Христа́ вооруже́ннии посто́м и моли́твами./ Ра́дуйтеся, я́ко честна́я своя́ телеса́ от тле́ния чистото́ю жития́ своего́ соблю́дшии;/ ра́дуйтеся, лука́вым духо́м прогони́тели и боля́щим цели́тели./ Ра́дуйтеся, Вели́кому Новугра́ду похвало́ и утвержде́ние. Песнь 7 Ирмос: От Иуде́и доше́дше, о́троцы/ в Вавило́не иногда́/ ве́рою Тро́ическою пла́мень пе́щный попра́ша, пою́ще:/ отце́в Бо́же, благослове́н еси́. Припев: Святи́и преподо́бнии отцы́, моли́те Бо́га о на́с. И́же от гра́да ва́ю прине́сшаяся ро́ждшими боля́щая де́ва ко всечестне́й ва́шей ра́це, святи́и,/ и моли́твовавши, а́бие цельбы́ сподо́бися/ и, здра́вствовавши, с су́щими с не́ю вопия́ше:/ просла́вивый святы́х, благослове́н Бог оте́ц на́ших. Припев: Святи́и преподо́бнии отцы́, моли́те Бо́га о на́с. И́же боле́знию чре́ва и ногу́ одержи́мая иноки́ня, доше́дши к вам, Богому́дрии,/ и моли́тву сотвори́вши, ско́ро цельбу́ получи́/ и, благодаря́щи Бо́га, вопия́ше:/ почти́вый целе́бными да́ры преподо́бных, благослове́н Бог оте́ц на́ших. Сла́ва Отцу́ и Сы́ну и Свято́му Ду́ху. И́же от оби́тели ва́ю иноки́ня, боле́зновавшая мно́го руко́ю,/ вы же, преподо́бнии,/ яви́стеся, цельбу́ подаю́ще ей, умаща́юще тро́стию,/ у́бо же моле́бствовавши вы, исцеле́ние прия́т, вопия́ше:/ да́вый целе́б дар пра́ведником сим, благослове́н Бог оте́ц на́ших. И ны́не и при́сно и во ве́ки веко́в. Ами́нь. Богородичен: И́же от пра́веднику произше́дшую, от Иоаки́ма и А́нны,/ Пречи́стую Де́ву и Бо́гу Ма́терь/ при́сно пе́сньми почти́м/ и Сы́ну Ея́, Бо́гу на́шему, благодари́в вопие́м:/ благослове́н Бог оте́ц на́ших. Песнь 8 Ирмос: Царя́ Небе́снаго,/ Его́же пою́т во́и а́нгельстии,/ хвали́те и превозноси́те во вся ве́ки. Припев: Святи́и преподо́бнии отцы́, моли́те Бо́га о на́с. Царя́ Небе́снаго с во́и а́нгельскими моля́ще, святи́и,/ свяще́нничу супру́жницу, разсла́блену су́щу, исцели́сте,/ у́бо же и мы возвели́чившаго вы Го́спода пое́м и превозно́сим во ве́ки. Припев: Святи́и преподо́бнии отцы́, моли́те Бо́га о на́с. Царя́ Небе́снаго с Вы́шними во́инствы мольбо́ю свое́ю на ми́лость преклони́сте, блаже́ннии,/ диа́кону, боле́вшу ногою́, цельбу́ пода́сте,/ вопию́щему просла́вльшаго сих святы́х чудесы́:/ лю́дие, Го́спода по́йте и превозноси́те Его́ во ве́ки. Сла́ва Отцу́ и Сы́ну и Свято́му Ду́ху. Царя́ Небе́снаго со все́ми святы́ми Небе́сными си́лами умоли́вше, преподо́бнии,/ бесну́ющуюся жену́ уцелому́дристе,/ и, здра́ва бы́вши, си́це взыва́ше Дарова́вшему очище́ние неду́жным си́ми блаже́нными:/ лю́дие, Го́спода по́йте и превозноси́те Его́ во ве́ки. И ны́не и при́сно и во ве́ки веко́в. Ами́нь. Богородичен: Царя́ Небе́снаго ро́ждшую,/ всем святы́м Небе́сным си́лам Цари́цу Де́ву Богоро́дицу,/ Тя мы, смире́ннии, мо́лим изба́вити нас от всех зол,/ да Сы́на Твоего́ и Бо́га на́шего пое́м и превозно́сим во ве́ки. Песнь 9 Ирмос: Вои́стинну Богоро́дицу,/ Тя испове́дуем,/ спасе́ннии Тобо́ю, Де́во Чи́стая,/ с Безпло́тными ли́ки Тя велича́юще. Припев: Святи́и преподо́бнии отцы́, моли́те Бо́га о на́с. Вои́стинну во Христа́ обле́кшеся, преподо́бная бра́тия/ Боже́ственный по́двиг сконча́вше,/ сего́ ра́ди в ра́йских селе́ниих почива́нием ликовству́юще, блаже́ннии,/ моли́теся о всех нас. Припев: Святи́и преподо́бнии отцы́, моли́те Бо́га о на́с. Вои́стинну у́бо вы, преподо́бнии, слу́ги Бо́жии есте́/ и раби́ Госпо́дни и́скреннии,/ и бли́жнии свиде́тельствуют нам целе́бныя да́ры, от ва́ю точа́щаяся,/ но, я́ко име́юще дерзнове́ние к Небе́сному Царю́,/ о всех нас моли́тися не преста́йте, блаже́ннии. Сла́ва Отцу́ и Сы́ну и Свято́му Ду́ху. Вои́стинну во Христа́ обле́кшиися и́менем,/ то́кмо аз, окая́нный, де́лы же нечи́ст и скве́рнен есмь,/ но, оба́че любо́вию понужда́емь,/ сие́ вам, преподо́бным, отце́м, моле́ние принесо́х,/ но а́ще что и не удовли́х21, проще́ние да получу́ и грехо́в оставле́ние,/ и злых ве́ка сего́ избу́ду, и ве́чных мук свобожде́ние богоприя́тными ва́ю моли́твами. И ны́не и при́сно и во ве́ки веко́в. Ами́нь. Богородичен: Вои́стинну у́бо Ты, Пресвята́я Богоро́дице,/ непосты́дная Хода́таица к Бо́гу за ны, многогре́шныя,/ и ны́не у́бо не преста́й, о Пречи́стая Присноблаже́нная Де́во, Засту́пнице на́ша кре́пкая,/ умоля́ющи Сы́на Своего́ и Бо́га на́шего о соедине́нии Правосла́вия,/ и о побе́де на супоста́ты,/ и о ми́ре и здра́вии правосла́вному наро́ду на́шему и всей стране́,/ и буду́щия гее́нны о́гненныя и всех лю́тых муче́ний свободи́ Свои́ми Богома́терними моли́твами. Светилен Процвели́ есте́, я́ко фи́никс, дави́дски, отцы́,/ оби́тели яви́стеся Ду́ха Пресвята́го и сла́вни вселе́нней показа́стеся,/ о нас непреста́нно моли́те, почита́ющих ве́рою пречестну́ю па́мять ва́шу, преподо́бнии. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Тя пе́сньми немо́лчными ублажа́ем, Де́во,/ я́ко от Тро́ицы Еди́наго родила́ еси́, Богоро́дице,/ и но́сиши на Боже́ственную руку́ Пребога́тое Сло́во непреме́нно и неизме́нно.

Минея, 16 Октября, Канон святаго Глас 4 Песнь 1 Ирмос: Моря чермну́ю пучину/ невлажными стопами/ древний пешешествовав Израиль,/ крестообразными Моисеевыми рукама/ Амаликову силу в пустыни победил есть. Припев: Святы́й му́чениче Ло́нгине, моли́ Бо́га о на́с. Божественными светоли́тии, славне, просвеща́емь/ и со Ангельскими чи́нми Христу Богу предстоя́,/ светоносную память твою совершающия просвети́. Припев: Святы́й му́чениче Ло́нгине, моли́ Бо́га о на́с. Ничто́же тебе к Богу единения, мучениче, разлучи́,/ отлуче́на всякия плотския сласти верою,/ и чисто желания кра́йнейшаго наслаждаешися. Сла́ва Отцу́ и Сы́ну и Свято́му Ду́ху. Служа Богу Живому, всемудре, ума чистото́ю,/ мертвым куми́ром, блаженне, никакоже службы принесл еси./ Тем к безконечней жизни, умерщвлен, прешел еси. И ны́не и при́сно и во ве́ки веко́в. Ами́нь. Богородичен: Слово Отчее во утро́бе Твоей словом зачала́ еси,/ безслове́сия изба́вити земныя восхоте́в благосты́нею,/ Дево Мати Пречистая, Благословенная, Всенепорочная. Песнь 3 Ирмос: Веселится о Тебе Церковь Твоя, Христе, зовущи:/ Ты моя крепость, Господи,/ и прибежище, и утверждение. Припев: Святы́й му́чениче Ло́нгине, моли́ Бо́га о на́с. Позна́в на Кресте́ Сына Божия,/ Истиннаго Господа, за ны стра́ждуща,/ в Того вседу́шно веровал еси. Припев: Святы́й му́чениче Ло́нгине, моли́ Бо́га о на́с. Земля, якоже напоена́, прии́мши слове́сная се́мена,/ твоя душа клас, мудре, зрел/ Божественнаго благочестия возраста́ла есть. Сла́ва Отцу́ и Сы́ну и Свято́му Ду́ху. Ве́трилом Креста́/ мук стра́стную преплы́в пучи́ну,/ тихая приста́нища постигл еси, славне, веселяся. И ны́не и при́сно и во ве́ки веко́в. Ами́нь. Богородичен: Неду́гующую мою ду́шу страсте́й нанесе́ньми исцели́,/ Мати Божия Пречистая,/ и ко спасению напра́ви. Седален, глас 8 Распина́ема видел еси Изба́вителя,/ и Того заря́ми освети́вся,/ тьмы избегл еси неразумия глубочайшия/ и к Божественному разуму себе сочетал еси,/ веровав, яко есть Бог Видимый./ Тем и пострада́в, лико́м причислился еси,/ Ло́нгине блаженне, мученическим, радуяся./ С нимиже всегда, славне, молися Христу Богу/ согрешений оставление подати/ чтущим любовию святую память твою. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: В напа́сти многоплете́нныя впад от враг видимых и невидимых,/ бу́рею одержимь безчисленных согрешений моих,/ и, яко к теплому заступле́нию и покро́ву моему, Чистая,/ ко пристанищу притекаю Твоея благости./ Темже, Пречистая, из Тебе Воплоще́нному безсе́менно/ моли́ся прилежно о всех рабех Твоих,/ непрестанно моля́щихтися, Богородице Пречистая,/ моля́щи Его присно согрешений оставление дарова́ти/ воспевающим достойно славу Твою. Песнь 4 Ирмос: Вознесе́на Тя видевши Церковь на Кресте,/ Солнце праведное,/ ста в чи́не своем,/ достойно взывающи:/ слава силе Твоей, Господи. Припев: Святы́й му́чениче Ло́нгине, моли́ Бо́га о на́с. Крепча́йший стяжа́в в вере смысл, блаженне,/ некре́пкую пре́лести разруши́л еси твердость/ и, радуяся, взывал еси:/ слава силе Твоей, Господи. Припев: Святы́й му́чениче Ло́нгине, моли́ Бо́га о на́с. Возвыше́на и к Древу пригвожде́на/ Безстра́стнаго зря Господа славы,/ Того исповедал еси Сына Божия, славне,/ стра́ждуща Своею волею. Сла́ва Отцу́ и Сы́ну и Свято́му Ду́ху. Увяда́ему смерть смертию Безсмертнаго видев,/ потща́лся еси, Ло́нгине, Его ради умре́ти/ и жа́ти по смерти со благославно пострада́вшими. И ны́не и при́сно и во ве́ки веко́в. Ами́нь. Богородичен: Уедини́вшася по Ипоста́си во чре́ве Твоем/ и бывша Человека, Пречистая,/ Сло́ва, па́че сло́ва, родила́ еси,/ сугу́ба хоте́ньми и де́йствы являемаго. Песнь 5 Ирмос: Ты, Господи, мой свет,/ в мир пришел еси,/ Свет Святый, обращаяй из мра́чна неведения/ верою воспевающия Тя. Припев: Святы́й му́чениче Ло́нгине, моли́ Бо́га о на́с. Земли́ всякия воистинну быв пришле́ц,/ в я́звах страстоте́рпческих украси́лся еси, Ло́нгине,/ и на земли́ кротких вселился еси. Припев: Святы́й му́чениче Ло́нгине, моли́ Бо́га о на́с. Возмогл еси, Креста силою укрепляем,/ немощно́е мучителей, страстотерпче Ло́нгине, победи́ти безумие. Сла́ва Отцу́ и Сы́ну и Свято́му Ду́ху. Поста́вив на тве́рдем основании сердце твое, всехвальне,/ колебания искушений волнением неколе́блен пребыл еси. И ны́не и при́сно и во ве́ки веко́в. Ами́нь. Богородичен: Едину, Бога Рождшую неискусомужно, воспои́м Деву,/ Еюже спасе́ни бывше, и верою ублажи́м. Песнь 6 Ирмос: Пожру́ Ти со гла́сом хваления, Господи,/ Церковь вопиет Ти,/ от бесовския кро́ве очи́щшися,/ ради милости от ребр Твоих/ истекшею Кровию. Припев: Святы́й му́чениче Ло́нгине, моли́ Бо́га о на́с. Го́ры же и зе́млю колеба́вшуюся видев в Стра́сти день,/ неверствием стоя́ния поколебался еси/ и верою утверди́лся еси, Ло́нгине, Страждущаго. Припев: Святы́й му́чениче Ло́нгине, моли́ Бо́га о на́с. Разум истинный и соверше́н, и смы́слен восприя́ти возмогл еси,/ видя тварь изменяющуся,/ и к Божественному изменился еси, Ло́нгине, познанию. Сла́ва Отцу́ и Сы́ну и Свято́му Ду́ху. Претерпел еси лю́тую му́ку, радуяся,/ и выю мечу́ несомненною мыслию преклонил еси,/ усекая главы́ врагов верою. И ны́не и при́сно и во ве́ки веко́в. Ами́нь. Богородичен: Изсуши́ и из ко́рене, Всенепорочная, исто́ргни терно́вныя по́мыслы сердца моего,/ и плодоносно сие́ покажи́ хода́тайством Твоим,/ Отрокови́це Всечистая. Кондак, глас 4 Весело возрадовася Церковь/ в памяти днесь приснопамятнаго страдальца Ло́нгина, взывающие/ Ты моя держава, Христе, и утверждение. Икос Небо, тьмою многою омрача́емо, и землю трясу́щуся,/ и ка́мение разседа́ющеся, храма же катапета́сму раздирающуся на дво́е видев,/ в Божественней Страсти Христове Ло́нгин Божия Сына позна́,/ страждуща Своим благоутробием, безстра́стна же су́ща Божеством,/ и Славою со Отцем и Духом Святым содержащаго все и объемлюща,/ яко Бога Истинна и Царя./ Тем радостно страдалец зовяше:/ Ты моя держава, Христе, и утверждение. Песнь 7 Ирмос: В пещи́ Авраа́мстии о́троцы перси́дстей,/ любовию благочестия па́че,/ не́жели пламенем, опаля́еми, взываху:/ благословен еси в храме славы Твоея, Господи. Припев: Святы́й му́чениче Ло́нгине, моли́ Бо́га о на́с. Законно пострада́в, мучениче,/ мужеским нра́вом души́ вся беззако́ннующих посрами́л еси советы/ и законно венчался еси:/ благословен еси, вопия, в храме славы Твоея, Господи. Припев: Святы́й му́чениче Ло́нгине, моли́ Бо́га о на́с. Божественная благодать, нашедши мощем твоим,/ всяку болезнь реши́т благочести́во приходящих к тебе, блаженне,/ и проповедающих тя, истины непобеди́маго свидетеля. Сла́ва Отцу́ и Сы́ну и Свято́му Ду́ху. Плоти умирающия не пощади́л еси, Ло́нгине, за Христа,/ жре́ти отреклся еси де́моном/ и тебе само́го Богу жертву непорочну, радуяся, принесл еси,/ мече́м посе́чен, досточудне. И ны́не и при́сно и во ве́ки веко́в. Ами́нь. Богородичен: Яко Чистую Тя, Чистое Слово обре́т, всели́ся, Дево,/ Тобою очи́стити скве́рны человеков изво́лив:/ благословен бо Плод чре́ва Твоего. Песнь 8 Ирмос: Ру́це распросте́р Даниил,/ львов зия́ния в рове затче́:/ о́гненную же силу угаси́ша,/ добродетелию препоя́савшеся,/ благочестия рачи́тели, о́троцы взывающе:/ благословите вся дела Господня Господа. Припев: Святы́й му́чениче Ло́нгине, моли́ Бо́га о на́с. Успи́в прежде плотска́я двиза́ния, славне, бде́ньми, су́щими ко Господу,/ усну́л еси сладким сном, блаженне, умертвився Христа ради,/ на Древе Крестнем сном Божественным мертвым Жизнь источившаго. Припев: Святы́й му́чениче Ло́нгине, моли́ Бо́га о на́с. Копие́м прободе́на в ре́бра, блаженнейше, яко видел еси,/ и, Кровь и во́ду источи́вша, Христа Человека, за милосердие, бывша,/ и уя́звен был еси Того сладким желанием, воспевая:/ благословите вся дела Господня Господа. Припев: Святы́й му́чениче Ло́нгине, моли́ Бо́га о на́с. Погаси́л еси огни́ще и́дольское крове́й теченьми, Ло́нгине всемудре,/ и поже́гл еси кумиры, и нетве́рдая чти́лища,/ Божественною ревностию ду́шу возпали́в и взывая:/ благословите вся дела Господня Господа. Сла́ва Отцу́ и Сы́ну и Свято́му Ду́ху. Очи сердечныя просвети́в Божественными сия́ньми, омрачившагося Солнца всесветлое сияние,/ мрак усердно оставил еси злочестия и звезда яви́лся еси, мудре, просвещающая вопиющия:/ благословите вся дела Господня Господа. И ны́не и при́сно и во ве́ки веко́в. Ами́нь. Богородичен: Усты́ и язы́ком, и душе́ю проповедаю Тя, Богородительницу, и молю Тя, Пречистая:/ сердце мое озари светом Твоим и лютыя мя тьмы свободи́, вопиюща:/ благословите вся дела Господня Господа. Песнь 9 Ирмос: Камень нерукосечный/ от несекомыя горы Тебе, Дево,/ краеугольный отсече́ся, Христос, совокупивый разстоящаяся естества:/ тем, веселящеся, Тя, Богородице, величаем. Припев: Святы́й му́чениче Ло́нгине, моли́ Бо́га о на́с. Крепость моя и пение – Слово, Иже на Кресте ру́це распрострый,/ мучениче, беззаконным вопиял еси:/ Того страсть всеблаженную изобразу́я, смерть волею приемлю. Припев: Святы́й му́чениче Ло́нгине, моли́ Бо́га о на́с. Яко предобрый страстоте́рпец обда́рствован страстьми́ Божественными,/ весь красне́йш яви́лся еси и красному Слову предстои́ши,/ воздая́ния боле́зней твоих богате́йте восприе́мля. Припев: Святы́й му́чениче Ло́нгине, моли́ Бо́га о на́с. Тя, сиянием страсте́й солнце незаходимое явльшася/ и заря́ми исцелений вселенную всю просветившаго,/ и мрак разгна́вша неразумия, ублажаем. Сла́ва Отцу́ и Сы́ну и Свято́му Ду́ху. Взялся еси ко обителем вечным и лико́м сочи́слился еси всех святых мучеников:/ с нимиже, мучениче Ло́нгине, нас поминай,/ благочестно память твою празднующих, всеблаженне. И ны́не и при́сно и во ве́ки веко́в. Ами́нь. Богородичен: Света невечерняго явилася еси жили́ще, Богородице,/ Имже во тьме сущии и се́ни греха свет узре́ша:/ тем и моя просвети сердечная чувствия. Светилен На Кресте висяща яко узре́л еси вся Содержащаго ма́нием и советом неизреченным,/ удиви́лся еси чудеси́/ и Сына нарицал еси Бога Небеснаго:/ егоже славы достойно по подобию истинно причастник был еси. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Да славлю, Пречистая, Твою нератную благодать, многими прегреше́ньми впа́дшийся безумно:/ постигни ско́ростию Твоею и Твоею мя крепостию исхити́ грехопадений,/ яко спасаеши, яже хо́щеши, от всяческих скорбе́й силою Твоею непобори́мою.

Минея, 18 Июля, Кано́н преподо́бнаго Глас 3 Песнь 1 Ирмос: Во́ды дре́вле ма́нием Боже́ственным/ во еди́но со́нмище совокупи́вый/ и раздели́вый мо́ре изра́ильтеским лю́дем,/ Сей Бог наш препросла́влен есть,/ Тому́ еди́ному пои́м, я́ко просла́вися. Припев: Преподо́бне о́тче Иоа́нне, моли́ Бо́га о на́с. Во́ды жа́ждущим в пусты́ни лю́дем Твои́м иногда́ да́вый,/ и мне, Христе́ мой, жа́ждущему хвалу́ принести́ Тебе́, даждь во́ду благода́ти,/ да в па́мяти преподо́бнаго Твоего́ воспою́ песнь:/ я́ко просла́вися. Припев: Преподо́бне о́тче Иоа́нне, моли́ Бо́га о на́с. Те́сный путь и мно́гия ско́рби Ты Сам показа́л еси́, Го́споди, ше́ствующим к Ца́рствию Твоему́,/ его́же жела́я, преподо́бный Твой ра́достно ско́рби подъя́л есть в жи́зни сей,/ да та́мо возвесели́тся, поя́:/ я́ко просла́вися. Припев: Преподо́бне о́тче Иоа́нне, моли́ Бо́га о на́с. Глас всегда́шняго ра́дования и шум пра́зднующих непреста́нно помина́я, свя́те Иоа́нне,/ зову́щия к суете́ пре́лести оста́вль, Христо́в яре́м взял еси́ на ся/ и ле́гце той в наде́жди ско́раго премене́ния носи́л еси́, поя́ Бо́гу:/ я́ко просла́вися. Сла́ва Отцу́ и Сы́ну и Свято́му Ду́ху. Удали́вся стра́стнаго ми́ра, блаже́нне,/ прите́кл еси́, я́ко еле́нь, на Пече́рскую го́ру,/ иде́же струя́ми духо́внаго пото́ка, блаже́нных оте́ц, напои́в ду́шу, воспе́л еси́ Бо́гу:/ я́ко просла́вися. И ны́не и при́сно и во ве́ки веко́в. Ами́нь. Богородичен: С корабле́м потопля́емь душе́вным в мо́ри страсте́й, вопию́ Ти, Чи́стая:/ ми́лостию Твое́ю помози́ мне и от потопле́ния изба́ви,/ еси́ бо кора́бль хотя́щим спасти́ся/ и ти́хое приста́нище жите́йских пла́ваний. Песнь 3 Ирмос: И́же от не су́щих вся Приведы́й,/ сло́вом созида́емая,/ соверша́емая Ду́хом,/ Вседержи́телю Вы́шний,/ в любви́ Твое́й утверди́ мене́. Припев: Преподо́бне о́тче Иоа́нне, моли́ Бо́га о на́с. Я́ко от не су́щия, мирски́я ве́щи избе́г,/ в ти́хое приста́нище и́ночествующих прите́кл еси́, о́тче,/ с ни́миже живы́й, Еди́наго любя́ Бо́га, воспе́л еси́:/ Христе́ мой, в любви́ Твое́й утверди́ мене́. Припев: Преподо́бне о́тче Иоа́нне, моли́ Бо́га о на́с. Пречи́стому и Непоро́чному А́гнцу после́довати хотя́ща тя в чистоте́, блаже́нне, ви́дя,/ враг скве́рный нападе́ на тя разжже́нием плотски́м,/ ему́же проти́ву стал еси́, смиря́я плоть свою́ посто́м и жа́ждею и в моли́тве поя́:/ Христе́ мой, утверди́ мене́. Припев: Преподо́бне о́тче Иоа́нне, моли́ Бо́га о на́с. Отпаде́ние Присносу́щнаго Све́та блуднико́м помина́я, преподо́бне,/ в те́мную всели́лся еси́ пеще́ру,/ и, при гро́бе вели́каго Анто́ния безмо́лвствуя, свой исхо́д помина́л еси́ при́сно,/ и та́ко обре́л еси́ мир в косте́х твои́х. Сла́ва Отцу́ и Сы́ну и Свято́му Ду́ху. Не смерть, но премене́ние на живо́т лу́чший святы́м Бо́жиим есть,/ и́бо а́ще и во гробе́х положе́ни суть,/ но Бо́гови живу́т при́сно и глас испуща́ют;/ я́коже и к тебе́, о́тче Иоа́нне, от гро́ба вели́каго Анто́ния глас бысть,/ на безмо́лвие тя призыва́яй. И ны́не и при́сно и во ве́ки веко́в. Ами́нь. Богородичен: Час Су́дный помина́ю,/ но премене́ния от страсте́й на живо́т безстра́стный не и́мам, Чи́стая Богоро́дице;/ моли́тв ра́ди преподо́бнаго де́вственника Иоа́нна от любве́ страсте́й отврати́/ и в любви́ Сы́на Твоего́ утверди́ мене́. Седален, глас 8 Блаже́нству не оскверни́вшихся с жена́ми поревнова́в,/ да после́дуеши А́гнцу на горе́ Сио́нстей,/ поста́вил еси́ де́вство свое́ соблюсти́ нескве́рно/ и соблю́л еси́ е́ це́ло,/ мно́гими напа́стьми бесо́вскими невреди́мо;/ те́мже пое́ши песнь но́вую, преподо́бне Иоа́нне,/ и ра́дуется со А́нгелы дух твой. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Блаже́нству де́вственник не поревнова́х, окая́нный,/ оскверни́х креще́ния моего́ ри́зу блу́дными растле́нии/ и удали́хся благода́ти Твоея́, Нескве́рный А́гнче, Сы́не Бо́жий,/ страсте́й ра́ди святы́х Твои́х и Пречи́стыя Богоро́дицы/ даждь ми исправле́ние и поми́луй мя. Песнь 4 Ирмос: Положи́л еси́ к нам тве́рдую любо́вь, Го́споди:/ Единоро́днаго бо Твоего́ Сы́на/ за ны на смерть дал еси́./ Те́мже Ти зове́м, благодаря́ще:/ сла́ва си́ле Твое́й, Го́споди. Припев: Преподо́бне о́тче Иоа́нне, моли́ Бо́га о на́с. Положи́л еси́ житие́ твое́ в те́мней пеще́ре, о́тче, неисхо́дно,/ до́ндеже стра́стная мгла во свет преложи́тся молча́нием/ и неви́дением чу́вственнаго све́та. Припев: Преподо́бне о́тче Иоа́нне, моли́ Бо́га о на́с. Мно́гия ско́рби подъя́л еси́, свя́те,/ со страстьми́ боря́ся, а́ки с лю́тыми зверьми́,/ жесто́кая тех нападе́ния посто́м и бде́нием в теле́снем соста́ве свое́м кре́пко обуздава́я. Припев: Преподо́бне о́тче Иоа́нне, моли́ Бо́га о на́с. Огне́м бесо́вских прило́г пали́мую плоть твою́ не моги́й устуди́ти, блаже́нне,/ наг изво́лил еси́ жи́ти в те́сне ме́сте,/ сту́дению к теплоте́ духо́вней та́мо подвиза́яся. Сла́ва Отцу́ и Сы́ну и Свято́му Ду́ху. Зве́ря лю́та и неукроти́ма, свирепе́ющее те́ло свое́, смири́ти хотя́,/ тя́жкими желе́зы связа́л еси́, преподо́бне, да не по́хотствует на ду́ха,/ но па́че да повину́ется ду́ху. И ны́не и при́сно и во ве́ки веко́в. Ами́нь. Богородичен: От мно́гаго невоздержа́ния востаю́щих на мя страсте́й не моги́й укроти́ти,/ к Тебе́ прибега́ю, Влады́чице:/ Ты, Пречи́стая, сих нечистоту́ смири́/ и спаси́ мя от тех нападе́ния. Песнь 5 Ирмос: На земли́ Неви́димый яви́лся еси́/ и челове́ком во́лею сожи́л еси́, Непостижи́мый,/ и, к Тебе́ у́тренююще,/ воспева́ем Тя, Человеколю́бче. Припев: Преподо́бне о́тче Иоа́нне, моли́ Бо́га о на́с. На земли́ живы́й всяк, кто не удиви́тся терпе́нию твоему́, о́тче,/ и́бо, ископа́в себе́ ров и наг вшед, окопа́лся еси́ до ра́му,/ пе́рстию угнета́я плотско́е стремле́ние, от супоста́та врага́ дви́жимое. Припев: Преподо́бне о́тче Иоа́нне, моли́ Бо́га о на́с. Твое́ те́ло, пе́рстию угнета́емо, уныва́ше,/ но враг бо́дрствоваше, кре́пко востава́я бра́нию/ и напа́дая страхова́ньми, хотя́ та́ко одоле́ти тебе́,/ да не я́звен паде́т от Тебе́, преподо́бне. Припев: Преподо́бне о́тче Иоа́нне, моли́ Бо́га о на́с. Ум твой, всече́стне Иоа́нне, горя́щ к Бо́гу, ви́дя, диа́вол/ злохи́трым пла́менем со дна паля́ше у́ды твоя́ и утро́бу,/ но ты, о сей боле́зни неради́в,/ изво́лил еси́ Го́спода ра́ди сгоре́ти, не́же бы́ти поруга́н бе́сом. Сла́ва Отцу́ и Сы́ну и Свято́му Ду́ху. Я́дом а́спидным не моги́й сатана́ чистоты́ твоея́ порази́ти, блаже́нне,/ во змия́, огне́м ды́шуща, преобрази́ся,/ да поне́ та́ко устраши́в,/ победи́т тя, непобеди́маго во́ина Христо́ва. И ны́не и при́сно и во ве́ки веко́в. Ами́нь. Богородичен: Яд а́спиден, стра́стныя прило́ги, и́миже враг се́рдце ми уязвля́ет,/ цельбо́ю ми́лости Твоея́ уврачу́й, Безневе́стная Де́во,/ я́ко да спасе́н от сих, плод покая́ния принесу́ Ти всеце́лый. Песнь 6 Ирмос: Бе́здна после́дняя грехо́в обы́де мя,/ и исчеза́ет дух мой;/ но простры́й, Влады́ко, высо́кую Твою́ мы́шцу,/ я́ко Петра́, мя, Упра́вителю, спаси́. Припев: Преподо́бне о́тче Иоа́нне, моли́ Бо́га о на́с. Бе́здна после́дняя отве́рзе горта́нь,/ нечи́стый во зми́я преобрази́выйся диа́вол воспе́нися,/ пламеноно́сными ды́ша зия́нии, хотя́ше поглоти́ти тя,/ но ты, о́тче, был еси́ а́ки столп недви́жимь, поя́:/ Бо́же мой, Упра́вителю, мя спаси́. Припев: Преподо́бне о́тче Иоа́нне, моли́ Бо́га о на́с. На ка́мени тве́рдыя ве́ры стоя́, преподо́бне, щито́м наде́жды покры́лся еси́,/ и, бу́рю злоко́зненнаго врага́ ни во что же вмени́в, на главу́ его́ обрати́л еси́,/ и, в горта́ни того́ сый, не устраши́лся еси́, зовы́й ко Христу́:/ Упра́вителю, мя спаси́. Припев: Преподо́бне о́тче Иоа́нне, моли́ Бо́га о на́с. Кит мы́сленный главу́ твою́, блаже́нне, в горта́нь свой вложи́,/ и опали́шася тебе́ власи́,/ но не опали́ся малоду́шием се́рдце твое́, о́тче, и́мже взыва́л еси́./ И Госпо́дь услы́ша тя, я́ко Добр Ко́рмчий, любоприима́тельне спаса́я. Сла́ва Отцу́ и Сы́ну и Свято́му Ду́ху. Моли́тва твоя́, Иоа́нне, бысть стре́лы мо́лниины на сопроти́внаго си́лу,/ рекл бо еси́:/ Бо́же мой, вску́ю мя еси́ оста́вил?/ И а́бие исчезе́ льсти́вый я́звен/ и ктому́ не прибли́жися уже́ к тебе́, Све́том Боже́ственным прогна́н. И ны́не и при́сно и во ве́ки веко́в. Ами́нь. Богородичен: Стре́лы мы́сленнаго супоста́та страстьми́ ура́ниша ми се́рдце,/ тем от го́рести души́ моея́ к тебе́ вопию́, Чи́стая:/ исто́ргни ты́я руко́ю Твое́ю, я́ко ро́ждшая Христа́, Цели́теля моего́. Кондак, глас 2 Столп целому́дрия, вра́жиими боре́ньми непобеди́мь сый,/ а́ки столп, многострада́льное водруже́нно оста́вил еси́ нам те́ло твое́,/ всече́стне Иоа́нне,/ ему́же в не́мощех душе́вных и теле́сных покланя́ющеся,/ мо́лим тя, преподо́бне:/ моли́ Христа́ Бо́га непреста́нно о всех нас. Икос Возлюби́в, преподо́бне, Христо́вы Боже́ственныя за́поведи/ и возненави́дев ми́ра сего́ наслажде́ние,/ прише́л еси́ усе́рдно к Тому́/ и был еси́ свети́льник, просвеща́я концы́ блиста́нием духо́вным./ Тем, припа́дая, молю́ тя:/ просвети́ мои́ о́чи душе́внеи воспе́ти твоя́ по́двиги,/ поще́ние, и бде́ние, и сле́зы, боле́зни и изможде́ние те́ла/ блаже́нныя ра́ди бу́дущия жи́зни,/ ея́же ны́не наслажда́яся, моли́ непреста́нно о всех нас. Песнь 7 Ирмос: Я́коже дре́вле/ благочести́выя три о́троки ороси́л еси́ в пла́мени халде́йстем,/ све́тлым Божества́ огне́м и нас озари́,/ благослове́н еси́, взыва́ющия,/ Бо́же оте́ц на́ших. Припев: Преподо́бне о́тче Иоа́нне, моли́ Бо́га о на́с. Я́коже прах от ве́тра и я́коже дым от тучено́снаго о́блака погиба́ет,/ та́ко и Све́ту Боже́ственному прише́дшу, исчезе́ лука́вый,/ ты же, о́тче, поклони́лся еси́ Го́сподеви, поя́:/ Бо́же, благослове́н еси́. Припев: Преподо́бне о́тче Иоа́нне, моли́ Бо́га о на́с. Близ Госпо́дь бысть призыва́ющу ти в по́мощь, свя́те,/ Его́же благода́ть ощути́в, ра́достною душе́ю из глубины́ се́рдца воспе́л еси́:/ Бо́же, благослове́н еси́. Сла́ва Отцу́ и Сы́ну и Свято́му Ду́ху. Я́коже прему́др господи́н кре́пкому рабу́ вели́кое налага́ет де́ло,/ та́ко и Госпо́дь попусти́ тебе́ терпе́ти дневны́й и нощны́й вар раздеже́ний плотски́х,/ ты же терпеливоду́шне поне́сл еси́ его́, поя́:/ Бо́же, благослове́н еси́. И ны́не и при́сно и во ве́ки веко́в. Ами́нь. Богородичен: Я́ко прему́др Влады́ка, Сын Твой, Де́во,/ на лени́ваго мя ле́гким страсте́м приити́ попуща́ет,/ но пре́жде да́же не приидо́ша о́ныя, аз изнемого́х,/ тем к Тебе́ вопию́:/ помози́ ми, о Ма́ти Сло́ва, Ты бо благослове́нна еси́. Песнь 8 Ирмос: Нестерпи́мому огню́ соедини́вшеся,/ богоче́стия предстоя́ще, ю́ноши,/ пла́менем же неврежде́ни,/ Боже́ственную песнь поя́ху:/ благослови́те, вся дела́ Госпо́дня, Го́спода/ и превозноси́те во вся ве́ки. Припев: Преподо́бне о́тче Иоа́нне, моли́ Бо́га о на́с. В нестерпи́мем огни́ разжже́ний плотски́х/ повелева́ет тебе́, блаже́нне, свы́ше глас помоли́тися мертвецу́,/ могу́щему во страсте́х блу́дных помога́ти и про́чим,/ да пою́т Го́спода во ве́ки. Припев: Преподо́бне о́тче Иоа́нне, моли́ Бо́га о на́с. И́же бо́лее Ио́сифа сотвори́вый, внегда́, плене́н сый, скве́рней жене́ не повину́ся,/ той и тебе́, свя́те, посо́бствова хода́тайством к Бо́гу,/ И́мже избы́в страсте́й тле́нных, ны́не пое́ши Го́спода во ве́ки. Припев: Преподо́бне о́тче Иоа́нне, моли́ Бо́га о на́с. Твое́ великоду́шие, о́тче, тьма́ми светле́йшее со́лнца ви́дя Бо́жие О́ко,/ свет низпосла́ благода́ти, и мрак па́губнаго блуда́ от косте́й твои́х поги́бе весьма́./ Про́чее же пожи́в в тишине́,/ ны́не пое́ши Го́спода во ве́ки. Сла́ва Отцу́ и Сы́ну и Свято́му Ду́ху. Безстра́стным подая́й у́мное весе́лие Влады́ка,/ подаде́ и тебе́, преподо́бне Иоа́нне, по мно́гих труде́х,/ е́же от Све́та Боже́ственнаго прие́мь, возра́довался еси́/ и ны́не на Небеси́ весели́шися с пою́щими Го́спода во ве́ки. И ны́не и при́сно и во ве́ки веко́в. Ами́нь. Богородичен: Вне страсте́й заче́ншая, Де́во,/ и без по́хоти му́жеския ро́ждшая Бо́жие Сло́во,/ начина́ющияся во тьме лука́ваго прило́ги истреби́,/ да, грехолю́бия избы́в, сподо́блюся Го́спода пе́ти во ве́ки. Песнь 9 Ирмос: Но́вое чу́до и Боголе́пное:/ деви́ческую бо дверь затворе́нную/ я́ве прохо́дит Госпо́дь, наг во вхо́де,/ и плотоно́сец яви́ся во исхо́де Бог,/ и пребыва́ет Дверь затворе́на;/ Сию́ неизрече́нно я́ко Богома́терь велича́ем. Припев: Преподо́бне о́тче Иоа́нне, моли́ Бо́га о на́с. Но́вую жизнь нача́л еси́,/ егда́ по мно́зем страда́нии страсте́й бу́ря в тебе́ ути́шися, о́тче,/ и пожи́л еси́ в тишине́ про́чее вре́мя, си́лу Бо́жию велича́яй. Припев: Преподо́бне о́тче Иоа́нне, моли́ Бо́га о на́с. На тве́рдем ка́мени терпе́ния стоя́,/ был еси́ а́ки столп кре́пок, проти́ву лица́ вра́жия,/ его́же стре́лы, прира́жшеся тебе́, сокруши́шася,/ тем тя, Иоа́нне, велича́ем. Припев: Преподо́бне о́тче Иоа́нне, моли́ Бо́га о на́с. Чист душе́ю и те́лом на земли́ пожи́в, отше́л еси́ к Небе́сным,/ с чи́стыми се́рдцем лице́ Бо́жие ви́дети,/ Его́же зре́нием наслажда́яся, моли́ся о нас, преподо́бне,/ да с тобо́ю Тро́ицу велича́ем. Сла́ва Отцу́ и Сы́ну и Свято́му Ду́ху. Блаже́нна жизнь твоя́, Иоа́нне, блаже́нна кончи́на,/ но блаже́ннейший живо́т в немерца́ющем све́те,/ его́же ра́ди мно́гия поне́сл еси́ ско́рби,/ ны́не, ра́дуяся, моли́ся о нас, чту́щих па́мять твою́, всему́дре. И ны́не и при́сно и во ве́ки веко́в. Ами́нь. Богородичен: Жи́зни Нача́льника от крове́й Твои́х ро́ждшая, Де́во, безсе́менно,/ моли́тв ра́ди де́вственника Иоа́нна/ нас, покланя́ющихся Тебе́, к жи́зни ве́чней упра́ви,/ да Тя, Исто́чника жи́зни ро́ждшую, велича́ем. Светилен Чистоты́ ра́ди своея́ ско́рбную ше́ствуя стезю́, се́ял еси́ мно́гия сле́зы;/ ны́не же с весе́лием жняй блаже́нныя рукоя́ти,/ моли́ся о нас, преподо́бне, со святы́ми отцы́,/ да и мы прича́стницы ва́шего блаже́нства бу́дем:/ мы бо ча́да ва́ша и о́вцы слове́сныя уче́ний ва́ших. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Чи́стая Де́во, Сло́ва врата́,/ Ма́ти Христа́ Бо́га на́шего,/ моли́ спасти́ся нам, рабо́м Твои́м.

Минея, 26 Ноября, Канон святителя Глас 8 Песнь 1 Ирмос: Истря́сшему в мо́ри мучи́тельство фарао́не/ и Изра́иля су́шею наста́вльшему,/ пои́м Христу́:/ я́ко просла́вися во ве́ки. Припев: Святи́телю, о́тче Инноке́нтие, моли́ Бо́га о на́с. Иера́рше непоро́чне, при́зри с Небесе́, и виждь,/ и посети́ осене́нием твои́м виногра́д сей,/ его́же насади́ десни́ца твоя́ во стране́ язы́ков,/ да просла́вим благогове́йно чудеса́ твоя́,/ а́ще и не возмо́жно есть исчи́слити я. Припев: Святи́телю, о́тче Инноке́нтие, моли́ Бо́га о на́с. На пути́ иногда́ вразумля́ше Валаа́ма осли́ца,/ да не и́дет проклина́ти Изра́иля,/ его́же и благослови́ прише́дый от Месопота́мии;/ си́це утомле́нными ко́ньми вразумле́н бя́ше преогорче́нный пу́тник,/ да возда́ст святи́телю Инноке́нтию сла́ву, е́юже обеща́ся. Сла́ва Отцу́ и Сы́ну и Свято́му Ду́ху. Ног боле́знию и разслабле́нием всех чле́нов неду́гующему,/ яви́лся еси́ ско́рый цели́тель, о́тче наш Инноке́нтие,/ не пре́зри у́бо и ны́не с ве́рою притека́ющих/ к живоно́сным и присноцеле́бным моща́м твои́м. И ны́не и при́сно и во ве́ки веко́в. Ами́нь. Богородичен: Отцу́ Собезнача́льнаго Сы́на пло́тию родила́ еси́, Пренепоро́чная Де́во,/ Его́же моли́ со святи́телем,/ да сотвори́т ны сы́ны Своего́ Ца́рствия/ и насле́дники обетова́ния ве́чнаго. Песнь 3 Ирмос: Утверди́ наш ум и сердца́,/ Небеса́ сло́вом утвержде́й,/ во е́же пе́ти и сла́вити Тя/ во спасе́ние душ на́ших. Припев: Святи́телю, о́тче Инноке́нтие, моли́ Бо́га о на́с. Купину́ втору́ю показа́л еси́, слове́сный па́стырю,/ егда́ моли́твами твои́ми сохрани́л еси́ среди́ пла́мене невреди́му святу́ю це́рковь,/ в не́йже почива́ше не у просла́вленное на земли́,/ но с небеси́ оби́лием чудотворе́ний я́вственно свиде́тельствованное,/ свя́то бы́ти нетле́нное те́ло твое́. Припев: Святи́телю, о́тче Инноке́нтие, моли́ Бо́га о на́с. Еди́ной ве́ре досту́пен яви́лся еси́, непоро́чне:/ те́мже с премене́нием естества́ уста́вов,/ мраз и и́ней сокры́ша чистоту́ твою́ от оче́с нечи́стых,/ дерзну́вших в неве́рии ви́дети тя,/ и́мже не дал еси́ узре́ти сла́вы твоея́,/ поучава́я ны чи́стым се́рдцем тебе́ сла́вити. Сла́ва Отцу́ и Сы́ну и Свято́му Ду́ху. На по́мощь ско́ро прите́кл еси́ к ста́рцу, очи́ма тя́жко ви́дящему,/ и, прикосну́вся боле́зненной главе́ его́,/ яви́л еси́ на нем дела́ Бо́жия;/ просвети́ у́бо и на́ша душе́вная о́чи/ моли́твами твои́ми, священнонача́льниче. И ны́не и при́сно и во ве́ки веко́в. Ами́нь. Богородичен: Тве́рдое и непрело́жное упова́ние ве́мы Тя, Богоро́дице,/ его́же де́ржимся и, упова́я, мо́лимся:/ сохрани́ град сей и вся гра́ды и страны́ Христиа́нския/ от всех бед, находя́щих челове́ком согреша́ющим,/ но а́бие моли́твами твои́ми прие́млющим согреше́ний оставле́ние. Седален, глас 3 Тако́в нам подоба́ше архиере́й,/ преподо́бен, незло́бив, кро́ток, отлуче́н от гре́шник,/ и́же пред ве́чным А́рхиереем, Иису́с Христо́м,/ мо́лится вы́ну о спасе́нии ста́да своего́:/ мно́го бо мо́жет моли́тва пра́веднаго, поспешеству́ема во благо́е. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: О Тебе́, Отрокови́це, возгласи́ проро́к, глаго́ля:/ се врата́ восто́ка, и бу́дут затворе́на,/ и никто́же про́йдет сквозе́ я:/ но Госпо́дь Бог еди́н про́йдет,/ и бу́дут врата́ затворе́на. Песнь 4 Ирмос: Услы́шах, Го́споди,/ смотре́ния Твоего́ та́инство,/ разуме́х дела́ Твоя́,/ и просла́вих Твое́ Божество́. Припев: Святи́телю, о́тче Инноке́нтие, моли́ Бо́га о на́с. Иису́с в до́ме Петро́вом/ прикосну́ся руце́ те́щи его́, огне́м жего́мой,/ и а́бие оста́ви ю огнь;/ сия́ же зна́мения после́доваша тебе́, ве́рующему чудотво́рцу,/ укроти́л бо еси́ огне́вицу/ еди́ным прикоснове́нием бо́ку лежа́щаго на одре́ сме́рти,/ но призва́вшаго тя во упова́нии жи́зни. Припев: Святи́телю, о́тче Инноке́нтие, моли́ Бо́га о на́с. Исцелева́хуся иногда́ ве́рующии/ от нанесе́ния главотя́жей и убру́сцев Па́вловых;/ не про́сты си́лы творя́ше Бог и твои́ма рука́ма, но́вый апо́столе,/ персть бо от твоея́ свяще́нныя ра́ки и еле́й от лампа́ды/ отверза́ют слепотству́ющей о́чи и да́руют исцеле́ние. Сла́ва Отцу́ и Сы́ну и Свято́му Ду́ху. Моли́тва ве́ры спасе́ лю́те боля́щаго,/ и́же и испове́да, я́ко вра́чеве не воскреся́т,/ упова́ние же на тя, благосе́рдый о́тче,/ николи́же посрамля́ет с ве́рою призыва́ющих тя во благовре́менную по́мощь. И ны́не и при́сно и во ве́ки веко́в. Ами́нь. Богородичен: Отрокови́ца неискусому́жная ражда́ет Прови́деннаго Ду́хом от Авваку́ма,/ и к Рожде́нному мо́лится о душа́х на́ших,/ му́дре пасо́мых па́стырем,/ и по исхо́де свое́м вы́ну с на́ми в неистле́нии свята́го телесе́ своего́ пребыва́ющим. Песнь 5 Ирмос: От но́щи неве́дения,/ Богове́дения день/ во све́те лица́ Твоего́, Христе́, да возсия́ет,/ ко у́тру хвале́ние Твое́ в сердца́х на́ших. Припев: Святи́телю, о́тче Инноке́нтие, моли́ Бо́га о на́с. Любо́вию погрузи́вся во струя́х упова́ния на уго́дника Бо́жия,/ покры́тый от главы́ до ног стру́пами/ и в пло́ти свое́й не обрета́ющий исцеле́ния,/ и а́бие очи́стися от нечистоты́ боле́зненной,/ я́коже Неема́н от прока́зы погруже́нием во Иорда́не, по глаго́лу Елиссе́еву. Припев: Святи́телю, о́тче Инноке́нтие, моли́ Бо́га о на́с. И́щущим тебе́ обрета́ешися гото́вый помо́щник, святи́телю Инноке́нтие,/ и ско́ро подае́ши неду́гов исцеле́ние,/ я́коже иногда́ жене́,/ боле́знующей десно́ю руко́ю,/ яви́лся еси́ в со́нном виде́нии/ и сотвори́л еси́ ю здра́ву за еди́ное призва́ние свята́го твоего́ и́мене. Сла́ва Отцу́ и Сы́ну и Свято́му Ду́ху. Тве́рдое благода́ти позна́ние утвержда́я в ве́рующих,/ научи́л еси́ нас ве́дети тя я́ко наста́вника ми́лостиваго,/ благоутро́бия сокро́вище, правове́рия учи́теля,/ архиере́ев похвалу́, безпо́мощных засту́пника,/ при́сно моля́щагося о спасе́нии чад тво́их,/ с ве́рою к тебе́ притека́ющих. И ны́не и при́сно и во ве́ки веко́в. Ами́нь. Богородичен: Вереи́ а́довы сломи́шася, и закле́пи ве́чнии сокруши́шася/ Ро́ждшимся от Тебе́, Пречи́стая Ма́ти./ Те́мже мо́лим Тя:/ изба́ви ны от ве́чныя сме́рти хода́тайством Твои́м/ и всели́ ны во све́те Сы́на Твоего́,/ свет искупле́ния ми́рови возсия́вшаго. Песнь 6 Ирмос: Ри́зу мне пода́ждь све́тлу,/ одея́йся све́том, я́ко ри́зою,/ Многоми́лостиве Христе́ Бо́же наш. Припев: Святи́телю, о́тче Инноке́нтие, моли́ Бо́га о на́с. Ели́цы притека́ху к тебе́, помо́щниче те́плый,/ не отхожда́ху посра́млении:/ немощни́и исцелева́хуся,/ в боле́зни деторожде́ния су́щия/ от многоцеле́бной благосты́ни твое́й приима́ху ско́рое неду́га разреше́ние,/ слепи́и прозира́ху;/ посети́ у́бо и нас, ще́дрый о́тче, твое́ю по́мощию. Припев: Святи́телю, о́тче Инноке́нтие, моли́ Бо́га о на́с. Не бу́ди неве́рен, но ве́рен, рекл еси́, о́тче,/ втори́цею яви́выйся от преломле́ния ноги́ лю́те стра́ждущему,/ и, уда́рив жезло́м в ме́сто, иде́же стоя́сте но́зе твои́,/ я́звою на дре́ве уврачева́л еси́ душе́вную я́зву омраче́ннаго неве́рием,/ а́бие бо испове́да бы́ти тебе́ благода́тнаго врача́,/ воздви́гшаго его́ от одра́ боле́зненнаго. Сла́ва Отцу́ и Сы́ну и Свято́му Ду́ху. Непоро́чныма твои́ма рука́ма препо́дал еси́, архиере́ю Бо́жий,/ безсме́ртную пи́щу стра́ждущей,/ о чу́до! на Небеси́ приобща́яся и́стее Невече́рняго Све́та,/ вя́щшее седми́десяти лет по твое́м успе́нии,/ и на земли́ явля́ешися священноде́йствитель Боже́ственных Та́ин,/ уверя́я па́ству твою́ в неразлу́чном пребыва́нии вы́ну/ с притека́ющими к твое́й по́мощи. И ны́не и при́сно и во ве́ки веко́в. Ами́нь. Богородичен: И́стины учи́телю, наста́ви ны во и́стинней ве́ре,/ моля́ о спасе́нии на́шем с Пречи́стою Де́вою Богоро́дицею/ рожде́ннаго от Нея́ на спасе́ние всего́ ми́ра. Кондак, глас 4 Непоро́чности соиме́ннаго па́стыря,/ пропове́дника ве́ры в язы́цех Монго́льских,/ сла́ву и украше́ние Ирку́тския па́ствы,/ любо́вию восхва́лим, вси ве́рнии:/ той бо есть храни́тель страны́ Сиби́рския и моли́твенник о душа́х на́ших. Икос А́нгельским житие́м возвы́сился еси́, о́тче,/ до лицезре́ния красоты́ не созда́нной,/ е́юже наслажда́яся ны́не на Небеси́, мо́лишися о спасе́нии на́шем,/ нас же на земли́ науча́еши взыва́ти тебе́ такова́я:/ ра́дуйся, кри́не, в благорастворе́нном ю́ге процве́тший;/ ра́дуйся, пе́рвенче духо́внаго сыноположе́ния, от Ма́лыя Росси́и Бо́гу посвяще́нный;/ ра́дуйся, сла́во и велича́ние гра́да Ки́ева;/ ра́дуйся, в земно́м учи́лищи Небе́сныя му́дрости наста́вниче; ра́дуйся, му́дрый исполни́телю веле́ний земны́х;/ ра́дуйся, му́жественный подви́жниче Царя́ Небе́снаго;/ ра́дуйся, пропове́дниче ве́ры в язы́цех Монго́льских;/ ра́дуйся, началоположи́телю до́браго священнонача́лия во страна́х Сиби́рских;/ ра́дуйся, украше́ние Ирку́тския па́ствы;/ ра́дуйся, благоуха́ние пусты́ни;/ ра́дуйся, о́бщаго воскресе́ния в нетле́нии твое́м увери́телю;/ ра́дуйся, неизчерпа́емых чуде́с исто́чниче;/ ра́дуйся, храни́телю страны́, тобо́ю избра́нныя;/ ра́дуйся, Инноке́нтие, моли́твенниче о душа́х на́ших. Песнь 7 Ирмос: В нача́ле зе́млю основа́вый/ и Небеса́ сло́вом утверди́вый, благослове́н еси́ во ве́ки,/ Го́споди Бо́же оте́ц на́ших. Припев: Святи́телю, о́тче Инноке́нтие, моли́ Бо́га о на́с. Кре́пость и исцеле́ние приима́ху от Тебе́, о́тче, немощству́ющии пло́тию;/ ско́рбнии же ду́хом и удруче́ннии печа́льми жите́йскими/ обрета́ху душе́вное утеше́ние в умиле́нном призыва́нии свята́го и просла́вленнаго и́мене твоего́,/ прославля́ющаго ди́внаго во святы́х Свои́х Бо́га Изра́илева. Припев: Святи́телю, о́тче Инноке́нтие, моли́ Бо́га о на́с. О́тче, непоро́чности соиме́нне,/ та́ко просла́вися свет твой пред челове́ки,/ я́ко ви́дяще до́брая дела́ твоя́ и чудотворе́ния мно́гая,/ прославля́ют чудоде́йствующаго тобо́ю, ди́внаго во святы́х Свои́х Бо́га Изра́илева. Сла́ва Отцу́ и Сы́ну и Свято́му Ду́ху. Троичен: Душе́вныя на́ша боле́зни исцели́, Бо́же,/ моли́твами просла́вленнаго от Тебе́ уго́дника,/ ускоря́ющаго на по́мощь умиле́нною душе́ю,/ тре́бующим де́йственнаго его́ пред Тобо́ю, Тро́ице Свята́я, заступле́ния. И ны́не и при́сно и во ве́ки веко́в. Ами́нь. Богородичен: Ум наш плени́ в послуша́ние ве́ры,/ дух и ду́шу всесоверше́нны соблюди́/ и те́ло в прише́ствие Го́спода на́шего Иису́са Христа́/ непоро́чно сохрани́ моли́твами Твои́ми, Богороди́тельнице. Песнь 8 Ирмос: Безнача́льнаго Царя́ Сла́вы,/ Его́же трепе́щут Небе́сныя Си́лы,/ по́йте, свяще́нницы,/ лю́дие, превозноси́те во вся ве́ки. Припев: Святи́телю, о́тче Инноке́нтие, моли́ Бо́га о на́с. Широ́кий путь, вводя́й в па́губу, презре́л еси́, преподо́бне,/ и те́сными враты́ вшел еси́ в Небе́сное Ца́рствие./ Отону́дуже призира́я вы́ну на призыва́ющих тя с ве́рою,/ укрепи́ у́бо и нас понести́ благо́е и ле́гкое и́го Креста́,/ да вни́дем в поко́й Бо́га Благослове́ннаго. Припев: Святи́телю, о́тче Инноке́нтие, моли́ Бо́га о на́с. Ангелоподо́бным житие́м на земли́ обре́л еси́ благода́ть исцеле́ний/ и яви́лся еси́ вои́стинну А́нгел Храни́тель па́ствы твоея́,/ бо́дрственно утвержда́я ю в ве́ре многоразли́чными твои́ми чудотворе́ниями/ и соблюда́я в чи́стом испове́дании отце́в Бо́га Благослове́ннаго. Сла́ва Отцу́ и Сы́ну и Свято́му Ду́ху. Христо́во благоуха́ние яви́лся еси́, о́тче,/ в спаса́емых тобо́ю от неду́гов душе́вных же и теле́сных;/ те́мже обита́тели гра́да, тобо́ю избра́ннаго,/ прославля́я святу́ю па́мять твою́,/ благословля́ют просла́вившаго тя, отце́в Бо́га Благослове́ннаго. И ны́не и при́сно и во ве́ки веко́в. Ами́нь. Богородичен: Несть на́ша брань к пло́ти и кро́ви,/ но к нача́лом, и ко власте́м, и к миродержи́телем тьмы ве́ка сего́,/ к духово́м зло́бы поднебе́сным;/ над ни́ми же покажи́ ны, Влады́чице, победи́тели,/ я́ко да по о́бразу непоро́чнаго Па́стыря/ возмо́жем вся стре́лы лука́ваго разжже́нныя угаси́ти. Песнь 9 Ирмос: Проявле́нное на горе́/ законополо́жнику во огни́ и купине́/ Рождество́ Присноде́вы/ в на́ше ве́рных спасе́ние,/ пе́сньми немо́лчными велича́ем. Припев: Святи́телю, о́тче Инноке́нтие, моли́ Бо́га о на́с. Апо́стол язы́ков был еси́, о́тче, я́коже и Па́вел,/ те́мже ны́не восхище́н еси́ на высоту́ Боже́ственнаго лицезре́ния, иде́же мо́лишися,/ да Бог возрасти́т, е́же ты, му́дрый де́лателю, насади́л и напои́л еси́. Припев: Святи́телю, о́тче Инноке́нтие, моли́ Бо́га о на́с. Шлем спасе́ния восприи́м и мече́м духо́вным препоя́сався,/ изше́л еси́ на де́ло твое́, па́стырю ди́вный,/ и согради́л еси́ опло́т благоче́стия во мра́це язы́чества./ Моли́ у́бо Преблага́го Бо́га,/ да укрепи́т, е́же соде́ла в нас руко́ю твое́ю. Сла́ва Отцу́ и Сы́ну и Свято́му Ду́ху. И́менем и житие́м непоро́чне, приими́ хвале́бныя пе́сни,/ любо́вию к тебе́ возноси́мыя,/ осеня́я моли́твами твои́ми па́ству, осия́нную луча́ми добро́т твои́х,/ и ускоря́я на по́мощь благода́тным заступле́нием твои́м во вре́мя благопотре́бно. И ны́не и при́сно и во ве́ки веко́в. Ами́нь. Богородичен: Херуви́мов Честне́йшая и Сла́внейшая без сравне́ния Серафи́мов,/ не пре́зри моле́ния раб Твои́х,/ но покры́й нас честны́м Твои́м покро́вом:/ спаси́ лю́ди, благогове́йно чту́щия па́мять непоро́чнаго па́стыря/ и моли́твенника о гра́де сем, ди́внаго Инноке́нтия. Светилен Сла́ва Тебе́, Бо́гу,/ показа́вшему нам свет спасе́ния в житии́ и сло́ве Твоего́ уго́дника;/ сла́ва Тебе́, Благода́телю,/ возсия́вшему просвеще́ние и́стины в побо́рнике благоче́стия и и́стины;/ сла́ва Тебе́, ди́вному Щедротода́вцу,/ удиви́вшему ми́лости Своя́ на ходи́вшем во све́те Лица́ Твоего́/ святи́теле и чудотво́рце Инноке́нтии. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Свет ми́рови возсия́л еси́ в Рождестве́ Твое́м, Пречи́стая Богоро́дице,/ осия́й у́бо ум наш позна́нием Сы́на Твоего́,/ се́рдце уязви́ любо́вию к Боже́ственным за́поведем,/ укрепля́я ны моли́твами Твои́ми в ве́ре и благоде́лании.

Минея, 31 Марта, Канон святителю Глас 8 Песнь 1 Ирмос: Ди́вному Бо́гу вели́чия принесе́м,/ и великоле́пно с на́ми/ да воспое́т земля́ и не́бо/ я́сно сла́ву Его́. Припев: Святи́телю о́тче Инноке́нтие, моли́ Бо́га о на́с. Отве́рзем уста́ похва́льная,/ уясни́м язы́к в па́мяти, вси ве́рнии, но́ваго Росси́йскаго свети́льника,/ апо́стола Сиби́ри и Аме́рики, святи́теля Инноке́нтия,/ и с ним ди́вному Бо́гу вели́чия принесе́м, и воспое́м сла́ву Его́. Припев: Святи́телю о́тче Инноке́нтие, моли́ Бо́га о на́с. Госпо́дню гла́су, призва́вшему просвети́ти лю́ди, во тьме́ седя́щия, послушли́в был еси́,/ страну́ свою́ оста́вив, да́льнему и тру́дному пути́ вда́лся еси́/ и, дости́г к Алеу́тским острово́м,/ тамо апо́стольски потруди́лся еси́,/ вели́чия ди́вному Бо́гу принося́ и воспева́я сла́ву Его́. Сла́ва Отцу́ и Сы́ну и Свято́му Ду́ху. Оте́ц и учи́тель был еси́ алеу́том, све́том Ева́нгелия тех просвети́в,/ научи́л еси́ их плинфоде́ланию, каменозда́тельству и ины́м худо́жеством/ и с по́мощию их храм в че́сть Вознесе́ния Госпо́дня воздви́гл еси́,/ освяти́л еси́ его́,/ да вси прино́сят в нем вели́чия Бо́гу, ди́вному во святы́х, и пою́т сла́ву Его́. И ны́не и при́сно и во ве́ки веко́в. Ами́нь. Богородичен: Спаси́тельное еси́ приста́нище и покро́в призыва́ющих Тя, Богороди́тельнице Пречи́стая,/ те́мже от души́ призыва́ем Тя те́пле:/ Влады́чице, спаси́ ны/ и научи́ нас ди́вному Бо́гу вели́чия приноси́ти и воспева́ти сла́ву Его́. Песнь 3 Ирмос: Уподо́би мя, Христе́, у́мно горе́ Сио́нстей,/ возвы́сивый и утверди́вый в наде́жди о Тебе́/ и иска́павый ро́су благода́ти,/ Человеколю́бче. Припев: Святи́телю о́тче Инноке́нтие, моли́ Бо́га о на́с. Подража́тель любве́ Отца́ Небе́снаго,/ я́ко сын любве́, в любви́ пребыва́яй,/ любо́вию Христо́вою возлюби́л еси́ ча́да твоя́, святи́телю Инноке́нтие,/ просвеще́ния их ра́ди в ма́лем кораблеце́,/ волна́ми морски́ми обурева́емь, преплыва́л еси́ от о́строва на о́стров, пропове́дуя Христа́:/ мно́гия жи́тели прибре́жия Бе́рингова мо́ря крести́л еси́ и моли́лся еси́ о них,/ я́ко да иска́пает на них ро́су благода́ти Своея́ Человеколю́бец. Припев: Святи́телю о́тче Инноке́нтие, моли́ Бо́га о на́с. О́стров Ситх апо́стольскими твои́ми труды́, святи́телю Инноке́нтие, хва́лится,/ та́мо бо пле́мя колоше́й просвети́л еси́/ и храм во и́мя Арха́нгела Михаи́ла воздви́гл еси́,/ в не́мже и до ны́не возно́сится моле́ние Го́споду Бо́гу,/ источи́вшему на них ро́су благода́ти Своея́. Сла́ва Отцу́ и Сы́ну и Свято́му Ду́ху. Доброде́тельми, я́ко луча́ми со́лнечными, просвети́л еси́ неве́рных в да́льних страна́х,/ пятьна́десять бо лет апо́стольски труди́лся еси́ на Алеу́тских острове́х,/ иде́же не то́чию па́стырь и учи́тель,/ но и строи́тель, и врач, и всем вся в ну́ждах был еси́,/ да вся приобря́щеши и приведе́ши Христу́. Те́мже от святи́теля Филаре́та Моско́вскаго проро́чески,/ я́ко равноапо́стол, пре́жде твоего́ прославле́ния на земли́, почте́н был еси́/ и от Бо́га венча́н сла́вою на Небеси́,/ Его́же моли́, да низпо́слет и нам ро́су благода́ти Своея́ Человеколю́бец. И ны́не и при́сно и во ве́ки веко́в. Ами́нь. Богородичен: Арха́нгельскую пе́снь, е́же ра́дуйся, Тебе́ зове́м, Богоневе́сто, Госпо́дь с Тобо́ю,/ ра́дуйся, Ра́досте А́нгелов и всех челове́ков, сла́вящих Тя, весе́лие,/ спаси́ ду́ши пою́щих Тя, Богоро́дице Чи́стая. Седален, глас 2 Орга́не доброгла́сный,/ возгреме́вый Христо́во Ева́нгелие лю́дем Сиби́ри и Аме́рики/ и тем возвести́вый сло́ва Бо́жия смотре́ние,/ ум Го́рний,/ до́ле жи́тельствуяй и в Небесе́х Богомы́слием пребыва́яй,/ ты, управля́я твою́ па́ству, умно́жил еси́ церко́вная ча́да/ усынови́в я Небе́сному Отцу́,/ и ны́не, святи́телю Инноке́нтие, моли́ся о нас,/ всеблаже́нную па́мять твою́ ра́достно пра́зднующих. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: С ве́рою и любо́вию притека́ющих к Тебе́/ и со стра́хом пою́щих Тя/ моли́твенный глас услы́ши, Влады́чице. Песнь 4 Ирмос: Всел еси́ на ко́ни, апо́столы Твоя́, Го́споди,/ и прия́л еси́ рука́ма Твои́ма узды́ их,/ и спасе́ние бы́сть ежде́ние Твое́/ ве́рно пою́щим;/ сла́ва си́ле Твое́й, Го́споди. Припев: Святи́телю о́тче Инноке́нтие, моли́ Бо́га о на́с. Смотре́нием Бо́жиим Це́рковь Ру́сская в земли́ Америка́нстей ка́федру святи́тельскую учрежда́ет/ и тя во епи́скопа Камча́тскаго, Кури́льскаго и Алеу́тскаго поставля́ет./ Ты же, святи́телю Инноке́нтие, во́ли Госпо́дней повину́яся, корми́ло правле́ния прие́млеши,/ ди́вному Па́влу, апо́столу язы́ков, подража́я, земли́ обши́рныя обтека́еши,/ просвеще́нную твою́ па́ству науча́я пе́ти:/ сла́ва си́ле Твое́й, Го́споди. Припев: Святи́телю о́тче Инноке́нтие, моли́ Бо́га о на́с. Труды́ твои́ми апо́стольскими просвети́л е́сть Госпо́дь лю́ди, во тьме́ и се́ни сме́ртней седя́щия,/ те́мже, я́ко до́брый па́стырь, святи́телю Инноке́нтие,/ указа́л еси́ им пу́ть в Ца́рство Небе́сное, всех науча́я пе́ти:/ сла́ва си́ле Твое́й, Го́споди. Сла́ва Отцу́ и Сы́ну и Свято́му Ду́ху. О тебе́, просвети́теле свое́м, алеу́ты и колоши́ возра́довашася/ и, до дне́сь внима́я уче́нию твоему́, прино́сят в же́ртву Бо́гу труды́ рук свои́х,/ благода́рно любо́вию почита́я тя,/ научи́вшаго их воспева́ти еди́ными усты́:/ сла́ва си́ле Твое́й, Го́споди. И ны́не и при́сно и во ве́ки веко́в. Ами́нь. Богородичен: Пыла́ющий страсте́й пла́мень в нас угаси́,/ исто́чник слез да́руй, Влады́чице,/ я́ко да и́ми оты́мем скве́рну смире́нных душ на́ших и обря́щем ми́лость, во е́же пе́ти:/ сла́ва си́ле Твое́й, Го́споди. Песнь 5 Ирмос: Повеле́ния Твоя́ просвеще́нием, Христе́ Бо́же,/ я́ко Благ, показа́л еси́,/ зане́, Светода́вче,/ от но́щи у́тренююще, сла́ву возсыла́ем. Припев: Святи́телю о́тче Инноке́нтие, моли́ Бо́га о на́с. Чистото́ю жития́ твоего́ и неуста́нными труды́ твои́ми/ в нощи́ неве́дения седя́щия язы́ки Камча́тския – коря́ки, чу́кчи и тунгу́сы ко све́ту Христо́ву обрати́л еси́, святи́телю Инноке́нтие,/ и научи́л еси́ их у́треневати и сла́ву Бо́гу возсыла́ти. Припев: Святи́телю о́тче Инноке́нтие, моли́ Бо́га о на́с. Еле́ем любве́ твоея пома́зал еси́ лю́ди, на морски́х острове́х су́щия,/ апо́стольски утвержда́я Це́рковь Христо́ву, в ве́ре покланя́тися Триеди́ному Бо́гу./ Сего́ ра́ди со апо́столы ра́дуешися,/ прие́мля по́честь благове́стника Христо́ва. Сла́ва Отцу́ и Сы́ну и Свято́му Ду́ху. Ле́ности и вся́каго мирска́го пристра́стия в жи́зни сей уклони́лся еси́,/ пло́ть свою́ труда́ми и по́двигами истни́л еси́,/ посеща́я па́ству свою́ в Яку́тске и Приаму́рстей стране́,/ иде́же хра́мы Бо́жия созда́в,/ град Благове́щенск святи́тельскою ка́федрою украси́л еси́/ и, но́выя о́вцы ста́да Христо́ва поуча́я,/ сло́во Бо́жие на их язы́ки преве́л еси́:/ да всяк язы́к, от но́щи у́тренюя, сла́ву возсыла́ет Бо́гу. И ны́не и при́сно и во ве́ки веко́в. Ами́нь. Богородичен: О Богороди́тельнице, ра́дости Пода́тельнице,/ ве́рою сла́вящия Тя и от души́ пою́щия Тя/ ра́дости неизрече́нныя испо́лни и Све́та невече́рняго сподо́би,/ Де́во Богоблагода́тная, Влады́чице. Песнь 6 Ирмос: Отве́ргл мя еси́/ во глубины́ се́рдца морска́го,/ и ви́дех чудеса́ Твоя́, Го́споди. Припев: Святи́телю о́тче Инноке́нтие, моли́ Бо́га о на́с. В корабли́ с тобо́ю плову́щии, в пучи́не бу́рею потопля́еми,/ мо́ре, повину́вшееся тебе́, ви́деша и у́жасом одержи́ми бы́ша,/ те́мже, от безду́шнаго научи́вшеся, свя́тости твое́й поклони́шася, святи́телю Инноке́нтие,/ прославля́юще чудеса́ Госпо́дня. Припев: Святи́телю о́тче Инноке́нтие, моли́ Бо́га о на́с. Егда́ во́лею Бо́жиею к бе́регу Япо́нии приста́л еси́, святи́телю Инноке́нтие,/ та́мо сподви́жнику твоему́, равноапо́стольному Никола́ю, благослове́ние на труды́ апо́стольския препода́л еси́,/ утверди́в в нем ре́вность Бо́жию просвеща́ти лю́ди япо́нския,/ сего́ ра́ди и просла́влена еста́, я́ко благове́стника Христо́ва. Сла́ва Отцу́ и Сы́ну и Свято́му Ду́ху. Ко́рмчий иску́сный корабля́ церко́внаго,/ чу́дно по вода́м морски́м преплы́л еси́/ и в земле́ непло́дней ра́лом слове́с твои́х олядене́вшая люде́й се́рдца возде́лал еси́,/ Боже́ственное се́мя в них все́яв,/ плод кра́сный Христу́, святи́телю Инноке́нтие, возрасти́л еси́, взыва́я ко Го́споду:/ на о́стровех морски́х ви́дех чудеса́ Твоя́, Го́споди. И ны́не и при́сно и во ве́ки веко́в. Ами́нь. Богородичен: Упова́ние и наде́жда на́ша Ты еси́, Пресвята́я Богоро́дице,/ спаси́ страну́ на́шу правосла́вную и лю́ди Твоя́,/ моля́щияся и и́мя Твое́ призыва́ющия. Кондак, глас 4 И́стинный и нело́жный учи́тель был еси́:/ запове́данная бо Го́сподем сам сотвори́в,/ и́мже учи́л еси́ и наказа́л еси́ ко благоче́стию приходя́щая ча́да,/ неве́рныя вразумля́л еси́ позна́ти ве́ру и́стинную,/ просвеща́я их святы́м Креще́нием./ Сего́ ра́ди со апо́столы ра́дуешися,/ прие́мля по́честь благове́стника Христо́ва. Икос Пе́рвый се́ятель был еси́ духо́вных доброде́телей,/ архиере́й и учи́тель тобо́ю просвеще́нным в стра́нах Сиби́ри и Аме́рики./ Мно́гия язы́ки от неве́рия в ве́ру Христо́ву приве́л еси́,/ чи́стым житие́м Бо́гу угожда́ти тех наставля́я./ Сего́ ра́ди прославля́ем тя, святи́телю Инноке́нтие,/ я́ко благове́стника Христо́ва. Песнь 7 Ирмос: В нача́ле зе́млю основа́вый/ и Небеса́ сло́вом утверди́вый,/ благослове́н еси́ во ве́ки, Го́споди, Бо́же оте́ц на́ших. Припев: Святи́телю о́тче Инноке́нтие, моли́ Бо́га о на́с. И́го Христо́во на ра́мо взем, после́довал еси́ стопа́м Его́,/ апо́стольски в да́льней стране́ потруди́лся еси́,/ тобо́ю просвеще́нным ча́дом сло́во Бо́жие на яку́тском язы́ке возвести́л еси́,/ да прославля́ют они́ Основа́вшаго зе́млю на вода́х, поя́ Го́сподеви:/ благослове́н еси́ во ве́ки, Бо́же оте́ц на́ших. Припев: Святи́телю о́тче Инноке́нтие, моли́ Бо́га о на́с. Слове́сную па́ству Христо́ву благово́нным зла́ком богоуго́дно воспита́вый/ и на пра́вый христоподража́тельнаго жития́ пу́ть боголе́пно наста́вивый,/ вручи́л еси́ прее́мником твои́м/ и, Го́споду изво́лившу, стопы́ твоя́ в первопресто́льный град Москву́ напра́вил еси́, поя́ Го́сподеви:/ благослове́н еси́ во ве́ки, Бо́же оте́ц на́ших. Сла́ва Отцу́ и Сы́ну и Свято́му Ду́ху. Па́стырски жезл прие́м, святи́телю Инноке́нтие, Про́мыслом Бо́жиим води́м был еси́,/ на престо́л моско́вский прише́д,/ пра́здник святи́телей Петра́, Алекси́я, Ио́ны и Фили́ппа учреди́л еси́,/ и, по апо́столу, всем вся быв,/ да всех ко Христу́ приведе́ши и ку́пно с ни́ми вопие́ши:/ благослове́н еси́ во ве́ки, Го́споди, Бо́же оте́ц на́ших. И ны́не и при́сно и во ве́ки веко́в. Ами́нь. Богородичен: Ра́дуйся, престо́ле Госпо́день огнезра́чный;/ ра́дуйся, заре́ невеще́ственнаго блиста́ния;/ ра́дуйся, о́блаче возсия́вшаго Со́лнца Пра́веднаго – Христа́, Спа́са на́шего, Ему́же пое́м:/ благослове́н еси́, Го́споди, Бо́же оте́ц на́ших. Песнь 8 Ирмос: Покрыва́яй вода́ми превы́спренняя Своя́,/ полага́яй мо́рю преде́л песо́к/ и содержа́й вся,/ Тя пое́т со́лнце, Тя хва́лит луна́,/ Тебе́ прино́сит пе́снь вся тва́рь,/ я́ко Соде́телю всех во ве́ки. Припев: Святи́телю о́тче Инноке́нтие, моли́ Бо́га о на́с. Архиере́й сый, святи́телю Инноке́нтие,/ архипа́стырем на́шим в моли́твах спосо́бствуй,/ да пра́во пра́вят сло́во и́стины,/ Це́рковь Правосла́вную огради́, страну́ на́шу сохрани́,/ су́етными и стра́стными помышле́нии мяту́щийся ум наш исцели́,/ разсла́бленная сердца́ на́ша укрепи́, ве́ру в нас умно́жи,/ да сла́вим Соде́теля всех во ве́ки. Припев: Святи́телю о́тче Инноке́нтие, моли́ Бо́га о на́с. Все́льшаяся в тя благода́ть Свята́го Ду́ха святи́теля тя изря́дна нам показа́,/ светоно́сными равноапо́стольных исправле́ний заря́ми/ Це́рковь Росси́йскую све́тло озари́, священнонача́льниче Инноке́нтие,/ те́мже де́ло Бо́жие на земли́ соверши́в, предугото́вав же себе́ Го́сподеви,/ по прия́тии Святы́х Та́ин Христо́вых о Бо́зе почи́л еси́,/ да со святы́ми пое́ши на Небеси́:/ благослове́н еси́, Го́споди, Бо́же оте́ц на́ших, во ве́ки. Сла́ва Отцу́ и Сы́ну и Свято́му Ду́ху. Любы́ николи́же отпа́дает, глаго́лет Боже́ственный Дух уста́ми первоверхо́внаго апо́стола Па́вла,/ в чудесе́х же любве́ твоея́ и́стина сия́ извести́ся, святи́телю Инноке́нтие,/ я́ко и по сме́рти ча́дом твои́м явля́ешися/ и пе́ти Го́сподеви поуча́еши во вся ве́ки. И ны́не и при́сно и во ве́ки веко́в. Ами́нь. Богородичен: Я́же по благода́ти дарова́нная от Бо́га Помо́щнице нам всем, христиа́ном,/ Того́ моли́, Всеблага́я и Непоро́чная,/ я́ко да пре́зрит на́ша безчи́сленная согреше́ния/ и изба́вит пла́меннаго томле́ния, и тьмы́ кроме́шныя, и му́ки вся́кия. Песнь 9 Ирмос: Благослове́н Госпо́дь, Бог Изра́илев,/ воздви́гнувый рог спасе́ния нам/ в до́му Дави́дове, о́трока Своего́,/ в них же посети́ нас Восто́к с высоты́/ и напра́вил ны е́сть на пу́ть ми́ра. Припев: Святи́телю о́тче Инноке́нтие, моли́ Бо́га о на́с. Ю́же стяжа́л еси́ честно́ю Твое́ю Кро́вию,/ Це́ркве Твоея, Христе́, ча́да утверди́ и напра́ви на пу́ть ми́ра,/ та́ко воздыха́л еси́ к Сы́ну Бо́жию, святи́телю о́тче наш Инноке́нтие,/ Ца́рствия Небе́снаго еще́ на земли́ сын быв. Припев: Святи́телю о́тче Инноке́нтие, моли́ Бо́га о на́с. Тече́ние восприя́т и пу́ть соверши́,/ зе́млю непло́дну моли́твами твои́ми добропло́дну показа́,/ о принося́щих тебе́ пе́ние сие́, святи́телю Инноке́нтие, Христа́ Бо́га на́шего моли́,/ да принесе́м покая́ния плоды́,/ я́ко да посети́т и нас Восто́к с высоты́/ и напра́вит стопы́ на́ша на пу́ть ми́ра. Сла́ва Отцу́ и Сы́ну и Свято́му Ду́ху. Смотре́нием Бо́жиим и святи́тельским благослове́нием/ руко́ю мое́ю приноси́мое твои́м трудо́м похвале́ние, святи́телю Инноке́нтие, не отри́ни,/ но приими́ и моли́ Христа́ Бо́га,/ да изба́вит мя шу́ияго стоя́ния и напра́вит мя на пу́ть ми́ра. И ны́не и при́сно и во ве́ки веко́в. Ами́нь. Богородичен: Я́ко похвалу́ А́нгелов и челове́ков/ восхваля́ем Тя вси, Де́во Мари́е, и ве́рно мо́лимся, Всепе́тая:/ моле́ние на́ше приими́ и проше́ния испо́лни. Светилен Пло́тию, а́ще и почи́л еси́, святи́телю Инноке́нтие,/ но ду́хом жив сый,/ в Ца́рствии невече́рнем со Христо́м ца́рствуеши/ и мо́лишися Ему́ о призыва́ющих тя ве́рою и любо́вию. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Влады́чице, Де́во Чи́стая, изба́ви нас лю́тых всех,/ умоля́ющи на Кресте́ Пригвозди́вшаго грехи́ на́ша,/ и сподо́би нас одесну́ю Его́ ста́ти, егда́ прии́дет во сла́ве Свое́й.

Минея, 24 Июня, Кано́н пе́рвый, творе́ние Иоа́нна мона́ха Глас 4 Песнь 1 Ирмос: Триста́ты кре́пкия,/ Рожде́йся от Де́вы,/ безстра́стия во глубине́/ души́ трича́стное потопи́, молю́ся,/ да Тебе́, я́ко в тимпа́не,/ во умерщвле́нии телесе́/ побе́дное воспою́ пе́ние. Припев: Святы́й вели́кий Иоа́нне, Предте́че Госпо́день, моли́ Бо́га о на́с. Я́ко у́тро благоле́пно, Со́лнца предтеки́й,/ непло́дныя прозябе́ние пропове́дает я́ве Де́вы Рождество́,/ всей ны́не вселе́нней сия́ет концо́м просвеще́ние благоче́стия и благода́ти. Припев: Святы́й вели́кий Иоа́нне, Предте́че Госпо́день, моли́ Бо́га о на́с. Проро́к Вы́шняго и́стинно нарече́шися,/ предъи́деши бо пред лице́м Христа́, – вопие́т тебе́, сы́ну, Иоа́нне прехва́льне,/ Ду́хом Заха́рия Пресвяты́м носи́м, – путь угото́вати Зижди́телю. Сла́ва Отцу́ и Сы́ну и Свято́му Ду́ху. Глаго́лы Гаврии́ла Заха́рия слы́шав, веща́ния Боже́ственнаго, яви́ся непокори́в,/ и молча́нием осужда́ется, реши́тся же внеза́пу от сего́:/ глас бо роди́ся Сло́ва, Иоа́нн Предте́ча. И ны́не и при́сно и во ве́ки веко́в. Ами́нь. Богородичен: Град Бо́жий, Всецаря́ Богоприя́тное селе́ние, сокро́вище честно́е,/ Богоро́дице Пренепоро́чная, сохрани́ достоя́ние Твое́,/ при́сно восхваля́ющее Тя и чту́щее ве́рою Рождество́ Твое́. Песнь 3 Ирмос: Не му́дростию, и си́лою, и бога́тством хва́лимся,/ но Тобо́ю, о́тчею Ипоста́сною Му́дростию, Христе́:/ несть бо свят, па́че Тебе́, Человеколю́бче. Припев: Святы́й вели́кий Иоа́нне, Предте́че Госпо́день, моли́ Бо́га о на́с. Влады́чне у́бо от Де́вы соверша́ется рожде́ние,/ но раба́ любе́зна от ста́рицы и непло́дныя ма́тере:/ в ле́поту предти́чет у́бо чу́до чудеси́. Сла́ва Отцу́ и Сы́ну и Свято́му Ду́ху. Ста́рица и непло́ды Де́ву Ма́терь лобза́ет, позна́вши нело́жно Сея́ Рождество́,/ я́ко разреши́ся соу́з непло́дства Боже́ственным хоте́нием. И ны́не и при́сно и во ве́ки веко́в. Ами́нь. Богородичен: Неискусобра́чно Бо́га воплоще́нна ро́ждши,/ страсте́й прило́ги обурева́емаго мя утверди́:/ несть бо, Пречи́стая, ра́зве Тебе́ помо́щницы. Седален, глас 8 Заха́риин глас све́тло разреши́ Словесе́ глас ро́ждься, Предте́ча,/ и зако́на непло́дие всем показа́, зовы́й:/ пока́йтеся, су́щии на земли́, се бо прии́де и яви́ся Иису́с,/ вся хотя́ изба́вити от пе́рвыя кля́твы, просвеща́я Креще́нием./ Вои́стинну чу́до пресла́вно! Песнь 4 Ирмос: Седя́й в сла́ве на Престо́ле Божества́/ во о́блаце ле́гце,/ прии́де Иису́с Пребоже́ственный/ Нетле́нною Дла́нию и спасе́ зову́щия:/ сла́ва, Христе́, си́ле Твое́й. Припев: Святы́й вели́кий Иоа́нне, Предте́че Госпо́день, моли́ Бо́га о на́с. Та́ин неизрече́нных предхо́дит та́инство/ новосече́нием законоположе́ния есте́ственнаго,/ боле́зни разреше́ние провозвеща́ющи, исправле́ние сея́, Христе́, и обоже́ние. Припев: Святы́й вели́кий Иоа́нне, Предте́че Госпо́день, моли́ Бо́га о на́с. Иса́ия от Отца́ Сы́ну проро́чествова, воплоти́тися хотя́щему:/ А́нгела земноро́дна равноа́нгельна се Аз посыла́ю пред лице́м Твои́м, зову́ща:/ сла́ва, Христе́, си́ле Твое́й. Сла́ва Отцу́ и Сы́ну и Свято́му Ду́ху. Служи́ти, я́ко раб Влады́це, роди́хся:/ на се бо приидо́х, Сего́ возвести́ти прише́ствие,/ я́ко да Де́вы Рождество́ предуве́рит, пресла́вно непло́дствующая ста́рица прозя́бши. И ны́не и при́сно и во ве́ки веко́в. Ами́нь. Богородичен: Свята́я Богоро́дица, в Ню́же всели́тися благоизво́ли,/ я́ко во благово́нен дом, Сло́во О́тчее Пребоже́ственное,/ не растле́ся утро́бою, ни поболе́,/ и́бо роди́ Емману́ила, Бо́га и Челове́ка. Песнь 5 Ирмос: Ны́не воста́ну, проро́чески рече́ Бог,/ ны́не просла́влюся, ны́не вознесу́ся,/ па́дшаго прие́м от Де́вы/ и к све́ту у́мному вознося́й Моего́ Божества́. Припев: Святы́й вели́кий Иоа́нне, Предте́че Госпо́день, моли́ Бо́га о на́с. Земля́ израсти́ всеи́стинна пропове́дника,/ гла́са, всем пропове́дающа язы́ком Ду́ха, Де́вы Сы́на,/ Пра́вду, с Небесе́ на нас прини́чущую ве́щию теле́сною. Припев: Святы́й вели́кий Иоа́нне, Предте́че Госпо́день, моли́ Бо́га о на́с. Положи́ Госпо́дь всеи́стинна свети́льника тя Христо́ва, вся просвеща́ющаго,/ еди́ны одева́юща вражду́ющия Ему́, я́ко ри́зою, в студ,/ нело́жно Бо́жия Сло́ва Сы́на пропове́дающа. Сла́ва Отцу́ и Сы́ну и Свято́му Ду́ху. Весели́тся вся тварь твои́м рождество́м, Боже́ственне:/ ты бо зе́млен А́нгел, Предте́че, и Небе́сный челове́к показа́лся еси́,/ Небе́снаго Бо́га провозвеща́я нам воплоще́нна. И ны́не и при́сно и во ве́ки веко́в. Ами́нь. Богородичен: От Тебе ражда́ется от Отца́ Сый,/ с Тобо́ю при́сно, Сло́во присносу́щное и неразде́льное, я́ко Сын Единоро́дный,/ и напосле́док от Де́вы То́йже от Свята́го воплоща́ется Ду́ха. Песнь 6 Ирмос: Приидо́х во глубины́ морски́я,/ и потопи́ла мя есть бу́ря мно́гих грехо́в,/ но, я́ко Бог, из глубины́ возведи́ живо́т мой, Многоми́лостиве. Припев: Святы́й вели́кий Иоа́нне, Предте́че Госпо́день, моли́ Бо́га о на́с. Бо́га Сло́ва позна́л еси́, я́ко проро́к, в ма́терней утро́бе,/ и, сея́ язы́ка употреби́в, богосло́виши в те́мне черто́зе,/ обожа́емь Све́том Непристу́пным. Сла́ва Отцу́ и Сы́ну и Свято́му Ду́ху. Немо́лчно, я́ко глас вопию́щаго, Изба́вителя ми́ра, Крести́телю, моля́ не преста́й/ душе́вное разреши́ти непло́дие пою́щих твое́ рождество́. И ны́не и при́сно и во ве́ки веко́в. Ами́нь. Богородичен: Непристу́пнаго Божества́ селе́ние, Чи́стая, Твоя́ утро́ба яви́ся, о Богоро́дице,/ на ню́же без боя́зни Небе́снии чи́нове взира́ти не мо́гут. Кондак, глас 3 Пре́жде непло́ды днесь Христо́ва Предте́чу ражда́ет,/ и той есть исполне́ние вся́каго проро́чества:/ Его́же бо проро́цы пропове́даша,/ на Сего́ во Иорда́не ру́ку положи́в,/ яви́ся Бо́жия Сло́ва проро́к, пропове́дник, вку́пе и Предте́ча. Икос Восхва́лим ны́не Госпо́дня Предте́чу,/ его́же свяще́ннику Елисаве́ть роди́ из ложе́сн непло́дных, но не без cе́мене:/ Христо́с бо еди́н вмести́лище про́йде непроходи́мо без cе́мене./ Иоа́нна непло́ды роди́, без му́жа же сего́ не роди́,/ Иису́са же, осене́нием Отца́ и Ду́ха Бо́жия, Де́ва роди́ Чи́стая./ Но Безсе́менному яви́ся от непло́дныя проро́к и пропове́дник, вку́пе и Предте́ча. Песнь 7 Ирмос: Ю́ноши три в Вавило́не,/ веле́ние мучи́телево на бу́йство прело́жше,/ посреде́ пла́мене вопия́ху:/ благослове́н еси́, Го́споди,/ Бо́же оте́ц на́ших. Припев: Святы́й вели́кий Иоа́нне, Предте́че Госпо́день, моли́ Бо́га о на́с. Бя́ше пе́рвее во мра́це вся́ко земноро́дных естество́, о Предте́че,/ но у́тро, вопия́, яви́лся еси́:/ благослове́н еси́, Го́споди, Бо́же оте́ц на́ших. Припев: Святы́й вели́кий Иоа́нне, Предте́че Госпо́день, моли́ Бо́га о на́с. Неду́говавшее исцели́ естество́ все, сла́вное от непло́дныя твое́ рождество́,/ научи́вшее, Предте́че, пе́ти:/ благослове́н еси́, Го́споди, Бо́же оте́ц на́ших. Сла́ва Отцу́ и Сы́ну и Свято́му Ду́ху. Роди́лся еси́, Предте́че, от непло́дныя,/ прии́де бо всеи́стинно, зако́ну непло́дствующу, благода́ть, Христу́ пою́щи:/ благослове́н еси́, Го́споди, Бо́же оте́ц на́ших. И ны́не и при́сно и во ве́ки веко́в. Ами́нь. Богородичен: Де́во Благослове́нная, моли́ о нас, моля́щих Тя,/ на Тя бо упова́ем вси и Тебе́ вопие́м:/ Влады́чице, не пре́зри рабо́в Твои́х. Песнь 8 Ирмос: Изба́вителю всех Всеси́льне,/ посреде́ пла́мене благоче́ствовавшия,/ снизше́д, ороси́л еси́/ и научи́л еси́ пе́ти:/ вся дела́, благослови́те, по́йте Го́спода. Припев: Святы́й вели́кий Иоа́нне, Предте́че Госпо́день, моли́ Бо́га о на́с. Законополо́жник раб бя́ше Моисе́й, Иису́с же – Бог Заве́та Но́ваго,/ ны́не же обои́х Предте́ча пое́т, я́ко хода́тай:/ вся дела́, благослови́те Госпо́дня Го́спода. Припев: Святы́й вели́кий Иоа́нне, Предте́че Госпо́день, моли́ Бо́га о на́с. От пу́ста чре́ва го́рлица прии́де, я́ко богосажде́нная дубра́ва,/ ны́не принесе́ Це́ркви Предте́чу Христо́ва и воспева́ет:/ вся дела́, благослови́те Госпо́дня Го́спода. Сла́ва Отцу́ и Сы́ну и Свято́му Ду́ху. Богоно́снии лю́дие, язы́к свят, го́рлице Христо́вей уподо́битеся/ и медото́чно воспо́йте, в целому́дрии живу́ще:/ вся дела́, благослови́те Госпо́дня Го́спода. И ны́не и при́сно и во ве́ки веко́в. Ами́нь. Троичен: Тричи́сленным све́том озаря́еми, Несозда́нное Еди́ное Божество́,/ немо́лчными усты́ правосла́вно вопию́ще, почти́м:/ вся дела́, благослови́те Госпо́дня Го́спода. Песнь 9 Ирмос: Сокрове́нное Бо́жие неизрече́нное/ в Тебе́ соверша́ется я́вственное та́инство,/ Де́во Пречи́стая,/ и́бо Бог из Тебе́ воплоти́ся за милосе́рдие./ Те́мже Тя я́ко Богоро́дицу велича́ем. Припев: Святы́й вели́кий Иоа́нне, Предте́че Госпо́день, моли́ Бо́га о на́с. Се глас Предте́чи непло́дным и пусты́м предста́ сердца́м вопию́щ:/ путъ Христо́в ны́не угото́вите, я́ко во сла́ве гряде́т,/ Ему́же повину́ющеся, велича́ем. Припев: Святы́й вели́кий Иоа́нне, Предте́че Госпо́день, моли́ Бо́га о на́с. Я́коже дре́вле Ду́хом Пресвяты́м я́ве пропове́дал еси́/ Сы́на, Предте́че, А́гнца Бо́жия, ми́ра взе́млющаго грехи́,/ ста́ду твоему́ согреше́ний разреше́ние испроси́. Сла́ва Отцу́ и Сы́ну и Свято́му Ду́ху. Троичен: Еди́ницу Тричи́сленную, Тро́ицу Единосу́щную,/ правосла́вно пою́ще, ве́рнии, просла́вим,/ богоде́тельне нас озаря́ющую/ и светлостьми́ незаходи́маго све́та исполня́ющую ду́ши на́ша. И ны́не и при́сно и во ве́ки веко́в. Ами́нь. Богородичен: Все́ми влады́чествующая творе́нии, лю́дем Твои́м да́руй побе́ду одоле́ния,/ непокори́ваго подложи́ под но́зе во́инству:/ да Тя я́ко Богоро́дицу велича́ем. Светилен Предте́чево днесь радостотво́рное рожде́ние/ се́тование реши́т о́тча безгла́сия и ро́ждения непло́дство,/ возвеща́ет же настоя́щую ра́дость и весе́лие./ Те́мже и вся тварь све́тло то́е пра́зднует. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Проро́цы пропове́даша, апо́столи научи́ша/ и му́ченицы богому́дренно Твоего́ Сы́на, Богоро́дице, я́сно испове́даша, Бо́га всех, Пречи́стая./ С ни́ми же Тя велича́ем, Тобо́ю изба́вльшеся дре́вняго осужде́ния.

Минея, 30 Сентября, Кано́н свята́го Глас 6 Песнь 1 Ирмос: Я́ко по су́ху, пешеше́ствовав Изра́иль/ по бе́здне стопа́ми,/ гони́теля фарао́на/ ви́дя потопля́ема:/ Бо́гу// побе́дную песнь пои́м, вопия́ше. Припев: Святи́телю óтче Михаи́ле, моли́ Бо́га о на́с. Я́ко Бо́жий иера́рх и служитель,/ Вы́шняго Престо́лу с ли́ки святы́х на Небеси́ предстоя́,/ моли́ся о нас, служа́щих богодухнове́нными пе́сньми,/ предста́ти с тобо́ю, иде́же весе́лие пра́ведных. Припев: Святи́телю óтче Михаи́ле, моли́ Бо́га о на́с. Я́ко избра́н Го́сподеви во служе́ние сла́вы Его́ на де́ло Ева́нгелия Христо́ва,/ о собра́нных нас в па́мяти твое́й, святи́телю Михаи́ле, моли́ся,/ да порабо́таем в за́поведех Ева́нгельских и прии́мем мзду весе́лия преподо́бных. Сла́ва Отцу́ и Сы́ну и Свято́му Ду́ху. Я́ко свеща́, на све́щнице стоя́щи,/ све́том ты благи́х дея́ний просия́л еси́ дале́че,/ я́ко и неве́рнии лю́дие твои́м, о́тче, наставле́нием узре́ша свет боговиде́ния,/ и ра́дуется страна́, тобо́ю просвеще́нна. И ны́не и при́сно и во ве́ки веко́в. Ами́нь. Богородичен: Я́ко и́стинный Свет от ложе́сн Свои́х яви́вшая ми́ру,/ нас, во тьме страсте́й ходя́щих, просвети́ и наста́ви на путь,/ Путь поро́ждшая ро́ду христиа́нскому, Мари́е Богоневе́сто. Песнь 3 Ирмос: Несть свят,/ я́коже Ты, Го́споди Бо́же мой,/ вознесы́й рог ве́рных Твои́х, Бла́же,/ и утверди́вый нас на ка́мени// испове́дания Твоего́. Припев: Святи́телю óтче Михаи́ле, моли́ Бо́га о на́с. Не бе ве́ра всажде́на в Росси́и, ни благоче́стие вкорене́но,/ до́ндеже ты, святи́телю Михаи́ле, а́ки прему́др де́латель,/ ля́дину многобо́жия истреби́в, углуби́л еси́ богоразу́мия тве́рдое испове́дание. Припев: Святи́телю óтче Михаи́ле, моли́ Бо́га о на́с. Све́том свы́ше осве́щся, вели́кий Влади́мир,/ а́ки зарю́ прие́м тя, Бо́жий иера́рше, приведе́ в омраче́нную идолослуже́нием Ру́сскую зе́млю,/ да и та́мо осветя́тся лю́дие твои́м прише́ствием и вразумя́тся тве́рдыя ве́ры испове́данием. Сла́ва Отцу́ и Сы́ну и Свято́му Ду́ху. Со́лнце Пра́вды, Христо́с Бог, а́ки лучу́ светоза́рную яви́ тя, Михаи́ле, земли́ Ру́сстей,/ ю́же ты осве́щ порожде́нием купе́льныя ба́ни,/ Влады́це приве́л еси́ лю́ди но́вы, обновле́ны благи́я ве́ры испове́данием. И ны́не и при́сно и во ве́ки веко́в. Ами́нь. Богородичен: Со́лнце Пра́вды, и́стинный Бог наш, Плоть заи́мствовав от Тебе́,/ ми́ру возсия́л есть, Мари́е Де́во, и тля многобо́жия поги́бе до конца́./ Све́том, Де́во Мари́е, уны́нием мя омраче́ннаго, просвети́ и наста́ви на путь благодея́ния. Седален, глас 8 Се́чивом Ева́нгельскаго уче́ния посе́кл еси́ и́дольское извая́ние, ка́пища на зе́млю опрове́рг,/ и благоче́стие насади́л еси́,/ и́мже красу́яйся, град Ки́ев любо́вию зове́т ти:/ ра́дуйся, Михаи́ле, архиере́ю Росси́и первопресто́льне. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Пою́щих Ти: ра́дуйся, изба́вльшая ва́рварскаго служе́ния, изми́ рабо́ты чужда́го/ и сокруши́ в мы́слех идолостра́стие, насади́ благоразу́мие стра́ха Бо́жия,/ Ты бо еси́ всему́ бла́гу вина́, нача́ток и исполне́ние. Песнь 4 Ирмос: Христо́с моя́ си́ла,/ Бог и Госпо́дь,/ честна́я Це́рковь/ боголе́пно пое́т, взыва́ющи// от смы́сла чи́ста, о Го́споде пра́зднующи. Припев: Святи́телю óтче Михаи́ле, моли́ Бо́га о на́с. Христо́ва раба́ и благоче́стна строи́теля/ тебе́, святи́телю, и́долы ощути́вше, рыда́ху го́рце поги́бели своея́,/ лю́дие же, Креще́нием обновле́ни, веселя́хуся,/ пра́здник све́тел о Го́споде пра́зднующе. Припев: Святи́телю óтче Михаи́ле, моли́ Бо́га о на́с. Тебе́, о́тче, на го́ры Ки́евския прише́дшу,/ пе́рвейший и́дол Перу́н, низве́ржен, влача́шеся ко́ньми, про́чим от стра́ха трясу́щимся куми́ром,/ лю́дие же обновле́ния день поя́ху,/ о Го́споде пра́зднующе. Сла́ва Отцу́ и Сы́ну и Свято́му Ду́ху. Всяк пол и во́зраст люде́й, пре́жде омраче́нных, ко просвеще́нию грядя́ху на Поча́йню/ и бысть полк безчи́сленный, тебе́ предводи́теля имы́й,/ ему́же послужи́в ба́нею Креще́ния, ко богоразу́мию наста́вил еси́, Михаи́ле, Бо́жий архиере́ю. И ны́не и при́сно и во ве́ки веко́в. Ами́нь. Богородичен: Вси ро́ди блажа́т Тя, Мари́е Цари́це,/ и мы, пе́сньми блажа́ще, изображе́нному на ико́не ли́ку Твоему́ покланя́емся,/ пра́здник све́тел в па́мяти святи́теля Твоего́ пра́зднующе. Песнь 5 Ирмос: Бо́жиим Све́том Твои́м, Бла́же,/ у́тренюющих Ти ду́ши любо́вию озари́, молю́ся,/ Тя ве́дети, Сло́ве Бо́жий,/ и́стиннаго Бо́га,// от мра́ка грехо́внаго взыва́юща. Припев: Святи́телю óтче Михаи́ле, моли́ Бо́га о на́с. Бо́жиим Све́том осве́щшеся,/ новокреще́ннии лю́дие вопия́ху с тобо́ю, Михаи́ле:/ Христе́ Бо́же, даждь Тебе́ Еди́наго ве́дети, Сло́ва Бо́жия,/ от мра́ка идолобе́сия нас изыма́ющаго. Припев: Святи́телю óтче Михаи́ле, моли́ Бо́га о на́с. Падо́ша Иерихо́нския сте́ны, Иису́сом Нави́ном киво́ту обнесе́ну,/ падо́ша и и́доли, со кресто́м тебе́, иера́рше, предгряду́щу,/ лю́дие же прославля́ху Сло́во Бо́жие, Тя, Христе́,/ от мра́ка неве́рия челове́ки изыма́ющаго. Сла́ва Отцу́ и Сы́ну и Свято́му Ду́ху. Красу́ется град Ки́ев до днесь, ба́нею Креще́ния омове́н от Тебе́, святи́телю,/ и но́сит, а́ки гри́вну зла́ту, на вы́и честно́е Ева́нгелие Христо́во,/ е́же мы лобыза́ем и прославля́ем Сло́ва Бо́жия,/ от тьмы грехо́вныя нас изыма́юща. И ны́не и при́сно и во ве́ки веко́в. Ами́нь. Богородичен: Красу́емся вси Твое́ю добро́тою, Мари́е Богоневе́сто, красна́ бо еси́ вои́стину,/ и, красоте́ Твое́й вожделе́в, Вы́шний пло́ти Твое́й соедини́ся и Челове́к бысть Бог,/ обожи́в нас, во тлю па́дших, Тебе́ ра́ди, Чи́стая Де́во. Песнь 6 Ирмос: Жите́йское мо́ре,/ воздвиза́емое, зря, напа́стей бу́рею,/ к ти́хому приста́нищу Твоему́ прите́к, вопию́ Ти:/ возведи́ от тли живо́т мой,// Многоми́лостиве. Припев: Святи́телю óтче Михаи́ле, моли́ Бо́га о на́с. Идолобе́сия смра́дное, а́ки Моисе́й, жезло́м Кре́стным пресе́кл еси́ мо́ре, архиере́ю Михаи́ле,/ и лю́ди, омы́в боговиде́ния водо́ю, приве́л еси́ во приста́нище, пою́щих:/ сла́ва Тебе́, Христе́ Многоми́лостиве. Припев: Святи́телю óтче Михаи́ле, моли́ Бо́га о на́с. И́же пе́рвее заблу́ждшая Ру́сская земля́ и не утвержде́на,/ ны́не тобо́ю, иера́рше Михаи́ле, наста́влена, прии́де к боговиде́нию,/ и, прие́мши пе́рстень усыновле́ния, весели́тся, зову́щи:/ сла́ва Тебе́, Христе́ мой, Многоми́лостиве. Сла́ва Отцу́ и Сы́ну и Свято́му Ду́ху. Свире́пеющия неве́рием лю́ди укроти́в в Ру́сстей земли́/ и яре́м Це́ркви повинове́ния возложи́в на ня,/ приве́л еси́, Михаи́ле, мно́гия де́латели в виногра́д Небе́снаго Влады́ки./ Сотвори́ и нас, свя́те, му́дрыя де́латели, и́ко прино́сим ти днесь хвале́ние. И ны́не и при́сно и во ве́ки веко́в. Ами́нь. Богородичен: Свире́пеющия во мне стра́сти укроти́/ и яре́м смире́ния возложи́ на мя, Богоро́дице,/ да в том порабо́таю про́чее вре́мя и обря́щу ми́лость в День Су́дный. Кондак, глас 2 Моисе́й вторы́й Росси́и яви́лся еси́, о́тче,/пренесы́й мы́сленный виногра́д/ от египетскаго идолослуже́ния в зе́млю, проро́чествием предуви́дену:/ бу́дет, рече́, утвержде́ние ве́ры на земли́,/ и на версе́х гор Ки́евских превознесе́тся па́че Лива́на/ Плод, пита́яй ми́ра всего́,/ от Него́же вкуси́вше,// ублажа́ем тя, Михаи́ле, Бо́жий иера́рше. Икос Расточе́нныя лю́ди собра́в во еди́н богове́дения ра́зум/ и Креще́нием омы́в невиде́ния ве́тхость,/ зе́млю Ру́сскую просвети́л еси́ Кресто́м/ и, научи́в сла́вити Пресвяту́ю Тро́ицу, Отца́ и Сы́на и Ду́ха Пресвята́го,/ сотвори́л еси́ разу́мное ста́до Христу́ Бо́гу,/ Ему́же до днесь ве́рою стоя́щи, взыва́ет:/ изба́ви от вся́каго зла́го обстоя́ния град и лю́ди,/ тя ублажа́ющия, Михаи́ле, Бо́жий иера́рше. Песнь 7 Ирмос: Росода́тельну у́бо пещь/ соде́ла А́нгел/ преподо́бным отроко́м,/ халде́и же опаля́ющее/ веле́ние Бо́жие мучи́теля увеща́ вопи́ти:// благослове́н еси́, Бо́же оте́ц на́ших. Припев: Святи́телю óтче Михаи́ле, моли́ Бо́га о на́с. Хладода́тельною благодати́ от Тебе́, святи́телю, Росси́я омове́на водо́ю,/ чешую́ разу́мных оче́с низве́рже во святе́й купе́ли,/ и позна́ Еди́наго Созда́теля своего́, и ве́рою зове́т:/ благослове́н Бог оте́ц на́ших. Припев: Святи́телю óтче Михаи́ле, моли́ Бо́га о на́с. Тебе́, гра́де Ки́еве, по Креще́нии веселя́щуся, скве́рнии и́доли рыда́ху,/ от ни́хже пе́рвейшим и́дол Перу́н влачи́мь, вопия́ше го́рце./ Отту́ду лю́дие, позна́вше свое́ пе́рвое заблужде́ние, с тобо́ю, Михаи́ле, возопи́ша:/ благослове́н Бог оте́ц на́ших. Сла́ва Отцу́ и Сы́ну и Свято́му Ду́ху. Злат пе́рстень новыя благода́ти, архиере́ю Михаи́ле, вложи́в Росси́и на ру́ку,/ обручи́л еси́ неве́сту чи́сту Христо́ви, я́же от язы́к Це́рковь./ Сия́ и до днесь, духо́вне веселя́щися, зове́т:/ благослове́н Бог оте́ц на́ших. И ны́не и при́сно и во ве́ки веко́в. Ами́нь. Богородичен: Злат пе́рстень имену́ем Тя, Де́во Чи́стая,/ укра́шен, а́ки драгоце́нным адама́нтом, приедине́нием Пло́ти Христо́вы./ Тем любо́вию зове́м:/ благослове́нна Ты еди́на, Сын Твой и Бог оте́ц на́ших. Песнь 8 Ирмос: Из пла́мене преподо́бным ро́су источи́л еси́/ и пра́веднаго же́ртву водо́ю попали́л еси́,/ вся бо твори́ши, Христе́, то́кмо е́же хоте́ти.// Тя превозно́сим во вся ве́ки. Припев: Святи́телю óтче Михаи́ле, моли́ Бо́га о на́с. Из пла́мене и́дольския ле́сти изъе́м, прему́дре, Ру́сскую зе́млю,/ росо́ю Креще́ния прохлади́л еси́, и несть уже́ пали́ма развраще́нием на пе́рвая,/ превознося́щи Христа́ и тебе́, па́стыря своего́, во ве́ки. Припев: Святи́телю óтче Михаи́ле, моли́ Бо́га о на́с. Вся до́бре разчини́в, я́же о лю́дех новоизбра́нных, поста́вил еси́ па́стыри и учи́тели по гра́дех/ и, тем новоизбра́нное ста́до испоручи́в,/ сам отше́л еси́ па́стырей Нача́льнику Христу́ Бо́гу соца́рствовати во ве́ки. Сла́ва Отцу́ и Сы́ну и Свято́му Ду́ху. Мног плач и рыда́ние гра́ду Ки́еву твои́м, о́тче, отше́ствием к Бо́гу сотвори́ся,/ но Вы́шний Иерусали́м, прие́м тя в не́дра своя́, возра́довася,/ иде́же живы́й, не забу́ди ста́да твоего́ и моли́, да с тобо́ю всели́тся во ве́ки. И ны́не и при́сно и во ве́ки веко́в. Ами́нь. Богородичен: Мно́гое весе́лие творю́ злы́ми де́лы бесо́м и ра́дость,/ храни́телю же моему́ печа́ль отвсю́ду./ О Чи́стая Мари́е, Ма́ти Христа́ Бо́га, наста́ви мя на покая́ние,/ да бу́дет о́нем плач, А́нгелу же моему́ ра́дость и мне с ним во ве́ки. Песнь 9 Ирмос: Бо́га/ челове́ком невозмо́жно ви́дети,/ на Него́же не сме́ют чи́ни а́нгельстии взира́ти;/ Тобо́ю бо, Всечи́стая, яви́ся челове́ком/ Сло́во Воплоще́нно,/ Его́же велича́юще,/ с Небе́сными во́и// Тя ублажа́ем. Припев: Святи́телю óтче Михаи́ле, моли́ Бо́га о на́с. Я́ко фи́никс, процве́л еси́, о́тче, в дому́ Бо́жии,/ и плоды́, нетле́ние моще́й твои́х, всем яви́л еси́,/ отсю́ду у́бо, лю́дие, уразуме́вше, я́ко предстои́ши Христу́,/ тя пе́сньми велича́ем. Припев: Святи́телю óтче Михаи́ле, моли́ Бо́га о на́с. Я́ко благово́нный кипари́с, святи́телю,/ облагоуха́еши и наслажда́еши покланя́ющихся ти,/ и нас испо́лни благоуха́ния твои́х моли́тв,/ я́ко пе́сньми па́мять твою́ велича́ем. Сла́ва Отцу́ и Сы́ну и Свято́му Ду́ху. Лик святи́телей Ру́сских и любопра́зднственных собо́ри, взыва́ем:/ сотецы́теся ко святе́й пеще́ре, па́стырие, первонача́льнаго па́стыря,/ лю́дие же, отца́ своего́ пе́сньми почти́те с на́ми,/ днесь бо па́мять его́ велича́ем. И ны́не и при́сно и во ве́ки веко́в. Ами́нь. Богородичен: Вся тварь песносло́вит Тя, Де́во,/ я́ко проше́дшую вся Небе́сная врата́ и ста́вшую огнезра́чнаго одесну́ю Престо́ла./ Одесну́ю ста́ти и нас сподо́би Сы́на Твоего́,/ я́ко пе́сньми Ро́ждшагося из Тебе́ и Тя велича́ем. Светилен Царе́ви всех предстои́ши, святи́телю Михаи́ле,/ и благослове́нием венча́ется верх твой от Вы́шняго десни́цы./ Простри́ ру́ку твою́ и благослови́ нас, я́коже не́коему на пресви́терство восходя́щу,/ не у́мерл бо еси́, но во ве́ки живе́ши,/ и па́мять твою́ пе́сньми пое́т вся Ру́сская Це́рковь,/ с не́юже и мы сла́вим. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Царя́ веко́в Цари́це су́щая и Ма́ти, над страстьми́ царе́й покажи́ певцы́ Твоя́,/ се бо приво́дим Ти в моли́тву чу́днаго Михаи́ла, святи́теля Твоего́,/ в его́же па́мяти покланя́ющеся, Тебе́ велича́ем.

Минея, 26 Января, Кано́н святы́х Глас 2 Песнь 1 Ирмос: Гряди́те, лю́дие,/ пои́м песнь Христу́ Бо́гу,/ разде́льшему мо́ре и наста́вльшему лю́ди, я́же изведе́ из рабо́ты еги́петския,/ я́ко просла́вися. Припев: Преподо́бне о́тче Ксенофóнте, моли́ Бо́га о на́с. Дре́ва жи́зни и ра́йскаго вои́стинну наслажде́ния/ вседомо́вне, всему́дрии, ны́не восприе́мше,/ вас восхваля́ющия моли́те спасти́, к Человеколю́бцу. Припев: Преподо́бне о́тче Ксенофóнте, моли́ Бо́га о на́с. В пути́ за́поведей Твои́х ше́ствуя те́пле,/ Твой раб, Влады́ко, оби́тели дости́же,/ сугу́бым жела́нием жи́зни ве́чныя наслажда́яся. Сла́ва Отцу́ и Сы́ну и Свято́му Ду́ху. Но́вую ски́нию Авраа́мову показа́л еси́ твой дом всем,/ темже, чудне, во Авраамлих недрех досто́йно и пра́ведно воспочи́л еси́. И ны́не и при́сно и во ве́ки веко́в. Ами́нь. Богородичен: Весь в Тя всели́вся, Всенепоро́чная,/ всего́ мя, челове́ка, вообрази́,/ из Отца́ возсия́вый пре́жде всех век, Сло́во Безнача́льное. Песнь 3 Ирмос: На ка́мени мя ве́ры утверди́в,/ разшири́л еси́ уста́ моя́ на враги́ моя́./ Возвесели́ бо ся дух мой, внегда́ пе́ти:/ несть свят, я́коже Бог наш, и несть пра́веден, па́че Тебе́, Го́споди. Припев: Преподо́бне о́тче Ксенофóнте, моли́ Бо́га о на́с. Светле́йшими досто́инствы почте́н, светоно́сным житие́м украси́вся,/ дея́ние бо восхожде́ние виде́ния, вопи́я, показа́л еси́:/ Ты еси́ Бог наш, и несть свят, па́че Тебе́, Го́споди. Припев: Преподо́бне о́тче Ксенофóнте, моли́ Бо́га о на́с. Я́ко всех строи́тель быв, всех попече́ние прия́л еси́,/ тре́бующим бога́тство твое́ раздая́,/ прие́мля любому́дренно мона́шествующих чи́ны,/ о́тче преподо́бне. Сла́ва Отцу́ и Сы́ну и Свято́му Ду́ху. Зако́нами пита́яся Влады́ки, в зако́не и поуче́нием,/ и наказа́нием Госпо́дним наказа́л еси́ твоя́ де́ти, зовы́й, чу́дне:/ Ты еси́ Бог наш, и несть свят, па́че Тебе́, Го́споди. И ны́не и при́сно и во ве́ки веко́в. Ами́нь. Богородичен: Еди́ну де́вствующую по рождестве́ Мари́ю,/ святы́х святе́йшую, су́щую неискусобра́чную Богоро́дицу,/ прииди́те, воспои́м, ве́рнии, зову́ще:/ ра́дуйся, Ма́ти Чи́стая, ра́дуйся, Влады́чице. Седален, глас 8 В за́поведех Влады́ки бдяй,/ подо́бными же нра́вы де́ти твоя́ наказу́я, блаже́нне Ксенофо́нте, и сопру́жницу,/ с ни́миже Вы́шнее насле́довал еси́ Ца́рствие,/ напа́стей вся́ческих оста́вив обурева́ние./ Те́мже восхваля́ем благоче́стно вас вси,/ и любо́вию почита́ем, и ве́рно взыва́ем:/ Богоно́снии всеблаже́ннии, моли́теся Христу́ Бо́гу грехо́в оставле́ние дарова́ти/ пра́зднующим любо́вию святу́ю па́мять ва́шу. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Я́ко Де́ву и Еди́ну в жена́х,/ Тя, безсе́менно ро́ждшую Бо́га пло́тию,/ вси блажи́м, ро́ди челове́честии:/ Огнь бо всели́ся в Тя Божества́/ и я́ко Младе́нца млеко́м пита́еши Зижди́теля и Го́спода./ Тем, А́нгельский и челове́ческий род, досто́йно сла́вим Всесвято́е Рождество́ Твое́/ и согла́сно вопие́м Ти:/ моли́ Христа́ Бо́га прегреше́ний оставле́ние дарова́ти/ покланя́ющимся ве́рою Пресвято́му Рождеству́ Твоему́. Песнь 4 Ирмос: Услы́шах, Го́споди,/ слух Твоего́ смотре́ния/ и просла́вих Тя,/ Еди́не Человеколю́бче. Припев: Преподо́бне о́тче Ксенофóнте, моли́ Бо́га о на́с. Спа́сшеся от бу́ри жите́йския,/ в приста́нище благоче́стия устреми́стеся, де́ти блаже́ннейшии. Припев: Преподо́бне о́тче Ксенофóнте, моли́ Бо́га о на́с. Научи́вшеся зна́нию Боже́ственных и челове́ческих,/ Бо́гу служи́ть изво́листе. Сла́ва Отцу́ и Сы́ну и Свято́му Ду́ху. Из бе́здны, преподо́бнии, мирски́я изба́вльшеся пресла́вно,/ ко благи́х бе́здне приидо́сте. И ны́не и при́сно и во ве́ки веко́в. Ами́нь. Богородичен: Изба́вленный кро́вию, от ребр излия́нною Сы́на Твоего́, Богома́ти,/ вси Тя блажи́м. Песнь 5 Ирмос: Све́та Пода́телю/ и веко́в Тво́рче, Го́споди,/во све́те Твои́х повеле́нии наста́ви нас:/ ра́зве бо Тебе́, ино́го бо́га не зна́ем. Припев: Преподо́бне о́тче Ксенофóнте, моли́ Бо́га о на́с. К неги́бнущей преходя́й жи́зни, потща́лся еси́ дости́гнута свяще́нный, Арка́дие, град/ и Гро́бу Су́щия Жи́зни поклони́лся еси́. Припев: Преподо́бне о́тче Ксенофóнте, моли́ Бо́га о на́с. Я́ко благоле́пный вои́стинну бы́вший о тебе́ про́мысл,/ и чу́дно, и препросла́вленно окормле́ние Боже́ственное всех Влады́ки, всеблаже́нне Арка́дие! Сла́ва Отцу́ и Сы́ну и Свято́му Ду́ху. Тобо́ю промышля́яй, И́же на объя́тиих Симео́новых пе́рвее возлега́й, Боже́ственнаго ста́рца,/ ста́рцу тя Боже́ственному, Арка́дие, приво́дит, Христо́с путево́ждствова. И ны́не и при́сно и во ве́ки веко́в. Ами́нь. Богородичен: Сы́на Безнача́льнаго и Соприсносу́щнаго Отцу́ родила́ еси́ преесте́ственно,/ из Тебе́ воплоще́нна, Всенепоро́чная Отрокови́це./ Те́мже Богоро́дицу Чи́стую Тя пропове́дуем. Песнь 6 Ирмос: В бе́здне грехо́вней валя́яся,/ неизсле́дную милосе́рдия Твоего́ призыва́ю бе́здну:/ от тли, Бо́же, мя возведи́. Припев: Преподо́бне о́тче Ксенофóнте, моли́ Бо́га о на́с. Блаже́нныя жи́зни жела́я, к мона́шествующих притека́еши собо́ру,/ жи́тельное дохнове́ние споспе́шника, Иоа́нне, творя́. Припев: Преподо́бне о́тче Ксенофóнте, моли́ Бо́га о на́с. Человекоуби́йцы зло́бы ме́ртвость и смертоно́сный яд отве́ргл,/ к Живоно́сному Гро́бу Христо́ву, Иоа́нне, прите́кл еси́. Сла́ва Отцу́ и Сы́ну и Свято́му Ду́ху. Иоа́ннову житию́ поревнова́л еси́,/ и́бо, я́ко он, в пусты́ню всели́лся еси́/ и чи́сте пожи́л еси́, Иоа́нне, Христу́ очища́яся. И ны́не и при́сно и во ве́ки веко́в. Ами́нь. Богородичен: Не́бо простры́й хоте́нием, друго́е Не́бо соде́ла одушевле́нно:/ Тя, Богома́ти Чи́стая,/ и из Тебе́ су́щим во тьме возсия́. Кондак, глас 4 Жите́йскаго мо́ря избе́гше, Ксенофо́нт пра́ведный/ с сопру́жницею честно́ю на Небесе́х свеселя́тся с ча́ды,/ Христа́ велича́юще. Икос Стра́нен путь боголе́пно, Ксенофо́нте, ше́ствовал еси́,/ и с сопру́жницею забы́сте естество́,/ я́коже безтеле́снии я́ве, на земли́ я́вльшеся;/ те́мже и две́ри Небе́сныя вам отверзо́шася,/ и со А́нгелы лику́ете, я́ко виногра́да бы́вше Госпо́дня Боже́ственнии де́лателе, и с ча́ды./ Моли́теся у́бо Христу́/ дарова́ти зарю́ просвеще́ния омраче́нным на́шим сердца́м,/ па́мять ва́шу творя́щим светоно́сную,/ Венцеда́теля Христа́ велича́юще. Песнь 7 Ирмос: Богопроти́вное веле́ние/ беззако́ннующаго мучи́теля высо́к пла́мень вознесло́ есть,/ Христо́с же простре́ Богочести́вым отроко́м ро́су духо́вную,/ Сый благослове́н и препросла́влен. Припев: Преподо́бне о́тче Ксенофóнте, моли́ Бо́га о на́с. Ума́ чистото́ю Богоно́сный ва́ше соше́ствие зря, провозвести́:/ Бог бо пра́ведный, благоче́стие ва́ше Боже́ственне возмзди́в,/ во еди́но, я́ко Ми́лостив, собра́. Сла́ва Отцу́ и Сы́ну и Свято́му Ду́ху. Ре́вность зря благоче́стия, жела́ние прие́м,/ ве́ру призре́в ва́шу, Человеколю́бец, вся собра во еди́ну трапе́зу вас,/ я́ко Благоде́тель и Препросла́вленный. И ны́не и при́сно и во ве́ки веко́в. Ами́нь. Богородичен: Наде́жда непосты́дная, наде́жда изве́стная, и стена́ непоколеби́мая,/ и покро́в, и помо́щница буди́ ми, Всенепоро́чная, упова́ющему на Тя:/ на Тя бо возлага́ю, Чи́стая, всю наде́жду спасе́ния моего́. Песнь 8 Ирмос: Пещь иногда́ о́гненная в Вавило́не де́йства разделя́ше,/ Бо́жиим веле́нием халде́и опаля́ющая,/ ве́рныя же ороша́ющая, пою́щия:/ благослови́те, вся дела́ Госпо́дня, Го́спода. Припев: Преподо́бне о́тче Ксенофóнте, моли́ Бо́га о на́с. Пещь, зело́ огне́м распаля́емую, разлуче́ние от друг дру́га кре́пко претерпе́сте,/ утро́бами бо растерза́еми и душа́ми распаля́еми,/ остно́м сро́дства страда́ния му́чеников подъя́сте. Припев: Преподо́бне о́тче Ксенофóнте, моли́ Бо́га о на́с. Свы́ше вас о́блак росода́тельный человеколю́бия осени́ в гора́х Сио́нских,/ иде́же роса́ Ду́ха ученики́ просвети́, зову́щия:/ благослови́те, вся дела́ Госпо́дня, Го́спода. Сла́ва Отцу́ и Сы́ну и Свято́му Ду́ху. Ми́лостива нам и благосе́рда бы́ти Благоде́теля/ моли́те, отцы́ всебога́тии,/ ва́шу торжеству́ющим свяще́нную па́мять,/ естество́м соедине́нных и совоку́пленных благода́тию. И ны́не и при́сно и во ве́ки веко́в. Ами́нь. Богородичен: Единоро́днаго Сы́на и Бо́га Сло́ва,/ пре́жде век из Безнача́льнаго Отца́ неизрече́нно возсия́вшаго,/ тва́ри перворо́дна бы́вша, родила́ еси́,/ тем Тя, Богома́ти, вси язы́цы, сла́вим. Песнь 9 Ирмос: Безнача́льна Роди́теля Сын, Бог и Госпо́дь,/ вопло́щся от Де́вы, нам яви́ся,/ омраче́нная просвети́ти, собра́ти расточе́нная,/ тем Всепе́тую Богоро́дицу велича́ем. Припев: Преподо́бне о́тче Ксенофóнте, моли́ Бо́га о на́с. На ра́мех взе́мше Христо́в Крест,/ вои́стинну ше́ствовасте стезе́ю воздержа́ния, вся́ку доброде́тель соверша́юще,/ до́ндеже са́мую и́стинно нестаре́емую Жизнь прия́сте,/ вседомо́вне венчава́еми. Припев: Преподо́бне о́тче Ксенофóнте, моли́ Бо́га о на́с. Огоспо́дствовавше плотско́му мудрова́нию,/ Ду́ха бога́тство сокро́вищетвовасте,/ благода́ть врачева́ний прие́мше от Исто́чника дарова́ний,/ к Нему́же ны́не преше́дше, ве́чно почива́ете. Сла́ва Отцу́ и Сы́ну и Свято́му Ду́ху. Победи́вше кова́рства змии́ная, на коне́ц по́честей, преподо́бнии, нареко́стеся,/ пра́вды венцы́ от Христа́ прие́мше досто́йно./ Его́же ны́не моли́те, е́же спасти́ ду́ши на́ша. И ны́не и при́сно и во ве́ки веко́в. Ами́нь. Богородичен: Безма́терня пе́рвее по пе́рвому рожде́нию,/ нас ра́ди воплоще́нна, ражда́еши без отца́,/ во двою́ познава́ема естеству́, Боже́ственнем и челове́честем,/ и си́ми ве́руема де́йствы, Богоневе́сто. Светилен Расточи́л еси́ бога́тство ни́щим богоуго́дно/ и вседомо́вне присво́ился еси́, о Ксенофо́нте, Го́споду,/ Его́же моли́, всеблаже́нне, от страсте́й нас изба́вити. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Во́инства А́нгелов и святы́х ли́ки превзыдо́ша и́стинно вели́чия Твоя́, Чи́стая./ Те́мже Христа́ умоли́ о лю́дех согре́шших.

Минея, 14 Февраля, Канон Глас 4 Песнь 1 Ирмос: Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,/ и воспою́, ра́дуяся, Тоя́ чудеса́. Припев: Святы́й равноапо́стольный Кири́лле, моли́ Бо́га о на́с. К ча́ши прему́дрости Боже́ственная твоя́ уста́ приложи́в,/ напита́ся спаси́тельнаго пития́,/ ра́зумом свет явля́я язы́ком,/ и секи́ра, посека́ющая неприя́зненну вся́ку лесть. Припев: Святы́й равноапо́стольный Кири́лле, моли́ Бо́га о на́с. Просвети́в тя, я́ко свети́ло,/ Светода́вец Христо́с Бог наш всему́ ми́рови яви́ тя учи́теля/ и посла́ учи́ти те́мныя Кни́гами Законоу́чными язы́ки за́падныя. Сла́ва Отцу́ и Сы́ну и Свято́му Ду́ху. Святы́й Дух от пучи́ны извлече́ Бо́жиим сло́вом/ всему́ ми́ру учи́теля благове́рия, му́дре, драги́й би́сер,/ Бо́жия зако́на Кни́гами, блаже́нне, язы́ки освяти́. И ны́не и при́сно и во ве́ки веко́в. Ами́нь. Богородичен: Кра́сный ум преиме́ Небе́сным си́лам,/ Бо́жий бо Твой бысть храм душе́вный,/ егда́ во чре́ве понесла́ еси́ Бо́га на́шего Де́ва, горо́ пресвята́я. Песнь 3 Ирмос: С высоты́ снизше́л еси́ во́лею/ на зе́млю/ превы́шше вся́каго нача́ла,/ и смире́нное возне́сл еси́ из а́да преиспо́дняго/ естество́ челове́ческое:/ несть бо свят, па́че Тебе́, Человеколю́бче. Припев: Святы́й равноапо́стольный Кири́лле, моли́ Бо́га о на́с. Сло́вом и се́рдцем и язы́ком Христа́, Сы́на Божия, пропове́да,/ прему́дрость же и си́лу и Сло́во вопло́щшееся, блаже́нне,/ струя́ми при́точными посрами́в триязы́чники. Припев: Святы́й равноапо́стольный Кири́лле, моли́ Бо́га о на́с. Цевни́ца при́точна свя́та вои́стинну яви́ся, блаже́нне Кири́лле,/ глас нам спасе́ния святы́м зву́ком духо́вным бряца́я прекра́сно,/ лесть прогна́л еси́. Сла́ва Отцу́ и Сы́ну и Свято́му Ду́ху. О у́ме о́гненный, о доброгла́сна трубо́,/ о сла́вию песни́вый, о ла́стовице златоглаго́ливая,/ о язы́че сла́ждший ме́да в при́тчах,/ Кири́лле прему́дре, всех нас помяни́. И ны́не и при́сно и во ве́ки веко́в. Ами́нь. Богородичен: Сове́том О́тчим Безнача́льный Сын/ я́ко Сло́во в ложесна́ Твоя́ осене́нием Свята́го Ду́ха, Богоро́дице, всели́ся/ и пло́тию роди́ся из Тебе́, спаса́я ду́ши на́ша. Седален, глас 8 Я́ко заря́, просвети́в всю зе́млю,/ еретики́ го́ниши, взыска́я на восто́це и за́паде и се́вере и ю́зе:/ триязы́чники исправля́еши, пропове́дая страна́м,/ язы́ки свои́ми им глаго́ля и Кни́ги предая́./ Ри́ма же доше́д, ту те́ло свое́ положи́, блаженне,/ в ру́це Госпо́дни ду́шу свою́ преда́в:/ благове́рия учи́телю, моли́ Христа́ Бо́га грехо́в оставле́ние пода́ти/ чту́щим любо́вию святу́ю твою́ па́мять. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Со́лнца о́блаче разу́мнаго, Боже́ственнаго све́та свети́льниче златокова́нный,/ нескве́рная, небла́зная, Всенепоро́чная Влады́чице,/ омраче́нную ду́шу мою́ ослепле́нием страсте́й безстра́стия заре́ю просвети́, молю́ся,/ и оскверне́ное мое́ се́рдце омы́й пото́ки умиле́ния, покая́ния же слеза́ми,/ и от тиме́ния мя очи́сти дел мои́х, да любо́вию зову́ Ти:/ Богоро́дице Присноде́во, моли́ Христа́ Бо́га прегреше́ний оставле́ние пода́ти ми,/ Тебе́ бо име́ю наде́жду, раб Твой. Песнь 4 Ирмос: Седя́й в сла́ве на престо́ле Божества́/ во о́блаце ле́гце,/ прии́де Иису́с Пребоже́ственный,/ Нетле́нною Дла́нию, и спасе́ зову́щия:/ сла́ва, Христе́, си́ле Твое́й. Припев: Святы́й равноапо́стольный Кири́лле, моли́ Бо́га о на́с. Други́й Авраа́м преселе́нием, блаже́нне, был еси́ от оте́чества,/ жела́нием Прему́дрости бо́льшия, я́ко златы́ми мони́сты украси́лся еси́,/ луча́ми пресве́тлыми зело́ облиста́яся. Припев: Святы́й равноапо́стольный Кири́лле, моли́ Бо́га о на́с. Копие́м слове́с твои́х я́ко За́мврия пронзи́л еси́,/ Мадиа́нстей е́реси приложи́вшася го́рько,/ теле́снаго о́браза отмета́ющихся яви́вшагося во пло́ти Иису́са. Сла́ва Отцу́ и Сы́ну и Свято́му Ду́ху. Равносу́щную пропове́дал еси́ Свята́го Ду́ха си́лу Отцу́ и Сы́ну Трисо́лнечнаго Све́та,/ И́мже Бо́жии быва́ем по пода́нию сы́нове Све́ту и и́стии насле́дницы. И ны́не и при́сно и во ве́ки веко́в. Ами́нь. Богородичен: Изба́вльшеся пе́рваго осужде́ния Ада́мова Тобо́ю, Деви́це,/ обрето́хом ра́дость неизглаго́ланную,/ благослове́ние бо всем родила́ еси́, Сы́на Бо́жия в наш о́браз. Песнь 5 Ирмос: Ны́не возста́ну,– проро́чески рече́ Бог,/ ны́не просла́влюся, ны́не вознесу́ся,/ па́дшаго прие́м от Де́вы,/ и к Све́ту У́мному вознося́й Моего́ Божества́. Припев: Святы́й равноапо́стольный Кири́лле, моли́ Бо́га о на́с. Ма́стию свое́ю укра́сившуся тебе́, блаже́нне, до́бре,/ благода́ть излия́ся во устна́х твои́х, духовному́дре,/ и нече́ствующих глубину́ изсуши́ наводне́ну словесы́ твои́ми. Припев: Святы́й равноапо́стольный Кири́лле, моли́ Бо́га о на́с. Стоя́ше кре́пко, посо́бствуя по ве́ре, му́дре,/ льсти претыка́ния посека́я сло́вом твои́м,/ равня́я ве́рным Боже́ственную стезю́,/ наставля́я во град Христо́в послу́шливыя. Сла́ва Отцу́ и Сы́ну и Свято́му Ду́ху. Преплыва́юще ди́вно бе́здну твои́м сло́вом и при́тчами,/ Кири́лле блаже́нне,/ от зимы́ мра́зныя благо́ю ве́рою в тишину́ Вы́шних оби́телей вшел еси́. И ны́не и при́сно и во ве́ки веко́в. Ами́нь. Богородичен: Спаса́я челове́ки, Отце́ви ра́вен Сын Челове́к быва́ет:/ из Тебе́, Пречи́стая, плоть прие́м и земна́я Бо́гови сотвори́в/ и Небе́сному Ца́рствию челове́ки соде́лал есть. Песнь 6 Ирмос: Приидо́х в глубины́ морски́я,/ и потопи́ла мя есть бу́ря мно́гих грехо́в:/ но я́ко Бог из глубины́ возведи́ живо́т мой,/ Многоми́лостиве. Припев: Святы́й равноапо́стольный Кири́лле, моли́ Бо́га о на́с. Сонм мертви́тся, приложи́вшся Агаря́ном,/ я́ко зми́и, живу́щим,/ в при́тчах твои́х Трисо́лнечнаго и Еди́наго Божества́ си́лою у́бо изнемога́я. Припев: Святы́й равноапо́стольный Кири́лле, моли́ Бо́га о на́с. Я́ко и́збра́нна стрела́ яви́ся еретико́м враго́м,/ я́тая в те́ле святе́м, я́коже проро́чески пи́шется,/ храня́щаяся Божество́м и состреля́ющая враги́. Сла́ва Отцу́ и Сы́ну и Свято́му Ду́ху. Возлюби́в из млада́ Прему́дрость,/ сестру́ себе́ прия́л ю еси́/ и, умудри́вся Бо́гом, блаже́нне, яви́лся еси́ фило́соф. И ны́не и при́сно и во ве́ки веко́в. Ами́нь. Богородичен: Иезекии́ль Тя врата́ ви́де,/ и́миже про́йде Еди́н Бог Вы́шний,/ ложесна́ свята́я Твоя́ проше́д пло́тию, Пречи́стая,/ и не отве́рста оста́вил есть их. Кондак, глас 2 Тве́рдым и Богодохнове́нным уче́нием/ просвеща́я мир пресве́тлыми заря́ми,/ обтече́, я́ко мо́лния вселе́нную, Кири́лле блаже́нне,/ разсева́я пресве́тлое Бо́жие сло́во,/ на за́паде, и се́вере, и ю́зе, мир просвеща́я чудесы́. Икос Пресве́тлое житие́ возлюби́в, му́дре,/ заря́ми Трисо́лнечнаго Божества́ освеще́н,/ прои́де, я́ко мо́лния, вселе́нную,/ се́верную и ю́жную просвети́в страну́,/ за́падным же свет незаходи́м возсия./ Те́мже и мне, мрак грехо́вный прогна́в, блаже́нне,/ свы́ше испроси́ посла́ти благода́ть духо́вную:/ и́маши бо дерзнове́ние к Бо́гу непреста́нно моли́тися за вся. Песнь 7 Ирмос: Не послужи́ша тва́ри Богому́дрии/ па́че Созда́вшаго,/ но о́гненное преще́ние му́жески попра́вше,/ ра́довахуся пою́ще:/ препе́тый отце́в Госпо́дь и Бог благослове́н еси́. Припев: Святы́й равноапо́стольный Кири́лле, моли́ Бо́га о на́с. Слове́сными пища́льми, блаже́нне,/ призыва́я о́вцы в огра́ды святы́я,/ му́дрыми при́тчами, красото́ю и сла́стию слове́с твои́х. Припев: Святы́й равноапо́стольный Кири́лле, моли́ Бо́га о на́с. Не устраши́ся, учи́телю, во́ински еди́н вни́ти в полк жидо́вский,/ всех же наро́д их столп му́дростию разве́рзе,/ я́ко и Он Ханаа́нский проро́ческими при́тчами. Сла́ва Отцу́ и Сы́ну и Свято́му Ду́ху. Тебе́ дарова́ исто́чника знамена́на всем пра́вей ве́ре, блаже́нне,/ воды́ сладото́чныя напая́юща всегда́ сы́ны благове́рия/ и исполня́юща, я́ко реку́, тече́нием Це́рковь Госпо́дню. И ны́не и при́сно и во ве́ки веко́в. Ами́нь. Богородичен: Небе́с ши́ршую соде́я Бог, Браконеиску́сная,/ в ложесна́ Твоя́ всели́вся, Пречи́стая,/ те́мже молю́ Ти ся стужа́юща мя прегреше́ния/ изба́ви широто́ю покая́ния моего́. Песнь 8 Ирмос: О́троки благочести́выя в пещи́,/ Рождество́ Богоро́дичо спасло́ есть,/ тогда́ у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте, дела́,/ и превозноси́те Его́ во вся ве́ки. Припев: Святы́й равноапо́стольный Кири́лле, моли́ Бо́га о на́с. К Све́ту преложи́вся, свет яви́ся вня́тию е́же от Бо́га, о фило́софе,/ ин бо обре́теся Па́вел доброде́тельми, прете́к всю зе́млю в язы́цех,/ со́лнца светле́е сия́я, сло́вом уче́ния твоего́ вопия́:/ Го́спода по́йте, дела́, и превозноси́те Его́ во вся ве́ки. Припев: Святы́й равноапо́стольный Кири́лле, моли́ Бо́га о на́с. Я́коже прето́ржеся сонм евре́йский острото́ю слове́с твои́х, блаже́нне,/ в гра́дех Се́верских в Коза́рех приложи́ся к тебе́./ Ты бо мно́жество посече́, учи́телю святы́й,/ я́ко Голиа́фа Дави́д, в пога́нех. Сла́ва Отцу́ и Сы́ну и Свято́му Ду́ху. Вели́ка тя опло́та и твердь земля́ Панно́нская иму́щи, блаже́нне,/ заблужде́ния ерети́ческая ру́шит Кни́гами и триязы́чников, кре́пко науче́на тобо́ю,/ те́мже тя, учи́теля му́драго, помина́юще при́сно, Христа́ прославля́ем. И ны́не и при́сно и во ве́ки веко́в. Ами́нь. Богородичен: Кни́гами уче́ний святы́х проро́к, Де́во,/ Богоро́дицу Тя ве́рою пропове́даем,/ Ты бо роди́ Отроча́, Ве́тхаго де́ньми, я́ко но́ва Челове́ка,/ те́мже Тя, Пресвята́я, пое́м и превозно́сим. Песнь 9 Ирмос: Е́ва у́бо неду́гом преслуша́ния/ кля́тву всели́ла есть:/ Ты же, Де́во Богоро́дице,/ прозябе́нием чревоноше́ния ми́рови благослове́ние процвела́ еси́,/ тем Тя вси велича́ем. Припев: Святы́й равноапо́стольный Кири́лле, моли́ Бо́га о на́с. Я́ко свети́ло, тя че́стно Христо́с возложи́,/ бле́щущася в конца́х, му́дре, в венци́ церко́внем,/ Его́же ра́ди до сме́рти подвиза́ся,/ умножа́я ве́рных воспита́ние ра́зумом и гове́нием. Припев: Святы́й равноапо́стольный Кири́лле, моли́ Бо́га о на́с. Па́влу Боже́ственному учени́к был еси́,/ его́же де́тели после́дуя,/ про́йде до край за́падных, сло́во разсева́я в язы́цех (в Као́не),/ и в Ри́ме дух свой в ру́це Бо́гу своему́ предаде́. Сла́ва Отцу́ и Сы́ну и Свято́му Ду́ху. Я́ко со́лнце на земли́ возсия́, учи́телю,/ всю́ду при́тчами, луча́ми Богогла́сия, просвеща́я,/ пою́щия тя ве́рою и о ра́це стоя́щих твоего́ те́ла,/ помяни́, блаже́нне, своя́ ученики́. И ны́не и при́сно и во ве́ки веко́в. Ами́нь. Богородичен: Луча́ми Твоего́ све́та, Пречи́стая,/ ду́шу мою́ ны́не просвети́/ лежа́щу в ро́ве ги́бельнем,/ воздви́гни, враги́ сокруша́ющи,/ оскорбля́юща при́сно души́ мое́й и на грехи́ мя побужда́юща. Светилен Я́ко свети́льника тя Христо́с ми́рови показа́/ и учи́теля вселе́нней, преблаже́нне Кири́лле, Солу́нская о́трасле,/ тем и нам, помина́ющим честну́ю твою́ па́мять,/ от Него́ про́сим ми́лость. Сла́ва Отцу́ и Сы́ну и Свято́му Ду́ху. Пред Бо́гом сконча́л еси́ житие́ свое́, свя́те,/ Кни́гам бо внима́я любому́дренно и те́ми просвещая ду́шу свою́,/ яви́лся еси́ испо́лнен Бо́жияго ра́зума/ учи́тель Слове́нский, Кири́лле достохва́льне. И ны́не и при́сно и во ве́ки веко́в. Ами́нь. Богородичен: Соединя́ется по Ипоста́си пло́тию/ Пресу́щное Сло́во души́ посреде́ и мы́сленне и соверше́нне,/ и Еди́н от Двою́ прохо́дит из Тебе́ несме́сно, Пречи́стая,/ обожи́в, е́же прия́т./ Те́мже Тя прославля́ет, вои́стинну Богоро́дицу.

Минея, 21 Мая, Кано́н преподо́бнаго Кассиа́на, его́же краегране́сие сицево́: Кассиа́на, а́нгела моего́ похвали́ти, Бо́же мой, да́руй ми Глас 8 Песнь 1 Ирмос: Колесницегони́теля фарао́ня погрузи́/ чудотворя́й иногда́/ Моисе́йский жезл, крестообра́зно порази́в/ и раздели́в мо́ре,/ Изра́иля же беглеца́, пешехо́дца спасе́,/ пе́снь Бо́гови воспева́юща. Припев: Преподо́бне о́тче Кассиа́не, моли́ Бо́га о на́с. А́нгела земна́го и, небе́снаго челове́ка,/ Кассиа́на преподо́бнаго, У́глечскую похвалу́,/ досто́йно воспе́ти се́рдцем и устна́ма помози́ ми, Со́лнце Пра́вды, Христе́,/ презира́я моя́ прегреше́ния. Припев: Преподо́бне о́тче Кассиа́не, моли́ Бо́га о на́с. Приими́ хвале́ние от уст недосто́йных, тебе́ приноси́мое,/ и возда́ждь те́плыми твои́ми моли́твами к Бо́гу,/ чту́щим святу́ю па́мять твою́, о́тче наш Кассиа́не. Сла́ва Отцу́ и Сы́ну и Свято́му Ду́ху. Ве́сь возло́жся Зижди́телю своему́,/ и сла́ву вре́менную и бога́тство презре́ти жела́я,/ к по́двигом и́ноческаго жития́ устреми́лся еси́, Кассиа́не преблаже́нне,/ да жи́знь ве́чную насле́дуеши. И ны́не и при́сно и во ве́ки веко́в. Ами́нь. Богородичен: Ра́дуйся, благода́тный Исто́чниче, ра́дуйся, ле́ствице и две́ре Небе́сная,/ ра́дуйся, све́щнице, и ста́мно злата́я, и горо́ несеко́мая,/ Я́же Жизнода́вца Христа́ ми́ру родила́ еси́. Песнь 3 Ирмос: Утвержде́й в нача́ле Небеса́ ра́зумом/ и зе́млю на вода́х основа́вый,/ на ка́мени мя, Христе́, за́поведей Твои́х утверди́,/ я́ко не́сть свят, па́че Тебе́, Еди́не Человеколю́бче. Припев: Преподо́бне о́тче Кассиа́не, моли́ Бо́га о на́с. Ди́вно житие́ твое́, преблаже́нне Кассиа́не,/ стра́сти бо душетле́нныя успи́л еси́ бо́дренными бде́нии и поще́нии,/ и был еси́ мона́х благоиску́сен, цветы́й в доброде́телех. Припев: Преподо́бне о́тче Кассиа́не, моли́ Бо́га о на́с. Кро́тостию и смире́нием после́дуя Влады́це Христу́,/ всем был еси́ вои́стинну о́браз благоче́стия,/ и, в преподо́бии и пра́вде пожи́в, ве́чнаго блаже́нства наслажда́ешися, пресла́вне. Сла́ва Отцу́ и Сы́ну и Свято́му Ду́ху. Тебе́ в чудесе́х сла́вна и свети́льника пресве́тла показа́ Бог, Кассиа́не преподо́бне,/ и украси́ тя небе́сными дарова́ньми,/ Того́ у́бо моли́, поми́ловати всех нас. И ны́не и при́сно и во ве́ки веко́в. Ами́нь. Богородичен: Тебе́ вси христиа́не стяжа́хом, Пречи́стая Богома́ти, прибе́жище и сте́ну/ и Тебе́ сла́вим немо́лчно, Богоневе́стная. Седален, глас 4 Приспе́ всечестны́й твой пра́здник, преблаже́нне Кассиа́не,/ просвеща́я всех, торжеству́ющих па́мять твою́ све́тло/ и Христа́ непреста́нно пе́сньми сла́вящих. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Мно́гими прегреше́ньми ум помраче́н иму́ще,/ вопие́м ко Твоему́ кре́пкому заступле́нию, Богома́ти Пречи́стая,/ просвети́ о́чи на́ши душе́вныя и возсия́й нам покая́ния зарю́,/ моли́твами уго́дника Твоего́, преподо́бнаго Кассиа́на, Еди́на Благослове́нная. Песнь 4 Ирмос: Ты моя́ кре́пость, Го́споди,/ Ты моя́ и си́ла,/ Ты мой Бог, Ты мое́ ра́дование,/ не оста́вль не́дра О́тча/ и на́шу нищету́ посети́в./ Тем с проро́ком Авваку́мом зову́ Ти:/ си́ле Твое́й сла́ва, Человеколю́бче. Припев: Преподо́бне о́тче Кассиа́не, моли́ Бо́га о на́с. Ца́рствия Небе́снаго жела́я, преподо́бне,/ и того́ ра́ди в слеза́х и воздыха́ниих, бде́ниих же и моли́твах твою́ жи́знь препроводи́л еси́,/ и отту́ду прия́л еси́ жела́емое тебе́ блаже́нство. Припев: Преподо́бне о́тче Кассиа́не, моли́ Бо́га о на́с. Воздержа́нием во пло́ти стра́сти чу́вственныя умертви́л еси́, Кассиа́не блаже́нне,/ и по успе́нии твое́м стра́сти неду́жных разреша́еши,/ и от наси́лий бесо́вских стра́ждущих избавля́еши. Сла́ва Отцу́ и Сы́ну и Свято́му Ду́ху. Чудесы́ мно́гими я́ко звезда́ многосве́тлая просия́л еси́, о́тче преподо́бне,/ от зу́бныя бо и о́чныя боле́зни исцеля́еши,/ и долголе́тныя ра́ны и вся́кия разслабле́ния врачу́еши. И ны́не и при́сно и во ве́ки веко́в. Ами́нь. Богородичен: На Тя упова́ние мое́ возложи́х, Ма́ти Присноде́во, спасе́ния моего́,/ и Тя Предста́тельницу име́ю живота́ моего́,/ тве́рду же и непоколеби́му. Песнь 5 Ирмос: Вску́ю мя отри́нул еси́/ от лица́ Твоего́, Све́те Незаходи́мый,/ и покры́ла мя е́сть чужда́я тьма́, окая́ннаго,/ но обрати́ мя и к све́ту за́поведей Твои́х/ пути́ моя́ напра́ви, молю́ся. Припев: Преподо́бне о́тче Кассиа́не, моли́ Бо́га о на́с. Всем, приходя́щим к тебе́, был еси́ учи́тель и́стинный/ и к Богоро́дице вели́кий моли́твенник,/ и ны́не, преподо́бне, не преста́й моля́ся о нас,/ я́ко име́еши дерзнове́ние мно́го. Припев: Преподо́бне о́тче Кассиа́не, моли́ Бо́га о на́с. Мно́гое име́я дерзнове́ние к Бо́гу, о́тче Кассиа́не,/ мно́гими ны, лю́тыми страстьми́ содержи́мыя, исцели́,/ я́коже и разсла́бленнаго рука́ма и нога́ма му́жа, прикосну́вшагося ра́це твое́й исцели́л еси́,/ и жену́ спасл еси́, му́чиму от лука́ваго ду́ха. Сла́ва Отцу́ и Сы́ну и Свято́му Ду́ху. Сопу́тник житию́ моему́ бу́ди, о́тче Кассиа́не,/ моли́твою твое́ю огражда́й многомяте́жную мою́ ду́шу,/ и введи́ ю в Небе́сное Ца́рство, твои́ми умиле́нными по́двиги и чудесы́,/ Христу́ же покая́нный принося́щую сле́зы. И ны́не и при́сно и во ве́ки веко́в. Ами́нь. Богородичен: Тя сте́ну иму́ще, Богома́ти Пречи́стая,/ и Твои́м предста́тельством соблюда́еми, Тя блажи́м, Присноде́во,/ Ты бо душа́м на́шим источа́еши весе́лие и ра́дование. Песнь 6 Ирмос: Очи́сти мя, Спа́се,/ мно́га бо беззако́ния моя́,/ низ глубины́ зол возведи́, молю́ся/ к Тебе́ бо возопи́х, и услы́ши мя,/ Бо́же спасе́ния моего́. Припев: Преподо́бне о́тче Кассиа́не, моли́ Бо́га о на́с. Тве́рдое упова́ние на предста́тельство твое́ возлага́ю, преподо́бне, и ве́рою молю́ся:/ да́ждь ми страсте́й лю́тых одоле́ние, и непреста́нную па́мять сме́ртную,/ и блаже́нства гряду́щаго ве́ка серде́чное жела́ние. Припев: Преподо́бне о́тче Кассиа́не, моли́ Бо́га о на́с. Досточу́дная и пресла́вная па́мять твоя́, блаже́нне Кассиа́не,/ возсия́ в земли́ Росси́йстей и ра́достно ве́рных весели́т собо́р,/ и́скренно тя в пе́снех сла́вящих. Сла́ва Отцу́ и Сы́ну и Свято́му Ду́ху. Грехо́в испо́лненнии вси есмы́,/ твоя́ же моли́твы, преподо́бне Кассиа́не, я́ко кади́ло благово́нно, ко Го́сподеви восхо́дят,/ ны́не мо́лим тя:/ волну́ющееся в земли́ на́шей мо́ре мра́чнаго раско́ла и зла́го неве́рия изсуши́/ и спасе́ние душа́м на́шим от Го́спода испроси́. И ны́не и при́сно и во ве́ки веко́в. Ами́нь. Богородичен: Ны́не к Тебе́ прибега́ем, Ма́ти Пречи́стая,/ спаси́ нас моли́твами Твои́ми и соблюди́:/ ели́ка бо хо́щеши; мо́жеши, я́ко Ма́ти Бо́жия. Кондак, глас 8 Я́ко светоза́рная звезда́, прише́л еси́ от восто́ка на за́пад,/ оста́вль оте́чество и княже́ние твое́ Христа́ ра́ди,/ и в ца́рствующий град Москву́ прише́л еси́,/ и, промышле́нием Боже́ственнаго ра́зума направля́емь,/ У́глеча гра́да дости́гл еси́,/ и, близ его́, над Во́лгою реко́ю, в пусты́ни У́чме всели́вся,/ оби́тель сотвори́л еси́, и це́рковь созда́,/ и созва́ мона́хов во спасе́ние;/ с ни́миже моли́ о нас, чту́щих па́мять твою́, да зове́м ти:/ ра́дуйся, преподо́бне о́тче Кассиа́не. Икос Дар Бо́жий вои́стинну яви́лся еси́ земли́ У́чемстей/ и гра́ду на́шему У́глечу, преподо́бне Кассиа́не,/ по́двигом бо до́брым до конца́ зде подвиза́лся еси́/ и, благода́ти Боже́ственныя сосу́д быв избра́нный,/ дарова́ния ве́лия прия́л еси́;/ те́мже и по преставле́нии твое́м со дерзнове́нием возде́еши преподо́бныя твоя́ ру́це,/ Го́сподеви те́пле моля́ся о всей стране́ Росси́йстей./ Сего́ ра́ди, с ве́рою и любо́вию к тебе́ притека́юще, вопие́м:/ ра́дуйся, Ду́ха Свята́го прия́телище;/ ра́дуйся земны́й а́нгеле и Небе́сный челове́че./ Ра́дуйся, оте́чество твое́ и род земны́й оста́вивый и в пусты́ни жи́ти изво́ливый;/ ра́дуйся, дре́во доброде́телей, при вода́х насажде́нное./ Ра́дуйся, я́ко плод прине́сл еси́, благоцвету́щ вся́кия доброде́тели;/ ра́дуйся, притека́ющих к тебе́ спасе́ния хода́тай./ Ра́дуйся, я́ко исцеле́ний источа́еши реку́;/ ра́дуйся, я́ко стра́ждущих от бед избавля́еши./ Ра́дуйся, и́ноков исправле́ние;/ ра́дуйся, душ на́ших ра́дование./ Ра́дуйся, оте́честву на́шему похвала́ и утвержде́ние,/ его́же соблюди́ моли́твами твои́ми от враг ненаве́тно, да зове́м ти:/ ра́дуйся, преподо́бне о́тче Кассиа́не. Песнь 7 Ирмос: Бо́жия снизхожде́ния/ о́гнь устыде́ся в Вавило́не иногда́./ Сего́ ра́ди о́троцы в пещи́, ра́дованною ного́ю,/ я́ко во цве́тнице, лику́юще, поя́ху:/ благослове́н еси́, Бо́же оте́ц на́ших. Припев: Преподо́бне о́тче Кассиа́не, моли́ Бо́га о на́с. Хва́лится о тебе́, преподо́бне, град У́глеч/ и у́чемстии лю́дие веселя́тся, име́юще мо́щи твоя́ у себе́,/ я́ко до́браго граждани́на, от Бо́га да́ннаго, и воспева́ют Христу́:/ благослове́н еси́, Бо́же оте́ц на́ших. Припев: Преподо́бне о́тче Кассиа́не, моли́ Бо́га о на́с. У Влады́ки Христа́ предстоя́ в Вы́шнем Ца́рствии, Кассиа́не богому́дре,/ боле́знующих очи́ма исцеля́еши,/ просвети́ у́бо и серде́чная очеса́ на́ша све́том богоразу́мия и научи́ Ему́ пе́ти:/ благослове́н еси́, Бо́же оте́ц на́ших. Сла́ва Отцу́ и Сы́ну и Свято́му Ду́ху. Чудесы́ у́бо твои́ми, я́ко цвет процве́л еси́, пресла́вне Кассиа́не,/ я́коже рече́ проро́к: пра́ведник, я́ко фи́никс, процвете́т./ Сего́ ра́ди вси тя ны́не сла́вим, блаже́нне, и воспева́ем Христу́:/ благослове́н еси́, Бо́же оте́ц на́ших. И ны́не и при́сно и во ве́ки веко́в. Ами́нь. Богородичен: Христа́ ро́ждши Влады́ку и Врача́ вся́ческих, Пречи́стая,/ ра́нами грехо́вными нас, уя́звленных и неисце́льно боля́щих,/ исцели́, Влады́чице, Твои́ми моли́твами, Сы́ну Твоему́ зову́щих:/ благослове́н еси́, Бо́же оте́ц на́ших. Песнь 8 Ирмос: Седмери́цею пе́щь/ халде́йский мучи́тель/ богочести́вым неи́стовно разжже́,/ си́лою же лу́чшею спасе́ны, сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки. Припев: Преподо́бне о́тче Кассиа́не, моли́ Бо́га о на́с. Светоно́сный твой пра́здник, преподо́бне Кассиа́не,/ исполня́ет ра́дости и весе́лия духо́внаго, благоуха́ния же и просвеще́ния/ тя иму́щих засту́пника и Бо́гу вопию́щих:/ де́ти, благослови́те, свяще́нницы, воспо́йте,/ лю́дие, превозноси́те во вся ве́ки. Припев: Преподо́бне о́тче Кассиа́не, моли́ Бо́га о на́с. Всем, под кров твой прибега́ющим, и тебе́ с ве́рою моля́щимся лю́дем,/ бу́ди дарова́ний духо́вных пода́тель, теле́сных же боле́зней цели́тель/ и пред Го́сподем те́плый предста́тель, Кассиа́не,/ земли́ У́глечския сла́во и украше́ние. Сла́ва Отцу́ и Сы́ну и Свято́му Ду́ху. И́мя твое́, преподо́бне Кассиа́не,/ я́ко ми́ро излия́нное, я́ко благоуха́ние рая́ Бо́жия,/ по лицу́ земли́ на́шея обно́сится, услажда́я се́рдца́ ве́рующих/ и призыва́я в ра́дости духо́вней воспева́ти Го́спода и превозноси́ти Его́ во ве́ки. И ны́не и при́сно и во ве́ки веко́в. Ами́нь. Богородичен: Не пре́зри моле́ний раб Твои́х, Ма́ти Бо́жия,/ приими́ воздыха́ния и сле́зы серде́чныя ра́ди уго́дника Твоего́, преподо́бнаго Кассиа́на,/ и принеси́ их ко Престо́лу Сы́на Твоего́ и Бо́га,/ да сла́вится препе́тое И́мя Его́ во ве́ки. Песнь 9 Ирмос: Ужасе́ся о сем Не́бо,/ и земли́ удиви́шася концы́,/ я́ко Бог яви́ся челове́ком пло́тски/ и чре́во Твое́ бы́сть простра́ннейшее Небе́с/ Тем Тя, Богоро́дицу,/ А́нгелов и челове́к чинонача́лия велича́ют. Припев: Преподо́бне о́тче Кассиа́не, моли́ Бо́га о на́с. Земля́, иде́же лежи́т пречестно́е те́ло твое́, преподо́бне,/ исто́чник явля́ется чуде́с и врачева́ний,/ и вси, тебе́ моля́щиися, от вся́кия скве́рны и страсте́й избавля́ются. Припев: Преподо́бне о́тче Кассиа́не, моли́ Бо́га о на́с. Свя́тче Бо́жий, уго́дниче Христо́в, ми́лости неистощи́мое сокро́вище,/ при́зри на не́мощи моя́, исцели́ ду́шу мою́, страстьми́ зла обурева́емую,/ исцели́ и те́ло мое́, немощми́ обложе́нное,/ да просла́влю Христа́ Бо́га, ди́внаго во святы́х Свои́х. Сла́ва Отцу́ и Сы́ну и Свято́му Ду́ху. В Небе́сных оби́телех ра́дости неизрече́нныя наслажда́яся, преподо́бне,/ Влады́ку всех моли́ храм сей, и ве́си си́и, и град У́глеч, и всю страну́ на́шу в ми́ре сохрани́ти/ и вся ны спасти́, благоче́стно тя почита́ющия. И ны́не и при́сно и во ве́ки веко́в. Ами́нь. Богородичен: Уврачу́й, Пречи́стая, стра́сти се́рдца моего́,/ ро́ждшая всех Царя́ и Бо́га,/ и пра́ведных ча́сти яви́ мя прича́стна, Богоро́дице Де́во,/ Христа́, Сы́на Твоего́, умоли́вши. Светилен Светода́вче Го́споди,/ свети́льника земли́ на́шея, Кассиа́на преподо́бнаго моли́твами/ просвети́ нас, ве́рою Тебе́ служа́щих/ и благоче́стно пра́зднующих светоно́сную того́ па́мять. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Свеще́ та́инственная, Богоневе́сто,/ су́щим во тьме́ неразу́мия све́том ра́зума и́стины возсия́й,/ и спаси́ всех, благоче́стно Тя, я́ко Ма́терь Бо́жию, велича́ющих.

Минея, 8 Февраля, Канон Глас 8 Песнь 1 Ирмос: Пои́м Го́сподеви, прове́дшему лю́ди Своя́ сквозе́ Чермно́е мо́ре, я́ко Еди́н сла́вно просла́вися. Припев: Святы́й проро́че Заха́рие, моли́ Бо́га о на́с. Име́я Светода́вца, твоя́ послу́шающа мольбы́, просвеще́ние ми́ пода́ждь, Заха́рие, проро́че пречу́дный. Припев: Святы́й проро́че Заха́рие, моли́ Бо́га о на́с. Укра́шен добро́тами Боже́ственныя красоты́, а́нгелов добро́ты зри́ши душе́вною чистото́ю. Сла́ва Отцу́ и Сы́ну и Свято́му Ду́ху. Испо́лнен святы́ни ангелоподо́бныя све́тлости я́ко сы́й, богому́дре, соглаго́лющия а́нгелы и просвеща́ющия име́л еси́, богопости́жне. И ны́не и при́сно и во ве́ки веко́в. Ами́нь. Богородичен: Разреши́ся кля́тва Е́вы прама́тере, Всенепоро́чная, Христа́ бо ро́ждши, благослове́ньми ми́р обогати́ла еси́. Песнь 3 Ирмос: Не́сть свя́т, я́ко Госпо́дь, и не́сть пра́веден, я́ко Бо́г на́ш, Его́же пое́т вся́ тва́рь: не́сть пра́веден па́че Тебе́, Го́споди. Припев: Святы́й проро́че Заха́рие, моли́ Бо́га о на́с. Вы́шняя благода́ть тебе́ осени́ промышле́ния несказа́ннаго Боже́ственно окормле́ние, святы́ми а́нгелы науча́ющи, прему́дре блаже́нне, и просвеща́ющи. Припев: Святы́й проро́че Заха́рие, моли́ Бо́га о на́с. Боже́ственней бла́гости наказу́яся, научи́лся еси́, пребога́те, я́ко пречи́ст, плодови́т жи́ти Боже́ственным свяще́нием во гра́де всеосвяще́ннем. Сла́ва Отцу́ и Сы́ну и Свято́му Ду́ху. Стена́ незы́блема, утвержде́ние лю́дем богому́дрым бы́л еси́, Го́споди, и душа́м спасе́ние, я́коже дре́вле провозвести́ проро́к чу́дный. И ны́не и при́сно и во ве́ки веко́в. Ами́нь. Богородичен: Рождество́ нетле́нно и пречи́сто, Богоро́дице, Твое́ чревоноше́ние ми́р изба́ви от тли́ и сме́рти, Спа́са бо родила́ еси́, Сло́во Присносу́щное. Седален, глас 3 Впряжены́ колесни́цы ви́дел еси́, пра́вимы руко́ю все́х Бо́га, безпло́тныя слуги́, Заха́рие чу́дне, с ни́миже ра́дуяся, я́ко проро́к приснопа́мятный, моли́ напра́витися к пути́ Боже́ственнаго ра́зума ве́рою несомне́нною соверша́ющим па́мять твою́ всесвяще́нную. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Недомы́сленно и непостижи́мо е́сть, Влады́чице Богора́дованная, е́же соде́ланное о Тебе́ стра́шное Бо́жие та́инство: и́бо необыме́ннаго заче́нши родила́ еси́, пло́тию обложе́на от пречи́стых крове́й Твои́х: Его́же всегда́, Чи́стая, я́ко Сы́на Твоего́ моли́, спасти́ся душа́м на́шим. Песнь 4 Ирмос: Из горы́ приосене́нныя, Сло́ве, проро́к, еди́ныя Богоро́дицы, хотя́ща воплоти́тися богови́дно усмотри́ и со стра́хом славосло́вяше си́лу Твою́. Припев: Святы́й проро́че Заха́рие, моли́ Бо́га о на́с. Еди́но у́бо просвеща́тельное Существо́ чести́, в Со́лнцех же Тре́х определя́емо, в су́щая проше́ствиями мно́жимо, я́ве науча́еши, всеблаже́нне. Припев: Святы́й проро́че Заха́рие, моли́ Бо́га о на́с. Колесни́ца Бо́жия бы́в, проро́че, колесни́цы зря́ разли́чны а́нгельския, обходи́ти вся́ сподо́бился еси́, со благочи́нием иду́щия. Сла́ва Отцу́ и Сы́ну и Свято́му Ду́ху. Священноле́пно многосве́тлый све́щник, о́браз зри́ши Боже́ственнаго светозаре́ния, смотря́еши же, всеблаже́нне, Всеви́дца, И́мже вся́ческая спаса́ются. И ны́не и при́сно и во ве́ки веко́в. Ами́нь. Богородичен: О́браз Твоего́ чи́стаго Рождества́ богови́днии проро́цы проначерта́ют, многови́дно прообрази́вше и разли́чно гада́ньми богому́дрии. Песнь 5 Ирмос: От но́щи неве́дения богове́дением просвети́вый концы́, просвети́ мя у́тром человеколю́бия Твоего́, Го́споди. Припев: Святы́й проро́че Заха́рие, моли́ Бо́га о на́с. Чи́стым се́рдцем и ума́ прови́дя острото́ю стра́сть Спа́сову, достоле́пно блажи́тся. Припев: Святы́й проро́че Заха́рие, моли́ Бо́га о на́с. Преесте́ственно святы́й ра́дуйся, Сио́не, проро́к предповелева́ет, гряде́т Ца́рь тво́й, пра́веден и спаса́яй кро́тостию. Сла́ва Отцу́ и Сы́ну и Свято́му Ду́ху. Проро́ков сла́ва, богоглаго́ливых муже́й благоле́пие ми́р озаря́ет проро́чества све́тлостию. И ны́не и при́сно и во ве́ки веко́в. Ами́нь. Богородичен: Де́вы Рождество́м обнови́в на́с, свободи́ пе́рвых согреше́ний, на́с ра́ди бы́в Челове́к. Песнь 6 Ирмос: Моли́тву пролию́ ко Го́споду и Тому́ возвещу́ печа́ли моя́, я́ко зо́л душа́ моя́ испо́лнися и живо́т мо́й а́ду прибли́жися, и молю́ся, я́ко Ио́на: от тли́, Бо́же, возведи́ мя. Припев: Святы́й проро́че Заха́рие, моли́ Бо́га о на́с. Сы́й проро́ческаго испо́лнь вдохнове́ния, бу́дущих ра́зума па́че естества́ научи́вся, по́слан бы́л еси́ пропове́дати благода́ть бу́дущую, де́нь же креста́ ве́домый Го́сподеви, богоприя́тне. Припев: Святы́й проро́че Заха́рие, моли́ Бо́га о на́с. Ра́зумом духо́вным укра́шен, даро́в су́щих па́че ума́ сподо́бился еси́, а́нгельская явле́ния, и чи́ны, и веща́ния, и сла́вы ви́дев, пребога́те, чу́дным науча́ющия и Боже́ственным та́йнам. Сла́ва Отцу́ и Сы́ну и Свято́му Ду́ху. Свещу́ доброде́телей стяжа́в, просвеще́нием богоразу́мия сия́еши, та́инственную провозвеща́я свещу́, е́юже па́че словесе́ Сло́ва воплоще́ние яви́тся боголе́пне от Сио́на, Заха́рие, проро́че богоприя́тне. И ны́не и при́сно и во ве́ки веко́в. Ами́нь. Богородичен: Поста́вивый не́бо, показа́ Тя Не́бо слове́сное, Богоро́дице, добро́ту Иа́ковлю возлюби́в, и из чре́ва Твоего́ Божества́ Со́лнце возсия́ пло́тски, и ми́р уясни́л е́сть благода́тию. Песнь 7 Ирмос: О́троцы евре́йстии в пещи́ попра́ша пла́мень дерзнове́нно и на ро́су о́гнь преложи́ша, вопию́ще: благослове́н еси́, Го́споди Бо́же, во ве́ки. Припев: Святы́й проро́че Заха́рие, моли́ Бо́га о на́с. По все́й земли́ твое́, проро́че, изы́де веща́ние богодохнове́нное и глаго́л твои́х си́ла, вопию́щих: благослове́н еси́, Го́споди Бо́же, во ве́ки. Сла́ва Отцу́ и Сы́ну и Свято́му Ду́ху. Ве́сь вы́шними заря́ми просвеще́н, бу́дущая ви́дел еси́, я́ко су́щая. Те́мже, пребога́те, вопия́л еси́: благослове́н еси́, Го́споди Бо́же, во ве́ки. И ны́не и при́сно и во ве́ки веко́в. Ами́нь. Богородичен: Пе́сньми почита́ю Тя́, Де́во, поче́тшую ро́д челове́ческий, безче́стием лю́тым пе́рвее осужде́нный: благослове́н, Всечи́стая, Пло́д Твоего́ чре́ва. Песнь 8 Ирмос: На горе́ святе́й просла́вльшася и в купине́ огне́м Присноде́вы Моисе́ови та́йну я́вльшаго, Го́спода по́йте и превозноси́те во вся́ ве́ки. Припев: Святы́й проро́че Заха́рие, моли́ Бо́га о на́с. Сио́не, горо́, гра́де святы́й, ра́дуйся зело́, — боже́ственный Заха́рия, а́нгелов собесе́дник, повелева́ет, — и ты́ весели́ся, Иерусали́ме, во вся́ ве́ки. Припев: Святы́й проро́че Заха́рие, моли́ Бо́га о на́с. Заха́рие проро́че, красу́йся, испо́лньшаяся ви́дя словеса́, я́же предглаго́лал еси́, Ду́хом просвеща́емь, Го́спода пою́щим и превознося́щим Его́ во ве́ки. Сла́ва Отцу́ и Сы́ну и Свято́му Ду́ху. Посреди́ го́р присе́нных ви́дел еси́ стоя́щия а́нгелы, и́же над все́ми промышле́нию научаю́щия тя́, сла́вный проро́че, песносло́вящия Христа́ во ве́ки. И ны́не и при́сно и во ве́ки веко́в. Ами́нь. Богородичен: Ра́дуйся, престо́ле огнезра́чный Госпо́день, ра́дуйся, две́ре невеще́ственнаго сия́ния, ра́дуйся, о́блаче ле́гкий, я́же Со́лнце пра́вды возсия́вшая ми́ру, Чи́стая Богороди́тельнице. Песнь 9 Ирмос: Тя́, Неискусобра́чную Ма́терь Бо́га Вы́шняго, Тя́, па́че ума́ ро́ждшую сло́вом вои́стинну Бо́га, вы́шшую пречи́стых си́л, немо́лчными славословле́нии велича́ем. Припев: Святы́й проро́че Заха́рие, моли́ Бо́га о на́с. Вся́ко чу́вство оста́вив, уму́ Боже́ственному и Чисте́йшему, всему́дре, светоно́сен предстои́ши, о ми́ре моли́твы творя́. Те́мже вси́ тя́, Заха́рие, блажи́м. Припев: Святы́й проро́че Заха́рие, моли́ Бо́га о на́с. Глаго́лом после́дующе твои́х усте́н, богоявле́нне, Го́спода призыва́ем. И́мже спаса́еми, я́ко и́стины тя́ проро́ка и пропове́дника, Заха́рие, благоче́стно блажи́м. Сла́ва Отцу́ и Сы́ну и Свято́му Ду́ху. Ми́лостива соде́лай твои́ми моли́твами Влады́ку, свяще́нный и благознамени́тый пра́здник тво́й, богодохнове́нне, ве́рою соверша́ющим и тя́ любо́вию чту́щим, я́ко проро́ка и богоглаго́льника и́стиннейша. И ны́не и при́сно и во ве́ки веко́в. Ами́нь. Богородичен: Бе́здну чуде́с Тя́ и дарова́ний, Богоро́дице, пучи́ну, Чи́стая, ве́дуще и я́ве зна́юще, в Твое́ предста́тельство, наде́ющеся, притека́ем и спе́шно к Твоему́ кро́ву прибега́ем.

Минея, 15 Июля, Ин канон равноапостольного Глас 6 Песнь 1 Ирмос: Я́ко по су́ху, пешеше́ствовав Изра́иль/ по бе́здне стопа́ми,/ гони́теля фарао́на/ ви́дя потопля́ема,/ Бо́гу побе́дную песнь пои́м, вопия́ше. Припев: Святы́й равноапо́стольный кня́же Влади́мире, моли́ Бо́га о на́с. Прииди́те, ве́рнии, песнь духо́вную возопие́м и просла́вим Христа́,/ И́же све́тло просла́вил есть честна́го Влади́мира, вели́каго кня́зя. Припев: Святы́й равноапо́стольный кня́же Влади́мире, моли́ Бо́га о на́с. И́же се́мя се́ющему да́руя,/ Ты и мне да́руй сло́во, Да́телю благи́х,/ разреша́я ми соу́з язы́ка, и обновя́, Спа́се, к славословле́нию ве́рно. Сла́ва Отцу́ и Сы́ну и Свято́му Ду́ху. И́же во́лею, а не нуждею к Тебе́ всех призыва́еши,/ я́коже дре́вле Моисе́я и Иса́ию,/ та́кожде и ны́не в се́рдце возгласи́л еси́ ве́рнаго и достохва́льнаго кня́зя. И ны́не и при́сно и во ве́ки веко́в. Ами́нь. Богородичен: Укра́шена добро́тою доброде́телей, Богома́ти Чи́стая,/ Бо́га и́стинннаго зачала́ еси́,/ нас Боже́ственными доброде́тельми просвети́вшаго. Песнь 3 Ирмос: Несть свят,/ я́коже Ты, Го́споди Бо́же мой,/ вознесы́й рог ве́рных Твои́х, Бла́же,/ и утверди́вый нас на ка́мени/ испове́дания Твоего́. Припев: Святы́й равноапо́стольный кня́же Влади́мире, моли́ Бо́га о на́с. И́же Па́вла просвети́вый и избра́нна сотвори́вый,/ та́ко и Васи́лия ны́не, о́тца Росси́йскаго, очны́й неду́г отто́ргнул еси́, Ми́лостиве,/ Твои́м Креще́нием. Припев: Святы́й равноапо́стольный кня́же Влади́мире, моли́ Бо́га о на́с. Константи́на ве́рнаго подо́бник яви́лся еси́, Христа́ в се́рдцы твое́м прии́м,/ и Его́ за́поведем, я́коже апо́стол, всю зе́млю Росси́йскую научи́л еси́. Сла́ва Отцу́ и Сы́ну и Свято́му Ду́ху. Боже́ственною си́лою ты возмога́я безбо́жнаго Перу́на, ку́чу бесо́вскую сокруши́л еси́/ и, ко о́паши ко́нстей того́ привяза́в,/ повеле́л еси́ во́ином разби́ти и́дола. И ны́не и при́сно и во ве́ки веко́в. Ами́нь. Богородичен: Сень святу́ю обре́т, Мари́ю Де́ву,/ Бо́жий сосу́д, Влади́мир, князь вели́кий, апо́стола Па́вла ревни́тель,/ сей це́рковь Боже́ственную в Тоя́ и́мя воздви́гл есть. Седален, глас 2 В моли́твах бдяй при́сно ра́достною душе́ю, Васи́лие,/ того́ ра́ди поче́рпл еси́ Ду́ха прему́дрости от исто́чника, сходя́щаго свы́ше./ Тем ве́рою просия́в, я́ко со́лнце, моля́ся Христу́ непреста́нно,/ ускори́, Ще́дрый, и потщи́ся спасти́ от прегреше́ний мир. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Богоро́дице Безневе́стная Чи́стая, я́же без се́мене ро́ждшая всех Влады́ку,/ Того́ со А́нгелы моли́ изба́витися нам от вся́каго недоуме́ния/ и да́ти умиле́ние и свет душа́м на́шим/ и согреше́ний очище́ние, я́же еди́на вско́ре заступа́ющи. Песнь 4 Ирмос: Христо́с моя́ си́ла,/ Бог и Госпо́дь,/ честна́я Це́рковь/ боголе́пно пое́т, взыва́ющи,/ от смы́сла чи́ста о Го́споде пра́зднующи. Припев: Святы́й равноапо́стольный кня́же Влади́мире, моли́ Бо́га о на́с. Чу́до стра́шное, и пресла́вное, и неизглаго́ланное соверша́ет Влады́ка Христо́с:/ обновля́ет бо Боже́ственным Креще́нием всю Росси́йскую зе́млю/ и просвеща́ет кня́зя Васи́лия. Припев: Святы́й равноапо́стольный кня́же Влади́мире, моли́ Бо́га о на́с. Све́тло прииди́те и достоле́пно возгласи́те,/ сы́нове росси́йстии, ко отцу́ на́шему Влади́миру,/ и па́мять его́ ве́рно вси да пра́зднуем све́тло. Сла́ва Отцу́ и Сы́ну и Свято́му Ду́ху. О́тчее нече́стие отгна́л еси́,/ всечестны́я же твоея́ прама́тере правове́рную ве́ру возлюби́л еси́,/ ра́вне апо́столом Христо́вым, кня́же вели́кий Влади́мире. И ны́не и при́сно и во ве́ки веко́в. Ами́нь. Богородичен: Я́ко дверь, приводя́щую к Боже́ственному вхо́ду рая́ све́тлаго,/ я́ко мы́сленное ме́сто свяще́ния,/ я́ко добро́ту Иа́ковлю, Де́ву ублажа́ем. Песнь 5 Ирмос: Бо́жиим све́том Твои́м, Бла́же,/ у́тренюющих Ти ду́ши любо́вию озари́, молю́ся,/ Тя ве́дети, Сло́ве Бо́жий,/ и́стиннаго Бо́га,/ от мра́ка грехо́внаго взыва́юща. Припев: Святы́й равноапо́стольный кня́же Влади́мире, моли́ Бо́га о на́с. Днесь А́нгели Бо́жии ра́дуются све́тло на Небесе́х в па́мять твою́ святу́ю:/ спасл бо еси́ нас от вся́каго лука́вства/ и жертв бесо́вских лю́ди мно́ги изба́вил еси́ и всю зе́млю Росси́йскую. Припев: Святы́й равноапо́стольный кня́же Влади́мире, моли́ Бо́га о на́с. Рыда́ет бесо́вское мно́жество и те́мное собо́рище,/ ви́дяще на земли́ попира́емы и́долы, и́же на поги́бель воздви́женныя челове́ком,/ и́хже Бо́жиим повеле́нием, Васи́лие, сокруши́л еси́. Сла́ва Отцу́ и Сы́ну и Свято́му Ду́ху. Ра́дуйся и весели́ся, ра́бе Христо́в,/ кня́же вели́кий и му́дрый, моле́бниче о душа́х на́ших:/ тобо́ю бо мы вси изба́влени есмы́ бесо́вския ле́сти./ Те́мже – ра́дуйся – вопие́м ти. И ны́не и при́сно и во ве́ки веко́в. Ами́нь. Богородичен: Чистото́ю сия́ющи издале́ча,/ Боже́ственное угото́вание Влады́чне, Всепе́тая, бы́вши:/ Ты бо еди́на показа́лася еси́ Ма́ти су́щи Бо́гу/ и рука́ми я́ко Младе́нца Того́ носи́вши. Песнь 6 Ирмос: Жите́йское мо́ре,/ воздвиза́емое зря напа́стей бу́рею,/ к ти́хому приста́нищу Твоему́ прите́к, вопию́ Ти:/ возведя́ от тли живо́т мой,/ Многоми́лостиве. Припев: Святы́й равноапо́стольный кня́же Влади́мире, моли́ Бо́га о на́с. Си́лою Бо́жиею попра́н есть сатана́ душегу́бец и ле́стныя его́ же́ртвы:/ побе́дника бо яви́л нам есть Христо́с, Васи́лия, ве́рнаго кня́зя,/ сокруши́ти и поврещи́ того́ под но́ги на́ша. Припев: Святы́й равноапо́стольный кня́же Влади́мире, моли́ Бо́га о на́с. Спасе́ пре́жде Госпо́дь руко́ю Моисе́овою Изра́иля от рабо́ты,/ То́йже и ны́не руко́ю Васи́лия, ве́рнаго кня́зя,/ всех нас от ле́сти и́дольския спасл есть. Сла́ва Отцу́ и Сы́ну и Свято́му Ду́ху. Досто́йно ти взыва́ем и вопие́м вси:/ ра́дуйся, всече́стне преблаже́нне, тя бо изба́вителя с Бого́м, Васи́лие, и́мамы./ Не пре́зри рабо́в твои́х, но при́сно сохраня́й нас. И ны́не и при́сно и во ве́ки веко́в. Ами́нь. Богородичен: Обрето́хом, Пречи́стая, Тобо́ю спасе́ние, Де́во Препе́тая:/ Его́же жела́ют А́нгели на Небесе́х ви́дети,/ Сей ны́не ви́дится в не́дрех Твои́х Младе́нец, Бог наш. Кондак, глас 8 Подо́бствовав вели́кому апо́столу Па́влу, в седи́нах, всесла́вне Влади́мире,/ вся, я́ко младе́нческая, мудрова́ния, я́же о и́долех тща́ния, оста́вль,/ я́ко муж соверше́нный, украси́лся еси́ Боже́ственнаго Креще́ния багряни́цею,/ и ны́не, Спа́су Христу́ в весе́лии предстоя́,/ моли́ спасти́ся держа́вы Росси́йския нача́льником и мно́жеству владо́мых. Икос Просвети́вый дре́вле Изра́иля Моисе́йским зако́ном,/ просвети́л же еси́ мир явле́нием Твоего́ прише́ствия, Христе́ Бо́же,/ богогла́сныя Твоя́ ученики́ посла́л еси́ пропове́дати по страна́м/ е́же от Де́вы безсе́менное рождество́ Твое́/ и тем повеле́л еси́ крести́ти во И́мя Отца́, и Сы́на, и Свята́го Ду́ха./ Обветша́вшу же ви́дя страну́ Росси́йскую грехо́м,/ Дух Твой посла́л еси́ в крепкоразу́мнаго ду́шу сла́внаго Влади́мира,/ позна́ти Тебе́, Еди́наго от Тро́ицы Христа́ Бо́га,/ и Твои́м Креще́нием просвети́ти избра́нныя Твоя́/ и от Тебе́ поруче́нныя ему́ лю́ди, и привести́ к Тебе́ ве́рою вопию́щия:/ изба́ви Твое́ достоя́ние от сопроти́вных пога́н,/ росси́йския нача́льники и мно́жество владо́мых. Песнь 7 Ирмос: Росода́тельну у́бо пещь/ соде́ла А́нгел/ преподо́бным отроко́м,/ халде́и же опаля́ющее/ веле́ние Бо́жие мучи́теля увеща́ вопи́ти:/ благослове́н еси́, Бо́же оте́ц на́ших. Припев: Святы́й равноапо́стольный кня́же Влади́мире, моли́ Бо́га о на́с. Еле́ны ты но́выя любо́вию извести́лся еси́, внук быв преблаже́нныя О́льги,/ Константи́н же Вели́кий но́вый яви́лся еси́, Христу́, Васи́лие, вопия́:/ благослове́н еси́, Бо́же оте́ц на́ших. Припев: Святы́й равноапо́стольный кня́же Влади́мире, моли́ Бо́га о на́с. Лю́тый льстец двиза́шеся на христиа́ны воева́ти,/ Превели́кий же Госпо́дь в Корсу́не тя просвеща́ет,/ и Креще́нию Боже́ственному сподобля́ет,/ и Ца́рствие Небе́сное тебе́ дарова́л есть. Сла́ва Отцу́ и Сы́ну и Свято́му Ду́ху. Обветша́вшую лесть бесо́вскую прогна́л еси́, я́ко вели́кий Христо́в учени́к,/ обнови́в, просвети́л еси́ всех нас вопи́ти Го́сподеви немо́лчно:/ благослове́н Бог оте́ц на́ших. И ны́не и при́сно и во ве́ки веко́в. Ами́нь. Богородичен: От родо́в Тя всех избра́л есть Бог Преве́чный пре́жде век/ и, в после́дния дни плоть прие́м от Тебе́,/ соверше́н вку́пе яви́ся Бог и Челове́к, Присноде́во. Песнь 8 Ирмос: Из пла́мене преподо́бным ро́су источи́л еси́/ и пра́веднаго же́ртву водо́ю попали́л еси́:/ вся бо твори́ши, Христе́, то́кмо е́же хоте́ти./ Тя превозно́сим во вся ве́ки. Припев: Святы́й равноапо́стольный кня́же Влади́мире, моли́ Бо́га о на́с. От безбо́жных и́долов всех нас изба́вил еси́,/ ко Христу́ же Бо́гу приве́л еси́, о́тче, ве́рных князе́й,/ наказа́теля стад твои́х, Христа́ пою́щих во ве́ки. Припев: Святы́й равноапо́стольный кня́же Влади́мире, моли́ Бо́га о на́с. Константи́н но́вый ты извести́лся еси́ во всей Росси́йстей земли́, блаже́нне Васи́лие:/ ты бо и́мя Христо́во изъясни́л еси́,/ Его́же превозно́сим во ве́ки. Сла́ва Отцу́ и Сы́ну и Свято́му Ду́ху. Царю́ ве́чному ны́не ты предстои́ши и десни́цею Его́ венча́н еси́,/ моли́ся Ему́ за недосто́йныя рабы́ твоя́,/ я́ко да пое́м Его́ и превозно́сим во ве́ки. И ны́не и при́сно и во ве́ки веко́в. Ами́нь. Богородичен: О́блак Сло́ва Ты еси́, Препе́тая, и свеща́ со́лнечная,/ колесни́ца многоце́нная, деви́ческое возвыше́ние, гора́ ту́чная и усыре́нная,/ пребыва́еши Пречи́стая Де́ва Господоимени́тая. Песнь 9 Ирмос: Бо́га/ челове́ком невозмо́жно ви́дети,/ на Него́же не сме́ют чи́ни А́нгельстии взира́ти;/ Тобо́ю бо, Всечи́стая, яви́ся челове́ком/ Сло́во воплоще́нно,/ Его́же велича́юще,/ с Небе́сными во́и Тя ублажа́ем. Припев: Святы́й равноапо́стольный кня́же Влади́мире, моли́ Бо́га о на́с. Сла́док, я́коже фи́никс высо́к израща́емь,/ и, цвет творя́ ма́сличный, ве́тви многопло́дныя,/ ты быва́еши ви́нное израще́ние, ки́сти две созре́лы – му́ченики принося́,/ Рома́на и Дави́да честны́я. Припев: Святы́й равноапо́стольный кня́же Влади́мире, моли́ Бо́га о на́с. Ли́цы князе́й ны́не благоро́дных предстоя́т,/ от Тебе́ благоче́стие нося́ще, с людьми́ ве́рными хва́ляще тя:/ наста́вниче и ско́рый засту́пниче, помина́й всех нас,/ я́ко да в ми́ре тобо́ю живо́т обря́щем. Сла́ва Отцу́ и Сы́ну и Свято́му Ду́ху. Лю́дие Росси́йстии, прииди́те, сни́дитеся в честне́й це́ркви Влади́мира свята́го,/ нарече́ннаго Васи́лия, преблаже́ннаго вели́каго кня́зя, уго́дника Христо́ва пресла́внаго,/ и приими́те живо́т и спасе́ние, благода́ть и ве́лию ми́лость. И ны́не и при́сно и во ве́ки веко́в. Ами́нь. Богородичен: Бо́га, Де́во, Ты родила́ еси́ на земли́,/ во пло́ти соедине́ние бысть Безпло́тное,/ во еди́ней Ипоста́си и во двою́ естеству́,/ да спасе́т всех нас, кла́няющихся ве́рно, я́ко Богоро́дице Пречи́стей. Светилен Свети́льницы, просвети́вше вселе́нную всю благоче́стием и ве́рою,/ вы яви́стеся вои́стинну, боговенча́нне Влади́мире с прама́терию Еле́ною сла́вною./ Вас возлюби́вшаго Христа́ и мы славосло́вим, ди́внаго во святы́х. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Во двою́ во́лю и естеству́, Пренепоро́чная,/ во еди́ной же Ипоста́си ражда́еши Бо́га неизрече́нно,/ нас ра́ди обнища́вшаго до распя́тия хоте́нием/ и дарова́вшаго нам бога́тство Боже́ственное, Богома́ти Де́во.