Молитвы

Минея, 12 Февраля, Канон святителя Глас 8 Песнь 1 Ирмос: Колесницегони́теля фарао́ня погрузи́/ чудотворя́й иногда́/ Моисе́йский жезл, крестообра́зно порази́в/ и раздели́в мо́ре,/ Изра́иля же беглеца́, пешехо́дца спа́се,/песнь Бо́гови воспева́юща. Припев: Святи́телю, о́тче Алекси́е, моли́ Бо́га о на́с. Колесни́цею благода́ти Твое́й, Го́споди, возвы́си на́ша по́мыслы от до́льних на Го́рняя/ и сподо́би восхвали́ти уго́дника Твоего́, святи́теля Алекси́я,/ песнь Тебе́, Бо́гу, воспева́юща. Припев: Святи́телю, о́тче Алекси́е, моли́ Бо́га о на́с. Колесни́цею хода́тайств твои́х/ ум наш, отягче́нный жите́йскими печа́льми, возвы́си от земны́х к Небе́сным/ и наста́ви восхвали́ти тя досто́йно, о́тче Алекси́е,/ песнь побе́дную Бо́гу воспева́юща. Припев: Святи́телю, о́тче Алекси́е, моли́ Бо́га о на́с. Колесни́цу го́рдости ми́ра сего́ превозше́л еси́ смире́нием,/ и, взем крест твой, после́довал еси́ Христу́ добро́тами,/ и, во приста́нище го́рняго селе́ния дости́г,/ песнь Бо́гу побе́дную воспева́еши. Сла́ва Отцу́ и Сы́ну и Свято́му Ду́ху. Колесни́цею доброде́телей, я́ко Илия́ о́гненною, возше́л еси́ на Не́бо,/ отону́дуже моли́ Бо́га низпосла́ти я́ко ми́лоть благода́ть Ду́ха,/ уча́щую ны песнь побе́дную Бо́гу воспева́ти. И ны́не и при́сно и во ве́ки веко́в. Ами́нь. Богородичен: Колесни́ца огнеобра́зная, носи́вшая Бо́га Сло́ва,/ во чре́ве Твое́м воплоще́ннаго,/ моли́ Его́ приле́жно спасти́ся рабо́м Твои́м,/ к Тебе́ притека́ющим и побе́дную песнь Бо́гу воспева́ющим. Песнь 3 Ирмос: Небе́снаго кру́га Верхотво́рче Го́споди,/ и Це́ркве Зижди́телю,/ Ты ме́не утверди́ в любви́ Твое́й,/ жела́ний кра́ю, ве́рных утвержде́ние,/ Еди́не Человеколю́бче. Припев: Святи́телю, о́тче Алекси́е, моли́ Бо́га о на́с. Небе́снаго кру́га и всея́ тва́ри Госпо́дь,/ предве́дый тя, о́тче Алекси́е, бу́дуща па́стыря добра́,/ вве́ри тебе́ па́ству слове́сную, я́ко Еди́н Человеколю́бец. Припев: Святи́телю, о́тче Алекси́е, моли́ Бо́га о на́с. Небе́снаго кру́га возлюби́в Творца́,/ посто́м облегче́н, страсте́й мо́ре преше́л еси́ и, на безстра́стия верх доброде́тельми возше́д,/ Бо́га узре́л еси́, Еди́наго Человеколю́бца. Сла́ва Отцу́ и Сы́ну и Свято́му Ду́ху. Небе́снаго кру́га на высоту́ возше́д Богоразу́мием,/ уви́дел еси́ у́мно та́мо неизрече́нная/ и прия́л еси́ дар чудотворе́ния от Бо́га Человеколю́бца. И ны́не и при́сно и во ве́ки веко́в. Ами́нь. Богородичен: Небе́снаго кру́га Верхотво́рца, хотя́ща роди́тися из Тебе́, Пречи́стая, возвести́ Тебе́ Гаврии́л:/ ра́дуйся, Де́во, Госпо́дь с Тобо́ю, Еди́н Человеколю́бец. Седален, глас 4 Благово́нною сло́ва Бо́жияго па́житию/ слове́сную па́ству Христо́ву Богоуго́дно воспита́нную,/ па́стырским Богодухо́вным исправле́ния жезло́м/ на пра́вую спасе́ния стезю́ путево́дствив я́ко до́брый па́стырь,/ удосто́ился еси́ нетле́нну ве́чныя жи́зни мзду восприя́ти/ в Го́рнем Сио́не от Пастыренача́льника Христа́ Бо́га./ Его́же моли́, досточу́дне Алекси́е,/ нам, твои́м о́вцам слове́сным, сохрани́тися от неви́димых волко́в хи́щных. Песнь 4 Ирмос: Ты моя́ кре́пость, Го́споди,/ Ты моя́ и си́ла,/ Ты мой Бог, Ты мое́ ра́дование,/ не оста́влъ не́дра О́тча/ и на́шу нищету́ посети́в./ Тем с проро́ком Авва́кумом зову́ Ти:/ си́ле Твое́й сла́ва, Человеколю́бче. Припев: Святи́телю, о́тче Алекси́е, моли́ Бо́га о на́с. Ты моя́ кре́пость, Го́споди, Ты моя́ и си́ла, – вопия́, о́тче Алекси́е, прия́л еси́ дар/ теле́сныя неду́ги цели́ти и лука́выя ду́хи отгоня́ти от зову́щих Христу́:/ си́ле Твое́й сла́ва, Человеколю́бче. Припев: Святи́телю, о́тче Алекси́е, моли́ Бо́га о на́с. Ты еси́ свети́ло Росси́йския земли́ и гра́ду Москве́ стена́ неруши́ма,/ на враги́ же победи́тель,/ и христоимени́тым людем во бранех посо́бник,/ зову́щим Христу́/ си́ле Твое́й сла́ва, Человеколю́бче. Сла́ва Отцу́ и Сы́ну и Свято́му Ду́ху. Ты Богосло́вил еси́ Едини́цу несозда́нную,/ в Трие́х Лицех су́щую, неслива́ему же и неразде́льну,/ воумля́я па́ству твою́, о́тче Алекси́е, непреста́нно зва́ти:/ си́ле Твое́й сла́ва, Человеколю́бче. И ны́не и при́сно и во ве́ки веко́в. Ами́нь. Богородичен: Ты моя́ кре́пость еси́ вои́стинну и спасе́ние, Богоро́дице,/ и на Тя наде́жду мою́ возложи́х,/ спаси́ мя, Де́во Чи́стая, и укрепи́ ро́ждшемуся из Тебе́ звати:/ си́ле Твое́й сла́ва, Человеколю́бче. Песнь 5 Ирмос: Вску́ю мя отри́нул еси́/ от лица́ Твоего́, Све́те Незаходи́мый,/ и покры́ла мя есть чужда́я тьма, окая́ннаго?/ но обрати́ мя и к све́ту за́поведей Твои́х/ пути́ моя́ напра́ви, молю́ся. Припев: Святи́телю, о́тче Алекси́е, моли́ Бо́га о на́с. Вску́ю проти́внии ополча́ются на ны, иму́щия тя кре́пка побо́рника?/ Ты, о́тче Алекси́е, де́рзость их низложи́ и во́инство на́ше моли́твою твое́ю стра́шно им покажи́. Припев: Святи́телю, о́тче Алекси́е, моли́ Бо́га о на́с. Вску́ю уныва́ем, согнета́емии мно́жеством печа́лей,/ иму́ще ско́рбных уте́шителя – святи́теля Алекси́я,/ избавля́юща ны от бед и скорбе́й на́ших/ и от враг ви́димых же и неви́димых? Сла́ва Отцу́ и Сы́ну и Свято́му Ду́ху. Вску́ю, о́тче Алекси́е, теле́сныя не́мощи нахо́дят на ны, и беды́ окружа́ют ны,/ врача́ тя иму́щия в боле́знех и уте́шителя в ско́рбех?/ изми́ у́бо ны от сих моли́твами твои́ми. И ны́не и при́сно и во ве́ки веко́в. Ами́нь. Богородичен: Вску́ю обурева́ют мя во́лны страсте́й,/ ко́рмчия Христа́ ро́ждшая, Де́во Всенепоро́чная?/ Ты Его́ моли́ сих исхи́тити мя/ и к стези́ за́поведей Его́ пути́ моя́ упра́вити, молю́ся. Песнь 6 Ирмос: Очи́сти мя, Спа́се,/ мно́га бо беззако́ния моя́/ и из глубины́ зол возведи́, молю́ся ,/ к Тебе́ бо возопи́х, и услы́ши мя,/ Бо́же спасе́ния моего́. Припев: Святи́телю, о́тче Алекси́е, моли́ Бо́га о на́с. Очи́сти ны, Спа́се, от мно́гих грехо́в на́ших/ и боле́зни отжени́ моли́твами святи́теля Твоего́ Алекси́я,/ и мир Церква́м Твои́м подаждь и соедине́ние. Припев: Святи́телю, о́тче Алекси́е, моли́ Бо́га о на́с. Очи́сти сердца́ на́ша и мы́сли хода́тайствы твои́ми, о́тче,/ и, прии́м от нас приноси́мыя тебе́ моли́твы,/ испроси́ у Христа́ обрести́ нам велию ми́лость. Сла́ва Отцу́ и Сы́ну и Свято́му Ду́ху. Очи́стив се́рдце твое́, о́тче Алекси́е,/ и трость языка́ твоего́ изостри́в Ду́хом,/ написа́л еси́ в сердца́х ве́рных сло́во Богоразу́мия уче́ньми твои́ми. И ны́не и при́сно и во ве́ки веко́в. Ами́нь. Богородичен: Очище́нну Тя Ду́хом, Всенепоро́чная, Арха́нгел Гаврии́л позна́в,/ зовяще Тебе́:/ ра́дуйся, Де́во Мари́е, па́дших воззва́ние и кля́твы разреше́ние. Кондак, глас 8 Боже́ственнаго и пречестна́го святи́теля Христо́ва,/ но́ваго чудотво́рца Алекси́я,/ ве́рно вси пою́ще, лю́дие, любо́вию да ублажи́м, я́ко па́стыря вели́каго,/ служи́теля же и учи́теля прему́дра земли́ Росси́йстей./ Днесь, в па́мять его́ прите́кше,/ ра́достно возопие́м песнь Богоно́сному:/ я́ко име́я дерзнове́ние к Бо́гу,/ многообра́зных нас изба́ви обстоя́ний, да зове́м ти:/ ра́дуйся, утвержде́ние гра́ду на́шему. Икос Ди́внаго и пречестна́го чудотво́рца ви́дяще чудеса́,/ исцеле́ния подава́юща всем, от души́ с ве́рою притека́ющим,/ и Христо́вы лю́ди неви́димо посеща́юща,/ и зе́млю Росси́йскую просвеща́юща,/ ра́достно от души́ вси, вку́пе соше́дшеся к раце моще́й его́,/ слышаще же и ви́дяще чуде́с мно́жество и исто́чник исцеле́ний неисчерпа́емь,/ чи́стыми сердцы́ и просвеще́нными ра́зумы, я́ко благоуха́нно кади́ло,/ плоды́ доброде́тельны от души́ принося́ще/ и ра́дующеся, воззове́м ему́, глаго́люще:/ ра́дуйся, о́тче, честны́й наш учи́телю,/ я́ко прия́л еси́ трудо́в твои́х воздая́ние/ и в Вы́шних водворя́ешися, о нас моля́ Человеколю́бца Бо́га./ Чуде́с дар прия́л еси́,/ земли́ Росси́йстей оте́ц и учи́тель,/ и святи́телем изря́дная похвала́,/ и во́инству на́шему во бране́х посо́бник кре́пок./ Ра́дуйся, святи́телю Алекси́е, гра́ду на́шему утвержде́ние. Песнь 7 Ирмос: От Иуде́и доше́дше, о́троцы/ в Вавило́не иногда́,/ ве́рою Тро́йческою пла́мень пе́щный попра́ша, пою́ще:/ отце́в Бо́же, благослове́н еси́. Припев: Святи́телю, о́тче Алекси́е, моли́ Бо́га о на́с. От Иуде́и отроко́м поревнова́в, огнепа́льныя стра́сти угаси́л еси́,/ Христу́ при́сно поя́, блаже́нне Алекси́е:/ отце́в Бо́же, благослове́н еси́. Припев: Святи́телю, о́тче Алекси́е, моли́ Бо́га о на́с. От Иуде́и о́троки подража́л еси́,/ живу́щею бо в тебе́ Ду́ха благода́тию просве́щъся,/ воспе́л еси́ Христу́:/ отцев Бо́же, благослове́н еси́. Сла́ва Отцу́ и Сы́ну и Свято́му Ду́ху. От Иуде́и отроко́м ревну́ем,/ ви́дяще мо́щи твоя́ чудоточа́щия, любо́вию распаля́еми, Христу́ зове́м:/ отцев Бо́же, благослове́н еси́. И ны́не и при́сно и во ве́ки веко́в. Ами́нь. Богородичен: От Иуде́и о́троцы Твое́ прообразиша Рождество́, Де́во Всечи́стая,/ огнь бо в пещи́ не опали́ их, пою́щих:/ отце́в Бо́же, благослове́н еси́. Песнь 8 Ирмос: Царя́ Небе́снаго,/ Его́же пою́т вои А́нгельстии,/ хвали́те и превозноси́те во вся ве́ки. Припев: Святи́телю, о́тче Алекси́е, моли́ Бо́га о на́с. Царя́ Небе́снаго хвали́ти учи́л еси́ па́ству твою́, зовы́й:/ по́йте и превозноси́те Христа́ во ве́ки. Припев: Святи́телю, о́тче Алекси́е, моли́ Бо́га о на́с. Царя́ Небе́снаго умоли́ о нас, ча́дех твои́х,/ ра́достно пою́щих и превознося́щих Его́ во ве́ки. Сла́ва Отцу́ и Сы́ну и Свято́му Ду́ху. Царю́ Небе́сному предстоя́, па́ству твою́ назира́й,/ пою́щую и превознося́щую Христа́ во ве́ки. И ны́не и при́сно и во ве́ки веко́в. Ами́нь. Богородичен: Царя́ Небеснаго родила́ еси́, Дево,/ Его́же Ангели пою́т и превозно́сят во вся ве́ки. Песнь 9 Ирмос: Вои́стиину Богоро́дицу,/ Тя испове́дуем,/ спасе́ннии Тобо́ю, Де́во Чи́стая,/ с Безпло́тными ли́ки Тя велича́юще. Припев: Святи́телю, о́тче Алекси́е, моли́ Бо́га о на́с. Вои́стинну свет ми́ру яви́лся еси́, светя́щ добро́детельми,/ и па́стырь изря́ден твоего́ ста́да был еси́,/ Христа́ велича́юща. Припев: Святи́телю, о́тче Алекси́е, моли́ Бо́га о на́с. Вои́стинну ве́мы тя, о́тче, чудотво́рца вели́ка,/ точа́ща мно́га чудеса́ ве́рно к тебе́ приходя́щим/ и Христа́ велича́ющим. Сла́ва Отцу́ и Сы́ну и Свято́му Ду́ху. Вои́стинну светло́ па́мять пра́зднуют святи́теля Алекси́я/ архиере́и, и свяще́нницы, мона́си и вси лю́дие,/ Христа́ Бо́га велича́юще. И ны́не и при́сно и во ве́ки веко́в. Ами́нь. Богородичен: Вои́стинну Ты еси́ христиа́ном спасе́ние:/ Христа́ бо родила́ еси́, спаса́ющаго ны,/ Де́ву Чи́сту Тя велича́ющия. Светилен Благода́ть Свята́го Ду́ха, все́льшаяся в тя, святи́теля́ тя пока́за,/ Христо́с же ти вручи́ па́ству Свою́ па́ствити на па́житех духо́вных,/ Его́же ра́ди потща́лся еси́ наставля́ти лю́ди,/ и ны́не на Небесе́х, ра́дуяся, живе́ши. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: По Бо́зе упова́ние иму́ще на Тя, Пречи́стая Богоро́дице,/ мо́лим Ти ся,/ ко и́же из Тебе́ Ро́ждшемуся мольба́ми/ невреди́мы нас до конца́ сохрани́.

Минея, 14 Августа, Кано́н предпра́зднства Глас 5 Песнь 1 Ирмос: Коня́ и вса́дника в мо́ре Че́рмное/ сокруша́яй бра́ни мы́шцею высо́кою/ Христос истрясе́, Изра́иля же спасе́,/ побе́дную песнь пою́ща. Припев: Пресвята́я Богоро́дице, спаси́ на́с. Гро́бу, Де́ву прие́мшу, присту́пим, ве́рнии,/ благово́ния боже́ственна прия́ти тща́щеся:/ в сем бо изли́лся Мирополо́жницы дыха́ющее благово́ние, ду́ши благоуха́ющее. Припев: Пресвята́я Богоро́дице, спаси́ на́с. Взя́тся Сио́н из горы́, Сио́н одушевле́нный,/ и почи́ во гра́де Гефсима́нии, я́ко одушевле́н,/ Бо́га Безсме́ртнаго прие́мши, в не́дрех нетле́нных почи́ти. Сла́ва Отцу́ и Сы́ну и Свято́му Ду́ху. Трубы́ возшуме́вше Богоно́сных му́жей,/ воззови́те вельми́ апо́стольская уста́:/ Си́лы, возми́те врата́, приими́те Цари́цу в лу́чшая. И ны́не и при́сно и во ве́ки веко́в. Ами́нь. Сме́рть ка́ко подъя́т, Живота́ присносу́щнаго я́ве ро́ждшую па́че естества́, Всенепоро́чную?/ Но, сию отри́нув,/ Влады́ка преста́ви Тя к прия́тию Небе́сному. Песнь 3 Ирмос: Водрузи́вый на ничесо́мже зе́млю повеле́нием Твои́м/ и пове́сивый неодержи́мо тяготе́ющую/ на недви́жимем, Христе́, ка́мени за́поведей Твои́х,/ Це́рковь Твою́ утверди́, Еди́не Бла́же и Человеколю́бче. Припев: Пресвята́я Богоро́дице, спаси́ на́с. Пе́сни надгро́бныя ны́не возсле́м Чисте́й, Зижди́теля Богороди́тельнице,/ и со Безпло́тными во́инствы одр живоно́сный окружи́м, ра́дующеся,/ я́ко престо́л Боже́ственный Святы́й. Сла́ва Отцу́ и Сы́ну и Свято́му Ду́ху. Лежа́щу и просте́рту ви́дяще, очи́ смежа́щу,/ живопода́тельный, Боже́ственный и при́сный исто́чник,/ прииди́те, ве́рными сердцы́ сле́зы точа́ще,/ прикосне́мся Сея́ нетле́нному телеси́. И ны́не и при́сно и во ве́ки веко́в. Ами́нь. Боже́ственное и благоро́дное Бо́жие жили́ще, седа́лище вои́стинну/ и град одушевле́н всех Царя́ вои́стинну,/ пода́ждь всех согреше́ний на́ших па́мятию Твое́ю оставле́ние/ и от бед спаси́. Седален, глас 4 Де́вы отрокови́цы, предвоспо́йте,/ ма́тери, похвали́те,/ и вси воспо́йте песнь происхо́дную, успе́ние Де́вы и Ма́тере Госпо́дни/ пе́сньми богокра́сными предсоверша́юще боже́ственне:/ преставля́ется бо сла́вно к Небе́сным. Песнь 4 Ирмос: Боже́ственное Твое́ разуме́в истоща́ние прозорли́во,/Авваку́м, Христе́, со тре́петом вопия́ше Тебе́:/ во спасе́ние люде́й Твои́х,/ спасти́ пома́занныя Твоя́ прише́л еси́. Припев: Пресвята́я Богоро́дице, спаси́ на́с. Небе́снии ли́цы веселя́тся и уготовля́ются Бо́жию Чи́стую Ма́терь прия́ти,/ Цари́цу все́ми тва́рьми благоче́стно госпо́дствующую. Припев: Пресвята́я Богоро́дице, спаси́ на́с. Да уклоня́тся возду́шнии ду́си,/ да отсту́пит же са́мый мироде́ржец,/ да па́дает посра́млен, ви́дя возноша́ему Бо́жию Ма́терь. Сла́ва Отцу́ и Сы́ну и Свято́му Ду́ху. Не ктому́ о́бразно в гада́ниих, свяще́нники ковче́г заве́та носи́м есть:/ святы́ми апо́столы вои́стинну Бо́жия Ма́ти носима есть. И ны́не и при́сно и во ве́ки веко́в. Ами́нь. Усну́вши в боже́ственное поко́ище,/ почи́ла еси́ в жи́зненных сокро́вищах немину́ющих,/ Голуби́це Соломо́ня, добра́ же, и кра́сна, и всечестна́. Песнь 5 Ирмос: Одея́йся све́том, я́ко ри́зою,/ к Тебе́ у́тренюю и Тебе́ зову́:/ ду́шу мою́ просвети́ омраче́нную, Христе́,/ я́ко Еди́н Благоутро́бен. Припев: Пресвята́я Богоро́дице, спаси́ на́с. Чи́стое Ду́ха Пресвята́го боже́ственное селе́ние,/ на Сина́йстей горе́ быв, дохну́,/ и всю тварь па́че естества́ просвети́. Сла́ва Отцу́ и Сы́ну и Свято́му Ду́ху. Всего́ Боже́ства была́ еси́ жили́ще,/ те́мже Тя Божество́ всю, Ма́ти, до конца́ преста́ви,/ от земли́, Богороди́тельнице, к Небеси́ прехо́дну. И ны́не и при́сно и во ве́ки веко́в. Ами́нь. Иису́с Пребоже́ственный сла́вы Госпо́дь,/ от Твоего́ чре́ва рожде́йся за милосе́рдие,/ Сам Тя преста́ви от земли́, Богома́ти, с душе́ю и те́лом. Песнь 6 Ирмос: Неи́стовствующееся бу́рею душетле́нною,/ Влады́ко Христе́, страсте́й мо́ре укроти́/ и от тли возведи́ мя,/ я́ко Благоутро́бен. Припев: Пресвята́я Богоро́дице, спаси́ на́с. Со А́нгелы теце́м,/ со Арха́нгелы же, и Властьми́, и Нача́лы,/ и Престо́лы, и Си́лами в Сио́н, вели́кое чу́до у́зрим. Сла́ва Отцу́ и Сы́ну и Свято́му Ду́ху. Яже Живота́ Роди́тельница,/ ка́ко подъя́т сме́рть тле́нну, убежа́вши вся́кия тли?/ Но вои́стинну Твоя́ па́че естества́, Чи́стая Де́во, та́инства. И ны́не и при́сно и во ве́ки веко́в. Ами́нь. Сио́няне ели́цы, свещи́ возжжи́те,/ све́том Обложе́нную, прииди́те, усря́щем в Гефсима́нии/ и Си́ю пе́сньми проводим. Кондак, глас 4 В сла́вней па́мяти Твое́й/ вселе́нная, невеще́ственным Ду́хом испещре́на,/ у́мно с весе́лием зове́т Тебе́:/ ра́дуйся, Де́во,/ христиа́н похвало. Икос И́же на о́блацех све́тло от всех коне́ц/ собра́вый Своя́ боже́ственныя апо́столы к те́лу Твое́му, Чи́стая,/ показа́ Тя всем, Богоро́дицу,/ и стра́шен черто́г преукра́шен, Бог и Сын Твой быв,/ взем ду́шу Твою́ на ру́ку пречи́стую, положи́л есть в рай:/ та́мо бо живо́тное есть дре́во,/ от него́же я́дше, ме́ртвеннии безсме́ртие обрето́ша Тобо́ю./ Те́мже и вопие́м Тебе́:/ ра́дуйся, Де́во, христиа́н похвало́. Песнь 7 Ирмос: Превозноси́мый отце́в Госпо́дь/ пла́мень угаси́, о́троки ороси́,/ согла́сно пою́щия:/ Бо́же, благосло́вен еси́. Припев: Пресвята́я Богоро́дице, спаси́ на́с. Свяще́нничестии собо́ри, люде́й составле́ния,/ отрокови́цы, вся де́вы, лику́юще, воспо́йте Де́вы преставле́ние боже́ственное. Сла́ва Отцу́ и Сы́ну и Свято́му Ду́ху. Зако́на и благода́ти лу́чшии,/ Богороди́тельницы успе́ние хвали́те, пою́ще, согла́сно воспева́юще:/ Бо́же, благослове́н еси́. И ны́не и при́сно и во ве́ки веко́в. Ами́нь. В Сио́н Пречи́стая преставля́ется днесь,/ святы́х во свята́я, гора́ свята́я и вели́кая, Е́йже вопие́м:/ ра́дуйся, Пренепоро́чная. Песнь 8 Ирмос: Тебе́, Вседе́телю,/ в пещи́ о́троцы, всеми́рный лик спле́тше, поя́ху:/ дела́ вся́кая, Го́спода по́йте/ и превозноси́те во вся ве́ки. Припев: Пресвята́я Богоро́дице, спаси́ на́с. Цари́це всех жен, Де́во,/ мольбу́ принеси́ Христу́ о соверша́ющих любо́вию па́мять Твою́ си́ю/ и превознося́щих во вся ве́ки. Сла́ва Отцу́ и Сы́ну и Свято́му Ду́ху. Я́ко светови́дно, освяще́нное добро́тою Божества́ лице́ Твое́, Пренепоро́чная,/ сла́вою сия́ющее боже́ственнаго де́вства,/ преукраше́ннаго во вся ве́ки. И ны́не и при́сно и во ве́ки веко́в. Ами́нь. Глаго́лати не могу, изумева́юся, и трепе́щу, и весьма́ соску́товаюся, Твоя́ превели́кая,/ но, любо́вь, Де́во, зря́щи,/ Боже́ственными возмзди́ дарова́нии непреста́нно. Песнь 9 Ирмос: Иса́ие, ликуй,/ Де́ва име́ во чре́ве и роди́ Сы́на Емману́ила,/ Бо́га же и Челове́ка, Восто́к имя Ему́,/ Его́же велича́юще, Де́ву ублажа́ем. Припев: Пресвята́я Богоро́дице, спаси́ на́с. Бла́гоже, бла́гоже Ты укра́шена, Неве́сто, Богома́ти Де́во:/ о Тебе́ бо поползнове́ние испра́вися Ада́мово/ и Е́вино побежде́ние всегуби́тельное./ Тем Тя вси пе́сньми непреста́нно велича́ем. Припев: Пресвята́я Богоро́дице, спаси́ на́с. Сла́ву по достоя́нию Тебе́ Бог подава́ет, я́ко Влады́ка Твой, Де́во,/ мы же что Тебе́ принесе́м, худи́и?/ Но приими́ то́чию усе́рдие/ и Тя любо́вию чту́щих, я́ко Богоро́дицу, сохраня́й. Сла́ва Отцу́ и Сы́ну и Свято́му Ду́ху. Я́коже Вы́шний, соше́д, про́йде из боку Твое́ю, Де́во,/ нас посети́л есть, из Тебе́, Богоневе́сто,/ подо́бящися ему́, посети́ от Небе́сных черто́г певцы́ Твоя́ па́мятию Твое́ю. И ны́не и при́сно и во ве́ки веко́в. Ами́нь. Побе́ду правосла́вному во́инству на́шему пода́ждь,/ усе́рдно иму́щему честно́е Твое́ погребе́ние во утвержде́ние при́сное/ и почита́ющему па́че па́мять Твою́, Богома́ти, враги́ покаря́ющи. Светилен А́нгели и па́стыри поя́ху рождество́ Твое́ пе́рвее,/ и ны́не а́нгельстии чи́ни, и апо́стольский лик, и всяк язы́к, Де́во,/ успе́ние Твое́ пою́т. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Твоего́ честна́го успе́ния па́мять пресве́тлую торжеству́юще,/ любо́вию воспева́ем, Богоро́дице:/ Ты же, я́ко Ма́ти Пречи́стая,/ к Сы́ну отходя́щи в сла́ве Твое́й и Го́споду,/ о христиа́нех моли́, ве́рою Тя воспева́ющих.

Во успении твоем обретоша на телеси твоем сокровище некрадомое:/ два креста и тяжчайшая железа, еже есть вериги,/ постом и молитвами Богу угодил еси, святителю Филиппе,/ моли Христа Бога о всех нас.

Православия наставника и истины провозвестника,/ златоустаго ревнителя, Российскаго светильника,/ Филиппа премудраго восхвалим,/ пищею словес своих разумно чада своя питающа:/ той бо языком хваления пояше,/ устнама же пение вещаше,// яко таинник Божия благодати.

Глас 2 Пе́снь 1. Ирмо́с: Гряди́те, лю́дие, пои́м пе́снь Христу́ Бо́гу, разде́льшему мо́ре и наста́вльшему лю́ди, я́же изведе́ из рабо́ты еги́петския, я́ко просла́вися. Припев: Святи́и апóстоли, моли́те Бо́га о на́с. Ликоходя́ ра́достно небе́сная, священноде́лателю, селе́ния, благода́ть пода́ждь ми́, святу́ю твою́ па́мять боже́ственно воспева́ющему: ты́ бо просла́вился еси́. Струя́ми твои́х слове́с сердца́ напои́в, де́лати небе́сная, блаже́нне, разуме́ния пригото́вал еси́ ве́рою, апо́столе Филимо́не, досточу́дне. Священноде́йствуя свяще́нное Ева́нгелие, сия́нии Ду́ха ду́ши просвети́л еси́, изба́вив от тмы́ идолонеи́стовства, му́дре апо́столе. Богоро́дичен: Тя́ проро́ков дре́вле боже́ственное собра́ние многови́дными, Чи́стая, о́бразы издале́ча проначерта́, и́стинно еди́ну Влады́ку поро́ждшую. Пе́снь 3. Ирмо́с: Утверди́ на́с в Тебе́, Го́споди, дре́вом умерщвле́й гре́х, и стра́х Тво́й всади́ в сердца́ на́с, пою́щих Тя́. Стра́сти Христо́вы и воста́ние пропове́дуя, воздви́гнул еси́ я́ко от гро́ба неве́рия и ме́ртвости челове́ки, Филимо́не, достосла́вне. Они́сима боже́ственнаго и Филимо́на, Апфи́ю и Архи́ппа, зве́зды, просвеща́ющия концы́, свяще́нными песнопе́ньми восхва́лим. Ума́ зри́тельное очи́стивше, Боже́ственнаго получи́сте боговиде́ния и сердца́ возврати́сте заблу́ждшия к зна́нию, свяще́ннейшии. Богоро́дичен: Я́вльшися, Чи́стая и Всенетле́нная, прия́ла еси́ во утро́бе Бо́га Сло́ва, очи́стившаго естество́ на́ше, оскве́рншееся, Де́во, грехопаде́нием. Седа́лен, гла́с 8 Ра́лом сло́ва доброде́лая олядене́вшая сердца́, священноде́телю, Боже́ственное позна́ние де́лати пригото́вал еси́ и, низложи́в и́дольския хра́мы, созда́л еси́ це́ркви, блаже́нне, в сла́ву Созда́теля твоего́. Те́мже, соше́дшеся, святу́ю твою́ па́мять, Филимо́не, сла́вим, священнопросвеща́еми, и согла́сно вопие́м ти́: моли́ Христа́ Бо́га грехо́в оставле́ние дарова́ти чту́щим любо́вию святу́ю па́мять твою́. Сла́ва, и ны́не: Да ра́дуется Дави́д песнопи́сец, и да ликовству́ет Иоаки́м со А́нною, я́ко пло́д святы́й из ни́х произы́де, Мари́я светоно́сная, Боже́ственная свеща́, и ра́дуется, входя́щи в хра́м, Ю́же и, зря́, благослови́ Варахи́ин сы́н и, ра́дуяся, взыва́ше: ра́дуйся, Чу́до всеми́рное. Пе́снь 4. Ирмо́с: Пою́ Тя, слу́хом бо, Го́споди, услы́шах и ужасо́хся: до мене́ бо и́деши, мене́ ища́, заблу́ждшаго. Те́м мно́гое Твое́ снизхожде́ние, е́же на мя́, прославля́ю, Многоми́лостиве. Ве́трилом креста́ вперя́емь, преплы́л еси́ небу́рно лю́тую пучи́ну искуше́ний жития́, блаже́нне, мно́гия упра́вив пла́вающия к спасе́ния приста́нищу Боже́ственною благода́тию. Свети́ла светоза́рная предлага́ет боже́ственный гра́д Колосса́йский: свяще́ннаго Архи́ппа, Филимо́на же и Апфи́ю я́ве и Они́сима сла́внаго, просвеща́ющия ми́ра концы́. Боже́ственная река́ воскипе́ в се́рдце твое́м, богоглаго́ливе, и ре́ки уста́ви, и тече́ния безбо́жия, ду́ши же, иста́явшия зно́ем неве́дения, напои́ благода́тию, сла́вне. Богоро́дичен: Пою́ Тя и́стинно, Всепе́тая, препе́таго Бо́га Сло́ва преесте́ственно роди́вшую, и молю́ся смире́нныя моея́ души́ исцели́ти неду́ги, я́ко блага́ су́щи, Богоневе́стная. Пе́снь 5. Ирмо́с: Све́та Пода́телю и веко́в Тво́рче, Го́споди, во све́те Твои́х повеле́ний наста́ви на́с: ра́зве бо Тебе́, ино́го Бо́га не зна́ем. Неду́гующия ви́дя острупле́нием злы́х, сла́вне, и де́тельным твои́м сло́вом исцели́л еси́, Филимо́не, иногда́, идолонеи́стовством лю́те бе́дствующия. Спаси́тельныя пути́ заблу́ждшим лю́те показа́л еси́, я́ко неле́стный путево́ждь, Филимо́не, еди́н пу́ть Христа́ возлюби́ти ди́вно путево́дствил еси́. Пое́т све́тлый пра́здник Колосса́йская честна́я дне́сь ра́достно Христо́ва Це́рковь, боже́ственнаго Архи́ппа и богоглаго́ливаго чту́ще Филимо́на. Богоро́дичен: Влады́чице, спаси́ ны, обурева́емыя лю́тым волне́нием искуше́ний, и некро́тких ва́рварских нахожде́ний, и де́монских лю́тых наве́тов. Пе́снь 6. Ирмо́с: В бе́здне грехо́вней валя́яся, неизсле́дную милосе́рдия Твоего́ призыва́ю бе́здну: от тли́, Бо́же, мя́ возведи́. Не́бо яви́лся еси́, все́м веща́я сла́ву спаси́тельную тебе́ Просла́вльшаго и ученико́м Сочета́вшаго седмодеся́тным, му́чениче всебога́те. Устрани́вся оте́чества, стра́нным твои́м сло́вом устрани́вшияся Бо́га улови́л еси́ и Сио́на жи́тели, иера́рше Филимо́не, показа́л еси́. Доброде́тельми свяще́нными сия́ющи и све́тло Бо́гу утожда́ющи, к небесе́м востекла́ еси́, и со а́нгелы, Апфи́я, лику́ющи. Богоро́дичен: Воплоща́ется Сло́во во чре́ве Твое́м и за благоутро́бие познава́ется Челове́к, да Бо́га челове́ка соде́лает, Отрокови́це Всенепоро́чная. Конда́к, гла́с 2. Я́ко зве́зды всесве́тлыя, просвеща́ющия концы́, апо́столы Христо́вы восхва́лим, Филимо́на сла́внаго, и Архи́ппа свяще́ннаго, и Они́сима, и Ма́рка, и Аполло́са, с ни́миже и Апфи́ю всему́друю, вопию́ще: моли́те непреста́нно о все́х на́с. Пе́снь 7. Ирмо́с: О́бразу злато́му на по́ле Деи́ре служи́му, трие́ Твои́ о́троцы небрего́ша безбо́жнаго веле́ния, посреде́ же огня́ вве́ржени, ороша́еми, поя́ху: благослове́н еси́, Бо́же оте́ц на́ших. Кра́сны твоя́, Филимо́не, бы́вше честны́я но́зе, стези́ кро́тко ше́ствующия Ева́нгелия, и все́м ра́тным ми́р свяще́нный возвеща́ющия, и де́монская стремле́ния запина́ющия. Твои́х слове́с све́том Га́зян глубо́кая тма́ прогна́ся, священноде́латель я́ко свяще́ннейший в си́х бы́л еси́ изя́щнейший, вся́ упа́с и научи́в пе́ти, апо́столе: благослове́н Бо́г оте́ц на́ших. В пе́рвых твои́х приобщи́ся до́брых Га́зский гра́д: того́ бо яви́лся еси́ первопресто́льник и иера́рх спаси́тельный, я́ко священновеща́тель, Филимо́не, вопи́ти повелева́я: благослове́н Бо́г оте́ц на́ших. Возлюби́в Христа́, возлюби́вшаго земны́я за благоутро́бие, любо́вию врага́ ненави́димыя су́ща, люби́мичи соде́ял еси́, Филимо́не, Бо́га воспева́ющия: благослове́н Бо́г оте́ц на́ших. Богоро́дичен: Кре́пость смире́нных и све́щник све́тлый, боже́ственная трапе́за, гора́ и две́рь непрохо́дная, престо́л Бо́жий и пала́та, же́зл же Ааро́нов и ста́мна златоза́рна су́щи, Христа́, Ма́нну жи́зни, Де́во, нося́щи. Пе́снь 8. Ирмо́с: В пе́щь о́гненную ко отроко́м евре́йским снизше́дшаго и пла́мень в ро́су прело́жшаго Бо́га, по́йте дела́ я́ко Го́спода, и превозноси́те во вся́ ве́ки. Сло́во, я́ко свети́льник све́тлый возже́н, в твое́м се́рдце нося́, пре́жде угаше́нныя и во тме́ мно́зей лежа́щия неве́дения, сла́вне, к богозна́ния воздви́гл еси́ дню́. Свяще́нное твое́ к Бо́гу изше́ствие свяще́нными возвели́чися провожде́ньми апо́столов и безпло́тных умо́в, и́хже име́л еси́ на земли́ житие́, я́ко священнотаи́нник, Филимо́не богоглаго́ливе. Ми́ро сладково́нное я́ве иска́пав свяще́нных чуде́с, блаже́нне, облагово́нил еси́ смы́слы и помышле́ния благочести́вым и стра́сти злосмра́дныя отгна́л еси́ превознося́щих Христа́, му́дре Филимо́не. Я́коже зве́зды све́тлыя тве́рди, Це́ркве при́сно сия́юще, ку́пно Архи́пп чу́дный, Апфи́я, Филимо́н и Они́сим помышле́ния на́ша просвеща́ют. Богоро́дичен: Но́в ра́й на́м чре́во Твое́ и́стинно, Чи́стая, яви́ся, жи́зни Дре́во возраща́я и уме́ршия плодо́м Дре́ва па́ки в ра́й, оживотвори́вши, введе́, Богоро́дице. Пе́снь 9. Ирмо́с: От Бо́га Бо́га Сло́ва, неизрече́нною му́дростию прише́дшаго обнови́ти Ада́ма, я́дию в тле́ние па́дшаго лю́те, от Святы́я Де́вы неизрече́нно воплоти́вшагося на́с ра́ди, ве́рнии, единому́дренно пе́сньми велича́ем. Со свяще́ннейшим ли́ком свяще́нных апо́стол подо́бно жи́тельствуеши на небесе́х, Боже́ственным прича́стием обожа́емь, и све́том сия́я неизрече́нным, и ра́достию духо́вною, Филимо́не, при́сно исполня́емь. Я́ко чу́дный тво́й нра́в, я́ко добро́ и красно́ житие́ твое́, я́ко пресла́вно и успе́ние твое́, блаже́нне апо́столе, я́ко све́тлый де́нь, в не́мже оста́вив, я́же на земли́, на небе́сныя кру́ги возше́л еси́, веселя́ся. Дне́сь весели́тся вся́ Христо́ва Це́рковь, пра́зднственную ра́дость духо́вно соста́вльши в па́мяти твое́й, ю́же непоколе́блену спаси́ твои́ми к Спа́су и Бо́гу благоприя́тными моли́твами, Филимо́не свяще́ннейше. Ра́ка моще́й твои́х врачева́ний ка́пли источа́ет приходя́щим свяще́нно, блаже́нне Филимо́не апо́столе, неду́ги уставля́ет и все́х ду́ши освяща́ет, боже́ственную твою́ па́мять пра́зднующих всегда́. Богоро́дичен: Но́сиши Нося́щаго вся́ и пита́еши Пита́ющаго, о́браз Рождества́ ника́коже ве́дящи, Всенепоро́чная, па́че ума́ Твое́ чу́до, а́нгелы ужаса́ющее и челове́ки, ве́дущия Тя́ еди́ну Де́ву Богома́терь.

Минея, 13 Августа, Кано́н святителя Глас 8 Песнь 1 Ирмос: Во́ду проше́д, я́ко су́шу,/ и еги́петскаго зла избежа́в,/ Изра́ильтянин вопия́ше:/Изба́вителю и Бо́гу на́шему пои́м. Припев: Святи́телю о́тче Ти́хоне, моли́ Бо́га о на́с. Святи́телю Христо́в Ти́хоне!/ Сам да́руй ми ум и язы́к,/ да воспою́ по достоя́нию сла́ву,/ е́юже сла́вно просла́ви тя Христо́с Госпо́дь. Припев: Святи́телю о́тче Ти́хоне, моли́ Бо́га о на́с. Луча́ Боже́ственнаго све́та возсия́ нам,/ прииди́те, ча́да све́та, да озари́мся е́ю,/ да возгори́мся Ду́хом, пе́сньми святи́теля велича́юще. Сла́ва Отцу́ и Сы́ну и Свято́му Ду́ху. Апо́столов прее́мника, святи́телей сопресто́льника, преподо́бных сожи́теля,/ просла́вим блаже́ннаго Ти́хона,/ его́же предста́тельством спасе́ние улуча́ем. И ны́не и при́сно и во ве́ки веко́в. Ами́нь. Богородичен: Воплоти́вся неизрече́нно Влады́ка всех из Тебе́, Богороди́тельнице Мари́е,/ соверше́н бы́сть челове́к/ и, роди́вся, я́коже пре́жде рождества́, сохрани́ Тя чи́сту,/ Его́же моли́ спасти́ от бед ду́ши на́ша. Песнь 3 Ирмос: Небе́снаго кру́га Верхотво́рче, Го́споди,/ и Це́ркве Зижди́телю,/ Ты мене́ утверди́ в любви́ Твое́й,/ жела́ний кра́ю, ве́рных утвержде́ние,/ Еди́не Человеколю́бче. Припев: Святи́телю о́тче Ти́хоне, моли́ Бо́га о на́с. Любо́вию Христо́вою уязви́вся, блаже́нне,/ тому́ от ю́ности невозвра́тным жела́нием после́довал еси́,/ вся́кое плотско́е наслажде́ние возненави́дев. Припев: Святи́телю о́тче Ти́хоне, моли́ Бо́га о на́с. Ю́ношеския стра́сти, пло́ть томя́щия, любому́дрия мече́м посе́кл еси́,/ же́ртву себе́ Влады́це Христу́ принося́. Сла́ва Отцу́ и Сы́ну и Свято́му Ду́ху. Стра́хом Госпо́дним утвержда́емь, нача́ло бо Прему́дрости сей е́сть,/ любо́вию лу́чшею прилепи́лся еси́ Прему́дрости, о Ти́хоне. И ны́не и при́сно и во ве́ки веко́в. Ами́нь. Богородичен: Воспои́м боже́ственный храм Бо́жий,/ ублажи́м Святу́ю Де́ву, обоже́ни бы́вше Е́ю и от бед избавля́еми. Седален, глас 8 Храм Свята́го Ду́ха от ю́ности был еси́:/ Уте́шителева бо благода́ть, по ве́ре твое́й очи́стивши ду́шу твою́ от страсте́й,/ я́ве в ней вселя́ется,/ сего́ ра́ди и по преставле́нии соблюде́ся те́ло твое́ нетле́нно./ Моли́ Христа́ Бо́га от тлетво́рных страсте́й изба́витися/ чту́щим любо́вию па́мять твою́. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Ма́ти сла́дкаго ми Иису́са, Чи́стая Богоотрокови́це, прия́телище Ду́ха Свята́го,/ очи́сти мою́ ду́шу, беззако́нии оскверне́нную,/ и све́тлое жили́ще доброде́телей соде́лай,/ Светоно́сная Нетле́нная, отжени́ о́блак страсте́й,/ да и мене́ Твои́ми моли́твами осени́т Уте́шителева благода́ть. Песнь 4 Ирмос: Ты моя́ кре́пость, Го́споди,/ Ты моя́ и си́ла,/ Ты мой Бог, Ты мое́ ра́дование,/ не оста́вль не́дра О́тча/ и на́шу нищету́ посети́в./ Тем с проро́ком Авваку́мом зову́ Ти:/ си́ле Твое́й сла́ва, Человеколю́бче. Припев: Святи́телю о́тче Ти́хоне, моли́ Бо́га о на́с. Я́ко овча́, от Христа́ упа́слся еси́,/ я́коже па́стырь, упа́сл еси́ ста́до,/ изводя́ на па́жити живоно́сных твои́х уче́ний. Припев: Святи́телю о́тче Ти́хоне, моли́ Бо́га о на́с. Таи́нник быв Христо́ва уче́ния,/ сего́ ве́дением просвети́л еси́ лю́ди,/ де́лы и словесы́ явля́я и́стину его́. Сла́ва Отцу́ и Сы́ну и Свято́му Ду́ху. И́стинен и ве́рен страж до́му Бо́жия был еси́,/ стреги́й его́ де́лом, я́ко о́браз явля́я житие́м,/ сло́вом, я́ко уча́ усе́рдно,/ помышле́нием, я́ко пеки́йся о бла́зе его́. И ны́не и при́сно и во ве́ки веко́в. Ами́нь. Богородичен: Тя приста́нище, и сте́ну, и прибе́жище, и наде́жду, и покро́в,/ и Предста́тельницу те́плую обре́тше, ве́рнии,/ к Тебе́ прибега́ем и вопие́м приле́жно,/ я́коже научи́ нас взыва́ти к тебе́ блаже́нный Ти́хон:/ Пресвята́я Богоро́дице, спаси́ нас. Песнь 5 Ирмос: Вску́ю мя отри́нул еси́/ от лица́ Твоего́, Све́те Незаходи́мый,/ и покры́ла мя е́сть чужда́я тьма́, окая́ннаго?/ Но обрати́ мя и к све́ту за́поведей Твои́х/ пути́ моя́ напра́ви, молю́ся. Припев: Святи́телю о́тче Ти́хоне, моли́ Бо́га о на́с. Его́же возлюби́л еси́, Его́же возжеле́л еси́,/ Его́же ра́ди подвиза́лся еси́, святи́телю,/ моли́ ны́не Христа́ о рабе́х,/ да, ми́лостив быв, всем нам ми́рное состоя́ние да́рует,/ почита́ющим па́мять твою́. Припев: Святи́телю о́тче Ти́хоне, моли́ Бо́га о на́с. Любо́вию и ве́рою Христо́вою испо́лнен сый,/ яви́лся еси́ я́ко река́, оби́льно всю зе́млю Росси́йскую напоя́я/ сло́вом уче́ния, блаже́нне Ти́хоне. Сла́ва Отцу́ и Сы́ну и Свято́му Ду́ху. Я́ко пчела́ сла́дкий мед от цвето́в, ско́ро увяда́ющих,/ собра́л еси́, о́тче, от тле́ннаго ми́ра духо́вное сокро́вище,/ и́мже всех нас услажда́еши. И ны́не и при́сно и во ве́ки веко́в. Ами́нь. Богородичен: Испо́лни весе́лия се́рдце на́ше, Пречи́стая Богоотрокови́це,/ весе́лия ро́ждшая Вино́внаго,/ грехо́вную печа́ль вся́кую потребля́ющи. Песнь 6 Ирмос: Очи́сти мя, Спа́се,/ мно́га бо беззако́ния моя́,/ и из глубины́ зол возведи́, молю́ся,/ к Тебе́ бо возопи́х, и услы́ши мя,/ Бо́же спасе́ния моего́. Припев: Святи́телю о́тче Ти́хоне, моли́ Бо́га о на́с. Чист быв се́рдцем,/ чи́стому Христу́ прилепи́лся еси́, святы́й Свято́му,/ люби́тель Люби́тельному, кро́ткий Кро́ткому, взыва́я непреста́нно:/ мне прилепля́тися Бо́гови бла́го е́сть. Припев: Святи́телю о́тче Ти́хоне, моли́ Бо́га о на́с. Уте́ху, ро́скошь, че́сть, бога́тство, сла́ву/ и все сокро́вище ми́ра презре́л еси́,/ воспаря́я к Го́рнему Иерусали́му, к до́му Отца́ Небе́снаго,/ иде́же оби́тели мно́ги су́ть. Сла́ва Отцу́ и Сы́ну и Свято́му Ду́ху. Доса́ды, ско́рби, оби́ды ра́достно терпе́л еси́, помышля́я,/ я́ко вене́ц без побе́ды, побе́да без по́двига,/ по́двиг без бра́ни, бра́нь без враго́в не быва́ет. И ны́не и при́сно и во ве́ки веко́в. Ами́нь. Богородичен: О Де́во Госпоже́, Ма́ти Зижди́телева!/ Небе́сных еси́ чино́в ра́дование/ и челове́ческому ро́ду благослове́нная Помо́щнице,/ моли́ спасти́ся душа́м на́шим. Кондак, глас 8 Апо́столов прее́мниче,/ святи́телей украше́ние,/ Правосла́вный Це́ркве учи́телю,/ Влады́це всех моли́ся/ мир вселе́нней дарова́ти/ и душа́м на́шим ве́лию ми́лость. Икос Ду́шу твою́ украси́в доброде́телию,/ ум просвети́в любому́дрием,/ па́стырь до́брый яви́лся еси́ ста́ду Христо́ву,/ сло́вом и писа́нием уча́, наказу́я и вразумля́я,/ житие́м свои́м о́браз слове́с явля́я,/ Те́мже на Небеси́ венце́м сла́вы украси́лся еси́ от Пастыренача́льника Христа́,/ на земли́ сия́я нетле́нием моще́й/ и источа́я оби́льныя то́ки чуде́с ве́рою призыва́ющим тя,/ досточу́дне и Богому́дре Ти́хоне./ Моли́ся ко Го́споду дарова́ти душа́м на́шим ве́лию ми́лость. Песнь 7 Ирмос: Бо́жия снизхожде́ния/ о́гнь устыде́ся в Вавило́не иногда́,/ сего́ ра́ди о́троцы в пещи́, ра́дованною ного́ю,/ я́ко во цве́тнице, лику́юще, поя́ху:/ благослове́н еси́, Бо́же оте́ц на́ших. Припев: Святи́телю о́тче Ти́хоне, моли́ Бо́га о на́с. Терпе́нием стяжа́л еси́ ду́шу твою́, блаже́нне,/ путе́м те́сным, еди́ным веду́щим в жи́знь ве́чную, шел еси́,/ вы́ну взира́я на кре́стный пу́ть подвигополо́жника Христа́/ и сего́ о́браз житию́ твоему́ полага́я. Припев: Святи́телю о́тче Ти́хоне, моли́ Бо́га о на́с. Всего́ себе́ любви́ Бо́жией пре́дал еси́,/ ду́шу и те́ло, се́рдце и ра́зум,/ па́мять и во́лю, наме́рение, начина́ние,/ сло́во, де́ло и помышле́ние Бо́гу в любо́вь посвяти́л еси́. Сла́ва Отцу́ и Сы́ну и Свято́му Ду́ху. Оте́ц сиро́т, и вдов защи́тник, и бога́тство ни́щих,/ боля́щих утеше́ние, и су́щих в бога́тстве наста́вник,/ ста́рости жезл, и наказа́ние ю́ности,/ и мона́шествующим доброде́телей пра́вило яви́лся еси́, блаже́нне Ти́хоне. И ны́не и при́сно и во ве́ки веко́в. Ами́нь. Богородичен: Ра́дуйся, Мари́е, ра́дуйся, Спаси́теля ми́ру ро́ждшая,/ приста́нище бу́ди нам, жите́йскою бу́рею волну́емым,/ и оти́шие в пучи́не скорбе́й,/ и води́тельство к Небе́сным селе́нием. Песнь 8 Ирмос: Седмери́цею пе́щь/ халде́йский мучи́тель/ Богочести́вым неи́стовно разжже́,/ си́лою же лу́чшею спасе́ны, сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки. Припев: Святи́телю о́тче Ти́хоне, моли́ Бо́га о на́с. Ца́рствия Небе́снаго еще́ на земли́ сын быв,/ вы́ну воздыха́л еси́ к Сы́ну Бо́жию, вопия́ Ему́:/ бу́ди ми пи́щи и питие́, бу́ди свет души́ мое́й,/ бу́ди отра́да в ско́рби, бу́ди жи́знь ве́чная по воскресе́нии,/ да превозношу́ Тя во ве́ки. Припев: Святи́телю о́тче Ти́хоне, моли́ Бо́га о на́с. Ада́ма паде́ние, Христо́выми страстьми́ искупле́ние,/ час сме́ртный, Стра́шный Суд, муче́ния гре́шных,/ блаже́нство пра́ведных всегда́ помышля́я, рыда́л еси́,/ нам умиле́ния о́браз показу́я,/ себе́ же предочища́я к бу́дущей сла́ве. Сла́ва Отцу́ и Сы́ну и Свято́му Ду́ху. Труды́ по ве́ре и благоче́стию подъе́м в жи́зни сей,/ сла́дце по труде́х почи́л и упоко́ился еси́:/ соше́л бо еси́ во гроб,/ я́ко пшени́ца, для жи́тницы Бо́жия созре́лая, во вре́мя пожа́тая. И ны́не и при́сно и во ве́ки веко́в. Ами́нь. Богородичен: Иссо́пом Животворя́щия Кро́ве за спасе́ние ми́ра закла́ннаго А́гнца,/ из Твои́х пречи́стых крове́й пло́ть прие́мшаго,/ окропи́ мя, оскверне́ннаго, Влады́чице, и очи́сти мя,/ да Твои́м ма́терним заступле́нием па́че сне́га убелю́ся. Песнь 9 Ирмос: Ужасе́ся о сем Не́бо,/ и земли́ удиви́шася концы́,/ я́ко Бог яви́ся челове́ком пло́тски/ и чре́во Твое́ бы́сть простра́ннейшее Небе́с./ Тем Тя, Богоро́дицу,/ А́нгелов и челове́к чинонача́лия велича́ют. Припев: Святи́телю о́тче Ти́хоне, моли́ Бо́га о на́с. Хода́тай яви́лся еси́ и моли́твенник те́плый о нас к Бо́гу, святи́телю,/ ми́лостива у́бо моли́твами твои́ми соде́лай Влады́ку,/ испроси́, о́тче, прегреше́ний оставле́ние ве́рою свяще́нную па́мять твою́ пра́зднующим/ и серде́чною любо́вию тя велича́ющим. Припев: Святи́телю о́тче Ти́хоне, моли́ Бо́га о на́с. От Бо́га Све́та Небе́сным све́том осия́нный,/ просвети́ нас, помраче́нных страстьми́ жите́йскими,/ реши́ти же и вяза́ти вла́сть от Него́ прие́мый,/ разреши́ прегреше́ния на́ша и Ца́рствия Небе́снаго сподо́би/ па́мять твою́ пра́зднующих и досто́йно тя велича́ющих. Сла́ва Отцу́ и Сы́ну и Свято́му Ду́ху. На́ше хвале́ние сие́, от недосто́йныя и окая́нныя души́,/ от усе́рдия же бога́таго приноси́мое Тебе́, приими́ ми́лостивно, святи́телю,/ благода́ть проти́ву воздая́ нам щедрооби́льную. И ны́не и при́сно и во ве́ки веко́в. Ами́нь. Богородичен: Ада́ма па́дшаго возста́вила еси́, Богома́ти, ро́ждши Но́ваго Ада́ма,/ возста́ви и нас, па́дших по подо́бию дре́вняго,/ но благода́ти Но́ваго зри́ши ве́рующих. Светилен Пло́тию а́ще и почи́л еси́, святи́телю Ти́хоне,/ но Ду́хом жив сый, в Ца́рствии Невече́рнем со Христо́м Ца́рствуеши/ и мо́лишися Ему́ о призыва́ющих тя ве́рою и любо́вию. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. В черто́зе Жениха́ Христа́ помышля́я тя, святи́телю, неизрече́нным све́том сия́юща,/ Ца́рствия Небе́снаго приобщи́тися жела́ю,/ но от сна грехо́внаго объюроде́ мой ум, угасе́ свети́льник, я́ко безъеле́ен,/ и души́ моея́ оскверне́на е́сть оде́жда,/ и ви́жду две́ри Ца́рствия мне заключе́нныя,/ но, твои́ми моли́твами возбуди́в мя от сна грехо́внаго,/ еле́й покая́ния ми да́руй и, ри́зою заслу́г Христо́вых прикры́в мою́ наготу́,/ досто́йна мя сотвори́ Невече́рняго Ца́рствия.

Минея, 14 Июля, Кано́н преподо́бнаго Стефа́на Глас 4 Песнь 1 Ирмос: Отве́рзу усти́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,/ и воспою́, ра́дуяся, Тоя́ чудеса́. Припев: Преподо́бне о́тче Стефа́не, моли́ Бо́га о на́с. Сло́во ми пода́ждь, Сло́ве Бо́жий, во отверзе́ние недосто́йных уст мои́х,/ и очи́сти се́рдце мое́,/ я́ко да возмогу́ по достоя́нию воспе́ти преподо́бнаго Твоего́. Припев: Преподо́бне о́тче Стефа́не, моли́ Бо́га о на́с. Его́же Сам просла́вил еси́, Христе́ Спа́се мой,/ просла́вити да́руй ми честно́е торжество́ Стефа́на преподо́бнаго, Твоего́ уго́дника,/ нача́льника мона́хов и оби́тели утвержде́ние. Сла́ва Отцу́ и Сы́ну и Свято́му Ду́ху. Триипоста́сным Све́том Божества́ просвети́л еси́ се́рдце, преподо́бне,/ от ю́ности мирска́го пристра́стия возгнуша́вся,/ и Небе́сная восприя́л еси́ наслажде́ния. И ны́не и при́сно и во ве́ки веко́в. Ами́нь. Богородичен: Без се́мене О́тчею во́лею от Боже́ственнаго Ду́ха Бо́жия Ты зача́т Сы́на,/ пло́тию родила́ еси́ на́шего ра́ди спасе́ния. Песнь 3 Ирмос: Твоя́ песносло́вцы, Богоро́дице,/ живы́й и незави́стныи Исто́чниче,/ лик себе́ совоку́пльшия, духо́вно утверди́,/ в Боже́ственней Твое́й сла́ве/ венце́в сла́вы сподо́би. Припев: Преподо́бне о́тче Стефа́не, моли́ Бо́га о на́с. Возмуще́ния мо́ря жите́йскаго избе́г, преподо́бне Стефа́не,/ в пусты́ню безмо́лвия по́стническаго пребыва́ния/ всели́лся еси́, ра́дуяся, блаже́нне. Припев: Преподо́бне о́тче Стефа́не, моли́ Бо́га о на́с. Воздержа́нием плоть свою́ и бде́нии ча́стыми удручи́л еси́, преподо́бне,/ и, пусты́нная претерпе́в озлобле́ния,/ стремле́ния лю́тых страсте́й уста́вил еси́, Стефа́не. Сла́ва Отцу́ и Сы́ну и Свято́му Ду́ху. На па́житех живо́тных слове́сное ста́до ученико́в твои́х му́дре упа́сл еси́/ и на зла́це воздержа́ния, Стефа́не,/ от волко́в мы́сленных невреди́мо сохрани́л еси́. И ны́не и при́сно и во ве́ки веко́в. Ами́нь. Богородичен: Ве́дуще, благоче́стно пропове́дуем Тя/ и́стинную Ма́терь Бо́жию, Пренепоро́чная:/ Тобо́ю бо к нам Зижди́тель прибли́жися. Седален, глас 8 Оте́чество свое́ оста́вил еси́, преподо́бне,/ я́коже Авраа́м други́й, пресе́льник быв,/ и в пусты́ню всели́лся еси́, крест свой взем,/ Христу́ после́довав, плоть свою́ воздержа́нием, и труды́, и пусты́нными озлобле́нии умертви́л еси́,/ и ста́до мона́хов собра́л еси́,/ и по сме́рти от Бо́га бдагода́ть прия́л еси́ неду́ги исцеля́ти/ с ве́рою приходя́щим к честне́й твое́й ра́це, Стефа́не преподо́бне,/ моли́ Христа́ Бо́га согреше́нием оставле́ние дарова́ти/ чту́щим любо́вию святу́ю па́мять твою́. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Во искуше́ния многоплете́нная впад от враг ви́димых и неви́димых,/ бу́рею одержу́ся безчи́сленных мои́х прегреше́ний/ и я́ко к те́плому заступле́нию и покро́ву моему́, Чи́стая, притека́ю./ Тем, Пресвята́я, из Тебе́ Вопло́щшагося без се́мене моли́/ о всех рабе́х Твои́х, непреста́нно пою́щих Тя,/ согреше́ний оставле́ние им дарова́ти. Песнь 4 Ирмос: Седя́й в Сла́ве на Престо́ле Божества́/ во о́блаце ле́гце,/ прии́де Иису́с Пребоже́ственный/ Нетле́нною Дла́нию и спасе́ зову́щия:/ сла́ва, Христе́, си́ле Твое́й. Припев: Преподо́бне о́тче Стефа́не, моли́ Бо́га о на́с. Оте́чество свое́, я́коже иногда́ Авраа́м, оста́вил еси́, преподо́бне Стефа́не,/ и, на землю обетова́нную пресели́вся,/ Го́рняго Иерусали́ма насле́дник изря́ден показа́лся еси́, Богому́дре. Припев: Преподо́бне о́тче Стефа́не, моли́ Бо́га о на́с. Страннолю́бие, я́коже Авраа́м пра́отец дре́вле, стяжа́л еси́,/ и, я́коже он, служи́тель и друг Бо́гу нарече́ся,/ и Сего́ ты в се́рдце твое́м чистоты́ ра́ди жития́ твоего́ всели́л еси́, Стефа́не. Сла́ва Отцу́ и Сы́ну и Свято́му Ду́ху. Заря́ми чуде́с облиста́лся еси́, Стефа́не Богоприя́тне,/ грехми́ отемне́нное се́рдце мое́ све́том твои́х моли́тв просвети́,/ я́ко да и аз благода́рственно воспою́ па́мять твою́. И ны́не и при́сно и во ве́ки веко́в. Ами́нь. Богородичен: Сни́де, я́ко дождь на руно́, во утро́бу Твою́ Госпо́дь,/ я́коже рече́ дре́вле проро́к, Всенепоро́чная, Ему́же взыва́ем:/ сла́ва си́ле Твое́й, Го́споди. Песнь 5 Ирмос: Нечести́вии не у́зрят Сла́вы Твоея́, Христе́,/ но мы Тя, Единоро́дне,/ Оте́ческия Сла́вы Сия́ние Божества́,/ от но́щи у́тренююще,/ воспева́ем Тя, Человеколю́бче. Припев: Преподо́бне о́тче Стефа́не, моли́ Бо́га о на́с. Влады́це своему́ Христу́ подо́бяся, во́льную страсть претерпе́вшему,/ распя́лся еси́ ми́рови и страсте́м, Стефа́не Богоприя́тне,/ и ны́не све́тло прославля́ешися, лику́я во Ца́рствии Его́. Припев: Преподо́бне о́тче Стефа́не, моли́ Бо́га о на́с. Исто́чник исцеле́ний показа́ся ра́ка моще́й твойх, Стефа́не,/ к не́йже вси с ве́рою притека́ющии разли́чных неду́г и страсте́й избавля́ются/ богоприя́тными твои́ми моли́твами. Сла́ва Отцу́ и Сы́ну и Свято́му Ду́ху. Во пло́ти ме́ртвенней безпло́тным подо́бяся,/ жития́ чистото́ю, Богому́дре,/ безпло́тных враг мы́сленная ополче́ния, Стефа́не, до конца́ низложи́л еси́. И ны́не и при́сно и во ве́ки веко́в. Ами́нь. Богородичен: Тя ору́жие непобеди́мое на враги́ предлага́ем,/ Тя держа́ву и наде́жду на́шему спасе́нию, Богома́ти, стяжа́хом. Песнь 6 Ирмос: Приидо́х во глубины́ морски́я,/ и потопи́ла мя есть бу́ря мно́гих грехо́в,/ но, я́ко Бог, из глубины́ возведи́ живо́т мой, Многоми́лостиве. Припев: Преподо́бне о́тче Стефа́не, моли́ Бо́га о на́с. В пусты́нях всели́лся еси́, бе́гая сла́вы су́етныя, я́коже дре́вле вели́кий Анто́ний,/ те́мже обре́те Боже́ственную кончи́ну/ и по сме́рти сия́еши чудесы́, преподо́бне. Припев: Преподо́бне о́тче Стефа́не, моли́ Бо́га о на́с. Кто изрещи́ возмо́жет труды́ твоя и бде́ния, Богому́дре Стефа́не,/ и́хже ра́ди возме́здие от Бо́га по достоя́нию восприя́л еси́,/ по свое́й сме́рти разли́чныя неду́ги исцеля́ти. Сла́ва Отцу́ и Сы́ну и Свято́му Ду́ху. Те́ло свое́ моли́твами и посто́м удручи́л еси́,/ ду́шу же свою́ благодея́нии просвети́л еси́/ и се́рдце свое́ от скверн плотски́х очи́стил еси́,/ те́мже прия́телище Ду́ху Пресвято́му, Стефа́не, показа́ся. И ны́не и при́сно и во ве́ки веко́в. Ами́нь. Богородичен: О чу́до, всех чуде́с превы́шшее:/ я́ко Де́ва, во чре́ве вся́ческая Содержа́щаго сло́вом неискусому́жно прии́мши,/ без истле́ния родила́ еси́. Кондак, глас 8 Чистото́ю душе́вною боже́ственно вооружи́вся,/ блаже́нную жизнь соверши́л еси́,/ в пусты́ню, я́ко во град, всели́вся,/ благода́ть прия́л еси́ от Бо́га/ исцеля́ти неду́ги приходя́щим к честне́й твое́й ра́це/ и всех возвыша́ти к Боже́ственней высоте́,/ те́мже, име́я дерзнове́ние ко Святе́й Тро́ице,/ помина́й нас, чту́щих па́мять твою́, да зове́м ти:/ ра́дуйся, преподо́бне Стефа́не, по́стником удобре́ние. Икос Разу́мнаго свети́льника, вся озаря́юща чудесы́ исцеле́ний,/ во смире́нии и кро́тости Влады́ки всех Христа́ подража́теля и столпа́ утвержде́ния,/ и́ноком наста́вника, равноа́нгельно на земли́ пожи́вша,/ неви́димыя враги́ си́лою кре́стною до́бльственне ннзложи́вша/ и плотска́я мудрова́ння ду́хови повину́вша,/ в страннолю́бии же и в ми́лостыни неоску́днаго и в благодея́ниих прекра́снаго,/ преподо́бнаго Се́ргия спо́стника же и собесе́дника,/ Боже́ственнаго кри́на, в пусты́нных удо́лиих процве́тшаго, восхва́лим, зову́ще:/ ра́дуйся, преподо́бне Стефа́не, по́стником основа́ние. Песнь 7 Ирмос: Ю́ноши три в Вавило́не,/ веле́ние мучи́телево на бу́йство прело́жше,/ посреде́ пла́мене вопия́ху:/ благослове́н еси́, Го́споди,/ Бо́же оте́ц на́ших. Припев: Преподо́бне о́тче Стефа́не, моли́ Бо́га о на́с. Я́коже Лот Содо́ма дре́вле, латы́нскаго злове́рия избежа́в,/ а́ки в Сиго́р, в Моско́вскую зе́млю, кре́пко соблюда́ющую и́стннное правове́рие, прише́л еси́, Стефа́не, вопия́:/ благослове́н еси́, Го́споди, Бо́же оте́ц на́ших. Припев: Преподо́бне о́тче Стефа́не, моли́ Бо́га о на́с. Си́лою Христо́вою вооружи́вся, преподо́бне, стра́шен яви́лся еси́ бесо́м/ и над страстьми́ воцари́лся еси́, взем крест свой, после́дуя Христо́ви и вопия́:/ благослове́н еси́, Го́споди, Бо́же оте́ц на́ших. Сла́ва Отцу́ и Сы́ну и Свято́му Ду́ху. Собра́нное тобо́ю слове́сное ста́до весели́тся днесь в па́мять твою́, Стефа́не Богому́дре,/ посреде́ иму́ще честны́я твоя́ мо́щи, источа́ющия струи́ исцеле́ний, преподо́бне, зову́щим:/ благослове́н еси́, Го́споди, Бо́же оте́ц на́ших. И ны́не и при́сно и во ве́ки веко́в. Ами́нь. Богородичен: Благослове́н Плод благослове́ннаго чре́ва Твоего́,/ Его́же благословя́т Небе́сныя си́лы и преподо́бных собо́ри,/ нас изба́вльшаго кля́твы дре́вния, Благослове́нная. Песнь 8 Ирмос: Изба́вителю всех, Всеси́льне,/ посреде́ пла́мене благоче́ствовавшия,/ снизше́д, ороси́л еси́/ и научи́л еси́ пе́ти:/ вся дела́, благослови́те, по́йте Го́спода. Припев: Преподо́бне о́тче Стефа́не, моли́ Бо́га о на́с. Оби́лием благода́ти и одожде́нием слове́с твои́х/ серде́чныя бразды́ учени́к твои́х напои́л еси́, Стефа́не,/ и в сих мног плод Влады́це Христу́ возрасти́л еси́, Богому́дре. Припев: Преподо́бне о́тче Стефа́не, моли́ Бо́га о на́с. Ме́ртвость твоя́ живоно́сною яви́ся, преподо́бне Стефа́не, Христа́ ра́ди,/ Его́же Престо́лу со дерзнове́нием предстоя́,/ моли́ся о чту́щих честну́ю па́мять твою́. Сла́ва Отцу́ и Сы́ну и Свято́му Ду́ху. Я́ко незави́стну благода́ть имы́й от Бо́га, преподо́бне,/ пресла́вная чудеса́ источа́еши/ с ве́рою притека́ющим к ра́це честны́х моще́й твои́х. И ны́не и при́сно и во ве́ки веко́в. Ами́нь. Богородичен: Вода́ еси́ неисчерпа́емая, Де́во,/ от нея́же вси, пию́ще, благода́ти исполня́емся,/ душе́ю и те́лом освяща́еми. Песнь 9 Ирмос: Е́ва у́бо неду́гом преслуша́ния/ кля́тву всели́ла есть;/ Ты же, Де́во Богоро́дице,/ прозябе́нием чрев оноше́ния ми́рови Благослове́ние процвела́ еси́./ Тем Тя вси велича́ем. Припев: Преподо́бне о́тче Стефа́не, моли́ Бо́га о на́с. Побе́дное одоле́ние оте́честву на́шему/ на проти́вныя да́руй моли́твами твои́ми, Стефа́не преподо́бне,/ и Це́рквам единомы́слие устро́й,/ да непреста́нно в пе́снех па́мять твою́ почита́ем. Припев: Преподо́бне о́тче Стефа́не, моли́ Бо́га о на́с. О чту́щих честну́ю па́мять твою́ любо́вию моли́ся, Стефа́не преподо́бне,/ изба́витися враг мы́сленных и ви́димых,/ да ктому́ мно́жае тя в пе́снех непреста́нно велича́ем. Сла́ва Отцу́ и Сы́ну и Свято́му Ду́ху. От недосто́йных мои́х усте́н/ приноси́мое ти ма́лое от усе́рдия хвале́ние приими́, Богоблаже́нне,/ и огня́ ве́чнаго изба́витися моли́ся,/ да непреста́нно честну́ю твою́ па́мять почита́ю. И ны́не и при́сно и во ве́ки веко́в. Ами́нь. Богородичен: Ра́дуйся и весели́ся, Неве́сто Царя́ Вели́каго,/ созерца́ющая све́тло Твоего́ Жениха́ красоты́, па́че зла́та сия́юща,/ Его́же пою́ще, велича́ем. Светилен Ты яви́лся еси́, Богому́дре о́тче, столп доброде́телей/ и преподо́бным сла́ва и украше́ние,/ те́мже помина́й чту́щих честну́ю твою́ па́мять. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Тя Предста́тельницу вси иму́ще, гре́шнии, о Пресвята́я Де́во!/ Моли́ся благопремени́тельна сотвори́ти нам Сы́на Твоего́/ ма́терними Твои́ми моли́твами.

Минея, 19 Мая, Кано́н, творе́ние Феофа́ново Глас 8 Песнь 1 Ирмос: Колесницегони́теля фарао́ня погрузи́/ чудотворя́й иногда́/ Моисе́йский жезл, крестообра́зно порази́в/ и раздели́в мо́ре,/ Изра́иля же беглеца́, пешехо́дца спасе́,/ песнь Бо́гови воспева́юща. Припев: Святи́и священному́ченицы, моли́те Бо́га о на́с. Вся́ческими укра́шени благода́тьми, свяще́нства оде́ждею/ и обагре́нием а́бие муче́ния кро́вию украси́вшеся, сла́внии,/ и до́бре укра́шшеся, благоче́стия яви́стеся побо́рницы, тве́рди ве́рою. Припев: Святи́и священному́ченицы, моли́те Бо́га о на́с. Подвигополо́жник Христо́с, седя́й одесну́ю Отца́,/ страда́льцем всем подвиго́в три́знище отве́рзый,/ собра́ возра́стно сочета́нных, лик му́ченик четверочи́сленный,/ пе́сньми Того́ велича́ющия. Сла́ва Отцу́ и Сы́ну и Свято́му Ду́ху. Це́ркве предста́тель, Патрики́е, я́коже па́стырь благ,/ по ней, блаже́нне, ду́шу твою́ положи́л еси́,/ со Ака́кием, Мена́ндром и Полие́ном Боже́ственным,/ прему́дрыми засту́пники обога́щся, пе́ние Бо́гу возсыла́я при́сно. И ны́не и при́сно и во ве́ки веко́в. Ами́нь. Богородичен: Глаго́лом Боже́ственных проро́к после́дующе,/ испове́даша Бо́жие Сло́во,/ плоть прие́мшаго, Богоглаго́ливии му́ченицы, от Пречи́стыя Де́вы,/ Ю́же, Богоро́дицу, сла́вяще, пе́сньми при́сно блажи́м. Песнь 3 Ирмос: Утвержде́й в нача́ле небеса́ ра́зумом/ и зе́млю на вода́х основа́вый,/ на ка́мени мя, Христе́, за́поведей Твои́х утверди́,/ я́ко несть свят, па́че Тебе́, еди́не Человеколю́бче. Припев: Святи́и священному́ченицы, моли́те Бо́га о на́с. Ше́ствовавшия му́жески стезю́ муче́ния и сконча́вшия до́брое тече́ние/ ублажи́м, ве́рнии, я́ко победоно́сныя му́ченики,/ и вене́чники Боже́ственныя, и святи́тели Богому́дрыя. Припев: Святи́и священному́ченицы, моли́те Бо́га о на́с. Богогла́сный, разже́гся ре́вностию благоче́стия, увяди́ пла́мень пре́лести,/ вити́йствуя тве́рдо богослове́сная веле́ния/ и вразумля́я всех к Боже́ственному вои́стинну позна́нию. Сла́ва Отцу́ и Сы́ну и Свято́му Ду́ху. Умерщвле́на ви́дев пия́нством нече́стия Патрики́й лю́таго иге́мона,/ вскочи́, вопия́ Богоразу́мия глаго́лы/ разсева́я всем Боже́ственное сло́во ве́ры. И ны́не и при́сно и во ве́ки веко́в. Ами́нь. Богородичен: Неискусобра́чно Сло́во Бо́жие, о Богоро́дице, породила́ еси́, из Тебе́ воплоще́нна,/ Его́же му́ченицы, Бо́га, му́жески испове́даша,/ я́ко во́ини Сего́ и вене́чницы бы́вше. Седален, глас 8 С Мена́ндром Ака́кия му́драго,/ и Полие́на, ве́рою свяще́ннаго, почти́м пе́сньми, и вели́каго Патрики́я:/ свяще́нницы бо си́и Бо́га Вседержи́теля бы́вше, ве́рою Тому́ благоугоди́ша,/ те́мже муче́ния при кончи́не жития́ све́тло сподо́бишася и А́нгелом сочета́шася./ И́мже любо́вию вопие́м:/ моли́те Христа́ Бо́га согреше́ний оставле́ние дарова́ти/ чту́щим любо́вию святу́ю па́мять ва́шу. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Небе́сную дверь и киво́т, пресвяту́ю го́ру,/ све́тлый о́блак воспои́м, неопали́мую купину́, слове́сный ра́й,/ Е́вы воззва́ние, вселе́нныя всея́ вели́кое сокро́вище,/ я́ко спасе́ние в Ней соде́лася ми́ру/ и оставле́ние дре́вних согреше́ний./ Сего́ ра́ди вопие́м Ей:/ моли́ся Сы́ну Твоему́ прегреше́ний оставле́ние дарова́ти/ благоче́стно покланя́ющимся всесвято́му рождеству́ Твоему́. Песнь 4 Ирмос: Ты моя́ кре́пость, Го́споди,/ Ты моя́ и си́ла,/ Ты мой Бог, Ты мое́ ра́дование,/ не оста́вль не́дра О́тча,/ и на́шу нищету́ посети́в./ Тем с проро́ком Авваку́мом зову́ Ти:/ си́ле Твое́й сла́ва, Человеколю́бче. Припев: Святи́и священному́ченицы, моли́те Бо́га о на́с. Си́лою Христо́вою оде́явся, Патрики́е,/ свяще́нник бо Сего́ был еси́ и, Того́ стопа́м я́ве после́довав,/ муче́нии прине́слся еси́ еди́ному Благоде́телю, благоче́стно взыва́я:/ си́ле Твое́й сла́ва, Человеколю́бче. Припев: Святи́и священному́ченицы, моли́те Бо́га о на́с. Священноде́йственник Боже́ствен показа́лся еси́, Ака́кие,/ Боже́ственныя зари́, о́тче, насыща́яся,/ и, Христо́в му́ченик и́стинен я́влься,/ и́дольскую ле́сть оплева́л еси́./ Те́мже и ра́достною со́вестию зове́ши:/ си́ле Твое́й сла́ва, Человеколю́бче. Сла́ва Отцу́ и Сы́ну и Свято́му Ду́ху. С со́нмом, Христе́, Твои́х му́ченик Мена́ндр лику́я и ра́дуяся,/ луча́ми ны́не сия́ет Твои́ми, и светоли́тии ле́по украшае́мь,/ и та́мо Тебе́, Влады́це, ра́дуяся, взыва́ет:/ си́ле Твое́й сла́ва, Человеколю́бче. И ны́не и при́сно и во ве́ки веко́в. Ами́нь. Богородичен: Ору́жие, Христе́, Тя ро́ждшую Всенепоро́чную стяжа́вше,/ ле́сти победи́ша кова́рства му́ченицы му́дрии/ и томи́телей ласка́ния я́ве отри́нуша./ И ны́не, венцено́сцы я́вльшеся, вопию́т:/ си́ле Твое́й сла́ва, Человеколю́бче. Песнь 5 Ирмос: Вску́ю мя отри́нул еси́/ от лица́ Твоего́, Све́те незаходи́мый,/ и покры́ла мя есть чужда́я тьма́, окая́ннаго?/ Но обрати́ мя и к све́ту за́поведей Твои́х/ пути́ моя́ напра́ви, молю́ся. Припев: Святи́и священному́ченицы, моли́те Бо́га о на́с. Умертви́вшеся ми́ру, му́ченицы Богому́дрии, боле́зньми воздержа́ния,/ Христу́ усе́рдно принесо́стеся заколе́ния соверше́ная, себе́ поже́рше, я́коже а́гнцы,/ Влады́чним предповину́стеся Боже́ственным повеле́нием. Припев: Святи́и священному́ченицы, моли́те Бо́га о на́с. Пострада́вше зако́нно, му́ченицы всехва́льнии, венча́стеся:/ претерпе́вше бо го́рькия боле́зни и ра́ны от беззако́нных,/ на Небесе́х наслажда́тися нетле́нныя жи́зни сподо́бистеся. Сла́ва Отцу́ и Сы́ну и Свято́му Ду́ху. У́мно со А́нгелы ны́не живы́й, Патрики́е блаже́нне,/ соверша́ющих честну́ю па́мять твою́ помяни́,/ ко Влады́це твои́ми моли́твами приле́жно моля́ся/ от бед изба́вити, всехва́льне. И ны́не и при́сно и во ве́ки веко́в. Ами́нь. Богородичен: И́стинную Богоро́дицу вси Тя позна́вше, му́ченицы сла́внии,/ из Тебе́ рожде́ннаго Бо́га Сло́ва, ве́дяще,/ пропове́даша, проти́ву греху́ ю́ношески/ и до сме́рти сопроти́вльшеся, Отрокови́це Всепе́тая. Песнь 6 Ирмос: Бе́здна грехо́в и прегреше́ний бу́ря мя смуща́ет/ и во глубину́ ну́жднаго ре́ет мя, отча́яния,/ но Твою́ кре́пкую ру́ку мне́ простри́, яко Петро́ви,/ о Упра́вителю, и спаси́. Припев: Святи́и священному́ченицы, моли́те Бо́га о на́с. Лик страда́льческий, от четы́рех соста́влен му́ченик и святи́тель,/ досто́йно благоле́пно уясня́емый,/ лю́дие благочести́вии, ны́не соста́вльше лик, ра́достно восхва́лим. Припев: Святи́и священному́ченицы, моли́те Бо́га о на́с. Разреша́ют теле́сныя боле́зни, страда́льцы, неду́жным/ те́плых вод от гробо́в ва́ших излия́ния,/ и стра́сти душе́вныя ва́шими Боже́ственными моли́твами ве́рою приходя́щим изменя́ются. Сла́ва Отцу́ и Сы́ну и Свято́му Ду́ху. У́тро ми у́мное, во тьме прегреше́ний лежа́щу/ и в скве́рней жи́зни пребыва́ющу, моли́твами, блаже́нне, твои́ми ны́не возста́ви,/ моля́ Изба́вителя Христа́, Патрики́е. И ны́не и при́сно и во ве́ки веко́в. Ами́нь. Богородичен: Просвети́ мою́ ду́шу, ро́ждшая сия́ние сла́вы О́тчи,/ Де́во Богоро́дице Всепе́тая:/ Твою́ бо страда́льцы благода́ть иму́ще, мучи́телей языкобо́лия отри́нуша. Кондак, глас 4 Я́ко светосия́нен добро́тою свяще́нства/ и муче́ния кро́вию преукра́шен,/ с пострада́вшими с тобо́ю, Патрики́е, Христу́ предстоя́,/ о нас помина́й,/ я́ко страда́лец честны́й. Песнь 7 Ирмос: Бо́жия снизхожде́ния/ огнь устыде́ся в Вавило́не иногда́,/ сего́ ра́ди о́троцы в пещи́, ра́дованною ного́ю,/ я́ко во цве́тнице, лику́юще, поя́ху:/ благослове́н еси́, Бо́же оте́ц на́ших. Припев: Святи́и священному́ченицы, моли́те Бо́га о на́с. Сла́внии му́ченицы, свяще́нства укра́шени оде́ждею,/ свое́ю кро́вию сию́ свяще́ннейшу соде́лавше,/ в Боговиде́нии лику́юще, поя́ху:/ благослове́н еси́, Бо́же оте́ц на́ших. Припев: Святи́и священному́ченицы, моли́те Бо́га о на́с. Вити́йскую лю́тость, све́том Боже́ственным озаря́емь, изобличи́л еси́, блаже́нне,/ я́ко в пещи́ тепли́цах, в ни́хже не опали́лся еси́, взыва́я:/ благослове́н еси́, Бо́же оте́ц на́ших. Сла́ва Отцу́ и Сы́ну и Свято́му Ду́ху. Не терпя́ще, сла́вне, му́дрых твои́х слове́с иге́мон го́рдый,/ и́миже обличи́л еси́ прескверна́выя и лжеимени́тыя бо́ги,/ и́хже поплева́в, пел еси́, ра́дуяся:/ благослове́н еси́, Бо́же оте́ц на́ших. И ны́не и при́сно и во ве́ки веко́в. Ами́нь. Богородичен: Се ны́не соверши́ся Дави́да Боже́ственнаго Боже́ственное прорече́ние,/ мо́лится бо любо́вию четвери́ца му́ченик Твоему́ лицу́, Чи́стая,/ воплоще́нному из Тебе́ взыва́ющи:/ благослове́н еси́, Бо́же оте́ц на́ших. Песнь 8 Ирмос: Седмери́цею пещь/ халде́йский мучи́тель/ Богочести́вым неи́стовно разжже́,/ си́лою же лу́чшею спасе́ны, сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки. Припев: Святи́и священному́ченицы, моли́те Бо́га о на́с. Венцено́сныя му́ченики, святи́тели Богому́дрыя,/ прииди́те, ра́дующеся, ве́рнии, почти́м, Христа́ велича́юще,/ дарова́вшаго сим кре́пость злочести́вых не ужаса́тися мук, пою́щим:/ о́троцы, благослови́те, свяще́нницы, воспо́йте,/ лю́дие, превозноси́те во вся ве́ки. Припев: Святи́и священному́ченицы, моли́те Бо́га о на́с. Свяще́ния пома́занием, муче́ния же кро́вию добропобе́дных четвери́ца украси́ся/ и сия́ет чудесы́ разли́чно па́че све́та,/ Соде́телю и Изба́вителю вопию́щи:/ о́троцы, благослови́те, свяще́нницы, воспо́йте,/ лю́дие, превозноси́те во вся ве́ки. Сла́ва Отцу́ и Сы́ну и Свято́му Ду́ху. Победи́вше, сла́внии, де́монския полки́ и мучи́телей преще́ния не убоя́вшеся,/ венцы́ прия́сте от Христа́, всехва́льнии,/ и, я́ко победоно́снии страда́льцы, поете́:/ о́троцы, благослови́те, свяще́нницы, воспо́йте,/ лю́дие, превозноси́те во вся ве́ки. И ны́не и при́сно и во ве́ки веко́в. Ами́нь. Богородичен: Да ра́дуется Мена́ндр, да весели́тся Ака́кий/ и с Полие́ном све́тлый Патрики́й, лик соста́вльше,/ воплоще́нное Сло́во О́тчее от деви́ческих неискусобра́чных ложе́сн/ да пою́т непреста́нно, свяще́нницы я́вльшеся,/ Того́ превознося́ще во вся ве́ки. Песнь 9 Ирмос: Ужасе́ся о сем Не́бо/ и земли́ удиви́шася концы́,/ я́ко Бог яви́ся челове́ком пло́тски/ и чре́во Твое́ бы́сть простра́ннейшее небе́с./ Тем Тя, Богоро́дицу,/ А́нгелов и челове́к чинонача́лия велича́ют. Припев: Святи́и священному́ченицы, моли́те Бо́га о на́с. Удиви́шася, зря́ще страда́льцев главы́ посека́еми, мучи́тели,/ и ду́ши любо́вию предаю́щи терпели́вно./ Христо́с же прия́т сих, упоко́ив я у Себе́,/ и́миже и исцеле́ния источа́ют, я́ко от окри́на,/ непреста́нно притека́ющим. Припев: Святи́и священному́ченицы, моли́те Бо́га о на́с. Ви́дети тща́щеся жела́емых исто́чника,/ святи́тели и му́ченики, на Небесе́х,/ вся́ко достоя́ние, е́же на земли́, оста́вльше,/ взя́стеся к высо́кому вели́честву Боже́ственнаго Ца́рствия,/ пи́щи сподо́бльшеся, е́же па́че ума́ блаже́нства. Сла́ва Отцу́ и Сы́ну и Свято́му Ду́ху. Проидо́сте во́ду искуше́ний, и огнь муче́ний премину́сте,/ и ны́не я́сно, ве́чнующий страда́льцы, поко́й прия́сте в Небе́сных ски́ниих,/ в ни́хже, венцено́сцы, лику́юще непреста́нно, от бед нас изба́вите. И ны́не и при́сно и во ве́ки веко́в. Ами́нь. Богородичен: Яко со́лнце, па́мять страда́льцев ве́рныя осиява́ет чудесы́,/ и́бо из Тебе́, Чи́стая Де́ва, рожде́йся Бог,/ Его́же благоче́стно пропове́даша святи́и,/ сия́ преосия́ све́тло,/ прославля́яй ве́рою Того́ прише́ствие поче́тшия, я́ко обеща́.

Минея, 6 Апреля, Канон Глас 2 Песнь 1 Ирмос: Гряди́те, лю́дие,/ пои́м песнь Христу́ Бо́гу,/ разде́льшему мо́ре и наста́вльшему лю́ди,/ я́же изведе́ из рабо́ты еги́петския,/ я́ко просла́вися. Припев: Святи́телю, о́тче Мефо́дие, моли́ Бо́га о на́с. Даждь, Христе́ Спа́се, Еди́не Милосе́рде,/ сло́во простра́нно, молю́ся Твоея́ ми́лости,/ да святи́теля Твоего́ восхвалю́ Мефо́дия и Тя просла́влю. Припев: Святи́телю, о́тче Мефо́дие, моли́ Бо́га о на́с. Оста́вив род и оте́чество, подру́жие и де́тий, свя́те учи́телю,/ в пусты́ни изво́ли со святы́ми отцы́ жи́ти, пресла́вне. Сла́ва Отцу́ и Сы́ну и Свято́му Ду́ху. Брань лю́ту посрами́в, о́тче, бесо́вскую,/ брань лю́ту утоли́ грехо́в мои́х,/ учи́телю Мефо́дие, моли́твами твои́ми. И ны́не и при́сно и во ве́ки веко́в. Ами́нь. Богородичен: Кто изрещи́ Тебе́ досто́йно мо́жет зача́тие Твое́, па́че словесе́,/ Бо́га бо роди́ пло́тию, Пречи́стая,/ нам явле́на, Спа́са всем. Песнь 3 Ирмос: Утверди́ нас в Тебе́, Го́споди,/ Дре́вом умерщвле́й грех,/ и страх Твой всади́/ в сердца́ нас, пою́щих Тя. Припев: Святи́телю, о́тче Мефо́дие, моли́ Бо́га о на́с. О пресла́вне!/ кто мо́жет изрещи́ Мефо́дия доброде́тели и труд,/ и́же пострада́ от ерети́к триязы́чных. Припев: Святи́телю, о́тче Мефо́дие, моли́ Бо́га о на́с. Мефо́дие свя́те!/ дар ты прия́л от Бо́га и подаде́ тре́бующим,/ сла́вящим Бо́га, просла́вльшаго тя. Сла́ва Отцу́ и Сы́ну и Свято́му Ду́ху. Е́же ми подаде́ бога́тство, Христе́ Спа́се,/ блу́дно жив, погуби́х окая́нный,/ но обогати́ мя покая́нием. И ны́не и при́сно и во ве́ки веко́в. Ами́нь. Богородичен: Мари́е, злата́я кади́льнице,/ Ты стра́стный мой смрад отжени́,/ утверди́ мене́, коле́блющася приложе́нием льсти́ваго борца́. Седален, глас 4 Я́ко све́тлость от восто́ка тя Христо́с возсия́в, к за́паду, о́тче,/ посла́ му́дра учи́теля Мефо́дия всем,/ просвеща́юща гра́ды мно́ги и страны́ бу́квами твои́ми,/ почита́юща, Богодухнове́нный блаже́нне, уче́ния Ду́ха Пресвята́го,/ ны́не моли́ся непреста́нно о хва́лящих тя. Песнь 4 Ирмос: Услы́шах, Го́споди, слух Твой и убоя́хся,/ разуме́х дела́ Твоя́, и диви́хся, и возопи́х:/ сла́ва си́ле Твое́й, Го́споди. Припев: Святи́телю, о́тче Мефо́дие, моли́ Бо́га о на́с. Тя и́мать, о́тче, земля́ Мора́вска сте́ну тве́рду,/ е́юже побежда́ем еретики́. Припев: Святи́телю, о́тче Мефо́дие, моли́ Бо́га о на́с. Одесну́ю предстоя́ща Пресвяты́я Тро́ицы, учи́теля,/ моли́тася сохрани́ти ста́до слове́нское. Сла́ва Отцу́ и Сы́ну и Свято́му Ду́ху. Ду́шу свою́ и те́ло же оскверни́х, неключи́мая де́лая,/ но, Спа́се, очи́сти мя Свое́ю ми́лостию. И ны́не и при́сно и во ве́ки веко́в. Ами́нь. Богородичен: Молю́тися, Пречи́стая,/ заче́нши Бо́га без се́мене,/ при́сно моли́ся за рабы́ Своя́. Песнь 5 Ирмос: Све́та Пода́телю и веко́в Тво́рче, Го́споди,/ во све́те Твои́х повеле́ний наста́ви нас:/ ра́зве бо Тебе́, ино́го бо́га не зна́ем. Припев: Святи́телю, о́тче Мефо́дие, моли́ Бо́га о на́с. И́стый насто́льник апо́стола сла́внаго Андрони́ка, сла́вне, яви́ся,/ украся́ престо́л Святы́я Це́ркве Панно́нския, му́дре. Припев: Святи́телю, о́тче Мефо́дие, моли́ Бо́га о на́с. Тя мо́лим, Мефо́дие, святи́телю сла́вне,/ разгна́ное еретики́ ста́до твое́ сохрани́ в ве́ре правове́рней/ моли́твами твои́ми, о́тче. Сла́ва Отцу́ и Сы́ну и Свято́му Ду́ху. Пучи́ну преплыва́я жите́йскую, прелете́, о́тче, оре́льски,/ потопля́ема мя грехи́, свя́те, изведи́, молю́ся, моли́твами твои́ми, му́дре. И ны́не и при́сно и во ве́ки веко́в. Ами́нь. Богородичен: Тебе́, ро́ждшей Творца́ вся́ческим, вопие́м:/ ра́дуйся, Пречи́стая, ра́дуйся, возсия́вшая нам Свет,/ ра́дуйся, вмести́вшая Бо́га Невмести́маго. Песнь 6 Ирмос: В бе́здне грехо́вней валя́яся,/ неизсле́дную милосе́рдия Твоего́ призыва́ю бе́здну:/ от тли, Бо́же, мя возведи́. Припев: Святи́телю, о́тче Мефо́дие, моли́ Бо́га о на́с. Ты от за́пада, свя́те, возсия́в,/ я́коже звезда́, своя́ лучи́ посыла́ющи/ до восто́ка, и се́вера, и ю́га, сла́вне Мефо́дие. Припев: Святи́телю, о́тче Мефо́дие, моли́ Бо́га о на́с. Ю́же слу́жбу, сла́вне, прия́ от Христа́ Спа́са Милосе́рдаго,/ сконча́, святи́телю, я́ко ве́рен раб Го́споду своему́. Сла́ва Отцу́ и Сы́ну и Свято́му Ду́ху. От скве́рны грехо́в мои́х измы́й мя,/ Ще́дре Спаси́телю, еди́не Милосе́рде,/ Ты бо еди́н и́маши власть, Го́споди, отпуща́ти грехи́. И ны́не и при́сно и во ве́ки веко́в. Ами́нь. Богородичен: Ве́рныя лю́ди Твоя́ утверди́,/ побе́ду дая́ им, я́ко Всемогу́щ, на ва́рвары, Влады́ко,/ рожде́йся из Чи́стыя и Безму́жныя Ма́тере. Кондак, глас 2 Боже́ственна и ве́рна Мефо́дия/ вси воспои́м, лю́дие, и любо́вию ублажи́м,/ я́ко па́стыря вели́каго слове́ном,/ служи́теля Тро́ицы че́стна,/ прогони́теля е́реси,/ мо́лит бо ся о всех нас. Икос Ца́рственная Панно́ния, ку́пно но́вии су́ще лю́дие,/ тебе́ па́стыря че́стна све́дящи, ра́дуется,/ мы же доброде́тели твое́й поспешеству́ем,/ труды́ же и боле́зни похва́льныя та́йно тебе́ почита́ющим/ ми́ро многоче́стное суть,/ Мефо́дие святи́телю, моли́ся непреста́нно о всех нас. Песнь 7 Ирмос: О́бразу злато́му, на по́ле Деи́ре служи́му,/ трие́ Твои́ о́троцы небрего́ша безбо́жнаго веле́ния,/ посреде́ же огня́ вве́ржени, ороша́еми, поя́ху:/ благослове́н еси́, Бо́же оте́ц на́ших. Припев: Святи́телю, о́тче Мефо́дие, моли́ Бо́га о на́с. О ва́ю, свята́я, хва́лится сла́вно град Солу́нский, Кири́лле свя́те и Мефо́дие,/ Ми́сия, и Панно́ния, и Мора́вская, блаже́ннии, земля́, сла́вящи и вопию́щи:/ благослове́н еси́, Бо́же оте́ц на́ших. Припев: Святи́телю, о́тче Мефо́дие, моли́ Бо́га о на́с. На ка́мени ты ве́ры утверди́ но́зе свои́, блаже́нне,/ и не поколеба́ тебе́, свя́те, богопроти́вных духо́в си́ла,/ но, я́ко хра́брый боре́ц, проти́вяся им, поя́ше:/ благослове́н еси́, Бо́же оте́ц на́ших. Сла́ва Отцу́ и Сы́ну и Свято́му Ду́ху. Избоде́на мя разбо́йники, Христе́, и уя́звлена,/ поми́луй мя, молю́ся Тебе́,/ и возле́й еле́й ми́лости Твоея́ на мя,/ я́ко да восхвалю́ Тя:/ Бо́же, благослове́н еси́. И ны́не и при́сно и во ве́ки веко́в. Ами́нь. Богородичен: Невеще́ственнаго Све́та селе́ние Твое́ чре́во бысть,/ светлостьми́ Бо́жия ра́зума безбо́жие отгна́вшее,/ Чи́стая Богоневе́сто Деви́це,/ е́же пое́м, вопию́ще:/ благослове́н еси́, Бо́же оте́ц на́ших. Песнь 8 Ирмос: В пещь о́гненную ко отроко́м евре́йским снизше́дшаго/ и пла́мень в ро́су прело́жшаго Бо́га/ по́йте, дела́, я́ко Го́спода/ и превозноси́те во вся ве́ки. Припев: Святи́телю, о́тче Мефо́дие, моли́ Бо́га о на́с. Сла́вен, свя́те Мефо́дие, ты был еси́,/ ко́зни вра́жия низложи́в, сла́вне учи́телю прему́дре, по́йте, вопию́ще:/ благослови́те, вся дела́, Го́спода, по́йте и превозноси́те Его́ во ве́ки. Припев: Святи́телю, о́тче Мефо́дие, моли́ Бо́га о на́с. Архиере́й ты был еси́ по чи́ну Ааро́ню ве́рным, блаже́нне,/ А́гнца рука́ми твои́ми святы́ми жру́щий, поя́:/ благослови́те, вся дела́, Го́спода,/ по́йте и превозноси́те Его́ во ве́ки. Сла́ва Отцу́ и Сы́ну и Свято́му Ду́ху. Нощь лю́та мя, Христе́, грехо́вная пости́же/ и лю́те зело́ омрачи́ ду́шу мою́,/ молю Ти ся, Бо́же, просвети́/ и на покая́ние наста́ви пою́ща Тя во ве́ки. И ны́не и при́сно и во ве́ки веко́в. Ами́нь. Богородичен: Изнемо́гшу мно́гими прило́ги лука́ваго, Богоро́дице,/ окая́нную ду́шу мою́ целе́бными моли́твами, Деви́це, здра́ву соде́лай,/ да Тя прославля́ем во ве́ки. Песнь 9 Ирмос: От Бо́га Бо́га Сло́ва,/ неизрече́нною му́дростию прише́дшаго обнови́ти Ада́ма,/ я́дию в тле́ние па́дшаго лю́те,/ от Святы́я Де́вы неизрече́нно воплоти́вшагося нас ра́ди,/ ве́рнии, единому́дренно пе́сньми велича́ем. Припев: Святи́телю, о́тче Мефо́дие, моли́ Бо́га о на́с. Тя, блаже́нне, пое́т земля́ Мора́вская, че́стно твое́ те́ло иму́щи,/ и Панно́нская, святи́телю, просвеще́на тобо́ю,/ и лю́дие, е́ю, соше́дшеся, пра́зднуют твою́ па́мять. Припев: Святи́телю, о́тче Мефо́дие, моли́ Бо́га о на́с. Иму́ща, свята́я, прю о Святе́й Тро́ице, Кири́лле преподо́бне и Мефо́дие святи́телю,/ ста́до ва́ше свято́е, ходя́ще по земли́ стра́нней, сохра́нша,/ расти́та моли́твами свои́ми, блаже́нная. Сла́ва Отцу́ и Сы́ну и Свято́му Ду́ху. Ны́не припа́даю, учи́телю свя́те, моля́ся тебе́,/ умиле́нное сие́ пе́ние приими́/ и проси́ же отпу́ста грехо́в мои́х от Спа́са Христа́. И ны́не и при́сно и во ве́ки веко́в. Ами́нь. Богородичен: Ра́дуйся, Пресвята́я Богоро́дице Мари́е,/ ра́дуйся, Непоро́чная, иску́са му́жеска не позна́вшая,/ ра́дуйся, Свети́ло всему́ ми́ру ро́ждши,/ моля́щи не преста́й к Бо́гу Спа́су.

Минея, 22 Июля, Кано́н святы́я Глас 8 Песнь 1 Ирмос: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:/ Изба́вителю и Бо́гу на́шему пои́м. Припев: Свята́я равноапóстольная Мари́е, моли́ Бо́га о на́с. Боже́ственными укра́шена добро́тами и светоли́тии сия́ющи Боже́ственными,/ очерне́вшее мое́ се́рдце твои́ми моли́твами, Мари́е, озари́. Припев: Свята́я равноапóстольная Мари́е, моли́ Бо́га о на́с. Освяти́ тя Сло́во О́тчее, от духо́в зло́бы изба́вив я́ве,/ Ему́же учени́ца бы́вши, дарова́ний Свята́го Ду́ха испо́лнилася еси́. Сла́ва Отцу́ и Сы́ну и Свято́му Ду́ху. Вод испо́лншися животво́рных от исто́чника незави́стнаго,/ за милосе́рдие на земли́ я́вльшагося Влады́ки,/ греха́ му́тныя изсуши́ла еси́ то́ки. И ны́не и при́сно и во ве́ки веко́в. Ами́нь. Богородичен: Ма́терь естество́м Соде́теля, пое́м Тя, Отрокови́це,/ примири́вшую Бо́гу отпа́дшее естество́ челове́ческое,/ Богороди́тельнице Всенепоро́чная Влады́чице. Песнь 3 Ирмос: Небе́снаго кру́га Верхотво́рче, Го́споди,/ и Це́ркве Зижди́телю,/ Ты мене́ утверди́ в любви́ Твое́й,/ жела́ний кра́ю, ве́рных утвержде́ние,/ еди́не Человеколю́бче. Припев: Свята́я равноапóстольная Мари́е, моли́ Бо́га о на́с. Возлюби́вша пе́рвее благи́х Вино́вника, на́ше благосе́рдно естество́ обожи́вшаго,/ после́довала еси́ Ему́ усе́рдно, Мари́е,/ Того́ повину́вшася Боже́ственным веле́нием. Сла́ва Отцу́ и Сы́ну и Свято́му Ду́ху. Рыда́ющи, гро́ба Изба́вителева дости́гла еси́,/ пе́рвее ви́девша Боже́ственное, отрокови́це, воскресе́ние./ Те́мже благове́стница яви́лася еси́, вопию́щи:/ Христо́с воста́, рука́ми восплещи́те. И ны́не и при́сно и во ве́ки веко́в. Ами́нь. Богородичен: Спаса́ет мя Сло́во вопло́щшееся, Пречи́стая, от Твои́х пречи́стых крове́й,/ бога́тством бла́гости разреша́я осужде́ние пе́рваго паде́ния,/ Его́же непреста́нно моли́ спасти́ ста́до Твое́. Седален, глас 8 Обнища́вшему Сло́ву премно́гим милосе́рдием,/ Мари́е Магдали́но, я́ве я́ко учени́ца и́стинно послужи́ла еси́,/ зри́щи же Сего́, на Кресте́ вознесе́на и во гро́бе положе́на, рыда́ла еси́, слезя́щи./ Те́мже тя почита́ем и твое́ соверша́ем ве́рою торжество́, мироно́сице сла́вная,/ моли́ Христа́ Бо́га грехо́в оставле́ние пода́ти/ чту́щим любо́вию святу́ю па́мять твою́. Песнь 4 Ирмос: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́. Припев: Свята́я равноапóстольная Мари́е, моли́ Бо́га о на́с. Без смуще́ния иму́щи мирска́го су́етства мысль,/ Прише́дшему мир весь спасти́ от ле́сти послужи́ла еси́. Припев: Свята́я равноапóстольная Мари́е, моли́ Бо́га о на́с. Мы́ющися слеза́ми, гро́ба живоно́снаго дости́гши,/ А́нгела узре́ла еси́, возвеща́юща Христо́во, Мари́е, воскресе́ние. Сла́ва Отцу́ и Сы́ну и Свято́му Ду́ху. Се́рдце твое́ непоро́чное во оправда́ниих Христо́вых бысть,/ и Того́ еди́наго вожделе́ла еси́, Кра́снаго добро́тою, достосла́вная. И ны́не и при́сно и во ве́ки веко́в. Ами́нь. Богородичен: Дрема́нием ле́ности мя сон грехо́вный, Отрокови́це, пости́же,/ бо́дренною моли́твою Твое́ю возста́ви мя к покая́нию. Песнь 5 Ирмос: Вску́ю мя отри́нул еси́/ от лица́ Твоего́, Све́те незаходи́мый,/ и покры́ла мя есть чужда́я тьма, окая́ннаго?/ Но обрати́ мя и к све́ту за́поведей Твои́х/ пути́ моя́ напра́ви, молю́ся. Припев: Свята́я равноапóстольная Мари́е, моли́ Бо́га о на́с. Пра́баба, сию́ словесы́ прельсти́вшаго и изгна́вшаго от рая́ дре́вле/ зря́щи нога́ми попира́ема чи́стых жен, нрав му́жеский стяжа́вших,/ с ни́ми ве́чно ра́дуется. Припев: Свята́я равноапóстольная Мари́е, моли́ Бо́га о на́с. Уме́ршаго и во гро́бе Затворе́ннаго, всем жизнь Вдыха́ющаго, уязвля́ема любо́вию,/ сла́дцей Его́ любви́ приноша́еши ми́ро, Магдали́но, честна́я Мари́е,/ и сле́зныя пролива́еши арома́ты. Сла́ва Отцу́ и Сы́ну и Свято́му Ду́ху. По стра́сти Боже́ственней, по стра́шнем Спа́сове вознесе́нии,/ прехо́диши, сло́во всю́ду честно́е возвеща́ющи и мно́ги уловля́ющи прельща́ющияся неве́дением,/ я́ко Сло́ва учени́ца сла́вная. И ны́не и при́сно и во ве́ки веко́в. Ами́нь. Богородичен: Избавля́ет мя, па́дшаго к грехо́вным многоплете́нным паде́жем,/ Иже из Тебе́ роди́тися благоизво́ливый за безме́рную ми́лость, Пресвята́я Отрокови́це,/ Его́же умоли́ вся́каго вре́да изба́витися ве́рою пою́щим Тя. Песнь 6 Ирмос: Очи́сти мя, Спа́се,/ мно́га бо беззако́ния моя́,/ и из глубины́ зол возведи́, молю́ся,/ к Тебе́ бо возопи́х, и услы́ши мя,/ Бо́же спасе́ния моего́. Припев: Свята́я равноапóстольная Мари́е, моли́ Бо́га о на́с. Глаго́л твои́х ороше́ние и печа́ли вар отъя́т ученико́в, честна́я, я́коже возопи́ла еси́:/ Христо́с воста́, живо́т яви́ся, я́сное облиста́ со́лнце. Сла́ва Отцу́ и Сы́ну и Свято́му Ду́ху. Се твоя́ светоза́рная па́мять возсия́, просвеща́ющи ве́рныя, в ней пою́щия тя,/ и тьму отгоня́щи лука́вых бесо́в искуше́ния, досточу́дная. И ны́не и при́сно и во ве́ки веко́в. Ами́нь. Богородичен: Свяще́нства мы́сленное и неприкоснове́нное очисти́лище,/ све́щник светови́ден яви́лася еси́, и мост к Бо́гу преводя́й,/ испове́дающим Тя, Богоро́дицу, Пренепоро́чная. Кондак, глас 3 Предстоя́щи, пресла́вная, у Креста́ Спа́сова со ины́ми мно́гими,/ и Ма́тери Госпо́дни состра́ждущи, и сле́зы точа́щи,/ сие́ в похвалу́ приноша́ше, глаго́лющи:/ что́ сие́ есть стра́нное чу́до?/ Содержа́й всю тварь пострада́ти изво́ли./ Сла́ва держа́ве Твое́й. Икос Влады́ка Христо́с и Царь созда́ния, не оста́вль Небеса́, сни́де, я́коже изво́ли,/ и плоть тле́нную восприя́т во́лею./ Его́же ви́девши Ма́ти Непоро́чная, на Кресте́ пригвожда́ема,/ с де́вами честны́ми предстоя́щи и Магдали́на Мари́я, пла́чущи./ Той бо, та́мо су́щей и тепле́йшую ве́ру показу́ющей при́сно, после́доваше Христу́/ и гроб зря́ше, ожида́ющи и вопию́щи:/ пострада́ти изво́лил еси́, сла́ва держа́ве Твое́й. Песнь 7 Ирмос: О́троцы евре́йстии в пещи́/ попра́ша пла́мень дерзнове́нно/ и на ро́су огнь преложи́ша, вопию́ще:/ благослове́н еси́, Го́споди Бо́же, во ве́ки. Припев: Свята́я равноапóстольная Мари́е, моли́ Бо́га о на́с. Неду́ги отгна́ла еси́ разли́чныя, споспешеству́ющаго тебе́ Сло́ва иму́щи,/ Ему́же предстои́ши ны́не, вопию́щи, мироно́сице:/ благослове́н еси́, Го́споди Бо́же, во ве́ки. Сла́ва Отцу́ и Сы́ну и Свято́му Ду́ху. Еди́на ви́дела еси́ пре́жде ине́х, живота́ на́шего Христа́ воста́вша,/ вертогра́даря же Того́ непщева́ла еси́, вопию́щи:/ благослове́н еси́, Го́споди Бо́же, во ве́ки. И ны́не и при́сно и во ве́ки веко́в. Ами́нь. Богородичен: Уста́вила еси́ тече́ние сме́ртное,/ Безсме́ртнаго Бо́га я́ко заче́нши и ро́ждши, Чи́стая, Ему́же вси пои́м:/ благослове́н еси́, Го́споди Бо́же, во ве́ки. Песнь 8 Ирмос: Седмери́цею пещь/ халде́йский мучи́тель/ Богочести́вым неи́стовно разжже́,/ си́лою же лу́чшею спасе́ны, сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки. Припев: Свята́я равноапóстольная Мари́е, моли́ Бо́га о на́с. Све́тло яви́ся житие́ твое́, заря́ми облиста́, о Магдали́но!/ Доброде́тельных дея́ний, Боже́ственнаго пропове́дания, е́же к Бо́жию манове́нию,/ и луча́ми я́же к Зижди́телю любве́, Ему́же пое́ши со А́нгелы:/ свяще́нницы, по́йте, лю́дие, превозноси́те Его́ во ве́ки. Сла́ва Отцу́ и Сы́ну и Свято́му Ду́ху. У Креста́ предстоя́ла еси́, зря́щи непра́ведное, сла́вная, заколе́ние/ Себе́ излия́вшаго за неизрече́нную ми́лость,/ и, стена́нии и слеза́ми облива́ема, что́ стра́нное, – вопия́ла еси́, Мари́е, – чу́до?/ Ка́ко умерщвля́ется и умира́ет смерть умертви́вый, Живо́т сый естество́м? И ны́не и при́сно и во ве́ки веко́в. Ами́нь. Богородичен: Я́ко Бо́жию Ма́терь Тя единому́дренно сла́вим и тва́ри вы́шшую, Чи́стая,/ о Тебе́ бо осужде́ние, е́же от Ада́ма, потреби́ся/ и отсту́пльшее присво́ися челове́ков существо́, пою́щее:/ свяще́нницы, благослови́те, лю́дие, превозносите Его́ во ве́ки. Песнь 9 Ирмос: Ужасе́ся о сем Не́бо,/ и земли́ удиви́шася концы́,/ я́ко Бог яви́ся челове́ком пло́тски/ и чре́во Твое́ бысть простра́ннейшее Небе́с./ Тем Тя, Богоро́дицу,/ А́нгелов и челове́к чинонача́лия велича́ют. Припев: Свята́я равноапóстольная Мари́е, моли́ Бо́га о на́с. К Боже́ственней преложи́лася еси́ ны́не ра́дости, к ра́йстей широте́ простра́нней,/ к мы́сленным и преми́рным оби́телем, иде́же преподо́бных чи́нове,/ иде́же есть глас чист све́тло пра́зднующих, Мари́е Богоно́сная./ Те́мже тя вси ублажа́ем. Припев: Свята́я равноапóстольная Мари́е, моли́ Бо́га о на́с. Ничто́же предпочла́ еси́ су́щих на земли́ па́че любве́ Христа́ Бо́га,/ но Того́ еди́наго снеда́ема добро́тами/ и непосре́дственно, всечестна́я, посыла́емыми луча́ми, стопа́м Сего́, вопия́ла еси́, после́дующи:/ Тя велича́ю, Многоми́лостиве. Сла́ва Отцу́ и Сы́ну и Свято́му Ду́ху. Обоже́ние получи́вши боготво́рное, и пото́ка напи́вшася благода́ти,/ и мзды боле́зней прие́мши богонача́льно,/ и апо́стольским чино́м счета́ема, Магдали́но, учени́ца Сло́ва,/ любо́вию чту́щия тя твои́ми моли́твами сохрани́. И ны́не и при́сно и во ве́ки веко́в. Ами́нь. Богородичен: Я́ко Ма́ти пострада́вшаго за ны, душетле́нных страсте́й мя изба́ви;/ я́ко Ми́лостива, разреши́ согреше́ний мои́х плени́цы;/ я́ко Блага́, ублажи́ ны́не озло́бленную мою́ ду́шу бесо́вскими искуше́нии, Де́во Богоро́дице,/ да пою́ Тя, Всепе́тую. Светилен Со́лнце незаходи́мое, отрокови́це, е́же от Отца́ пре́жде век возсия́вшее,/ во гро́бе евре́йский сонм запеча́та,/ но воскре́сшаго ви́дела еси́ пе́рвее, Мари́е,/ и ученико́м возвести́ла еси́. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Дании́л преднапису́ет Тя несеко́мую го́ру,/ из нея́же честны́й ка́мень отсече́ся и истни́ идольския хра́мы,/ Богороди́тельнице Мари́е.

Минея, 7 Сентября, Канон святителя Иоанна Глас 8 Песнь 1 Ирмос: Во́ду проше́д я́ко су́шу,/ и еги́петскаго зла избежа́в,/ изра́ильтянин вопия́ше:// Изба́вителю и Бо́гу на́шему пои́м. Припев: Святи́телю о́тче Иоáнне, моли́ Бо́га о на́с. Богозва́нне, я́ко вои́стину ми́лостив и кро́ток был еси́, о́тче,/ и вои́стину тих ду́хом,/ и одесну́ю Престо́ла Бо́жия стоя́ния сподо́бился еси́, блаже́нне;/ и ны́не, на Небесе́х сый, тишину́ пода́ждь се́рдцу моему́. Припев: Святи́телю о́тче Иоáнне, моли́ Бо́га о на́с. От млады́х ногте́й, святи́телю Иоа́нне,/ впери́лся еси́ умо́м к Бо́гу/ и стра́сти теле́сныя зо́льным воздержа́нием увяди́л еси́,/ вся́кими доброде́тельми украша́яся, прему́дре. Сла́ва Отцу́ и Сы́ну и Свято́му Ду́ху. Егда́ иере́йский сан восприя́т,/ и Госпо́дня оправда́ния внима́я умо́м, святи́телю Иоа́нне,/ и от среды́ молвы́ удаля́лся, прему́дре,/ нечистоте́ не прикаса́лся еси́./ Та́ко, святи́телю, нечи́стая помышле́ния отжени́ от се́рдца моего́. И ны́не и при́сно и во ве́ки веко́в. Ами́нь. Богородичен: Правосла́вия был еси́ учи́тель и́стинный и к Богоро́дице ве́лий моле́бник./ Но и ны́не, святи́телю, при́сно не преста́й посеща́я чад твои́х,/ я́ко к Бо́гу дерзнове́ние име́яй ве́лие. Песнь 3 Ирмос: Ты еси́ утвержде́ние/ притека́ющих к Тебе́, Го́споди,/ Ты еси́ Свет омраче́нных,// и пое́т Тя дух мой. Припев: Святи́телю о́тче Иоáнне, моли́ Бо́га о на́с. Я́ко у́бо со́лнце взы́де на восто́це,/ ты же, святи́телю Иоа́нне, на се́вере, на престо́ле седя́ Вели́каго Нова́града, возсия́л еси́ све́тлыми дея́ньми,/ и лю́ди вся просвети́л еси́ уче́нии,/ и еретико́в уста́ и́стинным сло́вом загради́л еси́. Припев: Святи́телю о́тче Иоáнне, моли́ Бо́га о на́с. Благообра́зен обы́чай име́я/ и ко всем любо́вь Боже́ственную притяжа́в, прему́дре Иоа́нне,/ ва́рваром остроту́ притупи́, святи́телю, и до конца́ их низложи́. Сла́ва Отцу́ и Сы́ну и Свято́му Ду́ху. Предочи́стив се́рдце твое́, моля́щуся тебе́ Бо́гу о по́льзе людсте́й,/ слы́шал еси́ глас Боже́ственный, глаго́лющ ти, е́же о поле́зных:/ моли́тва бо твоя́ услы́шана бысть,/ я́коже вели́каго о ста́де твое́м к Бо́гу моле́бника, святи́телю Иоа́нне. И ны́не и при́сно и во ве́ки веко́в. Ами́нь. Богородичен: Совокупи́, Пречи́стая, вся правосла́вныя,/ е́же просла́вити Тя, Цари́це, Царя́ Христа́ ро́ждшую;/ дале́че же от нас отжени́ ва́рварское негодова́ние;/ рабу́ же Твоему́ пода́ждь сло́во,/ да возмогу́ воспе́ти Твоя́ пресла́вная чудеса́. Седален, глас 4 Егда́ моля́щуся тебе́ в вели́цей це́ркви Прему́дрости Бо́жия,/ преблаже́нне Иоа́нне,/ предочище́нный душо́ю и те́лом,/ гла́су же Боже́ственному явле́нно тебе́ возгласи́вшу,/ е́же о чудеси́ Богоро́дицы, и о избавле́нии гра́да,/ и о украше́нии Це́ркве Христо́вы,/ и прия́т от слове́с чуднаго о́наго гла́са и́стинных зна́мений и чуде́с дарова́ния,/ и Боже́ственная уче́ния излива́еши всем./ Те́мже и с любо́вию, о́тче, пра́зднуем святу́ю па́мять твою́. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Де́ва Мари́я и Богоро́дица вои́стину,/ я́ко о́блак све́та, днесь возсия́ нам/ и от пра́веднику происхо́дит в сла́ву на́шу;/ не ктому́ Ада́м осужда́ется,/ и Е́ва от уз свободи́ся./ И сего́ ра́ди зове́м, вопию́ще со дерзнове́нием еди́ней Чи́стей:/ ра́дость возвеща́ет рождество́ Твое́ всей вселе́нней. Песнь 4 Ирмос: Услы́шах, Го́споди,/ смотре́ния Твоего́ та́инство,/ разуме́х дела́ Твоя́// и просла́вих Твое́ Божество́. Припев: Святи́телю о́тче Иоáнне, моли́ Бо́га о на́с. Законополо́жника вели́ка, я́ко Моисе́я тя и Дави́да,/ вои́стину стяжа́вше, о́тче, ча́да твоя́,/ я́ко чадолюби́ва отца́, сы́нове Росси́йстии ублажа́ем. Припев: Святи́телю о́тче Иоáнне, моли́ Бо́га о на́с. Мно́ги у́бо це́ркви в сла́ву Бо́жию воздви́гшу ти, святи́телю,/ показа́лся еси́ сам храм Бо́гу соверше́н и нескве́рнен,/ чист душо́ю и те́лом, прему́дре,/ те́мже и нас сотвори́ хра́мы Ду́ха Пресвята́го, преблаже́нне. Сла́ва Отцу́ и Сы́ну и Свято́му Ду́ху. Дне сын яви́лся еси́, в нощи́ же моля́щуся тебе́ Бо́гу/ в просвеще́нии слове́с Бо́жиих, о́тче Иоа́нне./ Враг ненави́димый хотя́ше постраши́ти тя,/ не терпя́ себе́ надо́лзе досажда́ема,/ но моли́твою твое́ю связа́ся вселука́вый. И ны́не и при́сно и во ве́ки веко́в. Ами́нь. Богородичен: Влады́чице Богоро́дице, уста́ви церко́вное смуще́ние,/ во благостоя́нии же учини́ во ве́ки веко́в,/ и еретико́в уста́ загради́, возлюби́вших огнь негаси́мый,/ от него́же изба́ви нас, рабо́в Твои́х,/ и послужи́ти небла́зненно сподо́би/ И́же под ле́том бы́вшу и от Отца́ безле́тно возсия́вшу, Богома́ти:/ Того́ бо нам родила́ еси́. Песнь 5 Ирмос: У́тренюет дух мой к Тебе́, Бо́же,/ зане́ свет повеле́ния прише́ствия Твоего́:/ и́миже у́бо озари́ ум наш, Влады́ко,// и наста́ви на стезю́ жи́зни. Припев: Святи́телю о́тче Иоáнне, моли́ Бо́га о на́с. Честно́е Воскресе́ние и Гроб Живоно́сный и́скренно узре́л еси́ во Иерусали́ме,/ две́рем церко́вным о себе́ тебе́ отве́рзшимся манове́нием Свята́го Ду́ха,/ и сподо́бился еси́ боговиде́ния почерпсти́, святи́телю Иоа́нне,/ искуси́теля же вся́чески победи́л еси́./ И ны́не моли́ся Христу́ Бо́гу,/ е́же победи́ти вся иноплеме́нныя и неве́рныя правосла́вному наро́ду на́шему. Припев: Святи́телю о́тче Иоáнне, моли́ Бо́га о на́с. Вели́каго Нова́града насто́льник и архиепи́скоп был еси́/ и в Дому́ Прему́дрости Бо́жия, я́ко фи́никс, процве́л еси́,/ словесы́ благопло́дными и непоро́чным житие́м наслажда́я сердца́,/ прему́дре и богодухнове́нне./ И мы у́бо, ча́да твоя́, мо́лим тя, блаже́нне,/ да моли́твами твои́ми ми́лость получи́м от Спа́са Христа́,/ и я́ко на чадолюби́ва отца́ наде́емся. Сла́ва Отцу́ и Сы́ну и Свято́му Ду́ху. Бо́жия Це́рковь жива́ и одушевле́на бысть, святи́телю вели́кий Иоа́нне,/ в Це́ркви Бо́жией простира́лся во дни и в нощи́, прему́дре,/ к Прему́дрости Бо́жии прилежа́:/ служи́тель бо и собесе́дник Бо́жий я́вственнейший был еси́,/ и Вели́каго Нова́града похвала́, и всея́ Росси́йския земли́ удобре́ние,/ правосла́вным лю́дем моли́твами твои́ми здра́вие да́руй и на пога́ныя побе́ды и одоле́ния. И ны́не и при́сно и во ве́ки веко́в. Ами́нь. Богородичен: Це́рковь Тя Бо́жию, и пала́ту одушевле́нну,/ и ру́чку, в не́йже ма́нна, и жезл прозя́бший, и го́ру несеко́мую,/ и вся я́же о Тебе́ сбы́вшаяся проро́чества, Богоро́дице,/ служи́тель Твой, вели́кий святи́тель Иоа́нн славосло́вляше,/ и мо́лим Тя, еди́ну челове́ческаго ро́да отъе́мшую поноше́ние. Песнь 6 Ирмос: К могу́щему мя спасти́ Го́споду/ из глубины́ грехо́вныя возопи́х,/ и от тли возведе́ живо́т мой,// я́ко Человеколю́бец. Припев: Святи́телю о́тче Иоáнне, моли́ Бо́га о на́с. К могу́щему Бо́гу ру́це простира́я иногда́, и спасе́ние обре́л еси́,/ вода́м же послужи́вшим тебе́ чрез естество́ Бо́жиим повеле́нием,/ искуси́тель же посрами́ся, и возрыда́, и до конца́ поги́бе/ твои́ми моли́твами, Иоа́нне святи́телю. Припев: Святи́телю о́тче Иоáнне, моли́ Бо́га о на́с. Бо́гу тя просла́вльшу, я́коже дре́вле Моисе́я, прему́дре Иоа́нне,/ предста́ви бо тя па́стыря и вожда́,/ мо́ре жите́йское преводя́ща небла́зненно лю́ди,/ и́хже Христо́с искупи́ Свое́ю Кро́вию. Сла́ва Отцу́ и Сы́ну и Свято́му Ду́ху. Самоде́ржца ума́ страсте́й сотвори́в,/ я́ве ца́рствовал еси́, я́ко изря́дный победи́тель,/ и ра́тных де́рзость покори́л еси́ моле́нием к Бо́гу и к Пречи́стей Богома́тери./ Ны́не же спосо́бствуй ве́рным твои́м на проти́вныя,/ Иоа́нне, вели́кий святи́телю. И ны́не и при́сно и во ве́ки веко́в. Ами́нь. Богородичен: Кре́пость ве́рным, и стена́, и утвержде́ние Ты еси́, Пречи́стая,/ даде́ся от пра́ведных Иоаки́ма и А́нны;/ и по Гаврии́лову благове́щению Бог роди́ся из Тебе́./ Тобо́ю, Пречи́стая, всем истека́ют лу́чшая/ и на земли́ живу́щии к Небеси́ восхо́дят. Кондак, глас 4 Возвесели́ся явле́нно честна́я Це́рковь Христо́ва/ в па́мять днесь приснослову́щаго святи́теля Иоа́нна,/ от Вели́каго Нова́града возсия́вшаго,/ и всю страну́ удиви́вшаго пресла́вными чудодея́нии,/ и все́ми доброде́тельми украси́вшагося./ И по преставле́нии бо честно́е те́ло его́ обре́теся нетле́нно,/ источа́ющее ве́лия чудеса́./ Те́мже зове́м ему́: о всеблаже́нне!/ Моли́ Христа́ Бо́га непреста́нно о всех нас. Икос Пра́зднуем све́тло днесь, к це́ркви теку́ще, весь свяще́нный собо́р, и мона́си, и мно́жество наро́да, и все христоимени́тое ста́до,/ в па́мять отца́ на́шего святи́теля Иоа́нна./ Прославля́ем бо просла́вленнаго от Бо́га,/ его́же житию́ А́нгели удиви́шася,/ и ненака́занным в наказа́ние бысть,/ и огражде́ние помышле́нием челове́ческим,/ и Це́ркви основа́ние,/ непа́дающий бо столп Прему́дрости Бо́жия,/ и Вели́каго Нова́града стена́ и утвержде́ние,/ и всея́ Росси́йския земли́ удобре́ние,/ и вселе́нную удиви́вшаго пресла́вными чудодея́нии,/ и все́ми доброде́тельми украси́вшагося./ Те́мже по достоя́нию блажи́м его́,/ мо́лит бо Христа́ о всех нас. Песнь 7 Ирмос: Халде́йския пе́щи всепа́губную си́лу угаси́вше/ о́бразом А́нгела снизше́дшаго,/ Зижди́телю ю́ноши взыва́ху:// благослове́н еси́ и хва́льный, Бо́же оте́ц на́ших. Припев: Святи́телю о́тче Иоáнне, моли́ Бо́га о на́с. Изнемо́гше иногда́ лю́дие, ору́жия проти́вных ви́дяще;/ ты же тогда́, Иоа́нне блаже́нне, я́рость на грех вооружи́л еси́,/ на моли́тву обрати́вся к ми́лостивому Бо́гу,/ и услы́шана бысть моли́тва твоя́,/ и лю́ди научи́л еси́ взыва́ти: благослове́н Бог отце́в на́ших. Сла́ва Отцу́ и Сы́ну и Свято́му Ду́ху. Не се́ни у́бо послужи́л еси́, но но́вей благода́ти и и́стине,/ зако́н бо богопи́сан внутрь скрижа́ли се́рдца твоего́ от Бо́га прие́м, святи́телю Иоа́нне пребога́те./ Те́мже зако́н нам Полага́ющему научи́л еси́ взыва́ти: благослове́н Бог отце́в на́ших. И ны́не и при́сно и во ве́ки веко́в. Ами́нь. Богородичен: Во све́те Госпо́дни ходя́ще,/ прииди́те, воспои́м Боже́ственную дверь Царя́ ца́рствующим, Мари́ю, Чи́стую Богоро́дицу,/ я́ко вои́стину наде́жду душ на́ших, зову́щим:/ благослове́н Бог отце́в на́ших. Песнь 8 Ирмос: На горе́ святе́й просла́вльшася/ и в купине́ огне́м Присноде́вы/ Моисе́ови та́йну я́вльшаго/ Го́спода по́йте// и превозноси́те во вся ве́ки. Припев: Святи́телю о́тче Иоáнне, моли́ Бо́га о на́с. С Небе́сными чи́нми водворя́яся во дво́рех Госпо́дних,/ во гра́де Жива́го Бо́га, святи́телю Иоа́нне равноа́нгельный,/ всено́щными стоя́нии вопи́л еси́ во бде́ниих:/ хвали́те и превозноси́те Его́ во ве́ки. Припев: Святи́телю о́тче Иоáнне, моли́ Бо́га о на́с. Днесь све́тло пра́зднует Вели́кий Но́вград па́мять твою́,/ красу́ется житие́м твои́м преди́вным, Иоа́нне святи́телю./ Не помяни́ согреше́ний чад твои́х, о́тче,/ но, я́ко чадолюби́вый оте́ц, на ми́лость обрати́ся,/ моля́ ми́лостиваго Бо́га, Ему́же пое́м:/ хвали́те и превозноси́те Его́ во ве́ки. Сла́ва Отцу́ и Сы́ну и Свято́му Ду́ху. Храм свяще́нная душа́ твоя́ показа́ся Бо́жий,/ в не́йже Отец и Сын и Святы́й Дух па́че естества́ всели́ся,/ ты же, святи́телю, пога́ных нахожде́ния отжени́ от достоя́ния твоего́,/ правосла́вным лю́дем мир и здра́вие да́руй, зову́щим:/ хвали́те, по́йте и превозноси́те Его́ во ве́ки. И ны́не и при́сно и во ве́ки веко́в. Ами́нь. Богородичен: Пои́стине вели́ким да́ром от Бо́га почте́н быв, святи́телю Иоа́нне,/ я́ко сподо́бился еси́ послужи́ти чудеси́ Святы́я Богоро́дицы,/ преди́вному Ея́ зна́мению./ Моли́тва бо твоя́ поспешеству́ема к Бо́гу и к Пречи́стей Его́ Богома́тере:/ пои́стине бо моли́тва пра́веднаго поспешеству́ема. Песнь 9 Ирмос: Ужасе́ся о сем Не́бо,/ и земли́ удиви́шася концы́,/ я́ко Бог яви́ся челове́ком пло́тски/ и чре́во Твое́ бысть простра́ннейшее Небе́с./ Тем Тя, Богоро́дицу,// А́нгелов и челове́к чинонача́лия велича́ют. Припев: Святи́телю о́тче Иоáнне, моли́ Бо́га о на́с. Удиви́л еси́ челове́ки в животе́ твое́м, преди́вный Иоа́нне,/ и по преставле́нии твое́м к Бо́гу/ вы́ше обы́чая вся чудеса́ соверши́шася в тебе́,/ Христу́ тя та́ко просла́вльшу,/ я́ко и́стинна служи́теля Своего́./ Мы же тя, я́ко кре́пка, свя́те, помо́щника во бране́х, ублажа́ем. Припев: Святи́телю о́тче Иоáнне, моли́ Бо́га о на́с. Мир Це́рквам пода́ждь, святи́телю, твои́ми моли́твами/ и хору́гви правосла́вной по́мощь на враги́ вся проти́вныя/ и рог Росси́йския земли́ возвы́си, блаже́нне,/ предстоя́ Престо́лу Святы́я Тро́ицы./ И от нас неотсту́пен бу́ди, неотсту́пный к Бо́гу моли́твенниче,/ те́мже тя ублажа́ем. Сла́ва Отцу́ и Сы́ну и Свято́му Ду́ху. Ма́лое сие́ и смире́нное хвале́ние приими́, святи́телю,/ от недосто́йных усте́н, и ме́рзкаго моего́ язы́ка,/ и от се́рдца нечи́ста:/ ты бо, вели́кий святи́телю Иоа́нне, преочище́нный душе́ю и те́лом,/ па́че со́лнечных луч облиста́л еси́, Бо́жия за́поведи соверша́в,/ и к Све́ту Невече́рнему преста́вился еси́./ Ве́рно тя чту́щим моли́ся пода́ти оставле́ние грехо́в, Иоа́нне блаже́нне. И ны́не и при́сно и во ве́ки веко́в. Ами́нь. Богородичен: Свята́я Блаже́нная Ма́ти Бо́жия, пою́щия Тя любо́вию спаса́,/ искуше́ний молву́ разоря́ющи ми́лостивно:/ я́ко Бо́га ро́ждши, вся, ели́ка хо́щеши, твори́ти мо́жеши, Де́во,/ те́мже Тя велича́ем. Светилен От Све́та Трисия́ннаго глас услы́шал еси́ Боже́ственный, святи́телю Иоа́нне,/ и Тро́ицу просла́вил еси́ во Еди́нице и Еди́ницу в Тро́ице,/ и лю́ди та́кожде научи́л еси́,/ и просвети́л еси́ мирски́я концы́ твои́м уче́нием./ Те́мже тя досто́йно почита́ем,/ творя́ще честну́ю па́мять твою́.

Минея, 21 Января, Канон Глас 2 Песнь 1 Ирмос: Нетре́ну, необы́чну, немо́кренно морску́ю ше́ствовав стезю́, избра́нный вопия́ше Изра́иль: Го́сподеви пои́м, я́ко просла́вися. Припев: Святи́и му́ченицы, моли́те Бо́га о на́с. Све́тлостию Трисо́лнечныя благода́ти, сла́внии му́ченицы, озаря́еми, воспева́ющия ва́шу па́мять всечестну́ю просвети́те, от тмы́ избавля́юще страсте́й и обстоя́ний. Припев: Святи́и му́ченицы, моли́те Бо́га о на́с. Освеща́еми Всесвяты́м Ду́хом, ми́ра оста́вльше бу́рю, удали́стеся в гора́х, му́дрии му́ченицы сла́внии, к боже́ственному страда́нию обуча́еми, е́же и све́тло соверши́сте. Сла́ва Отцу́ и Сы́ну и Свято́му Ду́ху. Утвержда́еми держа́вною Зижди́теля и всекре́пкою си́лою, боже́ственнии му́ченицы, обурева́ньми мно́гими яви́стеся непрекло́нни в му́ках, всю́ попра́вше враго́в си́лу. И ны́не и при́сно и во ве́ки веко́в. Ами́нь. Богородичен: Ми́лости мя́, благослове́нная Влады́чице, Боже́ственныя получи́ти сподо́би предста́тельствы Твои́ми, ро́ждшая пло́тию Сло́во Ми́лостивнейшее и Благопремени́тельное, прие́млющее к Нему́ притека́ющия. Песнь 3 Ирмос: На ка́мени мя́ ве́ры утверди́в, разшири́л еси́ уста́ моя́ на враги́ моя́, возвесели́бося ду́х мо́й, внегда́ пе́ти: не́сть свя́т, я́коже Бо́г на́ш, и не́сть пра́веден, па́че Тебе́, Го́споди. Припев: Святи́и му́ченицы, моли́те Бо́га о на́с. Любо́вию уязвля́еми Влады́чнею, му́ки претерпе́сте многообра́зныя: жи́лами бо суро́вейше, страда́льцы, бие́ми, огне́м же отвсю́ду лю́то опаля́еми, непрекло́нни пребы́сте. Припев: Святи́и му́ченицы, моли́те Бо́га о на́с. Укрепля́еми си́лою Госпо́днею, изыдо́сте к боре́нию врага́ и сего́ низложи́сте, страстоте́рпцы, Христу́ зову́ще: Ты́ еси́ Бо́г на́ш, и не́сть пра́веден, па́че Тебе́, Го́споди. Сла́ва Отцу́ и Сы́ну и Свято́му Ду́ху. Со а́нгелы лику́юще в вы́шних и с собо́ры соединя́еми му́чеников, с си́ми моли́теся изба́вити вся́кия ско́рби и обстоя́ния ва́с чту́щия, боже́ственнии му́ченицы. И ны́не и при́сно и во ве́ки веко́в. Ами́нь. Богородичен: Согла́сно Тя́, Всепе́тая, благослови́м, Е́юже на́м возсия́ неизрече́нно Сия́ние Невече́рнее, и вопие́м: спаса́й рабы́ Твоя́ вся́каго озлобле́ния, ве́рных бо Помо́щница Ты́ еси́. Седален, глас 4 Красота́ просия́вши тве́рдых му́чеников, четвери́ца озари́ четы́ре концы́ ми́ра заря́ми, страда́ньми му́чеников и си́лами, от ни́хже сия́ет вели́кий Евге́ний. Песнь 4 Ирмос: Пою́ Тя, слу́хом бо, Го́споди, услы́шах и ужасо́хся: до мене́ бо и́деши, мене́ ища́, заблу́ждшаго. Те́м мно́гое Твое́ снизхожде́ние, е́же на мя́, прославля́ю, Многоми́лостиве. Припев: Святи́и му́ченицы, моли́те Бо́га о на́с. Пою́ще благоче́стно, почти́м Евге́ниево дерзнове́ние, Аки́лы противле́ние, Кани́диево же терпе́ние, ку́пно с ни́ми почита́юще и Уалериа́нову кре́пость. Припев: Святи́и му́ченицы, моли́те Бо́га о на́с. Неи́стовством одержа́н, мучи́тель у́жами растя́гнена неми́лостивно би́ти тя́ повелева́ет, и желе́зом вельми́ строга́ти тя́, Евге́ние, и свеща́ми опаля́ти те́ло твое́. Сла́ва Отцу́ и Сы́ну и Свято́му Ду́ху. Непщева́в пребезу́мный мучи́тель тве́рдость ва́шу му́ками разори́ти, му́дрии му́ченицы, му́кам подлага́ет ва́с горча́йшим, но благода́тию Вседе́теля Христа́ сего́ посрами́сте. И ны́не и при́сно и во ве́ки веко́в. Ами́нь. Богородичен: Я́ко еди́на ве́рных по́моще, Всеблагослове́нная Богоро́дице, от вся́ких изба́ви скорбе́й Твоя́ рабы́, те́пле блажа́щия Тя́ и в боже́ственный кро́в Тво́й притека́ющия. Песнь 5 Ирмос: Просвеще́ние во тме́ лежа́щих, спасе́ние отча́янных, Христе́ Спа́се мо́й, к Тебе́ у́тренюю, Царю́ ми́ра, просвети́ мя сия́нием Твои́м, ино́го бо ра́зве Тебе́ Бо́га не зна́ю. Сла́ва Отцу́ и Сы́ну и Свято́му Ду́ху. Му́ченическое показу́я вои́стинну терпе́ние, ста́л еси́, я́ко адама́нт, го́рькия му́ки подъе́мля и взыва́я Зижди́телю благода́рно, му́чениче Евге́ние: ино́го бо, ра́зве Тебе́, Бо́га не зна́ем. И ны́не и при́сно и во ве́ки веко́в. Ами́нь. Безве́стию бо́ги и́дольския препосла́л еси́ свяще́ннейшими твои́ми к Зижди́телю моли́твами, подъя́л еси́ ра́ны многообра́зныя по всему́ те́лу, му́чениче Евге́ние, па́лицами неща́дно ураня́емь. Песнь 6 Ирмос: Ко Го́споду от ки́та Ио́на возопи́: Ты́ мя возведи́ из глубины́ а́да, молю́ся, да я́ко Изба́вителю, во гла́се хвале́ния, и́стины же ду́хом пожру́ Тебе́. Припев: Святи́и му́ченицы, моли́те Бо́га о на́с. Простира́еми на дре́ве, и желе́зом стру́жеми я́ростию судя́щаго и жи́лами ссека́еми по плеще́м неща́дно, и огне́м опаля́еми, добропобе́днии му́ченицы ра́довахуся. Сла́ва Отцу́ и Сы́ну и Свято́му Ду́ху. Терпе́л еси́ те́лом, свеща́ми опаля́емь, и на дре́ве, сла́вне, протяза́емь, Евге́ние, и со́лию ра́ны неща́дно посыпа́емы беззако́ннаго мучи́теля суровство́м. И ны́не и при́сно и во ве́ки веко́в. Ами́нь. Богородичен: Да изба́вимся вся́каго наве́та и ско́рби, Богора́дованная, и́же в Тво́й покро́в притека́ющии, и любо́вию Тя́ при́сно благоче́стно сла́вяще, я́ко Ма́терь Бо́жию Всенепоро́чную. Песнь 7 Ирмос: О́бразу злато́му на по́ле Деи́ре служи́му, трие́ Твои́ о́троцы небрего́ша безбо́жнаго веле́ния, посреде́ же огня́ вве́ржени, ороша́еми, поя́ху: благослове́н еси́, Бо́же оте́ц на́ших. Припев: Святи́и му́ченицы, моли́те Бо́га о на́с. По́двиги све́тлыми обле́клся еси́ му́жески на пре́лесть и, победоно́сец, о Евге́ние, Боже́ственным манове́нием бы́в, обре́л еси́ воздая́ния трудо́в, со а́нгелы же пое́ши: благослове́н еси́, Бо́же отце́в на́ших. Припев: Святи́и му́ченицы, моли́те Бо́га о на́с. Кре́ст Христо́в иму́ще, страда́льцы, я́ко Боже́ственное ору́жие, диа́воле ополче́ние и мучи́телей противле́ние вку́пе низложи́сте, побе́ды венцы́ прие́мше от жизноно́сныя десни́цы Страстополо́жника Бо́га. Сла́ва Отцу́ и Сы́ну и Свято́му Ду́ху. Умо́м чи́стым му́к прило́ги не поколеба́лся еси́, но непреста́нно, о Евге́ние, па́лицами бие́мь, изря́днейше посе́кл еси́, му́чениче, сопротивле́нием страда́ний твои́х главы́ враго́в и неви́димых супоста́тов. И ны́не и при́сно и во ве́ки веко́в. Ами́нь. Богородичен: Се́ вои́стинну, я́ко прорекла́ еси́, ро́ди Тя́, Всечи́стая, вси́ досто́йно ублажа́ем и по до́лгу сла́вим: Ты́ бо Собезнача́льное Сло́во О́тчее родила́ еси́, за е́же спасти́ челове́ки, воплоще́нное из Тебе́. Песнь 8 Ирмос: В пе́щь о́гненную ко отроко́м евре́йским снизше́дшаго и пла́мень в ро́су прело́жшаго Бо́га, по́йте дела́ я́ко Го́спода, и превозноси́те во вся́ ве́ки. Припев: Святи́и му́ченицы, моли́те Бо́га о на́с. Вся́кому лука́вному кова́рству гони́телей сопроти́вися Уалериа́н же, и сла́вный с ни́м Аки́ла, и боже́ственный Евге́ний, ку́пно со страда́льцем Кани́дием до́блественным. Припев: Святи́и му́ченицы, моли́те Бо́га о на́с. Богоза́рная чу́дных страстоте́рпцев Христо́вых наста́ па́мять, Уалериа́на же и Евге́ния ку́пно, Аки́лы боже́ственнаго и Кани́дия, ю́же ра́достно соверша́ем любо́вию. Сла́ва Отцу́ и Сы́ну и Свято́му Ду́ху. Светови́дными луча́ми облиста́ющи на́м све́тло, наста́ ле́тняя па́мять страстоте́рпцев Христо́вых, Аки́лы боже́ственнаго и Кани́дия ку́пно, и Евге́ния, и Уалериа́на. И ны́не и при́сно и во ве́ки веко́в. Ами́нь. Богородичен: Соприсносу́щный Отцу́ и Собезнача́льный Сы́н из Тебе́ про́йде, в после́дняя ле́та, за е́же спасти́ ны, Де́во Чи́стая Неискусобра́чная, Его́же не преста́й на́м умилостивля́ющи. Песнь 9 Ирмос: От Бо́га Бо́га Сло́ва, неизрече́нною му́дростию прише́дшаго обнови́ти Ада́ма, я́дию в тле́ние па́дшаго лю́те, от Святы́я Де́вы неизрече́нно воплоти́вшагося на́с ра́ди, ве́рнии, единому́дренно пе́сньми велича́ем. Припев: Святи́и му́ченицы, моли́те Бо́га о на́с. Стремле́ние победи́л еси́ мучи́телей, по мно́жайших му́ках преше́д к Бо́гу прера́достно, побе́ды по́чести прие́м, я́ко ору́жник до́блественный, я́ко вели́к хра́брник, я́ко избра́нный Христо́в во́ин, Евге́ние всеизя́щнейший. Припев: Святи́и му́ченицы, моли́те Бо́га о на́с. Со а́нгельскими ли́ки, и му́ченическими собо́ры совоку́пльшеся, и пра́ведных чи́ны, ны́не с ни́ми моли́теся ва́с воспева́ющим дарова́ти очище́ние грехо́в и вся́ких бе́д, му́ченицы, избавле́ние. Сла́ва Отцу́ и Сы́ну и Свято́му Ду́ху. О на́с, соверша́ющих све́тлую ва́шу па́мять, Евге́ние богому́дре, благоче́стно, му́чениче Аки́ло всесла́вне и Уалериа́не с Кани́дием сострада́льцем, приле́жно умоли́те Христа́ Преблага́го. И ны́не и при́сно и во ве́ки веко́в. Ами́нь. Богородичен: Тя́, Всесвята́я Де́во, а́нгелов мно́жества и все́х челове́к ро́ди прера́достно ублажа́ют: все́х бо Спа́са, и Зижди́теля, и Влады́ку, и Бо́га породила́ еси́, Его́же о на́с моли́.

глас 8 Пе́снь 1 Ирмо́с: Во́ду проше́д, я́ко су́шу, и еги́петскаго зла́ избежа́в, изра́ильтянин вопия́ше: Изба́вителю и Бо́гу на́шему пои́м. Припев: Священному́чениче Диони́сие, моли́ Бо́га о на́с. Па́влом боже́ственным науче́н, небе́сных, Диони́сие, ви́дцем, небе́сный таи́нник а́бие и боговеща́тель бы́л еси́. И́же благода́тию Бо́жиею озари́вся, просвети́, блаже́нне, пою́щих тя́ ду́ши твоя́ разуме́ти богодухнове́нная уче́ния, Диони́сие. Умо́м преочище́нным и душе́ю, небе́сных удобре́ний сия́ния уве́дети сподо́бился еси́, и те́х ликостоя́ния, Диони́сие. Богоро́дичен: Черто́г светоно́сный, па́че ума́ воплоще́ния яви́лася еси́ все́х Соде́теля: из Тебе́ бо пло́ть, Богома́ти, на́шу оде́ял е́сть. Пе́снь 3 Ирмо́с: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ в любви́ Твое́й, жела́ний кра́ю, ве́рных утвержде́ние, еди́не Человеколю́бче. Небе́сных круго́в превозше́д, о́тче, преми́рных чи́ны, и во́инства, и све́тлости, высоковеща́ньми слове́с и всему́дрыми уче́нии все́м изъясни́л еси́. Высо́каго виде́ния насы́щся, преподо́бне, име́н Боже́ственных Боже́ственное разуме́ние богосло́вил еси́, Тро́ичный богосло́в бы́в благода́тию, богоблаже́нне Диони́сие. Умертви́вся ны́нешним жела́нием, е́же к Бо́гу, и любому́дрию кре́пко научи́вся, су́щим па́че ума́ животво́рным дарова́нием богоно́сный орга́н, о́тче, бы́л еси́. Богоро́дичен: Дея́нием, Де́во, Вседе́тельнаго Ду́ха, те́ло Влады́це все́х плодоноси́ла еси́, в Не́мже осуди́ся ми́ра гре́х и Жи́знь источи́ся ве́чнующая. Седа́лен, гла́с 8 В пучи́не прему́дрости уча́, Ду́ха глубины́, Тро́ицы еди́но Божество́ пропове́дал еси́, преподо́бне, списа́в вся́ а́нгельския чи́ны и та́йная те́х сия́ния, богому́дре. Те́м и ни́жнюю иера́рхию счиня́я, ко еди́ному вся́ возве́л еси́ еди́нству, иера́рше Диони́сие. Моли́ Христа́ Бо́га прегреше́ний оставле́ние дарова́ти честву́ющим любо́вию святу́ю па́мять твою́. Богоро́дичен: Со́лнца о́блаче разу́мнаго, Боже́ственнаго Све́та свети́льниче златокова́нный, нескве́рная, небла́зная, всенепоро́чная Влады́чице, омраче́нную ду́шу мою́ ослепле́нием страсте́й безстра́стия заре́ю просвети́, молю́ся. И оскверне́нное мое́ се́рдце омы́й пото́ки умиле́ния, покая́ния же слеза́ми, и от тиме́ния мя́ очи́сти де́л мои́х, да любо́вию зову́ Ти́: Богоро́дице Присноде́во, моли́ Христа́ Бо́га, прегреше́ний оставле́ние пода́ти ми́, Тебе́ бо име́ю наде́жду, ра́б Тво́й. Крестобогоро́дичен: А́гнца, и Па́стыря, и Изба́вителя, А́гница зря́щи на Кресте́, восклица́ше, пла́чущи, и, го́рько рыда́ющи, вопия́ше: ми́р у́бо ра́дуется, прие́мляй Тобо́ю избавле́ние, утро́ба же Моя́ гори́т, зря́щи Твое́ распя́тие, е́же терпи́ши за милосе́рдие ми́лости. Долготерпели́ве Го́споди, ми́лости бе́здно и исто́чниче неисчерпа́емый, умилосе́рдися и да́руй согреше́ний оставле́ние, ве́рою пою́щим Боже́ственныя Стра́сти Твоя́. Пе́снь 4 Ирмо́с: Ты́ моя́ кре́пость, Го́споди, Ты́ моя́ и си́ла, Ты́ мо́й Бо́г, Ты́ мое́ ра́дование, не оста́вль не́дра О́тча, и на́шу нищету́ посети́в. Те́м с проро́ком Авваку́мом зову́ Ти́: си́ле Твое́й сла́ва, Человеколю́бче. Церко́вное благочи́ние украси́л еси́: в ни́х бо, о́тче, живописа́л еси́ зра́чныя о́бразы я́вственно священнописа́нием безобра́зных си́л; и́миже тайново́дятся и просвеща́ются вся́ ве́рных, богому́дре, собо́ры. Струи́ твоего́ богосло́вия, богоприя́тне, цветники́ напая́ют слове́сныя, присноцве́тущия зело́ и насажде́нныя на пра́вости богосло́вия: еди́нство бо Существа́ в Трие́х Ли́цех, честно́е Единонача́лие пропове́дал еси́. А́нгельскаго священнонача́льства си́льное, святи́телю, жела́ние и раче́ние, е́же к Бо́гу, и неукло́нное ма́ние к высоте́ боже́ственней и непостижи́мей, научи́л еси́ богому́дренно, ве́рою вопию́щия: си́ле Твое́й сла́ва, Человеколю́бче. Богоро́дичен: Священноде́йствитель спасе́ния бы́сть Сы́н Тво́й все́м пою́щим Тя́, и наста́вник, и просвети́тель, и пра́вда, Де́во, и избавле́ние. Те́м Тя́, Богоро́дицу, и́стинно и госпо́дьственно ве́рнии единому́дренно сла́вим. Пе́снь 5 Ирмо́с: Вску́ю мя́ отри́нул еси́ от лица́ Твоего́, Све́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя́, и к све́ту за́поведей Твои́х пути́ моя́ напра́ви, молю́ся. Глаго́л твои́х веща́ние, я́ко не́кий небе́сный шу́м носи́мь, безбо́жныя ра́зумы огроми́ сло́вом благода́ти и веле́ний боже́ственных заря́ми светле́йшими ве́рных сердца́ просвети́. Уподо́бился еси́ купцу́, и́щущему до́брыя би́серы, всебога́те, и обре́л еси́ еди́н Би́сер, и́стинно многоце́нен, и, уди́влься его́ боготво́рну световерже́нию, святи́телю, Бо́га испове́дал еси́. Исто́чник му́дрости, любому́дрейше о́тче, возлюби́л еси́, и, тоя́ раче́нием и любо́вию одержи́мь, вели́к бы́л еси́, и ре́ки боже́ственных веле́ний всегда́ то́чиши, богогла́се. Богоро́дичен: Я́ко Обра́дованная, добротворя́щее прия́ла еси́ благоле́пие, вся́ еди́нем хоте́нием Сотво́ршаго, и боже́ственною добро́тою и просвеще́нием благове́рия, Богома́ти, на́с Удобри́вшаго. Пе́снь 6 Ирмо́с: Очи́сти мя́, Спа́се, мно́га бо беззако́ния моя́, и из глубины́ зо́л возведи́, молю́ся, к Тебе́ бо возопи́х, и услы́ши мя́, Бо́же спасе́ния моего́. Зако́нно любому́дрствуя, му́дрости да́р получи́л еси́, боже́ственне богосло́вя правосла́вныя догма́ты, всеблаже́нне, оста́вил еси́, и́хже наслажда́ющеся, ве́рнии, тя́ блажи́м. Ра́зумом боголе́пным, богому́дре, удобря́емь, боже́ственному учи́телю слу́х тво́й приклони́л еси́, и преми́рную от него́ му́дрость навы́кл еси́, Диони́сие. Житие́ твое́ чу́дно, сло́во же ди́внейше, язы́к тво́й светоза́рен, уста́ огнедухнове́нна и духодви́жима, у́м же тво́й испы́тен, о́тче, богоблаже́нне. Богоро́дичен: Гла́с Ти́ Гаврии́лов ра́достно, Де́во, взыва́ем ве́рнии, из Тебе́ бо неизрече́нно на́м живонача́льный Творе́ц изше́л е́сть и примеси́ся челове́ком, Человеколю́бец. Конда́к, гла́с 8 Небе́сная врата́ проше́д ду́хом, я́ко учени́к, до тре́тияго небесе́ дости́гшаго апо́стола, Диони́сие, неизрече́нных обогати́лся еси́ вся́ким ра́зумом и озари́л еси́ во тме́ неве́дения седя́щия. Те́мже зове́м: ра́дуйся, о́тче всеми́рный. И́кос: А́нгел от челове́ков, доброде́тельми бы́в вели́кий Диони́сий, ве́сь, я́ко крила́т, навы́че умо́м небе́сныя ра́зумы. Те́м пе́сньми, я́ко а́нгела, почти́м, вопию́ще к нему́ такова́я: ра́дуйся, уве́девый Христа́ Па́влом; ра́дуйся, мно́гия ко Христу́ обрати́вый; ра́дуйся, многобо́жия храмо́в губи́телю; ра́дуйся, богоразу́мнаго сове́та смотре́ние; ра́дуйся, кни́го богоначерта́нная та́йных сокро́вищ; ра́дуйся, скрижа́ль богозра́чная и зерца́ло небе́сное; ра́дуйся, я́ко Стра́сть Госпо́дню ви́дел еси́; ра́дуйся, я́ко усе́рдно Того́ ра́ди закала́ешися; ра́дуйся, исто́чниче, источа́я ра́зум; ра́дуйся, ка́пле, угаша́ющи безу́мие; ра́дуйся, стезе́ неле́стная спасе́ния; ра́дуйся, прегра́до нечести́вых прехо́да; ра́дуйся, о́тче всеми́рный. Пе́снь 7 Ирмо́с: Бо́жия снисхожде́ния о́гнь устыде́ся в Вавило́не иногда́, сего́ ра́ди о́троцы в пещи́, ра́дованною ного́ю, я́ко во цве́тнице, лику́юще поя́ху: благослове́н еси́, Бо́же оте́ц на́ших. Я́ко ту́ча небе́сная зе́млю жа́ждущую, твоя́ уче́ния ве́рных сердца́ при́сно жела́ющая умаща́ют и несы́тно вопи́ти науча́т: оте́ц на́ших Бо́же, благослове́н еси́. Ра́зумом богому́дренным безпло́тныя умы́ расписа́л еси́ и те́х, преблаже́нне, песносло́вия, боже́ствен бы́в, Це́рковь пе́ти наказа́л еси́: благослове́н Бо́г оте́ц на́ших. Прия́телище Ду́ха Всесвята́го яви́лся еси́ благоключи́мое, и Того́ вдохнове́ния и явле́ния проро́чески провозглаша́я, му́дре Диони́сие, вопия́ше ве́село: благослове́н Бо́г оте́ц на́ших. Богоро́дичен: Се́ ны́не испо́лнися Иса́ии богоглаго́ливаго прорече́ние: Де́ва бо во чре́ве Бо́га Сло́ва име́ и породила́ е́сть Жизнода́вца; Ему́же вси́ зове́м: благослове́н Бо́г оте́ц на́ших. Пе́снь 8 Ирмо́с: Седмери́цею пе́щь халде́йский мучи́тель богочести́вым неи́стовно разжже́, си́лою же лу́чшею спасе́ны сия́ ви́дев, Творцу́ и Изба́вителю вопия́ше: о́троцы благослови́те, свяще́нницы воспо́йте, лю́дие превозноси́те во вся́ ве́ки. Све́тел, я́ко зерца́ло, бы́в, Диони́сие, и вмести́телен чи́стых явле́ний у́м соде́лав, доброде́телию, всебога́те, лучи́ па́че ума́ сия́ния прие́мля, вопия́л еси́: свяще́нницы благослови́те, лю́дие превозноси́те во вся́ ве́ки. Оби́льнейшая благода́ть излия́ся во устна́х твои́х, те́м боже́ственная уче́ния предложи́л еси́, и те́х ра́зумы па́че смы́сла на́м простира́я и ясне́е и све́тло отверза́я, ве́рою пою́щим: свяще́нницы благослови́те, лю́дие превозноси́те во вся́ ве́ки. Зна́емейша бы́сть тобо́ю, Диони́сие, Афи́нская всесла́вная митропо́лия, Христу́ прине́сшая тя́ нача́ток всесвяще́нный Всецарю́, всегда́ пою́щи: о́троцы благослови́те, свяще́нницы воспо́йте, лю́дие превозноси́те во вся́ ве́ки. Богоро́дичен: Ма́ти Бо́жия Всенепоро́чная, души́ моея́ стру́пы и грехо́вныя я́звы потреби́: Сы́на бо родила́ еси́, вла́сть иму́щаго свя́занныя плени́цами грехо́вными удо́бь осла́бити от у́з нереши́мых, еди́наго Благоде́теля и еди́наго Жизнода́вца. Пе́снь 9 Ирмо́с: Ужасе́ся о се́м не́бо, и земли́ удиви́шася концы́, я́ко Бо́г яви́ся челове́ком пло́тски, и чре́во Твое́ бы́сть простра́ннейшее небе́с. Те́м Тя́, Богоро́дицу, А́нгелов и челове́к чинонача́лия велича́ют. Святы́х апо́стол сподо́бился еси́ ви́дитель бы́ти и сострада́лец, и соо́бщник бы́л еси́ сла́вы, и с те́ми на виде́ние потща́лся еси́ телесе́ и́стинно живонача́льныя еди́ныя Богоро́дицы и честне́йшия, Ю́же досто́йно велича́ем. Боже́ственнаго Ца́рствия на небесе́х насле́дник бы́л еси́, я́ко зако́нен архиере́й, о́тче, я́ко непобеди́мь страда́лец, свяще́нства ма́стию кро́вь сраствори́л еси́ му́ченическую. Те́м сугу́бым венце́м сподо́бился еси́ досто́йно, священнотаи́нниче Диони́сие. Я́ко име́я дерзнове́ние ко Христу́, иера́рше, му́дре Диони́сие, всегда́ моли́ изба́витися от искуше́ния благоче́стно пою́щим тя́, учениче́ неизрече́нных виде́ний, я́ко тайноуче́нныя и богонача́льныя священноявле́нник бла́гости. Богоро́дичен: Победи́вшу е́реси хра́брски, честну́ю Це́рковь яви́, ю́же Христо́с честно́ю Свое́ю кро́вию я́ко Бла́г стяжа́, Обра́дованная, Сы́н Тво́й и́стинно, и спаси́ от бе́д и от обстоя́ния, одержа́щаго на́с, Влады́чице. Свети́лен Доброде́тельми восходя́, возвы́сився на небеса́, богоприя́тне, и позна́л еси́ а́нгелов чи́ны, и все́х вы́шних стоя́ния, и Трисо́лнечную Зарю́, навы́к от Па́вла. Богоро́дичен: И́же жи́зни боже́ственней и блаже́нней позави́дев ми́ дре́вле в раи́, вра́г прелука́вый и злоко́зненный, и от Еде́ма изгна́в мя́, умерщвля́ется Рождество́м Твои́м, Богоро́дице.

Минея, 29 Апреля, Канон мучеников Глас 4 Песнь 1 Ирмос: Триста́ты кре́пкия,/ рожде́йся от Де́вы,/ безстра́стия во глубине́ души́ трича́стное потопи́, молю́ся,/ да Тебе́, я́ко в тимпа́не,/ во умерщвле́нии телесе́ побе́дное воспою́ пе́ние. Припев: Святи́и му́ченицы, моли́те Бо́га о на́с. Боже́ственными добро́тами наслажда́ющеся вкупе́,/ и пото́ка пи́щнаго напита́ющеся бога́тно,/ и прича́стием обожа́еми, му́ченицы венцено́сцы,/ вас блажа́щия от лю́тых бед изба́вите. Припев: Святи́и му́ченицы, моли́те Бо́га о на́с. Я́коже со́лнечныя лучи́, возсия́вше, заря́ми тве́рдых по́двиг, страда́льцы,/ и чуде́с сия́нии вся просвеща́ете,/ страсте́й нощь решите́ и де́монов мрак разоря́ете. Сла́ва Отцу́ и Сы́ну и Свято́му Ду́ху. Умерщвле́ни на земли́ я́звами боле́зней,/ к неболе́зненней жи́зни преидо́сте вку́пе, ю́нии многострада́льнии./ Те́мже то́чите исцеле́ния, вся́ку боле́знь облегча́юще/ Богоприя́тными моли́твами, пребога́тии. И ны́не и при́сно и во ве́ки веко́в. Ами́нь. Богородичен: Родила́ еси́ Бо́га из чи́стых Твои́х крове́й,/ вопло́щшася па́че ума́ зра́ком и́же по нас, Ма́ти Пренепоро́чная./ Те́мже вси Тя, ро́дове родо́в, ублажа́ют, святы́х му́ченик утвержде́ние. Песнь 3 Ирмос: Не му́дростию, и си́лою,/ и бога́тством хва́лимся,/ но Тобо́ю, О́тчею Ипоста́сною Му́дростию, Христе́:/ несть бо свят, па́че Тебе́,/ Человеколю́бче. Припев: Святи́и му́ченицы, моли́те Бо́га о на́с. Ме́ртвым истука́нным пожре́ти ника́коже восхоте́вше,/ Поже́ршемуся нас ра́ди же́ртва жива́ принесо́стеся,/ о́троцы прекра́снии, святи́и му́ченицы. Припев: Святи́и му́ченицы, моли́те Бо́га о на́с. Зако́ны Боже́ственными, укрепля́еми си́лою Ду́ха,/ беззако́ннующих сове́ты и ловле́ния низложи́сте/ и, зако́нне пострада́вше, сла́ву улучи́сте. Сла́ва Отцу́ и Сы́ну и Свято́му Ду́ху. Да восхва́лится Арте́ма и Филимо́н, Феости́х и Магн,/ Руф сла́вный, и Антипа́тр, и Фавма́сий,/ Фео́гний и Феодо́т великоимени́тии. И ны́не и при́сно и во ве́ки веко́в. Ами́нь. Богородичен: Ору́жия вся вра́жия ны́не до конца́ оскуде́ша,/ Тебе́ ро́ждшей Христа́, уя́звлена копие́м, Всенепоро́чная,/ о Не́мже му́ченицы, уязви́вшеся, пострада́ша. Седален, глас 1 Лик светови́ден свяще́нных страда́лец, совокупле́ние красно́,/ Богособра́нен собо́р, девяточи́сленный соста́в,/ пострада́вше кре́пко, попра́вше вра́жие мучи́тельство/ и причто́стеся А́нгельским лико́м, Го́сподеви предстоите́. Песнь 4 Ирмос: Седя́й в сла́ве на престо́ле Божества́/ во о́блаце ле́гце,/ прии́де Иису́с Пребоже́ственный/ Нетле́нною Дла́нию и спасе́ зову́щия:/ сла́ва, Христе́, си́ле Твое́й. Припев: Святи́и му́ченицы, моли́те Бо́га о на́с. Сожже́ния страда́льцы и Богожре́нная заколе́ния,/ приноше́ние соверше́нно, же́ртвы прия́тны,/ приведо́стеся во́лею поже́ршемуся и смерть умертви́вшему./ Те́мже вас ублажа́ем. Припев: Святи́и му́ченицы, моли́те Бо́га о на́с. Чу́до вели́кое показу́юще, сля́ченныя испра́висте, страда́льцы, ру́ки,/ и во́днаго труда́ изба́висте прибе́гшаго с любо́вию к ра́це ва́шей,/ наро́чита му́жа иногда́, досточу́днии. Сла́ва Отцу́ и Сы́ну и Свято́му Ду́ху. Да ублажа́тся досто́йно Арте́ма и Антипа́тр,/ Феости́х и Руф, Магн, и Филимо́н, и Фео́н,/ и Фео́гн с сла́вным Феодо́том, пострада́вший, зову́т:/ сла́ва, Христе́, си́ле Твое́й. И ны́не и при́сно и во ве́ки веко́в. Ами́нь. Богородичен: И́же в не́дрех О́тчих неизрече́нно седя́й,/ на Твои́х объя́тиих седи́т, Де́во, я́ко Младе́нец,/ Его́же блаже́нную страсть вообража́юще, добропобе́днии о́троцы изво́лиша умре́ти. Песнь 5 Ирмос: Нечести́вии не у́зрят сла́вы Твоея́, Христе́,/ но мы Тя, Единоро́дне, Оте́ческия сла́вы сия́ние Божества́,/ от но́щи у́тренююще,/ воспева́ем Тя, Человеколю́бче. Припев: Святи́и му́ченицы, моли́те Бо́га о на́с. Я́коже мы́сленное у́глие, вже́гше ум,/ попали́сте вои́стинну хвра́стную вся́ку пре́лесть, блаже́ннии,/ и запале́ние угаси́сте и́дольское росо́ю ве́ры. Припев: Святи́и му́ченицы, моли́те Бо́га о на́с. Разделе́ния в телесе́х не име́сте мно́зех,/ за Неразде́льную пострада́ти, страда́льцы, Тро́ицу иду́ще,/ те́мже разруши́сте диа́вола ополче́ние вся́ко. Сла́ва Отцу́ и Сы́ну и Свято́му Ду́ху. Воспева́ет чудеса́ ва́ша/ от лука́ваго легео́на разреши́выйся де́монска, му́ченицы Богови́днии,/ к честны́м ковче́гом ва́шим прише́дый со усе́рдием. И ны́не и при́сно и во ве́ки веко́в. Ами́нь. Богородичен: Избавля́ющи яви́ся нас от бед и прегреше́ний,/ тлетво́рных страсте́й, и скорбе́й, и обстоя́ний,/ ве́рою пою́щия Тя, Богоро́дице, Присноде́во. Песнь 6 Ирмос: Приидо́х во глубины́ морски́я,/ и потопи́ла мя есть бу́ря мно́гих грехо́в,/ но, я́ко Бог, из глубины́ возведи́ живо́т мой,/ Многоми́лостиве. Припев: Святи́и му́ченицы, моли́те Бо́га о на́с. Честна́ смерть яви́ся Боже́ственных страда́льцев пред Тобо́ю, Бо́же вся́ческих,/ и́хже ны́не почита́я, врачевство́ безме́здное боля́щим яви́л еси́. Сла́ва Отцу́ и Сы́ну и Свято́му Ду́ху. Возвы́сивше ру́це и сердца́ высо́ким нра́вом к Вы́шнему мужеу́мно,/ лука́ваго возноше́ния, му́ченицы Богоно́сцы, низложи́сте. И ны́не и при́сно и во ве́ки веко́в. Ами́нь. Богородичен: Я́коже стог, чре́во Твое́, Чи́стая, яви́ся,/ пшени́цу нося́щий безcме́ртия,/ всех ве́рных ду́ши пита́ющую и му́ченики просвеща́ющую. Кондак, глас 2 Тве́рдый и всесве́тлый лик му́ченик девяти́,/ Трисо́лнечнаго Божества́ испове́дницы,/ на суди́щи Тому́ нача́льно взыва́ху:/ кровь и ду́ши на́ша с телесы́,/ я́ко непоро́чную же́ртву, прино́сим Тебе́, Влады́ко,/ в ли́цех Небе́сных Твои́х сопричти́, я́ко Бог Ми́лостивый. Песнь 7 Ирмос: Ю́ноши три в Вавило́не,/ веле́ние мучи́телево на бу́йство прело́жше,/ посреде́ пла́мене вопия́ху:/ благослове́н еси́, Го́споди, Бо́же оте́ц на́ших. Припев: Святи́и му́ченицы, моли́те Бо́га о на́с. Иска́пают ва́ши тру́дове, му́ченицы, Боже́ственныя струи́ исцеле́ний всегда́,/ боле́зней ре́ки изсуша́юще/ и скве́рну вся́ку отмыва́юще страсте́й, досточу́днии. Припев: Святи́и му́ченицы, моли́те Бо́га о на́с. Ра́довахуся страстоте́рпцы, внегда́ скорбе́ти им, ра́достию неизглаго́ланною,/ поя́ху, усека́еми мече́м:/ благослове́н еси́, Го́споди, Бо́же оте́ц на́ших. Сла́ва Отцу́ и Сы́ну и Свято́му Ду́ху. Тяготу́ неду́гов, стра́сти серде́чныя и боле́зни теле́сныя,/ вся́ку же находя́щую скорбь/ нам облегчи́те, сла́внии страда́льцы. И ны́не и при́сно и во ве́ки веко́в. Ами́нь. Богородичен: Яви́вшися всем му́чеником, Чи́стая Ма́ти Бо́жия, держа́ва ве́лия,/ яви́лася еси́ челове́ком заступле́ние,/ Тя пою́щим всегда́ свяще́нными пе́сньми. Песнь 8 Ирмос: Изба́вителю всех, Всеси́льне,/ посреде́ пла́мене блаточе́ствовавшия, снизше́д, ороси́л еси́/ и научи́л еси́ пе́ти:/ вся дела́, благослови́те, по́йте Го́спода. Припев: Святи́и му́ченицы, моли́те Бо́га о на́с. Ра́достную хвалу́ принесе́м/ вели́кия нам засту́пники, страстоте́рпцы му́ченики Пода́вшему, вопию́щим:/ вся дела́, благослови́те Госпо́дня Го́спода. Припев: Святи́и му́ченицы, моли́те Бо́га о на́с. Укорени́вшеся на ка́мени ве́ры благоро́дне,/ я́коже ве́тви, му́ченицы, плоды́ нам страда́ния принесо́ша, ве́рою пою́щим:/ благослови́те, вся дела́ Госпо́дня, Го́спода. Сла́ва Отцу́ и Сы́ну и Свято́му Ду́ху. Вра́чеве страсте́й великоимени́тии, души́ моея́ стра́сти исцели́те,/ и гее́нны изба́вите, и тьмы о́ныя кроме́шния,/ моля́ще Христа́ Бо́га на́шего. И ны́не и при́сно и во ве́ки веко́в. Ами́нь. Богородичен: Законода́вца Христа́ родила́ еси́,/ зако́нно страда́вшия венча́вшаго, страстоте́рпцы му́ченики,/ Его́же моли́ зако́ном греха́ побежде́на мя, Отрокови́це, исцели́ти. Песнь 9 Ирмос: Е́ва у́бо неду́гом преслуша́ния/ кля́тву всели́ла есть;/ Ты же, Де́во Богоро́дице,/ прозябе́нием чревоноше́ния ми́рови благослове́ние процвела́ еси́./ Тем Тя вси велича́ем. Припев: Святи́и му́ченицы, моли́те Бо́га о на́с. Се отверзо́шася вам Небе́сная врата́, пострада́вшим, –/ рече́ Христо́с страстоте́рпцем:/ вни́дите и приими́те, ра́дующеся, воздая́ния боле́зней досто́йная,/ от ве́ка хра́брствовавшим. Припев: Святи́и му́ченицы, моли́те Бо́га о на́с. Кра́сни в ра́нах теле́сных бы́сте и А́нгелом уподо́бистеся,/ ны́не же предстоите́ всех красоте́, ра́дующеся при́сно,/ прича́стием я́ве удобря́еми кра́сных, всечестни́и. Припев: Святи́и му́ченицы, моли́те Бо́га о на́с. Ста́нем в дому́ Бо́жием, восхваля́юще Антипа́тра, Феости́ха же,/ Ру́фа и Филимо́на страда́ния, Боже́ственнаго Фавма́сия чудеса́,/ Ма́гна и Арте́ма, Фео́гния и Феодо́та непобе́дное. Сла́ва Отцу́ и Сы́ну и Свято́му Ду́ху. День спасе́ния нам возсия́ святы́х торжество́,/ е́же соверша́юще моле́бно, вопие́м им с ве́рою:/ му́чеников светоза́рный ве́рше, всех сердца́ озари́те. И ны́не и при́сно и во ве́ки веко́в. Ами́нь. Богородичен: Обле́кся из Тебе́ Царь в теле́сную багряни́цу,/ про́йде, весь красе́н, из утро́бы Твоея́, и вся враги́ победи́,/ и побе́ду страда́льцем подаде́, Чи́стая еди́на Присноде́во.

4 Пе́снь 1. Ирмо́с: Отве́рзу уста́ моя́, и напо́лнятся Ду́ха, и сло́во отры́гну Цари́це Ма́тери, и явлю́ся, све́тло торжеству́я, и воспою́, ра́дуяся, Тоя́ чудеса́. Отве́рзи мои́ устне́, подви́гни мо́й язы́к и испра́ви мо́й смы́сл, вся́ умудря́яй, Бо́же, да похвалю́ уго́дника Твоего́ Андре́я, юро́да бы́вшаго на земли́ Тебе́ ра́ди. Андре́е блаже́нне, ты́ измла́да Христа́ возлюби́л еси́ и к Нему́ единоду́шно возжеле́л еси́: ка́ко же тя́ по достоя́нию похва́лим, на диа́вола вооружи́вшася и сего́ ко́зни победи́вша си́лою Христо́вою. Моли́твами Бо́гу моля́ся и диа́волу досажда́я, и мно́гаго его́ толца́ния в две́ри хи́жины твоея́ а́ще вма́ле и устраши́вся, но неподви́жен умо́м пребы́л еси́, си́лою Христо́вою укрепля́емый. Богоро́дичен: О, Пресвята́я Госпоже́ Де́во Богоро́дице, покры́й ны́ чу́дным Твои́м омофо́ром и сохраня́й гра́д Тво́й от бе́д и скорбе́й, я́коже Тя́ преблаже́нный ви́де Андре́й, во Влахе́рнстей це́ркви моля́щуюся. Пе́снь 3. Ирмо́с: Твоя́ песносло́вцы, Богоро́дице, живы́й и незави́стный Исто́чниче, ли́к Себе́ совоку́пльшия, духо́вно утверди́, в боже́ственней Твое́й сла́ве, венце́в сла́вы сподо́би. Со ефио́пом бра́вся, победи́л еси́ того́, от Христа́ дерзнове́ние прии́м, мно́гу печа́ль де́моном сотвори́л еси́, святы́м же а́нгелом весе́лие и ра́дость, с ни́миже ны́не водворя́ешися. Во сне́ Христа́ пре́жде ви́дел еси́, на де́моны тя́ укрепля́юща и вене́ц тебе́ подаю́ща, и со ефио́пом бра́тися поуча́юща: ны́не же не сновиде́нием, но в неизрече́ннем све́те сла́вы Его́ ви́дя, за ны́ моли́ся. Христа́ послу́шал еси́, повеле́вшаго тебе́ юро́ду бы́ти и Ца́рство небе́сное обеща́вша: Тому́ после́довав, неизрече́нная блага́я Его́ восприя́л еси́, Андре́е досточу́дне. Богоро́дичен: Прииди́ ны́не во сла́ве в це́рковь Твою́, Богоро́дице, с собо́ры святы́х, я́коже Тя́ ви́де святы́й Андре́й на возду́се све́тле, за христиа́ны моля́щуюся, и пода́ждь на́м, Госпоже́, ве́лию ми́лость. Седа́лен, гла́с 8: У́зы и желе́зы свя́зан, в це́ркви седя́, Андре́е, мно́ги стра́хи от де́монов подъя́л еси́ и помо́щника себе́ обре́л еси́ апо́стола Христо́ва, возлю́бленнаго Иоа́нна, и́же повеле́ тебе́ терпе́ти Христа́ ра́ди. С ни́мже ны́не водворя́ешися, за ны́ моли́ся, чту́щия па́мять твою́. Богоро́дичен: В напа́сти многоплете́нныя впа́д от вра́г ви́димых и неви́димых, бу́рею одержи́мь безчи́сленных согреше́ний мои́х, и я́ко к те́плому заступле́нию и покро́ву моему́, Чи́стая, ко приста́нищу притека́ю Твоея́ бла́гости. Те́мже, Пречи́стая, из Тебе́ Воплоще́нному безсе́менно моли́ся приле́жно о все́х рабе́х Твои́х, непреста́нно моля́щихтися, Богоро́дице Пречи́стая, моля́щи Его́ при́сно согреше́ний оставле́ние дарова́ти, воспева́ющим досто́йно сла́ву Твою́. Крестобогоро́дичен: А́гнца, и Па́стыря, и Изба́вителя А́гница зря́щи на Кресте́, восклица́ше, пла́чущи, и, го́рько рыда́ющи, вопия́ше: ми́р у́бо ра́дуется, прие́мляй Тобо́ю избавле́ние, утро́ба же Моя́ гори́т, зря́щи Твое́ распя́тие, е́же терпи́ши за милосе́рдие ми́лости. Долготерпели́ве Го́споди, ми́лости бе́здно и исто́чниче неисчерпа́емый, умилосе́рдися и да́руй согреше́ний оставле́ние ве́рою пою́щим Боже́ственныя Стра́сти Твоя́. Пе́снь 4. Ирмо́с: Седя́й в сла́ве на Престо́ле Божества́ во о́блаце ле́гце, прии́де Иису́с Пребоже́ственный, Нетле́нною Дла́нию и спасе́ зову́щия: сла́ва, Христе́, си́ле Твое́й. Седя́ща на престо́ле Христа́ Царя́ ви́дел еси́, го́рькия сея́ жи́зни о́браз разсмотри́л еси́, горча́йшь пелы́ни су́щий, пото́м же нетле́нныя сла́дости вку́с прия́л еси́. Тогда́ во сне́ и в восто́рзе Христа́ ви́дел еси́, ны́не же, со безпло́тными си́лами водворя́яся, сла́ву Бо́жию ви́диши непостижи́мую и неизглаго́ланную: помина́й на́с, Андре́е, чту́щих па́мять твою́. От виде́ния ра́зумов уве́рившагося Андре́я похва́лим, ве́рнии, на земли́ бы́вша юро́да Христа́ ра́ди, на небесе́х же ны́не прему́дра духо́вною благода́тию, со а́нгелы предстоя́ща все́х Бо́гу. Богоро́дичен: Кто́ изглаго́лати мо́жет Твоего́ Рождества́ та́инство? Или́ кто́ испове́сть Твоея́ моли́твы си́лу? А́ще не бы́ Сама́ Ты́ показа́ла еси́ Андре́ю юро́дивому в це́ркви Влахе́рнстей честны́й Тво́й Покро́в. Пе́снь 5. Ирмо́с: Ужасо́шася вся́ческая о Боже́ственней сла́ве Твое́й: Ты́ бо, неискусобра́чная Де́во, име́ла еси́ во утро́бе над все́ми Бо́га, и родила́ еси́ Безле́тнаго Сы́на, все́м, воспева́ющим Тя́, ми́р подава́ющая. Удивле́ние бы́сть все́м ви́дящим Андре́ево житие́: на сме́тьищи лега́ние и посреде́ гра́да обнаже́ние, и колесни́чное попра́ние, но сия́ вся́ бы́сть ему́ пути́ правле́ние в небе́сное Ца́рствие. Удиви́шася вси́, ви́дящии терпе́ние твое́: му́ченицы бо во еди́но вре́мя стра́сть претерпе́ша, ты́ же вся́ дни́ живота́ твоего́ злы́я му́ки терпе́л еси́, в небе́сное Ца́рство жела́я всели́тися, е́же получи́в ны́не, ра́дуешися безконе́чною ра́достию. Сокрове́нная бы́ша тебе́ открове́на и вся́ безпло́тныя, а́ки плотски́я, ви́дел еси́: ничто́же бо земны́х возлюби́л еси́. Те́мже и небе́сная врата́ отверзо́шася тебе́, в неизглаго́ланную ра́дость Го́спода твоего́, блаже́нне, вше́л еси́. Богоро́дичен: Пою́т Тя́ чи́ни а́нгельстии и сла́вят Тя́ земны́х ро́ди: Ты́ бо, небе́сная Цари́це, Андре́ю яви́лася еси́, покрыва́ющи лю́ди в це́ркви нетле́нным Твои́м Покро́вом, за вся́ пою́щия Тя́ непреста́нно моля́щися. Пе́снь 6. Ирмо́с: Боже́ственное сие́ и всечестно́е соверша́юще пра́зднество, богому́дрии, Богома́тере, прииди́те, рука́ми воспле́щим, от Нея́ ро́ждшагося Бо́га сла́вим. Апо́стола Па́вла испо́лнися гла́с на тебе́, о́тче: сло́во кре́стное погиба́ющим у́бо юро́дство вмени́ся, тебе́ же, спаса́ющемуся, си́ла Бо́жия бы́сть, Андре́е всехва́льне. Христо́в гла́с испо́лнися на тебе́, рече́нный: блаже́ни ни́щии ду́хом, я́ко те́х е́сть Ца́рство небе́сное. Ты́ бо обнища́л еси́ ду́хом и Ца́рство небе́сное восприя́л еси́. Епифа́ния иногда́, ю́ношу су́ща, на пу́ть пра́вый наста́вил еси́, ему́же и проре́кл еси́ архиере́ю бы́ти и лю́ди учи́ти: вся́ бо бу́дущая, я́ко пред очесы́ су́щая, ви́дел еси́. Богоро́дичен: Припа́даем Тебе́, Богоро́дице, мы́, гре́шнии, да и на на́с ны́не простре́ши неви́димый Покро́в Тво́й, к Сы́ну Твоему́ и Бо́гу на́шему да принесе́ши моли́твы Твоя́ за ны́, я́коже Тя́ дре́вле Андре́й ви́де. Конда́к, гла́с 4. Во юро́дство претвори́вся во́лею, ми́ра сего́ красоты́ отню́д возненави́дел еси́, плотска́я мудрова́ния увяди́л еси́ посто́м и жа́ждею, и зно́ем, и сту́дению мра́за, от дождя́ и сне́га, и от про́чия возду́шныя тяготы́ никогда́же уклони́вся, очи́стил еси́ себе́, я́ко зла́то в горни́ле, Андре́е блаже́нне. И́кос: Прииди́те, христолю́бцы, прииди́те, нищелю́бцы, восхва́лим блаже́ннаго страда́льца, прему́драго Андре́я, бы́вша юро́да Христа́ ра́ди, во́лею ми́р и я́же в не́м уме́ты вмени́вша, по апо́столу, и во сле́д Христа́ усе́рдно поте́кша, пло́ть же свою́ посто́м и жа́ждею, и зно́ем, и дожде́м и сне́гом, возду́шною тя́гостию смири́вша, ду́шу же от страсте́й свобо́дну соблю́дша и све́тлу доброде́тельми соде́лавша, и небе́сное житие́ со все́ми святы́ми ве́чно насле́довавша, и моля́щася Христу́ Бо́гу о чту́щих Его́ ве́рою и любо́вию. К нему́же возопии́м: ра́дуйся, уго́дниче Христо́в, Андре́е блаже́нне. Пе́снь 7. Ирмо́с: Не послужи́ша тва́ри богому́дрии, па́че Созда́вшаго, но, о́гненное преще́ние му́жески попра́вше, ра́довахуся, пою́ще: препе́тый отце́в Госпо́дь и Бо́г, благослове́н еси́. Ничто́же изво́лив люби́ти на земли́ па́че Зижди́теля, но посреде́ храмо́в скита́яся, блаже́нне Андре́е, ра́довался еси́, поя́: препе́тый отце́в Госпо́дь и Бо́г, благослове́н еси́. Не пощаде́ пло́ти своея́, но предаде́ ю́ на по́двиги и труды́, и ну́ждное пребыва́ние. Те́м ко́зни де́монския му́жески попра́ блаже́нный Андре́й, поя́: препе́тый отце́в Госпо́дь и Бо́г, благослове́н еси́. Ничто́же земны́я сла́вы восхоте́л еси́, Христа́ же па́че возлюби́л еси́, блаже́нне Андре́е, и к Нему́ восте́кл еси́, ра́дуяся, боле́зней твои́х прие́мля воздая́ние и поя́ при́сно: благослове́н Бо́г отце́в на́ших. Богоро́дичен: Блаже́нне Андре́е, моли́ся и ны́не Цари́це Богоро́дице, Ю́же ви́дел еси́ за ми́р моля́щуюся, да на́с покры́ет непобеди́мою Свое́ю ми́лостию: Тоя́ бо Покро́вом вси́ ве́рнии сохраня́емся. Пе́снь 8. Ирмо́с: О́троки благочести́выя в пещи́ Рождество́ Богоро́дичо спасло́ е́сть, тогда́ у́бо образу́емое, ны́не же де́йствуемое, вселе́нную всю́ воздвиза́ет пе́ти Тебе́: Го́спода по́йте, дела́, и превозноси́те Его́ во вся́ ве́ки. Бога́таго уме́рша иногда́ ви́дел еси́, с ви́димою че́стию провожда́ема, неви́димо же зле́ своди́ма во глубину́ а́дову, блаже́нне Андре́е, и о не́м пла́чася и моля́ся Го́споду. Безпло́тнаго а́нгела, печа́лующаго о поги́бели души́ бога́таго, в житии́ се́м не пока́явшася, от печа́ли премени́л еси́, Андре́е блаже́нне, с ни́мже пое́ши: Го́спода по́йте дела́ и превозноси́те Его́ во вся́ ве́ки. Сребролю́бца мона́ха ви́дел еси́, от зла́го зми́я стужа́ема, Андре́е блаже́нне, и того́, от сребролю́бнаго неду́га изба́вив, вразуми́л еси́ пе́ти и превозноси́ти Го́спода во вся́ ве́ки. Богоро́дичен: От Андре́ева виде́ния Покро́в Тво́й уве́девше, Цари́це Богоро́дице, мо́лимся Тебе́ приле́жно: покры́й ны́ ми́лостию Твое́ю пою́щия Сы́на Твоего́ и превознося́щия Его́ во вся́ ве́ки. Пе́снь 9. Ирмо́с: Вся́к земноро́дный да взыгра́ется, Ду́хом просвеща́емь, да торжеству́ет же безпло́тных умо́в естество́, почита́ющее свяще́нное торжество́ Богома́тере, и да вопие́т: ра́дуйся, Всеблаже́нная Богоро́дице, Чи́стая Присноде́во. По Христо́ву словеси́ за бию́щия тя́ моли́лся еси́, свя́те: те́мже небе́сная врата́ отве́рзста и ду́ши пра́ведных во о́бразе ла́стовиц лета́ющия ви́дел еси́, с ни́миже ны́не водворя́ешися, Андре́е блаже́нне. Христа́ Бо́га и́стинно возлюби́в, тебе́ сама́го отве́рглся еси́ и Тому́ после́довал еси́, я́коже О́н рече́: любя́й ду́шу свою́ спасти́, погуби́т ю́. Те́мже ду́шу твою́ в жи́знь ве́чную соблю́л еси́, достохва́льне свя́те Андре́е. Вели́кая и пресла́вная ны́не сбы́шася тебе́ в небе́снем Ца́рствии, а́ще и юро́д бы́л еси́ ми́ру, но Христу́ му́др яви́лся еси́, достохва́льне: призира́й с небе́снаго кру́га на ны́, почита́ющия па́мять твою́. Богоро́дичен: Вся́к земноро́дный покрыва́ется Покро́вом Твои́м, пресла́вная Засту́пнице Богоро́дице, я́коже блаже́нный Андре́й Тя́ ви́де, за ми́р моля́щуюся Несозда́нному Существу́, в созда́нное естество́ от Тебе́ обле́кшемуся.

глас 6 Песнь 1 Ирмос: Яко по суху, пешешествовав Израиль по бездне стопами, гонителя фараона видя потопляема, Богу победную песнь поим, вопияше. Яко немаго древле прикосновением устроил еси право глаголати, сице и мне, Христе, мой язык разреши, ум отверзи, да принесу в память угодника Твоего хваление, любовию поя. Не могу воспети ясно благодати твоея, преподобне, аще не ты молитвами твоими подаси мне помощь, да прославлю Владыку, давшаго тебе благодать исцелений, во хвалении поя. По предуведению воззван был еси, святе, вслед Владыки своего шествовати и, Тому последуя, вся красная мира оставль, любовию пришел еси к великому Антонию и с ним пожил еси, непрестанное хваление Богу поя. Земному Ангелу и Небесному человеку последуя, и сам ангельское житие стяжал еси, отче преподобне. Тем твоя исправления почитаем и прославляем всех Владыку, о тебе песнь Ему поюще. Богородичен: От земных и Небесных сил славимая, Приснодево, в днешний день хваление Тебе дерзающих приносити, от всех прилогов сохраняй, да выну Тя воспоем, Обрадованная. Песнь 3 Ирмос: Несть свят, якоже Ты, Господи Боже мой, вознесый рог верных Твоих, Блаже, и утвердивый нас на камени исповедания Твоего. Во многих летех множайшия прошел еси труды, Агапите, подвизался во бдении и пощении, дондеже единонравен показался еси наставнику своему и от него утвердился еси на камени твердаго жития. Ничтоже ино, токмо нищету имея, обнищавшему нас ради Христу последовал еси, отче, и, Того заповеди храня, служил еси больным, посещая, и упокоевая, и здравие тем молитвою своею подавая. С преподобным жительствуя, стяжал еси преподобство, достохвальне Агапите, и исцеления даров сподобился еси, яко молитвою и зелием снедным здравие подавал еси болящим, темже и врач нареклся еси безмездный. Прославил еси Бога во удесех твоих, преподобне, темже и Бог тя прослави благодатию исцеления, имже и наша недуги уврачуй душевныя и телесныя, да утвердимся на камени исповедания Божия. Богородичен: Израстившая животное древо, Того плодом нас, умерщвленных грехами, оживи и даруй нам, Мати Чистая, крепкое благости Твоея исповедание. Седален, глас 4 Яко туне приемый от Бога дар исцеления, страждущим исцеление туне подаеши, с верою к тебе притекающим. Темже и мы, кланяющеся раце мощей твоих, отче преподобне, просим прияти от тебе недугом нашим исцеление. Песнь 4 Ирмос: Христос моя сила, Бог и Господь, честная Церковь боголепно поет, взывающи, от смысла чиста о Господе празднующи. Буия мира сего Христос избра, да премудрыя посрамит, еже и на тебе сбыстся, отче всеблаженне: благодатию бо, а не хитростию премудраго посрамил еси врача. Тем тя славим, о Господе празднующе. Прельстися, иже первее больных прельщаше, извещая им день и час смерти, емуже ты поносив, преподобне, болящаго исцелил еси молитвою и зелием снедным, рек: даждь славу Богу, имущему ключ живота и смерти. Зависти стрелою злочестивый арменин уязвен, поношаше ти, святе, и, послав на смерть осужденнаго, повеле пред тобою умертвити былием смертоносным. Но ты сего молитвою и зелием исцелив, посрамил еси еретика, хотящаго тя посрамити. Претыкающемуся данная ти благодать бысть падение, преблаженне, наипаче бо на тя вооружився, злочестивый арменин наусти дати тебе отраву, но ты, и смертно испив, невредимь был еси, яко Божия благодать сохрани тя к большему чудодействию. Богородичен: Радуйся, сосуде, носивший миро, исцелившее род человеческий, ядом мя греховным умерщвленна оживи, да прочее время цел поживу, Тя, Дево, восхваляя. Песнь 5 Ирмос: Божиим светом Твоим, Блаже, утренюющих Ти души любовию озари, молюся, Тя ведети, Слове Божий, истиннаго Бога, от мрака греховнаго взывающа. От Бога благодать исцеления приемь, исцелил еси князя, иже аще и врачуемь бе от арменина, но не получаше отрады, твоего же зелия вкусив, от недуга избавися. Зрите, иночествующии, и добродетельному терпению Богоноснаго отца почудитеся, како со отречением мира воли своея отречеся и не изыде никогдаже вне врат монастырских, еже видяще, сему поревнуйте. Едину любовь ко всем имея, а не на лице зря, аще князь, аще прост к тебе прихождаше, преподобне, всем приходящим подавал еси исцеление туне, единаго ища возмездия от Бога. Приемь князь тобою исцеление, всеблаженне, уразуме, яко истинен раб Божий еси, и видети тя желаше, темже прииде к тебе с дары. Ты же, Единаго имея Бога, ничтоже от тех даров восхотел еси прияти. Богородичен: Хвалим Тя, Пречистая Дево, яко отверзаеши нам двери милости Твоея и подаеши всем независтный источник исцеления, от яда греховнаго избавляющий. Песнь 6 Ирмос: Житейское море, воздвизаемое зря напастей бурею, к тихому пристанищу Твоему притек, вопию Ти: возведи от тли живот мой, Многомилостиве. Вся тленная мира сего оставив, принесенное злато извергл еси, блаженне, пред враты келлии своея, извергая вкупе любоименнаго врага и стирая душегубную того главу. Един бисер стяжав многоценный — Иисуса, вся во уметы вменил еси, святе, и тем купил еси себе селение в Небесных, еже и мы получити молимся твоими, отче, молитвами. Многими леты постяся, изнемогл еси телом, преподобне, но духом пребыл еси крепок, аки столп, вся наносимая терпя и благодаря Бога, к Нему взывал еси: возведи от тли живот мой, Многомилостиве. Телом болезнуя, духом брался еси с злочестивым арменином, иже по триех днех смерть тебе провозвещаше, сего ты, блаженне, одолел еси, по триех месяцех отшествие свое к Богу возвещая. Богородичен: К Твоему пристанищу прибегаем, Богоневестная Дево, носими житейских страстей волнами, яже Ты укроти, да воспоем Тебе: радуйся, пристанище житейских плаваний. Кондак, глас 6 Врач сый изряден, чудне, являя несумненную твою веру, обличая же армениново неверие и приводя его к благочестию, себе, близ смерти бывшу, испросил еси от Бога продолжение живота и, сим чудом того уверив, привел еси Христови, Емуже в веселии предстоя, молися о нас, преподобне. Песнь 7 Ирмос: Росодательну убо пещь содела Ангел преподобным отроком, халдеи же опаляющее веление Божие мучителя увеща вопити: благословен еси, Боже отец наших. Дарование имый свыше недуги исцеляти, преподобне, боляща мя небрежением благих деяний уврачуй, якоже иногда принесеннаго в недузе уврачевал еси, молитвою подав тому здравие и воспев: благословен Бог отец наших. Чудодействуя святыми, твари Создатель внезапу постави тя здрава пред злочестивым, иже видев, удивися скорому твоему от болезни в здравие пременению. Мучима мя язвами студных дел, во изменение исправления приведи твоим, отче, свыше посещением, да пою: благословен Бог отец наших. Болезнь твоя и зелие снедно принуди исповести врача свое злочестие, егоже укорил еси, яко дерзну осязати святую твою руку; се дерзаю и аз к тебе, отче, приступити, но молю тя: не отрини мя в нуждах моих, да пою: благословен Бог отец наших. Трудов своих собрав плоды с веселием, аки добр земледелец, блаженною кончиною отшел еси к Горним прияти от Христа Бога даяние и приял еси от Него некончаемую радость, многочудне Агапите. Богородичен: Во Твое чрево, Пренепорочная Дево, всельшееся Слово род человеческий в Небесных дворех всели. Умоли Того от тления мя сея жизни преселити, идеже потоком сладости питаются святии. Песнь 8 Ирмос: Из пламене преподобным росу источил еси и праведнаго жертву водою попалил еси: вся бо твориши, Христе, токмо еже хотети. Тя превозносим во вся веки. Врач был еси, отче предивен, телесныя болезни врачуя, в жизни сей живый телом, по кончине же твоей душевное врачевство подавая, якоже сие на арменине явил еси, души того дав цельбу и ко благочестию наказание. Видев тя, святе, арменин в видении чудном, исповеда ясно, яко свят еси и преподобен, и в веру из неверия преложся, бысть инок твоим направлением, егоже и нас не лиши, поющих Господа во веки. Многое имый дарование, чудодействовал еси, исцеляя болящих, ныне же, сподобивыйся больших дарований, приложи пластырь на раны души моея, да, получив ослабу, превозношу Господа во веки. Из пламеновиднаго света святым струи благодати подаяй, Христе Боже, палящия мя страсти угаси щедрот Твоих росою, разгоняя тьму страстей. Се бо преподобный молит с нами Тебе, Господа, превозносимаго от всех во веки. Богородичен: Просветившая мир пречистым рождеством Твоим, мрак злодеяния моего разжени, изливая мне на благотворение щедрот Твоих богатую милость, да превозношу Тя, Матерь Божию, во веки. Песнь 9 Ирмос: Бога человеком невозможно видети, на Негоже не смеют чини Ангельстии взирати; Тобою бо, Всечистая, явися человеком Слово воплощенно, Егоже величающе, с Небесными вои Тя ублажаем. Богодарованнаго целебника людие имуще, никтоже да грядет к суетным врачем, иже имение и здравие вреждают, но требуяй с верою да грядет к раце Богоноснаго отца и туне приимет исцеление. Мысленныя ураниша ны разбойницы ныне, неисцельныя убо имуще язвы, несумненно к многочудесней припадаем раце твоей, преподобне, и просим: подаждь цельбу требующим, да вси тя хвалим и величаем. В Горняя душею возшед, во всесветящияся чертоги, оставил еси, преблаженне, раку мощей своих в пещере; имже покланяющеся, просим: подаждь недугом нашим исцеление, да тя песньми величаем. Помощи от тебе в немощех просящих не презри, но посещением твоим даждь душевное вкупе и телесное исцеление, преблаженне Агапите, яко сый врач преизящный, да выну тя величаем. Богородичен: Помощи от Тебе требующих не презри, Дево, но подавай с верою к Тебе притекающим: Ты бо еси источник цельбам неоскуден, да Тя с Небесными силами присно величаем. Светилен Тленная мира оставив и нетленная сподобився прияти, потщался еси хуждшая на лучшая пременити, обнищав любоимением страстным, но обогатився дарованием исцелений, и нам сия подай, днесь память твою почитающим, всеблаженне Агапите.

Минея, 26 Июня, Други́й кано́н Глас 4 Песнь 1 Ирмос: Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,/ и воспою́, ра́дуяся, Тоя́ чудеса́. Припев: Пресвята́я Богоро́дице, спаси́ на́с. Даждь ми, Светода́вче Христе́,/ в наро́читый день пресла́внаго явле́ния ико́ны, Ро́ждшия Тя, све́тло торжествова́ти/ и ве́село во стра́се и ра́дости воспева́ти при́сно Тоя́ чудеса́. Припев: Пресвята́я Богоро́дице, спаси́ на́с. Сло́во Бо́жие Светода́тельное и Прему́дрость О́тчую пло́тию, Де́во, ро́ждшая,/ просвети́ глубо́кую тьму моего́ неразу́мия/ и сло́во ми пода́ждь воспе́ти Твоя́ чудеса́. Сла́ва Отцу́ и Сы́ну и Свято́му Ду́ху. Днесь ве́рных собо́ри просвеща́ются, ерети́ческая же ополче́ния посрамля́ются,/ ви́дяще ико́ну Твою́, Влады́чице, я́ко со́лнце, по возду́ху ше́ствующу,/ нече́стия мглу потребля́ющу и ве́рныя просвеща́ющу. И ны́не и при́сно и во ве́ки веко́в. Ами́нь. Еди́на еси́ Ты вели́чие на́ше и похвала́ с Бо́гом, Богоневе́стная,/ Тобо́ю бо от бед спаса́емся, и к Тебе́ прибега́ем, и приле́жно мо́лимся:/ изба́ви, Влады́чице, рабы́ Твоя́ ве́чнаго муче́ния, воспева́ющия Твоя́ чудеса́. Песнь 3 Ирмос: Твоя́ песносло́вцы, Богоро́дице,/ Живы́й и Незави́стный Исто́чниче,/ лик себе́ совоку́пльшия, духо́вно утверди́,/ в Боже́ственней Твое́й сла́ве/ венце́в сла́вы сподо́би. Припев: Пресвята́я Богоро́дице, спаси́ на́с. Христе́ Иису́се, Преве́чный Царю́ и Многоми́лостиве,/ пречестна́го Твоего́ о́браза и ро́ждшия Тя Присноде́вы просвети́ нас явле́нием/ и пода́ждь нам согреше́ний оставле́ние и от бед избавле́ние. Припев: Пресвята́я Богоро́дице, спаси́ на́с. Егда́ А́нгелами неви́димо носи́му пречестну́ю Твою́ ико́ну, Влады́чице,/ и светоза́рно стоя́щу на возду́се лю́дие ви́деша,/ тогда́, просвети́вшеся све́том Твоея́ ми́лости, ра́дости неизглаго́ланныя испо́лнишася. Сла́ва Отцу́ и Сы́ну и Свято́му Ду́ху. О Боголюби́вии святи́телие и свяще́нницы, мона́си и прости́и/ и наро́ди вси́, све́тло ликовству́йте днесь,/ я́ко возсия́ на высоте́ Заря́ светоно́сная, держа́щи и́стиннаго Све́та, изображе́на пло́тию,/ с Ни́мже сни́де к нам, подаю́щи всему́ ми́ру просвеще́ние. И ны́не и при́сно и во ве́ки веко́в. Ами́нь. Твое́ю, Де́во, всечестно́ю ико́ною дре́вле Творе́ц всех чудоде́йствова,/ спасе́ Ца́рский град от иноплеме́нных нахожде́ния;/ си́це и Росси́йстей стране́ бу́ди, Госпоже́ Цари́це, покро́в и заступле́ние,/ спаса́ющи ю от всех наве́т вра́жиих. Седален, глас 4 Я́ко дре́вняго вои́стинну киво́та честне́йший Твой пречи́стый о́браз, Влады́чице!/ Па́че бо иле́ктра блиста́яся,/ повсю́ду неоску́дно лучи́ ми́лости Твоея́ всем, явля́я, простира́ет/ и чту́щия пресла́вное прише́ствие его́ благода́тию Бо́жиею ми́лостивно соблюда́ет./ О не́мже, Влады́чице, мы, ра́дующеся, усе́рдно пра́зднуем/ и ма́тернее Твое́ к нам милосе́рдие прославля́ем. Песнь 4 Ирмос: Седя́й в сла́ве на Престо́ле Божества́/ во о́блаце ле́гце,/ прии́де Иису́с Пребоже́ственный/ Нетле́нною Дла́нию и спасе́ зову́щия:/ сла́ва, Христе́, си́ле Твое́й. Припев: Пресвята́я Богоро́дице, спаси́ на́с. Земля́ у́бо вся днесь да возвесели́тся,/ вку́пе же и возду́х, и мо́ре да кропи́т ра́дование,/ я́ко всечестна́го о́браза Богома́тере чуде́сным ше́ствием/ Росси́йская страна́ пресла́вно озари́ся. Припев: Пресвята́я Богоро́дице, спаси́ на́с. Раболе́пно слу́жат и А́нгельстии чи́нове Тебе́, всех Цари́це,/ и благогове́йно почита́ют всечестну́ю Твою́ ико́ну,/ воспева́юще Тя, Пресвяту́ю Де́ву,/ мы же, смире́ннии, ка́ко Тебе́, Всечи́стую, досто́йно пе́ти возмо́жем? Сла́ва Отцу́ и Сы́ну и Свято́му Ду́ху. Арха́нгельскую песнь, е́же ра́дуйся, Тебе́ зове́м, Богоневе́сто, Госпо́дь с Тобо́ю,/ ра́дуйся, ра́досте А́нгелов и всех челове́ков, сла́вящих Тя, вои́стинну весе́лие,/ спаси́ ду́ши пою́щих Тя, Богоро́дице Чи́стая. И ны́не и при́сно и во ве́ки веко́в. Ами́нь. О Богороди́тельнице, ра́дости Пода́тельнице,/ ве́рою сла́вящия Тя и от души́ пою́щия ра́дости неизрече́нныя испо́лни/ и Све́та невече́рняго сподо́би, Де́во Благода́тная, Влады́чице. Песнь 5 Ирмос: Ужасо́шася вся́ческая/ о Боже́ственней сла́ве Твое́й:/ Ты бо, Неискусобра́чная Де́во,/ име́ла еси́ во утро́бе над все́ми Бо́га/ и родила́ еси́ Безле́тнаго Сы́на,/ всем воспева́ющим Тя/ мир подава́ющая. Припев: Пресвята́я Богоро́дице, спаси́ на́с. В пусты́ни явле́нно Тебе́, Богома́ти, со святи́телем благогове́йный узре́ти муж сподо́бися/ и благоволе́ния Твоего́ глаго́лы от Тебе, Цари́це, восприя́т,/ на бо́льшее утвержде́ние и в по́льзу ми́ру спасе́ния. Припев: Пресвята́я Богоро́дице, спаси́ на́с. Окая́нен у́бо аз, Всечи́стая, и недосто́ин таковы́я ны́не благода́ти, е́же Тя ви́дети,/ но поне́ в бу́дущем сподо́би мя узре́ти Тя,/ и Сы́на Твоего́ усре́сти, гряду́ща во сла́ве,/ и глас Боже́ственный услы́шати, зову́щ во Ца́рство Небе́сное. Сла́ва Отцу́ и Сы́ну и Свято́му Ду́ху. Прибега́ем к Твое́й, Де́во, бла́гости,/ и о́чи серде́ц на́ших воспуща́ем к Тебе́, Чи́стая,/ и, с пла́чем коле́на преклоня́юще, мо́лим Тя:/ не пре́зри на́шего воздыха́ния/ и бу́ди нам покро́в и Помо́щница в День су́дный. И ны́не и при́сно и во ве́ки веко́в. Ами́нь. Еди́на еси́ всех Предста́тельница христиа́н, Богома́ти Пречи́стая,/ услы́ши на́ше моле́ние, воззри́ на ны, Всепе́тая,/ спаси́ град и оби́тель Твою́/ и озари́ ста́до Твое́ заре́ю благода́ти Твоего́ заступле́ния. Песнь 6 Ирмос: Боже́ственное сие́ и всечестно́е/ соверша́юще пра́зднество,/ Богому́дрии, Богома́тере,/ прииди́те, рука́ми воспле́щим,/ от Нея́ ро́ждшагося Бо́га сла́вим. Припев: Пресвята́я Богоро́дице, спаси́ на́с. О, преди́внаго Твоего́ чудесе́, Влады́чице!/ Я́ко за преслуша́ние Твоего́ повеле́ния/ ужа́сно челове́к с главы́ церко́вныя восхище́н быв,/ на земли́ невреди́м обре́теся, ми́лостию Твое́ю, Всеми́лостивая. Припев: Пресвята́я Богоро́дице, спаси́ на́с. Никто́же та́ко преслу́ша Боже́ственная повеле́ния, я́коже аз, окая́нный./ Тем, Ти припа́дая, молю́ся, Влады́чице:/ пре́жде да́же до конца́ не поги́бну,/ наста́ви мя на и́стинный путь и спаси́ мя, Чи́стая. Сла́ва Отцу́ и Сы́ну и Свято́му Ду́ху. Ты, о Богома́ти, ро́ждшая Претерпе́вшаго нас ра́ди на Дре́ве Кре́стнем распя́тие,/ умоли́ при́сно нам, страда́ние Его́ свято́е по́мнящим,/ во́лю Его́ Боже́ственную твори́ти/ и ве́чных благ насле́дниками бы́ти. И ны́не и при́сно и во ве́ки веко́в. Ами́нь. Влады́чице, Де́во Чи́стая, изба́ви нас лю́тых всех,/ умоля́ющи Пригвозди́вшаго на Кресте́ грехи́ на́ша,/ и сподо́би нас досто́йно одесну́ю Его́ ста́ти,/ егда́ прии́дет во сла́ве Свое́й. Кондак, глас 8 Притеце́м, лю́дие, к Де́вей Богоро́дице Цари́це,/ благодаря́ще Христа́ Бо́га,/ и, к Тоя́ чудотво́рней ико́не, уми́льно взира́ющи, припаде́м и возопие́м Ей:/ о Влады́чице Мари́е,/ присети́вше страну́ сию́ Твоего́ честна́го о́браза явле́нием чуде́сно,/ спаса́й в ми́ре и благовре́менстве оте́чество на́ше и вся христиа́ны,/ насле́дники показу́ющи Небе́сныя жи́зни,/ Тебе́ бо ве́рно зове́м:/ ра́дуйся, Де́во, ми́ра спасе́ние. Икос Пречу́дное явле́ние Богома́тере ви́дяще,/ на высоту́ доброде́телей взы́дем и ум на Не́бо возведе́м./ Сего́ бо ра́ди небоше́ственне прии́де, да привлече́т к высоте́ вопию́щия Ей си́це:/ ра́дуйся, благослове́нная Де́во, от всех родо́в Бо́гом избра́нная;/ ра́дуйся, Небе́сная Цари́це, Го́спода Бо́га Ма́ти и Творца́ вся́ческих./ Ра́дуйся, всера́достное А́нгелом пе́ние;/ ра́дуйся, всежела́тельное всего́ ми́ра зре́ние./ Ра́дуйся, неподви́жимое ве́ры благоче́стия основа́ние;/ ра́дуйся, всесве́тлое благода́ти позна́ние./ Ра́дуйся, Бо́жие к земны́м благоволе́ние;/ ра́дуйся, земны́х к Бо́гу возведе́ние./ Ра́дуйся, озло́бленным душа́м утеше́ние;/ ра́дуйся, всем ве́рным ско́рое поможе́ние./ Ра́дуйся, дарова́нная от Бо́га Предста́тельнице ро́ду христиа́нскому,/ его́же и соблюда́й приле́жно от вся́ких бед и зол, да зове́м Ти:/ ра́дуйся, Де́во, ве́рным спасе́ние. Песнь 7 Ирмос: Не послужи́ша тва́ри Богому́дрии/ па́че Созда́вшаго,/ но, о́гненное преще́ние му́жески попра́вше,/ ра́довахуся, пою́ще:/ препе́тый отце́в Госпо́дь и Бог, благослове́н еси́. Припев: Пресвята́я Богоро́дице, спаси́ на́с. Единоча́дый Твой Сын и Бог всех, Богома́ти,/ пречи́стый Твой о́браз невреди́м сохрани́ во пла́мени, о, чудесе́!/ Благода́тию па́че со́лнца обре́теся сия́ющ, и ве́рныя просвеща́ющ, ве́рою пою́щия:/ Бо́же, благослове́н еси́. Припев: Пресвята́я Богоро́дице, спаси́ на́с. Небе́снии чи́нове веселя́тся с земноро́дными, Богоро́дице, в све́тлом торжестве́ Твое́м,/ е́же соверша́ющия ны и со стра́хом предстоя́щия пред пречи́стым Твои́м о́бразом/ просвети́ све́том сия́ния Твоего́, Пречи́стая, и вся спаси́. Сла́ва Отцу́ и Сы́ну и Свято́му Ду́ху. Еди́наго от Тро́ицы Бо́га Сло́ва, Царя́ Небе́снаго, пло́тию, Цари́це, родила́ еси́,/ Того́ моли́, Влады́чице, во́инству на́шему пода́ти одоле́ние на проти́вныя/ и всем ве́рным по́мощь, грехо́в оставле́ние и душа́м спасе́ние. И ны́не и при́сно и во ве́ки веко́в. Ами́нь. Рабы́ Твоя́, Чи́стая, пою́щия Тя и ве́рою несумне́нною моля́щияся Тебе,/ светода́тельною Твое́ю и Боже́ственною осени́ благода́тию,/ я́ко Благоде́теля всех ро́ждшая,/ и покры́й и сохрани́ от всех наве́т вра́жиих. Песнь 8 Ирмос: О́троки благочести́выя в пещи́/ Рождество́ Богоро́дичо спасло́ есть,/ тогда́ у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте, дела́,/ и превозноси́те Его́ во вся ве́ки. Припев: Пресвята́я Богоро́дице, спаси́ на́с. О, пресла́вных чуде́с Твои́х, Чи́стая!/ Я́ко зда́тели святы́я це́ркве Твоея́, под ка́мением тридне́вно бы́вшии,/ обрето́шася жи́ви и безвре́дни, покро́вом соблюде́ни,/ Тебе́, всех Цари́це, возсыла́юще гла́сы похва́льныя. Припев: Пресвята́я Богоро́дице, спаси́ на́с. Жизнь вме́сто сме́рти дарова́ла еси́, Богоро́дице, ме́ртвенному существу́./ Те́мже и нас, умерщвле́нных грехи́ мно́гими, Богоневе́сто,/ неврежде́нны от враг соблюди́/ и к жи́зни лу́чшей возведи́, спаса́ющи ду́ши на́ша. Сла́ва Отцу́ и Сы́ну и Свято́му Ду́ху. Днесь испо́лнишася ра́дости и весе́лия вси ве́рнии о ико́не Твое́й, Богоро́дице,/ я́ко в че́люстех сме́рти бы́вшим яви́лася еси Жи́зни Вино́вница/ и исто́чник приснотеку́щий, целе́бныя да́ры всем точа́щий и спасе́ние подаю́щий. И ны́не и при́сно и во ве́ки веко́в. Ами́нь. Изря́дно воспе́ти пречи́стаго Твоего́ о́браза/ и ро́ждшагося из Тебе́ Младе́нца, и́стинна же Бо́га,/ чу́дныя ико́ны преславное прише́ствие/ совоку́пльшихся люде́й отвсю́ду, Всепе́тая, моле́ние приими́ и проше́ния испо́лни. Песнь 9 Ирмос: Всяк земноро́дный/ да взыгра́ется, Ду́хом просвеща́емь,/ да торжеству́ет же Безпло́тных умо́в естество́,/ почита́ющее свяще́нное торжество́ Богома́тере,/ и да вопие́т:/ ра́дуйся, Всеблаже́нная Богоро́дице,/ Чи́стая Присноде́во. Припев: Пресвята́я Богоро́дице, спаси́ на́с. Явле́нию, Влады́чице, всечестны́я Твое́я ико́ны кто́ не удиви́тся или́ кто́ не почуди́тся?/ По возду́ху бо сию́, я́ко не́кий дар светоно́сный, низпосла́ла еси́ земли́ Росси́йстей,/ ра́достно пою́щей Тя и ве́рно велича́ющей. Припев: Пресвята́я Богоро́дице, спаси́ на́с. Ра́дость ми́ру, Де́во, неизглаго́ланную дарова́вши явле́нием пречи́стыя Твое́я ико́ны,/ изба́ви, Влады́чице, от вся́кия печа́ли ве́рою покланя́ющияся ей/ и со стра́хом целу́ющия ю:/ о Пресвята́я! вся спаси́ и поми́луй/ и Ца́рствия Небе́снаго сподо́би. Сла́ва Отцу́ и Сы́ну и Свято́му Ду́ху. Ро́ждшая, Влады́чице, Человеколю́бца Бо́га,/ за человеколю́бие посети́ла еси́ нас Боже́ственною Твое́ю ико́ною,/ к не́йже всегда́ притека́юще и благоле́пие ея́ зря́ще, Тебе́ уми́льно вопие́м:/ спаса́й при́сно, Богоро́дице, достоя́ние Твое́. И ны́не и при́сно и во ве́ки веко́в. Ами́нь. Устна́ми смире́нными принесо́х Ти препро́стое сие́, Всепе́тая, пе́ние:/ поне́же груб есмь, многогре́шный, и недосто́ин по достоя́нию воспе́ти Тя,/ но от усе́рдия на Твоя́ щедро́ты наде́яся,/ я́ко Спаси́теля всего́ ми́ра родила́ еси́,/ не возгнуша́йся, Цари́це, приими́ сие́ и спаси́ мя. Светилен Пречи́стый о́браз Твой, и́мже присети́ла еси́ нас, Богоотрокови́це Де́во, чту́ще,/ пра́зднуем сего́ ны́не прише́ствие,/ от него́ благода́тию Сына́ Твоего́ и Твое́ю/ прие́млюще скорбе́й, и бед, и напа́стей избавле́ние,/ Ма́ти Бо́га Вы́шняго. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Пречи́стый о́браз Твой, и́мже присети́ла еси́ нас, Богоотрокови́це Де́во, чту́ще,/ пра́зднуем сего́ ны́не прише́ствие,/ от него́ благода́тию Сына́ Твоего́ и Твое́ю/ прие́млюще скорбе́й, и бед, и напа́стей избавле́ние,/ Ма́ти Бо́га Вы́шняго.

Царства земнаго лишение,/ узы и страдания многоразличныя/ кротко претерпел еси,/ свидетельствовав о Христе даже до смерти от богоборцев,/ страстотерпче великий Боговенчанный царю Николае,/ сего ради мученическим венцем на небесех,/ венча тя с царицею и чады и слуги твоими Христос Бог,/ Егоже моли помиловати страну Российскую/ и спасти души наша.

Минея, 19 Сентября, Кано́н святы́х Глас 8 Песнь 1 Ирмос: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:// Изба́вителю и Бо́гу на́шему пои́м. Припев: Святи́и благове́рнии кня́зие, моли́те Бо́га о на́с. Мрак грехо́вный отжени́, Светода́вче Христе́,/ свы́ше просвети́ окая́нную мою́ ду́шу,/ моли́твами преподо́бнаго Фео́дора. Припев: Святи́и благове́рнии кня́зие, моли́те Бо́га о на́с. Просвеще́нием Трисо́лнечнаго Божества́ озари́вшеся, му́дрии,/ Фео́доре и Дави́де и Константи́не, свети́ла яви́стеся/ и просвеща́ете светоно́сную ва́шу па́мять ве́рно чту́щия. Сла́ва Отцу́ и Сы́ну и Свято́му Ду́ху. Све́том благода́ти озаряеми, преподо́бнии,/ Фео́доре и Дави́де и Константи́не сла́внии,/ ве́рно па́мять ва́шу торжеству́ющия просвети́те/ и от тьмы грехо́вныя моли́твами ва́шими изба́вите. И ны́не и при́сно и во ве́ки веко́в. Ами́нь. Богородичен: Пло́тию ро́ждши Безплотнаго, Богороди́тельнице Пречи́стая,/ теле́сныя на́ша и душе́вныя скве́рны омы́й/ окропле́нием боже́ственныя Твоея́ моли́твы. Песнь 3 Ирмос: Небе́снаго кру́га/ Верхотво́рче, Го́споди,/ и Це́ркве Зижди́телю,/ Ты мене́ утверди́ в любви́ Твое́й,/ жела́ний кра́ю, ве́рных утвержде́ние,// Еди́не Человеколю́бче. Припев: Святи́и благове́рнии кня́зие, моли́те Бо́га о на́с. Непреста́нныя моли́твы при́сно принося́ще к Бо́гу,/ блаже́нне Фео́доре и Дави́де с Константи́ном, за весь мир/ и трисве́тлою Заре́ю озари́вшеся,/ просвеща́ете, я́ко мо́лния, вселе́нную. Припев: Святи́и благове́рнии кня́зие, моли́те Бо́га о на́с. Предстоя́ще Го́споду со безпло́тными Си́лами,/ неизрече́нною сла́вою блиста́юще,/ преблаже́нне Фео́доре и Дави́де и Константи́не, за ны моли́теся,/ творя́щия честну́ю и пресла́вную па́мять ва́шу. Сла́ва Отцу́ и Сы́ну и Свято́му Ду́ху. Напои́вше ду́ши сле́зными пото́ки,/ соде́ясте их, преподо́бнии, плодоно́сны доброде́тельми,/ вся́кая износя́ще чудеса́ на показа́ние, пресла́внии. И ны́не и при́сно и во ве́ки веко́в. Ами́нь. Богородичен: Ни́ва духо́вная,/ я́коже из бразды́ клас, изнесла́ еси́/ всю тварь Пита́ющаго вся́чески, Присноде́во. Седален, глас 1 Жите́йское мо́ре воздержа́нием без труда́ преплы́вше,/ и в приста́нище мы́сленное безстра́стия приста́ли есте́,/ сосу́ди воздержа́нием бога́тства некра́дома благоче́стия яви́стеся, блаже́ннии,/ Фео́доре и Дави́де и Константи́не,/ безстра́стием житие́ ва́ше просвети́вше,/ и тре́бующия ми́лости обогаща́ете,/ Христа́ Бо́га моля́ще дарова́ти нам ве́лию ми́лость. Песнь 4 Ирмос: Ты моя́ кре́пость, Господи,/ Ты моя́ и си́ла,/ Ты мой Бог, Ты мое́ ра́дование,/ не оста́вль не́дра О́тча/ и на́шу нищету́ посети́в./ Тем с проро́ком Авваку́мом зову́ Ти:// си́ле Твое́й сла́ва, Человеколю́бче. Припев: Святи́и благове́рнии кня́зие, моли́те Бо́га о на́с. Ты на земли́ други́й А́нгел наре́клся еси́ чистото́ю,/ о́тче преподо́бне Фео́доре,/ полки́ вся де́монския и е́реси попаля́я духо́вною благода́тию./ Тем, соше́дшеся в па́мять ва́шу,/ прославля́ем Спа́са и Бо́га на́шего. Припев: Святи́и благове́рнии кня́зие, моли́те Бо́га о на́с. Ди́вный орга́н ты на земли́ яви́ся,/ весь мир сла́достно науча́я пра́вым уче́нием,/ о́тче преблаже́нне Фео́доре. Припев: Святи́и благове́рнии кня́зие, моли́те Бо́га о на́с. Я́ко Христо́во смире́ние возлюби́вше,/ возвы́систеся безстра́стием, смири́вше де́монскую горды́ню;/ возсия́вше, я́ко со́лнце от восто́ка,/ чуде́с луча́ми просвеща́ете всю подсо́лнечную. Сла́ва Отцу́ и Сы́ну и Свято́му Ду́ху. Кади́ло благово́ния Всеви́дцу, преподо́бнии,/ Фео́доре и Дави́де с Константи́ном богому́дрым,/ ва́ша моли́твы принесо́сте, я́же обоня́, и прия́т,/ и в по́стнем ку́пно пра́зднице устроя́ет. И ны́не и при́сно и во ве́ки веко́в. Ами́нь. Богородичен: Без се́мене зачала́ еси́ во чре́ве Творца́ и Го́спода,/ без поро́ка я́вльшися, Ма́ти Бо́жия,/ весь мир крила́ми Твои́ми покрыва́еши, Непоро́чная Госпоже́ Пречи́стая,/ пречи́стыя Твоя́ ру́ки вознося́щи к Нему́,/ изба́ви ны от бу́дущаго гне́ва. Песнь 5 Ирмос: Просвети́ нас повеле́нии Твои́ми, Го́споди,/ и мы́шцею Твое́ю высо́кою/ Твой мир пода́ждь нам,// Человеколю́бче. Припев: Святи́и благове́рнии кня́зие, моли́те Бо́га о на́с. Просвети́ твое́ житие́ всю вселе́нную,/ преподо́бне о́тче Фео́доре,/ правове́рными словесы́ сия́ющее, я́ко со́лнце,/ Трили́чнаго Божества́ заре́ю просвеща́ем. Припев: Святи́и благове́рнии кня́зие, моли́те Бо́га о на́с. Це́ркве ты был еси́ пропове́дник, свя́те,/ вся́ку е́ресь и лесть де́монскую разоря́я:/ те́мже со А́нгелы ны́не лику́еши. Припев: Святи́и благове́рнии кня́зие, моли́те Бо́га о на́с. Еди́ной любви́ Христо́ве вы приложи́вше ду́ши своя́,/ Фео́доре и Дави́де с Константи́ном сла́вным,/ и исполни́телие Бо́жиих за́поведей бы́вше,/ мно́гих чуде́с прия́сте благода́ть, всехва́льнии. Сла́ва Отцу́ и Сы́ну и Свято́му Ду́ху. Незло́биви и кро́тцы, вся зло́бы вра́жия погу́бльше/ и ми́лостиви до конца́ я́вльшеся, блаже́ннии,/ от Еди́наго Ми́лостиваго благода́ть прия́сте,/ и́стинную и спаси́тельную. И ны́не и при́сно и во ве́ки веко́в. Ами́нь. Богородичен: Воспо́йте, вся земля́,/ по́йте же Возсия́вшему из чре́ва боголе́пно Неискусобра́чныя/ и Сию́ ве́рным Показа́вшему/ тве́рду наде́жду и похвалу́. Песнь 6 Ирмос: Моли́тву пролию́ ко Го́споду/ и Тому́ возвещу́ печа́ли моя́,/ я́ко зол душа́ моя́ испо́лнися/ и живо́т мой а́ду прибли́жися,/ и молю́ся, я́ко Ио́на:// от тли, Бо́же, возведи́ мя. Припев: Святи́и благове́рнии кня́зие, моли́те Бо́га о на́с. Ве́рою и любо́вию прилепи́вся Влады́це вы́шних Сил, прему́дре Фео́доре,/ возсия́л еси́ на земли́, я́ко со́лнце,/ мглу и́дольскую всю́ду потребля́я,/ ве́рныя же просвеща́я моли́твами твои́ми. Припев: Святи́и благове́рнии кня́зие, моли́те Бо́га о на́с. Моли́твами предваря́я к Бо́гу и Тому́ предстоя́ со А́нгелы,/ за весь мир моли́ся,/ брань неприя́зненную всю потреби́ти/ и побе́ду изве́стну да́ти на сопоста́ты во́инству на́шему. Припев: Святи́и благове́рнии кня́зие, моли́те Бо́га о на́с. Благи́ми нра́вы украси́вся,/ Христу́ прилепи́лся еси́ от ю́ности,/ и плотски́я стра́сти умори́в воздержа́нием,/ и к жи́зни, преподо́бне Фео́доре, преста́вился еси́. Сла́ва Отцу́ и Сы́ну и Свято́му Ду́ху. Глаго́лов зако́нных испо́лнитель Бо́жиих был еси́,/ испо́лнился еси́, о́тче прему́дре Дави́де, Боже́ственных даро́в/ и чуде́с лучи́ всем испусти́л еси́. И ны́не и при́сно и во ве́ки веко́в. Ами́нь. Богородичен: Души́ моея́ стра́сти исцели́,/ Безстра́стия бы́вшая исто́чник/ и просвети́вшая ли́ки преподо́бных отце́в/ Рождество́м Свои́м. Кондак, глас 4 Яви́ся ве́лие со́лнце Христо́ве Це́ркви,/ просвеща́я уче́ний светлостьми́, всече́стне,/ я́ко черпа́лом златы́м, от Кла́дязя неиско́паннаго чуде́с поче́рпл еси́,/ от Исто́чника неистощи́маго, всеблаже́нне Фео́доре,// и ны́не о всех мо́лиши, да улучи́м грехо́в проще́ние. Икос На высоте́ Госпо́дь воздержа́нием и́стинным тя положи́,/ я́ко звезду́ небла́знену, просвеща́ющу стра́нных, чудоно́сче,/ быстрины́ слове́с твои́х и Боже́ственных чуде́с источи́л еси́ ми́рови,/ и ду́ши ве́рных напита́л еси́,/ ерети́ческия полки́ победи́л еси́, я́ко други́я еги́птяны,/ поклоне́ние Тро́йческое во Еди́ном Божестве́ пропове́дуя,/ сего́ ра́ди соблюди́ нас от враг ви́димых и неви́димых, преблаже́нне Фео́доре,/ я́ко о всех мо́лиши, да улучи́м грехо́в проще́ние. Песнь 7 Ирмос: От Иуде́и доше́дше, о́троцы/ в Вавило́не иногда́/ ве́рою тро́ическою пла́мень пе́щный попра́ша, пою́ще:// отце́в Бо́же, благослове́н еси́. Припев: Святи́и благове́рнии кня́зие, моли́те Бо́га о на́с. Приле́жныя твоя́ по́двиги и труды́ почита́юще/ и сла́дость уче́ния твоего́, преподо́бне о́тче Фео́доре,/ и́миже просвети́ ны и научи́ воспева́ти Триипоста́сное Божество́:/ отце́в на́ших Бо́же, благослове́н еси́. Припев: Святи́и благове́рнии кня́зие, моли́те Бо́га о на́с. Ору́жием ва́ших моли́тв, Фео́доре и Дави́де с Константи́ном сла́вным,/ победи́сте де́моны и с Небесе́ благода́ть прия́сте исцеля́ти боле́зни/ и прогони́ти ду́хи лука́выя от взыва́ющих:/ благослове́н Бог оте́ц на́ших. Сла́ва Отцу́ и Сы́ну и Свято́му Ду́ху. Посто́м и моли́твою и бде́нием, преподо́бне Фео́доре, просвети́вся,/ вшел еси́ на высоту́ доброде́телей/ и научи́л еси́ житие́м твои́м весь мир ве́рно воспева́ти:/ отце́в на́ших Бо́же, благослове́н еси́. И ны́не и при́сно и во ве́ки веко́в. Ами́нь. Богородичен: Ору́жие, Чи́стая, храня́щее пре́жде врата́ еде́мская,/ плещи́, Де́во, всем дае́т,/ низложи́вшим по́стнически бори́теля врага́,/ при́сно взыва́ющим:/ отце́в на́ших Бо́же, благослове́н еси́. Песнь 8 Ирмос: Седмери́цею пещь/ халде́йский мучи́тель/ богочести́вым неи́стовно разжже́,/ си́лою же лу́чшею спасе́ны сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,// лю́дие, превозноси́те во вся ве́ки. Припев: Святи́и благове́рнии кня́зие, моли́те Бо́га о на́с. Слез ва́ших ка́пли погаси́ша собла́зны грехо́вныя,/ реку́ же чуде́с показа́сте всем нам,/ вся́кия стра́сти потопля́ющую притека́ющих к вам,/ пресла́внии отцы́ святи́и, Фео́доре и Дави́де с Константи́ном сла́вным. Припев: Святи́и благове́рнии кня́зие, моли́те Бо́га о на́с. Ве́ру и наде́жду неразори́му и любо́вь и́стинную име́ли есте́, отцы́,/ и ми́лостивное прилежа́ние, терпе́ние бла́го и поуче́ние слове́с духо́вных,/ смиренному́дрие и соверше́нное беззло́бие. Сла́ва Отцу́ и Сы́ну и Свято́му Ду́ху. Подвиза́вшеся до́бре, победи́сте вра́жия вся де́йства/ и по конце́ жития́ венча́стеся, му́дрии,/ ко всем преподо́бным приче́тшеся,/ с ни́миже чтим вы, превознося́ще Христа́ во ве́ки. И ны́не и при́сно и во ве́ки веко́в. Ами́нь. Богородичен: Ма́ти Бо́жия Чи́стая,/ страсте́й мои́х у́зы грехо́вныя и молвы́ и неду́ги отжени́:/ и́маши бо к Нему́ дерзнове́ние и о́бласть/ поми́ловати ны, Госпоже́ милосе́рдая,/ Спа́са поро́ждши пло́тию,/ Его́же непреста́нно моли́ спасти́ся нам. Песнь 9 Ирмос: Ужасе́ся о сем Не́бо,/ и земли́ удиви́шася концы́,/ я́ко Бог яви́ся челове́ком пло́тски,/ и чре́во Твое́ бысть простра́ннейшее Небе́с,/ тем Тя, Богоро́дицу,// А́нгелов и челове́к чинонача́лия велича́ют. Припев: Святи́и благове́рнии кня́зие, моли́те Бо́га о на́с. Естество́ тле́нное премени́вше,/ в ве́чныя оби́тели взыдо́сте, блаже́ннии,/ житие́м чи́стым после́довавше Влады́це Бо́гу./ Те́мже честву́юще успе́ние ва́ше, святи́и,/ непреста́нно Христа́ велича́ем. Припев: Святи́и благове́рнии кня́зие, моли́те Бо́га о на́с. Се отве́рзеся вам, отцы́, Небе́сное Ца́рство,/ сконча́вшим до́брое тече́ние,/ и ви́дите, я́же ви́дят А́нгели,/ воздая́ние трудо́в подае́т вам по́чести Бог./ Те́мже ублажа́ем вы. Сла́ва Отцу́ и Сы́ну и Свято́му Ду́ху. Выспрь к Бо́гу мысль иму́ще, преподо́бнии, земна́я оста́висте,/ труда́ ра́ди воздержа́нием за неосла́бное облегча́еми,/ и со А́нгелы ны́не водворя́етеся,/ Христа́ велича́юще. И ны́не и при́сно и во ве́ки веко́в. Ами́нь. Богородичен: Пощади́ мя, Го́споди, пощади́, егда́ хо́щеши суди́ти ми,/ не осуди́ мене́ во огнь, ниже́ я́ростию Твое́ю обличи́ мя,/ мо́лит Тя Де́ва, ро́ждшая Тя, Христе́,/ и А́нгелов собо́ри, и преподо́бных соста́вы. Светилен Я́коже со́лнце блиста́я,/ зарю́ испуща́еши чуде́с,/ просвеща́я всех сердца́,/ твою́ сла́вную па́мять творя́щих ве́рно,/ преблаже́нне Фео́доре,/ и спаса́еши от бед и будущаго гне́ва. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Госпо́дь тя просла́ви в чудесе́х, всеблаже́нне Фео́доре,/ жи́ва прославля́я, изба́вил есть от сме́рти, я́ко Своего́ уго́дника,/ сего́ ра́ди и чуде́с твои́х па́мять восхваля́ем.

Минея, 11 Марта, Кано́н, его́же краегране́сие: Целому́дрия пою́ тезоимени́таго и́скренню же́ртву. Кир Феофа́на Глас 4 Песнь 1 Ирмос: Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,/ и воспою́, ра́дуяся, Тоя́ чудеса́. Припев: Святи́телю, о́тче Софро́ние, моли́ Бо́га о на́с. Целому́дренно преплы́л еси́ целому́дрия пучи́ну,/ ве́тры духо́вными направля́емь,/ и собра́л еси́ мно́го бога́тства,/ му́дрости дарова́ния, о́тче Софро́ние. Припев: Святи́телю, о́тче Софро́ние, моли́ Бо́га о на́с. Я́ко А́нгел был еси́ Христо́ва воскресе́ния/ и председа́тель Боже́ствен, Боже́ственнаго гро́ба,/ обогати́вшаго исто́чником безсме́ртия, Христа́,/ воздви́гшаго паде́ние ро́да на́шего. Припев: Святи́телю, о́тче Софро́ние, моли́ Бо́га о на́с. Све́тлостию слове́с твои́х и ума́ острото́ю мир уясни́л еси́,/ богосло́вив я́сно Триипоста́снаго Божества́ Существо́,/ Еди́ницу Тричи́сленную, о́тче Софро́ние. Сла́ва Отцу́ и Сы́ну и Свято́му Ду́ху. Глаго́л веща́ние твое́ и уче́ний благознамени́тая гу́сль протече́ земны́я концы́,/ та́инству строе́ния сло́ва учащая, о́тче Софро́ние. И ны́не и при́сно и во ве́ки веко́в. Ами́нь. Богородичен: Сый естество́м несозда́нен, и Отцу́ соприсносу́щен,/ и време́н превы́шший, и преве́чный,/ из Тебе́, Влады́чице, зиждемь,/ и под ле́том я́ко Челове́к быва́ет, спаса́я челове́ка. Песнь 3 Ирмос: Не му́дростию, и си́лою,/ и бога́тством хва́лимся,/ но Тобо́ю, О́тчею Ипоста́сною Му́дростию, Христе́:/ не́сть бо свят, па́че Тебе́, Человеколю́бче. Припев: Святи́телю, о́тче Софро́ние, моли́ Бо́га о на́с. Утвержда́ема па́лицею слове́с твои́х, преподо́бне,/ стремле́ния злочести́вых и богобо́рных ересе́й/ отража́ет, отгоня́щи, Це́рковь Христо́ва. Припев: Святи́телю, о́тче Софро́ние, моли́ Бо́га о на́с. Поборствовав по честне́м, Богоно́се, пропове́дании,/ показа́лся еси́ победи́тель по́мощию Ду́ха,/ му́дре укрепля́емь, о́тче Софро́ние. Припев: Святи́телю, о́тче Софро́ние, моли́ Бо́га о на́с. Умертви́в все тле́емое пло́ти сладостра́стие,/ нетле́нную ду́шу благоче́стием оживи́л еси́/ и сию́ показа́л еси́ Боже́ственный орга́н. Сла́ва Отцу́ и Сы́ну и Свято́му Ду́ху. Богосло́вный, и кра́сный, и мед отечный язы́к твой/ сло́ва ре́ки источа́ет, богоприя́тне,/ Боже́ственная уче́ния всем излива́я. И ны́не и при́сно и во ве́ки веко́в. Ами́нь. Богородичен: Тя, ро́ждшую Бо́га, Богоро́дицу сла́вим,/ Рождеству́ Твоему́ именова́нием сличествующе/ и зва́ния по обоему́, Пречи́стая Влады́чице. Седален, глас 4 Словесы́ украси́л еси́ Це́рковь Христо́ву,/ де́лы соблю́д е́же по о́бразу Бо́жию, Софро́ние преподо́бне,/ просия́ бо в ми́ре, е́же в тебе́ целому́дрие,/ благода́ть уче́ний облиста́ющая всем,/ любо́вию пра́зднующим, о́тче, па́мять твою́. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Обнови́ла еси́, Чи́стая, Боже́ственным Рождество́м Твои́м/ истле́вшее во страсте́х земноро́дных ме́ртвенное существо́/ и воздви́гла еси́ вся от сме́рти к животу́ нетле́ния./ Те́мже Тя по до́лгу блажи́м вси, Де́во Препросла́вленная,/ я́коже прорекла́ еси́. Песнь 4 Ирмос: Седя́й в сла́ве на престо́ле Божества́/ во о́блаце ле́гце,/ прии́де Иису́с Пребоже́ственный/ Нетле́нною Дла́нию и спа́се зову́щия:/ Сла́ва, Христе́, си́ле Твое́й. Припев: Святи́телю, о́тче Софро́ние, моли́ Бо́га о на́с. Еди́но Безнача́льное Существо́ в Трех Ипоста́сех/ сво́йствы соверше́нными ты, о́тче, му́дре пропове́дал еси́,/ разделя́емое непресеко́мо, совокупляемо же неслия́нно/ во́лею еди́ною и Божество́м. Припев: Святи́телю, о́тче Софро́ние, моли́ Бо́га о на́с. Име́я целомудренну мы́сль и ум целомудрейший,/ не смеше́ние мудровал еси́, о́тче, ни преложе́ние,/ ниже́ слия́ние соедине́нных непрело́жно/ двои́х есте́ств во еди́ном Христе́ Единоро́днем, всеблаже́нне. Припев: Святи́телю, о́тче Софро́ние, моли́ Бо́га о на́с. Просвеща́емь Боже́ственне просвеще́нием Ду́ха,/ лю́тое неи́стовство Несто́риево разори́л еси́/ то́южде во́лею и ра́зумом/ и́же соедине́ние пропове́давшаго Христо́ву обою́ естеству́. Сла́ва Отцу́ и Сы́ну и Свято́му Ду́ху. Пи́рра попали́л еси́, Богому́дре, огне́м уче́ний твои́х,/ отметающа два бы́ти Христо́ва хоте́ния/ разли́чными существы́, я́же по себе́,/ де́йства же вку́пе сугу́ба, о́тче преподо́бне. И ны́не и при́сно и во ве́ки веко́в. Ами́нь. Богородичен: Украси́лася еси́ па́че всего́ А́нгельскаго благоле́пия,/ я́ко ро́ждши сих, Отрокови́це,/ Творца́ же и Го́спода, от Твои́х пречи́стых крове́й воплоща́ема,/ избавляющего вся, Того́ сла́вящия. Песнь 5 Ирмос: Нечести́вии не у́зрят сла́вы Твое́й, Христе́,/ но мы Тя, Единоро́дне,/ Оте́ческия сла́вы сия́ние Божества́,/ от но́щи у́тренююще,/ воспева́ем Тя, Человеколю́бче. Припев: Святи́телю, о́тче Софро́ние, моли́ Бо́га о на́с. Честно́е воскресе́ние и Гроб жи́зни неукло́нною любо́вию зря,/ Боговиде́ния поче́рпл еси́ тайноуче́ния/ и ве́рным препо́дал еси́, святи́телю, сия́ния. Припев: Святи́телю, о́тче Софро́ние, моли́ Бо́га о на́с. Вся́чески возлюби́л еси́ еди́наго Блага́го, разже́гся заре́ю мы́сленною,/ и исто́чник возлюби́л еси́ нетле́ния,/ виде́ньми, всему́дре, к Нему́ простира́яся. Сла́ва Отцу́ и Сы́ну и Свято́му Ду́ху. Храм жив и одушевле́н был еси́ Бо́жий,/ умертви́вся всем, су́щим на земли́,/ сло́ва трапе́зу оби́льную стяжа́в, преподо́бне, и свети́льник ве́ры. И ны́не и при́сно и во ве́ки веко́в. Ами́нь. Богородичен: Во двою́ разумева́ема существу́, Христа́,/ Сы́на Единоро́днаго Бо́жия, Безнача́льнаго пло́ть бы́вша,/ па́че сло́ва родила́ еси́, Богома́ти Присноде́во. Песнь 6 Ирмос: Пожру́ Ти со гла́сом хвале́ния, Го́споди,/ Це́рковь вопие́т Ти,/ от бесо́вския кро́ве очи́щшися/ ра́ди ми́лости от ребр Твои́х/ исте́кшею кро́вию. Припев: Святи́телю, о́тче Софро́ние, моли́ Бо́га о на́с. Бога́тно излия́ся благода́ть Ду́ха Всесвята́го, Богому́дре, во устна́х твои́х,/ те́мже веща́ние твои́х слове́с ре́чным подо́бится тече́нием. Припев: Святи́телю, о́тче Софро́ние, моли́ Бо́га о на́с. Я́ко фи́никс, в До́му Госпо́дни процве́л еси́, благопло́дием слове́с/ и чи́стым житие́м наслажда́я се́рдца, святи́телю, ве́рно чту́щих тя. Сла́ва Отцу́ и Сы́ну и Свято́му Ду́ху. Умерщвля́ется живи́тельным ору́жием слове́с твои́х ерети́ческий собо́р/ и сверепое ополче́ние богобо́рец, закалаемо,/ умерщвля́ется уче́ний твои́х мечи́. И ны́не и при́сно и во ве́ки веко́в. Ами́нь. Богородичен: Пое́м, Богоро́дице, чи́стое рождество́ Твое́,/ и́мже спаса́емся вси сме́рти сете́й и лю́таго греха́/ и уз а́довых избавля́емся. Кондак, глас 8 И́же Боже́ственною ре́вностию подви́гся/ и и́стинных повеле́ний устне́ распросте́р,/ церко́вная основа́ния благоузако́нив/ и та́мо су́щим мона́шеским соста́вом преда́в,/ прему́дрый в Патриа́рсех Иерусали́мский Софро́ние,/ всему́драя словеса́ во свет изве́л еси́,/ и́миже наставля́еми, зове́м ти:/ ра́дуйся, све́тлая правосла́вных похвало́. Песнь 7 Ирмос: Спасы́й во огни́ авраа́мския Твоя́ о́троки/ и халде́и уби́в,/ я́же пра́вда пра́ведно уловля́ше,/ препе́тый Го́споди, Бо́же оте́ц на́ших, благослове́н еси́. Припев: Святи́телю, о́тче Софро́ние, моли́ Бо́га о на́с. Свы́ше манове́нием, ерети́ческим языкобо́лием противля́яся, му́дре,/ победоно́сец быв, вопия́л еси́, веселя́ся:/ препе́тый Го́споди, Бо́же оте́ц, благослове́н еси́. Припев: Святи́телю, о́тче Софро́ние, моли́ Бо́га о на́с. Весь возложе́н Бо́гу, по́стных садоде́лательства прелетая, му́дре,/ цветни́к твои́ми насади́л еси́ доброде́телей поуче́ньми,/ Бо́гу, Су́щему в Вы́шних, освяти́в. Сла́ва Отцу́ и Сы́ну и Свято́му Ду́ху. Зако́ну повину́йся Христо́ву,/ твоего́ худо́жества бога́тство тре́бующим/ благоче́стно, Богому́дре, разда́л еси́, воспева́я:/ препе́тый Го́споди, Бо́же оте́ц, благослове́н еси́. И ны́не и при́сно и во ве́ки веко́в. Ами́нь. Богородичен: Освяти́вши ду́шу и предочистивши те́ло,/ наи́тием на Тя Свята́го Ду́ха, Всенепоро́чная,/ Вы́шняго Си́лу во утро́бе Твое́й заче́нши, родила́ еси́ безсе́менно. Песнь 8 Ирмос: О́троки благочести́выя в пещи́/ Рождество́ Богоро́дичо спасло́ е́сть,/ тогда́ у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте, дела́,/ и превозноси́те Его́ во вся ве́ки. Припев: Святи́телю, о́тче Софро́ние, моли́ Бо́га о на́с. Иера́ршескаго священноде́йства ми́ром освяти́лся еси́ благода́ти,/ иде́же яви́ся ми́ра спасе́ние,/ архиерействовав, всему́дре о́тче Софро́ние, зовы́й:/ Го́спода по́йте, дела́, и превозноси́те Его́ во вся ве́ки. Припев: Святи́телю, о́тче Софро́ние, моли́ Бо́га о на́с. Прему́дрость почита́я лу́чшую, венце́м благода́тей венча́лся еси́,/ сла́ву неувяда́ему и бога́тство неотъе́млемо,/ прему́дрости, сла́вне, дар прие́м/ и, Го́спода по́йте, – зовы́й, – и превозноси́те Его́ во вся ве́ки. Припев: Святи́телю, о́тче Софро́ние, моли́ Бо́га о на́с. Священноле́пно, священнотайнниче, в Боже́ственную пра́вду оде́явся,/ упра́вил еси́, всеблаже́нне о́тче, праведнейшими Влады́чне ста́до словесы́ и дея́нии,/ Го́спода по́йте, – науча́я, – и превозноси́те Его́ во вся ве́ки. Сла́ва Отцу́ и Сы́ну и Свято́му Ду́ху. Великоле́пно и па́че сло́ва/ Сло́во, Отцу́, о́тче, Собезнача́льно, сло́во тебе́ дарова́,/ словеса́ развращающо, и языкобо́лия слабящо ересе́й,/ Го́спода по́йте, вопия́, и превозноси́те Его́ во вся ве́ки. И ны́не и при́сно и во ве́ки веко́в. Ами́нь. Богородичен: Святолепный показа́лася еси́ храм Сло́ва,/ всю тва́рь освяща́ющаго, гора́ ту́чная свята́я,/ гора́ пресве́тлая, Благослове́нная Влады́чице, еди́на всепе́тая./ Тем Тя, Богома́ти, пое́м и превозно́сим во вся ве́ки. Песнь 9 Ирмос: Ка́мень нерукосе́чный/ от несеко́мыя го́ры Тебе́, Де́во,/ краеуго́льный отсече́ся,/ Христо́с, совокупивши разстоя́щаяся естества́,/ тем веселя́щеся, Тя, Богоро́дице, велича́ем. Припев: Святи́телю, о́тче Софро́ние, моли́ Бо́га о на́с. Рече́ния, из усте́н твои́х Боже́ственных происхо́дят, Богоглаго́ливе,/ благочести́вых мы́сли услажда́ют благода́тию,/ я́коже сот, ка́плющий разуме́ний благоле́пие. Припев: Святи́телю, о́тче Софро́ние, моли́ Бо́га о на́с. Вну́трь Небе́сных незаходи́мых живе́ши, Богоглаго́ливе, у всех Влады́ки и Царя́,/ иде́же лику́ют А́нгельский све́тлости и святы́х во́инства. Припев: Святи́телю, о́тче Софро́ние, моли́ Бо́га о на́с. Жи́знь проходя́, о́тче, на земли́ А́нгельскую,/ А́нгельскаго на Небесе́х сподо́бился еси́ блаже́нства,/ иде́же Христа́ моли́ спасти́ся всем, пою́щим тя. Сла́ва Отцу́ и Сы́ну и Свято́му Ду́ху. Я́коже ароматами фиа́лы,/ лани́те твой, Богому́дре, на́рда пистикии многоце́нны,/ прему́дрости испо́лнь яви́ся алава́стр,/ Те́ло Христо́во честно́е ароматствуя твои́ми уче́нии. И ны́не и при́сно и во ве́ки веко́в. Ами́нь. Богородичен: О́блак Тя лего́к, Де́во, Иса́ия зря́ше:/ на Тя бо Госпо́дь наше́д, низложи́ вся рукотворе́нная/ и Свое́ разуме́ние Тя пою́щим яви́л е́сть.