Молитвы

Минея, 29 Апреля, Канон мучеников Глас 4 Песнь 1 Ирмос: Триста́ты кре́пкия,/ рожде́йся от Де́вы,/ безстра́стия во глубине́ души́ трича́стное потопи́, молю́ся,/ да Тебе́, я́ко в тимпа́не,/ во умерщвле́нии телесе́ побе́дное воспою́ пе́ние. Припев: Святи́и му́ченицы, моли́те Бо́га о на́с. Боже́ственными добро́тами наслажда́ющеся вкупе́,/ и пото́ка пи́щнаго напита́ющеся бога́тно,/ и прича́стием обожа́еми, му́ченицы венцено́сцы,/ вас блажа́щия от лю́тых бед изба́вите. Припев: Святи́и му́ченицы, моли́те Бо́га о на́с. Я́коже со́лнечныя лучи́, возсия́вше, заря́ми тве́рдых по́двиг, страда́льцы,/ и чуде́с сия́нии вся просвеща́ете,/ страсте́й нощь решите́ и де́монов мрак разоря́ете. Сла́ва Отцу́ и Сы́ну и Свято́му Ду́ху. Умерщвле́ни на земли́ я́звами боле́зней,/ к неболе́зненней жи́зни преидо́сте вку́пе, ю́нии многострада́льнии./ Те́мже то́чите исцеле́ния, вся́ку боле́знь облегча́юще/ Богоприя́тными моли́твами, пребога́тии. И ны́не и при́сно и во ве́ки веко́в. Ами́нь. Богородичен: Родила́ еси́ Бо́га из чи́стых Твои́х крове́й,/ вопло́щшася па́че ума́ зра́ком и́же по нас, Ма́ти Пренепоро́чная./ Те́мже вси Тя, ро́дове родо́в, ублажа́ют, святы́х му́ченик утвержде́ние. Песнь 3 Ирмос: Не му́дростию, и си́лою,/ и бога́тством хва́лимся,/ но Тобо́ю, О́тчею Ипоста́сною Му́дростию, Христе́:/ несть бо свят, па́че Тебе́,/ Человеколю́бче. Припев: Святи́и му́ченицы, моли́те Бо́га о на́с. Ме́ртвым истука́нным пожре́ти ника́коже восхоте́вше,/ Поже́ршемуся нас ра́ди же́ртва жива́ принесо́стеся,/ о́троцы прекра́снии, святи́и му́ченицы. Припев: Святи́и му́ченицы, моли́те Бо́га о на́с. Зако́ны Боже́ственными, укрепля́еми си́лою Ду́ха,/ беззако́ннующих сове́ты и ловле́ния низложи́сте/ и, зако́нне пострада́вше, сла́ву улучи́сте. Сла́ва Отцу́ и Сы́ну и Свято́му Ду́ху. Да восхва́лится Арте́ма и Филимо́н, Феости́х и Магн,/ Руф сла́вный, и Антипа́тр, и Фавма́сий,/ Фео́гний и Феодо́т великоимени́тии. И ны́не и при́сно и во ве́ки веко́в. Ами́нь. Богородичен: Ору́жия вся вра́жия ны́не до конца́ оскуде́ша,/ Тебе́ ро́ждшей Христа́, уя́звлена копие́м, Всенепоро́чная,/ о Не́мже му́ченицы, уязви́вшеся, пострада́ша. Седален, глас 1 Лик светови́ден свяще́нных страда́лец, совокупле́ние красно́,/ Богособра́нен собо́р, девяточи́сленный соста́в,/ пострада́вше кре́пко, попра́вше вра́жие мучи́тельство/ и причто́стеся А́нгельским лико́м, Го́сподеви предстоите́. Песнь 4 Ирмос: Седя́й в сла́ве на престо́ле Божества́/ во о́блаце ле́гце,/ прии́де Иису́с Пребоже́ственный/ Нетле́нною Дла́нию и спасе́ зову́щия:/ сла́ва, Христе́, си́ле Твое́й. Припев: Святи́и му́ченицы, моли́те Бо́га о на́с. Сожже́ния страда́льцы и Богожре́нная заколе́ния,/ приноше́ние соверше́нно, же́ртвы прия́тны,/ приведо́стеся во́лею поже́ршемуся и смерть умертви́вшему./ Те́мже вас ублажа́ем. Припев: Святи́и му́ченицы, моли́те Бо́га о на́с. Чу́до вели́кое показу́юще, сля́ченныя испра́висте, страда́льцы, ру́ки,/ и во́днаго труда́ изба́висте прибе́гшаго с любо́вию к ра́це ва́шей,/ наро́чита му́жа иногда́, досточу́днии. Сла́ва Отцу́ и Сы́ну и Свято́му Ду́ху. Да ублажа́тся досто́йно Арте́ма и Антипа́тр,/ Феости́х и Руф, Магн, и Филимо́н, и Фео́н,/ и Фео́гн с сла́вным Феодо́том, пострада́вший, зову́т:/ сла́ва, Христе́, си́ле Твое́й. И ны́не и при́сно и во ве́ки веко́в. Ами́нь. Богородичен: И́же в не́дрех О́тчих неизрече́нно седя́й,/ на Твои́х объя́тиих седи́т, Де́во, я́ко Младе́нец,/ Его́же блаже́нную страсть вообража́юще, добропобе́днии о́троцы изво́лиша умре́ти. Песнь 5 Ирмос: Нечести́вии не у́зрят сла́вы Твоея́, Христе́,/ но мы Тя, Единоро́дне, Оте́ческия сла́вы сия́ние Божества́,/ от но́щи у́тренююще,/ воспева́ем Тя, Человеколю́бче. Припев: Святи́и му́ченицы, моли́те Бо́га о на́с. Я́коже мы́сленное у́глие, вже́гше ум,/ попали́сте вои́стинну хвра́стную вся́ку пре́лесть, блаже́ннии,/ и запале́ние угаси́сте и́дольское росо́ю ве́ры. Припев: Святи́и му́ченицы, моли́те Бо́га о на́с. Разделе́ния в телесе́х не име́сте мно́зех,/ за Неразде́льную пострада́ти, страда́льцы, Тро́ицу иду́ще,/ те́мже разруши́сте диа́вола ополче́ние вся́ко. Сла́ва Отцу́ и Сы́ну и Свято́му Ду́ху. Воспева́ет чудеса́ ва́ша/ от лука́ваго легео́на разреши́выйся де́монска, му́ченицы Богови́днии,/ к честны́м ковче́гом ва́шим прише́дый со усе́рдием. И ны́не и при́сно и во ве́ки веко́в. Ами́нь. Богородичен: Избавля́ющи яви́ся нас от бед и прегреше́ний,/ тлетво́рных страсте́й, и скорбе́й, и обстоя́ний,/ ве́рою пою́щия Тя, Богоро́дице, Присноде́во. Песнь 6 Ирмос: Приидо́х во глубины́ морски́я,/ и потопи́ла мя есть бу́ря мно́гих грехо́в,/ но, я́ко Бог, из глубины́ возведи́ живо́т мой,/ Многоми́лостиве. Припев: Святи́и му́ченицы, моли́те Бо́га о на́с. Честна́ смерть яви́ся Боже́ственных страда́льцев пред Тобо́ю, Бо́же вся́ческих,/ и́хже ны́не почита́я, врачевство́ безме́здное боля́щим яви́л еси́. Сла́ва Отцу́ и Сы́ну и Свято́му Ду́ху. Возвы́сивше ру́це и сердца́ высо́ким нра́вом к Вы́шнему мужеу́мно,/ лука́ваго возноше́ния, му́ченицы Богоно́сцы, низложи́сте. И ны́не и при́сно и во ве́ки веко́в. Ами́нь. Богородичен: Я́коже стог, чре́во Твое́, Чи́стая, яви́ся,/ пшени́цу нося́щий безcме́ртия,/ всех ве́рных ду́ши пита́ющую и му́ченики просвеща́ющую. Кондак, глас 2 Тве́рдый и всесве́тлый лик му́ченик девяти́,/ Трисо́лнечнаго Божества́ испове́дницы,/ на суди́щи Тому́ нача́льно взыва́ху:/ кровь и ду́ши на́ша с телесы́,/ я́ко непоро́чную же́ртву, прино́сим Тебе́, Влады́ко,/ в ли́цех Небе́сных Твои́х сопричти́, я́ко Бог Ми́лостивый. Песнь 7 Ирмос: Ю́ноши три в Вавило́не,/ веле́ние мучи́телево на бу́йство прело́жше,/ посреде́ пла́мене вопия́ху:/ благослове́н еси́, Го́споди, Бо́же оте́ц на́ших. Припев: Святи́и му́ченицы, моли́те Бо́га о на́с. Иска́пают ва́ши тру́дове, му́ченицы, Боже́ственныя струи́ исцеле́ний всегда́,/ боле́зней ре́ки изсуша́юще/ и скве́рну вся́ку отмыва́юще страсте́й, досточу́днии. Припев: Святи́и му́ченицы, моли́те Бо́га о на́с. Ра́довахуся страстоте́рпцы, внегда́ скорбе́ти им, ра́достию неизглаго́ланною,/ поя́ху, усека́еми мече́м:/ благослове́н еси́, Го́споди, Бо́же оте́ц на́ших. Сла́ва Отцу́ и Сы́ну и Свято́му Ду́ху. Тяготу́ неду́гов, стра́сти серде́чныя и боле́зни теле́сныя,/ вся́ку же находя́щую скорбь/ нам облегчи́те, сла́внии страда́льцы. И ны́не и при́сно и во ве́ки веко́в. Ами́нь. Богородичен: Яви́вшися всем му́чеником, Чи́стая Ма́ти Бо́жия, держа́ва ве́лия,/ яви́лася еси́ челове́ком заступле́ние,/ Тя пою́щим всегда́ свяще́нными пе́сньми. Песнь 8 Ирмос: Изба́вителю всех, Всеси́льне,/ посреде́ пла́мене блаточе́ствовавшия, снизше́д, ороси́л еси́/ и научи́л еси́ пе́ти:/ вся дела́, благослови́те, по́йте Го́спода. Припев: Святи́и му́ченицы, моли́те Бо́га о на́с. Ра́достную хвалу́ принесе́м/ вели́кия нам засту́пники, страстоте́рпцы му́ченики Пода́вшему, вопию́щим:/ вся дела́, благослови́те Госпо́дня Го́спода. Припев: Святи́и му́ченицы, моли́те Бо́га о на́с. Укорени́вшеся на ка́мени ве́ры благоро́дне,/ я́коже ве́тви, му́ченицы, плоды́ нам страда́ния принесо́ша, ве́рою пою́щим:/ благослови́те, вся дела́ Госпо́дня, Го́спода. Сла́ва Отцу́ и Сы́ну и Свято́му Ду́ху. Вра́чеве страсте́й великоимени́тии, души́ моея́ стра́сти исцели́те,/ и гее́нны изба́вите, и тьмы о́ныя кроме́шния,/ моля́ще Христа́ Бо́га на́шего. И ны́не и при́сно и во ве́ки веко́в. Ами́нь. Богородичен: Законода́вца Христа́ родила́ еси́,/ зако́нно страда́вшия венча́вшаго, страстоте́рпцы му́ченики,/ Его́же моли́ зако́ном греха́ побежде́на мя, Отрокови́це, исцели́ти. Песнь 9 Ирмос: Е́ва у́бо неду́гом преслуша́ния/ кля́тву всели́ла есть;/ Ты же, Де́во Богоро́дице,/ прозябе́нием чревоноше́ния ми́рови благослове́ние процвела́ еси́./ Тем Тя вси велича́ем. Припев: Святи́и му́ченицы, моли́те Бо́га о на́с. Се отверзо́шася вам Небе́сная врата́, пострада́вшим, –/ рече́ Христо́с страстоте́рпцем:/ вни́дите и приими́те, ра́дующеся, воздая́ния боле́зней досто́йная,/ от ве́ка хра́брствовавшим. Припев: Святи́и му́ченицы, моли́те Бо́га о на́с. Кра́сни в ра́нах теле́сных бы́сте и А́нгелом уподо́бистеся,/ ны́не же предстоите́ всех красоте́, ра́дующеся при́сно,/ прича́стием я́ве удобря́еми кра́сных, всечестни́и. Припев: Святи́и му́ченицы, моли́те Бо́га о на́с. Ста́нем в дому́ Бо́жием, восхваля́юще Антипа́тра, Феости́ха же,/ Ру́фа и Филимо́на страда́ния, Боже́ственнаго Фавма́сия чудеса́,/ Ма́гна и Арте́ма, Фео́гния и Феодо́та непобе́дное. Сла́ва Отцу́ и Сы́ну и Свято́му Ду́ху. День спасе́ния нам возсия́ святы́х торжество́,/ е́же соверша́юще моле́бно, вопие́м им с ве́рою:/ му́чеников светоза́рный ве́рше, всех сердца́ озари́те. И ны́не и при́сно и во ве́ки веко́в. Ами́нь. Богородичен: Обле́кся из Тебе́ Царь в теле́сную багряни́цу,/ про́йде, весь красе́н, из утро́бы Твоея́, и вся враги́ победи́,/ и побе́ду страда́льцем подаде́, Чи́стая еди́на Присноде́во.

Минея, 16 Апреля, Кано́н, творе́ние Ио́сифово Глас 8 Песнь 1 Ирмос: Пои́м Го́сподеви,/ прове́дшему лю́ди Своя́ сквозе́ Чермно́е мо́ре,/ я́ко еди́н сла́вно просла́вися. Припев: Святи́и му́ченицы, моли́те Бо́га о на́с. Благода́ть мне с Небесе́, му́ченицы Госпо́дни, исхода́таите,/ ва́ше восхваля́ющему на земли́ светоно́сное торжество́. Припев: Святи́и му́ченицы, моли́те Бо́га о на́с. Расто́ргше пристра́стие плотски́х соу́з Боже́ственным Ду́хом,/ Христу́ де́вы связа́шася любо́вию Богоразу́мною. Припев: Святи́и му́ченицы, моли́те Бо́га о на́с. Напра́вил еси́ ко приста́нищем, Спа́се, Небе́сным де́вы Твоя́,/ проше́дшия немо́кренно мук непостоя́нную пучи́ну. Сла́ва Отцу́ и Сы́ну и Свято́му Ду́ху. Телесы́ чи́стыми от Де́вы Отрокови́цы возсия́вшему Сло́ву угоди́вше де́вы,/ Сим веселя́тся. И ны́не и при́сно и во ве́ки веко́в. Ами́нь. Богородичен: Ражда́еши несказа́нно, Его́же Оте́ц неизрече́нно роди́,/ и сосцы́ пита́еши вся́ческая пита́ющаго, Влады́чице. Песнь 3 Ирмос: Ты еси́ утвержде́ние/ притека́ющих к Тебе́, Го́споди,/ Ты еси́ свет омраче́нных,/ и пое́т Тя дух мой. Припев: Святи́и му́ченицы, моли́те Бо́га о на́с. Ту́чами Боже́ственнаго Ду́ха напая́еми/ кла́сы му́ченическия, Боже́ственным де́ланием де́вы процвето́ша. Припев: Святи́и му́ченицы, моли́те Бо́га о на́с. Па́че ви́димых неви́димая возлю́бльше,/ ви́димыя и неви́димыя враги́ побори́сте. Сла́ва Отцу́ и Сы́ну и Свято́му Ду́ху. Огня́ не ужасо́стеся, разгара́еми Ду́ха Боже́ственным огне́м,/ те́мже исцеле́ний Боже́ственную ро́су источа́ете. И ны́не и при́сно и во ве́ки веко́в. Ами́нь. Богородичен: Расто́ргни прегреше́ний мои́х лю́тое рукописа́ние, Влады́чице,/ Я́же у́зы разре́шшая а́довы безсе́менным рождество́м Твои́м. Седален, глас 8 Уневе́стившеся Го́сподеви боголе́пно,/ я́коже дар кровь и заколе́ние Тому́ принесо́сте, страстоно́сицы отрокови́цы,/ и черто́г Боже́ственный досто́йно улучи́сте,/ просвеще́ния неизрече́ннаго непреста́нно исполня́еми./ Те́мже, святу́ю и честну́ю ва́шу па́мять творя́ще духо́вно,/ Спа́са прославля́ем и ве́рно взыва́ем:/ моли́те Христа́ Бо́га грехо́в оставле́ние пода́ти/ чту́щим любо́вию святу́ю па́мять ва́шу. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Прему́дрость и Сло́во в Твое́м чре́ве заче́нши неопа́льно, Ма́ти Бо́жия,/ ми́рови родила́ еси́ мир Содержа́щаго/ и во объя́тиих понесла́ еси́ вся Нося́щаго,/ Пита́теля всех и Творца́ тва́ри./ Те́мже молю́ Тя, Всесвята́я Деви́це, и ве́рно сла́влю Тя,/ изба́витися ми от прегреше́ний, и в День Суда́,/ егда́ предста́ти и́мам пред лице́м Созда́теля моего́,/ Влады́чице Де́во Чи́стая, Твою́ по́мощь тогда́ пода́ждь ми:/ вся бо мо́жеши, ели́ка хо́щеши, Всепе́тая. Песнь 4 Ирмос: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́. Припев: Святи́и му́ченицы, моли́те Бо́га о на́с. Теле́сных жела́ний жела́нием Боже́ственным отлучи́вшеся,/ оби́телища Ду́ха Христо́вы де́вы соде́лашася. Припев: Святи́и му́ченицы, моли́те Бо́га о на́с. Согла́сием Богому́дрым на проти́внаго ополчи́вшеся, побе́ду Боже́ственную прия́сте/ и венце́в Боже́ственных сподо́бистеся. Сла́ва Отцу́ и Сы́ну и Свято́му Ду́ху. Свяще́нно, я́коже незло́биви води́стеся а́гницы, пожре́тися, всечестны́я,/ не вопию́ще, ни зову́ще,/ но произволе́нием умерщвля́еми. И ны́не и при́сно и во ве́ки веко́в. Ами́нь. Богородичен: Воплоща́ема Го́спода родила́ еси́, Госпоже́, всея́ тва́ри,/ Его́же моли́ изба́вити мя, Всесвята́я,/ от о́бласти вра́жия кова́рства. Песнь 5 Ирмос: Просвети́ нас повеле́нии Твои́ми, Го́споди,/ и мы́шцею Твое́ю высо́кою/ Твой мир пода́ждь нам,/ Человеколю́бче. Припев: Святи́и му́ченицы, моли́те Бо́га о на́с. У́треневаша вку́пе ко Христу́, Све́ту незаходи́мому, де́вы Богому́дрыя/ и па́че сия́ния со́лнечнаго озари́шася. Припев: Святи́и му́ченицы, моли́те Бо́га о на́с. У́ды му́жески отда́сте к му́кам,/ му́чивше томи́теля терпе́нием, страстоте́рпицы досточу́дныя. Припев: Святи́и му́ченицы, моли́те Бо́га о на́с. Цвет свяще́нен му́чеником показа́стеся,/ благово́ние Боже́ственнаго ра́зума Це́ркви подаю́ще, всехва́льнии. Сла́ва Отцу́ и Сы́ну и Свято́му Ду́ху. Глаго́лы ва́шими велехва́льный онеме́,/ терпе́нием же победи́ся/ и потребле́нию отпуще́н бысть, прехва́льнии. И ны́не и при́сно и во ве́ки веко́в. Ами́нь. Богородичен: Коне́ц ми благ прибы́ти, Отрокови́це, моли́,/ я́ко да избе́гну жду́щих мя безконе́чных мук и спасу́ся. Песнь 6 Ирмос: Моли́тву пролию́ ко Го́споду/ и Тому́ возвещу́ печа́ли моя́:/ я́ко зол душа́ моя́ испо́лнися/ и живо́т мой а́ду прибли́жися,/ и молю́ся, я́ко Ио́на:/ от тли, Бо́же, возведи́ мя. Припев: Святи́и му́ченицы, моли́те Бо́га о на́с. Претерпе́вше плотски́я боле́зни и о́гненное томле́ние му́жески,/ Христо́вы страстоте́рпицы и неве́сты Ага́пия, и Хиони́я, и Ири́на/ прия́ша вене́ц благоле́пен и неиждива́емую сла́ву с му́ченики. Припев: Святи́и му́ченицы, моли́те Бо́га о на́с. Влачи́мы по земли́, я́коже ка́мение,/ испроверго́сте, де́вы, пре́лести зда́ние все си́лою Сло́ва,/ к Це́ркви возведо́стеся Святе́й предстоя́ти ра́достно Владу́щему все́ю тва́рию. Сла́ва Отцу́ и Сы́ну и Свято́му Ду́ху. Исцеле́ния ра́ка Хиони́и, и Ири́ны, и Ага́пии то́чит,/ от исто́чника напая́ема бога́тно Уте́шителя, и уставля́ет боле́зни,/ напоя́ет же благоче́стно приступа́ющих сердца́ благода́тию. И ны́не и при́сно и во ве́ки веко́в. Ами́нь. Богородичен: Ме́ртвость ко́жных риз Ада́м отло́ж/ воплоще́нием Твоего́ Сы́на, Богоро́дице Де́во,/ во оде́жду Боже́ственныя сла́вы облече́ся,/ сла́вя Тя ра́достно, я́ко Ма́терь Бо́жию Всенепоро́чную. Кондак, глас 4 Кре́пко ду́шу, Ири́но, ополчи́ла еси́ ве́рою,/ я́ве лука́ваго посрами́вши,/ и ко Христу́ привела́ еси́ тьмы люде́й мно́жества, блаже́нная,/ и, порфи́ру от крове́й нося́щи,/ со А́нгелы ны́не весели́шися. Песнь 7 Ирмос: О́троцы евре́йстии в пещи́/ попра́ша пла́мень дерзнове́нно/ и на ро́су огнь преложи́ша, вопию́ще:/ благослове́н еси́, Го́споди Бо́же, во ве́ки. Припев: Святи́и му́ченицы, моли́те Бо́га о на́с. Ни звере́й ди́виих наи́тия, ни клоко́чущаго стремле́ния огня́ непостоя́ннаго,/ ни удо́в отсече́ния, ни боле́зней многообра́зных/ Христо́вы отрокови́цы устраши́шася доблему́дрыя. Припев: Святи́и му́ченицы, моли́те Бо́га о на́с. Иму́ще о́ко серде́чное ко спаса́ющему Бо́гу и Царю́, а́гницы Христо́вы/ отлучи́шася ко всему́ вра́жию ополче́нию и победи́ша му́жески. Припев: Святи́и му́ченицы, моли́те Бо́га о на́с. Ми́лостив бу́ди Твои́м рабо́м, Преблаги́й,/ мольба́ми Хиони́и, и Ири́ны чи́стыя, и честны́я Ага́пии,/ грехо́в проще́ние их ра́ди нам подава́я. Сла́ва Отцу́ и Сы́ну и Свято́му Ду́ху. Все жела́ние, де́вы, стяжа́вше ко еди́ному Влады́це,/ жите́йскую красоту́ вмени́сте, я́ко сон, вопию́ще:/ благослове́н еси́, Го́споди Бо́же, во ве́ки. И ны́не и при́сно и во ве́ки веко́в. Ами́нь. Богородичен: Умертви́, Чи́стая, живу́щий, молю́ Тя, во мне грех/ и жизнь мя улучи́ти сподо́би нестаре́емую,/ Я́же Живо́т ро́ждшая и умори́вшаго зми́я. Песнь 8 Ирмос: Богоглаго́ливии о́троцы в пещи́,/ со огне́м пла́мень попира́юще, поя́ху:/ благослови́те, дела́ Госпо́дня, Го́спода. Припев: Святи́и му́ченицы, моли́те Бо́га о на́с. Нау́чшеся Боже́ственным пресла́вно, во вре́мя подвиго́в нрав му́жески восприя́ша/ Христо́вы а́гницы, тве́рдо пострада́вше. Припев: Святи́и му́ченицы, моли́те Бо́га о на́с. Помраче́н пия́нством гони́тель мра́чнаго греха́,/ сме́ху до́лжен явля́шеся,/ Христо́вы же де́вы, я́ко свет, показа́шася. Припев: Святи́и му́ченицы, моли́те Бо́га о на́с. Цевни́ца, глася́щи я́ве Бо́жию песнь испове́дания Боже́ственнаго,/ и сведе́ния, и ве́ры показа́стеся вои́стинну, де́вы отрокови́цы. Сла́ва Отцу́ и Сы́ну и Свято́му Ду́ху. Утве́рждшеся любо́вию Влады́ки,/ утвержде́ния вся диа́воля низложи́сте, страстоно́сицы Христо́вы,/ и ны́не ублажа́етеся. И ны́не и при́сно и во ве́ки веко́в. Ами́нь. Богородичен: О́бразы нося́щи дре́вле Твоего́ рождества́,/ ю́ноши не опаля́ет, Де́во Ма́ти, пещь,/ я́коже ни утро́бу Твою́ Огнь Боже́ственный. Песнь 9 Ирмос: Вои́стинну Богоро́дицу,/ Тя испове́дуем,/ спасе́ннии Тобо́ю, Де́во Чи́стая,/ с безпло́тными ли́ки Тя велича́юще. Припев: Святи́и му́ченицы, моли́те Бо́га о на́с. Напра́вистеся, де́вы, к Боже́ственным приста́нищем окормле́нием Христа́ Бо́га на́шего,/ напа́сти преше́дше свире́пых волн. Припев: Святи́и му́ченицы, моли́те Бо́га о на́с. Я́ко зве́зды, я́ко свещи́, сия́юще,/ Ири́на, и Ага́пия, и Хиони́я/ просвеща́ют вселе́нныя бога́тно вся концы́. Припев: Святи́и му́ченицы, моли́те Бо́га о на́с. Совокупи́стеся с ли́ки Безпло́тных,/ безпло́тныя враги́, с пло́тию до́блественне, страстоно́сицы, победи́вше. Сла́ва Отцу́ и Сы́ну и Свято́му Ду́ху. Па́мять ва́ша Боже́ственными просвеще́на светови́дными, страстоно́сицы, дарова́нии,/ мы́сли просвеща́ет восхваля́ющих вас. И ны́не и при́сно и во ве́ки веко́в. Ами́нь. Богородичен: Благолюби́вая Де́во, озло́бленную грехо́м ду́шу мою́ уврачу́й,/ Я́же Преблага́го Сло́ва поро́ждшая.

Минея, 26 Июня, Други́й кано́н Глас 4 Песнь 1 Ирмос: Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,/ и воспою́, ра́дуяся, Тоя́ чудеса́. Припев: Пресвята́я Богоро́дице, спаси́ на́с. Даждь ми, Светода́вче Христе́,/ в наро́читый день пресла́внаго явле́ния ико́ны, Ро́ждшия Тя, све́тло торжествова́ти/ и ве́село во стра́се и ра́дости воспева́ти при́сно Тоя́ чудеса́. Припев: Пресвята́я Богоро́дице, спаси́ на́с. Сло́во Бо́жие Светода́тельное и Прему́дрость О́тчую пло́тию, Де́во, ро́ждшая,/ просвети́ глубо́кую тьму моего́ неразу́мия/ и сло́во ми пода́ждь воспе́ти Твоя́ чудеса́. Сла́ва Отцу́ и Сы́ну и Свято́му Ду́ху. Днесь ве́рных собо́ри просвеща́ются, ерети́ческая же ополче́ния посрамля́ются,/ ви́дяще ико́ну Твою́, Влады́чице, я́ко со́лнце, по возду́ху ше́ствующу,/ нече́стия мглу потребля́ющу и ве́рныя просвеща́ющу. И ны́не и при́сно и во ве́ки веко́в. Ами́нь. Еди́на еси́ Ты вели́чие на́ше и похвала́ с Бо́гом, Богоневе́стная,/ Тобо́ю бо от бед спаса́емся, и к Тебе́ прибега́ем, и приле́жно мо́лимся:/ изба́ви, Влады́чице, рабы́ Твоя́ ве́чнаго муче́ния, воспева́ющия Твоя́ чудеса́. Песнь 3 Ирмос: Твоя́ песносло́вцы, Богоро́дице,/ Живы́й и Незави́стный Исто́чниче,/ лик себе́ совоку́пльшия, духо́вно утверди́,/ в Боже́ственней Твое́й сла́ве/ венце́в сла́вы сподо́би. Припев: Пресвята́я Богоро́дице, спаси́ на́с. Христе́ Иису́се, Преве́чный Царю́ и Многоми́лостиве,/ пречестна́го Твоего́ о́браза и ро́ждшия Тя Присноде́вы просвети́ нас явле́нием/ и пода́ждь нам согреше́ний оставле́ние и от бед избавле́ние. Припев: Пресвята́я Богоро́дице, спаси́ на́с. Егда́ А́нгелами неви́димо носи́му пречестну́ю Твою́ ико́ну, Влады́чице,/ и светоза́рно стоя́щу на возду́се лю́дие ви́деша,/ тогда́, просвети́вшеся све́том Твоея́ ми́лости, ра́дости неизглаго́ланныя испо́лнишася. Сла́ва Отцу́ и Сы́ну и Свято́му Ду́ху. О Боголюби́вии святи́телие и свяще́нницы, мона́си и прости́и/ и наро́ди вси́, све́тло ликовству́йте днесь,/ я́ко возсия́ на высоте́ Заря́ светоно́сная, держа́щи и́стиннаго Све́та, изображе́на пло́тию,/ с Ни́мже сни́де к нам, подаю́щи всему́ ми́ру просвеще́ние. И ны́не и при́сно и во ве́ки веко́в. Ами́нь. Твое́ю, Де́во, всечестно́ю ико́ною дре́вле Творе́ц всех чудоде́йствова,/ спасе́ Ца́рский град от иноплеме́нных нахожде́ния;/ си́це и Росси́йстей стране́ бу́ди, Госпоже́ Цари́це, покро́в и заступле́ние,/ спаса́ющи ю от всех наве́т вра́жиих. Седален, глас 4 Я́ко дре́вняго вои́стинну киво́та честне́йший Твой пречи́стый о́браз, Влады́чице!/ Па́че бо иле́ктра блиста́яся,/ повсю́ду неоску́дно лучи́ ми́лости Твоея́ всем, явля́я, простира́ет/ и чту́щия пресла́вное прише́ствие его́ благода́тию Бо́жиею ми́лостивно соблюда́ет./ О не́мже, Влады́чице, мы, ра́дующеся, усе́рдно пра́зднуем/ и ма́тернее Твое́ к нам милосе́рдие прославля́ем. Песнь 4 Ирмос: Седя́й в сла́ве на Престо́ле Божества́/ во о́блаце ле́гце,/ прии́де Иису́с Пребоже́ственный/ Нетле́нною Дла́нию и спасе́ зову́щия:/ сла́ва, Христе́, си́ле Твое́й. Припев: Пресвята́я Богоро́дице, спаси́ на́с. Земля́ у́бо вся днесь да возвесели́тся,/ вку́пе же и возду́х, и мо́ре да кропи́т ра́дование,/ я́ко всечестна́го о́браза Богома́тере чуде́сным ше́ствием/ Росси́йская страна́ пресла́вно озари́ся. Припев: Пресвята́я Богоро́дице, спаси́ на́с. Раболе́пно слу́жат и А́нгельстии чи́нове Тебе́, всех Цари́це,/ и благогове́йно почита́ют всечестну́ю Твою́ ико́ну,/ воспева́юще Тя, Пресвяту́ю Де́ву,/ мы же, смире́ннии, ка́ко Тебе́, Всечи́стую, досто́йно пе́ти возмо́жем? Сла́ва Отцу́ и Сы́ну и Свято́му Ду́ху. Арха́нгельскую песнь, е́же ра́дуйся, Тебе́ зове́м, Богоневе́сто, Госпо́дь с Тобо́ю,/ ра́дуйся, ра́досте А́нгелов и всех челове́ков, сла́вящих Тя, вои́стинну весе́лие,/ спаси́ ду́ши пою́щих Тя, Богоро́дице Чи́стая. И ны́не и при́сно и во ве́ки веко́в. Ами́нь. О Богороди́тельнице, ра́дости Пода́тельнице,/ ве́рою сла́вящия Тя и от души́ пою́щия ра́дости неизрече́нныя испо́лни/ и Све́та невече́рняго сподо́би, Де́во Благода́тная, Влады́чице. Песнь 5 Ирмос: Ужасо́шася вся́ческая/ о Боже́ственней сла́ве Твое́й:/ Ты бо, Неискусобра́чная Де́во,/ име́ла еси́ во утро́бе над все́ми Бо́га/ и родила́ еси́ Безле́тнаго Сы́на,/ всем воспева́ющим Тя/ мир подава́ющая. Припев: Пресвята́я Богоро́дице, спаси́ на́с. В пусты́ни явле́нно Тебе́, Богома́ти, со святи́телем благогове́йный узре́ти муж сподо́бися/ и благоволе́ния Твоего́ глаго́лы от Тебе, Цари́це, восприя́т,/ на бо́льшее утвержде́ние и в по́льзу ми́ру спасе́ния. Припев: Пресвята́я Богоро́дице, спаси́ на́с. Окая́нен у́бо аз, Всечи́стая, и недосто́ин таковы́я ны́не благода́ти, е́же Тя ви́дети,/ но поне́ в бу́дущем сподо́би мя узре́ти Тя,/ и Сы́на Твоего́ усре́сти, гряду́ща во сла́ве,/ и глас Боже́ственный услы́шати, зову́щ во Ца́рство Небе́сное. Сла́ва Отцу́ и Сы́ну и Свято́му Ду́ху. Прибега́ем к Твое́й, Де́во, бла́гости,/ и о́чи серде́ц на́ших воспуща́ем к Тебе́, Чи́стая,/ и, с пла́чем коле́на преклоня́юще, мо́лим Тя:/ не пре́зри на́шего воздыха́ния/ и бу́ди нам покро́в и Помо́щница в День су́дный. И ны́не и при́сно и во ве́ки веко́в. Ами́нь. Еди́на еси́ всех Предста́тельница христиа́н, Богома́ти Пречи́стая,/ услы́ши на́ше моле́ние, воззри́ на ны, Всепе́тая,/ спаси́ град и оби́тель Твою́/ и озари́ ста́до Твое́ заре́ю благода́ти Твоего́ заступле́ния. Песнь 6 Ирмос: Боже́ственное сие́ и всечестно́е/ соверша́юще пра́зднество,/ Богому́дрии, Богома́тере,/ прииди́те, рука́ми воспле́щим,/ от Нея́ ро́ждшагося Бо́га сла́вим. Припев: Пресвята́я Богоро́дице, спаси́ на́с. О, преди́внаго Твоего́ чудесе́, Влады́чице!/ Я́ко за преслуша́ние Твоего́ повеле́ния/ ужа́сно челове́к с главы́ церко́вныя восхище́н быв,/ на земли́ невреди́м обре́теся, ми́лостию Твое́ю, Всеми́лостивая. Припев: Пресвята́я Богоро́дице, спаси́ на́с. Никто́же та́ко преслу́ша Боже́ственная повеле́ния, я́коже аз, окая́нный./ Тем, Ти припа́дая, молю́ся, Влады́чице:/ пре́жде да́же до конца́ не поги́бну,/ наста́ви мя на и́стинный путь и спаси́ мя, Чи́стая. Сла́ва Отцу́ и Сы́ну и Свято́му Ду́ху. Ты, о Богома́ти, ро́ждшая Претерпе́вшаго нас ра́ди на Дре́ве Кре́стнем распя́тие,/ умоли́ при́сно нам, страда́ние Его́ свято́е по́мнящим,/ во́лю Его́ Боже́ственную твори́ти/ и ве́чных благ насле́дниками бы́ти. И ны́не и при́сно и во ве́ки веко́в. Ами́нь. Влады́чице, Де́во Чи́стая, изба́ви нас лю́тых всех,/ умоля́ющи Пригвозди́вшаго на Кресте́ грехи́ на́ша,/ и сподо́би нас досто́йно одесну́ю Его́ ста́ти,/ егда́ прии́дет во сла́ве Свое́й. Кондак, глас 8 Притеце́м, лю́дие, к Де́вей Богоро́дице Цари́це,/ благодаря́ще Христа́ Бо́га,/ и, к Тоя́ чудотво́рней ико́не, уми́льно взира́ющи, припаде́м и возопие́м Ей:/ о Влады́чице Мари́е,/ присети́вше страну́ сию́ Твоего́ честна́го о́браза явле́нием чуде́сно,/ спаса́й в ми́ре и благовре́менстве оте́чество на́ше и вся христиа́ны,/ насле́дники показу́ющи Небе́сныя жи́зни,/ Тебе́ бо ве́рно зове́м:/ ра́дуйся, Де́во, ми́ра спасе́ние. Икос Пречу́дное явле́ние Богома́тере ви́дяще,/ на высоту́ доброде́телей взы́дем и ум на Не́бо возведе́м./ Сего́ бо ра́ди небоше́ственне прии́де, да привлече́т к высоте́ вопию́щия Ей си́це:/ ра́дуйся, благослове́нная Де́во, от всех родо́в Бо́гом избра́нная;/ ра́дуйся, Небе́сная Цари́це, Го́спода Бо́га Ма́ти и Творца́ вся́ческих./ Ра́дуйся, всера́достное А́нгелом пе́ние;/ ра́дуйся, всежела́тельное всего́ ми́ра зре́ние./ Ра́дуйся, неподви́жимое ве́ры благоче́стия основа́ние;/ ра́дуйся, всесве́тлое благода́ти позна́ние./ Ра́дуйся, Бо́жие к земны́м благоволе́ние;/ ра́дуйся, земны́х к Бо́гу возведе́ние./ Ра́дуйся, озло́бленным душа́м утеше́ние;/ ра́дуйся, всем ве́рным ско́рое поможе́ние./ Ра́дуйся, дарова́нная от Бо́га Предста́тельнице ро́ду христиа́нскому,/ его́же и соблюда́й приле́жно от вся́ких бед и зол, да зове́м Ти:/ ра́дуйся, Де́во, ве́рным спасе́ние. Песнь 7 Ирмос: Не послужи́ша тва́ри Богому́дрии/ па́че Созда́вшаго,/ но, о́гненное преще́ние му́жески попра́вше,/ ра́довахуся, пою́ще:/ препе́тый отце́в Госпо́дь и Бог, благослове́н еси́. Припев: Пресвята́я Богоро́дице, спаси́ на́с. Единоча́дый Твой Сын и Бог всех, Богома́ти,/ пречи́стый Твой о́браз невреди́м сохрани́ во пла́мени, о, чудесе́!/ Благода́тию па́че со́лнца обре́теся сия́ющ, и ве́рныя просвеща́ющ, ве́рою пою́щия:/ Бо́же, благослове́н еси́. Припев: Пресвята́я Богоро́дице, спаси́ на́с. Небе́снии чи́нове веселя́тся с земноро́дными, Богоро́дице, в све́тлом торжестве́ Твое́м,/ е́же соверша́ющия ны и со стра́хом предстоя́щия пред пречи́стым Твои́м о́бразом/ просвети́ све́том сия́ния Твоего́, Пречи́стая, и вся спаси́. Сла́ва Отцу́ и Сы́ну и Свято́му Ду́ху. Еди́наго от Тро́ицы Бо́га Сло́ва, Царя́ Небе́снаго, пло́тию, Цари́це, родила́ еси́,/ Того́ моли́, Влады́чице, во́инству на́шему пода́ти одоле́ние на проти́вныя/ и всем ве́рным по́мощь, грехо́в оставле́ние и душа́м спасе́ние. И ны́не и при́сно и во ве́ки веко́в. Ами́нь. Рабы́ Твоя́, Чи́стая, пою́щия Тя и ве́рою несумне́нною моля́щияся Тебе,/ светода́тельною Твое́ю и Боже́ственною осени́ благода́тию,/ я́ко Благоде́теля всех ро́ждшая,/ и покры́й и сохрани́ от всех наве́т вра́жиих. Песнь 8 Ирмос: О́троки благочести́выя в пещи́/ Рождество́ Богоро́дичо спасло́ есть,/ тогда́ у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте, дела́,/ и превозноси́те Его́ во вся ве́ки. Припев: Пресвята́я Богоро́дице, спаси́ на́с. О, пресла́вных чуде́с Твои́х, Чи́стая!/ Я́ко зда́тели святы́я це́ркве Твоея́, под ка́мением тридне́вно бы́вшии,/ обрето́шася жи́ви и безвре́дни, покро́вом соблюде́ни,/ Тебе́, всех Цари́це, возсыла́юще гла́сы похва́льныя. Припев: Пресвята́я Богоро́дице, спаси́ на́с. Жизнь вме́сто сме́рти дарова́ла еси́, Богоро́дице, ме́ртвенному существу́./ Те́мже и нас, умерщвле́нных грехи́ мно́гими, Богоневе́сто,/ неврежде́нны от враг соблюди́/ и к жи́зни лу́чшей возведи́, спаса́ющи ду́ши на́ша. Сла́ва Отцу́ и Сы́ну и Свято́му Ду́ху. Днесь испо́лнишася ра́дости и весе́лия вси ве́рнии о ико́не Твое́й, Богоро́дице,/ я́ко в че́люстех сме́рти бы́вшим яви́лася еси Жи́зни Вино́вница/ и исто́чник приснотеку́щий, целе́бныя да́ры всем точа́щий и спасе́ние подаю́щий. И ны́не и при́сно и во ве́ки веко́в. Ами́нь. Изря́дно воспе́ти пречи́стаго Твоего́ о́браза/ и ро́ждшагося из Тебе́ Младе́нца, и́стинна же Бо́га,/ чу́дныя ико́ны преславное прише́ствие/ совоку́пльшихся люде́й отвсю́ду, Всепе́тая, моле́ние приими́ и проше́ния испо́лни. Песнь 9 Ирмос: Всяк земноро́дный/ да взыгра́ется, Ду́хом просвеща́емь,/ да торжеству́ет же Безпло́тных умо́в естество́,/ почита́ющее свяще́нное торжество́ Богома́тере,/ и да вопие́т:/ ра́дуйся, Всеблаже́нная Богоро́дице,/ Чи́стая Присноде́во. Припев: Пресвята́я Богоро́дице, спаси́ на́с. Явле́нию, Влады́чице, всечестны́я Твое́я ико́ны кто́ не удиви́тся или́ кто́ не почуди́тся?/ По возду́ху бо сию́, я́ко не́кий дар светоно́сный, низпосла́ла еси́ земли́ Росси́йстей,/ ра́достно пою́щей Тя и ве́рно велича́ющей. Припев: Пресвята́я Богоро́дице, спаси́ на́с. Ра́дость ми́ру, Де́во, неизглаго́ланную дарова́вши явле́нием пречи́стыя Твое́я ико́ны,/ изба́ви, Влады́чице, от вся́кия печа́ли ве́рою покланя́ющияся ей/ и со стра́хом целу́ющия ю:/ о Пресвята́я! вся спаси́ и поми́луй/ и Ца́рствия Небе́снаго сподо́би. Сла́ва Отцу́ и Сы́ну и Свято́му Ду́ху. Ро́ждшая, Влады́чице, Человеколю́бца Бо́га,/ за человеколю́бие посети́ла еси́ нас Боже́ственною Твое́ю ико́ною,/ к не́йже всегда́ притека́юще и благоле́пие ея́ зря́ще, Тебе́ уми́льно вопие́м:/ спаса́й при́сно, Богоро́дице, достоя́ние Твое́. И ны́не и при́сно и во ве́ки веко́в. Ами́нь. Устна́ми смире́нными принесо́х Ти препро́стое сие́, Всепе́тая, пе́ние:/ поне́же груб есмь, многогре́шный, и недосто́ин по достоя́нию воспе́ти Тя,/ но от усе́рдия на Твоя́ щедро́ты наде́яся,/ я́ко Спаси́теля всего́ ми́ра родила́ еси́,/ не возгнуша́йся, Цари́це, приими́ сие́ и спаси́ мя. Светилен Пречи́стый о́браз Твой, и́мже присети́ла еси́ нас, Богоотрокови́це Де́во, чту́ще,/ пра́зднуем сего́ ны́не прише́ствие,/ от него́ благода́тию Сына́ Твоего́ и Твое́ю/ прие́млюще скорбе́й, и бед, и напа́стей избавле́ние,/ Ма́ти Бо́га Вы́шняго. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Пречи́стый о́браз Твой, и́мже присети́ла еси́ нас, Богоотрокови́це Де́во, чту́ще,/ пра́зднуем сего́ ны́не прише́ствие,/ от него́ благода́тию Сына́ Твоего́ и Твое́ю/ прие́млюще скорбе́й, и бед, и напа́стей избавле́ние,/ Ма́ти Бо́га Вы́шняго.

Минея, 18 Апреля, Кано́н Богоро́дицы Глас 1 Песнь 1 Ирмос: Воскресе́ния день,/ просвети́мся, лю́дие,/ Па́сха, Госпо́дня Па́сха:/ от сме́рти бо к Жи́зни/ и от земли́ к Небеси́/ Христо́с Бог нас/ преведе́, побе́дную пою́щия. Припев: Пресвята́я Богоро́дице, спаси́ на́с. Торжества́ день,/ просвети́мся, лю́дие!/ Цари́ца бо Небе́сная/ пресла́вно святи́телю Макси́му яви́ся./ Те́мже лику́ем вси в ра́дости,/ побе́дную пою́ще. Припев: Пресвята́я Богоро́дице, спаси́ на́с. Очи́стим чу́вствия/ и у́зрим в непристу́пном све́те/ Ма́терь Све́та,/ ко святи́телю прише́дшую,/ и, ра́дующеся, Ей вопие́м:/ ра́дуйся, Ма́ти Госпо́дня. Сла́ва Отцу́ и Сы́ну и Свято́му Ду́ху. Небеса́ у́бо досто́йно да веселя́тся,/ земля́ же да ра́дуется,/ да пра́зднует же град Влади́мир/ и вся Ру́сская страна́ да торжеству́ет,/ почита́ющи заступле́ние Богома́тере. И ны́не и при́сно и во ве́ки веко́в. Ами́нь. Да лику́ют согла́сно Не́бо и земля́/ в пра́здник Пречи́стыя Богома́тери,/ Та бо всем ве́рным освяще́ние подае́т./ Сию́ восхва́лим, душе́вно ра́дующеся. Песнь 3 Ирмос: Прииди́те, пи́во пие́м но́вое,/ не от ка́мене непло́дна чудоде́емое,/ но нетле́ния исто́чник,/ из гро́ба одожди́вша Христа́,/ в Не́мже утвержда́емся. Припев: Пресвята́я Богоро́дице, спаси́ на́с. Прииди́те, благода́ть вси почерпе́м,/ не от ка́мене непло́дна истека́ющую,/ но от Пречи́стыя Богома́тере,/ я́ко от неистощи́маго исто́чника,/ от него́же вси освяща́емся. Припев: Пресвята́я Богоро́дице, спаси́ на́с. Прииди́те, песнь но́ву пое́м,/ торжество́ Богома́тери соверша́юще,/ со псалма́ми и пе́нием лику́юще/ и Де́ве Пречи́стей/ с любо́вию покланя́ющеся. Сла́ва Отцу́ и Сы́ну и Свято́му Ду́ху. Ны́не вси испо́лнившеся ра́дости,/ архиере́и же и свяще́нницы,/ мона́хи и мирсти́и./ Пра́зднуем све́тло явле́ние Богома́тери,/ и́мже утеша́емся. И ны́не и при́сно и во ве́ки веко́в. Ами́нь. Тече́т благода́ть изоби́льная/ от Твоего́, Богоро́дице, о́браза,/ всем источа́ющи/ зол избавле́ние, и здра́вие, и ми́лость. Седален, глас 6 Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Влады́чице Преблагослове́нная,/ услы́ши нас, смире́нных,/ ве́рно Тебе́ покланя́ющихся/ и сла́вящих держа́ву Твою́, Всечи́стая:/ ины́я бо, кроме́ Тебе́, по́мощи не и́мамы./ Те́мже возопи́й пою́щим Тя:/ Аз семь с ва́ми,/ и никто́же возмо́жет на вы. Песнь 4 Ирмос: На Боже́ственней стра́жи/ Богоглаго́ливый Авваку́м/ да ста́нет с на́ми и пока́жет/ светоно́сна А́нгела,/ я́сно глаго́люща:/ днесь спасе́ние ми́ру,/ я́ко воскре́се Христо́с,/ я́ко Всеси́лен. Припев: Пресвята́я Богоро́дице, спаси́ на́с. На Боже́ственней стра́жи,/ в моли́твеннем бде́нии ста́нем/ и, я́ко светоно́сную свещу́, Святу́ю Де́ву у́зрим,/ из Нея́же возсия́ Изба́витель и Госпо́дь,/ спаса́яй всех, я́ко Всеси́лен. Припев: Пресвята́я Богоро́дице, спаси́ на́с. Богооте́ц у́бо Дави́д пред се́нным ковче́гом скака́ше, игра́я,/ лю́дие же Бо́жии святи́и,/ чудеса́ Богома́тере зря́ще,/ весели́мся Боже́ственне,/ и́бо ре́ки ми́лости источа́ет нам Влады́чица,/ я́ко Преблага́я. Сла́ва Отцу́ и Сы́ну и Свято́му Ду́ху. Что́ Ти принесе́м, Богома́ти,/ я́ко град наш Влади́мир освяти́ла еси́/ Твои́м ди́вным явле́нием?/ Его́же ны́не воспомина́юще,/ благода́рно славосло́вим Тя. И ны́не и при́сно и во ве́ки веко́в. Ами́нь. Днесь ве́рным ра́дость ве́лия:/ излива́ет бо Пречи́стая ми́лости/ всем, с любо́вию притека́ющим к Ней./ Те́мже стеце́мся, бра́тие,/ и чуде́с Богома́тери наслади́мся. Песнь 5 Ирмос: У́тренюем у́тренюю глубоку́,/ и вме́сто ми́ра песнь принесе́м Влады́це,/ и Христа́ у́зрим,/ Пра́вды Со́лнце,/ всем жизнь возсия́юща. Припев: Пресвята́я Богоро́дице, спаси́ на́с. У́тренююще, воспева́ем Тя, Влады́чице,/ пе́сней похвалы́ плету́ще,/ по Твоему́ хода́тайству наде́ющеся/ Свет узре́ти невече́рний,/ присносия́ющий. Припев: Пресвята́я Богоро́дице, спаси́ на́с. Безме́рное Твое́, Богома́ти, милосе́рдие/ ну́ждами жите́йскими содержи́мии зря́ще,/ ра́дуемся све́тло,/ ве́село вопию́ще:/ ра́дуйся, Ра́досте на́ша. Сла́ва Отцу́ и Сы́ну и Свято́му Ду́ху. Присту́пим, свещено́снии,/ к Бо́жией Ма́тери днесь/ и спра́зднуем любопра́зднственными чи́нми/ явле́ние Ея́ пресла́вное. И ны́не и при́сно и во ве́ки веко́в. Ами́нь. Просвеща́ется Твои́ми светолу́чными луча́ми/ и лику́ет днесь в Твое́м пра́зднице,/ Богома́ти Всенепоро́чная,/ благочести́вых собра́ние. Песнь 6 Ирмос: Снизше́л еси́ в преиспо́дняя земли́/ и сокруши́л еси́ вереи́ ве́чныя,/ содержа́щия свя́занныя, Христе́,/ и тридне́вен, я́ко от ки́та Ио́на,/ воскре́сл еси́ от Гро́ба. Припев: Пресвята́я Богоро́дице, спаси́ на́с. Сни́ди к нам Твои́м милосе́рдием, Пречи́стая,/ разреши́ ско́рби на́ша,/ виждь обстоя́ния, обдержа́щия нас,/ покро́й и заступи́ всех,/ Твоея́ по́мощи те́пле и́щущих. Припев: Пресвята́я Богоро́дице, спаси́ на́с. Лику́юще в пе́снех Боже́ственных, ве́рнии,/ воскли́кнем Де́ве,/ пра́здник Ея́ соверша́юще,/ освеще́ния бо исто́чник излива́ет всем,/ с любо́вию к Ней притека́ющим. Сла́ва Отцу́ и Сы́ну и Свято́му Ду́ху. Спа́се мой Преблаги́й/ и вся́ческих Тво́рче,/ Чи́стыя Богома́тере Богоприя́тными мольба́ми/ соблюди́ Твои́х певцо́в/ невреди́мыми от всех бед. И ны́не и при́сно и во ве́ки веко́в. Ами́нь. Тя пое́м, Богома́ти,/ и Тебе́ покланя́емся./ Не пре́зри моле́ния рабо́в Твои́х,/ заступи́ в беда́х на́ших,/ я́ко су́щи Ми́лостива. Кондак, глас 6 При́зри на нас, Всепе́тая Богоро́дице,/ возсия́й просвеще́ние сердце́м помраче́нным/ и озари́ ста́до Твое́, Пречи́стая,/ ели́ка бо хо́щеши и мо́жеши,/ я́ко Ма́ти су́щи Зижди́теля,/ и возопи́м моля́щим Тя:/ Аз есмь с ва́ми,/ и никто́же возмо́жет на вы. Икос Земна́я на земли́ оста́вльше/ и мы́сли от страсте́й очи́стивше,/ прииди́те ны́не, ве́рнии,/ ди́вное явле́ние Богома́тери святи́телю Макси́му воспомяне́м:/ ка́ко омофо́р тому́ подаде́/ и пасти́ слове́сныя о́вцы во гра́де Влади́мире повеле́./ Впери́м зре́ние, вку́пе и чу́вства ко Пречи́стей Богома́тери/ и к Ней моли́тву усе́рдную вознесе́м:/ не оста́ви нас, ста́до Твое́, Влады́чице,/ уте́ши нас, я́ко Ма́ти,/ наста́ви нас, я́ко сыно́в,/ и возопи́й моля́щим Тя:/ Аз есмь с ва́ми,/ и никто́же возмо́жет на вы. Песнь 7 Ирмос: О́троки от пе́щи изба́вивый,/ быв Челове́к,/ стра́ждет, я́ко сме́ртен,/ и стра́стию сме́ртное/ в нетле́ния облачи́т благоле́пие,/ Еди́н благослове́н/ отце́в Бог и препросла́влен. Припев: Пресвята́я Богоро́дице, спаси́ на́с. О́троки от пе́щи Изба́вльшаго/ нетле́нно родила́ еси́, Пречи́стая,/ по рождестве́, я́ко и пре́жде рождества́, сохра́ньшаго Тя./ Его́же моля́щи не преста́й/ с любо́вию чту́щих Тя. Припев: Пресвята́я Богоро́дице, спаси́ на́с. Вси ны́не, Богому́дрии, собери́теся,/ све́тлое пра́зднество соверша́юще,/ Влады́чицу ве́рно от души́ восхва́лим:/ ра́дуйся, Благослове́нная,/ Ма́ти Бо́жия Препросла́вленная. Сла́ва Отцу́ и Сы́ну и Свято́му Ду́ху. Вои́стинну свяще́нное ны́не, Богома́ти, сие́ торжество́,/ его́же святи́тель Макси́м учреди́/ во свиде́тельство всем/ неусы́пнаго Твоего́ о ста́де Твое́м промышле́ния./ Те́мже Тя с любо́вию велича́ем. И ны́не и при́сно и во ве́ки веко́в. Ами́нь. Вси ны́не со благогове́нием поклони́мся/ Пречи́стей Де́ве Богома́тери,/ моля́щеся со святи́телем Макси́мом/ и – ра́дуйся – Гаврии́лово/ принесе́м Благода́тней. Песнь 8 Ирмос: Сей нарече́нный и Святы́й День –/ еди́н суббо́т царь и госпо́дь,/ пра́здников пра́здник/ и торжество́ есть торже́ств,/ в о́ньже благослови́м Христа́ во ве́ки. Припев: Пресвята́я Богоро́дице, спаси́ на́с. Сей нарече́нный и святы́й день/ всех во гра́де Влади́мире и во о́бласти его́ су́щих созыва́ет на весе́лие./ Сни́демся у́бо в ра́дости/ и возопии́м Богоро́дице:/ ра́дуйся: Чи́стая, во вся ве́ки. Припев: Пресвята́я Богоро́дице, спаси́ на́с. Прииди́те, ве́рнии,/ испо́лнимся Боже́ственнаго благоуха́ния/ в пра́здник Бо́жия Ма́тери/ и Сию́ просла́вим,/ пою́ще во вся ве́ки. Сла́ва Отцу́ и Сы́ну и Свято́му Ду́ху. Троичен: О́тче Вседержи́телю, и Сло́ве, и Ду́ше,/ Еди́но в Трие́х Ли́цех Существо́,/ сохрани́ град сей и зе́млю на́шу/ от вся́кия ско́рби и беды́,/ мольба́ми Де́вы Богоро́дицы,/ святи́теля Макси́ма и всех святы́х Влади́мирских. И ны́не и при́сно и во ве́ки веко́в. Ами́нь. Возведи́ о́чи Твоя́, Чи́стая, и виждь:/ се бо прихо́дят к Тебе́/ от за́пада, и се́вера, и ю́га,/ и восто́ка ча́да Твоя́,/ Тя прославля́юще во вся ве́ки. Песнь 9 Ирмос: Свети́ся, свети́ся,/ Но́вый Иерусали́ме,/ сла́ва бо Госпо́дня/ на тебе́ возсия́,/ лику́й ны́не/ и весели́ся, Сио́не,/ Ты же, Чи́стая, красу́йся, Богоро́дице,/ о воста́нии Рождества́ Твоего́. Припев: Пресвята́я Богоро́дице, спаси́ на́с. Свети́ся и ра́дуйся, сла́вный гра́де Влади́мире,/ и́бо Богома́терь тя гра́дом Свои́м наименова́ла,/ лику́йте ны́не и весели́теся, ве́рнии,/ красу́йся же, и вся Ру́сская земля́,/ заступле́нием Влады́чицы храни́мая. Припев: Пресвята́я Богоро́дице, спаси́ на́с. О Боже́ственнаго, о любе́знаго,/ о сладча́йшаго Твоего́ гла́са,/ его́же святи́телю Макси́му изрекла́ еси́!/ При́сно у́бо, о Богома́ти,/ промышля́й о ста́де Твое́м,/ да, Тя Помо́щницу во всем иму́ще,/ ра́дуемся о Твое́м заступле́нии. Сла́ва Отцу́ и Сы́ну и Свято́му Ду́ху. О Ма́ти Бо́жия и Де́во!/ в моли́тву приво́дим Тебе́/ чудотво́рцев Влади́мирских,/ и́хже предста́тельством/ при́сно покрыва́й нас в житии́ сем,/ сподо́би же и нас невече́рняго дне/ во Ца́рствии Сы́на Твоего́. И ны́не и при́сно и во ве́ки веко́в. Ами́нь. Согла́сно, Де́во, Тебе́ блажи́м, ве́рнии:/ ра́дуйся, Ма́ти Бо́га на́шего Пресла́вная,/ Присноблаже́нная и Пренепоро́чная,/ еди́на, честне́йшая Херуви́м/ и сла́внейшая без сравне́ния Серафи́м. Светилен Сла́дость А́нгелов, святи́телей ра́дость,/ христиа́н всех Предста́тельнице,/ Де́во Ма́ти Госпо́дня,/ заступи́ нас и изба́ви от ве́чных мук.

Минея, 14 Сентября, Кано́н Креста́ Глас 8 Песнь 1 Ирмос: Крест начерта́в, Моисе́й/ впря́мо жезло́м Чермно́е пресече́,/ Изра́илю пешеходя́щу,/ то́же обра́тно фарао́новым колесни́цам,/ уда́рив, совокупи́,/ вопреки́ написа́в непобеди́мое ору́жие.// Тем Христу́ пои́м, Бо́гу на́шему, я́ко просла́вися. Припев: Сла́ва, Го́споди, Кресту́ Твоему́ Честно́му. О́браз дре́вле Моисе́й пречи́стыя Стра́сти в себе́ само́м прообрази́,/ свяще́нных среде́ стоя́:/ Крест же вообрази́в,/ просте́ртыми побе́ду дла́ньми воздви́же,/ держа́ву погуби́в Амали́ка всегуби́теля./ Тем Христу́ пои́м, Бо́гу на́шему, я́ко просла́вися. Сла́ва Отцу́ и Сы́ну и Свято́му Ду́ху. Возложи́ Моисе́й на столпе́ врачевство́,/ тлетвори́ваго избавле́ние и ядови́таго угрызе́ния,/ и дре́ву о́бразом Креста́/ по земли́ пресмыка́ющагося зми́я привяза́,/ лука́вный в сем обличи́в вред./ Тем Христу́ пои́м, Бо́гу на́шему, я́ко просла́вися. И ны́не и при́сно и во ве́ки веко́в. Ами́нь. Показа́ не́бо Креста́ побе́ду благоче́стия держа́телю и царю́ богому́дру,/ враго́в в не́мже злосе́рдных низложи́ся свире́пство,/ лесть же преврати́ся,/ и ве́ра распростре́ся земны́м конце́м Боже́ственная./ Тем Христу́ пои́м, Бо́гу на́шему, я́ко просла́вися. Песнь 3 Ирмос: Жезл во о́браз та́йны прие́млется,/ прозябе́нием бо предразсужда́ет свяще́нника,/ неплодя́щей же пре́жде Це́ркви,/ ны́не процвете́ Дре́во Креста́,// в держа́ву и утвержде́ние. Сла́ва Отцу́ и Сы́ну и Свято́му Ду́ху. Яко испусти́, ударя́емь, во́ду краесеко́мый/ непокори́вым лю́дем и жестосе́рдым,/ богозва́нныя проявля́ше Це́ркве та́инство,/ ея́же Крест держа́ва и утвержде́ние. И ны́не и при́сно и во ве́ки веко́в. Ами́нь. Ре́бром пречи́стым, копие́м прободе́нным,/ вода́ с Кро́вию истече́,/ обновля́ющая Заве́т и омыва́тельная греха́:/ ве́рных бо Крест похвала́ и царе́й держа́ва и утвержде́ние. Седален, глас 4 В тебе́, треблаже́нне и жизнода́вче Кре́сте,/ лю́дие учрежда́ющеся, спра́зднуют с невеще́ственными ли́ки,/ чи́ни архиере́йстии благогове́йно воспева́ют,/ мно́жества же мона́шествующих и по́стников покланя́ются,/ Христа́ же распе́ншагося вси сла́вим. Песнь 4 Ирмос: Услы́шах, Го́споди,/ смотре́ния Твоего́ та́инство,/ разуме́х дела́ Твоя́// и просла́вих Твое́ Божество́. Припев: Сла́ва, Го́споди, Кресту́ Твоему́ Честно́му. Горькоро́дныя преложи́ дре́вом Моисе́й/ исто́чники в пусты́ни дре́вле,/ Кресто́м ко благоче́стию язы́ков/ проявля́я преложе́ние. Припев: Сла́ва, Го́споди, Кресту́ Твоему́ Честно́му. Глубине́ вне́дривый секу́щую/ издаде́ Иорда́н дре́ву,/ Кресто́м и креще́нием/ сече́ние ле́сти зна́менуя. Сла́ва Отцу́ и Сы́ну и Свято́му Ду́ху. Свяще́нно ополча́ются/ четвероча́стнии лю́дие, предходя́ще/ о́бразом свиде́тельства ски́нии,/ крестообра́зными чи́нми прославля́еми. И ны́не и при́сно и во ве́ки веко́в. Ами́нь. Чу́дно простира́емь,/ солнечныя лучи́ испуща́ше Крест,/ и пове́даша небеса́/ сла́ву Бо́га на́шего. Песнь 5 Ирмос: О треблаже́нное Дре́во,/ на не́мже распя́ся Христо́с, Царь и Госпо́дь,/ и́мже паде́ дре́вом прельсти́вый,/ тобо́ю прельсти́вся,/ Бо́гу пригвозди́вшуся Пло́тию,// подаю́щему мир душа́м на́шим. Припев: Сла́ва, Го́споди, Кресту́ Твоему́ Честно́му. Тебе́, приснопе́тое Дре́во, на не́мже простре́ся Христо́с,/ Еде́м храня́щее обраща́ющееся ору́жие, Кре́сте, устыде́ся:/ стра́шный же Херуви́м уступи́ на тебе́ пригвожде́нному Христу́,/ подаю́щему мир душа́м на́шим. Сла́ва Отцу́ и Сы́ну и Свято́му Ду́ху. Подзе́мных си́лы проти́вныя Креста́ страша́тся/ начерта́ема зна́мения на возду́се,/ по нему́же хо́дят Небе́сных и земноро́дных ро́ди,/ коле́на преклоня́юще Христу́,/ подаю́щему мир душа́м на́шим. И ны́не и при́сно и во ве́ки веко́в. Ами́нь. Заря́ми нетле́нными я́влься Боже́ственный Крест/ омраче́нным язы́ком, заблужде́нным в пре́лести,/ Боже́ственный свет облиста́в,/ усвоя́ет на нем пригвожде́нному Христу́,/ подаю́щему мир душа́м на́шим. Песнь 6 Ирмос: Во́днаго зве́ря во утро́бе/ дла́ни Ио́на крестови́дно распросте́р,/ спаси́тельную Страсть прообража́ше я́ве./ Тем, тридне́вен изше́д,/ преми́рное Воскресе́ние прописа́ше/ Пло́тию пригвожде́ннаго Христа́ Бо́га// и тридне́вным Воскресе́нием мир просве́щшаго. Сла́ва Отцу́ и Сы́ну и Свято́му Ду́ху. Ста́ростию преклони́вся и неду́гом отягче́н, испра́вися Иа́ков, ру́це премени́в,/ де́йствие явля́я жизноно́снаго Креста́:/ и́бо ве́тхость зако́ннаго сено́внаго писа́ния новописа́ на сем Пло́тию пригвозди́выйся Бог/ и душегуби́тельный неду́г ле́сти отгна́. И ны́не и при́сно и во ве́ки веко́в. Ами́нь. На ю́ныя возложи́в дла́ни боже́ственный Изра́иль, крестови́дно главы́ явля́ше,/ я́ко старе́йшая сла́ва, законослужи́тели лю́дие./ Те́мже, подмне́вся та́ко испрельсти́тися, не измени́ жизноно́снаго о́браза:/ превзы́дут бо лю́дие Христо́вы Бо́жии новоутвержде́ннии,/ вопия́ху, Кресто́м огражда́еми. Кондак, глас 4 Вознесы́йся на Крест во́лею,/ тезоимени́тому Твоему́ но́вому жи́тельству/ щедро́ты Твоя́ да́руй, Христе́ Бо́же,/ возвесели́ нас си́лою Твое́ю,/ побе́ды дая́ нам на сопоста́ты,/ посо́бие иму́щим Твое́ ору́жие ми́ра,// непобеди́мую побе́ду. Икос И́же до тре́тияго Небесе́ восхище́н бысть в рай/ и глаго́лы слы́шав неизрече́нныя и Боже́ственныя,/ и́хже не леть язы́ки (челове́ческими) глаго́лати,/ что Гала́том пи́шет, я́ко рачи́телие Писа́ний прочто́сте и позна́сте:/ мне, глаго́лет, хвали́тися да не бу́дет, то́кмо во еди́ном Кресте́ Госпо́дни,/ на не́мже, страда́в, уби́ стра́сти./ Того́ у́бо и мы изве́стно держи́м, Крест Госпо́день, хвалу́ вси:/ есть бо нам спаси́тельное сие́ Дре́во/ ору́жие ми́ра, непобеди́мая побе́да. Песнь 7 Ирмос: Безу́мное веле́ние/ мучи́теля злочести́ваго лю́ди поколеба́,/ ды́шущее преще́ние и злохуле́ние богоме́рзкое;/ оба́че три о́троки не устраши́ я́рость зве́рская,/ ни огнь снеда́яй,/ но, противоды́шущу росоно́сному Ду́ху,/ со огне́м су́ще, поя́ху:// препе́тыи́ отце́в и нас Бо́же, благослове́н еси́. Припев: Сла́ва, Го́споди, Кресту́ Твоему́ Честно́му. От дре́ва вкуси́в, пе́рвый в челове́цех в тле́ние всели́ся:/ отверже́нием бо жи́зни безче́стнейшим осуди́вся,/ всему́ ро́ду телотле́нен не́кий я́ко вред неду́га преподаде́;/ но, обре́тше, земноро́днии, воззва́ние кре́стным Дре́вом, зове́м:/ препе́тый отце́в и нас Бо́же, благослове́н еси́. Сла́ва Отцу́ и Сы́ну и Свято́му Ду́ху. Разруши́ повеле́ние Бо́жие преслуша́ние,/ и дре́во принесе́ смерть челове́ком,/ е́же неблаговре́менно прича́стно бы́вшее;/ во утвержде́ние же зело́ честна́го/ отту́ду жи́зни дре́во возбраня́емо бе,/ е́же разбо́йнику злоуме́ршу отве́рзе, благоразу́мно зову́щу:/ препе́тый отце́в и нас Бо́же, благослове́н еси́. И ны́не и при́сно и во ве́ки веко́в. Ами́нь. Жезла́ объе́млет край Ио́сифова,/ бу́дущая зря, Изра́иль,/ Ца́рствия держа́вное,/ я́ко возыму́ществит пресла́вный Крест, проявля́я:/ сей бо царе́й победоно́сная похвала́ и свет ве́рою зову́щим:/ препе́тый отце́в и нас Бо́же, благослове́н еси́. Песнь 8 Ирмос: Благослови́те, о́троцы,/ Тро́ицы равночи́сленнии,/ Соде́теля Отца́ Бо́га,/ по́и́те снизше́дшее Сло́во,/ и огнь в ро́су претво́ршее,/ и превозноси́те всем жизнь подава́ющаго// Ду́ха Всесвята́го во ве́ки. Припев: Сла́ва, Го́споди, Кресту́ Твоему́ Честно́му. Воздвиза́ему Дре́ву,/ окропле́ну Кро́вию вопло́щшагося Сло́ва Бо́га,/ по́йте, Небе́сныя Си́лы;/ земны́х воззва́ние пра́зднующе, лю́дие,/ поклони́теся Христо́ву Кресту́,/ и́мже ми́ру воста́ние во ве́ки. Сла́ва Отцу́ и Сы́ну и Свято́му Ду́ху. Земноро́днии, дла́ньми, строи́телие благода́ти,/ Крест, на не́мже стоя́ше Христо́с Бог, возноси́те священноле́пно/ и копие́, Бо́жия Сло́ва Те́ло пробо́дшее,/ да ви́дят язы́цы вси спасе́ние Бо́жие,/ сла́вяще Его́ во ве́ки. И ны́не и при́сно и во ве́ки веко́в. Ами́нь. Боже́ственным судо́м предызбра́ннии, весели́теся,/ христиа́нстии ве́рнии ца́рие,/ хвали́теся победоно́сным ору́жием,/ прие́мше от Бо́га Крест честны́й:/ в сем бо коле́на бра́ней, де́рзости и́щуще,/ разсыпа́ются во ве́ки. Песнь 9 Ирмос: Та́ин еси́, Богоро́дице, рай,/ невозде́ланно возрасти́вший Христа́,/ Имже кре́стное живоно́сное на земли́ насади́ся Дре́во;/ тем, ны́не возноси́му,// покланя́ющеся Ему́, Тя велича́ем. Сла́ва Отцу́ и Сы́ну и Свято́му Ду́ху. Да возра́дуются древа́ дубра́вная вся, освяти́вшуся естеству́ их,/ от Него́же изнача́ла насади́шася,/ Христу́ распросте́ршуся на Дре́ве;/ тем, ны́не возноси́му,/ покланя́ющеся Ему́, Тя велича́ем. И ны́не и при́сно и во ве́ки веко́в. Ами́нь. Свяще́нный воста́ рог/ и глава́ всем богому́дрым, Крест,/ и́мже гре́шных мы́сленно стира́ются ро́зи вси/ тем, ны́не возноси́му,/ покланя́ющеся ему́, Тя велича́ем. Светилен Крест храни́тель всея́ вселе́нныя,/ Крест красота́ Це́ркве,/ Крест царе́й держа́ва,/ Крест ве́рных утвержде́ние,/ Крест А́нгелов сла́ва и де́монов я́зва. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Крест воздвиза́ется днесь, и мир освяща́ется:/ Иже бо со Отце́м седя́й и Ду́хом Святы́м/ на сем ру́це распростре́,/ мир весь привлече́ к Твоему́, Христе́, позна́нию;/ и́же у́бо на Тя наде́ющияся/ боже́ственныя сподо́би сла́вы.

Минея, 13 Августа, Кано́н святителя Глас 8 Песнь 1 Ирмос: Во́ду проше́д, я́ко су́шу,/ и еги́петскаго зла избежа́в,/ Изра́ильтянин вопия́ше:/Изба́вителю и Бо́гу на́шему пои́м. Припев: Святи́телю о́тче Ти́хоне, моли́ Бо́га о на́с. Святи́телю Христо́в Ти́хоне!/ Сам да́руй ми ум и язы́к,/ да воспою́ по достоя́нию сла́ву,/ е́юже сла́вно просла́ви тя Христо́с Госпо́дь. Припев: Святи́телю о́тче Ти́хоне, моли́ Бо́га о на́с. Луча́ Боже́ственнаго све́та возсия́ нам,/ прииди́те, ча́да све́та, да озари́мся е́ю,/ да возгори́мся Ду́хом, пе́сньми святи́теля велича́юще. Сла́ва Отцу́ и Сы́ну и Свято́му Ду́ху. Апо́столов прее́мника, святи́телей сопресто́льника, преподо́бных сожи́теля,/ просла́вим блаже́ннаго Ти́хона,/ его́же предста́тельством спасе́ние улуча́ем. И ны́не и при́сно и во ве́ки веко́в. Ами́нь. Богородичен: Воплоти́вся неизрече́нно Влады́ка всех из Тебе́, Богороди́тельнице Мари́е,/ соверше́н бы́сть челове́к/ и, роди́вся, я́коже пре́жде рождества́, сохрани́ Тя чи́сту,/ Его́же моли́ спасти́ от бед ду́ши на́ша. Песнь 3 Ирмос: Небе́снаго кру́га Верхотво́рче, Го́споди,/ и Це́ркве Зижди́телю,/ Ты мене́ утверди́ в любви́ Твое́й,/ жела́ний кра́ю, ве́рных утвержде́ние,/ Еди́не Человеколю́бче. Припев: Святи́телю о́тче Ти́хоне, моли́ Бо́га о на́с. Любо́вию Христо́вою уязви́вся, блаже́нне,/ тому́ от ю́ности невозвра́тным жела́нием после́довал еси́,/ вся́кое плотско́е наслажде́ние возненави́дев. Припев: Святи́телю о́тче Ти́хоне, моли́ Бо́га о на́с. Ю́ношеския стра́сти, пло́ть томя́щия, любому́дрия мече́м посе́кл еси́,/ же́ртву себе́ Влады́це Христу́ принося́. Сла́ва Отцу́ и Сы́ну и Свято́му Ду́ху. Стра́хом Госпо́дним утвержда́емь, нача́ло бо Прему́дрости сей е́сть,/ любо́вию лу́чшею прилепи́лся еси́ Прему́дрости, о Ти́хоне. И ны́не и при́сно и во ве́ки веко́в. Ами́нь. Богородичен: Воспои́м боже́ственный храм Бо́жий,/ ублажи́м Святу́ю Де́ву, обоже́ни бы́вше Е́ю и от бед избавля́еми. Седален, глас 8 Храм Свята́го Ду́ха от ю́ности был еси́:/ Уте́шителева бо благода́ть, по ве́ре твое́й очи́стивши ду́шу твою́ от страсте́й,/ я́ве в ней вселя́ется,/ сего́ ра́ди и по преставле́нии соблюде́ся те́ло твое́ нетле́нно./ Моли́ Христа́ Бо́га от тлетво́рных страсте́й изба́витися/ чту́щим любо́вию па́мять твою́. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Ма́ти сла́дкаго ми Иису́са, Чи́стая Богоотрокови́це, прия́телище Ду́ха Свята́го,/ очи́сти мою́ ду́шу, беззако́нии оскверне́нную,/ и све́тлое жили́ще доброде́телей соде́лай,/ Светоно́сная Нетле́нная, отжени́ о́блак страсте́й,/ да и мене́ Твои́ми моли́твами осени́т Уте́шителева благода́ть. Песнь 4 Ирмос: Ты моя́ кре́пость, Го́споди,/ Ты моя́ и си́ла,/ Ты мой Бог, Ты мое́ ра́дование,/ не оста́вль не́дра О́тча/ и на́шу нищету́ посети́в./ Тем с проро́ком Авваку́мом зову́ Ти:/ си́ле Твое́й сла́ва, Человеколю́бче. Припев: Святи́телю о́тче Ти́хоне, моли́ Бо́га о на́с. Я́ко овча́, от Христа́ упа́слся еси́,/ я́коже па́стырь, упа́сл еси́ ста́до,/ изводя́ на па́жити живоно́сных твои́х уче́ний. Припев: Святи́телю о́тче Ти́хоне, моли́ Бо́га о на́с. Таи́нник быв Христо́ва уче́ния,/ сего́ ве́дением просвети́л еси́ лю́ди,/ де́лы и словесы́ явля́я и́стину его́. Сла́ва Отцу́ и Сы́ну и Свято́му Ду́ху. И́стинен и ве́рен страж до́му Бо́жия был еси́,/ стреги́й его́ де́лом, я́ко о́браз явля́я житие́м,/ сло́вом, я́ко уча́ усе́рдно,/ помышле́нием, я́ко пеки́йся о бла́зе его́. И ны́не и при́сно и во ве́ки веко́в. Ами́нь. Богородичен: Тя приста́нище, и сте́ну, и прибе́жище, и наде́жду, и покро́в,/ и Предста́тельницу те́плую обре́тше, ве́рнии,/ к Тебе́ прибега́ем и вопие́м приле́жно,/ я́коже научи́ нас взыва́ти к тебе́ блаже́нный Ти́хон:/ Пресвята́я Богоро́дице, спаси́ нас. Песнь 5 Ирмос: Вску́ю мя отри́нул еси́/ от лица́ Твоего́, Све́те Незаходи́мый,/ и покры́ла мя е́сть чужда́я тьма́, окая́ннаго?/ Но обрати́ мя и к све́ту за́поведей Твои́х/ пути́ моя́ напра́ви, молю́ся. Припев: Святи́телю о́тче Ти́хоне, моли́ Бо́га о на́с. Его́же возлюби́л еси́, Его́же возжеле́л еси́,/ Его́же ра́ди подвиза́лся еси́, святи́телю,/ моли́ ны́не Христа́ о рабе́х,/ да, ми́лостив быв, всем нам ми́рное состоя́ние да́рует,/ почита́ющим па́мять твою́. Припев: Святи́телю о́тче Ти́хоне, моли́ Бо́га о на́с. Любо́вию и ве́рою Христо́вою испо́лнен сый,/ яви́лся еси́ я́ко река́, оби́льно всю зе́млю Росси́йскую напоя́я/ сло́вом уче́ния, блаже́нне Ти́хоне. Сла́ва Отцу́ и Сы́ну и Свято́му Ду́ху. Я́ко пчела́ сла́дкий мед от цвето́в, ско́ро увяда́ющих,/ собра́л еси́, о́тче, от тле́ннаго ми́ра духо́вное сокро́вище,/ и́мже всех нас услажда́еши. И ны́не и при́сно и во ве́ки веко́в. Ами́нь. Богородичен: Испо́лни весе́лия се́рдце на́ше, Пречи́стая Богоотрокови́це,/ весе́лия ро́ждшая Вино́внаго,/ грехо́вную печа́ль вся́кую потребля́ющи. Песнь 6 Ирмос: Очи́сти мя, Спа́се,/ мно́га бо беззако́ния моя́,/ и из глубины́ зол возведи́, молю́ся,/ к Тебе́ бо возопи́х, и услы́ши мя,/ Бо́же спасе́ния моего́. Припев: Святи́телю о́тче Ти́хоне, моли́ Бо́га о на́с. Чист быв се́рдцем,/ чи́стому Христу́ прилепи́лся еси́, святы́й Свято́му,/ люби́тель Люби́тельному, кро́ткий Кро́ткому, взыва́я непреста́нно:/ мне прилепля́тися Бо́гови бла́го е́сть. Припев: Святи́телю о́тче Ти́хоне, моли́ Бо́га о на́с. Уте́ху, ро́скошь, че́сть, бога́тство, сла́ву/ и все сокро́вище ми́ра презре́л еси́,/ воспаря́я к Го́рнему Иерусали́му, к до́му Отца́ Небе́снаго,/ иде́же оби́тели мно́ги су́ть. Сла́ва Отцу́ и Сы́ну и Свято́му Ду́ху. Доса́ды, ско́рби, оби́ды ра́достно терпе́л еси́, помышля́я,/ я́ко вене́ц без побе́ды, побе́да без по́двига,/ по́двиг без бра́ни, бра́нь без враго́в не быва́ет. И ны́не и при́сно и во ве́ки веко́в. Ами́нь. Богородичен: О Де́во Госпоже́, Ма́ти Зижди́телева!/ Небе́сных еси́ чино́в ра́дование/ и челове́ческому ро́ду благослове́нная Помо́щнице,/ моли́ спасти́ся душа́м на́шим. Кондак, глас 8 Апо́столов прее́мниче,/ святи́телей украше́ние,/ Правосла́вный Це́ркве учи́телю,/ Влады́це всех моли́ся/ мир вселе́нней дарова́ти/ и душа́м на́шим ве́лию ми́лость. Икос Ду́шу твою́ украси́в доброде́телию,/ ум просвети́в любому́дрием,/ па́стырь до́брый яви́лся еси́ ста́ду Христо́ву,/ сло́вом и писа́нием уча́, наказу́я и вразумля́я,/ житие́м свои́м о́браз слове́с явля́я,/ Те́мже на Небеси́ венце́м сла́вы украси́лся еси́ от Пастыренача́льника Христа́,/ на земли́ сия́я нетле́нием моще́й/ и источа́я оби́льныя то́ки чуде́с ве́рою призыва́ющим тя,/ досточу́дне и Богому́дре Ти́хоне./ Моли́ся ко Го́споду дарова́ти душа́м на́шим ве́лию ми́лость. Песнь 7 Ирмос: Бо́жия снизхожде́ния/ о́гнь устыде́ся в Вавило́не иногда́,/ сего́ ра́ди о́троцы в пещи́, ра́дованною ного́ю,/ я́ко во цве́тнице, лику́юще, поя́ху:/ благослове́н еси́, Бо́же оте́ц на́ших. Припев: Святи́телю о́тче Ти́хоне, моли́ Бо́га о на́с. Терпе́нием стяжа́л еси́ ду́шу твою́, блаже́нне,/ путе́м те́сным, еди́ным веду́щим в жи́знь ве́чную, шел еси́,/ вы́ну взира́я на кре́стный пу́ть подвигополо́жника Христа́/ и сего́ о́браз житию́ твоему́ полага́я. Припев: Святи́телю о́тче Ти́хоне, моли́ Бо́га о на́с. Всего́ себе́ любви́ Бо́жией пре́дал еси́,/ ду́шу и те́ло, се́рдце и ра́зум,/ па́мять и во́лю, наме́рение, начина́ние,/ сло́во, де́ло и помышле́ние Бо́гу в любо́вь посвяти́л еси́. Сла́ва Отцу́ и Сы́ну и Свято́му Ду́ху. Оте́ц сиро́т, и вдов защи́тник, и бога́тство ни́щих,/ боля́щих утеше́ние, и су́щих в бога́тстве наста́вник,/ ста́рости жезл, и наказа́ние ю́ности,/ и мона́шествующим доброде́телей пра́вило яви́лся еси́, блаже́нне Ти́хоне. И ны́не и при́сно и во ве́ки веко́в. Ами́нь. Богородичен: Ра́дуйся, Мари́е, ра́дуйся, Спаси́теля ми́ру ро́ждшая,/ приста́нище бу́ди нам, жите́йскою бу́рею волну́емым,/ и оти́шие в пучи́не скорбе́й,/ и води́тельство к Небе́сным селе́нием. Песнь 8 Ирмос: Седмери́цею пе́щь/ халде́йский мучи́тель/ Богочести́вым неи́стовно разжже́,/ си́лою же лу́чшею спасе́ны, сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки. Припев: Святи́телю о́тче Ти́хоне, моли́ Бо́га о на́с. Ца́рствия Небе́снаго еще́ на земли́ сын быв,/ вы́ну воздыха́л еси́ к Сы́ну Бо́жию, вопия́ Ему́:/ бу́ди ми пи́щи и питие́, бу́ди свет души́ мое́й,/ бу́ди отра́да в ско́рби, бу́ди жи́знь ве́чная по воскресе́нии,/ да превозношу́ Тя во ве́ки. Припев: Святи́телю о́тче Ти́хоне, моли́ Бо́га о на́с. Ада́ма паде́ние, Христо́выми страстьми́ искупле́ние,/ час сме́ртный, Стра́шный Суд, муче́ния гре́шных,/ блаже́нство пра́ведных всегда́ помышля́я, рыда́л еси́,/ нам умиле́ния о́браз показу́я,/ себе́ же предочища́я к бу́дущей сла́ве. Сла́ва Отцу́ и Сы́ну и Свято́му Ду́ху. Труды́ по ве́ре и благоче́стию подъе́м в жи́зни сей,/ сла́дце по труде́х почи́л и упоко́ился еси́:/ соше́л бо еси́ во гроб,/ я́ко пшени́ца, для жи́тницы Бо́жия созре́лая, во вре́мя пожа́тая. И ны́не и при́сно и во ве́ки веко́в. Ами́нь. Богородичен: Иссо́пом Животворя́щия Кро́ве за спасе́ние ми́ра закла́ннаго А́гнца,/ из Твои́х пречи́стых крове́й пло́ть прие́мшаго,/ окропи́ мя, оскверне́ннаго, Влады́чице, и очи́сти мя,/ да Твои́м ма́терним заступле́нием па́че сне́га убелю́ся. Песнь 9 Ирмос: Ужасе́ся о сем Не́бо,/ и земли́ удиви́шася концы́,/ я́ко Бог яви́ся челове́ком пло́тски/ и чре́во Твое́ бы́сть простра́ннейшее Небе́с./ Тем Тя, Богоро́дицу,/ А́нгелов и челове́к чинонача́лия велича́ют. Припев: Святи́телю о́тче Ти́хоне, моли́ Бо́га о на́с. Хода́тай яви́лся еси́ и моли́твенник те́плый о нас к Бо́гу, святи́телю,/ ми́лостива у́бо моли́твами твои́ми соде́лай Влады́ку,/ испроси́, о́тче, прегреше́ний оставле́ние ве́рою свяще́нную па́мять твою́ пра́зднующим/ и серде́чною любо́вию тя велича́ющим. Припев: Святи́телю о́тче Ти́хоне, моли́ Бо́га о на́с. От Бо́га Све́та Небе́сным све́том осия́нный,/ просвети́ нас, помраче́нных страстьми́ жите́йскими,/ реши́ти же и вяза́ти вла́сть от Него́ прие́мый,/ разреши́ прегреше́ния на́ша и Ца́рствия Небе́снаго сподо́би/ па́мять твою́ пра́зднующих и досто́йно тя велича́ющих. Сла́ва Отцу́ и Сы́ну и Свято́му Ду́ху. На́ше хвале́ние сие́, от недосто́йныя и окая́нныя души́,/ от усе́рдия же бога́таго приноси́мое Тебе́, приими́ ми́лостивно, святи́телю,/ благода́ть проти́ву воздая́ нам щедрооби́льную. И ны́не и при́сно и во ве́ки веко́в. Ами́нь. Богородичен: Ада́ма па́дшаго возста́вила еси́, Богома́ти, ро́ждши Но́ваго Ада́ма,/ возста́ви и нас, па́дших по подо́бию дре́вняго,/ но благода́ти Но́ваго зри́ши ве́рующих. Светилен Пло́тию а́ще и почи́л еси́, святи́телю Ти́хоне,/ но Ду́хом жив сый, в Ца́рствии Невече́рнем со Христо́м Ца́рствуеши/ и мо́лишися Ему́ о призыва́ющих тя ве́рою и любо́вию. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. В черто́зе Жениха́ Христа́ помышля́я тя, святи́телю, неизрече́нным све́том сия́юща,/ Ца́рствия Небе́снаго приобщи́тися жела́ю,/ но от сна грехо́внаго объюроде́ мой ум, угасе́ свети́льник, я́ко безъеле́ен,/ и души́ моея́ оскверне́на е́сть оде́жда,/ и ви́жду две́ри Ца́рствия мне заключе́нныя,/ но, твои́ми моли́твами возбуди́в мя от сна грехо́внаго,/ еле́й покая́ния ми да́руй и, ри́зою заслу́г Христо́вых прикры́в мою́ наготу́,/ досто́йна мя сотвори́ Невече́рняго Ца́рствия.

Глас 1 Пе́снь 1. Ирмо́с: Пе́снь побе́дную пои́м вси́ Бо́гу, сотво́ршему ди́вная чудеса́ мы́шцею высо́кою и спа́сшему Изра́иля, я́ко просла́вися. Припев: Преподо́бне о́тче на́ш Стефа́не, моли́ Бо́га о на́с. Боже́ственную па́мять твою́, богому́дре о́тче, ве́рно пра́зднующе, все́х Го́спода при́сно сла́вим, тя́ просла́вльшаго мно́гими, Стефа́не, чудесы́. У́м тво́й, манове́нии боже́ственными, всему́дре, обожа́емь, всеконе́чно отврати́ся от страсте́й пло́ти и а́нгела тя́ на земли́ показа́, Стефа́не. Подъя́л еси́ по́стничества боле́зни, о́тче, и стра́сти умертви́л еси́ пло́ти неудобоудержа́нныя, и в безстра́стие, я́ко во оде́жду све́тлу, я́ве оде́ялся еси́. Распе́н у́ды твоя́ воздержа́нием, Христу́, о́тче, пожи́л еси́, Кресто́м сме́рть погу́бльшему и исцеле́ний оби́льною благода́тию обогати́вшему тя́. Богоро́дичен: Зачала́ еси́, Пречи́стая, неизрече́нным сло́вом вся́ содержа́щаго земны́я концы́ и Сего́ родила́ еси́, Его́же моли́ приле́жно поми́ловати ны́. Пе́снь 3. Ирмо́с: Да утверди́тся се́рдце мое́ в во́ли Твое́й, Христе́ Бо́же, и́же над вода́ми не́бо утвержде́й второ́е и основа́вый на вода́х зе́млю, Всеси́льне. Де́лы честны́ми и исправле́нии доброде́тельными, о́тче, просия́л еси́, я́коже звезда́ всесве́тлая, мона́шествующих собо́ру и просвети́л еси́ чуде́сными сия́нии подсо́лнечную. Си́лою благода́ти Ду́ха враги́ безпло́тныя низложи́л еси́, и возне́слся еси́ благосла́вно смире́нною му́дростию, и чуде́с самоде́латель, о́тче му́дре, бы́л еси́. Ерети́чествующих, о́тче, уста́ и́стины сло́вом загради́л еси́ и, гоне́ния претерпе́в, вене́ц боже́ственный восприя́л еси́, кроме́ я́звы бы́в, му́дре, му́ченик изря́днейш. Богоро́дичен: Да Бо́г Челове́к бу́дет, Бо́г бы́сть Челове́к, из Тебе́, еди́ныя Чи́стыя, нача́ло прие́м Безнача́льный. Сего́ ра́ди Тя́, Де́во, ве́рнии, ублажа́ем. Седа́лен: Я́ко со́лнце, све́тло возсия́вши, о́тче, па́мять твоя́, ве́рных сердца́ просвеща́ет, стра́сти отгоня́ющи и тмы́ изъе́млющи. Ю́же ве́рою чи́стою соверша́ющия покры́й, сохрани́ от искуше́ний жите́йских на́с, о́тче Стефа́не. Богоро́дичен: Безневе́стная Чи́стая Богоро́дице Де́во, еди́на ве́рных Предста́тельнице и покро́ве, бе́д, и скорбе́й, и лю́тых обстоя́ний вся́ изба́ви, на Тя́ упова́ние, Отрокови́це, иму́щия, и ду́ши на́ша спаси́ боже́ственными моли́твами Твои́ми. Крестобогоро́дичен: Зря́щи Тя́, Христе́, Всенепоро́чная Ма́ти, ме́ртва на Кресте́ просте́рта, вопия́ше: Сы́не Мо́й, Собезнача́льне Отцу́ и Ду́ху, что́ неизрече́нное Твое́ сие́ строе́ние? И́мже спа́сл еси́ пречи́стых ру́к Твои́х, Ще́дре, созда́ние. Пе́снь 4. Ирмо́с: Ду́хом прови́дя, проро́че Авваку́ме, Словесе́ воплоще́ние, пропове́дал еси́, вопия́: внегда́ прибли́житися ле́том, позна́ешися, внегда́ приити́ вре́мени, пока́жешися. Сла́ва си́ле Твое́й, Го́споди. Ка́плями свяще́нных твои́х сле́з напои́вся, дре́во яви́лся еси́, Стефа́не, плодови́то, му́дре, плоды́ принося́ доброде́телей благово́нныя, и чудеса́ безчи́сленна источа́еши. Те́мже благоче́стно тя́ почита́ем. Я́ко боже́ственный зри́тся ра́й, му́дре, хра́м, име́я твои́х моще́й ра́ку, цве́ты разли́чныя принося́ чуде́с, и́миже сердца́ наслажда́ются ве́рою, Стефа́не, при́сно хва́лящих тя́. Слепы́я разреша́еши и уставля́еши лю́тыя челове́ков неду́ги в сла́ву Христо́ву, от Него́же, благода́тию трудо́в обогати́вся, возвели́чился еси́, просвети́лся еси́ и просла́вился еси́, сла́во мона́шествующих, о́тче на́ш. Богоро́дичен: Свята́я Богоро́дице, освяти́ ны, Я́же Пресвята́го ро́ждши пло́тию, уподо́битися восхоте́вша челове́ком, и небе́снаго жи́тельства вся́ покажи́, Пречи́стая, прича́стники моли́твами Твои́ми. Пе́снь 5. Ирмо́с: Тво́й ми́р да́ждь на́м, Сы́не Бо́жий, ино́го бо, ра́зве Тебе́, Бо́га не зна́ем, и́мя Твое́ имену́ем, я́ко Бо́г живы́х и ме́ртвых еси́. Миродохнове́нен бы́в боже́ственными доброде́тельми, источи́л еси́, му́дре, по успе́нии ми́ро благово́нное, удивля́емь ве́рными челове́ки, любо́вию честву́ющими тя́. Велича́йшими показа́нии чуде́с стра́шных, Стефа́не всему́дре, просия́л еси́ и пре́жде сме́рти, досточу́дне, и по изше́ствии, и свяще́нном твое́м погребе́нии. Свя́то соверши́в твое́ житие́ о Христе́, Стефа́не богому́дре, о́тче на́ш, со святы́ми всели́лся еси́ и ны́не освяща́еши ве́рою честву́ющия тя́. Богоро́дичен: Ро́ждши, Пренепоро́чная, Бо́га Емману́ила, Челове́ка я́ве за милосе́рдие бы́вша, Сего́ моли́ я́ко Человеколю́бца, Чи́стая, уще́дрити согре́шшия. Пе́снь 6. Ирмо́с: Проро́ка Ио́ну подража́я, вопию́: живо́т мо́й, Бла́же, свободи́ из тли́, и спаси́ мя, Спа́се ми́ра, зову́ща: сла́ва Тебе́. Исправля́еши, о́тче, хромы́я, вооча́еши слепы́я, ходи́ти же твори́ши разсла́бленныя, о Христе́, и отгоня́еши лука́выя ду́хи, Стефа́не преподо́бне. Струя́ истека́ет при́сно, я́ко от исто́чника чи́ста, от честны́я твоея́ ра́ки исцеле́ний бога́тно, блаже́нне, страсте́й изсуша́ющи вся́к пото́к. Чу́ден чудоде́латель и па́стырь и́стинен, о́тче Стефа́не, я́влься, сохраня́й при́сно ста́до твое́, е́же совокупи́л еси́ мно́гими по́ты твои́ми. Богоро́дичен: На Тя́, я́ко до́ждь на руно́, соше́д, Богоро́дице, Спа́с, изсуши́ я́ве то́ки безбо́жия, ду́ши же напои́в при́сно чту́щих Тя́. Пе́снь 7. Ирмо́с: Су́щим в пещи́ отроко́м Твои́м, Спа́се, не прикосну́ся, ниже́ стужи́ о́гнь. Тогда́ трие́ я́ко еди́неми усты́ поя́ху и благословля́ху, глаго́люще: благослове́н Бо́г оте́ц на́ших. Священноде́йствовал еси́, я́коже тебе́ сама́го у́глием по́стническаго пребыва́ния, ве́сь Христо́во показа́лся еси́, о́тче, благово́ние и ве́рных ли́ца благово́нствуеши при́сно, чудоде́йствуя па́че ума́. Правосла́вия сия́я блиста́нии, отгна́л еси́ тму́ ересе́й, му́дре, и, гоне́ния на ле́та мно́жайшая претерпе́в, му́ченик без кро́ве бы́л еси́. Те́мже ве́рно тя́ восхваля́ем. Терпе́ние стяжа́в мно́гое, воздержа́ние, ве́ру и любо́вь и́стинну, яви́лся еси́ оте́ц сиро́т, вдови́ц предста́тель сострада́телен и смире́н, Стефа́не, мона́хов сла́во и похвало́. Твоему́ удиви́ся по́лк злоу́мных всено́щному стоя́нию и моли́твенному пожда́нию, слеза́м и воздыха́нию к Зижди́телю и́стинней любви́, и́миже низложи́л еси́ те́х, Стефа́не, кова́рствия. Богоро́дичен: Ка́ко пита́еши млеко́м Сы́на безо́тча, пита́ющаго вся́ко дыха́ние, Ма́ти Чи́стая? Ка́ко на рука́х но́сиши содержа́щаго вся́? Па́че ума́ чу́до Твое́. Те́м пое́м при́сно вели́чия Твоя́. Пе́снь 8. Ирмо́с: Его́же ужаса́ются а́нгели и вся́ во́инства, я́ко Творца́ и Го́спода, по́йте, свяще́нницы, просла́вите, о́троцы, благослови́те, лю́дие, и превозноси́те во вся́ ве́ки. Преподо́бно преподо́бная, всеблаже́нне, соверша́я, преподо́бным сочта́лся еси́ и все́м избра́нным, с ни́миже тя́ почита́ем и ра́це моще́й твои́х покланя́ющеся, Стефа́не о́тче богоно́се. Ума́ чистоту́ стяжа́в, му́дре, Ду́ха зерца́ло бы́л еси́ красно́, Сего́ явле́ния прие́мля и лю́ди просвеща́я твои́ми уче́нии. Ви́дится пресла́вное, всеблаже́нне, тобо́ю, всему́дре, соверша́емое: от еди́наго бо твоего́ жена́ виде́ния прису́щаго е́й неду́га отре́шшся, пра́во ше́ствоваше. Тро́ичен: Воспои́м Безнача́льнаго Отца́, и Сы́на, и Ду́ха Свята́го, неразде́льное нача́ло, присносу́щную держа́ву, Триипоста́сное Естество́, еди́ну сла́ву и еди́но Ца́рство. Богоро́дичен: Вопло́щся Безпло́тный из Тебе́ боголе́пне, Его́же моли́, Пречи́стая, стра́сти пло́ти моея́ умертви́ти и оживи́ти мою́ умерщвле́нную ду́шу грехми́. Пе́снь 9. Ирмо́с: Светоно́сный о́блак, в о́ньже все́х Влады́ка, я́ко до́ждь с небесе́ на руно́, сни́де и воплоти́ся на́с ра́ди, бы́в Челове́к, Безнача́льный, велича́ем вси́ я́ко Ма́терь Бо́га на́шего Чи́стую. Стопа́м после́дуя, богоно́се, благоче́стно и преподо́бно пожи́вшим на земли́, кро́ток, незло́бив яви́лся еси́, сострада́телен, и смире́н, и ти́х, Стефа́не, и любве́ испо́лнен Боже́ственныя, сего́ ра́ди тя́ ве́рно восхваля́ем. Я́коже сладково́нное ми́ро, я́ко пречи́стый кри́н, я́ко ши́пок, о́тче, благоцвету́щь, благово́ние испуща́еши от честны́я твоея́ ра́ки безчи́сленных врачева́ний, злосмра́дныя неду́ги отгоня́ ве́рою приступа́ющих тебе́ те́пле. Тя́, па́стыря боже́ственнаго и подража́теля вели́каго Началопа́стыря Христа́, мо́лим, богому́дре: су́щия твоего́ ста́да ны́не о́вцы, на́с спаса́й от лука́вых волко́в святы́ми хода́тайствы твои́ми при́сно. Всесвята́я твоя́ па́мять, я́коже со́лнце ве́лие, возсия́вши, све́тло озаря́ет тва́рь, ю́же соверша́юще благоче́стно, вопие́м ти́, Стефа́не: моли́твами твои́ми все́х мы́сли озари́в, покры́й и сохрани́ ны́. Богоро́дичен: Грехолюби́в сы́й в нераде́нии жи́в, и Суди́ща, Чи́стая, неумы́тнаго трепе́щу, на не́мже мя́ соблюди́ Твои́ми святы́ми мольба́ми, Богоневе́сто, неосужде́нна, да я́ко Предста́тельницу при́сно ублажа́ю Тя́.

Минея, 4 Ноября, Кано́н блаже́ннаго Си́мона Глас 8 Песнь 1 Ирмос: Сокруши́вшему бра́ни мы́шцею Свое́ю/ и прове́дшему Изра́иля сквозе́ Чермно́е мо́ре,/ пои́м Ему́ я́ко Изба́вителю на́шему Бо́гу,/ я́ко просла́вися. Припев: Святы́й блаже́нный Си́моне, моли́ Бо́га о на́с. Бо́жию си́лу – Христа́, и Бо́жию прему́дрость:/ нача́ло ми прему́дрости – стра́х Тво́й,/ и́мже уклони́тися от зла весть кто одесны́м придержа́щихся, –/ пода́ти молю́,/ во е́же бы́ти ему́ и к соверше́нству каса́емых споспе́шника. Припев: Святы́й блаже́нный Си́моне, моли́ Бо́га о на́с. Любому́дрие от младе́нства, блаже́нне, возыме́л еси́,/ е́же есть поуче́ние сме́ртное,/ от добро́ты же зри́мых Предо́браго позна́в, Безконе́чнаго, и Превели́каго,/ и всяк ра́зум во мно́жестве си́лы Своея́ превосходя́щаго Бо́га,/ потща́лся еси́ души́ добро́ту непоро́чну стяжа́ти. Припев: Святы́й блаже́нный Си́моне, моли́ Бо́га о на́с. Алфави́т приско́рбнаго жития́,/ его́же ле́ствицы чу́дный предложи́ списа́тель,/ неукло́нно соверши́ти сподо́бился еси́, Си́моне приснопа́мятне,/ простоты́ с незло́бием и безстра́стия дом быв/ и подража́тель Влады́чен от по́мощи Влады́чни. Сла́ва Отцу́ и Сы́ну и Свято́му Ду́ху. Троичен: Жела́ний всех кра́йнейшее – Вседержи́теля Бо́га,/ в Тро́ице у́бо Лиц Ипоста́сьми разделя́емаго, ве́рнии, просла́вим,/ Еди́наго же, Боже́ственным Естество́м Су́ща,/ Безнача́льна, Присносу́щна, Непости́жна и Несказа́нна. И ны́не и при́сно и во ве́ки веко́в. Ами́нь. Богородичен: Еди́ну наде́жду ве́рных и к Бо́гу Хода́тайцу воспои́м Влады́чицу ми́ра,/ спа́сшися Пречи́стым Рождество́м Ея́:/ ра́дуйся,– вопию́ще Арха́нгельский глас,– всея́ тва́ри Честне́йшая,/ Госпо́дь с Тобо́ю и Тебе ра́ди с на́ми, спаса́й нас. Песнь 3 Ирмос: Утверди́ся се́рдце мое́ во Го́споде,/ вознесе́ся рог мой в Бо́зе мое́м,/ разшири́шася на враги́ моя́ уста́ моя́,/ возвесели́хся о спасе́нии Твое́м. Припев: Святы́й блаже́нный Си́моне, моли́ Бо́га о на́с. Нача́ло спасе́ния – страх Госпо́день име́в,/ и́мже огражде́н, в ненаселе́нная еди́н поте́кл еси́ места́,/ иде́же я́коже дре́вле Е́здра, нощь и зау́тра бу́дущи,/ пребыва́л еси́, моля́ся,/ я́ко да пока́жет Вы́шний све́тлость и вели́чество Небе́снаго Сио́на. Припев: Святы́й блаже́нный Си́моне, моли́ Бо́га о на́с. Не обучи́лся еси́ ле́ности, блаже́нне,/ но терпе́нию Христа́ ра́ди,/ ве́дяше предпи́санное, я́ко терпели́в муж – мног в му́дрости,/ ю́же скрыл еси́, я́ко би́сер, в та́йне бу́йства,/ егда́ от текто́нов, обре́тшихся в пусты́ни, пре́дан,/ да в разумля́ешися от пресви́тера. Припев: Святы́й блаже́нный Си́моне, моли́ Бо́га о на́с. О́браз Бо́жий – тебе́ сама́го – опа́сно ве́дая,/ оста́вил еси́ вре́менная, де́латель быв к Бо́гу подо́бия,/ от произволе́ния бо исправля́л еси́ до́лжное/ и, в селе́ живи́ и во град преше́д, неизме́нно,/ я́ко сбы́тися на тебе́ рече́нному:/ жела́ния благочести́вых наслажда́ют ду́шу. Сла́ва Отцу́ и Сы́ну и Свято́му Ду́ху. Троичен: Му́дрость, Си́лу, Свет и Жизнь –/ Сло́во Бо́жие – прославля́ти, ве́рнии, усе́рдствуим,/ благоволе́нием бо Безнача́льнаго Отца́ и соде́йством Свята́го Ду́ха/ свободи́ ны, земноро́днии, от рабо́ты вра́жия, я́ко Человеколю́бец,/ нося́й вся глаго́лом си́лы Свое́й. И ны́не и при́сно и во ве́ки веко́в. Ами́нь. Богородичен: Углебо́х в тиме́нии дел мои́х злых,/ сего́ ра́ди недоумева́ю, помышля́я страх, хотя́щий бы́ти согреша́ющим,/ но иму́щая бе́здну благосты́ни, Влады́чице Всеми́лостивая,/ к покая́нию наста́ви мя, я́ко вся могу́щая. Седален, глас 8 Повеле́нное Го́сподем прии́м в ра́зуме в кле́ти души́ своей,/ тща́нием крест Его́, е́же есть подража́ние спаси́тельнаго жития́ Его́,/ смиренному́дренно Си́мон блаже́нный понесе́,/ я́коже иногда́ гряды́й с села́ Кирине́й,/ Крест, нань возло́женный, по Гряду́щем на страсть во́льную, ноша́ше,/ и сего́ ра́ди блаже́н обре́теся, я́ко пло́ти не после́дова,/ и, чудеса́ ны́не точа́, весели́т взыва́ющия к нему́:/ ра́дуйся, уго́дниче Христо́в всече́стне. Песнь 4 Ирмос: Услы́шах, Го́споди, слух Твой и убоя́хся,/ я́ко неизрече́нным сове́том,/ Бог Сый Присносу́щный,/ от Де́вы проше́л еси́, вопло́щься:/ сла́ва снизхожде́нию Твоему́, Христе́,/ сла́ва си́ле Твое́й. Припев: Святы́й блаже́нный Си́моне, моли́ Бо́га о на́с. Чистоту́, я́же есть естества́ па́чеесте́ственное,/ вы́ше естества́ отверже́ние/ и безтеле́сным телесе́ ме́ртвеннаго и тле́ннаго пресла́вное вои́стинну обще́ние,/ чистолю́бец Си́мон возлюби́,/ жела́нием бо жела́ние возрази́/ и огнь веще́ственный невеще́ственным угаси́. Припев: Святы́й блаже́нный Си́моне, моли́ Бо́га о на́с. Еди́не Безсме́ртный Царю́, И́стино и Бла́госте ве́чная,/ благослове́н еси́ и препросла́влен, я́коже рекл еси́ проро́ком,/ испо́лнил еси́ и ны́не в суббо́тствование благи́х дел,/ се бо призре́л еси́ на кро́ткаго, и молчали́ваго, и трепе́щущаго слове́с Твои́х, с ни́мже Тебе́ вопие́м, Христе́:/ сла́ва си́ле Твое́й. Припев: Святы́й блаже́нный Си́моне, моли́ Бо́га о на́с. Та́йным поуче́нием Христо́в раб – нача́ло у́бо блаже́ннаго незлобоиме́ния,/ а́ще и в го́рести души́ и боле́зни,/ оба́че со благода́рствием безче́стие и поруга́ние от просты́я приима́ше,/ одоле́в же про́чее, без печа́ли пребыва́я,/ и я́коже благохвале́нием красу́яся, и поя́ше Го́сподеви:/ сла́ва си́ле Твое́й. Сла́ва Отцу́ и Сы́ну и Свято́му Ду́ху. Троичен: Вси ве́рнии, со стра́хом просла́вим Святу́ю Тро́ицу,/ покланя́ющеся Отцу́, и Сы́ну, и Свято́му Ду́ху,/ в Сы́не Отца́ зна́юще, в Ду́се Сы́на,/ в Я́же ве́ровахом, И́мже счини́хомся,/ пре́жде, не́же разделя́ти, совокупля́юще, вопию́ще:/ Трисвяты́й Бо́же, сла́ва си́ле Твое́й. И ны́не и при́сно и во ве́ки веко́в. Ами́нь. Богородичен: Еди́ну Богоро́дицу госпо́дственно и и́стинно/ Пресвяту́ю и Пречи́стую Де́ву Мари́ю, пропове́дающе, возвели́чим,/ из Нея́ бо воплоти́ся, О́тчих недр не отсту́пльше, Бо́жие Сло́во,/ неопи́санно и непости́жно, я́коже весть Сам,/ прие́м нача́ток на́шего смеше́ния – плоть, одушевле́нну душе́ю слове́сною же и у́мною,/ и спасе́ зову́щия Ему́:/ сла́ва си́ле Твое́й. Песнь 5 Ирмос: Мрак души́ моея́ разжени́, Светода́вче Христе́ Бо́же,/ началоро́дную тьму изгна́в бе́здны,/ и да́руй ми свет повеле́ний Твои́х, Сло́ве,/ да у́тренюя, сла́влю Тя. Припев: Святы́й блаже́нный Си́моне, моли́ Бо́га о на́с. Рукоя́ть твою́, приснопа́мятне, с ра́достию ны́не восприе́млеши,/ ходя́ бо в ми́ре сем в соверше́ннем нестяжа́нии,/ не име́я где главы́ подклони́ти и пла́чем мета́я семена́ доброде́телей,/ утеше́ния ве́чнаго сподо́бился еси́. Припев: Святы́й блаже́нный Си́моне, моли́ Бо́га о на́с. И́мство и непости́жно Бо́жия про́мысла на тебе́ позна́ся, блаже́нне Си́моне,/ попусти́ бо тебе́, я́ко кре́пка во́ина и пра́ведна су́ща,/ напа́стем пре́дана бы́ти,/ я́ко да тая́щуюся в тебе́ доброде́тель пока́жет и́ным,/ я́коже и в И́ове. Припев: Святы́й блаже́нный Си́моне, моли́ Бо́га о на́с. Цельбу́ дарова́л еси́ горта́ни пресви́тера,/ но не а́ки бу́йством содержи́мый,/ и́же и потече́ здрав яко секра́т ко свои́м, пребыва́ющаго тя в су́щем по естеству́,/ я́ко голуби́цу посреде́ крагу́ев,/ в ми́ре сем наро́ду возвеща́юще. Сла́ва Отцу́ и Сы́ну и Свято́му Ду́ху. Троичен: Уче́ньми крася́щеся апо́стол, и проро́к, и учи́тель,/ испове́дуем и сла́вим Святу́ю Тро́ицу,/ я́ко Еди́н есть Бог,/ си́речь Еди́но Естество́ в Трех Ипоста́сех зна́ется же и есть,/ и я́ко Оте́ц, и Сын, и Святы́й Дух по всем Еди́но суть,/ кроме́ нерожде́ния, и рожде́ния, и исхожде́ния. И ны́не и при́сно и во ве́ки веко́в. Ами́нь. Богородичен: Ду́ху Свято́му, я́коже Арха́нгел рече́, наше́дшу на Богоотрокови́цу,/ присени́ Ю Ипоста́сная Вы́шняго Му́дрость и Си́ла – Сы́н Бо́жий/ и созда́ Себе́ из нескве́рных и всечисте́йших крове́й Ея́ плоть одушевле́нну/ не се́менно, но соде́тельно во спасе́ние нас,/ покланя́ющихся Боже́ственному воплоще́нию Его́. Песнь 6 Ирмос: Я́коже проро́ка изба́вил еси́/ из глубины́ преиспо́дния, Христе́ Бо́же,/ и мене́ от грехо́в мои́х изба́ви, я́ко Человеколю́бец,/ и упра́ви живо́т мой, молю́ся. Припев: Святы́й блаже́нный Си́моне, моли́ Бо́га о на́с. Е́же у́бо Ада́м имя́ше пре́жде преслуша́ния,/ сие́, блаже́нне Си́моне, ты соблю́л еси́,/ а́ще бо и на земли́, живя́, был еси́,/ но душе́вно А́нгелом сожи́тельствоваше, духо́вными пита́яся по́мыслы,/ наг простото́ю и жи́знию безхи́тростною. Припев: Святы́й блаже́нный Си́моне, моли́ Бо́га о на́с. Созда́телю твоему́ угожда́я,/ был еси́ незло́бив, прав, кро́ток, смиренному́др,/ вся́кою доброде́телию освяще́н,/ по о́бразу бо, е́же есть у́мное и самовла́стное, соблю́л еси́ невреди́мо,/ по подо́бию же, е́же есть доброде́телию, по возмо́жному Бо́гови угоди́л еси́. Припев: Святы́й блаже́нный Си́моне, моли́ Бо́га о на́с. Язы́к твой, преподо́бне, на таи́нственное славосло́вие Бо́жие отлучи́л еси́,/ и́мже и проре́кл еси́ озло́бившему тя лише́ние супру́жницы/ и Ло́нгину предвозвести́л еси́ ку́пли приобре́тение и к свои́м здра́вое возвраще́ние,/ я́ко бо настоя́щая, открове́ния тебе́ бы́ша бу́дущая. Сла́ва Отцу́ и Сы́ну и Свято́му Ду́ху. Троичен: Тро́ице Свята́я и Пресу́щественная,/ Пребоже́ственная, Преблага́я, Препо́лная,/ вся нача́ла и чи́ны определя́ющая/ и вся́кому нача́лу и чи́ну Непостижи́мая,/ Ца́рствующая Безконе́чным и Безсме́ртным Ца́рством,/ поми́луй ны, Тя ве́дущия, И́стиннаго Бо́га на́шего. И ны́не и при́сно и во ве́ки веко́в. Ами́нь. Богородичен: Из Тебе́ возсия́ Пра́ведное Со́лнце – Иису́с Госпо́дь, Царь Сла́вы, Присноде́во Богоро́дице,/ к Нему́же Ма́тернюю Твою́ о нас, гре́шных, принеси́ моли́тву,/ да спасе́т ны, я́ко Человеколю́бец, сла́вящия Тя,/ влады́чествующую все́ми тва́рьми, ви́димыми и разумева́емыми. Кондак, глас 4 Возгоре́вся раче́нием Го́рним,/ же́стость во́льнаго юро́дства па́че все́х сла́дких ми́ра предпоче́л еси́,/ отону́дуже повину́ся ти огнь,/ от его́же запале́ния град твой Ю́рьевец изба́вил еси́,/ и во́ды немо́кренно, я́ко по су́ху, преше́л еси́,/ и хотя́щия бы́ти предре́кл еси́,/ просла́вльшу тя та́ко Бо́гу,/ к Нему́же моля́ся, и о нас, пою́щих тя,/ блаже́нне Си́моне, помина́й. Икос И́же до тре́тияго Небесе́ восхище́нный в рай,/ сокро́вищу духо́вному в скуде́льных сосу́дех обрета́тися сказу́ет,/ о́бразно предначерта́ бу́йство, е́же не́ции возыме́ша святи́и,/ в не́мже сокро́вище Боже́ственных дея́ний неявле́нне соблюдо́ша,/ от ни́хже Си́мон Юрьеве́цкий в во́льном свое́м юро́дстве/ Небе́снаго Бо́га Отца́ Ипоста́сней Му́дрости и Си́ле/ па́че вся́каго плодоприноше́ния, плоды́ жития́ своего́ принесе́,/ я́же стяжа́ во труде́х, бде́ниях же и слеза́х,/ во гла́де и жа́жде, зиме́ и наготе́,/ пха́ниях, руга́ниях же и ра́нах,/ его́же Изба́витель от ми́ра я́ко юро́да избра́,/ ему́ су́ща прему́дра, и просла́ви,/ про́чая же услы́шите, ели́ка ди́вный сей,/ ме́ртвость Го́спода Иису́са нося́, чудоде́йствова в житии́ свое́м,/ па́че же и по преставле́нии при́сно то́чит цельбы́,/ к нему́ же мы приле́жно воззове́м:/ блаже́нне и пра́ведне Си́моне,/ ко Го́споду моля́ся, и о нас, хва́лящих тя, помина́й. Песнь 7 Ирмос: На по́ле Деи́ре иногда́ мучи́тель/ пещь поста́ви на муче́ние Богоно́сных,/ в не́йже три о́трока песносло́вяху Еди́наго Бо́га,/ тро́ично воспева́ху, глаго́люще:/ отце́в Бо́же, благослове́н еси́. Припев: Святы́й блаже́нный Си́моне, моли́ Бо́га о на́с. Ца́рствия Небе́снаго возжела́л еси́ бы́ти насле́дник,/ его́же зло́бою де́тствующии улуча́ют/ и сего́ ра́ди, младе́нческое незло́бие име́в,/ простоту́, кро́тость же и ти́хость стяжа́л еси́,/ я́ко терпе́нию утвержде́ние,/ воспева́я благи́х Да́телю:/ отце́в Бо́же, благослове́н еси́. Припев: Святы́й блаже́нный Си́моне, моли́ Бо́га о на́с. Гра́ду Ю́рьевцу озаре́ние показа́лся еси́, Си́моне Богому́дре,/ я́коже бо узре́ тя Петр о́ный,/ путеше́ствующа по во́дам великоре́чным, я́ко невеще́ственныма нога́ма:/ о, коль ди́вен еси́, Го́споди, во святы́х Свои́х,/ – возопи́;/ тре́петен же быв, славосло́вляше воспе́таго отце́в Бо́га благослове́ннаго. Припев: Святы́й блаже́нный Си́моне, моли́ Бо́га о на́с. Ипоста́си О́тчия хара́ктире и осия́ние сла́вы Его́,/ живу́щая Му́дросте и Си́ло, и́стово Ипоста́сное, Суще́ственное,/ Иису́се Бо́же, мо́лим Тя, Животе́ и Воскресе́ние на́ше,/ испо́лнитися на нас Твоему́ чрез проро́ка Твоего́ обетова́нию,/ е́же не погуби́ти ны за на́ша беззако́ния,/ ра́ди послужи́вшаго Ти в преподо́бии и пра́вде,/ обре́тшагося во гра́де сем, я́коже зерно́ на гро́зде. Сла́ва Отцу́ и Сы́ну и Свято́му Ду́ху. Троичен: Моли́твенников Твои́х не забу́ди гла́са, Тро́ице Пресвята́я,/ вся́ бо, ели́ка хо́щеши, мо́жеши,/ поми́луй Богосло́вящия Тя, О́тче, Сло́ве, Уте́шителю,/ Еди́но Божество́, Еди́но Госпо́дьство, Еди́но Ца́рство/ в Трех Соверше́нных Ипоста́сех несли́тно соедине́нных,/ зна́емо же и покланя́емое от всего́ слове́снаго зда́ния. И ны́не и при́сно и во ве́ки веко́в. Ами́нь. Богородичен: Наде́жда ненаде́жных Ты еси́, Блага́я Богоро́дице,/ поми́луй ста́до Твое́, Богора́дованная,/ ве́си у́бо, Цари́це, я́ко неизле́чными грехо́в ра́нами изнуря́еми/ и ко врато́м поги́бели доспе́хом,/ Твое́ стра́шное и еди́но предста́тельство в по́мощь призыва́ем,/ не отри́ни достоя́ние Твое́,/ но спасе́ния сподо́би, во ве́ки Тя благословя́щее. Песнь 8 Ирмос: Разжжи́те пещь седмери́цею,/ до́ндеже до конца́ разгори́тся,– мучи́тель рече́ халде́ом, –/ Ана́нию, Аза́рию и Мисаи́ла, вложи́те я в ню,/ и́же о́бразу злато́му не поклони́шася, но глаго́лаху:/ мы Бо́га и́мамы на Небесе́х,/ Ему́же слу́жим и покланя́емся. Припев: Святы́й блаже́нный Си́моне, моли́ Бо́га о на́с. Объя́тиями свои́ми прие́мля младе́нцы,/ ро́ждшими приноси́мыя к тебе́,/ и́мже, по предопределе́нию Бо́га, ве́дети тебе́ даю́щаго открове́ние,/ о житии́ их преподава́л еси́,/ чудеса́ чудесе́м тобо́ю после́доваша:/ от ни́хже бо отвраща́лся еси́/ печа́ли се́товное о хотя́щей на ча́да их приити́ сме́рти прие́млюще,/ прине́сшия я же́ны отхожда́ху,/ но сла́ва та́ко тя просла́вльшему Бо́гу,/ Ему́же слу́жим и покланя́емся во ве́ки. Припев: Святы́й блаже́нный Си́моне, моли́ Бо́га о на́с. Вои́стинну испо́лнися на тебе́ Боже́ственный глас:/ претерпе́вый, – бо рече́, – до конца́, той спасе́тся./ Зимы́ бо лю́тость и зной до́блественно, я́коже в чужде́м телеси́,/ и наготу́, и необуве́ние, пост же и воздержа́ние,/ пха́ние же и уничиже́ние Христа́ ра́ди терпе́л еси́/ да́же до соверше́ния жи́зни твоея́,/ но ны́не тя гре́ет с Ла́зарем и Андре́ем ло́но Авраа́мле,/ с ни́ми же помина́й нас ко Го́споду,/ Ему́же слу́жим и покланя́емся во ве́ки. Припев: Святы́й блаже́нный Си́моне, моли́ Бо́га о на́с. Пострада́л еси́ непра́ведное озлобле́ние и ра́ны,/ в ни́хже и ду́шу твою́, блаже́нне, испусти́л еси́,/ оба́че во ве́ки живе́ши и от Го́спода мзда твоя́,/ прия́л бо еси́ Ца́рствие, благоле́пие и вене́ц добро́ты от руки́ Вседержи́телевы/ и благослове́ние Его́ на тебе́ возсия́/ и чуде́с де́тельми тя́ обогати́, превознося́ща Его́ во ве́ки. Сла́ва Отцу́ и Сы́ну и Свято́му Ду́ху. Троичен: Ру́це мои́ воздева́ю к Тебе́, Триипоста́сному Бо́гу, даю́щему ми ра́зум,/ воздаю́ Ти сла́ву, Трисо́лнечный Царю́,/ Ты бо вели́к еси́ па́че всех дел Твои́х,/ стра́шен еси́, Го́споди, зело́ и чу́дно може́ние Твое́,/ кто́ же насы́тится, поя́ сла́ву Твою́,/ сего́ ра́ди испове́м Ти ся и восхвалю́, недосто́йный,/ земля́ сый и пе́пел,/ и благословлю́ И́мя Твое́ Пресвято́е, Го́споди, и покланя́юся во ве́ки. И ны́не и при́сно и во ве́ки веко́в. Ами́нь. Богородичен: Избавле́ния ра́ди сме́ртнаго молю́ся Тебе́,/ Всеси́льней Ма́тери Бо́га Сло́ва:/ не оста́ви мя во дни́ скорбе́й и во вре́мя го́рдых без по́мощи/ и изми́ мя, Влады́чице, от вре́мене лука́вна,/ весь мир спа́сшая Боже́ственным Плодо́м чре́ва Твоего́,/ спаси́ мя от па́губы грехо́вныя,/ ино́го прибе́жища, окая́нный, не и́мам, ра́зве Тебе́,/ на Тя́ бо, Всеми́лостивая, наде́юся и Тебе́ покланя́юся во ве́ки. Песнь 9 Ирмос: Устраши́ся всяк слух/ неизрече́нна Бо́жия снизхожде́ния,/ я́ко Вы́шний во́лею сни́де да́же и до пло́ти,/ от Деви́ческаго чре́ва быв Челове́к./ Те́мже Пречи́стую Богоро́дицу, ве́рнии, велича́ем. Припев: Святы́й блаже́нный Си́моне, моли́ Бо́га о на́с. Ны́не у́бо не в гада́ниих, но зерца́лом разре́шшимся/ позна́л еси́ блага́я Иерусали́мова, от позна́вшаго тя прие́мля ра́дость ве́чную,/ со святы́ми дости́гл бо еси́ в му́жа соверше́нна,/ в ме́ру во́зраста исполне́ния Христо́ва, Его́же велича́ем. Припев: Святы́й блаже́нный Си́моне, моли́ Бо́га о на́с. Огнь пояда́яй есть Бог наш,/ Его́же моли́, блаже́нне Си́моне,/ грехи́ на́ша потреби́ти и спасе́ния сподо́бити ны,/ твоея́ добро́ты собира́ния тку́щих,/ по побе́де бо трех мучи́телей, е́же есть души́ трича́стнаго,/ возте́кл еси́ к зре́нию соверше́ннаго ми́ра/ и Тро́ицу при́сно зри́ши, Ю́же велича́ем. Припев: Святы́й блаже́нный Си́моне, моли́ Бо́га о на́с. Ше́ствие твое́ бысть, блаже́нне,/ от вре́менных на ве́чныя радостотво́рно у́бо Небе́сным А́нгелом,/ сопроти́вней же лука́ваго си́ле – плач и паде́ние,/ я́коже вра́нове обра́зно показа́ша,/ но и нас, тя честву́ющих, о Небе́сный хо́дче,/ твоего́ тече́ния ревни́тели показа́ти моли́,/ па́че же варя́й и предводи́ ны к соверше́нству добродея́ний,/ и́миже сла́вится Бог, Его́же велича́ем. Сла́ва Отцу́ и Сы́ну и Свято́му Ду́ху. Троичен: Адонаи́, Го́споди, Нерожде́нное, и Рожде́нное и Происходя́щее,/ Еди́но Естество́, Тро́ице Свята́я и Соверше́нная,/ Еди́не Бо́же над все́ми, и чрез вся́, и во все́х,/ Твое́ есмы́ де́ло, а́ще и удали́хомся, гре́шнии, от Тебе́,/ но и па́ки к Тебе́, Пребла́же, востягни́ ны,/ мо́лим Ти ся, Человеколю́бче,/ и град сей поми́луй,/ Тя, Трисо́лнечнаго Све́та, при́сно велича́ющий. И ны́не и при́сно и во ве́ки веко́в. Ами́нь. Богородичен: Ю́же избра́л еси́ от всех родо́в, Пресла́внейшую Де́ву,/ душе́ю и пло́тию предочище́нную Ду́хом/ и от Нея́ неизрече́нно роди́тися благоволи́вый,/ о Бо́жий Сло́ве – Преве́чне, Неви́диме, Непостижи́ме, Исто́чниче жи́зни,/ Тебе́ приво́дим в моли́тву,/ Тоя́ ра́ди спаси́ вся лю́ди Твоя́,/ да Тя при́сно я́ко Человеколю́бца с Ро́ждшею вси ве́рнии велича́ем. Светилен Ви́дев Кре́пкий управле́ние твое́ и чистоту́,/ ю́же име́л еси́ от ю́ности твоея́,/ и сего́ ра́ди от оте́чествия твоего́ преселя́ет тя стра́нствовати во гра́д Ю́рьевец,/ показа́ти чу́дная соде́лования на сла́ву Боже́ственных Его́ вели́чий,/ Его́же ми́лостива нам сотвори́ моли́твами твои́ми, блаже́нне Си́моне. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Сей есть от нас днесь похваля́емый вои́стинну, ве́рнии,/ и му́дрый раб Влады́чен,/ и́же теплоту́ свою́ сохрани́ неуга́сшу/ и да́же до своего́ исхо́да по вся дни прилага́ти огнь огню,/ и теплоту́ теплоте́, и лю́бовь любви́, и спе́х спе́ху не преста́,/ его́же просла́ви Христо́с, наде́жда душ на́ших.

Минея, 25 Апреля, Кано́н Глас 6 Песнь 1 Ирмос: Я́ко по су́ху пешеше́ствовав Изра́иль по бе́здне стопа́ми, гони́теля фарао́на ви́дя потопля́ема, Бо́гу побе́дную пе́снь пои́м, вопия́ше. Припев: Преподо́бне о́тче на́ш Сильвéстре, моли́ Бо́га о на́с. Пода́ждь ми́ си́лу, Многоми́лостиве Го́споди, пе́сньми восхвали́ти просла́вленнаго Тобо́ю богоно́снаго отца́ Силве́стра, да бу́дет ми́ предста́тель пред непристу́пным вели́чеством Сла́вы Твоея́. Припев: Преподо́бне о́тче на́ш Сильвéстре, моли́ Бо́га о на́с. Мона́шествующих богодухнове́нное удобре́ние яви́лся еси́, преподо́бне, бра́тию сло́вом, со́лию растворе́нным, и де́лы благи́ми во благоче́стии утвержда́я. Сла́ва Отцу́ и Сы́ну и Свято́му Ду́ху. Глаго́лал еси́, о́тче Силве́стре, бра́тии твое́й, я́ко а́ще стя́жеши по сме́рти дерзнове́ние ко Го́споду, хода́тай бу́деши о оби́тели твое́й. Те́мже, вене́ц сла́вы прии́м, моли́ся о недосто́йных рабе́х твои́х. И ны́не и при́сно и во ве́ки веко́в. Ами́нь. Богородичен: Его́ же родила́ еси́ неизрече́нно, Сы́на и Бо́га, моли́ Де́во Всесвята́я, сохрани́тися достоя́нию Твоему́ от бе́д малове́рия и злы́х помысло́в шата́ния. Песнь 3 Ирмос: Не́сть свя́т, я́коже Ты́, Го́споди Бо́же мо́й, вознесы́й ро́г ве́рных Твои́х, Бла́же, и утверди́вый на́с на ка́мени испове́дания Твоего́. Припев: Преподо́бне о́тче на́ш Сильвéстре, моли́ Бо́га о на́с. За́поведь твою́ блюсти́ повелева́я, преподо́бне, наказа́л еси́ за́поведь преступи́вшаго, но, прии́м сего́ покая́ние, благосе́рде исцели́л еси́ слепо́тствовавшаго. Припев: Преподо́бне о́тче на́ш Сильвéстре, моли́ Бо́га о на́с. Богоно́снаго Се́ргия благослове́ние прии́м, блаже́нне, взыска́л еси́ пусты́ни, и о́браз бы́л еси́ дво́ице учени́к его́, и́же, стопа́м твои́м после́довавше, бли́з тебе́ водвори́шася и святоле́пныя оби́тели устро́иша. Сла́ва Отцу́ и Сы́ну и Свято́му Ду́ху. Ско́рбию испо́лнил еси́ сердца́ бра́тии, жи́знь вре́менную оставля́я, Силве́стре, ны́не же ра́достию исполня́еши взира́ющих на нетле́нныя мо́щи твоя́. И ны́не и при́сно и во ве́ки веко́в. Ами́нь. Богородичен: Милосе́рдия исто́чниче, Влады́чице Пресвята́я, бу́ди покро́в все́м, прибега́ющим к Тебе́ с ве́рою тве́рдою, наде́ждою несумне́нною и любо́вию чи́стою. Седален, глас 4 Блаже́нства го́рняго взыску́я, вся́ кра́сная ми́ра сего́ оста́вил еси́, преподо́бне, ча́д твои́х духо́вных наказу́я, я́ко вся́ мирска́я прехо́дят, еди́но же пребыва́ет вы́ну сокро́вище благоче́стия. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: На престо́ле со Отце́м и Святы́м Ду́хом ве́чно ца́рствующаго неискусому́жно родила́ еси́, Присноде́во, Сы́на Бо́жия, те́м Тя́, я́ко Богома́терь, пе́сньми немо́лчными ублажа́ем. Песнь 4 Ирмос: Христо́с моя́ си́ла, Бо́г и Госпо́дь, честна́я Це́рковь боголе́пно пое́т, взыва́ющи, от смы́сла чи́ста, о Го́споде пра́зднующи. Припев: Преподо́бне о́тче на́ш Сильвéстре, моли́ Бо́га о на́с. Си́ла Христо́ва в тебе́ откры́ся, преподо́бне, бесо́в бо изгоня́еши, слепы́м зре́ние, глухи́м слы́шание, немощству́ющим исцеле́ние подае́ши. Припев: Преподо́бне о́тче на́ш Сильвéстре, моли́ Бо́га о на́с. Ду́хом горя́, Го́сподеви рабо́тая и то́ки сле́з источа́я, мно́зи благоче́стия плоды́ в пусты́ни Обно́рстей возрасти́л еси́, и́миже до дне́сь пита́ются к ра́це твое́й с ве́рою притека́ющии. Сла́ва Отцу́ и Сы́ну и Свято́му Ду́ху. Труды́, бде́ние и сухояде́ние изнури́ша те́ло твое́, Силве́стре, оба́че свы́ше укрепле́н, Спа́са просла́вил еси́ взыва́я: сла́ва си́ле Твое́й, Го́споди. И ны́не и при́сно и во ве́ки веко́в. Ами́нь. Богородичен: Помози́, Пресвята́я Богоотрокови́це, Благове́рному Импера́тору на́шему, да сотре́т си́лы сопроти́вных, и ца́рство Его́ ненаве́тно от злы́х и ми́ра испо́лнь соблюди́. Песнь 5 Ирмос: Бо́жиим све́том Твои́м, Бла́же, у́тренюющих Ти́ ду́ши любо́вию озари́, молю́ся, Тя́ ве́дети, Сло́ве Бо́жий, и́стиннаго Бо́га, от мра́ка грехо́внаго взыва́юща. Припев: Преподо́бне о́тче на́ш Сильвéстре, моли́ Бо́га о на́с. Очесы́ у́мными во вся́ дни́ живота́ твоего́ на Го́спода воскре́сшаго взира́яй, в пусты́ни хра́м Воскресе́ния воздви́гл еси́, в не́м же святы́я мо́щи твоя́ почива́ющи, я́вственне преднапису́ют ме́ртвеннаго телесе́ на́шего во о́браз безсме́ртныя сла́вы облече́ние. Припев: Преподо́бне о́тче на́ш Сильвéстре, моли́ Бо́га о на́с. Кня́зи и боля́ре я́ простцы́ прихожда́ху к ме́сту селе́ния твоего́, Силве́стре, и от у́ст твои́х глаго́лы наказа́ния духо́внаго в сла́дость слу́шаху. Сла́ва Отцу́ и Сы́ну и Свято́му Ду́ху. Прише́льцы иногда́, в пусты́ню прише́дша, зра́к тво́й, смире́ния и поще́ния испо́лнь, удиви́, и сего́ стяжа́л еси́, я́ко пе́рваго от учени́к твои́х. И ны́не и при́сно и во ве́ки веко́в. Ами́нь. Богородичен: Пренепоро́чная Де́во, моли́твами Твои́ми пода́ждь на́м из пусты́ни Силве́стра досточу́днаго цве́ты доброде́телей благоуха́нныя вы́ну износи́ти. Песнь 6 Ирмос: Жите́йское мо́ре, воздвиза́емое зря́ напа́стей бу́рею, к ти́хому приста́нищу Твоему́ прите́к, вопию́ Ти́: возведи́ от тли́ живо́т мо́й, Многоми́лостиве. Припев: Преподо́бне о́тче на́ш Сильвéстре, моли́ Бо́га о на́с. Мо́ря жите́йскаго треволне́ний отбе́г, в пусты́ню прите́кл еси́, и ти́хое приста́нище обреты́й, в Бо́зе еди́ном живо́т тво́й полага́л еси́, преподо́бне. Припев: Преподо́бне о́тче на́ш Сильвéстре, моли́ Бо́га о на́с. Деви́цу иногда́, бе́сом лю́те му́чиму, чу́дным явле́нием твои́м исцели́л еси́, егда́ спя́щей бы́лие травно́е по́дал еси́. Те́м чу́до узре́вшии восхвали́ша тя́, преподо́бне. Сла́ва Отцу́ и Сы́ну и Свято́му Ду́ху. Обе́т изрече́ еди́н от ве́рных ти́ хра́м созда́ти, иде́же мо́щи твоя́ святы́я почива́ху, его́же и созда́л е́сть. Те́мже от бе́д и скорбе́й изба́вил еси́ его́, блаже́нне. И ны́не и при́сно и во ве́ки веко́в. Ами́нь. Богородичен: В хра́м тво́й, Влады́чице, сходя́щеся вопие́м Ти́: Ты́ еси́ покро́в ме́сту сему́ свято́му, иде́же Силве́стр богоно́сный жи́тельствоваше. Спаси́ у́бо ны́, зде́ покланя́ющияся Тебе́, и все́м христиа́ном бу́ди Помо́щница. Кондак, глас 6 По́двигом до́брым подвиза́лся еси́, преподо́бне, и ду́шу твою́, я́ко же́ртву чи́сту и непоро́чну, Ду́ху Свято́му прине́сл еси́, и по сме́рти твое́й ста́до твое́ духо́вное соблюда́еши, и в боле́знех ско́ро посеща́еши. Те́мже мо́лим тя́, преблаже́нне, с ли́ки преподо́бных моли́ Христа́ Бо́га, да спасе́т Благове́рнаго Импера́тора на́шего [и́мярек], и пода́ст лю́дем в ми́ре глубо́це устро́итися, да зове́м ти́: ра́дуйся, Силве́стре, и́ноком духо́вный па́стырю и наста́вниче. Икос И́ноков вои́стину началово́ждь яви́лся еси́, богому́дре Силве́стре, смире́нию бо Христо́ву после́дуя, кре́ст Его́ на ра́мена подъя́л еси́, и терпе́нием, поще́нием и моли́твою ста́ду твоему́ о́браз бы́л еси́. Те́мже и бра́тия, я́ко отца́ и наста́вника тя́ почита́юще, зря́ще тя́ ко Го́споду отходя́ща, ско́рбию исполня́хуся; и́мже веща́л еси́ глаго́лы утеше́ния: потерпи́те, — глаго́ля, — ма́ло в ны́нешнем ве́це, бра́тия возлю́бленная, и венцы́ прии́мете от Христа́ Бо́га и Спа́са ду́ш на́ших. Его́же моли́, преподо́бне, ми́р ми́рови дарова́ти и душа́м на́шим ве́лию ми́лость. Песнь 7 Ирмос: Росода́тельну у́бо пе́щь соде́ла А́нгел преподо́бным отроко́м, халде́и же опаля́ющее веле́ние Бо́жие, мучи́теля увеща́ вопи́ти: благослове́н еси́, Бо́же оте́ц на́ших. Припев: Преподо́бне о́тче на́ш Сильвéстре, моли́ Бо́га о на́с. Изря́ден подвигополо́жник бы́л еси́, преподо́бне, во́ду на ра́менах твои́х нося́, и бы́лие еди́ное вкуша́я. Те́м просла́ви тя́ благослове́нный Бо́г оте́ц на́ших. Припев: Преподо́бне о́тче на́ш Сильвéстре, моли́ Бо́га о на́с. Не отхожда́ху лю́дие от ке́ллии твоея́, преподо́бне, словесе́м твои́м духоно́сным внима́юще, и восхваля́юще Го́спода, взыва́ху: благослове́н Бо́г тво́й и Бо́г оте́ц на́ших. Сла́ва Отцу́ и Сы́ну и Свято́му Ду́ху. Чудесы́ мно́гими просла́ви тя́ Христо́с Бо́г на́ш, и́миже удивля́еми лю́дие всего́ ца́рствия Росси́йскаго, восклица́ют: благослове́н Бо́г оте́ц на́ших. И ны́не и при́сно и во ве́ки веко́в. Ами́нь. Богородичен: Та́йну хра́мов, зде́ красу́ющихся, уразуме́им, ве́рнии, и возглаго́лем: покры́й на́с, Богома́ти, честны́м Твои́м покро́вом, и помози́ моли́твами твои́ми, блаже́нне Силве́стре, да дости́гнем сла́внаго из ме́ртвых воскресе́ния и сре́тения Госпо́дня на возду́се. Песнь 8 Ирмос: Из пла́мене преподо́бным ро́су источи́л еси́ и пра́веднаго же́ртву водо́ю попали́л еси́: вся́ бо твори́ши, Христе́, то́кмо е́же хоте́ти. Тя́ превозно́сим во вся́ ве́ки. Припев: Преподо́бне о́тче на́ш Сильвéстре, моли́ Бо́га о на́с. Святы́я Це́ркве не отлуча́йтеся, — глаго́лал еси́ бра́тии твое́й, преподо́бне, наказу́я, я́ко да во хра́ме воспева́ют ве́рнии Го́спода и превозно́сят Его́ во ве́ки. Сла́ва Отцу́ и Сы́ну и Свято́му Ду́ху. О́троцы блаже́ннии во огни́, я́ко зла́то в горни́ле, искуша́еми, Го́спода воспева́ху; си́це Силве́стр богому́дрый, огне́м терпе́ния искуша́емь и очища́емь, взыва́ше: Го́спода по́йте и превозноси́те во вся́ ве́ки. И ны́не и при́сно и во ве́ки веко́в. Ами́нь. Богородичен: Проле́й мольбы́ к Сы́ну Твоему́, неизрече́нно милосе́рдому, да спасе́т ны́ от вся́каго зла́го обстоя́ния, Присноде́во Богоблагода́тная. Песнь 9 Ирмос: Бо́га челове́ком невозмо́жно ви́дети, на Него́же не сме́ют чи́ни а́нгельстии взира́ти; Тобо́ю бо, Всечи́стая, яви́ся челове́ком Сло́во воплоще́нно, Его́же велича́юще, с небе́сными во́и, Тя́ ублажа́ем. Припев: Преподо́бне о́тче на́ш Сильвéстре, моли́ Бо́га о на́с. Незри́мый лю́дем в пусты́ни пребыва́л еси́, с Бо́гом неви́димым духо́вне бесе́дуя, Силве́стре блаже́нне, те́м и ангелоподо́бен бы́л еси́; сего́ ра́ди тя́ ублажа́ем. Припев: Преподо́бне о́тче на́ш Сильвéстре, моли́ Бо́га о на́с. Сла́вы от челове́к не ища́, от челове́к сокрове́н бы́л еси́, сокрове́нне в Бо́зе пребыва́я, но, я́ко сла́вою Бо́жиею просла́вленна, тя́ ублажа́ем. Сла́ва Отцу́ и Сы́ну и Свято́му Ду́ху. Благосе́рдно приими́, богому́дре Силве́стре, пе́сни сия́, во сла́ву и́мене твоего́ сложе́нныя, и помоли́ся о мне́, гре́шнем рабе́ твое́м. И ны́не и при́сно и во ве́ки веко́в. Ами́нь. Богородичен: Богоро́дице Де́во, упова́ние христиа́ном, бу́ди стена́ кре́пкая и огражде́ние все́м ве́рующим, да Тя́, я́ко Ма́терь Бо́га Сло́ва Премилосе́рдую, велича́ем. Светилен В черто́г Го́спода сла́вы возше́д и оде́жду имы́й убеле́нну све́том доброде́телей, моли́ Христа́ Бо́га, преподо́бне, да да́рует все́м правосла́вным в ве́ре сконча́ти живо́т сво́й и облещи́ся в оде́жду нетле́ния. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Ри́зу пода́ждь на́м све́тлу, Богома́ти, зла́том благи́х де́л преиспещре́нну, да прославля́ем вы́ну Твое́ благоутро́бие.

Минея, 22 Июля, Кано́н святы́я Глас 8 Песнь 1 Ирмос: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:/ Изба́вителю и Бо́гу на́шему пои́м. Припев: Свята́я равноапóстольная Мари́е, моли́ Бо́га о на́с. Боже́ственными укра́шена добро́тами и светоли́тии сия́ющи Боже́ственными,/ очерне́вшее мое́ се́рдце твои́ми моли́твами, Мари́е, озари́. Припев: Свята́я равноапóстольная Мари́е, моли́ Бо́га о на́с. Освяти́ тя Сло́во О́тчее, от духо́в зло́бы изба́вив я́ве,/ Ему́же учени́ца бы́вши, дарова́ний Свята́го Ду́ха испо́лнилася еси́. Сла́ва Отцу́ и Сы́ну и Свято́му Ду́ху. Вод испо́лншися животво́рных от исто́чника незави́стнаго,/ за милосе́рдие на земли́ я́вльшагося Влады́ки,/ греха́ му́тныя изсуши́ла еси́ то́ки. И ны́не и при́сно и во ве́ки веко́в. Ами́нь. Богородичен: Ма́терь естество́м Соде́теля, пое́м Тя, Отрокови́це,/ примири́вшую Бо́гу отпа́дшее естество́ челове́ческое,/ Богороди́тельнице Всенепоро́чная Влады́чице. Песнь 3 Ирмос: Небе́снаго кру́га Верхотво́рче, Го́споди,/ и Це́ркве Зижди́телю,/ Ты мене́ утверди́ в любви́ Твое́й,/ жела́ний кра́ю, ве́рных утвержде́ние,/ еди́не Человеколю́бче. Припев: Свята́я равноапóстольная Мари́е, моли́ Бо́га о на́с. Возлюби́вша пе́рвее благи́х Вино́вника, на́ше благосе́рдно естество́ обожи́вшаго,/ после́довала еси́ Ему́ усе́рдно, Мари́е,/ Того́ повину́вшася Боже́ственным веле́нием. Сла́ва Отцу́ и Сы́ну и Свято́му Ду́ху. Рыда́ющи, гро́ба Изба́вителева дости́гла еси́,/ пе́рвее ви́девша Боже́ственное, отрокови́це, воскресе́ние./ Те́мже благове́стница яви́лася еси́, вопию́щи:/ Христо́с воста́, рука́ми восплещи́те. И ны́не и при́сно и во ве́ки веко́в. Ами́нь. Богородичен: Спаса́ет мя Сло́во вопло́щшееся, Пречи́стая, от Твои́х пречи́стых крове́й,/ бога́тством бла́гости разреша́я осужде́ние пе́рваго паде́ния,/ Его́же непреста́нно моли́ спасти́ ста́до Твое́. Седален, глас 8 Обнища́вшему Сло́ву премно́гим милосе́рдием,/ Мари́е Магдали́но, я́ве я́ко учени́ца и́стинно послужи́ла еси́,/ зри́щи же Сего́, на Кресте́ вознесе́на и во гро́бе положе́на, рыда́ла еси́, слезя́щи./ Те́мже тя почита́ем и твое́ соверша́ем ве́рою торжество́, мироно́сице сла́вная,/ моли́ Христа́ Бо́га грехо́в оставле́ние пода́ти/ чту́щим любо́вию святу́ю па́мять твою́. Песнь 4 Ирмос: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́. Припев: Свята́я равноапóстольная Мари́е, моли́ Бо́га о на́с. Без смуще́ния иму́щи мирска́го су́етства мысль,/ Прише́дшему мир весь спасти́ от ле́сти послужи́ла еси́. Припев: Свята́я равноапóстольная Мари́е, моли́ Бо́га о на́с. Мы́ющися слеза́ми, гро́ба живоно́снаго дости́гши,/ А́нгела узре́ла еси́, возвеща́юща Христо́во, Мари́е, воскресе́ние. Сла́ва Отцу́ и Сы́ну и Свято́му Ду́ху. Се́рдце твое́ непоро́чное во оправда́ниих Христо́вых бысть,/ и Того́ еди́наго вожделе́ла еси́, Кра́снаго добро́тою, достосла́вная. И ны́не и при́сно и во ве́ки веко́в. Ами́нь. Богородичен: Дрема́нием ле́ности мя сон грехо́вный, Отрокови́це, пости́же,/ бо́дренною моли́твою Твое́ю возста́ви мя к покая́нию. Песнь 5 Ирмос: Вску́ю мя отри́нул еси́/ от лица́ Твоего́, Све́те незаходи́мый,/ и покры́ла мя есть чужда́я тьма, окая́ннаго?/ Но обрати́ мя и к све́ту за́поведей Твои́х/ пути́ моя́ напра́ви, молю́ся. Припев: Свята́я равноапóстольная Мари́е, моли́ Бо́га о на́с. Пра́баба, сию́ словесы́ прельсти́вшаго и изгна́вшаго от рая́ дре́вле/ зря́щи нога́ми попира́ема чи́стых жен, нрав му́жеский стяжа́вших,/ с ни́ми ве́чно ра́дуется. Припев: Свята́я равноапóстольная Мари́е, моли́ Бо́га о на́с. Уме́ршаго и во гро́бе Затворе́ннаго, всем жизнь Вдыха́ющаго, уязвля́ема любо́вию,/ сла́дцей Его́ любви́ приноша́еши ми́ро, Магдали́но, честна́я Мари́е,/ и сле́зныя пролива́еши арома́ты. Сла́ва Отцу́ и Сы́ну и Свято́му Ду́ху. По стра́сти Боже́ственней, по стра́шнем Спа́сове вознесе́нии,/ прехо́диши, сло́во всю́ду честно́е возвеща́ющи и мно́ги уловля́ющи прельща́ющияся неве́дением,/ я́ко Сло́ва учени́ца сла́вная. И ны́не и при́сно и во ве́ки веко́в. Ами́нь. Богородичен: Избавля́ет мя, па́дшаго к грехо́вным многоплете́нным паде́жем,/ Иже из Тебе́ роди́тися благоизво́ливый за безме́рную ми́лость, Пресвята́я Отрокови́це,/ Его́же умоли́ вся́каго вре́да изба́витися ве́рою пою́щим Тя. Песнь 6 Ирмос: Очи́сти мя, Спа́се,/ мно́га бо беззако́ния моя́,/ и из глубины́ зол возведи́, молю́ся,/ к Тебе́ бо возопи́х, и услы́ши мя,/ Бо́же спасе́ния моего́. Припев: Свята́я равноапóстольная Мари́е, моли́ Бо́га о на́с. Глаго́л твои́х ороше́ние и печа́ли вар отъя́т ученико́в, честна́я, я́коже возопи́ла еси́:/ Христо́с воста́, живо́т яви́ся, я́сное облиста́ со́лнце. Сла́ва Отцу́ и Сы́ну и Свято́му Ду́ху. Се твоя́ светоза́рная па́мять возсия́, просвеща́ющи ве́рныя, в ней пою́щия тя,/ и тьму отгоня́щи лука́вых бесо́в искуше́ния, досточу́дная. И ны́не и при́сно и во ве́ки веко́в. Ами́нь. Богородичен: Свяще́нства мы́сленное и неприкоснове́нное очисти́лище,/ све́щник светови́ден яви́лася еси́, и мост к Бо́гу преводя́й,/ испове́дающим Тя, Богоро́дицу, Пренепоро́чная. Кондак, глас 3 Предстоя́щи, пресла́вная, у Креста́ Спа́сова со ины́ми мно́гими,/ и Ма́тери Госпо́дни состра́ждущи, и сле́зы точа́щи,/ сие́ в похвалу́ приноша́ше, глаго́лющи:/ что́ сие́ есть стра́нное чу́до?/ Содержа́й всю тварь пострада́ти изво́ли./ Сла́ва держа́ве Твое́й. Икос Влады́ка Христо́с и Царь созда́ния, не оста́вль Небеса́, сни́де, я́коже изво́ли,/ и плоть тле́нную восприя́т во́лею./ Его́же ви́девши Ма́ти Непоро́чная, на Кресте́ пригвожда́ема,/ с де́вами честны́ми предстоя́щи и Магдали́на Мари́я, пла́чущи./ Той бо, та́мо су́щей и тепле́йшую ве́ру показу́ющей при́сно, после́доваше Христу́/ и гроб зря́ше, ожида́ющи и вопию́щи:/ пострада́ти изво́лил еси́, сла́ва держа́ве Твое́й. Песнь 7 Ирмос: О́троцы евре́йстии в пещи́/ попра́ша пла́мень дерзнове́нно/ и на ро́су огнь преложи́ша, вопию́ще:/ благослове́н еси́, Го́споди Бо́же, во ве́ки. Припев: Свята́я равноапóстольная Мари́е, моли́ Бо́га о на́с. Неду́ги отгна́ла еси́ разли́чныя, споспешеству́ющаго тебе́ Сло́ва иму́щи,/ Ему́же предстои́ши ны́не, вопию́щи, мироно́сице:/ благослове́н еси́, Го́споди Бо́же, во ве́ки. Сла́ва Отцу́ и Сы́ну и Свято́му Ду́ху. Еди́на ви́дела еси́ пре́жде ине́х, живота́ на́шего Христа́ воста́вша,/ вертогра́даря же Того́ непщева́ла еси́, вопию́щи:/ благослове́н еси́, Го́споди Бо́же, во ве́ки. И ны́не и при́сно и во ве́ки веко́в. Ами́нь. Богородичен: Уста́вила еси́ тече́ние сме́ртное,/ Безсме́ртнаго Бо́га я́ко заче́нши и ро́ждши, Чи́стая, Ему́же вси пои́м:/ благослове́н еси́, Го́споди Бо́же, во ве́ки. Песнь 8 Ирмос: Седмери́цею пещь/ халде́йский мучи́тель/ Богочести́вым неи́стовно разжже́,/ си́лою же лу́чшею спасе́ны, сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки. Припев: Свята́я равноапóстольная Мари́е, моли́ Бо́га о на́с. Све́тло яви́ся житие́ твое́, заря́ми облиста́, о Магдали́но!/ Доброде́тельных дея́ний, Боже́ственнаго пропове́дания, е́же к Бо́жию манове́нию,/ и луча́ми я́же к Зижди́телю любве́, Ему́же пое́ши со А́нгелы:/ свяще́нницы, по́йте, лю́дие, превозноси́те Его́ во ве́ки. Сла́ва Отцу́ и Сы́ну и Свято́му Ду́ху. У Креста́ предстоя́ла еси́, зря́щи непра́ведное, сла́вная, заколе́ние/ Себе́ излия́вшаго за неизрече́нную ми́лость,/ и, стена́нии и слеза́ми облива́ема, что́ стра́нное, – вопия́ла еси́, Мари́е, – чу́до?/ Ка́ко умерщвля́ется и умира́ет смерть умертви́вый, Живо́т сый естество́м? И ны́не и при́сно и во ве́ки веко́в. Ами́нь. Богородичен: Я́ко Бо́жию Ма́терь Тя единому́дренно сла́вим и тва́ри вы́шшую, Чи́стая,/ о Тебе́ бо осужде́ние, е́же от Ада́ма, потреби́ся/ и отсту́пльшее присво́ися челове́ков существо́, пою́щее:/ свяще́нницы, благослови́те, лю́дие, превозносите Его́ во ве́ки. Песнь 9 Ирмос: Ужасе́ся о сем Не́бо,/ и земли́ удиви́шася концы́,/ я́ко Бог яви́ся челове́ком пло́тски/ и чре́во Твое́ бысть простра́ннейшее Небе́с./ Тем Тя, Богоро́дицу,/ А́нгелов и челове́к чинонача́лия велича́ют. Припев: Свята́я равноапóстольная Мари́е, моли́ Бо́га о на́с. К Боже́ственней преложи́лася еси́ ны́не ра́дости, к ра́йстей широте́ простра́нней,/ к мы́сленным и преми́рным оби́телем, иде́же преподо́бных чи́нове,/ иде́же есть глас чист све́тло пра́зднующих, Мари́е Богоно́сная./ Те́мже тя вси ублажа́ем. Припев: Свята́я равноапóстольная Мари́е, моли́ Бо́га о на́с. Ничто́же предпочла́ еси́ су́щих на земли́ па́че любве́ Христа́ Бо́га,/ но Того́ еди́наго снеда́ема добро́тами/ и непосре́дственно, всечестна́я, посыла́емыми луча́ми, стопа́м Сего́, вопия́ла еси́, после́дующи:/ Тя велича́ю, Многоми́лостиве. Сла́ва Отцу́ и Сы́ну и Свято́му Ду́ху. Обоже́ние получи́вши боготво́рное, и пото́ка напи́вшася благода́ти,/ и мзды боле́зней прие́мши богонача́льно,/ и апо́стольским чино́м счета́ема, Магдали́но, учени́ца Сло́ва,/ любо́вию чту́щия тя твои́ми моли́твами сохрани́. И ны́не и при́сно и во ве́ки веко́в. Ами́нь. Богородичен: Я́ко Ма́ти пострада́вшаго за ны, душетле́нных страсте́й мя изба́ви;/ я́ко Ми́лостива, разреши́ согреше́ний мои́х плени́цы;/ я́ко Блага́, ублажи́ ны́не озло́бленную мою́ ду́шу бесо́вскими искуше́нии, Де́во Богоро́дице,/ да пою́ Тя, Всепе́тую. Светилен Со́лнце незаходи́мое, отрокови́це, е́же от Отца́ пре́жде век возсия́вшее,/ во гро́бе евре́йский сонм запеча́та,/ но воскре́сшаго ви́дела еси́ пе́рвее, Мари́е,/ и ученико́м возвести́ла еси́. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Дании́л преднапису́ет Тя несеко́мую го́ру,/ из нея́же честны́й ка́мень отсече́ся и истни́ идольския хра́мы,/ Богороди́тельнице Мари́е.

Минея, 18 Января, Канон Глас 4 Песнь 1 Ирмос: Мо́ря чермну́ю пучи́ну невла́жными стопа́ми дре́вний пешеше́ствовав Изра́иль, крестообра́зными Моисе́овыма рука́ма Амали́кову си́лу в пусты́ни победи́л е́сть. Припев: Святи́телю, óтче Макси́ме, моли́ Бо́га о на́с. Иису́су: Воспою́ Тебе́, Го́споди Бо́же мо́й, я́ко просла́вил еси́ Тебе́ просла́вльшаго, Макси́ма, все́ми хвали́маго, са́м бо себе́ от младе́нства, я́ко ма́слинную ве́твь, Тебе́, Христе́, принесе́, и Тебе́, я́ко Бо́гу, — оса́нна, — вопие́т. Припев: Святи́телю, óтче Макси́ме, моли́ Бо́га о на́с. Воспою́ тя́, блаже́нне Макси́ме, я́ко еле́ем ми́лостыни и по́том трудо́в свои́х ума́стил еси́ себе́, о́тче, и, свети́льник вже́г с му́дрыми де́вами в сре́тение Христу́, Жениху́, в весе́лие ве́чное восте́кл еси́. Сла́ва Отцу́ и Сы́ну и Свято́му Ду́ху. Симео́на преподо́бнаго и святи́теля Са́ввы ты́ яви́лся еси́, о́тче, лоза́ и́стинная, источа́я вино́ спасе́ния, все́х ве́рных ду́ши веселя́щее, святи́телю, о́тче на́ш преблаже́нне, Макси́ме досточу́дне. И ны́не и при́сно и во ве́ки веко́в. Ами́нь. Богородичен: Сове́та Преве́чнаго хра́м воздви́гл еси́, святи́телю, архистрати́га Гаврии́ла ра́достное провеща́ние Богоро́дице вседне́вно воспева́я: ра́дуйся, Неве́сто неневе́стная. Песнь 3 Ирмос: Весели́тся о Тебе́ Це́рковь Твоя́, Христе́, зову́щи: Ты́ моя́ кре́пость, Го́споди, и прибе́жище, и утвержде́ние. Припев: Святи́телю, óтче Макси́ме, моли́ Бо́га о на́с. Хвала́ми да почти́м треблаже́ннаго отца́, и́же, небе́сная жела́я, оста́ви земна́я, и, я́коже еле́нь, тече́т, жела́я водна́го исто́чника. Си́це усе́рдно после́довал еси́, о́тче, стопа́м прароди́телей свои́х. Припев: Святи́телю, óтче Макси́ме, моли́ Бо́га о на́с. Ве́сь у́м впери́в к высоте́, земна́я ни во что́ же вмени́л еси́ и смире́нием, достоблаже́нне Макси́ме, высо́кая восприя́л еси́. Сла́ва Отцу́ и Сы́ну и Свято́му Ду́ху. А́ще и изгна́н бы́л еси́, Макси́ме преподо́бне, оби́тели твоего́ оте́чества, но пресла́вный у́бо Ра́дул воево́да любе́зно тебе́, о́тче, прие́млет, ра́дуяся душе́ю и крася́ся вели́чием, я́ко даде́ ему́ Бо́г отца́, и учи́теля, и спаси́теля душе́внаго. И ны́не и при́сно и во ве́ки веко́в. Ами́нь. Богородичен: Ка́я сия́, я́же вои́стинну бли́з Бо́га, я́ко превозше́дши вся́ а́нгельския чи́ны, еди́на, добро́тою де́вства сия́ющи, я́ко Ма́ти Вседержи́теля? Седален, глас 8 Роди́теля и сро́дники, сла́ву же и и́же в сла́ве тебе́ служа́щих оста́вил еси́, же́ртву жи́ву Бо́гови себе́ предста́вив и мно́гих вразуми́л еси́, пу́ть покая́ния показа́вый, Макси́ме всеблаже́нне, моли́ Христа́ Бо́га согреше́ний оставле́ние дарова́ти чту́щим любо́вию святу́ю па́мять твою́. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Недомы́сленно и непостижи́мо есть, Влады́чице Богора́дованная,/ е́же соде́ланное о Тебе́ стра́шное Бо́жие та́инство,/ и́бо Необыме́ннаго, заче́нши, родила́ еси́, пло́тию обложе́нна от пречи́стых крове́й Твои́х./ Его́же всегда́, Чи́стая, я́ко Сы́на Своего́, моли́/ спасти́ся душа́м на́шим. Песнь 4 Ирмос: Вознесе́на Тя́ ви́девши Це́рковь на Кресте́, Со́лнце Пра́ведное, ста́ в чи́не свое́м, досто́йно взыва́ющи: сла́ва си́ле Твое́й, Го́споди. Припев: Святи́телю, óтче Макси́ме, моли́ Бо́га о на́с. Лю́ди Бо́жия возмуща́ет ненави́дяй добро́, и обою́ стратила́ту, Ра́дула и Богда́на, бли́з бы́вшу к сраже́нию, ты́, преподо́бне о́тче Макси́ме, я́ко крыла́т предста́в, обои́м полко́м ми́р да́л еси́. Они́ же возвраща́ются во своя́ си́, сла́вяща Бо́га и уго́дника Его́. Припев: Святи́телю, óтче Макси́ме, моли́ Бо́га о на́с. Иде́же бо Ду́х хо́щет — ды́шет, я́коже рече́ Христо́с во Ева́нгелии, и апо́стол: иде́же любо́вь — та́мо побежда́ется мно́жество грехо́в. Ду́хом, о́тче, провозвести́л еси́ боже́ственная твоя́ словеса́. Сла́ва Отцу́ и Сы́ну и Свято́му Ду́ху. Макси́ме всехва́льне, кто́ по достоя́нию возмо́жет восхвали́ти кро́ткий тво́й взо́р и медото́чныя твоя́ глаго́лы? Язы́к тво́й бы́сть тро́сть кни́жника, Ду́хом Святы́м подвиза́емь. Мно́гих бо привлече́ к ве́ре, мно́жайших же к покая́нию. И ны́не и при́сно и во ве́ки веко́в. Ами́нь. Богородичен: И́же от не су́щих вся́ческая Божество́м содева́я, роди́ся из Тебе́, Богома́ти, ми́р просвеща́я све́тлыми заря́ми Боже́ственными и богоразу́мия светлостьми́. Песнь 5 Ирмос: Ты́, Го́споди, мо́й Све́т, в ми́р прише́л еси́, Све́т Святы́й, обраща́яй из мра́чна неве́дения ве́рою воспева́ющия Тя́. Припев: Святи́телю, óтче Макси́ме, моли́ Бо́га о на́с. Самово́льне оста́вив, о́тче на́ш Макси́ме, вся́ сла́вная, и сро́дная, и подру́жная, по глаго́лу Ева́нгельскому, Христу́ Бо́гу после́довал еси́ и стра́нствовати изво́лил еси́. Припев: Святи́телю, óтче Макси́ме, моли́ Бо́га о на́с. Тле́нная оста́вль, треблаже́нне, нетле́нная восприя́л еси́, насыща́яся све́том Боже́ственныя све́тлости во дво́рех Го́спода твоего́, Макси́ме прему́дре. Сла́ва Отцу́ и Сы́ну и Свято́му Ду́ху. Лю́дие твои́, о о́тче, и ча́да, Ду́хом Святы́м порожде́нна, плаче́вная отве́ргше, ра́достная тебе́ воспева́ют пе́ния, вопию́ще: не оста́ви на́с, свя́те, в ра́дости Го́спода твоего́, моля́ Его́ о душа́х на́ших. И ны́не и при́сно и во ве́ки веко́в. Ами́нь. Богородичен: Свы́ше Тебе́ гла́с ра́достен возопи́ а́нгел, Богоро́дице, неизрече́нное Влады́ки возвеща́я Тебе́ зача́тие. Песнь 6 Ирмос: Пожру́ Ти́ со гла́сом хвале́ния, Го́споди, Це́рковь вопие́т Ти́, от бесо́вския кро́ве очи́щшися, ра́ди ми́лости от ре́бр Твои́х исте́кшею кро́вию. Припев: Святи́телю, óтче Макси́ме, моли́ Бо́га о на́с. Я́ко ши́пок в те́рнии, преподо́бне Макси́ме, во иноплеме́нных возра́сл еси́, ве́ру же и чистоту́ тве́рдо соблю́л еси́, и по ве́ре чи́стаго се́рдца твоего́ вседомо́вно преселя́ет тебе́ Бо́г в зе́млю люде́й твои́х, я́коже иногда́ Авраа́ма в зе́млю обетова́ния. Припев: Святи́телю, óтче Макси́ме, моли́ Бо́га о на́с. Хору́гвь Христо́ва, христиа́ном похвала́, о́тче на́ш Макси́ме, ю́же нося́, ничи́мже, по апо́столу, хвали́лся еси́, то́чию кресто́м Го́спода на́шего Иису́са Христа́. Сла́ва Отцу́ и Сы́ну и Свято́му Ду́ху. О, прему́драго твоего́ ра́зума, всехва́льне святи́телю! Егда́ утаи́вся все́х свои́х си́, и посреде́ мяте́жа и молвы́, кре́ст взе́м, после́довал еси́ Христу́. И ны́не и при́сно и во ве́ки веко́в. Ами́нь. Богородичен: Тя́ еди́ну посреде́ те́рния обре́т, я́ко пречестны́й кри́н и удо́лия цве́т, о Богома́ти, Жени́х — Сло́во, — из утро́бы Твоея́ про́йде. Кондак, глас 2 Кре́ст взе́м, мно́гия ско́рби и изгна́ния подъя́л еси́, святи́телю Макси́ме всеосвяще́нне, оте́чества твоего́ и Бо́гом вруче́ннаго ста́да лиша́емь, вся́ бо до́блественне терпе́л еси́, душе́внаго ра́ди твоего́ просвеще́ния. Икос О, кто́ от земны́х похвали́ти возмо́жет Бо́гом просла́вленнаго? Мы́ же ра́достными гла́сы, а́ки ве́твьми, сия́ тебе́, о́тче, сыно́вне глаго́лем: ра́дуйся, благочести́ваго ко́рене о́трасль; ра́дуйся, благоуха́нный цве́те, прозя́бший на ни́ве чи́стаго жития́ твоего́; ра́дуйся, до́блественнаго воздержа́ния сокро́вище; ра́дуйся, я́ко ца́рство земно́е оста́вив, воево́да Царя́ Христа́ бы́л еси́; ра́дуйся, я́ко мно́гия труды́ и беды́ подъя́л еси́; ра́дуйся, я́ко слеза́ми твои́ми мно́гих удиви́л еси́, пу́ть покая́ния показа́вый; ра́дуйся, я́ко мно́гая ча́да Ду́хом Святы́м породи́л еси́; ра́дуйся, я́ко кри́н, во юдо́ли процве́л еси́. Ра́дуйся, Макси́ме преблаже́нне, душе́вное просвеще́ние. Песнь 7 Ирмос: В пещи́ авраа́мстии о́троцы перси́дстей, любо́вию благоче́стия па́че, не́жели пла́менем, опаля́еми, взыва́ху: благослове́н еси́ в хра́ме сла́вы Твоея́, Го́споди. Припев: Святи́телю, óтче Макси́ме, моли́ Бо́га о на́с. Ра́дул воево́да, благоче́стия испо́лнь, ра́достно Бо́га похваля́ше, я́ко прия́т о́трасль благочести́ваго ко́рене, па́че же Бо́жие оби́телище и цве́т чистоты́. Те́мже и вопия́ше: благослове́н Бо́г оте́ц на́ших. Припев: Святи́телю, óтче Макси́ме, моли́ Бо́га о на́с. Госпо́дь даде́, Госпо́дь отъя́т, — по И́ову, Бо́га благодаря́, глаго́лал еси́, свяще́нне Макси́ме, хва́льнаго воспева́я Бо́га и препросла́вленнаго. Сла́ва Отцу́ и Сы́ну и Свято́му Ду́ху. Возду́х у́бо освяти́ся благово́нием моще́й твои́х, Макси́ме, Христо́в святи́телю, Це́рковь же, веселя́щися, вопие́т: благослове́н Бо́г оте́ц на́ших. И ны́не и при́сно и во ве́ки веко́в. Ами́нь. Богородичен: И́стинную Богоро́дицу испове́дающе Тя́, я́ко а́нгел, — ра́дуйся, — ве́рою вопие́м Ти́, — еди́на бо Ра́дость родила́ еси́, Обра́дованная и при́сно Благослове́нная. Песнь 8 Ирмос: Ру́це распросте́р, Дании́л, льво́в зия́ния в ро́ве затче́; о́гненную же си́лу угаси́ша, доброде́телию препоя́савшеся, благоче́стия рачи́тели, о́троцы, взыва́юще: благослови́те, вся́ дела́ Госпо́дня, Го́спода. Припев: Святи́телю, óтче Макси́ме, моли́ Бо́га о на́с. Усе́рдно взе́м кре́ст и Христу́ после́довав, Макси́ме преблаже́нне, ско́рби мно́ги и изгна́ния претерпе́л еси́, вопия́: благослови́те, вся́ дела́ Госпо́дня, Го́спода. Припев: Святи́телю, óтче Макси́ме, моли́ Бо́га о на́с. Ца́рский цве́т Це́ркви цвете́т, Кре́ст и́стинный, ты́ же, сего́ взе́м, святи́телю Макси́ме досточу́дне, ца́рским путе́м поте́кл еси́, вопия́: благослови́те, вся́ дела́ Госпо́дня, Го́спода. Сла́ва Отцу́ и Сы́ну и Свято́му Ду́ху. Отре́щся сою́за мирска́го, связа́л еси́ себе́ любо́вию Бо́жиею: и́го бо взе́м, яре́м Христо́в, и, то́й нося́, взыва́л еси́: благослови́те, вся́ дела́ Госпо́дня, Го́спода. И ны́не и при́сно и во ве́ки веко́в. Ами́нь. Богородичен: Неи́стовства злотворя́щих не устраши́лся еси́, боже́ственный Макси́ме: Вы́шняго бо си́ла, из Де́вы возсия́вшаго, всеору́жием кре́стным тя́ оде́я, вопи́ти: благослови́те, вся́ дела́ Госпо́дня, Го́спода. Песнь 9 Ирмос: Ка́мень нерукосе́чный от несеко́мыя горы́, Тебе́, Де́во, краеуго́льный отсече́ся — Христо́с, совокупи́вый разстоя́щаяся естества́. Те́м, веселя́щеся, Тя́, Богоро́дице, велича́ем. Припев: Святи́телю, óтче Макси́ме, моли́ Бо́га о на́с. Красно́ у́бо Це́рковь весели́тся в па́мяти твое́й, о святи́телю треблаже́нне Макси́ме! Се́рбстии же лю́дие стека́ются, пра́зднственная тебе́ принося́ще, восхваля́юще Христа́, тебе́ просла́вльшаго. Припев: Святи́телю, óтче Макси́ме, моли́ Бо́га о на́с. В печа́ли, о́тче, оста́вил еси́ боголюбе́зная твоя́ ча́да, в ра́дость же душе́вную претвори́л еси́ ве́рных мно́жества явле́нием благово́нных моще́й твои́х. Те́мже и похва́льная тебе́ прино́сят наро́да твоего́ собра́ния. Сла́ва Отцу́ и Сы́ну и Свято́му Ду́ху. И́хже о́ко не ви́де, и у́хо не слы́ша, и я́же на се́рдце челове́ку не взыдо́ша, такова́я, о́тче, от Бо́га получи́л еси́ блага́я, си́х наслажда́яся, моли́ о ста́де твое́м, е́же к Бо́гу собра́л еси́, и о лю́дех твои́х, восхваля́ющих тя́, греха́ изба́витися и сподо́битися ра́дости и весе́лия ве́чнаго. И ны́не и при́сно и во ве́ки веко́в. Ами́нь. Богородичен: В ра́дость Богоро́дицы водрузи́л еси́ оби́тель кра́сную, в не́йже ча́да твоя́ боголюби́вая, обстоя́ще ра́ку твою́ честну́ю, святи́телю Макси́ме преблаже́нне, воспева́ют Го́спода, Де́ву ублажа́юще. Светилен Ду́хом просвеща́емь, святи́телю треблаже́нне, озаря́еши сердца́ и ду́ши на́с, воспева́ющих твою́ све́тлую па́мять, Макси́ме досточу́дне. Слава: Тро́ицы пропове́дника,/ па́стыря до́блественнаго,/ прему́драго Макси́ма восхва́лим согла́сно. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Со дерзнове́нием глаго́лати Богоро́дицу и Сей покланя́тися вои́стинну/ ве́рных научи́л еси́, Макси́ме всеблаже́нне.

Минея, 18 Октября, Канон апостола Глас 8 Песнь 1 Ирмос: Песнь возслем, людие,/ Чу́дному Богу нашему,/ свободившему Израиля от работы,/ песнь победную поюще и вопиюще,/ пои́м Тебе, Единому Владыце. Припев: Святы́й апо́столе и евангели́сте Луко́, моли́ Бо́га о на́с. Колесница Божия пресветлая был еси,/ Всесвятое нося́ Имя пред человеки, Луко́ всече́стне,/ колесницы и триста́ты пре́лести погружая крепко. Припев: Святы́й апо́столе и евангели́сте Луко́, моли́ Бо́га о на́с. Струю́ прии́м жизни, зно́ем изсыхаемый безбожия, напоил еси мир, Луко́ всеблаженне,/ тучами Богоразумия,/ из чрева твоего изска́чущими. Сла́ва Отцу́ и Сы́ну и Свято́му Ду́ху. Блистанием Духа, Луко́, и жития́ чистотою озаря́ем,/ яко молния, треблаженне, Богоданно сиял еси всей вселенней, просвещая верных сердца́. И ны́не и при́сно и во ве́ки веко́в. Ами́нь. Богородичен: Радуйся, всесвятый хра́ме, руно́ Богоро́сное,/ запеча́танный источниче безсмертныя Струи́,/ стадо Твое, Владычице, сохраняй от всех ра́тных неплени́мо. Песнь 3 Ирмос: Несть свят, яко Господь,/ и несть праведен, яко Бог наш,/ егоже поет вся тварь:/ несть праведен, паче Тебе, Господи. Припев: Святы́й апо́столе и евангели́сте Луко́, моли́ Бо́га о на́с. Возсияв, яко солнце, проповеданием,/ Церкве укра́сил еси, Луко́, утверждение,/ прелести мглу теплотою веры иста́ив, всеблаженне. Припев: Святы́й апо́столе и евангели́сте Луко́, моли́ Бо́га о на́с. Скрижа́ли изсекл еси Боголепныя от ка́мене, пребогате, Божия воплощения,/ оско́рд имея Божественный язык твой и уста́ Богодухновенная. Сла́ва Отцу́ и Сы́ну и Свято́му Ду́ху. Во о́блак всесветлый входя́й/ и о́блаком покрываемь,/ приял еси, премудре, Новый Закон,/ пе́рстом Духа пи́санный на сердцы твоем. И ны́не и при́сно и во ве́ки веко́в. Ами́нь. Богородичен: Несть непоро́чны, яко Ты, Владычице,/ и несть пречисты, паче Тебе, Всенепоро́чная:/ во чре́ве бо Бога Слова вместила еси,/ Единаго Многомилостиваго. Седален, глас 8 Яко соше́ственник Павлов явився,/ различныя беды́ терпеливне претерпел еси,/ всехвальне Господень апостоле,/ и течение страданием совершив веры,/ с ним в вышних веселишися, блаженне./ Тем и миру Христово Евангелие проповедав,/ просветил еси подсолнечную всю, Луко́ всечестне./ Моли Христа Бога грехов оставление пода́ти празднующим любовию святую память твою. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Солнца о́блаче разумнаго,/ Божественнаго Света свети́льниче златокова́нный,/ Нескверная, Небла́зная, Всенепорочная Владычице,/ омраче́нную ду́шу мою ослеплением страсте́й/ безстрастна зарею просвети, молюся,/ и оскверне́нное мое сердце омы́й пото́ки умиления,/ покаяния же слезами,/ и от тиме́ния мя очи́сти дел моих, да любовию зову Ти:/ Богородице Приснодево, моли Христа Бога/ прегрешений оставление подати ми,/ Тебе бо имею надежду, раб Твой. Песнь 4 Ирмос: Из горы́ приосене́нныя, Слове, пророк,/ Единыя Богородицы,/ хотя́ща воплотитися, Боговидно усмотри́/ и со страхом славословите силу Твою. Припев: Святы́й апо́столе и евангели́сте Луко́, моли́ Бо́га о на́с. Море язы́ков смутил еси, Богомудре,/ конь быв Всецаря́,/ сла́ное неве́рствие со́лию Божественною ослажда́я, приснославне. Припев: Святы́й апо́столе и евангели́сте Луко́, моли́ Бо́га о на́с. Лук Христос напря́г,/ пусти́ стрелу́ тя, Луко́, све́тло обощре́ну,/ лучами сияюща благочестия и просвещающа наша души. Сла́ва Отцу́ и Сы́ну и Свято́му Ду́ху. Стра́сти душ ку́пно и телес твоих певцев уврачи́, всеблаженне,/ та́инственным рукоде́ланием,/ греха́ гни́лость изрезуя, всемудре. И ны́не и при́сно и во ве́ки веко́в. Ами́нь. Богородичен: Невесто Божия, Марие Богороди́тельнице,/ избави мя лютых прегрешений и бед/ и к тишины́ пристанищу и спасения Твоими молитвами направи. Песнь 5 Ирмос: Утренююще вопием Ти,/ Господи, спаси ны,/ Ты бо еси Бог наш,/ разве Тебе ино́го не ве́мы. Припев: Святы́й апо́столе и евангели́сте Луко́, моли́ Бо́га о на́с. Яко роса с Небес спа́дающи, явился еси,/ пре́лести зной разоряя словесы́ твоими. Припев: Святы́й апо́столе и евангели́сте Луко́, моли́ Бо́га о на́с. Страх во чреве твоем Божественный заче́н,/ спасение породи́л еси заблу́ждшим, апостоле. Сла́ва Отцу́ и Сы́ну и Свято́му Ду́ху. На гору возшед, всеблаженне, добродетелей,/ всем Евангелие Царствия проповедал еси. И ны́не и при́сно и во ве́ки веко́в. Ами́нь. Богородичен: Марие, Богородице Безневестная,/ надежды врагов су́етны сотвори/ и поющия Тя возвесели. Песнь 6 Ирмос: Ризу мне подаждь све́тлу,/ одеяйся Светом, яко ризою,/ Многомилостиве Христе Боже наш. Припев: Святы́й апо́столе и евангели́сте Луко́, моли́ Бо́га о на́с. Мудрости чашу испи́в,/ напои́л еси всех познания Спаса Христа,/ Луко́ всемудре. Припев: Святы́й апо́столе и евангели́сте Луко́, моли́ Бо́га о на́с. Павлу соисхо́дник избрався, Луко́ всеблаженне,/ язы́ки уловил еси мре́жею, Богоглагольниче,/ догма́тов твоих. Сла́ва Отцу́ и Сы́ну и Свято́му Ду́ху. Облак, тучу жизни нам одождя́ющь, явился еси, апостоле,/ от исто́чник спасения истекающую. И ны́не и при́сно и во ве́ки веко́в. Ами́нь. Богородичен: Куми́ров Разрушитель яко Бог/ бывшее Рождество Твое, Марие Богоневесто,/ покланяемо есть со Отцем и Духом. Кондак, глас 2 Истиннаго благочестия проповедника/ и тайн неизреченных ри́тора,/ звезду церковную, Луку́ Божественнаго восхва́лим:/ Слово бо его избра́, с Павлом мудрым язы́ков учителя,/ Един ведый сердечная. Икос Знанием обогати́вся Го́рнейшим от руки́ Владычни,/ вруче́н был еси язы́ков жребиоиму́ществу, всехвальне./ Тем, житие распали́в Словом, страна́м законоположник, Луко́, явился еси, паче Моисея:/ перстом Божиим, яко скрижа́ли Богоначертанныя, тобою сложи́вшася Духом, Божественную уяснил еси веру./ Тем и Христос тя прослави, Един ведый сердечная. Песнь 7 Ирмос: Отроцы Богочестивии в Вавилоне/ о́бразу злато́му не поклони́шася,/ но посреде́ пещи огненныя ороша́еми,/ песнь воспеваху, глаголюще:/ превозносимый отцев и нас Боже, благословен еси. Припев: Святы́й апо́столе и евангели́сте Луко́, моли́ Бо́га о на́с. Ученик неизрече́нных та́йн Христа Бога ве́рен быв,/ Евангелие Сего Божественное проповедал еси верным, всемудре, глаголющим:/ превозносимый отцев и нас Боже, благословен еси. Припев: Святы́й апо́столе и евангели́сте Луко́, моли́ Бо́га о на́с. Утворе́нии добродетелей укра́шен явился еси, Луко́ всеблаженне,/ Божественнаго благолепия заря́ми просвещаемь,/ и вопия́ непрестанно Творцу твоему:/ превозносимый отцев и нас Боже, благословен еси. Сла́ва Отцу́ и Сы́ну и Свято́му Ду́ху. Испуща́я светоносныя лучи́, якоже в нощи́ заря являемь,/ пре́лести тьму сиянием слове́с твоих,/ благочестно взывая, отгнал еси:/ превозносимый отцев и нас Боже, благословен еси. И ны́не и при́сно и во ве́ки веко́в. Ами́нь. Богородичен: Имея житие́, словом, Боговидче, мудрости просвеще́но, Луко́,/ Девы Рождество я́вственно исписал еси и иконами любезно вообразил еси:/ Ейже покланяемся верно, Христа славяще. Песнь 8 Ирмос: На горе святей прославльшася/ и в купине́ огне́м/ Приснодевы Моисеови тайну явльшаго,/ Господа пойте/ и превозносите во вся веки. Припев: Святы́й апо́столе и евангели́сте Луко́, моли́ Бо́га о на́с. Росодательною мудростию слове́с твоих/ и ту́чами благодати Божественныя прелести пещь погаси́л еси,/ вестник Господень и священнопропове́дник, Богомудре, быв. Припев: Святы́й апо́столе и евангели́сте Луко́, моли́ Бо́га о на́с. Яко красныя но́ги твоя, всеблаженне,/ мир благовествующаго,/ всяк ум преизвестно преиму́щь,/ егоже превозно́сим и славосло́вим во веки вся. Сла́ва Отцу́ и Сы́ну и Свято́му Ду́ху. Свет мира просвеща́ти во тьме седя́щия/ яви́ тя Христос, о́тча Существа Сияние, Господь Славы,/ егоже превозносим во веки. И ны́не и при́сно и во ве́ки веко́в. Ами́нь. Богородичен: Во утробе вселившагося Девы/ и от Нея страшно и паче сло́ва/ древняго Адама обновившаго Господа поем и славословим во веки. Песнь 9 Ирмос: Тя, Неискусобрачную Матерь Бога Вышняго,/ Тя, паче ума́ рождшую Сло́вом воистину Бога,/ вышшую Пречистых сил,/ немо́лчными славословле́нии величаем. Припев: Святы́й апо́столе и евангели́сте Луко́, моли́ Бо́га о на́с. Проповедник был еси всемирнаго спасения Евангельским пропове́данием,/ священная же и благознамени́тая труба́,/ вдохновением ды́шущи Духа, показался еси,/ священноглаго́льниче всече́стне. Припев: Святы́й апо́столе и евангели́сте Луко́, моли́ Бо́га о на́с. Деянии украша́емь Спасовых апостолов,/ сия от Бога подви́жим, верным написал еси,/ якоже образ одушевленный, присно пребывающь, объяви́в,/ священнопроповедниче всеславне. Сла́ва Отцу́ и Сы́ну и Свято́му Ду́ху. Стал еси убо, Луко́, якоже пости́г, Богоначальниче, желаний кра́йнейшее,/ Христу бо предстал еси,/ подае́маго от Него насыщался Боговидения./ Темже тя вси ублажаем. И ны́не и при́сно и во ве́ки веко́в. Ами́нь. Богородичен: Тя, Неприступнаго Бога носившую на объя́тиих,/ на Небесех поемаго от всякия силы/ и Тобою нам да́рующа всегда спасение,/ Богомати, величаем. Светилен Луко́, Христов апостоле, таи́нниче неизрече́нных и язы́ков учителю/ с Павлом Божественным и Пречистою Богородицею,/ Еяже Божественную икону от любве́ изобрази́л еси,/ моли, Боговидче, о нас, блажа́щих тя/ и совершающих священное твое успе́ние, всемудре тайноглаго́льниче. Сла́ва Отцу́ и Сы́ну и Свято́му Ду́ху. Яко ученика благодати и спосле́дователя Павлова,/ и словопи́сца изя́щнейша Божественнаго Евангелия похва́лим;/ Слова бо воплоще́ние и вочелове́чение, и Стра́сти, блаженне, пропове́дал еси./ Тем сошедшеся верно, Луко́, достойно тя почита́ем. И ны́не и при́сно и во ве́ки веко́в. Ами́нь. Богородичен: Неизрече́нно бысть рождение Пренепорочныя Невесты,/ яко бывши чисте́йший храм, Богородице,/ Советом бо Преве́чным в Тя Все́льшася,/ родила́ еси Бога Сло́ва./ Тем поюще Рождество Твое,/ величаем достойно, Всенепорочная.

Минея, 30 Марта, Канон Глас 4 Песнь 1 Ирмос: Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,/ и воспою́, ра́дуяся, Тоя́ чудеса́. Припев: Святáя пра́ведная Евву́ло, моли́ Бо́га о на́с. Чти́телие Пантелеи́мона сла́внаго,/ того́ святу́ю ма́терь пе́сньми почти́м,/ обои́х вку́пе велича́юще. Припев: Святáя пра́ведная Евву́ло, моли́ Бо́га о на́с. К злому́дрию идолослужи́телей не примеша́ющися, Богому́драя Евву́ло,/ Христа́ возлюби́ла еси́/ и Тому́ усе́рдно порабо́тала еси́. Сла́ва Отцу́ и Сы́ну и Свято́му Ду́ху. И́стинное чадолю́бие к рожде́нному тобо́ю име́ющи,/ благоче́стием па́че, не́же млеко́м,/ того́ воспита́ла еси́, достоблаже́нная. И ны́не и при́сно и во ве́ки веко́в. Ами́нь. Богородичен: Яви́лася еси́, Богороди́тельнице,/ вы́сшая Го́рних сил и всея́ тва́ри,/ возвы́сившая естество́ челове́ческое рождество́м Твои́м. Песнь 3 Ирмос: Твоя́ песносло́вцы, Богоро́дице,/ живы́й и незави́стный Исто́чниче,/ лик себе́ совоку́пльшия, духо́вно утверди́,/ в Боже́ственней Твое́й сла́ве,/ венце́в сла́вы сподо́би. Припев: Святáя пра́ведная Евву́ло, моли́ Бо́га о на́с. Твоя́ песносло́вцы, засту́пниче наш, лик себе́ совоку́пльше,/ воспева́ем дне́сь достоблаже́нную ма́терь твою́./ Моли́твами у́бо ва́шими духо́вно утверди́те ны. Припев: Святáя пра́ведная Евву́ло, моли́ Бо́га о на́с. Словеса́ свята́го Дави́да испо́лнишася на тебе́, пра́ведная Евву́ло:/ ты бо еси́ ма́терь,/ о святе́м ча́де свое́м веселя́щаяся в Небе́сных селе́ниих. Сла́ва Отцу́ и Сы́ну и Свято́му Ду́ху. Я́ко иму́щии дерзнове́ние ко Го́споду, дво́ице свята́я,/ чту́щия вас свобожда́йте от бед и нужд/ и ве́чных мук изба́витися нам Того́ умоли́те. И ны́не и при́сно и во ве́ки веко́в. Ами́нь. Богородичен: Благоле́пная ски́ние Божества́, Мари́е,/ первозда́нную ле́поту возврати́вшая нам Вопло́щщимся из Тебе́,/ неблаголе́пие души́ мое́й претвори́ во благоле́пие. Седален, глас 8 Ми́лование име́ла еси́, честна́я ма́ти, ко и́скреннему,/ ве́ру же и́стинную и любо́вь, я́же к Бо́гу,/ сего́ ра́ди Бо́жия благода́ть в тебе́ предпочи́ла е́сть,/ ю́же испроси́ и нам, воспева́ющим тя. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Богоро́дицу Тя испове́дуем, Влады́чице,/ Ро́ждшимся от Тебе́ спа́сшиися гре́шнии раби́,/ Бо́га бо непостижи́мо родила́ еси́,/ Кро́вию Свое́ю очища́ющаго нас от вся́каго греха́/ и в ра́йское весе́лие приводя́щаго. Песнь 4 Ирмос: Седя́й в сла́ве на Престо́ле Божества́/ во о́блаце ле́гце,/ прии́де Иису́с Пребоже́ственный/ Нетле́нною Дла́нию и спа́се зову́щия:/ сла́ва, Христе́, си́ле Твое́й. Припев: Святáя пра́ведная Евву́ло, моли́ Бо́га о на́с. Кто не похва́лит, о Евву́ло, благоче́стие твое́,/ ве́ру же и любо́вь ко Христу́ посреде́ идолослужи́телей,/ их же су́етная чти́лища презирала еси́. Припев: Святáя пра́ведная Евву́ло, моли́ Бо́га о на́с. Я́ко сын предо́брый, весели́ши ты, Пантелеи́моне, ублажаемую на́ми ма́терь твою́,/ ея́же почита́ние отно́сится и к тебе́,/ благотво́рное нам, обои́х вас восхваля́ющим. Сла́ва Отцу́ и Сы́ну и Свято́му Ду́ху. Удиви́шася никомиди́йцы,/ возра́довашася Небожи́телие о му́ченическом боре́нии кра́снаго прозябе́ния твоего́, Евву́ло,/ его́же увенча́ Христо́с венце́м побе́ды. И ны́не и при́сно и во ве́ки веко́в. Ами́нь. Богородичен: Неудо́бь соединя́емая в Себе́ соедини́вшая,/ е́же пре́жде рождества́, в рождестве́ и по рождестве́ де́вство,/ в де́встве утверди́ и в чистоте́ соблюди́ ны, Чи́стая Присноде́во. Песнь 5 Ирмос: Ужасо́шася вся́ческая/ о Боже́ственней сла́ве Твое́й:/ Ты бо, Неискусому́жная Де́во,/ име́ла еси́ во утро́бе над все́ми Бо́га/ и родила́ еси́ Безле́тнаго Сы́на,/ всем воспева́ющим Тя/ мир подава́ющая. Припев: Святáя пра́ведная Евву́ло, моли́ Бо́га о на́с. И́стинную любо́вь име́ла еси́ к Бо́гу, Боголюби́вая ма́ти,/ за́поведи Его́ храня́:/ сей бо и́стинно лю́бит Бо́га, и́же за́поведи Его́ соблюда́ет. Припев: Святáя пра́ведная Евву́ло, моли́ Бо́га о на́с. Благода́тию спасе́ннии чрез ве́ру,/ благи́ми де́лы угожда́ти Бо́гови до́лжни есмы́,/ я́коже угоди́ Тому́ благолюби́вая Евву́ла. Сла́ва Отцу́ и Сы́ну и Свято́му Ду́ху. Не оправди́тся пред Бо́гом всяк живы́й,/ ты же пра́ведна яви́лася еси́ пред Ним, приснопа́мятная./ Пра́ведную у́бо, тя пе́сньми почита́ем. И ны́не и при́сно и во ве́ки веко́в. Ами́нь. Богородичен: Кра́сную, и избра́нную, и всечестну́ю разуме́в Тя,/ Сын Бо́жий Сын Твой бы́сть./ Сы́ны сотвори́ по благода́ти, чту́щия Тя, Богоневе́сто. Песнь 6 Ирмос: Боже́ственное сие́ и всечестно́е/ соверша́юще пра́зднество,/ Богому́дрии, Богома́тере,/ прииди́те, рука́ми воспле́щим,/ от Нея́ ро́ждшагося Бо́га сла́вим. Припев: Святáя пра́ведная Евву́ло, моли́ Бо́га о на́с. Блаже́нна в христиа́нских жена́х вои́стинну показа́лася еси́, Евву́ло,/ вели́каго Христо́ва страстоте́рпца ма́терь су́щи, прехва́льная. Припев: Святáя пра́ведная Евву́ло, моли́ Бо́га о на́с. Досто́йна еси́ почита́ема бы́ти, ма́ти всечестна́я,/ я́ко в Боже́ственных повеле́ниях поуча́лася еси́/ и сих при́сная храни́тельница была́ еси́. Сла́ва Отцу́ и Сы́ну и Свято́му Ду́ху. Благочести́ва су́щи,/ и рожде́ннаго тобо́ю, Евву́ло, благоче́стию учи́ла еси́, глаго́лющи:/ Христо́с бу́ди тебе́, ча́до, Свет, Пу́ть, И́стина и Живо́т. И ны́не и при́сно и во ве́ки веко́в. Ами́нь. Богородичен: Тя, Госпоже́, жи́зни на́шея/ предлага́ем Храни́тельницу и Засту́пницу Непобеди́мую:/ Помо́щница нам бу́ди, избавля́ющи от бед сла́вящих Тя. Кондак, глас 3 Па́мять твоя́, Евву́ло,/ весели́т чту́щих тя,/ ма́терь сла́внаго Пантелеи́мона,/ с ни́мже Бо́жию Престо́лу предстоя́щи,/ моли́ся прегреше́ний оставле́ние да́ти нам. Икос Достоблаже́нную и святу́ю Еввулу во гла́се ра́дования ны́не ублажи́м./ Сия́ бо, благоче́стие, я́ко щит, иму́щи,/ и́дольскую пре́лесть и сопроти́внаго низложи́/ и по кончи́не свое́й пра́ведною душе́ю свое́ю на Небеса́ возлете́,/ иде́же с Пантелеи́моном Бо́жию Престо́лу предстоя́щи,/ мо́лится прегреше́ний оставле́ние да́ти нам. Песнь 7 Ирмос: Не послужи́ша тва́ри Богому́дрии/ па́че Созда́вшаго,/ но, о́гненное преще́ние му́жески попра́вше,/ ра́довахуся, пою́ще:/ препе́тый отце́в Госпо́дь и Бог, благослове́н еси́. Припев: Святáя пра́ведная Евву́ло, моли́ Бо́га о на́с. Не послужи́сте тва́ри, Богому́драя дво́ице, па́че Созда́вшаго,/ но преще́ние неве́рных и и́долы их попра́вше,/ с весе́лием взыва́ете:/ препе́тый отце́в Госпо́дь и Бог, благослове́н еси́. Припев: Святáя пра́ведная Евву́ло, моли́ Бо́га о на́с. Стре́лы огнено́сныя де́монов ты угаси́ла еси́, Евву́ло, огради́вшися ве́рою,/ смире́нием же твои́м низложи́ла еси́ го́рдаго зми́я, взыва́ющи:/ препе́тый отце́в Госпо́дь и Бог, благослове́н еси́. Сла́ва Отцу́ и Сы́ну и Свято́му Ду́ху. Побе́дных по́честей, я́же прия́ Пантелеи́мон,/ о́бщница еси́, блаже́нная того́ ма́ти:/ тобо́ю бо пе́рвее наста́вленный,/ му́жески подвиза́ся за Христа́ Богому́дрый сын твой. И ны́не и при́сно и во ве́ки веко́в. Ами́нь. Богородичен: Сбытие́ слове́с Твои́х, Влады́чице, испо́лнися:/ се бо ублажа́ют Тя вси ро́ди,/ ро́ждшую Спа́са ро́да челове́ческаго,/ Ему́же о Тебе́ пое́м:/ препе́тый отце́в Госпо́дь и Бог, благослове́н еси́. Песнь 8 Ирмос: О́троки благочести́выя в пещи́/ Рождество́ Богоро́дичо спасло́ е́сть,/ тогда́ у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте, дела́,/ и превозноси́те Его́ во вся ве́ки. Припев: Святáя пра́ведная Евву́ло, моли́ Бо́га о на́с. Свети́льник нога́ма свои́ма иму́щи зако́н Госпо́день и свет стезя́м свои́м,/ воспи́товала еси́ в том сы́на своего́, пою́щи с ним:/ Го́спода по́йте, дела́, и превозноси́те Его́ во вся ве́ки. Припев: Святáя пра́ведная Евву́ло, моли́ Бо́га о на́с. Я́ко зве́зды, просия́ете све́тлостию благоче́стия, свята́я дво́ице,/ науча́юще в но́щи неве́рия су́щих пе́ти:/ Го́спода по́йте, дела́, и превозноси́те Его́ во вся ве́ки. Сла́ва Отцу́ и Сы́ну и Свято́му Ду́ху. Зря́щи Пантелеи́мона, му́ченическим венце́м укра́шенна,/ на Небеси́, лику́еши, прехва́льная, и вопие́ши:/ сра́дуйтеся мне вси, пою́ще:/ Го́спода по́йте, дела́, и превозноси́те Его́ во вся ве́ки. И ны́не и при́сно и во ве́ки веко́в. Ами́нь. Богородичен: Я́ко Небе́снаго Царя́ чисте́йший храм,/ Того́ моли́, Де́во, очи́стити души́ на́ша/ и хра́мы себе́ человеколю́бием Свои́м соде́лати, да пое́м:/ Го́спода по́йте, дела́, и превозноси́те Его́ во вся ве́ки. Песнь 9 Ирмос: Всяк земноро́дный/ да взыгра́ется, Ду́хом просвеща́емь,/ да торжеству́ет же Безпло́тных умо́в естество́,/ почита́ющее свяще́нное торжество́ Богома́тере,/ и да вопие́т:/ ра́дуйся, Всеблаже́нная Богоро́дице,/ Чи́стая Присноде́во. Припев: Святáя пра́ведная Евву́ло, моли́ Бо́га о на́с. Ве́руя во Христа́ Бо́га и за́поведи Его́ усе́рдно храня́,/ благоугоди́ла еси́ Ему́, Боголюби́вая Евву́ло,/ моли́ у́бо Всеблага́го Влады́ку и нам благоуго́дным Ему́ бы́ти/ и спасти́ся душа́м на́шим. Припев: Святáя пра́ведная Евву́ло, моли́ Бо́га о на́с. И́же за́поведи Бо́жия сохраня́ет, того́ возлюби́ти обещава́ется Бог./ В за́поведех Его́ ходи́вшая, возлюблена еси́ Им, ма́ти,/ но моли́ся, да и мы возлю́бим Бо́га/ и возлю́блени бу́дем благоутро́бием Его́. Сла́ва Отцу́ и Сы́ну и Свято́му Ду́ху. Чту́щую вас, честна́я дво́ице, оби́тель присеща́йте, блаже́ннии,/ предста́тельством ва́шим избавляеши от вся́ких лю́тых обстоя́ний,/ и грехо́м на́шим испроси́те проще́ние. И ны́не и при́сно и во ве́ки веко́в. Ами́нь. Богородичен: А́да Победи́теля ро́ждшая,/ Того́ моли́, Влады́чице,/ да изба́вит ны, гре́шныя, от де́рзости лука́вых де́монов,/ страстьми́ нас борю́щих,/ и да огради́т ми́ром ду́ши на́ша. Светилен Све́том Тро́ическим осиява́емая, яви́лася еси́, Евву́ло, я́ко свеща́,/ све́том Богоразу́мия светя́щая Никомиди́и./ Те́мже, светоно́сную твою́ па́мять чту́ще,/ похва́льными пе́сньми тя ублажа́ем. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Две́ре Боже́ственная све́та,/ Безле́тный Свет ми́рови возсия́вшая,/ све́том благода́ти просвети́ ны/ и во све́те Того́ повеле́ний жи́тельствовати укрепи́,/ да похва́льными пе́сньми Тя, Богоро́дице, ублажа́ем.

Минея, 8 Января, Канон Глас 4 Песнь 1 Ирмос: Отве́рзу уста́ моя́, и напо́лнятся Ду́ха, и сло́во отры́гну Цари́це Ма́тери, и явлю́ся, све́тло торжеству́я, и воспою́, ра́дуяся, Тоя́ чудеса́. Припев: Преподо́бне о́тче Гео́ргие, моли́ Бо́га о на́с. Отверзе́ние у́ст да́ти мне́ благода́ть моли́ прему́дрости, Гео́ргие, нача́ло Иису́са, я́ко да воспою́ твою́ па́мять по досто́инству, неразу́мный, пе́сньми боже́ственными, ра́дуяся. Припев: Преподо́бне о́тче Гео́ргие, моли́ Бо́га о на́с. На земли́ пожи́л еси́, я́ко безпло́тен, сла́вне, совокупи́лся же еси́ отсю́ду безпло́тным лико́м, Безпло́тнаго пе́сньми трисвяты́ми поя́ и прие́мля Сего́ осия́ние. Сла́ва Отцу́ и Сы́ну и Свято́му Ду́ху. Ми́р преоби́дел еси́ преми́рными мы́сльми твои́ми, пости́вся же в ми́ре, иде́же воспита́ся Христо́с, отше́л же еси́ к нетле́нному ми́ру, лико́м совокупи́вся перворо́дных, му́дре. И ны́не и при́сно и во ве́ки веко́в. Ами́нь. Богородичен: Отве́рз уста́ моя́, Чи́стая, предвозглаго́лю воспе́ти Тя́, Му́дрость ро́ждшую Ипоста́сную, но, я́ко нечи́ст, Всечи́стую я́ко ле́по пе́ти Тя́ не моги́й, прошу́ по́мощи. Песнь 3 Ирмос: Твоя́ песносло́вцы, Богоро́дице, живы́й и незави́стный Исто́чниче, ли́к Себе́ совоку́пльшия, духо́вно утверди́, в боже́ственней Твое́й сла́ве, венце́в сла́вы сподо́би. Припев: Преподо́бне о́тче Гео́ргие, моли́ Бо́га о на́с. Омыва́яся слеза́ми твои́ми, от бре́ния мирска́го пло́ть очи́стил еси́ и, я́коже струя́ми ре́чными, си́ми де́монов полки́ по́стнически потопи́л еси́. Припев: Преподо́бне о́тче Гео́ргие, моли́ Бо́га о на́с. Преподо́бне, непоро́чне и пра́ведне житие́ преше́л еси́, му́дре, к сему́ и боле́зньми по́стническими неболе́зненную жи́знь насле́довал еси́, богоблаже́нне Гео́ргие. Сла́ва Отцу́ и Сы́ну и Свято́му Ду́ху. Объе́мся боже́ственным жела́нием, всеблаже́нне, к ме́стом Сио́нским отше́л еси́ и та́мо пребы́л еси́ да́же до сме́рти, всему́дре, изнуря́я боле́зньми пло́ть твою́. И ны́не и при́сно и во ве́ки веко́в. Ами́нь. Богородичен: Твоего́ песносло́вца заблу́ждша, Отрокови́це, к пути́ покая́ния напра́ви, я́же Сло́во ро́ждшая, ми́ра очища́ющаго грехи́, Богоневе́сто. Седален, глас 5 Мно́гаго в поще́нии и сла́внаго небе́снаго граждани́на, и ве́рных моли́твенника воспои́м ны́не и велича́ем, и́бо Благоизво́лившему взы́ти на Кре́ст потща́ся угоди́ти боле́зньми непоро́чными вои́стинну и сла́вным свои́м житие́м. Песнь 4 Ирмос: Седя́й в сла́ве на Престо́ле Божества́ во о́блаце ле́гце, прии́де Иису́с Пребоже́ственный, Нетле́нною Дла́нию и спасе́ зову́щия: сла́ва, Христе́, си́ле Твое́й. Припев: Преподо́бне о́тче Гео́ргие, моли́ Бо́га о на́с. Поще́ньми, я́ко снедьми́, любоче́стно пита́яся, ду́шу твою́, блаже́нне, ны́не веселя́щуюся, предста́вил еси́ Творцу́ все́х, призва́вшему тя́ к вы́шней Боже́ственней сла́дости, ра́дующася. Припев: Преподо́бне о́тче Гео́ргие, моли́ Бо́га о на́с. Не́бо не́кое яви́лся еси́, дея́ньми, я́ко звезда́ми, укра́шен, нося́, я́коже со́лнце, Го́спода, твою́ ду́шу, я́ко луну́, озаря́юща и показу́юща Своея́ сла́вы прича́стника. Сла́ва Отцу́ и Сы́ну и Свято́му Ду́ху. Влады́ка, с небесе́ на́с ра́ди сше́д, Сио́н обре́те Боже́ственное вои́стинну жили́ще, иде́же все́лься ты́ жела́нием, я́коже ле́ствицею, к вы́шнему возше́л еси́ Сио́ну, в се́м до́льнем пожи́в. И ны́не и при́сно и во ве́ки веко́в. Ами́нь. Богородичен: Седя́й в не́дрех присносу́щно Роди́вшаго неопи́санно на Твои́х объя́тиих яви́ся ны́не, опи́санно седя́, Ро́ждшую Тя́ показа́в по рождестве́ Присноде́ву и и́стинно нетле́нну. Песнь 5 Ирмос: Ужасо́шася вся́ческая о Боже́ственней сла́ве Твое́й: Ты́ бо, неискусобра́чная Де́во, име́ла еси́ во утро́бе над все́ми Бо́га, и родила́ еси́ Безле́тнаго Сы́на, все́м, воспева́ющим Тя́, ми́р подава́ющая. Припев: Преподо́бне о́тче Гео́ргие, моли́ Бо́га о на́с. Удиви́шася а́нгели и все́ преподо́бных сосло́вие, вои́стинну непреста́нное боле́зней твои́х зря́ще и жития́ жесто́кое: ты́ бо, я́ко безду́шный боле́знуя ка́мень, сконча́л еси́ доброде́телей исправле́ние. Припев: Преподо́бне о́тче Гео́ргие, моли́ Бо́га о на́с. Вся́ку просия́ у́бо ду́шу вели́кий, вся́ исполня́я светоли́тия и тмы́ свобожда́я страсте́й, я́коже чисте́йшее и ны́не со́лнце, испуща́я спаси́тельное движе́ние. Сла́ва Отцу́ и Сы́ну и Свято́му Ду́ху. Оте́чества устрани́лся еси́ твоего́, му́дре Гео́ргие, па́че подоба́ющих житию́ Христа́ возлюби́в устра́ньшагося челове́ком. Те́мже бы́л еси́ Тому́ досто́ин, го́рния удостоя́емь благода́ти. И ны́не и при́сно и во ве́ки веко́в. Ами́нь. Богородичен: Украси́ла еси́, Чи́стая, Ты́ челове́ков исполне́ние: Ты́ бо яви́лася еси́ простра́ннейши небе́сныя широты́, ро́ждшая Бо́га Сло́во, я́ко ко́жу, небеса́, Отрокови́це, просте́ршаго и земны́я возсозда́вшаго. Песнь 6 Ирмос: Возопи́, прообразу́я погребе́ние тридне́вное, проро́к Ио́на, в ки́те моля́ся: от тли́ изба́ви мя́, Иису́се, Царю́ си́л. Припев: Преподо́бне о́тче Гео́ргие, моли́ Бо́га о на́с. Возопи́л еси́ к Бо́гу с непреста́нными слеза́ми, и жития́, я́ко от ки́та, лю́таго тя́ спасе́ к небу́рным и приснотеку́щим исто́чником обоже́ния. Припев: Преподо́бне о́тче Гео́ргие, моли́ Бо́га о на́с. Четвероуго́льну доброде́телей ли́к тя́ поста́ви сте́ну, блаже́нне, мы́сленных враго́в не боя́щася верхостреля́ний, я́ко кре́пок бо, побежда́еши искуси́теля. Сла́ва Отцу́ и Сы́ну и Свято́му Ду́ху. Я́ко овча́, в Хози́в честны́й прите́кл еси́, дея́нии же, я́ко жезло́м, подпира́яся, к Еде́му напра́вил еси́ того́ вруче́ныя о́вцы. И ны́не и при́сно и во ве́ки веко́в. Ами́нь. Богородичен: Всели́ся я́ко Челове́к во утро́бу Твою́ Госпо́дь, челове́ка мя́ нетле́нных се́л сподобля́я, презира́я моя́ дея́ния беззако́нная, Чи́стая, и прегреше́ния. Кондак, глас 4 Яви́лся еси́ свети́ло пресве́тлое, Гео́ргие, озаря́я Боже́ственными заря́ми ве́рно зову́щия ти́: моли́ о на́с Влады́ку Христа́, я́вльшагося во струя́х и просве́щшаго земноро́дныя. Песнь 7 Ирмос: Не послужи́ша тва́ри богому́дрии, па́че Созда́вшаго, но, о́гненное преще́ние му́жески попра́вше, ра́довахуся, пою́ще: препе́тый отце́в Госпо́дь и Бо́г, благослове́н еси́. Припев: Преподо́бне о́тче Гео́ргие, моли́ Бо́га о на́с. Не вда́л еси́ себе́, боле́зньми изнуря́емь поще́ния, сатани́нским помысло́м: у́м бо нескита́телен к могу́щему спаса́ти Го́споду ты́ стяжа́в, вся́к прило́г оттря́сл еси́. Припев: Преподо́бне о́тче Гео́ргие, моли́ Бо́га о на́с. Низулежа́ньми, бде́ньми и поще́ньми твоя́ вся́ умертви́л еси́ у́ды, я́же на земли́, и ны́не нетле́нную и неболе́зненную жи́знь живе́ши, блаже́нне, о на́с моля́ся, пою́щих тя́ с любо́вию. Сла́ва Отцу́ и Сы́ну и Свято́му Ду́ху. Присносу́щаго Гро́б возжела́л еси́ кра́йне ви́дети и поклони́тися, му́дре, и, та́мо бы́в, изво́лил еси́ преподо́бно воздержа́нием соумертви́тися, преподо́бне, за милосе́рдие Умертви́вшемуся. И ны́не и при́сно и во ве́ки веко́в. Ами́нь. Богородичен: Не послужи́ша тва́ри, и́же Творца́ Тя́ позна́вшии Ро́ждшую, но Бо́га и́стинна, из Тебе́ возсия́вшаго Сло́ва, ве́дуще, Отрокови́це, зову́т: отце́в Госпо́дь и Бо́г, благослове́н еси́. Песнь 8 Ирмос: О́троки благочести́выя в пещи́ Рождество́ Богоро́дичо спасло́ е́сть, тогда́ у́бо образу́емое, ны́не же де́йствуемое, вселе́нную всю́ воздвиза́ет пе́ти Тебе́: Го́спода по́йте, дела́, и превозноси́те Его́ во вся́ ве́ки. Припев: Преподо́бне о́тче Гео́ргие, моли́ Бо́га о на́с. Отню́д дрема́ния твои́м ве́ждам, ниже́ сна́ твои́м очесе́м, о́тче, да́л еси́, до́ндеже сотвори́л еси́ ме́сто, уго́дно тебе́ сама́го, и селе́ние Вседержи́теля, Его́же вся́ пою́т дела́ и превозно́сят во ве́ки. Припев: Преподо́бне о́тче Гео́ргие, моли́ Бо́га о на́с. Обре́л еси́ возме́здие трудо́в безме́рных, всеблаже́нне, ра́й, его́же предугото́ва того́ жела́ющим от души́ Госпо́дь, о́бщее ца́рство зову́щим непреста́нно: по́йте и превозноси́те Его́ во ве́ки. Сла́ва Отцу́ и Сы́ну и Свято́му Ду́ху. Обре́те оби́тель Хози́вская тя́ пра́вило и изве́стнейший о́браз, вся́к проше́дша доброде́тельных дея́ний ви́д, преподо́бных похвало́, му́дре Гео́ргие. Те́мже пожи́вше боже́ственне, с тобо́ю игра́ют во вся́ ве́ки. И ны́не и при́сно и во ве́ки веко́в. Ами́нь. Богородичен: Яви́ся про́ст Боже́ственным естество́м, из Тебе́, Богороди́тельнице, вои́стинну сло́жен за неизрече́нную ми́лость Свои́м Божество́м, пло́ть от крове́й Твои́х прие́м. Те́мже Тя́, Богоро́дицу, ве́дуще, песносло́вим во вся́ ве́ки. Песнь 9 Ирмос: Вся́к земноро́дный да взыгра́ется, Ду́хом просвеща́емь, да торжеству́ет же безпло́тных умо́в естество́, почита́ющее свяще́нное торжество́ Богома́тере, и да вопие́т: ра́дуйся, Всеблаже́нная Богоро́дице, Чи́стая Присноде́во. Припев: Преподо́бне о́тче Гео́ргие, моли́ Бо́га о на́с. Вся́кую сла́дость жития́ оплева́л еси́ вы́шния ра́ди сла́дости, жесто́кому бо пребыва́нию па́че сла́дкаго жития́ поревнова́л еси́ и страсте́й потща́лся еси́ угаси́ти пе́щь мно́гими твои́ми слеза́ми, Гео́ргие, мона́шествующих честно́е украше́ние. Припев: Преподо́бне о́тче Гео́ргие, моли́ Бо́га о на́с. Ны́не я́ко вои́стинну пред Бо́гом стои́ши, всему́дре, Ему́же воздержа́нием присво́итися пе́рвее потща́лся еси́ и Того́ явле́ний наслажда́ешися я́ве. Те́мже все́м дава́й, чту́щим тя́, просвеще́ние и Боже́ственных прича́стие. Сла́ва Отцу́ и Сы́ну и Свято́му Ду́ху. Взя́лся еси́ к Све́ту незаходи́мому, сла́вне, тмы́ жития́ изба́вився, и Вседержи́телю и Трисо́лнечному Све́ту предстои́ши с вы́шними чи́нми, и отону́дныя наслажда́ешися испуща́емыя све́тлости, блаже́нне, и на́с озаря́еши, пою́щих тя́. И ны́не и при́сно и во ве́ки веко́в. Ами́нь. Богородичен: Всего́ мя́ Бо́г обожи́ти хотя́, ве́сь едини́тся Тебе́, и непости́жное все́м та́инство новоде́йствуется: ражда́еши, Де́ва нетле́нна, и пло́ть ви́дится Бо́г. Его́же чту́ще, Тя́ ны́не блажи́м, Мари́е, я́коже Сама́ прорекла́ еси́.

Минея, 26 Июня, Кано́н пе́рвый, имы́й краегране́сие сицево́: О Благода́тная, Ты облагодати́ ми препро́ста сло́ва песнь Глас 8 Песнь 1 Ирмос: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:/ Изба́вителю и Бо́гу на́шему пои́м. Припев: Пресвята́я Богоро́дице, спаси́ на́с. О Тро́ице Вседержи́тельная и Еди́нице Трисо́лнечная!/ Ду́шу мою́, и се́рдце, и ум, молю́, просвети́вши и благода́тию освяти́вши,/ к Боже́ственней Твое́й любви́, Преблага́я, возведи́/ и наста́ви благоче́стно пе́ти благосе́рдие Присноде́вы Благослове́нныя. Припев: Пресвята́я Богоро́дице, спаси́ на́с. Блага́го Царя́ Блага́я Ма́ти,/ Я́же всем благопослу́шная в проше́ниих и всеси́льная в благодея́ниих,/ благода́ть све́та Твоего́ и нам возсия́й и облагодати́ днесь, о Богоблагода́тная,/ песнь Тебе́ пе́ти начина́ющая. Сла́ва Отцу́ и Сы́ну и Свято́му Ду́ху. Лико́м А́нгельским вино́вно есть ра́дости/ Твоего́, Влады́чице, настоя́щаго торжества́ славосло́вие:/ си́и бо днесь дви́жутся к похвале́нию;/ мы же, бре́ннии, что́ Ти принесе́м?/ то́чию усе́рдная благода́рствия. И ны́не и при́сно и во ве́ки веко́в. Ами́нь. Арха́нгельский глас пое́м Ти:/ ра́дуйся, Чи́стая, а́ще и недосто́йни есмы́./ За бла́гость у́бо сей приими́, Влады́чице,/ све́том ми́лости Твоея́ нас просвеща́ющи/ и благода́ть всем подаю́щи. Песнь 3 Ирмос: Утвержде́й в нача́ле небеса́ ра́зумом/ и зе́млю на вода́х основа́вый,/ на ка́мени мя, Христе́, за́поведей Твои́х утверди́,/ я́ко несть свят, па́че Тебе́, еди́не Человеколю́бче. Припев: Пресвята́я Богоро́дице, спаси́ на́с. Гряди́те, ве́рнии, на пресла́вное виде́ние,/ зри́те на высоте́ благоле́пно сия́ющу пречи́стым Свои́м о́бразом Де́ву Пречи́стую,/ нас благода́тно посеща́ющу, благове́рно пою́щих:/ несть пречи́сты, па́че Тебе́, Влады́чице. Припев: Пресвята́я Богоро́дице, спаси́ на́с. Освяща́ется, Богоро́дице, Твое́ю благода́тию всяк ум ве́рных/ и возвыша́ется чу́дным ико́ны Твоея́ прише́ствием,/ ю́же благоче́стно почита́ющих и Тебе́ ве́рно сла́вящих,/ сподо́би, Влады́чице, нас, рабо́в Твои́х, Вы́шняго прича́стия. Сла́ва Отцу́ и Сы́ну и Свято́му Ду́ху. Даждь нам ненаве́тно Небе́сную ше́ствовати стезю́, Богоневе́стная,/ на Боже́ственная дея́ния нас укрепля́ющи,/ я́ко да Твои́м, Де́во, заступле́нием/ злоко́зненнаго путе́й укло́ньшеся, присносу́щныя сла́вы бу́дем о́бщницы. И ны́не и при́сно и во ве́ки веко́в. Ами́нь. А́нгелов Творца́, и́стиннаго Све́та Христа́,/ неизрече́нно из Тебе́, Богома́ти, возсия́вшаго луча́ми,/ омраче́нныя на́ша ду́ши и сердца́ просвети́/ и благода́тию Твое́ю, о Благода́тная, освяти́,/ к Го́рняго све́та раче́нию наставля́ющи. Седален, глас 4 Я́ко дре́вняго вои́стинну киво́та честне́йший Твой пречи́стый о́браз, Влады́чице!/ Па́че бо иле́ктра блиста́яся,/ повсю́ду неоску́дно лучи́ ми́лости Твоея́ всем, явля́я, простира́ет/ и чту́щия пресла́вное прише́ствие его́ благода́тию Бо́жиею ми́лостивно соблюда́ет./ О не́мже, Влады́чице, мы, ра́дующеся, усе́рдно пра́зднуем/ и ма́тернее Твое́ к нам милосе́рдие прославля́ем. Песнь 4 Ирмос: Ты моя́ кре́пость, Го́споди,/ Ты моя́ и си́ла,/ Ты мой Бог, Ты мое́ ра́дование,/ не оста́вль не́дра Отча/ и на́шу нищету́ посети́в./ Тем с проро́ком Авваку́мом зову́ Ти/ си́ле Твое́й сла́ва, Человеколю́бче. Припев: Пресвята́я Богоро́дице, спаси́ на́с. Творе́ц всех и Созда́тель, вседержи́тельною си́лою нося́й вся́ческая,/ о́бразом Свои́м Боже́ственным и Твои́м, Де́во, днесь чудоно́сным пресла́вно прии́де,/ на руку́ Твое́ю, Чи́стая, носи́м, на спасе́ние челове́ком и исцеле́ние. Припев: Пресвята́я Богоро́дице, спаси́ на́с. Неизрече́нному Бо́жию дарова́нию, ико́не Све́та Христа́ и Пречи́стыя Де́вы,/ прииди́те, ве́рнии, поклони́мся и с любо́вию припаде́м, вопию́ще:/ низпосли́, о Благоде́телю, ро́ждшия Тя ра́ди Присноде́вы Благосе́рдыя,/ благода́ть и ми́лость нам, рабо́м Твои́м. Сла́ва Отцу́ и Сы́ну и Свято́му Ду́ху. А́нгелов Цари́це, мы́сленный киво́те, зако́ннаго па́че киво́та пречи́стый Твой о́браз/ неизрече́нными чудесы́ и благода́тьми Бог украси́ и просла́ви/ и А́нгелом почита́ти того́ повеле́:/ с ни́миже о нас Ему́, о Всепе́тая, моли́ся,/ сла́вящих спаси́тельное Его́ смотре́ние,/ и Твое́ е́же бы нам спасе́ние улучи́ти. И ны́не и при́сно и во ве́ки веко́в. Ами́нь. Я́же по благода́ти дарова́нная от Бо́га Помо́щнице нам всем, христиа́ном,/ Того́ моли́, Всеблага́я и Всенепоро́чная,/ я́ко да пре́зрит на́ша безчи́сленная согреше́ния и изба́вит пла́меннаго томле́ния,/ и тьмы кроме́шния, и му́ки вся́кия. Песнь 5 Ирмос: У́тренюет дух мой к Тебе́, Бо́же,/ от Отца́ рожде́нному неизрече́нно/ и воздви́гнувшему рог спасе́ния нам. Припев: Пресвята́я Богоро́дице, спаси́ на́с. Ты, о Благода́тная,/ в ми́лостивом Твое́м днесь благоволе́нии/ боголе́пным явле́нием страну́ на́шу благода́тно просвети́ла еси́/ и та́инственное све́та Твоего́ просвеще́ние ми́ру низпосла́ла еси́,/ к све́ту Вы́шния сла́вы, Богоро́дице, ве́рныя возводя́щи. Припев: Пресвята́я Богоро́дице, спаси́ на́с. Омрачи́хомся по́мыслы, отягчи́хомся грехи́,/ недоуме́ем светоно́сныя благода́ти и ми́лости Твоея́ испове́дати, Влады́чице,/ но, о Пресвята́я Де́во,/ просвети́ нас и обогати́ та́инственными Твои́ми дарова́нии Боже́ственных жела́ний,/ к све́ту пра́ваго пути́ направля́ющи. Сла́ва Отцу́ и Сы́ну и Свято́му Ду́ху. Благоче́стно отвсю́ду, о Богома́ти,/ к пречестне́й Твое́й ико́не притека́ющия,/ и усе́рдно покланя́ющияся, и ве́рно ве́зде Тя призыва́ющия/ предвари́, от бед вся́ких спаса́ющи, и лю́тых неду́г избавля́ющи,/ и ду́хи лука́выя прогоня́ющи,/ тишину́ и здра́вие подаю́щи всем, Влады́чице. И ны́не и при́сно и во ве́ки веко́в. Ами́нь. Лю́тыми помышле́нии и скве́рными воспомина́нии/ от лука́вых враго́в стужа́емых зе́льне, не оста́ви нас, ниже́ пре́зри, Богороди́тельнице,/ но осени́ Твое́ю благода́тию, покрыва́ющи от сих, и заступа́ющи,/ и спаса́ющи от всех их наве́т, о Богоблаже́нная! Песнь 6 Ирмос: Моли́тву пролию́ ко Го́споду/ и Тому́ возвещу́ печа́ли моя́,/ я́ко зол душа́ моя́ испо́лнися/ и живо́т мой а́ду прибли́жися,/ и молю́ся, я́ко Ио́на:/ от тли, Бо́же, возведи́ мя. Припев: Пресвята́я Богоро́дице, спаси́ на́с. Ае́р простра́нный и земля́ на́ша, Цари́це, в пресла́вном Твоея́ ико́ны прише́ствии/ чуде́с и Боже́ственных даро́в благода́тию Твое́ю испо́лнися,/ во утвержде́ние благоче́стия и всех ве́рных, Всепе́тая,/ е́юже днесь и супоста́ты низлага́ются/ и сла́вящия Тя кре́пце утвержда́ются. Припев: Пресвята́я Богоро́дице, спаси́ на́с. Гра́де Бо́жий, селе́ние Свято́е, Де́во Богоневе́стная,/ сохрани́ от сопроти́вных нахожде́ния и от всех наве́т вра́жиих святы́й дом Твой/ и вся гра́ды и страны́ христиа́нския, любо́вию пою́щия Тя/ и ве́рно почита́ющия пречи́стый о́браз Твой. Сла́ва Отцу́ и Сы́ну и Свято́му Ду́ху. Освяще́ние, здра́вие и спасе́ние всегда́ подава́й/ душа́м же и телесе́м на́шим, о Ма́ти Бо́жия,/ благоче́стно покланя́ющимся ико́не Твое́й Боже́ственней,/ и усты́ и се́рдцем благогове́йно ю со стра́хом целу́ющим,/ и ве́рою от души́ Тя песносло́вящим. И ны́не и при́сно и во ве́ки веко́в. Ами́нь. Держа́вный покро́в и сте́ну необори́му стяжа́вше Тя, Присноде́во Богоро́дице,/ упова́ние на Тя с Бо́гом возлага́ем, ве́рнии, и приле́жно мо́лим:/ си́лою Твое́ю стре́лы вра́жия и ко́зни вся бесо́вския не́мощны, я́ко младе́нчески, покажи́/ и неде́йственны, кре́пкая на́ша Помо́щнице. Кондак, глас 8 Притеце́м, лю́дие, к Де́вей Богоро́дице Цари́це,/ благодаря́ще Христа́ Бо́га,/ и, к Тоя́ чудотво́рней ико́не, уми́льно взира́ющи, припаде́м и возопие́м Ей:/ о Влады́чице Мари́е,/ присети́вше страну́ сию́ Твоего́ честна́го о́браза явле́нием чуде́сно,/ спаса́й в ми́ре и благовре́менстве оте́чество на́ше и вся христиа́ны,/ насле́дники показу́ющи Небе́сныя жи́зни,/ Тебе́ бо ве́рно зове́м:/ ра́дуйся, Де́во, ми́ра спасе́ние. Икос Пречу́дное явле́ние Богома́тере ви́дяще,/ на высоту́ доброде́телей взы́дем и ум на Не́бо возведе́м./ Сего́ бо ра́ди небоше́ственне прии́де, да привлече́т к высоте́ вопию́щия Ей си́це:/ ра́дуйся, благослове́нная Де́во, от всех родо́в Бо́гом избра́нная;/ ра́дуйся, Небе́сная Цари́це, Го́спода Бо́га Ма́ти и Творца́ вся́ческих./ Ра́дуйся, всера́достное А́нгелом пе́ние;/ ра́дуйся, всежела́тельное всего́ ми́ра зре́ние./ Ра́дуйся, неподви́жимое ве́ры благоче́стия основа́ние;/ ра́дуйся, всесве́тлое благода́ти позна́ние./ Ра́дуйся, Бо́жие к земны́м благоволе́ние;/ ра́дуйся, земны́х к Бо́гу возведе́ние./ Ра́дуйся, озло́бленным душа́м утеше́ние;/ ра́дуйся, всем ве́рным ско́рое поможе́ние./ Ра́дуйся, дарова́нная от Бо́га Предста́тельнице ро́ду христиа́нскому,/ его́же и соблюда́й приле́жно от вся́ких бед и зол, да зове́м Ти:/ ра́дуйся, Де́во, ве́рным спасе́ние. Песнь 7 Ирмос: Бо́жия снизхожде́ния/ огнь устыде́ся в Вавило́не иногда́,/ сего́ ра́ди о́троцы в пещи́, ра́дованною ного́ю,/ яко во цве́тнице, лику́юще, поя́ху:/ благослове́н еси́, Бо́же оте́ц на́ших. Припев: Пресвята́я Богоро́дице, спаси́ на́с. А́нгелом гове́йный о́браз Твой, Влады́чице,/ неизрече́нною при́сно благода́тию сия́ет и си́лою:/ днесь бо того́ дарова́нии земны́я просвеща́еши,/ и к Небе́сным наставля́еши, и к ве́чному животу́ устроя́еши/ за неизглаго́ланную Твою́ бла́гость, Богоблагода́тная. Припев: Пресвята́я Богоро́дице, спаси́ на́с. Твоего́ боголе́пнаго явле́ния, и пресла́внаго ико́ны прише́ствия, и чуде́с пучи́ны, Чи́стая,/ вити́йствующих уста́ ника́коже возмога́ют испове́дати;/ мы же, гру́бии, что́ возглаго́лем?/ то́чию: поми́луй и спаси́ нас, о Всеми́лостивая Влады́чице! Сла́ва Отцу́ и Сы́ну и Свято́му Ду́ху. Изве́стная ве́рных Помо́щнице и всех благи́х Пода́тельнице,/ приими́ нас, ве́рно припа́дающих и любо́вию вопию́щих Ти:/ поми́луй нас, Госпоже́, поми́луй нас,/ я́коже днесь, та́ко и во о́ный век,/ бу́ди нам Помо́щница и Засту́пница. И ны́не и при́сно и во ве́ки веко́в. Ами́нь. Ма́ти Бо́жия Милосе́рдая, ми́лости Твоея́ две́ри днесь отве́рзи нам/ и от уст мы́сленных волко́в исхити́,/ хотя́щих нас поглоти́ти и до конца́ погуби́ти;/ поми́луй, мо́лим Тя, о Влады́чице, поми́луй,/ не отврати́ посра́мленных раб Твои́х. Песнь 8 Ирмос: Покрыва́яй вода́ми превы́спренняя Своя́,/ полага́яй мо́рю преде́л песо́к/ и содержа́й вся,/ Тя пое́т со́лнце, Тя сла́вит луна́,/ Тебе́ прино́сит песнь вся тварь,/ я́ко Соде́телю всех во ве́ки. Припев: Пресвята́я Богоро́дице, спаси́ на́с. Изря́днии чи́нове Небе́снии благоче́стно благогове́ют пречи́стому Твоему́ о́бразу, Всечи́стая,/ и пречу́дному Его́ прише́ствию, под со́лнцем пресла́вну показа́вшуся/ и род правове́рный воздви́гшу пе́ти и сла́вити Сы́на Твоего́,/ я́ко Соде́теля всех во ве́ки. Припев: Пресвята́я Богоро́дице, спаси́ на́с. Пресла́вная днесь пою́ще, любе́зно А́нгелом гове́йной Твое́й ико́не покланя́емся,/ благогове́юще, о Госпоже́ Цари́це!/ Сла́вящее Тя оте́чество на́ше Боже́ственною Твое́ю благода́тию осени́,/ и на враги́ укрепи́, и ми́рно соблюди́. Сла́ва Отцу́ и Сы́ну и Свято́му Ду́ху. Ра́дости вина́ Всеблагослове́нная, ра́дуйся, Всенепоро́чная, ра́дуйся, Благода́тная,/ держа́ва на́ша и огражде́ние и спаси́тельное прибе́жище,/ спаси́ ны, рабы́ Твоя́, не иму́щия па́че Тебе́ к Бо́гу по́мощи,/ на Тя бо наде́емся и Тебе́ пое́м во ве́ки. И ны́не и при́сно и во ве́ки веко́в. Ами́нь. Еди́ну Тя жи́зни на́шея стяжа́хом с Бо́гом Храни́тельницу и кре́пку наде́жду спасе́ния:/ мо́лим Тя, о Благосе́рдая, и по кончи́не хода́тайствовати о нас,/ я́ко да бу́дущих стяза́ний изба́вимся/ и ми́лостива обря́щем Сы́на Твоего́ и Бо́га в День су́дный. Песнь 9 Ирмос: Ужасе́ся о сем не́бо/ и земли́ удиви́шася концы́,/ я́ко Бог яви́ся челове́ком пло́тски/ и чре́во Твое́ бысть простра́ннейшее небе́с./ Тем Тя, Богоро́дицу,/ А́нгелов и челове́к чинонача́лия велича́ют. Припев: Пресвята́я Богоро́дице, спаси́ на́с. Про́ста пути́ по ае́ру светоприя́тному ико́на Твоя́, Влады́чице, стезю́ проходя́щи,/ богодви́жимо и светоле́пно неизсле́димы стези́ творя́щи,/ ве́рныя в поднебе́сней благода́тию озари́, ве́рою вопию́щия:/ вои́стинну честне́йши всех еси́, Де́во Чи́стая. Припев: Пресвята́я Богоро́дице, спаси́ на́с. Сло́ва вити́йством превысо́ких Твои́х, Чи́стая, чуде́с/ ника́коже по достоя́нию украси́ти удо́бни есмы́,/ то́чию усе́рдне мо́лим Тя, Цари́це:/ да мо́лиши Сы́на Твоего́, Влады́ку и Царя́ всех,/ дарова́вшаго нам Тебе́, пресла́вную Помо́щницу,/ сподо́бити нас Небе́снаго Своего́ Ца́рствия. Сла́ва Отцу́ и Сы́ну и Свято́му Ду́ху. Песнь благода́рственно пе́ния за неизрече́нное Твое́ милосе́рдие,/ о Богоблагода́тная, от нас приими́,/ проше́ния на́ша в по́льзу исполня́ющи,/ и к высоте́ го́рней всех возведи́, ве́рно бо Ти зове́м:/ вои́стинну вы́шши всех еси́, Де́во Всенепоро́чная. И ны́не и при́сно и во ве́ки веко́в. Ами́нь. Ро́ди вси, ра́достно блажи́м Тя, Богоро́дице,/ я́ко ра́дости вся ны испо́лнила еси́/ пресла́вным прише́ствием ико́ны Твоея́, Пречи́стая./ Е́йже днесь покланя́ющеся, уми́льно мо́лим Тя:/ не забу́ди, Влады́чице, Твои́х рабо́в сподо́бити в бу́дущем ве́це избра́нных ра́дости. Светилен Пречи́стый о́браз Твой, и́мже присети́ла еси́ нас, Богоотрокови́це Де́во, чту́ще,/ пра́зднуем сего́ ны́не прише́ствие,/ от него́ благода́тию Сына́ Твоего́ и Твое́ю/ прие́млюще скорбе́й, и бед, и напа́стей избавле́ние,/ Ма́ти Бо́га Вы́шняго. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Пречи́стый о́браз Твой, и́мже присети́ла еси́ нас, Богоотрокови́це Де́во, чту́ще,/ пра́зднуем сего́ ны́не прише́ствие,/ от него́ благода́тию Сына́ Твоего́ и Твое́ю/ прие́млюще скорбе́й, и бед, и напа́стей избавле́ние,/ Ма́ти Бо́га Вы́шняго.

глас 4 Канон господина Феофана Песнь 1 Ирмос: Мо́ря чермну́ю пучи́ну,/ невла́жными стопа́ми,/ дре́вний пешеше́ствовав Изра́иль,/ крестообра́зными Моисе́овыма рука́ма,/ Амали́кову си́лу в пусты́ни победи́л есть. Ве́лия я́же па́че ума́, Влады́ко,/ Боже́ственнаго Твоего́ воплоще́ния, благодея́ния сия́ют нам,/ да́рове же и благода́ти, и Боже́ственныя све́тлости,/ благода́тно истека́ющия. Прише́л еси́, Христе́, све́тлости Божества́ испуща́я,/ пра́здника посреде́ явле́нно,/ пра́здник бо ра́достный спаса́емых еси́,/ и спасе́ния на́шего хода́тай. Прему́дрость, пра́вда, Го́споди,/ и избавле́ние у Бо́га Ты был еси́ нам,/ от земли́ к небе́сной преводя́ высоте́,/ и Дух Боже́ственный да́руя. Плоть Твоя́ истле́ния во гро́бе не ви́де, Влады́ко,/ но я́ко соста́вися кроме́ се́мене, тле́ния не прия́т,/ после́дованию естества́, пресу́щественно не рабо́тавшая. Песнь 3 Ирмос: Весели́тся о Тебе́ Це́рковь Твоя́, Христе́, зову́щи:/ Ты моя́ кре́пость Го́споди,/ и прибе́жище, и утвержде́ние. Вод животво́рных исто́чники отве́рзл еси́ Це́ркви,/ а́ще кто жа́ждет, усе́рдно да прихо́дит и пие́т, вопия́, Бла́же. От земли́ у́бо на не́бо вознести́ся, проявле́нно глаго́лал еси́:/ с небесе́ же Ду́ха посла́ти обеща́л еси́ Свята́го. Естество́м животворя́й и от Де́вы роди́выйся Госпо́дь,/ всем ве́рным дарова́ безсме́ртие, я́ко Благоутро́бен. Седален, глас 8 Стоя́ посреде́ святи́лища, преполовля́ющуся боже́ственно пра́зднику,/ жа́ждай, взыва́л еси́, да гряде́т ко Мне и пие́т,/ пия́й бо от сея́ Боже́ственныя Моея́ воды́,/ ре́ки из чре́ва источи́т веле́ний Мои́х,/ а и́же ве́рует в Мя, по́сланнаго от Боже́ственнаго Роди́теля, со Мно́ю просла́вится./ Сего́ ра́ди вопие́м Ти:/ сла́ва Тебе́, Христе́ Бо́же,/ я́ко бога́тно излия́л еси́ во́ды Твоего́ человеколю́бия рабо́м Твои́м. Слава, и ныне: Прему́дрости во́ду и жи́зни, источа́я ми́рови,/ всех, Спа́се, призыва́еши почерпсти́ спасе́ния во́ды,/ Боже́ственный бо зако́н Твой прии́м челове́к,/ в себе́ угаша́ет пре́лести у́глие,/ отону́дуже во ве́ки не вжа́ждет,/ ни преста́нет насыще́ния Твоего́, Влады́ко Царю́ Пренебе́сный./ Сего́ ра́ди сла́вим держа́ву Твою́, Христе́ Бо́же,/ прегреше́ний оставле́ние прося́ще низпосла́ти бога́тно рабо́м Твои́м. Песнь 4 Ирмос: Вознесе́на Тя ви́девши Це́рковь на Кресте́,/ со́лнце пра́ведное,/ ста в чи́не свое́м,/ досто́йно взыва́ющи:/ сла́ва си́ле Твое́й, Го́споди. Растерза́в сме́рти врата́ си́лою Твое́ю,/ пути́ жи́зни сказа́л еси́,/ безсме́ртия же две́ри отве́рзл еси́, ве́рою зову́щим:/ сла́ва си́ле Твое́й, Го́споди. Преполове́ние всех и коне́ц име́яй,/ и нача́ла, я́ко безнача́лен, обдержа́й,/ стал еси́ посреде́ вопия́:/ Боже́ственных, богому́дрии, прииди́те, даро́в наслади́теся. Я́ко Бог и всех име́яй власть,/ я́ко си́лен держа́ву низложи́в сме́рти,/ посла́ти обеща́лся еси́, Христе́, Ду́ха Свята́го,/ от Отца́ происходя́щаго. Богородичен: Дае́ши бога́тно благода́ть Тебе́ пою́щим,/ и из Тебе́ ро́ждшагося преве́чнаго Сло́ва, Ма́ти неискусобра́чная,/ прегреше́ний оставле́ние сим прося́щи, Пречи́стая. Песнь 5 Ирмос: Ты, Го́споди мой, Свет в мир прише́л еси́./ Свет Святы́й, обраща́яй из мра́чна неве́дения,/ ве́рою воспева́ющих Тя. Боже́ственных пра́здников преполове́ния дости́гше,/ соверше́нное боже́ственною доброде́телию обучи́тися потщи́мся, богому́дрии. Я́ко вои́стинну свяще́нное настоя́щее торжество́, преполове́ние,/ превели́ких бо пра́здников ко́рень и све́тится обою́ду. Богородичен: Ум арха́нгельский не мо́жет разуме́ти/ Твое́ неизрече́нное из Де́вы и пречи́стое рождество́, Спа́се Многоми́лостиве. Песнь 6 Ирмос: Пожру́ Ти со гла́сом хвале́ния, Го́споди,/ Це́рковь вопие́т Ти,/ от бесо́вския кро́ве очи́щшися,/ ра́ди ми́лости от ребр Твои́х/ исте́кшею кро́вию. Преполове́ние Пятдеся́тницы наста́ днесь,/ отсю́ду Боже́ственныя у́бо Па́схи,/ Боже́ственнейшею све́тлостию озари́вшееся,/ отону́дуже Уте́шителевою благода́тию сия́ющее. Глаго́лал еси́ в хра́ме, Христе́, предстоя́ иуде́йским собо́ром/ Свою́ сла́ву открыва́я, и предъявля́я сро́дство к Роди́телю. Богородичен: Бу́ди ми предста́тельница и стена́ неруши́мая,/ от мирски́х мя собла́знов избавля́ющая, еди́на Богороди́тельнице,/ и боже́ственным светоли́тием освеща́ющая. Кондак, глас 4 Пра́зднику зако́нному преполовля́ющуся,/ всех Тво́рче и Влады́ко,/ к предстоя́щим глаго́лал еси́, Христе́ Бо́же:/ прииди́те и почерпи́те во́ду безсме́ртия./ Те́мже Тебе́ припа́даем и ве́рно вопие́м:/ щедро́ты Твоя́ да́руй нам,/ Ты бо еси́ Исто́чник жи́зни на́шея. Икос: Олядене́вшую мою́ ду́шу прегреше́ний беззако́ньми,/ тече́ньми Твои́х крове́й напо́й,/ и покажи́ плодоно́сну доброде́тельми./ Ты бо рекл еси́ всем, е́же приходи́ти к Тебе́, Сло́ве Бо́жий Всесвяты́й,/ и во́ду нетле́ния почерпа́ти, живу́ю же и очища́ющую грехи́,/ пою́щих сла́вное и Боже́ственное Твое́ воста́ние,/ подая́, Благи́й, с высоты́ сше́дшую вои́стинну ученико́м Твои́м Ду́ха кре́пость,/ Тебе́ Бо́га ве́дущим,/ Ты бо еси́ исто́чник жи́зни на́шея. Песнь 7 Ирмос: В пещи́ Авраа́мстии о́троцы перси́дстей,/ любо́вию благоче́стия па́че,/ не́жели пла́менем опаля́еми взыва́ху:/ благослове́н еси́ в хра́ме сла́вы Твоея́, Го́споди. Кре́постию, Спа́се, сме́ртную разо́рь си́лу,/ стезю́ жи́зни показа́л еси́ челове́ком, благода́рно Тебе́ зову́щим:/ благослове́н еси́ в хра́ме сла́вы Твоея́, Го́споди. Плоть нося́ща ви́дяще,/ не разуме́ша собо́ри евре́йстии Сло́ве Тя Бо́жий,/ но мы Тебе́ воспева́ем:/ благослове́н еси́ в хра́ме сла́вы Твоея́, Го́споди. Богородичен: Вы́шняго освяще́нное боже́ственное селе́ние, ра́дуйся!/ Тобо́ю бо даде́ся ра́дость, Богоро́дице, вопию́щим:/ благослове́на Ты в жена́х еси́, Пренепоро́чная Влады́чице. Песнь 8 Ирмос: Ру́це распросте́р Дании́л,/ львов зия́ния в ро́ве затче́,/ о́гненную же си́лу угаси́ша,/ доброде́телию препоя́савшеся,/ благоче́стия рачи́тели о́троцы, взыва́юще:/ благослови́те, вся дела́ Госпо́дня, Го́спода. Красе́н из гро́ба воста́в, Божества́ сла́вою укра́шен,/ апо́столом Твои́м, Го́споди, яви́лся еси́,/ Ду́ха обеща́яся тем посла́ти де́йство, вопию́щим:/ благослови́те, вся дела́ Госпо́дня, Го́спода. Умертви́в а́да, я́ко Бог живонача́льнейший,/ всем источи́л еси́ живо́т ве́чный,/ его́же ны́не вообража́ют я́вственнее,/ светоно́сных дней сих ра́дости, вопию́щим:/ благослови́те, вся дела́ Госпо́дня, Го́спода. Лучи́, я́ко Со́лнце, Христе́, пра́вды яви́вся,/ ми́ру посла́л еси́ апо́столы Твоя́,/ нося́щия Тебе́ свет непостижи́мый,/ и неве́дения мглу очища́ющия и вопию́щия:/ благослови́те, вся дела́ Госпо́дня, Го́спода. Богородичен: Се ны́не оскуде́ я́ве от Иу́дина пле́мене князь и вождь,/ Ты бо, Всенепоро́чная, родила́ еси́,/ пре́жде обеща́нное ча́яние язы́ков, Христа́ Бо́га,/ Ему́же пое́м: благослови́те, вся дела́ Госпо́дня, Го́спода. Песнь 9 Ирмос: Ка́мень нерукосе́чный/ от несеко́мыя горы́ Тебе́, Де́во,/ краеуго́льный отсече́ся,/ Христо́с, совокупи́вый разстоя́щаяся естества́./ Тем веселя́щеся, Тя Богоро́дице велича́ем. Но́вому и чи́стому жи́тельству, от Христа́ научи́вшеся,/ сие́ да́же до конца́ сохрани́ти поле́зно вси потщи́мся,/ я́ко да Свята́го Ду́ха прише́ствие восприи́мем. Ты мое́ сме́ртное, Жизнода́вче,/ обложе́нием безсме́ртия, и нетле́ния благода́тию/ обле́к, Спа́се, совоскреси́л еси́,/ и Отцу́ приве́л еси́, вре́менную мою́ разруши́в брань. В небе́сное па́ки житие́ зва́ни бы́вше,/ хода́тайства си́лою истощи́вшагося да́же и до ра́бия о́браза, и нас возне́сшаго,/ Сего́ досто́йно возвели́чим. Богородичен: Я́ко ко́рень, исто́чник и вину́ нетле́ния,/ Тебе́, Де́во, вси ве́рнии уве́девше, похвала́ми почита́ем,/ Ты бо ипоста́сное безсме́ртие нам источи́ла еси́.

Глас 2 Пе́снь 1. Ирмо́с: Гряди́те, лю́дие, пои́м пе́снь Христу́ Бо́гу, разде́льшему мо́ре и наста́вльшему лю́ди, я́же изведе́ из рабо́ты еги́петския, я́ко просла́вися. Припев: Святи́и апóстоли, моли́те Бо́га о на́с. Ликоходя́ ра́достно небе́сная, священноде́лателю, селе́ния, благода́ть пода́ждь ми́, святу́ю твою́ па́мять боже́ственно воспева́ющему: ты́ бо просла́вился еси́. Струя́ми твои́х слове́с сердца́ напои́в, де́лати небе́сная, блаже́нне, разуме́ния пригото́вал еси́ ве́рою, апо́столе Филимо́не, досточу́дне. Священноде́йствуя свяще́нное Ева́нгелие, сия́нии Ду́ха ду́ши просвети́л еси́, изба́вив от тмы́ идолонеи́стовства, му́дре апо́столе. Богоро́дичен: Тя́ проро́ков дре́вле боже́ственное собра́ние многови́дными, Чи́стая, о́бразы издале́ча проначерта́, и́стинно еди́ну Влады́ку поро́ждшую. Пе́снь 3. Ирмо́с: Утверди́ на́с в Тебе́, Го́споди, дре́вом умерщвле́й гре́х, и стра́х Тво́й всади́ в сердца́ на́с, пою́щих Тя́. Стра́сти Христо́вы и воста́ние пропове́дуя, воздви́гнул еси́ я́ко от гро́ба неве́рия и ме́ртвости челове́ки, Филимо́не, достосла́вне. Они́сима боже́ственнаго и Филимо́на, Апфи́ю и Архи́ппа, зве́зды, просвеща́ющия концы́, свяще́нными песнопе́ньми восхва́лим. Ума́ зри́тельное очи́стивше, Боже́ственнаго получи́сте боговиде́ния и сердца́ возврати́сте заблу́ждшия к зна́нию, свяще́ннейшии. Богоро́дичен: Я́вльшися, Чи́стая и Всенетле́нная, прия́ла еси́ во утро́бе Бо́га Сло́ва, очи́стившаго естество́ на́ше, оскве́рншееся, Де́во, грехопаде́нием. Седа́лен, гла́с 8 Ра́лом сло́ва доброде́лая олядене́вшая сердца́, священноде́телю, Боже́ственное позна́ние де́лати пригото́вал еси́ и, низложи́в и́дольския хра́мы, созда́л еси́ це́ркви, блаже́нне, в сла́ву Созда́теля твоего́. Те́мже, соше́дшеся, святу́ю твою́ па́мять, Филимо́не, сла́вим, священнопросвеща́еми, и согла́сно вопие́м ти́: моли́ Христа́ Бо́га грехо́в оставле́ние дарова́ти чту́щим любо́вию святу́ю па́мять твою́. Сла́ва, и ны́не: Да ра́дуется Дави́д песнопи́сец, и да ликовству́ет Иоаки́м со А́нною, я́ко пло́д святы́й из ни́х произы́де, Мари́я светоно́сная, Боже́ственная свеща́, и ра́дуется, входя́щи в хра́м, Ю́же и, зря́, благослови́ Варахи́ин сы́н и, ра́дуяся, взыва́ше: ра́дуйся, Чу́до всеми́рное. Пе́снь 4. Ирмо́с: Пою́ Тя, слу́хом бо, Го́споди, услы́шах и ужасо́хся: до мене́ бо и́деши, мене́ ища́, заблу́ждшаго. Те́м мно́гое Твое́ снизхожде́ние, е́же на мя́, прославля́ю, Многоми́лостиве. Ве́трилом креста́ вперя́емь, преплы́л еси́ небу́рно лю́тую пучи́ну искуше́ний жития́, блаже́нне, мно́гия упра́вив пла́вающия к спасе́ния приста́нищу Боже́ственною благода́тию. Свети́ла светоза́рная предлага́ет боже́ственный гра́д Колосса́йский: свяще́ннаго Архи́ппа, Филимо́на же и Апфи́ю я́ве и Они́сима сла́внаго, просвеща́ющия ми́ра концы́. Боже́ственная река́ воскипе́ в се́рдце твое́м, богоглаго́ливе, и ре́ки уста́ви, и тече́ния безбо́жия, ду́ши же, иста́явшия зно́ем неве́дения, напои́ благода́тию, сла́вне. Богоро́дичен: Пою́ Тя и́стинно, Всепе́тая, препе́таго Бо́га Сло́ва преесте́ственно роди́вшую, и молю́ся смире́нныя моея́ души́ исцели́ти неду́ги, я́ко блага́ су́щи, Богоневе́стная. Пе́снь 5. Ирмо́с: Све́та Пода́телю и веко́в Тво́рче, Го́споди, во све́те Твои́х повеле́ний наста́ви на́с: ра́зве бо Тебе́, ино́го Бо́га не зна́ем. Неду́гующия ви́дя острупле́нием злы́х, сла́вне, и де́тельным твои́м сло́вом исцели́л еси́, Филимо́не, иногда́, идолонеи́стовством лю́те бе́дствующия. Спаси́тельныя пути́ заблу́ждшим лю́те показа́л еси́, я́ко неле́стный путево́ждь, Филимо́не, еди́н пу́ть Христа́ возлюби́ти ди́вно путево́дствил еси́. Пое́т све́тлый пра́здник Колосса́йская честна́я дне́сь ра́достно Христо́ва Це́рковь, боже́ственнаго Архи́ппа и богоглаго́ливаго чту́ще Филимо́на. Богоро́дичен: Влады́чице, спаси́ ны, обурева́емыя лю́тым волне́нием искуше́ний, и некро́тких ва́рварских нахожде́ний, и де́монских лю́тых наве́тов. Пе́снь 6. Ирмо́с: В бе́здне грехо́вней валя́яся, неизсле́дную милосе́рдия Твоего́ призыва́ю бе́здну: от тли́, Бо́же, мя́ возведи́. Не́бо яви́лся еси́, все́м веща́я сла́ву спаси́тельную тебе́ Просла́вльшаго и ученико́м Сочета́вшаго седмодеся́тным, му́чениче всебога́те. Устрани́вся оте́чества, стра́нным твои́м сло́вом устрани́вшияся Бо́га улови́л еси́ и Сио́на жи́тели, иера́рше Филимо́не, показа́л еси́. Доброде́тельми свяще́нными сия́ющи и све́тло Бо́гу утожда́ющи, к небесе́м востекла́ еси́, и со а́нгелы, Апфи́я, лику́ющи. Богоро́дичен: Воплоща́ется Сло́во во чре́ве Твое́м и за благоутро́бие познава́ется Челове́к, да Бо́га челове́ка соде́лает, Отрокови́це Всенепоро́чная. Конда́к, гла́с 2. Я́ко зве́зды всесве́тлыя, просвеща́ющия концы́, апо́столы Христо́вы восхва́лим, Филимо́на сла́внаго, и Архи́ппа свяще́ннаго, и Они́сима, и Ма́рка, и Аполло́са, с ни́миже и Апфи́ю всему́друю, вопию́ще: моли́те непреста́нно о все́х на́с. Пе́снь 7. Ирмо́с: О́бразу злато́му на по́ле Деи́ре служи́му, трие́ Твои́ о́троцы небрего́ша безбо́жнаго веле́ния, посреде́ же огня́ вве́ржени, ороша́еми, поя́ху: благослове́н еси́, Бо́же оте́ц на́ших. Кра́сны твоя́, Филимо́не, бы́вше честны́я но́зе, стези́ кро́тко ше́ствующия Ева́нгелия, и все́м ра́тным ми́р свяще́нный возвеща́ющия, и де́монская стремле́ния запина́ющия. Твои́х слове́с све́том Га́зян глубо́кая тма́ прогна́ся, священноде́латель я́ко свяще́ннейший в си́х бы́л еси́ изя́щнейший, вся́ упа́с и научи́в пе́ти, апо́столе: благослове́н Бо́г оте́ц на́ших. В пе́рвых твои́х приобщи́ся до́брых Га́зский гра́д: того́ бо яви́лся еси́ первопресто́льник и иера́рх спаси́тельный, я́ко священновеща́тель, Филимо́не, вопи́ти повелева́я: благослове́н Бо́г оте́ц на́ших. Возлюби́в Христа́, возлюби́вшаго земны́я за благоутро́бие, любо́вию врага́ ненави́димыя су́ща, люби́мичи соде́ял еси́, Филимо́не, Бо́га воспева́ющия: благослове́н Бо́г оте́ц на́ших. Богоро́дичен: Кре́пость смире́нных и све́щник све́тлый, боже́ственная трапе́за, гора́ и две́рь непрохо́дная, престо́л Бо́жий и пала́та, же́зл же Ааро́нов и ста́мна златоза́рна су́щи, Христа́, Ма́нну жи́зни, Де́во, нося́щи. Пе́снь 8. Ирмо́с: В пе́щь о́гненную ко отроко́м евре́йским снизше́дшаго и пла́мень в ро́су прело́жшаго Бо́га, по́йте дела́ я́ко Го́спода, и превозноси́те во вся́ ве́ки. Сло́во, я́ко свети́льник све́тлый возже́н, в твое́м се́рдце нося́, пре́жде угаше́нныя и во тме́ мно́зей лежа́щия неве́дения, сла́вне, к богозна́ния воздви́гл еси́ дню́. Свяще́нное твое́ к Бо́гу изше́ствие свяще́нными возвели́чися провожде́ньми апо́столов и безпло́тных умо́в, и́хже име́л еси́ на земли́ житие́, я́ко священнотаи́нник, Филимо́не богоглаго́ливе. Ми́ро сладково́нное я́ве иска́пав свяще́нных чуде́с, блаже́нне, облагово́нил еси́ смы́слы и помышле́ния благочести́вым и стра́сти злосмра́дныя отгна́л еси́ превознося́щих Христа́, му́дре Филимо́не. Я́коже зве́зды све́тлыя тве́рди, Це́ркве при́сно сия́юще, ку́пно Архи́пп чу́дный, Апфи́я, Филимо́н и Они́сим помышле́ния на́ша просвеща́ют. Богоро́дичен: Но́в ра́й на́м чре́во Твое́ и́стинно, Чи́стая, яви́ся, жи́зни Дре́во возраща́я и уме́ршия плодо́м Дре́ва па́ки в ра́й, оживотвори́вши, введе́, Богоро́дице. Пе́снь 9. Ирмо́с: От Бо́га Бо́га Сло́ва, неизрече́нною му́дростию прише́дшаго обнови́ти Ада́ма, я́дию в тле́ние па́дшаго лю́те, от Святы́я Де́вы неизрече́нно воплоти́вшагося на́с ра́ди, ве́рнии, единому́дренно пе́сньми велича́ем. Со свяще́ннейшим ли́ком свяще́нных апо́стол подо́бно жи́тельствуеши на небесе́х, Боже́ственным прича́стием обожа́емь, и све́том сия́я неизрече́нным, и ра́достию духо́вною, Филимо́не, при́сно исполня́емь. Я́ко чу́дный тво́й нра́в, я́ко добро́ и красно́ житие́ твое́, я́ко пресла́вно и успе́ние твое́, блаже́нне апо́столе, я́ко све́тлый де́нь, в не́мже оста́вив, я́же на земли́, на небе́сныя кру́ги возше́л еси́, веселя́ся. Дне́сь весели́тся вся́ Христо́ва Це́рковь, пра́зднственную ра́дость духо́вно соста́вльши в па́мяти твое́й, ю́же непоколе́блену спаси́ твои́ми к Спа́су и Бо́гу благоприя́тными моли́твами, Филимо́не свяще́ннейше. Ра́ка моще́й твои́х врачева́ний ка́пли источа́ет приходя́щим свяще́нно, блаже́нне Филимо́не апо́столе, неду́ги уставля́ет и все́х ду́ши освяща́ет, боже́ственную твою́ па́мять пра́зднующих всегда́. Богоро́дичен: Но́сиши Нося́щаго вся́ и пита́еши Пита́ющаго, о́браз Рождества́ ника́коже ве́дящи, Всенепоро́чная, па́че ума́ Твое́ чу́до, а́нгелы ужаса́ющее и челове́ки, ве́дущия Тя́ еди́ну Де́ву Богома́терь.

Минея, 14 Июля, Кано́н преподо́бнаго Стефа́на Глас 4 Песнь 1 Ирмос: Отве́рзу усти́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,/ и воспою́, ра́дуяся, Тоя́ чудеса́. Припев: Преподо́бне о́тче Стефа́не, моли́ Бо́га о на́с. Сло́во ми пода́ждь, Сло́ве Бо́жий, во отверзе́ние недосто́йных уст мои́х,/ и очи́сти се́рдце мое́,/ я́ко да возмогу́ по достоя́нию воспе́ти преподо́бнаго Твоего́. Припев: Преподо́бне о́тче Стефа́не, моли́ Бо́га о на́с. Его́же Сам просла́вил еси́, Христе́ Спа́се мой,/ просла́вити да́руй ми честно́е торжество́ Стефа́на преподо́бнаго, Твоего́ уго́дника,/ нача́льника мона́хов и оби́тели утвержде́ние. Сла́ва Отцу́ и Сы́ну и Свято́му Ду́ху. Триипоста́сным Све́том Божества́ просвети́л еси́ се́рдце, преподо́бне,/ от ю́ности мирска́го пристра́стия возгнуша́вся,/ и Небе́сная восприя́л еси́ наслажде́ния. И ны́не и при́сно и во ве́ки веко́в. Ами́нь. Богородичен: Без се́мене О́тчею во́лею от Боже́ственнаго Ду́ха Бо́жия Ты зача́т Сы́на,/ пло́тию родила́ еси́ на́шего ра́ди спасе́ния. Песнь 3 Ирмос: Твоя́ песносло́вцы, Богоро́дице,/ живы́й и незави́стныи Исто́чниче,/ лик себе́ совоку́пльшия, духо́вно утверди́,/ в Боже́ственней Твое́й сла́ве/ венце́в сла́вы сподо́би. Припев: Преподо́бне о́тче Стефа́не, моли́ Бо́га о на́с. Возмуще́ния мо́ря жите́йскаго избе́г, преподо́бне Стефа́не,/ в пусты́ню безмо́лвия по́стническаго пребыва́ния/ всели́лся еси́, ра́дуяся, блаже́нне. Припев: Преподо́бне о́тче Стефа́не, моли́ Бо́га о на́с. Воздержа́нием плоть свою́ и бде́нии ча́стыми удручи́л еси́, преподо́бне,/ и, пусты́нная претерпе́в озлобле́ния,/ стремле́ния лю́тых страсте́й уста́вил еси́, Стефа́не. Сла́ва Отцу́ и Сы́ну и Свято́му Ду́ху. На па́житех живо́тных слове́сное ста́до ученико́в твои́х му́дре упа́сл еси́/ и на зла́це воздержа́ния, Стефа́не,/ от волко́в мы́сленных невреди́мо сохрани́л еси́. И ны́не и при́сно и во ве́ки веко́в. Ами́нь. Богородичен: Ве́дуще, благоче́стно пропове́дуем Тя/ и́стинную Ма́терь Бо́жию, Пренепоро́чная:/ Тобо́ю бо к нам Зижди́тель прибли́жися. Седален, глас 8 Оте́чество свое́ оста́вил еси́, преподо́бне,/ я́коже Авраа́м други́й, пресе́льник быв,/ и в пусты́ню всели́лся еси́, крест свой взем,/ Христу́ после́довав, плоть свою́ воздержа́нием, и труды́, и пусты́нными озлобле́нии умертви́л еси́,/ и ста́до мона́хов собра́л еси́,/ и по сме́рти от Бо́га бдагода́ть прия́л еси́ неду́ги исцеля́ти/ с ве́рою приходя́щим к честне́й твое́й ра́це, Стефа́не преподо́бне,/ моли́ Христа́ Бо́га согреше́нием оставле́ние дарова́ти/ чту́щим любо́вию святу́ю па́мять твою́. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Во искуше́ния многоплете́нная впад от враг ви́димых и неви́димых,/ бу́рею одержу́ся безчи́сленных мои́х прегреше́ний/ и я́ко к те́плому заступле́нию и покро́ву моему́, Чи́стая, притека́ю./ Тем, Пресвята́я, из Тебе́ Вопло́щшагося без се́мене моли́/ о всех рабе́х Твои́х, непреста́нно пою́щих Тя,/ согреше́ний оставле́ние им дарова́ти. Песнь 4 Ирмос: Седя́й в Сла́ве на Престо́ле Божества́/ во о́блаце ле́гце,/ прии́де Иису́с Пребоже́ственный/ Нетле́нною Дла́нию и спасе́ зову́щия:/ сла́ва, Христе́, си́ле Твое́й. Припев: Преподо́бне о́тче Стефа́не, моли́ Бо́га о на́с. Оте́чество свое́, я́коже иногда́ Авраа́м, оста́вил еси́, преподо́бне Стефа́не,/ и, на землю обетова́нную пресели́вся,/ Го́рняго Иерусали́ма насле́дник изря́ден показа́лся еси́, Богому́дре. Припев: Преподо́бне о́тче Стефа́не, моли́ Бо́га о на́с. Страннолю́бие, я́коже Авраа́м пра́отец дре́вле, стяжа́л еси́,/ и, я́коже он, служи́тель и друг Бо́гу нарече́ся,/ и Сего́ ты в се́рдце твое́м чистоты́ ра́ди жития́ твоего́ всели́л еси́, Стефа́не. Сла́ва Отцу́ и Сы́ну и Свято́му Ду́ху. Заря́ми чуде́с облиста́лся еси́, Стефа́не Богоприя́тне,/ грехми́ отемне́нное се́рдце мое́ све́том твои́х моли́тв просвети́,/ я́ко да и аз благода́рственно воспою́ па́мять твою́. И ны́не и при́сно и во ве́ки веко́в. Ами́нь. Богородичен: Сни́де, я́ко дождь на руно́, во утро́бу Твою́ Госпо́дь,/ я́коже рече́ дре́вле проро́к, Всенепоро́чная, Ему́же взыва́ем:/ сла́ва си́ле Твое́й, Го́споди. Песнь 5 Ирмос: Нечести́вии не у́зрят Сла́вы Твоея́, Христе́,/ но мы Тя, Единоро́дне,/ Оте́ческия Сла́вы Сия́ние Божества́,/ от но́щи у́тренююще,/ воспева́ем Тя, Человеколю́бче. Припев: Преподо́бне о́тче Стефа́не, моли́ Бо́га о на́с. Влады́це своему́ Христу́ подо́бяся, во́льную страсть претерпе́вшему,/ распя́лся еси́ ми́рови и страсте́м, Стефа́не Богоприя́тне,/ и ны́не све́тло прославля́ешися, лику́я во Ца́рствии Его́. Припев: Преподо́бне о́тче Стефа́не, моли́ Бо́га о на́с. Исто́чник исцеле́ний показа́ся ра́ка моще́й твойх, Стефа́не,/ к не́йже вси с ве́рою притека́ющии разли́чных неду́г и страсте́й избавля́ются/ богоприя́тными твои́ми моли́твами. Сла́ва Отцу́ и Сы́ну и Свято́му Ду́ху. Во пло́ти ме́ртвенней безпло́тным подо́бяся,/ жития́ чистото́ю, Богому́дре,/ безпло́тных враг мы́сленная ополче́ния, Стефа́не, до конца́ низложи́л еси́. И ны́не и при́сно и во ве́ки веко́в. Ами́нь. Богородичен: Тя ору́жие непобеди́мое на враги́ предлага́ем,/ Тя держа́ву и наде́жду на́шему спасе́нию, Богома́ти, стяжа́хом. Песнь 6 Ирмос: Приидо́х во глубины́ морски́я,/ и потопи́ла мя есть бу́ря мно́гих грехо́в,/ но, я́ко Бог, из глубины́ возведи́ живо́т мой, Многоми́лостиве. Припев: Преподо́бне о́тче Стефа́не, моли́ Бо́га о на́с. В пусты́нях всели́лся еси́, бе́гая сла́вы су́етныя, я́коже дре́вле вели́кий Анто́ний,/ те́мже обре́те Боже́ственную кончи́ну/ и по сме́рти сия́еши чудесы́, преподо́бне. Припев: Преподо́бне о́тче Стефа́не, моли́ Бо́га о на́с. Кто изрещи́ возмо́жет труды́ твоя и бде́ния, Богому́дре Стефа́не,/ и́хже ра́ди возме́здие от Бо́га по достоя́нию восприя́л еси́,/ по свое́й сме́рти разли́чныя неду́ги исцеля́ти. Сла́ва Отцу́ и Сы́ну и Свято́му Ду́ху. Те́ло свое́ моли́твами и посто́м удручи́л еси́,/ ду́шу же свою́ благодея́нии просвети́л еси́/ и се́рдце свое́ от скверн плотски́х очи́стил еси́,/ те́мже прия́телище Ду́ху Пресвято́му, Стефа́не, показа́ся. И ны́не и при́сно и во ве́ки веко́в. Ами́нь. Богородичен: О чу́до, всех чуде́с превы́шшее:/ я́ко Де́ва, во чре́ве вся́ческая Содержа́щаго сло́вом неискусому́жно прии́мши,/ без истле́ния родила́ еси́. Кондак, глас 8 Чистото́ю душе́вною боже́ственно вооружи́вся,/ блаже́нную жизнь соверши́л еси́,/ в пусты́ню, я́ко во град, всели́вся,/ благода́ть прия́л еси́ от Бо́га/ исцеля́ти неду́ги приходя́щим к честне́й твое́й ра́це/ и всех возвыша́ти к Боже́ственней высоте́,/ те́мже, име́я дерзнове́ние ко Святе́й Тро́ице,/ помина́й нас, чту́щих па́мять твою́, да зове́м ти:/ ра́дуйся, преподо́бне Стефа́не, по́стником удобре́ние. Икос Разу́мнаго свети́льника, вся озаря́юща чудесы́ исцеле́ний,/ во смире́нии и кро́тости Влады́ки всех Христа́ подража́теля и столпа́ утвержде́ния,/ и́ноком наста́вника, равноа́нгельно на земли́ пожи́вша,/ неви́димыя враги́ си́лою кре́стною до́бльственне ннзложи́вша/ и плотска́я мудрова́ння ду́хови повину́вша,/ в страннолю́бии же и в ми́лостыни неоску́днаго и в благодея́ниих прекра́снаго,/ преподо́бнаго Се́ргия спо́стника же и собесе́дника,/ Боже́ственнаго кри́на, в пусты́нных удо́лиих процве́тшаго, восхва́лим, зову́ще:/ ра́дуйся, преподо́бне Стефа́не, по́стником основа́ние. Песнь 7 Ирмос: Ю́ноши три в Вавило́не,/ веле́ние мучи́телево на бу́йство прело́жше,/ посреде́ пла́мене вопия́ху:/ благослове́н еси́, Го́споди,/ Бо́же оте́ц на́ших. Припев: Преподо́бне о́тче Стефа́не, моли́ Бо́га о на́с. Я́коже Лот Содо́ма дре́вле, латы́нскаго злове́рия избежа́в,/ а́ки в Сиго́р, в Моско́вскую зе́млю, кре́пко соблюда́ющую и́стннное правове́рие, прише́л еси́, Стефа́не, вопия́:/ благослове́н еси́, Го́споди, Бо́же оте́ц на́ших. Припев: Преподо́бне о́тче Стефа́не, моли́ Бо́га о на́с. Си́лою Христо́вою вооружи́вся, преподо́бне, стра́шен яви́лся еси́ бесо́м/ и над страстьми́ воцари́лся еси́, взем крест свой, после́дуя Христо́ви и вопия́:/ благослове́н еси́, Го́споди, Бо́же оте́ц на́ших. Сла́ва Отцу́ и Сы́ну и Свято́му Ду́ху. Собра́нное тобо́ю слове́сное ста́до весели́тся днесь в па́мять твою́, Стефа́не Богому́дре,/ посреде́ иму́ще честны́я твоя́ мо́щи, источа́ющия струи́ исцеле́ний, преподо́бне, зову́щим:/ благослове́н еси́, Го́споди, Бо́же оте́ц на́ших. И ны́не и при́сно и во ве́ки веко́в. Ами́нь. Богородичен: Благослове́н Плод благослове́ннаго чре́ва Твоего́,/ Его́же благословя́т Небе́сныя си́лы и преподо́бных собо́ри,/ нас изба́вльшаго кля́твы дре́вния, Благослове́нная. Песнь 8 Ирмос: Изба́вителю всех, Всеси́льне,/ посреде́ пла́мене благоче́ствовавшия,/ снизше́д, ороси́л еси́/ и научи́л еси́ пе́ти:/ вся дела́, благослови́те, по́йте Го́спода. Припев: Преподо́бне о́тче Стефа́не, моли́ Бо́га о на́с. Оби́лием благода́ти и одожде́нием слове́с твои́х/ серде́чныя бразды́ учени́к твои́х напои́л еси́, Стефа́не,/ и в сих мног плод Влады́це Христу́ возрасти́л еси́, Богому́дре. Припев: Преподо́бне о́тче Стефа́не, моли́ Бо́га о на́с. Ме́ртвость твоя́ живоно́сною яви́ся, преподо́бне Стефа́не, Христа́ ра́ди,/ Его́же Престо́лу со дерзнове́нием предстоя́,/ моли́ся о чту́щих честну́ю па́мять твою́. Сла́ва Отцу́ и Сы́ну и Свято́му Ду́ху. Я́ко незави́стну благода́ть имы́й от Бо́га, преподо́бне,/ пресла́вная чудеса́ источа́еши/ с ве́рою притека́ющим к ра́це честны́х моще́й твои́х. И ны́не и при́сно и во ве́ки веко́в. Ами́нь. Богородичен: Вода́ еси́ неисчерпа́емая, Де́во,/ от нея́же вси, пию́ще, благода́ти исполня́емся,/ душе́ю и те́лом освяща́еми. Песнь 9 Ирмос: Е́ва у́бо неду́гом преслуша́ния/ кля́тву всели́ла есть;/ Ты же, Де́во Богоро́дице,/ прозябе́нием чрев оноше́ния ми́рови Благослове́ние процвела́ еси́./ Тем Тя вси велича́ем. Припев: Преподо́бне о́тче Стефа́не, моли́ Бо́га о на́с. Побе́дное одоле́ние оте́честву на́шему/ на проти́вныя да́руй моли́твами твои́ми, Стефа́не преподо́бне,/ и Це́рквам единомы́слие устро́й,/ да непреста́нно в пе́снех па́мять твою́ почита́ем. Припев: Преподо́бне о́тче Стефа́не, моли́ Бо́га о на́с. О чту́щих честну́ю па́мять твою́ любо́вию моли́ся, Стефа́не преподо́бне,/ изба́витися враг мы́сленных и ви́димых,/ да ктому́ мно́жае тя в пе́снех непреста́нно велича́ем. Сла́ва Отцу́ и Сы́ну и Свято́му Ду́ху. От недосто́йных мои́х усте́н/ приноси́мое ти ма́лое от усе́рдия хвале́ние приими́, Богоблаже́нне,/ и огня́ ве́чнаго изба́витися моли́ся,/ да непреста́нно честну́ю твою́ па́мять почита́ю. И ны́не и при́сно и во ве́ки веко́в. Ами́нь. Богородичен: Ра́дуйся и весели́ся, Неве́сто Царя́ Вели́каго,/ созерца́ющая све́тло Твоего́ Жениха́ красоты́, па́че зла́та сия́юща,/ Его́же пою́ще, велича́ем. Светилен Ты яви́лся еси́, Богому́дре о́тче, столп доброде́телей/ и преподо́бным сла́ва и украше́ние,/ те́мже помина́й чту́щих честну́ю твою́ па́мять. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Тя Предста́тельницу вси иму́ще, гре́шнии, о Пресвята́я Де́во!/ Моли́ся благопремени́тельна сотвори́ти нам Сы́на Твоего́/ ма́терними Твои́ми моли́твами.

Глас 6 Пе́снь 1. Ирмо́с: Колесницегони́теля фарао́ня погрузи́ чудотворя́й иногда́ Моисе́йский же́зл, крестообра́зно порази́в и раздели́в мо́ре, Изра́иля же беглеца́, пешехо́дца спасе́, пе́снь Бо́гови воспева́юща. Припев: Преподо́бне о́тче Симео́не, моли́ Бо́га о на́с. Богосло́вия вои́стинну вина́ е́сть па́мять твоя́, чудоде́йственный о́тче Симео́не, и сия́ние соше́дшимся все́м чи́стыми сердцы́ пе́ти тоя́ вели́чество и досточу́дное житие́ твое́. От гла́са Крести́телева и виде́ния благовести́ся твое́й сла́вней ма́тери, и тя́, благово́нно и Боже́ственное жили́ще, всеблаже́нне о́тче, зача́т же и роди́, Триипоста́снаго Божества́. Па́че естества́ пра́вды носи́ло Бо́жиих дарова́ний, от пеле́н, о́тче, ма́терних хотя́ща бы́ти, проразуме́в вели́кий Предте́ча, шу́яго сосца́ тебе́ отвраща́тися повелева́ет и к десно́му прилепля́тися. Чи́сто из нача́ла прии́м житие́, пребога́те, ба́нею, о́тче, пакибытия́ да́р духо́вный, от младе́нства Боже́ственне твоея́ души́ благоле́пие показа́л еси́, со́лнца светле́йши. Богоро́дичен: Пресла́вная, возглаго́лашася о Тебе́ в ро́дех родо́в, Бо́га Сло́ва во чре́ве вмести́вшая, чиста́ же пребы́вши, Богоро́дице Мари́е, те́мже Тя́ вси́ почита́ем, су́щее по Бо́зе заступле́ние на́ше. Пе́снь 3. Ирмо́с: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ в любви́ Твое́й, жела́ний кра́ю, ве́рных утвержде́ние, Еди́не Человеколю́бче. От млады́х ногте́й подви́жник изря́ден изра́сл еси́, рачи́тель же Боже́ственныя добро́ты те́плый. Те́м от ложе́сн тя́ проуве́дев Влады́ка, Симео́не, освяти́л е́сть, о́тче пресла́вне. Умудри́вся от мла́да, чудотво́рче преподо́бне о́тче, во́зраста и́стинным ра́зумом, Ду́ха непостижи́маго самови́дно сподо́бился еси́ ви́дети, си́лами окружа́ема. Души́ чу́вства от ужа́снаго, преподо́бне о́тче, просвети́в виде́ния, чу́ден ра́зум благи́х стяжа́л еси́ и и́нако иму́щим, Симео́не, небла́зненно житие́ показа́л еси́. Я́вственно тебе́ предста́ по́сланный А́нгел, а́нгельское, Богоно́се, завеща́ житие́, целова́ти ра́достно, но́г же я́вльшагося прикосну́лся еси́, о́тче, стопа́м. Богоро́дичен: Всели́вся в Де́ву теле́сне, Го́споди, яви́лся еси́ челове́ком, я́коже подоба́ше ви́дети Тебе́, Ю́же и показа́л еси́ я́ко и́стинную Богоро́дицу и ве́рных Помо́щницу, еди́не Человеколю́бче. Седа́лен, гла́с 8. Пре́жде зача́тия, о́тче, освяти́вся, роди́тельнице пода́лся еси́ прекра́сно прозябе́ние, хотя́щ бы́ти сосу́д Боже́ственнаго Ду́ха, Его́же си́лою возра́с, уязви́л еси́ лука́вых духо́в мно́жество жезло́м ве́ры; те́мже, со сла́вою отше́д, бы́л еси́ ве́рных сто́лп непоколеби́м и свети́льник све́тел, Симео́не досточу́дне. Моли́ Христа́ Бо́га согреше́ний оставле́ние дарова́ти чту́щим любо́вию святу́ю па́мять твою́. Богоро́дичен: В напа́сти многоплете́нныя впа́д от вра́г ви́димых и неви́димых, бу́рею одержи́м безчи́сленных согреше́ний мои́х, и я́ко к те́плому заступле́нию и покро́ву моему́, Чи́стая, ко приста́нищу притека́ю Твоея́ бла́гости. Те́мже, Пречи́стая, из Тебе́ Воплоще́нному безсе́менно моли́ся приле́жно о все́х рабе́х Твои́х, непреста́нно моля́щихтися, Богоро́дице Пречи́стая, моля́щи Его́ при́сно согреше́ний оставле́ние дарова́ти, воспева́ющим досто́йно сла́ву Твою́. Крестобогоро́дичен: А́гнца и Па́стыря, и Изба́вителя, А́гница зря́щи на Кресте́, восклица́ше, пла́чущи, и го́рько рыда́ющи, вопия́ше: ми́р у́бо ра́дуется, прие́мля Тобо́ю избавле́ние, утро́ба же Моя́ гори́т, зря́щи Твое́ распя́тие, е́же терпи́ши за милосе́рдие ми́лости. Долготерпели́ве Го́споди, ми́лости бе́здно и исто́чниче неисчерпа́емый, умилосе́рдися и да́руй согреше́ний оставле́ние, ве́рою пою́щим Боже́ственныя Стра́сти Твоя́. Пе́снь 4. Ирмо́с: Ты́ моя́ кре́пость, Го́споди, Ты́ моя́ и си́ла, Ты́ мо́й Бо́г, Ты́ мое́ ра́дование, не оста́вль не́дра О́тча, и на́шу нищету́ посети́в. Те́м с проро́ком Авваку́мом зову́ Ти́: си́ле Твое́й сла́ва, Человеколю́бче. Пребы́ти вну́трь ника́коже ми́ра претерпе́л еси́ еще́, о́тче, име́я наставля́ющую тя́ Бо́жия Ду́ха си́лу: в непроходи́мых же пусты́нях живы́й и со зверьми́ ходя́ без боя́зни, отроча́ сы́й, и боле́зньми весели́лся еси́ теле́сными. Скача́, я́коже еле́нь, по гора́м, жела́л еси́, о́тче, Богото́чных исто́чников и, обре́т сия́, Симео́не, боголю́бия жа́жду преиспо́лнил еси́: от ни́хже богосло́вия насы́щся, источа́еши при́сно, лице́ Христо́во зря́. Белообразу́юща тя́, я́коже на колесни́це, зре́л еси́, преподо́бне, носи́ма, у́мныма, о́тче, очи́ма: столпо́м же све́тлым отроча́ наставля́емь, Боже́ственный Иоа́нн стоя́ на степе́ни, пре́жде твоего́ к нему́ восхожде́ния. Наста́влен бы́в, сла́вне, от благода́ти, да́нныя тебе́, я́коже от си́лы в Боже́ственную си́лу, ше́ствуеши ко Иоа́ннове хра́мине Богому́дреннаго, с ни́мже по́двигом любе́зно боре́ние проходя́, яви́лся еси́, я́коже А́нгел. Богоро́дичен: Ты́ ве́рных похвала́ еси́, Безневе́стная, Ты́ Предста́тельница, Ты́ прибе́жище христиа́н, стена́ и приста́нище: к Сы́ну бо Твоему́ мольбы́ но́сиши, Всенепоро́чная, и спаса́еши от бе́д ве́рою и любо́вию Богоро́дицу Чи́стую Тя́ ве́дущия. Пе́снь 5. Ирмо́с: Вску́ю мя́ отри́нул еси́ от лица́ Твоего́, Све́те незаходи́мый, и покры́ла мя́ е́сть чужда́я тьма́ окая́ннаго? Но обрати́ мя́, и к све́ту за́поведей Твои́х пути́ моя́ напра́ви, молю́ся. Красоты́ испо́лнь, я́ко благоле́пен де́тищ, о́тче, Госпо́дь я́вственно предста́, на степе́ни стоя́ния твоего́ су́щу, и облиста́в сла́вою терпе́ния, я́коже проси́л еси́, Себе́ показа́в распина́ема. Возсия́ заре́ю открове́ний все́ житие́ твое́, и́мже Боже́ственнаго ми́ра благово́ния бы́в испо́лнен, супроти́вныя страда́льчески, Христо́в уго́дниче, де́монския ссе́кл еси́ полки́. Возвы́сился еси́ виде́нии Боже́ственными, всеблаже́нне, ума́ чистото́ю и, исто́чник му́дрости живоно́сныя, то́ки источа́ющее се́рдце име́я, от Бо́га уче́ньми, ду́ши боля́щих просвети́л еси́. Богоро́дичен: Ма́тернее дерзнове́ние, е́же к Сы́ну Твоему́, иму́щи, Пречи́стая, сро́днаго промышле́ния, е́же о на́с, не пре́зри, мо́лимся, я́ко Тебе́ и еди́ну, христиа́не, ко Влады́це очище́ние ми́лостивно предлага́ем. Пе́снь 6. Ирмо́с: Моли́тву пролию́ ко Го́споду и Тому́ возвещу́ печа́ли моя́, я́ко зо́л душа́ моя́ испо́лнися и живо́т мо́й а́ду прибли́жися, и молю́ся, я́ко Ио́на: от тли́, Бо́же, возведи́ мя́. Вели́к, я́коже Моисе́й, доброде́тельми чу́дный бы́в, о́тче, на высо́к сто́лп ма́нием Боже́ственным возше́д, взя́тся Ду́хом, и, си́лу просвети́тельную прие́м, я́коже о́н, просла́вился еси́. Истощи́ сво́й вра́г стре́л душетле́нный ту́л, неи́стовно, Богоно́се, стреля́я, и души́ твоея́ столпа́ не поколеба́: на ка́мени бо неразсе́днем Христо́ве кре́пко утверди́лся еси́. Я́ко терпя́щу по́ты удо́бь воздержа́ния, чу́дный о́тче, я́влься Влады́ка тебе́, же́зл кре́пости Христо́с вруча́ет и си́м тебе́ немощны́х неду́ги повелева́ет цели́ти. Богоро́дичен: Мари́е, Влады́чнее селе́ние, све́тлыми де́вства заря́ми светови́дно, я́ко кри́н, сия́я посреди́ терно́внаго смеше́ния, Тебе́ молю́ся, Благо́й: согреше́ний ми́ да́руй проще́ние. Конда́к, гла́с 2. Вы́шняя жела́я, до́льная отложи́в, и, я́ко не́бо, сто́лп соде́лавый, те́м облиста́л еси́ чуде́с заре́ю, преподо́бне, и Христу́, все́х Бо́гу, мо́лишися непреста́нно о все́х на́с. И́кос: Всесве́тлая блаже́ннаго па́мять, други́й яви́ся де́нь спасе́ния на́м, сия́нием поще́ния но́щь глубо́кую страсте́й отгоня́щий и всеизря́дными дея́ньми просвеща́ющий. В ню́же све́тло, я́ко зве́зды, я́вльшеся, вси́ ве́рнии, пе́ния в весе́лии Симео́ну свети́льнику принесе́м: свы́ше бо зря́, просвеща́ет ны́ и дае́т умире́ние неизглаго́ланно, Христа́ Бо́га моля́ непреста́нно о все́х на́с. Пе́снь 7. Ирмо́с: Халде́йския пе́щи всепа́губную си́лу угаси́вше о́бразом А́нгела снизше́дшаго, Зижди́телю ю́ноши взыва́ху: благослове́н еси́ и хва́льный, Бо́же оте́ц на́ших. Ю́ношески, Богоно́се, мудрова́ния мирски́я ле́сти, тщи́я же сла́вы, низпа́дания бе́гая, в молча́нии жи́ти возлюби́л еси́, и ду́хом вопия́ непреста́нно: благослове́н Бо́г оте́ц на́ших. Крестообра́зно простира́я дла́ни твоя́ и моли́тву де́йствуяй, Христа́ во сла́ве со А́нгелы очи́ма явле́нно, Богоно́се, узре́л еси́, на го́ру сию́ ди́вную взы́ти повелева́юща. Неботе́чне нра́вом иды́й, о́тче, к столпу́, возше́л еси́ на него́, пре́жде сего́ ты́ Влады́ки Боже́ственным повину́вся веле́нием, дости́гл еси́ горы́ сея́, ю́же чу́дно чу́дну са́м именова́л еси́. Высо́кий ве́рх, я́коже Небе́сный ра́й, благово́нными насажде́н цветы́ вся́кими, обре́т, всели́лся еси́, жили́ще же сие́ чудоде́йственне, богоначерта́нно водрузи́л еси́. Богоро́дичен: Во све́те Госпо́дни ходя́щии, прииди́те, воспои́м Боже́ственный гра́д Царя́ ца́рствующих, Мари́ю Пречи́стую, Богоро́дицу и́стинную, я́ко упова́ние ду́ш на́ших. Пе́снь 8. Ирмо́с: Седмери́цею пе́щь халде́йский мучи́тель Богочести́вым неи́стовно разжже́, си́лою же лу́чшею спасе́ны сия́ ви́дев, Творцу́ и Изба́вителю вопия́ше: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки. Боголе́пными, преподо́бне, души́ твоея́ си́лами трисве́тлому спримеси́лся еси́ сия́нию, от него́ науча́емь, я́ко от еди́наго Божества́, Сему́ пред столпо́м твои́м требога́тен хра́м сла́вно созда́л еси́ и несозда́нную чти́ти научи́л еси́ в не́м Тро́ицу во ве́ки. Всеси́льное Ду́ха Свята́го де́йство, богови́дно все́льшееся в тя́, Богогла́се, стица́тися подви́же от коне́ц все́х, от духо́в лука́вых томи́мыя, и, си́х исцеля́я ва́ийным твои́м жезло́м, науча́еши Зижди́теля пе́ти во ве́ки вся́. Ю́ношеское мудрова́ние плотско́е повину́л еси́, о́тче, посто́м и моле́нием ду́ху, утро́бы же разгоре́ние угаси́в, потреби́л еси́ и, я́ко не яды́й, па́че челове́ка яви́лся еси́, пи́щею небе́сною пита́яся то́кмо, вино́вна же сему́ пое́ши во ве́ки. Ликостоя́ние Боже́ственное ученико́в тебе́, чу́дный о́тче, вруча́ет Христо́с Госпо́дь, и́хже любо́вию прие́м, уче́нии осия́л еси́ к воздержа́ния простре́тися тече́нию. С ни́миже почива́я во Ца́рствии, Царя́ все́х славосло́виши во вся́ ве́ки. Богоро́дичен: О на́с моли́ Сы́на Твоего́ и Го́спода, вои́стинну и чи́сто вопию́щих Ти́ и Тя́, Богома́терь, испове́дающих, Чи́стая, грехо́в прося́щи разреше́ния, улучи́ти же спасе́ние ве́рно пою́щим: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки. Пе́снь 9. Ирмо́с: Устраши́ся вся́к слу́х неизрече́нна Бо́жия снизхожде́ния, я́ко Вы́шний во́лею сни́де да́же и до пло́ти, от Деви́ческаго чре́ва бы́в Челове́к. Те́мже Пречи́стую Богоро́дицу, ве́рнии, велича́ем. Хле́бы ма́лыми, Симео́не, насы́щшаго мно́жество челове́к мно́гое, Христа́, треблаже́нне, моли́твами твои́ми подража́я, во огра́де твое́й пра́здныя жи́тницы пшени́цы напо́лнил еси́ благослове́нии твои́ми и от гла́да изба́вил еси́ ста́до твое́. Глаго́лы Ма́рфы, честны́я и преподо́бныя твоея́ ма́тере, всеблаже́нне, моле́ньми тя́ моля́ще умоли́ти Христа́, не отре́клся еси́ тоя́ испо́лнити проше́ния и Бо́жий гра́д Бо́жия гне́ва изба́вил еси́. Уве́дев кончи́ну, Симео́не, подвиго́в твои́х, разре́шся от телесе́, пренеизглаго́ланное в Вы́шних, всеблаже́нне, обоже́ние, к нему́же отсю́ду возлете́в, ра́дуешися ду́хом, зря́ того́ ра́ди триипоста́сное сия́ние. Ма́нием, о́тче Симео́не, и промышле́нии твои́ми от жития́ к тебе́ многомяте́жнаго моли́твами устреми́вшияся, в приста́нище твое́, от вся́ких врага́ страсте́й свободи́ и па́мять твою́ пра́зднующия све́тло сохраня́й. Богоро́дичен: Спаси́ мя́, Ма́ти Бо́жия, ро́ждшая Христа́, Спа́са моего́, Бо́га и Челове́ка, сугу́ба естество́м, а не Ипоста́сию, Единоро́дна же от Отца́, из Тебе́ же пе́рвенца тва́ри вся́кия. Те́мже вси́ Тя́ при́сно велича́ем. Свети́лен. От пусты́ни облиста́в, вселе́нную просвеща́еши, мона́хов мно́жества ра́дуются о твое́й па́мяти, о Симео́не Богоно́се, не преста́й о ми́ре моля́ся.

Минея, 22 Февраля, Канон мучеников Глас 8 Песнь 1 Ирмос: Колесни́цегонителя фарао́ня погрузи́/ чудотворя́й иногда́/ Моисе́йский жезл, крестообра́зно порази́в/ и раздели́в мо́ре,/ Изра́иля же беглеца́ пешехо́дца спа́се,/ песнь Бо́гови воспева́юща. Припев: Святи́и му́ченицы, моли́те Бо́га о на́с. Му́ченическими укра́шени дарова́ньми/ и вели́кому Све́ту всесве́тли любо́вию предстоя́ще, му́ченицы,/ о́блаки душ на́ших и страсте́й зи́му разори́те/ благода́тию Всеси́льнаго Бо́га на́шего. Припев: Святи́и му́ченицы, моли́те Бо́га о на́с. Возложи́вся му́ченический собо́р Всеви́дцу Бо́гу,/ и, Того́ любо́вию ду́ши привяза́вше, разреши́ша сою́з зло́бы/ и разреше́ние грехо́в подава́ют ве́рою тех блажа́щим. Сла́ва Отцу́ и Сы́ну и Свято́му Ду́ху. Огне́м Боже́ственным, страстоте́рпцы му́ченицы, распаля́еми/ и мы́сленною си́лою ду́ши вжили́вше,/ я́ко у́глие, яви́стеся, попаля́юще вещь многобо́жия/ и просвеща́юще сия́нием благоче́стия концы́. И ны́не и при́сно и во ве́ки веко́в. Ами́нь. Богородичен: От ви́димых и неви́димых изба́ви мя, Де́во Ма́ти, враго́в,/ Я́же Бо́га Сло́ва ви́димаго ро́ждши, неви́дима су́ща,/ и страсте́й мои́х бу́рю Твое́ю тишино́ю отжени́,/ Еди́на челове́ков исправле́ние. Песнь 3 Ирмос: Небе́снаго кру́га Верхотво́рче, Го́споди,/ и Це́ркве Зижди́телю,/ Ты ме́не утверди́ в любви́ Твое́й,/ жела́ний кра́ю, ве́рных утвержде́ние,/ Еди́не Человеколю́бче. Припев: Святи́и му́ченицы, моли́те Бо́га о на́с. Разже́гшеся любо́вию Боже́ственною, му́ченицы,/ огнь безбо́жия крове́й струя́ми угаси́сте/ и, возсия́вше светови́дно, я́ко зве́зды,/ всю подсо́лнечную уясни́сте. Припев: Святи́и му́ченицы, моли́те Бо́га о на́с. Блиста́ют му́чеников светоза́рный мо́щи свет исцеле́ний ве́рою к сим притека́ющим,/ благода́ть бо почерпо́ша от исто́чников Спа́совых,/ Того́ вольне́й стра́сти поревнова́вше. Сла́ва Отцу́ и Сы́ну и Свято́му Ду́ху. Ве́ры столпи́, Христо́ва закла́ния/ во вре́мя у́бо мно́го в во́дах кры́еми, ны́не яви́шася,/ архиере́йскими рука́ми благоче́стно и преподо́бно преноша́еми бы́ша. И ны́не и при́сно и во ве́ки веко́в. Ами́нь. Богородичен: Ра́дуйся, Еди́на, ро́ждшая вся́ческих Го́спода;/ ра́дуйся, ра́дость челове́ком исхода́таивши;/ ра́дуйся, присе́нная и несеко́мая горо́, ве́рным утвержде́ние;/ ра́дуйся, Всенепоро́чная. Седален, глас 1 Лесть вра́жию я́вственно низложи́вше,/ на ле́та мно́га зави́стне сокрове́ннии, нам яви́стеся,/ всеприснопа́мятнии му́ченицы,/ врачу́юще душ на́ших стра́сти/ и исцеля́юще теле́сныя боле́зни/ во сла́ву Бо́га на́шего. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Упра́ви, Чи́стая, окая́нную мою́ ду́шу/ и уще́дри ю от мно́жества прегреше́ний,/ во глубину́ попо́лзшуюся поги́бели, Всенепоро́чная,/ и в час мя стра́шный сме́рти/ Ты исхи́ти оглаго́лующих де́монов и вся́кия му́ки. Песнь 4 Ирмос: Ты моя́ кре́пость, Го́споди,/ Ты моя́ и си́ла,/ Ты мой Бог, Ты мое́ ра́дование,/ не оста́вль не́дра О́тча,/ и на́шу нищету́ посети́в./ Тем с проро́ком Авва́кумом зову́ Ти:/ си́ле Твое́й сла́ва, Человеколю́бче. Припев: Святи́и му́ченицы, моли́те Бо́га о на́с. Твое́ заколе́ние и во́льную смерть, Жизнода́вче,/ собо́р возжеле́ страда́лец и, многови́дныя боле́зни претерпе́в,/ в неболе́зненное пре́йде и Боже́ственное весе́лие, песнопоя́ благода́рственно:/ си́ле Твое́й сла́ва, Человеколю́бче. Припев: Святи́и му́ченицы, моли́те Бо́га о на́с. Креста́ огражда́еми броня́ми и любо́вию Боже́ственною утвержда́еми,/ ору́жие низложи́ша враго́в/ и ополче́ния сих ве́рою потреби́ша му́ченицы Боже́ственнии, пою́ще усе́рдно:/ си́ле Твое́й сла́ва, Человеколю́бче. Сла́ва Отцу́ и Сы́ну и Свято́му Ду́ху. Добротами доброде́телей просвещаеми,/ от кровей багряни́цею украси́стеся очервленою, мученицы,/ я́коже скиптр, Креста́ побе́ду носяще,/ со Христо́м царствовати сподобистеся войстинну,/ блаженныя наде́жды придана. И ны́не и при́сно и во ве́ки веко́в. Ами́нь. Богородичен: Ма́ти Бо́жия, благослове́нная, Всенепоро́чная,/ страда́лец Боже́ственное удобре́ние,/ онебеси́вшая на́ше естество́, отри́нувшееся сове́том змии́ным,/ спаси́ мя от вся́ких жития́ собла́зн и улучи́ти спасе́ние сподо́би. Песнь 5 Ирмос: Вску́ю мя отри́нул еси́/ от лица́ Твоего́, Све́те незаходи́мый,/ и покры́ла мя есть чу́ждая тьма, окая́ннаго?/ Но обрати́ мя и к све́ту за́поведей Твои́х/ пути́ моя́ направи, молю́ся. Припев: Святи́и му́ченицы, моли́те Бо́га о на́с. Святы́х Твои́х, Спа́се, вре́мя дово́льно сокрове́нныя ко́сти сохрани́в,/ яви́л еси́ ны́не, я́ко благоволи́л еси́,/ лю́дем Твои́м, Сло́ве, на освяще́ние, и спасе́ние,/ и в студ враго́м, хуля́щим Тя. Припев: Святи́и му́ченицы, моли́те Бо́га о на́с. Сту́день пре́лести, теплото́ю ве́ры разори́сте, сла́внии,/ мно́гих мук преше́дше многоплете́нныя се́ти;/ к Вы́шнему гра́ду вперя́еми любо́вию, почи́ли есте́,/ сла́вою исполня́еми. Сла́ва Отцу́ и Сы́ну и Свято́му Ду́ху. Терпе́нием ран вся́ко низло́жше вра́жие шата́ние, тве́рдии ору́жницы,/ и терза́еми, и пове́шаеми, и огню́ веще́ственному приобщи́вшеся,/ вся́ку вещь безбо́жия запали́сте благода́тию. И ны́не и при́сно и во ве́ки веко́в. Ами́нь. Богородичен: Превы́шши была́ еси́ Вы́шних сил, Богора́дованная,/ заче́нши Сло́во, вся сло́вом сотво́ршаго,/ и ро́ждши Сего́, от Отца́ пре́жде век рожде́нна/ нетле́нно, Пречи́стая. Песнь 6 Ирмос: Очи́сти мя, Спа́се,/ мно́га бо беззако́ния моя́,/и из глубины́ зол возведи́, молю́ся,/к Тебе́ бо возопи́х, и услы́ши мя,/ Бо́же спасе́ния моего́. Припев: Святи́и му́ченицы, моли́те Бо́га о на́с. Я́коже крин, в мы́сленных удо́лиих процве́тше,/ Боже́ственныя во́ни вся наполня́ете, всехва́льнии,/ и от душ отгоня́ете смрад всяк,/ страстоте́рпцы досточу́днии. Припев: Святи́и му́ченицы, моли́те Бо́га о на́с. Ссека́еми на у́дыи многообра́зно му́чими,/ терпе́ния и́стиннаго ме́чем ссеко́ша враги́, неве́дущия Тя,/ до́блии, Сло́ве, страстоте́рпцы Твои́,/ воспева́юще Тя. Сла́ва Отцу́ и Сы́ну и Свято́му Ду́ху. С тру́пы му́ченичестии душ исцеля́ют я́звы,/ си́ми бо врага́ кре́пко уязви́вше,/ врачева́ние безме́здно те́пле прося́щим Боже́ственным Ду́хом бы́ша. И ны́не и при́сно и во ве́ки веко́в. Ами́нь. Богородичен: Из Тебе́ Бог сме́ртным, плотски́м яви́ся прия́тием,/ бога́т Сый, мою́ нищету́, Всенепо́рочная, из Тебе́ взят,/ безсме́ртия вхо́ды ми да́руя. Кондак, глас 8 Кре́пцыи ве́ры столпи́, добропобе́днии му́ченицы,/ за Христа́ подъе́мше разли́чныя му́ки,/ и на ле́та мно́га сокрове́ни бы́сте,/ и ны́не яви́стеся я́ко многоце́нное бога́тство,/ и в Це́рковь Бо́жию че́стно носи́ми архиере́я Бо́жия дла́ньми,/ прося́щим раздава́ете, е́же на по́льзу./ Тем моли́теся о душа́х на́ших. Песнь 7 Ирмос: Бо́жия снизхожде́ния/ огнь устыде́ся в Вавило́не иногда́:/ сего́ ра́ди о́троцы в пе́щи ра́дованною ного́ю/ я́ко во цве́тнице, лику́юще, поя́ху:/ благослове́н еси́, Бо́же оте́ц на́ших. Припев: Святи́и му́ченицы, моли́те Бо́га о на́с. Ве́доми Сотво́ршему, муче́нием дре́вле бы́вше бе́з вести сокрове́ни,/ нам ны́не позна́ни бы́сте, песнопою́щим, всехва́льнии му́ченицы:/ благослове́н еси́, Бо́же оте́ц на́ших. Припев: Святи́и му́ченицы, моли́те Бо́га о на́с. Почерпи́те, челове́цы, от исто́чника, точа́щаго во́ду спаси́тельную,/ от пото́ков невеще́ственных моще́й ра́ди му́ченик днесь,/ и песнопо́йте сия́ Просла́вльшему:/ благослове́н еси́, Бо́же оте́ц на́ших. Сла́ва Отцу́ и Сы́ну и Свято́му Ду́ху. Све́та жили́ща яви́вшеся, мук ра́ди мно́гих,/ в сокрове́нии мра́чнем ле́та мно́га сокрыва́еми,/ я́ко от незаходи́мых свети́льницы возсия́ша страда́льцы Твой, Христе́,/ просвеща́юще нас. И ны́не и при́сно и во ве́ки веко́в. Ами́нь. Богородичен: Проро́цы провозвести́ша глубину́, Де́во, та́инства Твоего́,/ от чи́стых бо крове́й Бо́га, Отрокови́це, чревоноси́ла еси́/ и в существа́х двою́ породи́ла еси́ на спасе́ние на́ше и избавле́ние. Песнь 8 Ирмос: Седмери́цею пещь/ халде́йский мучи́тель/ Богочести́вым неи́стовно разжже́,/ си́лою же лу́чшею спасены́, сия́ ви́дев,/ Творцу́ и Избави́телю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки. Припев: Святи́и му́ченицы, моли́те Бо́га о на́с. Я́коже виногра́да ло́зие невеще́ственнаго су́ще, гро́здие нам Богоразу́мия процве́тша/ и вино́ источи́ша безсме́ртия всем я́ве,/ пия́нства душе́внаго отража́юще вред, му́ченицы вопию́ще:/ о́троцы, благослови́те, свяще́нницы, воспо́йте,/ лю́дие, превозноси́те во вся ве́ки. Припев: Святи́и му́ченицы, моли́те Бо́га о на́с. Тече́нии кро́вными ре́ки изсуши́ша идолонеи́стовства/ и разжже́ние угаси́ша безбо́жнаго веле́ния страда́льцы сла́вою Христо́вою,/ вся́ко же ве́рно вопию́щее се́рдце напои́ша бога́тно:/ о́троцы, благослови́те, свяще́нницы, воспо́йте,/ лю́дие, превозноси́те во вся ве́ки. Сла́ва Отцу́ и Сы́ну и Свято́му Ду́ху. Святи́телей предъизбра́нный священносподви́жен пренесе́ние свяще́нное сотвори́ ва́ше, всеблаже́ннии,/ и ле́тно сие́ почита́ет, поя́ со всем свяще́нным сосло́вием:/ о́троцы, благослови́те, свяще́нницы, воспо́йте,/ лю́дие, превозноси́те во вся ве́ки. И ны́не и при́сно и во ве́ки веко́в. Ами́нь. Богородичен: Освя́щшися Ду́хом, Богоро́дице Всенепоро́чная,/ во святы́х почива́ющаго родила́ еси́ Свята́го/ и Благоде́теля, Еди́наго Бо́га,/ вся вопию́щия освяща́юща ве́рою:/ о́троцы, благослови́те, свяще́нницы, воспо́йте,/ лю́дие, превозноси́те во вся ве́ки. Песнь 9 Ирмос: Ужасе́ся о сем Не́бо,/ и земли́ удиви́шася концы́,/ я́ко Бог яви́ся челове́ком пло́тски/и чре́во Твое́ быстъ простра́ннейшее Небе́с/ Тем Тя, Богоро́дицу,/ А́нгелов и челове́к чинонача́лия велича́ют. Припев: Святи́и му́ченицы, моли́те Бо́га о на́с. Друг дру́га порева́юще к жи́зни/ и дерза́ти са́ми себе́ повелева́юще ра́ны претерпе́ти, вопию́ще страда́льцы:/ се вре́мя благоприя́тно, ста́нем и победи́м врага́,/ Христо́с бо Подвигополо́жник простира́ет венцы́,/ И́же нас ра́ди страда́ти изво́ливый. Припев: Святи́и му́ченицы, моли́те Бо́га о на́с. Возвы́сился еси́ на Дре́во, Сло́ве Бо́жий,/ и му́чеников стада́ привле́кл еси́ к Себе́,/ страсть вообрази́вших и заколе́ние,/ е́же во́лею, Влады́ко, прия́л еси́ за милосе́рдие нас ра́ди./ Те́мже Тя до́блии возлюби́вше страда́льцы,/ я́ко овча́та, закала́ются. Сла́ва Отцу́ и Сы́ну и Свято́му Ду́ху. Со Христо́м ца́рствовати всегда́, страда́льцы всехва́льнии му́ченицы, ра́достно сподо́бльшеся на Небесе́х,/ стране́ победи́тельная и всем душе́вное испроси́те спасе́ние,/ ве́рою восхваля́ющим вы днесь. И ны́не и при́сно и во ве́ки веко́в. Ами́нь. Богородичен: О́блаче Со́лнца мы́сленнаго, души́ мое́й облаки разжени́,/ две́ре Бо́жия, отве́рзи мне две́ри, молю́ Тя, пра́вды Влады́чице,/ и ко вхо́дом благи́м введи́, Де́во,/ от путе́й многообра́зных лука́ваго избавля́ющи мя.