Молитвы

Минея, 12 Января, Канон Глас 8 Песнь 1 Ирмос: Пои́м Го́сподеви,/ прове́дшему лю́ди Своя́ сквозе́ Чермно́е мо́ре,/ я́ко Еди́н сла́вно просла́вися. Припев: Преподо́бне о́тче Мартиниа́не, моли́ Бо́га о на́с. Песнь ти приношу́, всеблаже́нне Мартиниа́не, от недосто́йных уст мои́х,/ приими́ бла́го се́рдце и спаси́ мя, сла́вяща Го́спода, просла́вльшаго тя,/ сла́вно бо просла́вися. Припев: Преподо́бне о́тче Мартиниа́не, моли́ Бо́га о на́с. Пое́м твою́ светоно́сную па́мять,/ в ню́же соше́дшеся, духо́вно пра́зднуем,/ и, у свята́го твоего́ гро́ба исцеле́ние с ве́рою прие́млюще, здра́ви отхо́дят, сла́вяще Го́спода,/ сла́вно бо просла́вися. Сла́ва Отцу́ и Сы́ну и Свято́му Ду́ху. Пое́м и почита́ем, преподо́бне, твоя́ честны́я по́двиги, боле́зни же и труды́,/ и́миже потруди́ся во вре́менней сей жи́зни,/ и сла́вим Го́спода, просла́вльшаго тя,/ сла́вно бо просла́вися. И ны́не и при́сно и во ве́ки веко́в. Ами́нь. Пое́м Тя, Ма́ти Бо́жия,/ я́ко породи́ нам Спа́са и Изба́вителя ро́ду на́шему,/ изба́вльшаго нас от а́довых нереши́мых уз и се́ни сме́ртныя,/ и сла́вим Рождество́ Твое́, сла́вно бо просла́вися. Песнь 3 Ирмос: Ты еси́ утвержде́ние/ притека́ющих к Тебе́, Го́споди,/ Ты еси́ Свет омраче́нных,/ и пое́т Тя дух мой. Припев: Преподо́бне о́тче Мартиниа́не, моли́ Бо́га о на́с. Ты еси́, преподо́бне, утвержде́ние и кре́пость разсла́бленно житие́ иму́щим,/ ты же и просвеще́ние страстьми́ омраче́нным,/ с ве́рою к тебе́ прибега́ющим. Припев: Преподо́бне о́тче Мартиниа́не, моли́ Бо́га о на́с. Ты, блаже́нне Мартиниа́не, мно́гими труды́ и по́двиги плоть свою́ истощи́л еси́,/ чистоту́ же душе́вную посто́м и воздержа́нием в себе́ соблю́л еси́,/ тем и Свято́му Ду́ху жили́ще чи́сто показа́ся. Сла́ва Отцу́ и Сы́ну и Свято́му Ду́ху. Ты, Богому́дре, свои́м подвиза́нием и труды́ духо́вную бразду́ до́бре де́лал еси́,/ и, сле́зною вла́гою напои́,/ безстра́стия клас возрасти́л еси́,/ и та́мо пожа́л еси́ жизнь ве́чную. И ны́не и при́сно и во ве́ки веко́в. Ами́нь. Богородичен: Ты еси́, Пречи́стая, гора́ Бо́жия присе́нная,/ Ты Боже́ственная трапе́за мы́сленная,/ прие́мшая Хле́ба – Христа́, живота́ всех и Пита́теля,/ и Тебе́ воспева́ем, сла́вяще. Седален, глас 8 От ю́наго во́зраста, преподо́бне, страх Бо́жий всели́ся в тя,/ Его́же любо́вию разгора́ем,/ го́рько душе́вную жизнь сию́ презре́л еси́,/ сла́дкому Влады́це после́довати возжеле́л еси́,/ посто́м, и бде́нием, и зе́льным воздержа́нием у́ды телеси́ своего́ умертви́л еси́,/ несумне́нною же ве́рою и благи́ми де́лы доброде́телей ду́шу свою́ оживотвори́л еси́,/ тем и по преставле́нии твое́м чуде́с дар от Бо́га восприя́л еси́,/ те́мже, о всеблаже́нне Мартиниа́не, о́тче наш преподо́бне,/ моли́ Христа́ Бо́га грехо́м оставле́ние дарова́ти/ пра́зднующим любо́вию святу́ю па́мять твою́. Песнь 4 Ирмос: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́. Припев: Преподо́бне о́тче Мартиниа́не, моли́ Бо́га о на́с. Услы́шаша о́крестнии лю́дие твоя́, преподо́бне, чудеса́ и исцеле́ния,/ и уве́девше чу́дная и Богоуго́дная дела́ твоя́,/ и просла́виша тя, Всеблаже́нне. Припев: Преподо́бне о́тче Мартиниа́не, моли́ Бо́га о на́с. Услыши нас, смире́нных раб свои́х, мо́лим тя, всеблаженне,/ и многообра́зных сете́й вражиих потщи́ся свободи́ти нас/ и спасе́ние получи́ти сподоби. Сла́ва Отцу́ и Сы́ну и Свято́му Ду́ху. Услы́ши, благосе́рде, мно́гими грехи́ обремене́нных нас/ и не заме́дли, Христо́в уго́дниче, пода́ти душа́м спасе́ние и телесе́м здра́вие/ ве́рою и любо́вию почита́ющим тя. И ны́не и при́сно и во ве́ки веко́в. Ами́нь. Богородичен: Услы́ши, Богоро́дице, нас, вопию́щих Ти и сла́вящих Твое́ вели́чие,/ и изба́ви нас от вся́каго зла́го обстоя́ния,/ и наста́ви нас твори́ти во́лю Сы́на Твоего́ и Бо́га на́шего,/ и ча́емых мук свободи́ нас, мо́лим Тя. Песнь 5 Ирмос: Просвети́ нас повеле́нии Твои́ми, Го́споди,/ и мы́шцею Твое́ю высо́кою/ Твой мир пода́ждь нам,/ Человеколю́бче. Припев: Преподо́бне о́тче Мартиниа́не, моли́ Бо́га о на́с. Просвети́л еси́, о́тче, ду́шу свою́ непреста́нными моли́твами и слеза́ми те́плыми/ и душе́вныя о́чи выспрь вы́ну име́л еси́,/ до́лу же теле́сных оче́й зре́ние, смиренному́дрием обогаща́яся. Припев: Преподо́бне о́тче Мартиниа́не, моли́ Бо́га о на́с. Просвети́, Богоблаже́нне, ду́шу мою́, помрачи́вшуюся лю́те,/ и наста́ви на стезю́ Богоразу́мия,/ и укрепи́ мя в благи́х дея́ниих,/ да, в путь твой ше́ствуя, непреста́нно ублажа́ю тя. Сла́ва Отцу́ и Сы́ну и Свято́му Ду́ху. Просвети́л еси́ всех Боже́ственным житие́м свои́м/ и был еси́, преподо́бне, вене́ц и́ноком,/ не ка́мением многоце́нным, но доброде́телию обложе́н, яви́л бо ся еси́ Богора́дованное воистинну украше́ние. И ны́не и при́сно и во ве́ки веко́в. Ами́нь. Богородичен: Просвети́ла еси́ Боже́ственным рождество́м Твои́м во тьме и се́ни сме́ртней седя́щая,/ Изба́вителя бо нам, Пречи́стая, родила́ еси́, Ему́же вопие́м:/ Твоего́ ми́ра пода́ждь нам, Еди́не Человеколю́бче. Песнь 6 Ирмос: Очи́сти мя, Спа́се,/ мно́га бо беззако́ния моя́,/ и из глубины́ зол возведи́, молю́ся,/к Тебе́ бо возопи́х, и услы́ши мя,/ Бо́же спасе́ния моего́. Припев: Преподо́бне о́тче Мартиниа́не, моли́ Бо́га о на́с. Очи́стил еси́ ум свой бде́нием и моли́твами/ и сле́зными тече́нии ду́шу свою́ чи́сту соде́лал еси́,/ смире́нием же и кро́тостию к жи́зни ве́чней возвы́сися. Припев: Преподо́бне о́тче Мартиниа́не, моли́ Бо́га о на́с. Очи́сти мя, преподо́бне Мартиниа́не, от страсте́й тиме́ния, належа́щих на мя,/ в сих бо побежда́юсь при́сно,/ но, победи́вый боре́ния вра́жия,/ победи́ и мою́ грехо́вную напа́сть, востаю́щую на мя. Сла́ва Отцу́ и Сы́ну и Свято́му Ду́ху. Очи́сти мя, всеблаже́нне, от скве́рных зол мои́х/ и сла́бость мою́ стягни́ ми,/ в воздержа́нии же и целому́дрии жи́ти укрепи́ мя/ и чистоту́ пода́ждь се́рдцу моему́, молю́тися. И ны́не и при́сно и во ве́ки веко́в. Ами́нь. Богородичен: Очи́сти мя, Богоро́дице, от всех мои́х согреше́ний,/ Ты бо еси́ нам, ве́рным, наде́жда и спасе́ние и гре́шным заступле́ние,/ и из глубины́ зол возведи́ мя, молю́ Ти ся. Кондак, глас 8 Благоизво́лив, преподо́бне,/ от ю́наго во́зраста рабо́тати Го́сподеви день и нощь,/ в стра́се Бо́жии и благогове́нии чистоту́ душе́вную соблю́л еси́,/ в моли́твах же и бде́ниих ум твой предочи́стил еси́,/ в по́двизех же, злострада́ниих те́ло твое́ изнури́в,/ вся доброде́тели духо́вныя испра́вил еси́/ и о́браз хотя́щим по тебе́ спасти́ся яви́лся еси́./ Те́мже ны́не, при́сно зря на Небесе́х Пресвяту́ю Тро́ицу,/ моли́ся, всеблаже́нне, дарова́ти душа́м на́шим спасе́ние,/ и житию́ на́шему исправле́ние,/ да вси ве́рою вопие́м ти:/ ра́дуйся, преподо́бне Мартиниа́не, о́тче наш. Икос Ка́ко возмогу́ по достоя́нию восхвали́ти тя, о всеблаже́нне,/ испо́лнен бо есмь вся́кия зло́бы,/ но ве́рою и любо́вию восхваля́ю тя,/ а́ще бо и челове́к бе подо́бием, о́тче,/ но а́нгельски на земли́ пожи́л еси́, я́ко безпло́тен,/ те́мже, преподо́бне, похва́льная тебе́ воспева́ем си́це:/ ра́дуйся, Богоблаже́нне, я́ко от ю́на во́зраста роди́телема свои́ма приведе́ся к преподо́бному Кири́ллу/ и Бо́жиим про́мыслом к нему́ вожделе́ вда́тися./ Возьми́ ме́не, – ре́че,– о честны́й о́тче, и наста́ви на путь спасе́ния./ И от него́ навы́че духо́вному по́двигу./ Ра́дуйся, я́ко испо́лнитель был еси́ Боже́ственным за́поведем;/ ра́дуйся, я́ко Богоуго́дным житие́м свои́м А́нгелы возвесели́л еси́./ Ра́дуйся, я́ко чудесы́ свои́ми челове́цы удиви́л еси́;/ ра́дуйся, по́стником украше́ние и преподо́бным похвала́./ Ра́дуйся, и́ноком предста́тель и засту́пник,/ те́мже и мы согла́сно вопие́м ти:/ ра́дуйся, преподо́бне Мартиниа́не, о́тче наш. Песнь 7 Ирмос: О́троцы Богочести́вии в Вавило́не/ о́бразу злато́му не поклони́шася,/ но посреде́ пещи́ о́гненныя, ороша́еми,/ песнь воспева́ху, глаго́люще:/ превозноси́мый отце́в и нас Бо́же, благослове́н еси́. Припев: Преподо́бне о́тче Мартиниа́не, моли́ Бо́га о на́с. Ди́вен Бог, прославля́яй святы́х Свои́х,/ я́коже просла́ви тебе́, всеблаже́нне, мно́гими чудесы́ и разли́чными исцеле́нии,/ ве́рою припа́дающим к ра́це моще́й твои́х/ исцеле́ния оби́льна подава́еши, вопию́щим:/ благослове́н Бог оте́ц на́ших. Припев: Преподо́бне о́тче Мартиниа́не, моли́ Бо́га о на́с. Доброде́тели мно́ги, о́тче, стяжа́л еси́,/ и, за́поведи Бо́жия до́бре испра́вив,/ житие́ непоро́чно сверши́в,/ блаже́нную жизнь получи́л еси́,/ и ны́не в лице́ преподо́бных пое́ши:/ благослове́н Бог оте́ц на́ших. Сла́ва Отцу́ и Сы́ну и Свято́му Ду́ху. Да пое́тся и прославля́ется днесь преподо́бный Мартиниа́н,/ и Боже́ственныя по́двиги его́ да почита́ются,/ и ди́вныя чудеса́ его́ да пропове́даются,/ Небе́сным бо све́том просвеща́ет и духо́вныя благода́ти исполня́ет ве́рою вопию́щих:/ благослове́н Бог оте́ц на́ших. И ны́не и при́сно и во ве́ки веко́в. Ами́нь. Богородичен: Де́во Влады́чице Богоро́дице,/ необори́мая стено́ и тве́рдое прибе́жище/ и те́плое заступле́ние от вся́ких напа́стей и скорбе́й ве́рою призыва́ющим пречи́стое и́мя Твое́,/ изба́ви мене́, грехо́вными беда́ми содержи́ма/ и ча́стыми напада́нии лю́те стра́ждуща,/ да, свобожде́н, воспева́ю Тя:/ благослове́н, Пречи́стая, Плод прижи́тия Твоего́. Песнь 8 Ирмос: Седмери́цею пещь/ халде́йский мучи́тель/ Богочести́вым неи́стовно разжже́,/ си́лою же лу́чшею спасе́ны, сия́ ви́дев,/ Творцу́ и Избави́телю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки. Припев: Преподо́бне о́тче Мартиниа́не, моли́ Бо́га о на́с. Свята́го Ду́ха в себе́ жили́ще име́л еси́,/ стра́хом Бо́жиим и чистото́ю душе́вною устро́ився,/ тем и одарова́ся от Бо́га Боже́ственною благода́тию,/ весть бо Госпо́дь прославля́ти просла́вльших Его́,/ я́коже ты, преподо́бне, просла́ви Его́ чу́дным и Богоуго́дным житие́м Свои́м на земли́,/ та́ко и тебе́ просла́ви в Ца́рствии Небе́снем,/ в не́мже ны́не, не премолча́я, пое́ши:/ де́ти, благослови́те, свяще́нницы, воспо́йте,/ лю́дие, превозноси́те Его́ во ве́ки. Припев: Преподо́бне о́тче Мартиниа́не, моли́ Бо́га о на́с. Свята́го Ду́ха благода́ть де́йствует тобо́ю и до ны́не,/ чудеса́ бо содева́еши и разли́чная исцеле́ния подава́еши к святы́м моще́м твои́м с ве́рою приходя́щим,/ но, о всеблаже́нне Мартиниа́не,/ исцели́ и моя́ теле́сныя боле́зни, я́же грехми́ роди́л,/ и ду́шу мою́ просвети́ и согреше́нием оставле́ние испроси́, пою́щу:/ де́ти, благослови́те, свяще́нницы, воспо́йте,/ лю́дие, превозноси́те Его́ во ве́ки. Сла́ва Отцу́ и Сы́ну и Свято́му Ду́ху. Све́та трисо́лнечнаго, Богому́дре, соприча́стник ны́не бысть с преподо́бными Кири́ллом и Ферапо́нтом,/ предстоя́ престо́лу Вседержи́теля тва́ри, со А́нгелы воспева́я непостижи́мую Его́ держа́ву,/ с ни́ми же, Богоблаже́нне Мартиниа́не, при́сно о нас моли́ся,/ любо́вию ублажа́ющих и почита́ющих тя во вся ве́ки. И ны́не и при́сно и во ве́ки веко́в. Ами́нь. Богородичен: Святы́й Дух на́йде на Тя и Си́ла Вы́шняго осени́ Тя, Де́во Чи́стая,/ и воплоти́ся от пречи́стаго Твоего́ чре́ва, я́коже изво́ли,/ да нас свободи́т от рабо́ты вра́жия,/ но что Ти принесе́м, Богоро́дице,/ ко́е ли пе́ние воспое́м, и́ли ку́ю похвалу́ воздади́м,/ досто́йно бо восхвали́ти Твое́ вели́чество ника́коже недоуме́ем мы,/ но ве́рою и любо́вию пое́м и превозно́сим Тебе́, Чи́стую Богома́терь, во ве́ки. Песнь 9 Ирмос: Ужасе́ся о сем Не́бо,/ и земли́ удиви́шася концы́,/ я́ко Бог яви́ся челове́ком плотски/ и чре́во Твое́ бысть простра́ннейшее Небе́с/ Тем Тя, Богоро́дицу,/ А́нгелов и челове́к чинонача́лия велича́ют. Припев: Преподо́бне о́тче Мартиниа́не, моли́ Бо́га о на́с. Удиви́шася а́нгельстии чи́нове равноа́нгельскому житию́ твоему́, преподо́бне,/ ка́ко подвиза́ся во пло́ти су́щей и безпло́тнаго врага́ победи́л еси́/ и вене́ц победи́тельный от Подвигополо́жника Бо́га восприя́л еси́,/ те́мже тя, всеблаже́нне Мартиниа́не,/ и́ночестии чи́нове, велича́ем. Припев: Преподо́бне о́тче Мартиниа́не, моли́ Бо́га о на́с. Удиви́шася челове́цы пресве́тлому и Богоуго́дному житию́ твоему́, Богому́дре,/ не дал бо еси́ сна свои́ма очи́ма, ни ве́ждома дрема́ния,/ до́ндеже сподо́бися ра́йскаго наслажде́ния,/ иде́же угото́ва Бог поко́й лю́бящим Его́,/ труды́ же твои́ и злострада́ния и великоду́шное терпе́ние кто исчести́ мо́жет?/ Тем тя вси велича́ем. Сла́ва Отцу́ и Сы́ну и Свято́му Ду́ху. Удиви́шася то́гда о́крестныя лю́дие,/ егда́ во оби́тели блаже́ннаго Кири́лла роди́телей свои́х отлучи́лся еси́,/ и ка́ко, в толи́це ю́ности су́щей, столе́тен смысл иму́щи,/ прии́де бо, и припаде́ к нему́, и рече́:/ возьми́ мене́, святы́й о́тче, к своему́ преподо́бству/ и наста́ви на путь спасе́ния./ Он же прови́де тебе́, хотя́ща бы́ти сосу́да избра́нна,/ прия́т тебе́ и наста́ви на духо́вный по́двиги,/ и уго́дник Бо́гу вели́к показа́ся,/ тем тя вси велича́ем. И ны́не и при́сно и во ве́ки веко́в. Ами́нь. Богородичен: Удиви́шася а́нгельстии собо́ри и челове́честии ро́ди о сем,/ Его́же бо трепе́щут вся́ческая, Сего́, Чи́стая, во чре́ве Свое́м понесла́ еси́/ и роди́ Собезнача́льна Сы́на и Сопресто́льна Отцу́ и Ду́хови па́че у́ма и сло́ва,/ за милосе́рдие ми́лости сообра́зна бы́вша/ и изба́вльшаго челове́чество от вра́жия губи́тельства,/ тем тя, Богоро́дице, А́нгел и челове́к чинонача́лия, велича́ем. Светилен Просвети́, преподо́бне, на́ши серде́чныя о́чи воззре́ти на Боже́ственную добро́ту/ и освяти́ на́ша ду́ши и телеса́,/ да досто́йными устна́ми песнь хвале́ния ти прино́сим,/ и моли́ся, преподо́бне, за чту́щия тя/ и ве́рою пра́зднующии па́мять твою́ присноблаже́нную.

Минея, 11 Ноября, Канон блаже́ннаго Макси́ма Глас 4 Песнь 1 Ирмос: Мо́ря чермну́ю пучи́ну/ невла́жными стопа́ми/ дре́вний пешеше́ствовав Изра́иль,/ крестообра́зныма Моисе́овыма рука́ма/ Амали́кову си́лу в пусты́ни победи́л есть. Припев: Святы́й блажéнный Макси́ме, моли́ Бо́га о на́с. Прича́стием е́же к Бо́гу, преподо́бне,/ свет был еси́/ и, к Нему́ отлучи́вся, Макси́ме блаже́нне, жела́нием кра́йним,/ благи́м наде́ждам свои́м, о́тче, исполне́ние при́ял еси́. Припев: Святы́й блажéнный Макси́ме, моли́ Бо́га о на́с. Жела́нием е́же к Бо́гу распала́емь, мир оста́вил еси́,/ спу́тника, о́тче, обре́т, Христа́, Макси́ме сла́вне,/ с Ни́мже стезю́ проше́л еси́ спаси́тельную, ра́дуяся. Сла́ва Отцу́ и Сы́ну и Свято́му Ду́ху. Обогати́тися ника́коже истоща́емыми возжеле́в,/ бога́тство и сла́ву вре́менную, му́дре,/ и пи́щу мимотеку́щую, и мирско́е достоя́ние доблему́дренно отри́нул еси́. И ны́не и при́сно и во ве́ки веко́в. Ами́нь. Богородичен: Кра́сную, и избра́нную, и всечестну́ю разуме́в Тя,/ Сын Бо́жий, Пренепоро́чная, Сын Твой бысть,/ сы́ны сотвори́ благода́тию, Влады́чице, чту́щия Тя. Песнь 3 Ирмос: Весели́тся о Тебе́ Це́рковь Твоя́, Христе́, зову́щи:/ Ты моя́ кре́пость, Го́споди,/ и прибе́жище, и утвержде́ние. Припев: Святы́й блажéнный Макси́ме, моли́ Бо́га о на́с. Усе́рдно к мы́сленным совлече́ся дея́нием,/ побежда́я вра́жия полки́ Боже́ственным посо́бием Ду́ха. Припев: Святы́й блажéнный Макси́ме, моли́ Бо́га о на́с. Ра́нами, и моли́твенным воздержа́нием, и бие́нии, преподо́бне,/ стра́сти мирски́я, о́тче Макси́ме, уязви́л еси́. Сла́ва Отцу́ и Сы́ну и Свято́му Ду́ху. Умори́ша врага́ по́стницы Твои́, Иису́се,/ умерщвле́ние ра́достно, Влады́ко, Твое́ живоно́сное возжеле́вше. И ны́не и при́сно и во ве́ки веко́в. Ами́нь. Богородичен: Избавля́ющаго челове́ки преслуша́ния, лю́таго паде́ния,/ всему́ Вино́внаго, Чи́стая и Всенепоро́чная, родила́ еси́. Седален, глас 8 Све́том Боже́ственным озаря́емь,/ в путь, веду́щий к Боже́ственным сия́нием, ходи́л еси́ ве́рно, о́тче преподо́бне,/ и вра́жиих отбе́гл еси́ прило́г,/ и сын све́та и дне яви́лся еси́, Макси́ме Богоблаже́нне. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Предста́тельнице ве́рных, Богороди́тельнице,/ скорбя́щих ра́досте и пла́чущих вели́кое утеше́ние,/ от чре́ва Твоего́, Де́во, всесвята́го преесте́ственно Ро́ждшагося непреста́нно моли́ с Макси́мом преблаже́нным/ изба́вити нас в час испыта́ния лю́таго осужде́ния. Песнь 4 Ирмос: Вознесе́на Тя ви́девши Це́рковь на Кресте́,/ Со́лнце Пра́ведное,/ ста в чи́не свое́м,/ досто́йно взыва́ющи:/ сла́ва си́ле Твое́й, Го́споди. Припев: Святы́й блажéнный Макси́ме, моли́ Бо́га о на́с. Соедини́вся к стезе́ пра́вды,/ в Богоспасае́мый Боже́ственный град вше́л еси́, преподо́бне,/ спаси́тельным сия́нием обогати́вся. Припев: Святы́й блажéнный Макси́ме, моли́ Бо́га о на́с. Единообра́зный, преподо́бне, смысл Богоно́сный ви́дев,/ Боже́ственными повестьми́ и Боже́ственною оде́ждею оде́ялся еси́. Сла́ва Отцу́ и Сы́ну и Свято́му Ду́ху. Се́рдце твое́ скрижа́ль очище́ну, Свята́го Ду́ха благода́ть, обре́тши, о́тче,/ написа́ соверше́нное безстра́стие и любо́вь нелицеме́рну. И ны́не и при́сно и во ве́ки веко́в. Ами́нь. Богородичен: Седя́й на Престо́ле превознесе́нне Херуви́мстем,/ я́ко престо́л, Тя име́я,/ на руке́ Твое́й почи́, Мари́е Богоневе́сто, препросла́вленный Бог. Песнь 5 Ирмос: Ты, Го́споди, мой свет,/ в мир прише́л еси́,/ Свет Святы́й, обраща́яй из мра́чна неве́дения/ ве́рою воспева́ющия Тя. Припев: Святы́й блажéнный Макси́ме, моли́ Бо́га о на́с. Пресве́тлую зарю́, Макси́ме, прии́м,/ я́ко со́лнце, яви́лся еси́/ и де́монскую тьму отгна́л еси́, достосла́вне. Припев: Святы́й блажéнный Макси́ме, моли́ Бо́га о на́с. Твои́м жела́нием, Христе́,/ отве́ргл все преподо́бный жела́ние теле́сное,/ я́коже сгре́бие мирско́е оттрясе́. Сла́ва Отцу́ и Сы́ну и Свято́му Ду́ху. Си́лою Боже́ственною ду́шу укрепи́в,/ в мир всели́лся еси́,/ опустева́я стра́сти, о́тче Богому́дре Макси́ме. И ны́не и при́сно и во ве́ки веко́в. Ами́нь. Богородичен: Раче́ние преста́ тле́нное,/ Де́ва бо нетле́нно роди́ Бо́га Сло́ва,/ па́че естества́ и сло́ва Де́ва пребыва́ет. Песнь 6 Ирмос: Пожру́ Ти со гла́сом хвале́ния, Го́споди,/ Це́рковь вопие́т Ти,/ от бесо́вския кро́ве очи́щшися/ ра́ди ми́лости от ребр Твои́х/ исте́кшею Кро́вию. Припев: Святы́й блажéнный Макси́ме, моли́ Бо́га о на́с. Ум твой весь к Бо́гу простира́я непреста́нными поуче́нии,/ плотску́ю любо́вь не пощаде́л еси́,/ благи́х тебе́ хода́тайству, Макси́ме, присвое́ние. Припев: Святы́й блажéнный Макси́ме, моли́ Бо́га о на́с. Ни скве́рны, ни вра́ски прия́л еси́, блаже́нне,/ посреде́ тебе́ ми́ра живу́щу,/ честны́ми же па́че мольба́ми твои́ми очища́еши от душе́вныя скве́рны притека́ющия. Сла́ва Отцу́ и Сы́ну и Свято́му Ду́ху. Ты, плотски́х мудрова́ний вы́шше име́я по́мысл,/ не уязви́лся еси́, посреде́ жен обнажа́емь:/ безстра́стия бо оде́ждею, Макси́ме, оде́ялся еси́. И ны́не и при́сно и во ве́ки веко́в. Ами́нь. Богородичен: Усты́, и по́мыслом, и се́рдцем, Пресвята́я Богоро́дице, Тя пропове́дуем:/ Тобо́ю Бо́гу примири́хомся,/ отринове́ннии преступле́нием пе́рвее пра́отца. Кондак, глас 2 Вы́шния красоты́ жела́я,/ ни́жния сла́дости и теле́сная одея́ния в ничто́же вмени́л еси́/ и нестяжа́ние па́че су́етнаго ми́ра возлюби́л еси́./ А́нгельское житие́ проходя́,/ сконча́лся еси́, блаже́нне Макси́ме:/ с ни́миже Христа́ моли́ непреста́нно о всех нас. Икос А́нгел на земли́ житие́м показа́вся,/ А́нгельския полки́ удиви́л еси́, и де́моны устраши́л еси́,/ и челове́ки просвети́л еси́ чуде́с твои́х заря́ми,/ Богоно́се и преблаже́нне о́тче наш Макси́ме./ И ны́не нас вразуми́ воспева́ти песнь к твоему́ хвале́нию,/ ра́достным гла́сом си́це глаго́лющих:/ ра́дуйся, оста́вивый тле́нное мудрова́ние и прие́мый нетле́нный вене́ц;/ ра́дуйся, терпели́вый душе́ю;/ ра́дуйся, целому́дренный ра́зумом и к Бо́гу воззре́нием;/ ра́дуйся, предо́блий юро́де, и́же злоко́зненнаго врага́ под нога́ми сотры́й;/ ра́дуйся, я́ко ни́жнее мудрова́ние оста́вль и вы́шняго Ца́рствия дости́гий;/ ра́дуйся, цели́телю боле́зней и отгони́телю страсте́й;/ ра́дуйся, Макси́ме блаже́нне, моля́ непреста́нно о всех нас. Песнь 7 Ирмос: В пещи́ Авраа́мстии о́троцы перси́дстеи,/ любо́вию благоче́стия па́че,/ не́жели пла́менем, опаля́еми, взыва́ху:/ благослове́н еси́ в хра́ме сла́вы Твоея́, Го́споди. Припев: Святы́й блажéнный Макси́ме, моли́ Бо́га о на́с. Содержи́мь Христо́вою подо́бно, о́тче, Боже́ственною любо́вию,/ други́х спасти́ ра́достно весь са́м ся, вопия́, изда́л:/ благослове́н Бог оте́ц на́ших. Припев: Святы́й блажéнный Макси́ме, моли́ Бо́га о на́с. С Небесе́ тебе́ пода́нуто, о́тче, прии́м пи́щу,/ се́ю препита́л еси́ благопоко́рно прие́млющия твоя́ повеле́ния/ и до́лу влеку́щий грех оставля́ющия, блаже́нне. Сла́ва Отцу́ и Сы́ну и Свято́му Ду́ху. После́довав оте́ческим преда́нием, о́тче му́дре,/ па́губы отринове́ние запове́да, зову́ще:/ благослове́н Бог оте́ц на́ших. И ны́не и при́сно и во ве́ки веко́в. Ами́нь. Богородичен: Вы́шняго освяще́нное Боже́ственное селе́ние, ра́дуйся,/ Тобо́ю бо даде́ся ра́дость, Богоро́дице, зову́щим:/ благослове́на Ты в жена́х, Всенепоро́чная Влады́чице. Песнь 8 Ирмос: Ру́це распросте́р, Дании́л/ льво́в зия́ния в ро́ве затче́;/ о́гненную же си́лу угаси́ша,/ доброде́телию препоя́савшеся,/ благоче́стия рачи́тели, о́троцы, взыва́юще:/ благослови́те вся дела́ Го́сподня Го́спода. Припев: Святы́й блажéнный Макси́ме, моли́ Бо́га о на́с. Всесве́тлая звезда́ сущ/ во тьме́ и стра́сти, световодя́ к жи́зни све́тлей:/ твори́ши бо жены́ нечи́стыя целому́дренно жи́ти/ и отго́ниши лю́тыя неду́ги, вопия́:/ благослови́те вся дела́ Госпо́дня Го́спода. Припев: Святы́й блажéнный Макси́ме, моли́ Бо́га о на́с. Ты исцели́ ум мой в кро́ве чу́дных и му́дрых, преподо́бне, повеле́ний Бо́жиих,/ мно́ги улови́л еси́ юро́дствовати Го́спода ра́ди,/ ве́дый наруга́емь бы́ти, вопия́ чисте́йшею душе́ю:/ благослови́те вся дела́ Госпо́дня Го́спода. Сла́ва Отцу́ и Сы́ну и Свято́му Ду́ху. Соверше́н еди́н,/ И́же весть своя́ прославля́ти, Госпо́дь, преподо́бныя:/ сии́ бо гро́бу посыла́емь и А́нгелов светлословле́нии почита́емь, вопию́щих:/ благослови́те вся дела́ Госпо́дня Го́спода. И ны́не и при́сно и во ве́ки веко́в. Ами́нь. Богородичен: Избавля́яй нас, возсия́ из Тебе́ Госпо́дь, Де́во Чи́стая,/ Его́же моли́, Влады́чице, просвети́ти пою́щия Тя и обстоя́ния нас изба́вити, вопию́щия:/ благослови́те вся дела́ Госпо́дня Го́спода. Песнь 9 Ирмос: Ка́мень нерукосе́чный/ от несеко́мыя горы́, Тебе́, Де́во,/ краеуго́льный отсече́ся,/ Христо́с, совокупи́вый разстоя́щаяся естества́./ Тем, веселя́щеся, Тя, Богоро́дице, велича́ем. Припев: Святы́й блажéнный Макси́ме, моли́ Бо́га о на́с. Всем се́рдцем, Макси́ме, Тро́ице усе́рдно предложи́вся/ и от Нея́ лучи́ Богоде́льно прие́мь,/ светови́ден был еси́ и со А́нгелы лику́еши. Припев: Святы́й блажéнный Макси́ме, моли́ Бо́га о на́с. Жела́нием Боже́ственным приедини́вся/ и воздержа́нием просвеща́емь,/ бу́дущих благ в прича́стии уже́ быв, Макси́ме Богоблаже́нне, и в наслажде́нии. Сла́ва Отцу́ и Сы́ну и Свято́му Ду́ху. Твоя́ боле́зни и по́ты прия́т весе́лие,/ ника́коже конца́ иму́ще,/ в не́мже пита́яся, Макси́ме преподо́бне, нас непреста́нно помина́й. И ны́не и при́сно и во ве́ки веко́в. Ами́нь. Богородичен: Разори́ души́ моея́ о́блаки, Све́та о́блаче, свята́я Влады́чице,/ и си́льна соде́лай мя́ на стра́сти, борю́щия мя,/ Спа́са всех ро́ждшая и Изба́вителя. Светилен А́нгельскаго жития́ жела́я, преподо́бне,/ покори́л еси́ стра́сти плотски́я му́жески/ и равноа́нгелен был еси́, Богоно́се о́тче Макси́ме. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Тя Предста́тельницу и́мамы вси гре́шнии, о Пресвята́я Де́во!/ Ты благопреме́нна сотвори́ Твоего́ Сы́на ма́терними Твои́ми моли́твами.

Минея, 27 Января, Други́й кано́н свята́го Глас 2 Песнь 1 Ирмос: Во́ды́ дре́вле/ ма́нием Боже́ственным/ во еди́но со́нмище совокупи́вый/ и раздели́вый мо́ре изра́ильтеским лю́дем,/ сей Бог наш препросла́влен есть,/ Тому́ Еди́ному пои́м, я́ко просла́вися, Припев: Святи́телю о́тче Иоа́нне, моли́ Бо́га о на́с. Боговеща́нная уста́, златогла́сный орга́не,/ све́тлостию слове́с мой просвети́ мольба́ми твои́ми ум,/ я́ко да воспою́ возвраще́ния твоего́ па́мять, Иоа́нне,/ благода́ти Боже́ственныя тезоиме́нне. Припев: Святи́телю о́тче Иоа́нне, моли́ Бо́га о на́с. Я́ко звезда́ светоно́сна, я́ко просвеща́ющее челове́ки со́лнце,/ я́ко свети́ло благоче́стия, под зе́млю заше́д, преподо́бне, зако́ны есте́ственными,/ па́ки возсия́л еси́ нам, ча́дом твои́м,/ посыла́я чуде́с оби́льная озаре́ния. Сла́ва Отцу́ и Сы́ну и Свято́му Ду́ху. Златоглаго́ливым твои́м язы́ком уче́ний испо́лнил еси́ всю подсо́лнечную/ и златы́ми у́ды́ исцеле́ний зари́ всем облиста́л еси́,/ страда́ний тьме изче́знути творя́, преподо́бне, возвраще́нием твои́м. И ны́не и при́сно и во ве́ки веко́в. Ами́нь. Богородичен: Вити́йствуя Боже́ственная, еди́нственную Ипоста́сь сказа́л еси́, Сло́во,/ а́ще и сугу́б бе, из Пречи́стыя проше́дый, плоть прие́м,/ Ю́же благослови́м непреста́нно и ве́рно сла́вим, Боже́ственный Златоу́сте. Песнь 3 Ирмос: И́же от не су́щих вся приведы́й,/ Сло́вом созида́емая,/ соверша́емая Ду́хом,/ Вседержи́телю Вы́шний,/ в любви́ Твое́й утверди́ мене́. Припев: Святи́телю о́тче Иоа́нне, моли́ Бо́га о на́с. В заточе́ния тя сокры́ верте́пех,/ свети́льника всесве́тлаго, цари́ца осле́пшая;/ Христо́с же на высоча́йшем тя све́щнице, и па́ки возвра́щ, поставля́ет. Припев: Святи́телю о́тче Иоа́нне, моли́ Бо́га о на́с. Иска́пая струи́ чуде́с и ре́ки пролива́я врачева́ний,/ возврати́лся еси́, Златоу́сте,/ ве́рно честву́ющим возвраще́ния твоего́ па́мять, Иоа́нне. Сла́ва Отцу́ и Сы́ну и Свято́му Ду́ху. Златоте́чный Нил наводня́яй в словесе́х же и чудесе́х возврати́ся;/ да стеце́мся и ве́рно почерпе́м оби́льно вси,/ во всех да насы́тимся. И ны́не и при́сно и во ве́ки веко́в. Ами́нь. Богородичен: 3емно́е естество́ не мо́жет Тя воспе́ти,/ Ю́же А́нгели пою́т, я́ко Бо́га пло́тию роди́вшую:/ оба́че ве́рно, раби́ Твои́, дерза́ем пе́ти Тя и сла́вити. Седален, глас 8 Ю́же с высоты́ му́дрость уве́дев и благода́ть слове́с от Бо́га,/ всем просия́л еси́, я́ко зла́то в горни́ле,/ и Святу́ю Тро́ицу во Еди́нстве пропове́дал еси́,/ сребролю́бную лесть устрели́в словесы́ твои́ми./ Те́мже и ре́вностию цари́цу обличи́в,/ А́риево посрами́л еси́ иноплеме́нное мудрова́ние./ Иоа́нне Златоу́сте, моли́ Христа́ Бо́га/ прегреше́ний оставле́ние дарова́ти/ пра́зднующим любо́вию святу́ю па́мять твою́. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: От Тро́ицы Еди́наго преесте́ственно заче́нши, Де́во,/ и чу́дно́ Сего́ породила́ еси́ па́че сло́ва́ и мы́сли,/ и о́бщно Боже́ственнаго естества́ устро́ила еси́ челове́ческое естество́, дре́вле изгна́нное./ Те́мже, соше́дшеся, Рождество́м Твои́м вси спа́сшиися, Всенепоро́чная,/ Твои́м словесе́м после́дующе, до́лжно Тя ублажа́ем,/ моля́ще Христа́ Бо́га прегреше́ний оставле́ние дарова́ти/ ве́рою Тя сла́вящим, Ма́терь Его́. Песнь 4 Ирмос: Положи́л еси́ к нам тве́рдую любо́вь, Го́споди,/ Единоро́днаго бо Твоего́ Сы́на за ны на смерть дал еси́./ Те́мже Ти зове́м, благодаря́ще:/ сла́ва си́ле Твое́й, Го́споди. Припев: Святи́телю о́тче Иоа́нне, моли́ Бо́га о на́с. Слове́с рачи́телие, слове́с вели́каго украси́теля словесы́ свяще́нными,/ ра́достне па́ки возвраща́ющася, прииди́те, да почита́ем,/ словеса́ суему́дренная прему́дростию слове́с буесло́вия обличи́вшаго. Припев: Святи́телю о́тче Иоа́нне, моли́ Бо́га о на́с. Обогати́вый нас уче́ний бога́тством, Златоу́сте,/ ру́ку же востяга́еши,/ тя́жестно лихоима́ния бога́тством отягча́вшую, облича́яй явле́ннейше/ и со еди́нем то́кмо бога́тством Боже́ственныя благода́ти. Сла́ва Отцу́ и Сы́ну и Свято́му Ду́ху. Лук си́льных лю́тости мучи́тельския сокруши́ся,/ ты же, в не́мощи пло́ти́ а́нгельски пожи́в, превозмо́гл еси́,/ моле́бники, Златоу́сте, су́щия пре́жде гони́тели, име́яй, свяще́ннейше. И ны́не и при́сно и во ве́ки веко́в. Ами́нь. Богородичен: Чи́ни у́мнии песнопе́нии Тя хва́лят, Отрокови́це:/ Его́же бо не мо́гут зре́ти, из чи́стыя утро́бы Твое́й породила́ еси́,/ плоть восприе́мша неизме́нно, Всечи́стая Богоневе́сто. Песнь 5 Ирмос: К Тебе́ у́тренюю, всех Творцу́,/ преиму́щему всяк ум ми́рови,/ зане́ свет повеле́ния Твоя́,/ в ни́хже наста́ви мя. Припев: Святи́телю о́тче Иоа́нне, моли́ Бо́га о на́с. Я́коже весна́, яви́лся еси́,/ благоуха́я та́инственне цве́ты благода́тей ве́рных мно́жества,/ разреша́я злых зи́му, о́тче, в возвраще́нии твое́м. Припев: Святи́телю о́тче Иоа́нне, моли́ Бо́га о на́с. Боже́ственная струя́, исто́чник дарова́ний возврати́ся./ Жа́ждущии, прииди́те, во́ду жи́зни почерпи́те ве́рою,/ Боже́ственне веселя́щеся. Сла́ва Отцу́ и Сы́ну и Свято́му Ду́ху. Заше́д, сокры́лся еси́, увы́ мне! добро́та моя́,/ но возврати́лся еси́ мне, вожделе́нне, во вре́мя свое́, -/ Христо́ва Це́рковь вопиет ти возврати́вшемуся. И ны́не и при́сно и во ве́ки веко́в. Ами́нь. Богородичен: Ми́лостива мне сотвори́/ проше́дшаго из Твоея́ утро́бы, Всенепоро́чная, Плотоно́сца Сло́ва́,/ Его́же в хра́ме Симео́н на руку́ держа́, я́ко Созда́теля велича́ше. Песнь 6 Ирмос: Бе́здна после́дняя грехо́в обы́де мя,/ и изчеза́ет дух мой,/ но простры́й, Влады́ко, высо́кую Твою́ мы́шцу,/ я́ко Петра́, мя, Упра́вителю, спаси́. Припев: Святи́телю о́тче Иоа́нне, моли́ Бо́га о на́с. Отсека́ет тя от Це́ркве Христо́вы безу́мная цари́ца, свере́по облича́ющая,/ но а́бие сама́ отсека́ется,/ ты же облича́еши ю и по сме́рти,/ чуде́сное пресече́ние соде́лавый. Припев: Святи́телю о́тче Иоа́нне, моли́ Бо́га о на́с. Орга́н показа́лся еси́ Вседе́тельнаго, Златоу́сте, Ду́ха, зело́ благосли́чнейше глася́щий;/ глуха́ же быва́ет мучи́тельница, я́коже а́спида проте́к обава́нием,/ и зело́ окая́нного возмеря́ется ей сме́ртию. Сла́ва Отцу́ и Сы́ну и Свято́му Ду́ху. Ме́ртвости, а́ще и у́мре, не пострада́ти ему́ я́ве научи́ цари́ Златоу́стый./ Тех бо повеле́нием не повину́вся пре́жде,/ на моле́ния же тех возврати́ся пото́м. И ны́не и при́сно и во ве́ки веко́в. Ами́нь. Богородичен: Еди́наго Тя, су́щаго от Де́вы, помышля́я,/ а́ще и плоть прия́л еси́, и сугу́б был еси́,/ дале́че отрази́ и сече́ние, и сли́тие Златоу́стый Иоа́нн,/ Богочелове́че Иису́се. Кондак, глас 1 Возвесели́ся та́инственно честна́я Це́рковь/ возвраще́нием честны́х твои́х моще́й,/ и, сия́ сокры́вши, я́ко зла́то многоце́нное,/ пою́щим тя неоску́дно подава́ет/ моли́твами твои́ми исцеле́ний благода́ть,/ Иоа́нне Златоу́сте. Икос Свеща́ дел мои́х дряхла́ бысть, Иоа́нне Златоу́сте,/ и ужаса́юся к сре́тению свяще́нных твои́х моще́й,/ но ты сам наста́ви мя и стези́ моя́ испра́ви,/ покая́ния подая́ ми вре́мя, всесвя́те,/ я́ко Того́ еси́ пропове́дник Боже́ственный,/ и страсте́й мои́х многови́дных ути́ши бу́рю/ и, от се́тей велиа́ровых исхи́тив мя, в коне́ц спаси́ мя,/ я́ко да пою́ твое́ досто́йне сла́вное возвраще́ние,/ я́ко пре́жде и успе́ние дерзну́в просла́вих, Иоа́нне Златоу́сте. Песнь 7 Ирмос: Я́коже дре́вле/ благочести́выя три о́троки ороси́л еси́ в пла́мени халде́йстем,/ све́тлым Божества́ огне́м и нас озари́,/ благослове́н еси́, взыва́ющия,/ Бо́же оте́ц на́ших. Припев: Святи́телю о́тче Иоа́нне, моли́ Бо́га о на́с. Чу́жду сотвори́ти вдови́цу, прему́дре,/ непроще́нну бы́ти пове́дающа от свои́х ей,/ чу́жда тя твори́т от ца́рствующаго гра́да вседе́рзая жена́,/ чу́жда быва́ет и сама́ Боже́ственныя благода́ти,/ отчужди́вшая себе́ от прему́дрых уче́ний твои́х. Припев: Святи́телю о́тче Иоа́нне, моли́ Бо́га о на́с. Но возврати́лся еси́ сла́достен, я́коже со́лнце, о́блаки покры́то бы́вшее,/ зело́ велича́йший свети́льниче,/ светоно́сных та́йным светозаре́нием златы́х уче́ний твои́х/ просвети́вшимся всем, Иоа́нне Златоу́сте. Сла́ва Отцу́ и Сы́ну и Свято́му Ду́ху. Простира́ю ти дла́ни моя́, Златоу́сте,/ внутрь огра́д мои́х тя прия́ти, невестово́дца,/ возвраща́ющася све́тле, зело́ любе́зна, я́ко ле́ты закосне́вшаго, -/ Це́рковь вопие́т ти, пра́зднующи днесь. И ны́не и при́сно и во ве́ки веко́в. Ами́нь. Богородичен: Я́ко та́йная клеща́ не́кая, Угль нося́щая мы́сленный,/ гряде́ши ко хра́му, Его́же, Симео́н просвети́ся, на ру́це, Пречи́стая, прие́м,/ и о зна́мениих стра́сти Его́ проро́чествовати и́мать зело́ ясне́йше. Песнь 8 Ирмос: Нестерпи́мому огню́ соедини́вшеся,/ богоче́стия предстоя́ще, ю́ноши,/ пла́менем же неврежде́ни,/ Боже́ственную песнь поя́ху:/ благослови́те, вся дела́ Госпо́дня, Го́спода/ и превозноси́те во вся ве́ки. Припев: Святи́телю о́тче Иоа́нне, моли́ Бо́га о на́с. Сосца́ми благоче́стия, о́тче преподо́бне, воспита́вшую тя пита́еши Це́рковь,/ отда́й седмокра́тным хле́бом Боже́ственныя благода́ти,/ твою́, пита́телю, сла́дость пролива́я, я́ко питие́ же врачева́ний, всеблаже́нне Златоу́сте. Припев: Святи́телю о́тче Иоа́нне, моли́ Бо́га о на́с. Во всю зе́млю произы́де, о́тче, веща́ние твои́х догма́тов,/ безу́мная же цари́ца тя изгна́ти ме́стне повеле́, но солга́ся:/ ты бо, я́ко исполи́н высокоте́чен, везде́ осиява́еши слове́с твои́х луча́ми. Сла́ва Отцу́ и Сы́ну и Свято́му Ду́ху. Да просвети́тся днесь сосло́вие ве́рных,/ с весе́лием срета́юще преизря́днейшаго учи́телей:/ прии́де бо и теле́сне настои́т, раздая́ всем благода́ть оби́льную,/ ея́же да наслади́мся, ра́дующеся бога́тно. И ны́не и при́сно и во ве́ки веко́в. Ами́нь. Богородичен: Зрю Тя на рука́х Ма́терских,/ вем же Тя непристу́пна Божества́ естество́м./ Ка́ко у́бо, Сло́ве, рука́ми держи́м еси́,/ И́же в руце́ всю тварь и́маши? – рече́ Симео́н, Богочелове́че,/ неизрече́нную Твою́ сла́вя си́лу. Песнь 9 Ирмос: Но́вое чу́до и Боголе́пное!/ Деви́ческую бо дверь затворе́нную я́ве прохо́дит Госпо́дь,/наг во вхо́де, и Плотоно́сец яви́ся во исхо́де Бог,/ и пребыва́ет дверь затворе́на./ Сию́ неизрече́нно я́ко Богома́терь велича́ем. Припев: Святи́телю о́тче Иоа́нне, моли́ Бо́га о на́с. Во́инство А́нгелов, собо́р проро́ков,/ апо́столов же и му́чеников Боже́ственный лик/ с на́ми веселя́тся све́тло, сообща́ющеся пра́зднику, всеблаже́нне,/ и пе́ний твои́х свою́ непщу́юще благода́ть:/ всех бо име́л еси́ в себе́, житие́ изобража́я. Припев: Святи́телю о́тче Иоа́нне, моли́ Бо́га о на́с. Се ми́ра возсия́ свет,/ превысо́кия яви́ся в не́м Боже́ственная свеща́,/ сладкотво́рная пучи́на Боже́ственных даро́в./ Да напита́емся, прииди́те, све́та, бра́тие, да согре́емся, да почерпе́м,/ от се́рдца пе́сньми вси златоглаго́ливаго велича́юще. Сла́ва Отцу́ и Сы́ну и Свято́му Ду́ху. Я́ко две ца́те, тебе́ пе́ние сие́ от недосто́йныя и окая́нныя души́ моея́,/ от вся́ких у́бо благи́х окая́нне вдо́вствующия,/ от усе́рдия же Боже́ственнаго бога́тства принося́щияя сие́,/ благо́сти подража́нием Боже́ственныя приими́,/ благода́ть проти́ву воздая́ ми богатода́рную. И ны́не и при́сно и во ве́ки веко́в. Ами́нь. Богородичен: Ступа́я, трясу́ся, – рече́ Симео́н, -/ колеба́тися же Творя́щаго свы́ше призира́нием то́кмо всей земли́,/ держа́ на руку́, укрепля́емь есмь, Твое́ рожде́ние, Де́во,/ от трясу́щияся уже́ пло́ти отпуща́емь,/ извеще́нию хотя́щих ми бы́ти уже́ сбыва́ющуся, ра́дуяся, ношу́,/ и су́щим во а́де избавле́ние благовеству́я. Светилен Ра́дуйся, гра́де градо́в всех Ца́рствующий,/ я́ко до́браго твоего́ па́стыря и пастыренача́льника те́ло восприе́мый днесь,/ тя и мир весь пра́вяща и спаса́юща медото́чными Златоу́стаго,/ и восплеща́й пе́сньми. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Ра́дуйся, Бо́жия пала́то,/ ра́дуйся, горо́ присе́нная,/ ра́дуйся, неопали́мая купино́,/ ра́дуйся, престо́ле сла́вы,/ ра́дуйся, Боже́ственная трапе́зо,/ ра́дуйся, ста́мно всезлата́я,/ ра́дуйся, свети́льниче всесве́тлый,/ ра́дуйся, ле́гкий о́блаче,/ Де́во Ма́ти Мари́е.

Минея, 3 Сентября, Кано́н свята́го Глас 4 Песнь 1 Ирмос: Мо́ря чермну́ю пучи́ну невла́жными стопа́ми дре́вний пешеше́ствовав Изра́иль, крестообра́зныма Моисе́овыма рука́ма Амали́кову си́лу в пусты́ни победи́л есть. Припев: Святы́й блажéнный Иоáнне, моли́ Бо́га о на́с. Тво́рче всея́ тва́ри, Преблаги́й Го́споди Иису́се Христе́, Бо́же наш,/ яви́л еси́ нам, рабо́м Твои́м, сего́ блаже́ннаго Иоа́нна, по́мнящим и слы́шавшим его́,/ и́же ны́не, ра́ди Твоего́ свята́го и́мене и Пречи́стыя Богоро́дицы и Предте́чи Иоа́нна/ ко гро́бу его́ приходя́ще, прие́млют исцеле́ния,/ тем Твое́ человеколю́бное смотре́ние сла́вим и мо́лим Тя:/ спаси́ нас, Го́споди. Припев: Святы́й блажéнный Иоáнне, моли́ Бо́га о на́с. Ми́лостивому Бо́гу на земли́ подо́бен был еси́, о́тче Иоа́нне,/ правове́рным смы́слом оста́вль оте́чество свое́, прии́де во град, я́ко в пусты́ню./ И, я́ко ца́рскою багряни́цею и ви́ссом, власяни́цею оде́явся, о́тче,/ и венце́м терпе́ния с пострада́вшими увязе́ся,/ моли́ Христа́ Бо́га о всех нас. Сла́ва Отцу́ и Сы́ну и Свято́му Ду́ху. Отче Иоа́нне блаже́нне,/ ко Христу́ ве́ру небла́зненну име́яй, чист по́мысл и любо́вь нелицеме́рну,/ терпе́нием же твои́м и смиренному́дрием/ прича́стника тя невече́рней благода́ти благоче́стно сла́вим. И ны́не и при́сно и во ве́ки веко́в. Ами́нь. Богородичен: Роди́выйся от Де́вы, Христе́ Бо́же, и мир просвети́вый от нетле́ния,/ изба́ви и мене́, окая́ннаго, Богоро́дицы ра́ди и всех святы́х Твои́х/ от прегреше́ний мои́х. Песнь 3 Ирмос: Весели́тся о Тебе́ Це́рковь Твоя́, Христе́, зову́щи: Ты моя́ кре́пость, Го́споди, и прибе́жище, и утвержде́ние. Припев: Святы́й блажéнный Иоáнне, моли́ Бо́га о на́с. Христа́ Бо́га в се́рдце свое́м восприя́л еси́, о́тче Иоа́нне,/ и Престо́ла Бо́жия дости́гл еси́,/ Пресвяту́ю Тро́ицу непреста́нно зре́ти сподо́бился еси́./ Мо́лим тя: испроси́ пода́ти правосла́вным Христиа́ном здра́вие,/ на враги́ одоле́ние и ми́ру умире́ние, земли́ благопло́дие/ и душа́м на́шим спасе́ние. Припев: Святы́й блажéнный Иоáнне, моли́ Бо́га о на́с. Име́я, о́тче Иоа́нне, ду́шу чи́сту и ми́лостиву и се́рдце бо́дро,/ тем вселе́ние во дворе́ ове́ц Христо́вых и путь предочи́щен обре́т к Пресвято́й Тро́ице,/ к ве́чному животу́ прибли́зился еси́, и нас спаси́ моли́твами твои́ми. Сла́ва Отцу́ и Сы́ну и Свято́му Ду́ху. Пресвято́му Ду́ху на земли́ был еси́ жили́ще, блаже́нне Иоа́нне,/ ны́не же на Небеси́ предстои́ши Го́сподеви./ Те́мже мо́лим тя:/ и нас Свято́му Ду́ху дом соде́лай моли́твами твои́ми, чту́щих тя. И ны́не и при́сно и во ве́ки веко́в. Ами́нь. Богородичен: Роди́тельнице безму́жная, Ма́ти Христа́ Бо́га, Де́во Мари́е,/ мо́лим Тя, Госпоже́:/ спаси́ рабы́ Твоя́ от всех зол. Седален, глас 5 Тве́рдаго адама́нта и столпа́, непоколеба́ма вра́жиими прило́ги,/ богоно́снаго Иоа́нна пе́сньми почти́м./ Терпе́нием бо вои́стину посрами́в прило́ги сопроти́внаго врага́ и без ве́сти его́ сотвори́вша,/ и ны́не мо́лится о спасе́нии душ на́ших. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Ужа́сно чу́до зача́тия и несказа́нен о́браз Рождества́/ в Тебе́ позна́ся, Чи́стая Присноде́во,/ ужаса́ет мой ум и удивля́ет по́мысл./ Сла́ва Твоя́, Богоро́дице, всем простре́ся/ во спасе́ние душ на́ших. Песнь 4 Ирмос: Вознесе́на Тя ви́девши Це́рковь на Кресте́, Со́лнце Пра́ведное, ста в чи́не свое́м, досто́йно взыва́ющи: сла́ва си́ле Твое́й, Го́споди. Припев: Святы́й блажéнный Иоáнне, моли́ Бо́га о на́с. Лучеза́рными светлостьми́ Пресвяты́я Тро́ицы просия́л еси́, о́тче Иоа́нне,/ я́ко ма́слина плодови́та в дому́ Бо́жии, еле́ем трудо́в твои́х./ И ны́не, в неизглаго́ланней ра́дости пребыва́я,/ посеща́й нас моли́твами твои́ми, чту́щих тя. Припев: Святы́й блажéнный Иоáнне, моли́ Бо́га о на́с. Богому́дре о́тче Иоа́нне,/ чи́стая твоя́ душа́ с ли́ки святы́х на Небесе́х предстоя́т Христу́ Бо́гу, ра́дуяся./ Те́мже мы святу́ю твою́ па́мять пе́сньми почита́ем и мо́лим тя спасти́ся нам. Сла́ва Отцу́ и Сы́ну и Свято́му Ду́ху. Житие́ твое́ на земли́, блаже́нне Иоа́нне, я́ко со́лнце возсия́,/ ны́не же, на Небесе́х предстоя́ Го́сподеви, мо́лишися за ны./ Зде же от гро́ба твоего́ чуде́с лучи́, исцеле́ния прие́млюще, мо́лим тя:/ просвети́ нас Невече́рним Све́том, моли́твами твои́ми. И ны́не и при́сно и во ве́ки веко́в. Ами́нь. Богородичен: Яко заче́нши Преве́чное из Безнача́льнаго Отца́ Сло́во,/ пло́тию ро́ждши па́че сло́ва, Де́во Ма́ти, Преве́чнаго Бо́га,/ Того́ моли́ спасти́ся рабо́м Твои́м. Песнь 5 Ирмос: Ты, Го́споди мой, Свет в мир прише́л еси́, Свет Святы́й, обраща́яй из мра́чна неве́дения ве́рою воспева́ющия Тя. Припев: Святы́й блажéнный Иоáнне, моли́ Бо́га о на́с. Свети́ло пресве́тлое от Бо́га возсия́л еси́, о́тче Иоа́нне, в преимени́том гра́де Росто́ве/ и в доброде́тельных све́тлостех чудесы́ просия́л еси́./ Те́мже тя прославля́ем, па́мять твою́ почита́юще. Припев: Святы́й блажéнный Иоáнне, моли́ Бо́га о на́с. Яви́лся еси́ во гра́де Росто́ве земны́й А́нгел и Небе́сный челове́к,/ подава́я всем исто́чник благоче́стия и ми́лости,/ по преставле́нии же да́руя душа́м на́шим спасе́ние и телесе́м исцеле́ние. Сла́ва Отцу́ и Сы́ну и Свято́му Ду́ху. Ко́е похвале́ние принесе́м ти, честны́й о́тче Иоа́нне,/ ви́дяще и слы́шаще блаже́нное твое́ житие́ и терпе́ние?/ Яко и ны́не, приходя́ще к тебе́, прие́млем неоску́дно исцеле́ние и здра́вие,/ и что ти возда́мы, не ве́мы, но то́кмо глаго́лем:/ ди́вен Бог во святы́х Свои́х, творя́й чудеса́ Еди́н. И ны́не и при́сно и во ве́ки веко́в. Ами́нь. Богородичен: Всесвята́я Богоро́дице,/ во вре́мя живота́ моего́ не оста́ви мене́,/ челове́ческому предста́тельству не вве́ри мя,/ но Сама́ заступи́ и поми́луй мя. Песнь 6 Ирмос: Пожру́ Ти со гла́сом хвале́ния, Го́споди, Це́рковь вопие́т Ти, от бесо́вския кро́ве очи́щшися ра́ди ми́лости от ребр Твои́х исте́кшею Кро́вию. Припев: Святы́й блажéнный Иоáнне, моли́ Бо́га о на́с. Богому́дре и всеблаже́нне Иоа́нне,/ смиренному́дрием, терпе́нием и по́двиги возжеле́л еси́ Небе́снаго Ца́рствия./ Ны́не же, предстоя́ со все́ми святы́ми Царе́ви Си́лам,/ моли́ спасти́ся рабо́м твои́м. Припев: Святы́й блажéнный Иоáнне, моли́ Бо́га о на́с. Бога́тства Небе́снаго возжела́л еси́, земну́ю сла́ву и бога́тство ни во что́же вмени́в,/ обре́т Ца́рство Небе́сное, нетле́нным и ве́чным бога́тством обогати́лся еси́,/ и нас спаси́ моли́твами твои́ми от всех зол. Сла́ва Отцу́ и Сы́ну и Свято́му Ду́ху. Посо́бием и вселе́нием в тя Пресвята́го Ду́ха, о́тче Иоа́нне,/ на земли́ терпе́нием побежда́я бесо́вския полки́,/ обре́л еси́ вене́ц нетле́нный от Христа́ Бо́га и Спа́са душ на́ших./ Моли́ спасти́ся рабо́м твои́м. И ны́не и при́сно и во ве́ки веко́в. Ами́нь. Богородичен: Пое́м Тя, Де́во, Богома́ти Чи́стая, Мари́е,/ па́че рождества́ Твое́ богому́жное Рождество́ и нетле́нную чистоту́,/ и́бо сочета́ся де́вство и рождество́. Кондак, глас 8 Христо́вою любо́вию уязви́вся, о́тче Иоа́нне блаже́нне,/ вы́шния красоты́ жела́я, земна́я же вся презре́ и ни во что́же вмени́;/ и на земли́ а́нгельское житие́ препроводи́, в ве́чный поко́й дости́же,/ иде́же глас пра́зднующих, с ни́миже моли́ся за ны// и душа́м на́шим проще́ние и телесе́м исцеле́ние да́руй. Икос Ка́ко возмогу́ аз, окая́нный, воспе́ти равноа́нгельное житие́ твое́ на земли́:/ целому́дрие, терпе́ние и те́плую я́же ко Христу́ любо́вь?/ По отше́ствии же твое́м к Бо́гу/ с ве́рою приходя́щим ко гро́бу твоему́ подае́ши исцеле́ния./ И что́ ти принесе́м? То́чию мо́лим тя и си́це вопие́м:/ ра́дуйся, честны́й о́тче наш Иоа́нне блаже́нне,/ ты бо еси́ гра́ду на́шему похвала́ и утвержде́ние,/ боля́щим исцеле́ние и душа́м на́шим спасе́ние. Песнь 7 Ирмос: В пещи́ Авраа́мстии о́троцы перси́дстей, любо́вию благоче́стия па́че, не́жели пла́менем, опаля́еми, взыва́ху: благослове́н еси́ в хра́ме сла́вы Твоея́, Го́споди. Припев: Святы́й блажéнный Иоáнне, моли́ Бо́га о на́с. Све́тло сия́ющим спаси́тельным бога́тством на земли́ обогатился еси́, блаже́нне о́тче Иоа́нне,/ всели́лся в боже́ственный град Росто́в и причти́лся еси́ с ли́ки пра́ведных в ве́чное ра́дование./ Моли́ся за ны, пою́щия:/ благослове́н Бог оте́ц на́ших. Припев: Святы́й блажéнный Иоáнне, моли́ Бо́га о на́с. Боже́ственными веле́нии и уче́нии оде́явся в смысл безстра́стный и моли́твенный,/ вни́де во двор ове́ц Па́стыря Небе́снаго,/ иде́же ли́цы святы́х веселя́щеся пою́т:/ благослове́н Бог оте́ц на́ших. Сла́ва Отцу́ и Сы́ну и Свято́му Ду́ху. Ди́вен еси́, Бо́же наш,/ я́ко и ко́сти на́ги де́йствуют в ми́ре чудеса́ и подаю́т исцеле́ния,/ да благослови́м Го́спода, пою́ще:/ благослове́н Бог оте́ц на́ших. И ны́не и при́сно и во ве́ки веко́в. Ами́нь. Богородичен: Безневе́стная Чи́стая браконеиску́сная Де́во, Ма́ти Христа́ Бо́га,/ моли́ Того́ о спасе́нии пою́щих:/ благослове́н Бог оте́ц на́ших. Песнь 8 Ирмос: Ру́це распросте́р Дании́л, львов зия́ния в ро́ве затче́, о́гненную же си́лу угаси́ша, доброде́телию препоя́савшеся, благоче́стия рачи́тели, о́троцы, взыва́юще: благослови́те, вся дела́ Госпо́дня, Го́спода. Припев: Святы́й блажéнный Иоáнне, моли́ Бо́га о на́с. Благи́м смиренному́дрием твои́м ум свой простира́я к Вы́шнему,/ Боже́ственным призыва́нием вни́де в ра́дость Го́спода своего́,/ хваля́ и благословя́ Христа́ во ве́ки. Припев: Святы́й блажéнный Иоáнне, моли́ Бо́га о на́с. Мольба́ми твои́ми и благоду́шным терпе́нием, ду́шу твою́ и те́ло очи́стив от вся́кия скве́рны,/ обре́л еси́ ве́чный поко́й,/ иде́же есть жили́ще веселя́щихся и сла́вящих Христа́ во ве́ки. Сла́ва Отцу́ и Сы́ну и Свято́му Ду́ху. После́довал еси́, о́тче, отце́м, Иоа́нне блаже́нне,/ и́же Христа́ ра́ди на земли́ мно́ги ско́рби претерпе́вый и Боже́ственная веле́ния вся соверши́вый./ Ты бо тле́нная вся мудрова́ния от себе́ отве́ргл еси́,/ тем Небе́сное Ца́рство насле́дова во ве́ки. И ны́не и при́сно и во ве́ки веко́в. Ами́нь. Богородичен: Яко Цари́цу, Царя́, всех Бо́га, Ро́ждшую,/ ве́рнии, со Арха́нгелом Благослове́нную возвели́чим Ма́терь Бо́жию:/ ра́дуйся, Ма́ти Творца́ тва́ри. Песнь 9 Ирмос: Ка́мень нерукосе́чный от несеко́мыя горы́ Тебе́, Де́во, краеуго́льный отсече́ся, Христо́с, совокупи́вый разстоя́щаяся естества́. Тем веселя́щеся Тя, Богоро́дице, велича́ем. Припев: Святы́й блажéнный Иоáнне, моли́ Бо́га о на́с. Ра́нами и наруга́нием от бесо́в и лука́вых челове́к, моли́твенным терпе́нием свои́м/ вра́жия полки́ побежда́я по́мощию Свято́го Ду́ха,/ вселя́лся еси́ к Невече́рнему Све́ту Бо́жия благода́ти./ Тем тя, хва́ляще, ублажа́ем. Припев: Святы́й блажéнный Иоáнне, моли́ Бо́га о на́с. Посреде́ ми́ра живы́й и вся стре́лы лука́ваго диа́вола сокруши́в,/ моли́твами твои́ми дости́гл еси́ горняго Иерусали́ма,/ предстоя́ Христу́ Бо́гу за чту́щия тя. Сла́ва Отцу́ и Сы́ну и Свято́му Ду́ху. Мо́лим тя, блаже́нне Иоа́нне,/ моля́ Христа́ Бо́га, и Пречи́стую Богоро́дицу, и Предте́чу Иоа́нна, и всех святы́х/ пода́ти правосла́вным христиа́ном здра́вие и побе́ду на вся ви́димыя и неви́димыя враги́/ и жела́ние о исполне́нии соверше́нства во ве́ки веко́в. И ны́не и при́сно и во ве́ки веко́в. Ами́нь. Богородичен: И́же нас ра́ди рожде́йся от Де́вы, Христе́ Бо́же,/ и за ны распны́йся, и сме́ртию смерть разруши́вый,/ моли́твами Богоро́дицы и всех святы́х поми́луй и спаси́ нас. Светилен Процве́л еси́, я́ко фи́никс, Дави́дски, о́тче,/ и оби́тель яви́лся еси́ Ду́ха Пресвято́го,/ и сла́вна тя вселе́нней показа́./ О нас непреста́нно моля́, почита́ющих ве́рою пречестну́ю па́мять твою́,/ преподо́бне Иоа́нне. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: От Бо́га ми́рови по́данных благи́х Ты вина́ была́ еси́, Богоро́дице,/ но и ны́не моля́ о о́бщем спасе́нии благопреме́ннаго Бо́га.

Минея, 2 Мая, Канон святителя Глас 8 Песнь 1 Ирмос: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:/ Изба́вителю и Бо́гу на́шему пои́м. Припев: Святи́телю, о́тче Афана́сие, моли́ Бо́га о на́с. Безсме́ртию быв тезоимени́т,/ в ве́ре тве́рдей житие́ твое́ проше́д,/ блаже́ннаго безсме́ртия прича́стник яви́лся еси́, о́тче святи́телю Афана́сие,/ ны́не Христо́ви предстоя́, помина́й нас, почита́ющих тя. Припев: Святи́телю, о́тче Афана́сие, моли́ Бо́га о на́с. Песнь хвале́бную прино́сим ти, святи́телю, в прославле́ние па́мяти твоея́,/ а́ще и не довле́ет ум наш по достоя́нию благохвали́ти тя,/ но ты сам помози́ нам почива́ющею на тебе́ неоску́дною благода́тию. Сла́ва Отцу́ и Сы́ну и Свято́му Ду́ху. Очи́стив от вся́кия скве́рны ду́шу и те́ло, святи́телю Афана́сие,/ храм досто́ин Бо́гу показа́лся еси́/ и Тро́ицы жили́ще яви́лся еси́,/ священнотаи́нниче пребога́те. И ны́не и при́сно и во ве́ки веко́в. Ами́нь. Богородичен: Храм освяще́н и ле́потою благоукраше́н воздви́же уго́дник Бо́жий Афана́сий/ во сла́ву Твою́ и честь, Пречи́стая Влады́чице,/ те́мже не преста́й моля́щися со святи́телем Христу́ Бо́гу о душа́х на́ших. Песнь 3 Ирмос: Небе́снаго кру́га Верхотво́рче, Го́споди,/ и Це́ркве Зижди́телю,/ Ты мене́ утверди́ в любви́ Твое́й,/ жела́ний кра́ю, ве́рных утвержде́ние,/ Еди́не Человеколю́бче. Припев: Святи́телю, о́тче Афана́сие, моли́ Бо́га о на́с. Све́том благода́ти вои́стинну просия́л еси́, святи́телю Афана́сие,/ и был еси́ священноде́латель Ева́нгелия Христо́ва. Припев: Святи́телю, о́тче Афана́сие, моли́ Бо́га о на́с. Благода́тными словесы́ твои́ми напая́ема па́ства твоя́,/ го́рькости ересе́й отрица́ется. Сла́ва Отцу́ и Сы́ну и Свято́му Ду́ху. До́бре упа́сл еси́ ста́до Влады́ки твоего́, о́тче Афана́сие,/ те́мже во оби́тели Небе́сныя всели́лся еси. И ны́не и при́сно и во ве́ки веко́в. Ами́нь. Богородичен: Даждь нам по́мощь моли́твами Твои́ми,/ прило́ги отгоня́ющи лю́тых обстоя́ний, Де́во Всепе́тая. Седален, глас 4 В пра́вей ве́ре Це́рковь Христо́ву упа́сл еси́, святи́телю Афана́сие,/ и ерети́чества исто́ргл еси́ го́рькия пле́велы./ Те́мже в Вы́шних черто́зех водворя́ешися, блаже́нне. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Сло́во О́тчее, Христа́ Бо́га на́шего,/ от Тебе́ воплоти́вшагося, позна́хом, Богоро́дице Де́во,/ Еди́на Чи́стая, Еди́на Благослове́нная,/ тем, непреста́нно Тя воспева́юще, велича́ем. Песнь 4 Ирмос: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́. Припев: Святи́телю, о́тче Афана́сие, моли́ Бо́га о на́с. Уста́ богодухно́венная стяжа́в, святи́телю Афана́сие,/ обличи́л еси́ злы́я нра́вы лука́вых челове́к/ и, сконча́вся в непра́веднем изгна́нии, при Фаво́ре Мга́рстем,/ оста́вил еси́ нам, недосто́йным, честно́е те́ло твое́, точа́щее чудеса́. Припев: Святи́телю, о́тче Афана́сие, моли́ Бо́га о на́с. Блаже́н яви́лся еси́,/ изгна́н пра́вды ра́ди, за́вистию злонра́вных челове́к,/ и нас посети́л еси́ твои́м благослове́нием./ Те́мже ны́не от всех почита́ешися свяще́нными пе́сньми,/ му́дре святи́телю Афана́сие. Сла́ва Отцу́ и Сы́ну и Свято́му Ду́ху. Пе́рвее был еси́ архиере́й нача́льнаго гра́да Кри́тскаго,/ та́же, по взя́тии того́ от ага́рян, Патриа́рх Константи́ню гра́ду поста́влен был еси́,/ иде́же богодухнове́нными уче́нии ста́до твое́ напая́л еси́,/ блаже́нне святи́телю Афана́сие. И ны́не и при́сно и во ве́ки веко́в. Ами́нь. Богородичен: Тя, Блаже́нную, Еди́ну избра́нную и непоро́чную обре́т,/ воплоща́ется Пребоже́ственное Сло́во, Богора́дованная. Песнь 5 Ирмос: Просвети́ нас повеле́нии Твои́ми, Го́споди,/ и мы́шцею Твое́ю высо́кою/ Твой мир подаждь нам,/ Человеколю́бче. Припев: Святи́телю, о́тче Афана́сие, моли́ Бо́га о на́с. Безсме́ртен по и́мени досто́йно наре́клся еси́, о́тче наш святи́телю Афана́сие,/ зане́, житие́ твое́ чи́сте соверши́в, во Христа́ обле́клся еси́,/ те́мже Царь Сла́вы и Бог ве́чный избра́ тя в жили́ще Себе́. Припев: Святи́телю, о́тче Афана́сие, моли́ Бо́га о на́с. Изба́ви чту́щия тя, святи́телю Афана́сие,/ от грехо́вныя бу́ри, от бед и скорбе́й,/ к ти́хому приста́нищу приводя́ богоприя́тными твои́ми моли́твами. Сла́ва Отцу́ и Сы́ну и Свято́му Ду́ху. До́брый па́стырь ста́да Христо́ва яви́лся еси́, уго́дниче святи́телю Афана́сие,/ не преста́й моля́ся ко Го́споду,/ да спасе́т ду́ши на́ша. И ны́не и при́сно и во ве́ки веко́в. Ами́нь. Богородичен: Досто́йно Тя сла́вят святи́тельстии собо́ри и вси преподо́бных ли́цы:/ Зижди́теля бо всех, Бо́жие Сло́во, на руку́ Твое́ю носи́ла еси́. Песнь 6 Ирмос: Моли́тву пролию́ ко Го́споду/ и Тому́ возвещу́ печа́ли моя́,/ я́ко зол душа́ моя́ испо́лнися/ и живо́т мой а́ду прибли́жися,/ и молю́ся, яко Ио́на:/ от тли, Бо́же, возведи́ мя. Припев: Святи́телю, о́тче Афана́сие, моли́ Бо́га о на́с. Оби́тель сию́, с ве́рою почита́ющую тя, святи́телю Афана́сие,/ храни́ от находя́щих искуше́ний, лю́тых обстоя́ний и вся́ких скорбе́й,/ непреста́нно моля́ся ко Влады́це Христу́ о ста́де твое́м. Припев: Святи́телю, о́тче Афана́сие, моли́ Бо́га о на́с. Ты и по сме́рти, я́ко жив сый, чудоде́йствуеши,/ да́руя немощны́м исцеле́ния Боже́ственною благода́тию,/ рече́ бо Госпо́дь:/ прославля́ющия Мя просла́влю. Сла́ва Отцу́ и Сы́ну и Свято́му Ду́ху. Напа́стей о́блацы покры́ша ны, и теле́сныя боле́зни умно́жишася./ К тебе́ прибега́ем и тебе́ призыва́ем, святи́телю Афана́сие:/ потщи́ся на по́мощь, ускори́ на моли́твы,/ от бед и ско́рбных обстоя́ний нас избавля́я. И ны́не и при́сно и во ве́ки веко́в. Ами́нь. Богородичен: Очи́стив свое́ се́рдце, Авраа́м, пра́отец Твой, Чи́стая Де́во,/ прия́т обеща́ние от Бо́га:/ благослови́тися о се́мени его́ всем язы́ком./ Тобо́ю исполне́ние обетова́ния прие́млем днесь. Кондак, глас 8 О всесвяте́йший па́стырю и учи́телю вселе́нныя,/ преблаже́нне о́тче наш святи́телю Афана́сие!/ К ра́це моще́й твои́х припа́дающе, усе́рдно мо́лим тя:/ приими́ от убо́гих душ на́ших любо́вию приноси́мая тебе́ моле́ния/ и, я́ко име́я дерзнове́ние у Престо́ла Влады́чня,/ испроси́ моли́твами твои́ми чту́щим тя/ со А́нгелы и все́ми святы́ми/ непреста́нно Пресвяте́й Тро́ице воспева́ти: аллилу́ия. Икос Ле́ностию окая́нный аз во глубину́ греха́ впадо́х,/ но, я́ко па́стырь добр, воздви́гни мя, святе́йший о́тче,/ и стра́сти угаси́, зле му́чащия мя,/ я́ко да, воста́в, чи́сте воспою́ твое́ светоно́сное торжество́,/ и́мже Влады́ка вселе́нныя просла́ви тя досто́йно, я́ко раба́ верне́йша,/ учи́теля прему́дра, соверши́теля Та́ин Бо́жиих и блюсти́теля за́поведей,/ я́же до́бре сохрани́л еси́,/ пома́зание свято́е, Афана́сие прему́дре./ Того́ при́сно моли́,/ да да́рует чту́щим тя со А́нгелы и все́ми святы́ми/ непреста́нно Пресвяте́й Тро́ице воспева́ти: аллилу́ия. Песнь 7 Ирмос: О́троцы евре́йстии в пещи́/ попра́ша пла́мень дерзнове́нно/ и на ро́су огнь преложи́ша, вопию́ще:/ благослове́н еси́, Го́споди Бо́же, во ве́ки. Припев: Святи́телю, о́тче Афана́сие, моли́ Бо́га о на́с. Во глубину́ зол впадо́х, страстьми́ погружа́емь,/ и ко врато́м а́да прибли́жихся, грехми́ побежда́емь./ Спаси́ мя моли́твами твои́ми, Богоблаже́нне, и воздви́гни, пою́ща:/ благослове́н Бог отце́в на́ших. Припев: Святи́телю, о́тче Афана́сие, моли́ Бо́га о на́с. Вся́ких лю́тых неду́гов врач всеизря́ден яви́лся еси́, о́тче Афана́сие./ Исцели́ у́бо не́мощь души́ моея́/ и сподо́би во умиле́нии се́рдца взыва́ти:/ отце́в на́ших Бо́же, благослове́н еси́. Сла́ва Отцу́ и Сы́ну и Свято́му Ду́ху. Ди́вный во святы́х Свои́х,/ просла́ви Госпо́дь и в земли́ Росси́йстей уго́дника Своего́, преблаже́ннаго святи́теля Афана́сия,/ па́стыря до́браго и моли́твенника о душа́х на́ших. И ны́не и при́сно и во ве́ки веко́в. Ами́нь. Богородичен: Всесла́вная всех Цари́це,/ мольба́ми святи́теля Афана́сия сохрани́ невреди́мы от вся́каго зла́го обстоя́ния лю́ди Твоя́,/ всегда́ Тя моля́щия, я́ко Предста́тельницу ми́рови. Песнь 8 Ирмос: Седмери́цею пещь/ халде́йский мучи́тель/ Богочести́вым неи́стовно разжже́,/ си́лою же лу́чшею спасе́ны, сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки. Припев: Святи́телю, о́тче Афана́сие, моли́ Бо́га о на́с. Бога́тство уче́ний твои́х неску́дно расточа́л еси́, святи́телю Афана́сие,/ и́мже обогати́ся ум а́лчущих словесе́ твоего́./ Изгна́н же быв непра́ведно от престо́ла Царягра́да,/ к ве́рным лю́дем Росси́йския земли́ прише́л еси́/ и в Фаво́ре Мга́рстем блаже́нныя кончи́ны сподобля́ешися./ Те́мже вопие́м:/ благослови́те, дела́ Госпо́дня, Го́спода,/ по́йте и превозноси́те Его́ во ве́ки. Припев: Святи́телю, о́тче Афана́сие, моли́ Бо́га о на́с. Яко ве́сна, яви́лся еси́, блаже́нне,/ та́инственными цве́ты даро́в Боже́ственных благоуха́я,/ разреша́я от напа́стей и скорбе́й ве́рная ча́да твоя́, к тебе́ притека́ющая и Бо́гу вопию́щая:/ благослови́те, дела́ Госпо́дня, Го́спода,/ по́йте и превозноси́те Его́ во ве́ки. Сла́ва Отцу́ и Сы́ну и Свято́му Ду́ху. Я́ко лоза́ многопло́дная, доброде́телей плоды́ израща́ющая,/ яви́шася словеса́ твоя́, благода́ти испо́лненная:/ прише́д бо ко ага́ряном, мольбу́ о лю́дех твои́х прине́сл еси́./ Ти́и же, ви́девше тя, умили́шася/ и, моле́ния ра́ди твоего́, преста́ша убива́ти кри́тския лю́ди, вопию́щии:/ благослови́те, дела́ Госпо́дня, Го́спода,/ по́йте и превозноси́те Его́ во ве́ки. И ны́не и при́сно и во ве́ки веко́в. Ами́нь. Богородичен: Вы́шний Престо́ле, Де́во Богоневе́сто,/ до́лу лежа́щее естество́ на́ше к Небеси́ возво́диши,/ те́мже Тя вси по до́лгу сла́вим. Песнь 9 Ирмос: Ужасе́ся о сем Не́бо,/ и земли́ удиви́шася концы́,/ я́ко Бог яви́ся челове́ком пло́тски/ и чре́во Твое́ бысть простра́ннейшее Небе́с/ Тем Тя, Богоро́дицу,/ А́нгелов и челове́к чинонача́лия велича́ют. Припев: Святи́телю, о́тче Афана́сие, моли́ Бо́га о на́с. Днесь све́тло красу́ется свята́я па́мять твоя́,/ и ты, святи́телю Афана́сие, я́ко со́лнце, блиста́еши, ве́рных озаря́я,/ во Мга́рстей же оби́тели мно́зи, приходя́щии к тебе́ с ве́рою, прие́млют исцеле́ния./ Те́мже тя велича́ем. Припев: Святи́телю, о́тче Афана́сие, моли́ Бо́га о на́с. Соше́дшеся днесь, досто́йно хва́лим тя, святи́телю Афана́сие,/ и моще́й твои́х чтим ра́ку,/ прося́ще пода́ти нам моли́твами твои́ми от страсте́й избавле́ние,/ боле́зней исцеле́ние, грехо́в оставле́ние, от напа́стей свобожде́ние,/ и я́ко уго́дника Бо́жия вси тя велича́ем. Сла́ва Отцу́ и Сы́ну и Свято́му Ду́ху. Сла́ву твою́ воспе́ти по досто́инству невозмо́жно есть:/ чудеса́ бо мно́га соверша́еши/ и исцеле́ния незави́стно источа́еши/ с ве́рою приходя́щим к тебе́, Афана́сие, Росси́йская похвало́./ Те́мже я́ко уго́дника Бо́жия вси тя велича́ем. И ны́не и при́сно и во ве́ки веко́в. Ами́нь. Богородичен: Ты еси́, Богоро́дице, ору́жие на́ше и стена́,/ Ты еси́ заступле́ние к Тебе́ прибега́ющих,/ Тя ны́не на моли́тву подвиза́ем,/ да изба́вимся от враг на́ших. Светилен Све́тло пра́зднуется днесь церко́вное торжество́,/ в прославле́ние жития́ и чуде́с твои́х, святи́телю о́тче Афана́сие,/ ты же, предстоя́ во све́те сла́вы лицу́ Бо́жию,/ помяни́ нас, чту́щих святу́ю па́мять твою́. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: По Бо́зе на Тя, Пречи́стая, упова́ние возлага́ем:/ не пре́зри нас в лю́тых ско́рбех и напа́стех,/ но Твои́ми мольба́ми ко Христу́, Сы́ну Твоему́,/ невреди́мы да́же до конца́ нас сохрани́.

Минея, 10 Июля, Кано́н преподо́бнаго Глас 4 Песнь 1 Ирмос: Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери́,/ и явлю́ся, све́тло торжеству́я,/ и воспою́, ра́дуяся, Тоя́ чудеса́. Припев: Преподо́бне о́тче Анто́ние, моли́ Бо́га о на́с. Зе́льным воздержа́нием, и труды́, о́тче Анто́ние, и всено́щным стоя́нием/ ду́шу твою́ царя́ над страстьми́ теле́сными поста́вил еси́./ Те́мже, со святы́ми веселя́щеся, Христа́ пое́м,/ тебе́ такову́ побе́ду на стра́сти дарова́вшаго. Припев: Преподо́бне о́тче Анто́ние, моли́ Бо́га о на́с. Приспе́ днесь всечестны́й день успе́ния твоего́, о́тче Анто́ние,/ бога́тно веселя́ ча́да твоя́, всече́стне./ Те́мже, помина́юще твое́ дре́внее житие́ и а́нгельскую жизнь,/ све́тло пра́зднующе, тебе́ воспева́ем, о́тче. Сла́ва Отцу́ и Сы́ну и Свято́му Ду́ху. От те́мных мест восхи́тився,/ к превы́шним све́тлостем пресла́вно преше́л еси́, преподо́бне,/ и та́мо со святы́ми, я́ко победи́тель страсте́й, о́тче, венча́лся еси́. И ны́не и при́сно и во ве́ки веко́в. Ами́нь. Богородичен: Лю́те погружа́емую ду́шу мою́ в пучи́не страсте́й бу́рею безме́рных обстоя́ний,/ спасе́ния просте́рши ми ру́ку, возведи́, Влады́чице, из глубины́ зол мои́х. Песнь 3 Ирмос: Твоя́ песносло́вцы, Богоро́дице,/ Живы́й и Незави́стный Исто́чниче,/ лик себе́ совоку́пльшия, духо́вно утверди́,/ в Боже́ственней Твое́й сла́ве/ венце́в сла́вы сподо́би. Припев: Преподо́бне о́тче Анто́ние, моли́ Бо́га о на́с. Пропове́дует пресла́вно и па́че трубы́ вопие́т/ свяще́нная твоя́, о́тче, вели́кая Ла́вра, я́же тобо́ю нача́ло прие́мшая,/ дом же Бо́жия Ма́тере, а́ще и не гла́сом, вещьми́ же хва́лится. глаго́ля:/ утверди́хся Тобо́ю, Го́споди. Припев: Преподо́бне о́тче Анто́ние, моли́ Бо́га о на́с. Еди́наго Го́спода возлюби́л еси́/ и, Сего́ Крест на ра́мо взем, преподо́бне Анто́ние,/ странноле́пно пожи́л еси́, в посте́х, и бде́ниих, и моли́твах о́браз быв твои́м ученико́м./ Те́мже и от Христа́ просла́вился еси́. Сла́ва Отцу́ и Сы́ну и Свято́му Ду́ху. Плотска́го жела́ния, преподо́бне, отве́ргся, го́рдость возненави́дел еси́,/ смире́нием же и нището́ю обогати́вся,/ превысо́кая дости́гл еси́ святы́х жили́ща. И ны́не и при́сно и во ве́ки веко́в. Ами́нь. Богородичен: Поми́луй, еди́на Богома́ти, поми́луй и уще́дри ду́шу мою́ окая́нную,/ потопля́емую бе́сы и страстьми́ лука́выми,/ и пре́жде вре́мене исхо́да моего́ сию́ очи́стити умилосе́рдися. Седален, глас 4 Удиви́ся твой духо́вный настоя́тель, в тебе́ вели́ко воздержа́ние зря,/ и внима́ше мы́слию хотя́щая о тебе́ напосле́док бы́ти, Анто́ние,/ ви́де бо по Бо́зе твое́ вели́кое житие́ и вра́жиими прило́ги ника́коже поколеби́ма./ Те́мже и свиде́тельствует, я́ко оте́ц и храни́тель твоего́ жития́,/ отце́м Святы́я Горы́ вопия́ше:/ сей, и́же посреде́ нас ви́дится ме́ньший/ но последи́ в Росси́и вели́кий свети́льник бу́дет. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Удиви́ся Ио́сиф, е́же па́че естества́ зря,/ и внима́ше мы́слию, и́же на руно́ дождь,/ в безсе́меннем зача́тии Твое́м, Богоро́дице,/ купину́, огне́м неопали́мую, жезл Ааро́нов проза́бший/ и, свиде́тельствуя, обру́чник Твой и храни́тель свяще́нником взыва́ше:/ Де́ва ражда́ет, и по рождестве́ па́ки Де́ва пребыва́ет. Песнь 4 Ирмос: Неизсле́дный Бо́жий Сове́т/ е́же от Де́вы воплоще́ния/ Тебе́, Вы́шняго,/ проро́к Авваку́м усмотря́я, зовя́ше:/ сла́ва си́ле Твое́и́, Го́споди. Припев: Преподо́бне о́тче Анто́ние, моли́ Бо́га о на́с. Ме́сто, в не́мже лежи́т честно́е и свяще́нное те́ло твое́, преподо́бне Анто́ние о́тче,/ мно́га исцеле́ния отту́ду прие́млют ве́рнии, Христу́ от души́ вопию́ще:/ сла́ва си́ле Твое́й, Го́споди. Припев: Преподо́бне о́тче Анто́ние, моли́ Бо́га о на́с. Не устраши́ тебе́, преподо́бне, долгота́ жесто́каго пути́,/ ниже́ та́мо разбо́йническое наше́ствие./ Те́мже Святу́ю Го́ру доше́д, с су́щими та́мо отцы́ воспева́л еси́:/ сла́ва си́ле Твое́й, Го́споди. Сла́ва Отцу́ и Сы́ну и Свято́му Ду́ху. Ви́дев Всеблаги́й Бог тве́рдое твое́ и до́брое изволе́ние,/ та́мо во святы́х ме́стех посреде́ оте́ц, сла́вна тя сотворя́ет,/ с ни́миже сподо́би взыва́ти:/ сла́ва си́ле Твое́й, Го́споди. И ны́не и при́сно и во ве́ки веко́в. Ами́нь. Богородичен: Ко́рень из чресл Тя ца́рских, всех Царь, я́ко су́щу, вожделе́в/ и вы́шшу Херуви́м и Серафи́м соде́лав,/ Богоро́дице, всели́ся в Тя. Песнь 5 Ирмос: Ужасо́шася вся́ческая/ о Боже́ственней сла́ве Твое́й:/ Ты бо, Неискусобра́чная Де́во,/ име́ла еси́ во утро́бе над все́ми Бо́га/ и родила́ еси́ Безле́тнаго Сы́на,/ всем воспева́ющим Тя/ мир подава́ющая. Припев: Преподо́бне о́тче Анто́ние, моли́ Бо́га о на́с. Мона́шествующих о́браз, о́тче, и наказа́тель был еси́,/ те́мже и си́льным запреща́еши на восхище́ние не жела́ти, но па́че маломо́щныя ми́ловати./ И от сего́ просла́вился еси́, Анто́ние,/ и вели́к нарече́н учи́тель яви́лся еси́. Припев: Преподо́бне о́тче Анто́ние, моли́ Бо́га о на́с. Вы́ше челове́ка, Анто́ние, стяжа́л еси́ житие́, равноа́нгельно пожи́в на земли́,/ те́мже ра́вну я́же А́нгелом по́честь сподо́бился еси́ получи́ти/ и пое́ши с ни́ми Влады́ку твоего́. Сла́ва Отцу́ и Сы́ну и Свято́му Ду́ху. Богодарова́нныя твоя́ благода́ти, о́тче Анто́ние,/ всяк слух челове́ческий удиви́ша и научи́ша,/ я́же зде мня́щаяся вели́кая, я́ко ма́ла и ху́да, презре́ти вся и после́довати стопа́м твои́м,/ отону́дуже моли́, преподо́бне, спасти́ся нам. И ны́не и при́сно и во ве́ки веко́в. Ами́нь. Богородичен: Упова́ние еси́ мое́, Пречи́стая, и спасе́ние, и похвала́./ Те́мже прибега́ю к покро́ву Твоему́:/ не гнуша́йся мене́, грехи́ мно́гими, и боле́зньми, и скорбьми́ ны́не поглоще́ннаго,/ но, предвари́вши, спаси́ мя. Песнь 6 Ирмос: Боже́ственное сне́ и всечестно́е/ соверша́юще пра́зднество,/ Богому́дрии, Богома́тере,/ прииди́те, рука́ми воспле́щим,/ от Нея́ ро́ждшагося Бо́га сла́вим. Припев: Преподо́бне о́тче Анто́ние, моли́ Бо́га о на́с. Всегда́шним к Бо́гу раче́нием вне пло́ти и ми́ра, о́тче Анто́ние, был еси́./ Те́мже и жили́ще досто́йно Ду́ха Пресвята́го показа́лся еси́,/ я́коже и Сам Христо́с рече́:/ прише́д со Отце́м и Ду́хом, та́мо явлю́ся. Припев: Преподо́бне о́тче Анто́ние, моли́ Бо́га о на́с. Я́ко пресла́дкий не́кий виногра́д, Свята́я Гора́ тебе́, о́тче, израсти́вши,/ пресла́вно тобо́ю красу́ется и, ра́дующися, Христа́ прославля́ет,/ тебе́ сим дарова́вшаго. Сла́ва Отцу́ и Сы́ну и Свято́му Ду́ху. Нощь, я́ко день, и день, я́ко нощь, тебе́ вменя́шеся, Анто́ние:/ не дал бо еси́, по проро́ку, сна очи́ма твои́ма, ни ве́ждома дрема́ния,/ ниже́ поко́я телеси́ твоему́, до́ндеже сие́ чи́сто с душе́ю Бо́гу предста́вил еси́. И ны́не и при́сно и во ве́ки веко́в. Ами́нь. Богородичен: Твою́ пода́ждь ми по́мощь/ и изба́ви мя бед, и скорбе́й, и прегреше́ний мои́х,/ я́же всех ро́ждшая при́сное Избавле́ние. Кондак, глас 8 Возложи́в себе́ Бо́гу, па́че всех возлю́бленному от ю́ности, преподо́бне,/ Тому́ от всея́ души́ любо́вию после́довал еси́,/ ми́ра же тле́нная ни во что́же вмени́в,/ в земли́ пеще́ру соде́лал еси́/ и, в ней до́бре проти́ву неви́димаго врага́ ко́зней подвиза́вся,/ я́ко светоза́рное со́лнце, во вся концы́ земли́ возсия́л еси́,/ отону́дуже, веселя́ся, преше́л еси́ к Небе́сным черто́гом./ И ны́не со А́нгелы Влады́чню престо́лу предстоя́,/ помина́й нас, чту́щих пя́мять твою́, да зове́м ти:/ ра́дуйся, Анто́ние, о́тче наш. Икос Присносу́щнаго немерца́ющаго све́та Святы́я Тро́ицы наслади́тися жела́я/ и сего́ ра́ди четыредесятоле́тное вре́мя в еди́ной пеще́ре те́мне тебе́ затвори́в,/ отту́ду неисхо́ден, о́тче, пребы́л еси́,/ до́ндеже те́ло твое́ чи́сто с душе́ю Бо́гу предста́вил еси́./ Отону́дуже и по преставле́нии, я́ко жив, от Го́спода дарова́ния чуде́с прия́л еси́,/ исцеля́ти разли́чныя боле́зни зле стра́ждущих/ и бе́сы от челове́к приходя́щих изгони́ти./ Те́мже мо́лим тя:/ моли́ся, о́тче, сохрани́ти без вре́да оте́чество твое́, град же и лю́ди, да зове́м ти:/ ра́дуйся, Анто́ние, о́тче наш. Песнь 7 Ирмос: Не послужи́ша тва́ри Богому́дрии/ па́че Созда́вшаго,/ но, о́гненное преще́ние му́жески попра́вше,/ ра́довахуся, пою́ще:/ препе́тый отце́в Госпо́дь и Бог, благослове́н еси́. Припев: Преподо́бне о́тче Анто́ние, моли́ Бо́га о на́с. Повеле́нием духо́внаго твоего́ настоя́теля, блаже́нне Анто́ние,/ па́ки ко оте́честву твоему́ посыла́емь быва́еши./ Те́мже рече́нная тебе́ отце́м, я́ко от Бо́га повеле́нная, сотвори́л еси́,/ иде́же прише́д, о́тче, мно́гих ду́ши Го́споду приве́л еси́. Припев: Преподо́бне о́тче Анто́ние, моли́ Бо́га о на́с. Святе́йшаго ме́ста, преподо́бне Анто́ние, я́ко дости́гл,/ мно́гих житие́м твои́м удиви́л еси́:/ вы́ше бо челове́ка восприе́м житие́,/ и́мже мно́гих мирска́я презира́ти сотвори́л еси́. Сла́ва Отцу́ и Сы́ну и Свято́му Ду́ху. Святи́теля Иларио́на пеще́ру я́ко обре́т,/ трудолю́бне в ней пожи́л еси́, преподо́бне, в моли́твах и поще́ниих,/ до́ндеже ину́ю пеще́ру себе́ соде́лал еси́,/ в не́йже сподо́бился еси́ го́рняго зва́ния. И ны́не и при́сно и во ве́ки веко́в. Ами́нь. Богородичен: Челове́ческия напа́сти и сове́ты, Чи́стая,/ разори́ Боже́ственными моли́твами Твои́ми/ и рабы́ Твоя́ изба́ви боле́зненных прегреше́ний,/ я́ко да Присноде́ву Тя ублажа́ем. Песнь 8 Ирмос: О́троки благочести́выя в пещи́/ Рождество́ Богоро́дичо спасло́ есть;/ тогда́ у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте, дела́,/ и превозноси́те Его́ во вся ве́ки. Припев: Преподо́бне о́тче Анто́ние, моли́ Бо́га о на́с. Влады́ки твоего́ Христа́, преподо́бне Анто́ние, смире́нию поревнова́л еси́/ и сего́ ра́ди смире́нное и жесто́кое житие́ возлюби́л еси́,/ земна́го пристра́стия отрева́яся./ Те́мже по́чести святы́х сподо́бился еси́/ и с ни́ми пое́ши Го́спода во ве́ки. Припев: Преподо́бне о́тче Анто́ние, моли́ Бо́га о на́с. Твое́ пресла́вное успе́ние пра́зднующим, блаже́нне,/ моли́ся изба́витися всем от разли́чных напа́стей,/ да вси тебе́ прославля́ем, Анто́ние, и превозно́сим Го́спода во ве́ки. Сла́ва Отцу́ и Сы́ну и Свято́му Ду́ху. О нас ми́лостивно о́ко, Анто́ние, простира́й ко Влады́це, чадолю́бное показу́я,/ и неотлу́чно от нас ду́хом пребыва́й, преподо́бне,/ я́коже обеща́лся еси́, егда́ был еси́ с на́ми,/ да вси с тобо́ю Христу́ воспое́м:/ благослови́те, вся дела́ Госпо́дня, Го́спода. И ны́не и при́сно и во ве́ки веко́в. Ами́нь. Богородичен: На моле́ние мое умилосе́рдися ны́не и ра́дость ми в печа́ли ме́сто да́руй,/ да пою́ Тя, Влады́чице, Сы́ну Твоему́ воспева́я:/ Го́спода по́йте, дела́, и превозноси́те Его́ во ве́ки. Песнь 9 Ирмос: Всяк земноро́дный/ да взыгра́ется, Ду́хом просвеща́емь,/ да торжеству́ет же Безпло́тных умо́в естество́,/ почита́ющее свяще́нное торжество́ Богома́тере,/ и да вопие́т:/ ра́дуйся, Всеблаже́нная Богоро́дице,/ Чи́стая Присноде́во. Припев: Преподо́бне о́тче Анто́ние, моли́ Бо́га о на́с. Анто́ния, дре́вле просия́вшаго,/ того́ житию́ вся́чески поревнова́ти потща́лся еси́:/ он бо в пусты́ню един всели́ся,/ ты же в пеще́ре еди́наго себе́ затвори́л еси́/ и мно́гими ле́ты, о́тче, неисхо́ден пребы́л еси́. Припев: Преподо́бне о́тче Анто́ние, моли́ Бо́га о на́с. Пече́рскому житию́ первонача́льник и наста́вник, о́тче, был еси́/ и та́мо подвиза́лся еси́, я́ко безпло́тен./ Те́мже и Христо́с дарова́нием чуде́с обогати́ тя, преподо́бне. Сла́ва Отцу́ и Сы́ну и Свято́му Ду́ху. Мое́ю руку́ воздея́ние приими́, преподо́бне,/ Влады́чней подо́бяся бла́гости, презира́я прегреше́ния:/ ты бо ду́шу уязви́л еси́ Христо́вою любо́вию и Его́ Пречи́стыя Богома́тере,/ Ю́же умоли́ спасти́ ду́ши на́ша. И ны́не и при́сно и во ве́ки веко́в. Ами́нь. Богородичен: Руко́ю твое́ю, преподо́бне Анто́ние,/ е́же к Бо́гу воздея́нием, пресла́вно чудоде́йствовася:/ моли́твами бо твои́ми огнь с Небесе́ сво́диши, во очище́ние ме́ста хра́ма Пречи́стыя,/ Ю́же вси с тобо́ю велича́ем. Светилен Жите́йское сладостра́стие умертви́л еси́, Анто́ние,/ сла́ву же маловре́менную позна́в, сея́ вско́ре отступи́л еси́,/ те́сным путе́м изво́лив ходи́ти,/ веду́щим к ра́йскому простра́нству./ Те́мже моли́ся, Анто́ние, спасти́ся тебе́ почита́ющим. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Богоро́дицу Тя вои́стинну испове́дающе, Влады́чице, и́же Тобо́ю спаса́емии:/ Ты бо Бо́га родила́ еси́,/ разо́ршаго Кресто́м смерть и к Себе́ привле́кша преподо́бных собо́ры,/ с ни́миже Тя восхваля́ем, Де́во.

Минея, 2 Января, Канон Глас 2 Песнь 1 Ирмос: Непроходи́мое волня́щееся мо́ре/ Бо́жиим Свои́м веле́нием изсуши́вшему/ пешеше́ствовати сквозе́ е изра́ильтеския лю́ди наста́вльшему,/ Го́сподеви пои́м: сла́вно бо просла́вися. Припев: Сла́ва Тебе́, Бо́же наш, сла́ва Тебе́. Ве́дый Госпо́дне прише́ствие,/ из пусты́ни прихо́дит Боже́ственный Предте́ча, вопия́ све́тло:/ прибли́жися, яви́ся избавле́ние, пока́йтеся и водою́ очи́ститеся. Припев: Сла́ва Тебе́, Бо́же наш, сла́ва Тебе́. Погруже́на мя грехо́в волно́ю, Сло́ве, Отцу́ Собезнача́льне,/ всего́ очи́сти покая́ния кропле́нием,/ и́же Креще́нием Твои́м ве́рным избавле́ние при́сно да́руя за милосе́рдие безме́рное. Сла́ва Отцу́ и Сы́ну и Свято́му Ду́ху. Земля́, я́коже пи́шет, Завуло́ня, незаходи́мый ви́девши Свет, озари́ся:/ се бо прии́де на Иорда́нския струи́ и Су́щаго над все́ми Бо́га пое́т, зову́щи:/ Го́сподеви воспои́м, сла́вно бо просла́вися. И ны́не и при́сно и во ве́ки веко́в. Ами́нь. Наро́д весь Богоглаго́ливый Предте́ча ви́дя прише́дш, сим веща́ше:/ кто показа́ вам от гряду́щаго гне́ва бежа́ти?/ Сотвори́те покая́ния плоды́, благода́тию спаса́емии. Песнь 3 Ирмос: Утверди́ нас в Тебе́, Го́споди,/ Дре́вом умерщвле́й грех,/ и страх Твой всади́ в сердца́ нас, пою́щих Тя. Припев: Сла́ва Тебе́, Бо́же наш, сла́ва Тебе́. Яви́ся Христо́с, – вопие́т Предте́ча, -/ и на струи́ восхо́дит Иорда́нския,/ сре́сти Сего́ потщи́мся, чи́стыми помышле́нии просвеща́еми. Сла́ва Отцу́ и Сы́ну и Свято́му Ду́ху. Ища́ мя, безпу́тием заблу́ждшаго, Бо́же мой,/ нището́ю бога́тною оде́явся, предстои́ши крести́тися,/ всех Избавле́ние. И ны́не и при́сно и во ве́ки веко́в. Ами́нь. Земля́ и Не́бо ны́не да лику́ют:/ всех креща́ется Благоде́тель,/ в вода́х погружа́я на́ше мно́жество безме́рных прегреше́ний. Седален, глас 8 Река́ благоче́стия яви́вся,/ уче́ний твои́х струя́ми всю зе́млю напои́л еси́, Сильве́стре, я́ко святи́тель Боже́ственный, и чуде́с ту́чами страсте́й скве́рну омы́л еси́,/ и пи́щньй пото́к досто́йно насле́довал еси́./ Те́мже, соше́дшеся, благоче́стно тя чтим пе́сньми днесь/ и ве́рно вопие́м ти:/ моли́ Христа́ Бо́га прегреше́ний оставле́ние пода́ти/ чту́щим любо́вию святу́ю па́мять твою́. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Неви́димый Бо́же, Непостижи́мый Сло́ве,/ роди́лся еси́ от Отца́ па́че естества́ и сло́ва,/ па́ки же в после́дняя от Де́вы, не измени́в, е́же бе,/ гряде́ши и во струя́х Иорда́нских ны́не крести́тися пло́тию,/ благоволи́вый спасти́ я́ко Бог род челове́ческий. Песнь 4 Ирмос: Прише́л еси́ от Де́вы,/ не хода́тай, ни А́нгел, но Сам, Го́споди, вопло́щся,/ и спасл еси́ всего́ мя, челове́ка./ Тем зову́ Ти: сла́ва си́ле Твое́й, Го́споди. Припев: Сла́ва Тебе́, Бо́же наш, сла́ва Тебе́. Чуди́тся Твоему́, Иису́се Благоде́телю, прихо́ду вели́кий Предте́ча/ и, ужаса́яся, вопие́т Тебе́:/ Огнь сый, Влады́ко, да не опали́ши мене́, се́но су́ща. Припев: Сла́ва Тебе́, Бо́же наш, сла́ва Тебе́. Стоя́ща в вода́х сих во́лею зря Мя ны́не,/ приступи́, о, Иоа́нне, и крести́,/ я́ко да водо́ю благода́ть челове́ческому ро́ду соде́лаю. Сла́ва Отцу́ и Сы́ну и Свято́му Ду́ху. Кры́ющееся я́ко во о́блацех Тя позна́х со́лнце, Бо́же мой, пло́тию./ Ка́ко у́бо на́га Тя, вода́ми ны́не оде́янна, зрю? -/ Иоа́нн вопия́ше, удивля́яся. И ны́не и при́сно и во ве́ки веко́в. Ами́нь. Просвеща́ется челове́ческое естество́,/ и избавле́ние тьмы прие́млет грехо́вныя,/ и свы́ше Боже́ственною одева́ется нетле́ния оде́ждою, обнажа́ему Мне. Песнь 5 Ирмос: Све́та Пода́телю/ и веко́в Тво́рче, Го́споди,/во све́те Твои́х повеле́ний наста́ви нас,/ ра́зве бо Тебе́, ино́го бо́га не зна́ем. Припев: Сла́ва Тебе́, Бо́же наш, сла́ва Тебе́. Пока́йтеся, – вопия́, – Ца́рствие Бо́жие прибли́жися:/ свяще́нный Предте́ча яви́ся из пусты́ни,/ опусте́вшия в злых обновля́я. Сла́ва Отцу́ и Сы́ну и Свято́му Ду́ху. Зако́н, его́же дре́вле рече́ и проро́к свяще́нное сосло́вие, прии́де – Христо́с,/ нас обновля́я Боже́ственным Креще́нием,/ обветша́вшия мно́гими прегреше́ньми. И ны́не и при́сно и во ве́ки веко́в. Ами́нь. Стра́нна, – рече́, – и ужа́сна, – Иоа́нн, – зрю днесь:/ ны́не бо Исто́чник безсме́ртия прии́де,/ от ма́лыя ка́пли Боже́ственное проси́ти Креще́ние. Песнь 6 Ирмос: Бе́здна согреше́ний обы́де мя после́дняя,/ но, я́ко проро́ка Ио́ну, Го́споди,/ Го́споди, возведи́ из истле́ния живо́т мой. Припев: Сла́ва Тебе́, Бо́же наш, сла́ва Тебе́. Одожди́ согреше́ний на́ших, Человеколю́бче, разреше́ние,/ И́же Иорда́нскими струя́ми погрузи́вый прегреше́ния земноро́дных, за ми́лость вели́кую. Сла́ва Отцу́ и Сы́ну и Свято́му Ду́ху. Пучи́на сый, Христе́, пра́вды,/ предгряде́ши ны́не на Иорда́нскую реку́ потопи́ти зми́я/ и Ада́мово преступле́ние изсуши́ти. И ны́не и при́сно и во ве́ки веко́в. Ами́нь. Струю́ Тя нетле́ния, Христе́, су́ща вои́стинну,/ струи́ ка́ко вместя́т ре́чныя? – вопия́ше Предте́ча,/ сла́вя Твое́ мно́гое благоутро́бие. Кондак, глас 4 Во струя́х днесь Иорда́нских быв, Госпо́дь/ Иоа́нну вопие́т:/ не убо́йся крести́ти Мя,/ спасти́ бо приидо́х/ Ада́ма первозда́ннаго. Икос Не истязу́ю тя, Крести́телю, преде́лы преходи́ти,/ не глаго́лю тебе́;/ рцы Ми, я́же глаго́леши беззако́нным и учи́ши гре́шники./ То́чию крести́ Мя молча́ и ча́я, я́же от Креще́ния:/ прии́меши бо сего́ ра́ди досто́инство, е́же не бысть А́нгелом,/ и́бо всех проро́ков бо́льша тя сотворю́./ От о́ных у́бо ни еди́н я́ве Мя ви́де,/но во о́бразех, и се́нех,и гада́ниих,/ ты же пред тобо́ю стояща́ ви́дел еси́,/ спасти́ бо приидо́х Ада́ма первозда́ннаго. Песнь 7 Ирмос: О́бразу злато́му, на по́ле Деире служи́му,/ три́е Твои́ о́троцы небрего́ша безбо́жнаго веле́ния,/ посреде́ же огня́ вве́ржени, ороша́еми, поя́ху:/ благослове́н еси́, Бо́же оте́ц на́ших. Припев: Сла́ва Тебе́, Бо́же наш, сла́ва Тебе́. Во оде́жду свяще́нную одева́я мя, Христе́, обнажи́вшагося сове́том льсти́ваго,/ наг проити́ сквозе́ во́ды прише́л еси́ бла́гости бога́тством./ Воспева́ю Твое́ милосе́рдие и покланя́юся чу́дному Твоему́ смотре́нию. Сла́ва Отцу́ и Сы́ну и Свято́му Ду́ху. Что́ сие́, Христе́, мно́гое Твое́, е́же к нам, смотре́ние?/ Что́ нищета́? Что́ неизрече́нное и па́че ума сни́тие? -/ рече́, егда́ Тя ви́де Иоа́нн обнаже́на и крести́тися от него́ повелева́юща. И ны́не и при́сно и во ве́ки веко́в. Ами́нь. Возже́гл еси́, Христе́, я́коже свети́льник, честну́ю плоть Твою́ среди́ Иорда́на,/ и взыска́л еси́ погребе́нный страстьми́ и грехо́м о́браз,/ и, обре́т, удобри́л еси́ Креще́нием Твои́м, Бла́же./ Те́мже пое́м Тя. Песнь 8 Ирмос: В пещь о́гненную ко отроко́м евре́йским снизше́дшаго/ и пла́мень в ро́су прело́жшаго Бо́га/ по́йте, дела́, я́ко Го́спода,/ и превозноси́те во вся ве́ки. Припев: Сла́ва Тебе́, Бо́же наш, сла́ва Тебе́. Глас вопию́щаго в пусты́ни я́вственно, предста́в Иоа́нн,/ обраща́я сердца́ пока́явшихся те́пле/ сла́вити я́вльшагося во Иорда́не Спа́са и Влады́ку. Припев: Сла́ва Тебе́, Бо́же наш, сла́ва Тебе́. Пото́к еси́ пи́щный, И́же моря́ и исто́чники соде́лавый,/ и ка́ко на во́ды восхо́диши?/ Что́ отмы́ти ища́й, И́же всех омове́ние и очище́ние,/ песносло́вящих Тя, Христе́, во ве́ки? Сла́ва Отцу́ и Сы́ну и Свято́му Ду́ху. Изсуши́ти струи́ ища́й зло́бы вра́жия, и моря́ страсте́й уста́вити,/ и ве́рным очище́ние источи́ти и оставле́ние,/ Влады́ко, гряде́ши крести́тися во струя́х Иорда́нских. И ны́не и при́сно и во ве́ки веко́в. Ами́нь. Часо́в и лет Тво́рче, под ле́ты быв за благоутро́бие,/ безле́тно возсия́в из Пребезнача́льнаго Отца́,/ прише́л еси́ ле́тняя прегреше́ния всех отмы́ти во струя́х Иорда́нских. Песнь 9 Ирмос: От Бо́га Бо́га Сло́ва,/ неизрече́нною му́дростию прише́дшаго обнови́ти Ада́ма,/ я́дию в тле́ние па́дшаго лю́те,/ от Святы́я Де́вы неизрече́нно воплоти́вшагося нас ра́ди,/ ве́рнии, единому́дренно пе́сньми велича́ем. Припев: Сла́ва Тебе́, Бо́же наш, сла́ва Тебе́. Ви́дев Тя Иоа́нн к себе́ Благоде́теля гряду́ща/ и прося́ща от него́ смире́нием Креще́ния, уди́влься, ужасеся,/ ника́коже руко́ю пракосну́тися сме́я Прикаса́ющагося всем гора́м, и воздымя́тся. Припев: Сла́ва Тебе́, Бо́же наш, сла́ва Тебе́. Я́ко ла́стовица пречестна́я, провозвеща́ющая ве́сну мы́сленную,/ предста́ Крести́тель в зиме́ су́щим безме́рных прегреше́ний/ и бурю терпя́щим при́сно сопроти́вных духо́в, лука́вых страсте́й. Припев: Сла́ва Тебе́, Бо́же наш, сла́ва Тебе́. Тя, озаре́ние сла́вы Отчия, просия́вшее во тьме седя́щим лю́тых,/ Незаходи́мое Со́лнце, Го́споди, и гряду́ща вся просвети́ти свяще́нным Твои́м Креще́нием,/ я́ко Бо́га и Спа́са пе́сньми велича́ем. Сла́ва Отцу́ и Сы́ну и Свято́му Ду́ху. Сме́ртная секи́ра, при ко́рени лежа́щи,/ я́ко дре́ву прети́т изсече́нием, непло́дие твое́ ви́дящи./ Не у́бо безпло́дна пребу́ди, душе́ моя́, но возопи́й Бо́гу те́плым покая́нием:/ согреши́х Ти, спаси́ мя. И ны́не и при́сно и во ве́ки веко́в. Ами́нь. Богородичен: Глас вопию́щаго слы́шан бысть в пусты́х сердца́х:/ возвесели́теся, предста́ Христо́с, оставле́ние всем да́руя./ Освяти́теся вся:/ мо́ре, исто́чницы и ре́ки, и удо́лия,/ и лу́жная места́, и вся подсо́лнечная. Светилен Глас вопию́щаго возгласи́:/ и го́ры, взыгра́йте, лику́й, ро́де челове́ческий,/ и́бо Пребезнача́льное Сло́во плоть прие́м, я́ко Челове́к,/ прии́де креща́яся от рук, я́же созда́,/ во Иорда́не погружа́яй ми́ра грех. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Ка́ко струи́ Тя ре́чныя приимут, Человеколю́бче,/ ре́ки и моря́ сотво́ршаго от не су́щих?/ Ка́ко на верх пречи́стый Твой дерзне́т Предте́ча ру́ку положи́ти, Влады́ко?/ Пое́м, трепе́щуще, Сло́ве, Твоея́ нище́ты высоту́.

Минея, 1 Января, Канон Глас 2 Песнь 1 Ирмос: Гряди́те, лю́дие, пои́м пе́снь Христу́ Бо́гу, разде́льшему мо́ре и наста́вльшему лю́ди, я́же изведе́ из рабо́ты еги́петския, я́ко просла́вися. Сла́ва Отцу́ и Сы́ну и Свято́му Ду́ху. Осмери́ца дне́й, нося́щая о́браз бу́дущаго, Твое́ю, Христе́, просвеща́ется и освяща́ется во́льною нището́ю, в се́й бо зако́нно обре́зался еси́ пло́тию. И ны́не и при́сно и во ве́ки веко́в. Ами́нь. Обре́зание прие́млет осмодне́вное Христо́с Своего́ рождества́, и сего́ дне́сь се́нь спря́тает, све́т возсиява́я но́выя благода́ти. Песнь 3 Ирмос: Утверди́ на́с в Тебе́, Го́споди, Дре́вом умерщвле́й гре́х, и стра́х Тво́й всади́ в сердца́ на́с, пою́щих Тя́. Сла́ва Отцу́ и Сы́ну и Свято́му Ду́ху. Сло́во вопло́щшееся Пресу́щественное в преста́тие зако́на обре́зася, нача́ток же Боже́ственныя благода́ти и жи́зни нетле́нныя на́м подаде́. И ны́не и при́сно и во ве́ки веко́в. Ами́нь. Зако́на исполни́тель, не я́ко сопроти́вен Бо́гу сы́й, Христо́с воплоти́выйся показа́ся и сподо́бися во́лею обре́затися осмодне́вен. Седален, глас 4 Я́ко Сы́й бе́здна человеколю́бия, оде́ялся еси́, Влады́ко, в зра́к ра́бий и пло́тию обре́зался еси́, да́руя все́м челове́ком вели́кую Твою́ ми́лость. Песнь 4 Ирмос: Услы́шах, Го́споди, слу́х Твоего́ смотре́ния, и просла́вих Тя́, Еди́не Человеколю́бче. Сла́ва Отцу́ и Сы́ну и Свято́му Ду́ху. Обре́зание преста́, отне́леже Христо́с во́лею обре́зася, язы́к мно́жество спаса́я благода́тию. И ны́не и при́сно и во ве́ки веко́в. Ами́нь. Бу́дущаго непреста́нную осма́го ве́ка жи́знь изобража́ет, в ню́же Влады́ка обре́зася пло́тию. Песнь 5 Ирмос: Све́та Пода́телю и веко́в Тво́рче, Го́споди, во све́те Твои́х повеле́ний наста́ви на́с, ра́зве бо Тебе́, ино́го бо́га не зна́ем. Сла́ва Отцу́ и Сы́ну и Свято́му Ду́ху. Ты́, от Де́вы Ма́тере несказа́нно проше́д, Го́споди, и в челове́ческий ны́не сподо́бился еси́ оде́ятися о́браз, я́ко Младе́нец зако́нно зако́н испо́лнил еси́. И ны́не и при́сно и во ве́ки веко́в. Ами́нь. Но́щи уподо́бися, я́ко се́нь зако́нную лю́бящи Изра́иля, Ро́ждшая, из Нея́же облиста́вший Све́т ми́ра, Христо́с, яви́ся. Песнь 6 Ирмос: Бе́здна мя́ мно́га грехо́вная окружа́ет, и вопию́ Ти, проро́ка подража́яй: от тли́ мя, Го́споди, возведи́. Сла́ва Отцу́ и Сы́ну и Свято́му Ду́ху. Прия́т коне́ц зако́н, отне́леже Христо́с, младе́нствовав, исполни́тель зако́на Сы́й, обре́зание восприя́т и разреши́ зако́нную кля́тву. И ны́не и при́сно и во ве́ки веко́в. Ами́нь. Суббо́тство, обре́зание же шата́ния евре́йскаго я́вльшагося Христа́ манове́нием преста́, и возсия́ благода́ти весна́. Кондак, глас 3 Все́х Госпо́дь обре́зание терпи́т и челове́ческая прегреше́ния, я́ко Бла́г, обре́зует, дае́т спасе́ние дне́сь ми́ру. Ра́дуется же в Вы́шних и Созда́телев иера́рх, и светоно́сный, Боже́ственный таи́нник Христо́в Васи́лий. Песнь 7 Ирмос: О́бразу злато́му, на по́ле Деи́ре служи́му, трие́ Твои́ о́троцы небрего́ша. Безбо́жнаго веле́ния, посреде́ же огня́ вве́ржени, ороша́еми, поя́ху: благослове́н еси́, Бо́же оте́ц на́ших. Сла́ва Отцу́ и Сы́ну и Свято́му Ду́ху. Све́тло и пресве́тло Рождество́ Христо́во, и бу́дущаго обновле́ния подписа́вшее та́инство дне́сь, я́ко зако́нным чи́ном Спа́с обре́зуется, не я́ко Бо́г, но я́ко Челове́к и зако́на исполне́ние. И ны́не и при́сно и во ве́ки веко́в. Ами́нь. Зако́н исполня́я, зако́на Творе́ц, пло́тию дне́сь во́лею обре́зуется, обре́зание содева́я грехо́вныя зимы́ и зва́ти да́руя: благослове́н еси́, Бо́же оте́ц на́ших. Песнь 8 Ирмос: Неизрече́нною му́дростию соста́вльшаго вся́ческая Бо́га Сло́ва и от не су́щих во е́же бы́ти приве́дшаго, благослови́те, дела́, я́ко Го́спода, и превозноси́те во вся́ ве́ки. Сла́ва Отцу́ и Сы́ну и Свято́му Ду́ху. Во осмы́й де́нь обре́зуется я́ко Младе́нец Влады́ка, Иису́са же прие́млет именова́ние, я́ко ми́ра е́сть Спа́с и Госпо́дь. И ны́не и при́сно и во ве́ки веко́в. Ами́нь. Ко Христо́ву Рождеству́ досто́йно осмы́й спряже́ся, святи́теля всесла́вная па́мять, ю́же почита́юще ве́рою, пое́м Го́спода и превозно́сим во ве́ки. Песнь 9 Ирмос: Я́же пре́жде со́лнца свети́льника Бо́га возсия́вшаго, пло́тски к на́м прише́дшаго из боку́ Деви́чу, неизрече́нно воплоти́вшая, Благослове́нная, Всечи́стая, Тя́, Богоро́дице, велича́ем. Припев: Сла́ва Тебе́, Бо́же на́ш, сла́ва Тебе́. Преше́д преде́лы Христо́с челове́ческаго всего́ естества́, преесте́ственно из Де́вы ражда́ется и, писа́ние зако́нное я́коже повелева́ет, пло́тию обре́зается, и испо́лнитель зако́на явля́ется. Припев: Сла́ва Тебе́, Бо́же на́ш, сла́ва Тебе́. Прииди́те, Влады́ки сла́вная Христо́ва именова́ния во святы́ни торжеству́им, Иису́с бо Боголе́пно нарече́ся дне́сь. С си́ми же и па́мять святи́теля велича́ем. Светилен Пло́тию обре́зуется зако́н испо́лнивый, я́ко Младе́нец осмодне́вен, веко́в Зижди́тель,/ и пелена́ми повива́ется, я́ко Челове́к, и млеко́м пита́ется,/ И́же вся безме́рною кре́постию я́ко Бог содержа́й/ и манове́нием возводя́й.

Святое и пренепорочное понесл еси самовольное мучение,/ яко вено пречестное, принесл еси тело твое к Пресвятей Троице и Пречистеи Богородице/ и ту сотворил еси честное твое преставление./ Терпением твоим и смирением ангельский лики удивил еси/ и диавола мучителя посрамил еси,/ от человек отгонявши духи темныя,/ различная исцеления подавая./ Радуйся, благоюроде Иоанне, с блаженным Василием,/ и печаль нашу на радость преложи,/ молися прилежно стране Российстей от междоусобныя брани и от безбожных язык избавитися./ Радуйся, земли Российский удобрение и града нашего Москвы великое утверждение.

Кондак 1 Избранная Богом от благочестиваго рода для прославления имени Господнего своим житием непорочным, святая преподобная Евфросиние, к чистым стопам твоим припадаем и умиленно тя просим: простри ко Господу Богу руце своя и умоли за нас Творца всяческих, да помилует нас в сем житии, вопиющих тебе: Радуйся, преподобная мати Евфросиние, радость в любве ко Христу испытавшая. Икос 1 Ангелом святым уподобившися, богобоязненнии родителие твоя, преподобная Евфросиние, печалуяся о безплодии своем, непрестанно Господа моляху, да послет им чадо во утешение. С высоты небесныя преблагий Господь на милосердие, моления и пощения рабов Своих взирая, благоволи, по молитвам игумена, благословити благочестиваго отца твоего Пафнутия и разрешися неплодие матери твоея. Мы же, с родителями твоими, прекрасная Евфросиние, рождению твоему радующеся, воспеваем ти: Радуйся, у Господа родителями твоими со слезами вымоленная; Радуйся, родителем твоим Господом за милосердие и смирение дарованная. Радуйся, утешением им неизреченным ставшая; Радуйся, ими благочестию и праведности наученная. Радуйся, с младых лет в православной вере воспитанная; Радуйся, заповеди Божии в сердце своем сохраншая. Радуйся, преподобная мати Евфросиние, радость в любве ко Христу испытавшая. Кондак 2 Видя девственную чистоту жития твоего, преподобная Евфросиние, велие благоразумие твое и красоту лика твоего, многия от благороднейших и знатнейших семейств Александрии желаху имети тя супругою своих сынов. Отец же твой Пафнутий, на волю Божию всецело полагаяся: «Да будет тако, яко же есть угодно Господу!», хвалы Ему пел неустанно: Аллилуиа. Икос 2 Разуму своему просвещения свыше прося, пришедши Пафнутий со дщерию своею во обитель, рекл игумену о чаде своем: «Аз приведох к тебе, святый отче, дщерь мою, ея же ми Бог даровал есть по молениям твоим; прошу тя, отче, помолися о ней, хощу бо отдати ея в замужество». Ты же, благоразумная Евфросиние, к ногам старца припадая, просила еси его: «Прошу тя, отче, помолися о мне, да спасет Господь душу мою», о замужестве ничуть не помышляя. Научи же и нас о небеснем помышляти паче, нежели о земном, воспевающих ти сице: Радуйся, благоразумием Господом щедро одаренная; Радуйся, ликом красивая, душею же прекрасная. Радуйся, тело и душу добродетельми очистившая; Радуйся, мудро житие свое устроявшая. Радуйся, быти одушевленным храмом Божиим свыше благословленная; Радуйся, гласа Христова, зовуща к безсмертней жизни, послушавшаяся. Радуйся, преподобная мати Евфросиние, радость в любве ко Христу испытавшая. Кондак 3 Сила Божественныя благодати воистину укрепи тя, мужественная Евфросиние, егда по тайнем пострижении твоем, в мужеския одежды облеклася еси и тайно от всех от дома своего отшла еси, жениха земнаго отрешившися и к Жениху Небесному во сретение устремившися, Ему же сладце пела: Аллилуиа. Икос 3 Имея велию любовь к возлюбившему тя Господу, богоблаженная Евфросиние, житием иноческим угодити Ему восхотев, за евнуха Измарагда себе выдавая, во обитель мужескую вошла еси и труды иноческия подъяти потщалася еси. Мы же, таковому подвигу твоему удивляяся, воздаем ти хвалы сии: Радуйся, богодохновенныя мудрости от младых лет исполненная; Радуйся, девством и целомудрием сияющая. Радуйся, яко крепость мужескую на труды иноческие дарова ти Христос; Радуйся, яко Божественною благодатию укрепленная, Жениху Небесному верно служившая. Радуйся, подвиги иноческия на хрупкия плещи своя небоязненно подъявшая; Радуйся, теми Господу угодившая и награду нетленную стяжавшая. Радуйся, преподобная мати Евфросиние, радость в любве ко Христу испытавшая. Кондак 4 Бури искушений воздвиже враг рода человеческаго на тя, прекрасная Евфросиние, смущаху бо ся многия из братии нечистыми помыслы, уязвляше бо диавол сердца их красотою лика твоего. Ты же, сего ради, во уединении жити обреченная, скрывая тленную красу свою, душею нетленною в Боге пребывала еси, Ему моляся тепле: Аллилуиа. Икос 4 Слышаще и видяще блаженный Агапит велии подвиги и труды твоя, преподобная Евфросиние, повествоваше о ня всей братии в назидание. Мы же, купно с ними поучаемся подвигами твоими и прославляем Бога, даровавшаго таковую силу ти, поюще тебе сице: Радуйся, Креста всеоружием оградившеся, враги побеждавшая; Радуйся, молитвою пламенною услаждаяся, с Господом непрестанно пребывавшая. Радуйся, яко светом Христовым просвещенное сердце имела еси; Радуйся, яко любовию Христовою навечно уязвилася еси. Радуйся, во Владычни пречистые длани надежды своя возложившая; Радуйся, сугубый венец от Христа Жизнодавца достойно приявшая. Радуйся, преподобная мати Евфросиние, радость в любве ко Христу испытавшая. Кондак 5 Боготечную звезду в тебе явленную найти тщашеся, искаше тя повсюду благочестивый отец твой и братию моляше да откроет по молитвам я Господь твою участь, Евфросиние святая. Ты же, днем и нощию ко Господу молилася еси, да не откроет Господь никому же о тебе в сем житии, и Бог тя слышаще, ты бо пела еси Ему верно: Аллилуиа. Икос 5 Видевши игумен обители идеже подвизалася еси ты, мати наша Евфросиние, яко отец твой велиею печалию по тебе истаяваем бысть, посли его к тебе в келию, да утешение от тебе приимет, яко мняше тя исполненною Духа Святаго. Мы же, таковую милость Божию на тебе зряще, восхваляем тя звании сими: Радуйся, светом Триипостасным еще в земном житии осиянная; Радуйся, небесный чертог еще на земли себе уготовившая. Радуйся, разум богоносный денно и нощно стяжавшая; Радуйся, добротою благочестия чистее злата блистающаяся. Радуйся, сияния Божественнаго ныне насыщающаяся; Радуйся, нощь жития всемудро прошедшая, день невечерний постигшая. Радуйся, преподобная мати Евфросиние, радость в любве ко Христу испытавшая. Кондак 6 Проповедницею истиннаго боговедения и велией любви ко Христу явилася еси, премудрая Евфросиние, егда любовь отца своего земнаго не презревая, обаче в печали по тебе с любовию дочернею его тепло утешая, Отцу Небесному взывала еси слезно: Аллилуиа. Икос 6 Возсияла еси, блаженная Евфросиние, зельными трудами и воздержанием тело твое удручающи тридесять и восемь лет, в уединенном житии воспевая ко Христу победную песнь над враги видимыми и невидимыми. Всего же величествия деяний твоих изрещи не могуще, малую мзду хвалебную воздаем тебе сице: Радуйся, нищету Христову вольно возлюбившая; Радуйся, сего ради богатство исцелений от Бога приявшая. Радуйся, яко росою воздержания пламень страстей погасила еси; Радуйся, яко Жениху Слову честное девство в дар принесла еси. Радуйся, тем же в чертог славы Христом введенная; Радуйся, со Ангелы и со лики святых веселящаяся. Радуйся, преподобная мати Евфросиние, радость в любве ко Христу испытавшая. Кондак 7 Хотяй душу твою в селениих райских упокоити, возвести тебе Господь, праведная Евфросиние, день отшествия твоего к Нему. Ты же, отцу своему земному тайну жития своего поведавши, ко Отцу Небесному потекла еси, воспевая Ему: Аллилуиа. Икос 7 Дивная тайна о тебе открыта бысть Господем игумену и братии святыя обители, идеже ты подвизалася еси, святая Евфросиние, да прославится Бог, явивший крепкую силу Свою в немощней плоти твоея. Молися о нас, мати преподобная, Господу Иисусу Христу, да сподобит и нас скончавши праведно житие свое, достигнути спасения и водворитися со святыми Его, вопиющих к тебе: Радуйся, иго легчайшее Христово от юности понесшая; Радуйся, лучами чудес твоих страстей вещь попалившая. Радуйся, одеяние иноческое, яко ангельское, носившая; Радуйся, исткану свыше ризу себе светозарную исходатайствовавшая. Радуйся, огнем Божественныя любве сердце свое согревавшая; Радуйся, росою благодати Божественныя душу свою орошавшая. Радуйся, преподобная мати Евфросиние, радость в любве ко Христу испытавшая. Кондак 8 Странное чудо и непостижимое явися от святых мощей твоих, Евфросиние преблагая, егда некоему от братии, иже бе слеп на единый глаз, по лобзании тела честнаго твоего, отверзеся око его. Видя исцеление сие, вся братия величала есть милость Божию, воспевая: Аллилуиа. Икос 8 Всем была еси в назидание святым житием твоим, мати преподобная, яко в женстем естестве мужескую крепость имела еси и победила еси супостата диавола. Подавай и нам крепость на подвиги и труды во славу Божию, восхваляющим тя: Радуйся, яко святыя мощи твоя благоухания исполнишася; Радуйся, яко тех благоуханием мы ныне наслаждаемся. Радуйся, врачевства струю обильно и богатно источающая; Радуйся, благородство души своея не уязвленым сохраншая. Радуйся, на Христа Жениха непрестанно взирающая. Радуйся, от Него же благодать приснотекущую получающая. Радуйся, преподобная мати Евфросиние, радость в любве ко Христу испытавшая. Кондак 9 Всю себе повинув Богови, воистину светел и тверд ум имела еси, боголюбивая Евфросиние, вся бо красная мира сего, яко во уметы вменила еси и ничтоже возможе поколебати храм души твоея, внегда воспевала еси Христу: Аллилуиа. Икос 9 Витийство человеческое не возможе изглаголати любве твоея, невесто Христова Евфросиние, Христов бо храм явилася еси твоею чистотою и целомудрием, темже вместила еси в себе Святаго Духа. Чистотою души твоея восхищаяся и в себе Святаго Духа стяжати хотящии, восклицаем ти словесами хвалебными: Радуйся, Богу Зиждителю песнопоющи с девами ликуеши; Радуйся, в Троице святей Господа неустанно прославляеши. Радуйся, яко лозо богомудрая явилася еси; Радуйся, яко к тебе приходящих вином благочестия напоила еси. Радуйся, девства светлостьми и иными добротами блистающая; Радуйся, сияньми терпения и смирения твоего мир просвещающая. Радуйся, преподобная мати Евфросиние, радость в любве ко Христу испытавшая. Кондак 10 Спастися всем верным хотящим пример благий житие твое, богомудрая Евфросиние, имже Жениха своего Небеснаго прославляла еси, приимши бо крест последовала еси Христу, темже и со Ангелы ныне срадуешися, поя Ему: Аллилуиа. Икос 10 Стена тверда еси всем верующим в Бога и с молитвами к тебе прибегающим, преподобная наша мати, не отвращаеши бо лица твоего от них: недужным исцеление испрашиваеши, сирым утешение подаеши, обидимым и гонимым защитница еси. Мы же, таковую велию твою помощь и защиту принимая, с благодарностию взываем ти: Радуйся, монашествующих славо и преподобных украшение; Радуйся, в болезнях твоих зревшая Господа посещение. Радуйся, лета младыя не жениху земному, а Жениху Небесному посвятившая; Радуйся, яко жертва непорочная Христу пожершаяся. Радуйся, яко на твоя мужеския подвиги со умилением взираем; Радуйся, яко теми на одоление страстей наших ополчаемся. Радуйся, преподобная мати Евфросиние, радость в любве ко Христу испытавшая. Кондак 11 Пение еже приносим ти, святая Евфросиние, несть довольно к прославлению преславных подвигов и трудов твоих, обаче, ведуще любовь нашу к тебе, внемли мольбам нашим, да души и сердца наша благодатною силою исполняются, уста же вопиют ангельскую песнь Творцу: Аллилуиа. Икос 11 Светозарная свеща еси в Церкве Христовой, Богом избранная Евфросиние, во мраце жития сущим неугасимая, у Престола Божия на небесней свещнице поставленная, сего ради воспеваем ти: Радуйся, богатством твоим и похвалою Христа именовавшая; Радуйся, темже от Того богатства духовныя непрестанно получавшая. Радуйся, любовию твоею страждущих объемлющая; Радуйся, в свои объятия немощных приемлющая. Радуйся, таинница молитвенныя сладости; Радуйся, хранительница благодатныя радости. Радуйся, преподобная мати Евфросиние, радость в любве ко Христу испытавшая. Кондак 12 Благодать Божественную испроси нам у Господа, боголюбивая Евфросиние, да ею очистивши сердца и души наша, укрепляеми будем на делание добрых дел, имиже прославим в Троице славимаго Бога, воспевая Ему присно: Аллилуиа. Икос 12 Поюще пресветлую память твою, добропобедная Евфросиние, почитаем великия подвиги и моления твоя, хвалим долготерпение и смирение твое, славим мужество твое в немощнем телеси, ублажаем святую кончину твою. О небесней славе твоей радуяся, со умилением сердечным вопием ти: Радуйся, яко дело жития твоего земнаго продолжаеши; Радуйся, яко на страже спасения нашего пребываеши. Радуйся, лучами Евангельскаго учения в сердца наша проникающая; Радуйся, силу в молитве от источника премудрости черпати нас научающая. Радуйся, волю свою воле Божией сочетати нам помагаеши; Радуйся, в скорби и болезни Небеснаго Врача призывати нас наставляеши. Радуйся, преподобная мати Евфросиние, радость в любве ко Христу испытавшая. Кондак 13 О, святая, всехвальная и многопобедная угоднице Христова Евфросиние! Нынешнее моление наше приемши, предстательством твоим сохрани ны от враг видимых и невидимых и испроси нам у Господа оставление всех наших прегрешений, жития нашего исправление и во Царствие Небесное невозбранное вхождение, да со всеми святыми воспевати непрестанно будем Богу: Аллилуиа.[Се́й конда́к глаго́лется три́жды.][Далее повторяем 1‑е икос и кондак:]Икос 1 Ангелом святым уподобившися, богобоязненнии родителие твоя, преподобная Евфросиние, печалуяся о безплодии своем, непрестанно Господа моляху, да послет им чадо во утешение. С высоты небесныя преблагий Господь на милосердие, моления и пощения рабов Своих взирая, благоволи, по молитвам игумена, благословити благочестиваго отца твоего Пафнутия и разрешися неплодие матери твоея. Мы же, с родителями твоими, прекрасная Евфросиние, рождению твоему радующеся, воспеваем ти: Радуйся, у Господа родителями твоими со слезами вымоленная; Радуйся, родителем твоим Господом за милосердие и смирение дарованная. Радуйся, утешением им неизреченным ставшая; Радуйся, ими благочестию и праведности наученная. Радуйся, с младых лет в православной вере воспитанная; Радуйся, заповеди Божии в сердце своем сохраншая. Радуйся, преподобная мати Евфросиние, радость в любве ко Христу испытавшая. Кондак 1 Избранная Богом от благочестиваго рода для прославления имени Господнего своим житием непорочным, святая преподобная Евфросиние, к чистым стопам твоим припадаем и умиленно тя просим: простри ко Господу Богу руце своя и умоли за нас Творца всяческих, да помилует нас в сем житии, вопиющих тебе: Радуйся, преподобная мати Евфросиние, радость в любве ко Христу испытавшая. Молитва преподобной Евфросинии Александрийской О, святая преподобная мати наша Евфросиние! Ныне светло память твою празднующе, умиленными сердцами восклицаем ти: ты послушалася еси благаго Учителя Господа нашего Иисуса Христа, глаголющаго в Евангелии: Иже любит отца или матерь паче Мене, несть Мене достоин, и иже не отречется всего своего имения, не может быти Мой ученик, и всем житием своим последовала еси Ему. Испроси нам, мати наша Евфросиние, силы и действа Святаго Духа, во еже искоренити всякий грех в нас живущий и сотворити души наша в храмы Божии; воспламени сердца наша любовию ко Господу да исполним уста наша ко славословию Его и совершим хождение наше пред лицем Божиим во всяком благочестии и чистоте, да небесным предстательством твоим спасаеми узрим славу Божию, славяще Отца и Сына и Святаго Духа во веки веков. Аминь.

Минея, 22 Июля, Кано́н Глас 8 Песнь 1 Ирмос: Сокруши́вшему бра́ни мы́шцею Свое́ю и прове́дшему Изра́иля сквозе́ Чермно́е мо́ре, пои́м Ему́, я́ко Изба́вителю на́шему Бо́гу, я́ко просла́вися. Припев: Святы́й священному́чениче Фо́ко, моли́ Бо́га о на́с. Све́ту непристу́пному предстоя́, Фо́ко, просвети́ мо́й по́мысл, молю́ся, му́дре, и се́рдце, восхвали́ти дне́сь свято́е твое́ страда́ние. Припев: Святы́й священному́чениче Фо́ко, моли́ Бо́га о на́с. Украси́лся еси́ от де́тска, боже́ствен ра́зум, Фо́ко, име́я, и благода́ти сподо́бився твори́ти зна́мения и отгоня́ти лука́выя ду́хи, прему́дре. Сла́ва Отцу́ и Сы́ну и Свято́му Ду́ху. Испо́лнен сы́й благода́ти, испо́лнен ра́зума Бо́жия, име́л еси́ живу́щую в тебе́ Ду́ха Боже́ственнаго си́лу, богому́дре, Ея́же ра́ди, я́ко со́лнце, просия́л еси́, просвеща́я ве́рныя. И ны́не и при́сно и во ве́ки веко́в. Ами́нь. Богородичен: Неискусому́жно во утро́бе Твое́й Невмести́маго Бо́га име́ла еси́ вме́стна, Богороди́тельнице, нете́сно, Его́же о на́с, Богора́дованная, при́сно моли́. Песнь 3 Ирмос: Утверди́ся се́рдце мое́ во Го́споде, вознесе́ся ро́г мо́й в Бо́зе мое́м, разшири́шася на враги́ моя́ уста́ моя́, возвесели́хся о спасе́нии Твое́м. Припев: Святы́й священному́чениче Фо́ко, моли́ Бо́га о на́с. Свяще́н из мла́да ра́зум име́л еси́ и да́же до ста́рости же и престаре́ния, богоно́се, Бо́гу угоди́л еси́, отту́ду сла́ву получи́л еси́. Припев: Святы́й священному́чениче Фо́ко, моли́ Бо́га о на́с. Твоего́ вели́каго преще́ния, богоно́се, не терпе́, де́мон, и́же в корабли́, отбега́ет, и Христо́с велича́ется де́лы твои́ми, чу́дне. Сла́ва Отцу́ и Сы́ну и Свято́му Ду́ху. И́же во граде́х до́блести твоя́, по́двиги же, и тече́ния, и благодея́ния, кто́ досто́йно восхва́лит, чу́дне, му́чеников украше́ние и похвало́? И ны́не и при́сно и во ве́ки веко́в. Ами́нь. Богородичен: Я́ко вы́шши а́нгел, прия́ла еси́ в ложесна́, Пречи́стая, Влады́ку а́нгелов и всея́ тва́ри, те́мже Тя́ ве́рно почита́ем. Седален, глас 4 Наста́, празднолю́бцы, све́тло торжество́, па́мять богому́драго и святи́теля Фо́ки, веселя́щи концы́, сия́ющи заря́ми чуде́с в ми́ре, нося́щи челове́ком неску́дную благода́ть: мо́лится бо Го́сподеви спасти́ ро́д на́ш. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Обнови́ла еси́, Чи́стая, Боже́ственным Рождество́м Твои́м истле́вшее во страсте́х земноро́дных ме́ртвенное существо́ и воздви́гла еси́ вся́ от сме́рти к животу́ нетле́ния. Те́мже Тя́ по до́лгу блажи́м вси́, Де́во препросла́вленная, я́коже прорекла́ еси́. Песнь 4 Ирмос: Услы́шах, Го́споди, слу́х Тво́й и убоя́хся, я́ко неизрече́нным сове́том, Бо́г сы́й Присносу́щный, от Де́вы прише́л еси́, вопло́щся. Сла́ва снизхожде́нию Твоему́, Христе́, сла́ва си́ле Твое́й. Припев: Святы́й священному́чениче Фо́ко, моли́ Бо́га о на́с. Свети́льника тя́ сия́юща пра́вды зна́ем, де́лы и муче́нием, при́сно светолу́чными сия́нии просвеща́юща сердца́ ве́рных и неду́гов мглу́, сла́вне, отгоня́ща. Припев: Святы́й священному́чениче Фо́ко, моли́ Бо́га о на́с. Красе́н в добро́тах муче́ния, Фо́ко, яви́лся еси́: го́лубь бо Бо́жий на версе́ твое́м честне́м се́де, сказа́, му́дре, страсте́м прича́стнику бы́ти Ду́хом. Сла́ва Отцу́ и Сы́ну и Свято́му Ду́ху. Окормле́ние иму́щии, и́же в мо́ри, богоно́се, твою́ моли́тву при́сно тя́жкия бу́ри избавля́ются, пою́ще тебе́ ра́ди Подаю́щаго и́м избавле́ние спаси́тельное. И ны́не и при́сно и во ве́ки веко́в. Ами́нь. Богородичен: Нескве́рная, Небла́зная, оскверне́нное мое́ се́рдце вре́дными помышле́ньми и преступле́ньми окаля́ное очи́сти Твои́ми к Преблага́го Бо́га Боже́ственными утеше́нии. Песнь 5 Ирмос: Го́споди Бо́же на́ш, ми́р да́ждь на́м, Го́споди Бо́же на́ш, стяжи́ ны, Го́споди ра́зве Тебе́ ино́го не ве́мы, и́мя Твое́ имену́ем. Припев: Святы́й священному́чениче Фо́ко, моли́ Бо́га о на́с. Я́коже че́стен ка́мень, проходя́, преподо́бне, служа́щия ка́мению лю́ди к Бо́жией ве́ре приве́л еси́ словесы́ твои́ми и чуде́сными явле́ньми. Припев: Святы́й священному́чениче Фо́ко, моли́ Бо́га о на́с. Преподо́бен в преподо́бных показа́лся еси́, сла́вне, и в му́ченицех све́тел, чу́дно пострада́в и борца́ победи́в, Фо́ко чу́дне. Сла́ва Отцу́ и Сы́ну и Свято́му Ду́ху. Воспе́ша а́нгельская во́инства, ви́дяще пострада́вша тя́, му́чениче, тве́рдо и безпло́тныя побежда́юща де́моны в тле́ннем твое́м, блаже́нне, телеси́. И ны́не и при́сно и во ве́ки веко́в. Ами́нь. Богородичен: Спаси́ мя, волну́ющася жития́ страстьми́, Пречи́стая, и окорми́ к ти́хим безстра́стия приста́нищем, все́х По́моще христиа́н, Богоблагода́тная. Песнь 6 Ирмос: Я́коже проро́ка изба́вил еси́ из глубины́ преиспо́дния, Христе́ Бо́же, и мене́ от грехо́в мои́х изба́ви, я́ко Человеколю́бец, и упра́ви живо́т мо́й, молю́ся. Припев: Святы́й священному́чениче Фо́ко, моли́ Бо́га о на́с. Возвеща́ет ти́ хотя́щая бы́ти челове́ческим гла́сом, пресла́вне, ча́шу глаго́ля пи́ти тебе́ спаси́тельную, по́сланный ти́ го́лубь свы́ше. Припев: Святы́й священному́чениче Фо́ко, моли́ Бо́га о на́с. По премно́гих по́тех, по боле́знех неизме́рных те́ла, мечу́ святу́ю твою́ главу́ преклони́л еси́ и кровьми́ зе́млю освяти́л еси́. Сла́ва Отцу́ и Сы́ну и Свято́му Ду́ху. Ме́ртвым ка́пищем не послужи́в, пребога́те, сме́рть претерпе́л еси́ и живе́ши по сме́рти, сего́ ра́ди тя́, Фо́ко, ублажа́ем. И ны́не и при́сно и во ве́ки веко́в. Ами́нь. Богородичен: Живы́й в вы́шних во святу́ю Твою́ утро́бу всели́ся, пло́ти подо́бием ми́рови явля́яся, сего́ ра́ди Тя́, Чи́стая, сла́вим. Кондак, глас 6 Я́ко святи́тель принося́, о́тче, же́ртвы, на коне́ц себе́ прине́сл еси́ же́ртву жи́ву, свиде́тельствовав зако́нно о Христе́ Бо́зе, от а́нгел укрепля́емый, и сме́рть изволя́я, сы́й с вопию́щими тебе́: прииди́, Фо́ко, с на́ми, и никто́же на ны́. Икос Жи́зни небе́сныя жела́юще, пи́щу же на земли́ попира́юще, устне́ очи́стим и язы́ки та́кожде, пе́ния и пе́сни я́ко плету́ще досто́йно Фо́ке свяще́ннику, и́бо, в небе́сную две́рь вше́д, невозбра́нно обре́те е́же вну́трь ше́ствие и взира́ет на Жела́емаго, от а́нгел сла́вима. Отту́ду бо и мо́жет о на́с моли́ти еди́наго Ми́лостиваго, душе́вных неду́гов Цели́теля, я́ко му́ки прия́т за Него́. Воспое́м у́бо Того́, и возопие́м Ему́: призира́я на ны́, прииди́, Фо́ко, с на́ми, и никто́же на ны́. Песнь 7 Ирмос: А́нгелом о́троки из огня́ спасы́й и гремя́щую пе́щь преложи́вый на ро́су, благослове́н еси́, Бо́же оте́ц на́ших. Припев: Святы́й священному́чениче Фо́ко, моли́ Бо́га о на́с. Проше́д сквозе́ пла́мень, я́коже три́ ю́ноши, неопале́н, му́чениче, пребы́л еси́ Христо́вою си́лою пожи́вшаго в тебе́ па́че ума́. Припев: Святы́й священному́чениче Фо́ко, моли́ Бо́га о на́с. Ты́, огне́м Боже́ственныя любве́, му́чениче, вну́трь распаля́емь, Фо́ко, огню́ ве́щному примеша́яся, пребыва́еши, му́дре, неопали́мь. Сла́ва Отцу́ и Сы́ну и Свято́му Ду́ху. Испещре́н Боже́ственными добро́тами я́звенными, к Бо́гу восте́кл еси́, твоему́ Подвигополо́жнику, побе́ды вене́ц от Него́ прие́мь. И ны́не и при́сно и во ве́ки веко́в. Ами́нь. Богородичен: Избавля́еми вся́каго осужде́ния, Де́во, чу́дным Рождество́м Твои́м, гла́сы ра́достными песносло́вим Тя́, Присноблаже́нная. Песнь 8 Ирмос: Покрыва́яй вода́ми превы́спренняя Своя́, полага́яй мо́рю преде́л песо́к, и содержа́й вся́, Тя́ пое́т со́лнце, Тя́ сла́вит луна́, Тебе́ прино́сит пе́снь вся́ тва́рь, я́ко Соде́телю все́х во ве́ки. Припев: Святы́й священному́чениче Фо́ко, моли́ Бо́га о на́с. От пеле́н освяти́ тя все́х Соде́тель Бо́г, и, в ме́ру дости́г во́зраста страда́ний Христо́вых, пострада́л еси́, и победи́л еси́ нача́ла си́лы вра́жия, и венцено́сец дости́гл еси́ вы́шних оби́телей жили́ще. Припев: Святы́й священному́чениче Фо́ко, моли́ Бо́га о на́с. Ко́рмчия тя́ изря́дна призыва́ют при́сно пла́вающии, му́чениче, и морски́х избавля́ются, му́дре, бе́д благоприя́тными твои́ми, сла́вне, моли́твами, воспева́юще все́х Царя́, и Соде́теля, и Бо́га во ве́ки. Сла́ва Отцу́ и Сы́ну и Свято́му Ду́ху. Я́ко а́гнца тя́ незло́бива, Госпо́дни врази́ умерщвля́ют, Фо́ко, во глубо́цей и честне́й ста́рости, врага́, сла́вне, злу́ нача́льника, мече́м уморя́ющаго испове́дания и дерзнове́ния твоего́ во ве́ки. И ны́не и при́сно и во ве́ки веко́в. Ами́нь. Богородичен: Очище́ние была́ еси́ па́дшему на́шему тле́нному естеству́, поро́ждши А́гнца Бо́жия, взе́млющаго согреше́ния челове́ков коне́чным милосе́рдием, те́мже Тя́ пое́м ра́достно, Де́во Богоро́дице. Песнь 9 Ирмос: Благослове́н Госпо́дь Бо́г Изра́илев, воздви́гнувый ро́г спасе́ния на́м в дому́ Дави́дове, О́трока Своего́, в ни́хже посети́ на́с Восто́к с высоты́ и напра́вил ны́ е́сть на пу́ть ми́ра. Припев: Святы́й священному́чениче Фо́ко, моли́ Бо́га о на́с. Я́ко не́бо зве́здно, бие́ний добро́тами чуде́с, му́чениче, позна́лся еси́, Фо́ко, просвеща́я при́сно подсо́лнечную и реша́ тму́ страсте́й и вся́каго злоче́стия, сего́ ра́ди ве́рою тя́ воспева́ем. Припев: Святы́й священному́чениче Фо́ко, моли́ Бо́га о на́с. Ты́ те́сный ше́ствовал еси́ на земли́, му́чениче, пу́ть, наде́ждами ве́чнующих красо́т, Фо́ко, благоче́стно разширя́яся, и вся́ утесни́л еси́ вра́жия лю́тая кова́рства. Сла́ва Отцу́ и Сы́ну и Свято́му Ду́ху. Свяще́нное торжество́ и честны́й тво́й пра́здник ны́не наста́, нося́щь на́м ра́дость соверше́ну. В се́й сла́вятся твоя́ до́блести вои́стинну, и боре́ния, в не́йже помина́й на́с, страстоно́сче и му́чениче. И ны́не и при́сно и во ве́ки веко́в. Ами́нь. Богородичен: Но́сиши Мое́ подо́бие, Оте́ческий име́я зра́к, о Сы́не Мо́й! Хо́щеши бо земны́х лю́тое я́ве безобра́зие исцели́ти, — вопия́ше Пречи́стая, рука́ми Христа́ нося́щи, Ю́же песносло́вим гла́сы немо́лчными. Светилен Святи́телей украше́ние, и ни́щих засту́пник ты́ яви́лся еси́, богому́дре о́тче, и сто́лп доброде́телей, те́мже помина́й вся́, пою́щия тя́, Фо́ко. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Дании́л преднапису́ет Тя́ несеко́мую го́ру, из нея́же честны́й Ка́мень отсече́ся и истни́ и́дольския хра́мы, Богороди́тельнице Мари́е.

Минея, 12 Января, Ин канон Глас 8 Песнь 1 Ирмос: Колесницегони́теля фарао́ня погрузи́ чудотворя́й иногда́ Моисе́йский же́зл, крестообра́зно порази́в и раздели́в мо́ре, Изра́иля же беглеца́, пешехо́дца спасе́, пе́снь Бо́гови воспева́юща. Припев: Святи́телю, о́тче Са́вво, моли́ Бо́га о на́с. Похваля́ющу мне́ твое́ житие́, ко Христу́ твое́ дерзнове́ние я́ко стяжа́в, от бога́тых Ду́ха сокро́вищ ка́плю ра́зума, о́тче, да́ти ми́ молю́ся, я́ко да досто́йно похвали́ти тя́ возмогу́, хвалы́ досто́йнаго. Припев: Святи́телю, о́тче Са́вво, моли́ Бо́га о на́с. Из ко́рене блага́го блажа́йшая о́трасль прозя́бл еси́, Бо́жия ра́зума вода́ми напая́емь, и пло́д благоуха́нен яви́лся еси́, житие́м твои́м из ю́ности, богоно́се, сердца́ и ду́ши весели́ши пою́щих тя́. Припев: Святи́телю, о́тче Са́вво, моли́ Бо́га о на́с. О, прему́драго твоего́ к Бо́гу ра́зума! И́мже прехи́трил еси́ отца́ твоего́, еле́ня лови́твою Христу́, о́тче, въеле́нив ду́шу твою́, Его́же любо́вию жго́мый, ко исто́чнику безсме́ртия Тому́ прите́кл еси́ Припев: Святи́телю, о́тче Са́вво, моли́ Бо́га о на́с. Па́че ума́ су́щих любо́вию небе́сных добро́т подви́жимь, земны́х малоле́пия избежа́в, еле́ня тече́нием Христа́ взыска́л еси́, от Него́же жела́емых, Са́вво о́тче, не погреши́л еси́. Сла́ва Отцу́ и Сы́ну и Свято́му Ду́ху. Чистоты́ любо́вию одержи́мь, благоро́дие души́ плотолю́бием не порабо́тив, те́м, ны́не чистоты́ венцы́ прие́мля, со а́нгелы у Христа́ весели́шися, к Нему́же о на́с, Са́вво о́тче, моли́ся. И ны́не и при́сно и во ве́ки веко́в. Ами́нь. Богородичен: Я́же от земли́ до небе́с дося́гшая Ле́ствица показа́ся Иа́кову, Е́юже Бо́г Челове́ком сподо́бися бы́ти, Благослове́нная Пречи́стая, неизрече́нно чу́до и недоумева́емо виде́ние. Спаса́й к Тебе́ прибега́ющия. Песнь 3 Ирмос: Утвержде́й в нача́ле небеса́ ра́зумом и зе́млю на вода́х основа́вый, на ка́мени мя́, Христе́, за́поведей Твои́х утверди́, я́ко не́сть свя́т, па́че Тебе́, еди́не Человеколю́бче. Припев: Святи́телю, о́тче Са́вво, моли́ Бо́га о на́с. На го́ру ра́зума доброде́телей возше́д, в чу́вственней же горе́ Афо́н, я́ко ина́го Исаа́ка подо́бно, сама́го себе́ возве́л еси́, иде́же, я́ко всесожже́ния овча́, се́рдце твое́ мы́сленно поже́рл еси́. Припев: Святи́телю, о́тче Са́вво, моли́ Бо́га о на́с. Свети́льник — твою́ ду́шу слеза́ми украша́я, ра́но ко Христу́ у́тренюя, ру́к же просте́ртием в моли́твах Амали́ка — те́ло умертви́л еси́ и на го́ру безстра́стия возше́л еси́. Припев: Святи́телю, о́тче Са́вво, моли́ Бо́га о на́с. Безстра́стия любо́вию пострека́емь, плотска́я взыгра́ния изсуши́л еси́, ду́шу же твою́ Боже́ственными сия́нии просвети́в, и на́м у́бо све́т разу́мный, Са́вво о́тче, улучи́ти моли́ся. Припев: Святи́телю, о́тче Са́вво, моли́ Бо́га о на́с. Ю́ности цве́т гла́дом увяди́в, воздержа́нием у́ды умертви́в, поще́нием те́ла отве́рглся еси́, бде́нием и моли́твами возмога́я, о Го́споде же любо́вию верха́ доброде́телей, Са́вво, дости́гл еси́ Сла́ва Отцу́ и Сы́ну и Свято́му Ду́ху. Благоро́дием высо́к и доброду́шием изя́щен, ра́зума му́дростию удивле́н бы́л еси́, цве́т я́ко прекра́сный, чистото́ю сия́я, и све́тлым смире́нием, Са́вво о́тче, украси́лся еси́. И ны́не и при́сно и во ве́ки веко́в. Ами́нь. Богородичен: Ма́ти Бо́жия Пречи́стая, Благослове́нная и Всенепоро́чная, души́ моея́ стру́пы исцели́, и стра́сти плотски́я отжени́, и свободи́ у́м мо́й от вся́каго вре́да, и от вра́жия мя́ напа́сти изми́, Влады́чице. Седален, глас 8 Па́влово насажде́ние, и Аполло́сово прие́мый напое́ние, и ва́шея ве́ры насажде́ние, и уче́нием напое́ние, вся́ возраща́яй Бо́г прия́л е́сть. Люде́й ва́ших благоче́стия ве́рою, моли́твами ва́шими возрасти́в, умно́жи, от Того́ я́ко ве́рнии раби́ и де́латели разу́мнии трудо́в возме́здия досто́йно прия́ли есте́, Симео́не преподо́бне, Са́вво свяще́нне, богоно́снии отцы́, па́стырие и учи́телие, Первопа́стыря и Учи́теля Христа́ моли́те ста́до ва́ше в ми́ре сохрани́ти и спасти́ ду́ши на́ша. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: О Тебе́ ра́дуется, Благода́тная, вся́кая тва́рь, а́нгельский собо́р и челове́ческий ро́д, освяще́нный хра́ме и раю́ слове́сный, де́вственная похвало́, из Нея́же Бо́г воплоти́ся, и Младе́нец бы́сть, пре́жде ве́к Сы́й Бо́г на́ш: ложесна́ бо Твоя́ престо́л сотвори́ и чре́во Твое́ простра́ннее небе́с соде́ла. О Тебе́ ра́дуется, Благода́тная, вся́кая тва́рь, сла́ва Тебе́. Песнь 4 Ирмос: Ты́ моя́ кре́пость, Го́споди, Ты́ моя́ и си́ла, Ты́ мо́й Бо́г, Ты́ мое́ ра́дование, не оста́вль не́дра О́тча, и на́шу нищету́ посети́в. Те́м с проро́ком Авваку́мом зову́ Ти: си́ле Твое́й сла́ва, Человеколю́бче. Припев: Святи́телю, о́тче Са́вво, моли́ Бо́га о на́с. Многочи́сленное зла́то со отце́м разда́вше, о́ба, я́ко му́дрии домовлады́ки, тле́нными нетле́нная измени́вше, я́же ны́не восприе́млюще, ра́дуетеся, и на́с ко Христу́ моли́твами ва́шими, пою́щих, вы́ спаса́йте. Припев: Святи́телю, о́тче Са́вво, моли́ Бо́га о на́с. Челове́ка отца́ призва́л еси́, а́нгела же ко Христу́ предпусти́л еси́, его́же посто́м иста́явшия святы́я мо́щи мироточе́ние моли́твами твои́ми устро́ил еси́, в кра́йнее извеще́ние се́рдца твоего́ проше́ния. Припев: Святи́телю, о́тче Са́вво, моли́ Бо́га о на́с. Суему́дренный го́тфин, братовоскормле́ние ва́ше, и стра́х Бо́жий, и кля́тву преоби́дев, потща́ся оте́чество твое́ озло́бити, его́же такова́го у́мысла премени́ти не возмо́г, Бо́жию суду́ того́ пре́дал еси́. Припев: Святи́телю, о́тче Са́вво, моли́ Бо́га о на́с. Поху́лен, и́же му́др о себе́, я́ко и се́й несмы́сленный, благосове́тующа тя́ не прие́мь, Бо́жию ме́сть на ся́ привлече́: ме́чь бо, его́же на па́ству твою́, о́тче, наостри́, а́нгелом всеконе́чно в се́рдце свое́ прия́ше. Сла́ва Отцу́ и Сы́ну и Свято́му Ду́ху. Просвеща́еми благода́тию Креста́ Твоего́ святи́и Твои́, Влады́ко, страну́ люде́й свои́х Тебе́ ве́рою приведо́ша, сы́н со отце́м, Са́вва и Симео́н богому́дреннии, и́хже моли́твами спаси́ от пога́ных нахо́да пою́щия: си́ле Твое́й сла́ва, Милосе́рде. И ны́не и при́сно и во ве́ки веко́в. Ами́нь. Богородичен: Но́в, я́коже Моисе́й, яви́вся, устро́ил еси́, я́ко о́н, ски́нию в пусты́ни, в горе́ святе́й огра́ду, ю́же превозрасти́л еси́ трудо́в твои́х по́ты и возложи́л еси́ Бо́жии Ма́тери, ю́же и сохраня́й ко Го́споду с Не́ю моли́твами. Песнь 5 Ирмос: Вску́ю мя́ отри́нул еси́ от лица́ Твоего́, Све́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и к све́ту за́поведей Твои́х пути́ моя́ напра́ви, молю́ся. Припев: Святи́телю, о́тче Са́вво, моли́ Бо́га о на́с. Я́ко Госпо́день учени́к, Влады́ки твоего́ благоутро́бие, о́тче, подража́я, разсла́бленнаго в це́рковь не́сл еси́. Врачева́нием же, ко Христу́ моли́твами и слеза́ми, обно́щно прилежа́в ему́, здра́ва от земли́ воздви́гл еси́ Припев: Святи́телю, о́тче Са́вво, моли́ Бо́га о на́с. Ста́рцу свято́му, твоему́ отцу́, в животе́ его́ послушли́в бы́л еси́, у́мер же о́н и во гро́бе тебе́ еди́наго послу́ша: ми́ро бо его́, мно́гими проси́мо и не улучи́мо, твои́м, о́тче, посла́нием оби́льно лю́дем свои́м сие́ источи́. Припев: Святи́телю, о́тче Са́вво, моли́ Бо́га о на́с. Други́й Илия́ ты́ яви́лся еси́, гра́д с небесе́ моли́твою, я́коже о́н о́гнь, све́л еси́ и, си́м царя́ удиви́в, ужаси́л еси́: в сла́ву Бо́жию и проти́вным на удивле́ние сия́, о́тче, сотвори́л еси́, о все́х возмога́ющу тя́ Христу́ Бо́гу на́шему. Припев: Святи́телю, о́тче Са́вво, моли́ Бо́га о на́с. Сопоста́т, ца́рь у́грин, на оте́чество твое́ подви́гся, твои́ми словесы́ свире́пства премени́ся, дивя́ся су́щей в тебе́ свя́тости, умили́вся, возврати́ся, гра́дное же ка́мение лобза́я, глаго́лаше: ди́вен Бо́г во святы́х Свои́х. Сла́ва Отцу́ и Сы́ну и Свято́му Ду́ху. Ка́мене краеуго́льна, иму́ща в се́рдцы Христа́ утвержде́ние, пре́лести утвержде́ние си́льно испрове́ргша, Це́ркви же необори́мое основа́ние яви́стеся, Ю́же сохраня́йте непоколеби́му, Са́вво свяще́нне и Симео́не богоно́се, моли́твами ва́шими. И ны́не и при́сно и во ве́ки веко́в. Ами́нь. Богородичен: Ко Христу́ Бо́гу вхо́да жела́юще, предводя́щую Тя́ взыска́вше, су́щей Ти́ небе́сней Бо́жией Це́ркви, хра́м Твоего́ вхо́да на земли́ Твои́ уго́дницы, Богома́ти, воздвиго́ша, в не́мже не преста́й даю́щи по́мощь сла́вящим Тя́. Песнь 6 Ирмос: Моли́тву пролию́ ко Го́споду и Тому́ возвещу́ печа́ли моя́, я́ко зо́л душа́ моя́ испо́лнися и живо́т мо́й а́ду прибли́жися, и молю́ся, я́ко Ио́на: от тли́, Бо́же, возведи́ мя. Припев: Святи́телю, о́тче Са́вво, моли́ Бо́га о на́с. Пресве́тлыя Тро́ицы пе́рвее же́ртвенник се́рдце твое́ сотвори́л еси́ и це́рковь Бо́гу Спа́су во оте́честве твое́м воздви́гл еси́, в не́йже, о́тче, первопресто́лен равноапо́стольный учи́тель от Христа́ удосто́ился еси́ и сло́во жи́зни лю́дем твои́м источи́л еси́. Припев: Святи́телю, о́тче Са́вво, моли́ Бо́га о на́с. Бра́та твоего́ уме́рша слы́шав, а́нгелу, ко Христу́ дерзнове́нием, ду́шу его́ возврати́ти повеле́л еси́, и сего́ вдушевле́нна, прише́д, обре́л еси́. Оле, ве́ры! Оле, дерзнове́ния! Чу́до, о́тче, вои́стинну ужа́сно: зе́мен сы́й, небе́сному повеле́л еси́. Припев: Святи́телю, о́тче Са́вво, моли́ Бо́га о на́с. Мы́сленное мо́ре страсте́й успи́в поще́нием, чу́вственное же, бе́здну ми́лости призва́в, свире́по волну́емо, сло́вом укроти́л еси́, кора́бль же спа́сл от потопле́ния и в не́м су́щия в ве́ру приве́л еси́. Припев: Святи́телю, о́тче Са́вво, моли́ Бо́га о на́с. Его́же вся́ боя́тся и трепе́щут я́ко Творца́ и Го́спода, Иису́са Христа́ всего́ стяжа́в, Христа́ в се́рдцы твое́м нося́, Христа́ в себе́ име́я, глаго́люща, мо́рю и ве́тром Того́ си́лою запрети́л еси́, и вся́, о́тче, повину́шася тебе́, я́ко Того́ изя́щну ученику́. Сла́ва Отцу́ и Сы́ну и Свято́му Ду́ху. Троичен: Пренача́льное Естество́ и Триипоста́сное Еди́нство: О́тче и Сы́не и Ду́ше Пресвяты́й, Све́те и Животе́ Богонача́льный, приими́ моли́твенники о на́с Твоя́ уго́дники, спаса́й Це́ркви Твоя́, в Тя́ ве́рующия, и сподо́би ны́ в ми́ре сла́вити Твою́ держа́ву. И ны́не и при́сно и во ве́ки веко́в. Ами́нь. Богородичен: Ви́дети жела́юще Твоего́ Сы́на и Бо́га, небе́снаго сла́ву Ца́рствия, Богоро́дице, Са́вва и Симео́н преподо́бнии, сла́ву земна́го ца́рствия оста́вивше и Сего́ Кре́ст на ра́му взе́мше, после́доваша живоно́сным Его́ и Боже́ственным стопа́м. Кондак, глас 8 Я́ко первосвяти́теля вели́каго и апо́столов соо́бщника, Це́рковь прославля́ет тя́ люде́й твои́х, преподо́бне, но я́ко име́я дерзнове́ние ко Христу́ Бо́гу, моли́твами твои́ми от вся́ких на́с бе́д спаса́й, да зове́м ти́: ра́дуйся, о́тче Са́вво богому́дре. Икос Житие́м, я́ко а́нгел на земли́, о́тче, яви́лся еси́, челове́к бо сы́й естество́м, и безпло́тных чистоте́ уподо́бился еси́. Те́мже и похва́льная удивля́еши на́с зва́ти такова́я: ра́дуйся, отца́ благочести́ва прозябе́ние и ма́тере благогове́йны прижи́тие; ра́дуйся, моли́твами, богода́нне, и да́вшему тя́ измла́да после́довав; ра́дуйся, поще́ния све́тлый ра́сте, чистото́ю благоуха́нне; ра́дуйся, целому́дрия сто́лпе, и́мже вся́кая стра́сть попра́ся; ра́дуйся, смире́нием высо́кий, де́монов горды́ню низложи́вый; ра́дуйся, свети́льниче многосве́тлый, возведы́й ко Христу́ лю́ди твоя́; ра́дуйся, це́рквей воздви́жение и святи́телем освяще́ние; ра́дуйся, сиро́т пита́телю и ни́щим пода́телю благоутро́бный; ра́дуйся, апо́столов равноре́вностне ева́нгельским науче́нием; ра́дуйся, му́чеником сострада́льне стра́нствия хожде́нием; ра́дуйся, чудоде́лателю ди́вных о Бо́зе и ужа́сных чуде́с; ра́дуйся, похвало́ оте́честву твоему́, спаса́й пою́щих тя́. Ра́дуйся, о́тче Са́вво богому́дре. Песнь 7 Ирмос: Бо́жия снизхожде́ния о́гнь устыде́ся в Вавило́не иногда́. Сего́ ра́ди о́троцы в пещи́, ра́дованною ного́ю, я́ко во цве́тнице, лику́юще, поя́ху: благослове́н еси́, Бо́же оте́ц на́ших. Припев: Святи́телю, о́тче Са́вво, моли́ Бо́га о на́с. Христа́, на́с ра́ди пло́тию на земли́ во́лею стра́нствовавша, любо́вию, о́тче, побежда́емь, престо́ла высоту́ во́лею оста́вив, восто́ку же, и за́паду, и глубина́м морски́м, я́ко со́лнце, обхо́дно стра́нствовал еси́. Припев: Святи́телю, о́тче Са́вво, моли́ Бо́га о на́с. Я́ко Христо́в учени́к, и нача́льник, от Него́ поста́влен, оте́чествия чужди́х обходя́, прие́млемь сы́й от ни́х и люби́мь, удивле́н же, о́тче, и дароноси́мь: покаря́ше бо вся́ су́щая в тебе́ Бо́жия любо́вь, кро́тость же и беззло́бие. Припев: Святи́телю, о́тче Са́вво, моли́ Бо́га о на́с. И́же бе́здну Сотвори́вый веле́нием, Того́ ученика́ сия́ позна́вши тя́, в боле́зни твое́й тебе́, о́тче, послужи́, ры́бу вели́ку, я́ко рука́ми, волно́ю взе́мши и, в корабли́ тебе́ возлежа́щу, в твои́ ру́це предложи́ Припев: Святи́телю, о́тче Са́вво, моли́ Бо́га о на́с. В корабли́ пучи́ну с тобо́ю плову́щии, мо́ре, повину́вшееся тебе́ и дароноси́мо, ви́девше, у́жасом, о́тче, одержи́ми бы́вше, от безду́шнаго научи́вшеся в Бо́жий ра́зум, умили́вшеся, поклони́шася твое́й свя́тости. Сла́ва Отцу́ и Сы́ну и Свято́му Ду́ху. Твоего́ се́рдца жела́ние исполня́я, его́же ра́ди по земли́ стра́нствовал еси́, в чужестра́нственнем гра́де Бо́г ду́х тво́й прие́млет, и́хже в животе́ чудесы́ и по сме́рти пе́рстию гро́ба и гро́бом удиви́л еси́. И ны́не и при́сно и во ве́ки веко́в. Ами́нь. Богородичен: Стопа́м после́дуя собо́р преподо́бных из чре́ва Твоего́ неизрече́нно Возсия́вшему неизглаго́ланным рождество́м, Де́во Ма́ти, с небе́сными ли́ки сочта́ся. С ни́миже мо́лимся: испроси́ на́м, чту́щим Тя́, грехо́в оставле́ние. Песнь 8 Ирмос: Седмери́цею пе́щь халде́йский мучи́тель богочести́вым неи́стовно разжже́, си́лою же лу́чшею спасе́ны сия́ ви́дев, Творцу́ и Изба́вителю вопия́ше: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки. Припев: Святи́телю, о́тче Са́вво, моли́ Бо́га о на́с. Земля́ от свои́х не́др предаде́ тя́ священноле́пна, це́ла же и неразруши́ма, благоуха́нием и чудесы́ удивля́юща, гра́да жи́тели пе́рстию гро́ба твоего́, проро́чески вопию́щия: пра́ведницы во ве́ки живу́т. Припев: Святи́телю, о́тче Са́вво, моли́ Бо́га о на́с. Ка́мене сапфи́ра облежа́щая пе́рсть страда́льнаго твоего́ те́ла дража́йши, о́тче, показа́ся: целе́бна бо, и чудотвори́ва, и па́че зла́та ве́рными разделя́ема, пою́щими досто́йно: честна́ пред Го́сподем сме́рть святы́х Его́. Припев: Святи́телю, о́тче Са́вво, моли́ Бо́га о на́с. Царе́й благочести́вых святы́ню и благослове́ние, твое́ свято́е и честно́е те́ло держа́ща, со́нным явле́нием пода́ти увещава́еши, е́же ча́да твоя́ со святи́тели и свяще́нными, я́ко пребога́тое сокро́вище, во своя́ принесо́ша. Припев: Святи́телю, о́тче Са́вво, моли́ Бо́га о на́с. Христолюби́вый Владисла́в самоде́ржец, я́ко дре́вле Дави́д пред киво́том, предходя́ пред святы́м твои́м те́лом, ра́довашеся, поя́: вели́чит душа́ моя́ Го́спода, я́ко даде́ мне́ отца́ и учи́теля. И в це́ркви свое́й, ра́дуяся, положи́. Сла́ва Отцу́ и Сы́ну и Свято́му Ду́ху. Я́ко ны́не престо́лу Влады́ки своего́ предстоя́ще и отону́дными заря́ми осия́еми, Симео́не богоно́се, Са́вво богому́дре, моли́твами ва́шими, святи́и, страсте́й греха́ на́с изба́вите, и пога́ных нахо́да, и разли́чных обстоя́ний. И ны́не и при́сно и во ве́ки веко́в. Ами́нь. Богородичен: Плеща́ми херуви́мскими стра́шными носи́мый Влады́ка, на престо́ле я́коже о́гненнем, в Твою́, Чи́стая, всели́ся утро́бу и пло́ти прия́тием челове́ческое обожи́ существо́. К Нему́же спаси́ моли́твами Твои́ми пою́щия Тя́, Ма́терь Его́. Песнь 9 Ирмос: Ужасе́ся о се́м не́бо, и земли́ удиви́шася концы́, я́ко Бо́г яви́ся челове́ком пло́тски, и чре́во Твое́ бы́сть простра́ннейшее небе́с. Те́м Тя́, Богоро́дицу, а́нгелов и челове́к чинонача́лия велича́ют. Припев: Святи́телю, о́тче Са́вво, моли́ Бо́га о на́с. Мно́г в терпе́нии и к зло́бе благоотда́тлив в животе́ и по сме́рти, о́тче, показа́лся еси́: слуки́й бо припо́лз и гро́ба твоего́ верху́ возле́г, во отмще́ния ме́сто здра́ва поста́вил еси́, и́же, в це́ркви ходя́, велича́ше Го́спода. Припев: Святи́телю, о́тче Са́вво, моли́ Бо́га о на́с. Преизя́щная ко Христу́ ва́ша любо́вь ны́не объяви́ся благода́тию, да́нною ва́м, Симео́не и Са́вво: мо́щи ва́ша благоуха́нны и мироточи́вы, па́мять сла́вна и святопочита́ема. И́миже уверя́емии, глаго́лем: па́мять пра́ведников с похвала́ми быва́ет. Припев: Святи́телю, о́тче Са́вво, моли́ Бо́га о на́с. Ны́не ви́димых глаго́лем, су́щих же, я́же лю́бящих Бо́га, иде́же а́нгели прини́кнути жела́ют, я́же ва́м досто́йно угото́ванная, о́ко не ви́де, и у́хо не слы́ша, Па́вел веща́ет, и кто́ пости́жет си́х изглаго́лати? Припев: Святи́телю, о́тче Са́вво, моли́ Бо́га о на́с. Зря́ще а́нгельския и Боже́ственныя све́тлости и все́х святы́х ли́ки, Са́вво свяще́нне и Симео́не богоно́се, с ни́ми моли́те Человеколю́бца жития́ исправле́ние и грехо́в оставле́ние пода́ти хва́лящим ве́рою ва́шу па́мять. Сла́ва Отцу́ и Сы́ну и Свято́му Ду́ху. О́ба в житии́ единоду́шна, о́ба в пусты́ни спо́стника, о́ба вы́ше ума́ благи́х получи́вша, о́ба Тро́ице ны́не предстоя́ща, обе́ма о́бщее хвалосло́вие прино́сим, е́же прие́мше, отцы́, певцы́ ва́ша моли́твами ва́шими спаса́йте. И ны́не и при́сно и во ве́ки веко́в. Ами́нь. Богородичен: Еди́на преиму́щая дерзнове́ние, Влады́чице, за ве́сь ми́р Сы́ну Твоему́ моли́ся. Не помяни́ безчи́сленных собла́зн на́ших, покры́й лю́ди, вопию́щия Ти́ уми́льным гла́сом: спаси́, Чи́стая Богоро́дице, Тебе́ досто́йно велича́ющих. Светилен Свети́льник тя́ многосве́тлый, святи́телю, зна́ем, моли́твы ча́до, пусты́ни воспита́ние, чистоты́ оби́телище, мона́хом спо́стника, ни́щим пита́теля, святи́телем све́тлость. Те́мже тя́, о́тче, ве́рнии, пое́м. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. От Восто́ка мы́сленнаго Со́лнца Христа́, светоза́рныя лучи́ возсия́вшия/ и мра́чную страну́ на за́паде люде́й свои́х просвети́вшия/ све́тлостию слове́с, и доброде́тели де́ланием,/ и ны́не не преста́йте Го́споду моля́щеся, и сия́ в ми́ре сохрани́ти,/ Са́вво и Симео́не, па́мять ва́шу почита́ющих.

Минея, 5 Октября, Канон святителей Глас 8 Песнь 1 Ирмос: Воду прошед, яко сушу,/ и египетскаго зла избежав,/ израильтянин вопияше:/ Изба́вителю и Богу нашему поим. Припев: Святи́телие Моско́встии, моли́те Бо́га о на́с. Многими содержи́ми напа́стьми,/ к вам прибегаем спасение получити,/ о велиции святителие, Петре, Алексие, Ионо, Филиппе и Ермогене!/ От лютыя ну́жды и бед спасите нас. Припев: Святи́телие Моско́встии, моли́те Бо́га о на́с. Страсте́й прило́зи/ и многия печали и беды́ погубляют мою душу;/ умири́те, святии святителие, к Богу вашими молитвами,/ и от печали на веселие преложи́те. Сла́ва Отцу́ и Сы́ну и Свято́му Ду́ху. Спаса Христа моли́те, вели́ции чудотворцы и избра́ннии,/ Петре, Алексие, Ионо, Филиппе и Ермогене,/ избавитися нам от бед и скорбей/ и варварскаго нахождения вашими молитвами. И ны́не и при́сно и во ве́ки веко́в. Ами́нь. Богородичен: В скорби ны и болезни суща,/ посещения Божественнаго и промышления/ еже от Тебе сподоби, о Богомати, Владычице. Песнь 3 Ирмос: Небеснаго кру́га Верхотво́рче, Господи,/ и Церкве Зижди́телю,/ Ты мене́ утверди́ в любви Тво́ей,/ желаний краю,/ верных утверждение,/ Едине Человеколюбче. Припев: Святи́телие Моско́встии, моли́те Бо́га о на́с. Заступницы и покрови́телие граду Москве вы есте́ по Бо́зе,/ Божии угодницы,/ направите нас на приста́нище спасения:/ вы бо есте́ верным ограждение. Припев: Святи́телие Моско́встии, моли́те Бо́га о на́с. Молим вас, святии чудотворцы, Петре, Алексие, Ионо, Филиппе и Ермогене,/ душевное смущение и печали бурю разорите нам/ и тишину подати/ к Богу вашими молитвами. Сла́ва Отцу́ и Сы́ну и Свято́му Ду́ху. Благоро́днейшии и благим подража́телие бывше,/ от Бога чудесы́ обогатившеся,/ всем помога́йте, молящеся Богу,/ вас прославляющему, Своя угодники. И ны́не и при́сно и во ве́ки веко́в. Ами́нь. Богородичен: Лютыми неду́ги/ и болезненными тяжкими варварскими нахо́ды истязаемым,/ Дево Богородице, Ты нам помози/ и печаль на радость преложи́. Седален, глас 4 Простри́те ваша длани, святии отцы, ко всех Владыце,/ и́миже до́бре потруди́стеся, и Богу угоди́сте,/ и требующим неоску́дно пода́ете,/ и устно́ ваша на молитву отве́рзите,/ и́миже Бога славосло́висте,/ и люди на Богоразумие наста́висте,/ ускори́те убо на помощь нашу,/ и от находя́щих на нас бед и зол/ и всякия нужды избавите нас вашими молитвами к Богу. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Дево Всенепорочная,/ Яже Пресу́щнаго Бога рождшая,/ со святители Того непрестанно моли,/ оставление прегреше́ний/ и исправление жития дати нам прежде конца,/ верою и любовию поющим Тя по долгу,/ Едина Всепетая. Песнь 4 Ирмос: Услы́шах, Господи,/ смотрения Твоего та́инство,/ разуме́х дела Твоя/ и просла́вих Твое Божество. Припев: Святи́телие Моско́встии, моли́те Бо́га о на́с. Страстей моих смущение/ и многих бед нахождения бурю утиши́ти/ моли́теся, святии отцы, к Богу вашими молитвами. Припев: Святи́телие Моско́встии, моли́те Бо́га о на́с. Милосердия бездну простри́те нам, святии отцы,/ призывающим вас на помощь,/ яко Милосе́рдаго Бога и́мате, послушающа ваших молитв. Сла́ва Отцу́ и Сы́ну и Свято́му Ду́ху. Надежду имуще вас, святии отцы,/ Петре, Алексие, Ионо, Филиппе и Ермогене,/ и яко сте́ну недви́жиму к Богу ваша молитвы,/ зол и всех бед избавляемся. И ны́не и при́сно и во ве́ки веко́в. Ами́нь. Богородичен: Исцели, Чистая, душевныя наша немощи и страсти телесныя,/ поспеши, Госпоже́, здравие подати молитвами Твоими. Песнь 5 Ирмос: Просвети́ нас повеле́нии Твоими, Господи,/ и мы́шцею Твоею высо́кою/ Твой мир пода́ждь нам,/ Человеколюбче. Припев: Святи́телие Моско́встии, моли́те Бо́га о на́с. Испо́лните, святии отцы, веселия живот наш,/ избавляюще нас варварскаго нахождения и междоусобныя брани. Припев: Святи́телие Моско́встии, моли́те Бо́га о на́с. Избавите нас от бед, святии чудотворцы,/ яко предста́телие теплии и молитвенницы о душах наших. Сла́ва Отцу́ и Сы́ну и Свято́му Ду́ху. Разруши́те мглу прегрешений моих и безместных деяний/ вашими к Богу молитвами. И ны́не и при́сно и во ве́ки веко́в. Ами́нь. Богородичен: Яко сте́ну нерушиму и пристанище стяжахом,/ и душа́м Тя совершенное спасение,/ и простра́нство в ско́рбех, о Владычице,/ ныне нас от страстей и бед спаси. Песнь 6 Ирмос: Моли́тву пролию́ ко Господу/ и Тому́ возвещу́ печа́ли моя,/ яко зол душа́ моя испо́лнися,/ и живо́т мой аду прибли́жися,/ и молю́ся, яко Ио́на:/ от тли, Боже, возведи́ мя. Припев: Святи́телие Моско́встии, моли́те Бо́га о на́с. Смерти и тли, и варварскаго пленения изба́вите,/ и огненнаго запале́ния свой град сохрани́те/ к Богу вашими молитвами. Припев: Святи́телие Моско́встии, моли́те Бо́га о на́с. Заступники вас ве́мы и твердыя хранители граду нашему,/ святителие Господни,/ тем к вам прибегающе, милость приемлем и бед избавляемся. Сла́ва Отцу́ и Сы́ну и Свято́му Ду́ху. Яко сте́ну и пристанище стяжа́хом вас, святии чудотворцы,/ пространство в ско́рбех/ подтверждение и спасение душам нашим. И ны́не и при́сно и во ве́ки веко́в. Ами́нь. Богородичен: Заступницу Тя живота вем и Хранительницу тверду, Дево,/ напастей решащу молвы и налоги бесов отгоняющу/ и молюся всегда страстей мя избавити, Всенепорочная. Кондак, глас 3 Во святителех благоче́стно пожи́сте/ и люди к Богоразумию наста́висте, и до́бре Богу угоди́сте,/ сего ради от Него нетлением и чудесы прославистеся,/ яко ученицы́ Божия благодати. Икос Первозва́ннаго наме́стницы и Российстии первопрестольницы,/ велиции светильницы, Петре, Алексие, Ионо, Филиппе и Ермогене,/ Троице поборницы, православию наставницы,/ в мире благочестно пожи́сте и учением своим вселенную просветисте,/ сего ради Царствию Небесному наследницы бы́сте, нетлением и чудесы́ прославистеся, яко ученицы́ Божия благодати. Песнь 7 Ирмос: От Иуде́и доше́дше о́троцы,/ в Вавило́не иногда́/ верою Тро́ическою пламень пе́щный попра́ша, пою́ще:/ отцев Боже, благословен еси. Припев: Святи́телие Моско́встии, моли́те Бо́га о на́с. Наше спасение, якоже восхотел еси, Спа́се, устроити,/ прославляеши Твоя угодники чудесы́, вопиющия Ти:/ отец наших Боже, благословен еси. Припев: Святи́телие Моско́встии, моли́те Бо́га о на́с. Воли́теля милости, егоже роди́ Мати,/ моли́те, святии Христовы святителие, Петре, Алексие, Ионо, Филиппе и Ермогене,/ избавити нас от прегрешений, и бед, и зол, зовущих:/ отец наших Боже, благословен еси. Сла́ва Отцу́ и Сы́ну и Свято́му Ду́ху. Сокровище спасения и источник исцеления,/ наставницы покаяния вы есте́, Божии уго́дницы, вопиющим:/ отец наших Боже, благословен еси. И ны́не и при́сно и во ве́ки веко́в. Ами́нь. Богородичен: Сокровище спасения, и источник нетления,/ Тебе рождшую/ и столп утверждения, и дверь покаяния вопиющим показа:/ отец наших Боже, благословен еси. Песнь 8 Ирмос: Царя Небе́снаго,/ Его́же поют во́й Ангельстии,/ хвали́те и превозноси́те во вся веки. Припев: Святи́телие Моско́встии, моли́те Бо́га о на́с. Помощи вашея требующия не пре́зрите, святии отцы и наставницы Православия,/ поющия и превозносящия Христа во веки. Припев: Святи́телие Моско́встии, моли́те Бо́га о на́с. Неможение душ наших исцеля́ете и от телесных болезней возставляете/ вопиющих и превозносящих Христа во веки. Сла́ва Отцу́ и Сы́ну и Свято́му Ду́ху. Исцелений богатство источаете к вам притекающим, Божиим угодником,/ и верно поющим, и превозносящим Христа во веки. И ны́не и при́сно и во ве́ки веко́в. Ами́нь. Богородичен: Напа́стныя Ты прило́ги отгоняеши и страстныя находы, Дево,/ яко да Тя поем и превозносим Чистую во веки. Песнь 9 Ирмос: Вои́стинну Богородицу/ Тя испове́дуем,/ спасе́ннии Тобою, Дево Чистая,/ с Беспло́тными ли́ки Тя величающе. Припев: Святи́телие Моско́встии, моли́те Бо́га о на́с. Точе́ния слез не пре́зрите, молим вас, святии отцы,/ Петре, Алексие, Ионо, Филиппе и Ермогене,/ и всем утешение подати, блажа́щим вас. Припев: Святи́телие Моско́встии, моли́те Бо́га о на́с. Радости сердца́ наша испо́лните вашими к Богу молитвами,/ святии отцы и заступницы те́плии. Сла́ва Отцу́ и Сы́ну и Свято́му Ду́ху. Светильницы пресветлии, Троицы побо́рницы,/ Петре, Алексие, Ионо, Филиппе и Ермогене,/ труды́ и подвиги вашими мрак неведения отгоняшеся, благоверно вас ублажающих. И ны́не и при́сно и во ве́ки веко́в. Ами́нь. Богородичен: Света Твоего заря́ми просвети, Дево,/ мрак неведения отгоняющи и лютых бед спасающи,/ иже благоверно Богородицу Тя исповедающих. Светилен Светоза́рныя светильники паче солнечных луч/ от Светонача́льныя Троицы и Трисо́лнечныя Еди́ницы паче естества сме́шены,/ Богоно́сныя восхвалим отцы. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Тебе песньми немо́лчными ублажаем, Дево,/ Яже от Троицы Единаго во чреве прие́мши, Богородице,/ Божественными руками Пресу́щное Слово носи́вши,/ непреложно и неизменно.

Минея, 9 Июля, Кано́н Глас 1 Песнь 1 Ирмос: Песнь побе́дную пои́м вси Бо́гу,/ сотво́ршему ди́вная чудеса́ мы́шцею высо́кою/ и спа́сшему Изра́иля,/ я́ко просла́вися. Припев: Священному́чениче Панкрáтие, моли́ Бо́га о на́с. Пречестны́й ка́мень тя Це́рковь познава́ет, Панкра́тие,/ водруже́нием слове́с твои́х утвержда́ема при́сно,/ и сего́ ра́ди твою́ почита́ем па́мять днесь. Припев: Священному́чениче Панкрáтие, моли́ Бо́га о на́с. Обнови́л еси́ ра́лом твои́х Боже́ственных слове́с сердца́, Панкра́тие,/ олядене́вшая пе́рвее злове́рия мгло́ю,/ плодоно́сна показа́л еси́ я́ве ве́ры ра́ди. Сла́ва Отцу́ и Сы́ну и Свято́му Ду́ху. Еди́ницу тричи́сленную, соединя́ему в то́жде естество́, возвеща́я,/ погаси́л еси́ безбо́жия мглу и светолу́чными уче́нии лю́ди просвети́л еси́. И ны́не и при́сно и во ве́ки веко́в. Ами́нь. Богородичен: Из Тебе́ возсия́ Светода́вец, просвеща́я концы́,/ Иису́с Госпо́дь, Чи́стая Влады́чице,/ И́мже и́же во тьме и се́ни свет ви́деша. Песнь 3 Ирмос: Да утверди́тся се́рдце мое́ в во́ли Твое́й, Христе́ Бо́же,/ И́же над вода́ми не́бо утвержде́й второ́е/ и основа́вый на вода́х зе́млю, Всеси́льне. Припев: Священному́чениче Панкрáтие, моли́ Бо́га о на́с. Ду́хом утвержда́емь, лука́выя отгна́л еси́ ду́хи/ и трудо́м моли́тв хра́мы разори́л еси и́дольския,/ це́ркви возставля́я, досточу́дне. Припев: Священному́чениче Панкрáтие, моли́ Бо́га о на́с. Сечи́тельным сло́вом твои́м посе́кл еси́ злоче́стия, преподо́бне, те́рние/ и насади́л еси́ душа́м спаси́тельная уче́ния доброде́телей,/ оби́лующа плодо́в, свяще́нне. Сла́ва Отцу́ и Сы́ну и Свято́му Ду́ху. Сосу́д обре́т тя, Боже́ственнаго Ду́ха чи́стыя зари́ прие́млюща, верхо́вный учени́к,/ к за́паду посла́ безбо́жия изгна́ти мглу, всече́стне. И ны́не и при́сно и во ве́ки веко́в. Ами́нь. Богородичен: Тя, о́блак всесве́тел, ковче́г и ста́мну всезла́ту, простра́ннейшу небе́с,/ и превознесе́нную ле́ствицу, Неискусобра́чная Де́во,/ ве́рнии, ублажа́ем. Седален, глас 4 Благоче́стия побо́рник, победоно́сец, свяще́нне Панкра́тие, показа́вся,/ на Небесе́х со Безпло́тными ны́не предстои́ши Го́сподеви,/ моли́ спасти́ся нам. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Те́плое заступле́ние су́щим в беда́х, и Помо́щницу на́шу,/ и к Бо́гу премене́ние, Е́юже тли изба́вихомся,/ Богоро́дицу, ве́рнии, ублажа́ем. Песнь 4 Ирмос: Ду́хом прови́дя, проро́че Авваку́ме, Словесе́ воплоще́ние,/ пропове́дал еси́, вопия́:/ внегда́ прибли́житися ле́том, позна́ешися,/ внегда́ приити́ вре́мени, пока́жешися./ Сла́ва си́ле Твое́й, Го́споди. Припев: Священному́чениче Панкрáтие, моли́ Бо́га о на́с. Огне́м Уте́шителя огнедохнове́нен я́влься, лесть попали́л еси́, Панкра́тие му́дре,/ и, возсия́в, я́ко све́щник, в мо́ри потопля́емым неве́дения,/ ко приста́нищем Боже́ственныя вво́диши во́ли. Припев: Священному́чениче Панкрáтие, моли́ Бо́га о на́с. От Ка́мене некраесеко́ма Петр напои́вся и насы́щся,/ я́ко и́ну тя посыла́ет реку́, олядене́вшия напои́ти ду́ши, Богому́дре,/ и нече́стия ре́ки изсуши́ти тече́нием Боже́ственнаго пропове́дания. Припев: Священному́чениче Панкрáтие, моли́ Бо́га о на́с. Глаго́л тво́их веща́ние излия́ся, му́дре, сия́нием просвеща́емь ра́зума Христо́ва./ Те́мже и е́ллинская му́дрость обуи́ся, и зло́бы мудре́ц сожже́ся,/ му́чениче святи́телю Панкра́тие. Сла́ва Отцу́ и Сы́ну и Свято́му Ду́ху. Житие́ твое́, Боже́ственными блиста́яся добро́тами,/ вся омрачи́ де́монская стремле́ния и, разори́в тьму безбо́жия,/ сы́ны дне показа́, любо́вию твои́м уче́нием покори́вшияся. И ны́не и при́сно и во ве́ки веко́в. Ами́нь. Богородичен: Воплоща́ема Сло́ва во двою́ существу́, Отрокови́це, и хоте́нии,/ родила́ еси́, Чи́стая,/ восхо́ды сказа́вшаго пресла́вно спасе́ния ле́стию порабоще́нным,/ Чи́стая Де́во Всепе́тая. Песнь 5 Ирмос: Твой мир даждь нам,/ Сы́не Бо́жий:/ ино́го бо, ра́зве Тебе́, бо́га не зна́ем,/ и́мя Твое́ имену́ем,/ я́ко Бог живы́х и ме́ртвых еси́. Припев: Священному́чениче Панкрáтие, моли́ Бо́га о на́с. Чуде́с показа́нии улови́л еси́ лю́ди,/ сло́вом же тре́бища разори́л еси́/ и созда́л еси́, свяще́нне, церкве́й добро́ты во обновле́ние челове́ком. Припев: Священному́чениче Панкрáтие, моли́ Бо́га о на́с. Кровьми́ обагри́л еси́ оде́жду свяще́нную,/ кровь же де́монскую изсуши́л еси́/ и победоно́сец возше́л еси к Небеси́, побе́ды прии́м вене́ц. Сла́ва Отцу́ и Сы́ну и Свято́му Ду́ху. Разсе́деся пред лице́м твои́м храм и́дольский, дверь же отве́рзеся язы́ком,/ и даде́ся благода́ть Боже́ственная ве́рных в сердца́,/ священнотаи́нниче о́тче. И ны́не и при́сно и во ве́ки веко́в. Ами́нь. Богородичен: Я́ко дождь, во утро́бу Твою́ сни́де Христо́с, Чи́стая,/ и ту́чи изсуши́ многобо́жия, и изведе́ Богоразу́мия во́ду/ су́щим в пла́мени ле́стнем. Песнь 6 Ирмос: Проро́ка Ио́ну подража́я, вопию́:/ живо́т мой, Бла́же, свободи́ из тли/ и спаси́ мя, Спа́се ми́ра, зову́ща: сла́ва Тебе́. Припев: Священному́чениче Панкрáтие, моли́ Бо́га о на́с. Облагодати́в твой ум и просвети́в бога́тно,/ Иису́с, просвеще́ние всех и Бог,/ сло́вом твои́м безслове́сия лю́ди изба́ви. Припев: Священному́чениче Панкрáтие, моли́ Бо́га о на́с. Священноде́йствовав Бо́жие Ева́нгелие, му́дре,/ Боже́ственная уче́ния запеча́тствовал еси́ све́тло кро́вию,/ священнотаи́нниче му́чениче Панкра́тие. Сла́ва Отцу́ и Сы́ну и Свято́му Ду́ху. Кропле́ний и́дольских и крове́й скве́рных изба́вил еси́ лю́ди/ и, поже́рся, я́коже а́гнец, Панкра́тие,/ же́ртва жива́ Бо́гу прине́слся еси́. И ны́не и при́сно и во ве́ки веко́в. Ами́нь. Богородичен: Соуда́влена прило́ги непло́дных помы́шле́ний,/ возведи́ к све́ту спасе́ния и жи́зни, Всенепоро́чная,/ Я́же Спа́са Христа́ ро́ждшая. Кондак, глас 4 Све́тлая тавромени́ом, Панкра́тие, звезда́ показа́лся еси́/ и священнострада́лец яви́лся еси́ за Христа́,/ Ему́же ны́не предстоя́, моли́ за чту́щия тя, блаже́нне. Песнь 7 Ирмос: Су́щим в пещи́ отроко́м Твои́м, Спа́се,/ не прикосну́ся, ниже́ стужи́ огнь./ Тогда́ трие́, я́ко еди́неми усты́, поя́ху/ и благословля́ху, глаго́люще:/ благослове́н Бог оте́ц на́ших. Припев: Священному́чениче Панкрáтие, моли́ Бо́га о на́с. Кро́вию крести́лся еси́ твое́ю, Панкра́тие,/ пе́рвее в воде́ крести́в лю́ди,/ и ко Христу́ преше́л еси́, ра́дуяся;/ с ни́миже водворя́яся, прича́стием обожа́ешися све́тло при́сно, преблаже́нне. Припев: Священному́чениче Панкрáтие, моли́ Бо́га о на́с. Сла́ностию погруже́нныя лю́тых у́дицею твои́х слове́с возве́л еси́, свяще́нне,/ и моли́тв чи́стым одожде́нием му́тную изсуши́л еси́ злове́рия глубину́,/ священнотаи́нниче Христо́в. Сла́ва Отцу́ и Сы́ну и Свято́му Ду́ху. Ка́мень тя вои́стинну неразсе́дный основа́ние положи́/ и степе́нь недви́жим, свяще́нныя священнояви́тель Це́ркве,/ в не́йже сокруша́ется вся́ка зло́ба, му́дре, младе́нствующаго врага́. И ны́не и при́сно и во ве́ки веко́в. Ами́нь. Богородичен: Чисте́йшу еди́ну Тя обре́т, Всенепоро́чная, Сло́во, Пречи́стая, Бо́жие,/ из Твоего́ чре́ва поро́ждся, ве́рныя очища́ет скве́рны, Богоневе́сто,/ прибы́вшия нам от невоздержа́ния зол. Песнь 8 Ирмос: Его́же ужаса́ются А́нгели и вся во́инства,/ я́ко Творца́ и Го́спода,/ по́йте, свяще́нницы, просла́вите, о́троцы,/ благослови́те, лю́дие,/ и превозноси́те во вся ве́ки. Припев: Священному́чениче Панкрáтие, моли́ Бо́га о на́с. Огне́м изнуря́емь разли́чных искуше́ний, невреди́м пребы́л еси́/ и, изостри́в ум све́тлыми виде́нии, яви́лся еси́, му́дре, меч,/ посека́я вещь многобо́жия. Припев: Священному́чениче Панкрáтие, моли́ Бо́га о на́с. Лю́ди приводя́ в ра́зум Христо́в, зна́мения и чудеса́ твори́л еси́ яве́,/ предглаго́ля хотя́щая бы́ти, я́ко проро́к Бо́жий,/ Уте́шителя, Богому́дре, дохнове́ньми. Сла́ва Отцу́ и Сы́ну и Свято́му Ду́ху. Образ Зижди́теля показу́я лю́дем, Его́же волею поне́сл есть, соединя́яся нам,/ зна́мения и си́лы тем сотворя́еши, многобо́жия де́рзость отгоня́. И ны́не и при́сно и во ве́ки веко́в. Ами́нь. Богородичен: Я́ко дождь, во утро́бу Твою́ сни́де Христо́с/ и всю напои́ тварь, вои́стинну, изсуши́в, Де́во, му́тныя ре́ки идолонеи́стовства,/ еди́ный Благоде́тель. Песнь 9 Ирмос: Живоприе́мный исто́чник приснотеку́щий,/ светоно́сный свети́льник благода́ти,/ храм одушевле́нный, сень пречи́стую,/ Небесе́ и земли́ простра́ннейшую,/ Богоро́дицу, ве́рнии, велича́ем. Припев: Священному́чениче Панкрáтие, моли́ Бо́га о на́с. Светолу́чными Петра́ сия́нии просве́щся душе́ю и мы́слию,/ я́ко звезда́ многосве́тлая, к за́паду дости́гл еси́,/ просвеща́я уче́нии заше́дшия в неве́дения, Панкра́тие, глубину́. Припев: Священному́чениче Панкрáтие, моли́ Бо́га о на́с. Ико́нную честь преходя́щу в первообра́зную ты ве́дый,/ всю́ду честну́ю поставля́л еси́, сла́вне, Иису́са и Бо́га на́шего ико́ну/ ка́пищем де́монским на потребле́ние. Сла́ва Отцу́ и Сы́ну и Свято́му Ду́ху. Светоно́сное твое́ сие́ торжество́/ град и собо́р сотворя́ет, ра́дуяся, чу́дный Панкра́тие, тя ве́рно почита́юще./ И́хже благослови́ти я́ко пастырь не преста́й, о всех моли́тву творя́. И ны́не и при́сно и во ве́ки веко́в. Ами́нь. Богородичен: Пощади́ нас, пою́щия Тя, Го́споди, от Де́вы несказа́нно рожде́йся,/ напа́стей избавля́я, и страсте́й, и скорбе́й Твоя́ рабы́ моли́твами Ея́,/ я́ко Благоде́тель и еди́н Человеколю́бец.

Творение Феофаново Минея, 15 Февраля, Кано́н, его́же краегране́сие: Страсте́й мя, раба́ су́ща, изба́ви, блаже́нне. Феофа́н. Глас 6 Песнь 1 Ирмос: Я́ко по су́ху, пешеше́ствовав Изра́иль,/ по бе́здне стопа́ми,/ гони́теля фарао́на/ ви́дя потопля́ема,/ Бо́гу, побе́дную песнь пои́м, вопия́ше. Припев: Святы́й апо́столе Они́симе, моли́ Бо́га о на́с. Просвеще́н Боже́ственною и светоза́рною Спа́са благода́тию,/ омраче́нную ду́шу мою́, моля́, Они́симе, Христа́ Человеколю́бца Бо́га,/ блаже́нне, просвети́. Припев: Святы́й апо́столе Они́симе, моли́ Бо́га о на́с. Светосия́нными Па́вла озари́вся луча́ми, сла́вне,/ неве́дения мглы удо́бь избегл еси́,/ Христу́ благода́рственную песнь вопия́, всеблаже́нне. Сла́ва Отцу́ и Сы́ну и Свято́му Ду́ху. Боже́ствен показа́лся еси́, преблаже́нне, священноде́йственник/ и, Боже́ственным Ду́хом сия́я светло́, всю́ду проте́кл еси́,/ Христа́ возвеща́я благоче́стно, Богоблаже́нне. И ны́не и при́сно и во ве́ки веко́в. Ами́нь. Богородичен: Укра́шена доброто́ю доброде́телей, Богома́ти Чи́стая,/ Бо́га и́стиннаго па́че ума́ зачала́ еси́,/ нас Боже́ственными доброде́тельми уясни́вшаго. Песнь 3 Ирмос: Несть свят,/ я́коже Ты, Го́споди Бо́же мой,/ вознесый рог ве́рных Твои́х, Блаже,/ и утверди́вый нас на ка́мени/ испове́дания Твоего́. Припев: Святы́й апо́столе Они́симе, моли́ Бо́га о на́с. Вод Боже́ственных исто́чнику прибли́жил еси́ уста́ и, сла́дости пото́к от него́ прие́м,/ лице́ честныя Це́ркве, славне, напои́л еси́. Припев: Святы́й апо́столе Они́симе, моли́ Бо́га о на́с. Прича́стием сия́ния мысленнаго светле́йший яви́лся еси́,/ благоче́стия свещами сердца́ ве́рных просвеща́я светло́/ и светоно́сною заре́ю про́поведи́. Сла́ва Отцу́ и Сы́ну и Свято́му Ду́ху. Разреши́лся еси́ Павловыми у́зами от рабо́тныя ле́сти/ и свобо́дою благода́ти почти́лся еси́,/ сын Бо́жий быв и насле́дник Божествен показа́лся еси́. И ны́не и при́сно и во ве́ки веко́в. Ами́нь. Богородичен: Ле́стно змий мя пе́рвее, я́ко пле́нника, взят, ле́стию плени́в;/ Тобо́ю же рабо́ты его́ изме́нься, Богома́ти,/ пе́сньми ублажа́ю Тя. Седален, глас 4 Вре́менныя, Они́симе, отреши́вся и́стинно работы,/ был еси́ раб Христа́ Бо́га/ и сосу́д благопотре́бен;/ те́мже порабоще́ныя враго́м свобо́дны пока́зал еси́ Боже́ственным сло́вом/ и Небе́сныя гра́жданы сотвори́в./ С ни́миже свяще́нную твою́ па́мять ве́рно сла́вим. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Обнови́ла еси́, Чи́стая, Боже́ственным Рождество́м Твои́м,/ истле́вшее во страсте́х земноро́дных ме́ртвенное существо́/ и воздви́гла еси́ вся от сме́рти к Животу́ нетле́ния./ Темже Тя по до́лгу блажи́м вси,/ Де́во препросла́вленная, я́коже прорекла́ еси́. Песнь 4 Ирмос: Христо́с моя́ си́ла/ Бог и Госпо́дь,/ честна́я Це́рковь/ Боголе́пно пое́т, взыва́ющи,/ от смы́сла чи́ста о Го́споде пра́зднующи. Припев: Святы́й апо́столе Они́симе, моли́ Бо́га о на́с. Хотя́й вся спасти́ Госпо́дь/ от и́га тя рабо́ты священноде́йственника, блаже́нне, поставля́ет,/ священноде́йствующа честно́е, Богоявле́нне, Ева́нгелие. Припев: Святы́й апо́столе Они́симе, моли́ Бо́га о на́с. Сын ты был еси́ Бо́жий благода́тию,/ Того́ возвеща́я Единоро́дное Сло́во Присносу́щное,/ с плотию су́щим на земли́ пресла́вно прибли́жшася. Сла́ва Отцу́ и Сы́ну и Свято́му Ду́ху. Сло́вом суда́ и Боже́ственным пома́занием свяще́нства,/ я́ко святи́тель, всему́дре, пожи́л еси́,/ и терпе́нием лю́тых Божествен му́ченик был еси́. И ны́не и при́сно и во ве́ки веко́в. Ами́нь. Богородичен: Естество́м Безнача́льный Сын и Безле́тный/ вре́менное от Де́вы Отрокови́цы начало во́льно прие́млет,/ сущия под ле́том от тли обнови́ти промышля́я. Песнь 5 Ирмос: Бо́жиим све́том Твои́м, Бла́же,/ у́тренюющих Ти ду́ши любо́вию озари́, молю́ся,/ Тя ве́дети, Сло́ве Бо́жий,/ и́стиннаго Бо́га,/ от мра́ка грехо́внаго взыва́юща. Припев: Святы́й апо́столе Они́симе, моли́ Бо́га о на́с. Ума́ острото́ю и души́, блаже́нне, чистото́ю, вра́жия прелете́в се́ти,/ возвы́сился еси́ к Небе́сным селе́нием,/ криле́ Богоразумия прие́м. Припев: Святы́й апо́столе Они́симе, моли́ Бо́га о на́с. Твой апо́стол, Блаже, плотско́е Твое́ к челове́ком прише́ствие пропове́да,/ заблу́ждшия к позна́нию наставля́я и просвеща́я заре́ю ве́ры. Сла́ва Отцу́ и Сы́ну и Свято́му Ду́ху. Храм яви́лся еси́ всеблаголе́пен,/ внутрь име́я, я́ко све́щник, сия́ние Боже́ственныя благода́ти,/ зда́нием Боже́ственнаго Ду́ха основа́н,/ блаже́нне Они́симе. И ны́не и при́сно и во ве́ки веко́в. Ами́нь. Богородичен: Греха́ моего́ плени́цы Твои́м хода́тайством и предста́тельством, Де́во, расто́ргни:/ Ты бо отча́янных еси́ наде́жда,/ ве́рою притека́ющих в Боже́ственный кров Твой. Песнь 6 Ирмос: Жите́йское мо́ре,/ воздвиза́емое зря/ напа́стей бу́рею,/ к ти́хому приста́нищу Твоему́ прите́к, вопию́ Ти:/ возведи́ от тли живо́т мой,/ Многоми́лостиве. Припев: Святы́й апо́столе Они́симе, моли́ Бо́га о на́с. Облиста́в, я́ко со́лнце, с Небесе́ зва́нный/ просвеще́нием благода́ти оста́ви тебе́ зарю́,/ издале́ча благомо́щно отгоня́щу неве́дения мрак, всеблаже́нне. Сла́ва Отцу́ и Сы́ну и Свято́му Ду́ху. Светло́ обличи́л еси́ беззако́нных гнила́я и злочести́вая шата́ния,/ благоче́стия веща́я вои́стинну Боже́ственная уче́ния,/ святи́телю Госпо́день всече́стне. И ны́не и при́сно и во ве́ки веко́в. Ами́нь. Богородичен: Сый пови́нен грехо́м и лю́те уя́звлен, окая́нный,/ к Тебе́, Богома́ти, ми́лостивей прибега́ю, моля́ся/ стру́пы очи́стити прегреше́ний мои́х. Кондак, глас 4 Я́ко луча́, возси́ял еси́ вселе́нней,/ заря́ми сия́я со́лнца, блаже́нне,/ всесве́тлаго Па́вла, мир просвети́вшаго:/ те́мже тя почита́ем, Они́симе сла́вне. Песнь 7 Ирмос: Росода́тельну у́бо пещь/ соде́ла А́нгел/ преподо́бным отроко́м,/ халде́и же опаля́ющее/ веле́ние Бо́жие мучи́теля увеща́ вопи́ти:/ благослове́н еси́, Бо́же оте́ц на́ших. Припев: Святы́й апо́столе Они́симе, моли́ Бо́га о на́с. Блаже́нную прия́л еси́, Они́симе, кончи́ну/ и неги́блемое безсме́ртие наде́ждею, блаже́нне, чи́стою/ и пое́ши, ра́дуяся, Христу́:/ благослове́н еси́, Бо́же оте́ц на́ших. Сла́ва Отцу́ и Сы́ну и Свято́му Ду́ху. Тве́рдым твои́м мудрова́нием, Они́симе, пре́лести кова́рства попра́л еси́,/ благоче́стия сия́ низложи́в ору́диями, Богому́дре, вопия́:/ благослове́н еси́, Бо́же оте́ц на́ших. И ны́не и при́сно и во ве́ки веко́в. Ами́нь. Богородичен: Я́ко су́щи Всенепоро́чная, Богоневе́сто, Сло́во Бо́жие зачала́ еси́,/ неразлу́чно в не́дрех Отца́ Су́ща,/ рука́ми же держи́мо Твои́ми,/ благослове́нна Богома́ти Неискусобра́чная. Песнь 8 Ирмос: Из пла́мене преподо́бным росу́ источи́л еси́/ и пра́веднаго же́ртву водо́ю попали́л еси́:/ вся бо твори́ши, Христе́, то́кмо е́же хоте́ти./ Тя превозно́сим во вся ве́ки. Припев: Святы́й апо́столе Они́симе, моли́ Бо́га о на́с. Со А́нгелы лику́я, блаже́нне Они́симе,/ муче́ния венце́м украша́емь, престо́лу же светло́ Влады́чню предстои́ши:/ Его́же превозно́сим во вся ве́ки. Припев: Святы́й апо́столе Они́симе, моли́ Бо́га о на́с. Апо́столу Бо́жию служа́, Боже́ственне Они́симе,/ неизрече́нных чуде́с име́л еси́ де́йство,/ пропове́дник и́стинен Христо́в, блаже́нне, быв:/ Его́же превозно́сим во вся ве́ки. Сла́ва Отцу́ и Сы́ну и Свято́му Ду́ху. Исцеле́ний благода́тию от незави́стна исто́чника Спа́сова обогати́вся, всем препода́л еси́,/ Сего́ повину́яся, блаже́нне, Боже́ственным веле́нием:/ Его́же превозно́сим во вся ве́ки. И ны́не и при́сно и во ве́ки веко́в. Ами́нь. Богородичен: Научи́вшеся чудеси́ Твоего́ Рождества,/ воспева́ем я́ко Боже́ственно па́че смы́сла,/ Всесвята́я, Чи́стая, Богома́ти Пренепоро́чная, та́инство,/ Тя превозноша́юще во вся ве́ки. Песнь 9 Ирмос: Бо́га/ челове́ком невозмо́жно ви́дети,/на Него́же не сме́ют чини́ Ангельстии взира́ти;/ Тобо́ю же, Всечи́стая, яви́ся челове́ком/ Сло́во воплоще́нно,/ Его́же велича́юще,/ с Небе́сными во́и Тя ублажа́ем. Припев: Святы́й апо́столе Они́симе, моли́ Бо́га о на́с. Свети́льник пресве́тел показа́лся еси́, све́тлыми заря́ми сия́я духо́вными,/ мирски́я концы́ освеща́я све́том Богоразу́мия, блаже́нне Они́симе./ Те́мже со апо́стольскими ли́ки тя велича́ем. Припев: Святы́й апо́столе Они́симе, моли́ Бо́га о на́с. Плоды́ духо́вными ты укра́шен, на Небеса́ взя́лся еси́, Богоявле́нне, ра́дуяся,/ Христо́в апо́стол яви́лся еси́ че́стен,/ прему́др святи́тель, му́ченик непобеди́мь, пропове́дник и́стинен/ су́щих па́че ума́, Богобла́женне. Сла́ва Отцу́ и Сы́ну и Свято́му Ду́ху. При́сно предста́ни пою́щим тя всегда́ и твое́ восхваля́ющим торжество́,/ Влады́це предстоя́, Они́симе,/ весь просвеще́н, весь пресве́тел,/ весь отону́дными блиста́яся светлостьми́. И ны́не и при́сно и во ве́ки веко́в. Ами́нь. Богородичен: Изба́влен быв Рождество́м Твои́м, Неискусобра́чная Ма́ти Бо́жия,/ дре́вняго ко́жнаго умерщвле́ния, и кля́твы, и тли, и сме́рти,/ ю́же от греха́ оттря́с, с Небе́сными во́и при́сно сла́влю Тя.

Минея, 19 Января, Канон Глас 4 Песнь 1 Ирмос: Отве́рзу уста́ моя́, и напо́лнятся Ду́ха, и сло́во отры́гну Цари́це Ма́тери, и явлю́ся, све́тло торжеству́я, и воспою́, ра́дуяся, Тоя́ чудеса́. Припев: Святи́телю о́тче Ма́рко, моли́ Бо́га о на́с. Земна́го исхити́ и веще́ственнаго пристра́стия мо́й у́м, содержа́щая не́бо и зе́млю Ипоста́сная Бо́га Отца́ Му́дросте, и сло́во ми́ да́руй, венча́ющему служи́теля твоего́. Припев: Святи́телю о́тче Ма́рко, моли́ Бо́га о на́с. Благода́ть слове́с, сладча́йших ме́да, богодухнове́нно объе́мши свяще́нную твою́ ду́шу, соверши́ наслажде́ние стра́нное, о́бщее ве́рным услажде́ние, бра́шно спаси́тельное. Припев: Святи́телю о́тче Ма́рко, моли́ Бо́га о на́с. Яко вели́кое жи́зни свети́ло мировожделе́нное, возсия́л еси́ от восто́ка, и восте́кл еси́, я́ко исполи́н держа́внейший, и просвети́л еси́ концы́ ми́ра луча́ми слове́с твои́х, Ма́рко боже́ственне. Сла́ва Отцу́ и Сы́ну и Свято́му Ду́ху. Уста́ благода́ти бы́ша богоглаго́ливии устне́ твои́ и гла́с медото́чный, язы́к же свяще́нный тво́й, я́ко тро́сть писца́, показа́ся, му́дрость соста́ви, благода́ть излия́. И ны́не и при́сно и во ве́ки веко́в. Ами́нь. Богородичен: Ум небе́сный, чи́стую и возвы́шенную ду́шу, и помышле́ний и та́инственных Писа́ний открове́ние, преде́л прему́дрости, ли́к умо́в прия́т с Ма́терию Бо́жиею. Песнь 3 Ирмос: Твоя́ песносло́вцы, Богоро́дице, живы́й и незави́стный Исто́чниче, ли́к Себе́ совоку́пльшия, духо́вно утверди́, в боже́ственней Твое́й сла́ве, венце́в сла́вы сподо́би. Припев: Святи́телю о́тче Ма́рко, моли́ Бо́га о на́с. Отве́рз боже́ственныя хля́би му́дрости и ве́дения твоего́, всю́ зе́млю наводни́л еси́, правосла́внейше богосло́вя бытие́ Свята́го Ду́ха то́чию от Отца́. Припев: Святи́телю о́тче Ма́рко, моли́ Бо́га о на́с. Ре́вность до́му Госпо́дня, ре́вность догма́тов оте́ческих, свяще́нное се́рдце твое́ объе́м, согре́ и честны́й язы́к тво́й на но́вшества изостри́. Припев: Святи́телю о́тче Ма́рко, моли́ Бо́га о на́с. Велича́йшая боре́ния и ну́жды благоду́шно, преблаже́нне, подъе́м и доброде́тель избра́в и оте́ческое благоче́стие, велича́йшую сла́ву на небесе́х ны́не насле́довал еси́. Сла́ва Отцу́ и Сы́ну и Свято́му Ду́ху. Ве́лий свети́льник и́же в мо́ри су́щим, ве́лия в ми́ре жива́я звезда́, све́т сла́дкий и всеуслади́тельный, со́ль земли́ кре́пкая, дре́во боже́ственнаго зна́ния, чу́дный Ма́рк да венча́ется. И ны́не и при́сно и во ве́ки веко́в. Ами́нь. Богородичен: Состаре́вшееся естество́ челове́ческое, я́ко ро́ждши все́х Творца́, о все́х преесте́ственно Челове́ка бы́вшаго по естеству́ невеще́ственному, Ты́, Богоро́дице, обнови́ла еси́. Седален, глас 8 Облета́я лу́г свяще́нный и ра́й, вои́стинну благоцвету́щий, я́ко не́кая пчела́, от писа́ний Ду́ха и святы́х оте́ц пе́рвых, ве́ры основа́ний возвести́телей и учи́телей, преподо́бне, ро́су поче́рпл еси́ прия́тную и благово́нную, от нея́же соде́лал еси́ со́ты ве́ры и ме́д ве́дения, его́же ца́рие и простецы́ во здра́вие прие́млюще, благода́рственная вси́ воспису́ют тебе́, всему́дре: моли́ Христа́ Бо́га прегреше́ний да́ти оставле́ние пра́зднующим любо́вию святу́ю па́мять твою́. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: В напа́сти многоплете́нныя впа́д от вра́г ви́димых и неви́димых, бу́рею одержи́мь безчи́сленных согреше́ний мои́х; и я́ко к те́плому Твоему́ заступле́нию и покро́ву моему́, Чи́стая, ко приста́нищу притека́ю Твоея́ бла́гости. Те́мже, Пречи́стая, из Тебе́ Воплоще́нному безсе́менно моли́ся приле́жно о все́х рабе́х Твои́х, непреста́нно моля́щих Ти ся, Богоро́дице Пречи́стая, моля́щи Его́ при́сно, согреше́ний оставле́ние дарова́ти воспева́ющим досто́йно сла́ву Твою́. Песнь 4 Ирмос: Неизсле́дный Бо́жий сове́т, е́же от Де́вы воплоще́ния Тебе́, Вы́шняго, проро́к Авваку́м усмотря́я, зовя́ше: сла́ва си́ле Твое́й, Го́споди. Припев: Святи́телю о́тче Ма́рко, моли́ Бо́га о на́с. Одоле́тель изя́щнейший трепобеди́тельный проти́ву лука́ваго мироде́ржца изде́тска му́жественно яви́лся еси́, проти́ву же пре́лести но́вшества последи́ ра́товал еси́. Припев: Святи́телю о́тче Ма́рко, моли́ Бо́га о на́с. Кре́пкое благобо́рственное кре́стное ору́жие и зна́мение нося́ на пре́лесть, я́ко Моисе́й, разсе́кл еси́ мо́ре страсте́й, та́же супоста́ты твоя́ потопи́л еси́. Припев: Святи́телю о́тче Ма́рко, моли́ Бо́га о на́с. Все́ твое́ жела́ние ко Христу́ просте́р изде́тска, приснохва́льне, к необы́чному наслажде́нию, к сла́дости душе́вней, к добро́те неизрече́нней, сла́дкая ми́ра возненави́дел еси́. Сла́ва Отцу́ и Сы́ну и Свято́му Ду́ху. Зна́мения боже́ственнаго внутрьу́ду и Ангельскаго нра́ва светле́йшия и святы́я твоея́ души́ ле́пота, и боже́ственность лица́ твоего́ изобрази́. И ны́не и при́сно и во ве́ки веко́в. Ами́нь. Богородичен: Отве́рзла еси́, ю́же заключи́ преслуша́ние, ра́йскую две́рь, Всечи́стая, угото́вав Себе́ к те́плому послуша́нию за́поведей Творца́ Твоего́, и жи́зни пу́ть показа́лася еси́, Влады́чице. Песнь 5 Ирмос: Ужасо́шася вся́ческая о Боже́ственней сла́ве Твое́й: Ты́ бо, неискусобра́чная Де́во, име́ла еси́ во утро́бе над все́ми Бо́га, и родила́ еси́ Безле́тнаго Сы́на, все́м, воспева́ющим Тя́, ми́р подава́ющая. Припев: Святи́телю о́тче Ма́рко, моли́ Бо́га о на́с. Всего́ себе́ сама́го же́ртву возноси́л еси́ благоприя́тную Бо́гу, за ны́ погребе́нному, хра́м украси́в Боже́ственный — те́ло твое́, и же́ртвенник святы́й — чи́стое се́рдце твое́, я́ко заколе́ние светоза́рное — ду́шу твою́. Припев: Святи́телю о́тче Ма́рко, моли́ Бо́га о на́с. Избе́гл еси́ до́блейше жития́ волне́ния, вся́ благоразу́мно, блаже́нне, отве́рг, я́ко да приобря́щеши еди́ное многоче́стное, еди́ный би́сер — Христа́, и возсокро́виществуеши Боже́ственное просвеще́ние и ве́дение Бо́га. Припев: Святи́телю о́тче Ма́рко, моли́ Бо́га о на́с. Ма́лая и недосто́йная ны́няшняго ве́ка страда́ния к иму́щей яви́тися све́тлей и Боже́ственней сла́ве непрестаю́щей разсужда́я, вся́ искуше́ния кре́пко и до́бле претерпе́л еси́ с Па́влом, блаже́нне. Сла́ва Отцу́ и Сы́ну и Свято́му Ду́ху. Кре́пость необори́мую и си́лу тебе́ даде́ Еди́ный Си́льный и Влады́ка я́ко всеце́ло проти́ву зми́я, та́ко и коне́чне проти́ву лука́ваго смеше́ния ве́ры и догма́тов наруше́ния. И ны́не и при́сно и во ве́ки веко́в. Ами́нь. Богородичен: Святы́ня оскудева́вшая святы́я неве́сты Сы́на Бо́жия, Це́ркве Христо́вы, Свята́я Де́во Всечи́стая, исправля́ется и возстановля́ется све́тло в сла́ве оте́ческой по благода́ти Твое́й, Ма́рком Твои́м. Песнь 6 Ирмос: Боже́ственное сие́ и всечестно́е соверша́юще пра́зднество, богому́дрии, Богома́тере, прииди́те, рука́ми воспле́щим, от Нея́ ро́ждшагося Бо́га сла́вим. Припев: Святи́телю о́тче Ма́рко, моли́ Бо́га о на́с. Благода́тию Еди́наго, укрепля́ющаго упова́ющия на Него́, сокруши́л еси́ главы́ беззако́нных наси́льников человеконенави́стных и мече́м Ду́ха посе́кл еси́ язы́ки вводя́щих но́вшества. Припев: Святи́телю о́тче Ма́рко, моли́ Бо́га о на́с. Вся́ земля́ пое́т, и мо́ре чуди́тся, и возвеща́ет Це́рковь чудеса́ твоя́ и победи́тельная и ра́дуется, супоста́ты вся́ обраща́ющи в бе́гство, всему́дре. Припев: Святи́телю о́тче Ма́рко, моли́ Бо́га о на́с. Пото́цы Ни́ловы златостру́йныя и сладча́йшия ме́да яви́шася то́ки нектароизлия́нныя богоглаго́ливаго язы́ка твоего́, Правосла́вия все́м иска́пающия догма́ты. Сла́ва Отцу́ и Сы́ну и Свято́му Ду́ху. Река́ приснотеку́щая устремле́нии весели́т лице́ Бо́жияго гра́да, Це́ркве исполне́ние, богоглаго́ливый Ма́рко, пра́выми догма́ты. И ны́не и при́сно и во ве́ки веко́в. Ами́нь. Богородичен: Но́во Отроча́ родила́ еси́, Безле́тнаго Сы́на Отча, Всечисте́йшая, и была́ еси́ честне́йшая тва́ри, я́ко все́х Творца́ тва́ри яви́ла еси́. Кондак, глас 8 Богосло́вов Богому́драя писа́ния,/ я́ко Богоглаго́льник и́стинен, прие́м в се́рдцы,/ исхожде́ние Ду́ха Свята́го возвести́л еси́, я́ко до́лжно есть, приснохва́льне,/ и всесвяты́й запечатле́л еси́ Си́мвол,/ сего́ ра́ди пое́м:/ ра́дуйся, Ма́рко Богоглаго́ливе. Икос А́нгел убо, предста́в, ра́доватися благовести́ иногда́ Богоро́дице со стра́хом,/ аз же еди́н от зря́щих тя, вы́ше естества́ я́вльшася, я́ко А́нгела,/ я́ко челове́к удивля́юся и пою́ ти с любо́вию такова́я:/ ра́дуйся, чистоты́ святы́я прия́телище;/ ра́дуйся, прему́дрости Бо́жия сокро́вищнице./ Ра́дуйся, Богосло́вов святы́х печа́те;/ ра́дуйся, учи́телей отце́в преде́ле./ Ра́дуйся, пучи́но неизмери́мая мышле́ний духо́вных;/ ра́дуйся, мо́ре простра́нное та́инственных писа́ний./ Ра́дуйся, я́ко показа́лся еси́ Це́ркве свет ве́лий;/ ра́дуйся, я́ко до ны́не постыжда́еши противомы́слящия./ Ра́дуйся, исто́чниче догма́тов ве́ры;/ ра́дуйся, закола́телю но́вшеских ухищре́ний./ Ра́дуйся, и́мже утверди́хомся вси;/ ра́дуйся, и́мже и́стина сия́ет./ Ра́дуйся, Ма́рко Богоглаго́ливе. Песнь 7 Ирмос: Не послужи́ша тва́ри богому́дрии, па́че Созда́вшаго, но, о́гненное преще́ние му́жески попра́вше, ра́довахуся, пою́ще: препе́тый отце́в Госпо́дь и Бо́г, благослове́н еси́. Припев: Святи́телю о́тче Ма́рко, моли́ Бо́га о на́с. Не поколеба́ столпа́ неруши́маго кре́пости твоея́ искуше́ний тя́жкая зима́, ниже́ в нача́ле, ниже́ по́зде, я́ко на ка́мени, тве́рдо основа́ни бы́ша благочести́выя дея́ния и словеса́. Припев: Святи́телю о́тче Ма́рко, моли́ Бо́га о на́с. Оскверне́ну зря́ неприкоснове́нну иму́щую сохрани́тися чи́стую ри́зу Христо́ву, ю́же Христо́с Кровьми́ Свои́ми удобри́ и даде́ Це́ркви, возстена́л еси́ и великоду́шно побо́рствовал еси́. Припев: Святи́телю о́тче Ма́рко, моли́ Бо́га о на́с. Непревра́тен по́мысл стяжа́в, испыта́нию бы́вшу о Бо́зе и святы́х догма́тах ве́ры, я́ко ле́в, обрати́л еси́ в бе́гство и порази́л еси́ ца́рским ры́канием но́вшествующих полки́. Сла́ва Отцу́ и Сы́ну и Свято́му Ду́ху. Весе́лостию и нра́ва удобре́нием, слове́с ле́потою и жития́ свя́тостию вся́каго челове́ка я́ве привле́кл еси́, я́ко си́ла магни́та желе́зо, богому́дре, и к сла́ве подви́гл еси́ Бо́жией. И ны́не и при́сно и во ве́ки веко́в. Ами́нь. Богородичен: Угрызе́нием зми́я истле́вший челове́ческий ро́д, Кла́с ро́ждши Живота́, все́м да́рующа дыха́ние, оживи́ла еси́, и назда́ла, и рая́ о́бщника соде́лала еси́, Богоро́дице. Песнь 8 Ирмос: Отроки благочести́выя в пещи́ Рождество́ Богоро́дичо спасло́ е́сть, тогда́ у́бо образу́емое, ны́не же де́йствуемое, вселе́нную всю́ воздвиза́ет пе́ти Тебе́: Го́спода по́йте, дела́, и превозноси́те Его́ во вся́ ве́ки. Припев: Святи́телю о́тче Ма́рко, моли́ Бо́га о на́с. Вели́кий Домострои́тель всего́, вся́ содержа́яй же и промысля́яй, Се́й, предумы́сливый о́бщее, блаже́нне, всеблагоче́стное испове́дание, о́бщаго тя́ учи́теля, отца́, па́стыря все́м устроя́ет и побо́рника кре́пкаго. Припев: Святи́телю о́тче Ма́рко, моли́ Бо́га о на́с. Младе́нцев стреля́ния противомы́слящих догма́тов софисти́ческая ухищре́ния показа́шеся, де́тское игра́лище, паучи́нное тка́ния исплете́ние, и си́ла язы́ков те́х ослабе́ проти́ву твоего́, богоглаго́ливе, богодви́жимаго и богосло́вскаго язы́ка. Припев: Святи́телю о́тче Ма́рко, моли́ Бо́га о на́с. Возве́д о́чи по́мысла и всего́ себе́ спросте́р ко Го́споду, во е́же сокруши́ти у́бо си́льнаго, спасти́ же благочести́выя, Сего́ необори́маго обре́л еси́ Спобо́рника, сло́во ти́ да́рующа, я́ко досто́йному и мно́гою си́лою благовеству́ющему. Сла́ва Отцу́ и Сы́ну и Свято́му Ду́ху. Бо́гу взаимода́в любо́вь к бли́жнему и благоде́яние, многокра́тное, я́коже То́й обеща́, обре́л еси́ воздая́ние в настоя́щем и в бу́дущем ве́це, бога́тство небе́сное, и сла́ву, и наслажде́ние неиждива́емое, и живо́т во ве́ки, и Ца́рство. И ны́не и при́сно и во ве́ки веко́в. Ами́нь. Богородичен: Изри́ну за́висть дре́вняго льстеца́ и отсту́пника изря́дное творе́ние Творца́, ро́д челове́ческий, в тмочи́сленныя пре́лести, и пре́жде и ны́не, от ни́хже ны́не спасе́ни есмы́ Твои́м, Влады́чице, споборе́нием боговеща́нному Ма́рку. Песнь 9 Ирмос: Вся́к земноро́дный да взыгра́ется, Ду́хом просвеща́емь, да торжеству́ет же безпло́тных умо́в естество́, почита́ющее свяще́нное торжество́ Богома́тере, и да вопие́т: ра́дуйся, Всеблаже́нная Богоро́дице, Чи́стая Присноде́во. Припев: Святи́телю о́тче Ма́рко, моли́ Бо́га о на́с. Се́ ны́не да соберу́тся христоимени́тии лю́дие, ра́дующеся, и правосла́вных свята́я непоро́чная Це́рковь да возвесели́тся дне́сь и благода́рственная да воспое́т Христу́, исто́ргшему лови́тельство но́вшества чрез еди́наго му́драго. Припев: Святи́телю о́тче Ма́рко, моли́ Бо́га о на́с. Знамени́тость нело́жную и сла́ву небе́сную, блаже́нне, насле́довал еси́, сла́ву бо ги́бнущую со ины́м вся́ким жития́ угожде́нием от души́, я́ко не су́щая, оттря́с, с чи́нми богосло́вов учи́телей, я́ко единонра́вный, сора́дуешися. Припев: Святи́телю о́тче Ма́рко, моли́ Бо́га о на́с. Голуби́ца, свобожде́ние от бе́дствования на́м возвести́вшая, напа́ствуемым тягча́йшим волне́нием но́выя пре́лести, Уте́шителя благода́тию доброде́телей кры́лы позлаще́нными прелете́вши, предвари́ во святы́я ски́нии святы́х. Сла́ва Отцу́ и Сы́ну и Свято́му Ду́ху. Избавле́ние всего́ ми́ра, честну́ю Кро́вь Творца́ твоего́, блаже́нне, предлага́я в ско́рбных испыта́ниях ве́ры, хода́тай Бо́гу и чина́м ве́рных поста́влен бы́л еси́, благоприя́тными моли́твами умилостивля́я Иже по существу́ су́щаго Человеколю́бца. И ны́не и при́сно и во ве́ки веко́в. Ами́нь. Богородичен: Укрепи́ся зия́вый, о Всечи́стая Влады́чице, а́дский льсти́вый зми́й началозло́бный, и́же, я́ко младе́нца, порази́ челове́ка. Но́ваго же, я́ко новорожде́нна Младе́нца, неизмери́маго Бо́га Сло́ва Ты́ ро́ждши, земле́ неора́нная, изба́вила еси́ ро́д челове́ческий, Всехва́льная. Светилен Уте́шителева благода́ть в тебе́ обита́вши, Ма́рко, боже́ственнейших догма́тов яви́ тя́ реку́, еретико́в потопля́ющую полки́, ве́рныя же вся́ веселя́щую. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Тя́, Госпожу́ все́х, я́ве воспева́я, мо́лим, Богоро́дице: бу́ди на́м боже́ственный покро́в, отгоня́ющи дале́че от на́с мра́чныя стре́лы велиа́ра.

Глас 4Пе́снь 1. Ирмо́с: Воспою́ Тебе́, Го́споди Бо́же мо́й, я́ко изве́л еси́ лю́ди из рабо́ты еги́петския, покры́л же еси́ колесни́цы фарао́новы и си́лу. Припев: Святи́и праве́днии Ио́сифе, Дави́де и Иа́кове, моли́те Бо́га о на́с. Ели́цы рожде́ственная сотворя́ем Вопло́щшагося на́с ра́ди, ра́достию воспои́м Иа́кова Богобра́та и Дави́да Богоотца́. Сла́ва в Вы́шних, ли́цы а́нгельстии в Вифлее́ме Ио́сифу предста́ша, глаго́люще, с ни́миже Благоизво́лившаго воплоти́тися воспои́м. Дави́де Богоо́тче, с гу́сльми, от ко́рене Иессе́ова вопло́щшася Го́спода, Иа́кова пра́веднаго привле́к, воспо́й. Богоро́дичен: Воспою́ Тебе́, Го́споди Бо́же мо́й, я́ко роди́лся еси́ из Ма́тере Де́вы Святы́я и Сию́ показа́л еси́ наде́жду ду́ш на́ших. Пе́снь 3. Ирмо́с: Утвержде́ние на Тя́ наде́ющихся, Христе́ Бо́же, в ве́ре Правосла́вней Твое́й утверди́ на́с, я́ко Человеколю́бец. Ро́ждшагося пло́тию от Де́вы без се́мене Христа́ Бо́га со А́нгелы вси́ воспое́м, сла́ва в Вы́шних Бо́гу, взыва́юще. Всепра́зднственный на́с ра́ди Истощи́вшагося, ве́рнии, пра́здник с Дави́дом же и Иа́ковом пе́сньми по достоя́нию почти́м. Я́ко жениху́ от черто́га, из ма́терних ложе́сн Дави́д рече́ Го́споду изы́ти, его́же ны́не со Иа́ковом воспое́м. Богоро́дичен: Безневе́стную и Богоро́дицу Мари́ю почти́м: Тоя́ бо ра́ди на́м возсия́ Пра́вды Со́лнце. Седа́лен, гла́с 3. Ио́сифа пра́веднаго, Де́вы обру́чника, с Дави́дом Иа́кова достодо́лжно воспое́м: си́и бо, пра́ведною ходи́вше стезе́ю, достиго́ша Небе́сныя оби́тели, досто́йно лику́юще со А́нгелы, на́м про́сят согреше́ний оставле́ние. Пе́снь 4. Ирмо́с: Твоего́ на земли́ явле́ния, Христе́ Бо́же, пропове́дая проро́к прише́ствие, с весе́лием вопия́ше: сла́ва си́ле Твое́й, Го́споди. С волхвы́ Ро́ждшемуся поклони́мся и со А́нгелы и Ио́сифом лику́им, боголе́пно взыва́юще: сла́ва в Вы́шних Христу́ Бо́гу. Ца́рствуяй все́ми царьми́ Христо́с, по пло́ти от се́мене Дави́дова рожде́йся, избра́ннаго Иа́кова прия́т, бра́та, я́коже изво́ли. От Де́вы Госпо́дь яви́выйся во пло́ти, спросла́ви па́мять ва́шу, святи́и, апо́столов лу́чший, Иа́кове, и Дави́де всеблаже́нне. Богоро́дичен: Херуви́мских чино́в преиму́щи и Бо́га, на руку́ носи́ма, с пло́тию поне́сши, ра́дуйся, Богоро́дице Безневе́стная. Пе́снь 5. Ирмо́с: Возсия́вый Све́т, и просвети́вый у́тро, и показа́вый де́нь, сла́ва Тебе́, сла́ва Тебе́, Иису́се, Сы́не Бо́жий. От Де́вы Чи́стыя благоволи́вый роди́тися, Бо́же воплоти́выйся, сла́ва Тебе́, сла́ва Тебе́, Ио́сиф вопия́ше. От Де́вы рожде́йся и па́мять уясни́вый Дави́да и Иа́кова, сла́ва Тебе́, сла́ва Тебе́, Иису́се, Сы́не Бо́жий. Его́же проро́к Дави́д До́ждь на Руно́ нарица́ше Богодохнове́нно, Иа́ков пропове́да Иису́са, Сы́на Бо́жия. Богоро́дичен: А́нгела гла́с немо́лчно тва́рь прино́сит Тебе́, Де́во: ра́дуйся, Ма́ти Чи́стая Иису́са, Сы́на Бо́жия. Пе́снь 6. Ирмо́с: Возопи́, прообразу́я погребе́ние тридне́вное, проро́к Ио́на, в ки́те моля́ся: от тли́ изба́ви мя́, Иису́се, Царю́ си́л. Предстоя́ху, ужаса́ющеся, чи́ни Небе́снии верте́пу и Рождество́ пречи́стое воспе́ша немо́лчно: сла́ва в Вы́шних Бо́гу ро́ждшуся. Се́л еси́ на Престо́ле, я́коже кля́лся еси́, Влады́ко, проро́ку Дави́ду, от Плода́ чре́ва Его́ проше́д, Иа́кову же Це́ркве пре́дал еси́ престо́л, Христе́. Ца́рь у́бо Дави́д, и проро́к чу́ден, и пра́отец показа́ся Боже́ственнаго воплоще́ния, первоепи́скоп же учени́к Иа́ков Иису́сов. Богоро́дичен: Мо́лимся, о рабе́х Твои́х, Де́во Богоро́дице, из Тебе́ Воплоще́ннаго моли́, я́ко Тя́ и Еди́ну Предста́тельницу на́шу ве́мы. Конда́к, гла́с 3. Весе́лия дне́сь Дави́д исполня́ется Боже́ственный, Ио́сиф же хвале́ние со Иа́ковом прино́сит: вене́ц бо сро́дством Христо́вым прие́мше, ра́дуются, и неизрече́нно на земли́ Ро́ждшагося воспева́ют, и вопию́т: Ще́дре, спаса́й Тебе́ чту́щия. И́кос: Неизрече́нным сове́том ражда́ется пло́тию, Безпло́тный опису́ется ны́не те́лом, неопи́санный, и спаса́ет непрело́жно о́ба существа́; нача́ло прие́млет, И́же естество́м Безнача́льный и Еди́н Безле́тен; зри́тся Младе́нец, Сы́й всесоверше́нный; но́сится рука́ми, нося́й вся́ческая. Те́мже Того́ сро́дством почте́нныя я́ко Бо́г венча́ет Свои́м Рождество́м, я́же прославля́юще ве́рою, немо́лчно вопие́м: Ще́дре, спаса́й Тебе́ чту́щия. Пе́снь 7. Ирмо́с: Авраа́мстии иногда́ в Вавило́не о́троцы пе́щный пла́мень попра́ша, пе́сньми взыва́юще: оте́ц на́ших Бо́же, благослове́н еси́. Па́че сло́ва Рождеству́ Богоро́дицы Мари́и ли́цы А́нгельстии дивя́щеся, Ио́сифу вопия́ху: в Вы́шних сла́ва, и на земли́ ми́р. Невестово́дец у́бо Дави́д, черто́жник же Боже́ственныя Це́ркве Иа́ков бы́вше, глаго́лаху: воплоще́йся на́с ра́ди, Бо́же, благослове́н еси́. И́же во проро́цех ца́рь и во царе́х проро́к, со Иа́ковом Богому́дрым и на́м воспо́й: воплоще́йся на́с ра́ди, Христе́, благослове́н еси́. Богоро́дичен: В неопа́льней купине́ и росода́тельней пе́щи Ты́ прописа́вшися, Ма́ти Пречи́стая, без се́мене родила́ еси́ воплоще́ннаго Бо́га, Присноблагослове́нная. Пе́снь 8. Ирмо́с: Царя́ Христа́, Его́же испове́даша плене́ннии о́троцы, в пещи́, глаго́люще ве́лиим гла́сом: вся́ дела́, по́йте Го́спода. Вопло́щшагося Христа́, Его́же славосло́виша Небе́сныя си́лы и Ио́сиф обру́чник непреста́нно воспева́ет: вся́ дела́, Го́спода по́йте и превозноси́те Его́ во ве́ки. Вопло́щшагося Христа́, Его́же прорече́ Дави́д Богооте́ц, и лю́дем пропове́да Иа́ков, вопия́: вся́ дела́, Го́спода по́йте и превозноси́те Его́ во ве́ки. От Де́вы ро́ждшагося Христа́ и возвели́чившаго Дави́дову и Иа́ковлю свяще́нную па́мять, я́ко друго́в Его́, вся́ дела́, Го́спода по́йте и превозноси́те Его́ во ве́ки. Богоро́дичен: Царя́ Христа́, Его́же на́м роди́ Богоро́дица Мари́я, и по Рождестве́ пребы́сть Де́ва Чи́стая, вся́ дела́, Го́спода по́йте и превозноси́те Его́ во ве́ки. Пе́снь 9. Ирмо́с: Моисе́й на горе́ неопали́мую купину́ ви́де, Ио́сиф в верте́пе неизрече́нное Рождество́ слы́ша, Нескве́рная Де́во, Безму́жная Ма́ти, пе́сньми Тя́, Богоро́дице, велича́ем. Ро́ждшемуся от Де́вы вся́ тва́рь тре́петом послужи́: Небеса́ у́бо – звездо́ю, земля́ же – я́сльми, гора́ – верте́пом, волсви́ – дарми́, па́стырие – чудесе́м, А́нгели же – сла́ва в Вы́шних Бо́гу. Ца́рь от па́стырей дре́вле у́бо Дави́д бы́сть, от коле́на же Иу́дова и ца́рскаго ты́, Иа́кове, па́стырь па́ствы показа́лся еси́ Вопло́щшагося, А́гнца Вы́шняго и Сы́на Бо́жия. Вифлее́ме, ны́не весели́ся, гра́д бы́в Но́ваго Дави́да, и Сио́не, возвеща́й Церкве́й старе́йшинство, о́бщее весе́лие, все́х Царя́, и Того́ уго́дники ны́не восприе́мши. Богоро́дичен: А́нгельстии собо́ри Тя́, Богороди́тельнице, сла́вят, и челове́ческий ро́д Тя́ непреста́нно пе́сньми почита́ет, Ты́ бо Боже́ственным Рождество́м земны́я с Небе́сными совокупи́ла еси́. Те́мже Тя́ почита́ем.

Минея, 2 Июня, Канон великомученика Глас 4 Песнь 1 Ирмос: Отве́рзу уста́ моя́,/ и напо́лнятся ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,/ и воспо́ю, ра́дуяся, Тоя́ чудеса́. Припев: Святы́й великому́чениче Иоáнне, моли́ Бо́га о на́с. Новоявле́н му́ченик, блаже́нне Иоа́нне, вселе́нней напосле́док яви́лся еси́,/ те́мже ми пода́ждь сло́во твое́ю благода́тию,/ твоя́ по́двиги воспе́ти по достоя́нию. Припев: Святы́й великому́чениче Иоáнне, моли́ Бо́га о на́с. Очи́ма мы́сленныма предстоя́ на суди́щи,/ му́чеников зрел еси́ честно́е сосло́вие, тебе́ призыва́ющих ра́достно, Иоа́нне,/ и подо́бными венцы́ украша́ющих. Припев: Святы́й великому́чениче Иоáнне, моли́ Бо́га о на́с. Во́инством досточу́дным твоего́ сопротивле́ния/ побе́дная прия́хом на мучи́теля естеству́:/ соверше́нне бо посра́млен быв,/ не ктому́ мучи́тельская дерза́ти начина́ет. Сла́ва Отцу́ и Сы́ну и Свято́му Ду́ху. Оде́явся во броня́ испове́дания ве́ры и шлем возложи́в благодати светле́йший,/ язы́ком же, Иоа́нне, боговеща́нным и честны́м,/ я́коже мече́м, ссекл еси́ безу́мнаго епа́рха. И ны́не и при́сно и во ве́ки веко́в. Ами́нь. Богородичен: Гора́ превысо́кая, ю́же ви́де Дании́л,/ ка́мень от горы́ же отсече́ся му́жеску руку́ кроме́, Тебе́ прообразова́, Богоро́дице:/ без му́жа бо нам пло́тию родила́ еси́ Емману́ила. Песнь 3 Ирмос: Твоя́ песносло́вцы, Богоро́дице,/ Живы́й и Незави́стный Исто́чниче,/ лик Себе́ совоку́пльшия, духо́вно утверди́,/ в Боже́ственней Твое́й сла́ве/ венце́в сла́вы сподо́би. Припев: Святы́й великому́чениче Иоáнне, моли́ Бо́га о на́с. Му́ками, я́ко зла́то честно́е, искуси́лся еси́, страда́льче сла́вне,/ и Царю́ сил прине́слся еси́, всепло́дие словеси́ и́стинно,/ вме́сто огня́ олта́рнаго мече́м истне́емо. Припев: Святы́й великому́чениче Иоáнне, моли́ Бо́га о на́с. О Влады́це пе́рвее и Го́споде не насы́тишася/ иуде́е законопресту́пнии и пророкоуби́йственнии,/ но и того́ му́ченика, влачи́ма неми́лостивно от слуг нече́стия, теку́ще, закла́ху. Припев: Святы́й великому́чениче Иоáнне, моли́ Бо́га о на́с. Епа́рх се́ти простира́ше словесы́ ласка́тельными к ловле́нию страда́льца прему́драго,/ но он вопия́ше к нему́:/ преста́ни на мно́зе буесло́вя,/ аз бо тва́ри не поклоню́ся, паче Созда́вшаго. Сла́ва Отцу́ и Сы́ну и Свято́му Ду́ху. Маслина плодовитая в церкви Живаго Бога твоих мощей рака ныне яви́ся,/ от неяже обираем различная недугов исцеления,/ и́же тобою обогащшиися и чудесы твоими крася́щиися. И ны́не и при́сно и во ве́ки веко́в. Ами́нь. Богородичен: Рече́ Боже́ственный Иезеки́иль:/ и бу́дет дверь затворе́на./ И сие́ на Тебе́ испо́лнися, Влады́чице:/ вни́де бо несказа́нно в Тя О́тчее Сло́во и ми́ру яви́ся Плотоно́сец из Тебе́, Де́во,/ сохрани́в Тя во обои́х. Седален, глас 8 Прему́дрости рачи́тель быв, сокро́вище доброде́телей,/ отону́дуже и поче́рпл еси́ Боже́ственная разуме́ния./ Те́мже и, време́ни призва́вшу, к подвиго́м усе́рдно совле́клся еси́,/ прие́мля му́ченическия ра́ны, пло́ти содробле́ние и крове́й истоща́ние,/ и ны́не живе́ши в неизрече́ннем све́те с му́ченики./ Сего́ ра́ди вопие́м ти:/ моли́ Христа́ Бо́га грехо́в оставле́ние дарова́ти/ покланя́ющимся ве́рою святы́м моще́м твои́м. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Помышля́ю суд и бою́ся, испыта́ния трепе́щу стра́шнаго/ и ужаса́юся му́ки и огня́ боле́зни, тьмы же и та́ртара./ Увы́, что́ сотворю́?/ Студ ка́ко претерплю́, егда́ кни́ги разгну́тся и дея́ния облича́тся?/ Сего́ ра́ди припа́даю Ти, Богоро́дице Пречи́стая:/ предста́ни ми тогда́, ну́жды о́ныя изыма́ющи,/ Тебе́ бо и́мам прибе́жище, Влады́чице. Песнь 4 Ирмос: Седя́й в Сла́ве на Престо́ле Божества́/ во о́блаце ле́гце,/ прии́де Иису́с Пребоже́ственный/ Нетле́нною Дла́нию и спасе́ зову́щия:/ сла́ва, Христе́, си́ле Твое́й. Припев: Святы́й великому́чениче Иоáнне, моли́ Бо́га о на́с. У́дица льсти́вая язы́к бя́ше мучи́теля,/ вра́жиими подви́жимь ко́зньми, преложи́ти великоду́шнаго спеша́щ,/ но безде́лен обличи́ся, страда́льцу в ра́дости зову́щу:/ сла́ва си́ле Твое́й, Го́споди. Припев: Святы́й великому́чениче Иоáнне, моли́ Бо́га о на́с. Что́ ми мно́гая словеса́ и обеща́ния тле́емая, я́же безу́мие предлага́вши?/ – Иоа́нн к мучи́телю вопия́ше. –/ Сия́ вся мне же́лчи горча́йша, сла́достно взыва́ющу: сла́ва си́ле Твое́й, Го́споди. Припев: Святы́й великому́чениче Иоáнне, моли́ Бо́га о на́с. Егда́ ра́ны мно́жайшия на мои́х процвету́т пло́тех,/ тогда́ венце́м светле́йшим упова́ю сподо́битися, –/ страда́лец к пе́рсу глаго́лаше, –/ не косни́ про́чее, о злому́дренне, аз бо вопию́:/ сла́ва си́ле Твое́й, Го́споди. Сла́ва Отцу́ и Сы́ну и Свято́му Ду́ху. Ника́коже тебе́ послу́шаю, к па́губе привлача́ща,/ – огнеслужи́телю Иоа́нн веща́ше, –/ умру́ же па́че усе́рдно за уме́ршаго мене́ ра́ди, да с му́ченики све́тло вопию́:/ сла́ва си́ле Твое́й, Го́споди. И ны́не и при́сно и во ве́ки веко́в. Ами́нь. Богородичен: Изобразова́ше в Чермне́м проше́ствие дре́вле Изра́илево/ безму́жное Твое́ рождество́, Всецари́це:/ я́коже бо он тогда́ про́йде немо́кренно,/ та́ко и Христо́с безсе́менно от Твои́х пречи́стых крове́й произы́де, Де́во. Песнь 5 Ирмос: Ужасошася вся́ческая/ о Боже́ственней сла́ве Твое́й:/ Ты бо, Неискусобра́чная Де́во,/ име́ла еси́ во утро́бе над все́ми Бо́га/ и родила ́ еси́ Безле́тнаго Сы́на,/ всем воспева́ющим Тя/ мир подава́ющая. Припев: Святы́й великому́чениче Иоáнне, моли́ Бо́га о на́с. Изнемого́ша, бию́ще, слуги́ страстоте́рпческия пло́ти,/ утруди́ся и мучи́тель, томле́ния изыску́я,/ но он до́блественне терпя́ше, красу́яся ра́нами,/ я́же за любо́вь подъя́т Го́спода своего́. Припев: Святы́й великому́чениче Иоáнне, моли́ Бо́га о на́с. Коль стра́шно же и сла́вно о Христе́ сопротивле́ние твое́,/ ему́же у́бо почуди́шася племена́, обре́тшаяся на по́двизе, и похвали́ша терпе́ние,/ пе́рсы же посрами́шася со иуде́и, студо́м обо́лкшеся. Припев: Святы́й великому́чениче Иоáнне, моли́ Бо́га о на́с. О́крест стоя́ху мно́жества, зря́ще быва́емое, сла́вне,/ и мучи́тель председя́ше, тебе́ приобрести́ наде́яся,/ но погреши́ безу́мный тща́ния, всу́е претя́ непристра́шному/ и вотще́ бия́ адама́нта. Сла́ва Отцу́ и Сы́ну и Свято́му Ду́ху. Епа́рха злочести́ваго безу́мному веле́нию руга́яся,/ Боже́ственный Иоа́нн пре́лесть облича́ше пе́рсския горды́ни:/ со́лнцу, глаго́ля, не поклоню́ся, тва́ри су́щей, челове́ком рабо́тающей,/ бо́льшему рук Бо́жиих созда́нию. И ны́не и при́сно и во ве́ки веко́в. Ами́нь. Богородичен: Горе́ бя́ше соприсносу́щен, Отцу́ и Бо́гу, Бог Сло́во/ и с на́ми Бог и Челове́к, Богоро́дице,/ Тобо́ю соше́д к на́шему смире́нию, свобожда́я от кля́твы пра́дедния:/ Тебе́ бо ви́де патриа́рх Иа́ков ле́ствицу Небе́сную. Песнь 6 Ирмос: Боже́ственное сие́ и всечестно́е/ соверша́юще пра́зднество,/ Богому́дрии, Богома́тере,/ прииди́те, рука́ми воспле́щим,/ от Нея́ ро́ждшагося Бо́га сла́вим. Припев: Святы́й великому́чениче Иоáнне, моли́ Бо́га о на́с. Ника́коже поколеба́ша столпа́ благоче́стия свире́пство повелева́ющаго, / ниже́ па́лицами бие́ния, но ни ра́ны, ни смерть ну́жднейшая. Припев: Святы́й великому́чениче Иоáнне, моли́ Бо́га о на́с. О́ку херуви́мску ума́ твоего́ чистота́ уподо́бися:/ до́ле бо му́жески терпе́л еси́ муче́ния и горе́ предстоя́л еси́ Влады́це,/ И́же посла́ тебе́ вене́ц победи́тельный. Припев: Святы́й великому́чениче Иоáнне, моли́ Бо́га о на́с. Взыгра́шася све́тло му́ченичестии тогда́ ли́кове, ви́девше твое́ дерзнове́ние,/ и, прини́кше ку́пно со А́нгелы, неви́димо укрепля́ху тя в по́двизе. Сла́ва Отцу́ и Сы́ну и Свято́му Ду́ху. У́жа желе́зная Иоа́нн, страда́лец изя́щный, зла́та ого́рлия вменя́ше я/ и я́же от иуде́й ка́меней мета́ния – степе́ни к Небе́сному ше́ствию. И ны́не и при́сно и во ве́ки веко́в. Ами́нь. Богородичен: Обра́зне руно́ Гедео́н прия́т ороше́но, Твое́ предвозвеща́я чу́до:/ сни́де бо, я́ко дождь на руно́, Богоро́дице, Еди́ный от Тро́ицы во утро́бу Твою́, воплоща́емь. Кондак, глас 4 Морску́ю пла́вая пучи́ну ку́плею,/ от восто́ка тща́лся еси́ к се́веру,/ но Бо́гу призва́вшу тя,/ я́коже Матфе́й мы́тницу, ты же ку́плю оста́вль,/ и Тому́ после́довал еси́ кро́вию муче́ния,/ вре́менными искупи́в непроходи́мая,/ и вене́ц прия́л еси́ непобеди́мый. Икос Прему́дрый Зижди́тель и Влады́ка и Господи́н виногра́да мы́сленнаго/ я́коже пресвяты́ми Свои́ми усты́ во при́тчи виногра́да глаго́лет:/ я́ко во единыйна́десять час де́лавшим подо́бную даде́ це́ну,/ я́коже и от пе́рваго де́лавшим./ Ны́не де́лы извести́ в при́тчи кры́емое, Иоа́нна показа́в све́тла му́ченика,/ на са́мый уже́ после́док ле́тным ты́сящам,/ подо́бно пе́рвым страда́льцем просла́ви нетле́нием и исцеле́ния да́ром:/ вре́менными бо искупи́в непроходи́мая,/ и вене́ц но́сит непобеди́мый. Песнь 7 Ирмос: Не послужи́ша тва́ри Богому́дрии/ па́че Созда́вшаго,/ но, о́гненное преще́ние му́жески попра́вше,/ ра́довахуся, пою́ще:/ препе́тый отце́в Госпо́дь и Бог, благослове́н еси́. Припев: Святы́й великому́чениче Иоáнне, моли́ Бо́га о на́с. Приноси́мая ти страда́ния, Иоа́нне досточу́дне,/ младе́нец стреля́ния му́жески вменя́л еси́, ра́достно поя́:/ препе́тый отце́в Госпо́дь и Бог, благослове́н еси́. Припев: Святы́й великому́чениче Иоáнне, моли́ Бо́га о на́с. Ру́ку ча́сто простира́я к мучи́телю, Иоа́нн глаго́лаше:/ что́ всу́е труди́шися, безсту́дне?/ му́ки бо творя́ мне – пестра́ одея́ния, и смерть – вене́ц безсме́ртия. Припев: Святы́й великому́чениче Иоáнне, моли́ Бо́га о на́с. И́стинен аз му́ченик и́стиннаго Христа́ Бо́га на́шего, – страда́лец взыва́ше, –/ влаче́ния бо цве́ты благово́нны вменя́ю/ и кро́вныя струи́ – ба́ню креще́ния. Сла́ва Отцу́ и Сы́ну и Свято́му Ду́ху. Нощь от мене́ су́дится житие́ е́же во пло́ти, – Иоа́нн любому́дрствоваше, –/ ско́ро у́бо про́чее пло́ти разреши́ мя соу́за,/ да я́же со Христо́м жизнь насле́дую. И ны́не и при́сно и во ве́ки веко́в. Ами́нь. Богородичен: Ри́торствующий язы́к безгла́сен и недви́жимь,/ и́же о Тебе́ зрим, Богора́дованная:/ не и́мать бо пости́гнути непостижи́маго зача́тия неизрече́нное рожде́ние. Песнь 8 Ирмос: О́троки благочести́выя в пещи́/ Рождество́ Богоро́дичо спасло́ есть,/ тогда́ у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте, дела́, и превозноси́те Его́ во вся ве́ки. Припев: Святы́й великому́чениче Иоáнне, моли́ Бо́га о на́с. Ублажи́ша тя цари́, благослови́ша тя святи́тели, слы́шаще твое́ му́жественное терпе́ние/ и ко Христу́ хода́тая стяжа́вше тя,/ и, ны́не приходя́ще, честны́м твои́м моще́м покланя́ются. Припев: Святы́й великому́чениче Иоáнне, моли́ Бо́га о на́с. Шата́шася иногда́ язы́цы с людьми́ законопресту́пными,/ на Христа́ и Го́спода поуча́ющеся тще́тная,/ и ны́не собра́шася, пе́рсы у́бо Иоа́нна влача́ще,/ иуде́и же закала́юще. Припев: Святы́й великому́чениче Иоáнне, моли́ Бо́га о на́с. Ят бысть тобо́ю, и удержа́н,/ и до конца́ низложе́н змий безпло́тный во пло́ти твои́м терпе́нием./ И того́ кре́пость угасе́ и лю́тое мучи́тельство, Христу́ в плоть обо́лкшуся. Сла́ва Отцу́ и Сы́ну и Свято́му Ду́ху. Хваля́ся я́звами Христо́выми, к ве́чным восте́кл еси́ оби́телем,/ в багряни́цу оде́ян, му́чениче, от крове́й твои́х обагре́ную,/ и све́тло Царю́ сил предстои́ши, с му́ченики лику́я. И ны́не и при́сно и во ве́ки веко́в. Ами́нь. Богородичен: Иса́ии угль дре́вле по́слан бысть, клеща́ми носи́м от Серафи́ма,/ каса́ются тому́ и грехи́ оставля́ющ./ Клеща́ же Ты еси́, Де́во, Боже́ственный Угль носи́вшая во оставле́ние грехо́в челове́честву. Песнь 9 Ирмос: Всяк земноро́дный/ да взыгра́ется, Ду́хом просвеща́емь,/ да торжеству́ет же Безпло́тных умо́в естество́,/ почита́ющее свяще́нное торжество Богома́тере,/ и да вопие́т:/ ра́дуйся, Всеблаже́нная Богоро́дице,/ Чи́стая Присноде́во. Припев: Святы́й великому́чениче Иоáнне, моли́ Бо́га о на́с. Во́ин и́стинный Христо́ва пропове́дания был еси́, Иоа́нне,/ и ле́сти потреби́тель безбо́жия./ Те́мже и ны́не моли́твами твои́ми потреби́ ва́рварское воста́ние,/ во́инству на́шему под но́ги сие́, сла́вне, низлага́я. Припев: Святы́й великому́чениче Иоáнне, моли́ Бо́га о на́с. А́ще и разсе́яни бы́ша свяще́нныя твоя́ пло́ти, му́дре,/ а́ще и кро́ви излия́шася, но победи́тельная на тебе́ преидо́ша./ Тем на нас востаю́щих си́лою твое́ю посрами́/ и во́инство на́ше яви́ победи́теля. Припев: Святы́й великому́чениче Иоáнне, моли́ Бо́га о на́с. Лук сокруши́ нечести́вых, во́ине непобеди́ме,/ непра́ведно дви́жимый на твое́ достоя́ние, е́же себе́ избра́л еси́, возлюби́в,/ и оте́чество на́ше утверди́,/ да и мы ти́хо и ми́рно препрово́дим жи́тельство. Сла́ва Отцу́ и Сы́ну и Свято́му Ду́ху. Ю́же жела́хом па́мять светоза́рную твою́ и честну́ю,/ прия́хом и облобыза́хом, ра́дующеся ду́хом и игра́юще,/ мо́лимся, блаже́нне:/ ме́сто сие́ и лю́ди, иде́же изво́ли сла́витися, сохраня́й невре́дно, со оте́чеством на́шим. И ны́не и при́сно и во ве́ки веко́в. Ами́нь. Богородичен: Его́же проро́цы провозвести́ша вси многообра́зне,/ воплоща́ема нас ра́ди, Тобо́ю ви́дехом, Богоро́дице, Бо́га, нам соверше́нна,/ избавля́ющаго челове́ки от кля́твы пра́дедния,/ мы же Твои́ми моли́твами ве́чныя гее́нны да изба́вимся. Светилен Све́ту невече́рнему предстоя́, блаже́нне, с му́ченическими ли́ки,/ воспева́ющия тя в па́мяти твое́й от искуше́ния спаса́й моли́твами твои́ми. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Незаходи́маго Све́та носи́ло, Присноде́во,/ просве́щшаго седя́щих во тьме неве́дения пре́лести,/ озари́ и нам, гре́шным, свет Сы́на Твоего́.

Минея, 9 Сентября, Ин кано́н святы́х Глас 2 Песнь 1 Ирмос: Во глубине́ постла́ иногда́/ фараони́тское всево́инство преоруже́нная си́ла,/ Вопло́щшееся же Сло́во всезло́бныи́ грех потреби́ло есть,/ Препросла́вленный Госпо́дь,// сла́вно бо просла́вися. Припев: Святи́и праве́днии Иоаки́ме и Áнно, моли́те Бо́га о на́с. Свещу́, мы́сленное Со́лнце возблиста́вшую,/ Пло́тию от Нея́ возсия́вшее,/ доброде́телей светлостьми́ просиява́юще,/ роди́ти сподо́бистеся, А́нно богому́драя и Иоаки́м присноблаже́нный. Припев: Святи́и праве́днии Иоаки́ме и Áнно, моли́те Бо́га о на́с. Всеобра́зным зре́нием к Бо́гу/ и́стинно богоприя́тный Иоаки́м и А́нна боже́ственная,/ неукло́нно моля́щеся, Пречи́стую Богоро́дицу роди́ша,/ пребо́льшую всея́ тва́ри свя́тостию. Сла́ва Отцу́ и Сы́ну и Свято́му Ду́ху. Превысо́ку иму́ще жизнь,/ жития́ же све́тлость,/ всех вку́пе роди́телей бы́сте земны́х превы́шшии,/ Нетле́нну Де́ву я́ко роди́вше/ и богоотцы́ и́стинно Тоя́ ра́ди бы́вше. И ны́не и при́сно и во ве́ки веко́в. Ами́нь. Богородичен: Спасе́ния всего́ нача́льницы,/ блаже́ннейший Иоаки́м и А́нна сла́вная,/ Чи́стую, и Непоро́чную, и Пречи́стую Богоро́дицу роди́ша,/ богоче́стия Сию́ прие́мше воздая́ние. Песнь 3 Ирмос: На ка́мени мя ве́ры утверди́в,/ разшири́л еси́ уста́ моя́ на враги́ моя́,/ возвесели́ бо ся дух мой, внегда́ пе́ти:/ несть свят, я́коже Бог наш,// и несть пра́веден, па́че Тебе́, Го́споди. Припев: Святи́и праве́днии Иоаки́ме и Áнно, моли́те Бо́га о на́с. Непло́дствующая, и дете́й лише́нная,/ и слеза́ми Соде́теля моля́щая,/ еди́ну Благослове́нную сподо́билася еси́ роди́ти,/ богоприя́тная А́нно, зову́щи,/ я́ко несть свят, ра́зве Тебе́, Го́споди. Припев: Святи́и праве́днии Иоаки́ме и Áнно, моли́те Бо́га о на́с. Иже сожи́тельницу обогати́в Боже́ственною благода́тию,/ Иоаки́м боже́ственный и богоглаго́ливый/ Хода́таицу спасе́ния челове́ком роди́ти сподо́бися./ К Не́йже взыва́ем, я́ко несть непоро́чны, па́че Тебе́, Влады́чице. Сла́ва Отцу́ и Сы́ну и Свято́му Ду́ху. Воспое́м всечестну́ю сопру́гу,/ от нея́же возсия́ нам Де́ва,/ всех тва́рей превы́шши су́щи,/ Бо́га бо роди́, к Нему́же возопии́м,/ я́ко несть свят, па́че Тебе́, Го́споди. И ны́не и при́сно и во ве́ки веко́в. Ами́нь. Богородичен: Непло́днаго поно́са избе́гши,/ роди́ А́нна Богоро́дицу,/ Е́вы бо поноше́ние пресла́вно потре́бльшую,/ к Не́йже взыва́ем,/ я́ко несть непоро́чны, па́че Тебе́, Влады́чице. Седален, глас 5 Иоаки́м и А́нна торжеству́ют,/ по Бо́зе бо досто́йно благода́ть обрето́ша/ и роди́ша плод, богоприя́тен храм,/ Де́ву и Чи́стую Ма́терь Бо́жию,/ еди́ну Благослове́нную, моля́щуюся непреста́нно/ спасти́ся душа́м на́шим. Песнь 4 Ирмос: Прише́л еси́ от Де́вы, не хода́тай, ни А́нгел,/ но Сам, Го́споди, вопло́щься,/ и спасл еси́ всего́ мя челове́ка./ Тем зову́ Ти:// сла́ва си́ле Твое́й, Го́споди. Припев: Святи́и праве́днии Иоаки́ме и Áнно, моли́те Бо́га о на́с. Ра́дуяся, Де́ву от непло́дове прие́млет,/ Ея́же ра́ди непло́дие мирско́е разреши́ся, Рождество́м де́вствующую,/ Иоаки́м богому́дрый и богоприя́тный. Припев: Святи́и праве́днии Иоаки́ме и Áнно, моли́те Бо́га о на́с. Пра́отец Бо́жий Иоаки́м/ ны́не предлага́ет нам трапе́зу духо́вную, пребога́тый:/ я́ко Богома́терь и Пренетле́нную Отрокови́цу роди́л есть. Припев: Святи́и праве́днии Иоаки́ме и Áнно, моли́те Бо́га о на́с. Умерщвле́ния и тли челове́ки спа́сшую/ благода́ть предлага́ет,/ хотя́щую бы́ти Ма́терь Бо́жию,/ Сло́во Присносу́щное прие́мшую,/ несказа́нно воплоща́емое. Сла́ва Отцу́ и Сы́ну и Свято́му Ду́ху. От ко́рене Иессе́ева сопру́г возсия́,/ от него́же прозябе́ жезл, Цвет нося́щий,/ всего́ мя челове́ка облагово́нствующ ми́ром Божества́. И ны́не и при́сно и во ве́ки веко́в. Ами́нь. Богородичен: Напра́ви мое́, Богоро́дице, житие́,/ повеле́нии Боже́ственными наставля́ющи/ вопло́щшагося Сло́ва из Тебе́,/ и к све́ту наста́ви, Де́во Ма́ти, Мари́е Богоневе́сто. Песнь 5 Ирмос: Просвеще́ние во тьме лежа́щих,/ спасе́ние отча́янных, Христе́, Спа́се мой,/ к Тебе́ у́треннюю, Царю́ ми́ра,/ просвети́ мя сия́нием Твои́м,// ино́го бо, ра́зве Тебе́, бо́га не зна́ю. Припев: Святи́и праве́днии Иоаки́ме и Áнно, моли́те Бо́га о на́с. Целому́дренная дво́ица,/ чистоты́ заря́ сия́ющая,/ ю́же де́вства боже́ственным сия́нием украси́вшую непло́дное естество́ челове́ческое/ нам породи́ А́нна и Иоаки́м богоприя́тный. Припев: Святи́и праве́днии Иоаки́ме и Áнно, моли́те Бо́га о на́с. Де́вственный богоукра́шенный престо́л,/ Иже всех превы́шши, дла́нию Боже́ственною,/ целому́дрия честны́й сопру́г и богому́драя дво́ица породи́,/ А́нна и Иоаки́м всехва́льнии. Припев: Святи́и праве́днии Иоаки́ме и Áнно, моли́те Бо́га о на́с. Восто́ку Свы́ше я́вльшуся/ в наставле́ние заблу́ждших/ светоно́сную дверь/ боже́ственный Иоаки́м и А́нна, богому́дренно пожи́вший,/ роди́ти, богови́дцы, я́ве сподо́бишася. Сла́ва Отцу́ и Сы́ну и Свято́му Ду́ху. Зако́на Новаго богопи́санную скрижа́ль,/ на не́йже реше́ние грехо́в Ве́тхаго Зако́на Боже́ственное Сло́во прообрази́ пре́жде,/ я́ко от ка́мене, ны́не усече́/ манове́нием Вседержи́тель от непло́дове. И ны́не и при́сно и во ве́ки веко́в. Ами́нь. Богородичен: Заре́ю Твое́ю, Богома́ти,/ уму́ моему́ озари́тися, омраче́нному грехо́м,/ повели́, Де́во,/ неве́дения мрак и прегреше́ний потребля́ющи,/ ины́я бо па́че Тебе́ храни́тельницы не вем. Песнь 6 Ирмос: В бе́здне грехо́вней валя́яся,/ неизсле́дную милосе́рдия Твоего́ призыва́ю бе́здну:// от тли, Бо́же, мя возведи́. Припев: Святи́и праве́днии Иоаки́ме и Áнно, моли́те Бо́га о на́с. Плодови́тое се́мя,/ е́же дре́вле непло́ды А́нна восприе́мши,/ от Боже́ственнаго осия́ния Отрокови́цу роди́ти сподо́бися,/ все́ми тва́рьми влады́чествующую. Припев: Святи́и праве́днии Иоаки́ме и Áнно, моли́те Бо́га о на́с. Ны́не непло́ды ро́ждши, во́лею Бо́жиею,/ покоре́нием прия́ти Де́ву,/ ро́ждшую кроме́ плотски́я во́ли,/ Самому́ восхоте́вшу Бо́гу проявле́нно. Сла́ва Отцу́ и Сы́ну и Свято́му Ду́ху. Озари́вся Иса́ия Ду́хом,/ Иоаки́ма и А́нны рождество́,/ сви́ток нов, ви́де,/ в не́мже написа́ся Сло́во воплоща́емо. И ны́не и при́сно и во ве́ки веко́в. Ами́нь. Богородичен: Та́инству предтече́т та́инство:/ пре́жде бо неплодя́щая благода́ть/ породи́ спасе́ния Хода́таицу,/ де́вства рожде́нием я́вльшуюся нам. Кондак, глас 2 Ра́дуется ны́не А́нна,/ непло́дства разреши́вшися соу́з,/ и пита́ет Пречи́стую,/ созыва́ющи вся воспе́ти/ Дарова́вшаго от чре́ва ея́ челове́ком// еди́ну Ма́терь и Неискусому́жную. Икос Я́же уз пре́жде безча́дства моли́твою изба́вльшися,/ призыва́ет ны спра́здновати чудеси́/ и да́ры принести́ Рожде́нней,/ моля́щияся пред Не́ю с любо́вию,/ Е́йже я́ко иногда́ де́вы предтеча́ху ско́ро, лику́юще и вопию́ще:/ се прии́де всех воззва́ние,/ се Ада́м свободи́ся,/ я́ко А́нна плод прозябе́,/ еди́ну Ма́терь и Неискусому́жную. Песнь 7 Ирмос: Богопроти́вное веле́ние/ беззако́ннующаго мучи́теля/ высо́к пла́мень вознесло́ есть;/ Христо́с же простре́ богочести́вым отроко́м ро́су духо́вную,// Сыи́ благослове́н и препросла́влен. Припев: Святи́и праве́днии Иоаки́ме и Áнно, моли́те Бо́га о на́с. От ко́рене прозя́бши, дво́ице свята́я, Давида богому́драго,/ жезл всесвяще́нный, Де́ву Чи́стую, ми́ру породи́сте,/ Цвет свяще́ннейший нам, Христа́, безсе́менно возсия́вшую. Припев: Святи́и праве́днии Иоаки́ме и Áнно, моли́те Бо́га о на́с. Свещу́ многосве́тлую Богоро́дицу/ А́нна боже́ственная, я́коже златоза́рен све́щник, нося́щи,/ мир весь просвети́ боже́ственным све́том,/ де́вства све́тлыми сия́ньми. Сла́ва Отцу́ и Сы́ну и Свято́му Ду́ху. Прароди́телие сла́внии/ воплоти́вшагося за неизрече́нную ма́лость Бо́га Вседержи́теля/ от Дще́ре богому́дрыя ва́шея, пребога́тии,/ ны́не мне, прибе́гшему к вам, согреше́ний разреше́ние испроси́те. И ны́не и при́сно и во ве́ки веко́в. Ами́нь. Богородичен: Яко су́ще пребо́льшии роди́телей,/ все́ми Влады́чествующую тва́рьми роди́сте, Мари́ю Пречи́стую,/ ро́ждшую Бо́га, Пло́тию обложе́на,/ нам уподо́бльшася за благоутро́бие мно́гое. Песнь 8 Ирмос: В пещь о́гненную ко отроко́м евре́йским снизше́дшаго/ и пла́мень в ро́су прело́жшаго Бо́га/ по́йте, дела́, я́ко Го́спода,// и превозноси́те во вся ве́ки. Припев: Святи́и праве́днии Иоаки́ме и Áнно, моли́те Бо́га о на́с. Бога́тством кипя́щии доброде́телей/ сла́вою Боже́ственною укра́шенную Цари́цу Де́ву/ Иоаки́м честны́й и А́нна целому́дренная роди́ша,/ ю́же вся тварь пое́т я́ко Богоро́дицу. Припев: Святи́и праве́днии Иоаки́ме и Áнно, моли́те Бо́га о на́с. Жезл си́лы нам ва́ми, дру́ги Бо́жиими, по́слан бысть,/ Всенепоро́чная Неве́ста,/ Еюже посреде́ враго́в безбо́жных одолева́ем,/ кова́рствия тех попира́юще. Припев: Святи́и праве́днии Иоаки́ме и Áнно, моли́те Бо́га о на́с. Ору́жие нам от Бо́га благоволе́ния/ тобо́ю, сопру́же свяще́ннейший, дарова́ся,/ и́мже ны́не мы, ве́рнии, кра́сне при́сно венча́емся,/ Бо́га ро́ждшая Чи́стая Де́во Ма́ти. Сла́ва Отцу́ и Сы́ну и Свято́му Ду́ху. Си́ла Бо́жия плодоноше́нием непло́дствующее чре́во отве́рзе,/ и предгряде́т Дверь де́вства све́тлостьми,/ Ея́же ра́ди Сло́во прии́де к земны́м,/ вопло́щься неизрече́нным сло́вом. И ны́не и при́сно и во ве́ки веко́в. Ами́нь. Богородичен: Светоли́тии из Тебе́ Воплоще́ннаго нас ра́ди/ просвеще́нная дво́ица изря́дная роди́телей Твои́х/ да бу́дет, Пренепоро́чная Влады́чице,/ хода́тайство нам благ Небе́сных. Песнь 9 Ирмос: Безнача́льна Роди́теля Сын, Бог и Госпо́дь,/ вопло́щься от Де́вы, нам яви́ся,/ омраче́нная просвети́ти, собра́ти расточе́нная,// тем Всепе́тую Богоро́дицу велича́ем. Припев: Святи́и праве́днии Иоаки́ме и Áнно, моли́те Бо́га о на́с. Единому́дреннии и единоду́шнии доброде́телию су́ще,/ Пречи́стыя Де́вы честни́и роди́телие,/ соверша́ющим усе́рдно прехва́льную и сла́вную па́мять ва́шу,/ свяще́ннейший, спасти́ся моли́теся. Припев: Святи́и праве́днии Иоаки́ме и Áнно, моли́те Бо́га о на́с. Па́жить разруша́ете сме́ртную, сла́внии,/ Жи́зни Ма́терь све́тло ро́ждшии,/ потре́бльшую сея́ прило́г/ и безсме́ртныя жи́зни исхода́таившую наде́жду ве́ры ра́ди. Сла́ва Отцу́ и Сы́ну и Свято́му Ду́ху. Кра́сное я́ко со́лнце Иоаки́м,/ единя́яся светоно́сней луне́ А́нне,/ породи́ де́вства лучу́,/ Е́юже Заря́ Боже́ственнаго Существа́,/ пло́ти по Ипоста́си соедини́вшися, нам возсия́. И ны́не и при́сно и во ве́ки веко́в. Ами́нь. Целому́дренно пожи́вше и благоче́стно, блаже́ннии,/ ны́не сла́дости несказа́нныя сподо́бистеся,/ Богоявле́ния получи́вше И́же от вас ми́ру я́вльшагося,/ Его́же моли́те спасти́ся душа́м на́шим. Светилен Я́же Е́вы кля́тву Потре́бльшая/ ны́не ражда́ется от ста́рец непло́дных,/ от А́нны и Иоаки́ма,/ Юже со А́нгелы вси по до́лгу в пе́снех, ве́рнии, да восхва́лим.

Минея, 21 Февраля, Канон Глас 7 Песнь 1 Ирмос: Поспе́шествовавшему Бо́гу во Еги́пте Моисе́ови, извести́ Изра́иля, Тому́ Еди́ному пои́м, я́ко просла́вися. Припев: Святи́телю, о́тче Евста́фие, моли́ Бо́га о на́с. И́же отце́в ве́рх, я́ко Сло́ва благода́тию оде́янна, вели́каго Евста́фия пе́сньми восхваля́ем. Припев: Святи́телю, о́тче Евста́фие, моли́ Бо́га о на́с. Побо́рник ве́ры я́влься, Христо́ву Це́рковь неплене́ну боре́нием е́реси сохрани́л еси́, преподо́бне. Сла́ва Отцу́ и Сы́ну и Свято́му Ду́ху. Уста́ Словесе́ бы́в, отры́гнул еси́ уче́ния пучи́ну, преподо́бне, в не́йже потопи́л еси́ А́риево злоче́стие. И ны́не и при́сно и во ве́ки веко́в. Ами́нь. Богородичен: И́же сло́вом пло́тию па́че сло́ва ро́ждши Нача́льника Жи́зни, непреста́нно моли́ спасти́ся душа́м на́шим. Песнь 3 Ирмос: Утверди́ся се́рдце мое́ во Го́споде, вознесе́ся ро́г мо́й в Бо́зе мое́м, разшири́шася на враги́ моя́ уста́ моя́, возвесели́хся о спасе́нии Твое́м. Припев: Святи́телю, о́тче Евста́фие, моли́ Бо́га о на́с. Ты́, ору́жие извле́к и́стинное, яви́лся еси́ благоче́стия первонача́льник, сопроти́вныя ве́ре пробо́д, Евста́фие. Припев: Святи́телю, о́тче Евста́фие, моли́ Бо́га о на́с. Ты́, любоболе́зненно возде́лав Це́рковь серпо́м уче́ний твои́х, блаже́нне, из ко́рене вся́ посе́кл еси́ те́м пле́велы. Сла́ва Отцу́ и Сы́ну и Свято́му Ду́ху. Старе́йшинствуя со сла́вою И́стинному, су́щаго вои́стинну нача́льника лжи́ А́рия, богоблаже́нне, порази́л еси́ ка́мением слове́с твои́х. И ны́не и при́сно и во ве́ки веко́в. Ами́нь. Богородичен: Роди́лся еси́ несказа́нно, яви́лся еси́, я́коже благоволи́л еси́, Спа́се на́ш, и ми́р обнови́л еси́, Го́споди. Седален, глас 3 Единосу́щнаго Отцу́ и Ду́ху Сло́ва пропове́дал еси́, о́тче Евста́фие, и безу́мнаго тве́рдо жи́лами уче́ний твои́х А́рия удави́л еси́, ху́лящаго на пра́вое уче́ние. Те́мже спричте́ся лико́м, ра́дуяся, боже́ственных пропове́дник оте́ц, с ни́миже на́с помина́й. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Я́ко невозде́ланная, Де́во, лоза́, красне́йший Гро́зд прозябла́ еси́, источа́ющ на́м вино́ спасе́ния, все́х веселя́щее ду́ши же и телеса́. Те́мже я́ко вину́ Тя́ до́брых блажа́ще при́сно, со а́нгелом вопие́м Ти́: ра́дуйся, Благода́тная. Песнь 4 Ирмос: Небеса́ покры́ла е́сть доброде́тель Твоя́, Го́споди, и Твоего́ хвале́ния вся́ испо́лнил еси́. Сла́ва си́ле Твое́й, Человеколю́бче. Припев: Святи́телю, о́тче Евста́фие, моли́ Бо́га о на́с. Ве́ры собира́я победи́тельная, стрела́ми слове́сными нечести́ваго богому́дренно низложи́л еси́, о́тче, А́рия. Припев: Святи́телю, о́тче Евста́фие, моли́ Бо́га о на́с. Слове́с твои́х све́тлость, я́коже мо́лния, изше́дши, А́риево злосла́вие попаля́ет, Евста́фие прему́дре. Сла́ва Отцу́ и Сы́ну и Свято́му Ду́ху. Огражде́ние положи́в словесы́ твои́ми, я́коже виногра́ду Госпо́дню, Це́ркви, преподо́бне. И ны́не и при́сно и во ве́ки веко́в. Ами́нь. Богородичен: Родила́ еси́ пло́тию, Де́во Чи́стая, И́же пре́жде Тебе́ Безнача́льнаго Сло́ва и по Тебе́ па́че Сло́ва, из Тебе́ вочелове́чшася. Песнь 5 Ирмос: У́тренюет ду́х мо́й к Тебе́, Бо́же, зане́ Све́т еси́, и Твоя́ повеле́ния бы́ша исцеле́ния рабо́м Твои́м, Человеколю́бче. Припев: Святи́телю, о́тче Евста́фие, моли́ Бо́га о на́с. Мра́к разори́л еси́ ересе́й и возсия́л еси́ конце́м все́м зари́ уче́ний твои́х, Евста́фие блаже́нне. Сла́ва Отцу́ и Сы́ну и Свято́му Ду́ху. Ору́жии огражда́еми, Евста́фие, уче́ний твои́х, настоя́щия Боже́ственней ве́ре е́реси побежда́ем. И ны́не и при́сно и во ве́ки веко́в. Ами́нь. Богородичен: Де́во, не преста́й моля́щи Бо́га, из Тебе́ ро́ждшагося пло́тию, изба́витися рабо́м Твои́м от вся́каго обстоя́ния. Песнь 6 Ирмос: Ио́на из чре́ва а́дова вопия́ше: возведи́ от тли́ живо́т мо́й. Мы́ же Тебе́ вопие́м: Всеси́льне Спа́се, поми́луй на́с. Припев: Святи́телю, о́тче Евста́фие, моли́ Бо́га о на́с. Слове́с твои́х богодохнове́нных ве́тром утиши́л еси́ бу́рю ерети́чествующих, в приста́нище благоче́стия Це́рковь направля́я, преблаже́нне. Сла́ва Отцу́ и Сы́ну и Свято́му Ду́ху. В доброде́тели непоро́чен сы́й, преподо́бне, сла́вен яви́лся еси́ сло́вом и житие́м, Це́ркве Христо́вы удобре́ние. И ны́не и при́сно и во ве́ки веко́в. Ами́нь. Богородичен: Его́же родила́ еси́, Богоро́дице, несказа́нно, Бо́га на́шего, моля́щи не преста́й, изба́витися от бе́д пою́щим Тя́, Чи́стая Присноде́во. Песнь 7 Ирмос: В пещи́ су́ще халде́йстей, авраа́мстии о́троцы ликова́ху со а́нгелом, глаго́люще: оте́ц на́ших Бо́же, благослове́н еси́. Припев: Святи́телю, о́тче Евста́фие, моли́ Бо́га о на́с. Ерети́чествующих бра́нь ору́жием Ду́ха, му́дре, победи́в, по́чести нетле́нныя прия́л еси́, от Христа́ венча́емь. Припев: Святи́телю, о́тче Евста́фие, моли́ Бо́га о на́с. Ме́чь обоюдуо́стр уста́ твоя́ на нечести́вых, о́тче, показа́шася, под руко́ю Сло́ва покрыва́ема, я́ко си́х бра́нь посе́к. Сла́ва Отцу́ и Сы́ну и Свято́му Ду́ху. Уче́ния лопа́тою разве́ял еси́ А́риеву ле́сть, я́ко пле́вы, во одушевле́нную, о́тче, жи́тницу собира́я пшени́цу ве́ры. И ны́не и при́сно и во ве́ки веко́в. Ами́нь. Богородичен: Богоро́дицу вси́ почти́м, я́ко Спа́са родила́ е́сть, ве́рою взыва́юще: ра́дуйся, Рабо́ и Ма́ти Христа́ Бо́га на́шего. Песнь 8 Ирмос: Еди́наго Безнача́льнаго Царя́ сла́вы, Его́же благословя́т небе́сныя си́лы и трепе́щут чи́ни а́нгельстии, по́йте, свяще́нницы, лю́дие, превозноси́те Его́ во ве́ки. Припев: Святи́телю, о́тче Евста́фие, моли́ Бо́га о на́с. Жезло́м прему́дрости твоея́ писа́ний раздели́в боже́ственную пучи́ну, Христо́в святи́телю, и преложи́л еси́ к земли́ правосла́вия но́ваго Изра́иля, ариани́ты же, я́ко еги́птяны, удави́л еси́. Припев: Святи́телю, о́тче Евста́фие, моли́ Бо́га о на́с. Небе́снаго ты́ сше́д виде́ния на сто́лп хала́нский, А́риев, размеси́л еси́ язы́ки ерети́чествующих, Евста́фие му́дре, единогла́сную ве́ру пропове́дуя во ве́ки. Сла́ва Отцу́ и Сы́ну и Свято́му Ду́ху. Испове́даньми твои́ми, и́же по и́стине, на за́паде жи́знь сконча́л еси́; возсия́л еси́ па́ки на восто́це ста́ду твоему́, му́дре, зарю́ благоче́стия испуща́я во ве́ки. И ны́не и при́сно и во ве́ки веко́в. Ами́нь. Богородичен: Созда́вшаго Ада́ма по о́бразу, и от смеше́ния его́ проше́дша, и спа́сша челове́ческий ро́д, по́йте, свяще́ннии, лю́дие, превозноси́те Его́ во ве́ки. Песнь 9 Ирмос: Па́че естества́ Ма́терь и по естеству́ Де́ву, еди́ну в жена́х Благослове́нную, пе́сньми, ве́рнии, Богоро́дицу велича́ем. Припев: Святи́телю, о́тче Евста́фие, моли́ Бо́га о на́с. И́же в писа́ниих, гро́зд, учи́тельно изгне́т, напои́л еси́ ве́рных вина́, о́тче, и́стины Христо́вы, сердца́ веселя́ща. Припев: Святи́телю, о́тче Евста́фие, моли́ Бо́га о на́с. Ору́жие обоюдуостро́, нося́, богосло́вный Тво́й язы́к, посе́кл еси́ лука́вый А́рия гне́в, непови́нную и душе́вную кро́вь, блаже́нне, излива́ющ. Сла́ва Отцу́ и Сы́ну и Свято́му Ду́ху. Наро́читый святы́й де́нь всесвяты́я твоея́ па́мяти творя́ще духо́вно, тя́ мо́лим: моли́ приле́жно, святи́телю, спасти́ся на́м. И ны́не и при́сно и во ве́ки веко́в. Ами́нь. Богородичен: Ю́же во чре́ве заче́ншую неопи́санное Сло́во и две́рь Боже́ственныя жи́зни на́м я́вльшую, Пречи́стую вои́стинну Богоро́дицу велича́ем.