Молитвы

Минея, 2 Января, Ин канон преподобному Глас 8 Песнь 1 Ирмос: Во́ду проше́д, я́ко су́шу, и еги́петскаго зла́ избежа́в, изра́ильтянин вопия́ше: Изба́вителю и Бо́гу на́шему пои́м. Припев: Преподо́бне о́тче Серафи́ме, моли́ Бо́га о на́с. По за́поведи Влады́ки Христа́ у́зким и те́сным путе́м вше́л еси́, преподо́бне, в Ца́рство небе́сное, широ́кий и простра́нный пу́ть возненави́дев, и ны́не моли́ся о на́с, творя́щих пресве́тлую па́мять твою́. Припев: Преподо́бне о́тче Серафи́ме, моли́ Бо́га о на́с. От ю́ности на безстра́стия го́ру возше́д и кре́ст сво́й взе́м, невозвра́тно Христу́ после́довал еси́, и духо́вную му́дрость стяжа́в, Го́рняго Иерусали́ма дости́гл еси́, преподо́бне, моли́ о на́с Еди́наго Человеколю́бца. Сла́ва Отцу́ и Сы́ну и Свято́му Ду́ху. Ны́не предстоя́, преподо́бне Престо́лу Бо́жию, моли́ся о стране́ на́шей изба́витися от наше́ствия иноплеме́нных, и христолюби́вым лю́дем земли́ Росси́йския спасе́ние испроси́ моли́твами твои́ми, преподо́бне. И ны́не и при́сно и во ве́ки веко́в. Ами́нь. Богородичен: С ве́рою и любо́вию притека́ющих к Тебе́ и со стра́хом пою́щих Тя́ моли́твенный гла́с услы́ши, Влады́чице. Песнь 3 Ирмос: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ в любви́ Твое́й, жела́ний кра́ю, ве́рных утвержде́ние, еди́не Человеколю́бче. Припев: Преподо́бне о́тче Серафи́ме, моли́ Бо́га о на́с. Моли́ся, блаже́нне, Христу́ Бо́гу изба́витися на́м от гла́да и па́губы, от напра́сныя сме́рти, от та́йных прегреше́ний и помышле́ний лука́вых, да чи́стым се́рдцем Христу́ возопии́м: моли́твами преподо́бнаго спаси́ на́с, Го́споди. Припев: Преподо́бне о́тче Серафи́ме, моли́ Бо́га о на́с. Кро́тостию и смире́нием после́дуя Влады́це Христу́, все́м вся́ вои́стинну бы́л еси́, бога́тых же и убо́гих неосла́бно благоче́стию поуча́я, бу́дущая, я́ко настоя́щая, прови́дел еси́. Моли́ Христа́ Бо́га, преподо́бне, согреше́ний на́ших оставле́ние дарова́ти. Сла́ва Отцу́ и Сы́ну и Свято́му Ду́ху. Изба́ви оби́тель твою́, преподо́бне, от вся́каго наве́та вра́жия и испо́лни ю́ любве́ и благода́ти, е́же не помышля́ти о жите́йских, но душеспаси́тельныя дости́гнути добро́ты моли́твами твои́ми. И ны́не и при́сно и во ве́ки веко́в. Ами́нь. Богородичен: Упова́ние и наде́жда на́ша Ты́ еси́, Пречи́стая Влады́чице, спаси́ держа́ву правосла́вную и лю́ди Твоя́, моля́щияся и и́мя Твое́ призыва́ющия. Седален, глас 4 Жите́йское мо́ре страсте́й воздержа́нием препобеди́в и в приста́нище безстра́стия прите́к, сосу́д воздержа́ния яви́лся еси́, преподо́бне Серафи́ме, моли́ Христа́ Бо́га дарова́ти на́м ве́лию ми́лость. Песнь 4 Ирмос: Услы́шах, Го́споди, смотре́ния Твоего́ та́инство, разуме́х дела́ Твоя́, и просла́вих Твое́ Божество́. Припев: Преподо́бне о́тче Серафи́ме, моли́ Бо́га о на́с. Не то́кмо свята́я оби́тель Саро́вская, но и вся́ Росси́йская земля́ име́ет тя́, блаже́нне, моли́твенника те́плаго и ско́раго помо́щника, кре́пкаго и непобеди́маго засту́пника и хода́тая о душа́х на́ших. Припев: Преподо́бне о́тче Серафи́ме, моли́ Бо́га о на́с. Бу́ди о на́с моле́бник и хода́тай ко Пресвяте́й Тро́ице, и подви́гни на моли́тву с тобо́ю ли́ки святы́х, и́хже житию́ поревнова́л еси́, преподо́бне, с ни́миже ку́пно моли́ся о ми́ре и устрое́нии всего́ ми́ра, да ти́хое и безмо́лвное житие́ поживе́м в ве́це се́м и в бу́дущем жи́знь ве́чную насле́дуем. Сла́ва Отцу́ и Сы́ну и Свято́му Ду́ху. В по́стницех вели́к бы́в, преподо́бне, те́сное и́ноческое в пусты́ни житие́ проходи́л еси́, и сие́ во умиле́нней моли́тве сконча́л еси́; моли́ спасти́ся на́м. И ны́не и при́сно и во ве́ки веко́в. Ами́нь. Богородичен: Ты́ еси́, Пречи́стая Богоро́дице, прибе́жище на́ше и утвержде́ние, моли́ Сы́на Твоего́ и Бо́га на́шего пода́ти на́м спасе́ние и грехо́в оставле́ние. Песнь 5 Ирмос: Просвети́ на́с повеле́нии Твои́ми, Го́споди, и мы́шцею Твое́ю высо́кою Тво́й ми́р пода́ждь на́м, Человеколю́бче. Припев: Преподо́бне о́тче Серафи́ме, моли́ Бо́га о на́с. Посто́м и непреста́нною моли́твою просла́вил еси́, преподо́бне, оби́тель Саро́вскую, еле́ем от ико́ны Влады́чицы помазу́я неду́жныя и те́м исцеле́ние неоску́дно подава́я, и ны́не моли́ся спасти́ся душа́м на́шим. Припев: Преподо́бне о́тче Серафи́ме, моли́ Бо́га о на́с. Святи́телие и свяще́нницы, сора́дуйтеся и́ноком Саро́вским, и прости́и лю́дие, вку́пе воспо́йте блаже́ннаго отца́, обурева́емых скорбьми́ ти́хое приста́нище, врача́ душе́вным и теле́сным неду́гом ско́раго. Сла́ва Отцу́ и Сы́ну и Свято́му Ду́ху. Принеси́ моли́твы твоя́, преподо́бне, я́ко же́ртву благоприя́тну и непоро́чну, ко Пресвяте́й Тро́ице, и не забу́ди на́с, ны́не творя́щих па́мять твою́, ми́лость испроси́ ненави́дящим, оби́дящим и вражду́ющим на на́с, и изба́ви все́х от вся́кия ско́рби. И ны́не и при́сно и во ве́ки веко́в. Ами́нь. Богородичен: Упра́ви у́м мо́й, Влады́чице, обурева́емый страстьми́ мно́гими, спаси́, Богоро́дице, к Тебе́ прибега́ющия, ины́я бо по́мощи, Чи́стая, ра́зве Тебе́, не зна́ем. Песнь 6 Ирмос: Моли́тву пролию́ ко Го́споду и Тому́ возвещу́ печа́ли моя́, я́ко зо́л душа́ моя́ испо́лнися и живо́т мо́й а́ду прибли́жися, и молю́ся, я́ко Ио́на: от тли́, Бо́же, возведи́ мя. Припев: Преподо́бне о́тче Серафи́ме, моли́ Бо́га о на́с. Грехо́в испо́лнени вси́ есмы́, твоя́ же моли́твы, преподо́бне Серафи́ме, я́ко кади́ло благово́нно, ко Го́сподеви восхо́дят. Ны́не мо́лим тя́: волну́ющееся в земли́ на́шей мо́ре зла́го неве́рия изсуши́ и спасе́ние душа́м на́шим от Го́спода испроси́. Припев: Преподо́бне о́тче Серафи́ме, моли́ Бо́га о на́с. Блаже́н вои́стинну бы́л еси́, преподо́бне Серафи́ме, нището́ю бога́тство и пла́чем ра́дость стяжа́в, ю́же приходя́щим оби́льно подава́л еси́, и ны́не лучи́ чуде́с источа́еши и исцеля́еши все́х, с ве́рою к тебе́ притека́ющих. Сла́ва Отцу́ и Сы́ну и Свято́му Ду́ху. В пусты́ни кладене́ц ископа́в твои́ма рука́ма, преподо́бне, приходя́щия жа́ждущия лю́ди напои́л еси́, и ны́не мно́гим неду́жным водо́ю кладенца́ сего́ боле́зни исцеля́еши; вои́стинну ди́внаго моли́твенника и чудотво́рца все́м, преподо́бне, Влады́ка тя́ показа́. И ны́не и при́сно и во ве́ки веко́в. Ами́нь. Богородичен: Вои́стинну Тя́, Ма́терь Бо́жию, испове́дуем, и́стинную Богоро́дицу: Твои́м бо Рождество́м тле́ннаго осужде́ния изба́вихомся, милосе́рдия ра́ди Человеколю́бца Бо́га, и к жи́зни нетле́нней воззва́ни бы́хом. Кондак, глас 2 Ми́ра красоту́ и я́же в не́м тле́нная оста́вив, преподо́бне, в Саро́вскую оби́тель всели́лся еси́, и та́мо а́нгельски пожи́в, мно́гим пу́ть бы́л еси́ ко спасе́нию, сего́ ра́ди и Христо́с тебе́, о́тче Серафи́ме, просла́ви и да́ром исцеле́ний и чуде́с обогати́. Те́мже вопие́м ти́: ра́дуйся, Серафи́ме, преподо́бне о́тче на́ш. Икос Оста́вив ро́д и дру́ги, бога́тство, я́ко пра́х, вмени́в, в пусты́ни Саро́встей водвори́лся еси́, и на стра́сти, я́ко безпло́тен, подвиза́вся, а́нгелов ликостоя́ния сподо́бился еси́. Те́мже духо́вная разуме́ния прии́м, пода́ждь и на́м, преподо́бне, разу́мно пе́сньми воспе́ти тя́, си́це глаго́лющим: ра́дуйся, Серафи́ме блаже́нне, небе́сный челове́че и земны́й а́нгеле; ра́дуйся, в любви́ Христу́ подража́телю; ра́дуйся, Свята́го Ду́ха оби́тель; ра́дуйся, уныва́ющим ве́лие ра́дование; ра́дуйся, исто́чниче исцеле́ний; ра́дуйся, скорбя́щим душа́м сла́дкое утеше́ние; ра́дуйся, и́ноком ти́хое приста́нище и учи́телю прему́дрый; ра́дуйся, похвало́ земли́ Росси́йския; ра́дуйся, Серафи́ме, преподо́бне о́тче на́ш. Песнь 7 Ирмос: От Иуде́и доше́дше, о́троцы, в Вавило́не иногда́, ве́рою Тро́ическою пла́мень пе́щный попра́ша, пою́ще: отце́в Бо́же, благослове́н еси́. Припев: Преподо́бне о́тче Серафи́ме, моли́ Бо́га о на́с. Поми́луй на́с, Го́споди, и от вся́каго зла́ душетле́ннаго сохрани́ моли́твами уго́дника Твоего́, преподо́бнаго Серафи́ма, да вси́ уми́льно вопие́м Ти́: оте́ц на́ших Бо́же, благослове́н еси́. Припев: Преподо́бне о́тче Серафи́ме, моли́ Бо́га о на́с. Кто́ не почуди́тся, кто́ не просла́вит неизсле́димую глубину́ милосе́рдия Твоего́, Го́споди, я́ко яви́л еси́ всему́ ми́ру уго́дника Твоего́, преподо́бнаго Серафи́ма, моли́твенника те́плаго о на́с, вопию́щих Тебе́: оте́ц на́ших Бо́же, благослове́н еси́. Сла́ва Отцу́ и Сы́ну и Свято́му Ду́ху. Благода́рное сие́ пе́ние, от на́с приноси́мое тебе́, преподо́бне Серафи́ме, приими́ и все́м на́м, пра́зднующим святу́ю па́мять твою́ и покланя́ющимся ра́це моще́й твои́х, исцеле́ние да́руй, вопию́щим: оте́ц на́ших Бо́же, благослове́н еси́. И ны́не и при́сно и во ве́ки веко́в. Ами́нь. Богородичен: Ты́ еси́, Пресвята́я Богоро́дице, прибе́жище на́ше и утвержде́ние, моли́ Сы́на Твоего́ и Бо́га на́шего пода́ти на́м спасе́ние и грехо́в оставле́ние. Песнь 8 Ирмос: Царя́ Небе́снаго, Его́же пою́т во́и а́нгельстии, хвали́те и превозноси́те во вся́ ве́ки. Припев: Преподо́бне о́тче Серафи́ме, моли́ Бо́га о на́с. Доброде́тельному житию́ твоему́, преподо́бне, позави́дев, вра́г вселука́вый восхоте́ запя́тие тебе́ сотвори́ти, ты́ же, благода́тию Бо́жиею и моли́твами Влады́чицы посрами́в того́, Бо́га просла́вил еси́, песносло́вя: Го́спода по́йте, дела́, и превозноси́те Его́ во ве́ки. Припев: Преподо́бне о́тче Серафи́ме, моли́ Бо́га о на́с. Я́ко мо́лния, блиста́ющися, све́тится на поднебе́сней, та́ко и веща́ния о твои́х, преподо́бне, чудесе́х во всю́ зе́млю изыдо́ша. Мы́ же, дивя́щеся сла́ве твое́й, вопие́м: де́ти, благослови́те, свяще́нницы, воспо́йте, лю́дие, превозноси́те Го́спода во ве́ки. Сла́ва Отцу́ и Сы́ну и Свято́му Ду́ху. Су́етными и стра́стными помышле́нии мяту́щийся у́м на́ш исцели́, преподо́бне, во́лны зла́го неве́рия в земли́ на́шей укроти́, разсла́бленная жите́йскими попече́нии сердца́ на́ша укрепи́, да сла́вим Христа́ Соде́теля во вся́ ве́ки. И ны́не и при́сно и во ве́ки веко́в. Ами́нь. Богородичен: Ра́дуйся, престо́ле Госпо́день огнезра́чный; ра́дуйся, заре́ невеще́ственнаго блиста́ния; ра́дуйся, о́блаче возсия́вшаго Со́лнца пра́веднаго, Христа́ Спа́са на́шего, Его́же превозно́сим во вся́ ве́ки. Песнь 9 Ирмос: Вои́стинну Богоро́дицу, Тя́ испове́дуем, спасе́ннии Тобо́ю, Де́во Чи́стая, с безпло́тными ли́ки Тя́ велича́юще. Припев: Преподо́бне о́тче Серафи́ме, моли́ Бо́га о на́с. Вели́ким отце́м, дре́вле в посте́ и по́двизех просия́вшим, поревнова́в, преподо́бне, чрез вся́ дни́ живота́ твоего́ в моли́тве, слеза́х и труде́х пребы́л еси́, до́ндеже дости́гл еси́ небе́сныя оби́тели, те́мже тя́ досто́йно ублажа́ем. Припев: Преподо́бне о́тче Серафи́ме, моли́ Бо́га о на́с. Кре́пкою си́лою Христо́с Бо́г тя́ препоя́са и укрепи́ побежда́ти ко́зни де́монския, преподо́бне. Те́мже ны́не мо́лим тя́: моли́ Человеколю́бца Бо́га, да изба́вит все́х на́с от вра́жиих нахожде́ний и искуше́ний и спасе́т ду́ши на́ша. Сла́ва Отцу́ и Сы́ну и Свято́му Ду́ху. В боле́знех и ско́рбех на́ших к тебе́, преподо́бне, прибега́ем и из глубины́ душе́вныя вопие́м: бу́ди на́м небу́рное приста́нище и боле́знем ско́рый цели́тель и изба́ви на́с от вся́каго неду́га и ну́жды, да тя́ непреста́нно велича́ем. И ны́не и при́сно и во ве́ки веко́в. Ами́нь. Богородичен: Еди́наго от Святы́я Тро́ицы, Сло́ва и Сы́на родила́ еси́, Де́во Пречи́стая, Его́же с преподо́бными и пра́ведными моли́ о рабе́х Твои́х, ве́рою прося́щих грехо́в проще́ния. Светилен Прииди́те, вси́ ве́рнии, свяще́нными пе́сньми восхва́лим ди́внаго в чудесе́х преподо́бнаго Серафи́ма, но́ваго свети́льника Росси́йския земли́, а́нгелом собесе́дника и те́плаго моли́твенника к Бо́гу о чту́щих святу́ю па́мять его́. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: По Бо́зе упова́ние иму́ще на Тя́, Пречи́стая Богоро́дице, мо́лим Ти ся: Ро́ждшагося из Тебе́ умоли́ дарова́ти ми́р вселе́нней и ве́лию ми́лость.

Минея, 11 Мая, Канон святых Глас 3 Песнь 1 Ирмос: Во́ды дре́вле ма́нием Боже́ственным/ во еди́но со́нмище совокупи́вый/ и раздели́вши мо́ре изра́ильтеским лю́дем,/ Сей Бог наш препросла́влен есть,/ Тому́ Еди́ному пои́м, я́ко просла́вися. Припев: Святи́и равноапо́стольнии Кири́лле и Мефо́дие, моли́те Бо́га о нас. Во́ды мяте́жа мирска́го прейти́ недоумева́я, преподо́бне Мефо́дие,/ оста́вил еси́ вся кра́сная ми́ра сего́/ и, во а́нгельстем о́бразе на неви́димыя враги́ во́инствуя,/ Бо́гу еди́ному порабо́тал еси́, ра́достно воспева́я:/ Тому́ еди́ному пои́м, я́ко просла́вися. Припев: Святи́и равноапо́стольнии Кири́лле и Мефо́дие, моли́те Бо́га о нас. Избра́нный сосу́д от пеле́н показа́лся еси́, Кири́лле блаже́нне,/ ю́ношеских шата́ний чужд яви́вся и Му́дрость Боже́ственную возлюби́в,/ те́мже Святы́я Правосла́вныя Це́ркве уче́нием просвеще́н,/ и сам мно́гим учи́тель и просвети́тель был еси́. Сла́ва Отцу́ и Сы́ну и Свято́му Ду́ху. Вода́ми уче́ний ва́ших ороси́вшася,/ слове́нския страны́ да́же додне́сь Влады́це Христу́ плоды́ благоприя́тны прино́сят./ Сего́ ра́ди ублажа́ет вас Свята́я Це́рковь, зову́щи:/ от бед изба́вите нас, уго́дницы Христо́вы. И ны́не и при́сно и во ве́ки веко́в. Ами́нь. Богородичен: Во́ды грехо́вныя внидо́ша до души́ моея́, Влады́чице,/ и в тиме́нии страсте́й углебо́х,/ к Тебе́ прибега́ю, Всенепоро́чная,/ нечи́стых помышле́ний волне́ние утиши́/ и ми́рное устрое́ние ми да́руй. Песнь 3 Ирмос: И́же от несу́щих вся приведы́й,/ сло́вом созида́емая,/ соверша́емая Ду́хом,/ Вседержи́телю Вы́шний,/ в любви́ Твое́й утверди́ мене́. Припев: Святи́и равноапо́стольнии Кири́лле и Мефо́дие, моли́те Бо́га о нас. Глаго́л Госпо́день, я́ко – и́же по Мне ити́ хо́щет, да во́зьмет крест свой, –/ слу́хом се́рдца твоего́ услы́шав, преподо́бне Мефо́дие,/ крест и́ноческаго жития́ возложи́в на ра́мо твое́, после́довал еси́ Христу́,/ Его́же моли́, да и мене́, хла́днаго, в любви́ Свое́й утверди́т. Припев: Святи́и равноапо́стольнии Кири́лле и Мефо́дие, моли́те Бо́га о нас. И́же дре́вле Иа́кову в со́ннем виде́нии ле́ствицу, к небеси́ возводя́щую, показа́,/ Той и тебе́, свя́те Кири́лле, еще́ о́троку су́щу, в ди́внем сне Софи́ю де́ву обручи́:/ се же бысть Престо́лу Его́ приседя́щая Прему́дрость,/ Я́же в любви́ Всевы́шняго утверди́ тя. Сла́ва Отцу́ и Сы́ну и Свято́му Ду́ху. И́же от не су́щих вся Приведы́й, и вас, отцы́ досточу́днии,/ от чре́ва ма́терия освяти́ в сосу́ды избра́нная Себе́,/ во е́же пронести́ И́мя Его́ пред язы́ки;/ те́мже честну́ю па́мять ва́шу соверша́юще, мо́лим вас, Кири́лле и Мефо́дие,/ вла́ющийся ум наш во испове́дании пра́выя ве́ры утверди́ти. И ны́не и при́сно и во ве́ки веко́в. Ами́нь. Богородичен: Я́же ми́рови мир пода́вшая/ и Нача́льника тишины́ ро́ждшая,/ укроти́ во́лны страсте́й мои́х, Чи́стая,/ и на ка́мени мя безстра́стия утверди́. Седален, глас 4 Уподо́бил еси́ со́лнцу Тро́ицу Святу́ю Единосу́щную, Кири́лле Богодухнове́нне,/ во о́браз Святы́я Тро́ицы зри́мому на небеси́ со́лнцу созда́ну бы́ти, глаго́ля:/ подо́бие Бо́га Отца́ со́лнечный круг есть,/ не имы́й конца́, ни нача́ла,/ и, я́коже от кру́га со́лнечна исхо́дит луча́ све́та, поднебе́сную просвеща́ющая,/ си́це от Бо́га Отца́ ражда́ется Сын, О́тчее сия́ние,/ теплота́ же, вселе́нную оживля́ющая,/ от того́жде кру́га ку́пно с луче́ю излива́емая,/ подо́бие есть Ду́ха Свята́го,/ от Того́жде Отца́ исходя́щаго./ Ди́вному уче́нию твоему́ вне́млюще,/ и мы в Тро́ице Еди́ному Бо́гу покланя́емся,/ па́мять же твою́ ублажа́ем, досточу́дне. Песнь 4 Ирмос: Положи́л еси́ к нам тве́рдую любо́вь, Го́споди:/ Единоро́днаго бо Твоего́ Сы́на/ за ны на смерть дал еси́./ Те́мже Ти зове́м, благодаря́ще:/ сла́ва си́ле Твое́й, Го́споди. Припев: Святи́и равноапо́стольнии Кири́лле и Мефо́дие, моли́те Бо́га о нас. Положи́л еси́ хране́ние за́поведей, я́ко ка́мень краеуго́лен,/ на не́мже созида́я хра́мину души́ твоея́, преподо́бне Мефо́дие,/ Ду́ха Свята́го селе́ние сотвори́л ю еси́;/ аз же, селе́ние греха́ сый, к тебе́ припа́даю, всеблаже́нне,/ очи́сти мя росо́ю моли́тв твои́х, да зову́, благодаря́:/ сла́ва си́ле Твое́й, Го́споди. Припев: Святи́и равноапо́стольнии Кири́лле и Мефо́дие, моли́те Бо́га о нас. Даждь ми, да разуме́ю, что есть уго́дно Тебе́, Влады́ко, –/ взыва́л еси́, блаже́нне Кири́лле,/ егда́ со ю́ным царе́м в науче́ние кни́жное вдан был еси́./ Сего́ ра́ди, ку́пно со вне́шним любому́дрием,/ Ду́ха прему́дрости и стра́ха Бо́жия свы́ше прия́л еси́,/ земну́ю же му́дрость ни во что́же вмени́л еси́, зовы́й:/ сла́ва си́ле Твое́й, Го́споди. Сла́ва Отцу́ и Сы́ну и Свято́му Ду́ху. Положи́л еси́ любо́вь к Зижди́телю твоему́, я́ко печа́ть, на се́рдце твое́м, всеблаже́нне./ Сего́ ра́ди земну́ю обру́чницу и сла́ву ми́ра сего́ отри́нул еси́, Кири́лле,/ и, я́ко пти́ца, от се́ти ловя́щих бе́гая,/ в ти́хое приста́нище и́ночествующих дости́гл еси́/ и в ри́зу ра́дования обле́клся еси́, воспева́я со Мефо́дием:/ сла́ва си́ле Твое́й, Го́споди. И ны́не и при́сно и во ве́ки веко́в. Ами́нь. Богородичен: Положи́в беззако́ния и непра́вды моя́ предо мно́ю,/ ви́жду, я́ко па́че песка́ морска́го умно́жишася./ К Тебе́ прибега́ю, Всенепоро́чная,/ стру́пы души́ моея́ исцели́,/ да зову́ к Ро́ждшемуся от Тебе́, благодаря́:/ сла́ва си́ле Твое́й, Го́споди. Песнь 5 Ирмос: Я́ко ви́де Иса́ия обра́зно/ на Престо́ле превознесе́на Бо́га,/ от А́нгел сла́вы дориноси́ма,/ о, окая́нный, – вопия́ше, – аз!/ прови́дех бо воплоща́ема Бо́га, Све́та Невече́рня,/ и ми́ром Влады́чествующа. Припев: Святи́и равноапо́стольнии Кири́лле и Мефо́дие, моли́те Бо́га о нас. Я́ко крин благоуха́нный, в пусты́ни процве́л еси́, преподо́бне Мефо́дие,/ моли́твами, бде́нием и поще́нием ду́шу твою́ украша́я,/ и, на земли́ равноа́нгельно пожи́в,/ ны́не со А́нгелы све́тло созерца́еши Све́та Невече́рня/ и ми́ром Влады́чествующа. Припев: Святи́и равноапо́стольнии Кири́лле и Мефо́дие, моли́те Бо́га о нас. От А́нгел сла́вы дориноси́мому моля́ся в пусты́ни, Кири́лле,/ ну́ждею в Ца́рствующий град возвраще́н был еси́/ и са́ном свяще́нства украси́лся еси́,/ да путь спасе́ния челове́ком пока́жеши,/ све́том уче́ния просвеща́я и Безкро́вную Же́ртву о всех принося́ Све́ту Невече́рнему/ и ми́ром Влады́чествующу. Сла́ва Отцу́ и Сы́ну и Свято́му Ду́ху. Я́ко кла́дязь прему́дрости неисчерпа́емый, яви́лся еси́, Богоно́се Кири́лле,/ егда́ в сарацы́ны на препре́ние ху́лящих Пресвяту́ю Тро́ицу от царя́ по́слан был еси́:/ не возмого́ша бо му́тными вода́ми злоуче́ния потопи́ти тя,/ Све́том Невече́рним свы́ше озаря́ема. И ны́не и при́сно и во ве́ки веко́в. Ами́нь. Богородичен: Я́ко дре́во непло́дное, сый,/ ка́ко не ужаса́юся гро́знаго посече́ния, о окая́нный аз!/ Ско́ро притецы́ ко Богоблагода́тней, душе́ моя́:/ а́ще бо не Она́ засту́пит тя,/ узре́ти не и́маши Све́та Невече́рня и ми́ром Влады́чествующа. Песнь 6 Ирмос: Бе́здна после́дняя грехо́в обы́де мя,/ и исчеза́ет дух мой;/ но простры́й, Влады́ко, высо́кую Твою́ мы́шцу,/ я́ко Петра́, мя, Упра́вителю, спаси́. Припев: Святи́и равноапо́стольнии Кири́лле и Мефо́дие, моли́те Бо́га о нас. Се, я́ко пучи́на морска́я, естество́ Бо́жие есть,/ непостижи́мое умо́м и неизрече́нное глаго́лы, –/ рекл еси́ ко ага́ряном, прему́дре Кири́лле, –/ ту́ю бо пучи́ну кроме́ свята́го Ева́нгелия преплы́ти хотя́щия потопля́ются, не ве́дуще пе́ти:/ я́ко Петра́ ны, Упра́вителю, спаси́. Припев: Святи́и равноапо́стольнии Кири́лле и Мефо́дие, моли́те Бо́га о нас. В бе́здне ра́зума лжеиме́ннаго угле́бшии ага́ряне/ та́йно яд сме́ртный предложи́ша тебе́;/ реки́й же во Ева́нгелии Христо́с:/ я́ко а́ще что сме́ртно испие́те, не вреди́т вы, –/ соблюде́ тя це́ла и с че́стию в Ца́рствующий град возврати́./ Ты же, царе́м и патриа́рхом досто́йно ублажа́емь,/ не превозне́слся еси́ и взыва́ти не преста́л еси́:/ я́ко Петра́ мя, Упра́вителю, спаси́. Сла́ва Отцу́ и Сы́ну и Свято́му Ду́ху. Дре́вле реки́й Боже́ственный Дух:/ отдели́те Ми Варна́ву и Са́вла на де́ло, на не́же призва́х их;/ подо́бне и вас, отцы́ преподо́бнии,/ в слове́нския страны́ посла́ти повеле́,/ и та́ко лю́дие, во тьме и се́ни сме́ртней седя́щии,/ све́том уче́ния ва́шего просвети́вшеся, воззва́ша:/ я́ко Петра́ ны, Упра́вителю, спасл еси́. И ны́не и при́сно и во ве́ки веко́в. Ами́нь. Богородичен: Бе́здна после́дняя грехо́в обы́де мя,/ и, тре́петом одержи́мь есмь, ужаса́яся всеконе́чнаго потопле́ния./ Те́мже мольбу́ приношу́ Ти, Пренепоро́чная:/ поми́луй стра́стную мою́ ду́шу,/ простри́ ру́ку Твою́, я́ко Блага́я,/ и, я́ко Петра́ спасе́ Сын Твой,/ та́ко мя, Упра́вительнице, спаси́. Кондак, глас 3 Свяще́нную дво́ицу просвети́телей на́ших почти́м,/ Боже́ственных писа́ний преложе́нием исто́чник Богопозна́ния нам источи́вших,/ из него́же да́же додне́сь неоску́дно почерпа́юще,/ ублажа́ем вас, Кири́лле и Мефо́дие,/ Престо́лу Вы́шняго предстоя́щих/ и те́пле моля́щихся о душа́х на́ших. Икос В доброде́тели просия́вшия пропове́дники благоче́стия,/ и́стинныя столпы́ и основа́ния Це́ркве,/ трубы́ Боже́ственныя Христо́вых догма́тов,/ Богоно́сныя отцы́ Мефо́дия и Кири́лла, прииди́те, ве́рнии, восхва́лим:/ ти́и бо, мрак неве́рия от нас отгна́вше/ и е́реси нече́стия огне́м Ду́ха попали́вше,/ преложе́нием писа́ний род слове́нский из ди́вия ма́слины в благопло́дную премени́ша,/ и Боже́ственным Креще́нием в ве́ру Христо́ву приведо́ша,/ и вселе́нную всю мно́жеством чуде́с испо́лниша./ Того́ ра́ди днесь а́ки венцено́сцы предстоя́т Вседержи́телю Бо́гу, к ни́мже возопии́м:/ отцы́ Боже́ственнии и равноапо́стольныи,/ предста́тельством ва́шим да́руйте всем племено́м слове́нским в правове́рии тве́рдость и единомы́слие,/ те́пле моля́щеся о душа́х на́ших. Песнь 7 Ирмос: Пре́жде о́бразу злато́му, перси́дскому чти́лищу,/ о́троцы не поклони́шася,/ трие́ пою́ще посреде́ пе́щи:/ отце́в Бо́же, благослове́н еси́. Припев: Святи́и равноапо́стольнии Кири́лле и Мефо́дие, моли́те Бо́га о нас. Пре́жде еди́н со Еди́ным пребыва́я,/ ду́шу твою́, я́ко рай богонасажде́нный, сотвори́л еси́, Мефо́дие,/ та́же на про́поведь апо́стольскую ку́пно с Богому́дрым Кири́ллом шед,/ во страна́х слове́нских потруди́лся еси́,/ иде́же, я́ко о́троцы, огне́м нече́стия неопаля́еми, воспева́ете:/ отце́в Бо́же, благослове́н еси́. Припев: Святи́и равноапо́стольнии Кири́лле и Мефо́дие, моли́те Бо́га о нас. Иуде́и и сарацы́ны препре́л еси́, прему́дре Кири́лле,/ и страну́ Хаза́рскую святы́м Креще́нием просвети́л еси́, у́зников мно́жество свобожда́я,/ и в пусты́ни безво́дней во́ду сла́ную в сла́дкую преложи́л еси́./ Лю́дие же, спасе́ннии тобо́ю, воспева́ху:/ отце́в Бо́же, благослове́н еси́. Сла́ва Отцу́ и Сы́ну и Свято́му Ду́ху. Сосу́ди избра́ннии бы́сте, отцы́ преподо́бнии, пронести́ И́мя Госпо́дне пред язы́ки,/ сего́ ра́ди и и́ны страны́ слове́нския возжеле́ша све́том уче́ния ва́шего озари́тися./ Вы же предсуди́сте сла́дость безмо́лвия на труд апо́стольский премени́ти,/ да мно́жайшия Христу́ приобря́щете и ку́пно с ни́ми воспое́те:/ отце́в Бо́же, благослове́н еси́. И ны́не и при́сно и во ве́ки веко́в. Ами́нь. Богородичен: Сосу́д полн страсте́й есмь, Пресвята́я Богоро́дице Де́во,/ и сме́рти о́ныя после́дния и о́гненнаго преще́ния страшу́ся./ Но Ты, Пречи́стая, спаси́ мя, погиба́ющего,/ кре́постию препоя́ши дух мой,/ да плени́цы грехо́вныя расто́рг, благода́рственно воспою́:/ Изба́вителя плене́нных ро́ждшая, благослове́на еси́. Песнь 8 Ирмос: Веще́ственнаго огня́ пла́мень/ невеще́ственным увяди́ша Богозри́мии о́троцы, и поя́ху:/ благослови́те, вся дела́ Госпо́дня, Го́спода. Припев: Святи́и равноапо́стольнии Кири́лле и Мефо́дие, моли́те Бо́га о нас. Невеще́ственным све́том благода́ти вы́ну озаря́емь,/ прия́л еси́ сан свяще́нства, блаже́нне Кири́лле,/ и споспе́шествующу тебе́ Ду́ху Свято́му, писмена́ слове́нская изобре́л еси́,/ да богодухнове́нных книг на сро́дную им бесе́ду преложе́нием лю́дие просвети́вшеея, воспою́т:/ благослови́те, вся дела́ Госпо́дня, Господа. Припев: Святи́и равноапо́стольнии Кири́лле и Мефо́дие, моли́те Бо́га о нас. Пе́рвее сы́на Гро́мова неземны́я глаго́лы: в нача́ле бе Сло́во, –/ я́ко ве́ры на́шея глави́зну возгреме́ли есте́, отцы́ всехва́льнии./ Те́мже псалти́рь сладкогла́сную на глаго́лы слове́нския преложи́ли есте́,/ е́юже и ны́не Свята́я Це́рковь, веселя́щися, взыва́ет:/ благослови́те, вся дела́ Госпо́дня, Го́спода. Сла́ва Отцу́ и Сы́ну и Свято́му Ду́ху. Невеще́ственным сокро́вищем обогати́сте нас, отцы́ досточу́днии:/ Боже́ственная бо Литурги́я на язы́це слове́нстем нача́тся от вас соверша́тися./ Сея́ благода́ти и мы додне́сь прича́стницы су́ще, воспева́ем Бо́га, глаго́люще:/ благослови́те, вся дела́ Госпо́дня, Го́спода. И ны́не и при́сно и во ве́ки веко́в. Ами́нь. Богородичен: Огнь искуше́ний и напа́стей злых обы́де мя,/ к Тебе́ прибега́ю, Богоро́дице Де́во:/ не пре́зри, Чи́стая, моле́ний раба́ Твоего́,/ от одержа́щих мя лю́тых изба́ви,/ да, благословля́я, благословлю́ Тя и превознесу́ и́мя Твое́ во ве́ки. Песнь 9 Ирмос: Тебе́, неопали́мую купину́ и Святу́ю Де́ву,/ Ма́терь Све́та и Богоро́дицу,/ наде́жду всех нас, велича́ем. Припев: Святи́и равноапо́стольнии Кири́лле и Мефо́дие, моли́те Бо́га о нас. Тебе́ по достоя́нию восхвали́ти кто возмо́жет, Мефо́дие всесла́вне?/ По́двиги и труды́ твоя́,/ я́же апо́стольски спасе́ния ра́ди люде́й заблу́ждших подъя́л еси́, Кири́лле, кто изочте́т?/ Па́че же мы, ва́ми сла́вити Бо́га Вы́шняго на сро́днем нам язы́це научи́вшеся,/ единому́дренно и вас с Ним велича́ем. Припев: Святи́и равноапо́стольнии Кири́лле и Мефо́дие, моли́те Бо́га о нас. Тебе́, Кири́лле блаже́нне, я́ко уже́ де́ло соверши́вшу и тече́ние сконча́вшу,/ бысть извеще́ние свы́ше о кончи́не твое́й,/ е́же прии́м, ра́достно воспе́л еси:/ о ре́кших мне, вни́дем во дворы́ Госпо́дни, возвесели́ся дух мой./ Та́же вожделе́в, в Го́рняя душе́ю возне́слся еси́,/ иде́же с Небе́сными си́лами Тро́ицу Единосу́щную вы́ну велича́еши. Сла́ва Отцу́ и Сы́ну и Свято́му Ду́ху. Це́ркве Мора́вския епи́скопство прие́м, преподо́бне Мефо́дие,/ мно́гия труды́ и по́двиги, ве́ру святу́ю возвеща́я, подъя́л еси́,/ мно́гия беды́ и изгна́ния претерпе́л еси́,/ ны́не же ку́пно со святы́м Кири́ллом в Вы́шних ра́дующеся, моли́теся о нас,/ да мы я́ко засту́пники и хода́таи на́ша вы́ну вас велича́ем. И ны́не и при́сно и во ве́ки веко́в. Ами́нь. Богородичен: Превы́шшая А́нгел и Херуви́м честне́йшая,/ предста́тельством святы́х Кири́лла и Мефо́дия, на на́ше смире́ние умилосе́рдися, мо́лим Ти ся,/ из глубины́ грехо́вныя возведи́ и ве́чнаго осужде́ния нас изба́ви,/ да ку́пно с ни́ми Тебе́, Ма́терь Све́та и Богоро́дицу, наде́жду всех нас, велича́ем. Светилен Учи́тели святи́и,/ па́мять ва́шу све́тло пра́зднующе,/ мо́лим вас всеусе́рдно:/ язы́ки, и́хже сокро́вищем благове́стия обогати́сте,/ на ка́мени испове́дания Христо́ва утверди́те,/ и соблюди́те в ми́ре живо́т наш.

Минея, 2 Мая, Канон святителя Глас 8 Песнь 1 Ирмос: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:/ Изба́вителю и Бо́гу на́шему пои́м. Припев: Святи́телю, о́тче Афана́сие, моли́ Бо́га о на́с. Безсме́ртию быв тезоимени́т,/ в ве́ре тве́рдей житие́ твое́ проше́д,/ блаже́ннаго безсме́ртия прича́стник яви́лся еси́, о́тче святи́телю Афана́сие,/ ны́не Христо́ви предстоя́, помина́й нас, почита́ющих тя. Припев: Святи́телю, о́тче Афана́сие, моли́ Бо́га о на́с. Песнь хвале́бную прино́сим ти, святи́телю, в прославле́ние па́мяти твоея́,/ а́ще и не довле́ет ум наш по достоя́нию благохвали́ти тя,/ но ты сам помози́ нам почива́ющею на тебе́ неоску́дною благода́тию. Сла́ва Отцу́ и Сы́ну и Свято́му Ду́ху. Очи́стив от вся́кия скве́рны ду́шу и те́ло, святи́телю Афана́сие,/ храм досто́ин Бо́гу показа́лся еси́/ и Тро́ицы жили́ще яви́лся еси́,/ священнотаи́нниче пребога́те. И ны́не и при́сно и во ве́ки веко́в. Ами́нь. Богородичен: Храм освяще́н и ле́потою благоукраше́н воздви́же уго́дник Бо́жий Афана́сий/ во сла́ву Твою́ и честь, Пречи́стая Влады́чице,/ те́мже не преста́й моля́щися со святи́телем Христу́ Бо́гу о душа́х на́ших. Песнь 3 Ирмос: Небе́снаго кру́га Верхотво́рче, Го́споди,/ и Це́ркве Зижди́телю,/ Ты мене́ утверди́ в любви́ Твое́й,/ жела́ний кра́ю, ве́рных утвержде́ние,/ Еди́не Человеколю́бче. Припев: Святи́телю, о́тче Афана́сие, моли́ Бо́га о на́с. Све́том благода́ти вои́стинну просия́л еси́, святи́телю Афана́сие,/ и был еси́ священноде́латель Ева́нгелия Христо́ва. Припев: Святи́телю, о́тче Афана́сие, моли́ Бо́га о на́с. Благода́тными словесы́ твои́ми напая́ема па́ства твоя́,/ го́рькости ересе́й отрица́ется. Сла́ва Отцу́ и Сы́ну и Свято́му Ду́ху. До́бре упа́сл еси́ ста́до Влады́ки твоего́, о́тче Афана́сие,/ те́мже во оби́тели Небе́сныя всели́лся еси. И ны́не и при́сно и во ве́ки веко́в. Ами́нь. Богородичен: Даждь нам по́мощь моли́твами Твои́ми,/ прило́ги отгоня́ющи лю́тых обстоя́ний, Де́во Всепе́тая. Седален, глас 4 В пра́вей ве́ре Це́рковь Христо́ву упа́сл еси́, святи́телю Афана́сие,/ и ерети́чества исто́ргл еси́ го́рькия пле́велы./ Те́мже в Вы́шних черто́зех водворя́ешися, блаже́нне. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Сло́во О́тчее, Христа́ Бо́га на́шего,/ от Тебе́ воплоти́вшагося, позна́хом, Богоро́дице Де́во,/ Еди́на Чи́стая, Еди́на Благослове́нная,/ тем, непреста́нно Тя воспева́юще, велича́ем. Песнь 4 Ирмос: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́. Припев: Святи́телю, о́тче Афана́сие, моли́ Бо́га о на́с. Уста́ богодухно́венная стяжа́в, святи́телю Афана́сие,/ обличи́л еси́ злы́я нра́вы лука́вых челове́к/ и, сконча́вся в непра́веднем изгна́нии, при Фаво́ре Мга́рстем,/ оста́вил еси́ нам, недосто́йным, честно́е те́ло твое́, точа́щее чудеса́. Припев: Святи́телю, о́тче Афана́сие, моли́ Бо́га о на́с. Блаже́н яви́лся еси́,/ изгна́н пра́вды ра́ди, за́вистию злонра́вных челове́к,/ и нас посети́л еси́ твои́м благослове́нием./ Те́мже ны́не от всех почита́ешися свяще́нными пе́сньми,/ му́дре святи́телю Афана́сие. Сла́ва Отцу́ и Сы́ну и Свято́му Ду́ху. Пе́рвее был еси́ архиере́й нача́льнаго гра́да Кри́тскаго,/ та́же, по взя́тии того́ от ага́рян, Патриа́рх Константи́ню гра́ду поста́влен был еси́,/ иде́же богодухнове́нными уче́нии ста́до твое́ напая́л еси́,/ блаже́нне святи́телю Афана́сие. И ны́не и при́сно и во ве́ки веко́в. Ами́нь. Богородичен: Тя, Блаже́нную, Еди́ну избра́нную и непоро́чную обре́т,/ воплоща́ется Пребоже́ственное Сло́во, Богора́дованная. Песнь 5 Ирмос: Просвети́ нас повеле́нии Твои́ми, Го́споди,/ и мы́шцею Твое́ю высо́кою/ Твой мир подаждь нам,/ Человеколю́бче. Припев: Святи́телю, о́тче Афана́сие, моли́ Бо́га о на́с. Безсме́ртен по и́мени досто́йно наре́клся еси́, о́тче наш святи́телю Афана́сие,/ зане́, житие́ твое́ чи́сте соверши́в, во Христа́ обле́клся еси́,/ те́мже Царь Сла́вы и Бог ве́чный избра́ тя в жили́ще Себе́. Припев: Святи́телю, о́тче Афана́сие, моли́ Бо́га о на́с. Изба́ви чту́щия тя, святи́телю Афана́сие,/ от грехо́вныя бу́ри, от бед и скорбе́й,/ к ти́хому приста́нищу приводя́ богоприя́тными твои́ми моли́твами. Сла́ва Отцу́ и Сы́ну и Свято́му Ду́ху. До́брый па́стырь ста́да Христо́ва яви́лся еси́, уго́дниче святи́телю Афана́сие,/ не преста́й моля́ся ко Го́споду,/ да спасе́т ду́ши на́ша. И ны́не и при́сно и во ве́ки веко́в. Ами́нь. Богородичен: Досто́йно Тя сла́вят святи́тельстии собо́ри и вси преподо́бных ли́цы:/ Зижди́теля бо всех, Бо́жие Сло́во, на руку́ Твое́ю носи́ла еси́. Песнь 6 Ирмос: Моли́тву пролию́ ко Го́споду/ и Тому́ возвещу́ печа́ли моя́,/ я́ко зол душа́ моя́ испо́лнися/ и живо́т мой а́ду прибли́жися,/ и молю́ся, яко Ио́на:/ от тли, Бо́же, возведи́ мя. Припев: Святи́телю, о́тче Афана́сие, моли́ Бо́га о на́с. Оби́тель сию́, с ве́рою почита́ющую тя, святи́телю Афана́сие,/ храни́ от находя́щих искуше́ний, лю́тых обстоя́ний и вся́ких скорбе́й,/ непреста́нно моля́ся ко Влады́це Христу́ о ста́де твое́м. Припев: Святи́телю, о́тче Афана́сие, моли́ Бо́га о на́с. Ты и по сме́рти, я́ко жив сый, чудоде́йствуеши,/ да́руя немощны́м исцеле́ния Боже́ственною благода́тию,/ рече́ бо Госпо́дь:/ прославля́ющия Мя просла́влю. Сла́ва Отцу́ и Сы́ну и Свято́му Ду́ху. Напа́стей о́блацы покры́ша ны, и теле́сныя боле́зни умно́жишася./ К тебе́ прибега́ем и тебе́ призыва́ем, святи́телю Афана́сие:/ потщи́ся на по́мощь, ускори́ на моли́твы,/ от бед и ско́рбных обстоя́ний нас избавля́я. И ны́не и при́сно и во ве́ки веко́в. Ами́нь. Богородичен: Очи́стив свое́ се́рдце, Авраа́м, пра́отец Твой, Чи́стая Де́во,/ прия́т обеща́ние от Бо́га:/ благослови́тися о се́мени его́ всем язы́ком./ Тобо́ю исполне́ние обетова́ния прие́млем днесь. Кондак, глас 8 О всесвяте́йший па́стырю и учи́телю вселе́нныя,/ преблаже́нне о́тче наш святи́телю Афана́сие!/ К ра́це моще́й твои́х припа́дающе, усе́рдно мо́лим тя:/ приими́ от убо́гих душ на́ших любо́вию приноси́мая тебе́ моле́ния/ и, я́ко име́я дерзнове́ние у Престо́ла Влады́чня,/ испроси́ моли́твами твои́ми чту́щим тя/ со А́нгелы и все́ми святы́ми/ непреста́нно Пресвяте́й Тро́ице воспева́ти: аллилу́ия. Икос Ле́ностию окая́нный аз во глубину́ греха́ впадо́х,/ но, я́ко па́стырь добр, воздви́гни мя, святе́йший о́тче,/ и стра́сти угаси́, зле му́чащия мя,/ я́ко да, воста́в, чи́сте воспою́ твое́ светоно́сное торжество́,/ и́мже Влады́ка вселе́нныя просла́ви тя досто́йно, я́ко раба́ верне́йша,/ учи́теля прему́дра, соверши́теля Та́ин Бо́жиих и блюсти́теля за́поведей,/ я́же до́бре сохрани́л еси́,/ пома́зание свято́е, Афана́сие прему́дре./ Того́ при́сно моли́,/ да да́рует чту́щим тя со А́нгелы и все́ми святы́ми/ непреста́нно Пресвяте́й Тро́ице воспева́ти: аллилу́ия. Песнь 7 Ирмос: О́троцы евре́йстии в пещи́/ попра́ша пла́мень дерзнове́нно/ и на ро́су огнь преложи́ша, вопию́ще:/ благослове́н еси́, Го́споди Бо́же, во ве́ки. Припев: Святи́телю, о́тче Афана́сие, моли́ Бо́га о на́с. Во глубину́ зол впадо́х, страстьми́ погружа́емь,/ и ко врато́м а́да прибли́жихся, грехми́ побежда́емь./ Спаси́ мя моли́твами твои́ми, Богоблаже́нне, и воздви́гни, пою́ща:/ благослове́н Бог отце́в на́ших. Припев: Святи́телю, о́тче Афана́сие, моли́ Бо́га о на́с. Вся́ких лю́тых неду́гов врач всеизря́ден яви́лся еси́, о́тче Афана́сие./ Исцели́ у́бо не́мощь души́ моея́/ и сподо́би во умиле́нии се́рдца взыва́ти:/ отце́в на́ших Бо́же, благослове́н еси́. Сла́ва Отцу́ и Сы́ну и Свято́му Ду́ху. Ди́вный во святы́х Свои́х,/ просла́ви Госпо́дь и в земли́ Росси́йстей уго́дника Своего́, преблаже́ннаго святи́теля Афана́сия,/ па́стыря до́браго и моли́твенника о душа́х на́ших. И ны́не и при́сно и во ве́ки веко́в. Ами́нь. Богородичен: Всесла́вная всех Цари́це,/ мольба́ми святи́теля Афана́сия сохрани́ невреди́мы от вся́каго зла́го обстоя́ния лю́ди Твоя́,/ всегда́ Тя моля́щия, я́ко Предста́тельницу ми́рови. Песнь 8 Ирмос: Седмери́цею пещь/ халде́йский мучи́тель/ Богочести́вым неи́стовно разжже́,/ си́лою же лу́чшею спасе́ны, сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки. Припев: Святи́телю, о́тче Афана́сие, моли́ Бо́га о на́с. Бога́тство уче́ний твои́х неску́дно расточа́л еси́, святи́телю Афана́сие,/ и́мже обогати́ся ум а́лчущих словесе́ твоего́./ Изгна́н же быв непра́ведно от престо́ла Царягра́да,/ к ве́рным лю́дем Росси́йския земли́ прише́л еси́/ и в Фаво́ре Мга́рстем блаже́нныя кончи́ны сподобля́ешися./ Те́мже вопие́м:/ благослови́те, дела́ Госпо́дня, Го́спода,/ по́йте и превозноси́те Его́ во ве́ки. Припев: Святи́телю, о́тче Афана́сие, моли́ Бо́га о на́с. Яко ве́сна, яви́лся еси́, блаже́нне,/ та́инственными цве́ты даро́в Боже́ственных благоуха́я,/ разреша́я от напа́стей и скорбе́й ве́рная ча́да твоя́, к тебе́ притека́ющая и Бо́гу вопию́щая:/ благослови́те, дела́ Госпо́дня, Го́спода,/ по́йте и превозноси́те Его́ во ве́ки. Сла́ва Отцу́ и Сы́ну и Свято́му Ду́ху. Я́ко лоза́ многопло́дная, доброде́телей плоды́ израща́ющая,/ яви́шася словеса́ твоя́, благода́ти испо́лненная:/ прише́д бо ко ага́ряном, мольбу́ о лю́дех твои́х прине́сл еси́./ Ти́и же, ви́девше тя, умили́шася/ и, моле́ния ра́ди твоего́, преста́ша убива́ти кри́тския лю́ди, вопию́щии:/ благослови́те, дела́ Госпо́дня, Го́спода,/ по́йте и превозноси́те Его́ во ве́ки. И ны́не и при́сно и во ве́ки веко́в. Ами́нь. Богородичен: Вы́шний Престо́ле, Де́во Богоневе́сто,/ до́лу лежа́щее естество́ на́ше к Небеси́ возво́диши,/ те́мже Тя вси по до́лгу сла́вим. Песнь 9 Ирмос: Ужасе́ся о сем Не́бо,/ и земли́ удиви́шася концы́,/ я́ко Бог яви́ся челове́ком пло́тски/ и чре́во Твое́ бысть простра́ннейшее Небе́с/ Тем Тя, Богоро́дицу,/ А́нгелов и челове́к чинонача́лия велича́ют. Припев: Святи́телю, о́тче Афана́сие, моли́ Бо́га о на́с. Днесь све́тло красу́ется свята́я па́мять твоя́,/ и ты, святи́телю Афана́сие, я́ко со́лнце, блиста́еши, ве́рных озаря́я,/ во Мга́рстей же оби́тели мно́зи, приходя́щии к тебе́ с ве́рою, прие́млют исцеле́ния./ Те́мже тя велича́ем. Припев: Святи́телю, о́тче Афана́сие, моли́ Бо́га о на́с. Соше́дшеся днесь, досто́йно хва́лим тя, святи́телю Афана́сие,/ и моще́й твои́х чтим ра́ку,/ прося́ще пода́ти нам моли́твами твои́ми от страсте́й избавле́ние,/ боле́зней исцеле́ние, грехо́в оставле́ние, от напа́стей свобожде́ние,/ и я́ко уго́дника Бо́жия вси тя велича́ем. Сла́ва Отцу́ и Сы́ну и Свято́му Ду́ху. Сла́ву твою́ воспе́ти по досто́инству невозмо́жно есть:/ чудеса́ бо мно́га соверша́еши/ и исцеле́ния незави́стно источа́еши/ с ве́рою приходя́щим к тебе́, Афана́сие, Росси́йская похвало́./ Те́мже я́ко уго́дника Бо́жия вси тя велича́ем. И ны́не и при́сно и во ве́ки веко́в. Ами́нь. Богородичен: Ты еси́, Богоро́дице, ору́жие на́ше и стена́,/ Ты еси́ заступле́ние к Тебе́ прибега́ющих,/ Тя ны́не на моли́тву подвиза́ем,/ да изба́вимся от враг на́ших. Светилен Све́тло пра́зднуется днесь церко́вное торжество́,/ в прославле́ние жития́ и чуде́с твои́х, святи́телю о́тче Афана́сие,/ ты же, предстоя́ во све́те сла́вы лицу́ Бо́жию,/ помяни́ нас, чту́щих святу́ю па́мять твою́. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: По Бо́зе на Тя, Пречи́стая, упова́ние возлага́ем:/ не пре́зри нас в лю́тых ско́рбех и напа́стех,/ но Твои́ми мольба́ми ко Христу́, Сы́ну Твоему́,/ невреди́мы да́же до конца́ нас сохрани́.

Минея, 6 Августа, Кано́н Преображению Господа нашего Иисуса Христа Глас 4 Песнь 1 Ирмос: Ли́цы изра́ильтестии,/ невла́жными стопа́ми/ понт Чермны́й и вла́жную глубину́ прогна́вше,/ вса́дники триста́ты враги́ ви́дяще в ней погруже́ны,/ с весе́лием поя́ху:/ пои́м Бо́гу на́шему, я́ко просла́вися. Припев: Слáва Тебé, Бóже нáш, слáва Тебé. Глаго́лы живо́тныя друго́м Христо́с/ и о Боже́ственнем наказу́я Ца́рствии, рече́:/ во Мне Отца́ позна́йте;/ Све́том я́ко облиста́я непристу́пным, в ра́дости пою́ще:/ пои́м Бо́гу на́шему, я́ко просла́вися. Сла́ва Отцу́ и Сы́ну и Свято́му Ду́ху. Си́лою язы́к облече́теся, дру́зи ученицы́,/ чу́дни же бу́дете в бога́тстве их, я́ко сла́вы напо́лнитеся,/ я́ко явлю́ся светле́е со́лнца, облиста́я в ра́дости пою́щих:/ пои́м Бо́гу на́шему, я́ко просла́вися. И ны́не и при́сно и во ве́ки веко́в. Ами́нь. Дне́сь Христо́с, на горе́ Фаво́рстей просия́в я́сно Боже́ственною заре́ю,/ я́коже обеща́ся, ученико́м обнажи́ зрак,/ светоно́сныя же напо́лнившеся Боже́ственныя зари́, в ра́дости поя́ху:/ пои́м Бо́гу на́шему, я́ко просла́вися. Песнь 3 Ирмос: Лук си́льных изнемо́же,/ и немощству́ющии препоя́сашася си́лою,/ сего́ ра́ди утверди́ся в Го́споде се́рдце мое́. Сла́ва Отцу́ и Сы́ну и Свято́му Ду́ху. Во всего́ Ада́ма обле́кся, Христе́,/ очерне́вшее, измени́в, просвети́л еси́ дре́вле естество́/ и измене́нием зра́ка Твоего́ богосоде́лал еси́. И ны́не и при́сно и во ве́ки веко́в. Ами́нь. Столпо́м огнезра́чным и о́блаком дре́вле/ и́же в пусты́ни Изра́иля ве́дый,/ дне́сь на горе́ Фаво́рстей неизрече́нно во све́те Христо́с просия́. Седален, глас 4 На горе́ Фаво́рстей преобрази́лся еси́, Иису́се,/ посреде́ Илии́ и Моисе́я прему́дрых, со Иа́ковом, и Петро́м, и Иоа́нном./ Петр же, сопребыва́я, сия́ Тебе́ глаго́лаше:/ добро́ зде е́сть сотвори́ти три се́ни:/ еди́ну Моисе́ю, и еди́ну Илии́, и еди́ну Тебе́, Влады́це Христу́./ и́же тогда́ Свет Твой сим возсия́вый, просвети́ души́ на́ша. Песнь 4 Ирмос: Услы́шах сла́вное смотре́ние твое́, Христе́ Бо́же,/ я́ко роди́лся еси́ от Де́вы,/ да от ле́сти изба́виши зову́щия:/ сла́ва си́ле Твое́й, Го́споди. Припев: Слáва Тебé, Бóже нáш, слáва Тебé. Зако́н в Сина́и писа́нием вообража́я, Христе́ Бо́же,/ во о́блаце, и огни́, и мра́це, и в ви́хре яви́лся еси́ носи́м:/ сла́ва си́ле Твое́й, Го́споди. Припев: Слáва Тебé, Бóже нáш, слáва Тебé. Да уве́риши сла́вное строе́ние Твое́, Христе́ Бо́же,/ я́ко Сый пре́жде век и То́йже на о́блаце восхожде́ние положи́вый,/ на Фаво́ре неизрече́нно просия́л еси́. Сла́ва Отцу́ и Сы́ну и Свято́му Ду́ху. Соглаго́люще, предстоя́ху раболе́пно Тебе́, Влады́це Христу́,/ к ни́мже па́рою огня́ и мра́ка и то́нким хла́дом бесе́довал еси́:/ сла́ва си́ле Твое́й, Го́споди. И ны́не и при́сно и во ве́ки веко́в. Ами́нь. Возвеща́ху сла́вное Креста́ ра́ди Твоего́, на Фаво́р прише́дше,/ и́же во огни́ Тя и купине́ дре́вле предви́девый Моисе́й/ и взя́тый на колесни́це о́гненней Илия́, Христе́. Песнь 5 Ирмос: От све́та пресеки́й перворо́дный свет,/ я́ко во све́те дела́ пою́т Тя, Христе́, Соде́теля,/ во све́те Твое́м пути́ на́ша напра́ви. Припев: Слáва Тебé, Бóже нáш, слáва Тебé. Пред лице́м Твои́м го́ры уклони́шася,/ свет бо и пред нога́ми неботе́чныя лучи́, Христе́, со́лнца прии́де,/ зрак зе́млен я́ко прия́ти благоволи́л еси́. Припев: Слáва Тебé, Бóже нáш, слáва Тебé. Се Спас, –/ вопия́ху Моисе́й и Илия́ ученико́м,/ на горе́ святе́й Фаво́рстей оглаша́емым, –/ Христо́с, Его́же дре́вле провозвести́хом Су́щаго Бо́га. Сла́ва Отцу́ и Сы́ну и Свято́му Ду́ху. Неизме́нное естество́, челове́ческому примеси́ся,/ оби́льно невеще́ственнаго Божества́ Свет/ изобнажи́в апо́столом, неизрече́нно возсия́. И ны́не и при́сно и во ве́ки веко́в. Ами́нь. Тя, присносу́щное сия́ние, во Оте́честей сла́ве/ ученицы́ я́ко ви́девше возсия́вша, Христе́, Тебе́ вопия́ху:/ во све́те твое́м пути́ на́ша напра́ви. Песнь 6 Ирмос: Внегда́ скорбе́ти ми,/ возопи́х ко Го́споду,/ и услы́ша мя Бог спасе́ния моего́. Припев: Слáва Тебé, Бóже нáш, слáва Тебé. Сия́ния па́че со́лнца Свет ясне́йший, Спас, просия́в на Фаво́ре,/ нас просвети́л е́сть. Сла́ва Отцу́ и Сы́ну и Свято́му Ду́ху. Возше́д на го́ру Фаво́рскую, преобрази́лся еси́, Христе́,/ и, ле́сть всю омрачи́в, нас просвети́л еси́. И ны́не и при́сно и во ве́ки веко́в. Ами́нь. Тя Бо́га позна́вше сла́внии апо́столи,/ на Фаво́ре же, Христе́, уди́вильшеся, коле́на преклони́ша. Кондак, глас 7 На горе́ преобрази́лся еси́,/ и я́коже вмеща́ху ученицы́ Твоя́,/ сла́ву Твою́, Христе́ Бо́же, ви́деша,/ да егда́ Тя у́зрят распина́ема,/ страда́ние у́бо уразуме́ют во́льное,/ ми́рови же пропове́дят,/ я́ко Ты еси́ вои́стинну О́тчее сия́ние. Икос Воста́ните, лени́вии, и́же всегда́ ни́зу пони́кшии в зе́млю души́ моея́ по́мыслы,/ возми́теся и возвыситеся на высоту́ Боже́ственнаго восхожде́ния./ Притеце́м к Петру́ и к Зеведе́евым/ и вку́пе со о́неми Фаво́рскую го́ру дости́гнем,/ да ви́дим с ни́ми сла́ву Бо́га на́шего, глас же услы́шим,/ его́же свы́ше слы́шаша и пропове́даша О́тчее сия́ние. Песнь 7 Ирмос: Авраа́мстии иногда́ в Вавило́не о́троцы/ пе́щный пла́мень попра́ша,/ пе́сньми взыва́юще:/ оте́ц на́ших Бо́же, благослове́н еси́. Припев: Слáва Тебé, Бóже нáш, слáва Тебé. Облиста́вшеся Све́том непристу́пныя сла́вы на Фаво́рстей горе́,/ апо́столи Христу́ вопия́ху:/ оте́ц на́ших Бо́же, благослове́н еси́. Припев: Слáва Тебé, Бóже нáш, слáва Тебé. Сия́нием Боже́ственнаго шу́ма, и росода́тельным о́блаком, Христе́,/ и заре́ю Твое́ю наслажда́еми, апо́столи поя́ху:/ оте́ц на́ших Бо́же, благослове́н еси́. Сла́ва Отцу́ и Сы́ну и Свято́му Ду́ху. В непристу́пном Све́те, я́ко ви́де Тя Петр,/ на Фаво́рстей горе́ облиста́вша, Христе́, возопи́:/ оте́ц на́ших Бо́же, благослове́н еси́. И ны́не и при́сно и во ве́ки веко́в. Ами́нь. С Нача́льником жи́зни Христо́м су́ще, де́ти Зеведе́евы,/ я́ко испусти́ зра́ка Свет, возгреме́ша:/ оте́ц на́ших Бо́же, благослове́н еси́. Песнь 8 Ирмос: В Вавило́не о́троцы,/ Боже́ственною распала́еми ре́вностию,/ мучи́теля и пла́мене́ преще́ние му́жески попра́ша/ и, посреде́ огня́ вве́ржени, ороша́еми, поя́ху:/ благослови́те, вся дела́ Госпо́дня, Го́спода. Припев: Слáва Тебé, Бóже нáш, слáва Тебé. Манове́нием вся нося́й, нога́ми пречи́стыми на го́ру взыде Фаво́рскую Христо́с,/ на не́йже па́че со́лнечныя лучи́ облиста́ лице́м,/ и́же зако́ну старе́йшия и благода́ти показа́ пою́щия:/ благослови́те, вся дела́ Госпо́дня, Го́спода. Припев: Слáва Тебé, Бóже нáш, слáва Тебé. Непристу́пною сла́вою на горе́ я́влься неизрече́нно Фаво́рстей,/ неодержи́мый и незаходи́мый Свет, О́тчее сия́ние,/ тва́рь уясни́в, челове́ки обожи́, пою́щия:/ благослови́те, вся дела́ Госпо́дня, Го́спода. Припев: Слáва Тебé, Бóже нáш, слáва Тебé. Священноле́пно стоя́ще Моисе́й же и Илия́ на горе́ Фаво́ре,/ Боже́ственныя начерта́ние я́сно ипоста́си ви́девше,/ Христа́, во Оте́честей облиста́вша сла́ве, воспева́ху:/ благослови́те, вся дела́ Госпо́дня, Го́спода. Сла́ва Отцу́ и Сы́ну и Свято́му Ду́ху. И́же во зра́це Боже́ственнаго ра́ди явле́ния лице́ просла́вися иногда́ Моисе́ово,/ Христо́с же, я́ко ри́зою, Све́том и сла́вою одева́ется,/ Све́та бо самоде́телен Сый, озаря́ет пою́щия:/ благослови́те, вся дела́ Госпо́дня, Го́спода. И ны́не и при́сно и во ве́ки веко́в. Ами́нь. От светоро́дна о́блака Христа́ ученицы́ объя́та зря́ще на Фаво́ре/ и ни́цы на зе́млю па́дше, ум просве́щше,/ со Отце́м сего́ поя́ху и Ду́хом:/ благослови́те, вся дела́ Госпо́дня, Го́спода. Песнь 9 Ирмос: Рождество́ твое́ нетле́нно яви́ся:/ Бог из боку́ Твое́ю про́йде,/ я́ко Плотоно́сец яви́ся на земли́/ и с челове́ки поживе́./ Тя, Богоро́дице, тем вси велича́ем. Припев: Слáва Тебé, Бóже нáш, слáва Тебé. Ужа́сни но́вым светоли́тием внеза́пу ученицы́ осве́щшеся, друг дру́га зря́ху,/ уди́вльшеся же и к земли́ прекло́ньшеся,/ Тебе́, Влады́це всех, поклони́шася. Припев: Слáва Тебé, Бóже нáш, слáва Тебé. Шум из о́блака посыла́шеся богогла́сен, известву́я чу́до:/ Оте́ц бо Све́тов, – Сей е́сть Сын Мой возлю́бленный, – апо́столом вопия́ше:/ Того́ послу́шайте. Сла́ва Отцу́ и Сы́ну и Свято́му Ду́ху. Но́вая ви́девше и пресла́вная, глас Оте́ческий внуши́вше,/ на Фаво́ре Словесе́ слуги́, изображе́ние Первообра́знаго,/ Сей е́сть, – вопия́ху, – Спас наш. И ны́не и при́сно и во ве́ки веко́в. Ами́нь. О́бразе непреме́нный Су́щаго, недви́жиме, печа́ть неизме́нна,/ Сы́не, Сло́ве, му́дросте и мы́шце, десни́це Вы́шняго, Си́ло,/ Тя воспева́ем со Отце́м же и Ду́хом. Светилен Све́те неизме́нный, Сло́ве, Све́та Отца́ нерожде́нна, в явле́ннем све́те Твое́м,/ дне́сь на Фаво́ре Свет ви́дехом Отца́, Свет и Ду́ха,/ Све́том наставля́ющаго всю тва́рь.

Минея, 1 Января, Канон Глас 2 Песнь 1 Ирмос: Гряди́те, лю́дие, пои́м пе́снь Христу́ Бо́гу, разде́льшему мо́ре и наста́вльшему лю́ди, я́же изведе́ из рабо́ты еги́петския, я́ко просла́вися. Сла́ва Отцу́ и Сы́ну и Свято́му Ду́ху. Осмери́ца дне́й, нося́щая о́браз бу́дущаго, Твое́ю, Христе́, просвеща́ется и освяща́ется во́льною нището́ю, в се́й бо зако́нно обре́зался еси́ пло́тию. И ны́не и при́сно и во ве́ки веко́в. Ами́нь. Обре́зание прие́млет осмодне́вное Христо́с Своего́ рождества́, и сего́ дне́сь се́нь спря́тает, све́т возсиява́я но́выя благода́ти. Песнь 3 Ирмос: Утверди́ на́с в Тебе́, Го́споди, Дре́вом умерщвле́й гре́х, и стра́х Тво́й всади́ в сердца́ на́с, пою́щих Тя́. Сла́ва Отцу́ и Сы́ну и Свято́му Ду́ху. Сло́во вопло́щшееся Пресу́щественное в преста́тие зако́на обре́зася, нача́ток же Боже́ственныя благода́ти и жи́зни нетле́нныя на́м подаде́. И ны́не и при́сно и во ве́ки веко́в. Ами́нь. Зако́на исполни́тель, не я́ко сопроти́вен Бо́гу сы́й, Христо́с воплоти́выйся показа́ся и сподо́бися во́лею обре́затися осмодне́вен. Седален, глас 4 Я́ко Сы́й бе́здна человеколю́бия, оде́ялся еси́, Влады́ко, в зра́к ра́бий и пло́тию обре́зался еси́, да́руя все́м челове́ком вели́кую Твою́ ми́лость. Песнь 4 Ирмос: Услы́шах, Го́споди, слу́х Твоего́ смотре́ния, и просла́вих Тя́, Еди́не Человеколю́бче. Сла́ва Отцу́ и Сы́ну и Свято́му Ду́ху. Обре́зание преста́, отне́леже Христо́с во́лею обре́зася, язы́к мно́жество спаса́я благода́тию. И ны́не и при́сно и во ве́ки веко́в. Ами́нь. Бу́дущаго непреста́нную осма́го ве́ка жи́знь изобража́ет, в ню́же Влады́ка обре́зася пло́тию. Песнь 5 Ирмос: Све́та Пода́телю и веко́в Тво́рче, Го́споди, во све́те Твои́х повеле́ний наста́ви на́с, ра́зве бо Тебе́, ино́го бо́га не зна́ем. Сла́ва Отцу́ и Сы́ну и Свято́му Ду́ху. Ты́, от Де́вы Ма́тере несказа́нно проше́д, Го́споди, и в челове́ческий ны́не сподо́бился еси́ оде́ятися о́браз, я́ко Младе́нец зако́нно зако́н испо́лнил еси́. И ны́не и при́сно и во ве́ки веко́в. Ами́нь. Но́щи уподо́бися, я́ко се́нь зако́нную лю́бящи Изра́иля, Ро́ждшая, из Нея́же облиста́вший Све́т ми́ра, Христо́с, яви́ся. Песнь 6 Ирмос: Бе́здна мя́ мно́га грехо́вная окружа́ет, и вопию́ Ти, проро́ка подража́яй: от тли́ мя, Го́споди, возведи́. Сла́ва Отцу́ и Сы́ну и Свято́му Ду́ху. Прия́т коне́ц зако́н, отне́леже Христо́с, младе́нствовав, исполни́тель зако́на Сы́й, обре́зание восприя́т и разреши́ зако́нную кля́тву. И ны́не и при́сно и во ве́ки веко́в. Ами́нь. Суббо́тство, обре́зание же шата́ния евре́йскаго я́вльшагося Христа́ манове́нием преста́, и возсия́ благода́ти весна́. Кондак, глас 3 Все́х Госпо́дь обре́зание терпи́т и челове́ческая прегреше́ния, я́ко Бла́г, обре́зует, дае́т спасе́ние дне́сь ми́ру. Ра́дуется же в Вы́шних и Созда́телев иера́рх, и светоно́сный, Боже́ственный таи́нник Христо́в Васи́лий. Песнь 7 Ирмос: О́бразу злато́му, на по́ле Деи́ре служи́му, трие́ Твои́ о́троцы небрего́ша. Безбо́жнаго веле́ния, посреде́ же огня́ вве́ржени, ороша́еми, поя́ху: благослове́н еси́, Бо́же оте́ц на́ших. Сла́ва Отцу́ и Сы́ну и Свято́му Ду́ху. Све́тло и пресве́тло Рождество́ Христо́во, и бу́дущаго обновле́ния подписа́вшее та́инство дне́сь, я́ко зако́нным чи́ном Спа́с обре́зуется, не я́ко Бо́г, но я́ко Челове́к и зако́на исполне́ние. И ны́не и при́сно и во ве́ки веко́в. Ами́нь. Зако́н исполня́я, зако́на Творе́ц, пло́тию дне́сь во́лею обре́зуется, обре́зание содева́я грехо́вныя зимы́ и зва́ти да́руя: благослове́н еси́, Бо́же оте́ц на́ших. Песнь 8 Ирмос: Неизрече́нною му́дростию соста́вльшаго вся́ческая Бо́га Сло́ва и от не су́щих во е́же бы́ти приве́дшаго, благослови́те, дела́, я́ко Го́спода, и превозноси́те во вся́ ве́ки. Сла́ва Отцу́ и Сы́ну и Свято́му Ду́ху. Во осмы́й де́нь обре́зуется я́ко Младе́нец Влады́ка, Иису́са же прие́млет именова́ние, я́ко ми́ра е́сть Спа́с и Госпо́дь. И ны́не и при́сно и во ве́ки веко́в. Ами́нь. Ко Христо́ву Рождеству́ досто́йно осмы́й спряже́ся, святи́теля всесла́вная па́мять, ю́же почита́юще ве́рою, пое́м Го́спода и превозно́сим во ве́ки. Песнь 9 Ирмос: Я́же пре́жде со́лнца свети́льника Бо́га возсия́вшаго, пло́тски к на́м прише́дшаго из боку́ Деви́чу, неизрече́нно воплоти́вшая, Благослове́нная, Всечи́стая, Тя́, Богоро́дице, велича́ем. Припев: Сла́ва Тебе́, Бо́же на́ш, сла́ва Тебе́. Преше́д преде́лы Христо́с челове́ческаго всего́ естества́, преесте́ственно из Де́вы ражда́ется и, писа́ние зако́нное я́коже повелева́ет, пло́тию обре́зается, и испо́лнитель зако́на явля́ется. Припев: Сла́ва Тебе́, Бо́же на́ш, сла́ва Тебе́. Прииди́те, Влады́ки сла́вная Христо́ва именова́ния во святы́ни торжеству́им, Иису́с бо Боголе́пно нарече́ся дне́сь. С си́ми же и па́мять святи́теля велича́ем. Светилен Пло́тию обре́зуется зако́н испо́лнивый, я́ко Младе́нец осмодне́вен, веко́в Зижди́тель,/ и пелена́ми повива́ется, я́ко Челове́к, и млеко́м пита́ется,/ И́же вся безме́рною кре́постию я́ко Бог содержа́й/ и манове́нием возводя́й.

Дева днесь предстоит Сыну,/ руце Свои к Нему простирающи,/ святый князь Андрей радуется,/ и с ним Российская страна торжествует,/ нас бо ради молит Богородица// Превечнаго Бога.

Кондак 1 Избранный угодниче Божий, благий заступниче града Пскова и всея державы Российския благоверный княже Гаврииле! Приими от нас милостивно сия песни хвалебныя, и яко имеяй дерзновение ко Господу, молися Ему выну о спасении от всяких бед нас грешных, зовущих ти радостно: Радуйся, святый благоверный княже Всеволоде Гаврииле, теплый о нас молитвенниче. Икос 1 Ангела нравом, аще и человека естеством, вемы тя, святый благоверный княже Всеволоде Гаврииле; кротостию бо и милостию преисполнен был еси, блаженне, и соуз совершенства духовнаго, любовь божественную, стяжал еси от юности твоея, яко быти тебе воистину угодником Божиим, достойным похвал таковых: Радуйся, от корене святаго произрастший; радуйся, великаго и равноапостольнаго князя Владимира правнуче благословенный. Радуйся, благоверных родителей сыне; радуйся, княжескаго рода прозябение честное. Радуйся, родителя твоего, князя Мстислава, добродетели унаследивый; радуйся, благочестию его и храбрости подражавый. Радуйся, от младых лет страху Божию наученный; радуйся, от юности твоея чтение слова Божия возлюбивый. Радуйся, молитвами и милостынями Богу угождавый; радуйся, целомудрием и воздержанием себе украшавый. Радуйся, праведниче Божий, Егоже правда сияет непомеркаемо во веки; радуйся, угодниче Христов, прославленный на небеси и на земли. Радуйся, святый благоверный княже Всеволоде Гаврииле, теплый о нас молитвенниче. Кондак 2 Видя себе поставлена волею родителя твоего, князя Мстислава, на княжение великаго Новаграда, святый благоверный княже Всеволоде Гаврииле, храбро отражал еси враги, на него нападавшия, и суды милостивы творил еси людем твоим, созидал и благоукрашал храмы Божия и обители святыя, немолчно воспевая среди трудов твоих праведных хвалебную песнь Богу: Аллилуиа. Икос 2 Разумно бысть всем людем Новоградским благочестие твое христианское, святый благоверный княже Всеволоде Гаврииле, егда обитель во имя святаго великомученика и победоносца Георгиа близ Новаграда соорудил еси и соборный храм из камене в ней создал еси, иже доныне свидетельствует нам о твоем благочестии, о немже тя ублажаем и зовем: Радуйся, властителю милостивый и кроткий; радуйся, власть земную праведно и благочестно содержавый. Радуйся, нищих и убогих препитавый; радуйся, вдовицам и сиротам защитник бывый. Радуйся, болящих и странников в доме твоем упокоевавый; радуйся, язвы и струпы прокаженных руками твоими врачевавый. Радуйся, иноков любителю и покровителю; радуйся, священников усердный почитателю. Радуйся, храмы Божия от имений твоих благоукрашавый; радуйся, обители иноческия созидавый. Радуйся, Богу и ближним твоим ревностно служивый. Радуйся, святый благоверный княже Всеволоде Гаврииле, теплый о нас молитвенниче. Кондак 3 Силою Божию укрепляемь, святый благоверный княже Всеволоде Гаврииле, полчища инородцев, разорявшия пределы Новоградския, мужественно победил еси, и во дни глада люди твоя препитал еси, истощевая на них все достояние твое княжеское, яко быти тебе воистину отцем и кормителем великаго Новаграда и всея его области, о немже нищии и убозии славяху Бога и вопияху Ему: Аллилуиа. Икос 3 Имея страх Божий в сердцы твоем, святый благоверный княже Всеволоде Гаврииле, послушание явил еси старейшему великому князю Ярополку и по воли его от великаго Новаграда в Переяславль княжити прешел еси, но по воли Божией в мале времени паки в великий Новград возвратился еси княжити, и, имея пособника себе Нифонта, соборный храм великаго святителя и чудотворца Николая тамо соорудил еси, и храмы Богоматере и Предтечи создал еси, сим показуяй велию любовь твою к Богу и святым Его и подвизаяй нас хвалебно взывати к тебе: Радуйся, образ послушания нам в себе, явивый; радуйся, воли старейшаго великаго князя волю твою покоривый. Радуйся, преселник в земли твоей бывый; радуйся, горняго града выну усердно взыскавый. Радуйся, мудрый странниче, на путь спасения стопы твоя направивый; радуйся, Божий избранниче, скорби многи претерпевый. Радуйся, кротко и мирно в великий Новград княжити возвративыйся; радуйся, богоугодно и праведно тамо княживый. Радуйся, блаженный храмоздателю; радуйся, благолепия церковнаго любителю. Радуйся, святых Божиих усердный чтителю; радуйся, небесныя их славы сонаследниче. Радуйся, святый благоверный княже Всеволоде Гаврииле, теплый о нас молитвенниче. Кондак 4 Буря смятения народнаго возшуме на тя люте, святый благоверный княже Всеволоде Гаврииле: буии и жестоковыйнии от людий Новоградских, забывше вся твоя благодеяния, им явленная, возсташа на тя гневом, егда побеждени быша полки их от полков суждальских в междоусобней брани; ты же, гневу их уступая, кротце отшел от них к великому князю в Киев, зовый во смирении духа ко Господу: Аллилуиа. Икос 4 Слышавше о премногих скорбех и безчестиих претерпенных тобою, святый благоверный княже Всеволоде Гаврииле, от буйных и своевольных людий тебе подвластных, дивимся кротости и терпению твоему и, яко вернаго подражателя Христова и мучеником равна, ублажаем тя с любовию песньми хвалебными таковыми: Радуйся, кротости правило, за изгонявшия тя моливыйся яко за благотворцев; радуйся, терпения столпе, безчестие претерпевый от людий твоих. Радуйся, узы и темницу восприявый безропотно; радуйся, во изгнании твоем неправеднем выну славивый Бога. Радуйся, временными скорбьми достигий блаженства вечнаго; радуйся, возшедый на высоту совершенства духовнаго. Радуйся, блаженство изгнанных правды ради достойно получивый; радуйся, в путь изгнания кротко и незлобиво изшедый. Радуйся, от великаго князя с любовию восприятый; радуйся, в Вышгороде удел от него получивый. Радуйся, звездо пресветлая, от Новаграда в Киев пришедшая; радуйся, всю страну Российскую доблестию терпения твоего удививый. Радуйся, святый благоверный княже Всеволоде Гаврииле, теплый о нас молитвенниче. Кондак 5 Благотечно шествовал еси, святый благоверный княже Всеволоде Гаврииле, от Киева паки в Великий Новград, междуусобием народным смятенный, да мир и тишину в нем водвориши; обаче ненавидевшии мира людие новоградстии не восхотеша тя прияти с миром Христовым к ним пришедшаго. Ты же во Псков от них прешел еси, и тамо водворился еси, возлюбив град сей любовию о Господе, Емуже присно пел еси: Аллилуиа. Икос 5 Видевше твое незлобие и кротость людие Псковстии, святый благоверный княже Всеволоде Гаврииле, прияша тя с любовию, от Великаго Новаграда к ним пришедшаго, и княжити над ними тя устроиша, напавших же на них за тя бранию отразиша и победиша; ты же благодеянии великими им за сие воздал еси и был еси истинный благодетель людий твоих, иже и взываху к тебе: Радуйся, око слепых, нога хромых и рука безпомощных бывый; радуйся, всякому страждущему любовию твоею сострадавый. Радуйся, Православие во граде твоем ревностно охранявый; радуйся, злоухищрения латинская от него отражавый. Радуйся, мечь твой на защиту Пскова мужественно воздвигнувый; радуйся, оным мир и тишину в земли Псковстей водворивый. Радуйся, милосердия сокровище всем нищым и убогим бывый; радуйся, скорбящия и страждущия утешавый. Радуйся, с плакавшими плакавый; радуйся, в темнице заключенныя посещавый. Радуйся, пищу и одежду всем требующим подававый; радуйся, постом и молитвою Богу благоугождавый. Радуйся, святый благоверный княже Всеволоде Гаврииле, теплый о нас молитвенниче. Кондак 6 Проповедника тя благочестия яви Господь во граде Пскове, святый благоверный княже Всеволоде Гаврииле; кто бо не умилится, воспоминая великия твоя добродетели: кротость, терпение и нищелюбие; кто не прославит подвиги твоя ратныя, на защиту града твоего явленныя, и твоя суды праведныя и милосердыя, имиже люди твоя облагодетельствовал еси; о сем и мы прославляем прославльшаго тя Господа и зовем Ему: Аллилуиа. Икос 6 Возсияв, яко солнце пресветлое, добродетелным житием твоим во граде Пскове, святый благоверный княже Всеволоде Гаврииле, по лете единем жительства твоего в нем к западу смертному приближился еси, и причастився святых Христовых Таин, мирно и безмятежно предал еси святую душу твою в руце Божии. Мы же, чтуще тя, аки надгробную песнь, с любовию и усердием сице тебе поем: Радуйся, великий угодниче Божий, жизнь земную свято и праведно скончавый; радуйся, прешедый от скорбей многих на покой вечный. Радуйся, восприятый со славою во обитель святых; радуйся, увенчанный от Христа венцем нетленныя славы. Радуйся, мног плачь кончиною твоею причинивый людем псковским; радуйся, меч твой им завещавый в защиту и ограждение духовное. Радуйся, преселивыйся к Богу душею твоею святою; радуйся, приявый от Него благодать молитися за град твой и люди. Радуйся, Пскова славо и похвало; радуйся, всея Церкве Христовы радование и утешение. Радуйся, чудесы дивными в погребении твоем возсиявый; радуйся, благоухание сладостное от мощей твоих испустивый. Радуйся, святый благоверный княже Всеволоде Гаврииле, теплый о нас молитвенниче. Кондак 7 Хотевшим людем Великаго Новаграда взяти к себе мощи твоя, святый благоверный княже Всеволоде Гаврииле, чудотворно им сие возбранил еси и гроб твой неподвижим соделал еси; тии же, в раскаяние пришедше о причиненнем тебе изгнании, со слезами моляхуся, да поне малая часть мощей твоих святых даруется им в благословение и утешение, и приемше ноготь, от честныя руки твоея отпадший, со благоговением в Великий Новград его принесоша, зовуще дивному во святых Своих Богу: Аллилуиа. Икос 7 Блаженство неизглаголанно унаследовал еси, угодниче Божий, разрешився от уз плоти и воспарив душею твоею во оный град прекрасный, Иерусалим Небесный, идеже вси святии упокоеваются; на земли же тело твое святое, во храме святаго великомученика Димитрия во граде Пскове, честно погребеся от всего освященнаго собора, и меч твой над гробом твоим повешен бысть по твоему завету, егоже памятующе, со умилением вопием ти сице: Радуйся, заступниче усердный града Пскова и всея Российския страны; радуйся, и по смерти заступлением твоим святым нас не оставляяй. Радуйся, преславно чудодействовуяй от мощей твоих честных; радуйся, мечем твоим ограждаяй нас от врагов видимых и невидимых. Радуйся, во дни браней благонадежный граду твоему защитниче; радуйся, во дни мира всем недужным благодатный целебниче. Радуйся, ближним и дальним благодеяния твоя подаваяй; радуйся, в сониих и видениих верныя посещаяй. Радуйся, святый благоверный княже Всеволоде Гаврииле, теплый о нас молитвенниче. Кондак 8 Странствие земное совершив, от дел благотворения не почил еси, святый благоверный княже Всеволоде Гаврииле, но прияв от Господа велию благодать чудотворения, всем с верою к тебе притекающым дары благодатныя всещедро подаеши от мощей твоих святых и недужныя безмездно врачуеши единем прикосновением к честному твоему гробу. Сего ради славим прославльшаго тя Господа и благодарно вопием Ему: Аллилуиа. Икос 8 Весь страха и ужаса исполнися муж благочестивый, емуже в видении во свете небеснем предстал еси, благоверный княже, и рекл ему: «Иди ко освященному собору, князю и посадником града и рцы им, да принесут мощи моя от храма святаго Димитрия в соборный храм Святыя Троицы, тамо бо хощу возлещи». Егда же вопроси он честнаго твоего имене, ты сие ему открыл еси и возвестил еси, яко град Псков предан есть тебе от Господа во хранение до скончания века, и яко имаши его сохраняти от язычник и латинь. Таковому светлому явлению твоему дивящеся и о заступлении твоем радующеся, сия радостныя возглашаем ти похвалы: Радуйся, святче Божий, со святыми почивай; радуйся, о нас грешных Бога выну умоляяй. Радуйся, града Пскова хранителю неотступный; радуйся, дивный воителю посмертный. Радуйся, волю твою в видении людем псковским объявивый; радуйся, в соборнем храме Святыя Троицы святыми мощами твоими почивати восхотевый. Радуйся, светом небесным озаренный; радуйся, благодати блаженныя преисполненный. Радуйся, дивным явлением твоим люди псковския духовно утешивый; радуйся, благим обетованием твоим их зело возвеселивый. Радуйся, радостный нам вестниче Христова всемогущества и силы; радуйся, благомощный предстателю за люди твоя и град, Богом тебе врученный. Радуйся, святый благоверный княже Всеволоде Гаврииле, теплый о нас молитвенниче. Кондак 9 Вси людие псковстии со князем своим и освященным собором изнесоша гроб твой честный, святый благоверный княже Всеволоде Гаврииле, из храма святаго великомученика Димитрия, и егда приближишася с ним ко вратом Пскова, именуемым смердиими, абие ста гроб твой неподвижим, дондеже по повелению твоему новая врата в стене града пробиша и теми гроб твой пронесоша в соборный храм Святыя Троицы, дивящеся сему чудеси и вопиюще ко Господу: Аллилуиа. Икос 9 Витийство человеческое не довлеет к достойней похвале святых, Богом прославленных на небеси и на земли; недоумеем и мы смиреннии достойно прославити тя, святый наш предстателю, благоверный княже Всеволоде Гаврииле, дивно прославленный на небеси славою вечною и на земли чудотворным нетлением святых мощей твоих и многими от них знаменьми и изцеленьми. Обаче ты, яко благий и милостивый, не возгнушайся гласов наших хвалебных, имиже от любве сердечныя дерзаем благохвалити тя сице: Радуйся, в пренесении святых мощей твоих чудесы великими просиявый; радуйся, мироточения благодать от Господа получивый. Радуйся, цвете нетления, облагоухавый святую Всероссийскую Церковь; радуйся, смерть вкусивый, тления же не познавый. Радуйся, по летех мнозех цел и нерушим в составех твоих обретенный; радуйся, нетленен и благоуханен во гробе возлежавый. Радуйся, миро благоуханное и целебное от мощей твоих святых источивый; радуйся, мира того исцеления многим недужным даровавый. Радуйся, в соборнем храме Святыя Троицы телом честне положенный; радуйся, сосуде, Божия благодати полный и преизливающийся. Радуйся, от исполнения твоего и нам даруяй благодатныя дары; радуйся, милостивно изцеляяй души наша и телеса. Радуйся, святый благоверный княже Всеволоде Гаврииле, теплый о нас молитвенниче. Кондак 10 Спасение людем от внезапнаго разрушения соборнаго храма устрояя, угодниче Божий, явился еси клирику храма и повелел еси ему, да изнесутся от храма того святии сосуди, иконы и книги, и людие прочее да не останутся в нем на молитву, яко хощет явити Господь знамение над мощами твоими; и егда сотвориша тако по повелению твоему, абие нощию падеся верх храма, и сокрушив раку твою, падшим камением отдели от главы твоея малую часть мощей твоих, яко всем дивитися о таковем благопромышлении Господни и пети Богу: Аллилуиа. Икос 10 Стена защищения граду Пскову был еси, святый благоверный княже Всеволоде Гаврииле, во дни ратных нападений на него иноплеменных и иноверных врагов, и Пресвятей Владычице Богородице в видении предстоял еси с прочими святыми, умоляя Ю о спасении града от ратнаго разорения, яко предстатель и защититель его неотступный. Сего ради благодарственно тя славим и вопием ти сице: Радуйся, избранный воеводо, воинство православное воодушевивый к победам; радуйся, ратей иноверных низложение. Радуйся, победоносный защитителю града Пскова от воюющих нань языков; радуйся, пленных и озлобляемых людий твоих отрадо и утешение. Радуйся, крепкое их упование; радуйся, мощами твоими святыми во дни сильныя брани со врагами на стены града пришедый. Радуйся, нападение их невидимо отразивый; радуйся, покровителю, Богом данный граду Пскову и всей его области. Радуйся, щите, защищаяй их от всякаго зла. Радуйся, святый благоверный княже Всеволоде Гаврииле, теплый о нас молитвенниче. Кондак 11 Пение молебное приносим ти, угодниче Божий, и с верою и любовию припадающе к раце святых и многоцелебных мощей твоих, молим тя всеусердно: молися за нас ко Господу Богу, да дух благочестия твоего, благости и милости не оскудевает и в нас немощных и грешных, да будем чада твоя не по имени токмо, но делом и всем житием нашим, и сподобимся вкупе с тобою во блаженней вечности пети Богу: Аллилуиа. Икос 11 Светом трисолнечным горе озаренный, благоверный и святый княже Всеволоде Гаврииле, озари наша мрачныя души сиянием Божия благодати и настави ны верно исполняти заповеди Христа Бога: вемы бо, вемы, яко много может молитва твоя пред благостию Его, яко вернаго Его раба и угодника. Сего ради со упованием благим молитвенно к тебе притекаем и взываем сице: Радуйся, великоименитый и многославный Всероссийский наш заступниче; радуйся, скипитра царскаго крепкое ограждение. Радуйся, князей удобрение; радуйся, Церкве Святыя светильниче пресветлый. Радуйся, соль земли Российския, яже николиже обуяет; радуйся, столпе Православия непоколебимый. Радуйся, маслино благоплодная, елеем милости Божия умащающая верныя души; радуйся, надежный ходатаю нам милости Господни. Радуйся, неусыпный молитвенниче наш ко Пресвятей Троице. Радуйся, святый благоверный княже Всеволоде Гаврииле, теплый о нас молитвенниче. Кондак 12 Благодати причастная рака святых мощей твоих, благоверный княже Всеволоде Гаврииле, яко новая купель Силоамская, даровася нам от Всеблагаго Бога, к нейже не единожды в лето, но всегда притекающе, недужнии здравие получают; благ бо еси и скор ко изцелению, аще токмо веру обретаеши, к сему способствующую в человецех. Темже славим Бога, дивно в тебе прославльшагося, и вопием Ему: Аллилуиа. Икос 12 Поюще многая твоя чудотворения, угодниче Божий, благоверный и святый княже Всеволоде Гаврииле, молитвенно совершаем святую память твою, яко торжество веры нашея православныя, в нейже единей процветают толицы чудотворцы, сильние пред Богом предстательством своим и благодеющии бедствующим и болящим человеком свыше данною им благодатию, юже в тебе добре ведуще, святче Божий, от благодарных устен сице зовем: Радуйся, благоволением Пресвятыя Троицы осененный; радуйся, всех святых сожителю. Радуйся, райских селений обитателю; радуйся, приявый блага нетленная и вечная. Радуйся, техже благ и нам всежелательный ходатаю; радуйся, душевнаго и телеснаго здравия усердный нам у Господа просителю. Радуйся, смиренная прошения наша во благо исполняяй; радуйся, скорую помощь и заступление твое нам являяй. Радуйся, от враг видимых и невидимых о Бозе крепкий наш защитниче. Радуйся, святый благоверный княже Всеволоде Гаврииле, теплый о нас молитвенниче. Кондак 13 О, святый и благоверный княже Всеволоде Гаврииле! Вонми молитве нашей смиренней и не презри малаго сего хвалебнаго пения, от усердия нашего тебе приносимаго с верою и любовию, и умоли Господа Бога, о еже избавити нас мучений вечных и сподобити блаженства святых, да поем Ему купно с тобою во веки: Аллилуиа.[Се́й конда́к глаго́лется три́жды.][Далее повторяем 1‑е икос и кондак:]Икос 1 Ангела нравом, аще и человека естеством, вемы тя, святый благоверный княже Всеволоде Гаврииле; кротостию бо и милостию преисполнен был еси, блаженне, и соуз совершенства духовнаго, любовь божественную, стяжал еси от юности твоея, яко быти тебе воистину угодником Божиим, достойным похвал таковых: Радуйся, от корене святаго произрастший; радуйся, великаго и равноапостольнаго князя Владимира правнуче благословенный. Радуйся, благоверных родителей сыне; радуйся, княжескаго рода прозябение честное. Радуйся, родителя твоего, князя Мстислава, добродетели унаследивый; радуйся, благочестию его и храбрости подражавый. Радуйся, от младых лет страху Божию наученный; радуйся, от юности твоея чтение слова Божия возлюбивый. Радуйся, молитвами и милостынями Богу угождавый; радуйся, целомудрием и воздержанием себе украшавый. Радуйся, праведниче Божий, Егоже правда сияет непомеркаемо во веки; радуйся, угодниче Христов, прославленный на небеси и на земли. Радуйся, святый благоверный княже Всеволоде Гаврииле, теплый о нас молитвенниче. Кондак 1 Избранный угодниче Божий, благий заступниче града Пскова и всея державы Российския благоверный княже Гаврииле! Приими от нас милостивно сия песни хвалебныя, и яко имеяй дерзновение ко Господу, молися Ему выну о спасении от всяких бед нас грешных, зовущих ти радостно: Радуйся, святый благоверный княже Всеволоде Гаврииле, теплый о нас молитвенниче. Молитва О, великий угодниче Божий и преславный чудотворче, святый благоверный княже Всеволоде Гаврииле, града Пскова и всея державы Российския небесный заступниче и покровителю, и всех нас усердный пред Богом предстателю и защитителю! Предстоя Престолу Великаго Царя и Бога нашего, в Троице Святей славимаго и покланяемаго, велие дерзновение имаши к нему, яко верный раб Его и угодник. К тебе убо, яко сроднему нам и многомощному пред Господем ходатаю, прибегаем мы грешнии и недостойнии и умиленно просим тя: моли Триединаго Бога, да отвратит от нас гнев свой, праведно по делом нашим на ны движимый, и презрев безчисленныя прегрешения наша, обратит нас на путь покаяния и спасения. Огради молитвами твоими в мире живот наш, и во всем благом благое поспешение и вся, яже к животу и благочестию потребная, нам даровати испроси. И якоже древле град твой Псков от пленения и разорения ратнаго дивно избавил еси, тако и ныне нас и вся грады и веси страны нашея от всяких напастей и бед, и напрасныя смерти, предстательством твоим избави, и от всех враг видимых и невидимых покровом твоим защити. Моли присно милостиваго Бога: страждущую страну Российскую от лютых безбожник и власти их да свободит, и да возставит престол православных правителей, верных рабов Его, в скорби и печали день и нощь вопиющих к нему, многоболезный вопль да услышит и да изведет от погибели живот наш, да тихое и безмолвное житие поживем во всяком благочестии и чистоте, и тако в мире временное сие житие прешедше, в вечный достигнем покой, и сподобимся Небеснаго Царствия, славяще Отца и Сына и Святаго Духа и твое святое заступление, во веки веков. Аминь.

Кондак 1 Избраннаго угодника Христова и чудотворца предивнаго, изряднаго учителя подвижников земли Российския и заступника нашего, восхваляем тя любовию, преподобне отче Варнаво. Ты же, яко имеяй дерзновение велие ко Господу, молитвами твоими от всяких нас бед свобождай, да зовем ти: Радуйся, преподобне Варнаво Гефсиманский, пастырю богомудрый и преславный чудотворче. Икос 1 Ангелов Творец и всея твари Содетель Господь, равноангельное житие твое провидев, преподобне, от юности избра тя служити Ему в преподобии и правде, последи же многими небесными дары тя украси: демоны прогоняти, недуги врачевати, скорбящия утешати, ожесточенныя сердца умягчати. Темже от нас, недостойных, приими хвалу, и молитву сотвори о спасении душ всех чтущих любовию память твою, да величаем тя сице: Радуйся, во славу Божию поживый; радуйся, благодатию Духа Святаго осиянный. Радуйся, суету земную ни во чтоже вменивый; радуйся, небесная сокровища возлюбивый. Радуйся, подвигов отцев преподобных ревнителю; радуйся, дивных старцев и наставников духовный преемниче. Радуйся, пастырю добрый и долготерпеливый; радуйся, винограда Христова делателю усердный. Радуйся, даром чудотворений облагодатствованный; радуйся, равноангельнаго жития подражателю предивный. Радуйся, о всей земли Российстей богодарованный молитвенниче; радуйся, венцем славы от Господа увенчанный. Радуйся, преподобне Варнаво Гефсиманский, пастырю богомудрый и преславный чудотворче. Кондак 2 Видя Господь душу твою ко приятию благодати Духа Святаго предуготованную, яко волею по стези благочестия течеши, в немже родителями твоими христолюбивыми наставлен был еси, от юности храняше тя в болезнех и напастех. Ты же от лет малых прославлял еси Всещедраго Бога, Врача душ и телес, поя Ему песнь: Аллилуия. Икос 2 Разум озаренный благодатию Божиею от юности имея, пришел еси, отче преподобне, к старцу Геронтию, да направит тя на путь истиннаго жительства и благословит на подвиги духовныя. Ты же обрел еси в нем монашескаго делания добраго наставника, его же отеческим советом повинуяся и всякое мирское попечение отлагая, молитве и смирению научался еси. Темже, творяще честную память твою, величаем тебя тако: Радуйся, родителей благочестивых Илии и Дарии утешение богодарованное; радуйся, в вере и страсе Божии ими добре воспитанный. Радуйся, силою Божиею от смерти дивно сохраненный; радуйся, учением благочестия издетска напоенный. Радуйся, Господа всем сердцем возлюбивый; радуйся, от малых лет сладость молитвы вкусивый. Радуйся, душу свою к Богу устремивый; радуйся, от юности твоея добродетели христианския стяжавый. Радуйся, верою, надеждою и любовию измлада украшенный; радуйся, благое иго Христово на себе восприемый. Радуйся, яко послушанием старцу смирение в себе воспитал еси; радуйся, яко от юных лет ко иночеству себе приуготовил еси. Радуйся, преподобне Варнаво Гефсиманский, пастырю богомудрый и преславный чудотворче. Кондак 3 Сила Божия укрепляше тя, отче преподобне, егда совету старца Геронтия последуя, отечество и дом свой оставил еси и во обитель Троице-Сергиеву вселился еси, идеже в посте, молитве, неустанном труде и бдении пребывая и всякая мира искушения побеждая, единому Богу воспевал еси: Аллилуия. Икос 3 Имеяй старцев-наставников богомудрых Григория и Даниила, проречение от них приял еси, преподобне, яко многих ко спасению путевождствовати будеши. Послужил же еси ты преданно наставником своим до самыя их кончины, с терпением житие подвижническое проводя и восходя от силы в силу. Темже и мы, твоей верности и послушанию старцем дивящеся, вопием ти таковая: Радуйся, ревности Божественныя исполненый; радуйся, суету мира сего и вся блага его презревый. Радуйся, яко чистоту и безмолвие от юности возлюбил еси; радуйся, яко от лет отроческих иноческаго жития возжелал еси. Радуйся, любве ради ко Господу дом отеческий оставивый; радуйся, в Лавру преподобнаго Сергия вселивыйся. Радуйся, повиновение старцу твоему и во обители сохранивый; радуйся, наставников твоих благословений верный исполнителю. Радуйся, старцем-подвижником Григорию и Даниилу в подвизех подражавый; радуйся, до блаженныя их кончины добре им послуживый. Радуйся, постом и воздержанием плоть твою духови покоривый; радуйся, сердце свое во обитель Духа Святаго уготовавый. Радуйся, преподобне Варнаво Гефсиманский, пастырю богомудрый и преславный чудотворче. Кондак 4 Бури искушений обители многолюдней избегая, в Гефсиманский скит вселился еси, отче преподобне, в безмолвии житие проводити желая и с Богом невозбранно беседовати, за вся люди Спасителю мира молитвы вознося и поя Ему песнь: Аллилуия. Икос 4 Слышавше о богоугодном житии твоем, преподобне, прихождаху к тебе от всех концев земли Российстей ближнии и дальнии, их же ты с любовию принимая, руководствовал еси ко спасению. Темже старец твой схимонах Григорий вручи тебе две просфоры, глаголя: сим питай алчущих – словом и хлебом, тако хощет Бог, и благослови тя на подвиг старчества и священства. Мы же, прославляюще укрепившаго тя Господа, радостно тебе вопием: Радуйся, во обитель святую Богом призванный; радуйся, благословение старцев на путь иноческий получивый. Радуйся, образе истиннаго послушания; радуйся, иноков обители преподобнаго Сергия украшение. Радуйся, бдение и молитву возлюбивый; радуйся, от страстей себе подвигами очистивый. Радуйся, кротостию и смирением всех удививый; радуйся, Христовых заповедей делателю непорочный. Радуйся, спасения хотящим усердно послуживый; радуйся, яко притекающих к тебе с любовию принимал еси. Радуйся, ищущим спасения душевнаго благий помощниче; радуйся, яко многих к вере истинней привел еси. Радуйся, преподобне Варнаво Гефсиманский, пастырю богомудрый и преславный чудотворче. Кондак 5 Бооготечней звезде лучами благодати люди российския озаряющей подобен явился еси, угодниче Божий, егда образа монашескаго и священства сподобился еси, и от того часа многих к Солнцу Правды Христу приводил еси словом благодатным и примером жития твоего, еже все посвящено бысть служению Богу и ближним. И якоже видеша тя людие у престола храма Божия за всех и за вся Спасителю мира молящася, сице и ныне возноси молитвы твоя о Церкви Святей, Отечестве нашем и о всех чтущих тя и поющих Богу: Аллилуия. Икос 5 Видевше людие православнии ангельское житие твое, отче Варнаво, смирения твоего глубину, кротость, любовь нелицемерную, милование к скорбящим, болезней благодушное терпение, воздержание и велия дары духовныя, удивишася и прославиша Человеколюбца Бога, даровавшаго им таковаго заступника и утешителя. Сего ради и мы, любовию побуждаеми, похвальная песнопения тебе приносим и молитвенно тя на помощь призываем: Радуйся, сыном утешения во иночестве нареченный; радуйся, прибегающим к тебе отец чадолюбивый. Радуйся, небесному покровителю твоему, святому апостолу Варнаве подражавый; радуйся, Евангелия Христова немолчный проповедниче. Радуйся, избраный Богом на священное служение; радуйся, сан священства, яко дар Божий приявый. Радуйся, с благоговением и страхом Божиим Жертву Безкровную приносивый; радуйся, у престола Божия о людех ходатаю верный. Радуйся, пастырю, в вере и благочестии паству свою воспитавый; радуйся, милости источниче неистощимый. Радуйся, к чистому и непорочному житию путеводителю; радуйся, о душах наших к Богу молитвенниче. Радуйся, преподобне Варнаво Гефсиманский, пастырю богомудрый и преславный чудотворче. Кондак 6 Проповедник силы и славы Божия явился еси, отче Варнаво, дивными бо чудесы землю нашу озарил еси и сугубую благодать восприял еси недуги целити, скорбящия утешати, бесы прогоняти. Отвсюду бо земли нашея страждущия люди – мужи и жены со младенцы, старцы с юнотами, богатии и убозии к тебе притекаху и предстательством твоим здравие душ и телес обретаху, вопиюще Подателю всех благих Богу: Аллилуия. Икос 6 Возсиял еси в земли Российстей, отче Варнаво, яко светило многосветлое, просвещающее светом истины всякаго человека, приходящаго к тебе. Ты бо монахам и мирским был еси наставник и многих подвижников веры возрастил еси, благочестием их напоив. Озари лучами добродетелей твоих и всех нас, любящих тя и молитвенно тебе взывающих: Радуйся, сердце твое сосуд благодати сотворивый; радуйся, верою чудодейственною озаренный. Радуйся, постников и монахов богомудрый учителю; радуйся, живущим в миру дивный помощниче. Радуйся, безмездный врачу болезней душевных и телесных; радуйся, верный путеводителю ко спасению. Радуйся, любовию твоею вся покрывали; радуйся, никогоже от приходящих к тебе отвергаяй. Радуйся, многими дарованьми духовными от Бога украшенный; радуйся, подвижников и старцев Российских воспитателю. Радуйся, правило веры и благочестия; радуйся, истинный пастырю душ человеческих. Радуйся, преподобне Варнаво Гефсиманский, пастырю богомудрый и преславный чудотворче. Кондак 7 Хотящи показати любовь Свою к чадом Божиим, Премилосердая Мати Господа благослови тя, преподобне Варнаво, на реце Выксе обитель девичью во имя Иверской иконы Ея воздвигнути, яже бысть оттоле пристанище благоутишное многим девам и женам русским. Ты же, преподобне, явился еси благий отец и наставник всем собравшимся в ней инокинем, и яко добрый кормчий направлял еси сестер обители ко спасению, наставляя словом и примером жития своего единем сердцем и единеми усты воспевати Богу: Аллилуия. Икос 7 Новыя труды и подвиги ко устроению обители Иверстей подъял еси, отче преподобне, инокинь ея на усердное Христу Богу служение подвизая, и был еси им учитель благодатный и праведный. Тогда воздвигоша врази гонения противу обители, покушающеся отвратити тя от трудов сих. Ты же, благодатию свыше укрепленный, мнози скорби и искушения препобедил еси и вверил еси судьбы сестер промышлению Божию, подвизая их усердно молитися ко Пресвятей Владычице Богородице. Темже память твою святую славим и вопием ти сице: Радуйся, Матере Божия чадо верное и возлюбленное; радуйся, Покровом Ея невидимо осененный. Радуйся, Заступницы Усердныя благоговейный почитателю; радуйся, во дни и в нощи молитвы к Ней слезно возносивый. Радуйся, обитель во имя Пресвятыя Богородицы воздвигнувый; радуйся, яко в ней инокинь множество собрал еси. Радуйся, велиих трудов и скорбей не убоявыйся; радуйся, все упование на Пречистую Богородицу возложивый. Радуйся, смиренно моливый Владычицу путь твой управити; радуйся, небесную помощь от Нея восприемый. Радуйся, храм Вратарницы Афонския во обители Владычицы устроивый; радуйся, Пресвятей Богородице верно послуживый. Радуйся, преподобне Варнаво Гефсиманский, пастырю богомудрый и преславный чудотворче. Кондак 8 Странное чудо видим на тебе, преподобне Варнаво, како прослави тя Бог еще на земли и великими дары благодатными обогати: прозорливости, пророчества, любве, молитвы, исцеления. Ты бо, якоже другий Илия, дождь с небесе свел еси, сего ради вси людие православнии, от бедствия избавльшиися, благодарственно взываху Богу: Аллилуия. Икос 8 Весь благодатию Божественною преисполнен быв, преподобне отче Варнаво, прозорливыма очима грядущая, яко настоящая, провидел еси, и тайну беззакония верным предвозвестил еси, яко бурю гонений воздвигнет диавол на Церковь Русскую Православную. Последи же скорбь чад Божиих обратится в радость духовную и по всей земли Российстей, яко крины сельныя, процветут храмы и обители иноческия. Мы же, сбытие сих проречений ныне зряше, глаголем ти сице: Радуйся, духом премудрости и разума озаренный; радуйся, духом совета и крепости исполненный. Радуйся, духом ведения настоящаго и будущаго просвещеннный; радуйся, даром прозорливости просиявый. Радуйся, даром рассуждения почтенный; радуйся, дара Божественнаго ведения удостоенный. Радуйся, бедствия, на Церковь Божию грядущая, предзревый; радуйся, к венцем исповедническим истинных рабов Божиих предуготовлявый. Радуйся, великому пророку Божию Илии уподобивыйся; радуйся, молитвами твоими дождь на землю благовременно низведый. Радуйся, бездетным родителем чадородие даровавый; радуйся, богоблагодатный человеком помощниче. Радуйся, преподобне Варнаво Гефсиманский, пастырю богомудрый и преславный чудотворче. Кондак 9 Весь в Бозе был еси, святе Варнаво, егда с молитвою на устах предал еси праведную душу твою в руце Божии, мирно и безмятежно, в алтаре пред престолом храма Божия колена преклонив. Смерть бо тебе воистинну упокоение бысть от великих трудов и подвигов непрестанных. О таковом блаженном успении твоем радующеся, воспоем Создателю нашему песнь: Аллилуйя. Икос 9 Ветии многовещаннии не возмогут изрещи обилие радости духовныя, еюже исполнени быша сердца верных о прославлении твоем, отче Варнаво, в лице преподобных, яко великаго старца и чудотворца Церкве Русския. Темже, поюще твое прославление, молим тя: не забуди чад твоих, почитающих имя твое и взывающих тебе благодарно: Радуйся, грады и веси Российския славою твоих подвигов напоивый; радуйся, в чудесех от Бога прославленный. Радуйся, слезами и молитвами себе к смерти приготовивый; радуйся, блаженную кончину от Бога приемый. Радуйся, близость отшествия твоего ко Господу предвидевый; радуйся, житием и исходом твоим нас поучаяй. Радуйся, праведною кончиною святость жития твоего показавый; радуйся, в радость Господа своего вшедый. Радуйся, Церкве Русския Православныя новое торжество; радуйся, всея Российския земли пресветлый светильниче. Радуйся, Царствия Небеснаго наследниче; радуйся, о всем мире печальниче и молитвенниче. Радуйся, преподобне Варнаво Гефсиманский, пастырю богомудрый и преславный чудотворче. Кондак 10 Спасения всех желая, пастырю добрый отче Варнаво, до конца дней своих многих людей, мирскими делы обремененных, наставлял и укреплял еси, отраду им своим попечением подавая и тяготы трудов облегчая. Такожде и по отшествии твоем помощь и заступление подаеши во всех нуждах и испытаниих молящимся тебе и поющим о тебе благодарственную песнь Богу: Аллилуия. Икос 10 Стеною заступления православным людем страны нашея явишася чудотворныя мощи твоя, преподобне Варнаво, подаеши бо от них врачевание страстем неисцельным, слепым даеши свет, глухим слышание, разслабленным здравие, страждущим раковыми язвами исцеление и всем благодать изливаеши, радостию озаряя приходящих к раце мощей твоих и воспевающих тебе с любовию таковая: Радуйся, святыя мощи твоя, яко сокровище велие, явити изволивый; радуйся, обитель твою сим освятивый. Радуйся, нетлением мощей славно от Бога возвеличенный; радуйся, сосуде благодати, миро целебное болящим источаяй. Радуйся, чудесными исцелениями от мощей твоих верных возвеселивый; радуйся, всем приходящим к ним благ преизобильный подателю. Радуйся, лютых и неисцельных недугов телесных врачевателю; радуйся, немощей и страстей душевных целителю. Радуйся, молящимся у раки мощей твоих скорую помощь подаваяй; радуйся, великий чудотворче, на утешение нам дарованный. Радуйся, на земныя скорби и нужды наша призираяй; радуйся, радости духовныя нас исполняяй. Радуйся, преподобне Варнаво Гефсиманский, пастырю богомудрый и преславный чудотворче. Кондак 11 Пение всеумиленное приносим ти по достоянию о множестве чудес, яже от мощей твоих являются, отче Варнаво, ихже благодатию сияет обитель твоя святая, от безбожных разоренная. Темже инок множество зде собравшихся вкупе со всеми чтущими любовию память твою воспевают Богу, дивному во святых Своих, песнь: Аллилуия. Икос 11 Светозарный светильник старчества благодатнаго явился еси и яко Ангел пожил еси на земли, преподобне отче Варнаво. Сего ради многих подвижников благочестия и старцев воспитал еси, да не увянет цвет благоуханный старчества в Российстей земли. Ныне же, на небесех пребывая со ученики твоими в сонме святых земли нашея, поминай нас, вопиющих ти с любовию таковая: Радуйся, сиянием добродетелей твоих землю нашу просветивый; радуйся, светильниче Божественныя благодати. Радуйся, блистанием чудес Отечество твое земное озаривый; радуйся, многих сим в Православней вере утвердивый. Радуйся, тайнозрителю судеб человеческих; радуйся, наставлениями и молитвами твоими подвижники совершенныя воспитавый. Радуйся, в юном послушнике будущаго старца Захарию прозревый; радуйся, купца Василия, будущаго старца Серафима Вырицкаго, на путь духовнаго подвига направивый. Радуйся, яко будущему Оптинскому старцу Варсонофию мир оставити помогл еси; радуйся, будущаго подвижника и старца епископа Тихона Череповецкаго духовный учителю. Радуйся великаго святителя митрополита Трифона духовный отче и наставниче; радуйся, Царя-страстотерпца Николая Втораго на подвиг служения его благословивый. Радуйся, преподобне Варнаво Гефсиманский, пастырю богомудрый и преславный чудотворче. Кондак 12 Благодать велию дарова ти Господь, предивный угодниче Божий, якоже бо в земней жизни твоей пророчествовал еси и, совершал еси дивная и многая чудеса, тако и доныне не престаеши чудодействовати и источати исцеления всем чтущим тя. Темже и нас молитвою твоею исцели, буди нам помощник скорый и врач духовный, да покаянием очищени, в Царство Небесное внидем и тамо с тобою и со всеми угодившими Богу воспоем Ему: Аллилуия. Икос 12 Поюще твое прославление в лице святых земли нашея, хвалим, славим и ублажаем тя любовию, преподобне отче наш Варнаво, яко заступника и молитвенника о нас пред Господом. Ты же дарованною тебе благодатию освяти, просвети и настави на путь спасения нас, грешных; услыши нас, скорбных, недугующих, страждущих, вопиющих к тебе, великому всероссийскому старцу-утешителю таковая: Радуйся, ангеле земный и человече небесный; радуйся, великий Божий угодниче. Радуйся, яко серафимскою пламенною любовию к Богу горел еси; радуйся, яко со Ангелы ныне предстоиши Пресвятей Троице. Радуйся, во иноческих трудех и подвизех древним отцем уподобивыйся; радуйся, звездо сияющая в лике преподобных. Радуйся, под кровом обители преподобнаго Сергия подвиг иноческий совершивый; радуйся, подвизающимся в ней спасения вечнаго ходатаю. Радуйся, яко разоренную Иверскую обитель молитвами твоими обновивый; радуйся, яко с молитвами о сестрах ея Богу предстоиши. Радуйся, дерзновение велие пред Богом стяжавый; радуйся, к Богородице молитвенниче наш неусыпный. Радуйся, преподобне Варнаво Гефсиманский, пастырю богомудрый и преславный чудотворче. Кондак 13 О преподобне и богоносне отче наш Варнаво, ты явился еси в Отечестве нашем столп благочестия, воздержания правило, смиренномудрия образ, заступник, утешитель и хранитель всем прибегающим к тебе. Не забуди убо нас, чад своих, сохрани и заступи от находящих зол, да твоими молитвами соблюдаеми, Царствия Небеснаго сподобимся о Христе Иисусе Господе нашем, поюще Ему победную песнь: Аллилуия.[Се́й конда́к глаго́лется три́жды.][Далее повторяем 1‑е икос и кондак:]Икос 1 Ангелов Творец и всея твари Содетель Господь, равноангельное житие твое провидев, преподобне, от юности избра тя служити Ему в преподобии и правде, последи же многими небесными дары тя украси: демоны прогоняти, недуги врачевати, скорбящия утешати, ожесточенныя сердца умягчати. Темже от нас, недостойных, приими хвалу, и молитву сотвори о спасении душ всех чтущих любовию память твою, да величаем тя сице: Радуйся, во славу Божию поживый; радуйся, благодатию Духа Святаго осиянный. Радуйся, суету земную ни во чтоже вменивый; радуйся, небесная сокровища возлюбивый. Радуйся, подвигов отцев преподобных ревнителю; радуйся, дивных старцев и наставников духовный преемниче. Радуйся, пастырю добрый и долготерпеливый; радуйся, винограда Христова делателю усердный. Радуйся, даром чудотворений облагодатствованный; радуйся, равноангельнаго жития подражателю предивный. Радуйся, о всей земли Российстей богодарованный молитвенниче; радуйся, венцем славы от Господа увенчанный. Радуйся, преподобне Варнаво Гефсиманский, пастырю богомудрый и преславный чудотворче. Кондак 1 Избраннаго угодника Христова и чудотворца предивнаго, изряднаго учителя подвижников земли Российския и заступника нашего, восхваляем тя любовию, преподобне отче Варнаво. Ты же, яко имеяй дерзновение велие ко Господу, молитвами твоими от всяких нас бед свобождай, да зовем ти: Радуйся, преподобне Варнаво Гефсиманский, пастырю богомудрый и преславный чудотворче. Молитва преподобному Варнаве Гефсиманскому О преподобне отче Варнаво, пастырю наш кроткий и утешительный, милостивый помощниче и теплый о нас молитвенниче! Ты измлада чадо благословения Божия быв, образ послушания родителем и служения ближним показал еси. Заповеди Господни возлюбив, в Лавру Преподобнаго Сергия притекл еси и того верный ученик явился еси. Во обители же Божия Матере пребывая, дух смиренномудрия, кротости и терпения стяжал еси и дар рассуждения и прозрения от Бога приял еси. Сего ради монашествующим духовный наставник, инокинем созидатель обители Иверския на Выксе-реце и всем страждущим и болезнующим целитель и попечитель милостивый даже до часа смертнаго был еси. По преставлении же твоем Бог многия милости почитающим память твою яви и иноком учителя тя верна дарова. Темже молим тя, праведный отче, якоже и прежде, ходатайствуй пред Богом молитвами твоими всем людем во всяцем звании дух утешительный стяжати и коемуждо потребная обрести: юным послушание и целомудрие страхом Божиим сохранити; в возрасте сущим – любовь Божию и согласие стяжати; алчущим – не токмо хлебом насущным, но и наипаче словом Божиим насытитися; плачущим – утешитися; изгнанником и странником – пристанище обрести; в темнице сущим – от уз свободитися; благочестивым – в Дусе Божием возрасти и смиренномудрия достигнути. Сшествуй нам во всех путех жизни нашея, паче же умоли Господа нашего о прощении прегрешений и неправд наших и к свету заповедей Божиих стопы наша направи, да единем сердцем и единеми усты славим Пресвятую Троицу, Отца и Сына и Святаго Духа во веки веков. Аминь.

Минея, 28 Августа, Кано́н преподо́бных Глас 8 Песнь 1 Ирмос: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:/Изба́вителю и Бо́гу на́шему пои́м. Припев: Преподо́бнии отцы́, моли́те Бо́га о на́с. Во́ду преходи́ти пе́сненных слове́с в па́мять ва́шу, Богоно́снии отцы́, хотя́ща мя,/ в тишине́ у́мней всегда́ испра́вите/ и от бу́рных страсте́й удержи́те,/ да в ва́шем хвале́нии с пе́снию возвели́чу И́мя Бо́га моего́. Припев: Преподо́бнии отцы́, моли́те Бо́га о на́с. Изше́д на зла́чное по́ле мы́сленнаго рая́ пеще́ры святы́я,/ услажда́юся благово́нными арома́ты, я́же источа́ют мо́щи ва́ша, преподо́бнии отцы́,/ и ве́село Созда́телю Бо́гу пе́снь умо́м возсыла́ю. Припев: Преподо́бнии отцы́, моли́те Бо́га о на́с. Вертогра́д заключе́н ты еси́, пеще́ро свята́я,/ в тебе́ бо Сади́тель Вы́шний насади́ мно́жество древе́с,/ богоно́сных оте́ц, а́ки ке́дров лива́нских, и́же досяго́ша Небе́с высото́ю,/ и́мже удивля́яся, пою́ пе́снь Бо́гу моему́. Припев: Преподо́бнии отцы́, моли́те Бо́га о на́с. Стра́жу неусы́пне, Лонгине вра́тарю,/ дар име́вый прозира́ти мы́сли входя́щих,/ обреты́й по́чести Вы́шняго зва́ния,/ вни́ди и обыми́ хвалы́ богоно́сных оте́ц,/ в и́хже па́мяти пе́снь Бо́гу на́шему пое́м. Припев: Преподо́бнии отцы́, моли́те Бо́га о на́с. Игна́тие, па́стырю и́ночествующих и цели́телю боля́щих,/ в неду́зех на́ших посо́бствуй тя почита́ющим,/ да в па́мяти твое́й пе́снь хвалы́ Бо́гу на́шему принесе́м. Сла́ва Отцу́ и Сы́ну и Свято́му Ду́ху. Силуа́не преподо́бне, чистоты́ рачи́телю и храни́телю садо́вий,/ та́тей чу́вственных и мы́сленных, плоды́ обоя́ окрасти́ хотя́щих, моли́твою связа́вый,/ от тех нападе́ний и нас спаси́, мо́лимся. И ны́не и при́сно и во ве́ки веко́в. Ами́нь. Богородичен: Мно́гими та́ти обстои́мь, не чу́вствую всегда́,/ и окрада́ют ми врази́ покая́ния плоды́,/ но бо́дренною Твое́ю моли́твою и неисче́тною благосты́нею, Ма́ти Бо́жия,/ изба́ви мя, молю́ся. Песнь 3 Ирмос: Небе́снаго кру́га Верхотво́рче, Го́споди,/ и Це́ркве Зижди́телю,/ Ты мене́ утверди́ в любви́ Твое́й,/ жела́ний кра́ю, ве́рных утвержде́ние,/ Еди́не Человеколю́бче. Припев: Преподо́бнии отцы́, моли́те Бо́га о на́с. Небе́снаго и земна́го кру́га Созда́тель созда́ ме́сто сие́/ и вас, до́брыя гра́жданы, в нем поста́ви, треблаже́ннии отцы́,/ причти́те нас в сожи́тие ва́ше нетле́нное/ и жела́емаго кра́я ми́лости дости́гнути моли́теся, мо́лим вас. Припев: Преподо́бнии отцы́, моли́те Бо́га о на́с. Агафо́не блаже́нне, бла́гости веща́ния имени́те,/ по́стником красото́, проро́че нело́жный и цели́телю неду́жных,/ скажи́ нам, нечу́вственным, а́ще пу́ть беззако́ния е́сть в нас,/ и ты наста́ви ны моли́твами твои́ми на пу́ть ве́чен. Припев: Преподо́бнии отцы́, моли́те Бо́га о на́с. Пое́м ди́внаго Зинона, сия́ющаго посто́м,/ и Мака́рия, блаже́нству тезоимени́та,/ сих двои́х ра́ди отце́в, мо́лимтися, Влады́ко,/ изми́ нас душе́вных и теле́сных страсте́й, Еди́не Человеколю́бче. Припев: Преподо́бнии отцы́, моли́те Бо́га о на́с. Сла́вим Ахи́лу, служи́теля же́ртвы,/ и я́ко и́стиннаго по́стника приво́дим Ти, Христе́, в моли́тву,/ его́же ра́ди изми́ нас от порабоще́ния чре́вных страсте́й/ и воздержа́нию того́ научи́ ны, Еди́не Человеколю́бче. Припев: Преподо́бнии отцы́, моли́те Бо́га о на́с. Ипа́тие, служи́телю немощны́м,/ я́ко име́яй дар больны́х цели́ти возложе́нием руку́, тя мо́лим,/ посети́ свы́ше нас, душе́вными неду́ги обдержи́мых,/ и спаси́ моли́твами твои́ми. Припев: Преподо́бнии отцы́, моли́те Бо́га о на́с. Я́ко в житии́ сем любве́ свя́зани сою́зом,/ по сме́рти же в еди́нем гро́бе су́ще положе́ни,/ та́ко и в нетле́нней жи́зни ны́не вку́пе живу́ще, Паи́сие и Мерку́рие,/ хода́тайством ва́шим к Бо́гу в единомы́слии и любви́ утверди́те ны, мо́лимся. Сла́ва Отцу́ и Сы́ну и Свято́му Ду́ху. Лавре́нтие, по́стником свети́ло, и Моисе́е крестоно́сне,/ в тьме́ страсте́й нас су́щих и ходя́щих освети́те и моли́твами ва́шими наста́вите,/ да и мы в крестоноше́нии на́шем не преткне́м о ка́мень собла́зна ног на́ших. И ны́не и при́сно и во ве́ки веко́в. Ами́нь. Богородичен: Тьма́ страсте́й объя́т ны,/ и в пути́ сласте́й уклони́хомся непрохо́дны,/ све́та и справле́ния не ви́дим./ Наста́внице, наста́ви нас и свет покая́ния возсия́й нам,/ Ты бо еси́ всем многосве́тлое свети́ло, просвеща́ющее ду́ши на́ша. Седален, глас 2 Поще́нием просия́вших и све́тлыми по́двиги/ преподо́бных оте́ц Пече́рских чи́стое житие́ и труды́ кто восхвали́ти мо́щен?/ Оба́че от любве́, я́же к ним, пе́сненныя да́ры прино́сим,/ ти́и бо, со А́нгелы предстоя́ще, при́сно мо́лятся Го́сподеви о всех нас. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Милосе́рдия су́щи исто́чник, ми́лости сподо́би нас, Богоро́дице,/ при́зри на лю́ди согреши́вшия,/ яви́, я́ко при́сно, си́лу Твою́,/ на Тя бо упова́юще: ра́дуйся, – вопие́м Ти,/ я́коже иногда́ Гаврии́л, безпло́тных Архистрати́г. Песнь 4 Ирмос: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́. Припев: Преподо́бнии отцы́, моли́те Бо́га о на́с. Дре́вних оте́ц стопа́м после́дующе,/ не уклони́стеся ни ма́ло от их трудо́в,/ те́мже ра́вный дина́рь ве́чныя жи́зни от Христа́ прие́мше,/ со А́нгелы сла́вит е преве́чное Того́ Божество́. Припев: Преподо́бнии отцы́, моли́те Бо́га о на́с. Илларио́н ди́вный, вели́каго о́браза чин име́вый/ и, по чи́ну своему́ ревну́я житию́ преподо́бнаго Феодо́сия,/ еди́ною всегда́ в седми́це яды́й, кре́пок бе во славосло́вии пе́ти:/ Сла́ва си́ле Твое́й, Го́споди. Припев: Преподо́бнии отцы́, моли́те Бо́га о на́с. По́стническое стече́ся во́инство,/ в не́мже просия́ све́тлая звезда́, Диони́сий,/ и́же ны́не сия́ет во сла́ве святы́х и сла́вит Еди́но Божество́. Припев: Преподо́бнии отцы́, моли́те Бо́га о на́с. Трудолю́бцем о́браз изве́стный, Арсе́ний, му́жеству тезоимени́тый,/ в труде́х де́нь и но́щь живы́й,/ прия́т возме́здие, дар чудотворе́ния,/ от него́же подае́т тре́бующим всем неоску́дно. Припев: Преподо́бнии отцы́, моли́те Бо́га о на́с. Пи́мене, по́стником единонра́вне,/ кровопо́тными труды́ труди́выйся в послуша́нии вы́ну,/ дрова́ нося́, в же́рновех меля́,/ на вся́ку же но́щь непреста́нно поя́ Бо́га и Того́ Еди́но Божество́. Припев: Преподо́бнии отцы́, моли́те Бо́га о на́с. Сто́лпе непоколеби́ме, Афана́сие затво́рниче,/ водруже́н сый в затво́ре, не тре́бовал еси́ све́тлости чу́вственныя,/ поне́же тебе́ мы́сленная светя́ше,/ то́ю моли́, блаже́нне, просвети́тися тя почита́ющим. Сла́ва Отцу́ и Сы́ну и Свято́му Ду́ху. Троичен: Сла́ва Тебе́, Тро́ице Пресвята́я,/ я́ко просла́вила еси́ ме́сто земно́е, Небе́сному гра́жданы подо́бное,/ в и́хже па́мяти приноси́мым от нас пе́нием/ Тя, О́тче, и Сы́не, и Ду́ше Святы́й, с раболепным поклоне́нием, гре́шнии, сла́вим/ и Твое́ Еди́но Божество́ превозно́сим. И ны́не и при́сно и во ве́ки веко́в. Ами́нь. Богородичен: Сла́ва Тебе́, правосла́вных сла́во, Чи́стая,/ Тя бо сла́вит со А́нгелы род челове́ческий и, припа́дая, вопие́т:/ Сла́ва бо Твоя́, Богоро́дице, всем простре́ся во спасе́ние. Песнь 5 Ирмос: Просвети́ нас повеле́нии Твои́ми, Го́споди,/ и мы́шцею Твое́ю высо́кою/ Твой мир пода́ждь нам,/ Человеколю́бче. Припев: Преподо́бнии отцы́, моли́те Бо́га о на́с. Просвети́ша всю Росси́йскую зе́млю да́нною им благода́тию отцы́ всеблаже́ннии,/ и тьма́ уже́ злове́рия вконе́ц поги́бе./ Ты́я лучи́ простри́ на ны моле́ния их ра́ди,/ мо́лимтися, Еди́не Человеколю́бче. Припев: Преподо́бнии отцы́, моли́те Бо́га о на́с. Сисо́е чу́дне и Григо́рие, и́мя от бо́дрости име́вый,/ о́ба посто́м обуздавший своя́ стра́сти,/ свире́пеющую по́хоть и на́шея пло́ти смири́те,/ вам бо дана́ е́сть благода́ть в страсте́х нам посо́бствовати. Припев: Преподо́бнии отцы́, моли́те Бо́га о на́с. Воздержа́ния рачи́телю, Па́вле блаже́нне, со двема́ канона́рхома,/ простри́те о нас мольбы́ ко Влады́це,/ да Того́ благода́тию от чре́вняго несы́тства уде́ржимся/ и вам в воздержа́нии насле́дницы бу́дем. Припев: Преподо́бнии отцы́, моли́те Бо́га о на́с. Сло́во Бо́жие, вразумля́ющее челове́ки,/ не кни́жныя му́дрости научи́ тя, Не́сторе свя́те, но Вы́шния,/ е́юже зрел еси́ при моли́твах А́нгелы и кончи́ну свою́ предви́дел еси́./ Той и нас прича́стники сотвори́, мо́лим тя,/ па́мять твою́ почита́юще. Припев: Преподо́бнии отцы́, моли́те Бо́га о на́с. Ти́те всему́жественне, во́инствующу ти иногда́,/ поби́ша сопроти́внии ору́жием главу́ твою́,/ и бы́сть я́зва вино́ю, я́ко прише́л еси́ в Пече́рскую го́ру/ и та́мо пла́кал еси́ о гресе́х свои́х,/ о и́хже проще́нии извеще́ние прие́м,/ ра́достно отше́л еси́ к Го́рним селе́нием Небе́сным, преподо́бне. Припев: Преподо́бнии отцы́, моли́те Бо́га о на́с. Па́мву послушли́ваго почита́ти дерза́ю и удивля́юся:/ той бо в послуша́нии от неве́рных и ве́ры ра́ди во у́зах претерпе́ мно́го,/ оба́че, от А́нгел восхище́н и пренесе́н, в ке́ллии свое́й обре́теся,/ и сбы́стся на нем, я́ко послуша́ние от сме́рти избавля́ет. Сла́ва Отцу́ и Сы́ну и Свято́му Ду́ху. Троичен: Впадо́х в ру́ки враго́в мы́сленных/ и око́ван е́смь от них тя́жкими пу́ты, от ни́хже брат не изба́вит./ Ты, Тро́ице Пресвята́я, я́ко Ми́лостивая, созда́ние Твое́ поми́луй/ и бла́гостию Твое́ю от уз сме́ртных свободи́. И ны́не и при́сно и во ве́ки веко́в. Ами́нь. Богородичен: Свя́зан е́смь мно́гими плени́цами страсте́й,/ и не́сть ми разреше́ния наде́жды,/ но Ты поми́луй мя, я́ко Ма́ти Бо́га Вы́шняго,/ и разреши́ мя от них,/ Ты бо Еди́на си́льна еси́ по Бо́зе грехо́вныя плени́цы разреши́ти. Песнь 6 Ирмос: Моли́тву пролию́ ко Го́споду/ и Тому́ возвещу́ печа́ли моя́,/ я́ко зол душа́ моя́ испо́лнися,/ и живо́т мой а́ду прибли́жися,/ и молю́ся, я́ко Ио́на:/ от тли, Бо́же, возведи́ мя. Припев: Преподо́бнии отцы́, моли́те Бо́га о на́с. Моли́твы на́ша прино́сим вам, о Богоно́снии отцы́,/ вы бо есте́ моли́твенницы о нас к Бо́гу и хода́таи,/ хода́тайством у́бо ва́шим от тли грехо́вныя изба́вите/ честны́й ваш собо́р почита́ющих. Припев: Преподо́бнии отцы́, моли́те Бо́га о на́с. Неусы́пне серде́чное виде́ние иму́ще к Бо́гу,/ бы́сте незло́бивии, а́ки младе́нцы,/ но яро о́ко име́ете на бе́сы, я́ко и и́мене ва́шего им трепета́ти./ Мо́лим вас, моли́теся,/ да и от нас нападе́ния вра́жия со студо́м возвратя́тся. Припев: Преподо́бнии отцы́, моли́те Бо́га о на́с. Заха́рие, па́мяти Госпо́дней тезоимени́те,/ по и́мени твоему́ и житие́ стяжа́вый,/ та́ко бо на враги́ посто́м му́жески вооружи́влся еси́,/ я́ко во всем житии́ твое́м зе́лием пита́яся, дово́лен был еси́,/ тем и́мене твоего́ боя́хуся бе́си;/ от сих у́бо злоде́йства избавля́я, ускори́ на по́мощь на́шу,/ смире́нно мо́лимтися. Припев: Преподо́бнии отцы́, моли́те Бо́га о на́с. Фео́доре блаже́нне,/ сла́ву благоро́дства своего́ в пе́рсть всели́вый,/ измени́в княже́ние на и́ноческий о́браз,/ в не́мже Влады́це своему́ до́бре угоди́вый/ и ны́не со А́нгелы в Небе́сных живы́й,/ моли́ся о нас, да сла́вы неги́бнущия прича́стницы бу́дем. Припев: Преподо́бнии отцы́, моли́те Бо́га о на́с. Софро́ние преподо́бне, в те́мнем ме́сте себе́ затвори́вый,/ непреста́нно во псалме́х пел еси́ Бо́гу;/ и ны́не в простра́нней селе́нии Го́рнем наслажда́лся а́нгельских пе́ний,/ моли́ся, да и мы та́я слы́шати сподо́бимся. Припев: Преподо́бнии отцы́, моли́те Бо́га о на́с. В преподо́бии и пра́вде свяще́нствуя Вы́шнему, Панкра́тие чу́дне,/ чудотво́рными да́ры обогати́вся,/ от сих подава́л еси́ неоску́дно тре́бующим;/ пода́ждь у́бо сия́ и нам, в боле́знех к тебе́ усе́рдно приходя́щим. Сла́ва Отцу́ и Сы́ну и Свято́му Ду́ху. Троичен: Сла́вы ра́ди И́мене Твоего́, Пресу́щественная Тро́ице,/ просла́вила еси́ пра́ведных Твои́х и ме́сто сие́;/ бла́гостию у́бо Твое́ю пода́ждь и нам, Бла́же, сла́ву святы́х во сла́ве Твое́й зре́ти/ и с ни́ми Тебе́ сла́вит и, в трие́х Ипоста́сех Еди́наго Бо́га. И ны́не и при́сно и во ве́ки веко́в. Ами́нь. Богородичен: И́же Тя не просла́вит, Пресвята́я Де́во,/ той да не ви́дит сла́вы жи́зни ве́чныя;/ нам же да́ждь ви́дети ту́ю,/ и́бо зна́ем Тя, сла́виму от всех сил Небе́сных, и сие́ прино́сим Ти:/ ра́дуйся, ве́рным изве́стная похвало́. Кондак, глас 8 Избра́ннии от родо́в уго́дницы Бо́жии,/ святи́и преподо́бнии Пече́рстии,/ на сих гора́х доброде́тельми просия́вшим,/ вас земля́ не потаи́ла е́сть,/ но Не́бо отве́рзеся вам и ра́йское селе́ние./ Те́мже мы похва́льныя пе́сни Бо́гу, просла́вльшему вас,/ в па́мяти ва́шей прино́сим;/ вы же, я́ко иму́щии дерзнове́ние,/ ваш собо́р почита́ющих от всех бед моли́твами ва́шими заступа́йте,/ я́ко засту́пницы на́ши и к Бо́гу хода́таи. Икос Восхвали́ти по еди́ному кто возмо́жет святы́я Твоя́, Бла́же:/ изочту́ их, и па́че песка́ умно́жатся,/ но Сам, Влады́ко Христе́, исчита́яй мно́жество звезд и всем имена́ нарица́яй,/ приими́ всех их мольбы́ о нас и яви́ щедро́ты Твоя́ на лю́дех Твои́х;/ ве́мы бо, я́ко мно́го и́мут дерзнове́ние к вели́честву Твоему́ и хода́тайствуют к Тебе́,/ я́ко при́сно моли́твенницы о душа́х на́ших. Песнь 7 Ирмос: От Иуде́и доше́дше, о́троцы/ в Вавило́не иногда́/ ве́рою Тро́ическою пла́мень пе́щный попра́ша, пою́ще:/ отце́в Бо́же, благослове́н еси́. Припев: Преподо́бнии отцы́, моли́те Бо́га о на́с. Ту́чная еси́ и усыре́нная, Пече́рская горо́,/ в твои́х бо гра́жданех изво́ли Вы́шний селе́ние Свое́ полжи́ти,/ те́мже и мы с ни́ми пое́м:/ оте́ц на́ших Бо́же, благослове́н еси́. Припев: Преподо́бнии отцы́, моли́те Бо́га о на́с. Сми́рны испо́лнена и хо́лму Лива́нскому подо́бна еси́, Пече́рская горо́,/ ка́плющая ми́ры Богоно́сных оте́ц на исцеле́ние боле́зней тлетво́рных,/ и́хже мы благоуха́ние прие́млюще, пое́м:/ оте́ц на́ших Бо́же, благослове́н еси́. Припев: Преподо́бнии отцы́, моли́те Бо́га о на́с. Аммо́не и Марда́рие, подви́жный супру́г,/ бы́вше нищеты́ рачи́телие,/ ны́не же бога́тство неги́блющее стяжа́вшии,/ моли́теся и нам то́ежде стяжа́ти в Вы́шних, иде́же пою́т:/ Бо́же, благослове́н еси́. Припев: Преподо́бнии отцы́, моли́те Бо́га о на́с. Пое́м Ру́фа, по́стником и трудолюбцем зерца́ло, с Вениами́ном Блаже́нным,/ и́же все свое́ име́ние отдаде́ ни́щим,/ да еди́н би́сер Христа́ стя́жет,/ Ему́же ревни́телие да бу́дем, пою́ще:/ Бо́же, благослове́н еси́. Припев: Преподо́бнии отцы́, моли́те Бо́га о на́с. Фео́филе, иера́рхом удобре́ние, Нова́града престо́л содержа́вый/ и Сама́го Го́спода ви́девый,/ умоли́ Того́ бла́гость, да и мы Лице́ его́ у́зрим с тобо́ю и воспое́м:/ оте́ц на́ших Бо́же, благослове́н еси́. Припев: Преподо́бнии отцы́, моли́те Бо́га о на́с. В диа́конех свети́ло и в трудолю́бцех о́бразе, Марти́рие, чистоты́ рачи́телю,/ дар име́вый прогоня́ти от челове́к лука́выя ду́хи и не́мощи цели́ти,/ ду́ха зло́бы и вся́кия ле́сти отжени́ от нас, да чи́сто воспое́м:/ Бо́же, благослове́н еси́. Сла́ва Отцу́ и Сы́ну и Свято́му Ду́ху. Троичен: Прославля́ющия святы́х Твои́х просла́ви, Преблага́я Тро́ице, сла́вою,/ ю́же угото́вала еси́ от ве́ка рабо́м Твои́м, и сподо́би пе́ти:/ оте́ц на́ших Бо́же, благослове́н еси́. И ны́не и при́сно и во ве́ки веко́в. Ами́нь. Богородичен: Прера́дованная Ма́ти и Цари́це,/ ра́достная Тебе́ принося́щих ра́дости ве́чныя сподо́би/ и отве́рзи ра́йския две́ри христиа́нскому всему́ ро́ду, при́сно Тебе́ пою́щему:/ Богоро́дице, благослове́нна еси́. Песнь 8 Ирмос: Царя́ Небе́снаго,/ Его́же пою́т во́и а́нгельстии,/ хвали́те и превозноси́те во вся ве́ки. Припев: Преподо́бнии отцы́, моли́те Бо́га о на́с. Цари́цы Небе́сныя селе́ние еси́, Святопече́рская горо́,/ ю́же си́льных мно́жество преподо́бных оте́ц окружа́ют,/ вси ору́жия изощре́нна иму́ще, моли́твы проти́ву мироде́ржца, пою́т пе́снь Бо́гу:/ пое́м и превозно́сим его́ во ве́ки. Припев: Преподо́бнии отцы́, моли́те Бо́га о на́с. Восто́к и за́пад, юг и се́вер/ ви́дит во огра́де твое́й, Пече́рская горо́, исто́чник,/ кипя́щий ми́ры чуде́с Богоно́сных оте́ц, излива́ющийся всем изоби́льно,/ и́же пою́т и превозно́сят Го́спода во ве́ки. Припев: Преподо́бнии отцы́, моли́те Бо́га о на́с. Ко́е хвале́ние вам принесе́м, о Богоно́снии отцы́,/ ка́ко испове́мы труды́ и по́двиги ва́ша тупогру́бым язы́ком, не ве́мы./ Но ты, свя́те Евфи́мие молчали́ве, научи́ ны,/ да с тобо́ю пое́м Го́спода во ве́ки. Припев: Преподо́бнии отцы́, моли́те Бо́га о на́с. По́стником и трудолюбцем сия́ние, Кассиа́не и Пио́ре блаже́нне,/ о́ба светя́щийся житие́м, а́ки небе́сная свети́ла,/ све́тлостию благода́ти, да́нныя вам, озари́те ны,/ да сподо́бимся с ва́ми пе́ти Го́спода во вся ве́ки. Припев: Преподо́бнии отцы́, моли́те Бо́га о на́с. Пла́чущих помина́я блаже́нство, Пафну́тие преподо́бне, всегда́ пла́кал еси́,/ ны́не же ра́достная насле́див ме́ста,/ моли́ся та́мо и нам во кров безплаче́вный всели́тися,/ да с тобо́ю превозно́сим Го́спода во ве́ки. Припев: Преподо́бнии отцы́, моли́те Бо́га о на́с. Со Ио́сифом чу́дным ва́шу, вси святи́и, па́мять почита́ем,/ посто́м и труды́ до́бре Бо́гу угоди́вшии, и мо́лим,/ да от всех бед заступле́ние ва́ми обря́щем/ и сподо́бимся Го́спода превозноси́ти во ве́ки. Сла́ва Отцу́ и Сы́ну и Свято́му Ду́ху. Во огра́де пеще́ры святы́я проходя́ще умо́м,/ зрим на тве́рди ея́ мно́жество, а́ки звезд, оте́ц преподо́бных,/ и́хже исчи́слити невозмо́жно./ Тем о всех возда́вше хвалу́ Бо́гу, мо́лим,/ да даст нам с ни́ми превозноси́ти Его́ во ве́ки. И ны́не и при́сно и во ве́ки веко́в. Ами́нь. Богородичен: Гони́м сый зми́ем миролюбным,/ к Твое́й огра́де прибего́х, Чи́стая:/ кро́вом у́бо ми́лости Твое́й защити́ мя и того́ зубо́в изба́ви,/ я́ко да спасе́н, превозношу Тя, Ма́терь Бо́жию, во ве́ки. Песнь 9 Ирмос: Вои́стинну Богоро́дицу/ Тя испове́дуем,/ спасе́ннии Тобо́ю, Де́во Чи́стая,/ с безпло́тными ли́ки Тя велича́юще. Припев: Преподо́бнии отцы́, моли́те Бо́га о на́с. Вои́стинну пре́жде юдо́ль бе плаче́вная и верте́п разбо́йником гора́ сия́ Свята́я,/ ны́не же дом Бо́жий е́сть,/ и живу́щии в нем блаже́нни, я́ко ва́ми освяти́ся, Богоно́снии отцы́:/ сего́ ра́ди всех вас велича́ем. Припев: Преподо́бнии отцы́, моли́те Бо́га о на́с. Глас ра́дования и шум празднолю́бных стека́ется восхвали́ти собо́р ваш, отцы́ Пече́рстии;/ тех у́бо хвале́ния прие́мше,/ от всех скорбе́й и печа́лей спаса́йте,/ да всегда́ вас велича́ем. Припев: Преподо́бнии отцы́, моли́те Бо́га о на́с. Ра́достною душе́ю взе́мше кре́стное и́го/ и ра́лом трудо́в го́ру сию́ возде́лавше,/ насади́сте сады́ по́тов ва́ших, Богоно́снии отцы́, мы́сленных,/ и́хже плоды́ объе́мше, увеселя́ем ду́ши на́ша и всех вас велича́ем. Припев: Преподо́бнии отцы́, моли́те Бо́га о на́с. Во еди́н пу́ть за́поведей Госпо́дних ходя́ще, разли́чная се́мена се́ясте,/ ов чистоту́, ов послуша́ние, ин пост,/ други́й нищету́, труды́ и сле́зы./ Оба́че вси ра́вно ра́дости рукоя́ти пожинаете,/ от ни́хже и нам да́рствуйте, да вы́ну вас всех велича́ем. Припев: Преподо́бнии отцы́, моли́те Бо́га о на́с. Госпо́дь пасе́т вас ны́не на ме́сте зла́чне, преблаже́ннии отцы́,/ и ко́е уже́ вас лиша́ет бла́го?/ Пото́к бо сла́дости вас напая́ет,/ от него́же поне́ каплею еди́ною жития́ на́шего го́ресть, мо́лимся, услади́те,/ да ра́достно Бо́гу на́шему воспое́м. Припев: Преподо́бнии отцы́, моли́те Бо́га о на́с. От ме́ста плаче́внаго на безплаче́вное преше́дших, мо́лим вас, отцы́ преблаже́ннии,/ нас, па́мять ва́шу вку́пе почита́ющих, вся́кия ско́рби избавля́йте,/ да вси вас велича́ем. Сла́ва Отцу́ и Сы́ну и Свято́му Ду́ху. Троичен: Сла́ва Ты еси́, Тро́ице, преподо́бных оте́ц ли́ку, и неги́блющее весе́лие,/ о Тебе́ бо мир и пло́ть с неви́димым враго́м победи́вше, прия́ша венцы́/ и ра́дуются со А́нгелы, Тя всегда́ велича́юще. И ны́не и при́сно и во ве́ки веко́в. Ами́нь. Богородичен: Сла́вим Тя, пресла́вный гра́де Бо́жий,/ Тебе́ бо Сам основа́ Вы́шний/ и даде́ в прибе́жище всем от лица́ вра́жия бежа́щим./ И нам бу́ди в приста́нище, да Тя вы́ну велича́ем. Светилен Ца́рское свяще́ние, ро́де избра́нный,/ иера́рси святи́и, свяще́нницы, мона́си, де́вственницы, чудотво́рцы/ и все по́стническое сосло́вие преподо́бных оте́ц Пече́рских,/ собери́теся дне́сь на моли́тву,/ да вас ра́ди Ца́рь сла́вы спасе́т правосла́вныя лю́ди,/ благоче́стно собо́р ваш почита́ющих. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Святы́х Святе́йшую Тя сла́вим, Чи́стая Де́во,/ и велича́ем от Тебе́ рожде́нное Сло́во,/ Ты же приими́ и от нас славосло́вие сие́, и да́ждь сла́вити и Тя,/ иде́же вси святи́и Ма́терь Тя Бо́жию сла́вят.

Минея, 2 Июня, Канон великомученика Глас 4 Песнь 1 Ирмос: Отве́рзу уста́ моя́,/ и напо́лнятся ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,/ и воспо́ю, ра́дуяся, Тоя́ чудеса́. Припев: Святы́й великому́чениче Иоáнне, моли́ Бо́га о на́с. Новоявле́н му́ченик, блаже́нне Иоа́нне, вселе́нней напосле́док яви́лся еси́,/ те́мже ми пода́ждь сло́во твое́ю благода́тию,/ твоя́ по́двиги воспе́ти по достоя́нию. Припев: Святы́й великому́чениче Иоáнне, моли́ Бо́га о на́с. Очи́ма мы́сленныма предстоя́ на суди́щи,/ му́чеников зрел еси́ честно́е сосло́вие, тебе́ призыва́ющих ра́достно, Иоа́нне,/ и подо́бными венцы́ украша́ющих. Припев: Святы́й великому́чениче Иоáнне, моли́ Бо́га о на́с. Во́инством досточу́дным твоего́ сопротивле́ния/ побе́дная прия́хом на мучи́теля естеству́:/ соверше́нне бо посра́млен быв,/ не ктому́ мучи́тельская дерза́ти начина́ет. Сла́ва Отцу́ и Сы́ну и Свято́му Ду́ху. Оде́явся во броня́ испове́дания ве́ры и шлем возложи́в благодати светле́йший,/ язы́ком же, Иоа́нне, боговеща́нным и честны́м,/ я́коже мече́м, ссекл еси́ безу́мнаго епа́рха. И ны́не и при́сно и во ве́ки веко́в. Ами́нь. Богородичен: Гора́ превысо́кая, ю́же ви́де Дании́л,/ ка́мень от горы́ же отсече́ся му́жеску руку́ кроме́, Тебе́ прообразова́, Богоро́дице:/ без му́жа бо нам пло́тию родила́ еси́ Емману́ила. Песнь 3 Ирмос: Твоя́ песносло́вцы, Богоро́дице,/ Живы́й и Незави́стный Исто́чниче,/ лик Себе́ совоку́пльшия, духо́вно утверди́,/ в Боже́ственней Твое́й сла́ве/ венце́в сла́вы сподо́би. Припев: Святы́й великому́чениче Иоáнне, моли́ Бо́га о на́с. Му́ками, я́ко зла́то честно́е, искуси́лся еси́, страда́льче сла́вне,/ и Царю́ сил прине́слся еси́, всепло́дие словеси́ и́стинно,/ вме́сто огня́ олта́рнаго мече́м истне́емо. Припев: Святы́й великому́чениче Иоáнне, моли́ Бо́га о на́с. О Влады́це пе́рвее и Го́споде не насы́тишася/ иуде́е законопресту́пнии и пророкоуби́йственнии,/ но и того́ му́ченика, влачи́ма неми́лостивно от слуг нече́стия, теку́ще, закла́ху. Припев: Святы́й великому́чениче Иоáнне, моли́ Бо́га о на́с. Епа́рх се́ти простира́ше словесы́ ласка́тельными к ловле́нию страда́льца прему́драго,/ но он вопия́ше к нему́:/ преста́ни на мно́зе буесло́вя,/ аз бо тва́ри не поклоню́ся, паче Созда́вшаго. Сла́ва Отцу́ и Сы́ну и Свято́му Ду́ху. Маслина плодовитая в церкви Живаго Бога твоих мощей рака ныне яви́ся,/ от неяже обираем различная недугов исцеления,/ и́же тобою обогащшиися и чудесы твоими крася́щиися. И ны́не и при́сно и во ве́ки веко́в. Ами́нь. Богородичен: Рече́ Боже́ственный Иезеки́иль:/ и бу́дет дверь затворе́на./ И сие́ на Тебе́ испо́лнися, Влады́чице:/ вни́де бо несказа́нно в Тя О́тчее Сло́во и ми́ру яви́ся Плотоно́сец из Тебе́, Де́во,/ сохрани́в Тя во обои́х. Седален, глас 8 Прему́дрости рачи́тель быв, сокро́вище доброде́телей,/ отону́дуже и поче́рпл еси́ Боже́ственная разуме́ния./ Те́мже и, време́ни призва́вшу, к подвиго́м усе́рдно совле́клся еси́,/ прие́мля му́ченическия ра́ны, пло́ти содробле́ние и крове́й истоща́ние,/ и ны́не живе́ши в неизрече́ннем све́те с му́ченики./ Сего́ ра́ди вопие́м ти:/ моли́ Христа́ Бо́га грехо́в оставле́ние дарова́ти/ покланя́ющимся ве́рою святы́м моще́м твои́м. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Помышля́ю суд и бою́ся, испыта́ния трепе́щу стра́шнаго/ и ужаса́юся му́ки и огня́ боле́зни, тьмы же и та́ртара./ Увы́, что́ сотворю́?/ Студ ка́ко претерплю́, егда́ кни́ги разгну́тся и дея́ния облича́тся?/ Сего́ ра́ди припа́даю Ти, Богоро́дице Пречи́стая:/ предста́ни ми тогда́, ну́жды о́ныя изыма́ющи,/ Тебе́ бо и́мам прибе́жище, Влады́чице. Песнь 4 Ирмос: Седя́й в Сла́ве на Престо́ле Божества́/ во о́блаце ле́гце,/ прии́де Иису́с Пребоже́ственный/ Нетле́нною Дла́нию и спасе́ зову́щия:/ сла́ва, Христе́, си́ле Твое́й. Припев: Святы́й великому́чениче Иоáнне, моли́ Бо́га о на́с. У́дица льсти́вая язы́к бя́ше мучи́теля,/ вра́жиими подви́жимь ко́зньми, преложи́ти великоду́шнаго спеша́щ,/ но безде́лен обличи́ся, страда́льцу в ра́дости зову́щу:/ сла́ва си́ле Твое́й, Го́споди. Припев: Святы́й великому́чениче Иоáнне, моли́ Бо́га о на́с. Что́ ми мно́гая словеса́ и обеща́ния тле́емая, я́же безу́мие предлага́вши?/ – Иоа́нн к мучи́телю вопия́ше. –/ Сия́ вся мне же́лчи горча́йша, сла́достно взыва́ющу: сла́ва си́ле Твое́й, Го́споди. Припев: Святы́й великому́чениче Иоáнне, моли́ Бо́га о на́с. Егда́ ра́ны мно́жайшия на мои́х процвету́т пло́тех,/ тогда́ венце́м светле́йшим упова́ю сподо́битися, –/ страда́лец к пе́рсу глаго́лаше, –/ не косни́ про́чее, о злому́дренне, аз бо вопию́:/ сла́ва си́ле Твое́й, Го́споди. Сла́ва Отцу́ и Сы́ну и Свято́му Ду́ху. Ника́коже тебе́ послу́шаю, к па́губе привлача́ща,/ – огнеслужи́телю Иоа́нн веща́ше, –/ умру́ же па́че усе́рдно за уме́ршаго мене́ ра́ди, да с му́ченики све́тло вопию́:/ сла́ва си́ле Твое́й, Го́споди. И ны́не и при́сно и во ве́ки веко́в. Ами́нь. Богородичен: Изобразова́ше в Чермне́м проше́ствие дре́вле Изра́илево/ безму́жное Твое́ рождество́, Всецари́це:/ я́коже бо он тогда́ про́йде немо́кренно,/ та́ко и Христо́с безсе́менно от Твои́х пречи́стых крове́й произы́де, Де́во. Песнь 5 Ирмос: Ужасошася вся́ческая/ о Боже́ственней сла́ве Твое́й:/ Ты бо, Неискусобра́чная Де́во,/ име́ла еси́ во утро́бе над все́ми Бо́га/ и родила ́ еси́ Безле́тнаго Сы́на,/ всем воспева́ющим Тя/ мир подава́ющая. Припев: Святы́й великому́чениче Иоáнне, моли́ Бо́га о на́с. Изнемого́ша, бию́ще, слуги́ страстоте́рпческия пло́ти,/ утруди́ся и мучи́тель, томле́ния изыску́я,/ но он до́блественне терпя́ше, красу́яся ра́нами,/ я́же за любо́вь подъя́т Го́спода своего́. Припев: Святы́й великому́чениче Иоáнне, моли́ Бо́га о на́с. Коль стра́шно же и сла́вно о Христе́ сопротивле́ние твое́,/ ему́же у́бо почуди́шася племена́, обре́тшаяся на по́двизе, и похвали́ша терпе́ние,/ пе́рсы же посрами́шася со иуде́и, студо́м обо́лкшеся. Припев: Святы́й великому́чениче Иоáнне, моли́ Бо́га о на́с. О́крест стоя́ху мно́жества, зря́ще быва́емое, сла́вне,/ и мучи́тель председя́ше, тебе́ приобрести́ наде́яся,/ но погреши́ безу́мный тща́ния, всу́е претя́ непристра́шному/ и вотще́ бия́ адама́нта. Сла́ва Отцу́ и Сы́ну и Свято́му Ду́ху. Епа́рха злочести́ваго безу́мному веле́нию руга́яся,/ Боже́ственный Иоа́нн пре́лесть облича́ше пе́рсския горды́ни:/ со́лнцу, глаго́ля, не поклоню́ся, тва́ри су́щей, челове́ком рабо́тающей,/ бо́льшему рук Бо́жиих созда́нию. И ны́не и при́сно и во ве́ки веко́в. Ами́нь. Богородичен: Горе́ бя́ше соприсносу́щен, Отцу́ и Бо́гу, Бог Сло́во/ и с на́ми Бог и Челове́к, Богоро́дице,/ Тобо́ю соше́д к на́шему смире́нию, свобожда́я от кля́твы пра́дедния:/ Тебе́ бо ви́де патриа́рх Иа́ков ле́ствицу Небе́сную. Песнь 6 Ирмос: Боже́ственное сие́ и всечестно́е/ соверша́юще пра́зднество,/ Богому́дрии, Богома́тере,/ прииди́те, рука́ми воспле́щим,/ от Нея́ ро́ждшагося Бо́га сла́вим. Припев: Святы́й великому́чениче Иоáнне, моли́ Бо́га о на́с. Ника́коже поколеба́ша столпа́ благоче́стия свире́пство повелева́ющаго, / ниже́ па́лицами бие́ния, но ни ра́ны, ни смерть ну́жднейшая. Припев: Святы́й великому́чениче Иоáнне, моли́ Бо́га о на́с. О́ку херуви́мску ума́ твоего́ чистота́ уподо́бися:/ до́ле бо му́жески терпе́л еси́ муче́ния и горе́ предстоя́л еси́ Влады́це,/ И́же посла́ тебе́ вене́ц победи́тельный. Припев: Святы́й великому́чениче Иоáнне, моли́ Бо́га о на́с. Взыгра́шася све́тло му́ченичестии тогда́ ли́кове, ви́девше твое́ дерзнове́ние,/ и, прини́кше ку́пно со А́нгелы, неви́димо укрепля́ху тя в по́двизе. Сла́ва Отцу́ и Сы́ну и Свято́му Ду́ху. У́жа желе́зная Иоа́нн, страда́лец изя́щный, зла́та ого́рлия вменя́ше я/ и я́же от иуде́й ка́меней мета́ния – степе́ни к Небе́сному ше́ствию. И ны́не и при́сно и во ве́ки веко́в. Ами́нь. Богородичен: Обра́зне руно́ Гедео́н прия́т ороше́но, Твое́ предвозвеща́я чу́до:/ сни́де бо, я́ко дождь на руно́, Богоро́дице, Еди́ный от Тро́ицы во утро́бу Твою́, воплоща́емь. Кондак, глас 4 Морску́ю пла́вая пучи́ну ку́плею,/ от восто́ка тща́лся еси́ к се́веру,/ но Бо́гу призва́вшу тя,/ я́коже Матфе́й мы́тницу, ты же ку́плю оста́вль,/ и Тому́ после́довал еси́ кро́вию муче́ния,/ вре́менными искупи́в непроходи́мая,/ и вене́ц прия́л еси́ непобеди́мый. Икос Прему́дрый Зижди́тель и Влады́ка и Господи́н виногра́да мы́сленнаго/ я́коже пресвяты́ми Свои́ми усты́ во при́тчи виногра́да глаго́лет:/ я́ко во единыйна́десять час де́лавшим подо́бную даде́ це́ну,/ я́коже и от пе́рваго де́лавшим./ Ны́не де́лы извести́ в при́тчи кры́емое, Иоа́нна показа́в све́тла му́ченика,/ на са́мый уже́ после́док ле́тным ты́сящам,/ подо́бно пе́рвым страда́льцем просла́ви нетле́нием и исцеле́ния да́ром:/ вре́менными бо искупи́в непроходи́мая,/ и вене́ц но́сит непобеди́мый. Песнь 7 Ирмос: Не послужи́ша тва́ри Богому́дрии/ па́че Созда́вшаго,/ но, о́гненное преще́ние му́жески попра́вше,/ ра́довахуся, пою́ще:/ препе́тый отце́в Госпо́дь и Бог, благослове́н еси́. Припев: Святы́й великому́чениче Иоáнне, моли́ Бо́га о на́с. Приноси́мая ти страда́ния, Иоа́нне досточу́дне,/ младе́нец стреля́ния му́жески вменя́л еси́, ра́достно поя́:/ препе́тый отце́в Госпо́дь и Бог, благослове́н еси́. Припев: Святы́й великому́чениче Иоáнне, моли́ Бо́га о на́с. Ру́ку ча́сто простира́я к мучи́телю, Иоа́нн глаго́лаше:/ что́ всу́е труди́шися, безсту́дне?/ му́ки бо творя́ мне – пестра́ одея́ния, и смерть – вене́ц безсме́ртия. Припев: Святы́й великому́чениче Иоáнне, моли́ Бо́га о на́с. И́стинен аз му́ченик и́стиннаго Христа́ Бо́га на́шего, – страда́лец взыва́ше, –/ влаче́ния бо цве́ты благово́нны вменя́ю/ и кро́вныя струи́ – ба́ню креще́ния. Сла́ва Отцу́ и Сы́ну и Свято́му Ду́ху. Нощь от мене́ су́дится житие́ е́же во пло́ти, – Иоа́нн любому́дрствоваше, –/ ско́ро у́бо про́чее пло́ти разреши́ мя соу́за,/ да я́же со Христо́м жизнь насле́дую. И ны́не и при́сно и во ве́ки веко́в. Ами́нь. Богородичен: Ри́торствующий язы́к безгла́сен и недви́жимь,/ и́же о Тебе́ зрим, Богора́дованная:/ не и́мать бо пости́гнути непостижи́маго зача́тия неизрече́нное рожде́ние. Песнь 8 Ирмос: О́троки благочести́выя в пещи́/ Рождество́ Богоро́дичо спасло́ есть,/ тогда́ у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте, дела́, и превозноси́те Его́ во вся ве́ки. Припев: Святы́й великому́чениче Иоáнне, моли́ Бо́га о на́с. Ублажи́ша тя цари́, благослови́ша тя святи́тели, слы́шаще твое́ му́жественное терпе́ние/ и ко Христу́ хода́тая стяжа́вше тя,/ и, ны́не приходя́ще, честны́м твои́м моще́м покланя́ются. Припев: Святы́й великому́чениче Иоáнне, моли́ Бо́га о на́с. Шата́шася иногда́ язы́цы с людьми́ законопресту́пными,/ на Христа́ и Го́спода поуча́ющеся тще́тная,/ и ны́не собра́шася, пе́рсы у́бо Иоа́нна влача́ще,/ иуде́и же закала́юще. Припев: Святы́й великому́чениче Иоáнне, моли́ Бо́га о на́с. Ят бысть тобо́ю, и удержа́н,/ и до конца́ низложе́н змий безпло́тный во пло́ти твои́м терпе́нием./ И того́ кре́пость угасе́ и лю́тое мучи́тельство, Христу́ в плоть обо́лкшуся. Сла́ва Отцу́ и Сы́ну и Свято́му Ду́ху. Хваля́ся я́звами Христо́выми, к ве́чным восте́кл еси́ оби́телем,/ в багряни́цу оде́ян, му́чениче, от крове́й твои́х обагре́ную,/ и све́тло Царю́ сил предстои́ши, с му́ченики лику́я. И ны́не и при́сно и во ве́ки веко́в. Ами́нь. Богородичен: Иса́ии угль дре́вле по́слан бысть, клеща́ми носи́м от Серафи́ма,/ каса́ются тому́ и грехи́ оставля́ющ./ Клеща́ же Ты еси́, Де́во, Боже́ственный Угль носи́вшая во оставле́ние грехо́в челове́честву. Песнь 9 Ирмос: Всяк земноро́дный/ да взыгра́ется, Ду́хом просвеща́емь,/ да торжеству́ет же Безпло́тных умо́в естество́,/ почита́ющее свяще́нное торжество Богома́тере,/ и да вопие́т:/ ра́дуйся, Всеблаже́нная Богоро́дице,/ Чи́стая Присноде́во. Припев: Святы́й великому́чениче Иоáнне, моли́ Бо́га о на́с. Во́ин и́стинный Христо́ва пропове́дания был еси́, Иоа́нне,/ и ле́сти потреби́тель безбо́жия./ Те́мже и ны́не моли́твами твои́ми потреби́ ва́рварское воста́ние,/ во́инству на́шему под но́ги сие́, сла́вне, низлага́я. Припев: Святы́й великому́чениче Иоáнне, моли́ Бо́га о на́с. А́ще и разсе́яни бы́ша свяще́нныя твоя́ пло́ти, му́дре,/ а́ще и кро́ви излия́шася, но победи́тельная на тебе́ преидо́ша./ Тем на нас востаю́щих си́лою твое́ю посрами́/ и во́инство на́ше яви́ победи́теля. Припев: Святы́й великому́чениче Иоáнне, моли́ Бо́га о на́с. Лук сокруши́ нечести́вых, во́ине непобеди́ме,/ непра́ведно дви́жимый на твое́ достоя́ние, е́же себе́ избра́л еси́, возлюби́в,/ и оте́чество на́ше утверди́,/ да и мы ти́хо и ми́рно препрово́дим жи́тельство. Сла́ва Отцу́ и Сы́ну и Свято́му Ду́ху. Ю́же жела́хом па́мять светоза́рную твою́ и честну́ю,/ прия́хом и облобыза́хом, ра́дующеся ду́хом и игра́юще,/ мо́лимся, блаже́нне:/ ме́сто сие́ и лю́ди, иде́же изво́ли сла́витися, сохраня́й невре́дно, со оте́чеством на́шим. И ны́не и при́сно и во ве́ки веко́в. Ами́нь. Богородичен: Его́же проро́цы провозвести́ша вси многообра́зне,/ воплоща́ема нас ра́ди, Тобо́ю ви́дехом, Богоро́дице, Бо́га, нам соверше́нна,/ избавля́ющаго челове́ки от кля́твы пра́дедния,/ мы же Твои́ми моли́твами ве́чныя гее́нны да изба́вимся. Светилен Све́ту невече́рнему предстоя́, блаже́нне, с му́ченическими ли́ки,/ воспева́ющия тя в па́мяти твое́й от искуше́ния спаса́й моли́твами твои́ми. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Незаходи́маго Све́та носи́ло, Присноде́во,/ просве́щшаго седя́щих во тьме неве́дения пре́лести,/ озари́ и нам, гре́шным, свет Сы́на Твоего́.

Минея, 10 Июля, Кано́н преподо́бнаго Глас 4 Песнь 1 Ирмос: Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери́,/ и явлю́ся, све́тло торжеству́я,/ и воспою́, ра́дуяся, Тоя́ чудеса́. Припев: Преподо́бне о́тче Анто́ние, моли́ Бо́га о на́с. Зе́льным воздержа́нием, и труды́, о́тче Анто́ние, и всено́щным стоя́нием/ ду́шу твою́ царя́ над страстьми́ теле́сными поста́вил еси́./ Те́мже, со святы́ми веселя́щеся, Христа́ пое́м,/ тебе́ такову́ побе́ду на стра́сти дарова́вшаго. Припев: Преподо́бне о́тче Анто́ние, моли́ Бо́га о на́с. Приспе́ днесь всечестны́й день успе́ния твоего́, о́тче Анто́ние,/ бога́тно веселя́ ча́да твоя́, всече́стне./ Те́мже, помина́юще твое́ дре́внее житие́ и а́нгельскую жизнь,/ све́тло пра́зднующе, тебе́ воспева́ем, о́тче. Сла́ва Отцу́ и Сы́ну и Свято́му Ду́ху. От те́мных мест восхи́тився,/ к превы́шним све́тлостем пресла́вно преше́л еси́, преподо́бне,/ и та́мо со святы́ми, я́ко победи́тель страсте́й, о́тче, венча́лся еси́. И ны́не и при́сно и во ве́ки веко́в. Ами́нь. Богородичен: Лю́те погружа́емую ду́шу мою́ в пучи́не страсте́й бу́рею безме́рных обстоя́ний,/ спасе́ния просте́рши ми ру́ку, возведи́, Влады́чице, из глубины́ зол мои́х. Песнь 3 Ирмос: Твоя́ песносло́вцы, Богоро́дице,/ Живы́й и Незави́стный Исто́чниче,/ лик себе́ совоку́пльшия, духо́вно утверди́,/ в Боже́ственней Твое́й сла́ве/ венце́в сла́вы сподо́би. Припев: Преподо́бне о́тче Анто́ние, моли́ Бо́га о на́с. Пропове́дует пресла́вно и па́че трубы́ вопие́т/ свяще́нная твоя́, о́тче, вели́кая Ла́вра, я́же тобо́ю нача́ло прие́мшая,/ дом же Бо́жия Ма́тере, а́ще и не гла́сом, вещьми́ же хва́лится. глаго́ля:/ утверди́хся Тобо́ю, Го́споди. Припев: Преподо́бне о́тче Анто́ние, моли́ Бо́га о на́с. Еди́наго Го́спода возлюби́л еси́/ и, Сего́ Крест на ра́мо взем, преподо́бне Анто́ние,/ странноле́пно пожи́л еси́, в посте́х, и бде́ниих, и моли́твах о́браз быв твои́м ученико́м./ Те́мже и от Христа́ просла́вился еси́. Сла́ва Отцу́ и Сы́ну и Свято́му Ду́ху. Плотска́го жела́ния, преподо́бне, отве́ргся, го́рдость возненави́дел еси́,/ смире́нием же и нището́ю обогати́вся,/ превысо́кая дости́гл еси́ святы́х жили́ща. И ны́не и при́сно и во ве́ки веко́в. Ами́нь. Богородичен: Поми́луй, еди́на Богома́ти, поми́луй и уще́дри ду́шу мою́ окая́нную,/ потопля́емую бе́сы и страстьми́ лука́выми,/ и пре́жде вре́мене исхо́да моего́ сию́ очи́стити умилосе́рдися. Седален, глас 4 Удиви́ся твой духо́вный настоя́тель, в тебе́ вели́ко воздержа́ние зря,/ и внима́ше мы́слию хотя́щая о тебе́ напосле́док бы́ти, Анто́ние,/ ви́де бо по Бо́зе твое́ вели́кое житие́ и вра́жиими прило́ги ника́коже поколеби́ма./ Те́мже и свиде́тельствует, я́ко оте́ц и храни́тель твоего́ жития́,/ отце́м Святы́я Горы́ вопия́ше:/ сей, и́же посреде́ нас ви́дится ме́ньший/ но последи́ в Росси́и вели́кий свети́льник бу́дет. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Удиви́ся Ио́сиф, е́же па́че естества́ зря,/ и внима́ше мы́слию, и́же на руно́ дождь,/ в безсе́меннем зача́тии Твое́м, Богоро́дице,/ купину́, огне́м неопали́мую, жезл Ааро́нов проза́бший/ и, свиде́тельствуя, обру́чник Твой и храни́тель свяще́нником взыва́ше:/ Де́ва ражда́ет, и по рождестве́ па́ки Де́ва пребыва́ет. Песнь 4 Ирмос: Неизсле́дный Бо́жий Сове́т/ е́же от Де́вы воплоще́ния/ Тебе́, Вы́шняго,/ проро́к Авваку́м усмотря́я, зовя́ше:/ сла́ва си́ле Твое́и́, Го́споди. Припев: Преподо́бне о́тче Анто́ние, моли́ Бо́га о на́с. Ме́сто, в не́мже лежи́т честно́е и свяще́нное те́ло твое́, преподо́бне Анто́ние о́тче,/ мно́га исцеле́ния отту́ду прие́млют ве́рнии, Христу́ от души́ вопию́ще:/ сла́ва си́ле Твое́й, Го́споди. Припев: Преподо́бне о́тче Анто́ние, моли́ Бо́га о на́с. Не устраши́ тебе́, преподо́бне, долгота́ жесто́каго пути́,/ ниже́ та́мо разбо́йническое наше́ствие./ Те́мже Святу́ю Го́ру доше́д, с су́щими та́мо отцы́ воспева́л еси́:/ сла́ва си́ле Твое́й, Го́споди. Сла́ва Отцу́ и Сы́ну и Свято́му Ду́ху. Ви́дев Всеблаги́й Бог тве́рдое твое́ и до́брое изволе́ние,/ та́мо во святы́х ме́стех посреде́ оте́ц, сла́вна тя сотворя́ет,/ с ни́миже сподо́би взыва́ти:/ сла́ва си́ле Твое́й, Го́споди. И ны́не и при́сно и во ве́ки веко́в. Ами́нь. Богородичен: Ко́рень из чресл Тя ца́рских, всех Царь, я́ко су́щу, вожделе́в/ и вы́шшу Херуви́м и Серафи́м соде́лав,/ Богоро́дице, всели́ся в Тя. Песнь 5 Ирмос: Ужасо́шася вся́ческая/ о Боже́ственней сла́ве Твое́й:/ Ты бо, Неискусобра́чная Де́во,/ име́ла еси́ во утро́бе над все́ми Бо́га/ и родила́ еси́ Безле́тнаго Сы́на,/ всем воспева́ющим Тя/ мир подава́ющая. Припев: Преподо́бне о́тче Анто́ние, моли́ Бо́га о на́с. Мона́шествующих о́браз, о́тче, и наказа́тель был еси́,/ те́мже и си́льным запреща́еши на восхище́ние не жела́ти, но па́че маломо́щныя ми́ловати./ И от сего́ просла́вился еси́, Анто́ние,/ и вели́к нарече́н учи́тель яви́лся еси́. Припев: Преподо́бне о́тче Анто́ние, моли́ Бо́га о на́с. Вы́ше челове́ка, Анто́ние, стяжа́л еси́ житие́, равноа́нгельно пожи́в на земли́,/ те́мже ра́вну я́же А́нгелом по́честь сподо́бился еси́ получи́ти/ и пое́ши с ни́ми Влады́ку твоего́. Сла́ва Отцу́ и Сы́ну и Свято́му Ду́ху. Богодарова́нныя твоя́ благода́ти, о́тче Анто́ние,/ всяк слух челове́ческий удиви́ша и научи́ша,/ я́же зде мня́щаяся вели́кая, я́ко ма́ла и ху́да, презре́ти вся и после́довати стопа́м твои́м,/ отону́дуже моли́, преподо́бне, спасти́ся нам. И ны́не и при́сно и во ве́ки веко́в. Ами́нь. Богородичен: Упова́ние еси́ мое́, Пречи́стая, и спасе́ние, и похвала́./ Те́мже прибега́ю к покро́ву Твоему́:/ не гнуша́йся мене́, грехи́ мно́гими, и боле́зньми, и скорбьми́ ны́не поглоще́ннаго,/ но, предвари́вши, спаси́ мя. Песнь 6 Ирмос: Боже́ственное сне́ и всечестно́е/ соверша́юще пра́зднество,/ Богому́дрии, Богома́тере,/ прииди́те, рука́ми воспле́щим,/ от Нея́ ро́ждшагося Бо́га сла́вим. Припев: Преподо́бне о́тче Анто́ние, моли́ Бо́га о на́с. Всегда́шним к Бо́гу раче́нием вне пло́ти и ми́ра, о́тче Анто́ние, был еси́./ Те́мже и жили́ще досто́йно Ду́ха Пресвята́го показа́лся еси́,/ я́коже и Сам Христо́с рече́:/ прише́д со Отце́м и Ду́хом, та́мо явлю́ся. Припев: Преподо́бне о́тче Анто́ние, моли́ Бо́га о на́с. Я́ко пресла́дкий не́кий виногра́д, Свята́я Гора́ тебе́, о́тче, израсти́вши,/ пресла́вно тобо́ю красу́ется и, ра́дующися, Христа́ прославля́ет,/ тебе́ сим дарова́вшаго. Сла́ва Отцу́ и Сы́ну и Свято́му Ду́ху. Нощь, я́ко день, и день, я́ко нощь, тебе́ вменя́шеся, Анто́ние:/ не дал бо еси́, по проро́ку, сна очи́ма твои́ма, ни ве́ждома дрема́ния,/ ниже́ поко́я телеси́ твоему́, до́ндеже сие́ чи́сто с душе́ю Бо́гу предста́вил еси́. И ны́не и при́сно и во ве́ки веко́в. Ами́нь. Богородичен: Твою́ пода́ждь ми по́мощь/ и изба́ви мя бед, и скорбе́й, и прегреше́ний мои́х,/ я́же всех ро́ждшая при́сное Избавле́ние. Кондак, глас 8 Возложи́в себе́ Бо́гу, па́че всех возлю́бленному от ю́ности, преподо́бне,/ Тому́ от всея́ души́ любо́вию после́довал еси́,/ ми́ра же тле́нная ни во что́же вмени́в,/ в земли́ пеще́ру соде́лал еси́/ и, в ней до́бре проти́ву неви́димаго врага́ ко́зней подвиза́вся,/ я́ко светоза́рное со́лнце, во вся концы́ земли́ возсия́л еси́,/ отону́дуже, веселя́ся, преше́л еси́ к Небе́сным черто́гом./ И ны́не со А́нгелы Влады́чню престо́лу предстоя́,/ помина́й нас, чту́щих пя́мять твою́, да зове́м ти:/ ра́дуйся, Анто́ние, о́тче наш. Икос Присносу́щнаго немерца́ющаго све́та Святы́я Тро́ицы наслади́тися жела́я/ и сего́ ра́ди четыредесятоле́тное вре́мя в еди́ной пеще́ре те́мне тебе́ затвори́в,/ отту́ду неисхо́ден, о́тче, пребы́л еси́,/ до́ндеже те́ло твое́ чи́сто с душе́ю Бо́гу предста́вил еси́./ Отону́дуже и по преставле́нии, я́ко жив, от Го́спода дарова́ния чуде́с прия́л еси́,/ исцеля́ти разли́чныя боле́зни зле стра́ждущих/ и бе́сы от челове́к приходя́щих изгони́ти./ Те́мже мо́лим тя:/ моли́ся, о́тче, сохрани́ти без вре́да оте́чество твое́, град же и лю́ди, да зове́м ти:/ ра́дуйся, Анто́ние, о́тче наш. Песнь 7 Ирмос: Не послужи́ша тва́ри Богому́дрии/ па́че Созда́вшаго,/ но, о́гненное преще́ние му́жески попра́вше,/ ра́довахуся, пою́ще:/ препе́тый отце́в Госпо́дь и Бог, благослове́н еси́. Припев: Преподо́бне о́тче Анто́ние, моли́ Бо́га о на́с. Повеле́нием духо́внаго твоего́ настоя́теля, блаже́нне Анто́ние,/ па́ки ко оте́честву твоему́ посыла́емь быва́еши./ Те́мже рече́нная тебе́ отце́м, я́ко от Бо́га повеле́нная, сотвори́л еси́,/ иде́же прише́д, о́тче, мно́гих ду́ши Го́споду приве́л еси́. Припев: Преподо́бне о́тче Анто́ние, моли́ Бо́га о на́с. Святе́йшаго ме́ста, преподо́бне Анто́ние, я́ко дости́гл,/ мно́гих житие́м твои́м удиви́л еси́:/ вы́ше бо челове́ка восприе́м житие́,/ и́мже мно́гих мирска́я презира́ти сотвори́л еси́. Сла́ва Отцу́ и Сы́ну и Свято́му Ду́ху. Святи́теля Иларио́на пеще́ру я́ко обре́т,/ трудолю́бне в ней пожи́л еси́, преподо́бне, в моли́твах и поще́ниих,/ до́ндеже ину́ю пеще́ру себе́ соде́лал еси́,/ в не́йже сподо́бился еси́ го́рняго зва́ния. И ны́не и при́сно и во ве́ки веко́в. Ами́нь. Богородичен: Челове́ческия напа́сти и сове́ты, Чи́стая,/ разори́ Боже́ственными моли́твами Твои́ми/ и рабы́ Твоя́ изба́ви боле́зненных прегреше́ний,/ я́ко да Присноде́ву Тя ублажа́ем. Песнь 8 Ирмос: О́троки благочести́выя в пещи́/ Рождество́ Богоро́дичо спасло́ есть;/ тогда́ у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте, дела́,/ и превозноси́те Его́ во вся ве́ки. Припев: Преподо́бне о́тче Анто́ние, моли́ Бо́га о на́с. Влады́ки твоего́ Христа́, преподо́бне Анто́ние, смире́нию поревнова́л еси́/ и сего́ ра́ди смире́нное и жесто́кое житие́ возлюби́л еси́,/ земна́го пристра́стия отрева́яся./ Те́мже по́чести святы́х сподо́бился еси́/ и с ни́ми пое́ши Го́спода во ве́ки. Припев: Преподо́бне о́тче Анто́ние, моли́ Бо́га о на́с. Твое́ пресла́вное успе́ние пра́зднующим, блаже́нне,/ моли́ся изба́витися всем от разли́чных напа́стей,/ да вси тебе́ прославля́ем, Анто́ние, и превозно́сим Го́спода во ве́ки. Сла́ва Отцу́ и Сы́ну и Свято́му Ду́ху. О нас ми́лостивно о́ко, Анто́ние, простира́й ко Влады́це, чадолю́бное показу́я,/ и неотлу́чно от нас ду́хом пребыва́й, преподо́бне,/ я́коже обеща́лся еси́, егда́ был еси́ с на́ми,/ да вси с тобо́ю Христу́ воспое́м:/ благослови́те, вся дела́ Госпо́дня, Го́спода. И ны́не и при́сно и во ве́ки веко́в. Ами́нь. Богородичен: На моле́ние мое умилосе́рдися ны́не и ра́дость ми в печа́ли ме́сто да́руй,/ да пою́ Тя, Влады́чице, Сы́ну Твоему́ воспева́я:/ Го́спода по́йте, дела́, и превозноси́те Его́ во ве́ки. Песнь 9 Ирмос: Всяк земноро́дный/ да взыгра́ется, Ду́хом просвеща́емь,/ да торжеству́ет же Безпло́тных умо́в естество́,/ почита́ющее свяще́нное торжество́ Богома́тере,/ и да вопие́т:/ ра́дуйся, Всеблаже́нная Богоро́дице,/ Чи́стая Присноде́во. Припев: Преподо́бне о́тче Анто́ние, моли́ Бо́га о на́с. Анто́ния, дре́вле просия́вшаго,/ того́ житию́ вся́чески поревнова́ти потща́лся еси́:/ он бо в пусты́ню един всели́ся,/ ты же в пеще́ре еди́наго себе́ затвори́л еси́/ и мно́гими ле́ты, о́тче, неисхо́ден пребы́л еси́. Припев: Преподо́бне о́тче Анто́ние, моли́ Бо́га о на́с. Пече́рскому житию́ первонача́льник и наста́вник, о́тче, был еси́/ и та́мо подвиза́лся еси́, я́ко безпло́тен./ Те́мже и Христо́с дарова́нием чуде́с обогати́ тя, преподо́бне. Сла́ва Отцу́ и Сы́ну и Свято́му Ду́ху. Мое́ю руку́ воздея́ние приими́, преподо́бне,/ Влады́чней подо́бяся бла́гости, презира́я прегреше́ния:/ ты бо ду́шу уязви́л еси́ Христо́вою любо́вию и Его́ Пречи́стыя Богома́тере,/ Ю́же умоли́ спасти́ ду́ши на́ша. И ны́не и при́сно и во ве́ки веко́в. Ами́нь. Богородичен: Руко́ю твое́ю, преподо́бне Анто́ние,/ е́же к Бо́гу воздея́нием, пресла́вно чудоде́йствовася:/ моли́твами бо твои́ми огнь с Небесе́ сво́диши, во очище́ние ме́ста хра́ма Пречи́стыя,/ Ю́же вси с тобо́ю велича́ем. Светилен Жите́йское сладостра́стие умертви́л еси́, Анто́ние,/ сла́ву же маловре́менную позна́в, сея́ вско́ре отступи́л еси́,/ те́сным путе́м изво́лив ходи́ти,/ веду́щим к ра́йскому простра́нству./ Те́мже моли́ся, Анто́ние, спасти́ся тебе́ почита́ющим. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Богоро́дицу Тя вои́стинну испове́дающе, Влады́чице, и́же Тобо́ю спаса́емии:/ Ты бо Бо́га родила́ еси́,/ разо́ршаго Кресто́м смерть и к Себе́ привле́кша преподо́бных собо́ры,/ с ни́миже Тя восхваля́ем, Де́во.

Яко на огненную колесницу добродетельми, богоносе, возшед,/ востекл еси на Небесная жилища,/ яко Ангел, с человеки пожил еси/ и, яко человек, со Ангелы окрест ликовствуеши./ Сего ради показался еси чудес Божественное приятелище,// Феодоре преподобне.

Конда́к 1. Равноапо́стольный христиа́нския ве́ры благове́стниче, язы́ческаго злове́рия искорени́телю, ско́рый в беда́х и ско́рбех засту́пниче, благоутро́бия неистощи́мое сокро́вище, святи́телю о́тче Инноке́нтие! Вели́каго тя́ пред Го́сподем хода́тая и чуде́с мно́жеством свиде́тельствованна помо́щника иму́ще, к тебе́ во обстоя́нии от вся́ких ну́жд и зо́л с ве́рою и любо́вию притека́ем, и та́ко ти́ зове́м: Ра́дуйся, Инноке́нтие, святы́й уго́дниче Спа́са Христа́. И́кос 1. А́нгелом уподо́бился еси́ непоро́чным житие́м, святи́телю о́тче Инноке́нтие, и сего́ ра́ди а́нгелов соприча́стия сподо́бился еси́ в немо́лчнем славосло́вии Го́спода Сла́вы. Приими́ у́бо и от на́ших недосто́йных усте́н приноси́мое тебе́ хвале́ние: Ра́дуйся, по и́мени твоему́, непоро́чность зна́менующему, яви́вый житие́ твое́. Ра́дуйся, непоро́чности сохране́нием, а́нгелов житию́ подража́тель бы́вый. Ра́дуйся, ве́рный Христо́ва Ева́нгелиа служи́телю. Ра́дуйся, архиере́ев удобре́ние. Ра́дуйся, Це́ркве, неве́сты Христо́вы, драго́е украше́ние. Ра́дуйся, свя́тости жития́ и непоро́чности нра́вов учи́телю. Ра́дуйся, Инноке́нтие, святы́й уго́дниче Спа́са Христа́. Конда́к 2. Ви́дя Госпо́дь Бо́г благопотре́бен тя́ сосу́д ко прия́тию даро́в благода́ти, оби́льно излия́ в твое́ се́рдце ду́ха прему́дрости и ра́зума, во е́же просвеща́ти язы́ки, во тме́ и се́ни сме́ртней седя́щыя, ду́ха сове́та и кре́пости, во е́же превозмога́ти над враги́ спасе́ния ви́димыми и неви́димыми, ду́ха ве́дения и благоче́стия, во е́же Христо́во ста́до пасти́ уче́нием и житие́м. Мы́ же, тя́ на спасе́ние люди́й та́ко приугото́ванна уразуме́вше, со умиле́нием Пода́телю все́х бла́г Бо́гу зове́м: Аллилу́иа. И́кос 2. Ра́зум благопотре́бен к де́ланию прия́тых от Бо́га тала́нтов стяжа́ти хотя́, еще́ ю́н сы́й, водвори́лся еси́ в вертогра́де духо́вныя му́дрости пресла́внаго гра́да Ки́ева: соверше́н же в житии́ хотя́ бы́ти, сожи́тельство восприя́л еси́ в ли́це и́ноков Святопече́рския ла́вры, иде́же дости́гл еси́ в му́жа соверше́нна, в ме́ру во́зраста исполне́ния Христо́ва. Мы́ же, твое́ зва́ние и избра́ние разсмотря́юще, с любо́вию зове́м ти́: Ра́дуйся, розго́ виногра́да, плодо́в ду́ха испо́лненная, да и́х оби́лием страны́ Сиби́ри обогати́ши. Ра́дуйся, сладкоуха́нный кри́не Госпо́день, на Ю́зе процветы́й, да те́м страны́ Се́вера облагоуха́еши и украси́ши. Ра́дуйся, в земне́м учи́лищи небе́сней му́дрости навы́кший, да е́ю язы́ки на пу́ть спасе́ния наста́виши. Ра́дуйся, я́ко на высоту́ доброде́телей, а́ки свети́льник на све́щнице, поста́влен бы́л еси́, да мглу́ неподо́бнаго жития́ во изгна́нии су́щих разго́ниши. Ра́дуйся, ве́рный учениче́ Спа́са на́шего, во апо́стола язы́ков предъизбра́нный. Ра́дуйся, ча́до послушли́вое Це́ркве Правосла́вныя, в первосвяти́теля Ирку́тския па́ствы пронарече́нный. Ра́дуйся, Инноке́нтие, святы́й уго́дниче Спа́са Христа́. Конда́к 3. Си́лою свы́ше тя́ облече́нна уразуме́вше благове́рный ца́рь и святы́й Собо́р избра́ша тя́ во апо́стольское служе́ние, пропове́дати Ева́нгелие Ца́рства Христо́ва в земли́ язы́ков, неве́дущих пе́ти во Святе́й Тро́ице еди́ному Бо́гу: Аллилу́иа. И́кос 3. Име́я ре́вность апо́стольскую о спасе́нии ду́ш челове́ческих, подви́глся еси́ на вся́ труды́ и беды́ ше́ствия в да́льныя страны́ ца́рства хи́нов: но воспяще́н бы́в в преде́лы его́ вни́ти, во гра́де Селенги́нстем препокое́ние обре́л еси́, иде́же тя́ ма́лое ста́до при́сных ти́ по ве́ре приве́тствии сре́те си́ми: Ра́дуйся, но́вый апо́столе, на просвеще́ние язы́ков мно́гие страны́ прете́кший. Ра́дуйся, в ше́ствиих пу́тных, я́коже и Па́вел, язы́ков апо́стол, беды́ Христа́ ра́ди и Ева́нгелиа бо́дре сре́тивый. Ра́дуйся, лучеза́рное Це́ркве Христо́вы свети́ло, на просвеще́ние восто́ка возше́дшее. Ра́дуйся, боже́ственнаго огня́ носи́ло, теплоту́ любве́ Христо́вы во страны́ мра́за прине́сшее. Ра́дуйся, ду́хом ре́вности апо́стольския дви́жимый, ко язы́ком Монго́льским поспеши́вый. Ра́дуйся, во изгна́нии стра́ждущым поко́й душа́м в сле́довании благо́му и́гу Христо́ву указа́вый. Ра́дуйся, Инноке́нтие, святы́й уго́дниче Спа́са Христа́. Конда́к 4. Бу́рю за́висти дре́вний челове́ческих ду́ш прельсти́тель воздви́же в сердца́х хи́нов сопроти́в тебе́, во страну́ и́х гряду́щаго, благове́стника ми́ра Христо́ва, и возста́ви на тя́ лжебра́тию, во е́же в преде́лы хи́нов твое́ возбрани́ти вхожде́ние, да не навы́кнут хи́нове, вку́пе с правосла́вными, изве́дшему лю́ди из тмы́ во све́т сво́й чу́дный Христу́ Бо́гу пе́ти: Аллилу́иа. И́кос 4. Услы́шав ухищре́нныя хи́нов глаго́лы, я́ко не подоба́ет ти́, иера́рху вели́кому Го́спода, бы́ти прия́ту в и́х ца́рство, обрати́лся еси́ па́ки со Ева́нгелием ко язы́ком иноро́дным во стране́ Сиби́рстей, и́же с ве́лию ра́достию тя́ прие́мше, возопи́ша ти́ такова́я: Ра́дуйся, хи́нами во и́х ца́рство не прия́тый, ко прия́тию же саме́ми а́нгелы в Небе́сное Ца́рство досто́йный. Ра́дуйся, не ро́ду чужде́му хи́нов, но своего́ ца́рства язы́ком Монго́льским во апо́стола угото́ванный. Ра́дуйся, я́ко возбране́нием тебе́ благове́стия язы́ком ца́рства чужда́го ве́лие бла́го язы́ком Росси́йскаго ца́рства устро́ися. Ра́дуйся, я́ко про́поведию Ева́нгелиа язы́ком Монго́льским злоухищре́ние врага́ ду́ш челове́ческих же́стоко посрами́ся. Ра́дуйся, я́ко твои́м посреде́ на́с вселе́нием неве́дущии Бо́га в позна́ние и́стины приведо́шася, противля́ющиися же и́стине обличи́шася. Ра́дуйся, я́ко на житие́ твое́ взира́юще, гре́шнии пока́яшася, беззако́ннии же уцелому́дришася. Ра́дуйся, Инноке́нтие, святы́й уго́дниче Спа́са Христа́. Конда́к 5. Богото́чный прему́дрости исто́чник от оби́лия прису́щия ти́ благода́ти прото́ржеся в пусты́ни Монго́льстей, егда́ неразу́мнии хи́нове загради́ша то́ки ея́ в преде́лы и́х омраче́ннаго ца́рства: ре́вностию бо апо́стольскою дви́жимь и во служе́нии па́стырстем тружда́яся, о́во просвеща́л еси́ све́том Ева́нгелиа Христо́ва неве́рующыя язы́ки монго́льски, о́во утвержда́л еси́ ве́рующыя в послуша́нии Правосла́вныя Це́ркве уста́вом; и та́ко научи́л еси́ и си́х и о́нех вку́пе воспева́ти Еди́ному все́х челове́ков Спаси́телю Бо́гу: Аллилу́иа. И́кос 5. Ви́дя Вседержи́тель, вся́ на по́льзу стро́яй, я́ко не приспе́ вре́мя, да просветя́тся све́том Ева́нгелиа лю́дие ца́рства хи́нскаго, дарова́ тя́ в первосвяти́теля Ирку́тския Це́ркве и учи́теля язы́ков Сиби́ри, е́же мы́ ны́не ра́достно воспомина́юще, си́це зове́м ти́: Ра́дуйся, первопресто́льниче Ирку́тския Це́ркве, благове́стием Сиби́рскую о́бласть Росси́йскаго ца́рства огласи́вый. Ра́дуйся, свято́е нача́ло святи́телей Ирку́тския па́ствы, про́чым пременя́емым, еди́ный ея́ несме́нный блюсти́телю. Ра́дуйся, о́тче, святы́х оте́ц в насажде́нии благоче́стия и искорене́нии нече́стия подража́телю. Ра́дуйся, па́стырскому служе́нию уготовля́емых трудолюби́вый учи́телю. Ра́дуйся, па́стырю до́брый, гото́вый ду́шу твою́ положи́ти за о́вцы твоя́. Ра́дуйся, неусы́пный стра́же, вве́ренныя ти́ ду́шы, бде́нным моле́нием и пу́тным обхожде́нием, до́бре сохрани́вый. Ра́дуйся, Инноке́нтие, святы́й уго́дниче Спа́са Христа́. Конда́к 6. Богопропове́дников Христо́вых апо́столов труды́ на ся́ подъе́м, о́ных насле́довал еси́ по́двиги и лише́ния, ско́рби и озлобле́ния: но вся́ ра́ди Христа́ и Ева́нгелиа до́блественно поне́сл еси́, и вся́ ны́, не то́чию благоду́шствующия, но и скорбя́щыя, научи́л еси́ пе́ти Бо́гу: Аллилу́иа. И́кос 6. Возсия́ла е́сть па́че со́лнца, во огни́ искуше́ний и скорбе́й очище́нная, душа́ твоя́, до́блественный подви́жниче Христо́в: а́ще бо в не́мощех и боле́знех претружде́но бя́ше те́ло твое́, но ду́хом при́сно сы́й бо́др, вы́ну побежда́л еси́ враги́ Христо́вы Це́ркве. Сего́ ра́ди и мы́, тобо́ю в ско́рбех утеша́еми, побе́дная ти́ си́це вопие́м: Ра́дуйся, во́ине Христо́в, во всеору́жии Бо́жии проти́ву нача́л и власте́й и миродержи́телей тмы́ ве́ка сего́ подвиза́выйся. Ра́дуйся, и́стиною а́ки по́ясом препоя́санный, язы́ков шата́ния разруши́вый. Ра́дуйся, пра́вдою а́ки в броня́ оболче́нный, вся́ наве́тник клеветы́ неде́йственны сотвори́вый Ра́дуйся, но́зе во благовествова́ние ми́ра обуве́нне име́вый, главу́ дре́вняго зми́я попра́вый. Ра́дуйся, ве́рою а́ки щито́м покрове́нный, вся́ разжже́нныя лука́ваго стре́лы угаси́вый. Ра́дуйся, шле́м спасе́ния и ме́ч духо́вный восприя́вый, и вся́ враги́, а́ки воево́да возбра́нный, низложи́вый. Ра́дуйся, Инноке́нтие, святы́й уго́дниче Спа́са Христа́. Конда́к 7. Хотя́й милосе́рдый Госпо́дь не то́чию па́стве Ирку́тстей, но и вся́кому бли́жнему же и да́льнему тя́ дарова́ти в ско́рбех уте́шителя, в беда́х ско́раго помо́щника и от боле́зней цели́теля, ускори́ тя́ разреши́ти от у́з сея́ бре́нныя пло́ти, да по все́м градо́м и ве́сем чудесы́ и исцеле́ньми Бо́га просла́виши и вся́ Ему́ воздви́гнеши пе́ти: Аллилу́иа. И́кос 7. К но́вому и нестаре́ющемуся на небесе́х жи́тельству уготовля́я тво́й восхо́д, писа́нием со одра́ боле́зни всесмире́нно проси́л еси́ иере́и гра́да Ирку́тска со христиа́ны правосла́вными, да воспою́т во хра́мех Богоро́дице пара́клисис: мы́ же, зря́ще тя́ по преставле́нии просла́влена Бо́гом, к тебе́ самому́ си́це взыва́ем: Ра́дуйся, ратобо́рче Христо́в, по́двигом до́брым подвиза́выйся. Ра́дуйся, быстротеку́щий орле́, тече́ние твое́ в превы́спренних селе́ниих сконча́вый. Ра́дуйся, во́ине Царя́ Небе́снаго, вся́ обе́ты Христу́ Царю́ и Бо́гу на́шему ве́рно соблюды́й. Ра́дуйся, я́ко про́чее уже́ вене́ц пра́вды тебе́ соблюде́ся. Ра́дуйся, по преселе́нии во оби́тели Отца́ Небе́снаго не оставля́яй посеща́ти на́ш гра́д и оби́тель сию́. Ра́дуйся, те́плый о на моли́твенниче, не престаю́щь о на́с у Престо́ла Царя́ Небе́снаго хода́тайствовати. Ра́дуйся, Инноке́нтие, святы́й уго́дниче Спа́са Христа́. Конда́к 8. Стра́нное все́м чу́до показа́ся, егда́ древя́ная це́рковь, под ея́же олтаре́м почива́л еси́ от трудо́в сего́ вре́меннаго жития́, посреде́ всея́ оби́тели запале́ния, я́ко дре́вняя купина́, огне́м опаля́ема не сгара́ше. Чту́щии же па́мять твою́, я́ве уразуме́вше, я́ко твои́х ра́ди моще́й соверша́ется сие́ чу́до, со стра́хом и ра́достию, храня́щему тя́ Бо́гу, мно́жицею взыва́ху: Аллилу́иа. И́кос 8. Вси́ лю́дие, прите́кшии во оби́тель твою́ и це́рковь, в не́йже почива́ху мо́щи твоя́, огне́м опаля́ему ви́дяще, приступи́вше ко архипа́стырю, те́пле его́ моля́ху, да изнесу́т ра́ку святы́х моще́й твои́х: о́н же, ду́хом ве́ры испо́лнь, наде́ждею сохране́ния от огня́ не то́чию моще́й твои́х, но и всея́ це́ркве, все́х ободря́ше. Лю́дие же, сбытие́ слове́с архипа́стыря а́бие узре́вше, благода́рными ти́ гла́сы, чудотво́рче, воззва́ша: Ра́дуйся, свети́льниче Це́ркве, из-под спу́да па́че блиста́ния о́гненнаго возсия́вый. Ра́дуйся, несгара́нием храни́лища моще́й твои́х, о нетле́нии и́х пресла́вно провозвести́вый. Ра́дуйся, таковы́м зна́мением о твое́м с на́ми сопребыва́нии удостове́ривый. Ра́дуйся, це́ркве сохране́нием, в тебе́ от бе́д засту́пника на́м откры́вый. Ра́дуйся, и гра́да на́шего, посреде́ запале́ний о́гненных, мно́гажды удоборазумева́емый храни́телю. Ра́дуйся, наипа́че о избавле́нии на́с от огня́ гее́нскаго при́сный на́ш пред Го́сподем хода́таю. Ра́дуйся, Инноке́нтие, святы́й уго́дниче Спа́са Христа́. Конда́к 9. Вси́ ли́цы а́нгелов да́ша сла́ву, че́сть и благодаре́ние Седя́щему на Престо́ле, живу́щему во ве́ки веко́в Бо́гу и А́гнцу, егда́, убеле́нная све́тлостию непоро́чности, душа́ твоя́, святи́телю Христо́в Инноке́нтие, вознесе́ся на не́бо, в сожи́тельство а́нгелов. Мы́ же, прославле́нием на земли́ святы́х моще́й твои́х уве́рившеся о твое́й на небесе́х сла́ве, с весе́лием просла́вльшему тя́ Бо́гу при́сно взыва́ем пе́снь: Аллилу́иа. И́кос 9. Вети́ям любому́дрым на се́рдце не взыдо́ша, я́же ти́, Христо́в уго́дниче, угото́ва Госпо́дь во оби́телех небе́сных. Мы́ же, пра́зднующе твое́ на небеси́ прославле́ние, си́це тя́ на земли́ ублажа́юще зове́м: Ра́дуйся, мно́гу на небесе́х, многообра́знаго ра́ди на земли́ служе́ния, мзду́ восприе́мый. Ра́дуйся, де́вственниче, в пе́рвенцы Бо́гу и А́гнцу впи́саный. Ра́дуйся, страда́льче, вку́пе со прише́дшими от ско́рби ве́лия, в ри́зах бе́лых пред престо́лом спасе́ние и сла́ву воспева́яй. Ра́дуйся, апо́столе язы́ков, престо́лом апо́стольским на небеси́ почте́нный. Ра́дуйся, па́стырю научи́вый и сотвори́вый, и сего́ ра́ди ве́лиим во Ца́рствии Небе́снем от Христа́ нарече́нный. Ра́дуйся, воево́до возбра́нный, соседе́ния Победи́телю а́да и сме́рти на престо́ле сподо́бивыйся. Ра́дуйся, Инноке́нтие, святы́й уго́дниче Спа́са Христа́. Конда́к 10. Спасе́ния посреде́ земли́ соде́лавый, Человеколю́бец Госпо́дь посети́ страну́ Сиби́рскую свое́ю ми́лостию и щедро́тами: в ра́це бо моще́й твои́х, вели́кий уго́дниче Христо́в, откры́л е́сть на́м зна́мение твоего́ те́плаго о на́с на небеси́ хода́тайства, его́же сподобля́еми вси́ благове́рнии лю́дие страны́ Сиби́рския, еди́неми усты́ и се́рдцем пою́т Бо́гу: Аллилу́иа. И́кос 10. Стена́ еси́ необори́мая, засту́пниче на́ш, гра́ду и стране́ се́й от нахожде́ний вся́ких зо́л и скорбе́й: явле́нием бо чуде́с твои́х уве́рихомся, я́ко ве́лие стяжа́л еси́ дерзнове́ние у Го́спода. Сего́ ра́ди си́це зове́м ти́: Ра́дуйся, страны́ Сиби́рския богодарова́нный храни́телю и засту́пниче, хода́таю и помо́щниче. Ра́дуйся, я́ко вку́пе со а́нгелы по́слан еси́ во служе́ние за хотя́щих насле́довати спасе́ние, и все́м стра́ждущым неоску́дное подае́ши утеше́ние. Ра́дуйся, драгоце́нное на́м в ра́це моще́й твои́х насле́дие оста́вивый. Ра́дуйся, я́ко во оби́тели Вознесе́нстей все́х притека́ющих к тебе́ срета́еши с любо́вию. Ра́дуйся, и на вся́ком ме́сте тя́ с ве́рою призыва́ющым ско́рый помо́щник явля́яйся. Ра́дуйся, и не и́щущым тя́, ниже́ ве́дущим, я́ко до́брый наста́вник, вра́ч же и покрови́тель мно́гажды познава́емый. Ра́дуйся, Инноке́нтие, святы́й уго́дниче Спа́са Христа́. Конда́к 11. Пе́ние вся́кое не довле́ет к прославле́нию чуде́с твои́х, чудотво́рче преди́вный, и́миже не то́чию ве́рныя, но и неве́рныя удивля́еши: ве́руем же и наде́емся, я́ко твои́ми моли́твами и во мра́це идолослуже́ния су́щии из тмы́ и се́ни сме́ртныя изы́дут и с на́ми ку́пно просла́вльшему тя́ Бо́гу воззову́т: Аллилу́иа. И́кос 11. Свети́льник не поставля́ется под спу́дом, но на све́щник возлага́ется, да входя́щии ви́дят све́т: сего́ ра́ди и твоя́ святы́я мо́щи изведе́ из-под спу́да Госпо́дь, я́ко да входя́щии во оби́тель твою́, от сего́ чу́днаго све́та ве́рою просвеща́еми и исцеле́ния от тебе́ прие́млюще, взыва́ем к тебе́ си́це: Ра́дуйся, наста́вниче прему́дрый, мы́сли бла́ги и хоте́ния свя́та на се́рдце полага́яй. Ра́дуйся, вождю́ благонаде́жный, на пу́ть спасе́ния направля́яй. Ра́дуйся, пред Престо́лом Царя́ Небе́снаго о спасе́нии ду́ш на́ших хода́тайствуяй. Ра́дуйся, ско́рый помо́щниче, от нахожде́ния зо́л и скорбе́й сохраня́яй. Ра́дуйся, врачу́ сострада́тельный, от боле́зней душе́вных же и теле́сных свобожда́яй. Ра́дуйся, оста́вленных врачми́ от одра́ сме́рти воздвиза́яй. Ра́дуйся, Инноке́нтие, святы́й уго́дниче Спа́са Христа́. Конда́к 12. Благода́тиею Бо́жиею испо́лнена тя́ позна́вше не то́чию бли́з су́щии, но и во страна́х да́льних обита́ющии, с ве́рою притека́ют к ра́це моще́й твои́х: ты́ же, вне́мля и́х моле́нием, не преста́ни напу́тствовати все́х да́ры исцеле́ний и чуде́с твои́х, да от восто́к со́лнца до за́пад вси́ воспою́т чудоде́йствующему Бо́гу: Аллилу́иа. И́кос 12. Пою́ще чудеса́ твоя́, и́миже по преставле́нии, па́че же по обре́тении святы́х моще́й твои́х, Бо́га просла́вил еси́, благода́рно тебе́ си́це зове́м: Ра́дуйся, жи́лами разсла́бленныя со одра́ боле́зни возста́вивый. Ра́дуйся, сокруше́нием но́г и ру́к стра́ждущыя, а́ки николи́же страда́вшыя устро́ивый. Ра́дуйся, стру́пами покры́тыя и ра́нами уя́звленныя це́лы и здра́вы соде́лавый. Ра́дуйся, зре́ние слепы́м возврати́вый и изумле́нныя на здра́вый смы́сл наста́вивый. Ра́дуйся, во отча́янии живота́ к сме́рти уготовля́емыя к жи́зни па́ки возврати́вый. Ра́дуйся, ни еди́ней же боле́зни ко исцеле́нию тебе́ бы́ти неудо́бней, чуде́с мно́жеством засвиде́тельствовавый. Ра́дуйся, Инноке́нтие, святы́й уго́дниче Спа́са Христа́. Конда́к 13 О, вели́кий Христо́в уго́дниче, ми́лостивый на́ш наста́вниче, благоутро́бия сокро́вище, правове́рия учи́телю, архиере́ев похвало́, безпомо́щных засту́пниче, о́тче на́ш Инноке́нтие! Моли́ Христа́ Бо́га, да сподо́бит на́с земно́е по́прище без поро́ка прейти́ и егда́, я́ко Пра́ведный Судия́, со а́нгелы свои́ми во сла́ве прии́дет суди́ти живы́х и ме́ртвых, да не отлучи́т на́с от со́нма спаса́емых, но да сотвори́т на́с прича́стники Ца́рства Небе́снаго, во е́же та́мо вку́пе с тобо́ю, отце́м на́шим, вы́ну сла́вити его́ и воспева́ти Ему́ со Отце́м и Святы́м Ду́хом во ве́ки веко́в: Аллилу́иа.[Се́й конда́к глаго́лется три́жды.][Далее повторяем 1‑е икос и кондак:]И́кос 1. А́нгелом уподо́бился еси́ непоро́чным житие́м, святи́телю о́тче Инноке́нтие, и сего́ ра́ди а́нгелов соприча́стия сподо́бился еси́ в немо́лчнем славосло́вии Го́спода Сла́вы. Приими́ у́бо и от на́ших недосто́йных усте́н приноси́мое тебе́ хвале́ние: Ра́дуйся, по и́мени твоему́, непоро́чность зна́менующему, яви́вый житие́ твое́. Ра́дуйся, непоро́чности сохране́нием, а́нгелов житию́ подража́тель бы́вый. Ра́дуйся, ве́рный Христо́ва Ева́нгелиа служи́телю. Ра́дуйся, архиере́ев удобре́ние. Ра́дуйся, Це́ркве, неве́сты Христо́вы, драго́е украше́ние. Ра́дуйся, свя́тости жития́ и непоро́чности нра́вов учи́телю. Ра́дуйся, Инноке́нтие, святы́й уго́дниче Спа́са Христа́. Конда́к 1. Равноапо́стольный христиа́нския ве́ры благове́стниче, язы́ческаго злове́рия искорени́телю, ско́рый в беда́х и ско́рбех засту́пниче, благоутро́бия неистощи́мое сокро́вище, святи́телю о́тче Инноке́нтие! Вели́каго тя́ пред Го́сподем хода́тая и чуде́с мно́жеством свиде́тельствованна помо́щника иму́ще, к тебе́ во обстоя́нии от вся́ких ну́жд и зо́л с ве́рою и любо́вию притека́ем, и та́ко ти́ зове́м: Ра́дуйся, Инноке́нтие, святы́й уго́дниче Спа́са Христа́. Моли́тва святи́телю Инноке́нтию, Ирку́тскому чудотво́рцу. О, вели́кий Христо́в уго́дниче, святи́телю о́тче Инноке́нтие! Услы́ши на́с, тебе́ моля́щихся. Ты́ ве́си на́ша ско́рби и неду́ги, слы́шиши воздыха́ния мно́жества к тебе́ притека́ющих; сего́ ра́ди к тебе́, я́ко отцу́ на́шему, ско́рому помо́щнику и те́плому моли́твеннику, зове́м: не оста́ви на́с твои́м у Бо́га хода́тайством. Мы́ при́сно заблужда́емся от пути́ спасе́ния — руководи́ на́с, ми́лостивый на́ш наста́вниче. Мы́ немощни́и в ве́ре — утверди́ на́с, правове́рия учи́телю. Мы́ зело́ убо́зи сотвори́хомся до́брых де́л — обогати́ на́с, благоутро́бия сокро́вище. Мы́ при́сно наве́туеми есмы́ от вра́г ви́димых и неви́димых и озлобля́еми — помози́ на́м, безпомо́щных засту́пниче. Гне́в Бо́жий, пра́ведно дви́жимый на ны́ за беззако́ния на́ша, отврати́ от на́с твои́м хода́тайством у Престо́ла Судии́ Бо́га, Ему́же ты́ предстои́ши на небеси́, о́тче иера́рше, архиере́ев похвало́. Услы́ши, мо́лим тя́, вели́кий Христо́в уго́дниче, и зде́ с моле́нием тебе́ предстоя́щыя, и вся́, на вся́ком ме́сте тебе́ с ве́рою призыва́ющыя: и испроси́ моли́твами твои́ми у Отца́ Небе́снаго все́м на́м проще́ние грехо́в на́ших и от бе́д избавле́ние. Ты́ бо еси́ свиде́тельствованный безчи́сленными чудесы́ помо́щник, засту́пник и моли́твенник, и о тебе́ сла́ву возсыла́ем Отцу́ и Сы́ну и Свято́му Ду́ху, и ны́не и при́сно, и во ве́ки веко́в. Ами́нь. Моли́тва ина́я. Свя́тче Бо́жий, па́стырю до́брый, де́лателю ве́рный виногра́да Христо́ва, святи́телю о́тче Инноке́нтие! При́зри на гра́д се́й и на лю́ди сия́! Моли́ Христа́ Бо́га, да сохрани́т па́ству твою́ от волко́в, губя́щих ю́; да ниспо́слет Ду́ха Своего́ Свята́го во е́же умудри́ти на́с ходи́ти пред Ни́м во вся́ком благоче́стии и чистоте́ во вся́ дни́ живота́ на́шего, да славосло́вяще И́мя Его́ Всесвято́е во дни́ и в но́щи, сподо́бимся бы́ти насле́дницы жи́зни ве́чныя, и просла́вим Отца́, и Сы́на, и Свята́го Ду́ха, ны́не и при́сно и во ве́ки веко́в. Ами́нь.

Кондак 1 Избранней от всех родов Божией Матери и Царице пред пречистым Ея образом со умилением хвалебная пения приносим. Ты же, яко имущая к роду христианскому милосердие неизреченное, от бед и скорбей избави всех нас, Тебе зовущих: Радуйся, Невесто Неневестная. Икос 1 Архангелов и ангелов чини благоговейно Тебе служат, и вся небесныя силы немолчными гласы Тя, Богородице Дево, воспевают, яко рождшую небесных воинств Царя; мы же, земнороднии, трепетно предстоящии чудотворному Твоему лику, бренными усты вопием Ти сице: Радуйся, от всех родов ко искуплению рода нашего избранная; радуйся, Духа Святаго дарований преисполненная. Радуйся, херувимов и серафимов превозшедшая; радуйся, таинству спасения рода человеческаго послужившая. Радуйся, святое вместилище Слова Божия; радуйся, неописанное Слово Отчее в ложеснах Своих носившая. Радуйся, пророческих глаголов неложное исполнение; радуйся, прародителей рода нашего от клятвы рождеством Твоим свободившая. Радуйся, предстательство роду христианскому, от Бога дарованное; радуйся, спасения рода человеческаго начало. Радуйся, лествице Божественнаго снисхождения; радуйся, мосте, от земли к небеси земнородных возводяй. Радуйся, Невесто Неневестная. Кондак 2 Видящи, Пречистая, с высоты небеснаго жилища Своего, идеже с Сыном Своим во славе пребываеши, озлобление противу святынь христианских во стране Грузинстей, попущением Божиим во дни оны бывшее от персскаго царя Аббаса, Грузинскую страну разорившаго и храмы ея христианския осквернившаго, и, хранящи святую икону от таковаго поругания, страны Российския мужу верну и благоговейну Стефану благопромыслительно вдати ю вспомоществовала еси, Владычице. Стяжав убо сей верный раб святыню Твою, во умилении сердца возопи Богу: Аллилуиа. Икос 2 Разумети хотя благоговейный муж Георгий недоуменную тайну откровения Твоего, Владычице, о некоем безценном бисере, приставником имения его во стране Персидстей приобретеннем, с патриархом Филаретом совещавашеся. Мы же, таинственному вразумлению Преблагословенныя, свыше верным рабом подаваемому, дивящеся, благоговейно вопием к Ней: Радуйся, сокровенныя тайны благодати Божия верным открывающая; радуйся, устнами православных хвалу Богови совершающая. Радуйся, неверных агарян, святыню Твою презревших, посрамляющая; радуйся, славою чудес Твоих верным смыслы озаряющая. Радуйся, почитанию святых икон нас наставляющая; радуйся, Христову веру во стране утверждающая. Радуйся, иноков обителей Красныя горы святым Твоим образом освящающая; радуйся, день принесения честныя Твоея иконы исцелением инока знаменовавшая. Радуйся, безценный бисер, святую Твою икону, якоже рекла еси, нам даровавшая; радуйся, безценный Бисер, Христа, на спасение наше рождшая. Радуйся, честным Твоим образом страну нашу посетившая; радуйся, мирную обитель неотъемлемым богатством обогатившая. Радуйся, Невесто Неневестная. Кондак 3 Сила Вышняго осеняет выну с верою притекающих к державному покрову Твоему, Владычице, и благоговейно чтущих чудотворную икону Твою, Богомати, той бо дадеся благодать от Бога всяк недуг и язю в людех врачевати, темже благодарственно вопием Богу: Аллилуиа. Икос 3 Имущи промышление теплое о людех зимния полунощи, гору Красную под кров Твой, Богомати, прияла еси, и обители иноков тоя честный образ Твой милостивно даровала еси, да зряще токи чудес, преизобильно на молящихся Тебе с верою изливаемыя, во умилении вопиют Тебе, Владычице: Радуйся, смиренную обитель иноков Красныя горы державным покровом Твоим осеняющая; радуйся, чудесы от святыя Твоея иконы гору Красную прославляющая. Радуйся, подобие благодатнаго Афона на зимней полунощи явившая; радуйся, гору Красную житию иноческому чудно указавшая. Радуйся, в щит и ограждение места того цельбоносную икону Твою даровавшая; радуйся, поселившимся на сей святей горе иноком обитель тихую создавшая. Радуйся, житие чина иноческаго во спасение душ устрояющая; радуйся, всем хотящим улучити спасение споборствующая. Радуйся, Красную гору и обитающих на ней благодатным омофором покрывающая; радуйся, притекающих к Твоему покрову и заступлению не оставляющая. Радуйся, слабых на пути добродетели укрепляющая; радуйся, заблуждших на путь истинный наставляющая. Радуйся, Невесто Неневестная. Кондак 4 Бурю внутрь имея помышлений сумнительных, слепец Питирим, егда озарен бе сиянием света, яко солнечным, смятеся, и страхом одержим бе, мняше о сем, яко о наваждении бесовстем, многа бо лета слеп бе; с молитвою же знамение крестное сотвори, обращься ко храму, и, узрев чудную Твою, Владычице, икону, светозарными лучами во храме блиставшую, абие уразуме, яко отверзостася очи его и слух его открыся, сего ради благодарственное принес Богу, дивному в делех, пение: Аллилуиа. Икос 4 Слышав благоверный царь всея России Алексий, яко от святыя иконы Твоея, Владычице, яже на горе Красней, цельбы многоразличных недуг обильно подаются, даде повеление игумену обители по градом и весем великия державы своея с честию подобающею ю обносити, да приемлют страждущии врачевство недугов телесных и душевных и во умилении сердец взывают Тебе, Владычице: Радуйся, Христа Бога нашего освященный храме; радуйся, неизреченныя Его славы вместилище. Радуйся, Царя царствующих одушевленный граде; радуйся, палато и чертоже небесный. Радуйся, Церкве Православныя похвало; радуйся, державы Российския крепосте и утверждение. Радуйся, градов и весей наших благодатное охранение; радуйся, всех христиан, к Тебе притекающих, непостыдное упование. Радуйся, от всех родов достойно ублажаемая; радуйся, всех нас от бед и скорбей пришествием честнаго Твоего образа избавляющая. Радуйся, сущих в странствии ко взысканию горняго града направляющая; радуйся, путеводительнице наша к вечным обителем. Радуйся, Невесто Неневестная. Кондак 5 Боготечней звезде подобная явися Твоя, Богомати, икона, по воле Твоей святей от востока на самую полнощь принесенная, юже, яко дар небесный, восприимше иноцы красногорстии, поставиша в соборную церковь обители, и в веселии пояху благих подателю Богу: Аллилуиа. Икос 5 Видящи среброковача Гавриила, зельне плачуща пред Твоим чудотворным образом, Владычице, тогда умилосердилася еси, сына его на одре болезни лежаща воздвигла и здрава сотворила еси; сице и о мне умилосердися, преблагословенная Богородице, и грехми умерщвленную мою душу воскреси, зовущую: Радуйся, благоволение Сына Твоего, Христа Бога нашего, нам стяжавшая; радуйся, Мати Царя живота и Победителя смерти. Радуйся, светлыми лучами чудес от святыя Твоея иконы страну Российскую озаряющая; радуйся, богатыя дары исцелений и милостей просящим Тя пред чудною Твоею иконою источающая. Радуйся, моления наша, приносимая Тебе с верою и любовию, милостивно приемлющая; радуйся, телесныя недуги верно почитающих Тя скоро исцеляющая. Радуйся, печаль нашу в радость претворяющая; радуйся, от слез и скорбей нас избавляющая. Радуйся, скорбных о чадех родителей утешение; радуйся, чад их благодатное охранение и спасение. Радуйся, покрове нам в животе и по смерти; радуйся, спасение наше на праведнем Суде Божием. Радуйся, Невесто Неневестная. Кондак 6 Проповедника творящи купца Георгия воли Своея, рекла еси к нему, Владычице: Приставник имения твоего Стефан, сый в Персиде, купи тебе безценный бисер; егда же принесет к тебе, посли оный в Двинскую землю, на Чермную гору. Познав убо о сем Георгий Твое, Пречистая, к месту тому особое благоволение, воспряну воспети к рождшемуся от Тебе Богу: Аллилуиа. Икос 6 Возсияла есть слава Божия на святей горе Красней от пречудныя Твоея иконы, Богомати, пред неюже предстояще, со умилением молимся Ти: услыши нас, вопиющих Тебе усердно: Радуйся, гору полунощную пришествием чудотворнаго Твоего образа осенившая; радуйся, чудес неоскудевающий источник на ней явившая. Радуйся, милосердие и любовь Твою к обители иноков показавшая; радуйся, благое о ней промышление Свое явившая. Радуйся, телесныя недуги наша врачующая; радуйся, в душевных скорбех нас утешающая. Радуйся, благочестия наставнице; радуйся, иноческаго жития руководительнице. Радуйся, добрыя ко спасению обеты приемлющая; радуйся, благим намерением и начинанием нашим способствующая. Радуйся, злыя от наваждения врага бываемыя помыслы от нас отгоняющая; радуйся, вражия козни яко паучину расторгающая. Радуйся, Невесто Неневестная. Кондак 7 Хотя дати благословение новоустроенней обители иноков, Раифскою нареченней, архипастырь казанский Лаврентий лик Твой, Владычице, от чудотворнаго Твоего Красногорскаго образа тождественно списав, торжественно с молебным пением во обитель Раифскую внесе. Свидетелем же быв совершившихся от сея святыя Твоея, Владычице, иконы знамений и чудес, радостно возопи Богу: Аллилуиа. Икос 7 Новую купель Силоамскую зрим, Пречистая Богородице, храм Твой, иже в Раифе. Всяк бо недуг и всяку язю душевную и телесную врачуеши с верою и любовию к Тебе притекающих и благоговейно чтущих и лобызающих святый образ Твой. Сего ради, имуще новое неизреченное сокровище Твоих милостей, радостно вопием Ти, Пречистая: Радуйся, купеле, в нейже душевныя недуги наша врачуются; радуйся, источниче, жаждущим воду жизни источивый. Радуйся, слепым телесныма очима зрение подавающая; радуйся, глухим слух отверзающая. Радуйся, разслабленныя телом укрепляющая; радуйся, лежащия на одре болезни возставляющая. Радуйся, плавающия по водам от бурь и потопления спасающая; радуйся, влающияся в пучине житейскаго моря к тихому пристанищу спасения направляющая. Радуйся, оружие, имже устрашаются полцы демонския; радуйся, щите, имже покрываются обители иноков. Радуйся, тихое пустынножителей веселие; радуйся, тихое обуреваемых в сем веце пристанище. Радуйся, Невесто Неневестная. Кондак 8 Странно слышати и неудобно разумети злым неверием омраченным, како от святых икон Твоих, Владычице, знамения и чудеса бывают. Нам же, тепле верующим словеси, Тобою к первоначертанней благовестником евангельских таин святей иконе реченному: Благодать Рождшагося от Мене и Моя с сим образом да будет, удобно есть разумети и праведно уповати, яко и с сею иконою Твоею Грузинскою благодать Твоя и сила пребывают выну. Сего ради с благоговейным страхом предстояще, с тем и воздаем ей честь, яко Тебе Самой, нам присущей, радостно поюще Богу: Аллилуиа. Икос 8 Вся присно горе сущи и с небесными силами выну пребывающи, нас земнородных не оставляеши, Богомати, теплым предстательством пред Сыном и Богом Твоим, Матернее бо дерзновение к Нему имаши. Сего ради, предстояще пречистому Твоему образу, со слезами покаяния вопием Ти, Богородительнице: Радуйся, путеводительнице верная, к небесному отечеству добре нас направляющая; радуйся, Мати Царя небесе и земли, врата райская нам отверзающая. Радуйся, домостроительнице, житие наше к небесному устрояющая; радуйся, вечная благая Сына Твоего нам являющая. Радуйся, от скорбей и бед зде нас спасающая; радуйся, вечных мук и огня геенскаго по смерти нас избавляющая. Радуйся, всех притекающих с верою и любовию к Тебе сугубо милующая; радуйся, молитвы наша, приносимыя Тебе пред чудотворным Твоим образом, ко престолу Сына Твоего и Бога нашего возносящая. Радуйся, благая наша помощнице; радуйся, непостыдное наше упование. Радуйся, Невесто Неневестная. Кондак 9 Всякаго естества архангельскаго и ангельскаго превысши, херувим же и серафим честнейши еси, Пресвятая Дево. Бога бо, Царя небесных сил, плотию родила еси, Невместимаго во утробе Своей вместила еси, Носящаго весь мир дланию на руках носила еси, и всякое естество Питающаго млеком питала еси. Темже воистину Матерь Божию и ходатаицу рода христианскаго Тя ведуще, со дерзновением вопием Богу: Аллилуиа. Икос 9 Витии многовещаннии не ведят, киими словесы благохвальными подобает величати Тя, Богородице, обаче, благая сущи, приими милостивно, аще и немощными смыслы сложенная, но от чистаго сердца приносимая Тебе в похвалу сицевая пения: Радуйся, пренепорочная Отроковице, Превечным советом ко спасению рода нашего избранная; радуйся, Жено, Еяже Семя сокруши главу древняго змия. Радуйся, в женах преблагословенная; радуйся, благодать у Бога обретшая. Радуйся, архангельское вещание о воплощении Единаго от Святыя Троицы смиренно приявшая; радуйся, кроткая рабо Господня. Радуйся, сосуде, Духом Божиим освященный; радуйся, силою Всевышняго осененная. Радуйся, Спасителя наших душ рождшая; радуйся, падший род наш с правосудием Божиим примирившая. Радуйся, Эдем затворенный рождеством Твоим миру отверзшая; радуйся, от пленения адова нас рождеством Твоим свободившая. Радуйся, Невесто Неневестная. Кондак 10 Спасти хотящи многия люди от бед и скорбей, всюду являеши, Богомати, роду нашему неоскудеваемый от Своея иконы Грузинския источник милости. Красногорскую бо обитель от запаления огненнаго во дни оны неврежденну сохранила еси, угасивши свирепеющую окрест ея силу огненную, в царствующем же граде Москве и в пустыни Раифстей благодати струи от иконы Твоея источаеши всем с верою поклоняющимся Тебе, и во иных градех и весех наших чтущим Тя полезное подаеши. Темже, прославляюще Бога, даровавшаго нам о Тебе благодать таковую, присно вопием Ему: Аллилуиа. Икос 10 Стена еси крепкая, Богородице Дево, обители Красногорския и пустыни Раифския ограда несокрушимая, чину же иноческому украшение и слава. Сего ради, молящеся, вопием Ти, Пречистая: покрый с верою поклоняющихся Тебе пред Твоим чудотворным образом от бед и скорбей, с любовию Тебе вопиющих: Радуйся, крепкая от находящих на ны напастей и бед хранительнице; радуйся, обителей иноческих неусыпная блюстительнице. Радуйся, от свирепеющаго пламене во дни оны обитель Красногорскую по теплому молению иноков дивно сохранившая; радуйся, благорастворение воздухов и спасительный дождь благовременно той низпосылающая. Радуйся, жития чина иноческаго украшение и доброто; радуйся, в бурю искушений и бед нас спасающая. Радуйся, помышления наша освящающая; радуйся, сердца наша очищающая. Радуйся, душегубительный пламень страстей наших угашающая; радуйся, мрак сатанинских искушений разсевающая. Радуйся, житию нашему благословение Божие низводящая; радуйся, мысленная очеса наша к горним обителем направляющая. Радуйся, Невесто Неневестная. Кондак 11 Пение хвалебное приносят Ти, Владычице, людие богоспасаемаго града Архангельска, егда град их единою в лето освящается пришествием Твоего чудотворнаго образа, и со светильники и кадильницы грядуще во сретение его, радостно вопиют Богу: Аллилуиа. Икос 11 Светозарными лучами чудес икона Твоя, Владычице, на святей горе Красней немерцаемо сияет и Российскую страну нашу православную благодатно озаряет, прогоняющи всякое темное действо вражие силою Божиею, побуждающи нас пред нею Тебе, богоизбранная Отроковице, хвалебная пения возносити: Радуйся, на пути нашего спасения неугасимый светильниче веры и благочестия; радуйся, луче незаходимаго Солнца. Радуйся, немерцающая во стране нашей православия звездо; радуйся, добродетели путь освящающая. Радуйся, заре, Солнце правды являющая; радуйся, свете, мрак неведения отгоняющая. Радуйся, купино неопалимая, Бога явившая; радуйся, престоле огненный Вседержителя. Радуйся, чистоты сокровище; радуйся, цвете неувядаемый славы. Радуйся, Вышняго освященное божественное селение; радуйся, яко Тобою дадеся радость всем Тя, Богородице, призывающим. Радуйся, Невесто Неневестная. Кондак 12 Благодати Твоея никогдаже оскудевающия неизсякаемый источник явила еси, Богородительнице, чудотворную икону Твою, от неяже вси скорбящии и обремененнии грехми многими спасение и цельбы во вся времена приемлют и радостно о Тебе воспевают всеблагому Богу: Аллилуиа. Икос 12 Поюще Твоя преславная чудеса, Богомати, от святыя Твоея иконы неоскудно нам подаваемая, и все упование наше на Тя, Заступнице, возлагающе, со умилением вопием Ти: Радуйся, непостыдное христиан упование в будущем веце; радуйся, в делании заповедей Сына Твоего пребывающих спасающая. Радуйся, в животе сем нас во здравии сохраняющая; радуйся, в страшный час смерти нас не оставляющая. Радуйся, верным рабом Твоим христианскую кончину устрояющая; радуйся, на Суде праведнем Сына Твоего верных слуг Твоих вожделенный глас Его слышати сподобляющая. Радуйся, всем хотящим спастися и в разум истины приити благая Одигитрие; радуйся, всех в сокрушении сердечнем кающихся грешников несумненное спасение. Радуйся, рождеством Твоим двери рая миру отверзшая; радуйся, земнородных с небесными к вечному веселию сочетавшая. Радуйся, от ангел присно воспеваемая; радуйся, и от земнородных достойно ублажаемая. Радуйся, Невесто Неневестная. Кондак 13 О всепетая Мати, Пресвятая Госпоже Дево Богородице, не отрини смиренно приносимое Тебе ныне пред чудотворным Твоим образом сие малое моление наше, презирающи бездну грехов наших, избави всех нас от бед и скорбей в животе сем и грядущия вечныя изми муки, нелицемерно о Тебе вопиющих Богу: Аллилуиа.[Се́й конда́к глаго́лется три́жды.][Далее повторяем 1‑е икос и кондак:]Икос 1 Архангелов и ангелов чини благоговейно Тебе служат, и вся небесныя силы немолчными гласы Тя, Богородице Дево, воспевают, яко рождшую небесных воинств Царя; мы же, земнороднии, трепетно предстоящии чудотворному Твоему лику, бренными усты вопием Ти сице: Радуйся, от всех родов ко искуплению рода нашего избранная; радуйся, Духа Святаго дарований преисполненная. Радуйся, херувимов и серафимов превозшедшая; радуйся, таинству спасения рода человеческаго послужившая. Радуйся, святое вместилище Слова Божия; радуйся, неописанное Слово Отчее в ложеснах Своих носившая. Радуйся, пророческих глаголов неложное исполнение; радуйся, прародителей рода нашего от клятвы рождеством Твоим свободившая. Радуйся, предстательство роду христианскому, от Бога дарованное; радуйся, спасения рода человеческаго начало. Радуйся, лествице Божественнаго снисхождения; радуйся, мосте, от земли к небеси земнородных возводяй. Радуйся, Невесто Неневестная. Кондак 1 Избранней от всех родов Божией Матери и Царице пред пречистым Ея образом со умилением хвалебная пения приносим. Ты же, яко имущая к роду христианскому милосердие неизреченное, от бед и скорбей избави всех нас, Тебе зовущих: Радуйся, Невесто Неневестная. Молитва 1-я Приими, Всеблагомощная Пречистая Госпоже, Владычице Богородительнице, сия честныя дары от нас, недостойных рабов Твоих, к Твоему цельбоносному образу пение возсылающих со умилением, яко Тебе Самой сущей ту и послушающей моления наша, подающи с верою просящим по коемуждо прошению исполнение: скорбящим скорби облегчаеши, немощным здравие даруеши, разслабленных и недужных исцеляеши, и от бесных бесы прогоняеши, обидимыя от обид избавляеши, и насилуемых спасаеши, грешных прощаеши, прокаженных очищаеши, и малых детей милуеши, и неплодныя от неплодства разрешаеши. Еще, Госпоже Владычице, от уз и темниц свобождаеши, и всякия многоразличныя страсти исцеляеши, и очныя болезни уврачуеши, и от смертоносныя язвы избавляеши: вся бо возможна суть ходатайством Твоим к Сыну Твоему, Христу Богу нашему. О Всепетая Мати, Пречистая Богородице! Не престай молити о нас, недостойных рабех Твоих, славящих Тя и почитающих, и покланяющихся пречистому образу Твоему, и надежду имущих невозвратну и веру несумненну к Тебе, Приснодевей, Преславней и Непорочней, славящих, и чтущих, и поющих Тя во веки веков. Аминь. Молитва 2-я К Тебе, Богоизбранная Отроковице, Пресвятая Дево Богородице, Небесе и земли Царице, припадающе, вопием: услыши молений наших глас и не отврати лица Твоего от нас, недостойных. Приими, Всеблагая, от недостойных раб Твоих, чтущих всечестное имя Твое и с верою покланяющихся Тебе пред чудотворным Твоим образом, приносимое ныне теплое моление наше, вознеси е к Престолу Сына Твоего, Христа Бога нашего, да милостив будет к неправдам нашим и не воздаст нам по делом нашим, но да пробавит щедроты Своя. Вемы, яко несмы достойни, по грехом нашим, от Него помиловани быти, аще не Ты, Владычице, умолиши Его о нас, вся бо можеши испросити у Него, Матернее бо к Нему имаши дерзновение. Сего ради к Тебе, яко всемощней и всеблагой Заступнице нашей, прибегаем, усердно молящеся: испроси у рождшагося от Тебе Единороднаго Сына Божия, Христа Бога нашего, всем нам в святоотечестей Православней вере твердое до конца дней наших пребывание и во всех заповедех Господних неуклонное хождение, да, прочее время живота нашего поживше во всяком благочестии и чистоте, сподобимся мирныя христианския кончины и добраго ответа на страшнем Суде Сына Твоего и Бога нашего и тако достигнем, под кровом Твоея помощи, живота вечнаго во Царствии Отца светов, Емуже, купно со Единородным Его Сыном и Святым Духом, подобает слава, честь и поклонение, ныне, и присно, и во веки веков. Аминь.

Минея, 3 Мая, Кано́н, его́же краегране́сие: Тимофе́я и Ма́вры боле́зни честву́ю. Творе́ние Ио́сифово Глас 6 Песнь 1 Ирмос: Я́ко по су́ху, пешеше́ствовав Изра́иль/ по бе́здне стопа́ми,/ гони́теля фарао́на/ ви́дя потопля́ема,/ Бо́гу побе́дную песнь/ пои́м, вопия́ше. Припев: Святи́и му́ченицы, моли́те Бо́га о на́с. Свяще́нных страда́лец свяще́нное и честно́е торжество́,/ лю́дие свяще́ннии, свяще́нно почти́м,/ я́ко да тех мольба́ми от бед изба́вимся. Припев: Святи́и му́ченицы, моли́те Бо́га о на́с. Священнопобе́дныя венцы́ от Христа́ прия́ти/ тща́щеся умре́ти па́че, не́же жи́ти, до́блии му́ченицы, я́ве изво́ливше,/ тем сла́ву получи́ша. Сла́ва Отцу́ и Сы́ну и Свято́му Ду́ху. Не убоя́вшеся боле́зней плотски́х, ни мук устраши́вшеся,/ ни огня́ гони́телей, страстоте́рпцы му́ченицы/ Христа́ на суди́щи му́жески пропове́даете. И ны́не и при́сно и во ве́ки веко́в. Ами́нь. Богородичен: Пресу́щное Сло́во, существо́ прие́м от чи́стых крове́й Твои́х,/ богосоде́ла нас и тле́ния изба́ви, Чи́стая,/ сего́ ра́ди, ве́рнии, Тя всегда́ сла́вим. Песнь 3 Ирмос: Несть свят,/ я́коже Ты, Го́споди Бо́же мой,/ вознесы́й рог ве́рных Твои́х, Бла́же,/ и утверди́вый нас на ка́мени/ испове́дания Твоего́. Припев: Святи́и му́ченицы, моли́те Бо́га о на́с. Бо́жия кни́ги лю́дем свяще́нно отверза́я/ и просвеща́я сердца́, во́ине Христо́в Тимофе́е,/ в честно́е муче́ние, ра́дуяся, вшел еси́. Припев: Святи́и му́ченицы, моли́те Бо́га о на́с. Боже́ственным жела́нием ду́шу распали́в, му́чениче,/ ко огню́ мук приступи́л еси́ терпели́вно,/ те́мже тя Христо́ва Боже́ственная роса́, блаже́нне, прохлади́. Сла́ва Отцу́ и Сы́ну и Свято́му Ду́ху. Ум твой, воззре́нием к Бо́гу просвеща́емь, му́чениче,/ не чу́яше отню́д желе́з лю́тых прикоснове́ния, разжже́нных быва́ющих,/ сла́вне Тимофе́е. И ны́не и при́сно и во ве́ки веко́в. Ами́нь. Богородичен: Сый естество́м безстра́стен/ Сын Твой, Де́во, прия́т плоть от крове́й Твои́х чи́стых/ и стра́стию кре́стною от страсте́й мя, Чи́стая, изба́ви. Седален, глас 1 Поче́тше Бо́га, омрачи́ша пре́лесть Тимофе́й му́дрый и сла́вная Ма́вра/ и, вся́ко претерпе́вше, прехва́льнии, му́чение,/ просвети́шася па́че луч со́лнечных/ и бы́ша сослужи́тели А́нгелом,/ и́хже ве́рою сла́вим. Песнь 4 Ирмос: Христо́с моя́ си́ла,/ Бог и Госпо́дь,/ Честна́я Це́рковь/ боголе́пно пое́т, взыва́ющи,/ от смы́сла чи́ста о Го́споде пра́зднующи. Припев: Святи́и му́ченицы, моли́те Бо́га о на́с. Вели́каго благосла́вия возжеле́вше, сподо́бистеся сего́,/ ча́да Све́та Боже́ственнаго бы́вше,/ великому́ченицы Христо́вы, А́нгелом равностоя́тели. Припев: Святи́и му́ченицы, моли́те Бо́га о на́с. Святы́х чино́м сочета́вся и благопослушли́ве у́ши к Боже́ственным зако́ном име́я, сла́вне,/ проверте́ния кре́пко претерпе́л еси́, Тимофе́е. Припев: Святи́и му́ченицы, моли́те Бо́га о на́с. Воздви́гше тя на дре́во, суему́дреннии/ отягчава́ют ка́мением главу́, сла́вне Тимофе́е,/ но укрепля́ше тя Христо́с, Боже́ственною стра́стию украша́ема. Сла́ва Отцу́ и Сы́ну и Свято́му Ду́ху. Теку́щих непостоя́ннаго, блаже́ннии, возгнуша́стеся вои́стинну тече́ния/ и са́ми себе́ боле́знем отда́сте,/ сего́ ра́ди я́же от ве́ка блага́я восприя́сте. И ны́не и при́сно и во ве́ки веко́в. Ами́нь. Богородичен: Чистоты́ селе́ние, жили́ще Влады́ки всех/ и проро́ков всех сбытие́, Богора́дованная Чи́стая,/ пою́щия Тя уще́дри. Песнь 5 Ирмос: Бо́жиим све́том Твои́м, Бла́же,/ у́тренюющих Ти ду́ши любо́вию озари́, молю́ся,/ Тя ве́дети, Сло́ве Бо́жий,/ и́стиннаго Бо́га,/ от мра́ка грехо́внаго взыва́юща. Припев: Святи́и му́ченицы, моли́те Бо́га о на́с. Супру́жника своего́, Ма́вро, светови́дных слове́с послу́ша любе́зно/ и, омраче́ние зло́е отве́ргши, свет была́ еси́ муче́нием, Богоблаже́нная. Припев: Святи́и му́ченицы, моли́те Бо́га о на́с. Боже́ственным Ду́хом себе́, Ма́вро, вооружи́вши, честна́я,/ к боре́нию льсти́ваго, ра́дуяся, изошла́ еси́/ и, сего́ побе́ждши, побе́дныя венцы́, му́ченице, прия́ла еси́. Сла́ва Отцу́ и Сы́ну и Свято́му Ду́ху. Еди́наго Тя, Го́спода Иису́са, испове́давши честна́я,/ руко́ю челове́ка созда́вшаго,/ посека́ется перст ручны́х,/ непра́ведное томле́ние му́жески терпя́щи. И ны́не и при́сно и во ве́ки веко́в. Ами́нь. Богородичен: Бу́рю помышле́ний, воста́ния страсте́й,/ напа́стей волне́ние утиши́, Де́во Богора́дованная,/ и спаси́ мя, пою́ща вели́чия Твоя́. Песнь 6 Ирмос: Жите́йское мо́ре,/ воздвиза́емое зря напа́стей бу́рею,/ к ти́хому приста́нищу Твоему́ прите́к, вопию́ Ти:/ возведи́ от тли живо́т мой,/ Многоми́лостиве. Припев: Святи́и му́ченицы, моли́те Бо́га о на́с. Святи́и му́ченицы, я́дрилом16 Креста́ духо́вно окриля́еми,/ напа́стей пучи́ну без вре́да ве́рою претеко́сте/ и в Боже́ственных приста́нищах почи́ша. Припев: Святи́и му́ченицы, моли́те Бо́га о на́с. Разже́гше коно́б, в той тя, Христа́ испове́дающу, вверго́ша злочести́вии,/ но пребыла́ еси́ неврежде́на,/ росо́ю Ду́ха обре́тше тя, Ма́вро, прохлажде́ну. Сла́ва Отцу́ и Сы́ну и Свято́му Ду́ху. Связа́еми му́ченицы вся вяза́ния вра́жия му́жески разреши́сте/ и любо́вию до конца́ Христу́ ду́ши привяза́сте/ пло́ти отложе́нием всеприснопа́мятнии. И ны́не и при́сно и во ве́ки веко́в. Ами́нь. Богородичен: Всеблага́я Влады́чице, Я́же Преблага́го Бо́га пло́тию ро́ждши,/ озло́бленное страстьми́ мое́ се́рдце ублажи́,/ да ве́рою и любо́вию велича́ю Тя. Кондак, глас 4 Многообра́зныя я́звы претерпе́вше/ и венцы́ от Бо́га прие́мше,/ о нас моли́теся ко Го́споду,/ па́мять всесвяще́нную ва́шу соверша́ющих,/ превели́кий Тимофе́е и пресла́вная Ма́вро,/ е́же умири́ти град и лю́ди,/ Той бо есть ве́рных утвержде́ние. Песнь 7 Ирмос: Росода́тельну у́бо пещь/ соде́ла А́нгел/ преподо́бным отроко́м,/ халде́и же опаля́ющее веле́ние Бо́жие/ мучи́теля увеща́ вопи́ти:/ благослове́н еси́, Бо́же оте́ц на́ших. Припев: Святи́и му́ченицы, моли́те Бо́га о на́с. Не чу́яше, свеща́ми, пресла́вная, опаля́ема всю́ду,/ огнь в се́рдцы любве́ нося́щи Христо́в/ и Сему́ вопию́щи приле́жно:/ благослове́н еси́, Бо́же оте́ц на́ших. Припев: Святи́и му́ченицы, моли́те Бо́га о на́с. Дрема́ние от о́чию отри́нул зло́бное, о Тимофе́е,/ претерпе́л еси́ о́чию ослепле́ние, Христа́ серде́чныма очи́ма зря и поя́:/ благослове́н еси́, Бо́же оте́ц на́ших. Сла́ва Отцу́ и Сы́ну и Свято́му Ду́ху. До́льняя презре́вше, Боже́ственнии му́ченицы, Вы́шнее же жили́ще насле́доваша,/ свяще́нными да почту́тся пе́сньми, пою́ще непреста́нно с ни́ми:/ благослове́н еси́, Бо́же оте́ц на́ших. И ны́не и при́сно и во ве́ки веко́в. Ами́нь. Богородичен: Препе́тая Де́во, препе́таго Бо́га поро́ждшая,/ пою́щия Тя прича́стники покажи́ све́та/ и избави́ гее́нны, и огня́,/ и вся́каго вре́да вра́жия моли́твами Твои́ми. Песнь 8 Ирмос: Из пла́мене преподо́бным ро́су источи́л еси́/ и пра́веднаго же́ртву водо́ю попали́л еси́:/ вся бо твори́ши, Христе́, то́кмо е́же хоте́ти./ Тя превозно́сим во вся ве́ки. Припев: Святи́и му́ченицы, моли́те Бо́га о на́с. Соблюда́юще зако́ны Вседержи́теля, беззако́ннующих держа́ве не приклони́стеся,/ че́сти лука́вым де́моном не принесо́сте, му́ченицы до́блии,/ Госпо́дни насле́дницы. Припев: Святи́и му́ченицы, моли́те Бо́га о на́с. Сопряже́нием изря́дным я́ве совокупля́еми,/ и́го Госпо́дне ле́гкое взя́сте ку́пно на вы́ю му́ченицы/ и му́ченическим сопричто́стеся стадо́м. Припев: Святи́и му́ченицы, моли́те Бо́га о на́с. На дре́ве пострада́вше кре́стнем, прехва́льнии на мно́ги дни,/ изобрази́сте страсть честну́ю нас ра́ди пострада́вшаго во́лею,/ Его́же превозно́сим во вся ве́ки. Сла́ва Отцу́ и Сы́ну и Свято́му Ду́ху. Ну́жднейшую вои́стинну смерть, святи́и, просте́ртием боле́зни претерпе́сте,/ те́мже к неболе́зненней жи́зни преста́вистеся,/ воспева́юще Христа́ во вся ве́ки. И ны́не и при́сно и во ве́ки веко́в. Ами́нь. Богородичен: Украси́лася еси́, Де́во, поро́ждши прекра́снаго добро́тою Христа́ Го́спода,/ Боже́ственными ве́рныя заря́ми просвеща́ющаго,/ Его́же превозно́сим во вся ве́ки. Песнь 9 Ирмос: Бо́га челове́ком невозмо́жно ви́дети,/ на Него́же не сме́ют чи́ни А́нгельстии взира́ти,/ Тобо́ю же, Всечи́стая, яви́ся челове́ком/ Сло́во воплоще́нно,/ Его́же велича́юще,/ с Небе́сными во́и/ Тя ублажа́ем. Припев: Святи́и му́ченицы, моли́те Бо́га о на́с. Ви́дети сла́ву сподо́бистеся Себе́ излия́вшаго за милосе́рдие, прехва́льнии,/ Того́ бо зако́ны сохрани́сте и о́бщницы Сего́ страсте́й бы́сте./ Те́мже, соше́дшеся, благоче́стно вас почита́ем. Припев: Святи́и му́ченицы, моли́те Бо́га о на́с. Часо́м равночи́сленну ме́ру сотвори́сте, му́дрии,/ но́щи и дни пригвожде́ни е́же за милосе́рдие ко Кресту́ прибли́жшагося,/ Его́же испове́дающе, все́ми влады́чествующаго, в ру́це Сего́ ва́ша ду́хи преда́сте. Припев: Святи́и му́ченицы, моли́те Бо́га о на́с. Во́инство А́нгел, лик блаже́нный проро́к,/ апо́стол, му́ченик и преподо́бных во исхо́д ваш собра́шася,/ всех же Влады́ка венцы́ увязе́, му́ченицы, вас побе́дными, я́ко Преблаги́й. Сла́ва Отцу́ и Сы́ну и Свято́му Ду́ху. Нам, любо́вию вас почита́ющим и честно́е ва́ше соверша́ющим торжество́,/ страда́льцы Христо́вы до́блии,/ разреше́ние грехо́в, жития́ исправле́ние/ и всех лю́тых премене́ние, му́дрии, испроси́те. И ны́не и при́сно и во ве́ки веко́в. Ами́нь. Богородичен: Све́том Твои́м мя, Богора́дованная, в жена́х Де́во, просвети́, молю́ся,/ и огня́ ве́чнаго мя изба́ви,/ я́ко да велича́ю Тя, я́ко да сла́влю Тя,/ я́ко да по до́лгу воспою́ вели́чия Твоя́.

Минея, 9 Марта, Канон мучеников Глас 2 Песнь 1 Ирмос: Гряди́те, лю́дие,/ пои́м пе́снь Христу́ Бо́гу,/ разде́льшему мо́ре и наста́вльшему лю́ди,/ я́же изведе́ из рабо́ты еги́петския,/ я́ко просла́вися. Припев: Святи́и му́ченицы, моли́те Бо́га о нас. Боговенча́нный полк пою́ му́чеников Христо́вых, Богодухнове́нными пе́сньми, четы́редесяти,/ ле́тнюю па́мять све́тло торжеству́яй,/ я́ко просла́вися. Припев: Святи́и му́ченицы, моли́те Бо́га о нас. На земли́ всего́ отве́ргшеся именова́ния,/ изво́лиша четы́редесяте христоиме́нное зва́ние,/ и́мже ны́не в Вы́шних живу́т. Сла́ва Отцу́ и Сы́ну и Свято́му Ду́ху. Су́щии во Христе́, пло́ть и мир возненави́девше,/ ве́тхаго у́бо челове́ка совлеко́стеся со привре́менною оде́ждею,/ во оде́жду же нетле́ния облеко́стеся. И ны́не и при́сно и во ве́ки веко́в. Ами́нь. Богородичен: Кто изрещи́ Твое́ по досто́инству возмо́жет па́че сло́ва зача́тие?/ Бо́га бо родила́ еси́ пло́тию, Пречи́стая,/ нам я́вльшагося, Спа́са всех нас. Песнь 3 Ирмос: Утверди́ нас в Тебе́, Го́споди,/ Дре́вом умерщвле́й грех,/ и страх Твой всади́/ в сердца́ нас, пою́щих Тя. Припев: Святи́и му́ченицы, моли́те Бо́га о нас. Во́инство, и жи́знь, и красоту́ теле́с,/ и бога́тство пренебре́гше,/ благосла́внии четы́редесять Христа́ вме́сто всех насле́доваша. Припев: Святи́и му́ченицы, моли́те Бо́га о нас. Ка́мением неща́дно четы́редесяте повеле́нием бие́ми мучи́телевым,/ мета́ния Бо́жиим Ду́хом на повелева́ющий возвраща́хуся. Сла́ва Отцу́ и Сы́ну и Свято́му Ду́ху. Глаго́лаше на самаго́, мучи́телевыми устна́ми змий созда́вшего хулу́,/ но того́ богобо́рная уста́ на му́ченики ка́меньми сокруша́ются. И ны́не и при́сно и во ве́ки веко́в. Ами́нь. Богородичен: Без се́мене во утро́бе Бо́га зачала́ еси́/ и ро́ждши несказа́нно вопло́щшася,/ на Него́же зре́ти не сме́ют, Чи́стая, Небе́сныя си́лы, Присноде́во. Седален, глас 8 Христу́ вво́инившеся му́ченически,/ врага́ низложи́вше страда́льчески,/ де́лы испо́лнисте проро́ка глаго́лы:/ сквозе́ бо о́гнь и во́ду му́жески проидо́сте,/ поко́й обре́тше, жи́знь нетле́нную./ Те́мже Небе́сными укра́шшеся венцы́,/ с ли́ки весели́теся безпло́тных, блаже́ннии страстоте́рпцы прехва́льнии,/ моли́те Христа́ Бо́га грехо́в оставле́ние дарова́ти/ чту́щим любо́вию святу́ю па́мять ва́шу. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: В напа́сти многоплете́нныя впад от враг ви́димых и неви́димых,/ бу́рею одержи́м безчи́сленных согреше́ний мои́х,/ и я́ко к те́плому заступле́нию и покро́ву моему́, Чи́стая,/ ко приста́нищу притека́ю Твоея́ бла́гости./ Те́мже, Пречи́стая, из Тебе́ Воплоще́нному безсе́менно/ моли́ся приле́жно о всех рабе́х Твои́х,/ непреста́нно моля́щих Ти ся, Богоро́дице Пречи́стая,/ моля́щи Его́ при́сно согреше́ний оставле́ние дарова́ти/ воспева́ющим досто́йно сла́ву Твою́. Песнь 4 Ирмос: Услы́шах, Го́споди,/ слух Твоего́ смотре́ния/ и просла́вих Тя,/ Еди́не Человеколю́бче. Припев: Святи́и му́ченицы, моли́те Бо́га о нас. Умовре́дуете, – глаго́лаху страда́льцы, –/ стра́нную тщету́ всу́е простира́юще, пребезбо́жнейшии. Припев: Святи́и му́ченицы, моли́те Бо́га о нас. Изощре́ны мечи́, и зве́ри, и о́гнь, и крест святы́м/ Христо́вы гони́тели простира́ху. Припев: Святи́и му́ченицы, моли́те Бо́га о нас. Стра́шен нам, – глаго́лаху страда́льцы,– о́гнь гее́нский,/ ны́нешняго же, я́ко клевре́та, не убои́мся. Сла́ва Отцу́ и Сы́ну и Свято́му Ду́ху. Да отъя́ты бу́дут руки́, сожже́на же бу́ди нога́,–/ святи́и вопия́ху, – нетле́нны бо сия́ па́ки прии́мем. И ны́не и при́сно и во ве́ки веко́в. Ами́нь. Богородичен: Мо́лим Тя, Пречи́стая, Бо́га безсе́менно заче́ншую,/ при́сно моли́тися за рабы́ Твоя́. Песнь 5 Ирмос: Све́та Пода́телю и веко́в Тво́рче, Го́споди,/ во све́те Твои́х повеле́ний наста́ви нас:/ ра́зве бо Тебе́, ино́го бо́га не зна́ем. Припев: Святи́и му́ченицы, моли́те Бо́га о нас. Неи́стовством пребезу́мным гони́телей/ страда́льцы под возду́хом на сту́дени обноществова́ти осуди́вшеся,/ воспева́ху пе́ние Бо́гу благода́рственное. Припев: Святи́и му́ченицы, моли́те Бо́га о нас. Ра́дующеся четы́редесяте Христо́вы му́ченицы,/ боле́зненный претерпе́вше лед, во е́зере стоя́ще,/ наде́ждею Боже́ственных венце́в укрепля́еми. Сла́ва Отцу́ и Сы́ну и Свято́му Ду́ху. Смех предлага́ется четы́редесятем Христо́вым му́чеником,/ уда́влен быв пре́жде гнездя́щийся в вода́х змий,/ пагуборо́дныя бо кре́пости лиши́ся. И ны́не и при́сно и во ве́ки веко́в. Ами́нь. Богородичен: Тебе́, ро́ждшей Христа́, всех Зижди́теля, зове́м:/ ра́дуйся, Чи́стая, ра́дуйся, возсия́вшая Свет нам,/ ра́дуйся, вме́щшая Бо́га Невмести́маго. Песнь 6 Ирмос: В бе́здне грехо́вней валя́яся,/ неизсле́дную милосе́рдия Твоего́ призыва́ю бе́здну:/ от тли, Бо́же, мя возведи́. Припев: Святи́и му́ченицы, моли́те Бо́га о нас. Ра́достне началозло́бный восхити́, я́ко от двоюна́десяти Иу́ду окая́ннаго,/ и от Еде́ма челове́ка, от четы́редесяти отпа́дшаго. Припев: Святи́и му́ченицы, моли́те Бо́га о нас. Безсту́ден сый, всу́е шата́яся,/ я́коже бо разбо́йником и Матфи́ем пе́рвее,/ та́ко и ны́не мучи́тель стрегу́щаго зва́нием осуди́ся. Сла́ва Отцу́ и Сы́ну и Свято́му Ду́ху. Суему́дренный и рыда́ния досто́ин, и́же живото́в обои́х погреши́,/ огне́м бо раста́яся и ко огню́ оты́де негаси́мому. И ны́не и при́сно и во ве́ки веко́в. Ами́нь. Богородичен: Неискусому́жно, Де́во, родила́ еси́/ и ве́чнуеши Де́ва, явля́ющи и́стиннаго Божества́,/ Сы́на и Бо́га Твоего́, о́бразы. Кондак, глас 6 Все во́инство ми́ра оста́вльше,/ на Небесе́х Влады́це прилепи́стеся,/ страстоте́рпцы Госпо́дни четы́редесять,/ сквозе́ о́гнь бо и во́ду проше́дше, блаже́ннии,/ досто́йно восприя́сте сла́ву с Небе́с/ и венце́в мно́жество. Икос На престо́ле непристу́пнем седя́щему,/ просте́ршему Не́бо, я́ко ко́жу,/ и зе́млю утверди́вшему,/ и собра́вшему во́ды в со́нмы их,/ вся от не су́щих сотво́ршему бы́ти/ и всем подаю́щу дыха́ние и живо́т,/ прие́млющему от Арха́нгел пе́ние, и от А́нгел покланя́емому,/ и от всех сла́вимому, Христу́ Вседержи́телю,/ Зижди́телю и Бо́гу на́шему, припа́даю, недосто́йный,/ принося́ мое́ моле́ние, сло́ва благода́ти прошу́:/ да возмогу́ благоче́стно воспе́ти и аз святы́я,/ я́же Сам показа́в победи́тели,/ дарова́в им сла́ву с Небе́с и венце́в мно́жество. Песнь 7 Ирмос: О́бразу злато́му, на по́ле Деи́ре служи́му,/ трие́ Твои́ о́троцы небрего́ша безбо́жнаго веле́ния,/ посреде́ же огня́ вве́ржени, ороша́еми, поя́ху:/ благослове́н еси́, Бо́же оте́ц на́ших. Припев: Святи́и му́ченицы, моли́те Бо́га о нас. Ужасе́ся, зря венцы́, страж четы́редесяти,/ и, отри́нув любожи́зненное, впери́ся раче́нием явле́нныя Твоея́ сла́вы,/ и с му́ченики поя́ше:/ благослове́н еси́, Бо́же оте́ц на́ших. Припев: Святи́и му́ченицы, моли́те Бо́га о нас. В ба́ню прите́к душетле́нну, умерщвля́ется жизнолю́бный;/ христолю́бец же, хи́щник изря́днейший ви́денных быв,/ я́коже в ба́ни нетле́ния с му́ченики поя́ше:/ благослове́н еси́, Бо́же оте́ц на́ших. Припев: Святи́и му́ченицы, моли́те Бо́га о нас. Огню́ мы́сленному, возжже́ну во уме́х четы́редесяти,/ многоко́зненное нече́ствующих попаля́шеся безу́мие,/ я́коже не́кий воск та́емь./ Тебе́ же, Христе́, воспева́ху:/ благослове́н еси́, Бо́же оте́ц на́ших. Сла́ва Отцу́ и Сы́ну и Свято́му Ду́ху. Я́ко зело́ светла́, благоле́пна же, Христе́, Креста́ Твоего́ си́ла,/ проти́вными венцы́ плету́щи четы́редесятим му́чеником./ Во́ду бо и о́гнь проше́дше, в нетле́нии зову́т:/ благослове́н еси́, Бо́же оте́ц на́ших. И ны́не и при́сно и во ве́ки веко́в. Ами́нь. Богородичен: Тя купину́ Моисе́й в горе́ Сина́йстей огнепали́мую, Чи́стая, предзря́ше,/ поне́сшую неопа́льно нестерпи́мую зарю́ неизрече́ннаго Существа́,/ соедини́вшагося дебельству́ пло́ти,/ еди́ныя в ней святы́х Ипоста́сей. Песнь 8 Ирмос: В пе́щь о́гненную ко отроко́м евре́йским снизше́дшаго/ и пла́мень в ро́су прело́жшаго Бо́га,/ по́йте, дела́, я́ко Го́спода,/ и превозноси́те во вся ве́ки. Припев: Святи́и му́ченицы, моли́те Бо́га о нас. Неи́стовно страда́льцем поусти́в враг вся́ко зда́ние, все́ми постыде́ся,/ четы́редесять бо непреста́нно пою́т Го́спода/ и превозно́сят во вся ве́ки. Припев: Святи́и му́ченицы, моли́те Бо́га о нас. Неми́лостивно за Христа́ теле́с ва́ших у́ды сокру́шшеся,/ всесожже́ние Боже́ственно принесо́стеся Бо́гу,/ со А́нгелы при́сно лику́ете, му́ченицы, пою́ще Христа́ во ве́ки вся. Припев: Святи́и му́ченицы, моли́те Бо́га о нас. Кре́постию смы́сла, его́же ро́ди, на ра́мена взе́мши, христолюби́вая ма́ти,/ благоче́стия плод прино́сит, с му́ченики му́ченика,/ священноде́йству Авраа́мову подо́бящися. Сла́ва Отцу́ и Сы́ну и Свято́му Ду́ху. К непреста́нней жи́зни правоте́чно, о сы́не, твори́ ше́ствие, –/ христолюби́вая ма́ти христолюби́вому де́тищу вопия́ше, –/ не терплю́ тебе́ второ́е, Подвигополо́жнику Христу́ яви́тися. И ны́не и при́сно и во ве́ки веко́в. Ами́нь. Богородичен: И́же в не́дрех О́тчих/ неразде́льно же Сы́на седя́щаго, в веще́ственнем чре́ве Твое́м все́льшася, Чи́стая,/ пое́м, Де́во Богоневе́сто, и превозно́сим во вся ве́ки. Песнь 9 Ирмос: От Бо́га Бо́га Сло́ва,/ неизрече́нною му́дростию прише́дшаго обнови́ти Ада́ма,/ я́дию в тле́ние па́дшаго лю́те,/ от святы́я Де́вы неизрече́нно воплоти́вшагося нас ра́ди,/ ве́рнии, единому́дренно пе́сньми велича́ем. Припев: Святи́и му́ченицы, моли́те Бо́га о нас. За Христа́ обнажи́вшеся и ка́мением бие́ни бы́вше,/ возду́шную претерпе́сте зи́мность,/ водны́й лед и сокруше́ние уде́с и, огне́м опа́льшеся,/ в ре́чней сия́ете быстрине́ издале́ча,/ я́коже свети́ла, му́ченицы четы́редесяте. Припев: Святи́и му́ченицы, моли́те Бо́га о нас. Жезл си́лы Боже́ственныя, крест стяжа́вше,/ вопия́ху Христу́ страда́льцы четы́редесяте:/ Влады́ко Всеси́льный Победи́телю, руко́ю Твое́ю да венча́емся,/ да вси Тя пе́сньми непреста́нно велича́ем. Припев: Святи́и му́ченицы, моли́те Бо́га о нас. Я́ко боле́знен у́бо лед, я́коже зело́ безме́рна лю́тость,/ ю́же претерпе́сте, мра́за, но сла́док рай,/ Авраа́мова бо не́дра патриа́рха гре́ют вас в се́лех ве́чных, му́ченицы четы́редесяте. Сла́ва Отцу́ и Сы́ну и Свято́му Ду́ху. Победи́вше страда́ньми и венцы́ прии́мше от Боже́ственныя Влады́чни десни́цы,/ ны́не дарова́ти моли́теся мир ми́ру и нам спасе́ние, му́ченицы четы́редесяте. И ны́не и при́сно и во ве́ки веко́в. Ами́нь. Богородичен: Неве́сто Ма́ти Де́во,/ А́нгельская мно́жества Твоего́ мо́лят Сы́на,/ приими́ моле́ние на́ше, еди́на наде́жде ве́рных,/ и мир ми́ру и нам спасе́ние, Тебе́ лю́бящим, да́руй. Светилен Десяти́цу четверочи́сленную, победоно́сный полк,/ во́инство святы́х му́ченик воспои́м досто́йно,/ огне́м бо, и сту́дению, и водо́ю посрами́ша вражде́бных полки́/ и от Христа́ Спа́са венцы́ прия́ша сла́вы. Сла́ва Отцу́ и Сы́ну и Свято́му Ду́ху. Лик четверодесяточи́сленный му́чеников четы́редесяти,/ Пребоже́ственныя Тро́ицы доброде́телей четвери́чных,/ огня́, возду́ха, во́ды и земли́, стихи́й четы́рех,/ пе́сньми Боже́ственными да воспое́тся,/ я́ко за Христа́ пострада́вший, всех Влады́це. И ны́не и при́сно и во ве́ки веко́в. Ами́нь. Богородичен: Влады́ку всея́ тва́ри ро́ждши, Ма́ти Де́во,/ и вся́ческих, я́ко су́щи Отрокови́ца,/ о Влады́чице Богоро́дице, страсте́й мучи́тельствующих мя исхити́/ и проводи́ к милосе́рдия осия́нию/ и к прекра́сной па́сце воскре́сшего Сы́на Твоего́.

Минея, 12 Сентября, Кано́н пра́веднаго Глас 3 Песнь 1 Ирмос: Во́ды дре́вле ма́нием Боже́ственным/ во еди́но со́нмище Совокупи́вый/ и раздели́вый мо́ре изра́ильтеским лю́дем,/ Сей Бог наш препросла́влен есть,// Тому́ Еди́ному пои́м, я́ко просла́вися. Припев: Святы́й пра́ведный Симео́не, моли́ Бо́га о на́с. Омраче́нный грехми́, недоуме́ю, ка́ко по достоя́нию восхвали́ти тя, свя́те Симео́не,/ сия́юща по благода́ти Христо́вой по́двиг и чуде́с твои́х светлостьми́./ Ты ми, благосе́рде, помози́, возсиява́я в души́ мое́й свет, и́мже осиява́ешися,/ я́ко да поне́ ели́ко воспою́ в похвале́ние твое́ я́вльшаяся на тебе́ чу́дная дела́ Госпо́дня,/ воззыва́юща всех, пра́зднующих па́мять твою́, пе́ти Влады́це Христу́:/ Сей Бог наш, ди́вный и сла́вимый во святы́х Свои́х,/ препросла́влен есть, Тому́ Еди́ному пои́м, я́ко просла́вися. Припев: Святы́й пра́ведный Симео́не, моли́ Бо́га о на́с. Благоче́стия любо́вию и спасе́ния объя́т быв, избега́яй того́ ра́ди треволне́ний жите́йских,/ удали́лся еси́, блаже́нне Симео́не, от ро́да твоего́/ и ма́нием Боже́ственным изведе́н был еси́ в малонаселе́нную иногда́ страну́ Сиби́рскую,/ иде́же пресе́льник быв земли́ оте́ческия, подо́бник яви́лся еси́ пра́отцу Авраа́му,/ и стяжа́в нрав его́, в хи́жинах у́бо убо́гих вита́яй,/ я́коже он в ку́щах./ Ду́шу же впери́в к Небеси́, в го́рний Сио́н доброде́телей стезе́ю ходи́л еси́, веду́щею на Не́бо,/ всю жизнь твою́, во сла́ву Христа́, Спа́са всех, ти споспе́шествующа./ Ему́же вся сия́ науча́ют нас ра́достно днесь зва́ти:/ Сей Бог наш препросла́влен есть, Тому́ Еди́ному пои́м, я́ко просла́вися. Припев: Святы́й пра́ведный Симео́не, моли́ Бо́га о на́с. По рожде́нию твоему́, блаже́нне, быв о́трасль благонарочи́тых люде́й и сла́вных в наро́де свое́м,/ егда́ ма́нием Боже́ственным Сиби́ри доше́л еси́,/ а́бие отгна́л еси́ от себе́ самомне́ния пре́лесть,/ и смире́нию подклони́л еси́ вы́ю, себе́ вменя́яй после́днейша от всех,/ та́же труды́ мно́гими те́ло твое́ удручи́л еси́, и укроти́л свире́пое страсте́й мо́ре воздержа́нием,/ и та́ко возше́л еси́ на высоту́ доброде́телей, укрепля́ющу тя Христу́, прославля́емому твои́ми благи́ми де́лы./ Ему́же велегла́сно того́ ра́ди вопие́м: Сей Бог наш препросла́влен есть,/ Тому́ Еди́ному пои́м, я́ко просла́вися. Припев: Святы́й пра́ведный Симео́не, моли́ Бо́га о на́с. В нищете́ пожи́л еси́ в Сиби́рстей стране́, блаже́нне Симео́не,/ и, я́ко от ко́рене благопло́дна плод благоцвету́щ, доброде́тельми обогати́лся еси́./ Те́мже вельми́ украси́вша тя боже́ственными добро́тами, толи́ко нам вожделе́нными,/ и си́ми просла́вленна Влады́ку Христа́ пе́сньми славосло́вим, зову́ще:/ Сей Бог наш препросла́влен есть, Тому́ Еди́ному пои́м, я́ко просла́вися. Сла́ва Отцу́ и Сы́ну и Свято́му Ду́ху. Столп доброде́телей непрело́жен и благоче́стия жили́ще был еси́, блаже́нне,/ име́яй основа́ние у́бо тве́рдое, Правосла́вную ве́ру,/ посо́бие же непобеди́мо, соде́йствующую ти си́лу Христо́ву./ И ны́не, име́яй дерзнове́ние ко Христу́, Спаса́телю всех,/ моли́ Его́ дарова́ти к прославле́нию и́мени Его́/ всем нам утвержде́ние си́лою Его́ в сей толи́ко спаса́тельней ве́ре,/ я́ко да вси еди́ными усты́ согла́сно зове́м Ему́:/ Сей Бог наш препросла́влен есть, Тому́ Еди́ному пои́м, я́ко просла́вися. И ны́не и при́сно и во ве́ки веко́в. Ами́нь. Богородичен: Преблагослове́нна еси́, Богоро́дице Де́во, я́ко родила́ еси́ Христа́, Спа́са на́шего,/ Его́же славосло́вим, я́ко Единоро́днаго от Отца́,/ испо́лнь благода́ти и и́стины, и Ему́же вы́ну взыва́ем:/ Сей Бог наш препросла́влен есть, Тому́ Еди́ному пои́м, я́ко просла́вися. Песнь 3 Ирмос: Непло́дная душе́ и безча́дная,/ стяжи́ плод благосла́вный,/ веселя́щися возопи́й:/ утверди́хся Тобо́ю, Бо́же,/ несть свят и несть пра́веден// па́че Тебе́, Го́споди. Припев: Святы́й пра́ведный Симео́не, моли́ Бо́га о на́с. Правосла́вною ве́рою утверди́вся, блаже́нне Симео́не,/ стяжа́л еси́ благосла́вный плод ея́, обогати́вый тя доброде́тельми,/ оба́че николи́же велему́дрствовал еси́ о себе́/ и не дал еси́ человекоуби́йце искони́ обуя́ти тя тщесла́вием./ Но вы́ну води́лся еси́ смиренному́дрием, я́ко ви́дети тя при́сно всем/ а́ки бы усво́ивша себе́ песнь еди́наго от богому́дрых:/ утверди́хся Тобо́ю, Бо́же, несть свят и несть пра́веден па́че Тебе́, Го́споди. Припев: Святы́й пра́ведный Симео́не, моли́ Бо́га о на́с. С нището́ю теле́сною соедини́в нищету́ духо́вную, я́ко ко́рень всех благи́х,/ молчали́во и благоче́стно твою́ жизнь соверши́л еси́, блаже́нне Симео́не,/ и яви́л еси́ в себе́ плод благосла́вный Правосла́вныя ве́ры,/ предукрепи́в пе́рвее те́ло твое́ посто́м неосла́бным,/ та́же ду́шу твою́ храм Бо́жий пресвя́т соде́лав, боже́ственным хра́мом приседя́,/ внегда́ пе́тися та́мо свяще́нным песнопе́нием, всем иму́щим еди́н сей ра́зум:/ несть свят и несть пра́веден па́че Тебе́, Го́споди. Припев: Святы́й пра́ведный Симео́не, моли́ Бо́га о на́с. Сугу́бо благоро́ден был еси́, блаже́нне Симео́не, и ро́дом, и нра́вы:/ души́ бо твоей благоро́дие благоро́дия свы́ше добро́тами уясни́л еси́,/ Правосла́вия све́том блиста́я, и по́стничеством, и целому́дрием, и смире́нием, и терпе́нием, и му́жеством на го́рдаго зми́я,/ его́же си́ми низложи́л еси́, соде́йствующу ти Христу́,/ и та́ко дости́гл еси́ блаже́нных селе́ний святы́х,/ и́хже во усте́х коего́ждо вы́ну бысть песнь Це́ркве:/ утверди́хся Тобо́ю, Бо́же,/ несть свят и несть пра́веден па́че Тебе́, Го́споди. Сла́ва Отцу́ и Сы́ну и Свято́му Ду́ху. Дре́во благосенноли́ственное, насажде́нное при исхо́дищих вод,/ е́же дае́т плоды́ во вре́мя свое́, был еси́, блаже́нне Симео́не./ Ты бо, измла́да напое́н быв вода́ми благоче́стия,/ израсти́л еси́ доброде́телей плоды́, благоприя́тны Бо́гу,/ дарова́вшему ти за та́я живо́т ве́чный,/ его́же и нас сподо́би моли́твами твои́ми ко Го́споду,/ я́ко да и в гряду́щем ве́це, я́коже днесь, воспева́ем Ему́:/ несть свят и несть пра́веден па́че Тебе́, Го́споди. И ны́не и при́сно и во ве́ки веко́в. Ами́нь. Богородичен: Те́рние и волчцы́ грехо́в непло́дны содева́ют ду́ши на́ша,/ милосе́рдая Ма́ти Христа́ Бо́га на́шего,/ моли́ с пра́ведным Симео́ном Сы́на Твоего́ сотвори́ти ни́ву душ на́ших,/ во е́же приноси́ти ей плод благосла́вный и́стинныя ве́ры,/ несумне́нныя наде́жды и нелицеме́рныя любве́,/ я́ко да вы́ну воспева́ем Ро́ждшемуся от Тебе́:/ утверди́хомся Тобо́ю, Бо́же,/ несть свят и несть пра́веден па́че Тебе́, Го́споди. Седален, глас 4 Храм Бо́гу хотя́ яви́ти се́рдце твое́, блаже́нне Симео́не,/ изво́лил еси́ неле́ностно присеща́ти хра́мы Госпо́дни в часы́ песнопе́ний./ Отону́дуже и прия́л еси́ свет благода́ти Свята́го Ду́ха/ и яви́лся еси́ звезда́ многосве́тлая, све́тлаго ра́ди жития́ твоего́/ и чистоты́ душе́вныя же и теле́сныя, озаря́яй ве́рных собра́ния./ Те́мже пра́зднующе па́мять твою́, ра́достно восхваля́ем тя, блаже́нне. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Храм Све́та Неизрече́ннаго была́ еси́, Всепе́тая Де́во,/ вме́щши во чре́ве Твое́м просвеща́юща и освеща́юща ми́ра концы́ Христа́ Бо́га на́шего./ И ны́не моли́твами Твои́ми с пра́ведным Симео́ном соде́лай прича́стники Того́ Све́та и нас,/ Богоро́дицу Тя вои́стину имену́ющих. Песнь 4 Ирмос: Положи́л еси́ к нам тве́рдую любо́вь, Го́споди,/ Единоро́днаго бо Твоего́ Сы́на/ за ны на смерть дал еси́./ Те́мже Ти зове́м, благодаря́ще:// сла́ва си́ле Твое́й, Го́споди. Припев: Святы́й пра́ведный Симео́не, моли́ Бо́га о на́с. Непосты́дно бысть твое́, блаже́нне, на си́лу и по́мощь Человеколю́бца Го́спода,/ преда́вша Сы́на Своего́ за ны на смерть, упова́ние,/ и́мже укре́пль ду́шу твою́, не ужа́слся еси́ вступи́ти в по́прище по́двиг твои́х./ Го́сподем бо помогаемь, пе́рвее удержа́л еси́ в посте́ чре́во твое́,/ та́же воздержа́ния росо́ю до́бльственне страсте́й пещь погаси́л еси́/ и, та́ко мра́ка их изба́влься, просия́л еси́ безстра́стия све́тлостию,/ се́ю же показа́л еси́ нам путь, веду́щий в жизнь и́стинную./ Те́мже, восхваля́юще тя, Го́споду, дарова́вшу ти си́лу и кре́пость, пое́м:/ сла́ва си́ле Твое́й, Го́споди. Припев: Святы́й пра́ведный Симео́не, моли́ Бо́га о на́с. Насажде́н быв при вода́х воздержа́ния, блаже́нне,/ лоза́ яви́лся еси́ благора́сленна, благоче́стия гро́здие предлага́ющая./ К сим же показа́лся еси́ всем и о́браз трудолю́бия,/ подо́бяся бо скинотво́рцу апо́столу,/ рука́ми свои́ми приобрета́вшему себе́ и су́щим с ним вся потре́бная к жи́зни вре́менней,/ упраждня́лся еси́ в шве́нии оде́жд други́м и в ловле́нии рыб на потре́бу к жи́зни,/ я́ко да не отяготи́ши коего́ ли́бо пропита́нием тебе́./ Те́мже укре́пльшу тя о сем Христу́ Бо́гу пое́м:/сла́ва си́ле Твое́й, Го́споди. Припев: Святы́й пра́ведный Симео́не, моли́ Бо́га о на́с. Тружда́яся в шве́нии оде́жд, блаже́нне, к смотре́нию мы́сленных твое́ худо́жество упра́вил еси́,/ помышля́я одея́ние души́ твоея́, в не́мже да вни́деши в черто́г Спа́сов./ Та́кожде у́дицею ры́бы ловя́й, вы́ну мысль к Бо́гу име́л еси́, блюды́й себе́,/ я́ко да не у́дицею греха́ уловле́н бу́деши от вселука́ваго врага́ спасе́ния на́шего./ И та́ко непрело́жен име́яй по́мысл благоче́стия,/ устро́ил еси́ жизнь твою́ по Бо́зе, Христу́ ти споспе́шествующу,/ Ему́же, све́дуще сия́, велегла́сно пое́м:/ сла́ва си́ле Твое́й, Го́споди. Сла́ва Отцу́ и Сы́ну и Свято́му Ду́ху. Тезоиме́нно услы́шанию, и́мже преднаре́клся еси́ в креще́нии, блаже́нне,/ поуча́яся свято́му послуша́нию, са́мым де́лом исполни́тель о́наго был еси́,/ нрав сообра́зный и́мени твоему́ стяжа́в./ Гото́в бо был еси́ всегда́ послужи́ти всем, тре́бовавшим твоея́, благосе́рде, по́мощи в житии́ твое́м,/ и служи́л еси́, ели́ко ти мо́щно бысть, со усе́рдием, уве́тлив ко всем весь явля́яся, и че́стен, и послушли́в./ Разуме́юще у́бо, я́ко и сие́ дарова́ние ти даде́ся от Христа́ Бо́га,/ пое́м Ему́:/ сла́ва си́ле Твое́й, Го́споди. И ны́не и при́сно и во ве́ки веко́в. Ами́нь. Богородичен: И́маши вся мощи́, е́же а́ще хо́щеши, всеблага́я Ма́ти Христа́ Бо́га на́шего,/ употребля́ющи Ма́тернее дерзнове́ние к Нему́./ Те́мже мо́лим Тя, моли́ с пра́ведным Симео́ном Сы́на Твоего́/ дарова́ти нам си́лу и кре́пость ше́ствовати неукло́нно путе́м доброде́телей,/ я́ко да благода́рно вы́ну зове́м Ти:/ сла́ва, Влады́чице, всемо́щней си́ле Твое́й. Песнь 5 Ирмос: На земли́, Неви́димый, яви́лся еси́/ и челове́ком во́лею сожи́л еси́, Непостижи́мый,/ и к Тебе́ у́тренююще,// воспева́ем Тя, Человеколю́бче. Припев: Святы́й пра́ведный Симео́не, моли́ Бо́га о на́с. Име́яй в се́рдцы свое́м о́браз восхи́щена до тре́тияго Небесе́ в рай апо́стола, ре́кша: мы юро́ди Христа́ ра́ди,/ ты, блаже́нне Симео́не, таково́е юро́дство во́лею восприя́л еси́ на ся,/ я́ко бо цветни́к благоуха́ннейший и доброде́телей рай одушевле́н,/ воздержа́нием процве́л еси́./ Оба́че хотя́ утаи́тися от челове́к, юро́д был еси́ ми́ру,/ сам ся неблагоро́ден сотво́рь, скудоу́мия притворе́нии,/ Христу́ же прему́др был еси́,/ соверша́я пресла́вная, безстра́стия дости́гл еси́ и́стиннаго./ Те́мже восхваля́юще тя, пе́сненно прославля́ем/ да́вшаго ти такову́ю му́дрость Христа́ Человеколю́бца. Припев: Святы́й пра́ведный Симео́не, моли́ Бо́га о на́с. Уму́ стра́сти твоя́ подчини́в, блаже́нне, духо́вную му́дрость стяжа́л еси́/ и, се́ю управля́емь, нищету́ возлюби́л еси́, и воздержа́ние, и чистоту́, и смиренному́дрие./ И та́ко, си́ле Христо́вой ти соде́йствующей, на высоту́ доброде́телей восте́кл еси́,/ и́миже зря тя Христо́с обогати́вшася, человеколю́бне призре́ на тя/ и сла́вы Ца́рства Небе́снаго показа́ тя прича́стника пресла́вна,/ Его́же моли́ и нас сподо́бити о́бщники бы́ти той,/ я́ко да во ве́ки воспева́ем Его́, Человеколю́бца. Припев: Святы́й пра́ведный Симео́не, моли́ Бо́га о на́с. Юро́дствуяй Христа́ ра́ди, блаже́нне,/ и та́ко би́сер многоце́нный доброде́телей в селе́ се́рдца твоего́ сокрове́нный име́вый,/ я́ко безпло́тен, на земли́ пожи́л еси́ и соде́лался еси́ уго́дник Христу́,/ Иже тя, в возме́здие того́, просла́ви нетле́нием и чудесы́ и поста́ви моли́твенника о лю́дех Свои́х./ Сего́ ра́ди, ублажа́юще тя, велича́ем просла́вльшаго тя, Го́спода Человеколю́бца. Сла́ва Отцу́ и Сы́ну и Свято́му Ду́ху. Ве́лию сотвори́л есть Госпо́дь ми́лость Свою́ с на́ми,/ дарова́в нам тебе́, блаже́нне, исто́чника чуде́с и моли́твенника о нас./ Те́мже ублажа́юще тя днесь в па́мяти твое́й,/ сла́вим Да́вшаго ти и нам такову́ю благода́ть, вопию́ще:/ к Тебе́ у́тренююще, Го́споди, воспева́ем Тя, Человеколю́бче. И ны́не и при́сно и во ве́ки веко́в. Ами́нь. Богородичен: Арха́нгельский глас вопие́м Ти, Чи́стая Присноде́во:/ ра́дуйся, Благода́тная,/ я́ко родила́ еси́ Спаси́теля ми́ру, Христа́ Человеколю́бца. Песнь 6 Ирмос: Глубина́ страсте́й воста́ на мя/ и бу́ря проти́вных ве́тров,/ но, предвари́в мя, Ты спаси́, Спа́се,/ и изба́ви от тли,// я́ко спасл еси́ от зве́ря проро́ка. Припев: Святы́й пра́ведный Симео́не, моли́ Бо́га о на́с. Воздержа́ния ветри́лом управля́емь в житии́ твое́м, блаже́нне,/ дости́гл еси́ в безстра́стия сла́вная приста́нища/ и та́ко спа́слся еси́ от тли душепа́губных страсте́й./ Госпо́дь же по преставле́нии твое́м изба́ви и те́ло твое́ от тли/ и яви́ е нетле́нно, а́ще и мно́га ле́та пребы́сть в не́дрех земны́х./ И ны́не моли́, благосе́рде, Го́спода,/ я́ко да спасе́т и нас от вся́кия тли,/ я́коже спасл есть тебе́ от тли и от зве́ря проро́ка. Припев: Святы́й пра́ведный Симео́не, моли́ Бо́га о на́с. Враг спасе́ния, искуша́яй нас на грехи́, сластьми́ пали́т,/ но коль сия́ па́губна суть, су́щи тля сме́ртная,/ тлят бо добро́ту души́ на́шея, тлят и здра́вие те́ла/ и к сим гото́вят нам огнь неугаса́ющий и червь неумира́ющий./ Блаже́нне Симео́не, предстоя́ с ли́ки А́нгелов и святы́х Бо́жиих челове́ков Престо́лу Влады́ки,/ моли́ Его́ с ни́ми, я́ко да изба́вит от губи́тельства сласте́й и спасе́т нас, вопию́щих Ему́:/ спаси́, Спа́се, и изба́ви от тли, я́ко спасл еси́ от зверя проро́ка. Припев: Святы́й пра́ведный Симео́не, моли́ Бо́га о на́с. Мно́го согреша́юще на вся́кий час и грехми́ при́сно растлева́емии, та́ко сля́чени есмы́,/ я́ко не мощи́ нам восклони́ти главы́ и воззре́ти когда́ к Небе́сней добро́те,/ и бу́рею проти́вных ве́тров та́ко уноси́ми дале́че от пути́ доброде́телей и от стези́ покая́ния,/ я́ко колеба́тися в нас упова́нию спасе́ния./ Ты же, блаже́нне, предстоя́ ны́не Всесвято́му, к Нему́же и бога́тное стяжа́л еси́ дерзнове́ние,/ моли́ изба́вити ны от тли грехо́вныя и бу́рю тех проти́вных ве́тров утоли́ти, вопию́щия:/ спаси́, Спа́се, и изба́ви от тли, я́ко спасл еси́ от зве́ря проро́ка. Сла́ва Отцу́ и Сы́ну и Свято́му Ду́ху. Блаже́н еси́, свя́те Симео́не, и добро́ тебе́ есть,/ поне́же Госпо́дь, зря тя пра́ведна, вчини́ с ли́ки святы́х во оби́телех Небе́сных,/ изба́вль та́ко гее́нны, су́щия тли ве́чныя./ Ея́же изба́витися и нам моли́ Христа́ Бо́га, пою́щим Ему́:/ спаси́, Спа́се, и изба́ви от тли, я́ко спасл еси́ от зве́ря проро́ка. И ны́не и при́сно и во ве́ки веко́в. Ами́нь. Богородичен: Пречи́стая Влады́чице, Цари́це Небе́сная,/ стра́хом тли ве́чныя сме́рти содержи́мии, мо́лим Ти ся,/ моли́ с пра́ведным Симео́ном Сы́на Твоего́, Христа́ Бо́га на́шего,/ я́ко да изба́вит нас тоя́, вопию́щих:/ спаси́, Спа́се, и изба́ви от тли, я́ко спасл еси́ от зве́ря проро́ка. Кондак, глас 4 Наста́ днесь всечестна́я па́мять новаго целе́бника,/ пра́веднаго Симео́на,/ созыва́ет же лю́ди в пречестны́й храм свята́го Бо́жия архиере́я Никола́я,/ иде́же, ра́достно соше́дшеся, благочести́вых мно́жества/ ве́село пра́зднуют пренесе́ния честны́х и многоцеле́бных моще́й твои́х пра́здник./ Ты бо яви́лся еси́ гра́ду на́шему и всей Сиби́ри врачевство́ безме́здное,/ подава́я исцеле́ние с ве́рою приходя́щим к тебе́,/ Симео́не всеблаже́нне./ Но, я́ко име́яй дерзнове́ние ко Влады́це Христу́,/ Того́ моли́ спасти́ град и лю́ди, моля́щияся тебе́,/ па́че же хода́тай бу́ди ко Го́споду/ во дни наше́ствия печа́ли рабо́м твои́м, да зове́м ти:// ра́дуйся, Сиби́рстей стране́ похвало́ и утвержде́ние гра́ду на́шему. Икос Многоцеле́бнаго сокро́вища, чудотво́рных моще́й твои́х,/ не́дра подзе́мная не сокры́та, пра́ведный Симео́не,/ но в обогаще́ние изда́ша та́я притека́ющим ве́рным и неве́рным./ Те́мже прииди́те вси и приими́те бога́тый ток цельбы́,/ ще́драго бо Влады́ки раб ще́дрит и дае́т и есть в подая́нии неоску́ден./ Восхваля́юще у́бо в пе́снех сицева́го засту́пника и благоде́теля на́шего, да зове́м ему́:/ ра́дуйся, Сиби́рстей стране́ похвало́ и утвержде́ние гра́ду на́шему. Песнь 7 Ирмос: Якоже дре́вле благочести́выя три о́троки/ ороси́л еси́ в пла́мени халде́йстем,/ све́тлым Божества́ огне́м и нас озари́,/ благослове́н еси́, взыва́ющия,// Бо́же оте́ц на́ших. Припев: Святы́й пра́ведный Симео́не, моли́ Бо́га о на́с. Благоче́стие трие́х о́трок вавило́нских привлече́ к ним све́тлый Божества́ огнь,/ су́щую благода́ть Бо́жию, сохра́ньшую их в пла́мени халде́йстем невреди́мы./ То́ежде благоче́стие привлече́ и к твоему́, блаже́нне, те́лу благода́ть,/ сохра́ньшую е невреди́мо от тли в не́дрех земны́х./ И ны́не пребыва́яй с на́ми, Симео́не, я́ко прича́стник Боже́ственнаго огня́,/ возжзи́ в нас огнь ре́вности по благоче́стию,/ я́ко да и мы, сим сохра́ньшеся пла́мене страсте́й,/ восприи́мем песнь о́нех отроко́в, е́же взыва́ти Христу́ вы́ну:/ благослове́н еси́, Бо́же оте́ц на́ших. Припев: Святы́й пра́ведный Симео́не, моли́ Бо́га о на́с. Чу́дно бысть халде́ем виде́ние трие́х отроко́в, неопали́вшихся пла́менем огня́./ Та́кожде удиви́шася христоимени́тии лю́дие и умили́шася се́рдцем,/ ви́девше твой гроб, блаже́нне, восходя́щ от земли́./ Егда́ же узре́ша в нем нетле́нныя мо́щи твоя́/ и точа́ща чудесы́ пресла́вны Боже́ственною си́лою, в них обита́ющею,/ и па́че почуди́шася, и, стра́хом и ра́достию объя́ти бы́вше,/ со умиле́нием славосло́вяху Го́спода,/ ди́вная творя́щаго во святы́х Свои́х./ Те́мже и мы, торжеству́юще днесь па́мять твою́, свя́те,/ гла́сом трие́х о́нех отроко́в благода́рственно взыва́ем Христу́, Спа́су всех:/ благослове́н еси́, Бо́же оте́ц на́ших. Припев: Святы́й пра́ведный Симео́не, моли́ Бо́га о на́с. Вои́стину ве́лие, я́коже то трие́х отроко́в в Вавило́не, та́кожде и твое́, блаже́нне, бысть о́но чу́до,/ я́ко честны́я мо́щи твоя́ по толи́цех ле́тех обрето́шася це́лы и неразруши́мы,/ сохраня́емы в земли́ Боже́ственною благода́тию/ и изда́вшеся си́лою ея́ от недр земны́х, я́ко свети́льник,/ его́же Госпо́дь поста́ви не под спу́дом, но на све́щнице, да све́тит всем сия́нием чуде́с,/ озари́ша и обогати́ша правосла́вных разуме́нием боже́ственным./ Уцелому́дритеся ны́не, вопию́щии, и возлюби́те па́че всех Го́спода,/ да благода́ть обря́щете ве́чную, еще́ же и подаю́щу всем исцеле́ние, притека́ющим к тебе́./ Тебе́ же и мы покланя́ющеся, ра́достно пое́м песнь трие́х о́нех отроко́в/ Христу́, сподо́бившу нас таковы́я благода́ти:/ благослове́н еси́, Бо́же оте́ц на́ших. Сла́ва Отцу́ и Сы́ну и Свято́му Ду́ху. Яко фи́никс, процвете́ те́ло твое́ нетле́нием, блаже́нне,/ и, я́ко кедр, и́же в Лива́не, умно́жися чудесы́, принося́ще боже́ственную жизнь./ Сего́ ра́ди Сиби́рская страна́, иму́щи тя моли́твенника,/ я́ко боже́ственный зри́тся рай, цве́ты разли́чныя принося́ще чуде́с./ Имиже, я́ко дре́вле вавило́няне чу́дом трие́х отроко́в вразумля́еми бы́ша в и́стинней сих ве́ре,/ та́ко лю́дие спаса́емии при́сно утвержда́ются в и́стинней ве́ре Бо́жией,/ вводя́щей в живо́т ве́чный, его́же да́рует Госпо́дь Свои́м уго́дником,/ благослове́н сый Бог оте́ц на́ших. И ны́не и при́сно и во ве́ки веко́в. Ами́нь. Богородичен: Зри́ши, Пресвята́я Де́во, я́ко в пла́мени грехо́внем исчеза́ют дни́е на́ша./ Моли́твами Твои́ми с пра́ведным Симео́ном сотвори́,/ я́ко да не погуби́т сий пла́мень нас до конца́,/ но росо́ю све́тлаго Боже́ственнаго огня́ утуше́н бу́дет./ И мы та́ко, невреди́ми от пла́мене его́ яви́вшеся,/ Пода́телю того́ огня́, Сы́ну Твоему́, вы́ну взыва́ем:/ благослове́н еси́, Бо́же оте́ц на́ших. Песнь 8 Ирмос: Нестерпи́мому огню́ соедини́вшеся,/ богоче́стия предстоя́ще ю́ноши,/ пла́менем же неврежде́ни,/ боже́ственную песнь поя́ху:/ благослови́те, вся дела́ Госпо́дня, Го́спода// и превозноси́те во вся ве́ки. Припев: Святы́й пра́ведный Симео́не, моли́ Бо́га о на́с. Я́коже благочести́вии о́троцы в пещи́ вавило́нстей/ пла́менем иногда́ неврежде́ни бы́ша Боже́ственною си́лою,/ та́ко сподо́бившимся по́мощи твоей, блаже́нне,/ спасе́ни бы́ша от многоразли́чных зол, я́ко пла́менем огня́ их обдержа́щих./ Те́мже обновля́ющаяся в душа́х ве́рных чудеса́ твоя́ днесь в па́мяти твое́й,/ я́коже чу́до в пещи́ вавило́нстей ю́ноши о́ны, пе́ти всех науча́ют:/ благослови́те, вся дела́ Госпо́дня, Го́спода и превозноси́те во вся ве́ки. Припев: Святы́й пра́ведный Симео́не, моли́ Бо́га о на́с. Богото́чный исто́чник, ороша́ющ стра́ждущих в пла́мени нестерпи́мых зол, Госпо́дь яви́ тя, блаже́нне,/ я́ко вои́стину сокро́вище дарова́ний,/ мы же моли́твами твои́ми сподобля́емся бы́ти невреди́ми от злых./ От незави́стных бо вод духо́вныя благода́ти/ всем с те́плою ве́рою прибега́ющим к тебе́ подае́ши благопотре́бная ко спасе́нию/ и та́ко твори́ши, я́ко да вси, ра́достно торжеству́юще па́мять твою́, согла́сно вопие́м:/ благослови́те, вся дела́ Госпо́дня, Го́спода и превозноси́те во вся ве́ки. Припев: Святы́й пра́ведный Симео́не, моли́ Бо́га о на́с. Чуде́с твои́х, блаже́нне, ре́ки излия́вшеся исцеле́ний,/ бе́здну тя яви́ша, точа́щу благода́ть Го́спода./ Ини́и бо стражда́ нестерпи́мою бо́лию во о́чию свое́ю,/ пе́рстию то́кмо от гро́ба твоего́ обложи́вше я и о сем укрепи́вшеся, прозре́ша,/ друзи́и же прикоснове́нием то́кмо к моще́м твои́м облегче́ние в боле́зни получи́ша;/ пре́жде су́щии неми́и глаго́лание прия́ша, печа́льнии кре́пкое утеше́ние,/ хроми́и благотече́ние, разсла́бленнии исправле́ние, боля́щии нога́ма здра́вие;/ та́кожде мно́ги утро́бы непло́дны соде́лашася многоча́дны,/ пию́ще то́кмо во́ду от ме́ста явле́ния твои́х моще́й,/ мно́зи же еле́ем от канди́ла твоего́ исцели́шася от неисце́льных боле́зней./ И всем вся́ко пролива́вши ту́чи врачева́ний, уставля́я пале́ние неду́гов,/ и лю́ди, сих свобо́ждшияся, устроя́еши песнопе́ти:/ благослови́те, вся дела́ Госпо́дня, Го́спода и превозноси́те во вся ве́ки. Сла́ва Отцу́ и Сы́ну и Свято́му Ду́ху. Вельми́ тя просла́ви Госпо́дь, блаже́нне, в чудесе́х,/ от любве́ бо и ве́ры свято́е то́кмо и́мя твое́ призывающим/ а́бие услы́шани быва́ют, я́коже плене́ннии иногда́ пога́ными,/ и стра́ждущии от дух нечи́стых, и ини́и мно́зи боля́щии,/ и николи́же ску́дни по́мощи твоея́ оставля́ются./ И не то́чию тща́щимся и́мя твое́ нарица́ти, но и о́браз твой любо́вию, я́же к тебе́, напису́ющим, вели́к помо́щник явля́ешися./ К сим же и неве́дущим тя боля́щим,/ я́ко во мно́ги стра́ны и ве́си произы́де и слы́шана бысть сла́ва и́мене твоего́,/ в со́ниих явля́лся, врачу́юще я./ Те́мже па́мять твою́ пра́зднующе,/ в прославле́ние Го́спода, просла́вльшаго та́ко тя, велегла́сно взыва́ем:/ благослови́те, вся дела́ Госпо́дня, Го́спода и превозноси́те во вся ве́ки. И ны́не и при́сно и во ве́ки веко́в. Ами́нь. Богородичен: Образы нося́щи дре́вле Твоего́ Рождества́,/ ю́ноши не опаля́ет, Де́во, пещь,/ я́коже не опали́ утро́бу Твою́ Огнь Боже́ственный./ Вся бо твори́т Иису́с, Сын Твой, Бог и Челове́к,/ Его́же превозно́сим во вся ве́ки. Песнь 9 Ирмос: Благослове́н Госпо́дь Бог Изра́илев,/ воздви́гнувый рог спасе́ния нам/ в дому́ Дави́да, о́трока Своего́,/ милосе́рдия ра́ди ми́лости,/ в ни́хже посети́ нас Восто́к с высоты́,// и напра́вил ны есть на путь ми́ра. Припев: Святы́й пра́ведный Симео́не, моли́ Бо́га о на́с. Благослове́н Госпо́дь Бог, яви́вый тя, блаже́нне,/ споспе́шника всем ко спасе́нию житие́м твои́м и наста́вника сло́вом./ Ле́ствица бо небовосхо́дная житие́ твое́ бысть, сло́во же твое́ благода́тию срастворе́но есть,/ науча́юще трезве́нию души́ и те́ла и воздержа́нию по благоче́стию и та́ко направля́юще всех на путь ми́ра. Припев: Святы́й пра́ведный Симео́не, моли́ Бо́га о на́с. Благослове́н Госпо́дь Бог, дарова́вый нам тебе́, блаже́нне, чудотво́рца преди́вна,/ ку́пно же и сте́ну, и предгра́дие от языкозло́бия и озлобле́ния заблу́ждших от и́стинныя ве́ры./ Ихже чудесы́ от моще́й твои́х/ дале́че отгна́л еси́ от о́бласти Верхоту́рския,/ не терпя́ рачи́телей ересе́й и хуле́ния испо́лненных на Правосла́вие/ бы́ти та́мо, иде́же яви́шася мо́щи твоя́:/ чу́дная бо зна́мения от сих, я́ко огнь паля́щ, яви́шася в посрамле́ние еретико́м,/ нам же всем во утвержде́ние на путь ми́ра. Припев: Святы́й пра́ведный Симео́не, моли́ Бо́га о на́с. Благослове́н Госпо́дь Бог, поста́вивый тя, блаже́нне,/ хода́тая на Небеси́ и моли́твенника о нас./ Аще бо и земля́ сокры́ла тя, но горе́ тя вси бога́тна и́мамы/ предста́теля и моли́твенника к Бо́гу, любо́вию чту́щим тя,/ я́коже иногда́ моли́твами твои́ми спасл еси́ ины́я от потопле́ния, ины́я от о́гненнаго запале́ния,/ призыва́ющия свято́е и́мя твое́ и моля́щияся тебе́ о по́мощи,/ и ины́я от неизбе́жныя сме́рти в боле́зни их/ и та́ко всех напра́вил еси́ на путь ми́ра. Сла́ва Отцу́ и Сы́ну и Свято́му Ду́ху. Благослове́н Госпо́дь Бог, сподо́бивый прославле́ние твое́, блаже́нне, светоза́рное/ и чудеса́ пресла́вная воспе́ти, ели́ко мо́щно есть нам./ Ты же, благосе́рде, не отста́ви по́мощи твоея́ от нас,/ со умиле́нием про́сим тя,/ и не помяни́ беззако́ний на́ших, но обрати́ся на ми́лость,/ и моли́ ми́лостиваго Бо́га дарова́ти мир ми́рови,/ и всем согреше́ний проще́ние, и душа́м и телесе́м здра́вие/ и напра́вити всех на путь ми́ра. И ны́не и при́сно и во ве́ки веко́в. Ами́нь. Богородичен: Благослове́н Госпо́дь Бог, Тобо́ю, Пресвята́я Де́во,/ посети́вый нас Восто́к свы́ше,/ просвети́ти во тьме и се́ни седя́щия/ и напра́вити но́ги на́ша на путь ми́ра. Светилен Све́тло возсия́ днесь па́мять твоя́, блаже́нне Симео́не,/ луча́ми мно́го облиста́ющи твои́х доброде́тельных дея́ний/ и озаря́ющи ве́рных ра́зумы све́том чуде́с твои́х./ Сию́ у́бо пра́зднующе, ра́достно сла́вим тя/ и любо́вию ублажа́ем, уго́дниче Христа́, Бо́га на́шего,/ Его́же моли́ изба́вити ны от мра́ка грехо́внаго, и просвети́ти све́том за́поведей,/ разори́ти же и всю мра́чную тьму напа́стей, нас облежа́щих,/ и облиста́ти весе́лием сердца́, и спасти́ ду́ши на́ша. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Све́та немерца́ющаго вмести́лище яви́лася еси́, Пречи́стая Де́во,/ носи́вши Христа́, Бо́га на́шего,/ И́же есть Свет присносу́щный, просвеща́яй вся́каго челове́ка, гряду́щаго в мир./ Те́мже Тя по до́лгу ублажа́ем.

Минея, 17 Ноября, Кано́н преподо́бнаго Глас 4 Песнь 1 Ирмос: Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,/ и воспою́, ра́дуяся, Тоя́ чудеса́. Припев: Преподо́бне о́тче Ни́коне, моли́ Бо́га о на́с. Прему́дростию ра́зума украша́емь, преподо́бне Ни́коне,/ весь Христу́ порабо́тился еси́, к Нему́ жела́ние твое́ име́я,/ Его́же моли́ спасти́ от бед пою́щия тя. Припев: Преподо́бне о́тче Ни́коне, моли́ Бо́га о на́с. О всех Христа́ моли́, преподо́бне Ни́коне, па́мять твою́ любо́вию пою́щих,/ изба́витися ве́чнаго муче́ния,/ да тебе́ вси, я́ко те́пла предста́теля, пе́сньми велича́ем. Припев: Преподо́бне о́тче Ни́коне, моли́ Бо́га о на́с. Христу́ весь порабо́тився, преподо́бне Ни́коне,/ и к Нему́ все жела́ние име́я,/ и Того́ ра́ди любве́ ми́ра с жела́ньми его́ отре́кся./ Сего́ ра́ди тя вси пе́сньми ублажа́ем, Ни́коне всеблаже́нне. Припев: Преподо́бне о́тче Ни́коне, моли́ Бо́га о на́с. Все твое́ жела́ние к Богу́ му́жески впери́в, в Вы́шних селе́ние сотвори́л еси́ пресла́вно./ Те́мже тя пе́сньми, блаже́нне Ни́коне, почита́ем. Сла́ва Отцу́ и Сы́ну и Свято́му Ду́ху. А́ще и дале́че житие́м,/ но близ ве́рою и любо́вию духо́внаго твоего́ настоя́теля,/ и с ним вку́пе пресла́вно чудеса́ твори́ши,/ вку́пе же и Бо́гу предстоите́, о всех нас моля́щеся. И ны́не и при́сно и во ве́ки веко́в. Ами́нь. Богородичен: Му́дрости прему́дростныя прия́телище была́ еси́, Пренепоро́чная,/ Свой бо храм от Твои́х пречи́стых крове́й, Чи́стая,/ созда́ти благоизво́ли на спасе́ние на́ше. Песнь 3 Ирмос: Твоя́ песносло́вцы, Богоро́дице,/ живы́й и незави́стный исто́чниче,/ лик себе́ совоку́пльшия, духо́вно утверди́/ в Боже́ственней Твое́й сла́ве/ венце́в сла́вы сподо́би. Припев: Преподо́бне о́тче Ни́коне, моли́ Бо́га о на́с. Лю́ди вся, тебе́ ве́дущия/ и заступле́ния твоего́ ча́ющия, не пре́зри, о́тче,/ но, ели́ко мо́щно, предста́тельствуй,/ всем поле́зная прося́ моли́твами твои́ми. Припев: Преподо́бне о́тче Ни́коне, моли́ Бо́га о на́с. Упова́ние име́л еси́, блаже́нне Ни́коне, и прибе́жище всех Бо́га,/ Того́ моли́, мо́лим тя, о нас,/ любо́вию воспева́ющих тя, приснопа́мятне. Сла́ва Отцу́ и Сы́ну и Свято́му Ду́ху. Боже́ственным жела́нием, преподо́бне Ни́коне, разжига́емь,/ мирску́ю красоту́ преоби́дел еси́, мона́шеское житие́ возлюби́в./ Те́мже был еси́ преподо́бным единожи́тель и пра́ведным. И ны́не и при́сно и во ве́ки веко́в. Ами́нь. Богородичен: Исцеле́ний Тя исто́чник, в Твою́ утро́бу вшед, показа́,/ Ма́ти Бо́жия Пречи́стая,/ мою́ у́бо ду́шу исцели́. Седален, глас 3 Укрепля́емь Боже́ственною си́лою, преподо́бне Ни́коне,/ возмо́гл еси́ оскуде́ние, от безбо́жных ага́рян бы́вшее, напо́лнити:/ це́рковь бо но́ву и оби́тель красне́йшу па́че воздви́гл еси́./ Те́мже тя вси́ ублажа́ем. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Боже́ственная ски́ния была́ еси́ Сло́ва, еди́на Пречи́стая Ма́ти Де́во,/ чистото́ю А́нгелы превозше́дшая,/ па́че всех мене́, персть бы́вша,/ оскверне́на плотски́ми прегреше́ньми,/ очи́сти моли́тв Твои́х Боже́ственными вода́ми,/ подаю́щи, Чи́стая, ве́лию ми́лость. Песнь 4 Ирмос: Седя́й в сла́ве на Престо́ле Божества́/ во о́блаце ле́гце,/ прии́де Иису́с Пребоже́ственный/ нетле́нною дла́нию и спасе́ зовущия:/ сла́ва, Христе́, си́ле Твое́й. Припев: Преподо́бне о́тче Ни́коне, моли́ Бо́га о на́с. Невозвра́тно ше́ствовав вводя́щий путь к Небе́сному гра́ду, Ни́коне преподо́бне,/ иде́же наста́ви тя Святы́й Дух,/ оби́тель име́я се́рдце твое́. Припев: Преподо́бне о́тче Ни́коне, моли́ Бо́га о на́с. Смире́ние вознося́щее, Ни́коне блаже́нне, в се́рдце име́л еси́,/ отону́дуже тя и мы мо́лим уще́дрити смире́ние на́ше. Припев: Преподо́бне о́тче Ни́коне, моли́ Бо́га о на́с. Страстьми́ разли́чными коле́блемыя/ и ве́рою притека́ющия к твоему́ гро́бу, блаже́нне Ни́коне,/ святы́м твои́м хода́тайством вся посети́ ми́лостивно к Человеколю́бцу. Сла́ва Отцу́ и Сы́ну и Свято́му Ду́ху. Мрак страсте́й от се́рдца твоего́ ты, преподо́бне Ни́коне, очи́стив,/ Христо́ва повеле́ния вои́стинну свет прие́м,/ в посте́ просия́л еси́, умертви́в те́ло,/ ду́хом же, Ни́коне, ожи́л еси́. И ны́не и при́сно и во ве́ки веко́в. Ами́нь. Богородичен: Очище́ние всех земны́х,/ ве́рою молю́ и припа́даю, Благослове́нная,/ моли́твами Твои́ми Судию́ и Сы́на Твоего́ ми́лостива сотвори́,/ я́ко да по до́лгу сла́влю Тя. Песнь 5 Ирмос: Ужасо́шася вся́ческая/ о Боже́ственней сла́ве Твое́й:/ Ты бо, Неискусобра́чная Де́во,/ име́ла еси́ во утро́бе над все́ми Бо́га/ и родила́ еси́ безле́тнаго Сы́на,/ всем воспева́ющим Тя/ мир подава́ющая. Припев: Преподо́бне о́тче Ни́коне, моли́ Бо́га о на́с. У́зкий и приско́рбный путь ше́ствовал еси́, преподо́бне Ни́коне,/ восхожде́ньми Боже́ственными се́рдца твоего́,/ а́може отца́ твоего́ наста́виша тя моли́твы. Припев: Преподо́бне о́тче Ни́коне, моли́ Бо́га о на́с. От грехо́вных боле́зней мя облегчи́ ско́рбных,/ и се́рдца моего́ лю́тость утоли́,/ и согреше́ний оставле́ние испроси́,/ и́маши бо послу́шающа Христа́ чи́стыя твоея́ моли́твы. Припев: Преподо́бне о́тче Ни́коне, моли́ Бо́га о на́с. Стра́сти теле́сныя воздержа́нием, о́тче, увяди́в,/ я́ко дре́во многопло́дное, плод чу́ден прино́сиши Бо́гу:/ своя́ чу́дная исправле́ния, Ни́коне преподо́бне. Сла́ва Отцу́ и Сы́ну и Свято́му Ду́ху. Всесве́тлый свети́льник яви́лся еси́,/ озаря́я поющия тя, Ни́коне преподо́бне./ И сего́ ра́ди мо́лим тя:/ ве́чнаго муче́ния изба́ви ны, пою́щия тя. И ны́не и при́сно и во ве́ки веко́в. Ами́нь. Богородичен: Ума́ моего́ уврачу́й изступле́ние, Всенепоро́чная,/ и исцели́ стра́сти душе́вныя и уны́ния тьму́ отжени́,/ я́ко да восхвалю́ Тя по достоя́нию, Богоро́дице Всепе́тая. Песнь 6 Ирмос: Боже́ственное сие́ и всечестно́е/ соверша́юще пра́зднество,/ Богому́дрии, Богома́тере,/ прииди́те, рука́ми воспле́щим,/ от Нея́ ро́ждшагося Бо́га сла́вим. Припев: Преподо́бне о́тче Ни́коне, моли́ Бо́га о на́с. Свое́ се́рдце, преподо́бне Ни́коне,/ Святы́я Тро́ицы жили́ще и дом созда́л еси́./ Вси, ве́рою притека́ющии к честне́й твое́й ра́це,/ просвеще́ние, и освяще́ние, и очище́ние, всеблаже́нне Ни́коне, прие́млем. Припев: Преподо́бне о́тче Ни́коне, моли́ Бо́га о на́с. Твоя́, всеблаже́нне Ни́коне, свяще́нныя и всесвяты́я мо́щи,/ во гро́бе лежа́ще, неду́ги врачу́ют,/ де́монския же полки́ прогоня́ют всегда́,/ ве́рным же источа́ют исцеле́ния оби́льная,/ тебе́ по достоя́нию при́сно блажа́щим. Сла́ва Отцу́ и Сы́ну и Свято́му Ду́ху. Я́ко весь Христу́ приближа́яся ясне́йши,/ помяни́ всех, ве́рою помина́ющих тя, Ни́коне всече́стне,/ грехо́в проще́ния у Христа́ прося́/ и Небе́снаго Ца́рствия восприя́тия. И ны́не и при́сно и во ве́ки веко́в. Ами́нь. Богородичен: Еди́на всем поможе́ние,/ помози́ нам, бе́дствующим,/ и ру́ку пода́ждь, и к приста́нищу введи́ спасе́ния, Отрокови́це Богоблагода́тная. Кондак, глас 4 Духо́вному твоему́ настоя́телю, о́тче Ни́коне,/ вся́чески прилепи́вся/ и от него́ наставля́емь,/ во всем Христо́ви порабо́тився,/ мона́хов был еси́ чинонача́льник/ и преподо́бных сожи́тель,/ с ни́миже Христа́ Бо́га моли́ непреста́нно о всех нас. Икос Ка́ко возмогу́ воспе́ти твоя́ исправле́ния?/ Или́ изрещи́ труды́ твоя́,/ и́миже труди́лся еси́ по отце́ твое́м,/ а́ще не ты пода́си ми сло́во, недосто́йному рабу́ твоему́?/ ты бо был еси́ по отце́ мона́хов нача́льник,/ с ни́миже Христа́ Бо́га моли́ непреста́нно о всех нас. Песнь 7 Ирмос: Не послужи́ша тва́ри, Богому́дрии/ па́че Созда́вшаго,/ но о́гненное преще́ние му́жески попра́вше,/ ра́довахуся, пою́ще:/ препе́тый отце́в Госпо́дь и Бог, благослове́н еси́. Припев: Преподо́бне о́тче Ни́коне, моли́ Бо́га о на́с. Вся мимотеку́щая привре́менная пристра́стия, преподо́бне Ни́коне, отрази́в,/ всю наде́жду к Бо́гу стяжа́л еси́,/ И́мже де́йствуеши пресла́вная чудеса́. Припев: Преподо́бне о́тче Ни́коне, моли́ Бо́га о на́с. Твоея́ души́ тве́рдое и благостоя́нное ра́зума, преподо́бне Ни́коне,/ ника́коже лука́вый возмо́же соврати́ти,/ Бо́гу помога́ющу ти, досточу́дне. Припев: Преподо́бне о́тче Ни́коне, моли́ Бо́га о на́с. Ми́ру умертви́вся, бу́дущую жизнь насле́дил еси́, о́тче,/ исцеле́ний Боже́ственную благода́ть источа́еши пою́щим:/ благослове́н Бог оте́ц на́ших. Сла́ва Отцу́ и Сы́ну и Свято́му Ду́ху. Нельсти́вно навы́к пре́жде тебе́ бы́вших оте́ц по́стническому житию́, преподо́бне,/ но тех житие́м пожи́в, Богоблаже́нне, воспева́я:/ благослове́н Бог оте́ц на́ших. И ны́не и при́сно и во ве́ки веко́в. Ами́нь. Богородичен: Глаго́лом проро́ческим после́дующе, Де́во,/ Богоро́дицу, Тя испове́дуем:/ родила́ бо еси́ отроча́ всех древне́йшее, Емману́ил нарица́емое./ Ему́же зове́м:/ благослове́н Бог оте́ц на́ших. Песнь 8 Ирмос: О́троки благочести́выя в пещи́/ Рождество́ Богоро́дичо спасло́ есть:/ тогда́ у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте дела́/ и превозноси́те Его́ во вся ве́ки. Припев: Преподо́бне о́тче Ни́коне, моли́ Бо́га о на́с. Му́жествовав, победи́л еси́ страстна́я взыгра́ния вся,/ ум просвеще́н име́я, возмо́гл еси́,/ я́же ви́де отца́ творя́ща, сия́ де́тели испо́лнити:/ те́мже тя вси ублажа́ем, Ни́коне всеблаже́нне. Припев: Преподо́бне о́тче Ни́коне, моли́ Бо́га о на́с. Мы́слию очище́нною, прему́дре Ни́коне, Бо́гу приближа́яся,/ всем всяк быв, да Христа́ приобря́щеши./ Те́мже, в Небе́сныя оби́тели всели́вся, преподо́бне,/ дерзнове́нно зри́ши Святу́ю Тро́ицу,/ Ю́же непреста́нно моли́ спасти́ вся,/ правосла́вно тя почита́ющия. Припев: Преподо́бне о́тче Ни́коне, моли́ Бо́га о на́с. Серпо́м моли́тв, о́тче Ни́коне, страстна́я те́рния изсе́к/ и возде́лав воздержа́ния ра́лом душе́вную зе́млю,/ ввергл еси́ семена́ благоче́стия в ней:/ те́мже исцеле́ния плоды́ пожина́еши. Сла́ва Отцу́ и Сы́ну и Свято́му Ду́ху. Доброде́телей тя прия́телище нарица́ем, преблаже́нне,/ я́ко молча́ния дру́га, и бде́ния де́лателя,/ и о́браз целому́дрия, и моли́твы жили́ще некра́домое,/ и чуде́с сокро́вище, и моли́твенника о почита́ющих па́мять твою́, Ни́коне блаже́нне. И ны́не и при́сно и во ве́ки веко́в. Ами́нь. Богородичен: Ма́ти Бо́жия Всенепоро́чная,/ души́ моея́ я́звы исцели́,/ сла́сти утоли́ пло́ти моея́,/ омраче́нное се́рдце мое́ просвети́,/ и умири́ ум мой от вся́каго вре́да,/ и вра́жиих мя изба́ви напа́стей. Песнь 9 Ирмос: Всяк земноро́дный/ да взыгра́ется, Ду́хом просвеща́емь,/ да торжеству́ет же Безпло́тных умо́в естество́,/ почита́ющее свяще́нное торжество́ Богома́тере,/ и да вопие́т:/ ра́дуйся, Всеблаже́нная Богоро́дице,/ чи́стая Присноде́во. Припев: Преподо́бне о́тче Ни́коне, моли́ Бо́га о на́с. Слез твои́х пролия́нием грехо́вный огнь погаси́л еси́,/ безстра́стия же во́ду исцеле́ний чи́стаго пи́ва пою́щим источа́еши,/ блаже́нне Ни́коне досточу́дне. Припев: Преподо́бне о́тче Ни́коне, моли́ Бо́га о на́с. Ра́ка, иде́же лежи́т свято́е те́ло твое́, преподо́бне Ни́коне,/ чуде́с благода́ть источа́ет,/ просвеща́ющи на́ша ду́ши и телеса́ и обогаща́ющи/ предста́теля тя те́пла и засту́пнника иму́щия. Припев: Преподо́бне о́тче Ни́коне, моли́ Бо́га о на́с. Днесь с на́ми собо́ри А́нгел и преподо́бных веселя́тся/ в па́мять твою́, блаже́нне Ни́коне,/ с ни́ми же помина́й ны, чту́щия тя ве́рно, досточу́дне. Сла́ва Отцу́ и Сы́ну и Свято́му Ду́ху. Уста́ви свяще́нными твои́ми моли́твами воздвиза́емое на ны смуще́ние/ и челове́к всех озлобле́ние,/ я́ко име́я дерзнове́ние ко Влады́це и Бо́гу на́шему, Ни́коне досточу́дне. И ны́не и при́сно и во ве́ки веко́в. Ами́нь. Богородичен: О, па́че ума́ чуде́с Твои́х!/ Бо́жия бо Сло́ва воплоти́вшагося, Еди́наго родила́ еси́/ па́че естества́, Ма́ти Де́во,/ вся́ческая Боже́ственным свои́м хоте́нием му́дре держа́ща и окормля́юща. Светилен Святы́ни храм был еси́, преподо́бне,/ по Боже́ственному прича́стию ра́йский граждани́н,/ в не́мже наслажда́ешися невозбра́нно дре́ва зна́ния и нетле́нныя сла́вы,/ па́мять творя́, Ни́коне преподо́бне,/ о и́же ве́рою хва́лящих тя, о́тче Богому́дре. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Ра́дуйся, ве́рных похвало́;/ ра́дуйся, преподо́бных утвержде́ние;/ ра́дуйся, правосла́вных сла́во;/ ра́дуйся, све́те су́щих во тьме;/ ра́дуйся, хра́ме пресвяты́й;/ ра́дуйся, Бо́жий раю́;/ ра́дуйся, кля́твы разреше́ние, Благослове́нная Мари́е.

Минея, 20 Мая, Други́й кано́н Глас 8 Песнь 1 Ирмос: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:/ Изба́вителю и Бо́гу на́шему пои́м. Припев: Святи́телю о́тче Алекси́е, моли́ Бо́га о на́с. Да́ждь ми сло́во, Сло́ве, и ум мой благода́тию Ду́ха просвети́,/ е́же восхвали́ти Твоего́ уго́дника, святи́теля Алекси́я. Припев: Святи́телю о́тче Алекси́е, моли́ Бо́га о на́с. Испроси́ у Христа́ дарова́ти ми благода́ть Ду́ха,/ е́же соплести́ тебе́ достодо́лжную хвалу́,/ Богому́дре о́тче Алекси́е. Сла́ва Отцу́ и Сы́ну и Свято́му Ду́ху. Приими́ моле́ние на́ше, святи́телю Алекси́е,/ и озари́ на́ша мы́сли све́том твои́х доброде́телей,/ пе́ти тя досто́йно. И ны́не и при́сно и во ве́ки веко́в. Ами́нь. Богородичен: Земноро́днии Рождество́м Твои́м, Де́во Богоро́дице,/ от земли́ к Небе́сней высоте́ взя́хомся/ и а́нгельским лико́м причто́хомся. Песнь 3 Ирмос: Утверди́ся се́рдце мое́ во Го́споде,/ вознесе́ся рог мой в Бо́зе мое́м,/ разшири́шася на враги́ моя́ уста́ моя́,/ возвесели́хся о спасе́нии Твое́м. Припев: Святи́телю о́тче Алекси́е, моли́ Бо́га о на́с. Мо́лим тя, святи́телю, моли́ о хва́лящих тя/ и притека́ющих любо́вию к честны́м моще́м твои́м,/ е́же получи́ти грехо́в проще́ние и бед свобожде́ние. Припев: Святи́телю о́тче Алекси́е, моли́ Бо́га о на́с. Просла́ви тя Госпо́дь, святи́телю Алекси́е,/ мно́га бо ле́та те́ло твое́, земле́ю покрове́но, соблюде́ нетле́нно,/ точа́щее чудеса́ прося́щим тя те́пле. Сла́ва Отцу́ и Сы́ну и Свято́му Ду́ху. Прояви́ Госпо́дь мо́щи твоя́/ и, я́ко свети́льник све́тел, поста́ви я не под спу́дом, но на све́щнице,/ да све́тят сия́нием чуде́с притека́ющим ти с ве́рою. И ны́не и при́сно и во ве́ки веко́в. Ами́нь. Богородичен: Приво́дим Тебе́ в моли́тву ми́лостивную Хода́таицу,/ ро́ждшую Тя пло́тию, Христе́ Бо́же наш,/ Ея́же моли́твами, Ще́дре, мир Твой умири́. Седален, глас 1 Па́мять обре́тения честны́х моще́й твои́х наста́ нам све́тло пра́зднество,/ пречу́дный святи́телю Христо́в, Алекси́е прехва́льне,/ в ню́же чуде́с благода́ть прия́л еси́ от всех Царя́, Христа́ Бо́га,/ разли́чныя неду́ги от челове́к отгони́ти, и от уз избавля́ти,/ и оби́димых от лют изыма́ти./ Те́мже зове́м: изба́ви нас от враг на́ших. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Гаврии́лу веща́вшу Тебе́, Де́во, ра́дуйся,/ со гла́сом воплоща́шеся всех Влады́ка/ в Тебе́, святе́м киво́те, я́коже рече́ пра́ведный Дави́д,/ яви́лася еси́, ши́ршая Небе́с, поноси́вши Зижди́теля Твоего́./ Сла́ва Все́льшемуся в Тя, сла́ва Проше́дшему из Тебе́,/ сла́ва Свободи́вшему нас рождество́м Твои́м. Песнь 4 Ирмос: Из горы́ приосене́нныя, Сло́ве, проро́к,/ еди́ныя Богоро́дицы,/ хотя́ща воплоти́тися богови́дно усмотри́/ и со стра́хом славосло́вяше си́лу Твою́. Припев: Святи́телю о́тче Алекси́е, моли́ Бо́га о на́с. Те́плый предста́телю бе́дствующих/ и моля́щихся ско́рый услы́шателю, о́тче наш, святи́телю Алекси́е,/ изба́ви от вся́ких напа́стей вся, призыва́ющия тя. Припев: Святи́телю о́тче Алекси́е, моли́ Бо́га о на́с. Свети́льниче всесве́тлый, просия́вый доброде́тельми твои́ми,/ озари́ сердца́ на́ша, омраче́нная прило́ги льсти́ваго,/ и разжени́ тьму́ страсте́й при́сно борю́щих ны. Сла́ва Отцу́ и Сы́ну и Свято́му Ду́ху. Пра́зднующим све́тло па́мять твою́,/ оте́честву на́шему и лю́дем мир у Христа́ испроси́/ и изба́ви от междоусо́бныя бра́ни и наше́ствий проти́вных. И ны́не и при́сно и во ве́ки веко́в. Ами́нь. Богородичен: Пала́та прекра́сная и престо́л Всецаря́ Христа́ показа́лася еси́:/ честне́йшая бо еси́ вои́стинну всех тва́рей, Богома́ти,/ Предста́тельница и покро́в душ на́ших. Песнь 5 Ирмос: От но́щи неве́дения/ Богове́дением просвети́вый концы́,/ просвети́ мя у́тром человеколю́бия Твоего́, Го́споди. Припев: Святи́телю о́тче Алекси́е, моли́ Бо́га о на́с. Блиста́ньми чуде́с твои́х, Богому́дре, це́рковь твою́ озари́ и лю́ди возвесели́,/ Христа́ моля́ да́ти всем нам грехо́в проще́ние. Припев: Святи́телю о́тче Алекси́е, моли́ Бо́га о на́с. Моли́ о нас Всесвяту́ю Тро́ицу, святи́телю Алекси́е,/ я́ко да низпосле́т нам благода́ть Свою́, хва́лящим тя любо́вию. Сла́ва Отцу́ и Сы́ну и Свято́му Ду́ху. Всечестна́я ра́ка твоя́, святи́телю Алекси́е,/ чудеса́ то́чит приходя́щим ве́рно/ и прося́щим подае́т цельбу́ оби́льно. И ны́не и при́сно и во ве́ки веко́в. Ами́нь. Богородичен: Еди́наго от Тро́ицы воплоще́ннаго Бо́га и́стинно родила́ еси́,/ Его́же моли́ от бед изба́витися рабо́м Твои́м. Песнь 6 Ирмос: Моли́тву пролию́ ко Го́споду/ и Тому́ возвещу́ печа́ли моя́,/ я́ко зол душа́ моя́ испо́лнися/ и живо́т мой а́ду прибли́жися,/ и молю́ся, я́ко Ио́на:/ от тли, Бо́же, возведи́ мя. Припев: Святи́телю о́тче Алекси́е, моли́ Бо́га о на́с. Преосвяще́нне Алекси́е, красото́ церко́вная, архиере́ев благоле́пие,/ равностоя́телю же святы́х А́нгел, моли́ о хва́лящих тя/ и испроси́ получи́ти всем грехо́в оставле́ние. Припев: Святи́телю о́тче Алекси́е, моли́ Бо́га о на́с. Преблаже́нне святи́телю Алекси́е, моли́ся приле́жно за град и лю́ди твоя́,/ и обдержа́щия ско́рби премени́,/ и грехо́в проще́ние и го́рняго весе́лия насле́дие испроси́. Сла́ва Отцу́ и Сы́ну и Свято́му Ду́ху. По́двиг твои́х труда́ми прия́л еси́ Боже́ственная дарова́ния:/ честны́я бо твоя́ мо́щи в шестьдеся́тное ле́то обрето́шася нетле́нны,/ исцеле́ния разли́чная подаю́щия. И ны́не и при́сно и во ве́ки веко́в. Ами́нь. Богородичен: Припа́дающе, мо́лим Тя приле́жно, всеми́лостивая Влады́чице:/ моли́ из Тебе́ ро́ждшагося изба́вите ны лю́тыя ско́рби,/ и ва́рварскаго преще́ния, и вся́каго наве́та вра́жия. Кондак, глас 8 Я́ко со́лнце незаходи́мое, от гро́ба возсия́ нам/ от мног лет сокрове́ны честны́я твоя́ мо́щи нетле́нны,/ святи́телю Алекси́е,/ тобо́ю благода́ть прие́млем:/ всю бо страну́ сию́ и вся ны чудесы́ и добро́тою обогаща́еши,/ де́йством благода́ти, да пое́м ти:/ ра́дуйся, о́тче, свети́ло Росси́и. Икос Похва́лим ны́не святи́теля пе́сньми, Росси́йскаго па́стыря и учи́теля,/ и благоче́стно притеце́м к ра́це моще́й его́,/ и почерпе́м дарова́ния, я́ко от исто́чника исцеле́ний./ Ю́же обстоя́ще ны́не, ра́достно весели́мся/ и, усе́рдно обше́дше, светоно́сными пе́сньми просла́вим, глаго́люще:/ чудотво́рче святи́телю Алекси́е,/ чудесы́ обогаща́й всех нас соде́янием благода́ти, да пое́м ти:/ ра́дуйся, о́тче, свети́ло Росси́и. Песнь 7 Ирмос: От Иуде́и доше́дше, о́троцы/ в Вавило́не иногда́/ ве́рою Тро́йческою пла́мень пе́щный попра́ша, пою́ще:/ отце́в Бо́же, благослове́н еси́. Припев: Святи́телю о́тче Алекси́е, моли́ Бо́га о на́с. Орга́н духо́вный был еси́, о́тче святи́телю Алекси́е,/ у́мно дви́жим благода́тию, при́сно бряца́л еси́, поя́:/ оте́ц на́ших Бо́же, благослове́н еси́. Припев: Святи́телю о́тче Алекси́е, моли́ Бо́га о на́с. На земли́, я́ко со́лнце, сия́еши чудесы́, о́тче блаже́нне,/ на Небесе́х же венцено́сец, ра́дуяся, пое́ши:/ оте́ц на́ших Бо́же, благослове́н еси́. Сла́ва Отцу́ и Сы́ну и Свято́му Ду́ху. Благода́тию Ду́ха честны́я мо́щи святи́теля Алекси́я разли́чныя цельбы́ подаю́т ве́рою пою́щим:/ оте́ц на́ших Бо́же, благослове́н еси́. И ны́не и при́сно и во ве́ки веко́в. Ами́нь. Богородичен: Теле́сныя сла́бости и душе́вныя неду́ги, Богороди́тельнице,/ любо́вию приходя́щих к кро́ву Твоему́ исцели́,/ врача́ Христа́ нам ро́ждшая. Песнь 8 Ирмос: На горе́ святе́й просла́вльшася/ и в купине́ огне́м Присноде́вы/ Моисе́ови та́йну я́вльшаго,/ Го́спода по́йте/ и превозноси́те во вся ве́ки. Припев: Святи́телю о́тче Алекси́е, моли́ Бо́га о на́с. Потщи́ся, свя́те, изба́вити ны от напа́стей и скорбе́й мно́гих,/ обдержа́щих ны, плотски́х и душе́вных,/ да, ра́дующеся, пое́м Христа́ во вся ве́ки. Припев: Святи́телю о́тче Алекси́е, моли́ Бо́га о на́с. Призыва́ющия тя, о́тче, изба́ви вся́каго зла и лю́тых нахожде́ний/ и от напра́сныя сме́рти исхити́ пою́щия Христа́ во вся ве́ки. Сла́ва Отцу́ и Сы́ну и Свято́му Ду́ху. Ма́нием Боже́ственным разли́чныя цельбы́ подаю́т честны́я твоя́ мо́щи, святи́телю,/ прося́щим тя усе́рдно и Христа́ пою́щим во вся ве́ки. И ны́не и при́сно и во ве́ки веко́в. Ами́нь. Богородичен: Ро́ждшая Еди́наго от Тро́ицы,/ моли́ти не преста́й, Богоро́дице, изба́вится нам от бед,/ пою́щим и превознося́щим Его́ во ве́ки. Песнь 9 Ирмос: Проявле́нное на горе́ законополо́жнику во огни́ и купине́/ Рождество́ Присноде́вы/ в на́ше ве́рных спасе́ние,/ пе́сньми немо́лчными велича́ем. Припев: Святи́телю о́тче Алекси́е, моли́ Бо́га о на́с. Поми́луй ны, смире́нныя рабы́ твоя́, святи́телю Алекси́е, и от тьмы́ скорбе́й изми́/ и пла́мене искуше́ний исхити́, ве́рно к тебе́ притека́ющия. Припев: Святи́телю о́тче Алекси́е, моли́ Бо́га о на́с. Я́ко звезда́ светоза́рная, на Небесе́х водворя́яся,/ с ли́ки святы́х А́нгел моли́ся о хва́лящих тя/ и притека́ющих к ра́це честны́х моще́й твои́х. Сла́ва Отцу́ и Сы́ну и Свято́му Ду́ху. Архиере́ев украше́ние, мона́хов удобре́ние, всех ве́рных прописа́ние,/ Це́ркве изря́дный па́стырь и учи́тель ты еси́, Алекси́е преосвяще́нне. И ны́не и при́сно и во ве́ки веко́в. Ами́нь. Богородичен: Безсе́менно ро́ждшая пло́тию Ипоста́сное Сло́во Пребезнача́льнаго Отца́,/ моли́ся Ему́, Богоро́дице Всепе́тая, спасти́ души́ пою́щих Тя. Светилен Прииди́те вси, ди́внаго и сла́внаго в чудесе́х,/ вели́каго святи́теля Алекси́я пе́сньми свяще́нными похва́лим,/ Росси́йскаго свети́льника и учи́теля, и А́нгельским чино́м ссе́льника,/ и моли́твенника те́пла ко Го́споду о чту́щих па́мять его́. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: По Бо́зе упова́ние на́ше иму́ще на Тя,/ Пречи́стая Богоро́дице, мо́лим Ти ся:/ моли́ся о нас ко из Тебе́ ро́ждшемуся/ невре́дны нас да́же до конца́ сохрани́ти,/ прири́щущих к покро́ву Твоему́.

Минея, 6 Марта, Канон мучеников Глас 8 Песнь 1 Ирмос: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:/ Изба́вителю и Бо́гу на́шему пои́м. Припев: Святи́и му́ченицы, моли́те Бо́га о на́с. Во глубину́ мя па́дша грехо́в/ и Твое́й пучи́не прибега́юща щедро́т,/ мольба́ми, Христе́, страстоно́сец во спасе́ния приста́нище наста́ви. Припев: Святи́и му́ченицы, моли́те Бо́га о на́с. Блиста́яся добро́тою доброде́телей,/ нося́ багряни́цу от крове́й му́ченических,/ я́ко ски́петр, держа́ крест,/ ца́рствуеши с Го́сподем, Фео́доре. Сла́ва Отцу́ и Сы́ну и Свято́му Ду́ху. В пе́снех Фео́дора, ве́рнии, Ка́ллиста, и Васо́я/ и Фео́фила с ни́ми вку́пе с Константи́ном до́блим,/ и про́чия восхва́лим му́ченики. И ны́не и при́сно и во ве́ки веко́в. Ами́нь. Богородичен: Изблева́ Е́вы во у́ши яд душетле́нный льсте́ц и вражде́бник,/ Христа́ же ро́ждши, Богома́ти,/ сего́ вред исцели́ла еси́. Песнь 3 Ирмос: Небе́снаго кру́га Верхотво́рче, Го́споди,/ и Це́ркве Зижди́телю,/ Ты мене́ утверди́ в любви́ Твое́й,/ жела́ний кра́ю, ве́рных утвержде́ние,/ Еди́не Человеколю́бче. Припев: Святи́и му́ченицы, моли́те Бо́га о на́с. Просвеща́емь заре́ю я́ко вои́стинну, сла́вне, Богоче́стия/ и добро́тою украша́ем Боже́ственных дея́ний,/ ва́рварскаго безбо́жия мра́чное разруши́л еси́, блаже́нне, злоче́стие. Припев: Святи́и му́ченицы, моли́те Бо́га о на́с. Крове́й то́ки, река́ми те́кший из пречи́стых теле́с страстоте́рпец Твои́х,/ Ца́рствие Твое́ и сла́дости пото́к сим исхода́таи,/ Благоутро́бне Го́споди. Сла́ва Отцу́ и Сы́ну и Свято́му Ду́ху. Я́ко зве́зды, неле́стныя страда́льцы просия́вше/ Це́ркве святы́я ны́не тве́рди,/ всю озари́ша вселе́нную луча́ми свои́х страда́ний, до́блественнейшии. И ны́не и при́сно и во ве́ки веко́в. Ами́нь. Богородичен: Вопло́щся во чре́ве Твое́м/ и быв Челове́к лу́чшаго ра́ди,/ Сый еди́н Человеколю́бец спаса́ет челове́ка от врат сме́ртных,/ Богома́ти Пречи́стая, еди́на Всепе́тая. Седален, глас 8 Ведо́ми бы́сте свя́зани от враго́в/ и в темни́це заключе́ни на времена́ мно́га,/ ве́рою соблюда́еми, невре́дни пребы́сте/ и, отре́шшеся мечи́ теле́с,/ святи́и, Боже́ственным жела́нием я́ве связа́стеся./ Те́мже, я́ко свети́ла, просия́ете в ми́ре,/ вся просвеща́юще Ду́ха благода́тию, страстоте́рпцы блаже́ннии,/ моли́те Христа́ Бо́га грехо́в оставле́ние дарова́ти/ пра́зднующим любо́вию святу́ю па́мять ва́шу. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Я́ко Де́ву и еди́ну в жена́х,/ Тя, без се́мене ро́ждшую Бо́га пло́тию,/ вси ублажа́ем, ро́ди челове́честии,/ О́гнь бо всели́ся в Тя Божества́,/ и я́ко Младе́нца дои́ши Зижди́теля и Го́спода./ Тем, А́нгельский и челове́ческий род, досто́йно сла́вим Пресвято́е Рождество́ Твое́/ и согла́сно вопие́м Ти:/ моли́ Христа́ Бо́га согреше́ний оставле́ние дарова́ти/ покланя́ющимся ве́рою Пресвято́му Рождеству́ Твоему́. Песнь 4 Ирмос: Ты моя́ кре́пость, Го́споди,/ Ты моя́ и си́ла,/ Ты мой Бог, Ты мое́ ра́дование,/ не оста́вль не́дра о́тча/ и на́шу нищету́ посети́в./ Тем с проро́ком Авваку́мом зову́ Ти:/ си́ле Твое́й сла́ва, Человеколю́бче. Припев: Святи́и му́ченицы, моли́те Бо́га о на́с. Укра́шься добро́тами по́двигов твои́х,/ оде́ялся еси́ во хлами́ду, от крове́й твои́х очервле́ную му́ченических,/ и украси́лся еси́ диади́мою побе́ды./ Те́мже с му́ченики пред лице́м Госпо́дним слику́еши, всеблаже́нне Фео́доре. Припев: Святи́и му́ченицы, моли́те Бо́га о на́с. В темни́це окова́ны но́ги твоя́ желе́зом, Ка́ллисте непобеди́ме,/ муче́ния неле́стную стезю́ ше́ствовати невозбра́нно моли́лся еси́,/ разреши́вся же мече́м от те́ла,/ а́бие любо́вию связа́лся еси́ Зижди́теля. Сла́ва Отцу́ и Сы́ну и Свято́му Ду́ху. Боже́ственное во́инство, богособра́нный полк,/ от мно́гих мест же и градо́в дво́ица проста́ страда́лец/ с четверочи́сленною десяти́цею ны́не возсия́, зако́нно пострада́вше/ и усека́еми в главы́ за главу́ всех – Христа́. И ны́не и при́сно и во ве́ки веко́в. Ами́нь. Богородичен: Ты ве́рных похвала́ еси́, Безневе́стная,/ Ты Предста́тельница, Ты и прибе́жище христиа́н,/ стена́ и приста́нище,/ к Сы́ну бо Твоему́ мольбы́ но́сиши, Всенепоро́чная,/ и спаса́еши от бед ве́рою и любо́вию Богоро́дицу Чи́стую Тя сла́вящия. Песнь 5 Ирмос: Вску́ю мя отри́нул еси́/ от лица́ Твоего́, Све́те незаходи́мый,/ и покры́ла мя е́сть чужда́я тьма́, окая́ннаго?/ Но обрати́ мя и к све́ту за́поведей Твои́х/ пути́ моя́ напра́ви, молю́ся. Припев: Святи́и му́ченицы, моли́те Бо́га о на́с. Предзря́ венцы́ и пребыва́ющую сла́ву, Фео́доре,/ дерзнове́нным нра́вом стра́ждущим с тобо́ю вопия́л еси́:/ сме́рти ника́коже ужаса́йтеся,/ е́юже по ма́ле весе́лие и живо́т прии́мете несказа́нный. Припев: Святи́и му́ченицы, моли́те Бо́га о на́с. Уязвля́ем любо́вию, блаже́нне, Влады́ки твоего́/ и огне́м опаля́ем Того́ жела́нием,/ муче́ния ча́шу испи́л еси́,/ я́же скве́рнами вторы́ми ника́коже оскверня́ется,/ страда́льче всеприснопа́мятне Ка́ллисте. Сла́ва Отцу́ и Сы́ну и Свято́му Ду́ху. Терпеливому́дрым нра́вом пе́рвый к страда́нию самоотше́л еси́,/ поуче́ние му́жества состра́ждущим был еси́, Фео́доре,/ с ни́миже насле́дствовал еси́ ве́чная поко́ища/ и сла́дость, при́сно пребыва́ющую. И ны́не и при́сно и во ве́ки веко́в. Ами́нь. Богородичен: Разреше́ние согреше́ний Твои́ми моли́твами пода́ждь рабо́м Твои́м,/ избавля́ющи сия́ напа́стей, и бед, и скорбе́й,/ и ху́льных еретико́в одержа́ния,/ Богоро́дице Де́во Всенепоро́чная. Песнь 6 Ирмос: Очи́сти мя, Спа́се,/ мно́га бо беззако́ния моя́,/ и из глубины́ зол возведи́, молю́ся,/ к Тебе́ бо возопи́х, и услыши мя,/ Боже спасе́ния моего́. Припев: Святи́и му́ченицы, моли́те Бо́га о на́с. Крове́й твои́х тече́ния, ре́чно излива́емая,/ пре́лести му́тныя пото́ки изсуши́ша,/ ве́рных же напои́ша всех се́рдца, досточу́дне Фео́доре. Припев: Святи́и му́ченицы, моли́те Бо́га о на́с. От стра́сти глуби́нныя возводя́ твоя́ му́ченики,/ на ка́мени терпе́ния тех утверди́л еси́,/ враго́в стопы́ и стропти́вых путе́й уклони́вшияся, Человеколю́бче. Сла́ва Отцу́ и Сы́ну и Свято́му Ду́ху. Красно́, я́ко река́, из Еде́ма устреми́вшаяся,/ град Бо́жий ва́шими кровьми́ веселите́, му́ченицы,/ нече́стия скве́рну благоче́стно очи́стивше. И ны́не и при́сно и во ве́ки веко́в. Ами́нь. Богородичен: Я́ко одушевле́нный киво́т, Законоположи́теля вмести́ла еси́,/ и, я́ко свят же храм, прия́ла еси́ Свята́го,/ бы́вша Челове́ка на благодея́ние челове́ков, Богоро́дице Чи́стая. Кондак, глас 2 Новоявле́нныя зве́зды ве́ры,/ за Христа́ усе́рдно пострада́вшия,/ похва́льными венцы́ досто́йне вси венча́ем,/ о нас моля́щияся Христу́,/ я́ко су́ще столпы́ и забра́ла христиа́нскаго нача́льства. Икос Ага́рянскую безбо́жную ве́ру и лю́таго бе́са пре́лесть,/ от души́, страда́льцы, ненави́дяще и гнуша́ющеся/ и печа́ть Христо́ву Боже́ственную обнося́ще це́лу в сердца́х,/ плещи́ враго́м, ненави́дящим Того́, не да́сте,/ па́че же усе́рдно вси за Него́ я́коже а́гнцы, закала́еми,/ просия́сте по кончи́не, я́ко со́лнце,/ безсме́ртную сла́ву обре́тше,/ я́ко столпы́ и забра́ла христиа́нскаго нача́льства. Песнь 7 Ирмос: От Иуде́и доше́дше, о́троцы/ в Вавило́не иногда́,/ ве́рою Тро́ическою пла́мень пе́щный попра́ша, пою́ще:/ отце́в Бо́же, благослове́н еси́. Припев: Святи́и му́ченицы, моли́те Бо́га о на́с. Я́ко зако́нно пострада́в,/ пра́вды венцы́ прия́л еси́ от Еди́наго Влады́ки/ и ны́не Боже́ственною добро́тою наслажда́ешися, о Фео́доре, вопия́:/ оте́ц на́ших Бо́же, благослове́н еси́. Припев: Святи́и му́ченицы, моли́те Бо́га о на́с. К заколе́нию во́льне, я́ко а́гнец на же́ртву, му́чениче ведо́м,/ на Вы́шней положи́лся еси́ трапе́зе же́ртва,/ песнопоя́, внегда́ закала́тися:/ оте́ц на́ших Бо́же, благослове́н еси́. Припев: Святи́и му́ченицы, моли́те Бо́га о на́с. Любве́ Твоея́, Сло́ве, огне́м в се́рдцы опаля́емь,/ те́рние злосла́вия попали́л е́сть му́ченик,/ воспева́я Тебе́, Ка́ллист:/ оте́ц на́ших Бо́же, благослове́н еси́. Сла́ва Отцу́ и Сы́ну и Свято́му Ду́ху. Исма́ил пребезу́мный, Богому́дрыя увеща́ти Христа́ отврещи́ся мнев, посра́млен бы́сть,/ ти́и бо внегда́ умира́ти, благоче́стно взыва́ху:/ оте́ц на́ших Бо́же, благослове́н еси́. И ны́не и при́сно и во ве́ки веко́в. Ами́нь. Богородичен: Из де́вственнаго чре́ва вопло́щся, яви́лся еси́ на спасе́ние на́ше./ Те́мже, Твою́ Ма́терь ве́дуще, Богоро́дицу, благода́рно взыва́ем:/ оте́ц на́ших Бо́же, благослове́н еси́. Песнь 8 Ирмос: Седмери́цею пе́щь/ халде́йский мучи́тель/ Богочести́вым неи́стовно разжже́,/ си́лою же лу́чшею спасе́ны, сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки. Припев: Святи́и му́ченицы, моли́те Бо́га о на́с. Страда́льцев лик прило́г тя прия́т, муче́ния добро́тами сия́юща,/ возду́х освяти́ся в возвраще́нии твое́м, му́чениче,/ и А́нгельская собра́шася мно́жества,/ земля́ освяти́ся, иде́же лежи́т те́ло твое́,/ о терпеливому́дренне Фео́доре треблаже́нне. Припев: Святи́и му́ченицы, моли́те Бо́га о на́с. Насле́дия уже́ Госпо́дне быв/ и к заколе́нию самово́лею влеко́м,/ у́жем связа́тися тебе́ не прия́л еси́, Ка́ллисте,/ отсека́емей главе́ святе́й./ Те́мже венцено́сец возше́д,/ лику́еши с вы́шними во́инствы во ве́ки вся. Припев: Святи́и му́ченицы, моли́те Бо́га о на́с. Да ублажи́тся Ка́ллист и похвале́н бу́ди Фео́дор,/ вку́пе с Константи́ном чу́дный Фео́фил,/ Васо́й крепча́йший и про́чий му́чеников лик,/ со А́нгельскими ликовству́я ли́ки и поя́ немо́лчно:/ о́троцы, благослови́те, свяще́нницы, воспо́йте,/ лю́дие, превозноси́те во вся ве́ки. Сла́ва Отцу́ и Сы́ну и Свято́му Ду́ху. В реку́ вве́ржени му́ченицы бы́вше сла́внии,/ по ме́чнем томле́нии ведя́хуся ко приста́нищу благоти́шному,/ е́же о Христе́ осла́бы,/ во́ды преле́стныя, то́ками крове́й изсуши́вше, е́же пе́ти научи́ша:/ о́троцы, благослови́те, свяще́нницы, воспо́йте,/ лю́дие, превозноси́те во вся ве́ки. И ны́не и при́сно и во ве́ки веко́в. Ами́нь. Богородичен: Богороди́тельнице Всечи́стая, души́ моея́ я́звы и грехо́вныя стру́пы очи́сти,/ исто́чниками омыва́ющи, су́щими из ребр Рождества́ Твоего́/ и су́щими от них очища́ющи струя́ми,/ к Тебе́ бо взыва́ю, и к Тебе́ прибега́ю,/ и Тя призыва́ю, Богоблагода́тную. Песнь 9 Ирмос: Ужасе́ся о сем Не́бо/ и земли́ удиви́шася концы́,/ я́ко Бог яви́ся челове́ком пло́тски/ и чре́во Твое́ бы́сть простра́ннейшее Небе́с./ Тем Тя, Богоро́дицу,/ А́нгелов и челове́к чинонача́лия велича́ют. Припев: Святи́и му́ченицы, моли́те Бо́га о на́с. Дре́вних му́жеству поревнова́в страстоте́рпцев,/ тех и зва́ния и ра́дости получи́л еси́, Фео́доре, вои́стинну./ Но нас помина́й, соверша́ющих твою́ благоче́стно па́мять святу́ю,/ я́ко име́я дерзнове́ние ко Влады́це, е́же спасти́ся нам. Припев: Святи́и му́ченицы, моли́те Бо́га о на́с. В струя́х Иорда́нских крести́выйся, крести́вшияся свои́ми кровьми́/ и Того́ сме́рти поревнова́вшия благоче́стно, в реце́ му́ченики соедини́,/ вве́рженныя главы́ к телесе́м совокупи́в/ и ты́я в приста́нище наста́вив невла́емое. Сла́ва Отцу́ и Сы́ну и Свято́му Ду́ху. Четверочи́сленная му́чеников Боже́ственная десяти́це/ с дво́ицею честно́ю, моли́теся, на Небесе́х ны́не живу́ще в ра́дости, о нас, мо́лимся,/ соверша́ющих на земли́ ва́шу всесвяту́ю и светоно́сную па́мять,/ вся́каго изба́витися обстоя́ния. И ны́не и при́сно и во ве́ки веко́в. Ами́нь. Богородичен: Зачала́ еси́, Де́во, без се́мене/ вся́ческая созда́вшего Сло́ва Бо́жия,/ кроме́ хоте́ний пло́ти;/ без истле́ния же родила́ еси́, без боле́зней ма́терних./ Тем Тя, Богоро́дицу, и язы́ком и се́рдцем испове́дающе, велича́ем. Светилен Му́чеников ка́я у́бо бу́дет сы́тость мучениколю́бцу/ па́мяти Боже́ственныя, я́ко рече́ Васи́лий пре́жде Вели́кий?/ Нам же ны́не предстои́т пе́ти Боже́ственныя му́ченики,/ два и четы́редесять,/ терпели́вно пострада́вшия за Христа́ Спа́са. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Прему́дрость Ипоста́сную, и Сло́во Пресу́щественное,/ и Врача́ теле́с и душ ро́ждшая,/ стру́пы и я́звы души́ моея́ исцели́ лю́тыя и вре́менныя/ и се́рдца моего́ ути́ши боле́зни, Де́во.