Молитвы

Кондак 1 Избранней от славнаго святаго рода иерейскаго и к лику святых сопричтенней, служительнице Божией и преславней исповеднице Христовой, преподобномученице Арсении, яко покровительнице нашей и заступнице, похвальное духовное приносим пение. Ты же, имущи дерзновение ко Господу, от всяких нас бед и болезней свободи, да со умилением и любовию зовем ти: Радуйся, преподобномученице Арсение, всехвальная исповеднице веры Православныя. Икос 1 Ангельскою ко Господу горящи любовию и образу благочестивых родителей твоих подражающи, вся прелести суетнаго мира оставила еси и на узкий и тернистый путь, ведущий в Небесное Отечество, вступила еси. Мы же, воспоминающе праведный род твой, три века усердно Богови послуживший, и множество иереев, архиреев и святителя Иова, перваго Патриарха Московскаго и всея Руси, израстивший, и воспоминающе добродетельное житие твое, мати Арсение, восхваляем тя сице: Радуйся, яко издетска Христа возлюбила еси; Радуйся, яко измлада всю себе Богу предала еси. Радуйся, добронравных родителей благочестивая дщи; Радуйся, велие их утешение. Радуйся, любовь к Церкви Христовой от них унаследовавшая; Радуйся, благословение на служение Господу от них получившая. Радуйся, от корене рода святаго доброплодная ветве; Радуйся, святителю Иову, в смутное время за веру Христову пострадавшему, уподобившаяся. Радуйся, преподобномученице Арсение, всехвальная исповеднице веры Православныя. Кондак 2 Видя Господь чистоту сердца твоего и теплую любовь ко иноческому житию, благоволи призвати тя на служение Царице Небесней, во святую обитель Воскресенско-Феодоровскую, идеже в посте и молитве неленостно подвизалася еси и жития равноангельнаго достигла еси. Сему Божию о тебе промышлению дивящеся, вопием: Аллилуйя. Икос 2 Разум богомудрый стяжала еси и велию ревность по Бозе; добродетельми, аки лествицею, от силы в силу восходила еси, проповедница благочестия воистину явилася еси. Мы же, зряще прехвальныя труды и подвиги твоя, с благоговением и радостию глаголем ти сицевая: Радуйся, во обитель святую, яже на Тезе реце, пришедшая; Радуйся, Пресвятей Владычице во обители Ея верно послужившая. Радуйся, во игумению Господем тамо возведенная; Радуйся, труды и подвиги тамо прославленная. Радуйся, суету земную ни во чтоже вменившая; Радуйся, небесная сокровища зело возлюбившая. Радуйся, благодать Духа Святаго стяжавшая; Радуйся, все упование твое на Бога возлагавшая. Радуйся, преподобномученице Арсение, всехвальная исповеднице веры Православныя. Кондак 3 Силою Христовою укрепляемая, преподобная мати, немощи телесныя небрегла еси, подвигом добрым подвизатися хотящи. Евангельстей истине поревновавши, сораспятися Господу всем сердцем возжелала еси, по пути спасения за Ним последовала еси, веру в Троицу Божественную проповедовала еси, Богу вопиющи: Аллилуйя. Икос 3 Имущи велию любовь ко Господу, всеблаженная мати, плоть свою распяла еси со страстьми и похотьми, постом и воздержанием страсти умерщвляла еси, послушанием и самоукорением наветы вражия сокрушала еси. Сего ради восхваляем тя: Радуйся, образ подвига иноческаго чрез все житие твое пронесшая; Радуйся, в ризу смирения христианскаго себе облекшая. Радуйся, хуже всех себе почитавшая; Радуйся, осуждати и укоряти других всегда избегавшая. Радуйся, чистотою сердца всех и вся удивлявшая; Радуйся, сего ради велия духовныя высоты скоро достигшая. Радуйся, от чудесных наставниц Софии и Афанасии жезл игуменский достойно приявшая; Радуйся, от них же странноприимство и попечение о сиротах унаследовавшая. Радуйся, преподобномученице Арсение, всехвальная исповеднице веры Православныя. Кондак 4 Бурю злых напастей, нестроений и искушений кротостию, молитвою и незлобием утишала еси богомудрая мати, добродетельми христианскими, аки щитом, от стрел лукаваго защищалася еси и советом святых отцев внимала еси, темже прошла еси весь путь многотруднаго иноческаго жития, подвигом мученичества той завершивши, и в обители небесныя вселилася еси, идеже вкупе со святыми поеши Богу: Аллилуйя. Икос 4 Слышаще и видяще богоугодное житие твое, преподобномученице святая, вси ближний и дальний удивляхуся смирению твоему и, приходяще во обитель сию, поучахуся словесем и подвигом твоим; с нимиже и мы , восхваляюще тя, умиленно зовем: Радуйся, яко святое игуменское послушание со смирением прияла еси; Радуйся, яко непрестанную молитву Иисусову стяжала еси. Радуйся, яко в скорбех терпение неистощимое явила еси; Радуйся, благоговейная служительнице Христова. Радуйся, яко образом жития своего на путь спасения наставляла еси; Радуйся, яко притекающих во обитель твою к покаянию призывала еси. Радуйся, явление чудное смиренномудрия и кротости; Радуйся, образе истинныя веры и чистоты. Радуйся, преподобномученице Арсение, всехвальная исповеднице веры Православныя. Кондак 5 Боготечней звезде уподобилася еси, верная служительнице Христова, просвещающи светом апостольских истин люди земли Ивановския и наставляющи их на путь спасения; темже молим тя: не остави и нас, в суете мира сего погибающих, просвети омраченная грехом сердца наша и к жизни небесней направи, научающи Спасителю мира воспевати песнь: Аллилуйя. Икос 5 Видяще людие, яко сбывается предречение Кронштадтскаго светильника, праведнаго Иоанна, благословившаго создание святыя обители сея, яже процветет, по слову его, яко крин, и зряще дары духовныя твоя, во множестве притекаху во обитель сию; ты же, мати Арсение, всех с радостию принимала еси, согревающи любовию Христовою. Ныне у бо и мы к тебе с надеждою прибегаем и твоего молитвеннаго заступлення просим, воспевающе тако: Радуйся, мысль свою в Бозе утвердившая; Радуйся, на высоту безстрастия возшедшая. Радуйся, милосердием твоим всех утешавшая; Радуйся, никогоже, приходящаго к тебе, не отринувшая. Радуйся, благочестия и добролюбия усердная насадительнице; Радуйся, сирых и убогих благая попечительнице. Радуйся, ты бо скорбь человеческую, яко свою, восприяла еси; Радуйся, яко обитель сию от бед и напастей молитвою защищала еси. Радуйся, преподобномученице Арсение, всехвальная исповеднице веры Православныя. Кондак 6 Проповедник воли божественныя бысть преподобный отец наш Серафим, преславный Саровский чудотворец, егда явися во святей обители в видениих отроковице и некоему благочестивому человеку и благослови обитель сию. Ты же, всехвальная мати, в дивных видениих сих уразумевши молитвенное заступничество преподобнаго пред Господем, исполненная духовныя радости, за вся славила еси Бога, воспевающи Ему: Аллилуйя. Икос 6 Возсия благословением Господним под всемощным Покровом Царицы Небесныя и молитвенным предстательством отца нашего преподобнаго Серафима святая обитель Воскресенско-Феодоровская, обустроенная труды и слезами монахинь богомудрых, притекших под кров ея, во еже спастися и угодити Богу. Ты же, игумение всеблагая, чад твоих молитвами неусыпными от всякого зла охраняла еси, на невидимую брань духовную укрепляла еси; сего ради воспеваем тя сице: Радуйся, благодатию Духа Святаго осиянная; Радуйся, терпеливо душная наставнице наша и заступнице. Радуйся, скорбящих скорая утешительнице; Радуйся, милостей Божиих присная ходатаице. Радуйся, людем, в суете пребывающим, правду Божию открывавшая; Радуйся, любити ближних своих с самоотвержением научавшая. Радуйся, терпения, незлобия и безгневия учительнице; Радуйся, истинныя Веры поборнице и христианских добродетелей наследнице. Радуйся, преподобномученице Арсение, всехвальная исповеднице веры Православныя. Кондак 7 Восхотела еси вийти в Царствие Небесное, еже Господь обеща любящим Его, и, Божественным светом озаренная, путь спасения во исполнении евангельских заповедей духовныма очима узрела еси, и, смиренно приемши Крест, Христу последовала еси, ныне же купно со Ангелы поеши песнь Творцу: Аллилуйя. Икос 7 Новую мученицу прослави тя Господь в сонме новомучеников и исповедников Российских, егда велия скорбь прийде во отечество твое. Болезньми и гладом в узилищах изнуряемая, Христу даже до смерти верна пребыла еси и тем исполнила еси вся, елико заповеда нам Господь во святем учении Своем; мы же поклоняемся честным страданием твоим и воспеваем ти таковая: Радуйся, святая мученице, за веру Христову тяжкая страдания претерпевшая; Радуйся, безсильныя злобы богоборцев не устрашившаяся. Радуйся, скорби, Господем низпосланныя, с народом своим разделившая; Радуйся, гонения, яко наказание Божие, за отступление от веры Христовы попущенное, со смирением приявшая. Радуйся, Господа Вышняго верная служительнице; Радуйся, славы Божия дерзновенная проповеднице. Радуйся, евангельских истин усердная насадительнице; Радуйся, правды Божия утверждение и Царства Христова наследнице. Радуйся, преподобномученице Арсение, всехвальная исповеднице веры Православныя. Кондак 8 Странное зело и страшное узрела еси, чадолюбивая мати, егда ополчи враг рода человеческаго злобу людей безбожных на веру Православную: разорение обители сея, гонение, заточение, поношение, мучение и погубление безвинных чад твоих. Мы же, со слезами и благоговением воспоминающе сицевыя доблестныя подвиги вашего исповедничества, славим Дивнаго во святых Своих Господа и вопием Ему: Аллилуйя. Икос 8 Всем сердцем Богу предалася еси и всею душею Того возлюбила еси, преподобная мати, ничтоже предпочитавши паче любве Христовы, преходящи путь земный, по учению апостола, в Дусе Святе, в силе Божией, с оружием правды в деснице и шуйце. Того ради услыши от нас, тщащихся подражати ти, похвалы сия, с любовию возносимый; Радуйся, яко истинную ко Господу любовь показала еси. Радуйся, яко в долгих испытанию; непоколебима пребывала еси. Радуйся, тесноту и поругания за Христа, яко Божие изволение, претерпевшая; Радуйся, по слову апостола, силу Божию, в немощех наших совершающуюся, приявшая. Радуйся, веру Христову до смерти сохранившая; Радуйся, венца безсмертныя жизни от руки Вседержителя сподобившаяся. Радуйся, во врата райская возшедшая; Радуйся, чада духовная и по смерти твоей не оставляющая. Радуйся, преподобномученице Арсение, всехвальная исповеднице веры Православныя. Кондак 9 Всякия болезни, скорби и мученическую кончину в темнице Ивановстей кротко претерпела еси, мати Арсение, яко жертву принесши житие твое Христу Богу, Спасителю нашему, и ныне, с Невещественными в вышних предстоящи Престолу Троицы Пресвятыя, молишися о нас, вопиющи Богу: Аллилуйя. Икос 9 Витии многовещаннии не могут достойно воспети твоих благодеяний множество. Не убоялася еси, мати милосердная, во дни безбожия лютаго, странноприимное деяния совершити и гонимаго святителя Серафима, летописца Дивеевскаго, во обители святей приютила еси, исполненная любве Христовы, еже душу положити за други своя. Сему дивному мужеству твоему поем славу и величаем тя сице: Радуйся, щедрот и милостей струе неизсякаемая; Радуйся, любве и сострадания явление многочудное. Радуйся, благочестия и братолюбия хранительнице; Радуйся, в беде спасительныя руки подательнице. Радуйся, милостивых блаженство от Господа стяжавшая; Радуйся, надежду на Бога полагати научавшая. Радуйся, ближния паче себе возлюбившая; Радуйся, людем, не имевшим где главу подклонити, страннолюбивая мати явившаяся. Радуйся, преподобномученице Арсение, всехвальная исповеднице веры Православныя. Кондак 10 Спасения души своея от юности искала еси, егоже желала еси и всем человеком, сего ради в великий ангельский образ облещися удостоенная, наречена бысть Фомою, егда, тяжкому изгнанию подвергшися от власти нечестивыя, сослана бысть в землю Алма-Атинскую, в весь Каркалинскую, и тамо, силою схимы укрепленная, за весь мир молилася еси и Господа славила еси, воспвающи Ему песнь: Аллилуйя. Икос 10 Стену необоримую и ограждение нерушимое обители Воскресенско-Феодоровстей дарова тя Господь, мати Арсение, темже и мы паки и паки к заступленню твоему с верою и любовию прибегаем, да спасаемии тобою, сице глаголем: Радуйся, жезлом игуменским вся видимыя и невидимыя враги устрашающая; Радуйся, Крестом Христовым тех поборающая. Радуйся, святыя обители твоея невидимое охранение; Радуйся, от бесов и злых людей защищение. Радуйся, великаго ангельскаго образа достойная носительнице; Радуйся, схимнице благая, полков демонских сокрушительнице. Радуйся, призывающим тя неложное упование; Радуйся, Православныя веры небесное укрепление. Радуйся, преподобномученице Арсение, всехвальная исповеднице веры Православныя. Кондак 11 Пение умиленное приносим Христу Богу, прославившему тя, всехвальная мати, яко дарова нам таковую скорую во всех скорбех заступницу. Темже славим тя, просяще твоего молитвеннаго предстательства ко Господу, Емуже воспеваем: Аллилуйя. Икос 11 Светозарная свеща явися житие твое, преславная мати Арсение, во мраце безверия благодатию Божиею освещающе путь православным людем и направляюще их к свету Христову. Просвети и ныне тьму неведения, уныния и стеснения сердечнаго, находящаго на нас от маловерия и малодушия, да молитвами твоими ограждаемый, поем ти: Радуйся, учение Спасителя о блаженствах Евангельских житием своим исполнившая; Радуйся, нищету духовную стяжавшая и смиренномудрие обретшая. Радуйся, плачущая и скорбящая денно и нощно о гресех своих; Радуйся, кротостию Царствия Небеснаго достигшая. Радуйся, алчущая и жаждущая правды Божия; Радуйся, милостивая подательнице всем нуждающимся и за чистоту сердца Господа узревшая. Радуйся, миротворице, всегда готовая умирити враждующих; Радуйся, изгнанная правды Божия ради и ныне на Небесех веселящаяся. Радуйся, преподобномученице Арсение, всехвальная исповеднице веры Православныя. Кондак 12 Благодать Пресвятаго Духа стяжала еси в житии твоем за велию любовь к Отцу Небесному и к ближним своим; веруем, яко и по смерти благодать сия пребывает с тобою, сего ради молим тя: испроси у Господа Сил, да сохранит Церковь Православную от неверия и расколов, да избавит нас от всяких бед и напастей, вопиющих Ему: Аллилуйя. Икос 12 Поем дивное твое житие, угоднице Божия Арсение, ублажаем великия и преславныя твоя подвиги, почитаем мученическую кончину твою, величаем небесную славу твою, днесь бо предстоиши Престолу Вседержителя, и во умилении сердец наших похвальная зовем ти сице: Радуйся, Пресвятыя Владычицы достойная избраннице; Радуйся, почитающих светлую память твою небесная покровительнице. Радуйся, со Ангелы бо присно ликуеши; Радуйся, со святыми всеми ублажаемая. Радуйся, со святым преподобным Серафимом у Престола Божия неусыпная о нас, грешных, ходатаице; Радуйся, со святым праведным Иоанном Кронштадтским присная о нас печальнице. Радуйся, Церкве Российския преславное похваление; Радуйся, земли Ивановския предивное украшение. Радуйся, преподобномученице Арсение, всехвальная исповеднице веры Православныя. Кондак 13 О, многострадальная и славная заступнице наша, преподобномученице Арсение! Дивную икону твою с благоговением лобызаем и взываем к тебе: малое сие моление прийми от нас, недостойных чад твоих, от любве тебе нами приносимое; молися ко Господу Богу, да подаст нам грехов прощение и сподобит с тобою вкупе во обителех небесных воспевати Ему: Аллилуйя, Аллилуйя, Аллилуйя.[Се́й конда́к глаго́лется три́жды.][Далее повторяем 1‑е икос и кондак:]Икос 1 Ангельскою ко Господу горящи любовию и образу благочестивых родителей твоих подражающи, вся прелести суетнаго мира оставила еси и на узкий и тернистый путь, ведущий в Небесное Отечество, вступила еси. Мы же, воспоминающе праведный род твой, три века усердно Богови послуживший, и множество иереев, архиреев и святителя Иова, перваго Патриарха Московскаго и всея Руси, израстивший, и воспоминающе добродетельное житие твое, мати Арсение, восхваляем тя сице: Радуйся, яко издетска Христа возлюбила еси; Радуйся, яко измлада всю себе Богу предала еси. Радуйся, добронравных родителей благочестивая дщи; Радуйся, велие их утешение. Радуйся, любовь к Церкви Христовой от них унаследовавшая; Радуйся, благословение на служение Господу от них получившая. Радуйся, от корене рода святаго доброплодная ветве; Радуйся, святителю Иову, в смутное время за веру Христову пострадавшему, уподобившаяся. Радуйся, преподобномученице Арсение, всехвальная исповеднице веры Православныя. Кондак 1 Избранней от славнаго святаго рода иерейскаго и к лику святых сопричтенней, служительнице Божией и преславней исповеднице Христовой, преподобномученице Арсении, яко покровительнице нашей и заступнице, похвальное духовное приносим пение. Ты же, имущи дерзновение ко Господу, от всяких нас бед и болезней свободи, да со умилением и любовию зовем ти: Радуйся, преподобномученице Арсение, всехвальная исповеднице веры Православныя.

Кондак 1 Взбранной воеводе, Владычице Богородице, осенившей землю Череповскую дивным Своея иконы в Конечном лесу явлением, похвальное приносим пение. Ты же, Мати Божия, яко неиссякаемый источник милосердия неизреченнаго, благосклонно приими моления с любовию зовущих Ти: Радуйся, Благодатная Одигитрие, ко спасению нас направляющая. Икос 1 Архангела Михаила и пророка Илии церкви пономарю Иоанну близ села Ильинское при державе благовернаго князя Василия Московскаго явила еси на велей липе в лучах света стоящий образ Твой, Пречистая Богородице, велие радование людем сим дарова. Мы же и ныне заступление Твое и помощь зряще, благодарственно поем Ти: Радуйся, местом явления иконы Твоея Конечневский лес избравшая. Радуйся, образ Твой для возведения мыслей горе даровавшая. Радуйся, пономарю боголюбивому икону Твою дивно явивая. Радуйся, образа Твоего светоносным сиянием люди озаривая. Радуйся, северных лесов цвете благоухающий. Радуйся, чудный угле, в сердцах, яко кадильницах, любы к Богу воспламеняющий. Радуйся, кимвале, на подвиг самоотвержения Христа ради призываяй. Радуйся, нищих духом ризою Своею покрываяй. Радуйся, Славу Божию зрящая. Радуйся, звездо, в тихую пристань ладьи душ наших приводящая. Радуйся, скорбящих утешающая. Радуйся, с нами непрестанно пребывающая. Радуйся, Благодатная Одигитрие, ко спасению нас направляющая. Кондак 2 Видя образ Твой на древе, пономарь помолися и отиде от него, помышляя идти к дому, и, походив много, паки к тому же древу и иконе Твоей прииде. И тако сотворив двукратно, дивящеся сему, возопи Богу: Аллилуиа. Икос 2 Разумев Иоанн, яко сила Божия его водяши, возрев благоговейно на образ светозарный, со страхом взем икону Твою, Мати Божия, и успешно дому достигнув, постави ю в церкви архангела Михаила, поведав о том иерею Андрею. Мы же водительству Твоему, Дево, умиляющеся, с радостию воспеваем Тя тако: Радуйся, исполненная Хлеба жизни вечныя всезлатая стамно. Радуйся, вразумивая заблудшаго пономаря Иоанна. Радуйся, малодушных в вере утверждение. Радуйся, земли Череповской покров и ограждение. Радуйся, к Богу Путеводительнице. Радуйся, христолюбцев Покровительнице. Радуйся, скорбящих попечение. Радуйся, любы Божией водворение. Радуйся, лиро благозвучная, от сна греховнаго нас пробуждающая. Радуйся, мреже дивная, впадших в тяжкие грехи отчаяния исхищающая. Радуйся, враждующих примирение. Радуйся, кающихся исправление. Радуйся, Благодатная Одигитрие, ко спасению нас направляющая. Кондак 3 Сила Божия изнесе икону Твою из церкви и постави паки на липу. Иерей же Андрей и пономарь Иоанн образа Твоего на утро в церкви не обряще, недоумеваху о сем. Прииде же с надеждою в Конечный лес и зде икону Твою стоящу на том же древе узревше, со умилением воспеша Богу: Аллилуиа. Икос 3 Имея велию любовь ко Господу и к Тебе, Всепетая Мати, иерей Божий Андрей помыслив, яко иконе место в церкви есть, с трепетом взем образ Твой и паки постави его в церковь Архангела Михаила, да чествуют люди зде Тя, Дево Пречистая, и с верою зовут Ти: Радуйся, наставнице смирения. Радуйся, трудящимся вспоможение. Радуйся, печали от сердец прогнание. Радуйся, просвещающая светом истинного знания. Радуйся, от враг видимых и невидимых избавление. Радуйся, в добротолюбии руковождение. Радуйся, в мире и любви домы наша сохраняющая. Радуйся, земли Череповские оберегающая. Радуйся, любочестия проповеднице. Радуйся, безмолвников собеседнице. Радуйся, странствием иконы учивши на земли, яко гость жити. Радуйся, наставляющая паче всех и вся Бога любити. Радуйся, Благодатная Одигитрие, ко спасению нас направляющая. Кондак 4 Буря недоумений смути умы людския, егда наутро не обретоша паки иконы Твоея в церкви, и трепет объя сердца, бо человеки разумеша, яко сие есть дело Божие, и прославиша Господа, с ликованием пояша Владыце всех: Аллилуиа. Икос 4 Слышав глас иерея Андрея паки в лес Конечный идти, христолюбцы со свещами и кандилы пришедша на место явления и узреша икону Твою на той же липе стоящу, и пав пред ней на колена со слезами взываша к Ти: «Владычице, Мати Христа, Бога нашего, не прогневайся на ны, недостойныя!» Тако ныне и мы, грешницы, Пресвятая Богородице, зовем Ти: Радуйся, даром образа Твоего человеколюбие Сына явившая. Радуйся, по заповеди Христовой всех любившая. Радуйся, заблудших вразумление. Радуйся, унывающих ободрение. Радуйся, тщеславие, яко Даниил льва, укрощающая. Радуйся, злыя навыки победити помогающая. Радуйся, возвращением образа на липу волю Свою людем открывая. Радуйся, щедротно земли Череповския посетивая. Радуйся, страждущих укрепление. Радуйся, печальных увеселение. Радуйся, в искушении терпения исполняющая. Радуйся, боголюбцам двери райския отверзающая. Радуйся, Благодатная Одигитрие, ко спасению нас направляющая. Кондак 5 Боготечней звезде подобна явися пречестная икона Твоя, всеблагая Мати, любовию Твоею, яко чудными лучами, лес Конечный осиявши, да познают люди милосердие к ним Сына Твоего и поют Ему: Аллилуиа. Икос 5 Видети восхотевши образ Твой, Богородительнице, слепая от рождения девица Феодосия, целовавши икону Твою, моляшеся усердно о сем Ти и в той час прозреша очи ея. Яко исцелила еси Феодосию, тако избави слепоты духовныя всех поющих Ти: Радуйся, Спасителя людем родившая. Радуйся, чудным рождеством Эммануила и ангел, и человек удивившая. Радуйся, отроча Иисуса Христа воспитавшая. Радуйся, образ веры и любы людем давшая. Радуйся, прозрение ослепленных. Радуйся, отрадо обремененных. Радуйся, воздыханием и плачу человек с любовию внимающая. Радуйся, росою молитв пламень наших страстей угасающая. Радуйся, добродетельми, яко небо звездами, украшенная щедро. Радуйся, наставляющая служити Сыну верно. Радуйся, недугов душ и телес наших Целительнице. Радуйся, усердная к Богу о всех, зовущих Ти, Молитвеннице. Радуйся, Благодатная Одигитрие, ко спасению нас направляющая. Кондак 6 Проповедницею Твоего благоутробия икона Воронинская явишася, потоки чудес от нея, яко ручьи от езера источающи, подвигая скорою помощию молящимся Ти пети Богу, давшему людем таковую Заступницу: Аллилуиа. Икос 6 Возсия в Конечном лесу, яко солнце пресветлое, икона Твоя Воронинская, истинный свет – Христа людем показавшая, многими исцелениями взывающих пред ней к Ти Богом прославленная, да разумеют вси любовь Твою, да подражают ей, на помощь зовя Тя тако: Радуйся, чудным явлением образа на липе люди удивившая. Радуйся, перемещениями иконы к вере мнози обратившая. Радуйся, тихое житие нам дарующая. Радуйся, любящим Сына Твоего щедроты источающая. Радуйся, от волков мысленных наша Стражнице. Радуйся, Агнца Божия рождшая, Агнице. Радуйся, послушанием Богу красная. Радуйся, горлице кроткая и Богогласная. Радуйся, кампане дивный, Евангелие благовествующий. Радуйся, родник воды живыя недужных врачующий. Радуйся, в горнее Отечество вшедшая Страннице. Радуйся, пред Сыном о роде христианском Ходатаице. Радуйся, Благодатная Одигитрие, ко спасению нас направляющая. Кондак 7 Хотя волю Матери Божией исполнити, иерей Андрей со христолюбцы на месте явления образа Твоего часовню поставиша и икону Твою тамо оставиша, да поют зде верные Богу: Аллилуиа. Икос 7 Новые и новые люди притекоша к иконе Твоей, именуемою Воронинскою, болезней избавления прося. Хромии и слепии исцеляхуся, недуги молитвою Твоею прогоняхуся, и слава о Тебе скоро тече в дальние края, дабы везде Тебе воспеваша сицевая: Радуйся, мнози знамения от иконы Твоея силою Божию сотворившая. Радуйся, отчаявшихся радостью о Христе веселившая. Радуйся, пустыя и суетныя мысли из умов наших изгоняющая. Радуйся, ходатайством к Сыну жизни вечныя сподобляющая. Радуйся, и до Рождества, и по Рождестве Дево Непорочная. Радуйся, от стрел лукаваго броня прочная. Радуйся, учащая во всех бедах за помощью прибегати к Сыну. Радуйся, ходатайствующая пред Богом людем мирную кончину. Радуйся, страстей укрощение. Радуйся, обиженных заступление. Радуйся, болезни терпети с благодарением помогающая. Радуйся, заре, грешникам путь к покаянию освещающая. Радуйся, Благодатная Одигитрие, ко спасению нас направляющая. Кондак 8 Странное чудо явления иконы Твоея, Пречистая Дево, умы удивляет. Трикратное обретение Ея людьми сердца радостию исполняет, вдохновляя непрестанно промышляющему о спасении человек Богу пети: Аллилуиа. Икос 8 Всем с верою к иконе Твоея притекающим вся, яже ко спасению, даровала еси, Мати Господа нашего Иисуса Христа, тако и пришедшему к Ти иноку Марко Вороне благоволила еси устроити на месте явления образа Твоего монастырь в честь честнаго Твоего Успения, да возносятся и зде молитвы к Ти таковая: Радуйся, Мати Божия любвеобильная. Радуйся, Духом Святым сильная. Радуйся, радушно сретившая иноков Борисоглебскаго монастыря. Радуйся, бо на служение Сыну Твоему к церкви Успения Твоего притекоша братия. Радуйся, Скрижале, показавшая Бога премудрое о людех попечение. Радуйся, истинного богопочитания утверждение. Радуйся, споспешнице ревнителей равноангельнаго жития. Радуйся, Рождеством Твоим избавившая человек от смерти и проклятия. Радуйся, христоподражателей Помощнице. Радуйся, молитв исполненная кошнице. Радуйся, чудный Храме Спасов, Чертог Многоценный. Радуйся, носившая во чреве Плод благословенный. Радуйся, Благодатная Одигитрие, ко спасению нас направляющая. Кондак 9 Всякий с древних лет зовет явленную в Конечном лесу икону Твою Воронинскою по имени Марка Вороны, на месте дивнаго явления чудотворнаго образа Твоего монастырь Успенский основавшаго, дабы зде иноки спасахуся, непрестанно умы к небу возводяще, поюще Богу: Аллилуиа. Икос 9 Ветии многовещаннии не возмогут изъяснити исчезновение из монастыря иконы Твоея, при пожаре безвестным похищенной. Плачу людей о потере внявши, Ты не оставила еси скорбящих человек Своим заступлением, кое и мы ныне с благодарностию приемляще, поем Ти: Радуйся, радость явлением иконы Твоея людем принесшая. Радуйся, печалью об утрате Твоего образа двери покаяния многим отверзшая. Радуйся, пречестная отрасль праведных Иоакима и Анны. Радуйся, сосуде Божественной манны. Радуйся, воздерженников славо. Радуйся, смиряющих себе забрало. Радуйся, Раю Небесный. Радуйся, прошедшая со Христом путь крестный. Радуйся, исчезновением образа о временности сего жития напомнившая. Радуйся, духовными познаниями сердца ищущих Бога наполнившая. Радуйся, лампадо дивная, елей любы обильно источающая. Радуйся, житием Твоим и нас на подвиги вдохновляющая. Радуйся, Благодатная Одигитрие, ко спасению нас направляющая. Кондак 10 Спасти хотя чтущих Тя от скорби утраты иконы Твоея Воронинския, Всемилостивый Господь яви людем образ Твой потерянный в древней книге, да возрадуются человеки, да славят Тя, Матерь Божию, и поют Богу: Аллилуиа. Икос 10 Стеною крепкою, от бед и козней вражиих ограждающей, Ты, Мати Божия, всем нам буди, и, яко в доме апостола Иоанна Богослова, с нами поживи, любити Сына Твоего и творити заповеди Господни наставляя всех зовущих Ти: Радуйся, Божие к людем благоволение. Радуйся, Премудрости Творца откровение. Радуйся, творити волю Божию, а не свою, избравая. Радуйся, в Сыне Твоем Бога познавая. Радуйся, образе чистоты и пощения. Радуйся, меде небесный, горечь обид претворяющий в сладость прощения. Радуйся, любы ко Господу являти исполнением заповедей Его наставляющая. Радуйся, плевелы с полей душ наших исторгающая. Радуйся, мужество терпящих поношение. Радуйся, наказание впадших в самомнение. Радуйся, лебедю, кровом крылу Твоею род человеческий, яко птенцы, покрывающая. Радуйся, на камени веры стопы наша утверждающая. Радуйся, Благодатная Одигитрие, ко спасению нас направляющая. Кондак 11 Пение хвалебное приносяше Ти, Мати Божия, молим: смиренномудрыми и кроткими, яко Сын Твой, нам быти помози, да в любви и мире поживем, едиными усты поя Богу: Аллилуиа. Икос 11 Светозарная икона Твоя, Мати Света Невечерняго, сияя сквозь века, просвещает умы наша, суетою омраченныя, наставляя на путь истинный. Посему икону Твою, яко Тя, зовем Одигитрия. Тако, Путеводительнице, к Богу и Горнему Иерусалиму возводи всех, зовущих Ти: Радуйся, наше упование. Радуйся, дев величание. Радуйся, окамененных сердец умиление. Радуйся, очей души просвещение. Радуйся, кротких радосте. Радуйся, молитвенников сладосте. Радуйся, богатства и славы презрение. Радуйся, гордых смирение. Радуйся, богоугоднаго жития устроительнице. Радуйся, ищущим Солнца Правды световодительнице. Радуйся, крине, благовонием молитв сердца услаждающий. Радуйся, щите, от козней бесовских нас ограждающий. Радуйся, Благодатная Одигитрие, ко спасению нас направляющая. Кондак 12 Благодать Святаго Духа испроси нам у Сына Твоего, Богородительнице, и всесильную руку помощи простри всем просящим, от козней бесовских ограждая, любити Бога и ближнего наставляя, вразумляя выну благодарити Владыку всех и пети Ему: Аллилуиа. Икос 12 Поюще ныне Тебе, Пресвятая Богородице, песнь хвалы и благодарения, славим Твою Матернюю Любовь к нам, грешным, и молим: Покрова Твоего не отыми от нас, прилежно поющих Ти: Радуйся, детоводительнице ко Господу усердная. Радуйся, исполнительнице Слова Божия верная. Радуйся, Ангельской чистоты стяжательнице. Радуйся, радости о Христе подательнице. Радуйся, Дево, плоть духови покорившая. Радуйся, при кресте Сына Твоего всех людей усыновившая. Радуйся, неусыпная зла и бед отгонительнице. Радуйся, любве цветов в душах наших насадительнице. Радуйся, Царице земли и небеси, щедрая на благоподания. Радуйся, смиренных ликование. Радуйся, бури страстей утишение. Радуйся, неугасимое ко Господу стремление. Радуйся, Благодатная Одигитрие, ко спасению нас направляющая. Кондак 13 О Всепетая Мати Иисуса Сладчайшаго, Пречистая Богородице Дево, приими сие малое моление наше, с верою Ти приносимое, и умоли Сына Твоего, Христа Бога нашего, да дарует нам грехов оставление, от страстей освобождение, любовию Божественною сердец исполнение, да помилует и спасет нас, и сподобит в вечном блаженстве воспевати Ему: Аллилуиа.[Се́й конда́к глаго́лется три́жды.][Далее повторяем 1‑е икос и кондак:]Икос 1 Архангела Михаила и пророка Илии церкви пономарю Иоанну близ села Ильинское при державе благовернаго князя Василия Московскаго явила еси на велей липе в лучах света стоящий образ Твой, Пречистая Богородице, велие радование людем сим дарова. Мы же и ныне заступление Твое и помощь зряще, благодарственно поем Ти: Радуйся, местом явления иконы Твоея Конечневский лес избравшая. Радуйся, образ Твой для возведения мыслей горе даровавшая. Радуйся, пономарю боголюбивому икону Твою дивно явивая. Радуйся, образа Твоего светоносным сиянием люди озаривая. Радуйся, северных лесов цвете благоухающий. Радуйся, чудный угле, в сердцах, яко кадильницах, любы к Богу воспламеняющий. Радуйся, кимвале, на подвиг самоотвержения Христа ради призываяй. Радуйся, нищих духом ризою Своею покрываяй. Радуйся, Славу Божию зрящая. Радуйся, звездо, в тихую пристань ладьи душ наших приводящая. Радуйся, скорбящих утешающая. Радуйся, с нами непрестанно пребывающая. Радуйся, Благодатная Одигитрие, ко спасению нас направляющая. Кондак 1 Взбранной воеводе, Владычице Богородице, осенившей землю Череповскую дивным Своея иконы в Конечном лесу явлением, похвальное приносим пение. Ты же, Мати Божия, яко неиссякаемый источник милосердия неизреченнаго, благосклонно приими моления с любовию зовущих Ти: Радуйся, Благодатная Одигитрие, ко спасению нас направляющая.

Кондак 1 Избранней Предвечным Царем во спасение роду христианскому Небесе и земли Царице, яко нашей несумненной Предстательнице и всемощной Заступнице, с любовию и умилением сие акафистное пение приносим: Радуйся, Пресвятая Богородице, радость духовную нам без конца подающая. Икос 1 Ангелу небесному житием своим уподобившемуся, некоему старцу, в затворе на святей горе Афонстей житие свое проводящему и пред иконою Божией Матери каждодневно акафистное пение со словами «Радуйся» возносящему, бысть иногда глас, от иконы тоя исходящий: «Радуйся и ты, старец Божий!». Сему дивному гласу внимая, и мы со благочестивым старцем Владычице Небесней воспеваем: Радуйся, от сотворения мира Богом в Невесты Себе предназначенная. Радуйся, в храме святом Его в чистоте неземной воспитанная. Радуйся, Спасительницею мира еще от пророков предсказанная. Радуйся, Материю Божиею стать удостоившаяся. Радуйся, рождеством Преславнаго Сына Своего нам радость избавления от вечной смерти принесшая. Радуйся, быть Материю всему роду христианскому Сыном Своим предуготованная. Радуйся, Пресвятая Богородице, радость духовную нам без конца подающая. Кондак 2 Видя Пресвятая Богородица, яко ужасом велиим старец объят бысть, кротким гласом глагола ему: Не убойся, обаче во обитель свою потекши, объяви братии и игумену о вразех, иже близко суть. Аще кто слаб бе в дусе терпения, да скрывается, дондеже пройдет искушение, обаче ищущие страдальческих венцев да остаются и, приим от Господа награду, воспоют Ему на небе: Аллилуиа. Икос 2 Разумом своим невозможе постигнути старец, яко икона Пресвятыя Богородицы, пред нею же он акафист в келии читаше, неведомою силою к вратам обители перенесена бысть. Падше пред образом с благоговейною молитвою, старец таже с пречистым образом на руках ко игумену явися, воспевая Деве Чистой: Радуйся, от нашествия вражия чада Своя защищающая. Радуйся, милость Свою им неустанно подающая. Радуйся, от погибели вечной души наша отводящая. Радуйся, беды великия рукою крепкою предотвращающая. Радуйся, о спасении нашем постоянно пекущаяся. Радуйся, к горнему царствию души праведные возводящая. Радуйся, Пресвятая Богородице, радость духовную нам без конца подающая. Кондак 3 Силою свыше укрепленные и к Твоему всемилостивому заступлению с верою притекшии, непреоборимая Защитнице наша, двадцать шесть сильных духом иноков, в числе коих бе и сам настоятель, пребываху в обители. Старец, ему же небесное откровение бысть, такожде пребываше купно с ними, бе бо для оных утешителем в предстоящем искушении, неустанно вопиющим к Богу: Аллилуиа. Икос 3 Имущи намерение обратити в католичество православныя христианы, врази во обитель приидоша и к башне, в ней же мужественныя иноцы пребываху, приступивши, лестными увещаниями склонити их ко отречению от православия потщахуся. Увещавая их признати папу главою вселенския церкви, латиняне за сие поборником православия всякия милости обещаху. Обаче вернии сыны своея православныя церкви непреклонными оставахуся и пред иконою Матери Божией тако моляхуся: Радуйся, от латинян наша несумненная Защито. Радуйся, в вере православной наше необоримое Укрепление. Радуйся, от ересей и лжеучений наше крепкое Ограждение. Радуйся, в тяжких бедах наше сладостное Утешение. Радуйся, в Царствие Божие наша мудрая Руководительнице. Радуйся, пред Господом наша милостивая Заступнице. Радуйся, Пресвятая Богородице, радость духовную нам без конца подающая. Кондак 4 Бурею ненависти к вере православной одержимии, православия врази башню хврастием и древом обложиша и, не медля, запалиша ю. В пламенней молитве Господу благодарение воздавши, якоже сподоби я прияти мученичестии светлыя венцы, иноцы пояху Богу: Аллилуиа. Икос 4 Слышавше милость Твою, Богородице, чрез чудотворную икону Твою явленную, ею же Ты предварила еси старца о бедствии, вернии зело обрадовани быша, яко икона Твоя таже бысть обретена невредимою под развалинами обители. Мы же, таковей велией милости Твоея дивяшеся, вопием Ти: Радуйся, яко паки на радость людем в иконе Своей явилася еси. Радуйся, яко тою иконою чудеса велии источила еси. Радуйся, Тобою бо мы в добродетелех укрепляемся. Радуйся, Твоим бо заступлением мы перед неверными похваляемся. Радуйся, Тебя бо мы пред всем миром величаем. Радуйся, на Тебя бо мы всецело уповаем. Радуйся, Пресвятая Богородице, радость духовную нам без конца подающая. Кондак 5 Боготечней звезде подобна явися икона Твоя, Приснодево Марие, во утешение и укрепление братии Зографския обители, пред нею же лампада теплится неугасимо. Иноцы за Литургиею акафистное пение пред нею возглашают, по сему она наименована «Акафистная» бысть. И познавши силу, в ней явленную Тобою, песнь благодарения возносят Богу: Аллилуиа. Икос 5 Проявив велию любовь к людям, Ты, яко нежная и заботливая Мати, явила еси еще одну Свою икону именуемую «Хилендарская», яже бысть в Афонстей Хилендарстей обители, идеже пребывают Твои иконы «Млекопитательница» и «Попская». За таковое Твое попечение о людех Своих, восхваляем Тя: Радуйся, Путеводительнице подвижников благочестивых к Горнему Царствию. Радуйся, иноков пустыннолюбивых приводящая к Небесному Иерусалиму. Радуйся, гору Афонскую благоуханием исполнившая. Радуйся, на обители Хилендарстей Твое благоволение явившая. Радуйся, душевныя и телесныя болезни иконою Твоею скоро врачующая. Радуйся, в залог милости Твоея икону Твою даровавшая. Радуйся, Пресвятая Богородице, радость духовную нам без конца подающая. Кондак 6 Проповедует Церковь Христова чудеса Твоя, Богородице, наипаче бо чрез иконы Твоя изливаеши струи милостей и щедрот всем бедствующим и требующим помощи Твоея. Сего ради, славословяще Тя, Сыну Твоему и Богу нашему вопием: Аллилуиа. Икос 6 Возсия нам икона Твоя, Приснодево, чудом новым от нея истекшим, егда возгореся по нерадению экклесиарха иконостас, иже бысть в соборнем храме и в нем же бяше чудотворная икона Твоя. И аще иконостас едва не испепелися весь, обаче святый образ Твой, Богомати, не пострада от огня, пребывая невредимым к утешению верующих, поющих Ти: Радуйся, икону Твою честную несгораему в огни соделавшая. Радуйся, силою Божественною силу огненную погубившая. Радуйся, иконы Твоя чудотворныя, яко звезды в земле Афонстей умножившая. Радуйся, весь мир иконами Своими освятившая. Радуйся, мира излиянием от икон Твоих милосердие Твое к нам показующая. Радуйся, благодатию и славою чудес предивно сияющая. Радуйся, Пресвятая Богородице, радость духовную нам без конца подающая. Кондак 7 Хотя Человеколюбец Христос явити любовь Свою к людем, Честною Его Кровию искупленным, дарова Тебе, Матерь Свою, роду христианскому в покров и защищение. Не лиши и нас Твоего теплаго заступления, славящих пречестное имя Твое и поклоняющихся чудотворному образу Твоему, Сыну Твоему зовущих: Аллилуиа. Икос 7 Новое и предивное чудо яви Акафистная икона Твоя, Пресвятая Богородице, бысть бо от нея откровение святому Савве Сербскому о сокровище, иже бе близ святыя обители его. Сие сокровище нашедши, обитель старец благоустрояше, славя чудную Помощницу свою: Радуйся, в нуждах наших скоро помогающая. Радуйся, на благоустроение обителей средства щедро посылающая. Радуйся, обители святыя попечением Твоим не оставляющая. Радуйся, недостающее в них присно восполняющая. Радуйся, на молитву верных паки призывающая. Радуйся, подвизатися в благочестии им неустанно помогающая. Радуйся, Пресвятая Богородице, радость духовную нам без конца подающая. Кондак 8 Странное чудо зрим о Тебе, Богомати, Ты бо от чудотворныя иконы Твоея скорую помощь верным подаеши. За сие иноцы Хилендарския обители, величая икону Твою Акафистную еще и Скоропослушницею, Господу благодарение возносят: Аллилуиа. Икос 8 Весь мир любовию Твоею объемлеши, Приснодево, в иконе Твоей приснопоклоняемей всю поднебесную обтекающи. Ты бо, якоже и Сын Твой, не хощеши смерти грешника, но еже обратитися и живу ему быти. За таковое милосердие Твое взываем Тебе сице: Радуйся, временно наказующая и вечно милующая. Радуйся, истинному покаянию нас научающая. Радуйся, в земном уделе нас не оставляющая. Радуйся, в обителях небесных нас радостно встречающая. Радуйся, спасительною истиною нас вразумляющая. Радуйся, от погибельнаго пути нас сохраняющая. Радуйся, Пресвятая Богородице, радость духовную нам без конца подающая. Кондак 9 Всяких милостей и щедрот Подательницу, немолчно Тя хвалят сердца наша, Пресвятая Богородице. Ты же буди нам Ходатаицею к Сыну Твоему в день Страшнаго Суда, воспомянув тогда грешных моления и сподобив пети Богу: Аллилуиа. Икос 9 Ветии многовещаннии не возмогут достойно воспети Твой сладостный лик, ниже изъяснити силу чудес Твоих на всякую пользу человеком являемую, мы же похвальная воспеваем Тебе сице: Радуйся, Божией воли нам тайны открывающая. Радуйся, Его праведный гнев милостивно умягчающая. Радуйся, лучами чудес Своих нас просвещающая. Радуйся, вдов и сирот покровом Своим покрывающая. Радуйся, пресветлая Божественная красото. Радуйся, богомудрых премудрая доброто. Радуйся, Пресвятая Богородице, радость духовную нам без конца подающая. Кондак 10 Спасения ищуще, к Твоему милостивому заступлению прибегаем, Милосердная Мати, и чудотворныя иконы Твоя со благоговением и верою чествуем. Темже, воспоминая неисчетная чудотворения Твоя, вопием Всемогущему Богу: Аллилуиа. Икос 10 Стено необоримая всем людем Ты еси, Пресвятая Дево. Ты бо слезы наша отираеши, мир смущенным душам нашим подавая. Ты бо не оставляеши нас в годины лихих испытаний, силы душевныя и телесныя благодатию Своею нам подкрепляя. Сего ради услыши нас, зовущих Ти: Радуйся, на земли нас не оставляющая. Радуйся, руку помощи всем призывающим Тя простирающая. Радуйся, Тебе Материю Божиею именующим непрестанно помогающая. Радуйся, в бедах на нас находящих ны укрепляющая. Радуйся, яко вся возможна Тебе нам показующая. Радуйся, путь ко спасению нам указующая. Радуйся, Пресвятая Богородице, радость духовную нам без конца подающая. Кондак 11 Пение всеумиленное пред иконами Твоими приносим Ти раби Твои, Богородице. Не презри нас, Госпоже Всемилостивая, но благопослушлива буди к нам, с верою и благоговением Твоему Божественному образу поклоняющимся и Сына Твоего восхваляющим богокрасною песнию: Аллилуиа. Икос 11 Светлыми лучами чудес Твоих, Богородице Дево, души наша светло просвещаеши, от тьмы погибельныя их исхищая. Мы же с любовию чтуще Тя, яко Матерь Сына Божия и рода христианскаго, вопием Ти: Радуйся, яко Господь с Тобою и Тобою с нами. Радуйся, яко покров Твой Святый простираеши над нами. Радуйся, яко Неопалимая Купина нетленною пребываеши. Радуйся, яко Живоносный Источник жажду вечныя правды в людех утоляеши. Радуйся, яко Цвет Неувядаемый души наша благоуханием исполняющая. Радуйся, яко Стена Нерушимая от бурь житейских нас защищающая. Радуйся, Пресвятая Богородице, радость духовную нам без конца подающая. Кондак 12 Благодать Божественную явно в чудотворных иконах Твоих пребывающую не отними от нас, Пресвятая Дево, за грехи и беззакония наша. Не остави нас Своим чудным заступлением и на Страшнем Суде Сына Твоего прощение у Господа нам исходатайствуй, да во славе неизреченней узрим Христа Бога нашего и воспоем Ему: Аллилуиа. Икос 12 Поюще песни хвалы и благодарения Тебе, Дево Всепетая, восхваляем Тя вси, яко твердую Предстательницу за нас, грешных, и покланяемся Тебе с любовию, о нас молящейся пред Господем, веруем бо и уповаем, яко испросиши нам у Него спасение и жизнь вечную, вопиющим Ти сице: Радуйся, Бога и человека соединившая. Радуйся, спасение человеческое устроившая. Радуйся, цветами добродетелей верных украшающая. Радуйся, ризою Своею с материнскою любовию их покрывающая. Радуйся, от домашния брани и вражды единокровныя миром ограждающая. Радуйся, во благих намерениях нам присно помогающая. Радуйся, Пресвятая Богородице, радость духовную нам без конца подающая. Кондак 13 О Всепетая Мати, Небесная Царице и Владычице, Дево Богородице, милостивно приняв сие акафистное пение, избави нас от всякия напасти, болезни и внезапныя смерти, и яко старцу Божию некогда «Радуйся!» возгласила еси, тако и нам возгласи: «Радуйтеся и вы, чада Божии!», вопиющим Сыну Твоему и Богу нашему: Аллилуиа. Аллилуиа. Аллилуиа.[Се́й конда́к глаго́лется три́жды.][Далее повторяем 1‑е икос и кондак:]Икос 1 Ангелу небесному житием своим уподобившемуся, некоему старцу, в затворе на святей горе Афонстей житие свое проводящему и пред иконою Божией Матери каждодневно акафистное пение со словами «Радуйся» возносящему, бысть иногда глас, от иконы тоя исходящий: «Радуйся и ты, старец Божий!». Сему дивному гласу внимая, и мы со благочестивым старцем Владычице Небесней воспеваем: Радуйся, от сотворения мира Богом в Невесты Себе предназначенная. Радуйся, в храме святом Его в чистоте неземной воспитанная. Радуйся, Спасительницею мира еще от пророков предсказанная. Радуйся, Материю Божиею стать удостоившаяся. Радуйся, рождеством Преславнаго Сына Своего нам радость избавления от вечной смерти принесшая. Радуйся, быть Материю всему роду христианскому Сыном Своим предуготованная. Радуйся, Пресвятая Богородице, радость духовную нам без конца подающая. Кондак 1 Избранней Предвечным Царем во спасение роду христианскому Небесе и земли Царице, яко нашей несумненной Предстательнице и всемощной Заступнице, с любовию и умилением сие акафистное пение приносим: Радуйся, Пресвятая Богородице, радость духовную нам без конца подающая. Молитва О Пречудная и Превысшая всех тварей Царице и Богородице, Небеснаго Царя Христа Бога нашего Мати, припадаем и поклоняемся Тебе пред святою и пречестною иконою Твоею, еюже дивныя и преславныя чудеса содеваеши! Смиренно молим Тя, всесильная рода нашего Заступнице, услыши нас и удиви на нас пребогатыя милости Твоя, и прошения наша, приносимая Тебе, яко благая Скоропослушница, исполни. Благодатию Твоею души наша освяти и не отнимай от нас покрова Своего, под ним же присно пребывая, яко Стеной Нерушимой защищени пребудем от всех бед и напастей, от всякаго врага и супостата, от всех злых козней вражиих на нас присно находящих. Благоуханием непорочной души Своея наполни души наша, да возвеселятся сердца наша, ибо несть никто в мире сем милее и прекраснее Тебе, Дево Пресвятая! Ты еси наше Богатство, Ты еси наше Сокровище, Ты еси наше Упование и наша Защито! К Тебе Единей в печалех наших притекаем и у Тебе Единей утешение получити чаем. О Всепетая Дево Богородице, не престай молитися о нас, недостойных рабех Твоих, славящих Тя и почитающих, и надежду на Тебе имущих, ныне и присно, и во веки веков. Аминь.

Глас 8 Пе́снь 1. Ирмос: Колесницегони́теля фарао́ня погрузи́ чудотворя́й иногда́ Моисе́йский же́зл, крестообра́зно порази́в и раздели́в мо́ре, Изра́иля же беглеца́, пешехо́дца спасе́, пе́снь Бо́гови воспева́юща. Припев: Святии преподобные отцы Афонстии, молите Бога о нас. Бо́же все́х, да́р словесе́ пода́ждь ми́, Твоему́ рабу́, ны́не начина́ющему хвали́ти пе́сньми и́же во Афо́нстей Горе́ просия́вшия отцы́, Твою́ во́лю испо́лнившия. Припев: Святии преподобные отцы Афонстии, молите Бога о нас. Афо́нских отце́в свято́е собра́ние, су́щии во Афо́не, пе́сньми почти́м, дру́ги Пресвяты́я Де́вы и Христа́ Бо́га рачи́тельныя уго́дники, на́ша те́плыя предста́тели и моли́твенники непреста́нныя о спасе́нии ду́ш на́ших. Припев: Святии преподобные отцы Афонстии, молите Бога о нас. Вели́кия Ла́вры свяще́ннаго созда́теля в пе́снех почита́ю, Вели́каго Афана́сия, о́браз и начерта́ние бы́вшим во Афо́не отце́м, в виде́ниих вку́пе же и дея́ниих. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богоро́дичен: Ра́дуйся, Пресвята́я Госпоже́, освяти́вшая Афо́н Твои́м прише́ствием; ра́дуйся, низложи́вшая та́мо и́долы; ра́дуйся, насади́вшая в Горе́ ве́ру и́стинную; ра́дуйся, неве́рие отту́ду отгна́вшая. Пе́снь 3. Ирмос: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ в любви́ Твое́й, жела́ний кра́ю, ве́рных утвержде́ние, Еди́не Человеколю́бче. Припев: Святии преподобные отцы Афонстии, молите Бога о нас. Преподо́бнии отцы́ Афо́нстии, вы́, от Боже́ственныя благода́ти подви́гшеся, в Горе́ свяще́нныя огра́ды соста́висте и по́мощию Богома́тере мно́жества мона́шествующих в па́житех спасе́ния воспита́сте. Но и ны́не о на́с, ва́шем ста́де, моли́те, изба́витися на́м от вся́кия ну́жды и спасти́ся душа́м на́шим. Припев: Святии преподобные отцы Афонстии, молите Бога о нас. Богосло́ва вели́каго и свяще́нный орга́н Ду́ха Свята́го я́вльшагося, Григо́рия Пала́му воспева́ю, Све́та невече́рняго зри́теля, Богосло́вия ве́рным наста́вника нело́жнаго. Припев: Святии преподобные отцы Афонстии, молите Бога о нас. Пра́ведно е́сть восхвали́ти Григо́рия друга́го, в преде́лех ла́врских све́тло пости́вшагося, и соиме́ннаго тому́ Григо́рия Боже́ственнаго, оби́тель прехва́льну себе́ воздви́гшаго. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богоро́дичен: Ра́дуйся, во жре́бий Себе́ Го́ру сию́ избра́вшая; ра́дуйся, Засту́пницею ме́ста сего́ бы́ти изво́лившая; ра́дуйся, ве́рным, пребыва́ющим зде́, Пода́тельнице земны́х бла́г; ра́дуйся, Спору́чнице ве́чнаго и́х спасе́ния. Седа́лен, гла́с 4. Ужасо́шася вку́пе вся́ А́нгелов во́инства, ви́дяще му́жество души́ и боре́ния ва́ша, я́же па́че естества́, отцы́ знаменоно́снии, ка́ко, те́лом веще́ственным обложе́ни су́ще, безпло́тныя враги́ победи́сте, и благода́рно пе́снь Го́сподеви побе́дную воспе́сте: сла́ва Тебе́, Го́споди, сла́ва Тебе́, укрепля́ющему ме́ртвенное челове́ков естество́. Богоро́дичен: Ужаса́ет вся́к у́м человеколю́бие Твое́ мно́гое, Богоотрокови́це Мари́е, е́же показа́ла еси́ чи́ну и́ноческому зде́ постя́щихся: от всея́ бо земли́ собрала́ еси́ я́ в Го́ру сию́ вели́кую и я́ко Свое́ достоя́ние мона́хом сию́ дарова́ла еси́. Вели́ко вои́стинну е́же о на́с промышле́ние Твое́, Присноде́во. Пе́снь 4. Ирмос: Ты́ моя́ кре́пость, Го́споди, Ты́ моя́ и си́ла, Ты́ мо́й Бо́г, Ты́ мое́ ра́дование, не оста́вль не́дра О́тча и на́шу нищету́ посети́в. Те́м с проро́ком Авваку́мом зову́ Ти́: си́ле Твое́й сла́ва, Человеколю́бче. Припев: Святии преподобные отцы Афонстии, молите Бога о нас. Бо́га возлюби́вше от всея́ души́, преподо́бнии, вели́кия по́двиги соверши́ли есте́, та́же бли́жняго те́пле возлюби́вше, в разли́чных ме́стех Афо́на оби́тели воздви́гли есте́ и общежи́телей мно́жества в ты́я собра́ли есте́. Моли́теся у́бо, чадолюби́вии отцы́, и на́м любве́ исполни́тельми бы́ти и спасти́ся душа́м на́шим. Припев: Святии преподобные отцы Афонстии, молите Бога о нас. Пе́сньми почита́ю настоя́теля Ватопе́дскаго Евфи́мия, и́же свя́зан бы́сть вери́гами и погрузи́ся во глубине́ морсте́й, изобличи́ же у́мысл латиному́дренных и вене́ц муче́ния от руки́ Госпо́дни неувяда́емый прия́л е́сть. Припев: Святии преподобные отцы Афонстии, молите Бога о нас. Совоспева́ю и друга́го честна́го Евфи́мия, И́верския оби́тели созда́теля, я́ко, служа́щу ему́ не́когда Бо́гу, сто́лп узре́ся от су́щих с ни́м солнцеобра́зен. И Дохиа́рскаго созда́теля пою́, друга́го па́ки преподо́бнаго Евфи́мия. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богоро́дичен: Ра́дуйся, те́плая Хода́таице о живу́щих во жре́бии Твое́м; ра́дуйся, ми́лость Сы́на Твоего́ до сконча́ния ве́ка ме́сту сему́ обеща́вшая; ра́дуйся, благода́ть Его́ неотсту́пну бы́ти предре́кшая; ра́дуйся, ра́досте и спасе́ние ду́ш на́ших. Пе́снь 5. Ирмос: Вску́ю мя́ отри́нул еси́ от лица́ Твоего́, Све́те Незаходи́мый, и покры́ла мя́ е́сть чужда́я тьма́, окая́ннаго, но обрати́ мя́ и к све́ту за́поведей Твои́х пути́ моя́ напра́ви, молю́ся. Припев: Святии преподобные отцы Афонстии, молите Бога о нас. Преподо́бнии отцы́ Афо́нстии, вы́, я́ко сла́вие сладкогла́снии, посреде́ де́брий Святы́я Го́ры живу́ще, спаси́тельным и́менем Иису́совым поуча́стеся при́сно, у́м сво́й просвеща́юще Боже́ственным све́том, се́рдца же услажда́юще отту́ду источа́ющеюся ра́достию, е́же моли́твами свои́ми и на́м подади́те, помина́ющим ва́с. Припев: Святии преподобные отцы Афонстии, молите Бога о нас. Иоаса́фа преподо́бнаго Диони́сиевы оби́тели в пе́сни похваля́ю, я́ко, ра́дуяся, кро́вь свою́ излия́л е́сть за любо́вь все́х Царя́ Христа́ и муче́ния вене́ц прия́л е́сть. Припев: Святии преподобные отцы Афонстии, молите Бога о нас. Подоба́ет вои́стинну Ка́ллиста вели́каго в пе́снех похвали́ти, му́дрый и Богодухнове́нный орга́н благода́ти, И́верския же оби́тели украше́ние и па́стыря сла́внаго. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богоро́дичен: Ра́дуйся, Де́во, я́ко благослове́нием Твои́м осени́ Го́ру си́ла Вы́шняго; ра́дуйся, вертогра́д духо́вный благода́тию Бо́жиею в насле́дии Свое́м насади́вшая; ра́дуйся, я́ко удо́лия и де́бри его́ напо́лнишася и́ноки; ра́дуйся, я́ко просия́ во Афо́не мно́жество преподо́бных, моля́щихся о спасе́нии ду́ш на́ших. Пе́снь 6. Ирмос: Очи́сти мя́, Спа́се, мно́га бо беззако́ния моя́, и из глубины́ зо́л возведи́, молю́ся, к Тебе́ бо возопи́х, и услы́ши мя́, Бо́же спасе́ния моего́. Припев: Святии преподобные отцы Афонстии, молите Бога о нас. Преподо́бнии отцы́ Афо́нстии, вы́, многоразли́чныя по́двиги соверши́вше, си́ми от Горы́ сея́ возлете́сте в го́ры Небе́сныя и, жили́ще свое́ та́мо утверди́вше, ны́не упокоева́етеся душа́ми свои́ми, я́ко златы́я и вседо́брыя голуби́цы, иде́же помяни́те и на́с, восхваля́ющих вы́. Припев: Святии преподобные отцы Афонстии, молите Бога о нас. Ла́вры свяще́нное воспита́ние пе́сньми почти́м, безпло́тнаго во пло́ти, Богоно́снаго Макси́ма, от Боже́ственнаго Ду́ха бога́тый да́р проро́чества прие́мшаго. Припев: Святии преподобные отцы Афонстии, молите Бога о нас. Ватопе́дския оби́тели почита́ю Боже́ственныя о́трасли, Неофи́та сла́внаго, гла́с услы́шавша Чи́стыя Богоотрокови́цы, и в преподо́бных просия́вшаго Никоди́ма. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богоро́дичен: Ра́дуйся, я́ко на насле́дие Твое́ при́сно призира́еши; ра́дуйся, я́ко благода́ти Бо́жия и ми́лости Своея́ сподобля́еши е́; ра́дуйся, на ка́мени за́поведей Христо́вых сердца́ рабо́в Твои́х утвержда́ющая; ра́дуйся, благослове́ние Сы́на Твоего́ на на́с низводя́щая. Конда́к, гла́с 4. Онебеси́вшия Го́ру сию́, и показа́вшия в не́й житие́ а́нгельское, и мно́жество мона́хов собра́вшия отцы́, прииди́те, благохва́лим вси́, к ни́м взыва́юще: вся́кия беды́ и искуше́ния на́с изба́вите, мно́жество преподо́бных, Афо́нская похвало́. И́кос: О, ко́ль добро́ соедине́ние ва́ше, отцы́ Богому́дрии! О, ко́ль красе́н и сла́док о́бщий се́й ва́ш пра́здник, в не́мже вси́ вы́, в Горе́ се́й просия́вшии святи́и, зна́емии ку́пно и безъиме́ннии, о́бщее хвале́ние, я́коже духо́вная бра́тия, прие́млете! Подоба́ше бо во еди́нем ме́сте Го́сподеви угоди́вшим во еди́н де́нь и пра́здновати. Сего́ ра́ди и мы́, и́же во Афо́не мона́си и мирсти́и, во еди́но собра́вшеся, по до́лгу ва́с ублажа́ем, но́вии– дре́вних и сы́нове– отце́в, согла́сно вопию́ще: ме́сто сие́, в не́мже пожи́сте, от вся́каго зла́ спаса́йте, мно́жество преподо́бных, Афо́нская похвало́. Пе́снь 7. Ирмос: О́троцы евре́йстии в пещи́ попра́ша пла́мень дерзнове́нно и на ро́су о́гнь преложи́ша, вопию́ще: благослове́н еси́, Го́споди Бо́же, во ве́ки. Припев: Святии преподобные отцы Афонстии, молите Бога о нас. Преподо́бнии отцы́, во Афо́не возсия́вшии, луча́ми доброде́телей и Боже́ственных дарова́ний озаря́ете Го́ру сию́, я́ко зве́зды многосве́тлыя, и Не́бо друго́е ме́сто по́двигов ва́ших показа́сте, разгна́вше лю́тый мра́к де́монский. Не преста́йте моля́щеся за ны́ ко Го́споду. Припев: Святии преподобные отцы Афонстии, молите Бога о нас. Еди́н от святы́х, и́же во Афо́не, показа́ся Ни́фонт Богоно́сный, и́же пти́чим житие́м живя́ше в преде́лех ла́врских и проро́ческий да́р от Бо́га прия́т. Припев: Святии преподобные отцы Афонстии, молите Бога о нас. Ни́л, ла́врский мирото́чец, и Никоди́м, Кавсокали́вский цве́т, от Христа́ возлю́блен бы́вый, но́вый му́ченик, в пе́снех и пе́ниих похвали́тася досто́йно. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богоро́дичен: Ра́дуйся, вся́ких даро́в рабо́м Твои́м Всеще́драя Пода́тельнице; ра́дуйся, во бра́ни, в боле́знех и труде́х и́х премилосе́рдая Уте́шительнице; ра́дуйся, благоде́нственное житие́ на земли́ и всеблаже́нное на Небеси́ и́м устроя́ющая; ра́дуйся, наде́ждо и спасе́ние ду́ш на́ших. Пе́снь 8. Ирмос: Седмери́цею пе́щь халде́йский мучи́тель Богочести́вым неи́стовно разжже́, си́лою же лу́чшею спасе́ны, сия́ ви́дев, Творцу́ и Изба́вителю вопия́ше: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки. Припев: Святии преподобные отцы Афонстии, молите Бога о нас. Афо́на насе́льницы и храни́телие, по Богоро́дице на́ши предста́телие и многообра́знии благоде́телие и назира́телие, столпи́ о́гненнии, стоя́щии с любо́вию и ра́достию о́крест Ма́тере Све́та, не преста́йте моля́щеся за ны́ ко Го́споду. Припев: Святии преподобные отцы Афонстии, молите Бога о нас. Молча́льником пе́рвейший во Афо́не Пе́тр почита́ется, пожи́вый жи́знию невеще́ственною и прогна́вый во пло́ти безпло́тныя де́моны, и́же на́г всю́ свою́ жи́знь прохожда́ше и даро́в Ду́ха Свята́го сподо́бися бога́тно, Богоро́дицы моли́твами. Припев: Святии преподобные отцы Афонстии, молите Бога о нас. Рома́на сла́вна, по́стников украше́ние и му́чеником Христо́вым весе́лие, почти́м в пе́снех, его́же ла́врская по́стница процвете́, я́ко шипо́к благоуха́нен. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богоро́дичен: Ра́дуйся, Храни́тельнице на́ша в настоя́щем ве́це; ра́дуйся, Предста́тельнице и непосты́дное упова́ние в бу́дущем; ра́дуйся, всему́ благо́му вхо́д се́мо подаю́щая; ра́дуйся, прило́г вся́каго зла́ от жре́бия Своего́ отража́ющая. Пе́снь 9. Ирмос: Ужасе́ся о се́м Не́бо, и земли́ удиви́шася концы́, я́ко Бо́г яви́ся челове́ком пло́тски и чре́во Твое́ бы́сть простра́ннейшее Небе́с. Те́м Тя́, Богоро́дицу, А́нгелов и челове́к чинонача́лия велича́ют. Припев: Святии преподобные отцы Афонстии, молите Бога о нас. Преподо́бнии отцы́ Афо́нстии, Цари́цы Небе́сныя ополче́ние, нача́ла тьмы́ посо́бием Ея́ победи́вшии, пло́ть умертви́вшии и ду́х оживи́вшии, благода́ти прия́вшии Боже́ственное де́йство, не преста́йте моля́щеся за ны́ ко Го́споду. Припев: Святии преподобные отцы Афонстии, молите Бога о нас. Ра́дуйся, Ватопе́дская честна́я оби́тель, обогати́вшаяся двана́десятию страда́льцы преподо́бными, и́же изобличи́ша му́жественно царя́ Михаи́ла и патриа́рха Иоа́нна латиному́дренных, те́мже и пре́дани бы́ша сме́рти удавле́ния, и сугу́быя венцы́ от Бо́га восприя́ша. Припев: Святии преподобные отцы Афонстии, молите Бога о нас. Весели́ся, И́верская честна́я оби́тель, я́ко мно́ги принесла́ еси́ Бо́гу от твои́х ча́д преподобному́ченики, и́же ве́ржени бы́ша во глубину́ морску́ю, зане́ лжеслове́сие латиному́дренных мужему́дренне изобличи́ша. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богоро́дичен: Ра́дуйся, Е́юже вся́ оби́тели Горы́ огражда́ются; ра́дуйся, Е́юже вся́ ко́зни вра́жия разруша́ются; ра́дуйся, на благоутро́бие к на́м Сы́на Своего́ приклоня́ющая: ра́дуйся, Е́юже и́мут дерзнове́ние к Нему́ раби́ Тво́й. Свети́лен. Ра́дуйся, Горо́ Афо́нская сла́вная, моли́твенники твоя́ иму́щи просия́вшия в тебе́ Богоно́сныя отцы́: дне́сь пра́здник ра́достен с насе́льники твои́ми сотво́рши, почита́й собо́р и́х. Сла́ва, и ны́не: Ра́дуйся, Присноде́во, прорече́ние Твое́ ви́дящи испо́лнено, я́ко Гора́ сия́ свята́ бу́дет, и́бо подвиза́вшиися в не́й отцы́, и́хже дне́сь почита́ем, яви́шася вои́стинну свя́ти, де́лом запечатле́вше проро́чество Твое́, Отрокови́це. Молитва всем преподобным отцам, во Святой Горе Афонской просиявшим О, блаже́ннии и святи́и отцы́, преподо́бнии, святи́телие, священному́ченицы и преподобному́ченицы, мироточи́вии и чудотво́рцы, земни́и А́нгели и Небе́снии челове́цы, сея́ Святы́я Горы́ насе́льницы и украси́телие, по Богоро́дице на́ши предста́телие пред Го́сподем, благоде́телие и назира́телие, ца́рское победоно́сное ополче́ние, в телесе́х победи́вшее безтеле́сныя де́моны, Цари́цы Небе́сныя Пречи́стыя Богоро́дицы мироуха́ннии цве́ти, светлоплодови́тая древеса́ мы́сленнаго сего́ рая́ Присноде́вы, ре́ки приснотеку́щия дарова́ний духо́вных! Приими́те похва́льная словеса́ сия́, я́же вам прино́сим, я́коже Госпо́дь прия́т вдови́цы две ле́пте, и о́бщее пра́зднество, соверша́емое на́ми в честь и па́мять ва́шу, объими́те, я́ко воню́ благоуха́ния и же́ртву благоприя́тну: не и́мамы бо и́но что принести́ по до́лгу благоде́телем на́шим за вели́кая благодея́ния, я́же прия́хом и и́мамы приити́ от вас. Ей, испове́дуем, я́ко мы грех ра́ди на́ших не́смы досто́йни жи́ти на ме́сте сем и именова́тися сынми́ ва́шими, но вы за благосе́рдие ва́ше не отрица́йтеся бы́ти нам отцы́. Не забыва́йте нас, смире́нных, но соблюда́йте свяще́нныя монастыри́ ва́ша и вся скиты́ и ке́ллии и нас, живу́щих в них, сохраня́йте и избавля́йте от вся́каго искуше́ния и напа́сти в житии́ сем, в бу́дущем же ве́це да сподо́бимся святы́ми ва́шими моли́твами блаже́нства ку́пно с ва́ми, сы́нове со отцы́ свои́ми, ста́до с па́стыри свои́ми, ученицы́ со учи́тели свои́ми, и да услы́шим от вас о́ный блаже́нный глас ко Го́споду: се мы и де́ти, я́же дал еси́ нам, Го́споди! И, ра́дующеся, воздади́м вся́кую сла́ву, честь и поклоне́ние Отцу́ и Сы́ну и Свято́му Ду́ху во ве́ки веко́в. Ами́нь.

Минея, 25 Июня, Кано́н святы́м Глас 8 Песнь 1 Ирмос: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:/ Изба́вителю и Бо́гу на́шему пои́м. Припев: Святи́и благове́рнии Пе́тре и Февро́ние, моли́те Бо́га о на́с. Песнь Твоему́ уго́днику, на земли́ Тебе́ просла́вльшему,/ Петру́ принести́, Бо́же, да́руй ми,/ я́ко да Смыслода́вца пе́сньми возвели́чу Тя. Припев: Святи́и благове́рнии Пе́тре и Февро́ние, моли́те Бо́га о на́с. Вас, преблаже́ннии, оте́честву ва́шему,/ я́ко пресве́тлое со́лнце, Христо́с показа́,/ чудесы́ всех озаря́ющее, ве́рою к вам приходя́щих. Сла́ва Отцу́ и Сы́ну и Свято́му Ду́ху. Я́ко о теле́сных небре́гше, и земна́я, я́ко тле́нная, возненави́девше,/ и сего́ ра́ди ми́ра отре́кшеся, преподо́бных че́сти сподо́бистеся,/ с ни́миже о ми́ре моли́теся. И ны́не и при́сно и во ве́ки веко́в. Ами́нь. Богородичен: Пречи́стая Богоро́дице, ро́ждшая пло́тию присносу́щное Сло́во Безнача́льнаго Отца́, Присноде́во,/ Ему́же ны́не взыва́ем:/ Изба́вителю Бо́гу на́шему пои́м. Песнь 3 Ирмос: Небе́снаго кру́га Верхотво́рче, Го́споди,/ и Це́ркве Зижди́телю,/ Ты мене́ утверди́ в любви́ Твое́й,/ жела́ний кра́ю, ве́рных утвержде́ние,/ Еди́не Человеколю́бче. Припев: Святи́и благове́рнии Пе́тре и Февро́ние, моли́те Бо́га о на́с. Безпомо́щным бу́ди помо́щник, блаже́нне Пе́тре,/ и печа́льным ми́лостивное утеше́ние,/ да, твои́ми моли́твами избавля́еми, почита́ем тя. Припев: Святи́и благове́рнии Пе́тре и Февро́ние, моли́те Бо́га о на́с. Я́коже иногда́ зми́я уби́в, коне́чному безве́стию пре́дал еси́,/ та́ко и ны́не твое́ оте́чество борю́щих победи́, треблаже́нне,/ да тя прославля́ем. Сла́ва Отцу́ и Сы́ну и Свято́му Ду́ху. Виждь уны́ние, виждь печа́ль, виждь беду́, на ны напа́дающую от проти́вных,/ те́мже моли́твою твое́ю ко Го́споду премени́, Пе́тре,/ да благоче́стно тя почита́ем. И ны́не и при́сно и во ве́ки веко́в. Ами́нь. Богородичен: Тебе́ вси стяжа́хом, христиа́не, прибе́жище и сте́ну/ и Тебе́ славосло́вим немо́лчно, Безневе́стная. Седален, глас 4 Благослове́нному и светоно́сному торжеству́,/ я́коже со́лнцу возсия́вшему, Петра́ и Февро́нии, во всем ми́ре,/ к ни́мже стеце́мся, ве́рнии, и непреста́нно вопие́м си́це:/ а́ще и преидо́сте от земли́, пресла́внии, но нас не отлучи́стеся/ и та́мо со А́нгелы Тро́ице предстоите́,/ Ю́же моли́те спасти́ ду́ши на́ша. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Сло́во О́тчее, Христа́ Бо́га на́шего, от Тебе́ воплоти́вшагося, позна́хом, Богоро́дице Де́во,/ Еди́на Чи́стая, Еди́на Благослове́нная./ Тем непреста́нно Тя, воспева́юще, велича́ем. Песнь 4 Ирмос: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́. Припев: Святи́и благове́рнии Пе́тре и Февро́ние, моли́те Бо́га о на́с. Я́ко хода́тай и засту́пник оте́честву твоему́,/ я́ко сопроти́вных реша́тель бу́ди, заступа́я лю́ди твоя́,/ тебе́, Пе́тре, сла́вящия. Припев: Святи́и благове́рнии Пе́тре и Февро́ние, моли́те Бо́га о на́с. Я́ко в Небе́сных оби́телех с преподо́бными и пра́ведными веселя́ся,/ преблаже́нне Пе́тре ку́пно с Февро́ниею,/ не преста́й моля́ о лю́дех твои́х. Сла́ва Отцу́ и Сы́ну и Свято́му Ду́ху. Тебе́ мо́лимся, преблаже́нне, сопроти́вных шата́ние низложи́/ и неду́ги челове́ков облегчи́,/ я́ко да во гла́сех хвале́ния тебе́ велича́ем. И ны́не и при́сно и во ве́ки веко́в. Ами́нь. Богородичен: Очище́ние на́шим да́руй прегреше́нием, я́ко Пребла́г,/ и умири́ мир Твой, Бо́же, моли́твами ро́ждшия Тя. Песнь 5 Ирмос: Вску́ю мя отри́нул еси́/ от лица́ Твоего́, Све́те незаходи́мый,/ и покры́ла мя есть чужда́я тьма, окая́ннаго?/ Но обрати́ мя и к све́ту за́поведей Твои́х/ пути́ моя́ напра́ви, молю́ся. Припев: Святи́и благове́рнии Пе́тре и Февро́ние, моли́те Бо́га о на́с. Земля́ освяти́ся, прие́мши честна́я телеса́ ва́ша,/ Богоблаже́ннии Пе́тре и Февро́ние,/ челове́цы же, прие́млюще ва́ми исцеле́ние, Христа́ сла́вят,/ и́скренно вас просла́вльшаго. Припев: Святи́и благове́рнии Пе́тре и Февро́ние, моли́те Бо́га о на́с. А́ще и преидо́сте от земли́, но к Небе́сным доспе́ете/ и та́мо со А́нгелы Тро́ице предста́ете,/ Ю́же моли́те спасти́ любо́вию вас почита́ющих, блаже́ннии. Сла́ва Отцу́ и Сы́ну и Свято́му Ду́ху. Я́ко зве́зды пресве́тлыя и я́ко незаходи́мое со́лнце, стяжа́вше вас,/ оте́чество ва́ше хва́лится,/ почита́юще па́мять ва́шу пречестну́ю, Пе́тре и Февро́ние. И ны́не и при́сно и во ве́ки веко́в. Ами́нь. Богородичен: Де́ву пое́м Тя по рождестве́, Богоро́дице,/ Ты бо пло́тию Бо́га Сло́ва нам родила́ еси́,/ Ему́же вси си́це зове́м:/ пути́ на́ша напра́ви, мо́лим Ти ся. Песнь 6 Ирмос: Очи́сти мя, Спа́се,/ мно́га бо беззако́ния моя́,/ и из глубины́ зол возведи́, молю́ся,/к Тебе́ бо возопи́х, и услы́ши мя,/ Бо́же спасе́ния моего́. Припев: Святи́и благове́рнии Пе́тре и Февро́ние, моли́те Бо́га о на́с. О пречестна́я дво́ице!/ О вели́цыи свети́льницы!/ Освяти́те и просла́вите любо́вию вас в пе́снех сла́вящих, чудотво́рцы. Припев: Святи́и благове́рнии Пе́тре и Февро́ние, моли́те Бо́га о на́с. Я́ко пресве́тлая дво́ице и я́ко пречестна́я верста́ и благосочета́ние,/ яре́м Госпо́день взе́мше, Тому́ от души́ порабо́тасте. Сла́ва Отцу́ и Сы́ну и Свято́му Ду́ху. Я́ко сове́тницы до́брии своему́ жити́ю,/ еди́ну мысль во двою́ те́лу иму́ще, мир чудесы́ просвеща́ете,/ те́мже и нас озари́те моли́твами ва́шими. И ны́не и при́сно и во ве́ки веко́в. Ами́нь. Богородичен: Уясня́ют проро́честии гла́си Бо́жию Тя, Де́во, Роди́тельницу,/ пое́м же Тя и мы, ви́дяще сбытие́ честны́х прорица́ний,/ де́вству вои́стинну и чистоте́ вмести́лище. Кондак, глас 8 Ми́ра сего́ княже́ние и сла́ву вре́менну помышля́я,/ сего́ ра́ди благоче́стно в ми́ре пожи́л еси́, Пе́тре,/ ку́пно и с супру́жницею твое́ю прему́дрою Февро́ниею,/ ми́лостынею и моли́твами Бо́гу угоди́вше./ Те́мже, и по сме́рти неразлу́чно во гро́бе лежа́ще,/ исцеле́ние неви́димо подава́ете,/ и ны́не Христу́ моли́теся/ сохрани́ти град же и лю́ди, и́же вас сла́вящих. Икос Уясни́ язык мой, Спа́се, и умири́ се́рдце мое́,/ разшири́ уста́ моя́ и напо́лни Ду́ха и прему́дрости,/ да и́миже возглаго́лю и воспою́ си́це Твоя́ чудотво́рцы:/ ра́дуйся, Пе́тре блаже́нне с прехва́льною Февро́ниею вку́пе./ Ра́дуйтеся, зе́мли Росси́йстей засту́пницы и князе́м правосла́вным помо́щницы./ Ра́дуйтеся, оте́честву ва́шему храни́тели и гра́ду на́шему утвержде́ние./ О пречестна́я дво́ице и благо́е сопряже́ние, Христу́ моли́теся/ сохрани́ти град и лю́ди, и́же вас сла́вящих. Песнь 7 Ирмос: От Иуде́и доше́дше, о́троцы/ в Вавило́не иногда́/ ве́рою Тро́йческою пла́мень пе́щный попра́ша, пою́ще:/ отце́в Бо́же, благослове́н еси́. Припев: Святи́и благове́рнии Пе́тре и Февро́ние, моли́те Бо́га о на́с. В боле́зни к тебе́ прибега́ющих избавля́й, пребла́женне Пе́тре/ ку́пно с Февро́ниею, Христу́ вопию́щих:/ оте́ц на́ших Бо́же, благослове́н еси́. Припев: Святи́и благове́рнии Пе́тре и Февро́ние, моли́те Бо́га о на́с. Всем приста́нище бу́дите, преблаже́ннии,/ и небу́рное оти́шие су́щим во гресе́х,/ да и мы с ва́ми Христу́ возопие́м:/ оте́ц на́ших Бо́же, благослове́н еси́. Припев: Святи́и благове́рнии Пе́тре и Февро́ние, моли́те Бо́га о на́с. Прибе́жище да ми бу́дите в день гне́ва, Богоблаже́ннии,/ я́ко посреде́ хожду́ сете́й мно́гих:/ те́мже изба́вите мя от них, да возмогу́ воспе́ти вас. Сла́ва Отцу́ и Сы́ну и Свято́му Ду́ху. Днесь пресла́вная па́мять Петра́ и Февро́нии, я́ко со́лнце, возсия́ в ми́ре,/ в ню́же соше́дшеся, вси воспое́м си́це:/ оте́ц на́ших Бо́же, благослове́н еси́. И ны́не и при́сно и во ве́ки веко́в. Ами́нь. Богородичен: Ка́пля Богото́чная, от Тебе́ ро́ждшаяся, мир освяти́, Богоро́дице Де́во:/ ка́пли мне ми́лости источи́,/ освяща́ющия ду́ши и помышле́ния земны́х. Песнь 8 Ирмос: Царя́ Небе́снаго,/ Его́же пою́т во́и А́нгельстии,/ хвали́те и превозноси́те во вся ве́ки. Припев: Святи́и благове́рнии Пе́тре и Февро́ние, моли́те Бо́га о на́с. Очи́сти и прости́ согреше́ния на́ша, Безгре́шне,/ моли́твами Твои́х уго́дник Петра́ и Февро́нии,/ да пое́м Тя, Христе́, во ве́ки. Припев: Святи́и благове́рнии Пе́тре и Февро́ние, моли́те Бо́га о на́с. И́же от сердца́ руко́ю недосто́йною приноси́мое вам хвале́ние, блаже́ннии, приими́те/ и мольбу́ сотвори́те о нас ко Христу́ Бо́гу. Сла́ва Отцу́ и Сы́ну и Свято́му Ду́ху. Троичен: Певце́м, Тебе́ пою́щим, Тро́ице Пресвята́я,/ согреше́ния оста́ви, я́ко Пребла́га,/ моли́тв ра́ди Петра́ и Февро́нии, да Тя пое́м во ве́ки. И ны́не и при́сно и во ве́ки веко́в. Ами́нь. Богородичен: Божества́ сосу́д бы́вши, Чи́стая,/ просвети́ мя в повеле́нии Све́та ходи́ти, Пречи́стая,/ от чре́ва Твоего́ возсия́вшаго и просвети́вшаго ве́рных сердца́. Песнь 9 Ирмос: Вои́стинну Богоро́дицу/ Тя испове́дуем,/ спасе́ннии Тобо́ю, Де́во Чи́стая,/ с Безпло́тными ли́ки Тя велича́юще. Припев: Святи́и благове́рнии Пе́тре и Февро́ние, моли́те Бо́га о на́с. От ю́ности ва́шея чи́стую со́весть иму́ще к Бо́гу,/ сего́ ра́ди, благоче́стно пожи́вше, к Вы́шним преидо́сте./ Моли́те Христа́ о нас, да вас любо́вию почита́ем. Припев: Святи́и благове́рнии Пе́тре и Февро́ние, моли́те Бо́га о на́с. Я́ко предстоя́ще Святе́й Тро́ице с преподо́бными и пра́ведными,/ моли́теся, блаже́ннии, изба́вити нас вся́каго преще́ния и гне́ва,/ да вас непреста́нно велича́ем. Сла́ва Отцу́ и Сы́ну и Свято́му Ду́ху. Лю́дие твои́ мо́лят тя, Богоблаже́нне Пе́тре,/ ку́пно моли́ Христа́ с прему́дрою Февро́ниею,/ с не́юже в ми́ре богоуго́дно пожи́л еси́,/ изба́вити нас от вся́ких зол. И ны́не и при́сно и во ве́ки веко́в. Ами́нь. Богородичен: О, чудесе́ вели́каго!/ Ка́ко вмести́ся во утро́бу Твою́ Христо́с Бог, ника́коже вмести́мый?/ Его́же за хва́лящия Тя умоли́, Де́во, от бед изба́вити нас/ и от беззако́нных челове́к всегда́. Светилен И́же благоче́стно пра́зднующим па́мять ва́шу, Богоблаже́ннии Пе́тре и Февро́ние,/ вку́пе ми́рно пожи́вше и благоче́стно,/ моли́те Христа́ грехо́в оставле́ние дарова́ти рабо́м ва́шим. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Пресвята́я Богоро́дице, упова́ние на́ше и похвало́,/ Тя еди́ну ве́дуще, ве́рою покланя́ющеся, мо́лим:/ ра́дуйся, Неискусобра́чная Свята́я Мари́е, покро́ве и огражде́ние на́ше/ и Помо́щница су́щим в беда́х./ Моли́ Христа́, Сына Твоего́, за рабы́ Твоя́, на Тя бо наде́емся.

Апостолов первопрестольницы/ и вселенныя учителие,/ Владыку всех молите/ мир вселенней даровати// и душам нашим велию милость.

Да торжествует Церковь Христова/ и да радуется град Москва,/ яко возсия светильник земли Российския,/ во исповедании истины непоколебимый Иов Патриарх,/ егоже молитвами. Господи,/ вся соблазны мира сего и ереси искорени,/ люди во благочестии настави/ и утверди в Православии.

Послушания добрый рачитель быв,/ безплотныя враги слезными молитвами твоими крепко посрамил еси/ и явился еси Пресвятыя Троицы жилище,/ Юже зря, блаженне, ясно,/ Богомудре Мефодие преподобне,/ чудес дар от Ней приял еси./ Темже исцелявши с верою приходящих недуги,/ утолявши скорби/ и молишися непрестанно о всех нас.

Кондак 1 Избранный угодниче Христов и дивный благочестия подвижниче, веры Православныя поборниче, от безбожников даже смерти пострадавый, песньми духовными велегласно возхваляем тя, святый отче наш Николае, Ты же, яко имеяй дерзновение ко Прославльшему тя Господу, даровавшему в тебе нам новаго предстателя и скораго в бедах помощника, молись о нас Всемилостливому Спасу, да зовем ти: Радуйся, священномучениче Николае, теплый молитвенниче о душах наших! Икос 1 Ангелов сожитель и человеков заступник воистинну явился еси, святый новомучениче Николае, благоволением всех Творца Христа Бога нашего, Егоже возлюбил еси от юности и за Него же претерпел еси (скорби многия) и кончину мученическую; ныне же престолу Вседержителя со всеми святыми предстоиши, отраду и вспоможение даруеши всем с верою и любовию вопиющим ти сице: Радуйся, в неизреченной славе Творца мира созерцающий; Радуйся, во благоухании святыни присно почивающий; Радуйся, всех приходящих к тебе благодатию озаряющий; Радуйся, от заблуждений духовных нас исцеляющий; Радуйся, любити Бога и волю Его творити нас научающий; Радуйся, в добродетели терпения нас утверждающий; Радуйся, огнем молитвы твоея стрелы вражия попаляющий; Радуйся, беды и печали от чтущих тя отгоняющий; Радуйся, священномучениче Николае, теплый молитвенниче о душах наших! Кондак 2 Видящие благосчестивыя родители твоя (,священномучениче Николае,) пресвитер Константин и матушка Надежда тя, чадо свое благочестием и богомыслием с детства Всевышним одаренное и крепкою любовию к Христовой Церкви озаренное, в радости духовней воспеваша о тебе Господеви: Аллилуйа! Икос 2 Разумом свыше просвещаем, угодниче Христов, житие добродетельное возлюбил еси; богобоязненным родителям твоим внимая, во страсе Божии и благочестии возрастал еси; к молитве и чтению книг священных навыкл еси, и во трудах твоих образ будущаго добродетельнаго жития явил еси. Мы же, дивящееся таковому от юности твоея усердию вопием ти сице: Радуйся, рода честнаго отрасле благородная! Радуйся, лозо винограда Христова многоплодная! Радуйся, чадо молитвы родителей благочестивых! Радуйся, надеждо и утешение сердец их боголюбивых! Радуйся, от малых лет сладость молитвы вкусивый! Радуйся, Божественное Писание возлюбивый; Радуйся, от юности служити Христу возжелавый; Радуйся, нелецемерную по Бозе ревность показавый; Радуйся, священномучениче Николае, теплый молитвенниче о душах наших! Кондак 3 Сила Христова осени тя, преславне Николае, и дарова ти крепость мужественне претерпети искушения врага невидимаго, его же стрелы разженные угасил еси твоими слезными к Богу молитвами. Ныне же убо, причащаяся славы небесныя со всеми новомученики российскими, предстоиши Христу – Царю Славы, воспевая: Аллилуйя! Икос 3 Имуще в боголюбивей душе твоей ревность ко Господу, не возжелал еси, богомудре Николае, учеников твоих вести на сборище нечестивое в храме поруганем совершаемое и сего ради от учительства изгнан был еси, а послеже и иные скорби многие от властителей богоборных претерпел еси. Мы же вся сия ныне поминающе, просим тя, угодниче Божий, научи и нас о едином на потребу мыслити и прими величания сия: Радуйся, века сего суемудрия отвергати нас научающий; Радуйся, от искушений и соблазнов избавляющий. Радуйся, дев и юношей в целомудрии утверждающий; Радуйся, друг друга тяготы носити нас наставляющий. Радуйся, от плевел ненависти сердца наша очищающий; Радуйся, светом любви нелицемерныя нас озаряющий. Радуйся, от греховных навыков сердца наши свобождающий; Радуйся, на милость Божию уповати нас подвизающий. Радуйся, священномучениче Николае, теплый молитвенниче о душах наших! Кондак 4 Буря скорбей и напастей, злобою мира сего воздвизаемая не ослаби крепкия любве твоея яже к Богу, угодниче Христов, вся бо с верою и надеждою претерпел еси, в Бозе токмо отраду и утешение обретая и поя Ему: Аллилуйя! Икос 4 Слышавше, святый Николае, глаголы Спасителя нашего, яко «жатва убо многа, делателей же мало» (Лк 10:2), сему поревновал еси, и, егда сан священный прияти сподобился еси; со усердием провозвещал еси учение Христово, наставляя паству твою ни одесную, ни ошую уклонятися и верность матери-церкви сохраняти; сего ради твоя пастырские добродетели хваляще, тя, Боголюбче, ублажаем и на предстательство твое уповая, вопием ти сице: Радуйся, священство, яко велий дар Господень, восприявый; Радуйся, обильно в хиротонии благословение небесное стяжавый; Радуйся, Жертву безкровную со страхом и трепетом совершавый; Радуйся, словом мудрым всех приходящих к тебе питавый; Радуйся, твердо обновленческие глашения отвергавый; Радуйся, дерзновенно расколоучителей обличавый; Радуйся, от теплохладия и маловерия нас исцеляющий; Радуйся, в вере и верности Богу нас утверждающий. Радуйся, священномучениче Николае, теплый молитвениче о спасении нашем! Кондак 5 Боготечней звезде уподбился еси, священномучениче Николае, мнозих бо к Солнцу Правды Христу путеводил еси словом твоим премудрым и примером преславнаго жития твоего, еже посвящено бысть Богу и ближним твоим. Тем же блаженство вечное со всеми святыми унаследовал еси и с ними же (предстоя престолу святыя Троицы) пение хвалебное воспеваеши: Аллилуйя! Икос 5 Видевши обителей святых разорение и закрытие, иноков честных изгнание, воскробел еси, преславне Николае, яко не возмогл еси чина ангельского обшник быти; обаче в бушующем мире душею надмирно пожил еси, труды ко трудам прилагая, подвигом добрым до конца подвизаясь. Сего ради зовем ти: Радуйся, паче всего земнаго Христа возлюбивый; Радуйся, храм Божий в сердце твоем сотворивый. Радуйся, благое иго Христово на себе восприявый; Радуйся, в житии твоем угодником Божиим подражавый. Радуйся, кающимся слезы утешительныя низпосылающий; Радуйся, тайно творити добродетели нас научающий. Радуйся, к благочестия подвигам нас призывающий; Радуйся, в кротости и смирении нас утверждающий. Радуйся, священномучениче Николае, теплый молитвениче о спасении нашем! Кондак 6 Проповедник веры Христовой и ревнитель благочестия не словом токмо, но и всем житием твоим был еси, всехвальный священномучениче Николае; тем же и Церковь Святая достойно почитает подвиги, труды и страдания твоя, иже Спасителя ради подъял еси, немолчно Господеви воспевая: Аллилуйя! Икос 6 Возсия в боголюбивой души твоей, отче Николае, свет истиннаго боговедения; ты бо, благодатию Божественною просвещаем, заповеди Христовы о любви к Богу и ближнему со усердием радостно исполнял еси. Мы же, сие ныне поминающе, молим тя, святый новомучениче, озари и нас лучами добродетелей твоих и милостиво приими величания сия: Радуйся, состраданием скорби бедствующих утолявый; Радуйся, обездоленных хлебом насущным питавый. Радуйся, веру твою делами любви утвердивый; Радуйся, образ и подобие Божие в ближнем возлюбивый. Радуйся, от похоти себялюбия нас исцеляющий; Радуйся, прощати и благословляти ближних нас научающий. Радуйся, милосердие в сердцах наших пробуждающий; Радуйся, страждущим служити нас подвизающий. Радуйся, священномучениче Николае, теплый молитвенниче о душах наших! Кондак 7 Хотяще веру Православную в веси Дровосецкой утвердити, святый отче наш Николае, крест Христов с кротостью восприял еси, укрепляя чад твоих духовных в добродетелех христианских; смирении, кротости, любви к Богу и ближнему. Мы же ныне молим тя, угодниче Христов, предстательством твоим испроси и нам сия боголюбезные добродетели; да не поработимся страстем греховным, но чистым воспоем Спасителю Нашему: Аллилуйя! Икос 7 Дивныя показа дела Своя Господь в тебе, новомучениче Николае, ибо все житие твое на земли многими печальми и болезньми исполнено бе от клеветы и досаждения, укорения и иных многих бед и напастей. Ты же, глас хулы и поношения слышавше, в Бозе духом твоим пребывал еси. Мы же ныне просим тя: вдохни в сердца наша дух любви к Богу и ближним нашим и приими милостиво величания сия: Радуйся, в кротости и смирении Христу Богу и Пречистой Его Матери подражавый! Радуйся, силою свыше на брань протву сил преисподних препоясанный! Радуйся, скорби и испытания в богатство духа претворивый; Радуйся, грешников ко исправлению направляющий! Радуйся, пламень злобный струями любве твоея угасающий! Радуйся, молитвами твоима веру нашу укрепляющий! Радуйся, помраченные умы наша просвещающий; Радуйся, окаменелыя сердца наша оживляющий; Радуйся, священномучениче Николае, теплый молитвенниче о душах наших! Кондак 8 Странно и преславно бысть житие твое, богомудре Николае, ты бо, нищету духовную паче богатств и славы мира сего возлюбивше, в подвигах молитвы и благочестия сокровище нетленное души твоея стяжал еси. Кто же убо возможет достойно воспети страдания твоя, яже Христа ради добропобедно претерпел еси. Мы же, вся сия же поминающее ныне, Богу Нашему, Дивному во святых Своих, умиленно взываем: Аллилуйя! Икос 8 Всего себе Господу предал еси, святый новомучениче Николае, егда взяша тя нечестиви и в темницу ввергоша. Ты бо благодатию Христовой укрепияем путь страданий добропобедно прошел еси. Мы же, воспоминающе о подвигах твоих, восписуем ти хваления сия: Радуйся, яко неблагомысленных наветы претерпел еси; Радуйся, яко от яростных поношения приял еси; Радуйся, неправедный приговор с кротостью приявый; Радуйся, крилами богомыслия сети вражия сокрушивый; Радуйся, заповедь Христову о любви ко врагом исполнивый; Радуйся, пастырю, за Христову веру пострадавый; Радуйся, последователю верный распятаго Учителя; Радуйся, споспешниче усердный ада Разрушителя; Радуйся, священномучениче Николае, теплый молитвенниче о душах наших! Кондак 9 Вся помыслы и все упование на Спасителя Нашего возложил еси, страстотерпче Николае, егда во узах темничных суще, от гонителей веры Православия оскорбления, надругания, заушение и биения незлобливе приял еси, моляще Всеблагаго Христа о даровании ти в муках терпения и во страданиях – укрепления. Мы же, Господа Нашего, озарившего тя светом своим во дни испытаний твоих, вопием Ему: Аллилуйя! Икос 9 Вития многовещанные не довлеют по достоянию восхвалити праведное житие и мученическую кончину твою, всехвальне Николае; обаче же мы, любовию к тебе подвизаемы и надеждою на предстательство твое окрыляемы, со смирением и верою таковые похвалы приносим ти: Радуйся, венец терновый на земли благочестно носивый; Радуйся, венец нетленный на небеси от Господа получивый. Радуйся, нужды наша ко Престолу Божиему возносящий; Радуйся, от глада духовнаго всех нас избавляющий. Радуйся, светом радости души наша озаряющий; Радуйся, суетную славу мира сего презирати нас научающий. Радуйся, отраду и утешение нам ниспосылающий; Радуйся, от напрасныя смерти нас изымающий. Радуйся, священномучениче Николае, теплый молитвенниче о душах наших! Кондак 10 Спасение и славы вечныя достигл еси, святый новомучениче, егда верности Христу ради претерпел еси страдания лютыя и смерть мученическую. Мы же, память твою святую благоговейно чтуще, просим тя, отче наш Николае, исцели недуги наши духовныя и телесныя, да и тобою Благодеющему нам Господу смиренне воспеваем: Аллилуйя! Икос 10 Царю Небесному верность во страданиях твоих сохранил еси, священномучениче Николае, во след апостолу помысляюще: «аще бо живем, Господеви живем, аще бо умираем, Господеви умираем» (Рим.14:8) и тако безбоязненно пришел еси к венцу жития твоего земнаго. Мы же, воспоминающе о подвигах твоих, восписуем ти хваления сия: Радуйся, слезами и молитвами к смерти ся предуготовивый; Радуйся, токмо во Христе Распятом отраду обретавый. Радуйся, достойно мученическую кончину приявый; Радуйся, велию верою твоею страх смертный победивый. Радуйся, кровию твоею торжество веры Христовой явивый; Радуйся, ризы твоя в крови агнчей убеливый. Радуйся, пренесением мук лютых тленная на нетленная преминивый; Радуйся, терпением твоим верных христиан возвеселивый. Радуйся, священномучениче Николае, теплый молитвенниче о душах наших! Кондак 11 Пение наше молебное не призри, святый Николае, се бо любовию подвизаемы ко святому образу твоему притекаем и просим тя: сохрани нас в вере христианской, во всяком благочестии и чистоте, да в смертнем успении нашем обрящемся достойни Господеви воспевати: Аллилуйя! Икос 11 Светоносным сиянием троическим (выну) озаренный, богоблаженне мучениче Николае, просвети и наши сердца, мглою греховною помраченныя: да елеем дел благих возжегше угасшие светильники душ наших, сподобимся внити во обители небесныя, идеже ты ныне веселишися со всеми от века Христу угодившими и слышиши от нас благохваления сия: Радуйся, во свете лица Божия присно пребывающий; Радуйся, по Бозе вся благая нам взыскущий. Радуйся, от горных высот на помощь к нам ускоряющий; Радуйся, страсти душевныя и недузи телесныя от нас удаляющий. Радуйся, о спасении нашем Спасителя умоляющий; Радуйся, милость Богородицы к нам приклоняющий. Радуйся, кротких и благих нравов благоискусный насадителю; Радуйся, нечестивых и душетленных обычаев неуклонный искоренителю. Радуйся, священномучениче Николае, теплый молитвенниче о душах наших! Кондак 12 Благодать Божию и милость нам подати, прощение грехов и исправление жития ниспослати испроси нам у Милосерднаго Господа, святый отче наш Николае, и не престай о нас пред лицем Вседержателя Бога моляще, яко стяжавый к Нему дерзновение преславное. О сем же, усердно к тебе припадающе, просим и благоумиленно зовем всех Творцу: Аллилуйя! Икос 12 Поюще пение похвальное усты недостойными, уповаем на милость Божию и твое, страстотерпче Христов Николае, заступление и предстательство за нас, многогрешных, и просим тя: не престань молитися за ны купно с всеми новомученики земли нашея, да помилует нас Господь сего предстательства ради; о сем же воздыхающе, таковые похвалы ти, святый Николае, приносим: Радуйся, со всеми святыми Престолу Божию предстоящий; Радуйся, с воинством мученическим Творцу хвалу возносящий. Радуйся, труды наша на пути спасения облегчающий; Радуйся, недугом пианства страждующих исцеляющий. Радуйся, к покаянию всех нас призывающий; Радуйся, бремя житейское носити нам облегчающий. Радуйся, милость и утешение всем верным являющий; Радуйся, милосердие Божие к нам приклоняющий. Радуйся, священномучениче Николае, теплый молитвенниче о душах наших! Кондак 13 О святый угодниче Божий новомучениче Николае, прими усердное сие моление наше, от любве душевныя тебе приносимое, и умоли Всеблагаго и Всемилостиваго Господа и Бога Нашего избавитися нам от всякого зла и напасти, да благочестне в веце нынешнем поживем и блаженство живота вечнаго молитвами твоими обрящем, о тебе же благодарственно воспевающе Господеви: Аллилуйя![Се́й конда́к глаго́лется три́жды.][Далее повторяем 1‑е икос и кондак:]Икос 1 Ангелов сожитель и человеков заступник воистинну явился еси, святый новомучениче Николае, благоволением всех Творца Христа Бога нашего, Егоже возлюбил еси от юности и за Него же претерпел еси (скорби многия) и кончину мученическую; ныне же престолу Вседержителя со всеми святыми предстоиши, отраду и вспоможение даруеши всем с верою и любовию вопиющим ти сице: Радуйся, в неизреченной славе Творца мира созерцающий; Радуйся, во благоухании святыни присно почивающий; Радуйся, всех приходящих к тебе благодатию озаряющий; Радуйся, от заблуждений духовных нас исцеляющий; Радуйся, любити Бога и волю Его творити нас научающий; Радуйся, в добродетели терпения нас утверждающий; Радуйся, огнем молитвы твоея стрелы вражия попаляющий; Радуйся, беды и печали от чтущих тя отгоняющий; Радуйся, священномучениче Николае, теплый молитвенниче о душах наших! Кондак 1 Избранный угодниче Христов и дивный благочестия подвижниче, веры Православныя поборниче, от безбожников даже смерти пострадавый, песньми духовными велегласно возхваляем тя, святый отче наш Николае, Ты же, яко имеяй дерзновение ко Прославльшему тя Господу, даровавшему в тебе нам новаго предстателя и скораго в бедах помощника, молись о нас Всемилостливому Спасу, да зовем ти: Радуйся, священномучениче Николае, теплый молитвенниче о душах наших! Молитва священномученику Николаю Красовскому О избранниче и угодниче Христов, священномучениче Николае, Церкве Русския столпе непоколебимый, земли нашея благое прозябение и красный плод, сродников твоих предстателю и наставниче! К тебе припадаем и молимся мы, смиреннии и грешнии, и, яко отца чадолюбиваго просим: всели в сердца наша любовь, еюже к Богу и ближним твоим при жизни земней преисполнен был еси, яко и душу твою положил еси, мученически пострадав. Научи нас, отче Николае, подражати тебе верно, Бога и ближних наших любити искренне и заповеди Господни совершати непогрешительно, да будем и мы с тобою чада Божия, не по имени токмо, но и самим делом и всем житием нашим. Призри благоутробно на всякую душу христианскую, милости и помощи от тебе ищущую. Буди всем нам в болезнех — целитель, в скорбех — утешитель, в печалех — избавитель, в бедах — помощник, в час смертный – покровитель, да помощию молитв твоих святых сподобимся и мы грешнии спасение вечное получити и Царствие Небесное унаследовати. Ей, страстотерпче Христов, не посрами упования нашего, еже по Бозе и Пресвятей Богородице на тя крепко возлагаем, но яви нам многомощное заступленине, да хвалим, славим и величаем человеколюбие дивнаго во святых Своих Бога, Отца и Сына и Святаго Духа, во веки веков. Аминь.

Кондак 1 Избранный от Царя сил, Господа Иисуса, предивный в житии и чудесах, угодниче Христов Лаврентие! Восхваляем тя с любовию, милостиваго предстателя нашего; ты же, блаженне, яко имеяй дерзновение ко Господу, молитвами твоими от всяких нас бед и скорбей свобождай, да зовем ти: Радуйся, блаженне Лаврентие, Калужский чудотворче. Икос 1 Ангел земный и человек небесный был еси, блаженне Лаврентие, от юности твоей юродство Христа ради себе усвоивый, да в жизни временней от всех оскорбляем и поругаем будеши, во блаженней вечности мзду небесную да обрящеши. Темже яко истинный угодник Божий от верных слышиши благохваления таковая: Радуйся, от благочестивых родителей рожденный; Радуйся, от юности на служение Богу предъизбранный. Радуйся, миру и всем прелестем его поругавыйся; Радуйся, страстем греховным неповинувыйся. Радуйся, мудрый странниче, единаго Христа любовию усердно взыскавый; Радуйся, истинный нищелюбче, во единей раздранней ризе ходивый. Радуйся, яко поругания и биения сладце Христа ради претерпевый; Радуйся, яко буйством о Христе совершенство духовное стяжал еси. Радуйся, алкавый и жаждавый на земли; Радуйся, достойно насытивыйся брашна нетленного на небеси. Радуйся, праведниче, сияяй яко солнце во Царствии Небеснем; Радуйся, угодниче Божий, прославленный многими дарами благодатными. Радуйся, блаженне Лаврентие, Калужский чудотворче. Кондак 2 Видев непостоянство мира сего, Лаврентие блаженне, юродственное Христа ради житие возлюбил еси, и среди мира пребывая, чужд мирских страстей явился еси, и яко добрый воин Христов победоносно противу врагов спасения человеческаго ратовал еси, немолчно воспевая Подвигоположнику Господу Иисусу: Аллилуиа. Икос 2 Разумел еси добре, Лаврентие блаженне, вся козни врага диавола, имиже от злых человек поруганьми и биеньми доброе твое произволение сокрушити хотяще. Темже тому крепце противустал еси и за досадителя твоя молился еси, и нас вопити тебе научил еси: Радуйся, терпения столпе непоколебимый; Радуйся, незлобия образе предивный. Радуйся, истинный Христов последователю; Радуйся, биения благодушно претерпевый. Радуйся, о укорениях и осмеяниях небрегий; Радуйся, любовию святою злобу человеческую победивый. Радуйся, в мире премирно поживый; Радуйся, во плоти ангелам подражателю. Радуйся, буйством о Христе премудрости небесныя стяжателю; Радуйся, смирением высокая приявший. Радуйся, яко подвиги твоими миру светильник явился еси; Радуйся, яко страннообразным твоим житием Бога прославил еси. Радуйся, блаженне Лаврентие, Калужский чудотворче. Кондак 3 Сила Божия осени тя, святе Лаврентие, и ратоборца крепкаго христианам противу полчищ агарянских яви тебе, егда благовернаго князя Симеона от погибели смертныя явлением твоим избавил еси, секирою супостаты поражающа и в бегство неверныя обращающа, верныя же побуждающа победную песнь Христу Богу возносити: Аллилуиа. Икос 3 Имел еси огнь любве Божественныя в сердце твоем, Лаврентие богоблаженне, и яко некий пламеннообразный Серафим, непрестанно в молитве умной пребывал еси, сердцем и душею твоею выну ко Господу Иисусу Христу возношаяся. Темже и Господь дивными дарами духовными тя обогати, да вси тебе вопиют радостно: Радуйся, воине Христов, необязываяйся куплями житейскими; Радуйся, прозорливче дивный, будущее, яко настоящее, созерцавый. Радуйся, яко любимаго ти князя Симеона от посечения смертнаго избавил еси; Радуйся, яко от псов словесных того защитил еси. Радуйся, яко явлением твоим агарян неверных устрашивый и в бегство обративый; Радуйся, силою Господа сил победу верным даровавый. Радуйся, отечества твоего земнаго Богом данный заступниче; Радуйся, православному воинству добрый соратаю. Радуйся, воеводо победоносный людем христоименитым; Радуйся, врагов Церкве Христовы грозный карателю. Радуйся, смиренным и благочестивым тихое пристанище; Радуйся, подвизающимся добрый помощниче. Радуйся, блаженне Лаврентие, Калужский чудотворче. Кондак 4 Буря агарянскаго нашествия на град Калугу тобою, святе Лаврентие, умирися, и нечестивые полцы агарян зловерных от стада Христова тобою со студом отгнани быша; тако бо дарова тя Господь заступника изряднаго отечествию твоему, в нем же до ныне славится имя твое, и подвиги твои благодарственным чествуются пением Богу: Аллилуиа. Икос 4 Слышим многая и чудная исправления твоя, о праведниче, како уединенное о Бозе житие твое при храме Рождества Христова проходил еси, пещерную стезю от келлии твоея к тому ископав, да незримый человеки Богу молитвы твои совершаеши. Сему убо смиренномудрию и нас научи, преподобне, да зовем тебе хвалебно: Радуйся, уединения любителю; Радуйся, многослезный молитвенниче. Радуйся, всякую гордыню от сердца своего отгнавый; Радуйся, христоподражательное смирение искренно возлюбивый. Радуйся, подвиги твоя молитвенные от человек утаивый; Радуйся, юродством Христа ради сия благоискусно сокрывый. Радуйся, таинниче Пресвятыя Троицы; Радуйся, созерцателю Ангельских сил. Радуйся, пещерною стезею во храм Божий ходивый; Радуйся, путем тесным пространство Царствия Христова стяжавый. Радуйся, яко дни в юродстве, а нощи в молитве препровождал еси; Радуйся, яко постом и бдением душу свою просветил еси. Радуйся, блаженне Лаврентие, Калужский чудотворче. Кондак 5 Боготечное светило быв, согражданы твоя благочестию христианскому поучал еси, Лаврентие всеблаженне, образ равноангельного жития тем показуя. Кто убо, о твоем великом терпении слыша, не умилится и совершенное смирение твое воспоминая, како обидящим, по заповеди Христа Бога, вся прощал еси и Тому во умилении глубоцем воспевал еси: Аллилуиа. Икос 5 Видим был еси от человек, яко юрод и безумен, по стогнам града в раздранней одежде ходяй, от всех поругаем, Лаврентие праведне, обаче мудр о Христе пребыл еси и сие чудесы многими проявил еси. Темже от людей благочестивых, яко истинный угодник Божий почитаем, слышал еси похвалы таковые: Радуйся, словес Апостола Павла, еже о Христе юродства, добрый последователю; Радуйся, евангельских Христовых заповедей верный исполнителю; Радуйся, хлад и зной любве ради Божия претерпевый; Радуйся, всякое упокоение плотское возненавидевый, да покой вечный наследиши. Радуйся, в мире страннообразно поживый, да отечествие горнее приобрящеши; Радуйся, биения телу твоему радостно приявый, да безсмертныя славы сподобишися. Радуйся, мужу желаний духовных; Радуйся, делателю благий винограда небеснаго. Радуйся, плоды сладкие делания твоего Христу принесый; Радуйся, временными лишеньми богатство небесное стяжавый. Радуйся, изрядный праведнаго жития рачителю; Радуйся, преподобия и чистоты ревнителю. Радуйся, блаженне Лаврентие, Калужский чудотворче. Кондак 6 Проповедник был еси покаяния грешником и обличитель прозорливый беззаконий человеческих, Лаврентие преблаженне; слово бо твое многих ко спасению приведе и на путь исправления настави, их же с любовию обличал еси и к покаянию истинному призывал еси, Богу же учил еси воспевати: Аллилуиа. Икос 6 Возсиял еси, яко звезда пресветлая, во граде Калуге, угодниче Божий, и чудес благодатию согражданы твоя просветил еси и многия болящия преславно молитвами твоими исцелил еси, и вся верныя подвизал еси звати тебе: Радуйся, верующим врачу безмездный; Радуйся, молитвенниче всесильный ко Господу Богу. Радуйся, руце твои святыя цельбоподательно на недужныя полагавый; Радуйся, единым прикосновением к одежде твоей больным здравие подававый. Радуйся, яко чудотворения твоя юродством сокрыти тщался еси; Радуйся, яко тем искушения демонския победоносно отгнал еси. Радуйся, сострадательный и милостивый страждущим помощниче; Радуйся, любвеобильный и благосердный скорбящих утешителю. Радуйся, Богу всей душею твоею прилепивыйся; Радуйся, ближняя твоя зело возлюбивый. Радуйся, присно о обидящих тя молитвы возносивый; Радуйся, кротость совершенную себе усвоивый. Радуйся, блаженне Лаврентие, Калужский чудотворче. Кондак 7 Хотение присное имел еси, святе Лаврентие, да богоугодное и праведное житие твое от человек утаится. Темже всяко тщался еси от людей юродством сие сокрыти и радовался еси безчестиям и биениям, тебе наносимым, яко даром великим, присно зовый во смирении духа песнь Богу: Аллилуиа. Икос 7 Новаго тя Андрея Цареградскаго познаем, Лаврентие блаженне, град Калугу дивным юродственным житием твоим просветившаго: дадеся бо тебе благодать от Бога помыслы человеческие познавати и согрешения тайные обличати, согражданом же твоим духовно светити и на стези покаяния и спасения тех приводити. О сем тебе восхваляюще, поем: Радуйся, яко правда твоя в мире возсия немерцаемым Божия благодати светом; Радуйся, яко тайнии подвизи твои от Бога явно чудесы прославишася. Радуйся, древним пророкам подражавый; Радуйся, прозорливец воистину неложный явивыйся. Радуйся, приявый власть на духи нечистыя; Радуйся, смирением твоим вся козни их разрушивый. Радуйся, постом и молитвою сильно на диавола вооруживыйся; Радуйся, нищетою и уничижением всю гордыню его поправый. Радуйся, на земли небесный гражданине; Радуйся, среди молвы народныя безмолвия добрый хранителю. Радуйся, землю одром упокоения имевый; Радуйся, безчестие в честь вменивый. Радуйся, блаженне Лаврентие, Калужский чудотворче. Кондак 8 Страннообразное юродственное житие твое, Лаврентие праведне, святою кончиною завершил еси, яко истинный угодник Божий, о Господе почив, душею же твоею в небесныя скинии Царствия Христова восшел еси, и тамо со святыми Пресвятой Троице сподобился еси воспевати приснохвалебную песнь: Аллилуиа. Икос 8 Весь град Калуга благоухания духовнаго в час скончания твоего исполнился, Лаврентие блаженне, и келия твоя, идеже о Господе почил еси, мироположница благоухания Христова явися, емуже благовернии людие радующеся, тебе похвальныя сия словеса воспевати научишася: Радуйся, величием чудес в житии и по смерти просиявый; Радуйся, праведно и свято житие твое совершивый. Радуйся, яко кончину твою благоуханием чудным ознаменовал еси; Радуйся, яко ароматы райскими святость души твоея показал еси. Радуйся, в сладкую воню Христову радостно востекий; Радуйся, нетленное тело твое, аки масть духовную, верным оставивый. Радуйся, град Калугу святыми мощами твоими освятивый; Радуйся, радости многим подателю. Радуйся, недугов душевных и телесных целителю; Радуйся, ближним и дальним дары целебныя подаваяй. Радуйся, чтущих тя прошения исполняяй; Радуйся, блаженне Лаврентие, Калужский чудотворче. Кондак 9 Всем людем во утешение и освящение явися святое место уединения твоего, идеже во храме Рождества Христова гроб твой честный чудеса многа и предивна силою Христовою совершает и вся верныя научает твоя богоугодныя подвиги чествовати. Богу же, прославльшему тя, пети: Аллилуиа. Икос 9 Витийство мирское недовлеет к прославлению чудес, по молитве блаженнаго Лаврентия совершаемых и разумение человеческое превосходящих, о нихже мы, смиреннии, благохвалити угодника по достоянию недоумеем, но от усердия нашего приносим ему малыя нехитростныя похвалы сия: Радуйся, угодниче Божий, со святыми почиваяй; Радуйся, избранниче Христов, земнородным милосердие твое являяй. Радуйся, расслабленныя телом здравы возставляяй; Радуйся, бесныя от насилия диавольскаго свобождаяй. Радуйся, глухим слухи отверзаяй; Радуйся, немым уста разрешаяй. Радуйся, хромым право ходити устрояяй; Радуйся, бедствующих скоропредстательный помощниче. Радуйся, скорбящих благодатный утешителю; Радуйся, града Калуги небесный покровителю. Радуйся, святыя обители твоея неустанный хранителю; Радуйся, всея земли нашея заступниче. Радуйся, блаженне Лаврентие, Калужский чудотворче. Кондак 10 Спасительную Божию благодать подаеши всем, святе Лаврентие, с недугами человеческими и с верою крепкою молитвенно притекающим к цельбоносному твоему образу. Темже и мы, припадающе, молим тя недуги наша исцелити, грехом же нашим отпущение испросити, да зовем дивному во святых Своих Богу: Аллилуиа. Икос 10 Царя Небеснаго Христа Бога истинный раб и угодник был еси, Лаврентие блаженне, и от Него чудесы прославленный, отечествию твоему земному благотворения многая являеши, больныя исцеляя, расслабленныя укрепляя, слепыя просвещая. О немже радующеся, приносим ти сия радостныя пения: Радуйся, звездо немерцающая, чудес зарею верныя озаряющая; Радуйся, правды солнца Христа луче пресветлая. Радуйся, милосердия Спасова подражателю; Радуйся, милость твою болящим человеком являяй. Радуйся, верныя души благодатью посещаяй; Радуйся, в сониих и видениих земнородныя зраком лица твоего просвещаяй. Радуйся, от горних высот к ищущим заступления твоего милостивно приникаяй; Радуйся, от очес страждущих слезы отираяй. Радуйся, области Калужския духовная красото; Радуйся, Церкви Христовы светлая похвало. Радуйся, на небеси со ангелы и святыми славою нетленною украшенный; Радуйся, на земли от правоверных по долгу ублажаемый. Радуйся, блаженне Лаврентие, Калужский чудотворче. Кондак 11 Пение молебное у гроба твоего с верою некий разслабленный приношаше, руце и нозе недвижими и язык немый имеяй, но егда к целебней раце мощей твоих прикоснулся, абие здрав соделася, руце свои простре и ногами ходити нача и языком своим ясно проглагола; темже велию твою к нему милость прославляше и благодарственно взываше ко Господу: Аллилуиа. Икос 11 Светлостью чудес твоих, угодниче Божий Лаврентие праведне, помраченныя грехми души наша озаряеши и вся ны от сна лености возбуждаеши, да плоды покаяния принесем Христу, тебе в подвизех богоугождения подражающе, яко да возможем неосужденно благохвалити тя, предстателя нашего, сими песненными глаголы: Радуйся, лампадо, светом Христовым всех просвещающая; Радуйся, елеем милости твоего сердца болезненная умащаяй. Радуйся, руце согбенная и недвижимая целы и действенны устроивый; Радуйся, нозе неходящия к скорому и правому течению претворивый. Радуйся, язык, немотою связанный, благодатно разрешивый; Радуйся, разслабленнаго всеми уды крепка и здрава возставивый. Радуйся, алавастре целебный, на всякия недуги врачевство содержаяй; Радуйся, болящим милость сострадания твоего являяй. Радуйся, по Бозе и Пресвятей Богородице упование на тя возлагающих не посрамляяй; Радуйся, любящим тя и чествующим память твою предстательством небесным воздаваяй. Радуйся, молитвенно призывающим святое имя твое на помощь ускоряяй; Радуйся, поклоняющимся с верою честным мощем твоим дары целебные независтно подаваяй. Радуйся, блаженне Лаврентие, Калужский чудотворче. Кондак 12 Благодать Божию многоцелебную, от гроба твоего источаемую, некий муж уведев, сына своего, ногами болезновавша и отнюдь ходити не могуща, на плещах своих к целебной раце твоей, святе Лаврентие, принесе и со слезами о его исцелении к тебе моляшеся; и се молитве еще сущей во устех его, больной на нозе свои ста и ходити нача, скача и благодаря Бога, в тебе славно прославльшагося, благодарными усты взывая к Нему: Аллилуиа. Икос 12 Поюще подвиги твоя предивныя и чудеса твоя преславная, Лаврентие праведне, молим тя, заступника нашего: приклонися милостивно к нашим молитвам смиренным и вознеси о нас ко Господу твоя благоприятныя молитвы, прося нам от благости Его дары благопотребныя душевному спасению нашему, да возможем и мы грешнии не токмо подвиги твоя прославляти, но и добродетелем твоим подражати, зовуще и глаголюще: Радуйся, светлый образе богоугождения в мире жительствующим; Радуйся, предивный наставниче в иночестве подвизающимся. Радуйся, девствующим подражания образе; Радуйся, нищелюбцем преуспеяния правило. Радуйся, мудрости суетныя мирския посрамителю; Радуйся, буйства о Христе благодатнаго проявителю. Радуйся, евангельских обетований наследниче; Радуйся, апостольских целебных даров преемниче. Радуйся, ангельских воинств собеседниче; Радуйся, всех святых сожителю. Радуйся, телеса наша безмездно врачуяй; Радуйся, о душах наших Господа умоляяй. Радуйся, блаженне Лаврентие, Калужский чудотворче. Кондак 13 О, предивный чудотворче и заступниче всем нам премилостивый, святе блаженне Лаврентие! Приими с любовию сие малое, в похвалу тебе приносимое моление наше и помолися ко Господу Богу о еже избавится нам геенны огненныя и мучений вечных, Царствие же Небесное вкупе с тобою унаследовати, да в радости святых воспоем и мы, грешнии, Богу Спасителю нашему: Аллилуиа.[Се́й конда́к глаго́лется три́жды.][Далее повторяем 1‑е икос и кондак:]Икос 1 Ангел земный и человек небесный был еси, блаженне Лаврентие, от юности твоей юродство Христа ради себе усвоивый, да в жизни временней от всех оскорбляем и поругаем будеши, во блаженней вечности мзду небесную да обрящеши. Темже яко истинный угодник Божий от верных слышиши благохваления таковая: Радуйся, от благочестивых родителей рожденный; Радуйся, от юности на служение Богу предъизбранный. Радуйся, миру и всем прелестем его поругавыйся; Радуйся, страстем греховным неповинувыйся. Радуйся, мудрый странниче, единаго Христа любовию усердно взыскавый; Радуйся, истинный нищелюбче, во единей раздранней ризе ходивый. Радуйся, яко поругания и биения сладце Христа ради претерпевый; Радуйся, яко буйством о Христе совершенство духовное стяжал еси. Радуйся, алкавый и жаждавый на земли; Радуйся, достойно насытивыйся брашна нетленного на небеси. Радуйся, праведниче, сияяй яко солнце во Царствии Небеснем; Радуйся, угодниче Божий, прославленный многими дарами благодатными. Радуйся, блаженне Лаврентие, Калужский чудотворче. Кондак 1 Избранный от Царя сил, Господа Иисуса, предивный в житии и чудесах, угодниче Христов Лаврентие! Восхваляем тя с любовию, милостиваго предстателя нашего; ты же, блаженне, яко имеяй дерзновение ко Господу, молитвами твоими от всяких нас бед и скорбей свобождай, да зовем ти: Радуйся, блаженне Лаврентие, Калужский чудотворче.

Кондак 1 Избранному Апостолу Христову, иерарху преславному и мученику предивному, Иакову премудрому, брату Божию блаженному похвальная восписуем, яко ходатаю и скорому помощнику нашему. Ты же, предстояй Престолу Пресвятыя Троицы, не престай молитися за ны, сохраняющи от всяких бед и зол верою празднующих память твою и зовущих: Радуйся, Апостоле Иакове, Церкви Иерусалимския первый иерарше. Икос 1 Ангелов Творец и всея твари Содетель, яви тя, Иакове, яко звезду многосветлую, на тверди церковней возсиявшую, светом Богопознания мир просвещающую и тьму лжеверия прогоняющую. Мы же, к заступлению твоему прибегающе, радостно тебе приносим сицевая: Радуйся, яко брат Господень по плоти сый, ученик и самовидец неизреченных таин Его показался еси; Радуйся, Богом избранный, да людем верным тайну спасения премудро изъясниши. Радуйся, велегласно словеса Божия иудеем провозгласивый; Радуйся, сими народ Божий, от Христа отвергшийся, к покаянию призывавый. Радуйся, Церкве Иерусалимския истинный управителю; Радуйся, и всех христиан Богомудрый наказателю. Радуйся, иерарше Иерусалима дольняго, ныне во Иерусалиме горнем пребываяй; Радуйся, Жертву Безкровную принося, себе же в жертву чисту Творцу и Царю уготовавый. Радуйся, Апостоле Иакове, Церкви Иерусалимския первый иерарше. Кондак 2 Видящи, издалеча прозря твое жительство, Иакове, брата тя прия Христос Человеколюбец: ты бо, старший сын праведнаго Иосифа Обручника быв, издетска, яко назорей, Богу посвящен, воздержание возлюбил еси. Нравов же твоих благостию и ума чистотою Христов показался еси ученик искренний, сего ради сподобился еси у Престола Владычня вечно воспевати: Аллилуиа. Икос 2 Разум всякий отвергше, Ирод царь искаше Младенца Иисуса, да погубит Его; и се Ангел Господень во сне явися Иосифу глаголя: «Возстав, поими Отроча и Матерь Его и бежи во Египет». Ты же, Иакове, яко сродник по плоти Иисусов сый, со Иосифом и Материю Его во Египте пребывал еси. Сего ради, приими от нас, Иакове, усердныя похвалы сия: Радуйся, яко из колена Иудова процвел еси; Радуйся, яко Иосифа праведнаго отрасль пречестная был еси. Радуйся, яко чрез Христа лицем к лицу Бога узрел еси; Радуйся, яко от Негоже благодать многу приял еси. Радуйся, яко Христовым светолитием просвещен еси; Радуйся, яко сугубыя почести от Христа сподобился еси. Радуйся, яко Христа Пастыреначальника по плоти брат был еси; Радуйся, яко Христом наследник обетований Отца Небеснаго явился еси. Радуйся, Апостоле Иакове, Церкви Иерусалимския первый иерарше. Кондак 3 Сила Вышняго постави тя, Иакове праведне, пастыреначальника и таинника, неизреченная священнодействующа Таинства в Сионе святем, егда лик Апостольский избра тя епископа перваго Церкви Иерусалимския. Ты же, Апостоле, иго Христово усердно взем, Евангелия благости Его и Царствия проповедник был еси, поя Вседержителю Богу песнь: Аллилуиа. Икос 3 Имеяй мудрость Божественную во уме своем всегда, Иакове, служение апостольское приял еси, егоже тридесять лет совершая, ко Христу вся страждущия и обременненныя приводил еси, неустанно веру спасительную во граде Святем и земле Палестинстей проповедуя и к познанию истины вся приводя. Темже тя, яко избранника Спаса нашего, славословим тако: Радуйся, Святый Град Иерусалим проповедию Слова Божия огласивый; Радуйся, велию власть от Бога приемый. Радуйся, благовестниче Агнца Божия, вземлющаго грехи мира; Радуйся, многих от народа иудейскаго во имя Отца и Сына и Святаго Духа крестивый. Радуйся, пастырю добрый и учителю святый, яко тобою Бог Церковь Свою украси; Радуйся, кладезю, из негоже воды живыя напаяемся. Радуйся, яко стопам Спаса Христа неуклонно последовал еси; Радуйся, яко Духа Божественнаго сиянием верных сердца просветил еси. Радуйся, Апостоле Иакове, Церкви Иерусалимския первый иерарше. Кондак 4 Бурю нечестия разгоняя, множество иудеев и еллинов к Церкви Христовой обратил еси, отче праведный: словом бо и житием твоим любовь велию людей иерусалимских стяжал еси, и теми ко Христу вся приводил еси, научая пети Богу: Аллилуиа. Икос 4 Слыша мудрыя слова твоя, «яко от дел оправдается человек, а не от веры токмо», гордии фарисее и книжницы распыхахуся сердцем, мнящи тя разорителя отеческих преданий быти. Мы же, учителя благочестия тя ведуще, вопием: Радуйся, яко праведным житием твоим злословныя враги посрамил еси; Радуйся, яко широтою Божественнаго разума пути вражия утеснил еси. Радуйся, яко благодатию, из уст твоих изливающеюся, веровати в Троицу Единосущную верныя научал еси; Радуйся, столпе благочестия непоколебимый и стено Церкве необоримая. Радуйся, яко возсиял еси сущим во тьме неразумия, ко благочестию всех призываяй; Радуйся, яко собранное стадо твое от волков лютых избавил еси. Радуйся, яко брат Божий, Сына Бога Вышняго добльственне на земли исповедал еси; Радуйся, Апостоле святе, мудростию обложенный и благодатию озаренный. Радуйся, Апостоле Иакове, Церкви Иерусалимския первый иерарше. Кондак 5 Боготечною звездою прошел еси житие твое, Апостоле Иакове, благоговейно служение в Церкви Иерусалимстей совершая и образ праведнаго святителя Божия собою являя. Мы же, Богу, премудрость велию тебе даровавшему и благодатными дары преизобильно тя украсившему, немолчно воспеваем: Аллилуиа. Икос 5 Видеша тя вернии людие Израилевы помощника и утешителя в скорбех и печалех: ты бо усердно молился еси о отпущении грехов народа Божия, якоже и колена твоя зело огрубеша непрестаннаго ради коленопреклонения твоего. Сего ради восхваляем тя по достоянию, яко молитвенника нашего пред Богом, взывая сице: Радуйся, житием твоим добродетельным, яко солнце светозарное, вся просвещаяй; Радуйся, презирати плоть свою и прилежати о души безсмертней научаяй. Радуйся, Божественнаго Духа благодать приемля, плевелы лжеверия попаливый; Радуйся, плоть свою духови совершенно поработивый. Радуйся, вертограда Христова делателю усердный; Радуйся, молитвенниче к Богу неустанный. Радуйся, яко союзом любве стадо твое связал еси; Радуйся, яко свет миру и соль земли явился еси. Радуйся, Апостоле Иакове, Церкви Иерусалимския первый иерарше. Кондак 6 Проповедник истинныя веры Христовы и ревнитель благочестия был еси, святителю Иакове: сего ради, Духом Святым просвещаемый, чин Божественныя Литургии мудре устроил еси, благодарению Богу за вся научаяй. И ныне с небеси на ны милостиво призираеши и преизобильно всем нам благодать подаеши от щедраго Христа Бога, Емуже со Ангелы у Престола славы Его поеши: Аллилуиа. Икос 6 Возсиял еси яко звезда утренняя Церкви Христовой ревностию о славе Божией, и, Жизнеподательным Духом законополагая и вещая неизреченныя тайны Божия, паству свою таинствы церковными и служением Божественныя Литургии освящал еси и правилам веры научал еси. Мы же тебе, Святыя Троицы служителю верному, воспеваем таковая: Радуйся, чина церковнаго благоукрасителю; Радуйся, ученьми твоими мир просветивый. Радуйся, яко Духом Святым чрез тебе свет Богопознания в мир излияся; Радуйся, яко тобою Евангелие Царствия Божия проповедася. Радуйся, яко дару совершенну от Отца светов человеком подаятися учиши яве; Радуйся, яко Божественным проповеданием твоим свет благодатный седящим во тьме греховней возсиял еси. Радуйся, яко умом чистым и святыми усты твоими спасение всем верным предложил еси; Радуйся, яко Бог Слово богатно блистании Божественныя благодати тя просвети. Радуйся, Апостоле Иакове, Церкви Иерусалимския первый иерарше. Кондак 7 Хотя положити предел бывшей распре о законе Моисеове посреде благовествующих народом языческим слово Христово, на соборе Апостольстем во граде Иерусалиме главенствуя, ты, Апостоле преславне, словесы твоими богомудрыми о спасении души христианския паки мир в Церквах водворил еси. Мы же ублажаем тя, научившаго нас право разумети учение Христово и пети Тому: Аллилуиа. Икос 7 Новаго избранника Божия видим тя, святе Иакове: ты бо мудре вразумлял еси на соборе Апостольстем о скончании времени Завета Ветхаго и о Промысле Божием о обращении и спасении народов языческих. Сего ради тебе, яко великому во иерарсех Христовых, взываем: Радуйся, Мудрость Ипостасную — Христа всем проповедавый; Радуйся, яко о спасении верою и делами благочестия не токмо иудеев, обаче и язычников научавый. Радуйся, о Христе, яко о совершении пророчеств и преданий отеческих, свидетельствовавый; Радуйся, яко седящия во тьме греховней к свету благоверия приводил еси. Радуйся, яко просветил еси мудростию твоею вся; Радуйся, кладезю истиннаго Боговедения. Радуйся, реко богоглаголивая; Радуйся, премудрости чаше, добродетельми исполненная. Радуйся, Апостоле Иакове, Церкви Иерусалимския первый иерарше. Кондак 8 Странно и предивно всем иерусалимляном бысть житие твое, священномучениче Иакове, ты бо миротворец и истолкователь Закона Божия явился еси, просвещая и вразумляя люди. Темже и нас научи пети от всего сердца Творцу и Зиждителю нашему: Аллилуиа. Икос 8 Весь освящен благодатию Духа Святаго, Церковь Иерусалимскую добре упасл еси, святе Иакове, день и нощь укрепляя новопросвещенныя в благодати Христовой. Мы же восхваляем тя, горнюю премудрость стяжавшаго, пении сими: Радуйся, яко Божественный разум стяжал еси; Радуйся, яко словесы богомудрыми люди, от неведения избавляя, ко Христу руководил еси. Радуйся, яко труды твоими к водам спасения овцы словесныя приводил еси; Радуйся, яко жребий пастырскаго о душах попечения праведно ти дадеся. Радуйся, коегождо к безропотному несению креста его наставляяй; Радуйся, яко солнце миру учении твоими возсиявый. Радуйся, искусный ловителю душ человеческих; Радуйся, Божественныя благодати светило. Радуйся, Апостоле Иакове, Церкви Иерусалимския первый иерарше. Кондак 9 Всем сердцем возлюбивый Христа Бога, яко брат Его по плоти, и о спасении творения Его ревновавый, наставлял еси народ Божий в вере христианстей: яко быти во испытаниих терпеливу, на Бога уповающе и во смирении тяготы носяще. Мы же, тобою наученнии, милосердному Человеколюбцу Богу непрестанно взываем: Аллилуиа. Икос 9 Вития многовещанныя не возмогут воспети твоея, богоблаженне Иакове, мудрости, егда вразумлял еси, яко не в единем книжнем научении и внешнем исповедании есть вера спасительная, а в вере, поспешествуемой любовию и делами во имя Христово. Мы же, тебе, яко Богомудрому наставнику, благодарно воспеваем: Радуйся, яко тело без духа мертво есть, тако и вера без дел мертва есть, возвещаяй; Радуйся, яко во искушения различная впадая, радость имети научаяй. Радуйся, яко блажен муж, иже претерпит искушения, зане приимет венец жизни, рекий; Радуйся, яко «искушение вашея веры соделовает терпение», — мудро нам глаголеши. Радуйся, яко ведущему убо добро творити и не творящему — грех есть, нас умудряеши; Радуйся, яко любы мира сего — вражда Богу есть, нас вразумляеши. Радуйся, яко молитися друг за друга, много бо может молитва праведнаго поспешествуема, нас призываеши; Радуйся, яко обративый грешника от заблуждения пути его, спасает душу от смерти, нам взываеши. Радуйся, Апостоле Иакове, Церкви Иерусалимския первый иерарше. Кондак 10 Спасти хотяй всякаго человека, грядущаго в мир, Всевидец Господь дарова ти, Иакове славне, благодать велию укрепляти обращенныя в вере: ты бо на страдания предстоящия коегождо приуготовляя, призывал еси всех к терпению и упованию на Бога, всех и вся содержащему в деснице Своей. И нас, недостойных, сподоби молитвами твоими разумно пети Богу: Аллилуиа. Икос 10 Стена необоримая Церкви Иерусалимстей был еси, священномучениче преславне, и тако научал еси люди твоя спасительней вере Христовей: «Вера бо чиста и нескверна пред Богом есть, еже посещати сирых и вдовиц в скорбех их и нескверна блюсти себе от мира». Мы же, тебе, о нас молящемуся, неустанно взываем: Радуйся, яко «суд без милости — не сотворшему милости», — рекий; Радуйся, яко «гнев мужа правды Божия не соделовает», — вразумляяй. Радуйся, яко «плод правды в мире сеется творящим мир», — научаяй; Радуйся, яко «Господь гордым противится, смиренным же дает благодать», — глаголяй. Радуйся, яко «смиритеся пред Господем, и вознесет вы», — взываяй; Радуйся, путеводителю наш к Небеси. Радуйся, слова Божия истолкователю неложный; Радуйся, на подвиг деятельныя любве подвигаяй. Радуйся, Апостоле Иакове, Церкви Иерусалимския первый иерарше. Кондак 11 Пение всеумиленное приносил еси Пресвятей Троице во вся дни земнаго жития твоего; отпавшия же от благодати вожди иудейстии, видевше, яко множество мужей и жен к Церкви Христовой прилагается твоими, всеславне Апостоле, трудами, злоумыслиша конец положити сему: нестерпим бо бысть им праведник истинный, Господу верно служащий. Нас же, святителю Иакове, благослови, укрепи и настави в вере спасительней возрастати, поюще Богу: Аллилуиа. Икос 11 Светло Пасху Христову празднуя, во дни тыя неустанно проповедал еси, Иакове, глаголы жизни вечныя во граде Иерусалимстем собравшимся коленом иудейским и язычником множеству; начальницы же иудейстии совет положиша убити тя, пастыря Града Святаго. Мы же, тебе, яко мужественному воину Христову, усердно вопием: Радуйся, истину Христову пред вожди небоязненно вещавый; Радуйся, блистанием твоим тьму неведения просветивый. Радуйся, правил церковных нелицеприятный блюстителю; Радуйся, яко тобою Церковь Христова дивно красуется. Радуйся, яко Богомудрыми ученьми умы верных к небеси возводиши; Радуйся, яко крепостию проповеди твоея прелесть лжеучителей разрушил еси. Радуйся, святый иерарше и проповедниче, многия в послушание веры уловивый; Радуйся, лучу, от Солнца Правды исходяй, всю землю просвещаяй. Радуйся, Апостоле Иакове, Церкви Иерусалимския первый иерарше. Кондак 12 Благодатию Божиею и силою, от Бога тебе дарованною, облеклся еси, страстотерпче Иакове, Христа ради готовый мучения всякия претерпети, егда лестию поставлен был еси на криле храма святаго нечестивыми, вопрошающими тя: «Рцы нам о Распятом». Мы же Богу, в мученичестем подвизе тебе укрепившему, гласом велиим воспеваем: Аллилуиа. Икос 12 Поюще Пресвятей Троице хвалу и благодарение и исполнився Духа Святаго, ты, Богоносе Иакове, изрекл еси пред народом о Христе, яко Той «сидит на Небесех, одесную Силы Всевышняго и грядет на облацех небесных». Слышавше же сия, нечестивии скрежетаху зубы своими и устремишася на тя; быв же долу низвержен с криле храма, Апостоле святе, востав на колени, Творцу молился еси о прощении убивающих тя и, камением до смерти побиваем, душу свою в руце Божии предал еси. Мы же, предстоящему тебе пред Престолом Святыя Троицы, радостно зовем: Радуйся, яко на криле святилища представ, Бога Слова проповедал еси; Радуйся, яко от иудей низвержен быв, небесных чертогов сподобился еси. Радуйся, Горняго Иерусалима Апостольское основание; Радуйся, яко жертву чисту себе Царю и Творцу принесл еси. Радуйся, яко кровию твоею в Церковь Небесную вшел еси; Радуйся, яко тя заступника крепкаго пред Богом имамы. Радуйся, яко нетленныя пищи наслаждаяся, Престолу Святыя Троицы предстоиши; Радуйся, священномучениче непобедимый, иерарше прехвальный и светильниче всемирный. Радуйся, Апостоле Иакове, Церкви Иерусалимския первый иерарше. Кондак 13 О, преславный Апостоле Иакове, брате Господень, Церкви Христовой светильниче многосветлый! Приими от благоговейных сердец наших с любовию тебе приносимое хвалебное пение сие и испроси нам у Христа Бога нашего в вере утверждение, прегрешений оставление и от вечнаго осуждения избавление, да сподобимся в Царствии Небеснем купно с тобою во веки пети Богу: Аллилуиа.[Се́й конда́к глаго́лется три́жды.][Далее повторяем 1‑е икос и кондак:]Икос 1 Ангелов Творец и всея твари Содетель, яви тя, Иакове, яко звезду многосветлую, на тверди церковней возсиявшую, светом Богопознания мир просвещающую и тьму лжеверия прогоняющую. Мы же, к заступлению твоему прибегающе, радостно тебе приносим сицевая: Радуйся, яко брат Господень по плоти сый, ученик и самовидец неизреченных таин Его показался еси; Радуйся, Богом избранный, да людем верным тайну спасения премудро изъясниши. Радуйся, велегласно словеса Божия иудеем провозгласивый; Радуйся, сими народ Божий, от Христа отвергшийся, к покаянию призывавый. Радуйся, Церкве Иерусалимския истинный управителю; Радуйся, и всех христиан Богомудрый наказателю. Радуйся, иерарше Иерусалима дольняго, ныне во Иерусалиме горнем пребываяй; Радуйся, Жертву Безкровную принося, себе же в жертву чисту Творцу и Царю уготовавый. Радуйся, Апостоле Иакове, Церкви Иерусалимския первый иерарше. Кондак 1 Избранному Апостолу Христову, иерарху преславному и мученику предивному, Иакову премудрому, брату Божию блаженному похвальная восписуем, яко ходатаю и скорому помощнику нашему. Ты же, предстояй Престолу Пресвятыя Троицы, не престай молитися за ны, сохраняющи от всяких бед и зол верою празднующих память твою и зовущих: Радуйся, Апостоле Иакове, Церкви Иерусалимския первый иерарше. Молитва апостолу Иакову, брату Господню О, великий богоизбранный и богопрославленный Апостоле Иакове, брате Господень! Ты еси великий архиерей Града Святаго, теплый наш заступник и ходатай, предстоящий Престолу Пресвятыя Троицы. Не отрини нас от твоего заступления, но воздвигни нас, низверженных грехи многими. Имеяй власть решити и вязати, разреши зол наших соузы, любве Божией причти нас и Царствия Небеснаго причастники, блаженне, соделай молитвами твоими. Моли Христа Спаса, да сподобит непреткновенно совершати странствие наше земное, да вечныя и блаженныя жизни на небеси сподобившеся, с тобою вкупе возможем выну восхваляти Троицу Нераздельную и воспевати Едино Божество Отца и Сына и Духа Всесвятаго во веки веков. Аминь.

Конда́к 1 Избра́нному страстоте́рпцу и преди́вному чудотво́рцу, гра́да У́глича небе́сному покрови́телю, сла́вному благове́рному кня́зю царе́вичу Дими́трию соста́вим похвалы́, пра́вды ра́ди, я́ко А́вель, от врага́ пострада́вшему, преди́вному удобре́нию земли́ Росси́йския. Ты́ же, я́ко име́яй дерзнове́ние ко Го́споду, от вся́ких на́с бе́д свободи́, да зове́м ти́: Ра́дуйся, святы́й страстоте́рпче кня́же царе́вичу Дими́трие. И́кос 1 А́нгелов и челове́ков Творе́ц и Госпо́дь яви́ ду́шу твою́ непоро́чну и нра́в а́нгельский от святы́я купе́ли Креще́ния твоего́, страстоте́рпче кня́же царе́вичу Дими́трие; избе́гл еси́ обы́чных све́та сего́ суе́т и собла́знов, чу́жд бы́л еси́ претыка́ний и паде́ний, чи́стым се́рдцем моля́ся ко Еди́ному Всеблаго́му Бо́гу, ми́лостивно взира́ющему на кро́тких и смире́нных. Сего́ ра́ди тя́ чти́м, я́ко моли́твенника те́пла и чудотво́рца изря́дна, и к честне́й твое́й ико́не припа́дающе, уми́льно тебе́ зове́м: Ра́дуйся, гра́да Москвы́ прозябе́ние свято́е. Ра́дуйся, ро́да ца́рскаго блага́я о́трасле. Ра́дуйся, от отца́, благода́ти тезоимени́та, и ма́тери, госпожи́ нарече́нныя, рожде́нный. Ра́дуйся, твоего́ А́нгела Храни́теля непреста́нное увеселе́ние. Ра́дуйся, У́глича гра́да неруши́мое утвержде́ние. Ра́дуйся, отроко́м похвало́ и сла́во. Ра́дуйся, неви́нностию и чистото́ю убеле́нный. Ра́дуйся, честно́ю твое́ю кро́вию обагре́нный. Ра́дуйся, Це́ркве Христо́вы лучеза́рный свети́льниче. Ра́дуйся, все́х спаса́емых кро́ткий наста́вниче. Ра́дуйся, святы́й страстоте́рпче кня́же царе́вичу Дими́трие. Конда́к 2 Ви́дя Госпо́дь Бо́г чи́стую твою́ ду́шу, восхоте́ бы́ти тебе́ освяще́нному сосу́ду Ду́ха Свята́го, все́льшагося в непоро́чное се́рдце твое́ и воздыха́нии неизглаго́ланными научи́вшаго тя́ благоприя́тно пе́ти Пресвяте́й Тро́ице: Аллилу́иа. И́кос 2 Ра́зум иму́ще помраче́нный зло́бою, врази́ твои́, царе́вичу Дими́трие, не терпя́ще тя́ зре́ти во гра́де Москве́, отосла́ша тя́ с ма́терию твое́ю во гра́д У́глич. Мы́ же тя́ срета́ем пе́нием таковы́м: Ра́дуйся, непови́нный изгна́нниче. Ра́дуйся, Ца́рствия Небе́снаго насле́дниче. Ра́дуйся, в ю́ности твое́й креста́ своего́ усе́рдный носи́телю. Ра́дуйся, и́го Христо́во и бре́мя Его́ благоду́шно подъе́мый. Ра́дуйся, в страда́нии твое́м до́блесть чу́дную яви́вый. Ра́дуйся, я́звы Го́спода Иису́са Христа́ на те́ле твое́м носи́вый. Ра́дуйся, гра́да У́глича и всея́ страны́ на́шея кре́пкое защище́ние. Ра́дуйся, святы́я Правосла́вныя Це́ркве све́тлая похвало́ и утвержде́ние. Ра́дуйся, святы́й страстоте́рпче кня́же царе́вичу Дими́трие. Конда́к 3 Си́ла Вы́шняго вои́стину тя́ храня́ше, свя́те Дими́трие, егда́ врази́ твои́ я́дом тя́ уби́ти хотя́ху; ты́ же, а́ще и сме́ртное испи́л еси́, оба́че без вреда́ пребы́л еси́, всехва́льне, чи́стыми усты́ твои́ми поя́ спа́сшему тя́ Бо́гу: Аллилу́иа. И́кос 3 Име́я от ю́ности твоея́ чистоту́ се́рдца, чу́жд бы́л еси́ мирски́я уте́хи отроко́в; сего́ ра́ди Промысли́тель Бо́г, призира́яй всеви́дящим о́ком на всю́ тва́рь, испо́лни ду́шу твою́ благода́ти. Прославля́я у́бо Его́ благо́е о тебе́ промышле́ние, усе́рдно к тебе́ взыва́ем: Ра́дуйся, смире́ннаго и благода́тнаго о́трочества Христо́ва подража́телю. Ра́дуйся, благода́ти Бо́жия досто́йное храни́лище. Ра́дуйся, све́рстником твои́м приме́ре благонра́вия. Ра́дуйся, иску́са мирски́х сласте́й не прие́мый. Ра́дуйся, благода́тное отроча́, ду́х стра́ха Бо́жия стяжа́вшее. Ра́дуйся, жите́йских зо́л неприча́стный. Ра́дуйся, за лише́ние земно́е ра́йским наслажде́нием уте́шенный. Ра́дуйся, за ну́жды врeменныя изоби́лия бла́г ве́чныя несконча́емыя ра́дости сподо́бивыйся. Ра́дуйся, святы́й страстоте́рпче кня́же царе́вичу Дими́трие. Конда́к 4 Бу́рям жите́йских скорбе́й утоле́ния и́щущи, благове́рная Мари́я, ма́ти твоя́, Царе́вичу Дими́трие, с во́плем кре́пким моля́шеся и ко Го́споду взыва́ше: «Изми́ на́с, Го́споди, от челове́ков лука́вых и от муже́й непра́ведных изба́ви на́с». Те́мже в ско́рби се́рдца своего́ и́злиха вопия́ла е́сть к Бо́гу: Аллилу́иа. И́кос 4 Слы́шаще и ви́дяще лю́дие гра́да У́глича равноа́нгельное житие́ твое́, благове́рне царе́вичу Дими́трие, зело́ почита́ху тя́, я́ко Бо́жия избра́нника, и попремно́гу тя́ чествова́ху пе́нием таковы́м: Ра́дуйся, кня́же на́ш вожделе́нный. Ра́дуйся, во благове́рии на́м утвержде́ние. Ра́дуйся, я́ко Христа́ в неви́нней души́ твое́й всели́л еси́. Ра́дуйся, луча́ми Свята́го Ду́ха озаре́нный. Ра́дуйся, милосе́рдия Христо́ва подража́телю. Ра́дуйся, вдо́в и сиро́т прибе́жище и пита́телю. Ра́дуйся, младе́нцем и отроко́м на́шим небе́сный покрови́телю. Ра́дуйся, и все́м чту́щим тя́ усе́рдный к Бо́гу моли́твенниче. Ра́дуйся, святы́й страстоте́рпче кня́же царе́вичу Дими́трие. Конда́к 5 Боготе́чной звезде́, украша́ющей не́бо церко́вное, уподо́бити тя́ дерза́ем, страстоте́рпче кня́же Дими́трие, на́м, блудя́щим во тьме́ нече́стия и беззако́ния, пу́ть спасе́ния указу́ющей и на стези́ пра́вды и благоче́стия лю́ди Бо́жия наставля́ющей, усе́рдно Го́споду, Зижди́телю вся́ческих, немо́лчно взыва́ющих: Аллилу́иа. И́кос 5 Ви́дим тя́, благове́рне царе́вичу Дими́трие, подо́бника тезоимени́тому ти́ великому́ченику Дими́трию Солу́нскому: я́коже о́н ко́пиями избоде́н бя́ше, та́ко и ты́ от твои́х рабо́в, я́ко а́гнец непоро́чен ноже́м закла́н бы́л еси́. Мы́ же, со стра́хом помина́юще му́ченическую кончи́ну твою́, к тебе́ взыва́ем си́це: Ра́дуйся, непови́нный страда́льче. Ра́дуйся, же́ртво беззако́ннаго властолю́бия. Ра́дуйся, ца́рскую диади́му кро́вию твое́ю обагри́вый. Ра́дуйся, я́ко кре́ст в ру́ку вме́сто ски́птра прия́л еси́. Ра́дуйся, я́ко вме́сто земна́го ца́рства, Небе́сное Ца́рство восприя́л еси́. Ра́дуйся, я́ко осмоле́тним во́зрастом, я́ко кла́с незре́л, пожа́лся еси́. Ра́дуйся, кро́вию твое́ю зе́млю У́гличскую освяти́вый. Ра́дуйся, я́ко с му́ченики и со все́ми святы́ми при́сно торжеству́еши. Ра́дуйся, святы́й страстоте́рпче кня́же царе́вичу Дими́трие. Конда́к 6 Пропове́дник непови́ннаго твоего́ убие́ния яви́ся гро́б тво́й, страстоте́рпче кня́же Дими́трие, и́же пятьна́десять ле́т храня́ше нетле́нным те́ло твое́; те́мже и до дне́сь благове́рнии лю́дие, припа́дающе к ра́це многоцеле́бных моще́й твои́х, благода́рно пою́т Бо́гу: Аллилу́иа. И́кос 6 Возсия́ я́ко со́лнце па́мять твоя́, страстоте́рпче царе́вичу Дими́трие, и тече́т сла́ва, я́ко река́ в Росси́йстей земли́, пове́дающи, я́ко не по мно́зе вре́мене настоя́щее житие́ ви́де и осмоле́тним во́зрастом лю́тую, непови́нную сме́рть прия́л еси́; я́ко а́гнец незло́бив, ничи́м же проти́вился еси́ рабу́ твоему́ и уби́йце. Сего́ ра́ди мы́ со умиле́нием тебе́ взыва́ем си́це: Ра́дуйся, непови́нное закла́ние претерпе́вый. Ра́дуйся, я́ко кро́вь твоя́, я́коже А́велева, вопие́т от земли́ ко Христу́ Бо́гу. Ра́дуйся, би́сере драгоце́нный, в небе́сной сокро́вищнице Христо́ве сохране́нный. Ра́дуйся, диади́му княже́ния земна́го с венце́м му́ченическим сочета́вший. Ра́дуйся, исцеле́ний благода́тный исто́чниче. Ра́дуйся, дарова́ний вели́ких вмести́лище. Ра́дуйся, я́ко тобо́ю ди́вен Бо́г во Святы́х свои́х явля́ется. Ра́дуйся, я́ко тобо́ю благоче́стно и́мя Христо́во прославля́ется. Ра́дуйся, святы́й страстоте́рпче кня́же царе́вичу Дими́трие. Конда́к 7 Хотя́й Госпо́дь спасти́ зе́млю Ру́сскую, егда́ лю́тое колеба́ние бы́сть в земли́ на́шей по сме́рти твое́й, благове́рне царе́вичу Дими́трие, от о́ных злы́х и наве́тных челове́к, лжу́щих и́менем твои́м; твои́м же заступле́нием и моли́твами Бо́г те́х погуби́ и лю́тое колеба́ние от ни́х укроти́. Мы́ же хвале́бно о се́м ко Го́споду взыва́ем: Аллилу́иа. И́кос 7 Но́вый яви́ся вра́г в Росси́йстей земли́ по сме́рти твое́й, страстоте́рпче царе́вичу Дими́трие, и́же пре́жде нося́й на себе́ о́браз и́ноческий, по́слежде све́рже его́ с себе́, и возложи́ на ся́ тезоимени́тство твое́, и бы́сть ца́рь; Бо́г же, моли́тв ра́ди твои́х, до конца́ сего́ погуби́. Лю́дие же Росси́йския, от злы́х изба́вльшеся, благода́рно к тебе́ взыва́ху: Ра́дуйся, земли́ Росси́йския неусы́пный засту́пниче. Ра́дуйся, о спасе́нии ея́ те́плый моли́твенниче. Ра́дуйся, отра́до на́ша и в ско́рбех утеше́ние. Ра́дуйся, согреша́ющих исправле́ние и неду́гующих исцеле́ние. Ра́дуйся, благовре́менная на́ша в напа́стех по́моще. Ра́дуйся, предваря́яй проше́ния призыва́ющих тя́ в беда́х. Ра́дуйся, граждани́не Иерусали́ма Небе́снаго. Ра́дуйся, ца́рства Христо́ва насле́дниче. Ра́дуйся, святы́й страстоте́рпче кня́же царе́вичу Дими́трие. Конда́к 8 Стра́нное ми́рови житие́ твое́ ви́дяще, устрани́мся и мы́ того́ суе́т, и у́м на небеса́ прело́жше, возопии́м к тебе́: о, страстоте́рпче царе́вичу Дими́трие! Утоли́ боле́зни и источи́ благода́тная врачева́ния все́м, усе́рдно к по́мощи твое́й притека́ющим и вопию́щим вы́ну к Бо́гу: Аллилу́иа. И́кос 8 Все́ми вы́шними и ни́жними влады́чествуяй Госпо́дь, яви́ тя́, страстоте́рпче царе́вичу Дими́трие, при́снаго на́м помо́щника и от вра́г ви́димых и неви́димых кре́пкаго защи́тника, науча́ющаго на́с подража́ти тебе́ в чистоте́ и незло́бии, да напра́виши сердца́ на́ша ко смире́нию, покая́нию и неосла́бному исполне́нию за́поведей Христо́вых. Мы́ же взыва́ем ти́ си́це: Ра́дуйся, гре́шных ко исправле́нию приведе́ние. Ра́дуйся, ми́ро враче́бное неду́гов многоразли́чных. Ра́дуйся, храни́телю на́ш кре́пкий и неусы́пный. Ра́дуйся, не то́кмо теле́сных, но и душе́вных боле́зней изря́дный цели́телю. Ра́дуйся, в честны́х твои́х ико́нах и моща́ми с на́ми пребыва́яй. Ра́дуйся, испо́лнивый на себе́ сло́во Бо́жие: храни́т Госпо́дь вся́ ко́сти и́х. Ра́дуйся, Небе́снаго Сио́на жи́телю. Ра́дуйся, нерукотворе́нных ски́ний ра́йских обита́телю. Ра́дуйся, святы́й страстоте́рпче кня́же царе́вичу Дими́трие. Конда́к 9 Все́ естество́ а́нгельское возра́довася, ви́дяще тя́, страстоте́рпче царе́вичу Дими́трие: а́ще и я́ко кла́с незре́л пожа́лся еси́, но свято́ю твое́ю душе́ю невреди́м пребы́л еси́, и ны́не с ли́ки а́нгельскими в небе́сных селе́ниих пребыва́еши, ра́дуяся, и с ни́ми немо́лчно Святе́й Тро́ице пое́ши: Аллилу́иа. И́кос 9 Вети́я многовеща́нныя не возмо́гут по достоя́нию восхвали́ти ми́лости и вся́ чудеса́ твоя́, царе́вичу Дими́трие, и́миже отце́м на́шим вспомоществова́л еси́; не отри́ни и на́с, ча́д и́х, стопа́ми и́х к тебе́ ше́ствующих и моле́бне к тебе́ взыва́ющих: Ра́дуйся, ми́лостивый уте́шителю в беда́х на́м су́щим. Ра́дуйся, безпомо́щных спаси́тельное призре́ние. Ра́дуйся, боля́щих младе́нцев безме́здный целе́бниче. Ра́дуйся, ни́щих и убо́гих ско́рое услы́шание. Ра́дуйся, то́ки чуде́с ми́ру явля́яй. Ра́дуйся, слепце́м зре́ние возвраща́яй. Ра́дуйся, де́вственных лико́в сла́во и похвало́. Ра́дуйся, земны́х упова́ние и небе́сных сла́во. Ра́дуйся, святы́й страстоте́рпче кня́же царе́вичу Дими́трие. Конда́к 10 Спасти́ся на́м хотя́щим до́бр во́ждь ко спасе́нию яви́лся еси́, страстоте́рпче царе́вичу Дими́трие; сего́ ра́ди со усе́рдным моле́нием к чудотво́рному твоему́ о́бразу притека́ем, твое́ю всеси́льною о Го́споде по́мощию, я́ко необори́мою стено́ю, огражда́емся, усе́рдно взыва́юще ко Спа́су Христу́: Аллилу́иа. И́кос 10 Стена́ и заступле́ние земли́ Росси́йския яви́лся еси́, страстоте́рпче Христо́в царе́вичу Дими́трие, я́ко твои́ми моли́твами Госпо́дь Бо́г посла́ на раба́ твоего́ и уби́йцу — не́коего врага́ и отме́тника пра́выя ве́ры, наре́кшагося тезоимени́тством твои́м, да све́ржет уби́йцу твоего́ с престо́ла ца́рска, е́же и бы́сть. Сего́ ра́ди тебе́ припа́дающе зове́м: Ра́дуйся, в беда́х и напа́стех ско́рый на́ш помо́щниче. Ра́дуйся, ве́рных огражде́ние и свяще́нное прибе́жище. Ра́дуйся, ревну́ющих о спасе́нии души́ кре́пкий помо́щниче. Ра́дуйся, предста́тельство бе́дствующим на́м в мо́ре жите́йском. Ра́дуйся, послу́шателю тебе́ моля́щихся. Ра́дуйся, пода́телю ми́лости тоя́ тре́бующим. Ра́дуйся, нетле́нием моще́й твои́х в и́стине воскресе́ния ме́ртвых на́с уверя́яй. Ра́дуйся, о́браз безсме́ртия в сме́ртном телеси́ показу́яй. Ра́дуйся, святы́й страстоте́рпче кня́же царе́вичу Дими́трие. Конда́к 11 Пе́ния и пе́сни духо́вныя соверша́ху лю́дие в пренесе́нии честны́х и многоцеле́бных моще́й твои́х, царе́вичу Дими́трие, из богоспаса́емаго гра́да У́глича в ца́рствующий гра́д Москву́, его́же па́мять свята́я Це́рковь и до дне́сь соверша́ет, со все́ми ве́рными ча́ды свои́ми взыва́ющи ко Го́споду: Аллилу́иа. И́кос 11 Светоза́рнаго свети́льника пред Престо́лом Бо́жиим стоя́щаго, оча́ми ве́ры зри́м тя́, царе́вичу Дими́трие. Те́мже со умиле́нием припа́дающе ко изображе́нию лица́ твоего́, благода́рственно к тебе́ взыва́ем: Ра́дуйся, гра́да У́глича небе́сный покрови́телю. Ра́дуйся, все́м чту́щим па́мять твою́ небе́сных бла́г хода́таю. Ра́дуйся, прекра́сный кри́не, ве́рных сердца́ услажда́яй. Ра́дуйся, непоро́чнаго младе́нчества и о́трочества изря́дная похвало́. Ра́дуйся, целому́дрия и воздержа́ния ю́ных ве́рный наста́вниче. Ра́дуйся, веду́щим бра́нь проти́ву ми́ра, пло́ти и диа́вола до́брый споспе́шниче. Ра́дуйся, на́м, бе́дствующим, на по́мощь ускоря́яй. Ра́дуйся, от жития́ отходя́щим заступле́ние твое́ многомо́щное явля́яй. Ра́дуйся, святы́й страстоте́рпче кня́же царе́вичу Дими́трие. Конда́к 12 Благода́ть Боже́ственную и благовре́менную по́мощь испроси́ на́м, уго́дниче Бо́жий, страстоте́рпче царе́вичу Дими́трие, во дни́ безпомо́щия на́шего, и бу́ди на́м в напа́стех уте́шитель, в беда́х засту́пник, в неду́зех вра́ч, ту́не подава́яй на́м да́ры целе́бныя от святы́х моще́й твои́х, к ни́м же усе́рдно припа́дающе, взыва́ем чуде́с Творцу́ Бо́гу: Аллилу́иа. И́кос 12 Пою́ще твоя́ чудеса́, страстоте́рпче Христо́в, царе́вичу Дими́трие, ублажа́ем му́ченическую кончи́ну твою́, восхваля́ем хода́тайство и си́льное заступле́ние твое́ о все́х, тре́бующих по́мощи твоея́, пред свято́ю ико́ною твое́ю с ве́рою и любо́вию тебе́ покланя́ющихся и к тебе́ моле́бно взыва́ющих: Ра́дуйся, у Престо́ла Святы́я Тро́ицы усе́рдный на́ш хода́таю. Ра́дуйся, к Пречи́стей Де́ве Богоро́дице немо́лчный на́ш моле́бниче. Ра́дуйся, собесе́дниче и слико́вниче святы́х А́нгелов. Ра́дуйся, святы́х му́чеников равностоя́телю и совсе́льниче. Ра́дуйся, я́ко в хра́мех, во и́мя твое́ созда́нных, неви́димо пребыва́еши. Ра́дуйся, я́ко моля́щихся в ни́х люде́й моли́твы во бла́го исполня́еши. Ра́дуйся, градо́в Москвы́ и У́глича недви́жимое утвержде́ние. Ра́дуйся, всея́ страны́ Росси́йския благонаде́жное от все́х бе́д заступле́ние. Ра́дуйся, святы́й страстоте́рпче кня́же царе́вичу Дими́трие. Конда́к 13 О, святы́й страстоте́рпче благове́рный кня́же царе́вичу Дими́трие! Приими́ сие́ ма́лое моле́ние на́с, пред свято́ю ико́ною твое́ю с ве́рою и любо́вию тебе́ покланя́ющихся, и те́плыя моли́твы о на́с ко Го́споду вознеси́, и от бе́д и скорбе́й на́с свободи́, вопию́щих Ему́ вы́ну: Аллилу́иа, Аллилу́иа, Аллилу́иа.[Се́й конда́к глаго́лется три́жды.][Далее повторяем 1‑е икос и кондак:]И́кос 1 А́нгелов и челове́ков Творе́ц и Госпо́дь яви́ ду́шу твою́ непоро́чну и нра́в а́нгельский от святы́я купе́ли Креще́ния твоего́, страстоте́рпче кня́же царе́вичу Дими́трие; избе́гл еси́ обы́чных све́та сего́ суе́т и собла́знов, чу́жд бы́л еси́ претыка́ний и паде́ний, чи́стым се́рдцем моля́ся ко Еди́ному Всеблаго́му Бо́гу, ми́лостивно взира́ющему на кро́тких и смире́нных. Сего́ ра́ди тя́ чти́м, я́ко моли́твенника те́пла и чудотво́рца изря́дна, и к честне́й твое́й ико́не припа́дающе, уми́льно тебе́ зове́м: Ра́дуйся, гра́да Москвы́ прозябе́ние свято́е. Ра́дуйся, ро́да ца́рскаго блага́я о́трасле. Ра́дуйся, от отца́, благода́ти тезоимени́та, и ма́тери, госпожи́ нарече́нныя, рожде́нный. Ра́дуйся, твоего́ А́нгела Храни́теля непреста́нное увеселе́ние. Ра́дуйся, У́глича гра́да неруши́мое утвержде́ние. Ра́дуйся, отроко́м похвало́ и сла́во. Ра́дуйся, неви́нностию и чистото́ю убеле́нный. Ра́дуйся, честно́ю твое́ю кро́вию обагре́нный. Ра́дуйся, Це́ркве Христо́вы лучеза́рный свети́льниче. Ра́дуйся, все́х спаса́емых кро́ткий наста́вниче. Ра́дуйся, святы́й страстоте́рпче кня́же царе́вичу Дими́трие. Конда́к 1 Избра́нному страстоте́рпцу и преди́вному чудотво́рцу, гра́да У́глича небе́сному покрови́телю, сла́вному благове́рному кня́зю царе́вичу Дими́трию соста́вим похвалы́, пра́вды ра́ди, я́ко А́вель, от врага́ пострада́вшему, преди́вному удобре́нию земли́ Росси́йския. Ты́ же, я́ко име́яй дерзнове́ние ко Го́споду, от вся́ких на́с бе́д свободи́, да зове́м ти́: Ра́дуйся, святы́й страстоте́рпче кня́же царе́вичу Дими́трие. Моли́тва благове́рному царе́вичу Дими́трию У́гличскому О, пресла́вный и ди́вный в чудесе́х, красото́ му́чеников, страстоте́рпче кня́же царе́вичу Дими́трие! Ско́ро предста́ни Небе́сному Царю́ и му́ченическия твоя́ ру́це о на́с, гре́шных, моле́бне к Нему́ простри́, я́ко име́яй дерзнове́ние ве́лие. Сохрани́ же твои́ми моли́твами гра́д се́й и вся́ гра́ды и ве́си правосла́вныя, и святе́йшия патриа́рхи и преосвяще́нныя митрополи́ты, архиепи́скопы и епи́скопы, и ве́сь свяще́нный чи́н церко́вный, и вся́ правосла́вныя христиа́ны; все́х на́с приими́ в твое́ заступле́ние, от все́х бе́д и зо́л избавля́я и от наше́ствия ви́димых и неви́димых, борю́щих на́с враго́в, свобожда́я, и те́х вся́к наве́т и злохи́трство погубля́я и отгоня́я; та́же прегреше́ний на́ших проще́ние испроси́ и в ве́к бу́дущий Небе́снаго Ца́рствия на́с сподо́би и спасе́нных Бо́гу предста́ви, благода́тию и человеколю́бием Го́спода и Спа́са на́шего Иису́са Христа́, Ему́ же че́сть и поклоне́ние подоба́ет, ны́не и при́сно и во ве́ки веко́в. Ами́нь. Моли́тва ина́я О, святы́й му́чениче, благове́рный царе́вичу и кня́же Дими́трие! Я́ко а́гнец незло́бив от раба́ заколе́нный, венце́м ца́рским от Го́спода венча́лся еси́, и сы́н царе́в бы́в, му́ченик непобеди́м яви́лся еси́, и вме́сто земны́х и тле́нных на небеси́ нетле́нная восприя́л еси́. И ны́не предстоя́ в ра́дости Святе́й Тро́ице, посеща́й творя́щих ве́рно твою́ светоно́сную па́мять: соблюда́й оте́чествие твое́ и гра́д тво́й невреди́м, тому́ бо еси́ утвержде́ние; утверди́ правосла́вных жи́тельство в ми́ре глубо́це: междоусо́бную бра́нь укроти́, и вся́ поле́зная да́руй всегда́ лю́дем моли́твами твои́ми, да ве́рою и любо́вию вопие́м ти́: ра́дуйся, свя́те Дими́трие, ве́рных люде́й те́плый засту́пниче и прибе́жище и земли́ Росси́йския украше́ние. Ами́нь. Моли́тва тре́тья О, вели́кий и ми́лостивый страстоте́рпче, царе́вичу кня́же Дими́трие! Услы́ши на́с, гре́шных, моле́ние со усе́рдием тебе́ принося́щих, и помози́ на́м в жи́зни се́й, от грехо́в и скорбе́й избавля́я, и в бу́дущем ве́це бу́ди помо́щник и засту́пник, от муче́ний а́довых свобожда́я и сподобля́я ку́пно с тобо́ю покланя́тися и воспева́ти Всесвяту́ю Тро́ицу, Отца́ и Сы́на и Свята́го Ду́ха, ны́не и при́сно и во ве́ки веко́в. Ами́нь.

Кондак 1 Избранному воеводе земли Российския, светлому украшению Церкве Православныя, святому благоверному великому князю Александру Невскому, похвальная восписующе, яко верою враги, видимыя же и невидимыя, победившему, и в вере своей, по речению апостолову, добродетель, в добродетели же разум, в разуме же воздержание, в воздержании же терпение, в терпении же благочестие, братолюбие и любовь явившему со умилением и радостию возопиим: Радуйся, святый благоверный великий княже Александре. Икос 1 Со Ангелы и всеми святыми предстоиши ныне Христу, блаженне Александре, моляся о любовию чтущих тя: темже, поминающе, яко, измлада Христа возлюбив, к небесным духом прилепился еси, безплотных подражав житию, ублажаем тя, вопиюще: Радуйся, корене благочестиваго отрасле пречестная; Радуйся, благоверия предков наследниче. Радуйся, добродетелей отца боголюбиваго подражателю; Радуйся, кротости и благочестия матерняго преемниче. Радуйся, вождю к Небесем стада своего христолюбиваго; Радуйся, в житии всех рабов Божиих друже и ревнителей благочестия собеседниче. Радуйся, преподобных лика богосветлаго сопричастниче; Радуйся, веры Христовы непобедимый исповедниче. Радуйся, волею мучениче, сликовствуяй ныне сонму мучеников добропобедному; Радуйся, христианскаго упования и любве всем нам девственный проповедниче. Радуйся, уставов и чина церковнаго благолепнаго ревнителю; Радуйся, верных чад Церкве и угодников Божиих сонаследниче. Радуйся, святый благоверный великий княже Александре. Кондак 2 Видевше лепоту лица и телеснаго возраста твоего, новоградстии людие радовахуся и славляху Бога, взирающе на тя: мы же, поминающе светлейшия паче солнца добродетели твоя, блаженне Александре, прославившему тя Господеви поим: Аллилуиа. Икос 2 Разумел еси, богомудре Александре, яко преходит образ мира сего, едино же есть на потребу человеком, еже благоугодити Господеви: сего ради измлада от любве к миру и яже в мире уклонился еси, вожделев же зде сущими стяжати небесная, яко верный раб Господу во всем житии неленостно послужил еси. Темже вопием ти: Радуйся, подвижниче веры, угождение Богу паче всего предызбравый; Радуйся, подобне Аврааму во всем житии непорочно пред Богом поживый. Радуйся, Исааково послушание показавый; Радуйся, путем Иаковля смиренномудрия ходивый. Радуйся, Иосифову чистоту и целомудрие стяжавый; Радуйся, Моисееву любовь к людем своим в себе явивый. Радуйся, якоже Самуил чиста себе от всякаго любостяжания соблюдавый; Радуйся, кротостию Давидовою враги своя победивый. Радуйся, Петровой пламенней вере поревновавый; Радуйся, с Павлом игу Христову себе поработивый. Радуйся, богомудрие Иоанново подвигом поучения в слове Божием снискавый; Радуйся, многих святых добродетели в себе совокупивый. Радуйся, святый благоверный великий княже Александре. Кондак 3 Силою веры стяжал еси, блаженне Александре, высшее любомудрие, егоже ради, презирая плоть, прилежал еси о души безсмертней: темже ублажающе тя, яко стяжавша ныне безсмертие, вопием прославившему тя Христу: Аллилуиа. Икос 3 Имеяй всегда пред очима своима Господа, трезвенно пожил еси, блаженне Александре, и вся яже творил еси, творя во славу Божию, угодил еси Богу, Емуже предстоиши ныне с лики от века угодивших: темже радующеся о тебе, зовем ти: Радуйся, истиннаго трезвения подвижниче; Радуйся, спасительнаго созерцания любителю. Радуйся, наставниче наш в подвиге от мира удаления; Радуйся, стяжателю совершеннаго дара бодрственнаго себе внимания. Радуйся, всякаго безсловеснаго вожделения твердый противоборниче; Радуйся, благочестия добрый подвижниче, преуспевый в разуме и деянии. Радуйся, яко силою молитвы препобедил еси диавольская искушения; Радуйся, яко себе от греха оградил еси последних воспоминанием. Радуйся, яко возлюбил еси душею еже о небесных помышление; Радуйся, яко преуспел еси в неленостных яже к Богу молитвенных предстояниих. Радуйся, яко все житие свое освящал еси непрестанным Имене Божия призыванием; Радуйся, яко угождал еси Господеви всяким благоугождением. Радуйся, святый благоверный великий княже Александре. Кондак 4 Бури искушений воздвигоша врази и противу тебе, блаженне Александре. Ты же препобедил еси сия силою благодати Христовы: темже ныне, к тихому пристанищу притек, с лики искушенных в мире, победивших же мир, вопиеши Христу: Аллилуиа. Икос 4 Слышав Павла, глаголюща: «Всяк подвизаяйся от всех воздержится», вся в уметы вменил еси, блаженне Александре, да Христа приобрящеши: подвигами же отвержения себе и ко благим делом принуждения стяжал еси свободу славы чад Божиих: темже ублажающе тя, вопием ти таковая: Радуйся, образ отвержения себе нам показавый; Радуйся, ношению креста в последовании Христу нас научивый. Радуйся, плоть со страстьми и похотьми ея поправый; Радуйся, житием твоим суету мира обличивый. Радуйся, всякое пристрастие земное от себе отгнавый; Радуйся, разум свой в послушание веры пленивый. Радуйся, волею своею благое иго заповедей Христовых подъявый; Радуйся, сердце свое от всякия страсти душевредныя чисто сохранивый. Радуйся, себе Богу всесовершенне предавый; Радуйся, чрез все житие свое Богу послуживый. Радуйся, совершением заповедей любовь к себе Божию стяжавый; Радуйся, наследие Царствия благоугождением Богу улучивый. Радуйся, святый благоверный великий княже Александре. Кондак 5 Боготечною звездою прешел еси в мире, блаженне Александре, блистающ славою и добродетелию: темже ныне сияеши на Небесех славою вечною с лики праведник, с нимиже выну воспеваеши Христу: Аллилуиа. Икос 5 Видевше тя, блаженне Александре, николиже во бранех побеждаема, всегда же побеждающа, невернии единаго имене твоего устрашахуся, мы же, поминающе исполненное веры мужество твое, ублажаем тя, глаголюще: Радуйся, доблественный в защиту веры и Церкве воителю; Радуйся, своея земли мужественный защитителю. Радуйся, наветов вражиих мудрый разорителю; Радуйся, мира безпомощных сильный оградителю. Радуйся, воинства свейскаго на брегах Невских славный победителю; Радуйся, безопасности всея северныя страны земли Российския охранителю. Радуйся, злых козней иноверия, подвигших чуждую рать на землю нашу, разрушителю; Радуйся, законов правды богоукрепляемый утвердителю. Радуйся, Пскова, отечества святыя Ольги, свободителю; Радуйся, ненавидевших мира умирителю. Радуйся, буйства неустроенныя в тыя дни Литвы укротителю; Радуйся, во всех сих бранех христолюбиваго воинства своего мудрый предводителю. Радуйся, святый благоверный великий княже Александре. Кондак 6 Проповедника кротости и терпения явил еси себе, блаженне Александре, посреди преславных побед твоих: темже и стяжал еси сугубый венец от Царя Христа, Емуже предстоиши ныне, вопия: Аллилуиа. Икос 6 Провозсиял еси, блаженне Александре, паче мужества, терпением твоим, егоже стяжал еси, взирая на Начальника веры и Совершителя Иисуса, Иже вместо предлежащия ему радосте претерпе Крест: темже восхваляюще тя, усердно вопием: Радуйся, до конца в подвизех служения Богу претерпевый; Радуйся, терпению Христову верно подражавый. Радуйся, силу заповеди Христовы, яже о любви ко врагом, премудро уразумевый; Радуйся, и согрешшим противу тебе избавленным тобою людем любовь истинную показавый. Радуйся, во искушении от народа своего хитрость лукавого прозревый; Радуйся, мирным отбытием своим из земли своея злобу врага поправый. Радуйся, и во всем житии своем ухищрения сатаны проразумевый; Радуйся, злое благим, по апостолу, выну препобеждавый. Радуйся, паки, в годину скорби, в помощь оскорбившему тя Новуграду предуспевый; Радуйся, сего ради пламенную любовь от народа своего себе снискавый. Радуйся, Божия посещения, болезни и лишения, со упованием терпевый; Радуйся, сего ради светлый венец от Господа стяжавый. Радуйся, святый благоверный великий княже Александре. Кондак 7 Хотяй провозсияти тебе всеми добродетельми, блаженне Александре, Владыка Христос призвал есть тебе к служению людем своим во дни посещения: ты же притяжал еси к терпению смирение, егоже ради ныне превознесен еси, предстоя Богу с песнию: Аллилуиа. Икос 7 Дивно бе видети, како непобедимый воитель смиренно преклоняет главу свою пред неверными, ихже посла Господь на люди своя ради грех их: дивно же есть и воспомянути непобедимое смирение твое, блаженне Александре, имже и Господеви благоугодил еси, и люди своя спасл еси. Темже благодарно вопием ти: Радуйся, смирения Господня подражателю; Радуйся, подобающаго богопоставленным властем почитания учителю. Радуйся, всякаго превозношения противоборче; Радуйся, истиннаго послушания подвижниче. Радуйся, всем нам образе вернаго Богу служения; Радуйся, начальствующим наставниче в богоприятном людем предстоянии. Радуйся, подвластных руководителю в богозаповеданном предержащим властем повиновении; Радуйся, яко многажды ради блага людей своих путьшествовал еси к безбожным, ни во чтоже вменяя яже от них испытания. Радуйся, яко не устрашился еси, призвав Бога, прийти к Батыеви, исполняя его веление; Радуйся, яко многащи воспринимал еси на себе страшный ответ о неразумных народа своего востаниих. Радуйся, яко оградил еси люди твоя от зловреднаго с неверными общения; Радуйся, яко мудре оградил еси в земли своей отеческия доблести и предания. Радуйся, святый благоверный великий княже Александре. Кондак 8 Странническое житие прешел еси на земли, блаженне Александре, не ведый покоя в трудех своих и не имый зде пребывающаго града, но грядущаго взыскуяй: сего ради ныне, блаженне, вселился еси в вечных обителех, выну поя Богу: Аллилуиа. Икос 8 Всею душею послужив Господу и всем житием своим благоугодив Ему, прославился еси благочестием, егоже ради и исповедник явился еси веры Христовы, блаженне Александре: поминающе убо подвиг исповедничества твоего, вопием ти: Радуйся, злобы неверных не устрашивыйся; Радуйся, твари паче Создавшаго не послуживый. Радуйся, солнцу и огню в стане безбожных не поклонивыйся; Радуйся, веру свою во искушении сохранивый. Радуйся, велению безбожному не покоривыйся; Радуйся, твердый проповедник веры пред неверными себе явивый. Радуйся, с сугубою славою, по исповедании своем, в землю свою возвративыйся; Радуйся, во всем житии верным вере отцев пребывый. Радуйся, от лести иноверия премудре уклонивыйся; Радуйся, лукавство проповедников лжеверия яве обличивый. Радуйся, твердый защитник правоверия явивыйся; Радуйся, лжесловесие врагов Православия словом здравым препобедивый. Радуйся, святый благоверный великий княже Александре. Кондак 9 Всего себе повинув Богови, яко раб благий и верный послужил еси Ему, блаженне Александре, паче сверстник твоих для земли твоея потрудився: темже и внити сподобился еси в радость Господа своего, Емуже предстоиши ныне, со Ангелы поя: Аллилуиа. Икос 9 Витийствующий язык не возмогл бы восхвалити дела твоя, блаженне Александре, яже совершил еси, полагая по братии душу свою: смиренно убо поминающе сицевая исправления твоя, умиленную песнь приносим ти, глаголюще: Радуйся, братолюбия христианскаго приискренний ревнителю; Радуйся, Моисеевы и Павловы любве ко братии подражателю. Радуйся, заповедей Христовых яже о любви верный исполнителю; Радуйся, и всех нас в любви к присным дивный наставниче. Радуйся, примером своим паче слова явивыйся стязающихся о наследии братии своих примиритель; Радуйся, о благе народа усердно в житии своем пекийся. Радуйся, общаго мира во днех своих устроителю; Радуйся, изгнаннаго страхом нашествий татарских народа своего собирателю. Радуйся, безпомощных присный защитителю; Радуйся, нищих и алчущих питателю. Радуйся, сирых сильный покровителю; Радуйся, и ныне всех скорбящих и нуждающихся мощный пред Господом предстателю. Радуйся, святый благоверный великий княже Александре. Кондак 10 Спасти хотя душу свою, ведый же, яко не имущему любве к Богу никиими же подвигами и добродетельми улучити спасение возможно есть, стяжал еси венец добродетелей, еже есть любовь к Богу, Емуже предстоя ныне, радостно вопиеши: Аллилуиа. Икос 10 Царя Небеснаго возлюбив от всего сердца твоего, и от всея души твоея, и всею мыслию твоею, принесл еси Ему, блаженне Александре, последи многоразличных приношений веры и усердия, себе самаго в жертву живу, святу, благоугодну: темже ублажающе тя, вопием ти: Радуйся, в житии своем всеми богоугодными делы Господеви послуживый; Радуйся, обетами иночества святое житие свое увенчавый. Радуйся, многи храмы Божии, безбожными раззоренныя, обновивый; Радуйся, к просиянию подвигов постничества обители святыя созидавый. Радуйся, подвизающихся измлада в благочестии ради Бога возлюбивый; Радуйся, ангельский образ и себе чистою душею предызбравый. Радуйся, в конец жития своего всего себе Богу посвятивый; Радуйся, приятием схимы, с новым именем Алексия, всесовершенне себе Богу предавый. Радуйся, обетом девства чистоту сердца своего явивый; Радуйся, обетом нестяжания высоту духа своего показавый. Радуйся, обетом послушания всецелое служение свое Единому Богу во веки утвердивый; Радуйся, к венцу мудраго и благаго князя мзду инока притяжавый. Радуйся, святый благоверный великий княже Александре. Кондак 11 Пение погребальное слезами растворяшеся у гроба твоего, блаженне Александре; людие твои плакахуся о тебе, солнце земли Русския, в полудни зашедшем, и рыдания прерываху умиленную песнь их к Богу: Аллилуиа. Икос 11 Свет славы небесныя осия тя вскоре, блаженне Александре, утешая плачущия люди твоя: темже видяще при гробе твоем знамения и чудеса, сынове российстии достойне призываху тя, яко в молитвах предстателя; мы же, поминающе скорое заступление твое, вопием ти: Радуйся, угодниче Божий, в самом погребении прославление от Бога получивый; Радуйся, скорый предстателю наш, егоже призываху отцы наши в нуждех и озлоблениих. Радуйся, в борьбе с татары князю Димитрию Донскому вспоможение явивый; Радуйся, царю Иоанну и казанцы одоление исходатаивый. Радуйся, исцеления многоразличныя всем подаваяй; Радуйся, слепым зрение молитвою твоею возвращаяй. Радуйся, хромым, припадающим ко гробу твоему, хождение даруяй; Радуйся, разслабленных неможение врачуяй. Радуйся, одержимым от бесов свобождение подаваяй; Радуйся, безнадежных надеждою спасения оживляяй. Радуйся, в погубльших разум разумение возставляяй; Радуйся, от гроба твоего многообразныя чудотворения присно источаяй. Радуйся, святый благоверный великий княже Александре. Кондак 12 Благодать познавше, живущую в нетленных мощех твоих, людие владимирстии с любовию прихождаху ко святей раце твоей и, радостно лобызающе ю, славляху о тебе Бога, прославляющаго святыя Своя, со умилением вопиюще Ему: Аллилуиа. Икос 12 Поюще добродетели и чудеса твоя, радостию сретаху и провождаху отцы наши святое тело твое, егда, преселяхуся святыя мощи твоя на новое место покоища в славном святаго Петра граде: и мы ныне, радующеся о небесней славе твоей и обитании нетленных мощей твоих в богоизбранном граде сем со онеми вопием ти: Радуйся, российский Иосифе, на новое место упокоения преселивыйся; Радуйся, всех концев земли Российския покровителю. Радуйся, Петрова града благонадежное утверждение; Радуйся, тогоже во бранех Небесный защитителю. Радуйся, северныя столицы неоцененное украшение; Радуйся, тезоименитыя тебе обители славо и утверждение. Радуйся, народу русскому здравие же и спасение молитвами твоими подаваяй; Радуйся, всех упование на тя возложивших, богомудрый учителю. Радуйся, иноком, яко инок, полезное, примером жизни своея, наставление преподаваяй; Радуйся, мирским людем, яко в мире потрудивыйся, к добродетелем общежития руководителю. Радуйся, нетлением своим всем нам надежду воскресения подаваяй; Радуйся, всех нас в напастех и скорбех поборниче, хранителю и свободителю. Радуйся, святый благоверный великий княже Александре. Кондак 13 О, святый благоверный великий княже Александре! От благоговейных сердец приносимую ти, аще и недостойную, хвалебную песнь сию, приими от нас, яко усердную жертву сердец, любящих тя и ублажающих святую память твою. Охраняй всех нас молитвами твоими: огради ходатайствы твоими град твой и вся люди земли Российския, да тихое и безмолвное житие поживше в нынешнем веце блаженство вечное наследим и купно с тобою и всеми святыми выну сподобимся воспевати Богу: Аллилуиа. [Этот кондак читается трижды.] [Далее повторяем 1‑е икос и кондак:] Икос 1 Со Ангелы и всеми святыми предстоиши ныне Христу, блаженне Александре, моляся о любовию чтущих тя: темже, поминающе, яко, измлада Христа возлюбив, к небесным духом прилепился еси, безплотных подражав житию, ублажаем тя, вопиюще: Радуйся, корене благочестиваго отрасле пречестная; Радуйся, благоверия предков наследниче. Радуйся, добродетелей отца боголюбиваго подражателю; Радуйся, кротости и благочестия матерняго преемниче. Радуйся, вождю к Небесем стада своего христолюбиваго; Радуйся, в житии всех рабов Божиих друже и ревнителей благочестия собеседниче. Радуйся, преподобных лика богосветлаго сопричастниче; Радуйся, веры Христовы непобедимый исповедниче. Радуйся, волею мучениче, сликовствуяй ныне сонму мучеников добропобедному; Радуйся, христианскаго упования и любве всем нам девственный проповедниче. Радуйся, уставов и чина церковнаго благолепнаго ревнителю; Радуйся, верных чад Церкве и угодников Божиих сонаследниче. Радуйся, святый благоверный великий княже Александре. Кондак 1 Избранному воеводе земли Российския, светлому украшению Церкве Православныя, святому благоверному великому князю Александру Невскому, похвальная восписующе, яко верою враги, видимыя же и невидимыя, победившему, и в вере своей, по речению апостолову, добродетель, в добродетели же разум, в разуме же воздержание, в воздержании же терпение, в терпении же благочестие, братолюбие и любовь явившему со умилением и радостию возопиим: Радуйся, святый благоверный великий княже Александре. Молитва 1‑я Скорый помощниче всех усердно к тебе прибегающих и теплый наш пред Господем предстателю, святый благоверный великий княже Александре! Призри милостивно на ны, недостойныя, многими беззаконии непотребны себе сотворшия, к раце мощей твоих (или: иконе твоей) ныне притекающая и из глубины сердца к тебе взывающия: ты в житии своем ревнитель и защитник православныя веры был еси, и нас в ней теплыми твоими к Богу молитвами непоколебимы утверди. Ты великое возложенное на тя служение тщательно проходил еси, и нас твоею помощию пребывати коегождо, в неже призван есть, настави. Ты, победив полки супостатов, от пределов российских оных отгнал еси, и на нас ополчающихся всех видимых и невидимых врагов низложи. Ты, оставив тленный венец царства земнаго, избрал еси безмолвное житие и ныне праведно венцем нетленным увенчанный на Небесех царствуеши, исходатайствуй и нам, смиренно молим тя, житие тихое и безмятежное и к Вечному Царствию шествие неуклонное твоим предстательством устрой нам. Предстоя же со всеми святыми Престолу Божию, молися о всех православных христианех, да сохранит их Господь Бог Своею благодатию в мире, здравии, долгоденствии и всяком благополучии в должайшая лета, да присно славим и благословим Бога, в Троице Святей славимаго, Отца и Сына и Святого Духа, ныне и присно и во веки веков. Аминь. Молитва 2‑я О, святый благоверный княже Александре! Призри милостивно на ны, недостойныя рабы Божии (имена), и исходатайствуй нам житие тихое и безмятежное, и к вечному Царствию шествие неуклонное твоим предстательством устрой нам, да сохранит нас Господь Бог Своею благодатию в мире, здравии, долгоденствии и всяком благополучии в должайшая лета, да присно славим и благословим Бога в Троице Святей славимаго, Отца и Сына и Святаго Духа, ныне и присно, и во веки веков. Аминь.

Кондак 1 Взбранной Воеводе Владычице нашей Богородице, милостиво икону Свою пречудную нам даровавшей и вся верныя чада Церкве просветившей, благодарственное приносим пение. Ты же, о Царице небесе и земли, Сына Твоего о нас умоли и от всяких бед избави, да с радостию зовем Ти: Радуйся, Мати Молебнице, Милостивая о нас пред Богом Предстательнице. Икос 1 Ангел множество и вся Силы Небесныя Тебе, честнейшую Херувим и славнейшую без сравнения Серафим, небесными гласы непрестанно величают. Мы же, грешнии, ангельстей песни подражати дерзающе, со умилением поем Ти: Радуйся, Еюже рaдocть возсияет. Радуйся, Еюже клятва изчезнет. Радуйся, падшаго Адама воззвание. Радуйся, слез Евиных избавление. Радуйся, высото неудобовосходимая человеческими помыслы. Радуйся, глубино неудобозримая и ангельскима очима. Радуйся, яко еси Царево седалище. Радуйся, яко носиши Носящаго вся. Радуйся, Звездо, являющая Солнце. Радуйся, утробо Божественнаго воплощения. Радуйся, Еюже обновляется тварь. Радуйся, Еюже покланяемся Творцу. Радуйся, Мати Молебнице, Милостивая о нас пред Богом Предстательнице. Кондак 2 Видяще Твое милосердие неизреченное, Всемилостивая Владычице, всем верно молящимся Тебе преизобильно являемое, и многая и дивная чудеса Тобою чрез святыя иконы Твоя творимая, величаем Тя, возвеличившую род наш Твоим благоволением, и с любовию покланяемся пречистаго лика Твоего изображению, зовуще Сыну Твоему и Богу нашему: Аллилуиа. Икос 2 Разумом от Бога свыше просвещеннии, на чудотворный лик Твой взирающе, Царице Небесная, разумеем, яко дарова Тя Господь всем страждущим во избавление от бед: Ты бо с верою и упованием к Тебе прибегающим простираеши руку помощи, Владычице. Сего ради дивное заступление Твое о роде человечестем восхваляюще, радостно вопием Ти: Радуйся, совета неизреченнаго Таиннице. Радуйся, молчания просящих веро. Радуйся, чудес Христовых начало. Радуйся, велений Его главизно. Радуйся, лествице небесная, Еюже сниде Бог. Радуйся, мосте, преводяй сущих от земли на небо. Радуйся, Ангелов многословущее чудо. Радуйся, бесов многоплачевное поражение. Радуйся, Свет неизреченно родившая. Радуйся, еже како, ни единаго же научившая. Радуйся, премудрых превосходящая разум. Радуйся, верных озаряющая смыслы. Радуйся, Мати Молебнице, Милостивая о нас пред Богом Предстательнице. Кондак 3 Сила Вышняго осени Тя, Пречистая, егда Архангелу Гавриилу, безсеменное зачатие Ти благовествующу, со смирением «Се, Раба Господня», — рекла еси, Богу же из глубины сердечныя вопия: Аллилуиа. Икос 3 Имущи Тя, Мати Божия, Премилосердную Ходатаицу за нас, пред возлюбленным Сыном Твоим и Богом нашим непрестанно молитвы Своя возносящую, с благодарением ко образу Твоему прибегаем и Тебе, яко источнику радости приснотекущия, вопием: Радуйся, отрасли неувядаемыя розго. Радуйся, Плода безсмертнаго стяжание. Радуйся, Делателя делающая Человеколюбца. Радуйся, Садителя жизни нашея рождшая. Радуйся, ниво, растящая гобзование щедрот. Радуйся, трапезо, носящая обилие очищения. Радуйся, яко рай пищный процветаеши. Радуйся, яко пристанище душам готовиши. Радуйся, приятное молитвы кадило. Радуйся, всего мира очищение. Радуйся, Божие к смертным благоволение. Радуйся, смертных к Богу дерзновение. Радуйся, Мати Молебнице, Милостивая о нас пред Богом Предстательнице. Кондак 4 Бури житейския избегающи, под осенение иконы Твоея, Преблагая Владычице, вернии притекают и мольбы своя пред тою возносят, получивше же благодатное утешение от Тебе, восхваляют матерния щедроты Твоя, поя о Тебе Богу: Аллилуиа. Икос 4 Слышавше о чудесех Твоих, Преблагословенная, от икон Твоих бываемая, просим Тя, Дево Богородице: умоли Сына Твоего и Бога нашего, да укрепит нас творити волю Его, да поможет нам во всех трудех наших, да исцелит нас от страстей и уврачует греховныя язвы душ и телес наших, да благодаряще Господа, воспеваем Ти сице: Радуйся, Агнца и Пастыря Мати. Радуйся, дворе словесных овец. Радуйся, невидимых врагов мучение. Радуйся, райских дверей отверзение. Радуйся, яко небесная срадуются земным. Радуйся, яко земная сликовствуют небесным. Радуйся, апостолов немолчная уста. Радуйся, страстотерпцев непобедимая дерзосте. Радуйся, твердое веры утверждение. Радуйся, светлое благодати познание. Радуйся, Еюже обнажися ад. Радуйся, Еюже облекохомся славою. Радуйся, Мати Молебнице, Милостивая о нас пред Богом Предстательнице. Кондак 5 Боготечная звезда явися икона Твоя «Мати Молебница», путь спасения верным указующая и сущих в болезнех и печалех радостию осиявающая; на нюже взирающе, Тебе, истинней Матери Божией, с любовию покланяемся и за вся милости и щедроты Твоя благодарение возносим, Богу вопия: Аллилуиа. Икос 5 Видевше богатыя и неисчетныя милости Твоя, Пресвятая Дево, вси вернии Тебе Материю своею величают: Ты бо еси воистину любвеобильная и сердобольная о всех нас Предстательница пред Престолом Живоначальныя Троицы. Сего ради приими от нас похвалы сия: Радуйся, Звезды незаходимыя Мати. Радуйся, заре таинственнаго дне. Радуйся, прелести пещь угасившая. Радуйся, Троицы таинники просвещающая. Радуйся, мучителя безчеловечнаго изметающая от начальства. Радуйся, Господа Человеколюбца показавшая Христа. Радуйся, варварскаго избавляющая служения. Радуйся, тимения изымающая дел. Радуйся, огня поклонение угасившая. Радуйся, пламене страстей изменяющая. Радуйся, верных Наставнице целомудрия. Радуйся, всех родов веселие. Радуйся, Мати Молебнице, Милостивая о нас пред Богом Предстательнице. Кондак 6 Проповедуют благодатную помощь Твою, Всемилостивая Владычице, вси Тобою от бед и напастей спасеннии и милостивым заступлением Твоим обрадованнии, благодаряще о всех благодеяниих Твоих, вопиют о Тебе Богу: Аллилуиа. Икос 6 Возсия нам чудесы многими святая икона Твоя, о Богомати, еюже исцеления и помощь верным обильно подаеши. Мы же, таковому промышлению о нас дивяся, с любовию вопием Ти сице: Радуйся, исправление человеков. Радуйся, низпадение бесов. Радуйся, прелести державу поправшая. Радуйся, идольскую лесть обличившая. Радуйся, море, потопившее фараона мысленнаго. Радуйся, каменю, напоивший жаждущия жизни. Радуйся, огненный столпе, наставляяй сущия во тьме. Радуйся, покрове миру, ширший облака. Радуйся, пище, манны Приемнице. Радуйся, сладости святыя Служительнице. Радуйся, земле обетования. Радуйся, из неяже течет мед и млеко. Радуйся, Мати Молебнице, Милостивая о нас пред Богом Предстательнице. Кондак 7 Хотящих всех спастися и в разум истины приити милостиво под кров Свой, Пречистая Дево, приемлеши и благодатныя дары от иконы Твоея подаеши. Темже, со усердием припадающе к многоцелебному образу Твоему, взываем Богу: Аллилуиа. Икос 7 Дивную Ходатаицу за род человеческий показал еси нам, Господи, Пречистую Матерь Твою, Преблагословенную Деву Богородицу, Еяже всемощным покровом невидимо покрываеми, бед и напастей избавляемся, поюще: Радуйся, цвете нетления. Радуйся, венче воздержания. Радуйся, воскресения образ облистающая. Радуйся, ангельское житие являющая. Радуйся, древо светлоплодовитое, от негоже питаются вернии. Радуйся, древо благосеннолиственное, имже покрываются мнози. Радуйся, во чреве носящая Избавителя плененным. Радуйся, рождшая Наставника заблуждшим. Радуйся, Судии праведнаго умоление. Радуйся, многих согрешений прощение. Радуйся, одеждо нагих дерзновения. Радуйся, любы, всякое желание побеждающая. Радуйся, Мати Молебнице, Милостивая о нас пред Богом Предстательнице. Кондак 8 Странствие земное многотрудное и многоскорбное зде совершающе, горняго града, Иерусалима Небеснаго, непрестанно взыскуем, Тя, Владычице, Путеводительницу Благую имуще. Ты же не престай наставляти путем заповедей Христовых шествовати, всех вопиющих Богу: Аллилуиа. Икос 8 Всем вся верою призывающим Тя на помощь, Царице небесе и земли, по коегождо потребе подаеши: скорбящим – утешение, бедствующим – вспоможение, болящим – исцеление, маловерным – в вере укрепление, страждущим – отраду. О всех сих благодеяниих Твоих благодарственно вопием Ти сице: Радуйся, Бога невместимаго вместилище. Радуйся, честнаго таинства двери. Радуйся, неверных сумнительное слышание. Радуйся, верных известная похвало. Радуйся, колеснице пресвятая Сущаго на Херувимех. Радуйся, селение преславное Сущаго на Серафимех. Радуйся, противная в тожде собравшая. Радуйся, девство и рождество сочетавшая. Радуйся, Еюже разрешися преступление. Радуйся, Еюже отверзеся рай. Радуйся, ключу Царствия Христова. Радуйся, надеждо благ вечных. Радуйся, Мати Молебнице, Милостивая о нас пред Богом Предстательнице. Кондак 9 Всяк земнородный, духом просвещаемь, радостию да торжествует, славяще неисчетныя милости Твоя, Всеблагая Владычице, и со Архангелом да вопиет: «Радуйся, Благодатная, Господь с Тобою!», и Тобою с нами, вопиющими Ему: Аллилуиа. Икос 9 Ветии человечестии не возмогут по достоянию восхвалити дивная чудотворения Твоя от образа Твоего «Мати Молебница» именуемаго и от множества иных икон верным источаемая. Мы же, преславная чудеса Твоя видяще, со умилением сердечным Тебе взываем: Радуйся, премудрости Божия приятелище. Радуйся, промышления Его сокровище. Радуйся, любомудрыя немудрыя являющая. Радуйся, хитрословесныя безсловесныя обличающая. Радуйся, яко обуяша лютии взыскателе. Радуйся, яко увядоша баснотворцы. Радуйся, афинейская плетения растерзающая. Радуйся, рыбарския мрежи исполняющая. Радуйся, из глубины неведения извлачающая. Радуйся, многи в разуме просвещающая. Радуйся, кораблю хотящих спастися. Радуйся, пристанище житейских плаваний. Радуйся, Мати Молебнице, Милостивая о нас пред Богом Предстательнице. Кондак 10 Спасти хотя мир, Иже всех Спаситель и Господь, дарова Тя, Владычице Богородице, нам яко Всемощную Покровительницу и Заступницу. Мы же, воспоминая глаголы Твоя к Нему: «Царю Небесный, приими всякаго человека, молящагося Тебе и призывающаго имя Мое на помощь, да не отъидет от лика Моего тощь и неуслышан» и несумненную надежду на милосердие Божие имуще, благодарственно вопием о Тебе: Аллилуиа. Икос 10 Стена нерушимая и прибежище еси Ты, Царице Небесная, всем, упование свое на Тя возлагающим и пред чудотворным образом Твоим с верою Тебе молящимся и воспевающим Ти сице: Радуйся, столпе девства. Радуйся, дверь спасения. Радуйся, Начальнице мысленнаго наздания. Радуйся, Подательнице Божественныя благости. Радуйся, Ты бо обновила еси зачатыя студно. Радуйся, Ты бо наказала еси окраденныя умом. Радуйся, тлителя смыслов упраждняющая. Радуйся, Сеятеля чистоты рождшая. Радуйся, чертоже безсеменнаго уневещения. Радуйся, верных Господеви сочетавшая. Радуйся, добрая Младопитательнице девам. Радуйся, Невестокрасительнице душ святых. Радуйся, Мати Молебнице, Милостивая о нас пред Богом Предстательнице. Кондак 11 Пение всеумиленное приносим Ти, милосердная наша Заступнице, и молим Тя: от бед и напастей нас избави, да Тобою утешаеми и облагодетельствовани, Возлюбленному Сыну Твоему вопием: Аллилуиа. Икос 11 Светоприемная свеща истиннаго Света сущим на земли явльшися, Благодатная Дево Богородице, души просвещаеши с любовию к Тебе притекающим и молишися пред Престолом Небеснаго Владыки о всех поющих Ти таковая: Радуйся, луче умнаго Солнца. Радуйся, светило незаходимаго Света. Радуйся, молние, души просвещающая. Радуйся, яко гром враги устрашающая. Радуйся, яко многосветлое возсияваеши просвещение. Радуйся, яко многотекущую источаеши реку. Радуйся, купели живописующая образ. Радуйся, греховную отъемлющая скверну. Радуйся, бане, омывающая совесть. Радуйся, чаше, черплющая рaдocть. Радуйся, обоняние Христова благоухания. Радуйся, животе тайнаго веселия. Радуйся, Мати Молебнице, Милостивая о нас пред Богом Предстательнице. Кондак 12 Благодать Божественную испроси нам у Сына Твоего и Бога, Всеблагая Владычице, руку помощи нам простирающи и от всякаго зла сохраняющи, пред святою иконою Твоею «Мати Молебница» молящихся и со умилением поющих о Тебе Богу: Аллилуиа. Икос 12 Поюще чудеса Твоя и матернее милосердие к роду человеческому, хвалим Тя, Преблагословенная, яко твердую Предстательницу нашу, веруем бо, яко испросиши для нас вся полезная благая, по обетованию Сына Твоего, рекшаго Ти: «Проси, Мати Моя, зане не отвращуся Тебе, но исполню вся прошения Твоя» и научившаго всех благодарственная пети Ти сицевая: Радуйся, селение Бога и Слова. Радуйся, святая святых большая. Радуйся, ковчеже, позлащенный Духом. Радуйся, сокровище живота неистощимое. Радуйся, честный венче царей благочестивых. Радуйся, честная похвало иереев благоговейных. Радуйся, Церкве непоколебимый столпе. Радуйся, Царствия нерушимая стено. Радуйся, Еюже воздвижутся победы. Радуйся, Еюже низпадают врази. Радуйся, тела моего врачевание. Радуйся, души моея спасение. Радуйся, Мати Молебнице, Милостивая о нас пред Богом Предстательнице. Кондак 13 О Всепетая Мати, Госпоже Дево Богородице, рождшая всех святых Святейшее Слово! Приими милостиво сие малое приношение наше и Сыну Твоему принеси, да избавит нас от всех бед и напастей и будущия измет муки, о Тебе вопиющих Ему: Аллилуиа.[Се́й конда́к глаго́лется три́жды.][Далее повторяем 1‑е икос и кондак:]Икос 1 Ангел множество и вся Силы Небесныя Тебе, честнейшую Херувим и славнейшую без сравнения Серафим, небесными гласы непрестанно величают. Мы же, грешнии, ангельстей песни подражати дерзающе, со умилением поем Ти: Радуйся, Еюже рaдocть возсияет. Радуйся, Еюже клятва изчезнет. Радуйся, падшаго Адама воззвание. Радуйся, слез Евиных избавление. Радуйся, высото неудобовосходимая человеческими помыслы. Радуйся, глубино неудобозримая и ангельскима очима. Радуйся, яко еси Царево седалище. Радуйся, яко носиши Носящаго вся. Радуйся, Звездо, являющая Солнце. Радуйся, утробо Божественнаго воплощения. Радуйся, Еюже обновляется тварь. Радуйся, Еюже покланяемся Творцу. Радуйся, Мати Молебнице, Милостивая о нас пред Богом Предстательнице. Кондак 1 Взбранной Воеводе Владычице нашей Богородице, милостиво икону Свою пречудную нам даровавшей и вся верныя чада Церкве просветившей, благодарственное приносим пение. Ты же, о Царице небесе и земли, Сына Твоего о нас умоли и от всяких бед избави, да с радостию зовем Ти: Радуйся, Мати Молебнице, Милостивая о нас пред Богом Предстательнице. Молитва О Пречистая Госпоже Владычице Богородице, Надеждо нашего спасения! Воззри милостивно на предстоящия с верою и любовию и покланяющияся пречистому образу Твоему: приими наше хвалебное пение сие и пролей теплую Твою молитву о нас, грешных, ко Господу, да, презрев вся наша согрешения, спасет и помилует нас. О Предивная Владычице! Покажи на нас чудныя милости Твоя. Молим Тя умиленно: избави нас от всякия скорби, настави на путь всякия добродетели и благостыни, спаси от искушений, бед и болезней, изми от нас оклеветания и ссоры, сохрани от молниеноснаго грома, от запаления огненнаго, от глада, труса, потопа и смертоносныя язвы: подай нам Свою милостивную помощь на пути, в мори и на суше, да не погибнем люте. О Всемилостивая Мати, с твердым упованием возсылаем к Тебе нашу смиренную молитву! Не отрини наших слез и воздыханий, не забуди нас во вся дни живота нашего, но всегда пребывай с нами и Твоим заступлением и ходатайством у Господа подаждь нам отраду, утешение, защиту и помощь, да выну славим и величаем преблагословенное и всепетое имя Твое. Аминь.

Текст утвержден Священным Синодом Русской Православной Церкви 8 декабря 2020 года (журнал № 99) [Акафист составлен в 1919 году епископом Калужским и Боровским Феофаном (Туляковым; †1937)] Кондак 1 Взбра́нной Воево́де, Пренепоро́чней Де́ве Богоро́дице, земли́ Калу́жския изба́вительнице, хвале́бныя пе́сни прино́сим Ти, раби́ Твои́, я́ко ико́ны Твоея́ явле́нием дарова́вшей нам стра́жа неусы́пна. Ты же моле́ния на́шего, пред ико́ною Твое́ю возноси́маго, не отве́ржи, но защити́ ны, Влады́чице, от всех враго́в ви́димых и неви́димых и изба́ви ны от вся́ких боле́зней душе́вных и теле́сных, да во умиле́нии се́рдца зове́м Ти: Ра́дуйся, Влады́чице, ми́лость Свою́ и заступле́ние нам явля́ющая. Икос 1 А́нгелов мно́жество сла́вят Тя, Цари́цу всех и Богоро́дицу, Ты бо испо́лнила еси́ ра́дости сердца́ на́ша явле́нием нам чудотво́рныя ико́ны Твоея́ в Тинько́ве и чудесы́ во хра́ме и́мене Рождества́ Твоего́ в ве́си Калу́жке; сей у́бо ико́не Твое́й поклоня́ющеся, Тебе́, богоизбра́нная Де́во, моле́ние возно́сим, со стра́хом и любо́вию глаго́люще: Ра́дуйся, от патриа́рхов прообразова́нная и от проро́ков предвозвеще́нная; ра́дуйся, ро́ждшая А́гнца, взе́мшаго грехи́ ми́ра. Ра́дуйся, Ада́ма и Е́ву от дре́вняго прокля́тия свободи́вшая; ра́дуйся, чудотво́рною ико́ною Твое́ю всю зе́млю Калу́жскую озаря́ющая. Ра́дуйся, ико́ну Твою́ во зна́мение ми́лости нам да́вшая; ра́дуйся, я́ко на ико́ну Твою́ взира́юще, Само́й Тебе́, и́стинней Богоро́дице, покланя́емся. Ра́дуйся, Влады́чице, ми́лость Свою́ и засту́пление нам явля́ющая. Кондак 2 Ви́дящи начерта́ние ли́ка Твоего́, деви́ца Евдоки́я в развраще́нии се́рдца своего́ дерзнове́нно оплева́нием поруга́ся ему́, не ве́дущи, я́ко сей Твой лик есть, Пресвята́я Дево; Ты же вразумле́ния ра́ди вда́ла еси́ ю́ в разслабле́ние всего́ телесе́, смягче́ние руку́ и ногу́, ослепле́ние о́чию и язы́ка немо́тствование, и сим показа́ла еси́, я́ко начерта́ние ли́ка сего́ есть ико́на Твоя́ чудотво́рная, да вси лю́дие вопию́т к ро́ждшемуся от Тебе́ Бо́гу Сло́ву: Аллилу́иа. Икос 2 Ра́зум челове́ческий не мо́жет пости́гнути вели́каго Твоего́ милосе́рдия, Пресвята́я Богоро́дице, я́ко и́скреннее покая́ние боля́щия деви́цы прия́ла еси́ и соверше́нное исцеле́ние ей дарова́ла еси́, да моли́тву прино́сит пред ико́ною Твое́ю, взыва́ющи си́це: Ра́дуйся, ле́ствице небе́сная, Иа́ковом предви́денная; ра́дуйся, та́йну воплоще́ния Бо́жия, пре́жде век в Бо́зе сокрове́нную, откры́вшая. Ра́дуйся, веду́щим брань проти́ву ми́ра и диа́вола до́брая споспе́шнице; ра́дуйся, от грехопаде́ний на́ших, и́мже несть числа́, избавля́ющая. Ра́дуйся, я́ко призыва́ющия и́мя Твое́ от паде́ния стра́стнаго возставля́ющая; ра́дуйся, благода́тное безстра́стие и́щущим сие́ усе́рдно подаю́щая. Ра́дуйся, Влады́чице, ми́лость Свою́ и засту́пление нам явля́ющая. Кондак 3 Си́лою, да́нною Ти свы́ше, чудотво́рную Твою́ ико́ну, Пречи́стая Богоро́дице, дарова́ла еси́ нам в зна́мение ми́лости Твоея́, я́вльшися роди́телем тоя́ деви́цы, и рекла́ еси́ им: Бу́ду хода́тайствовати о гра́де Калу́ге и о всех лю́дех его́. Мы же, взира́юще на ико́ну Твою́ и мно́жество чуде́с от нея́ ве́дуще, с ра́достию к ней припа́даем и из глубины́ се́рдца благодари́м Тя, ди́вную Засту́пницу, взыва́юще Бо́гу: Аллилу́иа. Икос 3 Иму́щи присное милосердное попече́ние о е́же лю́дем согре́шшим не до конца́ поги́бнути, роди́телем тоя́ деви́цы повеле́ла еси́, Пресвята́я Богоро́дице, да сверше́но бу́дет моле́бствие пред Твое́ю ико́ною со освяще́нием воды́ и да окропи́т иере́й дщерь их, боле́знию пораже́нную, я́ко да исцеле́ет от неду́га своего́. Нас же спаси́, Госпоже́, ве́рою и любо́вию воспева́ющих Ти: Ра́дуйся, две́ре, Иезеки́илем прорече́нная; ра́дуйся, вочелове́чению Еди́наго от Святы́я Тро́ицы непоро́чно послужи́вшая. Ра́дуйся, рожде́нием Сы́на Твоего́ спасе́ние ми́ру я́вльшая; ра́дуйся, с ве́рою и́мя Твое́ призыва́ющих от сме́рти спаса́ющая. Ра́дуйся, святи́телей весе́лие и благогове́йных иерее́в похвало́; ра́дуйся, и́ноков и и́нокинь благочести́вых изря́дная Покрови́тельнице. Ра́дуйся, Влады́чице, ми́лость Свою́ и засту́пление нам явля́ющая. Кондак 4 Бу́рю напа́стей прови́дя, угрожа́вших кра́ю Калу́жскому от Наполео́на, святи́тель Евла́мпий моля́шеся пред Твое́ю ико́ною, Богоро́дице, о избавле́нии от враго́в; весть же прие́мь, я́ко во́инство вра́жие пораже́но бысть на реце́ Черну́шце, благода́рственно Спа́су Христу́ возопи́: Аллилу́иа. Икос 4 Слы́шавше ми́лость Твою́, Богоро́дице, чрез Твою́ ико́ну на по́ли бра́ни близ ве́си Тару́тино нам низпосла́нную, егда́ яви́ла еси́ ю́ на возду́се иноплеме́нником, я́коже свиде́тельствоваша плене́ннии от них; и та́ко дарова́ла еси́ побе́ду во́ем росси́йским, ра́дуемся о Твое́й, Влады́чице, по́мощи и со упова́нием воспева́ем Ти си́це: Ра́дуйся, Купино́ неопали́мая, Богови́дцем Моисе́ем предзри́мая; ра́дуйся, от пото́па грехо́внаго нас спаса́ющая. Ра́дуйся, кади́льнице злата́я, я́ко фимиа́м благоуха́нный моли́твы Твоя́ к Бо́гу, Сы́ну Твоему́, при́сно вознося́щая; ра́дуйся, пра́ведно дви́жимый гнев Бо́жий на ны моле́нием Свои́м ско́ро утоля́ющая. Ра́дуйся, явле́нием на возду́се ико́ны Твоея́ страх и тре́пет на враги́ наве́дшая; ра́дуйся, во́инству росси́йскому побе́ду во бра́ни пода́вшая. Ра́дуйся, Влады́чице, ми́лость Свою́ и засту́пление нам явля́ющая. Кондак 5 Боготе́чная звезда́ яви́лася еси́ нам, Богоро́дице, смы́слы на́ша озаря́ющая и на путь спаси́тельный наставля́ющая, враго́м же на́шим была́ еси́, я́ко мо́лния, устраша́ющи их и отража́ющи от нас, егда́ Наполео́н, порази́в близ гра́да Малояросла́вца рать на́шу, пону́ди ю́ отыти́ ко гра́ду Калу́ге, сам же, услы́шав сие́, по Твоему́ ми́лостивому, Засту́пнице, повеле́нию, неве́домыя ра́ди вины́, вме́сто е́же ко гра́ду Калу́ге ити́, и́де по пути́, его́же сам разори́ и опустоши́, ко гра́ду Гжа́тску, и та́ко рать свою́ погуби́. Сего́ ра́ди, Твое́ кре́пкое заступле́ние ве́дуще, со умиле́нием глаго́лем Бо́гу: Аллилу́иа. Икос 5 Проя́вльши ве́лию любо́вь к лю́дем, живу́щим во стране́ Калу́жстей, Пресвята́я Богоро́дице, зе́млю на́шу сохрани́ла еси́ и мно́жество враго́в, обыше́дших ю́, дале́че от нея́ отгна́ла еси́, си́и же врази́ на́ши уве́деша, коль крепка́ есть по́мощь Бо́жия Ма́тере. Мы же, Твое́ всемо́щное заступле́ние, нам бы́вшее, до́бре ве́дуще, в ра́дости се́рдца воспева́ем Ти си́це: Ра́дуйся, клеще́ та́инственная, Иса́ием прови́денная; ра́дуйся, примире́ние на́ше с Бо́гом соде́лавшая. Ра́дуйся, Спаси́теля па́дшему челове́честву ро́ждшая; ра́дуйся, в годи́ну бра́ни по́мощию Твое́ю упова́ющих на Тя не оставля́ющая. Ра́дуйся, всемо́щным заступле́нием Твои́м от меча́ иноплеме́нных нас избавля́ющая; ра́дуйся, без проли́тия кро́ве одоле́ние правосла́вным во́ем дарова́вшая. Ра́дуйся, Влады́чице, ми́лость Свою́ и засту́пление нам явля́ющая. Кондак 6 Пропове́дница богознамени́таго чудесе́ яви́ся не́кая жена́ во гра́де Бо́ровске, ю́же вра́чеве ника́коже возмого́ша исцели́ти, и реко́ша, я́ко належи́т ей не по мно́зе вре́мени умре́ти. Она́ же, ве́ру иму́щи, я́ко си́ла Бо́жия всемогу́щая есть, не закосне́ проси́ти, да в ве́си Калу́жке пред Твое́ю, Богоро́дице, ико́ною сверше́но бу́дет о здра́вии ея́ моле́бствие, и по ве́ре свое́й а́бие от неду́га своего́ исцеле́на бысть. Те́мже и мы, благода́рственно прославля́юще Бо́га, вопие́м Ему́: Аллилу́иа. Икос 6 Возсия́ла есть ико́на Твоя́, Богоро́дице, чуде́снаго исцеле́ния ра́ди жены́, живу́щия во гра́де Бо́ровске, да́же и посреде́ жи́телей его́, в раско́ле пребыва́ющих и не чту́щих о́браз Твой. Сего́ ра́ди и синкли́т гра́дский, в не́мже по преизбы́точеству бя́ху лю́дие, в раско́ле упо́рствующии, уста́ви, да бу́дет сверше́но на сто́гнах гра́да моле́бное пе́ние пред ико́ною Твое́ю, во град сей принесе́нною. Те́мже, я́ко блага́я Влады́чица, научи́ ны разуме́ти промышле́ние Бо́жие о спасе́нии люде́й, да взыва́ем Ти ра́достно: Ра́дуйся, в защи́ту Це́ркве Правосла́вныя чудеса́ показу́ющая; ра́дуйся, хули́тели и́стинныя ве́ры неви́димо наказу́ющая. Ра́дуйся, догма́тов ве́ры огражде́ние и утвержде́ние; ра́дуйся, я́ко боже́ственную ве́ру просла́вила еси́. Ра́дуйся, раско́льники на путь благи́й обраща́ющая; ра́дуйся, пре́лесть же раско́ла посрамля́ющая. Ра́дуйся, Влады́чице, ми́лость Свою́ и засту́пление нам явля́ющая. Кондак 7 Хотя́щи возгре́ти в сердца́х люде́й земли́ Калу́жския любо́вь к ико́не Твое́й, Засту́пнице на́ша, то́ки чуде́с излива́еши от нея́: моли́твою бо, к Тебе́ возноси́мою, глухо́му внеза́пу слух дарова́ся, осле́пшему зре́ние откры́ся, разсла́бленному кре́пость во удесе́х его́ возврати́ся, здра́вие душе́ю страждуще́й и бе́сом одержи́мей даде́ся, лю́те боля́щей и врачми́ оста́вленней житие́ во здра́вии на мно́гая ле́та продолжи́ся; те́мже и мы, с любо́вию ко ико́не Твое́й припа́дающе и прославля́юще Бо́га, вопие́м Ему́: Аллилу́иа. Икос 7 Необори́мая еси́ огра́да, охраня́ющая ны от вся́ких боле́зней душе́вных и теле́сных, Пресвята́я Богоро́дице, и заступа́ющая всех, к Тебе́ прибега́ющих с моли́твою. Те́мже и мы, припа́дающе ко ико́не Твое́й, мо́лим Тя, Влады́чице: от вся́ких боле́зней душе́вных и теле́сных изба́ви ны, вопию́щия Ти из глубины́ се́рдца: Ра́дуйся, со́лнце селе́ния Христо́ва, псалмопе́вцем предъявле́нное; ра́дуйся, ро́ждшая Изба́вителя, беззако́ния на́ша ту́не очища́ющаго. Ра́дуйся, ста́мно пресвята́я, в не́йже а́лчущим пра́вды соблюда́ется Хлеб жи́зни ве́чныя; ра́дуйся, я́ко приходя́щих с ве́рою к чудотво́рней Твое́й ико́не от боле́зней душе́вных и теле́сных ми́лостивно врачу́еши. Ра́дуйся, боле́знующих, оста́вленных врачми́, от сме́рти избавля́ющая; ра́дуйся, я́ко моли́твами Твои́ми престаю́т тлетво́рнии ве́три и смертоно́сныя я́звы. Ра́дуйся, Влады́чице, ми́лость Свою́ и засту́пление нам явля́ющая. Кондак 8 Вели́кое и уму́ челове́ческому неудобопости́жное чу́до яви́ла еси́, Влады́чице ми́ра, егда́ внеза́пу исцели́ла и укрепи́ла еси́ в тре́звенном житии́ не́кую жену́, в о́бласти гра́да Жи́здры жи́вшую, я́же пья́нству предана́ бе; со́вестию свое́ю терза́шеся, я́ко стра́стию поро́ка порабоще́на бысть, и сея́ ра́ди вины́ обрати́ся с ве́рою к Тебе́, Влады́чице, моля́щися пред Твое́ю ико́ною и от Тебе́ исцеле́ние жела́ющи получи́ти. Сего́ ра́ди и мы, на ми́лость Твою́ упова́юще, восхваля́ем Твое́ милосе́рдие, взыва́юще Бо́гу: Аллилу́иа. Икос 8 Ви́дят и слы́шат жи́тели Калу́жския земли́ но́вую купе́ль Силоа́мскую, па́че о́ныя дре́вния я́вльшуюся, Пресвята́я Богоро́дице, в хра́ме Рождества́ Твоего́ в ве́си Калу́жке, в не́мже покланя́ются чудотво́рней ико́не Твое́й; не еди́ножды бо в ле́то и не то́чию пе́рвее входя́й здра́вие прие́млет, но вы́ну всяк неду́г врачу́еши всех с ве́рою к Тебе́ прибега́ющих. Сего́ ра́ди вопие́м Ти: Ра́дуйся, Ея́же ра́ди ад стене́т и ду́си зло́бы трепе́щут; ра́дуйся, Ея́же ра́ди врата́ рая́ всем нам отверза́ются. Ра́дуйся, по́мощь Твою́ святу́ю благовре́менно подаю́щая вся́цей души́, ве́рно Тебе́ моля́щейся; ра́дуйся, от стра́сти пия́нства обрати́вшихся к Тебе́ с моли́твою избавля́ющая. Ра́дуйся, от ро́ва поги́бельнаго безнаде́жных извлача́ющая; ра́дуйся, притека́ющих к покро́ву Твоему́ сла́дкое успокое́ние. Ра́дуйся, Влады́чице, ми́лость Свою́ и засту́пление нам явля́ющая. Кондак 9 Вси горды́нею одержи́мии страх Бо́жий ско́ро забыва́ют. Си́це две жены́, в стране́ Калу́жстей живу́щия, горды́нею преиспо́лненныя, я́сно явля́ху сомне́ние свое́, я́ко ико́на Твоя́ цельбоно́сна есть, Влады́чице, и сим толи́ко прогне́ваша Бо́га, я́ко пра́ведным судо́м Его́ тя́жкими неду́ги наказа́ние прия́ша. Мы же, таково́е вразумле́ние ви́дяще, с любо́вию покланя́емся Твоему́ о́бразу, взыва́юще Бо́гу: Аллилу́иа. Икос 9 Вети́и ве́ка сего́ отрица́ют поклоне́ние ико́не Твое́й, Пречи́стая Де́во, не разуме́ют бо в свое́м суему́дрии, я́ко честь, ико́не воздава́емая, на первообра́зное восхо́дит. Мы же, не то́кмо сие́ ве́дуще, но и благодея́ния, ико́ною Твое́ю нам явля́емая, душе́ю ра́дующеся, Тебе́, Богоро́дице, глаго́лем: Ра́дуйся, ста́мно всезлата́я, в не́йже плоть и кровь Боже́ственнаго А́гнца угото́вашася; ра́дуйся, трапе́зо свята́я, Хле́бом жи́зни нас пита́ющая. Ра́дуйся, су́етную му́дрость нечести́вых вети́й посрамля́ющая и ослепле́нных е́ю на путь пра́вый наставля́ющая; ра́дуйся, я́ко по благосты́ни Свое́й угаша́еши в нас огнь нече́стия пла́менем огня́ Боже́ственнаго. Ра́дуйся, вразумля́ющая зна́меньми и чудесы́ коле́блемых в ве́ре; ра́дуйся, Богоблагода́тная, страх Бо́жий и смире́ние в сердца́ на́ша вселя́ющая. Ра́дуйся, Влады́чице, ми́лость Свою́ и засту́пление нам явля́ющая. Кондак 10 Спасти́ хотя́щи лю́ди, покланя́ющияся Твое́й ико́не, от бед, благоволи́ла еси́, Богоро́дице, яви́тися не́коей деви́це, в Лу́жецком, близ гра́да Можа́йска, монастыри́ жи́тельствовавшей, и предвари́ти, да не и́мать обще́ния с жено́ю развраще́нною, и тем сохрани́ла еси́ деви́цу о́ную от гряду́щия беды́. Те́мже и мы прославля́ем Го́спода Бо́га, да́вшаго благода́ть такову́ю ико́не Твое́й, и вопие́м Ему́: Аллилу́иа. Икос 10 Стена́ еси кре́пкая, огражда́ющая род челове́ческий от бед, Пресвята́я Богоро́дице, ско́рую по́мощь явля́ющая от Твое́я ико́ны всем чту́щим ю́ во гра́дех, ве́сех и оби́телех. Сего́ ра́ди и мы, осеня́емии Твои́м, Богома́ти, заступле́нием, на Твой взира́юще пречи́стый о́браз, мо́лим Тя, да изба́виши ны от вся́ких клеве́т, бед и скорбе́й, вопию́щих Ти: Ра́дуйся, я́вльшая ми́ру обетова́ннаго Сокруши́теля главы́ зми́евы; ра́дуйся, ра́дость ве́чную, Спаси́теля ми́ру, ро́ждшая. Ра́дуйся, рожде́нием Сы́на Бо́жия две́ри ца́рствия Христо́ва нам отве́рзшая; ра́дуйся, казнь Бо́жию за беззако́ния на́ша от глав на́ших отводя́щая. Ра́дуйся, лю́бящих и чту́щих Тя от вся́ких бед и скорбе́й избавля́ющая; ра́дуйся, ра́досте всего́ ми́ра, Е́юже сле́зы скорбя́щих отъе́млются. Ра́дуйся, Влады́чице, ми́лость Свою́ и засту́пление нам явля́ющая. Кондак 11 Пе́ние непреста́нно приноша́ше Ти, Пресвята́я Богоро́дице, не́кий жи́тель Жи́здринския ве́си, с ве́рою пред Твое́ю ико́ною моля́ся, да ему́ дщерь да́руеши. Ты же, Богоро́дице, благоволи́ла еси́ вня́ти мольба́м его́ и исполнити проше́ние его́. Мы же, зря́ще на Твою́ ико́ну и ви́дяще то́ки чуде́с, от нея́ излива́емыя, блага́я Богороди́тельнице, из глубины́ се́рдца благодари́м Тя, Цари́цу на́шу ди́вную, воспева́юще Бо́гу: Аллилу́иа. Икос 11 Све́тлыми луча́ми чуде́с ико́на Твоя́ сия́ет, Богома́ти Пречи́стая, и прогоня́ет си́лою Бо́жиею вся́кое вра́жие де́йство; те́мже и мы, гре́шнии, иму́ще таково́е зна́мение Твоего́ к нам благоволе́ния, ра́дуемся, глаго́люще: о, Пресвята́я Богоро́дице! Умоли́ Го́спода, да спасе́т ны и́миже весть судьба́ми, да не поги́бнем в нераска́янии о на́ших грехопаде́ниих, и услы́ши похвалы́ сия́, Тебе́ возноси́мыя: Ра́дуйся, Творца́ небесе́ и земли́ безсе́менно воплоти́вшая; ра́дуйся, осене́нием святы́я ико́ны Твоея́ вся́кое вра́жие де́йство от нас отгоня́ющая. Ра́дуйся, проше́ния на́ша на по́льзу исполня́ющая; ра́дуйся, неоскудева́емый исто́чниче благослове́ний и ми́лостей Бо́жиих к лю́дем Твои́м. Ра́дуйся, благочести́вых супру́жеств незри́мое огражде́ние; ра́дуйся, моли́тв ра́ди усе́рдных плод безча́дным низпосыла́ющая. Ра́дуйся, Влады́чице, ми́лость Свою́ и засту́пление нам явля́ющая. Кондак 12 Благода́ть умиле́ния моли́твеннаго от Твоея́, Влады́чице, ико́ны источа́емая, да испо́лнит ду́ши на́ша, а́ще и грех ра́ди в безчу́вствие впа́даем. Пробуди́ на́ше душе́вное усыпле́ние, да не поги́бнем лю́те без покая́ния, и приими́ нас в ве́чныя кро́вы, Богороди́тельнице, да, ра́дующеся, пое́м Бо́гу, Тобо́ю нас спаса́ющему: Аллилу́иа. Икос 12 Пою́ще чудеса́, явля́емая от Твоея́ ико́ны, Ма́ти Христа́ Бо́га на́шего, и припа́дающе к ней, мо́лим Тя, Влады́чице: бу́ди нам защище́ние в день кончи́ны на́шея, егда́ и́мамы предста́ти на суд пред стра́шным Престо́лом сла́вы Сы́на Твоего́, Го́спода на́шего, да вопие́м Ти: Ра́дуйся, от вла́сти лю́таго мироде́ржца упова́ющих на Тя избавля́ющая; ра́дуйся, гнев Бо́жий от ро́да правосла́внаго отводя́щая. Ра́дуйся, благу́ю христиа́нскую кончи́ну ублажа́ющим Тя подаю́щая; ра́дуйся, сла́вящия Тя на возду́шных мыта́рствах заступа́ющая. Ра́дуйся, кре́пкая наде́ждо ве́чнаго спасе́ния; ра́дуйся, две́ри ра́йския отверза́ющая при́сно Тя блажа́щим. Ра́дуйся, Влады́чице, ми́лость Свою́ и засту́пление нам явля́ющая. Кондак 13 О, всепе́тая Ма́ти Христа́ Бо́га на́шего! Приими́ ми́лостивно сие́ моле́ние на́ше, е́же прино́сим пред Твое́ю ико́ною, и в час сме́ртный яви́ся нам Сама́, Пречи́стая, простира́ющи ру́ку по́мощи, отгоня́ющи ду́хи зло́бы, и́щущия поглоти́ти ду́ши на́ша при разлуче́нии от телесе́, и умоли́ приснопокланя́емую Тро́ицу изба́вити ны муче́ния ве́чнаго, да предста́тельством Твои́м насле́дуем Ца́рствие Небе́сное и сподо́бимся со святы́ми пе́ти Бо́гу: Аллилу́иа.[Се́й конда́к глаго́лется три́жды.][Далее повторяем 1‑е икос и кондак:]Икос 1 А́нгелов мно́жество сла́вят Тя, Цари́цу всех и Богоро́дицу, Ты бо испо́лнила еси́ ра́дости сердца́ на́ша явле́нием нам чудотво́рныя ико́ны Твоея́ в Тинько́ве и чудесы́ во хра́ме и́мене Рождества́ Твоего́ в ве́си Калу́жке; сей у́бо ико́не Твое́й поклоня́ющеся, Тебе́, богоизбра́нная Де́во, моле́ние возно́сим, со стра́хом и любо́вию глаго́люще: Ра́дуйся, от патриа́рхов прообразова́нная и от проро́ков предвозвеще́нная; ра́дуйся, ро́ждшая А́гнца, взе́мшаго грехи́ ми́ра. Ра́дуйся, Ада́ма и Е́ву от дре́вняго прокля́тия свободи́вшая; ра́дуйся, чудотво́рною ико́ною Твое́ю всю зе́млю Калу́жскую озаря́ющая. Ра́дуйся, ико́ну Твою́ во зна́мение ми́лости нам да́вшая; ра́дуйся, я́ко на ико́ну Твою́ взира́юще, Само́й Тебе́, и́стинней Богоро́дице, покланя́емся. Ра́дуйся, Влады́чице, ми́лость Свою́ и засту́пление нам явля́ющая. Кондак 1 Взбра́нной Воево́де, Пренепоро́чней Де́ве Богоро́дице, земли́ Калу́жския изба́вительнице, хвале́бныя пе́сни прино́сим Ти, раби́ Твои́, я́ко ико́ны Твоея́ явле́нием дарова́вшей нам стра́жа неусы́пна. Ты же моле́ния на́шего, пред ико́ною Твое́ю возноси́маго, не отве́ржи, но защити́ ны, Влады́чице, от всех враго́в ви́димых и неви́димых и изба́ви ны от вся́ких боле́зней душе́вных и теле́сных, да во умиле́нии се́рдца зове́м Ти: Ра́дуйся, Влады́чице, ми́лость Свою́ и заступле́ние нам явля́ющая. Молитва О, Пресвята́я Де́во, Ма́ти Христа́ Бо́га на́шего, ди́вная Цари́це небесе́ и земли́! Вонми́ многоболе́зненному воздыха́нию серде́ц на́ших, при́зри с высоты́ святы́я Твоея́ на нас, с ве́рою и любо́вию предстоя́щих пред чудотво́рною Твое́ю ико́ною и со умиле́нием моля́щихся Тебе́, Влады́чице! Не преда́ждь умале́нию Це́рковь Правосла́вную, помози́ нам, Пресвята́я Богоро́дице, святооте́ческую правосла́вную ве́ру до конца́ дней на́ших непоро́чно сохрани́ти, во всех за́поведех Госпо́дних неукло́нно ходи́ти и изба́ви ны от па́губных душевре́дных уче́ний. На Твою́, ди́вная Цари́це, ми́лость упова́ем раби́ Твои́: очи́сти умы́ на́ша от грехо́вных по́мыслов, ду́ши – от разслабле́ния, обурева́ния страсте́й, искуше́ний, собла́знов и грехопаде́ний, Ты бо еси́, Влады́чице, кре́пкое прибе́жище гре́шников ка́ющихся. Воздви́гни нас из глубины́ грехо́вныя и и́стинным покая́нием ороси́ изсо́хшая сердца́ на́ша, просвети́ серде́чная о́чи на́ша к зре́нию спасе́ния и прельще́нных бесо́вскою пре́лестию на путь пра́вый наста́ви; вся́кое де́ло зло́е и богопроти́вное разруши́, вся́кому же благо́му и богоуго́дному де́лу научи́ и споспе́шествуй; вложи́, Влады́чице, в сердца́ на́ша дух стра́ха Бо́жия, дух благоче́стия, дух кро́тости, смире́ния, терпе́ния, незло́бия; умягчи́ зла́я сердца́ на́ша и злы́я бла́ги сотвори́, низпосли́ нам ре́вность о спасе́нии. Вразуми́ и научи́ ны, о Всеми́лостивая Засту́пнице на́ша, ка́ко безгре́шно ходи́ти по пути́ земна́го сего́ жития́, я́ко Ты, Пресвята́я, ве́си и ве́ру на́шу, и упова́ние на́ше ви́диши. О Влады́чице ми́ра! Скорбя́щих уте́ши, бе́дствующим помози́; сохрани́ от молниено́снаго гро́ма, тлетво́рных ве́тров, лю́тых боле́зней, смертоно́сныя я́звы, междоусо́бныя бра́ни, наше́ствия враго́в иноплеме́нных. О Пресвята́я Богоро́дице! Изба́ви ны от внеза́пныя и наси́льственныя сме́рти; всем нам да́руй обраще́ние на путь и́стинный и христиа́нскую кончи́ну живота́ на́шего, безболе́зненну, непосты́дну, ми́рну, Святы́х Та́ин прича́стну. Во вре́мя исхо́да на́шего предста́ни нам, Де́во Богоро́дице, и изба́ви ны от вла́сти бесо́вския, возду́шных го́рьких мыта́рств и огня́ ве́чнаго. Сконча́вшимся внеза́пною сме́ртию ми́лостива бы́ти Сы́на Твоего́ умоли́ и о всех усо́пших, и́же не и́мут сро́дников, о упокое́нии их Сы́на Твоего́ умоля́ющих, Са́ма бу́ди непреста́нная и те́плая Моли́твенница и Хода́таица. Преста́вльшияся же в ве́ре и покая́нии от вре́меннаго жития́ сего́ отцы́, бра́тию и сестры́ на́ша сподо́би Твои́м хода́тайством всели́тися во оби́телех небе́сных со А́нгелы и со все́ми святы́ми, иде́же не престаю́т гла́си пра́зднующих и ра́достно сла́вящих Пресвяту́ю Тро́ицу, Отца́ и Сы́на и Свята́го Ду́ха, ны́не и при́сно и во ве́ки веко́в. Ами́нь. Моли́тва и́на, во вре́мя кре́стнаго хожде́ния что́мая О, Пресвята́я Влады́чице Богоро́дице, Цари́це Небесе́ и земли́, к Тебе́ прибега́ем и к Твое́й по́мощи взыва́ем: сохрани́ зе́млю на́шу от наше́ствия враго́в иноплеме́нных и междусо́бныя бра́ни, и нас от вся́кия боле́зни душе́вныя и теле́сныя, и от смертоно́сныя я́звы: да всегда́ пое́м, велича́ем и сла́вим Тя, Пресвяту́ю Богоро́дицу, я́ко благу́ю и ди́вную Засту́пницу на́шу во ве́ки веко́в. Ами́нь.

Минея, 2 Августа, Кано́н Глас 8 Песнь 1 Ирмос: Колесницегони́теля фарао́ня погрузи́/ чудотворя́й иногда́/ Моисе́йский жезл, крестообра́зно порази́в/ и раздели́в море,/ Изра́иля же беглеца́, пешехо́дца спасе́,/ песнь Бо́гови воспева́юща. Припев: Святы́й первому́чениче Стефáне, моли́ Бо́га о на́с. Светолу́чными блиста́нии Ду́ха просвеща́емь,/ преесте́ственными страда́нии и тве́рдаго терпе́ния, тя пою́щия просвети́,/ предстоя́ Влады́це, венцено́сче пребога́те Стефа́не, му́чеников венча́ние. Припев: Святы́й первому́чениче Стефáне, моли́ Бо́га о на́с. Подвиготеку́щим нача́ток быв и верхо́вник му́ченическаго собо́ра,/ зре́ти сподо́бился еси́ Страстополо́жника, сла́вне,/ десни́цею живоно́сною богоплете́нный Тебе́ простира́юща вене́ц, чу́дный Стефа́не. Припев: Святы́й первому́чениче Стефáне, моли́ Бо́га о на́с. Еди́н Сый сокро́вище бла́гости, Спа́се,/ показа́л еси́ от земны́х недр сокро́вище многоце́нное,/ Бо́гатство неиждива́емое, неотъе́млемо име́ние, коры́сть неги́блему,/ Стефа́на Твоего́ первому́ченика. Сла́ва Отцу́ и Сы́ну и Свято́му Ду́ху. Ангелозра́чною яве све́тлостию озаря́емь,/ а́нгельскими пе́сньми, первому́чениче Стефа́не и диа́конов перволу́чший,/ сокрове́н я́ко яви́лся еси́, досто́йно вои́стинну почти́лся еси́,/ испо́лнен благово́ния духо́внаго. И ны́не и при́сно и во ве́ки веко́в. Ами́нь. Богородичен: Воплоще́ннаго нас ра́ди, Пренепоро́чная, пре́жде Безпло́тнаго,/ Богонача́льнаго Сло́ва О́тча роди́ла еси́./ О де́вства селе́ние, и прия́телище чистоты́,/ и храм свяще́ния, Влады́чице ми́ра Богоневе́сто! Песнь 3 Ирмос: Утвержде́й в нача́ле Небеса́ ра́зумом/ и зе́млю на вода́х основа́вый,/ на ка́мени мя, Христе́, за́поведей Твои́х утверди́,/ я́ко несть свят, па́че Тебе́, Еди́не Человеколю́бче. Припев: Святы́й первому́чениче Стефáне, моли́ Бо́га о на́с. Священносло́в свяще́нный и Богосло́в показа́лся еси́,/ сплета́лся с евре́йскими собо́ры,/ облича́я кре́пко сих безбо́жие и богобо́рный нрав,/ Стефа́не, му́чениче всеизря́дне. Припев: Святы́й первому́чениче Стефáне, моли́ Бо́га о на́с. Первому́ченика Христо́ва и служи́теля пе́рваго,/ му́чеником тече́ния сте́пень показа́вша светло́,/ А́нгелов собесе́дника, прииди́те согла́сно вси, пе́сньми Боже́ственными почти́м. Припев: Святы́й первому́чениче Стефáне, моли́ Бо́га о на́с. Сокрове́нное сокро́вище в земли́ явля́ется,/ и мир благово́ния Боже́ственнаго и бога́тых даро́в Це́рковь испо́лни/ му́чеников пе́рвый и служи́телей первоизбра́нный. Сла́ва Отцу́ и Сы́ну и Свято́му Ду́ху. Умерщвле́нный мой ум жи́зни де́йством,/ тобо́ю пропове́давшимся, му́дре, возста́ви пе́ти твое́ честно́е торжество́/ и Твои́м стопа́м после́довати, Стефа́не блаже́нне, сподо́би. И ны́не и при́сно и во ве́ки веко́в. Ами́нь. Богородичен: Дверь яви́лася еси́ мы́сленна восто́ка Вы́шняго, на земли́ я́вльшагося, Де́во:/ Тобо́ю бо к нам Сло́во привни́де спасти́ всех от безслове́сия, Пречи́стая. Седален, глас 1 Апо́столе Христо́в, диа́конов пе́рвый, первому́чениче му́дре, му́чеников верх,/ мирски́я концы́ освяти́в страда́нии Твои́ми и чудесы́ ду́ши челове́ков просвети́л еси́,/ чту́щия тя изба́ви вся́ческих бед, всехва́льне Стефа́не. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Упова́ние христиа́н, Пресвята́я Де́во,/ Его́же родила́ еси́, Бо́га, па́че ума же и сло́ва,/ непреста́нно моли́ с Вы́шними си́лами/ пода́ти оставле́ние грехо́в на́ших всех и исправле́ние жития́/ ве́рою и любо́вию при́сно Тя сла́вящим. Песнь 4 Ирмос: Ты моя кре́пость, Го́споди,/ Ты моя и си́ла,/ Ты мой Бог, Ты Мое́ ра́дование,/ не оста́вль не́дра О́тча/ и на́шу нищету́ посети́в./ Тем с проро́ком Авваку́мом зову́ Ти:/ си́ле Твое́й Сла́ва, Человеколю́бче. Припев: Святы́й первому́чениче Стефáне, моли́ Бо́га о на́с. Струи́ нам днесь ми́ра источи́ благово́ния,/ исто́чник исхо́дит и река́ Боже́ственных благ,/ и пи́щный пото́к отве́рзе сла́вный, пе́рвый му́чеников,/ и́же ве́ры испо́лнен, и си́лы Боже́ственныя, и благода́ти. Припев: Святы́й первому́чениче Стефáне, моли́ Бо́га о на́с. Я́ко свяще́н и све́тел и благонаро́чит день первому́ченика,/ испо́лнен све́та и духо́внаго вои́стинну весе́лия, Ца́рскому гра́ду яви́ся,/ сохраня́я держа́ву честны́я Це́ркве и ва́рварскую де́рзость отгоня́я. Припев: Святы́й первому́чениче Стефáне, моли́ Бо́га о на́с. Благо́е насле́дие восприя́л еси́ досто́йно, Стефа́не Блаже́нне,/ иде́же Христо́с Царь всех, ты всели́лся еси́,/ Того́ бо яви́лся еси́ служи́тель, зна́мений и чуде́с творя́ си́лы/ и подая́ боля́щим исцеле́ния. Сла́ва Отцу́ и Сы́ну и Свято́му Ду́ху. Непрекло́нен Це́ркве и непоколеби́м и водруже́н столп/ простре́ся от земли́ даже до небе́с, заре́ю благоче́стия просвеща́я вся концы́,/ Стефа́н, вели́кий и́стины пропове́дник, страда́ния и́стинный побо́рник. И ны́не и при́сно и во ве́ки веко́в. Ами́нь. Богородичен: Нов Ада́м за пе́рваго Ты был еси́, от Де́вы за прама́терь,/ Изба́витель всех и Спас, за смерть и́стинна жизнь безсме́ртная./ Те́мже, Тя ро́ждшую Богоро́дицу ве́дуще, по достоя́нию, вси ве́рнии, ублажа́ем. Песнь 5 Ирмос: Вску́ю мя отри́нул еси́/ от лица́ Твоего́, Све́те незаходи́мый,/ и покры́ла мя есть чужда́я тьма, окая́ннаго?/ Но обра́ти мя и к све́ту за́поведей Твои́х/ пути́ моя напра́ви, молю́ся. Припев: Святы́й первому́чениче Стефáне, моли́ Бо́га о на́с. Беззако́нных евре́ев су́етный вои́стинну собо́р терпели́вно обличи́л еси́,/ от тех, Богогла́се, покрывае́мь мета́нии ка́менными,/ на Небеса́ я́ко победоно́сец возне́слся еси́ ду́хом, Стефа́не. Припев: Святы́й первому́чениче Стефáне, моли́ Бо́га о на́с. Я́ко кра́сен, я́ко у́тро, ми́ру яви́лся еси́, сла́вне Стефа́не, мглу́ отгоня́,/ и де́монов прогоня́ мечта́ния и неду́гующих стра́сти,/ и душе́вных не́мощей целя́ гное́ния, Богодохнове́нне. Сла́ва Отцу́ и Сы́ну и Свято́му Ду́ху. Мы́сленно со А́нгелы, блаже́нне, ра́дуяся,/ ми́ра концы́ освяща́еши вои́стинну Твои́м прише́ствием и благода́тию,/ благово́ния ми́ры духо́вными благоуха́я и бед и бу́ри избавля́я. И ны́не и при́сно и во ве́ки веко́в. Ами́нь. Богородичен: Ма́тернее дерзнове́ние е́же к Сы́ну Твоему́ иму́щи, Всечи́стая,/ сро́днаго промышле́ния, е́же о нас, не пре́зри, мо́лимся:/ я́ко Тебе́ и еди́ну христиа́не ко Влады́це очище́ние ми́лостивно предлага́ем. Песнь 6 Ирмос: Очи́сти мя, Спа́се,/ мно́га бо беззако́ния моя́,/ и из глубины́ зол возведи́, молю́ся,/к Тебе́ бо возопи́х, и услы́ши мя,/ Бо́же Спа́сения моего́. Припев: Святы́й первому́чениче Стефáне, моли́ Бо́га о на́с. А́нгелом я́ко подо́бник произволе́нием быв,/ вид А́нгельский стяжа́л еси́, блаже́нне,/ с ними́же ра́дуяся и обходя́, пою́щия тя спаса́й. Припев: Святы́й первому́чениче Стефáне, моли́ Бо́га о на́с. Глаго́л, блаже́нне, Твои́х богодохнове́нных си́ла, я́ко шум гро́мный,/ во у́ши, Богоприя́тне, я́ве возгреме́ беззако́нных и ли́ца их помрачи́. Сла́ва Отцу́ и Сы́ну и Свято́му Ду́ху. Сла́ву Оте́ческую узре́ти сподо́бился еси́ и сея́ соесте́ственное сия́ние, Стефа́не,/ страда́нии возвеща́я Тебе́ све́тлыя венцы́, Богогла́се всече́стне. И ны́не и при́сно и во ве́ки веко́в. Ами́нь. Богородичен: Сын Единоро́дный и пре́жде век неви́димый напосле́док дней Пе́рвенец бысть,/ ви́дим пло́тию из Тебе́, Богома́ти, Бог Спа́сения Моего́. Кондак, глас 6 Пе́рвый сея́лся еси́ на земли́ Небе́сным де́лателем,/ всехва́льне Стефа́не,/ пе́рвый на земли́ за Христа́ кровь излия́л еси́, Блаже́нне,/ пе́рвый от Него́ побе́ды венце́м увя́злся еси́ на Небесе́х,/ страда́льцев нача́ло,/ вене́чниче, му́чеников первострада́льне. Икос Ра́йския цветы́ зря, благово́нием свои́м кра́сным исполня́ющия всю вселе́нную,/ стра́нному их дивлю́ся зре́нию:/ в ле́де зи́мнем мно́жае цвету́т па́че, е́же стра́нно во цвете́х./ И му́ченик Христо́в, процветы́й пе́рвее, и дверь быв стра́ждущим зако́нно,/ и цвету́щим зимою́ муче́ния, путь показа́ всем неле́стный,/ хотя́щим страда́ти, до́брый подвигонача́льник,/ и́же боле́зньми просия́в, вене́чниче, му́чеников первострада́льне. Песнь 7 Ирмос: Бо́жия снизхожде́ния/ огнь устыде́ся в Вавило́не иногда́,/ Сего́ ра́ди о́троцы в пещи́, ра́дованною ного́ю,/ я́ко во цве́тнице, лику́юще, поя́ху:/ Благослове́н еси́, Бо́же оте́ц на́ших. Припев: Святы́й первому́чениче Стефáне, моли́ Бо́га о на́с. Тече́ние крове́й Твои́х Небе́сныя две́ри отве́рзе/ и Подвигополо́жника, предстоя́ща и простира́юща Тебе́ вене́ц, показа́, зову́щу:/ Благослове́н Бог оте́ц на́ших. Припев: Святы́й первому́чениче Стефáне, моли́ Бо́га о на́с. Я́ко зве́рие, похи́тивше богоуби́йцы богоявле́ннаго,/ скверноуби́йственными дла́ньми Сего́ убива́ху,/ моля́щася о убива́ющих приле́жно и пою́ща:/ Благослове́н Бог оте́ц на́ших. Сла́ва Отцу́ и Сы́ну и Свято́му Ду́ху. Зако́нно обличи́л еси́ беззако́нныя, зако́нный подо́бник Спа́сов,/ и богобо́рны сих показа́л еси́,/ от ни́хже ка́мением побива́емь, пел еси́:/ благослове́н Бог оте́ц на́ших. И ны́не и при́сно и во ве́ки веко́в. Ами́нь. Богородичен: В ле́то Безле́тнаго неискусобра́чно, Чи́стая, заче́нши,/ и́же пе́рвее Безпло́тное Сло́во, пло́ти прия́тием, Де́во, родила́ еси́./ Ему́же пое́м, согла́сно зовуще:/ Благослове́н Бог оте́ц на́ших. Песнь 8 Ирмос: Седмери́цею пещь/ халде́йский мучи́тель/ Богочести́вым неи́стовно разжже́,/ си́лою же лу́чшею спасе́ны, сия́ ви́дев,/ Творцу́ и Изба́вителю вопия́ше:/ о́троцы, Благослови́те,/ свяще́нницы, воспо́йте,/ лю́дие, превозноси́те во вся ве́ки. Припев: Святы́й первому́чениче Стефáне, моли́ Бо́га о на́с. Преесте́ственным сия́я светозаре́нием, преизря́дне,/ и лица́ Твоего́ зрак равноа́нгелен пока́зовал еси́, благода́ти изда́вшися, Стефа́не,/ я́же в души́ твое́й, сокрове́нне бога́тно./ Те́мже вопия́л еси́:/ о́троцы, благослови́те, свяще́нницы, воспо́йте,/ лю́дие, превозноси́те во вся ве́ки. Припев: Святы́й первому́чениче Стефáне, моли́ Бо́га о на́с. Венцено́сче Стефа́не, души́ моея́ я́звы и грехо́вныя стру́пы очи́сти кропле́нием крове́й твои́х,/ к твоему́ бо заступле́нию ми́лостивному и христоподо́бному нра́ву прибего́х, зовы́й:/ о́троцы, благослови́те, свяще́нницы, воспо́йте,/ лю́дие, превозноси́те во вся ве́ки. Припев: Святы́й первому́чениче Стефáне, моли́ Бо́га о на́с. Благода́тей, сла́вне, тебе́ тезоимени́тый вене́ц/ твоему́ честно́му верху́ положи́ Судия́ нелицеме́рный,/ Его́же благоче́стно пропове́дал еси́, Зижди́теля, и Бо́га, и Царя́ всех, вопия́ непреста́нно:/ о́троцы, благослови́те, свяще́нницы, воспо́йте,/ лю́дие, превозноси́те во вся ве́ки. Сла́ва Отцу́ и Сы́ну и Свято́му Ду́ху. В ру́ку Соде́теля пре́дал еси́ дух твой,/ и Небе́сная во́инства собесе́дника прия́ша тя, ра́дующеся,/ пе́рвее на земли́ равноа́нгельна, ны́не же тех причте́на ли́ком, непреста́нно пою́ща:/ о́троцы, благослови́те, свяще́нницы, воспо́йте,/ лю́дие, превозноси́те во вся ве́ки. И ны́не и при́сно и во ве́ки веко́в. Ами́нь. Богородичен: Све́та незаходи́маго была́ еси́ сосу́д, Всечи́стая,/ Свет бо су́щим во тьме и се́ни родила́ еси́, просвеща́ющ вся́ческая богоразу́мия благода́тию./ Ему́же непреста́нно, ве́рнии, пое́м:/ о́троцы, благослови́те, свяще́нницы, воспо́йте,/ лю́дие, превозноси́те во вся ве́ки. Песнь 9 Ирмос: Ужасе́ся о сем Не́бо,/ и земли́ удиви́шася концы́,/ я́ко Бог яви́ся челове́ком пло́тски/ и чре́во Твое́ бысть простра́ннейшее небе́с./ Тем Тя, Богоро́дицу,/ А́нгелов и челове́к чинонача́лия велича́ют. Припев: Святы́й первому́чениче Стефáне, моли́ Бо́га о на́с. Страда́ния му́чеников нача́ло,/ све́тло показа́вый муче́ния неле́стную стезю́, наставля́ющу к Небеси́,/ первому́ченик Стефа́н вся призыва́ет духо́вне к Боже́ственному весе́лию/ и к прича́стию све́та, ко обще́нию святы́ни. Припев: Святы́й первому́чениче Стефáне, моли́ Бо́га о на́с. Вжиля́ем любо́вию Христо́вою и Сего́ поревнова́в кро́тости и гла́су, глаго́лаше:/ не поста́ви уби́йцам греха́, Го́споди,/ приими́ же дух мой, Бла́же,/ и Боже́ственнаго Ца́рствия, пи́щи же неизрече́нныя, су́щия у Тебе́, сподо́би мя. Припев: Святы́й первому́чениче Стефáне, моли́ Бо́га о на́с. Кра́сен, и ви́да А́нгельскаго, и прему́дрости, и ве́ры испо́лнен,/ и Боже́ственныя зари́ сия́я луча́ми, и богогла́сными усты́ богоглаго́лал еси́, я́ко река́,/ Боже́ственне вети́йствуя, Вы́шнее насле́дие, Богоблаже́нне, улучи́л еси́. Сла́ва Отцу́ и Сы́ну и Свято́му Ду́ху. Венце́м благода́тей венча́лся еси́, и ли́ки му́ченическими окруже́н,/ и Христу́ Подвигополо́жнику предстоя́,/ о нас моли́ся, творя́щих све́тло вои́стинну светоно́сное Твое́ торжество́, блаже́нне,/ и от бед нас изба́ви. И ны́не и при́сно и во ве́ки веко́в. Ами́нь. Богородичен: Я́ко всех Предста́тельнице христиа́н, Богома́ти Всенепоро́чная Влады́чице,/ я́ко Ми́лостива, изба́ви от бед и искуше́ний стра́ждущия рабы́ Твоя́/ и неду́гующия лю́тых прегреше́ний ра́нами и боле́зньми тя́жкими одержи́мыя изврачу́й. Светилен Ка́менная мета́ния преми́рный исплето́ша тебе́ нетле́ния вене́ц,/ и кро́вныя ка́пли – багряни́цу ца́рску, нача́льниче му́чеников, изря́дный Стефа́не. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Свята́я Влады́чице Пречи́стая и еди́на Неискусобра́чная, спасе́ние и упова́ние,/ Ты умоли́ из Тебе́ рожде́ннаго Изба́вителя на́шего/ спасти́ мир от ле́сти, и бед, и скорбе́й.

Минея, 16 Марта, Кано́н, его́же краегране́сие: Страда́льчески Сави́на восхвалю́ любо́вию. Кир Феофа́на Глас 8 Песнь 1 Ирмос: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:/ Изба́вителю и Бо́гу на́шему пои́м. Припев: Святи́и му́ченицы, моли́те Бо́га о на́с. Нетле́ннаго и Боже́ственнаго пребыва́ния/ и непости́жных наслажда́яся ны́не благ, Сави́не, с му́ченики, Богому́дре,/ восхваля́ющия тя спаса́й. Припев: Святи́и му́ченицы, моли́те Бо́га о на́с. Же́ртву хвале́ния Христу́ себе́ освяща́я к страда́нием терпели́вно,/ в пусты́нях удали́лся еси́, Сави́не, по́стническими обуча́яся по́двиги. Сла́ва Отцу́ и Сы́ну и Свято́му Ду́ху. Цветцы́ наслади́вся духо́вными,/ рай яви́лся еси́, укра́шен доброде́тельми,/ объе́млемь мече́м муче́ния и сне́дь Бо́гу познава́емь. И ны́не и при́сно и во ве́ки веко́в. Ами́нь. Богородичен: Отбеже́ сме́ртное се́тование:/ Живо́т бо из утро́бы Твоея́, во ипоста́си Бог про́йде несказа́нно, Богоро́дице,/ обновля́яй, Де́во, естество́ на́ше. Песнь 3 Ирмос: Ты еси́ утвержде́ние/ притека́ющих к Тебе́, Го́споди,/ Ты еси́ Свет омраче́нных,/ и пое́т Тя дух мой. Припев: Святи́и му́ченицы, моли́те Бо́га о на́с. Храм соде́лав чи́стую твою́ ду́шу,/ прия́л еси́ в ню Бо́га/ и хра́мы де́монския, о Сави́не, низложи́л еси́. Сла́ва Отцу́ и Сы́ну и Свято́му Ду́ху. Ми́лостива ра́ди ми́лости Бо́га обре́т,/ страсте́м Его́ подража́тель был еси́,/ преда́телю ученику́ бы́вшу. И ны́не и при́сно и во ве́ки веко́в. Ами́нь. Богородичен: Бо́га ро́ждши всея́ тва́ри, Влады́чице,/ я́ко вои́стинну еди́на Богоро́дица превы́шшая яви́лася еси́. Седален, глас 8 Связа́вся любо́вию Изба́вителя,/ я́звы многообра́зны и растерза́ния претерпе́л еси́, свя́те, му́жественным мудрова́нием,/ в реку́ же вве́ржен быв, коне́ц святы́м в ней прия́л еси́/ и бога́тство многоце́нно всем пода́лся еси́, источа́я исцеле́ния/ и реша́я неду́ги ве́рно притека́ющим к тебе́, Сави́не блаже́нне./ Моли́ Христа́ Бо́га прегреше́ний оставле́ние дарова́ти чту́щим любо́вию святу́ю па́мять твою́. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Я́ко Де́ву и еди́ну в жена́х, Тя, без се́мене ро́ждшую Бо́га пло́тию,/ вси ублажа́ем, ро́ди челове́честии,/ О́гнь бо всели́ся в Тя Божества́,/ и я́ко Младе́нца млеко́м пита́еши Зижди́теля и Го́спода./ Тем, А́нгельский и челове́ческий род, досто́йно сла́вим пресвято́е рождество́ Твое́/ и согла́сно вопие́м Ти:/ моли́ Христа́ Бо́га согреше́ний оставле́ние дарова́ти/ покланя́ющимся ве́рою пресвято́му рождеству́ Твоему́. Песнь 4 Ирмос: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́. Припев: Святи́и му́ченицы, моли́те Бо́га о на́с. Я́ко а́гня, води́мо, му́чениче, на же́ртву,/ ника́коже провеща́л еси́, Влады́це твоему́ подо́бяся,/ Его́же ра́ди и сме́рть пренебре́гл еси́. Припев: Святи́и му́ченицы, моли́те Бо́га о на́с. Целому́дрием украша́емь/ и с сим живы́й,/ строга́ния и ра́ны тве́рдым умо́м твои́м терпе́в,/ враги́, Сави́не, низложи́л еси́. Сла́ва Отцу́ и Сы́ну и Свято́му Ду́ху. Плотски́ми твои́ми у́ды, му́чениче, Христа́ просла́вив,/ прия́л еси́ с пра́ведных ду́хи весе́лие Боже́ственное и не погиба́ющее. И ны́не и при́сно и во ве́ки веко́в. Ами́нь. Богородичен: Наслажда́ющеся, Пречи́стая, Твои́х дарова́ний,/ Тебе́ благода́рственное воспева́ем пе́ние,/ ве́дуще Тя Богома́терь. Песнь 5 Ирмос: Просвети́ нас повеле́нии Твои́ми, Го́споди,/ и мы́шцею Твое́ю высо́кою/ Твой мир пода́ждь нам,/ Человеколю́бче. Припев: Святи́и му́ченицы, моли́те Бо́га о на́с. Тяготу́ строга́ньми пло́ти твоея́ отло́ж,/ ду́шу уясни́в, впери́л еси́, Бо́жий Сави́не,/ к Боже́ственному и и́стинному наслажде́нию. Сла́ва Отцу́ и Сы́ну и Свято́му Ду́ху. Да сла́дости пото́к и нетле́ния добро́ту обря́щеши, пресла́вне,/ теку́щую ми́ра я́ве оплева́л еси́. И ны́не и при́сно и во ве́ки веко́в. Ами́нь. Богородичен: Умертви́, Чи́стая, страсте́й мои́х взыгра́ния,/ тле́ния избавля́ющи мя и безстра́стия спасе́ние мне подаю́щи. Песнь 6 Ирмос: Моли́тву пролию́ ко Го́споду/ и Тому́ возвещу́ печа́ли моя́,/ я́ко зол душа́ моя́ испо́лнися/ и живо́т мой а́ду прибли́жися,/ и молю́ся, я́ко Ио́на:/ от тли, Бо́же, возведи́ мя. Припев: Святи́и му́ченицы, моли́те Бо́га о на́с. Ника́коже о привре́менных брег,/ я́коже в чужде́й пло́ти претерпе́л еси́ я́звы,/ связа́ния, терза́ния, жже́ния и кончи́ну блаже́нную прие́м,/ от Христа́ венце́в сла́вы, Сави́не, улучи́л еси́. Сла́ва Отцу́ и Сы́ну и Свято́му Ду́ху. Вод я́ко вои́стинну испо́лнися живото́чных Христо́ва Це́рковь/ из глубины́ ре́чных вод, тя, исто́чника чуде́с, обогати́вшейся,/ обре́тши же себе́ би́сер, Сави́не, многоце́нен. И ны́не и при́сно и во ве́ки веко́в. Ами́нь. Богородичен: Испра́вила еси́ па́дшее существо́ Твои́м рождество́м, Богоро́дице Де́во,/ Зижди́теля и Влады́ку ро́ждши, на́ша не́мощи поне́сшаго/ и спа́сшаго ны от тли сме́ртныя стра́стию Свое́ю. Кондак, глас 2 Боже́ственная прозябе́ния,/ цвет неувяда́ющий,/ розга́ многопло́дная, Богоно́се Сави́не,/ и́же ве́рою чту́щих па́мять твою́/ весе́лия твоего́ испо́лни/ и моли́ся непреста́нно о всех нас. Песнь 7 Ирмос: О́троцы евре́йстии в пещи́/ попра́ша пла́мень дерзнове́нно/ и на ро́су о́гнь преложи́ша, вопию́ще:/ благослове́н еси́, Го́споди Бо́же, во ве́ки. Припев: Святи́и му́ченицы, моли́те Бо́га о на́с. Да сла́ву нетле́нную прии́меши,/ сла́ву оплева́л еси́ жития́ сла́вы ра́ди Бо́жия,/ наслажда́яся в му́ках, Сави́не, зовы́й непреста́нно:/ Бо́же, благослове́н еси́. Сла́ва Отцу́ и Сы́ну и Свято́му Ду́ху. Ма́нием Боже́ственным Влады́ки отве́ргл еси́ безбо́жных ме́рзость,/ Боже́ственную я́ве избра́в му́дрость, Сави́не, поя́ непреста́нно:/ Бо́же, благослове́н еси́. И ны́не и при́сно и во ве́ки веко́в. Ами́нь. Богородичен: Спасе́ мир, Богоро́дице, от утро́бы Твоея́ вопло́щшееся Сло́во Боже́ственное,/ Его́же почита́юще, пое́м Тя, вопию́ще:/ благослове́н, Пречи́стая, плод Твоего́ чре́ва. Песнь 8 Ирмос: Мусики́йским орга́ном согласу́ющим/ и лю́дем безчи́сленным, покланя́ющимся о́бразу в Деи́ре,/ три о́троцы не повину́вшеся,/ Го́спода воспева́ху/ и славосло́вяху во вся ве́ки. Припев: Святи́и му́ченицы, моли́те Бо́га о на́с. Прекриве́н быв мучи́телей суровствы́, Христо́вою же любо́вию испра́влен,/ неотъе́млемо обре́л еси́ та́мо о безстра́стие, Сави́не, поя́ пе́снь Го́сподеви:/ Тя превозно́сим во вся ве́ки. Сла́ва Отцу́ и Сы́ну и Свято́му Ду́ху. Украси́лся еси́, му́чениче, воздержа́нием,/ уясни́лся еси́ страда́ний ле́потою/ и просия́л еси́, я́коже звезда́, зову́щим:/ по́йте Го́спода, вся дела́, и превозноси́те во вся ве́ки. И ны́не и при́сно и во ве́ки веко́в. Ами́нь. Богородичен: Де́вства просия́ла еси́ заре́ю,/ мы́сленнаго бо Со́лнца о́блак была́ еси́, Ма́ти Бо́жия,/ угаси́вшаго и́дольскаго пе́щь неи́стовства,/ Его́же превозно́сим во вся ве́ки. Песнь 9 Ирмос: Вои́стинну Богоро́дицу/ Тя испове́дуем,/ спасе́ннии Тобо́ю, Де́во Чи́стая,/ с безпло́тными ли́ки Тя велича́юще. Припев: Святи́и му́ченицы, моли́те Бо́га о на́с. Устреми́вся любо́вию всех Бо́га, речны́я во́лны попра́л еси́,/ в нетле́ния приста́нище дости́г, му́чениче сла́вне. Сла́ва Отцу́ и Сы́ну и Свято́му Ду́ху. Основа́ние ве́ру име́я Спа́сову,/ прило́г безбо́жных не устраши́лся еси́,/ но из глубины́ к тишине́ жи́зни устреми́лся еси́. И ны́не и при́сно и во ве́ки веко́в. Ами́нь. Богородичен: Я́ко сте́ну Тя и покро́в/ и я́ко Предста́тельницу Еди́ну, Чи́стая, и спасе́ние иму́ще,/ от бед и прегреше́ний при́сно избавля́емся.

Минея, 19 Апреля, Канон блаженной Глас 8 Песнь 1 Ирмос: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:/ Изба́вителю и Бо́гу на́шему пои́м. Припев: Свята́я блаже́нная ма́ти Матро́но, моли́ Бо́га о на́с. Бо́же Всеми́лостиве, сподо́би ны, недосто́йныя,/ воспе́ти уго́дницу Твою́ Матро́ну,/ на́шу изря́дную пред Тобо́ю хода́таицу и моли́твенницу. Припев: Свята́я блаже́нная ма́ти Матро́но, моли́ Бо́га о на́с. Любо́вию ко Христу́ от младе́нческих пеле́н уязви́лася еси́/ и Тому́ неле́ностно в житии́ твое́м служи́ла еси́, ма́ти блаже́нная. Сла́ва Отцу́ и Сы́ну и Свято́му Ду́ху. Избра́нный сосу́д Ду́ха Свята́го яви́лася еси́,/ благода́ть бо Бо́жию от святы́я купе́ли до конца́ дний твои́х/ при́сно усе́рдно возгрева́ла еси́, ма́ти блаже́нная. И ны́не и при́сно и во ве́ки веко́в. Ами́нь. Богородичен: Арха́нгельски пе́снь Тебе́ пое́м, Чи́стая:/ ра́дуйся, Обра́дованная, Мари́е, Ма́ти Христа́ Бо́га,/ при́сно моля́щаяся за род наш. Песнь 3 Ирмос: Небе́снаго кру́га Верхотво́рче, Го́споди,/ и Це́ркве Зижди́телю,/ Ты мене́ утверди́ в любви́ Твое́й,/ жела́ний кра́ю, ве́рных утвержде́ние,/ Еди́не Человеколю́бче. Припев: Свята́я блаже́нная ма́ти Матро́но, моли́ Бо́га о на́с. Житие́м богоуго́дным и пра́ведным освяти́лася еси́, ма́ти блаже́нная,/ те́мже и нам, с ве́рою к тебе́ прибега́ющим,/ помози́ благода́ти Бо́жия испо́лнитися. Припев: Свята́я блаже́нная ма́ти Матро́но, моли́ Бо́га о на́с. Христа́ Человеколю́бца, Его́же от ю́ности твое́я возлюби́ла еси́, ма́ти свята́я,/ моли́ утверди́тися нам на ка́мени за́поведей Его́. Сла́ва Отцу́ и Сы́ну и Свято́му Ду́ху. Це́ркве Зижди́тель Госпо́дь/ светообра́зное ча́до церко́вное соде́ла тя, пра́ведная ма́ти,/ и в любви́ Свое́й утверди́ тя, я́ко Человеколю́бец. И ны́не и при́сно и во ве́ки веко́в. Ами́нь. Богородичен: Небеси́ и земли́ Цари́це, Богоро́дице Де́во,/ и Це́ркве покро́ве всемо́щный,/ утверди́ оби́тель сию́ непоколеби́мо во благоче́стии пребыва́ти. Седален, глас 4 По и́мени твоему́, Матро́но блаже́нная, житие́ твое́ бы́сть,/ скита́ния бо, поноше́ния и ско́рби ни во что же вмени́вши,/ госпожа́ яви́лася еси́ не то́кмо и́менем, но и ду́хом./ Те́мже и вся потре́бная Ца́рствия ра́ди Бо́жия стяжа́ла еси́/ и Бо́гом обогати́лася еси́. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Ны́не, ра́дуйся, Тебе́ зове́м, Влады́чице,/ гре́шником погиба́ющим исправле́ние/ и нам, велича́ющим Тя, спасе́ние. Песнь 4 Ирмос: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́. Припев: Свята́я блаже́нная ма́ти Матро́но, моли́ Бо́га о на́с. Смотре́ние Бо́жие на тебе́ осо́бь явле́но бы́сть, ма́ти блаже́нная,/ я́ко сле́па и не́мощна те́лом су́щи,/ да́ром прозре́ния и чуде́с обогати́лася еси́/ и венце́м нетле́нным от Го́спода украси́лася еси́. Припев: Свята́я блаже́нная ма́ти Матро́но, моли́ Бо́га о на́с. Мудрова́ния плотска́я презре́ла еси́, блаже́нная,/ оба́че му́дростию, е́юже Госпо́дь умудря́ет слепцы́,/ изря́дно обогати́лася еси́. Сла́ва Отцу́ и Сы́ну и Свято́му Ду́ху. Я́ко алава́стр ми́ра, облагоуха́ющ преде́лы Росси́йския,/ ве́мы тя, Матро́но пра́ведная,/ стека́ются бо к тебе́ со всех конце́в лю́дие земли́ на́шея, заступле́ния прося́ще. И ны́не и при́сно и во ве́ки веко́в. Ами́нь. Богородичен: Блажи́м Тя, вси ро́ди, Пресвята́я Де́во,/ погиба́ющих взыску́ющую, немощны́х врачу́ющую и си́рых заступа́ющую. Песнь 5 Ирмос: Просвети́ нас повеле́нии Твои́ми, Го́споди,/ и мы́шцею Твое́ю высо́кою/ Твой мир пода́ждь нам,/ Человеколю́бче. Припев: Свята́я блаже́нная ма́ти Матро́но, моли́ Бо́га о на́с. Христо́с, Свет И́стинный,/ ум твой, свята́я ма́ти, просвети́л е́сть к разуме́нию повеле́ний Его́,/ те́мже служи́ти Ему́ в житии́ твое́м усе́рдно потща́лася еси́. Припев: Свята́я блаже́нная ма́ти Матро́но, моли́ Бо́га о на́с. Све́том Христо́вым озаря́ема,/ в ми́ре сем, безбо́жнем и грехолюби́вем,/ яви́лася еси́ я́ко столп о́гнен, светя́й во тьме́, пра́ведная Матро́но. Сла́ва Отцу́ и Сы́ну и Свято́му Ду́ху. Я́ко звезда́ многосве́тлая, возсия́ла еси́ в житии́ твое́м, пра́ведная Матро́но,/ указу́ющи и́стинный пу́ть люде́м заблу́ждшим./ Си́це и ны́не, в Небе́сных оби́телех водвори́вшися,/ моли́ просвети́ти и спасти́ ду́ши на́ша. И ны́не и при́сно и во ве́ки веко́в. Ами́нь. Богородичен: Свет ро́ждшая Боже́ственный и Преве́чный, Богоневе́сто,/ разреши́ мглу прегреше́ний на́ших. Песнь 6 Ирмос: Моли́тву пролию́ ко Го́споду/ и Тому́ возвещу́ печа́ли моя́,/ я́ко зол душа́ моя́ испо́лнися/ и живо́т мой а́ду прибли́жися,/ и молю́ся, я́ко Ио́на:/ от тли, Бо́же, возведи́ мя. Припев: Свята́я блаже́нная ма́ти Матро́но, моли́ Бо́га о на́с. Моли́твы при́сно к Бо́гу вознося́щи,/ вся ну́жды и печа́ли Тому́ возвеща́ла еси́, пра́ведная ма́ти,/ и, я́ко Ио́на во чре́ве ки́тове, в ско́рби ве́лией вопия́ла еси́:/ Бо́же, из глубины́ зол возведи́ мя. Припев: Свята́я блаже́нная ма́ти Матро́но, моли́ Бо́га о на́с. По́мощию Бо́жиею вся ну́жды смире́нне претерпе́вши, пра́ведная Матро́но,/ вра́жию си́лу моли́твою твое́ю победи́ла еси́./ Те́мже, ны́не неоску́дно благода́ть Христо́ву прие́мши,/ моли́ся, е́же от злоде́йства диа́вольскаго нам изба́витися. Сла́ва Отцу́ и Сы́ну и Свято́му Ду́ху. Мно́гими по́двиги твои́ми, пра́ведная Матро́но, ста́ла еси́ проти́ву ко́зней диа́вольских,/ бра́нь веду́щи с миродержи́телем тьмы́ ве́ка сего́./ Те́мже о нас ны́не моли́ся, да прии́мем вся ору́жия Бо́жия/ и возмо́жем проти́витися во дни лю́тыя духово́м зло́бы поднебе́сным. И ны́не и при́сно и во ве́ки веко́в. Ами́нь. Богородичен: А́да и сме́рти Победи́теля ро́ждшая, Пречи́стая Де́во,/ моли́ Го́спода и Сы́на Твоего́/ враго́в злоде́йствия нас изба́вити. Кондак, глас 7 К служе́нию Христо́ву/ от чре́ва ма́терня предызбра́нная,/ пра́ведная Матро́но,/ стезе́ю скорбе́й и печа́лей ше́ствующи,/ тве́рдую ве́ру и благоче́стие яви́вши,/ Бо́гу угоди́ла еси́./ Те́мже, почита́юще па́мять твою́, мо́лим тя:/ помози́ и нам в любви́ Бо́жии пребыва́ти,/ ста́рице блаже́нная. Песнь 7 Ирмос: От Иуде́и доше́дше, о́троцы/ в Вавило́не иногда́/ ве́рою Тро́ическою пла́мень пе́щный попра́ша, пою́ще/ отце́в Бо́же, благослове́н еси́. Припев: Свята́я блаже́нная ма́ти Матро́но, моли́ Бо́га о на́с. Возгоре́ся нече́стие в земли́ на́шей,/ я́ко пла́мень дре́вле в пещи́ вавило́нстей,/ ве́ру оте́ческую в лю́дех тща́щееся попали́ти,/ ты же, блаже́нная, приходя́щих к тебе́ науча́ла еси́ ве́рою воспева́ти:/ отце́в Бо́же, благослове́н еси́. Припев: Свята́я блаже́нная ма́ти Матро́но, моли́ Бо́га о на́с. Богопроти́внии мучи́телие, от зако́на Бо́жия отсту́пльшии,/ о́гнь гоне́ний во стране́ на́шей возжго́ша,/ ты же, пра́ведная Матро́но, приходя́щим к тебе́ си́лою Христо́вою ро́су духо́вную подава́ла еси́,/ да не попале́ны до конца́ бу́дут, но при́сно воспева́ют:/ отце́в Бо́же, благослове́н еси́. Сла́ва Отцу́ и Сы́ну и Свято́му Ду́ху. А́нгелу Бо́жию,/ в пещи́ вавило́нстей отроко́м дре́вле пла́мень о́гненный угаси́вшему,/ уподо́билася еси́, блаже́нная,/ росси́йским бо лю́дем во дни нече́стия моли́твами твои́ми/ от злобо́жнаго языковре́дия неврежде́нным бы́ти споспе́шествовала еси́, науча́ющи взыва́ти:/ отце́в Бо́же, благослове́н еси́. И ны́не и при́сно и во ве́ки веко́в. Ами́нь. Богородичен: К покро́ву Твоему́ прибега́ем, Де́во, купино́ неопали́мая,/ грехи́ на́ша, я́ко те́рние зловре́дное, попали́ моли́твами Твои́ми,/ да чи́стым се́рдцем взыва́ем:/ отце́в Бо́же, благослове́н еси́. Песнь 8 Ирмос: Царя́ Небе́снаго,/ Его́же пою́т во́и а́нгельстии,/ хвали́те и превозноси́те во вся ве́ки. Припев: Свята́я блаже́нная ма́ти Матро́но, моли́ Бо́га о на́с. Царя́ Небе́снаго измла́да возлюби́ла еси́/ и Тому́ до конца́ дний свои́х со тща́нием служи́ла еси́, блаже́нная./ Ны́не же с ли́ки а́нгельскими при́сно пое́ши:/ Го́спода по́йте и превозноси́те Его́ во вся ве́ки. Припев: Свята́я блаже́нная ма́ти Матро́но, моли́ Бо́га о на́с. За́поведи Госпо́дни усе́рдне соблюда́ющи,/ столп благоче́стия Росси́и яви́лася еси́, ма́ти блаже́нная,/ я́коже о тебе́ предрече́ кроншта́дтский пра́ведник,/ с ни́мже превозно́сиши Христа́ во ве́ки. Сла́ва Отцу́ и Сы́ну и Свято́му Ду́ху. Мно́зи лю́дие росси́йстии, плене́ннии безбо́жием,/ моли́твами твои́ми, пра́ведная Матро́но, на пу́ть спасе́ния возврати́шася/ и, в ве́ре пра́вей укрепи́вшеся, Триеди́ному Бо́гу воспе́ша:/ Го́спода по́йте и превозноси́те Его́ во вся ве́ки. И ны́не и при́сно и во ве́ки веко́в. Ами́нь. Богородичен: Ро́ждшую Царя́ Небе́снаго,/ я́вльшагося в мир взыска́ти нас, погиба́ющих,/ Тя, Богоро́дице, велича́ем. Песнь 9 Ирмос: Вои́стину Богоро́дицу/ Тя испове́дуем,/ спасе́ннии Тобо́ю, Де́во Чи́стая,/ с безпло́тными ли́ки Тя велича́юще. Припев: Свята́я блаже́нная ма́ти Матро́но, моли́ Бо́га о на́с. О чу́до ве́лие, ко́сти сухи́я источа́ют исцеле́ния/ и тле́нное естество́ дух наш к Нетле́нному Бо́гу возво́дит./ Сего́ ра́ди Матро́ну блаже́нную велича́ем. Припев: Свята́я блаже́нная ма́ти Матро́но, моли́ Бо́га о на́с. Град Москву́ и оби́тель Покро́ва Пресвяты́я Богоро́дицы,/ иде́же почива́ют честны́я мо́щи твоя́, пра́ведная Матро́но,/ сохрани́ от вся́ких напа́стей и зол/ и утверди́ в пра́вей ве́ре и благоче́стии всех, почита́ющих тя. Сла́ва Отцу́ и Сы́ну и Свято́му Ду́ху. Приими́ на́ше недосто́йное моле́ние, Матро́но блаже́нная,/ и, я́коже обеща́лася еси́, хода́тайствуй пред Го́сподем поле́зная нам дарова́ти,/ да с тобо́ю сподо́бимся в селе́ниих ра́йских сла́вити Святу́ю Тро́ицу. И ны́не и при́сно и во ве́ки веко́в. Ами́нь. Богородичен: И́стинную избра́нницу Твою́, Богома́ти, ве́мы Матро́ну блаже́нную:/ сия́ бо в де́нь почита́ния ико́ны Твоея́ Скоропослу́шницы роди́ся,/ в хра́ме Успе́ния Твоего́ крести́ся,/ о́браз Твой Взыска́ние поги́бших тща́нием ея́ написа́ся,/ та́же и те́лом во оби́тели честна́го Покро́ва Твоего́ почива́ет/ и мо́лится о душа́х на́ших. Светилен А́нгели пресве́тлии вознесо́ша святу́ю ду́шу твою́, блаже́нная Матро́но, к Престо́лу Царя́ сла́вы,/ иде́же торжеству́еши со все́ми святы́ми и мо́лишися о душа́х на́ших. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Свет и́стинный ро́ждшая, Богоро́дице,/ помраче́нных нас тьмо́ю грехо́вною просвети́/ и прича́стники ве́чных благ соде́лай.

глас 8 Песнь 1 Ирмос: Воду прошед, яко сушу, и египетскаго зла избежав, израильтянин вопияше: Избавителю и Богу нашему поим. Ум помраченный мой просвети, Дево, огненосным сиянием Твоея славы, память в славословии изнемогающую укрепи и воспламени хладное мое сердце Божественною любовию, да Тебе, Купине Неопалимей, пение хвалебное воспою достойно, Чистая. Храм Трисолнечнаго Света прекрасный, украси моя чувства, молюся, да целомудренною мыслию и нескверными усты огнезрачныя иконы Твоея явление воспою достойно, Чистая. К Твоей пресветлаго зрака иконе припадаю, окаянный: душу мою озари благодатно, яви и тело нескверно и, от лютых мя недугов свободивши, покажи причастника наследия Небеснаго, Богоневестная. Недугующа страстьми многоразличными от иконы Твоея Божественныя исцеления сподоби мя, о, Богомати Владычице. Да славлю чудеса Твоя и пою Тя, благих Виновную, Вечную Благость Воплотившую, мира Благую Заступницу. Песнь 3 Ирмос: Небеснаго круга Верхотворче, Господи, и Церкве Зиждителю, Ты мене утверди в любви Твоей, желаний Краю, верных Утверждение, Едине Человеколюбче. Низложи налоги бесовския, стужающия мне, Владычице, гордость в добродетели, лицемерие в святости, тщеславие во бдении, высокоумие в благоговении и неблагодарность в благодеяниих Сына Твоего, Едина Всепетая Дево. Странна мя любочестия сотвори, молю Тя, Дево, и чужда любопытства о человеческих согрешениих, дерзость и излишнее на милость Сына Твоего упование отдали от мене, да достойны Ему плоды принесу, Едина Пречистая. Начало от земли приемшую худость моего естества познавая, молю Тя, Дево, даждь ми презрение славолюбия, бегство человеческия хвалы, познание собственнаго греха и собственныя немощи, Едина Богоблаженная. Краткий всех вещей и всего мира конец, смертный час и мучение будущее за суету деяний тщеславных помышляти сподоби мя, Дево. Да благодатию Сына Твоего к пути истиннаго покаяния наставлен, вечнаго избегну проклятия, Пренепорочная. Седален, глас 8 Величия Твоя кто исповесть, Богородице, явлением бо огнезрачныя иконы Твоея возвеселила еси души православных, многим недуги ею врачующи, от огня же и грома защищающи, иже по Бозе на Тя упование возлагают. О, Всемилостивая Владычице, не лиши убо и нас Твоего заступления, спаси православных христиан от всякаго зла, да Тобою хвалящеся, не постыдимся во веки. Песнь 4 Ирмос: Услышах, Господи, смотрения Твоего таинство, разумех дела Твоя и прославих Твое Божество. Жестокосердием отягченнаго мя облегчи, немилосердием к требующим окамененную утробу мою умягчи, бурею сребролюбия объятаго мя утиши, во огни неопалимыя купины Прообразованная Владычице. Во уповании тленных и временных вещей не остави мя и пламень хищения неправеднаго угаси во мне пламенем огня Божественнаго, Неопалимая Купино явльшаяся, Богоневестная Владычице. Идолослужение в лихоимении и заблуждение от истиннаго благочестия и православныя веры потреби от мене, Владычице, и не попусти мя пасти падением еретическим, да восхваляю имя Твое благословенное до кончины живота моего в Православии непорочно, Едина Приснодево. Ум мой, молю Тя, Богородице, благоустрой к познанию вечных истин Христова Евангелия, к разсмотрению тленности временных благ направи мой помысел и щедролюбие даруй ми неоскудное, да благодатию Христовою украшен, пою Тя, Едина Приснодево. Песнь 5 Ирмос: Просвети нас повелении Твоими, Господи, и мышцею Твоею высокою Твой мир подаждь нам, Человеколюбче. Огнь нечистоты и всякия скверны во мне, безстуднем, морем благости Твоея потопи, и мглу греховную разжени, и сердце мое радости исполни, Всенепорочная. Срамословию безобразному не даждь во мне места, Владычице, селение соблазнов замени в души моей зрением собственных грехов, храм мя чистоты и целомудрия соделай, да нескверными усты величаю Тя выну, Всенепорочная. Смерть, суд и мучения вечная грешником уготованная в памяти моей углуби, Владычице, да поне последняя сия в памяти содержа, лютая беззакония оставлю и плоды покаяния истиннаго принесу, величая Тя присно, Едино души моея Упование. Любовь сея жизни излишнюю и плотскаго покоя рачение отложи от мене, молю Тя, Дево Чистая. Да суетных попечений избег, Тобою получу нетленное на Небеси богатство, Едина души моея Покровительнице. Песнь 6 Ирмос: Молитву пролию ко Господу и Тому возвещу печали моя, яко зол душа моя исполнися, и живот мой аду приближися, и молюся, яко Иона: от тли, Боже, возведи мя. Радости суетныя, к преогорчению ближняго приводящия, чужда мя соделай, Купино Неопалимая верными именуемая, Пречудная Царица. Даждь ми сопечаловатися искреннему моему в бедствиях, Человеколюбивая Владычице и памятозлобия избави мя, прилежно молю Тя, Всенепорочная Дево. Зависти в помысле моем не даждь вкоренятися, видением несгараемыя купины Прообразованная Моисею, и Рождшаяся от корене свята, Дево, и братоненавидения избави мя, Чистая. Да не злобою мрачною осквернен быв, лишуся Божия благодати и жизни вечныя, Всенепорочная Владычице. Терпение в бедах утверди во мне, Всечистая, с радующимися духовную радость, к сетующим сожаление даруй ми, Пресвятая, и братолюбие низпосли мне свыше, любве пучину Рождшая Дево, и любовь велию присно Являющая роду христианскому. Желание крайнее согрей во мне всякому ближнему от души благотворити, Благая, да не како злоб лютых душа моя исполнится, и живот мой аду приближится, и предан буду без милости яко не сотворивый милости, во тьму кромешнюю, Всенепорочная Богоневесто. Кондак, глас 8 Предочистим чувствия душ и телес наших, да видим таинство Божественное, образно явленное древле великому во пророцех Моисею купиною, горевшею огнем и не сгаравшею, в нейже Твоего безсеменнаго Рождества, Богородице, предвозвещение исповедуем и, благоговейно покланяющеся Тебе и Рождшемуся от Тебе Спасу нашему, со страхом вопием: радуйся, Владычице, Покрове, и Прибежище, и Спасение душ наших. Икос Провидя дивный Моисей в неопалимей купине на Синаи тайну от века утаеную, Безлетнаго в лете родитися Восхотевшаго, Рождение от Чистыя и Неискусобрачныя Девы, ужасом содержим вопияше: сия земля воистину свята есть, яко Плод спасительный миру из нея произыдет, Имже горесть падения Адамова усладится. Сего послушая, и мы, таинства Божия событие познавшии, ублажаем Тя, Богородице, Возвеличившую падшее человечество и милосердием неизреченным Призревающую на род христианский, темже и зовем Ти: радуйся, Владычице, Покрове, и Прибежище, и Спасение душ наших. Песнь 7 Ирмос: От Иудеи дошедше отроцы, в Вавилоне иногда верою Троическою пламень пещный попраша, поюще: отцев Боже, благословен еси. Веселие мирское пресецы и душетленное пристрастие умертви во мне, Дево, презрение временных, желание вечных благ и нетленную радость подаждь ми, с поющими: отцев Боже, благословен еси. Безчинное веселие и излишество, ум вредящее, душе скверну раждающее, отлучи от мене, Дево, и сподоби во здравии душевнем и телеснем духовнаго утешения наслаждатися с поющими: отцев Боже, благословен еси. Грехом, смерть лютую раждающим, оскверних душу мою, но Ты, Пречистая Владычице, огнезрачная и неопалимая купино явльшися, тину страстей моих изсуши огнем Божия благодати и настави мя на богоугодное житие. Украси же воздержанием и целомудрием и даждь ми чистым сердцем пети: отцев Боже, благословен еси. К Твоей огнезрачной иконе взирая, молю Тя, Владычице, омраченнаго мя самолюбием светом зрака Твоего просвети и, похоти плотския укротивши во мне, огнем Божия любве хладное сердце мое воспламени, да Рождшемуся от Тебе достойно возмогу пети: отцев Боже, благословен еси. Песнь 8 Ирмос: Царя Небеснаго, Егоже поют вои Ангельстии, хвалите и превозносите во вся веки. Возмущение души моея утоли, Всенепорочная, от клеветы наветующих избави мя, вражду греховную во мне укроти и ненависть мрачную отврати от мене, Дево, да прославляю Тя, Чистая, во веки. Огнь ярости во мне зело разжженный, росою благодатныя молитвы Твоея угаси, хулу, умножающую души моея озлобление и всякий вид злобы, гнездяйся в сердце моем, искорени, Дево, да Тя прославляю, Чистая, во веки. Образ Христов Евангельскими добродетельми напиши в души моей, Богоблагодатная, укрепи и утверди мя во всяком деле благом, от всякия же злобы отврати сердце мое, да мирными усты прославляю Тя, Чистая, во веки. Кротким оком Твоим виждь мое смирение, Пренепорочная Богоневесто, и приклони ухо Твое к молитве сердца моего, кротостию и незлобием благоукраси мя, помраченнаго безобразием злобных страстей, и сотвори причастника блаженства, кротким обетованнаго, да радуяся прославляю Тя, Чистая, во веки. Песнь 9 Ирмос: Воистину Богородицу Тя исповедуем, спасеннии Тобою, Дево Чистая, с безплотными лики Тя величающе. Скорби сердца моего утиши, Радосте скорбящих, уныние душегубительное отъими от мене, Утолительнице печали, и леность ко взысканию добродетелей искорени во мне, Взыскание погибших, да Тебе, Дево Чистая, непрестанно величаю. Малодушием болезнующаго мя оживи, Целительнице болящих, отчаянием падшаго мя возстави, Одигитрие заблуждших, грехами умерщвленнаго мя воскреси, Споручнице грешных, да Тебе, Дево Непорочная, непрестанно величаю. Усердие во мне творити волю Божию возбуди и ревность ко славе Божией воспламени в сердце моем, Купино Огнезрачная и Неопалимая, и благоговейна служителя Христова соделай мя, Дево, Предводительнице моего спасения. Слезами покаяния и умиления изсохшую в знои страстей душу мою умягчи, яко руно орошенное Гедеона, и сокрушение к исправлению даждь ми, Дево, да вечныя блага унаследую, и с лики избранных Божиих воспою Тя, Ходатаицу моего спасения. Светилен Икону Твою всечестную в залог благоволения Твоего верным даровала еси, Владычице, покрывающи и сохраняющи ею от огненнаго запаления на Тя уповаюшия. О, Мати Царя Христа Бога, буди и нам, грешным, Прибежище спасения в нечаянных бедах и Ходатаица вечныя жизни.

Минея, 7 Мая, Канон Глас 4 Песнь 1 Ирмос: Колесни́цы фарао́новы и си́лу его́/ вве́рже в мо́ре кре́пкий в бра́нех./ Воспое́м песнь но́вую, я́ко просла́вися. Припев: Сла́ва, Го́споди, Кресту́ Твоему́ честно́му. Яви́л еси́ на земли́ зарю́ Креста́,/ и́мже, диа́вола низложи́в, челове́ческий род спасл еси́, Го́споди,/ те́мже поем славу Твою́. Припев: Сла́ва, Го́споди, Кресту́ Твоему́ честно́му. Ра́зума непоко́рство Кресто́м Изба́витель разори́ вражду́ О́тчим благоволе́нием./ Пое́м Ему́ песнь но́ву, сла́вно бо просла́вися. Сла́ва Отцу́ и Сы́ну и Свято́му Ду́ху. Я́ко во Еде́ме живо́тное дре́во всади́л еси́, Христе́,/ та́ко ски́петр победотво́рный,/ Крест Твой светови́дно, возсия́л еси́ на го́ру святу́ю. И ны́не и при́сно и во ве́ки веко́в. Ами́нь. Богородичен: Ю́же проро́ческий прови́де лик,/ я́коже дверь Небе́сную и неопали́мую купину́,/ Тя, Де́во Ма́ти Чи́стая, Бо́га ро́ждшую, позна́хом. Песнь 3 Ирмос: Лук си́льных изнемо́же,/ и немощству́ющии препоя́сашася си́лою,/ сего́ ра́ди утверди́ся в Го́споде се́рдце мое́. Припев: Сла́ва, Го́споди, Кресту́ Твоему́ честно́му. Я́ко щито́м, защища́еми непобеди́маго Креста́ зна́мением, Влады́ко,/ его́же не терпя́, ме́рзкий исчеза́ет с де́монским мно́жеством. Сла́ва Отцу́ и Сы́ну и Свято́му Ду́ху. Вся Крест Твой возвесели́, распя́таго Тя Бо́га испове́дающия,/ и я́ко пресве́тлою и непристу́пною красото́ю осия́. И ны́не и при́сно и во ве́ки веко́в. Ами́нь. Богородичен: Ра́дуйся, Ма́ти Неискусобра́чная,/ Бо́га Сло́ва во утро́бе Твое́й вмести́вшая,/ и ро́ждши воплоще́ннаго Бо́га ку́пно и Челове́ка. Седален, глас 4 Показа́вый Креста́ Боже́ственный о́браз на Небеси́,/ су́щия на земли́ наста́вити к Твоему́ позна́нию, Христе́ Бо́же,/ днесь просия́ невече́рняя све́тлость, и свет лица́ Твоего́ на нас зна́менася./ Того́ у́бо вси и́мамы, ве́рнии, ору́жие ми́ра, непобеди́мую побе́ду. Песнь 4 Ирмос: Услы́шах слух Твой, Го́споди,/ я́ко яви́лся еси́ на земли́,/ и просла́вих Твою́ си́лу. Припев: Сла́ва, Го́споди, Кресту́ Твоему́ честно́му. Та́йно у́бо пе́рвее, чу́вственно же днесь,/ просия́л есть, Христе́, Пречи́стаго Креста́ Твоего́ о́браз. Припев: Сла́ва, Го́споди, Кресту́ Твоему́ честно́му. Беззако́нных богоуби́йц де́рзость, Кре́стным о́бразом просвети́в,/ изобличи́л еси́, Спа́се Ще́дре. Сла́ва Отцу́ и Сы́ну и Свято́му Ду́ху. Утверди́л еси́ христиа́нскую ве́ру невеще́ственным Твои́м све́том,/ Крест нам, Христе́, начерта́в. И ны́не и при́сно и во ве́ки веко́в. Ами́нь. Богородичен: Ма́ти Чи́стая, Благослове́нная Влады́чице,/ Его́же родила́ еси́, Бо́га моли́твами Твои́ми ми́лостива сотвори́ нам. Песнь 5 Ирмос: Возсия́вый свет,/ и просвети́вый утро,/ и показа́вый день,/ сла́ва Тебе́, сла́ва Тебе́,/ Иису́се Сы́не Бо́жий. Припев: Сла́ва, Го́споди, Кресту́ Твоему́ честно́му. Смертоно́сное дре́во во Еде́ме Ада́му, дре́вле преступи́вшему, смерть принесе́;/ Крест же Живоно́сный, ны́не я́влься, ми́ра просвети́ концы́. Припев: Сла́ва, Го́споди, Кресту́ Твоему́ честно́му. Соста́вивый сло́вом первозда́нное сия́ние, я́ко Сы́ну Оте́ц,/ Крест ны́не светоза́рен напису́ет,/ Распе́ншемуся свиде́тельствуя Божество́. Сла́ва Отцу́ и Сы́ну и Свято́му Ду́ху. Во све́те незаходи́ме превы́спренний свет,/ во Отце́ у́зрим ве́рою, Христе́, Тя, Сы́на, и Твой Дух,/ душа́м на́шим просия́н. И ны́не и при́сно и во ве́ки веко́в. Ами́нь. Богородичен: Боле́зней ма́терних, Отрокови́це, не позна́ла еси́,/ преесте́ственно заче́нши Бо́га и ро́ждши пло́тию,/ те́мже Тя вси досто́йно сла́вим. Песнь 6 Ирмос: Внегда́ скорбе́ти ми,/ возопи́х ко Го́споду,/ и услы́ша мя Бог спасе́ния моего́. Припев: Сла́ва, Го́споди, Кресту́ Твоему́ честно́му. Да покры́ются у́бо о́чи беззако́нных,/ Кре́стныя добро́ты блиста́ющия не могу́ще зре́ти. Сла́ва Отцу́ и Сы́ну и Свято́му Ду́ху. Да насладя́тся заре́ю Пречи́стаго Креста́/ Бо́га ве́дящии, на дре́ве распе́ншагося пло́тию. И ны́не и при́сно и во ве́ки веко́в. Ами́нь. Богородичен: Я́же Бо́га ро́ждшая, Де́во Неискусобра́чная,/ о нас не преста́й Сы́на Твоего́ моля́щи. Кондак, глас 4 Отве́рзый Небеса́ заключе́нная, на Небеси́ пресве́тлыя лучи́,/ на земли́ возсия́ Пречи́стый Крест:/ те́мже, сия́ние его́ де́йства прие́мше, к незаходи́мому наставля́емся Све́ту/ и во бране́х и́мамы его́ ору́жие ми́ра,/ непобеди́мую побе́ду. Икос Зна́мение се стра́шное вели́каго Бо́га ви́де вели́кий Константи́н/ и слы́шаше глаго́лющу в нем Иису́су,/ пе́рвее глаго́лавшу царю́ христиа́н ве́рных самодержа́вному:/ да́же у́бо до втора́го прише́ствия/ сей, твоему́ гра́ду достоя́ние сохраня́я, пребу́дет и да́же до сконча́ния,/ и градо́м всем первоседа́ние./ Стена́ же тому́ бу́дет Крест, ору́жие ми́ра, непобеди́мая побе́да. Песнь 7 Ирмос: Спасы́й во огни́ авраа́мския Твоя́ о́троки/ и халде́и уби́в,/ я́же пра́вда пра́ведно уловля́ше, препе́тый Го́споди,/ Бо́же оте́ц на́ших, благослове́н еси́. Припев: Сла́ва, Го́споди, Кресту́ Твоему́ честно́му. Возне́сшееся на Крест Со́лнце в полу́дне,/ Его́же зря́щи чу́вственное со́лнце, лучи́ своя́ скры:/ препе́тый Го́споди, Бо́же оте́ц на́ших, благослове́н еси́. Припев: Сла́ва, Го́споди, Кресту́ Твоему́ честно́му. Богови́дцу во огни́ дре́вле бесе́дова и мра́це,/ крестоявле́нным же блиста́нием я́ко Бог сла́вим днесь:/ препе́тый Го́споди, Бо́же оте́ц на́ших, благослове́н еси́. Сла́ва Отцу́ и Сы́ну и Свято́му Ду́ху. От Све́та и во све́те Свет соприсносу́щный сия́я/ и пречи́стым Твои́м све́том Креста́ Твоего́ побе́ду показа́л еси́:/ препе́тый Го́споди, Бо́же оте́ц на́ших, благослове́н еси́. И ны́не и при́сно и во ве́ки веко́в. Ами́нь. Богородичен: Несказа́нно во утро́бе и преесте́ственно прие́мшую Непреме́ннаго Бо́га,/ за милосе́рдие к челове́ком прише́дшаго,/ благоче́стно воспое́м я́ко Ма́терь Бо́га на́шего во ве́ки. Песнь 8 Ирмос: Во о́бразе А́нгела,/ я́вльшагося в пещи́ о́гненней песносло́вцем,/ Христа́ Бо́га по́йте, о́троцы,/ свяще́нницы, благослови́те,/ лю́дие, превозноси́те во вся ве́ки. Припев: Сла́ва, Го́споди, Кресту́ Твоему́ честно́му. На престо́ле сла́вы ви́дена бы́вша и на дре́ве Кре́стнем пригвожде́на существо́м пло́ти,/ по́йте, о́троцы, свяще́нницы, благослови́те,/ лю́дие, превозноси́те во вся ве́ки. Припев: Сла́ва, Го́споди, Кресту́ Твоему́ честно́му. Све́том пречи́стым вообра́жшаго на кра́ниеве Крест, на горе́ святе́й,/ по́йте, о́троцы, свяще́нницы, благослови́те,/ лю́дие, превозноси́те во вся ве́ки. Сла́ва Отцу́ и Сы́ну и Свято́му Ду́ху. Славосло́вяще Еди́наго от Тро́ицы, заре́ю Кре́стнаго вселе́нную просвеща́юща,/ по́йте, о́троцы, свяще́нницы, благослови́те,/ лю́дие, превозноси́те во вся ве́ки. И ны́не и при́сно и во ве́ки веко́в. Ами́нь. Богородичен: Неизрече́нно и без се́мене заче́ншую/ и ро́ждшую Ра́дость вселе́нныя, Христа́ Бо́га,/ по́йте, о́троцы, свяще́нницы, благослови́те,/ лю́дие, превозноси́те во вся ве́ки. Песнь 9 Ирмос: Ка́мень нерукосе́чный/ от несеко́мыя горы́, Тебе́, Де́во,/ краеуго́льный отсече́ся,/ Христо́с, совокупи́вый разстоя́щаяся естества́,/ тем, веселя́щеся, Тя, Богоро́дице, велича́ем. Припев: Сла́ва, Го́споди, Кресту́ Твоему́ честно́му. Дре́вле во огни́ же и мра́це непокори́вым узако́нивый,/ ны́не же ве́рным Твои́м лю́дем Креста́ Твоего́ о́браз начерта́л еси́, па́че свети́л сия́ющ,/ его́же досто́йно велича́ем. Припев: Сла́ва, Го́споди, Кресту́ Твоему́ честно́му. Пла́кася тьмо́ю тварь распе́нших Тя де́рзости,/ ны́не же благоле́пнейшим све́том Живоно́сный просия́ Крест Твой, Христе́,/ церко́вную показу́я сокрове́нную красоту́. Сла́ва Отцу́ и Сы́ну и Свято́му Ду́ху. О Тебе́ упова́ние возвы́сивше, бога́тии лю́дие Твои́/ Тебе́ на мольбу́ Крест и стра́шную кровь Твою́ предлага́ют,/ но благопребы́тно пода́ждь нам, Сло́ве Бо́жий, избавле́ние. И ны́не и при́сно и во ве́ки веко́в. Ами́нь. Богородичен: Просвети́ нас, ро́ждшая Свет непристу́пный, Де́во,/ и испо́лни нас весе́лия, и ра́дости, и Боже́ственнаго ра́зума,/ чи́стым се́рдцем Тя благоразу́мно велича́ющия. Светилен Крест – храни́тель всея́ вселе́нныя,/ Крест – красота́ Це́ркве,/ Крест – на́ша держа́ва,/ Крест – ве́рных утвержде́ние,/ Крест – А́нгелов сла́ва и де́монов я́зва.