Не утвержден для общецерковного использования
Кондак 1
Избраннии от Бога угодницы и чудотворцы земли Тавричестей, светом истины Христовой озареннии и в южнем крае сем отечества нашего и во вселенней просиявшии, яко звезды светлыя Церковь Крымскую украсившии, восхваляя подвиги ваша и труды евангельскаго спасительнаго сеяния, почитаем пречестную память и ваше пред Богом ходатайство, помощь и заступление, с любовию сыновнею зовуще вам: Радуйтеся, светильницы Церкви нашея, вси святии в земли Тавричестей просиявшии!
Икос 1
Ангельскому поревновавши житию и Духом Святым просвещеннии мужие апостольстии и доблественнии жены́, благовестники и просветителие земли нашея и Церкви Святыя насадителие. Днесь чада ваша духовная на земли, идеже стопы ваша прошли грады и веси, с умилением приносим сердечныя похвалы сия:
Радуйся, первозванный апостоле Христов Андрее, первейший святыя веры в Таврии насадителю!
Радуйся, благоверный царю Константине, повелением твоим в земли́ нашей Православие утвердивый.
Радуйся, богомудрая царице Елено, святою ревностию твоею край Таврический светом евангельским озарившая.
Радуйся, богоблаженная княгине российская Ольго, чрез Тавриду посетившая Царьград, в правоверии нас наставляющая.
Радуйся, духовная наша мати, праотцем нашим испросившая у Бога просвещение.
Радуйся, равноапостольный княже Владимире, в Херсонесе приявший крещение и тем христианскую веру прославив, прелесть идольскую посрамил еси.
Радуйся, благовестителю света Христова, провидевший Божие смотрение о спасении народа державы твоея.
Радуйся, наипаче и Ты, Благословенная Владычице, Мати Божия, всех Крымских святых на труды и подвиги укрепившая.
Радуйтеся, светильницы Церкви нашея, вси святии в земли Тавричестей просиявшии!
Кондак 2
Видя Господь Бог тебе, преблаженне Клименте, истиннаго пастыря Церкви Своея, скорбь и утеснение словеснаго стада и яко нечестивый царь Троян, не терпя твоего ревностнаго служения, сосла в пределы Тавриды в каменоломни Инкерманския. Зде же в горьких работах пребывая, вкупе со ученики устроял еси храмы, приводя ко Христу, восхвалял Бога Промыслителя, с верою и любовию воспевая Ему победную песнь: Аллилуиа!
Икос 2
Разумом истиннаго богопознания неверных людей Тавриды древния верою Христовою просветили есте, проповедницы богоноснии, вразумляя тех силою словес ваших и дивных чудес. Тем же ревность вашу похваляюще, взываем сице:
Радуйся, Андрее апостоле, вновь и сугубо от нас прославляемый.
Радуйся, от древния Тавриды до Киева и Но́вграда Христово Евангелие благовестивый.
Радуйся, и по прошествии веков в наши дни стопою с Афона принесенною нас посетил еси.
Радуйся, благословение Божие и благодать Его верным испросил еси.
Радуйтеся, первомученицы и исповедницы Святыя Троицы Инно, Пинно и Риммо — вернии ученики апостола Андрея в Скифии пострадавшии.
Радуйся, священомучениче Клименте Римский, правды ради Христовой от нечестиваго царя в Херсонес изгнанный.
Радуйся, зде тысящи ко Христу приведы́й и мнози храмы устроивый.
Радуйся, изрядно прославляемая Всемилостивая христиан Владычице, землю нашу, аки вторый Афон благодатно посещающая!
Радуйтеся, светильницы Церкви нашея, вси святии в земли Тавричестей просиявшии!
Кондак 3
«Силен еси Господи и истина Твоя окрест Тебе» — рече пророк Давид. Силою Вышняго, данною вам, святии угодницы Божии, благовестили всем жителем земли Таврическия, Христа Ра́спята и Христа Воскресшаго — Божию Премудрость и силу. Ему же купно с вами, соотечественницы наши, поем: Аллилуиа!
Икос 3
Имуще твердую веру в сердцах своих вы, богохвальнии проповедницы Господни, со тщанием прошли зе́мли вдоль Понта Евксинскаго, сиречь Че́рнаго моря, храмы созидали и Таинствами освящали уверовавших во Христа, непоколебимы пребыли во исповедничестве и мученическими страданьми укрепляли верныя. Того ради все мы, прославляя вас, песнословим тако:
Радуйся, преславный во апостолех Симоне Зилоте, Босфор Киммерийский, сиречь град Керчь, учением Христовым просветивый.
Радуйся, благовестниче Господень, святителю Аполлинарие Равеннийский, труды апостольския в Скифии подъявый и за Христа мужески пострадавый.
Радуйся, предивный архипастырю Никито Ремесианский, земли́ сея пречудным проповедником ставый.
Радуйтеся, Ефреме и Василие, насадителие веры в Херсонесе и священномученицы.
Радуйтеся, Евге́ние, Елпи́дие и Агафадо́ре, продолжателие подвигов в том же граде, за Христа и паству кровь свою пролиявшии.
Радуйтеся, Ефе́рие и Капи́тоне, преславными чудесы в христианскую веру град и страну приведшии.
Радуйтеся, вси седмочисленнии священномученицы, кровьми вашими в Херсонесе Тавричестем Церковь Христову утвердившии, от нея же и мы освящение прияхом.
Радуйся, непрестанно земными и небесными прославляемая Царице Богородице, всех нас Своим честным покровом покрывающая.
Радуйтеся, светильницы Церкви нашея, вси святии в земли Тавричестей просиявшии!
Кондак 4
Буря нечестия идолобожнаго, аще и восставаше по временам, но десницею Божиею укрепляющею архипастырей Церкви Христовой дивным подвигом проповедания и чудесы от волков хищных соблюдши словесное стадо, утверждашеся в вере паства Таврическая, яже и доселе стоит в чине своем, победно поюще Богу: Аллилуиа!
Икос 4
Слышаша святии угодницы земли Таврическия сладчайший глас Христов: «Иже хощет по Мне идти, да отвержется себе. И возмет крест свой и по Мне грядет», оставиша мир и вся яже в нем под сень Животворящего Креста притекоша и всем благовестиша спасение чрез крестныя страдания Господа нашего и Спасителя и сами блаженства райския улучивши, умилением напаяют сердца наша, вопиющия им таковая:
Радуйся, Евангеле Томитанский и всея Скифии наставниче, от земли к небесем востекий.
Радуйся, святителю Господень Еферие Херсонесский, втораго Вселенскаго Собора председателю.
Радуйся, великий вселенский учителю Иоанне Златоусте, об устроении Скифския и Таврическия Церкви имевый попечение велие.
Радуйся, иерарше Таврический, исповедниче Геронтие, неусыпный о нас пред Богом предстателю.
Радуйся, единому Богу ве́домый святителю Тавриды, на пятом Вселенстем Соборе восседый и в книзе жизни вечныя со Вселенскими отцы вписанный.
Радуйся, достоблаженне Феотиме, святителю Скифский, благовестителю спасения.
Радуйся, архипастырю Тимофее, украшение Церкви Божией, в Скифии и Готфии потрудивыйся.
Радуйся, первейшая наша похвало, Мати Божия и Мати христианская, иконами Твоими честными, землю Крымскую посещающая.
Радуйтеся, светильницы Церкви нашея, вси святии в земли Тавричестей просиявшии!
Кондак 5
Боготечныя и светоносныя лучи явистеся, святии наша соотечественницы, землю Крымскую благодатию озаряющии, различными подвиги Богу угодившия и Христа прославившия. Восхваляем ваше преславное житие во святительстве, мученичестве, исповедничестве, пустынножительстве, в горах и пещерах, вси бо вы преподобием и правдою Богу послужившия, во веки веков согласно воспеваете ангельскую песнь: Аллилуиа!
Икос 5
«Видеша вси концы земли спасение Бога нашего» — рече псалмопевец Давид. Видим и мы верныя чады Церкви Христовой, дивныя дела Промысла Божия явленныя чрез угодников и чудотворцев, благовестников, исповедников и мучеников земли Таврическия и прославляя Бога, воспеваем святым Его:
Радуйтеся, Кирилле и Мефодие, в неусыпных трудах благовестия Таврию прошедшия и путь спасения верным указавшия.
Радуйся, святейший Анатолие, Цареградский предстоятелю, Таврическия Церкви кормчий и светило.
Радуйся, иерарше Христов Иоанне Скифский, страже неусыпный и ангельския славы сонаследниче.
Радуйся, Стефане Сурожский, исповедниче Христов и чудотворче, страны Таврическия светлое украшение.
Радуйся, всех научивый покланятися святым иконам и за то страдавый и мучимый.
Радуйся, угодниче Божий Марти́не, предстоятелю Церкви Римския в Инкерман сосланный и тамо венец райский восприявый.
Радуйся, праведный Павле, сотрудниче словенских учителей и помощниче.
Радуйся, изрядно почитаемая Богородице Марие, в иконе Твоей, апостолом Андреем принесенныя и Ацкурской именуемая.
Радуйтеся, светильницы Церкви нашея, вси святии в земли Тавричестей просиявшии!
Кондак 6
Проповедницы имене Христова и учителие веры истинныя бысте, святии угодницы земли нашея, еретическая шатания низложившия, суемудрия и лесть лжеучителей победили. Сего ради от Бога благодать прияли, нам напа́тствуемым помогати и на пути спасения укрепляти, да в вечней жизни со всеми вами воспоем песнь Богу: Аллилуиа!
Икос 6
«Воссия во тьме свет правым: Милостив и Щедр и Праведен» — взывает псалмопевец, ублажая угодников Божиих. И вы святии наши сродницы, возсияли есте нам изобилием многоразличных даров, имиже венча вас подвигоположник Христос. Молитвами вашими ниспосылает нам Господь Свою милость и Божественную благодать да воспеваем вам:
Радуйся, преподобный Иоанне Готфский, святителю преизрядный и подвижниче смиренный.
Радуйся, яко мощи твоя под спудом в Партените возсиявают в утешение и помощь верным.
Радуйся, твердый адаманте Георгие Митиленский и Херсонесский, светлейший образ страдания за Христа являющий.
Радуйся, изрядный во иерарсех Алекси́е Цареградский, чрез Таврию пришедый в Киев и народ в Божественных истинах утвердивый.
Радуйся, святейший Фотие, яко благословением твоим правоверие в Таврии укрепивый.
Радуйся, богомудре Михаиле, первый митрополите Киевский, пришествием на Русь, Таврическую страну освятивый и князя Владимира в Херсонесе крестивый.
Радуйся, сподвижниче святаго Владимира епископе Иоакиме Корсу́нянине, край Новгородский просветивый и спасению научивый.
Радуйся, превыше всех славима Госпоже Всемилостивая, иконою к Тихвину ангелы носимую, Тавриду благодатно осенившая.
Радуйтеся, светильницы Церкви нашея, вси святии в земли Тавричестей просиявшии!
Кондак 7
Хотение едино имели есте, угодницы Божии Тавричестии, еже Богу благоугождати и спасению душевному ближних благочестно помогати, яко бодрии кормчии вся верныя наставляли есте словом и примером своим, сердцем и усты немолчно воспевая Богу: Аллилуиа!
Икос 7
Новое благодатное зна́мение милости Божией бысть на земли Тавричестей, егда исповедницы от гонителей сосланы и сами пришедшии, насельниками быша градо́в и весей, де́брей и пещер и гор, истину Православия утверждая, молитвою непрестанною умоляя Содетеля и Бога, того ради восхваляем вас сице:
Радуйтеся, затворниче Памво и Никоне Сухий, отцы Киево Печерстии, пребывавшии в пленении у агарян Таврических и зде явившия неизреченное смирение.
Радуйся, преподобный Евстратие, иноче КиевоПечерский, сотворивый чудо обращения ко Христу пятидесяти мужей и в Херсонесе с ними душу Богу предавый.
Радуйся, ублажаемый Леонтие, из Скифии в Царьград пришедый и тамо нетленными мощами почивающий.
Радуйтеся, святии чудотворцы Косьмо и Дамиане в ущелиях Таврии пребывавшии.
Радуйтеся, у Господа источник воды целебныя испросившии.
Радуйтеся, яко и обитель на месте сем милостию Божиею устрои́шася.
Радуйся, пустыннолюбче Николае, игумене Студийский, седмь лет в Таврии пребывый в изгнании.
Радуйся, Богородице Преблагословенная, чудотворною иконою Евангелистом Лукой написанною, от Константинополя в Киев несенную, освятившая землю Таврическую и Владимирскою затем наименованною.
Радуйтеся, светильницы Церкви нашея, вси святии в земли Тавричестей просиявшии!
Кондак 8
Странное для мира сего житие ваше видяще, преподобнии отцы и отшельники, в горах и удолиях Тавриды яко крины процветшия? устранимся и мы того сует и ум на небеса преложше, вкупе с вами воспоем Творцу всяческих: Аллилуиа!
Икос 8
«Весь мир ихже не бе достоин — вещающу апостолу Павлу — в пустынях скитающеся и в горах, в вертепах и в пропастех земных», вы убо всеблаженнии отцы и матери, стезею постническаго жития, непрестанною молитвою и добропобедными подвигами Господу благоугодили и Всесвятое имя Его в Тавричестем крае прославили. Тем же ублажающе труды и подвиги ваша согласно воспеваем вам:
Радуйся, ангелоподобный Иосифе Песнописче, в Херсонес на единонадесять лет сосланный за иконопочитание.
Радуйся, преподобне Феодоре Студите, такожде пребывый в Тавриду и в дебрях ея обитавый.
Радуйся, и нам оставивый свое благословение — источник воды в скиту и ныне преизливающийся.
Радуйся, достоблаженне отче Лампаде отшельниче, Таврию молитвами освятивый.
Радуйся, неизвестный Инкерманский чудотворче, Богом прославленный и паствою доселе любимый.
Радуйся, преподобномученице Параскево, молитвенным подвигом и мученичеством край наш освятившая.
Радуйся, яко обитель Топловскую о имени твоем основа́нную, благословляющая и силу чудотворений зде являющая.
Радуйся, славно превознесенная Царице Небесная, чрез икону Бахчисарайскую всех нас благословляющая.
Радуйтеся, светильницы Церкви нашея, вси святии в земли Тавричестей просиявшии!
Кондак 9
Вси небеснии силы ублажают собор Таврических угодников и непрестанным гласом величают Премудраго Творца, Дивнаго во святых Своих Бога нашего и Церковь Христова православных чад ея на земли сей, идеже подвизались святии, согласно воспевает: Аллилуиа!
Икос 9
Вети́й человеческих уста не возмогут изрещи́ пречуднаго прославления всех святых подвижников земли́ Таврическия, многообразными подвигами благоугодившими Господеви и от Него венцы Небеснаго Царствия приявшии. Мы же, благоговейно воспоминающе дивное их на земли житие и преславное на небеса восшествие, во умилении сердец взываем:
Радуйтеся, пречестнии отцы Авдие и Евтихие, пресвитеры Спасовы, Скифии и Готфии просветителие.
Радуйся, премудростию Божиею просвещенный Несторе Летописче, яко писания твоя от Таврии неотделимы и нам даруй просвещение.
Радуйся, боголюбивейший Савво, святителю Сурожский, вся прилоги вражия молитвою попаливый.
Радуйся, Григорие, патриарше Цареградский, за Христа от агарян пострадавый и епархию нашу благословивый.
Радуйся, святителю Иннокентие, Таврическия Церкви украшение, всероссийский златоусте и богослове.
Радуйся, яко многия древния обители земли нашея ревностно возобновивый.
Радуйся, молитвенниче и предстателю о нас пред Господем.
Радуйся, от всех Небесных Сил приснопеваемая Госпоже и Заступнице наша, Влахернскою иконою пронесенную чрез Таврию, землю сию освятившая.
Радуйтеся, светильницы Церкви нашея, вси святии в земли Тавричестей просиявшии!
Кондак 10
Спасению нашему ходатаи бысте, угодницы Божии земли Крымския, сего ради молим вы — будите нам помощницы в христианстем благочестии и образы жития спасительнаго? о нас молитеся, да избавльшеся от суеты и вражиих наветов, благодарно вопием Богу: Аллилуиа!
Икос 10
Стена тверда и крепкое ограждение явистеся святии наши соотечественницы, вам бо дадеся благодать всем требующим полезная подавати, от всякаго душевреднаго искушения диавольскаго ограждати. Вас убо прославляем и просим — помозите нам во всякой скорби и обстоянии, молящимся с умилением:
Радуйтеся, великомучениче Георгие Победоносче, Иоанне Воине, великоименитый Никито — страдальцы Спасовы, наши заступницы и неотъемлемая наша святыня.
Радуйся, исповеднице Христова Доминато, с учителем святым Климентом из Рима в Инкерман сосланная и тамо в темнице душу свою Господеви предавшая.
Радуйтеся, страстотерпцы Меркурие и Савво Стратилате с седмидесятью воины в Скифии, образ долготерпения показавшии и за Христа пострадавшии.
Радуйся, и ты, Савво Готфянине, мученичества венец унаследовавый.
Радуйтеся, страдальцы Господни, Оре́нтие, Фарна́кие, Еросе, Фирмо́се, Фирми́не, Кириа́че и Ло́нгине на предлежащий вам подвиг мученичества добре востекшии.
Радуйся, царевиче Ермининге́льде в Готфии пострадавый и вечныя обители улучивый.
Радуйся, преподобномучениче Парфение, монастыря Кизилташскаго игумене, от агарян убиенный, путь спасения верным указу́ющий.
Радуйся, возвеличенная Божественною славою Дево Богородице, чудотворным образом Твоим, Одигитрией именуемым, оросившая благодать краю нашему.
Радуйтеся, светильницы Церкви нашея, вси святии в земли Тавричестей просиявшии!
Кондак 11
Пение хвалебное приносим вам, новомученицы Крымстии, в лютую годину гонений от безбожных пострадавшии и кровию своею мученическою, за Христа проливаемою, освятившии землю нашу, образ непоколебимаго стояния в вере Православней нам являющии, да и мы со всеми вами непрестанно воспеваем Богу: Аллилуиа!
Икос 11
Светозарному небеси уготовали души ваша, страдальцы Господни, священномученицы, исповедницы и вси святии новомученицы, знаемии и незнаемии, в ссылках, в темничных узах всякия муки приявшии, от хлада, глада и огня, в лесах и иных ведомых и неведомых тяжких обстоятельствах страдальческую кончину приявшии и замученныя, непоколебими в вере Христовой и Православии пребывшии, небесной славы достигшии и венцами мученическими увенча́нныя, приимите и от нас похвалы сия:
Радуйся, святителю Никодиме, скорби и муки мнози за имя Господне приявший.
Радуйся, епископе Порфирие, Симферополяграда и всего Крыма архиерее, за веру Православную душу свою положивый.
Радуйтеся, священномученицы седмочисленнии, спострадавшии архипастырю Крымскому и за Христа убиенныя.
Радуйтеся, яко имена ваша написана суть на небесех.
Радуйтеся, яко и мы прибегаем к вам в молитвах, священномученицы, пастыри словеснаго стада — Димитрие, Николае, Варфоломее, Владимире, Тимофее, Иоанне и Антоние.
Радуйтеся, страдальцы земли нашея, вси исповедницы имени Христова, не убоявшиеся убивавших тело и не могущих душе что сотворити, поношения, гонения, и вся лютая претерпевшия.
Радуйтеся, вси новомученицы Крымстии, нами именуемыя и их же имена Единому Богу ве́домыя, в обителех Отца Небеснаго ликовствующия.
Радуйся, Препрославленная Мати Божия, в сии дни явившая земли Крымстей честную икону свою «Скорбящая», от нея же болящия исцеление, скорбящия утешение, бедствующии благовременную помощь получают.
Радуйтеся, светильницы Церкви нашея, вси святии в земли Тавричестей просиявшии!
Кондак 12
Благодати Божией зна́мение явися земли́ нашей во дни сия, егда прославленному сонму угодников Таврических причислен бысть святый исповедник архиепископ Лука и мощи откры Господь, благословляя паству Крымскую в веселии и радости зовущих: Аллилуиа!
Икос 12
Поюще богоугодное житие ваше, святии земли Крымстей, величаем ревностное о Господе проповедание, страдание яже за Христа и подвиги пустынножительства, благодарно славословим прославльшаго вас Творца и Благодателя и смиренно молим вы — испросите у Христа Господа всем верным милость Его и прощение, да усердно воспоем вам:
Радуйся, исповедниче Луко, святителю новопрославленный, лучезарная звездо Церкви Крымския.
Радуйся, всероссийская похвало и Греции и Афона всежеланное радование.
Радуйся, мощми своими почиваяй в монастыре Святыя Троицы, идеже многолетно проповедовал еси о Христе.
Радуйся, дивными и многими чудесы удивил еси и зде притекающих к тебе и в стране Восточныя Церкви.
Радуйтеся, земнии сродницы наши, вернии проповедницы Евангелия Христова и спасения человеков Крестных ради страданий Спасовых.
Радуйтеся, святии земли нашея, в постничестве и пустыннем жительстве просиявшия и восшедшия ко Господу яко фимиам благоуханный.
Радуйтеся, велиции соотечественницы наша, новомученицы и исповедницы, явленнии и неявленнии, улучити спасение нам у Господа ходатайствующия.
Радуйся, Пречестнейшая и всех святых Пресвятейшая Дево Мати Божия, Предстательнице и Ходатаице спасения нашего.
Радуйтеся, светильницы Церкви нашея, вси святии в земли Тавричестей просиявшии!
Кондак 13
O, преславнии угодницы Божии, святии вси в земли Тавричестей просиявшии, на небесех же Троице Святей предстоящии и славы вечныя причастницы явльшиеся, нынешнее наше пение и возсылаемыя сердечныя моления сия приимите. Исцелите многообразные недуги душ и телес наших и предстательством вашим испросите у Христа Бога избавление от напастей, от всех бед и ско́рбей, в Православней вере до конца жития сего непоколебими пребывати и в будущем веце Небеснаго Царствия наследницы быти, поюще с вами ангельскую песнь: Аллилуиа, аллилуиа, аллилуиа![Се́й конда́к глаго́лется три́жды.][Далее повторяем 1‑е икос и кондак:]Икос 1
Ангельскому поревновавши житию и Духом Святым просвещеннии мужие апостольстии и доблественнии жены́, благовестники и просветителие земли нашея и Церкви Святыя насадителие. Днесь чада ваша духовная на земли, идеже стопы ваша прошли грады и веси, с умилением приносим сердечныя похвалы сия:
Радуйся, первозванный апостоле Христов Андрее, первейший святыя веры в Таврии насадителю!
Радуйся, благоверный царю Константине, повелением твоим в земли́ нашей Православие утвердивый.
Радуйся, богомудрая царице Елено, святою ревностию твоею край Таврический светом евангельским озарившая.
Радуйся, богоблаженная княгине российская Ольго, чрез Тавриду посетившая Царьград, в правоверии нас наставляющая.
Радуйся, духовная наша мати, праотцем нашим испросившая у Бога просвещение.
Радуйся, равноапостольный княже Владимире, в Херсонесе приявший крещение и тем христианскую веру прославив, прелесть идольскую посрамил еси.
Радуйся, благовестителю света Христова, провидевший Божие смотрение о спасении народа державы твоея.
Радуйся, наипаче и Ты, Благословенная Владычице, Мати Божия, всех Крымских святых на труды и подвиги укрепившая.
Радуйтеся, светильницы Церкви нашея, вси святии в земли Тавричестей просиявшии!
Кондак 1
Избраннии от Бога угодницы и чудотворцы земли Тавричестей, светом истины Христовой озареннии и в южнем крае сем отечества нашего и во вселенней просиявшии, яко звезды светлыя Церковь Крымскую украсившии, восхваляя подвиги ваша и труды евангельскаго спасительнаго сеяния, почитаем пречестную память и ваше пред Богом ходатайство, помощь и заступление, с любовию сыновнею зовуще вам: Радуйтеся, светильницы Церкви нашея, вси святии в земли Тавричестей просиявшии!
Молитва
O, всечестный соборе всеблаженных святых сородичей наших, вси святии в земли Тавричестей подвизавшиеся! Богоноснии отцы, пастырие и учителие, постницы и исповедницы, новомученицы и вси праведнии, по Богородице наши предстателие пред Господем! Ублажаем ваше святое житие, светильницы Божественнии, зве́зды светом веры и добродетели светящиеся и наша умы и сердца богомудренне озаряющия, всю же вселенную высоких добродетелей светлостьми удивившия и всю Таврическую землю светом Евангелия Христова просветившия.
Приимите похвальная словеса сия, наша к вам усердныя молитвы и коленопреклонения, яже вам приносим. Светлое празднетство в честь и память вашу совершаемое нами, обымите яко воню благоухания и жертву благоприятну. Умоляем вашу богоподражательную любовь, предстателие наша и покровителие: сохраните вся грады и веси земли Крымския от огня, трясения и бурных ветров, от глада, нашествия иноплеменников и междуусобныя брани. Оградите нас от всякаго зла и посетите нас в немощех наших.
Молитвами вашими утвердите Православие Церкви Крымския и сохраните словесное стадо свое в вере и добродетели. В терпении и подвизех сами пожившии, оградите и нас от прелести мира сего лукаваго, да отвергшеся себе и вземше крест, последуем Христу. Помяните нас у Престола Вседержителя Бога, Ему же предстояще и со ангелы ликовствующе, можете и нам, напа́тствуемым, помощи́, да безбедно преплывше житейскую пучину и невредимо соблюдше сокровище веры, пристанища вечнаго спасения достигнем, славяще купно с вами Отца и Сына и Святаго Духа в безконечныя веки. Аминь.
Акафист составлен настоятелем храма Трех Святителей (Василия Великого, Григория Богослова и Иоанна Златоуста) г. Симферополя протоиереем Георгием Севериным. Симферополь, 2004 г.