Молитвы

Изрядная отрасле благочестиваго корене,/ дивный благородный цвете,/ избранный от пелен благодатию Христовою,/ возлюбленный от юности Духом Святым,/ девственное процветение, Игнатие блаженне,/ днесь, сошедшеся, вернии, в память твою,/ похвальными венцы честную твою главу венчающе, зовем:/ радуйся, преподобне, сосуде Святаго Духа, всея Российской земли удобрение.

Отверзый небеса заключенная,/ на небеси пресветлыя лучи,/ на земли возсия пречистый Крест;/ Темже сияний Его действа приемше,/ к незаходимому наставляемся свету/ и во бранех имамы Его оружие мира/ непобедимую победу.

Явися днесь Церкви новое торжество/ триех страстотерпцев,/ яко светила, озаряющее/ православных, Христе,/ исполнения.

Страстотерпцы всечестнии,/ воини Христовы четыредесяте,/ твердии оружницы,/ сквозе бо огнь и воду проидосте/ и Ангелом сограждане бысте,/ с нимиже молитеся Христу о иже верою хвалящих вас./ Слава Давшему вам крепость,/ слава Венчавшему вас,/ слава Подавающему вами всем исцеления.

Моря зловерие обличил еси,/ и идольскаго безбожия лесть верою правоверия уязвил еси/ и, всесожжение Божественное быв,/ чудодействием орошаеши концы,/ отче святителю Феодоте, Христа Бога моли// даровати нам велию милость.

Иго Христово прием, Симеоне,/ и, Того Крест взем, последовал Ему, / насажден в дому Господнем, процвете, яко финике, / якоже кедр, иже в Ливане, умножил еси чада твоя,/ муж желаний духовных, чудотворец бо явися,/ Христа Бога моли непрестанно о всех нас.

Твердаго и Боговещаннаго проповедателя Евангелия Твоего, Господи,/ возмездил еси Боголепно/, труды бо его и болезни приял еси паче всех жертв законных и всесожжении./ Того молитвами соблюди нас от неприязни.

Кондак 1 Избранным Богом от суетнаго мира, вам, о, преподобнии отцы Оптинстии, крест свой благоговейно подъемши и Христу последовавшим верою, яко дерзновенным предстателем нашим пред Господем ныне усердное моление приносяще, с любовию взываем: Радуйтеся, преподобнии отцы Оптинстии, благодати старчества светильницы. Икос 1 Ангельскаго иноческаго жития всем сердцем взыскавше, вся мирская пристрастия отвергосте, Богомудрии, и во объятия Отча с любовию в обитель Оптинy притекше, путем тесным и прискорбным до конца дней ваших шествовасте. Сего ради воспеваем сице: Радуйтеся, на зов Господень радостно притекшии; радуйтеся, всем желанием Христу последовавшии. Радуйтеся, крест свой на рамо восприимшии; радуйтеся, паче Господа ничесоже возлюбившии. Радуйтеся, Христа ради всеконечно себя отвергшиися; радуйтеся, Царствия Божия блаженнии наследницы. Радуйтеся, преподобнии отцы Оптинстии, благодати старчества светильницы. Кондак 2 Видевше сети диаволъския, аки паучина в мире распростертая, и во глубине сердец ваших восчувствовавше, яко от них человецы токмо смирением спасаются, себе самех в теплой молитве пред Господем повергосте, со умилением взывающе: Аллилуиа. Икос 2 Разумевше сердцем и умом, яко делы своими не оправдится пред Богом всяк живый, и присно содержаще пред очесы вашими согрешения своя, токи слезныя, единому Господу зримыя, источати не престасте, покаяние души Ему приносяще, Егоже образ показасте нам, взывающим: Радуйтеся, грехи своя неприкровенны прозревавшии; радуйтеся, дар умиления и слез от Господа приявшии. Радуйтеся, блаженство плача о гресех познавшии; радуйтеся, неусыпающую скорбь о них стяжавшии. Радуйтеся, на земли покаяния проповедницы; радуйтеся, на небеси ныне Господем утешаемии. Радуйтеся, преподобнии отцы Оптинстии, благодати старчества светильницы. Кондак 3 Силу искупительных страданий Христовых положисте, святии, яко нерушимую надежду спасения, себе самех хуждшими всех человек и никоеяже милости достойных помышляюще, и сего ради со многим смирением и благодарением присно вопиясте Богу: Аллилуиа. Икос 3 Имуще в сердцах своих Божественный смиренномудрия дар, истинные ученицы Христа, смирившаго Себе даже до смерти Крестныя, ни во чтоже вменисте вся подвиги и труды ваша. Возрастающим бо подвигом, сугубо возрасташе и смирение, емуже дивящеся, глаголем: Радуйтеся, послушанию и смирению Спасителем наученнии; радуйтеся, за смирение Господем Славы вознесеннии. Радуйтеся, безгневия и кротости смирением достигшии; радуйтеся, смирением и самоукорением покой душам обретшии. Радуйтеся, нищетою духовною обогатившиися избранницы; радуйтеся, ваше бо есть Царствие Небесное, нищим духом уготованное. Радуйтеся, преподобнии отцы Оптинстии, благодати старчества светильницы. Кондак 4 Бурю страстей, плотию и диаволом воздвизаемую, утоляюще, ум владыку над страстьми пагубными постнически постависте, мужески бо естество понудивше, потщастеся благодатию Божиею хуждшее покорити лучшему и плоть поработити духу, Подвигоположнику Христу пети не престающе: Аллилуиа. Икос 4 Слышавше глагол Господень, яко Царствие Небесное нудится и токмо нуждницы восхищают е, постом, бдением и молитвою непрестанно подвизастеся и плоть свою со страстьми и похотьми Христови распясте, уставы иноческия нерушимо соблюдше. Темже ублажаем вы: Радуйтеся, благое иго Христово люботрудно noнесшии; радуйтеся, трезвением сердечным духа не угасившии. Радуйтеся, крепкое хранение устом своим полагавшии; радуйтеся, телеса своя нещадно утеснявшии. Радуйтеся, с телесными подвиги умное делание сочетавшии; радуйтеся, в терпении вашем души ваша стяжавшии. Радуйтеся, преподобнии отцы Оптинстии, благодати старчества светильницы. Кондак 5 Светоносное имя Иисусово, яко оружие непобедимое противу бесовския рати, непрестанно в сердце с верою носяще, приснотекущий источник благодати обретосте, восходяще от силы в силу и огнь ко огню прилагающе, очищенным смыслом воспеваете Богу: Аллилуиа. Икос 5 Прозревающе всечасно немощь свою и спасительную, благодатную силу молитвы Иисусовой, николиже престасте творити ю, страстей прилоги тою посецающе и вся козни вражия попаляюще, в безмолвии сердца молитвенное собеседование с Господем таинственно обретше, нас научаете взывати вам: Радуйтеся, весь ум свой в молитву погрузившии; радуйтеся, всецело горе сердца своя имевшии. Радуйтеся, на молитве ни о чемже суетнем помышлявшии; радуйтеся, имя Иисусово неусыпно призывавшии. Радуйтеся, молитвы сердечныя изряднии подвижницы; радуйтеся, вся просимая во имя Господне получавшии молитвенницы. Радуйтеся, преподобнии отцы Оптинстии, благодати старчества светильницы. Кондак 6 Предстояще сердцем в молитве пред Крестом за грехи людския страждущаго Господа, рыданием возрыдаете, преподобнии, скорбию о гресех своих снедаеми и неизглаголанною любовию к Искупителю нашему возгарающеся, до конца жития убо трепетно взывасте Ему: Аллилуиа. Икос 6 Воссиявшу в сердцах ваших свету любве Божественныя, славу земную и похвалы возненавидесте и омерзисте, безчестие же от человеков и всякия скорби отверстым сердцем радостно приемлюще, поношению Христову усердно приобщистеся. Нам убо образ злострадания и терпения показасте, зовущим: Радуйтеся, язвы Господа Иисуса Христа на теле своем носившии; радуйтеся, поругания, яко врачевство чистительное, усердно пившии. Радуйтеся, от почестей земных всем сердцем отвратившиися; радуйтеся, за ненавидящих вас с любовию молившиися. Радуйтеся, обидящих вас, яко благодетелей, возлюбившии; радуйтеся, благодарити Милосердаго Господа николиже преставшии. Радуйтеся, преподобнии отцы Оптинстии, благодати старчества светильницы. Кондак 7 Хотяй Господь всем человеком спастися и в разум истины приити, видя ваше благое произволение и труд непрестанный в исполнении заповедей Его, отверзе вам ум разумети пути Своя и оправданием Своим научи вас. Темже сердцем просвещенным выну воспевасте: Аллилуиа. Икос 7 Дивна дела Твоя, Господи, яко паче книжник вразумляеши рабов Твоих, всем сердцем взыскующих Тя, и открываеши очи их, да уразумеют чудеса от закона Твоего. Блажим убо преподобных Твоих, отцев наших Оптинстих, присно поучавшихся в заповедех Твоих, яже возлюбиша зело, и поем им: Радуйтеся, словеса Божия, яко богатство много, в сердце сокрывшии; радуйтеся, путие заповедей Божиих всем сердцем возлюбившии. Радуйтеся, всяк путь неправды омерзившии; радуйтеся, от пути Господня николиже отступившии. Радуйтеся, в добрем подвизе уготовившиися и не смутившиися; радуйтеся, слово Божие вместивше, мир мног во Христе обретшии. Радуйтеся, преподобнии отцы Оптинстии, благодати старчества светильницы. Кондак 8 Странников и пришельцев на земли себе помышляюще, ничесоже от тленных вещей мира сего стяжати себе не возжеласте, да не будут сердца ваша к земли влекома, обаче к единому Богу прилепистеся, чисте возносяще Ему песнь: Аллилуиа. Икос 8 Всякое плотское пристрастие, от любве Господни отлучающее, вседушно отвергосте, единое на потребу взыскующе. Всегда убо при ногу Иисусову неотторженною приседесте любовию, ко благом житейским сердца не прилагающе и все упование свое на Господа возложивше. Темже похваляем вас, святии: Радуйтеся, без пристрастий к миру житие свое скончавшии; радуйтеся, от земных забот свобождшеся, сладость чистыя молитвы познавшии. Радуйтеся, твердою верою попечения житейская отложившии; радуйтеся, нестяжанием и послушанием пагубныя страсти умертвившии. Радуйтеся, иноческий обет нестяжания свято соблюдшии; радуйтеся, волю свою отсекшии Христовы послушницы. Радуйтеся, преподобнии отцы Оптинстии, благодати старчества светильницы. Кондак 9 Вся молитвы ваша и вся силы ваша подвигосте, преподобнии, во еже стяжати чистоту душевную и телесную, без неяже, по словеси Христову, никтоже узрит Бога; темже убо чистым сердцем сподобистеся в раи Господни достойно воспети чудную праведных песнь, зовуще: Аллилуиа. Икос 9 Воюющии на душу плотская вожделения постом и молитвою укрощающе, помыслом греховным возобладати вами не попускаете, от Господа Бога, единаго власть имущаго побеждати естества чин, дар чистоты и целомудрия приясте. Приимите убо и от нас хваления таковая: Радуйтеся, благодать Божию в борьбе с плотию смирением привлекшии; радуйтеся, труды и лишения возлюбивше, покой телесный отринувшии. Радуйтеся, постом и всенощными моленьми похоть плоти умертвившии; радуйтеся, естества уставы силою Христовою победившии. Радуйтеся, телеса и души ваша чисты Господеви принесшии; радуйтеся, чистии сердцем, Бога в вечнем блаженстве зрящии. Радуйтеся, преподобнии отцы Оптинстии, благодати старчества светильницы. Кондак 10 Спасти хотяще души своя для жизни вечныя, вся помышления о земнем и привременнем отринусте и Спасителю нашему, заповедь велику о любви учеником Своим давшему, делом и истиною последовасте. Сего ради ближних ваших теплою любовию тогда возлюбисте, Небесному Отцу всех человеков зовуще: Аллилуиа. Икос 10 Возлюбивше всею душею ближняго своего, Царствие Божие внутрь себе обретосте, темже сниде в сердца ваша огнь попаляяй любве Божия, еюже необыменно насыщающеся, всецело себе в жертву делом любве принесосте. Ныне же и от нас благоговейное пение сие слышите: Радуйтеся, всех человеков святою любовию возлюбившии; радуйтеся, во еже некия спасти, всем вся бывшии. Радуйтеся, о горестех людских слезно воздыхавшии; радуйтеся, всех притекающих в сердцах своих вмещавшии. Радуйтеся, тща от себе никогоже отпускавшии; радуйтеся, души ваша за ближних полагавшии. Радуйтеся, преподобнии отцы Оптинстии, благодати старчества светильницы. Кондак 11 Пение молебное приносим вам, преподобнии отцы наши Оптинстии, вашею бо стезею воистину право ходити познахом. Блажени есте, Христу работавшии и вражию посрамившии силу, истинное правило добродетели показастеся всем, Господеви зовущим: Аллилуиа. Икос 11 Светлыя подвиги ваша похваляюще, преподобнии отцы наши Оптинстии, ублажаем вас, яко славных наставников монахов и чудных собеседников Ангелов ныне на небеси Престолу Божию предстоящих и молящихся о нас, с любовию поющих вам: Радуйтеся, трезвения непрестаннаго усерднии ревнителе; радуйтеся, пламени сердечнаго неусыпнии хранителе. Радуйтеся, непоколебимии столпи послушания, вся претерпевшии; радуйтеся, многими скорбьми в Царствие Божие вшедшии. Радуйтеся, иноческаго жития равноангельнии подвижницы; радуйтеся, добрии раби Божии, блазии и вернии. Радуйтеся, преподобнии отцы Оптинстии, благодати старчества светильницы. Кондак 12 Благодати дар испросите нам у Господа, вас, о, блаженнии, верно хвалящим. Вонмите воздыханием нашим, слез наших не презрите. Умолите Господа утолити лютыя страсти наша, дати нам плач сокрушенный о гресех наших, да чистою душею и неоскверненными устнами купно с вами сподобимся в раи Господни воспевати: Аллилуиа. Икос 12 Поюще ныне вас, о, преподобнии, хвалебными гласы, вемы, яко не пения устен взыскуете, но подвигом вашим последования, смирения сердечнаго и жития исправления. Темже в покаянии помощи вашея просяще, любовию же подвизаеми, глаголем: Радуйтеся, добре жительствующих ограждающии; радуйтеся, немощных и сирых укрепляющии. Радуйтеся, падающим руку помощи простирающии; радуйтеся, кающимся слезы утешительныя низпосылающии. Радуйтеся, всем призывающим вас скории помощницы; радуйтеся, спасения нашего пред Богом теплии ходатаи. Радуйтеся, преподобнии отцы Оптинстии, благодати старчества светильницы. Кондак 13 О, преславнии угодницы Христовы, преподобнии отцы и старцы, Моисее, Антоние, Исаакие, Иларионе, Анатолие, Иосифе и Вторый Исаакие, Льве, Макарие, Амвросие, Варсонофие, Вторый Анатолие, Нектарие и Никоне, яко седмь столпов и седмь светильников в Оптинстей обители просиявшии! Нынешнее наше моление услышите и испросите нам у Господа смирение и память смертную, да избавит нас Господь от всякаго зла и сподобит христианския кончины всех вопиющих Ему: Аллилуиа.[Се́й конда́к глаго́лется три́жды.][Далее повторяем 1‑е икос и кондак:]Икос 1 Ангельскаго иноческаго жития всем сердцем взыскавше, вся мирская пристрастия отвергосте, Богомудрии, и во объятия Отча с любовию в обитель Оптинy притекше, путем тесным и прискорбным до конца дней ваших шествовасте. Сего ради воспеваем сице: Радуйтеся, на зов Господень радостно притекшии; радуйтеся, всем желанием Христу последовавшии. Радуйтеся, крест свой на рамо восприимшии; радуйтеся, паче Господа ничесоже возлюбившии. Радуйтеся, Христа ради всеконечно себя отвергшиися; радуйтеся, Царствия Божия блаженнии наследницы. Радуйтеся, преподобнии отцы Оптинстии, благодати старчества светильницы. Кондак 1 Избранным Богом от суетнаго мира, вам, о, преподобнии отцы Оптинстии, крест свой благоговейно подъемши и Христу последовавшим верою, яко дерзновенным предстателем нашим пред Господем ныне усердное моление приносяще, с любовию взываем: Радуйтеся, преподобнии отцы Оптинстии, благодати старчества светильницы.

Кондак 1 Избранниче благодати Божией, преподобне отче наш Мартирие, от юности твоея Христа возлюбил еси и Тому невозвратно последовал еси. Обитель Зеленецкую создав, в той многия к спасению управил еси. Чудесы украсився в житии, в маститей старости преставился еси и, днесь на небесех ликующе выну молишися за ны. Мы же, светло память тою празднующе, тако тя величаем: Радуйся, Мартирие, скорый наш помощниче, Зеленецкий чудотворче! Икос 1 Ангели и архангели и вся воинства небесная Христа песньми превозносят. Сим же и духи праведник совершенных сликовстуют, в них же лице тя зряще, тако хвалим достойно, нашего заступника: Радуйся, от юности небеснаго отечествия взыскавый! Радуйся, вся мира сего красная ни во что же вменивый! Радуйся, Христови единому послуживый! Радуйся, сего ради крест жития иноческаго приемый! Радуйся, обитель Зеленецкую устроивый! Радуйся, создавый иноком виталище безпечальное! Радуйся, братии ради многи труды претерпевый! Радуйся, еще в житии чудесы от Бога прославленный! Радуйся, царевича от смертнаго одра воздвигнувый! Радуйся, в житии явления Матере Божия удостоенный! Радуйся, лику праведных вчиненный! Радуйся, Мартирие, скорый наш помощниче, Зеленецкий чудотворче! Кондак 2 Видел еси, преподобне Мартирие, смерть родителей твоих, и от сего еще в младости познал еси, яко странники и пришельцы есмы в юдоли сей земной. Море же житейское зря напастей, бурею воздвизаемое, к тихому пристанищу устремился еси. В церковь бо, яко в корабль, притекл еси и небесным кормчим Христом в селения горняя управлен был еси, идеже днесь радостно вопиеши Богови: Аллилуиа! Икос 2 Уразумел еси пути спасительныя, отче наш Мартирие, егда, иерея Благовещенския церкве Бориса посещая, поучениям его внимал еси. И, тому последовав, в великолуцкую обитель Сергиеву преселился еси и вся иноческаго жития тяготы понесл еси. Темже тако ти рцем: Радуйся, Великих Лук произрастание дивное! Радуйся, сирото, сохраненное Богом от напастей всяческих! Радуйся, яко посла ти Господь родителя нова иерея праведна! Радуйся, яко любовию той благому игу Христову тя покори! Радуйся, сладце послушавый того от писания назидания! Радуйся, часте входивый в храм Благовещения Пречистыя! Радуйся, молитвою тамо умудрявыйся! Радуйся, приятием Пречистых Таин укреплявыйся! Радуйся, прочее дня проводивый в трудех всяческих! Радуйся, целомудрие душевное и телесное нерушимо соблюдый! Радуйся, достойно на подвиг иноческого жития вшедый во обитель Великолуцкую! Радуйся, Мартирие, скорый наш помощниче, Зеленецкий чудотворче! Кондак 3 Силою благодати Божией снабдеваем, седмь лет со наставником твоим пребыл еси, преподобне, иже многим полезным тя научи. Наипаче же учаше болящих поскору Святых Таин сподобляти, зане по смерти той душе, яко несущей святая, демони никако же могут касатися, ангели же ю сретают с песнию: Аллилуиа! Икос 3 Имений не стяжав, стяжал еси мудрость жизни по Бозе, преподобне Мартирие, яко бо семя, в землю вметаемо, новы класы возращает, тако и поучения наставника твоего быша души твоей семенем жизни вечныя. Сего ради тя ублажаем: Радуйся, послушанием украсивыйся! Радуйся, постом истончивый плоти страстная! Радуйся, препобеждавый сон молитвенным бдением! Радуйся, трудом земледелия укрепивый силы своя! Радуйся, послуживый больным во врачебнице! Радуйся, омывавый струпы гнойная и язвы неисцельныя! Радуйся, поскорбевый с скорбящими! Радуйся, немощных роптания кротце понесый! Радуйся, заповедь Христову деянием совершивый! Радуйся, милостиве, яко вечное помилование стяжал еси! Радуйся, тако себе предуготовавый к пострижению иноческому! Радуйся, Мартирие, скорый наш помощниче, Зеленецкий чудотворче! Кондак 4 Буря греховная многи люди погуби. Обаче силою благодати Христовы мнози спасение улучают, живуще благочестне, монаси и мирстии. Кийждо приемлет, еже по мере сил обретает, ов о чадех спасается, ов же иночестии приемлет обеты и Богови деннонощно поет песнь серафимскую: Аллилуиа! Икос 4 Слышав Иисуса Христа, рекша о иночестем житии: «могий вместити, да вместит», и зря себе к оному преклоненна, усердно молил еси, преподобне, наставника, да желание твое освятит и укрепит пострижением, еже и получил еси. Тем же тебе вопием: Радуйся, яко остригл еси власы главы твоея в знамение мироотречения! Радуйся, яко облеклся еси в хитон вольныя нищеты! Радуйся, приемый рясу аки одежду веселия! Радуйся, препоясавый бедра свои яко силою истины! Радуйся, мантиею, аки бронею правды, одеявыйся! Радуйся, покрывый главу свою покрывалом смирения! Радуйся, с одеянием сандалий не скор бывый на творение воли своея! Радуйся, глаголом Божиим, аки мечем вооруживыйся в всегдашней молитве Иисусовой! Радуйся, крест, щит веры приим, с любовию облобызавый и! Радуйся, свещу взем, свещею благочестия явивыйся последи! Радуйся, приятый в воинства противу мира, плоти и диавола! Радуйся, Мартирие, скорый наш помощниче, Зеленецкий чудотворче! Кондак 5 Боготечная звезда древле приведе мудрецы восточныя к яслям Вифлеемским, идеже тии обретоша Царя царствующих и Господа господствующих. Тако и тя, преподобне Мартирие, путь иноческаго жития приведе последи в селения горняя, идеже рожденному от Девы выну приносится спасенными песнь великая и хвалебная: Аллилуиа! Икос 5 Врагу, присно на пустынных мужей страхованиями многими нападающу, житием молитвенным противустал еси, преподобне, и жестоким страстей умерщвлением. Мы же, чудящиеся твоему терпению брани, от того воздвигнутыя, умиленно поем ти хвалы: Радуйся, добре преуспевый в иночестих подвизех! Радуйся, пустыннаго жительства возжелевый зело! Радуйся, молитвою на сие Божия благословения просивый! Радуйся, удостоивыйся явления преподобнаго Михаила Клопскаго! Радуйся, яко той благослови твое изволение! Радуйся, за шестьдесят поприщ от обители наченый пустынное жительство! Радуйся, яко велию брань воздвигоша противу тя зде злии демоны! Радуйся, яко множицею воплями в время полунощи устрашаху тя! Радуйся, избити мняще, ничтоже ти зло сотворити можаху! Радуйся, яко прогонял еси я молитвою, аки пламенным мечем! Радуйся, силою креста Христова посрамивый силу вражию! Радуйся, Мартирие, скорый наш помощниче, Зеленецкий чудотворче! Кондак 6 Проповедниче благочестия, егда узрел еси, преподобне Мартирие, образ Владычицы нашея Богородицы в столпе огненне и светле в стране Тихфинстей, зело умилился еси Божию к себе милосердию. Егда же в град Смоленск богомоления ради вшел еси, явишася ти преподобнии Авраамий и Ефрем и паки пустынное ти прорекоша житие, сладце воспел еси: Аллилуиа! Икос 6 Возсия благодать Божия в обители Тихфинстей, егда тамо пожил еси с учеником своим Авраамием, иже и сподобися зрети крест звезден, назнаменующ место твоея обители. Тем же ти рцем тако: Радуйся, на Господа возложивый все свое упование! Радуйся, исшедый на поклонение святым мощем преподобных Авраамия и Ефрема! Радуйся, преподобне, преподобных собеседниче! Радуйся, незримый днесь споспешниче ко святым местом шествующим! Радуйся, пришедый на поклонение иконе Богоматери Тихфинстей! Радуйся, яко тамо добродетельным житием просиял еси! Радуйся, ключехранителю, отверзавый и затворявый двери храмовныя! Радуйся, днесь вводяй в врата небесныя молитвою за немощную братию! Радуйся, прославивый приявшую тя обитель равноангельным житием! Радуйся, исшедший из тоя на подвиг устроения новыя! Радуйся, возжегий светильник во спасение немощным! Радуйся, Мартирие, скорый наш помощниче, Зеленецкий чудотворче! Кондак 7 Хотяй един Богови молитися и быти в безмолвии, отшел еси, преподобне, в место, над ним же Авраамий крест виде звезден, и обрел еси тое, яко остров зелен посреде вод блатных, лес же, аки страж ночный, покой его от пришествия мирских людей храняше. Вельми ти любезна обретеся пустыня сия прегорчайшая, юже видящи, умиленно воспел еси: Аллилуиа! Икос 7 Новая купель Силоамская бысть ти, преподобне, Зеленецкая пустынь, в той бо от немощных и страстных естества очистил еси себе бдением и постом и деланием духовным, и угоден Господеви явился еси, сего ради и мы тако ублажаем: Радуйся, обретый место, ти Богом на вселенне уготованое! Радуйся, не убоявыйся пустыннаго одиночества! Радуйся, памятовавый, яко с тобою бе присно Господь! Радуйся, яко Илия на Кармиле, молился еси ту! Радуйся, яко Иоанн в Иорданской пустыне постом украсился еси! Радуйся, ревнителю преподобных Онуфрия, Макария и Антония, великих отцев! Радуйся, проразумевый абие бывшую кознь диавола! Радуйся, предрекий приведшу тя мужеви Иосифу дщери смерть диавлим ухищрением бывшую! Радуйся, открывый, яко утопшая лику мученичу причтеся Божией милостью! Радуйся, вола погибша в ветвех древесных диавольским кознованием объявивый томужде! Радуйся, тако от уныния мужа благоговейна спасый! Радуйся, Мартирие, скорый наш помощниче, Зеленецкий чудотворче! Кондак 8 Странники и пришельцы есмы на земли сей, преподобне, присно ны враг искушает, страсти возмущая, уныние вселяя, и многи поставляет препоны текущим по пути в горний Иерусалим. Аще же что и благо сотоворим ближнему, тщится, да погибнет мзда, скорбьми абие нама отмстити. Бог же сия терпит, якоже древле Иовле поругание, дя вящее даст утешение последи поющим: Аллилуиа! Икос 8 Всяк в житии крест скорбей и печалей, его же кому даде Господь, преносит, и аще в уныние не впадет, последи сугубо прославляется. Тако и ты, отче, вся претерпев, милостей Господних сподобился еси, сего ради тя ублажаем: Радуйся, изначала соградивый часовницу и малу хижину! Радуйся, ту сладце деннонощно моливыйся Богови! Радуйся, Христа ради претерпевый зной и мразы многие! Радуйся, питавыйся, яже точию ти приношаху окрестнии! Радуйся, вскоре утешенный видением огненного столпа с рукою, искры разметающею! Радуйся, яко сия знаменаше обилие благодати, от тебе исходити имущия ко братии! Радуйся, светильниче, его же познаша вскоре вернии! Радуйся, яко не отгнал еси жаждавших с тобою пожити! Радуйся, яко приимал еси от мира к тебе притекающих! Радуйся, пастырю словесных овец! Радуйся, послуживый немощному человечеству до скончания живота! Радуйся, Мартирие, скорый наш помощниче, Зеленецкий чудотворче! Кондак 9 Всего себе принесл еси в жертву, Богови угодную. Многие труды, скорби и печали понесл еси, устрояя обитель и служаще братии, иже от язв мирския суеты мудре в чистоту жития богоугоднаго влекл еси, словеса и деяния молитвою укрепляяй. Два же храма и келлии соградил и обитель стеною древяною оградил еси, да яко же в вертограде цветы источают благоухания, иноцы зде угодне Богови поют: Аллилуиа! Икос 9 Ветвьми древо благосеннолиственное прикрывает многия, и ты, преподобне, многия прикрыл еси от наветов вражиих и моря житейскаго бурь. Мнози бо к тебе притекоша во обитель Зеленецкую, их же ради игуменства сан многопопечительный и священство приял еси и в царствующий град потребных ради обители пешешествовал еси. Сего ради ублажаем тя: Радуйся, светильниче, осиявый темную страну! Радуйся, создателю храмов, в нихже имя Божие прославляется! Радуйся, аки сокровище велие внесый в оныя святыя иконы, от настоятеля ти прежде вданныя! Радуйся, постом, слезами и молитвою создавый основание обители непоколебимое! Радуйся, благочестием привлекий многие щедродатели! Радуйся, к тебе бо, яко пчела ко улию, приношаху боголюбцы сокровища своя! Радуйся, вероваху бо. Яко тако творяще взаим даяху Богови! Радуйся, яко един благий Феодор согради ти вся потребная! Радуйся, поучаяй, яко обителей лепота молитвою иноков стяжавается! Радуйся, яко за добро, ти данное, молился усердно сам и вся братия твоя! Радуйся, образе истиннаго иноческаго жития! Радуйся, Мартирие, скорый наш помощниче, Зеленецкий чудотворче! Кондак 10 Спасительныя милости сподобился еси, преподобне отче Мартирие. Единожды по молитве мало уснувшу ти, узрел еси Матерь Божию. В девичьем образе бе Пречистая, умиленна лицем и прекрасна, бровьми черна. На главе бяше златый венец, от камений многоценных светящий зело. Ты же, Ю узрев, с слезами умиления преклонився, воспел еси: Аллилуиа! Икос 10 Стена ти нерушимая бысть, преподобне, икона Тихфинская, ею же благослови тя настоятель, егда в Зеленецкий оток отхождал еси. Егда же Пречистую зрети удостоился еси, абие невидимей бывшей, на икону сию воззрел еси и познав еси, яко в подобии тоя иконы бе Владычица. Яже памятующи, тако ти рцем: Радуйся, истинный Пречистыя святых икон чтителю! Радуйся, истиннаго святых икон почитания научителю! Радуйся, Пречистыя Владычицы лик, слезами исполненный и прекрасный видети удостоенный! Радуйся, яко келейнии иконы твои и днесь осеняют гроб твой! Радуйся, яко покланяющеся им, честь не древу, но на нем изображенным воздаем! Радуйся, яко не доскам и вапам, но написанному Божеству на них поклонение приносим! Радуйся, яко лики святых и твой лобызающе, аки нози ваша лобызаем! Радуйся, яко фимиамом молитву нашу знаменуем! Радуйся, свещи возжигающе, о свете, в нем же Бог живет, памятуем! Радуйся, яко от икон твоих исходит сила целебная! Радуйся, яко возложением их мертва воскреси Господь! Радуйся, Мартирие, скорый наш помощниче, Зеленецкий чудотворче! Кондак 11 Песни надгробныя и последнее целование сменися пением хвалебным милости Божией и слезами радости, егда, в Москву ти шествующу, во Твери, у царя Симеона сына Иоанна воскресил еси молитвою и святых икон твоих возложение по силе благодати Христовы, ти данныя. Сего ради зело возлюби Симеон обитель твою, преподобне, и три новы храмы ту согради, да о чудеси сем выну Богови возносится песнь хвалебная: Аллилуиа! Икос 11 Яко светильника тя благочестия почитающий царь Симеон много потребными обитель твою снабде. Егда же скончался еси, преподобне, чтый вельми память твою святитель Корнилий, Новуграду владыка мудрый, зело возлюби и преукраси, идеже и место упокоения си избра. Яже памятующи и обитель твою ради веры и терпения украшену видящи, тако тебе вопием: Радуйся, искателю царствия Божия, емуже вся земная приложишася! Радуйся, яко обитель твоя потребными не оскуде! Радуйся, яко тремя храмами, яко купель тремя свещи, осияся сия! Радуйся, яко недужнии душею ту оздравляхуся! Радуйся, яко царие и простии, богатии и убозии, досезающие ю, во спасение назидахуся! Радуйся, яко умершего отрока в утешение родителема воскресил еси! Радуйся, яко тем силу благодати Божия явил еси! Радуйся, научаяй тем, яко в Бозе живот наш и смерть скончаваются! Радуйся, проповедниче Божия всемогущества! Радуйся, благодати сосуде преисполненный! Радуйся, от гроба твоего источаяй многообразная исцеления! Радуйся, Мартирие, скорый наш помощниче, Зеленецкий чудотворче! Кондак 12 Благодати Божией избранниче, преподобне отче наш Мартирие, егда состарелся еси и остави тя крепость твоя, сам рукама своима место упокоения и гроб соделал еси. Провидя же кончину свою, добре поучал еси братию твою, еже жити и достойно пети выну Богови: Аллилуиа! Икос 12 Поем твоя милости и чудеса, преподобне отче наш Мартирие, выну бо и по преставлении твоем нас не оставляеши и молитвами твоими у Господа потребная, яже к животу и благочестию, исходатайствуеши, егда тя с верою и любовию призываем, и молишися, во еже спастися всем. Сего ради от благодарных сердец ти вопием усердно: Радуйся, молитвенниче наш усердный! Радуйся, помощниче наш скорый! Радуйся, мир всем православным пред кончиною твоею завещавый! Радуйся, о мире всего мира незримый ходатаю! Радуйся, на суше и в мори от всех оставленным помощь подаваяй! Радуйся, недугующих от смертнаго одра к жизни возвращаяй! Радуйся, всех душевных и телесных недугов врачю! Радуйся, от злых духов мучимых избавителю! Радуйся, скорбных сердец незримое умиротворение! Радуйся, покрове к тебе притекающих! Радуйся, о спасении всех теплый молитвенниче! Радуйся, Мартирие, скорый наш помощниче, Зеленецкий чудотворче! Кондак 13 О, преподобне и богоносне отче наш Мартирие! Приими малое со умилением ти приносимое нами моление сие, и со Пречистою Материю Господа и всеми святыми молися Господу Иисусу Христу, да избавит нас от всяких бед и скорбей, от враг видимых и невидимых, от напрасныя смерти и будущих мук, и сподобит со избранными Его воспевати Троице Святей во веки: Аллилуиа![Се́й конда́к глаго́лется три́жды.][Далее повторяем 1‑е икос и кондак:]Икос 1 Ангели и архангели и вся воинства небесная Христа песньми превозносят. Сим же и духи праведник совершенных сликовстуют, в них же лице тя зряще, тако хвалим достойно, нашего заступника: Радуйся, от юности небеснаго отечествия взыскавый! Радуйся, вся мира сего красная ни во что же вменивый! Радуйся, Христови единому послуживый! Радуйся, сего ради крест жития иноческаго приемый! Радуйся, обитель Зеленецкую устроивый! Радуйся, создавый иноком виталище безпечальное! Радуйся, братии ради многи труды претерпевый! Радуйся, еще в житии чудесы от Бога прославленный! Радуйся, царевича от смертнаго одра воздвигнувый! Радуйся, в житии явления Матере Божия удостоенный! Радуйся, лику праведных вчиненный! Радуйся, Мартирие, скорый наш помощниче, Зеленецкий чудотворче! Кондак 1 Избранниче благодати Божией, преподобне отче наш Мартирие, от юности твоея Христа возлюбил еси и Тому невозвратно последовал еси. Обитель Зеленецкую создав, в той многия к спасению управил еси. Чудесы украсився в житии, в маститей старости преставился еси и, днесь на небесех ликующе выну молишися за ны. Мы же, светло память тою празднующе, тако тя величаем: Радуйся, Мартирие, скорый наш помощниче, Зеленецкий чудотворче! Молитва преподобному Мартирию, Зеленецкому чудотворцу О, пастырю добрый, наставниче наш, преподобне отче Мартирие! Услыши еже к тебе ныне приносимое моление наше. Вемы бо, яко духом с нами пребываеши. Ты убо, преподобне, яко имея дерзновение ко Владыце Иисусу Христу, Богу нашему, и к Пречистей Богоматери, буди ходатай и молитвенник теплый о обители сей, юже возградил еси, и о нас, недостойных рабех, живущих в ней, – ея же ты просветитель сый и начальник, богособранному твоему братству помощник и заступник присно являешися, – яко да твоим предстательством и молитвами невредимы на месте сем пребудем: от бесов же и злых человек ненаветованны от всех бед и напастей свободни сохранимся. Всем же отовсюду приходящим во святую обитель твою, и молящимся тебе с верою, и поклоняющимся раце мощей твоих, о еже избавитися от всякия скорби, болезни и напасти, милостивне поспеши, – даровати же православным мир, тишину, благоденствие и изобилие плодов земных. И о всех нас теплый предстатель ко Господу и помощник душам нашим буди, еже отпуститися нам согрешениям нашим и молитвами твоими, святе, избавитися нам вечнаго мучения и сподобитися Царствия со всеми святыми, да славу, благодарение и поклонение возсылаем Единому Богу, в Троице славимому, Отцу и Сыну и Святому Духу, ныне и присно и во веки веков. Аминь.

Тропарь, глас 3* Святи́телю Христу́ Бо́гу возлю́бленне,/ пра́вило ве́ры и о́браз милосе́рдия лю́дем был еси́,/ бде́нием же, посто́м и моли́твою,/ я́ко свети́льник пресве́тлый просия́л еси́,/ и просла́влен от Бо́га яви́лся еси́;/ те́лом у́бо в нетле́нии почива́я,/ ду́хом же престо́лу Бо́жию предстоя́,/ чудеса́ пресла́вно источа́еши./ Моли́ Христа́ Бо́га,// да утверди́т нас в Правосла́вии и благоче́стии/ и спасе́т ду́ши на́ша. Перевод: Святитель, Христом Богом возлюбленный, ты был образцом веры и примером милосердия для людей, бдением же, постом и молитвой, как преяркий светильник просиял ты, и был прославлен Богом, ибо телом ты почиваешь в нетлении, духом же Престолу Божию предстоишь и чудеса удивительно источаешь. Моли Христа Бога, да утвердит нас в Православии и благочестии и спасет души наши. Кондак, глас 8* Многоразли́чныя по́двиги жития́ твоего́ кто испове́сть?/ Многообра́зныя ми́лости Бо́жия тобо́ю явле́нныя кто исчислит?/ Дерзнове́ние же твое́ у Пречи́стыя Богоро́дицы и Всеще́драго Бо́га до́бре ве́дуще,/ во умиле́нии серде́чнем зове́м ти:/ не лиши́ и нас твоея́ по́мощи и заступле́ния,// святи́телю Христо́в и чудотво́рче Иоаса́фе. Перевод: О многоразличных подвигах жития твоего кто поведает? Многообразные милости Божии тобой явленные кто сосчитает? Дерзновение же твое ко Пречистой Богородице и Всещедрому Богу прекрасно зная, с сердечным сокрушением взываем к тебе: «Не лиши и нас твоей помощи и защиты, святитель Христов и чудотворец Иоасаф». Молитва 1-я** О, святи́телю Христо́в Иоаса́фе, чудотво́рче Белогра́дский! Ве́руем гре́шнии и недосто́йнии, я́ко о́чи Госпо́дни на пра́ведных и у́ши Его́ на моли́тву их, и того́ ра́ди к моли́твам твои́м прибега́ем и хода́тайства твоего́ за нас про́сим, по глаго́лу апо́стольскому упова́юще, я́ко любы́ твоея́ николи́же отпадае́т. Во гресе́х и боле́знех на́ших льну куря́щемуся и тро́сти сокруше́нней уподо́бихомся, и, а́ще живе́м, ми́лостию Бо́га живе́м и за моли́твы пра́ведник Его́. Приклони́ у́бо и ты, о́тче пра́ведне, се́рдце твое́ к моле́нию на́шему, и предста́тельством твои́м даждь ро́ду христиа́нскому от Го́спода мир и благослове́ние. Правосла́вие укрепи́, нападе́ния же лука́внующих и беззако́нных на це́рковь Бо́жию отжени́. Умоли́ Отца́ Небе́снаго изба́витися нам от наше́ствия вра́жескаго, от междоусо́бий же и смяте́ний наро́дных, от губи́тельных пове́трий и смертоно́сныя я́звы, от гла́да, огня́, пото́па и ины́х бед и обстоя́ний. Испроси́ у Христа́ Бо́га душа́м на́шим кре́пость и телесе́м на́шим потре́бное здра́вие, боле́знем же исцеле́ние: хромы́м хожде́ние, слепы́м прозре́ние, разсла́бленным утвержде́ние, печа́льным утеше́ние и от всех скорбе́й избавле́ние. Отпа́дшыя же лозы́ Христо́вы ве́тви па́ки с то́ю соедини́, ея́же и сам прича́стник бы́ти сподо́бился еси́, да та́ко просла́вится тобо́ю пречестно́е и великоле́пое и́мя Бо́га на́шего, Отца́ и Сы́на и Свята́го Ду́ха, ны́не и при́сно и во ве́ки веко́в. Ами́нь. Молитва 2-я, о недугующих и страждущих** О, вели́кий уго́дниче Христо́в, святи́телю о́тче наш Иоаса́фе, ско́рый помо́щниче и ди́вный чудотво́рче! При́зри ми́лостивно на ны неду́гующия. Ве́мы, уго́дниче Христо́в, ве́мы, и усты́ и се́рдцем испове́дуем, я́ко по дело́м на́шим беды́ постиго́ша нас. С разбо́йником благоразу́мным испове́дуем Го́сподеви, я́ко досто́йная по дело́м на́шим восприе́млем и зла́я сия́ я́коже раби́ неключи́мии терпи́м. Си́ми бо вре́менными муче́ньми Госпо́дь милосе́рдый сокруша́ет горды́ню и жестоковы́йное се́рдце на́ше, да ве́чныя избежи́м ка́зни, гре́шником угото́ванныя: се́яхом бо се́мена жития́ своево́льнаго и жнем те́рния скорбе́й. Оба́че, не́мощни су́ще, но в покая́ние те́плое прише́дше, о сем моли́тися дерза́ем, да гнев Госпо́день на ми́лость к нам преложи́тся, и тебе́, святи́телю Бо́жий и чудотво́рче, усе́рдно про́сим: проли́й те́плую моли́тву твою́ ко Христу́ Го́споду на́шему, Ему́же днесь предстои́ши и мо́лишися о почита́ющих тя с любо́вию и смире́нным на твое́ предста́тельство упова́нием. Се бо в житии́ твое́м, святи́телю Христо́в, ни еди́наго же скорбя́ща и ми́лости твоея́ прося́ща, грехи́ же своя́ испове́дающа, николи́же презре́л еси́. Умоли́ Пра́веднаго Судию́, да преложи́т гнев пра́вды Своея́ на ми́лование на́ше. Благода́тию Его́, тебе́ да́нною, святи́телю милосе́рдый, уврачу́й на́ша не́мощи, боле́зней лю́тых тече́ния уста́ви, сме́рти отыти́ повели́ и на покая́ние си́лу нам да́руй. Ста́рость поддержи́, младе́нцы воспита́й, ю́ность уцелому́дри, супру́жества в чистоте́ и смире́нии утверди́, нам же всем послуша́ние трудолю́бное и ми́рное жи́тельство моли́твою твое́ю да́руй, да терпе́нием тече́м на предлежа́щий нам по́двиг жития́ сего́ вре́меннаго, взира́юще на Нача́льника ве́ры и Соверши́теля Го́спода Иису́са, Ему́же сла́ва во ве́ки веко́в. Ами́нь. Молитва 3-я, благодарственная** О, вели́кий Святи́телю наш и чудотво́рче преди́вный Иоаса́фе, ско́рый помо́щниче к тебе́ припа́дающих! Ми́лостивно при́зри на нас недосто́йных, со слеза́ми умиле́ния зде моля́щихся и благодаре́ние тебе́ по си́ле принося́щих. Благодари́м тя, уго́дниче Христо́в, я́ко услы́шал еси́ моле́ния нас недосто́йных и проси́мая нам оби́льно дарова́л еси́. Ве́мы и усты́ испове́дуем, я́ко вои́стину Христу́ те́плый о нас еси́ моли́твенник и, по да́нной ти благода́ти и да́ру, во спасе́ние всем нам потре́бная да́руеши: боля́щыя исцеля́еши, стра́ждущыя утеша́еши, мир и отра́ду ско́рбным сердца́м излива́еши, пла́чущыя ра́доватися твори́ти, печа́льныя ликова́ти содева́еши: роди́телем ча́да воздравля́еши, супру́гом подру́жия от одра́ сме́ртнаго возставля́еши, вражду́ющия умиротворя́еши, зави́стливыя твори́ши ми́лостивы, и вся́кия непра́вды кара́еши, я́коже и в житии́ твое́м пра́вды и милосе́рдия му́жественный ревни́тель был еси́. Благодари́м тя, Святи́телю, за вели́кая твоя́ и нам явле́нная благодея́ния, и смире́нно мо́лимся тебе́ мы недосто́йнии: предста́тельствуй за нас у престо́ла Христо́ва, и помози́ нам па́мять при́сную твои́х благодея́ний и щедро́т на нас излия́нных храни́ти, да во смире́нии се́рдца про́чее соверши́м житие́, и Небе́сное да насле́дуем селе́ние Боже́ственное, моли́твами твои́ми, во ве́ки веко́в. Ами́нь. Молитва 4-я, в день прославления** Вели́кий и пра́зднственный де́нь се́й, де́нь твоего́ на земли́ прославле́ния, святи́телю о́тче на́ш Иоаса́фе, земли́ на́шея сла́во и ра́дование вели́кое, приими́ сия́ смире́нная и те́плая моле́ния на́ша. Дне́сь зри́м испо́лнившийся глаго́л Госпо́день: прославля́ющия Мя́ просла́влю. Се́ бо во дни́ земна́го жития́ твоего́ ничто́же иска́л еси́, то́чию же во́лю Бо́жию исполня́ти и ча́да па́ствы твоея́ упра́вити во спасе́ние, и того́ ра́ди мно́гия труды́, ско́рби, боле́зни, путеше́ствия подъя́л еси́. По сконча́нии же твое́м просла́ви тя́ милосе́рдый Госпо́дь, телеси́ твоему́ нетле́ние и си́лы целе́бныя дарова́вый; те́мже то́ки исцеле́ний моля́щимся источи́л еси́ и призыва́ющим тя́ неду́гующим и скорбя́щим мно́гажды явля́лся еси́, и утеше́ние и цельбу́ ско́рую те́м подава́я. Сего́ ра́ди, я́коже избра́нника Боже́ственныя благода́ти тя́ ве́дущи, Це́рковь Христо́ва просла́вите тя́ я́коже но́ваго чудотво́рца земли́ на́шея сподо́бися. Благослови́ у́бо и поми́луй, архиере́ю и́стиннаго Бо́га, лю́ди правосла́вныя. Да́руй и́м утеше́ние се́рдца, отра́ду и ми́р и ра́дость при́сную о Го́споде. Сохрани́ в ми́ре держа́ву Росси́йскую и лю́ди ея́ во и́стине утверди́, во́ином му́жество непоколеби́мое да́руй и вся́ лю́ди безпеча́льны сохрани́. Изжени́ вся́кую крамолу́ и крамо́льных челове́к лука́вая разруши́ сове́тования, па́че же те́х са́мых в покая́ние приведи́. Па́стырем и архиере́ом пода́ждь прему́дрость, чистоту́ и пра́ведное житие́, я́коже и са́м си́ми украша́лся еси́. Младе́нцем воспита́ние благо́е да́ждь, ю́ныя научи́, боля́щим и скорбя́щим здра́вие испроси́. Су́щим во труде́х терпе́ние и упова́ние посли́, бога́тым смиренному́дрие и ко бли́жним милосе́рдие да́руй. На́м же все́м ра́дость о Го́споде при́сную пода́ждь, да вси́ благода́рне тя́ ублажа́ем, глаго́люще та́ко: велича́ем тя́, святи́телю о́тче Иоаса́фе, и чти́м святу́ю па́мять твою́, ты́ бо мо́лиши за на́с Христа́ Бо́га на́шего. * Минея. 10-е декабря. ** Акафист святителю Иоасафу, епископу Белгородскому. Глас в Словаре.

Яко многосветлая звезда днесь в странах российских возсиял еси, отче,/ вселився в пустыню, Христовым стопам последовати усердно возжелел еси/ и, Того святое иго на рамо твое взем — честный крест,/ умертвил еси труды подвиг твоих телесныя взыграния,/ темже вопием ти:/ спаси стадо твое, еже собрал еси, мудре, да зовем ти:/ радуйся, преподобне Александре, отче наш.

Чистотою душевною божественно вооружився,/ блаженную жизнь совершил еси,/ в пустыню, яко во град, вселився,/ благодать приял еси от Бога/ исцеляти недуги приходящим к честней твоей раце/ и всех возвышати к Божественней высоте,/ темже, имея дерзновение ко Святей Троице,/ поминай нас, чтущих память твою, да зовем ти:/ радуйся, преподобне Стефане, постником удобрение.

Одеяние нетления, спасительнаго целения/ всем человеком, Владыко, даровал еси,/ Твое Божественное сокровище - честную ризу,/ яже есть хитон,/ еюже живоносную и святую плоть вочеловечения Твоего/ одеяти благоволил еси./ Сию желанием приемлюще, светло празднуем,/ страхом же и любовию, яко Благодетелю воспевающе,/ зовем Ти, Христе:/ сохрани в мире Отечество наше, и архиереев, и вся люди,// по велицей Твоей милости.

Яко светильник пресветлый,/ явился еси в Российстей земли,/ преподобне отче наш Тихоне,/ в пустыни вселився,/ в нейже преходя жестокое жительство,/ яко безплотен, пожил еси,/ сего ради и чудес дарованием обогати тя Бог./ Тем и мы, притекающе к мощем твоим, умильно глаголем:/ отче преподобне,/ моли Христа Бога// спастися душам нашим.

Oтцев все Афонское множество,/ соберитеся, верно празднующе,/ днесь радующеся и светло восклицающе вси в веселии,/ Божия бо Мати ныне от Ангела преславно воспевается./ Темже, яко Богородицу, присно Сию славим.

Яко многосветлыя звезды, от града Рязани возсиявшии, угодницы Христовы, Православия охранители и благочестия учители, присные наши заступницы молим вас, за ны Христу Богу и Пречистей Его Матери молитеся, да благодарною душею зовем: радуйтеся, святии вси, в земли Рязанстей просиявшии.

И нравом причастник,/ и престолом наместник, апостолом быв,/ деяние обрел еси, Богодохновенне,/ в видения восход;/ сего ради, слово истины исправляя,/ и веры ради пострадал еси даже до крове,/ священномучениче Дорофее,/ моли Христа Бога// спастися душам нашим.

Божественною любовию возгоревся,/ мирская пристрастия от души отвергше,/ тесным путем постничества во след Христа/ невозвратным умом шествовал еси, Арсение всеблаженне,/ от Негоже и мзду трудов твоих на Небесех восприим,/ поминай нас, чтущих святую память твою и вопиющих:/ слава Давшему ти крепость,/ слава Венчавшему тя,/ слава Действующему тобою всем исцеления.

И нравом причастник,/ и престолом наместник апостолом быв,/ деяние обрел еси, Богодухновенне,/ в видения восход;/ сего ради, слово истины исправляя,/ и веры ради пострадал еси даже до крове,/ священномучениче Мокие./ Моли Христа Бога/ спастися душам нашим.

Свет вечный Христа Спаса нашего/ тя на путь евангельский во Америку настави,/ возвестити весть о мире евангельскую./ Днесь Престолу Славы предстоя,/ молися о стране твоей и людех ея,/ о мире всего мира/ и спасении душ наших.