Молитвы

Приспе день светлаго торжества,/ град Барский радуется,/ и с ним вселенная вся ликовствует/ песньми и пеньми духовными:/ днесь бо священное торжество/ в пренесение честных и многоцелебных мощей/ святителя и чудотворца Николая,/ якоже солнце незаходимое, возсия светозарными лучами,/ разгоняя тьму искушений же и бед/ от вопиющих верно:// спасай нас, яко предстатель наш, великий Николае.

Приидите, вси русстии собори,/ чудотворцев и мучеников Бориса и Глеба восхвалим,/ законно бо пострадавше,/ победисте сопротивнаго врага,/ тем святым заступлением князи русстии враги побеждают,/ тем память ею весело и любовию похвалим, вопиюще:/ за ны молите Святую Троицу,/ умирити мир и спасти души наша.

Подвигом добрым подвизался еси, преподобне,/ и душу твою, яко жертву чисту и непорочну,/ Духу Святому принеся еси,/ и по смерти твоей стадо твое духовное соблюдавши,/ и в болезнех скоро посещавши./ Темже молим тя, преблаженне:/ с лики преподобных моли Христа Бога,/ да спасет православный христианы/ и подаст людем в мире глубоце устроитися, да зовем ти:/ радуйся, Сильвестре, иноком духовный пастырю и наставниче.

Вышняго светом озарився, блаженне,/ просвещаеши вся,/ иже любовию чествующия твое, отче, честное страдание./ Василие священнострадальне,/ моли Христа Бога// непрестанно о всех нас.

От юности твоей вперив ум твой к Богу,/ блаженне Евфросине,/ мира же отвергся,/ вселился еси в пустыню непроходимую,/ и тамо, от Господа укрепляемь,/ в молитвах и пощениих доблественне пожил еси,/ и жизнь твою страдальчески/ убиением от сынов противления скончал еси,/ сего ради со преподобными и мученики венчался еси,/ с нимиже и ныне предстоиши Престолу Пресвятыя Троицы./ Сию моли, молим тя,/ оставление подати согрешений наших/ и даровати нам велию милость.

Пустыни явился еси доброе прозябение, / отче преподобне, / от юности бо чистое житие изволил еси, / духовному учителю последуя, / и, того учением ум твой к Небесным вперив, / в пустыню вселился еси, / и в ней обитель создал еси, / и стаду твоему премудр наставник показался еси, / великому же Новуграду похвала и утверждение, / темже и Христос, яко пресветла светильника, / чудесы обогати и прослави тя. / Ксенофонте, отче наш, / моли Христа Бога спастися душам нашим.

Архиерейское украшение,/ Великому Новуграду Богодухновенное удобрение,/ сущия бо в нем люди на пажитех живоноснаго закона Господня упасл еси,/ и сего ради в лице святых водворятися сподобися,/ и святую твою память многими леты сотвори неоскверненну,/ в нейже, тя почитающе,— радуйся,— от души вопием ти,/ святителю отче Феоктисте,/ Великому Новуграду похвала и утверждение.

Мученик Христовых лик песньми почтим, пострадавших крепко Христовы ради веры истинныя и вражию гордыню до конца низложивших: озарившеся бо благодатию несозданныя Троицы, славнии, со священномучеником Исидором пострадавшии, яко звезды сияете во всем мире, и ныне молитеся Христу непрестанно, и нас защищаете от враждебных язык нашествия, неусыпнии молитвенницы о душах наших.

Кондак 1 Избранный апостоле Христов и благовестниче, мрежею проповеди твоея уловивый во спасение многия души человеческия и ко Христу приведый идолослужением помраченныя люди, Симоне блаженне, в песнех восхваляем тя с любовию и молим ти ся прилежно: яко имеяй дерзновение ко Господу, молися Ему выну за ны грешныя и молитвами твоими от всяких нас бед свобождай, да зовем ти: Радуйся, Симоне, апостоле Христов и молитвенниче о душах наших. Икос 1 Ангелов Творец и Владыка, Христос Бог, спасти хотя падшее человечество, в плоть нашу облечеся и с человеки поживе, в Кану же Галилейскую на брак в дом твой прииде, Симоне прехвальне, вкупе с Пречистою Своею Материю, Девою Богородицею, Еяже умолением Матерним начаток чудес Своих в доме твоем яви, воду в вино на браце твоем чудесно претворив и сим показав Божества Своего силу. Темже тебе, сице облагодатствованному посещением и благоволением Богочеловека, яко Боговидцу и ученику Его избранному, со умилением сице вопием: Радуйся, женише прекрасный, от брака земнаго на брак Агнчий чудесно призванный; Радуйся, на небеси и на земли прославленный. Радуйся, воплощшемуся Богу Слову верно послуживый; Радуйся, в проповедании Евангелия правды ревность велию явивый. Радуйся, Пресладкаго Господа Иисуса всем сердцем твоим возлюбивый; Радуйся, обручницу земную оставивый и во след Его потекий. Радуйся, Симоне, апостоле Христов и молитвенниче о душах наших. Кондак 2 Видев чудеса Христовы, Симоне преславне, верно последовал еси во плоти явльшемуся Богу, от Негоже возлюблен был еси и к лику избранных дванадесяти апостол Его сопричтен был еси, якоже ревнитель славы Его, наименование новое Зилота, си есть ревнителя, получил еси. Сию ревность о славе Божией испроси и нам, учениче Спасов, да купно с тобою сподобимся пети Христу: Аллилуиа. Икос 2 Разум небесный тебе свыше дадеся, Симоне богомудре, темже внимая Божественным словесем Христа Бога, слагал еси я в сердце твое, и, яко земля добрая, плод сторичен принесл еси Ему учения Евангельскаго благодать, еюже озарил еси во спасение мира концы и, яко богопроповедник душеспасительный, слышиши от нас песни таковыя: Радуйся, иго Христово, благое и легкое, на рамо твое восприемый; Радуйся, примером твоим святым вся ны к последованию Христову привлекаяй. Радуйся, ревности тезоименитый ревнителю о славе Божией; Радуйся, теплейший любителю Господа Иисуса. Радуйся, дивный наставниче к Нему ищущих спасения; Радуйся, немолчный благовестниче Евангельскаго душеспасительнаго учения. Радуйся, Симоне, апостоле Христов и молитвенниче о душах наших. Кондак 3 Сила Божия осени тя, апостоле Христов Симоне, егда во след ходил еси Христа Господа, обходя с Ним Иудею и Галилею, внимая учению Его Божественному и созерцая превелия Его чудеса. Темже и Христос, яко верному Своему последователю и ученику, дарова ти власть и силу недуги исцеляти, болезни врачевати и духи нечистыя прогоняти, да вси славят силу Его, в тебе явленную, и поют Ему хвалебную песнь: Аллилуиа. Икос 3 Имел еси едино попечение, Симоне всеблаженне, еже верно служити и благоугождати Христу Богу, во плоти явльшуся на спасение человеческое, Егоже спутник и самовидец сподобился еси быти и от уст Его Божественных почерпнул еси превелию учения небеснаго благодать, о нейже дивящеся, сице тебе глаголем: Радуйся, всерадостный нам проповедниче Евангелия правды; Радуйся, деннице, возвестившая нам солнце невечернее. Радуйся, самовидче и слуго воплощеннаго Бога; Радуйся, странствия Владычня и безсмертныя Его трапезы сопричастниче. Радуйся, избранный и верный Христов учениче; Радуйся, друже Его присный, до конца дружество твое к Нему сохранивый. Радуйся, Симоне, апостоле Христов и молитвенниче о душах наших. Кондак 4 Буря ярости иудейския пригвозди ко Кресту Христа Бога, волею пострадати за вся люди изволившего, но не поколеба веры и упования твоего, Симоне блаженне, яко Той есть Спаситель мира, древле прореченный пророки во искушение падшаго человечества. Темже, яко Владыце и Богу, верно воспевал еси Ему хвалебную песнь: Аллилуиа. Икос 4 Слышав Божественный глас Христа жизнодавца, тридневно воскресшаго от мертвых и дверем затворенным вшедшаго ко учеником Своим, и «Мир вам!» рекшаго, Симоне богоносне, зело возрадовался еси и Тому, яко Богу, благоговейно поклонился еси, всем же потом возвещал еси немолчно непреложную истину Его воскресения. О сем и мы хвалебно тебе зовем: Радуйся, мир Христов достойно приемый в непорочный сосуд души твоея; Радуйся, миром тем мира концы умиротворивый благодатно. Радуйся, древния вражды идолослужительныя потребителю; Радуйся, истины воскресения Христова очевидный и громогласный свидетелю. Радуйся, дверем затворенным дивно прошедшаго Христа созерцателю; Радуйся, пребожественнаго и радостотворнаго гласа Его слышателю. Радуйся, Симоне, апостоле Христов и молитвенниче о душах наших. Кондак 5 Боготечное на небо вознесение Христово видев и Духа Святаго, от Него ниспосланнаго во огненных языцех, сопричастник быв, Симоне прехвальне, духоносец божественный соделался еси и, облеченный силою свыше, потекл еси на проповедь Евангельскую во Иудею, Сирию, Египет, Мавританию, Испанию, Британию, Персиду, Иверию и Армению, возвещая людем, во мраце неверия бывшим, свет Христа Бога спасительный и веру в Него правую и всех приводя звати Ему: Аллилуиа. Икос 5 Видевши тя, апостоле Христов, Пречистая Богородица, от дальных стран на облаце приспевшаго ко пречестному Ея успению, возрадовася радостию святою и сподоби тя Своея беседы и благословения предсмертнаго; ты же о коликия радости исполнился еси, созерцая Сына Ея и Бога, со святыми Ангелы к Ней пришедшаго и святую душу Ея в руце Свои приемшаго. Сию радость твою и мы, благоговейно воспоминающе, от любве усердныя возглашаем ти сия всерадостныя глаголы: Радуйся, небошественный учениче Спасов, на погребение Матере Господни на облаце чудесно принесенный; Радуйся, Христа, в руце Свои душу Матере Своея приемшаго, созерцавый. Радуйся, погребению Пречистыя Богоматере достойно послуживый; Радуйся, вознесенную с телом горе Богородицу уразумевый. Радуйся, погребальныя пелены и праздный гроб Ея в Гефсимании видевый; Радуйся, в видении светозарнем со святыми Ангелы пришедшую Владычицу мира зрети сподобивыйся. Радуйся, Симоне, апостоле Христов и молитвенниче о душах наших. Кондак 6 Проповедник богоглаголивый явился еси, апостоле Христов Симоне, в странах диких и людем зверонравным возвещал еси Евангелие Христово, кротостию и незлобием твоим препобеждая тех лютость и из волков дивиих претворяя их в агнцы Христовы, иже и научишася тобою пети Триединому Богу ангельскую песнь: Аллилуиа. Икос 6 Возсиял еси, учениче Спасов, яко светильник лучезарный, в странах неверных и, яко боготечное светило, обтекл еси восток и запад, возвещая людем спасительную веру во Христа Иисуса, Иже внушает нам благохвалити тя, богопроповедника божественного, похвалами сими: Радуйся, от востока востекий и запад просветивый светом Христовым; Радуйся, Африку и Испанию огласивый учением Евангельским. Радуйся, бритян суровость укротивый кротостию Иисусовою; Радуйся, Армению и Иверию приведый к познанию Сына Божия. Радуйся, персов и мидов убедивый веровати во Христа Бога; Радуйся, неутомимо трудивыйся во благовестии Христове. Радуйся, Симоне, апостоле Христов и молитвенниче о душах наших. Кондак 7 Хотение усердное имел еси, апостоле Христов, еже мученически пострадати за имя Христово и кровию твоею запечатлети божественную истину проповеди твоея Евангельския, еже Господь устрояя, приведе тя во Иверии от неверных Лазов на кресте распяту быти и мученически скончатися. Таковую страдальческую Христоподобную кончину твою воспоминающе, почитаем болезни и труды твоя и поем Богу: Аллилуиа. Икос 7 Новаго Ноя, начальника ковчега душеспасительнаго веры Христовы во Иверии, познаем тя быти, Симоне Богоглаголиве, и яко основателя и краеугольнаго камня церкве Иверския тя почитаем, место же погребения твоего с любовию чтим, яко освященное кровию твоею и мощей твоих почиванием, от негоже дары целебныя источаеши верным и привлекаеши звати тебе: Радуйся, Иверии хранителю неотступный; Радуйся, Пицунды покровителю, Богом данный. Радуйся, храм твой в пустыни чудесно сохранивый от конечнаго разрушения; Радуйся, гроб твой честный нам даровавый во утешение. Радуйся, место подвигов твоих и страданий обновивый обителию иноческою во имя твое; Радуйся, от святаго Афона подвижники поста и молитвы в ню преселивый предивно. Радуйся, Симоне, апостоле Христов и молитвенниче о душах наших. Кондак 8 Странствие земное совершив, апостоле Спасов, преселился еси от земли к обителем небесным, на земли же чудес лучами сияеши и просвещавши души верных, иже по Бозе молитвенно к тебе прибегают и почитают святую твою память, юже и мы благоговейно чтуще, поем прославльшему тя Богу песнь: Аллилуиа. Икос 8 Вся церковь Иверская почитает тя, апостоле Симоне, яко основателя своего и покровителя, наздавшаго ю на основании незыблемом веры Христовы и оросившаго ю к плодоносию духовному честною твоею кровию, от неяже дивно прозябоша в ней сонмы святых, торжествующих ныне вкупе с тобою на небе. Темже и мы на земли блажим твоя подвиги и сице тебе зовем: Радуйся, благий и милостивый утешителю скорбящих; Радуйся, скоропредстательный помощниче бедствующих. Радуйся, велие дерзновение стяжавый ко Христу Богу, яко друг Его искренний; Радуйся, приемый от Него власть на духи нечистыя. Радуйся, обители твоея святыя славо и похвало; Радуйся, подвизающимся в ней ходатаю вечнаго спасения. Радуйся, Симоне, апостоле Христов и молитвенниче о душах наших. Кондак 9 Всему миру судити имаши, апостоле Спасов, седяй на престоле высоце и превознесенне, егда Христос Господь со славою приидет сотворити суд Свой праведный; тогда, свято, умоли Его благость помиловати нас и не осудити в погибель вечную, но сподобити со святыми пети Ему: Аллилуиа. Икос 9 Витийство человеческое не довлеет к достойному прославлению твоих подвигов и чудес, Симоне прехвальне, обаче приими, учениче Спасов, благоутробно и милостиво сия малыя наша и нехитростныя песни, в похвалу тебе приносимыя с верою и любовию, и услыши вопиющих ти сице: Радуйся, от востока и до запада хвалимый и славимый; Радуйся, Иверскую страну кончиною твоею освятивый. Радуйся, яко лозу благоплодную, в ней Нину равноапостольную духовно возрастивый; Радуйся, сонмы святых от недр ея Христу плодопринесый. Радуйся, горы и удолия ея подвижниками благочестия прославивый; Радуйся, яко отец со чады, со святыми Иверскими в обителех райских торжествуяй. Радуйся, Симоне, апостоле Христов и молитвенниче о душах наших. Кондак 10 Спасения залог, святую православную веру, унаследовахом от тебе, апостоле Христов Симоне. Темже молим тя: от всяких ересей и расколов соблюди нас, чад твоих, молитвенным предстательством твоим к Богу и помози нам в православии непоколебимом пребыти до конца дней наших и верно пети Богу: Аллилуиа. Икос 10 Царя Небеснаго Христа избранный учениче, Симоне блаженне, помолися Ему за ны грешныя, да ревность твоя боголюбезная о хранении закона Его даруется и нам недостойным, во еже быти нам готовыми на подвиги доброделания христианского и на исповедание православныя нашея веры не словесы токмо, но и делы, и явитися чадами твоими не по имени токмо, но самою истиною. О сем тя молим и зовем: Радуйся, звездо пресветлая, всех путеводящая к солнцу правды Христову; Радуйся, свеще неугасимая, в молитвах присногорящая у Престола Господа славы. Радуйся, столпе непоколебимый святыя Христовы Церкве; Радуйся, фиале златый, изливаяй струи нам целебныя. Радуйся, приемый от Христа власть вязати и решити; Радуйся, получивый от Него благодатныя дары Духа Святаго. Радуйся, Симоне, апостоле Христов и молитвенниче о душах наших. Кондак 11 Пение Пресвятей Троице горе приносиши со всеми святыми, Симоне прехвальне, и от небесных высот отечески приникаеши на место подвигов и страданий твоих на земли, молитвами твоими помогая всем, верно чтущим святую память твою и поющим о тебе песнь Богу: Аллилуиа. Икос 11 Светоподательный светильниче Трисолнечнаго Света являешися верным, апостоле Христов Симоне, и всех нас невидимо озаряеши на пути доброделания христианскаго, да не падем в сеть врага, диавола, но невредимы пребудем от всех его ловлений лукавых и тако неосужденно возможем вопити тебе: Радуйся, пастырю добрый словеснаго стада Христова; Радуйся, не попускаяй волку душегубительному расхитити духовную паству твою. Радуйся, мрежею проповеди твоея мира концы уловивый во спасение; Радуйся, и ныне способствуяй нашему спасению молитвами твоими. Радуйся, архитектоне премудрый Церкве Христовы; Радуйся, каменю краеугольный ея основания. Радуйся, Симоне, апостоле Христов и молитвенниче о душах наших. Кондак 12 Благодать и милость испроси нам у Господа, Симоне богоносне, апостоле Спасов, яко стяжавый велие к Нему дерзновение, наипаче проси нам у Него покаяния во гресех и исправления жития нашего, да будет оно преисполнено добродетелей христианских, во еже возмощи нам еще на земли достойно пети Создателю нашему небесную песнь: Аллилуиа. Икос 12 Поюще болезни и труды твоя, апостоле Спасов, имиже трудился еси во благовестии Христовом, почитаем святую и приснославную память твою, яже облагоухает нас духовно и услаждает души наша: миро бо воистину явишася пред Богом поты твоя и капли крове страдальческия, за Христа излиянныя тобою, святый наш предстателю. Темже и зовем тебе: Радуйся, Пресвятыя Живоначальныя Троицы верный проповедниче; Радуйся, ангельских ликов достойный собеседниче. Радуйся, апостолов красото и основание; Радуйся, человеческаго рода возвышение. Радуйся, врачу безмездный недугов душевных и телесных; Радуйся, по Бозе и Пресвятей Богородице непостыдное наше упование. Радуйся, Симоне, апостоле Христов и молитвенниче о душах наших. Кондак 13 О святый, славный и всехвальный апостоле Христов Симоне, ревнителю закона Божия и многомощный наш предстателю! Приими малое сие молебное пение, в похвалу тебе приносимое, и умоли Спаса Христа избавити нас муки вечныя и сподобити радости святых, да с ними поем Ему во веки: Аллилуиа.[Се́й конда́к глаго́лется три́жды.][Далее повторяем 1‑е икос и кондак:]Икос 1 Ангелов Творец и Владыка, Христос Бог, спасти хотя падшее человечество, в плоть нашу облечеся и с человеки поживе, в Кану же Галилейскую на брак в дом твой прииде, Симоне прехвальне, вкупе с Пречистою Своею Материю, Девою Богородицею, Еяже умолением Матерним начаток чудес Своих в доме твоем яви, воду в вино на браце твоем чудесно претворив и сим показав Божества Своего силу. Темже тебе, сице облагодатствованному посещением и благоволением Богочеловека, яко Боговидцу и ученику Его избранному, со умилением сице вопием: Радуйся, женише прекрасный, от брака земнаго на брак Агнчий чудесно призванный; Радуйся, на небеси и на земли прославленный. Радуйся, воплощшемуся Богу Слову верно послуживый; Радуйся, в проповедании Евангелия правды ревность велию явивый. Радуйся, Пресладкаго Господа Иисуса всем сердцем твоим возлюбивый; Радуйся, обручницу земную оставивый и во след Его потекий. Радуйся, Симоне, апостоле Христов и молитвенниче о душах наших. Кондак 1 Избранный апостоле Христов и благовестниче, мрежею проповеди твоея уловивый во спасение многия души человеческия и ко Христу приведый идолослужением помраченныя люди, Симоне блаженне, в песнех восхваляем тя с любовию и молим ти ся прилежно: яко имеяй дерзновение ко Господу, молися Ему выну за ны грешныя и молитвами твоими от всяких нас бед свобождай, да зовем ти: Радуйся, Симоне, апостоле Христов и молитвенниче о душах наших. Молитва святому славному и всехвальному апостолу Христову Симону Зилоту, иже и Кананит именуется Святый славный и всехвальный апостоле Христов Симоне, сподобивыйся прияти в дом твой в Кане Галилейстей Господа нашего Иисуса Христа и Его Пречистую Матерь, Владычицу нашу Богородицу, и очевидцем быти преславнаго чудесе Христова, на браце твоем явленнаго, претворения воды в вино! Молим тя с верою и любовию: умоли Христа Господа претворити души наша из грехолюбивых в боголюбивыя; сохрани и соблюди нас молитвами твоими от искушений диавольских и падений греховных, и испроси нам свыше помощь во время уныния и беспомощия нашего; да не преткнемся о камень соблазна, но неуклонно шествуем спасительным путем заповедей Христовых, дондеже достигнем оных блаженных обителей райских, идеже ты ныне водворяешися и веселишися. Ей, апостоле Спасов! Не посрами нас, крепце на тя уповающих, но буди нам помощник и покровитель во всем житии нашем и помози нам благочестно и богоугодно житие сие временное скончати, благую и мирную христианскую кончину получити и добраго ответа сподобитися на Страшнем Суде Христове; да избежавше мытарств воздушных и власти лютаго миродержца, унаследуем Царство Небесное и прославим великолепное имя Отца и Сына и Святаго Духа, во веки веков. Аминь.

Кондак 1 Избранная Богом от иновернаго языческаго рода чешскаго, призванная в язык свят, служительнице новая благодати, святая всехвальная мученице Христова Людмило, во страдании твоем мученический венец нетленный приявшая от руки Вседержителя и со Ангелы ныне предстоящая Его Престолу, песньми восхваляем тя любовию, угоднице Христова, и молим ти ся: молитвами твоими от вечных мук, бед и скорбей свобождай ны, зовущия: Радуйся, блаженная княгине Людмило, святая мученице и молитвеннице о душах наших. Икос 1 Ангелов сожительница и человеков заступница воистину явилася еси, мученице Людмило достохвальная, благоволением всех Творца, Христа Бога, Егоже возлюбила еси и за Негоже пострадала еси даже до смерти во исповедании непоколебимем; темже приими от нас сия хваления: Радуйся, скорби многия за имя Господне приявшая; радуйся, венцем исповедническим от Бога украшенная. Радуйся, мучеников совсельнице; радуйся, веры христианския небоязненная проповеднице. Радуйся, яко тленное богатство свое раздавала еси нищим; радуйся, за неже нетленное обретшая на Небеси. Радуйся, душу свою Христа ради погубившая, во еже спасти ю; радуйся, аки светило, во тьме нечестия преславно возсиявшая. Радуйся, блаженная княгине Людмило, святая мученице и молитвеннице о душах наших. Кондак 2 Видя Христос Господь душу твою, ко приятию семене Слова Божия чистотою и милостынею предуготовленную, светом познания Своего просвети ю, блаженная Людмило, и спасаемых части сотвори тя общницу в Небеснем Царствии, идеже со Ангелы поеши Пресвятей Троице песнь: Аллилуия. Икос 2 Разум богопросвещенный даровася тебе, святая мученице Людмило, имже ясно проразумела еси тщету душепагубную зловерия невестки твоея, хотящия тя погубити. Ты же, ведящи сие, удалилася еси во град Тетин, укрытися спасения ради души твоея, Христа же взыскати потщалася еси вседушне. Темже взываем ти: Радуйся, блаженная последовательнице Христова; радуйся, любительнице заповедей Его преискренняя. Радуйся, всемогущую силу благодати Христовы познавшая; радуйся, лютаго демонскаго рабства избегшая. Радуйся, богатство земное ни во чтоже вменившая; радуйся, от юности идолослужение презревшая. Радуйся, руками убогих сокровища твоя горе предпославшая; радуйся, идолослужительныя люди к Истинному Богу призвавшая. Радуйся, блаженная княгине Людмило, святая мученице и молитвеннице о душах наших. Кондак 3 Сила благодати Божия осени тя, блаженная Людмило, егда приясте Святое Крещение с супругом твоим Боривоем (Борживоем), князем чешским, во Имя Отца и Сына и Святаго Духа. Таяже сила Божия осени тя ко благочестию и научи тя славити Единаго Бога и воспевати Ему: Аллилуия. Икос 3 Имущи неоскудное милосердие ко всякому человеку, но более к присным, святая блаженная княгине Людмило, в страсе Божием воспитывающи чада твоя, явилася еси добрая прамати внука твоего, святаго князя Вячеслава, воспитавши его во благочестии; помози и нам, мученице Христова, прейти сие земное поприще во благом делании, да величаем тя звании сими: Радуйся, блаженная мати Людмило, мученице Христова; радуйся, понесшая вдовство твое благочестно и преславно. Радуйся, по смерти князя, супруга твоего, воли Божией предавшаяся; радуйся, яко и нам помощница являешися в скорбех наших. Радуйся, в нуждах наших обращатися к Богу нас научающая; радуйся, внука твоего, святаго князя Вячеслава, в истинах веры воспитавшая. Радуйся, яко и той прият мученическую кончину, якоже и ты, прамати его; радуйся, яко вам за сие уготовано сокровище вечных благ. Радуйся, блаженная княгине Людмило, святая мученице и молитвеннице о душах наших. Кондак 4 Бурею одержима помышлений злобных, нечестивая невестка твоя смятеся зело, видевши тя верную рабу Христову, в вере и благочестии просвещающую страну Чешскую, низлагающую идольския храмы и созидающую христианския, во еже славословити Трисвятое Имя Божие и пети хвалебную песнь Тому: Аллилуия. Икос 4 Слышавши от святаго равноапостольнаго Мефодия, архиепископа Моравскаго, слово о чистоте, посте, молитве и о всех добродетелех, христианом подобающих, прияла еси в сердце свое, и за сия добродетели возлюби тя Господь и даде ти крепость и силу. Темже и нас научи, блаженная Людмило, заповеди Господни исполняти и тебе величати: Радуйся, усердная слушательнице словес Божественных; радуйся, ревностная исполнительнице закона Христова. Радуйся, ниву сердца твоего очистившая от терния душевредных страстей; радуйся, оросившая ю слезами покаяния. Радуйся, во вдовстве чистоту непорочно сохранившая; радуйся, воздержанием, молитвою и мученическим подвигом Богу угодившая. Радуйся, страданием сочетавшаяся Христу; радуйся, избавляющая от бед и скорбей веру и любовь к тебе имущих. Радуйся, блаженная княгине Людмило, святая мученице и молитвеннице о душах наших. Кондак 5 Боготечная звезда явилася еси, святая княгине мученице Людмило, егда боготканною одеждею святаго Крещения облекшися и нетленною пищею Пречистаго Тела и Крове Христовы духовно укрепльшися, прилепилася еси всем сердцем твоим ко Единому Иисусу; темже вся страна Чешская, просвещенная тобою, едиными усты поет Богу: Аллилуия. Икос 5 Видевши, святая блаженная княгине Людмило, вся люди земли Чешския во тьме идолослужения погруженныя, усердно потщалася еси просветити тех светом Христовы веры, подвизающися в созидании храмов Божиих и в укреплении веры православныя в стране чешстей; мы же воспеваем и величаем тя тако: Радуйся, мудрыми глаголы поучавшая люди оставити тьму языческаго нечестия; радуйся, от Бога токмо, а не от человек, утешение в скорбех искати нас научающая. Радуйся, внука твоего Вячеслава научившая покланятися Единому и Истинному Богу; радуйся, яко тем сестра являешися равноапостольней Ользе, княгине Российстей. Радуйся, ум твой выну горе имевшая; радуйся, сердце твое жилище Святаго Духа соделавшая. Радуйся, Христу Богу Человеколюбцу всю себя предавшая; радуйся, первая от земли Чешския к лику святых причтенная. Радуйся, блаженная княгине Людмило, святая мученице и молитвеннице о душах наших. Кондак 6 Проповедником духоносным, апостолом, подражавши, блаженная Людмило, славная княгине, твоими слезными молитвами оросила и облагоухала еси вся грады и веси близлежащия града Праги, приводящи, елико ти мощно, люди к вере Христовой и научающи их воспевати Единому, в Троице славимому Богу: Аллилуия. Икос 6 В граде Праге ты была еси мати милосердная возлюбленным чадом Церкве Православныя, досточудная угоднице Христова, блаженная Людмило, сердце бо твое на прошения и нужды приходящих к тебе милостиво открывала еси. Приими и нас, добрая мати, с любовию к тебе прибегающих и вопиющих сице: Радуйся, яко сиротам была еси мати и вдовицам питательница; радуйся, яко нищим была еси милостивая подательница и обидимых благая защитница. Радуйся, со князем, супругом твоим, во благочестии пожившая; радуйся, чада твоя в страсе Божием воспитавшая. Радуйся, яко благая отрасль твоя, святый князь Вячеслав, восприят мученическую кончину; радуйся, яко и той с праматерию своею вселися в царствие Небесное. Радуйся, за всех христиан пред Престолом Божиим верная молитвеннице; радуйся, ищущим пути ко спасению наставнице благодатная. Радуйся, блаженная княгине Людмило, святая мученице и молитвеннице о душах наших. Кондак 7 Коль многими бисеры и камением драгоценным украшен есть венец, паче солнца сияяй, егоже дарова ти Господь, святая блаженная княгине Людмило, ибо подвигом добрым во исповедании веры подвизалася еси и образ святаго жития нам явила еси; сего ради прибегаем под кров твой, ищуще спасения, и благодарно о тебе вопием Богу: Аллилуия. Икос 7 Новое изобрете безчеловечие злочестивая невестка твоя Драгомира, бегущей тебе во град Тетин, укрытися хотящей от оныя, святая благоверная Людмило. Та бо, наученная сатанинскою силою, погубити душу твою возжелавши позорною смертию, посла вслед ти двух злочестивых боляр, предати тя на лютая страдания, аки агницу Христову, зависти ради. Тии же собраша множество нечестиваго народа, взломаша двери дворца княжескаго и позорней смерти удавлением предаша непорочное тело твое. Мы же, воспоминающе страшную смерть твою, вопием ти сицевая: Радуйся, блаженная Людмило, от злых боляр вервием удавленная по выи твоей; радуйся, таковым образом угодившая Богу, пострадавшая мученически. Радуйся, Господу душу предавшая в субботу, во едином часе нощи; радуйся, имевшая от рождения твоего шестьдесят и едино лето, Господем к мучению уготованная. Радуйся, яко тобою дивен Бог во святых Своих является; радуйся, яко мощи твоя прослави Господь нетлением благодатно. Радуйся, градов чешских и словацких похвало и утверждение; радуйся, всем носящим имя твое скорая помощнице и молитвеннице. Радуйся, блаженная княгине Людмило, святая мученице и молитвеннице о душах наших. Кондак 8 Не может укрытися град, верху горы стояй, тако, святая мученице Людмило, по кончине твоей прослави Господь мощи твоя и место погребения твоего, еже под градскою стеною града Тетина. Мы же тя, угодницу Божию, просим: буди нам ходатаица ко Господу о прощении грехов наших, да и мы, вкупе с тобою, Великому и Чудному Богу воспоим: Аллилуия. Икос 8 Вся была еси объята неизреченною радостию, блаженная мати Людмило, зрящи крещаемыя люди твоя, повелением Ангелов, и во умилении воздала еси хвалу Спасителю Богу, усердно моливши Его, да призрит на обратившияся люди Своя, да утвердит их в вере и благочестии и да прославит Имя Свое в стране чешстей. Мы же, воспоминающе убо прерадостное событие сие, приносим ти благодарственныя и похвальныя песни: Радуйся, неоскудеваяй источниче милостей к народу сему; радуйся, духовная наша мати, испросившая у Бога просвещение праотцем нашим. Радуйся, явлением на тебе силы Божия христианы возрадовавшая; радуйся, именем Всесильнаго Господа вся идолы в стране Чешстей сокрушившая. Радуйся, мученице Христова предобрая; радуйся, молитвеннице пред Богом чудная. Радуйся, яко демонов коварствие упразднися по молитвам твоим; радуйся, победы венец от руки Христа Жизнодавца приемшая. Радуйся, блаженная княгине Людмило, святая мученице и молитвеннице о душах наших. Кондак 9 Во вся концы земли Чешския и за ея пределы прославися великоименитое имя твое, преблагостная мученице мати Людмило! Имела бо еси духа премудрости, яко мудрыми словесы безумных яве обуяла еси, и духа страха Божия, яко деяньми богоугодными душу очистила еси. Темже, представши Престолу Вышняго с сонмом Ангелов, купно воспеваеши Ему: Аллилуия. Икос 9 Ветии многовещаннии не могут достойно изобразити величие благодеяний твоих, святая мученице Людмило, стране Чешстей и иным странам идолопоклонства, идеже водворила еси Божественную веру, избавляющи люди от мрака языческаго и вечныя погибели, открывающи им путь ко спасению. Сего ради со благодарением благочестно поем ти: Радуйся, к свету Православия душу свою обратившая; радуйся, многия в духовнем разуме просветившая. Радуйся, яко сердце твое на прошения и нужды приходящих к тебе открывала еси; радуйся, яко странники и нищия питала еси. Радуйся, яко с верою покланяемся честней иконе твоей; радуйся, яко, чтуще память твою, восхваляем Господа. Радуйся, страданием твоим церковь Христову украсившая; радуйся, яко, взирающе на страдания твоя, вернии прославляют Имя Вышняго. Радуйся, блаженная княгине Людмило, святая мученице и молитвеннице о душах наших. Кондак 10 Спастися всем преискренне желающи, молишися за ны горе у Престола Господня, избраннице Христова, блаженная Людмило, и твоими молитвами пособствуеши нам в странствовании многотруднем земнаго жития, еже сподоби ны в покаянии и благочестии скончати, яко облече тя Господь Божественною силою, да обратиши вся неверныя и научиши всех со умилением сердец воспевати Творцу Богу: Аллилуия. Икос 10 Стена явилася еси стране твоей несокрушимая, богомудрая Людмило, и необоримая защитница всем призывающим тя, зане тако благоволи о тебе Небеси и земли Творец Господь, прославляя угодницу Свою, яко при гробнице твоей совершашася знамения и чудеса, и изыде молва по всей стране, и понуди князя Вячеслава торжественно пренести нетленное тело твое из града Тетина во град Прагу, в сооруженную отцем его церковь святаго великомученика Георгия. Мы же из глубины сердца со воздыханием к Богу глаголем ти песни таковыя: Радуйся, молитвенница наша пред Богом теплая; радуйся, изыде бо по всей стране вещание о чудесех твоих. Радуйся, яко некий слепец прозре, егда прикоснуся земли с могилы твоея; радуйся, яко внук твой со славою пренесе честное тело твое. Радуйся, прославленная Богом на Небеси и на земли; радуйся, яко успение твое торжествует Церковь Православная. Радуйся, явлением мощей твоих младенческую Церковь Чешскую возвеселившая; радуйся, мученице Христова, и в земли Российстей и Сербстей зело почитаемая. Радуйся, блаженная княгине Людмило, святая мученице и молитвеннице о душах наших. Кондак 11 Пение умиленное приносим ти, угоднице Божия, и смиренно молим тя: моли о нас Единаго Человеколюбца Бога, да не отвратит от нас Лица Своего и дарует нам по молитве твоей, святая мученице Людмило, прощение многих наших согрешений. Мы же, прославляюще Бога о тебе, вопием: Аллилуия. Икос 11 Светоносным Троическим сиянием горе осиянная, святая мученице Людмило, озари сердца наша, тьмою греховною покровенная, да елеем благих дел возжегше угасшия светильники наша, сподобимся внити в брачный чертог Христов, идеже ты веселишися и слышиши сия от нас благохваления: Радуйся, предстоящи ныне Агнцу Божию в лице мученичестем; радуйся, яко и по преставлении твоем с нами пребываеши. Радуйся, луно, просвещенная от незаходимаго Солнца Правды; радуйся, путеводительнице, правую стезю к вечному спасению нам показующая. Радуйся, яко Христос по мучении твоем в чертог Свой тя всели; радуйся, яко, тебе последующе, и мы царство Небесное обрящем. Радуйся, особливая покровительнице Чешскаго и Словацкаго народа православнаго; радуйся, о нас, сродных ти людех, присная пред Богом молитвеннице. Радуйся, блаженная княгине Людмило, святая мученице и молитвеннице о душах наших. Кондак 12 Благодать Пресвятаго Духа испроси нам, угоднице Христова, святая мученице Людмило, от Всещедраго Бога и Спаса нашего, вразумляющую и укрепляющую нас в деле спасения, да не безплодно будет в нас всеянное тобою семя святыя веры, но да прозябнет и плод достоен сотворит, имже препитаем души наша до будущия жизни и со всеми святыми воспоем Богу песнь: Аллилуия. Икос 12 Поюще твое преставление, ублажаем мученическую кончину и почитаем память твою, святая мученице мати Людмило, многомощная заступнице земли Чешския, Словацкия и Сербския, буди же и о российских людех благая молитвенница ко Господу, да вопием ти: Радуйся, благодатию Святаго Духа одеянная; радуйся, представшая Живущему во свете неприступнем. Радуйся, вдовицам правило богоугоднаго жития; радуйся, теплая ходатаице, всем православным от Бога дарованная. Радуйся, соучастнице на Небеси жребия праведников веры Христовы; радуйся, со святыми Божиими Трисвятую песнь воспевати сподобльшаяся. Радуйся, от Господа всех благ нам, молящимся ти, подательнице; радуйся, яко всем православным христианом, тя молитвенно призывающим, на помощь скоро притекаеши. Радуйся, блаженная княгине Людмило, святая мученице и молитвеннице о душах наших. Кондак 13 О, святая мученице и верная угоднице Христова Людмило! Малое сие песнословие от нас приемлющи, моли милостиваго Бога нашего, да вселится и возблагоухает в сердцах наших святыня Православныя веры, да умножится в житии нашем елей дел благих, да не угаснут светильницы наши в полунощный час сретения Небеснаго Жениха и да сподобимся купно с тобою выну воспевати Ему в вечнем царствии: Аллилуия.[Се́й конда́к глаго́лется три́жды.][Далее повторяем 1‑е икос и кондак:]Икос 1 Ангелов сожительница и человеков заступница воистину явилася еси, мученице Людмило достохвальная, благоволением всех Творца, Христа Бога, Егоже возлюбила еси и за Негоже пострадала еси даже до смерти во исповедании непоколебимем; темже приими от нас сия хваления: Радуйся, скорби многия за имя Господне приявшая; радуйся, венцем исповедническим от Бога украшенная. Радуйся, мучеников совсельнице; радуйся, веры христианския небоязненная проповеднице. Радуйся, яко тленное богатство свое раздавала еси нищим; радуйся, за неже нетленное обретшая на Небеси. Радуйся, душу свою Христа ради погубившая, во еже спасти ю; радуйся, аки светило, во тьме нечестия преславно возсиявшая. Радуйся, блаженная княгине Людмило, святая мученице и молитвеннице о душах наших. Кондак 1 Избранная Богом от иновернаго языческаго рода чешскаго, призванная в язык свят, служительнице новая благодати, святая всехвальная мученице Христова Людмило, во страдании твоем мученический венец нетленный приявшая от руки Вседержителя и со Ангелы ныне предстоящая Его Престолу, песньми восхваляем тя любовию, угоднице Христова, и молим ти ся: молитвами твоими от вечных мук, бед и скорбей свобождай ны, зовущия: Радуйся, блаженная княгине Людмило, святая мученице и молитвеннице о душах наших. Молитва О, святая угоднице Христова, мученице княгине Людмило, первоугоднице Чешския страны и стольнаго града Праги украшение, теплая о нас пред Богом молитвеннице! Се мы, многогрешнии, смиренно припадающе, молим тя: не попусти нам погибнути в тине грехов наших, но вознеси о нас моление ко Господу, да помилует нас и дарует нам покаяние. О, преблагая мати Людмило! Не забуди посещати чад твоих, аще бо и преставилася еси от нас в Небесныя обители, вкупе со внуком твоим, святым мучеником Вячеславом. Темже, святая прамати его, испроси и нам, грешным, Божие благословение на чада наша и на всех нас, да и мы, многогрешнии, возблагодарим Господа за подаяние Его благодати и купно с тобою да прославим Отца и Сына и Святаго Духа и твое великое заступление о нас во веки веков. Аминь.

Утвержден Св. Синодом 29 декабря 2022 года (журнал № 130). Конда́к 1. Избра́нней от все́х родо́в Бо́жией Ма́тери, Небесе́ и земли́ Цари́це, освяти́вшей ро́д челове́ческий прише́ствием к на́м во всечестне́м рождестве́ Свое́м, благогове́йная пе́ния прино́сим Ти́ раби́ Твои́, Богоро́дице. Ты́ же, я́ко прише́дшая на утеше́ние и спасе́ние на́ше, от вся́ких на́с бе́д свободи́, да зове́м Ти́: Ра́дуйся, Пречи́стая, ве́сь ми́р рождество́м Свои́м возвесели́вшая. И́кос 1. Арха́нгел Гаврии́л по́слан бы́сть к пра́ведней А́нне, егда́ та́ в ско́рби непло́дства своего́ возопи́ ко Го́споду из глубины́ серде́чныя, узре́вши в са́де свое́м гнездо́ пти́чие, птенцы́ ма́лыя иму́щее, и благовести́ е́й ра́дость ве́лию, глаго́ля: «Услы́шана моли́тва твоя́, сле́зы же твоя́ пред Бо́гом внидо́ша, и се́ роди́ши Дще́рь преблагослове́нную, о Не́йже возблагословя́тся вся́ коле́на земна́я, нарече́тся же и́мя Е́й — Мари́я». Сему́ ра́достному обетова́нию чудя́щеся, возопие́м Преблагослове́нней: Ра́дуйся, от благоро́днейшаго ца́рскаго ко́рене Иоаки́мом произраще́нная; ра́дуйся, от свяще́ннейшаго архиере́йскаго ро́да А́нною рожде́нная. Ра́дуйся, прароди́телей на́ших от тли́ сме́ртныя свободи́вшая; ра́дуйся, роди́телей Твои́х поноше́ния безча́дства разреши́вшая. Ра́дуйся, свята́я врата́, на восто́к зря́щая, рождество́м Свои́м е́же от непло́дове отве́рзшая; ра́дуйся, де́вственная две́ре заключе́нная, вхо́да Святи́теля Вели́каго ожида́ющая. Ра́дуйся, сле́з ма́тере Твоея́ на ра́дость премене́ние; ра́дуйся, тоя́ поноше́ния в лю́дех отъя́тие. Ра́дуйся, вели́кое ро́ждшим Тя́ утеше́ние; ра́дуйся, всему́ ми́ру наслажде́ние. Ра́дуйся, па́дшаго Ада́ма воззва́ние; ра́дуйся, сле́з Е́виных избавле́ние. Ра́дуйся, Пречи́стая, ве́сь ми́р рождество́м Свои́м возвесели́вшая. Конда́к 2. Ви́дящи пра́ведная А́нна вели́каго Арха́нгела явле́ние, и слы́шавши глаго́лы его́, поклони́ся Бо́гу и рече́: «Жи́в Госпо́дь Бо́г, я́ко а́ще рожду́ отроча́, да́м е́ в слу́жбу Ему́, да бу́дет служа́ и хваля́ и́мя Его́ свято́е де́нь и но́щь во вся́ ле́та живота́ своего́». Испо́лнися же ра́дости неизглаго́ланныя и тече́ во Иерусали́м со тща́нием, да та́мо в це́ркви воспое́т Бо́гу благода́рственно: Аллилу́иа. И́кос 2. Ра́зум чи́ст имя́ше пред Бо́гом пра́ведный Иоаки́м, оба́че от люде́й отве́ржен бы́сть во хра́ме безча́дия ра́ди, и в ско́рби се́й и́де в пусты́ню, и та́мо моля́ся со слеза́ми, рече́: «Не вложу́ во уста́ моя́ пи́щи, ни в до́м мо́й возвращу́ся, но сле́зы моя́ пи́щею ми́ да бу́дут и пусты́ня — до́мом, до́ндеже посети́т мя́ Госпо́дь Бо́г Изра́илев». И се́ А́нгел Госпо́день яви́ся ему́ и благовести́, я́ко роди́тся ему́ Дще́рь, о Ея́же рождестве́ ра́дость бу́дет всему́ ми́ру. Се́ю ра́достию испо́лнився, и́де в Иерусали́м, и та́мо ку́пно с А́нною просла́виша Бо́га, глаго́люще Обетова́нней: Ра́дуйся, от ле́т дре́вних все́ми ча́емая; ра́дуйся, от все́х проро́к я́ве предрече́нная. Ра́дуйся, от сложе́ния ми́ра Бо́гом предызбра́нная; ра́дуйся, от паде́ния прароди́телей гре́шным обетова́нная. Ра́дуйся, сове́те неизрече́нный предве́чнаго попече́ния; ра́дуйся, о́бразе благонапи́санный Боже́ственнаго Предве́дения. Ра́дуйся, сви́тче одушевле́нный, в не́мже пе́рстом Бо́жиим написа́ся Сло́во; ра́дуйся, исто́чниче присноживо́тный, из него́же изоби́льно источи́ся благове́стие Христо́во. Ра́дуйся, Боготка́нная порфи́ро, в ню́же облече́ся Предве́чное Сло́во; ра́дуйся, благоуха́нное ми́ро, в не́же всели́ся благода́ть Ду́ха Пресвята́го. Ра́дуйся, па́че зла́та вся́каго блиста́ющая, нерукотворе́нная пала́то Прему́дрости Бо́жия; ра́дуйся, у́тра вся́каго со́лнечнаго светле́йшая, жили́ще Христо́во. Ра́дуйся, Пречи́стая, ве́сь ми́р рождество́м Свои́м возвесели́вшая. Конда́к 3. Си́ла Вы́шняго осени́ тогда́ к зача́тию заматоре́вшую во дне́х свои́х пра́ведную А́нну, и непло́дная тоя́ ложесна́ я́ко ни́ву показа́ благопло́дную, да прозя́бнет от нея́ на ра́дость всему́ ми́ру, в ско́рби погиба́ющему, село́ сла́дкое, Преблагослове́нная Де́ва Мари́я, все́м хотя́щим жа́ти спасе́ние и воспева́ти из глубины́ душе́вныя: Аллилу́иа. И́кос 3. Иму́ще, Пречи́стая, роди́тели Твои́ житие́ непоро́чное, зача́ша Тя́ в ста́рости до́брей, не плотски́м сласте́м прилежа́ще, но в целому́дрии и воздержа́нии подвиза́ющеся, да яви́тся в рождестве́ Твое́м не естества́ произволе́ние, но благода́ти Бо́жия си́ла, естества́ чи́н побежда́ющая, и да позна́ют вси́, я́ко моли́тва вку́пе и воздыха́ние непло́дства прозябе́ Тя пло́д живоно́сен ми́ру. Сего́ ра́ди почита́юще всесла́вное зача́тие Твое́, пое́м Тебе́ сицева́я: Ра́дуйся, непло́дныя ма́тере увеселе́ние; ра́дуйся, безча́дных роди́телей утеше́ние. Ра́дуйся, от су́ха ко́рене Иессе́ова прозя́бшая; ра́дуйся, и цве́т от него́ Христа́ произрасти́вшая. Ра́дуйся, я́ко еще́ в зача́тии Твое́м естества́ уста́вы побежда́ются; ра́дуйся, я́ко си́м Твоего́ де́вства в рождестве́ сохране́ние предвозвеща́ется. Ра́дуйся, я́ко отто́ле возве́яша ве́три, спасе́ния провозве́стницы; ра́дуйся, я́ко отону́дуже пло́д ражда́ти благода́ть начина́ет. Ра́дуйся, я́ко Тобо́ю естества́ на́шего непло́дство побежда́ется; ра́дуйся, я́ко Тобо́ю прама́терняя кля́тва разреша́ется. Ра́дуйся, всеми́рныя ра́дости провозвеще́ние; ра́дуйся, нача́ло на́шего спасе́ния. Ра́дуйся, Пречи́стая, ве́сь ми́р рождество́м Свои́м возвесели́вшая. Конда́к 4. Бу́рею печа́лей и скорбе́й мно́гих одержи́ми бы́вше пра́веднии роди́тели Твои́, Пречи́стая, я́ко до ста́рости безпло́дни бы́ша, мня́ху себе́ недосто́йны име́ти насле́дие во Ца́рствии Бо́жием. Сострада́ше же с ни́ми от ве́ка о непло́дстве естества́ на́шего вся́ тва́рь, суете́ повину́вшися: стене́т у́бо Ада́м, я́ко проклята́ бы́сть земля́ его́ ра́ди; рыда́ет же и Е́ва, я́ко умно́жишася печа́ли и боле́зни ея́; совоздыха́ет же с ни́ми и ве́сь ро́д челове́чь, тле́нию приобщи́вся. Егда́ же, о Богома́ти, рождество́м Твои́м разреши́ся дре́внее непло́дство и тле́ние потреби́ся, вся́ тва́рь благода́рственне о Тебе́ возопи́ Бо́гу: Аллилу́иа. И́кос 4. Услы́ша Госпо́дь Бо́г пра́ведных Иоаки́ма и А́нны воздыха́ния и дарова́ и́м, по обетова́нию Арха́нгелову, Дще́рь Пречи́стую и Преблагослове́нную, Де́ву Мари́ю, спасе́ния на́шего нача́ло и Хода́таицу, о Ея́же рождестве́ Не́бо и земля́ возра́довастася, А́нгели и Арха́нгели возвесели́шася, лю́дие же, просла́вивше Бо́га, воспе́ша си́це: Ра́дуйся, Мари́е, вели́кое всея́ тва́ри чу́до; ра́дуйся, Дщи́ Дави́дова, Госпо́дня же Ма́ти. Ра́дуйся, еди́ная в жена́х благослове́нная; ра́дуйся, от А́нгел на Небесе́х препросла́вленная. Ра́дуйся, заре́ незаходи́мая, све́т ми́рови возсия́вшая; ра́дуйся, лампа́до неугаси́мая, но́щь скорбе́й просвети́вшая. Ра́дуйся, я́ко виде́ние зра́ка Твоего́ А́нгелом пресла́достно; ра́дуйся, я́ко явле́ние Твое́ ми́ру челове́ком прера́достно. Ра́дуйся, но́вый раю́, на земли́ насажде́нный; ра́дуйся, све́тлый черто́же, Небе́сному Царю́ преукраше́нный. Ра́дуйся, пала́то Ду́ха Пресвята́го; ра́дуйся, ски́ния Бо́га с челове́ки. Ра́дуйся, Пречи́стая, ве́сь ми́р рождество́м Свои́м возвесели́вшая. Конда́к 5 Боготе́чную звезду́, от Назаре́та возсия́вшую и ве́сь ми́р просвети́вшую, зри́м Тя́, Пресвята́я Де́во; ма́л бо бе́ гра́д, его́же освяти́ла еси́ рождество́м Твои́м, и презира́емь бе́ у люде́й, я́коже все́м глаго́лати: «От Назаре́та мо́жет ли что́ добро́ бы́ти?» — оба́че немощна́я и уничиже́нная избра́ Бо́г, да кре́пкая посрами́т, и яви́ от Назаре́та Тя́ всему́ ми́ру цве́т неувяда́емый, де́вством присноцвету́щий, все́х святы́х святе́йшую Де́ву, греха́ во все́м житии́ Свое́м ни еди́наго же позна́вшую, да вси́ о Тебе́ благода́рственно воспое́м Бо́гу: Аллилу́иа. И́кос 5 Ви́девше роди́тели Твои́ чу́дное рождество́ Твое́, Пречи́стая, принесо́ша Бо́гу да́ры вели́кия, и благослове́ни бы́ша от свяще́нник и от все́х люде́й, я́ко восприя́вшии благослове́ние Бо́жие, и сотвори́ша учрежде́ние ве́лие в дому́ свое́м, веселя́щеся ду́хом и прославля́юще Бо́га. Помина́юще же обетова́ние А́нгельское, почита́ху Тя́, я́ко Госпожу́ Свою́, и поклони́вшеся, воспе́ша Тебе́ си́це: Ра́дуйся, пре́жде все́х ве́к пронарече́нная Ду́ха Свята́го Неве́сто; ра́дуйся, в после́дняя времена́ я́вльшаяся Сы́на Бо́жия Ма́ти, Де́во. Ра́дуйся, Бо́гу Отцу́ Дще́рь от все́х родо́в избра́нная; ра́дуйся, Живонача́льныя Тро́ицы заря́ми ди́вно осия́нная. Ра́дуйся, вся́ Небе́сныя Си́лы без разсужде́ния превосходя́щая; ра́дуйся, вся́ де́монския ра́ти посрамля́ющая и отгоня́ющая. Ра́дуйся, всему́ ро́ду челове́ческому всемо́щная Засту́пнице; ра́дуйся, все́м ка́ющимся гре́шником всеми́лостивая Хода́таице. Ра́дуйся, честны́х же́н похвало́; ра́дуйся, чи́стых де́в сла́во. Ра́дуйся, от ма́лаго Назаре́та добро́ всему́ ми́ру прине́сшая; ра́дуйся, да́же до после́дних земли́ любо́вию Свое́ю все́х покры́вшая. Ра́дуйся, Пречи́стая, ве́сь ми́р рождество́м Свои́м возвесели́вшая. Конда́к 6. Пропове́дница прише́ствия Христо́ва в ми́р Тобо́ю, Богоро́дице, бы́сть пра́ведная Елисаве́та, егда́, узре́вши Тя́, в до́м ея́ гряду́щую, изы́де на сре́тение Твое́ и возопи́ гла́сом ве́лиим: «Благослове́нна Ты́ в жена́х, и благослове́н Пло́д чре́ва Твоего́. И отку́ду мне́ сие́, да прии́де Ма́ти Го́спода моего́ ко мне́?» Си́це и мы́, пресла́вное рождество́ Твое́ я́ко посеще́ние земли́ на́шея пра́зднующе, срета́ем Тя́ приве́тствием си́м: благослове́нна Ты́ в жена́х, и благослове́н Пло́д чре́ва Твоего́, Ему́же вси́ благода́рственно да воспое́м: Аллилу́иа. И́кос 6. Возсия́ ра́дость рождества́ Твоего́, Пречи́стая, не то́чию пра́ведным роди́телем Твои́м, но и все́м бли́жним и дале́че су́щим, и да́же до коне́ц вселе́нныя: я́ко Бо́г на разу́мных Престо́лех почива́яй Престо́л Свя́т Себе́ предугото́ва уже́ на земли́, и Заря́ но́вая яви́ся, предвозвеща́ющи Со́лнца пра́вды Христа́ прише́ствие ско́рое. Сего́ ра́ди воспое́м Ти́, Чи́стая, си́це: Ра́дуйся, заре́ светле́йшая, вели́каго Со́лнца Христа́ Провозве́стнице; ра́дуйся, луче́ незаходи́мая, Невече́рняго Све́та Роди́тельнице. Ра́дуйся, огне́м Твои́х моли́тв челове́ки от страсте́й очища́ющая; ра́дуйся, росо́ю Твоея́ благода́ти пла́мень гее́нны охлажда́ющая. Ра́дуйся, о́блаче Све́та Боже́ственнаго, вся́кое помраче́ние разоря́яй; ра́дуйся, благоуха́нное кади́ло, моли́твы ве́рных к Сы́ну Твоему́ вознося́щее. Ра́дуйся, Небе́сный киво́те, от превы́шних к земны́м пренесе́нный; ра́дуйся, огнеобра́зный престо́ле, Небе́сному Царю́ на земли́ угото́ванный. Ра́дуйся, ски́нию Дави́дову па́дшую возста́вившая; ра́дуйся, превы́шний Иерусали́м Небе́сный на земли́ яви́вшая. Ра́дуйся, пречестну́ю багряни́цу от крове́й Твои́х А́гнцу Бо́жию приугото́вившая; ра́дуйся, Боготка́нную порфи́ру Сло́ву Бо́жию от пло́ти Твоея́ истка́вшая. Ра́дуйся, Пречи́стая, ве́сь ми́р рождество́м Свои́м возвесели́вшая. Конда́к 7. Хотя́й долготерпели́вый Госпо́дь яви́ти бе́здну человеколю́бия Своего́ к па́дшему дре́вле в раи́ ро́ду челове́ческому, даде́ та́мо прароди́телем на́шим обетова́ние, я́ко се́мя жены́ сотре́т главу́ зми́я, в после́дняя же времена́ испо́лни на Тебе́, Пречи́стая, первообетова́ние Свое́, избра́в Тя́ Еди́ну от все́х родо́в в Ма́терь Себе́, да рождество́м Твои́м сотре́ши главу́ дре́вняго зми́я, сего́ ра́ди благода́рственно воспое́м Бо́гу: Аллилу́иа. И́кос 7. Но́вая стра́шная и чу́дная та́инства Твоя́, Богоро́дице, и но́вый яви́лся е́сть Исто́чник жи́зни вме́сто Е́вы чу́вственныя: та́ бо, повину́вшися зми́ю, нача́ло положи́ отвраще́ния лица́ Бо́жия от челове́к и печа́ль роди́ жена́м. Тво́й же Сы́н, о Де́во, И́же Е́вину утро́бу осуди́ ражда́ти ча́да в боле́знех, во Твое́ чре́во всели́ся безболе́зненно, ключи́ де́вства невреди́вый в рождестве́ Твое́м. Сего́ ра́ди Тобо́ю ра́дуется па́дшее челове́ческое естество́, вме́сто дре́вния кля́твы свобо́ду Христо́ву получи́вше: Тебе́ после́дующа, жены́ я́ве враги́ побежда́ти начина́ют, де́вства держа́щася и вопию́ща Тебе́ такова́я: Ра́дуйся, Боже́ственною сла́вою преукраше́нная; ра́дуйся, чистото́ю де́вства превознесе́нная. Ра́дуйся, па́дшее челове́ческое естество́ обожи́вшая; ра́дуйся, же́н от дре́вния печа́ли свободи́вшая. Ра́дуйся, красото́ю де́вства Твоего́ Гаврии́ла удиви́вшая; ра́дуйся, пресве́тлою чистото́ю Твое́ю А́нгельския собо́ры неизмери́мо превозше́дшая. Ра́дуйся, две́ре непроходи́мая, Еде́м заключе́нный отве́рзшая; ра́дуйся, кни́го запечатле́нная, недове́домыя та́йны Бо́жия вмести́вшая. Ра́дуйся, благоуха́нный кри́не де́вства; ра́дуйся, неувяда́емый цве́те чистоты́. Ра́дуйся, Небе́сное де́вство на земли́ насади́вшая; ра́дуйся, две́ри ра́йския па́дшим отве́рзшая. Ра́дуйся, Пречи́стая, ве́сь ми́р рождество́м Свои́м возвесели́вшая. Конда́к 8. Стра́нное рождество́ Твое́ от непло́дове ви́дяще сла́сти неприча́стное, но от целому́дрия и воздержа́ния просия́вшее, устрани́мся су́етнаго ми́ра, и вся́каго нецелому́дрия душе́внаго и теле́снаго, умы́ и сердца́ на Небеса́ прело́жше. На сие́ бо пришла́ еси́ в ми́р, Ма́ти целому́дрия, да ни́жняя возведе́ши к го́рней высоте́, и да научи́ши все́х чи́стыми усты́ и нескве́рным се́рдцем воспева́ти Бо́гу: Аллилу́иа. И́кос 8. «Вся́ добра́ еси́, бли́жняя Моя́, и поро́ка не́сть в Тебе́. Воста́ни, прииди́, Голуби́це Моя́, яви́ Ми зра́к Тво́й и услы́шан сотвори́ Ми гла́с Тво́й, я́ко гла́с Тво́й сла́док и о́браз Тво́й красе́н. Еди́на еси́ ма́тере Твоея́, избра́нна еси́ роди́вшей Тя́», — та́ко глаго́лаше Сы́н Тво́й и Госпо́дь, Пречи́стая, срета́я е́же от непло́дове рождество́ Твое́. Сему́ Боже́ственному гла́су вне́млюще, дерза́ем воспева́ти Тебе́ такова́я: Ра́дуйся, Цари́це, одесну́ю Царя́ Христа́ предста́вшая; ра́дуйся, Влады́чице, в ри́зы позлаще́ны де́вства оде́янная и преукраше́нная. Ра́дуйся, Ея́же добро́ты возжела́ Ца́рь Небе́сный; ра́дуйся, И́мже бли́жнею и до́брою в жена́х нарече́на была́ еси́. Ра́дуйся, восходя́щая от пусты́ни, я́ко о́блак ды́ма, сми́рну и лива́н кадя́й; ра́дуйся, ми́ро излия́нное, благоуха́ние от Небе́снаго Мирова́рца износя́щее. Ра́дуйся, вертогра́де заключе́нный, в него́же никто́же возмо́жет взы́ти; ра́дуйся, кла́дезю запечатле́нный, от его́же глубины́ никто́же возмо́жет испи́ти. Ра́дуйся, блиста́ющаяся, я́ко у́тро, во тьме́ седя́щим; ра́дуйся, восходя́щая, я́ко луна́, избра́нная, я́ко со́лнце. Ра́дуйся, исто́чниче воды́ живо́тныя, приснотеку́щия от Престо́ла Бо́жия; ра́дуйся, дре́во жи́зни, присноцвету́щее посреде́ рая́. Ра́дуйся, Пречи́стая, ве́сь ми́р рождество́м Свои́м возвесели́вшая. Конда́к 9. Вся́кое естество́ А́нгельское ра́достию возра́довася, прославля́юще Бо́га, егда́ по рождестве́ Твое́м, Пречи́стая, святи́тель вели́кий со иере́и и людьми́ избра́нными прии́де в до́м роди́телей Твои́х, моли́твы благода́рственныя возсыла́юще. Егда́ же благослови́ Тя, воздви́же гла́с сво́й, глаго́ля: «Бо́же оте́ц на́ших, благослови́ младе́нца сего́ и да́руй Е́й и́мя, да бу́дет просла́влено во вся́ ро́ды». И нарече́ Тебе́ и́мя Мари́я, вели́кое и благода́тное, лю́дем пресла́достное, де́моном же стра́ха испо́лнено, и возопи́ с весе́лием: Аллилу́иа. И́кос 9. Вети́и многовеща́ннии, я́ко ры́бы безгла́сныя, недоумева́ют, ка́ко воспе́ти Твою́ равноа́нгельскую от младе́нческих пеле́н чистоту́, Пречи́стая, ю́же дарова́ Ти Госпо́дь, да предста́вит Тя́ Ма́терь Свою́, не иму́щу скве́рны, или́ поро́ка, или́ не́что от таковы́х, но да бу́деши свя́та и непоро́чна. Сего́ ра́ди ма́ти Твоя́ со тща́нием соблюда́ше Тя́ в непоро́чней чистоте́, да ника́коже одушевле́нному киво́ту Бо́жию ко́снется рука́ скве́рных: та́ бо освяти́ ло́же Твое́ и себе́ саму́ отчужда́ше от вся́кия скве́рны и призва́ чи́стыя де́вы храни́ти поко́й Тво́й. И егда́ сосца́ми пита́ше Тя́, моли́тву де́яше, да с млеко́м ма́терним наипа́че напита́ешися Бо́жиим сло́вом. Такове́й непоро́чней чистоте́ Твое́й чудя́щеся, вопие́м Ти́ си́це: Ра́дуйся, от младе́нчества Твоего́ ни еди́наго греха́ позна́вшая; ра́дуйся, от рождества́ Твоего́ все́х святы́х святе́йшая. Ра́дуйся, моли́твою па́че млека́ отдое́ная; ра́дуйся, сло́вом Бо́жиим па́че хле́ба насыще́нная. Ра́дуйся, Небе́сное произраста́ние, на земли́ насажде́нное; ра́дуйся, ра́йское прозябе́ние, от роди́телей Твои́х воспита́нное. Ра́дуйся, чи́стая Голуби́це, Ея́же чистоты́ не бе́ досто́ин ми́р ве́сь; ра́дуйся, нескве́рная А́гнице, Ея́же непоро́чность яви́ Ю́ досто́йну Ма́терь Христу́. Ра́дуйся, ма́нием Вседержи́теля от непло́дове пло́д возсия́вшая; ра́дуйся, досто́йное Твоея́ чистоты́ рождество́ восприя́вшая. Ра́дуйся, я́ко от восто́к со́лнца до за́пад хва́льно и́мя Твое́; ра́дуйся, я́ко от все́х родо́в благослове́нна Ты́ в жена́х. Ра́дуйся, Пречи́стая, ве́сь ми́р рождество́м Свои́м возвесели́вшая. Конда́к 10. Спасти́ хотя́й ми́р от пре́лести вра́жия, Человеколю́бец Госпо́дь избра́ Тя от земна́го ро́да, от ма́лаго гра́да и от непло́дныя утро́бы в Ма́терь Себе́, от ве́ка предопределе́нную, проро́ки же дре́вле пропове́данную, Хода́таицу бы́ти на́шего спасе́ния, да бу́деши печа́льным и в беда́х су́щим ско́рое утеше́ние и мирска́го непло́дства разреше́ние, все́м же во мра́це греха́ блужда́ющим да яви́ши Со́лнце пра́вды Христа́, во е́же пе́ти Ему́: Аллилу́иа. И́кос 10. Стена́ еси́ и прибе́жище все́м челове́ком, Богоро́дице Де́во, Твое́ рождество́ пра́зднующим: Ты́ бо от черто́га ма́лаго гра́д Бо́жий су́щая, е́же бы́ти начина́еши, и от утро́бы неражда́ющия исхо́д соверша́еши, да угото́ваеши вхо́д Святи́телю Вели́кому: Еди́н бо Бо́г Тобо́ю про́йде стра́нною стезе́ю, неопа́льну Тя́ сохрани́в. Сего́ ра́ди со дерзнове́нием зове́м Ти́, еди́ней чи́стей и благослове́нней, такова́я: Ра́дуйся, на Небесе́х преблагослове́нная; ра́дуйся, на земли́ препросла́вленная. Ра́дуйся, А́нгелов ра́досте и увеселе́ние; ра́дуйся, земноро́дным отра́до и утеше́ние. Ра́дуйся, Го́рлице богогла́сная и незло́бивая; ра́дуйся, Ю́нице кро́ткая и ти́хая. Ра́дуйся, Ду́ха Всесвята́го хра́ме святе́йший; ра́дуйся, Небе́снаго уневе́щения черто́же чисте́йший. Ра́дуйся, росо́ Аермо́нская, на го́ры Сио́нския соше́дшая; ра́дуйся, алава́стре ми́ра многоце́ннаго, зе́млю облагоуха́вший. Ра́дуйся, гра́де Бо́жий, от черто́га ма́лаго прозябе́ние; ра́дуйся, в Назаре́те гра́де от су́ха ко́рене произраста́ние. Ра́дуйся, Пречи́стая, ве́сь ми́р рождество́м Свои́м возвесели́вшая. Конда́к 11. Пе́ние благода́рственное воспева́ют ду́хом Иоаки́м чу́дный и пра́ведная А́нна, я́ко ви́деша на земли́ Ма́терь Созда́теля, Ю́же роди́ша, Дще́рь Мари́ю. С ни́ми же и мы́, Влады́чице, равночи́сленныя песка́ морска́го пе́сни прино́сим Ти́, восхваля́юще пресла́вное от непло́дных ложе́сн рождество́ Твое́, благода́рственно воспева́юще Бо́гу: Аллилу́иа. И́кос 11. Светоприе́мную свещу́, в нощи́ богоневе́дения рождество́м Твои́м пресла́вно возжже́нную, ви́дим Тя́, Пресвята́я Де́во: все́м бо во тьме́ греха́ и се́ни сме́ртней седя́щим возсия́ла еси́ све́т, ра́дость, благода́ть и разреше́ние дре́вния кля́твы, Е́вы ра́ди бы́вшия: из Тебе́ бо возсия́ Со́лнце пра́вды Христо́с Бо́г на́ш, просвеща́яй су́щия во тьме́, вопию́щия в похвалу́ Тебе́ такова́я: Ра́дуйся, заре́ дне́ невече́рняго, врата́ Ца́рствия Христо́ва отве́рзшая; ра́дуйся, денни́це светле́йшая, спасе́ние на́м возвести́вшая. Ра́дуйся, звездо́ незаходи́мая, Вели́кое Со́лнце в ми́р се́й вводя́щая; ра́дуйся, свеще́ светоза́рная, дре́внюю тьму́ грехо́вную разгоня́ющая. Ра́дуйся, исто́чниче живоно́сный, жи́знь все́м подаю́щий; ра́дуйся, свети́льниче, пре́жде со́лнца Све́т на́м источи́вший. Ра́дуйся, еще́ су́щей тьме́, заря́ми благода́ти на́с просвети́вшая; ра́дуйся, Ма́ти Све́та у́мнаго, благода́тию всю́ вселе́нную озари́вшая. Ра́дуйся, Неве́сто черто́га светосия́ннаго; ра́дуйся, сия́нием ри́зы Своея́ всю́ поднебе́сную облиста́вшая. Ра́дуйся, Же́но, облече́нная в со́лнце, в ми́р на спасе́ние погиба́ющим я́вльшаяся; ра́дуйся, под нога́ма Свои́ма луну́ иму́щая, от двоюна́десяте зве́зд увенча́нная. Ра́дуйся, Пречи́стая, ве́сь ми́р рождество́м Свои́м возвесели́вшая. Конда́к 12. Благода́ти тезоимени́тая блаже́нная А́нна весели́тся и хва́лящися вопие́т: «Непло́ды су́щи, роди́х Бо́жию Ма́терь, Ея́же ра́ди осужде́ние Е́вино разреши́ся и я́же в печа́лех боле́знь». И та́ко ра́дующися, даде́ обе́т привести́ Дще́рь свою́ ро́ждшуюся Бо́гови, да бу́дет Ему́ в да́р соверше́н от все́х родо́в земны́х, челове́ком же в ве́чное утеше́ние и ра́дование, во е́же пе́ти и́м вы́ну: Аллилу́иа. И́кос 12. Пое́м Твое́ пречи́стое рождество́, чти́м и несказа́нное зача́тие, покланя́емся са́мым пелена́м Твои́м, Неве́сто Богозва́нная и Де́во; славосло́вят же с на́ми вку́пе Твое́ в ми́р прише́ствие А́нгелов и Арха́нгелов чи́ни и ду́ш святы́х собо́ри: о́бщая бо ра́дость возсия́ на Небеси́ и на земли́ от пра́ведных Иоаки́ма и А́нны рождество́м Твои́м, Богоро́дице, его́же прославля́юще, вопие́м Ти́ такова́я: Ра́дуйся, Всенепоро́чная, по Святе́й Тро́ице о́бщая все́х А́нгел и челове́к Влады́чице; ра́дуйся, Всеблагослове́нная, по Уте́шители о́бщая все́х на Небеси́ и на земли́ Уте́шительнице. Ра́дуйся, красото́ в десни́це Госпо́дни, украша́ющая блажа́щих Тя́ все́х Небе́сных; ра́дуйся, утеше́ние Вседержи́телево, возвеселя́ющее призыва́ющих Тя́ все́х земны́х. Ра́дуйся, не́бо небе́с, вся́ А́нгельския си́лы без сравне́ния превосходя́щее; ра́дуйся, чу́до чуде́с, все́х челове́ков пе́рсть в Те́ло Бо́жие созида́ющее. Ра́дуйся, Цари́це цари́ц, все́й вселе́нней преде́л соде́ловавшая грехо́вному растле́нию; ра́дуйся, свята́я святы́х все́й Це́ркве Христо́вы, нача́ло положи́вшая на́шему спасе́нию. Ра́дуйся, Боголе́пная Деви́це, все́х време́н и веко́в Бо́жие благослове́ние; ра́дуйся, Богоизбра́нная Отрокови́це, все́х язы́к и родо́в благода́тное примире́ние. Ра́дуйся, сто́лпе де́вства, все́м де́вства жела́ющим добро́ту де́вства я́ве низпосыла́ющая; ра́дуйся, две́ре спасе́ния, все́м спасе́ния ча́ющим по́мощь вско́ре подаю́щая. Ра́дуйся, Пречи́стая, ве́сь ми́р рождество́м Свои́м возвесели́вшая. Конда́к 13. О всепе́тая Ма́ти, от непло́дове ро́ждшаяся на спасе́ние ми́ру, ны́нешняя на́ша о всечестне́м рождестве́ Твое́м прие́мши приноше́ния, не оста́ви на́с во вре́мя живота́ на́шего, от вся́кия напа́сти и пле́на вра́жия изба́ви на́с и от непло́дства душе́внаго разреши́ все́х, о Тебе́ вопию́щих: Аллилу́иа. Этот конда́к читается трижды, затем и́кос 1-й и конда́к 1-й. И́кос 1. Арха́нгел Гаврии́л по́слан бы́сть к пра́ведней А́нне, егда́ та́ в ско́рби непло́дства своего́ возопи́ ко Го́споду из глубины́ серде́чныя, узре́вши в са́де свое́м гнездо́ пти́чие, птенцы́ ма́лыя иму́щее, и благовести́ е́й ра́дость ве́лию, глаго́ля: «Услы́шана моли́тва твоя́, сле́зы же твоя́ пред Бо́гом внидо́ша, и се́ роди́ши Дще́рь преблагослове́нную, о Не́йже возблагословя́тся вся́ коле́на земна́я, нарече́тся же и́мя Е́й — Мари́я». Сему́ ра́достному обетова́нию чудя́щеся, возопие́м Преблагослове́нней: Ра́дуйся, от благоро́днейшаго ца́рскаго ко́рене Иоаки́мом произраще́нная; ра́дуйся, от свяще́ннейшаго архиере́йскаго ро́да А́нною рожде́нная. Ра́дуйся, прароди́телей на́ших от тли́ сме́ртныя свободи́вшая; ра́дуйся, роди́телей Твои́х поноше́ния безча́дства разреши́вшая. Ра́дуйся, свята́я врата́, на восто́к зря́щая, рождество́м Свои́м е́же от непло́дове отве́рзшая; ра́дуйся, де́вственная две́ре заключе́нная, вхо́да Святи́теля Вели́каго ожида́ющая. Ра́дуйся, сле́з ма́тере Твоея́ на ра́дость премене́ние; ра́дуйся, тоя́ поноше́ния в лю́дех отъя́тие. Ра́дуйся, вели́кое ро́ждшим Тя́ утеше́ние; ра́дуйся, всему́ ми́ру наслажде́ние. Ра́дуйся, па́дшаго Ада́ма воззва́ние; ра́дуйся, сле́з Е́виных избавле́ние. Ра́дуйся, Пречи́стая, ве́сь ми́р рождество́м Свои́м возвесели́вшая. Конда́к 1. Избра́нней от все́х родо́в Бо́жией Ма́тери, Небесе́ и земли́ Цари́це, освяти́вшей ро́д челове́ческий прише́ствием к на́м во всечестне́м рождестве́ Свое́м, благогове́йная пе́ния прино́сим Ти́ раби́ Твои́, Богоро́дице. Ты́ же, я́ко прише́дшая на утеше́ние и спасе́ние на́ше, от вся́ких на́с бе́д свободи́, да зове́м Ти́: Ра́дуйся, Пречи́стая, ве́сь ми́р рождество́м Свои́м возвесели́вшая. Моли́тва. О Пресвята́я и Богоизбра́нная Де́во, Влады́чице на́ша Богоро́дице, Небеси́ и земли́ Цари́це, на ра́дость и утеше́ние всему́ ми́ру от безпло́дных и безча́дных роди́телей Бо́гом дарова́нная! Роди́вшися Бо́жиим Промышле́нием, Ты́ разреши́ла еси́ непло́дствие ро́ждшия Тя́, и ны́не непло́дная сердца́ на́ша плодоно́сна сотвори́ предста́тельством Твои́м у Престо́ла Вседержи́телева, непло́дствовати же соде́лай ны́ злы́ми де́лы, гнилы́ми словесы́ и нечи́стыми помышле́ньми. О Всеблаже́нная, да яви́мся ча́да Бо́жия, доброде́телей благопло́дие при́сно принося́щая. Ты́ утоли́ла еси́ пречи́стым рождество́м Твои́м пла́ч прама́тере на́шея Е́вы и пра́ведныя роди́тели Твоя́ изба́вила еси́ поноше́ния безча́дства, и ны́не утоли́ пла́ч и воздыха́ния многоболе́зненных ду́ш на́ших и изба́ви все́х на́с поноше́ния злы́х де́л на́ших, страсте́й безче́стия и вся́каго порабоще́ния вра́жескаго. Наипа́че же да́руй на́м, Пресвята́я Богоро́дице Де́во, во всесве́тлый де́нь Рождества́ Твоего́ чи́стым се́рдцем разуме́ти и па́мятовати, с коли́кою ра́достию и благодаре́нием непло́дная утро́ба святы́я пра́ведныя А́нны ноша́ше Тя́, да и мы́ не то́чию словесы́, но наипа́че де́лы свои́ми вы́ну бу́дем со умиле́нием серде́чным прославля́ти Тя́, вопию́ще: сла́ва рождеству́ Твоему́, Чи́стая; сла́ва де́вству Твоему́, Ма́ти Безневе́стная. Ку́пно же с Тобо́ю сподо́би на́с непреста́нно сла́вити и велича́ти Всесвяты́й Пло́д Тво́й, Сло́во воплоще́нно, Ему́же сла́ва подоба́ет, че́сть и поклоне́ние, со Безнача́льным Его́ Отце́м, и с Пресвяты́м, и Благи́м, и Животворя́щим Его́ Ду́хом, ны́не и при́сно, и во ве́ки веко́в. Ами́нь.

Кано́н Пресвяте́й и Живонача́льней Тро́ице, [его́же краестро́чие: Хвалю́ Тро́ице Тя́, Единонача́льное Естество́.] Творе́ние Митрофа́ново. Гла́с 7: Пе́снь 1 Ирмо́с: Ма́нием Твои́м на земны́й о́браз преложи́ся, пре́жде удоборазлива́емое водно́е естество́, Го́споди: те́мже немо́кренно пешеше́ствовав Изра́иль, пое́т Тебе́ пе́снь побе́дную. Припе́в: Пресвята́я Тро́ице, Бо́же на́ш, сла́ва Тебе́. Отве́рзи ми́ уста́ у́мная се́рдца, и устне́ веще́ственныя ко хвале́ Твое́й, Трисве́тлое Еди́но Божество́ все́х, пе́ти Тебе́ пе́снь, Светоде́телю, благода́рственную. Да преизли́шнее Твоея́ бла́гости пока́жеши, создала́ еси́ челове́ка Тро́ице безмерноси́льная: то́кмо о́браз бре́нный Твоего́ нача́льнаго соде́телю, Госпо́дьства. Сла́ва Отцу́, и Сы́ну, и Свято́му Ду́ху. Ум безнача́льный, Сло́во соприсносу́щное роди́вый, и Ду́ха собезнача́льнаго просия́вый, сподо́би еди́ному Бо́гу по существу́ сообра́зну на́с покланя́тися Триипоста́сному. И ны́не, и при́сно, и во ве́ки веко́в. Ами́нь. Богоро́дичен: Яви́лся еси́ при купине́ Моисе́ю Бо́жий Сло́ве, я́ко о́гнь чисти́тельный, не опаля́я же отню́д, е́же от Де́вы прообразу́я твое́ воплоще́ние, и́мже челове́ки вообрази́л еси́. Пе́снь 3 Ирмо́с: В нача́ле небеса́, всеси́льным Сло́вом Твои́м утвержде́й, Го́споди Спа́се, и вседе́тельным и Бо́жиим Ду́хом всю́ си́лу и́х: на недви́жимем мя́ ка́мени испове́дания Твоего́ утверди́. И́же Еди́нственнаго и Трисия́ннаго, и вседе́тельнаго Тя́ Влады́ку воспева́юще, грехо́в и искуше́ний про́сим избавле́ния, безмерноси́льный Бо́же: да не у́бо пре́зриши, ве́рою Твою́ бла́гость сла́вящих. О́трасль яви́ся от Отца́, я́ко от ко́рене безнача́льна Бо́г Сло́во, и равномо́щен со сра́сленым и Боже́ственным ду́хом: и сего́ ра́ди ве́рнии, тро́ичное ли́цы еди́но Госпо́дьство сла́вим. Сла́ва Отцу́, и Сы́ну, и Свято́му Ду́ху. Равносла́вно и сра́слено, триипоста́сное естество́ неразде́льне и разде́льне, и единонача́льную Тро́ицу вси́ Тя славосло́вим ве́рнии: и покланя́ющеся про́сим согреше́ний проще́ния. И ны́не, и при́сно, и во ве́ки веко́в. Ами́нь. Богоро́дичен: Неизме́нно челове́ком уподо́блься по всему́ Бо́жий Сло́ве, от Чи́стыя Отрокови́цы проше́л еси́ я́ве: и все́м показа́л еси́ Богонача́лие Трисия́нное, и еди́нственное Существо́м неизме́нных Ипоста́сей. Го́споди, поми́луй, три́жды. Седа́лен, гла́с 7. Согреши́вшыя поми́луй, Тро́ице Свята́я, рабы́ Твоя́: и приими́ ка́ющыяся Тебе́ благоутро́бне, и проще́ния сподо́би. Сла́ва Отцу́, и Сы́ну, и Свято́му Ду́ху, и ны́не, и при́сно, и во ве́ки веко́в. Ами́нь. Богоро́дичен: Озло́бленныя ду́шы на́шя грехми́, ублажи́, Всечи́стая Богоро́дице, и изба́ви от прегреше́ний Тебе́ пою́щыя Богоневе́сто. Пе́снь 4 Ирмо́с: О́тча не́дра не оста́вль, и соше́д на зе́млю, Христе́ Бо́же, та́йну услы́шах смотре́ния Твоего́, и просла́вих Тя́, Еди́не Человеколю́бче. Содержи́тельная Трисве́тлая Еди́нице, Богонача́льная и спаси́тельная все́х, Твоя́ певцы́ ны́не огради́, и спаси́ от ско́рби, и страсте́й, и вся́каго озлобле́ния. Назна́менательных рече́ний, Твоего́ непостижи́маго Трисве́тлаго Божества́, недоумева́юще воспева́ем Тя́, Человеколю́бче Го́споди, и прославля́ем Твою́ си́лу. Сла́ва Отцу́, и Сы́ну, и Свято́му Ду́ху. На земли́ я́ко на небесе́х со безпло́тными ли́ки, Еди́нице и Тро́ице, неразде́льно Тя́ разделя́ем, и любо́вию сла́вим, я́ко су́щими все́ми влады́чествующую. И ны́не, и при́сно, и во ве́ки веко́в. Ами́нь. Богоро́дичен: Оте́ческия сла́вы не отсту́пль, к на́шей ху́дости снизше́л еси́ во́лею, вопло́щься Пресу́щественный: и возне́сл еси́ к Боже́ственней сла́ве, я́ко благоутро́бен. Пе́снь 5 Ирмо́с: Но́щь несветла́ неве́рным, Христе́, ве́рным же просвеще́ние в сла́дости слове́с Твои́х: сего́ ра́ди к Тебе́ у́тренюю, и воспева́ю Твое́ Божество́. Светонача́льное Естество́ Тро́ице начерта́ньми, и Еди́нице в Сове́те и Сла́ве и Че́сти, утверди́ на́с в Твое́й любви́. Сла́ва Отцу́, и Сы́ну, и Свято́му Ду́ху. Ум, и Сло́во, и Ду́х, еди́но Богонача́льное и трисо́лнечное естество́ сла́вяще, про́сим изба́витися искуше́ний, и вся́ких скорбе́й. И ны́не, и при́сно, и во ве́ки веко́в. Ами́нь. Богоро́дичен: Вообра́жься Бо́жий Сло́ве, в естество́ челове́ческое, от Святы́я Де́вы, Тро́ицу во Еди́нице научи́л еси́ пе́ти, сообра́зну и сопресто́льну. Пе́снь 6 Ирмо́с: Пла́вающаго в молве́ жите́йских попече́ний, с корабле́м потопля́ема грехи́, и душетле́нному зве́рю примета́ема, я́ко Ио́на, Христе́, вопию́ Ти: из смертоно́сныя глубины́ возведи́ мя. Единосла́вную держа́ву, и единонача́льное богонача́лие, треми́ ипоста́сьми су́щее, непреме́нне с дру́г дру́гом сла́вим, разли́чие иму́ще то́кмо, бытие́м ко́йждо сво́йства. Сла́ва Отцу́, и Сы́ну, и Свято́му Ду́ху. У́мнии Тя́ чи́нове а́нгельских красо́т хва́лят, трисо́лнечное Богонача́лие: с ни́миже и мы́ бре́нными усты́, я́ко твори́тельну все́х, еди́ну песносло́вим, и ве́рно сла́вим. И ны́не, и при́сно, и во ве́ки веко́в. Ами́нь. Богоро́дичен: Недоуме́нным сло́вом, Сло́во ро́ждшееся от Со́лнца Отца́, и́но со́лнце, пре́жде ве́к, от Де́вы напосле́док возсия́: и еди́нственнаго треми́ ли́цы, недомы́слимаго Бо́га пропове́да. Седа́лен, гла́с 7: Тро́ице Единосу́щная, Еди́нице все́х Триипоста́сная, поми́луй, я́же создала́ еси́, Безсме́ртная: попаля́ющи зло́бы прегреша́ющих, и просвеща́ющи сердца́ пою́щих благоутро́бие Твое́, Бо́же на́ш, сла́ва Тебе́. Сла́ва Отцу́, и Сы́ну, и Свято́му Ду́ху, и ны́не, и при́сно, и во ве́ки веко́в. Ами́нь. Богоро́дичен: Огня́ светле́йши, све́та де́йственнейши ми́лость благода́ти Твоея́, Влады́чице, попаля́ющи грехи́ челове́ков, и ороша́ющи мы́сли хва́лящих вели́чия Твоя́, Богоро́дице Пренепоро́чная. Пе́снь 7 Ирмо́с: В пе́щь о́гненную вве́ржени преподо́бнии о́троцы, о́гнь в ро́су преложи́ша, воспева́нием си́це вопию́ще: благослове́н еси́, Го́споди, Бо́же оте́ц на́ших. Светолу́чными блиста́нии при́сно сия́я, трисве́те Бо́же, Еди́нице непристу́пная и пресу́щная спаси́, и́же в Тя́, Влады́ко, ве́рующыя благоче́стно, и покланя́ющыяся Тебе́. Рече́нием Боже́ственных проро́к повину́ющеся, еди́наго тя́ то́чию Бо́га все́х сла́вим в трие́х начерта́ниих, си́це вопию́ще: благослове́н еси́, Го́споди, Бо́же оте́ц на́ших. Сла́ва Отцу́, и Сы́ну, и Свято́му Ду́ху. Пе́рстными устна́ми мы́ с невеще́ственными чи́нми, пе́сньми Тро́ице Свята́я, Тя́ пое́м во еди́нстве существа́, вопию́ще: благослове́н еси́, Го́споди, Бо́же Оте́ц на́ших. И ны́не, и при́сно, и во ве́ки веко́в. Ами́нь. Богоро́дичен: Да и́же созда́вый Ада́ма, возсози́ждет па́ки, Всечи́стая, из Тебе́ я́ве вочелове́чися, челове́ки обожи́в си́це вопию́щыя: благослове́н, Пречи́стая, пло́д Твоего́ чре́ва. Пе́снь 8 Ирмо́с: Неопа́льная огню́ в Сина́и прича́щшаяся купина́, Бо́га яви́ медленоязы́чному и гугни́вому Моисе́ови, и о́троки ре́вность Бо́жия три́ непребори́мыя во огни́ певцы́ показа́: вся́ дела́ Госпо́дня Го́спода по́йте, и превозноси́те во вся́ ве́ки. Со́лнца луча́ми трисия́ннаго озари́тися светоде́тельными сподо́би, сердца́м певце́в Твои́х: и ны́не зре́ти добро́ту Твою́ Тро́ице, Еди́нице, я́ко мо́щно да́руй всегда́, все́м ве́рою подо́бною, Твое́ вели́чие песносло́вящым во вся́ ве́ки. Держи́ши вся́ческая, тро́ичное и еди́нственное Господонача́лие безнача́льное, и управля́еши не́бо и зе́млю. Те́мже мя́ любо́вию Твое́ю привлачи́ма при́сно, сохрани́ пе́ти Тебе́: вся́ дела́ Госпо́дня Го́спода по́йте, и превозноси́те во вся́ ве́ки. Сла́ва Отцу́, и Сы́ну, и Свято́му Ду́ху. Хра́м мя́ Твоея́ трисве́тныя сотвори́ зари́, Благоде́телю Человеколю́бче: и прича́стия и приобще́ния непристу́пна враго́м неви́димым, и плотски́м страсте́м, Влады́ко, покажи́, единонача́льный Бо́же мо́й и Го́споди сла́вы, песносло́вити Тя́ во вся́ ве́ки. И ны́не, и при́сно, и во ве́ки веко́в. Ами́нь. Богоро́дичен: Све́т Богонача́льный от чре́ва Твоего́ возсия́вый, Богома́ти Пречи́стая, ве́сь ми́р трисо́лнечным све́том озари́, и зе́млю я́коже друго́е не́бо показа́, пою́щу: вся́ дела́ Госпо́дня Го́спода по́йте, и превозноси́те во вся́ ве́ки. Пе́снь 9 Ирмо́с: Ма́ти Бо́жия и Де́ва, ро́ждшая и де́вствующая па́ки, не естества́ де́ло, но Бо́жия снизхожде́ния: те́м я́ко Еди́ну Бо́жиих чуде́с сподо́бльшуюся, Тя́ при́сно велича́ем. Высокосло́вити и пе́ти Тя́ досто́йно, Его́же в вы́шних непреста́нно Серафи́ми воспева́ют, не возмога́ем бре́ннии: оба́че я́ко Влады́ку все́х дерза́юще, и человеколю́бнейшаго Бо́га велича́ем. Теле́сныя боле́зни изба́ви, и душе́внаго пристра́стия певцы́ Твоя́, еди́нственная Тро́ице неразде́льная, и сохрани́тися неврежде́нным от все́х жите́йских искуше́ний сподо́би. Сла́ва Отцу́, и Сы́ну, и Свято́му Ду́ху. Равноси́льная, Богонача́льная, Трисве́тная, Всеси́льная Держа́во, неизме́нная Добро́то су́щественныя Бла́гости, да́ждь прегреше́ний разреше́ние Твои́м рабо́м, и искуше́ний, и страсте́й изба́ви. И ны́не, и при́сно, и во ве́ки веко́в. Ами́нь. Богоро́дичен: Ум и ду́шу, и плотско́е смеше́ние прие́м, Богоро́дице, от Твои́х ложе́сн пречи́стых, Бо́г Сло́во пои́стинне челове́к яви́ся: и Боже́ственнаго существа́ о́бщника челове́ка я́ве показа́л е́сть. Ипакои, глас 7: И́же наш зрак восприе́мый, / и претерпе́вый Крест пло́тски, / спаси́ мя воскресе́нием Твои́м Христе́ Бо́же, / я́ко человеколю́бец. Молитва Пресвятей Троице: Всемогу́щая и Животворя́щая Свята́я Тро́ице и светонача́льная, я́же мирную вся́кую и премирную тварь, за еди́ну бла́гость от не су́щих приведы́й, и промышля́я и содержа́. И́же по про́чих Твои́х неизрече́нных о земно́м ро́де благодея́ниих, и покая́ние нам ра́ди плотска́го неможе́ния до сме́рти дарова́вый: не оста́ви нас окая́нных в лука́вых на́ших дея́ниих умре́ти, ниже́ злонача́льнику и зави́стцу, и губи́телю посме́шство бы́ти. Зри́ши бо Благосе́рде, ели́к у́бо о́наго на нас наве́т и вражда́, ели́ко же и на́ше страстова́ние, и сла́бость, и небреже́ние. Но неоску́дныя Твоя́ бла́гости соде́лай на нас, мо́лим на вся́кий день и час прогне́вающии Тя честны́х и животво́рных за́поведей преступле́нием. И вся у́бо всего́ преше́дшаго живота́ на́шего, и до ны́нешняго часа́ согреше́нная на́ми, в дея́ниих, или́ глаго́ланиих, или́ в помышле́ниих, оста́ви и прости́. Сподо́би же нас, про́чее сконча́ти житие́ в покая́нии, и умиле́нии, и соблюде́нии святы́х Твои́х повеле́ний. А́ще у́бо сла́достию прельсти́вшеся, многообра́зне согреши́хом, или́ ме́рзкими похотьми́ неполе́зными и вре́дными обольсти́вшеся препроводи́хом: а́ще гне́вом и я́ростию подви́гшеся безслове́сною, кого́ бра́та на́шего оскорби́хом, а́ще язы́ком неизбе́жных и стро́потных и кре́пких сете́й объя́хомся: а́ще ко́им чувств на́ших, или́ все́ми, во́лею или́ нево́лею, ве́дуще или́ не ве́дуще, от восхище́ния, или́ поуче́ния безу́мно поползо́хомся: а́ще же лука́выми по́мыслы и су́етными со́весть оскверни́хом: а́ще ли ко́им други́м о́бразом прегреши́хом, от предприя́тия и обы́чая томи́ми зла́го: прости́ нам, и оста́ви вся Всеще́дре, Пребла́же и Многоми́лостиве: и да́руй нам про́чее бо́дрость и си́лу, во е́же твори́ти во́лю Твою́ бла́гу, и благоуго́дну и соверше́нну: да нощна́го и мра́чнаго зла, светови́дным покая́нием преме́ншеся, и я́ко во дни благообра́зно ходя́ще, и очище́ни объяви́мся человеколю́бию Твоему́ недосто́йнии, воспева́юще Тя и велича́юще во ве́ки, ами́нь.

Минея, 13 Октября, Канон Пресвятей Богородице Глас 8 Песнь 1 Ирмос: Колесницегони́теля фарао́ня погрузи́,/ чудотворяй иногда,/ Моисе́йский жезл, крестообра́зно поразив/ и раздели́в море,/ Изра́иля же беглеца́, пешехо́дца, спасе́,/ песнь Бо́гови воспева́юща. Припев: Пресвята́я Богоро́дице, спаси́ на́с. От скверных устен хваление приими́, Всенепорочная,/ якоже прежде Сын Твой, Бог же мой и Господь, прият две ле́пты вдовицы,/ и разрешение прегрешений моих подаждь,/ яко да по долгу величаю Тя. Припев: Пресвята́я Богоро́дице, спаси́ на́с. Ангельское пение подоба́ше Тебе, Матери Божией,/ Творца бо сих родила́ еси странно./ Но и от нас приими́, Владычице, смиренныя сия молитвы,/ да поем Го́сподеви:/ славно просла́вися в нашей немощи. Сла́ва Отцу́ и Сы́ну и Свято́му Ду́ху. Огусте́ша во́ды, огусте́ша и волны посреде́ моря,/ нося́щя Твою, Богомати, икону./ Утверди и мое подви́гшееся сердце на камени заповедей Христовых. И ны́не и при́сно и во ве́ки веко́в. Ами́нь. Помощница и Покровительница была еси, Дево, обители Иверския,/ во́ев Амиры с корабли их в мори погрузивши,/ но потопи́ в пучи́не милосердия Сына Твоего/ вся моя душевныя страсти и безчисленная моя прегрешения. Песнь 3 Ирмос: Утвержде́й в начале Небеса разумом/ и зе́млю на вода́х основавый,/ на камени мя, Христе, заповедей Твоих утверди,/ яко несть свят паче Тебе, Едине Человеколюбче. Припев: Пресвята́я Богоро́дице, спаси́ на́с. Утверди сердце мое во уповании на Тя, Богомати,/ изми́ всякую гордыню и превозношение из помраченнаго ума моего, да вопию́:/ несть свят, яко Господь, и несть праведен, яко Бог наш. Припев: Пресвята́я Богоро́дице, спаси́ на́с. Ты, о Богомати, немощствующия препоясу́еши силою,/ алчущия насыщаеши;/ посети и мою немощь/ и алчущаго и жаждущаго мене насы́ти Животнаго Хле́ба,/ чрез Твою девственную утробу сшедшаго с Небесе на землю. Сла́ва Отцу́ и Сы́ну и Свято́му Ду́ху. Возста́ви, Владычице, от земли́ мене, убогаго,/ и от гно́ища греховнаго воздви́гни, нищаго,/ даждь молитву мне, молящемуся,/ да, велича́я, пою Твое заступление. И ны́не и при́сно и во ве́ки веко́в. Ами́нь. Непло́дствующий мой ум плодоно́сен покажи, Блага́я Дево,/ от непло́дове рождшаяся:/ Ты бо плодоно́сие всех благ явлением иконы Твоея подае́ши. Седален, глас 4 Светлое днесь Заступницы нашея наста́ торжество./ Да взыгра́ется тварь,/ да ликовству́ют человечестии собори,/ созывает бо нас Святая Богородица видети огнено́сную икону Свою,/ лучами милости верныя просвещающую. Темже, радующеся, вопие́м:/ спаси, Госпоже, от глада, огня, меча и бед вся почитающия явление иконы Твоея. Песнь 4 Ирмос: Ты моя крепость, Господи,/ Ты моя и сила,/ Ты мой Бог, Ты мое ра́дование,/ не оставль недра Отча/ и нашу нищету посетив./ Тем с пророком Авваку́мом зову Ти:/ силе Твоей слава, Человеколюбче. Припев: Пресвята́я Богоро́дице, спаси́ на́с. Покры́ Небеса доброде́тель Твоя, Богомати,/ и хвалы Твоея испо́лнися земля,/ но положи́ любовь держа́вную крепости Твоея и на мне, отча́янном. Припев: Пресвята́я Богоро́дице, спаси́ на́с. Уготовля́ющи шествие чу́дней иконе Твоей, даде́ бездна глас свой,/ воздвижеся солнце, и сияние ея яко свет бысть,/ но Ты изшла́ еси на спасение людей,/ спасти́ Твое насле́дие пришла еси. Сла́ва Отцу́ и Сы́ну и Свято́му Ду́ху. Услы́шавше слух пришествия Твоего, иноцы убои́шася;/ уразуме́вше же дела Твоя, ужасо́шася,/ но внегда́ смути́тися души́ моей, милость Твою помяни, Владычице, да взываю:/ слава заступлению Твоему, Богомати. И ны́не и при́сно и во ве́ки веко́в. Ами́нь. Ты еси моя крепость и сила, Богородице,/ Тобою почи́ю в день скорби моея,/ и из страны́ прише́льствия взы́ду Тобою в Небесное наследие,/ и возрадуюся о Господе и Бозе, Спасе моем. Песнь 5 Ирмос: Вску́ю мя отри́нул еси/ от лица Твоего, Све́те незаходимый,/ и покрыла мя есть чужда́я тьма, окаяннаго,/ но обрати́ мя и к свету заповедей Твоих/ пути моя направи, молюся. Припев: Пресвята́я Богоро́дице, спаси́ на́с. Виждь, Чистая, от но́щи у́тренюющия люди паствы Твоея,/ икону Твою Богохва́льную обстоящии,/ разрешения же грехов просящия, и жития исправления, и Божественныя славы причастия:/ не отри́ни убо нас от лица Твоего, Света незаходимаго Мати. Припев: Пресвята́я Богоро́дице, спаси́ на́с. Всею душею и мыслию в па́стве Твоей вси слику́юще,/ псалмы, и пе́сньми духовными, и пением Божественным икону Твою почитают,/ прощения грехов просяще и душ спасения./ Ты же, исцеление наше сущи, сия вся подаждь, Владычице Богоневесто. Сла́ва Отцу́ и Сы́ну и Свято́му Ду́ху. Храм Твой, Дево, яко рай други́й показа́ся ныне,/ яко древо жизни имея икону красоты́ Твоея,/ ю́же вси усердно со благоговением и любовию целующе, взываем:/ Владычице, мир даждь нам,/ Владычице, стяжи́ нас,/ иного бо разве Тебе утешения не ве́мы. И ны́не и при́сно и во ве́ки веко́в. Ами́нь. Ре́ку Тя сладкую и пото́к насыще́ния,/ манну Небесную, изобилие и благодать приснотекущую во обители Твоей живущии стяжавше,/ поют Рождество Твое, Отроковице. Песнь 6 Ирмос: Очисти мя, Спа́се,/ мно́га бо беззакония моя,/и из глубины́ зол возведи, молюся:/ к Тебе бо возопи́х, и услы́ши мя,/ Боже спасения моего. Припев: Пресвята́я Богоро́дице, спаси́ на́с. В скорби се́рдца вопию́ ти, Владычице,/ житейскаго мо́ря потопля́ем бу́рею,/ к Тебе, яко тихому пристанищу, прибегаю:/ возведи от тли живот мой. Припев: Пресвята́я Богоро́дице, спаси́ на́с. Бездна последняя грехов обы́де мя, и исчезает дух мой,/ но простри, Владычице, высокую Твою мышцу/ и, яко Гаврии́ла, и мене, ко Твоей иконе прибега́юща, невредима сотвори. Сла́ва Отцу́ и Сы́ну и Свято́му Ду́ху. Не отри́ни мене до конца от лица Твоего, Мати незаходимаго Света,/ не попусти́ мне погря́знути в пучи́не беззаконий,/ но возведи мене от бла́та страсте́й, да взыдет из нетления живот мой/ и пожру́ Тебе со гла́сом хваления и испове́дания. И ны́не и при́сно и во ве́ки веко́в. Ами́нь. Храм нося́й телесный весь оскверне́н,/ Тебе, Пречистому храму Вечнаго Сло́ва,/ дерзаю в честно́м храме Твоем, пред Твоею святою иконою приносити смиренныя моя молитвы./ Ты же, яко Милостивая, очисти мя Твоим благоутробием. Кондак, глас 8 Аще и в море вве́ржена бысть святая икона Твоя, Богородице,/ от вдовицы, не могу́щия спасти сию от врагов,/ но явилася есть хранительница Афона/ и врата́рница обители Иверския, враги устрашающая/ и в православней Российстей стране/ чтущия Тя от всех бед и напа́стей избавля́ющая. Икос В столпе́ о́гненне явльшуюся Богоматере икону видевше,/ возопи́ша по́стников иверских лицы:/ о Владыко, сподоби нас прияти икону Матере Твоея во утешение странствия нашего;/ ты же, Гаврии́ле, дерзай и вни́ди в море,/ и приими́ во объятия твоя сокровище, нам являемое,/ да будет нам страж неусыпный, покров же, и радость всем христианом,/ и хранительница, от бед и напастей избавляющая. Песнь 7 Ирмос: Божия снизхождения/ огнь устыде́ся в Вавило́не иногда,/ сего ради о́троцы в пещи радованною ногою,/ яко во цве́тнице ликующе, поя́ху:/ благословен еси, Боже отец наших. Припев: Пресвята́я Богоро́дице, спаси́ на́с. Согреши́хом, беззако́нновахом, непра́вдовахом пред Господем,/ но, Владычице моя Богородице,/ яко Благая угаси огнь Его праведнаго гнева Твоим теплым хода́тайством, да поем Ему:/ отец наших Боже, благословен еси. Припев: Пресвята́я Богоро́дице, спаси́ на́с. В пещи́ искушений и бед опаляемыя ороси́, Богомати, струя́ми Твоих щедрот,/ да посрамя́тся врази́ наши и да разумеют вси,/ яко Ты едина еси Владычица Богородица, по всей вселенней славимая. Сла́ва Отцу́ и Сы́ну и Свято́му Ду́ху. Престоле Царя Славы, Честнейшая Херувим, одушевленный хра́ме, в немже всели́ся Господь,/ твердь Небесная, на нейже возсия́ Солнце правды, Христос,/ Тя поем, Богомати, и превозносим во вся веки. И ны́не и при́сно и во ве́ки веко́в. Ами́нь. Ты еси веселие и в пусты́нях живущим,/ Ты еси и стольнаго града утешение и похвала, Дево Марие,/ препетая и превозносимая во веки. Песнь 8 Ирмос: Седмери́цею пещь/ халде́йский мучитель/ Богочестивым неи́стовно разжже́,/ силою же лучшею спасены сия видев,/ Творцу и Избавителю вопия́ше:/ отроцы, благослови́те,/ священницы, воспо́йте,/ людие, превозносите во вся веки. Припев: Пресвята́я Богоро́дице, спаси́ на́с. Поют Тя Ангельския силы, превозносит человеческий род,/ благословя́т Тя вся тварь, Пречистая Дево Богородице./ Приими́ и от Мене, недостойнаго, приносимое Тебе хваление. Припев: Пресвята́я Богоро́дице, спаси́ на́с. Пойте, иноцы Афона,/ благословляй, земле Иверская,/ превозноси, вся стране́ Российская, Благу́ю Владычицу,/ реки чудес от Своея чудотворныя иконы источающую./ Хва́лим, благослови́м, покланяемся Ти, Богородице, пою́ще и превознося́ще во вся веки. Сла́ва Отцу́ и Сы́ну и Свято́му Ду́ху. Подобием иконы Иверския не то́чию святый Афон просвещается,/ но и стольный град Москва украшается,/ от того чудесную помощь прие́мля и источник утешения в нем обретая. И ны́не и при́сно и во ве́ки веко́в. Ами́нь. Еще и страна Новгородская и ини́и гра́ды и ве́си/ подобием Иверския иконы Твоея, Владычице, освяти́шася и чудесы просветишася, вопиюще:/ Господа пойте и превозносите во вся веки. Песнь 9 Ирмос: Ужасеся о сем Небо/ и земли удивишася концы,/ яко Бог явися человеком пло́тски/ и чрево Твое бысть пространнейшее Небес./ Тем Тя, Богородицу,/ Ангелов и человек чиноначалия величают. Припев: Пресвята́я Богоро́дице, спаси́ на́с. Тайна глубины́ Рождества Твоего ум Ангельский ужасает, Дево,/ и пречистая икона Твоя демоны прогоняет,/ не терпя́ще бо взирати на силу ея, бегают и исчезают./ Мы же той любезно покланя́емся и облобыза́ем и Тя, Богородицу, величаем. Припев: Пресвята́я Богоро́дице, спаси́ на́с. Прииди́те вси, поклони́мся, припаде́м и возвеличим Божию Матерь,/ призре́вшую на нас, смиренных, алчущия исполняющую благ/ и положившую с нами завет милости во явлении Своея дивныя иконы. Сла́ва Отцу́ и Сы́ну и Свято́му Ду́ху. Богородице Дево, упование христианом,/ проба́ви и нашему роду милости Твоя, бывшая отцем нашим,/ покрый и соблюди нас от всякаго зла. И ны́не и при́сно и во ве́ки веко́в. Ами́нь. О Всемилостивая христианом Помощнице,/ не может Тя воспети достойно язык человеческий и Ангельский,/ яко всея твари честне́йшую и земных сла́внейшую,/ но приими́ милостивно сие приносимое Тебе от нас моление/ и спасай нас всегда, на Тя бо упование возложи́хом. Светилен Икону Твою всечестну́ю прии́м Гаврии́л во объятия, вопия́ше Тебе, Владычице:/ о сладкая Мати Царя Христа,/ бу́ди покров Твоей обители,/ радость же всем Христианом и Споручница жизни вечныя.

Во плоти яко Ангел на земли явился еси,/ и пощением был еси яко древо насажденное,/ водою воздержания добре возрастився,/ и теченьми твоих слез скверну омыв:/ сего ради явился еси// приятелище Божественное, Авраамие, Духа.

Светильники светлыя явльшеся,/ доброту земную мудренно оставльше,/ и идоша во внутреннюю пустыню, Амфилохие, Макарие, Тарасие и Феодосие,/ смирение и всякую добродетель извыкше,/ и обретоша безсмертие,/ постом и бдением и прочим воздержанием себе приносяще Христу,/ и ныне на Небесех Престолу Христову предстоите./ Молите, отцы Богомудрии, Амфилохие, Макарие, Тарасие и Феодосие,/ умирити мир и спастися душам поющих вас,/ и согрешений оставление даровати/ чтущим всечестную память вашу.

Божественною любовию возгоревся,/ мирская пристрастия от души отвергше,/ тесным путем постничества во след Христа/ невозвратным умом шествовал еси, Арсение всеблаженне,/ от Негоже и мзду трудов твоих на Небесех восприим,/ поминай нас, чтущих святую память твою и вопиющих:/ слава Давшему ти крепость,/ слава Венчавшему тя,/ слава Действующему тобою всем исцеления.

Ограды живоносныя твоея пажити,/ пастырски невредимо стадо соблюл еси/ и явился еси высотою дел велик, новый Иларионе,/ по благочестии многи муки и скорби прием:/ тем во всерадостный живот вселився Горняго Сиона,// моли за ны, преподобне.

Богоноснаго Антония ревнуя смиренномудрию,/ аки некиим врачеством зелием снедным/ исцелял еси болящия, преподобне Агапите,/ тем и врача неверна уверив,/ наставил еси на путь спасения./ Уврачуй и наша болезни/ и молися Господеви о воспевающих тя.

Евангельския любве служителя,/ правды Божия ревнителя,/ чистоты душевныя и телесныя хранителя,/ веру Христову исповедавша в страданиих,/ праведнаго Иоанна ублажаем и почитаем днесь/ и, житием его назидающеся, поем:/ радуйся, молитвенниче наш, от Бога прославленный.

Звезду пресветлую,/ богоразумия светом просвещшаго языки/ апостола Христова Андроника восхвалим/ и с ним во благовестии потрудившуюся Иунию премудрую, вопиюще:// молите Христа Бога непрестанно о всех нас.