Тропари, кондаки и величания

Днесь вельми хвалится царствующий град Москва,/ имея в себе праведныя твоя мощи,/ благоверне царевиче Димитрие,/ яко цвети благоуханнии,/ пребываеми во святем храме,/ просвещение подают душам и телом нашим./ Тем радостно тя восхваляем,/ и честное пренесение мощей твоих верно почитаем, и молим тя:/ моли Христа Бога// даровати нам велию милость.

Воспоем днесь Благодетеля всех Бога,/ прославльшаго в России Иулианию Богомудрую,/ да молитвами ея подаст душам нашим/ грехов оставление и велию милость.

Благочестно в законе поживши/ и благими делы украсившися,/ яко крепкий адамант, явися,/ целомудренная святая благоверная княгине Иулиание,/ тленную славу и добротство телесное презревши,/ злокозненнаго врага победила еси,/ целомудрия ради мученическую смерть прияла еси./ Сего ради от Христа Бога нетленным и вечным венцем венчавшися,/ ныне с лики мученик ликуеши/ и нам велия чудеса, приходящим ко гробу твоему,/ обильно источавши./ Темже ти вопием:/ молися Христу Богу о всех нас,/ верою и любовию страдания твоя почитающих.

Победы венец с Небесе,/ о Никифоре преславне,/ яко прием от Бога,/ спасай верою почитающия тя,// яко священноначальника Христова и учителя.

Иже первороднаго Царства отец,/ правоверный службы истинный пастырь бысть, преподобне,/ Царя града, Церкви всех матере явися светильник, Никифоре,/ моли Христа Бога,/ да спасет души наша.

Правило веры и образ кротости,/ воздержания учителя/ яви тя стаду твоему/ Яже вещей Истина:/ сего ради стяжал еси смирением высокая,/ нищетою богатая,/ отче Никифоре,/ моли Христа Бога// спастися душам нашим.

Морскую плавая пучину куплею,/ от востока тщался еси к северу,/ но Богу призвавшу тя,/ якоже Матфей мытницу, ты же куплю оставль,/ и Тому последовал еси кровию мучения,/ временными искупив непроходимая,/ и венец приял еси непобедимый.

Житие на земли добре окормляя, страдальче,/ милостынями, и частыми молитвами, и слезами,/ паки же ко страданию мужески устремився,/ персское обличил еси нечестие./ Темже Церкве был еси утверждение/ и христиан похвало,/ Иоанне приснопамятне.

Премудростию Божественных твоих словес, Иустине,/ Церковь Божия вся украсившися,/ жития твоего светлостию мир освещает,/ излияния же ради крове венец прием/ и со Ангелы предстоя Христу,// моли непрестанно о всех нас.

Все твое умное желание к Богу вперив,/ Тому невозвратно от души последовал еси, в пустыню вселився,/ и, тамо ангельски пожив, многим путь был еси ко спасению;/ сего ради и Христос тебе прослави и даром чудес обогати./ Темже вси вопием ти:/ радуйся, Дионисие преподобне, пустынный жителю.

Божественною любовию от юности распалаемь,/ Дионисие преподобне,/ вся, яже в мире красная, возненавидев,/ Христа единаго возлюбил еси/ и сего ради во внутреннюю пустыню вселился еси,/ со зверьми живый, весь Христови./ Отонудуже и Всевидящее Око, твоя труды видев,/ даром чудес и по преставлении обогатил тя есть./ Темже вопием ти:/ моли непрестанно о всех нас,/ честную память твою присно/ в песнех почитающих.

Мученицы Твои, Господи,/ во страданиих своих венцы прияша нетленныя от Тебе, Бога нашего:/ имуще бо крепость Твою,/ мучителей низложиша,/ сокрушиша и демонов немощныя дерзости./ Тех молитвами// спаси души наша.

Врач сый изряден, чудне,/ являя несумненную твою веру,/ обличая же армениново неверие/ и приводя его к благочестию,/ себе, близ смерти бывшу,/ испросил еси от Бога продолжение живота/ и, сим чудом того уверив,/ привел еси Христови,/ Емуже в веселии предстоя,/ молися о нас, преподобне.

Богоноснаго Антония ревнуя смиренномудрию,/ аки некиим врачеством зелием снедным/ исцелял еси болящия, преподобне Агапите,/ тем и врача неверна уверив,/ наставил еси на путь спасения./ Уврачуй и наша болезни/ и молися Господеви о воспевающих тя.

Иже по Христе усердно подвизався,/ в сединах доблих мужество стяжа,/ мучениче Ермее,/ беззаконных злоумышления поправ/ Христовою силою,/ от чаровных напоений невредим пребысть, зовый:// Бог есть со мною, и никтоже на мя.

Мученик Твой, Господи, Ермий/ во страдании своем венец прият нетленный от Тебе, Бога нашего:/ имеяй бо крепость Твою,/ мучителей низложи,/ сокруши и демонов немощныя дерзости./ Того молитвами// спаси души наша.

Яко звезда, возсиял еси вселенней,/ светом просияв солнца, блаженне,/ всесветлаго Павла,/ мира просвещшаго концы,/ сего ради тя чтим, Ермие.

Апостоле святый Ермие,/ моли Милостиваго Бога,/ да прегрешений оставление/ подаст душам нашим.

Яко угодник Божий верный,/ по Христове Церкви ревностию разжегся,/ бразды Валентовы удержав,/ пророчески тому о затворении Церкве пагубную смерть предрекл еси, преподобне./ Темже присно моли о нас, чтущих тя, Исаакие преподобне.

Апостол проповедание и отец догматы/ Церкви едину веру запечатлеша,/ яже и ризу носящи истины,/ исткану от еже свыше богословия,// исправляет и славит благочестия великое таинство.