Молитвы

Минея, 25 Января, Канон Глас 4 Песнь 1 Ирмос: Триста́ты кре́пкия, Рожде́йся от Де́вы, безстра́стия во глубине́, души́ трича́стное потопи́, молю́ся, да Тебе́, я́ко в тимпа́не, во умерщвле́нии телесе́ побе́дное воспою́ пе́ние. Припев: Преподо́бне о́тче Моисéе, моли́ Бо́га о на́с. Иису́су: Отве́рзи устне́ мои́, Го́споди, и просвети́ смы́сл мо́й омраче́нный, разреши́ ю́зу язы́ка моего́, я́ко да све́тле и ра́достне восхвалю́ до́бляго святи́теля Моисе́я, Твоего́ уго́дника. Припев: Преподо́бне о́тче Моисéе, моли́ Бо́га о на́с. А́ще и не красно́ приноси́мое тебе́ пе́ние, но от усе́рдия приими́, о́тче, я́коже две́ ца́ты вдови́цы прия́т Христо́с, и не лише́на мя́ сотвори́ твои́х даро́в, и согреше́нием мои́м испроси́ проще́ние твои́ми к Бо́гу моли́твами. Сла́ва Отцу́ и Сы́ну и Свято́му Ду́ху. Блага́го Бо́га подража́тель бы́л еси́, преблаже́нне Моисе́е, милосе́рдие к ни́щим и любо́вь нелицеме́рну ко все́м стяжа́в, помина́я и де́лом показу́я рече́нная: возлю́биши и́скренняго твоего́, я́ко са́м себе́. И ны́не и при́сно и во ве́ки веко́в. Ами́нь. Богородичен: Всепе́тая Богоро́дице, Я́же Всеми́лостиваго Бо́га ро́ждшая, ду́шу мою́, омраче́нную бесо́вскими прило́ги, просвети́, Всенепоро́чная, и ума́ моего́ я́звы уврачу́й, и заступи́ мя́, я́ко да по достоя́нию сла́влю Тя́. Песнь 3 Ирмос: Лу́к си́льных изнемо́же, и немощству́ющии препоя́сашася си́лою, сего́ ра́ди утверди́ся в Го́споде се́рдце мое́. Припев: Преподо́бне о́тче Моисéе, моли́ Бо́га о на́с. Го́спода своего́ во́лю сотвори́в, сугу́б тала́нт приобре́л еси́, сего́ ра́ди благи́й о́н слы́шиши гла́с: до́брый ра́бе и ве́рный, вни́ди в ра́дость Го́спода твоего́. Припев: Преподо́бне о́тче Моисéе, моли́ Бо́га о на́с. Душе́вную чистоту́ стяжа́в, без нея́же никто́же у́зрит Го́спода, Моисе́е, о́тче на́ш, стра́сти окая́нныя души́ моея́ и сла́сти теле́сныя утоли́ моли́твами твои́ми. Сла́ва Отцу́ и Сы́ну и Свято́му Ду́ху. Христу́ Бо́гу производя́щу тя́ на лу́чшая, мирска́я вся́ оплева́л еси́ и, благи́й яре́м на ра́мо взе́м, усе́рдно Тому́ после́довал еси́. И ны́не и при́сно и во ве́ки веко́в. Ами́нь. Богородичен: Живо́т ро́ждшая составны́й, Де́во Всенепоро́чная, се́рдца моего́ стру́пы исцели́ хода́тайствы Твои́ми, е́же к Сы́ну Твоему́, Богоблагода́тная. Седален, глас 1 Разу́мнаго адама́нта, до́бляго святи́теля, Моисе́я днесь, ве́рнии, почти́м,/ све́тло пра́зднующе всечестну́ю па́мять его́,/ той бо моли́твами свои́ми к Бо́гу/ от свои́х многоцеле́бных моще́й подава́ет нам неоску́дно исцеле́ния исто́чник,/ велегла́сно нас науча́я Христо́ви вопи́ти:/ прославля́яй святы́х Твои́х, Го́споди, сла́ва Тебе́. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Спасе́ния на́шего Хода́таица Ты яви́лася еси́, Всенепоро́чная,/ ду́шу мою́ окая́нную изба́ви бесо́вскаго мучи́тельства/ и пода́ждь ми прегреше́ний очище́ние:/ ра́зве бо Тебе́, раби́ Твои́, не име́ем помо́щницы. Песнь 4 Ирмос: Любве́ ра́ди, Ще́дре, Твоего́ о́браза, на Кресте́ Твое́м ста́л еси́, и раста́яшася язы́цы: Ты́ бо еси́, Человеколю́бче, кре́пость моя́ и хвале́ние. Припев: Преподо́бне о́тче Моисéе, моли́ Бо́га о на́с. Зе́льных ра́ди поще́ний, и моли́тв непреста́нных, и чистоты́ серде́чныя всели́ся в тя́ Христо́с, преблаже́нне святи́телю Моисе́е, на Него́же наде́жду всю́ возложи́л еси́. Припев: Преподо́бне о́тче Моисéе, моли́ Бо́га о на́с. Земна́я отри́нув, небе́сная насле́довал еси́, от си́лы бо в си́лу восходя́, к преми́рному Ца́рствию пресели́лся еси́, иде́же терпе́ния ра́ди твоего́ угото́вася ти́ вене́ц нетле́нный и ве́чное весе́лие. Сла́ва Отцу́ и Сы́ну и Свято́му Ду́ху. Изволе́нием Бо́жиим и избра́нием по́стников сосло́вия па́стырь поставля́ешися и наста́вник, и́же ко спасе́нию, вводя́ ста́до твое́ во огра́ду небе́сную. И ны́не и при́сно и во ве́ки веко́в. Ами́нь. Богородичен: И ражда́еши, и де́вствуеши, Де́во Всенепоро́чная, иску́са бо му́жеска не прие́мши, родила́ еси́ Бо́га воплоще́нна, Его́же моли́ о пою́щих Тя́. Песнь 5 Ирмос: Ты́, Го́споди, мо́й Све́т, в ми́р прише́л еси́, Све́т Святы́й, обраща́яй из мра́чна неве́дения ве́рою воспева́ющия Тя́. Припев: Преподо́бне о́тче Моисéе, моли́ Бо́га о на́с. Кре́пко вооружи́вся на неви́димыя враги́, я́коже тве́рдый адама́нт, вы́я и́х сокруши́л еси́, го́рдостная шата́ния утоли́л еси́, Го́споду тя́ прославля́ющу. Припев: Преподо́бне о́тче Моисéе, моли́ Бо́га о на́с. От лука́вых бесо́в ла́яния ста́до твое́ сохраня́я, и́стиннаго Па́стыря — Христа́ — и́стинный учени́к бы́л еси́, святи́телю Моисе́е, сего́ ра́ди избра́нием первосвяти́теля Петра́ наме́стник блаже́ннаго святи́теля Иоа́нна в це́ркви Прему́дрости Бо́жия устроя́ешися. Сла́ва Отцу́ и Сы́ну и Свято́му Ду́ху. Ми́лостивно наказу́я, о́тче, о Христе́ поруче́нное тебе́ ста́до, упа́сл еси́ на па́житех зако́на живоно́снаго: тобо́ю бо о́браз показа́л еси́, возвеща́я пу́ть ко спасе́нию и е́же от злы́х премене́нию. И ны́не и при́сно и во ве́ки веко́в. Ами́нь. Богородичен: На́шего спасе́ния Хода́таица Ты́ яви́лася еси́, Всенепоро́чная, ду́шу мою́ окая́нную изба́ви бесо́вскаго мучи́тельства и пода́ждь прегреше́нием очище́ние: ра́зве бо Тебе́, раби́ Твои́, не и́мамы помо́щницы. Песнь 6 Ирмос: Да не погрузи́т мене́ бу́ря водна́я, ниже́ пожре́т мене́ глубина́, отве́ржен бо е́смь во глубины́ се́рдца морска́го зо́л мои́х. Те́м зову́, я́ко Ио́на: да взы́дет от тли́ зо́л живо́т мо́й к Тебе́, Бо́же. Припев: Преподо́бне о́тче Моисéе, моли́ Бо́га о на́с. Зли́и челове́цы приидо́ша ко оби́тели, в не́йже твое́ честно́е те́ло положе́но бы́сть, святи́телю Моисе́е, не ве́дуще, я́ко ты́ заступа́еши ста́до твое́ и по отше́ствии твое́м от жития́ твоего́. Ты́ же, еди́наго коего́ждо и́х, ми́лостивно наказа́в, на пу́ть пра́вый наста́вил еси́. Припев: Преподо́бне о́тче Моисéе, моли́ Бо́га о на́с. Почто́ совеща́етеся, зли́и, ка́ко дерзну́сте умы́слити зла́я на оби́тель мою́? — святи́тель Моисе́й глаго́лаше. — Или́ не ве́сте си́лы непобеди́маго воево́ды Госпо́дня, вели́каго арха́нгела Михаи́ла? А́ще не пока́етеся, то́ вси́ зде́ лю́те поги́бнете. — Они́ же, с пла́чем и слеза́ми пока́явшеся тебе́ и ви́девше тя́, моля́щася о ни́х, Бо́гу хвалу́ возсыла́ху. Сла́ва Отцу́ и Сы́ну и Свято́му Ду́ху. Ра́зум от Бо́га прии́м, благочести́выя па́че приводя́ к благоразу́мию, нечести́вым же уста́ загражда́я, Моисе́е святи́телю: го́рдостнаго бо епи́скопа, бы́вша во оби́тели твое́й и уничижи́вша тя́, ума́ отъя́тием смири́в, во святи́тельстве непотре́бна сотвори́л еси́. И ны́не и при́сно и во ве́ки веко́в. Ами́нь. Богородичен: Святе́йшая херуви́м и серафи́м яви́лася еси́, Пречи́стая, Зижди́теля бо и́х несказа́нно родила́ еси́, не опа́льшися огне́м Божества́, и ны́не блажа́т Тя́ вси́ ро́ди, я́коже прорекла́ еси́, Всепе́тая. Кондак, глас 3 Я́ко венце́м пресве́тлым украси́вся дне́сь, вели́кий Новгра́д лику́ет в па́мять па́стыря своего́ и учи́теля, и, я́ко диади́му ца́рскую возложи́вши, честна́я о́на оби́тель све́тло ра́дуется: просла́ви бо тя́ Бо́г, уго́дника Своего́, и прояви́ после́днему ро́ду на́шему цельбоно́сныя мо́щи твоя́, святи́телю Моисе́е, Це́рковь же Бо́жия весели́тся, созыва́ющи и́нок сосло́вие велегла́сно вопи́ти: ра́дуйся, гра́ду твоему́ и оби́тели похвало́ и всея́ Росси́йския страны́ пресве́тлый свети́льниче. Икос Я́ко из мра́чна о́блака пресве́тлая звезда́ возсия́, та́ко ны́не от вели́каго Новагра́да небе́снаго Ца́рствия граждани́н произы́де, вели́кий Моисе́й, и все́х озари́ чуде́с луча́ми, и́же с ве́рою приходя́щих к цельбоно́сному его́ гро́бу и любе́зно целу́ющих ра́ку моще́й его́, ю́же и мы́, обстоя́ще, дне́сь серде́чною любо́вию ве́рно возопии́м: ра́дуйся, я́ко от мла́дости Бо́гу порабо́тал еси́; ра́дуйся, я́ко мирска́я вся́ оплева́л еси́; ра́дуйся, я́ко Христо́в яре́м на ра́мо взе́м, усе́рдно Тому́ после́довал еси́; ра́дуйся, я́ко вруче́нное тебе́ ста́до до́бре упа́сл еси́; ра́дуйся, я́ко престо́лом наме́стник бы́в блаже́ннаго Иоа́нна, того́ стопа́м после́довал еси́; ра́дуйся, Прему́дрости Бо́жия престо́л украси́вый; ра́дуйся, чудесы́ гра́д сво́й озари́вый; ра́дуйся, ни́щих и а́лчущих пита́телю; ра́дуйся, сирота́м печа́льным и вдови́цам утеше́ние; ра́дуйся, я́ко спа́сл еси́ му́жа, от потопле́ния водна́го погря́знути уже́ хотя́ща; ра́дуйся, я́ко того́же сохрани́л еси́ от иноплеме́нных разбо́йник; ра́дуйся, засту́пниче гра́ду твоему́ и все́м, живу́щим в не́м, и моли́твенниче те́плый ко Влады́це Христу́ Бо́гу; ра́дуйся, па́стырю до́брый, во все́м подража́яй Влады́це твоему́, Его́же моли́ о чту́щих святу́ю па́мять твою́, да вси́ в весе́лии се́рдца вопие́м ти́: ра́дуйся, святи́телю Моисе́е, вели́кому Новугра́ду похвало́ и всея́ Росси́йския земли́ пресве́тлый свети́льниче. Песнь 7 Ирмос: Спасы́й во огни́ авраа́мския Твоя́ о́троки и халде́и уби́в, я́же Пра́вда пра́ведно уловля́ше, препе́тый Го́споди, Бо́же оте́ц на́ших, благослове́н еси́. Припев: Преподо́бне о́тче Моисéе, моли́ Бо́га о на́с. Терпе́ния ра́ди твоего́ и му́жества возлюби́ тя́ И́же над все́ми су́щий Бо́г и чудесы́ обогати́л тя́ е́сть, пою́ща: препе́тый Го́споди, Бо́же оте́ц, благослове́н еси́. Припев: Преподо́бне о́тче Моисéе, моли́ Бо́га о на́с. Устроя́ет тя́ Госпо́дь Це́ркви Своея́ архиере́я, слове́сным овца́м па́стыря всеизря́дна, ты́ же, прему́дре Моисе́е, святи́тельства па́ству прии́м, в бо́льшия по́двиги вда́лся еси́, Христо́ви поя́: препе́тый Го́споди, Бо́же оте́ц, благослове́н еси́. Сла́ва Отцу́ и Сы́ну и Свято́му Ду́ху. Уже́ погря́знути хотя́ше во глубине́ во́дней, его́же ты́, святи́телю, а́бие от потопле́ния спа́сл еси́, под ру́це подъе́мля и держа́, до́ндеже па́ки прия́ша его́ в ладию́. Та́кожде и мене́, погря́знути хотя́ща в ти́не беззако́ний мои́х, спаси́, и соблюди́, и умоли́ Влады́ку Христа́, да прии́мет мя́ в ве́чныя жи́зненныя кро́вы, пою́ща: препе́тый Го́споди, Бо́же оте́ц, благослове́н еси́. И ны́не и при́сно и во ве́ки веко́в. Ами́нь. Богородичен: Фарисе́йскаго бу́яго киче́ния ненави́дети ми́ сотвори́, Богоро́дице, и мытаре́ву смире́нию поревнова́ти сподо́би, умоли́, Его́же родила́ еси́, Христа́, да просвети́т ду́шу мою́ омраче́нную и лю́таго паде́ния изба́вит, я́ко да во явле́нии сла́влю Тя́, Всенепоро́чная, Сы́ну Твоему́ вопия́: препе́тый Го́споди, Бо́же оте́ц, благослове́н еси́. Песнь 8 Ирмос: Ру́це распросте́р, Дании́л, льво́в зия́ния в ро́ве затче́; о́гненную же си́лу угаси́ша, доброде́телию препоя́савшеся, благоче́стия рачи́тели, о́троцы, взыва́юще: благослови́те, вся́ дела́ Госпо́дня, Го́спода. Припев: Преподо́бне о́тче Моисéе, моли́ Бо́га о на́с. Хра́м Свято́му Ду́ху, святи́телю Моисе́е, сотвори́л, и са́м во оби́тель Тому́ бы́л еси́, те́мже и на́с моли́твами твои́ми селе́ния Ему́ соде́лай и от вся́ких напа́стей и озлобле́ния изба́ви, я́ко да пое́м в ра́дости се́рдца: благослови́те, вся́ дела́ Госпо́дня, Го́спода. Припев: Преподо́бне о́тче Моисéе, моли́ Бо́га о на́с. Отве́рзи на́м ра́йский вхо́д моли́твами твои́ми, святи́телю Моисе́е, и не пре́зри на́с в ско́рбех мно́зех, тебе́ бо засту́пника гра́ду твоему́ живу́щии в не́м, и́мамы, я́ко да в ра́дости се́рдца пое́м: благослови́те, вся́ дела́ Госпо́дня, Го́спода. Сла́ва Отцу́ и Сы́ну и Свято́му Ду́ху. Царю́ Небе́сному Влады́це и Бо́гу моля́ся, гряду́щаго ку́плю де́яти от потопле́ния и от разбо́йник спа́сл еси́, по́мощь име́я и заступле́ние Бо́жия Ма́тере. То́й бо не ве́дяше, кто́ е́сть спаса́яй его́, до́ндеже ты́, святи́телю Моисе́е, яви́вся ему́ в то́нце сне́, сказа́л еси́, я́ко тобо́ю сотвори́ Бо́г избавле́ние ему́, и запове́дал еси́ сотвори́ти покро́в на честне́й ра́це твое́й. О́н же в ра́дости повеле́нная тобо́ю сотвори́, поя́ Го́сподеви: благослови́те, вся́ дела́ Госпо́дня, Го́спода. И ны́не и при́сно и во ве́ки веко́в. Ами́нь. Богородичен: Чи́стая и Сла́вная Влады́чице, Ма́ти Бо́га Вы́шняго, щедро́ты низпосли́ на́м от неистощи́мых сокро́вищ Твои́х и пода́ждь в ну́ждах терпе́ние, да в весе́лии пое́м: благослови́те, вся́ дела́ Госпо́дня, Го́спода. Песнь 9 Ирмос: Ка́мень нерукосе́чный от несеко́мыя горы́, Тебе́, Де́во, краеуго́льный отсече́ся — Христо́с, совокупи́вый разстоя́щаяся естества́. Те́м, веселя́щеся, Тя́, Богоро́дице, велича́ем. Припев: Преподо́бне о́тче Моисéе, моли́ Бо́га о на́с. Ше́ствовати на́с сотвори́ во сле́д сохрани́вших за́поведи Бо́га на́шего, и спаси́ моли́твами твои́ми, святи́телю Моисе́е, па́стырю и учи́телю на́ш, от все́х зо́л, находя́щих на ны́, и наста́ви на пу́ть живота́, моля́ся о на́с Человеколю́бцу Бо́гу и Спа́су ду́ш на́ших. Припев: Преподо́бне о́тче Моисéе, моли́ Бо́га о на́с. Ще́драго Человеколю́бца Бо́га моли́ о на́с, па́стырю на́ш до́брый, тезоимени́тый Богови́дцу, святи́телю Моисе́е: и́мать бо послу́шати Ма́тере Своея́, Засту́пницы гра́да на́шего, и твои́х пречестны́х моле́ний и поми́лует на́с. Сла́ва Отцу́ и Сы́ну и Свято́му Ду́ху. Ле́гко, я́коже оре́л крило́ма, на небе́сную высоту́ дости́гл еси́ и терпе́ния и чи́стаго ра́ди жития́ твоего́ по́честь прия́л еси́ от Мздовоздая́теля, и ны́не Госпо́дь яви́ на́м цельбоно́сныя мо́щи твоя́, точа́щия исцеле́ния с ве́рою приходя́щим. Те́мже мо́лим тя́, святи́телю Моисе́е: помяни́ на́с, и́же ве́рою чту́щих тя́ и достодо́лжно ублажа́ющих тя́. И ны́не и при́сно и во ве́ки веко́в. Ами́нь. Богородичен: Из пречи́стых ложе́сн Твои́х про́йде у́мное Со́лнце, Богоро́дице, просвеща́я и́же во тме́ седя́щих, омраче́нныя неве́дением, и приводя́ к све́ту богоразу́мия, страда́вшим Его́ ра́ди нетле́нныя венцы́ подава́я и ве́чное ра́дование. Его́же моли́ о на́с, Влады́чице, не лиши́ти на́с десна́го стоя́ния в ча́с испыта́ния, да Тя́ вси́ велича́ем. Светилен Ско́ро предвари́, святи́телю Моисе́е, ве́рным побо́рниче, и Христа́ Бо́га умоли́ покори́ти под но́зе Импера́тору на́шему иноплеме́нныя язы́ки, да навы́кнут сла́вити Святу́ю Тро́ицу; на́с же, чту́щих твою́ святу́ю па́мять, спаса́й от вся́каго зла́. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Всеблага́я Влады́чице,/ я́же Ще́драго Бо́га пло́тию ро́ждшая,/ поми́луй нас, озло́бленных прило́ги лука́ваго,/ и устра́ншихся за́поведей Сы́на Твоего́ и Бо́га на́шего,/ и греху́ порабо́тивших себе́,/ Свои́м хоте́нием привлецы́, Пречи́стая, к повеле́нием Бо́жиим/ и не лиши́ нас ве́чнаго наслажде́ния моли́твами Твои́ми.

глас 4 Пе́снь 1. Ирмо́с: Триста́ты кре́пкия, Рожде́йся от Де́вы, безстра́стия во глубине́, души́ трича́стное потопи́, молю́ся, да Тебе́, я́ко в тимпа́не, во умерщвле́нии телесе́ побе́дное воспою́ пе́ние. Припев: Святы́й блажéнный óтче Макси́ме, моли́ Бо́га о на́с. Пода́ждь ми́, Христе́, Ду́ха Твоего́ благода́ть, да по достоя́нию воспою́ пе́снь но́ву от усте́н мои́х в па́мять Твоего́ уго́дника Макси́ма преблаже́ннаго. И́же кре́ст на ра́мо взе́м, блаже́нне, и жела́емаго ти́ оте́чества дости́г, го́рняго Иерусали́ма, и в не́м со а́нгелы лику́еши, юро́де прему́дрый, моли́ся о на́с, чту́щих па́мять твою́ всечестну́ю. Бу́йством премени́в мирско́е мудрова́ние, о́тче, непокрове́нно те́ло име́я, блаже́нне, покры́й на́ша стра́сти, богому́дре, да твои́ми моли́твами от бе́д избавля́емся. Богоро́дичен: Успи́ души́ моея́ свире́пую во́лну, я́ко мно́жество прегреше́ний, искуше́ний и печа́ли, Влады́чице, воста́ша на мя́, но Сама́ мя спаси́. Пе́снь 3. Ирмо́с: Лу́к си́льных изнемо́же, и немощству́ющии препоя́сашася си́лою, сего́ ра́ди утверди́ся в Го́споде се́рдце мое́. Умо́м ве́сь к преми́рным взе́мся, блаже́нне, юро́д прозва́лся еси́, о́тче, и на́с, умовре́дных, сохрани́, да неврежде́ни пребу́дем козньми́ чужда́го, и тебе́ ублажа́ем, Макси́ме преблаже́нне. Ва́ром со́лнечным опаля́емь, о́тче, и на́с, пали́мых грехо́вными страстьми́, ороси́ твои́ми моли́твами, да непреста́нно воспева́ем па́мять твою́, Макси́ме прехва́льне. Зимо́ю томи́мь, свя́те, небре́гл еси́ о те́ле пе́рстнем и ны́не наслажда́ешися ра́йския добро́ты. И на́м проси́ оставле́ния, озло́бленным прило́ги чужда́го, да тебе́ ублажа́ем, о́тче богому́дре. Богоро́дичен: Я́же еди́на в напа́стех и ско́рбех защища́ющи, под кро́в Тво́й, Пречи́стая, прибе́гша те́пле, приими́, я́ко Преблага́я, е́же от се́рдца моего́ моле́ние. Седа́лен, гла́с 8: Све́том Боже́ственным озаря́емь, в пу́ть, веду́щий к Боже́ственным сия́нием, ходи́л еси́ ве́рно, о́тче преподо́бне, и вра́жиих отбе́гл еси́ прило́г, и сы́н све́та и дне́ яви́лся еси́, Макси́ме богоблаже́нне. Сла́ва: О́тче богому́дре и преблаже́нне Макси́ме, кра́сная ми́ра сего́ я́ко уме́ты вмени́в, ве́сь, умо́м измени́вся, изме́ншемуся на́с ра́ди Христу́ после́довал еси́, и юро́д Его́ ра́ди наре́клся еси́ и от неразу́мных ско́рби претерпе́л еси́. И ны́не о на́с моли́ся, па́мять твою́ ве́рно сла́вящих, прехва́льне. Богоро́дичен: Предста́тельнице ве́рных, Богороди́тельнице, скорбя́щих ра́досте и пла́чущих вели́кое утеше́ние, от чре́ва Твоего́, Де́во, всесвята́го преесте́ственно Ро́ждшагося непреста́нно моли́ с Макси́мом преблаже́нным изба́вити на́с в ча́с испыта́ния лю́таго осужде́ния. Пе́снь 4. Ирмо́с: Любве́ ра́ди, Ще́дре, Твоего́ о́браза на Кресте́ Твое́м ста́л еси́, и раста́яшася язы́цы: Ты́ бо еси́, Человеколю́бче, кре́пость моя́ и хвале́ние. Любве́ сро́дников отре́клся, блаже́нне, любо́вию Христо́вою уязвля́емь, и пло́ть, я́коже рабы́ню, ду́хови покори́в, над страстьми́ ца́рь показа́лся еси́, о́тче. И на́с, плене́нных грехо́вными страстьми́, свободи́, богому́дре. Стезе́ю приско́рбнаго пути́ ше́ствовав, блаже́нне, и простра́ннаго жили́ща доше́д, с безпло́тными ликовствова́ти сподо́бился еси́, о́тче богоно́се. Вла́сть прии́м на дусе́х нечи́стых, о́тче Макси́ме, си́х от челове́к прогоня́еши, вся́кими неду́ги боля́щия исцелева́еши, с ве́рою приходя́щия к ра́це моще́й твои́х. Богоро́дичен: Ми́лости Твое́й сподо́би мя́, благоми́лостивное Сло́во ро́ждши, и ны́не, Влады́чице, прибега́юща мя́ к Тебе́ спаси́. Пе́снь 5. Ирмо́с: Возсия́й ми́, Го́споди, све́т повеле́ний Твои́х, я́ко к Тебе́ ду́х мо́й у́тренюет и пое́т Тя́: Ты́ бо еси́ Бо́г на́ш, и к Тебе́ прибега́ю, Царю́ ми́ра. Юро́д яви́лся еси́ изволе́нием, о́тче, и о́ному ди́вному Андре́ю после́довал еси́. И я́коже то́й ви́де духо́вныма очи́ма Богоро́дицу на возду́се, за ми́р моля́щуюся, ты́ же ны́не зри́ши Святу́ю Тро́ицу, моля́ся непреста́нно о душа́х на́ших. Ревни́тель бы́в ди́вному Симео́ну, пусты́ню и све́рстника оста́вльшему, и юро́дство на ся́ возложи́вшему, и го́рния митропо́лии дости́гшу, с ни́мже ны́не и ты́ наслажда́ешися, и на́с помина́й, пра́зднующих па́мять твою́ всечестну́ю. Вторы́й Твердисло́в в Росси́и показа́лся еси́, о́тче Макси́ме, непокрове́но те́ло име́я, покры́й на́с покро́вом моли́тв твои́х, да не уязви́т на́с уязви́вый пра́отца преступле́нием. Богоро́дичен: От ко́рене исто́чник и вину́ нетле́ния, Тя́, Де́во, вси́ ве́рнии хвала́ми почита́ем: Ты́ бо Ипоста́сное на́м Безсме́ртие родила́ еси́. Пе́снь 6. Ирмо́с: Очище́ние на́м, Христе́, и спасе́ние, Влады́ко, возсия́л еси́ от Де́вы, да я́ко проро́ка от зве́ря морска́го пе́рсей Ио́ну, от тли́ исхити́ши всего́ Ада́ма всеро́дна па́дшаго. На безстра́стия го́ру возше́д доброде́тельми, на враги́ храбо́рник чу́ден показа́лся еси́: и ны́не моли́ся Христу́ Бо́гу об оте́честве на́шем, я́ко да твои́ми моли́твами проти́внии побежда́ются. Чуде́с исто́чник ра́ка твоя́ яви́ся, Макси́ме блаже́нне, от нея́же оби́льно вси́ притека́ющии прие́млют телесе́м здра́вие и душа́м спасе́ние твои́ми моли́твами. Прему́дростию ра́зума объя́т, о́тче, су́етную му́дрость бу́йством премину́л еси́ и утае́ная от му́дрых и разу́мных Тро́ическим благоволе́нием позна́л еси́. Богоро́дичен: Моисе́й в купине́ Тя ви́де, в горе́ прие́млющу нестерпи́мый Божества́ о́гнь неопа́льно, те́м Тя́ вси́ пе́сньми велича́ем. Конда́к, гла́с 2: Вы́шния красоты́ жела́я, ни́жния сла́дости и теле́сная одея́ния в ничто́же вмени́л еси́ и нестяжа́ние па́че су́етнаго ми́ра возлюби́л еси́. А́нгельское житие́ проходя́, сконча́лся еси́, блаже́нне Макси́ме: с ни́миже Христа́ моли́ непреста́нно о все́х на́с. И́кос: А́нгел на земли́ житие́м показа́вся, а́нгельския полки́ удиви́л еси́, и де́моны устраши́л еси́, и челове́ки просвети́л еси́ чуде́с твои́х заря́ми, богоно́се и преблаже́нне о́тче на́ш Макси́ме. И ны́не на́с вразуми́ воспева́ти пе́снь к твоему́ хвале́нию, ра́достным гла́сом си́це глаго́лющих: ра́дуйся, оста́вивый тле́нное мудрова́ние и прие́мый нетле́нный вене́ц; ра́дуйся, терпели́вый душе́ю; ра́дуйся, целому́дренный ра́зумом и к Бо́гу воззре́нием; ра́дуйся, предо́блий юро́де, и́же злоко́зненнаго врага́ под нога́ми сотры́й; ра́дуйся, я́ко ни́жнее мудрова́ние оста́вль и вы́шняго Ца́рствия дости́гий; ра́дуйся, цели́телю боле́зней и отгони́телю страсте́й; ра́дуйся, Макси́ме блаже́нне, моля́ непреста́нно о все́х на́с. Пе́снь 7. Ирмо́с: Спасы́й во огни́ Авраа́мския Твоя́ о́троки, и халде́и уби́в, я́же пра́вда пра́ведно уловля́ше, препе́тый Го́споди, Бо́же оте́ц на́ших, благослове́н еси́. Прича́стием Свята́го Ду́ха просвеще́н, блаже́нне, измени́вся добро́ты теле́сныя и позо́р бы́в челове́ком, непокрове́но те́ло тле́нными оде́ждами име́я, Христу́ вопия́л еси́: благослове́н Бо́г оте́ц на́ших. Нищету́ и юро́дство изво́лив, преподо́бне, на́с ра́ди Обнища́вшаго и Сего́ ле́гкий яре́м на ра́мена взе́м, Тому́ после́довал еси́, Христу́, вопия́: благослове́н Бо́г оте́ц на́ших. Злому́драго врага́ ко́зни премудри́в, юро́де прехва́льне, и сего́, я́ко ры́бу безгла́сну, сотвори́л еси́, богому́дре, Христу́ вопия́: благослове́н Бо́г оте́ц на́ших. Богоро́дичен: Я́коже ло́жницу Бо́жию и кади́льницу разу́мнаго и светоно́снаго У́гля, Приснора́дованную воспое́м, зову́ще: ра́дуйся, вина́ спаси́тельнаго воззва́ния, Благослове́нная во ве́ки. Пе́снь 8. Ирмо́с: Изба́вителю все́х, Всеси́льне, посреде́ пла́мене благоче́ствовавшия, снизше́д, ороси́л еси́ и научи́л еси́ пе́ти: вся́ дела́, благослови́те, по́йте Го́спода. Присво́ився Соде́телю все́х, о́тче, и грехо́вныя я́зи удали́вся, прия́л еси́ небе́сное насле́дие и, со а́нгелы лику́я, вопия́л еси́: благослови́те, вся́ дела́ Госпо́дня, Го́спода. Ю́ношеских и плотски́х страсте́й удержа́л еси́ взыгра́ния, очи́стив вся́кия скве́рны ду́шу же и те́ло, Макси́ме преблаже́нне, хра́м показа́лся еси́ нескве́рнен Бо́гу, Ему́же непреста́нно вопие́ши: благослови́те, вся́ дела́ Госпо́дня, Го́спода. Незаходи́мый возсия́ тебе́ све́т, о́тче богому́дре, присносу́щнаго весе́лия, в не́мже ны́не наслажда́ешися, предстоя́ Святе́й Тро́ице и воспева́я Христа́ во вся́ ве́ки. Богоро́дичен: Тя́ ору́жие непобеди́мое на враги́ предлага́ем, Тя́ основа́ние и наде́жду на́шего спасе́ния, Богоневе́сто, и́мамы и Тя́ воспева́ем во ве́ки. Пе́снь 9. Ирмо́с: Ка́мень нерукосе́чный от несеко́мыя горы́, Тебе́, Де́во, краеуго́льный отсече́ся — Христо́с, совокупи́вый разстоя́щаяся естества́. Те́м, веселя́щеся, Тя́, Богоро́дице, велича́ем. Я́коже тве́рдый адама́нт душе́ю показа́лся еси́, непоколеби́мь вра́жиими прило́ги, о́тче, и на́м тве́рдое забра́ло бу́ди, блаже́нне, моли́твами твои́ми от нахожде́ний проти́вных. Освяти́ся возду́х, Макси́ме блаже́нне, па́мятию твое́ю, и на́с торжествова́ти подвиза́ет ра́достно освяще́нное твое́ пра́зднество. Жезло́м доброде́телей страсте́й мо́ре пресе́к и го́рдаго врага́, я́коже ина́го фарао́на, моли́твами твои́ми погрузи́в, избра́нное ста́до но́ваго Изра́иля невре́дно соблю́л еси́, Макси́ме блаже́нне, моли́твами твои́ми. Богоро́дичен: Ски́ния свиде́тельства Тя́ прообрази́, Хле́б И́стинный жи́зни прие́мшую, Чи́стая, Сло́во Отца́ Соприсносу́щное. Свети́лен. А́нгельскаго жития́ жела́я, преподо́бне, покори́л еси́ стра́сти плотски́я му́жески и равноа́нгелен бы́л еси́, богоно́се о́тче Макси́ме. Богоро́дичен: Тя́ Предста́тельницу и́мамы вси́ гре́шнии, о Пресвята́я Де́во! Ты́ благопреме́нна сотвори́ Твоего́ Сы́на ма́терними Твои́ми моли́твами.

Минея, 26 Мая, Канон преподобному Глас 1 Песнь 1 Ирмос: Твоя́ победи́тельная десни́ца/ боголе́пно в кре́пости просла́вися:/ та бо, Безсме́ртне,/ я́ко всемогу́щая, проти́вныя сотре́,/ изра́ильтяном путь глубины́ новосоде́лавшая. Припев: Преподо́бне о́тче Мака́рие, моли́ Бо́га о на́с. Ума́ чи́стыми светлостьми́ Боже́ственная зря,/ му́жеским нра́вом, блаже́нне, к подвиго́м устреми́лся еси́,/ преми́рными блиста́нии трисо́лнечнаго све́та озаря́емь. Припев: Преподо́бне о́тче Мака́рие, моли́ Бо́га о на́с. Поста́вив но́зе на ка́мени ве́ры,/ не поколеба́лся еси́, блаже́нне, от искуше́ний и наве́т вра́жиих,/ но, я́ко огнепа́льна звезда́, попаля́я вся благода́тию Пресвята́го Ду́ха. Сла́ва Отцу́ и Сы́ну и Свято́му Ду́ху. Зако́ны Боже́ственныя соблюда́я,/ побе́ду ве́чную взял еси́, преподо́бне, прогони́ти ду́хи лука́выя/ и сих до конца́ низложи́л еси́. И ны́не и при́сно и во ве́ки веко́в. Ами́нь. Богородичен: Неизглаго́ланно зачала́ еси́ Бо́га/ и па́че естества́ родила́ еси́, Пречи́стая Влады́чице,/ земны́я от прегреше́ний изме́ншаго./ Те́мже молю́ Тя: мно́гих мя согрешений изба́ви. Песнь 3 Ирмос: Еди́не, ве́дый челове́ческаго существа́ не́мощь/ и ми́лостивно в не вообра́жся,/ препоя́ши мя с высоты́ си́лою,/ е́же вопи́ти Тебе́, Святы́й,/ одушевле́нный хра́ме неизрече́нныя сла́вы Твоея́, Человеколю́бче. Припев: Преподо́бне о́тче Мака́рие, моли́ Бо́га о на́с. Я́коже честны́й би́сер, твоя́ мо́щи, преподо́бне, все́ми ви́димы, предлежа́т,/ разли́чная исцеле́ния неоску́дно подаю́ще. Припев: Преподо́бне о́тче Мака́рие, моли́ Бо́га о на́с. Глаго́лом и зако́ном Бо́жиим испо́лнитель был еси́,/ испо́лнися, о́тче прему́дре, Боже́ственных даро́в и чуде́с,/ и всем луча́ бога́тно испусти́л еси́. Сла́ва Отцу́ и Сы́ну и Свято́му Ду́ху. Напра́вился еси́, преподо́бне, к Боже́ственным приста́нищем/ окормле́нием Христа́ Бо́га на́шего,/ напа́стей преше́д свире́пых волн. И ны́не и при́сно и во ве́ки веко́в. Ами́нь. Богородичен: Де́ло, е́же соде́лал еси́, Го́споди, кто ска́жет?/ Ю́же бо прокля́л еси́ в печа́лех роди́ти ча́да,/ Сын Ея́ показа́лся еси́,/ и ра́дуется же́нское отпа́дшее естество́ о Тебе́, Бо́зе, Богоро́дицы ра́ди. Седален, глас 8 Храни́тель сый Боже́ственных повеле́ний Влады́ки, сла́вне,/ чи́стое житие́ твое́ показа́ тя священноде́теля Боже́ственна,/ ка́плями по́тов твои́х пре́лести лю́тое у́глие погаси́л еси́/ и в ти́хое приста́нище дости́гл еси́,/ зри́ши, блаже́нне, Его́же возжеле́л еси́./ Те́мже вопие́м ти:/ моли́ Христа́ Бо́га грехо́в оставле́ние пода́ти/ чту́щим любо́вию святу́ю па́мять твою́. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Я́ко Де́ву и еди́ну в жена́х,/ Тя, без се́мене ро́ждшую Бо́га пло́тию, вси ублажа́ем, ро́ди челове́честии,/ Огнь бо всели́ся в Тя Божества́,/ и я́ко Младе́нца дои́ши Зижди́теля и Го́спода./ Тем, а́нгельский и челове́ческий род, досто́йно сла́вим пресвято́е рождество́ Твое́/ и согла́сно вопие́м Ти:/ моли́ Христа́ Бо́га согреше́ний оставле́ние дарова́ти/ покланя́ющимся ве́рою пресвято́му рождеству́ Твоему́. Песнь 4 Ирмос: Го́ру Тя, благода́тию Бо́жиею приосене́нную,/ прозорли́выма Авваку́м усмотри́в очи́ма,/ из Тебе́ изы́ти Изра́илеву провозглаша́ше Свято́му/ во спасе́ние на́ше и обновле́ние. Припев: Преподо́бне о́тче Мака́рие, моли́ Бо́га о на́с. Поче́т до́брыми твои́ми нра́вы Бо́га Преблага́го, Мака́рие./ Те́мже исцеле́ний исто́чник излива́еши,/ зной отгоня́я боле́зней же и печа́лей, му́дре. Припев: Преподо́бне о́тче Мака́рие, моли́ Бо́га о на́с. Ны́нешняго жити́я красоты́ вся уме́ты вмени́л еси́,/ да Христа́ приобря́щеши,/ и сего́ ра́ди до́бре потруди́лся еси́, венцено́сче великоимени́тый. Сла́ва Отцу́ и Сы́ну и Свято́му Ду́ху. Просте́р ум ко еди́ному Влады́це,/ вене́ц нетле́ния от Него́ прия́л еси́,/ сия́ющий све́тлыми светоли́тии и бога́тыми дарова́нии,/ иде́же перворо́дных жили́ща. И ны́не и при́сно и во ве́ки веко́в. Ами́нь. Богородичен: Влады́чице ми́ра, Богоро́дице, помози́ ми,/ прелука́вый враг поглоща́ет мя зе́льне лю́тыми воспомина́нии и помышле́нии,/ я́же от Бо́га мя разлуча́ют,/ не оста́ви у́бо мене́, ниже́ пре́зри. Песнь 5 Ирмос: Твой мир даждь нам, Сы́не Бо́жий,/ ино́го бо, ра́зве Тебе́, бо́га не зна́ем,/ и́мя Твое́ имену́ем,/ я́ко Бог живы́х и ме́ртвых еси́. Припев: Преподо́бне о́тче Мака́рие, моли́ Бо́га о на́с. Стра́сти попали́л еси́ огне́м воздержа́ния,/ ду́шу озари́в Боже́ственными сия́нии,/ де́монов прогони́тель яви́лся еси́, Боже́ственным Ду́хом просвеща́емь. Припев: Преподо́бне о́тче Мака́рие, моли́ Бо́га о на́с. До́блести твоя́, Мака́рие, человекоуби́йца зре́ти не моги́й,/ искуше́ния тебе́ простира́ет,/ и́мже мужему́дренно противля́яся, до конца́ сего́ низложи́л еси. Сла́ва Отцу́ и Сы́ну и Свято́му Ду́ху. Мирска́го смуще́ния отбе́гл еси́,/ доброде́тельми удобри́в житие́ твое́,/ мона́хов утвержде́ние был еси́, о́тче Мака́рие преподо́бне. И ны́не и при́сно и во ве́ки веко́в. Ами́нь. Богородичен: Ты кре́пость моя́, Ты похвала́ и ра́дование,/ Храни́тельница ми и заступле́ние, и прибе́жище,/ и Предста́тельница непобеди́ма, Пресвята́я Богоро́дице,/ те́мже спаси́ раба́ Твоего́. Песнь 6 Ирмос: Обы́де нас после́дняя бе́здна,/ несть избавля́яй,/ вмени́хомся, я́ко о́вцы заколе́ния,/ спаси́ лю́ди Твоя́, Бо́же наш:/ Ты бо кре́пость немощству́ющих и исправле́ние. Припев: Преподо́бне о́тче Мака́рие, моли́ Бо́га о на́с. Моля́ приле́жно Го́спода,/ недви́жущагося о́трока це́ла сотворя́еши,/ безгла́снаго пре́жде Бо́жиим про́мыслом показа́л еси́ многоглаго́лива,/ о́тче наш, чудотво́рче Мака́рие, и́ночествующим свети́льниче пресве́тлый. Припев: Преподо́бне о́тче Мака́рие, моли́ Бо́га о на́с. По́стническим огне́м искуси́вся, о́ко се́рдца твоего́ преочи́стив,/ и доброде́тельным нра́вом ду́шу просвети́л еси́. Сла́ва Отцу́ и Сы́ну и Свято́му Ду́ху. Вни́де в тя раче́ние Соде́теля, Богому́дре,/ оста́вль земны́х пристра́стие,/ единосе́льник показа́лся еси́ Вы́шним служи́телем. И ны́не и при́сно и во ве́ки веко́в. Ами́нь. Богородичен: Без се́мене во чре́ве Бо́га зачала́ еси́,/ Де́ва пребы́вши по рождестве́, Чи́стая, стра́шнем./ Те́мже хвала́ми Тя сла́вим, Тобо́ю изба́вльшеся кля́твы, Пречи́стая. Кондак, глас 2 Вы́шних жела́я, воздержа́нием, и труды́, и по́ты наслади́вся,/ жела́ние пло́ти твоея́ обузда́в,/ чуде́с дар прие́м от Христа́ Бо́га,/ свети́льник яви́лся еси́ пресве́тлый./ Те́мже Христо́ва Це́рковь пе́сньми сла́вит тя,/ преподо́бне Мака́рие, о́тче наш. Икос Зва́ние Вседержи́тельныя десни́цы в се́рдцы твое́м яви́ся,/ ты же но́вое пресве́тлое свети́ло, о́тче Мака́рие, показа́ся,/ а́ще и естество́м челове́к быв, но Вы́шнего Иерусали́ма сограждани́н яви́ся,/ вся оста́вил еси́ плотска́я мудрова́ния,/ бога́тство и сла́ву, я́ко прах, нивочто́же вмени́в,/ и на стра́сти, яко безпло́тен, подвиза́ся./ Тем вопие́м ти:/ ра́дуйся, я́ко моли́твами твои́ми проти́внии побежда́ются;/ ра́дуйся, целому́дрия сто́лпе, и́мже бесо́вская шата́ния искорени́шася./ Ра́дуйся, свети́льниче многосве́тлый;/ ра́дуйся, ста́ду твоему́ по́мощь и заступле́ние./ Ра́дуйся, правосла́вным лю́дем похвала́ и утвержде́ние,/ и́хже соблюди́ моли́твами свои́ми от враг ненаве́тных,/ да, вси ве́рнии, вопие́м ти:/ ра́дуйся, Мака́рие, преподо́бне о́тче наш. Песнь 7 Ирмос: Тебе́ у́мную, Богоро́дице, пещь/ разсмотря́ем, ве́рнии:/ я́коже бо о́троки спасе́ три Превозноси́мый,/ мир обнови́, во чре́ве Твое́м всеце́л,/ хва́льный отце́в Бог и препросла́влен. Припев: Преподо́бне о́тче Мака́рие, моли́ Бо́га о на́с. Воздержа́ния росо́ю до́блественне страстну́ю пещь погаси́л еси́,/ слез же ка́плями, возду́шных князе́й написа́ния растерза́л еси́/ и со дерзнове́нием вопия́л еси́ Христу́:/ оте́ц на́ших Бо́же, благослове́н еси́. Припев: Преподо́бне о́тче Мака́рие, моли́ Бо́га о на́с. По́стников ты был еси́ похвала́, Мака́рие,/ кре́пко низложи́в де́монская шата́ния,/ и ны́не наслажда́ешися неизрече́нныя красоты́, вопия́ Христу́:/ оте́ц на́ших Бо́же, благослове́н еси́. Сла́ва Отцу́ и Сы́ну и Свято́му Ду́ху. Еди́ному Бо́гу возложи́в ду́шу и помышле́ние, те́сный путь ше́ствовал еси́,/ тем получи́л еси́ Небе́снаго Ца́рствия наслажде́ние./ И ны́не взыва́еши:/ оте́ц на́ших Бо́же, благослове́н еси́. И ны́не и при́сно и во ве́ки веко́в. Ами́нь. Богородичен: Тро́ице во еди́нстве правосла́вно служа́ще,/ Тя, Ма́ти Де́во Чи́стая, я́ко Бо́га пло́тию ро́ждшую пропове́дающе,/ земни́и, боже́ственне пое́м:/ оте́ц на́ших Бо́же, благослове́н еси́. Песнь 8 Ирмос: В пещи́ о́троцы Изра́илевы,/ я́коже в горни́ле,/ добро́тою благоче́стия чисте́е зла́та блеща́хуся, глаго́люще:/ благослови́те, вся дела́ Госпо́дня, Го́спода,/ по́йте и превозноси́те во вся ве́ки. Припев: Преподо́бне о́тче Мака́рие, моли́ Бо́га о на́с. Ду́ха благода́ть прии́м, о́тче Мака́рие, сосу́д избра́нный показа́лся еси́,/ святы́ню прии́м от Христа́ Бо́га, Ему́же непреста́нно вопия́:/ да благослови́т тварь вся Го́спода и превозно́сит во вся ве́ки. Припев: Преподо́бне о́тче Мака́рие, моли́ Бо́га о на́с. Боже́ственною си́лою укрепля́емь, победи́л еси́ неви́димых враг ополче́ния,/ к Све́ту прибли́жился еси́ невече́рнему, при́сно воспева́я:/ да благослови́т вся тварь Го́спода и превозно́сит во вся ве́ки. Сла́ва Отцу́ и Сы́ну и Свято́му Ду́ху. Мона́шествующих был еси́ пра́вило пра́вости и стра́сти вся кре́пко попра́л еси́./ Те́мже, возше́д на высоту́, научи́л еси́ воспева́ти:/ да благослови́т тварь вся Го́спода и превозно́сит во вся ве́ки. И ны́не и при́сно и во ве́ки веко́в. Ами́нь. Богородичен: Спасе́ния Хода́таица нам яви́лася еси́, Богоро́дице,/ ро́ждшая Спа́са и Влады́ку всех./ Те́мже молю́ Тя:/ спасе́ния сподо́би смире́нную мою́ ду́шу/ песносло́вити Тя ве́рно во вся ве́ки. Песнь 9 Ирмос: О́браз чи́стаго рождества́ Твоего́/ огнепали́мая купина́ показа́ неопа́льная,/ и ны́не на нас напа́стей свире́пеющую угаси́ти, мо́лимся, пещь,/ да Тя, Богоро́дице,/ непреста́нно велича́ем. Припев: Преподо́бне о́тче Мака́рие, моли́ Бо́га о на́с. Мраз нощны́й до́блественне претерпе́л еси́ и вар дневны́й поне́сл еси́,/ дом Прему́дрости Бо́жия был еси́/ и возше́л еси́ на го́ру Боже́ственнаго ра́зума. Припев: Преподо́бне о́тче Мака́рие, моли́ Бо́га о на́с. А́лчбою, и моли́твами непреста́нными, и чистото́ю Бо́гу соединя́яся,/ мно́жества мона́шествующих научи́л еси́/ веще́ственных всех огреба́тися. Сла́ва Отцу́ и Сы́ну и Свято́му Ду́ху. Ста́до твое́, о́тче, возгна́л еси́ на па́жить чи́сту воздержа́ния,/ и приве́л еси́ к безстра́стия исто́чнику,/ и ны́не потщи́ся, па́стырю до́брый, сохрани́ти сие́ невре́дно. И ны́не и при́сно и во ве́ки веко́в. Ами́нь. Богородичен: О Пресвята́я Де́во, Ма́ти Бо́га Вы́шнего!/ Твое́ Рождество́ на земли́ спасе́ние яви́ся гре́шником и смире́нным,/ о Тебе́ бо спасо́хомся, ве́ровавшии,/ но спаса́еши мя ны́не и во вся ве́ки жи́зненныя. Светилен Многосве́тлый свети́льник, пусты́нное воспита́ние, чистоты́ сокро́вище,/ А́нгелом собесе́дниче, дом Ду́ха Пресвята́го, Мака́рие преподо́бне,/ непреста́нно моли́ся о ве́рою почита́ющих пречестну́ю па́мять твою́. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Тя пе́сньми немо́лчными ублажа́ем, Де́во,/ я́ко от Тро́ицы Еди́наго родила́ еси́, Богоро́дице,/ и но́сиши на Боже́ственных объя́тиих Боже́ственное Сло́во,/ Его́же пе́сньми досто́йно сла́вим.

Минея, 10 Августа, Канон свята́го Лавре́нтия Глас 2 Песнь 1 Ирмос: Во глубине́ постла́ иногда́/ фараони́тское всево́инство преоруже́нная си́ла,/ вопло́щшееся же Сло́во всезло́бный грех потреби́ло есть:/ препросла́вленный Госпо́дь сла́вно бо просла́вися. Припев: Святы́й пра́ведный Лавре́нтие, моли́ Бо́га о на́с. Высоко́ житие́ име́я и восхожде́нии боже́ственными весь све́тел быв,/ просвеще́ние ми испроси́, похваля́ющему́ честны́я твоя́ по́двиги,/ и́миже до́бре пожи́в, получи́л еси́, и́хже наде́ялся еси́, блаже́нне Лавре́нтие. Припев: Святы́й пра́ведный Лавре́нтие, моли́ Бо́га о на́с. Мироуха́нная любя́ уче́ния/ и во чте́нии святы́х писа́ний упражня́яся,/ сласте́й уклони́лся еси́, блаже́нне, смра́дных и безче́стных,/ и облагово́нился еси́, боже́ственными дарова́нии удобря́яся. Сла́ва Отцу́ и Сы́ну и Свято́му Ду́ху. Дрема́ние ве́ждома от души́, блаже́нне, отгна́л еси́,/ бдя и Бо́гу приединева́яся всено́щными стоя́нии,/ непрекло́нен ну́ждами есте́ственными,/ Те́мже ко дню невече́рнему́ преше́л еси́. И ны́не и при́сно и во ве́ки веко́в. Ами́нь. Богородичен: Я́ко черто́г одушевле́нный Бо́жий/ и кади́льницу разу́мнаго и светоно́снаго у́гля,/ Приснора́дованную блажи́м Богоро́дицу, зову́ще:/ ра́дуйся, Хода́таице спасе́ннаго воззва́ния. Песнь 3 Ирмос: На ка́мени мя ве́ры утверди́в,/ разшири́л еси́ уста́ моя́ на враги́ моя́,/ возвесе́ли бо ся дух мой, внегда́ пе́ти:/ несть свят, я́коже Бог наш,/ и несть пра́веден, па́че Тебе́, Го́споди. Припев: Святы́й пра́ведный Лавре́нтие, моли́ Бо́га о на́с. Глаго́лом живото́чным внима́я,/ испи́л еси́ воду спасе́ния, возгнуша́вся го́рькаго греха́,/ и, поя́, глаго́лал еси́ Бо́гу, Лавре́нтие:/ я́ко несть свят, па́че Тебе́, Го́споди. Припев: Святы́й пра́ведный Лавре́нтие, моли́ Бо́га о на́с. Ми́лование стяжа́л еси́ христоподо́бно,/ разда́л еси́ бога́тство тре́бующим,/ Небе́сное бога́тство хода́тайствующее тебе́, его́же и получи́л еси́, вопия́, Лавре́нтие:/ я́ко несть свят, па́че Тебе́, Го́споди. Сла́ва Отцу́ и Сы́ну и Свято́му Ду́ху. Присво́ився Зижди́телю любо́вию боже́ственною,/ прия́л еси́ Небе́сное насле́дие,/ Дре́ва живо́тнаго получи́ти сподо́бился еси́, блаже́нне,/ боготворе́нием обожа́яся и поя́, сла́вне:/ я́ко несть свят, па́че Тебе́, Го́споди. И ны́не и при́сно и во ве́ки веко́в. Ами́нь. Богородичен: Су́щи А́нгел святе́йши,/ Зижди́теля А́нгелов во Твою́ боку́ носи́ла еси́/ и роди́ла еси́, Богома́ти, на избавле́ние челове́ком, пою́щим Ти:/ я́ко несть Пречи́сты, ра́зве Тебе́, Влады́чице. Седален, глас 4 Благоволи́в благи́ми дея́нии,/ искуси́лся еси́, я́ко зла́то в пещи́, напа́стьми, Лавре́нтие сла́вне./ Те́мже и по сме́рти источа́еши чудеса́ бога́тно, я́ко во́ды, неду́ги уставля́еши./ О нас при́сно моли́ся,/ я́ко да согреше́ний проще́ние прии́мем. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Чи́стая Всенепоро́чная и Неискусому́жная,/ и́же еди́на безле́тнаго Сы́на и Сло́ва Бо́жия в ле́то ро́ждши,/ сего́ со святы́ми и честны́ми патриа́рхи, и му́ченики, и проро́ки, преподо́бными моли́/ дарова́ти нам очище́ние и ве́лию ми́лость. Песнь 4 Ирмос: Прише́л еси́ от Де́вы не хода́тай, ни А́нгел,/ но Сам, Го́споди, вопло́щся,/ и спасл еси́ всего́ мя, челове́ка./ Тем зову́ Ти: сла́ва си́ле Твое́й, Го́споди. Припев: Святы́й пра́ведный Лавре́нтие, моли́ Бо́га о на́с. Повеле́ния оте́ческая храня́ невреди́мо,/ правове́рным смы́слом ты от ю́ности имел еси́ житие́ чи́сто/ и ми́лостивен нрав, досточу́дне. Припев: Святы́й пра́ведный Лавре́нтие, моли́ Бо́га о на́с. Ни смуще́ние мирско́е, ни вла́сти держа́ние,/ ни сла́ва вре́менная твоего́ к Бо́гу раче́ния, Лавре́нтие, преврати́,/ но благоволи́л еси́ вои́стинну боже́ственным дея́нием. Сла́ва Отцу́ и Сы́ну и Свято́му Ду́ху. Возне́сся Боже́ственными поуче́нии вы́ну, врага́ смири́л еси́,/ исцеле́ния де́тель прия́л еси́, Лавре́нтие,/ судо́м пра́ведным вся́ческая Пра́вящаго. И ны́не и при́сно и во ве́ки веко́в. Ами́нь. Богородичен: Препе́тая, во́инствы горе́ Препе́таго Бо́га роди́ла еси́,/ Челове́ка вои́стинну бы́вша,/ Его́же за рабы́ Твоя́ моля́щи не преста́й, Присноде́во. Песнь 5 Ирмос: Просвеще́ние во тьме лежа́щих,/ спасе́ние отча́янных, Христе́, Спа́се мой,/ к Тебе́ у́тренюю, Царю́ ми́ра,/ просвети́ мя сия́нием Твои́м,/ ино́го бо, ра́зве Тебе́, Бо́га не зна́ю. Припев: Святы́й пра́ведный Лавре́нтие, моли́ Бо́га о на́с. Све́том чи́стым Святы́я Тро́ицы просвеще́н, зако́ном же Ея́ огражде́н,/ нощь жите́йскую без претыка́ния преше́л еси́./ Виде́нии боже́ственными возвыша́яся, блаже́нне,/ в боже́ственный живо́т всели́лся еси́. Припев: Святы́й пра́ведный Лавре́нтие, моли́ Бо́га о на́с. Ны́не на Тебе́ чу́до Бо́жие ви́дится, и у́жаса испо́лнено:/ ка́ко по погребе́нии вои́стинну надо́лзе соблюда́ется невреди́мо, блаже́нне, твое́ те́ло, во гро́бе лежа́ще!/ Судо́м, и́мже весть Бог, прославля́яй тя. Сла́ва Отцу́ и Сы́ну и Свято́му Ду́ху. Блаже́нне Лавре́нтие, твое́ дерзнове́ние к Бо́гу/ и любо́вь, ю́же от се́рдца, к тому́ име́ти благоволи́в,/ и́стинно имени́то же возсия́в пресла́вно Боже́ственными светлостьми́,/ просвети́ ве́рных со́нмища. И ны́не и при́сно и во ве́ки веко́в. Ами́нь. Богородичен: За ны из Тебе́ вопло́щшагося, Де́во Ма́ти, всегда́ моли́,/ благоче́стно Тя блажа́щим изба́вится бед, душетле́нных страсте́й,/ и печа́лей, и ве́чнующаго пла́мене муче́ния. Песнь 6 Ирмос: В бе́здне грехо́вней валя́яся,/ неизсле́дную милосе́рдия Твоего́ призыва́ю бе́здну:/ от тли, Бо́же, мя возведи́. Припев: Святы́й пра́ведный Лавре́нтие, моли́ Бо́га о на́с. Ка́пли сла́дкия иска́павше, блаже́нне, пот твои́х сла́дость/ и исцеле́ний сия́ния на хвалу́ Христа́ Бо́га на́шего. Припев: Святы́й пра́ведный Лавре́нтие, моли́ Бо́га о на́с. Во дво́рех Бо́га процве́л еси́,/ виногра́д многопло́ден прозя́б/ и доброде́телей гро́здие Де́лателю, душа́м оби́лие пода́в. Сла́ва Отцу́ и Сы́ну и Свято́му Ду́ху. Ца́рства Бо́жия возжеле́л еси́, над страстьми́ ца́рствовав, Лавре́нтие,/ и по произволе́нию лу́чшему ра́дость пра́ведных получи́л еси́. И ны́не и при́сно и во ве́ки веко́в. Ами́нь. Богородичен: Избра́нно Бо́гу бы́вши,/ я́ко прекра́сное селе́ние и простра́нное, Сему́, Де́во, была́ еси́,/ и чертог, и све́щник, и трапе́за. Кондак, глас 8 Избра́нному и ди́вному в пра́ведницех,/ и́же у́бо от Христа́ дар чуде́с прии́мшему,/ похва́льныя ны́не принесе́м глаго́лы,/ но я́ко име́я дерзнове́ние ко Святе́й Тро́ице,/ Ю́же моли́ изба́витися от бед рабо́м твои́м, да зове́м ти:/ ра́дуйся, Богому́дре Лавре́нтие. Икос Ка́ко возмогу, гре́шный и скве́рный аз душе́ю вку́пе и те́лом,/ исписа́ти во пло́ти су́щее равноа́нгелом житие́ твое́ и пресла́вная чудеса́,/ а́ще у́бо мно́зи прему́дрии не дости́гнут испове́дати мно́гаго твоего́ терпе́ния, и смире́ния, и те́плыя ко Христу́ любве́./ Но оба́че, наде́яся на твое́ беззло́бие, о блаже́нне, си́це вопи́ю ти:/ ра́дуйся, пресве́тлая звездо́,/ от восто́ка доброде́телей возсия́вшая и вселе́нную чудесы́ озари́вшая./ Ра́дуйся, возненави́девый роди́тельскую любо́вь,/ Христа́ же, еди́наго над все́ми Бо́га, всем се́рдцем возлюби́вый/ и тому́ невозвра́тным жела́нием после́довавый./ Ра́дуйся, я́ко бу́йственное и юро́дственное, е́же по апо́столу, жи́тельство избра́вый./ Ра́дуйся, премени́вый тле́нная и настоя́щая наде́ждею бу́дущих благ./ Ра́дуйся, дре́внему Ио́ву уподо́бивыйся терпе́нием./ Ра́дуйся, страстоте́рпче Христо́в непобеди́мый,/ но при́сно победи́вый диа́вола твои́м смире́нием./ Ра́дуйся, я́ко дре́вний он Ла́зарь ни́щий, ны́не почива́еши в не́дрех Авраа́млих./ Ра́дуйся, и́же по отше́ствии ми́ра сего́/ су́щих в беда́х и искуше́ниих гото́в обрета́яйся предста́тель и засту́пник./ Ра́дуйся, везде́ призыва́ющия тя бы́стро предваря́яй,/ моли́ши бо Христа́ Бо́га непреста́нно пода́ти грехо́в на́ших проще́ние. Песнь 7 Ирмос: Богопроти́вное веле́ние беззако́ннующаго мучи́теля/ высо́к пла́мень вознесло́ есть./ Христо́с же простре́ Богочести́вым отроко́м ро́су духо́вную,/ Сый благослове́н и препросла́влен. Припев: Святы́й пра́ведный Лавре́нтие, моли́ Бо́га о на́с. Кре́постию возмо́г Живода́вца,/ плотско́е удержа́л еси́ жела́ние, пребога́те,/ и ум возвы́сил еси́ на Небе́сная, поя́ кре́пко:/ Сый благослове́н и препросла́влен. Припев: Святы́й пра́ведный Лавре́нтие, моли́ Бо́га о на́с. Сам неблагоро́ден сотвори́вся,/ благоро́дны нра́вы стяжа́л еси́ умо́м це́лым,/ поуче́нием же упражня́яся богодохнове́нных писа́ний,/ все жела́ние твое́ к Бо́гу Всеви́дцу, блаже́нне, возложи́л еси́. Сла́ва Отцу́ и Сы́ну и Свято́му Ду́ху. Го́рнее Ца́рство, Вы́шний град, Бо́жий рай,/ пра́ведных наслажде́ние и пи́щу несоде́янную,/ бога́тство некра́домое, свет невече́рний/ обрести́ сподо́бился еси́, блаже́нне Лавре́нтие. И ны́не и при́сно и во ве́ки веко́в. Ами́нь. Богородичен: Его́же породи́ла еси́, Влады́чице,/ при́сно моли́ от рабо́ты изба́вити мя страсте́й,/ и осужде́ния, и стужа́ющаго ми лю́таго окамене́ния,/ и оскорбля́ющаго, Чи́стая, одержа́ния, Богора́дованная. Песнь 8 Ирмос: Пещь иногда́ о́гненная в Вавило́не де́йства разделя́ше,/ Бо́жиим веле́нием халде́и опаля́ющая,/ ве́рныя же ороша́ющая, пою́щия:/ благослови́те, вся дела́ госпо́дня, го́спода. Припев: Святы́й пра́ведный Лавре́нтие, моли́ Бо́га о на́с. Огнь помышля́я стра́шный, пред Престо́лом Христо́вым хотя́щ изы́ти,/ умиле́нием се́рдца те́плы пролива́еши пото́ки сле́зныя,/ погаша́я те́ми страсте́й пещь, Лавре́нтие Богому́дре. Припев: Святы́й пра́ведный Лавре́нтие, моли́ Бо́га о на́с. Любо́вию предложи́л еси́ твою́, му́дре, к Бо́гу ду́шу/ и к тому́ прилепи́лся еси́, вопия́ пе́сненно:/ Христе́ мой, Ты ны́не мя изба́ви страсте́й смертоно́сных во ве́ки. Сла́ва Отцу́ и Сы́ну и Свято́му Ду́ху. Терпе́нием пожда́тель и се́рдцем смире́н ты ви́ден был еси́,/ ми́лостив тре́бующим, обы́чай при́сно благ име́я/ и нрав доброде́тельный, всече́стне,/ в них же до́бре пожи́в, чуде́с то́чиши благода́ть. И ны́не и при́сно и во ве́ки веко́в. Ами́нь. Богородичен: Ада́мов Соде́тель от крове́й Твои́х чи́стых зи́ждется/ и млеко́м пита́ется, пита́яй вся́кое дыха́ние, Де́во Богоро́дице./ Тем я́ко Ма́терь Тя Бо́жию прославля́ем. Песнь 9 Ирмос: Безнача́льна Роди́теля Сын, Бог и Госпо́дь,/ вопло́щся от Де́вы, нам яви́ся,/ омраче́нная просвети́ти, собра́ти расточе́нная./ Тем Всепе́тую Богоро́дицу велича́ем. Припев: Святы́й пра́ведный Лавре́нтие, моли́ Бо́га о на́с. Ви́дети желая сла́ву Бо́га на́шего,/ доброде́тельми богора́зумия себе́ удобри́л еси́/ и, свещу́ нося́, вшел еси́ во све́тлый черто́г,/ со А́нгелы живы́й, ясне́е наслажда́яся Божества́. Припев: Святы́й пра́ведный Лавре́нтие, моли́ Бо́га о на́с. Я́ко у́треннее со́лнце, взы́де па́мять твоя́,/ су́щия во мра́це сердца́ просвеща́ющи,/ ты бо све́та и дне яви́лся еси́ вои́стинну сын, Богому́дре Лавре́нтие,/ сего́ ра́ди тя почита́ем. Сла́ва Отцу́ и Сы́ну и Свято́му Ду́ху. Му́дростию украша́яся и ра́зумо́м просвеща́яся,/ смире́нием се́рдца красу́яся, высото́ю жития́, досточу́дне,/ в разу́мныя дворы́ вшел еси́,/ иде́же нас помяни́, чту́щих тя, блаже́нне Лавре́нтие. И ны́не и при́сно и во ве́ки веко́в. Ами́нь. Богородичен: Све́та жили́ще, вся озари́вшаго,/ и сень ви́дена была́ еси́, Богоблагода́тная,/ мост и ле́ствица, на высоту́ земны́я возводя́щи, Де́во./ Тем Тя ублажа́ем и ве́рно велича́ем. Светилен Удали́лся еси́, бе́гая, мирска́го сожи́тельства/ и Христу́, су́щему над все́ми Бо́гу на́шему,/ непоро́чным житие́м благоугоди́л еси́, всеблаже́нне Лавре́нтие,/ Его́же и ны́не моли́ о нас, рабе́х твои́х,/ ве́рою пра́зднующих всечестну́ю па́мять твою́. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Прему́дрость Ипоста́сную, Сло́во О́тчее При́сносущное,/ Врача́ челове́ком, Христа́, ро́ждшая, Де́во Пречи́стая,/ я́звы и стру́пы се́рдца моего́ исцели́, лю́тыя и многовре́менныя,/ и страстна́я взыгра́ния утиши́ пло́ти мое́й.

Минея, 30 Января, Канон Глас 4 Песнь 1 Ирмос: Колесни́цы фарао́новы и си́лу его́ вве́рже в мо́ре Кре́пкий во бране́х, воспое́м пе́снь но́вую, я́ко просла́вися. Припев: Священному́чениче Ипполи́те, моли́ Бо́га о на́с. Гряди́те, му́ченическими воспое́м пе́сньми священному́ченика, богоза́рною зря́ще благода́тию све́тло просия́вша, Христа́ сла́вяще всегда́. Припев: Священному́чениче Ипполи́те, моли́ Бо́га о на́с. Ты́ за ста́до слове́сное, от Христа́ вруче́нное, Сего́ подража́я, в беде́ су́щия изря́дне, о́тче, ду́шу положи́л еси́ и сугу́бым венце́м украси́лся еси́. Сла́ва Отцу́ и Сы́ну и Свято́му Ду́ху. Свяще́нным от повеле́ния Бо́жия ра́дования пома́зався еле́ем му́ченическим, Ипполи́те, назна́менался еси́ кро́вию. И ны́не и при́сно и во ве́ки веко́в. Ами́нь. Богородичен: Неопа́льну Моисе́й в горе́ Сина́йстей купину́ зря́ше, Тя́ прописа́вшую, Де́во, заре́ю неопа́льшуся Боже́ственнаго огня́, и́бо Бо́га родила́ еси́. Песнь 3 Ирмос: Лу́к си́льных изнемо́же, и немощству́ющии препоя́сашася си́лою, сего́ ра́ди утверди́ся в Го́споде се́рдце мое́. Припев: Священному́чениче Ипполи́те, моли́ Бо́га о на́с. А́гнцы слове́сныя упа́сл еси́ и, я́коже а́гня ове́ц, предпоже́рлся еси́, все́х Первопа́стыря и Бо́жия А́гнца подража́я. Припев: Священному́чениче Ипполи́те, моли́ Бо́га о на́с. Млеко́м слове́сным, Ипполи́те, пасо́мыя богодохнове́нно напои́л еси́, Христо́ва же свиде́тельства, ра́дуяся, испи́л еси́ ча́шу. Сла́ва Отцу́ и Сы́ну и Свято́му Ду́ху. Собо́ры страда́льцев водя́й, за благоче́стие прия́л еси́ муче́ние, еди́наго сла́вя Бо́га Отца́ с Сы́ном и Боже́ственным Ду́хом. И ны́не и при́сно и во ве́ки веко́в. Ами́нь. Богородичен: Ра́дуйся, Ма́ти Неискусобра́чная, я́же Бо́га Сло́ва во утро́бе Твое́й вмести́вшая и ро́ждшая Воплоще́ннаго, я́ко Бо́га ку́пно и Челове́ка. Седален, глас 1 Свети́льник присносия́нен яви́лся еси́ ми́ру, просвеща́я мо́лниями боже́ственных твои́х слове́с ве́рных помышле́ния, святи́телю Ипполи́те. Те́мже вси́ свяще́нную твою́ и боже́ственную па́мять дне́сь ра́достно соверша́ем и ве́рно почита́ем. Песнь 4 Ирмос: Твоего́ на земли́ явле́ния, Христе́ Бо́же, пропове́дая проро́к прише́ствие, с весе́лием вопия́ше: сла́ва си́ле Твое́й, Го́споди. Припев: Священному́чениче Ипполи́те, моли́ Бо́га о на́с. Доброде́телей твои́х я́ко многоплете́нная боже́ственная плени́ца, я́ко па́стырь бо и свиде́тель, Ипполи́те, от Бо́га почествова́лся еси́, зело́ о Не́м веселя́ся. Припев: Священному́чениче Ипполи́те, моли́ Бо́га о на́с. Приноше́ние А́велево превозше́л еси́, слове́сныя бо а́гнцы приве́л еси́ Бо́гу, и твое́ю кро́вию, ра́дуяся, Влады́це предста́л еси́. Сла́ва Отцу́ и Сы́ну и Свято́му Ду́ху. Ерети́чествующих пакиглаго́льное зломы́слие Ду́хом победи́в, блаже́нне, священному́ченик изря́ден любо́вию Влады́ки бы́л еси́. И ны́не и при́сно и во ве́ки веко́в. Ами́нь. Богородичен: Я́ко ви́деша а́нгели, Де́во Чи́стая, от утро́бы Твоея́ произше́дшаго Сы́на Бо́жия, с весе́лием глаго́лаху: сла́ва Рождеству́ Твоему́, Влады́чице. Песнь 5 Ирмос: Ты́, Го́споди, мо́й Све́т, в ми́р прише́л еси́, Све́т Святы́й, обраща́яй из мра́чна неве́дения ве́рою воспева́ющия Тя́. Припев: Священному́чениче Ипполи́те, моли́ Бо́га о на́с. Ты́ му́ченик и́стинен свяще́нником бы́л еси́ и му́чеником святи́тель и сугу́быми блиста́еши дарова́ньми, Ипполи́те. Припев: Священному́чениче Ипполи́те, моли́ Бо́га о на́с. Ка́мение у́бо златоза́рное и ле́потное, Ипполи́те, заре́ю же твоего́ священнонача́льства украси́ся твое́ страда́ние. Сла́ва Отцу́ и Сы́ну и Свято́му Ду́ху. Ба́сни е́ллинския благоче́стно ты́ изобличи́л еси́, о изря́дне в му́ченицех! и пребеззако́нную ле́сть евре́ев Боже́ственною благода́тию. И ны́не и при́сно и во ве́ки веко́в. Ами́нь. Богородичен: Тя́ ору́жие непобеди́мое на враги́ предлага́ем, Тя́, упова́ние и наде́жду на́шего спасе́ния, Богоневе́сто, стяжа́хом. Песнь 6 Ирмос: Пожру́ Ти со гла́сом хвале́ния, Го́споди, Це́рковь вопие́т Ти́, от бесо́вския кро́ве очи́щшися, ра́ди ми́лости от ре́бр Твои́х исте́кшею кро́вию. Припев: Священному́чениче Ипполи́те, моли́ Бо́га о на́с. Поже́рл еси́ Спа́су же́ртву хвале́ния в Це́ркви преподо́бных, я́ко Бо́гу хода́тай же и челове́ком, и усе́рдно ду́шу твою́ приве́л еси́ кро́вию. Припев: Священному́чениче Ипполи́те, моли́ Бо́га о на́с. Прия́л еси́ дарова́ний мно́жество Ду́хом, священному́чениче, от Бо́га во отверзе́нии боже́ственных усте́н твои́х и приво́диши, благода́рно тебе́ умерщвля́я. Сла́ва Отцу́ и Сы́ну и Свято́му Ду́ху. Я́ко боже́ственно страда́льцев Твои́х, Христе́, собра́ние, о наде́жди лежа́щих, я́ко настоя́щими уже́ пита́ющеся, и сладча́е жи́зни вменя́ющим сме́рть. И ны́не и при́сно и во ве́ки веко́в. Ами́нь. Богородичен: О, чу́до, все́х чуде́с нове́йшее! Я́ко Де́ва, во утро́бе вся́ческая Содержа́щаго неискусому́жно заче́нши, не тесновмести́. Кондак, глас 4 Во святителех благочестно пожив / и мучения путь прошед, / идольския угасил еси жертвы, / и поборник быв твоему стаду, богомудре. / Темже тя почитающе, тайно вопием ти: / от бед избави ны присно твоими мольбами, / отче наш Ипполите. Песнь 7 Ирмос: Спасы́й во огни́ авраа́мския Твоя́ о́троки и халде́и уби́в, я́же Пра́вда пра́ведно уловля́ше, препе́тый Го́споди, Бо́же оте́ц на́ших, благослове́н еси́. Припев: Священному́чениче Ипполи́те, моли́ Бо́га о на́с. Му́ченическими све́тлостьми и свяще́нническими просвеща́еши, священному́чениче явле́нне, вопию́щия Христу́ в па́мяти твое́й: препе́тый Го́споди, Бо́же оте́ц на́ших, благослове́н еси́. Припев: Священному́чениче Ипполи́те, моли́ Бо́га о на́с. Предве́дящаго издале́че страда́ние свяще́ннейшее, о́тче, муче́ния зря́, предстоя́ща тебе́, ра́дуяся, взыва́л еси́: препе́тый Го́споди, Бо́же оте́ц на́ших, благослове́н еси́. Сла́ва Отцу́ и Сы́ну и Свято́му Ду́ху. Ра́ны претерпе́в от разжже́нныя любве́ муче́ния, терпели́вно со дерзнове́нием вопия́ше Ипполи́т: препе́тый Го́споди, Бо́же оте́ц на́ших, благослове́н еси́. И ны́не и при́сно и во ве́ки веко́в. Ами́нь. Богородичен: Безсе́менно во утро́бе и преесте́ственно прие́мшую непреме́ннаго Бо́га, за милосе́рдие к челове́ком прише́дша, препе́тый Го́споди, Бо́же оте́ц на́ших, благослове́н еси́. Песнь 8 Ирмос: Во о́бразе а́нгела, я́вльшагося в пещи́ о́гненней песносло́вцем, Христа́ Бо́га по́йте, о́троцы, свяще́нницы, благослови́те, лю́дие, превозноси́те во вся́ ве́ки. Припев: Священному́чениче Ипполи́те, моли́ Бо́га о на́с. Я́ко мягка́ и ту́чна же́ртва: до́брый бо па́стырь, я́ко овча́, приво́дится Христу́, взыва́я: свяще́нницы, благослови́те, лю́дие, превозноси́те во вся́ ве́ки. Припев: Священному́чениче Ипполи́те, моли́ Бо́га о на́с. Му́ченическим венце́м блиста́я, Це́ркви Твое́й, Христе́, иера́рх возсия́, — по́йте, о́троцы, — ра́дуяся, взыва́я, — лю́дие, превозноси́те во вся́ ве́ки. Сла́ва Отцу́ и Сы́ну и Свято́му Ду́ху. По преще́ннем отве́те сме́ртнем Христо́в страда́лец, ра́дуяся, Ипполи́т вопия́ше: о́троцы, Христа́ благослови́те, лю́дие, превозноси́те во вся́ ве́ки. И ны́не и при́сно и во ве́ки веко́в. Ами́нь. Богородичен: Неизглаго́ланно и безсе́менно заче́ншую и Ро́ждшую ра́дость вселе́нней — Христа́ Бо́га, по́йте, о́троцы, свяще́нницы, благослови́те и превозноси́те во вся́ ве́ки. Песнь 9 Ирмос: Рождество́ Твое́ нетле́нно яви́ся: Бо́г из боку́ Твое́ю про́йде, я́ко Плотоно́сец яви́ся на земли́ и с челове́ки поживе́. Тя́, Богоро́дице, те́м вси́ велича́ем. Припев: Священному́чениче Ипполи́те, моли́ Бо́га о на́с. Я́ко всесла́вен священному́ченик, сугу́бою уясни́л еси́ заре́ю Христо́ву Це́рковь и весели́ши сердца́ тя пою́щих. Те́мже тя́ вси́ досто́йно блажи́м. Припев: Священному́чениче Ипполи́те, моли́ Бо́га о на́с. Исто́чник источи́в уче́ний, всеблаже́нне, Христо́ве Це́ркви, из му́ченических крове́й пото́ки ре́чно Бо́гу прино́сиши, те́мже тя́ вси́ блажи́м, Ипполи́те. Сла́ва Отцу́ и Сы́ну и Свято́му Ду́ху. Научи́л еси́ Еди́ному, богоглаго́ливе, Бо́гу покланя́тися в Тро́ице, Зижди́телю все́х ви́димых же тва́рей и неви́димых, му́ченическим же украси́лся еси́ венце́м. И ны́не и при́сно и во ве́ки веко́в. Ами́нь. Богородичен: Блиста́яй Тебе́ а́нгел предста́ и луча́ми де́вства Твоего́ вельми́ просвети́ся, себе́ сама́го я́ко сво́йственныя забы́ сла́вы, е́же — ра́дуйся, — со стра́хом Тебе́ веща́ше.

Минея, 27 Января, Кано́н святаго Глас 6 Песнь 1 Ирмос: Се́ченое сече́тся мо́ре Чермно́е,/ волнопита́емая же изсуша́ется глубина́,/ та́яжде ку́пно безору́жным бы́вши проходи́ма, и всеору́жным гроб,/ песнь же Богокра́сная воспева́шеся:/сла́вно просла́вися Христо́с Бог наш. Припев: Святи́телю о́тче Иоа́нне, моли́ Бо́га о на́с. Невече́рния, преподо́бне, зари́ исполня́емь,/ и престо́лу Боже́ственному предстоя́ при́сно со все́ми избра́нными,/ нам, ве́рно чту́щим тя и Боже́ственное твое́ соверша́ющим возвраще́ние,/ дарова́ти моли́ мир и ве́лию ми́лость. Припев: Святи́телю о́тче Иоа́нне, моли́ Бо́га о на́с. Земля́ лику́ет, и Не́бо с челове́ки ра́дуется,/ с на́ми боголе́пно в твое́м, му́дре, святе́м пра́зднице,/ в не́мже свяще́нное твое́ те́ло возврати́ся к твоему́ ста́ду,/ сла́вне Златоу́сте, Ду́ха честно́е жили́ще. Припев: Святи́телю о́тче Иоа́нне, моли́ Бо́га о на́с. Ума́ твоего́ Боже́ственная, блаже́нне, блиста́ния многоко́зненный не терпя́,/ искуше́ния воздвиза́ет на тя, я́коже дре́вле на И́ова,/ но у́бо омрачи́ся мно́жае:/ се бо по заточе́нии светле́йший в па́ству твою́ вшел еси́. Сла́ва Отцу́ и Сы́ну и Свято́му Ду́ху. Всезлаты́ми словесы́ твои́ми помышле́ния, Златосло́ве, позлати́л еси́ ве́рных/ и, заточе́н быв от ста́да́ зави́стно,/ Бо́жиим же манове́нием па́ки к сему́ по погребе́нии возврати́лся еси́,/ све́тло восхваля́емь, всеблаже́нне Златоу́сте. И ны́не и при́сно и во ве́ки веко́в. Ами́нь. Святе́йши яви́лася еси́ Херуви́мов, Пресвята́го ро́ждши Бо́га:/ Его́же моли́, я́ко всех Творца́, Чи́стая, освяти́ти вся,/ святы́ми Тя гла́сы́ ублажа́ющии, отце́в похвало́, челове́ков по́моще. Песнь 3 Ирмос: Госпо́дь Сый всех и Зижди́тель Бог,/ созда́нное Безстра́стный, обнища́в, Себе́ соедини́,/ и Па́сха, за я́же хотя́ше умре́ти,/ Сам Сый Себе́ предпожре́, – яди́те, -вопия́,– Те́ло Мое́/ и ве́рою утверди́теся. Припев: Святи́телю о́тче Иоа́нне, моли́ Бо́га о на́с. Был еси́ прия́телище Бо́жие чи́стое/ и догма́тов испыта́л еси́ глубину́, блаже́нне Златоу́сте,/ зломы́слящих потопля́я умы́, ве́рных же напая́я сердца́,/ те́мже честно́е твое́ днесь пра́зднуем возвраще́ние. Припев: Святи́телю о́тче Иоа́нне, моли́ Бо́га о на́с. Златы́й орга́н, возглаша́ющий нам неизрече́нная, был еси́ ты, блаже́нне Златоу́сте,/ сего́ ра́ди пое́м тя ве́рно в возвраще́ние твои́х моще́й,/ А́нгеле Бо́жий земны́й и челове́че Небе́сный. Сла́ва Отцу́ и Сы́ну и Свято́му Ду́ху. Глаго́лы жи́зни отры́гнул еси́ ве́рным/ и, непра́ведно зави́ден быв, всеблаже́нне,/ в да́льняя заточе́н бысть изгна́ния и в ско́рби́ мно́ги,/ но вседе́тельным манове́нием па́ки по кончи́не, преподо́бне,/ твоему́ ста́ду подава́ешися. И ны́не и при́сно и во ве́ки веко́в. Ами́нь. Богородичен: Высоту́ неизрече́ннаго и глубину́ Твоего́ Рождества́ кто сказа́ти и́мать, Отрокови́це?/ Бо́га бо родила́ еси́ па́че сло́ва и ума́ всего́,/ изба́вльшаго от тли челове́ки./ Те́мже по до́лгу, вси ве́рнии, Тя блажи́м. Седален, глас 8 Ю́же с высоты́ му́дрость уве́дев и благода́ть слове́с от Бо́га,/ всем просия́л еси́, я́ко зла́то в горни́ле,/ и Святу́ю Тро́ицу во Еди́нстве пропове́дал еси́,/ сребролю́бную лесть устрели́в словесы́ твои́ми./ Те́мже и ре́вностию цари́цу обличи́в,/ А́риево посрами́л еси́ иноплеме́нное мудрова́ние./ Иоа́нне Златоу́сте, моли́ Христа́ Бо́га/ прегреше́ний оставле́ние дарова́ти/ пра́зднующим любо́вию святу́ю па́мять твою́. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: От Тро́ицы Еди́наго преесте́ственно заче́нши, Де́во,/ и чу́дно́ Сего́ породила́ еси́ па́че сло́ва́ и мы́сли,/ и о́бщно Боже́ственнаго естества́ устро́ила еси́ челове́ческое естество́, дре́вле изгна́нное./ Те́мже, соше́дшеся, Рождество́м Твои́м вси спа́сшиися, Всенепоро́чная,/ Твои́м словесе́м после́дующе, до́лжно Тя ублажа́ем,/ моля́ще Христа́ Бо́га прегреше́ний оставле́ние дарова́ти/ ве́рою Тя сла́вящим, Ма́терь Его́. Песнь 4 Ирмос: Прови́дя проро́к/ та́йну Твою́ неизрече́нную, Христе́, провозгласи́:/ положи́л еси́ тве́рдую любо́вь кре́пости, О́тче Ще́дрый:/ Единоро́днаго бо Сы́на, Благи́й,/ очище́ние в мир посла́л еси́. Припев: Святи́телю о́тче Иоа́нне, моли́ Бо́га о на́с. Уста́ огнедохнове́нна и язы́к стяжа́в, о́тче преподо́бне,/ писа́ния я́сность разшири́л еси́ я́ве/ и уме́рл еси́ в непра́веднем заточе́нии./ Днесь нам блаже́нное подаде́ся, я́ко дар, те́ло твое́. Припев: Святи́телю о́тче Иоа́нне, моли́ Бо́га о на́с. Сказа́тель неизглаго́ланных да возвели́чится ны́не Златоу́стый:/ се бо по вре́менней сме́рти до́бре Бо́жиим манове́нием па́ки прехо́дит к Ца́рскому гра́ду,/ свяще́нно пе́сньми Боже́ственными честву́емь. Припев: Святи́телю о́тче Иоа́нне, моли́ Бо́га о на́с. Ум, облиста́емь заре́ю Всесвята́го Ду́ха, име́я,/ просвеща́еши подсо́лнечную Боже́ственными уче́нии/ и тьму отго́ниши нече́стия,/ о́тче свяще́нне Златоу́сте,/ святы́х А́нгелов собесе́дниче. Сла́ва Отцу́ и Сы́ну и Свято́му Ду́ху. Блаже́н яви́лся еси́ пра́вды ра́ди, преподо́бне,/ от па́ствы отгна́н за́вистию лука́вою,/ и ны́не же возвраща́яся,/ и от всех пе́сньми свяще́нными почита́емь му́дре,/ святи́телю Госпо́день Златоу́сте. И ны́не и при́сно и во ве́ки веко́в. Ами́нь. Богородичен: Из Тебе́, Де́во, спасе́ние ми́ру прии́де и яви́ся,/ из Тебе́ избавле́ние возсия́, Христо́с:/ тем Тя по до́лгу песносло́вим,/ всех свяще́нных похвало́, Чи́стая,/ и ве́рных свяще́нное очисти́лище. Песнь 5 Ирмос: Сою́зом любве́ связу́еми, апо́столи,/ влады́чествующему все́ми себе́ Христу́ возло́жше,/ кра́сны но́ги очища́ху,/ благовеству́юще всем мир. Припев: Святи́телю о́тче Иоа́нне, моли́ Бо́га о на́с. Свети́льник яви́лся еси́ всем, сия́я в нощи́ жития́ су́щим,/ облиста́я лучи́ Боже́ственных слове́с, о́тче Златоу́сте,/ и озаря́я помышле́ния на́ша./ Те́мже по до́лгу тя песносло́вим. Припев: Святи́телю о́тче Иоа́нне, моли́ Бо́га о на́с. Бога́тство слове́с разда́л еси́,/ обогати́в смы́слы, преподо́бне, а́лчущия, Златоглаго́ливе,/ и, непра́ведно заточе́н, судо́м пра́ведным па́ки возврати́лся еси́ к твоему́ ста́ду,/ ра́дующуся твои́ми вели́чии. Сла́ва Отцу́ и Сы́ну и Свято́му Ду́ху. Я́коже розга́ многопло́дна, умиле́ния вино́ прине́сл еси́/ и, ца́рицу облича́я, виногра́д вдови́цы восхи́тившую,/ заточе́н был еси́, о́тче Златоу́сте./ Те́мже возвраще́ние твое́ честву́ем. И ны́не и при́сно и во ве́ки веко́в. Ами́нь. Богородичен: Во́инства безпло́тных Его́же не мо́гут ви́дети, Влады́чице,/ во объя́тиих Твои́х я́ко Младе́нца вмести́вшася,/ в Тебе́ носи́ла еси́ за благоутро́бие пло́тию обнища́вша,/ я́ко да обнища́вший мир обогати́т. Песнь 6 Ирмос: Бе́здна после́дняя грехо́в обы́де мя,/ и, волне́ния не ктому́ терпя́,/ я́ко Ио́на Влады́це, вопию́ Ти:/ от тли мя возведи́. Припев: Святи́телю о́тче Иоа́нне, моли́ Бо́га о на́с. Источи́ язы́к твой, всеблаже́нне Златоу́сте, струи́ всезлаты́я Це́ркви/ и а́лчущая сердца́ обогаща́ет, свяще́нно сла́вящая тя. Припев: Святи́телю о́тче Иоа́нне, моли́ Бо́га о на́с. Честна́, всеблаже́нне, смерть твоя́ пред Бо́гом яви́ся на́шим,/ в не́йже сла́вится па́ки прише́ствием твои́м, о́тче,/ ко престо́лу твоему́, Златоу́сте. Сла́ва Отцу́ и Сы́ну и Свято́му Ду́ху. Блаже́н гроб, и́же честно́е твое́ содержи́т те́ло,/ я́ко обогаща́я чудоде́йствии притека́ющия ве́рою, всеблаже́нне,/ святи́телю Златоу́сте. И ны́не и при́сно и во ве́ки веко́в. Ами́нь. Богородичен: Высоча́йшаго ро́ждши, Пресвята́я Богоневе́сто,/ до́ле лежа́щее естество́ на́ше к Небеси́ возво́диши,/ те́мже тя по до́лгу сла́вим. Кондак, глас 1 Возвесели́ся та́инственно честна́я Це́рковь/ возвраще́нием честны́х твои́х моще́й,/ и, сия́ сокры́вши, я́ко зла́то многоце́нное,/ пою́щим тя неоску́дно подава́ет/ моли́твами твои́ми исцеле́ний благода́ть,/ Иоа́нне Златоу́сте. Икос Свеща́ дел мои́х дряхла́ бысть, Иоа́нне Златоу́сте,/ и ужаса́юся к сре́тению свяще́нных твои́х моще́й,/ но ты сам наста́ви мя и стези́ моя́ испра́ви,/ покая́ния подая́ ми вре́мя, всесвя́те,/ я́ко Того́ еси́ пропове́дник Боже́ственный,/ и страсте́й мои́х многови́дных ути́ши бу́рю/ и, от се́тей велиа́ровых исхи́тив мя, в коне́ц спаси́ мя,/ я́ко да пою́ твое́ досто́йне сла́вное возвраще́ние,/ я́ко пре́жде и успе́ние дерзну́в просла́вих, Иоа́нне Златоу́сте. Песнь 7 Ирмос: О́троцы в Вавило́не/ пе́щнаго пла́мене не убоя́шася,/ но, посреде́ пла́мене вве́ржени, ороша́еми, поя́ху:/ благослове́н еси́, Го́споди, Бо́же оте́ц на́ших. Припев: Святи́телю о́тче Иоа́нне, моли́ Бо́га о на́с. Чудоде́йствии сия́я, Богосло́вием украша́яся златоза́рным, му́дре,/ заточе́нием лю́тым преда́лся еси́;/ от ни́хже возвраща́яся, от всех просла́вился еси́. Припев: Святи́телю о́тче Иоа́нне, моли́ Бо́га о на́с. Изсека́еши коре́ния зло́бы секи́рою Боже́ственных уче́ний твои́х/ и насажда́еши душа́м Боже́ственное зна́ние, святи́телю Златоу́сте./ Тем твои́х возвраще́ние моще́й прославля́ем. Сла́ва Отцу́ и Сы́ну и Свято́му Ду́ху. Преподо́бне, возврати́вся, разстоя́щаяся умири́л еси́/ и положи́лся еси́ в хра́ме прему́дрых апо́столов, Златоу́сте,/ и́хже честно́ю обогати́лся еси́ вла́стию, всехва́льне. И ны́не и при́сно и во ве́ки веко́в. Ами́нь. Богородичен: Пресу́щественныя Тро́ицы Еди́наго родила́ еси́, Всечи́стая, Иису́са Христа́,/ Его́же моли́ премно́гая моя́ прегреше́ния/ за милосе́рдие неизрече́нное прости́ти, Всенепоро́чная. Песнь 8 Ирмос: За зако́ны оте́ческия/ блаже́ннии в Вавило́не ю́ноши предбе́дствующе,/ царю́ющаго оплева́ша повеле́ние безу́мное/ и, совоку́плены и́мже, не свари́шася огне́м,/ Держа́вствующему досто́йную воспева́ху песнь:/ Го́спода по́йте, дела́, и превозноси́те во вся ве́ки. Припев: Святи́телю о́тче Иоа́нне, моли́ Бо́га о на́с. Реши́ти же и вяза́ти, преподо́бне, име́я власть,/ вся разреши́ прегреше́ния Боже́ственное твое́ возвраще́ние све́тло пра́зднующих/ и Ца́рствия сподо́битися Небе́снаго умоли́ пою́щим во умиле́нии се́рдца:/ Го́спода по́йте, дела́, и превозноси́те во вся ве́ки. Припев: Святи́телю о́тче Иоа́нне, моли́ Бо́га о на́с. В заточе́нии претерпе́л еси́, о́тче Богому́дре, боле́зни,/ в не́мже прие́м блаже́нную, Златоу́сте, и сла́вную кончи́ну,/ хоте́нием Боже́ственным па́ки возвраща́ешися к твоему́ Боже́ственному престо́лу, честву́емь от пою́щих:/ Го́спода по́йте, дела́, и превозноси́те во вся ве́ки. Припев: Святи́телю о́тче Иоа́нне, моли́ Бо́га о на́с. Глаго́лов стре́лы терпе́ти, преподо́бне, твои́х не моги́й,/ змий льсти́вый испроша́ет искуси́ти тя, я́коже Иова до́бляго,/ но побежде́н бысть твои́м Христа́ ра́ди терпе́нием;/ вели́к я́влься смех тебе́, ве́рою песнопою́щу:/ Го́спода по́йте, дела́, и превозноси́те во вся ве́ки. Сла́ва Отцу́ и Сы́ну и Свято́му Ду́ху. Троичен: Безнача́льне О́тче, и Собезнача́льне Сы́не, и Боже́ственный Ду́ше,/ Тро́ице Неразде́льная, еди́но естество́, еди́на си́ла и еди́на власть,/ Тя пою́щия испо́лни вся́ких благ и муче́ния изба́ви непреста́нно пою́щия:/ Го́спода по́йте, дела́, и превозноси́те во вся ве́ки. И ны́не и при́сно и во ве́ки веко́в. Ами́нь. Богородичен: Разуме́ти не мо́жет ум челове́ческий/ е́же па́че ума́ и сло́ва, Отрокови́це, та́инство неизрече́ннаго Твоего́ рождества́:/ Бог бо Плотоно́сец из Тебе́ яви́ся,/ спаса́я па́дшия во тлю и на пе́рвое досто́инство возводя́ пою́щия:/ Го́спода по́йте, дела́, и превозноси́те во вся ве́ки. Песнь 9 Ирмос: Недоуме́ет всяк язы́к благохвали́ти по достоя́нию;/ изумева́ет же ум и преми́рный пе́ти Тя, Богоро́дице./ Оба́че, Блага́я су́щи, ве́ру приими́,/ и́бо любо́вь ве́си Боже́ственную на́шу:/ Ты бо христиа́н еси́ Предста́тельница, Тя велича́ем. Припев: Святи́телю о́тче Иоа́нне, моли́ Бо́га о на́с. Свяще́нства был еси́ пра́вило, Богоглаго́ливе,/ оде́ян пра́вдою, я́коже Боже́ственною оде́ждою,/ и обогати́в словесы́ твои́ми Це́рковь, и писа́ния обнажи́в ум духо́вно./ Те́мже твое́ возвраще́ние, о́тче, торжеству́ем. Припев: Святи́телю о́тче Иоа́нне, моли́ Бо́га о на́с. Кра́сен, я́коже слави́й, о́тче, яви́лся еси́,/ Боже́ственную ве́сну покая́ния сказу́я зиме́ грехо́вней рабо́тающим;/ заточе́н же быв наве́том льсти́ваго, му́дре,/ па́ки притека́еши, ра́дуяся, к жела́ющему тя ста́ду, блаже́нне Златоу́сте. Припев: Святи́телю о́тче Иоа́нне, моли́ Бо́га о на́с. Игра́ют днесь всех сердца́, зря́ще чи́стаго тя, преподо́бне, жениха́,/ твое́й неве́сте Це́ркви подае́ма благода́тию,/ и Да́теля благи́х пою́т непреста́нными гла́сы,/ тебе́ же восхваля́ют досто́йно и ублажа́ют. Сла́ва Отцу́ и Сы́ну и Свято́му Ду́ху. Прии́де свети́льник на све́щнице положи́тися от Кома́н,/ приспе́ украше́ние Бо́жия Це́ркве,/ воспо́йте Го́споду, по́йте с весе́лием,/ и, сре́тение творя́ще ему́ духо́вное, вси возопии́м:/ о́тче, моли́твами твои́ми спаси́ нас. И ны́не и при́сно и во ве́ки веко́в. Ами́нь. Богородичен: Светле́йшими, Отрокови́це, блиста́нии Ро́ждшагося из Тебе́ неизрече́нно/ просвети́, свята́я Богоро́дице, ду́шу мою́,/ вся́цеми преступле́ньми, Всечи́стая, омраче́нную/ и не хотя́щую сотвори́ти до́брое,/ я́ко да непреста́нно возвеща́ю вели́чия Твоя́. Светилен Ра́дуйся, гра́де градо́в всех Ца́рствующий,/ я́ко до́браго твоего́ па́стыря и пастыренача́льника те́ло восприе́мый днесь,/ тя и мир весь пра́вяща и спаса́юща медото́чными Златоу́стаго,/ и восплеща́й пе́сньми. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Ра́дуйся, Бо́жия пала́то,/ ра́дуйся, горо́ присе́нная,/ ра́дуйся, неопали́мая купино́,/ ра́дуйся, престо́ле сла́вы,/ ра́дуйся, Боже́ственная трапе́зо,/ ра́дуйся, ста́мно всезлата́я,/ ра́дуйся, свети́льниче всесве́тлый,/ ра́дуйся, ле́гкий о́блаче,/ Де́во Ма́ти Мари́е.

Минея, 20 Апреля, Кано́н преподо́бному Алекса́ндру, его́же краегране́сие: Хвалу́ пою́ но́вому чудотво́рцу Алекса́ндру Глас 4 Песнь 1 Ирмос: Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,/ и воспою́, ра́дуяся, Тоя́ чудеса́. Припев: Преподо́бне о́тче Алекса́ндре, моли́ Бо́га о на́с. Све́том озаря́емь благода́ти Твоея́, Христе́,/ уясни́ ми язы́к, и просвети́ очи мои́,/ и ду́шу освяти́, и се́рдце озари́,/ да воспою́ похвалу́ но́вому чудотво́рцу, преподо́бному Алекса́ндру. Припев: Преподо́бне о́тче Алекса́ндре, моли́ Бо́га о на́с. Путе́м, вводя́щим ко гра́ду Небе́сному,/ невозвра́тно ше́ствовал еси́, Алекса́ндре,/ и́бо Святы́й Дух наста́ви тя, почива́ющ в се́рдце твое́м. Сла́ва Отцу́ и Сы́ну и Свято́му Ду́ху. Вознося́шеся смире́нием, о́тче Алекса́ндре, любо́вь име́л еси́ ко Христу́,/ тем мо́лимся ти, преподо́бне,/ уще́дри смире́ние на́ше и боле́зни вся облегчи́ серде́ц на́ших. И ны́не и при́сно и во ве́ки веко́в. Ами́нь. Богородичен: Па́дшим воста́ние и стоя́щим укрепле́ние су́щи, Всенепоро́чная,/ тем молю́ся Ти:/ па́дший грехо́м мой ум испра́ви, Влады́чице. Песнь 3 Ирмос: Твоя́ песносло́вцы, Богоро́дице,/ живы́й и незави́стный Исто́чниче,/ лик себе́ совоку́пльшия, духо́вно утверди́,/ в Боже́ственней Твое́й сла́ве/ венце́в сла́вы сподо́би. Припев: Преподо́бне о́тче Алекса́ндре, моли́ Бо́га о на́с. Теку́щих стоя́щими измени́л еси́ смы́слено,/ прие́м свой крест, о́тче Алекса́ндре,/ и в непроходи́мую пусты́ню, я́ко Илия́ вели́кий, отходя́, прибы́л еси́. Припев: Преподо́бне о́тче Алекса́ндре, моли́ Бо́га о на́с. Путь тебе́, зело́ жела́емый, оте́ц пове́да, и́же рече́:/ иди́, ча́до, на о́ну страну́ реки́/ и обря́щеши мно́гими ле́ты сокрыва́ему пусты́ню,/ и та́мо всели́ся, поя́ Го́спода. Сла́ва Отцу́ и Сы́ну и Свято́му Ду́ху. Коле́блемы страстьми́ разли́чными,/ ве́рою притека́ем к твоему́ покро́ву, Алекса́ндре преподо́бне,/ святы́ми твои́ми хода́тайствы вся ны посети́, моля́ся Человеколю́бцу. И ны́не и при́сно и во ве́ки веко́в. Ами́нь. Богородичен: Кропле́нием ми́лости Твоея́, Де́во,/ у́глие погаси́ мои́х страсте́й, Богора́дованная,/ и уга́сший возжзи́ свети́льник се́рдца моего́,/ Златы́й Свети́льниче, Всенепоро́чная. Седален, глас 8 Стра́стный мрак очи́стив и Христо́ва повеле́ния, я́ко свет, вои́стину прие́м,/ в посте́ просия́л еси́/ и, умертви́в те́ло, дух оживи́л еси́, вра́жия се́ти попра́в, блаже́нне,/ тем и Вы́шних Безпло́тных слуг соприча́стник бы́сть Ду́ха благода́тию,/ Алекса́ндре, о́тче наш, моли́ Христа́ Бо́га грехо́в оставле́ние дарова́ти/ пра́зднующим любо́вию святу́ю па́мять твою́. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Я́ко Всенепоро́чная Неве́сто Творца́,/ я́ко Неискусому́жная Ма́ти Изба́вителя,/ прия́телище я́ко су́щи Уте́шителя, Всепе́тая,/ беззако́нию мя су́ща скве́рно жили́ще и де́монов игра́лище в ра́зуме бы́вша,/ потщи́ся от сих злоде́йствия мя изба́ви ти,/ све́тло жили́ще доброде́тельми соде́лавши, Светода́тельная и Нетле́нная,/ разжени́ о́блак страсте́й/ и Вы́шняго прича́стия сподо́би и Све́та Невече́рняго моли́твами Твои́ми. Песнь 4 Ирмос: Неизсле́дный Бо́жий Сове́т,/ е́же от Де́вы, воплоще́ния/ Тебе́, Вы́шняго,/ проро́к Авваку́м усмотря́я, зовя́ше:/ сла́ва си́ле Твое́й, Го́споди. Припев: Преподо́бне о́тче Алекса́ндре, моли́ Бо́га о на́с. Пусты́ни непроходи́мыя доше́д,/ верхи́ бесо́вския возвыша́емыя/ смире́нием смири́л еси́, му́дре Алекса́ндре, и на них мужествова́л еси́,/ сла́во и́ночествующим и утвержде́ние. Припев: Преподо́бне о́тче Алекса́ндре, моли́ Бо́га о на́с. Мече́м обоюдуо́стрым в Христо́в страх вооружи́вся,/ зми́я отсту́пника низложи́л еси́ разу́мно и чу́вственно, блаже́нне Алекса́ндре,/ свяще́нными побе́дами прославля́емь. Сла́ва Отцу́ и Сы́ну и Свято́му Ду́ху. Ве́сь Боже́ственным Ду́хом распали́вся, о́тче,/ мраз терпе́л еси́ и мно́ги беды́, в пусты́нях вселя́яся, иски́й Го́спода,/ благода́тию тя Боже́ственною согрева́юща. И ны́не и при́сно и во ве́ки веко́в. Ами́нь. Богородичен: Тя, очище́ние всем земны́м, ве́рою молю́ и припа́даю, Благослове́нная,/ ми́лостива ми Судию́ и Сы́на Твоего́ сотвори́,/ я́ко да по до́лгу сла́влю Тя. Песнь 5 Ирмос: Ужасо́шася вся́ческая/ о Боже́ственней сла́ве Твое́й:/ Ты бо, Неискусобра́чная Де́во,/ име́ла еси́ во утро́бе над все́ми Бо́га/ и родила́ еси́ Безле́тнаго Сы́на,/ всем воспева́ющим Тя/ мир подава́ющая. Припев: Преподо́бне о́тче Алекса́ндре, моли́ Бо́га о на́с. Ше́ствовал еси́, преподо́бне, у́зкий и приско́рбный пу́ть,/ Боже́ственными восхожде́нии се́рдца, и виде́нии разширя́емь, и положе́нием обожа́емь я́ве,/ тем бы́сть и́ноком утвержде́ние и украше́ние. Припев: Преподо́бне о́тче Алекса́ндре, моли́ Бо́га о на́с. Я́ко очи́стившу помышле́ния, преподо́бне,/ благода́ть тебе́ даде́ся, я́ко проро́ку,/ я́ко настоя́щая, глаго́лати бу́дущая,/ зре́ти же да́льная, я́ко бли́жняя, Алекса́ндре, Бо́жие оби́телище. Сла́ва Отцу́ и Сы́ну и Свято́му Ду́ху. Боле́зней мя изба́ви грехо́вных и скорбе́й,/ утоли́ се́рдца моего́ лю́тость/ и грехопаде́ниям разреше́ние да́руй,/ Благоде́теля Бо́га име́я, послу́шающа честны́х твои́х моли́тв. И ны́не и при́сно и во ве́ки веко́в. Ами́нь. Богородичен: Ума́ моего́ уврачу́й изступле́ние, Всенепоро́чная,/ и исцели́ стра́сти душе́вныя моя́, и уны́ния тьму́ отжени́,/ я́ко да восхваля́ю Тя пе́сненно, Присноблаже́нная Богоро́дице Всепе́тая. Песнь 6 Ирмос: Боже́ственное сие́ и всечестно́е/ соверша́юще пра́зднество,/ Богому́дрии, Богома́тере,/ прииди́те, рука́ми воспле́щим,/ от Нея́ ро́ждшагося Бо́га сла́вим. Припев: Преподо́бне о́тче Алекса́ндре, моли́ Бо́га о на́с. Увяди́в стра́сти теле́сныя, я́ко дре́во узре́ся высокове́рхое,/ плоды́ чуде́сныя израща́я/ и честна́я исправле́ния священнонося́, Богоблаже́нне. Припев: Преподо́бне о́тче Алекса́ндре, моли́ Бо́га о на́с. Исцели́ тя Госпо́дь явле́нием Кири́лла чудотво́рца,/ и ра́зуме, я́ко от вели́кия боле́зни вско́ре премени́ся на здра́вие/ и, возбну́в от виде́ния, ра́довашеся, поя́ Го́спода. Сла́ва Отцу́ и Сы́ну и Свято́му Ду́ху. Тьма́м боле́зней прибли́жихся аз, те́лом не́мощен низлежа́, Алекса́ндре, о́тче,/ тем ве́рою зову́ ти:/ боле́зни утоли́ се́рдца моего́. И ны́не и при́сно и во ве́ки веко́в. Ами́нь. Богородичен: Еди́на всем поможе́ние, помози́ нам, бе́дствующим,/ и ру́ку пода́ждь, и к приста́нищу введи́ спасе́ния,/ Отрокови́це Богоблагода́тная. Кондак, глас 8 Роди́телей свои́х любо́вь отри́нул еси́/ и дом свой, я́ко чужд, оста́вил еси́,/ водвори́ бо ся в пусты́ню,/ и та́мо ви́де Бог труды́ твоя́ и по́двиги,/ па́стыря и наста́вника избра́нному Своему́ ста́ду сподобля́ет тя/ и по преставле́нии вели́кими чудесы́ прославля́ет тя,/ исцеля́ти разли́чныя неду́ги./ Моли́ о нас Христа́ Бо́га,/ пра́зднующих любо́вию святу́ю па́мять твою́,/ да вси единогла́сно вопие́м ти:/ ра́дуйся, Алекса́ндре преподо́бне, о́тче наш. Икос Други́й, о́тче, яви́ся врач и предста́тель/ неду́ги одержи́мым и скорбьми́, Алекса́ндре чудотво́рче,/ исцеля́я всех, ве́рно притека́ющих под Боже́ственный кров твой,/ тем и от нас слы́шиши:/ ра́дуйся, отца́ блага́го ко́рене;/ ра́дуйся, ма́тере благи́я ве́твь;/ ра́дуйся, и́же тех любо́вь отри́нувый;/ ра́дуйся, и́же еди́наго Бо́га прие́мый;/ ра́дуйся, я́ко оста́вил еси́ мирску́ю суету́ и дом/ и Пречи́стыя Ма́тере оби́тели Кири́лловы огра́ды дости́гл еси́;/ ра́дуйся, я́ко та́мо во и́ноческая обле́клся еси́/ и извы́че вся́кому благочи́нию и добронра́вию;/ ра́дуйся, я́ко отту́ду в Ка́ргопольския страны́ пресели́лся еси́/ и та́мо в непроходи́мую пусты́ню всели́лся еси́;/ ра́дуйся, я́ко в ней це́рковь вели́каго чудотво́рца Нико́лы воздви́гл еси́,/ и о́бщий монасты́рь соста́вил еси́, и собра́л еси́ учени́к мно́жество,/ и́хже стра́хом Бо́жиим и твои́м уче́нием наставля́емых,/ до конца́ соблюди́;/ ра́дуйся, я́ко ми́рови яви́ся столп непоколеби́м;/ ра́дуйся, свети́льниче, сия́я чудесы́./ Моли́ о нас Христа́ Бо́га, пра́зднующих святу́ю па́мять твою́,/ да вси единогла́сно вопие́м ти:/ ра́дуйся, Алекса́ндре преподо́бне, о́тче наш. Песнь 7 Ирмос: Не послужи́ша тва́ри Богому́дрии/ па́че Созда́вшего,/ но, о́гненное преще́ние му́жески попра́вше,/ ра́довахуся, пою́ще:/ препе́тый отце́в Госпо́дь и Бог, благослове́н еси́. Припев: Преподо́бне о́тче Алекса́ндре, моли́ Бо́га о на́с. Се́рдце твое́ Тро́ице жили́ще соде́лал еси́/ и ду́шу свою́ престо́л Бо́гови сотвори́л еси́,/ те́мже Боже́ственною благода́тию, о́тче Алекса́ндре,/ источа́еши неду́жным исцеле́ния, с ве́рою приходя́щим. Припев: Преподо́бне о́тче Алекса́ндре, моли́ Бо́га о на́с. Душа́ твоя́, светозаре́нием Боже́ственнаго Ду́ха освяща́ема при́сно,/ душ зря́ше ве́рных, приходя́щих ти, свет, блаже́нне, и двиза́ния,/ проро́чески ми провиде́ньми свяще́нно удивля́ема. Сла́ва Отцу́ и Сы́ну и Свято́му Ду́ху. Неду́г, обурева́ющих мя, блаже́нне, души́ же и телесе́,/ твои́ми святы́ми моли́твами ско́ро изба́ви и пе́ти сотвори́:/ препе́тый оте́ц на́ших Бо́же, благослове́н еси́. И ны́не и при́сно и во ве́ки веко́в. Ами́нь. Богородичен: Неизме́нно ро́ждшая Еди́наго Го́спода, Богора́дованная,/ десни́цею Его́, Чи́стая, премени́ти ми ум моли́ся к лу́чшим,/ лю́те совраща́емый жите́йскими печа́льми. Песнь 8 Ирмос: О́троки благочести́выя в пещи́/ Рождество́ Богоро́дичо спасло́ е́сть;/ тогда́ у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте, дела́,/ и превозноси́те Его́ во вся ве́ки. Припев: Преподо́бне о́тче Алекса́ндре, моли́ Бо́га о на́с. Пребыва́ющу ти в пусты́ни, я́ко на све́щнице свети́льник, преподо́бне,/ всех помышле́ния ве́рою просвеща́еши,/ показу́я изря́дно словесы́ и де́лы стезю́ живота́/ и возводя́ сих Боже́ственными словесы́ к высоте́ безстра́стия. Припев: Преподо́бне о́тче Алекса́ндре, моли́ Бо́га о на́с. Умо́м безстра́стия очище́н, бесе́доваше Го́споду Вседержи́телю,/ от Него́ же неизглаго́ланным, преподо́бне, науча́емь, проро́чески предглаго́лаше,/ просвеща́я ду́ши, я́ко вели́к, всеблаже́нне, Свята́го Ду́ха сподо́бися,/ тем тя согла́сно, ве́рнии, похваля́ем. Сла́ва Отцу́ и Сы́ну и Свято́му Ду́ху. Постиго́ша мя ра́ны тя́жкия, и неду́ги разли́чнии смуща́ют мя,/ сих мя изба́ви, о́тче, молю́тися,/ я́ко от Бо́га прие́м, Алекса́ндре, благода́ть врачева́ти стра́сти/ и боле́зни ве́рным облегчева́ти. И ны́не и при́сно и во ве́ки веко́в. Ами́нь. Богородичен: Яви́ся А́нгел вы́шши, Бо́га неизрече́нно вопло́щши,/ Того́ умоли́, Влады́чице Всенепоро́чная, плотски́х вы́шша страсте́й бы́ти ми/ умо́м, высото́ю смире́ния, песносло́вящему Твою́ вели́кую благода́ть. Песнь 9 Ирмос: Всяк земноро́дный/ да взыгра́ется, Ду́хом просвеща́емь,/ да торжеству́ет же Безпло́тных умо́в естество́,/ почита́ющее свяще́нное торжество́ Богома́тере,/ и да вопие́т:/ ра́дуйся, Всеблаже́нная Богоро́дице,/ Чи́стая Присноде́во. Припев: Преподо́бне о́тче Алекса́ндре, моли́ Бо́га о на́с. Укрепи́ся Бо́гу, ум ти утверди́вшу, удержа́ти стра́сти,/ А́нгел во пло́ти отсю́ду, о́тче, бы́сть,/ и со А́нгелы на Небесе́х живе́ши всегда́, и Небе́сныя сла́вы наслажда́ешися,/ Влады́чню предстоя́ Престо́лу и Све́та Невече́рняго исполня́емь. Припев: Преподо́бне о́тче Алекса́ндре, моли́ Бо́га о на́с. Твоя́ свяще́нныя и святы́я мо́щи, во гро́бе лежа́ще, неду́ги погружа́ют,/ и попаля́ют полки́ бесо́вския всегда́, му́дре Алекса́ндре, Бо́жиею благода́тию,/ и источа́ют всем исцеле́ния, ве́рно тя при́сно блажа́щим. Сла́ва Отцу́ и Сы́ну и Свято́му Ду́ху. Уже́ Христо́ви приближа́яся ясне́йше и чисте́йше,/ помяни́ ве́рою тя помина́ющих, Алекса́ндре о́тче,/ грехо́в проще́ния нам прося́ и неду́г всех избавле́ния,/ и Небе́снаго Ца́рства сподо́битися. И ны́не и при́сно и во ве́ки веко́в. Ами́нь. Богородичен: Просвети́, Чи́стая, души́ моея́ о́чи, Свет поро́ждшая,/ да не пости́гнет мя грехо́вная тьма́ тя́жкая,/ ниже́ глубина́ покры́ет мя отча́яния,/ но Ты мя спаси́ и окорми́ ко приста́нищу Боже́ственнаго хоте́ния. Светилен Слы́шана бы́сть во всех страна́х превели́кая твоя́ доброде́тель и чудеса́,/ отвсю́ду стека́хуся ви́дети све́тлое по Бо́зе житие́ твое́,/ а́ки све́та дневна́го, наслади́тися жела́юще, преподо́бства твоего́. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Ю́же дре́вле провозвести́ проро́ческий собо́р,/ ру́чку, и жезл, и скрижа́ль, и несеко́мую го́ру,/ Мари́ю Богоотрокови́цу ве́рно восхва́лим дне́сь, с Гаврии́лом зову́ще:/ ра́дуйся, Обра́дованная.

Минея, 20 Декабря, Кано́н предпра́зднства Глас 1 Песнь 1 Ирмос: Песнь побе́дную пои́м вси Бо́гу,/ сотво́ршему ди́вная чудеса́ мы́шцею высо́кою/ и спа́сшему Изра́иля,/ я́ко просла́вися. Припев: Слáва Тебé, Гóсподи, слáва Тебé. Начне́м днесь предпра́зднетвовати Христо́во Рождество́,/ ро́ждшагося пло́тию от Де́вы Ма́тере в верте́пе Вифлее́мстем/ за благоутро́бие мно́гое. Сла́ва Отцу́ и Сы́ну и Свято́му Ду́ху. Уз отреша́я мя грехо́вных,/ пелена́ми повива́ется и в я́слех полага́ется Младе́нец ви́димь, Преве́чный Бог./ Сла́ва держа́ве его́. И ны́не и при́сно и во ве́ки веко́в. Ами́нь. Богородичен: Еде́м отверза́ется Тебе́, ро́ждшуся от Де́вы Богоотрокови́цы/ во гра́де, Влады́ко, Вифлее́ме пло́тию./ Песносло́вим стра́шное смотре́ние Твое́. Песнь 3 Ирмос: Ка́мень, его́же небрего́ша зи́ждущим,/ сей бысть во главу́ угла́,/ Той есть Ка́мень,/ на Не́мже утверди́ Це́рковь Христо́с,/ ю́же от язы́к искупи́. Припев: Слáва Тебé, Гóсподи, слáва Тебé. Песнь предпра́зднственную вся да припева́ет тварь/ пре́жде денни́цы от Отца́ ро́ждшемуся, и ны́не из Де́вы неизрече́нно просия́вшему,/ и ражда́ющемуся пло́тию в Вифлее́ме за милосе́рдие мно́гое. Сла́ва Отцу́ и Сы́ну и Свято́му Ду́ху. Звезда́ уже́ возсия́ от пле́мене Иу́дова,/ ю́же позна́вше, ца́рие дви́жение от восто́ков творя́т/ и дости́гнути тща́тся, я́ко да у́зрят Христа́,/ в Вифлее́ме пло́тию ражда́ема. И ны́не и при́сно и во ве́ки веко́в. Ами́нь. Богородичен: Сие́ вопло́щение Христо́во уве́дев,/ Иса́ия Ду́хом Святы́м я́ве предглаго́лет:/ Отроча́ из Де́вы ражда́ется, Госпо́дь, в возрожде́ние на́ше,/ его́же власть на ра́ме его́. Седален, глас 8 Из чре́ва пре́жде век от Отца́ возсия́в неслия́нне, Сло́ве Бо́жий,/ безсе́менно предгряде́т от Твоея́ утро́бы, Пречи́стая, вре́менми последи́,/ вознося́й и́же дре́вле лю́те попо́лзшагося/ и к дре́вней добро́те возводя́, я́ко Милосе́рд./ Его́же Рождеству́ во́инства Безпло́тных предъи́дут/ и челове́ком побе́дная та́йно возсыла́ют,/ сла́ва, – взыва́юще, – Бо́гу, дарова́вшему нам мир,/ разруши́вшему средосте́ние вражды́, я́коже изво́ли. Песнь 4 Ирмос: Ду́хом прови́дя, проро́че Авваку́ме, Словесе́ вопло́щение,/ пропове́дал еси́, вопия́:/ внегда́ прибли́житися ле́том – позна́ешися,/ внегда́ приити́ вре́мени – пока́жешися./ Сла́ва си́ле Твое́й, Го́споди. Припев: Слáва Тебé, Гóсподи, слáва Тебé. Го́ры, хо́лми же и дре́ва дубра́вная,/ ре́ки, и моря́, и вся́кое дыха́ние, в весе́лии взыгра́йте:/ ны́не приближа́ется спасе́ние,/ Иису́с из Де́вы во гра́де Вифлее́ме роди́тися. Сла́ва Отцу́ и Сы́ну и Свято́му Ду́ху. Восприими́, проро́че Дави́де, псалти́рь и песнопо́й Ду́хом Святы́м я́ве:/ от Де́вы бо ражда́ется неслия́нно пре́жде денни́цы из чре́ва О́тча возсия́вый,/ Госпо́дь сла́вы, Христо́с Бог. И ны́не и при́сно и во ве́ки веко́в. Ами́нь. Ка́ко прии́мет Тя, Сло́ве, ражда́ема пло́тию, верте́п мале́йший и зело́ худы́й?/ Ка́ко же повие́шися пелена́ми, Одеява́яй не́бо о́блаки?/ Ка́ко в я́слех безслове́сных возля́жеши, я́ко Младе́нец? Песнь 5 Ирмос: Твой ми́р даждь нам,/ Сы́не Бо́жий:/ ино́го бо, ра́зве Тебе́, Бо́га не зна́ем,/ и́мя Твое́ имену́ем,/ я́ко Бог живы́х и ме́ртвых еси́. Припев: Слáва Тебé, Гóсподи, слáва Тебé. Да кропя́т, ра́дующеся, о́блацы сла́дость:/ уже́ бо приближа́ется Госпо́дь роди́тися я́коже Младе́нец из Чи́стыя Де́вы/ в худе́м верте́пе. Сла́ва Отцу́ и Сы́ну и Свято́му Ду́ху. Боже́ственнии ны́не взыгра́йте, проро́цы Бо́жии:/ прихо́дит бо Христо́с И́стина/ исполни́т про́поведи ва́шего Боже́ственнаго язы́ка,/ ражда́яся я́ко Младе́нец. И ны́не и при́сно и во ве́ки веко́в. Ами́нь. Богородичен: Еде́ме, заключи́выйся мне дре́вле,/ отве́рзися про́чее, ви́дя Христа́, младе́нствующа пло́тию/ и во гра́де, я́ко благоволи́, Вифлее́ме/ от Де́вы ражда́ющася Отрокови́цы. Песнь 6 Ирмос: Проро́ка Ио́ну подража́я, вопию́:/ живо́т мой, Бла́же, свободи́ из тли/ и спаси́ мя, Спа́се ми́ра, зову́щи: сла́ва Тебе́. Припев: Слáва Тебé, Гóсподи, слáва Тебé. Не́бо на земли́ Небе́снаго показу́ет звездо́ю све́тлою/ Царя́, нас ра́ди ражда́ющагося,/ звездосло́вцем ны́не во гра́де Дави́дове. Сла́ва Отцу́ и Сы́ну и Свято́му Ду́ху. Вити́йствует и вопие́т проро́к я́ве:/ до́ме ты Евфра́фов, Вифлее́ме,/ в не́мже Бог яви́тся от Де́вы,/ игра́й и лику́й. И ны́не и при́сно и во ве́ки веко́в. Ами́нь. Богородичен: В верте́пе Вифлее́мстем Де́ва ражда́ет я́вственне Го́спода, всех Творца́,/ и я́ко Челове́ка пови́вши пелена́ми, в я́слех восклоняет ны́не. Кондак, глас 3 Де́ва днесь преве́чное Сло́во в верте́пе гряде́т роди́ти неизрече́нно:/ лику́й, вселе́нная, услы́шавши,/ просла́ви со А́нгелы и па́стырьми/ хотя́щаго яви́тися Отроча́ Младо, Преве́чнаго Бо́га. Икос О, ужа́снаго и́стинно и па́че сло́ва чудесе́!/ Е́же бы́ти дая́й всем ра́ди бла́гости, во чре́во Святы́я Де́вы вни́де,/ и в верте́пе роди́тися гряде́т,/ и в я́слех положи́тися./ Звезда́ же сего́ пропове́дует свы́ше волхво́м, иду́щим на поклоне́ние его́ с да́ры,/ издале́ча привлача́щи со тща́нием, после́дующия Валаа́мову прорече́нию, ре́кшаго:/ звезда́ хо́щет провозвести́ти Отроча́ Мла́до, Преве́чнаго Бо́га. Песнь 7 Ирмос: Су́щим в пещи́ отроко́м Твои́м, Спа́се,/ не прикосну́ся, ниже́ стужи́, огнь./ Тогда́ трие́, я́ко еди́неми усты́, поя́ху/ и благословля́ху, глаго́люще:/ благослове́н Бог оте́ц на́ших. Припев: Слáва Тебé, Гóсподи, слáва Тебé. Христо́во во пло́ти показу́я явле́ние, Иереми́я вопия́ше:/ на земли́, вопло́щся, Бог яви́ся;/ худо́жества же обре́те всяк путь, рожде́йся в Вифлее́ме из Ма́тере. Сла́ва Отцу́ и Сы́ну и Свято́му Ду́ху. Се из ко́рене Иессе́ева прозябе́ жезл, цвет, прозяба́ющ Христа́,/ и на нем, ны́не ражда́емем в верте́пе,/ Дух почи́ет ра́зума, и сове́та,/ и Боже́ственнаго ве́дения. И ны́не и при́сно и во ве́ки веко́в. Ами́нь. Да услы́шим словеса́ свяще́нная:/ Госпо́дь ражда́ется, Отроча́ ра́ди нас,/ его́же нача́льство на ра́ме бысть,/ и нарица́ется А́нгел Сове́та Вели́ка О́тча,/ Нача́льник Ми́ра – Христо́с. Песнь 8 Ирмос: Его́же ужаса́ются А́нгели и вся во́инства,/ я́ко Творца́ и Го́спода,/ по́йте, свяще́нницы, просла́вите, о́троцы,/ благослови́те, лю́дие,/ и превозноси́те во вся ве́ки. Припев: Слáва Тебé, Гóсподи, слáва Тебé. Госпо́дь гряде́т стра́нным Рождество́м я́ве во Своя́,/ прии́мем его́, я́ко да устра́ншияся ра́йския сла́дости па́ки присво́ит,/ ражда́яся в верте́пе. Сла́ва Отцу́ и Сы́ну и Свято́му Ду́ху. Се Воззва́ние на́ше прихо́дит,/ возгласи́м пе́ния ра́достная тща́нием/ и воспои́м пе́сни предпра́зднственныя/ в мале́йшем Вмеща́ющемуся верте́пе. И ны́не и при́сно и во ве́ки веко́в. Ами́нь. Богородичен: Я́ко кля́тся Госпо́дь, испо́лни уже́,/ от се́мене дав нам Дави́дова Свою́ Ма́терь Де́ву;/ из Нея́же Младе́нец пло́тию роди́ся во гра́де Вифлее́ме па́че сло́ва. Песнь 9 Ирмос: Живоприе́мный Исто́чник приснотеку́щий,/ светоно́сный свети́льник благода́ти,/ храм одушевле́нный, сень Пречи́стую,/ Небесе́ и земли́ простра́ннейшую,/ Богоро́дицу, ве́рнии, велича́ем. Припев: Слáва Тебé, Гóсподи, слáва Тебé. С патриа́рхи, и пра́ведными все́ми, и со святы́ми проро́ки взыгра́им, от Де́вы Госпо́дь Иису́с, избавле́ние, просвеще́ние, и жи́знь, и спасе́ние,/ ны́не во гра́де Дави́дове ражда́ется. Сла́ва Отцу́ и Сы́ну и Свято́му Ду́ху. Уже Боже́ственнаго Сло́ва воплоще́ния всем отверзо́шася я́ве преддве́рия./ Небеса́, ра́дуйтеся, А́нгели, взыгра́йте,/ и да весели́тся земля́ с челове́ки,/ с па́стырьми и волхвы́ ду́хом. И ны́не и при́сно и во ве́ки веко́в. Ами́нь. Богородичен: Но́сит Христа́, я́коже ми́ро неистоще́нное, у́мный Де́ва алава́стр,/ и сие́ предъи́дет в верте́пе излия́ти Ду́хом я́ве,/ я́ко да напо́лнит благоуха́ния его́ ду́ши на́ша. Светилен Украси́ся, Вифлее́ме, но́вое жили́ще,/ я́сли и верте́п, па́стырей со́нмища,/ волсви́ от восто́ков в него́ предвари́те звезды́ све́тлостию:/ Де́ва бо уже́ Всесоверше́ннаго я́ко Младе́нца в том ражда́ет.

Православия наставника и истины провозвестника,/ златоустаго ревнителя, Российскаго светильника,/ Филиппа премудраго восхвалим,/ пищею словес своих разумно чада своя питающа:/ той бо языком хваления пояше,/ устнама же пение вещаше,// яко таинник Божия благодати.

Минея, 20 Сентября, Творе́ние не́гли иеромона́ха Святы́я Горы́ Пахо́мия, кроме́ Богоро́дичнов Глас 4 Песнь 1 Ирмос: Мо́ря чермну́ю пучи́ну/ невла́жными стопа́ми/ дре́вний пешеше́ствовав Изра́иль,/ крестообра́зныма Моисе́овыма рука́ма// Амали́кову си́лу в пусты́ни победи́л есть. Припев: Святи́и му́ченицы, моли́те Бо́га о на́с. Твои́ми моли́твами, страстоте́рпче Михаи́ле,/ благода́ть мне и просвеще́ние с Небесе́ да́руй,/ я́ко да возмогу́ похвали́ти до́блести и страда́ния твоя́. Припев: Святи́и му́ченицы, моли́те Бо́га о на́с. Боже́ственным жела́нием разжига́емь, Михаи́ле свя́те с Фео́дором боля́рином,/ па́ки к ва́шему Оте́честву возвраща́етеся,/ иде́же муче́ния венцы́ от десни́цы Вы́шняго прия́сте;/ изря́дно помина́йте вас почита́ющих. Сла́ва Отцу́ и Сы́ну и Свято́му Ду́ху. Ца́рствия ве́чнующаго и ника́коже мимотеку́щаго воспомина́я наслажде́ние, свя́те,/ ца́рство земно́е преоби́дев, и вме́сто ски́птра крест взял еси́,/ и самозва́н к подвиго́м устреми́лся еси́,/ ку́пно со страда́вшим с тобо́ю Фео́дором боля́рином. И ны́не и при́сно и во ве́ки веко́в. Ами́нь. Богородичен: Святы́х Святе́йшая была́ еси́, Де́во Чи́стая,/ святы́х Свята́го на руку́ Христа́ носи́вши,/ Боже́ственною си́лою тварь содержа́щаго. Песнь 3 Ирмос: Весели́тся о Тебе́ Це́рковь Твоя́, Христе́, зову́щи:/ Ты моя́ кре́пость, Го́споди, // и прибе́жище, и утвержде́ние. Припев: Святи́и му́ченицы, моли́те Бо́га о на́с. Яря́ся, зверь нечести́вый уби́ти вас повелева́ет,/ сего́ скве́рным повеле́нием повину́тися не хотя́щих,/ и тва́ри па́че Творца́ не послужи́сте, но Христу́ вопия́сте: свят еси́, Го́споди. Припев: Святи́и му́ченицы, моли́те Бо́га о на́с. Любо́вию твоего́ Влады́ки снеда́емь быв, Михаи́ле, ку́пно с Фео́дором боля́рином,/ ничто́же земна́го вмени́сте и Того́ жела́нием муче́ния ча́шу испи́сте усе́рдно,/ Христу́ вопию́ще: свят еси́, Го́споди. Сла́ва Отцу́ и Сы́ну и Свято́му Ду́ху. Самозва́н от да́льних стран оте́чество твое́ прише́д посети́ти/ и злоимени́таго царя́ богобо́рную пре́лесть обличи́ти,/ от него́же пострада́в, же́ртва Бо́гу прине́слся еси́. И ны́не и при́сно и во ве́ки веко́в. Ами́нь. Богородичен: Возста́вила еси́, Чи́стая,/ па́ки па́дший мой о́браз,/ ро́ждшая Виновнаго па́че есте́ственнаго Воскресе́ния. Седален, глас 1 Ка́мение тве́рдо яви́стеся/ и непребори́ми бы́сте мучи́телей преще́нием,/ Михаи́ле сла́вне и Фео́доре прему́дре./ Сего́ ра́ди росси́йстии собо́ри вопию́т ра́достно:/ сла́ва Укре́пльшему вы,/ сла́ва Венча́вшему вы,/ сла́ва Просве́щшему ва́ми весь мир. Песнь 4 Ирмос: Вознесе́на Тя ви́девши Це́рковь на Кресте́,/ Со́лнце Пра́ведное,/ ста в чи́не свое́м,/ досто́йно взыва́ющи:// сла́ва си́ле Твое́й, Го́споди. Припев: Святи́и му́ченицы, моли́те Бо́га о на́с. Богоме́рзкаго и злочести́ваго царя́ непра́ведна/ и лука́внейша па́че всея́ земли́ безбо́жную ве́ру укори́сте,/ и, лю́таго де́мона обличи́вше пре́лесть,/ я́ко а́гнцы, за Христа́ закла́ни бы́сте,/ и, я́ко со́лнце, по кончи́не просия́ли есте́. Припев: Святи́и му́ченицы, моли́те Бо́га о на́с. Усты́ све́тлыми вити́йствуя,/ испове́дал еси́ благоче́стно Еди́наго Бо́га, Михаи́ле, с пострада́вшим с тобо́ю Фео́дором;/ и сего́ ра́ди злочести́вый царь, не терпя́,/ повелева́ет уби́ти вас, на са́мей кончи́не Христа́ испове́дающия. Сла́ва Отцу́ и Сы́ну и Свято́му Ду́ху. О я́рости царя́ злочести́ваго и непра́веднаго убие́ния!/ О терпе́ния непобеди́мых страда́лец!/ Иже по ве́ре до́бре подви́гшеся, Христу́ вопия́ху:/ сла́ва си́ле Твое́й, Го́споди. И ны́не и при́сно и во ве́ки веко́в. Ами́нь. Богородичен: Неискусобра́чно родила́ еси́, о Де́во,/ и по Рождестве́ яви́лася еси́ де́вствующи па́ки./ Тем немо́лчными гла́сы: ра́дуйся, Тебе́, Влады́чице,/ ве́рою несомне́нною вопие́м. Песнь 5 Ирмос: Ты, Го́споди, мой свет,/ в мир прише́л еси́,/ Свет Святы́й, обраща́яй из мра́чна неве́дения// ве́рою воспева́ющия Тя. Припев: Святи́и му́ченицы, моли́те Бо́га о на́с. Дивлю́ся, о царю́, твоему́ безу́мию и су́етному глаго́лу,/ испове́дниче Михаи́ле, рекл еси́, и с благоро́дным Фео́дором:/ тва́ри па́че Творца́ ника́коже да бу́дет нам покланя́тися,/ она́ бо челове́ка ра́ди сотворе́на есть. Припев: Святи́и му́ченицы, моли́те Бо́га о на́с. Злочести́вый он законопресту́пный До́ман, и́же пе́рвее ве́ры христиа́нския отве́ргся,/ не терпя́ твоего́ испове́дания, зле огорчи́ся,/ ноже́м отре́зует главу́ твою́ честну́ю,/ испове́дниче Христо́в Михаи́ле. Сла́ва Отцу́ и Сы́ну и Свято́му Ду́ху. Аще честна́я свята́я телеса́ ва́ша и небрего́ма пребы́ша/ от кровоя́дец о́нех, пове́ржена псом на снеде́ние,/ но Бог соблюда́ше о́ная/ и столпо́м о́гненным осиява́ше, пресве́тлыми заря́ми. И ны́не и при́сно и во ве́ки веко́в. Ами́нь. Богородичен: Бог в Тя, Богома́ти, всели́ся,/ челове́ка назида́я,/ во тлю па́дшаго пре́лестию зми́я. Песнь 6 Ирмос: Пожру́ Ти со гла́сом хвале́ния, Го́споди,/ Це́рковь вопие́т Ти,/ от бесо́вския кро́ве очи́щшися,/ ра́ди ми́лости от ребр Твои́х// исте́кшею Кро́вию. Припев: Святи́и му́ченицы, моли́те Бо́га о на́с. Недово́лен злочести́вый быв мучи́тель о убие́нии благочести́ваго Михаи́ла,/ покуша́шеся и страда́льца Фео́дора ле́стию увеща́ти:/ а́ще бо, рече́, бого́м мои́м покло́нишися, со мно́ю во сла́ве бу́деши/ и име́нию господи́на твоего́ насле́дник бу́деши. Припев: Святи́и му́ченицы, моли́те Бо́га о на́с. Мне да не бу́дет, о царю́ пребеззако́нне,/ Христа́ отврещи́ся и ло́жным твои́м бого́м поклони́тися,/ мне бо е́же жи́ти Христо́с/ и е́же умре́ти за Него́ приобре́тение. Сла́ва Отцу́ и Сы́ну и Свято́му Ду́ху. От ю́ности житие́ твое́ чи́сто яви́ся/ Пресвято́го Ду́ха дарова́нием, Фео́доре,/ посреде́ бо злочести́вых мучи́телей твоему́ господи́ну побо́рник был еси́/ и с ним на Небеса́х при́сно весели́шися. И ны́не и при́сно и во ве́ки веко́в. Ами́нь. Богородичен: Излия́ пе́рвее яд во у́ши Е́вины змий вселука́вый,/ Ты же сего́ еди́на оттрясла́ еси́, Богома́ти,/ Истреби́теля сему́ ро́ждши. Кондак, глас 8 Ца́рство земно́е в ничто́же вмени́в,/ сла́ву, я́ко преходя́щую, оста́вил еси́,/ самозва́н прише́д к подвиго́м,/ Тро́ицу пропове́дал еси́ пред нечести́вым мучи́телем,/ страстоте́рпче Михаи́ле с до́блим Фео́дором,/ Царю́ Сил предстоя́ще,/ моли́те без вре́да сохрани́ти Оте́чество ва́ше, град же и лю́ди,// да вас непреста́нно почита́ем. Икос Кто по́двиги ва́ша и боле́зни возмо́жет извеща́ти, страстоте́рпцы,/ я́же му́жески претерпе́сте за ве́ру Госпо́дню?/ и́ дарова́ний, и́хже сподо́бистеся, не довле́ют уста́ челове́ческая испове́дати./ Прему́дростию бо укра́шени и му́жеством,/ бога́тство и сла́ву привре́менную возненави́десте,/ Михаи́ле сла́вный, и с пострада́вшим с тобо́ю ди́вным Фео́дором,/ с ним не разлучи́стеся на земли́ и на Небеси́./ Тем моли́те без вре́да сохрани́ти Оте́чество ва́ше, град же и лю́ди,/ да вас непреста́нно почита́ем. Песнь 7 Ирмос: В пещи́ авраа́мстии о́троцы перси́дстей,/ любо́вию благоче́стия па́че,/ не́жели пла́менем, опаля́еми, взыва́ху:// благослове́н еси́ в хра́ме сла́вы Твоея́, Го́споди. Припев: Святи́и му́ченицы, моли́те Бо́га о на́с. Ни любви́ сопру́жницы, ни чад разлуче́нию внима́л еси́,/ но сия́ вся в ру́ки преда́в Бо́жия,/ я́ко Творца́ и Промы́сленника всех, вопия́л еси́:/ благослове́н Бог отце́в на́ших. Сла́ва Отцу́ и Сы́ну и Свято́му Ду́ху. Поревнова́в му́жеству пре́жде бы́вших му́чеников,/ тех блаже́нство и сла́ву получи́л еси́,/ достохва́льне Михаи́ле, ку́пно с Фео́дором, вопию́ще:/ благослове́н Бог отце́в на́ших. И ны́не и при́сно и во ве́ки веко́в. Ами́нь. Богородичен: Вы́шняго освяще́нное Боже́ственное селе́ние, ра́дуйся,/ Тобо́ю бо даде́ся ра́дость, Богоро́дице, зову́щим:/ благослове́нна Ты в жена́х еси́, Всенепоро́чная Влады́чице. Песнь 8 Ирмос: Ру́це распросте́р, Дании́л/ львов зия́ния в ро́ве затче́;/ о́гненную же си́лу угаси́ша,/ доброде́телию препоя́савшеся,/ благоче́стия рачи́тели, о́троцы, взыва́юще:// благослови́те, вся дела́ Госпо́дня, Го́спода. Припев: Святи́и му́ченицы, моли́те Бо́га о на́с. Взира́л еси́ на воздая́ния, су́щая на Небесе́х, всече́стне,/ я́же лю́бящим Христо́с предугото́ва/ и вопию́щим Ему́ от души́:/ благослови́те, вся дела́ Госпо́дня, Го́спода. Припев: Святи́и му́ченицы, моли́те Бо́га о на́с. Боже́ственная му́ченик страда́ния вои́стину превзыдо́ша похвале́ния,/ па́че сло́ва и помышле́ния,/ я́ко тле́нным те́лом безпло́тныя враги́ победи́ша, вопию́ще:/ благослови́те, вся дела́ Госпо́дня, Го́спода. Сла́ва Отцу́ и Сы́ну и Свято́му Ду́ху. Непоколеби́мь в по́двизех пребы́л еси́,/ па́че же нечести́вых сердца́ поколеба́л еси́, ви́девших тя непрекло́нна,/ свя́те Михаи́ле, ку́пно с Фео́дором вопию́ща:/ благослови́те, вся дела́ Госпо́дня, Го́спода. И ны́не и при́сно и во ве́ки веко́в. Ами́нь. Богородичен: Та́инство стра́нно, и́стинно, под со́лнцем еди́на показа́ла еси́,/ Бо́га бо родила́ еси́, Чи́стая,/ Неви́димаго и Безнача́льнаго, Невмести́маго, всем Непостижи́маго, Ему́же вопие́м:/ благослови́те, вся дела́ Госпо́дня, Го́спода. Песнь 9 Ирмос: Ка́мень нерукосе́чный/ от несеко́мыя горы́, Тебе́, Де́во,/ краеуго́льный отсече́ся,/ Христо́с, совокупи́вши разстоя́щаяся естества́.// Тем веселя́щеся, Тя, Богоро́дице, велича́ем. Припев: Святи́и му́ченицы, моли́те Бо́га о на́с. Прииди́те, чи́стым се́рдцем и тре́звою со́вестию/ великому́ченика Михаи́ла с сове́тником кре́пким Фео́дором/ па́че зла́та светя́щася зря́ще, велича́ем. Припев: Святи́и му́ченицы, моли́те Бо́га о на́с. Све́тлая ва́ша, пребога́тии, побе́дная храбо́рствия на враги́/ ви́дев Всеви́дящее о́ко, по́двиги ва́ша/ венцы́ одоле́ния венча́ет Спас душ на́ших. Припев: Святи́и му́ченицы, моли́те Бо́га о на́с. Во́инства А́нгелов удиви́шася,/ му́чеников же ли́цы и пра́ведных собо́ри согла́сно похвали́ша Христа́,/ таково́е терпе́ние вам дарова́вшаго. Сла́ва Отцу́ и Сы́ну и Свято́му Ду́ху. Непобеди́мая честна́я му́ченик дво́ица, на Небесе́х живу́щи,/ певцы́ своя́ помина́й, соверша́ющих во хвале́нии свяще́нная ва́ша страда́ния,/ вас непреста́нно велича́ющих. И ны́не и при́сно и во ве́ки веко́в. Ами́нь. Богородичен: Земля́ изба́вися от кля́твы дре́вния Рождество́м Твои́м./ Те́мже Тя, Богороди́тельнице, велича́ем. Светилен Да просла́вим вси Бо́га,/ просла́вльшаго святы́я Своя́ великому́ченики,/ Михаи́ла ку́пно с Фео́дором,/ ти́и бо пострада́ша за Христа́, и венцы́ от Него́ прия́ша,/ и ны́не, в вы́шних предстоя́ще, о ми́ре мо́лятся.

Канон Преподобного Мефодия Пешношского Глас 8 Песнь 1 Ирмос: Мо́ре огусти́л еси́,/ погрузи́вый со ору́жием го́рдаго фарао́на,/ и лю́ди спасл еси́ немо́кренно, Го́споди,/ и ввел еси́ я в го́ру святы́ни, вопию́щия:/ пои́м Тебе́, Бо́гу на́шему, песнь побе́дную, я́ко просла́вися. Припев: Преподо́бне о́тче Мефо́дие, моли́ Бо́га о нас. Мо́ря страстна́го пучи́ною обурева́емы,/ к Тебе́, Иису́се Всеблаги́й, прибега́юще, вопие́м:/ от тиме́ния страсте́й нас изба́ви,/ да в тишине́ ду́ха уго́днику Твоему́ песнь хвале́бную принесе́м,/ его́же чудесы́ сла́вно просла́вил еси́. Припев: Преподо́бне о́тче Мефо́дие, моли́ Бо́га о нас. Мо́рю песо́к преде́л положи́вый Госпо́дь,/ тя избра́, преподо́бне о́тче Мефо́дие, от ю́ности Ему́ благоугожда́ти/ и сего́ ра́ди к вели́кому Се́ргию тя наста́ви,/ от него́же подвиго́м духо́вным научи́вся,/ в них сла́вно просла́вился еси́. Сла́ва Отцу́ и Сы́ну и Свято́му Ду́ху. Мо́ря жите́йскаго треволне́ние/ не потопи́ ладьи́ твоея́, о́тче преподо́бне,/ но, ве́янием Ду́ха Бо́жия управля́емый,/ в ти́хое приста́нище спасе́ния вшел еси́/ и чудесы́ мно́гими от Го́спода просла́вился еси́. И ны́не и при́сно и во ве́ки веко́в. Ами́нь. Богородичен: Мо́ре слез испроси́ нам, Влады́чице Преблага́я,/ у Ми́лостиваго Сы́на Твоего́ и Бо́га на́шего,/ да, и́ми угаси́вше пещь страсте́й,/ омы́ем скве́рну грехо́вную душ на́ших/ и, спасе́ние ве́чное улучи́вше,/ воспои́м Христу́ песнь побе́дную, я́ко просла́вися. Песнь 3 Ирмос: Утверди́ся се́рдце мое́ во Го́споде,/ вознесе́ся рог мой в Бо́зе мое́м,/ разшири́шася на враги́ моя́ уста́ моя́,/ возвесели́хся о спасе́нии Твое́м. Припев: Преподо́бне о́тче Мефо́дие, моли́ Бо́га о нас. Утверди́л еси́ на ка́мени за́поведей Христо́вых се́рдце твое́, преподо́бне о́тче Мефо́дие,/ у́зким и приско́рбным путе́м ше́ствовал еси́,/ а́лчбою и жа́ждею плоть свою́ изнуря́я/ блаже́ннаго ра́ди бу́дущаго поко́я,/ его́же получи́в, весели́шися ве́чно со святы́ми. Припев: Преподо́бне о́тче Мефо́дие, моли́ Бо́га о нас. Утвержде́нный благослове́нием и моли́твою преподо́бнаго Се́ргия,/ в пусты́ню удали́лся еси́, о́тче Мефо́дие,/ и, в ней многоле́тне потруди́вся,/ оби́тель и́ноком возгради́л еси́,/ я́же спасе́ния хода́таица бысть мно́гим. Сла́ва Отцу́ и Сы́ну и Свято́му Ду́ху. Утвержда́л еси́ словесы́ твои́ми душеспаси́тельными бра́тию твою́, преподо́бне о́тче,/ и был еси́ о́браз благоче́стия твои́м ученико́м,/ и́же, тобо́ю наставля́еми, подража́тели бы́ша твоему́ житию́ свято́му/ и вку́пе с тобо́ю получи́ша спасе́ние. И ны́не и при́сно и во ве́ки веко́в. Ами́нь. Богородичен: Утвержде́ние на Тя наде́ющихся, Пресвята́я Богоро́дице Влады́чице,/ не посрами́ упова́ния на́шего,/ е́же по Бо́зе на Тя возлага́ем,/ но бу́ди нам Засту́пница от нападе́ний диа́вольских,/ да, Тобо́ю помоществу́еми, возвесели́мся о спасе́нии на́шем. Песнь 4 Ирмос: Проро́к Авваку́м у́мныма очи́ма/ прови́де, Го́споди, прише́ствие Твое́,/ тем и вопия́ше:/ от ю́га прии́дет Бог./ Сла́ва си́ле Твое́й, сла́ва снизхожде́нию Твоему́. Припев: Преподо́бне о́тче Мефо́дие, моли́ Бо́га о нас. Проро́ком Бо́жиим Илии́ и Крести́телю/ уподо́бился еси́, преподо́бне о́тче Мефо́дие,/ пусты́нный жи́тель быв, я́ко го́рлица уедине́нная,/ славосло́вия пе́сни еди́н Еди́ному Христу́ возноси́л еси́,/ воспева́я Того́ Боже́ственное снизхожде́ние. Припев: Преподо́бне о́тче Мефо́дие, моли́ Бо́га о нас. Проро́чески прови́дев преподо́бный Се́ргий/ име́вшую устро́итися в пусты́ни твое́й оби́тель,/ прише́д к тебе́, о́тче Мефо́дие, избра́ и благослови́ ме́сто,/ на сооруже́ние оби́тели удо́бное,/ его́же посеще́нием обра́дован быв,/ вку́пе с ним воспева́л еси́ Спа́сово Боже́ственное снизхожде́ние. Сла́ва Отцу́ и Сы́ну и Свято́му Ду́ху. Проро́ка и царя́ Дави́да словесе́м после́дуя, преподо́бне о́тче,/ жи́ти бра́тии вку́пе в оби́тели твое́й законоположи́л еси́/ и о́бщаго жития́ ревни́тель был еси́ вели́кий,/ приме́р собо́ю всем подава́я/ и немо́лчно воспева́я Христо́во Боже́ственное снизхожде́ние. И ны́не и при́сно и во ве́ки веко́в. Ами́нь. Богородичен: Проро́ческая рече́ния на Тебе́ сбы́шася, Де́во Богоро́дице,/ Ты бо Сло́во Бо́жие нетле́нно воплоти́ла еси́,/ и Невмести́маго во утро́бе Твое́й де́вственней нете́сно вмести́ла еси́;/ тем Тя хвале́бно ублажа́ем/ и воспева́ем спаси́тельное Христо́во снизхожде́ние. Песнь 5 Ирмос: Го́споди Бо́же наш, мир даждь нам,/ Го́споди Бо́же наш, стяжи́ ны,/ Го́споди, ра́зве Тебе́, ино́го не ве́мы,/ И́мя Твое́ имену́ем. Припев: Преподо́бне о́тче Мефо́дие, моли́ Бо́га о нас. Го́спода Бо́га освяти́л еси́ в души́ твое́й, преподо́бне о́тче,/ и же́ртвенник мы́сленный ду́шу твою́ соде́лал еси́,/ на не́мже же́ртву хвалы́ Го́сподеви возноси́л еси́ во смире́нии ду́ха,/ немо́лчно призыва́я И́мя Бо́жие спаси́тельное. Припев: Преподо́бне о́тче Мефо́дие, моли́ Бо́га о нас. Госпо́дни за́поведи животво́рныя/ име́л еси́ напи́санныя на скрижа́лех се́рдца твоего́, преподо́бне о́тче,/ и пропове́дник бра́тии твое́й был еси́ ева́нгельскаго уче́ния,/ к Небеси́ возводя́щаго челове́ки,/ и́же, послу́шающе сего́, моли́твенно призыва́ют Боже́ственное Христо́во И́мя. Сла́ва Отцу́ и Сы́ну и Свято́му Ду́ху. Госпо́день раб был еси́, Мефо́дие Богому́дре,/ день и нощь труди́выйся во сла́ву Бо́жию и на по́льзу душе́вную бли́жних твои́х,/ и́хже, я́ко сама́го себе́, возлюби́в усе́рдно,/ гла́дныя пита́л еси́,/ ни́щия, сироты́ и вдови́цы удовля́л еси́,/ подвиза́я их сла́вити о тебе́ Христо́во И́мя. И ны́не и при́сно и во ве́ки веко́в. Ами́нь. Богородичен: Госпо́дня Ма́ти и Влады́чица всея́ тва́ри яви́лася еси́, Богоро́дице Мари́е,/ нетле́нно поро́ждши Еди́наго от Тро́ицы, Бо́га Сло́ва,/ Его́же моли́, Чи́стая, безслове́сных страсте́й нас изба́вити,/ да в тишине́ безстра́стия се́рдцем и усты́ воспева́ем Его́ Свято́е И́мя. Песнь 6 Ирмос: Я́ко во́ды морски́я, Человеколю́бче,/ волна́ми жите́йскими обурева́юся./ Те́мже, я́ко Ио́на, та́ко вопию́ Ти:/ возведи́ от тли живо́т мой, Благоутро́бне Го́споди. Припев: Преподо́бне о́тче Мефо́дие, моли́ Бо́га о нас. Я́ко кипари́с высокове́рхий, возра́сл еси́, преподо́бне Мефо́дие, в пусты́ни непло́дней/ и плодоноше́нии духо́вными облагоуха́л еси́ Христо́ву Це́рковь,/ оби́тель созда́в, и, в ней и́ноков мно́жество насели́в,/ и́хже сло́вом и приме́ром твои́м ко Христу́ наста́вил еси́. Припев: Преподо́бне о́тче Мефо́дие, моли́ Бо́га о нас. Я́ко при́сный учени́к преподо́бнаго Се́ргия, о́тче Мефо́дие,/ в устрое́нии оби́тели ему́ подража́л еси́ то́щно,/ слеза́ми моли́твенными па́че, не́же бога́тством земны́м, сию́ созида́я/ и при́сно моля́ся ко Го́споду,/ да от тли грехо́вныя соблюде́т де́ло руку́ твое́ю. Сла́ва Отцу́ и Сы́ну и Свято́му Ду́ху. Я́ко воево́да благоиску́сный, о́тче,/ во́ины духо́вныя в бра́нех со враги́ неви́димыми к побе́дам руково́дствовал еси́:/ искуше́н бо быв сам в по́двизех пусты́нных,/ и искуша́емым удо́бно помога́л еси́ тли грехо́вныя избега́ти. И ны́не и при́сно и во ве́ки веко́в. Ами́нь. Богородичен: Я́ко вои́стинну прибе́жище непосты́дное христиа́ном,/ и щит, и покро́в, Ма́ти Бо́жия,/ воспева́ющия Тя бед и скорбе́й свободи́:/ Тя бо, Еди́ну Благослове́нную в жена́х,/ Тобо́ю тли грехо́вныя изба́вльшиися,/ немо́лчными хвала́ми ублажа́ем. Песнь 7 Ирмос: Халде́йская пещь, огне́м распала́емая,/ ороша́шеся Ду́хом, Бо́жиим предстоя́нием,/ о́троцы поя́ху:/ благослове́н еси́, Бо́же оте́ц на́ших. Припев: Преподо́бне о́тче Мефо́дие, моли́ Бо́га о нас. В пещи́ искуше́ний пусты́нных, о́тче Мефо́дие,/ благода́ть Госпо́дню, тя ороша́ющую, стяжа́л еси́, преподо́бне,/ те́мже непобеди́м враго́м неви́димым показа́лся еси́/ и вся прило́ги диа́вольския кре́пко сокруши́л еси́, зовы́й немо́лчно:/ благослове́н еси́, Бо́же оте́ц на́ших. Припев: Преподо́бне о́тче Мефо́дие, моли́ Бо́га о нас. Поревнова́л еси́, преподо́бне о́тче, в житии́ твое́м/ вели́ким во отце́х Анто́нию, Пахо́мию и Евфи́мию/ и, сих нра́ву и чистоте́ вы́ну поуча́яся,/ я́ко безпло́тен, на земли́ подвиза́лся еси́,/ сего́ ра́ди сосу́д избра́н Ду́ху Свято́му сподо́бился еси́ бы́ти,/ Его́же де́йством чудеса́ пресла́вная соде́лал еси́ в житии́ и по сме́рти,/ о ни́хже ве́рнии благословля́ют Бо́га оте́ц на́ших. Сла́ва Отцу́ и Сы́ну и Свято́му Ду́ху. Я́ко крин в пусты́ни, процве́л еси́, преподо́бне,/ и благоуха́ния Христо́ва испо́лнил еси́ оте́чество твое́ земно́е:/ све́том до́брых дел твои́х озари́л еси́ сердца́ челове́ков,/ просвеща́я их уче́нии твои́ми и науча́я пе́ти Го́сподеви:/ благослове́н еси́, Бо́же оте́ц на́ших. И ны́не и при́сно и во ве́ки веко́в. Ами́нь. Богородичен: В пещи́ халде́йской та́инство рождества́ Твоего́ проразумева́я, Богоро́дице,/ ро́ждшимся от Тебе́ Искупи́телем спасе́ние обрето́хом/ и, подо́бно отроко́м Богосло́вцем, Сы́ну Твоему́ и Го́споду благода́рно зове́м:/ благослове́н еси́, Бо́же оте́ц на́ших. Песнь 8 Ирмос: А́нгели и Небеса́,/ на Престо́ле сла́вы седя́щаго/ и я́ко Бо́га непреста́нно сла́вимаго,/ благослови́те, по́йте/ и превозноси́те Его́ во ве́ки. Припев: Преподо́бне о́тче Мефо́дие, моли́ Бо́га о нас. А́нгелы собесе́дники име́л еси́, преподо́бне о́тче,/ и, си́ми укрепля́емый, в пусты́ни безлю́дней многоле́тне пребы́л еси́,/ еди́н Еди́ному Бо́гу рабо́тая./ Сего́ ра́ди ны́не со Безпло́тными водворя́ешися/ и пое́ши хвале́бную песнь Триеди́ному Бо́гу,/ Препе́тому и Превозноси́мому во ве́ки. Припев: Преподо́бне о́тче Мефо́дие, моли́ Бо́га о нас. А́нгела тя плотя́наго ве́мы, преподо́бне о́тче Мефо́дие:/ ангелоподо́бно бо на земли́ пожи́л еси́,/ и чистоту́ души́ и те́ла ре́вностно соблю́л еси́,/ ны́не же водворя́ешися там, иде́же ничто́же скве́рно вхо́дит,/ и пое́ши немо́лчную песнь Бо́гу, Препе́тому и Превозноси́мому во ве́ки. Сла́ва Отцу́ и Сы́ну и Свято́му Ду́ху. А́нгелов Творе́ц и всея́ тва́ри Созда́тель/ подви́жника доброде́телей яви́ тя, Мефо́дие,/ Его́же си́лою укрепля́емый, путе́м те́сным ше́ствуя,/ дости́гл еси́ соверше́нства духо́внаго,/ Ца́рствие же Христо́во унасле́довал еси́,/ и со святы́ми пое́ши ра́достно:/ Го́спода по́йте и превозноси́те Его́ во ве́ки. И ны́не и при́сно и во ве́ки веко́в. Ами́нь. Богородичен: А́нгельское целова́ние прино́сим Ти с любо́вию, Богоро́дице Чи́стая:/ ра́дуйся, Благода́тная, Госпо́дь с Тобо́ю./ Ты же ра́дости нетле́нныя сподо́би Тя по до́лгу ублажа́ющия,/ Ро́ждшагося же от Тебе́ Го́спода пою́щия и превознося́щия во ве́ки. Песнь 9 Ирмос: Чу́жде ма́терем де́вство,/ и стра́нно де́вам деторожде́ние:/ на Тебе́, Богоро́дице, обоя́ устро́ишася./ Тем Тя, вся племена́ земна́я,/ непреста́нно велича́ем. Припев: Преподо́бне о́тче Мефо́дие, моли́ Бо́га о нас. Чужд был еси́, преподо́бне, превозноше́ния тщесла́внаго/ и в смире́нии глубо́цем житие́ твое́ препроводи́л еси́:/ о́браз смире́ния был еси́ твои́м ученико́м,/ и́хже при́сно поуча́л еси́ бе́гати душепа́губныя горды́ни/ и во смире́нии ду́ха велича́ти Христа́ Жизнода́вца. Припев: Преподо́бне о́тче Мефо́дие, моли́ Бо́га о нас. Чу́ждым прише́льцем и стра́нником убо́гим/ врата́ оби́тели твоея́ незатворе́на бы́ша, преподо́бне о́тче,/ но, Авраа́мово страннолю́бие стяжа́в,/ сия́ с любо́вию приима́л и упокоева́л еси́,/ зря в них Самого́ Христа́, Его́же при́сно велича́л еси́. Сла́ва Отцу́ и Сы́ну и Свято́му Ду́ху. Чужд пра́здности был еси́, блаже́нне,/ но при́сно в моли́твах и труде́х теле́сных подвиза́лся еси́,/ при сооруже́нии же оби́тели твоея́ святы́я/ мно́гия вели́кия труды́ подъя́л еси́, си́лою Го́спода сил укрепля́емый,/ Его́же гла́сы хвале́бными немо́лчно велича́л еси́. И ны́не и при́сно и во ве́ки веко́в. Ами́нь. Богородичен: Чу́ждых нас яви́, Влады́чице, вла́сти лю́таго мироде́ржца/ и в час кончи́ны на́шея на по́мощь ускори́ к нам, безпо́мощным:/ мно́го бо мо́жет Ма́терняя моли́тва Твоя́ ко Го́споду,/ и трепе́щут пред Тобо́ю ду́си тьмы,/ и́хже наси́лия нас изба́ви, Всеблага́я,/ да Тя славосло́вии ра́достными велича́ем.

Минея, 29 Апреля, Кано́н преподо́бнаго Глас 4 Песнь 1 Ирмос: Мо́ря чермну́ю пучи́ну невла́жными стопа́ми дре́вний пешеше́ствовав Изра́иль, крестообра́зными Моисе́овыма рука́ма Амали́кову си́лу в пусты́ни победи́л е́сть. Припев: Преподо́бне о́тче Ме́мноне, моли́ Бо́га о на́с. Боже́ственною Пресвята́го Ду́ха блиста́яся благода́тию, светоно́сне Ме́мноне, и честно́е творя́щия твое́ успе́ние све́тлою моли́твою твое́ю страсте́й мглу́ очи́сти. Припев: Преподо́бне о́тче Ме́мноне, моли́ Бо́га о на́с. Преподо́бне, тво́й кре́ст взе́м, после́довал еси́ распе́ншемуся Сло́ву на́с ра́ди и плотска́я движе́ния воздержа́нием, преподо́бне, и ни́зу лега́нием умертви́л еси́. Сла́ва Отцу́ и Сы́ну и Свято́му Ду́ху. Поще́нием, и моли́твами, и слеза́ми Бо́гу соединя́яся, прия́л еси́ благода́ть от Него́ цели́ти неду́ги и отгони́ти ду́хи, Ме́мноне богому́дре преблаже́нне. И ны́не и при́сно и во ве́ки веко́в. Ами́нь. Богородичен: Обле́кся из Тебе́ Бо́г в челове́ка за бла́гость, сугу́б про́йде, Пресвята́я Чи́стая, де́йствы и естествы́. Его́же моли́ всегда́ просвети́ти пою́щия Тя́. Песнь 3 Ирмос: Весели́тся о Тебе́ Це́рковь Твоя́, Христе́, зову́щи: Ты́ моя́ кре́пость, Го́споди, и прибе́жище, и утвержде́ние. Припев: Преподо́бне о́тче Ме́мноне, моли́ Бо́га о на́с. Я́коже со́лнце на земли́, доброде́телей просвеще́нием просия́л еси́, все́х ду́ши, преподо́бне, благода́тию просвеща́я духо́вною. Припев: Преподо́бне о́тче Ме́мноне, моли́ Бо́га о на́с. Желе́зом твоя́ чре́сла препоя́сана име́л еси́ страсте́й на умерщвле́ние, я́ве, преподо́бне Ме́мноне, оде́явся безстра́стием. Сла́ва Отцу́ и Сы́ну и Свято́му Ду́ху. Человеколюби́в бы́в немощны́м, от Бо́га прия́л еси́ благода́ть мно́гу, преподо́бне, стра́сти цели́ти неисце́льныя. И ны́не и при́сно и во ве́ки веко́в. Ами́нь. Богородичен: Сло́во Бо́жие в Твое́ нескве́рное чре́во всели́ся и земны́м, Пречи́стая, вся́к гре́х отъя́ло е́сть. Седален, глас 8 Я́ко звезду́ тя́ вси́ светови́дну, доброде́тельми и чуде́с заря́ми ми́р просвеща́юща, восхваля́ем, блаже́нне: прича́стник бо Боже́ственныя све́тлости бы́л еси́, и к сия́нию, Ме́мноне, преше́л еси́ незаходи́мому. Те́мже светоно́сную и святу́ю па́мять твою́ почита́ем, всегда́ Спа́са сла́вяще, и ве́рно вопие́м ти́: моли́ Христа́ Бо́га грехо́в оставле́ние пода́ти чту́щим любо́вию святу́ю па́мять твою́. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: В напа́сти многоплете́нныя впа́д от вра́г ви́димых и неви́димых, бу́рею одержи́мь безчи́сленных согреше́ний мои́х, и я́ко к те́плому заступле́нию и покро́ву моему́, Чи́стая, ко приста́нищу притека́ю Твоея́ бла́гости. Те́мже, Пречи́стая, из Тебе́ Воплоще́нному безсе́менно моли́ся приле́жно о все́х рабе́х Твои́х, непреста́нно моля́щих Ти ся, Богоро́дице Пречи́стая, моля́щи Его́ при́сно согреше́ний оставле́ние дарова́ти воспева́ющим досто́йно сла́ву Твою́. Песнь 4 Ирмос: Вознесе́на Тя́ ви́девши Це́рковь на Кресте́, Со́лнце Пра́ведное, ста́ в чи́не свое́м, досто́йно взыва́ющи: сла́ва си́ле Твое́й, Го́споди. Припев: Преподо́бне о́тче Ме́мноне, моли́ Бо́га о на́с. Струя́ми, преподо́бне, сле́зными твое́ се́рдце очи́стив, во́ды на безво́днем ме́сте истека́ти устро́ил еси́, Бо́гу тя́ просла́вльшу, Ме́мноне, я́ко Своего́ уго́дника. Припев: Преподо́бне о́тче Ме́мноне, моли́ Бо́га о на́с. Пресла́вным житие́м, я́ко звезда́, сия́я, свяще́нными чудесы́ твои́ми, друго́е ты́ не́бо показа́лся еси́, блаже́нне, ве́рою зову́щим: сла́ва си́ле Твое́й, Го́споди. Сла́ва Отцу́ и Сы́ну и Свято́му Ду́ху. Зако́ном, преподо́бне, повину́яся Влады́чним, я́же под тобо́ю су́щия наста́вил еси́, упа́с, преподо́бне, многоусугу́бив же я́ко ра́б послушли́в, Дарова́вшему тебе́ тала́нт. И ны́не и при́сно и во ве́ки веко́в. Ами́нь. Богородичен: Привлече́нный у́м мо́й, Богороди́тельнице, к сла́достем теле́сным Твои́м хода́тайством, молю́ся, утверди́, Я́же еди́на ро́ждшая Благода́вца Бо́га. Песнь 5 Ирмос: Ты́, Го́споди, мо́й Све́т, в ми́р прише́л еси́, Све́т Святы́й, обраща́яй из мра́чна неве́дения ве́рою воспева́ющия Тя́. Припев: Преподо́бне о́тче Ме́мноне, моли́ Бо́га о на́с. Ум тво́й, чи́стыми воззре́нии к Бо́гу ве́сь бы́в, богоблаже́нне, плотски́х сласте́й яви́ся вы́шши. Припев: Преподо́бне о́тче Ме́мноне, моли́ Бо́га о на́с. Сы́й вра́чь теле́с, пребога́те, отжени́ ско́тския ду́ш боле́зни благода́тию Ду́ха. Сла́ва Отцу́ и Сы́ну и Свято́му Ду́ху. Блаже́н еси́ ты́, и добро́ тебе́ е́сть, побе́ждшу зло́бу вра́жию и стра́сти, преблаже́нне, умертви́вшу. И ны́не и при́сно и во ве́ки веко́в. Ами́нь. Богородичен: Родила́ еси́ Бо́га и Де́ва пребыла́ еси́, Богоневе́сто, сего́ ра́ди ублажа́ет Тя́ ве́сь челове́ческий язы́к, ра́дуяся. Песнь 6 Ирмос: Пожру́ Ти со гла́сом хвале́ния, Го́споди, Це́рковь вопие́т Ти́, от бесо́вския кро́ве очи́щшися, ра́ди ми́лости от ре́бр Твои́х исте́кшею кро́вию. Припев: Преподо́бне о́тче Ме́мноне, моли́ Бо́га о на́с. Еди́нем то́чию зва́нием пру́зи отгоня́ются и вся́к вре́д де́монский: Бо́га бо, Ме́мноне, ве́лий уго́дник, позна́лся еси́, вельми́ тя́, о́тче, просла́вльшаго. Припев: Преподо́бне о́тче Ме́мноне, моли́ Бо́га о на́с. Победи́в плотска́го наве́та мудрова́ние, Ду́ха благода́ть прия́л еси́ отгоня́ти неду́ги и боля́щия греха́ми цели́ти ду́ши, досточу́дне. Сла́ва Отцу́ и Сы́ну и Свято́му Ду́ху. О, чу́до! Ка́ко от еди́наго то́кмо призыва́ния спаса́ются твоего́, пресла́вне Ме́мноне, ве́рнии пла́вающии, тебе́ ви́дяще приспева́юща и во́лн молву́ кротя́ща? И ны́не и при́сно и во ве́ки веко́в. Ами́нь. Богородичен: Умертви́ пло́ти моея́, Де́во, мудрова́ние, Умертви́теля сме́рти и Жизнода́вца я́ко заче́нши и ро́ждши па́че сло́ва и смы́сла, Пречи́стая. Кондак, глас 2 Чистотою душевною божественно вооружився, / и непрестанные молитвы, яко копие, вручив крепко, / пробол еси бесовская ополчения, / Мемноне, отче наш, / моли непрестанно о всех нас. Песнь 7 Ирмос: В пещи́ авраа́мстии о́троцы перси́дстей, любо́вию благоче́стия па́че, не́жели пла́менем, опаля́еми, взыва́ху: благослове́н еси́ в хра́ме сла́вы Твоея́, Го́споди. Припев: Преподо́бне о́тче Ме́мноне, моли́ Бо́га о на́с. Сле́зными ту́чами страсте́й погаси́л еси́ пе́щь, ны́не же огне́м, блаже́нне, вои́стинну попаля́еши чуде́с твои́х ве́щный всегда́ неду́гов вре́д благода́тию. Припев: Преподо́бне о́тче Ме́мноне, моли́ Бо́га о на́с. Всеусе́рдно Творца́ твоего́, блаже́нне, возлюби́л еси́. Те́мже пло́ти и ми́ра, Ме́мноне му́дре, взыва́я вне́ бы́л еси́: благослове́н еси́ в хра́ме сла́вы Твоея́, Го́споди. Припев: Преподо́бне о́тче Ме́мноне, моли́ Бо́га о на́с. Я́коже дре́во, при исхо́дищих воздержа́ния, о́тче, насажде́н бы́в, возда́л еси́ плоды́ чуде́с де́йство, Ме́мноне пребога́те, во бла́го вре́мя изоби́луя. Сла́ва Отцу́ и Сы́ну и Свято́му Ду́ху. От пруго́в вре́д прибы́вший уста́вил еси́ повеле́нии боже́ственными, Ме́мноне му́дре, ре́чными удави́в вода́ми, — благослове́н еси́, Бо́же мо́й, — зовы́й, возопи́л еси́. И ны́не и при́сно и во ве́ки веко́в. Ами́нь. Богородичен: Бу́ри безме́рных согреше́ний, Отрокови́це, изба́ви мя́, еди́на смире́нных по́мощь кре́пкая и прегреше́ний очище́ние: благослове́нна Ты́ в жена́х еси́, Всенепоро́чная Влады́чице. Песнь 8 Ирмос: Ру́це распросте́р, Дании́л, льво́в зия́ния в ро́ве затче́; о́гненную же си́лу угаси́ша, доброде́телию препоя́савшеся, благоче́стия рачи́тели, о́троцы, взыва́юще: благослови́те, вся́ дела́ Госпо́дня, Го́спода. Припев: Преподо́бне о́тче Ме́мноне, моли́ Бо́га о на́с. Я́ко у́тро, просия́л еси́, я́ко звезда́, я́ко вели́кое со́лнце, Ме́мноне богодухнове́нне, ду́ши просвети́л еси́ благода́тию наста́вника тя́ поста́вльшим изря́дна, и учи́теля свяще́нна, и наказа́теля чу́дна, вопию́ща: вся́ дела́, благослови́те Госпо́дня Го́спода. Припев: Преподо́бне о́тче Ме́мноне, моли́ Бо́га о на́с. Глубоку́ я́зву врагу́, ражда́ющу сме́рть, преблаже́нне, да́л еси́, егда́ благода́тию Ду́ха смире́ну стяжа́л еси́ му́дрость, высокому́дрый того́ нра́в в зе́млю смиря́я и се́ти душетле́нныя его́ попира́я. Припев: Преподо́бне о́тче Ме́мноне, моли́ Бо́га о на́с. Ви́дети сподо́бился еси́ та́мо блаже́нство, и наслажде́ние ве́чнующее, свя́те, и святы́х све́тлости, пожи́в житие́ до́бре, и ны́не вопие́ши ра́достно: благослови́те, вся́ дела́ Госпо́дня, Го́спода. Сла́ва Отцу́ и Сы́ну и Свято́му Ду́ху. Ме́сто, безво́дное пре́жде, ны́не же во́дно, пропове́дует, преподо́бне, ко Го́споду ве́ру твою́ и благода́ть чуде́с твои́х, я́же соверши́л еси́, вопия́ Пода́телю до́брых: благослови́те, вся́ дела́ Госпо́дня, Го́спода. И ны́не и при́сно и во ве́ки веко́в. Ами́нь. Богородичен: Неду́говавшую тягото́ю лю́тых и пото́пльшуюся смире́нную ду́шу мою́, Богоблагода́тная Влады́чице, посеще́ния сподо́би и здра́ву до конца́ покажи́, зову́щую: благослови́те, вся́ дела́ Госпо́дня, Го́спода. Песнь 9 Ирмос: Ка́мень нерукосе́чный от несеко́мыя горы́, Тебе́, Де́во, краеуго́льный отсече́ся — Христо́с, совокупи́вый разстоя́щаяся естества́. Те́м, веселя́щеся, Тя́, Богоро́дице, велича́ем. Припев: Преподо́бне о́тче Ме́мноне, моли́ Бо́га о на́с. Возмо́гл еси́, укрепля́емь, держа́вою богонача́льною, Ме́мноне богому́дре, всю́ вра́жию си́лу пребори́ти, те́мже вене́ц я́ко победоно́сец прие́мь, о на́с Христу́ моли́ся. Припев: Преподо́бне о́тче Ме́мноне, моли́ Бо́га о на́с. Я́коже от исто́чника, твоея́ ра́ки струи́ исцеле́ний истека́ют, боле́зни и скве́рны си́лою Боже́ственнаго Ду́ха очища́ют и напоя́ют, преподо́бне, помышле́ния чту́щих тя́. Припев: Преподо́бне о́тче Ме́мноне, моли́ Бо́га о на́с. Дне́сь па́мять твоя́, о́тче, я́коже со́лнце, просвеща́ет вся́к во́зраст и ра́зум: Све́та бо дела́, Ме́мноне, соверши́л еси́ и к Све́ту незаходи́мому, ны́не отше́д, всели́лся еси́. Сла́ва Отцу́ и Сы́ну и Свято́му Ду́ху. Взя́лся еси́ ко оби́телем ве́чным, Бо́га я́ко досто́йно зря́, и к стадо́м преподо́бных приче́лся еси́, Ме́мноне блаже́нне, с ни́миже на́с помина́й, на земли́ помина́ющих тя́. И ны́не и при́сно и во ве́ки веко́в. Ами́нь. Богородичен: Гла́с Ти́ вопие́м, Де́во, ра́достно арха́нгелов: ра́дуйся, кля́твы разруше́ние, преподо́бных сла́во, му́чеников похвало́, проро́ков про́поведь и челове́ков спасе́ние.

Минея, 19 Января, Канон Глас 8 Песнь 1 Ирмос: Мо́ре огусти́л еси́, погрузи́вый со ору́жием го́рдаго фарао́на, и лю́ди спа́сл еси́ немо́кренно, Го́споди, и вве́л еси́ я́ в Го́ру Святы́ни, вопию́щия: пои́м Тебе́, Бо́гу на́шему, пе́снь побе́дную, я́ко просла́вися. Припев: Преподо́бне о́тче Мака́рие, моли́ Бо́га о на́с. Мо́ря жите́йскаго волна́ми обурева́еми, к Тебе́, Иису́се Всеблаги́й, прибега́юще, вопие́м: от ти́ны страсте́й на́с изба́ви, да в тишине́ ду́ха уго́днику Твоему́, преподо́бному Мака́рию, пе́снь хвале́бную принесе́м, его́же чудесы́ сла́вно просла́вил еси́. Припев: Преподо́бне о́тче Мака́рие, моли́ Бо́га о на́с. Мо́ря песо́к преде́л положи́вый, Госпо́дь избра́ тя́ от ри́мскаго ро́да, преподо́бне о́тче Мака́рие, служи́ти Ему́ в преподо́бии и чистоте́ и в Росси́йстей стране́ показа́ тя́ чудотво́рца изря́дна: в чудесе́х бо мно́гих сла́вно просла́вился еси́. Сла́ва Отцу́ и Сы́ну и Свято́му Ду́ху. Мо́ря жите́йскаго треволне́ние не потопи́ ладии́ твоея́, о́тче Мака́рие, но, ве́янием Ду́ха Бо́жия управля́емь, в ти́хое приста́нище спасе́ния вше́л еси́ и чуде́с дарова́нием от Го́спода просла́вился еси́. И ны́не и при́сно и во ве́ки веко́в. Ами́нь. Богородичен: Мо́ре сле́з испроси́ на́м, Влады́чице Преблага́я, у Ми́лостиваго Сы́на Твоего́ и Бо́га на́шего, да, и́ми угаси́вше пе́щь страсте́й, омы́ем скве́рну грехо́вную ду́ш на́ших и, спасе́ние ве́чное получи́вше, воспое́м Христу́ пе́снь побе́дную, я́ко просла́вися. Песнь 3 Ирмос: Утверди́ся се́рдце мое́ во Го́споде, вознесе́ся ро́г мо́й в Бо́зе мое́м, разшири́шася на враги́ моя́ уста́ моя́, возвесели́хся о спасе́нии Твое́м. Припев: Преподо́бне о́тче Мака́рие, моли́ Бо́га о на́с. Утверди́л еси́ на ка́мени за́поведей Христо́вых се́рдце твое́, преподо́бне о́тче Мака́рие, у́зким и приско́рбным путе́м ше́ствовал еси́, а́лчбою, и жа́ждою, и вери́гами желе́зными пло́ть твою́ изнуря́я блаже́ннаго ра́ди бу́дущаго поко́я, его́же получи́в, весели́шися ве́чно со святы́ми. Припев: Преподо́бне о́тче Мака́рие, моли́ Бо́га о на́с. Житию́ дре́вних богоно́сных оте́ц поревнова́в, в пусты́ню бла́тную и суро́вую удали́лся еси́, о́тче Мака́рие, не име́вшую никоего́же челове́ческаго утеше́ния, в не́йже многоле́тне потруди́вся, оби́тель и́ноком созда́л еси́, во спасе́ние мно́гим. Сла́ва Отцу́ и Сы́ну и Свято́му Ду́ху. Утвержда́л еси́ бра́тию твою́ словесы́ богодухнове́нными, о́тче Мака́рие, па́че же о́бразом святоподви́жнаго твоего́ жития́; ти́и же, тобо́ю наставля́еми, подража́тели бы́ша подвиго́м твои́м и вку́пе с тобо́ю получи́ша спасе́ние. И ны́не и при́сно и во ве́ки веко́в. Ами́нь. Богородичен: Утвержде́ние на Тя́ наде́ющихся, Пресвята́я Богоро́дице Влады́чице, не посрами́ упова́ния на́шего, е́же по Бо́зе на Тя́ возлага́ем, но бу́ди на́м Засту́пница от нападе́ний диа́вольских, да, Тобо́ю помоществу́еми, возвесели́мся о спасе́нии на́шем. Седален, глас 4 Ско́рый помо́щник явля́ешися, преподо́бне о́тче Мака́рие, с ве́рою в моли́твах Тя́ призыва́ющим, и ме́сто пусты́нное твои́х по́двигов от запусте́ния коне́чнаго соблю́л еси́ ди́вно, на не́мже с любо́вию честву́ем святу́ю и всера́достную па́мять твою́. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Ско́рый Твой покро́в, и по́мощь, и ми́лость покажи́ на рабе́х Твои́х,/ и во́лны, Чи́стая, укроти́ су́етных помышле́ний,/ и па́дшую мою́ ду́шу возста́ви, Богоро́дице:/ вем бо, вем, Де́во, я́ко мо́жеши, ели́ка и хо́щеши. Песнь 4 Ирмос: Проро́к Авваку́м у́мныма очи́ма прови́де, Го́споди, прише́ствие Твое́, те́м и вопия́ше: от ю́га прии́дет Бо́г. Сла́ва си́ле Твое́й, сла́ва снизхожде́нию Твоему́! Припев: Преподо́бне о́тче Мака́рие, моли́ Бо́га о на́с. Проро́ком Бо́жиим Илии́ и Крести́телю поревнова́л еси́, преподо́бне о́тче Мака́рие, пусты́нное житие́ возлюби́в, я́ко го́рлица уедине́нная, славосло́вия же еди́н Еди́ному Христу́ возноси́л еси́, воспева́я Того́ Боже́ственное снизхожде́ние. Припев: Преподо́бне о́тче Мака́рие, моли́ Бо́га о на́с. Проро́чески, о́тче Мака́рие, по́мыслы челове́ческия прозрева́л еси́, чистоты́ ра́ди твоея́ серде́чныя, и бра́тию твою́ ве́рно поуча́л еси́ в моли́твах бо́дрствовати и немо́лчно воспева́ти гла́сы преподо́бными Спа́сово Боже́ственное снизхожде́ние. Сла́ва Отцу́ и Сы́ну и Свято́му Ду́ху. Проро́ка и царя́ Дави́да пе́снь во усте́х твои́х всегда́ име́л еси́, преподо́бне Мака́рие, и се́ю Бо́га немо́лчно славосло́вил еси́, о́браз тобо́ю бра́тии твоея́ подава́я, да во псалме́х и пе́снех духо́вных воспева́ют при́сно Христо́во Боже́ственное снизхожде́ние. И ны́не и при́сно и во ве́ки веко́в. Ами́нь. Богородичен: Проро́ческая рече́ния на Тебе́ сбы́шася, Де́во Богоро́дице: Ты́ бо Сло́во Бо́жие нетле́нно воплоти́ла еси́ и Невмести́маго во утро́бе Твое́й де́вственней нете́сно вмести́ла еси́. Те́мже Тя́ хвале́бно ублажа́ем и воспева́ем спаси́тельное Христо́во снизхожде́ние. Песнь 5 Ирмос: Го́споди Бо́же на́ш, ми́р да́ждь на́м, Го́споди Бо́же на́ш, стяжи́ ны́, Го́споди, ра́зве Тебе́, ино́го не ве́мы, и́мя Твое́ имену́ем. Припев: Преподо́бне о́тче Мака́рие, моли́ Бо́га о на́с. Го́спода Бо́га освяти́л еси́ в души́ твое́й, преподо́бне о́тче Мака́рие, и же́ртвенник мы́сленный ду́шу твою́ соде́лал еси́, на не́мже же́ртву хвалы́ Го́сподеви возноси́л еси́, во смире́нии ду́ха немо́лчно призыва́я и́мя Бо́жие спаси́тельное. Припев: Преподо́бне о́тче Мака́рие, моли́ Бо́га о на́с. Госпо́дни за́поведи животво́рныя име́л еси́, напи́саны на скрижа́лех се́рдца твоего́, преподо́бне о́тче Мака́рие, и пропове́дник бра́тии твое́й бы́л еси́ Ева́нгельскаго уче́ния, к небеси́ возводя́щаго челове́ки, и́же, послу́шающе сего́, моли́твенно призыва́ют Боже́ственное Христо́во и́мя. Сла́ва Отцу́ и Сы́ну и Свято́му Ду́ху. Госпо́день ра́б бы́л еси́, Мака́рие богому́дре, де́нь и но́щь труди́вся во сла́ву Бо́жию и на по́льзу душе́вную бли́жним твои́м, и́хже, я́ко сама́го себе́, возлюби́л еси́, усе́рдно подвиза́я и́х сла́вити о тебе́ Христо́во и́мя. И ны́не и при́сно и во ве́ки веко́в. Ами́нь. Богородичен: Го́спода Ма́ти и Влады́чица всея́ тва́ри яви́лася еси́, Богоро́дице Мари́е, нетле́нно пло́тию ро́ждши Еди́наго от Тро́ицы, Бо́га Сло́ва. Его́же моли́, Чи́стая, от безслове́сных страсте́й на́с изба́вити, да в тишине́ безстра́стия се́рдцем и усты́ воспева́ем свято́е и́мя Его́. Песнь 6 Ирмос: Я́ко во́ды морски́я, Человеколю́бче, волна́ми жите́йскими обурева́юся. Те́мже, я́ко Ио́на, та́ко вопию́ Ти́: возведи́ от тли́ живо́т мо́й, Благоутро́бне Го́споди. Припев: Преподо́бне о́тче Мака́рие, моли́ Бо́га о на́с. Я́ко кипари́с высокове́рхий, возра́сл еси́, преподо́бне Мака́рие, в пусты́ни бла́тней и непло́дней и плодоноше́нии духо́вными просла́вился еси́ в не́й, я́ко и́стинный уго́дник Христа́ Бо́га, к Нему́же и на́ша стопы́ напра́ви и моли́твами твои́ми от тле́ния грехо́внаго на́с изба́ви, мо́лимся. Припев: Преподо́бне о́тче Мака́рие, моли́ Бо́га о на́с. Я́ко и́стинный после́дователь Иису́сов, во смире́нии глубо́це жи́знь твою́ провожда́л еси́, Мака́рие блаже́нне, власяны́ми ру́бы и вери́гами желе́зными утесня́я твое́ те́ло, да свободи́шися от тле́ния грехо́внаго и получи́ши спасе́ние. Сла́ва Отцу́ и Сы́ну и Свято́му Ду́ху. Я́ко во́ин благоиску́сный, о́тче Мака́рие, стре́лы вра́жия изощре́нныя со у́гльми пусты́нными сле́зными пото́ки устуди́л еси́ и победоно́сец показа́лся еси́ во бране́х со враги́ неви́димыми, и́же не возмого́ша тя́ низри́нути в про́пасть и тле́ние грехо́вное, си́лою Христа́ утвержде́ннаго. И ны́не и при́сно и во ве́ки веко́в. Ами́нь. Богородичен: Я́ко вои́стинну прибе́жище непосты́дное христиа́ном, и щи́т, и покро́в, Ма́ти Бо́жия, воспева́ющия Тя́ от бе́д и скорбе́й свободи́: Тя́ бо Еди́ну, благослове́нную в жена́х, Тобо́ю от тле́ния грехо́внаго изба́вльшиися, немо́лчными хвала́ми ублажа́ем. Кондак, глас 7 От Ри́ма возсия́л еси́, я́коже звезда́ пресве́тлая,/ преподо́бне о́тче наш Мака́рие,/ и, в пусты́ни всели́вся,/ просвети́л еси́ чи́стым житие́м твои́м/ ве́рно притека́ющия к тебе́./ Те́мже и мы, прославля́юще све́тлую па́мять твою́, вопие́м ти:/ ра́дуйся, преподо́бне о́тче Мака́рие. Икос Возлюби́в Христо́вы Боже́ственныя за́поведи,/ возненави́дел еси́ ми́ра сего́ наслажде́ние:/ плоть твою́, преподо́бне,/ посто́м, бде́нием, до́лу лега́нием и вери́гами желе́зными изнури́л еси́/ и во умерщвле́ннем телеси́ пе́сни благоприя́тныя,/ хвалы́ и славосло́вия Триеди́ному Бо́гу немо́лчно приноси́л еси́, о́тче Мака́рие./ Сего́ ра́ди приими́ от нас по достоя́нию такова́я:/ ра́дуйся, А́нгеле земны́й и челове́че, Небе́сный,/ А́нгелы удиви́вый жития́ твоего́ чистото́ю/ и челове́ки научи́вый благоугожда́ти Бо́гу;/ ра́дуйся, свети́льниче немерца́яй Боже́ственныя благода́ти,/ в житии́ и по сме́рти сия́яй чудесы́./ Ра́дуйся, озаря́яй ду́ши и сердца́ челове́ческая невече́рним све́том твоея́ сла́вы,/ е́юже и ме́сто по́двигов твои́х прославля́еши преди́вно;/ ра́дуйся, преподо́бне о́тче Мака́рие. Песнь 7 Ирмос: Халде́йская пе́щь, огне́м распала́емая, ороша́шеся Ду́хом, Бо́жиим предстоя́нием, о́троцы поя́ху: благослове́н еси́, Бо́же оте́ц на́ших. Припев: Преподо́бне о́тче Мака́рие, моли́ Бо́га о на́с. В пещи́ искуше́ний пусты́нных, о́тче Мака́рие, благода́ть Госпо́дню, тя́ ороша́ющую, стяжа́л еси́. Те́мже непобеди́м враго́м неви́димым показа́лся еси́ и вся́ прило́ги диа́вольския кре́пко сокруши́л еси́, зовы́й немо́лчно: благослове́н еси́, Бо́же оте́ц на́ших. Припев: Преподо́бне о́тче Мака́рие, моли́ Бо́га о на́с. Поревнова́л еси́, преподо́бне о́тче, соиме́нному ти́ вели́кому во отце́х Мака́рию, его́же нра́ву и чистоте́ непреста́нно поуча́яся, я́ко безпло́тен, на земли́ подвиза́лся еси́, сего́ ра́ди сосу́д избра́н Ду́ху Свято́му сподо́бился еси́ бы́ти, Его́же де́йством чудеса́ пресла́вная соде́лал еси́ в житии́ и по сме́рти, о ни́хже ве́рнии благословля́ют Бо́га оте́ц на́ших. Сла́ва Отцу́ и Сы́ну и Свято́му Ду́ху. Я́ко кри́н, в пусты́ни процве́л еси́, преподо́бне, и благоуха́ния Христо́ва испо́лнил еси́ ме́сто по́двигов твои́х земны́х. Све́том до́брых де́л твои́х озари́л еси́ сердца́ челове́ков, просвеща́я и́х уче́нии твои́ми и науча́я пе́ти Го́сподеви: благослове́н еси́, Бо́же оте́ц на́ших. И ны́не и при́сно и во ве́ки веко́в. Ами́нь. Богородичен: В пещи́ халде́йстей та́инство Рождества́ Твоего́ проразумева́юще, Богоро́дице, ро́ждшимся от Тебе́ Искупи́телем спасе́ние обрето́хом и, подо́бящеся отроко́м богосло́вцем, Сы́ну Твоему́ и Го́споду благода́рно зове́м: благослове́н еси́, Бо́же оте́ц на́ших. Песнь 8 Ирмос: А́нгели и небеса́, на престо́ле сла́вы седя́щаго, и я́ко Бо́га непреста́нно сла́вимаго, благослови́те, по́йте, и превозноси́те Его́ во ве́ки. Припев: Преподо́бне о́тче Мака́рие, моли́ Бо́га о на́с. А́нгелы собесе́дники име́л еси́, преподо́бне Мака́рие, и, си́ми укрепля́емь, в пусты́ни безлю́дней и бла́тней многоле́тне пребы́л еси́, еди́н Еди́ному Бо́гу рабо́тая; сего́ ра́ди ны́не со безпло́тными водворя́ешися и пое́ши хвале́бную пе́снь Триеди́ному Бо́гу, препе́тому и превозноси́мому во ве́ки. Припев: Преподо́бне о́тче Мака́рие, моли́ Бо́га о на́с. А́нгела тя́ пло́тянаго ве́мы, преподо́бне о́тче Мака́рие, ангелоподо́бно бо на земли́ пожи́л еси́ и чистоту́ души́ и те́ла ре́вностно соблю́л еси́, ны́не же водворя́ешися та́мо, иде́же ничто́же скве́рно вхо́дит, и пое́ши немо́лчную пе́снь Бо́гу, препе́тому и превозноси́мому во ве́ки. Сла́ва Отцу́ и Сы́ну и Свято́му Ду́ху. А́нгелов Творе́ц и всея́ тва́ри Соде́тель подви́жника доброде́телей яви́ тя́, Мака́рие преподо́бне, Его́же си́лою укрепля́емь, путе́м те́сным ше́ствуя, дости́гл еси́ соверше́нства духо́внаго, Ца́рствие Христо́во унасле́довал еси́ и со святы́ми пое́ши ра́достно: Го́спода по́йте и превозноси́те Его́ во ве́ки. И ны́не и при́сно и во ве́ки веко́в. Ами́нь. Богородичен: А́нгельское целова́ние прино́сим Ти́ с любо́вию, Богоро́дице Чи́стая: ра́дуйся, Благода́тная, Госпо́дь с Тобо́ю! Ты́ же ра́дости нетле́нныя сподо́би Тя́ по до́лгу ублажа́ющия, ро́ждшагося же от Тебе́ Го́спода пою́щия и превознося́щия во ве́ки. Песнь 9 Ирмос: Чу́жде ма́терем де́вство, и стра́нно де́вам деторожде́ние, на Тебе́, Богоро́дице, обоя́ устро́ишася. Те́м Тя́, вся́ племена́ земна́я, непреста́нно велича́ем. Припев: Преподо́бне о́тче Мака́рие, моли́ Бо́га о на́с. Чу́ждь бы́л еси́, преподо́бне Мака́рие, превозноше́ния тщесла́внаго и во смире́нии глубо́це житие́ твое́ провожда́л еси́, о́браз смире́ния бы́л еси́ твои́м ученико́м, и́хже при́сно поуча́л еси́ бе́гати душепа́губныя го́рдости и во смире́нии ду́ха велича́ти Христа́ Жизнода́вца. Припев: Преподо́бне о́тче Мака́рие, моли́ Бо́га о на́с. Чу́ждь и стра́нен бы́л еси́ во стране́ Росси́йстей, Мака́рие, взыску́яй вы́шняго гра́да, Иерусали́ма небе́снаго, и к нему́ непреста́нно воспаря́яй по́мыслми боголюби́выя твоея́ души́, я́же ны́не со а́нгелы Христа́ велича́ет. Сла́ва Отцу́ и Сы́ну и Свято́му Ду́ху. Чу́ждь пра́здности яви́лся еси́, блаже́нне, но при́сно в моли́твах и труде́х пусты́нных подвиза́лся еси́ и вери́гами желе́зными пло́ть твою́ утесня́л еси́, си́лою Го́спода си́л укрепля́емь, Его́же гла́сы хвале́бными немо́лчно велича́л еси́. И ны́не и при́сно и во ве́ки веко́в. Ами́нь. Богородичен: Чу́ждих на́с яви́, Влады́чице, вла́сти лю́таго мироде́ржца и в ча́с кончи́ны на́шея на по́мощь ускори́ к на́м, безпомо́щным: мно́го бо мо́жет Ма́терняя моли́тва Твоя́ ко Го́споду, и трепе́щут пред Тобо́ю ду́си тмы́, от и́хже наси́лия на́с изба́ви, Всеблага́я, да Тя́ славосло́вии ра́достными велича́ем. Светилен Процве́л еси́ в по́стнических по́двизех, преподо́бне о́тче Мака́рие, и пло́д чудотворе́ния прине́сл еси́ Христо́ве Це́ркви, и о́ную пусты́ню, в не́йже подвиза́лся еси́, благоуха́ния духо́внаго испо́лнил еси́, во утеше́ние с ве́рою и любо́вию к тебе́ притека́ющим. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Тя пе́сньми немо́лчными ублажа́ем, Де́во,/ я́ко от Тро́ицы Еди́наго родила́ еси́, Богоро́дице,/ и яви́ла еси́ нам, потемне́нным, свет спасе́ния/ Боже́ственным и Пречи́стым Твои́м Рождество́м.

Минея, 9 Мая, Канон пророка Глас 4 Песнь 1 Ирмос: Воспою́ Тебе́, Го́споди Бо́же мой,/ я́ко изве́л еси́ лю́ди из рабо́ты еги́петския,/ покры́л же еси́ колесни́цы фарао́новы и си́лу. Припев: Проро́че Бо́жий Иса́ие, моли́ Бо́га о нас. Просвети́ мя, Го́споди Бо́же мой,/ и наста́ви све́тло Боже́ственнаго проро́ка Твоего́/ сла́вное и честно́е восхвали́ти торжество́. Сла́ва Отцу́ и Сы́ну и Свято́му Ду́ху. Боговеща́нная труба́ Иса́иина, огласи́вшая зе́млю,/ церко́вныя пита́тели созва́ пра́здновати па́мять его́. И ны́не и при́сно и во ве́ки веко́в. Ами́нь. Стра́сти теле́сныя, Богоно́се, помысло́м душе́вным тве́рдо покори́в,/ сла́ву сподо́бился еси́ ви́дети Вседержи́теля. Песнь 3 Ирмос: Лук си́льных изнемо́же,/ и немощству́ющии препоя́сашася си́лою,/ сего́ ра́ди утверди́ся в Го́споде се́рдце мое́. Припев: Проро́че Бо́жий Иса́ие, моли́ Бо́га о нас. Всю зарю́ духо́вную восприе́м,/ провозгласи́л еси́, сла́вне, Сло́ва смотре́ния неизрече́нное та́инство. Сла́ва Отцу́ и Сы́ну и Свято́му Ду́ху. Взя́лся еси́ к высоте́ Небе́сней, и благоче́стия све́тлость показа́л еси́,/ и́дольскаго су́етия ты изобличи́в не́мощь. И ны́не и при́сно и во ве́ки веко́в. Ами́нь. Ка́меня в Сио́не пречестна́го, краеуго́льнаго,/ вселе́нную содержа́щего Влады́ку Христа́/ Иса́ия проро́чествует, полага́ема. Седален, глас 4 От страсте́й теле́сных преочи́стив ду́шу,/ сла́ву ви́дел еси́ над все́ми су́щаго Бо́га, проро́че пребога́те./ Просия́в проро́чества светоно́сными заря́ми,/ Мла́до, – рекл еси́, – Отроча́ роди́тся, Зижди́тель,/ спаса́ющий нас от тли моли́твами твои́ми. Песнь 4 Ирмос: Твоего́ на земли́ явле́ния, Христе́ Бо́же,/ пропове́дуя проро́к прише́ствие, с весе́лием вопия́ше:/ сла́ва си́ле Твое́й, Го́споди. Припев: Проро́че Бо́жий Иса́ие, моли́ Бо́га о нас. На доброде́тельный возше́д верх,/ чи́сто жела́емому бесе́довал еси́ и ра́достно пел еси́:/ сла́ва си́ле Твое́й, Го́споди. Сла́ва Отцу́ и Сы́ну и Свято́му Ду́ху. Проро́честей Иса́ия благода́ти вве́рен бысть, и Бо́жие жили́ще показа́ся,/ и Небе́сных сел сла́вы нетле́нныя сподо́бися. И ны́не и при́сно и во ве́ки веко́в. Ами́нь. Обнови́тися острово́м рекл еси́ при́точно, язы́ческим це́рквам,/ Боже́ственнаго Ду́ха испо́лнен, сла́вне,/ таи́нник неизрече́нных был еси́. Песнь 5 Ирмос: Просвеще́ние Твое́, Го́споди, низпосли́ нам/ и от мглы прегреше́ний разреши́ ны, Бла́же,/ Твой мир да́руяй. Припев: Проро́че Бо́жий Иса́ие, моли́ Бо́га о нас. Сокрове́нное свы́ше та́инство зря и дре́вний сове́т Вы́шнего,/ е́же о нас смотре́ние, Богоглаго́ливе, возвести́л еси́. Сла́ва Отцу́ и Сы́ну и Свято́му Ду́ху. Страсте́й Твои́х, Го́споди, приснотеку́щий исто́чник страсте́й нас отмыва́ет,/ прише́л бо еси́, Спа́се, я́коже Иса́ия проро́к научи́. И ны́не и при́сно и во ве́ки веко́в. Ами́нь. Богочести́вый Иса́ия, от Бо́га изше́д,/ Отца́, Сло́ва и Свята́го Ду́ха в Естестве́ Еди́ном,/ Тро́ицу Еди́ну неве́дущим пропове́да. Песнь 6 Ирмос: Возопи́, прообразу́я погребе́ние тридне́вное,/ проро́к Ио́на, в ки́те моля́ся:/ от тли изба́ви мя, Иису́се, Царю́ сил. Припев: Проро́че Бо́жий Иса́ие, моли́ Бо́га о нас. Ду́хом воображе́н, Иса́ия узре́ на престо́ле госпо́дьства сла́ву блеща́щуся,/ песносло́вимую трисвяты́м гла́сом, тричи́сленную. Сла́ва Отцу́ и Сы́ну и Свято́му Ду́ху. Ко усто́м боя́щимся твои́м прино́сит угль, Иса́ие, Серафи́м, клеща́ми взем,/ и Бо́гу проро́ка соверша́ет, та́йно освяще́на. И ны́не и при́сно и во ве́ки веко́в. Ами́нь. Событие́ издале́ча зря прорече́ний,/ Иса́ия у́мно со А́нгелы ра́дуется/ и, игра́я, сла́вит испо́лнившаго его́ пропове́дания. Кондак, глас 2 Проро́чества дарова́ние прие́м, пророкому́чениче, Иса́ие Богопропове́дниче,/ всем изъясни́л еси́ вочелове́чение Го́сподне,/ возгласи́в велегла́сно конце́м:/ се Де́ва во чре́ве прии́мет. Икос Вси сни́демся, и́же во страна́х, воспе́ти досто́йно Иса́ию, ве́рнии, во проро́цех ди́внаго:/ той бо, коне́ц проро́чества восприи́м, мир просвеща́ет,/ всем вку́пе та́йну Боже́ственнаго соедине́ния провозвести́в,/ с те́ми все́ми возопи́в:/ с на́ми Бог неви́димый, се Де́ва во чре́ве прии́мет. Песнь 7 Ирмос: Авраа́мстии иногда́ в Вавило́не о́троцы/ пе́щный пла́мень попра́ша,/ пе́сньми взыва́юще:/ оте́ц на́ших Бо́же, благослове́н еси́. Припев: Проро́че Бо́жий Иса́ие, моли́ Бо́га о нас. Спаси́тельное нам приходя́щее зря Иса́ия избавле́ние, прии́дет, возопи́:/ оте́ц на́ших Бо́же, благослове́н еси́. Сла́ва Отцу́ и Сы́ну и Свято́му Ду́ху. Проро́чества благода́тию и муче́ния венце́м Иса́ия увязе́ся,/ кре́пость моя́ и пе́ние мое́:/ оте́ц на́ших Бо́же, благослове́н еси́. И ны́не и при́сно и во ве́ки веко́в. Ами́нь. Благоче́стия преде́лы и жития́ зако́ны богоно́сным язы́ком положи́л еси́, проро́че Богодухнове́нне:/ оте́ц на́ших Бо́же, благослове́н еси́. Песнь 8 Ирмос: В Вавило́не о́троцы,/ Боже́ственною распала́еми ре́вностию,/ мучи́теля и пла́мене преще́ние му́жески попра́ша/ и, посреде́ огня́ вве́ржени, ороша́еми, поя́ху:/ благослови́те, вся дела́ Госпо́дня, Го́спода. Припев: Проро́че Бо́жий Иса́ие, моли́ Бо́га о нас. Весе́лия ри́зою женихо́вою обложе́н обра́зно,/ ра́дуется ны́не ве́село Иса́ия сла́вный/ и, Боже́ственныя пи́щи наслажда́яся, со А́нгелы веща́ет:/ благослови́те, вся дела́ Госпо́дня, Го́спода. Сла́ва Отцу́ и Сы́ну и Свято́му Ду́ху. Бо́га пе́рвее отлучи́вшиися, де́монскими прельще́ннии словесы́,/ пра́ведно отступи́ша земли́ чи́стыя, окая́ннии,/ проро́ка гласово́м после́дованно, и пе́ти не мо́гут:/ благослови́те, вся дела́ Госпо́дня, Го́спода. И ны́не и при́сно и во ве́ки веко́в. Ами́нь. Пре́лесть оста́вивше, к Боже́ственному притеко́ша сия́нию мно́жества язы́к/ и Христо́ве Це́ркви обручи́шася, я́коже дре́вле рече́ Иса́ия,/ и пе́сньми ны́не пою́т:/ благослови́те, вся дела́ Госпо́дня, Го́спода. Песнь 9 Ирмос: Е́ва у́бо неду́гом преслуша́ния кля́тву всели́ла есть;/ Ты же, Де́во Богоро́дице,/ прозябе́нием чревоноше́ния/ ми́рови благослове́ние процвела́ еси́./ Тем Тя вси велича́ем. Припев: Проро́че Бо́жий Иса́ие, моли́ Бо́га о нас. Престо́лу предста́л еси́ све́тло, Богоприя́тне, Влады́ки сил,/ сла́вы же Того́ наслади́вся, твоего́ благоче́стия собирая́ плоды́, всеблаже́нне сла́вне./ Тем тя вси велича́ем. Сла́ва Отцу́ и Сы́ну и Свято́му Ду́ху. Прииди́те ны́не, све́та проро́ческаго дарова́ния жела́ющии,/ прия́ти кни́гу усе́рдно Иса́ии, богоразу́мия испо́лнену:/ тве́рдым жела́нием внима́ем, да Боже́ственныя зари́ испо́лнимся. И ны́не и при́сно и во ве́ки веко́в. Ами́нь. Ду́хом све́тлости я́ве осия́емь, Иса́ие Богоно́се,/ вся, ве́рою творя́щия честну́ю твою́ и светоно́сную па́мять,/ моли́ спасе́ние получи́ти, да тя вси велича́ем.

Минея, 16 Августа, Кано́н о́браза Глас 6 Песнь 1 Ирмос: Я́ко по су́ху, пешеше́ствовав Изра́иль,/ по бе́здне стопа́ми,/ гони́теля фарао́на/ ви́дя потопля́ема,/ Бо́гу побе́дную пе́снь пои́м, вопия́ше. Припев: Сла́ва Тебе́, Бо́же на́ш, сла́ва Тебе́. Пло́тски изобрази́тися по нам, И́же пре́жде Безпло́тный, благоволе́нием О́тчим,/ не отверги́йся зра́ка, дарова́ нам Боже́ственное изображе́ние. Припев: Сла́ва Тебе́, Бо́же на́ш, сла́ва Тебе́. Неизме́нное естество́, О́тчий преде́л изве́стнейший,/ в челове́ческую пло́ть прише́дый,/ сво́йства на земли́ оста́вил е́сть нам возше́дый на Небеса́. Припев: Сла́ва Тебе́, Бо́же на́ш, сла́ва Тебе́. Коле́блемое ле́стию сопроти́вных достоя́ние Твое́ оправда́л еси́, Христе́,/ честны́ми Твои́ми сию́ утверди́в страстьми́ и зра́ка изображе́нием. Сла́ва Отцу́ и Сы́ну и Свято́му Ду́ху. Подоба́ше принести́ся к Ца́рствующему все́ми гра́ды/ Небесе́ и земли́ Царя́ о́браза начерта́нию,/ е́же он, воплоще́йся самоде́тельно, омочи́л е́сть/ царя́ и христолюби́вых поспеше́ньми. И ны́не и при́сно и во ве́ки веко́в. Ами́нь. Богородичен: От чи́стых Твои́х ложе́сн преесте́ственне пло́ть заи́мствовавый,/ И́же всем подая́й е́же бы́ти челове́ком, Пренепоро́чная, ви́дяшеся,/ не отсту́пль, иде́же бе пе́рвее. Песнь 3 Ирмос: Не́сть свят,/ я́коже Ты, Го́споди Бо́же мой,/ вознесы́й рог ве́рных Твои́х, Бла́же,/ и утверди́вый нас на ка́мени/ испове́дания Твоего́. Припев: Сла́ва Тебе́, Бо́же на́ш, сла́ва Тебе́. Оде́ждею доброде́телей оде́ял еси́, Спа́се, честну́ю Це́рковь,/ подви́гнув царе́во се́рдце защище́ние взыска́ти Твоего́ подо́бия. Припев: Сла́ва Тебе́, Бо́же на́ш, сла́ва Тебе́. Обнажи́ти хотя́ до́брая и вре́менем ума́лити,/ и́же за́висти роди́тель рука́м скве́рным сия́ предаде́ безсту́дне,/ но обличи́вся, всу́е помышля́я. Припев: Сла́ва Тебе́, Бо́же на́ш, сла́ва Тебе́. Све́тло ра́довашеся иногда́ Дави́д, лику́я пред киво́том святы́м,/ и ны́не ски́птры прие́м управля́ти ца́рския/ мно́жае ра́дуется Боже́ственному изображе́нию. Сла́ва Отцу́ и Сы́ну и Свято́му Ду́ху. Тебе́, созда́вшему челове́ка по о́бразу пе́рвее,/ во е́же вообрази́лся еси́ а́бие за милосе́рдие,/ тем прие́мша Тя вои́стинну подо́бие неизме́нное,/ со А́нгелы, Христе́, сла́вим. И ны́не и при́сно и во ве́ки веко́в. Ами́нь. Богородичен: Из ко́рене вся́ко отсещи́ пра́отца хотя́й, Твой Сын, Де́во,/ прозя́бшее преслуша́ние,/ из чре́ва Твоего́, Чи́стая, прие́млет все челове́ческое. Седален, глас 1 Еде́сский ца́рь всех Царя́, не ски́птры, ниже́ во́и,/ но мно́жества чуде́с сло́вом износя́щаго, позна́в Тя, моля́ше:/ богочелове́чное к себе́ получи́ти,/ во о́бразе же, я́ко узре́ Тя, взыва́ше:/ Бог Ты и Госпо́дь. Песнь 4 Ирмос: Христо́с моя́ си́ла,/ Бог и Госпо́дь,/ честна́я Це́рковь/ боголе́пно пое́т, взыва́ющи,/ от смы́сла чи́ста о Го́споде пра́зднующи. Припев: Сла́ва Тебе́, Бо́же на́ш, сла́ва Тебе́. Сла́дкое у́бо со́лнце, озаря́ющее очеса́,/ сладча́йшее же зре́ние Твоего́, Христе́, подо́бия,/ я́ко то у́бо чу́вственная, сие́ же у́мная светозаря́ет. Припев: Сла́ва Тебе́, Бо́же на́ш, сла́ва Тебе́. Кре́пость оскуде́ исма́ильтеская:/ десни́цы бо ору́жия Кре́стнаго все огражде́ние/ державному́дренный ца́рь в свое́й земли́ положи́. Сла́ва Отцу́ и Сы́ну и Свято́му Ду́ху. Кня́зи вси и судии́ земли́, благослови́те Христа́,/ с первосвяще́нники, и святи́тели дне́сь, и все́ми людьми́,/ Того́ зре́ния сподо́бльшиися. И ны́не и при́сно и во ве́ки веко́в. Ами́нь. Богородичен: Соблюде́нну бы́ти Твоему́ гра́ду, Пречи́стая,/ невреди́мо от наше́ствия ва́рварскаго моли́ся, мо́лимся,/ се бо коли́ко на́нь наве́тницы созида́ют. Песнь 5 Ирмос: Бо́жиим све́том Твои́м, Бла́же,/ у́тренюющих Ти ду́ши любо́вию озари́, молю́ся,/ Тя ве́дети, Сло́ве Бо́жий,/ и́стиннаго Бо́га,/ от мра́ка грехо́внаго взыва́юща. Припев: Сла́ва Тебе́, Бо́же на́ш, сла́ва Тебе́. Мал Тебе́ град прия́телище дре́вле предугото́ва, Христе́,/ его́же Фадде́я прише́ствие неду́г пременя́ет, и руки́ Твоея́ писа́ние,/ и Боже́ственное напеча́тание лица́ Твоего́. Припев: Сла́ва Тебе́, Бо́же на́ш, сла́ва Тебе́. Благода́тей Твои́х дарова́ния, Христе́, преумно́жишася:/ я́же бо пе́рвее Еде́са не́дрствовавши хваля́щеся,/ но́вый же прие́мши Рим ра́дуется. Сла́ва Отцу́ и Сы́ну и Свято́му Ду́ху. О́чи Госпо́дни на пра́ведныя лю́ди/ и уста́ на моли́тву люде́й благочестивному́дрствующих,/ чту́щим Его́ подо́бие благоле́пно самопи́санное. И ны́не и при́сно и во ве́ки веко́в. Ами́нь. Богородичен: Уста́ви, Де́во, враго́в настоя́ния ча́стая,/ разруши́ сове́ты их, достоя́нию Твоему́ помози́:/ зри́ши бо, я́ко отча́яхомся, озло́бленнии. Песнь 6 Ирмос: Ят бы́сть,/ но не удержа́н в пе́рсех ки́товых Ио́на:/ Твой бо о́браз нося́,/ Страда́вшаго и погребе́нию да́вшагося,/ я́ко от черто́га, от зве́ря изы́де./ Приглаша́ше же кустоди́и:/ храня́щии су́етная и ло́жная,/ ми́лость сию́ оста́вили есте́. Припев: Сла́ва Тебе́, Бо́же на́ш, сла́ва Тебе́. Красне́йший добро́тою, Спа́се, па́че всех сыно́в челове́ческих:/ а́ще бо ни виде́ния имя́ше, ниже́ добро́ты во вре́мя стра́сти,/ но су́щим вся просвеща́ше и явля́ше Твоего́ зра́ка виде́ние./ Его́же подо́бия на обетша́вшем ру́бе изображе́ние,/ я́коже сокро́вище, нам дарова́ся. Припев: Сла́ва Тебе́, Бо́же на́ш, сла́ва Тебе́. Кре́пости, нанесе́нный от ага́рянскаго мно́жества,/ я́коже от иноплеме́нных киво́т Изра́илю но́вому,/ лица́ Твоего́ ны́не к сему́ даде́ изображе́ние Твое́, Христе́, и сла́ву, ю́же стяжа́:/ ниже́ бо подоба́ше лже, свята́я псом предпомета́ти. Сла́ва Отцу́ и Сы́ну и Свято́му Ду́ху. Неве́дущу о ца́рствии Твое́м Небе́снем,/ к нему́же нас, Благи́й, из тле́нных и до́лу лежа́щих возве́л еси́,/ И́же невеще́ственными Херуви́мы непристу́пен, снизше́л еси́ да́же до а́да,/ Твоего́ апо́стола ко А́вгарю, Христе́, посла́л еси́, та́инство умудря́юща. И ны́не и при́сно и во ве́ки веко́в. Ами́нь. Богородичен: От кре́пости руки́ Твоея́, Спа́се, ны́не оста́х аз:/ но ра́ны Твоя́ удали́л еси́ от мене́ моли́твами неискусобра́чно Ро́ждшия Тя, Сло́ве,/ да не оста́виши мене́ бу́рею грехо́вною погружа́тися/ и лю́те пла́вати, Еди́не Изба́вителю. Кондак, глас 2 Неизрече́ннаго и Боже́ственнаго Твоего́ к челове́ком смотре́ния,/ неопи́санное Сло́во О́тчее,/ и о́браз непи́санный, и богопи́санный победи́телен,/ ве́дуще нело́жнаго Твоего́ воплоще́ния,/ почита́ем, того́ лобыза́юще. Икос Уверя́я челове́ком Госпо́дь вочелове́чения Своего́ та́йну ужа́сную,/ самопису́ет богому́жный Свой о́браз на убру́се,/ и первообра́зное у́бо возне́с от го́ры Елео́нския,/ на престо́ле спосажда́ет О́тчи, покланя́тися от безтеле́сных А́нгел./ Подо́бию же первообра́знаго нам дарова́ покланя́тися:/ Его́же объе́млюще душе́ю же и се́рдцем,/ почита́ем, того́ лобыза́юще. Песнь 7 Ирмос: О́троцы в Вавило́не/ пе́щнаго пла́мене не убоя́шася,/ но, посреде́ пла́мене вве́ржени, ороша́еми, поя́ху:/ благослове́н еси́, Го́споди Бо́же оте́ц на́ших. Припев: Сла́ва Тебе́, Бо́же на́ш, сла́ва Тебе́. Глаго́лом у́бо вся́ку боле́знь, Сло́ве Бо́жий, отгна́л еси́, по земли́ ходя́й,/ но, ко Оте́ческому престо́лу восходя́й,/ изображе́нием исцеля́еши на́шу боле́знь. Припев: Сла́ва Тебе́, Бо́же на́ш, сла́ва Тебе́. Сло́вом вся́ческая созда́вый и воображе́н в чужде́е,/ зра́ка Твоего́ оста́вил е́сть нам сво́йственная,/ я́же подъе́млюще, в ра́дости весели́мся. Припев: Сла́ва Тебе́, Бо́же на́ш, сла́ва Тебе́. От всея́ души́ поиска́в сво́йства Твоего́ напеча́тание ве́рный ца́рь,/ я́коже иска́ше, та́ко и получи́, Го́споди,/ взаи́м обре́т Боже́ственнаго жела́ния исполне́ние. Сла́ва Отцу́ и Сы́ну и Свято́му Ду́ху. К Боговиде́нию о́чи угото́вим/ и досто́йно потщи́мся ви́дети о́браз Христо́в всечестны́й во спасе́ние на́ше. И ны́не и при́сно и во ве́ки веко́в. Ами́нь. Богородичен: Осужде́ния дре́вняго разреши́ся челове́чество Рождество́м Твои́м:/ Тя бо, еди́ну небе́с ши́ршую, обре́т, Всенепоро́чная,/ Бог в Тя всели́ся. Песнь 8 Ирмос: За зако́ны оте́ческая/ блаже́ннии в Вавило́не ю́ноши, предбе́дствующе,/ царю́ющаго оплева́ша повеле́ние безу́мное/ и, совоку́плени, и́мже, не свари́шася огне́м,/ Держа́вствующему досто́йную воспева́ху пе́снь:/ Го́спода по́йте, дела́,/ и превозноси́те во вся ве́ки. Припев: Сла́ва Тебе́, Бо́же на́ш, сла́ва Тебе́. Я́коже у́бо лице́м к лицу́ наде́ющеся Тя, Го́спода, приити́,/ вси гра́да избра́ннейшии лю́дие сре́тение чуде́сно Ти сотворя́ют,/ архиере́ов Боже́ственный предводя́й лик./ На и́хже ра́мех носи́мый и к достоя́нию Твоему́ влага́емь, Ще́дрый,/ почи́л еси́ в хра́ме Ма́тере Твоея́. Припев: Сла́ва Тебе́, Бо́же на́ш, сла́ва Тебе́. Уста́ незло́бивых дете́й к пророкоуби́йственному Тя дре́вле ше́ствующа гра́ду песносло́вяху,/ но сонм собо́рища евре́йскаго беззако́нный уби́йственную ру́ку вооружа́ше, свире́пеющую на Тя./ Ны́не же зако́нный град, вси, ку́пно предте́кшии, я́ко Соде́теля Тя зря,/ ра́дуется, прие́мля о́браз зра́ка Твоего́. Сла́ва Отцу́ и Сы́ну и Свято́му Ду́ху. Па́че Моисе́я Богови́дца, богопи́санныя скрижа́ли прие́мшаго,/ возвели́чился еси́, честны́й местонача́льниче,/ прие́м честно́е посла́ние Бо́жия Сло́ва, блажа́щее Тя, благоче́стию ве́ровавшаго,/ и́же ника́коже ви́де чудоде́йствия. И ны́не и при́сно и во ве́ки веко́в. Ами́нь. Богородичен: Пло́ть произво́ливый носи́ти Вели́каго Сове́та О́тча А́нгел/ во утро́бе Твое́й, Пречи́стая, соверше́нно де́йствовася,/ и Тя, Ма́терь, до́ле описа́, Чи́стая,/ и истле́вшее обнови́ челове́ческое естество́,/ Его́же благослови́м вси, я́ко Зижди́теля,/ и превозно́сим во вся ве́ки. Песнь 9 Ирмос: Стра́нствия Влады́чня/ и Безсме́ртныя Трапе́зы/ на Го́рнем ме́сте высо́кими умы́,/ве́рнии, прииди́те, наслади́мся,/возше́дша Сло́ва,/от Сло́ва научи́вшеся, Его́же велича́ем. Припев: Сла́ва Тебе́, Бо́же на́ш, сла́ва Тебе́. Изблева́ на Тя наро́д неразу́мный, Спа́се,/ и вме́сто благоде́тельства безме́стная де́рзостие Ти протяже́,/ но мы, и́же дале́че отстоя́щии, страстьми́ Твои́ми сыноположи́хомся. Припев: Сла́ва Тебе́, Бо́же на́ш, сла́ва Тебе́. По́мощь на враги́ благочести́вым и ве́рным пода́ждь лю́дем,/ я́ко зна́мение пло́ти Твоея́, я́коже необори́мое, Влады́ко, стяжа́вше огражде́ние,/ си́ми да ви́дят спасе́ние свое́. Сла́ва Отцу́ и Сы́ну и Свято́му Ду́ху. О́бразе неизме́нный Оте́чь, Сия́ние сла́вы Присносу́щнаго Све́та,/ печа́ть Вы́шняго, Сло́ве, Си́ло и Му́дросте,/ Тя богословя́щим Благопремени́тель бу́ди. И ны́не и при́сно и во ве́ки веко́в. Ами́нь. Богородичен: Ви́дено бы́сть на земли́ плотоно́сное Сло́во,/ сугу́бо естество́м из Тебе́, Всенепоро́чная, возда́нием Божества́,/ в еди́ной Ипоста́си, несме́сне соедини́вся смеше́нию,/ Его́же сла́вим. Светилен Свет невече́рний, Христе́,/ просвети́ нас лица́ Твоего́ зра́ком/ и све́тлости святы́х сподо́би, егда́ ся́деши возда́ти кому́ждо по де́лом его́,/ моли́твами ро́ждшия Тя Богоро́дицы.

Минея, 11 Марта, Канон Глас 4 Песнь 1 Ирмос: Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,/ и воспою́, ра́дуяся, Тоя́ чудеса́. Припев: Святи́телю о́тче Софрóние, моли́ Бо́га о на́с. Воспе́ти ми жела́ющу иера́рха Софро́ния, Го́споди,/ просвети́ мой ра́зум осия́нием Свята́го Ду́ха/ и да́руй ми свет прему́дрости Твое́я,/ да досто́йно воспою́ и возвели́чу и́мя его́. Припев: Святи́телю о́тче Софрóние, моли́ Бо́га о на́с. Без отца́ и без ма́тере измла́да остався,/ ко Христу́ прите́кл еси́/ и, Того́ за́поведьми огражда́яся, злокозненного врага́ не убоя́лся еси́./ Си́рыя и ни́щия возлюби́в, наста́вил еси́ на пу́ть спасе́ния,/ помина́й и нас, гре́шных, святи́телю Софро́ние. Припев: Святи́телю о́тче Софрóние, моли́ Бо́га о на́с. Благода́тию Бо́жиею водим,/ Це́рковь Святу́ю возлюби́л еси́/ и, сан архиере́йский прие́м, па́стырь и́стинный яви́лся еси́ слове́снаго ста́да Христо́ва,/ наста́вник и учи́тель ве́ры быв, Софро́ние, о́тче наш./ Сего́ ра́ди вене́ц нетле́ния от Бо́га прия́л еси́,/ Того́ моли́ о душа́х на́ших. Сла́ва Отцу́ и Сы́ну и Свято́му Ду́ху. И́га ага́рянскаго не терпя́ зре́ти/ и язы́к гре́ческий отри́нув из церкве́й,/ язы́ком слове́нским сло́во Христо́во пропове́дал еси́ ве́рующим./ Моли́ изба́витися и нам от и́га грехо́внаго и от наше́ствия иноплеме́нник. И ны́не и при́сно и во ве́ки веко́в. Ами́нь. Богородичен: Мари́ю Чи́стую, прииди́те вси, воспои́м,/ еди́ну, украси́вшую челове́чество и ро́ждшую Бо́га воплоще́нна,/ Де́ву же пребы́вшую неврежде́нну. Песнь 3 Ирмос: Твоя́ песносло́вцы, Богоро́дице,/ Живы́й и Незави́стный Исто́чниче,/ лик себе́ совоку́пльшия, духо́вно утверди́,/ в Боже́ственней Твое́й сла́ве/ венце́в сла́вы сподо́би. Припев: Святи́телю о́тче Софрóние, моли́ Бо́га о на́с. Ре́вностию Бо́жиею, я́ко Илия́ проро́к, распаляем, иера́рше Софро́ние,/ обходя́ гра́ды и ве́си бо́лгарския,/ ве́ру Христо́ву пропове́дуя и обы́чаи ага́рянския в лю́дех искореня́я,/ не убоя́лся еси́ свире́паго врага́./ Моли́ изба́витися нам от неви́димых враг. Припев: Святи́телю о́тче Софрóние, моли́ Бо́га о на́с. Нечести́вый враг на тя разгне́вася зело́, ища́ зле погуби́ти тя,/ но ты, бе́гая гне́ва его́, к Бо́гу дави́дски взыва́л еси́:/ изми́ мя, Го́споди, от челове́ка лука́ва, от му́жа непра́ведна изба́ви мя./ Изба́ви и нас, Го́споди, от вся́каго греха́ моли́твами святи́теля Твоего́. Припев: Святи́телю о́тче Софрóние, моли́ Бо́га о на́с. Сугу́бую благода́ть архиере́йскаго служе́ния прие́м от Бо́га,/ усугу́бил еси́ по Бо́зе ре́вность твою́./ Усе́рдно ста́до твое́ пася и храня́,/ деви́цу от сластолюби́ваго агарянина спасл еси́,/ супру́гу ве́рному венча́л еси́ ю и научи́л еси́ я пе́ти:/ Сла́ва си́ле Твое́й, Го́споди. Сла́ва Отцу́ и Сы́ну и Свято́му Ду́ху. Враг челове́ческий искони́ не терпя́ зре́ти тя, по Бо́зе житие́ иму́щу, блаже́нне,/ воздви́же на тя гоне́ния, я́ко на втора́го Па́вла, от сро́дников и лжебра́тии,/ сего́ ра́ди бе́гая, водвори́лся еси́ в де́брех и пещерех вратчанских,/ гла́дом и мра́зом мучим, ду́шу твою́ спасл еси́. И ны́не и при́сно и во ве́ки веко́в. Ами́нь. Богородичен: Све́тлыми сия́ньми, Пречи́стая Ма́ти Бо́жия, озари́ мой ум,/ тьмо́ю лю́таго неразу́мия одержи́мый:/ я́ко улучи́в Боже́ственное просвеще́ние,/ вели́чия Твоя́ возвещу́, Присноде́во. Седален, глас 4 Я́ко заря́ у́тренняя с небесе́,/ возсия́ нам всечестна́я па́мять твоя́, святи́телю Софро́ние,/ ве́рных озаря́ющи и слове́нский род вку́пе созыва́ющи./ Те́мже и мы дне́сь согла́сно вопие́м ти:/ моли́ Христа́ Бо́га о душа́х на́ших. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Я́ко невозде́ланная, Де́во, лоза́,/ красне́йший Грозд прозябла́ еси́,/ источа́ющ нам вино́ спасе́ния, всех веселя́щее души́ же и телеса́./ Те́мже, я́ко вину́ Тя до́брых блажа́ще при́сно, со А́нгелом вопие́м Ти:/ ра́дуйся, Благода́тная. Песнь 4 Ирмос: Седя́й в сла́ве на Престо́ле Божества́/ во о́блаце ле́гце,/ прии́де Иису́с Пребоже́ственный/ Нетле́нною Дла́нию и спа́се зову́щия:/ Сла́ва, Христе́, си́ле Твое́й. Припев: Святи́телю о́тче Софрóние, моли́ Бо́га о на́с. Изба́вивый дре́вле Дании́ла проро́ка от че́люстей Льво́вых,/ та́ко и тебе́ изба́ви, о́тче Софро́ние, от султана нечести́ваго и сластолюби́ваго,/ хотя́щаго погуби́ти тя невинна су́ща./ Ве́лиим стра́хом обдержи́м, вопия́л еси́:/ Сла́ва си́ле Твое́й, Го́споди. Припев: Святи́телю о́тче Софрóние, моли́ Бо́га о на́с. Обходя́ зе́млю Болгарскую и утеша́я стра́ждущия лю́ди,/ ра́ны, бие́ния и в темни́це затворе́ния пра́вды ра́ди претерпева́я, Софро́ние блаже́нне,/ не отступи́л еси́ от ве́ры, Бо́гу тя укрепля́ющу,/ я́ко не оста́вит Госпо́дь жезла́ гре́шных на жре́бий пра́ведных./ Сего́ ра́ди, изба́влен, вопия́л еси́:/ Сла́ва си́ле Твое́й, Го́споди. Припев: Святи́телю о́тче Софрóние, моли́ Бо́га о на́с. Тя́жким страда́нием искуше́н был еси́, о́тче Софро́ние,/ и, я́ко зла́то в горни́ле, очи́стился еси́,/ сего́ ра́ди досто́йно Вратчанский престо́л прие́м, жезл пра́вости в ру́це нося́,/ ста́до разу́мно упа́сл еси́ и вопия́л еси́, изба́влен:/ Сла́ва си́ле Твое́й, Го́споди. Припев: Святи́телю о́тче Софрóние, моли́ Бо́га о на́с. В моли́тве бо́дрствуя, святи́телю Софро́ние,/ не дал еси́ ве́ждома твои́ма дрема́ния и поко́й скраниа́ма твои́ма./ Непреста́нно Бо́гу моля́ся о избавле́нии ро́ду бо́лгарскому от и́га долговечнаго,/ си́це вопия́л еси́:/ Сла́ва си́ле Твое́й, Го́споди. Сла́ва Отцу́ и Сы́ну и Свято́му Ду́ху. Возненави́деша тя ту́не 22 и погна́ша тя врази́ твои́,/ но ты, возлага́я на Го́спода печа́ль твою́, си́це вопия́л еси́:/ Го́споди, Бо́же мой, на Тя упова́х, спаси́ мя от всех, гоня́щих мя,/ я́ко не возда́х воздающим ми зла́я:/ Сла́ва си́ле Твое́й, Го́споди. И ны́не и при́сно и во ве́ки веко́в. Ами́нь. Богородичен: Украси́лася еси́ па́че всего́ А́нгельскаго благоле́пия,/ я́ко ро́ждши всех, Отрокови́це, Творца́ же и Го́спода,/ от Твои́х пречи́стых крове́й воплоща́ема,/ избавля́ющаго вся, Того́ сла́вящия. Песнь 5 Ирмос: Ужасо́шася вся́ческая/ о Боже́ственней сла́ве Твое́й:/ Ты бо, Неискусобра́чная Де́во,/ име́ла еси́ во утро́бе над все́ми Бо́га/ и родила́ еси́ Безле́тнаго Сы́на,/ всем воспева́ющим Тя/ мир подава́ющая. Припев: Святи́телю о́тче Софрóние, моли́ Бо́га о на́с. Ти́хое и необурева́емое приста́нище души́ твоея́ ища́,/ до Афо́на дости́гл еси́,/ слеза́ми и те́плыми моли́твами ду́шу свою́ очи́стив,/ па́ки во оте́чество свое́ возврати́лся еси́,/ взыска́ти и спасти́ хотя́ лю́ди заблу́ждшия./ Ко и́стинному све́ту приве́д вся,/ к Бо́гу, ра́дуяся, взыва́л еси́:/ Сла́ва си́ле Твое́й, Го́споди. Припев: Святи́телю о́тче Софрóние, моли́ Бо́га о на́с. Я́ко ла́стовица от ю́га, Паи́сию преподо́бному долетевшу,/ с ве́лиею ра́достию прие́м его́ и любому́дренно с ним бесе́довал еси́./ Исто́рию славяноболгарскую от него́ прие́м,/ прописа́в ю и к прочита́нию наро́ду бо́лгарскому отда́л еси́ ю./ Те́мже и мы, язы́ком свои́м к Бо́гу ны́не пою́ще,/ тебе́ при́сно ублажа́ем. Припев: Святи́телю о́тче Софрóние, моли́ Бо́га о на́с. Столпи́ незыблемии Це́ркве Бо́лгарския показа́стеся, о Паи́сие преподо́бне и Софро́ние свяще́нне:/ уче́ньми и писа́ньми ва́шими зе́млю Болгарскую просвети́сте/ и лю́ди вся ко и́стинней ве́ре наста́висте./ Сего́ ра́ди ве́сь славянский род, любо́вию вас чту́ще, велича́ет. Припев: Святи́телю о́тче Софрóние, моли́ Бо́га о на́с. Иера́рше Софро́ние, ты воздви́гл еси́ уче́ньми твои́ми лю́ди,/ во тьме́ неве́дения и се́ни сме́ртней седя́щия,/ сы́ны све́та сотвори́в я, пу́ть спасе́ния показу́я им./ Сего́ ра́ди венца́ Небе́снаго сподо́бился еси́,/ не преста́й моля́ся о душа́х на́ших. Сла́ва Отцу́ и Сы́ну и Свято́му Ду́ху. Не терпя́ зре́ти му́чиму бы́ти бо́лгарскому наро́ду от нечести́вых ага́рян,/ писа́нием и словесы́ о́гненными противоста́л еси́ им, не убоя́вся лю́таго преще́ния./ Ра́ны мно́ги и гоне́ния ве́ры ра́ди претерпева́я до́блестно,/ к Бо́гу взыва́л еси́:/ спаси́, Го́споди, лю́ди Твоя́ и благослови́ достоя́ние Твое́. И ны́не и при́сно и во ве́ки веко́в. Ами́нь. Богородичен: Тя ору́жие на враги́ предлага́ем,/ ско́рби вся́кия лю́тых обстоя́ний отрева́ем/ и возмуще́ния ерети́ческаго, Ма́ти Бо́жия, избега́ем. Песнь 6 Ирмос: Боже́ственное сие́ и всечестно́е/ соверша́юще пра́зднество,/ Богому́дрии, Богома́тере,/ прииди́те, рука́ми воспле́щим,/ от Нея́ ро́ждшагося Бо́га сла́вим. Припев: Святи́телю о́тче Софрóние, моли́ Бо́га о на́с. Излия́ся благода́ть Свята́го Ду́ха во устна́х твои́х, иера́рше Софро́ние,/ ре́ки медото́чных слове́с из тебе́ потеко́ша,/ се́рдца ве́рных напая́ющи и све́том Ева́нгелия ду́ши всех просвеща́ющи./ Обновле́нный род славянский дне́сь лику́ет,/ Бо́га сла́вяще, тебе́ велича́ет. Припев: Святи́телю о́тче Софрóние, моли́ Бо́га о на́с. Да воспое́м дне́сь ра́достно церко́внаго свети́льника, столпа́ ве́ры незы́блемаго,/ Правосла́вия учи́теля, благоглаго́ливаго пропове́дника благоче́стия, иера́рха Софро́ния,/ прославляющего Бо́га всех, смиреному́дренно да просла́вим от чи́ста се́рдца. Припев: Святи́телю о́тче Софрóние, моли́ Бо́га о на́с. Проро́ческими очи́ма прови́дев ско́рое избавле́ние от и́га ага́рянскаго,/ до́брыми словесы́ лю́ди в це́рквах поуча́л еси́./ О́тай же зе́млю Болгарскую обходя́, му́дрыя писа́ния лю́дем раздава́я,/ Бо́жиею му́дростию озаре́н был еси́./ Не забу́ди и ны́не нас на земли́,/ любо́вию и ве́рою тя песносло́вящих. Припев: Святи́телю о́тче Софрóние, моли́ Бо́га о на́с. Я́ко го́лубь чи́стый, пожи́л еси́ посреде́ гре́шник,/ ле́сть же ду́шу твою́ не прельсти́./ Пра́ведно поживе́, и пра́вда Бо́жия изба́ви тя от сме́рти./ К ве́чному животу́ преше́л еси́,/ со А́нгели на Небеси́ лику́еши при́сно,/ моли́ изба́витися нам от ве́чных мук. Сла́ва Отцу́ и Сы́ну и Свято́му Ду́ху. Я́ко па́стырь преизря́ден яви́лся еси́, И́стинному Па́стырю после́дуя,/ ста́до слове́сное на па́жити тучныя изве́л еси́, пи́щею духо́вною напита́в./ Не оста́ви и нас, чту́щих тя. И ны́не и при́сно и во ве́ки веко́в. Ами́нь. Богородичен: Притеце́м, ве́рнии, в це́рковь Бо́жия Ма́тере,/ и, ве́рно моля́щеся, возопие́м Ей:/ поми́луй, Влады́чице, Твое́ достоя́ние/ и от враг изба́ви нас моли́твами Твои́ми. Кондак, глас 3 Архиере́ев похвала́ и страда́льцев украше́ние быв,/ святи́телю Софро́ние,/ доброде́тельми просла́вився,/ возсия́л еси́, я́ко со́лнце,/ нас просвеща́я и грехо́вную тьму́ неве́дения отгоня́я./ Но, я́ко име́я дерзнове́ние к Бо́гу,/ мир испроси́ душа́м на́шим и ве́лию ми́лость. Икос Се возшуме́ша врази́ твои́,/ лю́ди лука́вноваша и воздвиго́ша главу́ свою́ на тя, святи́телю Софро́ние,/ но не убоя́лся еси́ и, благода́тию Бо́жиею укрепляемь, си́це вопия́л еси́:/ да постыдя́тся и посра́мятся вку́пе и́щущии ду́шу мою́,/ да возвратя́тся вспя́ть и постыдя́тся мы́слящии ми зла́я./ Главу́ врага́ злоко́зненнаго сокруши́в моли́твами твои́ми,/ ста́до твое́ сохрани́л еси́ неврежде́нно./ Те́мже тя ве́сь бо́лгарский наро́д сла́вит, воспева́юще твоя́ труды́ и страда́ния,/ Богому́дре Софро́ние, мир испроси́ душа́м на́шим и ве́лию ми́лость. Песнь 7 Ирмос: Не послужи́ша тва́ри Богому́дрии/ па́че Созда́вшаго,/ но, о́гненное прещенне му́жески попра́вше,/ ра́довахуся, пою́ще:/ препе́тый отце́в Госпо́дь и Бог, благослове́н еси́. Припев: Святи́телю о́тче Софрóние, моли́ Бо́га о на́с. Обходя́щу всю зе́млю Болгарскую,/ лю́ди, спящия от сна долговечнаго и́га, воздви́гл еси́./ И нас ны́не воздви́гни, святи́телю Софро́ние, от сна грехо́внаго,/ я́ко да возвели́чим возвели́чившаго тя Христа́, Бо́га на́шего. Припев: Святи́телю о́тче Софрóние, моли́ Бо́га о на́с. Духо́вная уче́ния возлюби́в и во чте́нии Свяще́нных Писа́ний упражня́лся,/ ум Бо́гу просветившу ти, я́ко фи́никс, в до́му Госпо́дни, процве́л еси́,/ благопло́дия слове́с насажда́я бога́тно в сердца́х ве́рно пою́щих ти:/ благослове́н Бог оте́ц на́ших. Припев: Святи́телю о́тче Софрóние, моли́ Бо́га о на́с. Благода́тию Бо́жиею просвеща́ем,/ я́ко со́лнце на небеси́, возсия́л еси́,/ те́плыми луча́ми озаря́я зе́млю и лю́ди,/ доброде́тели в се́рдца люде́й насажда́я./ Сего́ ра́ди научи́л еси́ я пе́ти:/ благослове́н Бог оте́ц на́ших. Припев: Святи́телю о́тче Софрóние, моли́ Бо́га о на́с. Бо́жиим манове́нием дре́вле Моисе́й Изра́иля изведе́ от рабо́ты еги́петския,/ вторы́й Моисе́й яви́лся еси́, Софро́ние, о́тче наш,/ изводя́ лю́ди своя́ от рабо́ты ага́рянския,/ изба́ви и нас от фарао́на мы́сленнаго./ Те́мже тя пое́м во вся ве́ки. Сла́ва Отцу́ и Сы́ну и Свято́му Ду́ху. Я́ко безпло́дную смоко́вницу, ду́шу мою́ не посецы́, Спа́се,/ но обогати́ ю стократными плоды́ духо́вными гобзованием щедро́т Твои́х./ Обогати́вый святи́теля Твоего́ доброде́тельми, Го́споди,/ изба́ви и нас ве́чных мук моли́твами его́. И ны́не и при́сно и во ве́ки веко́в. Ами́нь. Богородичен: Светороди́тельнице Де́во,/ души́ моея́ стра́сти отжени́/ и да́ждь ми чи́сто зре́ти, Влады́чице,/ спаси́тельную добро́ту Возсия́вшаго неизрече́нно из Твое́й пречи́стыя утро́бы/ во свет язы́ков, Всепе́тая. Песнь 8 Ирмос: О́троки благочести́выя в пещи́/ Рождество́ Богоро́дичо спасло́ е́сть,/ тогда́ у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте, дела́,/ и превозноси́те Его́ во вся ве́ки. Припев: Святи́телю о́тче Софрóние, моли́ Бо́га о на́с. Архиере́ю Бо́жию тя бы́ти ве́дяще,/ к Ве́чному Архиере́ю Безкро́вныя же́ртвы о людски́х неве́дениих приноси́л еси́,/ нас от грехо́в искупи́вшему./ Те́мже тя превозно́сим во вся ве́ки. Припев: Святи́телю о́тче Софрóние, моли́ Бо́га о на́с. Бога́тства земна́я в ничто́же вмени́в,/ Ева́нгелие еди́но сокро́вище некра́домо име́л еси́./ Нищ сый, нището́ю нас обогаща́я благода́тию обнищавшего нас ра́ди и зрак раба́ прии́мшаго,/ Того́ пое́м и превозно́сим во вся ве́ки. Припев: Святи́телю о́тче Софрóние, моли́ Бо́га о на́с. Бегающу Иа́кову гне́ва бра́та своего́, в зе́млю чужду́ю оты́де,/ та́ко и ты, страда́льче Софро́ние, в зе́млю Влашскую удали́лся еси́,/ бе́гая гне́ва ага́рянскаго, пе́снь спаси́тельную поя́:/ Го́спода по́йте, дела́, и превозноси́те Его́ во вся ве́ки. Сла́ва Отцу́ и Сы́ну и Свято́му Ду́ху. Я́ко пришле́ц на земли́ чужде́й быв,/ Иеремиевым пла́чем пла́кался еси́ о ста́де твое́м, Софро́ние, о́тче наш./ Кни́ги Богодухнове́нныя написа́в им, благи́ми словесы́ уте́шил еси́ их,/ Бо́жие избавле́ние от долговеко́внаго и́га обещава́я им./ Те́мже и мы ны́не, изба́вленнии, пое́м:/ Изба́вителю Бо́же, благослове́н еси́. И ны́не и при́сно и во ве́ки веко́в. Ами́нь. Богородичен: Благослове́н Плод, Пречи́стая, чре́ва Твоего́,/ И́мже, земни́и вси, кля́твы изба́вихомся, Благослове́нная Всечи́стая,/ несказа́нное чу́до, неве́домое слы́шание, всех же ве́рных спасе́ние. Песнь 9 Ирмос: Всяк земноро́дный/ да взыгра́ется, Ду́хом просвеща́емь,/ да торжеству́ет же Безпло́тных умо́в естество́,/ почита́ющее свяще́нное торжество́ Богома́тере,/ и да вопие́т:/ ра́дуйся, Всеблаже́нная Богоро́дице,/ Чи́стая Присноде́во. Припев: Святи́телю о́тче Софрóние, моли́ Бо́га о на́с. Бо́жиим милосе́рдием дре́вний Изра́иль от еги́петскаго зла избежа,/ ны́не и бо́лгарский наро́д Бо́жиим промышле́нием от и́га ага́рянскаго изба́влен бы́сть./ Те́мже и мы ра́достно зове́м:/ пои́м Го́сподеви, сла́вно бо просла́вися. Припев: Святи́телю о́тче Софрóние, моли́ Бо́га о на́с. Ре́вностию Илиино́ю обдержи́м быв, святи́телю Софро́ние,/ не устраша́лся преще́ния, ра́ны и гоне́ния,/ дерзнове́нно врага́ безбо́жнаго изобличил еси́/ и, в темни́це затворя́ем, к Бо́гу взыва́л еси́:/ Изба́вителю Бо́же, благослове́н еси́. Припев: Святи́телю о́тче Софрóние, моли́ Бо́га о на́с. Пе́сненно дне́сь да почти́м иера́рха Христо́ва Софро́ния,/ от земли́ Бо́лгарския возсия́вшаго/ и пу́ть спасе́ния нам озаря́я луча́ми све́тлыми доброде́телей./ Того́ моли́твами, Христе́ Бо́же наш,/ сподо́би и нас чи́стым се́рдцем сла́вити Тя во вся ве́ки. Сла́ва Отцу́ и Сы́ну и Свято́му Ду́ху. Житие́ свое́ многострада́льное сконча́в на земли́,/ к Небе́сному Престо́лу возше́л еси́, нося́ ве́тви благоде́лания./ Тле́нными нетле́нная до́бре приобре́тши,/ Ца́рство Небе́сное от Христа́ прия́л еси́./ Того́ моли́ сподо́битися нам жи́зни ве́чныя моли́твами твои́ми. И ны́не и при́сно и во ве́ки веко́в. Ами́нь. Богородичен: Яви́ся нам из Тебе́, Богороди́тельнице, Пра́вды све́тлое Со́лнце,/ просвеща́ющее вся́ческая заре́ю Божества́,/ вопло́щся Вы́шний, Его́же ны́не воспева́ем:/ благослови́те, вся дела́ Госпо́дня, Го́спода. Светилен Све́тло дне́сь пра́зднуем святу́ю па́мять твою́, иера́рше Софро́ние,/ зря́щу ти ны́не на Небеси́ свет лица́ Бо́жия:/ моли́ о нас, пою́щих тя. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: По Бо́зе упова́ние на́ше иму́ще на Тя, Пречи́стая Богоро́дице, мо́лим Ти ся:/ моли́ся о нас ко из Тебе́ Ро́ждшемуся,/ невре́дны нас да́же до конца́ сохрани́ти,/ притека́ющих к покро́ву Твоему́.

Минея, 13 Февраля, Ин кано́н. Пи́сан кир Феодо́сием священнои́ноком Глас 4 Песнь 1 Ирмос: Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся све́тло торжеству́я,/ и воспою́, ра́дуяся, То́я чудеса́. Припев: Святи́и отцы́ Симеóне и Сáвво, моли́те Бóга о нáс. Отве́рзи уста́ моя́, благи́х Пода́телю, Христе́,/ и, прие́м по́мощь, Ду́хом сло́во благода́рственно отры́гну моле́бней па́мяти Твои́х уго́дник,/ прие́м сих по́мощь, воспою́, ра́дуяся, Твою́ благода́ть. Припев: Святи́и отцы́ Симеóне и Сáвво, моли́те Бóга о нáс. Отве́рзи устне́ свои́ ми́лостивне/ и ру́це на мольбу́ воздежи́ к Бо́гу всех и Влады́це, Симео́не,/ изба́вити ста́до твое́ от плене́ния и озлобле́ния,/ да тя почита́ем, воспева́юще твоя́ чудеса́. Сла́ва Отцу́ и Сы́ну и Свято́му Ду́ху. Отве́ргся, Са́вво, плотски́х роди́телей,/ с ни́ми духо́вне Тро́ицы – всех Бо́гу, усыни́лся еси́,/ Е́йже ны́не предстоя́ще,/ рабы́ своя́ изба́вите наси́лия сопроти́вных и враг обстоя́ния. И ны́не и при́сно и во ве́ки веко́в. Ами́нь. Богородичен: Чистоты́ сокро́вище, ра́дуйся,/ Е́юже от паде́ния на́шего воста́хом./ Ра́дуйся, сладкоуха́нный кри́не, Влады́чице, ве́рных благоуха́яй,/ кади́ло благово́нное и ми́ро многоце́нное. Песнь 3 Ирмос: Твоя́ песносло́вцы, Богоро́дице,/ живы́й и незави́стный исто́чниче,/ лик себе́ совоку́пльшия духо́вно утверди́,/ в Боже́ственней Твое́й сла́ве/ венце́в сла́вы сподо́би. Припев: Святи́и отцы́ Симеóне и Сáвво, моли́те Бóга о нáс. Твои́х раб, Благоде́телю, Животворя́щим Уте́шителем Ду́хом Симео́на и Са́вву просла́вим,/ лик, си́ми духо́вне со́бранный, огради́ Боже́ственным покро́вом/ и благода́ти сла́вы Твое́я сподо́би. Припев: Святи́и отцы́ Симеóне и Сáвво, моли́те Бóга о нáс. Твое́ достоя́ние, Симео́не, предвари́ изба́вити от расхище́ния/ зверови́дно на них устремля́ющихся,/ и воста́ния страсте́й на́ших твои́ми моли́твами укроти́,/ и благода́рне твоя́ чудеса́ сла́вити сподо́би. Сла́ва Отцу́ и Сы́ну и Свято́му Ду́ху. Твои́м дерзнове́нием, Са́вво, и́же ко Христу́,/ не преста́й моля́ о воспева́ющих тя,/ и в ли́ке сих устро́ити спаса́емых/ и нападе́ния сопроти́вных изба́витися сим сподо́би. И ны́не и при́сно и во ве́ки веко́в. Ами́нь. Богородичен: Ра́дуйся, две́ре еди́на,/ Е́юже Сло́во про́йде Еди́но,/ вереи́ и врата́ а́дова, Влады́чице, рождество́м Твои́м сокруши́вшая./ Ра́дуйся, Боже́ственный вхо́де спаса́емых, Богоневе́сто. Седален, глас 8 Ду́шу преда́вше любви́ Христо́вы,/ земна́я вся оста́вивше му́дре,/ всели́стеся, преподо́бнии, в пусты́нях и гора́х:/ вкуси́вше бо от дре́ва ве́дения, сла́внии,/ а́ки от вод таи́нницы, А́нгельски возсия́ли есте́./ Те́мже тьму пло́тскую превозше́дше, мрак де́монский отгна́ли есте́,/ блаже́ннии Симео́не и Са́вво сла́внии:/ моли́те Христа́ Бо́га прегреше́ний оставле́ние дарова́ти/ любо́вию пра́зднующим святу́ю па́мять ва́шу. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Я́ко Всенепоро́чная Неве́сто Творца́,/ я́ко Неискусому́жная Ма́ти Изба́вителя,/ прия́телище я́ко су́щи Уте́шителя, Всепе́тая,/ беззако́нию мя су́ща скве́рно жили́ще,/ и де́монов игра́лище, в ра́зуме бы́вша,/ потщи́ся от сих злоде́йствия мя изба́вити,/ све́тло жили́ще доброде́тельми соде́лавши,/ Светода́тельная и Нетле́нная, разжени́ о́блак страсте́й и вы́шняго прича́стия сподо́би,/ и Све́та Невече́рняго, моли́твами Твои́ми. Песнь 4 Ирмос: Седя́й в сла́ве на престо́ле Божества́/ во о́блаце ле́гце,/ прии́де Иису́с Пребоже́ственный/ Нетле́нною Дла́нию и спасе́ зову́щия:/ сла́ва, Христе́, си́ле Твое́й. Припев: Святи́и отцы́ Симеóне и Сáвво, моли́те Бóга о нáс. Седя́щаго в Вы́шних и Зря́щаго смире́нных,/ Симео́не Богоно́се и Са́вво святи́телю, приле́жно о нас умоли́те/ уще́дрити смире́ние на́ше и лю́тых изба́вите нас и спасти́ вопию́щих:/ сла́ва си́ле Твое́й, Го́споди. Припев: Святи́и отцы́ Симеóне и Сáвво, моли́те Бóга о нáс. Седа́лище мирска́го влады́чествия оста́вив,/ смире́нием Влады́це своему́ после́довал еси́,/ те́мже и бога́тыми дарова́ньми просла́вил тя есть,/ Его́же непреста́нно, о́тче, моли́,/ ста́до твое́ от расхища́ющих е изба́вити. Сла́ва Отцу́ и Сы́ну и Свято́му Ду́ху. Сел еси́ на престо́ле высо́це святи́ельства/ и упа́сл еси́ апо́стольски ста́до свое́/ и оби́тель и́ноков соста́вив, Боже́ственными уче́ньми утверди́л еси́,/ и́хже и ны́не моли́твами свои́ми сохрани́ невреди́мы от супоста́тных нахожде́ний. И ны́не и при́сно и во ве́ки веко́в. Ами́нь. Богородичен: Тя, испле́тшую ми́рови нерукоплете́нный вене́ц, песносло́вим,/ ра́дуйся, Тебе́, Де́во, зову́ще:/ храни́лище всех, и огражде́ние, и утвержде́ние, и свяще́нное прибе́жище. Песнь 5 Ирмос: Ужасо́шася вся́ческая/ о Боже́ственней сла́ве Твое́й:/ Ты бо Неискусобра́чная Де́во,/ име́ла еси́ во утро́бе над все́ми Бо́га,/ и родила́ еси́ Безле́тнаго Сы́на,/ всем воспева́ющим Тя/ мир подава́ющая. Припев: Святи́и отцы́ Симеóне и Сáвво, моли́те Бóга о нáс. Удиви́ на нас ми́лости Твое́я бога́тство, Го́споди, моли́твами Твои́х уго́дник,/ Ты бо, Благосе́рде Влады́ко, прие́млеши тех, приле́жно моля́щихся о нас,/ и, от бу́ри избавля́я, смире́ние подава́еши. Припев: Святи́и отцы́ Симеóне и Сáвво, моли́те Бóга о нáс. Удивле́н быв во вся́ческих: в смире́нии высокотво́рнем и мироизлия́нии оби́льнем,/ ты бо, чудотво́рче преподо́бне, прие́млеши всех, ве́рою притека́ющих к тебе́,/ и, моли́твами твои́ми от бед избавля́я, смире́ние подава́еши. Сла́ва Отцу́ и Сы́ну и Свято́му Ду́ху. Удиви́л еси́ всяк слух па́че естества́ чудотворе́ньми твои́ми,/ звери́ным обузда́нием и соста́ва повинове́нием, и еще́ же и А́нгелу повеле́нием,/ ты же, вели́кий святи́телю, и на нас покажи́ чудеса́ твоя́/ и, моли́твами твои́ми от ну́ждных изба́вив, сми́рение пода́ждь. И ны́не и при́сно и во ве́ки веко́в. Ами́нь. Богородичен: Простра́нное селе́ние Сло́ва, ра́дуйся, Пречи́стая,/ сосу́де, Боже́ственный би́сер произве́дшая:/ ра́дуйся, всечу́дное всех к Бо́гу примире́ние,/ блажа́щих Тя, Богоро́дице, всегда́. Песнь 6 Ирмос: Возопи́ прообразу́я погребе́ние тридне́вное/ проро́к Ио́на, в ки́те моля́ся:/ от тли изба́ви мя, Иису́се, Царю́ Сил. Припев: Святи́и отцы́ Симеóне и Сáвво, моли́те Бóга о нáс. Возопи́те ко Творцу́ и Бо́гу непреста́нно оби́тель ва́шу непоколеби́му сохрани́ти,/ ю́же соста́вльша, в ней по́стнически подвиза́стася,/ я́ко при́сна уго́дника Иису́су, Царю́ Сил. Припев: Святи́и отцы́ Симеóне и Сáвво, моли́те Бóга о нáс. Взыва́ем к тебе́, неключи́мая ча́да твоя́:/ погреби́ в ро́ве па́губнем ра́тующих нас мы́сленныя и чу́вственныя враги́,/ и от тли и напа́стей моли́ возвести́ нас Иису́са, Царя́ Сил. Сла́ва Отцу́ и Сы́ну и Свято́му Ду́ху. Взыва́я не преста́й о нас,/ Ему́же Же́ртвы Безкро́вныя прине́сл еси́, я́ко и́стинен святи́тель,/ сохрани́ти нас от обы́шедших зол невреди́мы Иису́су, Царю́ Сил. И ны́не и при́сно и во ве́ки веко́в. Ами́нь. Богородичен: Ра́дости вина́, облагодати́ наш по́мысл, е́же зва́ти Тебе́:/ ра́дуйся, неопали́мая Купино́,/ о́блаче всесве́тлый, ве́рныя непреста́нно осеня́ющий. Кондак, глас 2 Го́рнюю жизнь возлюби́вше, сла́внии,/ жизнь су́щую на земли́ презре́сте./ Сего́ ра́ди в вы́шних со А́нгелы всегда́ лику́юще,/ моли́те о всех нас. Икос Кто возмо́жет досто́йно похвали́ти/ твои́х натрижне́ний и по́двигов и трудо́в мно́гих сла́ву и вели́чие?/ Но моли́твами твои́ми спомози́ ми, и даждь ми благода́ть Ду́ха,/ я́ко да изреку́ твоя́ боре́ния ве́рно,/ и воспою́ па́че сло́ва си́лу твою́ и кре́пость, всеблаже́нне,/ е́юже кова́рнаго врага́ посрами́л еси́,/ Са́вво Богоно́се с Симео́ном Богому́дрым,/ не преста́йте моли́ти о всех нас. Песнь 7 Ирмос: Спасы́й во огни́ Авраа́мския Твоя́ о́троки,/ и халде́и уби́в/ я́же пра́вда пра́ведно уловля́ше,/ препе́тый Го́споди,/ Бо́же оте́ц на́ших, благослове́н еси́. Припев: Святи́и отцы́ Симеóне и Сáвво, моли́те Бóга о нáс. Спасе́нию хода́тая нам, Авраа́му подо́бнаго,/ Симео́на приво́дим Ти, Влады́ко,/ и, я́ко друга́го Исаа́ка, Са́вву священнонача́льника,/ на Горе́ Святе́й в же́ртву прине́сшася Тебе́,/ и́хже моли́твами от бед изба́ви нас, вопию́щих:/ препе́тый благослове́н Бог оте́ц на́ших. Припев: Святи́и отцы́ Симеóне и Сáвво, моли́те Бóга о нáс. Спасе́ния наде́жде да не погреши́м,/ наде́ющеся сие́ тобо́ю прия́ти, преподо́бне,/ но да получи́м моли́твами твои́ми страсте́м облегче́ние и душа́м спасе́ние, взыва́юще:/ препе́тый оте́ц на́ших Бо́же, благослове́н еси́. Сла́ва Отцу́ и Сы́ну и Свято́му Ду́ху. Спасы́й себе́ мирска́го пристра́стия крестоле́пно в пусты́ню Христу́ после́довал еси́,/ в не́йже во и́мя Того́ Пречи́стыя Ма́тере оби́тель соста́вив,/ мно́жество спаса́емых Тому́ приве́л еси́,/ е́йже, ны́не моли́ Его́, сохрани́тися неразори́ме во ве́ки. И ны́не и при́сно и во ве́ки веко́в. Ами́нь. Богородичен: Мо́лим раби́ Твои́, и приклоня́ем коле́но се́рдца на́шего:/ приклони́ у́хо Твое́, Чи́стая, и спаси́ скорбьми́ погружа́емыя при́сно,/ и соблюди́ от вся́каго вра́жия плене́ния Твой град, Богоро́дице. Песнь 8 Ирмос: Слы́ши, Отрокови́це Де́во Чи́стая,/ да ре́чет у́бо Гаврии́л/ сове́т Вы́шняго дре́вний, и́стинный:/ бу́ди к прия́тию гото́ва Бо́жию,/ Тобо́ю бо Невмести́мый с челове́ки поживе́./ Тем и, ра́дуяся, вопию́:/ благослови́те, вся дела́ Госпо́дня, Го́спода. Припев: Святи́и отцы́ Симеóне и Сáвво, моли́те Бóга о нáс. Слы́ши, Благоде́телю, Тво́рче всех, моле́ния, я́же о нас, преподо́бных Твои́х,/ да я́вятся и́же на ны сове́ты наси́лующих нам вско́ре су́етны,/ и бу́дем в благодаре́ние гото́вы Тебе́,/ те́ми бо неудо́бь избавля́емых избавля́еми явля́емся,/ тем и, веселя́щеся, вопие́м:/ благослови́те, вся дела́, Го́спода, по́йте и превозноси́те Его́ во ве́ки. Припев: Святи́и отцы́ Симеóне и Сáвво, моли́те Бóга о нáс. Слы́шав глас Ева́нгельский, преподо́бне Симео́не,/ и рече́ные тобо́ю обе́ты ко Христу́ соблю́л еси́, я́ко и́стинный Сего́ служи́тель,/ и бысть на прия́тие гото́в Ду́хови,/ Его́же благода́тию и нас сохрани́ невреди́мы/ от наве́та борю́щих ны ви́димых враг и неви́димых. Сла́ва Отцу́ и Сы́ну и Свято́му Ду́ху. Слы́шана бы́ша твоя́ исправле́ния, Са́вво всеблаже́нне,/ прие́м бо благода́ть Ду́ха, заблужде́ние обрати́л еси́ на путь и́стины,/ бу́ди на прия́тие гото́в моле́ния на́шего,/ тобо́ю и ны́не настоя́щих бед и душе́вных страсте́й изба́витися нам и благода́рственне взыва́ти:/ благослови́те, вся дела́, Го́спода, по́йте и превозноси́те во вся ве́ки. И ны́не и при́сно и во ве́ки веко́в. Ами́нь. Богородичен: Ми́ру ро́ждшая спасе́ние, и́мже от земли́ на высоту́ взя́ти бы́хом,/ ра́дуйся, Всеблагослове́нная, покро́ве и держа́во,/ стено́ и утвержде́ние, пою́щим, Чи́стая:/ Го́спода по́йте, дела́, и превозноси́те во вся ве́ки. Песнь 9 Ирмос: Яко одушевле́нному Бо́жию киво́ту,/ да ника́коже ко́снется рука́ скве́рных,/ устне́ же ве́рных Богоро́дице немо́лчно,/ глас А́нгела воспева́юще, с ра́достию да вопию́т:/ ра́дуйся, Благода́тная, Госпо́дь с Тобо́ю. Припев: Святи́и отцы́ Симеóне и Сáвво, моли́те Бóга о нáс. Я́коже спаси́тельный, Твои́м повеле́нием сотворе́нный, Влады́ко, киво́т,/ та́ко сохрани́ Це́рковь ве́рных от пото́па е́ресей и наси́лия ра́тующих/ моле́нием Симео́на преподо́бнаго и Са́ввы архиере́я, всебога́тых и приснопа́мятных. Припев: Святи́и отцы́ Симеóне и Сáвво, моли́те Бóга о нáс. Я́коже свяще́ния зако́нный киво́т/ искуше́ние гне́ва Бо́жия наведе́ беззако́нне одержа́щим и де́рзостно прикосну́вшемуся,/ та́ко, мо́лимся, Богоно́се Симео́не, сотвори́ и́же ста́ду твоему́ наси́лующим,/ храм ра́ки моще́й твои́х, и́же тебе́, о́тче, в небреже́ние вменя́ющим. Сла́ва Отцу́ и Сы́ну и Свято́му Ду́ху. Я́ко свяще́нствий Боже́ственных и́стинный служи́тель,/ дерзнове́ние име́я к Пастыренача́льнику Христу́,/ ника́коже да оста́виши расхище́ну, ни прикоснове́ну бы́ти ста́ду твоему́ рука́ми неве́рных и безсту́дных,/ и́же соста́ви мно́гими поты́, Са́вво блаже́нне. И ны́не и при́сно и во ве́ки веко́в. Ами́нь. Богородичен: Пощади́, Бо́же, насле́дие Твое́, грехи́ на́ша вся презре́х ны́не,/ на сие́ име́я Моля́щую Тя, на земли́ безсе́менно Тебе́ Ро́ждшую,/ вели́кия ра́ди ми́лости восхоте́вшаго вообрази́тися, Христе́, в челове́чество. Светилен Чудотво́рцы свети́льницы, Симео́не со Са́ввою,/ уврачу́йте ду́ши на́ша и телесе́ неду́ги,/ от Го́спода прии́мше благода́ть исцеле́ний. Сла́ва Отцу́ и Сы́ну и Свято́му Ду́ху. Дво́е свети́льники светоза́рныя,/ святи́теля Са́вву с преподо́бным Симео́ном,/ Боже́ственныя отцы́ и учи́телие на́ша,/ в пе́снех доброгла́сных вси да почти́м. И ны́не и при́сно и во ве́ки веко́в. Ами́нь. Богородичен: Су́щих от Бо́га дае́мых ми́ру благ,/ Ты причи́ною была́ еси́, Пречи́стая,/ но и ны́не уми́лостиви Сы́на Твоего́, Богоро́дице, о о́бщем спасе́нии.

Минея, 13 Марта, Канон святителя Глас 2 Песнь 1 Ирмос: Гряди́те, лю́дие,/ пои́м пе́снь Христу́ Бо́гу,/ разде́льшему мо́ре и наста́вльшему лю́ди,/ я́же изведе́ из рабо́ты еги́петския,/ я́ко просла́вися. Припев: Святи́телю о́тче Ники́форе, моли́ Бо́га о на́с. Грехо́в гро́бом лю́те содержи́ма мя/ безсме́ртным манове́нием Твои́м и благоутро́бною Твое́ю возста́ви дла́нию/ и оживи́, Ще́дре, я́ко всеси́лен. Припев: Святи́телю о́тче Ники́форе, моли́ Бо́га о на́с. Ро́дная доброде́телей соверше́нства четвероча́стно стяжа́в/ и, я́ко на колесни́цу, вшед, Богоно́се,/ в коне́ц Боговиде́ния взя́лся еси́ от дея́ния. Припев: Святи́телю о́тче Ники́форе, моли́ Бо́га о на́с. Ты, жи́зни нетле́нныя вкуси́в,/ от ча́ши, преподо́бне, Боже́ственныя пил еси́ тре́звенное пи́во,/ тем и му́дрости прия́телище был еси́. Сла́ва Отцу́ и Сы́ну и Свято́му Ду́ху. Отгна́н быв престо́ла, и сла́вы, и па́ствы твое́й/ руко́ю ну́жною, преподо́бне, е́реси яротле́нных звере́й,/ ны́не к твое́й огра́де вшел еси́. И ны́не и при́сно и во ве́ки веко́в. Ами́нь. Богородичен: О́тчее Сло́во сло́вом зачала́ еси́, и па́че сло́ва родила́ еси́,/ и по рождестве́ па́че естества́ и сло́ва/ Де́ва, я́ко пре́жде рождества́, па́ки пребыла́ еси́. Песнь 3 Ирмос: Утверди́ нас в Тебе́, Го́споди,/ Дре́вом умерщвле́н грех,/ и страх Твой всади́/ в се́рдца нас, пою́щих Тя. Припев: Святи́телю о́тче Ники́форе, моли́ Бо́га о на́с. Ору́жием Креста́ защити́вся,/ Боже́ственное воображе́ние Влады́ки напису́я,/ покланя́ешися благоче́стно, оте́ческим после́дуя уче́нием. Припев: Святи́телю о́тче Ники́форе, моли́ Бо́га о на́с. Па́ства, па́стыря тя жела́ющи, ту́ю по и́мени зову́щаго/ и во́лки отгоня́ща жезло́м ве́ры,/ к тебе́ притека́ет, му́дре. Сла́ва Отцу́ и Сы́ну и Свято́му Ду́ху. Я́коже дре́вле Ио́сифа Боже́ственнаго целому́дреннаго те́ло Изра́иль прено́сит,/ та́ко ны́не Це́рковь Христо́ва ра́ку моще́й твои́х почита́ет. И ны́не и при́сно и во ве́ки веко́в. Ами́нь. Богородичен: Храм и свяще́нное жили́ще Сло́ва су́щи, Богоро́дице,/ прегреше́ний очище́ние, Пресвята́я, бу́ди ми, Присноде́во. Седален, глас 3 Побе́дами венча́л еси́ Це́рковь,/ пре́лесть отгна́в злосла́вия,/ победоно́сец су́що быв,/ и освяща́еши ми́ра концы́ пренесе́нием святы́х моще́й твои́х,/ о́тче преподо́бне, Христа́ Бо́га моли́/ дарова́ти нам ве́лию ми́лость. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Боже́ственная ски́ния была́ еси́ Сло́ва, еди́на Пречи́стая Ма́ти Де́во,/ чистото́ю А́нгелы превозше́дшая,/ па́че всех мене́ пе́рсть бы́вша,/ оскверне́на плотски́ми прегреше́ньми, очи́сти моли́тв Твои́х Боже́ственными вода́ми,/ подаю́щи, Чи́стая, ве́лию ми́лость. Песнь 4 Ирмос: Услы́шах, Го́споди,/ сла́вное Твое́ смотре́ние/ и просла́вих, Человеколю́бче,/ непостижи́мую Твою́ си́лу. Припев: Святи́телю о́тче Ники́форе, моли́ Бо́га о на́с. Киво́т свяще́ния, из него́же исто́чник исцеле́ний почерпа́ем,/ ра́ка твой бы́сть чту́щим тя. Припев: Святи́телю о́тче Ники́форе, моли́ Бо́га о на́с. Е́реси отгна́л еси́ и па́ствы огра́ду утверди́л еси́,/ уче́нии Боже́ственными огради́в. Сла́ва Отцу́ и Сы́ну и Свято́му Ду́ху. По до́лгу почита́ем твои́х моще́й, блаже́нне, мирополо́жницу,/ я́ко жи́зни точа́щую благово́ние ве́рным. И ны́не и при́сно и во ве́ки веко́в. Ами́нь. Богородичен: Мы́сленный Тя рай, я́ко жи́зни дре́во прие́мшую,/ во чре́ве, Де́во, Христа́,/ тем, Тя чту́ще, прославля́ем. Песнь 5 Ирмос: Све́та Пода́телю и веко́в Тво́рче, Го́споди,/ во све́те Твои́х повеле́ний наста́ви нас,/ ра́зве бо Тебе́, ино́го бо́га не зна́ем. Припев: Святи́телю о́тче Ники́форе, моли́ Бо́га о на́с. Врази́ посрамля́ются, ересенача́льницы с ни́ми неи́стовятся,/ твою́ ра́ку зря́ще, Богому́дре,/ ве́рне почита́емую от царя́ и всея́ па́ствы твое́я. Припев: Святи́телю о́тче Ники́форе, моли́ Бо́га о на́с. Свяще́нная твоя́ ра́ка де́монов лука́выя ду́хи, я́коже стра́шный бич, отгоня́ет/ и побе́ду на ты́я, Ники́форе,/ сла́вы Боже́ственныя от Бо́га прие́млет. Сла́ва Отцу́ и Сы́ну и Свято́му Ду́ху. Со́вести горни́ло, огне́м ду́ха воспале́но,/ я́ко зла́то, ве́рою тя показа́ све́тло,/ ерети́чествующих облича́я ме́рзость. И ны́не и при́сно и во ве́ки веко́в. Ами́нь. Богородичен: Украси́вшися, Чи́стая, наи́тием Пресвята́го Ду́ха,/ Бо́га сосце́ма дои́ши и Сего́ держи́ши объя́тии,/ всю тва́рь дла́нию содержа́щаго. Песнь 6 Ирмос: В бе́здне грехо́вней валяяся,/ неизсле́дную милосе́рдия Твоего́ призыва́ю бе́здну:/ от тли, Бо́же, мя возведи́. Припев: Святи́телю о́тче Ники́форе, моли́ Бо́га о на́с. За ве́ру стра́сти претерпе́л еси́,/ оте́ческих ра́ди честны́х преда́ний изгна́ния поне́сл еси́,/ и́миже сла́ву стяжа́л еси́ пречестну́ю. Припев: Святи́телю о́тче Ники́форе, моли́ Бо́га о на́с. Тверда́ ве́ра твоя́ и противле́ние мучи́телей безу́мие поколеба́,/ столп же о́гнен был еси́ честне́й Це́ркви, блаже́нне. Сла́ва Отцу́ и Сы́ну и Свято́му Ду́ху. Я́ко све́тлых би́сер и ка́мения, му́дре, па́че светле́йши,/ ра́ку и пе́рсть Це́рковь твоя́ иму́щи,/ правосла́вия венце́м удобря́ется. И ны́не и при́сно и во ве́ки веко́в. Ами́нь. Богородичен: Неизрече́нный о́браз рождества́ Твоего́ язы́цы земноро́дных и А́нгелов честву́ют,/ Тя, тва́рей, Влады́чице, вы́шшую всех, сла́вяще. Кондак, глас 1 Лик патриа́ршеский святу́ю твою́ па́мять/ хвала́ми и пе́сньми, Ники́форе, честву́ет,/ в преложе́нии бо прия́т ду́шу твою́, сла́вне./ Тем дне́сь честна́я Це́рковь, велича́ющи Христа́ Царя́,/ сла́вит Еди́наго Человеколю́бца. Песнь 7 Ирмос: О́бразу злато́му, на по́ле Деи́ре служи́му,/ трие́ Твои́ о́троцы небрего́ша безбо́жнаго веле́ния,/ посреде́ же огня́ вве́ржени, ороша́еми, поя́ху:/ благослове́н еси́, Бо́же оте́ц на́ших. Припев: Святи́телю о́тче Ники́форе, моли́ Бо́га о на́с. Боже́ственною си́лою нетле́нны соблюдо́шася погреба́тельныя ри́зы,/ и ко́сти твоя́ Боже́ственным манове́нием сопряже́ния не отреши́шася, блаже́нне,/ нечи́стых духо́в разсыпа́ют злоу́мие./ Мы же вопие́м:/ благослове́н еси́, Бо́же оте́ц на́ших. Припев: Святи́телю о́тче Ники́форе, моли́ Бо́га о на́с. Стека́ются лю́дие, ца́рь же благочести́вый и сано́вных мно́жество,/ и, возло́жше сла́вную твою́ ра́ку на вы́ях, Богоприя́тне,/ я́коже киво́т пресвя́т, дорино́сят и пою́т:/ благослове́н еси́, Бо́же оте́ц на́ших. Сла́ва Отцу́ и Сы́ну и Свято́му Ду́ху. Боже́ственный храм Сло́ва ученико́в да прии́мет ве́рно,/ апо́столов собесе́дника и му́чеников сожи́теля,/ патриа́рхов степе́нь и отце́в соседа́теля,/ благослове́н еси́, – вопия́, – Бо́же оте́ц на́ших. И ны́не и при́сно и во ве́ки веко́в. Ами́нь. Богородичен: Зря Моисе́й купину́ неопали́му, пре́жде горя́щу огне́м в Сина́и,/ Ма́ти Пречи́стая, прообразу́ющу ложесна́ Твоя́:/ О́гнь бо заче́нши Боже́ственный, не опали́лася еси́,/ но родила́ еси́ све́та Соде́теля, Бо́га и Челове́ка. Песнь 8 Ирмос: В пе́щь о́гненную ко отроко́м евре́йским снизше́дшаго/ и пла́мень в ро́су прело́жшаго Бо́га,/ по́йте, дела́, я́ко Го́спода/ и превозноси́те во вся ве́ки. Припев: Святи́телю о́тче Ники́форе, моли́ Бо́га о на́с. В приста́нище жи́зни от мно́гих треволне́ний дости́гл еси́, о́тче, Ду́ха ве́тром,/ и бре́мя до́брое немо́кренною ного́ю твое́ю спасл еси́,/ и ны́не наслажда́ешися та́мошния тишины́. Припев: Святи́телю о́тче Ники́форе, моли́ Бо́га о на́с. Гроб ви́дяще, ве́рнии, в но́вый же́ртвенник прия́т,/ в не́мже Боже́ственная соверша́ются всесожже́ния ве́рно/ и вну́трь мертвеца́ свяще́ннейшаго, Чудодетеля и Бо́га превозно́сим. Сла́ва Отцу́ и Сы́ну и Свято́му Ду́ху. Ра́дуется ста́до све́тло,/ пра́зднует мона́хов све́тлый лик,/ и ве́рных царе́й благочести́вая порфи́ра, и вся́кое си́льных торжество́/ в честно́м моще́й твои́х пренесе́нии. И ны́не и при́сно и во ве́ки веко́в. Ами́нь. Богородичен: Сло́вом Сло́во во утро́бе,/ вся́ческая сло́вом соста́вльшаго, заче́нши безсе́менно, Богороди́тельнице,/ Чи́стая Де́во, па́че сло́ва родила́ еси́./ Его́же превозно́сим во вся ве́ки. Песнь 9 Ирмос: От Бо́га Бо́га Сло́ва,/ неизрече́нною му́дростию прише́дшаго обнови́ти Ада́ма,/ я́дию в тле́ние па́дшаго лю́те,/ от Святы́я Де́вы неизрече́нно воплоти́вшагося нас ра́ди,/ ве́рнии, единому́дренно пе́сньми велича́ем. Припев: Святи́телю о́тче Ники́форе, моли́ Бо́га о на́с. О твое́м торжестве́ и боле́знех твои́х, о́тче, А́нгельская сликовству́ют мно́жества,/ Пресвята́го Го́спода благода́рственно сла́вяще,/ и мир свы́ше нам испроша́ют,/ ве́рно чту́щим твоя́ мо́щи. Припев: Святи́телю о́тче Ники́форе, моли́ Бо́га о на́с. Моще́й твои́х благода́ть я́ко че́стно врачевство́ да бу́дет не́мощем на́шим,/ и моли́тва, всехва́льне, очисти́лище всем,/ и к Бо́гу пу́ть и во́ждь/ ве́рою и любо́вию чту́щим тя, блаже́нне. Сла́ва Отцу́ и Сы́ну и Свято́му Ду́ху. Победи́тельными всеору́жии ве́рныя защити́в, Всецарю́,/ руко́ю Твое́ю ве́рныя на ва́рвары укрепи́,/ и Твою́ Це́рковь, я́ко тве́рдое основа́ние ве́рных,/ преподо́бнаго моли́твами православящую, сохрани́. И ны́не и при́сно и во ве́ки веко́в. Ами́нь. Богородичен: Я́ко кре́пкое предста́тельство, я́ко наде́жду, и сте́ну, анки́ру,/ и покро́в тверд, и необори́мое утвержде́ние,/ и небу́рное приста́нище, и еди́но прибе́жище, Чи́стая,/ стяжа́вше Тя вси, спаса́емся, Всепе́тая.

Глас 4 Пе́снь 1. Ирмо́с: Мо́ря чермну́ю пучи́ну невла́жными стопа́ми дре́вний пешеше́ствовав Изра́иль, крестообра́зныма Моисе́овыма рука́ма Амали́кову си́лу в пусты́ни победи́л е́сть. Припев: Преподо́бне о́тче Ники́то, моли́ Бо́га о на́с. Боже́ственными светоли́тии, преподо́бне, облиста́н, светови́ден бы́л еси́; ве́рно светоно́сное твое́ успе́ние творя́щия просвети́, страсте́й мглу́ отъе́мля. Яви́лся еси́ светови́дными дея́нии, све́та испо́лнен, су́щия в нощи́ лю́тыя просвеща́я и к све́ту Небе́сному наставля́я Ду́хом, о́тче Ники́то свяще́нне. Чуде́с облиста́еши дарова́ния приступа́ющим всегда́ свяще́нней твое́й ра́це, вме́сто трудо́в и боле́зней твои́х от Бо́га воздая́ние сие́, преблаже́нне, прие́м. Богоро́дичен: Без се́мене О́тчею во́лею от Боже́ственнаго Ду́ха Бо́жия зачала́ еси́ Сы́на и пло́тию родила́ еси́ из Отца́ без ма́тере, на́с же ра́ди из Тебе́ без отца́ бы́вша. Пе́снь 3. Ирмо́с: Весели́тся о Тебе́ Це́рковь Твоя́, Христе́, зову́щи: Ты́ моя́ кре́пость, Го́споди, и прибе́жище, и утвержде́ние. Возне́слся еси́, смири́вся Христа́ ра́ди, и бро́вь, преподо́бне, мы́сленнаго зми́я Ду́хом в зе́млю смири́л еси́. Вели́ких от Бо́га сподо́бився даро́в, вели́к свяще́нник бы́л еси́, о́тче святи́телю Богоприя́тне. Беззло́бием твою́ жи́знь, я́коже младе́нец, соверша́я, погуби́л еси́ враго́в, преподо́бне, всю́ зло́бу благода́тию. Богоро́дичен: Еди́ну в жена́х благослове́нную Богоро́дицу, я́ко Бо́жие селе́ние преблаголе́пно, вси́ ра́достию просла́вим. Седа́лен, гла́с 4. От младе́нства взе́м тво́й кре́ст, благоче́стно Христу́ после́довал еси́, увяди́в плотско́е воздержа́нием мудрова́ние, те́мже на святи́тельсте седа́лищи, Ники́то, возне́сл еси́ Влады́ку, зна́меньми разли́чными твою́ украси́вша ра́ку, Богоблаже́нне. Сла́ва, и ны́не: Чи́стая, Всенепоро́чная и Неискусому́жная, Я́же еди́на Безле́тнаго Сы́на и Сло́ва Бо́жия в ле́то ро́ждши, Сего́ со святы́ми и честны́ми патриа́рхи, и му́ченики, и проро́ки, и преподо́бными моли́ дарова́ти на́м очище́ние и ве́лию ми́лость. Крестобогоро́дичен: На Кресте́ Тя возвы́шена я́ко узре́ Пречи́стая Ма́ти Твоя́, Сло́ве Бо́жий, ма́терски рыда́ющи, веща́ше: что́ но́вое и стра́нное сие́ чу́до, Сы́не Мо́й? Ка́ко, Жи́знь все́х, вкуша́еши сме́рти, оживи́ти ме́ртвыя хотя́, я́ко Милосе́рд? Пе́снь 4. Ирмо́с: Вознесе́на Тя́ ви́девши Це́рковь на Кресте́, Со́лнце пра́ведное, ста́ в чи́не свое́м, досто́йно взыва́ющи: сла́ва си́ле Твое́й, Го́споди. Всено́щными бде́нии и вседне́вными, о́тче Богому́дре, стоя́нии, пло́ти движе́ния вся́ увяди́л еси́ и, ра́дуяся, взыва́л еси́: сла́ва си́ле Твое́й, Го́споди. Повину́л еси́ непоко́рное пло́ти твоея́ душе́вными си́лами, Богому́дре, прия́л еси́ благода́ть, всеблаже́нне, отгоня́ти ду́хи и очища́ти неду́ги. Си́лою Боже́ственною укрепля́емь, святи́телю, де́монския полки́ победи́л еси́ вся́, побе́ды, я́ко тезоимени́т, вене́ц чуде́с от Венцеда́вца насле́дил еси́. Богоро́дичен: Украси́лася еси́ духо́вными красота́ми, Отцу́ Собезнача́льнаго Сло́ва заче́нши и пло́тию ро́ждши, Де́во Всенепоро́чная, Его́же о ми́ре моли́. Пе́снь 5. Ирмо́с: Ты́, Го́споди, мо́й Све́т, в ми́р прише́л еси́, Све́т Святы́й, обраща́яй из мра́чна неве́дения ве́рою воспева́ющия Тя́. Кро́тостию я́ве души́ украша́емь, всели́лся еси́, святи́телю, в зе́млю кро́тких, блаже́н бы́в. Струя́ми, о́тче, напои́вся дарова́ний Ду́ха, целе́ния жела́ющим источа́еши, Ники́то Богому́дре свяще́нне. Житие́ твое́, све́том доброде́телей сия́я, я́коже многоце́нною у́тварию, чуде́с благода́тию, всеблаже́нне, украси́ся. Богоро́дичен: Тя́ ору́жие непобеди́мое на враги́ предлага́ем, Тя́ утвержде́ние и наде́жду на́шего спасе́ния, Богоневе́сто, стяжа́хом. Пе́снь 6. Ирмо́с: Пожру́ Ти́ со гла́сом хвале́ния, Го́споди, Це́рковь вопие́т Ти́, от бесо́вския кро́ве очи́щшися ра́ди ми́лости от ре́бр Твои́х исте́кшею Кро́вию. Свеща́ светоза́рная тро́ичная возсия́ла е́сть, со Игна́тием Ники́та, свяще́нное самобра́тство, и подаю́т исцеле́ния ве́рным, све́тло блиста́ющи. Дру́г дру́гу по пло́ти му́дрии сро́дствующе, и́стиннаго по Ду́ху сро́дства ны́не сподо́бистася, единонра́вно, и Бо́гу благоуго́дно пожи́вша. Губи́тельныя отбе́г ересе́й ти́ны честны́м поклоне́нием Христо́вы ико́ны, е́же по о́бразу спа́сл еси́, святи́телю Ники́то Богоприя́тне. Богоро́дичен: Две́рь, е́юже про́йде еди́н Вы́шний, покая́ния ми́ две́ри и вхо́ды отве́рзи спасе́ния, от вся́каго мя́ соблюда́ющи вре́да, Всенепоро́чная. Конда́к, гла́с 8. Све́тлостию де́л твои́х просия́л еси́, преподо́бне, апо́стольскаго престо́ла насле́дник бы́л еси́, Ники́то, и, я́ко со́лнце, облиста́л еси́ твое́й па́стве, о́тче, вся́ Боже́ственных уче́ний испо́лнь. Те́мже зове́м ти́: ра́дуйся, Халкидо́ну удобре́ние. Пе́снь 7. Ирмо́с: В пещи́ авраа́мстии о́троцы перси́дстей, любо́вию благоче́стия па́че, не́жели пла́менем, опаля́еми, взыва́ху: благослове́н еси́ в хра́ме сла́вы Твоея́, Го́споди. Со святи́тели водворя́ешися вои́стинну, о́тче му́дре, сия́ния мы́сленнаго исполня́емь, и на́с озари́, взыва́ющия: благослове́н еси́ в хра́ме сла́вы Твоея́, Го́споди. Я́ко пастыренача́льник, я́ко Бо́жий предста́тель непоро́чен, Сему́ чи́сты же́ртвы, све́тло воспева́я, прине́сл еси́: благослове́н еси́ в хра́ме сла́вы Твоея́, Го́споди. Па́стырь показа́лся еси́, слове́сною, Ники́то, цевни́цею ста́до слове́сное к па́жити и́стинных уче́ний призыва́я, благослове́н еси́, – вопия́, – в хра́ме сла́вы Твоея́, Го́споди. Испове́данием житие́ украси́в, о́тче, целе́ний благода́ть и́стинную от Ду́ха прия́л еси́, благослове́н еси́, Бо́же мо́й, – вопия́, – в хра́ме сла́вы Твоея́, Го́споди. Богоро́дичен: Да обожи́т челове́чество яви́ся Челове́к, Отрокови́це, из чре́ва Твоего́ пло́ть Изба́витель заимова́в хоте́нием. Благослове́на Ты́ в жена́х, Пренепоро́чная Влады́чице. Пе́снь 8. Ирмо́с: Ру́це распросте́р, Дании́л льво́в зия́ния в ро́ве затче́, о́гненную же си́лу угаси́ша, доброде́телию препоя́савшеся, благоче́стия рачи́тели о́троцы, взыва́юще: благослови́те, вся́ дела́ Госпо́дня, Го́спода. Вели́ких трудо́в воздая́ния я́ве прии́м: све́т неизглаго́ланный, жи́знь безсме́ртную, преподо́бне, и черто́г неразори́мый, Венцеда́вцу твоему́ Христу́ вопие́ши, ра́дуяся: благослови́те, вся́ дела́ Госпо́дня, Го́спода. Ми́лостию ми́лости ища́, ни́щия удово́лил еси́, убо́гия напита́л еси́, наги́я оде́ял еси́, сла́вы себе́ оде́жду притворя́я, мона́шествующих о́браз, Ники́то, бы́л еси́, вопию́щих: благослови́те, вся́ дела́ Госпо́дня, Го́спода. Це́рковь бы́в прекра́сна Боже́ственнаго Ду́ха ума́ чистото́ю, отгоня́еши ду́хи лука́вствия и неду́ги очища́еши, приходя́щим к тебе́ и вопию́щим: благослови́те, вся́ дела́ Госпо́дня, Го́спода. Моги́й вся́ о Христе́, и ны́не ясне́йши и чисте́йши Бо́гу соединя́яся, предста́ни, его́же стяжа́л еси́, ста́ду, преподо́бне, творя́щему твое́ ве́рно Боже́ственное успе́ние и вопию́щу: благослови́те, вся́ дела́ Госпо́дня, Го́спода. Богоро́дичен: Все́лься во Твое́ чре́во, Христо́с, вся́ческих Госпо́дь, я́коже изво́ли, святе́йшу Тя́ показа́ А́нгел, Ма́ти Де́во, освяще́ние и просвеще́ние на́м дарова́, вопию́щим: благослови́те, вся́ дела́ Госпо́дня, Го́спода. Пе́снь 9. Ирмо́с: Ка́мень нерукосе́чный от несеко́мыя горы́, Тебе́, Де́во, краеуго́льный отсече́ся, Христо́с, совокупи́вый разстоя́щаяся естества́, те́м, веселя́щеся, Тя́, Богоро́дице, велича́ем. Священноле́пно после́дуя твоему́ тезоимени́тому и Боже́ственному, сего́ сподо́бился еси́ о́бразом, Ники́то, о́тче Богоблаже́нне, и заре́ю Ду́ха благода́тною обогати́лся еси́, Богодохнове́нне. Яви́стеся, Тро́ическою благода́тию обога́щшеся, Богоно́сцы, ра́вно от нея́ прие́мше исцеле́ний Боже́ственное де́йство и чи́сто пожи́вше и богоуго́дно, досточу́днии. Дне́сь па́мять твоя́, о́тче, па́че со́лнца блиста́ет сия́нием доброде́телей, чудесы́ вселе́нную озаря́ющи и ве́рныя уясня́ющи священнотаи́нниче всече́стне. Я́коже денносве́тлыя зве́зды, о́тче Ники́то, со священноде́йственным Игна́тием я́вльшеся, вся́ у́бо просвети́те, благочести́вии и блаже́ннии, восхваля́ющия ва́с всегда́. Богоро́дичен: Све́та жили́ще яви́лася еси́, от Отца́ пре́жде денни́цы Сло́ву возсия́вшаго, Отрокови́це Де́во, еди́на Богора́дованная, и ве́рныя просве́щшаго, и преподо́бныя венча́вшаго.

Минея, 24 Сентября, Кано́н свята́го Ника́ндра Глас 4 Песнь 1 Ирмос: Раздели́в пучи́ну Чермну́ю Бог,/ фарао́на погрузи́вый в ней,/ прове́д Моисе́я немо́кренно в пусты́ню/ и одожди́в ма́нну в снедь лю́дем Изра́илевым,// я́ко Всеси́лен. Припев: Преподо́бне о́тче Ника́ндре, моли́ Бо́га о на́с. Наста́ви мя, Го́споди, на путь ра́зума,/ све́тло воспе́ти уго́дника Твоего́,/ его́же сло́вом Твои́м в пусты́ню изве́л еси́,/ и враги́ его́ под но́ги тому́ покори́в,/ я́ко Всеси́лен. Припев: Преподо́бне о́тче Ника́ндре, моли́ Бо́га о на́с. Изба́ви ны, Бо́же, от уст душепа́губнаго во́лка/ моли́твами преподо́бнаго Своего́,/ и́же невре́дно премину́ жите́йскую пучи́ну,/ его́же ра́ди одожди́ на ны бога́тую Твою́ ми́лость,/ я́ко Всеси́лен. Припев: Преподо́бне о́тче Ника́ндре, моли́ Бо́га о на́с. Кто подо́бне по́двиги твоя́ исчи́слити возмо́жет, пресла́вне Ника́ндре,/ и́миже подвиза́яся, врага́ победи́л еси́?/ И ны́не сла́вно твори́ши чудеса́ де́йствием Свята́го Ду́ха,/ Бо́га Всеси́льна. Сла́ва Отцу́ и Сы́ну и Свято́му Ду́ху. Аще и тьма́ми покуша́шеся враг отъя́ти сокро́вище души́ твоея́,/ но, уя́звен быв мече́м кре́пкаго ти воздержа́ния, побеже́,/ ты же госпо́дствуеши у Царя́ сла́вы,/ Бо́га Всеси́льна. И ны́не и при́сно и во ве́ки веко́в. Ами́нь. Богородичен: Богоро́дице, Присноде́во Мари́е,/ простри́ ми ми́лостивне десни́цу на по́мощь, умоля́ющи Сы́на Твоего́ и Бо́га,/ я́ко уя́звен есмь лю́те и на Тя то́чию наде́жду мою́ положи́х,/ Ты мя уще́дри. Песнь 3 Ирмос: Утверди́ся се́рдце мое́ в Го́споде,/ даю́щем моли́тву моля́щемуся,/ я́ко лук си́льных изнемо́же// и немощству́ющии препоя́сашася си́лою. Припев: Преподо́бне о́тче Ника́ндре, моли́ Бо́га о на́с. Непоколеби́мь пребы́л еси́ о Го́споде, преподо́бне,/ даю́щем спасе́ние прося́щим смире́нно,/ го́рдость же бесо́вская низпаде́ся,/ ви́девши тя во пло́ти препоя́савшагося Бо́жиею си́лою. Припев: Преподо́бне о́тче Ника́ндре, моли́ Бо́га о на́с. Дарова́ тебе́ Госпо́дь, всебога́те,/ бога́тство неотъе́млемыя сла́вы,/ е́же возставля́ти разсла́бленных,/ те́мже и нас препоя́ши си́лою. Сла́ва Отцу́ и Сы́ну и Свято́му Ду́ху. Разу́мно препоя́сався, свя́те,/ во оде́жду смире́ннаго богоразу́мия,/ не́мощны сотвори́ супоста́ты на́ша,/ моли́твами твои́ми, мо́лимся. И ны́не и при́сно и во ве́ки веко́в. Ами́нь. Богородичен: Наде́жда и упова́ние на́ше, Владычице ми́ра,/ Блага́я Помо́щнице,/ спаси́, и в кре́пости рог вознеси́ правосла́вных, и лю́ди на́ша от вся́ких бед и от разли́чных обстоя́ний свободи́. Седален, глас 3 Я́ко заря́ со́лнечная, пресве́тло сия́еши/ и всем ве́рно прибега́ющим под кров ми́лости твоея́, преподо́бне,/ весе́лие подае́ши и душа́м спасе́ние;/ стяжа́л бо еси́ мно́гое дерзнове́ние ко Христу́ Бо́гу,/ Ему́же и моли́ся непреста́нно, Ника́ндре, о́тче наш всеблаже́нне,/ прегреше́ний оставле́ние дарова́ти нам и ве́лию ми́лость. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Под Твое́ благоутро́бие притека́юще, мо́лим, Богоро́дице Де́во,/ не пре́зри рыда́ния на́шего и моли́твы,/ но ускори́ изба́вити от бед и скорбе́й лю́ди безотве́тны,/ Ты бо еди́на еси́ изве́стнейшее христиа́ном упова́ние,/ и, к Тебе́ прибега́юще, вси спаса́емся. Песнь 4 Ирмос: Небеса́ доброде́тель Твоя́ покры́ла есть,/ и земля́ испо́лнися сла́вы Твоея́, Христе́,/ те́мже ве́рно вопие́м:// сла́ва си́ле Твое́й, Го́споди. Припев: Преподо́бне о́тче Ника́ндре, моли́ Бо́га о на́с. Еди́наго Бо́га в се́рдце твое́м име́я, преподо́бне,/ в пусты́ни трудолю́бно пожи́л еси́, Ника́ндре, о́тче наш, взыва́я ве́рно:/ сла́ва си́ле Твое́й, Го́споди. Припев: Преподо́бне о́тче Ника́ндре, моли́ Бо́га о на́с. Пресве́тел и че́стен свети́льник ты еси́, о́тче Ника́ндре,/ не за́йде бо свет доброде́тельнаго твоего́ жития́ под спуд забве́ния,/ но, я́ко со́лнце, озаря́ет ве́рно Христо́ви пою́щих:/ сла́ва си́ле Твое́й, Го́споди. Сла́ва Отцу́ и Сы́ну и Свято́му Ду́ху. Расточи́л еси́ име́ние твое́, о́тче, Христа́ ра́ди,/ от Него́же и глас услы́шав, в пусты́ню всели́лся еси́/ и на высоту́ доброде́телей возше́л, взыва́я:/ сла́ва си́ле Твое́й, Го́споди. И ны́не и при́сно и во ве́ки веко́в. Ами́нь. Богородичен: Из Твои́х Пречи́стых чресл, Богороди́тельнице,/ Сло́во Бо́жие произы́де несказа́нно,/ Его́же объе́мши, от зол изба́вити умоли́ зову́щих:/ сла́ва си́ле Твое́й, Го́споди. Песнь 5 Ирмос: Мрак разреши́ греха́ моего́,/ внегда́ возсия́ти Ти/ у́тро све́тлое за́поведей Твои́х,// Го́споди, непристу́пный Све́те. Припев: Преподо́бне о́тче Ника́ндре, моли́ Бо́га о на́с. Его́же возлюби́л еси́/ и Ему́же порабо́тал еси́ от ю́ности, о́тче,/ Того́ умоли́ мрак грехо́вный от души́ моея́ разгна́ти/ сия́нием духо́вным. Припев: Преподо́бне о́тче Ника́ндре, моли́ Бо́га о на́с. Приложи́л еси́, о́тче, труды́ ко трудо́м сугу́бо,/ сего́ ра́ди и мно́гая блага́я Небе́сная приложи́шася тебе́./ Те́мже тя мо́лим:/ приложи́ и нам ми́рнаго жития́ и ра́йскаго весе́лия. Сла́ва Отцу́ и Сы́ну и Свято́му Ду́ху. О те́ле твое́м небреги́й, преподо́бне,/ пребы́л еси́ на земли́, о Небе́сных поуча́яся,/ иде́же ны́не ра́дуяся живе́ши;/ моли́ у́бо и нам ра́дости той сопричасти́тися. И ны́не и при́сно и во ве́ки веко́в. Ами́нь. Богородичен: Нескве́рная А́гнице и Богоотрокови́це Мари́е,/ Твои́ми моли́твами укрепи́вшеся, святи́и победи́ша бесо́вския си́лы./ Те́мже и нам, упова́ющим на Тя, ско́ро предста́ни в по́мощь,/ да посра́мятся и паду́т вси явля́ющии рабо́м Твои́м зла́я. Песнь 6 Ирмос: Приидо́х во глубины́ морски́я,/ и потопи́ла мя есть бу́ря мно́гих грехо́в, // но, я́ко Бог, из глубины́ возведи́ живо́т мой, Многоми́лостиве. Припев: Преподо́бне о́тче Ника́ндре, моли́ Бо́га о на́с. Дале́че от Бо́га грех мя отри́ну,/ и в пучи́не зол погружа́юся, увы́ мне!/ Но, о предста́телю наш те́плый,/ изба́ви от належа́щия ско́рби ду́шу мою́, преподо́бне Ника́ндре. Припев: Преподо́бне о́тче Ника́ндре, моли́ Бо́га о на́с. Оста́ви мя си́ла моя́, и лю́те окружа́ют мя ско́рби,/ те́пле у́бо припа́даю ти, преподо́бне Ника́ндре:/ пода́ждь ми долго́в разреше́ние, молю́ся, исцеле́ние телеси́ и души́ спасе́ние,/ моли́твами твои́ми, всебога́те. Сла́ва Отцу́ и Сы́ну и Свято́му Ду́ху. Бе́здною грехо́в сляца́емь, окая́нный,/ во глубине́ отча́яния потопля́юся,/ но, предвари́в моли́твами твои́ми, о́тче,/ руково́дствуй мя во све́те богове́дения, я́ко оте́ц благоутро́бный. И ны́не и при́сно и во ве́ки веко́в. Ами́нь. Богородичен: Безнача́льный Бог из Тебе́ роди́ся, Де́во,/ и по рождестве́ Тя Де́ву соблюде́ нетле́нно,/ Того́ нам ми́лостива сотвори́, мо́лимся,/ и от нахожде́ний лютых зол сохрани́, я́ко Милосе́рда. Кондак, глас 1 Яко лучу́ тя со́лнечную Христо́с показа́, преподо́бне,/ сия́еши бо в земли́ Росси́йстей чуде́с благода́тию/ и отгоня́еши тьму страсте́й же и скорбе́й/ от приходя́щих к тебе́ с ве́рою./ Те́мже почита́ем твою́ па́мять, Ника́ндре, о́тче наш, и вопие́м ти:/ ра́дуйся, пустынножи́телей красоте́// и стране́ на́шей похвало́ и утвержде́ние. Икос Проро́ческое сло́во де́лом соверши́л еси́, богому́дре,/ удали́вся бо ми́ра и в пусты́ню всели́вся, преподо́бне,/ Бо́га обре́л еси́ Помо́щника тебе́,/ и Той тя бога́тно просла́ви и чуде́с благода́тию обогати́ пресла́вно,/ я́ко и от о́браза твоего́ здра́вие боля́щим истека́ет незави́стно./ Те́мже, сте́кшеся, день преставле́ния твоего́ духо́вно пра́зднуем,/ по́двиги твоя́ почита́юще и похва́льная воспева́юще:/ ра́дуйся, по́стниче терпеливоду́шный, трудополо́жниче смиренному́дрый,/ исто́чниче слез непресыха́емый, сто́лпе моли́твенный неподви́жимый,/ сказа́телю бу́дущих нело́жный, послуша́ния бе́здно и высота́ смире́ния,/ изве́стный насле́дниче Небе́снаго Ца́рствия, помо́щниче скорбя́щим милосе́рдый,/ засту́пниче ко Влады́це Христу́ Бо́гу непрело́жный,/ вели́кому Новугра́ду и Пско́ву све́тлая добро́то/ и всем ве́рным спасе́ние и сла́во, преподобне Ника́ндре, о́тче наш,/ стране́ на́шей похвала́ и утвержде́ние. Песнь 7 Ирмос: Образу злато́му не поклони́вшеся, о́троцы авраа́мстии/ искуша́хуся, я́ко зла́то в горни́ле,/ в пещи́ о́гненней, я́ко в черто́зе све́тлем,/ ликова́ху, пою́ще:// благослове́н еси́, Бо́же оте́ц на́ших. Припев: Преподо́бне о́тче Ника́ндре, моли́ Бо́га о на́с. Ничто́же предпоче́л еси́ земны́х па́че Небе́сных,/ но, я́ко зла́то в горни́ле, искуси́лся еси́, в пусты́не живы́й, весь светови́ден быв,/ не помрачи́ бо тя нощь бесо́вския пре́лести,/ зане́, всегда́ во све́те богомы́слия пребыва́я, взыва́л еси́:/ Бо́же, благослове́н еси́. Припев: Преподо́бне о́тче Ника́ндре, моли́ Бо́га о на́с. Еди́н Еди́ному Го́споду прилепи́вся, богоблаже́нне,/ моли́твами и посто́м вы́ну Тому́ бесе́довал еси́,/ те́мже и венце́м неувяда́емыя по́чести оде́ян,/ ра́достно вшел еси́ с му́дрыми де́вами в неве́стник Христо́в, вопия́:/ Бо́же, благослове́н еси́. Сла́ва Отцу́ и Сы́ну и Свято́му Ду́ху. Ре́сна па́мять твоя́, преподобне Ника́ндре,/ свет вторы́й ве́рным лю́дем яви́ся,/ ю́же пра́зднующе, бога́тно луча́ми чуде́с озаря́емся и Христу́ вопие́м:/ Бо́же, благослове́н еси́. И ны́не и при́сно и во ве́ки веко́в. Ами́нь. Богородичен: Виждь, Влады́чице, души́ моея́ злосмра́дныя ра́ны, и́хже самохо́тне подъя́х, окая́нный,/ и не могу́ приложи́ти пла́стыря, но, е́ле жив сый, вопию́:/ ми́лостива мне Врача́ всех и Бо́га Ма́терними Твои́ми моли́твами сотвори́,/ я́ко да спа́сшися воспою́ Ти:/ благослове́н, Пречи́стая, Плод Твоего́ чре́ва. Песнь 8 Ирмос: Изба́вителю всех, Всеси́льне,/ посреде́ пла́мене благоче́ствовавшия,/ снизше́д, ороси́л еси́/ и научи́л еси́ пе́ти:// вся дела́, благослови́те, по́йте Го́спода. Припев: Преподо́бне о́тче Ника́ндре, моли́ Бо́га о на́с. Аще и в пусты́ни сокры́лся еси́, преподо́бне,/ но не утаи́ся доброде́тельнаго жития́ твоего́ све́тлость,/ снизше́д бо свы́ше, преподо́бный Алекса́ндр/ на неви́димыя враги́ побе́ду дарова́ и пе́ти тя укрепи́:/ вся дела́, благослови́те, по́йте Го́спода. Припев: Преподо́бне о́тче Ника́ндре, моли́ Бо́га о на́с. Дре́во благоплодови́то гроб твой обре́теся посреде́ пусты́ни,/ от него́же чуде́сный виногра́д обыма́юще,/ непреста́нно ду́ши наслажда́ем, и от напа́стей изменя́емся,/ и почита́ем терпе́ние твое́, Ника́ндре преподо́бне, Христа́ славосло́вяще, зове́м:/ вся дела́, благослови́те, по́йте Го́спода. Сла́ва Отцу́ и Сы́ну и Свято́му Ду́ху. Увы́ мне, что сотворю́, окая́нный, зря многосве́тлыя ико́ны твоея́ зрак,/ блиста́ющийся о доброде́тели, ея́же не стяжа́х отню́д?/ Но, о преподо́бне Ника́ндре,/ наста́ви мя на путь пра́вый, вопи́ти Христу́ и́стинно:/ вся дела́, благослови́те, по́йте Го́спода. И ны́не и при́сно и во ве́ки веко́в. Ами́нь. Богородичен: От Тебе́, Пресвята́я Богоро́дице,/ излия́ся вода́ живо́тная на омове́ние скве́рны всеми́рныя,/ е́юже благоволи́ и мое́ се́рдце прохлади́ти и окропи́ти росо́ю моли́тв/ в кро́ве крил Твои́х во ве́ки вся. Песнь 9 Ирмос: Велича́ем вси/ человеколю́бие Твое́, Христе́, Спа́се наш,/ сла́во раб Твои́х и ве́нче ве́рных,// возвели́чивый па́мять Ро́ждшия Тя. Припев: Преподо́бне о́тче Ника́ндре, моли́ Бо́га о на́с. Иде́же осеня́ет благода́ть Твоя́, Христе́, Спа́се наш,/ та́мо быва́ет сла́ва рабо́м Твои́м и венцы́ по́честей терпя́щим ве́рно./ Тем и нам да́руй ми́лости Твоя́, почита́ющим па́мять преподо́бнаго Твоего́. Припев: Преподо́бне о́тче Ника́ндре, моли́ Бо́га о на́с. Сло́во твое́ и́стинно и житие́ богоуго́дно на земли́ изобрази́л еси́, преподо́бне,/ ны́не же и на Небесе́х Христо́ви предстоя́,/ моли́ся возвели́чити держа́ву благове́рных царе́й и во́инство ми́ром огради́ти. Сла́ва Отцу́ и Сы́ну и Свято́му Ду́ху. Я́коже предре́кл еси́, богодухнове́нне,/ сохрани́тися от бед погре́бшим те́ло твое́ иногда́, и бысть та́ко,/ и нас ны́не от належа́щих обстоя́ний ми́лостивно заступи́,/ я́ко да спа́сшеся тобо́ю, ве́рно возвели́чим па́мять твою́. И ны́не и при́сно и во ве́ки веко́в. Ами́нь. Богородичен: Ко́е Тебе́ дарова́ние принесе́м, Богоро́дице,/ или́ что веща́ти и́мамы, гре́шнии?/ То́чию уми́льно вопие́м, моля́щеся:/ спаси́ рабы́ Твоя́, Богоблагода́тная Отрокови́це,/ я́ко да Тя при́сно велича́ем. Светилен От ю́ности, о́тче, дом Ду́ху Пресвято́му яви́лся еси́,/ во кро́тости со смиренному́дрием всего́ себе́ поручи́в Го́сподеви,/ И́же и призре́ неукло́нно на ти́хость души́ твоей./ Тем ны́не и зе́млю кро́тких на Небесе́х насле́довав, ве́чно лику́еши. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Ра́дуйся, Тебе́ зове́м, Благослове́нная Богоро́дице Де́во,/ я́ко Тобо́ю присносу́щныя ра́дости прича́стницы бы́хом,/ Живо́т бо наш и Спасе́ние недомы́слимо и вы́ше естества́ родила́ еси́,/ сего́ ра́ди непреста́нно ублажа́ют Тя ро́дове родо́в,/ я́коже пре́жде прорекла́ еси́.