Молитвы

Минея, 1 Мая, Канон преподобного Глас 8 Песнь 1 Ирмос: Колесницегони́теля фарао́ня погрузи́/ чудотворя́й иногда́/ Моисе́йский жезл, крестообра́зно порази́в/ и раздели́в мо́ре,/ Изра́иля же беглеца́, пешехо́дца спасе́,/ песнь Бо́гови воспева́юща. Припев: Преподо́бне о́тче на́ш Пафну́тие, моли́ Бо́га о на́с. Сла́ву мимотеку́щую на нетле́нную премину́л еси́, преподо́бне,/ с Вы́шними ли́ки ны́не причте́ся,/ предстои́ши Престо́лу всех Царя́,/ просвеще́ние ми испроси́, восхваля́ющу честны́я твоя́ по́двиги. Припев: Преподо́бне о́тче на́ш Пафну́тие, моли́ Бо́га о на́с. А́ще и от непра́ведна ро́да влеча́шеся,/ но пра́веден плод Бо́гови принесе́ся/ и Тро́ицы жили́ще показа́ся,/ Юже моли́ о пою́щих тя. Сла́ва Отцу́ и Сы́ну и Свято́му Ду́ху. Не довле́ тебе́, преподо́бне, в ми́ре,/ посто́м и воздержа́нием в по́лк свяще́нных себе́ вчиня́еши и́ноческаго пребыва́ния/ и с си́ми до́блественне Христа́ моли́л еси́. И ны́не и при́сно и во ве́ки веко́в. Ами́нь. Богородичен: Мари́е Богора́дованная, злата́я кади́льнице, Ма́ти Безневе́стная,/ ро́ждшая нам Пресла́дкаго Иису́са,/ Его́же любо́вию распаля́емь, при́сный уго́дник Твой преподо́бный Пафну́тий/ прече́стен храм Тебе́, Богоро́дице, воздви́же. Песнь 3 Ирмос: Утвержде́й в нача́ле Небеса́ ра́зумом/ и зе́млю на вода́х основа́вый,/ на ка́мени мя, Христе́, за́поведей Твои́х утверди́,/ я́ко несть свят, па́че Тебе́, Еди́не Человеколю́бче. Припев: Преподо́бне о́тче на́ш Пафну́тие, моли́ Бо́га о на́с. В по́двизе учене́н быв послуша́ния,/ седмори́чное обхожде́ние време́н сверши́л еси́,/ смотря́я навы́кнути всяк доброде́тели о́браз. Припев: Преподо́бне о́тче на́ш Пафну́тие, моли́ Бо́га о на́с. Два́десят в по́двизе лет сверши́л еси́,/ па́стырь оби́тели поставля́ешися/ и до́блественне о ста́де пече́шеся,/ жела́я всех привести́ ко спасе́нию. Сла́ва Отцу́ и Сы́ну и Свято́му Ду́ху. Всеви́дяй Царь Госпо́дь, ви́дев твоя́ страда́ния с опасе́нием,/ не то́чию рассужде́ния да́ром тебе́ почте́,/ но и е́же от о́браза не́киих познава́ти стра́сти душе́вныя. И ны́не и при́сно и во ве́ки веко́в. Ами́нь. Богородичен: Ме́сто свяще́ния и мы́сленную, Чи́стая, трапе́зу,/ Хлеб – Христа́, Жизнь всех, прие́мшую, пое́м Тя. Седален, глас 8 От ю́ности, блаже́нне, вся оста́вль жите́йская, кра́сная же и ле́потная,/ усе́рдно после́довал еси́ Христу́, зва́вшему тя, преподо́бне,/ посто́м, о́тче, те́ло изнури́л еси́, в моли́твах непреста́нно бдя./ Те́мже тя Всеве́дый Госпо́дь до́бре устроя́ет/ па́стыря Свои́м овца́м слове́сным, Пафну́тие Богоно́се,/ моли́ Христа́ Бо́га грехо́в оставле́ние пода́ти/ чту́щим любо́вию святу́ю па́мять твою́. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Я́ко Де́ву и еди́ну в жена́х,/ Тя, без се́мене ро́ждшую Бо́га пло́тию, вси ублажа́ем, ро́ди челове́честии:/ Огнь бо всели́ся в Тя Божества́, и я́ко Младе́нца млеко́м пита́еши Зижди́теля и Го́спода./ Тем, а́нгельский и челове́ческий род, досто́йно сла́вим пресвято́е рождество́ Твое́/ и согла́сно вопие́м Ти:/ моли́ Христа́ Бо́га согреше́ний оставле́ние дарова́ти/ покланя́ющимся ве́рою пресвято́му рождеству́ Твоему́. Песнь 4 Ирмос: Ты моя́ кре́пость, Го́споди,/ Ты моя́ и си́ла, Ты мой Бог, Ты мое́ ра́дование,/ не оста́вль не́дра О́тча/ и на́шу нищету́ посети́в./ Тем проро́ком Авваку́мом зову́ Ти:/ си́ле Твое́й сла́ва, Человеколю́бче. Припев: Преподо́бне о́тче на́ш Пафну́тие, моли́ Бо́га о на́с. Со́нным виде́нием объя́влено бысть тебе́ бра́тне прегреше́ние/ прекра́снаго дре́ва исторже́нием,/ твои́м же, преподо́бне, насажде́нием сподо́бися и́стиннаго покая́ния. Припев: Преподо́бне о́тче на́ш Пафну́тие, моли́ Бо́га о на́с. Дре́внюю оби́тель оставля́еши, и но́вое населя́еши,/ и храм, Пафну́тие, Бо́жия Ма́тере воздвиза́еши и благоле́пием украша́еши,/ в не́мже мно́жество учени́к благоче́стию научи́л еси́. Сла́ва Отцу́ и Сы́ну и Свято́му Ду́ху. Превысо́кая и близ ми́ра оста́вль,/ в гора́х пусты́нных жи́ти возлюби́л еси́/ и в них, Пафну́тие, па́че Бо́гови угоди́л еси́. И ны́не и при́сно и во ве́ки веко́в. Ами́нь. Богородичен: Несеко́мую го́ру Тя дре́вле Авваку́м прови́де Всенепоро́чная,/ из нея́же Бог яви́ся и нас, истле́вшия, обнови́л есть. Песнь 5 Ирмос: Вску́ю мя отрин́ул еси/́ от лица́ Твоего́, Све́те Незаходи́мый,/ и покры́ла мя есть чужда́я тьма, окая́ннаго,/ но обрати́ мя и к све́ту за́поведей Твои́х/ пути́ моя́ напра́ви, молю́ся. Припев: Преподо́бне о́тче на́ш Пафну́тие, моли́ Бо́га о на́с. Князь, я́ростию распали́вся,/ оби́тель твою́ огне́м запали́ти повелева́ет,/ но в день я́рости гне́ва Бо́жия/ честна́го твоего́ и́мени призыва́нием от ва́рвар изба́влься,/ те́плую ве́ру последи́ показа́. Припев: Преподо́бне о́тче на́ш Пафну́тие, моли́ Бо́га о на́с. В день пра́здника Па́схи ры́бы моли́твою умно́жил еси́,/ ча́да своя́ возвесели́л еси́/ и на мно́ги дни преизоби́ловати, преподо́бне Пафну́тие, сотвори́л еси́. Сла́ва Отцу́ и Сы́ну и Свято́му Ду́ху. Иконопи́сцу, но́зе больны́ иму́щу/ и сих ра́ди твои́х повеле́ний отрица́ющу,/ ты же, преподо́бне, на де́ло дерза́ти повелева́еши/ и сему́ моли́твами свои́ми вско́ре исцеле́ние подава́еши. И ны́не и при́сно и во ве́ки веко́в. Ами́нь. Богородичен: Богоро́дице Пречи́стая,/ Твоего́ Сы́на и Бо́га ви́дети жела́я, Пафну́тий, уго́дник Твой,/ Сего́ живоно́сным и Боже́ственным стопа́м невозвра́тно после́дова. Песнь 6 Ирмос: Очи́сти мя, Спа́се,/ мно́га бо беззако́ния моя́,/ и из глубины́ зол возведи́, молю́ся,/ к Тебе́ бо возопи́х, и услы́ши мя,/ Бо́же спасе́ния моего́. Припев: Преподо́бне о́тче на́ш Пафну́тие, моли́ Бо́га о на́с. Дерзну́вшаго уби́ти еди́наго от птиц,/ и́хже любе́зно пита́л еси́,/ глава́ зре́нием наза́д обрати́ся,/ и сему́, уми́льно моля́щу, вско́ре исцеле́ние подава́еши. Припев: Преподо́бне о́тче на́ш Пафну́тие, моли́ Бо́га о на́с. И́ноку ропта́вшу, в виде́нии зря́щу,/ я́ко тобо́ю, преподо́бне, измета́ему, и от му́рин восхища́ему,/ и от сих го́рце стра́ждущу,/ сего́ ми́лостивно наказу́еши и в чу́вство приво́диши. Сла́ва Отцу́ и Сы́ну и Свято́му Ду́ху. Жене́ боля́щей и от де́мон зело́ стра́ждущей,/ честное́ твое́ и́мя призыва́ющей,/ ты ми́лостивно, блаже́нне, явля́ешися,/ и, я́ко во́лки, от сия де́моны отгоня́еши, и здра́вие подава́еши. И ны́не и при́сно и во ве́ки веко́в. Ами́нь. Богородичен: Коренесека́тельным серпо́м Твоея́ моли́твы/ посецы́, Отрокови́це, лука́вая помышле́ния души́ моея́/ и плодоно́сну покажи́, молю́ся,/ всех бо Вседе́теля, Бо́га и Спа́са породила́ еси́. Кондак, глас 8 Бо́жиим светоли́тием просвеще́н, о́тче,/ по́стническое стяжа́л еси́ жи́тельство, преподо́бне,/ и́ноком предо́брый наста́вниче и по́стником благо́е украше́ние./ Сего́ ра́ди Госпо́дь, труды́, твоя́ ви́дев,/ чуде́с да́ром обогати́ тя,/ источа́еши бо исцеле́ния./ Мы же, ра́дующеся, вопие́м ти:/ ра́дуйся, о́тче Пафну́тие. Икос Песнь от усте́н скве́рных к похвале́нию по́двиг твои́х, о́тче, прино́сится:/ не и́мам бо се́рдца моего́ чи́стаго,/ я́ко сие́ сра́мными дея́ньми оскверни́х/ и ду́шу лука́выми по́мыслы осмради́х./ Но ты пода́ждь ми сло́во, преподо́бне, чи́стое твое́ воспе́ти житие́,/ взыва́ющу тебе́ такова́я, преблаже́нне:/ ра́дуйся, преподо́бных всех похвало́;/ ра́дуйся, по́стников подража́телю и пусты́ни насади́телю;/ ра́дуйся, я́ко в ней прече́стен храм Богоро́дице воздви́гл еси́;/ ра́дуйся, я́ко в нем тобо́ю Бог сла́вится;/ ра́дуйся, до́бре пасы́й ста́до твое́ от наве́т вра́жиих;/ ра́дуйся, я́ко смири́л еси́ злонача́льнаго врага́;/ ра́дуйся, я́ко посрами́л еси́ бесо́в полки́;/ ра́дуйся, мона́шествующих свети́льниче пресве́тлый и столп терпе́ния;/ ра́дуйся, я́ко собра́л еси́ мона́хов мно́жество во спасе́ние;/ ра́дуйся, о не́мже хва́лимся вси;/ ра́дуйся, его́же ра́ди избавля́емся от бе́д;/ ра́дуйся, о́тче Пафну́тие. Песнь 7 Ирмос: Бо́жия снизхожде́ния/ огнь устыде́ся в Вавило́не иногда́./ Сего́ ра́ди о́троцы в пещи́, ра́дованною ного́ю,/ я́ко во цве́тнице, лику́юще, поя́ху:/ благослове́н еси́, Бо́же оте́ц на́ших. Припев: Преподо́бне о́тче на́ш Пафну́тие, моли́ Бо́га о на́с. Челове́ка боля́ща, в оби́тель твою́ на одре́ принесе́нна,/ сего́, блаже́нне, ви́дев, оте́чески о сем умили́ся,/ здра́ва моли́твою сотвори́л еси́ и пе́ти научи́л еси́:/ оте́ц на́ших Бо́же, благослове́н еси́. Припев: Преподо́бне о́тче на́ш Пафну́тие, моли́ Бо́га о на́с. Прока́зою одержи́ма, и лю́те гно́ем растлева́ема, и к сме́рти приближа́ющася/ свяще́нною водо́ю помазу́еши/ и, я́ко, изря́ден врач, преподо́бне, ми́лостивно сего́ исцеля́еши и пе́ти науча́еши:/ оте́ц на́ших Бо́же, благослове́н еси́. Сла́ва Отцу́ и Сы́ну и Свято́му Ду́ху. Лю́те беся́щагося, и у́зы сокруша́юща, и зело́ реву́ща/ честны́м кресто́м огради́л еси́,/ и того́ уцелому́дрил еси́, и пе́ти научи́л еси́:/ оте́ц на́ших Бо́же, благослове́н еси́. И ны́не и при́сно и во ве́ки веко́в. Ами́нь. Богородичен: И́же пре́жде Безпло́тный воплоща́ется, Пречи́стая,/ за милосе́рдие безчи́сленное из ложе́сн Твои́х святы́х,/ Ему́же в си пое́м:/ Бо́же, благослове́н еси́. Песнь 8 Ирмос: Седмери́цею пещь/ халде́йский мучи́тель/ Богочести́вым неи́стовно разжже́́,/ си́лою же лу́чшею спасе́ны, сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки. Припев: Преподо́бне о́тче на́ш Пафну́тие, моли́ Бо́га о на́с. Ми́лование стяжа́л еси́ христоподража́тельно,/ вся неду́ги и стра́сти исцеля́еши и вся́ку скве́рну очища́еши,/ очи́сти, преподо́бне, и моя́ душе́вныя стру́пы,/ да моли́твами твои́ми изба́влюся ве́чнаго осужде́ния. Припев: Преподо́бне о́тче на́ш Пафну́тие, моли́ Бо́га о на́с. Ра́ка моще́й твои́х, преподо́бне, источа́ет бога́тно чуде́с дарова́ния:/ Госпо́день бо уго́дник показа́лся еси́ и Того́ за́поведем де́латель яви́ся непосты́ден,/ Его́же превозно́сим во вся ве́ки. Сла́ва Отцу́ и Сы́ну и Свято́му Ду́ху. День ве́рно пра́зднуем/ честна́го твоего́ от земли́ преставле́ния, Пафну́тие блаже́нне,/ в онь же испроси́ ста́ду твоему́ грехо́в разреше́ние и от лю́тых премене́ние,/ да тя прославля́ем, Христа́ воспева́юще во ве́ки. И ны́не и при́сно и во ве́ки веко́в. Ами́нь. Богородичен: Его́же родила́ еси́, Сло́во, па́че сло́ва, Богороди́тельнице Чи́стая,/ Того́ о нас моли́, ве́рно чту́щих Тя во ве́ки. Песнь 9 Ирмос: Ужасе́ся о сем Не́бо,/и земли́ удиви́шася концы́,/ яко Бог яви́ся челове́ком пло́тски/ и чре́во Твое́ бысть простра́ннейшее Небе́с/ Тем Тя, Богоро́дицу,/ А́нгелов и челове́к чинонача́лия велича́ют. Припев: Преподо́бне о́тче на́ш Пафну́тие, моли́ Бо́га о на́с. Усе́рдно после́довал еси́ Зва́вшему тя, преподо́бне,/ те́мже и па́стыря тя Свои́м овца́м устроя́ет,/ и законополо́жник и́ноком был еси́, и пра́вило изве́стно,/ и вождь ко спасе́нию. Припев: Преподо́бне о́тче на́ш Пафну́тие, моли́ Бо́га о на́с. Свяще́нно и кра́сно жили́ще созда́л еси́,/ и́нок мно́гих наставля́я к послуша́нию и смире́нию/ сла́достию, Пафну́тие, слове́с твои́х,/ те́мже тя вси ублажа́ем. Сла́ва Отцу́ и Сы́ну и Свято́му Ду́ху. Весели́тся оте́чество твое́ и град тебе́ воспита́вый,/ и красу́ется пусты́ня, в не́йже по́двиги своя́ и труды́ сконча́л еси́/ и побе́ды венцы́ восприя́л еси́. И ны́не и при́сно и во ве́ки веко́в. Ами́нь. Богородичен: Но́сиши на руку́ Бо́га, нося́щаго вся́ческая,/ пита́еши Пита́теля, Чи́стая Богоро́дице,/ Его́же моли́ с блаже́нным Пафну́тием дарова́ти ста́ду Твоему́ бога́тно ве́лию ми́лость. Светилен Пусты́ню град сотвори́л еси́ прему́дрыми о́бразы,/ отце́м украше́ние, Пафну́тие богому́дре,/ и сию́ соверши́л еси́ я́ко мы́сленный рай,/ принося́щ цве́ты Боже́ственный, единообра́зных мно́жества,/ досто́йно творя́щих па́мять твою́. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Я́ко иму́щи милосе́рдие и ми́лость ве́лию,/ при́зри, Препе́тая Богоро́дице Де́во, на мое́ смире́ние/ и страсте́й мглу, и собла́зны жития́ разори́, Отрокови́це,/ и огня́ гее́нскаго изба́ви моли́твами Твои́ми.

Минея, 3 Февраля, Ин канон Глас 1 Песнь 1 Ирмос: Го́рькия рабо́ты изба́влься Изра́иль, непроходи́мое про́йде я́ко су́шу. Врага́ зря́ потопля́ема, пе́снь я́ко благоде́телю пое́т Бо́гу, чудоде́ющему мы́шцею высо́кою, я́ко просла́вися. Припев: Святы́й равноапо́стольне о́тче Никóлае, моли́ Бо́га о на́с. Я́коже Моисе́й не убоя́лся еси́ фараони́тских страхова́ний, но му́жественно про́йде провести́ ро́д япо́нский чрез мо́ре Креще́ния в обетова́нную зе́млю Правосла́вия, Го́сподеви поя́: сла́вно бо просла́вися. Припев: Святы́й равноапо́стольне о́тче Никóлае, моли́ Бо́га о на́с. Покрыва́ша тя́ о́блак Бо́жия благода́ти во дни́ напа́стей, в нощи́ же твоея́ от люде́й оста́вленности све́т Боже́ственный тя́ осиява́ше, в тве́рдом терпе́нии Го́сподеви пою́ща: сла́вно бо просла́вися. Сла́ва Отцу́ и Сы́ну и Свято́му Ду́ху. О́ный Моисе́й даде́ наро́ду своему́ зако́н Сина́йский, се́й же япо́нскому наро́ду даде́ ве́сь зако́н правосла́внаго благоче́стия, я́ко да поуча́ются и возраста́ют, Го́сподеви пою́ще: сла́вно бо просла́вися. И ны́не и при́сно и во ве́ки веко́в. Ами́нь. Богородичен: Неискусобра́чная Ма́ти, не преста́й помога́ющи моли́твами Твоего́ равноапо́стола Никола́я, процвета́ти Правосла́вию в Япо́нии, умы́тися всему́ наро́ду ба́нею пакибытия́ и спасти́ся все́м пою́щим Го́сподеви: сла́вно бо просла́вися. Песнь 3 Ирмос: Пре́жде ве́к от Отца́ рожде́нному нетле́нно Сы́ну и в после́дняя от Де́вы воплоще́нному безсе́менно, Христу́ Бо́гу возопии́м: вознесы́й ро́г на́ш, свя́т еси́, Го́споди. Припев: Святы́й равноапо́стольне о́тче Никóлае, моли́ Бо́га о на́с. И́зо у́ст твои́х не изы́де велере́чие, смире́н сы́й, но, утверди́в в Го́споде се́рдце твое́, вели́кая соверши́л еси́, в терпе́нии взыва́я: свя́т еси́, Го́споди. Припев: Святы́й равноапо́стольне о́тче Никóлае, моли́ Бо́га о на́с. Ели́ко противля́хуся сло́ву твоему́ неве́рнии, толи́ко па́че утвержда́л еси́ в Го́споде ду́х тво́й, и не убоя́вся, и вспя́ть не возврати́вся, спа́сл еси́ спасе́ния и́щущих, взыва́я: свя́т еси́, Го́споди. Сла́ва Отцу́ и Сы́ну и Свято́му Ду́ху. Свя́тость Бо́жию пропове́дуя и са́м ю́ стяжава́я, умили́л еси́ наконе́ц коравосерде́чных и мно́жество и́х приве́л еси́ ко Го́споду, взыва́ющих: свя́т еси́, Го́споди. И ны́не и при́сно и во ве́ки веко́в. Ами́нь. Богородичен: Преблагослове́нна еси́, Богоро́дице Де́во, Твои́м бо Рождество́м спаса́ются челове́цы вси́ от пре́лести лука́ваго, взыва́юще: свя́т еси́, Го́споди. Седален, глас 7 Ю́ность твою́ Христу́ да́л еси́ и освяти́л еси́ всего́ себе́, апо́столом ра́вный, Нико́лае сла́вне, све́том Бо́жиим сия́я, бы́л еси́ свети́льник, на высоте́ поста́вленный, указу́ющий пу́ть ве́чныя жи́зни, к не́й же чрез пучи́ну жите́йскаго мо́ря мно́гия сыны́ и дще́ри твоя́ приве́л еси́ в стране́ Япо́нстей. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Покро́ве христиа́ном и Блага́я Помо́щнице на земли́, Засту́пнице ми́ра, Богоро́дице Мари́е, утверди́ моли́твами Твои́ми Це́рковь Сы́на Твоего́ в стране́ Япо́нстей и во все́м ми́ре и спаси́ лю́ди Твоя́ от вся́каго зла́. Песнь 4 Ирмос: Же́зл из ко́рене Иессе́ова и цве́т от него́, Христе́, от Де́вы прозя́бл еси́ из горы́, хва́льный приосене́нныя ча́щи. Прише́л еси́ вопло́щся от Неискусому́жныя, невеще́ственный и Бо́же, сла́ва си́ле Твое́й, Го́споди. Припев: Святы́й равноапо́стольне о́тче Никóлае, моли́ Бо́га о на́с. А́ще и пе́рвее от сама́го себе́ не возжела́л еси́, но в хра́ме Бо́жии услы́шав гла́с Го́спода твоего́, я́ко зове́т тя́, возде́в ру́це твои́, То́й тя́ препоя́са и поведе́ в да́льнюю страну́ на по́двиг. Припев: Святы́й равноапо́стольне о́тче Никóлае, моли́ Бо́га о на́с. Се́де на тя́ Госпо́дь, я́коже на коня́ кре́пкаго, впусти́ тя в Япо́нию и спасе́ние е́й бы́сть ежде́ние Его́, То́й бо сотвори́ де́ло Свое́ тобо́ю, я́коже Богодохнове́нным послу́шником. Сла́ва Отцу́ и Сы́ну и Свято́му Ду́ху. А́з – рече́т Япо́ния иногда́ – ра́дуюся и веселю́ся о Го́споде я́ко спасе́ние соде́лася мои́х ча́д досе́ле и в пре́дняя апо́стольскими труды́ святи́теля Никола́я. И ны́не и при́сно и во ве́ки веко́в. Ами́нь. Богородичен: Изми́ на́с вла́сти те́мнаго мироде́ржца, Ма́ти Бо́жия, просвети́ ны моли́твами Твои́ми в ра́зум благоче́стия и спаси́ ны в десны́х стоя́нием Сы́на Твоего́ в де́нь Суда́. Песнь 5 Ирмос: Бо́г сы́й ми́ра, Оте́ц щедро́т, вели́каго сове́та Твоего́ А́нгела, ми́р подава́юща, посла́л еси́ на́м. Те́м, Богоразу́мия к све́ту наста́вльшеся, от но́щи у́тренююще, славосло́вим Тя́, Человеколю́бче. Припев: Святы́й равноапо́стольне о́тче Никóлае, моли́ Бо́га о на́с. Све́т повеле́ний Бо́жиих возсия́ на земли́ япо́нстей твои́ми апо́стольскими труды́ и пра́вде Христо́вой научи́шася та́мо живу́щии, и доброде́тель сотвори́ша по зако́ну и И́мя Бо́жие просла́виша. Припев: Святы́й равноапо́стольне о́тче Никóлае, моли́ Бо́га о на́с. Я́ко помяну́л еси́ Го́спода в ско́рбех твои́х, того́ ра́ди услы́ша тя́ и помо́же ти́ да преумно́жиши по́двиги твоя́ и кни́ги и ча́д духо́вных мно́жество. Сла́ва Отцу́ и Сы́ну и Свято́му Ду́ху. Преста́ нече́стие среди́ избра́нныя па́ствы твоея́, и апо́стольское вдохнове́ние косну́ся серде́ц и́х, егда́ бо диа́кон возглаша́ше моли́твы, ве́сь умиле́н па́д на коле́на моля́шеся в рыда́ниях пред Бо́гом, и с ни́м вся́ Це́рковь. И ны́не и при́сно и во ве́ки веко́в. Ами́нь. Богородичен: Рука́ми носи́вшая Емману́ила, Богоро́дице Чи́стая, умоли́ Его́ посла́ти по́мощь Свою́ всемогу́щую ве́рным Свои́м, я́ко да с на́ми Бо́га иму́ще, поживе́м в благоче́стии и вся́кой че́стности. Песнь 6 Ирмос: Из утро́бы Ио́ну младе́нца изблева́ морски́й зве́рь, якова́ прия́т. В Де́ву же все́льшееся Сло́во и пло́ть прие́мшее про́йде, сохра́ншее нетле́нну, Его́же бо не пострада́ истле́ния, Ро́ждшую сохрани́ неврежде́нну. Припев: Святы́й равноапо́стольне о́тче Никóлае, моли́ Бо́га о на́с. А́нгел храни́тель тя́ руковожда́ше на пути́ твое́м терни́стом. Те́мже кро́тостию Христа́ твоего́ и му́дростию Ду́ха враги́ приобре́л еси́ в дру́ги твоя́. Припев: Святы́й равноапо́стольне о́тче Никóлае, моли́ Бо́га о на́с. Воева́ше лю́дие дру́г на дру́га – па́ства твоя́ проти́ву ро́дины твоея́, но Кня́зь ми́ра тя́ умудри́ держа́тися ме́ры разу́мныя, я́коже похвали́ша тя́ о́бе. Сла́ва Отцу́ и Сы́ну и Свято́му Ду́ху. Осла́бы не дава́л еси́ твоему́ те́лу, ни твоему́ ду́ху, претружда́я и́х до конца́, до́ндеже де́ло соверши́л еси́ ди́вное, я́коже никто́же и́н пре́жде тебе́. И ны́не и при́сно и во ве́ки веко́в. Ами́нь. Богородичен: Сла́ву Твою́ на земли́ и на Небеси́, Ма́ти Бо́жия, не затми́т зми́й вели́кий, ни ору́дия его́, Ты́ бо Бо́га родила́ еси́ и от Него́ благода́ть прия́ла еси́ наступа́ти на всю́ си́лу вра́жию, и вся́ мо́жеши, ели́ка хо́щеши. Кондак, глас 4 Стра́нника и прише́льца прия́т тя́ страна́ Япо́нская, равноапо́стольне святи́телю Нико́лае, в не́й же испе́рва позна́л еси́ себе́ я́ко чужда́го, оба́че теплоту́ и све́т Христо́в источа́я, прелага́л еси́ враги́ твоя́ в сы́ны духо́вныя, и́мже раздая́ благода́ть Бо́жию, созида́л еси́ Це́рковь Христо́ву, о не́й же ны́не моли́ся, и тебе́ бо сы́нове ея́ и дще́ри взыва́ют: ра́дуйся, па́стырю до́брый на́ш. Икос Яви́лся еси́, равноапо́стольне святи́телю Нико́лае, в стране́ Япо́нстей, нося́ в себе́ о́браз вои́стину Христо́в, любо́вию побежда́я сопроти́вныя, низлага́я и́дольскую пре́лесть, утвержда́я и созида́я Бо́жию Це́рковь, порожда́я водо́ю и Ду́хом сы́ны и дще́ри Ца́рствия Бо́жия. Ны́не ча́да твоя́, о ни́х же мо́лишися, сохраня́юще ве́ру Христо́ву, к тебе́ взыва́ют: ра́дуйся, па́стырю до́брый на́ш. Песнь 7 Ирмос: О́троцы благоче́стию совоспита́ни, злочести́ваго веле́ния небре́гше, о́гненнаго преще́ния не убоя́шася, но, посреде́ пла́мене стоя́ще, поя́ху: отце́в Бо́же, благослове́н еси́. Припев: Святы́й равноапо́стольне о́тче Никóлае, моли́ Бо́га о на́с. Любо́вию к Бо́гу и лю́дем разжиза́ем, не убоя́лся еси́ огня́ зло́бы и не́нависти люде́й стропти́вых, но Бо́гом укрепля́ем ше́ствовал еси́ пу́ть тво́й терни́стый, взыва́я: отце́в Бо́же, благослове́н еси́. Припев: Святы́й равноапо́стольне о́тче Никóлае, моли́ Бо́га о на́с. А́бие по прише́ствии твое́м нача́т язы́к япо́нский изуча́ти, я́ко да не иноязы́чник наро́ду бу́деши, и да́р Пятидеся́тницы апо́стольския получи́в, ско́ро преуспе́л еси́, взыва́я: отце́в Бо́же, благослове́н еси́. Сла́ва Отцу́ и Сы́ну и Свято́му Ду́ху. Всю́ду быва́я и се́мя се́ятеля верга́я, Госпо́дню попече́нию с ве́рою предава́л еси́, те́мже и преумно́жишася ни́ва трудо́в твои́х плодоноше́нием и вку́пе с мно́жеством па́ствы твоея́ взыва́л еси́: отце́в Бо́же, благослове́н еси́. И ны́не и при́сно и во ве́ки веко́в. Ами́нь. Богородичен: И́мамы Тя́ предста́тельство непосты́дное к Сы́ну Твоему́ и Бо́гу на́шему, Ма́ти Де́во, И́мже враго́в сломля́ются мечи́, прегреше́ний проще́ние прие́млем и жи́знь ве́чную насле́дствуем. Песнь 8 Ирмос: Чу́да преесте́ственнаго показа́ о́браз огнеро́сная пе́щь дре́вле: о́гнь бо не опали́ ю́ныя де́ти, Христо́во явля́я безсе́менное от Де́вы Боже́ственное рождество́. Те́м, воспева́юще, воспои́м: да благослови́т тва́рь вся́ Го́спода и превозно́сит во вся́ ве́ки. Припев: Святы́й равноапо́стольне о́тче Никóлае, моли́ Бо́га о на́с. Еди́н проти́ву ты́сящи, изше́л еси́ не ору́жием, но кро́тостию и любо́вию, благода́тию же Христа́, и победи́л еси́ враги́, и вве́л еси́ избра́нныя в Це́рковь Бо́жию, все́х поуча́я: да благослови́т тва́рь вся́ Го́спода и превозно́сит во вся́ ве́ки. Припев: Святы́й равноапо́стольне о́тче Никóлае, моли́ Бо́га о на́с. Му́дрый зижди́тель бы́в, на тве́рдом ка́мени ве́ры созда́л еси́ Це́рковь Япо́нскую, ино́го бо основа́ния никто́же мо́жет положи́ти па́че поло́женнаго Христо́м. Те́мже на ве́ки утвержде́на тобо́ю воспева́ет: да благослови́т тва́рь вся́ Го́спода и превозно́сит во вся́ ве́ки. Припев: Святы́й равноапо́стольне о́тче Никóлае, моли́ Бо́га о на́с. Пу́ть вся́кия пло́ти наста́ де́нь и тебе́ проидти́, и благослови́в люде́й твои́х, и приобщи́вся Христо́вых Та́ин, коне́ц земна́го труда́ прия́л еси́, все́х рыда́ти по тебе́ оста́вив, и по сме́рти и́х наставля́я: да благослови́т тва́рь вся́ Го́спода и превозно́сит во вся́ ве́ки. Сла́ва Отцу́ и Сы́ну и Свято́му Ду́ху. А́ще и у́мерл еси́, но жи́в в Го́споде пребыва́еши чудотворя́ ко гро́бу твоему́ притекаю́щим и и́мя твое́ призыва́ющим, и по все́й Япо́нии прино́сиши сла́ву Христо́ву неслы́шным гла́сом вопия́: да благослови́т тва́рь вся́ Го́спода и превозно́сит во вся́ ве́ки. И ны́не и при́сно и во ве́ки веко́в. Ами́нь. Богородичен: Раба́ Бо́жия смире́нная Цари́ца Небе́сная бы́сть и все́х покрыва́ет всемогу́щим предста́тельством Свои́м, и все́м помога́ет в напа́стех су́щим, и все́м покрыва́ет согреше́ния ма́тернею любо́вию, и все́м хода́тайствует спасти́ся. Песнь 9 Ирмос: Неизглаго́ланное Де́вы та́инство: Не́бо возсия́, и Престо́л Херуви́мский, и светоно́сный черто́г показа́ся Христа́ Бо́га Вседержи́теля, Сию́ благоче́стно я́ко Богоро́дицу велича́ем. Припев: Святы́й равноапо́стольне о́тче Никóлае, моли́ Бо́га о на́с. Фимиа́м прино́сим тебе́ пред гро́бом твои́м честны́м, я́ко да с кади́лом вку́пе и моли́твы твоя́ возно́сятся вы́ну ко Го́споду о преспе́янии вся́ческом па́ствы твоея́ и вели́кия Япо́нии. Припев: Святы́й равноапо́стольне о́тче Никóлае, моли́ Бо́га о на́с. Еди́наго Бо́га пропове́дав вся́ дни́ живота́ твоего́, То́й тя́ и просла́ви по́двигом апо́стольским и да́ром прозорли́вства и жи́знию свято́ю и ве́чным воздая́нием. Припев: Святы́й равноапо́стольне о́тче Никóлае, моли́ Бо́га о на́с. На сме́ртном одре́ те́ла многотру́днаго вся́ Япо́ния тя́ почте́ вку́пе с царе́м свои́м, и да́же до ны́не почита́ет святу́ю па́мять твою́ и про́сит благода́тныя по́мощи при гро́бе твое́м. Сла́ва Отцу́ и Сы́ну и Свято́му Ду́ху. Иису́са И́мя пресла́дкое всегда́ во усте́х и се́рдце име́в при жи́зни, То́й тебе́ посо́бствова в де́ле и по́двизе, и То́й тя́ упоко́и в ве́чных селе́ниих по преставле́нии. И ны́не и при́сно и во ве́ки веко́в. Ами́нь. Богородичен: И ны́не, и при́сно, и во ве́ки веко́в сла́ва Твоя́, Богома́ти, в ро́ды родо́в челове́ческих, на земли́ и на Небеси́, благодея́ния ра́ди спасе́ния спаса́емых. Светилен Осия́ све́т Небе́сный тя́, челове́ка земна́го, и просвети́ся се́рдце твое́, и все́ житие́ Христо́м утверди́ся, да после́дуеши Ему́ неукло́нно путе́м спаси́тельным не то́кмо са́м, но приведе́ши к Нему́ и лю́ди мно́ги. Сла́ва Отцу́ и Сы́ну и Свято́му Ду́ху. Мо́лимся Тебе́, Небе́сный О́тче, про́сим Тя́, Сы́не Безнача́льне, взыва́ем к Тебе́, Ду́ше Пресвяты́й, озари́ на́с све́том и́стины и любо́вию Твое́ю, я́коже Никола́я, Япо́нскаго апо́стола, да вку́пе с ни́м предста́нем во Ца́рствии ве́чнем. И ны́не и при́сно и во ве́ки веко́в. Ами́нь. Богородичен: Наде́ждо не иму́щих наде́жды, Прибе́жище все́х су́щих в жите́йстей бу́ри, Ма́ти Госпо́дня Непоро́чная, услы́ши все́х прибега́ющих к Тебе́ и по́мощи у Тебе́ прося́щих, не и́мамы бо ины́я наде́жды, ра́зве Тебе́, не и́мамы ины́я по́мощи.

Минея, 22 Мая, Канон святого Глас 5 Песнь 1 Ирмос: Спасителю Богу,/ в мо́ри люди немо́крыми ногами наста́вльшему/ и фараона со всево́инством пото́пльшему,/ Тому Единому пои́м, яко просла́вися. Припев: Святы́й пра́ведный Иа́кове, моли́ Бо́га о на́с. Агнче Божий, Слове, даждь ми слово недостойному Твоему рабу,/ да возмогу́ воспе́ти в память пренесения моще́й блаженнаго Иакова торжество, взывая:/ Тому Единому воспоим, яко прославися. Припев: Святы́й пра́ведный Иа́кове, моли́ Бо́га о на́с. Безвестная и тайная последнему роду явле́на быша честныя мо́щи твоя́, премудре Иакове,/ к нимже прикасающеся, освящение прие́млем, Господеви поюще:/ Того Единаго воспоим, яко прославися. Сла́ва Отцу́ и Сы́ну и Свято́му Ду́ху. Всесвятая твоя память возсия́ ми́рови, яко солнце, просвещая ду́ши благочестно поющих тя,/ в нейже моли́ся,блаженне, пода́ти очищение грехов Го́сподеви зовущим:/ Того Единаго воспоим, яко прославися. И ны́не и при́сно и во ве́ки веко́в. Ами́нь. Богородичен: Господороди́тельнице Чистая, Небесный вхо́де,/ горо́ несеко́мая, дверь непроходи́мая,/ апостолом слава, мучеником веселие, преподобным красота,/ приими моление наше, еже Ти приносим/ в память блаженнаго Иакова, Господеви поюще:/ Того Единаго воспоим, яко прославися. Песнь 3 Ирмос: Водрузи́вый на ничесо́мже зе́млю повелением Твоим/ и пове́сивый неодержи́мо тяготе́ющую/ на недви́жимем, Христе, ка́мени заповедей Твоих,/ Церковь Твою утверди, Едине Блаже и Человеколюбче. Припев: Святы́й пра́ведный Иа́кове, моли́ Бо́га о на́с. День пра́зднственный днесь празднуют наро́ди Великаго Нова́гра́да,/ обрето́ша бо мощи блаженнаго Иакова, яко некое сокровище бога́тно,/ непрестанно Христу зовуще:/ Церковь Твою утверди, Едине Блаже и Человеколюбче. Припев: Святы́й пра́ведный Иа́кове, моли́ Бо́га о на́с. Естество́ тле́нное нивочто́же вмени́в,/ житие чистое на земли пожи́л еси/ и сего ради наследовал еси Небесное селение./ Моли и нам получити та́мошнее блаженство, празднующим твое пренесение,/ да непрестанно Христу зовем:/ Церковь Твою утверди, Едине Блаже и Человеколюбче. Сла́ва Отцу́ и Сы́ну и Свято́му Ду́ху. Житие твое, яко солнце, в сердца́ верных возсия́, зарю́ чуде́с испуща́я,/ темже и нас невечерним Светом озари́, всечестное твое пренесение почитающих,/ да непрестанно Христу зовем:/ Церковь Твою утверди, Едине Блаже и Человеколюбче. И ны́не и при́сно и во ве́ки веко́в. Ами́нь. Богородичен: Зело́ лю́те погружа́емую ду́шу мою в пучи́не житейских страстей/ и бу́рею одержи́мую безме́рных согрешений,/ спасения ми простри́ ру́ку, Пречистая, и изведи из глубины́ зол моих,/ да, радуяся, славлю Тя, Всенепорочную. Седален, глас 5 Пресветлая и светоносная, отче Богомудре Иакове,/ приспе́ твоя память, созывающи верных множество/ прославити и пети твое честно́е пренесение,/ просим от Христа прияти велию милость. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Явилася еси вы́шши Небесных сил,/ Владыку и Господа рождши, Богородице:/ земны́х естество возвела еси, Богоневестная./ Темже Тя, воистинну, Богородительнице,/ сердцем и душе́ю вернии славим. Песнь 4 Ирмос: Дела́ смотре́ния Твоего, Господи,/ ужаси́ша пророка Аввакума:/ изше́л бо еси на спасение людей Твоих,/ спасти пома́занныя Твоя́ пришел еси. Припев: Святы́й пра́ведный Иа́кове, моли́ Бо́га о на́с. Зе́млени бо есмы́ и пе́рстни челове́цы,/ верно припа́даем к пречестны́м моще́м твоим, блаженне Иакове, прося́ще отпуще́ния грехов:/ молися о верно празднующих твое честно́е пренесение. Припев: Святы́й пра́ведный Иа́кове, моли́ Бо́га о на́с. Иже крест взем, блаженне, и желаемаго ти отечества достиг, Горняго Иерусалима,/ и в нем со Ангелы лику́еши, Иакове премудре:/ молися о чтущих твое честно́е пренесение. Сла́ва Отцу́ и Сы́ну и Свято́му Ду́ху. Ныне на Небесе́х с праведными весели́шися, преблаженне Иакове,/ с нимиже молися, Христу предстоя́, мир ми́рови дарова́ти/ и благочестивому народу нашему здравие, и на враги побеждение,/ и всем скорбя́щим утеше́ние. И ны́не и при́сно и во ве́ки веко́в. Ами́нь. Богородичен: Кто не удиви́тся или кто не почуди́тся человеколюбию Божию,/ сшед бо с Небесе́ и воплоти́ся нас ради из Тебе без Отца, Едина Всепетая:/ егоже моли изба́витися рабо́м Твоим от всякия скорби. Песнь 5 Ирмос: Окая́нную душу мою, нощеборю́щуюся со тьмою страсте́й,/ предвари́в, уще́дри/ и возсияй, мысленное Солнце, днесве́тлыя звезды́ во мне,/ во еже раздели́ти нощь от света. Припев: Святы́й пра́ведный Иа́кове, моли́ Бо́га о на́с. Любовию чту́ще твое пренесение, прилежно тя молим, премудре Иакове,/ не преста́й моли́ся Христу Богу,/ да прии́мем грехов просты́ню и да озари́т нас в нощи́ свет. Припев: Святы́й пра́ведный Иа́кове, моли́ Бо́га о на́с. Множество народа Великаго Нова́гра́да, сошедшеся днесь в твое пренесение, блаженне Иакове,/ и прикаса́ющеся честны́м моще́м твоим, от них исцеления почерпа́ем, непрестанно зову́ще:/ да озарит нас в нощи́ свет. Сла́ва Отцу́ и Сы́ну и Свято́му Ду́ху. Не то́кмо в житии сый, но и по смерти мно́га чудеса/ от честныя ти раки содева́ются приходящим с верою, всеблаженне Иакове,/ недуги прогоняеши и от бед избавляеши силою Христовою./ К Немуже непрестанно зовем:/ да озарит нас в нощи́ свет. И ны́не и при́сно и во ве́ки веко́в. Ами́нь. Богородичен: Он, вселукавый, по вся дни к го́ршим влече́т мя,/ и в ров погибели влага́ет, и во отчаяние мя влече́т;/ но того мя ловле́ния, Чистая, исхи́ти,/ и творити волю Божественную Сына Твоего и Бога нашего настави,/ и в час страшнаго пришествия Его избави мя всякаго осуждения. Песнь 6 Ирмос: Обы́де мя бездна,/ гроб мне кит бысть:/ аз же возопих к Тебе, Человеколюбцу,/ и спасе́ мя десни́ца Твоя, Господи. Припев: Святы́й пра́ведный Иа́кове, моли́ Бо́га о на́с. Прииди́те, соберитеся, Великаго Нова́гра́да народи,/ све́тло празднуем пренесение моще́й блаженнаго Иакова,/ мо́лится бо ко Владыце и Богу нашему, да избавит нас от всякаго озлобле́ния,/ к Немуже, воспевающе, глаголем:/ спасе́ нас десни́ца Твоя, Господи. Припев: Святы́й пра́ведный Иа́кове, моли́ Бо́га о на́с. Ра́ка мощей твоих, премудре Иакове, дража́йши сапфира показася,/ чудотвори́ва бо бе, исцеле́ния источа́ющи./ Тя ублажающе́, вернии радостно от души Христу зове́м:/ спасе́ нас десни́ца Твоя, Господи. Сла́ва Отцу́ и Сы́ну и Свято́му Ду́ху. Светлыми сиянии обрето́шася на кре честныя твоя мо́щи, Иакове пречудне,/ ныне, аки заря пресветлая, просвещают и освещают чтущих тя верно/ и радостно от души Христу зову́щих:/ спасе́ нас десни́ца Твоя, Господи. И ны́не и при́сно и во ве́ки веко́в. Ами́нь. Богородичен: Тебе, Чистую Деву Нескве́рную,/ Едину и́мам сте́ну непреобори́му,/ прибежище и покров кре́пок и оружие спасения,/ да мя не пре́зриши окаяннаго,/ надежда ненадежным, скорбя́щим радость и заступление. Кондак, глас 8 Верою и любовию/ твое честно́е пренесение пра́зднующих, блаженне,/ сохрани и соблюди от всякия зло́бы и соблазна змии́на,/ и́маши бо дерзновение ко Владыце всех, Христу Богу./ егоже моли спасти православныя люди,/ молящия тя, да вси вопие́м ти:/ радуйся, отче Иакове,/ всея Российския земли удобрение. Икос Ангел на земли житием показався,/ Ангелы удивил еси, бесы же устраши́л еси,/ и человеки просветил еси заря́ми чудес твоих, Богоносе и преблаженне, отче наш Иакове./ И ныне нас вразуми́ воспевати песнь к твоему хвалению,/ радостным гла́сом си́це глаго́лющих:/ радуйся, оста́вивый тле́нное мудрова́ние и прие́мый нетленный венец;/ радуйся, терпеливый душею, иже злокозненнаго врага под нога́ми стерл еси;/ радуйся, ни́жнее мудрование оставль и Вышняго Царствия достиг;/ радуйся, цели́телю болезней и отгони́телю страсте́й;/ радуйся, отче Иакове, всея Российския земли удобрение. Песнь 7 Ирмос: Огня гаси́лище, отроко́в молитва,/ орошающая пещь проповедница чудесе́,/ не опаля́ющи, ниже́ сожига́ющи/ песносло́вцы Бога отец наших. Припев: Святы́й пра́ведный Иа́кове, моли́ Бо́га о на́с. Уста́ви нынешнюю бурю, обдержащую нас, блаженне,/ и укроти́ молитвами твоими,/ и варварское нахождение низложи́,/ и нас, раб твоих, на сопостаты укрепи, да, радующеся, поем:/ Боже, благосло́вен еси. Припев: Святы́й пра́ведный Иа́кове, моли́ Бо́га о на́с. Фарисейски не лицеме́руем, но, со смирением и радостию прикасающеся к мощем твоим, премудре Иакове,/ просим прощения грехов, Христу от души вопиюще:/ Боже, благословен еси. Сла́ва Отцу́ и Сы́ну и Свято́му Ду́ху. Храни́тель бу́ди великия России, христолюби́вому народу нашему, Богомудре Иакове,/ сохраняяй от пога́ных нашествия и междоусобныя бра́ни, гла́да же и па́губы,/ да молитвами твоими изба́вльшеся, радостно от души Христу зове́м:/ Боже, благословен еси. И ны́не и при́сно и во ве́ки веко́в. Ами́нь. Богородичен: Отчаявшимся еси ве́лие прибежище, обуреваемым тихое пристанице еси, Богородице./ Темже и мы, припа́дающе, да не постыдимся, Мати Истиннаго Живота, Тебе благодаря́ще и пою́ще:/ благословенна Ты в жена́х, Всенепорочная Владычице. Песнь 8 Ирмос: Ороси́вшаго пещь и отроки сохра́ншаго посреде́ горящаго пла́мене,/ о́троцы, славосло́вите,/ священницы, благослови́те,/ людие, превозноси́те во вся веки. Припев: Святы́й пра́ведный Иа́кове, моли́ Бо́га о на́с. Молитвенника тя тепла стяжавше и скораго помощника,/ и яко сте́ну тве́рду, и забра́ло недвижи́мо и необурева́емо,/ не забу́ди молитвенник твоих, избавляй нас от всякия ну́жды и печали, да, радующеся, Христу зове́м:/ людие, превозносите Его во веки. Припев: Святы́й пра́ведный Иа́кове, моли́ Бо́га о на́с. Чудес источник мо́щи твоя явися, Иакове преблаженне,/ от нихже обильно вси притекающии приемлют телесе́м здравие и душа́м спасение твоими молитвами,/ да, радующеся, Христу зовем:/ людие, превозноси́те Его во веки. Сла́ва Отцу́ и Сы́ну и Свято́му Ду́ху. Шествие твое до́бре скончал еси и мирски́й мяте́ж, аки безбурное пристанище, преплы́л еси,/ и Ангельски на земли пожи́л еси, плоть твою ду́хови повину́л еси./ И ныне на Небесех предстоя всех Царю Христу,/ поминай чтущих твое пренесение, Емуже зовем:/ людие, превозноси́те Его во веки. И ны́не и при́сно и во ве́ки веко́в. Ами́нь. Богородичен: Щедраго и Человеколюби́ваго Спаса рождши, Чистая,/ Того моли уще́дрити раба Твоего и к пока́яния пути́ настави,/ лукаваго соблазны от се́рдца моего отжени́, и того́ изба́ви ловле́ния,/ и огня́ вечнаго исхити́,/ яко да непрестанно пою Тя, Чистую, во вся веки. Песнь 9 Ирмос: Иса́йе, лику́й,/ Дева име́ во чреве и роди́ Сына Емману́ила,/ Бога же и Человека, Восток Имя Ему,/ егоже величающе, Деву ублажаем. Припев: Святы́й пра́ведный Иа́кове, моли́ Бо́га о на́с. Источник исцеления испуща́я, врачевание же безме́здно,/ ковчег священия твоих мо́щей рака явися:/ от нихже почерпа́ем здравие присноживо́тное, притека́ющии верно, блаженне Иакове,/ и тебе Даровавшаго в пе́снех величаем. Припев: Святы́й пра́ведный Иа́кове, моли́ Бо́га о на́с. Возвели́чил еси на земли́ твоего Владыку,/ тем и в твое пренесение глубину́ чудес показа́ и струю́ неоскудева́ему, раку моще́й твоих, Иакове премудре,/ слепым еже ви́дети дарова́ся, прокаженным очище́ние/ и одержи́мыя нечистыми ду́хи целому́дренны твори́ши./ Темже тя величаем. Сла́ва Отцу́ и Сы́ну и Свято́му Ду́ху. Недостойною моею рукою принесо́х ти таковое сло́ва изви́тие, Богомудрый Иакове,/ не пре́зри, но приими́ сие́ с любовию и моли́ за мя Творца, твоего Владыку и Господа/ та́мошняго мя изба́вити мучения и милость обрести́ в день страшнаго испыта́ния. И ны́не и при́сно и во ве́ки веко́в. Ами́нь. Богородичен: Владычице мира, Богородице,/ во глубине́ зол поги́бели мене, погруже́ннаго злоу́мно сластьми́ плотски́ми,/ и пристра́стием вещьми́ жития́,/ изведи́, Пресвятая Дево, Твоим милосердием,/ ибо не и́мам надежды:/ весь бо есмь, Чистая, во отчаянии, да Тя непрестанно величаю. Светилен Якоже солнце облиста́я, чудеса испуща́еши, просвещая верных сердца́,/ твое славное пренесение верно творя́щия спасай, Богомудре Иакове, отче наш. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Тя Предстательницу и́мамы грешнии, о Пресвятая Дево!/ Ты благопреме́нна сотвори Сына Твоего и Бога нашего/ Ма́терними Твоими молитвами.

Минея, 17 Марта, Канон преподобного Глас 2 Песнь 1 Ирмос: Во глубине́ постла́ иногда́/ фараони́тское всево́инство преоруже́нная си́ла,/ вопло́щшееся же Сло́во всезло́бный грех потреби́ло е́сть,/ препросла́вленный Госпо́дь сла́вно бо просла́вися. Припев: Преподо́бне о́тче Алекси́е, моли́ Бо́га о нас. Тесне́йший ше́ствовал еси́ пу́ть,/ непоро́чное и преподо́бное житие́, му́дре, проходя́ от ю́ности,/ те́мже мою́ тесноту́ разшири́ ума́ восхвали́ти тя,/ в ра́йстей широте́ водворя́яся, Алекси́е. Припев: Преподо́бне о́тче Алекси́е, моли́ Бо́га о нас. Тебе́ сама́го весьма́ Бо́гу возложи́в, блаже́нне,/ вне пло́ти и ми́ра был еси́,/ бога́тству теку́щу Небе́сное предпоче́л еси́ и пребыва́ющее/ и обеща́нный град Сио́н ве́чнующий. Сла́ва Отцу́ и Сы́ну и Свято́му Ду́ху. Ложе́сн ты ма́терних непло́дие разреши́л еси́,/ ро́ждся, я́коже Самуи́л, пребога́те,/ во чре́ве же се́рдца чи́стый заче́н страх,/ роди́л еси́ дух спасе́ния Боже́ственных доброде́телей ве́рою. И ны́не и при́сно и во ве́ки веко́в. Ами́нь. Богородичен: Бо́жий Собезнача́льный Сын име́ я́ко вино́вну Тя к нам, Де́во, подо́бия,/ еди́ну, па́че всея́ тва́ри, Чи́стая, чи́сту Тя обре́т./ Тем Тя пое́м, вси ро́ди, и ублажа́ем. Песнь 3 Ирмос: Процвела́ е́сть пусты́ня, я́ко крин, Го́споди,/ язы́ческая неплодя́щая, Це́рковь/ прише́ствием Твои́м,/ в не́йже утверди́ся мое́ се́рдце. Припев: Преподо́бне о́тче Алекси́е, моли́ Бо́га о нас. Пронза́емь жела́нием чистоты́,/ черто́гом, и́же на земли́, Небе́сный премени́л еси́/ и жены́ любо́вию сладча́йшее А́нгельское подо́бие. Припев: Преподо́бне о́тче Алекси́е, моли́ Бо́га о нас. Молвы́ жите́йския и тя́жесть бога́тства оста́вил еси́/ и пресе́льник был оте́чества, блаже́нне Алекси́е,/ Христо́ве нищете́ подо́бяся. Сла́ва Отцу́ и Сы́ну и Свято́му Ду́ху. Слеза́ми, и боле́зньми, и воздержа́нием, всему́дре, благо́е взыска́л еси́,/ когда́ прии́дет свет ра́зума,/ безстра́стие дая́ се́рдцу твоему́. И ны́не и при́сно и во ве́ки веко́в. Ами́нь. Богородичен: Горе́ неви́димый А́нгелом, Чи́стая,/ до́ле из Тебе́ ражда́емь, зри́тся соверше́н Челове́к,/ погиба́ющий мир обновля́я. Седален, глас 3 Ми́ра красоту́, преподо́бне, оста́вил еси́,/ премени́в бога́тством теку́щим непроходи́мое я́ве и пребыва́ющее, Алекси́е./ Те́мже со все́ми тя святы́ми сла́вим/ и торжеству́ем све́тло в па́мяти твое́й,/ прося́ще обрести́ моли́твами твои́ми, блаже́нне, ве́лию ми́лость. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Недомы́сленно и непости́жно е́сть, Влады́чице Богора́дованная,/ е́же соде́ланное о Тебе́ стра́шное Бо́жие та́инство,/ и́бо Необыме́ннаго, заче́нши, родила́ еси́,/ пло́тию обложе́на от пречи́стых крове́й Твои́х./ Его́же всегда́, Чи́стая, я́ко Сы́на Твоего́ моли́ спасти́ся душа́м на́шим. Песнь 4 Ирмос: Прише́л еси́ от Де́вы, не хода́тай, ни А́нгел,/ но Сам, Го́споди, вопло́щся,/ и спасл еси́ всего́ мя, челове́ка./ Тем зову́ Ти: сла́ва си́ле Твое́й, Го́споди. Припев: Преподо́бне о́тче Алекси́е, моли́ Бо́га о нас. Претерпе́л еси́ нищету́, проси́тель быв, нищ, я́коже Ла́зарь,/ жела́ние бо Боже́ственное утеша́ше, блаже́нне, се́рдце твое́,/ пожела́вшее бога́тства Небе́снаго. Припев: Преподо́бне о́тче Алекси́е, моли́ Бо́га о нас. Безпеча́льнаго и ти́хаго жития́ возжела́л еси́,/ еди́нощи яды́й в седми́це, Алекси́е,/ жела́нием ожида́ющаго тя не мимотеку́щаго, всеблаже́нне, наслажде́ния. Сла́ва Отцу́ и Сы́ну и Свято́му Ду́ху. Храм Бо́гу се́рдце ища́й соде́лати,/ в до́му возлюби́л еси́ Богома́тере, сла́вне, всегда́ седе́ти/ и Небе́сныя добро́ты созира́ти. И ны́не и при́сно и во ве́ки веко́в. Ами́нь. Богородичен: Воздои́вши Да́теля, Де́во, млека́,/ а́лчущее и утесня́емое ны́не се́рдце мое́ насы́ти вся́каго ра́зума/ и умиле́ния Боже́ственнаго, молю́ Тя. Песнь 5 Ирмос: Хода́тай Бо́гу и челове́ком был еси́, Христе́ Бо́же:/ Тобо́ю бо, Влады́ко, к Светонача́льнику Отцу́ Твоему́,/ от но́щи неве́дения/ приведе́ние и́мамы. Припев: Преподо́бне о́тче Алекси́е, моли́ Бо́га о нас. То́ки свяще́нными напая́я всегда́ слез твою́ ду́шу,/ соде́лал еси́ клас, вои́стинну стори́чествующ,/ Де́лателю Безсме́ртному до́бре соблюда́емь. Припев: Преподо́бне о́тче Алекси́е, моли́ Бо́га о нас. Ви́ден был еси́ на земли́, житие́ Безпло́тных подража́я,/ премно́гим твои́м, о́тче, воздержа́нием, досточу́дне, и в моли́твах прилежа́нием,/ и́мже, я́ко све́том, просвети́лся еси́. Сла́ва Отцу́ и Сы́ну и Свято́му Ду́ху. Огне́м моли́тв греха́ попали́л еси́ ве́щь, му́дре,/ бде́нными же стоя́ньми вся́кое сладостра́стие успи́л еси́,/ усну́в же, к сия́нию преста́вился еси́ невече́рнему. И ны́не и при́сно и во ве́ки веко́в. Ами́нь. Богородичен: И́же, во Све́те живы́й,/ во свято́е чре́во Твое́ всели́ся, Чи́стая,/ мир, поги́бший тьмо́ю неразу́мия, па́ки назида́я,/ Его́же моли́ вся просвети́ти, пою́щия Тя. Песнь 6 Ирмос: В бе́здне грехо́вней валя́яся,/ неизсле́дную милосе́рдия Твоего́ призыва́ю бе́здну:/ от тли, Бо́же, мя возведи́. Припев: Преподо́бне о́тче Алекси́е, моли́ Бо́га о нас. Я́ко храм жив Бо́жий, тя, бы́вша Христо́во селе́ние,/ Неискусобра́чная проявля́ет кры́ющася/ и прославля́ет утаи́тися тща́щагося. Припев: Преподо́бне о́тче Алекси́е, моли́ Бо́га о нас. Моли́твы твоя́ Бо́гу, я́ко кади́ло, блаже́нне, прия́тны быта,/ отсю́ду житие́м твои́м ве́рных ра́зумы облагово́нил еси́/ Ду́ха благода́тию. Сла́ва Отцу́ и Сы́ну и Свято́му Ду́ху. Свяще́нным житие́м украша́ема,/ па́ки Христо́с не хотя́ща, сла́вне, тя оте́честву дае́т,/ отбега́юща сла́вы привре́менныя. И ны́не и при́сно и во ве́ки веко́в. Ами́нь. Богородичен: Зако́ны естества́, Чи́стая Влады́чице,/ Зижди́тель, новосоде́лавый созда́ния,/ из Тебе́ неизрече́нно ражда́ется/ и обожа́ет мя безме́рною ми́лостию. Кондак, глас 2 Дом роди́телей твои́х, я́ко чужд, име́в,/ водвори́лся еси́ в нем нищеобра́зно/ и, по преставле́нии вене́ц прие́м сла́вы,/ ди́вен на земли́ яви́лся еси́, Алекси́е, челове́че Бо́жий,/ А́нгелом и челове́ком ра́дование. Икос Житие́м и словесы́ украси́лся еси́/ и Христо́ву Це́рковь возвели́чил еси́ твои́м житие́м,/ отца́ и ма́терь, царя́ и лю́ди торжествова́ти устро́ив,/ де́лы же соблю́д, е́же по о́бразу Бо́жию, Алекси́е преподо́бне,/ возсия́л еси́ в ми́ре твои́м целому́дрием./ Те́мже благода́ть доброде́телей твои́х облистава́ет вся, ве́рою пра́зднующия, о́тче, па́мять твою́,/ яви́л бо ся еси́ А́нгелом и челове́ком ра́дование. Песнь 7 Ирмос: Богопроти́вное веле́ние беззако́ннующаго мучи́теля/ высо́к пла́мень вознесло́ е́сть./ Христо́с же простре́ Богочести́вым отроко́м ро́су духо́вную,/ Сый благослове́н и препросла́влен. Припев: Преподо́бне о́тче Алекси́е, моли́ Бо́га о нас. Претерпе́л еси́, преподо́бне, пред роди́тельными враты́ седя́,/ и весьма́ непознава́емь, и от о́трок руга́ния подъе́мля,/ и наруга́емь лю́те, и нището́ю мно́гою оскорбля́емь. Припев: Преподо́бне о́тче Алекси́е, моли́ Бо́га о нас. Пло́ти твоея́ мудрова́ние умертви́в,/ зря роди́тели, и си́ми непознава́емь, естества́ покрыва́л еси́ ну́жду, преподо́бне,/ и презре́ние твои́х неиску́сных о́трок, оскорбля́ющих тя. Сла́ва Отцу́ и Сы́ну и Свято́му Ду́ху. О, чудесе́! Ка́ко пребы́л еси́, при́сно нище́тствуя,/ в бога́тстве, Алекси́е, безме́рнаго смире́ния?/ Ка́ко претерпе́л еси́ руга́ния и укори́зны от о́трок, прему́дре, твои́х,/ не ве́девших жития́ твоего́? И ны́не и при́сно и во ве́ки веко́в. Ами́нь. Богородичен: Вели́каго служи́тельница Ты та́инства была́ еси́, Всенепоро́чная:/ Бо́га бо воплоти́ла еси́, вели́ких зол нас изба́вльшаго,/ Тя велича́ющия, Чи́стая Благослове́нная, Богора́дованная. Песнь 8 Ирмос: Пе́щь иногда́ о́гненная в Вавило́не де́йства разделя́ше,/ Бо́жиим веле́нием халде́и опаля́ющая,/ ве́рныя же ороша́ющая, пою́щия:/ благослови́те, вся дела́ Госпо́дня, Го́спода. Припев: Преподо́бне о́тче Алекси́е, моли́ Бо́га о нас. Неве́дом пре́жде роди́телем сый,/ во вре́мя отше́ствия твоего́ сим та́йну открыва́еши,/ явля́емь в сла́ву Бо́га на́шего, сла́вне,/ вельми́ тя и досто́йне просла́вльшаго. Припев: Преподо́бне о́тче Алекси́е, моли́ Бо́га о нас. Госпо́дь гла́сом ве́лиим явля́ет тя всему́ Ри́му,/ сокрове́нное сокро́вище, пребога́те, в нище́тне о́бразе лежа́ща/ и да́ры врачева́ний вся, ве́рою к тебе́ приходя́щия, обогаща́юща. Сла́ва Отцу́ и Сы́ну и Свято́му Ду́ху. Кня́зи лю́дстии, и ца́рие снидо́шася, и свяще́нницы, блаже́нне,/ погребсти́ тя Бо́жиим манове́нием/ и, ви́дяще ве́лие виде́ние, диви́шася чудесе́м, преподо́бне,/ я́же твори́л еси́ Боже́ственною си́лою Ду́ха. И ны́не и при́сно и во ве́ки веко́в. Ами́нь. Богородичен: Истле́вшия ны дре́вле преступле́нием обновля́я,/ Человеколю́бец нетле́нно воплоти́ся от нетле́нныя Твоея́, Всенепоро́чная, утро́бы/ и изба́ви всех грехо́вныя тли, Богоневе́стная. Песнь 9 Ирмос: Безнача́льна Роди́теля Сын, Бог и Госпо́дь,/ вопло́щся от Де́вы, нам яви́ся,/ омраче́нная просвети́ти, собра́ти расточе́нная,/ тем Всепе́тую Богоро́дицу велича́ем. Припев: Преподо́бне о́тче Алекси́е, моли́ Бо́га о нас. Исцеле́ния источи́л еси́, ко гро́бу несо́м,/ Бо́гу тя, блаже́нне, вельми́ сла́вящу:/ свет бо неви́дящий ви́деша/ и глаго́лание прия́ша пре́жде су́ще не́мии, всесла́вне Алекси́е. Припев: Преподо́бне о́тче Алекси́е, моли́ Бо́га о нас. Ви́ден был еси́, предлежа́щ и к погребе́нию несо́м,/ я́ко со́лнце, о́тче, испуща́я исцеле́ний зари́ пресла́вно,/ и те́мныя стра́сти отгоня́я, и опаля́я де́моны,/ и просвеща́я Богому́дрыя. Припев: Преподо́бне о́тче Алекси́е, моли́ Бо́га о нас. Прии́де погребсти́ тя Патриа́рхов пе́рвейший,/ ца́рь же, вельми́ христолюби́вейший,/ кня́зи, ста́рцы и ю́нии и мона́шествующих ли́цы, Боже́ственным манове́нием/ освяща́ющеся прикоснове́нием твои́м, блаже́нне. Сла́ва Отцу́ и Сы́ну и Свято́му Ду́ху. Восхище́н был еси́, на колесни́це доброде́телей несо́м,/ и почива́еши, иде́же преподо́бных чи́ни,/ собо́р апо́стол и му́чеников, патриа́рхов и всех пра́ведник,/ с ни́миже нас помяни́, почита́ющия тя, Алекси́е. И ны́не и при́сно и во ве́ки веко́в. Ами́нь. Богородичен: Глас Тебе́ прино́сим Гаврии́лов, Всенепоро́чная,/ ра́дуйся, глаго́люще, ни́во неде́ланная;/ ра́дуйся, кля́твы разреше́ние;/ ра́дуйся, исто́чниче во́ды живо́тныя,/ преподо́бных похвало́, Богоро́дице Присноде́во. Светилен О, чу́до:/ ка́ко во врате́х роди́телей твои́х, многоле́тне,/ я́коже не́кий адама́нт, терпе́л еси́,/ естества́ ну́ждею не преклони́лся,/ ни роди́телей же и супру́жницы, Алекси́е, го́рькими рыда́ньми. Сла́ва: Я́ко фи́никс, процвете́ цветоно́сен, всече́стне, благоле́пно,/ возсия́, я́коже звезда́ми, чудесы́ озари́ вся, де́нь твой, блаже́нне,/ в о́ньже пра́зднующе, всех нас изба́ви моли́твами твои́ми, о блаже́нне челове́че Бо́жий Алекси́е. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Просвети́, Чи́стая, ду́шу мою́, грехи́ потемне́вшую,/ и ве́чнующаго мя пла́мене и мра́ка изба́ви хода́тайством Твои́м,/ я́ко да с весе́лием хвалю́ Твое́ вели́чие.

глас 1 Песнь 1 Ирмос: Воскресения день, просветимся, людие, Пасха, Господня Пасха: от смерти бо к Жизни и от земли к Небеси Христос Бог нас преведе, победную поющия. Воскресения день, славим ныне Господа Христа. Приидите, и Пресвятую Матерь Его прославим, пред святою иконою Ея благодарственная поюще. Очистим чувствия и узрим воскресшаго Христа и Всеблагую Деву, Избавительницу от бед, блистающуюся и озаряющую верныя благодатию. Очистим чувствия и узрим мысленными очесы промышление о нас Владычицы: честным бо образом Своим избави от бед христоименитыя люди. Небеса убо достойно да веселятся, земля же да радуется воскресшему Христу, да торжествует же сия обитель, обогатившаяся Избавительницы иконою. Небо и земля достойно да веселятся во Христовом востании, да празднуют же Богоматери монаси и бельцы, чудотворный Ея образ почитающе. Умерщвления предел сломила еси, вечную Жизнь рождшая — Христа, из гроба возсиявшаго днесь, Дево Всенепорочная, и мир просветившаго. Песнь 3 Ирмос: Приидите, пиво пием новое, не от камене неплодна чудодеемое, но нетления источник, из гроба одождивша Христа, в Немже утверждаемся. Приидите, пиво пием новое от источника целительнаго недугом душевным и телесным, егоже источи Богоблагодатная с верою притекшим ко иконе Ея. Приидите, весны умныя в видимой весне насладимся, неувядаемый бо Цвет — Христа — израстившая Дева благоуханием благодати живит и утешает скорбящия. Ныне вся исполнишася света воскресением Христовым, да празднуем и мы светло Избавительнице, лучи испущающей радости о Бозе Спасе в нощи искушений. Ныне обитель сия озаряется светом от Матере Света в нарочитом дни празднества чудотворному Тоя образу и благодатию Сына Ея утверждается. Вчера погребено бе селение верных в смертоносном отчаянии, днесь же оживотворися скорым от бед избавлением Богоневестныя Марии, надежды безнадежных. На нетленную жизнь прихожду днесь, благостию Рождшагося из Тебе, Чистая, и всем концем свет облиставшаго. Песнь 4 Ирмос: На Божественней стражи Богоглаголивый Аввакум да станет с нами и покажет светоносна Ангела, ясно глаголюща: днесь спасение миру, яко воскресе Христос, яко всесилен. На Божественней стражи ставше во Христе, братие, и воспоминание творяще чудес Избавительницы, со благоговением рцем: днесь спасение Богородицею бысть скорбящим, яко вся могущею. Яко непорочную Агницу, пречистаго Агнца рождшую, венчаем Тя, Благословенная, песненными цветы: покрый от зол рабы Твоя, воскресшаго Сына Твоего о всех умилостивляющи. Богоотец убо Давид пред сенным ковчегом скакаше, играя, раби же Твои, Госпоже, пред иконою Твоею ликующе, веселимся божественне о Твоем милосердом заступлении к Тебе прибегающих. Яко в краснейший храм, вселися в Тя, Чистая, Иисус, всех Царь, снитием же во ад жилище мрачное упраздни и воскресением совоскреси человеки, оживляя Тобою умершия, яко всесилен. Святых Святаго паче ума Мати явилася еси, Владычице, освящение и избавление от бед подающи верным, славящим Его воскресение и Тебе, Всеблагую Избавительницу, призывающим. Создавый Адама, Твоего праотца, Чистая, зиждется от Тебе, и смертное жилище разори Своею смертию днесь, и озари вся Божественными блистаньми воскресения. Песнь 5 Ирмос: Утренюем утренюю глубоку, и вместо мира песнь принесем Владыце, и Христа узрим, Правды Солнце, всем жизнь возсияюща. Утренююще во святем храме Твоем, Чистая, Сына Твоего воспеваем, из гроба возсиявшаго, и Тя, Избавительнице, величаем, от Солнца Правды, умершему отроку жизнь возсияющу. Утренюем утренюю глубоку и с пением деяния принесем богоугодная, Деве вопиюще: храни, Всецарице, Гору, и Россию, и вся православныя необоримы от враг видимых и невидимых. Безмерное Твое благоутробие, Владычице, узами вражиими содержимии зряще, ко иконе Твоей избавленный идяху веселыми ногами, Твою и Сына Твоего хваляще Божественную силу. Приступим, свещеноснии, исходящу Христу из гроба, яко жениху, и спразднуим Богородице любопразднственными чинми, в честь святыя иконы Ея, прославленныя чудесы многими. Облиста Тя и возвесели, Богорадованная, Спас всех, из гроба возсиявый, Правды Солнце, Егоже моли озарити и утешити сердца любовию песнословящих Тя, Избавительнице, пред Твоею иконою. Просвещается Божественными лучами и живоносными воскресения Сына Твоего, Богомати Пречистая, и радости исполняется благочестивых собрание. Песнь 6 Ирмос: Снизшел еси в преисподняя земли и сокрушил еси вереи вечныя, содержащия связанныя, Христе, и тридневен, яко от кита Иона, воскресл еси от Гроба. Снидохом во тьму греховную и праведное на ся негодование Божие привлекохом,— вопияху вернии, но, о Госпоже Всемилостивая, Ты избавила еси нас от рова отчаяния. Сохранив целы труды рук наших и невредимы от всепоядающаго пружия, предстательством Твоим, Избавительнице, отверзла еси нам милосердия двери. Спасе наш, живое же и нежертвенное от всех заколение, бедствующим даровал еси Матерь Твою Избавительницу от бед молитвами убо Ея избави нас от всякия нужды и печали. Явилася еси, Богоневесто, вышши Ангел, Бога воплощши, распеншагося за ны, и погребена, и мертвым нетление из гроба источивша, чтущих же Тя тли греховныя избавляюща. Видевши Сына Твоего, из мертвых возставша, райския сладости исполнилася еси, Приснодево, Того убо моли, Благословенная, да отверзет молящимся Тебе райския двери. Возведеся древле держимое смертию и тлением Воплотившимся от Твоего пречистаго чрева к нетленней и присносущней жизни, Богородице Дево. Песнь 7 Ирмос: Отроки от пещи избавивый, быв Человек, страждет, яко смертен, и страстию смертное в нетления облачит благолепие, един Благословен отцев Бог и Препрославлен. Отроки от пещи избавивый, презрев, яко Милосерд, прегрешения наша, соблюди ны невредны от пещи искушений Пресвятыя Матере Твоея мольбами, отцев Боже Препрославленный. Жены с миры Богомудрыя вслед течаху Христа, обитателие же веси, вместо мира слезы Деве приносяще, поклонишася, радующияся, Ея иконе и избавление от бед зде благовестиша. Жены с миры вслед Христа течаху, да течем и мы усердно, добрый подвиг иночества совершающе и радующеся живому Богу, да сподобимся молитвами Богоматере пасху тайную вкушати. Смерти празднуем умерщвление воскресением Христа и избавление от бед милосердием Владычицы, темже, пред иконою Ея ликующе, поем Виновнаго, единаго Благословеннаго отцев Бога и Препрославленнаго. Яко воистину священный и радостный сей праздник Богородицы, провозвестник сущий чудес от честнаго Тоя образа, от негоже благодать исцелений явственно всем возсия. Умертвив Сын Твой смерть, Всенепорочная, днесь, всем смертным пребывающий живот во веки веков дарова, един Благословенный отцев Бог и Препрославленный. Песнь 8 Ирмос: Сей нареченный и Святый День — един суббот царь и господь, праздников праздник и торжество есть торжеств, в оньже благословим Христа во веки. Сей нареченный и Святый День, в оньже славим Всепетую Владычицу, яко избави от бед притекших к Ея образу, и благословим Сию во веки. Приидите, обители сея иночествующии, с любовию благодарение Деве принесем, Хранительнице Горы и Избавительнице нашей, поюще Ю яко Богоматерь во веки. Возведи окрест очи Твоя, Чистая, и виждь рабы Твоя, пред иконою Твоею молящияся Тебе, и прошения исполни о Тебе благословящия Христа во веки. Всесильный Господь родися из Тебе, Марие, и Крестом Своим умерщвление аду содела, избавляя смертоносных бед к образу Твоему притекающих и поющих Его яко Бога во веки. Отче Вседержителю, и Слове, и Душе, ходатаицу о нас Пресвятую Деву Тебе предлагаем: молитвами Тоя помилуй и спаси нас, в Тя крестившихся, да Тя благословим во вся веки. Прииде Тобою в мир Господь, Дево Богородице, и, чрево адово расторг, смертным нам воскресение дарова, темже благословим Его во веки. Песнь 9 Ирмос: Светися, светися, Новый Иерусалиме, слава бо Господня на тебе возсия, ликуй ныне, и веселися, Сионе. Ты же, Чистая, красуйся, Богородице, о востании Рождества Твоего. Светися, Русская обителе, веселися и красуйся, святая бо в тебе Избавительницы икона чудесы прославися многими, от бед свобождением и недугов исцелением. Благоутробие Твое к верным и дары Твои суть паче постижения, Всеблагая Госпоже, сподобляй убо сих рабы Твоя, благодарственная Тебе поющия и радующияся о востании Рождества Твоего. О, Божественнаго, о, любезнаго Твоего, Богомати, гласа! Яко повелела еси не скрывати чудотворную икону Свою, да притекающии к ней многих лютых избавляются милостию Твоею. О, паче словесе Твоих чудес, Избавительнице! Ты бо осененна иконою Твоею отрока воскресила еси, Мати сущи Живота, воскресением Своим всех оживотворившаго. О Пресвятая Владычице, о Всемилостивая Избавительнице от бед, не престай милосердовати о бедствующих и сподобляти благодатнаго присещения обитель, образ Твой почитающую. Согласно, Дево, Тебе блажим, вернии: радуйся, двере Господня; радуйся, граде одушевленный; радуйся, Еяже ради нам ныне возсия свет из Тебе Рожденнаго из мертвых воскресения. Светилен Светильниче светлый, Пресветлаго Света мира, от гроба возсиявшаго, просвети, Благословенная, души наша светом благодати, да сподобимся зрети воплотившееся из Тебе Солнце Правды и Тебе, Просветительницу нашу, присно величати.

Минея, 2 Марта, Канон Глас 8 Песнь 1 Ирмос: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:/ Изба́вителю и Бо́гу на́шему пои́м. Припев: Пресвята́я Богоро́дице, спаси́ на́с. От земноро́дных возра́стши и Зижди́теля ро́ждши,/ ра́дуйся, на́ша похвало́, Богоро́дице Чи́стая,/ Тя, я́ко облада́ющую тва́рьми, велича́ем. Припев: Пресвята́я Богоро́дице, спаси́ на́с. Своего́ прие́мши Соде́теля, я́ко Сам восхоте́,/ от безсе́меннаго Твоего́ чре́ва па́че ума́ воплоща́ема, Чи́стая,/ тва́рей вои́стинну яви́лася еси́ Влады́чица. Припев: Пресвята́я Богоро́дице, спаси́ на́с. Пречи́стая Богоро́дице,/ Тобо́ю спасе́ние нетле́нно дарова́ся/ и неразруши́мо весе́лие и наде́жда, покро́в и Держа́ва/ и душа́м на́шим прибе́жище. Припев: Пресвята́я Богоро́дице, спаси́ на́с. Цари́ца еси́ всех еди́на,/ Бо́гу, Богороди́тельнице Чи́стая, святы́й престо́л и пала́та Христа́ Бо́га,/ Его́же моли́ о чту́щих ико́ну Твою́ честну́ю,/ пода́ти грехо́в оставле́ние. Сла́ва Отцу́ и Сы́ну и Свято́му Ду́ху. Бу́ди нам по́мощь, Твои́м рабо́м, Влады́чице Чи́стая,/ ве́рно моля́щим Тя, я́ко ми́лостива,/ и держа́вны нас воздви́гни, во е́же пе́ти Тя. И ны́не и при́сно и во ве́ки веко́в. Ами́нь. Спаса́еши, я́ко мо́жеши, при́сно всех,/ я́ко ро́ждши Влады́ку,/ влады́чествия мя сла́стнаго и страсте́й свободи́, да пою́, ра́дуяся:/ ра́дуйся, Престо́ле Вы́шняго, Благослове́нная. Песнь 3 Ирмос: Небе́снаго кру́га Верхотво́рче, Го́споди,/ и Це́ркве Зижди́телю,/ Ты мене́ утверди́ в любви́ Твое́й,/ жела́ний кра́ю, ве́рных утвержде́ние,/ Еди́не Человеколю́бче. Припев: Пресвята́я Богоро́дице, спаси́ на́с. Наде́ждо ми́ру держа́вная, покро́ве и предста́тельство, Всесвята́я Де́во,/ не пре́зри, Блага́я, моле́ния рабо́в,/ от любве́ Тя при́сно ублажа́ющих. Припев: Пресвята́я Богоро́дице, спаси́ на́с. Вопло́щся от утро́бы Твоея́ Госпо́дь, госпо́дствуя тва́рию,/ и Тебе́, Де́во, Госпожу́ показа́в ви́димым же всем и неви́димым,/ я́ко Ма́терь прославля́я Непоро́чную. Припев: Пресвята́я Богоро́дице, спаси́ на́с. Мари́е, честно́е Влады́ки прия́телище,/ возста́ви ны, па́дшия в про́пасть лю́таго отча́яния, и прегреше́ний, и скорбе́й,/ Ты бо еси́ гре́шных спасе́ние, и по́мощь, и держа́вное предста́тельство/ и спаса́еши рабы́ Твоя́. Припев: Пресвята́я Богоро́дице, спаси́ на́с. Су́щая Влады́чица на́ша, Всесвята́я Де́во,/ моля́щи не преста́й, Его́же родила́ еси́, Бо́га,/ Ца́рствия Своего́ нас сподо́бити. Сла́ва Отцу́ и Сы́ну и Свято́му Ду́ху. Кня́зь ми́рный прии́де на престо́л Дави́дов,/ ца́рствуя из Тебе́, Богоро́дице, Бог воплоща́емь./ О, чу́до!/ и, бра́нь разре́шь, почте́ кня́зи моави́тския/ и Тебе́, Ро́ждшую, Цари́цу показа́. И ны́не и при́сно и во ве́ки веко́в. Ами́нь. Цари́це Де́во,/ ро́ждшая Царя́ Христа́,/ уще́дри и спаси́ мя, страстьми́ преклоне́ннаго,/ ве́рою утверди́ и наста́ви мя ко спасе́ния стези́, ве́рных спасе́ние. Седален, глас 4 Да откры́вши нам всем мно́жество Твоея́ ми́лости/ и бла́гости безпреде́льную пучи́ну,/ грехи́ рабо́в Твои́х вся изгла́ди./ И́маши бо, Всенепоро́чная, я́ко Ма́ти Бо́жия, вла́сть над созда́нием/ и си́лою Твое́ю изводиши вся, я́ко хо́щеши,/ и́бо благода́ть Ду́ха Свята́го, я́ве все́льшаяся в Тя,/ соде́йствует Ти во всем, при́сно Всеблаже́ннейшая. Песнь 4 Ирмос: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́. Припев: Пресвята́я Богоро́дице, спаси́ на́с. Тя, Богоневе́сто, похвалу́ всем Христо́с яви́/ и Держа́ву, пою́щим ве́рно Твое́ та́инство. Припев: Пресвята́я Богоро́дице, спаси́ на́с. Ста́нем благогове́йно в дому́ Бо́га на́шего и возопии́м:/ ра́дуйся, ми́ру Влады́чице,/ ра́дуйся, Мари́е, Госпоже́ всех нас;/ ра́дуйся, еди́на непоро́чная в жена́х и до́брая;/ ра́дуйся, сто́лпе о́гненный, вводя́щий в Вы́шнюю жи́знь челове́чество. Припев: Пресвята́я Богоро́дице, спаси́ на́с. Прибе́жище, Засту́пницу и си́льный покро́в Тя иму́ще,/ Благослове́нная Пречи́стая Ма́ти Бо́жия./ Твое́ю по́мощию и покро́вом Боже́ственным сохрани́ нас. Припев: Пресвята́я Богоро́дице, спаси́ на́с. Де́во господоимени́тая и Цари́ца всея́ тва́ри,/ мно́гими проро́ки пронарече́нная и ро́ждшая Царя́ Небе́сных сил,/ Ца́рствия Небе́снаго, Госпоже́, всех нас сподо́би моли́твами Твои́ми. Припев: Пресвята́я Богоро́дице, спаси́ на́с. Чи́ны а́нгельския удивля́ет, Богоро́дице, та́йны Твоея́ глубина́,/ бе́сы же смуща́ет Твоя́ ико́на,/ е́йже мы кла́няемся, чту́ще Тя, Бо́жию Ма́терь. Сла́ва Отцу́ и Сы́ну и Свято́му Ду́ху. Вы́сшую Херуви́м и всея́ тва́ри восхва́лим,/ Еди́ну, ро́ждшую Зижди́теля и Го́спода/ и отве́рзшую две́ри ра́йския нам. И ны́не и при́сно и во ве́ки веко́в. Ами́нь. К Тебе́ прибега́ю, Еди́ней Держа́вней, ве́рных покро́ву,/ на Тя наде́жду возлага́ю спасе́ния моего́,/ Пресвята́я Влады́чице Богоро́дице, не пре́зри мене́. Песнь 5 Ирмос: Просвети́ нас повеле́нии Твои́ми, Го́споди,/ и мы́шцею Твое́ю высо́кою/ Твой мир пода́ждь нам,/ Человеколю́бче. Припев: Пресвята́я Богоро́дице, спаси́ на́с. Богоро́дице, всех Цари́це, правосла́вных похвало́,/ ерети́чествующих шата́ния разори́,/ мир же пода́ждь чтушим, Пречи́стая, честны́й Твой о́браз. Припев: Пресвята́я Богоро́дице, спаси́ на́с. Держа́вным Твои́м кро́вом от враг наве́та/ нас, Чи́стая, Твоя́ рабы́, сохрани́ вся невре́дны,/ Тя бо стяжа́хом еди́ну прибе́жище в ско́рбех. Припев: Пресвята́я Богоро́дице, спаси́ на́с. Скоре́йшею моли́твою, бо́дрым Твои́м покро́вом,/ держа́вною Твое́ю, Влады́чице Чи́стая, по́мощию,/ ны́не соблюди́ ве́рныя Твоя́ рабы́ от вся́каго сопроти́внаго прило́га/ и страсте́й, и прегреше́ний, и напа́стей спаси́. Сла́ва Отцу́ и Сы́ну и Свято́му Ду́ху. Цари́ца еси́ Царя́ Христа́ и Го́спода,/ па́че сло́ва ро́ждши Разо́ршаго а́дова ца́рствия,/ Его́же приле́жно моли́, Отрокови́це,/ Вы́шняго Ца́рствия сподо́бити вся, чту́щия Тя. И ны́не и при́сно и во ве́ки веко́в. Ами́нь. Избавля́ющи яви́ся, Пречи́стая, от страсте́й наведе́ния 12 и бесо́в лука́вых Твоего́ раба́,/ стяжа́вшаго Тя держа́вное заступле́ние и Предста́тельницу Непосты́дную. Песнь 6 Ирмос: Моли́тву пролию́ ко Го́споду/ и Тому́ возвещу́ печа́ли моя́,/ я́ко зол душа́ моя́ испо́лнися/ и живо́т мой а́ду прибли́жися,/ и молю́ся, я́ко Ио́на:/ от тли, Бо́же, возведи́ мя. Припев: Пресвята́я Богоро́дице, спаси́ на́с. Преукраше́на сла́вою Боже́ственною,/ Честна́я Цари́ца Сы́ну Своему́ и Бо́гу предстои́т,/ спасе́ние душе́вное нам прося́щи. Припев: Пресвята́я Богоро́дице, спаси́ на́с. Благоде́теля ро́ждши, до́брых Вино́внаго,/ благодея́ния бога́тство всем источи́:/ вся бо мо́жеши,/ я́ко си́льнаго в кре́пости Христа́ ро́ждши, Богоблаже́нная. Припев: Пресвята́я Богоро́дице, спаси́ на́с. Да прии́дет ны́не на ны держа́вная Твоя́ дла́нь, Влады́чице,/ и ча́емыя челове́ческия ско́рби да изба́вит нас. Припев: Пресвята́я Богоро́дице, спаси́ на́с. Влады́чице, Ма́ти Изба́вителя,/ приими́ моли́твы Твои́х непотре́бных раб,/ и́мже возда́ждь избавле́ние грехо́в/ и богоуго́дныя жи́зни прия́тное исправле́ние. Припев: Пресвята́я Богоро́дице, спаси́ на́с. Цари́ца еси́ всех еди́на, Бо́гу, Богороди́тельнице Чи́стая,/ святы́й престо́л и пала́та Христа́ Бо́га,/ Его́же моли́ о чту́щих честну́ю ико́ну Твою́,/ пода́ти грехо́в оставле́ние. Сла́ва Отцу́ и Сы́ну и Свято́му Ду́ху. Раб, ны́не прихожду́ к Тебе́, Ма́тери всех Бо́га,/ от всех изба́витися напа́стей моля́ся./ Но, о Богороди́тельнице,/ ца́рствующи с Сыно́м Твои́м, христиа́нский род сохраня́й. И ны́не и при́сно и во ве́ки веко́в. Ами́нь. Держа́вный Твой покро́в, Богороди́тельнице,/ я́ко Засту́пница су́щи,/ да́ждь ми вско́ре, напа́стьми одержи́му,/ и невре́дна от сих сохрани́ мя. Кондак, глас 8 Взбра́нней Воево́де, Засту́пнице на́шей Держа́вней,/ пе́сни благода́рственныя прино́сим о дарова́нии нам ико́ны Ея́ святы́я,/ е́юже огражда́еми, ничесо́же устраши́мся,/ не от челове́к бо спасе́ние на́ше,/ но Преблагослове́нныя Влады́чицы милосе́рдием./ Те́мже дне́сь ра́дуемся и пра́зднуем све́тло,/ я́ко прии́де Держа́вная на стра́жу земли́ Своея́. Песнь 7 Ирмос: От Иуде́и доше́дше, о́троцы/ в Вавило́не иногда́/ ве́рою Тро́йческою пла́мень пе́щный попра́ша, пою́ще:/ отце́в Бо́же, благослове́н еси́.От Иуде́и доше́дше, о́троцы/ в Вавило́не иногда́/ ве́рою Тро́йческою пла́мень пе́щный попра́ша, пою́ще:/ отце́в Бо́же, благослове́н еси́. Припев: Пресвята́я Богоро́дице, спаси́ на́с. Богооте́ц у́бо Дави́д Твою́ сла́ву напису́ет, Де́во,/ и Тебе́ тва́рей Цари́цу я́вленно проро́чествует,/ предстоя́щую одесну́ю, Всенепоро́чная, Бо́га оте́ц на́ших. Припев: Пресвята́я Богоро́дице, спаси́ на́с. Цари́ца Де́ва, злато́ю оде́ждою украше́на,/ Сы́ну Царю́ ны́не предстои́т,/ Я́же без сравне́ния А́нгел превы́шши. Припев: Пресвята́я Богоро́дице, спаси́ на́с. Ро́дове Тя вси блажа́т, Чи́стая,/ Иису́с бо еди́н, рожде́йся от Твоея́ утро́бы,/ Той, я́ко ве́сть, сотвори́, Отрокови́це Де́во, с Тобо́ю вели́чия,/ Его́же моли́ спасти́ся ста́ду и лю́дем Твои́м. Припев: Пресвята́я Богоро́дице, спаси́ на́с. Цари́ца всех, прише́дши свято́ю ико́ною Свое́ю,/ Небе́сный кров на сла́ву нам уста́ви,/ и́мже спаса́емся от неви́димых враг нахожде́ния, к Сы́ну Ей вопию́ще:/ благослове́н Бог оте́ц на́ших. Сла́ва Отцу́ и Сы́ну и Свято́му Ду́ху. Я́ко жениха́ Тя кра́сный черто́г,/ я́ко Влады́чню пала́ту одушевле́нну,/ я́ко порфи́ру всезлату́ю,/ я́ко красне́йшее оби́телище Христо́во,/ Влады́чице всех, умоля́ющаго Тя спаси́ мя. И ны́не и при́сно и во ве́ки веко́в. Ами́нь. Отча́явся по́мощи вся́кия,/ к Тебе́, Пренепоро́чная, Держа́вной Храни́тельнице и Покро́ву, притеко́х:/ не отри́ни у́бо мене́ от Боже́ственнаго покро́ва Твоего́. Песнь 8 Ирмос: Царя́ Небе́снаго,/ Его́же пою́т во́и А́нгельстии,/ хвали́те и превозноси́те во вся ве́ки. Припев: Пресвята́я Богоро́дице, спаси́ на́с. Кто не воспое́т Тя от земноро́дных, Нескве́рная, Чи́стая Голуби́це,/ Ты бо родила́ еси́ нам Свет вели́кий, жи́зни бога́тство, Иису́са Спа́са,/ Его́же пое́м, хва́ляще я́ко Го́спода, и превозно́сим во вся ве́ки. Припев: Пресвята́я Богоро́дице, спаси́ на́с. Тебе́, све́тлому Изба́вителя све́щнику,/ прекра́сный спле́тше лик, пое́м:/ вся дела́ Госпо́дня, по́йте непреста́нно Де́ву Мари́ю/ и превозноси́те Ю во ве́ки. Припев: Пресвята́я Богоро́дице, спаси́ на́с. Тро́ицы яви́лася еси́ честны́й храм,/ в Не́мже Оте́ц – любо́вию, Сын – пло́тию,/ Дух Святы́й наше́ствием оби́тель Себе́ сотвори́, Еди́н и́стинный Бог наш,/ Его́же умоли́ о нас, Предста́тельнице всемо́щная. Припев: Пресвята́я Богоро́дице, спаси́ на́с. Позлаще́нною ри́зою, я́коже Цари́цу, Сын Твой просвети́в заре́ю Ду́ха,/ Тебе́ одесну́ю Себе́ поста́ви, Пречи́стая,/ Его́же превозно́сим во вся ве́ки. Сла́ва Отцу́ и Сы́ну и Свято́му Ду́ху. Ты – две́рь Царя́ Небе́с и храм сла́вы Его́, Де́во Всепе́тая,/ отве́рзи нам две́ри милосе́рдия/ и введи́ ны моли́твами Твои́ми в жили́ще Небе́сныя сла́вы. И ны́не и при́сно и во ве́ки веко́в. Ами́нь. Ма́ти Пресвята́я,/ Ея́же моли́твами род челове́ческий при́сно соблюда́ется,/ поклони́ся Отцу́, умоли́ Сы́на, призови́ Свята́го Ду́ха/ и уми́лостиви Бо́га, в Тро́ице Еди́наго, о мно́жестве грехо́в на́ших,/ да, Тобо́ю поми́ловани бы́вше,/ Творца́ и Тебе́ благослови́м отны́не и до ве́ка. Песнь 9 Ирмос: Вои́стинну Богоро́дицу,/ Тя испове́дуем,/ спасе́ннии Тобо́ю, Де́во Чи́стая,/ с Безпло́тными ли́ки Тя велича́юще. Припев: Пресвята́я Богоро́дице, спаси́ на́с. Рече́м Твои́х усте́н, Всечи́стая, после́дующе, Тя ублажа́ем,/ с Тобо́ю бо вои́стинну вели́чия сотвори́вый Госпо́дь возвели́чи Тя/ и и́стинную Бо́жию Ма́терь, рожде́йся из чре́ва Твоего́, показа́. Припев: Пресвята́я Богоро́дице, спаси́ на́с. Приклони́вый Небеса́ в Тя, Де́во, всели́ся/ и ны́не на моли́тву Твою́ зрит, Богоро́дице Чи́стая,/ Твое́, Цари́це, исполня́я проше́ние,/ Ему́же за ны усе́рдно помоли́ся,/ на Тя бо наде́емся, Благослове́нная. Припев: Пресвята́я Богоро́дице, спаси́ на́с. Святы́х Свята́я, Де́во Чи́стая,/ святы́х Свята́го родила́ еси́,/ всех освяща́ющаго, Христа́ Изба́вителя./ Те́мже Тя, Цари́цу и Влады́чицу всех, я́ко Ма́терь Зижди́теля тва́рей пропове́дуем. Припев: Пресвята́я Богоро́дице, спаси́ на́с. Предъизбра́нная от всех родо́в, услы́ши глас наш/ и да́руй проще́ние душ на́ших, избавле́ние страсте́й и боле́зней,/ вся могу́щая, я́ко Ма́ти Бо́жия. Сла́ва Отцу́ и Сы́ну и Свято́му Ду́ху. Цари́цу Де́ву Тя пропове́дует Дави́д, Пречи́стая, Чи́стую,/ те́мже мо́лим Тя:/ Небе́снаго ны Ца́рствия сотвори́ насле́дники, да ублажа́ем Тя. И ны́не и при́сно и во ве́ки веко́в. Ами́нь. Приими́ е́же от души́ моле́ние мое́, Пречи́стая Влады́чице,/ Я́же Бо́га ро́ждши пло́тию,/ к Тебе́ бо прибего́х, к держа́вней по́мощи,/ да не погрешу́ наде́жды моея́. Светилен Влады́чице, всех Влады́чица и всех вы́шшая,/ всех же превосходя́щая Го́рних во́инств,/ простри́ ру́ку держа́вну и сохрани́ мир,/ свяще́нники благослови́, Тебе́ священноде́йствующия,/ мона́хи же прости́, моля́щияся Тебе́,/ оте́чество на́ше соблюди́, Свята́я Богоро́дице./ И ны́не нас сподо́би ви́дети Небе́сное Ца́рство и ра́йскую две́рь,/ егда́ ся́дет Судия́ суди́ти вселе́нней/ во второ́м и Стра́шном Суди́лище, Влады́чице А́нгелов. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Да и́мя Твое́, Богоро́дице, на земли́ славосло́вится,/ И́же из Тебе́ просия́в гре́шником держа́вную наде́жду и сте́ну Тя дарова́,/ Тобо́ю бо вся́кое дыха́ние к Бо́гу притека́ет.

Яко солнце, днесь от земных недр возсияша/ честныя твоя мощи, святителю./ Землю же и воздух шествием твоим осветил еси/ и всех верных чудес богознаменьми облистал еси,/ чудотворец предивен и молитвенник к Богу о мире изящен явися./ Сего ради вопием ти:/ спасай нас теплым своим предстательством,/ яко ученик Божия благодати.

Минея, 6 Июля, Кано́н преподо́бным Глас 8 Песнь 1 Ирмос: Колесницегони́теля фарао́ня погрузи́/ чудотворя́й иногда́/ Моисе́йский жезл, крестообра́зно порази́в/ и раздели́в мо́ре,/ Изра́иля же беглеца́, пешехо́дца спасе́,/ песнь Бо́гови воспева́юща. Припев: Вси́ святи́и земли́ Ра́донежския, моли́те Бо́га о на́с. Ка́ко восхва́лим вас, преподо́бнии Се́ргие, Ни́коне/ и вси чудотво́рцы, во оби́тели Тро́ицы Пресвяты́я подвиза́вшиися/ и мир весь житие́м свои́м равноа́нгельным удиви́вшии? Припев: Вси́ святи́и земли́ Ра́донежския, моли́те Бо́га о на́с. Сам сый до́брая о́трасль от блага́го ко́рене роди́телей твои́х, блаже́нных Кири́лла и Мари́и,/ во святе́й схи́ме сконча́вшися, Богому́дре Се́ргие,/ восприя́л еси́ на ра́мо многоско́рбный Крест мона́шескаго жития́,/ не обину́яся после́дова Христу́. Припев: Вси́ святи́и земли́ Ра́донежския, моли́те Бо́га о на́с. Пусты́нное житие́ избра́в,/ насади́л еси́ духо́вный вертогра́д, Богоно́се о́тче Се́ргие,/ и воспита́л еси́ мно́жество и́ноков добронра́вных,/ и́миже просла́вися вели́кое Имя Святы́я Тро́ицы. Сла́ва Отцу́ и Сы́ну и Свято́му Ду́ху. Процвете́, я́ко фи́никс, оби́тель Живонача́льныя Тро́ицы/ мно́гими труды́ твои́ми, преблаже́нне о́тче Се́ргие,/ да спаса́ются зде ре́вностно ученицы́ твои́. И ны́не и при́сно и во ве́ки веко́в. Ами́нь. Богородичен: Ма́ти Бо́га Истиннаго,/ приими́ мольбы́ рабо́в Твои́х, и́щущих Твоего́ заступле́ния,/ Ты бо еси́ приста́нище необурева́емое правосла́вных христиа́н. Песнь 3 Ирмос: Утвержде́й в нача́ле Небеса́ ра́зумом/ и зе́млю на вода́х оспова́вый,/ на ка́мени мя, Христе́, за́поведей Твои́х утверди́,/ я́ко несть свят, па́че Тебе́, Еди́не Человеколю́бче. Припев: Вси́ святи́и земли́ Ра́донежския, моли́те Бо́га о на́с. В час нощны́я моли́твы твоея́, Богохва́льне о́тче наш Се́ргие,/ бысть чу́дное явле́ние с Небесе́,/ зна́менующе бу́дущая о мно́жестве учени́к твои́х. Припев: Вси́ святи́и земли́ Ра́донежския, моли́те Бо́га о на́с. Ди́вныя пти́цы ра́йския, излете́вшия в луча́х све́та Небе́снаго,/ ви́дел еси́ в той час, преподо́бне о́тче Се́ргие,/ и слы́шал еси́ глас, свы́ше глаго́лющ тебе́ гряду́щая о ученице́х твои́х. Припев: Вси́ святи́и земли́ Ра́донежския, моли́те Бо́га о на́с. Я́ко кедр, и́же в Лива́не, умно́жишася сподви́жницы и ученицы́ твои́/ и просла́вишася в доброде́телех, Се́ргие Богоблаже́нне,/ подража́юще твоему́ житию́. Сла́ва Отцу́ и Сы́ну и Свято́му Ду́ху. Восприи́м ре́вность духо́вную, мно́ги по́двиги соверши́л еси́/ и те́ми Пресвяту́ю Тро́ицу просла́вил еси́,/ те́мже ны́не наслажда́ешися на Небеси́,/ зря Той добро́ту неизрече́нную, Се́ргие вели́кий. И ны́не и при́сно и во ве́ки веко́в. Ами́нь. Богородичен: Бо́га, воплоща́ема из Тебе́, зри́ще, Де́во,/ ужаса́хуся стра́хом и тре́петом Го́рния си́лы/ и я́ко су́щую Богоро́дицу Тя непреста́нно велича́ют. Седален, глас 4 Приидо́сте в дом Животвори́щия Тро́ицы, преподо́бнии отцы́,/ и обрето́сте безце́нный би́сер, Христа́,/ в пе́ниих, бде́ниих и поще́ниих мона́шескаго жития́ стяжа́вше благода́ть Его́,/ непреста́нно моли́те Всеми́лостиваго Спа́са о душа́х на́ших. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Тебе́, Ма́ти Бо́жия, ро́ди родо́в пою́т, сла́вят и поклоня́ются,/ изба́ви нас от вся́ких злых преткнове́ний вра́жиих,/ Твои́ бо есмы́ раби́, да не постыди́мся. Песнь 4 Ирмос: Ты моя́ кре́пость, Го́споди,/ Ты моя́ и си́ла,/ Ты мой Бог, Ты мое́ ра́дование,/ не оста́вль не́дра О́тча/ и на́шу нищету́ посети́в./ Тем с проро́ком Авваку́мом зову́ Ти:/ си́ле Твое́й сла́ва, Человеколю́бче. Припев: Вси́ святи́и земли́ Ра́донежския, моли́те Бо́га о на́с. Оста́вивше суету́ мирску́ю, возлюби́ли есте́ житие́ мона́шеское/ и до конца́ пре́дали есте́ себе́, я́ко о́вцы, послуша́нию и смире́нию,/ во о́браз Сладча́йшаго Христа́, Ни́коне и Михе́е Богоно́снии. Припев: Вси́ святи́и земли́ Ра́донежския, моли́те Бо́га о на́с. Ми́ра красоту́ презре́ли есте́/ и всели́лися есте́ во оби́тель Ра́донежскую,/ процве́тшую, я́ко сад ди́вный, многообра́зными ва́шими доброде́тельми,/ Васи́лие и Иа́кове, отцы́ всеблаже́ннии. Припев: Вси́ святи́и земли́ Ра́донежския, моли́те Бо́га о на́с. Воздержа́нием, коленопреклоне́нием и слеза́ми/ угаси́ли есте́ душепа́губныя стра́сти в себе́, отцы́ пресла́внии Они́симе и Елиссе́е,/ и просла́вили есте́ Христа́ в душа́х и телесе́х ва́ших. Сла́ва Отцу́ и Сы́ну и Свято́му Ду́ху. Земны́я пре́лести отве́ргше,/ благода́тию Бо́жиею стори́цею преумно́женный плод духо́вный обрели́ есте́,/ научи́те у́бо и нас пра́вилам ве́ры и о́бразу и́стиннаго жития́,/ преподо́бнии Си́моне архимандри́те и игу́мене Митрофа́не. И ны́не и при́сно и во ве́ки веко́в. Ами́нь. Богородичен: Еди́н от Святы́я Тро́ицы воплоти́ся от Тебе́, Пречи́стая,/ да спасе́т весь род челове́ческий от рабо́ты вра́жия и ве́чнаго осужде́ния. Песнь 5 Ирмос: Вску́ю мя отри́нул еси́/ от лица́ Твоего́, Свете Незаходи́мый,/ и покры́ла мя есть чужда́я тьма, окая́ннаго,/ но обрати́ мя и к све́ту за́поведеи́ Твои́х/ пути́ моя́ напра́ви, молю́ся. Припев: Вси́ святи́и земли́ Ра́донежския, моли́те Бо́га о на́с. Мно́гими боле́зньми, непреста́нными моли́твами/ и духо́вным трезве́нием тьму бесо́вскую отгна́вше,/ собесе́дники А́нгелов яви́лися есте́,/ Исаа́кие и Мака́рие, отцы́ прехва́льнии. Припев: Вси́ святи́и земли́ Ра́донежския, моли́те Бо́га о на́с. Вои́стинну христоподража́тельне пожи́ли есте́, преподо́бнии отцы́ Си́моне и Илие́,/ плоть свою́ со страстьми́ и похотьми́ распя́вше,/ те́мже помози́те нам, немощны́м, преодоле́ти сопроти́вныя си́лы лука́вых духо́в. Припев: Вси́ святи́и земли́ Ра́донежския, моли́те Бо́га о на́с. Возде́вше ру́ки горе́,/ сотвори́те усе́рдное моле́ние и хода́тайство пред Всеми́лостивым Спа́сом/ о всех чту́щих ва́шу всечестну́ю па́мять,/ преподо́бнии Сильве́стре, Се́ргие и Па́вле,/ на реце́ Обно́ре подвиза́вшиися. Сла́ва Отцу́ и Сы́ну и Свято́му Ду́ху. Те́плое предста́тельство ко Святе́й Тро́ице иму́ще,/ не забу́дите убо́гих рабо́в, с ве́рою призыва́ющих вас в час лю́тыя напа́сти,/ святи́и Фео́доре и Па́вле Росто́встии/ и сро́дниче по пло́ти Се́ргиев, святи́телю о́тче Фео́доре. И ны́не и при́сно и во ве́ки веко́в. Ами́нь. Богородичен: Все на́ше упова́ние на Тя возложи́хом, Де́во Мари́е,/ при́зри на ны, лю́ди согреши́вшия,/ с ве́рою ча́ющия от Тебе́ заступле́ния и спасе́ния. Песнь 6 Ирмос: Очи́сти мя, Спа́се,/ мно́га бо беззако́ния моя́,/ и из глубины́ зол возведи́, молю́ся,/ к Тебе́ бо возопи́х, и услы́ши мя,/ Бо́же спасе́ния моего́. Припев: Вси́ святи́и земли́ Ра́донежския, моли́те Бо́га о на́с. Прии́мше Госпо́дне благослове́ние и благода́тию Ду́ха Всесвята́го укрепля́емии,/ преподо́бнии отцы́ Иа́кове Железнобо́ровский и Григо́рие Голу́твинский,/ насади́ли есте́ оби́тели, я́ко духо́вныя исто́чники, на земли́ Российстей. Припев: Вси́ святи́и земли́ Ра́донежския, моли́те Бо́га о на́с. Просла́влени бы́ша ва́шими по́двиги, отцы́ досточу́днии,/ Авраа́мие Га́лицкий и Мефо́дие Пе́шношский, пусты́ни непроходи́мыя,/ процве́тшия, я́ко кри́ни се́льнии, и источи́вшия ре́ки чуде́с. Припев: Вси́ святи́и земли́ Ра́донежския, моли́те Бо́га о на́с. Слеза́ми, посто́м и моли́твою созда́вше оби́тели святы́я на земли́,/ ны́не ве́чно ра́дуетеся во оби́телех Отца́ Небе́снаго,/ святи́и Са́вво Стромы́нский и Лео́нтие Ду́бенский, му́жие добропобе́днии. Сла́ва Отцу́ и Сы́ну и Свято́му Ду́ху. Обогати́ли есте́ духо́вным сокро́вищем селе́ния своя́,/ и просла́вишася ва́шими доброде́тельми зе́мли Росто́вская и Обно́рская,/ Киржа́чская и Стромы́нская, Стороже́вская и Коло́менская/ и ины́я от преде́л мно́гих. И ны́не и при́сно и во ве́ки веко́в. Ами́нь. Богородичен: Влады́чице Богоро́дице, отве́рзи нам две́ри милосе́рдия Твоего́,/ Ты бо еси́ спасе́ние ро́да христиа́нскаго. Кондак, глас 8 Прииди́те, вси концы́ оте́чества на́шего,/ просла́вим святы́й лик уго́дников Ра́донежских,/ я́ко зве́зды, украси́вших не́бо церко́вное по́двиги земна́го жи́тельства,/ тех бо предста́тельством те́плым ко Го́споду/ мно́гия нам ми́лости Его́ низпосыла́ются,/ бе́дствия отгоня́ются и злы́я стра́сти укроща́ются./ И́хже всесвяту́ю па́мять ны́не пра́зднующе, та́ко возопии́м:/ ра́дуйтеся, Се́ргие и Ни́коне и вси Ра́донежстии чудотво́рцы,/ усе́рднии служи́телие Живонача́льныя Тро́ицы. Икос Мирску́ю честь и сла́ву презре́вше,/ еди́ному Христу́ вожделе́ли есте́ порабо́тати,/ преподо́бнии отцы́ на́ши Се́ргие, Ни́коне и вси святи́и,/ в земли́ Ра́донежстей и о́крест ея́ просия́вшии,/ зде досто́йно и пра́ведно Живонача́льней Тро́ице послужи́ли есте́./ Те́мже и всели́ся в вас Дух Пресвяты́й и умудри́ позна́нием пачеесте́ственным,/ наста́вите у́бо нас и́стинней ве́ре и житию́,/ да сподо́бимся неосужде́нно призыва́ти Тро́ицу Единосу́щную и Неразде́льную./ Те́мже, ублажа́юще ны́не ва́шу честну́ю па́мять, непреста́нно зове́м:/ ра́дуйтеся, отцы́ пресла́внии,/ учи́телие на́ши и служи́телие неотсту́пнии Святы́я Тро́ицы. Песнь 7 Ирмос: Бо́жия снизхожде́ния/ огнь устыде́ся в Вавило́не иногда́./ Сего́ ра́ди о́троцы в пещи́, ра́дованною ного́ю,/ я́ко во цве́тннце, лику́юще, поя́ху:/ благослове́н еси́, Бо́же оте́ц на́ших. Припев: Вси́ святи́и земли́ Ра́донежския, моли́те Бо́га о на́с. Дости́гше Го́рних черто́гов,/ та́мо со А́нгелы славосло́вите Го́спода Вседержи́теля, пою́ще:/ отце́в Бо́же, благослове́н еси́. Припев: Вси́ святи́и земли́ Ра́донежския, моли́те Бо́га о на́с. Моли́теся непреста́нно за ны,/ де́ти ва́ша духо́вная, с ве́рою пою́щая:/ отце́в Бо́же, благослове́н еси́. Припев: Вси́ святи́и земли́ Ра́донежския, моли́те Бо́га о на́с. Зря́ще с Небесе́ на призыва́ющия вас в ско́рбех христиа́ны,/ возниспосли́те по́мощь пою́щим:/ отце́в Бо́же, благослове́н еси́. Сла́ва Отцу́ и Сы́ну и Свято́му Ду́ху. Со Христо́м ца́рствуете несконча́емо,/ те́мже умоли́те Го́спода сил спасти́ ны, пою́щия:/ отце́в Бо́же, благослове́н еси́. И ны́не и при́сно и во ве́ки веко́в. Ами́нь. Богородичен: Простри́ ру́це Твои́, Преблагослове́нная Де́во, к Сы́ну Твоему́, Христу́ Бо́гу на́шему, моля́щи усе́рдно,/ да поми́лует нас, гре́шных, по вели́цей Свое́й ми́лости. Песнь 8 Ирмос: Седмери́цею пещь/ халде́йский мучи́тель/ Богочести́вым неи́стовно разжже́,/ си́лою же лу́чшею спасе́ны, сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки. Припев: Вси́ святи́и земли́ Ра́донежския, моли́те Бо́га о на́с. Досто́йно и пра́ведно на земли́ житие́ сконча́вше,/ Ца́рству нетле́нных благ приобщи́лися есте́, пою́ще:/ да благослови́т тварь вся Го́спода/ и превозно́сит во вся ве́ки. Припев: Вси́ святи́и земли́ Ра́донежския, моли́те Бо́га о на́с. Вельми́ прославля́ет ны́не ва́ше равноа́нгельное житие́/ Це́рковь Христо́ва, воспева́ющи:/ да благослови́т тварь вся Го́спода/ и превозно́сит во вся ве́ки. Припев: Вси́ святи́и земли́ Ра́донежския, моли́те Бо́га о на́с. До́брии и ве́рнии предста́ли есте́ на Небесе́х раби́ Христо́ви,/ я́ко умно́жили есте́ вруче́нныя вам тала́нты духо́вныя,/ те́мже благода́рне воспева́ете:/ да благослови́т тварь вся Го́спода/ и превозно́сит во вся ве́ки. Сла́ва Отцу́ и Сы́ну и Свято́му Ду́ху. Насле́довавше блаже́нство неопи́санное,/ научи́те нас досто́йно жи́ти во вся́ком благоче́стии и чистоте́, пою́щих:/ да благослови́т тварь вся Го́спода/ и превозно́сит во вся ве́ки. И ны́не и при́сно и во ве́ки веко́в. Ами́нь. Богородичен: Неусыпа́емую в моли́твах Засту́пницу/ обре́те Тя, Непоро́чная Де́во, челове́ческий род./ Те́мже, ра́дующеся, пое́м:/ да благослови́т тварь вся Го́спода/ и превозно́сит во вся ве́ки. Песнь 9 Ирмос: Ужасе́ся о сем Не́бо,/ и земли́ удиви́шася концы́,/ я́ко Бог яви́ся челове́ком пло́тски/ и чре́во Твое́ бысть простра́ннейшее Небе́с./ Тем Тя, Богоро́дицу,/ А́нгелов и челове́к чинонача́лия велича́ют. Припев: Вси́ святи́и земли́ Ра́донежския, моли́те Бо́га о на́с. Я́ко иму́щии дерзнове́ние ко Святе́й Тро́ице, Богоно́снии отцы́,/ ско́ро предвари́те ми́лостию свое́ю всех чту́щих всечестну́ю па́мять ва́шу. Припев: Вси́ святи́и земли́ Ра́донежския, моли́те Бо́га о на́с. Услы́шите покая́нный глас моле́ния на́шего,/ да изба́вимся ва́шим кре́пким заступле́нием от мно́жества зол и прегреше́ний. Припев: Вси́ святи́и земли́ Ра́донежския, моли́те Бо́га о на́с. Исцели́те на́ша неду́ги и я́звы грехо́вныя, отцы́ Богохва́льнии,/ вам бо свы́ше даде́ся благода́ть врачева́ти боле́зни душе́вныя и теле́сныя. Сла́ва Отцу́ и Сы́ну и Свято́му Ду́ху. Земля́ Росси́йская ны́не ликовству́ет,/ ублажа́ющи ва́шу пречестну́ю па́мять, отцы́ всесла́внии,/ те́мже приими́те на́шу песнь хвале́бную. И ны́не и при́сно и во ве́ки веко́в. Ами́нь. Богородичен: Родила́ еси́ Безле́тнаго Сы́на, Пречи́стая, плоть на́шу прие́мшаго,/ кро́вию Свое́ю на Кресте́ омы́вшаго от грехо́в па́дшаго Ада́ма,/ умоли́ у́бо Спа́са на́шего изба́вити нас от ве́чныя сме́рти. Светилен Никто́же мо́жет из земноро́дных изрещи́ подвиго́в ва́ших тяготу́/ и уразуме́ти си́лу да́нныя вам от Бо́га благода́ти,/ те́мже при́зрите с высоты́ Небе́сныя, преподо́бнии отцы́, на нас,/ и́щущих ва́шея благосе́рдныя по́мощи. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Немо́лчно воспева́ем Тя, Мари́е Богоневе́стная,/ а́нгельскими глаго́лы велича́юще:/ ра́дуйся, Благода́тная, Госпо́дь с Тобо́ю.

Минея, 12 Января, Канон Глас 2 Песнь 1 Ирмос: Гряди́те, лю́дие, пои́м пе́снь Христу́ Бо́гу, разде́льшему мо́ре и наста́вльшему лю́ди, я́же изведе́ из рабо́ты еги́петския, я́ко просла́вися. Припев: Святи́телю, о́тче Са́вво, моли́ Бо́га о на́с. Све́т от Све́та, Христе́ Бо́же, от Отца́ пре́жде ве́к рожде́йся и в нача́ле Сы́й со Отце́м и Ду́хом, мра́к души́ моея́ отгна́в, озари́ у́м мо́й, молю́ся, я́ко да возмогу́ пе́ти Твоего́ уго́дника, Са́вву свяще́ннаго. Припев: Святи́телю, о́тче Са́вво, моли́ Бо́га о на́с. А́ще и челове́к еси́, о́тче, естество́м, но а́нгельски на земли́ пожи́л еси́, десна́го из ю́ности пути́ е́мься, целому́дрия рачи́тель бы́в, Ду́ха Свята́го честно́е оби́телище, Са́вво всесвяще́нне, яви́лся еси́ Сла́ва Отцу́ и Сы́ну и Свято́му Ду́ху. Возлюби́в му́дрости нача́ло — стра́х Бо́жий и за́поведем Его́ при́сно поуча́яся, дре́во насади́лся еси́ при исхо́дищих во́д духо́вных, от ни́хже, о́тче, напая́емь, пло́д Христу́, Са́вво, прине́слся еси́. И ны́не и при́сно и во ве́ки веко́в. Ами́нь. Богородичен: Услы́ша Е́ва прама́ти, Чи́стая: в печа́лех роди́ши ча́да. Ты́ же, Де́во, услы́шала еси́: Госпо́дь с Тобо́ю, ра́дуйся! И ра́дованным гла́сом, Богоневе́сто, печа́ль прама́тере потреби́ла еси́. Песнь 3 Ирмос: На ка́мени мя́ ве́ры утверди́в, разшири́л еси́ уста́ моя́ на враги́ моя́, возвесели́бося ду́х мо́й, внегда́ пе́ти: не́сть свя́т, я́коже Бо́г на́ш, и не́сть пра́веден, па́че Тебе́, Го́споди. Припев: Святи́телю, о́тче Са́вво, моли́ Бо́га о на́с. Презре́в ни́жняя, я́ко попира́емая, и любо́вь роди́телей преоби́дев, пустыннолю́бно Христа́ взыска́л еси́, Его́же мече́м любве́ уязви́в ду́шу твою́, Того́ любя́ и Того́ ища́ ненасыща́емыя красоты́. Припев: Святи́телю, о́тче Са́вво, моли́ Бо́га о на́с. О все́х су́щих на земли́ неради́в, звере́й лови́твою у роди́телей испроси́вся, пусты́ню, о́тче, пости́гл еси́, иде́же мно́гим поще́нием, ско́рым же бде́нием и моли́твами душегуби́тельныя зве́ри — стра́сти умертви́л еси́. Сла́ва Отцу́ и Сы́ну и Свято́му Ду́ху. Христа́, на́с ра́ди смири́вшагося во́лею до ра́бия о́браза, возлюби́в смире́ние, и́мже высо́к бы́в, го́рдаго смири́л еси́ и во пло́ти мно́гим воздержа́нием Тро́ицы до́м благооби́телен, Са́вво свяще́нне, удосто́ился еси́. И ны́не и при́сно и во ве́ки веко́в. Ами́нь. Богородичен: Во ине́х жена́х ма́ти, до́ндеже де́ва, не позна́ся, ни ма́ти по рождестве́ де́вствовати сподо́бися, на Тебе́ же, Де́во Богома́ти, обоя́ сбы́шася. Те́м весе́лием ду́ха воспева́ю: не́сть непоро́чны, па́че Тебе́, Влады́чице. Седален, глас 8 Па́влово насажде́ние, и Аполло́сово прие́мый напое́ние, и ва́шея ве́ры насажде́ние, и уче́нием напое́ние, вся́ возраща́яй Бо́г прия́л е́сть. Люде́й ва́ших благоче́стия ве́рою, моли́твами ва́шими возрасти́в, умно́жи, от Того́ я́ко ве́рнии раби́ и де́латели разу́мнии трудо́в возме́здия досто́йно прия́ли есте́, Симео́не преподо́бне, Са́вво свяще́нне, богоно́снии отцы́, па́стырие и учи́телие, Первопа́стыря и Учи́теля Христа́ моли́те ста́до ва́ше в ми́ре сохрани́ти и спасти́ ду́ши на́ша. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: О Тебе́ ра́дуется, Благода́тная, вся́кая тва́рь, а́нгельский собо́р и челове́ческий ро́д, освяще́нный хра́ме и раю́ слове́сный, де́вственная похвало́, из Нея́же Бо́г воплоти́ся, и Младе́нец бы́сть, пре́жде ве́к Сы́й Бо́г на́ш: ложесна́ бо Твоя́ престо́л сотвори́ и чре́во Твое́ простра́ннее небе́с соде́ла. О Тебе́ ра́дуется, Благода́тная, вся́кая тва́рь, сла́ва Тебе́. Песнь 4 Ирмос: Пою́ Тя, слу́хом бо, Го́споди, услы́шах и ужасо́хся: до мене́ бо и́деши, мене́ ища́, заблу́ждшаго. Те́м мно́гое Твое́ снизхожде́ние, е́же на мя́, прославля́ю, Многоми́лостиве. Припев: Святи́телю, о́тче Са́вво, моли́ Бо́га о на́с. А́нгельскому житию́ ревнова́в, влады́чествующа отца́ оста́вив, горы́ Афо́на дости́гл еси́. Отону́дуже поще́нием и моли́твами к мы́сленному Восто́ку, Христу́, восте́кл еси́ и от Того́ со́лнце за́падным возсия́л еси́. Припев: Святи́телю, о́тче Са́вво, моли́ Бо́га о на́с. Любому́дрием мо́ре жите́йское испыта́в и позна́в су́етства глубину́, бога́тство и сие́, я́ко гни́ло, отве́ргл еси́, словеса́ же Христо́ва избра́в, в сосу́де се́рдца твоего́ скры́л еси́ и о́ная, я́ко честна́я, изво́лил еси́ храни́ти. Припев: Святи́телю, о́тче Са́вво, моли́ Бо́га о на́с. И́же в гора́х тесноживу́щия босы́ми нога́ми обходя́, преподо́бне, и си́х те́плыми хле́бы насыща́я, те́плыя и́х приима́л еси́ моли́твы и от все́х ко Христу́ поуче́ньми восхожде́ния в се́рдцы твое́м полага́л еси́ Сла́ва Отцу́ и Сы́ну и Свято́му Ду́ху. Ты́ ро́ждшаго тя́ пло́тию Ду́хом породи́л еси́, увеща́в его́ влады́чество, све́рстницу же и ча́да оста́вити, и́же, я́ко Авраа́м из оте́чества на зе́млю чу́жду, к тебе́, о́тче, в пусты́ню пресе́льник и спо́стник бы́сть. И ны́не и при́сно и во ве́ки веко́в. Ами́нь. Богородичен: И́стинно Тя́ се́нь свиде́тельствова, многоразли́чно образу́юща, я́ве показу́ющи воплоще́ннаго из Тебе́ Еди́наго от Тро́ицы, Пречи́стая, неизме́нно, Богома́ти Влады́чице, и ми́р обно́вльша. Песнь 5 Ирмос: Просвеще́ние во тме́ лежа́щих, спасе́ние отча́янных, Христе́ Спа́се мо́й, к Тебе́ у́тренюю, Царю́ ми́ра, просвети́ мя сия́нием Твои́м, ино́го бо ра́зве Тебе́ Бо́га не зна́ю. Припев: Святи́телю, о́тче Са́вво, моли́ Бо́га о на́с. Ра́зума твоего́ ре́вность Предве́дый ви́дев, пе́рваго тя́ па́стыря на за́паде лю́дем Свои́м устро́и, и́мже мы́сленнаго Восто́ка, Того́ вопло́щшася Сло́ва Христа́, пропове́дал еси́, ра́вна же Отцу́ и Ду́ху Свято́му сопресто́льна. Припев: Святи́телю, о́тче Са́вво, моли́ Бо́га о на́с. Авситиди́йскаго И́ова нра́вом вои́стинну, о́тче, подо́бяся, до́м тво́й отве́рст име́л еси́ и, язы́ка две́рь па́че ме́да сла́достию а́лчущим спасе́ние отверза́я, ду́ши испо́лнил еси́ слове́с а́нгельския пи́щи. Сла́ва Отцу́ и Сы́ну и Свято́му Ду́ху. Зако́ном Боже́ственным после́дуя, законополо́жник яви́лся еси́, архиере́й богоприя́тен, пра́вило изве́стнейшее, наста́вник заблу́ждших, свети́льник всесве́тел, оте́чество твое́ просвеща́я, Са́вво богому́дре. И ны́не и при́сно и во ве́ки веко́в. Ами́нь. Богородичен: Упра́ви у́м мо́й, Влады́чице, тружда́ющийся в пучи́не скорбе́й и потопля́емый наше́ствием тлетво́рных страсте́й, мене́ же спаси́, Богоро́дице, к Тебе́ прибега́ющаго, ины́я бо по́мощи, Чи́стая, ра́зве Тебе́, не зна́ю. Песнь 6 Ирмос: В бе́здне грехо́вней валя́яся, неизсле́дную милосе́рдия Твоего́ призыва́ю бе́здну: от тли́, Бо́же, мя́ возведи́. Припев: Святи́телю, о́тче Са́вво, моли́ Бо́га о на́с. Мра́ком е́реси покрыва́ема земля́ люде́й твои́х иногда́, ны́не Правосла́вия све́том светле́ется, ве́тхия пре́лести изме́ньшися, но́вый Изра́иль и лю́дие Бо́жии бы́вше, на и́стинный зако́н тобо́ю, богоно́се, наставля́еми. Припев: Святи́телю, о́тче Са́вво, моли́ Бо́га о на́с. Апо́стол я́ко, от Христа́ посла́ся и, сло́вом Ева́нгелия науча́я, су́щия в нощи́ неве́дения просвети́л еси́; исцеле́ния же творя́ и чудеса́ ве́лия и си́ми удивля́я, привле́кл еси́ к Нему́ ве́рою люде́й твои́х исполне́ния. Сла́ва Отцу́ и Сы́ну и Свято́му Ду́ху. Бо́льших ища́, лу́чшая жела́я, Иерусали́ма у́бо, Еги́пта же и Сина́я доше́д и вся́, та́мо су́щия, в пусты́нях обходя́, оби́льною руко́ю на все́х призира́я, и́хже моли́твами оте́чество твое́, Са́вво, обогати́л еси́. И ны́не и при́сно и во ве́ки веко́в. Ами́нь. Богородичен: Обветша́вшия ны́ го́рьким дре́ва пре́жде вкуше́нием и па́дшия поползнове́нием, Пречи́стая, обнови́ла еси́, Зижди́теля ро́ждши, Сло́во Ипоста́сное, Де́во Ма́ти Влады́чице. Кондак, глас 8 Я́ко первосвяти́теля вели́каго и апо́столов соо́бщника, Це́рковь прославля́ет тя́ люде́й твои́х, преподо́бне, но я́ко име́я дерзнове́ние ко Христу́ Бо́гу, моли́твами твои́ми от вся́ких на́с бе́д спаса́й, да зове́м ти́: ра́дуйся, о́тче Са́вво богому́дре. Икос Житие́м, я́ко а́нгел на земли́, о́тче, яви́лся еси́, челове́к бо сы́й естество́м, и безпло́тных чистоте́ уподо́бился еси́. Те́мже и похва́льная удивля́еши на́с зва́ти такова́я: ра́дуйся, отца́ благочести́ва прозябе́ние и ма́тере благогове́йны прижи́тие; ра́дуйся, моли́твами, богода́нне, и да́вшему тя́ измла́да после́довав; ра́дуйся, поще́ния све́тлый ра́сте, чистото́ю благоуха́нне; ра́дуйся, целому́дрия сто́лпе, и́мже вся́кая стра́сть попра́ся; ра́дуйся, смире́нием высо́кий, де́монов горды́ню низложи́вый; ра́дуйся, свети́льниче многосве́тлый, возведы́й ко Христу́ лю́ди твоя́; ра́дуйся, це́рквей воздви́жение и святи́телем освяще́ние; ра́дуйся, сиро́т пита́телю и ни́щим пода́телю благоутро́бный; ра́дуйся, апо́столов равноре́вностне ева́нгельским науче́нием; ра́дуйся, му́чеником сострада́льне стра́нствия хожде́нием; ра́дуйся, чудоде́лателю ди́вных о Бо́зе и ужа́сных чуде́с; ра́дуйся, похвало́ оте́честву твоему́, спаса́й пою́щих тя́. Ра́дуйся, о́тче Са́вво богому́дре. Песнь 7 Ирмос: Богопроти́вное веле́ние беззако́ннующаго мучи́теля высо́к пла́мень вознесло́ е́сть: Христо́с же простре́ Богочести́вым отроко́м ро́су духо́вную, Сы́й Благослове́н и Препросла́влен. Припев: Святи́телю, о́тче Са́вво, моли́ Бо́га о на́с. Жития́ твоего́ богоуго́дное зря́ исправле́ние, Прове́дец, я́ко все́х Бо́г, избра́в тебе́, сочта́ апо́стольскому ли́ку первосвяти́тель, богоно́се, и благода́тию просвети́ се́рдце твое́; ты́ же лю́ди твоя́ Тому́ просвети́л еси́ вопи́ти: благослове́н Бо́г и препросла́влен. Припев: Святи́телю, о́тче Са́вво, моли́ Бо́га о на́с. Ева́нгельских слове́с луча́ми лю́ди твоя́ разу́мно озари́в, от недосто́йнаго в досто́йное изве́л еси́ и изсо́хшая и́х сердца́ злове́рием о Бо́зе ве́рою плодови́та, Са́вво о́тче, возде́лал еси́. Сла́ва Отцу́ и Сы́ну и Свято́му Ду́ху. Ми́лостив у́бо и кро́ток, преподо́бен и беззло́бив, ти́х же и уве́тлив яви́лся еси́, я́коже Па́вел, о Христе́ похваля́я, рече́: тако́в на́м подоба́ше Архиере́й. Его́же моли́, Са́вво архиере́ю, в ми́ре сохрани́ти ста́до твое́. И ны́не и при́сно и во ве́ки веко́в. Ами́нь. Богородичен: Обновля́ются в Тебе́ зако́ны естества́: вы́ше естества́ бо, естество́м Непости́жнаго Бо́га, Де́во, Емману́ила пресла́вно, Чи́стая, родила́ еси́ в на́ше ве́рных возрожде́ние. Песнь 8 Ирмос: Свещено́сцы душе́ю, све́тлии, па́че сне́га пресия́юще, преподо́бнии о́троцы посреде́ пла́мене не опали́шася: вся́ бо вку́пе, ели́ка под тва́рию, к Бо́жии пе́сни себе́ созыва́юще, с ра́достию поя́ху: по́йте, дела́ Госпо́дня, Го́спода. Припев: Святи́телю, о́тче Са́вво, моли́ Бо́га о на́с. Во святы́х почива́ющаго Свята́го Ду́ха благода́тию, Са́вво святи́телю, лю́дем твои́м пропове́дал еси́ Сы́на собезнача́льна Отцу́ и сопресто́льна, Челове́ка бы́вша, челове́ком спасе́ние содева́юща, пою́щим: дела́ вся́, Го́спода по́йте и превозноси́те Его́ во ве́ки. Припев: Святи́телю, о́тче Са́вво, моли́ Бо́га о на́с. До́бре тече́ние соверши́в, к жела́емому концу́ преста́вился еси́, ра́дуяся. Те́мже светоно́сную твою́ па́мять Це́рковь твоя́, о́тче, соверша́ющи, созыва́ет преподо́бныя па́стыри же и учи́тели, и́же, просвеща́еми, пою́т: дела́ вся́, Го́спода по́йте и превозноси́те Его́ во ве́ки. Сла́ва Отцу́ и Сы́ну и Свято́му Ду́ху. Ага́ри ча́дом, пога́ным изма́ильтяном, внегда́ устремля́тися на ста́до твое́ возбрани́, святи́телю, моли́твами твои́ми, я́ко мно́го дерзнове́ние ко Христу́ стяжа́вый, да в ми́ре свяще́нную твою́ па́мять соверша́юще, ра́достно пое́м: дела́ вся́, Го́спода по́йте и превозноси́те Его́ во ве́ки. И ны́не и при́сно и во ве́ки веко́в. Ами́нь. Богородичен: Распя́тие и погребе́ние, и́же от Тебе́ небра́чно, Де́во, про́йде, претерпе́в на́с ра́ди и муче́ние, Его́же страсте́м ревну́юще, преподо́бнии крестови́дно муче́нием поще́ния Тому́, Чи́стая, после́доваша. Песнь 9 Ирмос: От Бо́га Бо́га Сло́ва, неизрече́нною му́дростию прише́дшаго обнови́ти Ада́ма, я́дию в тле́ние па́дшаго лю́те, от Святы́я Де́вы неизрече́нно воплоти́вшагося на́с ра́ди, ве́рнии, единому́дренно пе́сньми велича́ем. Припев: Святи́телю, о́тче Са́вво, моли́ Бо́га о на́с. Укра́шен, о́тче, вои́стинну доброде́тельными дея́нии яви́лся еси́, украси́ся светоно́сная твоя́ па́мять, благода́тными луча́ми на́с просвеща́ющи, в не́йже бе́д и напа́стей изба́витися твои́ми ко Христу́ моли́твами мо́лимся. Припев: Святи́телю, о́тче Са́вво, моли́ Бо́га о на́с. Израсти́вшее тя́ Христу́ оте́чество твое́ ра́дуется, и светле́ется Це́рковь Спа́са и Бо́га, це́ла и благоуха́нна иму́щи тя́, и па́мять твою́ дне́сь ра́достно пра́зднует. Е́йже возме́здие возда́в, святи́телю, вся́каго озлобле́ния изба́ви ю́. Сла́ва Отцу́ и Сы́ну и Свято́му Ду́ху. Моле́ний и пе́ний гла́сы услы́ши, иера́рше Христо́в, ве́ре же и любви́ вонми́ люде́й твои́х, и, я́ко отечестволю́бец, проти́вися, о́тче, ко гне́вом на́с вою́ющих, и свы́ше покро́в тво́й да́руй хва́лящим тя́. И ны́не и при́сно и во ве́ки веко́в. Ами́нь. Богородичен: Исцели́ла еси́ сокруше́ние, Всенепоро́чная, и ве́тхое страда́ние земны́х, Бо́га поро́ждши, Царя́ Христа́, поне́сшаго пло́тию неду́ги на́ша. Те́мже Тя́, вси́ ро́ди, Де́во Влады́чице, ублажа́юще, Богоневе́сто, велича́ем. Светилен Свети́льник тя́ многосве́тлый, святи́телю, зна́ем, моли́твы ча́до, пусты́ни воспита́ние, чистоты́ оби́телище, мона́хом спо́стника, ни́щим пита́теля, святи́телем све́тлость. Те́мже тя́, о́тче, ве́рнии, пое́м. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. От Восто́ка мы́сленнаго Со́лнца Христа́, светоза́рныя лучи́ возсия́вшия/ и мра́чную страну́ на за́паде люде́й свои́х просвети́вшия/ све́тлостию слове́с, и доброде́тели де́ланием,/ и ны́не не преста́йте Го́споду моля́щеся, и сия́ в ми́ре сохрани́ти,/ Са́вво и Симео́не, па́мять ва́шу почита́ющих.

Минея, 9 Июля, Кано́н Глас 1 Песнь 1 Ирмос: Песнь побе́дную пои́м вси Бо́гу,/ сотво́ршему ди́вная чудеса́ мы́шцею высо́кою/ и спа́сшему Изра́иля,/ я́ко просла́вися. Припев: Священному́чениче Панкрáтие, моли́ Бо́га о на́с. Пречестны́й ка́мень тя Це́рковь познава́ет, Панкра́тие,/ водруже́нием слове́с твои́х утвержда́ема при́сно,/ и сего́ ра́ди твою́ почита́ем па́мять днесь. Припев: Священному́чениче Панкрáтие, моли́ Бо́га о на́с. Обнови́л еси́ ра́лом твои́х Боже́ственных слове́с сердца́, Панкра́тие,/ олядене́вшая пе́рвее злове́рия мгло́ю,/ плодоно́сна показа́л еси́ я́ве ве́ры ра́ди. Сла́ва Отцу́ и Сы́ну и Свято́му Ду́ху. Еди́ницу тричи́сленную, соединя́ему в то́жде естество́, возвеща́я,/ погаси́л еси́ безбо́жия мглу и светолу́чными уче́нии лю́ди просвети́л еси́. И ны́не и при́сно и во ве́ки веко́в. Ами́нь. Богородичен: Из Тебе́ возсия́ Светода́вец, просвеща́я концы́,/ Иису́с Госпо́дь, Чи́стая Влады́чице,/ И́мже и́же во тьме и се́ни свет ви́деша. Песнь 3 Ирмос: Да утверди́тся се́рдце мое́ в во́ли Твое́й, Христе́ Бо́же,/ И́же над вода́ми не́бо утвержде́й второ́е/ и основа́вый на вода́х зе́млю, Всеси́льне. Припев: Священному́чениче Панкрáтие, моли́ Бо́га о на́с. Ду́хом утвержда́емь, лука́выя отгна́л еси́ ду́хи/ и трудо́м моли́тв хра́мы разори́л еси и́дольския,/ це́ркви возставля́я, досточу́дне. Припев: Священному́чениче Панкрáтие, моли́ Бо́га о на́с. Сечи́тельным сло́вом твои́м посе́кл еси́ злоче́стия, преподо́бне, те́рние/ и насади́л еси́ душа́м спаси́тельная уче́ния доброде́телей,/ оби́лующа плодо́в, свяще́нне. Сла́ва Отцу́ и Сы́ну и Свято́му Ду́ху. Сосу́д обре́т тя, Боже́ственнаго Ду́ха чи́стыя зари́ прие́млюща, верхо́вный учени́к,/ к за́паду посла́ безбо́жия изгна́ти мглу, всече́стне. И ны́не и при́сно и во ве́ки веко́в. Ами́нь. Богородичен: Тя, о́блак всесве́тел, ковче́г и ста́мну всезла́ту, простра́ннейшу небе́с,/ и превознесе́нную ле́ствицу, Неискусобра́чная Де́во,/ ве́рнии, ублажа́ем. Седален, глас 4 Благоче́стия побо́рник, победоно́сец, свяще́нне Панкра́тие, показа́вся,/ на Небесе́х со Безпло́тными ны́не предстои́ши Го́сподеви,/ моли́ спасти́ся нам. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Те́плое заступле́ние су́щим в беда́х, и Помо́щницу на́шу,/ и к Бо́гу премене́ние, Е́юже тли изба́вихомся,/ Богоро́дицу, ве́рнии, ублажа́ем. Песнь 4 Ирмос: Ду́хом прови́дя, проро́че Авваку́ме, Словесе́ воплоще́ние,/ пропове́дал еси́, вопия́:/ внегда́ прибли́житися ле́том, позна́ешися,/ внегда́ приити́ вре́мени, пока́жешися./ Сла́ва си́ле Твое́й, Го́споди. Припев: Священному́чениче Панкрáтие, моли́ Бо́га о на́с. Огне́м Уте́шителя огнедохнове́нен я́влься, лесть попали́л еси́, Панкра́тие му́дре,/ и, возсия́в, я́ко све́щник, в мо́ри потопля́емым неве́дения,/ ко приста́нищем Боже́ственныя вво́диши во́ли. Припев: Священному́чениче Панкрáтие, моли́ Бо́га о на́с. От Ка́мене некраесеко́ма Петр напои́вся и насы́щся,/ я́ко и́ну тя посыла́ет реку́, олядене́вшия напои́ти ду́ши, Богому́дре,/ и нече́стия ре́ки изсуши́ти тече́нием Боже́ственнаго пропове́дания. Припев: Священному́чениче Панкрáтие, моли́ Бо́га о на́с. Глаго́л тво́их веща́ние излия́ся, му́дре, сия́нием просвеща́емь ра́зума Христо́ва./ Те́мже и е́ллинская му́дрость обуи́ся, и зло́бы мудре́ц сожже́ся,/ му́чениче святи́телю Панкра́тие. Сла́ва Отцу́ и Сы́ну и Свято́му Ду́ху. Житие́ твое́, Боже́ственными блиста́яся добро́тами,/ вся омрачи́ де́монская стремле́ния и, разори́в тьму безбо́жия,/ сы́ны дне показа́, любо́вию твои́м уче́нием покори́вшияся. И ны́не и при́сно и во ве́ки веко́в. Ами́нь. Богородичен: Воплоща́ема Сло́ва во двою́ существу́, Отрокови́це, и хоте́нии,/ родила́ еси́, Чи́стая,/ восхо́ды сказа́вшаго пресла́вно спасе́ния ле́стию порабоще́нным,/ Чи́стая Де́во Всепе́тая. Песнь 5 Ирмос: Твой мир даждь нам,/ Сы́не Бо́жий:/ ино́го бо, ра́зве Тебе́, бо́га не зна́ем,/ и́мя Твое́ имену́ем,/ я́ко Бог живы́х и ме́ртвых еси́. Припев: Священному́чениче Панкрáтие, моли́ Бо́га о на́с. Чуде́с показа́нии улови́л еси́ лю́ди,/ сло́вом же тре́бища разори́л еси́/ и созда́л еси́, свяще́нне, церкве́й добро́ты во обновле́ние челове́ком. Припев: Священному́чениче Панкрáтие, моли́ Бо́га о на́с. Кровьми́ обагри́л еси́ оде́жду свяще́нную,/ кровь же де́монскую изсуши́л еси́/ и победоно́сец возше́л еси к Небеси́, побе́ды прии́м вене́ц. Сла́ва Отцу́ и Сы́ну и Свято́му Ду́ху. Разсе́деся пред лице́м твои́м храм и́дольский, дверь же отве́рзеся язы́ком,/ и даде́ся благода́ть Боже́ственная ве́рных в сердца́,/ священнотаи́нниче о́тче. И ны́не и при́сно и во ве́ки веко́в. Ами́нь. Богородичен: Я́ко дождь, во утро́бу Твою́ сни́де Христо́с, Чи́стая,/ и ту́чи изсуши́ многобо́жия, и изведе́ Богоразу́мия во́ду/ су́щим в пла́мени ле́стнем. Песнь 6 Ирмос: Проро́ка Ио́ну подража́я, вопию́:/ живо́т мой, Бла́же, свободи́ из тли/ и спаси́ мя, Спа́се ми́ра, зову́ща: сла́ва Тебе́. Припев: Священному́чениче Панкрáтие, моли́ Бо́га о на́с. Облагодати́в твой ум и просвети́в бога́тно,/ Иису́с, просвеще́ние всех и Бог,/ сло́вом твои́м безслове́сия лю́ди изба́ви. Припев: Священному́чениче Панкрáтие, моли́ Бо́га о на́с. Священноде́йствовав Бо́жие Ева́нгелие, му́дре,/ Боже́ственная уче́ния запеча́тствовал еси́ све́тло кро́вию,/ священнотаи́нниче му́чениче Панкра́тие. Сла́ва Отцу́ и Сы́ну и Свято́му Ду́ху. Кропле́ний и́дольских и крове́й скве́рных изба́вил еси́ лю́ди/ и, поже́рся, я́коже а́гнец, Панкра́тие,/ же́ртва жива́ Бо́гу прине́слся еси́. И ны́не и при́сно и во ве́ки веко́в. Ами́нь. Богородичен: Соуда́влена прило́ги непло́дных помы́шле́ний,/ возведи́ к све́ту спасе́ния и жи́зни, Всенепоро́чная,/ Я́же Спа́са Христа́ ро́ждшая. Кондак, глас 4 Све́тлая тавромени́ом, Панкра́тие, звезда́ показа́лся еси́/ и священнострада́лец яви́лся еси́ за Христа́,/ Ему́же ны́не предстоя́, моли́ за чту́щия тя, блаже́нне. Песнь 7 Ирмос: Су́щим в пещи́ отроко́м Твои́м, Спа́се,/ не прикосну́ся, ниже́ стужи́ огнь./ Тогда́ трие́, я́ко еди́неми усты́, поя́ху/ и благословля́ху, глаго́люще:/ благослове́н Бог оте́ц на́ших. Припев: Священному́чениче Панкрáтие, моли́ Бо́га о на́с. Кро́вию крести́лся еси́ твое́ю, Панкра́тие,/ пе́рвее в воде́ крести́в лю́ди,/ и ко Христу́ преше́л еси́, ра́дуяся;/ с ни́миже водворя́яся, прича́стием обожа́ешися све́тло при́сно, преблаже́нне. Припев: Священному́чениче Панкрáтие, моли́ Бо́га о на́с. Сла́ностию погруже́нныя лю́тых у́дицею твои́х слове́с возве́л еси́, свяще́нне,/ и моли́тв чи́стым одожде́нием му́тную изсуши́л еси́ злове́рия глубину́,/ священнотаи́нниче Христо́в. Сла́ва Отцу́ и Сы́ну и Свято́му Ду́ху. Ка́мень тя вои́стинну неразсе́дный основа́ние положи́/ и степе́нь недви́жим, свяще́нныя священнояви́тель Це́ркве,/ в не́йже сокруша́ется вся́ка зло́ба, му́дре, младе́нствующаго врага́. И ны́не и при́сно и во ве́ки веко́в. Ами́нь. Богородичен: Чисте́йшу еди́ну Тя обре́т, Всенепоро́чная, Сло́во, Пречи́стая, Бо́жие,/ из Твоего́ чре́ва поро́ждся, ве́рныя очища́ет скве́рны, Богоневе́сто,/ прибы́вшия нам от невоздержа́ния зол. Песнь 8 Ирмос: Его́же ужаса́ются А́нгели и вся во́инства,/ я́ко Творца́ и Го́спода,/ по́йте, свяще́нницы, просла́вите, о́троцы,/ благослови́те, лю́дие,/ и превозноси́те во вся ве́ки. Припев: Священному́чениче Панкрáтие, моли́ Бо́га о на́с. Огне́м изнуря́емь разли́чных искуше́ний, невреди́м пребы́л еси́/ и, изостри́в ум све́тлыми виде́нии, яви́лся еси́, му́дре, меч,/ посека́я вещь многобо́жия. Припев: Священному́чениче Панкрáтие, моли́ Бо́га о на́с. Лю́ди приводя́ в ра́зум Христо́в, зна́мения и чудеса́ твори́л еси́ яве́,/ предглаго́ля хотя́щая бы́ти, я́ко проро́к Бо́жий,/ Уте́шителя, Богому́дре, дохнове́ньми. Сла́ва Отцу́ и Сы́ну и Свято́му Ду́ху. Образ Зижди́теля показу́я лю́дем, Его́же волею поне́сл есть, соединя́яся нам,/ зна́мения и си́лы тем сотворя́еши, многобо́жия де́рзость отгоня́. И ны́не и при́сно и во ве́ки веко́в. Ами́нь. Богородичен: Я́ко дождь, во утро́бу Твою́ сни́де Христо́с/ и всю напои́ тварь, вои́стинну, изсуши́в, Де́во, му́тныя ре́ки идолонеи́стовства,/ еди́ный Благоде́тель. Песнь 9 Ирмос: Живоприе́мный исто́чник приснотеку́щий,/ светоно́сный свети́льник благода́ти,/ храм одушевле́нный, сень пречи́стую,/ Небесе́ и земли́ простра́ннейшую,/ Богоро́дицу, ве́рнии, велича́ем. Припев: Священному́чениче Панкрáтие, моли́ Бо́га о на́с. Светолу́чными Петра́ сия́нии просве́щся душе́ю и мы́слию,/ я́ко звезда́ многосве́тлая, к за́паду дости́гл еси́,/ просвеща́я уче́нии заше́дшия в неве́дения, Панкра́тие, глубину́. Припев: Священному́чениче Панкрáтие, моли́ Бо́га о на́с. Ико́нную честь преходя́щу в первообра́зную ты ве́дый,/ всю́ду честну́ю поставля́л еси́, сла́вне, Иису́са и Бо́га на́шего ико́ну/ ка́пищем де́монским на потребле́ние. Сла́ва Отцу́ и Сы́ну и Свято́му Ду́ху. Светоно́сное твое́ сие́ торжество́/ град и собо́р сотворя́ет, ра́дуяся, чу́дный Панкра́тие, тя ве́рно почита́юще./ И́хже благослови́ти я́ко пастырь не преста́й, о всех моли́тву творя́. И ны́не и при́сно и во ве́ки веко́в. Ами́нь. Богородичен: Пощади́ нас, пою́щия Тя, Го́споди, от Де́вы несказа́нно рожде́йся,/ напа́стей избавля́я, и страсте́й, и скорбе́й Твоя́ рабы́ моли́твами Ея́,/ я́ко Благоде́тель и еди́н Человеколю́бец.

глас 8 Песнь 1 Ирмос: Пои́м Го́сподеви, / прове́дшему лю́ди Своя́ сквозе́ Чермно́е мо́ре, / я́ко еди́н сла́вно просла́вися. Запев: Слава Тебе, Боже наш, слава Тебе. Ла́заря уме́ршаго, / ма́нием Боже́ственным воскреси́л еси́, / я́ко Созда́тель сый, / и живота́ сокро́вище, Человеколю́бче. Сло́вом четверодне́внаго Ла́заря / возгласи́л еси́, Безсме́ртне, / темнообра́зное а́дово разруши́в кре́постию ца́рство. Всем пребоже́ственнаго позна́ние Божества́ показа́л еси́, / из ме́ртвых возста́вив / четверодне́внаго Ла́заря, Влады́ко. Днесь Вифа́ния предвозвеща́ет / Воскресе́ние Христа́ Жизнода́вца, / воста́нием Ла́заревым ликовству́ющи. Песнь 3 Ирмос: Ты еси́ утвержде́ние / притека́ющих к Тебе́, Го́споди, / Ты еси́ свет омраче́нных, / и пое́т Тя дух мой. Два предлага́я де́йства Твоя́, / показа́л еси́ суще́ств, Спа́се, сугу́бство: / Бог бо еси́ и Челове́к. Бе́здна сый ра́зума, Ты вопроша́еши: / где положи́ся ме́ртвый; / хотя́ воскреси́ти, Животода́вче, лежа́щаго. Ме́ста преходя́й, я́ко быв Челове́к, / яви́лся еси́ опи́сан, / исполня́я вся́ческая, я́ко Бог неопи́санный. Ла́заря воздви́гл еси́ / Боже́ственным, Христе́, глаго́лом, / и мене́ мно́гими прегреше́ньми уме́рша / возста́ви, молю́ся. Седален, глас 4. Вку́пе предста́сте Христу́ Ла́зареве сестре́, / и слезя́ще го́рце, и пла́чуще его́, ре́ша Ему́: / Го́споди, у́мре Ла́зарь. / Он же я́ко Бог не неве́дый погреба́ния, / вопроша́ше я́ко Челове́к: / где положи́сте его́? / И приступи́в ко гро́бу, возглаша́ше четверодне́внаго Ла́заря. / Он же а́бие воста́, / и покланя́шеся Воскреси́вшему. Песнь 4 Ирмос: Услы́шах, Го́споди, / смотре́ния Твоего́ та́инство, / разуме́х дела́ Твоя́, / и просла́вих Твое́ Божество́. Не посо́бника тре́буяй, / но смотре́ния соверша́яй неизрече́нное, / моля́ся возста́вил еси́ ме́ртва, / четверодне́внаго, Всеси́льне. Отцу́ соприсносу́щное Сло́во, / и Бог пре́жде зри́мый, / ны́не я́ко Челове́к мо́лится, / моли́твы всех Прие́мляй. Глас Твой разруши́, Спа́се, сме́ртную всю си́лу, / основа́ния же а́дова / Боже́ственною Твое́ю си́лою поколеба́шася. Богородичен: Де́ву воспои́м, я́ко по рождестве́ Де́ву пребы́вшую, / и ро́ждшую Христа́ Бо́га, / от пре́лести мир изба́вльшаго. Песнь 5 Ирмос: Вску́ю мя отри́нул еси́ / от лица́ Твоего́, Све́те Незаходи́мый, / и покры́ла мя есть чужда́я тьма, окая́нного, / но обрати́ мя / и к све́ту за́поведей Твои́х / пути́ моя́ напра́ви, молю́ся. Предста́в Ла́зареву гро́бу, Человеколю́бче, / сего́ призва́л еси́ и жизнь по́дал еси́, / я́ко жизнь сый безсме́ртная челове́ком всем, / я́ко Бог бу́дущее прообразу́я я́ве воскресе́ние. Свя́зан нога́ма Ла́зарь хожда́ше, чу́до в чудесе́х, / ибо бо́лий яви́ся возбраня́ющаго укрепля́яй и Христо́с, / Его́же сло́ву вся раболе́пно слу́жат, / я́ко Бо́гу и Влады́це рабо́тающа. Ме́ртва смердя́ща Ла́заря воздви́гнувый, Христе́, четверодне́вна, / возста́ви мя, уме́рша ны́не грехи́ мои́ми, / и положе́на в ро́ве и те́мней се́ни сме́ртней, / и я́ко благоутро́бен изба́ви и спаси́ мя. Песнь 6 Ирмос: Ио́ну в ки́те, Го́споди, / еди́наго всели́л еси́, / мене́ же, свя́заннаго мре́жами вра́жиями, / я́ко от тли о́наго, спаси́. Любо́вь Тебе́ в Вифа́нию, Го́споди, отведе́ к Ла́зарю, / и сего́ уже́ смердя́ща воскреси́л еси́ я́ко Бог, / и от уз а́довых спасл еси́. Ма́рфа у́бо отча́яшеся Ла́заря, я́ко ви́де четверодне́вна, / Христо́с же истле́вшаго воскреси́ я́ко Бог, / и к жи́зни преста́ви глаго́лом. Кондак, глас 2. Всех ра́дость Христо́с, / И́стина, Свет, Живо́т и ми́ра Воскресе́ние, / су́щим на земли́ яви́ся Свое́ю бла́гостию, / и бысть о́браз Воскресе́ния, / всем подая́ Боже́ственное оставле́ние. Икос: Ученико́м Созда́тель всех предвеща́, глаго́ля: / бра́тия и зна́емии, наш друг у́спе, / си́ми предглаго́ля и уча́, я́ко вся ве́си, я́ко Созда́тель всех. / И́дем у́бо, и уви́дим стра́нное погребе́ние, / и рыда́ние Мари́ино, и Ла́зарев гроб у́зрим, / та́мо бо хощу́ чудоде́йствовати, / соверша́я Креста́ предначина́ние, / и всем подая́ Боже́ственное оставле́ние. Песнь 7 Ирмос: О́троцы евре́йстии в пещи́ / попра́ша пла́мень дерзнове́нно, / и на ро́су огнь преложи́ша, вопию́ще: / благослове́н еси́ Го́споди Бо́же во ве́ки. Прослези́вся я́ко челове́к, Ще́дре, / воскреси́л еси́ я́ко Бог су́щаго во гро́бе, / и разре́шся от а́да Ла́зарь взыва́ше: / благослове́н еси́ Го́споди Бо́же во ве́ки. Изы́де пово́йми обвя́зан, / про́пасти а́да же и тьмы убе́г Влады́чним сло́вом, Ла́зарь взыва́я: / благослове́н еси́ Го́споди Бо́же во ве́ки. Песнь 8 Ирмос: Мусики́йским орга́ном согласу́ющим, / и лю́дем безчи́сленным, покланя́ющимся о́бразу в Деи́ре, / три о́троцы не повину́вшеся, / Го́спода воспева́ху, / и славосло́вляху во вся ве́ки. Я́ко Па́стырь а́гнца взыска́л еси́, / от во́лка лю́таго губи́теля восхи́тив, / растле́вша обнови́л еси́, пою́ща Тебе́: / по́йте и превозноси́те во вся ве́ки. Я́ко Челове́к гро́ба взыска́л еси́, / ме́ртваго я́ко Соде́тель воскреси́л еси́, / повеле́нием Твои́м Влады́чним, Его́же ад ужасе́ся, / вопию́ща Тебе́: по́йте и превозноси́те во вся ве́ки. Песнь 9 Ирмос: Чи́стую сла́вно почти́м, лю́дие, Богоро́дицу, / огнь Божества́ прии́мшую во чре́ве неопа́льно, / пе́сньми велича́ем. Лю́дие ви́девше ходя́ща мертвеца́ четверодне́вна, / удиви́вшеся чудеси́, вопия́ху Изба́вителю, / Бо́га Тя в пе́снех велича́юще. Предуверя́я сла́вное воста́ние Твое́, о Спа́се мой, / ме́ртва четверодне́вна, из а́да свобожда́еши Ла́заря, / пе́сньми Тя велича́юща.

Минея, 5 Мая, Канон мученицы Глас 4 Песнь 1 Ирмос: Воспою́ Тебе́, Го́споди Бо́же мой,/ я́ко изве́л еси́ лю́ди из рабо́ты еги́петския,/ покры́л же еси́ колесни́цы фарао́новы и си́лу. Припев: Свята́я великому́ченице Ири́но, моли́ Бо́га о на́с. Вене́ц сый страстоно́сицы, сея́, Христе́, моли́твами мир ми́ру/ и сла́ву неувяда́ему пою́щим Тя да́руй. Припев: Свята́я великому́ченице Ири́но, моли́ Бо́га о на́с. Заре́ю сия́ющи де́вства, укра́шена добро́тою твоего́ муче́ния,/ Ири́но великоимени́тая, твоему́ Жениху́ предстои́ши. Сла́ва Отцу́ и Сы́ну и Свято́му Ду́ху. Ми́лостиву бы́ти Це́рквам твоего́ моли́ Жениха́, Ири́но Богому́драя,/ согреше́ний же оставле́ние пода́ти чту́щим тя. И ны́не и при́сно и во ве́ки веко́в. Ами́нь. Богородичен: Плоть бы́вша Бо́га Сло́ва и су́щаго, я́ко мы, Свята́я Де́во,/ неизрече́нно родила́ еси́, па́че сло́ва и ра́зума. Песнь 3 Ирмос: Лук си́льных изнемо́же,/ и немощству́ющии препоя́сашася си́лою,/ сего́ ра́ди утверди́ся в Го́споде се́рдце мое́. Припев: Свята́я великому́ченице Ири́но, моли́ Бо́га о на́с. Ми́ра излия́вшагося чу́вствующи и вселе́нную облагоуха́вшаго благода́тию прии́мши,/ воспери́ся к жела́нию сего́, сла́вная. Припев: Свята́я великому́ченице Ири́но, моли́ Бо́га о на́с. Име́ла еси́ Бо́га помо́щника во твои́х по́двизех и защища́юща, всему́драя,/ сего́ ра́ди венча́вшися, мучи́теля победи́ла еси́. Сла́ва Отцу́ и Сы́ну и Свято́му Ду́ху. Столп доброде́телей непрекло́нен, и благоче́стия жили́ще бысть,/ и му́жества, и целому́дрия прия́телище, всехва́льная. И ны́не и при́сно и во ве́ки веко́в. Ами́нь. Богородичен: Те́кши до Тебе́, смерть ста,/ прирази́вшися из Тебе́ рожде́нному, Всенепоро́чная,/ сего́ ра́ди бессме́ртия нача́ток Тя имену́ем. Седален, глас 8 Мир тебе́ мног прибы́сть, му́ченице,/ разре́шшися пло́ти по боле́знех мно́гих:/ ра́дуяся бо, Жени́х на Небесе́х тя горе́ прия́т, всепросвеще́ну, и страда́нием облиста́ющу,/ и в черто́г Боже́ственный введе́ ра́дующуся. Песнь 4 Ирмос: Твоего́ на земли́ явле́ния, Христе́ Бо́же,/ пропове́дуя проро́к прише́ствие,/ с весе́лием вопия́ше:/ сла́ва си́ле Твое́й, Го́споди. Припев: Свята́я великому́ченице Ири́но, моли́ Бо́га о на́с. И́же мир тебе́ подава́яй, мироимени́тая, ми́ра ра́ди посо́бствующу тя ви́дя,/ мужеподо́бным ра́зумом, му́ченице, и кре́постию испо́лни. Припев: Свята́я великому́ченице Ири́но, моли́ Бо́га о на́с. Кре́пким усе́рдием превозше́дши же́нскую не́мощь, преблаже́нная,/ тве́рдо изобличи́ла еси́, му́ченице, ле́сти служа́щия. Припев: Свята́я великому́ченице Ири́но, моли́ Бо́га о на́с. Боже́ственное терпе́ние показа́вши, мучи́телей де́рзости низложи́ла еси́,/ твоему́ Жениху́ зову́щи:/ сла́ва си́ле Твоей, Го́споди. Сла́ва Отцу́ и Сы́ну и Свято́му Ду́ху. Песносло́вием немо́лчным и мольба́ми Влады́ку, Богому́драя, песносло́вила еси́,/ и, к Нему́ восте́кши, сла́ву зри́ши неизрече́нную. И ны́не и при́сно и во ве́ки веко́в. Ами́нь. Богородичен: Ра́достно Тебе́, веселя́щеся, гла́сы, Пречи́стая, Тебе́ ра́ди спа́сшиися, взыва́ем:/ ра́дуйся, Де́во Всечестна́я, ра́дуйся, Богоро́дице Всепе́тая. Песнь 5 Ирмос: Просвеще́ние Твое́, Го́споди, ниспосли́ нам,/ и от мглы прегреше́ний разреши́ ны, Бла́же,/ Твой мир да́руяй. Припев: Свята́я великому́ченице Ири́но, моли́ Бо́га о на́с. Му́жеским, сла́вная, ра́зумом Христа́, Бо́га всех я́сно испове́дала еси́,/ сло́вом же тве́рдым сопротивоборца́, страстоте́рпице, посрами́ла еси́. Припев: Свята́я великому́ченице Ири́но, моли́ Бо́га о на́с. После́довати возжеле́ла еси́ стра́сти Христо́ве/ и подо́бием те́пле после́довала еси́,/ подви́жно стра́ждущи по Влады́це, пребога́тая. Сла́ва Отцу́ и Сы́ну и Свято́му Ду́ху. Полки́ му́ченик, сла́вная, привела́ еси́ Христу́ твое́ю му́дростию и Богосло́вием,/ сия́ и́стинно тайноуча́щи сло́вом ве́ры. И ны́не и при́сно и во ве́ки веко́в. Ами́нь. Богородичен: Научи́вшеся та́йны зача́тия Твоего́/ и неизрече́ннаго и Боже́ственнаго Твоего́ рождества, Де́во,/ ны́не всеблагоче́стно песносло́вим Тя, Богоро́дице Всепе́тая. Песнь 6 Ирмос: Возопи́, прообразу́я погребе́ние тридне́вное,/ проро́к Ио́на, в ки́те моля́ся:/ от тли изба́ви мя, Иису́се, Царю́ сил. Припев: Свята́я великому́ченице Ири́но, моли́ Бо́га о на́с. Испра́вила еси́ прама́тере Е́вы паде́ние, страстоте́рпице,/ врага́ низложи́вши си́лу/ и победи́вши о́наго шата́ние Боже́ственною благода́тию. Припев: Свята́я великому́ченице Ири́но, моли́ Бо́га о на́с. Кре́пость стяжа́вши, Ири́но, ра́зума,/ мучи́телем супроти́вилася еси́ души до́блестию/ и венце́м побе́дным от Христа́ Бо́га венча́лася еси́. Сла́ва Отцу́ и Сы́ну и Свято́му Ду́ху. Кро́вию страда́ния, му́ченице,/ светле́йшу соде́лала еси́ есте́ственную добро́ту, чи́стая,/ до́блественныя по́двиги подъе́мши тве́рдо, до́брая де́во. И ны́не и при́сно и во ве́ки веко́в. Ами́нь. Богородичен: Прояви́ та́йну Твоего́ рождества́ Богови́дец,/ горя́щу купину́ ви́дев, и неопаля́ему, Богоро́дице Чи́стая Присноде́во. Кондак, глас 4 Де́вства добро́тами преиспещре́нна, де́во,/ страда́льчеством была́ еси́ красне́йшая, Ири́но,/ кровьми́ твои́ми исте́кшими обагре́на,/ пре́лесть же низложи́вшая безбо́жия./ Сего́ ра́ди и прия́ла еси́ по́чести побе́ды руко́ю Созда́теля твоего́. Песнь 7 Ирмос: Авраа́мстии иногда́ в Вавило́не о́троцы/ пе́щный пла́мень попра́ша, пе́сньми взыва́юще:/ оте́ц на́ших Бо́же, благослове́н еси́. Припев: Свята́я великому́ченице Ири́но, моли́ Бо́га о на́с. Венцено́сно, му́ченице, предстоя́щи престо́лу твоего́ Влады́ки,/ соблюди́ ве́рою зову́щия:/ оте́ц на́ших Бо́же, благослове́н еси́. Припев: Свята́я великому́ченице Ири́но, моли́ Бо́га о на́с. В Небе́сных селе́ниих ликова́ти, му́ченице, сподо́билася еси́,/ досточу́дная Ири́но, зову́щи:/ оте́ц на́ших Бо́же, благослове́н еси́. Сла́ва Отцу́ и Сы́ну и Свято́му Ду́ху. Жела́ющи улучи́ти Рачи́теля твоего́ добро́ты,/ муче́ния боле́зни претерпе́ла еси́, Ири́но, зову́щи:/ оте́ц на́ших Бо́же, благослове́н еси́. И ны́не и при́сно и во ве́ки веко́в. Ами́нь. Богородичен: Глаго́лом усте́н Твои́х после́дующе,/ ве́рою Тя, Богома́ти, ублажа́ем, вопию́ще Рождеству́ Твоему́:/ оте́ц на́ших Бо́же, благослове́н еси́. Песнь 8 Ирмос: О́троки благочести́выя в пещи́/ Рождество́ Богоро́дичо спасло́ есть,/ тогда́ у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте, дела́,/ и превозноси́те Его́ во вся ве́ки. Припев: Свята́я великому́ченице Ири́но, моли́ Бо́га о на́с. Пострада́ла еси́, Ири́но блаже́нная, до́бле и мучи́теля низложи́ла еси́,/ иму́щи посо́бие непобеди́мое, Влады́ки твоего́ си́лу, соде́йствующую тебе́,/ и, Го́спода по́йте, – вопия́ла еси́, – и превозноси́те Его́ во ве́ки. Припев: Свята́я великому́ченице Ири́но, моли́ Бо́га о на́с. Ю́ношескою любо́вию уя́звена, во след твоего́ Жениха́ после́довала еси́,/ Сего́ страда́ния, му́ченице, и ра́ны на те́ле твое́м нося́щи и вопию́щи:/ Го́спода по́йте, дела́, и превозноси́те Его́ во ве́ки. Сла́ва Отцу́ и Сы́ну и Свято́му Ду́ху. Твое́, е́же в му́ках, терпе́ние, Ири́но венцено́сице,/ посмея́ся су́етию и безбо́жию наде́ющимся, сла́вная, ве́рою же поя́ше:/ Го́спода воспева́йте, дела́, и превозноси́те Его́ во ве́ки. И ны́не и при́сно и во ве́ки веко́в. Ами́нь. Богородичен: Му́дрость Бо́жия, всех Хитре́ц, во Твое́ чре́во, Богома́ти, все́льшися,/ храм созда́, разу́мен же и одушевле́н, Себе́ и спасе́ мир, зову́щий:/ Го́спода воспева́йте, дела́, и превозноси́те Его́ во ве́ки. Песнь 9 Ирмос: Е́ва у́бо неду́гом преслуша́ния кля́тву всели́ла есть;/ Ты же, Де́во Богоро́дице,/ прозябе́нием чревоноше́ния/ ми́рови благослове́ние процвела́ еси́./ Тем Тя вси вели́чаем. Припев: Свята́я великому́ченице Ири́но, моли́ Бо́га о на́с. О́крест твоего́ Рачи́теля лику́ющи в вы́шних, до́брая де́во,/ испроси́ ми́ру мир, Ири́но, и согреше́ний оставле́ние/ ве́рою творя́щим па́мять твою́ светоно́сную и свяще́нную. Припев: Свята́я великому́ченице Ири́но, моли́ Бо́га о на́с. Внутрь тя черто́га Христо́с я́ко му́ченицу и де́ву всели́,/ иде́же с де́вами ра́дуешися и с му́ченическими во́инствы,/ Ири́но венцено́сныя всехва́льная,/ те́мже тя вси ублажа́ем. Сла́ва Отцу́ и Сы́ну и Свято́му Ду́ху. Две́ри отве́рз Небе́сныя, прия́т ду́шу твою́ всенепоро́чную/ Еди́н, все́ми ца́рствуяй, и пра́вды Строи́тель,/ Ири́но, Боже́ственнаго ми́ра тезоимени́тая,/ Те́мже тя вси ублажа́ем. И ны́не и при́сно и во ве́ки веко́в. Ами́нь. Богородичен: Иму́щи к Твоему́ Сы́ну, Пренепоро́чная, дерзнове́ние непосты́дно,/ Сего́ умоли́ низпосла́ти ми́ру ми́рно устрое́ние и всем Це́рквам единомышле́ние,/ да Тя вси велича́ем.

Минея, 14 Июня, Кано́н проро́ка Глас 5 Песнь 1 Ирмос: Спаси́телю Бо́гу,/ в мо́ри лю́ди немо́крыми нога́ми наста́вльшему/ и фарао́на со всево́инством пото́пльшему,/ Тому́ еди́ному пои́м, я́ко просла́вися. Припев: Святы́й проро́че Бо́жий Елисéе, моли́ Бо́га о на́с. Изнача́ла о Бо́зе пое́мыми пе́сньми, и́миже пое́тся пое́мый,/ проро́ческими облиста́я хвала́ми, пою́ просла́вльшаго:/ я́ко просла́вися. Припев: Святы́й проро́че Бо́жий Елисéе, моли́ Бо́га о на́с. Взем ко́жу из руки́ проро́чи, совосприя́т сан,/ от ра́ла проро́к претворя́емь заре́ю духо́вною:/ я́ко просла́вися. Сла́ва Отцу́ и Сы́ну и Свято́му Ду́ху. Я́ко предразуме́, Христе́, е́же к лу́чшему зва́нию, Елиссе́ево предложе́ние,/ проро́чества благода́тию просвети́л еси́, Спа́се Всеси́льне,/ я́ко просла́вися. И ны́не и при́сно и во ве́ки веко́в. Ами́нь. Богородичен: Пречи́стая Ма́ти Бо́жия,/ воплоще́ннаго из Тебе́ и от недр Роди́теля не отлу́чшася Бо́га непреста́нно моли́/ от вся́кия беды́ спасти́, и́хже созда́. Песнь 3 Ирмос: Си́лою Креста́ Твоего́, Христе́,/ утверди́ мое́ помышле́ние,/ во е́же пе́ти и сла́вити/ спаси́тельное Твое́ вознесе́ние. Припев: Святы́й проро́че Бо́жий Елисéе, моли́ Бо́га о на́с. Земна́го пристра́стия отсту́пль, огнедохнове́нному послужи́л еси́,/ служи́телем угожде́ния Влады́ки бесе́дуя. Припев: Святы́й проро́че Бо́жий Елисéе, моли́ Бо́га о на́с. В ду́се прия́л еси́ сугу́ба учи́теля дарова́ния,/ не погреши́в ле́ностию о́наго восхожде́ния. Сла́ва Отцу́ и Сы́ну и Свято́му Ду́ху. С рыда́нием Илии́ предста́в и растерза́в ри́зу,/ ми́лотию разделя́еши струи́ Иорда́нския. И ны́не и при́сно и во ве́ки веко́в. Ами́нь. Богородичен: Моли́ непреста́нно, Чи́стая, Проше́дшаго из чресл Твои́х/ изба́вити от ле́сти диа́воли пою́щия Тя, Богоневе́сто. Седален, глас 1 Прозре́нием Боже́ственным Илия́ тя вели́кий, му́дре Елиссе́е, учени́ка взима́ет,/ проро́ка предпоказу́ет, сия́юща Ду́хом./ Те́мже, днесь всесвяту́ю твою́ па́мять пра́зднующе,/ благочестному́дренно почита́ем тя с ним, сла́вне. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Наста́ви нас на путь покая́ния,/ укло́ншияся при́сно к безпу́тием зол и Преблага́го прогне́вавшия Го́спода,/ Неискусобра́чная благослове́нная Мари́е,/ прибе́жище отчая́нных челове́ков, Бо́жие жили́ще. Песнь 4 Ирмос: Услы́шах, Го́споди,/ из гро́ба Твое́ воста́ние/ и просла́вих/ Твою́ непобеди́мую си́лу. Припев: Святы́й проро́че Бо́жий Елисéе, моли́ Бо́га о на́с. Я́коже дре́вле во́ды, и ны́не непло́дный ум мой исцеля́еши, Благода́телю,/ Елиссе́евыми моли́твами. Припев: Святы́й проро́че Бо́жий Елисéе, моли́ Бо́га о на́с. Боже́ственне обогати́лся еси́ Вы́шних сказа́нием/ и зве́рем дете́й отъе́млеши злообра́зие. Припев: Святы́й проро́че Бо́жий Елисéе, моли́ Бо́га о на́с. Ви́ден был еси́, сла́вне, де́вством укра́шен,/ су́щим во тьме пре́лести, я́ко свети́льник, издале́ча сия́я. Сла́ва Отцу́ и Сы́ну и Свято́му Ду́ху. Молча́ти не мо́жет Ду́хом дви́жим язы́к,/ твоя́ ди́вная в житии́, Елиссе́е, исправле́ния. И ны́не и при́сно и во ве́ки веко́в. Ами́нь. Богородичен: Вои́стинну сла́вим Тя, Богоро́дице Безневе́стная,/ и в Твое́ приста́нище, ве́рнии, прибега́ем. Песнь 5 Ирмос: У́тренююще, вопие́м Ти:/ Го́споди, спаси́ ны,/ Ты бо еси́ Бог наш,/ ра́зве бо Тебе,́ ино́го не зна́ем. Припев: Святы́й проро́че Бо́жий Елисéе, моли́ Бо́га о на́с. Молчали́вое и кро́ткое, Богодохнове́нне, души́ твоея́/ проро́ка тя показа́, Елиссе́е, ве́ры ра́ди. Припев: Святы́й проро́че Бо́жий Елисéе, моли́ Бо́га о на́с. Боже́ственное твои́х слове́с де́йство просвеща́ет мя глаго́лы духо́вными,/ Елиссе́е всеблаже́нне. Сла́ва Отцу́ и Сы́ну и Свято́му Ду́ху. Мертв грех, я́ко жи́ву предстоя́щу Го́сподеви, проро́че,/ тебе́, Елиссе́е, вменя́шеся. И ны́не и при́сно и во ве́ки веко́в. Ами́нь. Богородичен: Не преста́й моля́щи, Его́же родила́ еси́, Богоро́дице,/ спасти́ ду́ши на́ша, воспева́ющих Тя, Пречи́стая. Песнь 6 Ирмос: Обы́де мя бе́здна,/ гроб мне кит быстъ,/ аз же возопи́х к Тебе́, Человеколю́бцу,/ и спасе́ мя десни́ца Твоя́, Го́споди. Припев: Святы́й проро́че Бо́жий Елисéе, моли́ Бо́га о на́с. Напо́лни пото́ки иногда́ ни дождь, ни дух возду́шный,/ возду́х же благода́ти, проро́че,/ и сло́во твое́ де́йством Ду́ха напо́лни. Припев: Святы́й проро́че Бо́жий Елисéе, моли́ Бо́га о на́с. От ма́ла сосу́да иногда́, проро́че, я́коже напо́лнил еси́ незави́стно еле́й жене́,/ и мне Боже́ственную ми́лость источи́ти, Елиссе́е, помоли́ся. Сла́ва Отцу́ и Сы́ну и Свято́му Ду́ху. Честна́я жена́, проро́че, ве́рою вжиля́ема,/ в ста́рости непло́дствия разреше́ние прие́млет моли́твою,/ благоча́дие плодя́щи. И ны́не и при́сно и во ве́ки веко́в. Ами́нь. Богородичен: Купину́ Тя неопали́му, и го́ру, и ле́ствицу одушевле́нну,/ и дверь Небе́сную досто́йно сла́вим, Мари́е сла́вная,/ правове́рных похвало́. Кондак, глас 2 Проро́к Бо́жий яви́лся еси́,/ сугу́бую благода́ть прие́мь,/ вои́стинну досто́йную тебе́, Елиссе́е блаже́нне:/ Илии́ бо был еси́ совсе́льник,/ с ни́мже Христу́ Бо́гу моли́ся непреста́нно о всех нас. Икос В зако́не Госпо́дни возсия́вшаго, вси Елиссе́я му́драго пе́нии пе́сненными воспое́м:/ весь бо испо́лнен есть чуде́с сугу́быми о́бразы, нам источа́я исцеле́ний струи́,/ кропи́т бо ду́ши ве́рных и спаса́ет от бед,/ я́коже дре́вле лю́ди безча́дствующия,/ услажда́ет со́лию во́ды, креще́ния благода́ть возвеща́я я́ве,/ моля́ непреста́нно о всех нас. Песнь 7 Ирмос: В пещи́ о́гненней/ песносло́вцы спасы́й о́троки,/ благослове́н Бог оте́ц на́ших. Припев: Святы́й проро́че Бо́жий Елисéе, моли́ Бо́га о на́с. Прему́дрости лу́чшия ты, Елиссе́е, испо́лнився, вопия́л еси́:/ благослове́н Бог оте́ц на́ших. Припев: Святы́й проро́че Бо́жий Елисéе, моли́ Бо́га о на́с. Ты, я́ко Жи́зни служи́тель, ма́тери а́бие жи́ва ме́ртва сы́на,/ проро́че, показа́л еси́. Сла́ва Отцу́ и Сы́ну и Свято́му Ду́ху. Неначае́мыя иногда́ проро́ческия пита́я де́ти,/ всегуби́тельныя сне́ди сотвори́л еси́ неврежде́нны. И ны́не и при́сно и во ве́ки веко́в. Ами́нь. Богородичен: И́же от Де́вы рожде́йся, Ю́же Богоро́дицу соде́ла,/ благослове́н Бог оте́ц на́ших. Песнь 8 Ирмос: Ороси́вшаго пещь/ и о́троки сохра́ньшаго посреде́ горя́щаго пла́мене,/ о́троцы, славосло́вите, свяще́нницы, благослови́те,/ лю́дие, превозноси́те во вся ве́ки. Припев: Святы́й проро́че Бо́жий Елисéе, моли́ Бо́га о на́с. Сотво́ршаго очище́ние проро́ка повеле́нием о́троцы воспева́ют,/ святи́тели благословя́т, лю́дие превозно́сят Его́ во ве́ки. Припев: Святы́й проро́че Бо́жий Елисéе, моли́ Бо́га о на́с. От ве́щи очи́щ ум,/ невеще́ственнаго жела́нием одержи́м, невеще́ственно ви́дел еси́./ Те́мже, игра́я, вопия́л еси́:/ Христа́ превозноси́те во вся ве́ки. Припев: Святы́й проро́че Бо́жий Елисéе, моли́ Бо́га о на́с. Благода́тию прови́дя бу́дущая, на дре́ве пречи́стый Крест зри́ши воображе́н./ Те́мже вопия́л еси́, ра́дуяся, Богонауче́нный проро́че:/ Христа́ превозноси́те во вся ве́ки. Сла́ва Отцу́ и Сы́ну и Свято́му Ду́ху. Колесни́ц мно́жество, окру́жших тя, низложи́, чу́дне,/ мра́ком незави́стно уста́вил еси́, безу́мие облича́я, всеблаже́нне, вопия́:/ Христа́ превозноси́те во вся ве́ки. И ны́не и при́сно и во ве́ки веко́в. Ами́нь. Богородичен: А́нгели сла́вят Рождество́ Твое́, Чи́стая Богоневе́сто,/ с ни́миже вси пое́м:/ о́троцы, благослови́те, свяще́нницы, песносло́вите,/ лю́дие, превозноси́те во вся ве́ки. Песнь 9 Ирмос: Тя, па́че ума́ и словесе́, Ма́терь Бо́жию,/ в ле́то Безле́тнаго/ неизрече́нно ро́ждшую,/ ве́рнии, единому́дренно велича́ем. Припев: Святы́й проро́че Бо́жий Елисéе, моли́ Бо́га о на́с. Жезло́м сечи́тельным возвлача́ желе́зо проро́к,/ ве́щное челове́к существо́, Кресто́м вознесе́но, науча́ше. Припев: Святы́й проро́че Бо́жий Елисéе, моли́ Бо́га о на́с. Да теле́с пока́жет воста́ние Живонача́льник,/ возставля́ет мертвеца́,/ отню́д не иму́ща дыха́ния пло́тию,/ проро́ка показу́я пречестно́е. Сла́ва Отцу́ и Сы́ну и Свято́му Ду́ху. Ны́не в Боже́ственнем поко́и Бо́га мо́лиши, чу́дне,/ блаже́нство улучи́ти при́сно тя блажа́щим. И ны́не и при́сно и во ве́ки веко́в. Ами́нь. Богородичен: Ра́дуйся, Богоро́дице, Ма́ти Христа́ Бо́га,/ Его́же родила́ еси́, моли́ согреше́ний оставле́ние дарова́ти/ ве́рою воспева́ющим Тя. Светилен Илиину́ благода́ть сугу́бу прия́л еси́ от Бо́га, Елиссе́е Богоблаже́нне,/ и прося́щим у тебе́ ве́рно сугу́бо исцеле́ния дае́ши,/ душа́м же и те́лом.

Минея, 23 Декабря, Канон святаго Глас 4 Песнь 1 Ирмос: Триста́ты кре́пкия,/ Рожде́йся от Де́вы,/ безстра́стия во глубине́ души́ трича́стное потопи́, молю́ся,/ да Тебе́, я́ко в тимпа́не, во умерщвле́нии телесе́/ побе́дное воспою́ пе́ние. Припев: Святи́телю, о́тче Феокти́сте, моли́ Бо́га о на́с. Благода́ть да́руй ми, Бо́же, ду́ха Твоего́ Свята́го,/ е́юже возмогу́ воспе́ти до́бляго святи́теля, уго́дника Твоего́ Феокти́ста:/ его́же моли́твами да получу́ часть со избра́нными Твои́ми. Припев: Святи́телю, о́тче Феокти́сте, моли́ Бо́га о на́с. Лю́тыми грехопаде́нии объя́т есмь смире́нный,/ но к тебе́, до́брому па́стырю, под кров прибего́х, святи́телю Феокти́сте,/ ты же, свя́те, не оскуде́й моля́ся за мя при́сно,/ его́же Престо́лу вы́ну предстои́ши. Сла́ва Отцу́ и Сы́ну и Свято́му Ду́ху. Аз унылы́й, крова́ ища́ тве́рдаго,/ по́мощи кре́пкия и заступле́ния неотвра́тна,/ к тебе́ прибего́х, архиере́ю Бо́жию:/ да умо́лиши за мя всех Царя́ и Влады́ку. И ны́не и при́сно и во ве́ки веко́в. Ами́нь. Богородичен: Пресвята́я Чи́стая Бо́га на́шего Ма́ти,/ моли́, Его́же родила́ еси́, Бо́га,/ изба́вити ны от вся́ких лю́тых нахожде́ний. Песнь 3 Ирмос: Не му́дростию, и си́лою, и бога́тством хва́лимся,/ но Тобо́ю, О́тчею ипоста́сною му́дростию, Христе́,/ несть бо свят, па́че Тебе́, Человеколю́бче. Припев: Святи́телю, о́тче Феокти́сте, моли́ Бо́га о на́с. Го́рдостию враг нападе́ на мя, тща́ся поглоти́ти лю́те,/ но ты, святи́телю Феокти́сте, я́ко в жи́зни сей лю́ди упасл еси́,/ та́ко и ны́не моли́твами твои́ми изми́ мене́ из че́люстей его́. Припев: Святи́телю, о́тче Феокти́сте, моли́ Бо́га о на́с. О́ко смире́нно и ум не смуще́н стяжа́л еси́, о́тче, в животе́/ си́ми и нам просвети́тися сподо́би/ и дости́гнути Свет Невече́рний. Сла́ва Отцу́ и Сы́ну и Свято́му Ду́ху. Досто́йно восхвали́ти тя тщи́мся, о́тче, но недоуме́ем,/ поне́же не и́мамы серде́ц чи́стых,/ до́ндеже ты, свя́те, мольбо́ю свое́ю очи́стиши я в нас/ и возде́лаеши, я́ко кла́сы стори́чествующия. И ны́не и при́сно и во ве́ки веко́в. Ами́нь. Богородичен: Богоро́дице Де́во, ро́ждшая Спа́са,/ при́зри на лю́ди согреши́вшия/ и изба́ви от вся́ких лю́тых, находя́щих вы́ну на ны. Седален, глас 6 Феокти́сте Богому́дре, верхо́вный о́тче,/ А́нгелом ра́вне, Вели́кому Но́ву гра́ду утвержде́ние,/ не отве́ржи, но песносло́вие приими́, я́ко кади́ло, от убо́жества моего́,/ е́же ти принесо́х, недосто́йный. Песнь 4 Ирмос: Любве́ ра́ди, Ще́дре, Твоего́ о́браза/ на Кресте́ Твое́м стал еси́,/ и раста́яшася язы́цы,/ Ты бо еси́, Человеколю́бче,/ кре́пость моя́ и хвале́ние. Припев: Святи́телю, о́тче Феокти́сте, моли́ Бо́га о на́с. Архиепи́скопства дар име́л еси́ свяще́ннаго собо́ра/ избра́нием в це́ркви Прему́дрости Сло́ва Бо́жия кра́йняго святи́теля рукополо́жением/ и лю́ди к доброде́телем наста́вил еси́,/ я́же и ны́не те́ми же упаса́й на зла́це зако́на Христо́ва. Припев: Святи́телю, о́тче Феокти́сте, моли́ Бо́га о на́с. Реши́ти и вяза́ти власть апо́стольски восприи́м, святи́телю Феокти́сте,/ вся ны су́щия, свя́занныя грехопаде́ньми,/ разреши́ моли́твами твои́ми. Сла́ва Отцу́ и Сы́ну и Свято́му Ду́ху. На престо́ле святи́тельства седя́ и архиере́йства дар восприе́мый,/ я́ко досто́ин сый, ста́до Христо́во упа́сл еси́ в жи́зни вре́менней/ и, к ве́чным отше́д, в ве́чная бла́гая наставля́й, святи́телю. И ны́не и при́сно и во ве́ки веко́в. Ами́нь. Богородичен: Спаси́, Богоро́дице Влады́чице, лю́ди Сы́на Твоего́ и Твоя́,/ па́дшия душепа́губными мы́сльми и телесы́,/ и наста́ви на путь жи́зненный, приводя́ во огра́ду Небе́сную. Песнь 5 Ирмос: Нечести́вии не у́зрят сла́вы Твоей, Христе́,/ но мы Тя, Единоро́дне,/ Оте́ческия сла́вы сия́ние Божества́,/ от но́щи у́тренююще,/ воспева́ем Тя, Человеколю́бче. Припев: Святи́телю, о́тче Феокти́сте, моли́ Бо́га о на́с. Очи́ма вну́треннима вы́ну зря Бо́га в жи́зни сей в несмуще́нне уме́,/ тем же, архиере́йство оста́вль, безмо́лвие возлюби́л еси́/ и во оби́тель Бо́жия Ма́тере вшел еси́,/ ю́же за ны немо́лчно моли́, святи́телю. Припев: Святи́телю, о́тче Феокти́сте, моли́ Бо́га о на́с. Есте́ственный нрав незло́бив име́л еси́, о́тче,/ нас же, су́щих нравозло́бных, спаси́, Феокти́сте святи́телю,/ от вся́ких озлобле́ний. Сла́ва Отцу́ и Сы́ну и Свято́му Ду́ху. Поя Бо́га при́сно во обеща́нном ме́сте и́ночества своего́,/ Той бо, я́ко сокрове́нных Ве́дец,/ сего́ ра́ди возведе́ тя на архиере́йский престо́л Безкро́вныя Же́ртвы приноси́ти,/ я́ко уго́ждша ему́. И ны́не и при́сно и во ве́ки веко́в. Ами́нь. Богородичен: Нас, вре́дными, прекло́ньшихся грехми́/ и, я́ко у́зами нереши́мыми, от врага́ свя́занных,/ разреши́, Бо́га на́шего Ма́ти,/ и от тли возведи́, я́ко Еди́на еси́ Ты Всеми́лостивая. Песнь 6 Ирмос: Приидо́х во глубины́ морски́я,/ и потопи́ла мя есть бу́ря мно́гих грехо́в,/ но, я́ко Бог, из глубины́ возведи́ живо́т мой, Многоми́лостиве. Припев: Святи́телю, о́тче Феокти́сте, моли́ Бо́га о на́с. Ежде́ние и хожде́ние не ле́ностное в животе́ вре́меннем/ в да́льняя свяще́нная места́ и оби́тели/ славосло́вия ра́ди Бо́жия и святы́х его́, я́ко тепл сый моле́бник,/ за вруче́нныя тебе́ лю́ди имел еси́/ и, я́ко до́брый купе́ц безце́нныя би́серы,/ Бо́жия благодея́ния им моли́твами свои́ми подава́л,/ в ни́хже и ны́не не оскуде́й, святи́телю. Припев: Святи́телю, о́тче Феокти́сте, моли́ Бо́га о на́с. Не забу́ди ста́до твое, о́тче, е́же тебе́ Бог дарова́/ пасти́ в живо́те́ не то́кмо вре́меннем, но и в ве́чную жи́знь наставля́ти,/ святи́телю о́тче всечестны́й. Сла́ва Отцу́ и Сы́ну и Свято́му Ду́ху. И е́же от Бо́га произбра́н во святи́тельство/ еще́ во обеща́ннем ме́сте и́ночества, Боголюби́ве Феокти́сте,/ и на престо́ле архиере́йства седя́, я́ко па́стырь и́стинен,/ и ко Го́споду отше́д, нас, чад свои́х, наставля́й на путь жи́зненный. И ны́не и при́сно и во ве́ки веко́в. Ами́нь. Богородичен: Изба́ви, Богоро́дице, лю́ди Твоя́ вся многогре́шныя/ от вся́каго озлобле́ния и вра́жия нападе́ния,/ да благода́рно Сы́ну Твоему́ зове́м:/ из тли возведи́ ду́ши на́ша, Преми́лостиве. Кондак, глас 8 Архиере́йское украше́ние, Вели́кому Но́ву гра́ду Богодухнове́нное удобре́ние,/ су́щия бо в нем лю́ди на па́житех живоно́снаго зако́на Госпо́дня упа́сл еси́,/ и сего́ ра́ди в ли́це святы́х водворя́тися сподо́бися,/ и святу́ю твою́ па́мять мно́гими ле́ты сотвори́ неоскверне́нну,/ в нея́же тя почита́юще, ра́дуйся, от души́ вопие́м ти, святи́телю о́тче Феокти́сте,/ Вели́кому Но́ву гра́ду похвала́ и утвержде́ние. Икос Апо́стольскаго гла́са подража́телю, архиере́ю свяще́нному, вели́кому Феокти́сту,/ па́стырю и учи́телю Вели́каго Но́ва гра́да, благода́рно воззове́м, правове́рнии лю́дие, глаго́люще:/ ра́дуйся, святи́телю вели́кий, сожи́тельниче оби́тели Богома́терней,/ со́зданной от чудоно́сных архиере́ев Иоа́нна и Григо́рия;/ ра́дуйся, сопресто́льниче тем во хра́ме Прему́дрости Бо́жия./ Ра́дуйся, осмоле́тним обхожде́нием архиере́йства своего́/ во осмори́чная бла́гая де́тели лю́ди своя́, я́ко избра́нныя Бо́жия, обо́лкший, е́же есть:/ свя́тость, ми́лость, щедро́тство, любо́вь,/ бла́гость, смиренному́дрие, кро́тость и долготерпе́ние,/ е́же и ны́не нам от Христа́ испроси́;/ ра́дуйся, соше́ствием свои́м с престо́ла и триле́тным жи́тельством во оби́тели Бо́жия Ма́тере/ наставля́яй нас ко и́стинному Богоугожде́нию,/ е́же к безмо́лвию немяте́жному, славосло́вию Бо́жию и чистоте́,/ без нея́ же никто́же у́зрит Го́спода./ Ра́дуйся, я́ко предстоя́нием у Престо́ла Бо́жия слику́еши А́нгелом;/ ра́дуйся, сопресто́льниче иера́рхов./ Ра́дуйся, моли́твенниче те́плый;/ ра́дуйся, засту́пниче кре́пкий./ Ра́дуйся, помо́щниче скорбя́щим;/ ра́дуйся, святи́телю о́тче Феокти́сте, Вели́кому Но́ву гра́ду похвала́ и утвержде́ние. Песнь 7 Ирмос: Ю́ноши три в Вавило́не,/ веле́ние мучи́телево на бу́йство прело́жше,/ посреде́ пла́мене вопия́ху:/ благослове́н еси́, Го́споди,/ Бо́же оте́ц на́ших. Припев: Святи́телю, о́тче Феокти́сте, моли́ Бо́га о на́с. С моли́твою непреста́нною вся́кия до́брыя де́тели Го́сподеви прине́сл еси́, святи́телю Феокти́сте,/ и, си́ми ему́ до́бре угоди́в, в ра́йских све́тлостех с ли́ки святы́х вопие́ши:/ благослове́н Бог оте́ц на́ших. Припев: Святи́телю, о́тче Феокти́сте, моли́ Бо́га о на́с. Приле́жною ти мольбо́ю,/ щедро́ты Бо́жия на лю́ди твоя́ привлача́я, Феокти́сте о́тче наш, в животе́ вре́меннем/ и ны́не в жи́зни ве́чней со а́нгельскими во́инствы за ны моли́ся, вопию́щия:/ благослове́н еси́, Го́споди Бо́же оте́ц на́ших. Сла́ва Отцу́ и Сы́ну и Свято́му Ду́ху. Феокти́сту, вели́кому спо́стнику Евфи́миеву, тезоиме́нно зва́ние стяжа́л еси́,/ и доброде́телем его́ подо́бник был еси́,/ и сликовствова́нию в незаходи́мых све́тлостех ему́ о́бщник яви́лся еси́,/ а́ще и последи́ просия́, но пе́рвых че́сти сподо́бися,/ с ни́миже за ны хода́тайствуй, зовя́:/ благослове́н еси́, Го́споди Бо́же оте́ц на́ших. И ны́не и при́сно и во ве́ки веко́в. Ами́нь. Богородичен: Му́ки безконе́чныя хо́щут мя объя́ти,/ зане́ окая́нен есмь и страстен,/ тем же под кров Твой прибега́ю, Присноде́во,/ изба́ви мя от всех сих, вопию́щаго Сы́ну Твоему́:/ благослове́н еси́, Го́споди Бо́же оте́ц на́ших. Песнь 8 Ирмос: Ру́це распросте́р, Дании́л/ львов зия́ния в ро́ве затче́;/ о́гненную же си́лу угаси́ша,/ доброде́телию препоя́савшеся,/ благоче́стия рачи́тели о́троцы, взыва́юще:/ благослови́те, вся дела́ Госпо́дня, Го́спода. Припев: Святи́телю, о́тче Феокти́сте, моли́ Бо́га о на́с. Святи́телю Феокти́сте, честны́й наш благоде́телю,/ благодари́м тя, вси приходя́щии к моще́м твои́м/ и лобыза́ющии свяще́нный о́браз твой,/ даждь нам цельбу́ душеполе́зную,/ я́коже дарова́л еси́ жене многоболе́зненней, да в ра́дости вопие́м:/ благослови́те, вся дела́ Госпо́дня, Го́спода. Припев: Святи́телю, о́тче Феокти́сте, моли́ Бо́га о на́с. Приношу песнь Бо́гови, просла́вльшему́ тя, уго́дника Своего́,/ за е́же предста́л еси́ жене, боле́зненно утро́бней,/ обещава́я ей цельбу́, а́ще гро́ба твоего́ взыщет, взыва́я:/ благослови́те, вся дела́ Госпо́дня, Го́спода. Сла́ва Отцу́ и Сы́ну и Свято́му Ду́ху. Многогре́шный аз и непотре́бный, я́ко блу́дный сын,/ не сме́ю ни о́чию возвести́ к Бо́гу моему́,/ поне́же мно́го греши́х и беззако́новах,/ а́ще не ты, па́стырю, наста́виши мя досто́йно Го́сподеви пе́ти:/ благослови́те, вся дела́ Госпо́дня, Го́спода. И ны́не и при́сно и во ве́ки веко́в. Ами́нь. Богородичен: Ве́чныя ра́дости отчужде́н есмь, окая́нный, нечи́стых ра́ди дел мои́х,/ но Ты, Ма́ти Бо́жия, поне́ от му́ки свободи́ Богоприя́тными Твои́ми моли́твами,/ и́хже неотвра́тно и́маши за ны обы́чным Свои́м милосе́рдием,/ я́ко всем нам, христиа́ном, Засту́пница су́щи. Песнь 9 Ирмос: Е́ва у́бо неду́гом преслуша́ния/ кля́тву всели́ла есть;/ Ты же, Де́во Богоро́дице,/ прозябе́нием чревоноше́ния ми́рови Благослове́ние процвела́ еси́./ Тем Тя вси велича́ем. Припев: Святи́телю, о́тче Феокти́сте, моли́ Бо́га о на́с. Бог дарова́ сте́ну необори́мую, тебе́, святи́телю Феокти́сте, гра́ду твоему́,/ в нем же ты, блаже́нне, архиере́йский престо́л содержа́л еси́,/ тобо́ю бо той красу́ется, и оби́тель, иму́щи честны́я твоя́ мо́щи, све́тло хва́лится,/ я́ко огражда́еши от всех прило́г нечести́ваго. Припев: Святи́телю, о́тче Феокти́сте, моли́ Бо́га о на́с. Очи́стив ни́ву се́рдца́ твоего́ нетле́нным чисти́тельством/ и Свята́го Ду́ха прия́телище сим сотвори́в е,/ того́ благода́тию и нам умоли́ просвеща́тися при́сно и сохрани́ти святы́я за́поведи. Припев: Святи́телю, о́тче Феокти́сте, моли́ Бо́га о на́с. Расхи́тити ны тща́щихся умири́, святи́телю Бо́жий Феокти́сте, моли́твами твои́ми,/ да и ти́и, наста́влени на стезю́ и́стины,/ дости́гнут блаже́нство ве́чное. Сла́ва Отцу́ и Сы́ну и Свято́му Ду́ху. Изми́ от вся́каго гнева, приходя́щаго на ны, святи́телю Госпо́день,/ да не поги́бнем за мно́гая прегреше́ния на́ша, ча́да су́щая твоя́,/ но моли́твами твои́ми изба́вимся вре́менных и ве́чных зол. И ны́не и при́сно и во ве́ки веко́в. Ами́нь. Богородичен: Скве́рнами душепа́губными содержи́м есмь,/ похвалы́ досто́йныя и мольбы́ благоприя́тныя не могу́ принести́ Тебе́, Пречи́стей Ма́тери Бо́жией,/ но ели́ко возмогаю, толи́ко приношу́, и молю́ся Тебе́ усе́рдно/ напра́вити мя на путь спаси́тельный. Светилен Житие́ благоче́стно на земли́ сконча́в,/ прия́телище чи́стое ты Свята́го Ду́ха яви́лся еси́,/ просвеща́я ве́рою притека́ющия к моще́м твои́м святы́м, блаже́нне,/ тем же моли́ твоего́ Влады́ку просвети́ти ду́ши на́ша,/ воспева́ющих тя, Феокти́сте святи́телю, о́тче Богому́дре.

Минея, 3 Мая, Ин канон преподобного Глас 6 Песнь 1 Ирмос: Я́ко по су́ху пешеше́ствовав Изра́иль/ по бе́здне стопа́ми,/ гони́теля фарао́на/ ви́дя потопля́ема,/ Бо́гу побе́дную песнь/ пои́м вопия́ше. Припев: Преподо́бне о́тче Феодо́сие, моли́ Бо́га о на́с. Пресве́тлыми Бо́жиими луча́ми просвеще́н, о́тче Феодо́сие,/ просвети́ ум мой твои́ми моли́твами/ воспе́ти све́тло твою́ Боже́ственную па́мять. Припев: Преподо́бне о́тче Феодо́сие, моли́ Бо́га о на́с. Еди́ному принесе́ся Бо́гу от ю́ности,/ от Него́же прия́т бога́тую благода́ть чуде́с,/ те́мже был еси́ сокро́вище ста́ду своему́ нетле́нно. Сла́ва Отцу́ и Сы́ну и Свято́му Ду́ху. Но́вый нам яви́ся Авраа́м, же́ртву принося́ Бо́гу,/ А́гнца, взе́млющаго грехи́ всего́ ми́ра вои́стинну,/ хле́бы сотворя́я свои́ми рука́ми чи́стыми. И ны́не и при́сно и во ве́ки веко́в. Ами́нь. Богородичен: И́же пре́жде денни́цы Сый,/ Сло́во Бо́жие Челове́к нам яви́ся,/ вопло́щся нас ра́ди от Пречи́стыя Де́вы,/ и, от Тоя́ изше́д, невреди́му сохрани́. Песнь 3 Ирмос: Несть свят,/ я́коже Ты, Го́споди Бо́же мой,/ вознесы́й рог ве́рных Твои́х, Бла́же,/ и утверди́вый нас на ка́мени/ испове́дания Твоего́. Припев: Преподо́бне о́тче Феодо́сие, моли́ Бо́га о на́с. Ева́нгельскаго послу́ша гла́са Феодо́сий, в це́рковь прири́ща,/ возжеле́в взя́ти крест Госпо́день на ра́мо свое́,/ ми́ра всего́ оста́вль пристра́стия, Тому́ после́дова. Припев: Преподо́бне о́тче Феодо́сие, моли́ Бо́га о на́с. Испыта́вши тебе́, ро́ждшая тя ма́ти повелева́ет ри́зу твою́ совлещи́/ и ви́де ужа́сное виде́ние:/ чре́сла твоя́, источа́ющая кровь желе́зным препоя́санием. Сла́ва Отцу́ и Сы́ну и Свято́му Ду́ху. Зело́ гроб Госпо́день вожделе́в ви́дети, Феодо́сие блаже́нне,/ но, удержа́н быв смотре́нием Влады́чним,/ Анто́нию был еси́ собесе́дник преподо́бному. И ны́не и при́сно и во ве́ки веко́в. Ами́нь. Богородичен: Па́че ума́ Ты зачала́ еси́, Препе́тая Де́ва,/ еди́на бо от ве́ка всех Творца́, и Бо́га, и Соде́теля,/ Бо́жие Сло́во ро́ждшая. Седален, глас 4 Па́че ума́ челове́ча яви́лся еси́, преподо́бне, на земли́,/ Бо́жий сад свяще́нный, посреде́ до́му Госпо́дня стоя́,/ подае́ши плод боле́зней твои́х ученико́м твои́м:/ от уст бо твои́х благода́ть Ду́ха возрасти́л еси́,/ о́браз быв подвиго́в и уста́в лю́бящих Го́спода./ Его́же ны́не моли́ти не преста́й спасти́ся пою́щим тя. Песнь 4 Ирмос: Христо́с моя́ си́ла,/ Бог и Госпо́дь, Честна́я Це́рковь/ боголе́пно пое́т, взыва́ющи,/ от смы́сла чи́ста о Го́споде пра́зднующи. Припев: Преподо́бне о́тче Феодо́сие, моли́ Бо́га о на́с. Уве́давши ма́ти твоя́, му́дре, живу́ща тя со Анто́нием блаже́нным в пеще́ре,/ ю́же, прише́дшу и пла́чущуся, уте́шив,/ мирски́я зло́бы увеща́л еси́ ю убежа́ти. Припев: Преподо́бне о́тче Феодо́сие, моли́ Бо́га о на́с. Ты иере́й Бо́жий беззло́бный был еси́,/ я́ко вои́стинну, о́тче, безкро́вныя же́ртвы принося́, свяще́нне,/ и воспева́я се́рдцем чи́стым ко Го́споду, пра́зднуя при́сно. Сла́ва Отцу́ и Сы́ну и Свято́му Ду́ху. Грехо́в нам избавле́ние испроси́, Бо́жий слуго́ и предста́телю,/ ста́до твое́, вопие́м ти,/ и от собла́зн вра́жиих пою́щия тя сохрани́. И ны́не и при́сно и во ве́ки веко́в. Ами́нь. Богородичен: Твою́ пречи́стую утро́бу освяти́ от Отца́ просия́вшее Бо́жие Сло́во/ и мно́гия ра́ди бла́гости изба́ви челове́ческий род от дре́вния кля́твы. Песнь 5 Ирмос: Бо́жиим све́том Твои́м, Бла́же,/ у́тренюющих Ти ду́ши любо́вию озари́, молю́ся,/ Тя ве́дети, Сло́ве Бо́жий,/ и́стиннаго Бо́га,/ от мра́ка грехо́внаго взыва́юща. Припев: Преподо́бне о́тче Феодо́сие, моли́ Бо́га о на́с. Чи́стый сосу́д, цве́ты доброде́тельными украша́емь, о́тче Феодо́сие,/ из него́же источа́еши исто́чник ста́ду поуче́ния, па́че ме́да и со́та сладча́йша. Припев: Преподо́бне о́тче Феодо́сие, моли́ Бо́га о на́с. Естество́ плотско́е умертви́л еси́ доброде́тельными по́двиги, о́тче му́дре Феодо́сие,/ те́мже тя па́стыря Христо́с показа́,/ иде́же па́жить пре́жде избра́ Чи́стей Де́ве. Сла́ва Отцу́ и Сы́ну и Свято́му Ду́ху. И́же мона́хом был еси́ наста́вник/ и па́стырь овца́м, пасо́мым на па́жити Бо́жия Ма́тере,/ сего́ ра́ди Бог сугу́бу ра́дость подае́т ти, Феодо́сие,/ моли́твами Чи́стыя Богома́тере. И ны́не и при́сно и во ве́ки веко́в. Ами́нь. Богородичен: Обре́т Тя свяще́нный дом, Живы́й на Небесе́х во́лею в Твою́ утро́бу всели́ся./ Тем благода́рными гла́сы пое́м пречи́стое Твое́ рождество́ при́сно,/ в дому́ Твое́м стоя́ще. Песнь 6 Ирмос: Жите́йское мо́ре,/ воздвиза́емое зря напа́стей бу́рею,/ к ти́хому приста́нищу Твоему́ прите́к, вопию́ Ти:/ возведи́ от тли живо́т мой,/ Многоми́лостиве. Припев: Преподо́бне о́тче Феодо́сие, моли́ Бо́га о на́с. И́стинную воздви́г це́рковь Бо́жия Ма́тере,/ в не́йже мно́жества мона́шествующих собра́л еси́ лик,/ любо́вию пою́щих честну́ю твою́ па́мять. Припев: Преподо́бне о́тче Феодо́сие, моли́ Бо́га о на́с. Прибега́ющим к кро́ву твоему́ с ве́рою,/ исто́чник исцеле́ний источа́еши всем,/ и святы́ню излива́еши, преподо́бне, и просвеща́еши сердца́,/ бесо́вския ле́сти прогоня́я. Сла́ва Отцу́ и Сы́ну и Свято́му Ду́ху. Ко Христу́ Бо́гу воздви́гни твои́ ру́це, преподо́бне,/ и твое́ ста́до соблюди́, о́тче, е́же собра́л еси́ Ду́хом све́тло,/ моли́твами твои́ми пою́щих твою́ па́мять. И ны́не и при́сно и во ве́ки веко́в. Ами́нь. Богородичен: Ра́дуйся, Препе́тая, препе́таго Бо́га всех поро́ждшая,/ пою́щия Тя прича́стники яви́ све́ту, Чи́стая,/ и огня́ ве́чнаго изба́ви. Кондак, глас 3 Звезду́ Росси́йскую днесь почти́м,/ от восто́ка возсия́вшую и на за́пад прише́дшую,/ всю бо страну́ сию́ чудесы́ и добро́тою обогати́вшу и вся ны/ соде́янием и благода́тию мона́шескаго уста́ва,/ блаже́ннаго Феодо́сия. Икос Кто́ изрещи́ возмо́жет по́двиги твоя́, о́тче?/ Или́ кто́ изочте́т мно́жества трудо́в твои́х и чуде́с ди́вных?/ Еще́ бо в пло́ти сый, Безпло́тнаго ви́дел еси́,/ в пло́тяне о́бразе бесе́дующа к тебе́/ и дар принося́ща тебе́, Бо́гом по́сланное зла́то./ Па́че челове́ка ты яви́лся еси́ смире́нием и кро́тким нра́вом/ и духо́вныя му́дрости испо́лнен./ Тем, Ду́ха в себе́ прие́м, во све́те ви́ден был еси́, я́ко со́лнце, сия́я./ И мене́, тебе́ пою́ща, просвети́ сия́нием твои́м, преподо́бне,/ мона́шескаго уста́ва, Боже́ственный Феодо́сие. Песнь 7 Ирмос: Росода́тельну у́бо пещь/ соде́ла А́нгел/ преподо́бным отроко́м,/ халде́и же опаля́ющее веле́ние Бо́жие/ мучи́теля увеща́ вопи́ти:/ благослове́н еси́, Бо́же оте́ц на́ших. Припев: Преподо́бне о́тче Феодо́сие, моли́ Бо́га о на́с. Я́же ду́хом осени́вшая тя Бо́жия благода́ть возрасте́ в тебе́,/ просвеща́ющи, о́тче, твое́ се́рдце, е́юже учи́л еси́ воспева́ти:/ благослове́н Бог оте́ц на́ших. Припев: Преподо́бне о́тче Феодо́сие, моли́ Бо́га о на́с. Извеще́ния глаго́л твои́х изыдо́ша во вся страны́ смотре́ния та́ин при́сно пою́щим:/ благослове́н Бог оте́ц на́ших. Сла́ва Отцу́ и Сы́ну и Свято́му Ду́ху. Многоразли́чна благода́ть Ду́ха на тебе́, о́тче, почи́/ и пресла́вная чудеса́ показа́ пою́щим:/ благослове́н Бог оте́ц на́ших. И ны́не и при́сно и во ве́ки веко́в. Ами́нь. Богородичен: Под кров Твой, Влады́чице, прибега́юще, избавля́емся от лют,/ наде́жду бо иму́ще, ве́рнии вси, мо́лим:/ Твоя́ рабы́ не пре́зри, Богоро́дице Де́во. Песнь 8 Ирмос: Из пла́мене преподо́бным ро́су источи́л еси́/ и пра́веднаго же́ртву водо́ю попали́л еси́:/ вся бо твори́ши, Христе́, то́кмо е́же хоте́ти./ Тя превозно́сим во вся ве́ки. Припев: Преподо́бне о́тче Феодо́сие, моли́ Бо́га о на́с. Христа́ воспева́ет лик твои́х учени́к,/ с наста́вником о́крест стоя́ ра́ки твоея́,/ прие́мший твоя́ труды́, досто́йныя Бо́гу,/ Его́же превозно́сим во ве́ки. Припев: Преподо́бне о́тче Феодо́сие, моли́ Бо́га о на́с. Ра́дуяся, после́довал еси́ распя́тому Христу́ Бо́гу,/ мно́гими труды́ и боле́зньми те́ло умертви́в,/ ве́ру и́стинную и любо́вь стяжа́л еси́,/ ми́ра отве́ргся и Христа́ еди́наго возлюби́в. Сла́ва Отцу́ и Сы́ну и Свято́му Ду́ху. Источа́ет здра́вие Боже́ственною си́лою ра́ка моще́й твои́х, о́тче Феодо́сие,/ и стра́сти душе́вныя и плотски́я исцеля́ет,/ тем воспева́ем досто́йно па́мять твою́. И ны́не и при́сно и во ве́ки веко́в. Ами́нь. Гаврии́лов Ти глас ны́не восклица́ем: ра́дуйся, Преблагослове́нная Влады́чице Богоблагода́тная,/ Ея́же ра́ди кля́твы дре́вния избы́хом,/ Ты бо Хода́таица всех спасе́ния. Песнь 9 Ирмос: Бо́га челове́ком невозмо́жно ви́дети,/ на Него́же не сме́ют чи́ни А́нгельстии взира́ти;/ Тобо́ю же, Всечи́стая, яви́ся челове́ком/ Сло́во воплоще́нно,/ Его́же велича́юще,/ с Небе́сными во́и/ Тя ублажа́ем. Припев: Преподо́бне о́тче Феодо́сие, моли́ Бо́га о на́с. О́тче, ве́рою ча́да, я́же совокупи́л еси́,/ доброде́тельми сия́ просвети́ти сподо́би, па́стырем досто́ин па́стырь;/ оставле́ние же грехо́в и жития́ исправле́ние,/ преподо́бне, дарова́ти нам моли́ся. Припев: Преподо́бне о́тче Феодо́сие, моли́ Бо́га о на́с. Ра́вно пожи́в со святы́ми отцы́, Пречи́стыя Де́вы слуга́ был еси́, блаже́нне,/ и па́стырь мона́хов изря́ден, я́ко вои́стинну столп правове́рия,/ ве́рных наде́жда и упова́ние пою́щих в дому́ Бо́жия Ма́тере. Сла́ва Отцу́ и Сы́ну и Свято́му Ду́ху. Освяща́емь си́лою Вседержи́телевою, ко́зни вра́жия победи́л еси́/ и сих полки́ прогна́л еси́, боля́щим здра́вие по́дал еси́,/ тем, веселя́щеся, при́сно чтим твою́ па́мять. И ны́не и при́сно и во ве́ки веко́в. Ами́нь. Богородичен: Возсия́вшаго от Отца́ без ма́тере,/ неизрече́нно заче́нши, родила́ еси́, Богома́ти препе́тая, Де́во Чи́стая./ Моли́, Пресвята́я, за рабы́ Твоя́ Сы́на Твоего́ и Бо́га на́шего. Светилен Свет Единосу́щныя Тро́ицы восприи́м в се́рдце твое́м, Феодо́сие,/ отце́м о́тче, благочести́выя просвети́л еси́,/ в пеще́ре укре́плься с вели́ким Анто́нием, А́нгелом единокро́вне./ С ни́миже помина́й тебе́ ве́рою воспева́ющих.

Минея, 11 Сентября, Кано́н свята́го Глас 5 Песнь 1 Ирмос: Спаси́телю Бо́гу,/ в мо́ри лю́ди немо́крыми нога́ми наста́вльшему/ и фарао́на со всево́инством пото́пльшему,// Тому́ Еди́ному пои́м, я́ко просла́вися. Припев: Преподо́бне о́тче Силуа́не, моли́ Бо́га о на́с. Ума́ чистото́ю зо́ву Ма́тере Го́спода Сил вне́мляй,/ зми́я, грех поражда́ющаго, изрыгну́л еси́,/ и взыгра́ся дух твой о Бо́зе Спа́се твое́м, боголюби́ве о́тче Силуа́не,/ Его́же моли́ о чту́щих па́мять твою́. Припев: Преподо́бне о́тче Силуа́не, моли́ Бо́га о на́с. К тебе́, крест твой взе́мшему и на го́ру безстра́стия возше́дшему,/ припа́дающе, мо́лимся, всеблаже́нне:/ воспламени́ сердца́ на́ша ко всех лю́бящему Бо́гу,/ пла́менем любве́ твоея́, в горе́нии неугаса́ющем. Припев: Преподо́бне о́тче Силуа́не, моли́ Бо́га о на́с. Его́же возлюби́ душа́ твоя́, Сему́ уве́рился еси́,/ и к Нему́ Еди́ному прилепи́лся еси́, боголю́бче,/ и си́це искуси́теля злолука́ваго души́ твоея́ покори́л еси́,/ трудо́м, бде́нием, смире́нием и сле́зною моли́твою сего́ посрамля́я. Сла́ва Отцу́ и Сы́ну и Свято́му Ду́ху. Го́споди Сил, освяща́яй вся́каго челове́ка, гряду́щаго в мир,/ даждь сло́во хвале́ния усто́м мои́м,/ да превознесу́ Трисвято́е и́мя Твое́, ди́вно во святы́х Твои́х почива́ющее,/ с ни́миже и Силуа́н, возлю́бленный Твой, мо́лит Тя о душа́х на́ших. И ны́не и при́сно и во ве́ки веко́в. Ами́нь. Богородичен: Ско́рбных наведе́ния обурева́ют убо́гую мою́ ду́шу,/ и напа́стей о́блацы мое́ покрыва́ют се́рдце, Богоневе́сто,/ но, Свет ро́ждшая Боже́ственный и преве́чный,/ возсия́й мне свет ра́дости, моли́твами Силуа́на, уго́дника Твоего́. Песнь 3 Ирмос: Си́лою Креста́ Твоего́, Христе́,/ утверди́ мое́ помышле́ние,/ во е́же пе́ти и сла́вити// спаси́тельное Твое́ Воскресе́ние. Припев: Преподо́бне о́тче Силуа́не, моли́ Бо́га о на́с. Кто испове́сть страда́ния души́ твоея́, преподо́бне Силуа́не,/ егда́ дух зло́бы поднебе́сныя претя́ше ти,/ от Го́спода удали́ти ду́шу твою́ зложела́я?/ Сете́й сего́ лука́ваго изба́ви и нас, моли́твенниче о всей вселе́нней. Припев: Преподо́бне о́тче Силуа́не, моли́ Бо́га о на́с. Си́лою терпе́ния и красото́ю смире́ния душа́ твоя́, всеблаже́нне,/ хра́мина Ду́ху Свято́му устро́ися, сего́ ра́ди взыва́л еси́:/ о лю́дие, творе́ние Бо́жие, позна́йте Творца́/ и любо́вию к Нему́ прилепи́теся. Припев: Преподо́бне о́тче Силуа́не, моли́ Бо́га о на́с. Исто́чник ра́достей твои́х и средото́чие мы́слей твои́х/ и́мя Бо́га Вы́шняго бысть, о́тче Силуа́не,/ к Нему́ прилепи́тися и в Нем утверди́тися/ моли́твами твои́ми помози́ нам, к тебе́ прибега́ющим. Сла́ва Отцу́ и Сы́ну и Свято́му Ду́ху. Го́споди, Го́споди, да́руй си́лу Твоея́ благода́ти,/ да позна́ют Тебе́ вси лю́дие Ду́хом Святы́м,/ взыва́ем к Тебе́ уми́льно, я́коже возлю́бленный Твой,/ любо́вию к Тебе́ распаля́емый, Силуа́н преди́вный. И ны́не и при́сно и во ве́ки веко́в. Ами́нь. Богородичен: Не умолчу́ вопи́ти ясне́йше вели́чия Твоя́:/ а́ще бо не Ты, Отрокови́це,/ всегда́ предстоя́ла, моля́щи о мне Сы́на Твоего́,/ кто бы толи́кия бу́ри и лю́тых бед изба́вил мя? Седален, глас 4 Жа́ждею по Бо́зе возревнова́в, о́тче наш Силуа́не, зе́млю оте́ческую оста́вил еси́,/ и со пустыннолю́бцы Горы́ Афо́нския/ дла́ни твоя́ порабо́тати Го́сподеви всеусе́рднейше распросте́рл еси́,/ иде́же равноа́нгельскими труды́ твои́ми вертогра́д Влады́чицы ми́ра преукра́сил еси́/ и, я́ко благово́ние, Це́ркви Вселе́нстей возблагоуха́л еси́,/ лозо́ виногра́да но́ваго, Ду́хом Святы́м облагода́тствованная. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Несть возмо́жно исчи́слити вели́чия Твоя́, Богоро́дице,/ ниже́ изрещи́ неизсле́димую па́че ума́ си́лу чуде́с Твои́х, соверша́емых вы́ну,/ любо́вию Тя чту́щим и ве́рою покланя́ющимся,/ я́ко вои́стину Бо́га ро́ждшей. Песнь 4 Ирмос: Услы́шах слух си́лы Креста́,/ я́ко рай отве́рзеся им,/ и возопи́х:// сла́ва си́ле Твое́й, Го́споди. Припев: Преподо́бне о́тче Силуа́не, моли́ Бо́га о на́с. Я́ко пчела́ трудолю́бная, посто́м и моли́твою к Бо́гу прилежа́л еси́/ и Богоро́дицу Пречи́стую мир не оставля́ти сле́зно умоля́л еси́,/ о́тче преподо́бне, не преста́й и ны́не о нас моли́тися,/ я́ко и́маши дерзнове́ние ве́лие. Припев: Преподо́бне о́тче Силуа́не, моли́ Бо́га о на́с. Кла́дязь но́вый благода́ти неисчерпа́емыя в Горе́ Афо́нстей яви́лся еси́, всеблаже́нне,/ из него́же, па́че ме́да и со́та,/ сла́дость любве́ Христо́вы Ду́хом Святы́м источа́ется,/ е́юже в го́рести грехо́вней услади́ сердца́ на́ша. Припев: Преподо́бне о́тче Силуа́не, моли́ Бо́га о на́с. Го́споду, ре́кшу: иде́же есть сокро́вище ва́ше, ту бу́дет и се́рдце ва́ше,-/ благоволи́ у́бо, о всеблаже́нне, с тобо́ю Тому́ взыва́ти:/ Го́споди, Ду́хом Твои́м Святы́м даждь се́рдцу моему́ жа́жду,/ да никогда́же Тобо́ю насы́щуся. Сла́ва Отцу́ и Сы́ну и Свято́му Ду́ху. Я́ко же́ртву благово́нную и непоро́чную,/ принеси́ моли́твы твоя́ за ны ко Пресвято́й Тро́ице, преподо́бне о́тче наш,/ и ми́лости испроси́ ненави́дящим и вражду́ющим на нас,/ и их и нас изба́ви от вся́кия ско́рби и печа́ли. И ны́не и при́сно и во ве́ки веко́в. Ами́нь. Богородичен: Тя, Чи́стую, Тя, Де́ву Нескве́рную, еди́ну и́мам сте́ну необори́мую,/ прибе́жище, покро́в кре́пок, ору́жие спасе́ния,/ не пре́зри мене́, блу́днаго, наде́ждо ненаде́емых,/ немощству́ющих по́моще, ра́досте оскорбля́емых и заступле́ние. Песнь 5 Ирмос: Утренююще, вопие́м Ти:/ Го́споди, спаси́ ны,/ Ты бо еси́ Бог наш,// ра́зве бо Тебе́, ино́го не зна́ем. Припев: Преподо́бне о́тче Силуа́не, моли́ Бо́га о на́с. Ты, Го́споди, созда́л мя еси́ и святы́м Креще́нием просвети́л мя еси́,/ Ты проща́еши грехи́ моя́ и да́руеши причаща́тися Те́ла Твоего́ и Кро́ве,/ да́руй ми си́лу всегда́ пребыва́ти в Тебе́,/ Силуа́ново рыда́ние приношу́ Ти, Бо́же наш. Припев: Преподо́бне о́тче Силуа́не, моли́ Бо́га о на́с. Ума́ моего́ омраче́ние и страсте́й теле́сных обурева́ние/ твои́ми моли́твами, всеблаже́нне, просвети́ и ути́ши,/ я́коже дерзну́л еси́ укроти́ти во́лны морски́я,/ не терпя́ ви́дети ры́бари ги́бельными ве́тры обурева́емы. Припев: Преподо́бне о́тче Силуа́не, моли́ Бо́га о на́с. Недосто́йными усты́ приноси́мое тебе́ убо́гое хвале́ние на́ше, преподо́бне, не пре́зри,/ но приими́ и воспева́ющих па́мять твою́ моли́твою посети́,/ бед и напа́стей и ве́чнаго муче́ния изба́ви,/ да не постыди́мся, на тя упова́юще. Сла́ва Отцу́ и Сы́ну и Свято́му Ду́ху. Я́коже го́рлица пустыннолю́бная, от стра́жи у́тренния до но́щи/ воспева́ти Тро́ицу Единосу́щную и Неразде́льную/ со пустыннолю́бцы Горы́ Святы́я прилежа́л еси́, о́тче Силуа́не,/ умилостивле́ния ме́ртвым, живы́м и гряду́щим хода́тайствуя. И ны́не и при́сно и во ве́ки веко́в. Ами́нь. Богородичен: Кий дар благодаре́ния принесу́ Ти, Богоро́дице,/ я́ко наслади́хся Твои́х дарова́ний и Твоея́ безме́рныя бла́гости?/ Те́мже у́бо песносло́влю и велича́ю/ Твою́ неизрече́нную ко мне ми́лость. Песнь 6 Ирмос: Обы́де мя бе́здна,/ гроб мне кит бысть,/ аз же возопи́х к Тебе́, Человеколю́бцу,// и спасе́ мя десни́ца Твоя́, Го́споди. Припев: Преподо́бне о́тче Силуа́не, моли́ Бо́га о на́с. Святи́телие и свяще́нницы, и́ноцы и вси лю́дие,/ ра́дующеся, вку́пе просла́вите Бо́га и Пречи́стую Ма́терь Его́,/ кади́ло но́вое, моли́тву чи́стую Силуа́на, пла́менем Ду́ха Свята́го горя́ща,/ у Престо́ла Небе́снаго за нас прия́вших. Припев: Преподо́бне о́тче Силуа́не, моли́ Бо́га о на́с. Возвесели́ся, Горо́ Афо́нская, со пустыннолю́бцы твои́ми/ и во псалме́х и пе́ниих и песнех духо́вных воскли́кни Бо́гу:/ да уго́ден бу́дет пред Лицо́м Твои́м ве́рный слуга́ Твой,/ его́же моли́твами благода́ть но́вая Це́ркви Святе́й дарова́ся. Припев: Преподо́бне о́тче Силуа́не, моли́ Бо́га о на́с. Прииди́те, вси ве́рнии, со пустыннолю́бцы Горы́ Святы́я,/ па́мять пра́веднаго с похвала́ми почти́м, взыва́юще:/ возноси́те Го́спода Бо́га на́шего и покланя́йтеся в горе́ святе́й Его́/ ди́вно во святы́х Свои́х Почива́ющему. Сла́ва Отцу́ и Сы́ну и Свято́му Ду́ху. Бо́же, кто уподо́бится Тебе́?/ Ты Еди́н Вы́шний по всей земли́./ Мы же, равноа́нгельному смире́нию раба́ Твоего́ вне́млюще,/ о́бразу и подо́бию Твоему́ Ду́хом Святы́м ча́ем обнови́тися. И ны́не и при́сно и во ве́ки веко́в. Ами́нь. Богородичен: Не скры́ю глубины́ Твои́х щедро́т, и то́ка безме́рных чуде́с,/ и исто́чника приснотеку́щаго вои́стину е́же ко мне ми́лости Твоея́, Богоро́дице:/ но всем испове́дую, и вопию́, и веща́ю. Кондак, глас 2 Смиренному́дрия испове́дниче преди́вный/ и человеколю́бия Ду́хом Святы́м согрева́емая добро́то,/ Бо́гу возлю́бленне Силуа́не,/ о по́двизе твое́м Це́рковь Росси́йская ра́дуется,/ и́ноцы же Горы́ Афо́нския и вси христиа́нстии лю́дие,/ веселя́щеся, сыно́внею любо́вию к Бо́гу устремля́ются./ Его́же моли́ о нас, равноа́нгельне богове́дче,// во е́же спасти́ся нам, в горе́нии любве́ тебе́ подража́ющим. Икос Име́я бога́тство благода́ти, во е́же ду́хом на Небеса́ возведе́ну бы́ти,/ вои́стину ра́дости неизрече́нныя сподо́бился еси́, о́тче преблаже́нне Силуа́не./ Егда́ бо, вне образо́в ми́ра, в созерца́нии безме́рно лю́бящаго Христа́ Бо́га Лице́ ви́дети сподо́бился еси́,/ тогда́, Ду́хом Святы́м укрепля́емь,/ в вертогра́де Преблагослове́нныя Богома́тере Тому́ всеусе́рднейше послужи́л еси́./ Его́же моли́, равноа́нгельне богове́дче,/ во е́же спасти́ся нам, в горе́нии любве́ тебе́ подража́ющим. Песнь 7 Ирмос: В пещи́ о́гненней/ песносло́вцы спасы́й о́троки,// благослове́н Бог оте́ц на́ших. Припев: Преподо́бне о́тче Силуа́не, моли́ Бо́га о на́с. И́го благо́е, бре́мя ле́гкое Христа́ Спа́са взем,/ и ветри́лом Ду́ха Свята́го, в стра́се боже́ственнем,/ к приста́нищу благооти́шному кора́бль душе́вный твой упра́вил еси́, о́тче Силуа́не,/ мона́хом, в по́двизе изнемога́ющим, о́бразе преди́вный. Припев: Преподо́бне о́тче Силуа́не, моли́ Бо́га о на́с. Ка́ко не диви́мся смире́нию и человеколю́бию твоему́, Силуа́не предо́бре,/ ви́дяще тя сле́зы источа́юща/ и о су́щих во а́де и нераска́янных гре́шницех рыда́ньми сраспина́ющася,/ враго́м же свои́м проще́ния прося́ща, всепроще́нию Христо́ву подража́юща? Припев: Преподо́бне о́тче Силуа́не, моли́ Бо́га о на́с. Псало́мски восклица́я: ви́дена бы́ша ше́ствия Твоя́, Бо́же,/ ше́ствия Бо́га моего́ и Царя́, Иже во свято́м,/ Сего́ вои́стину в лице́ отца́ духо́внаго Авраа́мия зре́ти сподо́бился еси́,/ чти́ти наста́вники на́ша благода́тне нас наставля́я, Силуа́не богове́дче. Сла́ва Отцу́ и Сы́ну и Свято́му Ду́ху. О́браз начерта́ний доброде́тельных дея́ний сый,/ смире́н же, и кро́ток, и наста́вник до́брый мона́шествующим в Горе́ Афо́нстей показа́лся еси́, Силуа́не,/ сего́ ра́ди мона́си и мирсти́и/ предста́тельству твоему́ пред Бо́гом вверя́ются. И ны́не и при́сно и во ве́ки веко́в. Ами́нь. Богородичен: Покро́в бу́ди, и предста́тельство, и заступле́ние, и похвала́, Де́во,/ обнаже́ну мне ны́не вся́кия по́мощи,/ безпо́мощных си́ло и наде́ждо ненаде́емых,/ Силуа́на моли́твами, со́лнца тепле́йшими. Песнь 8 Ирмос: Из Отца́ пре́жде век рожде́ннаго Сы́на и Бо́га/ и в после́дняя ле́та воплоще́ннаго от Де́вы Ма́тере, / свяще́нницы, по́йте,// лю́дие, превозноси́те во вся ве́ки. Припев: Преподо́бне о́тче Силуа́не, моли́ Бо́га о на́с. Воздея́ние рук на́ших приими́, преподо́бне,/ Влады́чней бла́гости подо́бяся, прегреше́ния на́ша презира́я,/ ты бо ду́шу твою́ уязви́л еси́ Христо́вою любо́вию и Пречи́стыя Его́ Ма́тере,/ Е́юже умоли́ спасти́ ду́ши на́ша. Припев: Преподо́бне о́тче Силуа́не, моли́ Бо́га о на́с. Я́ко крин преди́вный и сапфи́р пречу́дный,/ в вертогра́де Пречи́стыя процве́л еси́, преподо́бне Силуа́не,/ Влады́це твоему́ Христу́ смире́нно ревну́я, вы́ше бо челове́ка восприе́м житие́,/ и́мже мно́гих ду́ши Го́споду приво́диши. Припев: Преподо́бне о́тче Силуа́не, моли́ Бо́га о на́с. Вои́стину носи́тель даро́в Свята́го Ду́ха был еси́/ и, разли́чными доброде́тельми укра́шен, Силуа́не,/ смире́нием го́рнюю высоту́ насле́див, нището́ю Небе́сное бога́тство изря́дно прия́л еси́./ Насле́дники сего́ покажи́ ны, моли́твами твои́ми. Сла́ва Отцу́ и Сы́ну и Свято́му Ду́ху. Сия́ния Боже́ственнаго и Ду́ха Свята́го сла́дости прича́стника показа́ тя Госпо́дь, о́тче Силуа́не,/ егда́ в неизрече́ннем Фаво́рстем сия́нии тя посети́л есть./ Зре́ти сла́ву Сего́ в све́те блиста́ния Божества́ Его́/ сподо́би и нас, мо́лимтися. И ны́не и при́сно и во ве́ки веко́в. Ами́нь. Богородичен: Пречи́стая Влады́чице, Небе́сных Сил превы́шшая,/ ро́ждшая Спа́са, всех Соде́теля, Единосу́щна Отцу́ и Ду́ху,/ даждь нам сло́во, Препе́тая, я́ко да возмо́жем пе́ти Тя,/ су́щую Засту́пницу ро́да на́шего. Песнь 9 Ирмос: Тя, па́че ума́ и словесе́ Ма́терь Бо́жию,/ в ле́то Безле́тнаго/ неизрече́нно ро́ждшую,// ве́рнии, единому́дренно велича́ем. Припев: Преподо́бне о́тче Силуа́не, моли́ Бо́га о на́с. В житии́ подви́жника преди́вна, по сме́рти же моли́твенника/ и сострада́теля за ны пред Бо́гом изря́дна позна́хом тя, преподо́бне,/ егда́ иеродиа́кона Дави́да, смерте́льне отра́влена, посеще́нием твои́м внеза́пу исцели́л еси́,/ покая́ния вре́мя сему́ исхода́тайствовав усе́рдно. Припев: Преподо́бне о́тче Силуа́не, моли́ Бо́га о на́с. Земли́ Росси́йския сосу́де избра́нный и Горы́ Афо́нския подви́жниче но́вый,/ уго́дниче Бо́жий Силуа́не, простри́ дла́ни твоя́ за ны ко Го́споду/ и, я́ко ми́ро благово́нное, моли́твы вознеси́,/ да спасе́т от сме́рти ду́ши на́ша. Припев: Преподо́бне о́тче Силуа́не, моли́ Бо́га о на́с. А́нгелом единонра́вна и святы́м соприча́стна/ к го́рнему Сио́ну призва́ тя Госпо́дь, преподо́бне,/ иде́же вознеси́ моли́твы твоя́ за ны ко всех Влады́це,/ хода́тайствуя о Святе́й Це́ркви и о нас, чту́щих па́мять твою́ сладкопе́сненно. Сла́ва Отцу́ и Сы́ну и Свято́му Ду́ху. Огне́м купину́ не опали́вшаго и пла́менными язы́ки Це́рковь Христо́ву освяти́вшаго,/ смире́ния твоего́ ра́ди, Ду́хом Святы́м возжже́н был еси́, о́тче преди́вне,/ да житие́м нескве́рным научи́ши ны покланя́тися Тро́ице, всех Бо́гу,/ пла́менем любве́ твоея́ к Нему́ приближа́ющихся. И ны́не и при́сно и во ве́ки веко́в. Ами́нь. Богородичен: Яко всех Цари́цу и Влады́чицу на́шу,/ Тя любо́вию сла́вим, Пречи́стая Де́во,/ просве́щшиися Страстьми́ Сы́на Твоего́ и позна́вшии Сего́ всем Благоде́теля./ Сла́ва благода́ти Его́ во вся ве́ки. Светилен Све́та неме́ркнущаго блиста́нием украси́лся еси́, преподо́бне о́тче наш Силуа́не,/ и предстои́ши ве́чно престо́лу сла́вы Триеди́наго Божества́, о Ду́се Свято́м ликовству́яй./ Благода́ти сея́ испроси́ и нам,/ да моли́твами твои́ми прича́стницы жи́зни ве́чныя бу́дем. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Осия́нием Твои́м просвети́ на́ша помышле́ния, и сердца́, и ра́зум, Ма́ти Безневе́стная,/ я́ко да стезя́ми жи́зни пра́во ходя́ще, ми́лость приобря́щем,/ возвеща́юще при́сно хвалы́ Твоя́.

Минея, 4 Августа, Кано́н святы́х Глас 2 Песнь 1 Ирмос: Гряди́те, лю́дие,/ пои́м песнь Христу́ Бо́гу,/ разде́льшему мо́ре и настав́льшему лю́ди,/ я́же изведе́ из рабо́ты еги́петския,/ я́ко просла́вися. Припев: Святи́и о́троцы, моли́те Бо́га о на́с. Число́м сия́ющия честны́я де́ти седмь, прииди́те, ве́рно почти́м,/ я́ко просвеща́ют Христо́ву Це́рковь, свети́льники седмосве́тлыя,/ лу́чшия зако́нных. Припев: Святи́и о́троцы, моли́те Бо́га о на́с. И́же в плотско́е пе́рвее умерщвле́ние, жи́ви суще, Христо́во о́троцы седмь оде́яшася,/ я́коже сон, смерть пресла́вно прие́мше,/ утвержда́юще уче́ние воскресе́ния. Сла́ва Отцу́ и Сы́ну и Свято́му Ду́ху. Иерихо́н паде́ся гла́сом труб седми́,/ пре́лести же возноше́ние седмогла́сием ны́не ве́ры страда́лец/ сни́де до а́да и разори́ся. И ны́не и при́сно и во ве́ки веко́в. Ами́нь. Богородичен: Новоле́пно рождество́ обновля́вши, Безневе́стная,/ и́бо Отцу́ Собезнача́льное и Боже́ственному Ду́ху соприсносу́щное Сло́во/ из Тебе́ воплоти́ся, спряже́ния не оставль. Песнь 3 Ирмос: Утверди́ нас в Тебе́, Го́споди,/ Дре́вом умерщвле́й грех,/ и страх Твой всади́/ в сердца́ нас, пою́щих Тя. Припев: Святи́и о́троцы, моли́те Бо́га о на́с. Зве́зды неукло́нны седмь, яви́стеся, ве́рою сия́юще, страстоте́рпцы,/ и и́же ле́сти, ныря́ющия глубино́ю,/ к приста́нищу спаси́тельному упра́висте. Припев: Святи́и о́троцы, моли́те Бо́га о на́с. Пред суди́щем тве́рдо ста́вше, святи́и, мучи́телей, я́коже иногда́ Маккаве́и,/ во́инства измени́стеся тле́нныя жи́зни, вво́инившеся Христу́. Сла́ва Отцу́ и Сы́ну и Свято́му Ду́ху. Досто́йно Бо́гу прия́тна яви́стеся же́ртва моли́твы, святи́и о́троцы,/ и воне́ю благоуха́нною смрад обличи́вше пре́лести тве́рдо. И ны́не и при́сно и во ве́ки веко́в. Ами́нь. Богородичен: Купина́ в Сина́и прообража́ше твое́, Де́во, пресла́вное рождество́:/ огне́м бо Бо́жества не опали́лася еси́,/ в ложесна́ прие́мши ве́рно. Седален, глас 4 Я́ко столпи́ су́ще Це́ркве Христо́вы,/ стены разверго́сте неве́рия тве́рдо, седмобра́тнии му́ченицы./ Те́мже пре́жде сме́рти е́ллинский гнев,/ и па́ки по сме́рти ерети́ческую бу́рю отгна́вше, и воскресе́ния ве́ру удержа́вше,/ моли́теся ве́рою утверди́тися нам. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Де́во Всенепоро́чная, Я́же Пресу́щнаго Бо́га ро́ждшая,/ со Безпло́тными того́ непреста́нно моли́/ оставле́ние прегреше́ний и исправле́ние жития́ да́ти нам пре́жде конца́,/ ве́рою и любо́вию пою́щим Тя по до́лгу, еди́на Всепе́тая. Песнь 4 Ирмос: Услы́шах, Го́споди,/ сла́вное твое́ смотре́ние/ и просла́вих, Человеколю́бче,/ непостижи́мую Твою́ си́лу. Припев: Святи́и о́троцы, моли́те Бо́га о на́с. Свяще́нное совокупле́ние и число́м я́ве почте́ное,/ седмери́цу честны́х о́троков воспое́м. Припев: Святи́и о́троцы, моли́те Бо́га о на́с. Умудре́на су́етием нечести́ваго пре́лести царя́/ Ефе́сстии о́троцы показа́ша безу́мна. Сла́ва Отцу́ и Сы́ну и Свято́му Ду́ху. Же́ртвы пренепоро́чныя я́ко вои́стинну/ и заколе́ния Госпо́дня ве́рою яви́стеся, о́троцы святи́и. И ны́не и при́сно и во ве́ки веко́в. Ами́нь. Богородичен: Не пре́зри, моля́щи о нас, при́сно Благослове́нная,/ изба́вится вся́кия скорби, Чи́стая. Песнь 5 Ирмос: Све́та Пода́телю и веко́в Тво́рче, Го́споди,/ во све́те Твои́х повеле́ний наста́ви нас:/ ра́зве бо Тебе́, бо́га не знаем. Припев: Святи́и о́троцы, моли́те Бо́га о на́с. Нечу́вственно пе́рвее, о́бщею уме́рше на земли́ сме́ртию,/ па́че естества́ воскресну́сте а́бие,/ уверя́юще я́ве, Ефе́сстии о́троцы, ме́ртвых воскресе́ние. Припев: Святи́и о́троцы, моли́те Бо́га о на́с. Освя́щшеся Бо́гови испове́данием и́стинныя ве́ры,/ я́ко страда́льцы зако́ннии Госпо́дни,/ изба́влени бы́сте, му́дрии, темни́ц и ран и венцы́ прия́сте. Сла́ва Отцу́ и Сы́ну и Свято́му Ду́ху. Победи́вше тве́рдо и́дольскую лесть, сла́внии му́ченицы,/ и от нечести́вых ересе́й уче́ния,/ сохраня́йте при́сно испове́дающия ме́ртвых воскресе́ние. И ны́не и при́сно и во ве́ки веко́в. Ами́нь. Богородичен: Во двух естества́х и Ипоста́си еди́ней бысть,/ соверше́н сый челове́к неслия́нно и соверше́н Бог,/ рожде́йся от Святы́я Ма́тере Пресу́щный. Песнь 6 Ирмос: В бе́здне грехо́вней валя́яся,/ неизсле́дную милосе́рдия Твоего́ призыва́ю бе́здну:/ от тли, Бо́же, мя возведи́. Припев: Святи́и о́троцы, моли́те Бо́га о на́с. Боже́ственныя Прему́дрости равночи́сленнии столпи́,/ да восхва́лятся святи́и о́троцы седмь,/ сло́весы́, я́ко ка́мением, сокру́шше мучи́телей безбо́жное повеле́ние. Припев: Святи́и о́троцы, моли́те Бо́га о на́с. Зако́ном Боже́ственнаго промышле́ния соблюда́еми,/ гото́вое прия́сте погребе́ние пеще́ру,/ в не́йже ме́ртви и нетле́нни, многоле́тни, святи́и, яви́стеся. Сла́ва Отцу́ и Сы́ну и Свято́му Ду́ху. Нетле́ния воста́сте свиде́тели,/ ве́ру отгоня́юще тлетво́рную и ме́ртвую/ и Бо́гу моля́щеся о наде́ющихся воскресе́ния. И ны́не и при́сно и во ве́ки веко́в. Ами́нь. Богородичен: Ны́не естество́ же́нское возра́довася,/ ны́не печа́ль преста́, ра́дость же процвете́,/ я́ко Мари́я роди́ ра́дость, Спа́са Христа́ Бо́га. Кондак, глас 4 Ми́ра су́щая тле́нная презре́вше/ и нетле́нныя да́ры прие́мше,/ уме́рше, кроме́ тле́ния пребы́ша./ Те́мже востаю́т по мно́гих ле́тех,/ все погре́бше лю́тых неве́рие,/ я́же во хвале́нии днесь, ве́рнии, восхваля́юще, Христа́ воспои́м. Песнь 7 Ирмос: Те́лу злато́му прему́дрыя де́ти не послужи́ша,/ и в пла́мень са́ми поидо́ша,/ и бо́ги их обруга́ша,/ среди́ пла́мене возопи́ша, и ороси́ я́ А́нгел:/ услы́шася уже уст ва́ших моли́тва. Припев: Святи́и о́троцы, моли́те Бо́га о на́с. Прия́телища Бо́жия чи́ста и избра́нна о́троцы яви́шася:/ и́миже преда́ния ересе́й от Це́ркве отго́нятся и правосла́вие сия́ет,/ я́ко есть воскресе́ние вся́кой души́ же и пло́ти, я́коже роди́ся. Припев: Святи́и о́троцы, моли́те Бо́га о на́с. Я́ко су́ще тве́рди, пре́жде сме́рти вои́стинну/ во страда́нии свое́м святи́и о́троцы а́бие яви́шася/ и по уме́ртвии жи́ви, сла́вою содержи́ми Боже́ственною,/ благоче́стно уве́ривше собо́ю и́стинное воскресе́ние. Сла́ва Отцу́ и Сы́ну и Свято́му Ду́ху. Душа́м вку́пе и телесе́м чу́вственным бу́дет воскресе́ние,/ я́коже бо не мо́щно без те́ла души́ в мир приити́,/ си́це ни телеси́ без души́, – прехва́льнии глаго́лаху, –/ или́ просла́вится душа́, или́ посрами́тся. И ны́не и при́сно и во ве́ки веко́в. Ами́нь. Богородичен: Ро́ждшая Бо́га Спа́са всех, Мари́е,/ отча́янных еси́ исправле́ние, гре́шных обновле́ние,/ и ненаде́жных наде́жда, и пою́щих по́мощь:/ благослове́н Бог оте́ц на́ших. Песнь 8 Ирмос: В пещи́ о́трочестей прообрази́л еси́ иногда́ Твою́ Ма́терь, Го́споди,/ о́браз же сия́ из огня́ изыма́ше, неопа́льно входя́щая,/ Ю́же пое́м, я́вльшуюся Тобо́ю конце́м днесь,/ и превозно́сим во вся ве́ки. Припев: Святи́и о́троцы, моли́те Бо́га о на́с. Ко́рень го́рести нечести́вых, возра́стший лю́те, Боже́ственнии о́троцы,/ посе́кше пре́лести е́реси, приноша́ют плод ве́ры,/ жи́вы, и погре́бшеся ве́рно, и воскре́сше. Припев: Святи́и о́троцы, моли́те Бо́га о на́с. Ефе́сских нача́льников, о́троцы святи́и седмь и страстоте́рпцы,/ Христо́ве Це́ркви и Ца́рству ве́рному, Боже́ственное яви́стеся утвержде́ние,/ его́же превозно́сим во вся ве́ки. Сла́ва Отцу́ и Сы́ну и Свято́му Ду́ху. Тве́рди я́вльшеся на земли́ и равночи́сленнии показа́вшеся звезда́м,/ неле́стное ше́ствие Боже́ственныя ве́ры о́троцы творя́ще, взыва́ху:/ Тя превозно́сим, Христе́, во ве́ки. И ны́не и при́сно и во ве́ки веко́в. Ами́нь. Богородичен: Никто́же поги́бе, Чи́стая, ве́ры наде́жду име́я на Тя, правосла́вно, Ма́ти Бо́жия,/ то́кмо за́вистию отмета́ющиися Твоего́ не покланя́тися зра́ка воображе́нию. Песнь 9 Ирмос: Я́же пре́жде со́лнца свети́льника Бо́га возсия́вшаго,/ пло́тски к нам прише́дшаго, из боку́ Деви́чу,/ неизрече́нно воплоти́вшая, Благослове́нная, Всечи́стая,/ Тя, Богоро́дице, велича́ем. Припев: Святи́и о́троцы, моли́те Бо́га о на́с. Бога́тство чуде́с и Боже́ственных тайн открове́ние святы́х яви́ся ны́не воскресе́ние:/ и́же бо иногда́ есте́ственною пло́тию уме́рше сме́ртию,/ нетле́нно ны́не воскресо́ша, оде́яни, я́коже не уме́рше. Припев: Святи́и о́троцы, моли́те Бо́га о на́с. Зна́ния сокро́вище и ве́ры тве́рдое огражде́ние святы́х дете́й яви́ся пеще́ра,/ провозвеща́я бу́дущее всех воскресе́ние:/ не четверодне́внаго Ла́заря, но ве́чныя воскреси́ мертвецы́. Сла́ва Отцу́ и Сы́ну и Свято́му Ду́ху. Венце́м муче́ния, пострада́вше, зако́нно оде́ястеся, о́троцы седмь,/ столпы́ прему́дрости Бо́жия,/ и уче́нием правосла́вия воста́ние яви́сте,/ я́ко Це́ркви побо́рницы и моли́твенницы воспева́ющих вас. И ны́не и при́сно и во ве́ки веко́в. Ами́нь. Богородичен: Те́ло и ду́шу Твою́ нескве́рно Бо́гу соблюла́ еси́, Чи́стая,/ Царь же возжела́ Твое́я добро́ты, Христо́с,/ и Ма́терь Своего́ воплоще́ния показа́, Мари́е пресла́вная,/ спасе́ние мне при́сно подава́я. Светилен Ору́жием Честна́го Твоего́ Креста́ воору́жшеся, страстоте́рпцы Твои́, Сло́ве,/ сопроти́вныя си́лы тве́рдо победи́ша/ и с Тобо́ю, Христе́ мой, всех Царю́, Ца́рствуют вку́пе. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Вои́стинну Богоро́дицу, Тя испове́дуем, Влады́чице, Тебе́ ра́ди спа́сшиися,/ и́бо Бо́га неизрече́нно роди́ла еси́, разо́ршаго Кресто́м смерть,/ к себе́ же привле́кша собо́ры,/ с ни́миже Тя восхваля́ем.

Минея, 27 Июня, Кано́н, его́же краегране́сие: Пою́ тя, Сампсо́не, ве́рно Боже́ственными словесы́. Глас 2 Песнь 1 Ирмос: Гряди́те, лю́дие,/ пои́м песнь Христу́ Бо́гу,/ разде́льшему мо́ре и наста́вльшему лю́ди,/ я́же изведе́ из рабо́ты еги́петския,/ я́ко просла́вися. Припев: Преподо́бне о́тче Сампсо́не, моли́ Бо́га о на́с. Пе́сньми твое́ пресве́тлое торжество́ восхвали́ти устреми́вшуся,/ свет ми низпосли́,/ предстоя́ венцено́сец престо́лу Влады́чню, преблаже́нне. Припев: Преподо́бне о́тче Сампсо́не, моли́ Бо́га о на́с. Еди́ну жела́я, я́же к жи́зни веду́щую тя, ми́ра кра́сная прете́кл еси́/ и преми́рное насле́дие стяжа́л еси́./ Те́мже тя, соше́дшеся, Сампсо́не, почита́ем. Сла́ва Отцу́ и Сы́ну и Свято́му Ду́ху. Зако́ну Бо́жию повину́вся, досточу́дне,/ к кра́йней доброде́тели, ра́дуяся, восте́кл еси́, ми́лостив всем быв./ Те́мже тя ны́не ублажа́ем. И ны́не и при́сно и во ве́ки веко́в. Ами́нь. Богородичен: Тя, Бо́жию па́че сло́ва Роди́тельницу,/ я́ко держа́вно заступле́ние всех, Пренепоро́чная, побежда́емых,/ сла́вим непреста́нно и ублажа́ем. Песнь 3 Ирмос: Утверди́ нас в Тебе́, Го́споди,/ Дре́вом умерщвле́й грех,/ и страх Твой всади́/ в сердца́ нас, пою́щих Тя. Припев: Преподо́бне о́тче Сампсо́не, моли́ Бо́га о на́с. Сампсо́на свяще́ннаго восхва́лим:/ Бо́жию бо подо́бяся благоутро́бию, ми́лостив неду́жным бысть,/ наготу́ющим же всем оде́жда. Припев: Преподо́бне о́тче Сампсо́не, моли́ Бо́га о на́с. Свя́то и че́стно Боже́ственное житие́ твое́ препроводи́в, со святы́ми сочета́лся еси́/ и оби́тели преподо́бных дости́гл еси́, просвеще́ния неизрече́ннаго сподобля́емь. Сла́ва Отцу́ и Сы́ну и Свято́му Ду́ху. Блаже́н еси ты, и бла́го тебе́ бу́дет,/ Боже́ственныя соблю́дшу, о́тче, зако́ны Го́спода и Бо́га на́шего,/ Его́же моли́ спасти́ся ста́ду твоему́. И ны́не и при́сно и во ве́ки веко́в. Ами́нь. Богородичен: Души́ моея́ и ума́, Чи́стая, тьму отжени́/ и даждь я́ко в день наро́чит пожи́ти,/ спаси́тельная творя́щу повеле́ния. Седален, глас 4 Просия́в ду́хом, я́ко свети́льник све́тел, Сампсо́не всеблаже́нне,/ озаря́еши нас, че́стне, в дому́ твое́м:/ сего́ ра́ди врачева́ния, от Бо́га тебе́ да́нная, о́тче,/ су́щим в разли́чных неду́зех раздава́еши./ Те́мже мольба́ми твои́ми изба́ви ны от страсте́й. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Обнови́ла еси́, Чи́стая, Боже́ственным Рождество́м Твои́м/ истле́вшее во страсте́х земноро́дных ме́ртвенное существо́/ и воздви́гла еси́ вся от сме́рти к животу́ нетле́ния./ Те́мже Тя по до́лгу блажи́м вси, Де́во Препросла́вленная,/ я́коже прорекла́ еси́. Песнь 4 Ирмос: Услы́шах, Го́споди,/ слух Твоего́ смотре́ния/ и просла́вих Тя,/ Еди́не Человеколю́бче. Припев: Преподо́бне о́тче Сампсо́не, моли́ Бо́га о на́с. Я́ко звезда́ пресве́тлая, всех нас просвеща́еши сердца́,/ достодо́лжно блажа́щих тя. Припев: Преподо́бне о́тче Сампсо́не, моли́ Бо́га о на́с. Дрема́ние от о́чию твое́ю отложи́в, бдел еси́ непреста́нно/ и сла́сти теле́сныя успи́л еси́. Сла́ва Отцу́ и Сы́ну и Свято́му Ду́ху. Ни́щим дово́лен был еси́ Христа́ ра́ди/ и прия́л еси́ вы́шнее насле́дие, преподо́бне, ра́дуйся. И ны́не и при́сно и во ве́ки веко́в. Ами́нь. Богородичен: Тя, Всенепоро́чная Влады́чице, све́тлую пала́ту Сло́ва,/ песносло́вим и ублажа́ем. Песнь 5 Ирмос: Све́та Пода́телю и веко́в Тво́рче, Го́споди,/ во све́те Твои́х повеле́ний наста́ви нас:/ ра́зве бо Тебе́, ино́го бо́га не зна́ем. Припев: Преподо́бне о́тче Сампсо́не, моли́ Бо́га о на́с. Пречи́стый Свет, почи́вший в тебе́,/ всего́ тя светови́дна сотвори́, о́тче,/ просвеща́юща ве́рных доброде́телей твои́х све́тлыми сия́нии. Припев: Преподо́бне о́тче Сампсо́не, моли́ Бо́га о на́с. Ми́лованием мно́гим ни́щим бога́тство был еси́/ и врач су́щим в не́мощи воста́л еси́ я́ве,/ сих врачева́нием отъе́мля неду́ги. Сла́ва Отцу́ и Сы́ну и Свято́му Ду́ху. Яви́лся еси храм чист Пресвята́го и Честна́го Ду́ха, страсте́й ти́ну очи́щ/ сам себе́ я́ко вои́стинну, о́тче Богоно́се,/ те́мже восхваля́ем тя. И ны́не и при́сно и во ве́ки веко́в. Ами́нь. Богородичен: Тя, Пресвята́я Чи́стая, добро́ту Иа́ковлю,/ ве́рою Боже́ственными гла́сы песносло́вим,/ ро́ждшую нам Бо́га Плотоно́сца, Его́же трепе́щут вся́ческая. Песнь 6 Ирмос: В бе́здне грехо́вней валя́яся,/ неизсле́дную милосе́рдия Твоего́ призыва́ю бе́здну:/ от тли, Бо́же, мя возведи́. Припев: Преподо́бне о́тче Сампсо́не, моли́ Бо́га о на́с. Сокро́вищи Небе́сными обогати́лся еси́,/ любя́ ми́лование, Сампсо́не сла́вне,/ и отверза́я ни́щим твою́ утро́бу, соверше́нным умо́м. Припев: Преподо́бне о́тче Сампсо́не, моли́ Бо́га о на́с. Созда́л еси́ в сла́ву Бо́гу на́шему храм освяще́н,/ во́ньже притека́юще, от многови́дных очища́ются неду́г ве́рнии, преблаже́нне. Сла́ва Отцу́ и Сы́ну и Свято́му Ду́ху. Чи́сто житие́ твое́ препроводи́л еси́/ и с преподо́бными преподо́бно всели́лся еси́;/ о нас моли́ся, ве́рно чту́щих тя, Богодохнове́нне. И ны́не и при́сно и во ве́ки веко́в. Ами́нь. Богородичен: Не́бо высоко́ была́ еси́ всех Царя́ Бо́га, Всенепоро́чная,/ и чи́стая пала́та, и черто́г све́тел, Боже́ственною благода́тию. Кондак, глас 8 Яко врача́ всеизря́дна и моли́твенника благоприя́тна,/ к ра́це твое́й Боже́ственней притека́юще, Сампсо́не Богому́дре преподо́бне,/ соше́дшеся любо́вию, псалмы́ и пе́сньми, ра́дующеся, Христа́ прославля́ем,/ такову́ю тебе́ благода́ть подава́юща исцеле́ний. Икос Ста́рческое, кро́ткое и незло́бивое, непоро́чно житие́ соверши́вшаго,/ сла́вно благода́ть прии́мшаго чуде́с, тве́рду и неизрече́нну,/ Сампсо́на преподо́бнаго восхва́лим,/ а́лчущих пита́теля, и су́щих в ну́ждах помо́щника, и побо́рника вели́ка,/ неду́гующим воздви́гша Боже́ственный храм исцеле́ний. Песнь 7 Ирмос: О́бразу злато́му, на по́ле Деи́ре служи́му,/ трие́ Твои́ о́троцы небрего́ша безбо́жнаго веле́ния,/ посреде́ же огня́ вве́ржени, ороша́еми, поя́ху:/ благослове́н еси́, Бо́же оте́ц на́ших. Припев: Преподо́бне о́тче Сампсо́не, моли́ Бо́га о на́с. Кре́пость Христа́ держа́вну в напа́стех име́я, преблаже́нне,/ жития́ премину́л еси́ бу́рю без истопле́ния, преподо́бне,/ и к ти́хому приста́нищу, воспева́я, дости́гл еси́:/ благослове́н еси́, Бо́же оте́ц на́ших. Припев: Преподо́бне о́тче Сампсо́не, моли́ Бо́га о на́с. Прему́дростию мно́гою и любо́вию духо́вною подвиза́емь,/ храм созда́л еси́, о́тче, вели́к,/ в него́же притека́юще всегда́, исцеле́ние прие́млют вси, вопию́ще и глаго́люще:/ благослове́н еси́, Бо́же оте́ц на́ших. Сла́ва Отцу́ и Сы́ну и Свято́му Ду́ху. Све́щник све́тел доброде́телей, Боже́ственным све́том просвеща́емь, Сампсо́не, яви́лся еси́/ и озари́л еси́ вселе́нныя концы́./ Те́мже, соше́дшеся, тя ве́рою ублажа́ем, пою́ще:/ благослове́н еси, Бо́же оте́ц на́ших. И ны́не и при́сно и во ве́ки веко́в. Ами́нь. Богородичен: Руно́ иногда́ предъявля́ше чи́стую утро́бу Твою́, прие́мшую Небе́сный дождь,/ всех ороша́ющ одержи́мых жа́ждею грехо́вною, Всепе́тая./ Благослове́на еси́, Бо́га пло́тию ро́ждшая. Песнь 8 Ирмос: В пещь о́гненную ко отроко́м евре́йским снизше́дшаго/ и пла́мень в ро́су прело́жшаго Бо́га/ по́йте, дела́, я́ко Го́спода,/ и превозноси́те во вся ве́ки. Припев: Преподо́бне о́тче Сампсо́не, моли́ Бо́га о на́с. Язы́к движа́ ра́достно на Бо́жия, о́тче Сампсо́не, пе́сни,/ стра́сти плотски́я воздержа́нием порабо́тил еси души́/ и раб Христу́ и́скренний яви́лся еси́ и Вы́шняго гра́да насле́дник. Припев: Преподо́бне о́тче Сампсо́не, моли́ Бо́га о на́с. Чи́стый твой ум, блиста́нии Боже́ственными укра́шен, пресве́тел яви́ся/ и прия́тен чи́стых, всеблаже́нне, Боже́ственных сия́ний,/ те́мже тя чтим, Сампсо́не, во ве́ки. Сла́ва Отцу́ и Сы́ну и Свято́му Ду́ху. Освяще́нну име́я жизнь, пресла́вно, Сампсо́не всеблаже́нне,/ я́ве просла́вился еси́, к Бо́гу преше́д/ се бо пребыва́ет па́мять твоя́ во ве́ки и пра́вда. И ны́не и при́сно и во ве́ки веко́в. Ами́нь. Богородичен: Уста́ви страсте́й мои́х лю́тую бу́рю, Чи́стая Благослове́нная,/ и возбрани́ всем, неща́дно мою́ нищету́, Де́во, борю́щим враго́м безпло́тным,/ я́ко да ве́рно пою́ Тя. Песнь 9 Ирмос: От Бо́га Бо́га Сло́ва,/ неизрече́нною му́дростию прише́дшаго обнови́ти Ада́ма,/ я́дию в тле́ние па́дшаго лю́те,/ от Святы́я Де́вы неизрече́нно воплоти́вшагося нас ра́ди,/ ве́рнии, единому́дренно пе́сньми велича́ем. Припев: Преподо́бне о́тче Сампсо́не, моли́ Бо́га о на́с. Се па́мять твоя́, о́тче, я́коже со́лнце, всем возсия́,/ просвеща́ющи све́тло в ней тя сла́вящия,/ я́ко служи́теля Христо́ва, и насле́дника Ца́рствия Его́,/ и всем преподо́бным соприча́стника. Припев: Преподо́бне о́тче Сампсо́не, моли́ Бо́га о на́с. Я́ко светоза́рно житие́ твое́, я́ко ве́лия сла́ва,/ я́ко бога́т гроб твой, му́дре, иде́же честно́е те́ло твое́ лежа́ше,/ здра́вие источа́ет притека́ющим ве́рно и твоея́ прося́щим по́мощи всегда́. Припев: Преподо́бне о́тче Сампсо́не, моли́ Бо́га о на́с. Твои́м пресла́вным, о́тче, врачевство́м, е́же боле́зньми стяжа́л еси́,/ посеща́ти при́сно не оскуде́й, мо́лимся, во мно́зе милосе́рдии непреста́нно предстоя́ нам/ и облегча́я боле́зни и труды́ душ на́ших. Сла́ва Отцу́ и Сы́ну и Свято́му Ду́ху. Со́лнечныя облиста́я чту́щим тя, о́тче, зари́,/ просвети́ на́ша душе́вная чу́вства/ и све́тлости Боже́ственныя прича́стники сподо́би ны/ моли́твами твои́ми, блаже́нне, бы́ти, мо́лим тя. И ны́не и при́сно и во ве́ки веко́в. Ами́нь. Богородичен: Светови́ден Тя о́блак пра́веднаго Со́лнца ве́дяще, Чи́стая,/ ра́дуйся, ве́рно Тебе́ взыва́ем,/ апо́столов сла́ва, и вене́ц му́чеников сла́вных,/ и ве́рных спасе́ние, Де́во Неискусобра́чная. Светилен Расточи́л еси́ твое́ бога́тство ни́щим богоуго́дно/ и весь возложи́лся еси́, о Сампсо́не, Го́сподеви,/ Его́же моли́ вся́ческих страсте́й нас изба́вити. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Держа́вным Твои́м покро́вом/ от враг наве́та нас, Чи́стая, Твоя́ рабы́, сохрани́ вся невре́дны,/ Тя бо стяжа́хом еди́ну прибе́жище в ну́ждах.

Минея, 26 Февраля, Канон свт. Порфирия Глас 4 Песнь 1 Ирмос: Мо́ря чермну́ю пучи́ну/ невла́жными стопа́ми/ дре́вний пешеше́ствовав Изра́иль,/ крестообра́зныма Моисе́овыма рука́ма/ Амали́кову си́лу в пусты́ни победи́л есть. Припев: Святи́телю, о́тче Порфи́рие, моли́ Бо́га о на́с. Порфи́рою Це́рковь днесь я́коже ца́рскою укра́шена,/ уче́ньми твои́ми, святи́телю Порфи́рие,/ си́ми украша́ется и воспева́ет всех Го́спода. Припев: Святи́телю, о́тче Порфи́рие, моли́ Бо́га о на́с. Житием просия́в, преподо́бне, и словесы́ Бо́жественными твои́ми,/ свети́льник яви́лся еси́ всем челове́ком,/ при́сно сия́я делы и уче́ньми и озаря́я концы́. Сла́ва Отцу́ и Сы́ну и Свято́му Ду́ху. Кропле́нием Пресвята́го Ду́ха, Порфи́рие, очи́щься/ и Боже́ственных доброде́телей во оде́жду оде́явся,/ вшел еси́ в незаходи́мая свяще́ннодействовати тебе́ пома́завшему. И ны́не и при́сно и во ве́ки веко́в. Ами́нь. Богородичен: Сказа́ти су́щим на земли́ неизрече́нное и па́че ума́ человеколю́бие/ хотя́, Сын Бо́жий, Богоневе́сто,/ из Тебе́ пло́тию роди́ся, ве́рным подая порожде́ние. Песнь 3 Ирмос: Весели́тся о Тебе́ Це́рковь Твоя́, Христе́, зову́щи:/ Ты моя́ кре́пость, Го́споди,/ и прибежище, и утвержде́ние. Припев: Святи́телю, о́тче Порфи́рие, моли́ Бо́га о на́с. Покори́л еси́ под но́зе злочести́вых мудрова́ния,/ и́же на Сама́го Бо́га вся́ческих веща́ющая. Припев: Святи́телю, о́тче Порфи́рие, моли́ Бо́га о на́с. Глаго́л твои́х огне́м хвра́стие Ма́нентово му́дре попали́л еси́/ и ве́рным просвеще́ние уче́ния простерл еси́. Сла́ва Отцу́ и Сы́ну и Свято́му Ду́ху. Водрузи́в на твердем камени но́ги ве́рных,/ поколеба́л еси́ от основа́ния самого́ основа́ние нече́ствующих, Порфи́рие. И ны́не и при́сно и во ве́ки веко́в. Ами́нь. Богородичен: Испо́лнися вся земля́ Сы́на Твоего́ и Бо́га, Чи́стая, и́стиннаго ра́зума,/ и сла́вы неизрече́нныя, и благода́ти. Седален, глас 3 Де́лы просия́л еси́, я́ко денни́ца,/ всю е́ресь отгна́л еси́ от Це́ркве, святи́телю Порфи́рие,/ и ве́рных сердца́ просвети́л еси́ воспева́ти и сла́вити Го́спода./ Те́мже, днесь па́мять творя́ще, вопие́м ти:/ моли́ Христа́ Бо́га спасти́ся ду́шам на́шим. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Боже́ственнаго естества́ не отлу́чься, плоть быв во чре́ве Твое́м,/ но Бог вочелове́чься и пребысть,/ И́же по Рождестве́ Ма́терь Тя Де́ву,/ я́ко пре́жде Рождества́, сохрани́в Всенепоро́чну, Еди́н Госпо́дь./ Того́ приле́жно моли́ дарова́ти нам ве́лию ми́лость. Песнь 4 Ирмос: Вознесе́на Тя ви́девши Це́рковь на Кресте́,/ Со́лнце Пра́ведное,/ ста в чи́не свое́м,/ досто́йно взыва́ющи;/ сла́ва си́ле Твое́й, Го́споди. Припев: Святи́телю, о́тче Порфи́рие, моли́ Бо́га о на́с. Пресветлаго ве́ры сияния,/ в души́ со́лнце пра́вды име́я, просвети́л еси́ словесы́, Порфи́рие,/ церко́вное все исполне́ние. Припев: Святи́телю, о́тче Порфи́рие, моли́ Бо́га о на́с. Утве́рждься в любви́ Бо́жия Сло́ва,/ ви́димых, Порфи́рие, пристра́стия вся́каго возгнуша́лся еси́;/ те́мже тя почита́ем, я́ко равноа́нгельна и святи́теля честна́. Сла́ва Отцу́ и Сы́ну и Свято́му Ду́ху. В прича́стии тайн неизрече́нных я́коже быв, Порфи́рие,/ сия́ чи́стыми соблю́л еси́ дея́ньми чи́сто и неизрече́нно,/ я́ко таи́нник сим досто́ин. И ны́не и при́сно и во ве́ки веко́в. Ами́нь. Богородичен: Украша́ется сла́вно Твои́ми Це́рковь вели́чествии, Пречи́стая, Боже́ственными,/ и удобря́ется си́ми я́сно, и любовию сла́вит Тя,/ песносло́вя Твое́ Рождество́. Песнь 5 Ирмос: Ты, Го́споди, мой Свет,/ в мир прише́л еси́,/ Свет Святы́й, обраща́яй из мрачна́ неве́дения/ ве́рою воспева́ющия Тя. Припев: Святи́телю, о́тче Порфи́рие, моли́ Бо́га о на́с. Вети́ям плени́цы разоря́я, Порфи́рие, словесы́ и́стинными,/ ве́ры держа́ву утверди́л еси́ всячески. Припев: Святи́телю, о́тче Порфи́рие, моли́ Бо́га о на́с. Поче́рп на земли́ Уте́шителя, преподо́бне,/ уче́ний незави́стныя ре́ки благоче́стия источи́л еси́, Порфи́рие. Сла́ва Отцу́ и Сы́ну и Свято́му Ду́ху. Изсуши́в огне́м слове́с твои́х, Порфи́рие, пото́ки нече́стия,/ благоче́стия веща́нием челове́ки просвети́л еси́. И ны́не и при́сно и во ве́ки веко́в. Ами́нь. Богородичен: Укре́пльшеся Тобо́ю,/ си́лою духо́вною супоста́ты проти́вныя Христо́вы и́стины побежда́ем, Пречи́стая. Песнь 6 Ирмос: Пожру́ Ти со гла́сом хвале́ния, Го́споди,/ Це́рковь вопиет Ти,/ от бесо́вския кро́ве очи́щшися/ ра́ди ми́лости от ребр Твои́х/ исте́кше́ю Кро́вию. Припев: Святи́телю, о́тче Порфи́рие, моли́ Бо́га о на́с. Духо́вно тя одушевле́н доброде́телей о́браз, Порфи́рие,/ и при́сно сия́ющ иму́ще в дела́ Боже́ственна вси́ вои́стинну,/ сего́ ра́ди тя почита́ем. Припев: Святи́телю, о́тче Порфи́рие, моли́ Бо́га о на́с. Си́лою Утеши́теля оде́явся, я́коже самови́дцы Сло́ва,/ враги́ непобеди́м яви́лся еси́,/ отгоня́ и посека́я сих нече́стия. Сла́ва Отцу́ и Сы́ну и Свято́му Ду́ху. Водо́ю сыноположе́ния креще́ния обновля́я челове́ки,/ сыны́ творя́щаго, сих приве́л еси́/ и преда́л еси́ чи́сты, непоро́чны, Порфи́рие. И ны́не и при́сно и во ве́ки веко́в. Ами́нь. Богородичен: Разуме́вше Твоя́, я́же па́че сло́ва Боже́ственная та́инства/ и неизрече́нну сла́ву, и́же о Тебе́ хва́лящийся, Пречи́стая,/ вои́стинну Тя, Богоро́дицу, непреста́нно сла́вим. Кондак, глас 2 Свяще́ннейшими твои́ми нра́вы украша́емь,/ свяще́нства оде́ждею озари́лся еси́,/ всеблаже́нне Богому́дре Порфи́рие,/ и исцеле́ний удобря́еши возвыше́ньми,/ моляся непреста́нно о всех нас. Песнь 7 Ирмос: В пещи́ Авраамстии о́троцы перси́дстей,/ любо́вию благоче́стия па́че,/ не́жели пла́менем, опаля́еми, взыва́ху:/ благослове́н еси́ в хра́ме сла́вы Твое́я, Го́споди. Припев: Святи́телю, о́тче Порфи́рие, моли́ Бо́га о на́с. Коле́блемую проти́вными ве́тры и прило́ги,/ о́тче, Христо́ву водрузи́л еси́ держа́вно Це́рковь, Сему́ пою́щую:/ благослове́н еси́ в хра́ме сла́вы Твое́я, Го́споди. Припев: Святи́телю, о́тче Порфи́рие, моли́ Бо́га о на́с. Собо́ры до́блественне ерети́ческия победи́л еси́, о́тче му́дре, ору́жии слове́сными оде́явся,/ и Христу́ благода́рно взыва́л еси́:/ благослове́н еси́ в хра́ме сла́вы Твоея, Го́споди. Сла́ва Отцу́ и Сы́ну и Свято́му Ду́ху. В рай мы́сленных вшел еси́ доброде́телей,/ от ни́хже цветы́ пожа́л еси́ и́стинныя и кра́сныя, о́тче Порфи́рие,/ и́ми́же в ми́ре благоуха́л еси́. И ны́не и при́сно и во ве́ки веко́в. Ами́нь. Богородичен: Кре́пость и держа́ву Тя немощным всем си́льное Сло́во Бо́жие, Де́во,/ из Тебе́ ро́ждшееся, дарова́ взыва́ющим:/ благослове́н еси́ в хра́ме сла́вы Твое́й, Го́споди. Песнь 8 Ирмос: Ру́це распросте́р, Дании́л/ льво́в зия́ния в ро́ве затче́:/ о́гненную же си́лу угаси́ша,/ доброде́телию препоя́савшеся,/ благоче́стия рачи́тели, о́троцы, взыва́юще/ благослови́те, вся дела́ Госпо́дня, Го́спода. Припев: Святи́телю, о́тче Порфи́рие, моли́ Бо́га о на́с. Вооружи́л еси́ словесы́ твои́ми, му́дре, Це́рковь Христо́ву и утверди́л еси́,/ те́мже побежда́ет всегда́ наше́ствие е́ресей/ и победоно́сно Христу́ пое́т, взыва́ющи:/ благослови́те, вся дела́ Госпо́дня, Го́спода. Припев: Святи́телю, о́тче Порфи́рие, моли́ Бо́га о на́с. Ум на Небеса́ вы́ну име́я, Порфи́рие,/ Божественна́го улучи́л еси́ премене́ния неизрече́нно,/ и чу́вством непости́жна ви́дя та́инства Христо́ва,/ и ве́рою взыва́л еси́ Ему́:/ благослови́те, вся дела́ Госпо́дня, Го́спода. Сла́ва Отцу́ и Сы́ну и Свято́му Ду́ху. Уста́ льво́в мы́сленных, зле ху́лящих, загради́л еси́ моли́твами твои́ми, Порфи́рие,/ и че́люсти сокруши́л еси́ стре́лами тве́рдыми Боже́ственных слове́с твои́х,/ Сему́ взыва́я приле́жно, укрепля́ющему тя:/ благослови́те, вся дела́ Госпо́дня, Го́спода. И ны́не и при́сно и во ве́ки веко́в. Ами́нь. Богородичен: И́же на престо́ле сла́вы Отца́ седя́й Сын и Сло́во Его́/ Тя, Боже́ственно носи́ло, Чи́стая, и седа́лище пресла́вно,/ из Тебе́ рожде́йся пло́тию,/ еди́ну соде́ла, Ю́же вси земни́и воспева́ют, я́ко Влады́чицу. Песнь 9 Ирмос: Ка́мень нерукосе́чный/ от несеко́мыя горы́ Тебе́, Де́во,/ краеуго́льный отсече́ся,/ Христо́с, совокупи́вый разстоя́щаяся естества́./ Тем, веселя́щеся, Тя, Богоро́дице, велича́ем. Припев: Святи́телю, о́тче Порфи́рие, моли́ Бо́га о на́с. Честны́я прине́сл еси́ дары́, благоприя́тный доброде́тели твоя́, великодарови́тому Влады́це,/ изба́вльшияся от ле́сти е́ресей тобо́ю, о́тче преподобне,/ Зижди́теля всех велича́ющия. Припев: Святи́телю, о́тче Порфи́рие, моли́ Бо́га о на́с. Ту́чами слез твои́х страсте́й угаси́л еси́ пламень,/ и безстра́стием Зижди́телю послужи́л еси́,/ и сла́вы лу́чшия сподо́бился еси́, Порфи́рие,/ Сего́ поя́ и велича́я присно. Сла́ва Отцу́ и Сы́ну и Свято́му Ду́ху. С Вы́шними лику́я А́нгелы, и святы́ми, и преподо́бными,/ о и́же ве́рою чту́щих тя и восхваля́ющих, о́тче Порфи́рие,/ Благоде́теля Го́спода непреста́нно моли́. И ны́не и при́сно и во ве́ки веко́в. Ами́нь. Богородичен: О на́шем спасе́нии вочелове́чився Влады́ка,/ Тя, Хода́таицу всем, и покро́в, и враче́вание, Чи́стая, дарова́,/ ве́рно Тя сла́вящим и Сего́ любо́вию велича́ющим.

Минея, 27 Августа, Канон святаго Глас 8 Песнь 1 Ирмос: Пои́м Го́сподеви,/ прове́дшему лю́ди Своя́ сквозе́ Чермно́е мо́ре,/ я́ко Еди́н сла́вно просла́вися. Припев: Преподо́бне о́тче Пи́мене, моли́ Бо́га о на́с. Теплото́ю Уте́шителя, о́тче, согрева́емо се́рдце твое́,/ лед де́монский и страсте́й зи́му разруши́. Припев: Преподо́бне о́тче Пи́мене, моли́ Бо́га о на́с. У́глем Боже́ственнаго стра́ха опали́в страсте́й вещь,/ был еси́ разсужде́ния свети́льник,/ безстра́стие же, блаже́нне, о́гненно. Сла́ва Отцу́ и Сы́ну и Свято́му Ду́ху. Нося́ на ра́ме, о́тче, крест твой,/ после́довал еси́ Зову́щему любо́вию/ и свети́льник мона́хов был еси́. И ны́не и при́сно и во ве́ки веко́в. Ами́нь. Богородичен: Всего́ мя спаса́ет Сло́во Пребоже́ственное,/ бла́гостию восхоте́в из чре́ва Твоего́ воплоти́тися,/ Чи́стая Ма́ти Де́во. Песнь 3 Ирмос: Ты еси́ утвержде́ние/ притека́ющих к Тебе́, Го́споди,/ Ты еси́ Свет омраче́нных,/ и пое́т Тя дух мой. Припев: Преподо́бне о́тче Пи́мене, моли́ Бо́га о на́с. Стоя́нию всено́щному твоему́ удиви́шася А́нгели,/ и́бо тех име́л еси́ споспе́шников и́же к Бо́гу в моли́твах. Припев: Преподо́бне о́тче Пи́мене, моли́ Бо́га о на́с. Слепоту́ оттря́сл еси́ страсте́й от ума́ твоего́ оче́с,/ те́мже прозира́л еси́ чи́сто Неви́димаго. Сла́ва Отцу́ и Сы́ну и Свято́му Ду́ху. Я́ко млеко́м воздержа́ния воспита́вся, Пи́мене преподо́бне,/ на высоту́ доброде́телей возвы́сился еси́ в соверше́нное безстра́стие. И ны́не и при́сно и во ве́ки веко́в. Ами́нь. Богородичен: Име́я Тя Помо́щницу,/ враго́в стремле́ния, Чи́стая, не убою́ся:/ име́я Тя Предста́тельницу, тех побежда́ю полки́. Седален, глас 3 Пасо́м от Го́спода, сего́ овча́ яви́лся еси́ кро́тко,/ сопроти́вныя, блаже́нне, во́лки побежда́я,/ и, сконча́в Боже́ственный по́двиг твой,/ в Небе́сную огра́ду всели́лся еси́, о́тче преподо́бне./ Христа́ Бо́га приле́жно моли́ дарова́ти нам ве́лию ми́лость. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Боже́ственнаго естества́ не отлу́чся, плоть быв во чре́ве Твое́м,/ но Бог вочелове́чся и пребы́сть,/ И́же по рождестве́ Ма́терь Тя Де́ву, я́ко пре́жде рождества́, сохрани́в Всенепоро́чну, еди́н Госпо́дь./ Того́ приле́жно моли́ дарова́ти нам ве́лию ми́лость. Песнь 4 Ирмос: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́. Припев: Преподо́бне о́тче Пи́мене, моли́ Бо́га о на́с. Нескве́рное зерца́ло, уте́шительную зарю́ прие́м, Богоно́се, был еси́/ и прия́телище Боже́ственных восхожде́ний. Припев: Преподо́бне о́тче Пи́мене, моли́ Бо́га о на́с. Напая́емо дре́во слеза́ми яви́лся еси́, о́тче, высокора́слено,/ воздержа́нием удобря́емо и плоды́ Боже́ственными направля́емо. Сла́ва Отцу́ и Сы́ну и Свято́му Ду́ху. Возде́лал еси́ ни́ву твоего́ ума́ боле́зньми воздержа́ния,/ доброде́телей клас многопло́ден и чуде́с благода́ть разплоди́л еси́. И ны́не и при́сно и во ве́ки веко́в. Ами́нь. Богородичен: Де́вства сосу́де и невмести́маго естества́ селе́ние,/ ду́шу мою́ просвети́ омраче́нную, Богоневе́сто. Песнь 5 Ирмос: У́тренююще вопие́м Ти:/ Го́споди, спаси́ ны,/ Ты бо еси́ Бог наш,/ ра́зве Тебе́, ино́го не ве́мы. Припев: Преподо́бне о́тче Пи́мене, моли́ Бо́га о на́с. Вар поне́с, сла́вне, дневны́й,/ ра́дости сподо́бился еси́ Го́спода твоего́, преподо́бне. Припев: Преподо́бне о́тче Пи́мене, моли́ Бо́га о на́с. Воздержа́ния удо́лий сладково́нен прозя́бл еси́ шипо́к,/ дыха́нии Бо́жия ра́зума благово́нствуя концы́. Сла́ва Отцу́ и Сы́ну и Свято́му Ду́ху. Пе́рвее вельми́ хва́лящагося, о́тче, зми́я,/ к земли́ смири́л еси́, смире́нием огра́ждься. И ны́не и при́сно и во ве́ки веко́в. Ами́нь. Богородичен: Де́ву по рождестве́ пое́м Тя, Богоро́дице:/ Ты бо Бо́га Сло́ва пло́тию ми́ру родила́ еси́. Песнь 6 Ирмос: Ри́зу мне пода́ждь све́тлу,/ одея́йся све́том, я́ко ри́зою,/ Многоми́лостиве Христе́ Бо́же наш. Припев: Преподо́бне о́тче Пи́мене, моли́ Бо́га о на́с. Умертви́в теле́сная стремлени́я мно́гими по́двиги,/ к жи́зни безсме́ртней отше́л еси́, Пи́мене досточу́дне. Припев: Преподо́бне о́тче Пи́мене, моли́ Бо́га о на́с. Воздержа́ние при́сно, моли́тву и любо́вь нелицеме́рну стяжа́в, преподо́бне,/ нескве́рно Бо́жие яви́лся еси́ зерца́ло. Сла́ва Отцу́ и Сы́ну и Свято́му Ду́ху. В пусты́нях непрохо́дных живы́й,/ страсте́й пусто́шных себе́ обнажи́л еси́/ и граждани́н Небе́сный был еси́. И ны́не и при́сно и во ве́ки веко́в. Ами́нь. Богородичен: Я́же еди́на сло́вом пло́тию Сло́во ро́ждши,/ изба́ви, мо́лимся, от се́тей вра́жиих ду́ши на́ша. Кондак, глас 4 Све́тлых по́двиг твои́х, преподо́бне о́тче,/ наста́ днесь свята́я па́мять твоя́,/ ду́ши благочести́вых веселя́щи,/ Пи́мене Богому́дре,/ о́тче наш преподо́бне. Икос Душетле́нныя сла́сти и молвы́ мирски́я вседу́шно возненави́дев/ и Христа́ возжела́в, Крест его́ взем на свою́ ра́му,/ после́довал еси́ ему́ неосла́бным жела́нием/ и, воздержа́нии подви́гся, невеще́ственно стяжа́л еси́ житие́,/ в посте́х, и слеза́х, и моли́твах непреста́нных./ Те́мже и Спас тебе́ дарова́ Ца́рство Небе́сное,/ сподо́бль незаходи́маго све́та и зари́ непристу́пныя,/ Пи́мене Богому́дре, о́тче наш преподо́бне. Песнь 7 Ирмос: О́троцы евре́йстии в пещи́/ попра́ша пла́мень дерзнове́нно/ и на ро́су огнь преложи́ша, вопию́ще:/ благослове́н еси́, Го́споди Бо́же, во веки. Припев: Преподо́бне о́тче Пи́мене, моли́ Бо́га о на́с. В Боже́ственных упражня́яся виде́ниих,/ просвеща́яся невеще́ственными заря́ми,/ и дне сын и свет су́щим во тьме/ я́ко вои́стинну был еси́, Богоно́се, во ве́ки. Припев: Преподо́бне о́тче Пи́мене, моли́ Бо́га о на́с. Взя́тся на высоту́ безстра́стия с пло́тию,/ А́нгелом подо́бяся, рая пи́щи был еси́ насле́дник, взыва́я, блаже́нне:/ Бо́же, благослове́н еси́. Сла́ва Отцу́ и Сы́ну и Свято́му Ду́ху. Сия́я заре́ю безстра́стия, омрачи́л еси́ де́монская искуше́ния/ и сих мно́ги озлобле́ния изба́ви, вопию́щия, преподо́бне:/ Бо́же, благослове́н еси́. И ны́не и при́сно и во ве́ки веко́в. Ами́нь. Богородичен: Се, Ю́же рече́ Де́ву Ду́хом вели́кий Иса́ия,/ во чре́ве Бо́га зача́т и ражда́ет, Ему́же пою́ще, зове́м:/ Бо́же, благослове́н еси́. Песнь 8 Ирмос: Безнача́льнаго Царя́ сла́вы,/ Его́же трепе́щут Небе́сныя си́лы,/ по́йте, свяще́нницы,/ лю́дие, превозноси́те во вся ве́ки. Припев: Преподо́бне о́тче Пи́мене, моли́ Бо́га о на́с. Недрема́нно душе́вную свещу́ еле́ем твои́х по́двиг соблю́д,/ вшел еси́ с ра́достию в нетле́нен черто́г и живе́ши во ве́ки. Припев: Преподо́бне о́тче Пи́мене, моли́ Бо́га о на́с. Не поколеба́ша души́ твое́й столпа́ ве́тры нечи́стых духо́в:/ утверди́ бо ся на ка́мени ве́ры, всеблаже́нне Богоно́се. Сла́ва Отцу́ и Сы́ну и Свято́му Ду́ху. Злоо́бразную страсте́й совле́кл еси́ ри́зу,/ обле́клся еси́, блаже́нне, в кра́сную оде́жду Боже́ственнаго безстра́стия,/ Христу́ сца́рствуя. И ны́не и при́сно и во ве́ки веко́в. Ами́нь. Богородичен: Я́ко честны́й и превознесе́нный престо́л Бо́га Вы́шняго су́щую, воспое́м, лю́дие,/ еди́ну по рождестве́ Де́ву сохра́ньшуюся. Песнь 9 Ирмос: Устраши́ся всяк слух/ неизрече́нна Бо́жия снизхожде́ния,/ я́ко Вы́шний во́лею сни́де да́же и до пло́ти,/ от деви́ческаго чре́ва быв Челове́к./ Те́мже Пречи́стую Богоро́дицу, ве́рнии, велича́ем. Припев: Преподо́бне о́тче Пи́мене, моли́ Бо́га о на́с. Заше́л еси́ у́бо, я́коже звезда́, от ми́ра,/ у Христа́ же возсия́л еси́, у́мнаго вои́стинну Пра́вды, всеблаже́нне, Со́лнца,/ и, я́коже зарю́, ве́рным, твоя́ оста́вил еси́ светови́дныя доброде́тели,/ отъе́млющия душ омраче́ние. Припев: Преподо́бне о́тче Пи́мене, моли́ Бо́га о на́с. Честна́ пред Бо́гом твоя́ сме́рть, сла́вне, бысть:/ и́бо преподо́бно на земли́ пожи́л еси́,/ сего́ повеле́ния и опра́вдания, Пи́мене, соблюд невре́дна./ Те́мже возсия́ я́ко пра́веднику тебе́ Свет невече́рний. Сла́ва Отцу́ и Сы́ну и Свято́му Ду́ху. Боже́ственными, о́тче, добро́тами наслажда́яся, и прича́стием обожа́емь,/ и вели́кому Све́ту просвеще́н ны́не предстоя́,/ и кра́йним жела́нием прибли́жился еси́ ясне́йше./ Тя чту́щия, Пи́мене, и творя́щия твою́ па́мять помина́й. И ны́не и при́сно и во ве́ки веко́в. Ами́нь. Богородичен: Уста́вила еси́ еди́на в жена́х кля́тву первозда́нных, Богоневе́сто,/ Неопи́саннаго пло́тию ро́ждши опису́ема,/ обнови́ла еси́ зако́ны естества́, Нескве́рная, разстоя́щия пе́рвее,/ пресла́вным хода́тайством Твои́м соедини́ла еси́. Светилен А́нгельскаго жития́ жела́я, удали́лся еси́, Пи́мене, в пусты́ни/ и стра́сти покори́л еси́ плотски́я, равноа́нгелен яви́лся еси́,/ о́тче наш Богоно́се. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Держа́вным Твои́м покро́вом/ от враго́в наве́та нас, Чи́стая, Твоя́ рабы́, сохрани́ вся невре́дны:/ Тебе́ бо стяжа́хом еди́ну прибе́жище в ну́ждах.