Молитвы

Пе́снь 1. Ирмос: Яко по су́ху пешеше́ствовав Изра́иль по бе́здне стопа́ми, гони́теля фарао́на ви́дя потопля́ема, Бо́гу побе́дную пе́снь пои́м, вопия́ше. Припев: Святии отцы́, моли́те Бо́га о нас. Иже от Нике́и, я́коже от не́коего небесе́, всю́ду возгреме́вше Сло́во Жива́го Отца́ и Сего́ показа́вше враги́, гро́мом избие́ны, свяще́нными словесы́ да почту́тся. Припев: Святии отцы́, моли́те Бо́га о нас. Духобо́рцев ду́х лука́вый Святы́м Ду́хом Христо́с от Своея́ Це́ркве дале́че отгна́, вторы́м де́йством Собо́ра совокупи́в. Сла́ва Отцу́ и Сы́ну и Свято́му Ду́ху: Христобо́рца пре́лесть изгна́ Несто́рия Кири́лл, Собо́ра нача́льник, и́же я́сно Де́ву Мари́ю испове́да, Бо́гу Ма́терь чи́стую. И ны́не и при́сно и во ве́ки веко́в. Ами́нь. Богородичен: Несозда́нныя Тро́ицы Еди́наго Христа́ во двою́ естеству́ и хоте́нию, Чи́стая, ражда́еши, соедине́ние челове́ком и Ангелом Тебе́ ра́ди соде́лавшаго. Пе́снь 3. Ирмос: Не́сть свя́т, я́коже Ты́, Го́споди Бо́же мо́й, вознесы́й ро́г ве́рных Твои́х, Бла́же, и утверди́вый на́с на ка́мени испове́дания Твоего́. Припев: Святии отцы́, моли́те Бо́га о нас. Тва́ри служи́тель я́влься Арий безу́мный, и Македо́ний па́ки ме́рзок я́влься, в гее́нне о́гненней ра́вно му́чатся со е́ллины. Припев: Святии отцы́, моли́те Бо́га о нас. Седмию́ Собо́ры свяще́нными святы́х оте́ц честну́ю Це́рковь уясни́л еси́, Христе́, я́коже седми́х свети́льник све́том пре́лести тму́ прогна́в дале́че. Сла́ва Отцу́ и Сы́ну и Свято́му Ду́ху: Ста́до Твое́, Сло́ве, погубля́ет многообра́зная кра́ста ерети́к, па́стырие же Твои́х слове́сных ове́ц уче́нием сие́ премени́ша. И ны́не и при́сно и во ве́ки веко́в. Ами́нь. Богородичен: Еди́наго родила́ еси́, Пречи́стая, от Несозда́нныя Тро́ицы во двою́ существу́ и хоте́нию, Его́же о́бразу честно́му покланя́емся, благода́ти исполня́еми. Та́же седа́лен отце́в, гла́с 4. Свети́льницы пресве́тлии и́стины Христо́вы ми́ру яви́стеся на земли́, вои́стинну блаже́ннейший, отцы́ боговеща́ннии, изсуши́вше е́реси ху́льных языковре́дий и угаси́вше пламенови́дная злосла́вных смуще́ния: те́мже, я́ко святи́телие Христо́вы, моли́теся спасти́ся на́м. Сла́ва, и ны́не, Богородичен: Обнови́ла еси́, Чи́стая, Боже́ственным рождество́м Твои́м истле́вшее во страсте́х земноро́дных ме́ртвенное существо́ и воздви́гла еси́ вся́ от сме́рти к животу́ нетле́ния. Те́мже Тя́ по до́лгу блажи́м вси́, Де́во Препросла́вленная, я́коже прорекла́ еси́. Пе́снь 4. Ирмос: Христо́с моя́ си́ла, Бо́г и Госпо́дь, честна́я Це́рковь боголе́пно пое́т, взыва́ющи, от смы́сла чи́ста, о Го́споде пра́зднующи. Припев: Святии отцы́, моли́те Бо́га о нас. Врази́ Твои́ возшуме́ша, и ненави́дящии Тя́ главу́ воздвиго́ша, Спа́се, вма́ле, но а́бие падо́ша, не терпя́ще гла́са тру́б духо́вных. Припев: Святии отцы́, моли́те Бо́га о нас. Со́лнца Со́лнцы сугу́бо озари́ша, Сы́н и Ду́х от Отца́, несозда́ни, Собезнача́льни: Обои́м Оте́ц Еди́н вино́вен ве́руется. Сла́ва Отцу́ и Сы́ну и Свято́му Ду́ху: Се́дмь у́бо духо́в, и́же почи́ша на Христе́, Иса́ия сие́ рече́, на седми́х же Собо́рех почи́ Христо́с со Отце́м и Боже́ственным Ду́хом. И ны́не и при́сно и во ве́ки веко́в. Ами́нь. Богородичен: Бо́га родила́ еси́, пло́ть носи́вшаго, от чи́стых Твои́х крове́й, Отрокови́це Чи́стая, Его́же, сугу́ба естество́м, во Ипоста́си же еди́ней, отцы́ пропове́даша. Пе́снь 5 Ирмос: Бо́жиим све́том Твои́м, Бла́же, у́тренюющих Ти́ ду́ши любо́вию озари́, молю́ся, Тя́ ве́дети, Сло́ве Бо́жий, и́стиннаго Бо́га, от мра́ка грехо́внаго взыва́юща. Припев: Святии отцы́, моли́те Бо́га о нас. Боже́ственный виногра́д Христо́в, и́же от Еги́пта пренесе́н, те́мнаго отча́янна губи́теля зве́рие пе́рвее пояда́ху, пра́щею же святы́х оте́ц дале́че отгна́шася. Припев: Святии отцы́, моли́те Бо́га о нас. Боже́ственным сия́нием трисия́нным у́м просве́щше, честни́и отцы́ Еди́наго пропове́даша Честны́я Тро́ицы Христа́ Го́спода, сугу́ба естествы́ и хоте́нии. Сла́ва Отцу́ и Сы́ну и Свято́му Ду́ху: Тро́ичен: В ве́щных, я́коже в серафи́мских, му́дрыми отцы́, о Тро́ице, Це́рковь онебеси́ся, трисвяту́ю пе́снь при́сно Тебе́ пою́щи, собира́ет Тро́ическое Твое́ Еди́но Божество́. И ны́не и при́сно и во ве́ки веко́в. Ами́нь. Богородичен: Ма́ти и раба́ Твоего́ Сы́на бы́ла еси́, Чи́стая, и́бо Иже из Тебе́ пре́жде Тебе́ бя́ше, я́ко Соде́тель Тво́й, Его́же во двою́ существу́ познава́ем и соединя́ем Сло́вом Ипоста́сным. Пе́снь 6. Ирмос: Жите́йское мо́ре, воздвиза́емое зря́ напа́стей бу́рею, к ти́хому приста́нищу Твоему́ прите́к, вопию́ Ти: возведи́ от тли́ живо́т мо́й, Многоми́лостиве. Припев: Святии отцы́, моли́те Бо́га о нас. Бо́г бого́в Госпо́дь, — Дави́д, пре́жде воспе́в, — глаго́ла и призва́ от восто́к, от коне́ц всея́ земли́, да́же до за́пад и́х, — Вселе́нския Собо́ры оте́ц назна́менуя. Припев: Святии отцы́, моли́те Бо́га о нас. Се́дмь столпо́в утверди́ прему́дрость Бо́жия, Твою́ Це́рковь, Влады́ко, седмочи́сленными Собо́ры свяще́нных оте́ц неукло́нну соблюда́ему от вся́ких ересе́й. Сла́ва Отцу́ и Сы́ну и Свято́му Ду́ху: Сты́д лица́ да покры́ет Евти́ха и Диоско́ра, слия́ние буесло́вивших естества́ Христо́ва: не в привиде́нии бо, но во обоже́нии естество́ земноро́дных прия́т. И ны́не и при́сно и во ве́ки веко́в. Ами́нь. Богородичен: Да во́змется Несто́рий во евре́йския те́мныя собо́ры, и язы́к же отсече́тся ху́льный: Бо́га бо роди́ Де́ва Мари́я, Плотоно́сца на́м. Конда́к, гла́с 8. Апо́стол пропове́дание и оте́ц догма́ты Це́ркве еди́ну ве́ру запечатле́ша, я́же и ри́зу нося́щи и́стины, истка́нну от е́же свы́ше богосло́вия, исправля́ет и сла́вит благоче́стия вели́кое та́инство. Икос: Высо́ким пропове́данием Бо́жию Це́рковь услы́шим, вопию́щу: жа́ждай, да гряде́т ко мне́ и пие́т ча́шу, ю́же держу́, ча́ша е́сть прему́дрости. Сие́ питие́ и́стины сло́вом почерпо́х, во́ду пролива́ющую не прекосло́вия, но испове́дания, ю́же пия́, ны́нешний Изра́иль Бо́га зри́т, веща́юща: ви́дите, ви́дите, я́ко Са́м Аз е́смь и не пременя́юся: Аз Бо́г пе́рвый, Аз же и по си́х, и ра́зве Мене́, не́сть ино́го отню́д. Отсю́ду причаща́ющиися насы́тятся и восхва́лят благоче́стия вели́кое та́инство. Пе́снь 7. Ирмос: Росода́тельну у́бо пе́щь соде́ла Ангел преподо́бным отроко́м, халде́и же опаля́ющее веле́ние Бо́жие, мучи́теля увеща́ вопи́ти: благослове́н еси́, Бо́же оте́ц на́ших. Припев: Святии отцы́, моли́те Бо́га о нас. Вавило́нскаго у́бо зми́я разрази́ Дании́л пе́рвее, моли́твами же оте́ц прося́деся лю́тый еги́петский зми́й, я́ве Арий, пояда́ющий Христо́во ста́до. Припев: Святии отцы́, моли́те Бо́га о нас. Непроще́ным нече́стием негодова́ во́лк Македо́ний, прирази́вся Ду́ху, обожа́ющему челове́ки и вся́ ба́нею креще́ния на пе́рвую добро́ту вообража́ющу ве́рныя. Сла́ва Отцу́ и Сы́ну и Свято́му Ду́ху: Диоско́р, и Евти́х, и Севи́р левиафа́м, трие́, слива́ющии и смеша́ющии Христо́ва существа́ смеше́нием у́мным, к Тро́ице Честне́й прирази́шася де́рзостию. И ны́не и при́сно и во ве́ки веко́в. Ами́нь. Богородичен: Плотска́го Твоего́ зра́ка о́браз, Влады́ко, че́стно облобыза́ем, и Ма́тере Твоея́, и святы́х все́х, по́честь ве́дяще пра́вым по́мыслом преходи́ти до́бре к первообра́зному. Пе́снь 8. Ирмос: Из пла́мене преподо́бным ро́су источи́л еси́ и пра́веднаго же́ртву водо́ю попали́л еси́: вся́ бо твори́ши, Христе́, то́кмо е́же хоте́ти. Тя́ превозно́сим во вся́ ве́ки. Припев: Святии отцы́, моли́те Бо́га о нас. Якоже еди́наго ко́рене о́трасли Богоса́дны, Сы́н и Ду́х возсия́вше: и́бо Оте́ц Единовино́вен е́сть, Безле́тный, Безле́тным Ли́цам Единоче́стен. Припев: Святии отцы́, моли́те Бо́га о нас. Из чре́ва невеще́ственна безле́тно возсия́л еси́, Единосу́щное Сло́во Отцу́ и Ду́ху, но на́с ра́ди в ле́тнюю всели́ся веще́ственную утро́бу еди́ныя Богоро́дицы. Сла́ва Отцу́ и Сы́ну и Свято́му Ду́ху: Разжже́нныя стре́лы огне́м духо́вным в студе́ная сердца́ враго́в вонзо́шася еретико́в и на сме́рть удави́ша и́х совокупле́нии оте́ц седмочи́сленных и боже́ственных. И ны́не и при́сно и во ве́ки веко́в. Ами́нь. Богородичен: Не ли́цы Еди́наго Христа́ сла́вим, не смеше́нием существа́ Сего́ соединя́ем: Еди́н бо Сы́й и То́йже Лице́м, раздвоя́ется естествы́, Де́во, Тво́й Сы́н и Соде́тель. Песнь 9 Ирмос: Бо́га челове́ком невозмо́жно ви́дети, на Него́же не сме́ют чи́ни Ангельстии взира́ти; Тобо́ю бо, Всечи́стая, яви́ся челове́ком Сло́во воплоще́нно, Его́же велича́юще, с небе́сными во́и, Тя́ ублажа́ем. Припев: Святии отцы́, моли́те Бо́га о нас. Не подоба́ет приложи́ти или́ оста́вити что́ свяще́ннаго преда́ния правосла́вныя на́шея ве́ры: в не́йже бо ве́рно крести́хомся, а и́же приложи́тели сея́ ве́ры впра́вду пре́дани бу́дут преще́нию прокля́тия. Припев: Святии отцы́, моли́те Бо́га о нас. Ра́достию се́рдца вси́ взыгра́им, свяще́нныя Собо́ры оте́ц совоку́пльше: те́х бо ра́ди све́т ви́дехом правосла́вия. Свети́льницы бо яви́шася, вся́ наставля́юще к пра́вым уче́ния обре́тением. Сла́ва Отцу́ и Сы́ну и Свято́му Ду́ху: Душа́м испро́сим очище́ние и благоче́стно житие́ препроводи́ти потщи́мся, я́ко да прича́стницы бу́дем святы́м отце́м, и́же скры́ша пра́вых уче́ний бога́тство на́м, ча́дом и́х. И ны́не и при́сно и во ве́ки веко́в. Ами́нь. Богородичен: Бо́г от боку́ Твое́ю возсия́, Ма́ти Бо́жия, и челове́ческий ро́д обожи́, и сла́вы Своея́ сподо́би, и насле́дники вся́ показа́, и́же Тя́ Богоро́дицу вои́стинну при́сно пропове́дающия. Свети́лен. Оте́ц Боже́ственных дне́сь па́мять пра́зднующе, моле́ньми те́х мо́лим, Всеще́дре: вся́каго вре́да ересе́й изба́ви лю́ди Твоя́, Го́споди, и вся́ сподо́би Отца́, Сло́во сла́вити и Всесвята́го Ду́ха. Богоро́дичен. Ра́дуйся, Бо́жия пала́то. Ра́дуйся, горо́ присе́нная. Ра́дуйся, неопали́мая купино́. Ра́дуйся, престо́ле сла́вы. Ра́дуйся, Боже́ственная трапе́зо. Ра́дуйся, ру́чко всезла́тая. Ра́дуйся, свети́льниче всесве́тлый. Ра́дуйся, ле́гкий о́блаче, Де́во Ма́ти Мари́е. Молитва О преблаже́ннии отцы́, уго́дницы Бо́жии, предстоя́щии Престо́лу Пресвяты́я Тро́ицы и наслажда́ющиися неизрече́ннаго блаже́нства! Се ны́не, в день о́бщаго ва́шего торжества́, ми́лостивно при́зрите на нас, ме́ньших бра́тий ва́ших, принося́щих вам сие́ хвале́бное пе́ние и хода́тайством ва́шим прося́щих ми́лости и отпуще́ния грехо́в у Преблага́го Го́спода: ве́мы бо, вои́стинну ве́мы, я́ко вся, ели́ка восхо́щете, испроси́ти у Него́ мо́жете. Те́мже у́бо смире́нно мо́лимся вам: моли́те ми́лостиваго Влады́ку, да пода́ст нам дух ва́шея ре́вности к хране́нию святы́х Его́ за́поведей, я́ко да те́кше по стопа́м ва́шим, возмо́жем земно́е по́прище в доброде́тельном житии́ без поро́ка прейти́ и в покая́нии дости́гнути пресла́вных селе́ний ра́йских, и та́мо ку́пно с ва́ми прославля́ти Отца́ и Сы́на и Свята́го Ду́ха, во ве́ки веко́в. Ами́нь.

Минея, 17 Октября, Канон пророка Глас 1 Песнь 1 Ирмос: Помо́гшему Богу во Еги́пте Моисе́ови/ и тем фараона со всево́инством погрузи́вшему,/ победную песнь поим, яко прославися. Припев: Святы́й прорóче Оси́е, моли́ Бо́га о на́с. Яко Богоглагольник воистинну, яко пророк, Оси́е,/ Жизнода́телю предстоя́, прилежно молися/ избавити искушений верно восхваляющия тя. Припев: Святы́й прорóче Оси́е, моли́ Бо́га о на́с. Твоея души́ ви́дительное очи́стив от скверн,/ сподобился еси прозира́ти све́тло будущая/ и предглаго́лати нело́жно, славне, сбыва́ющаяся. Сла́ва Отцу́ и Сы́ну и Свято́му Ду́ху. Прозре́ния источник мудрость Божия/ Боговеща́ннаго Оси́ю пророчества показа́ реку́ неоску́дну,/ кипя́щу Божественная учения. И ны́не и при́сно и во ве́ки веко́в. Ами́нь. Богородичен: Явльшагося Христа от Девы нас ра́ди/ от Египта явле́нно Отец призва́,/ якоже прорече́ Оси́я древле Богови́дительнейший. Песнь 3 Ирмос: Утверди мене, Христе, на недви́жимом камени заповедей Твоих/ и просвети мя светом лица Твоего;/ несть бо свят, паче Тебе, Человеколюбче. Припев: Святы́й прорóче Оси́е, моли́ Бо́га о на́с. Учением Боголепным науче́н Божия изъявле́ния,/ язы́ков звание яве провозгласи́л еси, пророче,/ Духом Святым воображаемь. Припев: Святы́й прорóче Оси́е, моли́ Бо́га о на́с. Будущая предзре́ти яко настоящая, Богомудре, сподо́бился еси,/ иудейское я́сно отпаде́ние возвещая/ и законных потребле́ние. Сла́ва Отцу́ и Сы́ну и Свято́му Ду́ху. Избавитися Израилю не бра́нию, ни лу́ком, ни всеору́жием,/ но в Господе Бозе Вседержители проре́кл еси,/ воплощение Слова зна́менуя нам. И ны́не и при́сно и во ве́ки веко́в. Ами́нь. Богородичен: Радуйся, Дево Честна́я, заче́ншая Слово Воплощенное,/ Своею ны изба́вльшаго от ле́сти Кровию святою и Телом. Седален, глас 8 Чи́сто сердце от страсте́й, пророче, стяжа́в,/ яко и́стинно орга́н был еси сли́чный Духа,/ от Него богатно, му́дре, просвещаемь,/ и будущих всех знание прии́м./ Тем, соше́дшеся, святую твою память верно совершаем, Спаса славяще,/ Оси́е приснопамятне:/ моли Христа Бога грехов оставление пода́ти/ чтущим любовию святую память твою. Песнь 4 Ирмос: Разуме́х, Всеси́льне,/ Твое смотре́ние,/ и со страхом просла́вих Тя, Спа́се. Припев: Святы́й прорóче Оси́е, моли́ Бо́га о на́с. Оси́е, Богови́днейшее о́ко церковное,/ бед избави хва́лящия тя. Припев: Святы́й прорóче Оси́е, моли́ Бо́га о на́с. Светле́йшее и тверде́йшее Духа прия́телище,/ молися спасти воспевающия тя. Сла́ва Отцу́ и Сы́ну и Свято́му Ду́ху. Судии́ ты всех предстоя, яко Боже́ствен пророк,/ страсте́й мя избави молитвами твоими. И ны́не и при́сно и во ве́ки веко́в. Ами́нь. Богородичен: Превозшла еси, Приснодево, Ангельския чи́ны,/ Творца сих чревоноси́вши. Песнь 5 Ирмос: От но́щи у́тренююще, воспеваем Тя, Христе Боже,/ обнища́вшаго нас ра́ди/ и Крест и смерть пло́тию претерпе́вшаго. Припев: Святы́й прорóче Оси́е, моли́ Бо́га о на́с. Ми́лостивно дви́жим,/ научи́л еси нас Божию долготерпению,/ благоутробию же и благости, еюже вся щади́т,/ пророче Богоглаго́ливе. Припев: Святы́й прорóче Оси́е, моли́ Бо́га о на́с. Умертви́в смерть, воста Христос,/ якоже мудрое твое прорече́ние, Богогла́се, провозвести,/ и жизнь сущим во аде душа́м дарова. Сла́ва Отцу́ и Сы́ну и Свято́му Ду́ху. От глубины мя греховныя, проро́че Оси́е,/ твоими молитвами исхи́ти,/ дерзновение беззазо́рное ко Христу имея,/ Богомудре пребога́те. И ны́не и при́сно и во ве́ки веко́в. Ами́нь. Богородичен: Всех Господь и всех Царь,/ Отцу Собезначальный,/ под ле́том из Тебе бысть, Богородице Дево,/ и плоть показа́ся. Песнь 6 Ирмос: Проро́ка спасл еси от ки́та, Человеколюбче,/ и мене из глубины прегрешений/ возведи, молюся. Припев: Святы́й прорóче Оси́е, моли́ Бо́га о на́с. Провозглаша́я будущая, Оси́е всеблаженне,/ еже к человеком Слова возвести́л еси соше́ствие. Припев: Святы́й прорóче Оси́е, моли́ Бо́га о на́с. Умерщвле́нныя грехами Жизнь Безсмертная/ от адовых преде́л, якоже прорекл еси, возведе. Сла́ва Отцу́ и Сы́ну и Свято́му Ду́ху. Законных отъя́тие, иудеев отпаде́ние/ и язы́ков введе́ние, пророче, явил еси. И ны́не и при́сно и во ве́ки веко́в. Ами́нь. Богородичен: Из чрева Твоего возсия Бог Слово, Всенепорочная,/ плотию нас ради неизреченно обложен яко Благоутробен. Песнь 7 Ирмос: Авраа́мстии о́троцы в пещи/ Троицу прообрази́вше,/ о́гненный пла́мень на ро́су преложи́ша/ и, поюще, вопия́ху:/ благословен еси, Боже отец наших. Припев: Святы́й прорóче Оси́е, моли́ Бо́га о на́с. Паче естества просвеще́нием, Оси́е,/ ум просвети́в твой, бу́дущих, блаженне,/ знанием обогати́лся еси,/ Владыце зовый:/ благословен еси, Боже отец наших. Припев: Святы́й прорóче Оси́е, моли́ Бо́га о на́с. Ты в руках пророков уподо́бився,/ умножил еси, Безсмертне, виде́ния, Спасе,/ различно образу́емь,/ Тебе верно вопиющим:/ благословен еси, Боже отец наших. Сла́ва Отцу́ и Сы́ну и Свято́му Ду́ху. Израилев ты источник, спасения пролива́ющий во́ды,/ реку мирную – Христа пропове́дая, Осие,/ Емуже вопием:/ благословен еси, Боже отец наших. И ны́не и при́сно и во ве́ки веко́в. Ами́нь. Богородичен: Из Безначальнаго Отца возсия́в, из Тебе воплоти́ся, Богомати Отроковице,/ за милость неизрече́нную,/ Емуже поюще, вопием:/ благословен еси, Боже отец наших. Песнь 8 Ирмос: В пла́мени о́гненне горящия пе́щи/ сохраншаго де́ти/ и во зра́це Ангела снизше́дшаго к ним,/ пойте Господа/ и превозносите Его во веки. Припев: Святы́й прорóче Оси́е, моли́ Бо́га о на́с. Паче постиже́ния пророком данная от Божественнаго дара/ предзна́тельное де́йство и будущих знание/ пети Господа и превозноша́ти Его во веки. Припев: Святы́й прорóче Оси́е, моли́ Бо́га о на́с. Уста Богодохновенная стяжа́в и язы́к Богоглаго́лив, Оси́е,/ Богочестия свет просвеща́ющь пое́ши:/ пойте Господа и превозносите Его во веки. Сла́ва Отцу́ и Сы́ну и Свято́му Ду́ху. Словесы́ и дея́ньми проро́чествуя,/ облича́еши люди блу́дствовавшия, обра́зно, пребогате, науча́я пети:/ пойте Господа и превозноси́те Его во веки. И ны́не и при́сно и во ве́ки веко́в. Ами́нь. Богородичен: Соприсносу́щное Божие Бог Слово,/ от Святыя Девы воплощся, яви́ся верою вопиющим:/ пойте Господа и превозноси́те Его во веки. Песнь 9 Ирмос: Радуйся, де́вственная похвало́,/ радуйся, Мати Пречистая,/ Юже вся тварь Божественными песньми велича́ем. Припев: Святы́й прорóче Оси́е, моли́ Бо́га о на́с. Честь, яко пророк, прия́л еси, Оси́е,/ прие́м венец благолепия от Бога, всеблаженне. Припев: Святы́й прорóче Оси́е, моли́ Бо́га о на́с. Всем светом озаря́емь Христовым всеизря́дне,/ даждь твоими молитвами Сего ми́лостива поющим тя. Сла́ва Отцу́ и Сы́ну и Свято́му Ду́ху. Хвала́ми с чи́нми Ангельскими, Оси́е,/ предстои́ши, Владыку хваля́,/ пожи́в житие́ равноангельное. И ны́не и при́сно и во ве́ки веко́в. Ами́нь. Богородичен: Спасти́ восхоте́в человека Спас и Господь,/ от Пречистыя Девы в плоть нашу оде́яся.

Минея, 14 Января, Кано́н святе́й Ни́не Глас 1 Песнь 1 Ирмос: Спасе́ лю́ди чудоде́йствуяй Влады́ка,/ мо́крую мо́ря во́лну оземлени́в дре́вле;/ во́лею же ро́дждся от Де́вы,/ стезю́ проходну Небесе́ полага́ет нам./ Его́же, по Существу́ ра́вна же Отцу́ и челове́ком, сла́вим. Припев: Свята́я равноапóстольная Ни́но, моли́ Бо́га о на́с. Отве́рзи устне́ мои́, Христе́ Бо́же,/ да восхвалю́ де́ву равноапо́стольную и пропове́дницу Ни́ну воспою́,/ и просвети́ ум мой,/ да досто́йную цве́ты слове́с укра́шу по достоя́нию. Припев: Свята́я равноапóстольная Ни́но, моли́ Бо́га о на́с. Ре́чи чужды́х ти племе́н уразуме́ла еси́, прехва́льная Ни́но,/ и, от Ду́ха Свя́та умудре́на бы́вши, в виде́нии Сама́го Го́спода узре́ла еси́./ Те́мже в земли́ непло́дней, Богому́драя де́во,/ лю́ди И́верския ко Христу́ привела́ еси́. Сла́ва Отцу́ и Сы́ну и Свято́му Ду́ху. Жестосе́рдыя ва́рвары, куми́ром служа́щия,/ я́ко голуби́ца, от за́пада воспари́вшая,/ любо́вию твое́ю обрати́ла еси́ ко Творцу́/ и, благода́тию обновле́нныя, неве́сто Христо́ва непоро́чная,/ Жениху́ твоему́ обручи́ла еси́. И ны́не и при́сно и во ве́ки веко́в. Ами́нь. Богородичен: Сосу́д благосты́ни Твоея́, Пречи́стая Де́во Богоро́дице, бысть свята́я де́ва/ и страну́, жре́бием Тебе́ свиде́тельствовану, просвети́./ Сего́ ра́ди мо́лим Тя:/ сию́ приими́ с Тобо́ю в моли́тву о вопию́щих Тебе́:/ поми́луй жре́бий Твой. Песнь 3 Ирмос: Призри́ на пе́ния рабо́в, Благоде́телю,/ врага́ смиря́я вознесе́нную горды́ню,/ нося́й же, Всеви́дче, греха́ превы́ше,/ непоколе́блемо утвержде́ныя, Бла́же, певцы́/ основа́нием ве́ры. Припев: Свята́я равноапóстольная Ни́но, моли́ Бо́га о на́с. Милосе́рдия ра́ди Своего́ ми́лостивно помяну́в нас,/ усе́рдну благове́стницу соде́ла тя Бог,/ жену́ су́щу, му́жеским смы́слом укра́шену,/ и испо́лнену Ду́ха Свя́та яви́ нам,/ и твое́ю про́поведию о Христе́, чрез ве́ру в Него́, нас усынови́л есть. Припев: Свята́я равноапóстольная Ни́но, моли́ Бо́га о на́с. Покрыва́ло от серде́ц на́ших безчу́вственных отпаде́,/ отягче́нный слух наш от гла́са про́поведи твоея́ откры́ся,/ омраче́ние ума́ на́шего разсе́яся све́том уче́ния Христо́ва, тобо́ю возвеще́ннаго,/ о свята́я равноапо́стольная Ни́но, до́блественная учени́це Христо́ва. Сла́ва Отцу́ и Сы́ну и Свято́му Ду́ху. Покланя́вшиися иногда́ куми́ром и пребыва́вший во тьме нече́стия/ от ле́сти и́дольския твои́м прише́ствием, блаже́нная Ни́но, свободи́шася,/ Арма́з же вострепета́, егда́ гром возгреме́,/ и неи́стовства За́дена преста́ша. И ны́не и при́сно и во ве́ки веко́в. Ами́нь. Богородичен: Тобо́ю, Богоро́дице Де́во, от ро́ва нече́стия подъя́ти бы́хом,/ егда́ Ти уго́дно бысть просвеще́ние на́ше жено́ю сотвори́ти,/ повнегда́ же изы́ти нам от купе́ли святы́я,/ позна́хом Сы́на Твоего́ и Бо́га на́шего блаже́нною Ни́ною. Седален, глас 2 Я́коже со́лнце незаходи́мое, Со́лнца Пра́вды – Христа́ Бо́га/ пропове́дница, светоза́рная звезда́, све́тлый вселе́нныя свети́льник,/ неоцене́нное сокро́вище И́верския страны́,/ днесь Ни́на в земли́ на́шей сия́ет и благоуха́ет,/ наста́вница на́ша, равноапо́стольная раба́ Христо́ва. Песнь 4 Ирмос: Ро́да челове́ча обновле́ние/ дре́вле, поя́, проро́к Авваку́м предвозвеща́ет,/ ви́дети неизрече́нно сподо́бився о́браз:/ млады́м Младе́нец бо из горы́ – Де́вы изы́де,/ люде́й во обновле́ние, Сло́во. Припев: Свята́я равноапóстольная Ни́но, моли́ Бо́га о на́с. Я́коже лев, безстра́шна пребы́вши,/ кре́пце Христа́ Бо́га пропове́дала еси́:/ па́рфян си́лою чуде́с улови́ла еси́,/ Гаиани́ю же и Рипсими́ю по́двигом до́блественнаго их му́ченичества в дар Христу́ принесла́ еси́./ Той же сохрани́ тебе́ саму́ю,/ во еже́ просвети́ти тобо́ю И́верскую страну́. Припев: Свята́я равноапóстольная Ни́но, моли́ Бо́га о на́с. Я́коже оре́л, во о́чию твое́ю возобрази́ла еси́ И́верскую страну́ на́шу, пресла́вная Ни́но,/ и, свято́ю ре́вностию по Бо́зе разже́гшися,/ святы́м Ева́нгелием сию́ просвети́ла еси́. Сла́ва Отцу́ и Сы́ну и Свято́му Ду́ху. Власть иму́щи разгна́ти мглу,/ му́драго царя́ просвети́ла еси́,/ равноапо́стольному царю́ Константи́ну уподо́бльшися, наста́внице на́ша и врачу́ смы́сленный./ Сего́ ра́ди ублажа́ем и́мя твое́, де́во,/ пропове́днице Христа́, вели́кая равноапо́стольная Ни́но. И ны́не и при́сно и во ве́ки веко́в. Ами́нь. Богородичен: От ле́сти и́дольския Тобо́ю, Богоро́дице, изба́влены бы́вше лю́дие И́верстии,/ и́хже Тебе́ жре́бий показа́,/ и, благове́стием преподо́бныя ма́тере на́шея Ни́ны озаре́ни бы́вше,/ взыва́ют к Тебе́:/ избавле́ние на́ше, спаси́ ны, Ма́ти Христа́ Бо́га. Песнь 5 Ирмос: Из но́щи дел омраче́нный пре́лести/ очище́ние нам, Христе́,/ бо́дренно ны́не соверша́ющим песнь, я́ко Благоде́телю,/ прииди́, подава́яй удо́бну стезю́,/ по не́йже востека́юще, обря́щем сла́ву. Припев: Свята́я равноапóстольная Ни́но, моли́ Бо́га о на́с. Падо́ша и́доли во стране́ И́верстей/ и созда́шася хра́мы Госпо́дни тобо́ю, ма́ти на́ша./ Мы же, ча́да Сио́на, тобо́ю просвеще́ни бы́вше,/ днесь прославля́ем Триипоста́сное Божество́,/ сла́вим Честны́й Крест Христа́ и чествуе́м цельбоно́сный хито́н Его́. Припев: Свята́я равноапóстольная Ни́но, моли́ Бо́га о на́с. Сы́нове тех, и́же от дней столпотворе́ния Вавило́нска злоче́стием плене́ни бы́ша/ и песнь Госпо́дню воспева́ти не разуме́ша,/ ны́не изше́дше от святы́я купе́ли, глаго́лют:/ во Христа́ облеко́хомся, во Христа́ крести́вшеся. Сла́ва Отцу́ и Сы́ну и Свято́му Ду́ху. Егда́ ца́рствова фарао́н над еги́птяны,/ ти́и, во тьме еги́петстей седя́ше,/ и́стинному Бо́гу служи́ти не мого́ша;/ днесь же мы, ча́да Сио́на, Ни́ною изба́влены бы́вше,/ ра́достно пои́м Го́сподеви. И ны́не и при́сно и во ве́ки веко́в. Ами́нь. Богородичен: Егда́ приспе́ ко мне врач, Пресвята́я Богоро́дице,/ тогда́ воста́х от одра́ моего́, немощству́яй,/ и преподо́бною Ни́ною изба́вихся от ле́сти и́дол нечи́стых, сия́ род И́верский взыва́ет, глаго́ля:/ воспева́ю Тя, упова́ние мое́, Ма́ти Бо́жия. Песнь 6 Ирмос: Обита́я Ио́на в преиспо́дних морски́х,/ приити́ моля́шеся и бу́рю утоли́ти;/ унзе́н же аз муча́щаго стрело́ю,/ Христу́ воспева́ю, зол губи́телю,/ ско́ро приити́ Тебе́ к мое́й ле́ности. Припев: Свята́я равноапóстольная Ни́но, моли́ Бо́га о на́с. Возсия́вшу све́ту от за́пада, преста́ни, се́вере, и пове́й, ю́же,/ со́лнце бо восхо́дит разгна́ти мглу,/ и близ есть дхнове́ние теплоты́, во еже́ та́яти ле́ду:/ се гряде́т пропове́дница Христа́, Ни́на свята́я. Припев: Свята́я равноапóстольная Ни́но, моли́ Бо́га о на́с. От тьмы и́дольския изба́влени бы́вше тобо́ю, равноапо́стольная Ни́но,/ вси лю́дие Картали́нстии воспева́ют тя и умиле́нно взыва́ют:/ отжени́ от нас зло́бу, диа́вола же и супоста́ты на́ша порази́. Сла́ва Отцу́ и Сы́ну и Свято́му Ду́ху. Угото́ванная тобо́ю при столпе́ животво́рнем/ и ме́сте хране́ния хито́на Госпо́дня купе́ль свята́я/ не мертви́т младе́нцы, но сия́ возражда́ет, еле́ем святы́м умаща́ющи./ Те́мже вопие́м ти:/ ра́дуйся, дево, равноапо́стольная Ни́но. И ны́не и при́сно и во ве́ки веко́в. Ами́нь. Богородичен: Наде́ждо непосты́дная наде́ющихся на Тя,/ еди́на, ро́ждшая па́че естества́ пло́тию Христа́ Бо́га на́шего,/ Того́ со блаже́нною Ни́ною моли́ пода́ти И́верстей стране́ утвержде́ние и преспе́яние в ве́ре/ и всем нам пре́жде конца́ жития́ исправле́ние. Кондак, глас 2 Прииди́те днесь вси,/ воспои́м избра́нную от Христа́/ равноапо́стольную пропове́дницу Бо́жия сло́ва,/ му́друю благове́стницу,/ лю́ди Картали́нии приве́дшу на путь живота́ и и́стины,/ Богома́тере учени́цу,/ усе́рдную засту́пницу и неусыпа́ющую храни́тельницу на́шу,/ Ни́ну прехва́льную. Икос В гу́слех духо́вных да восхва́лится му́драя пропове́дница, Иве́рии просвети́тельница,/ в купе́ли Креще́ния избра́нными па́стырьми освяти́вшая лю́ди,/ жре́бием свиде́тельствованный,/ равноапо́стольная, возлю́бленная раба́ Христо́ва,/ я́же де́сять за́поведей Бо́жиих прия́т, я́коже Моисе́й Богови́дец./ Прииди́те у́бо, днесь ублажи́м пе́сньми/ усе́рдную засту́пницу и неусыпа́ющую храни́тельницу на́шу,/ Ни́ну прехва́льную. Песнь 7 Ирмос: Всецаря́ любо́вию уловле́ннии, о́троцы/ укори́ша безчи́сленно яря́щася мучи́теля злобо́жное языковре́дие./ И́мже повину́ся огнь мно́гий,/ Влады́це глаго́лющим:/ во ве́ки благослове́н еси́. Припев: Свята́я равноапóстольная Ни́но, моли́ Бо́га о на́с. Черто́зи царя́ и цари́цы я́ко пле́нницу и стра́нницу тя призре́ша,/ оба́че и сия́ от пле́на преиспо́дняго благода́тию Христо́вою привела́ еси́ ко Христу́ Бо́гу,/ Ни́но равноапо́стольная, благове́стнице спасе́ния. Припев: Свята́я равноапóстольная Ни́но, моли́ Бо́га о на́с. Внегда́ воздви́гнути тебе́ столп святы́й и возде́яти ру́це твои́,/ устраши́шася си́лы диа́вола и со тре́петом бежа́ша, возрыда́ша го́рько./ Мы же вопие́м:/ благослове́н еси́, Христе́ Бо́же, во ве́ки. Сла́ва Отцу́ и Сы́ну и Свято́му Ду́ху. Возвеща́емым словесе́м твои́м, падо́ша ниц лю́дие,/ я́ко от гла́са труб царе́вых, и ца́рства и ца́рие вострепета́ша, глаго́люще:/ о пле́ннице и пле́нных свобожде́ние!/ Буди́ благослове́но прише́ствие твое́. И ны́не и при́сно и во ве́ки веко́в. Ами́нь. Богородичен: Я́ве предрече́нная проро́ки, Ма́ти Бо́жия, Пренепоро́чная Де́во Мари́е,/ пребыва́нием Твои́м во Еги́пте с Богомладе́нцем Иису́с Христо́м/ истука́ны еги́петския сокруши́ла еси́ до основа́ний/ и Ни́ною потреби́ла еси́ куми́ры Картали́нии,/ бу́ди благослове́на, Присноде́во. Песнь 8 Ирмос: Утро́бу неопа́льно образу́ют Отрокови́цы/ и́же в Ве́тсем опаля́емии ю́ноши,/ преесте́ственно ражда́ющую запечатле́нну;/ обоя́ же содева́ющи чудоде́йство еди́но,/ лю́ди к пе́нию возставля́ет благода́ть. Припев: Свята́я равноапóстольная Ни́но, моли́ Бо́га о на́с. Па́мяти святы́я Ни́ны подоба́ет пра́зднество./ Прииди́те у́бо, ве́рнии, Христу́, просла́вим и возблагодари́м ми́лостиваго Бо́га./ Ро́ди же, и племена́, и ча́да Сио́на, в духо́вней ра́дости торжеству́йте ку́пно с на́ми, глаго́люще:/ сла́ва пропове́днице Христа́ и Бо́га на́шего. Припев: Свята́я равноапóстольная Ни́но, моли́ Бо́га о на́с. Ра́дуйся, стране́ Картали́нская,/ от Ни́ны венце́м Христо́вым венча́нная, свети́ся и благоукраша́йся:/ призыва́ет бо ны равноапо́стольная свята́я Ни́на,/ све́том Госпо́дним вся озаря́ющи. Сла́ва Отцу́ и Сы́ну и Свято́му Ду́ху. Ты запове́дала еси́ нам, равноапо́стольная, ве́ру свя́то блюсти́,/ е́йже новообраще́нныя лю́ди научи́ла еси́./ Сего́ ра́ди вертогра́ды, яже насади́ла еси́ в духо́вней па́стве твое́й,/ посети́ и утверди́. И ны́не и при́сно и во ве́ки веко́в. Ами́нь. Богородичен: О Ма́ти Христа́ Бо́га, Творца́ су́щих,/ сподо́бльшийся Тобо́ю жи́зни ве́чныя род Картали́нский храни́/ моли́твами Ни́ны блаже́нныя. Песнь 9 Ирмос: Люби́ти у́бо нам я́ко безбе́дное стра́хом/ удо́бее молча́ние;/ любо́вию же, Де́во,/ пе́сни тка́ти, спротяже́нно сложе́нный, неудо́бно есть./ Но и, Ма́ти, си́лу, ели́ко есть произволе́ние, даждь. Припев: Свята́я равноапóстольная Ни́но, моли́ Бо́га о на́с. Вожделе́нна нам па́мять твоя́,/ ди́вно чудоде́йство твое́, свя́то житие́ твое́ -/ вся нам быва́ют во бла́го тобо́ю, Ни́но целому́дренная. Припев: Свята́я равноапóстольная Ни́но, моли́ Бо́га о на́с. Прия́телище моще́й твои́х, благода́ть источа́ющих,/ утвержде́ние есть стране́ Ивери́йстей./ Сего́ ра́ди и взыва́ет к тебе́:/ блаже́нная Ни́но, охраня́й нас твои́м заступле́нием. Сла́ва Отцу́ и Сы́ну и Свято́му Ду́ху. Пропове́днице и просвети́тельнице,/ при́зри на пе́ние на́ше умиле́нное и уми́лостиви к нам Го́спода,/ не попусти́ нам, хвалы́ твоея́ ревни́телем, во гресе́х поги́бнути/ и, предстоя́щи Престо́лу Бо́жию,/ моли́ Христа́ Бо́га спасти́ся душа́м на́шим. И ны́не и при́сно и во ве́ки веко́в. Ами́нь. Богородичен: Услы́ши моле́ния на́ша, Ма́ти Бо́жия,/ и преподо́бныя Ни́ны заступле́нием отжени́ от нас вся искуше́ния,/ да́руй нам ми́лость Твою́ и побе́ду на враги́. Светилен Равноапо́стольная пропове́днице и благове́стнице Христо́ва,/ от наве́т вра́жиих избавля́ющая ны!/ А́ще и в не́дрех земли́ сокрове́на еси́ от о́чию на́шею,/ оба́че жива́ пребыва́еши у Престо́ла Христа́ Бо́га на́шего./ Буди́ у́бо засту́пница усе́рдно чту́щим тя.

Минея, 23 Марта, Канон мучеников Глас 4 Песнь 1 Ирмос: Мо́ря чермну́ю пучи́ну/ невла́жными стопа́ми/ дре́вний пешеше́ствовав Изра́иль,/ крестообра́зныма Моисе́овыма рука́ма/ Амали́кову си́лу в пусты́ни победи́л е́сть. Припев: Святи́и му́ченицы, моли́те Бо́га о на́с. Победи́в по́стническими боре́нии злоко́зненнаго,/ страда́льческими венча́лся еси́ добро́тами/ и Бо́гу ны́не предстои́ши, о нас моля́ся, преподо́бне Ни́коне, чту́щих тя. Припев: Святи́и му́ченицы, моли́те Бо́га о на́с. Кре́постию на́ша не́мощи укрепи́вшаго возмо́г,/ хра́бровал еси́ пре́жде во бране́х, блаже́нне,/ и, победи́тель быв, ко Христо́ву притека́еши креще́нию. Сла́ва Отцу́ и Сы́ну и Свято́му Ду́ху. Украша́ется муче́нием полк блаже́ннейший учени́к твои́х,/ пе́рвее му́дре просве́щся поще́ньми,/ и сугу́быми боре́нии сугу́бы венцы́ исплете́. И ны́не и при́сно и во ве́ки веко́в. Ами́нь. Богородичен: Две́рь, я́же к нам Твоего́, Го́споди, сни́тая, восто́ка,/ и со́лнце, и свет, та́инственно Тя нарица́емаго,/ преесте́ственно роди́ сугу́ба естество́м Невме́стнаго. Песнь 3 Ирмос: Весели́тся о Тебе́ Це́рковь Твоя́, Христе́, зову́щи,/ Ты моя́ кре́пость, Го́споди,/ и прибе́жище, и утвержде́ние. Припев: Святи́и му́ченицы, моли́те Бо́га о на́с. Во́инством духо́вным препоя́сан,/ во́инство Боже́ственное, му́чениче Христо́в,/ вооружи́л еси́ ко страда́ния подвиго́м. Припев: Святи́и му́ченицы, моли́те Бо́га о на́с. Распя́в по́стнически пло́ть, всесла́вне, пе́рвее,/ потща́лся еси́ страда́льческими ра́нами полки́ де́монския победи́ти. Сла́ва Отцу́ и Сы́ну и Свято́му Ду́ху. От восто́ка я́коже звезда́, Ни́коне, прише́д,/ к за́падом дости́гл еси́./ Те́мже, у́мер, заше́л еси́ и ко Христу́ возсия́л еси́. И ны́не и при́сно и во ве́ки веко́в. Ами́нь. Богородичен: Му́ченический собо́р Твое́ изобрази́ заколе́ние, Влады́ко,/ позна́в Тя, из Отрокови́цы Неискусобра́чныя прозя́бша. Седален, глас 4 Преподо́бно пожи́в, Ни́коне, пе́рвее,/ и лик собра́л еси́ богопокори́вых,/ благоче́стно при́сно после́дующих тебе́,/ от восто́ка к за́паду возсия́в, я́коже со́лнце светоно́сно, заря́ми страда́ний,/ гно́ем крове́й ва́ших пре́лесть ума́ливше. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Де́во Всенепоро́чная, Я́же пресу́щнаго Бо́га ро́ждшая,/ со безпло́тными Того́ непреста́нно моли́/ оставле́ние прегреше́ний и исправле́ние жития́ да́ти нам пре́жде конца́,/ ве́рою и любо́внию пою́щим Тя по до́лгу, еди́на Всепе́тая. Песнь 4 Ирмос: Вознесе́на Тя ви́девши Це́рковь на Кресте́,/ Со́лнце Пра́ведное,/ ста в чи́не свое́м,/ досто́йно взыва́ющи:/ сла́ва си́ле Твое́й, Го́споди. Припев: Святи́и му́ченицы, моли́те Бо́га о на́с. Наслажда́яся Боже́ственными светоли́тии,/ мук тече́ния неуя́звлен преше́л еси́, Ни́коне досточу́дне,/ и побе́ды вене́ц, му́чениче, досто́йно прия́л еси́. Припев: Святи́и му́ченицы, моли́те Бо́га о на́с. Светлостьми́ преле́потствуя до́блестей, я́ко по́стник подвиза́лся еси́,/ стра́сти умертви́в пе́рвее теле́сныя страда́нием,/ второ́е де́монския победи́в полки́. Сла́ва Отцу́ и Сы́ну и Свято́му Ду́ху. Ополчи́стеся ору́жием благоче́стия на врага́, Богому́дрии,/ и сме́ртию сла́вною безсме́ртие прия́сте, пою́ще:/ сла́ва си́ле Твое́й, Го́споди. И ны́не и при́сно и во ве́ки веко́в. Ами́нь. Богородичен: Я́ко су́щу тва́ри вы́шшу Творе́ц возлюби́в,/ о Де́во Ма́ти, показа́ Тя Ма́терь Себе́,/ Ю́же ны́не мо́лят собо́ри страда́лец благоле́пнейше. Песнь 5 Ирмос: Ты, Го́споди, мой свет,/ в мир прише́л еси́,/ Свет Святы́й, обраща́яй из мра́чна неве́дения/ ве́рою воспева́ющия Тя. Припев: Святи́и му́ченицы, моли́те Бо́га о на́с. Боже́ственным твоея́ ма́тере благоповину́яся наказа́нием,/ си́лу, Ни́коне, име́л еси́ кре́стную во бране́х, науча́яся лу́чшим. Припев: Святи́и му́ченицы, моли́те Бо́га о на́с. Житие́ твое́, све́том доброде́телей просвеща́емо,/ страда́ние, я́коже у́тварь благоле́пнейшу, и́мать,/ Богому́дре и всече́стне. Сла́ва Отцу́ и Сы́ну и Свято́му Ду́ху. Зако́ном Богонача́льным повину́ющеся, му́ченицы хра́бровавше/ и беззако́нныя Бо́жиим посо́бием му́жески победи́ша. И ны́не и при́сно и во ве́ки веко́в. Ами́нь. Богородичен: Свет безле́тный нам, О́тчее сия́ние, родила́ еси́,/ подле́тна бога́тством бла́гости бы́вша, Всенепоро́чная. Песнь 6 Ирмос: Пожру́ Ти со гла́сом хвале́ния, Го́споди,/ Це́рковь вопие́т Ти,/ от бесо́вския кро́ве очи́щшися,/ ра́ди ми́лости от ребр Твои́х/ исте́кшею Кро́вию. Припев: Святи́и му́ченицы, моли́те Бо́га о на́с. От восто́ка, я́ко многосве́тлое устреми́лся еси́ со́лнце,/ я́коже зве́зды, Богому́дре, ученико́в лик приводя́,/ и за́пад заря́ми ва́шими просвети́сте. Припев: Святи́и му́ченицы, моли́те Бо́га о на́с. Ка́плями крове́й твои́х, му́чениче, потопи́л еси́ многобо́жия мо́ре/ и глубино́ю по́двигов удави́л еси́ зло́бы лю́таго обрета́теля и вселука́ваго. Сла́ва Отцу́ и Сы́ну и Свято́му Ду́ху. Я́ко крин, во страда́нии зла́чнем процвето́сте,/ и, я́ко сладкодыха́тельный шипо́к, на́ша сердца́ благоуха́ете муче́ния добро́тами,/ страстоте́рпцы Богодухнове́ннии. И ны́не и при́сно и во ве́ки веко́в. Ами́нь. Богородичен: Храм Тя Бо́жий и пала́ту одушевле́нну/ страстоте́рпческий лик позна́в, Влады́чице,/ мо́лит Тя, еди́ну жен отъе́мшую поноше́ние. Песнь 7 Ирмос: В пещи́ авраа́мстии о́троцы перси́дстей/ любо́вию благоче́стия па́че,/ не́жели пла́менем, опаля́еми, взыва́ху,/ благослове́н еси́ в хра́ме сла́вы Твоея́, Го́споди. Припев: Святи́и му́ченицы, моли́те Бо́га о на́с. Па́че зла́та искуси́вся, Богому́дре, ра́нами,/ столп доброде́телей яви́лся еси́, напа́дания де́монская отгоня́:/ благослове́н еси́, Бо́же мой, – зовы́й, – и Го́споди оте́ц на́ших. Припев: Святи́и му́ченицы, моли́те Бо́га о на́с. По кончи́не пове́ржено твое́ те́ло, му́чениче, та́йно,/ Боже́ственныя врачева́ний испуща́я све́тлости, отго́нит вред де́монский,/ тя явле́ннаго Боже́ственною сотво́ршаго си́лою. Припев: Святи́и му́ченицы, моли́те Бо́га о на́с. Ве́сь Боже́ственными наслади́вся, всеблаже́нне, манове́ньми,/ те́ло ра́нам пре́дал еси́ терпели́вно,/ венцено́сец же предстои́ши Вседержи́телю на Небесе́х,/ я́ко возжела́л еси́, преподо́бне. Сла́ва Отцу́ и Сы́ну и Свято́му Ду́ху. Па́стырь ове́ц сый слове́сных, му́дре,/ от волко́в мы́сленных соблю́л еси́ невре́дны/ и, с си́ми в Небе́сней огра́де всели́вся,/ жела́ний кра́йнейшему предстои́ши. И ны́не и при́сно и во ве́ки веко́в. Ами́нь. Богородичен: Не растли́в де́вства Твоего́, Отрокови́це, отню́д,/ Сло́во О́тчее в Тя всели́ся,/ и му́чеников лобыза́ лик сла́вный,/ Богоро́дицу Тя чи́стую пропове́дающ. Песнь 8 Ирмос: Ру́це распросте́р, Дании́л/ льво́в зия́ния в ро́ве затче́,/ о́гненную же си́лу угаси́ша,/ доброде́телию препоя́савшеся,/ благоче́стия рачи́тели о́троцы, взыва́юще:/ благослови́те, вся дела́ Госпо́дня, Го́спода. Припев: Святи́и му́ченицы, моли́те Бо́га о на́с. Недрема́нно нося́ сия́ние се́рдца твоего́,/ напое́но слез пото́ки, преподо́бне, и страда́ния кровьми́,/ в нерукотворе́ннем, вопия́, черто́зе ны́не живе́ши:/ благослови́те, вся дела́ Госпо́дня, Го́спода. Припев: Святи́и му́ченицы, моли́те Бо́га о на́с. Красота́ по́стников и страда́льцев показа́лся еси́, преподо́бне,/ во обои́х бо благоизво́лил еси́ побе́ды,/ удивля́юща мы́сль, на еди́наго врага́, Ни́коне, стяжа́в, зовы́й:/ благослови́те, вся дела́ Госпо́дня, Го́спода. Сла́ва Отцу́ и Сы́ну и Свято́му Ду́ху. Кровьми́ напои́в души́,/ на ре́вность Боже́ственную воздви́гл еси́, преподо́бне,/ я́звами муче́ний уязви́л еси́ де́монское ополче́ние,/ и́стинствующее в тебе́ зва́ние показа́в, вопия́:/ благослови́те, вся дела́ Госпо́дня, Го́спода. И ны́не и при́сно и во ве́ки веко́в. Ами́нь. Богородичен: Расто́ргни вери́ги тя́жкия мои́х паде́ний,/ испра́вльши Ада́мово испаде́ние, Чи́стая, рождество́м Твои́м, Всепе́тая,/ и светово́ждствуй вопи́ти чи́стым по́мыслом:/ благослови́те, вся дела́ Госпо́дня, Го́спода. Песнь 9 Ирмос: Ка́мень нерукосе́чный/ от несеко́мыя го́ры – Тебе́, Де́во,/ краеуго́льный отсече́ся,/ Христо́с, совокупи́вши разстоя́щаяся естества́./ Тем, веселя́щеся, Тя, Богоро́дице, велича́ем. Припев: Святи́и му́ченицы, моли́те Бо́га о на́с. Ви́де тя, ран добро́тою процве́тша/ и багряни́цею от му́ченических твои́х крове́й Венцеда́тель облече́на,/ с собо́ю всели́, Ни́коне, Боже́ственно ра́дующася. Припев: Святи́и му́ченицы, моли́те Бо́га о на́с. Я́ко предо́бра твоя́ любо́вь, ю́же к Бо́гу стяжа́л еси́, Ни́коне,/ и те́пла твоя́ ре́вность, огне́м Боже́ственным распала́ема,/ и чу́дно страда́ние, с Небе́сными тя совоку́пльшее. Припев: Святи́и му́ченицы, моли́те Бо́га о на́с. Тя на церко́вней высоте́ со́лнце посреди́ иму́ще лик страстоте́рпец,/ я́ко зве́зды, све́том Боже́ственным облиста́ни,/ лучеда́тными сия́нии вселе́нную всю озаря́ют. Сла́ва Отцу́ и Сы́ну и Свято́му Ду́ху. Взя́лся еси́ ко оби́телем нетле́нным,/ лик сугубосо́тный, му́чениче, страда́льцев предста́вив Венцеда́вцу,/ с ни́миже помина́й соверша́ющих дне́сь свяще́нную ва́шу па́мять. И ны́не и при́сно и во ве́ки веко́в. Ами́нь. Богородичен: Све́та жили́ще яви́лася еси́ нас ра́ди из Тебе́ я́вльшагося,/ Его́же непреста́нно моли́ просвети́ти мы́сли на́ша,/ благоче́стно пою́щих Тя, Де́во Ма́ти Всенепоро́чная.

Минея, 19 Июня, Канон апостола Глас 5 Песнь 1 Ирмос: Коня́ и вса́дника в мо́ре Чермно́е,/ сокруша́яй бра́ни мы́шцею высо́кою/ Христо́с истрясе́, Изра́иля же спасе́,/ побе́дную пе́снь пою́ща. Припев: Святы́й апо́столе Иýдо, моли́ Бо́га о нас. Таи́нниче Небе́сных, Иу́до всему́дре,/ учениче́ Спа́сов и о́бщниче и́стинный жи́зни,/ язы́к мой подви́гни и сло́во упра́ви на пе́ние твое́, всеблаже́нне. Припев: Святы́й апо́столе Иýдо, моли́ Бо́га о нас. Влеки́й Спа́сов яре́м, апо́столе,/ и бразду́ секи́й, и обновля́я благода́тию, се́мя се́ял еси́/ и мног плод прине́сл еси́ призва́вшему, пресла́вне. Сла́ва Отцу́ и Сы́ну и Свято́му Ду́ху. Сло́ва вопло́щшагося обре́т Учи́теля/ и Сего́, Богови́дче, луча́ми просвеща́емь,/ был еси́ свет вторы́й,/ пе́рваго сия́ньми сообразу́яся, досточу́дне. И ны́не и при́сно и во ве́ки веко́в. Ами́нь. Богородичен: Ве́ра да пове́дуется то́кмо, а не сказа́ние,/ е́же па́че ума́ чуде́с, Богороди́тельнице Пречи́стая,/ Непостижи́маго Бо́га Сло́ва родила́ еси́, оболче́на в челове́чество. Песнь 3 Ирмос: Водрузи́вый на ничесо́мже зе́млю повеле́нием Твои́м/ и пове́сивый неодержи́мо тяготе́ющую/ на недви́жимем, Христе́, ка́мени за́поведей Твои́х,/ Це́рковь Твою́ утверди́, еди́не Бла́же и Человеколю́бче. Припев: Святы́й апо́столе Иýдо, моли́ Бо́га о нас. Взя́тся учени́к Христо́вых благоле́пие превы́ше вся́каго вели́чества:/ си́и бо бы́ша Ему́ дру́зи же и сво́йственнии, и сро́дницы,/ и сосне́дницы, и та́ин сказа́тели. Припев: Святы́й апо́столе Иýдо, моли́ Бо́га о нас. Иу́до, бра́тия твоя́ тя похваля́ют, бра́та я́вльшася/ и непщу́ема я́вльшагося пло́тию Сло́ва Преве́чнаго, от Присносу́щнаго возсия́вшаго,/ от нерожде́на Роди́теля. Сла́ва Отцу́ и Сы́ну и Свято́му Ду́ху. Умертви́в на земли́ твоя́ у́ды, пожи́л еси́ с жи́знию всех Христа́, пребога́те,/ и живоно́сныя жи́зни всей вселе́нней провозве́стник ты был еси́,/ глаго́лы живо́тныя пропове́дая. И ны́не и при́сно и во ве́ки веко́в. Ами́нь. Богородичен: Се Ты па́че всех, Чи́стая, ублажи́лася еси́,/ превозшла́ еси́ всех свя́тостию,/ всех превознесла́ся еси́/ и всех яви́лася вы́шши Небе́сных сил, Ма́ти Бо́жия бы́вши. Седален, глас 8 Ро́ждшагося Влады́ки и бра́та бы́вша всем избра́нным, Иу́до блаже́нне, брат был еси́/ и от Него́ апо́стол во вся концы́ посла́лся еси́, прему́дре,/ сло́во ве́ры всем всева́я и просвеща́я во тьме́ неве́дения рабо́тающая лука́вому мироде́ржцу./ Сего́ ра́ди вопие́м ти:/ моли́ Христа́ Бо́га грехо́в оставле́ние дарова́ти/ чту́щим любо́вию святу́ю па́мять твою́. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Я́ко Всенепоро́чная Неве́сто Творцу́, я́ко Неискусому́жная Ма́ти Изба́вителю,/ прия́телище я́ко су́щи Уте́шителя, Препе́тая,/ беззако́нию мя су́ща скве́рное оби́телище и бесо́м игра́лище в ра́зуме бы́вша,/ потщи́ся от тех злоде́йства мя изба́вити/ и све́тлое жили́ще доброде́телей соверши́, Светоно́сная Нетле́нная,/ отжени́ о́блак страсте́й и Вы́шняго прича́стия сподо́би/ и Све́та невече́рняго моли́твами Твои́ми. Песнь 4 Ирмос: Боже́ственное Твое́ разуме́в истоща́ние прозорли́во,/ Авваку́м, Христе́, со тре́петом вопия́ше Тебе́:/ во спасе́ние люде́й Твои́х/ спасти́ пома́занныя Твоя́ прише́л еси́. Припев: Святы́й апо́столе Иýдо, моли́ Бо́га о нас. Вели́кий Спа́сов апо́стол явле́ния Ду́ха сподо́блен/ и возлю́блен бы́сть, зре́ния Его́ зарю́ и добро́ту ви́дев. Припев: Святы́й апо́столе Иýдо, моли́ Бо́га о нас. Благода́ти сый испо́лнен и даро́в, от Бо́га пода́нных, апо́столе,/ на спаси́тельное приста́нище тя песносло́вящия наставля́й. Сла́ва Отцу́ и Сы́ну и Свято́му Ду́ху. Си́лою непобеди́мою Ду́ха Пресвята́го огражда́емь, служи́телю неизрече́нных,/ лука́вствия отгоня́еши ду́хи сло́вом благода́ти. И ны́не и при́сно и во ве́ки веко́в. Ами́нь. Богородичен: Несказа́нно заче́нши, Всенепоро́чная, Творца́ Твоего́ и Бо́га,/ моли́ спасти́ ны от бед/ и душе́вное спасе́ние пода́ти пою́щим Тя, Влады́чице. Песнь 5 Ирмос: Одея́йся све́том, я́ко ри́зою,/ к Тебе́ у́тренюю и Тебе́ зову́:/ ду́шу мою́ просвети́ омраче́нную, Христе́,/ я́ко еди́н Благоутро́бен. Припев: Святы́й апо́столе Иýдо, моли́ Бо́га о нас. Зако́на оста́вль се́ни, и́стины о́браз све́тло пропове́дал еси́,/ са́мую и́стину стяжа́в наста́вника. Припев: Святы́й апо́столе Иýдо, моли́ Бо́га о нас. Сло́ва повеле́ние исполня́я, апо́столе, язы́ки вся, уче́нии твои́ми науча́я, обте́кл еси́,/ и сих крестя́ Тро́ическим призыва́нием. Сла́ва Отцу́ и Сы́ну и Свято́му Ду́ху. До́ждь небе́сный, я́ко роса́ свы́ше, Боже́ственное веща́ние твое́, Богопропове́дниче,/ мглу разори́ многобо́жия еди́наго Бо́га пропове́данием. И ны́не и при́сно и во ве́ки веко́в. Ами́нь. Богородичен: Умертви́ стра́сти моя́, Богороди́тельнице,/ и ду́шу мою́, умерщвле́нную грехо́вными сластьми́, возста́ви,/ Ма́ти и́стиннаго Воскресе́ния. Песнь 6 Ирмос: Неи́стовствующееся бу́рею душетле́нною,/ Влады́ко Христе́, страсте́й мо́ре укроти́/ и от тли возведи́ мя,/ я́ко Благоутро́бен. Припев: Святы́й апо́столе Иýдо, моли́ Бо́га о нас. Виде́ния уче́нием, жития́ дея́ньми све́тло, Христо́в апо́столе, сия́я,/ су́щия во глубине́ неве́дения просвети́л еси́. Припев: Святы́й апо́столе Иýдо, моли́ Бо́га о нас. Посыла́еши всем челове́ком све́тлое и уче́ния Ду́ха испо́лнено посла́ние,/ священноявле́нне пречу́дне. Сла́ва Отцу́ и Сы́ну и Свято́му Ду́ху. Богови́дец веща́ет Небе́сная,/ я́коже слове́сную не́кую Бо́жию сла́ву пове́дая/ нас ра́ди пло́тию Я́вльшагося и чудесы́. И ны́не и при́сно и во ве́ки веко́в. Ами́нь. Богородичен: Пресвята́я Влады́чице Богома́ти,/ изба́ви мя тли и страсте́й смуще́ние утоли́,/ исто́чник безстра́стия ро́ждшая. Кондак, глас 2 Тве́рдым умо́м избра́н учени́к ты яви́лся еси́/ и столп необори́м Це́ркве Христо́вы,/ язы́ком пропове́дал еси́ сло́во Христо́во,/ ве́ровати глаго́ля во Еди́но Божество́;/ от Него́же просла́вився, прия́л еси́ дар исцеле́ний,/ цели́ти неду́ги притека́ющих к тебе́,/ апо́столе Иу́до всехва́льне. Икос И́стиннаго благоче́стия пропове́дника и держа́внаго и́стины побо́рника досто́йно восхва́лим,/ я́ко подо́бника Христу́ и свиде́теля:/ стра́сти бо Его́ на те́ле му́жески прия́т,/ я́ко учени́к Словесе́ и апо́стол, Иу́до всехва́льный. Песнь 7 Ирмос: Превозноси́мый отце́в Госпо́дь/ пла́мень угаси́, о́троки ороси́,/ согла́сно пою́щия:/ Бо́же, благослове́н еси́. Припев: Святы́й апо́столе Иýдо, моли́ Бо́га о нас. Богови́дна ссу́щием Божества́ бы́вша,/ вси Иу́ду воспое́м, согла́сно пою́ще:/ Бо́же, благослове́н еси́. Припев: Святы́й апо́столе Иýдо, моли́ Бо́га о нас. Духодви́жимый и Богодухнове́нный язы́к твой мир обрати́ Христо́вым пропове́данием,/ Ему́же вси пое́м:/ Бо́же, благослове́н еси́. Сла́ва Отцу́ и Сы́ну и Свято́му Ду́ху. Дае́т тебе́ Небе́сное насле́дие Госпо́дь и престо́л пресве́тел,/ на не́мже почива́я, боже́ственне пое́ши:/ Бо́же, благослове́н еси́. И ны́не и при́сно и во ве́ки веко́в. Ами́нь. Богородичен: Усты́ и ра́зумом Тя Богоро́дицу Влады́чицу пропове́дуем, веселя́щеся:/ Бо́га бо родила́ еси́, Ему́же вси пое́м:/ Бо́же, благослове́н еси́. Песнь 8 Ирмос: Тебе́, Вседе́телю,/ в пещи́ о́троцы, всеми́рный лик спле́тше, поя́ху/ дела́ вся́кая, Го́спода по́йте/ и превозноси́те во вся ве́ки. Припев: Святы́й апо́столе Иýдо, моли́ Бо́га о нас. Бога́тство язы́к и царе́й по́честь,/ благозва́ние восприя́л еси́, вопия́, апо́столе:/ вся дела́ Госпо́дня, Го́спода по́йте и превозноси́те во вся ве́ки. Припев: Святы́й апо́столе Иýдо, моли́ Бо́га о нас. Всю зарю́ Уте́шителеву, блаже́нне, прия́л еси́ соше́дшую, зовы́й, сла́вне:/ вся дела́ Госпо́дня, Го́спода по́йте и превозноси́те во вся ве́ки. Сла́ва Отцу́ и Сы́ну и Свято́му Ду́ху. Ве́щи тле́нныя возненави́дев, Небе́сных сла́ву производи́л еси́,/ пребыва́ющую ве́дый, апо́столе, те́мже вопия́л еси́:/ вся дела́ Госпо́дня, Го́спода по́йте и превозноси́те во вся ве́ки. И ны́не и при́сно и во ве́ки веко́в. Ами́нь. Богородичен: Прииди́те, добро́ту Иа́ковлю воспои́м,/ Мари́ю Пречи́стую, согла́сно пою́ще:/ вся дела́ Госпо́дня, Го́спода по́йте и превозноси́те во вся ве́ки. Песнь 9 Ирмос: Иса́ие, лику́й:/ Де́ва име́ во чре́ве/ и ро́ди Сы́на Емману́ила,/ Бо́га же и Челове́ка, Восто́к и́мя Ему́,/ Его́же велича́юще, Де́ву ублажа́ем. Припев: Святы́й апо́столе Иýдо, моли́ Бо́га о нас. Облиста́вся, сла́вне, светоли́тий Ду́ха заре́ю,/ чуде́с блиста́ния па́че естества́ всем испуща́еши, я́ко учени́к Емману́илев,/ Его́же велича́юще, тя, Богови́дче, ублажа́ем. Сла́ва Отцу́ и Сы́ну и Свято́му Ду́ху. Со А́нгельскими чи́нми предстоя́ще, богови́днии самови́дцы/ и зри́тели Единоро́днаго, пло́тию обнища́вшаго нас ра́ди,/ Сего́ приле́жно ны́не моли́те спасти́ ду́ши на́ша. И ны́не и при́сно и во ве́ки веко́в. Ами́нь. Богородичен: Я́ко ро́ждши, Пречи́стая, тва́ри Соде́теля, по всему́ Роди́теля но́сиши нача́ло,/ несравни́тельно име́я превзя́тие и превознесе́нно./ Те́мже Рождеству́ Твоему́ покланя́ющеся, Тя прославля́ем. Светилен Тече́ние кра́сных твои́х ног, Иу́до апо́столе, возврати́в к ше́ствию Небе́сному,/ возше́л еси́, ра́дуяся,/ и, Тро́ице предста́в, во Отце́ ви́диши Сы́на и Ду́ха Боже́ственнаго./ Сего́ ра́ди ве́рою пресвяще́нную твою́ и Боже́ственную пра́зднуем па́мять. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Стра́шнаго испыта́ния воспомина́ю час,/ мно́жество злых дел мои́х ужаса́ет и устраша́ет мя,/ но уще́дри, Пречи́стая, те́плою Твое́ю моли́твою и да́ждь ми спасе́ние:/ ели́ка бо хо́щеши, мо́жеши.

Минея, 7 Марта, Канон Богородицы Глас 2 Песнь 1 Ирмос: Во глубине́ постла́ иногда́/ фараони́тское всево́инство преоруже́нная си́ла,/ вопло́щшееся же Сло́во всезло́бный грех потреби́ло е́сть,/ препросла́вленный Госпо́дь/ сла́вно бо просла́вися. Припев: Пресвята́я Богоро́дице, спаси́ на́с. В наро́читый де́нь пра́здника на́шего/ отве́рзем, лю́дие, уста́ своя́/ и но́выми пе́сньми вели́чия Присноде́вы воспое́м./ Се бо явле́нием святы́я Своея ́ ико́ны – гре́шным Спору́чницы –/ мно́жеством чуде́с от нея́ сла́вно просла́вися. Припев: Пресвята́я Богоро́дице, спаси́ на́с. Я́коже светоза́рное Со́лнце, от го́ры Сина́йския возсия́вшее,/ облиста́ нас о́браз Спору́чницы гре́шных,/ и́мже благода́ти зало́г ми́ру дарова́ся и спасе́ние на земли́ возвести́ся,/ покро́в и прибе́жище ве́рным, любо́вию почита́ющим Его́. Сла́ва Отцу́ и Сы́ну и Свято́му Ду́ху. Руко́ю кре́пкою лю́ди Своя́ от го́рькия рабо́ты Изба́вльшему/ и из глубины́ морски́я Изве́дшему/ простри́ ру́це Твоя́, Де́во Чи́стая, и моли́ся приле́жно,/ да изведе́т из пле́на грехо́внаго ду́ши ве́рных,/ пра́зднующих све́тло заступле́ние Твое́. И ны́не и при́сно и во ве́ки веко́в. Ами́нь. Всех па́дших воста́ние,/ заблужда́ющих Наста́внице, уныва́ющих ра́дование,/ боля́щих исцеле́ние и всех гре́шных спасе́ние,/ соблюди́ и сохрани́ нас, Госпоже́,/ Боже́ственным к Сы́ну за ны хода́тайством Твои́м. Песнь 3 Ирмос: Непло́дствовавший мой ум/ плодоно́сен, Бо́же, покажи́ ми,/ Де́лателю до́брых, Насади́телю благи́х,/ благоутро́бием Твои́м. Припев: Пресвята́я Богоро́дице, спаси́ на́с. Свы́ше да́нною Ти благода́тию обнови́ла еси́, Спору́чнице ми́ра,/ мно́гими грехми́ обветша́вшия сердца́ на́ша,/ и, возде́ющи ру́це, мо́лишися к Сы́ну Твоему́ за лю́ди согреши́вшия:/ спаси́, Де́во, нас моли́твами Твои́ми. Припев: Пресвята́я Богоро́дице, спаси́ на́с. Я́ко о́блак дождено́сный, ви́дим о́браз Твой, Влады́чице ми́ра,/ во́ду бо спаси́тельную чуде́с от Него́ испуща́ющи,/ грехми́ изсо́хшия се́рдца благода́тию напая́еши/ и приво́дише нас к творе́нию доброде́телей плода́,/ сего́ ра́ди любо́вию ублажа́ем Тя. Сла́ва Отцу́ и Сы́ну и Свято́му Ду́ху. Жезл Ааро́нов процве́тший именова́ Тя дре́вле Моисе́й,/ Цвет бо живоно́сный – Христа́ – прозябла́ еси́,/ Ему́же просте́рши дла́ни, моли́ся, Богома́ти,/ страстьми́ умерщвле́нныя ду́ши на́ша оживи́ти плодоно́сною благода́тию Свое́ю. И ны́не и при́сно и во ве́ки веко́в. Ами́нь. Ороси́ нас росо́ю моли́тв Твои́х, Богороди́тельнице,/ и непло́дная в пусты́не грехо́вней увяда́ющая се́рдца на́ша плодоно́сны ны́не соде́лай/ всеси́льным к Бо́гу хода́тайством Твои́м. Седален, глас 4 Подо́бен: Яви́лся еси́ дне́сь: Заря́ми просия́ всеми́рная ра́дость о́браза Твоего́, Де́во Ма́ти Мари́е:/ на земли́ просвети́ мы́сли любо́вию пою́щих Тя. Слава и ныне: Заря́ми просия́ всеми́рная ра́дость о́браза Твоего́, Де́во Ма́ти Мари́е:/ на земли́ просвети́ мы́сли любо́вию пою́щих Тя. Песнь 4 Ирмос: Прише́л еси́ от Де́вы, не Хода́тай, ни А́нгел,/ но Сам, Го́споди, вопло́щся,/ и спасл еси́ всего́ мя, челове́ка./ Тем зову́ Ти: сла́ва си́ле Твое́й, Го́споди. Припев: Пресвята́я Богоро́дице, спаси́ на́с. Пришла́ еси́ в мир за гре́шники Хода́таица,/ и я́ко А́нгел утеша́яй и ко исправле́нию вся подвиза́яй;/ те́мже у́бо, Ма́ти Бо́жия, Спору́чница бу́ди ми во бла́го,/ я́ко да обращу́ся и пре́жде согреше́нных разреше́ние прииму́, ра́достно вопию́ще:/ сла́ва си́ле Твое́й, Го́споди. Припев: Пресвята́я Богоро́дице, спаси́ на́с. Сокро́вище безце́нное обрето́хом –/ светоно́сный о́браз Твой, Богоро́дице, мирото́чный и многоцеле́бный,/ благода́ти Бо́жия оби́льно преиспо́лненный,/ Ему́же покланя́ющеся, источи́ти про́сим освяще́ние душа́м и телесе́м на́шим. Сла́ва Отцу́ и Сы́ну и Свято́му Ду́ху. Ле́ствица яви́лася еси́ обра́зно Иа́кову,/ от земли́ к высоте́ утвержде́нная,/ е́юже сни́де Влады́ка Не́ба и земли́,/ да То́ю пу́ть пра́вый покая́ния пока́жет нам/ и к черто́гам Небе́сным возведе́т лю́ди согреши́вшия. И ны́не и при́сно и во ве́ки веко́в. Ами́нь. Еди́на наде́жда несумне́нная и гре́шным Спору́чница Ты еси́, Пречи́стая,/ Тобо́ю бо Христо́с Бог, прекло́нь Небеса́,/ на зе́млю сни́де обнови́ти па́дшее созда́ние Свое́;/ те́мже, проси́, Де́во, грехо́в проще́ние дарова́ти нам, ве́рою пою́щим Ему́:/ сла́ва си́ле Твое́й, Го́споди. Песнь 5 Ирмос: Хода́тай Бо́гу и челове́ком был еси́, Христе́ Бо́же:/ Тобо́ю бо, Влады́ко, к Светонача́льнику, Отцу́ Твоему́,/ от но́щи неве́дения/ приведе́ние и́мамы. Припев: Пресвята́я Богоро́дице, спаси́ на́с. Хода́тай Бо́гу и челове́ком, Христо́с Бог,/ Хода́таицу Тя ми́ру показа́ и гре́шным Спору́чницу./ Его́же ми́лостива соде́лай нам, Пресвята́я Ма́ти Де́во,/ те́плым заступле́нием Твои́м. Припев: Пресвята́я Богоро́дице, спаси́ на́с. Па́че со́лнца светле́ется о́браз Твой, Богоневе́сто,/ всю страну́ на́шу осиява́ющий зна́мении и чудесы́,/ тьму́ же грехо́вную разгоня́ющий и благо́е всем источа́ющий Небе́сное ми́ро/ во спасе́ние ве́рных и ми́ру христиа́нскому во обновле́ние. Сла́ва Отцу́ и Сы́ну и Свято́му Ду́ху. Руно́ Тя Гедео́н вообрази́ ороше́нное,/ на него́же, я́ко роса́, Христо́с Бог сни́де,/ да, росо́ю моли́тв Твои́х ороше́ннии,/ гре́шницы к покая́нию подви́гнутся/ и к ве́чным оби́телем Светонача́льника Отца́ Небе́снаго приведе́ние да и́мут. И ны́не и при́сно и во ве́ки веко́в. Ами́нь. Се пла́чу и рыда́ю го́рце,/ егда́ от но́щи нераде́ния во ум прииду́ от мно́гих мои́х злых прегреше́ний./ Те́мже молю́ Тя, Ма́ти Блага́я:/ Спору́чница бу́ди ми и наста́ви мя на пу́ть, е́же ходи́ти во и́стине,/ сле́зы принося́ще о свои́х согреше́ниих. Песнь 6 Ирмос: В бе́здне грехо́вней валяя́ся,/ неизсле́дную милосе́рдия Твоего́ призыва́ю бе́здну;/ от тли, Бо́же, мя возведи́. Припев: Пресвята́я Богоро́дице, спаси́ на́с. Ра́дости нам ве́чныя и жи́зни нетле́нныя Хода́таица яви́лася еси́, Богороди́тельнице,/ принося́ще за ны ру́це к Сы́ну Твоему́ и Спа́су всех,/ вся́ку сле́зу от лица́ земна́го отъе́мшему/ и неизсле́дную милосе́рдия Своего́ бе́здну Тобо́ю ми́ру показа́вшему. Припев: Пресвята́я Богоро́дице, спаси́ на́с. Святи́теля Никола́я, предстоя́ща о́бразу Твоему́,/ благогове́йный муж узре́ти сподо́бися/ и благоволе́ния Твоего́ глаго́лы от Тебе́, Цари́це, услы́ша,/ я́же ве́рным бы́ша во утвержде́ние/ и о лю́дех промышле́ния Твоего́ во свиде́тельство. Сла́ва Отцу́ и Сы́ну и Свято́му Ду́ху. Сви́ток нов Тебе́ Иса́ия, Де́во, предви́дев,/ на не́мже написа́ся живо́е сло́во О́тчее,/ Его́же моли́, Чи́стая, Всеблаже́нная,/ в кни́зе мне живы́х написа́тися/ и мно́гих зол мои́х разтерза́ти сви́ток/ покая́ния предо́брыми о́бразы. И ны́не и при́сно и во ве́ки веко́в. Ами́нь. Из глубины́ бе́здны грехо́вныя к Тебе́ ру́це простира́ю/ и скве́рнии устне́ мои́ к моле́нию отверза́ю,/ подно́жию же ног Твои́х, Влады́чице, припа́даю/ и, рыда́ющи, вопию́ Ти:/ моли́ся, Засту́пнице, Сы́ну Твоему́,/ проще́ние улучи́ти ми и ми́лость в Де́нь су́дный. Кондак, глас 1 Честно́е жили́ще бы́вшее/ неизрече́ннаго естества́ Боже́ственнаго/ вы́ше сло́ва и па́че ума́/ и гре́шным еси́ Спору́чница,/ подава ́еши благода́ть и исцеле́ние,/ я́ко Ма́ти всех Ца́рствующаго:/ моли́ Сы́на Твоего́/ получи́ти нам ми́лость в Де́нь су́дный. Икос Светоно́снаго явле́ния/ и пресла́внаго Твоея́ ико́ны, Спору́чницы гре́шных прославле́ния,/ чуде́с же мно́гих пучи́ны и ми́ра многоцеле́бнаго излия́ния/ вити́йствующих уста́ не возмога́ют испове́дати досто́йно;/ мы же, гре́шнии и смире́ннии, что возглаго́лем Ти, Богоневе́стная Де́во?/ То́кмо: поми́луй нас/ Еди́ну бо Тя жи́зни на́шея стяжа́хом Храни́тельницу и Наде́жду кре́пку спасе́ния,/ Те́мже мо́лим Тя, о Благосе́рдная:/ Спору́чница нам покая́ния яви́ся/ и хода́тайствуй к Сы́ну Твоему́:/ да бу́дущих истяза́ний изба́вимся/ и ми́лостива Его́ обря́щем в Де́нь су́дный. Песнь 7 Ирмос: Богопроти́вное веле́ние/ беззако́ннующаго мучи́теля/ высо́к пла́мень вознесло́ е́сть./ Христо́с же простре́ благочести́вым отроко́м ро́су духо́вную,/ Сый благослове́н и препросла́влен. Припев: Пресвята́я Богоро́дице, спаси́ на́с. В но́щи, и во дни, и во вся́ких обстоя́ниих/ спасе́ние тве́рдо и́мамы Тя, Богоро́дице, христиа́ном покро́в и прибе́жище,/ вы́ну бо ру́це ко Го́споду просте́рши,/ росо́ю моли́тв Твои́х, я́коже о́троки благочести́выя,/ охраня́еши от напа́стей ве́рныя, зову́щия:/ благослове́нна еси́, Ма́ти Де́во, и препросла́влена. Припев: Пресвята́я Богоро́дице, спаси́ на́с. Не терпя́ муж благочести́вый зре́ти неизрече́ннаго от о́браза Твоего́ осия́ния,/ на зе́млю ниц паде́, моля́ся;/ мы же, гре́шнии, благода́тную ико́ну сию́ зря́ще,/ любо́вно вопие́м Ти:/ благослове́нна бу́ди, Спору́чнице спасе́ния на́шего,/ и препросла́влена во ве́ки. Сла́ва Отцу́ и Сы́ну и Свято́му Ду́ху. Серафи́м дре́вле, клеща́ми у́гль нося́й горя́щий,/ во уста́ косну́ся Иса́ии, попаля́я грехи́ его́./ Ты же, клеща́ светоза́рная су́щи, Богоро́дице,/ У́гль Боже́ственный носи́вшая, Христа́ Иису́са,/ прикосни́ся Его́ милосе́рдию,/ да опали́т грехи́ на́ша и беззако́ния лю́тая. И ны́не и при́сно и во ве́ки веко́в. Ами́нь. Не отве́ржи мене́ от лица́ Твоего́, Всенепоро́чная,/ егда́ к Пречи́стому о́бразу Твоему́ воззрю́, стеня́ще о гресе́х тя́жких,/ но ми́лостива бу́ди ми Засту́пница к Сы́ну,/ милосе́рдием бо преклоня́ется и спасе́ние гре́шников соде́лывает хода́тайством Твои́м. Песнь 8 Ирмос: В пе́щь о́гненную ко отроко́м евре́йским снизше́дшаго/ и пла́мень в ро́су прело́жшаго Бо́га/ по́йте, дела́, я́ко Го́спода/ и превозноси́те во вся ве́ки. Припев: Пресвята́я Богоро́дице, спаси́ на́с. В пе́щь о́гненную страсте́й ми́ра снизше́дшую/ и пла́мень грехо́вный в ро́су покая́ния спаси́тельнаго прело́жшую Богоро́дицу,/ прекра́сный лик ве́село спле́тши,/ по́йте, дела́, я́ко Засту́пницу ми́ра Де́ву Чи́стую,/ и превозноси́те во вся ве́ки. Припев: Пресвята́я Богоро́дице, спаси́ на́с. Све́та Небе́снаго в но́щи многообра́зными игра́ньми сла́вят всечестну́ю ико́ну Твою́, Влады́чице, Го́рнии чи́ни/ и Тебе́, Богоневе́стную Ма́терь, ублажа́ют ра́достно./ Ю́же, я́ко Световоди́тельницу из тьмы́ грехо́вныя,/ лю́дие, превозноси́те во вся ве́ки. Сла́ва Отцу́ и Сы́ну и Свято́му Ду́ху. От дре́вле до ны́не Саму́ Ма́терь Царя́ Христа́/ Уте́шительницу тве́рду в напа́стех иму́щи,/ в ско́рбех же и печа́лех при́сное избавле́ние,/ в беда́х по́мощь и в покая́нии Спору́чницу,/ благослови́те, сы́нове челове́честии,/ по́йте Сию́ и превозноси́те во вся ве́ки. И ны́не и при́сно и во ве́ки веко́в. Ами́нь. Да́ждь рабо́м Твои́м, Всеблага́я Цари́це, проше́ния спаси́тельная в хра́ме сем,/ в не́мже исто́чник пресла́вных чуде́с показа́ла еси́,/ то́ки ми́ра источа́я от свята́го о́браза Твоего́,/ и́миже стра́сти душ и теле́с врачу́еши неизрече́нным милосе́рдием Твои́м. Песнь 9 Ирмос: Безнача́льна Роди́теля Сын, Бог и Госпо́дь,/ воплоще́н от Де́вы, нам яви́ся,/ омраче́нныя просвети́ти, собра́ти расточе́нная,/ тем Всепе́тую Богоро́дицу велича́ем. Припев: Пресвята́я Богоро́дице, спаси́ на́с. Не возмога́ет сло́во челове́ческое,/ ниже́ язы́к всяк похвали́ти Тя досто́йно,/ но Ты, Пресвята́я, благода́ть неоску́дную от Го́спода прии́мшая/ и гре́шным Спору́чница свы́ше преднарече́нная,/ вре́тище прегреше́ний на́ших расто́ргни и омраче́нныя просвети́ ны,/ весе́лием же доброде́телей препоя́сующи,/ не оста́ви нас заступле́нием Твои́м,/ да Тя, Всепе́тую Богоро́дицу, велича́ем. Припев: Пресвята́я Богоро́дице, спаси́ на́с. Све́том невеще́ственнаго светоли́тия сия́я, о́браз Твой, Отрокови́це Непоро́чная,/ омраче́нныя грехми́ просвеща́ет и расточе́нная вся под кров спаси́тельный хра́ма Твоего́ собира́ет,/ тем, веселя́щеся, Тя, Всепе́тую Богоро́дицу, велича́ем. Сла́ва Отцу́ и Сы́ну и Свято́му Ду́ху. Я́коже Дави́д пра́отец дре́вле пред се́нным ковче́гом взыгра́ше ра́достно,/ си́це и мы Цари́це Не́ба прише́дшей пе́сньми взыгра́ем немо́лчными,/ сла́вяще о́браза Ея́ многоцеле́бнаго всечестно́е прославле́ние. И ны́не и при́сно и во ве́ки веко́в. Ами́нь. Сра́дуемся дне́сь и свесели́мся неизрече́нному Бо́жию дарова́нию/ – ди́вному о́бразу Присноде́вы,/ ра́дость бо ве́чную от Него́ источа́ет нам, напа́стей и печа́лей свобожда́я./ Те́мже благода́рственныя пе́сни воспева́ем весе́лия Хода́таице/ и ве́рно любо́вию вси я́ко Богома́терь велича́ем.

Минея, 6 Января, Ин канон Глас 2 Песнь 1 Ирмос: Шествует морскую волнящуюся бурю, сушу абие Израиль явльшуюся. Чермный же понт тристаты египетская покры купно, водостланен гроб, силою крепкою десницы Владычни. Сла́ва Отцу́ и Сы́ну и Свято́му Ду́ху. Утру явльшуся человеком светоносну ныне из пустыни, к водам Иорданским преклонил еси, Царю солнца, Твою выю, лика мрачна родоначальника исхитити, скверны же всякия очистити тварь. И ны́не и при́сно и во ве́ки веко́в. Ами́нь. Безначальне, струям спогребшася Тебе, Слове, новаго преводиши, истлевшаго лестию, Сего несказанно от Отца прием глас державен: Сей возлюбленный, равен же Мне Отрок естеством. Песнь 3 Ирмос: Елицы древних изрешихомся сетей брашен львов, сотренных членовными, радуимся и разширим уста, слово плетуще от словес сладкопения, имже к нам наслаждается дарований. Сла́ва Отцу́ и Сы́ну и Свято́му Ду́ху. Умерщвление первее насадивый твари, зверя злодейственнаго воображься в естество, омрачается плотским пришествием: утру явльшуся, приразився Владыце сокрушити свою враждебную главу. И ны́не и при́сно и во ве́ки веко́в. Ами́нь. Влечет к себе Богозданное естество, утробы мучителя погребенное пределы; раждается паки земнородных Обновление, дело державно совершая Владыка: прииде бо, тое очистити хотя. Седален, глас 5 Егда́ явле́нием Твои́м просвети́л еси́ вся́ческая,/ тогда́ сла́ное неве́рия мо́ре побеже́,/ и Иорда́н, до́ле теки́й, возврати́ся,/ к Небеси́ возвыша́я нас./ Но высото́ю Боже́ственных за́поведей Твои́х/ соблюди́, Христе́ Бо́же, моли́твами Богоро́дицы и поми́луй нас. Песнь 4 Ирмос: Огнем очищся тайнаго зрения, поя пророк человеков новодейство, возглашает глас, Духом плещущ, воплощение являющ неизреченна Слова, Имже сильных державы сотрошася. Припев: Сла́ва Тебе́, Бо́же наш, сла́ва Тебе́. Послан от Отца, всесветлое Слово, нощи отгнати зломрачное стремление, и искоренити грядеши человеков грехи, сыны же привлещи, Твоим Крещением, Блаже, светлы от струй Иорданских. Сла́ва Отцу́ и Сы́ну и Свято́му Ду́ху. Самое провидев нареченное Слово, ясно проповедник вопиет твари: Сей прежде мене, вторый плотию сообразен, просия Божественною силою враждебный наш отъяти грех. И ны́не и при́сно и во ве́ки веко́в. Ами́нь. Пажить у Себе животворну нося, уловляет змиев, гнездам натекая многими сетьми, низлагая, Бог Слово, запинает же уязвившаго всемирный род, сего потребль, избавляет тварь. Песнь 5 Ирмос: Врага темнаго и оскверненнаго яда очищением Духа измовени, к новой пристахом неблазненной стези, вводящей в неприступную радость, Единем приступну, имже Бог примирися. Сла́ва Отцу́ и Сы́ну и Свято́му Ду́ху. Видев Зиждитель во мраце прегрешений пленицами неизбежными егоже вообрази персты, поставляет на обою раму, воздвиг горе, ныне во многотекущих водах омывая студа древняго Адамова злаго нрава. И ны́не и при́сно и во ве́ки веко́в. Ами́нь. Со благочестием притецем прилежно ко источником пречистым течения спасительнаго, Слово усмотряюще от Нетленныя, почерпала приносяще жажди Божественныя, мира сладостне исцеляя недуг. Песнь 6 Ирмос: Вожделеннаго, явствова со всеблаженным гласом Отец, Егоже из чрева отрыгну: ей, — глаголет, — Сей соестествен Сын, Сый светозарен, произниче из человеча рода: Слово же Мое живо и Человек промышлением. Сла́ва Отцу́ и Сы́ну и Свято́му Ду́ху. От глубиннаго льва, тревечерний странне пророк во внутренних валяяся, абие произыде, пакибытия спасение от змия человекоубийцы всем предъявляя в последняя лета. И ны́не и при́сно и во ве́ки веко́в. Ами́нь. Отверсту Небу всесветлых писаний, ученик зрит от Отца посылаемый, пребывающ же Дух на Пречистем Слове, нашед яко голубь неизреченным образом, людем же является, пришедшим ко Владыце. Кондак, глас 4 Яви́лся еси́ днесь вселе́нней,/ и свет Твой, Го́споди, зна́менася на нас,/ в ра́зуме пою́щих Тя:/ прише́л еси́ и яви́лся еси́,/ Свет Непристу́пный. Икос Галиле́и язы́честей, Завуло́нстей стране́ и Неффали́мстей земли́,/ я́коже рече́ проро́к, Свет вели́к возсия́, Христо́с./ Омраче́нным све́тла яви́ся Заря́, из Вифлее́ма облиста́ющая,/ па́че же из Мари́и Госпо́дь, всей вселе́нней возсиява́ет лучи́ Со́лнце пра́вды./ Те́мже, и́же от Ада́ма нази́и, прииди́те вси, облече́мся в Него́, да согре́емся,/ покрыва́ет бо наги́я и просвеща́ет те́мныя./ Прише́л еси́ и яви́лся еси́, Свет Непристу́пный. Песнь 7 Ирмос: Опали струею змиевы главы пещный высокий пламень, юноши носящ благочестивыя, утишивый неудободержимую мглу из греха всю же омывает росою Духа. Припев: Сла́ва Тебе́, Бо́же наш, сла́ва Тебе́. Тебе живописующий ассирийский пламень ужасен поставляеши, в росу преведен; темже вода ныне, якоже пламень, одеваяй, вредную злобу, Христе, прикровенную опаляет, от поползновенныя стези призывающи. Сла́ва Отцу́ и Сы́ну и Свято́му Ду́ху. Раздельшуся Иордану древле, по суху преходят людие Израильтестии, Тебе, Державнейшаго, содержаща тварь некоснительне, ныне в водах написующии, к нетленней и полезней стези. И ны́не и при́сно и во ве́ки веко́в. Ами́нь. Вемы, первее всепагубный потоп милостивно Тя всех во тлю привести, о, тревеликая сотворяя и странная! Ныне же потопльша, Христе, грех за благосердие и человеческое спасение. Песнь 8 Ирмос: Свободна убо тварь познавается и сынове Света прежде омраченнии; един стенет тьмы предстатель. Ныне да благословит усердно Виновнаго прежде окаянное языков всенаследие. Сла́ва Отцу́ и Сы́ну и Свято́му Ду́ху. Трие Боговиднии, во огни орошаеми, озаряющеся треми всесветле святынями, яве показоваху Превышнее Естество смешением человеческим, огнепалящее росою милостивно всяку пагубную лесть. И ны́не и при́сно и во ве́ки веко́в. Ами́нь. Да убелится всякое земное естество, от падения ныне на Небо возводимо, Имже бо вся соблюдаются, Словом, текущими струями омывшеся, прегрешений прежних убеже, пресветло измовено. Песнь 9 Ирмос: О, паче ума Рождества Твоего чудес! Невесто Всечистая, Мати Благословенная, Еюже получивше всесовершенное спасение, достойно хвалим, яко Благодетеля, дар носяще — песнь благодарения. Припев: Сла́ва Тебе́, Бо́же наш, сла́ва Тебе́. Уведехом Моисею купиною явленная, гряди, странными уставы соделанная: яко бо спасеся, Огнь носящи, Дева, Светоносна рождши Благодетеля, во Иорданских же струях явленна. Припев: Сла́ва Тебе́, Бо́же наш, сла́ва Тебе́. Помазу́еши, соверша́я челове́ческое существо́, Царю́ Безнача́льне,/ Ду́ха обще́нием, струя́ми чи́стыми отмы́в/ и тьмы кре́пость же посра́мль возвы́шенную,/ ны́не в безпреста́ннем возда́ти житии́. Светилен Явися Спас, благодать и истина, во струях Иорданских и сущия во тьме и сени спящия просветил есть, ибо прииде и явися Свет Неприступный.

Храм Божий одушевленный,/ девственною чистотою благоукрашенный,/ вемы тя, святая и праведная дев о, княжно Иулиание,/ темже, с любовию празднующе/ святых твоих мощей обретение, молим тя,/ известная желаний наших ходатаице:/ принеси за нас молитвы твоя ко Господу/ и от всяких бед свобождай нас/ предстательством твоим у Престола Всевышняго, да зовем ти:/ радуйся, дево святая Иулиание, невесто Христова прекрасная.

Камень Христос каменя веры прославляет светло,/ учеников преизрядна,/ и с Павлом весь дванадесяточисленный собор днесь,/ ихже память совершающе верно,// сих Прославльшаго прославляем.

Своего епископска сана тезоименство храня,/ сирых, вдовиц и всех, зле страждущих,/ сам собою посещал еси любезне/ и, милостынею довольне тех ущедряя, яко отец,/ сподобился еси Ангелы на освящение церкве Печерския, святителю Исаие,/ принесен быти чудне,/ с нимиже молися Господеви о душах наших.

Акафист святому преподобному Корнилию, игумену Комельскому, Вологодскому чудотворцу в формате PDF

Минея, 8 Февраля, Канон Глас 8 Песнь 1 Ирмос: Колесницегони́теля фарао́ня погрузи́ чудотворя́й иногда́ Моисе́йский же́зл, крестообра́зно порази́в и раздели́в мо́ре, Изра́иля же беглеца́, пешехо́дца спасе́, пе́снь Бо́гови воспева́юща. Припев: Святы́й великому́чениче Фео́доре, моли́ Бо́га о на́с. Боже́ственными я́ве све́тлостьми удобря́яся, страда́льческим венце́м священноукраша́емь и сла́вою облиста́емь Святы́я Тро́ицы, хва́лящия тя́ помина́й, вели́кий в му́ченицех Фео́доре. Припев: Святы́й великому́чениче Фео́доре, моли́ Бо́га о на́с. Испо́лнь све́та, испо́лнь Боже́ственныя благода́ти, на́м возсия́ свяще́нная па́мять честны́х по́двиг твои́х, пресве́тлыми светлостьми́ озаря́ющи все́х, благоче́стно тя́ почита́ющих, му́чениче страстоте́рпче Фео́доре. Сла́ва Отцу́ и Сы́ну и Свято́му Ду́ху. И́дольстей одержа́щи бу́ри челове́чество, свяще́нный му́ченик, окормля́емь Креста́ Боже́ственною благода́тию, небу́рно преплы́в, и в приста́нища дости́же небе́сная, ра́дуяся. И ны́не и при́сно и во ве́ки веко́в. Ами́нь. Богородичен: Две́ре Бо́жия, покая́ния две́ри ми́, Де́во, отве́рзи, помышле́ньми Боже́ственными ду́шу мою́ просвети́ и страсте́й отжени́ тя́жкия о́блаки, я́ко да почита́ю, ра́дуяся, и до́лжно ублажа́ю Тя́. Песнь 3 Ирмос: Утвержде́й в нача́ле небеса́ ра́зумом и зе́млю на вода́х основа́вый, на ка́мени мя́, Христе́, за́поведей Твои́х утверди́, я́ко не́сть свя́т па́че Тебе́, Еди́не Человеколю́бче. Припев: Святы́й великому́чениче Фео́доре, моли́ Бо́га о на́с. Я́ко ле́в, дерзну́в, посреди́ суди́ща ста́л еси́, возвеща́я спаси́тельное сло́во, досажда́я злочести́вым, пропове́дая и́стину и облича́я лжу́ безбо́жия, Фео́доре. Припев: Святы́й великому́чениче Фео́доре, моли́ Бо́га о на́с. Мучи́тель, уди́влься твоему́ му́жеству, му́дре, ско́тскою я́ростию подви́гся, жи́лами волу́ями неща́дно ураня́ет тя́, Фео́доре, ме́рзким истука́нным сокруше́ние соде́лавша. Сла́ва Отцу́ и Сы́ну и Свято́му Ду́ху. Му́жеским по́мыслом я́звенныя ка́пли, я́ко во́лны морски́я, богому́дре, отри́нул еси́, Креста́ благода́тию укрепля́емь и венцено́сец Боже́ственнаго Ду́ха си́лою явля́яся. И ны́не и при́сно и во ве́ки веко́в. Ами́нь. Богородичен: Сотвори́ вои́стинну Тебе́ вели́чие И́же от Тебе́ рожде́йся Госпо́дь, и ро́ди вси́ Тя́, Бо́жию Ма́терь, сла́вят. Седален, глас 8 Боже́ственное всеору́жие восприи́м и и́дольскую ле́сть низложи́в, а́нгелы воздви́гл еси́ восхвали́ти по́двиги твоя́, Боже́ственною бо любо́вию у́м распали́в, на о́гненную сме́рть до́блественно дерзну́л еси́. Те́мже тезоимени́тно прося́щим тя́ дае́ши Боже́ственная дарова́ния, страстоте́рпче Фео́доре. Сего́ ра́ди вопие́м ти́: моли́ Христа́ Бо́га прегреше́ний оставле́ние дарова́ти пра́зднующим любо́вию па́мять твою́. Песнь 4 Ирмос: Ты́ моя́ кре́пость, Го́споди, Ты́ моя́ и си́ла, Ты́ мо́й Бо́г, Ты́ мое́ ра́дование, не оста́вль не́дра О́тча, и на́шу нищету́ посети́в. Те́м с проро́ком Авваку́мом зову́ Ти́: си́ле Твое́й сла́ва, Человеколю́бче. Припев: Святы́й великому́чениче Фео́доре, моли́ Бо́га о на́с. Име́я Христа́ вну́трь себе́, блаже́нне, веща́юща, Ликини́еву горды́ню низложи́л еси́ словесы́ му́дрыми. Се́ вои́стинну, му́чениче, обличи́л еси́ премно́гое безу́мие и де́лы пресла́вными зря́щия удиви́л еси́, страда́льче доблему́дренне Фео́доре. Сла́ва Отцу́ и Сы́ну и Свято́му Ду́ху. Пове́шен бы́в беззако́нием мучи́теля, и ногтьми́ истерза́емь, и обагре́н ка́плями, му́чениче, непра́ведно излива́емых крове́й твои́х, умерщвле́ния дебельства́ и тли́ совле́кл еси́ ри́зы, преблаже́нне Фео́доре. И ны́не и при́сно и во ве́ки веко́в. Ами́нь. Богородичен: Лука́вое грехо́в мои́х рукописа́ние боже́ственным копие́м, Пречи́стая, расто́ргни, пробо́дшим Боже́ственная ре́бра вочелове́читися из Тебе́, Де́во, восхоте́вшаго, и в кни́зе мя́ написа́ти спаса́емых моли́ся, без ума́ от Бо́га уда́льшася. Песнь 5 Ирмос: Вску́ю мя́ отри́нул еси́ от лица́ Твоего́, Све́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя́, и к све́ту за́поведей Твои́х пути́ моя́ напра́ви, молю́ся. Припев: Святы́й великому́чениче Фео́доре, моли́ Бо́га о на́с. Просвеща́емь заре́ю, му́чениче, Боже́ственнаго Ду́ха и распаля́емь Христо́вою любо́вию, опаля́еме пло́ти неради́л еси́, ни ощути́л еси́ боле́зни, ни вмени́л еси́ му́ки, небе́сными наде́ждами пита́емь. Припев: Святы́й великому́чениче Фео́доре, моли́ Бо́га о на́с. И́го Влады́ки нося́ на вы́и преле́гкое, о́лова тягото́ю, страстоте́рпче преблаже́нне, отягче́н, не преклони́лся еси́ отню́д, ни поколеба́лся еси́, ниже́ победи́лся еси́, во́ине до́блий Фео́доре. Сла́ва Отцу́ и Сы́ну и Свято́му Ду́ху. С небесе́ пригласи́в тя́ Преблаго́е Сло́во, де́рзостна сотвори́, Его́же си́лою го́рькия боле́зни претерпе́л еси́ беззако́ннующих, му́чениче Христо́в, и му́ки и ну́ждную, сла́вне, сме́рть. И ны́не и при́сно и во ве́ки веко́в. Ами́нь. Богородичен: Пребыва́ти мя́ це́ла, непрело́жна стоя́ния лу́чшаго, но пра́ве ше́ствующа и богоуго́дная де́юща, Блага́я, умоли́, Блага́го ро́ждши Сло́ва, на́с безслове́сия изба́вльшаго. Песнь 6 Ирмос: Моли́тву пролию́ ко Го́споду и Тому́ возвещу́ печа́ли моя́, я́ко зо́л душа́ моя́ испо́лнися и живо́т мо́й а́ду прибли́жися, и молю́ся, я́ко Ио́на: от тли́, Бо́же, возведи́ мя́. Припев: Святы́й великому́чениче Фео́доре, моли́ Бо́га о на́с. Стра́сть Безстра́стнаго вообража́я, распя́лся еси́, сла́вный му́чениче, пригвозди́вся на дре́ве, преблаже́нне, и подо́бник Влады́це бы́л еси́, разреши́вшаго Кресто́м челове́ческия стра́сти во́лею. Припев: Святы́й великому́чениче Фео́доре, моли́ Бо́га о на́с. Пове́шен, я́ко а́гнец, на дре́ве, и стрела́ми состре́лян, блаже́нне, и оче́с зе́ницы избоде́н, и уя́звлен по всему́ телеси́, уязви́л еси́ враго́в сердца́ копие́м боле́зней твои́х. Сла́ва Отцу́ и Сы́ну и Свято́му Ду́ху. Пото́цы безме́рных му́к, ко хра́мине припре́вшеся, му́чениче, твоея́ души́, не поколеба́ша сея́: на недви́жимем бо ка́мени утверди́ся просия́вшаго от Де́вы и челове́ческий ро́д просве́щшаго. И ны́не и при́сно и во ве́ки веко́в. Ами́нь. Богородичен: Мари́е, всего́ ми́ра Госпоже́, я́ко Го́спода все́х ро́ждши, вра́жия рабо́ты мя́ изба́ви, и того́ муче́ния исхи́ти, и спаси́ мя́, на Тя́ несомне́нно упова́ющаго. Кондак, глас 2 Му́жеством души́ в ве́ру оболки́йся и глаго́л Бо́жий, а́ки копие́, в ру́ку взе́м, врага́ победи́л еси́, му́чеников преве́лий Фео́доре, с ни́ми Христу́ Бо́гу моля́ся не преста́й о все́х на́с. Икос Страда́льцев пресве́тлую добро́ту, прииди́те вси́, пе́сненными венцы́, ве́рнии, Фео́дора венча́ем, да́р бо Бо́жий вели́к ми́ру яви́ся сия́ньми чуде́с, врага́ бо победи́в Велиа́ра страда́нии честны́ми, одождя́ет вме́сто кро́вных ка́плей исцеле́ний то́ки, с си́ми у́бо все́ми ра́дуется Христу́ и дае́т ми́р неоску́ден. Те́м вопие́м Ему́: моли́ непреста́нно о все́х на́с. Песнь 7 Ирмос: Бо́жия снизхожде́ния о́гнь устыде́ся в Вавило́не иногда́, сего́ ра́ди о́троцы в пещи́, ра́дованною ного́ю, я́ко во цве́тнице лику́юще, поя́ху: благослове́н еси́, Бо́же оте́ц на́ших. Припев: Святы́й великому́чениче Фео́доре, моли́ Бо́га о на́с. Глаго́лаше, ра́дуяся вели́чия Вседержи́телева, те́мже уди́вльшеся, зря́щии, пре́лести оста́виша мучи́тельство и ве́рою вопия́ху: благослове́н еси́, Бо́же оте́ц на́ших. Припев: Святы́й великому́чениче Фео́доре, моли́ Бо́га о на́с. Плени́цами прему́дрых твои́х слове́с, преблаже́нне, ра́дуяся, улови́л еси́ из глубины́ неразу́мия приступа́ющия, и боже́ственны му́ченики соде́лал еси́, Фео́доре, пою́щия: благослове́н еси́, Бо́же оте́ц на́ших. Сла́ва Отцу́ и Сы́ну и Свято́му Ду́ху. В темни́це к дре́ву тя́ свя́зана а́нгел свя́т, прише́д, разреши́, дерзнове́ние дая́ и укрепля́я тя́ велегла́сно вопи́ти, Фео́доре: благослове́н еси́, Бо́же оте́ц на́ших. И ны́не и при́сно и во ве́ки веко́в. Ами́нь. Богородичен: Мене́, жи́вша в ле́ности и презре́вша святы́я Твоя́ зако́ны и честны́я Твоя́, Христе́, за́поведи, уще́дри и спаси́ Ро́ждшия Тя́ ра́ди, я́ко Благоде́тель Бо́г и Многоми́лостив. Песнь 8 Ирмос: Седмери́цею пе́щь халде́йский мучи́тель богочести́вым неи́стовно разжже́, си́лою же лу́чшею спасе́ны сия́ ви́дев, Творцу́ и Изба́вителю вопия́ше: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки. Припев: Святы́й великому́чениче Фео́доре, моли́ Бо́га о на́с. Све́тло подвиза́вся, врага́ победи́л еси́, и потре́бль во́инства его́ ору́жии ве́ры. Те́мже побе́дным венце́м увя́злся еси́, поя́ Влады́це: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки. Припев: Святы́й великому́чениче Фео́доре, моли́ Бо́га о на́с. По распя́тии, сла́вне, по стра́сти блаже́нней, по безме́рных ра́нах, блаже́нне, Бо́гу вы́ю твою́ приклони́л еси́, му́чениче му́дре, мече́м честна́я глава́ твоя́ усе́чена бы́сть, зовы́й Влады́це: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки. Сла́ва Отцу́ и Сы́ну и Свято́му Ду́ху. Свяще́нное, Фео́доре, и многострада́льное те́ло твое́ исто́чник исцеле́ний ве́рным бы́сть, из него́же почерпа́ют благоче́стное притека́ющии разреше́ние страсте́й и ду́ш спасе́ние, вопию́ще Влады́це: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки. И ны́не и при́сно и во ве́ки веко́в. Ами́нь. Богородичен: Умерщвле́нную оживи́, па́дшую возста́ви, уя́звленную ду́шу мою́ исцели́, у́м мо́й умири́, напа́стей во́лны укроти́, Де́во, и вопию́ща мя́ спаси́: о́троцы, благослови́те, свяще́нницы, воспо́йте, лю́дие, превозноси́те Го́спода во вся́ ве́ки. Песнь 9 Ирмос: Ужасе́ся о се́м не́бо, и земли́ удиви́шася концы́, я́ко Бо́г яви́ся челове́ком пло́тски, и чре́во Твое́ бы́сть простра́ннейшее небе́с. Те́м Тя́, Богоро́дицу, а́нгелов и челове́к чинонача́лия велича́ют. Припев: Святы́й великому́чениче Фео́доре, моли́ Бо́га о на́с. Освяти́л еси́, богому́дре му́чениче, са́м себе́ поже́ршемуся А́гнцу и Бо́гу на́шему, возвы́сився, я́ко всесожже́ние благово́нно, к Нему́, и свяще́нно возложе́ние, и соверше́нна и чиста́ благоприя́тна же́ртва. Те́мже тя́ восхваля́ем и по до́лгу ублажа́ем. Припев: Святы́й великому́чениче Фео́доре, моли́ Бо́га о на́с. Я́ко у́тро, я́ко де́нь светоза́рен, яви́лся еси́, Фео́доре, со́лнце, све́тлыми твоего́ страда́ния луча́ми и чудесы́, всеблаже́нне, подсо́лнечную благоче́стно просвеща́я и отгоня́ тму́ пре́лести и страсте́й на́ших, Фео́доре. Припев: Святы́й великому́чениче Фео́доре, моли́ Бо́га о на́с. Совокупи́лся еси́ со а́нгелы пло́тию, безпло́тныя враги́ побе́ждь, и со страда́льческими ли́ки весели́шися всегда́, и с ни́ми боже́ственную пе́снь Тро́ице возглаша́еши, Фео́доре треблаже́нне, свети́льниче Це́ркве и страстоте́рпцев удобре́ние. Сла́ва Отцу́ и Сы́ну и Свято́му Ду́ху. Земля́ положе́нием твоего́ честна́го, Фео́доре, телесе́ освяща́ется, не́бо же ра́дуется, ду́х тво́й свяще́нный стяжа́в; всегда́ челове́цы, па́мять твою́ честну́ю творя́ще, моле́бно про́сим тя́ моли́твенника о на́с, преблаже́нне. И ны́не и при́сно и во ве́ки веко́в. Ами́нь. Богородичен: Боголюби́вая Де́во, Блага́го моли́ спасти́ мя́ от скве́рн все́х, я́звы се́рдца моего́ омы́вши покая́нием чи́стым и пла́чем сле́зным, да Тя́ ублажа́ю и велича́ю, Пренепоро́чная. Светилен Полки́ враго́в и де́монов на́глости до конца́ низложи́л еси́/ и кончи́ну прия́л еси́, Фео́доре блаже́нне, ве́ры ра́ди Зижди́теля твоего́,/ я́ко свиде́тель и́стины, спаса́еши всех от вся́ких скорбе́й и вреда́ чужда́го.

Минея, 25 Сентября, Кано́н преподо́бнаго Се́ргия Глас 8 Песнь 1 Ирмос: Колесницегони́теля фарао́ня погрузи́/ чудотворя́й иногда́/ Моисе́йский жезл, крестообра́зно порази́в/ и раздели́в мо́ре,/ Изра́иля же беглеца́, пешехо́дца спасе́,// песнь Бо́гови воспева́юща. Припев: Преподо́бне о́тче Се́ргие, моли́ Бо́га о на́с. Христа́, нас ра́ди во́лею смири́вшагося да́же до ра́бия о́браза, подража́в,/ возлюби́л еси́ смире́ние/ и, зе́льным бде́нием и моли́твами душегу́бныя стра́сти умертви́в,/ на го́ру безстра́стия возше́л еси́, Се́ргие пребога́те. Припев: Преподо́бне о́тче Се́ргие, моли́ Бо́га о на́с. Я́ко свети́льник све́та,/ твою́ ду́шу сле́зными пото́ки украша́я,/ и друга́го Исаа́ка подо́бно сам себе́ возне́сл еси́, преподо́бне,/ и се́рдце твое́ Бо́гу поже́рл еси́. Сла́ва Отцу́ и Сы́ну и Свято́му Ду́ху. И́же во чре́ве ма́терни трикра́ты проглаше́нием/ Тро́ицы служи́тель показа́лся еси́/ и, Трисо́лнечным све́том озаряемь,/ де́монская ополче́ния, я́ко паучи́ну, разори́л еси́, преблаже́нне Се́ргие. И ны́не и при́сно и во ве́ки веко́в. Ами́нь. Богородичен: Зако́нов кроме́ есте́ственных родила́ еси́ Законода́вца Бо́га и Челове́ка бы́вша,/ Того́, я́ко Бла́га, моли́, Всенепоро́чная,/ на́ша беззако́ния презре́ти, вопию́щих всегда́:/ пои́м Го́споду, сла́вно бо просла́вися. Песнь 3 Ирмос: Утвержде́й в нача́ле Небеса́ ра́зумом/ и зе́млю на вода́х основа́вый,/ на ка́мени мя, Христе́, за́поведей Твои́х утверди́,/ я́ко несть свят па́че Тебе́,// Еди́не Человеколю́бче. Припев: Преподо́бне о́тче Се́ргие, моли́ Бо́га о на́с. Благи́х о́браз тебе́ дав твои́м ученико́м,/ и привле́кл еси́ мно́ги ду́ши во спасе́ние, отлучи́вшихся мирска́го пристра́стия,/ и́же утеше́ния улучи́ша ра́йскаго наслажде́ния. Припев: Преподо́бне о́тче Се́ргие, моли́ Бо́га о на́с. Я́ко добропло́дная ма́слина в дому́ Бо́жии, блаже́нне, процве́л еси́,/ и еле́ем умаща́я ду́ши любо́вию тя пою́щих, преблаже́нне Се́ргие,/ и ве́рою Христу́ вопию́щих:/ несть свят па́че Тебе́, Человеколю́бче. Сла́ва Отцу́ и Сы́ну и Свято́му Ду́ху. Стра́сти душетле́нныя успи́л еси́ бо́дренными бде́нии, блаже́нне,/ и сих ра́ди в черто́г Небе́сный всели́лся еси́,/ прие́м, богому́дре Се́ргие, благода́ть исцеле́ний. И ны́не и при́сно и во ве́ки веко́в. Ами́нь. Богородичен: Херуви́мов и Серафи́мов превы́шши яви́лася еси́, Богоро́дице:/ Ты бо еди́на прия́ла еси́ невмести́маго Бо́га во чре́ве Твое́м, Нескве́рная./ Те́мже Тя, вси ве́рнии, пе́сньми, Чи́стая, ублажа́ем. Седален, глас 4 Яко вои́стину тле́нных оста́вив нестоя́нное,/ Христу́ от души́ после́довал еси́/ и боле́зньми, и труды́, и зе́льным воздержа́нием,/ я́ко безпло́тен пожи́в, преблаже́нне Се́ргие,/ моли́ Христа́ Бо́га спасти́ся душа́м на́шим. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Херуви́мов и Серафи́мов превы́шши еси́, Богоро́дице,/ Небесе́ же и земли́ простра́ннейши,/ ви́димыя тва́ри и неви́димыя яви́лася еси́ преиму́щи/ несосу́дным сосужде́нием:/ Его́же бо простра́нствия Небеса́ не вмеща́ют,/ в Твое́й утро́бе вмести́ла еси́, Чи́стая,/ Его́же моли́ спасти́ся рабо́м Твои́м. Песнь 4 Ирмос: Ты моя́ кре́пость, Го́споди,/ Ты моя́ и си́ла,/ Ты мой Бог, Ты мое́ ра́дование,/ не оста́вль не́дра О́тча/ и на́шу нищету́ посети́в./ Тем с проро́ком Авваку́мом зову́ Ти:// си́ле Твое́й сла́ва, Человеколю́бче. Припев: Преподо́бне о́тче Се́ргие, моли́ Бо́га о на́с. Ду́ха Пресвято́го храм, о́тче, был еси́ и жи́зненных вод река́ исполня́ема,/ основа́ние непоколеби́мо Це́ркве, мона́шествующих утвержде́ние,/ Се́ргие досточу́дне. Припев: Преподо́бне о́тче Се́ргие, моли́ Бо́га о на́с. Проро́чески сле́зными ка́плями на всяк день посте́лю омоча́я, Се́ргие сла́вне,/ до́ндеже до конца́ страсте́й пучи́ну изсуши́л еси́;/ те́мже па́мять твою́ почита́ем, присночестну́ю и свяще́нную. Сла́ва Отцу́ и Сы́ну и Свято́му Ду́ху. Лице́ Христо́во лице́м, преподо́бне Се́ргие, зре́ти сподо́бился еси́,/ зерца́лом вои́стину разре́шшимся./ Сие́ бо и от ми́ра отлучи́ тя к возлю́бленному жела́нию. И ны́не и при́сно и во ве́ки веко́в. Ами́нь. Богородичен: Очище́ние на́ших да́руй неве́дений, я́ко безгре́шен,/ и умири́ мир Твой, Бо́же, моли́твами Ро́ждшия Тя. Песнь 5 Ирмос: Вску́ю мя отри́нул еси́/ от лица́ Твоего́, Све́те незаходи́мый,/ и покры́ла мя есть чужда́я тьма, окая́ннаго?/ Но обрати́ мя и к све́ту за́поведей Твои́х// пути́ моя́ напра́ви, молю́ся. Припев: Преподо́бне о́тче Се́ргие, моли́ Бо́га о на́с. В поще́ниих непрекло́нен пребы́л еси́, му́дре,/ и до отше́ствия своего́ храня́ сие́ опа́сно,/ и́мже сподо́бился еси́ я́ве нетле́ннаго блаже́нства. Припев: Преподо́бне о́тче Се́ргие, моли́ Бо́га о на́с. Остр ум име́я к Бо́гу внима́ти, страсти душетле́нныя успи́л еси́, о́тче,/ и снопы́ благопло́дия пожа́л еси́,/ пита́я благоче́стно восхваля́ющия тя, преподо́бне о́тче Се́ргие. Сла́ва Отцу́ и Сы́ну и Свято́му Ду́ху. Све́тло житие́ твое́, преподо́бне Се́ргие, и изве́стно всем конце́м яви́ся,/ и боже́ственныя добро́ты испо́лнено,/ моли́твами же, и поще́ньми, и любо́вию, я́же ко Христу́ Человеколю́бцу. И ны́не и при́сно и во ве́ки веко́в. Ами́нь. Богородичен: Тя сте́ну иму́ще и заступле́нием Твои́м соблюда́ема,/ Твое́ю боже́ственною сла́вою хва́лящеся, Тя ублажа́ем./ Ты бо, Пречи́стая, душа́м на́шим источа́еши весе́лие и ра́дование. Песнь 6 Ирмос: Очи́сти мя, Спа́се,/ мно́га бо беззако́ния моя́,/ и из глубины́ зол возведи́, молю́ся,/ к Тебе́ бо возопи́х, и услы́ши мя,// Бо́же спасе́ния моего́. Припев: Преподо́бне о́тче Се́ргие, моли́ Бо́га о на́с. Па́мять твою́ творя́щим свяще́нную, о́тче,/ не преста́й, моля́ Изба́вителя дарова́ти согреше́ний оставле́ние/ и Небе́сное Ца́рство восприя́ти, иде́же глас пра́зднующих весели́т вся. Припев: Преподо́бне о́тче Се́ргие, моли́ Бо́га о на́с. О Христе́ укрепля́емь,/ вся кова́рствия лука́ваго тве́рдым умо́м, Се́ргие,/ я́коже сеть, расто́ргнул еси́/ и пресве́тло свети́ло ми́ру, о́тче, показа́лся еси́. Сла́ва Отцу́ и Сы́ну и Свято́му Ду́ху. Све́том Боже́ственным осия́емь/ и со А́нгелы ны́не на Небесе́х водвори́лся,/ помина́й ве́рою чту́щих па́мять твою́,/ преподо́бне Се́ргие приснопа́мятне. И ны́не и при́сно и во ве́ки веко́в. Ами́нь. Богородичен: Возвы́сила еси́ вои́стину па́дшее челове́ческое существо́,/ я́же о́бразом Боже́ственным и Отца́ ра́венством,/ ви́димым Сы́ном неизме́нным, Богома́ти,/ без Се́мене во чре́ве поноси́вши. Кондак, глас 8 Христо́вою любо́вию уязви́вся, преподо́бне,/ и Тому́ невозвра́тным жела́нием после́довав,/ вся́кое наслажде́ние плотско́е возненави́дел еси́/ и, я́ко со́лнце, Оте́честву твоему́ возсия́л еси́;/ тем и Христо́с да́ром чуде́с обогатя́ тя./ Помина́й нас, чту́щих пресве́тлую па́мять твою́, да зове́м ти:// ра́дуйся, Се́ргие богому́дре. Икос Ева́нгельский глас, о́тче, услы́шав,/ вся оста́вил еси́ плотска́я мудрова́ния,/ бога́тство же и сла́ву, я́ко прах, вмени́в,/ и на стра́сти, я́ко безпло́тен, подвиза́вся,/ и безпло́тных ликостоя́нием че́сти сподо́бился еси́./ Ра́зума дарова́ние прия́л еси́,/ е́же и пода́ждь в пе́снех пою́щим ти си́це:/ ра́дуйся, Се́ргие преподо́бне и богоно́се, Небе́сный челове́че, земны́й А́нгеле;/ ра́дуйся, Ду́ха Свята́го оби́тель;/ ра́дуйся, моли́твами богода́нен дар прие́мый;/ ра́дуйся, я́ко пре́жде рожде́ния проглаше́нием просла́вив Святу́ю Тро́ицу, Яже тя просла́ви в жи́зни сей и по сме́рти;/ ра́дуйся, целому́дрия сто́лпе, и́мже вся́ка страсть попра́ся;/ ра́дуйся, я́ко от млады́х ногте́й после́дствовал еси́ Христу́;/ ра́дуйся, притека́ющим к тебе́ спасе́ния хода́тай;/ ра́дуйся, свети́льниче многосве́тлый, возведы́й ко Христу́ мона́хов мно́жества;/ ра́дуйся, похвала́ Оте́честву твоему́;/ ра́дуйся, проро́чеством укра́шенный, во е́же прорица́ти, я́ко настоя́щая, бу́дущая;/ ра́дуйся, я́ко моли́твами твои́ми сопроти́внии побежда́ются;/ ра́дуйся, правосла́вному во́инству на́шему похвала́ и утвержде́ние,/ его́же соблюди́ моли́твами твои́ми от враг ненаве́тно, да зове́м ти:/ ра́дуйся, Се́ргие богому́дре. Песнь 7 Ирмос: Бо́жия снизхожде́ния/ огнь устыде́ся в Вавило́не иногда́,/ сего́ ра́ди о́троцы в пещи́, ра́дованною ного́ю,/ я́ко во цве́тнице, лику́юще, поя́ху:// благослове́н еси́, Бо́же оте́ц на́ших. Припев: Преподо́бне о́тче Се́ргие, моли́ Бо́га о на́с. В пещи́ искуше́ний разжже́ния/ Боже́ственная благода́ть ороси́ тя, преподо́бне,/ и многосве́тла Тро́ическим жела́нием показа́, зову́ща:/ благослове́н Бог оте́ц на́ших. Припев: Преподо́бне о́тче Се́ргие, моли́ Бо́га о на́с. Мир преоби́дев, сла́вне Се́ргие,/ на земли́, я́ко безпло́тен, пожи́л еси́/ и а́нгельским ликостоя́нием сподо́бился еси́./ Тем тя ве́рою почита́ем, досточу́дне. Сла́ва Отцу́ и Сы́ну и Свято́му Ду́ху. В приста́нище ти́хое вшед, богому́дре,/ жите́йских пла́ваний отбе́гл еси́/ и волну́ющимся жите́йскими спаси́тельное окормле́ние был еси́, воспева́ющим:/ благослове́н Бог оте́ц на́ших. И ны́не и при́сно и во ве́ки веко́в. Ами́нь. Богородичен: Жезл прорасте́, Де́во, из ко́рене Иессе́ева,/ всеблаже́нный Плод, Цвет нося́щи спаси́тельный/ ве́рою Сы́ну Твоему́ вопию́щим:/ отце́в на́ших Бо́же, благослове́н еси́. Песнь 8 Ирмос: Седмери́цею пещь/ халде́йский мучи́тель/ богочести́вым неи́стовно разжже́,/ си́лою же лу́чшею спасе́ны сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,// лю́дие, превозноси́те во вся ве́ки. Припев: Преподо́бне о́тче Се́ргие, моли́ Бо́га о на́с. Светоно́сный твой пра́здник, преблаже́нне Се́ргие,/ испо́лни ра́дости и весе́лия духо́внаго, благоуха́ния же и просвеще́ния/ тя иму́щим засту́пника и пра́вило мона́шествующим. Припев: Преподо́бне о́тче Се́ргие, моли́ Бо́га о на́с. Моли́твою непреста́нною к Бо́гу восте́кл еси́/ и отту́ду Трисо́лнечными сия́нии озари́лся еси́,/ на враги́ боре́ния поста́вив, приводя́ по́стников собо́ры но́вым житие́м, Христу́ вопию́щим:/ де́ти, благослови́те, свяще́нницы, воспо́йте, лю́дие, превозноси́те Его́ во ве́ки. Сла́ва Отцу́ и Сы́ну и Свято́му Ду́ху. В поще́ниих кре́пкое, в моли́твах неле́ностное/ терпе́ние в искуше́ниих, Се́ргие, на земли́ показа́л еси́, зовы́й:/ де́ти, благослови́те, свяще́нницы, воспо́йте, лю́дие, превозноси́те Его́ во ве́ки. И ны́не и при́сно и во ве́ки веко́в. Ами́нь. Богородичен: Богороди́тельнице Чи́стая, души́ моея я́звы грехо́вныя и собла́зны очи́сти,/ ко исто́чником примеша́ющи, я́же из ребр Рождества́ Твоего́, и́же от них поте́кшим струя́м;/ к Тебе́ бо взыва́ю, и к Тебе́ прибега́ю, и Тя призыва́ю, Богоблагода́тную. Песнь 9 Ирмос: Ужасе́ся о сем Не́бо,/ и земли́ удиви́шася концы́,/ я́ко Бог яви́ся челове́ком пло́тски/ и чре́во Твое́ бысть простра́ннейшее Небе́с./ Тем Тя, Богоро́дицу,// А́нгелов и челове́к чинонача́лия велича́ют. Припев: Преподо́бне о́тче Се́ргие, моли́ Бо́га о на́с. Светоявле́ния духо́внаго испо́лнен быв, преподо́бне Се́ргие,/ свети́льник, сия́я издале́ча, яви́лся еси́,/ слове́сныя зари́ нам облиста́я,/ и Пребоже́ственныя Тро́ицы жили́ще показа́лся еси́. Припев: Преподо́бне о́тче Се́ргие, моли́ Бо́га о на́с. Вои́стину тя вели́ка учи́теля, му́дре Се́ргие, Росси́йским страна́м Христо́с дарова́,/ нело́жным правле́нием пра́вяща оте́чество свое́/ и уче́ния сладча́йша ме́да излива́юща,/ и́хже, я́ко от окри́на, и мы, ве́рнии, почерпа́ем незави́стно. Сла́ва Отцу́ и Сы́ну и Свято́му Ду́ху. Душетле́нныя стра́сти победи́в,/ я́ко па́стырь и́стинный, упа́сл еси́ слове́сное Христо́во ста́до,/ е́же вы́ну благода́тию Ду́ха, я́ко цве́ты ра́йския, пита́я, преподо́бне. И ны́не и при́сно и во ве́ки веко́в. Ами́нь. Богородичен: Псалмы́ Тя воспева́ем, Обра́дованная,/ и немо́лчно Ти, е́же ра́дуйся, вопие́м:/ Ты бо источи́ла еси́ всем ра́дование. Светилен Процве́л еси́, я́ко фи́никс, Дави́дски, о́тче,/ и оби́тель яви́лся еси́ Ду́ха Всесвята́го,/ И́же сла́вна тя вселе́нней показа́,/ о нас непреста́нно Христа́ моли́,/ почита́ющих ве́рою пречестну́ю па́мять твою́,/ преподо́бне Се́ргие. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Тя пе́сньми немо́лчными ублажа́ем, Де́во,/ я́ко от Тро́ицы Еди́наго родила́ еси́, Богоро́дице,/ и но́сиши на боже́ственных объя́тиих/ Пребога́тое Сло́во, Невра́щное и Неизме́нное.

Минея, 28 Августа, Кано́н преподо́бных Глас 8 Песнь 1 Ирмос: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:/Изба́вителю и Бо́гу на́шему пои́м. Припев: Преподо́бнии отцы́, моли́те Бо́га о на́с. Во́ду преходи́ти пе́сненных слове́с в па́мять ва́шу, Богоно́снии отцы́, хотя́ща мя,/ в тишине́ у́мней всегда́ испра́вите/ и от бу́рных страсте́й удержи́те,/ да в ва́шем хвале́нии с пе́снию возвели́чу И́мя Бо́га моего́. Припев: Преподо́бнии отцы́, моли́те Бо́га о на́с. Изше́д на зла́чное по́ле мы́сленнаго рая́ пеще́ры святы́я,/ услажда́юся благово́нными арома́ты, я́же источа́ют мо́щи ва́ша, преподо́бнии отцы́,/ и ве́село Созда́телю Бо́гу пе́снь умо́м возсыла́ю. Припев: Преподо́бнии отцы́, моли́те Бо́га о на́с. Вертогра́д заключе́н ты еси́, пеще́ро свята́я,/ в тебе́ бо Сади́тель Вы́шний насади́ мно́жество древе́с,/ богоно́сных оте́ц, а́ки ке́дров лива́нских, и́же досяго́ша Небе́с высото́ю,/ и́мже удивля́яся, пою́ пе́снь Бо́гу моему́. Припев: Преподо́бнии отцы́, моли́те Бо́га о на́с. Стра́жу неусы́пне, Лонгине вра́тарю,/ дар име́вый прозира́ти мы́сли входя́щих,/ обреты́й по́чести Вы́шняго зва́ния,/ вни́ди и обыми́ хвалы́ богоно́сных оте́ц,/ в и́хже па́мяти пе́снь Бо́гу на́шему пое́м. Припев: Преподо́бнии отцы́, моли́те Бо́га о на́с. Игна́тие, па́стырю и́ночествующих и цели́телю боля́щих,/ в неду́зех на́ших посо́бствуй тя почита́ющим,/ да в па́мяти твое́й пе́снь хвалы́ Бо́гу на́шему принесе́м. Сла́ва Отцу́ и Сы́ну и Свято́му Ду́ху. Силуа́не преподо́бне, чистоты́ рачи́телю и храни́телю садо́вий,/ та́тей чу́вственных и мы́сленных, плоды́ обоя́ окрасти́ хотя́щих, моли́твою связа́вый,/ от тех нападе́ний и нас спаси́, мо́лимся. И ны́не и при́сно и во ве́ки веко́в. Ами́нь. Богородичен: Мно́гими та́ти обстои́мь, не чу́вствую всегда́,/ и окрада́ют ми врази́ покая́ния плоды́,/ но бо́дренною Твое́ю моли́твою и неисче́тною благосты́нею, Ма́ти Бо́жия,/ изба́ви мя, молю́ся. Песнь 3 Ирмос: Небе́снаго кру́га Верхотво́рче, Го́споди,/ и Це́ркве Зижди́телю,/ Ты мене́ утверди́ в любви́ Твое́й,/ жела́ний кра́ю, ве́рных утвержде́ние,/ Еди́не Человеколю́бче. Припев: Преподо́бнии отцы́, моли́те Бо́га о на́с. Небе́снаго и земна́го кру́га Созда́тель созда́ ме́сто сие́/ и вас, до́брыя гра́жданы, в нем поста́ви, треблаже́ннии отцы́,/ причти́те нас в сожи́тие ва́ше нетле́нное/ и жела́емаго кра́я ми́лости дости́гнути моли́теся, мо́лим вас. Припев: Преподо́бнии отцы́, моли́те Бо́га о на́с. Агафо́не блаже́нне, бла́гости веща́ния имени́те,/ по́стником красото́, проро́че нело́жный и цели́телю неду́жных,/ скажи́ нам, нечу́вственным, а́ще пу́ть беззако́ния е́сть в нас,/ и ты наста́ви ны моли́твами твои́ми на пу́ть ве́чен. Припев: Преподо́бнии отцы́, моли́те Бо́га о на́с. Пое́м ди́внаго Зинона, сия́ющаго посто́м,/ и Мака́рия, блаже́нству тезоимени́та,/ сих двои́х ра́ди отце́в, мо́лимтися, Влады́ко,/ изми́ нас душе́вных и теле́сных страсте́й, Еди́не Человеколю́бче. Припев: Преподо́бнии отцы́, моли́те Бо́га о на́с. Сла́вим Ахи́лу, служи́теля же́ртвы,/ и я́ко и́стиннаго по́стника приво́дим Ти, Христе́, в моли́тву,/ его́же ра́ди изми́ нас от порабоще́ния чре́вных страсте́й/ и воздержа́нию того́ научи́ ны, Еди́не Человеколю́бче. Припев: Преподо́бнии отцы́, моли́те Бо́га о на́с. Ипа́тие, служи́телю немощны́м,/ я́ко име́яй дар больны́х цели́ти возложе́нием руку́, тя мо́лим,/ посети́ свы́ше нас, душе́вными неду́ги обдержи́мых,/ и спаси́ моли́твами твои́ми. Припев: Преподо́бнии отцы́, моли́те Бо́га о на́с. Я́ко в житии́ сем любве́ свя́зани сою́зом,/ по сме́рти же в еди́нем гро́бе су́ще положе́ни,/ та́ко и в нетле́нней жи́зни ны́не вку́пе живу́ще, Паи́сие и Мерку́рие,/ хода́тайством ва́шим к Бо́гу в единомы́слии и любви́ утверди́те ны, мо́лимся. Сла́ва Отцу́ и Сы́ну и Свято́му Ду́ху. Лавре́нтие, по́стником свети́ло, и Моисе́е крестоно́сне,/ в тьме́ страсте́й нас су́щих и ходя́щих освети́те и моли́твами ва́шими наста́вите,/ да и мы в крестоноше́нии на́шем не преткне́м о ка́мень собла́зна ног на́ших. И ны́не и при́сно и во ве́ки веко́в. Ами́нь. Богородичен: Тьма́ страсте́й объя́т ны,/ и в пути́ сласте́й уклони́хомся непрохо́дны,/ све́та и справле́ния не ви́дим./ Наста́внице, наста́ви нас и свет покая́ния возсия́й нам,/ Ты бо еси́ всем многосве́тлое свети́ло, просвеща́ющее ду́ши на́ша. Седален, глас 2 Поще́нием просия́вших и све́тлыми по́двиги/ преподо́бных оте́ц Пече́рских чи́стое житие́ и труды́ кто восхвали́ти мо́щен?/ Оба́че от любве́, я́же к ним, пе́сненныя да́ры прино́сим,/ ти́и бо, со А́нгелы предстоя́ще, при́сно мо́лятся Го́сподеви о всех нас. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Милосе́рдия су́щи исто́чник, ми́лости сподо́би нас, Богоро́дице,/ при́зри на лю́ди согреши́вшия,/ яви́, я́ко при́сно, си́лу Твою́,/ на Тя бо упова́юще: ра́дуйся, – вопие́м Ти,/ я́коже иногда́ Гаврии́л, безпло́тных Архистрати́г. Песнь 4 Ирмос: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́. Припев: Преподо́бнии отцы́, моли́те Бо́га о на́с. Дре́вних оте́ц стопа́м после́дующе,/ не уклони́стеся ни ма́ло от их трудо́в,/ те́мже ра́вный дина́рь ве́чныя жи́зни от Христа́ прие́мше,/ со А́нгелы сла́вит е преве́чное Того́ Божество́. Припев: Преподо́бнии отцы́, моли́те Бо́га о на́с. Илларио́н ди́вный, вели́каго о́браза чин име́вый/ и, по чи́ну своему́ ревну́я житию́ преподо́бнаго Феодо́сия,/ еди́ною всегда́ в седми́це яды́й, кре́пок бе во славосло́вии пе́ти:/ Сла́ва си́ле Твое́й, Го́споди. Припев: Преподо́бнии отцы́, моли́те Бо́га о на́с. По́стническое стече́ся во́инство,/ в не́мже просия́ све́тлая звезда́, Диони́сий,/ и́же ны́не сия́ет во сла́ве святы́х и сла́вит Еди́но Божество́. Припев: Преподо́бнии отцы́, моли́те Бо́га о на́с. Трудолю́бцем о́браз изве́стный, Арсе́ний, му́жеству тезоимени́тый,/ в труде́х де́нь и но́щь живы́й,/ прия́т возме́здие, дар чудотворе́ния,/ от него́же подае́т тре́бующим всем неоску́дно. Припев: Преподо́бнии отцы́, моли́те Бо́га о на́с. Пи́мене, по́стником единонра́вне,/ кровопо́тными труды́ труди́выйся в послуша́нии вы́ну,/ дрова́ нося́, в же́рновех меля́,/ на вся́ку же но́щь непреста́нно поя́ Бо́га и Того́ Еди́но Божество́. Припев: Преподо́бнии отцы́, моли́те Бо́га о на́с. Сто́лпе непоколеби́ме, Афана́сие затво́рниче,/ водруже́н сый в затво́ре, не тре́бовал еси́ све́тлости чу́вственныя,/ поне́же тебе́ мы́сленная светя́ше,/ то́ю моли́, блаже́нне, просвети́тися тя почита́ющим. Сла́ва Отцу́ и Сы́ну и Свято́му Ду́ху. Троичен: Сла́ва Тебе́, Тро́ице Пресвята́я,/ я́ко просла́вила еси́ ме́сто земно́е, Небе́сному гра́жданы подо́бное,/ в и́хже па́мяти приноси́мым от нас пе́нием/ Тя, О́тче, и Сы́не, и Ду́ше Святы́й, с раболепным поклоне́нием, гре́шнии, сла́вим/ и Твое́ Еди́но Божество́ превозно́сим. И ны́не и при́сно и во ве́ки веко́в. Ами́нь. Богородичен: Сла́ва Тебе́, правосла́вных сла́во, Чи́стая,/ Тя бо сла́вит со А́нгелы род челове́ческий и, припа́дая, вопие́т:/ Сла́ва бо Твоя́, Богоро́дице, всем простре́ся во спасе́ние. Песнь 5 Ирмос: Просвети́ нас повеле́нии Твои́ми, Го́споди,/ и мы́шцею Твое́ю высо́кою/ Твой мир пода́ждь нам,/ Человеколю́бче. Припев: Преподо́бнии отцы́, моли́те Бо́га о на́с. Просвети́ша всю Росси́йскую зе́млю да́нною им благода́тию отцы́ всеблаже́ннии,/ и тьма́ уже́ злове́рия вконе́ц поги́бе./ Ты́я лучи́ простри́ на ны моле́ния их ра́ди,/ мо́лимтися, Еди́не Человеколю́бче. Припев: Преподо́бнии отцы́, моли́те Бо́га о на́с. Сисо́е чу́дне и Григо́рие, и́мя от бо́дрости име́вый,/ о́ба посто́м обуздавший своя́ стра́сти,/ свире́пеющую по́хоть и на́шея пло́ти смири́те,/ вам бо дана́ е́сть благода́ть в страсте́х нам посо́бствовати. Припев: Преподо́бнии отцы́, моли́те Бо́га о на́с. Воздержа́ния рачи́телю, Па́вле блаже́нне, со двема́ канона́рхома,/ простри́те о нас мольбы́ ко Влады́це,/ да Того́ благода́тию от чре́вняго несы́тства уде́ржимся/ и вам в воздержа́нии насле́дницы бу́дем. Припев: Преподо́бнии отцы́, моли́те Бо́га о на́с. Сло́во Бо́жие, вразумля́ющее челове́ки,/ не кни́жныя му́дрости научи́ тя, Не́сторе свя́те, но Вы́шния,/ е́юже зрел еси́ при моли́твах А́нгелы и кончи́ну свою́ предви́дел еси́./ Той и нас прича́стники сотвори́, мо́лим тя,/ па́мять твою́ почита́юще. Припев: Преподо́бнии отцы́, моли́те Бо́га о на́с. Ти́те всему́жественне, во́инствующу ти иногда́,/ поби́ша сопроти́внии ору́жием главу́ твою́,/ и бы́сть я́зва вино́ю, я́ко прише́л еси́ в Пече́рскую го́ру/ и та́мо пла́кал еси́ о гресе́х свои́х,/ о и́хже проще́нии извеще́ние прие́м,/ ра́достно отше́л еси́ к Го́рним селе́нием Небе́сным, преподо́бне. Припев: Преподо́бнии отцы́, моли́те Бо́га о на́с. Па́мву послушли́ваго почита́ти дерза́ю и удивля́юся:/ той бо в послуша́нии от неве́рных и ве́ры ра́ди во у́зах претерпе́ мно́го,/ оба́че, от А́нгел восхище́н и пренесе́н, в ке́ллии свое́й обре́теся,/ и сбы́стся на нем, я́ко послуша́ние от сме́рти избавля́ет. Сла́ва Отцу́ и Сы́ну и Свято́му Ду́ху. Троичен: Впадо́х в ру́ки враго́в мы́сленных/ и око́ван е́смь от них тя́жкими пу́ты, от ни́хже брат не изба́вит./ Ты, Тро́ице Пресвята́я, я́ко Ми́лостивая, созда́ние Твое́ поми́луй/ и бла́гостию Твое́ю от уз сме́ртных свободи́. И ны́не и при́сно и во ве́ки веко́в. Ами́нь. Богородичен: Свя́зан е́смь мно́гими плени́цами страсте́й,/ и не́сть ми разреше́ния наде́жды,/ но Ты поми́луй мя, я́ко Ма́ти Бо́га Вы́шняго,/ и разреши́ мя от них,/ Ты бо Еди́на си́льна еси́ по Бо́зе грехо́вныя плени́цы разреши́ти. Песнь 6 Ирмос: Моли́тву пролию́ ко Го́споду/ и Тому́ возвещу́ печа́ли моя́,/ я́ко зол душа́ моя́ испо́лнися,/ и живо́т мой а́ду прибли́жися,/ и молю́ся, я́ко Ио́на:/ от тли, Бо́же, возведи́ мя. Припев: Преподо́бнии отцы́, моли́те Бо́га о на́с. Моли́твы на́ша прино́сим вам, о Богоно́снии отцы́,/ вы бо есте́ моли́твенницы о нас к Бо́гу и хода́таи,/ хода́тайством у́бо ва́шим от тли грехо́вныя изба́вите/ честны́й ваш собо́р почита́ющих. Припев: Преподо́бнии отцы́, моли́те Бо́га о на́с. Неусы́пне серде́чное виде́ние иму́ще к Бо́гу,/ бы́сте незло́бивии, а́ки младе́нцы,/ но яро о́ко име́ете на бе́сы, я́ко и и́мене ва́шего им трепета́ти./ Мо́лим вас, моли́теся,/ да и от нас нападе́ния вра́жия со студо́м возвратя́тся. Припев: Преподо́бнии отцы́, моли́те Бо́га о на́с. Заха́рие, па́мяти Госпо́дней тезоимени́те,/ по и́мени твоему́ и житие́ стяжа́вый,/ та́ко бо на враги́ посто́м му́жески вооружи́влся еси́,/ я́ко во всем житии́ твое́м зе́лием пита́яся, дово́лен был еси́,/ тем и́мене твоего́ боя́хуся бе́си;/ от сих у́бо злоде́йства избавля́я, ускори́ на по́мощь на́шу,/ смире́нно мо́лимтися. Припев: Преподо́бнии отцы́, моли́те Бо́га о на́с. Фео́доре блаже́нне,/ сла́ву благоро́дства своего́ в пе́рсть всели́вый,/ измени́в княже́ние на и́ноческий о́браз,/ в не́мже Влады́це своему́ до́бре угоди́вый/ и ны́не со А́нгелы в Небе́сных живы́й,/ моли́ся о нас, да сла́вы неги́бнущия прича́стницы бу́дем. Припев: Преподо́бнии отцы́, моли́те Бо́га о на́с. Софро́ние преподо́бне, в те́мнем ме́сте себе́ затвори́вый,/ непреста́нно во псалме́х пел еси́ Бо́гу;/ и ны́не в простра́нней селе́нии Го́рнем наслажда́лся а́нгельских пе́ний,/ моли́ся, да и мы та́я слы́шати сподо́бимся. Припев: Преподо́бнии отцы́, моли́те Бо́га о на́с. В преподо́бии и пра́вде свяще́нствуя Вы́шнему, Панкра́тие чу́дне,/ чудотво́рными да́ры обогати́вся,/ от сих подава́л еси́ неоску́дно тре́бующим;/ пода́ждь у́бо сия́ и нам, в боле́знех к тебе́ усе́рдно приходя́щим. Сла́ва Отцу́ и Сы́ну и Свято́му Ду́ху. Троичен: Сла́вы ра́ди И́мене Твоего́, Пресу́щественная Тро́ице,/ просла́вила еси́ пра́ведных Твои́х и ме́сто сие́;/ бла́гостию у́бо Твое́ю пода́ждь и нам, Бла́же, сла́ву святы́х во сла́ве Твое́й зре́ти/ и с ни́ми Тебе́ сла́вит и, в трие́х Ипоста́сех Еди́наго Бо́га. И ны́не и при́сно и во ве́ки веко́в. Ами́нь. Богородичен: И́же Тя не просла́вит, Пресвята́я Де́во,/ той да не ви́дит сла́вы жи́зни ве́чныя;/ нам же да́ждь ви́дети ту́ю,/ и́бо зна́ем Тя, сла́виму от всех сил Небе́сных, и сие́ прино́сим Ти:/ ра́дуйся, ве́рным изве́стная похвало́. Кондак, глас 8 Избра́ннии от родо́в уго́дницы Бо́жии,/ святи́и преподо́бнии Пече́рстии,/ на сих гора́х доброде́тельми просия́вшим,/ вас земля́ не потаи́ла е́сть,/ но Не́бо отве́рзеся вам и ра́йское селе́ние./ Те́мже мы похва́льныя пе́сни Бо́гу, просла́вльшему вас,/ в па́мяти ва́шей прино́сим;/ вы же, я́ко иму́щии дерзнове́ние,/ ваш собо́р почита́ющих от всех бед моли́твами ва́шими заступа́йте,/ я́ко засту́пницы на́ши и к Бо́гу хода́таи. Икос Восхвали́ти по еди́ному кто возмо́жет святы́я Твоя́, Бла́же:/ изочту́ их, и па́че песка́ умно́жатся,/ но Сам, Влады́ко Христе́, исчита́яй мно́жество звезд и всем имена́ нарица́яй,/ приими́ всех их мольбы́ о нас и яви́ щедро́ты Твоя́ на лю́дех Твои́х;/ ве́мы бо, я́ко мно́го и́мут дерзнове́ние к вели́честву Твоему́ и хода́тайствуют к Тебе́,/ я́ко при́сно моли́твенницы о душа́х на́ших. Песнь 7 Ирмос: От Иуде́и доше́дше, о́троцы/ в Вавило́не иногда́/ ве́рою Тро́ическою пла́мень пе́щный попра́ша, пою́ще:/ отце́в Бо́же, благослове́н еси́. Припев: Преподо́бнии отцы́, моли́те Бо́га о на́с. Ту́чная еси́ и усыре́нная, Пече́рская горо́,/ в твои́х бо гра́жданех изво́ли Вы́шний селе́ние Свое́ полжи́ти,/ те́мже и мы с ни́ми пое́м:/ оте́ц на́ших Бо́же, благослове́н еси́. Припев: Преподо́бнии отцы́, моли́те Бо́га о на́с. Сми́рны испо́лнена и хо́лму Лива́нскому подо́бна еси́, Пече́рская горо́,/ ка́плющая ми́ры Богоно́сных оте́ц на исцеле́ние боле́зней тлетво́рных,/ и́хже мы благоуха́ние прие́млюще, пое́м:/ оте́ц на́ших Бо́же, благослове́н еси́. Припев: Преподо́бнии отцы́, моли́те Бо́га о на́с. Аммо́не и Марда́рие, подви́жный супру́г,/ бы́вше нищеты́ рачи́телие,/ ны́не же бога́тство неги́блющее стяжа́вшии,/ моли́теся и нам то́ежде стяжа́ти в Вы́шних, иде́же пою́т:/ Бо́же, благослове́н еси́. Припев: Преподо́бнии отцы́, моли́те Бо́га о на́с. Пое́м Ру́фа, по́стником и трудолюбцем зерца́ло, с Вениами́ном Блаже́нным,/ и́же все свое́ име́ние отдаде́ ни́щим,/ да еди́н би́сер Христа́ стя́жет,/ Ему́же ревни́телие да бу́дем, пою́ще:/ Бо́же, благослове́н еси́. Припев: Преподо́бнии отцы́, моли́те Бо́га о на́с. Фео́филе, иера́рхом удобре́ние, Нова́града престо́л содержа́вый/ и Сама́го Го́спода ви́девый,/ умоли́ Того́ бла́гость, да и мы Лице́ его́ у́зрим с тобо́ю и воспое́м:/ оте́ц на́ших Бо́же, благослове́н еси́. Припев: Преподо́бнии отцы́, моли́те Бо́га о на́с. В диа́конех свети́ло и в трудолю́бцех о́бразе, Марти́рие, чистоты́ рачи́телю,/ дар име́вый прогоня́ти от челове́к лука́выя ду́хи и не́мощи цели́ти,/ ду́ха зло́бы и вся́кия ле́сти отжени́ от нас, да чи́сто воспое́м:/ Бо́же, благослове́н еси́. Сла́ва Отцу́ и Сы́ну и Свято́му Ду́ху. Троичен: Прославля́ющия святы́х Твои́х просла́ви, Преблага́я Тро́ице, сла́вою,/ ю́же угото́вала еси́ от ве́ка рабо́м Твои́м, и сподо́би пе́ти:/ оте́ц на́ших Бо́же, благослове́н еси́. И ны́не и при́сно и во ве́ки веко́в. Ами́нь. Богородичен: Прера́дованная Ма́ти и Цари́це,/ ра́достная Тебе́ принося́щих ра́дости ве́чныя сподо́би/ и отве́рзи ра́йския две́ри христиа́нскому всему́ ро́ду, при́сно Тебе́ пою́щему:/ Богоро́дице, благослове́нна еси́. Песнь 8 Ирмос: Царя́ Небе́снаго,/ Его́же пою́т во́и а́нгельстии,/ хвали́те и превозноси́те во вся ве́ки. Припев: Преподо́бнии отцы́, моли́те Бо́га о на́с. Цари́цы Небе́сныя селе́ние еси́, Святопече́рская горо́,/ ю́же си́льных мно́жество преподо́бных оте́ц окружа́ют,/ вси ору́жия изощре́нна иму́ще, моли́твы проти́ву мироде́ржца, пою́т пе́снь Бо́гу:/ пое́м и превозно́сим его́ во ве́ки. Припев: Преподо́бнии отцы́, моли́те Бо́га о на́с. Восто́к и за́пад, юг и се́вер/ ви́дит во огра́де твое́й, Пече́рская горо́, исто́чник,/ кипя́щий ми́ры чуде́с Богоно́сных оте́ц, излива́ющийся всем изоби́льно,/ и́же пою́т и превозно́сят Го́спода во ве́ки. Припев: Преподо́бнии отцы́, моли́те Бо́га о на́с. Ко́е хвале́ние вам принесе́м, о Богоно́снии отцы́,/ ка́ко испове́мы труды́ и по́двиги ва́ша тупогру́бым язы́ком, не ве́мы./ Но ты, свя́те Евфи́мие молчали́ве, научи́ ны,/ да с тобо́ю пое́м Го́спода во ве́ки. Припев: Преподо́бнии отцы́, моли́те Бо́га о на́с. По́стником и трудолюбцем сия́ние, Кассиа́не и Пио́ре блаже́нне,/ о́ба светя́щийся житие́м, а́ки небе́сная свети́ла,/ све́тлостию благода́ти, да́нныя вам, озари́те ны,/ да сподо́бимся с ва́ми пе́ти Го́спода во вся ве́ки. Припев: Преподо́бнии отцы́, моли́те Бо́га о на́с. Пла́чущих помина́я блаже́нство, Пафну́тие преподо́бне, всегда́ пла́кал еси́,/ ны́не же ра́достная насле́див ме́ста,/ моли́ся та́мо и нам во кров безплаче́вный всели́тися,/ да с тобо́ю превозно́сим Го́спода во ве́ки. Припев: Преподо́бнии отцы́, моли́те Бо́га о на́с. Со Ио́сифом чу́дным ва́шу, вси святи́и, па́мять почита́ем,/ посто́м и труды́ до́бре Бо́гу угоди́вшии, и мо́лим,/ да от всех бед заступле́ние ва́ми обря́щем/ и сподо́бимся Го́спода превозноси́ти во ве́ки. Сла́ва Отцу́ и Сы́ну и Свято́му Ду́ху. Во огра́де пеще́ры святы́я проходя́ще умо́м,/ зрим на тве́рди ея́ мно́жество, а́ки звезд, оте́ц преподо́бных,/ и́хже исчи́слити невозмо́жно./ Тем о всех возда́вше хвалу́ Бо́гу, мо́лим,/ да даст нам с ни́ми превозноси́ти Его́ во ве́ки. И ны́не и при́сно и во ве́ки веко́в. Ами́нь. Богородичен: Гони́м сый зми́ем миролюбным,/ к Твое́й огра́де прибего́х, Чи́стая:/ кро́вом у́бо ми́лости Твое́й защити́ мя и того́ зубо́в изба́ви,/ я́ко да спасе́н, превозношу Тя, Ма́терь Бо́жию, во ве́ки. Песнь 9 Ирмос: Вои́стинну Богоро́дицу/ Тя испове́дуем,/ спасе́ннии Тобо́ю, Де́во Чи́стая,/ с безпло́тными ли́ки Тя велича́юще. Припев: Преподо́бнии отцы́, моли́те Бо́га о на́с. Вои́стинну пре́жде юдо́ль бе плаче́вная и верте́п разбо́йником гора́ сия́ Свята́я,/ ны́не же дом Бо́жий е́сть,/ и живу́щии в нем блаже́нни, я́ко ва́ми освяти́ся, Богоно́снии отцы́:/ сего́ ра́ди всех вас велича́ем. Припев: Преподо́бнии отцы́, моли́те Бо́га о на́с. Глас ра́дования и шум празднолю́бных стека́ется восхвали́ти собо́р ваш, отцы́ Пече́рстии;/ тех у́бо хвале́ния прие́мше,/ от всех скорбе́й и печа́лей спаса́йте,/ да всегда́ вас велича́ем. Припев: Преподо́бнии отцы́, моли́те Бо́га о на́с. Ра́достною душе́ю взе́мше кре́стное и́го/ и ра́лом трудо́в го́ру сию́ возде́лавше,/ насади́сте сады́ по́тов ва́ших, Богоно́снии отцы́, мы́сленных,/ и́хже плоды́ объе́мше, увеселя́ем ду́ши на́ша и всех вас велича́ем. Припев: Преподо́бнии отцы́, моли́те Бо́га о на́с. Во еди́н пу́ть за́поведей Госпо́дних ходя́ще, разли́чная се́мена се́ясте,/ ов чистоту́, ов послуша́ние, ин пост,/ други́й нищету́, труды́ и сле́зы./ Оба́че вси ра́вно ра́дости рукоя́ти пожинаете,/ от ни́хже и нам да́рствуйте, да вы́ну вас всех велича́ем. Припев: Преподо́бнии отцы́, моли́те Бо́га о на́с. Госпо́дь пасе́т вас ны́не на ме́сте зла́чне, преблаже́ннии отцы́,/ и ко́е уже́ вас лиша́ет бла́го?/ Пото́к бо сла́дости вас напая́ет,/ от него́же поне́ каплею еди́ною жития́ на́шего го́ресть, мо́лимся, услади́те,/ да ра́достно Бо́гу на́шему воспое́м. Припев: Преподо́бнии отцы́, моли́те Бо́га о на́с. От ме́ста плаче́внаго на безплаче́вное преше́дших, мо́лим вас, отцы́ преблаже́ннии,/ нас, па́мять ва́шу вку́пе почита́ющих, вся́кия ско́рби избавля́йте,/ да вси вас велича́ем. Сла́ва Отцу́ и Сы́ну и Свято́му Ду́ху. Троичен: Сла́ва Ты еси́, Тро́ице, преподо́бных оте́ц ли́ку, и неги́блющее весе́лие,/ о Тебе́ бо мир и пло́ть с неви́димым враго́м победи́вше, прия́ша венцы́/ и ра́дуются со А́нгелы, Тя всегда́ велича́юще. И ны́не и при́сно и во ве́ки веко́в. Ами́нь. Богородичен: Сла́вим Тя, пресла́вный гра́де Бо́жий,/ Тебе́ бо Сам основа́ Вы́шний/ и даде́ в прибе́жище всем от лица́ вра́жия бежа́щим./ И нам бу́ди в приста́нище, да Тя вы́ну велича́ем. Светилен Ца́рское свяще́ние, ро́де избра́нный,/ иера́рси святи́и, свяще́нницы, мона́си, де́вственницы, чудотво́рцы/ и все по́стническое сосло́вие преподо́бных оте́ц Пече́рских,/ собери́теся дне́сь на моли́тву,/ да вас ра́ди Ца́рь сла́вы спасе́т правосла́вныя лю́ди,/ благоче́стно собо́р ваш почита́ющих. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Святы́х Святе́йшую Тя сла́вим, Чи́стая Де́во,/ и велича́ем от Тебе́ рожде́нное Сло́во,/ Ты же приими́ и от нас славосло́вие сие́, и да́ждь сла́вити и Тя,/ иде́же вси святи́и Ма́терь Тя Бо́жию сла́вят.

Минея, 21 Мая, Канон равноапостольных Глас 8 Песнь 1 Ирмос: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:/ Изба́вителю и Бо́гу на́шему пои́м. Припев: Святи́и равноапо́стольнии Константи́не и Еле́но, моли́те Бо́га о на́с. Еди́не Небе́сный Царю́, ца́рствующаго греха́ ны́не во мне/ Твои́х уго́дников мольба́ми смире́нную ду́шу мою́ свободи́. Припев: Святи́и равноапо́стольнии Константи́не и Еле́но, моли́те Бо́га о на́с. Го́рняго быв рачи́тель Ца́рствия, блаже́нне Константи́не,/ Царю́ всех и Влады́це, умо́м чи́стым ве́ровав, послужи́л еси́. Сла́ва Отцу́ и Сы́ну и Свято́му Ду́ху. Све́том облиста́вшися Богонача́льным,/ тьму́ неразу́мия оста́вила еси́ вои́стинну, Богому́драя Еле́но,/ прии́скренно Царю́ веко́в порабо́тала еси́. И ны́не и при́сно и во ве́ки веко́в. Ами́нь. Богородичен: Две́рь Боже́ственнаго восто́ка, отве́рзи ми две́ри покая́ния/ и от двере́й смертоно́снаго греха́ хода́тайством Твои́м изба́ви мя, Влады́чице. Песнь 3 Ирмос: Небе́снаго кру́га Верхотво́рче, Го́споди,/ и Це́ркве Зижди́телю,/ Ты мене́ утверди́ в любви́ Твое́й,/ жела́ний кра́ю, ве́рных утвержде́ние,/ еди́не Человеколю́бче. Припев: Святи́и равноапо́стольнии Константи́не и Еле́но, моли́те Бо́га о на́с. Возме́здия Небе́сная получи́ти потща́лся еси́,/ те́мже зову́щему, Богому́дре, после́довал еси́,/ и тьму́ оста́вил еси́, о́тче, пре́данныя ти ле́сти,/ и свети́льник Ду́хом Боже́ственным был еси́. Припев: Святи́и равноапо́стольнии Константи́не и Еле́но, моли́те Бо́га о на́с. Христу́ прилепи́вшися и на Него́, всечестна́я, всю возложи́вши наде́жду,/ свяще́нная Его́ места́ дости́гла еси́,/ в ни́хже пречи́стыя стра́сти, воплоти́вся, претерпе́, Преблаги́й. Сла́ва Отцу́ и Сы́ну и Свято́му Ду́ху. Спаси́тельное ору́жие, неразори́мое одоле́ние, христиа́нскую наде́жду,/ Крест Честны́й, за́вистию/ сокрове́нный, ты яви́ла еси́,/ Боже́ственным распаля́ема жела́нием, Богоблаже́нная. И ны́не и при́сно и во ве́ки веко́в. Ами́нь. Богородичен: Свяще́ннаго гражда́нства отпа́д, Пречи́стая,/ приложи́хся ското́м и осужде́н ве́сь бых;/ Я́же Судию́ ро́ждшая, вся́каго осужде́ния изба́ви и спаси́ мя. Седален, глас 8 Чу́вства просте́р к Небеси́ и зве́здную навы́кнув добро́ту,/ от сих тайноучи́м быва́я вся́ческих Го́спода,/ кре́стное же ору́жие посреде́ облиста́,/ напису́я о сем побежда́ти и держа́вным бы́ти./ Те́мже, души́ твоея́ отве́рз очеса́, письмо́ проче́л еси́/ и о́бразу научи́вся, Константи́не всече́стне,/ моли́ Христа́ Бо́га согреше́ний оставле́ние дарова́ти/ пра́зднующим любо́вию святу́ю па́мять твою́. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Прему́дрость и Сло́во в Твое́м чре́ве заче́нши неопа́льно, Ма́ти Бо́жия,/ ми́рови родила́ еси́ мир Содержа́щаго/ и в объя́тиях понесла́ еси́ вся Нося́щаго,/ Пита́теля всех и Творца́ тва́ри./ Те́мже молю́ Тя, Всесвята́я Де́во, и ве́рно сла́влю Тя,/ изба́витися ми от прегреше́ний, и в де́нь суда́,/ егда́ предста́ти и́мам пред лице́м Созда́теля моего́,/ Влады́чице Де́во Чи́стая, Твою́ по́мощь тогда́ пода́ждь ми:/ вся бо мо́жеши, ели́ка хо́щеши, Всепе́тая. Песнь 4 Ирмос: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́. Припев: Святи́и равноапо́стольнии Константи́не и Еле́но, моли́те Бо́га о на́с. С Небесе́, я́ко Па́вла тя дре́вле, уловля́ет Христо́с Госпо́дь, Константи́не,/ науча́я тя Царя́ Еди́наго Сего́ почита́ти. Припев: Святи́и равноапо́стольнии Константи́не и Еле́но, моли́те Бо́га о на́с. Пресве́тлым зна́мением тя, блаже́нне, звезда́ми Христо́с Со́лнце озаря́ет/ и свети́льника тя омраче́нным показа́. Припев: Святи́и равноапо́стольнии Константи́не и Еле́но, моли́те Бо́га о на́с. И нра́вы Боголюби́ва и Боже́ственными дея́нии досточу́дна, блаже́нная, была́ еси́:/ сего́ ра́ди ве́рою тя сла́вим. Сла́ва Отцу́ и Сы́ну и Свято́му Ду́ху. Явля́еши кры́емую ле́ты мно́гими ны́не Боже́ственную побе́ду Креста́,/ и́мже спасо́хомся и де́монския пре́лести изба́вихомся. И ны́не и при́сно и во ве́ки веко́в. Ами́нь. Богородичен: Ду́шу мою́ озари́, омраче́нную согреше́ньми,/ Я́же Со́лнце пра́вды ро́ждшая, Присноде́во. Песнь 5 Ирмос: У́тренююще, вопие́м Ти:/ Го́споди, спаси́ ны,/ Ты бо еси́ Бог наш,/ ра́зве Тебе́, ино́го не ве́мы. Припев: Святи́и равноапо́стольнии Константи́не и Еле́но, моли́те Бо́га о на́с. У́треневав к незаходи́мому Со́лнцу и Влады́це,/ царю́ Богому́дре, све́та испо́лнен был еси́. Припев: Святи́и равноапо́стольнии Константи́не и Еле́но, моли́те Бо́га о на́с. Любо́вь и соверше́нное милосе́рдие, я́ко порфи́ру, нося́щи,/ всели́лася еси́ ны́не в Вы́шняя Ца́рствия. Сла́ва Отцу́ и Сы́ну и Свято́му Ду́ху. Совокупи́лася еси́ со безпло́тных, Еле́но, ликостоя́нии,/ Бо́гу угоди́вши доброде́тельными твои́ми дея́нии. И ны́не и при́сно и во ве́ки веко́в. Ами́нь. Богородичен: Де́во, ду́шу мою́ очи́сти,/ оскверне́нную сластьми́ теле́сными, наве́том змии́ным. Песнь 6 Ирмос: Моли́тву пролию́ ко Го́споду/ и Тому́ возвещу́ печа́ли моя́,/ я́ко зол душа́ моя́ испо́лнися/ и живо́т мой а́ду прибли́жися,/ и молю́ся, я́ко Ио́на:/ от тли, Бо́же, возведи́ мя. Припев: Святи́и равноапо́стольнии Константи́не и Еле́но, моли́те Бо́га о на́с. Собра́л еси́ Богоно́сных оте́ц блаже́нный лик пресла́вно/ и те́ми, Константи́не, всех обурева́емая сердца́ утверди́л еси́/ единоче́стна славосло́вити Ро́ждшему, Сло́ва и сопресто́льна. Припев: Святи́и равноапо́стольнии Константи́не и Еле́но, моли́те Бо́га о на́с. Ве́ровавши в Го́спода жи́ва, е́же бы́ти всем подаю́щаго,/ ме́рзских и су́етных и́долов ме́ртвенная отри́нула еси́ служе́ния/ и прия́ла еси́ ра́достно, Еле́но, Ца́рство Небе́сное. Сла́ва Отцу́ и Сы́ну и Свято́му Ду́ху. Дла́нию Твое́ю окормля́еми, Сло́ве,/ неве́дения глубоча́йшую тьму́ и лю́таго безбо́жия бу́рю Тобо́ю ца́рствовавшии отри́нуша/ и приведо́шася к ти́хим благоче́стия приста́нищам, ра́дующеся. И ны́не и при́сно и во ве́ки веко́в. Ами́нь. Богородичен: Исцели́ неисце́льно неду́говавшее/ и ухапле́нием лука́ваго лю́те уязви́вшееся се́рдце мое́, Отрокови́це,/ и Твоего́ исцеле́ния сподо́би, и спаси́ мя,/ на Тя наде́ющагося, мольба́ми Твои́ми, Пречи́стая. Кондак, глас 3 Константи́н дне́сь с ма́терию Еле́ною/ Крест явля́ют, всечестно́е дре́во,/ всех у́бо иуде́ев посрамле́ние су́ще,/ ору́жие же на проти́вныя ве́рных люде́й:/ нас бо ра́ди яви́ся зна́мение ве́лие/ и во бране́х гро́зное. Икос Константи́на, ве́рнии, с ма́терию почти́м:/ Дави́да бо и си́и словеса́ услы́шавше, на ке́дре, и пе́вге, и кипари́се,/ тресло́жный Крест позна́ша, и́мже спаси́тельная стра́сть после́дова,/ и вся предста́виша иуде́и, угото́витися показа́ти лю́дем ве́лие оправда́ние,/ сокрове́нное за́висти ра́ди и не́нависти тех,/ и, сие́ обре́тше, показа́ша они́./ Сего́ ра́ди всем победоно́снии яви́шася,/ ору́жие нося́ще необори́мое, зна́мение ве́лие и во бране́х гро́зное. Песнь 7 Ирмос: О́троцы евре́йстии в пещи́/ попра́ша пла́мень дерзнове́нно/ и на ро́су о́гнь преложи́ша, вопию́ще:/ благослове́н еси́, Го́споди Бо́же, во ве́ки. Припев: Святи́и равноапо́стольнии Константи́не и Еле́но, моли́те Бо́га о на́с. Твоя́ повеле́ния сохраня́я, повину́ся Твоему́ зако́ну Константи́н./ Те́мже беззако́ннующих низложи́ ополче́ния, вопия́ Тебе́:/ Го́споди Бо́же, благослове́н еси́. Припев: Святи́и равноапо́стольнии Константи́не и Еле́но, моли́те Бо́га о на́с. Дре́во, е́же всех извле́кшее, досточу́дне, из ро́ва поги́бели,/ загребе́нное за́вистию, нам открыва́еши,/ погреба́яй де́моны всегуби́тельныя во ве́ки. Сла́ва Отцу́ и Сы́ну и Свято́му Ду́ху. Дея́нии Боже́ственными создала́ еси́ се́рдце твое́ це́рковь Бо́гу, Еле́но,/ и хра́мы свяще́нныя Тому́ соде́лала еси́,/ иде́же пло́тию пречи́стыя нас ра́ди подъя́т стра́сти. И ны́не и при́сно и во ве́ки веко́в. Ами́нь. Богородичен: Во́лею мое́ю согреша́яй и порабоще́н безме́стными обы́чайми,/ ко обы́чному Твоему́ ны́не притека́ю милосе́рдию,/ отча́яннаго спаси́ мя, Пресвята́я Богоро́дице. Песнь 8 Ирмос: Седмери́цею пе́щь/ халде́йский мучи́тель/ Богочести́вым неи́стовно разжже́,/ си́лою же лу́чшею спасе́ны, сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки. Припев: Святи́и равноапо́стольнии Константи́не и Еле́но, моли́те Бо́га о на́с. Я́ко багряни́цею, сла́вне, оде́явся милосе́рдием,/ и я́коже хлами́дою, в до́брую кро́тость венце́м укра́шен был еси́ доброде́телей соверше́нным умо́м/ и, преста́влься от земли́ к Вы́шнему Ца́рствию, зове́ши:/ иере́и, благослови́те, лю́дие, превозноси́те Христа́ во ве́ки. Припев: Святи́и равноапо́стольнии Константи́не и Еле́но, моли́те Бо́га о на́с. Веселя́щуюся ви́дящии с сыно́м тя Богому́дрым, сла́вная Еле́но, в Бо́жии Ца́рствии,/ Христа́ велича́ем, ваш честны́й пра́здник показа́вшаго нам,/ па́че лучи́ со́лнечныя нас озари́вший, ве́рно пою́щих:/ лю́дие, превозноси́те Христа́ во ве́ки. Сла́ва Отцу́ и Сы́ну и Свято́му Ду́ху. Я́ко чу́дно жела́ние твое́ и нрав Боже́ственный,/ сла́вная Еле́но, жена́м похвало́:/ мест бо дости́гши, честны́я стра́сти подъе́мших,/ Влады́це всех хра́мы прекра́сными удобри́ла еси́, вопию́щи:/ лю́дие, превозноси́те Христа́ во вся ве́ки. И ны́не и при́сно и во ве́ки веко́в. Ами́нь. Богородичен: Души́ моея́ о́чи, мно́гими преступле́нии ослепле́нныя, Богоро́дице, просвети́,/ ум мой умири́ и се́рдце, молю́ся, смуще́нное сластьми́ многообра́зными,/ и спаси́ мя, вопию́ща:/ иере́и, благослови́те, лю́дие, превозноси́те Чи́стую во вся ве́ки. Песнь 9 Ирмос: Ужасе́ся о сем Не́бо,/ и земли́ удиви́шася концы́,/ я́ко Бог яви́ся челове́ком пло́тски/ и чре́во Твое́ бысть простра́ннейшее небе́с./ Тем Тя, Богоро́дицу,/ А́нгелов и челове́к чинонача́лия велича́ют. Припев: Святи́и равноапо́стольнии Константи́не и Еле́но, моли́те Бо́га о на́с. Гроб, иде́же лежи́т свяще́нное, Константи́не, и честно́е те́ло твое́,/ зарю́ Боже́ственных исцеле́ний чи́сте приступа́ющим всегда́ источа́ет,/ страсте́й разли́чных тьму́ отгоня́/ и све́том невече́рним просвеща́я восхваля́ющих тя. Припев: Святи́и равноапо́стольнии Константи́не и Еле́но, моли́те Бо́га о на́с. Свя́то свою́ сконча́вши жи́знь, со святы́ми ны́не всели́лася еси́,/ освяще́ния испо́лнена бы́вши и просвеще́ния./ Те́мже и исцеле́ний всегда́ источа́еши ре́ки,/ и стра́сти попаля́еши, Еле́но блаже́нная, и напая́еши души́ на́ша. Сла́ва Отцу́ и Сы́ну и Свято́му Ду́ху. Пребезнача́льне безсме́ртне Царю́,/ Ца́рствия Вы́шняго сподо́бил еси́,/ и́хже благоче́стно дре́вле оправда́л еси́ на земли́,/ е́же ца́рствовати, Го́споди, Тя возлюби́вших чи́сте,/ Еле́ну святу́ю и вели́каго Константи́на,/ и́хже моли́твами всех уще́дри. И ны́не и при́сно и во ве́ки веко́в. Ами́нь. Богородичен: Всех Царя́ и Творца́ заче́нши, Де́во, родила́ еси́/ и се ны́не, я́коже Цари́ца одесну́ю Сего́, Чи́стая, предстои́ши./ Те́мже молю́ Тя:/ шу́ия ча́сти изба́ви мя в час суда́/ и десны́м овца́м сопричти́. Светилен Свети́льницы, просвети́вшии вселе́нную всю благоче́стия ве́рою,/ вы яви́стеся вои́стинну, Боговенча́нне Константи́не и Еле́но сла́вная./ Вас возвели́чившаго Христа́ пе́сньми славосло́вим, Ди́внаго во святы́х. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Не от челове́к прия́т ца́рственную держа́ву,/ но от Боже́ственныя благода́ти Константи́н вели́кий с ма́терию,/ с небесе́ облиста́емь же, зрит Креста́ Боже́ственную побе́ду,/ и́же сим погуби́в враго́в, и́дольскую разруши́ ле́сть,/ в ми́ре же укрепи́ правосла́вную ве́ру.

Плоды добродетелей на земли принесше,/ преподобнии отцы,/ в Небесных чертозех ныне благоухаете, яко райстии цвети,/ и лицем к лицу зрите Пресвятую Троицу,/ Юже дерзновенно молите/ спастися душам нашим.

Светильник Церкве Русския/ и пастырь добрый явился еси,/ святителю отче Иове,/ молитвою твоею ко Господу/ храни землю Российскую/ и спаси души наша.

Акафист святому блаженному Иоанну, Устюжскому чудотворцу в формате PDF

Кондак 1 Избранной от рода державнаго угоднице Христовой Евфросинии, яко крепкой заступнице и молитвеннице нашей, похвальная восписуем ти, чтущия тя. Ты же, яко имущая дерзновение ко Господу, Того умоли избавитися нам бед и скорбей, и в будущем веце небесное улучити царствие, да зовем ти: Радуйся, преподобная княгине Евфросиние. Икос 1 Ангельское воистину безстрастие еще на земли стяжала еси, преподобная, нивочтоже вменяющи княжения славу, богатств обилие, вся мира красная, о юности и красоте телесней нерадивши, непрестанными же к Богу молитвами, бдением и постом плоть изнуривши и душу добродетельми украсивши. Сицевому равноангельному житию твоему удивляющеся, сия вопием ти, преподобная: Радуйся, от младых лет спасения взыскавшая; радуйся в молитвах к Богу прилежавшая. Радуйся, в напастех на Него единаго упование полагавшая; радуйся, в сане княжестем смирение сохранившая. Радуйся, во власти державней кротость ко всем соблюдшая; радуйся, к нищим милосердие неоскудное показавшая. Радуйся, в чертозе княжестем иночески пожившая; радуйся, в неговании двора царскаго постническое житие явившая. Радуйся, преподобная княгине Евфросиние. Кондак 2 Видящи преподобная в доме отчем заповедей Божиих усердное хранение и в благочестии преспеяние, от юности навыче о спасении душевнем паче всего ревновати и в теплых к Богу молитвах Ему воспевати: Аллилуиа. Икос 2 Разум во благочестии утвержден имущи преподобная, не земныя радости в супружестве взыскаше, но паче всех супругу в добродетелех подражаше и того к делом добрым подвизаше, со тщанием к почести вышняго звания течаше. Сицевое житие преподобныя похваляюще, возопиим к ней таковая: Радуйся, Бога паче всех возлюбльшая; радуйся, в жизни славней нощи в молитвах пребывати не оставльшая. Радуйся, во обилии благ земных постнической жизни навыкшая; радуйся, в мирстей жизни чистоту сердца сохраншая. Радуйся, супружеств христианских удобрение; радуйся, жен благочестивых украшение. Радуйся, во обилии благ живущим благочестия образ подавшая; радуйся, во славе сущим христианскаго жития правило показавшая. Радуйся, преподобная княгине Евфросиние. Кондак 3 Сила Вышняго присно невредиму тя сохрани, преподобная, егда смертоносная язва многи окрест тебе погубляше, и многажды в нахождениих врагов безбожных соблюдаше тя от меча их и пленения. Темже, Бога благодарящи, вопияла еси: Аллилуиа. Икос 3 Имущи сердце милостивое и к людем страждущим удобь преклонное, во всех града и княжения напастех, в запалениих огненных, в нахождениих и губительствах вражиих первее к Богу обыкла еси, преподобная, с молитвою теплою прибегати и к той вся люди подвизати. Темже, почитающе твое теплое к Богу о людех ходатайство и скорую бедствующим помощь, вопием ти сицевая: Радуйся, гнев Божий молитвами твоими утолявшая; радуйся, в бедах и напастех помощь Божию обретавшая. Радуйся, крова лишенным пристанище уготовлявшая; радуйся, от врагов разоренным снабдение подававшая. Радуйся, состраданием скорби бедствующих утолявшая; радуйся, милосердием нищету обнищавших отгонявшая. Радуйся, душу ко всем милосерду имевшая; радуйся, во мнозех благотворениих любовь к людем показавшая. Радуйся, преподобная княгине Евфросиние. Кондак 4 Буря скорбных помышлений обдержаше тя, преподобная, егда юный князь, блага ради людей своих, волею пойде в жилище ярящихся злонравных агарян, яко овча в ложа дивиих зверей, и паки, егда сын твой два лета проживе в пленении у безбожных врагов. Ты же, скорби сердца твоего пред Господем единым в молитвах теплых изливающи, Ему непрестанно взывала еси: Аллилуиа. Икос 4 Слышавше иногда безбожнии агаряне твое, преподобная, из царствующаго града удаление, гнаша вслед тебе, в плен яти тя хотяще. Ты же, Богом сохраняема, избегла еси рук вражиих, и Бога благодарящи, многи храмы и обители иноческия воздвигла еси. Темже, ведуще твою теплую к Богу любовь, вопием ти сицевая: Радуйся, непрестанными молитвенными хвалении Бога прославлявшая; радуйся, в непрестанную жертву благодарения Ему храмы многи создавшая. Радуйся, приметатися во дворех Божиих возлюбившая; радуйся, в мирстей жизни высоту иноческаго жития познавшая. Радуйся, во славе светлаго княжения суету мирскаго жития уразумевшая; радуйся, мира суету уразумевшим пристанище тихое во обителех уготовавшая. Радуйся, спасения душевнаго присно желавшая; радуйся, спастися хотящих к жизни иноческой призывавшая. Радуйся, преподобная княгине Евфросиние. Кондак 5 Боготечная звезда явилася еси, преподобная, в житии твоем, егда супружеских уз отрешившися, всецело Господу себе предала еси, постом и молитвами работающи Ему день и нощь и непрестанно вопиющи Ему: Аллилуиа. Икос 5 Видящи, преподобная, себе по смерти мужа сиротствующу, возжела на служение единому Богу себе предати, обаче, воспитания ради чад, до времени в чертозех княжеских жити и о делех земных попечение имети понуждаема, умысли в тайне Богу работати, зельным пощением тело юное изнуряющи, людем же в светлых ризах и красну лицем себе являющи. Той единому Богу ведомыя подвиги почитающе, возопиим к ней таковая: Радуйся, в тайне Богу послужившая; радуйся, сокровенно от людей Тому угодившая. Радуйся, Давидски в полунощи на молитву восстававшая; радуйся, во дни бодрственно дела земная совершавшая. Радуйся, псаломски утро в молениих предварявшая; радуйся, до нощи во обычных о чадех и людех попечениих пребывавшая. Радуйся, яко пред Богом псаломски во вретищи и стенании душу твою смирила еси; радуйся, яко пред людьми евангельски во умащении главы и в светелости лица и одеяния себе являла еси. Радуйся, преподобная княгине Евфросиние. Кондак 6 Проповеднику премудрому согласующися, глаголала еси, преподобная, в сердцы твоем: всяческая в мире суета сует. Темже тихое от суеты убежище — обитель святую сию создала еси, еже бы в ней мира удалившися, в мире и безмолвии пети Богу: Аллилуиа. Икос 6 Возсия в сердцы твоем, преподобная, светлая благодати луча, тайными молитвами и подвигами возжигаемая, еяже сияния не терпя древний враг, восхоте возмутити душу твою, наустив лукавыя люди хулы глаголати о житии твоем. Ты же клеветы слышащи, духом пребывала еси в Бозе утвержденна и помыслом не смущенна. Темже вопием ти, преподобная: Радуйся, неправедное поношение без гнева терпевшая; радуйся, злокозненное хуление несмущенно понесшая. Радуйся, за ревность о чистоте сердца в нечистоте жития оклеветаемая; радуйся, за зельное тела умерщвление в житии сластопитанном укоряемая. Радуйся, от Бога единаго похвалы на суде Его желавшая; радуйся, славы токмо на небесех искавшая. Радуйся твердое терпение во озлоблении соблюдшая; радуйся, смирением козни вражия расторгшая. Радуйся, преподобная княгине Евфросиние. Кондак 7 Хотяй Господь тайныя твоя в добродетелех подвиги ведомы людем соделати, попусти диаволу бурю воздвигнути на тя поношений и оклеветаний, да известно уведевше святое твое житие, прославят вси Бога, дивнаго в тайных рабех Своих, присно вопиюще Ему: Аллилуиа. Икос 7 Новую показа добродетели высоту преподобная Евфросиния, егда, видящи чад своих злыми о ней клеветами смущаемых, призва я тайно и часть одежд пред ними откры, яко видети бе мощно тело ея, от поста и зельных подвигов изсохшее и очернелое, и плоть костем прильпнувшу; и тако смущение от сердец их отгнавши, никомуже поведати виденное повеле. Таковей преподобныя добродетели дивящеся, возопиим к ней сицевая: Радуйся, во глубине смирения подвиги твоя от всех скрывавшая; радуйся, в широте любве чадом твоим оныя явившая. Радуйся, очищения ради своея души, поношение безчестия терпеливо понесшая; радуйся, избавления ради чад своих от греха осуждения, чистоту жития своего показавшая. Радуйся, обиды от людей Судии Богу предавшая; радуйся, худыя помыслы чад своих во благо исправившая. Радуйся, во уверение истины подвиги твоя им открывшая; радуйся, во избежание славы, уста их молчанием заградившая. Радуйся, преподобная княгине Евфросиние. Кондак 8 Странное видение плоти твоея, яко уже умершия, зряще сынове твои и жестокое твое житие уразумевше, страхом одержими, Богу, укрепившему тя в подвизех, вопияху прилежно: Аллилуиа. Икос 8 Весь сонм злословящих людей хотяху чада твоя наказати, егда уведаша твоего жития чистоту и уразумеша велию злобу поношающих тя; ты же, яко незлобивая, никакоже попустила еси отмстити обидящим, от Бога единаго чающи оправдания своего. Темже вопием ти, преподобная: Радуйся, сердцем кроткая; радуйся, духом незлобивая. Радуйся, ко обидам терпеливая; радуйся ко обидящим негневливая. Радуйся, в терпении обид Христу Богу подобящаяся; радуйся, от Бога единаго своего оправдания ожидавшая. Радуйся, поношение терпением победившая; радуйся, ко обидящим любовь сохранившая. Радуйся, преподобная княгине Евфросиние. Кондак 9 Все естество Ангельское возвеселися, егда Архистратиг Небесных Сил, предстояй Престолу Божию, послан бысть к тебе, преподобная, ко исходу душу твою уготовати, и Богу, сице благоизволившему, вопияху: Аллилуиа. Икос 9 Витии многовещанныя не возмогут по достоянию восхвалити твое ангельское безстрастие и чистоту ока душевнаго, яко, во плоти сущи, от Архистратига Божия посещения сподобилася еси и от него извещение о исходе из сего временнаго жития прияла еси. Мы же, таковую тебе от Бога данную благодать чтуще, вопием ти, преподобная: Радуйся, безстрастием Ангелом соревновавшая; радуйся, Архангельскаго посещения сподобльшаяся. Радуйся, сиянием Ангельскаго света осиянная; радуйся, благоуханием святыни от Архангела облагоуханная. Радуйся, о изшествии из мира от Господа предызвещенная; радуйся, явлением Ангельским от всего земнаго отрешенная. Радуйся, яко Архистратиг Божий явлением своим князя воздушных мытарств от тебе далече отгна; радуйся, яко своим благодатным посещением победу на диавола тебе дарова. Радуйся, преподобная княгине Евфросиние. Кондак 10 Спасти хотящи душу твою, преподобная, егда от Ангела весть о скором от жития сего исходе прияла еси, внити в созданную тобою обитель ускорила еси, да тамо в безмолвии работающи Богу, воспеваеши Ему: Аллилуиа. Икос 10 Стена еси твердая и ограждение необоримое обители, тобою созданней, преподобная, еже и яви Господь, еще грядущей тебе во обитель: многи бо на пути недужныя исцелила еси и во обитель вошла еси не яко новоначальная, но яко славная чудотворица. Темже, прославляюще тя, вопием ти, преподобная: Радуйся, явлением твоим слепцу исцеление обещавшая; радуйся, прикосновением ризы зрение тому подавшая. Радуйся, болящих в житии твоем нужным снабдевавшая; радуйся, тридесяти недужным при вхождении во обитель исцеление даровавшая. Радуйся, во обитель шедшая по смирению, яко новоначальная; радуйся, в тую вшедшая по благодати Божией, яко чудотворица прехвальная. Радуйся, благодать Божию с собою во обитель вводящая; радуйся, вхождением своим украшение святолепное ей преподавшая. Радуйся, преподобная княгине Евфросиние. Кондак 11 Пение всеумиленное принесла еси, преподобная, благодарственная восписующи Господу, сподобльшему тя иноческое пострижение прияти, к нему же во всем житии душу твою предуготовляла еси, да мира сего отлучившися и ничимже земным смущаема, вопиеши Богу: Аллилуиа. Икос 11 Светозарная свеща иночествующим показася житие твое во обители, преподобная: аще бо и не многи дни во иночестве пожила еси, обаче всякия иноческия добродетели образ преизящный в себе явила еси. Темже, восхваляюще тя, сицевая вопием ти, преподобная: Радуйся, вольнаго мира оставления преизящная наставнице; радуйся, правило усерднаго за вся люди моления. Радуйся, совершеннаго своей воли отсечения премудрое наставление; радуйся, душевныя и телесныя чистоты светило изрядное. Радуйся, умерщвления плоти образе преизящный; радуйся, мирнаго купножития наставнице. Радуйся, умныя к Богу молитвы образе; радуйся, святаго на земли жития зерцало. Радуйся, преподобная княгине Евфросиние. Кондак 12 Благодати исполнена и благих дел, яко добре течение земное совершившая, в мире преставилася еси от земных к небесным, идеже веселящися предстоиши Господу и вопиеши Ему: Аллилуиа. Икос 12 Поюще твоя многообразная людем благодеяния, восхваляем тя вси, преподобная мати Евфросиние, независтно подающую исцеления с верою к тебе прибегающим и вопиющим ти: Радуйся, яко на небесех ныне пред Господем предстоиши; радуйся, яко о людех пред Богом выну предстательствуеши. Радуйся, града твоего крепкое ограждение; радуйся, обители твоея незыблемое утверждение. Радуйся, о благом преспеянии иночествующих тепле молящаяся; радуйся, о утверждении добре живущих в мире Бога просящая. Радуйся, чтущих память твою пред Богом поминающая; радуйся, о прославляющих тя Бога молящая. Радуйся, преподобная княгине Евфросиние. Кондак 13 О, прехвальная угоднице Божия, преподобная княгине Евфросиние! Приими смиренное сие хваление наше и твоим теплым предстательством у Царя Славы испроси нам в немощех исцеление, в добродетелех преспеяние, от врагов видимых и невидимых избавление, от вечныя муки свобождение и Царства Небеснаго наследие, да с тобою присно поем Богу: Аллилуиа.[Се́й конда́к глаго́лется три́жды.][Далее повторяем 1‑е икос и кондак:]Икос 1 Ангельское воистину безстрастие еще на земли стяжала еси, преподобная, нивочтоже вменяющи княжения славу, богатств обилие, вся мира красная, о юности и красоте телесней нерадивши, непрестанными же к Богу молитвами, бдением и постом плоть изнуривши и душу добродетельми украсивши. Сицевому равноангельному житию твоему удивляющеся, сия вопием ти, преподобная: Радуйся, от младых лет спасения взыскавшая; радуйся в молитвах к Богу прилежавшая. Радуйся, в напастех на Него единаго упование полагавшая; радуйся, в сане княжестем смирение сохранившая. Радуйся, во власти державней кротость ко всем соблюдшая; радуйся, к нищим милосердие неоскудное показавшая. Радуйся, в чертозе княжестем иночески пожившая; радуйся, в неговании двора царскаго постническое житие явившая. Радуйся, преподобная княгине Евфросиние. Кондак 1 Избранной от рода державнаго угоднице Христовой Евфросинии, яко крепкой заступнице и молитвеннице нашей, похвальная восписуем ти, чтущия тя. Ты же, яко имущая дерзновение ко Господу, Того умоли избавитися нам бед и скорбей, и в будущем веце небесное улучити царствие, да зовем ти: Радуйся, преподобная княгине Евфросиние. Молитва О, преподобная княгине Евфросиние, добляя в женах подвижнице, прехвальная угоднице Христова! Приими моление о нас, недостоиных, с верою и любовию к тебе припадающих, и теплым к Богу ходатайством испроси граду Москве и людем от бед и напастей сохранение, споспешествуй, яко чадолюбивая мати, чадом, тобою собранным, понести иго Христово во благодушии и терпении и добре подвизатися ко исправлению жития своего, еже ко спасению; в мире благочестно живущим испроси у Господа в вере твердость, во благочестии преспеяние и всем, с верою прибегающим к тебе и твоея просящим помощи и заступления, подавай всегда недугов исцеление, в скорбех утешение и во всем житии благопоспешение, наипаче же умоли Господа в мире и покаянии земное житие преити нам, мытарств горьких и мук вечных избавится и Царство Небесное твоим ходатайством получити, идеже ты со всеми святыми Господу предстоиши, да всегда славим Отца и Сына и Святаго Духа, ныне и в безконечныя веки веков. Аминь.

Акафист святому преподобному Дионисию, игумену Глушицкому, Вологодскому чудототворцу в формате PDF