Молитвы

Волнений множество невлажно преходя,/ безплотныя враги струями слез твоих погрузил еси,/ Богомудре Евфимие преподобне,/ тем и чудес дар приял еси,/ моли непрестанно о всех нас.

Предназначен для келейного чтения Находится на рассмотрении в Комиссии по акафистам при Издательском Совете Русской Православной Церкви Кондак 1 Избранный исповедниче оптинский, благодати старческия наследниче, воине духовный и монахов изрядный наставниче. Похвальная приносим тебе пение. Ты же, яко имея ко Христу велие дерзновение, молися о нас, любовию тебе зовущих: радуйся, исповедниче Христов, Никоне богомудре. Икос 1 От младенства твоего тайну Воскресения постигнувый, егда умершу ти, отче мудре, молитвами матере твоея паки к жизни возвратился еси. Сего ради таковому чуду удивившеся, велегласно тебе зовем: Радуйся, молитвами матере от уст адских восхищеный; радуйся, радость воскресения еще в младенстве познавый. Радуйся, твоим благочестием смерти жало при­тупивый; радуйся, твоими чудодействы о животе вечнем возвестивый. Радуйся, дважды избегнувый смерти горчайшия; радуйся, яко сладости райския сугубо ныне причащаешися. Радуйся, велегласная труба воскресения; радуйся, сладкозвучный органе безсмертия. Радуйся, исповедниче Христов, Никоне богомудре. Кондак 2 Мир оставил еси, отче богомудре, и в Скит Оптинский вселивыйся, ко Христу любовию распалаемь, яко горлица пустыннолюбивая в жертву живу принесл еси себе, словесным служением взывая: Аллилуиа. Икос 2 Под криле богомудраго Варсонофия притекл еси, яко млеком словесным старческим окормлением от него воспитавыйся, в мужа возраста духовнаго достигл еси, темже твое боголюбие похваляем глаголюще сице: Радуйся, яко орля, духовную весну иский; радуйся, от зимы мирских страстей отбегий. Радуйся, Солнца Праведнаго лучами согретый; радуйся, звезды мысленныя постигнути желавый. Радуйся, под криле мудрости старческия притекий; радуйся, тою мудростию окрилен быв, в горняя востекий. Радуйся, небомудренное житие в Скиту обретый; радуйся, похотений юношеских избегий. Радуйся, исповедниче Христов, Никоне богомудре. Кондак 3 Кладезь мудрости в Скиту обрет, преподобне отче, писменник был еси великаго старца. В писменех бо его сладость почерпл еси благодатных словес, жажду духовную утоляя, Богу благодарне взывая: Аллилуиа. Икос 3 В сотаинники своя избра тебе богомудрый ста­рец Варсонофий, души твоея провидевый богоразумную доброту, яко имаши явитися преемник благодати старческия. Сего ради воспеваем тебе похвальная: Радуйся, преемниче даров сыноположения; радуйся, ко отечестей любви сыновнее явивый люб­ление. Радуйся, сотаинниче премудрый богомудраго старца; радуйся, непорочный агнче Варсонофиева стада. Радуйся, овене, пасыйся на пажитех учений; радуйся, елене, жаждаяй воды упокоения. Радуйся, послушниче прилежный старческих волений; радуйся, ревновавый Ангелом правым произволением. Радуйся, исповедниче Христов, Никоне богомудре. Кондак 4 Якоже дождь на землю жаждущую, тако сниде на тя старческое окормление, темже изнесе земля сердца твоего цветы прекрасныя благочестия, и фимиам благодарения принесл еси Христу, поя молитвенно Ему: Аллилуиа. Икос 4 Послушанием окрылився, преподобне, плоть увядил еси и духом якоже крин во юдоли пустынной процвел еси. Целомудрием и чистотою украсился еси, богоблаженне. Сего ради песенный исплетеся тебе венец: Радуйся, добродетели целомудрия благоухан­ный крине; радуйся, монашеских чинов благовонный шипок. Радуйся, многосветлая свеще проповедания; радуйся, многоплетенный венче богомыслия. Радуйся, розго апостольскаго предания; радуйся, грозде Владычния любве. Радуйся, яко тобою девственнии лицы украша­ются; радуйся, яко тобою иночестии чини утверждаются. Радуйся, исповедниче Христов, Никоне богомудре. Кондак 5 Исповеднический богосветлый венец тебе, отче Никоне, предрече богомудрый старец Варсонофий, иже узами и страдальческою смертию яко камением честным обложен. Ты же, велелепой красоте его дивяся, Христу венчающему тя возопил еси: Аллилуиа. Икос 5 Печали исполнися сердце твое, отче Никоне, егда старец твой завистию диавола от обители изгнан бысть. Обаче осиротел еси токмо лицем, а не сердцем, яко союзом любве к старцу привязан быв. Сего ради сыновнюю твою любовь похваляюще, сице тебе вопием: Радуйся, послушания рачителю известнейший; радуйся, своея воли отсекателю прилежнейший. Радуйся, непоколебимый исполнителю воли старца бывый; радуйся, пламенеющую любовь ему явивый. Радуйся, отчесыновний союз любве показавый богоподражательне; радуйся, любвеобильный пре­емник явивыйся старческия благодати. Радуйся, яко не гонение, ниже смерть разлучи тя от любве твоего старца; радуйся, яко и по смерти с нимже в райских селех водворяешися. Радуйся, исповедниче Христов, Никоне богомудре. Кондак 6 Якоже в сладости райстей в вертограде Оптинстем пожил еси, отче Никоне, плоды наслаждаяся старческого окормления. Темже благоискусно к подвигом исповедническим уготовивый себе, поя избавителю всех Богу: Аллилуиа. Икос 6 Яко кедр ливанский возрасл еси во обители оптинстей, егоже не поколеба буря безбожия, молитвою бо досязал еси небесе, и смиренномудрие, яко корень, воглубил еси в души. Сего ради в сени поучений твоих покоящеся, похвальная тебе зовем: Радуйся, неувядаемая отрасле оптинскаго стар­чества; радуйся, цветоносная ваие предпасхальныя страсти. Радуйся, плоде сладчайший старческаго окор­мления; радуйся, благоуханный крине новаго испо­ведания. Радуйся, яко терноносный шипок был еси для безбожных мучителей; радуйся, яко медоточная розга был еси алчущим истины. Радуйся, яко тобою уничижися гордость безбожия; радуйся, яко тобою возвысися вера православ­ная. Радуйся, исповедниче Христов, Никоне богомудре. Кондак 7 Жертву безкровную в Казанстей церкви совершив последнюю, отче Никоне, егда от безбожников затворени быша храми вси, и сам себе уготовал еси быти жертва одушевленная, Христу пожершемуся нас ради вопия: Аллилуиа. Икос 7 В темницу мрачную ввергоша тя мучителие, яко надеяшася поколебати крепость твоея души, ты же яко адамант пребыл еси непоколебимь, поя благодарно псалмы, темже узилище темничное яко рая пространство вменися тебе. Сего ради великодушию души твоей дивящеся, похвальная тебе зовем: Радуйся, узы темничныя в бисеры себе вменивый; радуйся, похвалу Павлову себе усвоивый. Радуйся, апостольских преданий верный блю­стителю; радуйся, благовестниче Христов всерачительный. Радуйся, по вся дни по глаголу Павла умиравый; радуйся, Бога Жива в себе стяжавый. Радуйся, яко добр воин Христов злопострадав верно; радуйся, яко подвигом исповедническим подвизався законно. Радуйся, исповедниче Христов, Никоне богомудре. Кондак 8 Из темницы изшел еси яко от брачнаго чертога, виссон праведности носяй, венцем верности от Христа увязлся еси, Никоне добропобедне, и страданьми исповедания украсился еси, поя Богу: Аллилуиа. Икос 8 Гонение тебе приключися, яко дух бурен, скорбными бо обстояньми от обители изгнан быв, в лодии телесней легце преминул еси бурю безбожия и блаженныя пристани Христа ради гонимых достигл еси. Сего ради яко тихия волны приступают к тебе хвалы сия: Радуйся, лодии церковныя изрядный управителю; радуйся, богодохновенное ветрило тихих молитв. Радуйся, от потопления греховнаго спасый овцы Христовы; радуйся, от раскола церковнаго избавивый паству твою. Радуйся, яко псалмопением обезгласил еси трубы безбожия; радуйся, яко в пристанище безстрастия достигл еси. Радуйся, яко немокренно шествие твое бысть в мори житейстем; радуйся, яко слезы страждущих в плач по Бозе претворил еси. Радуйся, исповедниче Христов, Никоне богомудре. Кондак 9 Слово Божие по глаголу апостольскому во устех не вяжется, обаче во вся концы вселенныя богогласно сообщается. Сице слово на тебе сбыстся, отче Никоне, яко по широте земли Русския промчася богокрасное исповедание твое, в немже пел еси Христа, зовый: Аллилуиа. Икос 9 Страны северныя достигл еси, отче богоносе, и подвиг странничества усугубил еси на Архангельстей земли, житие показав равноангельное, многострадальне отче. Сего ради слышиши сия похвалы: Радуйся, яко многи скорби претерпел еси несмущенным духом; радуйся, яко поношение приял еси ради Господа Иисуса. Радуйся, на земли скитаяся, небо обретый отверсто; радуйся, землю освятивый, в гроб зашед безвестно. Радуйся, яко равноангельную восприял еси славу; радуйся, яко посрамил еси безбожия державу. Радуйся, страннолепно на земли житие скончавый; радуйся, на небеси новое житие начавый. Радуйся, исповедниче Христов, Никоне богомудре. Кондак 10 Яко Божественною утварью, исповеданием твоим Церковь Русская украсися, и чин иноческий светоносным просветися благочестием твоим. Сего ради яко свещник тя зрим, отче Никоне, богоразумием на тверди церковней сияяй, и от души прославльшему тя Христу поем: Аллилуиа. Икос 10 Пастырскою свирелию исповедания твоего заградил еси уста безбожия и овцы разсеянныя стада Христова на пажити благочестия воспитал еси. Темже в кров твоего пастырскаго прибегающе заступления, от души умильно тебе вопием: Радуйся, раскола церковнаго верный устранителю; радуйся, единства духовнаго богомудрый подателю. Радуйся, яко пастырь сый добрый, за овцы сло­весныя душу положивый; радуйся, яко агнец сый непорочный, мечем девства сласть любодейства заклавый. Радуйся, яко старческим окормлением люди оз­лобленныя утешил еси; радуйся, яко богомудрыми советы свет во тьме духовней возвестил еси. Радуйся, башне крепкая православных догматов; радуйся, трубо благозвучная благочестивых нравов. Радуйся, исповедниче Христов, Никоне богомудре. Кондак 11 Благоухание Христово бысть житие твое, отче Никоне, в стране Российстей, испущающее ароматы богомудрых речений твоих, и воня в смерть твое исповедание познася, имже прозябения безбожнаго неверия увядил еси. Сего ради неумолкаемую песнь стяжал еси к Богу, поя Ему: Аллилуиа. Икос 11 Сердце яко скрижаль богописану стяжал еси, отче Никоне, ум якоже небо ясное, резцем послушания красоту монашества изобразив и Славу Божию твоим исповеданием возвестив. Сего ради Оптиной пустыни явился еси похвала и утверждение, в нейже услыши приносимыя тебе песнопения: Радуйся, исповедников Российских звездо светозарная; радуйся, монашествующих кроткий утеши­телю. Радуйся, сыне старческих благословений; радуйся, наставниче богомудрых речений. Радуйся, некрадомое сокровище оптинских преданий; радуйся, скрижале, писанная богомудрыми отцами. Радуйся, яко отраду подаеши во узилищех сущим; радуйся, яко сшественник бываеши гонимым ради Господа Иисуса. Радуйся, исповедниче Христов, Никоне богомудре. Кондак 12 Постное течение совершив, житие монашеское украсил еси исповеданием, добропобедне Никоне, и лествицею добродетелей небесный обретый восход, скончал еси страдальчески шествие твое, Богу со многим дерзновением представ, песнь преславную поя: Аллилуиа. Икос 12 Яко кимвал доброгласный житие твое явися, добродетельми красно бряцающее, и яко труба богогласная исповедание твое, добропобедне Никоне, познася. Мы же, яко дел отнюд не имуще, медь звенящая токмо являемся, и яко воздух биюще обретаемся, обаче на помощь твою надеющеся, любовию тебе зовем: Радуйся, православия тимпане звоногласный; ра­дуйся, Церкве немолчная и сладкая уста. Радуйся, кифаро старческих поучений; радуйся, кротости песне ко иноческим ушесам. Радуйся, яко сын громов, благовествовал еси Евангелие; радуйся, яко глас, вопиющий в пустыне, проповедал еси нам покаяние. Радуйся, яко тобою побеждаем супротивная пол­чища; радуйся, яко тобою сликовствуем новомученическому воинству. Радуйся, исповедниче Христов, Никоне богомудре. Кондак 13 О Никоне треблаженне, иже путь на земли добре скончав и веру соблюд, и течение твоих красных ног устремив к небесному шествию. Исправи наша стези к деланию заповедей Божественных, да мимоходим сетей диавольских, но о всем преключшемся смиренномудренно поем Богу: Аллилуиа.[Се́й конда́к глаго́лется три́жды.][Далее повторяем 1‑е икос и кондак:]Икос 1 От младенства твоего тайну Воскресения постигнувый, егда умершу ти, отче мудре, молитвами матере твоея паки к жизни возвратился еси. Сего ради таковому чуду удивившеся, велегласно тебе зовем: Радуйся, молитвами матере от уст адских восхищеный; радуйся, радость воскресения еще в младенстве познавый. Радуйся, твоим благочестием смерти жало при­тупивый; радуйся, твоими чудодействы о животе вечнем возвестивый. Радуйся, дважды избегнувый смерти горчайшия; радуйся, яко сладости райския сугубо ныне причащаешися. Радуйся, велегласная труба воскресения; радуйся, сладкозвучный органе безсмертия. Радуйся, исповедниче Христов, Никоне богомудре. Кондак 1 Избранный исповедниче оптинский, благодати старческия наследниче, воине духовный и монахов изрядный наставниче. Похвальная приносим тебе пение. Ты же, яко имея ко Христу велие дерзновение, молися о нас, любовию тебе зовущих: радуйся, исповедниче Христов, Никоне богомудре. Молитва Преподобному Никону исповеднику О, Никоне священне, о преподобне наш отче, старчества Оптинскаго светлый венче и новомучеников Русских благовонный цвете! Ты первее постническими труды душу твою очистив, демонская ополчения посрамил еси, послушанием, яко быстротечную лествицею на верхи добродетелей достигл еси и веры благославный исповедник явился еси. В годину же гонений безбожных терпением мужески облеклся еси, и яко пастырь добрый и яко истинный сын старцев Оптинских люди страждущия принимал и утешал еси. Сего ради от богоборных многия скорби претерпел еси и во изгнание осужден был еси, но якоже тогда от паствы твоея духом не отлучился, но пастырскую свирелию молитв твоих добре упасл еси овцы твоя, сице и ныне, не отступай от чад твоих духом твоим, но присно с нами пребывай, да укрепляеми тобою, веру истинно сохраним и заветы Оптинских старцев вседетельне исполним. Паче же моли Всеблагаго Господа нашего Иисуса Христа, да утвердит в Православии Церковь нашу, Отечество и люди, да сохранит обители монашеския, верныя обетом иноческим, да дарует нам прощение грехов и покаяние истинное, да очистившеся тем, возлюбим еже есть едино на потребу: прилеплятися Христу Богу и Спасу нашему всем сердцем, всем помышлением, всею волею и всем чувством ничтоже любя от похотей мира сего и тако от сетей миродержителя тьмы века сего избавляющеся, во смирении воспоем и прославим всесвятое имя Отца и Сына и Святаго Духа ныне и присно и во веки веков. Аминь.

Кондак 1 Взбраннаго Христова воина днесь дерзаем ублажити тя, преподобне Иове! Ты бо в терпении мнозе претек житие, прилоги врагов раззорил еси и страданием украсився, угоден Богови явился еси, Емуже на Небесех предстоя, выну молишися о вопиющих тебе таковая: Радуйся, Иове, присный наш споспешниче, Ущельский чудотворче. Икос 1 Ангелообразным Богови угоден житием, воистинну ищущым спасения светильник явился еси, преподобне Иове, ихже ради обитель создав, Мезенскую страну от лютаго миродержца свободил еси. Темже ти вопием: Радуйся, мира славою не уязвленный. Радуйся, в обители Соловецтей игу Христову подклонивыйся. Радуйся, яко тамо, плоть умертвив, духом просветился еси. Радуйся, яко последи в Мезенстей стране водворился еси. Радуйся, яко ту, на спасение людей, обитель Ущельскую соградил еси, в нейже в подвизех добрых до конца подвизался еси. Радуйся, в скончании жития добрый страдальче. Радуйся, Иове, присный наш споспешниче, Ущельский чудотворче. Кондак 2 Видяй, преподобне Иове, яко мира красная ни во что же вменяются, куплями к тому житейскими не обязался еси. Обаче, духом влеком, во обитель прешед Соловецкую, Христови единому поработати возжелал еси, смиренно поя: Аллилуиа. Икос 2 Разум Христов стяжавая во обители преподобных отец посты и молитвами плоть истончив, дух же окрилив, в меру возраста исполнения Христова достигл еси, преподобне Иове, сего ради рцем: Радуйся, Христову стаду приобщивыйся. Радуйся, во бдении не ослабевый. Радуйся, унынием не преодоленный. Радуйся, терпением в подвизех укрепивыйся, и всеми добродетельми украсивыйся. Радуйся, высоту подвигов утаевавый смирением, пребываяй в молчании. Радуйся, темже всея братии любимиче. Радуйся, Иове, присный наш споспешниче, Ущельский чудотворче. Кондак 3 Силу благодати, яко спасения шлем, веру аки щит восприяв, чресла истиною препоясав, всякое искушение отразил еси, преподобне Иове, духовным мечем, иже есть Божий глагол: Аллилуиа. Икос 3 Имеяй выну Крест Христов пред очима, муж желаний духовных неложно явился еси, преподобне Иове. Всех бо твоя исправление, паче солнца светлейшая, воздвизаша вопити тебе: Радуйся, Зосимы, Савватиа и Германа воспитание дивное. Радуйся, Антониа и Иринарха чадо всехвальное. Радуйся, Елеазара, Елиссеа и Диодора сподвижниче. Радуйся, ангелозрачнаго воинства совоителю, и в пагубу ловчих сетей раззорителю. Радуйся, яко миру незримый, о мире ходатай явился еси. Радуйся, яко о свершении всякаго блага усердно молился еси. Радуйся, Иове, присный наш споспешниче, Ущельский чудотворче. Кондак 4 Бурю греховную, миром воздвизаемую, Христос утишити хотяй, трапезе своей предстояти сподоби тя, преподобне Иове. Ты же, достойне жертву святую творя, исцеляя недуги благодарными усты воспевал еси Ему: Аллилуиа. Икос 4 Слыша владыка Исидор прошение братии, видев же свет добродетелей твоих, преподобне Иове, священства тебе удостои, егоже ради усугубил еси подвиги воздержания братии служением, приемля от всех сицевая: Радуйся, Святейшаго чистый служителю. Радуйся, непорочный Тела и Крове Его преподателю. Радуйся, о грешницех ходатаю. Радуйся, скорбящым утешение. Радуйся, яко молитва твоя на путь всех благий наставляше. Радуйся, яко усопших сия лютых мытарств свобождаше. Радуйся, Иове, присный наш споспешниче, Ущельский чудотворче. Кондак 5 Боготечный, аки древле звезда, ко Христови приведением мудрецы от Восток просветившая, к Мезенстей стране устремился еси, преподобне Иове, идеже Рождшуся от Девы дом молитвы создав, научил еси вся смиренно пети Ему: Аллилуиа. Икос 5 Видяще, страны тоя людие, яко древняго Иова сбыстся упование, егда искупитель за ны явися Христос, о пришествии твоем веселяхуся. Христу бо верно служити учай, Иов новый явился еси, преподобне, слыша от всяких таковая: Радуйся, звавших тя услышавый. Радуйся, яко мразныя страны, духом горяй, не убоялся еси. Радуйся, во благо людем тоя изнесый благодать искупления. Радуйся, исповедания неложнаго научителю. Радуйся, жития богоугоднаго наказателю. Радуйся, светильниче, егоже дому Владыка не скры. Радуйся, Иове, присный наш споспешниче, Ущельский чудотворче. Кондак 6 Проповедник Христова учения делами вся словеса оправдал еси, преподобне Иове. Живый бо в Мезенстей стране, людем глаголя, яко добрыми делы благоугождается Бог, первее сия сотворил еси сам, Жизнодавцу Христу смиренно поя: Аллилуиа. Икос 6 Возсияв, яко солнце, в полунощней стране, светом твоих добродетелей, многих привлекл еси, преподобне Иове, иже крестом плоть распяв, чужди мирови, о Христе восхваляху тебе: Радуйся, Христовы любве исполнение. Радуйся, образе надежды крепкия. Радуйся, в горняя управителю. Радуйся, благочестия страны утвердителю. Радуйся, аки столп светел, имже демоном путь во страну заградися. Радуйся, аки лествица, еюже к небесем открыся восхождение. Радуйся, Иове, присный наш споспешниче, Ущельский чудотворче. Кондак 7 Спасения ради сошедшихся обитель Ущельскую соградил еси, преподобне Иове. Христова Рождества ю храмом украсив, иноческаго жития уставы утвердил еси, да иноцы, неблазненно живуще, выну Богови поют: Аллилуиа. Икос 7 Новая купель Силоамская бысть обитель твоя, преподобне Иове. В нейже язвами греха изможденнии душы мир улучаху, по слову Христову живуще: «Иже ити по Мне хощет, да отвержет себе, и взем крест свой, Мене вслед грядет: иго бо благо и бремя Мое есть легко». Темже чтим тя, глаголюще: Радуйся, пастырю добрый, душу за овцы своя полагавый. Радуйся, сеятелю добраго семене, слова Христова. Радуйся, яко сие на ниву благую паде. Радуйся, яко тем израсте благочестия древо. Радуйся, яко избранным плодом соградил еси кошницу. Радуйся, яко Церкве Зиждителя трудом приобщился еси. Радуйся, Иове, присный наш споспешниче, Ущельский чудотворче. Кондак 8 Странное явися видение, яко тоя быв начальник обители, тяжкия труды приимал еси, преподобне Иове. Во плоти бо, яко безплотен, в постех и молитвах живый, ничтоже себе недостойно возмнил еси, выну сладце Христови поя: Аллилуиа. Икос 8 Всем единожды братием на селе трудящымся, един, обитель блюдяй, помышлял еси в себе, преподобне Иове: трава яко дние суть наши, яже ожестеет и изсхнет, и множае в них труд и болезнь, егда приидоша разбойницы, о нихже помышляюще со страхом, ти рцем: Радуйся, ангельскаго образа блаженный носителю. Радуйся, иноком братием независтный содетелю. Радуйся, трудником образе. Радуйся, яко тобою труд всякий освятися. Радуйся, яко тем праздность гордых обличися. Радуйся, обители своея даже до крове защитниче. Радуйся, Иове, присный наш споспешниче, Ущельский чудотворче. Кондак 9 Всякия исполньше радости, о сокровищех разбойницы вопрошаху тя, преподобне Иове; имже противустал еси кротце глаголя: «Чадца, ничесоже сих имамы: нам Христос есть едино сокровище, во еже жити о нем и умрети, смиренно поя во трудех: Аллилуиа. Икос 9 Витийством твоим посрамленнии ничесоже пояти могуще, сии сердце свое озлобиша на тя преподобне Иове. Жгуще бо тя, нещадно влачаху, пхаху, бияху, яко тело твое, постом изсушенное, раздирашася, кровь же твоя напаяше сию освященную землю. Зряще сия умиленно вопием ти: Радуйся, яко дадеся ти область страдания. Радуйся, яко терпением губителей уничижил еси. Радуйся, яко малодушным мужества образ явился еси. Радуйся, яко в страдании Творца не укорил еси. Радуйся, яко диавола древнюю лжу паки обличил еси. Радуйся, Иова Тидийскаго достойный соименниче. Радуйся, Иове, присный наш споспешниче, Ущельский чудотворче. Кондак 10 Спасл еси тела страданием душу твою, преподобне Иове, терпением бо твоим изможденнии разбойницы ти усекоша главу, и тело повергше, отъидоша в погибель. Ты же Христови представ, с лики старцев Ему вопиеши: Аллилуиа. Икос 10 Стену тя имущи, узрев же убиена, ужасеся о сем братия, привлачащи окрестная плачем. Егда купно вси соидошася, честне тело твое погребоша, к немуже притекающе, молитвы творяще, вопияху тебе: Радуйся, страдания светлое совершение. Радуйся, яко руце твои мечу не прикоснушася. Радуйся, яко седины твоя кровию за ны обагришася. Радуйся, яко усечением главы тайна жития твоего запечатлеся. Радуйся, яко душа твоя ангелы на небеса возведеся и Цареви предста. Радуйся, яко в ризы брачныя одеявся, Христу, на Фаворе преобразившуся, уподобился. Радуйся, Иове, присный наш споспешниче, Ущельский чудотворче. Кондак 11 Пение Рожденному от Девы благодатныя иереи и вси людие принесоша велие, зряще, яко по мнозех летех нетленно тело твое соблюдеся, чудесы же источая, научи вся вопити о тебе: Аллилуиа. Икос 11 Светозарен, яко сияние небес, чудесы, аки света столпы облистал еси, преподобне Иове, мрачную страну; теплыми же Богови молитвами хлад тоя испразднил еси, от любящих тя приемля сердец таковыя хвалы: Радуйся, сияние мрака силы разгоняющее. Радуйся, луно, умирение душам подающая. Радуйся, пустыни мразныя согреяние и вихрей хладных утишение. Радуйся, океана-моря украшение, в немже плавающих от потопления спасаеши. Радуйся, яко от бесов дручимых свобождаеши и всякия недуги целиши. Радуйся, яко звезда и нам путь указует твое житие. Радуйся, Иове, присный наш споспешниче, Ущельский чудотворче. Кондак 12 Благодати причастник, чудеса показуеши всем, преподобне Иове, яко присныя ти не оставляеши, обаче со святыми усердно моляся о нас, козни злых раззоряеши муринов, победне Цареви поя: Аллилуиа. Икос 12 Песньми превозносяще Христа, Емуже послужив, приложился еси Церкве Святых, яже бо, зрящи на текущыя, спасения ищущым велие творит вспоможение, сице тя величаем: Радуйся, Троице Единосущныя предстоятелю, в райских кущех радости великия наслаждаяйся. Радуйся, Рождшия Сына Божия ублажателю. Радуйся, Симеонови и Анне со Предтечею соутешенный. Радуйся, Иова Многострадальнаго совсельниче. Радуйся, всем святым сотаинниче. Радуйся, яко на земли тя чтущыя призираеши и моления сих любезне приемлеши. Радуйся, Иове, присный наш споспешниче, Ущельский чудотворче. Кондак 13 О преподобне отче наш Иове! Вечно живый в невечернем дни Царствия Христова, умоли всех Владыку, да верою тя ублажающе, молитвами твоими, наше житие преобразив во благое, тояжде причастимся благодати, во веки поюще Искупившему нас: Аллилуиа.[Се́й конда́к глаго́лется три́жды.][Далее повторяем 1‑е икос и кондак:]Икос 1 Ангелообразным Богови угоден житием, воистинну ищущым спасения светильник явился еси, преподобне Иове, ихже ради обитель создав, Мезенскую страну от лютаго миродержца свободил еси. Темже ти вопием: Радуйся, мира славою не уязвленный. Радуйся, в обители Соловецтей игу Христову подклонивыйся. Радуйся, яко тамо, плоть умертвив, духом просветился еси. Радуйся, яко последи в Мезенстей стране водворился еси. Радуйся, яко ту, на спасение людей, обитель Ущельскую соградил еси, в нейже в подвизех добрых до конца подвизался еси. Радуйся, в скончании жития добрый страдальче. Радуйся, Иове, присный наш споспешниче, Ущельский чудотворче. Кондак 1 Взбраннаго Христова воина днесь дерзаем ублажити тя, преподобне Иове! Ты бо в терпении мнозе претек житие, прилоги врагов раззорил еси и страданием украсився, угоден Богови явился еси, Емуже на Небесех предстоя, выну молишися о вопиющих тебе таковая: Радуйся, Иове, присный наш споспешниче, Ущельский чудотворче. Молитва преподобному Иову, Ущельскому чудотворцу Преподобне отче наш Иове, молитвою твоею и верою и любовию и чистотою сердца еще на земли во обитель Предвечнаго Бога Слова душу свою устроивый и мечным от разбойник усечением главы твоея житие запечатлевый, по отшествии же твоем от земных наипаче к Богу приближивыйся, но и от нас духом любве твоея не отступивый, и честныя твоя мощи, яко сосуд благодати полный, нам оставивый. Велие имея дерзновение ко Всемилостивому Владыце, моли Его спасти ны верующыя и к тебе с любовию и теплою молитвою притекающыя. Ходатайствуй пред Ним: страждущую страну Российскую от лютых безбожник и власти их да свободит, и да возставит престол православных правителей: верных рабов Его, в скорби и печали день и нощь вопиющих к Нему, многоболезный вопль да услышит и да изведет от погибели живот наш. Испроси нам у Великодаровитаго Бога нашего всякий дар, коемуждо благопотребен во спасение, веры непорочны соблюдение, градов наших утверждение, мира умирение, от нашествия иноплеменных избавление, от глада и пагубы сохранение, младенцем воспитание, юным наставление, сиротам и вдовицам заступление, скорбящым утешение, по морю плавающым, хладныя пустыни и темныя дебри преходящым верное ко пристанищу приведение, недугующым исцеление, бесным от демонскаго нашествия свобождение, падшым во грехи покаяние и возстание, от Церкви Христовы отпадшым вразумление и на путь спасения возвращение, подвизающымся укрепление, благоделающым в делех благих преспеяние и благословение, отходящым от сего временнаго жития к вечному благое напутствие, отшедшым блаженное упокоение. О священная главо! Посети место сие святое, древле кровию твоею честною обагренное и омовенное: соблюди и укрепи молитвами твоими обитель твою, разшири ю, украси добродетельми тоя сестры, и вся притекающыя к тебе добре сохрани во веки веков. Аминь. Молитва иная О преподобне и богоносне отче наш Иове! Велие имея к Богу дерзновение, молися непрестанно о всех нас, зане буря многих бед и скорбей обдержит ны: се бо недузи телеснии, болезни душевныя, приражения вражия обуревают ны. Ходит бо враг наш, иский кого поглотити: мы же о спасении нашем нерадяще, несмы достойни ниже воззрети на высоту небесную, ни Господа в помощь свою призвати. Но ты буди нам помощник во спасение скорый и от зол избавитель неодолимый. Подаждь нам память смертную, слезы покаяния и надежду спасения, да не в отчаяние впадем, ниже дерзостным на милосердие Божие упованием, во гресех же пребыванием, в конец себе погубим: но да будет нам память грехов наших во источник теплых слез и сокрушения сердечнаго, милосердие же Божие и благодать Его во спасение наше, молитвами твоими, да подастся нам твоим чадом, во веки веков. Аминь. Молитва третья О преподобне отче и богоносне наш Иове! Предстоя Престолу Пресвятыя Троицы, молися непрестанно: страждущую страну Российскую от лютых безбожник и власти их да свободит, и да возставит престол православных правителей: верных рабов Его, в скорби и печали день и нощь вопиющих к Нему, многоболезный вопль да услышит и да изведет от погибели живот наш: да ходим кийждо достойно звания нашего, в немже звани быхом, и да будет земля наша добра, и вси живущии на ней род избран, царское священие, язык свят, людие обновления, ныне и присно и во веки веков. Аминь.

Кондак 1 Возбранному подвижнику от Господа Сил, вечною славою достойно увенчанному, яко препобедившему в житии своем суетную мира сего прелесть и стяжавшему преизобильную Духа Святаго благодать, похвальное пение приносим ти, чтуще твою память, блаженне Иларионе, ты же яко имеяй дерзновение ко Господу, от всяких бед свобождай нас, зовущих ти: Радуйся, преподобне Иларионе, отче наш милостивый. Икос 1 Ангелом, непрестанно на Небеси славящым Творца и Владыку всех Бога, уподобился еси на земли, блаженне Иларионе: тину бо страстей плотских отряс и в ризу чистоты светлейшую облеклся еси, быв воистинну во плоти ангел. Тем же и ныне в небесных чертозех со ангелы и всеми святыми ликовствуя, радуешися нетленною радостию и веселишися светло. Мы же яко дивнаго угодника Божия тя почитающе, зовем ти: Радуйся, ангелов невещественнаго пребывания ревнителю. Радуйся, благий и верный Царя Славы Господа служителю. Радуйся, ангелов достойный собеседниче. Радуйся, славы святых сонаследниче. Радуйся, праведных сподвижниче. Радуйся, мучеников сопричастниче. Радуйся, яко Царю Небесному предстоя, о всех нас тепле к Нему ходатайствуеши. Радуйся, яко благоутробие Его о всех чтущих память твою, умилостивляеши. Радуйся, преподобне Иларионе, отче наш милостивый. Кондак 2 Видя преходящаго и тленнаго мира сего суету, причастник быти нестареющия и вечныя жизни вожделел еси, сего ради дом твой и Отечество оставив, во обитель дивнаго Евфросина притекл еси, поя присносущному Богу: Аллилуиа. Икос 2 Разум горний разумети ища, плотский разум отвергл еси: постом и молитвою страсти плотския умертвив, дух твой к приятию божественныя истины уготовал еси, темже божественнаго разума огнем душу просветив, во всем подражатель Христу был еси. В том же убо разуме настави и нас, зовущих ти: Радуйся, мир и вся его прелести оставивый. Радуйся, горнее Отечество обретый. Радуйся, к Богу разум твой превозвысивый. Радуйся, горнее любомудрие возлюбивый. Радуйся, телесныя любве удаливыйся. Радуйся, Богу Всещедрому присвоивыйся. Радуйся, яко во благочестии жити нас возбуждаеши. Радуйся, яко на путь спасения нас наставляеши. Радуйся, преподобне Иларионе, отче наш милостивый. Кондак 3 Силою свыше укрепляемь, демонския козни сокрушил еси, блаженне, крестом бо вооруживыйся, егоже образ в сердцы своем всадил еси, мрачныя силы вражия силою того дерзостно сокрушил еси, поя укрепляющему тя Богу: Аллилуиа. Икос 3 Имея ревность многу о Господе во еже Ему Единому послужити, всякаго мирскаго пристрастия чужд был еси, отвергся бо себе и взем крест свой последовал еси Христу: душу же твою Христа ради и Евангелиа отщетив, тем убо спасал еси ю. Сего ради ублажающе тя вопием: Радуйся, Господеви поработати пламенне вожделевый. Радуйся, Христа паче всех возлюбивый. Радуйся, от юности Христу последовавый. Радуйся, благое иго Христово на рамена твоя вземый. Радуйся, крепость невидимых врагов сокрушивый. Радуйся, крепости божественныя исполнена себе явивый. Радуйся, яко от козней вражиих нас защищаеши. Радуйся, яко Христу последовати нас научаеши. Радуйся, преподобне Иларионе, отче наш милостивый. Кондак 4 Бурею помышлений сумнительных ни единою смущаемь был еси, преподобне, егда вся красная мира сего оставив, тесным и многотрудным путем к Царствию Небесному шествовати обет дал еси, верою мужественно сея бури ярость укрощал еси, паки и паки вопия Богу: Аллилуиа. Икос 4 Слыша глас Господа глаголюща: «Бодрствуйте и молитеся, да не внидите в напасть, дух бо бодр, плоть же немощна есть», во бдениих и молитвах непрестанно пребывал еси, всяку напасть теми отгоняя и немощь естества человеческаго побеждая. Темже молимся ти: твоими молитвами от всяких напастей избави и нас зовущих ти: Радуйся, возстания телесная поправый. Радуйся, на высоту добродетелей возшедый. Радуйся, воздержанием житие твое украсивый. Радуйся, блаженную жизнь обретый. Радуйся, плотския желания постом увядивый. Радуйся, божественному безстрастию поревновавый. Радуйся, яко подвигом добрым подвизался еси. Радуйся, яко веру непоколебимую соблюл еси. Радуйся, преподобне Иларионе, отче наш милостивый. Кондак 5 Светозарною звездою предносящымся мысленному твоему взору, образом Царствия водим, обитель преподобнаго Евфросина оставил еси и в пустынней дебри при реце Желче вселился еси, пустынное безмолвие огласив пением: Аллилуиа. Икос 5 Видя мысленныма очима Начальника веры и Совершителя Иисуса, иже вместо предлежащия Ему радости претерпе Крест, всего себе принесл еси Богу жертву живую, чистую, угодную. Мы же, помышляюще подвиги твоя и труды, имиже Господеви хотя угодити, трудился еси, прославляем тя тако: Радуйся, Царствие Божие внутрь себе восхитивый. Радуйся, в бреннем телеси райскую сладость предвкусивый. Радуйся, плоти мудрование умертвивый. Радуйся, духом премудро поживый. Радуйся, воине Христов добропобедный. Радуйся, Небеснаго Владыки рабе благий и верный. Радуйся, яко в радость Господа твоего вшел еси. Радуйся, яко венец нетленный от Него приял еси. Радуйся, преподобне Иларионе, отче наш милостивый. Кондак 6 Проповедник богоносный евангелския истины показался еси преподобне Иларионе, не точию бо словом, паче же самым делом дивнаго жития твоего проповедал еси людем, како подобает Господеви служити: в воздержании, в чистоте, в молитвах сердечных и пети Ему: Аллилуиа. Икос 6 Возсиял еси премудростию, яко многосветлое светило, от истиннаго солнца правды Христа озаряемь. Темже мрак неразумия и нерадения находящий на ны, отжени от нас, зовущих ти: Радуйся, светом божественным просвещенный. Радуйся, добротою вседетельнаго и Святаго Духа украшенный. Радуйся, заповедей Господних верный исполнителю. Радуйся, чистоты душевныя и телесныя строгий блюстителю. Радуйся, правило веры и благочестия. Радуйся, яко труждающымся еси предивное поможение. Радуйся, яко скорбящым еси претихое утешение. Радуйся, Озерския веси священное украшение. Радуйся, преподобне Иларионе, отче наш милостивый. Кондак 7 Хотя плотских уз свободитися и духом пожити, подвигом добрым подвизался еси, богоносне: в терпении, в трудех, в пощениих, в бдениих непрестанно пребывая. Сего ради, видяще добрая твоя дела, прославляем Отца, иже есть на Небесех, поюще Ему: Аллилуиа. Икос 7 Новаго подвижника благочестия видевше тя мнози христолюбцы, якоже и ты горняго града взыскующе, к тебе прихождаху, да под твоим водительством поживут благоугодно. Сего ради обитель и храм Покрова Пресвятыя Богородицы создал еси и был еси наставник иноком премудрый и игумен добрый. Темже к высоте небесней возведи и нас, поющих ти: Радуйся, образ терпения еже по Бозе и молитвы непрестанны показуяй. Радуйся, на небеси, а не на земли сокровище наше искати нас научаяй. Радуйся, крине райскаго прозябения, в пустыни преславно процветый. Радуйся, цвете божественнаго саждения, весь Озерскую тобою украсивый. Радуйся, сосуде божественный воздержания. Радуйся, богатство некрадомо благочестия. Радуйся, яко притекающым к тебе спасения еси ходатай. Радуйся, яко прибегающым к тебе увеселение еси и отрада. Радуйся, преподобне Иларионе, отче наш милостивый. Кондак 8 Дивное житие пожил еси, преподобне, от юности твоея шествуя трудолюбно по стопам заповедей Господних, и тако старости честныя и седины маститыя достигл еси, всяческими добродетельми украшен, Богу на всяк день воспевая: Аллилуиа. Икос 8 Весь Богу освятился еси и еже со Христом быти паче всех вожделел еси. Темже и при скончании жития твоего страха смертнаго чужд был еси: егда же разлучашеся душа твоя блаженная от телесе, тогда светел лицем был еси, и тако радуяся, преставился еси ко Господу, да всегда пребудеши с Ним. Сего ради ублажаем тя звании сими: Радуйся, нощь жития сего всемудро прошедый. Радуйся, невечерний день Царствия Небеснаго постигнувый. Радуйся, светом вечныя жизни достойно оболкийся. Радуйся, во блаженных обителех божественныя трапезы сподобивыйся. Радуйся, Духа Святаго святилище благолепнейшее. Радуйся, благодати божественныя сосуде чистейший. Радуйся, яко Господним видением ныне наслаждаешися. Радуйся, яко Того светлостию невозбранно насыщаешися. Радуйся, преподобне Иларионе, отче наш милостивый. Кондак 9 Всякое естество ангельское радовашеся о тебе, зря, яко невещественное житие на земли показал еси, и во плоти яко безплотен явился еси, сего ради небесным силам сопричастен, Престолу Господа Царя Славы ныне предстоиши, со ангельскими лики воспевая Ему: Аллилуиа. Икос 9 Витии многовещанныя не возмогут изрещи, яже уготова Бог любящым Его: ихже око не виде, и ухо не слыша и яже на сердце человеку не взыдоша. Ты же, блаженне отче, ныне наслаждаяся сих изобильно, не забуди твоею любовию и нас, зовущих ти: Радуйся, нетленных благ небесных наследниче. Радуйся, вечныя жизни причастниче. Радуйся, неизреченную Божию славу присно созерцаяй. Радуйся, во свете невещественном непрестанно пребываяй. Радуйся, райскаго наслаждения умнаго сподобивыйся. Радуйся, нетленныя и божественныя славы удостоивыйся. Радуйся, благодатию Божиею недужным исцеление подаеши. Радуйся, яко силою Вышняго всем нуждающымся вспомощствуеши. Радуйся, преподобне Иларионе, отче наш милостивый. Кондак 10 Спасти хотя от отчаяния и пагубы верою к тебе притекающыя, приклонял еси им милосердие Владыки, сего ради отцы наши издревле научишася яко заступника в бедах и напастех и чудотворца предивнаго тя почитати, Богу же чрез тебе чудодеющему воспевати: Аллилуиа. Икос 10 Стена еси и ограждение всем к заступлению твоему прибегающым. Тем же буди стена крепкая и ограждение непреоборимое и нам, милостиваго твоего заступления просящым и почитающым тя звании сими: Радуйся, немощей наших безмездный целителю. Радуйся, в скорби и печали сущым скорый утешителю. Радуйся, преславный в бедах заступниче. Радуйся, превеликий в напастех защитниче. Радуйся, предстателю пред Богом непостыдный. Радуйся, чудесы от Господа прославленный. Радуйся, яко по успении твоем нас сущих на земли не оставляеши. Радуйся, путеводителю, всех к Небеси направляяй. Радуйся, преподобне Иларионе, отче наш милостивый. Кондак 11 Пение дивное слышаша иногда людие и свещы горящыя видеша в храме, идеже честныя мощи твоя почивают, обители, юже создал еси, запустевшей и службе преставшей: сими же знаменми возбуждаеши христоименитыя люди, да потщатся храм святый возсоздати и службы Божия в нем уставити, да верных соборища Дивному во святых Богу со умилением воспевают: Аллилуиа. Икос 11 Светоносная память твоя, божественне Иларионе, возсия нам пресветлыя лучи исправлений твоих: страстей убо наших отгоняеши облак и к свету благочестия наставляеши нас, иже совершающе память твою, верою и любовию блажим, взывающе: Радуйся, светильниче, огнем божественным возженный. Радуйся, благодатию Божиею просвещенный. Радуйся, заре, верным путь жизни освещающая. Радуйся, звездо, в нощи греховней заблуждшим сияющая. Радуйся, благодатных исцелений неоскудеваяй источниче. Радуйся, люте страждущым милостивый помощниче. Радуйся, яко во светлостех святых пребываеши. Радуйся, яко со избранными Божиими купно торжествуеши. Радуйся, преподобне Иларионе, отче наш милостивый. Кондак 12 Благодать Пресвятаго Духа испроси нам, преподобне Иларионе, у Всещедраго Бога и Спаса нашего, вразумляющую и укрепляющую нас во спасение, да уклоняющеся от путей нечестия и заблуждений, ходим во свете заповедей Божиих и тако вечнаго блаженства в Царствии Небеснем достигнем, воспевающе Богу: Аллилуиа. Икос 12 Поюще славное житие твое, подвиги же дивныя и чудотворения, от тебе являемая, ублажаем тя, отче Иларионе, яко угодника Божия преподобнаго и чудотворца предивнаго. Ты же Богу предстоя, присно поминай нас любовию совершающих память священную твою и всечестную, и во смирении зовущих ти таковая: Радуйся, по достоянию от Господа возвеличенный. Радуйся, за смиренномудрие от Него превознесенный. Радуйся, благочестия столпе непоколебимый. Радуйся, в бедах и напастех сущым поборниче крепкий. Радуйся, чтущих тя наставниче благодатный. Радуйся, притекающих к тебе покровителю благонадежный. Радуйся, яко блаженную жизнь наследовал еси. Радуйся, яко дар чудотворений от Господа приял еси. Радуйся, преподобне Иларионе, отче наш милостивый. Кондак 13 О, пресветлый угодниче Христов, преподобне отче наш Иларионе, песненное наше приими приношение и молитвами твоими испроси нам у Господа прощение и оставление грехов и прегрешений наших и велию Его милость, да всяких зол избегше в сей жизни, гибели горькия избавимся и в будущем веце, Царствие же Небесное улучим, со дерзновением воспевающе: Аллилуиа.[Се́й конда́к глаго́лется три́жды.][Далее повторяем 1‑е икос и кондак:]Икос 1 Ангелом, непрестанно на Небеси славящым Творца и Владыку всех Бога, уподобился еси на земли, блаженне Иларионе: тину бо страстей плотских отряс и в ризу чистоты светлейшую облеклся еси, быв воистинну во плоти ангел. Тем же и ныне в небесных чертозех со ангелы и всеми святыми ликовствуя, радуешися нетленною радостию и веселишися светло. Мы же яко дивнаго угодника Божия тя почитающе, зовем ти: Радуйся, ангелов невещественнаго пребывания ревнителю. Радуйся, благий и верный Царя Славы Господа служителю. Радуйся, ангелов достойный собеседниче. Радуйся, славы святых сонаследниче. Радуйся, праведных сподвижниче. Радуйся, мучеников сопричастниче. Радуйся, яко Царю Небесному предстоя, о всех нас тепле к Нему ходатайствуеши. Радуйся, яко благоутробие Его о всех чтущих память твою, умилостивляеши. Радуйся, преподобне Иларионе, отче наш милостивый. Кондак 1 Возбранному подвижнику от Господа Сил, вечною славою достойно увенчанному, яко препобедившему в житии своем суетную мира сего прелесть и стяжавшему преизобильную Духа Святаго благодать, похвальное пение приносим ти, чтуще твою память, блаженне Иларионе, ты же яко имеяй дерзновение ко Господу, от всяких бед свобождай нас, зовущих ти: Радуйся, преподобне Иларионе, отче наш милостивый. Молитва преподобному Илариону, Псковоезерскому чудотворцу О, священная главо, преподобне отче, преблаженне авво Иларионе! Не забуди убогих твоих до конца, но поминай нас всегда во святых твоих и благоприятных молитвах к Богу. Помяни стадо твое, еже сам упасл еси, и не забуди посещати чад твоих. Моли за ны, отче священный, за дети твоя духовная, яко имеяй дерзновение к Небесному Царю: не премолчи за ны ко Господу, и не презри нас верою и любовию чтущих тя. Поминай нас недостойных у Престола Вседержителева, и не престай моляся о нас ко Христу Богу, ибо дана тебе бысть благодать за ны молитися. Не мним бо тя суща мертва: аще бо телом и преставился еси от нас, но и по смерти жив сый пребываеши. Не отступай от нас духом, сохраняя нас от стрел вражиих и всякия прелести бесовския и козней диавольских, пастырю наш добрый. Аще бо и мощей твоих рака пред очима нашима видима есть всегда, святая твоя душа со ангельскими воинствы, со безплотными лики, с небесными силами, у Престола Вседержителева престоящи достойно веселится. Ведуще убо тя воистинну и по смерти жива суща, к тебе припадаем и тебе молимся: молися о нас всесильному Богу о пользе душ наших, и испроси нам время на покаяние, да невозбранно прейдем от земли на небо, от мытарств же горьких, бесов, воздушных князей и от вечныя муки да избавимся, и Небеснаго Царствия наследницы да будем со всеми праведными, от века угодившими Господу нашему Иисусу Христу; Емуже подобает всякая слава, честь и поклонение, со безначальным Его Отцем, и с Пресвятым и Благим и Животворящим Его Духом, ныне и присно и во веки веков. Аминь.

Для келейного чтения Кондак 1 Избрал еси, Господи, угодника Твоего Василиска, из млада сердце чисто созиждя в нем, и, дары духовными изрядно его украсив, явил еси земли Сибирстей подвижника дивнаго, иже, пустыни тяжкая волею претерпевая, молитвы чистыя благодать воистинну стяжа, темже подвигни и нас, Христе Боже, горняя помышляти, предстательством блаженнаго отца нашего, да поем тому: Радуйся, преподобне отче Василисче, умнаго безмолвия велий рачителю. Икос 1 Ангелов крилами к Богу воспаряющих, образы святыя издетска с любовию зрел еси, отче Василисче, темже, возрастом еще младенствуя, к Вышнему вознестися помыслил еси, во еже телесныма очима славу Божию видети, отонудуже крилы духовныя Господь тебе дарова, имиже в Небесныя обители воистинну вознеслся еси. Мы же, сим поучаеми, приносим ти таковая: Радуйся, издетска в служение Богу избранный; радуйся, светом божественнаго разума осиянный. Радуйся, от млада познавый нищету телесную; радуйся, воистинну стяжавый нищету духовную. Радуйся, кротостию и незлобием ангелом подобниче; радуйся, истиннаго смирения верным наставниче. Радуйся, монахом и мирским красоту восхождения явивый; радуйся, богоугодными делы страну Сибирскую просветивый. Радуйся, преподобне отче Василисче, умнаго безмолвия велий рачителю. Кондак 2 Видя желание твое, токмо единому Богови работати, и нрав послушливый, Господь Всеведец умягчи жены твоея сердце, юже родитель твой избра тебе, и тако три леты воздержанием себе испытующа, супружества соуз согласно расторгли еста; ты же, отче, душу твою Христу уневестив, радостне воспел еси Богу: Аллилуия. Икос 2 Разумея волю Божию и закону Христову кротко повинуяся, блаженне, тяготы брата твоего, подвижника тайнаго, с любовию понесл еси, в немощах его служа ему усердно; наипаче же вкупе в молитвах прилежаща, вашим изрядным в Боге радением многия нерадивыя к исправлению призвали еста. Мы же, братолюбие христианское твое зряще, сице тебе взываем: Радуйся, Бога паче всего земнаго возлюбивый; радуйся, Того Единаго в животе твоем взыскавый. Радуйся, яко любовь божественную мирстей любви предпочел еси; радуйся, яко житейскую радость на тяготы пустынныя пременил еси. Радуйся, образе смиренномудрия и послушания; радуйся, правило постническаго воздержания. Радуйся, помысла чистотою просиявый; радуйся, яко Мария, благую часть избравый. Радуйся, преподобне отче Василисче, умнаго безмолвия велий рачителю. Кондак 3 Силою любве ко Господу мира красная отвергл еси, отче Василисче, отшельническое житие избрав, идеже ревностно подвизаяся, к вящшему постничеству приступил еси, и тако тело твое поклоны и бдении зело утруждая, страсти плотския воздержанием крайним уставил еси, вопия в смирении Богу: Аллилуия. Икос 3 Имущу велие стремление богоугодно жити, Подвигоположник Господь показа тебе ума самочиннаго пагубу, и в леса брянския стопы твоя направи, идеже старцу пустынному Адриану в послушание себе вдал еси, отче, и, яко лоза благораслена, в трудех пустынных зело преспев, иноческим одеянием достойно украсился еси. Мы же взываем ти тако: Радуйся, в пустыню, яко в цветник, с радостию вшедый; радуйся, подвиги твоими, яко крин сельный, процветый. Радуйся, нестяжанием зело обогативыйся; радуйся, воздержанием крепким украсивыйся. Радуйся, обет пустынничества при постриге твоем давый; радуйся, егоже в подвизе добром до конца исполнивый. Радуйся, псалмы и молитвы Господу присно возлиявый; радуйся, поклоны земными от сна себе воставлявый. Радуйся, преподобне отче Василисче, умнаго безмолвия велий рачителю. Кондак 4 Буря искушений и бесов наветы обступиша тя, хотяще унынием душу твою поборити, ты же, отче Василисче, болезньми воздержания силу вражию посрамил еси, на камени смирения терпением велием веру твою утвердив, и тако немощь естества о Господе укреплял еси, денно и нощно возывая к Тому: Аллилуия. Икос 4 Слышавше людие о твоем, отче Василисче, благочестном житии пустынном, стекахуся к тебе, желающе с тобою купно жительствовати и во спасении тобою наставлятися, ты же, святе, смирения истиннаго исполненный, невежду себе пред всеми почел еси, во еже в безмолвии един с Единым всегда пребывати. Мы же, богомудре, глаголем тебе тако: Радуйся, сердце твое мирови затворивый; радуйся, воле Божией всего себе покоривый. Радуйся, благоуветия и благочестия смиренный учителю; радуйся, словесным и безсловесным кроткий благодетелю. Радуйся, с усердием на врага спасения противоставый; радуйся, постом и молитвою демоны отгнавый. Радуйся, духа нищету паче славы человеческия возлюбивый; радуйся, не в многословии твоем глубину мудрости показавый. Радуйся, преподобне отче Василисче, умнаго безмолвия велий рачителю. Кондак 5 Боготочный источник духовныя благодати зря в тебе юный Зосима, тепле моляше тя, да ученик тебе прилежен будет, ты же, отче, духовными очами промысл Божий в сем прозрев, яко друга искренняго любовию того приял еси; темже словесы и делы на путь иночества тобою наставляемый Зосима радостне воспе Богу: Аллилуия. Икос 5 Видя помышление духовника твоего, хотяща во обитель Коневскую тебе, отче, преселити, тепле моля просил еси того, да в отшельстве своем недвижимо пребудеши; обаче послушания ради, яко воли Божией повинуяся, с Зосимою вкупе, егоже возлюби душа твоя, за старцем своим последовал еси. Мы же, кротость твою ублажающе, взываем ти сице: Радуйся, Авраамле послушание познавый; радуйся, Иовлю терпению поревновавый. Радуйся, иноче, в смирении и кротости совершенный; радуйся, в безстрастия ризу оболченный. Радуйся, скудною пищею тело твое изнуривый; радуйся, хлебом Живота вечнаго душу твою насытивый. Радуйся, простоты жития монашескаго наставниче; радуйся, чистоты души христианския хранителю. Радуйся, преподобне отче Василисче, умнаго безмолвия велий рачителю. Кондак 6 Проповедуемым словесем Христовым, яко кроток есмь и смирен сердцем, воистинну поучился еси, труженниче пустынный, темже и Господь тя зело утеши, благоволив чрез Зосиму открыти ти сокровище молитвы сердечныя учения; ты же, преподобне Василисче, благодарен сый воспел еси Богу о сем: Аллилуия. Икос 6 Возсиял еси на острови Коневстем высотою жития твоего, отче досточудне, идеже в молитвы делании вельми возрастая, ум твой священным безмолвием просветил еси, и сладость молитвенную о имени Иисусове, рекою из сердца обильно изливаему, вкусил еси, богоблаженне. Мы же, толикое дарование в тебе зряще, смиренно взываем ти: Радуйся, словес евангельских послушателю благодатный; радуйся, ига Христова благаго носителю благодарный. Радуйся, добродетель благую, трезвение, стяжавый; радуйся, ума хранением сердце твое очистивый. Радуйся, благодати Божией хранилище преисполненное; радуйся, Духа Святаго жилище достойное. Радуйся, высоты Христова разумения достигнувый; радуйся, ум твой с сердцем в молитве срастворивый. Радуйся, преподобне отче Василисче, умнаго безмолвия велий рачителю. Кондак 7 Хотя, преподобне, в Бозе Единем всегда пребывати, ум твой памятованием Христовым от всякия страсти очистил еси, и Духа Святаго благодатию молитву самодвижиму в сердце твоем стяжал еси, темже непрестанно Господеви в любви предстоя, в умилении чистом вопиял еси Ему: Аллилуия. Икос 7 Новую лествицу восхождения чтим тя, богомудре, ты бо любве ради благоволил еси, молитвенных твоих деяний рукописание, егоже сподвижник твой и сотаинник Зосима прилежный списатель бысть, по преставлении твоем на полезное мирови явити. Мы же, отче Василисче, молитвенно светильник сей приемлюще, в спасительной ревности взываем ти: Радуйся, Христа Бога в сердце твоем вместивый; радуйся, имя Его спасительное в уме всегда носивый. Радуйся, молитвенную сладость сердцем твоим познавый; радуйся, слез благодатных поток умилительный источивый. Радуйся, к Богу пламеневый любовию великою; радуйся, яко действом ея сердце твое взыграся. Радуйся, молитвы чистыя священнодейства стяжателю; радуйся, сокровенных Божиих предивный тайнозрителю. Радуйся, преподобне отче Василисче, умнаго безмолвия велий рачителю. Кондак 8 Странен быв всякия славы человеческия, единыя славы Божия иский, блаженне, в пустыню внутреннюю с Зосимою верным удалитися возжелал еси, Василисче, темже, старцем твоим благословенный, предел Сибирских достигл еси, идеже лишения многа претерпевая, Богу в надежде воспевал еси: Аллилуия. Икос 8 Все упование возложив на промысл Божий и к Пречистей в молитвах всегда прибегая, пустынниче святый, яко птица небесная попечением малым о телесе твоем тщался еси, паче же воздержанием многим дух твой укрепив, красоту исправлений твоих верным уяснил еси, темже приими от нас сицевая: Радуйся, узок путь во Царствие небесное избравый; радуйся, пустынничества крест волею подъявый. Радуйся, страны мразныя не убоявыйся; радуйся, ветра хладнаго не устрашивыйся. Радуйся, скорби и болезни мужественно понесый; радуйся, Заступницею усердною всегда хранимый. Радуйся, молитвы храм в сердце твоем воздвигнувый; радуйся, труд, терпение и усердие в основание того положивый. Радуйся, преподобне отче Василисче, умнаго безмолвия велий рачителю. Кондак 9 Всего себе Господу освятив, отче Василисче, в болезнях жестоких Христу сраспялся еси воистинну, и в пустыни, яко во гробе, Тому спогреблся еси, блаженне, и Того ради многая злострадания претерпел еси, но любве Божия никако же отпал еси, присно поя Ему: Аллилуия. Икос 9 Витии многоречивии умолкают, зряще твоего, отче Василисче, жития безмолвнаго подвиг, ибо яко пламя прилежит свещи, тако ты, блаженне, умом и сердцем твоим воистинну Христу в молитве срастворился еси. Мы же, таковое действо в тебе зряще, любовию взываем ти: Радуйся, Богу в любви непрестанно предстоявый; радуйся, благодать Богообщения стяжавый. Радуйся, великих дарований небесных приятелю; радуйся, духов поднебесных велий устрашителю. Радуйся, на высоту добродетелей восшедый; радуйся, Царствие Божие внутрь себе имый. Радуйся, Владыки вышняго верный служителю; радуйся, истинныя радости о Боге благий стяжателю. Радуйся, преподобне отче Василисче, умнаго безмолвия велий рачителю. Кондак 10 Спасения ради души твоея, отче Василисче, многая лета в пустыне неисходно подвизался еси, и тамо старости честныя достигнув, высоту добродетели стяжал еси, темже Господь на ину стезю направи тя, во еже ближних спасению послужити, отонудуже малую братию собрав, воспел еси Богу: Аллилуия. Икос 10 Стена крепкая в молитве братии пустынней был еси, святый Василисче, духом сокрушенным, яко мечем, научал еси тех коварства вражии посекати, и нас ныне от сна лености житием твоим богозарным пробуждая, явился еси утешения духовнаго податель. Мы же, подвиги твоя ублажающе, воспеваем тя сице: Радуйся, в горении духа ангелом уподобивыйся; радуйся, в доброделании душею обновивыйся. Радуйся, чистою молитвою изрядно благоукрашенный; радуйся, во брани невидемей воине совершенный. Радуйся, правды Божией всегда алкавый; радуйся, рая сладости еще на земли вкусивый. Радуйся, блаженнаго смирения доброту стяжавый; радуйся, Иерусалим небесный воистинну наследивый. Радуйся, преподобне отче Василисче, умнаго безмолвия велий рачителю. Кондак 11 Пение умиленное тебе приносим, блаженне отче, и успению твоему с трепетом внимаем, ибо всельшагося в тя Святаго Духа действо благодатию обильно сердце твое напита, якоже и по изшествии души твоея ко Господу молитвы чистыя двизанием сердце твое исполненно бе. Мы же, сему дивящеся, вопием Богу о тебе: Аллилуия. Икос 11 Светом божественным просвещенный, отче Василисче, внутренняго делания высоты молитвы непрестанныя достигл еси, отонудуже умными очами сердечными Свет присносущный воистинну сподобился еси зрети, имже вельми озаренный сам световиден верным показался еси, темже приими от нас таковая: Радуйся, главо, о Господе присно любомудрствующая; радуйся, заре, от нощи к Богу утреннюющая. Радуйся, яко руце твоя в молитве многажды простирал еси; радуйся, яко нозе твоя во бдениих зело претрудил еси. Радуйся, заповеди Евангельския до конца совершивый; радуйся, обетования Евангельския вправду восприемый. Радуйся, яко житием твоим ко благочестию нас пробуждаеши; радуйся, яко деянии твоими на путь спасения нас наставляеши. Радуйся, преподобне отче Василисче, умнаго безмолвия велий рачителю. Кондак 12 Блажен воистинну еси, отче Василисче, ибо в клеть сердца твоего вшед, собеседник любезен Господеви был еси, и яко Серафими любовию к Нему горел еси, и якоже Херувими всегда умно Его зрел еси; ныне же в нескончаемой радости пребывая, и нас научаеши славословити Бога: Аллилуия. Икос 12 Поюще честную память твою, отче Василисче, благодарная приносим ти, и молитв благоухание от мощей твоих приемлюще, веселия духовнаго исполняемся, и твоя, пустыннолюбче, труды и болезни, Христа ради подъятыя, ублажающе, достойно величаем тя словесы таковыми: Радуйся, звездо, спасения путь ко вратом небесным нам указующая; радуйся, сокровищнице, пребезценный камень, Христа, в себе имущая. Радуйся, кладезю, духовною влагою обильно нас напаяяй; радуйся, столпе, несокрушимую силу молитвы во брани являяй. Радуйся, стамно, чудесы доныне богатно преизливаемая; радуйся, реко, деянии твоими души верных орошающая. Радуйся, в скорбех пребывающим скорый и благий поспешниче; радуйся, тебе чтущих теплый и верный к Богу молитвенниче. Радуйся, преподобне отче Василисче, умнаго безмолвия велий рачителю. Кондак 13 О, пустынниче дивный, преподобне отче Василисче, к тебе в смирении припадаем, яко стяжавшему велию Духа Святаго благодать: призри с высоты райския на нас, дольними обуреваемых, и подаждь душам нашим молитвами твоими возрастание духовное, во еже чистым умом и сердцем достойно пети Христу Богу нашему: Аллилуия, аллилуия, аллилуия.[Се́й конда́к глаго́лется три́жды.][Далее повторяем 1‑е икос и кондак:]Икос 1 Ангелов крилами к Богу воспаряющих, образы святыя издетска с любовию зрел еси, отче Василисче, темже, возрастом еще младенствуя, к Вышнему вознестися помыслил еси, во еже телесныма очима славу Божию видети, отонудуже крилы духовныя Господь тебе дарова, имиже в Небесныя обители воистинну вознеслся еси. Мы же, сим поучаеми, приносим ти таковая: Радуйся, издетска в служение Богу избранный; радуйся, светом божественнаго разума осиянный. Радуйся, от млада познавый нищету телесную; радуйся, воистинну стяжавый нищету духовную. Радуйся, кротостию и незлобием ангелом подобниче; радуйся, истиннаго смирения верным наставниче. Радуйся, монахом и мирским красоту восхождения явивый; радуйся, богоугодными делы страну Сибирскую просветивый. Радуйся, преподобне отче Василисче, умнаго безмолвия велий рачителю. Кондак 1 Избрал еси, Господи, угодника Твоего Василиска, из млада сердце чисто созиждя в нем, и, дары духовными изрядно его украсив, явил еси земли Сибирстей подвижника дивнаго, иже, пустыни тяжкая волею претерпевая, молитвы чистыя благодать воистинну стяжа, темже подвигни и нас, Христе Боже, горняя помышляти, предстательством блаженнаго отца нашего, да поем тому: Радуйся, преподобне отче Василисче, умнаго безмолвия велий рачителю. Молитва О, преподобне и богоблаженне отче наш Василисче, безмолвия доблий рачителю и пустынножителю ревностный, умнаго делания смиренный наставниче и послушания предивный образе! Ты мира сладости бегая, пустыни непроходныя достигл еси, в нейже многая лета, богомыслием озаряем, в трудех пустынных подвизался еси, смиренномудрия глубину ископав; сего ради, яко сокровище пребогатое, сердечныя молитвы сладость утешительную Господь тебе дарова, еяже действием великих дарований исполнился еси. Темже молим тя, отче Василисче, воззри на ны, унылыя и немощныя, и возгрей в сердцах наших истинную ревность о Христе Иисусе Господе нашем, Иже есть един источник спасения нашего. Буди нам поспешник к высоты духовныя восхождению: ум наш в трезвении бодренном укрепи и дух сокрушен в сердца наша вкорени; наипаче вразуми, научи и усердие неослабное в молитве непрестанней подаждь нам, во еже освятити уста, умы и сердца Христу Богу нашему, Егоже именем отбежит от нас всякая неправда и уныние, диавольским действом составляемыя, и да просветятся души наша светом любве Божественныя ко исправлению жития нашего, да не погибнем в огне аки плевелы, но, яко пшеницу чистую, соберет ны Господь в житницу Свою небесную, идеже вси любящии Его в радости нескончаемей пребывают, славяще Отца, и Сына, и Святаго Духа, во веки веков. Аминь.

Минея, 6 Октября, Канон апостола Глас 4 Песнь 1 Ирмос: Триста́ты кре́пкия,/ Рождейся от Девы,/ безстра́стия во глубине/души́ трича́стное потопи́, молюся,/ да Тебе, яко в тимпа́не,/ во умерщвле́нии телесе́/ победное воспою́ пение. Припев: Святы́й апо́столе Фомо́, моли́ Бо́га о нас. Безначальна Сына Божия,/ Бога Слова, я́вльшагося на земли, зраком Су́щим по нам,/ егоже видел еси, славне,/ егоже и руки дланию, и ребро́ осяза́л еси,/ умоли́ спасти паству твою. Припев: Святы́й апо́столе Фомо́, моли́ Бо́га о нас. Знатель тайных,/ и утробы истязу́яй, и сердца́ испыту́яй,/ Бог мой Иисус, тя, Фомо́ всеблаже́нне,/ Своего Богоявления служителя, и свидетеля,/ и апостола Божественна прият. Сла́ва Отцу́ и Сы́ну и Свято́му Ду́ху. Вод та́инственных река ты показался еси,/ напаяющая, Фомо́, лице земли;/ церковный же сонм струями Богознания и шумом Духа/ многобожную прелесть отгнал еси. И ны́не и при́сно и во ве́ки веко́в. Ами́нь. Богородичен: Смерти и тли потребительница су́щи,/ нетления источник рождшая, Христа,/ Богородице Всепетая,/ и безсмертия украсившаго благодатию/ человеческое естество, Пречистая. Песнь 3 Ирмос: Не мудростию, и силою, и богатством хвалимся,/ но Тобою, Отчею Ипостасною Мудростию, Христе:/ несть бо свят, паче/ Тебе, Человеколюбче. Припев: Святы́й апо́столе Фомо́, моли́ Бо́га о нас. Добродетели добро́тою благолепен сый подобяся самови́дче, и чудесы,/ инди́ов зловидное светом Божественным озарив,/ и верою просветил еси тех помрачение. Припев: Святы́й апо́столе Фомо́, моли́ Бо́га о нас. Зарею разже́гся самоде́тельством Духа,/ яко стрела Богосветлая, по́слан был еси, Богоприя́тне,/ и мир просветил еси, Фомо́, чудесы. Сла́ва Отцу́ и Сы́ну и Свято́му Ду́ху. Тайнонаучен Божественныя мудрости догма́том,/ якоже скорость молнии преходящия, апостоле Фомо́,/ светом просветил еси мира концы. И ны́не и при́сно и во ве́ки веко́в. Ами́нь. Богородичен: Неискусобрачная, Бога плотию рождши,/страстей прилоги колеблема мя утверди:/ несть бо, Пречистая, разве Тебе помощницы. Седален, глас 8 Мре́жею словес Божественных рыбы уловив словесныя,/ сия принесл еси начатой Богу нашему,/ и в Христовы язвы желая облещи́ся, подобник стра́сти Его явился еси./ Тем, соше́дшеся по до́лгу, чтим, апостоле сла́вне, всепра́зднственную память твою/ и согласно вопии́м ти:/ моли Христа Бога грехов оставление даровати чтущим любовию святую память твою. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Яко Деву и Едину в жена́х,/ Тя, без Семене Рождшую Бога плотию,/ вси ублажаем роди человечестии:/ огнь бо вселися в Тя Божества/ и, яко младенца, дои́ши Зижди́теля и Господа./ Тем Ангельский и человеческий род достойно славим пресвятое рождество Твое и согласно вопием Ти:/ моли Христа Бога согрешений оставление даровати покланяющимся верою пресвятому рождеству Твоему. Песнь 4 Ирмос: Седя́й в славе на Престоле Божества,/ во облаце ле́гце/ прии́де Иисус Пребоже́ственный,/ нетленною дла́нию, и спасе́ зовущия:/ слава, Христе, силе Твоей. Припев: Святы́й апо́столе Фомо́, моли́ Бо́га о нас. Величайшим чудес явлением наче́н/ и догма́тов Божественных славу светле излага́я,/ вселенную объя́л еси пропове́данием, взывающу:/ слава, Христе, силе Твоей. Припев: Святы́й апо́столе Фомо́, моли́ Бо́га о нас. Яко самовидца тя Слова и теплаго служителя,/ и Того славы и величествия свиде́теля,/ и яко ве́рна строи́теля, и апостола/ восхваля́ем тя, блаженне Фомо́, всече́стне. Сла́ва Отцу́ и Сы́ну и Свято́му Ду́ху. Якоже неве́стный чертог и скинию Небесную,/ основание на Ка́мени краеуго́льнем утвердив,/ назда́л еси, блаже́нне всеприснопа́мятне, зовущим:/ слава, Христе, силе Твоей. И ны́не и при́сно и во ве́ки веко́в. Ами́нь. Богородичен: Землю неора́нную, Клас жизни возде́лавшую,/ и облак легкий, тучу, Жизнодавца источившую,/ Всесвятую Деву именуем, зовуще:/ слава, Христе, силе Твоей. Песнь 5 Ирмос: Нечести́вии не у́зрят славы Твоея́, Христе,/ но мы Тя, Единоро́дне,/ Оте́ческия славы сияние Божества,/ от но́щи у́тренююще,/ воспеваем Тя, Человеколюбче. Припев: Святы́й апо́столе Фомо́, моли́ Бо́га о нас. Осия́н, апо́столе, славою Христо́вою/ и, ребро животворное осяза́в,/ почерпл еси неизследи́мую Богословия пучину/ и мир обогатил еси. Припев: Святы́й апо́столе Фомо́, моли́ Бо́га о нас. Не пришед к первому Твоему входу Фома,/ не веруя же ученико́м, ве́ровав же последи́,/ радуяся, возопи́,/ Тя, Бога и Господа возвещая, Многомилостиве. Сла́ва Отцу́ и Сы́ну и Свято́му Ду́ху. Яко небо одушевленное, славу Твою, Христе,/ гро́мом духовным Фома возопи́,/ испове́дуя и Бога, и Господа,/ Тя верным благовести́. И ны́не и при́сно и во ве́ки веко́в. Ами́нь. Богородичен: Победителя покажи, Всенепоро́чная,/ ум страстей и помышлений стремления покори́ сих, Богоневесто,/ Бога Рождшая, Спасителя душ наших. Песнь 6 Ирмос: Пожру́ Ти со гла́сом хвале́ния, Господи,/ Церковь вопиет Ти,/ от бесо́вския кро́ве очи́щшися/ ради милости от ребр Твоих/ исте́кшею Кро́вию. Припев: Святы́й апо́столе Фомо́, моли́ Бо́га о нас. Всех неверие, Фомо́, душегу́бное,/ неве́рование твое, блаженне, исцеляет:/ ты бо несумненно/ гвоздей же и копия язвы испытал еси. Припев: Святы́й апо́столе Фомо́, моли́ Бо́га о нас. Испусти́л еси, яко си́лен, Христе, апостола,/ яко стрелу́ изощре́ну,/ в сердца враг Твоих, Жизнодавче,/ и коры́стей объя́тие Тебе сих приведе. Сла́ва Отцу́ и Сы́ну и Свято́му Ду́ху. Жертвы идольския, Ще́дре, упраздни́л еси,/ закла́н быв на Дре́ве,/ и заколе́нии святы́ми Богоглаго́ливых апостол,/ подража́ющих Твоя страдания. И ны́не и при́сно и во ве́ки веко́в. Ами́нь. Богородичен: О чудо, всех чудес новейшее:/ яко Дева во утробе/ всяческая Содержащаго,/ неискусомужно заченши, не тесновмести́. Кондак, глас 4 Премудрости благодати исполнен,/ Христов апостол и служитель истинный/ в покаянии вопияше Тебе:/ Ты мой еси Бог же и Господь. Икос Госпо́дню ученику и великому тайнопове́дателю,/ Фоме Богоглаголивому, Петр возопи́:/ ви́дехом Господа./ Рече́ же той: аще не ви́жду аз язвы рук Его, не уве́рую, вопия́ше близнец./ Тогда Владыка всех, якоже раб прии́де, хотя спасти вся, и глаго́лет Фоме:/ осяжи руки Моя и ребра и не не веруй:/ Аз бо есмь Господь и Бог твой./ Он же с покаянием возопи:/ Ты мой еси Бог же и Господь. Песнь 7 Ирмос: В пещи́ Авраа́мстии отроцы перси́дстей,/ любовию благочестия/ паче, не́жели пламенем опаля́еми, взыва́ху:/ Благослове́н еси в храме славы Твоей, Господи. Припев: Святы́й апо́столе Фомо́, моли́ Бо́га о нас. С вышними ликостоя́ньми, яко апостол, ра́дуяся, ликуеши, блаженне,/ на небесех, воспевавши же, веселяся:/ Благословен еси в храме славы Твоея, Господи. Припев: Святы́й апо́столе Фомо́, моли́ Бо́га о нас. От конец до конец протече́ твое вещание/ и глаго́л твоих Божественных предложе́ние, зовущия научающее:/ благословен еси в храме славы Твоея, Господи. Сла́ва Отцу́ и Сы́ну и Свято́му Ду́ху. Храм был еси ты Троицы, прехвальне,/ темже и хра́мы идольския и куми́ры разруши́л еси,/ апостоле,/ храмы же воздвиг во славу и хвалу Христа Бога. И ны́не и при́сно и во ве́ки веко́в. Ами́нь. Богородичен: Законныя работы Твоим Рождеством изба́вихомся:/ Ты бо, Богородице, Избавителя неискусому́жно нам родила еси./ Благословенна Ты в женах еси, Всенепорочная Владычице. Песнь 8 Ирмос: Отроки благочестивыя в пещи́/ Ро́ждество Богоро́дичо спасло́ есть./ Тогда убо образуемое,/ ныне же действуемое,/ вселенную всю воздвиза́ет пе́ти Тебе:/ Господа пойте дела/ и превозноси́те Его во вся веки. Припев: Святы́й апо́столе Фомо́, моли́ Бо́га о нас. С Богом беседуя вопло́щшимся,/ плоть забыв, явился еси, блаженне,/ премирным же обоже́нием обогати́лся еси,/ приближе́нием к Богу Боготвори́м,/ и, Господа пойте, зовя́, и превозноси́те Его во вся веки. Припев: Святы́й апо́столе Фомо́, моли́ Бо́га о нас. Любо́вию Христу сочетався,/ смерть с Ним, блаженне, возлюби́л еси,/ и со апостолом Твоим и́дем, вещав,/ и с ним смерть прии́мем:/ Господа пойте, вопия́, и превозноси́те Его во вся веки. Сла́ва Отцу́ и Сы́ну и Свято́му Ду́ху. Вас Христос апостолы,/ облаки во́льнаго дождя показа,/ тучами наводняющия Божественнаго познания Церкви, прему́дрии,/ и напаяющия поющих:/ Господа пойте дела и превозноси́те Его во вся веки. И ны́не и при́сно и во ве́ки веко́в. Ами́нь. Богородичен: Пороков и скверн чиста́/ и всякия святыни еси храм,/ Слово Всесвято́е, вся освяща́ющее,/ Отцу Собезначальное, породила́ еси́./ Тем Тя, Дево, поем и превозно́сим во вся веки. Песнь 9 Ирмос: Камень нерукосе́чный,/ от несеко́мыя горы́, Тебе, Дево,/ краеуго́льный отсече́ся, Христос,/ совокупивый разстоя́щаяся естества́./ Тем, веселящеся, Тя, Богородице, величаем. Припев: Святы́й апо́столе Фомо́, моли́ Бо́га о нас. Колесница светоносная явился еси́ седя́щаго Слова,/ на благолепнейшей твоей души́ и Богоно́сней носи́ма,/ ко спасению, славне, направля́я пою́щих тя. Припев: Святы́й апо́столе Фомо́, моли́ Бо́га о нас. Твою преблаженную память совершающе,/ молим всякаго треволне́ния изба́витися/ хода́тайством дерзнове́ния твоего,/ еже, яко Христов апостол, и́маши,/ Богови́дче всече́стне. Сла́ва Отцу́ и Сы́ну и Свято́му Ду́ху. Днесь память твою вси,/ Фомо́ апостоле, соверша́ем,/ освяти и просвети верою искуше́ний, и обстоя́ний,/ и страстей всяких избавля́я молитвами твоими. И ны́не и при́сно и во ве́ки веко́в. Ами́нь. Богородичен: Красе́н прозябе́ Клас от земли́ Деви́ческия,/ Божие Слово, Имже питаемся ве́рнии,/ в Немже и живем и составляемся./ Тем Тя, Рождшую, яко Богородицу величаем. Светилен Самови́дче и апостоле Христа Всеще́драго,/ мир даровати всей вселенней и победы воинству нашему,/ и прегрешений оставление, и спасение испроси́ тя, Фомо́, восхваля́ющим/ яко ученика Богоглаголива. Сла́ва Отцу́ и Сы́ну и Свято́му Ду́ху. Яко солнце востока, инди́ом послася, Фомо апостоле, пресве́тлое,/ апостолов славо,/ и тех омрачение светом словес твоих/ и Трои́ческою верою просветил еси./ Тем святую твою и Божественную празднуем память. И ны́не и при́сно и во ве́ки веко́в. Ами́нь. Богородичен: Молебницу Ти приводим и теплую Заступницу,/ Пречистую Матерь Твою, вернии по до́лгу:/ сподо́би рабы Твоя причасти́тися славы Твоея, Христе,/ и праведных насле́дия, и пи́щи ра́йския/ и даждь Царство Небесное.

Минея, 12 Октября, Кано́н свято́му Глас 4 Песнь 1 Ирмос: Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,/ и воспою́, ра́дуяся, Тоя́ чудеса́. Припев: Преподóбне óтче Симеóне, моли́ Бóга о нас. Ду́ха орга́н показа́вся, свяще́ннейше Симео́не,/ и благода́ти гу́сли доброгласныя,/ и мене́ соде́лай благода́ти гу́сли,/ я́ко да твоя́ благода́ти воспою́ в благода́ти. Припев: Преподóбне óтче Симеóне, моли́ Бóга о нас. Ум всесве́тлый Богосло́вия яви́ся,/ гром Небе́сный дне́сь огласи́ громогла́сная поуче́ния прему́дрости./ Просвети́теся, вси, и внемли́те. Сла́ва Отцу́ и Сы́ну и Свято́му Ду́ху. Разуме́ти кто мо́жет твоего́ Боже́ственнаго ве́дения, прему́дре,/ высоту́ неудобовосходи́мую, глубину́ неизсле́диму,/ неудобозри́мую широту́ и долготу́ вку́пе,/ его́же сподо́бился еси́, Богови́днейше? И ны́не и при́сно и во ве́ки веко́в. Ами́нь. Богородичен: Оде́ждо нарече́нная ца́рская вопло́щшагося Бо́га Сло́ва, Пречи́стая,/ Богоукраше́нную, ю́же погуби́х, оде́жду благода́ти Боже́ственныя/ па́ки ми оде́й хода́тайством Твои́м. Песнь 3 Ирмос: Твоя́ песносло́вцы, Богоро́дице,/ живы́й и незави́стный исто́чниче,/ лик себе́ совоку́пльшия, духо́вно утверди́,/ в Боже́ственней Твое́й сла́ве/ венце́в сла́вы сподо́би. Припев: Преподóбне óтче Симеóне, моли́ Бóга о нас. Был еси́ храм освяще́н Бо́жий,/ я́коже же́ртву чи́сту, ум Твой име́я, свя́те,/ моли́тву – я́ко жертвоприноше́ние же/ и я́ко же́ртвенник – пра́вейшее се́рдце твое́. Припев: Преподóбне óтче Симеóне, моли́ Бóга о нас. Моисе́я, спребыва́юща Бо́гу, я́коже дре́вле просла́вися лице́,/ та́ко, о́тче, и твое́ лице́, в неприступных пребыва́ющу ти,/ Боже́ственным Све́том просла́вися, всесве́тлое, я́коже со́лнце. Сла́ва Отцу́ и Сы́ну и Свято́му Ду́ху. Яви́ся во времена́ после́дняя кни́га твоя́, о́тче Симео́не,/ ле́ствица, нас возводя́щая от земли́ к Небе́сным,/ и звон свяще́ннейший, спя́щих возставляющий. И ны́не и при́сно и во ве́ки веко́в. Ами́нь. Богородичен: Я́коже мир, в ми́ре яви́лася еси́ в ма́лом, Превелича́йшая Де́во,/ от не су́щих бо вся́ческая в ми́ре Созда́вый,/ ми́ру Невместим, Тебе́ ве́сь вместим бы́сть. Седален, глас 4 Мона́шествующих пра́вило и украси́тель,/ по́стников наста́вник и общежи́тельных детоводи́тель/ и всех наслажде́ние показа́лся еси́, свяще́ннейше Симео́не Богосло́ве,/ те́мже и ны́не моли́ся со дерзнове́нием Зижди́телю о нас,/ ве́рою и любо́вию чту́щих па́мять твою́, преподо́бне. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Не умолчи́м никогда́, Богоро́дице,/ си́лы Твоя́ глаго́лати, недосто́йнии,/ а́ще бо Ты не бы предстоя́ла моля́щи,/ кто бы нас изба́вил от толи́ких бед,/ кто же бы сохрани́л доны́не свобо́дны?/ Не отсту́пим, Влады́чице, от Тебе́,/ Твоя́ бо рабы́ спаса́еши при́сно от вся́ких лю́тых. Песнь 4 Ирмос: Неизсле́дный Бо́жий сове́т ,/ е́же от Де́вы воплоще́ния/ Тебе́, Вы́шняго, проро́к Авваку́м усмотря́я, зовя́ше:/ Сла́ва си́ле Твое́й, Го́споди. Припев: Преподóбне óтче Симеóне, моли́ Бóга о нас. Зако́ном Влады́ки повину́йся, му́дре, за́поведи вся испо́лнил еси́,/ в ни́хже обре́л еси́ сокры́та Христа́, сия́ запове́давша,/ и Его́ благода́тию обогати́лся еси́. Припев: Преподóбне óтче Симеóне, моли́ Бóга о нас. Язы́к, вити́йствующий ри́торскими хитростьми́ и смышленьми,/ не мо́жет просла́вити дарова́ния твоя́,/ я́же па́че естества́ прия́л еси́, о́тче Симео́не Богопросла́вленне. Сла́ва Отцу́ и Сы́ну и Свято́му Ду́ху. Обре́л еси́ неудо́бь обрета́емое дре́вле и ны́не бога́тство, Симео́не Богопросла́вленне,/ е́же обожи́тися и восхи́титися уму́ твоему́ от земли́ к Небе́сным./ О, стра́ннаго слы́шания! И ны́не и при́сно и во ве́ки веко́в. Ами́нь. Богородичен: Словесе́м Твои́м после́дующе, Пречи́стая,/ вси ро́ди, ублажа́ем Тя, я́ко ро́ждшую Блаже́ннаго Бо́га,/ блаже́нны показа́вшего умы́ и челове́ки Боже́ственною благода́тию. Песнь 5 Ирмос: Ужасо́шася вся́ческая/ о Боже́ственней сла́ве Твое́й,/ Ты бо, Неискусобра́чная Де́во,/ име́ла еси́ во утро́бе над все́ми Бо́га/ и родила́ еси́ безле́тнаго Сы́на,/ всем воспева́ющим Тя/ мир подава́ющая. Припев: Преподóбне óтче Симеóне, моли́ Бóга о нас. Любве́ горя́ огне́м в се́рдце твое́м,/ ве́сь во изступле́нии был еси́/ и Бо́гу еди́ному всему́, возлю́бленному от Тебе́, сраствори́лся еси́,/ я́коже еди́н дух бы́ти с Ним, свяще́ннейше. Припев: Преподóбне óтче Симеóне, моли́ Бóга о нас. Се ны́не возсия́ Свет Боже́ственныя благода́ти!/ Се безсме́ртие ма́нны живо́тныя всем предлага́ется Симео́н, Боже́ственный оте́ц!/ Прииди́те и наслади́теся, живота́ жа́ждущии. Сла́ва Отцу́ и Сы́ну и Свято́му Ду́ху. Ри́торов красне́йший показа́вся ду́хом,/ я́же о Бо́зе и Боже́ственнем словеса́ боголе́пнейше богосло́вствовал еси́ нам,/ те́мже но́вый нарече́ся Богосло́в, тезоимени́те. И ны́не и при́сно и во ве́ки веко́в. Ами́нь. Богородичен: О Ма́ти всесве́тлая Све́та Пе́рваго,/ просвети́ ду́шу несве́тлую све́том Твои́м,/ я́ко да Свет ви́жду па́ки Пе́рвейший,/ И́же из Тебе́ озари́ нас и Тя просвети́вший,/ Сей бо от Све́та то́йжде. Песнь 6 Ирмос: Боже́ственное сие́ и всечестно́е/ соверша́юще пра́зднество,/ Богому́дрии, Богома́тере,/ прииди́те, рука́ми воспле́щим,/ от Нея́ ро́ждшагося Бо́га сла́вим. Припев: Преподóбне óтче Симеóне, моли́ Бóга о нас. Реку́ приснотеку́щую Боже́ственныя благода́ти,/ от мы́сленнаго Еде́ма истека́ющую,/ прииди́те, в пе́снех почти́м и живота́ струя́ми ея́ наслади́мся. Припев: Преподóбне óтче Симеóне, моли́ Бóга о нас. Покая́ния учи́тель, пропове́дник просвеще́ния благода́ти,/ свяще́ннейший ны́не Симео́н ублажа́ется,/ поживший в ми́ре сем житие́м равноа́нгельским. Сла́ва Отцу́ и Сы́ну и Свято́му Ду́ху. Победи́в кре́постию Ду́ха, и труды́ воздержа́ния, и слеза́ми,/ Симео́не преподо́бне, стра́сти душе́вныя же и теле́сныя,/ к безстра́стию кра́йнему дости́гл еси́. И ны́не и при́сно и во ве́ки веко́в. Ами́нь. Богородичен: Бо́га безсе́менно зачала́ еси́, Де́во,/ и нетру́дно носи́ла еси́ во утро́бе Твое́й,/ нетле́нно же Сего́ родила́ еси́./ О, трегу́баго чудесе́!/ Кто не ужа́снется! Кондак, глас 3 Све́том просвеще́н Трисо́лнечным, Богому́дре,/ Богосло́в яви́лся еси́ Пребоже́ственныя Тро́ицы./ Свы́ше прему́дростию слове́с обогати́вся,/ источи́л еси́ Богому́дрия Боже́ственныя струи́,/ от ни́хже пию́ще, вопие́м:/ ра́дуйся, треблаже́нне Симео́не Богонауче́нне. Икос Пресвяты́й Дух, И́же пре́жде ры́бари некни́жныя умудри́/ и ри́торы и Богосло́вы их показа́,/ Той и в после́дняя времена́, в чи́стей твое́й душе́ всели́вся, Симео́не святе́йший,/ ри́тора ри́торов и Богосло́ва тя прему́дра из некни́жнаго и нему́драго соде́ла,/ добропи́шуща и ди́вно излага́юща догма́ты пресу́щественнаго Богосло́вия/ и та́инства Боже́ственнаго Све́та/ и я́же в души́ та́йно быва́ющая разли́чная де́йства Боже́ственныя благода́ти Свята́го Ду́ха,/ и́хже и мы чте́ния наслажда́ющеся, тя ублажа́ем, достоблаже́ннейше о́тче,/ я́ко преесте́ственна и Небе́сна челове́ка,/ и, святы́й пра́здник твой любо́вию соверша́юще, согла́сно вопие́м:/ ра́дуйся, треблаже́нне Симео́не преподо́бне. Песнь 7 Ирмос: Не послужи́ша тва́ри Богому́дрии/ па́че Созда́вшаго,/ но, о́гненное преще́ние му́жески попра́вше,/ ра́довахуся, пою́ще:/ препе́тый отце́в Госпо́дь и Бог, благослове́н еси́. Припев: Преподóбне óтче Симеóне, моли́ Бóга о нас. Излия́ся благода́ть во устне́ твои́ бога́тая свы́ше, о свяще́нне Симео́не,/ и полнота́ се́рдца даде́ся ти, я́ко песо́к морски́й,/ от тя Умудри́вшаго, я́коже иногда́ Соломо́ну. Припев: Преподóбне óтче Симеóне, моли́ Бóга о нас. Многосве́тлое и всезлато́е благода́ти и сия́нное со́лнце Це́ркве Христо́вы,/ честну́ю проходя́щее всю тве́рдь и тре́звости сия́ющее блиста́ньми,/ Симео́н да похва́лится! Сла́ва Отцу́ и Сы́ну и Свято́му Ду́ху. Слове́снейший слове́сных, Богонауче́нный и духоно́сный,/ ты Богосло́в Христо́в показа́лся еси́ конце́м земли́, Симео́не преподо́бне,/ напе́рсный вторы́й и Григо́рий, огнедухнове́нный Богосло́в. И ны́не и при́сно и во ве́ки веко́в. Ами́нь. Богородичен: Огнеобра́зный престо́ле и пла́меннейшее Христа́ Всецаря́ высо́кое не́бо,/ от вся́кия стра́сти ни́зменныя мя свободи́/ и бре́ннаго обстоя́ния, Присноде́во Мари́е! Песнь 8 Ирмос: О́троки благочести́выя в пещи́/ Рождество́ Богоро́дичо спасло́ е́сть,/ тогда́ у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте, дела́,/ и превозноси́те Его́ во вся ве́ки. Припев: Преподóбне óтче Симеóне, моли́ Бóга о нас. Яви́лся еси́ мы́сленный, всеблаже́нне, рай, во Еде́ме Богонасажде́нный,/ име́я посреде́ тебе́, я́ко дре́во жи́зни, цвету́щее сладкопло́дное, Христа́ прозя́бшаго, преподо́бне,/ о́крест же, я́ко древеса́, крася́щаяся плода́ми же и листа́ми, –доброде́тели вся́ческия. Припев: Преподóбне óтче Симеóне, моли́ Бóга о нас. Уподо́бился еси́ купцу́, о не́мже рече́ Христо́с, Симео́не преподо́бне,/ ты бо, я́же стяжа́л еси́, вся про́дал еси́/ и би́сер прия́л еси́ многоце́нный, его́же сокры́л еси́ вну́трь се́рдца,/ и возвесели́лся еси́ о сем неизрече́нно. Сла́ва Отцу́ и Сы́ну и Свято́му Ду́ху. Но́вое не́бо узре́ся, о́тче,/ Го́спода, я́коже со́лнце превели́кое, све́тлое и златоза́рнейшее име́я в пе́рсех твои́х,/ и, я́коже луну́ всесве́тлую, среброблиста́ющую, благода́ть Ду́ха стяжа́в,/ и, я́коже све́тлыя зве́зды, честна́я списа́ния твоя́. И ны́не и при́сно и во ве́ки веко́в. Ами́нь. Богородичен: Свята́го Святы́х я́ко ро́ждши, во святы́х при́сно Почива́юща,/ и я́ко еди́на воздви́гшая побе́ду на враги́ неви́димыя, Пречи́стая,/ ум соблю́дшая па́че смы́сла неразу́мнаго,/ нарица́ешися от всех пра́ведно Пресвята́я. Песнь 9 Ирмос: Всяк земноро́дный/ да взыгра́ется, Ду́хом просвеща́емь,/ да торжеству́ет же Безпло́тных умо́в естество́,/ почита́ющее свяще́нное торжество́ Богома́тере,/ и да вопие́т:/ ра́дуйся, Всеблаже́нная Богоро́дице,/ Чи́стая Присноде́во. Припев: Преподóбне óтче Симеóне, моли́ Бóга о нас. Ра́дуйся ны́не ра́достию вои́стинну безконе́чною и неизрече́нною, Симео́не треблаже́нне,/ иде́же селе́ние ра́дости благода́тное,/ пла́кася бо зде вре́менне, на Небесе́х уте́шился еси́/ и весели́шися ве́чно ра́достным и блаже́нным весе́лием. Припев: Преподóбне óтче Симеóне, моли́ Бóга о нас. Зри́ши сла́дкаго Иису́са лице́м к лицу́,/ Его́же пре́жде зре́ти сподо́бился еси́, но зерца́лом в гада́нии./ Наслаждайся у́бо, свя́те, взыгра́й и лику́й, приобща́яся ны́не Возлю́бленнаго тобо́ю,/ и нас, почита́ющих тя, помина́й. Сла́ва Отцу́ и Сы́ну и Свято́му Ду́ху. Приими́ пе́снь сию́, ю́же прино́сим, Симео́не преподо́бне,/ я́ко ме́ньший дар мно́гаго до́лга, его́же к тебе́ и́мамы,/ и награ́ду про́сим дарова́ти, Ду́ха благода́ть, и нам, моли́твами твои́ми,/ ю́же зло́бою мно́гою отврати́хом от себе́. И ны́не и при́сно и во ве́ки веко́в. Ами́нь. Богородичен: Творе́ния и Созда́теля Посредница несре́дственне пребыла́ еси́, Чи́стая,/ те́мже и полноту́ всех благода́тей прие́млеши, Всенепоро́чная,/ и подае́ши всем челове́ком же и А́нгелом,/ отону́дуже пода́ждь сию́ и нам, Влады́чице, непотре́бным рабо́м Твои́м. Светилен Богосло́ва вси Симео́на благопохва́лим,/ мона́шествующих удобре́ние и свяще́нников сла́ву,/ Богосло́вов похвалу́ и ве́рных украше́ние,/ благода́ти трубу́ и Це́ркве Христо́вы живоно́сное свети́ло. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: По Бо́зе, Пренепоро́чная, Ты Бог показа́лася еси́,/ Втори́чная иму́щи Святы́я Тро́ицы,/ ве́ры нача́ло пе́рвое и наде́жды основа́ние,/ утвержде́ние дея́ния и олта́рь Богозре́ния,/ краестро́чие проро́ков всех и Писа́ний скрижа́ль,/ небесе́ и земли́ зна́мение и стихи́я ми́ра.

Минея, 10 Октября, Кано́н свята́го Глас 8 Песнь 1 Ирмос: Колесницегони́теля фарао́ня погрузи́ / чудотворя́й иногда́ / Моисе́йский жезл, крестообра́зно порази́в / и раздели́в мо́ре: / Изра́иля же беглеца́, пешехо́дца спасе́, // песнь Бо́гови воспева́юща. Припев: Преподо́бне о́тче Амвро́сие, моли́ Бо́га о на́с. Це́рковь ны́не торжеству́ет, / све́тло пра́зднующи твою́ святу́ю па́мять, / и с ра́достию воспева́ет ти хвале́бную песнь, / сла́вящи Го́спода, ди́внаго во святы́х Свои́х. Припев: Преподо́бне о́тче Амвро́сие, моли́ Бо́га о на́с. Позна́л еси́ сла́дость жи́зни во Христе́ / и не обину́яся оста́вил еси́ пре́лесть земны́х благ и суету́ ми́ра, / всего́ себе́ покори́в Бо́гу. Припев: Преподо́бне о́тче Амвро́сие, моли́ Бо́га о на́с. Кто изочте́т по́двиги твоя́, / я́же поне́сл еси́ ра́ди Ца́рствия Небе́снаго, / в пе́нии, бде́нии и поще́нии утвержда́я дух свой? Сла́ва Отцу́ и Сы́ну и Свято́му Ду́ху. Восходи́л еси́ от си́лы в си́лу в доброде́лании за́поведей Христо́вых / и стяжа́л еси́ дар Ду́ха Свята́го, / Его́же де́йствием спасл еси́ мно́гия ду́ши христиа́нския. И ны́не и при́сно и во ве́ки веко́в. Ами́нь. Богородичен: Богоро́дице Присноде́во Мари́е, / простри́ ми ми́лостивне десни́цу на по́мощь, / умоля́ющи Сы́на Твоего́ и Бо́га, / я́ко уя́звен есмь лю́те / и на Тя то́чию наде́жду мою́ положи́х, / Ты мя уще́дри. Песнь 3 Ирмос: Утвержде́й в нача́ле небеса́ ра́зумом / и зе́млю на вода́х основа́вый, / на ка́мени мя, Христе́, за́поведей твои́х утверди́: // я́ко несть свят, па́че Тебе́, Еди́не Человеколю́бче. Припев: Преподо́бне о́тче Амвро́сие, моли́ Бо́га о на́с. Послуша́нием соверше́нным отве́рглся еси́ во́ли своея́ / и тем стра́сти существа́ па́дшаго Ада́ма отри́нул еси́, / всего́ себе́ преда́в води́тельству богому́дрых ста́рцев и отце́в пу́стыни, / и́же и возрасти́ша тя в ме́ру во́зраста духо́внаго. Припев: Преподо́бне о́тче Амвро́сие, моли́ Бо́га о на́с. Целому́дрия красоту́ стяжа́ла есть твоя́ чи́стая душа́, / си́лою покая́ния совле́кшися ве́тхаго челове́ка / и в духо́внем преуспе́янии обле́кшися во Христа́. Припев: Преподо́бне о́тче Амвро́сие, моли́ Бо́га о на́с. Бога́тства тле́ннаго ми́ра возненави́дел еси́ / и был еси́ я́ко стра́нник и пришле́ц на земли́, / взыску́я Гра́да Небе́снаго, / те́мже Домовлады́ка введе́ тя в черто́г сла́вы Своея́. Сла́ва Отцу́ и Сы́ну и Свято́му Ду́ху. Христо́с Бог обогати́ тя да́ром чуде́с, / и мно́гия боле́зни стра́ждущих исцели́л еси́, / не оста́ви нас, ча́ющих от Тебе́ благода́тныя по́мощи. И ны́не и при́сно и во ве́ки веко́в. Ами́нь. Богородичен: Наде́ждо и упова́ние на́ше, / Влады́чице ми́ра, блага́я Помо́щнице, / спаси́, и в кре́пости рог вознеси́ правосла́вных, / и лю́ди на́ша от вся́ких бед и от разли́чных обстоя́ний свободи́. Седален, глас 4 Лик мона́хов ны́не славосло́вит тя, / преподо́бне о́тче наш Амвро́сие, / ублажа́я честну́ю па́мять твою́, / и вся оби́тель в ра́дости торжеству́ет, / почита́ющи твое́ чи́стое в доброде́телех житие́ / и мно́жество чудотворе́ний, тобо́ю преизлива́емых. / Те́мже мы вси вку́пе вопие́м: / спаса́й нас моли́твами твои́ми, Амвро́сие, о́тче наш. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Под твое́ благоутро́бие притека́юще, / мо́лим, Богоро́дице Де́во, / не пре́зри пла́ча на́шего и моли́твы, / но ускори́ изба́вити от бед и скорбе́й лю́ди безотве́тныя: / Ты бо еди́на еси́ изве́стнейшее христиа́ном упова́ние, / и к Тебе́ прибега́юще, вси спаса́емся. Песнь 4 Ирмос: Ты моя́ кре́пость, Го́споди, / Ты моя́ и си́ла, / Ты мой Бог, Ты мое́ ра́дование, / не оста́вль не́дра О́тча / и на́шу нищету́ посети́в. / Тем с проро́ком Авваку́мом зову́ Ти: // си́ле Твое́й сла́ва, Человеколю́бче. Припев: Преподо́бне о́тче Амвро́сие, моли́ Бо́га о на́с. Избра́нный сосу́д Ду́ха Свята́го был еси́ / и то́ки чуде́с изли́л еси́. / Приими́ на́ша моли́твы / и исцели́ нас от ран грехо́вных и страсте́й. Припев: Преподо́бне о́тче Амвро́сие, моли́ Бо́га о на́с. Позна́вый си́лу моли́твы во спасе́ние души́, / научи́ нас душеполе́зно моли́тися / ко Изба́вителю всех ми́лостивому Иису́су. Припев: Преподо́бне о́тче Амвро́сие, моли́ Бо́га о на́с. Ве́ру и́стинную правосла́вную утверди́ в лю́дех твои́х, / чту́щих тя я́ко ревни́теля уче́ния Христо́ва. Сла́ва Отцу́ и Сы́ну и Свято́му Ду́ху. Что воздади́м ти, преблаже́нне о́тче наш, / за вся, я́же возда́л еси́ нам, ча́дом твои́м, / чту́щим твою́ честну́ю па́мять? И ны́не и при́сно и во ве́ки веко́в. Ами́нь. Богородичен: Из Твоего́ пречи́стаго чре́ва, Богороди́тельнице, / Сло́во Бо́жие произы́де несказа́нно, / Его́же объе́мши, от зол изба́вити умоли́ зову́щих: / сла́ва си́ле Твое́й, Го́споди. Песнь 5 Ирмос: Вску́ю мя отри́нул еси́ / от лица́ Твоего́, Све́те незаходи́мый? / И покры́ша мя есть чужда́я тьма, окая́ннаго. / Но обрати́ мя и к све́ту за́поведей Твои́х // пути́ моя́ напра́ви, молю́ся. Припев: Преподо́бне о́тче Амвро́сие, моли́ Бо́га о на́с. Све́том уче́ния Христо́ва просвеще́нный, / мрак заблужде́ния грехо́внаго отме́л еси́, / наста́ви во све́те повеле́ний Бо́жиих и нас, омраче́нных страстьми́. Припев: Преподо́бне о́тче Амвро́сие, моли́ Бо́га о на́с. Но́вая свеща́ возсия́л еси́, о́тче, на земли́ Росси́йстей, / озаря́я све́том любве́ Боже́ственныя вся до́льняя, / просвети́, богоно́се, нас, недосто́йных чад твои́х, / све́том за́поведей Христо́вых. Припев: Преподо́бне о́тче Амвро́сие, моли́ Бо́га о на́с. Возлюби́л еси́ бли́жняго и подъя́л еси́ его́ бре́мя грехо́в и скорбе́й, / да у́зрит свет и́стины и испра́вит стопы́ своя́ к де́ланию за́поведей Христо́вых. Сла́ва Отцу́ и Сы́ну и Свято́му Ду́ху. Унасле́довал еси́ Ца́рство Небе́сное, / иде́же пра́зднующих глас непреста́нный / и безконе́чная сла́дость зря́щих лица́ добро́ту Бо́га неизрече́нную. И ны́не и при́сно и во ве́ки веко́в. Ами́нь. Богородичен: Нескве́рная А́гнице и Богоотрокови́це Мари́е, / Твои́ми моли́твами укрепи́вшеся, / святи́и победи́ша бесо́вския си́лы. / Те́мже и нам, упова́ющим на Тя, / ско́ро предста́ни в по́мощь, / да посра́мятся и паду́т вси, явля́ющии рабо́м Твои́м зла́я. Песнь 6 Ирмос: Очи́сти мя, Спа́се, / мно́га бо беззако́ния моя́, / и из глубины́ зол возведи́, молю́ся: / к Тебе́ бо возопи́х, и услы́ши мя, // Бо́же спасе́ния моего́. Припев: Преподо́бне о́тче Амвро́сие, моли́ Бо́га о на́с. Кре́пкое заступле́ние бу́ди всем, / притека́ющим к твое́й по́мощи в неду́зех и печа́лех, о́тче наш Амвро́сие, / О́птинския оби́тели вели́кий ста́рче. Припев: Преподо́бне о́тче Амвро́сие, моли́ Бо́га о на́с. Изба́ви нас от кова́рства лука́вых духо́в / и изведи́ из глубины́ грехо́вныя, / да очи́стит нас Христо́с Бог от беззако́ний на́ших и спасе́т ду́ши на́ша. Припев: Преподо́бне о́тче Амвро́сие, моли́ Бо́га о на́с. Ка́ко рцем твои́ благодея́ния лю́дем, стра́ждущим и уничиже́нным? / Ка́ко воспои́м ти благода́рственную песнь? / Приими́ ны́не песнь хвале́бную недосто́йных чад твои́х. Сла́ва Отцу́ и Сы́ну и Свято́му Ду́ху. Посети́ на́ша не́мощи по ми́лости твое́й, / исцели́ я́звы духо́вныя си́лою да́нною ти свы́ше благода́ти, / да воста́нем от ме́ртвеннаго сна грехо́внаго. И ны́не и при́сно и во ве́ки веко́в. Ами́нь. Богородичен: Песносло́вяще, Чи́стая, из утро́бы Твоей Вопло́щшагося, / Тя славосло́вим, я́ко Бо́жию Ма́терь. Кондак, глас 2 Заве́т Пастыренача́льника испо́лнив, / ста́рчества благода́ть насле́довал еси́, / боле́знуя се́рдцем о всех, с ве́рою притека́ющих к тебе́. / Те́мже и мы, ча́да твои́, с любо́вию вопие́м ти: / о́тче святы́й Амвро́сие, // моли́ Христа́ Бо́га спасти́ся душа́м на́шим. Икос Доброзра́чное житие́ показа́л еси́ / и свои́ми доброде́тельми озари́л еси́ всю зе́млю Ру́сскую, / привле́кл еси́ к себе́ вся концы́ Оте́чества на́шего, / окормля́я неисче́тную па́ству ве́рных чад твои́х, / и́хже с любо́вию призре́л еси́, я́ко оте́ц чадолюби́вый и ми́лостивый. / Те́мже сте́кшеся в день преставле́ния твоего́, / во умиле́нии зове́м: / ра́дуйся, подви́жниче благоче́стия, восприе́мый бога́тыя да́ры Ду́ха Всесвята́го; / ра́дуйся, высото́ смире́ния и терпе́ния, и́миже науча́еши ве́рная ча́да своя́; / ра́дуйся, дре́во плодоно́сное, и́мже напита́л еси́ мно́жество а́лчущих жи́зни ве́чныя; / ра́дуйся, цве́те благоуха́нный любве́ Боже́ственныя, е́юже утеша́ются скорбя́щии и боле́знующии; / ра́дуйся, исто́чниче приснотеки́й чуде́с и благотворе́ний, от ни́хже боля́щии исцелева́ют и ги́бнущии спаса́ются; / ра́дуйся, дерзнове́нный хода́таю наш пред пра́ведным Судие́ю; / ра́дуйся, помо́щниче нам пресла́вный во всех обстоя́ниих. / Ра́дуйся, богому́дре Амвро́сие, вели́кий ста́рче всеросси́йский. Песнь 7 Ирмос: Бо́жия снизхожде́ния / огнь устыде́ся в Вавило́не иногда́: / сего́ ра́ди о́троцы в пещи́ ра́дованною ного́ю, / я́ко во цве́тнице, лику́юще, поя́ху: // благослове́н еси́, Бо́же оте́ц на́ших. Припев: Преподо́бне о́тче Амвро́сие, моли́ Бо́га о на́с. Пресели́лся еси́ в Го́рния черто́ги / и та́мо зри́ши сла́ву неизрече́нную преве́чнаго Бо́га, зовя́: / благослове́н еси́, Бо́же оте́ц на́ших. Припев: Преподо́бне о́тче Амвро́сие, моли́ Бо́га о на́с. В со́нме святы́х уго́дников ны́не / прославля́еши прему́драго Творца́ и Го́спода Сил, воспева́я: / благослове́н еси́, Бо́же оте́ц на́ших. Припев: Преподо́бне о́тче Амвро́сие, моли́ Бо́га о на́с. С ли́ки А́нгелов и Арха́нгелов предстои́ши пред лице́м Вседержи́теля / и та́мо немо́лчно пое́ши: / благослове́н еси́, Бо́же оте́ц на́ших. Сла́ва Отцу́ и Сы́ну и Свято́му Ду́ху. Вни́де в ра́дость Го́спода, я́ко до́брый и ве́рный раб его́ был еси́ на земли́, / и ны́не на Небесе́х взыва́еши: / благослове́н еси́, Бо́же оте́ц на́ших. И ны́не и при́сно и во ве́ки веко́в. Ами́нь. Богородичен: Виждь, Влады́чице, души́ моея́ злосмра́дныя ра́ны, / и́хже самохо́тне подъя́х, окая́нный, и не могу́ приложи́ти пла́стыря, но е́ле жив сый, вопию́: / ми́лостива мне Врача́ всех и Бо́га ма́терними твои́ми моли́твами сотвори́, / я́ко да воспою́ ти: / благослове́н, Пречи́стая, Плод Твоего́ чре́ва. Песнь 8 Ирмос: Седмери́цею пещь / халде́йский мучи́тель / богочести́вым неи́стовно разжже́, / си́лою же лу́чшею спасе́ны сия́ ви́дев, / Творцу́ и Изба́вителю вопия́ше: / о́троцы, благослови́те, / свяще́нницы, воспо́йте, // лю́дие, превозноси́те во вся ве́ки. Припев: Преподо́бне о́тче Амвро́сие, моли́ Бо́га о на́с. Це́рковь ны́не ликовству́ет, / пра́зднующи блаже́нную па́мять твою́, достохва́льне о́тче, / и обре́тение честны́х моще́й твои́х прославля́ет ра́достно, пою́щи: / да благослови́т вся тварь Го́спода и превозно́сит Его́ во ве́ки. Припев: Преподо́бне о́тче Амвро́сие, моли́ Бо́га о на́с. Собра́шася ны́не в оби́тели святе́й мона́хов мно́жество, / ублажа́ющих твою́ честну́ю па́мять и пою́щих с ра́достию: / да благослови́т вся тварь Го́спода и превозно́сит Его́ во ве́ки. Припев: Преподо́бне о́тче Амвро́сие, моли́ Бо́га о на́с. Па́стырие и учи́телие стеко́шася в сей град оби́тельный, / иде́же в доброде́телех ты процве́л еси́, поя́: / да благослови́т вся тварь Го́спода и превозно́сит Его́ во ве́ки. Сла́ва Отцу́ и Сы́ну и Свято́му Ду́ху. Ста́рии и млади́и, си́льнии и немощни́и приидо́ша ны́не в дом Госпо́день / просла́вити преподо́бнаго ста́рца и отца́ на́шего Амвро́сия, вопию́ще: / да благослови́т вся тварь Го́спода и превозно́сит Его́ во ве́ки. И ны́не и при́сно и во ве́ки веко́в. Ами́нь. Богородичен: Oт Тебе́, Пресвята́я Богоро́дице, / излия́ся вода́ живо́тная на омове́ние скве́рны всеми́рныя, / е́юже благоволи́ и мое́ се́рдце прохлади́ти / и окропи́ти росо́ю моли́тв в кро́ве крил Твои́х во ве́ки вся. Песнь 9 Ирмос: Ужасе́ся о сем Не́бо, / и земли́ удиви́шася концы́, / я́ко Бог яви́ся челове́ком пло́тски / и чре́во Твое́ бысть простра́ннейшее Небе́с. / Тем Тя, Богоро́дицу, // А́нгелов и челове́к чинонача́лия велича́ют. Припев: Преподо́бне о́тче Амвро́сие, моли́ Бо́га о на́с. Пропове́дует ны́не Правосла́вная Це́рковь по́двиги твоя́, / я́ко всеросси́йскаго уго́дника Бо́жия, / и чтит твою́ па́мять, / восхваля́ющи твое́ ангелоподо́бное житие́. Припев: Преподо́бне о́тче Амвро́сие, моли́ Бо́га о на́с. При́зри с Небесе́, о́тче наш Амвро́сие, на ве́рныя лю́ди твоя́ / и низпосли́ свы́ше ру́ку по́мощи / всем покланя́ющимся честно́му о́бразу твоему́. Припев: Преподо́бне о́тче Амвро́сие, моли́ Бо́га о на́с. Услы́ши глас моле́ния на́шего, / посети́ ми́лостию твое́ю боле́зни и не́мощи чад твои́х, / с ве́рою к тебе́ прибега́ющих, досточу́дне о́тче наш. Сла́ва Отцу́ и Сы́ну и Свято́му Ду́ху. Припа́даем во умиле́нии серде́ц на́ших к стопа́м твои́м, / вели́кий ста́рче земли́ на́шея, про́сим и мо́лим: / не забу́ди посеща́ти чту́щия пречестну́ю па́мять твою́. И ны́не и при́сно и во ве́ки веко́в. Ами́нь. Богородичен: Ко́е Тебе́ дарова́ние принесе́м, Богоро́дице? / Или́ что веща́ти и́мамы, гре́шнии? / То́чию уми́льно вопие́м, моля́щеся: / спаси́ рабы́ Твоя́, Богоблагода́тная Отрокови́це, / я́ко да Тя при́сно велича́ем. Светилен Мона́шескаго о́браза житие́ избра́в непрело́жно / и отри́нув ми́ра сего́ суету́ и сла́ву, / всели́лся еси́ в оби́тель Богоро́дицы, / преподо́бне о́тче наш Амвро́сие, / и процве́л еси́, я́ко крин се́льный. / Мы же, чту́ще святу́ю па́мять твою́, зове́м ти: / бу́ди нам помо́щник и засту́пник в беда́х и ско́рбех обстоя́щих. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Ра́дуйся, Тебе́ зове́м, благослове́нная Богоро́дице Де́во, / я́ко Тобо́ю присносу́щныя ра́дости прича́стницы бы́хом. / Живо́т бо наш и спасе́ние недомы́слимо и превы́ше естества́ родила́ еси́, / сего́ ра́ди непреста́нно ублажа́ют Тя ро́дове родо́в, / я́коже пре́жде прорекла́ еси́.

Минея, 26 Августа, Праздника сре́тения чудотво́рный ико́ны Пресвяты́я Богоро́дицы, я́же нарицается «Влади́мирская» Глас 4 Песнь 1 Ирмос: Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,/ и воспою́, ра́дуяся, Тоя́ чудеса́. Припев: Пресвята́я Богоро́дице, спаси́ на́с. Просвети́, Влады́чице, ду́ши на́ша заре́ю Боже́ственною, па́че ума́ благода́тию Твое́ю,/ и незави́стный дар пода́ждь ми воспе́ти Тя,/ я́ко Помо́щницу челове́ческому существу́, Препе́тая,/ ве́рное заступле́ние, на враги́ побе́ду оте́честву на́шему. Припев: Пресвята́я Богоро́дице, спаси́ на́с. Прииди́те, собери́теся, Росси́йстии собо́ри,/ в пречестны́й храм Всенепоро́чныя Влады́чицы/ и возопи́йте, уми́льно моля́щеся, к честно́му о́бразу взира́юще:/ Богоро́дице Безневе́стная, хваля́щия Тя спаси́. Сла́ва Отцу́ и Сы́ну и Свято́му Ду́ху. Твой, Богома́ти, всечестны́й о́браз/ Богогла́сный Ева́нгелия Христо́ва списа́телъ, пребоже́ственный Лука́, написа́в,/ Творца́ всех на Твои́х честны́х рука́х вообрази́,/ к нему́же притека́ющия напа́сти и печа́ли избавля́еши/ и вся покрыва́еши Твое́ю ми́лостию. И ны́не и при́сно и во ве́ки веко́в. Ами́нь. Храм прекра́сный, Соде́тель всех еди́ну Тя обре́т,/ в Тя всели́ся и челове́ки обожи́./ К Нему́же за ны, Богоро́дице, моли́ся,/ спасти́ ны от пога́ных плене́ния и вся́кия ины́я ско́рби, находя́щия на ны,/ да Твоего́ днесь о́браза сре́тение всече́стно пра́зднуем. Песнь 3 Ирмос: Твоя́ песносло́вцы, Богоро́дице/ Живы́й и Незави́стный Исто́чниче,/ лик себе́ совоку́пльшия, духо́вно утверди́,/ в Боже́ственней Твое́й сла́ве/ венце́в сла́вы сподо́би. Припев: Пресвята́я Богоро́дице, спаси́ на́с. Все помышлени́е отве́ргше, Богому́дрии, прииди́те в сре́тение прекра́сныя зари́,/ держа́щия пресве́тлую лучу́, вся просвеща́ющую/ и ми́лостию весь мир обога́щшую. Припев: Пресвята́я Богоро́дице, спаси́ на́с. Твою́, Богома́ти, всечестну́ю и чудотво́рную ико́ну Росси́йстии лю́ди стяжа́вше,/ я́ко заступле́ние кре́пко и сте́ну неруши́му,/ моля́тся Ти, на враги́ побе́ду дарова́ти оте́честву на́шему. Сла́ва Отцу́ и Сы́ну и Свято́му Ду́ху. О́блак светоза́рный показа́ся,/ росо́ю благода́ти вся омыва́ющи теле́сныя скве́рны/ и ду́ши просвеща́ющи, еди́на Всепе́тая. И ны́не и при́сно и во ве́ки веко́в. Ами́нь. Дре́во многопло́дно яви́лася еси́, пи́щею неги́блющею вся насыща́ющи,/ ду́ши же веселя́щи, Богоневе́сто Чи́стая,/ добродея́ния всем источи́/ и от скорбе́й ну́ждных спаси́. Седален, глас 4 Наро́ди боголюби́вии, прииди́те в сре́тение:/ се бо приходи́т Де́ва, всех проро́ков превы́шши,/ честны́м Свои́м о́бразом, Жи́знодателя ми́ру на рука́х име́ющи,/ град Свой сохраня́ти стра́ждущий, ва́рварскую де́рзость низложи́ти,/ вообрази́тися всем Храни́тельница тверда́,/ держа́ва и огражде́ние ве́рно моля́щимся. Песнь 4 Ирмос: Неизсле́дный Бо́жий Сове́т,/ еже от Де́вы воплоще́ния/ Тебе́, Вы́шняго,/ проро́к Авваку́м усмотря́я, зовя́ше:/ Сла́ва си́ле Твое́й, Го́споди. Припев: Пресвята́я Богоро́дице, спаси́ на́с. Го́ру преве́лию, ю́же Дании́л ви́де, от нея́же ка́мень отсече́ся без руки́/ и вся собла́зны истни́, ве́рныя же просвети́,/ и́стинное светоза́рное со́лнце показа́, луча́ми просвеща́ющи, Богоро́дице Присноде́во. Припев: Пресвята́я Богоро́дице, спаси́ на́с. Вооружа́ются на лю́ди Твоя́, Чи́стая Богоро́дице, сы́нове Ага́рины,/ злый сове́т творя́ще, гра́ды разоря́юще, ве́рныя же погубля́юще,/ но Ты, Всепе́тая, Твое́ю ми́лостию вся низложи́,/ исма́ильтяны враги́ покаря́ющи оте́честву на́шему. Сла́ва Отцу́ и Сы́ну и Свято́му Ду́ху. Не́бо одушевле́но, еди́на Богома́ти, Свет ве́лий прие́мши,/ вся просвеща́ющи, тьму держа́щих бед разжени́/ и нас Вы́шняго прича́стия сподо́би. И ны́не и при́сно и во ве́ки веко́в. Ами́нь. Дави́д пред киво́том ликовству́ет, леви́ти же воспева́ют,/ па́че же пред Тобо́ю, Богороди́тельнице Чи́стая,/ Росси́я хвала́ми я́ко Цари́цу воспева́ет,/ гласы моле́бными приле́жно Ти вопию́щи:/ ра́дуйся, Засту́пнице гра́да на́шего. Песнь 5 Ирмос: Ужасо́шася вся́ческая/ о Боже́ственней сла́ве Твое́й:/ Ты бо, Неискусобра́чная Де́во,/ име́ла еси́ во утро́бе над все́ми Бо́га/ и родила́ еси́ Безле́тнаго Сы́на,/ всем воспева́ющим Тя/ мир подава́ющая. Припев: Пресвята́я Богоро́дице, спаси́ на́с. Тебе́, Богома́ти, вели́кий во проро́цех Иса́ия прови́де ду́хом,/ Угль име́ющу во чре́ве, ве́рныя просвеща́ющ и собла́зны вся пожига́ющ,/ спаса́я род челове́ч. Припев: Пресвята́я Богоро́дице, спаси́ на́с. Жезл Ааро́нов прозя́бла еси́/ и зло́бный ко́рень исто́ргнула еси́, Де́во Богоневе́стная,/ Жизнода́теля ро́ждши ми́ру,/ Его́же моли́ сему́ гра́ду спасти́ся от мно́гих напа́стей. Сла́ва Отцу́ и Сы́ну и Свято́му Ду́ху. Ны́не у́бо приступи́те с весе́лием, Богоизбра́нное ста́до, Росси́йстии собо́ри,/ ко Всечестне́й Бо́жии Ма́тери и честны́й Ея́ о́браз любе́зно приими́те:/ се бо благода́ть неисчерпа́емая, во́ды точа́щи Боже́ственныя неоску́дно,/ Ю́же, ве́рнии, почти́м и честно́му образу́ Ея́ поклони́мся. И ны́не и при́сно и во ве́ки веко́в. Ами́нь. От ко́рене Иессе́ева дре́во возрасте́ всем животное,/ Плод у́бо прозя́бла еси́ во утро́бе Твое́й, Де́во Чи́стая,/ вся лю́ди насыща́ющи Твое́ю ми́лостию. Песнь 6 Ирмос: Боже́ственное сие́ и всечестно́е/ соверша́юще пра́зднество,/ Богому́дрии, Богома́тере,/ прииди́те, рука́ми воспле́щим,/ от Ней ро́ждшагося Бо́га сла́вим. Припев: Пресвята́я Богоро́дице, спаси́ на́с. От Тебе́, Богома́ти, истече́ поток сла́дкий,/ вся напая́я лю́ди, душ измыва́я скве́рны, Богоро́дице Влады́чице,/ спаси́ всех, покланя́ющихся ве́рно честно́му о́бразу Твоему́. Припев: Пресвята́я Богоро́дице, спаси́ на́с. Вси у́бо, совоку́пльшеся вку́пе, воспое́м Чи́стую Де́ву,/ Богоизбра́нную ле́ствицу Иа́ковлю, Гедео́ново же руно́, ра́дости Хода́таицу,/ кре́пость и похвалу́ спаса́емых, Богороди́тельницу Чи́стую. Сла́ва Отцу́ и Сы́ну и Свято́му Ду́ху. Се ны́не весе́лие приближа́ется,/ скорбь же потребля́ется, ве́рнии спаса́ются,/ я́ко от исто́чника ра́дость почерпа́юще, вы́ну хвала́ми воспева́ют:/ ра́дуйся, Чи́стая Влады́чице, спасе́ния на́шего нача́ток/ и всех ве́рных стена́ и похвала́. И ны́не и при́сно и во ве́ки веко́в. Ами́нь. Пода́ждь нам по́мощь мольба́ми Твои́ми, Пречи́стая Богоро́дице,/ ско́рби у́бо нахо́дят на ны и печа́ли умножа́ются, врази́ ополча́ются,/ но Ты, Пречи́стая, предста́вши, изба́ви,/ враго́в на́ших шата́ние низложи́, на враги́ побе́ду да́руй,/ да посра́мятся вси, явля́ющии рабо́м Твои́м зла́я. Кондак, глас 8 Взбра́нной Воево́де победи́тельная,/ я́ко изба́вльшеся от злых/ прише́ствием Твоего́ честна́го о́браза, Влады́чице Богоро́дице,/ све́тло сотворя́ем пра́зднество сре́тения Твоего́ и обы́чно зове́м Ти:/ ра́дуйся, Неве́сто Неневе́стная. Икос А́нгел Предста́тель с Небесе́ по́слан бысть рещи́ Богоро́дице: ра́дуйся,/ и, со безпло́тным гла́сом воплоща́ема Тя зря, Го́споди, ужаса́шеся,/ и стоя́ше, зовы́й к Ней такова́я:/ ра́дуйся, Е́юже ра́дость возсия́ет;/ ра́дуйся, Ею́же кля́тва исче́знет./ Ра́дуйся, па́дшаго Ада́ма воззва́ние;/ ра́дуйся, слез Е́виных избавле́ние./ Ра́дуйся, высото́ неудобовосходи́мая челове́ческими по́мыслы;/ ра́дуйся, глубино́ неудобозри́мая и а́нгельскима очи́ма./ Ра́дуйся, я́ко еси́ Царе́во седа́лище;/ ра́дуйся, я́ко но́сиши Нося́щаго вся./ Ра́дуйся, звездо́, явля́ющая со́лнце;/ ра́дуйся, утро́бо Боже́ственнаго воплоще́ния./ Ра́дуйся, Ею́же обновля́ется тварь;/ ра́дуйся, Ею́же покланя́емся Творцу́./ Ра́дуйся, Неве́сто Неневе́стная. Песнь 7 Ирмос: Не послужи́ша тва́ри Богому́дрии/ па́че Созда́вшаго,/ но, о́гненное преще́ние му́жески попра́вше,/ ра́довахуся, пою́ще:/ препе́тый отце́в Госпо́дь и Бог, благослове́н еси́. Припев: Пресвята́я Богоро́дице, спаси́ на́с. Я́ко порфи́рою и ви́ссом, червле́ною хлами́дою, Де́во Богоро́дице Влады́чице,/ град Твой Тобо́ю оде́явся, Христа́ велича́ет/ и прише́ствие честна́го Твоего́ о́браза сла́вит,/ я́вльшася па́че луч со́лнечных/ и немра́чным све́том просвеща́юща велегла́сно хваля́щия Тя. Припев: Пресвята́я Богоро́дице, спаси́ на́с. Скрижа́ли, богопи́санныя пе́рстом Ду́ха, в я́рости Моисе́й сокруши́;/ но в Тебе́, Чи́стая, пресла́вный Творе́ц всели́вся, невре́дну Тя сохрани́./ Ему́же пое́м:/ оте́ц на́ших Бо́же, благослове́н еси́. Сла́ва Отцу́ и Сы́ну и Свято́му Ду́ху. Приими́ Твои́х раб мольбы, Пречи́стая Де́во Богоро́дице,/ непостоя́нную бу́рю ути́ши моли́твами Твои́ми/ и сове́ты проти́вных враго́в разжени́,/ напада́ющих на ста́до Твое́, Всенепоро́чная Влады́чице. И ны́не и при́сно и во ве́ки веко́в. Ами́нь. Тебе́ еди́ну Помо́щницу ро́ду челове́ческому, Богоро́дице Мари́е,/ Зижди́тель всех рождество́м Свои́м назна́мена и проро́цы прообрази́ша:/ ов Тя дверь, ин же Тя ло́жницу Бо́жию;/ мы же Тя воспева́ем Роди́тельницу Бо́жию, и Хода́таицу к Бо́гу,/ и Засту́пницу от всех зол, находя́щих на ны. Песнь 8 Ирмос: О́троки благочести́выя в пещи́/ Рождество́ Богоро́дичо спасло́ есть,/ тогда́ у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте, дела́,/ и превозноси́те Его́ во вся ве́ки. Припев: Пресвята́я Богоро́дице, спаси́ на́с. Ка́ко Тя, Де́во, по достоя́нию воспое́м?/ По́мощь тве́рдую, Храни́тельницу жи́зни на́шея/ и Хода́таицу непрело́жну к Сы́ну Твоему́ и Бо́гу на́шему,/ Его́же воспева́ем и превозно́сим во ве́ки. Припев: Пресвята́я Богоро́дице, спаси́ на́с. Цве́те прекра́сный и во́ня пи́щная, облагоуха́еши, Богоро́дице Мари́е, вся,/ и спаса́еши, и от неду́г исцеля́еши, бе́сы прогоня́еши./ Те́мже Ти вопие́м:/ ра́дуйся, Помо́щнице всем моля́щимся ве́рным. Сла́ва Отцу́ и Сы́ну и Свято́му Ду́ху. Столп я́вльшися, Богома́ти, нахожде́ния проти́вных отгоня́:/ Тя бо чту́щим се́рдцем те́плым яви́лася еси́ стена́, и огражде́ние,/ и спаси́тельное прибе́жище. И ны́не и при́сно и во ве́ки веко́в. Ами́нь. Дави́дски воспева́ем Ти песнь, го́ру Бо́жию Тя имену́юще, Пречи́стая Де́во:/ Исто́чника бо су́щим приснотеку́щаго источи́ла еси́./ Его́же пое́м и превозно́сим во ве́ки. Песнь 9 Ирмос: Всяк земноро́дный/ да взыгра́ется, Ду́хом просвеща́емь,/ да торжеству́ет же Безпло́тных умо́в естество́,/ почита́ющее свяще́нное торжество́ Богома́тере,/ и да вопие́т:/ ра́дуйся, Всеблаже́нная Богоро́дице,/ Чи́стая Присноде́во. Припев: Пресвята́я Богоро́дице, спаси́ на́с. Ра́дости Хода́таице, возвесели́ наш смысл вопи́ти Тебе́, Богоро́дице Чи́стая:/ ра́дуйся, Храни́тельнице на́ша,/ держа́во, и огражде́ние, и спаси́тельное прибе́жище. Припев: Пресвята́я Богоро́дице, спаси́ на́с. Да восхваля́т согла́сно Тя не́бо и земля́ ,/ я́ко Жизнода́теля ми́ру ро́ждши:/ ра́дуйся, ти́хое приста́нище, живо́тныя воды исто́чниче неисчерпа́емый, Влады́чице. Сла́ва Отцу́ и Сы́ну и Свято́му Ду́ху. Собра́вшеся днесь, лю́дие, во сре́тение Пречи́стыя Бо́жия Ма́тере,/ Я́же виногра́да мы́сленнаго грезн нося́щи,/ вино́ источа́ющ всегда́ и весе́лия всех исполня́ющ,/ я́ко Богоро́дицу по до́лгу сла́вим. И ны́не и при́сно и во ве́ки веко́в. Ами́нь. Боже́ственная река вод живо́тных, вся удо́лия напоя́ющи,/ на́ша собла́зны, Богома́ти, погрузи́ и до конца́ потре́би́. Светилен Да почти́тся днесь Богома́ти, Зижди́теля ро́ждшая,/ ра́йских две́рей отверзе́ние и всего́ ми́ра очище́ние,/ побе́ду да́вшая христолюби́вому во́инству,/ о Сей бо проро́цы глаго́лаша, Той поклони́мся. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Пресве́тлая днесь ми́лостивная све́тлость,/ Бо́жия благода́ть, вся ра́достно одождя́ет небе́сными ту́чами,/ на стези́ сла́дкия направля́ющи, Богоро́дице Влады́чице,/ всех, позна́вших Тя земны́х, Присноде́во,/ ны́не бо вся земля́ Росси́йская ра́дуется, ве́рою Тя сла́вящи.

Изрядному воеводе и правоверному,/ благодарственная восписует ти вся Русь, Василие, имущи тя начальника и заступника,/ яко избавил еси нас от всякия скверны и лести, темже ти вопием:/ радуйся, великий княже Владимире преблаженне.

Видев себе ради темничныя двери отверсты в полунощи/ и идолы сокрушены,/ и Гортинскую паству святительскую,/ от Бога повеленную, добре упас,/ и по Христе надеждно пострадав,/ священномучениче Кирилле,/ молися за чтущия тя.

Приводим Ти, о Всещедре, Иулианию,/ присносветящую свещу, елеем благодати обдержимую,/ немощным цельбу./ Еяже молитвами от всякаго зла свободи нас и спаси всех,/ иже Тя с поклонением величают.

Взирающе на предлежащий честный твой гроб,/ в немже скрыся, яко многоценное сокровище, святое трудолюбное твое тело чистоты,/ мы, чада твоя суще жалостная,/ в удивлении един со единем вещающе, вопием:/ отче наш Сергие, моли Святую Троицу/ и нам спастися, твоим чадом.

Желанием духовным в пустыню вселился еси/ и, тамо невозвратно шествовав Божественными стезями,/ достигл еси в Небесныя обители,/ и ныне со Ангелы предстоиши/ у Престола всех Царя Христа Бога,/ Емуже прилежно молися/ помиловати град сей и люди,/ верою празднующия пречестную память твою,// Тихоне преподобне, отче наш.

К Взбранней Воеводе и Заступнице, Деве и Богородице,/ в чистей совести, верою утвердившеся, русстии народи,/ невозвратно надежду имуще, притецем,/ к чудотворному Ей и пречистому образу, и возопием Ей:/ радуйся, Невесто Неневестная.

Возсия днесь пресветлая память премудраго Артемия;/ Богоданная благодать, яко реки, изливает от целебных мощей его дивная исцеления,/ имиже от многоразличных недуг избавляемся,/ с верою приемлюще я и взывающе:/ радуйся, Артемие Богомудре.

Благочестия непобедимаго воина/ и истины согласника и оружника,/ вси достойно восхвалим/ Иулиана днесь/ и к нему возопиим:// моли Христа Бога о всех нас.

В преподобных преподобнейшаго и в блаженных блаженнейшаго учителя,/ песньми восхвалим Иеронима достохвальнаго,/ верных наставника и заступника, любовию тому зовуще:/ радуйся, отче Богомудре.

Кондак 1 Избранная служительнице Бога воплощеннаго и чистая хранительнице девства нерастленнаго, родителей своих Христа ради отрекшуся и крове исповедницы порфирою облекшуся, в лик празднственный ныне тя вси чтущии сошедшеся любовию поем, о, Злато, Церкве позлащение: но яко непорочная невеста Слова Божия и велие ко Господу имущи дерзновение, о нас, всеокаянных, молися неотступно, да мира многострастнаго океан преплывше, сподобимся в день судный благодати свыше, тебе с благодарением умильно вопиюще: Радуйся, великомученице Злато, златая целомудрия палато. Икос 1 Ангелов и всех святых небесных удивление, любовию Христа возлюбльшая презельною и девства чисте обручившися Тому хранением, Злата достохвальная пребысть неоскверненною; и вено златотканное — одежду обагренную Небесному Обручнику с веселием вручи. Молитвенницу теплую от Бога получивше, девице богомудренней умильно вопием: Радуйся, источниче небесных утешений; Pадуйся, прекрасное девства прославление. Радуйся, Царя Христа обручнице нескверная; Pадуйся, заступнице всем любящым тя верная. Радуйся, кадильнице Святейшему лучистая; Pадуйся, девице благонравная и чистая. Радуйся, звездо, во мраце рабства просиявшая; Pадуйся, луно златая, тьму греха разгнавшая. Радуйся, великомученице Злато, златая целомудрия палато. Кондак 2 Видящи святая сатанинство неверных, доблественно муки претерпети положи в сердце и молитвою укрепльшися, рече: «Верую во Христа, Тому Единому служу, Той бо есть Жених, Егоже аз не отрекуся даже аще тмы страданий ныне претерплю». Сицевое девы богомудрыя рачение хваляще, поем Христу умильно: Аллилуиа. Икос 2 Разума небеснаго девицы невмещающе и хотяще сквернии грехом растлити Злату, отдаша ю женам своим, да, льстяще и вещающе, помутят сердце девы сластолюбием и златом. Обаче не смутися, ни подвижеся святая, но паче благодатию мужающися в любви пребысть на Веры камени, поганиц посрамляющи; темже и мы златую Злату сице воспеваем: Радуйся, Христова избраннице венчанная; Pадуйся, Болгарии печальнице всехвальная. Радуйся, Божественныя Веры славословие; Pадуйся, смирившая агарян пустословие. Радуйся, смутившая поганцев, боголюбице; Pадуйся, любезная другине Богородицы. Радуйся, пресладостное мучеников пение; Pадуйся, от ереси надежное хранение. Радуйся, великомученице Злато, златая целомудрия палато. Кондак 3 Силою прельщения сломити невозмогше Злату благонравную, зловернии призваша с сестрами ея, отца и матери — слезами да деву отвратят от Веры чистыя, хвалами, да никогда возможет Богу пети: Аллилуиа. Икос 3 Имущи дева чистую к родителем любовь смутися обольщением и вмале не подвижеся, обаче не возможе ухищрение врагов, и Злата небомудренно родителей отвержеся: «Глаголющих ми истиннаго Бога отрещися, отныне вас не вем. Христос Отец есть мой, и Матерь ми отныне есть Владычица Пречистая, всех мучеников вои мне суть братия и сестры!» Мы убо небомудрию дивимся Златы чистыя и гласы непрестанными ей сице вопием: Радуйся, соловей святыя Церкве богогласный; Pадуйся, сосуде девства, светлый и прекрасный. Радуйся, превечную весну достигший цвете; Pадуйся, нас озаривый златозарный свете. Радуйся, блаженство воспевающих тя вечное; Pадуйся, всем чтущым тя радость безконечная. Радуйся, сокровище благих и исцеления; Pадуйся, свеще пречудна верным озарения. Радуйся, великомученице Злато, златая целомудрия палато. Кондак 4 Бурею к родителем не возмог пристрастия Злату на нечестие поганское прельстити, диавол возъярися и неверных распаляше зверское, во еже ю нещадно бити. Плоть девицы чистыя агаряне начаша резати и пред очима ея вешати ю, но паче прежде к Богу возгореся Злата пламенем любве, Христу в терпении поющи: Аллилуиа. Икос 4 Отцу ея духовному иерею Тимофею прилучшуся страданий места близу, Злата к нему посла, просящи: да молитвою своею поможет ей течение страдальчества скончати. И, Златою посрамлены, злодеи озверевше, повесиша на древе непорочную девицу и резаху ю, дондеже от плоти разрешися. Она же ныне духом слышит поющия ю сице: Радуйся, златая Македонии девице; Pадуйся, крилома нас хранящая орлице. Радуйся, супружества честнаго ограждение; Pадуйся, монашества златое украшение. Радуйся, всем верным благоверная княгине; Pадуйся, всем девствующым верная другине. Радуйся, святыя Веры лиро златогласная; Pадуйся, деннице целомудрием прекрасная. Радуйся, великомученице Злато, златая целомудрия палато. Кондак 5 Боготечную звезду сию, нам верно озарившую тесный путь спасения в растленнем веце сем, Злату, чашу горькую до дна выпившую хваляще немолчно, Богу вопием: Аллилуиа. Икос 5 Видев дщере лютыя духовныя страдания, Тимофей святому Никодиму вся поведа; Никодим же славный благочестным в назидание всезлатыя Златы написа победу. Мощи всечестныя девы вземше, благовернии со благоговением и пеньми погребоша, с чистым фимиамом к небесем каждением пение всечудней сицевое вознесоша: Радуйся, садов небесных ластовице белая; Pадуйся, поправшая врага девице смелая. Радуйся, нам диавола безсилие явившая; Pадуйся, всем силу целомудрия открывшая. Радуйся, духовное млеко нам источающая; Pадуйся, языков новых нравы обличающая. Радуйся, всем любящым тя радосте спасения; Pадуйся, от скверны мира верным сохранение. Радуйся, великомученице Злато, златая целомудрия палато. Кондак 6 Проповедь Евангелия в веце ересей присно ухищряется людей поработитель упразднити лжею в умножении страстей, яко да никтоже воспоет Спасителю: Аллилуиа. Икос 6 Возсиявши в мраце долгих лет порабощения, Злата златолучное нам солнце показася, имже тьма разгнася агарянскаго прельщения, тепле озаряюще страждущий наш род. Днесь султан духовный вновь обаче воцарися, люди обольщая Православия предательми; проповедь Евангелия паки мрак объят, темже со слезами от нощи взываем Злате: Радуйся, прельщенных к свету Истины воззвание; Pадуйся, всех кающихся твердое возстание. Радуйся, иконо всезлатая Православия; Pадуйся, бесов нечистых славное прогнание. Радуйся, родов славянских грозде чист и сладок; Pадуйся, поточе златоструен и пресладок. Радуйся, девице, голубицы чистшая; Pадуйся, реко, струями Церковь позлатившая. Радуйся, великомученице Злато, златая целомудрия палато. Кондак 7 Хотящия от нынешняго века заблуждений и многих ересей ко свету Истины преити, девице чистонравная, избави от тимения, да вкупе водворимся в храм пресветлый чистоты, поюще Свободившаго навеки нас от тли: Аллилуиа. Икос 7 Новую тя всех Царя невесту ублажаем, чтуще тя усердную молитвенницу Злато, яко в ниве рабства клас прозябший златостеблен, напоенней кровию неведомых страдальцев, с нимиже о нас молися, славная девице, поющих тебе сице: Радуйся, воистинну рабо Господня верная; Pадуйся, Христа невесто чистая, нескверная. Радуйся, прекрасный крине нивы целомудрия; Pадуйся, пресладкий соте луга богомудрия. Радуйся, любве зерцало небоорошенное; Pадуйся, Святаго Духа езеро блаженное. Радуйся, златое добродетелей сияние; Pадуйся, прекрасное Зиждителя ваяние. Радуйся, великомученице Злато, златая целомудрия палато. Кондак 8 Странное и дивное явила есть терпение Злата страстотерпица, Болгарии покров — та бо нам явися дний последних утешение, место сокровения от злобы всех врагов. Темже велегласное о ней возносим пение к Богу: Аллилуиа. Икос 8 Вся Церковь Православная днесь светло торжествует, в превыспренних всех Ангелов славление звучит и вкупе земнороднии с небесными ликуют — вся Златы память светлую земная тварь творит. Вси в мраце утомленнии, грядите, почерпите прощение грехов от вод источника пречистаго, и вси обремененнии печальми приидите, да солнцу Православия лучистому поем: Радуйся, Едема голубице белоснежная; Pадуйся, любве Христовы высото безбрежная. Радуйся, село, плодами щедрое и тучное; Pадуйся, раздравый мрака кресте златолучный. Радуйся, избраннице Царя веков прекрасная; Pадуйся, Святыя Веры гусле доброгласная. Радуйся, безблазнства изящний аметисте; Pадуйся, кристале богорядия пречистый. Радуйся, великомученице Злато, златая целомудрия палато. Кондак 9 Всякое дыхание и Ангелов сословие зряще тя, дивляхуся, понеже юна сущи познала еси тайны несказанно Богословия, возмогши пред лицем врагов воспети Присносущному: Аллилуиа. Икос 9 Витийскаго искусства невладеющи, святая агарян безсловесие премудро обличи, и девства сохранение на Бога возлагающи, блаженство несказанное навеки улучи, егоже и мы, грешнии, молитвами ея сподобитися чаем и Злату воспеваем: Радуйся, покрове проповедником Евангелия; Pадуйся, обителем святым пречудный Ангеле. Радуйся, смиренным богословом поспешение; Pадуйся, ветий лицеприятных обличение. Радуйся, времен последних ясное светило; Pадуйся, душ верных кораблей кормило. Радуйся, Святыя Церкве луче небопарный; Pадуйся, смирившая вся козни всековарных. Радуйся, великомученице Злато, златая целомудрия палато. Кондак 10 Спастися всем хотящым есть предстательница дивная молитвенница крепкая о всех смиренных Злата, в страданиих всем сущым утешение премирное, и на Суде — поющих ю покров и благодать, еяже ради Бога велегласно величаем: Аллилуиа. Икос 10 Стена еси хранящымся от мира адотечнаго и любящым тя тепле от падений сохранение — молитвами твоими избавляй от муки вечныя вся лики православных тя, мученице, чтущыя, венцы тебе словесныя прославленней плетущия: Радуйся, в океане бед нам остров неприступный; Pадуйся, заступнице, в молитвах неотступная. Радуйся, нам в мире любодейнем твердь пречистая; Pадуйся, прощения грехов купель лучистая. Радуйся, душам болящым былие целебное; Pадуйся, сердечным язвам тишино врачебная. Радуйся, монахом чистым аммо благосердая; Pадуйся, живущым в мире помоще усердная. Радуйся, великомученице Злато, златая целомудрия палато. Кондак 11 Пением восхвалити Тя, всех Владыко, тщащимся словеса подаждь — к милостем Твоим сладостно спростретися, и Тебе молящимся даруй благодать, да благодарно воззовем: Аллилуиа. Икос 11 Свещу златосияйну в мраце рабскаго страдания, зрим Злату, наставляющую к свету всех спасения: та образ нам явися добродетелей Писания любы от нихже Божия венец есть всех велений. Венчания сего и мы сподобитися чающе, грядите, поклонимся Злате, сице воспевающе: Радуйся, любве неизглаголанныя море; Pадуйся, церквей всех умирение раздора. Радуйся, пещеро от напастей сокровенная; Pадуйся, алкательнице правды насыщенная. Радуйся, божественнаго алавастр ухания; Pадуйся, златая ветве Богопочитания. Радуйся, Болгарии святыя дщи нескверная; Pадуйся, тя чтущым воеводо благоверная. Радуйся, великомученице Злато, златая целомудрия палато. Кондак 12 Благодати чудное яви нам во страдании Злата венцеславимая, да и мы имеем твердое на Бога еже в скорбех упование, зверства небоящеся имущаго явитися сына беззакония, всех в мире обольстити. Молитвами ея же нас избави от злодея Боже милосерде, да поем Ти присно: Аллилуиа. Икос 12 Поюще тя девице и мученице славная, о всех в недузех сущих и во обстояниих сугубое приносим ти и слезное моление: Радуйся, труждающимся помоще обильная; Pадуйся, печальных утешение пресладкое. Радуйся, обидимых защитнице всесильная; Pадуйся, уязвленных целительнице кроткая. Радуйся, всем плачущим заступнице благая; Pадуйся, отчаянным советнице златая. Радуйся, от мрака мира в светлость нам вселение; Pадуйся, в чертог небесный верных водворение. Радуйся, о нас всегрешных Бога умоление; Pадуйся, страстьми растленных дивно удобрение. Радуйся, девице всезлатая и прекрасная; Радуйся, Церкве Православныя птице богогласная. Радуйся, великомученице Злато, златая целомудрия палато. Кондак 13 О, Злато досточудная, Болгарии хваление! Приимши благосердно ныне любящих тя пение, от всяких нас напастей и грехом порабощения молитвами твоими благосердными спаси, во еже нам сподобитися и на небеси с тобою непрестанно Христа Бога величати: Аллилуиа.[Се́й конда́к глаго́лется три́жды.][Далее повторяем 1‑е икос и кондак:]Икос 1 Ангелов и всех святых небесных удивление, любовию Христа возлюбльшая презельною и девства чисте обручившися Тому хранением, Злата достохвальная пребысть неоскверненною; и вено златотканное — одежду обагренную Небесному Обручнику с веселием вручи. Молитвенницу теплую от Бога получивше, девице богомудренней умильно вопием: Радуйся, источниче небесных утешений; Pадуйся, прекрасное девства прославление. Радуйся, Царя Христа обручнице нескверная; Pадуйся, заступнице всем любящым тя верная. Радуйся, кадильнице Святейшему лучистая; Pадуйся, девице благонравная и чистая. Радуйся, звездо, во мраце рабства просиявшая; Pадуйся, луно златая, тьму греха разгнавшая. Радуйся, великомученице Злато, златая целомудрия палато. Кондак 1 Избранная служительнице Бога воплощеннаго и чистая хранительнице девства нерастленнаго, родителей своих Христа ради отрекшуся и крове исповедницы порфирою облекшуся, в лик празднственный ныне тя вси чтущии сошедшеся любовию поем, о, Злато, Церкве позлащение: но яко непорочная невеста Слова Божия и велие ко Господу имущи дерзновение, о нас, всеокаянных, молися неотступно, да мира многострастнаго океан преплывше, сподобимся в день судный благодати свыше, тебе с благодарением умильно вопиюще: Радуйся, великомученице Злато, златая целомудрия палато.

Акафист святым преподобным Андронику и Савве в формате PDF