Кондак 1
Возбранная от рождества Своего Дево и по тихом успении Своем в небесная вознесенная преславно, служительнице избавления мира смиреннейшая, в сердце своем о людех печаль имеющая, близкая другиня и утешительнице всех обидимых, труждающихся и обремененным опоро нерушимая, — Тебе ныне хвалебная пения по силе приносим, понеже явила еси от образа Своего милости предивныя людям изборским, да взываем Тебе немолчно:
Радуйся, Богомати, в напастех помощнице скорая.
Икос 1
Ангельстии собори, воплощения тайне чудящеся и Вседержителю о Ней немолчные хвалы всегда приносяще, величания приносят и Деве избранней, Богоматери Пречистей, из Нея же на спасение всем Бог воплотися; сего ради, небожителем подражая, да подвижется всяк земнородный и, исполнь духа радования, да почитает он светло священное торжество Девы и Матере, взывая Ей тако:
Радуйся, жизни нестареющей весно благоуханная.
Радуйся, луча вознесенного цвет краснейший.
Радуйся, яко от Тебе всего мира обновление изыде.
Радуйся, грехи и скверны всего мира омывающая.
Радуйся, таинственного дне жизни блаженной заря пресветлая.
Радуйся, всем, совершающим путь спасения, невидимая сопутнице.
Радуйся, душ чистых ниво небесная.
Радуйся, пажитей духовных росо плодоносная.
Радуйся, Тебе бо земля дарствует цвети предивнии.
Радуйся, Тебе бо днесь тщимся приносити песни избранные.
Радуйся, благодать молитвы, яко дыхание тонкое, в душах возгревающая.
Радуйся, Светоче моления нашего тихий.
Радуйся, Богомати, в напастех помощнице скорая.
Кондак 2
Безгласен бысть некогда иерей Захария, егда усумнеся глаголанному от ангела, яко, стар сый, пророка великого отец будет, и нем бе, дондеже сбыстся реченное ангелом. Такожде и мы, безмолвнии бывши зрением чудесного знамения от образа Пречистыя Богоматере, ныне дерзновенно отверзаем уста своя творящему нам милости великия, вопия ему: Аллилуия.
Икос 2
Весть приемше людие Изборстии, яко убийством и пожаром идяху иноплеменнии и уже пожгоша посад Печерстий, страхом одержими быша. Ищущим же им спасения у дома святителя Николая, с вышних призре на обуреваемых напастьми Пречистая и от образа Своего, еже бысть у вдовы Евдокии, яви знамение сострадания горю людскому, излия слезы. Тогда, радости исполнени, люди изборстии умиленно взываху Богородице:
Радуйся, внезапу милость людем Твоим от образа Твоего явльшая.
Радуйся, горестей нашим слезы своими для всех зримо сострадавша.
Радуйся, Твоя бо любовь на нас, аки дождь, ниспадает.
Радуйся, яко Ты подъемлеши на Себе ярем спасения нашего.
Радуйся, всему миру врачевство духовное.
Радуйся, всякому делу благому пособнице усердная.
Радуйся, изымающая от сетей корысти и буесловия.
Радуйся, довольство житием тихим в душах укрепляющая.
Радуйся, державная заступнице всего мира христианского.
Радуйся, град наш соблюдающая от обдержания вражия.
Радуйся, Богомати, в напастех помощнице скорая.
Кондак 3
Гавриил Благовестник странные глаголы рече Деве Марии, яко смутитися Ей зело, понеже благовести Ей рождение Сына без мужа. Покорна же бе воле Божией избранная раба Господня, смирение великое показа, вдах Себе всю в руце Божии, да научит и нас, приосененных Богоматерним заступлением, возглашати неустанно Вышнему, пути наши дивно устроящему: Аллилуия.
Икос 3
Достоит мужем наипаче охрану домов и весей имети, зане силою и крепостию обладают. Сего ради и возсташа, якоже един, вси мужие изборстии, внегда услышаху бряцание бранем и шествие лютого врага, разоряющего домы, — и егда помышляху, како врагу противостати и ограждение веси своея сотворити, внезапу Жена великая прииде и знамение от образа своего яви, да покрову Богоматере радующеся, вознесут ей вси мужие величания таковая:
Радуйся, опоро людей Твоих нерушимая.
Радуйся, всем ослабевающим укрепление твердое.
Радуйся, моря житейского кормчий верный.
Радуйся, всем обуреваемым отишия пристань.
Радуйся, бурю страстей греховных умиряющая.
Радуйся, от деяний бесчестных и злых удерживающая.
Радуйся, на земле в поте трудящимся бодрение и сило.
Радуйся, делателю нелицемерному отдохновение и отрадо.
Радуйся, грубость сердец людских умягчающая.
Радуйся, подъемлющая их от земли на небо.
Радуйся, забвение несущая дел суетных и ложных.
Радуйся, силы подающая к отвращению от путей лукавствия.
Радуйся, Богомати, в напастех помощнице скорая.
Кондак 4
Еще в земнем житии Своем, смирением великим богатея, преисполнена бысть труда и забот обрученная старцу Дева-Мати, о доме и о Сыне Своем возлюбленнем попечение всегда имея. И по днесь, егда крестною смертию увенча мир деяния Искупителя не забывает Богомати, уже в славе небесней пребывая, грешного мира людей сирых и обремененных, не преставая о них перед Сыном моления творити да вопиют спасаемые Богу: Аллилуия.
Икос 4
Жизнь дарствуя людем и радостную ю творяще, в земнем служении Своем некогда призван бысть Иисус со ученики Своими на брак в Кану Галилейскую, да благословит людей простых и бедных. Недоставшу же вина пирующим, болезнова Мати Пречистая, зане любляше людей и радости их любляше, и приступи к Сыну и проси знамение сотворити Любови Матерней помоществуя, претвори Иисус воду в вино, начаток знамением Своим полагая. Мы же, сие на память приводя, Богоматернее сорадование нам всегда величающе, да вопием Ей тако:
Радуйся, из сонма жен избранная чудно.
Радуйся, любве великия свете, горе вознесенный.
Радуйся, Бога родшая на спасение наше.
Радуйся, всемирное избавление Собою наченшая.
Радуйся, Сеятеля чистоты в мире Единого Мати.
Радуйся, даровании духовными светло озаренная.
Радуйся, Жено единая, болезней чадорождения не познавшая.
Радуйся, вместилищем Невместимого соделавшаяся.
Радуйся, Собою вся наполняющего Мати.
Радуйся, мир и согласие семьи наблюдающая.
Радуйся, напрасны творящая ухищрения людей противумирных и жестоких.
Радуйся, в Себе сочетавшая жизни терпение и Богу служение.
Радуйся, Богомати, в напастех помощнице скорая.
Кондак 5
Зело расширила еси покров всеобдержныя милости Твоея, Богородице, и, быв цветом избранным всех жен, сияющим добродетельми многоразличными, показа миру чудо, и небожителем странное: земная бывши к Царю небес приблизилася еси тесно, людския страдания и слезы к престолу Вышняго принесла еси охотно и тако дала еси людем силу к Отцу всех взывати хвалебно: Аллилуия.
Икос 5
Земная злоба неистовствова, и оружие пройде Твое сердце, Богомати, егда узрела еси Сына на Кpecтe распята. Мучении горькими одержима бысть душа Твоя, и велий плач принесла ecи, глаголюще: «странным и дивным Рождеством Твоим, Сыне Мой, возвеличена бысть пред всеми матерями; но горе Мне, утроба Моя раздирается, егда вижу Тя на Древе». Сими страданиями безмерными да укрепятся вси матери и да принесут ныне Божией Матери славословия сицевая:
Радуйся, сердца матернего, страдании Сына, яко мечем пронзенного, достойный образ подражания.
Радуйся, матерем горестным и душею израненным надежное укрепление.
Радуйся, Мати всю жизнь содержащего.
Радуйся, скорбный путь материнства горце уведевшая.
Радуйся, муки чадорождения утишающая.
Радуйся, матерей печаль безъисходную веянием любви рассеевающая.
Радуйся, роди бо вси Тебе присно чудятся.
Радуйся, яко паче горних сил превознеслася, рождши неприступного Бога.
Радуйся, рождением из Себе Сына предвечнаго чадородие благословившая.
Радуйся, многочадным матерям силы неслышно подающая.
Радуйся, слезы матерей благодатно осушающая.
Радуйся, подвиг жизни их добрый светом утешения озаряющая.
Радуйся, Богомати, в напастех помощнице скорая.
Кондак 6
Из бездны адовой вси силы тьмы возликоваша, егда на Голгофе вечеру заходящу единственного дне, на Кресте распинаемое Слово жизни в человечестнем естестве своем приблизися к смерти. Тогда скорби неисцельныя исполнися сердце Богоматере, зряще страдания Божественного Сына; любовию же матернею ко Кресту припадала есть купно со учеником возлюбленным Сына Своего, чающе утешения болезнующей душе Своей, дондеже не услышала есть со Креста словесе Сыновнего утешения и не воззвала со учеником слова Всемогущему: Аллилуия.
Икос 6
Иерусалим своими вольными страдании освятил есть Царь царствующих, и при вхождении в онь, егда гряде на страсть, ликования детей приял есть Сын Твой, Богомати, якоже и прежде сего любовно благослови их, рекши: «аще не будете яко дети, не внидите в Царство Небесное»: тем же, любови Сына к детем соревнуя, поныне являешися, Богородице, опорою детем чистым и кротким, немощным и убогим, сирым и оставленным, да вопиют они детскими усты великия Тебе хваления:
Радуйся, детем непорочным радость Собою низводящая.
Радуйся, повсюду хранящая их от бед и скорбей.
Радуйся, разум детей к познанию Бога и жизни руководящая.
Радуйся, пути стропотны к шествию младенцев исправляющая.
Радуйся, раю детские сладости.
Радуйся, сокровище жизни неоскудеваемое.
Радуйся, из уст младенцев моления нехитростная приемлющая.
Радуйся, всяко благое от Бога даяние им посылающая.
Радуйся, обращающая сердца к родителям.
Радуйся, умиряющая надмение юных.
Радуйся, от силы в силу возводящая.
Радуйся, красоту и премудрость Божия мира детем указующая.
Радуйся, Богомати, в напастех помощнице скорая.
Кондак 7
Концев всея земле людие, из века в век приносят превеликая и немолчная хваления Тебе, Богоизбранная Дево, зане не токмо славу приемлеши, но и едина имееши от Вышняго исполняти всякое благое людей прошение, чего ради и числа не имут явленные и цельбоносные Твоя иконы, явно зримыя знамения любве Твоея, всепомоществующей всем верующим взывающим Богу: Аллилуиа.
Икос 7
Любве престарелых родителей плод краснейший, вручена бысть старцу Иосифу Мариа, да сбудется вся, реченная пророки. Послушива бысть старейшим во всем, Дева благоуветлива явися им, яко жезл старости добрый. Такожде и до сего дне вси старцы и старицы, течение жизни в трудех и подвизех совершающе, недузи телесные и душевные мощно превозмогают, подкрепляеми Твоим, Приснодево, явлением и помощию, чесо ради и ныне, притекающе к Тебе, сияющему свету заходящия жизни, благодарственно глаголят тако:
Радуйся, престарелых родителей радость неизреченная.
Радуйся, старость их благочестием украсившая.
Радуйся, старости угасающая Свете тихий.
Радуйся, сокровище жизни неистощимое.
Радуйся, жизнь наполняющая деяньми святыми.
Радуйся, мудрость дающая, не в числе лет исчисляему.
Радуйся, отверзающая врата Иерусалима вечного, идеже скончавается людей странствие.
Радуйся, Приятелище всего мира премудрости несозданной.
Радуйся, в малом удерживающая, да не сотворим грехов больших.
Радуйся, руководящая к упованию единому жизни всея.
Радуйся, добре пожившим мирную кончину уготовляющая.
Радуйся, расширяющая дом души нашея для вхождения Господня.
Радуйся, Богомати, в напастех помощнице скорая.
Кондак 8
Мариа — другая, седши некогда при ногу Иисусову, слушала слово Божественного учения и питающая душу благодати, яко забыти ей вся земная и временная и, Божественному Учителю последующе, воспарити духом в небесная и вечная, идеже жизнь совершенная и дуси в Господнем покои пребывают. Тако и Царица Небесная, всегда предстоя престолу Бога и Сына, любовию подъемлет нас ко Вседержителю и царствию Его да возносим Ему присно: Аллилуиа.
Икос 8
Недоумеет ум и бессилен бывает, егда тщится уразумети вселенское чудо явления в мир Богоматере, зане превыше плотянаго ума сочетание в единей девства Матере и деторождения Девы. И ныне сердцем чистии и кротцыи, осиянные смирения благодатию, да предстанут образу Царицы душ девственных и, от Нея приявшии силу и бодрость на подвиг жизни своея, да славословят Ю сице:
Радуйся, светом целомудрия осиянная.
Радуйся, девство вместилищем Бога воплотившася соделавшая.
Радуйся, чудесе велия и единого: Девы, рождающей без мужа, явление.
Радуйся, мира чуждого и хладного Заступнице теплая.
Радуйся, моления за людей свеща неугасимая.
Радуйся, стено, крепкая всем, подвигом девства подвизающимся.
Радуйся, Невесто-красительнице душ девственных и святых.
Радуйся, тайну промышления Божия о людех явльшая.
Радуйся, достигшая конца человеческих вожделений.
Радуйся, обожению естества человеческого девством Своим послужившая.
Радуйся, Бога, нисшедшего к людем, обитель святая.
Радуйся, Богомати, в напастех помощнице скорая.
Кондак 9
Образ матернего служения великого, благословила еси жен чадородие, Сына Божия сущи Мати единая, да на Тебе взирающе, силу восприимут вси немощствующии жены и сиротствующие девы, их же и в Небесных обителех не забываеши присно, яко и сподобитися им первым свидетельницы быти во Изборске явления от образа Твоего и о сем возносити Господу немолчно: Аллилуиа.
Икос 9
Пречистыя Богородицы образу явленному зело возрадовахуся людие изборстии, река бо явися неоскудеваемая заступлений Владычных. Радости же людей изборских поревновав, повеле Псковский архиерей Макарий изнести Корсунскую икону Божия Матере во град Псков, и ту две седмицы прием Пречистая поклонение Своему образу, егда вси псковичи, припадающе благочестно взываху сице:
Радуйся, древний град Изборск знамением от иконы Твоея возвеличившая.
Радуйся, Божие благоволение к людем низведшая.
Радуйся, людей изборских дерзостная похвало.
Радуйся, Тебе благочестиво сретшим помилование уготовляющая.
Радуйся, изшедшая от Изборска во Псков на милость и заступление.
Радуйся, во Пскове двою седмицею поклонение образу Твоему приемшая.
Радуйся, всея земли псковския щит и оружие.
Радуйся, о всех и за вся благая поборнице скорая.
Радуйся, благодати бо Твоей осеняемей, страхом исчезают темные силы.
Радуйся, яко врагов шатания, яже на нас движимая, разоряеши.
Радуйся, неправедно злословящих нас к молчанию приводящая.
Радуйся, Тебе бо уста отверзаем, возносяще благодарения песни.
Радуйся, Богомати, в напастех помощнице скорая.
Кондак 10
Роду человеческому искупление творя, не име Сын человеческий, в Своем служении на земли, идеже главу Свою подклонити: Ты же ревностно следовала Ему, любвеобильная Мати, опорою и утешением в Его шествии из града в град, из веси в весь всегда бывая и Своим прошением низводя на людей милосердие Своего Сына. И ныне род человеческий во время всякое и день каждый в Тебе, любве Мати, имать скорую помощь и непреоборимую защиту, чесо ради и вопиет о Тебе Богу: Аллилуиа.
Икос 10
Силы неоскудеваемые любовь всеобдержная вхождением в мир Богородицы явися чудно: несть взывающего, Его же не услышала бы любве Мати, несть в молитве вопрошающего, Ему же утешение не даровала бы Заступница, несть падающего под ярмом жизни скорбные, Ему же Пречистая помощи не упроси. Изнемогает всяк глагол вознести Утешительнице мира достойная хваления, но и молчати уста наша не могут, со смирением взывая Богородице:
Радуйся, любве кладезь глубокий и неисчерпаемый.
Радуйся, всех любовно содержащая в сердце Своем.
Радуйся, милосердие Вышняго на людей низводящая.
Радуйся, всемерно взыскующая спасение падших.
Радуйся, духов мрака и злобы далече от нас отгоняющая.
Радуйся, побеждающая их всемощною силою кротости Своей.
Радуйся, всякому творению Божию к блаженной жизни спутешествующая.
Радуйся, мира горняго и дольняго мосте предивный.
Радуйся, царству любве в людех путь правый уготовляющая.
Радуйся, сокрушающая тем державу власти темныя.
Радуйся, всех подвигом жизни добре подвизающихся неомраченное веселие.
Радуйся, Тобою бо в домех и во градех благоденствие почивает.
Радуйся, Богомати, в напастех помощнице скорая.
Кондак 11
Труда тяжкого и болезней есть житие человека на земли, беды и лишения обдержат его всюду, приходящим им, отонудуже не чает и борющим его силою, противу Ея же не может крепко стати. И тако преисполнен бы был скорбей и стенание всяк путь жизни, аще бы не Ты Своим предстательством, радосте незаходимыя Мати, о Тебе же вопием Богу. Аллилуиа.
Икос 11
У Господа величие обретшая и быв по вся дни земныя жизни Своея другиня сирых и обездоленных, преславно вознесена Сыном в Небесные кровы в честнем Успении Своем. И ныне преукрашенная божественными лепотами, присно призираеши на людей, озлобленных грехи многими, да противустоят они твердо помощию Твоею всем скорбем и напастем сея многотрудныя жизни и, Царицу Небесную славяще, тщание имут всегда восхваляти Ю тако:
Радуйся, в Царствии Сына Твоего славою венчанная.
Радуйся, с высот славы Небесныя в души убогих нисходящая.
Радуйся, величием вознесенная по Успении Своем.
Радуйся, людей страждущих присно покрывающая омофором Своим.
Радуйся, другиня верная душ сирых и оставленных.
Радуйся, радосте всякие твари живущия.
Радуйся, царство благодати Сыном Своим людем даровавшая.
Радуйся, обиталище в домех нищих Себе сотворшая.
Радуйся, приемлющая немолчное хваление Ангельских сил.
Радуйся, Богоматере величие и Приснодевы смирение в Себе сочетавшая.
Радуйся, яко Тебе от края и до края земли многоустные хвалы верных приносятся.
Радуйся, ни единыя же души недугующей и в томлении сущей, Своею помощью не оставляющая.
Радуйся, Богомати, в напастех помощнице скорая.
Кондак 12
Круг жизни моея проходя, страдание и горе уведев, недуги тела и духа в себе поборая и о всей радости жизни Творца прославляя, дерзаю к Тебе, Матери Света, принести моя песнопения; Ты же милостиво приими их, зане являешися река великая, точащая обилие щедрот, их же преисполнени вси люди, да соберутся ныне со мною купно, вопиюще Богу едиными усты и сердцем единым: Аллилуиа.
Икос 12
Царь славы Христос благоволи родитися от Неискусомужныя, паче мира Ю удобрив, и великия милости на людей изливая, Сию дарова помощницу людем Своим строити и покрывати от всякия беды рабы Своя, еже и всем видимо бысть в чудеснем знамении во граде нашем от Пречестныя иконы Богоматере, да не престанем Пречистей на всяко лето о сем службу творити, со благодарением глаголя:
Радуйся, покровение града нашего.
Радуйся, неотступная Предстательнице о впадших в напасть.
Радуйся, с вышних призирающая на смиренных.
Радуйся, гордым и завистным указующая путь исправления.
Радуйся, Тобою бо труд землепашца освящается.
Радуйся, в Тебе бо силу емлют в труде ослабльшии.
Радуйся, нам к Тебе руки молитвою воздевающим, жизнь творящая богатно.
Радуйся, грозы гибельные, град и бездождие от земли нашея отгонящая.
Радуйся, нив и сел Изборских незримая Охрано.
Радуйся, от неистовств нашествия иноплеменных ограждение наше.
Радуйся, Богомати, в напастех помощнице скорая.
Кондак 13
О, Мати Единая, любовию весь мир содержащая в сердце Своем и перед Сыном Своим за него ходатайствующая немолчно. Светло внемли хвалениям нашим. Тебе из глубины душ смиренных и благодарных приносимым: приими и моления наша, не отними Покрова заступления Твоего от мира греховного, зане преступления и грехи наши всегда пред нами, Твоим предстательством умножи силы наши стезю греха миновати, поборов прелести и искушения пути блазненного и пространного, не остави нac сирыми в жизни нашей, ея же дни труда и лишений исполнены, — да к Тебе в молениях присно прилепляяся, вся дни жизни нашея твердо, радостно и благочестно пройдем, понеже Ты имаши силу низводити на нас, недостойных, благословение Владыки жизни и любве, Ему же ныне со умилением вопием: Аллилуиа.[Се́й конда́к глаго́лется три́жды.][Далее повторяем 1‑е икос и кондак:]Икос 1
Ангельстии собори, воплощения тайне чудящеся и Вседержителю о Ней немолчные хвалы всегда приносяще, величания приносят и Деве избранней, Богоматери Пречистей, из Нея же на спасение всем Бог воплотися; сего ради, небожителем подражая, да подвижется всяк земнородный и, исполнь духа радования, да почитает он светло священное торжество Девы и Матере, взывая Ей тако:
Радуйся, жизни нестареющей весно благоуханная.
Радуйся, луча вознесенного цвет краснейший.
Радуйся, яко от Тебе всего мира обновление изыде.
Радуйся, грехи и скверны всего мира омывающая.
Радуйся, таинственного дне жизни блаженной заря пресветлая.
Радуйся, всем, совершающим путь спасения, невидимая сопутнице.
Радуйся, душ чистых ниво небесная.
Радуйся, пажитей духовных росо плодоносная.
Радуйся, Тебе бо земля дарствует цвети предивнии.
Радуйся, Тебе бо днесь тщимся приносити песни избранные.
Радуйся, благодать молитвы, яко дыхание тонкое, в душах возгревающая.
Радуйся, Светоче моления нашего тихий.
Радуйся, Богомати, в напастех помощнице скорая.
Кондак 1
Возбранная от рождества Своего Дево и по тихом успении Своем в небесная вознесенная преславно, служительнице избавления мира смиреннейшая, в сердце своем о людех печаль имеющая, близкая другиня и утешительнице всех обидимых, труждающихся и обремененным опоро нерушимая, — Тебе ныне хвалебная пения по силе приносим, понеже явила еси от образа Своего милости предивныя людям изборским, да взываем Тебе немолчно:
Радуйся, Богомати, в напастех помощнице скорая.
Молитва
О, Всемилостивая Госпоже, Пресвятая Дево, Мати Господа Вышних Сил, Небесе и земли Царице, града нашего всемощная Заступнице. С верою и любовию припадаем и поклоняемся Тебе пред Святою и пречистою Твоею чудотворною иконою, Ею же дивные и преславные чудеса содеваеши. О, Всемилостивая наша Заступнице и непостыдное наше упование, благодарим Тя о всех благодеяниих от Тебе, бывших на нас от древних времен и до ныне.
И ныне мы грешнии, воспоминающе, дивное знамение Твоего заступления града нашего Изборска, явленное, во дни ратнаго на сей град нашествия, смиренно молим Тя: яко же древле отцем нашим на помощь тогда ускорила еси и люди изборския от бед спасла еси и многие знамения и чудеса являла еси, так и ныне, Преблагословенная Владычице, призри на нас немощных и грешных раб Своих. Сподоби Твоего Матернего заступления и благопопечения, о еже избавитися нам от всякого зла.
Но, о, Пресвятая Госпоже Владычице Богородице! Со страхом, верою и любовию припадаем пред Честною иконою Твоею и умиленною душею и сокрушенным сердцем со слезами молим Тя: отврати от нас, Всемилостивая наша Помощнице и Заступнице, праведный гнев Божий на ны движимый и избави, нас, от глада, града, огня, меча, нашествия иноплеменников и междоусобные брани. Храм и град сей добре сохрани и верою живущих зде в мире соблюди. Буди нам Заступнице и Ходатаице пред Престолом Всевышнего, идеже предстоиши. К кому убо прибегнем, аще не к Тебе, Пресвятая Мати Дево! Не имамы бо иныя помощи, не имамы иныя надежды, разве Тебе, Царице и Владычице! Под Твой Покров притекаем. Молитвами Твоими ниспосли Отечеству нашему мир, людем здравие и земли плодоносие, воздуху благорастворение. Избави нас от падений греховных, от навета злых человек, скорбей, бед и внезапныя смерти. Вразуми нас, о, Всемилостивая Заступнице, како безгрешно прейти путь земного сего жития. Ты бо веси немощи наша, веси и согрешения наша, но и веру зриши и упование видиши.
Даруй же нам дух сокрушения, смирение сердца, чистоту помышлений, исправление греховной жизни и оставление прегрешений. Укрепи в нас Православную веру, вложи в сердца наша дух страха Божия, дух благочестия, дух кротости и смирения, дух любви и терпения, в добрых делах преуспеяние.
В Страшный же день суда Божия Твоим молитвенным ходатайством и заступлением, о, Пречистая Владычице, сподоби нас стать одесную Сына Твоего, Христа Бога нашего. Ему же подобает всякая слава, честь и поклонение ныне и присно и в бесконечные веки. Аминь.