Молитвы

Пустынный житель, и в телеси Ангел,/ и чудотворец явился еси, богоносе, отче наш Симеоне,/ постом, бдением, молитвою Небесная дарования приим,/ исцеляеши недужныя и души верою притекающих ти./ Слава Давшему тебе крепость,/ слава Венчавшему тя,// слава Действующему тобою всем исцеления.

Апостоли святии,/ молите Милостиваго Бога,/ да прегрешений оставление// подаст душам нашим.

В пустыни безмолвствуя,/ единствующу тя, Богоносе, взыскующу ти Господа,/ Богу же тебе не оставльшу единому быти в пустыни,/ и Того повелением снидошася к тебе неколико братии,/ с нимиже ти молящуся Господеви,/ Троице пречестен храм воздвиже,/ в немже предстояще, преподобне Пахомие,/ молися о спасении душ наших.

Благочестия ревнителю и рачителю,/ иноков и столпников похвале,/ святителю Туровския паствы, преславне,/ златословесный учителю,/ светлым учением богоразумия своего просветивый концы русския,/ в молитве к Богу благодатный грешников споспешниче,/ Кирилле Богомудре, моли Христа Бога/ утвердитися нам, соотечественником твоим,/ во Православии, благочестии и единомыслии.

Божественным желанием,/ от юнаго возраста, Стефане премудре, разжегся,/ ярем Христов взял еси/ и людей оляденевшая древле неверием сердца,/ Божественное семя в них сеяв,/ евангельски духовне породил еси./ Темже преславную твою память почитающе, молим тя:/ моли, Егоже проповедал еси,/ да спасет души наша.

Кондак 1 Избранный страстотерпче и исповедниче Христов, Святителю Никодиме, Церкви Зиждителя крестоносителю верный, пламенем любви Христовой разжигаемый, якоже жезл Ааронов, на камене веры процвел еси; биения и поношения, и темничные изнурения от спиры богоборческия сладце претерпел еси, со всеми страстотерпцы народов наших, Русь Святую Православную, яко вертоград Христов, прославил еси, основание Церкви Христовой в Ней утверждающе. Мы же, взирая на благия страдания твоя, зовем ти: Радуйся, исповедниче Христов Никодиме, Костромскаго края светильниче неугасимый. Икос 1 Ангелы и Боголюбивые людие днесь Христу благодарение и славословие приносят, от рода священническаго, яко же иногда преславнаго Предтечу, глашатая и пастыря овец Церкви Своея избравшего тя, Святителю Богомудре Никодиме, да во дни гонений лютых, яко страж верный и пастырь добрый, паству Костромскую на растерзание волков лютых не оставиши, но душу свою за спасение ея положиши. О сем ублажаем Тя сицевыми похвалы: Радуйся, рода иерейского богоугодной молитвы рождение; Радуйся, земли костромския благоуханное цветение. Радуйся, Духа Святаго сосуде избранный; Радуйся, силою и действием Сего облагодатствованный. Радуйся, ковчеже чистоты и целомудрия; Радуйся, воплощение доброты и Богомудрия. Радуйся, святой Руси — Божие предначертание; Радуйся, севера земли нашея немеркнущее сияние. Радуйся, исповедниче Христов Никодиме, Костромскаго края светильниче неугасимый. Кондак 2 Видя Господь ниву духовную народов наших православных, плеве ли произрастающую, делателя неленостного, наставника и сеятеля слова Божия в сердца юных отроков, избра тя, вертоградарю Христов Никодиме. Ты же, видя ветры адовы поднимавшийся Русь Святую опустошити, струями Божественнаго Откровения питомцы своя напаял еси, и яко воинов Христовых противу борющих на Церковь Святую приуготовлял еси, да неумолкнет в народе нашем победная песнь Богу: Аллилуиа. Икос 2 Разум Богодухновенный укрепи и просвети тя, светильниче веры, всеблаженне Никодиме, егда некии пастыринаемники, увидевше волков лютых, соблазняша тя бежати в страны далече, бросив верных на гибельное растерзание, ты же, яко пастырь добрый, со апостолом Павлом рекл еси: мне бо во еже жити — Христос, а еже умрети — преобретение, предавшись воле Божьей, чад верных своих не оставил еси. О сем взываем Ти умильно: Радуйся, благодати архиерейския страха ради непосрамивый; Радуйся, в годину страшную паствы своей не оставивый. Радуйся, архиерея Божия, Христово подобие, жертвенной любовью олицетворивый; Радуйся, паству Христову, паче благ мира сего возлюбивый. Радуйся, Захарии, убиенному между жертвенником и алтарем, уподобившийся; Радуйся, со Исааком целомудренным заклатися за Церковь Христову уготовившийся. Радуйся, твоими молитвами гнев Божий утоляется; Радуйся, ходатайством твоим за ны ко Господу, глава змия сокрушается. Радуйся, исповедниче Христов Никодиме, Костромскаго края светильниче неугасимый. Кондак 3 Силою свыше на брань с князем мира сего препояшася, церковь лукавнующих возненавидел еси, и на седалище с законопреступными не воссел еси, иерарше Христов Никодиме, но со смирением к жертвеннику Божию припадая, Ему Единому день и ночь взывал еси: помяни, Господи, призывающих Имя Твое во истине, помяни всех, благая или сопротивная нам хотящих, все бо человецы есмы; Давидски вопияше: благословен Господь во веки: Аллилуиа. Икос 3 Имея твердое упование на всеблагую волю Божью и непоколебимую веру во Едину, Святую, Соборную и Апостольскую Церковь, соблазны и суеверия расколов злочестивых, разрушающих Божественный хитон Церкви Христовой, не поколебаша тя, апостолов похвало и мучеников радование, Никодиме преблаженне, утвердившегося на камене исповедания Петрова. Сице бо верныя видяще тя яко ангела на страже Эдема Христова — Церкви Вселенския стояща, восхваляют тя сице: Радуйся, зоркий кормчий корабля Церковнаго; Радуйся, мудрый управителю витрыл духовных. Радуйся, суемудренных лжепастырей грозный посрамителю; Радуйся, лживых богоборцев неустрашимый обличителю. Радуйся, демонския наваждения постом и молитвой отразивый; Радуйся, паству православную от шатаний богохульных оградивый. Радуйся, жертву слезную всеусердно за Отечество Богу приносивый; Радуйся, Христу распяту жертвенной любовью последовавый. Радуйся, исповедниче Христов Никодиме, Костромскаго края светильниче неугасимый. Кондак 4 Бурею неистовства богоборческаго потрясеся Русь Святая, егда все силы исчадий адских устремишася опустошите и истребите Ю. Ты же, видя многия архипастыри и поколебавшииеся духом пастыри, страха ради наемнически бежавшие, неподражав еси им, но яко пастырь добрый обрекшися на страдания многия: заточения, биения и заушения, состраждуще пастве гонимой, вопиял еси с верными слезную песнь Богу: Аллилуиа. Икос 4 Слышаша и видеша непоколебимую верность твою Христу и Его Церкви Святей, боголюбивый архипастырю Никодиме, паства костромская в вере непоколебашася, Духом Святым согреваемая, мног плод изобиловаша: иные у жертвенников храмов Божиих на смерть стояша, иные же в темницах, даже до крови веру православную исповедаша. Тако бо в мужестве образа Христова, созвездие святых Церкви Небесныя умножил еси. О сем восхваляем подвиги твоя, зовуще: Радуйся, адаманте веры, немеркнущего сияния; Радуйся, столпы Церкви Христовой непоколебимаго стояния. Радуйся, узы темничныя, яко чертог царский вменивый; Радуйся, в нем бо страдания Христовы сладце облобызавый. Радуйся, яко кокош птенцы своя, верныя крылома веры согревавый; Радуйся, духом премудрости Христовой их укреплявый. Радуйся, злато, седмерицею в горниле страданий очищенное. Радуйся, питие, жаждущих правды, Духом Святым освященное. Радуйся, исповедниче Христов Никодиме, Костромскаго края светильниче неугасимый. Кондак 5 Богоизлиянною Кровию созда Господь Церковь Свою Святую, в ней бо, яко Агнец Божий: раздробляемый и неразделяемый, всегда ядомый и никогдаже иждиваемый, но причащающихся освящаяй, союзом Любви Своея верныя связует. Ты же, святителю отче наш Никодиме, видя храмы Божия и обители святыя разрушаемые, и верныя, яко жертву всесожженную, в них сжигаемые, кровоточаще, взывал еси Богу: Аллилуиа. Икос 5 Видя гонителей зверонравных на «Лифостратоне» Святой Руси, у пламени сгоравших святых икон и книг богодухновенных греющихся, и Святыню небоподобную — Собор Благовещения Пресвятыя Богородице, беснующися, взорвавших, рыданьми возопил еси к Преблагословенней, страстотерпче Никодиме: Благодатная! Восплачь с нами! Верныя люди увещавал еси неотчаяватися, ибо храм Божий мы есьмы, в нем бо Русь православная, вечно торжествующая! Зову сему внемлюще, вопием Ти: Радуйся, источниче слез, ими же Русь Святая, в вере сожженная, орошается; Радуйся, каменю веры, на нем же ереси злочестивыя сокрушаются. Радуйся, древо плода священного, вертограда Христова; Радуйся, езеро веры, в нем же потопляется всякая злоба. Радуйся, церкви Христовой несокрушимое ограждение; Радуйся, житие твое, ангельское пред Богом украшение. Радуйся, ищущим правды Божия, благодатный светильниче; Радуйся, Пречистой Попечительнице о Церкви Христовой, верный сподвижниче. Радуйся, исповедниче Христов Никодиме, Костромскаго края светильниче неугасимый. Кондак 6 Провозвестник Божественных откровений — Дух Святый, возвести тебе, богодухновенне Никодиме, иже имать страшное разорение Благовещенскаго Собора совершитися, идеже Святыня края Костромскаго и всей земли Российстей — Феодоровская Божией Матери храняшеся, Сию благодати исполненную, со благоговением нощию изъял еси и сице, от уничтожения огненнаго спасл еси Ю, верным на утешение и спасительное прибежище Сию сохранил. Людие же сему Божьему благоволению радующися, вопиют Ему: Аллилуиа. Икос 6 Возсия благодать от святыя иконы Божьей Матери чудодейственном Покрове Ея, в дни истребления народов наших православных, ихже Пречистая, иных, к прославлению Имени Божия всячески спасла есть, а иных, богоизбранных, к венцам мученическаго исповедания Материнской Любовию укрепившая. С ними же Тя, страстотерпче Никодиме, спасшего святой Лик Ея, славно бо прославила. Мы же, Пречистую величающе, Тебе приносим сицевая: Радуйся, Лика Пречистыя Матери от пламене огненнаго спасителю; Радуйся, о спасении паствы костромския ревностный попечителю. Радуйся, Иеремии о народе плачущем, пламенный сподвижниче; Радуйся, о спасении Отечества нашего неумолкающий молитвенниче. Радуйся, от юности всем сердцем Бога возлюбивый; Радуйся, яко Аарон, жертву непорочную Богу приносивый. Радуйся, путеводителю благий, на спасительныя стези нас наставляющий; Радуйся, неповинные от уз темничных присно избавляющий. Радуйся, исповедниче Христов Никодиме, Костромскаго края светильниче неугасимый. Кондак 7 Хотя Владыка и Господь Славы явити тя мужа совершенна и греху неискусна, испытаньми многими и страданьми многотрудными, якоже Иова иногда обложи тя,страстотерпче Христов Никодиме. Ты же любовию ко Христу преисполненный, узы темничныя и нощныя истязания, доблесне притерпел еси, Христа дерзновенно исповедуя, якоже три отроцы в Вавилоне в пещи горящей, воспевая любящему нас Богу: Аллилуиа. Икос 7 Новую благость дарует Господь страждущему народу нашему, в горниле испытаний лютых смертельно изнемогшему, да уразумеем яко благ Господь, наказует, но не умерщевляет, показуя на избранных Своих, вчера униженных и обесславленных, ныне их Церковь святая к лику святых воздвизает. С ними же тя, священномучениче Никодиме, в чертог Свой приемлет молитися за ны. Сего ради радующеся, вопием Ти: Радуйся, архиерейския благодати пред Богом не посрамивый; Радуйся, даный тебе талант добродетельми преумноживый. Радуйся, целомудрия и чистоты душевныя кладезю неисчерпаемый; Радуйся, в жилище Духа Святаго из детства призванный. Радуйся, в стоянии молитв слезных Марии Египетския твердейший; Радуйся, в борении против сынов беззакония, Гедеона мудраго сильнейший. Радуйся, постом и молитвой со слезами духа злобы победивый; Радуйся, стадо Христово, мечем веры от неверия оградивый. Радуйся, исповедниче Христов Никодиме, Костромскаго края светильниче неугасимый. Кондак 8 Странно и уязвленно бе слышати проповедание Евангелия Христового обкраденных умом, святителю Никодиме, тобою проповеданного. Ты же, любовию ко Христу пламенея и взирая на страдания Его, и на сраспинавшихся за Истину благочестия Евангельскаго, безбоязненно призывал еси паству свою: имети совесть незазорную и любити друг друга, якоже Господь возлюбил нас, воеже, не токмо зде, но и в селении праведных, воспевати Творцу нашему: Аллилуиа. Икос 8 Любви Божественныя исполнен и силою Духа святаго укрепляемый, верный друже Христов Никодиме, якоже Господь иногда шел еси, ведомый из судилища на судилище богоборцев зверонравных, идеже гладом и хладом, и истязаньми лютыми, аки звери дивные, тщетно пытавшийся отторгнути Тя от любви Христовой, ихже посрамляя, отвещал еси: устыдитеся! Жестоковыйность ваша не разлучит мя с возлюбленным Господом моим. Мы же видяще тя тверда в вере стояща, приносим Ти таковые похвалы: Радуйся, судилища врагов Божиих не устрашился еси; Радуйся, исповедати Христа — Сына Божия не убоялся еси. Радуйся, хладом темничным вера твоя — не охладися; Радуйся, мученьми лютыми любовь твоя ко Господу неистощися. Радуйся, страже Церкви Христовой преславный; Радуйся, венценоще диадемы Христовой преизрядный. Радуйся, страданьми твоими Церковь Православная торжествует; Радуйся, мужеством любви твоей ко Господу, Церковь Небесная ликовствует. Радуйся, исповедниче Христов Никодиме, Костромскаго края светильниче неугасимый. Кондак 9 Все естество опустошителей, расхищавших святое достояние храмов Божиих, оболгавше, собрашася судити тя, архипастырю наш Никодиме, за яже, яко пророк Илия лжепророков Иезавелиных, обличал еси беззакония их. Они же, облекшеся клятвою, яко ризою, словесе и истязаньми лютыми обыдоша тя. Ты же, мучения тяжкая превозмогая, слезно взывал еси ко Господу, да облекутся оболгающии мя в срамоту, и яко одеждею, студом своим, раб же Твой веселящися о Имени Твоем, вопиюще: Аллилуиа. Икос 9 Вития многовещаная не могут достойно воспети страдания твоя, святителю отче Никодиме, яже претерпел еси за Церковь Божию, и гонимых пастырей и боголюбивых чад Ея, богатство веры отеческия храня; за них же в заточении Ярославском душу твою, яко жертву Христу Пастыреначальнику благоприятну, положил еси. О сем дивящеся, и своя прегрешения горько вспоминая, умильно зовем ти: Радуйся, возвещати Истину Христову ревностно возлюбивый; Радуйся, смиренномудренно душу свою за Церковь Божию положивый. Радуйся, терпения и кротости духовныя преизрядный учителю; Радуйся, догматов веры православныя достойный блюстителю. Радуйся, верных надеждо и в бедах лютых заступление; Радуйся, гонителей Церкви Христовой грозное посрамление. Радуйся, сущим во узах и заточении утешителю. Радуйся, суеверий и учений ложных пламенный искоренителю. Радуйся, исповедниче Христов Никодиме, Костромскаго края светильниче неугасимый. Кондак 10 Спасти хотя вверенное тебе Божие достояние пажити костромския, Никодиме преблаженне, егоже дивно украсили и приумножили подвижники святыя: Геннадий Любимоградский, Макарий Унженский, Паисий Галичский, Авраамий Чухломский, Пахомий Нерехтский и многие боголюбцы, постом и молитвой со слезами, а иные, во бранех с духом злобы поднебесной жизнь свою положиша в венец их подвига ратного, Христу сраспявшися, ко дветысячелетия торжества Церкви Христовой, славно воспел еси Богу: Аллилуиа. Икос 10 Стена необоримая, Небесе и земли Владычица Пречистая, град Кострому ограждающая, состроителя Тайн Божиих и стража верна Церкви Сына Своего и Бога нашего избра тя, Христу Богу возлюблене Никодиме, воеже, не токмо в земном уделе, но и у Престола Царя Славы на Небесе, со всеми святыми и Ангелами небесными, священнодействовати со Христом пред Отцем Небесным будеши. Мы же, радости исполняемся: каково богатство благодати уготовил Господь любящим Его, тебе же вопием: Радуйся, Матери Божией — похвала и радование; Радуйся, Эдема земнаго — Христово венчание. Радуйся, ангелом собеседниче и святым сопричастниче; Радуйся, в невечернем дне Райския славы соучастниче. Радуйся, Никодимом нареченный, иже есть — присно побеждающий; Радуйся, изнеможденных горестьми житейскими подкрепляющий. Радуйся, избавляющий нас от огня, меча и землетруса; Радуйся, наслаждающийся лицезрением сладчайшего Иисуса. Радуйся, исповедниче Христов Никодиме, Костромскаго края светильниче неугасимый. Кондак 11 Пение всеумиленное, со слезами безутешными возрыдаша верные града Костромы, егда услышаша о страшной гибели твоей, всеблаженне Никодиме, за веру Православную и спасения народа Божьего, аки агнца закланного. Ныне же преисполнены веселием неизреченным, видяще тя, архипастыря своего, в сонме святых в Церкви Небесней восседающа и за ны Христу молящегося, с радостию вопиют Богу, все во благо устрояющему: Аллилуиа. Икос 11 Светозарного светильника, елея молитвы чистыя преисполнена, и пламенем веры светло сияюща, воздвижи тя Господь, святителю Никодиме, в Богохранимой земле костромския, да тьма ересей и расколов нечестивых необымет Свет Христов в сердцах и разуме боголюбиваго народа нашего, и низведет грядущих по нас в пасть губителя адскаго. Мы же, видим тя в Троическом Свете пребывающего и Отечеству нашему мира и благоденствия просящего, с упованием веры зовем ти: Радуйся, мечем молитвы пламенной нас охраняющий; Радуйся, огнем Духа Святаго плевелы зловерия сжигающий. Радуйся, омраченныя умом к Свету Истины приводяй; Радуйся, отроки несведущия из тьмы лжеверия изымаяй. Радуйся, о спасении народа нашего всеусерднейший попечителю; Радуйся, пленения и порабощения Святой Руси верный избавителю. Радуйся, пагубных обычаев и шатаний языческих искоренителю; Радуйся, добрых нравов и благочестия веры в вертограде Российстем насадителю. Радуйся, исповедниче Христов Никодиме, Костромскаго края светильниче неугасимый. Кондак 12 Благодати Святаго Духа испроси народам православным, преблагий пастырю стада Христова, Никодиме, да егда все силы искуса диавольского восстанут, во еже погубити нас и с посмеянием рекут: где есть Бог наш? Ты же, молитвениче всеусердный, ублажи Пречистую Божию Матерь и всех Святых, во еже спастися нам, врази же наша да облекутся студом, мы же увидим сыны сынов наших в мире и благоденствии прославляющих милость Божию, вопиющих: Аллилуиа. Икос 12 Поюще многострадальная подвиги твоя, святителю Христолюбивый Никодиме, и ублажаем святую кончину твою, еюже Крестный подвиг Церкви Зиждителя — Христа Жизнодавца и всех Святых сподвижников утверждения Его Святыя Церкви, всехвально увенчал еси, Костромскаго края достохвальная похвало. Сего богатства некрадомого, силу и мудрость, и в любви Божией утешения, и нам стяжати Господа умоли, да облекшися в броню правды, благодарно зовем ти: Радуйся, архиерею Христов благий и верный; Радуйся, архипастырю стада Христова непостыдный. Радуйся, Апостольских преданий незыблемый хранителю; Радуйся, христианскаго Благочестия веры пламенный насадителю. Радуйся, твердостоянием твоим Церковь Христова украшается; Радуйся, слезной молитвой твоей Русь святая раеви уподобляется. Радуйся, крине благоуханный, райскаго прозябения; Радуйся, усердный помощниче нашего земнаго крестоношения. Радуйся, исповедниче Христов Никодиме, Костромскаго края светильниче неугасимый. Кондак 13 О преславный исповедниче Христов Никодиме! Приими от нас, любящих тя чад твоих приносимое тебе сие убогое приношение и, теплым ходатайством твоим ко Господу, огради Святую Церковь православную и боголюбивые народы наши, от междоусобий братских, расколов и еретических смятений, да в покаянии сокрушенном избавимся праведнаго гнева Божия, бед и грядущия вечныя муки, и сподобимся с тобою, яко чада со отцем, во веки воспевати Богу: Аллилуиа.[Се́й конда́к глаго́лется три́жды.][Далее повторяем 1‑е икос и кондак:]Икос 1 Ангелы и Боголюбивые людие днесь Христу благодарение и славословие приносят, от рода священническаго, яко же иногда преславнаго Предтечу, глашатая и пастыря овец Церкви Своея избравшего тя, Святителю Богомудре Никодиме, да во дни гонений лютых, яко страж верный и пастырь добрый, паству Костромскую на растерзание волков лютых не оставиши, но душу свою за спасение ея положиши. О сем ублажаем Тя сицевыми похвалы: Радуйся, рода иерейского богоугодной молитвы рождение; Радуйся, земли костромския благоуханное цветение. Радуйся, Духа Святаго сосуде избранный; Радуйся, силою и действием Сего облагодатствованный. Радуйся, ковчеже чистоты и целомудрия; Радуйся, воплощение доброты и Богомудрия. Радуйся, святой Руси — Божие предначертание; Радуйся, севера земли нашея немеркнущее сияние. Радуйся, исповедниче Христов Никодиме, Костромскаго края светильниче неугасимый. Кондак 1 Избранный страстотерпче и исповедниче Христов, Святителю Никодиме, Церкви Зиждителя крестоносителю верный, пламенем любви Христовой разжигаемый, якоже жезл Ааронов, на камене веры процвел еси; биения и поношения, и темничные изнурения от спиры богоборческия сладце претерпел еси, со всеми страстотерпцы народов наших, Русь Святую Православную, яко вертоград Христов, прославил еси, основание Церкви Христовой в Ней утверждающе. Мы же, взирая на благия страдания твоя, зовем ти: Радуйся, исповедниче Христов Никодиме, Костромскаго края светильниче неугасимый.

Кондак 1 Избранный угодниче Божий, светлостию жития твоего и чудес благодатию просиявый в пустыни севернаго Помория, преподобне отче наш Елеазаре! Хвалебныя песни приносим ти, подвиги твоя воспевающе. Ты же, яко благоприятный молитвенник ко Господу, от всяких нас бед свобождай, да зовем ти: Радуйся, преподобне отче наш Елеазаре. Икос 1 Ангел житием и путеводитель многим ко спасению был еси, преподобне отче Елеазаре. Темже и мы ныне к твоему предстательству прибегающе, приносим ти хваления сицевая: Радуйся, единаго Господа измлада возлюбивый; радуйся, чистоту душевную от юности сохранивый. Радуйся, равноангельно поживый на земли; радуйся, яко со ангелы ликуеши на небеси. Радуйся, на демоны мужественно ополчивыйся; радуйся, небесных видений сподобивыйся. Радуйся, смирение сердца до конца сохранивый; радуйся, безмолвное житие тепле возлюбивый. Радуйся, преподобне отче наш Елеазаре. Кондак 2 Видевше благочестивии родители твои усердие твое ко иноческому житию, на сей спасительный путь тя благословити не отрекошася. Ты же, преподобне, из дому отеческаго абие изшед, во обитель Соловецкую устремился еси, еяже достиже, радостно воспел еси Богу: Аллилуиа. Икос 2 Разум богопросвещенный стяжав, мирскаго пристрастия избегл еси, пречудне Елеазаре, и подвиги плоть умертвив, образ добраго жития иноком преподал еси. Сего ради восхваляем тя сице: Радуйся, отечество и род твой оставивый; радуйся, богатство и славу возненавидевый. Радуйся, суровое житие возлюбивый; радуйся, Христу последовати возжелавый. Радуйся, яко пристанища тихаго достигл еси; радуйся, яко спасению многих послужил еси. Радуйся, грядущая прозираяй; радуйся, далече сущая провидяй. Радуйся, преподобне отче наш Елеазаре. Кондак 3 Сила Божия укрепляше тя на подвиги, блаженне Елеазаре, егда из обители преподобных Зосимы и Савватия изшед, в пустыню Анзерскаго острова вселился еси, идеже в безмолвии воспевал еси Богу: Аллилуиа. Икос 3 Имея молитву и крестное знамение яко щит непобедимый, досточудне Елеазаре, мужественно прогонял еси вражия ополчения, страховании многообразными на тя воюющая. Мы же яко воина Христова ублажаем тя сице: Радуйся, темных духов прогонителю; радуйся, злокозненных их сетей разрушителю. Радуйся, именем Иисусовым враги невидимыя отражавый; радуйся, мудрость духовную стяжавый. Радуйся, на невидимую брань верою и молитвою вооруживыйся; радуйся, воин Христов непобедимь явивыйся. Радуйся, полунощныя страны светильниче; радуйся, неусыпный о людех молитвенниче. Радуйся, преподобне отче наш Елеазаре. Кондак 4 Бурю искушений и бед враг рода человеческаго воздвизая на тя, доброподвижниче Елеазаре, аки от игумена посланный льстивно тебе является. Ты же молитвою Господнею того обличил еси и в бегство обратил еси, воспевая Богу: Аллилуиа. Икос 4 Слышав христолюбивый царь Михаил слух богоугоднаго твоего жития, преподобне Елеазаре, лице твое видети возжела: ты же, повелению цареву повинуяся, во стольный град притекл еси и о рождении первенца ему прорекл еси. Сего ради глаголем тебе сице: Радуйся, дерзновение ко Господу стяжавый; радуйся, пророческаго дара исполненный. Радуйся, христолюбиваго царя веру умноживый; радуйся, на хвалу Господню того подвигнувый. Радуйся, честию царевою не превозносивыйся; радуйся, о славе единаго Бога возвеселивыйся. Радуйся, яко твоею молитвою неплодие царицы прекратися; радуйся, яко плод благословен земли Российстей молитвою твоею даровася. Радуйся, преподобне отче наш Елеазаре. Кондак 5 Боготечная звезда иноком Соловецким являешися, отче Елеазаре, к небесному отечеству тех путеводящая, такожде и всех притекающих к раце мощей твоих умилением и верою просвещающая, вопиющих к Богу: Аллилуиа. Икос 5 Видеша ученицы твои, преподобне Елеазаре, царево к тебе благоволение, и повеление его к построению храма во обители твоей приемше, радовахуся. Мы же, Господне на то благословение уведевше и видения чудесная тебе явленная воспоминающе, глаголем: Радуйся, Христовы словесныя овцы ко спасению подвизаяй; радуйся, нерадивыя от сна греховнаго возбуждаяй. Радуйся, ученики твоя неленостно в житии назидавый; радуйся, и по преставлении писаньми твоими тех сердца умиляяй. Радуйся, словеса и учения святоотеческая в сердце твоем запечатлевый; радуйся, теми души ко спасению наставляяй. Радуйся, верный подражатель богоносным учителем бывый; радуйся, искусный иноков наставник явивыйся. Радуйся, преподобне отче наш Елеазаре. Кондак 6 Провидец и провозвестник будущих и далече отстоящих яко близ сущих был еси, преподобне Елеазаре: темже и преставление духовнаго друга твоего за тридесять поприщ прозрел еси. Сего ради Богу, дивно прославляющему святыя Своя, поим: Аллилуиа. Икос 6 Возсияваше лице твое небесною радостию и духовным веселием, ангелоподобне Елеазаре, егда сподоблялся еси Божественных откровений и видений. Сего ради сице тебе зовем: Радуйся, глас Божественный многажды слышавый; радуйся апостолу Павлу собеседник в видении бывый. Радуйся, Христов лик присно во уме твоем предносивый; радуйся, многострадальнаго о Христе жития благий образ явивый. Радуйся, на демоны воинствующим присный споборник бывый; радуйся, братию твою козни демонския прозирати научивый. Радуйся, правыя веры добрый учителю; радуйся, сомнящихся вере мудрый наказателю. Радуйся, преподобне отче наш Елеазаре. Кондак 7 Хотяще злии человецы досаду тебе сотворити, и того ради глубокое море преплывше, дерзостно к келлии твоей с прещением приближишася; но Божественною силою во изступление ума впадше, окрест жилища твоего в недоумении блуждаху. Ты же, незлобив сый, молитвою тати оныя от таковаго помрачения исцелил еси и научил еси пети Богу: Аллилуиа. Икос 7 Дивно от Царицы Небесныя на подвиги наставляемь, преподобне отче, непоколебимь во твоем изволении блазе пребыл еси, и небесную славу улучити сподобился еси. Темже ублажающе тя, глаголем: Радуйся, небесных видений достойный зритель бывый; радуйся, сосуде, Божия благодати преисполненный. Радуйся, путь спасения ясно познавый; радуйся, житием твоим путь сей нам указавый. Радуйся, безмолвия и молитвы учителю; радуйся, заповедей Господних верный блюстителю. Радуйся, ангелоподобный человече; радуйся, монашескаго жития наставниче. Радуйся, преподобне отче наш Елеазаре. Кондак 8 Странствие досточудно совершил еси, чудотворче Христов Елеазаре, егда море преплывал еси с братиею, ладию твою молитвою от крушения посреде плавающаго леда избавил еси и спасл еси сущия в ней люди, воспевающия Богу песнь: Аллилуиа. Икос 8 Весь пламенем Божественныя любве объят был еси, преподобне Елеазаре, егда во острове пусте богомыслием непрестанным и плоти умерщвлением подвизался еси, душу убо молитвою питая, тело же веригами удручая. О сем хваляще тя, зовем таковая: Радуйся, ветхаго человека в себе не пощадивый; радуйся, силою креста в подвизех себе утвердивый. Радуйся, пустынное лишение доблественне претерпевый; радуйся, память смертную присно имевый. Радуйся, власяницею и веригами плоть свою смиривый; радуйся, все плотское мудрование духу покоривый. Радуйся, богодухновенных книг списатель бывый; радуйся, мудрость духовную возлюбивый. Радуйся, преподобне отче наш Елеазаре. Кондак 9 Вси жительствующии в богоспасаемой обители сей к раце честных мощей твоих сошедшеся днесь, приснопамятне Елеазаре, и памятию добродетелей твоих сердца умиляюще, приносим ти хвалебную песнь, ангельски поюще Богу: Аллилуиа. Икос 9 Витийственных словес плетение не довлеет восхвалити достойно чудотворения твоя, преподобне Елеазаре. Обаче любовию движими, восписуем ти сицевая: Радуйся, вождю духовных воинов; радуйся, беснуемых свободителю. Радуйся, приемый от Господа власть на духи нечистыя; радуйся, и по смерти твоей низлагаяй вражия на нас ополчения. Радуйся, яко мощей твоих духи злобы устрашаются; радуйся, яко предстательством твоим всякия болезни исцеляются. Радуйся, в пучине морстей плавающим помощниче; радуйся, обидимых защитниче. Радуйся, преподобне отче наш Елеазаре. Кондак 10 Спасения подвигом добре подвизался еси, приснопамятне Елеазаре. Темже от Господа венец нетления тебе сплетеся, егда святую душу твою предал еси в руце Вседержителя, воспевая ангельскую песнь: Аллилуиа. Икос 10 Царю превечному в Небеснем Царствии предстал еси, святе Елеазаре, отшед от временныя жизни. Мы же, молитвенника тя тепла пред Престолом Господним имуще, зовем сице: Радуйся, от трудов временных к покою вечному славно прешедый; радуйся, и нас труды богоугодныя возлюбити научаяй. Радуйся, на земли Пресвятую Троицу присно славити обыкнувый; радуйся, Святей Троице ныне со ангелы предстояй радостно. Радуйся, дерзновение молитвенное ко Господу стяжавый; радуйся, дар чудотворения свыше восприемый. Радуйся, здравие болящим подаваяй; радуйся, во всякой нужде и беде сущим скоро помогаяй. Радуйся, преподобне отче наш Елеазаре. Кондак 11 Пения хвалебная угоднику Божию приносяще, о празднолюбцы, всечестную память его духовно торжествуим; подвиги же его и чудесная деяния прославляюще, воспоим Богу песнь: Аллилуиа. Икос 11 Светозарная звезда явился еси, отче Елеазаре, во мраце страстей нас сущих озаряющая и ко свету спасения приводящая всех вопиющих тебе таковая: Радуйся, обитель твою и по смерти не оставляяй; радуйся, живущия в ней невидимо назираяй. Радуйся, пищею духовною нас удовляяй; радуйся, на потребу телесную вся от Господа нам подаваяй. Радуйся, в житии твоем молитве деннонощней братию научивый; радуйся, и по преставлении твоем в молитве нас укрепляяй. Радуйся, скорбящих тайный утешителю; радуйся, страдальцев незримый посетителю. Радуйся, преподобне отче наш Елеазаре. Кондак 12 Благодать приял еси от Христа Бога, угодниче Христов Елеазаре, еже за ны, во обители твоей жительствующия, молитися. Темже ныне память твою любезно почитающия благослови и удовли нас ко славословию Бога с песнию: Аллилуиа. Икос 12 Поюще твоя чудеса и пророческий дар твой благоговейно почитающе, все же богоугодное твое житие и многая исцеления, от раки твоея святыя болящим подаваемая, любовию воспоминающе, молим тя, угодниче Христов Елеазаре, твоего предстательства и нас грешных не отщетити, но прияти от нас хваления сицевая: Радуйся, благодатию Пресвятыя Троицы освященный; радуйся, благодатию Пресвятыя Богородицы осененный. Радуйся, в лице преподобных ублажаемый; радуйся, к великим чудотворцем Соловецким сопричтенный. Радуйся, со всеми святыми прославляемый; радуйся, со ангелы Пресвятей Троице предстояй. Радуйся, еще на земли Господа зрети сподобивыйся; радуйся, ныне Того лицем к лицу созерцаяй. Радуйся, преподобне отче наш Елеазаре. Кондак 13 О преподобне и богоносне отче наш Елеазаре! Приими ныне приносимая тебе хваления наша и святыми твоими молитвами в жизни сей нас от всякаго злаго обстояния сохрани, в будущей же вечнаго осуждения избави, да сподобимся купно с тобою и со всеми святыми воспевати в Троице славимому Богу: Аллилуиа.[Се́й конда́к глаго́лется три́жды.][Далее повторяем 1‑е икос и кондак:]Икос 1 Ангел житием и путеводитель многим ко спасению был еси, преподобне отче Елеазаре. Темже и мы ныне к твоему предстательству прибегающе, приносим ти хваления сицевая: Радуйся, единаго Господа измлада возлюбивый; радуйся, чистоту душевную от юности сохранивый. Радуйся, равноангельно поживый на земли; радуйся, яко со ангелы ликуеши на небеси. Радуйся, на демоны мужественно ополчивыйся; радуйся, небесных видений сподобивыйся. Радуйся, смирение сердца до конца сохранивый; радуйся, безмолвное житие тепле возлюбивый. Радуйся, преподобне отче наш Елеазаре. Кондак 1 Избранный угодниче Божий, светлостию жития твоего и чудес благодатию просиявый в пустыни севернаго Помория, преподобне отче наш Елеазаре! Хвалебныя песни приносим ти, подвиги твоя воспевающе. Ты же, яко благоприятный молитвенник ко Господу, от всяких нас бед свобождай, да зовем ти: Радуйся, преподобне отче наш Елеазаре. Молитва О преподобне отче наш Елеазаре, безмолвнаго иноческаго жития в пустыни Анзерстей богоизбранный начальниче и основателю! Молим тя мы, смиреннии и недостойнии, обстояще священный гроб твой во храме Пресвятыя Троицы, имже место сие освятися и, сущия ради в тебе благодати пророческия, прославися; испроси, угодниче Божий, у Вседержителя Бога, в Троице покланяемаго, Емуже в дерзновении с лики святых предстоиши, да дарует православному народу нашему на враги победу и одоление, державе Российстей мир и утверждение, церквам благостояние и всем людем тишину, и благоденствие, и изобилие плодов земных. Угаси молитвами твоими разжженныя на ны стрелы диавольския, да не прикоснется нам злоба вражия, да благочестно скончавше временное житие, сподобимся наследовати Царствие Небесное и купно с тобою славити Отца и Сына и Святаго Духа во веки веков. Аминь.

Кондак 1 Избранной от рода державнаго угоднице Христовой Евфросинии, яко крепкой заступнице и молитвеннице нашей, похвальная восписуем ти, чтущия тя. Ты же, яко имущая дерзновение ко Господу, Того умоли избавитися нам бед и скорбей, и в будущем веце небесное улучити царствие, да зовем ти: Радуйся, преподобная княгине Евфросиние. Икос 1 Ангельское воистину безстрастие еще на земли стяжала еси, преподобная, нивочтоже вменяющи княжения славу, богатств обилие, вся мира красная, о юности и красоте телесней нерадивши, непрестанными же к Богу молитвами, бдением и постом плоть изнуривши и душу добродетельми украсивши. Сицевому равноангельному житию твоему удивляющеся, сия вопием ти, преподобная: Радуйся, от младых лет спасения взыскавшая; радуйся в молитвах к Богу прилежавшая. Радуйся, в напастех на Него единаго упование полагавшая; радуйся, в сане княжестем смирение сохранившая. Радуйся, во власти державней кротость ко всем соблюдшая; радуйся, к нищим милосердие неоскудное показавшая. Радуйся, в чертозе княжестем иночески пожившая; радуйся, в неговании двора царскаго постническое житие явившая. Радуйся, преподобная княгине Евфросиние. Кондак 2 Видящи преподобная в доме отчем заповедей Божиих усердное хранение и в благочестии преспеяние, от юности навыче о спасении душевнем паче всего ревновати и в теплых к Богу молитвах Ему воспевати: Аллилуиа. Икос 2 Разум во благочестии утвержден имущи преподобная, не земныя радости в супружестве взыскаше, но паче всех супругу в добродетелех подражаше и того к делом добрым подвизаше, со тщанием к почести вышняго звания течаше. Сицевое житие преподобныя похваляюще, возопиим к ней таковая: Радуйся, Бога паче всех возлюбльшая; радуйся, в жизни славней нощи в молитвах пребывати не оставльшая. Радуйся, во обилии благ земных постнической жизни навыкшая; радуйся, в мирстей жизни чистоту сердца сохраншая. Радуйся, супружеств христианских удобрение; радуйся, жен благочестивых украшение. Радуйся, во обилии благ живущим благочестия образ подавшая; радуйся, во славе сущим христианскаго жития правило показавшая. Радуйся, преподобная княгине Евфросиние. Кондак 3 Сила Вышняго присно невредиму тя сохрани, преподобная, егда смертоносная язва многи окрест тебе погубляше, и многажды в нахождениих врагов безбожных соблюдаше тя от меча их и пленения. Темже, Бога благодарящи, вопияла еси: Аллилуиа. Икос 3 Имущи сердце милостивое и к людем страждущим удобь преклонное, во всех града и княжения напастех, в запалениих огненных, в нахождениих и губительствах вражиих первее к Богу обыкла еси, преподобная, с молитвою теплою прибегати и к той вся люди подвизати. Темже, почитающе твое теплое к Богу о людех ходатайство и скорую бедствующим помощь, вопием ти сицевая: Радуйся, гнев Божий молитвами твоими утолявшая; радуйся, в бедах и напастех помощь Божию обретавшая. Радуйся, крова лишенным пристанище уготовлявшая; радуйся, от врагов разоренным снабдение подававшая. Радуйся, состраданием скорби бедствующих утолявшая; радуйся, милосердием нищету обнищавших отгонявшая. Радуйся, душу ко всем милосерду имевшая; радуйся, во мнозех благотворениих любовь к людем показавшая. Радуйся, преподобная княгине Евфросиние. Кондак 4 Буря скорбных помышлений обдержаше тя, преподобная, егда юный князь, блага ради людей своих, волею пойде в жилище ярящихся злонравных агарян, яко овча в ложа дивиих зверей, и паки, егда сын твой два лета проживе в пленении у безбожных врагов. Ты же, скорби сердца твоего пред Господем единым в молитвах теплых изливающи, Ему непрестанно взывала еси: Аллилуиа. Икос 4 Слышавше иногда безбожнии агаряне твое, преподобная, из царствующаго града удаление, гнаша вслед тебе, в плен яти тя хотяще. Ты же, Богом сохраняема, избегла еси рук вражиих, и Бога благодарящи, многи храмы и обители иноческия воздвигла еси. Темже, ведуще твою теплую к Богу любовь, вопием ти сицевая: Радуйся, непрестанными молитвенными хвалении Бога прославлявшая; радуйся, в непрестанную жертву благодарения Ему храмы многи создавшая. Радуйся, приметатися во дворех Божиих возлюбившая; радуйся, в мирстей жизни высоту иноческаго жития познавшая. Радуйся, во славе светлаго княжения суету мирскаго жития уразумевшая; радуйся, мира суету уразумевшим пристанище тихое во обителех уготовавшая. Радуйся, спасения душевнаго присно желавшая; радуйся, спастися хотящих к жизни иноческой призывавшая. Радуйся, преподобная княгине Евфросиние. Кондак 5 Боготечная звезда явилася еси, преподобная, в житии твоем, егда супружеских уз отрешившися, всецело Господу себе предала еси, постом и молитвами работающи Ему день и нощь и непрестанно вопиющи Ему: Аллилуиа. Икос 5 Видящи, преподобная, себе по смерти мужа сиротствующу, возжела на служение единому Богу себе предати, обаче, воспитания ради чад, до времени в чертозех княжеских жити и о делех земных попечение имети понуждаема, умысли в тайне Богу работати, зельным пощением тело юное изнуряющи, людем же в светлых ризах и красну лицем себе являющи. Той единому Богу ведомыя подвиги почитающе, возопиим к ней таковая: Радуйся, в тайне Богу послужившая; радуйся, сокровенно от людей Тому угодившая. Радуйся, Давидски в полунощи на молитву восстававшая; радуйся, во дни бодрственно дела земная совершавшая. Радуйся, псаломски утро в молениих предварявшая; радуйся, до нощи во обычных о чадех и людех попечениих пребывавшая. Радуйся, яко пред Богом псаломски во вретищи и стенании душу твою смирила еси; радуйся, яко пред людьми евангельски во умащении главы и в светелости лица и одеяния себе являла еси. Радуйся, преподобная княгине Евфросиние. Кондак 6 Проповеднику премудрому согласующися, глаголала еси, преподобная, в сердцы твоем: всяческая в мире суета сует. Темже тихое от суеты убежище — обитель святую сию создала еси, еже бы в ней мира удалившися, в мире и безмолвии пети Богу: Аллилуиа. Икос 6 Возсия в сердцы твоем, преподобная, светлая благодати луча, тайными молитвами и подвигами возжигаемая, еяже сияния не терпя древний враг, восхоте возмутити душу твою, наустив лукавыя люди хулы глаголати о житии твоем. Ты же клеветы слышащи, духом пребывала еси в Бозе утвержденна и помыслом не смущенна. Темже вопием ти, преподобная: Радуйся, неправедное поношение без гнева терпевшая; радуйся, злокозненное хуление несмущенно понесшая. Радуйся, за ревность о чистоте сердца в нечистоте жития оклеветаемая; радуйся, за зельное тела умерщвление в житии сластопитанном укоряемая. Радуйся, от Бога единаго похвалы на суде Его желавшая; радуйся, славы токмо на небесех искавшая. Радуйся твердое терпение во озлоблении соблюдшая; радуйся, смирением козни вражия расторгшая. Радуйся, преподобная княгине Евфросиние. Кондак 7 Хотяй Господь тайныя твоя в добродетелех подвиги ведомы людем соделати, попусти диаволу бурю воздвигнути на тя поношений и оклеветаний, да известно уведевше святое твое житие, прославят вси Бога, дивнаго в тайных рабех Своих, присно вопиюще Ему: Аллилуиа. Икос 7 Новую показа добродетели высоту преподобная Евфросиния, егда, видящи чад своих злыми о ней клеветами смущаемых, призва я тайно и часть одежд пред ними откры, яко видети бе мощно тело ея, от поста и зельных подвигов изсохшее и очернелое, и плоть костем прильпнувшу; и тако смущение от сердец их отгнавши, никомуже поведати виденное повеле. Таковей преподобныя добродетели дивящеся, возопиим к ней сицевая: Радуйся, во глубине смирения подвиги твоя от всех скрывавшая; радуйся, в широте любве чадом твоим оныя явившая. Радуйся, очищения ради своея души, поношение безчестия терпеливо понесшая; радуйся, избавления ради чад своих от греха осуждения, чистоту жития своего показавшая. Радуйся, обиды от людей Судии Богу предавшая; радуйся, худыя помыслы чад своих во благо исправившая. Радуйся, во уверение истины подвиги твоя им открывшая; радуйся, во избежание славы, уста их молчанием заградившая. Радуйся, преподобная княгине Евфросиние. Кондак 8 Странное видение плоти твоея, яко уже умершия, зряще сынове твои и жестокое твое житие уразумевше, страхом одержими, Богу, укрепившему тя в подвизех, вопияху прилежно: Аллилуиа. Икос 8 Весь сонм злословящих людей хотяху чада твоя наказати, егда уведаша твоего жития чистоту и уразумеша велию злобу поношающих тя; ты же, яко незлобивая, никакоже попустила еси отмстити обидящим, от Бога единаго чающи оправдания своего. Темже вопием ти, преподобная: Радуйся, сердцем кроткая; радуйся, духом незлобивая. Радуйся, ко обидам терпеливая; радуйся ко обидящим негневливая. Радуйся, в терпении обид Христу Богу подобящаяся; радуйся, от Бога единаго своего оправдания ожидавшая. Радуйся, поношение терпением победившая; радуйся, ко обидящим любовь сохранившая. Радуйся, преподобная княгине Евфросиние. Кондак 9 Все естество Ангельское возвеселися, егда Архистратиг Небесных Сил, предстояй Престолу Божию, послан бысть к тебе, преподобная, ко исходу душу твою уготовати, и Богу, сице благоизволившему, вопияху: Аллилуиа. Икос 9 Витии многовещанныя не возмогут по достоянию восхвалити твое ангельское безстрастие и чистоту ока душевнаго, яко, во плоти сущи, от Архистратига Божия посещения сподобилася еси и от него извещение о исходе из сего временнаго жития прияла еси. Мы же, таковую тебе от Бога данную благодать чтуще, вопием ти, преподобная: Радуйся, безстрастием Ангелом соревновавшая; радуйся, Архангельскаго посещения сподобльшаяся. Радуйся, сиянием Ангельскаго света осиянная; радуйся, благоуханием святыни от Архангела облагоуханная. Радуйся, о изшествии из мира от Господа предызвещенная; радуйся, явлением Ангельским от всего земнаго отрешенная. Радуйся, яко Архистратиг Божий явлением своим князя воздушных мытарств от тебе далече отгна; радуйся, яко своим благодатным посещением победу на диавола тебе дарова. Радуйся, преподобная княгине Евфросиние. Кондак 10 Спасти хотящи душу твою, преподобная, егда от Ангела весть о скором от жития сего исходе прияла еси, внити в созданную тобою обитель ускорила еси, да тамо в безмолвии работающи Богу, воспеваеши Ему: Аллилуиа. Икос 10 Стена еси твердая и ограждение необоримое обители, тобою созданней, преподобная, еже и яви Господь, еще грядущей тебе во обитель: многи бо на пути недужныя исцелила еси и во обитель вошла еси не яко новоначальная, но яко славная чудотворица. Темже, прославляюще тя, вопием ти, преподобная: Радуйся, явлением твоим слепцу исцеление обещавшая; радуйся, прикосновением ризы зрение тому подавшая. Радуйся, болящих в житии твоем нужным снабдевавшая; радуйся, тридесяти недужным при вхождении во обитель исцеление даровавшая. Радуйся, во обитель шедшая по смирению, яко новоначальная; радуйся, в тую вшедшая по благодати Божией, яко чудотворица прехвальная. Радуйся, благодать Божию с собою во обитель вводящая; радуйся, вхождением своим украшение святолепное ей преподавшая. Радуйся, преподобная княгине Евфросиние. Кондак 11 Пение всеумиленное принесла еси, преподобная, благодарственная восписующи Господу, сподобльшему тя иноческое пострижение прияти, к нему же во всем житии душу твою предуготовляла еси, да мира сего отлучившися и ничимже земным смущаема, вопиеши Богу: Аллилуиа. Икос 11 Светозарная свеща иночествующим показася житие твое во обители, преподобная: аще бо и не многи дни во иночестве пожила еси, обаче всякия иноческия добродетели образ преизящный в себе явила еси. Темже, восхваляюще тя, сицевая вопием ти, преподобная: Радуйся, вольнаго мира оставления преизящная наставнице; радуйся, правило усерднаго за вся люди моления. Радуйся, совершеннаго своей воли отсечения премудрое наставление; радуйся, душевныя и телесныя чистоты светило изрядное. Радуйся, умерщвления плоти образе преизящный; радуйся, мирнаго купножития наставнице. Радуйся, умныя к Богу молитвы образе; радуйся, святаго на земли жития зерцало. Радуйся, преподобная княгине Евфросиние. Кондак 12 Благодати исполнена и благих дел, яко добре течение земное совершившая, в мире преставилася еси от земных к небесным, идеже веселящися предстоиши Господу и вопиеши Ему: Аллилуиа. Икос 12 Поюще твоя многообразная людем благодеяния, восхваляем тя вси, преподобная мати Евфросиние, независтно подающую исцеления с верою к тебе прибегающим и вопиющим ти: Радуйся, яко на небесех ныне пред Господем предстоиши; радуйся, яко о людех пред Богом выну предстательствуеши. Радуйся, града твоего крепкое ограждение; радуйся, обители твоея незыблемое утверждение. Радуйся, о благом преспеянии иночествующих тепле молящаяся; радуйся, о утверждении добре живущих в мире Бога просящая. Радуйся, чтущих память твою пред Богом поминающая; радуйся, о прославляющих тя Бога молящая. Радуйся, преподобная княгине Евфросиние. Кондак 13 О, прехвальная угоднице Божия, преподобная княгине Евфросиние! Приими смиренное сие хваление наше и твоим теплым предстательством у Царя Славы испроси нам в немощех исцеление, в добродетелех преспеяние, от врагов видимых и невидимых избавление, от вечныя муки свобождение и Царства Небеснаго наследие, да с тобою присно поем Богу: Аллилуиа.[Се́й конда́к глаго́лется три́жды.][Далее повторяем 1‑е икос и кондак:]Икос 1 Ангельское воистину безстрастие еще на земли стяжала еси, преподобная, нивочтоже вменяющи княжения славу, богатств обилие, вся мира красная, о юности и красоте телесней нерадивши, непрестанными же к Богу молитвами, бдением и постом плоть изнуривши и душу добродетельми украсивши. Сицевому равноангельному житию твоему удивляющеся, сия вопием ти, преподобная: Радуйся, от младых лет спасения взыскавшая; радуйся в молитвах к Богу прилежавшая. Радуйся, в напастех на Него единаго упование полагавшая; радуйся, в сане княжестем смирение сохранившая. Радуйся, во власти державней кротость ко всем соблюдшая; радуйся, к нищим милосердие неоскудное показавшая. Радуйся, в чертозе княжестем иночески пожившая; радуйся, в неговании двора царскаго постническое житие явившая. Радуйся, преподобная княгине Евфросиние. Кондак 1 Избранной от рода державнаго угоднице Христовой Евфросинии, яко крепкой заступнице и молитвеннице нашей, похвальная восписуем ти, чтущия тя. Ты же, яко имущая дерзновение ко Господу, Того умоли избавитися нам бед и скорбей, и в будущем веце небесное улучити царствие, да зовем ти: Радуйся, преподобная княгине Евфросиние. Молитва О, преподобная княгине Евфросиние, добляя в женах подвижнице, прехвальная угоднице Христова! Приими моление о нас, недостоиных, с верою и любовию к тебе припадающих, и теплым к Богу ходатайством испроси граду Москве и людем от бед и напастей сохранение, споспешествуй, яко чадолюбивая мати, чадом, тобою собранным, понести иго Христово во благодушии и терпении и добре подвизатися ко исправлению жития своего, еже ко спасению; в мире благочестно живущим испроси у Господа в вере твердость, во благочестии преспеяние и всем, с верою прибегающим к тебе и твоея просящим помощи и заступления, подавай всегда недугов исцеление, в скорбех утешение и во всем житии благопоспешение, наипаче же умоли Господа в мире и покаянии земное житие преити нам, мытарств горьких и мук вечных избавится и Царство Небесное твоим ходатайством получити, идеже ты со всеми святыми Господу предстоиши, да всегда славим Отца и Сына и Святаго Духа, ныне и в безконечныя веки веков. Аминь.

Кондак 1 Избранную Христову невесту песньми восхвалим днесь, вернии, Евфросинию; сия бо княжна, дом отчий оставльши и во иночестве поживши добре, многая управила есть ко спасению; во Иерусалиме плотию преставльшися, во Иерусалим горний духом преселися и тамо присно за ны молится. Ейже тако возопиим: Радуйся, Евфросиние, невесто Христова всечестная. Икос 1 Ангельски поживши, преподобная, постническим житием угодила еси Христу и небесныя радости причаститися сподобилася еси по скончании. Темже с горних высот призри на ны, тако тя величающия: Радуйся, Российския земли похвало; Радуйся, отрасль славная от рода Владимира равноапостольнаго. Радуйся, именитых родителей чадо богоизбранное; Радуйся, голубице непорочная. Радуйся, девственнице чистая; Радуйся, инокиням утешение. Радуйся, ко Иерусалиму небесному путеводительнице; Радуйся, благочестия звездо. Радуйся, заступнице к тебе притекающих; Радуйся, целительнице недугов незримая. Радуйся, ходатаице за ны теплая; Радуйся, Евфросиние, невесто Христова всечестная. Кондак 2 Видение бе радостное, егда по рождении твоем принесоста тя, преславная, родителя твоя во храм Господень: тамо бо в купели крещения от первороднаго греха омылася еси погружением, и мира священным помазанием тя, яко отрасль младую, иерей привил есть ко Христу, да поеши Ему выну со избранными Его: Аллилуиа. Икос 2 Разумом, свыше просвещенным, и чистым сердцем Христови от юности вручила еси себе, Предиславо; почасту во храм притекающи, в горнице во трудех присно пребывала еси. Темже тя ублажаем: Радуйся, Христови обрученная от купели крещения; Радуйся, миром благодатным запечатленная. Радуйся, Духа Свята вместилище чистое; Радуйся, тем умудренная во спасение. Радуйся, во благое свыше укрепленная; Радуйся, разум просветившая молитвою. Радуйся, совесть стяжавшая крепкую во благом; Радуйся, от младости уведевшая пути благочестия. Радуйся, уклонилася бо еси пути гибельнаго; Радуйся, трудолюбивая отроковице. Радуйся, юных дев российских красото; Радуйся, Евфросиние, невесто Христова всечестная. Кондак 3 Силою Вышняго укрепленная, возлюбила еси преподобная; научение книжное и тому прилежала еси; мудрость же книжную постигши, паче прочих божественныя книги избрала еси, и яже умудрити могут во спасение всякаго человека, усердно почитала еси, сладце поющи Господеви: Аллилуиа. Икос 3 Имать днесь обитель твоя отроковицы многи и млады, научению книжному зде вданныя. Сего ради усердно молим тя, всехвальная, призри на тыя и умудри я во спасение, да тя величаем: Радуйся, ключ мудрости взыскавшая; Радуйся, яко художество книжное постигла еси от младости. Радуйся, тем отверзшая двери богопознания; Радуйся, Священное почитавшая Писание. Радуйся, от сего узревшая мира сущаго сотворение; Радуйся, умиленная неизреченным Христовым снизхождением к падшему роду нашему. Радуйся, возлюбившая возлюбльшаго нас Господа; Радуйся, Тому Единому поработати возжелевшая. Радуйся, последи в чертог славы Его всельшаяся; Радуйся, девственнице, юным девам незримая споспешнице в научении. Радуйся, светильниче благочестия и знания; Радуйся, Евфросиние, невесто Христова всечестная. Кондак 4 Бури житейских бед и напастей бежавши, преподобная, паче брака честна житие девственное возлюбила еси и от именитых женихов уклонилася еси, отроковице, да единому Жениху Небесному Христу поработаеши, поющи Ему: Аллилуиа. Икос 4 Слышала еси, преподобная, яже апостол рече: глаголю безбрачным и вдовицам — добро им есть, аще пребудут, якоже и аз; аще ли жени, да посягают; не оженивый бо ся печется, како угодити Господеви; и сему поревновала еси. Темже тя величаем: Радуйся, девственнице чистая; Радуйся, путь иноческаго жития избравшая. Радуйся, яко жребий девства прияти и вместити возмогла еси Божиею благодатию; Радуйся, мирскаго треволнения избегшая. Радуйся, тихаго пристанища взыскавшая; Радуйся, Марии Лазареве подражавшая. Радуйся, яко во храме, аки при ногу Христову, приметалася еси; Радуйся, яко лику мучениц и преподобных жен приобщилася еси. Радуйся, презревшая лепоту мира тленнаго; Радуйся, неизреченныя радости в мире горнем днесь причастнице. Радуйся, праведнаго жития образе; Радуйся, Евфросиние, невесто Христова всечестная. Кондак 5 Бога точию боящися, не устрашилася еси, Евфросиние, тяготы жития иноческаго, кров же оставльши отчий, во обитель притекла еси и облещи тя во ангельский образ умильне игумению молила еси, да не обязавшися куплями житейскими, выну пети сподобишися Христови: Аллилуиа. Икос 5 Врача Небеснаго молила еси, всехвальная, да скорбь, родителема твоима отшествием учиненная, на радость преложится; оставила бо еси я, преподобная, да Христови послужиши за рождших тя молишися. Темже тя хвалим достойно: Радуйся, избраннице Божия; Радуйся, тайне, из отчаго дома отшедшая. Радуйся, во обитель всельшаяся княгини Романовы; Радуйся, возложшая руку на рало делания духовнаго. Радуйся, брачный венец отложившая; Радуйся, главу покрывшая кукулем незлобия. Радуйся, одеждам брачным одежду нищеты предпочетшая; Радуйся, со приятием вервицы, аки мечем, вооруженная словом Божиим. Радуйся, крест Христов, аки знамя веры, приимшая; Радуйся, яко не посрами тя Господь во уповании. Радуйся, родителя бо, пришедшая тя видети, от писания тобою утешившася, в радости возвратистася; Радуйся, Евфросиние, невесто Христова всечестная. Кондак 6 Проповедника Павла, иже рече: всяк подвизаяся от всех да воздержится, послушающи, в посте и воздержании неослабно пожила еси, преподобная, во обители; суесловия бо бегала еси и песньми псаломскими назидающися молилася еси, и в добрем изволении утверждающися, выну пела еси: Аллилуиа. Икос 6 Возсия благодать в подвизех жития твоего, Евфросиние всечестная; по некоем бо времени во град Полотск преселилася еси, и при храме святыя Софии в клетце мале подвизающися, книги божественныя преписовала еси и тако град ти присный полезным учением напаяла еси, слышащи от всех таковая: Радуйся, Полотское радование; Радуйся, девам сияние. Радуйся, звездо благочестия; Радуйся, смирения исполненная. Радуйся, послушанием утвержденная; Радуйся, с молчанием скорби терпевшая. Радуйся, при храме бо, яко древле Богоотроковица, пожила еси; Радуйся, мудрая княжно и инокине пречестная. Радуйся, цвете постничества; Радуйся, свете кротости. Радуйся, упования неложнаго исповеднице; Радуйся, Евфросиние, невесто Христова всечестная. Кондак 7 Хотяй спасти тобою жены и девы многия во иночестве, Владыка Христос сицеваго видения удостой тя, преподобная; в соннем видении узрела еси себе, Евфросиние, принесену в сельце к церквице Спасове, и Ангела ти рекшаго: зде ти быти подобает. Ты же абие от сна воставши, радостне пела еси: Аллилуиа. Икос 7 Новое чудо бысть: тойже бо Ангел явився святителю Илии, повеле ему дати сельце то на вселение ти и церквицу на молитву, еже и сотвори святитель абие. Сия поминающе, тако тя величаем: Радуйся, ангельски пожившая; Радуйся, Ангела Господня узревшая. Радуйся, сладкия беседы его причастнице; Радуйся, яко и пред святителем ходатай бе о тебе. Радуйся, Ангелом и на всех путех твоих храненная; Радуйся, кровом крил его огражденная. Радуйся, не преткнувшая ноги твоея о камень гордыни; Радуйся, сего ради видения зрака ангельского удостоенная. Радуйся, яко явися ти, иже зрит лице Отца нашего Небеснаго; Радуйся, не прогневльшая хранителя ничимже суетным и греховным. Радуйся, сего ради радостныя вести удостоенная; радуйся, Евфросиние, невесто Христова всечестная. Кондак 8 Странник, кров узрев, радуется и, пришед, покой си приемлет. И ты, преподобная, радости исполнилася еси, при церквице на сельце водворившися со единою от инокинь, и ту основание обители твоея сотворила еси отнюдуже Богови днесь возносится песнь великая, в вышних сугубо песнословимая: Аллилуиа. Икос 8 Вся весть Господь, и ничтоже тайно, еже не открыется; ведый же вся коемуждо от человек изволение дарует, да изберет кийждо путь жития, и якоже кто поживет, по житию коегождо скончавшася судит. Яже памятующе, тако тя хвалим: Радуйся, благий ярем Христов подъемшая; Радуйся, по гласу ангельскому на место пустынно отшедшая. Радуйся, точию книги с собою принесшая; Радуйся, со единем одеянием бывшая. Радуйся, с треми малыми хлебы всельшаяся; Радуйся, прочая вся оставльшая. Радуйся, пустыни украшение; Радуйся, яко сроднии за подвиг сей благословиша тя. Радуйся, епископом Илиею утешенная; Радуйся, яко вскоре к тебе многи инокини стекошася. Радуйся, яко и обитель славная ту устроися; Радуйся, Евфросиние, невесто Христова всечестная. Кондак 9 Всемилостиваго Спаса храм во обители создала еси и честными иконами украсила еси, преподобная, споспешествующей ти благодати Божией; древоделя бо на строение церковное некий глас буждаше, на скончание же храма дивне плинфы многи обретошася. Яже зрящи, со умилением пела еси: Аллилуиа. Икос 9 Вития мудрая была еси, преподобная, памятовала бо еси слово Христово, иже сотворит едину заповедей сих малых и научит тако человеки, сей велий наречется в Царствии Небеснем, и поучающи благочестию сестры своя, первее сия творила еси. Темже тя величаем: Радуйся, инокиням правило иноческаго жития; Радуйся, яко в чистоте и целомудрии блюла еси юныя. Радуйся, неложно старыя почитавшая; Радуйся, скорбным споспешнице в терпении. Радуйся, была бо еси всем образ смирения и благолепнаго хождения; Радуйся, обличительнице осуждения и многословия. Радуйся, приятелище дара прозрения сердец; Радуйся, вопрошающим мудрая советнице. Радуйся, миротворице сварящихся; Радуйся, добродетельми преукрашенная. Радуйся, великая российская дево; Радуйся, Евфросиние, невесто Христова всечестная. Кондак 10 Спасения ради и утешения Ефесскую икону Владычицы нашея Богородицы испросила еси из Царяграда, преподобная, во град Полотск. Обитель ину устроивши, тою иконою сию украсила еси; сестру же и две дщери братния, Кирианну и Ольгу, иночества обеты Христови обручила еси и во обителех твоих во спасение управила еси многия, поющи: Аллилуиа. Икос 10 Стеною крепкою от искушений явися смирение твое; вся бо ти повеленная совершивши, яко рабу неключиму вменила еси себе, преподобная; кротостию и тихостию нрава паче злата и бисера украсила еси душу твою. Темже тя величаем: Радуйся, слуго чистая Девы Пречистыя; Радуйся, увеселила бо еси Полотск чудным Божия Матере образом. Радуйся, великое сокровище Российстей земли тако стяжавшая; Радуйся, многия девы во обитель Божия Матере приведшая. Радуйся, присныя ти на путь спасения привлекшая; Радуйся, мудрая управительнице во спасение. Радуйся, две обители, яко свещи возжегшая; Радуйся, теми просветившая страну Полотскую. Радуйся, насадительнице древа иноческаго жития; Радуйся, смирением утаевавшая высоту твоих подвигов. Радуйся, строительнице Российския земли; Радуйся, Евфросиние, невесто Христова всечестная. Кондак 11 Песньми восхваляюще тя, терпению твоему дивимся, преподобная; всякия бо труды и скорби понесши, последи во Святую Землю странствие прияла еси, идеже, по желанию твоему, и скончатися приведе ти Господь; тамо бо к Нему в старости маститей преселилася еси, подвиг добрый совершивши, с песнию: Аллилуиа. Икос 11 Светозарная луча земли Российския! Аще плотию преставилася еси от нас, преподобная, обаче духом с нами присно пребываеши. Во храме, тобою созданном, молящеся и кресту, от тебе устроену, покланяющеся, молим тя, приими от нас сицевыя хвалы: Радуйся, древния России сияние; Радуйся, оныя днесь великия похвало. Радуйся, славная Земли Святыя от севера пришельнице; Радуйся, гробу Христову поклонитися сподобльшаяся. Радуйся, лампаду ту от земли Российския возжегшая; Радуйся, у гроба Христова ко Христу отшедшая. Радуйся, у онаго крест земнаго жития твоего оставльшая; Радуйся, святыми тайнами при скончании напутствованная. Радуйся, на небеси от святых угодник радостно сретенная; Радуйся, венцем славы от Небеснаго Жениха увенчанная. Радуйся, мудрая дево, вшедшая в чертог Жениха Небеснаго со славою; Радуйся, Евфросиние, невесто Христова всечестная. Кондак 12 Благодати причастнице, усердно молим тя, Евфросиние всехвальная, пролий теплую твою молитву ко Всевышнему за всю землю нашу православную, да мудростию и чистотою жития народнаго, яко дщерь избранная, будет во языцех земля наша, и чада ея да внидут в горняя селения, поюще Богови: Аллилуиа. Икос 12 Поюще тя, яко заступницу нашу теплую, инокиням же и девам обители твоея покров и утверждение, радуемся о тебе, преподобная, и молитвами твоими просимая приемлюще, с любовию величаем тя сице достойно: Радуйся, яко мощи твоя, во отечество принесенныя, процветоша нетлением; Радуйся, всехвальная, равноапостольнаго Владимира правнуко. Радуйся, собеседнице равноапостольныя Ольги и всего благосветлаго лика праведных жен; Радуйся, всельшаяся в скинию святых. Радуйся, незримая о нас ходатаице; Радуйся, болящих врачевание дивное. Радуйся, печальных утешение неложное; Радуйся, отрадо скорбящих. Радуйся, опоро тя призывающих; Радуйся, заступнице наша теплая у Христа. Радуйся, дивная, верою чтущих тя путеводительнице ко спасению; Радуйся, Евфросиние, невесто Христова всечестная. Кондак 13 О, всехвальная мати наша Евфросиние всечестная! Моли за ны Господа и Матерь Его Пречистую, да укрепит наша немощныя силы и во спасение управит, юныя в чистоте соблюдет, девствующия укрепит в подвизе, во браце сущия в любви и мире усовершит, уврачует недужныя, просветит омраченныя, умершия простит и вся в чертоги Своя управит, идеже выну Ангели поют песнь хвалебную: Аллилуиа.[Се́й конда́к глаго́лется три́жды.][Далее повторяем 1‑е икос и кондак:]Икос 1 Ангельски поживши, преподобная, постническим житием угодила еси Христу и небесныя радости причаститися сподобилася еси по скончании. Темже с горних высот призри на ны, тако тя величающия: Радуйся, Российския земли похвало; Радуйся, отрасль славная от рода Владимира равноапостольнаго. Радуйся, именитых родителей чадо богоизбранное; Радуйся, голубице непорочная. Радуйся, девственнице чистая; Радуйся, инокиням утешение. Радуйся, ко Иерусалиму небесному путеводительнице; Радуйся, благочестия звездо. Радуйся, заступнице к тебе притекающих; Радуйся, целительнице недугов незримая. Радуйся, ходатаице за ны теплая; Радуйся, Евфросиние, невесто Христова всечестная. Кондак 1 Избранную Христову невесту песньми восхвалим днесь, вернии, Евфросинию; сия бо княжна, дом отчий оставльши и во иночестве поживши добре, многая управила есть ко спасению; во Иерусалиме плотию преставльшися, во Иерусалим горний духом преселися и тамо присно за ны молится. Ейже тако возопиим: Радуйся, Евфросиние, невесто Христова всечестная. Молитва 1-я О, преподобная и приснопамятная, всехвальная мати Евфросиние, Ангеле во плоти, Богоизбранный сосуде Святаго Духа, Церкве Христовы похвало и украшение, монашествующих славо и утверждение, отечеству, обители твоей и всей стране Российстей помоще, покрове и защитнице! Ты еси, яко древо, насажденное при исходищих вод, плоды добродетелей твоих и благодатными даровании Святаго Духа украшенная, наставнице делом и словом, избранная, непорочная и добрая. Услыши ны, молящияся тебе и призывающия имя твое, имаши бо дерзновение у Господа. Испроси нам преуспеяние в жизни добродетельней, огради сердца наша верою, надеждою и любовию и страхом Божиим. Подай нам помощь в трудех и скорбех наших и, якоже попечение имела еси в житии твоем о обители твоей и иночествующих, тако и ныне потщися о нас, благопоспешити нам во всем: и обитель твою огради миром и защити от враг видимых и невидимых, да преуспевает и процветает в добродетелех. Изми ны от всякия нужды и тесноты, от лютых болезней и от нечаянныя смерти и приведи ны ко истинному покаянию при исходе из жизни сея; испроси нам у Господа Бога кончину мирну, безболезненну, непостыдну, святых Таин причастну и преведи ны чрез мытарства воздушная, да не похитят нас истязателие грознии по грехом нашим, но да твоим заступлением и помощию возможем безбедно пройти истязание воздушное, и милость получити, и предстати неосужденно страшному Престолу, и на Страшнем Судищи сподобитися одесную стати Праведнаго Судии, и наследовати праведных часть. Ей, госпоже, всечестная мати, преподобная Евфросиние, помози нам молитвами твоими, огради нас и заступи от всяких козней вражиих, да сподобимся прейти время жизни сея непреткновенно и спасение получити молитвами твоими у Христа Господа, Его же и сподобимся пети и славословити со Безначальным Отцем и со Святым Духом во веки веков. Аминь. Молитва 2-я О, преподобная мати Евфросиние! Услыши ны молящияся тебе; испроси нам, рабам Божиим (имена), преспеяние в жизни добродетельней; огради сердца наша верою, надеждою и любовию, и страхом Божиим, подай нам помощь во трудех и скорбех наших, изьми ны от всякия нужды и тесноты, от лютых болезней и от нечаянныя смерти, и приведи ны ко истинному покаянию при исходе от жизни сея; испроси нам у Господа Бога кончину мирну, безболезненну, непостыдну, Святых Таин причастну; и проведи ны чрез мытарства воздушная. Ей, преподобная Евфросиние, помози нам молитвами твоими: огради нас и заступи от всяких козней вражиих, да сподобимся спасение получити у Христа Господа, Егоже и сподобимся славословити, со Безначальным Отцем и со Святым Духом, во веки веков.

Кондак 1 Избранный по предуведению Божию угодниче Христов, преподобне отче Евфимие! Прославляюще Господа Славы, давшаго в тебе граду Суздалю и всей православней державе русской крепкаго заступника и молитвенника, и в бедах помощника и утешителя, похвальное восписуем ти пение; ты же твоими теплыми молитвами у Престола Святыя Троицы от всяких бед душевных и телесных вся ны избави, зовущия ти: Радуйся, Евфимие, скорый помощниче и преславный чудотворче! Икос 1 Ангельское житие иночествующих от юности возлюбил еси, преподобне Евфимие, и Богу Единому работати всем сердцем еще в отрочестве своем возревновал еси. Сего ради взываем ти: Радуйся, отроча кроткое и благопокорливое; Радуйся, родителей утешение. Радуйся, с любовию прилежавый книжному учению; Радуйся, ведению Господа и Его заповедей учитися возлюбивый. Радуйся, вся утехи детския презревый; Радуйся, Божественными токмо от юности веселяйся. Радуйся, селения Господа Сил паче всего возлюбивый; Радуйся, душею своею и скончаватися во дворех Господних возжелавый. Радуйся, в храме Божием, якоже пред Лицем Самого Господа, выну предстоявый; Радуйся, ум свой весь к Единому Богу устремивый. Радуйся, яко ничтоже земное в храме помышлял еси; Радуйся, со страхом и трепетом Богу предстоявый. Радуйся, Евфимие, скорый помощниче и преславный чудотворче! Кондак 2 Видя подвиги и молитвенныя труды Дионисия, в пещере близ Нижняго Новаграда жительствующа, притекл еси к нему, и лобызая нозе его, со слезами того молил еси, еже причтену ти быти к лику иноков, да вопиеши купно с ними: Аллилуиа. Икос 2 Разум слышаннаго тобою словесе Евангельскаго: “Кая польза человеку, аще мир весь приобрящет, душу же свою погубит”, добре уразумев и на скрижалех сердца тое начертав, мирская вся презрел еси, о спасении же души твоей точию ревновал еси, Царствия Божия и правды его прежде всего искати научая вся ны, вопиющия ти: Радуйся, земная презревый; Радуйся, небесная возлюбивый. Радуйся, яко от юности на стражбу Божию стал еси, да утреннюеши к Богу; Радуйся, в чтениих и пениих церковных поучавыйся день и нощь. Радуйся, из млада млеком слова жизни питавыйся; Радуйся, во благодати у Бога и человек непрестанно возраставый. Радуйся, в тайне от людей молитися возлюбивый; Радуйся, от Видящаго яже в тайне, яве прославленный. Радуйся, во отрочестве не с земными сверстники, но с небесными Ангелы содруживыйся; Радуйся, всего себе Богу предавый. Радуйся, целомудрия ревнителю; Радуйся, чистоты хранителю. Радуйся, Евфимие, скорый помощниче и преславный чудотворче! Кондак 3 Сила Вышняго осени тя, преподобне Евфимие, егда мира отвергся, иноческое житие восприял еси, по непреложному обетованию Божию, тебе изреченному при пострижении: “Аще и мать забудет отроча, Аз не забуду тебе”; сего ради к лику иноков причтен быв, вопиял еси Богу: Аллилуиа. Икос 3 Имея в иночестем житии мудраго наставника блаженнаго Дионисия, преуспевал еси, преподобне, в подвизех и трудех, восходя от силы в силу, да совершен инок явишися. Мы же, воспевая подвиги и труды твоя, взываем ти сице: Радуйся, послушания добрый рачителю; Радуйся, на всякую службу Господа ради присно готовый. Радуйся, со уготовлением брашна братии ум свой возводивый к вечери Агнца, избранным уготованной; Радуйся, зрением огня в пещи возгревавый в себе память огня геенскаго. Радуйся, яко во измовении рук труждаяся, убелити душу твою, яко снег, поревновал еси; Радуйся, яко, измывая срачицы, облещися в хитон заслуг Христовых возлюбил еси. Радуйся, яко древа посекая, из сердца твоего вся нечистыя мысли и желания исторгал еси; Радуйся, яко зрением сухих древес, якоже притчею о смоковнице, плодоношению добрых дел поучался еси. Радуйся, во образ младенческаго незлобия и яко шлем упования куколь восприемый; Радуйся, во власяницу, яко в знамение умерщвления плоти, облекийся. Радуйся, аналав, яко броню необоримую, на рамена возложивый; Радуйся, яко спогребшийся Христу, милостию одеянный. Радуйся, Евфимие, скорый помощниче и преславный чудотворче! Кондак 4 Бури житейских волнений в тихом пристанищи обители иноческия избегл еси и росою воздержания угасил еси, преподобне, юношеский пламень страстей; огнем же страданий попаляя приражения мира прелестнаго, постом и молитвою душу твою светлее лучей солнечных просветил еси, вопия Богу: Аллилуиа. Икос 4 Слышав моление князя Суздальскаго, о еже даровати наставника и строителя обители во граде его, блаженный Дионисий тя яко предтечу предпосылая пред собою в страну, идеже предопредели ему Бог святительствовати, тебе, преподобне отче, ввери сие дело, и не хотящу ти удалитися от отца твоего; ты же, яко сын послушания, волю свою Господу покоривый, Егоже вся есть земля, последовал еси воли наставника; темже ублажая тя, взываем ти сице: Радуйся, яко Авраам, послушания ради Гласу Божию, отечество твое Нижний Новград, обитель и знаемых оставивый; Радуйся, Небеснаго Отечества ради в земнем отечествии странен явивыйся. Радуйся, спасению других послужити готовый; Радуйся, иноческаго братства добрый вождю. Радуйся, благословение отца своего духовнаго и молитву, яко копие острое, на поражение невидимых враг приемый; Радуйся, духом молитвы от него не отлучивыйся. Радуйся, обитель святаго Василия устроивый и тамо иноков собравый; Радуйся, при отшествии из обители сея путнический твой посох тамо на благословение оставивый. Радуйся, яко во граде Суздале благословения Божия во храме Пресвятыя Богородицы прежде всего искал еси; Радуйся, яко святителя Иоанна благоговейно почитал еси. Радуйся, яко от архиерея Божия молитвы и благословения на дело твое прежде всего испросил еси; Радуйся, во еже дело повеленное совершити усердно потрудивыйся. Радуйся, Евфимие, скорый помощниче и преславный чудотворче! Кондак 5 Боготечная звезда явился еси, преподобне, небо церковное украшая, град Суздаль светом своим осиявая и плавающия во мраке житейских попечений к тихому пристанищу иночества наставляя, да вопиют вси Богу: Аллилуиа. Икос 5 Видев со епископом и князем место благопотребно на горе, идеже храму Преображения Господня создатися, яко Петр на Фаворе мыслил еси: “Добро нам зде быти, и сотворим сени братии”, ведый яже глаголеши; темже со всеусердием трудился еси в созидании храма и жилищ иноком. Мы же, зряще совершение дела и столпостение обители, радостно взываем ти: Радуйся, здателю мудрый; Радуйся, домостроителю верный. Радуйся, яко мотыкою углубляяся в землю, духом твоим нисходил еси во глубину смирения; Радуйся, яко земная недра разрывая, возделовал еси в себе добродетели. Радуйся, при устроении храма Божия на земли, о храме вечнем на небеси выну помышлявый; Радуйся, в чаянии жизни вечныя устроивый гроб себе под кровом, идеже безкровная приносится жертва. Радуйся, своима рукама истесавый камни для гроба своего; Радуйся, выну память смертную имевый. Радуйся, постом, молитвою и слезами место обители освятивый; Радуйся, пусто место во благоплодный вертоград Христов преобразивый. Радуйся, при реце веселящей град, обитель иноков яко мост к небеси преводяй, устроивый; Радуйся, строителю обители, процветшия яко крин в стране Суздальстей. Радуйся, Евфимие, скорый помощниче и преславный чудотворче! Кондак 6 Проповедник богоносный быв, преподобне, истинному боговедению и благочестию поучал еси присно братию свою и вся люди земли Суздальския словом спасения, паче же образом жития своего наставляя на путь спасения, да вопиют вси Богу: Аллилуиа. Икос 6 Возсия благоверному князю святость жития твоего, отче Евфимие, егда узре Ангела Божия сослужаща ти и святителю Иоанну при Божественней литургии, якоже иногда спостнику и собеседнику твоему преподобному Сергию; мы же, тако прославивша тя Господа славяще, вопием ти: Радуйся, пастырю добрый вверенных тебе словесных агнцев; Радуйся, вождю добрый, сильный словом и делом. Радуйся, винограда Христова насадителю и хранителю; Радуйся, вертограда Господня благоискусный делателю. Радуйся, таин богоизбранный строителю; Радуйся, немощей братии врачу богомудрый и скорый целителю. Радуйся, свирель доброгласная, песньми духовными веселящая души человеков; Радуйся, псалтирь, славу Божию возвещающая. Радуйся, печальных утешение; Радуйся, обидимых заступление. Радуйся, Божия благодати струя неизсякающая; Радуйся, милостей Божиих присный ходатаю. Радуйся, Евфимие, скорый помощниче и преславный чудотворче! Кондак 7 Хотя добре упаствити вверенную ти от Бога паству, заповедал еси в храме и трапезе молчание, в келлии молитвенное пребывание, всякого мудрования отсечение, своих стяжаний отчуждение, чистоты и целомудрия хранение, и всех иноческих обетов верное соблюдение, да возможеши, представ Страшному Судищу Христову, рещи: “Се аз и дети, яже ми дал еси”, и воспети вкупе с ними: Аллилуиа. Икос 7 Новаго тя молитвенника, заступника и помощника в бедах стяжаша людие суздальстии: ты бо гладным питание, больным упокоение, должником искупление, утесняемым на суде заступление подавал еси; мы же сих ради благодарственная ти восписующе, взываем к тебе сице: Радуйся, любве Отца Небеснаго подражателю; Радуйся, братию твою любовию Христовою возлюбивый. Радуйся, ближним, якоже и Христу Самому, служивый; Радуйся, благословение Отца Небеснаго милостынею наследовати поревновавый. Радуйся, подвиги поста, молитвы и бдения любовию увенчавый; Радуйся, любовь — союз совершенства стяжавый. Радуйся, любве к ближнему основание в любви к Богу положивый; Радуйся, веру свою и любовь к Богу делы явивый. Радуйся, яко сын правыя веры и чистыя любве Богу усыновивыйся; Радуйся, Святыя Троицы благоуготованное селение явивыйся. Радуйся, в Бозе пребываяй; Радуйся, яко Бог в тебе пребывает. Радуйся, Евфимие, скорый помощниче и преславный чудотворче! Кондак 8 Странен и убог внешним видом являлся еси, преподобне, худыми ризами прикровен и милотию ветхою одеян, тоюжде в зное летнем и в хладе зимнем, внутрь же добродетельми преукрашен был и чистотою сиял еси, воспевая Богу: Аллилуиа. Икос 8 Вся страна Суздальская, светом твоих добрых дел и полезных учений осияваема, прославляше о тебе Отца Небеснаго и яко ангела земнаго и человека небеснаго тя почиташе. Темже и мы отонуду пети научихомся тебе таковая: Радуйся, всякия добродетели усердный делателю; Радуйся, смирения избранный сосуде. Радуйся, молитвою и слезами душу очистивый; Радуйся, постом и веригами железными плоть умертвивый. Радуйся, Царство Небесное нищетою духа наследивый; Радуйся, вечное веселие плачем исходатайствовавый. Радуйся, в наследие землю Небесную кротостию улучивый; Радуйся, яко за алчбу и жажду правды восприял еси насыщение благами вечными. Радуйся, яко милости ради от Бога помилован был еси; Радуйся, чистотою сердца зрети Бога сподобивыйся. Радуйся, яко миротворения ради, в сынех Божиих нарещися сподобился еси; Радуйся, яко терпением и злострадании мзду многую стяжал еси. Радуйся, Евфимие, скорый помощниче и преславный чудотворче! Кондак 9 Всякое духовное утешение почерпал еси, преподобне, от содружества с великим Сергием, словом спасения в беседах назидаяся, подвиги иноческия с ним разделяя и купно воспевая Богу: Аллилуиа. Икос 9 Витийствующий язык не может по достоянию восхвалити труды твоя, подвиги и всякую добродетель твою: от юности бо до маститыя старости неустанно Богу работал еси, труды ко трудом прилагая и восходя от силы в силу, да вообразится в тебе Христос, Егоже ради подвизался еси, Егоже возлюбил еси, Егоже вожделе душа твоя. Настави убо на путь Христовых заповедей и нас, взывающих к тебе сице: Радуйся, от младых ногтей до престарения всю жизнь твою Богу посвятивый; Радуйся, делая в вертограде Христове, тяготу и вар дне понесый. Радуйся, в жизни присно о смерти помышлявый; Радуйся, выну предстати Страшному Судищу Христову готовивыйся. Радуйся, умерый миру и плоти прежде успения своего; Радуйся, воскресый духом прежде преития в райская селения. Радуйся, подвигом добрым подвизавыйся; Радуйся, честне земное течение скончавый. Радуйся, рабе верный, в радость Господа своего вшедый; Радуйся, доблий воине Царя Небеснаго, венец славы вечныя приявый. Радуйся, яко Престолу Царя Славы предстоиши; Радуйся, яко Христу Царю молитвы о нас приносиши. Радуйся, Евфимие, скорый помощниче и преславный чудотворче! Кондак 10 Спасти хотя всех, твоего наставления требующих, грешных призывал еси к покаянию, болящим подавал еси исцеления молитвою твоею, братии имети любовь между собою заповедал еси, и в час смертный, всех благословляя и прощение коемуждо подавая, неотступен от обители твоея обещался еси пребыти духом твоим, егоже с миром предал еси Богу, вопия Ему: Аллилуиа. Икос 10 Стена был еси и ограждение и по преставлении обители твоей и добрых уставов иноческаго жития: небрегуща бо об обители архимандрита Евфимия огневицею поразил еси, келаря же Киприана, устава, даннаго тобою, несоблюдша, разслаблением вразумил еси; темже мы, прославляя тя, яко неусыпнаго стража обители, взываем ти таковая: Радуйся, яко паству твою, с нею живый, добре упасл еси; Радуйся, яко и по смерти благоустрояти ю не престаеши. Радуйся, устава добраго общежития насадителю; Радуйся, присный его охранителю. Радуйся, нерадящих строгий обличителю; Радуйся, кающимся скорое прощение подаваяй. Радуйся, пастырей умудрение; Радуйся, иноков научение. Радуйся, обещавый, яко не оскудеет обитель твоя; Радуйся, обетования сего исполнение исходатайствовавый. Радуйся, дерзновение к Богу получивый; Радуйся, присно о чадех твоих предстательствуяй. Радуйся, Евфимие, скорый помощниче и преславный чудотворче! Кондак 11 Пение всеумиленное приносим дивному во святых Богу, за еже мощи твоя, угодниче Божий, яко сосуд благодати полный и преизливаяйся, нам даровал есть: презрением бо тленнаго мира и плоти умерщвлением не токмо вечное блаженство духом, но и плоти нетление улучил еси, и истекшим сту летом пребывания в земле светел лицем и в ризах неистленных обретен был еси; сего ради вопием Богу: Аллилуиа. Икос 11 Светлосияющую свещу, сущим во тьме явленную, зрим раку святых мощей твоих, преподобне Евфимие; при ней бо мраком беснования одержимии просвещаются, изступленнии умом и разслабленнии телом здравы содеваются, огнь трясавицы угашается, и многая неисчетная чудеса совершаются, о нихже дивящеся, вопием ти: Радуйся, яко восходя на небо, мощи твоя святыя нам оставил еси; Радуйся, яко мощи твоя исцеляют всякия скорби и болезни. Радуйся, яко мощей твоих демони трепещут; Радуйся, яко твоя мощи комуждо в приключшихся печалех бывают утешение. Радуйся, яко вериги и жезл твой чудодействуют; Радуйся, источниче, струю обильную исцелений точащий. Радуйся, многообразных чудес подателю; Радуйся, по твоем отшествии от земли нас не оставляяй. Радуйся, из небесных сокровищ блага нам, на земли сущим, низпосылаяй; Радуйся, на земныя скорби и нужды наша призираяй. Радуйся, к молитвам скоро слух свой преклоняяй; Радуйся, на помощь быстро готовый. Радуйся, Евфимие, скорый помощниче и преславный чудотворче! Кондак 12 Благодать свыше приял еси, преподобне, заблуждающияся на путь истины обращати, грешников к покаянию призывати; не презри под кровом обители твоея требующих духовнаго врачевания и целения, всякое неправомыслие исправляя и всякий греховный недуг отгоняя, да вси едиными усты и чистым сердцем вопием Богу: Аллилуиа. Икос 12 Поюще многия твоя, преподобне Евфимие, подвиги и труды в жизни сей, ублажаем приснопамятное успение твое, торжествуем и о Божественней славе твоей в Небесном Царствии, и, припадающе к раце многоцелебных мощей твоих, со умилением взываем ти сице: Радуйся, мужу желаний, в телеси и душе Бога прославивый; Радуйся, в невечерний день Царствия Божия зрети сподобивыйся. Радуйся, в книгу животную вписанный; Радуйся, Горняго Иерусалима жителю. Радуйся, в раю сладости водою жизни напаяемый; Радуйся, плодами древа жизни насыщаемый. Радуйся, в свете Славы Божия и светильника Агнца обитаяй; Радуйся, Престолу Господа Вседержителя предстояй. Радуйся, в селения, отнюдуже отбеже всяка печаль и воздыхание, вселивыйся; Радуйся, в горней скинии Божией, на нейже почиет благословение, веселяйся. Радуйся, Вечери брака Агнча приобщивыйся; Радуйся, со всеми святыми во Царствии Небеснем ликовствуяй. Радуйся, Евфимие, скорый помощниче и преславный чудотворче! Кондак 13 О, преславный чудотворче, преподобне и богоносне отче Евфимие! Приими ныне сие усердное моление наше и умоли Милостиваго Бога, да дарует Церкви мир и тишину, царю крепость и долгоденствие, всем нам душевное спасение и от всех бед избавление, и твоим теплым ходатайством будущия изми муки нас, аще и недостойне, вопиющих Богу: Аллилуиа.[Се́й конда́к глаго́лется три́жды.][Далее повторяем 1‑е икос и кондак:]Икос 1 Ангельское житие иночествующих от юности возлюбил еси, преподобне Евфимие, и Богу Единому работати всем сердцем еще в отрочестве своем возревновал еси. Сего ради взываем ти: Радуйся, отроча кроткое и благопокорливое; Радуйся, родителей утешение. Радуйся, с любовию прилежавый книжному учению; Радуйся, ведению Господа и Его заповедей учитися возлюбивый. Радуйся, вся утехи детския презревый; Радуйся, Божественными токмо от юности веселяйся. Радуйся, селения Господа Сил паче всего возлюбивый; Радуйся, душею своею и скончаватися во дворех Господних возжелавый. Радуйся, в храме Божием, якоже пред Лицем Самого Господа, выну предстоявый; Радуйся, ум свой весь к Единому Богу устремивый. Радуйся, яко ничтоже земное в храме помышлял еси; Радуйся, со страхом и трепетом Богу предстоявый. Радуйся, Евфимие, скорый помощниче и преславный чудотворче! Кондак 1 Избранный по предуведению Божию угодниче Христов, преподобне отче Евфимие! Прославляюще Господа Славы, давшаго в тебе граду Суздалю и всей православней державе русской крепкаго заступника и молитвенника, и в бедах помощника и утешителя, похвальное восписуем ти пение; ты же твоими теплыми молитвами у Престола Святыя Троицы от всяких бед душевных и телесных вся ны избави, зовущия ти: Радуйся, Евфимие, скорый помощниче и преславный чудотворче! Молитва преподобному архимандриту Евфимию, Суздальскому чудотворцу Преподобне и преблаженне отче наш Евфимие, вонми нам, к тебе смиренно припадающим и твоего заступления тепле просящим. Веси немощи наша, веси грехи наша, но и усердие наше не утаися от тебе. Умоли Милостиваго Спасителя нашего, Господа Иисуса Христа, даровати нам оставление многих согрешений наших и утвердити нас на пути делания заповедей Его. Огради нас твоими молитвами от всех искушений и бед, отврати належащия нам скорби и напасти, даруй нам в здравии, мире, тишине и благоугождении Богу провождати дни жития нашего, испроси нам время на покаяние и ответ благоприятен на Страшнем Судищи Христове, да с тобою и со всеми избранными славим вечно Отца и Сына и Святаго Духа. Аминь.

Кондак 1 Избранный чудотворче и изрядный угодниче Христов, отче наш Германе преблаженне, пустыннаго жития на острове Соловецстем первоначальниче, восхваляем тя любовию; ты же, яко имея дерзновение ко Господу, от всяких нас бед и скорбей свобождай, да зовем ти: Радуйся, отче наш Германе, преподобных Зосимы и Савватия сподвижниче. Икос 1 Ангельски пожив, яко ангел безплотен на земли явился еси, преподобне отче наш Германе; ты бо евангельскаго гласа послушав, от юности иго Христово на рамо свое взем, в пустыню потекл еси, и, упование все на Бога возложив, Тому ревностно служити возжелал еси. Сего ради восхваляем тя сице: Радуйся, родителей твоих плоде благословенный; радуйся, Господа твоего благий рабе и верный. Радуйся, яко Христа единаго возлюбил еси; радуйся, яко многая лета на острове пустыннем Богу служил еси. Радуйся, иго Христово на себе вземый; радуйся, от Подвигоположника Христа дар исцелений приемый. Радуйся, яко красная мира сего нивочтоже вменил еси; радуйся, в бреннем телеси, яко безплотен, пожил еси. Радуйся, в страсе Божии издетска воспитанный; радуйся, на подвиги иночества от Господа призванный. Радуйся, места рождения твоего града Тотьмы похвало и утверждение; радуйся, обители Соловецкия славо и ограждение. Радуйся, отче наш Германе, преподобных Зосимы и Савватия сподвижниче. Кондак 2 Видя, яко надлежит человеку прилежно злая от юности его терпети, усердно потщался еси совлещися ветхаго человека, тлеющаго в похотех его, и облещися в новаго, по Богу созданнаго в преподобии и правде; темже слезами покаяния день и нощь душевную ниву твою орошал еси, терния грехов и страстей искореняя, Христу же поя: Аллилуиа. Икос 2 Разум просвещен свыше имея, провидел еси, отче Германе, будущая яко настоящая, и егда преподобный Зосима узре свет, осиявый место, на немже живяше, и церковь велию на воздусе, на востоце явльшуюся, тогда пророчески рекл еси ему, глаголя: «Не ужасайся и внимай себе, яко Господь чрез тя монахов множество соберет зде». Мы же, проречения твоего исполнение видяще и сему дивящеся, тако глаголем ти: Радуйся, душетленных сластей мира сего не познавый; радуйся, премудрости небесныя взыскавый. Радуйся, яко добре на земли подвизался еси; радуйся, яко козней демонских не убоялся еси. Радуйся, некнижным путь верный к небесем показавый; радуйся, в молитве и трудех непрестанно пребывавый. Радуйся, яко нерадивых молитвою твоею к покаянию воздвизаеши; радуйся, яко изнемогающих и унывающих силою благодати укрепляеши. Радуйся, вольную Христа ради нищету возлюбивый; радуйся, в нестяжании безпечальное житие проводивый. Радуйся, яко лучами добродетелей твоих иноков просвещаеши; радуйся, яко от всякия напасти их ограждаеши. Радуйся, отче наш Германе, преподобных Зосимы и Савватия сподвижниче. Кондак 3 Сила Вышняго укрепи тя, егда, приступая работати Господеви, по слову Писания, душу твою во искушение уготовал еси, постом, бдением и многими лишении в пустыни тело твое изнуряя, душу же молитвою непрестанною питая, во псалмех и пениих и песнех духовных воспевая сердцем и усты Богу: Аллилуиа. Икос 3 Имея ревность о спасении души своея, дом отчий и вся красная мира сего оставил еси, угодниче Христов, и мужественно в пустыню вселился еси, сподвижник и сотаинник преподобным Савватию и Зосиме был еси; темже и на небеси купно с ними мзду трудов своих обрел еси, идеже слышиши от нас похвалы сия: Радуйся, преподобных Савватия и Зосимы сожителю; радуйся, преподобных совершеннаго безмолвия любителю. Радуйся, яко тесный путь паче широкаго избрал еси; радуйся, яко непрестанною молитвою дары духовныя стяжал еси. Радуйся, святым древним отцем ревновавый; радуйся, всего себе на служение Богу предавый. Радуйся, яко демонския полки всеконечно погубил еси; радуйся, яко ангельския лики возвеселил еси. Радуйся, плоти угодия никогдаже творивый; радуйся, притекающим к тебе отец чадолюбивый. Радуйся, яко во плоти сый риз греховных до конца совлеклся еси; радуйся, яко образ Божий в себе благодатию Христовою возставил еси. Радуйся, отче наш Германе, преподобных Зосимы и Савватия сподвижниче. Кондак 4 Бурю уныния и напастей, от врага спасения подвижником благочестия наводимую, молитвою отгоняя и в непрестанных трудех пребывая, помощию Божиею достигл еси тихаго пристанища, покоя душевнаго, благодарне Благодетелю Богу взывая: Аллилуиа. Икос 4 Слышавше ревнителие равноангельнаго жития, яко на острове Соловецстем преподобнии oтцы Зосима и Герман обитель боголепнаго Спасова Преображения устрояют и ищущих спасения братолюбно приемлют, Божиим Духом движимии притекаху к има, просяще наставления и руководительства. Мы же, суетою омраченнии, тебе, яко общаго наставника, отче наш Германе, прославляем звании сими: Радуйся, плоть твою духови покоривый; радуйся, трудом, бдением и постом ю изнуривый. Радуйся, яко слез твоих струями ниву душевную напоил еси; радуйся, яко вся помыслы душепагубныя от себе удалил еси. Радуйся, стрелою любве Божественныя сердце твое уязвивый; радуйся, немощи немощных, яко сильный, на себе носивый. Радуйся, яко причастник всем боящимся Бога был еси; радуйся, яко до зела себе смирил еси. Радуйся, очи наша верою просвещаяй; радуйся, сердца наша надеждою спасения озаряяй. Радуйся, яко преподобному Зосиме в созидании обители послужил еси; радуйся, яко подвиги твоими братию всю удивил еси. Радуйся, отче наш Германе, преподобных Зосимы и Савватия сподвижниче. Кондак 5 Боготечная звезда явился еси, богоблаженне отче наш, преподобным Савватию и Зосиме, егда восхвалял еси пустынность острова Соловецкаго и провождал еси их, по морю плывя, на место святое сие, идеже в безмолвии труды ко трудом прилагая, плоды духовныя собирал еси, Богу же сердцем чистым взывал еси: Аллилуиа. Икос 5 Видя враг рода человеча, яко необитаемая доселе пустыня процветает, яко крин, и яко в ней имя Господне от пустынножителей прославляется, восхоте погубити святое дело Божие; напусти бо человека некоего с женою его и чады преселитися на остров. Ангели же Господни, биения давше жене, повелеша оставити остров, да будет сей в жилище токмо иноков. Сего ради, прославляюще Господа, тако благоизволившаго, глаголем ти: Радуйся, измлада иноческое житие избравый; радуйся, пустыннаго и безмолвнаго пребывания взыскавый. Радуйся, яко непрестанно себе внимал еси; радуйся, яко равноангельное жительство показал еси. Радуйся, в терпении мнозе потрудивыйся; радуйся, молитв забралом присно ограждавыйся. Радуйся, яко преподобным Зосиме и Савватию сподвижник и сотаинник был еси; радуйся, яко с ними в пристанище безстрастия достигл еси. Радуйся, яко злато в горниле искушенный; радуйся, светом Трисиянным озаренный. Радуйся, яко с небесе на вся ны милостивно призираеши; радуйся, яко вся прошения наша во благо исполняеши. Радуйся, отче наш Германе, преподобных Зосимы и Савватия сподвижниче. Кондак 6 Проповедник всем глагол ангельских был еси, преблаженне отче, егда, по совершении с преподобным Савватием воскреснаго нощнаго молитвословия изшед из храмины, внезапу услышал еси глас жены плачущия и, узрев ю, вопросил еси о причине плача. Она же рече: «Два юноши светли жестоко биша мя и рекоша ми: бежите отсюду, ибо не для вас место сие, яко зде иноков множество прославит Господа». Ты же, слышав сие, умиленне Богу возгласил еси: Аллилуиа. Икос 6 Возсия свет велий от обители Соловецстей, осияваяй всю страну нашу, ибо лучами добродетелей твоих просвещаеши не токмо притекающих к цельбоносным мощем твоим, но и издалече верою призывающих тя. Озари убо светом Евангелия омраченная грехом сердца наша и укрепи нас во благочестии, да вси радостно взываем ти: Радуйся, пустыни красное прозябение; радуйся, постников предивное украшение. Радуйся, яко в бодреннем трезвении пребывал еси; радуйся, яко мзду трудов твоих на небеси восприял еси. Радуйся, ангелов собеседниче; радуйся, Царствия Христова наследниче. Радуйся, яко благодать от Бога обрел еси; радуйся, яко иерею благоговейному образ твой во сне списати повелел еси. Радуйся, безмездный недугов целителю; радуйся, благодатный бесов прогонителю. Радуйся, яко с преподобными Зосимою и Савватием ревностно трудился еси; радуйся, яко с ними наставник добр монахом явился еси. Радуйся, отче наш Германе, преподобных Зосимы и Савватия сподвижниче. Кондак 7 Хотя всем человеком спастися и в разум истины приити, Человеколюбец Господь указа ти место удобно спасения, идеже ты многими поты и скорбьми, злострадании и лишении неленостне Богу работал еси, выну вопия Ему: Аллилуиа. Икос 7 Новаго Моисеа, древнему подобна, видим тя, богоизбранне отче наш, ибо в пустыни земнаго странствия нашего всех, к помощи твоей прибегающих, к Иерусалиму горнему наставляеши, фараона мысленнаго потопляя и всех молением твоим ограждая, вопиющих ти таковая: Радуйся, молитвенниче наш неусыпный; радуйся, предстателю о нас непостыдный. Радуйся, яко скорби пустыннаго жития доблественне претерпел еси; радуйся, яко постом и молитвою, аки крилами, на высоту добродетелей возшел еси. Радуйся, чистотою душевною и телесною Бога прославивый; радуйся, нравы твоими вся ны наставивый. Радуйся, яко в небесных чертозех вселился еси; радуйся, яко оных обителей и нам пред Богом ходатай явился еси. Радуйся, бед и напастей нас свобождаяй; радуйся, всем благая от Спаса Христа подаваяй. Радуйся, яко непрестанно духом горел еси; радуйся, яко со всеми человецы мир имел еси. Радуйся, отче наш Германе, преподобных Зосимы и Савватия сподвижниче. Кондак 8 Странно убо видети, како ты, богоблаженне отче, старостию притружденный, за послушание настоятелю и братии по морю многажды плавал еси, о нуждах новосозидаемыя обители и об утешении братии попечение имея, отнюд покоя себе не дая и среди опасностей потопления живот твой Богови вверяя и сердцем взывая Ему: Аллилуиа. Икос 8 Весь ум твой в небесная вперив, горняя мудрствовал еси, а не земная, преподобне отче наш, вышних ища, идеже есть Христос одесную Бога седя, идеже празднующих глас непрестанный, идеже радость праведных несказанная. Тамо убо со всеми святыми водворяяся, слышиши от нас ублажения сии: Радуйся, очесы веры на Христа присно взиравый; радуйся, в злостраданиих николиже роптавый. Радуйся, яко на ладии многажды по морю плыл еси; радуйся, яко сие за послушание настоятелю и братии творил еси. Радуйся, морских волнений и напастей не страшивыйся; радуйся, благому Промыслу Божию всецело покоривыйся. Радуйся, яко смирением и послушанием Богу угодил еси; радуйся, яко козни вражия до конца сокрушил еси. Радуйся, в бурю пловцем подаваяй спасение; радуйся, дивное им в бедах поможение. Радуйся, яко душу твою по братии полагал еси; радуйся, яко имя Господне непрестанно призывал еси. Радуйся, отче наш Германе, преподобных Зосимы и Савватия сподвижниче. Кондак 9 Всякое плотское мудрование мужественне отринув, вдал еси себе в совершенное послушание настоятелю и братии, памятуя слово наставления святоотеческаго, яко послушание паче поста и молитвы есть, и тако достигл еси в мужа совершенна, в меру возраста Христова, Богу поя: Аллилуиа. Икос 9 Витии премудрии не возмогут достойно восхвалити труды и подвиги твоя, ибо всего себе от юности в жертву Господеви возложив, даже до старости многолетныя распинал еси плоть со страстьми и похотьми, да очистиши сердце твое и да будеши храм Животворящаго Духа Святаго. Сподоби и нас, святче Божий, тебе усердно подражати и сице тебе возглашати: Радуйся, в пустынных дебрех и горах привитавый; радуйся, постом и молитвою в напастех себе ограждавый. Радуйся, яко чести и славы мирския избегал еси; радуйся, яко во смирение аки в порфиру Царствия Небеснаго облеклся еси. Радуйся, благодати сосуде избранный; радуйся, любве, соуза совершенства, кладенец преизливанный. Радуйся, яко игу Христову выю твою подклонил еси; радуйся, яко по трудех дневных нощи в молитве проводил еси. Радуйся, вся обеты иноческия свято соблюдавый; радуйся, прельщениям лукаваго никакоже внимавый. Радуйся, яко от всякаго зла себе хранил еси; радуйся, яко полчища бесов посрамил еси. Радуйся, отче наш Германе, преподобных Зосимы и Савватия сподвижниче. Кондак 10 Спасти хотя душу твою, нозе твои на камени веры поставил еси и, светильник слова Божия вжег, в законе Господни ходил еси, помышляя, яко странник и пришлец еси на земли, и яко жительство Твое на небеси есть. Сего ради ко всем заповедем Господним направлялся еси, всяк путь неправды возненавидев, во еже непрестанно воспевати Христу Богу ангельскую песнь: Аллилуиа. Икос 10 Стена еси и крепкое заступление обители твоея и всем верно молящимся тебе, ибо небесе и земли Творец, видя богоугодное житие твое, облагодати тя, да будеши печальным утешение, скорбящим радование, недугующим врач и целитель, кающимся надежда прощения и всем во всяких нуждах помощник, да вси ублажают тя сице: Радуйся, образе кротости и смирения; радуйся, теплый ходатаю нам спасения. Радуйся, яко ревнующих о спасении под кровом своим соблюдаеши; радуйся, яко трудников и богомольцев обители твоея с небеси благословляеши. Радуйся, обидимых благонадежное и скорое защищение; радуйся, в скорбех и печалех нам всем утешение. Радуйся, яко всем, притекающим к тебе, в нуждах помогаеши; радуйся, яко за вся православныя христианы молитвы Богу возсылаеши. Радуйся, на свещнице Христовой поставленный; радуйся, на земли дивно от Бога прославленный. Радуйся, яко гнев Божий от нас грешных отвращаеши; радуйся, яко любовию чтущих святую память твою благодатно посещаеши. Радуйся, отче наш Германе, преподобных Зосимы и Савватия сподвижниче. Кондак 11 Пение надгробное со слезами смешанное принесл еси, всеблаженне отче, егда, возвратився в обитель, уведел еси о преставлении сподвижника твоего преподобнаго Савватия, егоже зело, яко брата, любил еси. Егда же Господь посла тебе новаго сподвижника твоего, преподобнаго Зосиму, тогда радости исполнився, благодарно Богу возгласил еси: Аллилуиа. Икос 11 Светозарное светило показался еси, отче наш, Германе, в нощи греховней блуждающим, души наша светом богопознания просвещая и по пути заповедей Христовых ходити наставляя. Сего ради к тебе усердно притекаем и тако тя восхваляем: Радуйся, целомудрия изрядный ревнителю; радуйся, чистоты усердный блюстителю. Радуйся, яко надежду небеснаго наследия в себе имел еси; радуйся, яко жития преподобных Зосимы и Савватия списати повелел еси. Радуйся, вся заветы преподобнаго Зосимы свято хранивый; радуйся, ни един же от них преступивый. Радуйся, яко о смертнем часе непрестанно помышлял еси; радуйся, яко ко исходу от жития сего себе присно уготовлял еси. Радуйся, по Бозе упование твое на Матерь Божию возлагавый; радуйся, Богородицу яко Матерь Света выну в песнех величавый. Радуйся, яко преподобнаго Зосиму ко гробу проводил еси; радуйся, яко тело его многотрудное слезами теплыми оросил еси. Радуйся, отче наш Германе, преподобных Зосимы и Савватия сподвижниче. Кондак 12 Благодать, свыше ти дарованную, подаждь нам, досточудне отче наш, яко да и мы, подражающе вере и благочестию твоему, принесем Спасителю нашему дары духовныя: покаяние теплое, молитвы усердныя, братолюбие нелицемерное со всеми добродетельми и сподобимся купно с тобою взывати Богу: Аллилуиа. Икос 12 Поюще твоя чудеса, богоносне отче наш, восхваляем подвиги твоя, ублажаем и кончину твою, ибо, на смертнем одре возлежа и исход свой провидя, возжелал еси исповедатися и Святых Христовых Таин причаститися. Сподоби убо и нас христианския кончины живота нашего и добраго ответа на Страшнем судищи Христове, да зовем ти: Радуйся, в монастыри преподобнаго Антония Римлянина богоугодное житие твое скончавый; радуйся, в Новограде на послушании умиленный дух твой Богу предавый. Радуйся, яко и по смерти чудесы твоими сияеши; радуйся, яко духи нечистыя от человек прогоняеши. Радуйся, от обители земныя во обители небесныя преселивыйся; радуйся, тамо со всеми святыми в вечней славе водворивыйся. Радуйся, яко мощи твоя на месте трудов твоих почивают; радуйся, яко тыя мощи исцеления верующим источают. Радуйся, духом воскресый прежде общаго воскресения; радуйся, и нашим душам указуяй путь обновления. Радуйся, яко монахов множество наставника тя почитают; радуйся, яко православных собор присно тя ублажает. Радуйся, отче наш Германе, преподобных Зосимы и Савватия сподвижниче. Кондак 13 О преподобне и преблаженне отче наш Германе, приими ныне малое сие моление наше, от души в похвалу тебе приносимое, и твоим многомощным предстательством умоли Господа нашего Иисуса Христа, да пробавит милость Свою нам грешным и подаст нам во временнем житии нашем вся благая и потребная яже к животу и благочестию, да и мы с тобою и всеми святыми выну Ему вопием: Аллилуиа.[Се́й конда́к глаго́лется три́жды.][Далее повторяем 1‑е икос и кондак:]Икос 1 Ангельски пожив, яко ангел безплотен на земли явился еси, преподобне отче наш Германе; ты бо евангельскаго гласа послушав, от юности иго Христово на рамо свое взем, в пустыню потекл еси, и, упование все на Бога возложив, Тому ревностно служити возжелал еси. Сего ради восхваляем тя сице: Радуйся, родителей твоих плоде благословенный; радуйся, Господа твоего благий рабе и верный. Радуйся, яко Христа единаго возлюбил еси; радуйся, яко многая лета на острове пустыннем Богу служил еси. Радуйся, иго Христово на себе вземый; радуйся, от Подвигоположника Христа дар исцелений приемый. Радуйся, яко красная мира сего нивочтоже вменил еси; радуйся, в бреннем телеси, яко безплотен, пожил еси. Радуйся, в страсе Божии издетска воспитанный; радуйся, на подвиги иночества от Господа призванный. Радуйся, места рождения твоего града Тотьмы похвало и утверждение; радуйся, обители Соловецкия славо и ограждение. Радуйся, отче наш Германе, преподобных Зосимы и Савватия сподвижниче. Кондак 1 Избранный чудотворче и изрядный угодниче Христов, отче наш Германе преблаженне, пустыннаго жития на острове Соловецстем первоначальниче, восхваляем тя любовию; ты же, яко имея дерзновение ко Господу, от всяких нас бед и скорбей свобождай, да зовем ти: Радуйся, отче наш Германе, преподобных Зосимы и Савватия сподвижниче. Молитва 1-я О великий угодниче Христов, земный ангеле и небесный человече, преблаженне отче наш Германе, преподобных Зосимы и Савватия сподвижниче, Соловецкий чудотворче и пустынножителю, обстояще честную раку цельбоносных мощей твоих, мысленными очесы зрим тя с нами суща и мольбам нашим внемлюща. Сего ради, с верою и любовию припадающе к тебе, молим тя: призри с небесе святаго на нас грешных, слабых духом и немощных телом и умилосердися, помози нам твоим многомощным ходатайством ко Творцу и Спасителю нашему. Ты веси, яко, подобно реце многоводней, разливаются по земли нашей безбожие, неверие, зловерие, ереси, расколы, распри, раздоры, разделения, и увы нам. Среди именующихся именем Христовым хулится имя Божие, раздирается Церковь — Тело Христово, попираются Евангелие и закон Христов. Ты зриши оскудение велие любве многих и умножение беззаконий, ихже ради грядет гнев Божий на нас грешных. К кому прибегнем, отче наш? К кому возопиим? Кто предстанет и защитит нас? На тя упование наше возлагаем, предивный угодниче Христов. Испроси нам у Господа грехов наших прощение и отврати от нас весь гнев Его, праведно движимый на ны. Утверди веру правую в сердцах наших, защити Церковь святую, духом грядущаго в мир противника Христова обуреваемую. Даруй нам любовь к Богу и друг ко другу, мир и единомыслие, утоли вся раздоры и нестроения наша, да не до конца погибнем. Буди стена крепка и заступление обители твоей, в еяже созидании много потрудился еси. Буди отец и наставник и покровитель иноком, ихже с преподобными Зосимою и Савватием мудре собрал еси на месте трудов ваших. Помози им подвигом добрым подвизатися, веру нераздельну соблюсти, главы невидимых змиев сокрушити, победителем греха явитися и житием своим прославити превелие имя Святыя Троицы. Не забуди и нас, любовию чтущих святую память твою и к тебе, яко отцу чадолюбивому, притекающих. Помогай и нам, отче наш милостивый, в душевных и телесных нуждах наших, подавай нам вся благая и потребная в жизни временней, да ревностно поработаем Господу Богу прочее время живота нашего, и понесем на себе иго Его благое и легкое Его бремя, и, тако достигше благодатию Христовою Небеснаго Царствия, сподобимся с тобою и со всеми святыми славити и воспевати пречестное и великолепое имя Отца и Сына и Святаго Духа ныне и присно, и во веки веков. Аминь. Молитва 2-я О преподобне и Богоносне отче наш Германе, безмолвнаго иноческаго жития во острове Соловецстем первоначальниче! Молим тя мы, недостойнии, прибегающе к молитвам твоим, имиже купно с молением преподобных отец наших Зосимы и Савватия освящается и прославляется богоизбранное место сие. Буди, с сими угодники Божиими и прочими Соловецкими чудотворцы и всея Российския земли Небесными предстатели, молитвенник и ходатай о нас, грешных, пред Престолом Вседержителя Бога, Емуже в дерзновении предстоиши со Ангелы и всеми святыми, да дарует нам, яко Благий и Человеколюбивый, вся потребная к животу и благочестию, душам и телесем нашим здравие, во всех благих преспеяние и Свою всесильную помощь во всяких искушениих, бедах же и напастех, воздвизаемых на ны от враг спасения нашего; обители твоей моли избавится от всякаго злаго обстояния и приходящим в ню ближним и дальним получити вся просимая ко душевней и телесней пользе. Наипаче же испроси, угодниче Христов, всем нам грехов отпущение, христианскую кончину жития и наследие Царства Небеснаго у Христа Бога нашего, Емуже честь и слава, со Отцем и Святым Духом, ныне, и присно, и во веки веков. Аминь.

Кондак 1 Избранный угодниче Христов и предивный чудотворче, мудрый монахов наставниче и храмов Божиих строителю н украсителю, преподобне отче наш Гаврииле, се ныне припадающе к раце честных мощей твоих, яко избавльшеся от злых молебная пения восписуем ти, недостойнии. Ты же яко имеяй благодать молитися за ны, от всяких нас бед и обстояний свободи, да зовем ти: радуйся, преподобне отче Гаврииле, теплый о нас молитвенниче и преславный чудотворче. Икос 1 Ангели Божии возрадовашася на небеси о пречудном рождении твоем, преподобне Гаврииле, прозирающе, яко избран сосуд Божественныя благодати явишися и будеши добр слуга Домовладыки, исполняя во всем волю Его святую. От юности бо навыкл еси в Боге ходити, и страх Его выну в сердце имети, сего ради чествуем тя сими похвалы: Радуйся, прозябение от корене живоноснаго — Христа Господа. Радуйся, святое стеблие, произрастшее из маслины светло-плодовитыя — Церкве Христовы. Радуйся, семя благое, в ниву удобренную всеянное. Pадуйся, зерно, сторичный плод принесшее. Радуйся, мал злак, возрастший в древо великое. Радуйся, от утробы матерния очищенный и освященный. Радуйся, благочестивых родителей отрасль пречестная. Радуйся, чадо обетованное, в дар Богу принесенное. Радуйся, преподобне отче Гаврииле, теплый о нас молитвенниче и преславный чудотворче. Кондак 2 Видяще родителие и сродницы отрочате нрав его кроток н богобоязнен, чужд мирскаго мятежа и радостей земных, зело дивляхуся н глаголаху в себе: что убо чадо сие будет? Измлада бо Христа возлюбил еси, нося образ Его в сердце твоем и моляся Ему прилежно: Аллилуиа. Икос 2 Разум недоразумеваемый разумети ищущи, како душу свою спасти возмогл бы еси и Богу угодити, уясни светлый отрок, яко в мире обретающимся сие мало возможно, дружба бо с миром вражда есть противу Бога, а иже Христовы суть, плоть распяша со страстьми и похотьми. Мы же, дивящеся толикому к Богу стремлению твоему, вопием сицевая: Радуйся, еще от юности твоея борющия душу страсти отринул еси. Радуйся, заступления Спасителева взыскал еси. Радуйся, ненавидящия Сиона бесы вселукавыя посрамил еси. Радуйся, изсохше яко трава в тебе злая похотения и вожделения плоти. Радуйся, Святым Духом благодатне оживился еси. Радуйся, чистотою душевною и телесною к Богу возвысился еси. Радуйся, священнотайне просветился еси Тройческим единством. Радуйся, славу Отцу и Сыну и Духу Животворящему всеблаголепно воздал еси. Радуйся, преподобне отче Гаврииле, теплый о нас молитвенниче и преславный чудотворче. Кондак 3 Сила Вышняго храняще тя, преподобне, егда родителие твоя преселишася в вечность, и тя, единаго сына своего, сира оставиша. Обаче в Бозе, Заступнике сирых, Отца всещедра обрел еси, и Церковь Христова быша ти Матерь вселюбезная, под Их же благодатным покровом сыновне пожил еси, воспевая непрестанно: Аллилуиа. Икос 3 Имуще богоприятное желание по исцелении от тяжкаго недуга обет паломничества совершити, притекл еси на поклонение во святую лавру Киево-Печерскую, идеже со благоговением честныя мощи преподобных подвижников лобызающе, возгорелся еси желанием иноческаго жития, преблаженне Гаврииле, егоже достойное исполнение зряще, зовем ти таковая: радуйся, равноангельнаго подвига возжелевый. Радуйся, в жертву благоприятную всего себе Богу принесый. Радуйся, благое иго и легкое бремя монашескаго звания приявый. Радуйся, крест отречения от пожеланий и похотений плоти на рамена подъявый. Радуйся, страсти, ради Господа, умертвивый. Радуйся, начатки мыслей и чувств душевных Богу посвятивый. Радуйся, яко добрый воин служити Господеви обещавыйся. Радуйся, Благодать Святаго Духа стяжавый, и многих окрест себе спасый. Радуйся, преподобне отче Гаврииле, теплый о нас молитвенниче и преславный чудотворче. Кондак 4 Бурю искушений воздвиже на тя боритель всезлобный, егда в число насельников Феофановой пустыни поступил еси, и во всецелое послушание многоопытному старцу Вонифатию вдал еси себе, преподобне Гаврииле. Обаче предстательством и молитвами аввы твоего сетей вражиих избавлен был еси, и в ратовании твоем на диавола укрепился еси, взывая ко Господу: Аллилуиа. Икос 4 Слышаще и видяще отцы лаврския прилежание твое, блаженне, неуклонное в храм хождение и к трудам монастырским усердное тщание, благоволиша послати тя ко Гробу Господню, да узриши благая Иерусалима и послет ти Господь благословение от Сиона. Посем же и на святый Афон сподобился еси паломничество совершити, и всеблагодатным святыням вертограда Божия Матере поклонение воздати. Темже с радостию зовем ти: радуйся, яко елень на источники водныя, к Богу трепетно стремился еси. Радуйся, во отеческих наставлениих старцев богомудрых пути спасительному поучался еси. Радуйся, горняго Сиона обетование приемый. Радуйся, небеснаго Иерусалима улучити сподобивый. Радуйся, яко от Живоноснаго Гроба Своего Господь светом неприступным освети тя. Радуйся, от Голгофскаго Креста силою всемогущею осени тя. Радуйся, в дом Богородицы, богоспасаемый Афон всерадостно вшедый. Радуйся, Покров Заступницы всех монашествующих обретый. Радуйся, преподобне отче Гаврииле, теплый о нас молитвенниче и преславный чудотворче. Кондак 5 Боготечная звезда святая гора Афонская честным инокам явися, в ней бо сонмы добровольных мучеников Творцу веков денно н нощно служаху отринувше вся благая и красная мира и спогребшеся Христу. Сие истинно богоугодное житие афонских монахов видяще, возгорелся еси духом, преподобне Гаврииле, и в сем земном Эдеме водворитися восхотел еси, да взирая на подвиги святогорцев, научишися в трезвении и хранении сердца умную песнь приносити Богу: Аллилуиа. Икос 5 Видевше тя настоятель Афонскаго Свято-ильинскаго скита старец Паисий аки овцу кроткую, ко стаду богоспасаемому грядущую, искусу подверже, да возможет испытати, почто пришел еси к дружине сей. Обрет же тя добродетелей вместилище и чистоты целомудренныя жилище, водвори в скитское братство и послушанию монастырскому прилучи. Мы же с любовию вопием ти: Радуйся, нищету духа и телесе возлюбивый. Радуйся, воздержание чудное явивый. Радуйся, боголепнаго самоуничижения н самоукорения взыскавый. Радуйся, невозмущаемое безмолвие стяжавый. Радуйся, чувств простую пятерицу богомыслием просветивый. Радуйся, всего себе страху Божию пригвоздивый. Радуйся, селение Духа, а не ктому селение греха себе показавый. Радуйся, входом покаяния всякаго злодея, всяку страсть от сердца твоего отгнавый. Радуйся, преподобне отче Гаврииле, теплый о нас молитвенниче и преславный чудотворче. Кондак 6 Проповедует гора Афонская подвиги и труды твоя, достоблаженне отче, приим бо пострижение монашеское с именем небеснаго благовестника Архистратига Гавриила, и сам яко бесплотен и невеществен явился еси, силою Божиею попаляя греховное терние и возращая цветы пречудных добродетелей, да очистив чувствия сподобишися узрети Господа, вознося пение умиленное: Аллилуиа. Икос 6 Возсиял еси в душе твоей, преподобне, cвeт присносущный Спаса Господа, просвещающий всякого человека, грядущаго узким и тесным путем равноангельнаго подвига. Достигшу же ти зрелости духовныя, облагодатствова тя Пастыреначальник Христос велиею честию священства, да не токмо о себе молишися, но и священнодействуеши за люди, принося Богу жертву хвалы и благодарения. Мы же, видяще непорочное служение твое у престола Божия, сицевая тебе воздаем: Радуйся, Божественнаго Царя рабе благий и верный. Радуйся, Архиерея Вечнаго служителю усердный. Радуйся, возшедый в радость Господа своего. Радуйся, яко в малом вернаго над многим Домовладыка тя постави. Радуйся, сосуде честный, освященный и Богу благопотребный. Радуйся, делателю неукоризненный, право правящий слово истины. Радуйся, пастырю священнейший, добре служение твое совершавый. Радуйся, о хранении веры православныя непрестанное рачение имевый. Радуйся, преподобне отче Гаврииле, теплый о нас молитвенниче и преславный чудотворче. Кондак 7 Хотя братии послужити, блаженне отче, послушание эконома монастырскаго корабля “Святый пророк Илия” приял еси, доставляя по морю в скит вся ко пропитанию потребная. Бысть же корабль сей яко ковчег спасительный, по бурным волнам безбедно преплавающий, монаси бо в нем мореплаватели быша, и в палубнем храме уставныя богослужения неустанно совершахуся. Мы же тя, мудраго кормчаго корабля сего яко новаго Ноя почитающе, молитвенно взываем к Богу: Аллилуиа. Икос 7 Дивнаго тя монахов наставника показа Всевышний Господь, егда жезл настоятельский вручи тебе, да добре упасеши стадо свое, возводя к пажити спасительней и окормляя от злака душеполезных поучений. Братия же, послушающе гласа твоего и во всем безпрекословное послушание творяще, вопияху ти, отцу своему: Радуйся, авво богомудрый и святый. Радуйся, пастырю прозорливый и духоносный. Радуйся, греховных язв искусный врачевателю. Радуйся, в скорбех и напастех кроткий утешителю. Радуйся, иноческаго устава строгий блюстителю. Радуйся, монашеских обетов неленостный исполнителю. Радуйся, преподобным Петру и Афанасию Афонским всеусердный подражателю. Радуйся, святыя горы Афонския украшение. Радуйся, преподобне отче Гаврииле, теплый о нас молитвенниче и преславный чудотворче. Кондак 8 Странник явился еси в мире сем греховнем, святе Гаврииле, не имея зде пребывающаго града, но грядущего взыскуя, и не ко временному и скоропреходящему, но к нескончаемому и небесному душею прилепляяся, да получиши венец неувядаемый от Мздовоздаятеля Бога, в молитве поя Ему: Аллилуиа. Икос 8 Весь пребывал еси к Бозе, отче досточудне, слезами омыв и покаянием просветив одеяние души своея. Темже в чертог преукрашенный Спаса Вседержителя безпрепятственно вшел еси, да вси, призвание твое славяще, вопиют ти: Радуйся, постничеством и воздержанием просиявый. Радуйся, плач немолчный стяжавый. Радуйся, светильник свой елеем благих деяний просветивый. Радуйся, хранение устом и дверь ограждения о устнах своих положивый. Радуйся, дух праздности, уныния, любоначалия и празднословия далече от себе отгнавый. Радуйся, дух же целомудрия, смиренномудрия, терпения и любве стяжавый. Радуйся, от Господа и Владыки живота дар зрения своих прегрешений и неосуждения ближняго получивый. Радуйся, образ истиннаго покаяния житием твоим явивый. Радуйся, преподобне отче Гаврииле, теплый о нас молитвенниче и преславный чудотворче. Кондак 9 Всего себе Сладчайшему Иисусу повинул еси, пребогате, отринув работныя страсти, да единому Богу точию поработаеши неленостно, и стяжеши внутрь себе мир пресветлый и невозмущаемый, еже есть венец иноческаго делания. Егда же человеконенавистник диавол искушение тяжкое наведе на скит, немирствие и вражду всевая, истинный миротворец показался еси, исторгнув яко плевелы семена вражия, и подвизая братию, избавльшуюся от брани лукаваго, воспевати Христу: Аллилуиа. Икос 9 Ветии многовещаннии не возмогут изрещи великаго твоего о святынях Афона попечения, преподобне Гаврииле, ходатайствовал бо пред священноначалием, да благословение подаст на сбор благих даяний по всей земле Российстей. Получив же оное, изшел еси во отечество твое с чудотворною иконою Божией Матери Млекопитательницы, частицею Животворящего Креста Господня и мощами апостола Андрея Первозваннаго. Мы же, зряще ревность твою о Бозе, взываем ти: Радуйся, грады и веси державы нашея со святынями Афонскими обтекл еси. Радуйся, яко вси людие православнии благоговейно их повсюду сретаху. Радуйся, достойное поклонение и чествование им воздаяху. Радуйся, доброхотныя пожертвования на святую Гору щедро приношаху. Радуйся, велие вспомоществование на обители святогорския посылаху. Радуйся, многоценною утварию и святыми иконами храмы Афонския украшаху. Радуйся, воздаяние за сие дело благостыни от Бога примаху. Радуйся, яко вся гора Афонская о таковем твоем благодеянии Бога славословяше неустанно. Радуйся, преподобне отче Гаврииле, теплый о нас молитвенниче и преславный чудотворче. Кондак 10 Спасти хотя душу, плоть твою духови покорил еси воистину, отче наш Гаврииле, бдяще бодрственно, да усовершится в тебе сокровенный сердца человек в нетленной красоте кроткаго и молчаливаго духа, еже есть драгоценно пред Богом, и да возможеши пение умное Вседержителю приносити: Аллилуиа. Икос 10 Стена еси похваляющим, преблаженне, неизглаголанныя труды твоя, не токмо бо храм души твоея созидал еси, но и многия рукотворенныя храмы на Афоне и в державе нашей воздвигл еси, благолепно сия украсивши. Мы же, дивящеся Давидовой и Соломоновой о дому Божии ревности твоей, воссылаем ти хвалы сицевыя: Радуйся, блаженный храмоздателю, Бога прославивый. Радуйся, мужу благоразумну, иже не на песце, а на камени твердом храмину созда, уподобивыйся. Радуйся, Господа выну в помощь призывая, не всуе зиждяй трудился еси. Радуйся, не давый себе покоя, дондеже новый велелепный собор в скиту святаго пророка Илии заложил еси. Радуйся, подвория скитския в земле гречестей и в стране нашей основал еси. Радуйся, во граде Одессе предивный храм во имя иконы Божией Матери “Млекопитательницы” возвел еси. Радуйся, чудотворными иконами, с Афона принесенными, преискусно его украсил еси. Радуйся, тем граду нашему благословение богоспасаемыя Горы подал еси. Радуйся, преподобне отче Гаврииле, теплый о нас молитвенниче и преславный чудотворче. Кондак 11 Пение Пресвятей Троице паче иных принесл еси, преподобне Гаврииле, многим бо испытанием веру крепку, любовь нелицемерну и надежду непостыдну показав, течение достойно совершил еси, и к Трисиянному Свету безболезненно, непостыдно и мирно изшел еси, да тамо, идеже вси святии пребывают, зриши славу Божию, моление принося: Аллилуиа. Икос 11 Светозарную лучу во мраце грехов сущим зрим чудотворныя мощи твоя, имиже благоволил еси пребывати во граде Одессе и в храме, егоже создал еси, преподобне отче Гаврииле. Граду бо нашему и храму сему святому по неизреченней милости Своей Господь велелепное сокровище тя дарова, да молишися за люди, с любовию тя почитающия и умильно взывающия: Радуйся, токи чудес от цельбоносныя раки твоея неоскудно изливаеши. Радуйся, помощь благодатную от честных мощей изобильно источаеши. Радуйся, врачевство от язв и болезней милостивно подаеши. Радуйся, духов злобы дерзновенно прогоняеши. Радуйся, прозрение душевных и телесных очес даруеши. Радуйся, умирение чувств ниспосылаеши. Радуйся, от грозных стихий и лютых бедствий град и страну нашу защищаеши. Радуйся, чудесными сими явлениями веру православную укрепляеши. Радуйся, преподобне отче Гаврииле, теплый о нас молитвенниче и преславный чудотворче. Кондак 12 Благодать и милость излияся от тебе, преподобне отче Гаврииле, людие бо православнии с радостию прихождаху к раце мощей твоих, и с любовию их лобызающе, славяху о тебе Бога, дивнаго во святых Своих, всем сердцем вопиюще: Аллилуиа. Икос 12 Поюще неизглаголанная и дивная чудотворения от мощей твоих, преподобне отче наш Гаврииле, исповедуем твоя великия постничества и бдения подвиги, проповедуем покаяния труды, воспеваем мудрое пастырское братии водительство, похваляем ко святыням прилежание и о возведении храмов Божиих усердное тщание. Образ бо ангелоподобнаго жития нам подаеши, и на немолчное песнословие Бога, толико тя прославльшаго, подвизаеши. Всего же величествия деяний твоих изрещи не могуще, малую мзду хвалебную воздаем ти сицевую: Радуйся, всегубителя диавола посрамил еси. Радуйся, мытарства воздушныя безбедно прошел еси. Радуйся, к Богу, к Нему же все помыслы и желания имевый, вознеслся еси. Радуйся, во обители Небесныя, идеже Сам Христос пребывает, преселился еси. Радуйся, в раи сладости приснотекущия водворился еси. Радуйся, благодать предстояния у престола Владычня обрел еси. Радуйся, о тя призывающих и память твою чтущих молитися николиже престал еси. Радуйся, светом чудес твоих всю землю нашу исполнил еси. Радуйся, преподобне отче Гаврииле, теплый о нас молитвенниче и преславный чудотворче. Кондак 13 О пречудный и преблаженный отче, чудотворче святый Гаврииле! Приими малое сие моление, всеумиленно тебе приносимое, и теплыми твоими мольбами испроси у Господа оставление прегрешений наших, покаяние и исправление жития, стяжание благодати Святаго Духа, без негоже ни един возможет спасен быти. В час же исхода нашего от уз смертнаго сего телесе сподоби предстательством твоим сильным и помощию крепкою водворитися в Небесных селениих, да с тобою в бесконечном веце воспеваем песнь Богу, Спасителю нашему: Аллилуиа, аллилуиа, аллилуиа.[Се́й конда́к глаго́лется три́жды.][Далее повторяем 1‑е икос и кондак:]Икос 1 Ангели Божии возрадовашася на небеси о пречудном рождении твоем, преподобне Гаврииле, прозирающе, яко избран сосуд Божественныя благодати явишися и будеши добр слуга Домовладыки, исполняя во всем волю Его святую. От юности бо навыкл еси в Боге ходити, и страх Его выну в сердце имети, сего ради чествуем тя сими похвалы: Радуйся, прозябение от корене живоноснаго — Христа Господа. Радуйся, святое стеблие, произрастшее из маслины светло-плодовитыя — Церкве Христовы. Радуйся, семя благое, в ниву удобренную всеянное. Pадуйся, зерно, сторичный плод принесшее. Радуйся, мал злак, возрастший в древо великое. Радуйся, от утробы матерния очищенный и освященный. Радуйся, благочестивых родителей отрасль пречестная. Радуйся, чадо обетованное, в дар Богу принесенное. Радуйся, преподобне отче Гаврииле, теплый о нас молитвенниче и преславный чудотворче. Кондак 1 Избранный угодниче Христов и предивный чудотворче, мудрый монахов наставниче и храмов Божиих строителю н украсителю, преподобне отче наш Гаврииле, се ныне припадающе к раце честных мощей твоих, яко избавльшеся от злых молебная пения восписуем ти, недостойнии. Ты же яко имеяй благодать молитися за ны, от всяких нас бед и обстояний свободи, да зовем ти: радуйся, преподобне отче Гаврииле, теплый о нас молитвенниче и преславный чудотворче. Молитва преподобному Гавриилу Афонскому О, преподобне и богоносне отче наш Гаврииле, угодниче Христов, теплый о нас молитвенниче и скорый помощниче! Се ныне мы, грешнии и недостойнии, с благоговением притекающе к раце мощей твоих, усердно молим тя: яко имеяй дерзновение ко Христу Богу, потщися богоприятным твоим ходатайством испросити у Господа сил, яко да пробавит великия и богатыя милости Своя на нас грешных, да подаст нам дух правыя веры, дух ведения и любве, дух мира и радости о Дусе Святе. Моли, отче священне, милосерднаго Бога, да возсияет свет благодати Его сущим во тьме лжеверия, и да познают Христа, Бога истиннаго, да возсияет свет сей блуждающим на распутиях раскола, да вразумятся и приидут во ограду Православныя Церкве, в нейже единой несомненно содевается вечное спасение верных. Помози нам, угодниче Божий, да призовет Господь народ наш к великому покаянию и плачу о гресех отечества нашего, да не погибнем со беззаконии нашими, да утолит шатания и раздоры в земле нашей, оградит нас от гнева, убийства, вражды и злобы, да паки возлюбим друг друга и едино пребудем в Господе и Спасителе нашем, Емуже подобает всякая слава, честь и поклонение, со Безначальным его Отцем, и Пресвятым и Благим и Животворящим Его Духом, ныне и присно и во веки веков. Аминь.

Кондак 1 Избранного Богом от юности поборника православныя святыя веры и приявшаго мученический венец за исповедание ея, святаго преподобномученика Афанасия похвальными песньми почтим, ты же, яко предстоя пред престолом Царя Славы, от всяких нас бед свободи, да зовем ти: Радуйся, преподобномучениче Афанасие, похвало и украшение наше. Икос 1 Ангельский чин восприявши, ангельское житие явил еси, душу твою чистотою добродетелей украсил, непорочно Богу служил еси, словом и житием верные своя наставляя, сего ради приими от нас, преподобномучениче, сия усердныя похвалы; Радуйся, измлада Бога возлюбивый. Радуйся, заповеди Его верно сохранивый. Радуйся, соблюдший душу твою страстьми непорабощенну; Радуйся, благодатию Божию просвещенный. Радуйся, веры Христовыя истинный поборниче. Радуйся, отеческих преданий неложный защитниче. Радуйся, мученическими добротами украшенный; Радуйся, в светлый чертог Господень приятый. Радуйся, Преподобномучениче Афанасие, похвало и украшение наше. Кондак 2 Видев суету жития мирскаго, еще от юности, в мире пребывая, удалялся еси сладостей жития сего, молитве же и службе Божией усердно прилежа и ум свой богомыслием возвышая, присно воспевал еси Господеви ангельскую песнь: Аллилуиа. Икос 2 Разум твой божественными ученьми просвещая, красная мира сего, Преподобне, отринул еси, сего ради, водворяяся во обитель Святаго Духа града Вильны и тамо молитвою и пощением во служение Христу себе уготовляя, душеполезное сокровище стяжал еси. Мы же твое высокое любомудрие ублажая, приносим ти похвалы сия: Радуйся, прельщения юнаго возраста победивый; Радуйся, от юности жития богобоязненнаго сладость вкусивый. Радуйся, велений Христовых из млада исполнителю; Радуйся, чистоты душевныя и телесныя усердный хранителю. Радуйся, подвижниче, угождение Богу паче всего возлюбивый; Радуйся, образ отвержения себе нам показавый. Радуйся, яко путем прискорбным ко Христу последовал еси; Радуйся, яко в райския обители возвещал еси. Радуйся, Преподобномучениче Афанасие, похвало и украшение наше. Кондак 3 Сила Всевышняго охраняющи тя непрестанно в житии твоем, яве показа тя, яко сосуд избранный во еже служити Богови и наставляти люди ко спасению, тем же и мы таковое Божественное смотрение о тебе зряше, воспеваем купно с тобою хвалебную песнь в Троице славимому Богу: Аллилуиа. Икос 3 Имущи присно пред очима своима жертву Христову, за грехи людския принесенную, жертвенно предал еси житие твое в руце Божии и, взем крест долготерпения и злострадания, Христу последовал еси: тем же и мы, ублажающе христоподражательное житие твое, воспеваем ти сице: Радуйся, в сердце твоем образ Христа непрерывно носивый; Радуйся, Христу работати и искренно Ему служити люди научивый. Радуйся, яко очесами мысленными к свету невечернему устремлялся еси; Радуйся, яко к небеси путем прискорбным возшел еси; Радуйся, заповедей Христовых и заветов апостольских усерднейший хранителю. Радуйся, спасению душ паствы твоея изрядный рачителю; Радуйся, житием твоим праведным Богу угодивый; Радуйся, наследие царствия небеснаго богоугождением себе улучивый. Радуйся, преподобномучениче Афанасие, похвало и украшение наше. Кондак 4 Бурю гонений воздвигоша врази противо обители Дубойския, юже устроял, соделал еси, преподобномучениче, оплотом веры православныя, ты же ведением небесным озаренный, вверив судьбы братии твоея Божию Промышлению усердно моляся с нею Богови, взывал ему: Аллилуиа. Икос 4 Слышавше насельницы града Береста о богоугодном житии иноков Купятницкия обители, просиша игумена сия обители, да изберет единаго из братии поставити во игумена обители Берестейския. Егда же братия недоумеваша, кому же дати жезл игуменства, Промысл Божий жребием каза на тя, яко достойный сосуд божественныя благодати. Тем же и мы, дивяся чудному промышлению Божию о тебе, достохвально взываем ти: Радуйся, пастырю, от самого Бога предуказанный; Радуйся, начальниче обители, свыше избранный. Радуйся, во православии братию обители твоея укрепивый; Радуйся, молитве и терпению житием твоим вся научивый. Радуйся, обители твоея честныя от вражеских козней охранителю; Радуйся, и насельников земли Берестейския в охранении веры святыя твердый руководителю. Радуйся, в поте лица твоего Бога ради потрудивыйся; Радуйся, верный рабе, добрым делателем винограда Христова явивыйся. Радуйся, преподобномучениче Афанасие, похвало и украшение наше. Кондак 5 Боготечней звезде подобен был еси преподобномучениче Афанасие, в житии твоем деяньми и ученьми добре паству твою назидая и путь истинный к горнему Иерусалиму ей указуя, тем же и ныне на небесех сияеши славою вечною и купно со лики праведных воспеваеши хвалебную песнь Богови: Аллилуиа. Икос 5 Видев, яко защищение верных чад твоих не довлеет надеятися на силы человеческия, все упование твое возложил еси на помощь Заступницы рода христианского, моляся пред образом Ея святым, именуемым Матери Божия Купятицкия и в час теплыя молитвы твоея услышал еси глас Ея, повелевающий ти бодрственно за Веру святую стояти и паству твою пред сильными мира сего защищати. Сего ради вернии научишася воспевати тебе таковая: Радуйся, в житии земнем слышати глас Пречистыя Владычицы сподобивыйся; Радуйся, гласом Ея служити Богу призванный. Радуйся, в защищении обидимых крепкое забрало; Радуйся, сильным мира сего небоязненный суда Божия провозвестителю. Радуйся, вожделений иноверия разрушителю; Радуйся, правды Божия в сердцах возстающих на Святую Веру утвердителю. Радуйся, пастырю добрый, душу свою положити за овцы своя изволивый; Радуйся, за правду гонения и скорби претерпевый. Радуйся, преподобномучениче Афанасие, похвало и украшение наше. Кондак 6 Проповедник учения Христова воистину явился еси, преподобномучениче Афанасие, словом твоим в вере наставляя, житием во благочестии верных утверждая и всех поучая с любовию пети Богу: Аллилуиа. Икос 6 Возсиял еси, преподобномучениче, яко светильник, светяй на свещнице истиныя веры Христовы, высотою ума твоего озаряя души верных и разгоняя тьму нечестия и неверия, сего ради избраша тя людие, яко поборника веры сия, предстати пред лицем сильных мира сего и оградити ю от злокозненных наветов. возстающих на ню. Тем же и мы достойно ублажаем тя похвалами сими: Радуйся, сущим в напастех скорый помощниче; Радуйся, обидимым крепкий заступниче. Радуйся, паствы твоея во благоустроении жития церковнаго мудрый руководителю; Радуйся, малодушием колеблемых верный укрепителю. Радуйся, враждебных наветов достохвальный отразителю; Радуйся, безпомощных присный защитителю. Радуйся, оградою крепкою обидимых явивыйся; Радуйся, пред лицем сильных мира сего изрещи правду не убоявыйся. Радуйся, преподобномучениче Афанасие, похвало и украшение наше. Кондак 7 Хотяй непрестанно житием своим Богу благоугождати, подвигоположник был еси, преподобномучениче Афанасие, неослабный образ братии твоей подая в трудах, бдениих и пощениих, с любовию поучал еси их, призывая служити Богу и пети Тому: Аллилуиа. Икос 7 Новаго подвига иноческаго жития вожделев, не отринул еси прошения иноков обители Дубойския возложити на тя бремя во благоугождении ея и, шед во обитель сию, узрел на пути мужа убога, еле жива суща, и самарянину милосердному подобищася, подъял еси его на рамена твоя и несл еси, внимая неизреченным его глаголам: сей же муж, внезапну скрывыйся от тебе, назвался сладчайшим именем Иисус. Сего ради и мы, тайне твоего боговидения дивящеся, со умилением тебе вопием: Радуйся, ко милосердию душу твою предуготовавый; Радуйся, образ сострадания людям собою явивый. Радуйся, глаголы Господни слышати сподобивыйся; Радуйся, откровение дивных тайн от Бога восприявый. Радуйся, боговидче Христов. Радуйся, боговидцу Моисеови уподобивыйся. Радуйся, таиниче Божий, еще на земли небесных благ вкусивый; Радуйся, яко Сам Пастыреначальник Иисус призвати тя на подвиг благоволивый. Радуйся, преподобномучениче Афанасие, похвало и украшение наше. Кондак 8 Странен и безумен показался еси людем, преподобномучениче, егда Христа ради юродство восприяв, на стогнах царствующего града истину святыя православныя веры защищая и гневом Божиим отшедших от сея истины устрашая, восклицал еси: горе отступником и неверным, вера бо православная яко солнце возсияет. Мы же словеса сия, яко пророчествие приемлюще, молитвенно к тебе взываем: обьюродевший ум наш на стезю истины направи, да с тобою взываем Богу: Аллилуиа. Икос 8 Весь еси желание мое и радость моя, сладчайший Иисусе, взывал еси ко Господу, преподобномучениче, егда веден был на место мучения твоего, душу бо твою предав в руце Божии, тело твое сладце предал еси в руце мучителей твоих. Таковая любовь твоя ко Господу и кротость твоя мучителей смути, и сего ради один от воин, от его же руки повинен был еси прияти смерть, дивяся мужеству твоему, благословения отеческаго и прощения за сие безумное дело у тебя испроси. Мы же, благоговейно воспоминающе сие, похвалами ублажаем тя сими: Радуйся, любовию ко Христу, аки многоценным бисером, душу твою украсивый. Радуйся, действенным проповеданием сия любве верный путь во святыя нам указавый. Радуйся, мужественным смирением врагов твоих удививый. Радуйся, кротостию твоею ослепленным враждою к тебе мучителем умное прозрение даровавый. Радуйся, мужественно смерть претерпевый. Радуйся, небесную Иисусову сладость вкусивый. Радуйся, немолчныя исповедников слава. Радуйся, предивная мучеников похвало. Радуйся, преподобномучениче Афанасие, похвало и украшение наше. Кондак 9 Вси видящи тя в темничнем заточении, преподобномучениче, зело дивляхуся твоему непоколебимому стоянию за веру истинную святую, заветы бо отеческия соблюдая, не токмо не устрашился еси уз, оплеваний и поруганий, но мужественно вся сия терпя за Христа, слезнаго исполнивыйся умиления, благодарственно воспевал еси Богу Аллилуиа. Икос 9 Витии многовещании не возмогут изрещи радости тоя великия, ею же исполнены быша сердца достигших верно чтити святую память твою: сии, веселием одержимы, помыслиша воздвигнути храм на месте мученическия кончины твоея, место же сие и по триех ста летех по кончине твоей сохрано было в памяти верных. Терн бо, прорастший на крови твоей, яко свидетель неложный соблюдаше место сие от людскаго забвения, и свеща во гробе твоем, юже имел еси в руцех твоих в час кончины твоея, истиствова место твоего упокоения. О сем убо радующеся, вернии восклицаху ти: Радуйся, путем тернистым жития твоего греховная тернии души твоея умертвивый. Радуйся, яко тернием прорастшим на гробе твоем: место упокоения твоего показавый и тем радость велию верным твоим явивый. Радуйся, хранителю обычаев церковных, со свещею возженною смерть восприявый. Радуйся, в знамении свещи зажженныя образно тайну сияния славы твоея предобразивый. Радуйся, яко храмом, созданным в память твою на гробе твоем, славно имя твое от людей прославися. Радуйся, яко на гробе твоем, яко же и древле на гробах мученических, жертва Христова за грехи людския приносится. Радуйся, неизсякаемый источниче блаженныя памяти о тебе на земли. Радуйся, цветом нетления украшенный на небеси. Радуйся, преподобномучениче Афанасие, похвало и украшение наше. Кондак 10 Спасти хотяй душу твою, о житии сем привременнем нерадел еси, преподобномучениче, егда бо на тя осуждение смерти изыде, с радостию великою предал еси душу в руце Богови, воспевая Ему, в мученическом подвизе тебе укрепляющему, хвалебную песнь: Аллилуиа. Икос 10 Стеною ограждения церкви православней обещался еси быти, пророчески на сие указуя в предсмертном завете учеником твоим: тамо, идеже тело мое изъязвленное и острупленное за имя Божие положено будет, Вера Православная процветет, яко крин посреде терния и яко искра в тепле сокрытая явится, возсияет и повсюду осветит. Сего ради и мы, славяще Бога, дивнаго во святых Своих, и тя ублажаем: Радуйся, яко за истину скорби многия и язвы претерпел еси. Радуйся, яко за исповедание и защищение веры православныя нетление мощей твоих во блаженном упокоении приял еси. Радуйся, духовно слепотствующих и в законе Господнем заблуждающих пречудный руководителю. Радуйся, всех напастей и бед, обуревающих верное стадо Христово, отразителю. Радуйся, прославлением мощей твоих превеликия радости нас исполнивый. Радуйся, и неверныя нетлением телесе твоего к познанию истины православия приведый. Радуйся, твоим проречением в надежди торжества веры истинныя нас укрепивый. Радуйся, и по успении твоем превеликим сия веры защитником себе явивый. Радуйся, преподобномучениче Афанасие, похвало и украшение наше. Кондак 11 Пение всеумиленное принесоша Богови ученицы твои, преподобномучениче, егда обретоша сокрыто от людей, чтущих память твою, место твоего упокоения и мощи твои, нетленно пребывающия, обаче и мы, взирающи на таковую милость Божию, нам явленную, благодарственно вопием прославившему тя Богу: Аллилуиа. Икос 11 Светильник жития благочестнаго верному стаду твоему был еси, преподобномучениче Афанасие, души твоей божественная богатства Духа Святаго собрав, за Христа мученичество исповедания приял еси, тем же и мы, молитвами твоими просвещшеся, вопием ти: Радуйся, светильниче благодатный жития благочестнаго. Радуйся, веру, надежду и любовь до конца сохранивый. Радуйся, со Христом, Его же от юности возлюбил еси, на веки соединивыйся. Радуйся, мзду великую за житие твое славное от Него восприявый. Радуйся, звездо лучезарная, над землею нашею возсиявшая. Радуйся, царствия небесного и славы вечныя наследниче. Радуйся, нетлением мощей твоих образ воскресения нашего явивый. Радуйся, яко имя твое по всей стране нашей от конца в конец прославляется. Радуйся, страны нашея крепкое ограждение. Радуйся, присное пред Богом наше защищение. Радуйся, преподобномучениче Афанасие, похвало и украшение наше. Кондак 12 Благодать цельбоносна дана от Бога нетленному твоему телеси, егда бо отрок, на смертном одре лежащ, прикоснулся раце твоей, абие исцеле: благодати сия, преподобномучениче Афанасие, и нам немощным испроси, да и мы здравы суще телом и духом, в сей и будущей жизни о тебе поем Богу: Аллилуиа. Икос 12 Поюще твое славное и непреоборимое стояние за веру Истинную, ублажаем, преподобномучениче, и святую твою кончину, ею же на земли и на небеси прославился еси и приносим ти похвалы сия: Радуйся, непоколебимый столпе Веры Христовой и отеческих преданий. Радуйся, яко тобою церковь верных просвещается. Радуйся, верный рабе Христов, любовь ко Христу свою кровию запечатленный. Радуйся, за веру и страдание в радость Господа приятый. Радуйся, верным чадом твоим истинный путь во обители показавый. Радуйся, во обителех Христовых на скорби наши призирающий. Радуйся, от враг видимых и невидимых крепкий наш заступниче. Радуйся, дарованной от Господа милости неоскудный источниче. Радуйся, душевных и телесных недугов наш целебниче. Радуйся, всеусердный ко спасению наш наставниче. Радуйся, преподобномучениче Афанасие, похвало и украшение наше. Кондак 13 О всехвальный угодниче Христов, преподобномучениче Афанасие, прими сие малое моление наше, в похвалу тебе приносимое. Буди неослабный молитвенник наш пред престолом Всевышняго и теплым предстательством твоим избави нас от зол земных и грядущего мучения, да с тобою воспеваем Богу: Аллилуиа.[Се́й конда́к глаго́лется три́жды.][Далее повторяем 1‑е икос и кондак:]Икос 1 Ангельский чин восприявши, ангельское житие явил еси, душу твою чистотою добродетелей украсил, непорочно Богу служил еси, словом и житием верные своя наставляя, сего ради приими от нас, преподобномучениче, сия усердныя похвалы; Радуйся, измлада Бога возлюбивый. Радуйся, заповеди Его верно сохранивый. Радуйся, соблюдший душу твою страстьми непорабощенну; Радуйся, благодатию Божию просвещенный. Радуйся, веры Христовыя истинный поборниче. Радуйся, отеческих преданий неложный защитниче. Радуйся, мученическими добротами украшенный; Радуйся, в светлый чертог Господень приятый. Радуйся, Преподобномучениче Афанасие, похвало и украшение наше. Кондак 1 Избранного Богом от юности поборника православныя святыя веры и приявшаго мученический венец за исповедание ея, святаго преподобномученика Афанасия похвальными песньми почтим, ты же, яко предстоя пред престолом Царя Славы, от всяких нас бед свободи, да зовем ти: Радуйся, преподобномучениче Афанасие, похвало и украшение наше.

Текст акафиста утвержден для употребления за богослужением и в домашней молитве на заседании Священного Синода 24 августа 2023 года (журнал № 68). Кондак 1 Возбра́нниче све́тлый на тму ве́ка сего́, во вся ору́жия Бо́жия облече́нный, и ве́ру Христо́ву, а́ки щит, проти́ву су́етных мудрова́ний держа́вый, восхваля́ем тя любо́вию, святи́телю и испове́дниче Афана́сие, ты же я́ко моли́твенник о нас ко Го́споду дерзнове́нный, утвержде́ния в и́стине Правосла́вия испроси́ нам, зову́щим: Ра́дуйся, Афана́сие, но́вый испове́дниче и моли́твы наста́вниче. Икос 1 А́нгельскаго ча́я о́браза, Афана́сие блаже́нне, измла́да игра́нием де́тским не внима́л еси́ ра́зумом, моли́твам же те́плым во хра́ме Госпо́дни и рукоде́лию в дому́ ма́терни, а́ки бы в ке́ллии, всегда́ прилежа́, дерзнове́нно предвозвеща́л еси́ отроко́м, све́рстным тебе́, я́ко и́маши бы́ти Це́ркве Христо́вы служи́тель свяще́нный. Ве́дуще у́бо мы, я́ко Про́мыслом Бо́жиим сбы́ся рече́ние твое́, со удивле́нием зове́м ти: Ра́дуйся, дре́внею и свято́ю земле́ю Влади́мирскою в добронра́вии воспита́нный; ра́дуйся, в Ла́вре преподо́бнаго Се́ргия ли́ку и́нокующих вчине́нный. Ра́дуйся, посто́м и моли́твою житие́ богоуго́дное стяжа́вый; ра́дуйся, от Го́спода к по́двигу свиде́тельства во дни лука́выя избра́нный. Ра́дуйся, благоле́пия церко́внаго блюсти́телю; ра́дуйся, прему́дрым Правосла́вия наста́вником подо́бниче. Ра́дуйся, Афана́сие, но́вый испове́дниче и моли́твы наста́вниче. Кондак 2 Ви́дев, я́ко лю́тое на Це́рковь Ру́сскую гоне́ние наста́, не то́чию пра́ведно дви́жимый гнев Бо́жий помышля́л еси́ о́ное, Афана́сие богоразу́мне, но па́че прему́друю жа́тву душа́м, я́же созре́ша в живо́т ве́чный, и сего́ ра́ди Го́споду жа́твы Христу́ воспева́л еси́: Аллилу́иа. Икос 2 Разуме́я Собо́р всех святы́х земли́ Ру́сския Оте́честву на́шему от бед избавле́ние бы́ти, словеса́ тем пра́здничная нача́ слага́ти, богодухнове́нне, пе́сньми ди́вными Це́рковь украша́я. Мы же, гре́шнии, ны́не тя зря́ще в ли́це при́сно тобо́ю что́мых уго́дников Бо́жиих, воспису́ем ти похва́льная сия́: Ра́дуйся, моле́ний умиле́нных слага́телю; ра́дуйся, пе́ния Го́сподеви разу́мнаго рачи́телю. Ра́дуйся, чудотво́рцев Росси́йских чи́сте возлюби́вый; ра́дуйся, предста́телей страны́ на́шея в по́мощь всегда́ призыва́вый. Ра́дуйся, я́ко страстоте́рпцы но́выя увенча́л еси́ на земли́ похвала́ми; ра́дуйся, я́ко в со́нме тех на Небеси́ Бо́га сла́виши. Ра́дуйся, Афана́сие, но́вый испове́дниче и моли́твы наста́вниче. Кондак 3 Си́лу мня́ще безбо́жницы на правове́рие прия́ти, честны́я мо́щи святы́х земли́ Влади́мирския посреде́ Успе́нскаго хра́ма собо́рнаго непокрове́нны поста́виша, во е́же посмея́тися им, ты же, до́блий ра́тниче Христо́в, наро́ду во храм прите́кшу, воззва́л еси́ велегла́сно: Благослове́н Бог наш! И та́ко злоумы́сляемое святы́ням поруга́ние в моле́бное прославле́ние претвори́л еси́, с ве́рными вку́пе вопия́ Бо́гу: Аллилу́иа. Икос 3 Име́ющу ти почте́нну бы́ти честне́йшим епи́скопством, всу́е потщи́шася гони́тели Церкве Христовы прежде архиере́йства твоего́ гро́зными словесы́ и преще́нии тя устраши́ти. Благода́ть же Свята́го Ду́ха досто́йно пома́за тя во святи́тели земли́ Влади́мирския, иде́же испове́дник и Правосла́вия учи́тель яви́лся еси́, Афана́сие боголюбе́зне. Помина́юще у́бо ре́вностное служе́ние твое́, глаго́лем ти си́це: Ра́дуйся, ве́ры пра́выя кре́пкий побо́рниче; ра́дуйся, раско́ла нове́йшаго небоя́зненный обличи́телю. Ра́дуйся, мудрова́ний ве́ка сего́, вознося́щихся на ра́зум Бо́жий, посрамле́ние; ра́дуйся, от волко́в, во оде́жди о́вчей во ста́до Христо́во входя́щих, огражде́ние. Ра́дуйся, смуще́нием коле́блемых в и́стине утвержда́вый; ра́дуйся, отсту́пников ко обраще́нию приводи́вый. Ра́дуйся, Афана́сие, но́вый испове́дниче и моли́твы наста́вниче. Кондак 4 Бу́ри и смяте́нию раско́ла проти́ву стоя́, а́ще и в заточе́ние бы́сть непра́ведно вве́ржен, святи́телю Бо́жий, оба́че не оста́вил еси́ корми́ла церко́внаго, вся ве́рныя писа́ньми твои́ми увещава́я и моля́, да не соединя́ются с отсту́пниками, ниже́ да боя́тся лука́ваго вре́мене, но я́ко ма́лое ста́до, ему́же благоизволи́ Оте́ц Небе́сный да́ти Ца́рство, взыва́ют вы́ну: Аллилу́иа. Икос 4 Слы́шавше, дивля́хуся вси ве́рнии благоду́шию твоему́, испове́дниче, темни́цу бо, в ню́же затворе́н бы́сть, прибе́жище благо́е от пове́трия обновле́нческаго нарица́л еси́. Име́я же та́мо соу́зников нема́ло, вку́пе с тобо́ю за ве́ру Христо́ву стра́ждущих, весе́лился еси́ о Го́споде со единомы́сленники твои́ми, вся святы́я земли́ Ру́сския моли́твенно воспева́я. Мы же ти, досто́йный о́браз нам злострада́ния я́вльшу, прино́сим такова́я: Ра́дуйся, темни́цу моли́твенным сия́нием озари́вый; ра́дуйся, и во врате́х сме́ртных Жизнода́вцу хвалу́ возсыла́вый. Ра́дуйся, стра́ждущих и́стины ра́ди милосе́рдый уте́шителю; ра́дуйся, и безбо́жников заточе́нных человеколю́бный пита́телю. Ра́дуйся, скорбьми́ от любве́ Бо́жия не разлуче́нный; ра́дуйся, в терпе́нии твое́м от Го́спода укрепле́нный. Ра́дуйся, Афана́сие, но́вый испове́дниче и моли́твы наста́вниче. Кондак 5 Богохрани́маго избра́нника помышля́ем тя, дру́же Христо́в Афана́сие, зане́ на бре́зе Оне́жскаго е́зера в темни́це нарочи́то учине́нной, да бы заточе́нныя та́мо сме́рти удо́бно преда́ти, мно́зи спле́нницы твои́ ну́ждне от мучи́телей кончи́ну прия́ша, тебе́ же, три́е ме́сяцы день и нощь убие́нием безсу́дным угрожа́ема бы́вша, изба́ви Госпо́дь Многоми́лостивый, Ему́же благода́рно воззва́л еси́: Аллилу́иа. Икос 5 Ви́дя всегда́ очи́ма се́рдца твоего́, духоно́сне Афана́сие, ко́ликими ра́нами и труды́ стяжа́ша отцы́ святи́и и́стинное по Бо́зе житие́, доса́ды и укори́зны мно́гая претерпева́л еси́, гони́телей твои́х, я́ко запове́да Христо́с, благословля́я. Обремене́н же быв го́рькими рабо́тами, во узи́лищи, аки вторы́й Иоа́нн Дамаски́н, вся ме́ста нечи́стая рука́ма твои́ма безро́потне омыва́л еси́. Неизрече́ннаго ра́ди смире́ния твоего́ прино́сим ти похва́льная сия́: Ра́дуйся, кро́тости пречу́дныя о́бразе; ра́дуйся, блаже́ннейшаго послуша́ния сы́не. Ра́дуйся, от нечести́вых уничиже́ние в честь себе́ вмени́вый; ра́дуйся, оби́дящим тебе вседу́шно погреше́ния прости́вый. Ра́дуйся, вражде́бников твои́х возлюби́телю нелицеме́рный; ра́дуйся, ненави́дящим тебе́ благоде́телю усе́рдный. Ра́дуйся, Афана́сие, но́вый испове́дниче и моли́твы наста́вниче. Кондак 6 Пропове́дник немо́лчен Ева́нгелия Христо́ва и в темни́цах яви́лся еси́, Афана́сие досточу́дне, разбо́йники бо и душегу́бцы суро́выя к покая́нию приводи́л еси́ и науча́л еси́ пе́снь хвалы́ и благодаре́ния воспева́ти Бо́гу: Аллилу́иа́. Икос 6 Возсия́вшу тебе́ в темни́це све́том и́стины, приказа́ мучи́тель не́кий отвести́ тя во узи́лище ино́е, и стра́жницы, я́же ведо́ша тебе́, немилосе́рди бы́ша зело́ и томля́ху тя, ста́рче святы́й, ско́ро гоня́ще, во е́же ма́лыми деньми́ преи́ти то́ликую долготу́ пути́. Та́же гла́дом в заточе́нии том непреста́нно мо́рим бысть, я́ко едва́ тебе́ живу́ оста́тися. Оба́че, кре́постию теле́сною изнемога́я, не изнемога́л еси́ терпе́нием, вся Христа́ ра́ди препобежда́я. Мы же, таково́му дивя́щеся по́двигу твоему́, пое́м ти си́це: Ра́дуйся, без кро́ве му́чениче добропобе́дный; ра́дуйся, во́ине Христо́в непреодоле́нный. Ра́дуйся, огне́м страда́ний па́че зла́та искуше́нный; ра́дуйся, в му́жестве непосту́пнем па́че адама́нта утвержде́нный. Ра́дуйся, Бо́га ра́ди кро́тце в же́ртву пра́вды себе́ преда́вый; ра́дуйся, слеза́ми все́янное ра́достию пожа́вый. Ра́дуйся, Афана́сие, но́вый испове́дниче и моли́твы наста́вниче. Кондак 7 Хотя́ще безбо́жницы, испове́дания ра́ди и са́на твоего́ святи́тельскаго, не отпусти́ти да́же по заточе́нии тя свобо́дна, глаго́лаша лука́вне, я́ко ни от кого́ и́маши обрести́ послуже́ния в ста́рости твое́й, и затвори́ша тя в темни́чнем до́ме призре́ния, иде́же безчи́сленными скорбьми́ и поноше́нии па́че не́же в узи́лищи стужа́ху ти. Но попече́нием христиа́н благочести́вых от го́ршаго ме́ста онаго изве́ден был еси́, воспевая по́мощи пода́телю Бо́гу: Аллилу́иа. Икос 7 Но́вому наста́вшу гоне́нию на Це́рковь Христо́ву, повеле́ша богопроти́вницы заключи́ти святы́я хра́мы, а ины́я до основа́ния разори́ти. Ты же, на Го́спода наде́яся несумне́нно, му́жество бли́жним твои́м внуша́л еси́, да не бу́дут страшли́ви и малоду́шни, рече́ бо Госпо́дь, я́ко врата а́дова не одоле́ют Це́ркве Его́. Те́мже вопие́м ти си́це: Ра́дуйся, неизрече́ннаго милосе́рдия Христо́ва до́брый ве́стниче; ра́дуйся, благонаде́жнаго упова́ния Бо́жия ти́хий А́нгеле. Ра́дуйся, глубино́ю покая́ния высоту́ смиренному́дрия стяжа́вый; ра́дуйся, от сыно́вняго Це́ркви послуша́ния к соверше́нству святы́х оте́ц ея́ восте́кший. Ра́дуйся, за Оте́чество на́ше моли́твенниче непреста́нный; ра́дуйся, хода́таю о лю́дех его́ ко Творцу́ неусы́пный. Ра́дуйся, Афана́сие, но́вый испове́дниче и моли́твы наста́вниче. Кондак 8 Стра́нное и недоразумева́емое чу́до яви́ о тебе́ Госпо́дь, святи́телю Афана́сие, литургиса́вшу бо ти во святе́й оби́тели преподо́бнаго Се́ргия, не́цыи от моля́щихся зре́ша тя а́ки волно́ю из алтаря́ свята́го и па́ки во о́ный по возду́ху износи́ма и вноси́ма бы́вша. Самови́дцы же чудеси́ тому́ со удивле́нием возопи́ша в сердца́х свои́х Бо́гу: Аллилу́иа. Икос 8 Всем неблагоразсу́дным, я́же то́чию в доме́х свои́х моля́хуся, обще́ния же церко́внаго ся отлуча́ху, богоразу́мными словесы́ и посла́ньми твои́ми наставля́ше, миротво́рче усе́рдный, возсоедини́тися с те́лом церко́вным, да раско́ла но́ваго не бы́ша сотвори́ли, и тех к согла́сному единомы́слию до́бре упра́вил еси́. Того́ ра́ди и мы, ми́ра днесь Це́ркви Правосла́вней и ско́раго раздо́ром утоле́ния взыску́юще, зове́м ти: Ра́дуйся, собла́зны и несогла́сия среде́ ве́рных потреби́вый; ра́дуйся, хито́на церко́внаго раздра́нию возбрани́ти преуспе́вый. Ра́дуйся, расточе́нныя о́вцы Христо́вы во еди́но ста́до собира́яй; ра́дуйся, заблужда́ющия от пути́ и́стиннаго к покая́нию обраща́яй. Ра́дуйся, я́ко послуша́нию Ма́тери Це́ркви ча́да ея́ наставля́еши; ра́дуйся, я́ко ве́ру правосла́вную храни́ти науча́еши. Ра́дуйся, Афана́сие, но́вый испове́дниче и моли́твы наста́вниче. Кондак 9 Всю ве́рным бы́вшую ра́дость кто изрещи́ возмо́жет, святи́телю сла́вне, егда́ во Влади́мире гра́де яви́лся еси́, пра́зднества ра́ди осми́ сот лет собо́ра Успе́нскаго; ка́ко кли́рицы и вси лю́ди сла́дце взира́ху на тя и любе́зно о Го́споде тя целова́ху; та́же виде́нием твои́м духо́внаго весе́лия испо́лньшеся, вма́ле не на рука́х своих внесо́ша тя во храм, пою́ще Бо́гови: Аллилу́иа. Икос 9 Ве́тию тя преизя́щна показа́ Госпо́дь, Афана́сие благоглаго́ливе, пе́сньми но́выми украси́вшаго па́мяти и пра́здники святы́х земли́ Ру́сския, ги́мны бо церко́вныя и кано́нов словеса́ слага́я, в таковы́х труде́х душеполе́зных и Це́ркви Христо́вой зело́ потре́бных, препроводи́л еси́ лета́ дово́льна, отту́ду же и песнопи́сца прозва́ние стяжа́л еси́. Мы же и днесь от умиле́нных глаго́лов твои́х пи́щею духо́вною пита́ющеся и сла́дким пото́ком напая́ющеся, восхваля́ем тя: Ра́дуйся, тала́нт песнотво́рчества, от Бо́га ти да́нный, изря́дно умножи́вый; ра́дуйся, молитвосло́вия многоразли́чна, послуша́ния ра́ди церко́внаго, со тща́нием до́бре испра́вивый. Ра́дуйся, цевни́це духо́вная, сердца́ на́ша увеселя́ющая; ра́дуйся, исто́чниче изоби́льный, во́ду живоно́сную нам источа́яй. Ра́дуйся, я́ко песнопи́сцы но́выя к усе́рдию благочести́вому подвиза́еши; ра́дуйся, я́ко, от слове́с твои́х оправда́нный, и нам у Бо́га оправда́ния про́сиши. Ра́дуйся, Афана́сие, но́вый испове́дниче и моли́твы наста́вниче. Кондак 10 Спасе́нному пути́ по вся дни ча́да церко́вная наставля́л еси́, духоно́сне Афана́сие, мно́зи бо ве́рнии с любо́вию к тебе́ теча́ху, да бы поучи́тися от че́стнаго жития́ твоего́, поели́ку се́рдцем смире́н и тих обы́чаем, негневли́в и кро́ток, и всех доброде́телей исполне́н сы́й, де́лы твои́ми па́че слове́с науча́л еси́ пе́ти Бо́гу: Аллилу́иа. Икос 10 Сте́ну тве́рдую от наве́т и ко́зней вра́жиих ве́ру правосла́вную пе́рвее пропове́дал еси́, ста́рче святы́й, та́же покая́ние сле́зное и моли́тву непреста́нную вку́пе с богоуго́дными де́лы, и себе́ на служе́ние всем приходя́щим предава́я, мно́гих ко спасе́нию до́бре упра́вил еси́. Сего́ ра́ди и мы, недо́стойнии, руково́дствия до́браго тре́бующе, вопие́м ти та́ко: Ра́дуйся, недоумева́ющим благи́й сове́тниче; ра́дуйся, заблужда́ющим кро́ткое вразумле́ние. Ра́дуйся, душ смяте́нных сла́достный умири́телю; ра́дуйся, неудобоизце́льных страсте́й врачева́телю. Ра́дуйся, лука́выя по́мыслы в сердца́х челове́ческих прови́девый; ра́дуйся, благоуве́тливыми словесы́ ко отложе́нию грехо́внаго прило́га увещава́вый. Ра́дуйся, Афана́сие, но́вый испове́дниче и моли́твы наста́вниче. Кондак 11 Пе́нию моле́бному прилежа́ща усе́рдно, уте́ши тя Госпо́дь пред кончи́ною виде́нием чу́дным, я́ко святы́х земли́ Ру́сския, и́хже при́сно почита́л бе любо́вию, зре́ти сподо́бился еси́ ку́пно со Христо́м, Ему́же а́бие воззва́л еси́: Аллилу́иа. Икос 11 Све́том Боже́ственнаго явле́ния осия́нный, в предвозвеще́нный ти день и час блаже́ннаго исхо́да твоего́ ми́рно преда́л еси́, тайнови́дче, ду́шу твою́ в ру́це Христа́ Бо́га, Его́же от ю́ности возлюби́л еси́ и за Него́же то́ликая пострада́л еси́. Но я́ко в животе́ свое́м, подви́жниче ве́лий, свет бысть ми́ру, та́кожде и по преставле́нии чудесы́ мно́гими озаря́ти нас не престае́ши, зову́щих: Ра́дуйся, во́ина ю́наго от лю́тыя сме́рти чуде́сно изба́вивый; ра́дуйся, вдови́цу благочести́вую из руку́ злово́льника ди́вно исхи́тивый. Ра́дуйся, я́ко персть и бы́лие от гро́ба твоего́ неду́жным исцеле́ния подава́ша; ра́дуйся, я́ко мно́зи при гро́бе твое́м моли́вшеся, душепа́губным страсте́м врачество́ обрето́ша. Ра́дуйся, честна́го бра́ка христиа́нскаго изве́стный покрови́телю; ра́дуйся, де́вствующих и целому́дренных благонаде́жный засту́пниче. Ра́дуйся, Афана́сие, но́вый испове́дниче и моли́твы наста́вниче. Кондак 12 Благода́ть, ю́же те́сным твои́м житие́м и по́двиги мно́гими у Бо́га стяжа́л еси́, ве́дая, освяще́нный Собо́р Правосла́вныя на́шея Це́ркве сопричте́ тебе́ со́нму всех ру́сских святы́х, в том же све́тло лику́еши ны́не, всесоста́вным гла́сом воспева́я побе́дную песнь: Аллилу́иа. Икос 12 Пое́м тя со умиле́нием, святи́телю достохва́льне, я́ко во оби́тели го́рней всели́выйся, на земли́ нам оста́вил еси́ честны́я твоя мо́щи, я́же благогове́йно днесь почита́ем, и ско́раго исцеле́ния скорбе́м душе́вным и теле́сным ча́юще, взыва́ем ти та́ко: Ра́дуйся, блаже́нства изгна́нных пра́вды ра́ди удосто́енный; ра́дуйся, во све́тлостех Пресвяты́я Тро́ицы живу́щим соводворе́нный. Ра́дуйся, а́нгельским чи́ном сликовству́яй в вы́шних; ра́дуйся, от челове́к похвалы́ досточе́стно прие́мляй в ни́жних. Ра́дуйся, ве́рою тя почита́ющим ско́рое утеше́ние; ра́дуйся, любо́вию тя воспева́ющим благо́е весе́лие. Ра́дуйся, Афана́сие, но́вый испове́дниче и моли́твы наста́вниче. Кондак 13 О святи́телю благоглаго́ливе Афана́сие, и́мене Бо́жия досточу́дный испове́дниче, зе́мли Влади́мирския ра́дование и Це́ркве Святы́я украше́ние, убо́гое сие́ услы́ши моле́ние на́ше и благомо́щное хода́тайство твое́ вознеси́ о нас Го́сподеви, да вся поле́зная ко спасе́нию душе́вному нам да́рует, во е́же непреткнове́нно вни́ти нам в Ца́рство Небе́сное и воспе́ти та́мо Живоноча́льней Тро́ице: Аллилу́иа.[Се́й конда́к глаго́лется три́жды.][Далее повторяем 1‑е икос и кондак:]Икос 1 А́нгельскаго ча́я о́браза, Афана́сие блаже́нне, измла́да игра́нием де́тским не внима́л еси́ ра́зумом, моли́твам же те́плым во хра́ме Госпо́дни и рукоде́лию в дому́ ма́терни, а́ки бы в ке́ллии, всегда́ прилежа́, дерзнове́нно предвозвеща́л еси́ отроко́м, све́рстным тебе́, я́ко и́маши бы́ти Це́ркве Христо́вы служи́тель свяще́нный. Ве́дуще у́бо мы, я́ко Про́мыслом Бо́жиим сбы́ся рече́ние твое́, со удивле́нием зове́м ти: Ра́дуйся, дре́внею и свято́ю земле́ю Влади́мирскою в добронра́вии воспита́нный; ра́дуйся, в Ла́вре преподо́бнаго Се́ргия ли́ку и́нокующих вчине́нный. Ра́дуйся, посто́м и моли́твою житие́ богоуго́дное стяжа́вый; ра́дуйся, от Го́спода к по́двигу свиде́тельства во дни лука́выя избра́нный. Ра́дуйся, благоле́пия церко́внаго блюсти́телю; ра́дуйся, прему́дрым Правосла́вия наста́вником подо́бниче. Ра́дуйся, Афана́сие, но́вый испове́дниче и моли́твы наста́вниче. Кондак 1 Возбра́нниче све́тлый на тму ве́ка сего́, во вся ору́жия Бо́жия облече́нный, и ве́ру Христо́ву, а́ки щит, проти́ву су́етных мудрова́ний держа́вый, восхваля́ем тя любо́вию, святи́телю и испове́дниче Афана́сие, ты же я́ко моли́твенник о нас ко Го́споду дерзнове́нный, утвержде́ния в и́стине Правосла́вия испроси́ нам, зову́щим: Ра́дуйся, Афана́сие, но́вый испове́дниче и моли́твы наста́вниче. Молитва О, многострада́льне и благоглаго́ливе святи́телю и испове́дниче Христо́в Афана́сие, па́стырю до́брый па́житей Це́ркве Ру́сския, Правосла́вия ревни́телю, покая́ния пропове́дниче, моли́твы сто́лпе, любве́ неиссяка́емый исто́чниче, цевни́це богодухнове́нная! Ты, земле́ю дре́внею и свято́ю воспи́танный, измла́да сосу́д избра́нный Бо́гу яви́лся еси́, ре́вностно служа́ Ему́ словесы́ и де́лы, моли́твою те́плою, посто́м неосла́бным, ми́лостынею нелицеме́рною. Слу́жбе Бо́жией зело́ прилежа́, тала́нт песнотво́рчества усе́рдно умно́жил еси́ и мно́гими духоно́сными пе́нии Це́рковь Ру́сскую украси́л еси́, наипа́че же потруди́лся еси́ в прославле́нии святы́х земли́ Ру́сския, и́хже пред кончи́ною ку́пно с Го́сподом зре́ти сподо́бился еси́. И́стины ра́ди и кро́тости и пра́вды досто́йно помаза́ тя во святи́тели Влади́мирския благода́ть Свята́го Ду́ха, е́юже просвеще́н, пропове́дал еси́ Правосла́вия преда́ния неукло́нно посреде́ безбо́жных гони́телей. А́ще и в заточе́ниих, изгна́ниих и го́рьких рабо́тах три́десять лет про́был еси́, поноше́ния, озлобле́ния и ра́ны за Христа́ сла́дце претерпевая́, ты, свяще́нное испове́дание я́ко забра́ло восприи́м, богоху́льныя дерзнове́нно обличи́л еси́ и безпло́тныя враги́ посрами́л еси́, па́ству свою́ де́лы па́че слов поуча́я, я́ко Богу подоба́ет повинова́тися па́че челове́к. Те́мже блаже́нства изгна́нных пра́вды ра́ди сподо́бився и Престо́лу Небе́сному предстоя́, моли́ Всеблага́го Бо́га на́шего, да утверди́т Це́рковь Ру́сскую, ея́ па́стыри непозы́блемы в и́стинах ве́ры от е́ресей и раско́лов, да пребу́дут ча́да ея́ тве́рды во испове́дании свята́го Правосла́вия, претерпева́юще вся напа́сти вре́мени, прославля́юще еди́ным се́рдцем и еди́ными усты́ ди́внаго во святы́х Свои́х Бо́га, Отца́ и Сы́на и Свята́го Ду́ха, во ве́ки веко́в. Ами́нь.

Кондак 1 Взбра́нный от Царя́ си́л Го́спода Иису́са, воево́до во́инов духо́вных, и кре́пкий победи́телю враго́в неви́димых, Адриа́не преподо́бне, пострада́вый непови́нно и стяжа́вый дерзнове́ние ко Го́споду, от вся́ких на́с бе́д свободи́ благоприя́тными твои́ми моли́твами, да, сла́вяще тя́, засту́пника на́шего, хвале́бно тебе́ зове́м: Ра́дуйся, Адриа́не преподобному́чениче и чудотво́рче преди́вный. Икос 1 Ангела земна́го и челове́ка небе́снаго явля́еши на́м в житии́ твое́м, преподо́бне о́тче. Те́мже а́нгельскими глаго́лы подоба́ше восхваля́ти тя́ по достоя́нию, но мы́ любо́вию к тебе́ подвиза́еми, а́ще челове́ческими гла́сы со усе́рдием си́це тебе́ взыва́ем: Ра́дуйся, роди́телей благочести́вых ча́до благо́е; ра́дуйся, вели́каго Росто́ва прозябе́ние свято́е. Ра́дуйся, Бо́гу Отцу́ усыновле́нный в святе́м креще́нии; ра́дуйся, Бо́гу Сы́ну соедини́выйся во святе́м причаще́нии. Ра́дуйся, Бо́га Ду́ха Свята́го да́ры прие́мый в святе́м миропома́зании; ра́дуйся, от пеле́н Бо́гу освяще́нный Боже́ственных та́инств благода́тию. Ра́дуйся, пе́щь страсте́й ю́ностных угаси́вый воздержа́нием; ра́дуйся, пло́ть томя́щую сокруши́вый посто́м и бде́нием. Ра́дуйся, и́го Христо́во и бре́мя Его́ ле́гкое возлюби́вый па́че все́х мирски́х красо́т; ра́дуйся, го́рняя бла́га взыска́ти возжеле́вый па́че все́х земны́х добро́т. Ра́дуйся, земна́я и мимотеку́щая в уме́ты вмени́вый; ра́дуйся, восхожде́ния небе́сная в се́рдце твое́м соверши́вый. Ра́дуйся, Адриа́не преподобному́чениче и чудотво́рче преди́вный. Кондак 2 Ви́дев суету́ ми́ра сего́ привре́меннаго, преподо́бне о́тче, оте́чество твое́ и до́м роди́телей твои́х оста́вил еси́, и во гра́д Ки́ев прише́д, во оби́тели Ки́ево-Пече́рстей во и́ночество постриже́н бы́л еси́, подвиза́вся та́мо с преподо́бными, научи́лся еси́ от ни́х благоприя́тно пе́ти Бо́гу: Аллилу́ия. Икос 2 Ра́зум небе́сный тебе́ дарова́ся, преподо́бне о́тче, и жи́тельствуя в оби́тели Ки́ево-Пече́рстей, доброде́тели преподо́бных оте́ц Анто́ния и Феодо́сия стяжа́ти поревнова́л еси́, я́ко бы́ти тебе́ вои́стину насле́днику преподо́бных, досто́йному похва́л таковы́х: Ра́дуйся, треволне́ния мо́ря жите́йскаго безбе́дно избежа́вый; ра́дуйся, во оби́тели Ки́ево-Пече́рстей приста́нище спасе́ния стяжа́вый. Ра́дуйся, и́ноче боголюбе́зный, отверги́йся во́ли своея́ всеце́ло; ра́дуйся, послу́шниче соверше́нный, веле́ния ста́рцев исполне́нием и́х предваря́вый. Ра́дуйся, по́стниче неизнемога́ющий, хле́бом сухи́м пита́выйся; ра́дуйся, трудолю́бче благослове́нный, пра́здность душевре́дную возненави́девый. Ра́дуйся, во смире́нии преуспе́вый; ра́дуйся, в моли́твах и псалмопе́ниих неутоми́мо пребы́вый. Ра́дуйся, ху́дость ри́зную возлюби́вый; ра́дуйся, нищету́ во́льную себе́ усво́ивый. Ра́дуйся, преподо́бных Пече́рских духо́вный учени́че; ра́дуйся, доброде́телей и́х прее́мниче. Ра́дуйся, Адриа́не преподобному́чениче и чудотво́рче преди́вный. Кондак 3 Си́лою Бо́жиею осене́нный, о́тче преблаже́нне, стужи́в молво́ю челове́ческою в оби́тели Ки́ево-Пече́рстей, возжела́л еси́ безмо́лвствовати в оби́тели пусты́нней, и сего́ ра́ди отше́л еси́ в оби́тель Коме́льскую преподо́бнаго Корни́лия, и та́мо водвори́лся еси́, зовы́й в безмо́лвии ду́ха Христу́, Царю́ и Бо́гу: Аллилу́ия. Икос 3 Иму́щи еди́но попече́ние, преподо́бне о́тче, е́же ка́ко спасти́ся и благоугоди́ти Христу́ Бо́гу, зело́ возра́довался еси́, ви́дев оби́тель Коме́льскую, в пусты́ни вне́ молвы́ челове́ческия стоя́вшую, и уста́вы пустынножи́тельныя преподо́бнаго Корни́лия ве́рно соблюда́вшую, те́мже си́це обра́дованному и мы́ сия́ ра́достная прино́сим песноглаше́ния: Ра́дуйся, му́дрый стра́нниче, иски́й оте́чества го́рняго; ра́дуйся, Бо́жий избра́нниче, от ю́га на се́вер пресели́выйся во спасе́ние. Ра́дуйся, жесто́кою стезе́ю ше́ствовавый по́движничества соверше́ннаго; ра́дуйся, неосла́бно труди́выйся во бде́ниих, пе́ниих и поще́ниих. Ра́дуйся, пло́ть ду́ху всеце́ло покори́вый; ра́дуйся, стра́сти в души́ твое́й искорени́вый. Ра́дуйся, сло́вом Бо́жиим пита́выйся, па́че не́же бра́шном ги́блющим; ра́дуйся, слеза́ми моли́твенными питие́ твое́ растворя́вый. Ра́дуйся, моли́твенниче неусы́пающий и благоумиле́нный; ра́дуйся, подви́жниче, благода́тию Бо́жиею приосене́нный. Ра́дуйся, безмо́лвниче, чу́ждый попече́ний жите́йских; ра́дуйся, безстра́стия дости́гнувый, и молчали́вая уста́ име́вый. Ра́дуйся, Адриа́не преподобному́чениче и чудотво́рче преди́вный. Кондак 4 Бу́рное страсте́й мо́ре преплы́л еси́, преподо́бне, и ве́янием Ду́ха Бо́жия в при́стань безстра́стия благода́тнаго дости́гл еси́, е́же ви́дев Коме́льския оби́тели благогове́йный игу́мен Лавре́нтий, во диа́кона тя́ избра́, да слу́жиши олтарю́ Госпо́дню и моли́твы собо́рныя возно́сиши за лю́ди, зовы́й Бо́гу: Аллилу́ия. Икос 4 Слы́шав себе́ похваля́ема от челове́к во оби́тели Коме́льстей, смути́лся еси́ ду́хом, преподо́бне о́тче, и та́йно помышля́л еси́, е́же безмо́лвствовати соверше́нно в пусты́ни, по приме́ру дре́вних преподо́бных оте́ц, и та́мо избежа́ти превозноше́ния челове́ческаго. Таково́му смиренному́дрию твоему́ мы́ дивя́щеся, си́це тебе́ вопие́м: Ра́дуйся, смире́ния высото́ недосяга́емая ми́ра сего́ суето́ю; ра́дуйся, пусты́ни красото́, веселя́щая боголюби́выя ду́ши. Ра́дуйся, насле́дниче святы́х, нра́вы и́х подража́вый; ра́дуйся, подо́бниче а́нгелов, чистото́ю душе́вною просия́вый. Ра́дуйся, Ду́ха Свята́го оби́тель прекра́сная; ра́дуйся, таи́нниче Пресвяты́я Тро́ицы. Ра́дуйся, и́мже побежда́емии рыда́ху ду́си тмы́; ра́дуйся, кре́пкий низложи́телю все́х и́х искуше́ний и привиде́ний. Ра́дуйся, му́жественный победи́телю немощны́я и́х си́лы; ра́дуйся, благода́тию Бо́жиею преиспо́лненный. Ра́дуйся, Адриа́не преподобному́чениче и чудотво́рче преди́вный. Кондак 5 Боготе́чно ше́ствовал еси́, преподо́бне о́тче, а́нгелом Бо́жиим руководи́мый от оби́тели Коме́льския в пусты́ню, Бо́гом тебе́ назна́ченную для по́двигов духо́вных, и егда́ прише́л еси́, та́мо а́нгел, во о́бразе ста́рца тебе́ сопу́тствовавый, внеза́пу неви́дим бы́сть, и позна́л еси́, я́ко спу́тник тво́й не челове́к, но безпло́тный бы́сть. Те́мже со тре́петом воспе́л еси́, а́нгелов и челове́ков Творцу́ пе́снь: Аллилу́ия. Икос 5 Ви́девше красоту́ пусты́ни, Бо́гом тебе́ дарова́нныя, преподо́бне о́тче, возра́довался еси́ ду́хом, и о́браз Пресвяты́я Богоро́дицы та́мо на дре́ве поста́вив, во и́мя Ея́ освяти́л еси́ ме́сто то́, да бу́дет Она́ ему́ Покрови́тельницею и Попечи́тельницею навсегда́, о се́м похваля́юще тя́, си́це тебе́ зове́м: Ра́дуйся, усе́рдный почита́телю Пресвяты́я Богоро́дицы; ра́дуйся, при́сно сла́вителю и́мене Ея́ преблагослове́ннаго. Ра́дуйся, прие́мый от Нея́ извеще́ние хле́бом и ры́бою, пред ико́ною Ея́ обре́тенными, я́ко благоволи́т Она́ к твоему́ начина́нию; ра́дуйся, о се́м преиспо́лнивыйся ра́дости духо́вныя. Ра́дуйся, оби́тель и́ноческую во и́мя Богома́тере в пусты́ни твое́й основа́вый; ра́дуйся, и́ноков пустыннолюби́вых в о́ную собра́вый. Ра́дуйся, до́брый па́стырю ове́ц слове́сных; ра́дуйся, сотвори́вый и научи́вый. Ра́дуйся, ве́лий нарече́нный во Ца́рствии небе́снем; ра́дуйся, к нему́ бо́дренно руководи́вый твоя́ ученики́. Ра́дуйся, назида́вый и́х во спасе́ние сло́вом и житие́м твои́м; ра́дуйся, труди́выйся неле́ностно во сла́ву Бо́жию и во спасе́ние ду́ш челове́ческих. Ра́дуйся, Адриа́не преподобному́чениче и чудотво́рче преди́вный. Кондак 6 Пропове́дник чуде́с Бо́жиих яви́лся еси́, преподо́бне о́тче, прише́д от пусты́ни твоея́ в ца́рствующий гра́д Москву́, иде́же от первосвяти́теля Мака́рия с любо́вию восприя́тый, во иере́я от него́ освяще́н бы́л еси́ и игу́меном оби́тели твоея́ поста́вленный, со мно́гою ми́лостынею в ню́ возврати́лся еси́, благода́рственно взыва́я ко Го́споду: Аллилу́ия. Икос 6 Возсия́л еси́, преподо́бне о́тче, бли́жним и да́льним, я́ко со́лнце пресве́тлое, луча́ми доброде́телей сия́ющее, ду́ши и сердца́ ве́рных духо́вно просвеща́ющее. Те́мже прихожда́ху к тебе́ христолюби́вии лю́дие, наставле́ния и благослове́ния от тебе́ и́щуще, зову́ще и глаго́люще: Ра́дуйся, Ева́нгелия Христо́ва благове́стниче; ра́дуйся, апо́стольских преда́ний храни́телю. Ра́дуйся, правосла́вия наста́вниче; ра́дуйся, благоче́стия учи́телю. Ра́дуйся, гре́шников обличи́телю; ра́дуйся, ка́ющихся с Бо́гом примири́телю. Ра́дуйся, пресла́дкий увеща́телю; ра́дуйся, прекро́ткий наказа́телю. Ра́дуйся, олтаря́ Госпо́дня непоро́чный служи́телю; ра́дуйся, та́инств Бо́жиих досто́йный соверши́телю. Ра́дуйся, моли́твенныя ру́це горе́ со дерзнове́нием содева́вый; ра́дуйся, моли́твы тепле́йшия Го́сподеви возноси́вый. Ра́дуйся, Адриа́не преподобному́чениче и чудотво́рче преди́вный. Кондак 7 Хоте́ние име́л еси́ усе́рдное, преподо́бне о́тче, хра́м Бо́жий во и́мя Пресвяты́я Богоро́дицы честна́го и сла́внаго Ея́ Успе́ния в оби́тели твое́й постро́ити, его́же сооруди́в и освяти́в, безкро́вную же́ртву приноси́л еси́ в не́м Бо́гу, досто́йно и пра́ведно воспева́я Ему́ а́нгельскую пе́снь: Аллилу́ия. Икос 7 Но́вый преподобному́ченик в земли́ Росси́йстей яви́лся еси́, преподо́бне о́тче, непови́нно пострада́в от зло́бных разбо́йник, на оби́тель твою́ напа́дших и тя́ му́ченически истяза́вших, ножа́ми бо те́ло твое́ изра́нивше, огне́м ра́ны твоя́ опаля́ху, та́же к коне́м тя́ привяза́вше, по земли́ влачи́ша и го́рцей сме́рти тя́ преда́ша, е́же мы́ воспомина́юще, си́це тебе́ вопие́м: Ра́дуйся, многотерпели́вый страстоте́рпче; ра́дуйся, му́жественный страда́льче. Ра́дуйся, кро́тко и незло́биво муче́ние лю́тое претерпе́вый; ра́дуйся, за му́чивших тя́ Бо́га моли́вый. Ра́дуйся, ножа́ми уязвля́емый и огне́м опаля́емый не возстена́вый; ра́дуйся, моли́твенно о по́мощи к Бо́гу вопия́вый. Ра́дуйся, му́ченическую сме́рть ми́рно восприя́вый; ра́дуйся, святу́ю ду́шу твою́, ко́нми по земли́ влачи́мый, Го́сподеви преда́вый. Ра́дуйся, житие́ земно́е до́блественне сконча́вый; ра́дуйся, вене́ц нетле́нный от Го́спода получи́вый. Ра́дуйся, я́ко про́чее не ко́снется тебе́ ни боле́знь, ни му́ка; ра́дуйся, я́ко ве́чно ра́дуешися со святы́ми. Ра́дуйся, Адриа́не преподобному́чениче и чудотво́рче преди́вный. Кондак 8 Стра́нное и пресла́вное чу́до яви́ Госпо́дь над моща́ми твои́ми, преподо́бне о́тче, разбо́йниками из оби́тели твое́й увезе́нными и в пусты́ни безве́стне в земли́ сокрове́нными: дре́во бо чудотво́рное над ни́ми возрасте́, его́же ве́тви и плоды́ исцеля́ху вся́кия боле́зни в лю́дех, и́же моля́щеся сла́вляху Бо́га и вопия́ху Ему́: Аллилу́ия. Икос 8 Ве́сь наро́д недоумева́ше, отку́ду дре́ву безду́шному такова́я благода́ть целе́бная даде́ся, до́ндеже по смотре́нию Бо́жию откры́ся, я́ко у корне́й сего́ дре́ва святы́я мо́щи твоя́ почива́ху, многострада́льный уго́дниче Бо́жий, ублажа́емый от ве́рных зва́нии таковы́ми: Ра́дуйся, чуде́с пучи́но Бо́гом излия́нная; ра́дуйся, целе́бниче благи́й неду́гов челове́ческих. Ра́дуйся, дре́во сладкоплодови́тое, и́мже напита́шася ве́рнии; ра́дуйся, дре́во благосенноли́ственное, и́мже покрыва́ются мно́зи. Ра́дуйся, иска́вшим тя́ неявле́нный; ра́дуйся, неве́давшим тя́ откры́тый. Ра́дуйся, сокро́вище драго́е в пусты́ни сокрове́нное; ра́дуйся, би́сере многоце́нный от не́др земны́х возсия́вый. Ра́дуйся, обре́тением моще́й твои́х оби́тель твою́ духо́вне возвесели́вый; ра́дуйся, сиротство́ ея́ уте́шивый. Ра́дуйся, лише́ние ея́ благода́тно воспо́лнивый; ра́дуйся, бли́жним и да́льним ми́лость твою́ целе́бную всеще́дро дарова́вый. Ра́дуйся, Адриа́не преподобному́чениче и чудотво́рче преди́вный. Кондак 9 Вси́ и́ноцы оби́тели твоея́, преподо́бне о́тче, возвесели́шася ра́достию свято́ю егда́ честны́я мо́щи твоя́ от пусты́ни со сла́вою и псалмопе́нием во о́ную принесо́шася, и во хра́ме Богома́тере благоле́пно положи́шася, и́хже пренесе́ние све́тло пра́зднующе, хвале́бно вопия́ху ко Го́споду: Аллилу́ия. Икос 9 Вети́йство на́ше пе́сненное не довле́ет к досто́йному прославле́нию твои́х мно́гих чуде́с, преподобному́чениче Адриа́не приснопа́мятне: оба́че ты́, я́ко бла́г и милосе́рд, не возгнуша́йся на́ших недовле́ющих похва́л, но ми́лостивно услы́ши с любо́вию тебе́ зову́щих: Ра́дуйся, но́вый Росси́йский целе́бниче; ра́дуйся, все́х преподо́бных Росси́йских сподви́жниче. Ра́дуйся, Анто́ния Пече́рскаго подража́телю; ра́дуйся, Феодо́сия Пече́рскаго соревнова́телю. Ра́дуйся, Се́ргию Ра́донежскому равноче́стне; ра́дуйся, Варлаа́му Ху́тынскому единонра́вне. Ра́дуйся, подо́бне Авраа́мию Росто́вскому неви́димаго веле́са сокруши́вый; ра́дуйся, подо́бне Корни́лию Коме́льскому пусты́ню духо́вне уплодоноси́вый. Ра́дуйся, Мака́рия Желтово́дскаго великоду́шие стяжа́вый; ра́дуйся, Дими́трия Прилу́цкаго благода́тныя да́ры получи́вый. Ра́дуйся, Зоси́ме Солове́цкому нра́вом пустыннолю́бным соравни́выйся; ра́дуйся, Савва́тию Солове́цкому упова́нием на Бо́га уподо́бивыйся. Ра́дуйся, Адриа́не преподобному́чениче и чудотво́рче преди́вный. Кондак 10 Спасе́ние ве́чное унасле́довал еси́, уго́дниче Бо́жий, и за страда́ния вре́менная получи́л еси́ блаже́нство ве́чное: обита́еши бо со а́нгелы и все́ми святы́ми во сла́ве невече́рней, и сла́дце пое́ши во гла́се ра́дования и весе́лия побе́дную пе́снь Христу́ Бо́гу: Аллилу́ия. Икос 10 Стена́ еси́ защище́ния ве́рным, чудотво́рче святы́й, и все́м с любо́вию соверша́ющим па́мять твою́ засту́пник и покрови́тель быва́еши, неду́жныя исцеля́еши, скорбя́щия утеша́еши, и все́х подвиза́еши зва́ти тебе́: Ра́дуйся, свети́льниче пресве́тлый, мра́к страсте́й прогоня́ющий; ра́дуйся, исто́чниче многово́дный исцеле́ний благода́тных. Ра́дуйся, реко́ приснотеку́щая чуде́с; ра́дуйся, цве́те нетле́ния, святу́ю Росси́йскую Це́рковь облагоуха́вый. Ра́дуйся, ми́лования и врачева́ния пода́телю всеще́дрый; ра́дуйся, любве́ и сострада́ния прояви́телю всебога́тый. Ра́дуйся, земноро́дным засту́пниче небе́сный; ра́дуйся, правосла́вным предста́телю неле́стный. Ра́дуйся, пусты́ни прекра́сное прозябе́ние; ра́дуйся, оби́тели твоея́ при́сное ра́дование. Ра́дуйся, сто́лпе правосла́вия непоколеби́мый; ра́дуйся, покро́ве, некры́ющийся от на́шего претыка́ния. Ра́дуйся, Адриа́не преподобному́чениче и чудотво́рче преди́вный. Кондак 11 Пе́ние хвале́бное тебе́ прино́сим, уго́дниче Бо́жий, преди́вный в чудесе́х, и с любо́вию соверша́ем пресве́тлое торжество́ твоего́ му́ченическаго убие́ния и пресла́внаго моще́й твои́х обре́тения и пренесе́ния, ра́дующеся о твое́м прославле́нии в ли́це святы́х и зову́ще Бо́гу ди́вно в тебе́ просла́вльшемуся: Аллилу́ия. Икос 11 Светопода́тельный свети́льник Бо́жией благода́ти явля́ешися на́м, преподобному́чениче преблаже́нне, во мно́зех и преди́вных твои́х чудесе́х, я́же удостоверя́ют на́с в твое́й свя́тости и бли́зости ко Го́споду, Ему́же помоли́ся за ны́ гре́шныя, усе́рдием си́це тебе́ зову́щия: Ра́дуйся, алава́стре многоцеле́бный на вся́к неду́г врачевство́ содержа́щий; ра́дуйся, ма́слино благопло́дная, еле́й Бо́жией благода́ти оби́льно на́м источа́ющая. Ра́дуйся, благоуха́нный кипари́се, зно́й страсте́й на́м прохлажда́ющий; ра́дуйся, кри́не пусты́нный, духо́вне на́с увеселя́ющий. Ра́дуйся, со́ль земли́ Росси́йския, я́же никогда́же обуя́ет; ра́дуйся, све́тлое зерца́ло доброде́телей. Ра́дуйся, пра́вило и́ноческаго богоуго́дного жития́; ра́дуйся, о́браз терпе́ния и незло́бия. Ра́дуйся, кро́ткий Христо́в после́дователю; ра́дуйся, прии́скренний Иису́сов люби́телю. Ра́дуйся, сы́не благослове́нный Отца́ Небе́снаго; ра́дуйся, дру́же святы́х, при́сный Бо́гу. Ра́дуйся, Адриа́не преподобному́чениче и чудотво́рче преди́вный. Кондак 12 Благода́ти прича́стная ра́ка святы́х и многоцеле́бных моще́й твои́х, Адриа́не преблаже́нне, я́ко но́вая купе́ль Силоа́мская на́м явля́ется, к не́йже приходя́ще неду́жнии здра́ви возвраща́ются, и вся́ким боле́знем исцеле́ние от нея́ подае́тся твои́ми моли́твами ко Го́споду, чудотво́рче святы́й, Ему́же пое́м о тебе́ хвале́бную пе́снь: Аллилу́ия. Икос 12 Пою́ще мно́гая и пресла́вная чудотворе́ния твоя́, Адриа́не преподо́бне, хва́лим, сла́вим и велича́ем просла́вльшаго тя́ и ди́внаго во святы́х Свои́х Бо́га на́шего, Иже дарова́ на́м тебе́ целе́бника благода́тнаго и засту́пника ми́лостиваго, тебе́ от любве́ серде́чныя си́це вопие́м: Ра́дуйся, Пресвяты́я Тро́ицы ве́рный уго́дниче; ра́дуйся, Пресвяты́я Богоро́дицы изря́дный слуго́. Ра́дуйся, а́нгельских во́инств собесе́дниче; ра́дуйся, Предте́чи пустыннолюби́вый подража́телю. Ра́дуйся, проро́ков Бо́жиих единоревни́телю; ра́дуйся, апо́столов Христо́вых после́дователю. Ра́дуйся, му́ченических полко́в украше́ние; ра́дуйся, бо́лий в ли́це преподо́бных. Ра́дуйся, пра́ведных сонасле́дниче; ра́дуйся, все́х святы́х сожи́телю. Ра́дуйся, телеса́ на́ша безме́здне врачу́яй; ра́дуйся, ду́ши на́ша моли́твами твои́ми спаса́яй. Ра́дуйся, Адриа́не преподобному́чениче и чудотво́рче преди́вный. Кондак 13 О, вели́кий уго́дниче Бо́жий, преподобному́чениче и чудотво́рче Адриа́не! Ны́нешнее на́ше моле́ние ми́лостиво прие́м, моли́ Триеди́наго Бо́га изба́вити на́с от бе́д вре́менных и ве́чных, да, изба́вльшеся муче́ний а́дских моли́твами твои́ми, блаже́нство ра́йское унасле́дуем и со святы́ми воспое́м Ему́ пе́снь хвалы́ и благодаре́ния: Аллилу́ия.[Се́й конда́к глаго́лется три́жды.][Далее повторяем 1‑е икос и кондак:]Икос 1 Ангела земна́го и челове́ка небе́снаго явля́еши на́м в житии́ твое́м, преподо́бне о́тче. Те́мже а́нгельскими глаго́лы подоба́ше восхваля́ти тя́ по достоя́нию, но мы́ любо́вию к тебе́ подвиза́еми, а́ще челове́ческими гла́сы со усе́рдием си́це тебе́ взыва́ем: Ра́дуйся, роди́телей благочести́вых ча́до благо́е; ра́дуйся, вели́каго Росто́ва прозябе́ние свято́е. Ра́дуйся, Бо́гу Отцу́ усыновле́нный в святе́м креще́нии; ра́дуйся, Бо́гу Сы́ну соедини́выйся во святе́м причаще́нии. Ра́дуйся, Бо́га Ду́ха Свята́го да́ры прие́мый в святе́м миропома́зании; ра́дуйся, от пеле́н Бо́гу освяще́нный Боже́ственных та́инств благода́тию. Ра́дуйся, пе́щь страсте́й ю́ностных угаси́вый воздержа́нием; ра́дуйся, пло́ть томя́щую сокруши́вый посто́м и бде́нием. Ра́дуйся, и́го Христо́во и бре́мя Его́ ле́гкое возлюби́вый па́че все́х мирски́х красо́т; ра́дуйся, го́рняя бла́га взыска́ти возжеле́вый па́че все́х земны́х добро́т. Ра́дуйся, земна́я и мимотеку́щая в уме́ты вмени́вый; ра́дуйся, восхожде́ния небе́сная в се́рдце твое́м соверши́вый. Ра́дуйся, Адриа́не преподобному́чениче и чудотво́рче преди́вный. Кондак 1 Взбра́нный от Царя́ си́л Го́спода Иису́са, воево́до во́инов духо́вных, и кре́пкий победи́телю враго́в неви́димых, Адриа́не преподо́бне, пострада́вый непови́нно и стяжа́вый дерзнове́ние ко Го́споду, от вся́ких на́с бе́д свободи́ благоприя́тными твои́ми моли́твами, да, сла́вяще тя́, засту́пника на́шего, хвале́бно тебе́ зове́м: Ра́дуйся, Адриа́не преподобному́чениче и чудотво́рче преди́вный.

Кондак 1 Избранней от всех родов Пресвятей Деве и Божией Матери похвальное приносим пение пред чудотворною иконою преславного рождества Твоего Богородице. Ты же, Пречистая, имущая о нас благое промышление, от всяких бед, скорбей и постыдныя смерти свободи, да во умиленнии зовем Ти: Радуйся, Пресвятая Дево, рождеством Своим радость спасения миру возвестившая. Икос 1 Ангел Предстатель Престолу Вседержителя послан бысть возвестити неплодным родителям о рождестве Твоем, Владычице, и Ангелов воинство ныне на небеси славит Тя, Честнейшую Херувим и Матерь Бога нашего. Мы же земнороднии, рождеству Твоему и явлению иконы радующеся, аще и бренными усты похвальная приносим Ти таковая: Радуйся, Непорочная, праведными родителями рожденная; Радуйся, Дщерь земная, в Матерь Божию благословенная. Радуйся, неплодия радостное разрешение; Радуйся, родителей-старцев великое утешение. Радуйся, молитвою у Бога испрошенная; Радуйся, Святая, святыми воспитанная. Радуйся, Иоакима и Анны чудное прозябение; Радуйся, мирови верное спасение. Радуйся, силою Вышняго осененная; Радуйся, Славо небес превознесенная. Радуйся, радости приятелище, праматернюю клятву разрушившая; Радуйся, Рождшимся из Тебе древняго змия победившая. Радуйся, Пресвятая Дево, рождеством Своим радость спасения миру возвестившая. Кондак 2 Видевши в рождестве Твоем избавление поношения безчадства, праведнии родители Твои слависта Бога. Темже и мы, подражающе им, благопокорно хощем носити поношение злословящих нас, Сына Твоего ради, православно исповедуя и славя святое Имя Его, поюще: Аллилуиа. Икос 2 Разум Ангельский недоумеваше о рождестве Твоем, о тайне воплощения Сына Божия, како неискусобрачная Дева возможет имети зачатие. Ныне же вси верующии, уразумевше тайну Божественнаго смотрения о спасении рода человеческаго, славят девство Твое, Пречистая, усердно взывающе Тебе таковая: Радуйся, сбытие пророческих вещаний; Радуйся, Дево, исполнение благих желаний. Радуйся, Святая и Пренепорочная в девах; Радуйся, Богом избранная в женах. Радуйся, от младенчества Богу посвященная; Радуйся, Духом Святым приосененная. Радуйся, новый и живый кивоте, во святая Святых хранимый; Радуйся, Неувядаемый Цвете, достойно хвалимый. Радуйся, Архангелы и Ангелы посещаемая; Радуйся, небесною пищею питаемая. Радуйся, святостию паче всех просиявшая; Радуйся, в девственную утробу Господа приявшая. Радуйся, Пресвятая Дево, рождеством Своим радость спасения миру возвестившая. Кондак 3 Сила Вышняго, осенившая Иоакима и Анну, разрешила заматоревшее их неплодие, помяну бо Господь смирение рабов Своих. Сего ради почитающе праведных родителей Твоих, Пречистая, молимся, да разрешится их молитвами и Твоим заступлением неплодие добродетелей наших ко умножению молитвы и смирения, терпения и воздержания, благодатию всех благ Подателя Бога, Ему же поем: Аллилуиа. Икос 3 Имущи великое смирение, достойна избранна была еси, Пресвятая Дево, Матерь Христу Богу, Спасителю нашему, туне являя нам многия благодеяния, имиже наслаждающеся, благодарственно воспеваем пение: Радуйся, смиренная Рабо Господня, нас смирению научающая; Радуйся, рабом Божиим помогающая. Радуйся, младенцев благодатное хранение; Радуйся, юношей мудрое наставление. Радуйся, матерей радостное похваление; Радуйся, сущим в браке любовное единомыслие. Радуйся, добрых к добру влечение; Радуйся, злых сердец умягчение. Радуйся, Подательнице Божественныя благости; Радуйся, Виновнице всякия радости. Радуйся, Своею помощию земнородных взыскавшая; Радуйся, под кров Свой христиан приявшая. Радуйся, Пресвятая Дево, рождеством Своим радость спасения миру возвестившая. Кондак 4 Бури страстей и напастей наших Господь хотя утолити, в честней иконе рождества Твоего явил нам Тя, Богородице, Ходатаицу. Сего ради ближних и дальних Твоя чудеса исповедывать собрала еси, Благодеющему же Богу взывати: Аллилуиа. Икос 4 Слышавше о иконе Твоей, Богородице, вси верующии притекают в надежде Твоего заступления, никто бо отходит от нея тощь, и не может по достоянию блажити Тя, Владычице, обаче приими благодарное хваление наше: Радуйся, Богоизбранная, рождеством Своим возвеселившая родителей; Радуйся, благое научение детоводителей. Радуйся, разума духовного подательнице; Радуйся, соблазнителей карательнице. Радуйся, скорбями грехи очищающая; Радуйся, от скорбей малодушных избавляющая. Радуйся, ангельскому житию нас научающая; Радуйся, благами небесными от благ земных отвлекающая. Радуйся, борющихся с соблазнами верное укрепление; Радуйся, изнемогающих в борьбе и подвигах скорое поможение. Радуйся, Благодатная, явлением иконы благодать нам явившая; Радуйся, ею же чудеса велия сотворившая. Радуйся, Пресвятая Дево, рождеством Своим радость спасения миру возвестившая. Кондак 5 Боготечная звезда бысть святая икона Твоя, Богородице, егда невидимо шествова вспять из окрестных градов на место явления, таковому чуду дивящеся, Господу Богу похвальная приносим: Аллилуиа. Икос 5 Видя Архипастырь Кирилл троекратное чудесна возвращение иконы Твоея из града Севска на место явления, познает, яко не удержит ю во граде своем, и в прославление иконы рождества Твоего абие создает храм и благоустрояет обитель. Таковому промышлению Твоему о нас радующеся, Тебе, Покровительнице нашей, гласом радования взываем: Радуйся, Владычице, человеческому самоволию не благоволившая; Радуйся, неугодное Тебе людское желание разорившая. Радуйся, Ангелы носимая; Радуйся, родом человеческим хвалимая. Радуйся, воздуха благодатное освящение; Радуйся, губительных поветрий очищение. Радуйся, дожди благовременные к плодоношению земли посылающая; Радуйся, вредное многодождие прекращающая. Радуйся, пажити наша от всякаго вреда сохраняющая; Радуйся, и нас всех ко благу наставляющая. Радуйся, всю вселенную просветившая; Радуйся, умерщвленныя страстьми оживившая. Радуйся, Пресвятая Дево, рождеством Своим радость спасения миру возвестившая. Кондак 6 Проповедуют чудеса богатство благодати Царицы Матере, от дивныя иконы бывшия, не оставляет бо Пречистая Богородица с верою притекающих к Ней и избавляет их от всякия напасти. Темже, Богородице Деве, благодарственная Тебе восписуя, Всещедрому Богу присно славу возсылаем: Аллилуиа. Икос 6 Возсия, яко крин в пустыни, явленная икона Твоя, Богородице, подающе всем благопотребную помощь, обаче не благоволила есть противящимся воле Твоей: наказа смертию сгубившаго древо, на нем же икона Твоя явися. Сего ради со страхом и умилением рцем вси: Радуйся, Царице, непокорных воле Твоей наказующая; Радуйся, человеческое мудрование отсекающая. Радуйся, человеческую злобу укрощающая; Радуйся, Судию Праведнаго о грехах наших умоляющая. Радуйся, тела моего врачевание; Радуйся, души моея спасение. Радуйся, упование мое в жизни сей; Радуйся, надеждо по смерти моей. Радуйся, Тобою бо от вечныя смерти избавляемся; Радуйся, Тобою бо блаженныя жизни сподобляемся. Радуйся, иноческия обители имени Своего во отечестве нашем обильно насадившая; Радуйся, благочестие в сердцах верных укрепившая. Радуйся, Пресвятая Дево, рождеством Своим радость спасения миру возвестившая. Кондак 7 Хотяще милость Свою явити христианскому роду, даровала еси нам пречудную икону рождества Твоего, Богородице, да вси радующеся о Твоих благодеяниях, аще и недостойни суще, Ангельскую песнь поем Христу Спасителю нашему: Аллилуиа. Икос 7 Новый источник благодати явила еси нам, Владычице, егда избавила еси град Глухов от смертоносныя язвы, наставляющи нас прибегати к скорой благодатной Помощнице в бедах и болезнех, во еже звати Тебе: Радуйся, Богообрадованная, печальных и плачущих присное утешение; Радуйся, кающихся грешников прощение. Радуйся, исцелений неоскудеваемое сокровище; Радуйся, труждающихся тихое покоище. Радуйся, обидимых заступающая; Радуйся, обидящих вразумляющая. Радуйся, оклеветанных оправдание; Радуйся, погибающих взыскание. Радуйся, градов и весей упование; Радуйся, наше непостыдное возвание. Радуйся, иконам Своим благодать даровавшая; Радуйся, верных Господеви сочетавшая. Радуйся, Пресвятая Дево, рождеством Своим радость спасения миру возвестившая. Кондак 8 Странно рождество Твое от неплодия престарелых родителей; яко же странно и явление иконы Твоея, Владычице, обаче Бог, идеже хощет, побеждается естества чин, глаголет бо: «Невозможная у человек, возможна суть у Бога». Сего ради чудодействующему нам Всемогущему Промыслителю возносим хвалу: Аллилуиа. Икос 8 Вся тварь о Тебе радуется, Благодатная, Ангельский Собор и человеческий род светло торжествует преславное рождество Твое. Ты же, яко Царица небесе и земли, приими моление рабов Твоих, покланяющихся честному образу Твоему и любовию вопиющих: Радуйся, Преблагословенная, Ангелов честнейшая; Радуйся, без сравнения Серафим славнейшая. Радуйся, по Бозе Святейшая всех Святых; Радуйся, краснейшая паче дщерей земных. Радуйся, Царице, Престолу Царя славы предстоящая; Радуйся, молитвы Ему о нас приносящая. Радуйся, храмов Божиих великолепное украшение; Радуйся, притекающих к Тебе истинное утешение. Радуйся, во иконах Твоих ризами златыми одеянная; Радуйся, каменями драгими испещренная. Радуйся, вся добродетели в Себе вместившая; Радуйся, воплощению Сына Божия послужившая. Радуйся, Пресвятая Дево, рождеством Своим радость спасения миру возвестившая. Кондак 9 Всякаго естества Ангельскаго высшая в горних обителях владычествуеши, Богородице, но и дольних не оставляеши, защищающи святою иконою обитель нашу и вся к Тебе прибегающая, тем же Тя верховную Покровительницу нашу молим, облагодати нас умом и сердцем Источнику спасения усердно взывати: Аллилуиа. Икос 9 Витии суемудреннии недоумевают, како прибегающе к иконе Твоей вернии приемлют Божественную благодать; мы же, извещены бывше глаголом Господним, яко вся возможно верующему, несумненно притекаем к чудотворней иконе Твоей в надежде Божественнаго благопотребнаго воздания. Тем же, теплое заступление Твое о нас ведуще глаголем: Радуйся, Богородице правоверущия возносящая; Радуйся, неверующия наставляющая. Радуйся, суеверие и невежество отметающая; Радуйся, заблудшия право веровати научающая. Радуйся, к познанию истины приведение; Радуйся, нераскаянных грешников устрашение. Радуйся, никому же погибели хотящая; Радуйся, и отчаянных к упованию приводящая. Радуйся, невидимых врагов наших мучение; Радуйся, видимых врагов наших посрамление. Радуйся, веру нашу чудесами утвердившая; Радуйся, гнев Божий, праведно движимый на ны, многократно утолившая. Радуйся, Пресвятая Дево, рождеством Своим радость спасения миру возвестившая. Кондак 10 Спасения нашего начало бысть славное рождество Твое, Богородице, явленная же икона Твоя бысть началом спасения иноков на месте сем, идеже верующие притекают к Тебе, тепле моляся: «Не забуди нас, Владычице, вся полезная душам подающи, да спасаемии Тобою Подвигоположнику и Спасителю нашему поем: Аллилуиа». Икос 10 Стена нерушимая еси всем, к Тебе и иконе Твоей прибегающим, не имамы бо инаго упования по Бозе, разве Тебе, Владычице, Ты нам прибежище и сила в скорбех, обретших ны зело, избавляющи ны от всякия напасти, и Тебе, Радосте наша, взываем: Радуйся, Пречистая, с небес на христиан призирающая; Радуйся, от бед обитель нашу избавляющая. Радуйся, постников не изнемогающее воздержание; Радуйся, добродетелей наших стяжание. Радуйся,страстей укрощение; Радуйся, кающихся исправление. Радуйся, искушений прогнание; Радуйся, падших восстание. Радуйся, злосмрадие грехов удаляющая; Радуйся, благоуханием святости снабдевающая. Радуйся, основание обители нашея положившая; Радуйся, Пресвятая Дево рождеством Своим радость спасения миру возвестившая. Кондак 11 Пение всеусердное приносим Ти, Владычице, о Твоих великих благодеяниях бывших на нас, обаче ничтоже совершаем достойно о всех, яже подаеши нам, Сыну Твоему вопиющим: Аллилуиа. Икос 11 Светоприемную свещу зрим цельбоносную икону Твою, Пречистая, благодатию нам возжженную, просвещающую вся концы на спасение всем, с верою прибегающим, сего ради Тя явившую христианам многия знамения, звании почитаем сими: Радуйся, Путеводительнице, на путь спасения наставляющая; Радуйся, Вратарнице, двери райския верным отверзающая. Радуйся, Благоуханный Цвете, в горном Сионе благоухающий; Радуйся, Живоносный Источниче, обильно благодать источающий. Радуйся, нерушимая стено, православие укрепляющая; Радуйся, Неопалимая Купино, от огненнаго запаления избавляющая. Радуйся, Заступнице, Сыну Своему о нас вопиющая; Радуйся, Скоропослушнице, скорую помощь нуждающим подающая. Радуйся, всех скорбящих Радосте; Радуйся, жизни нашея духовныя сладосте. Радуйся, Милостивая, милость Свою многократно явившая; Радуйся, многия от бед и мук свободившая. Радуйся, Пресвятая Дево, рождеством Своим радость спасения миру возвестившая. Кондак 12 Благодать Божия преисполни Тя в рождестве Твоем, Благодатная, юже иконою Своею выну изливаеши нам, с верою прибегающим к заступлению Твоему и благодарственная Милосердному Богу приносящим: Аллилуиа. Икос 12 Поюще Твое рождество, почитаем, чудотворную икону Твою, славим о нас вся чудеса Твоя и, научившеся за благодеяния благодарственно блажити святое имя Твое, взываем Благословенней в женах: Радуйся, Заре Царя славы Божественною красотою сияющая; Радуйся, вся концы вселенныя озаряющая. Радуйся, архангельский глас о воплощении Еммануила приемшая; Радуйся, невместимаго всеми Бога во утробе Своей вместившая. Радуйся, наитием Духа Святаго обетованнаго Мессию родившая; Радуйся, Солнце Правды миру явившая. Радуйся, Богом данная христианам Предстательнице; Радуйся, неусыпающая о нас Молитвеннице. Радуйся, на земле родом человеческим хвалимая; Радуйся, на небеси святыми превозносимая. Радуйся, прародительский грех упразднившая; Радуйся, благоплодие душевное обогатившая. Радуйся, Пресвятая Дево, рождеством Своим радость спасения миру возвестившая. Кондак 13 О, Всепетая Дево, рождшая всех святых Святейшая в женах, в похвалу рождества Твоего приими малое сие моление, Христа Бога о нас умоли избавити от всякия напасти, и вечныя муки нас свободи, Богу о Тебе вопиющих: Аллилуиа, Аллилуиа, Аллилуиа.[Се́й конда́к глаго́лется три́жды.][Далее повторяем 1‑е икос и кондак:]Икос 1 Ангел Предстатель Престолу Вседержителя послан бысть возвестити неплодным родителям о рождестве Твоем, Владычице, и Ангелов воинство ныне на небеси славит Тя, Честнейшую Херувим и Матерь Бога нашего. Мы же земнороднии, рождеству Твоему и явлению иконы радующеся, аще и бренными усты похвальная приносим Ти таковая: Радуйся, Непорочная, праведными родителями рожденная; Радуйся, Дщерь земная, в Матерь Божию благословенная. Радуйся, неплодия радостное разрешение; Радуйся, родителей-старцев великое утешение. Радуйся, молитвою у Бога испрошенная; Радуйся, Святая, святыми воспитанная. Радуйся, Иоакима и Анны чудное прозябение; Радуйся, мирови верное спасение. Радуйся, силою Вышняго осененная; Радуйся, Славо небес превознесенная. Радуйся, радости приятелище, праматернюю клятву разрушившая; Радуйся, Рождшимся из Тебе древняго змия победившая. Радуйся, Пресвятая Дево, рождеством Своим радость спасения миру возвестившая. Кондак 1 Избранней от всех родов Пресвятей Деве и Божией Матери похвальное приносим пение пред чудотворною иконою преславного рождества Твоего Богородице. Ты же, Пречистая, имущая о нас благое промышление, от всяких бед, скорбей и постыдныя смерти свободи, да во умиленнии зовем Ти: Радуйся, Пресвятая Дево, рождеством Своим радость спасения миру возвестившая. Молитва 1-я О, Пресвятая Владычице, Христа Спасителя нашего Богоизбранная Мати, у Бога святыми молитвами праведных родителей испрошенная, Богу посвященная, и Богом возлюбленная. Кто Тебе не ублажит, или кто не воспоет Твоего преславного рождества? Рождество бо Твое бысть началом спасения человеком и мы, сидящии во тьме согрешений, зрим Тя неприступнаго Света жилище. Сего ради витийствующий язык не может песнословити Тя по достоянию, паче бо Серафим возвысилася еси Пречистая; обаче приими недостойных рабов Твоих нынешнее похваление и не отрини мольбы наша, Твое величие исповедуем, Тебе во умилении припадаем и скорую в заступлении чадолюбивую и благосердую Матерь дерзновенно просим: умоли Сына Твоего и Бога нашего даровати нам, много согрешающим, искреннее покаяние и благочестное житие, да возможем творити вся Богу угодная и душам нашим полезная, и к тому возненавидим вся злая, укрепляемии Божественною благодатию во благом произволении нашем. Ты, непостыдная Надеждо наша в час смерти, даруй нам христианскую кончину, безбедное шествие на страшных мытарствах воздушных и наследие вечных, неизреченных благ Царствия Небеснаго, да со всеми святыми немолчно исповедуем Твое о нас заступление и да славим Единаго Истиннаго Бога, во Святей Троице покланяемаго Отца и Сына и Святаго Духа. Аминь. Молитва 2-я Преблагословенная Дево Марие, Царице небесе и земли, Твоему чудотворному образу припадающе, умильно глаголем: призри милостиво на рабы Твоя и Твоим всесильным ходатайством ниспосли комуждо потребная: вся верныя чада Святыя Церкви спаси, неверныя обрати, заблудшия на путь правый настави, старость и слабость сил поддержи, юных в вере святой возрасти, мужей ко благу направи; грешников к покаянию приведи и всех христиан мольбы услыши; болящия уврачуй, скорби утоли, путешествующим спутешествуй. Ты веси, Всемилостивая, яко немощни, яко грешни, яко озлобляеми и достойни прещения Божия; обаче буди нам на помощь, да ни коим грехом самолюбия, соблазна и диавольскаго прельщения прогневаем Бога. Тя имамы Предстательницу, Юже не отринет Господь, аще бо восхощеши, вся даровати нам можеши, яко благодатный источник верно поющих Тя и превозносящих преславное Твое рождество. Избави, Владычице, грехопадений и бед всех благочестно призывающих Святое Имя Твое и покланяющихся честному образу Твоему, Ты бо молитвами Своими, беззакония наша туне очищаеши. Темже Тебе припадаем и паки вопием: отжени от нас всякаго врага и супостата, всякия напасти и губительныя поветрия, молитвами Своими подающи дожди благовременны и земли обильное плодоприношение; вложи в сердца наша страх Божественный ко исполнению заповедей Господних, да вси в христианской любви, благочестии и чистоте благоденственно, тихо и мирно поживем во спасение душ наших, во благо ближних и во славу Господа. Ему бо, яко Творцу, Промыслителю и Спасителю нашему всякая подобает слава, честь и поклонение ныне, и присно, и во веки веков. Аминь.

Минея, 16 Мая, Кано́н, его́же краегране́сие: Пою́ Бо́гу тя да́ра свяще́нна Глас 2 Песнь 1 Ирмос: Во глубине́ постла́ иногда́/ фараони́тское всево́инство преоруже́нная си́ла,/ вопло́щшееся же Сло́во всезло́бный грех потреби́ло есть,/ препросла́вленный Госпо́дь, сла́вно бо просла́вися. Припев: Преподо́бне о́тче Фео́доре, моли́ Бо́га о на́с. Песнопе́нии хотя́щему твое́ пе́ти ны́не торжество́,/ Боже́ственных даро́в я́ко сый тезоимени́т,/ дар пода́ждь ми светоно́сен,/ от сокро́вищ почерпа́я неиздае́мых благода́ть Боже́ственную, всеприснопа́мятне. Сла́ва Отцу́ и Сы́ну и Свято́му Ду́ху. Поуча́яся зако́ну приле́жно, о́тче, чи́стому,/ весь чист и пречи́ст был еси́,/ Всечи́стому же Сло́ву совокупля́яся,/ чистоты́ све́тел сосу́д показа́лся еси́ и освяще́н, всеблаже́нне. И ны́не и при́сно и во ве́ки веко́в. Ами́нь. Богородичен: Умертви́в себе́ ми́ру,/ жизнь, о́тче, равноа́нгельну на земли́ благоче́стно проходя́,/ Возсия́вшему от ложе́сн деви́ческих после́довал еси́,/ крест твой на ра́мо взем, Богому́дре преблаже́нне. Песнь 3 Ирмос: Процвела́ есть пусты́ня, я́ко крин, Го́споди,/ язы́ческая неплодя́щая, Це́рковь/ прише́ствием, Твои́м,/ в не́йже утверди́ся мое́ се́рдце. Припев: Преподо́бне о́тче Фео́доре, моли́ Бо́га о на́с. Я́ко дар люби́м, Влады́це, преподо́бне,/ твою́ ду́шу, Фео́доре, спаса́ему/ и воздержа́нием от страсте́й измене́нну прине́сл еси́. Сла́ва Отцу́ и Сы́ну и Свято́му Ду́ху. Бо́гу освяще́н, превозше́л еси́, всему́дре, зри́мых чу́вство,/ чи́стым же умо́м бесе́довал еси́ уму́ превы́спреннему, преблаже́нне. И ны́не и при́сно и во ве́ки веко́в. Ами́нь. Богородичен: Удали́лся еси́ в пусты́ни, бе́гая, сла́вне,/ и́же от Де́вы просия́вшаго Бо́га Сло́ва ты прии́м,/ о Не́мже и спа́слся еси́, досточу́дне. Седален, глас 3 Боже́ственною си́лою оде́ян,/ обнажи́л еси́ полки́ супроти́вных сил, Богоно́се,/ и, доброде́телей просия́в све́тлостию,/ исцеле́ний зарю́ облиста́л еси́, о́тче преподо́бне:/ Христа́ Бо́га моли́ дарова́ти нам ве́лию ми́лость. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Боже́ственная ски́ния была́ еси́ Сло́ва,/ еди́на Пречи́стая Ма́ти Де́во, чистото́ю А́нгелы превозше́дшая,/ па́че всех мене́, персть бы́вша, оскверне́на плотски́ми прегреше́ньми,/ очи́сти моли́тв Твои́х Боже́ственными вода́ми,/ подаю́щи, Чи́стая, ве́лию ми́лость. Песнь 4 Ирмос: Прише́л еси́ от Де́вы, не хода́тай, ни А́нгел,/ но Сам, Го́споди, вопло́щся,/ и спасл еси́ всего́ мя, челове́ка./ Тем зову́ Ти: сла́ва си́ле Твое́й, Го́споди. Припев: Преподо́бне о́тче Фео́доре, моли́ Бо́га о на́с. Купносе́льник Пахо́мию Боже́ственному быв,/ нра́вы подража́л еси́, о́тче Богому́дре Фео́доре,/ того́ воздержа́нию и правосла́вней ве́ре подо́бяся. Припев: Преподо́бне о́тче Фео́доре, моли́ Бо́га о на́с. Пева́емаго Ца́рства и Боже́ственнаго сия́ния, досто́йно получи́л еси́,/ я́ко быв худо́г, о́тче, чистото́ю, к прича́стию неизрече́нныя красоты́. Сла́ва Отцу́ и Сы́ну и Свято́му Ду́ху. Се́ла ефио́пская, де́монская со́нмища твоего́ ужасо́шася терпе́ния, и смире́ния,/ и непреста́ннаго во бде́ниих твоего́ стоя́ния, досточу́дне. И ны́не и при́сно и во ве́ки веко́в. Ами́нь. Богородичен: Во изступле́нии главы́ си́льных ссеко́шася/ стра́хом рождества́ Твоего́, Богороди́тельнице Всенепоро́чная,/ собо́р же преподо́бных удиви́ся досто́йно Боже́ственною благода́тию. Песнь 5 Ирмос: Ходата́й Бо́гу и челове́ком был еси́, Христе́ Бо́же:/ Тобо́ю бо, Влады́ко, к Светонача́льнику, Отцу́ Твоему́,/ от но́щи неве́дения/ приведе́ние и́мамы. Припев: Преподо́бне о́тче Фео́доре, моли́ Бо́га о на́с. Уче́ния те́пле честна́я име́в,/ разори́л еси́ всех ересе́й преле́стная прия́тия, му́дре,/ Тро́йческою ве́рою огражда́я ста́до твое́. Сла́ва Отцу́ и Сы́ну и Свято́му Ду́ху. Я́ко свет вои́стинну на земли́ был еси́, Фео́доре,/ житие́ непоро́чно пожи́в, всеприснопа́мятне,/ по́стников украше́ние, мона́шествующих похвала́. И ны́не и при́сно и во ве́ки веко́в. Ами́нь. Богородичен: Тече́нием по́стнических слез напая́я се́рдце твое́,/ плодоно́сно показа́л еси́ возсия́вшему Влады́це Христу́ от Де́вы Святы́я,/ Фео́доре пребога́те. Песнь 6 Ирмос: В бе́здне грехо́вней валя́яся,/ неизсле́дную милосе́рдия Твоего́ призыва́ю бе́здну:/ от тли, Бо́же, мя возведи́. Припев: Преподо́бне о́тче Фео́доре, моли́ Бо́га о на́с. Све́тлое и Богоуго́дное житие́ твое́/ тебе́ Небе́сную, о́тче, све́тлость святы́х показа́,/ в се́лех небе́сных, Фео́доре. Сла́ва Отцу́ и Сы́ну и Свято́му Ду́ху. Победи́тель, одолева́я, Фео́доре, лука́вствия духо́в, был еси́,/ Уте́шителя Ду́ха помо́щника стяжа́в, Богоприя́тне. И ны́не и при́сно и во ве́ки веко́в. Ами́нь. Богородичен: О́блак ле́гкий еси́, Чи́стая,/ на не́мже седя́, прии́де во Еги́пет Вседержи́тель Госпо́дь/ и свети́льники преподо́бныя соде́ла. Кондак, глас 2 В дому́ Бо́жии, я́ко фи́никс, процве́л еси́,/ плоды́ же доброде́телей Го́сподеви прине́сл поще́нием изря́дным,/ о́тче преподо́бне,/ те́мже и убла́жаешися,/ я́ко Безпло́тных равностоя́телен. Песнь 7 Ирмос: Богопроти́вное веле́ние/ беззако́ннующаго мучи́теля/ высо́к пла́мень вознесло́ есть,/ Христо́с же простре́ Богочести́вым отроко́м ро́су духо́вную,/ Сын благослове́н и препросла́влен. Припев: Преподо́бне о́тче Фео́доре, моли́ Бо́га о на́с. Разу́мно возжела́л еси́, я́коже Богови́дец,/ Боже́ственную све́тлость ви́дети, Фео́доре,/ те́мже ви́димая вся оста́вил еси́,/ во мрак же вшед, зре́ти сподо́бился еси́ Непостижи́маго. Сла́ва Отцу́ и Сы́ну и Свято́му Ду́ху. Я́да ты змии́на душетле́ннаго, преблаже́нне Фео́доре, ника́коже прии́м,/ сего́ па́мять, о́тче, погуби́л еси́,/ па́мять непреста́нно Бо́жию в се́рдцы, блаже́нне, стяжа́в. И ны́не и при́сно и во ве́ки веко́в. Ами́нь. Богородичен: Святы́х Свята́го, во святы́х почива́ющаго,/ свя́то породила́ еси́, Де́во Всенепоро́чная,/ за милосе́рдие мно́гое Челове́ка бы́вша, из Тебе́ воплоще́нна,/ пре́жде Безпло́тнаго. Песнь 8 Ирмос: Пещь иногда́ о́гненная в Вавило́не де́йства разделя́ше,/ Бо́жиим веле́нием халде́и опаля́ющая,/ ве́рныя же ороша́ющая, пою́щия:/ благослови́те вся дела́ Госпо́дня, Го́спода. Припев: Преподо́бне о́тче Фео́доре, моли́ Бо́га о на́с. Ты светови́ден, Све́ту пресве́тлому бесе́довав, яви́лся еси́, преблаже́нне Фео́доре,/ едине́нием же лу́чшим па́че естества́ обожа́емь, зовы́й ны́не:/ благослови́те вся дела́ Госпо́дня, Го́спода. Сла́ва Отцу́ и Сы́ну и Свято́му Ду́ху. Му́ченик быв тверд ко греху́, да́же до кро́ве проти́влься, Богому́дре Фео́доре,/ венце́м страда́ния твою́ главу́ украси́л еси́, зовы́й ны́не:/ благослови́те вся дела́ Госпо́дня, Го́спода. И ны́не и при́сно и во ве́ки веко́в. Ами́нь. Богородичен: Яви́ся нам из Тебе́, Богороди́тельнице, пра́вды све́тлое Со́лнце,/ просвеща́я вся́ческая заре́ю Божества́,/ вопло́щся Вы́шний, Его́же ны́не воспева́ем:/ благослови́те, вся дела́ Госпо́дня, Го́спода. Песнь 9 Ирмос: Безнача́льна Роди́теля Сын, Бог и Госпо́дь,/ вопло́щся от Де́вы, нам яви́ся,/ омраче́нная просвети́ти, собра́ти расточе́нная./ Тем Всепе́тую Богоро́дицу велича́ем. Припев: Преподо́бне о́тче Фео́доре, моли́ Бо́га о на́с. Ны́не не в гада́ниих тебе́ Христо́с ви́дим есть,/ к лицу́ же па́че ви́дится лице́м, и́стинным явле́нием,/ и́же сено́вным разре́шшимся зерца́лом,/ даро́в тезоимени́те, Спа́са и Бо́га на́шего. Сла́ва Отцу́ и Сы́ну и Свято́му Ду́ху. Жела́ние Боже́ственное твое́ испо́лнися, Фео́доре,/ я́ко дости́г кончи́ну, е́же поще́нием издале́ча зря́ше со умиле́нием,/ его́же и получи́в, жела́ния уста́вил еси́,/ по́стников похвало́, мона́шествующих благоле́пие. И ны́не и при́сно и во ве́ки веко́в. Ами́нь. Богородичен: Неду́говав растле́тися преслуша́нием, пе́рвый Ада́м Тобо́ю, Богома́ти, обнови́ся:/ Ты бо, воплоще́нна Сло́ва ро́ждши без истле́ния неизрече́нно,/ тлю искорени́вши, нетле́ние процвела́ еси́.

Глас 4 Пе́снь 1. Ирмо́с: Мо́ря чермну́ю пучи́ну, невла́жными стопа́ми, дре́вний пешеше́ствовав Изра́иль, крестообра́зными Моисе́овыма рука́ма Амали́кову си́лу в пусты́ни победи́л е́сть. Припев: Священному́чениче Ромáне, моли́ Бо́га о на́с. Незаходи́мыми луча́ми сия́я Тро́ичными я́сно и со страстоте́рпческими ли́ки просвеща́емь, просвеще́ние ми́ посли́, тму́ стра́стную отгоня́я богоприя́тными твои́ми, Рома́не, моли́твами. Мо́ря и́дольскаго волне́нием не обурева́емь, я́ко на Христо́ве ка́мени утверди́вся, треволне́ния разреши́л еси́ тишино́ю Боже́ственнаго Ду́ха многомяте́жнаго безбо́жия. Цветни́к я́ко благосла́вный и благопло́дный, Це́рковь Христо́ву, гобзу́ющу все́ми благи́ми, Рома́не, соблю́л еси́ от волко́в непристу́пну, твои́м уче́нием утвержда́я сию́. Богоро́дичен: Поми́ловася Тобо́ю, Всенепоро́чная, естество́ челове́ческое и́стинно: Творе́ц бо, из Тебе́ воплоти́вся па́че сло́ва и смы́сла, за ны́ на сме́рть приведе́ся, избавля́я от а́да на́с. Пе́снь 3. Ирмо́с: Весели́тся о Тебе́ Це́рковь Твоя́, Христе́, зову́щи: Ты́ моя́ кре́пость, Го́споди, и прибе́жище, и утвержде́ние. Зве́ря разу́мнаго пра́щею уби́в, Рома́не, словесы́ твои́ми па́ству Христо́ву спа́сл еси́ от и́дольскаго вре́да нетле́нну. Возмога́я ору́жием кре́стным, прило́ги вра́жия возврати́л еси́ и не́мощь и́х обличи́л еси́, Рома́не му́дре достоблаже́нне. Низложи́л еси́ вра́жия, сокруши́в, че́люсти Рома́не сла́вне, за Христа́, блаже́нне, лани́те стру́жеме, приснопа́мятне. Богоро́дичен: Естество́м еди́н Бо́г Сло́во О́тчее и соесте́ственное Ду́ху, пло́тию из Тебе́ оде́явся, земны́я обожи́, Богома́ти. Седа́лен, гла́с 4. По́стнически лука́ваго попра́в и страда́льчески, му́чениче Христо́в, просла́вился еси́, претерпе́в му́жески соверше́нным умо́м. Те́мже причта́лся еси́ лико́м му́ченическим и ве́чнующее Ца́рство стяжа́л еси́; в не́мже лику́я, помяни́ на́с, соверша́ющия ве́рою па́мять твою́. Богоро́дичен: По Бо́зе в Тво́й, Богоро́дице, прибега́ю, смире́нный, покро́в боже́ственный, припа́дая, молю́ся: поми́луй, Пречи́стая, я́ко превзыдо́ша главу́ мою́ греси́, и бою́ся, Влады́чице, му́ки, и трепе́щу, моле́ние сотвори́, Чи́стая, к Сы́ну Твоему́ от си́х изба́вити мя́. Крестобогоро́дичен: Из Безнача́льнаго Отца́ Рожде́ннаго, напосле́док Тя́ пло́тию Ро́ждшая, на Кресте́ ви́сяща зря́щи, Христе́, — увы́ Мне́, любе́знейший Иису́се! — вопия́ше, — ка́ко сла́вимый я́ко Бо́г от а́нгел, от беззако́нных ны́не челове́к, Сы́не, хотя́, распина́ешися? Пою́ Тя́, Долготерпели́ве. Пе́снь 4. Ирмо́с: Вознесе́на Тя́ ви́девши Це́рковь на Кресте́, Со́лнце пра́ведное, ста́ в чи́не свое́м, досто́йно взыва́ющи: сла́ва си́ле Твое́й, Го́споди. Направля́емь, я́ко ле́ствицею, на дре́во возне́слся еси́, блаже́нне, неизглаго́ланною добро́тою и пребыва́ющий ли́к пости́гл еси́, му́чениче Рома́не достосла́вне. Совле́кся ме́ртвенныя оде́жды в му́ках, блаже́нне, и спасе́ния в све́тлую ри́зу све́тло, всесла́вне му́чениче Рома́не, обле́клся еси́. Умудри́вся вдохнове́нием Уте́шителя, о́трочища язы́к Тя́, Го́спода сла́вы, Творца́ пропове́да все́х, Человеколю́бче, и Бо́га, спасти́ могу́щаго. Богоро́дичен: Благослове́н, Де́во, Пло́д Твоего́ чре́ва, И́мже изба́вихомся кля́твы сме́ртныя, вся́ оте́чествия язы́ков, и Тобо́ю благослове́ннии я́ко жи́зни пое́м Тя́ Хода́таицу. Пе́снь 5. Ирмо́с: Ты́, Го́споди, мо́й све́т, в ми́р прише́л еси́, Све́т Святы́й, обраща́яй из мра́чна неве́дения ве́рою воспева́ющия Тя́. Струя́ми страда́льческими крове́й твои́х потопи́л еси́ мо́ре безбо́жия, ре́ки же исцеле́ния, Рома́не, источи́л еси́. Я́ко да́р избра́нный, же́ртву я́ко непоро́чну, прине́сл еси́ Влады́це, Рома́не, богосло́вствующаго младе́нца закала́ема. Юро́дство вра́жие му́дростию Свята́го Ду́ха уязви́л еси́, уязви́в твое́ те́ло ра́нами, Рома́не всесла́вне. Богоро́дичен: Потреби́ла еси́ кля́тву, я́ко ра́дость ро́ждши, и обнови́ла еси́ челове́ки Твои́м Рождество́м, Де́во Мари́е Неискусобра́чная. Пе́снь 6. Ирмо́с: Пожру́ Ти со гла́сом хвале́ния, Го́споди, Це́рковь вопие́т Ти́, от бесо́вския кро́ве очи́щшися, ра́ди ми́лости от ре́бр Твои́х исте́кшею кро́вию. Ме́ртвость и тлю́ строга́нием отложи́в, жи́зни нетле́нныя в добро́ту оде́явся, му́чениче, укра́шен светлостьми́, Рома́не, духо́вными, незаходя́щими. Источи́в я́ко кро́вныя то́ки уче́ния отре́занный тво́й язы́к, и́миже непогиба́ющее насле́довал еси́, страстоте́рпче, блаже́нство, при́сно пребыва́ющее. Прему́дрости пото́к жажда́в, испи́л еси́ сове́том ро́ждшия уста́ богосло́вна младе́нца, мече́м к жи́зни прише́дша неконча́емей. Богоро́дичен: Ско́рое прибе́жище бу́ди мне́, Пречи́стая, наси́лия избавля́ющи мя́, и стра́стнаго студа́ изыма́ющи, и к Боже́ственней стези́ направля́ющи, Богома́ти. Пе́снь 7. Ирмо́с: В пещи́ Авраа́мстии о́троцы перси́дстей, любо́вию благоче́стия па́че, не́жели пла́менем опаля́еми, взыва́ху: благослове́н еси́ в хра́ме сла́вы Твоея́, Го́споди. Удавле́нием твои́м, страстоте́рпче, удави́в зми́я, обре́л еси́ жи́знь и́стинно, пресла́вне Рома́не, зовы́й всегда́: благослове́н еси́ в хра́ме сла́ве Твоея́, Го́споди. Све́та незаходи́маго луча́ми озаря́емь, пла́мень высо́кий угаси́л еси́, Рома́не, проро́ческим дарова́нием украша́емь, и с му́ченическими ли́ки сочета́емь, зовы́й: благослове́н еси́ в хра́ме сла́вы Твоея́, Го́споди. Я́ко от са́да многоцве́тнаго, ма́терними уче́нии, ши́пок благово́нный младе́нческий во́зраст, му́ченическою кро́вию напая́емь, Христу́ нетле́нно прино́сится. Богоро́дичен: Впа́дшыя во глубину́ грехо́вную, Всепе́тая, еди́на Бо́га ро́ждшая без се́мене, изведи́ ны, пою́щыя Тя́: благослове́нна Ты́ в жена́х, Всенепоро́чная Влады́чице. Пе́снь 8. Ирмо́с: Ру́це распросте́р, Дании́л, льво́в зия́ния в ро́ве затче́; о́гненную же си́лу угаси́ша, доброде́телию препоя́савшеся, благоче́стия рачи́тели, о́троцы, взыва́юще: благослови́те, вся́ дела́ Госпо́дня, Го́спода. Глаго́лов послу́шник Христо́вых бы́л еси́, сла́вне, ду́шу твою́ положи́в за па́ству твою́, усе́рдно за Него́ удавля́емь, му́чимь, и стру́жемь, и ураня́емь, вопия́л еси́: благослови́те вся́ дела́ Госпо́дня Го́спода. Вои́стинну уста́ твоя́ и язы́к ра́дости и весе́лия испо́лнися, благословя́ Бо́га непреста́нно: отре́зан бо и кро́вию ка́пля, зако́н ве́ры на́м, Рома́не, полага́ет, вопия́: благослови́те вся́ дела́ Госпо́дня Го́спода. Богоро́дичен: Сло́во ро́ждши О́тчее Боже́ственным Ду́хом, Де́ва пребыла́ еси́, Богороди́тельнице безму́жная, превозше́дши есте́ственныя зако́ны рождество́м Твои́м. Те́мже, ра́дующеся, пое́м: благослови́те вся́ дела́ Госпо́дня Го́спода. Пе́снь 9. Ирмо́с: Ка́мень нерукосе́чный от несеко́мыя горы́, Тебе́, Де́во, краеуго́льный отсече́ся — Христо́с, совокупи́вый разстоя́щаяся естества́. Те́м, веселя́щеся, Тя́, Богоро́дице, велича́ем. Все́ твое́ жела́ние, му́чениче, ко Влады́це просте́рл еси́ и, многови́дныя ра́ны претерпе́в, Рома́не сла́вне, сла́вы неизглаго́ланныя получи́л еси́ и блаже́ннаго наслажде́ния. Се́ вме́сто боле́зни сла́дость тебе́ пото́ка даде́ся, му́чениче, вене́ц нося́щу ти́, Рома́не, и от кро́ве багряни́цу иму́щу: я́ко ши́пок благоуха́ющ и неувяда́ющ, младе́нец закла́н бы́л еси́ Христа́ ра́ди. Богоро́дичен: Ты́ началороди́тельныя кля́твы, земны́я, Де́во, изба́вила еси́ и отве́рзла еси́ на́м жи́знь Еде́ма Рождество́м Твои́м па́че естества́. Те́мже, веселя́щеся, Тя́, Богоро́дице, велича́ем.

Минея, 4 Апреля, Канон Глас 8 Песнь 1 Ирмос: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:/ Изба́вителю и Бо́гу на́шему пои́м. Припев: Священному́чениче Ники́то, моли́ Бо́га о на́с. Во́ду проше́д мирска́го мяте́жа и вся́каго зла избежа́в, Богому́дре,/ в ти́хое приста́нище Афо́на всели́лся еси́ и благоуго́дная Изба́вителю и Бо́гу твори́л еси́. Припев: Священному́чениче Ники́то, моли́ Бо́га о на́с. Восхожде́ния в се́рдце свое́м полага́ющу тебе́, благосла́вне, в воде́ слез твои́х потопи́л еси́ фарао́на мы́сленнаго/ победи́тельною десни́цею Бо́га на́шего. Сла́ва Отцу́ и Сы́ну и Свято́му Ду́ху. Тезоиме́нен сый побе́ды, добропобе́дниче, на стра́сти подвиза́лся еси́/ и всеору́жием Креста́ победи́тель тех был еси́,/ но и нам победи́тели греха́ бы́ти, моли́ся. И ны́не и при́сно и во ве́ки веко́в. Ами́нь. Богородичен: Вве́дши Богозва́ннаго Ники́ту в Го́ру достоя́ния Своего́,/ в гото́вое жили́ще ски́тское,/ Помо́щница и Покрови́тельница, Госпоже́, была́ еси́ ему́ во спасе́ние. Песнь 3 Ирмос: Небе́снаго кру́га Верхотво́рче, Го́споди,/ и Це́ркве Зижди́телю,/ Ты мене́ утверди́ в любви́ Твое́й,/ жела́ний кра́ю, ве́рных утвержде́ние,/ Еди́не Человеколю́бче. Припев: Священному́чениче Ники́то, моли́ Бо́га о на́с. Небе́снаго кру́га Творцу́ и жела́ний кра́ю, всеизя́щне, приближа́яся,/ в любви́ к Нему́ от всея́ души́, се́рдца и помышле́ния утвержда́лся еси́/ и от си́лы в си́лу ше́ствовал еси́ благода́тию Еди́наго Человеколю́бца. Припев: Священному́чениче Ники́то, моли́ Бо́га о на́с. Се что добро́ или́ что красно́,– пою́щу ти,–/ но е́же жи́ти бра́тии вку́пе;/ житие́ общежи́тельное в оби́тели сей возлюби́л еси́/ и соверше́нныя любве́ к бли́жним испо́лнился еси́ по́мощию Человеколю́бца. Сла́ва Отцу́ и Сы́ну и Свято́му Ду́ху. Небе́сный челове́к и земны́й А́нгел ревну́я бы́ти,/ а́нгельския чистоты́ рачи́тель был еси́/ и, благода́ти свяще́нства сподо́блен,/ я́ко А́нгел, слове́сную слу́жбу непоро́чно приноси́л еси́ Еди́ному Человеколю́бцу. И ны́не и при́сно и во ве́ки веко́в. Ами́нь. Богородичен: Небе́сною си́лою Твое́ю, Всецари́це, препоя́сану бы́вшу Ники́те,/ Небе́сныя си́лы, неви́димо служа́щии, име́,/ достосла́вный в стра́шном Тайноде́йствии,/ сла́вя бла́гость Твою́ и вели́чие Сы́на Твоего́, Еди́наго Человеколю́бца. Седален, глас 4 Преподо́бных похвалу́ и страда́льцев украше́ние свяще́нное,/ Ники́ту достоблаже́ннаго воспои́м/ с ве́рою к нему́ взыва́юще:/ священному́чениче светоза́рне,/ моли́ Христа́ Бо́га прегреше́ний оставле́ние дарова́ти/ пра́зднующим любо́вию святу́ю па́мять твою́. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Всю наде́жду на Тя, Богоро́дице, Ники́та возложи́в,/ благоугоди́ Тебе́ в насле́дии Твое́м,/ иере́й и му́ченик быв Сы́на Твоего́./ Хода́тайством того́ яви́ богоуго́дны и нас, упова́ющих на Тя,/ и грехо́в проще́ние испроси́ нам, Преблагослове́нная. Песнь 4 Ирмос: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́. Припев: Священному́чениче Ники́то, моли́ Бо́га о на́с. Услы́шав, приснопа́мятне, глас Христа́, во Ева́нгелии глаго́люща:/ возми́те и́го Мое́ на себе́,–/ в труде́х и бде́ниих пожи́л еси́ зде, в воздержа́нии и поще́нии,/ сокро́вище некра́домо – моли́тву у́мную име́я и сла́вя Его́ Божество́. Припев: Священному́чениче Ники́то, моли́ Бо́га о на́с. Услы́шавше равноа́нгельное житие́ твое́, всеизря́дне, и по́стническия по́двиги,/ мно́зи от су́щих на Афо́не назида́хуся кро́тостию и смире́нием твои́м, молча́нием же и терпе́нием,/ и прославля́ху Христо́во Божество́. Сла́ва Отцу́ и Сы́ну и Свято́му Ду́ху. Услы́шавшу тебе́, свя́те, о неизрече́нных бла́гах, я́же угото́ва Бог лю́бящим Его́,/ в слеза́х и воздыха́ниих стреми́лся еси́ стяжа́ти себе́ хра́мину нерукотворе́ну, ве́чну на Небесе́х,/ да прославля́еши та́мо Христо́во Божество́. И ны́не и при́сно и во ве́ки веко́в. Ами́нь. Богородичен: Услы́ша преподо́бный Ники́та обетова́ния Твои́, Де́во,/ я́ко боголюбе́зно пожи́вших в Горе́ Твое́й/ предста́виши Бо́гу и испро́сиши проще́ние грехо́в,/ труды́ к трудо́м прилага́ше,/ благоугожда́я Тебе́ и сла́вя Сы́на Твоего́ Божество́. Песнь 5 Ирмос: Просвети́ нас повеле́нии Твои́ми, Го́споди,/ и мы́шцею Твое́ю высо́кою/ Твой мир пода́ждь нам,/ Человеколю́бче. Припев: Священному́чениче Ники́то, моли́ Бо́га о на́с. Просвеща́ему тебе́ повеле́нии Госпо́дними,/ мра́чная де́монская искуше́ния побежда́л еси́, победоно́сне,/ Боже́ственною благода́тию покрыва́емь храни́вшаго тя Человеколю́бца. Припев: Священному́чениче Ники́то, моли́ Бо́га о на́с. Просвеща́ющаго вся́каго челове́ка, Христа́, иере́й сый,/ моли́ся о почита́ющих тя, богатносве́тле,/ да не объи́мет нас но́щь лю́тых наведе́ний,/ от но́щи у́тренюющих к Человеколю́бцу. Сла́ва Отцу́ и Сы́ну и Свято́му Ду́ху. Просвеща́емь словесы́ Го́спода, доблему́дре, е́же после́довати стопа́м Его́,/ огню́ любве́, снеда́ющу тя,/ возжеле́л еси́ испове́дати пред мусульма́ны И́мя Его́/ и принести́ себе́ в же́ртву Человеколю́бцу. И ны́не и при́сно и во ве́ки веко́в. Ами́нь. Богородичен: Просвети́ ум наш и ду́шу световоди́, Световоди́тельнице Ники́ты,/ наставля́ющи ны моли́твами его́ на повеле́ния Сы́на Твоего́/ и укрепля́ющи благода́тию Того́, я́ко Человеколю́бца. Песнь 6 Ирмос: Моли́тву пролию́ ко Го́споду/ и Тому́ возвещу́ печа́ли моя́,/ я́ко зол душа́ моя́ испо́лнися/ и живо́т мой а́ду прибли́жися,/ и молю́ся, я́ко Ио́на:/ от тли, Бо́же, возведи́ мя. Припев: Священному́чениче Ники́то, моли́ Бо́га о на́с. Моли́твы пролива́л еси́ те́плыя ко Го́споду,/ да пода́ст ти, достосла́вне, Боже́ственную си́лу Свою́/ со гла́сом хвале́ния и испове́дания пожре́тися Ему́,/ поже́ршемуся нас ра́ди и от тли возве́дшему ны. Припев: Священному́чениче Ники́то, моли́ Бо́га о на́с. Моли́тву приле́жну твори́л еси́, свя́те,/ я́вльшуся ти на по́двиг страда́льческий во дни воспомина́ния страсте́й Христо́вых:/ в оби́тели бо гра́да Серр, всю но́щь у хра́ма бдя,/ по и́споведи Пренебе́сными Да́ры оживотвори́лся еси́. Сла́ва Отцу́ и Сы́ну и Свято́му Ду́ху. Моли́твою и Та́йнами, прехва́льне, укрепле́н,/ узре́л еси́ ага́рянина, хро́ма от рожде́ния,/ и обеща́вшуся ти исцели́ти его́, Еще́ уве́рует во Христа́ Бо́га,/ ят был еси́ мусульма́ны и пре́дан тех власти́телем. И ны́не и при́сно и во ве́ки веко́в. Ами́нь. Богородичен: Моли́твам, принесе́нным Тебе́, Богоро́дице, Ники́тою, ми́лостивно вне́мши,/ укрепи́ла еси́ того́ соверши́ти, ели́ка обеща́ он/ и возжела́ возда́ти во спасе́ние свое́ Го́сподеви./ И мы мо́лим Тя:/ от тли возведи́ ны. Кондак, глас 2 В преподо́бии и пра́вде, о́тче, пожи́л еси́/ и, страда́ньми усоверши́вся,/ сокро́виществовал еси́ себе́ бога́тство дарова́ний./ Долго́в у́бо разреше́ние испроси́ нам,/ неду́гов свобожда́ющи, всебога́те Ники́то,/ и оби́тели сея́, в не́йже Же́ртву Бо́гу приноси́л еси́,/ бу́ди при́сное утвержде́ние. Икос Новоявле́нная звезда́ показа́лся еси́ на тве́рди церко́вней, Ники́то небоявле́нне,/ ты бо, по́стничеством удобре́н, иере́йством укра́шен и Ду́ха благода́тию осия́н,/ све́тлым испове́данием свои́м омраче́нныя оттома́ны посрами́л еси́,/ Христа́ – Со́лнце Пра́вды – благоче́стно тем пропове́давшу ти,/ му́ки же лю́тыя и удавле́ние за Него́ небоя́зненно прия́вшу,/ досто́йно увенча́нну и просла́влену на Небеси́,/ отону́дуже не преста́й озари́те сла́вящия тя, священному́чениче,/ и оби́тели сея́, в не́йже священноде́йствовал еси́,/ бу́ди при́сное утвержде́ние. Песнь 7 Ирмос: От Иуде́и доше́дше, о́троцы/ в Вавило́не иногда́/ ве́рою Тро́йческою пла́мень пе́щный попра́ша, пою́ще:/ отце́в Бо́же, благослове́н еси́. Припев: Священному́чениче Ники́то, моли́ Бо́га о на́с. Честна́я па́мять твоя́, великоимени́те,/ весели́т оби́тель сию́, воспева́ющую по́двиги твоя́,/ ю́же соблюда́й мольба́ми свои́ми ко Го́споду, да пое́м:/ отце́в Бо́же, благослове́н еси́. Припев: Священному́чениче Ники́то, моли́ Бо́га о на́с. Я́ко адама́нт, тверд быв,/ притупи́л еси́ стре́лы ага́рянския, уничижи́в Моаме́фа,/ све́тлое же возвы́сив зна́мение побе́ды, ра́дуйся, взыва́л еси́, добропобе́дниче:/ отце́в Бо́же, благослове́н еси́. Сла́ва Отцу́ и Сы́ну и Свято́му Ду́ху. Целому́дрием и пра́вдою укра́шену ти,/ му́дрость же и му́жество я́вльшу во страда́нии,/ кра́сною колесни́цею сея́ четвери́цы восте́кл еси́ к Небе́сным, вопия́:/ отце́в Бо́же, благослове́н еси́. И ны́не и при́сно и во ве́ки веко́в. Ами́нь. Богородичен: Кре́пость и утвержде́ние Тебе́, Всенепоро́чная, Ники́та име́я,/ проти́ву сарацы́нския пре́лести кре́пко вооружи́ся,/ Тя пропове́дав, Богоро́дицу, и Сы́ну Твоему́ поя́:/ отце́в Бо́же, благослове́н еси́. Песнь 8 Ирмос: Седмери́цею пе́щь/ халде́йский мучи́тель/ Богочести́вым неи́стовно разжже́,/ си́лою же лу́чшею спасе́ны, сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки. Припев: Священному́чениче Ники́то, моли́ Бо́га о на́с. Слове́с твои́х, свя́те, си́лы злочести́вии стерпе́ти не возмого́ша,/ те́мже в смра́дную темни́цу, бию́ще, тя вверго́ша, Го́сподеви взыва́юща:/ свяще́нницы, благослови́те Его́ во ве́ки. Припев: Священному́чениче Ники́то, моли́ Бо́га о на́с. Огне́м лю́те опаля́емь и за но́зе неми́лостивно пове́шаемь,/ под ногтьми́ же и чре́вом ужа́сно пронза́емь,/ пострада́вшему за ны Христу́ вопия́л еси́:/ свяще́нницы, воспо́йте Его́ во вся ве́ки. Сла́ва Отцу́ и Сы́ну и Свято́му Ду́ху. Зря Подвигополо́жник достосла́вный коне́ц по́двигов твои́х,/ рука́ми а́нгельскими несо́му, прия́ свяще́нную ду́шу твою́,/ к Нему́же ра́достно взыва́л еси́:/ свяще́нницы, хвали́те Его́ во вся ве́ки. И ны́не и при́сно и во ве́ки веко́в. Ами́нь. Богородичен: И́же от Тебе́, Чи́стая, воплоти́вшееся Сло́во/ распя́тие претерпи́ спасе́ния ра́ди на́шего,/ Того́ стра́сти велича́я, Ники́та, в му́ках укрепля́емь, взыва́ше:/ свяще́нницы, превозноси́те Его́ во ве́ки. Песнь 9 Ирмос: Проявле́нное на горе́ законополо́жнику во огни́ и купине́/ Рождество́ Присноде́вы/ в на́ше, ве́рных, спасе́ние/ пе́сньми немо́лчными велича́ем. Припев: Священному́чениче Ники́то, моли́ Бо́га о на́с. Подража́тель быв Усну́вшаго на Дре́ве и ме́ртвых Возбуди́вшаго/ и непобеди́мый таи́нник Того́,/ в де́нь поко́я Его́ у́спе, на дре́ве ве́рвию уду́шен,/ враги́ удуши́в терпе́нием свои́м. Припев: Священному́чениче Ники́то, моли́ Бо́га о на́с. Венцено́сный возше́л еси́, добрострада́льче, в Го́рняя селе́ния,/ сугу́бым венце́м увязе́н руко́ю Венцеда́теля,/ всеблаже́нный у́бо небожи́тель сый,/ помина́й помина́ющия тя. Сла́ва Отцу́ и Сы́ну и Свято́му Ду́ху. Духовнику́, поощри́вшему тебе́, свя́те, Боже́ственными словесы́ на му́ченичество,/ спасе́ние с Небесе́ подае́ши/ и честна́го ученика́ твоего́ спаса́еши по обои́м твои́м предста́тельством. И ны́не и при́сно и во ве́ки веко́в. Ами́нь. Богородичен: Ми́лостива яви́ нам Сы́на Твоего́, Пречи́стая,/ егда́ ся́дет на Престо́ле сла́вы Свое́й суди́ти вся земны́я,/ име́ющи на сие́ моля́щаго Тя ублажа́емаго на́ми уго́дника Твоего́ Ники́ту. Светилен Сын све́та сый, Богосве́тле,/ све́том благода́ти озари́лся еси́ по кончи́не, освеща́я град, Ники́то,/ я́коже узре́ша ве́рнии в но́щь пресве́тлаго Воскресе́ния Христо́ва./ И ны́не светоно́сною душе́ю твое́ю предстоя́ Безле́тному Све́ту,/ озаря́й оби́тель сию́, проси́ нам ве́лия ми́лости. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Све́та незаходи́маго была́ еси́ оби́тель, Влады́чице,/ де́вства добро́тами светя́щи и благода́тию сия́ющи,/ те́мже просвети́ ны, вопию́щия Ти:/ ра́дуйся, хра́ме пресвяты́й Боже́ственныя сла́вы/ и све́те су́щих во тьме́,/ препросла́вленная Богоро́дице Присноде́во.

Минея, 26 Сентября, Кано́н апо́стола Глас 2 Песнь 1 Ирмос: Во глубине́ постла́ иногда́/ фараони́тское всево́инство преоруже́нная си́ла,/ вопло́щшееся же Сло́во всезло́бный грех потреби́ло есть,/ препросла́вленный Госпо́дь,// сла́вно бо просла́вися. Припев: Святы́й апо́столе и евангели́сте Иоа́нне, моли́ Бо́га о на́с. Ца́рство Небе́сное, блаже́нне, е́же пропове́дал еси́, восприи́м/ и Сло́ву собесе́дник быв Небе́сному,/ ве́рующия честно́му твоему́ пропове́данию и богосло́вию/ твои́ми моли́твами сохрани́. Припев: Святы́й апо́столе и евангели́сте Иоа́нне, моли́ Бо́га о на́с. Кре́пок смысл явля́я,/ о всех небре́гл еси́ су́щих на земли́ и уз естества́/ и, Сло́ву, всему́дре, слове́сне же и у́мне сопребыва́я,/ от безслове́сия безслове́сне живу́щия свободи́л еси́. Сла́ва Отцу́ и Сы́ну и Свято́му Ду́ху. Небе́сных ра́зум прии́м богослове́снейше,/ Бо́га Сло́ва пропове́дал еси́:/ в нача́ле бе Сло́во, и Сло́во бе к Своему́ Роди́телю, и Бог бе Сло́во,/ благовеству́я, научи́л еси́. И ны́не и при́сно и во ве́ки веко́в. Ами́нь. Богородичен: Отрокови́ц боже́ственных лик, боже́ственнейше в жена́х Тя до́брую воспева́ют,/ Богоро́дице Влады́чице, добро́тами укра́шену Божества́,/ добротвори́тельное бо Сло́во па́че сло́ва родила́ еси́. Песнь 3 Ирмос: Процвела́ есть пусты́ня, я́ко крин, Го́споди,/ язы́ческая неплодя́щая це́рковь/ прише́ствием Твои́м,// в не́йже утверди́ся мое́ се́рдце. Припев: Святы́й апо́столе и евангели́сте Иоа́нне, моли́ Бо́га о на́с. Тро́ицы яви́л еси́ богосло́вным язы́ком твои́м/ ю́же па́че ума́ та́йну, Иоа́нне богоблаже́нне,/ в не́йже утверди́ся мое́ се́рдце. Припев: Святы́й апо́столе и евангели́сте Иоа́нне, моли́ Бо́га о на́с. Язы́к твой бысть Пи́сьменника трость, Всесвята́го Ду́ха,/ богопи́санно зна́менующий честно́е твое́ и боже́ственное Ева́нгелие. Сла́ва Отцу́ и Сы́ну и Свято́му Ду́ху. Му́дрости ты бе́здну поче́рпл еси́, всему́дре,/ возле́г богому́дренным дерзнове́нием на Прему́дрости Исто́чнице,/ и Сего́ богопропове́дник был еси́. И ны́не и при́сно и во ве́ки веко́в. Ами́нь. Богородичен: Еди́ну Де́вствующую и Ма́терь чтим,/ я́ко спасе́ния Хода́таицу бы́вшу нам, Всенепоро́чная,/ и мир изба́вльшую моли́твами Твои́ми. Седален, глас 8 Прему́дрости на пе́рси возле́г и ра́зуму су́щих научи́вся,/ боже́ственно возгреме́л еси́: в нача́ле бе Сло́во,/ до́бре написа́в пе́рвый безнача́льное рождество́,/ и пропове́дал еси́ всем Сло́ва воплоще́ние./ Те́мже и язы́ком, я́ко мре́жею, улови́в язы́ки,/ благода́тию Ду́ха изуча́еши концы́ и просвеща́еши чудесы́,/ Богосло́ве апо́столе, моли́ Христа́ Бо́га грехо́в оставле́ние дарова́ти/ пра́зднующим любо́вию святу́ю па́мять твою́. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: В напа́сти многоплете́нныя впад от враг ви́димых и неви́димых,/ бу́рею одержи́мь безчи́сленных согреше́ний мои́х;/ и, я́ко к те́плому Твоему́ заступле́нию и покро́ву моему́, Чи́стая,/ ко приста́нищу притека́ю Твоей бла́гости./ Те́мже, Пречи́стая, из Тебе́ Воплоще́нному безсе́менно/ моли́ся приле́жно о всех рабе́х Твои́х,/ непреста́нно моля́щих Ти ся, Богоро́дице Пречи́стая,/ моля́щи Его́ при́сно согреше́ний оставле́ние дарова́ти/ воспева́ющим досто́йно сла́ву Твою́. Песнь 4 Ирмос: Прише́л еси́ от Де́вы не хода́тай, ни А́нгел,/ но Сам, Го́споди, вопло́щся,/ и спасл еси́ всего́ мя челове́ка./ Тем зову́ Ти:// сла́ва си́ле Твое́й, Го́споди. Припев: Святы́й апо́столе и евангели́сте Иоа́нне, моли́ Бо́га о на́с. Сло́во тя Богосло́ва досто́йно показа́,/ Того́ Божества́ тайнонаучи́в, преизя́щнейше,/ и е́же по челове́ку строе́нию научи́в неизрече́нному. Припев: Святы́й апо́столе и евангели́сте Иоа́нне, моли́ Бо́га о на́с. Ум боже́ствен и де́вственно те́ло стяжа́в,/ храм был еси́ живы́й же и одушевле́нный, сла́вне,/ и жили́ще Всепе́тыя Тро́ицы свяще́ннейшее. Сла́ва Отцу́ и Сы́ну и Свято́му Ду́ху. Сыновство́м Пречи́стыя Де́вы почествова́лся еси́,/ де́вственниче блаже́нне, и брат показа́лся еси́ Избра́вшему тя/ и ученика́ Богосло́ва Соверши́вшему. И ны́не и при́сно и во ве́ки веко́в. Ами́нь. Богородичен: Исцеля́я Е́вы дре́внее преступле́ние,/ в Тя, Всенепоро́чную и Пречи́стую, всели́ся Пребоже́ственный,/ всего́ мя, челове́ка, вообрази́ти па́дша. Песнь 5 Ирмос: Хода́тай Бо́гу и челове́ком был еси́, Христе́ Бо́же:/ Тобо́ю бо, Влады́ко, к Светонача́льнику, Отцу́ Твоему́,/ от но́щи неве́дения// приведе́ние и́мамы. Припев: Святы́й апо́столе и евангели́сте Иоа́нне, моли́ Бо́га о на́с. Небе́сный ум, Богосло́ве, яви́лся еси́ благода́тию,/ весь свет быв е́же к Началосве́ту приближе́нием/ и чи́стым твои́м зре́нием, е́же к Не́му, обожа́емь. Припев: Святы́й апо́столе и евангели́сте Иоа́нне, моли́ Бо́га о на́с. Умо́м чи́стым, и святы́ми устна́ми, богодохнове́нне,/ и пречи́стыми усты́ твое́ Ева́нгелие пропове́дал еси́/ и о́бщее спасе́ние всем ве́рным предложи́л еси́. Сла́ва Отцу́ и Сы́ну и Свято́му Ду́ху. Со Христо́м живы́й от младе́нства,/ орга́н благода́ти от Него́ предложе́н был еси́,/ богосло́вии изобуча́емь и Тро́ичестей сла́ве па́че естества́ науча́емь. И ны́не и при́сно и во ве́ки веко́в. Ами́нь. Богородичен: Глаго́лы Твоя́ помина́юще, Тя ны́не блажи́м:/ Тобо́ю, Всенепоро́чная, блаже́нство неизрече́нное/ и жизнь нестаре́ющуюся и́стинно прия́хом. Песнь 6 Ирмос: В бе́здне грехо́вней валя́яся,/ неизсле́дную милосе́рдия Твоего́ призыва́ю бе́здну:// от тли, Бо́же, мя возведи́. Припев: Святы́й апо́столе и евангели́сте Иоа́нне, моли́ Бо́га о на́с. Иису́с, Бог мой и Госпо́дь,/ твою́ чистоту́ прии́м и всесоверше́нную свя́тость,/ бра́та тя, Богосло́ве, прия́т. Припев: Святы́й апо́столе и евангели́сте Иоа́нне, моли́ Бо́га о на́с. Венча́в свя́то житие́ твое́,/ си́це упова́в, Му́дрости возле́гл еси́ на пе́рси, сла́вне,/ и благода́ть отту́ду извле́кл еси́. Сла́ва Отцу́ и Сы́ну и Свято́му Ду́ху. Вели́кая и боже́ственная сия́ния богосло́вия твоего́/ всю просвети́ша, сла́вне, вселе́нную/ и све́том Трисо́лнечным озари́ша. И ны́не и при́сно и во ве́ки веко́в. Ами́нь. Богородичен: Не́бо простры́й во́лею,/ Не́бо земно́е ино́е распростре́ Тя, Богома́ти Чи́стая,/ и, из Тебе́ возсия́в, яви́ся. Кондак, глас 2 Вели́чия твоя́, де́вственниче, кто пове́сть?/ То́чиши бо чудеса́, и излива́еши исцеле́ния,/ и мо́лишися о душа́х на́ших,// я́ко Богосло́в и друг Христо́в. Икос Высоты́ небе́сныя уве́дети и мо́ря глубины́ испыта́ти де́рзостно есть и непости́жно,/ я́коже бо зве́зды исчи́слити и примо́рский песо́к невозмо́жно отню́д,/ си́це ниже́ я́же Богосло́вова рещи́ дово́льно:/ толи́цеми того́ венцы́ Христо́с, его́же возлюби́, венча́,/ Ему́же и на пе́рси возле́г и на Та́йней ве́чери с Ним яде́,/ я́ко Богосло́в и друг Христо́в. Песнь 7 Ирмос: Богопроти́вное веле́ние беззако́ннующаго мучи́теля/ высо́к пла́мень вознесло́ есть,/ Христо́с же простре́ богочести́вым отроко́м ро́су духо́вную, // сый Благослове́н и Препросла́влен. Припев: Святы́й апо́столе и евангели́сте Иоа́нне, моли́ Бо́га о на́с. Боже́ственным сия́я светоли́тием,/ Ду́ха Свята́го я́сно богосло́вил еси́,/ исходя́ща из Безнача́льнаго Отца́ и почива́юща в Сы́не неотхо́дно,/ я́ко Единосу́щна. Припев: Святы́й апо́столе и евангели́сте Иоа́нне, моли́ Бо́га о на́с. В тебе́, блаже́нне, положи́ пра́вды Со́лнце селе́ние,/ не́бо приснодви́жимо тя соде́лавый/ и богосло́вным твои́м язы́ком пропове́дуемый Христо́с,/ возлю́бленне, препросла́вленный. Сла́ва Отцу́ и Сы́ну и Свято́му Ду́ху. Глаго́л твои́х си́ла, боже́ственное веща́ние изы́де,/ всеблаже́нне досточу́дне,/ и преми́рное твое́ Ева́нгелие всю объя́ше зе́млю/ догма́тов вели́чеством. И ны́не и при́сно и во ве́ки веко́в. Ами́нь. Богородичен: Пречи́стое зача́тие, нетле́нно Рождество́/ Ты еди́на показа́ла еси́, Де́ва пребы́вши:/ Бо́га бо зачала́ еси́, над все́ми Су́щаго, Чи́стая, Челове́ка бы́вша,/ ве́рных на спасе́ние и избавле́ние. Песнь 8 Ирмос: Пещь иногда́ о́гненная в Вавило́не де́йства разделя́ше,/ Бо́жиим веле́нием халде́и опаля́ющая,/ ве́рныя же ороша́ющая, пою́щия:// благослови́те, вся дела́ Госпо́дня, Го́спода. Припев: Святы́й апо́столе и евангели́сте Иоа́нне, моли́ Бо́га о на́с. Я́коже мо́лния све́тлая проходя́щи, вселе́нней, блаже́нне, яви́лся еси́,/ чистоты́ све́тлостию, де́вства же блиста́нием/ и благоче́стия догма́ты мир просвеща́я,/ возлю́бленне Христу́ Бо́гу. Припев: Святы́й апо́столе и евангели́сте Иоа́нне, моли́ Бо́га о на́с. Те́ло, и ду́шу, и ум очи́стив,/ благовести́л еси́ Небе́сное Христо́во Ева́нгелие,/ и, А́нгелом единожи́тель на Небеса́х быв, зове́ши ны́не:/ благослови́те, вся дела́ Госпо́дня, Го́спода. Сла́ва Отцу́ и Сы́ну и Свято́му Ду́ху. Столп све́тел, возложе́ние же боже́ственно Небе́снаго хра́ма был еси́,/ и престо́л чу́вствия, и му́дрости прия́телище,/ богосло́вия орга́н, поя́:/ благослови́те, вся дела́ Госпо́дня, Го́спода. И ны́не и при́сно и во ве́ки веко́в. Ами́нь. Богородичен: Да кля́тву пе́рвую истреби́ши/ и сме́ртное осужде́ние дре́вле прама́тере,/ из Де́вы Богома́тере, Сло́ве Бо́жий, роди́лся еси́,/ всем дарова́в безсме́ртие неги́блемо. Песнь 9 Ирмос: Безнача́льна Роди́теля Сын, Бог и Госпо́дь,/ вопло́щся от Де́вы, нам яви́ся,/ омраче́нная просвети́ти, собра́ти расточе́нная, //тем Всепе́тую Богоро́дицу велича́ем. Припев: Святы́й апо́столе и евангели́сте Иоа́нне, моли́ Бо́га о на́с. Ны́не не в гада́ниих, но лице́м к лицу́/ сла́дости пото́к зре́ти удосто́ился еси́,/ и реку́ ми́ра, и исто́чник безсме́ртия,/ и́мже ны́не напая́емь, наслажда́ешися обоже́ния. Припев: Святы́й апо́столе и евангели́сте Иоа́нне, моли́ Бо́га о на́с. Назе́мное проси́л еси́ седа́лище прия́ти от Христа́,/ но Он тебе́ пе́рси Своя́ да́рует,/ на ня́же возле́г, Богосло́ве,/ тве́рдым и пребыва́ющим седе́нием до́брым обогати́лся еси́,/ апо́столов украше́ние. Сла́ва Отцу́ и Сы́ну и Свято́му Ду́ху. Му́дрости погаси́л еси́ е́ллинския безбо́жное,/ в нача́ле бе Сло́во, му́дре, провеща́в,/ и к Бо́гу бе Сло́во, и и́стинно Бог бе Сло́во,/ Имже вся бы́ша, ви́димая же и неви́димая. И ны́не и при́сно и во ве́ки веко́в. Ами́нь. Богородичен: Яко у́тро обрела́ся еси́ у́треннее в нощи́ жития́,/ де́вства заря́ми облиста́ющи,/ восто́к Со́лнца мы́сленнаго пра́вды нам я́вльшая,/ Богома́ти Всечи́стая. Светилен Я́ко душе́ю де́вственна тя и те́лом, блаже́нне, Сло́во избра́,/ Богосло́ве де́вственниче,/ и Того́ Божества́ чу́дна показа́ писца́ и слугу́,/ и́же и от земли́ преста́вился еси́, не у́мерл,/ но в Бо́зе жив и безсме́ртен пребыва́я. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Гро́мов сын быв, челове́ком богосло́вил еси́,/ е́же в нача́ле бе Сло́во, апо́столе Иоа́нне:/ возлеги́й бо на пе́рси ве́рно Влады́ки твоего́/ и отту́ду поче́рп богосло́вия струи́, тварь всю напая́еши.