Молитвы

И нравом причастник,/ и престолом наместник, апостолом быв,/ деяние обрел еси, Богодохновенне,/ в видения восход;/ сего ради, слово истины исправляя,/ и веры ради пострадал еси даже до крове,/ священномучениче Дорофее,/ моли Христа Бога// спастися душам нашим.

Яко Ангел во плоти, на земли показася,/ пощением насажден быв, преподобне отче Корнилие,/ наставник иноком многим был еси,/ сего ради вопием ти:/ моли Христа Бога спастися душам нашим.

В дому Божии, яко финикс, процвел еси,/ плоды же добродетелей Господеви принесл пощением изрядным,/ отче преподобне,/ темже и ублажаешися,// яко Безплотных равностоятелен.

Кондак 1 Избрании от рождения ратницы духовнии, воспеваем вам умиленно, воспоминающе о подвизе вашем, и глаголы благодарные возносим: Радуйтеся, Александре и Андрее, воини преподобнии. Икос 1 Ангелам небесным подобно, из воинства духовнаго явленнии войску русскому во укрепление, подвижницы Христовы, смиренно послушание исполнившии и венцы духовнии победно приявшии. Мы же, грешнии, к вам припадаем, подвиг ваш духовный сице славим: Радуйтеся, воини праведнии. Радуйтеся, русския победы знамение. Радуйтеся, монаси благонравнии. радуйтеся, послушницы славнии. Радуйтеся, ратницы непобедимии. радуйтеся, Духом Божиим хранимии. Радуйтеся, монашеский хитон избравшии. радуйтеся, на поле брани просиявшии. Радуйтеся, Александре и Андрее, воини преподобнии. Кондак 2 Видел есть Господь, яко раби вернии во святей обители подвигами возрасте, примером иноческому житию бысте, волю Божию исполнившии, святыми молитвами окрепшии, Богу Вседержителю вопияше: Аллилуиа. Икос 2 Разумом не вместити высоту подвига вашего, сердце же его радостно приемлет, и мы недостойнии, святих молитв ваших вопрошающе, о подвизе вашем знаменном с радостию возглаголем: Радуйтеся, поклонницы Царя Христа. радуйтеся, усерднии Христовы ратницы. Радуйтеся, молитвенницы обильнии. радуйтеся, Христовым Духом сильнии. Радуйтеся, в сонме святых российстих просиявшии. радуйтеся, за веру Богу жизнь предавшии. Радуйтеся, молитвами благоухавшии. радуйтеся, ими врагов отгнавшии. Радуйтеся, Александре и Андрее, воини преподобнии. Кондак 3 Силою Божию просвещеннии, елеем благодатным помазаннии, на подвиг ратный благословеннии, в духовней брани землю русскую отстоявшии, святых наставников наследницы, со ангели ныне славословите Бога: Аллилуиа. Икос 3 Имуще любовь Христову, вси блага мирстии ни во что вменисте, вси богатства и имения раздасте, на подвиг ради спасения духовнаго ушедшии, его же во страданиих обретшии, спустя столетия на победу вашу взираем и благодарно возопиим: Радуйтеся, монаси досточтимии. радуйтеся, ангели, облаченнии в схимы. радуйтеся, за Русь святии молитвенницы. радуйтеся, веры Христовыя светильницы. радуйтеся, духовно умиленнии. радуйтеся, на поле брани упокоеннии. радуйтеся Царствия Божия наследницы. радуйтеся, Ангелов святии собеседницы. Радуйтеся, Александре и Андрее, воини преподобнии. Кондак 4 На бурю вражиих напастей с духовным плачем взирали есте, да спасет Господь Русь православную, вашими молитвами и ныне спасаемся, с любовию ко Господу припадаем: Аллилуиа. Икос 4 Слышавше Слово Божие, велие оное приемше, спасения шлем обретосте, во иночестве страсти низложивше, ножем духовным врагов спасения отметавше, молитвы непрестаннии ко Господу возносивше, победу достойно обретшии, и ныне мы победе вашей радуемся: Радуйтеся, схимницы смиреннии. радуйтеся, Святым Духом исполнении. Радуйтеся, воини русскии. радуйтеся, шедшии тропы узкия. Радуйтеся, защитницы усерднии. радуйтеся, победительницы нерукотвореннии. Радуйтеся, Светом Христовым просиявшии. радуйтеся, победу над смертию приявшии. Радуйтеся, Александре и Андрее, воини преподобнии. Кондак 5 Боготечною звездою победа ваша просияла есть, за веру Христову с любовию постояли есте, землю русскую от неверных языков очищающе, и ныне Бога победно хвалите: Аллилуиа. Икос 5 Видевше Света Истины, к Солнцу Правды сердце обратисте, обителию Бога души соделавшии, и врага духовнаго не убоясте и врагу ратному не вмале ниже предасте, твердость духа вашего, яко урок усердный, со умилением прославляем: Радуйтеся, Евангелия любители. радуйтеся, воинам ратным покровители. Радуйтеся, Христа и Бога зрители. радуйтеся, смирению учители. Радуйтеся, воини мужественнии. радуйтеся, насельницы дружественнии. Радуйтеся, сомолитвенницы славнии. радуйтеся, семена засеявшии на Руси державнии. Радуйтеся, Александре и Андрее, воини преподобнии. Кондак 6 Проповеданием незримым ныне сияете, землю русскую духом прозресте, святым праотцам воспевающе, и Отечеству меру измеристе, Божиим даром его восприимше, и мы ныне с усердием с Вами припадаем и с покаянием Богу глаголем: Аллилуиа. Икос 6 Возсиял есть Христос в сердцах праведних, святих ликов узреть начертания не возмогли бы, аще послушание не бысте исполнили, сердцем ко Господу горесте, жизнь за веру сложити готовии, и мы укрепления духовнаго просим и со смирением восклицаем: Радуйтеся, благодатнии послушницы. радуйтеся Христовы ратницы. Радуйтеся, Богом хранимии. радуйтеся, земнии Херувими. Радуйтеся, Силу Божию приявшии. радуйтеся, за спасение жизнь отдавшии. Радуйтеся, Христа во славе сретившии. радуйтеся, в сонме праведнем светящии. Радуйтеся, Александре и Андрее, воини преподобнии. Кондак 7 Хотевше спасения единого, награды земнии с покаянием отвергшии, с усердием к Богу припадосте, во святой обители иноческаго образа сподобльшии, окормляемии благодатным наставничеством, награды небеснии обретосте, к Богу одесную молите: Аллилуиа. Икос 7 Новии избранницы Христовы, стремена духовнии одернусте, видевше немощь человеческую, Богом на пути подъятии и за усердие возрадованнии: Радуйся, Александре, Челубея-злаго победивший. Радуйся умерщвление от онаго приявший. Радуйся, венец за подвизи от Бога получивший. Радуйся, Андрее, на поле ратнем главу победно сложивший. Радуйся, обретый упокоение. Радуйся, во святых прославление. Радуйтеся, блазии ратницы. радуйтеся, Христовы подвижницы. Радуйтеся, Александре и Андрее, воини преподобнии. Кондак 8 Странное чудо зрим умиленно, Царица Преблагая, на подвиг воинов своих ты обличила еси, слыша молитвы русския и прошения. Русь святую ты не оставила еси, Христовых воинов во обители раиския приимшая, тамо они ныне благодарственно Богу взывают: Аллилуиа. Икос 8 Вси святии дивятся, яко архангели небеснии отсупников диаволских низвергосте, тако воини преподобнии сразисте языков неправедних, с Именем Божиим на устах, Его заступничество призывающе. И мы, недостоинии и грешнии, с замиранием сердечным молим: Радуйтеся, ратницы непобедимии. радуйтеся, человецы, духовною скверною неопалимии. Радуйтеся, Богородице молитвенницы. радуйтеся, Христа ученицы. радуйтеся, воинам Христовым пристанище. радуйтеся, воинам ратным прибежище. Радуйтеся, молитвенницы знаменнии. радуйтеся, схимницы праведнии. Радуйтеся, Александре и Андрее, воини преподобнии. Кондак 9 Вси помышления свои к Богу возносите, спасители земли русския, и ныне нас не оставляете, с плачем святым сердечным к Отцу Небесному взываете: Аллилуиа. Икос 9 Ветии многовещаннии, яко рыбы безгласныя, не возмогут возрещи высоту подвига вашего, для пределов русских знаменнаго, мы же, окамененнии, Духа Божиего просим и с покаянием сердечным восклицаем: Радуйтеся, в битве духовней победу земную одержавшии. радуйтеся, за веру Христовую пострадавшии. Радуйтеся, воини победители. радуйтеся, от страстей омытии. Радуйтеся, скорбями иноческими очищеннии. радуйтеся, Христовым Духом просвещеннии. Радуйтеся, небеснии послушницы. радуйтеся, за Россию святии заступницы. Радуйтеся, Александре и Андрее, воини преподобнии. Кондак 10 Спасти хотите, премилосердно, души русския, защитницы всем с верою к вам прибегающим и молитвенно к заступничеству вашему взывающим. И мы, разумеюще ваше успеяние, к Богу возопиим: Аллилуиа. Икос 10 Стена еси людем русским, славное чудо явил еси, Господи, на поле брани Куликовом, духовных воинов ратниками земными соделал еси, прославляя землю русскую, и мы благочестно к сим воинам взываем и их усердно славим: Радуйтеся, русския Церкви украшение. радуйтеся, русския земли спасение. Радуйтеся, всадницы святии. радуйтеся, защитницы Руси. Радуйтеся, князем святим избрании. радуйтеся, Богом утверждении. Радуйтеся, Евангелие приявшии. радуйтеся, в вере твердо постоявшии. Радуйтеся, Александре и Андрее, воини преподобнии. Кондак 11 Пение благодарно приносим о воинех земных и небесных. Силою свыше укрепляемии, на подвизе ратнем просиявшии, дружину русскую прослависте, в убиении жизнь приемше, непрестанно ныне глаголете: Аллилуиа. Икос 11 Светозарною свещею молитва святых отец ваших от натиска диаволскаго вас ограждала есть; и вы покорливии в послушании, суровии ко врагу иноверному, на нас с плачем взираете, а мы усердно взываем: Радуйтеся, святии праведницы. радуйтеся, благочестия ратницы. Радуйтеся, победы вместилище. радуйтеся, заветов Христовых хранилище. Радуйтеся, трудов покаяния стяжатели. радуйтеся, победы русской зачинатели. Радуйтеся, плодов велиих показатели. радуйтеся, процветания Руси благовестители. Радуйтеся, Александре и Андрее, воини преподобнии. Кондак 12 Благодати двери отверзшии, Христа во страданиих вопрашасте, молитвы ваши Господь приял есть, и вы возмогли есте с чистым сердцем славословити: Аллилуиа. Икос 12 Поюще смирение ваше, его же с умилением славим. Души не отдав погибели, в подвизе усердном пребывасте, и камения с души низложивше, в Небесных Землях во веки радуетеся. И мы к вам припадаем и в сокрушении сердечном взываем сицевая: Радуйтеся, ратницы святии. радуйтеся, попечители блазии. Радуйтеся, за Россию молитвенницы. радуйтеся, небеснии праведницы. Радуйтеся, подвижницы статнии. радуйтеся, мученицы благодатнии. Радуйтеся, Духа Святаго приятели. радуйтеся, блаженнаго покоя получатели. Радуйтеся, Александре и Андрее, воини преподобнии. Кондак 13 О воини святии, Александре и Андрее, христолюбивым смирением вашим вы Русь с колен подъяли есте, Россию прослависте, православную силу в земном бою показавше, знамением народу нашему бысте, умолите и нам, грешным, спасение и днесь Руси очищение и укрепление в твердыне веры православныя, мы же о вас всехвально Бога славим: Аллилуиа.[Се́й конда́к глаго́лется три́жды.][Далее повторяем 1‑е икос и кондак:]Икос 1 Ангелам небесным подобно, из воинства духовнаго явленнии войску русскому во укрепление, подвижницы Христовы, смиренно послушание исполнившии и венцы духовнии победно приявшии. Мы же, грешнии, к вам припадаем, подвиг ваш духовный сице славим: Радуйтеся, воини праведнии. Радуйтеся, русския победы знамение. Радуйтеся, монаси благонравнии. радуйтеся, послушницы славнии. Радуйтеся, ратницы непобедимии. радуйтеся, Духом Божиим хранимии. Радуйтеся, монашеский хитон избравшии. радуйтеся, на поле брани просиявшии. Радуйтеся, Александре и Андрее, воини преподобнии. Кондак 1 Избрании от рождения ратницы духовнии, воспеваем вам умиленно, воспоминающе о подвизе вашем, и глаголы благодарные возносим: Радуйтеся, Александре и Андрее, воини преподобнии. Молитва преподобным Александру Пересвету и Андрею Ослябе Воини небеснии, ангели досточтимии, сокрушенно к вам припадаем и с плачем умиленным просим: Не оставите землю русскую, напасти от врагов терпящу, изменами исполненну, лицемерством диавольским задавленну. Умолите Бога Вседержителя о спасении народа нашего, в подвизех монахов укрепите, Церковь русскую от расколов, ересей, лжеучений уберегите, народу русскому православное единство, праведное, о Бозе, умолите, войско русское в Православии утвердите, победы оному на полях сражения даруйте. Святии преподобнии воини Александре Пересвете и Андрее Ослябя, молите Бога о нас, грешных. Аминь.

Минея, 25 Августа, Канон апостола Глас 4 Песнь 1 Ирмос: Отве́рзу уста́ моя́,/ и наполнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,/ и воспою́, ра́дуяся, Тоя́ чудеса́. Припев: Святы́й апо́столе Ти́те, моли́ Бо́га о на́с. Вся́кими дарова́ньми обога́ти́вши тя благода́ть Ду́ха,/ пропове́дника боже́ственна апо́стола, в концы́ пропове́дающа, посла Сло́ва воплоще́ние,/ Ти́те пресла́вне. Припев: Святы́й апо́столе Ти́те, моли́ Бо́га о на́с. Зарю́ Боже́ственныя благода́ти прие́мь,/ облиста́л еси́, я́ко со́лнце, прему́дре,/ су́щим во тьме душа́м, я́же просвети́л еси́,/ изыма́я неве́дения, пре́лести рабо́ты изба́вля́я, блаже́нне. Сла́ва Отцу́ и Сы́ну и Свято́му Ду́ху. Сый испо́лнен даро́в духо́вных,/ Па́вел прему́дрый на тя рукополо́жение возлага́ет/ и служи́теля, и боже́ственна ученика́, и ве́ры пропове́дника устроя́ет, Ти́те пречу́дне. И ны́не и при́сно и во ве́ки веко́в. Ами́нь. Богородичен: Изба́вля́я мирски́я концы́ пре́лести,/ возсия́ от Твоего́ чре́ва Госпо́дь, Богоневе́сто,/ Его́же моли́ всегда́ спасти́ ве́рою Тя, Де́во, чту́щия. Песнь 3 Ирмос: Не му́дростию, и си́лою, и бога́тством хва́лимся,/ но Тобо́ю, О́тчею Ипоста́сною Му́дростию, Христе́:/ несть бо свят, па́че Тебе́, Человеколю́бче. Припев: Святы́й апо́столе Ти́те, моли́ Бо́га о на́с. Не му́дростию объюро́ди той внима́ющия,/ но ра́зумом и́стины ослепле́ние, блаже́нне, душ отгна́л еси́,/ притека́ющих к тебе́. Припев: Святы́й апо́столе Ти́те, моли́ Бо́га о на́с. Олядене́вшую безбо́жия те́рнием бразду, всенасле́дие язы́к,/ серпо́м Боже́ственным очи́стил еси́,/ ра́зума се́мена насе́яв. Сла́ва Отцу́ и Сы́ну и Свято́му Ду́ху. Еди́но пропове́дал в Трех Ли́цах Божество́,/ отгна́л еси́ мглу многобо́жия, блаже́нне,/ к Боже́ственному ра́зуму приводя́ концы́. И ны́не и при́сно и во ве́ки веко́в. Ами́нь. Богородичен: Святе́йшу А́нгелов и всея́ тва́ри вы́шшу,/ из Тебе́ пло́тию Роди́выйся Тя соде́ла,/ те́мже Тя, я́ко Влады́чицу всех, почита́ем. Седален, глас 8 Я́коже звезда́ с со́лнцем, ходи́л еси́, пресла́вне Ти́те, с Па́влом,/ я́ве зе́млю просвети́сте и тьму разори́сте,/ в Кри́тстем же о́строве заше́д, блаже́нне, сме́ртию,/ всем незаходи́мы оста́вил еси́, я́ко зари́, Богому́дре, твоя́ боле́зни и словеса́,/ и́миже просве́щшеся, благоче́стно тя чтим и согла́сно вопие́м ти:/ моли́ Христа́ Бо́га грехо́в оставле́ние пода́ти/ чту́щим любо́вию святу́ю па́мять твою́. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Я́ко Всенепоро́чная Неве́сто Творцу́,/ я́ко Неискусому́жная Ма́ти Изба́вителя,/ прия́телище я́ко су́щи Уте́шителя, Препе́тая,/ беззако́нию мя су́ща скве́рное оби́телище и бесо́м игра́лище в ра́зуме бы́вша,/ потщи́ся от тех злоде́йства мя изба́вити/ и све́тлое жили́ще доброде́телей соверши́, Светоно́сная, Нетле́нная,/ отжени́ о́блак страсте́й и Вы́шняго прича́стия сподо́би/ и Све́та невече́рняго моли́твами Твои́ми. Песнь 4 Ирмос: Седя́й в сла́ве на Престо́ле Божества́,/ во о́блаце ле́гце/ прии́де Иису́с Пребоже́ственный/ Нетле́нною Дла́нию и спасе́ зову́щия:/ Сла́ва, Христе́, си́ле Твое́й. Припев: Святы́й апо́столе Ти́те, моли́ Бо́га о на́с. От сокро́вищ неистощи́мых поче́рп, всему́дре,/ жа́дныя ра́зумы бога́тства и́стиннаго насы́тил еси́/ и умерщвле́нная сердца́ оживи́л еси́,/ неразу́мия отгоня́я мглу, всесла́вне. Припев: Святы́й апо́столе Ти́те, моли́ Бо́га о на́с. Па́влова тя мре́жа промышле́нием благода́ти уловля́ет, Ти́те,/ хотя́ща усе́рдно по́слежде твое́ю у́дицею сло́ва/ язы́ки премно́гия извлещи́ от ле́стныя глуби́ны ко благоче́стию. Сла́ва Отцу́ и Сы́ну и Свято́му Ду́ху. Сла́вному, я́коже а́гня, Боже́ственному Па́влу после́дуя,/ тя́жкия от среды́ во́лки, Богогла́се, отгна́л еси́,/ и́дольския же хра́мы на зе́млю низве́ргл еси́/ и хра́мы Бо́гу земноро́дныя сотвори́л еси́. И ны́не и при́сно и во ве́ки веко́в. Ами́нь. Богородичен: Свята́я Богоро́дица, сень нескве́рная, Све́та дверь,/ трапе́за и ру́чка всезлата́я, несеко́мая гора́ и присе́нная,/ я́ко вмести́вшая Соде́теля, ублажа́ется. Песнь 5 Ирмос: Нечести́вии не у́зрят сла́вы Твое́й, Христе́,/ но мы Тя, Единоро́дне,/ Оте́ческия сла́вы Сия́ние Божества́,/ от но́щи у́тренююще,/ воспева́ем Тя, Человеколю́бче. Припев: Святы́й апо́столе Ти́те, моли́ Бо́га о на́с. Смердя́щую уста́вил еси́ зло́бы я́зву язы́ком, блаже́нне, душ,/ сла́дкою со́лию Боже́ственных слове́с твои́х,/ я́коже врач изря́ден и я́ко благода́ти служи́тель. Припев: Святы́й апо́столе Ти́те, моли́ Бо́га о на́с. Па́вла веле́нием повину́яся кро́тко,/ с ним поднебе́сную обхо́диши, прему́дре,/ сло́во ра́зума благовеству́я, богопропове́дниче всече́стне. Сла́ва Отцу́ и Сы́ну и Свято́му Ду́ху. Равноде́тельна, Еднопресто́льна Сло́ва Отцу́ науча́я,/ я́коже мудр, Богогла́се, повину́л еси́ суему́дрыя/ и́дольскую всю лесть отри́нути. И ны́не и при́сно и во ве́ки веко́в. Ами́нь. Богородичен: Чи́стую чи́стым почти́м умо́м, добро́ту Иа́ковлю,/ Боже́ственными дея́ньми удобря́еми, благоче́стно воспое́м,/ я́ко Ма́терь Бо́га на́шего. Песнь 6 Ирмос: Пожру́ Ти со гла́сом хвале́ния, Го́споди,/ Це́рковь вопие́т Ти,/ от бесо́вския кро́ве очи́щшися/ ра́ди ми́лости от ребр Твои́х/ исте́кшею Кро́вию. Припев: Святы́й апо́столе Ти́те, моли́ Бо́га о на́с. Па́вел, ми́ра невече́рнее со́лнце,/ тя, я́коже зарю́, испуща́ет светолу́чну, блаже́нне,/ я́же во тьме неразу́мия седя́щая сердца́ просвеща́юща. Сла́ва Отцу́ и Сы́ну и Свято́му Ду́ху. Вод живото́чных сый испо́лнен,/ струя́ми Боже́ственных уче́ний пото́ки, блаже́нне, неразу́мия потопля́еши,/ напоя́я язы́ков совокупле́ния. И ны́не и при́сно и во ве́ки веко́в. Ами́нь. Богородичен: Пою́т ро́ди родо́в Тя, Всепе́тая:/ препе́тое бо Сло́во Бо́жие родила́ еси́ па́че сло́ва,/ Его́же сла́вят и челове́честии и А́нгельстии чи́ни. Кондак, глас 2 Па́влов яви́вся собесе́дник, апо́столе,/ с ним нам сло́во предвозвести́л еси́ Боже́ственныя благода́ти,/ тайноглаго́льниче Ти́те приснопа́мятне./ сего́ ра́ди вопие́м ти:/ не преста́й моля́ся о всех нас. Песнь 7 Ирмос: Спасы́й во огни́ Авраа́мския Твоя́ о́троки/ и халде́и уби́в,/ я́же Пра́вда пра́ведно уловля́ше,/ препе́тый Го́споди,/ Бо́же оте́ц на́ших, благослове́н еси́. Припев: Святы́й апо́столе Ти́те, моли́ Бо́га о на́с. Еди́но Божество́ пе́ти, Еди́но Госпо́дство чти́ти Тит науча́я челове́ки,/ многобо́жнаго неи́стовства измени́ благоче́стно взыва́ющия:/ благослове́н Бог оте́ц на́ших. Припев: Святы́й апо́столе Ти́те, моли́ Бо́га о на́с. Умерщвле́нныя душе́ю, безду́шную чту́щия вещь,/ умерщвле́ннаго нас ра́ди Животода́вца Бо́га позна́ша,/ тобо́ю наказу́емы, учениче́ и тайновеща́телю неизрече́нных. Сла́ва Отцу́ и Сы́ну и Свято́му Ду́ху. Я́ко и́стины служи́тель, лжи отгони́тель яви́лся еси́/ и, я́ко Па́влов учени́к, гоне́ния и бе́ды претерпе́л еси́, с ним поя́, сла́вне:/ благослове́н Бог оте́ц на́ших. И ны́не и при́сно и во ве́ки веко́в. Ами́нь. Богородичен: Испещре́на доброде́тельми, Всецарю́ предста́ла еси́ одесну́ю,/ от Твои́х воплоще́на крове́й, Безневе́стная,/ приле́жно моля́щи изба́витися нам от вся́кия ну́жды. Песнь 8 Ирмос: О́троки благочести́выя в пещи́/ Рождество́ Богоро́дичо спасло́ есть,/ тогда́ у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте, дела́,/ и превозноси́те Его́ во вся ве́ки. Припев: Святы́й апо́столе Ти́те, моли́ Бо́га о на́с. Кропле́нием крове́й твои́х угасе́ огнь пре́лести чужди́й,/ неду́зи отгна́шася, де́мони исчезо́ша к Бо́гу мольбо́ю твое́ю, Ти́те апо́столе./ Тем тя, я́ко уго́дника боже́ственна Всецаря́ Христа́, восхваля́ем. Припев: Святы́й апо́столе Ти́те, моли́ Бо́га о на́с. Весь Бо́гу освяще́н и Боже́ственными укра́шен, Ти́те, благода́тьми,/ сло́во спаси́тельное всем уясни́л еси́, безслове́сия, всему́дре, нас изба́вльшее,/ ве́рою и́стинною благословя́щих и превознося́щих Христа́ во ве́ки. Сла́ва Отцу́ и Сы́ну и Свято́му Ду́ху. Све́та чисте́йшее прия́телище быв,/ просвети́л еси́ подсо́лнечную Боже́ственными сия́ньми, Ти́те досточу́дне,/ и омрачи́л еси́ сопротивле́ния беззако́ннующих враг,/ Го́спода поя́ и превознося́ во вся ве́ки. И ны́не и при́сно и во ве́ки веко́в. Ами́нь. Богородичен: Ору́жие, дре́вле обраща́емое, плещи́, Де́во, ны́не мне дае́т,/ я́ко Сло́во родила́ еси́, пло́тию обложе́но и во двою́ естеству́ разумева́емо,/ Его́же трепе́щут а́нгельстии чи́ни и славосло́вят земни́и во ве́ки. Песнь 9 Ирмос: Е́ва у́бо неду́гом преслуша́ния/ кля́тву всели́ла есть;/ Ты же, Де́во Богоро́дице,/ прозябе́нием чревоноше́ния ми́рови Благослове́ние процвела́ еси́,/ тем Тя вси велича́ем. Припев: Святы́й апо́столе Ти́те, моли́ Бо́га о на́с. Всю твою́ ко Изба́вителю нося́ и любо́вь и наде́жду,/ влече́т спу́тника Па́вел, с тобю свяще́нное Ева́нгелие язы́ком пропове́дуя, апо́столе./ Те́мже с ним тя почита́ем. Припев: Святы́й апо́столе Ти́те, моли́ Бо́га о на́с. Неду́ги отго́ниши ве́рных, де́моны прогоня́еши Боже́ственною благода́тию./ Крит, вели́кий град, первопресто́льника тя стяжа́ боже́ственна,/ свети́льника же и зарю́ небе́сную, Ти́те Богому́дре и достохва́льне. Сла́ва Отцу́ и Сы́ну и Свято́му Ду́ху. Я́ко со́лнце, возсия́ нам па́мять твоя́,/ заря́ми духо́вными всесве́тло укра́шена, о́блаки душ отгоня́щи,/ ю́же ве́рою творя́щия ны сохраня́й, Ти́те всеблаже́нне и достохва́льне. И ны́не и при́сно и во ве́ки веко́в. Ами́нь. Богородичен: Плени́цы прегреше́ний мои́х, Чи́стая, разреши́ хода́тайством Твои́м, Всенепоро́чная,/ разори́ тьму ду́ши моея́, бу́рю страсте́й мои́х ути́ши,/ всу́е борю́щия мя сокруши́/ и спаси́ мя, Влады́чице Присноде́во.

Минея, 9 Января, Канон Глас 8 Песнь 1 Ирмос: Посе́ченый несеко́маго пресече́, и ви́де со́лнце зе́млю, ю́же не ви́де, лю́таго врага́ вода́ потопи́, и непроходи́мое про́йде Изра́иль. Пе́снь же воспева́шеся: Го́сподеви пои́м, сла́вно бо просла́вися. Припев: Святы́й му́чениче Полие́вкте, моли́ Бо́га о на́с. Многожела́нныя пи́щи насыща́емь, и блаже́нныя зари́, сла́вне, исполня́емь, и а́нгельскаго ли́ка удостоя́емь, тво́й благохва́лящия пра́здник, Полие́вкте, спаса́й, Го́споду пою́щия: сла́вно бо просла́вися. Припев: Святы́й му́чениче Полие́вкте, моли́ Бо́га о на́с. Светоно́сная и благознамени́тая па́мять твоя́, све́та Боже́ственнейшаго полна́, возсия́, просвеща́ющая све́тло ве́рою воспева́ющия тя́, до́блий во́ине Христо́в Полие́вкте всеблаже́нне, Го́споду пою́щия: сла́вно бо просла́вися. Сла́ва Отцу́ и Сы́ну и Свято́му Ду́ху. Вжиля́емь кре́постию Ду́ха и Боже́ственною си́лою, блаже́нне, оде́явся, изше́л еси́ тве́рдо к боре́нию го́рдаго и, сего́ кре́пко низложи́в, усе́рдно взыва́л еси́: Го́споду воспои́м, сла́вно бо просла́вися. И ны́не и при́сно и во ве́ки веко́в. Ами́нь. Богородичен: Воплоще́ннаго, пе́рвее Безпло́тнаго, Де́во Богоро́дице, родила́ еси́, Всенепоро́чная и Всечи́стая, я́ве Де́ва пребы́вши, бога́тством благоутро́бия на́с ра́ди обнища́вшаго и спа́сшаго Тому́ зову́щия: сла́вно бо просла́вися. Песнь 3 Ирмос: Ты́ еси́ утвержде́ние притека́ющих к Тебе́, Го́споди, Ты́ еси́ Све́т омраче́нных, и пое́т Тя́ ду́х мо́й. Припев: Святы́й му́чениче Полие́вкте, моли́ Бо́га о на́с. Измени́л еси́ мудрова́ние к благоче́стию, свы́ше сподо́бився боже́ственнаго зре́ния Спа́сова, Полие́вкте. Припев: Святы́й му́чениче Полие́вкте, моли́ Бо́га о на́с. Побе́ды жела́яй, вся́ оплева́л еси́, сла́вне, я́же на земли́, и небе́снаго насле́дия сподо́бился еси́. Сла́ва Отцу́ и Сы́ну и Свято́му Ду́ху. Сла́вы жела́я, я́же па́че ума́, устреми́лся еси́ терпели́вно и и́дольское безсла́вие низложи́л еси́. И ны́не и при́сно и во ве́ки веко́в. Ами́нь. Богородичен: Напра́ви моя́, Влады́чице, стопы́, да к Твоему́ Сы́ну похва́льным жи́тельством пойду́. Седален, глас 5 Я́ко до́бр во́ин Христа́, все́х Бо́га, благода́тию Сего́ укрепля́емь, всего́ преложи́л еси́ себе́ в любо́вь Его́ Неа́рхом, ве́рным во́ином, и́же с тобо́ю, му́дре. Те́мже, зако́нно пострада́в, досто́йно венча́лся еси́ от Го́спода, му́чениче Полие́вкте. Песнь 4 Ирмос: Ты́ моя́ кре́пость, Го́споди, Ты́ моя́ и си́ла, Ты́ мо́й Бо́г, Ты́ мое́ ра́дование, не оста́вль не́дра О́тча, и на́шу нищету́ посети́в. Те́м с проро́ком Авваку́мом зову́ Ти: си́ле Твое́й сла́ва, Человеколю́бче. Припев: Святы́й му́чениче Полие́вкте, моли́ Бо́га о на́с. Благочести́вым испове́данием, всеизря́дне, Влады́це са́м себе́ приве́л еси́, е́же за Того́, сла́вне, заколе́ние любо́вию прие́м и поро́ка вся́каго свобо́ден бы́в. Отсю́ду Спа́су взыва́еши: си́ле Твое́й сла́ва, Человеколю́бче. Припев: Святы́й му́чениче Полие́вкте, моли́ Бо́га о на́с. Сла́дость благоче́стия услади́ся тебе́, впери́лся еси́ Боже́ственною любо́вию, чи́стым и све́тлым жела́нием уя́звен и любо́вию распала́емь вы́шняго Ца́рствия, песнопое́ши Влады́це: си́ле Твое́й сла́ва, Человеколю́бче. Припев: Святы́й му́чениче Полие́вкте, моли́ Бо́га о на́с. Преесте́ственным единому́дрием связа́вся Неа́рху, сего́ же глаго́лы огласи́вся ко благочести́вей ве́ре Тро́ичестей, богому́дре му́чениче Полие́вкте, вои́стинну многожела́нныя и любе́зныя сподо́бился еси́ му́чеников све́тлости. Сла́ва Отцу́ и Сы́ну и Свято́му Ду́ху. Му́ченическим сочи́слився во́инством, Ца́рство прия́л еси́ недви́жимое, новозакла́вся, в сие́ вше́л еси́, еще́ кро́вем ка́плющим. Взя́лся же еси́, прему́дре, в ра́дость непреме́нную, и Све́т невече́рний, и вели́кия сла́вы получи́в. И ны́не и при́сно и во ве́ки веко́в. Ами́нь. Богородичен: Уподо́бився су́щим на земли́, Небе́сный небе́сныя сия́ соде́ла и, пострада́в естество́м стра́стным, Боже́ственнаго безстра́стия прича́стие дарова́. Сего́ у́бо Ро́ждшую, Неискусобра́чную Отрокови́цу Богоро́дицу ве́дуще, сла́вим. Песнь 5 Ирмос: Вску́ю мя́ отри́нул еси́ от лица́ Твоего́, Све́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и к све́ту за́поведей Твои́х пути́ моя́ напра́ви, молю́ся. Припев: Святы́й му́чениче Полие́вкте, моли́ Бо́га о на́с. Да присносу́щное получи́ши наслажде́ние, блаже́ннейше, кра́сная жития́, и естества́ сво́йство, и сла́дость, и сла́ву, и жи́знь са́мую презре́л еси́ и наде́жды твоея́ не погреши́л еси́. Припев: Святы́й му́чениче Полие́вкте, моли́ Бо́га о на́с. Тайнонауче́н бы́в Боже́ственнаго о́браза Боже́ственным та́йнам, тве́рдым умо́м к соверше́нным подвиго́м отлучи́лся еси́ и, победоно́сец я́влься, нетле́нных сподо́бился еси́ венце́в, Полие́вкте. Сла́ва Отцу́ и Сы́ну и Свято́му Ду́ху. Безбо́жнейшую че́сть, естество́м ненавистозло́бное име́я мудрова́ние, благоче́стно отри́нул еси́ и бо́ги су́етныя низве́ргл еси́, благоче́стия ре́вностию разже́гся и усе́рдия богодохнове́ннаго испо́лнився, пресла́вне. И ны́не и при́сно и во ве́ки веко́в. Ами́нь. Богородичен: Рече́нию Твои́х усте́н, Пречи́стая, после́дующе, Тя́ ублажа́ем: с Тобо́ю бо вои́стинну вели́чия сотвори́в, Госпо́дь возвели́чи Тя́ и́стинную Бо́жию Ма́терь, ро́ждся из утро́бы Твоея́, показа́. Песнь 6 Ирмос: Бе́здна грехо́в и прегреше́ний бу́ря мя́ смуща́ет и во глубину́ ну́жднаго ре́ет мя́ отча́яния, но Твою́ кре́пкую ру́ку мне́ простри́, я́ко Петро́ви, о Упра́вителю! и спаси́. Припев: Святы́й му́чениче Полие́вкте, моли́ Бо́га о на́с. Чи́на а́нгельскаго удосто́ился еси́, досточу́дне му́чениче, а́нгельскую ре́вность я́ве показа́в, с ни́ми у́бо приле́жно, блаже́нне, моли́, изба́витися от напа́стей воспева́ющим тя́. Припев: Святы́й му́чениче Полие́вкте, моли́ Бо́га о на́с. Усну́л еси́ любе́зне, страда́льче, до́лжным сно́м, отсе́кшейся главе́ мече́м, многострада́льне, и ны́не на небесе́х жре́бий нетле́нен насле́довал еси́, с му́ченики водворя́яся. Сла́ва Отцу́ и Сы́ну и Свято́му Ду́ху. Сообра́зен и о́бщник страда́ний Спа́са бы́л еси́, на́с ра́ди стра́сть кре́стную подъе́мшаго, и ны́не, блаже́нне, с Ни́м, я́коже обеща́, ца́рствуеши во ве́к безконе́чный. И ны́не и при́сно и во ве́ки веко́в. Ами́нь. Богородичен: Иму́щи милосе́рдие, я́ко ро́ждши человеколю́бное Сло́во, спаси́ ны ну́жднаго и лю́таго обстоя́ния: Тя́ бо еди́ну, ве́рнии, Всечи́стая Влады́чице, Предста́тельницу непобеди́му стяжа́хом. Кондак, глас 4 Спа́су прикло́ншу во Иорда́не главу́, / сокруши́шася змие́в главы́. / Полие́вктова же глава́ отсе́кшаяся // льсти́ваго посрами́. Икос Во Иорда́не реце́ Зижди́тель всяческих, главу́ преклони́в, Креще́ние прие́млет,/ и змие́в главы́ неви́димо сокруши́в,/ си́лу подаде́ челове́ком на велему́дреннаго,/ пе́рвее в раи́ запе́ншаго Ада́му сне́дию дре́ва,/ и сме́рть нане́сшаго ему́ без наде́жди./ Темже страда́лец ны́не Полие́вкт, ласка́ньми жены́ не преклони́вся,/ пострада́ тве́рдо, просте́р главу́,/ е́йже отсе́кшейся, льсти́ваго посрами́. Песнь 7 Ирмос: Бо́жия снизхожде́ния о́гнь устыде́ся в Вавило́не иногда́, сего́ ра́ди о́троцы в пещи́, ра́дованною ного́ю, я́ко во цве́тнице, лику́юще поя́ху: благослове́н еси́, Бо́же оте́ц на́ших. Припев: Святы́й му́чениче Полие́вкте, моли́ Бо́га о на́с. Показа́л еси́, Влады́ко, Твоему́ рабу́ си́лу Твою́, сего́ ра́ди преусе́рдно к подвиго́м прии́де самозва́нен и, победоно́сец бы́в, поя́ше: благослове́н Бо́г оте́ц на́ших. Припев: Святы́й му́чениче Полие́вкте, моли́ Бо́га о на́с. Сла́вный и всезнамени́тый пра́здник тво́й, му́чениче, возсия́, явле́ния бо твоего́ Влады́ки све́т прино́сит и озаря́ет ве́рою зову́щия: оте́ц на́ших Бо́же, благослове́н еси́. Сла́ва Отцу́ и Сы́ну и Свято́му Ду́ху. Бога́тство некра́домо, пребыва́ющее обре́л еси́ досто́инство и неотпа́дающе, но во ве́ки пребыва́ющую прия́л еси́ сла́ву, поя́, чу́дне: благослове́н Бо́г оте́ц на́ших. И ны́не и при́сно и во ве́ки веко́в. Ами́нь. Богородичен: Безнача́льному Роди́телю Спребыва́ющаго при́сно Разумева́емаго заче́нши, Де́во, воплоще́нна Сы́на родила́ еси́, за е́же спасти́ ве́рою зову́щия: благослове́н Бо́г оте́ц на́ших. Песнь 8 Ирмос: Седмери́цею пе́щь халде́йский мучи́тель богочести́вым неи́стовно разжже́, си́лою же лу́чшею спасе́ны сия́ ви́дев, Творцу́ и Изба́вителю вопия́ше: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки. Припев: Святы́й му́чениче Полие́вкте, моли́ Бо́га о на́с. Священноде́йствуется дне́сь многомоле́бная па́мять твоя́, му́чениче страстоте́рпче Христо́в Полие́вкте: Христу́ бо благоуго́дна и прия́тна же́ртва бы́л еси́, закла́вшемуся тебе́ ра́ди и поже́ршуся. Его́же о́троцы благословя́т, свяще́нницы воспева́ют, лю́дие превозно́сят во вся́ ве́ки. Припев: Святы́й му́чениче Полие́вкте, моли́ Бо́га о на́с. Страда́льческое сопротивле́ние, страстоте́рпче, да́же до кро́ве показа́в на земли́, Полие́вкте, в черто́г многосве́тлый на небесе́х всели́лся еси́, твои́х крове́й кре́щся ба́нею и поя́ Влады́це: свяще́нницы, воспо́йте, лю́дие, превозноси́те во вся́ ве́ки. Сла́ва Отцу́ и Сы́ну и Свято́му Ду́ху. Умерщвле́нную паде́ньми ду́шу мою́ возста́ви, му́ченическим твои́м дерзнове́нием объе́м, Боже́ственным повеле́нием причита́я, сла́вне, достоле́пно к доброде́тели обраща́я вопию́щую Влады́це: свяще́нницы, воспо́йте, лю́дие, превозноси́те во вся́ ве́ки. И ны́не и при́сно и во ве́ки веко́в. Ами́нь. Богородичен: Ра́дуйся, Ея́же ра́ди обрето́хом ра́дость ве́чную; ра́дуйся, Е́вину печа́ль разреши́вшая, Ада́мово се́тование в све́тлость обрати́вши; ра́дуйся, Бо́га воплоще́нна ро́ждшая, Де́во Богоро́дице, ве́рных Предста́тельнице, Тя́ превознося́щих во вся́ ве́ки. Песнь 9 Ирмос: Устраши́ся вся́к слу́х неизрече́нна Бо́жия снизхожде́ния, я́ко Вы́шний во́лею сни́де да́же и до пло́ти, от деви́ческаго чре́ва бы́в Челове́к. Те́мже Пречи́стую Богоро́дицу, ве́рнии, велича́ем. Припев: Святы́й му́чениче Полие́вкте, моли́ Бо́га о на́с. Прииди́те, у́бо боговенча́ннаго, мучениколю́бцы, воспои́м му́ченика, его́же спросла́ви светоиме́нным Свои́м Вы́шний явле́нием, и честны́м дне́м почествова́, и венча́, и боже́ственными доброде́тельми украси́. Припев: Святы́й му́чениче Полие́вкте, моли́ Бо́га о на́с. Струя́ми му́ченических излия́вшихся твои́х крове́й удави́л еси́ вражде́бнейшаго, зло́бу соде́лавшаго, Це́рковь же Христо́ву напая́я, уясни́л еси́, богоблаже́нне, ве́рою тя́ при́сно блажа́щую. Сла́ва Отцу́ и Сы́ну и Свято́му Ду́ху. Бу́ди ми́, му́чениче, помо́щник, от напа́стей мя́ разли́чных избавля́я и обстоя́ний, у́з же реша́ е́реси и лю́тыя свобожда́я темни́цы моли́твами твои́ми, воспева́ющаго тя́ мы́слию чи́стою, пресла́вне. И ны́не и при́сно и во ве́ки веко́в. Ами́нь. Богородичен: Зако́на же и проро́ков Главу́, Христа́, и полноту́, Всечи́стая, родила́ еси́, за благоутро́бие безме́рныя пучи́ны вочелове́читися на́с ра́ди из Тебе́ благоизво́лившаго и спа́сшаго ве́рою Тя́ при́сно велича́ющия. Светилен Многожела́нное стяжа́в, и от души́ многожела́нныя бога́тство Небе́сное,/ о Полие́вкте блаже́нне, и сла́ву, и све́тлость,/ в Бо́зе быв, и вене́ц Боже́ственный прия́л еси́ от руки́ Вы́шняго/ с му́ченическими ли́ки я́ко му́ченик и́стинен.

Минея, 30 Июля, Кано́н свята́го Глас 2 Песнь 1 Ирмос: Гряди́те, лю́дие,/ пои́м песнь Христу́ Бо́гу,/ разде́льшему мо́ре и наста́вльшему лю́ди,/ я́же изведе́ из рабо́ты еги́петския,/ я́ко просла́вися. Припев: Святы́й му́чениче Иоáнне, моли́ Бо́га о на́с. Све́тлое пра́зднество твое́, свя́те Иоа́нне, ра́достно на духо́вную трапе́зу нас созыва́ет,/ в не́йже учрежда́еши ны вся, к тебе́ притека́ющия, дарова́нии,/ в по́льзу проше́ния нам исполня́я. Припев: Святы́й му́чениче Иоáнне, моли́ Бо́га о на́с. По́двигом до́брым подвиза́вся на земли́, преблаже́нне Иоа́нне,/ и от зла́го мучи́теля му́ченики Христо́вы сохраня́я,/ прия́л еси́ от Христа́ Бо́га Небе́сную жизнь,/ отню́дуже в ско́рбех нам пода́ждь по́мощь. Припев: Святы́й му́чениче Иоáнне, моли́ Бо́га о на́с. Во́инством и́стинным, Богому́дре, злочести́ваго царя́ небре́г мучи́тельства/ и бога́тство ни́щим Христа́ ра́ди расточи́в,/ прия́л еси́ дар чуде́с от Бо́га,/ лука́выя челове́ки облича́я, благочести́вым спосо́бствуеши. Сла́ва Отцу́ и Сы́ну и Свято́му Ду́ху. Во́инство земно́е небре́гл еси́,/ иногда́ Христа́ ра́ди те́ло свое́ удруча́я посто́м и моли́твою,/ и враги́ посрами́л еси́./ Сего́ ра́ди и чудесы́ от Бо́га обогати́лся еси́. И ны́не и при́сно и во ве́ки веко́в. Ами́нь. Богородичен: Воплоти́ся из Тебе́ боголе́пно Сло́во Безпло́тное/ премно́жеством человеколю́бия, Пречи́стая Де́во;/ Его́же, Влады́чице, моли́ ве́чное блаже́нство дарова́ти нам. Песнь 3 Ирмос: На ка́мени мя ве́ры утверди́в,/ разшири́л еси́ уста́ моя́ на враги́ моя́,/ возвесели́ бо ся дух мой, внегда́ пе́ти:/ несть свят, я́коже Бог наш,/ и несть пра́веден, па́че Тебе́, Го́споди. Припев: Святы́й му́чениче Иоáнне, моли́ Бо́га о на́с. С му́ченики несумне́нну ве́ру стяжа́в, благоду́шне,/ и Христу́ Иису́су быв во́ин, доброде́тельми обогати́лся еси́;/ те́мже соверша́ющим па́мять твою́ честну́ю благо́е просвеще́ние всегда́ да́руй. Припев: Святы́й му́чениче Иоáнне, моли́ Бо́га о на́с. Лука́внующим зле неви́димый гони́тель, му́чениче Христо́в, явля́ешися/ и крадьбы́, в та́йне су́щия, открыва́еши,/ прия́л бо еси́ власть от Бо́га поле́зная ко спасе́нию всем содева́ти. Припев: Святы́й му́чениче Иоáнне, моли́ Бо́га о на́с. Я́коже столп непоколе́блем, се́рдце твое́, всече́стне Иоа́нне, име́я,/ любо́вь му́чеником Христо́вым сотвори́л еси́, не боя́ся царе́ва суровства́,/ те́мже в любви́ Госпо́дни утвержда́тися нам помози́. Сла́ва Отцу́ и Сы́ну и Свято́му Ду́ху. Я́ко дерзнове́ние име́я к Бо́гу, Иоа́нне,/ во́ин ны́не Небе́сному Царю́ сый,/ проси́ нам грехо́в оставле́ния, пра́зднующим па́мять твою́. И ны́не и при́сно и во ве́ки веко́в. Ами́нь. Богородичен: Богоро́дице, Ма́ти Го́спода Иису́са,/ со все́ми святы́ми Того́ моли́ изба́вити ны от всех бед и скорбе́й,/ я́ко да посра́мятся вси, явля́ющии рабо́м Твои́м зла́я,/ хвали́ти же с Сы́ном Тя при́сно нас сподо́би. Седален, глас 8 Царю́ Небе́сному и Творцу́ веко́в угожда́я при́сно,/ законопресту́пнаго Иулиа́на мучи́теля вся злокова́рныя и богоме́рзкия сове́ты отрази́л еси́, сла́вне,/ и́долом безду́шным же́ртвы возбрани́в твори́ти,/ и та́ко в по́двизе ду́шу твою́ в ру́це Го́споду Бо́гу пре́дал еси́./ Его́же моли́, свя́те Иоа́нне, прегреше́ний оставле́ние нам дарова́ти,/ честву́ющим святу́ю па́мять твою́. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: О Тебе́ ра́дуется, Благода́тная, вся́кая тварь,/ а́нгельский собо́р и челове́ческий род,/ освяще́нный хра́ме и раю́ слове́сный,/ де́вственная похвало́,/ из Нея́же Бог воплоти́ся, и Младе́нец бысть, пре́жде век Сый Бог наш:/ ложесна́ бо Твоя́ престо́л сотвори́/ и чре́во Твое́ простра́ннее небе́с соде́ла./ О Тебе́ ра́дуется, Благода́тная, вся́кая тварь, сла́ва Тебе́. Песнь 4 Ирмос: Прише́л еси́ от Де́вы не хода́тай, ни А́нгел,/ но Сам, Го́споди, вопло́щся,/ и спасл еси́ всего́ мя, челове́ка./ Тем зову́ Ти: сла́ва си́ле Твое́й, Го́споди. Припев: Святы́й му́чениче Иоáнне, моли́ Бо́га о на́с. Уподо́бился еси́ распе́ншемуся во́лею на Дре́ве Христу́ Бо́гу на́шему, всече́стне,/ сраспе́нся Ему́ вся́ким воздержа́нием,/ моли́твою же, и ми́лостынею, и мно́гими добродея́ньми. Припев: Святы́й му́чениче Иоáнне, моли́ Бо́га о на́с. Се да́же до сме́рти, Иоа́нне му́чениче, смири́лся еси́:/ святы́я бо твоя́ мо́щи на ме́сте в погребе́нии стра́нных бы́ша сокрове́ны,/ сего́ ра́ди Госпо́дь по всей вселе́нней тебе́ просла́ви. Припев: Святы́й му́чениче Иоáнне, моли́ Бо́га о на́с. Царя́ престу́пника Иулиа́на во́инство тле́нное во вла́сти содержа́в,/ от того́ по́слан был еси́ убива́ти Христо́вы му́ченики./ Но ты, блаже́нне, ты́я храня́, в ве́ре утвержда́л еси́, во е́же пе́ти:/ сла́ва си́ле Твое́й, Го́споди. Сла́ва Отцу́ и Сы́ну и Свято́му Ду́ху. Небе́снаго ра́ди ра́дования и бу́дущаго пра́ведным весе́лия/ земна́я вся оста́вил еси́ мудрова́ния,/ и, вся́чески доброде́тельми Бо́гу угожда́я,/ за ны моли́ся, Иоа́нне всече́стне. И ны́не и при́сно и во ве́ки веко́в. Ами́нь. Богородичен: Недоуме́ние во спасе́ние предлежи́т ми, от обыше́дших мя зол, Пречи́стая./ Те́мже изба́ви мя от них ско́ро, благоразу́мие подаю́щи,/ к Тебе́ бо еди́ней прибего́х, Богома́ти. Песнь 5 Ирмос: Све́та Пода́телю и веко́в Тво́рче, Го́споди,/ во све́те Твои́х повеле́ний наста́ви нас:/ ра́зве бо Тебе́, ино́го бо́га не зна́ем. Припев: Святы́й му́чениче Иоáнне, моли́ Бо́га о на́с. Та́ин Боже́ственных вкуси́в в ра́зуме, Иоа́нне,/ про́поведь Бо́жия рожде́ния испове́дал еси́, глаго́ля пред все́ми:/ ино́го бо́га, ра́зве Всетворца́, не зна́ю. Припев: Святы́й му́чениче Иоáнне, моли́ Бо́га о на́с. Возлюби́вшаго Го́спода люби́те, – возглаго́лал еси́, страстоте́рпче, стра́ждущим му́чеником,/ в Его́же лю́бви утверди́вся, обогати́лся еси́ чудесы́,/ врачу́я боле́зни мно́гия. Припев: Святы́й му́чениче Иоáнне, моли́ Бо́га о на́с. Сла́ву ми́ра сего́ ни во что́же, Богому́дре во́ине, вмени́л еси́,/ сла́вы ра́ди Христо́вы,/ те́мже, страда́льчество соверши́в и сла́вы Боже́ственныя сподо́бився,/ нам получи́ти о́ную моли́ся. Сла́ва Отцу́ и Сы́ну и Свято́му Ду́ху. Не убоя́вся законопресту́пнаго царя́ повеле́ния,/ вме́сто мук христиа́ны заступа́ше,/ и сокрыва́хуся твои́м повеле́нием,/ и сего́ ра́ди во́ин бысть ю́ си́лам. И ны́не и при́сно и во ве́ки веко́в. Ами́нь. Богородичен: Тя, Влады́чице, мо́лим, сла́вяще Твое́ о нас милосе́рдие:/ вся́ких ны скорбе́й, Мари́е, свободи́/ и помози́ у́треневати нам к Бо́гу и ве́чнаго блаже́нства сподо́битися. Песнь 6 Ирмос: В бе́здне грехо́вней валя́яся,/ неизсле́дную милосе́рдия Твоего́ призыва́ю бе́здну:/ от тли, Бо́же, мя возведи́. Припев: Святы́й му́чениче Иоáнне, моли́ Бо́га о на́с. Си́лою Бо́жиею укрепи́вся, му́чеников сла́во, Иоа́нне,/ преще́ний нечести́вых небре́гл еси́;/ ны́не же зря ра́достне Бо́га,/ от злых нас изба́ви. Припев: Святы́й му́чениче Иоáнне, моли́ Бо́га о на́с. Моли́твами и посто́м и в целому́дрии/ вся́ким воздержа́нием Бо́гу угоди́л еси́, всече́стне;/ свы́ше назира́я, свобожда́й ны от ско́рби. Припев: Святы́й му́чениче Иоáнне, моли́ Бо́га о на́с. Проси́мая честву́ющим тя ве́рно, блаже́нне, подае́ши,/ злы́я челове́ки облича́я, о ка́ющихся же Бо́гу моля́ся. Сла́ва Отцу́ и Сы́ну и Свято́му Ду́ху. Му́ченическое дерзнове́ние восприи́м,/ потща́лся еси́ по ве́ре Христо́ве побора́ти, я́коже до́брый во́ин,/ вооружи́ себе́ си́лою Креста́ Госпо́дня,/ от Него́же да́ром чуде́с обогати́ся. И ны́не и при́сно и во ве́ки веко́в. Ами́нь. Богородичен: Уврачу́й, Богоро́дице, стра́сти душ и теле́с на́ших,/ Врача́ Христа́ нам поро́ждши,/ и вра́жие злокова́рство посрами́ милосе́рдием Твои́м. Кондак, глас 6 Благочести́ваго во́ина Христо́ва,/ победи́вшаго враги́ душе́вныя и теле́сныя богому́дренно,/ Иоа́нна му́ченика достодо́лжно пе́сньми восхва́лим,/ чудоде́йствуя бо, подае́т оби́льная исцеле́ния стра́ждущим лю́дем/ и мо́лится Го́споду Бо́гу/ от вся́ких бед спасти́ правове́рныя. Икос Кто по́двиги твоя́ и страда́ния ра́ди ве́ры в Го́спода Иису́са/ изрещи́ возмо́жет, прехва́льне Иоа́нне?/ Или́ ки́ими тя увенча́ем похвала́ми,/ ра́ди му́жественнаго твоего́ в зако́не Госпо́дни и во и́стиннем благоче́стии стоя́ния?/ Попра́л бо еси́ вся ко́зни душетли́теля врага́,/ целому́дрием и вся́кими добротворе́нии вооружи́вся;/ бога́тство и сла́ву и по́хоть вре́дную возненави́дев,/ нищету́ и поноше́ние Христо́во возлюби́л еси́,/ стра́ждущим в ско́рбех помога́я./ Те́мже, всели́вся в Небе́сныя кро́вы, дарова́нии пресла́вных чуде́с обогати́лся еси́./ Отту́ду у́бо, блаже́нне, вся, притека́ющия к тебе́, назира́й, по́мощи творя́,/ во е́же от вся́ких бед спасти́ правове́рныя. Песнь 7 Ирмос: Образу злато́му, на по́ли Деи́ре служи́му,/ трие́ Твои́ о́троцы небрего́ша безбо́жнаго веле́ния,/ посреде́ же огня́ вве́ржени, ороша́еми, поя́ху:/ благослове́н еси́, Бо́же оте́ц на́ших. Припев: Святы́й му́чениче Иоáнне, моли́ Бо́га о на́с. Безбо́жное мучи́теля законопресту́пнаго веле́ние, страстоте́рпче Иоа́нне, преоби́дев,/ богочести́в Всемогу́щаго Царя́ во́ин показа́лся еси́,/ благода́тне же ороша́емь, с людьми́ Бо́жиими пел еси́:/ благослове́н еси́, Бо́же оте́ц на́ших. Припев: Святы́й му́чениче Иоáнне, моли́ Бо́га о на́с. Сла́дкое и вели́кое и ра́достное торжество́ ны́не лю́ди Госпо́дни облиста́,/ е́же му́чеников до́блейший целому́дрый Иоа́нн вообрази́./ То́чит бо цельбы́ моля́щимся ве́рно Го́споду, и́же взыва́ют:/ благослове́н еси́, Бо́же оте́ц на́ших. Припев: Святы́й му́чениче Иоáнне, моли́ Бо́га о на́с. Дерзнове́ние име́я ко Влады́це всех, свя́те Иоа́нне, я́ко бли́жний уго́дник Его́,/ во обстоя́нии напа́стей на́ших предста́тельствуй Ему́ о нас/ и помога́й изба́витися нам от грехо́в, да богому́дренно пое́м:/ благослове́н еси́, Бо́же оте́ц на́ших. Сла́ва Отцу́ и Сы́ну и Свято́му Ду́ху. Дерзнове́ние име́я к своему́ Влады́це,/ о нас моли́тву сотвори́, Иоа́нне,/ и проше́ния на́ша испо́лни,/ и грехо́в проще́ния испроси́ нам моли́твами твои́ми, вопию́щим:/ благослове́н еси́, Бо́же оте́ц на́ших. И ны́не и при́сно и во ве́ки веко́в. Ами́нь. Богородичен: Пресла́вное соверши́ся та́инство в Тебе́, Богома́ти,/ безсе́менно бо зачала́ еси́ Сы́на бре́мя грех на́ших упраздни́вшаго./ Те́мже, упова́ние на Тя иму́ще и Твою́ по́мощь зря́ще, усе́рдно вопие́м:/ благослове́на еси́, Де́во Влады́чице. Песнь 8 Ирмос: Пещь иногда́ о́гненная в Вавило́не де́йства разделя́ше,/ Бо́жиим веле́нием халде́и опаля́ющая,/ ве́рныя же ороша́ющая, пою́щия:/ благослови́те, вся дела́ Госпо́дня, Го́спода. Припев: Святы́й му́чениче Иоáнне, моли́ Бо́га о на́с. Вы́шних ища́й, на земли́ пре́лести возненави́дел еси́, Богоблаже́нне./ Те́мже, с му́ченики Христо́выми в любви́ духо́вней соедини́вся,/ дерзнове́нно Богочелове́ка Иису́са пропове́дал еси́, о Не́мже зове́ши:/ благослови́те, вся дела́ Госпо́дня, Го́спода. Припев: Святы́й му́чениче Иоáнне, моли́ Бо́га о на́с. Неоску́дно тре́бования подава́я,/ ни́щим был еси́ гото́вый пита́тель, во́ине благочестивому́дренне Иоа́нне./ И ны́не, притека́ющия к тебе́ назира́я, испо́лни тех проше́ния, да ра́достно зове́м:/ благослови́те, вся дела́ Госпо́дня, Го́спода. Припев: Святы́й му́чениче Иоáнне, моли́ Бо́га о на́с. Всезри́тель Бог, усе́рдие твое́, Иоа́нне, и соверше́нную ве́ру ви́дев,/ просла́ви тя сла́вою ве́чною./ Его́же моли́ в по́льзе уще́дрити ны, богому́дренно пою́щия:/ благослови́те, вся дела́ Госпо́дня, Го́спода. Сла́ва Отцу́ и Сы́ну и Свято́му Ду́ху. Моле́ния на́ша приими́, ны́не приноси́мая тебе́, пра́ведному страстоте́рпцу./ Тебе́ бо даде́ Госпо́дь чудесе́м дарова́ние/ подая́ти прося́щим ве́рно проше́ния и превознося́щим Христа́ во ве́ки и пою́щим:/ благослови́те, вся дела́ Госпо́дня, Го́спода. И ны́не и при́сно и во ве́ки веко́в. Ами́нь. Богородичен: Мари́е Богоневе́сто, к Тебе́ прибега́ем и Тебе́, припа́дающе, мо́лимся:/ виждь, Влады́чице, скорбь на́шу и озлобле́ние от враг на́ших/ и умири́ жизнь всех нас, Миротво́рца поро́ждши Го́спода,/ Его́же благослови́м во ве́ки. Песнь 9 Ирмос: Безнача́льна Роди́теля Сын, Бог и Госпо́дь,/ вопло́щся от Де́вы, нам яви́ся,/ омраче́нная просвети́ти, собра́ти расточе́нная./ Тем Всепе́тую Богоро́дицу велича́ем. Припев: Святы́й му́чениче Иоáнне, моли́ Бо́га о на́с. Добр яви́лся еси́ посо́бник, пресла́вне, лю́дем Бо́жиим, гони́мыя сокрыва́я,/ и ны́не чуде́сне помоществу́еши ве́рным,/ сего́ ра́ди в па́мяти благодея́ний твои́х Христа́ Бо́га велича́ем. Припев: Святы́й му́чениче Иоáнне, моли́ Бо́га о на́с. Твоя́ чудеса́, преблаже́нне Иоа́нне, во всем ми́ре пропове́даются;/ те́мже и днесь, собра́вшеся, сла́ву возсыла́ем Христу́, тебе́ просла́вльшему. Припев: Святы́й му́чениче Иоáнне, моли́ Бо́га о на́с. Нас, восхваля́ющих тя, му́чениче Христо́в,/ и твоея́ по́мощи прося́щих, днесь услы́ши,/ и к поле́зным управля́ти не преста́й,/ моли́твенник тепле́йший и хода́тай к Бо́гу на́шему явля́яся. Сла́ва Отцу́ и Сы́ну и Свято́му Ду́ху. Изря́ден врач серде́ц челове́ческих чудодея́нии яви́лся еси́, Иоа́нне,/ помоществу́я всем богочести́вым;/ тем, воспева́юще тя, Христа́ велича́ем. И ны́не и при́сно и во ве́ки веко́в. Ами́нь. Богородичен: Пе́ти, Де́во, Тя не престае́м,/ Помо́щницу, покро́в, ско́рое заступле́ние и Предста́тельницу на́шу непосты́дную;/ соблюди́ Твоя́ рабы́ от вся́каго озлобле́ния/ и от ко́зней лука́ваго свобожда́й при́сно. Светилен Венцено́сче святе, предстоя́й со А́нгелы Христо́ву Престо́лу/ и све́та отту́ду исполня́яйся, страстоте́рпче,/ мир ми́ру моли́твами твои́ми исхода́тайствуй/ и нам спасе́ние, благоче́стно па́мять твою́ соверша́ющим/ и в ско́рбех притека́ющим к тебе́, Иоа́нне всебога́те. Сла́ва Отцу́ и Сы́ну и Свято́му Ду́ху. Позна́нием себе́ сама́го позна́л еси́ Всетворя́щую Вину́, Бо́га,/ в Него́же и уве́ровал еси́/ и, Того́ испове́дав, просвеща́еши мир чудесы́, Иоа́нне Богоблаже́нне. И ны́не и при́сно и во ве́ки веко́в. Ами́нь. Богородичен: Во чре́ве Твое́м Госпо́дь, погиба́ющий мир от тле́ния призва́ти восхоте́в,/ я́коже ве́дяше, всели́ся, Богоро́дице./ Спасе́ние у́бо вси обре́тше, вопие́м Тебе́:/ ра́дуйся, Всепе́тая Де́во, поро́ждши ра́дость всей вселе́нней,/ обра́дуй и нас, от враго́в злоде́йства храня́щи всегда́.

Предведый Божие пришествие во плоти/ и наитие Духа Святаго и грядущий Суд предсказавый,/ пророче Иоиле,/ спасай молитвами твоими// чтущия тя от всех скорбей.

Мудрости благодатию, отче, украшенный,/ труба богогласная показался еси Духа/ и добродетелей наставник, Никодиме Богоглаголивый,/ всем бо подаеши спасительная учения,/ жития чистаго показуя сияние/ богатством Божественных твоих словес,// имиже, яко свет, мирови возсиял еси.

От юности твоея вперив ум твой к Богу, блаженне Симоне,/ мира же отвергся, вселился еси в пустыню непроходимую,/ и тамо, от Господа укрепляемь,/ в молитвах и пощениих доблественне пожил еси,/ и жизнь твою страдальчески/ убиением от сынов противления скончал еси./ Сего ради со преподобными и мученики венчался еси,/ с ними же и ныне предстоиши Престолу Пресвятыя Троицы./ Сию моли, молим тя,/ оставление подати согрешений наших/ и даровати нам велию милость.

В тебе, отче, известно спасеся, еже по образу:/ приим бо крест, последовал еси Христу/ и, дея, учил еси презирати убо плоть, преходит бо,/ прилежати же о души, вещи безсмертней./ Темже и со Ангелы срадуется, преподобне Михаиле, дух твой.

Заступнице земли Российския/ от нашествия Свейскаго/ и непрестанная за нас Молитвеннице,/ мир земли и душам нашим у Господа испроси,/ да святится в нас Имя Божие во веки.

Иже к добродетелем прилежанием взыграния плоти обуздал еси,/ благими нравы душу свою украсив,/ от земных Христу превозведе ум свой,/ тем от Него исцелением струя независтна явися,/ притекающим верою к тебе и любезно зовущим:/ Варлааме, отче наш,/ моли Христа Бога,/ да спасет души наша.

Яко пресветлая звезда,/ явилася еси в Российстей земли, во граде Кашине,/ преподобная мати Анно,/ во всех благочестивых и верных женах,/ аки крин, процвела еси чистым и непорочным твоим житием,/ во инокинях же совершенными твоими труды и подвиги,/ и возшла еси к Вышнему граду, радующися и веселящися,/ яко добре совершивши твое течение,/ и ныне честныя твоя мощи,/ аки бисерие драгое, явишася,/ на исцеление всем, приходящим с верою./ Тем и вопием ти:/ радуйся, всекрасная душею,/ и моли Христа Бога/ о спасении душ наших.

Божественною свыше благодатию просветився, Богомудре, / и по смерти яви тя светлость жития твоего, / темже источаеши мирови благоухание, / иже с верою притекающим к раце мощей твоих, Ефреме преподобне. / Тем вопием ти: / слава Давшему ти чудесем благодать, / слава Прославльшему тя в чудесех, / слава Действующему тобою всем исцеления.

Верою память твою, блаженне, совершающий,/ соблюдай от всякия злобы и соблазна змиина,/ имаши бо дерзновение ко всех Владыце, Христу Богу,/ Егоже моли избавитися от бед и напастей рабом твоим,/ Богомудре Исидоре.

Просветився Божественною благодатию, Богомудре,/ целомудрием многим и терпением/ во временней жизни течение добре скончал еси./ Тем и по смерти яви тя светлость жития твоего:/ источавши бо исцелений благодать/ иже с верою притекающим ко святому твоему гробу,/ Исидоре блаженне,/ моли Христа Бога,/ да спасет души наша.

Красото Церкве, утвердившийся на камени — Боговоплощенном Спасе Христе,/ Богоправимое добродетелей правило,/ Донате, досточудный чудотворче,/ яко иерарх имееши дерзновение всетворящему Богу о людех молитися,/ врагов видимых и невидимых предстательством твоим свободи вопиющия:/ слава в Троице Единому Богу.

Псково-Печерская обитель,/ издревле славная чудесы иконы Богоматерни,/ многия иноки Богови воспита,/ тамо и преподобный Корнилий/ подвигом добрым подвизася,/ чудную Богоматерь славя,/ иноверныя просвещая,/ иноки и многия люди спасая,/ обитель же свою дивно украшая и ограждая./ Тамо и мученичества венец/ по многих летех пастырства своего доблестне прият./ Темже воспоим, людие,/ Христа Бога и Пречистую Его Матерь возблагодарим,/ яко даров а нам преподобномученика славна/ и молитвенника о душах наших достоблаженна.

Наста днесь всечестный новый праздник,/ пренесение честных мощей/ блаженнаго князя Гавриила,/ веселящи изрядно всех благочестивых множества,/ темже, вси вернии,/ сошедшеся во святый храм Живоначальныя Троицы, возопием:/ блаженне княже Гаврииле,/ имея дерзновение ко Христу Богу,/ моли спастися празднующим любовию память твою.