Молитвы

Днесь Ангели с человеки радуются вкупе общим веселием,/ Небо и земля светло ликуют в память твою, святе./ И мы, грешнии, прилежно ти вопием:/ помолися к Владыце о нас,/ избавити ны от напасти/ видимых и невидимых враг,/ чтущих пресветлую память твою.

Твердаго и Боговещаннаго проповедателя Евангелия Твоего, Господи,/ возмездил еси Боголепно/, труды бо его и болезни приял еси паче всех жертв законных и всесожжении./ Того молитвами соблюди нас от неприязни.

Днесь Едес град веселится,/ прием тобою Крещения баню,/ и Авгарь, страстей пременен, твою память славит./ С нимиже поем и мы:/ веселия духовнаго исполни живот наш/ и страсти исцели,/ Фаддее апостоле, молитвами твоими.

Кондак 1 Избранный чудотворче, великий угодниче Христов, святителю отче Феодосие, нетлением мощей твоих и множеством чудес от Бога прославленный, в песнех радостных ублажаем тя, заступника нашего. Ты же, яко имеяй дерзновение ко Господу, от всяких нас бед свобождай, да зовем ти: Радуйся, угодниче Божий, святителю Феодосие, чудотворче преславный. Икос 1 Ангел во плоти явился еси, богомудре Феодосие, ангельскими нравы измлада себе украшая; темже и Ангел церкве Черниговския достойне поставлен был еси от Бога, всех наставляя ко спасению и всем являя в себе правило веры и образ кротости, воздержания же и любве. Сего ради, чада твоя суще, любовию вопием ти сице: Радуйся, Ангеле земный и человече небесный; ра́дуйся, небесных сил собеседниче и сослужителю. Радуйся, в житии твоем безплотным поревновавый; ра́дуйся, и по смерти с ними водворивыйся. Радуйся, от юности Христа всем сердцем твоим возлюбивый; ра́дуйся, от утра жизни твоея Тому единому поработавый. Радуйся, вся заповеди Господни верно и непорочно сохранивый; ра́дуйся, мног плод духовный о Христе сотворивый. Радуйся, усердною молитвою дух твой окриливый; ра́дуйся, чтущих любовию память твою от бед покрывающий. Радуйся, угодниче Божий, святителю Феодосие, чудотворче преславный. Кондак 2 Видев суету мира сего скорогибнущую, всем сердцем возжелал еси, отче Феодосие, мир сей оставити и во иночестве Богу послужити. Темже иго Христово благое и легкое усердне восприяв, инок святыя обители Киево-Печерския смирен и послушлив был еси, воспевая всех Творцу ангельскую песнь: Аллилуиа. Икос 2 Разум богопросвещенный твой видев, святитель Киевский Дионисий постави тя, Феодосие, архидиакона соборныя церкве Софии Премудрости Божией, да служиши алтарю Господню при совершении Таин Божиих. Мы же, в тебе избранный сосуд Духа Святаго ведуще, со умилением зовем ти сицевая: Радуйся, под кровом чудотворцев Печерских начало подвигов твоих положивый; ра́дуйся, от юности добродетельми монашескаго жития преизрядно себе украсивый. Радуйся, иноков пресветлая красото; ра́дуйся, постников преславная похвало. Радуйся, святителей благоговейных любимый собеседниче; ра́дуйся, послушания нелицемерный рачителю. Радуйся, подвижниче смиренный, на Господа все упование возложивый; ра́дуйся, уединеннаго жития добрый ревнителю. Радуйся, избранниче Христов преблаженный; ра́дуйся, Богом данный нам заступниче непреоборимый. Радуйся, угодниче Божий, святителю Феодосие, чудотворче преславный. Кондак 3 Сила Божия осени тя, отче Феодосие, егда во иерея посвящен был еси от святителя Дионисия и во игумена обители Корсунския от него поставлен, да пасеши Христово стадо и руководиши иноки ко спасению, воспевая купно с ними хвалебную песнь в Троице славимому Богу: Аллилуиа. Икос 3 Имея смирение нелицемерное, прах и пепел себе именовал еси, преблаженне Феодосие, и запрещение от архиерея, неповинен сый, безропотно понесл еси; темже и мы, ублажающе таковое, воистину христоподражательное, незлобие твое, воспеваем тебе сице: Радуйся, агнче незлобивый, никомуже зла за зло воздавый; ра́дуйся, яко запрещение архиерейское нося, послушание великое явил еси. Радуйся, яко тогда и епитрахили коснутися не дерзал еси; ра́дуйся, смирением и преданием себе в волю Божию врага победивый. Радуйся, иноче боголюбезный, преподобием и кротостию благоукрашенный; ра́дуйся, постническим житием, яко безкровным мученичеством увенчанный. Радуйся, монашествующим отец и наставник богомудрый; ра́дуйся, обителей иноческих многоопытный руководителю. Радуйся, Престола Божия верный и благоговейный служителю; ра́дуйся, пред Богом теплый о нас ходатаю. Радуйся, угодниче Божий, святителю Феодосие, чудотворче преславный. Кондак 4 Бурю гонений на Церковь Божию во граде Киеве воздвиже мудрование латинское; ты же, богомудре Феодосие, во игумена обители Выдубецкия тогда поставлен быв, сию от лжеучения оградил еси, утверждая братию свою в православней вере непорочно воспевати Богу: Аллилуиа. Икос 4 Слышав богоугодное житие твое, отче Феодосие, святитель Божий Лазарь, призва тя от Киева в Чернигов и, поставив во архимандрита пречестныя обители Елецкия, сотвори помощника себе во управлении церковнем; ты же с любовию сыновнею послужил еси ему и воистину достоин явился еси, да воспеваем ти сицевая: Радуйся, старцу святителю с любовию послуживый; ра́дуйся, яко сын отцу во всем ему послушен бывый. Радуйся, старость его упокоивый; ра́дуйся, труды святительския ему облегчивый. Радуйся, благолепия церковнаго усердный рачителю; ра́дуйся, преданий апостольских верный хранителю. Радуйся, правды ревностный блюстителю; ра́дуйся, долга пастырска непоколебимый исполнителю. Радуйся, алтаря Господня служителю непорочный; ра́дуйся, пастырем светлый образе. Радуйся, угодниче Божий, святителю Феодосие, чудотворче преславный. Кондак 5 Боготечную звезду, к горнему Иерусалиму путеводящую и добродетельми светло сияющую, зряще тя, предивный Феодосие, иноцы же и мирстии с любовию последоваху тебе, внимающе твоему учению душеполезному и взирающе на образ чистаго жития твоего, поучахуся взывати с тобою Богу, дивному во святых Своих: Аллилуиа. Икос 5 Видев себе святитель Лазарь старостию преутруждена и в силах телесных изнемогша, возжела имети тя, Феодосие, преемника по себе во святительстве и проси Святейшаго Патриарха Московскаго посвятити тя во архиепископа. Мы же в сем Божие звание, еже на тебе, уразумевающе, любовию прославляем тя сице: Радуйся, архиерею Божий, от Предвечнаго Архиерея дивно предызбранный; ра́дуйся, Апостолов достойный преемниче и усердный ревнителю. Радуйся, святителю Христов, от собора святителей российских освященный; ра́дуйся, иерарше благий и нищелюбивый. Радуйся, архипастырю милостивый и сострадательный; ра́дуйся, святителем Митрофану и Димитрию собеседниче и сопрестольниче. Радуйся, архиереев православных красото; ра́дуйся, пастырю добрый, душу твою за овцы положити готовый. Радуйся, учителю златословесный; ра́дуйся, богосветлый светильниче Церкве Христовы, во тьме века сего возсиявший. Радуйся, угодниче Божий, святителю Феодосие, чудотворче преславный. Кондак 6 Проповедник не словом точию, но и делом явился еси Христова учения, святителю Феодосие, яко пастырь добрый, по образу Пастыреначальника Христа всех с любовию наставляя ко спасению, всем образ жития по заповедем Христовым подавая и всех поучая взывати присно Богу: Аллилуиа. Икос 6 Возсиял еси, яко утро светозарное, стране Черниговстей, святителю Божий Феодосие, и паству, тебе вверенную, светом добродетелей твоих озарил еси, смирением высокая стяжавая и нищету иноческую соблюдая; вся бо, яже имел еси, неимущим усердне раздавал еси. О сем дивящеся, яко нищелюбца совершеннаго ублажаем тя, зовуще: Радуйся, милосердия источниче неисчерпаемый; ра́дуйся, сирым прибежище благонадежное. Радуйся, вдовицам милостивый покровителю; ра́дуйся, алчущих неоскудный питателю. Радуйся, обидимым скорый заступниче; ра́дуйся, скорбящим благонадежный утешителю. Радуйся, сущим в бедах готовый помощниче; ра́дуйся, младенцем добрый воспитателю. Радуйся, юношам и девам в целомудрии наставниче; ра́дуйся, старцем и немощным твердое укрепление. Радуйся, угодниче Божий, святителю Феодосие, чудотворче преславный. Кондак 7 Хотя всем сердцем твоим единому Господу благоугождати, подвигом добрым до конца подвизался еси, Феодосие, труды к трудом во смирении прилагая, постом и бдением с молитвою плоть твою умерщвляя и любовию всех согревая. Темже и сподобился еси еще на земли достойно и праведно воспевати ангельскую песнь Богу: Аллилуиа. Икос 7 Новаго тя молитвенника и чудотворца предивнаго яви Господь в стране Российстей, святителю отче Феодосие; темже и светло красуется тобою Церковь Православная, яко дерзновение велие ко Христу имаши, Емуже молися, святителю, о нас грешных, любовию тебе вопиющих сицевая: Радуйся, пресветлый светильниче веры православныя; ра́дуйся, православия страже неусыпающий. Радуйся, благочестия ревностный поборниче; ра́дуйся, Церкве Божия столпе непоколебимый. Радуйся, храмино добродетелей приукрашенная; ра́дуйся, безстрастия и чистоты ревнителю преизрядный. Радуйся, молитвы сокровище неистощимое; ра́дуйся, таин Божиих верный строителю. Радуйся, паству твою в вере и благочестии соблюдаяй; ра́дуйся, со святыми сликования в Небесном Царствии сподобивыйся. Радуйся, угодниче Божий, святителю Феодосие, чудотворче преславный. Кондак 8 Странствие земное богоугодне совершив, святителю отче Феодосие, свято и праведно почил еси о Господе сном смерти, яже бысть тебе прохождение от трудов на покой вечный; приял бо еси от Христа Бога венец славы нетленный и водворился еси со святыми воспевати Ему вечно хвалебную песнь: Аллилуиа. Икос 8 Весь еси любовь неоскудевающая, святителю Божий Феодосие; якоже бо в житии сем, тако и по преставлении к Богу чад твоих не оставляеши; на всех, к тебе верою притекающих, милостивне призираеши, болящим исцеление подавая, скорбящих утешая, от бед избавляя. Сего ради, благодарни суще, воспеваем ти сице: Радуйся, нищету духовную от юности возлюбивый; ра́дуйся, Христу в меньших братиях Его верно послуживый. Радуйся, двери милосердия Божия нам отверзающий; ра́дуйся, гнев Божий, праведно на ны движимый, на милость прелагающий. Радуйся, по отшествии твоем к Богу с нами пребывающий; ра́дуйся, умерщвленныя грехами души благодатию Христовою оживляющий. Радуйся, источниче сострадания к людем приснотекущий; ра́дуйся, омраченных заблуждениями благостный просветителю. Радуйся, с небесных высот на скорби наши призирающий; ра́дуйся, всех нас любовию твоею объемлющий. Радуйся, угодниче Божий, святителю Феодосие, чудотворче преславный. Кондак 9 Вси людие черниговстии прославиша Бога, егда услышаша о преславном явлении твоем, святителю Феодосие, преемнику твоему архиепископу Иоанну, егоже от недуга тяжка исцелил еси, являя дерзновение твое ко Господу. Сего ради и потщася гроб твой благоукрасити и подобие лица твоего над ним поставити, зовый дивному во святых Своих Богу: Аллилуиа. Икос 9 Витии многовещаннии не возмогут восхвалити тя по достоянию, вечныя славы достойнаго, святителю отче Феодосие; и кто может поведати многая и преславная чудеса твоя, яже источил еси от нетленных мощей и икон твоих святых; о сем убо радующеся и Бога, святых Своих прославляющаго, славяще, вопием ти сице: Радуйся, в пресветлых райских чертозех обитающий; ра́дуйся, нетлением мощей твоих зарю общаго воскресения нам предпоказующий. Радуйся, в видениих во благо верующим являющийся; ра́дуйся, в сониих на молитву к твоему ходатайству призывающий. Радуйся, слезы и воздыхания скорбящих с любовию утоляющий; ра́дуйся, прошения труждающихся и обремененных скоро исполняющий. Радуйся, от внезапныя смерти верных избавляющий; ра́дуйся, данныя Богу обеты исполняти побуждающий. Радуйся, слепым прозрение, глухим слышание подающий; ра́дуйся, отче чадолюбивый, якоже кокош под криле, духовная чада твоя у гроба твоего собирающий. Радуйся, угодниче Божий, святителю Феодосие, чудотворче преславный. Кондак 10 Спасение вечное унаследовал еси, святителю Феодосие, и светло ныне ликуеши со Ангелы и всеми святыми, присно созерцая пресветлое лице Христа Бога нашего, Егоже молити не престай за ны грешныя, да твоим заступлением сподобимся купно с тобою воспевати Ему: Аллилуиа. Икос 10 Стена ограждения в Церкви Православней являешися, святителю Божий, множеством дивных чудес твоих верныя утверждающая и явлением силы Божиея вся еретическая мудрования отражающая; наставников бо раскола нетлением мощей твоих зело удивил еси и исповедати истину православия возбудил еси. Темже со страхом и благоговением вкупе с верными взываху ти сице: Радуйся, прославлением мощей твоих всех нас радости исполнивый; ра́дуйся, нетлением телесе твоего неверие глаголемых старообрядцев в веру претворивый. Радуйся, ересь штунды чудесы преславными посрамивый; ра́дуйся, жену от люторовы ереси крестное знамение православне полагати научивый. Радуйся, младенцу слепому у мощей твоих внезапу прозрение даровавый; ра́дуйся, немотствующий язык помазанием елея от лампады твоея разрешивый. Радуйся, тем же елеем струпы неисцельныя исцеляяй; ра́дуйся, близ смерти сущих болящих к жизни возвращаяй. Радуйся, яко лишеннии разума у мощей твоих благодатию Христовою исцеляются; ра́дуйся, яко и пелены от гроба твоего чудодействуют. Радуйся, угодниче Божий, святителю Феодосие, чудотворче преславный. Кондак 11 Пение молитвенное не умолкаше у мощей твоих, святителю Феодосие, от дне погребения даже до дне прославления твоего со святыми, егда собор святителей Церкве Российския со славою из пещеры мощи твоя изнесе и в соборней церкви града Чернигова на общее поклонение честне положи. Приими убо и наше смиренное пение хвалебное и помози нам покаянием очиститися, да во исполнении заповедей Христовых преуспевающе и тобою наставляеми, с тобою благодарственне вопием Богу: Аллилуиа. Икос 11 Светильник благодатный быв в житии твоем, святителю Феодосие, тихим светом смирения и любве на свещнице Церкве Христовы сияющий, и по преставлении твоем возсиял еси, яко солнце, предивными чудесы мглу раскола и ересей разгоняя и верных сердца к Богу обращая. Темже, с любовию празднующе святую память твою, вопием ти: Радуйся, звездо лучезарная, над землею черниговскою возсиявшая; ра́дуйся, и всю страну Российскую светом своим озарившая. Радуйся, града Чернигова славо и ограждение; ра́дуйся, всея земли нашея страже неусыпный и теплый молитвенниче. Радуйся, у Престола Царя царствующих за царя нашего предстательствующий; ра́дуйся, яко имя твое по всей стране нашей от конца в конец прославляется. Радуйся, яко явлении твоими неверныя в веру православную обращаеши; ра́дуйся, яко чудесы твоими инославныя к православию наставляеши. Радуйся, яко с небесными силами присно Богу воспеваеши; ра́дуйся, яко на небесех выну славу Его созерцаеши. Радуйся, угодниче Божий, святителю Феодосие, чудотворче преславный. Кондак 12 Благодати Божией сосуд избранный был еси, святителю Феодосие; благодать Божию и в помощь немощи нашей испроси у Господа, да сею благодатию спасаеми, присноборющия ны страсти победим, и тою укрепляеми, Подателя всех благ Господа Иисуса всегда с тобою прославляем, зовуще Ему: Аллилуиа. Икос 12 Поюще многая и преславная чудеса твоя и прославляюще великия подвиги твоя, святителю отче наш Феодосие, со умилением сердца славим, хвалим и величаем возвеличившаго тя Господа, в тебе явльшаго нам новое знамение Своего благоволения к Церкви Православней, яко вечному столпу и утверждению истины; тебе же, яко теплому предстателю нашему пред Богом, возглашаем сицевая: Радуйся, в вертограде Господни от утра до вечера жизни твоея добре потрудивыйся; ра́дуйся, в радость Господа своего, яко раб благий и верный, вшедый. Радуйся, житием твоим путь в обители небесныя нам показавый; ра́дуйся, венцем безсмертия и славы небесныя увенчанный. Радуйся, неба церковнаго звездо пресветлая; ра́дуйся, земли Российския похвало пречудная. Радуйся, яко со всеми святыми в горних обитаеши; ра́дуйся, яко и нас грешных на земли любовию посещаеши. Радуйся, имже Христос прославися; ра́дуйся, имже сатана посрамися. Радуйся, угодниче Божий, святителю Феодосие, чудотворче преславный. Кондак 13 О, великий угодниче Божий и чудотворче, святителю отче наш Феодосие! Приими сие малое моление наше, в похвалу тебе, аще и недостойне, обаче с любовию сыновнею приносимое, и умоли Господа Бога избавитися нам от всяких бед, скорбей и напастей, от междоусобныя брани и внезапныя смерти, и от мучений вечных в будущем веце, и сподобитися в вечней жизни с тобою воспевати Ему: Аллилуиа.[Се́й конда́к глаго́лется три́жды.][Далее повторяем 1‑е икос и кондак:]Икос 1 Ангел во плоти явился еси, богомудре Феодосие, ангельскими нравы измлада себе украшая; темже и Ангел церкве Черниговския достойне поставлен был еси от Бога, всех наставляя ко спасению и всем являя в себе правило веры и образ кротости, воздержания же и любве. Сего ради, чада твоя суще, любовию вопием ти сице: Радуйся, Ангеле земный и человече небесный; ра́дуйся, небесных сил собеседниче и сослужителю. Радуйся, в житии твоем безплотным поревновавый; ра́дуйся, и по смерти с ними водворивыйся. Радуйся, от юности Христа всем сердцем твоим возлюбивый; ра́дуйся, от утра жизни твоея Тому единому поработавый. Радуйся, вся заповеди Господни верно и непорочно сохранивый; ра́дуйся, мног плод духовный о Христе сотворивый. Радуйся, усердною молитвою дух твой окриливый; ра́дуйся, чтущих любовию память твою от бед покрывающий. Радуйся, угодниче Божий, святителю Феодосие, чудотворче преславный. Кондак 1 Избранный чудотворче, великий угодниче Христов, святителю отче Феодосие, нетлением мощей твоих и множеством чудес от Бога прославленный, в песнех радостных ублажаем тя, заступника нашего. Ты же, яко имеяй дерзновение ко Господу, от всяких нас бед свобождай, да зовем ти: Радуйся, угодниче Божий, святителю Феодосие, чудотворче преславный. Молитва О, священная главо, крепкий наш молитвенниче и заступниче, святителю Феодосие, услыши нас, с верою призывающих тя и усердно припадающих к раце честных и многоцелебных мощей твоих (или: иконе твоей). Поминай нас у Престола Вседержителева и не престай молитися за ны. Вемы, яко грехи наши разлучают нас между нами и тобою, и недостойни есмы толикаго отца и ходатая. Но ты, быв подражатель человеколюбия Божия, не престани вопия о нас ко Господу, испроси предстательством твоим у Всемилостивейшаго Бога нашего мир Церкви Его, на земли воинствующей, пастырем ея силу ревностно подвизатися о спасении людей. Умоли Небеснаго Отца всем нам подати дар, коемуждо благопотребен, веру истинную, надежду твердую и любовь неоскудевающую, градов наших утверждение, мира умирение, от глада и пагубы избавление, от нашествия иноплеменников сохранение, юным и младенцем благое в вере возрастание, старым и немощным утешение и подкрепление, болящим исцеление, сиротам и вдовицам милость и заступление, заблуждшим исправление, бедствующим благовременную помощь. Не посрами нас в уповании нашем, споспешествуй, яко отец чадолюбивый, и нам понести иго Христово во благодушии и терпении, и всех управи в мире и покаянии непостыдно скончати живот свой и Царствия Божия наследником быти, идеже ты ныне водворяешися со Ангелы и всеми святыми, прославляя Бога, в Троице славимаго, Отца и Сына и Святаго Духа. Аминь.

Кондак 1 Избранный угодниче и добрый воине Царя Небеснаго, заповедей Евангельских изрядный делателю, всех прибегающих к тебе ко спасению наставниче, смирением велие дерзновение стяжавый ко Господу, выну моли о нас, недостойных чадех твоих, да зовем ти: Радуйся, преподобне Феодоре, стада Христова пастырю богомудрый. Икос 1 Ангельское житие твое провидя и многих ко спасению привести имущаго, от юности избрав тя Христос в жилище Себе, дары многими тя почти: мы же, прославляюще тя прославльшаго, бренными устнами вопием ти: Радуйся, в разум истины пришедый; Радуйся, яко врага и вся страсти одолел еси. Радуйся, яко звание учительства от Господа приял еси; Радуйся, яко научил еси нас спасения пути. Радуйся, вся злострадания кротко претерпевый; Радуйся, яко данный тебе талант сторицею преумножил еси. Радуйся, преподобне Феодоре, стада Христова пастырю богомудрый. Кондак 2 Видев печальный конец плотскаго жития и безчинныя утехи мирския в смертоносный яд вменив, вразумившему тя Господу, взывал еси: Аллилуиа. Икос 2 Разум божественный желая стяжати, вся земная во уметы вменил еси, да безценный бисер, Христа, приобрящеши. Темже пустынное житие избрал еси, сего ради вопием ти: Радуйся, человеческая пристрастия отринувый; Радуйся, безстрастия возжелевый. Радуйся, своеволие оставивый; Радуйся, плотоугодие возненавидевый. Радуйся, яко немощную плоть духом побеждал еси; Радуйся, яко вместо земнаго веселия небесное стяжал еси. Радуйся, преподобне Феодоре, стада Христова пастырю богомудрый. Кондак 3 Силою Божиею укрепляемь, велия подвиги подъял еси: покаяние начало положив, плоть непрестанно озлоблял еси и, все упование на Господа возложив, вопиял еси Ему: Аллилуиа. Икос 3 Имея нрав незлобивый и сердце милующее, неразумным гонителем твоим вся обиды прощал еси, наипаче умолял еси от возлюбленныя тя пустыни не отлучати. Темже, видяще таковое твое во юности преуспеяние, восхваляем тя: Радуйся, кроткий пустынножителю; Радуйся, от юности непрелестный подвижниче. Радуйся, от демонов ненавидимый; Радуйся, за Христа поношения претерпевый. Радуйся, все упование на Господа возложивый; Радуйся, в вере своей не посрамивыйся. Радуйся, преподобне Феодоре, стада Христова пастырю богомудрый. Кондак 4 Буря безбожия и противных ветров воста тогда на Русь святую, и не бе места во обителех истинным рабом Христовым, сего ради и ты странствия и скитания подъял еси, обаче на всяком месте возлюбленному Богу вопиял еси: Аллилуиа. Икос 4 Слышав повеление Спасителево, не отвратился еси воздати кесарево кесарю и, представ на суд мира сего, вспять не обратился еси, темже ублажаем твердость твою, взывающе: Радуйся, любовь к миру до конца умертвивый; Радуйся, яко вся земная презрел еси. Радуйся, вышняго Царя паче земнаго убоявыйся; Радуйся, славы суетныя не восхотевый. Радуйся, несмущенною твердостию царицу удививый; Радуйся, верою крепкою суд на милость преложивый. Радуйся, преподобне Феодоре, стада Христова пастырю богомудрый. Кондак 5 Боготечная звезда возсиял еси в столице северней, темный запад унылаго жития благочестием своим озарив и научая собою Просветителю душ вопити: Аллилуиа. Икос 5 Видя себе ко ангельскому чину причтена, Бога восхвалял еси, вся благая желания исполняющаго: чада спасения же в тебе истиннаго отца и пастыря обретоша, с нимиже и мы поем таковая: Радуйся, чистым житием к себе души привлекавый; Радуйся, постничеством всех удивлявый. Радуйся, яко обеты иноческия строго соблюл еси; Радуйся, яко непрестанную молитву возделал еси. Радуйся, в разсуждении Златоусту подобник быв; Радуйся, яко свыше дар врачевания душ приял еси. Радуйся, преподобне Феодоре, стада Христова пастырю богомудрый. Кондак 6 Проповедника боговещаннаго тя видя и стадо овец Христовых окрест тебе умножающееся, паки воста на тя завистник древний, злобу и клевету во уста недостойная вложив; ты же, провидя козни его, Подателю благосердия пел еси: Аллилуиа. Икос 6 Возсия свет радости в души твоей, егда, место гневу дав, псаломски в пустыни саровстей водворился еси, обаче и паству твою на тучныя пажити монашескаго жительства привел еси, с неюже ликующе, и мы рцем: Радуйся, гонителем мщения не давый; Радуйся, смирением их победивый. Радуйся, яко словопрений удалялся еси; Радуйся, среди житейския молвы пустыннаго духа не угасивый. Радуйся, шумом мира тяготивыйся; Радуйся, яко горлица пустыннолюбная, из него воспаривый. Радуйся, преподобне Феодоре, стада Христова пастырю богомудрый. Кондак 7 Хотя человеколюбец Господь воинство иноков преумножити и чрез тя сие ко спасению привести, из славнаго Сарова в тишину Санаксара пресели тя и тамо, яко светильник горящий и светящий, на свещнице тя постави, со чады поющаго: Аллилуиа. Икос 7 Новое и дивное явление зрим на месте сем, видяще тя, яко единаго от древних, лучами святости сияющаго, среди дремучих лесов обитель святую, яко град велик, воздвизающаго: темже зело удивляеми, благодарно воспеваем ти: Радуйся, воли Божия усердный исполнителю; Радуйся, всякое послушание от него радостно приемляй. Радуйся, великаго труда не убоявыйся; Радуйся, всю надежду на Щедродавца возложивый. Радуйся, место сие молитвами своими освятивый; Радуйся, потом и слезами сие удобривый. Радуйся, преподобне Феодоре, стада Христова пастырю богомудрый. Кондак 8 Странное чудо и боголепное зрится, яко в немногих летех храм велик во славу Пречистыя созидается, и обитель иночествующих, древним подобная, твоими труды укрепляется, в нейже монаси мнози Строителю спасения единым гласом вопиют: Аллилуиа. Икос 8 Весь закон, еже по Бозе жития, явлен тебе имея, наставник искусный и предивный был еси, вражия коварства и хитрости мглу, яко луч солнечный, разсеял еси, темже по достоянию слышиши: Радуйся, бесов прогонителю; Радуйся, страстей искоренителю. Радуйся, иноческаго общежития устроителю; Радуйся, церковнаго благолепия ревнителю. Радуйся, исцелявый прощением; Радуйся, врачевавый терпением. Радуйся, преподобне Феодоре, стада Христова пастырю богомудрый. Кондак 9 Всякую неправость в себе искоренивый, тщался еси и ближнему сие благо доставити, сего ради неустанно трудился еси, наставляя, обличая и запрещая; льстивое же чадо твое, не терпя отеческих прещений, оклевета тя пред сильными мира сего, не ведуще пети: Аллилуиа. Икос 9 Витийства сугубаго недостанет, во еже сказати терпение твое скорбей многих, егда в заточении многолетнем во обители Соловецтей пребывал еси; мы же ныне, якоже и чада твоя тогда, со слезами взываем: Радуйся, яко человекоугодие презрел еси; Радуйся, яко безчинных строгостию исправлял еси. Радуйся, давидски гонения терпевый; Радуйся, скорби в небесный дар вменявый. Радуйся, выну к Богу духом горевый; Радуйся, яко и Бог с тобою пребысть. Радуйся, преподобне Феодоре, стада Христова пастырю богомудрый. Кондак 10 Спасти хотя верных множества, великий Началопастырь многими дары обогати тя, егда, яко злато, огнем страданий очищена паки в родную обитель возврати, яже, усретши тя, светом ангелоподобнаго лика твоего озарися и радостно воспевает праведному Воздаятелю: Аллилуиа. Икос 10 Стена несокрушимая Православным явился еси, пламенными молитвами лукавыя духи попаляя, трезвыми советы от заблуждения ограждая, божественною любовию сердца согревая; всем быв вся, многих спасл еси, сего ради приими хвалы сия: Радуйся, на крест радостно возшедый; Радуйся, на кресте не роптавый. Радуйся, распятием сим до конца ветхая в себе умертвивый; Радуйся, яко в страдании ум к Богу возводил еси. Радуйся, яко непрестанно горе сердце имел еси; Радуйся, земный ангеле и небесный человече. Радуйся, преподобне Феодоре, стада Христова пастырю богомудрый. Кондак 11 Пение всякое побеждается, егда восхощет воспети многочисленныя подвиги твоя; всенощная бдения, непрестанная пощения, слез излияния, болезней и теснот благодушное терпение, яже во все время жития твоего, яко дар должный, Всевышнему приносил еси, темже и сподобился еси от Него со ангелы пети: Аллилуиа. Икос 11 Светозарный светильник старчества благодатнаго явился еси во времена мрачная забвения и благоуханное цветение его провозвестил еси житием своим, да не увянет цвет духовный в Российстей земли; ныне же на небесех живый, от земных приими песнь сию: Радуйся, умнаго делания подвижниче; Радуйся, любве чистыя приятелище. Радуйся, Евангельския мудрости вместилище; Радуйся, яко, паче своея, пользы ближних искал еси. Радуйся, яко добрый виноградарь явился еси; Радуйся, яко ни едину же розгу презрел еси. Радуйся, преподобне Феодоре, стада Христова пастырю богомудрый. Кондак 12 Благодать Божия яви нам, недостойным, в последняя времена мощи твоя святыя, имиже обитель твою от конечнаго разорения сохранил еси, наипаче же к новей жизни возродил еси, темже и ныне умоли за ны, чада твоя, да не явимся неблагодарни за толикую милость к нам и нерадению да не предадимся, обаче да усердно воспеваем Богу: Аллилуиа. Икос 12 Поюще равноангельное и многоскорбное твое житие, восхваляюще благость Божию, до конца нас не оставившую и за грехи не презревшую, зрим убо наше убожество и скудоумие, во еже воспети тя по достоянию, обаче не отвратися пения сего: Радуйся, оставляяй согрешающему; Радуйся, небрежное житие обличавый. Радуйся, в Бозе утешение имевый; Радуйся, яко о миролюбцех рыдал еси. Радуйся, монашества крепосте необоримая; Радуйся, священства украшение. Радуйся, преподобне Феодоре, стада Христова пастырю богомудрый. Кондак 13 О, священная главо, богоносне отче наш Феодоре, славу преподобных и венец исповедников стяжавый и в незаходимей сияяй славе! Якоже прежде, тако и ныне не забуди стадо твое, но управи е к вечному спасению, зовущее о тебе Богу: Аллилуиа.[Се́й конда́к глаго́лется три́жды.][Далее повторяем 1‑е икос и кондак:]Икос 1 Ангельское житие твое провидя и многих ко спасению привести имущаго, от юности избрав тя Христос в жилище Себе, дары многими тя почти: мы же, прославляюще тя прославльшаго, бренными устнами вопием ти: Радуйся, в разум истины пришедый; Радуйся, яко врага и вся страсти одолел еси. Радуйся, яко звание учительства от Господа приял еси; Радуйся, яко научил еси нас спасения пути. Радуйся, вся злострадания кротко претерпевый; Радуйся, яко данный тебе талант сторицею преумножил еси. Радуйся, преподобне Феодоре, стада Христова пастырю богомудрый. Кондак 1 Избранный угодниче и добрый воине Царя Небеснаго, заповедей Евангельских изрядный делателю, всех прибегающих к тебе ко спасению наставниче, смирением велие дерзновение стяжавый ко Господу, выну моли о нас, недостойных чадех твоих, да зовем ти: Радуйся, преподобне Феодоре, стада Христова пастырю богомудрый. Молитва О, радосте наша! Пастырю наш, преподобне отче Феодоре! Воздыхаем из глубины сердца нашего и со слезами вопием ти: видиши наше неможение, во мраце страстей пребывание, сил душевных разслабление, своеволием обдержание, плотоугодием пленение и всякия добродетели обнищание! Виждь плач и недоумение наше! Вразуми ны и настави на спасения стези, испроси нам у великодаровитаго Бога нищеты нашея познание, слезное покаяние, нелицемерное смирение и в молитве непрестанное терпение, да сими благость Его к себе приклоним ко прощению грехов и сподобимся с тобою вечно пребывати во Царствии Небеснем, поюще и благословяще Всесвятую Троицу: Отца, и Сына, и Святаго Духа, ныне и присно, и во веки веков. Аминь.

глас 4Творение преподобного Максима Грека Песнь 1 Ирмос: Боже́ственным покрове́н/ медленноязы́чный мра́ком,/ извити́йствова Богопи́санный зако́н:/ ти́ну бо оттря́с очесе́ у́мнаго,/ ви́дит Су́щаго/ и науча́ется Ду́ха ра́зуму,/ хваля́ Боже́ственными пе́сньми. Припев: Сла́ва Тебе́, Бо́же наш, сла́ва Тебе́. И́же ма́нною препита́вый Изра́иля в пусты́ни дре́вле, / и ду́шу мою́, Влады́ко, Ду́ха напо́лни Всесвята́го,/ я́ко да о Нем богоуго́дно служу́ Ти вы́ну. Сла́ва Тебе́, Бо́же наш, сла́ва Тебе́. Со Безпло́тными Твои́ми слу́гами, сме́я, припева́ю Ти и аз,/ земля́ сый и пе́пел,/ трисвята́го гла́са пе́ние,/ Тро́ице тая́жде и Еди́нице Преблага́я. Сла́ва Тебе́, Бо́же наш, сла́ва Тебе́. Всегда́ бу́рями губи́тельных страсте́й и духо́в возмуща́емь душе́ю, / Тебе́, Всеблаже́нному Паракли́ту,/ я́же о мое́м спасе́нии я́ко Бо́гу возлага́ю. Сла́ва Тебе́, Бо́же наш, сла́ва Тебе́. Нестрое́нием вся́ческих беззако́нных по́мыслов омрача́емь лю́те,/ губи́тельного сего́, молю́ Тя, изба́вити мя изво́ли неду́га. Сла́ва Тебе́, Бо́же наш, сла́ва Тебе́. Глубино́ю неразу́мия и лю́таго нераде́ния дрема́нием потопля́емь бе́дне,/ к Тебе́, Всепречи́стому, вопию́:/ душе́вныя сея́ тли изба́ви мя. Слава: Во чре́ве заче́нши де́вственнем,/ Его́же из чре́ва пре́жде век Оте́ц роди́,/ чре́вными сладостра́стии порабоще́нна,/ Твое́ю кре́пкою свободи́ мя си́лою. И ныне: Земля́ Ты еди́на свя́та вои́стину,/ я́ко ро́ждшая всех Боже́ственный Живо́т;/ зе́млю плодоно́сну ду́шу мою́ Твоему́ Сы́ну покажи́, Богоро́дице. Песнь 3 Ирмос: Разве́рзе утро́бы неча́дствовавшия у́зы,/ доса́ду же неудоботерпи́му благоча́дствующия,/ еди́на моли́тва проро́чицы дре́вле А́нны,/ нося́щая дух сокруше́н,/ к Си́льному и Бо́гу ра́зумов. Сла́ва Тебе́, Бо́же наш, сла́ва Тебе́. Бла́гости Твоея́, Свята́я Тро́ице, позна́ние ве́лие есть,/ обновле́ние созда́ннаго по Твоему́ Боже́ственному о́бразу,/ Его́же, воплоще́нием преди́вным из Тебе́ па́че сло́ва,/ Себе́ жили́ще Боже́ственное показа́ла еси́. Сла́ва Тебе́, Бо́же наш, сла́ва Тебе́. Дарова́нии Твои́ми святы́ми и по́мыслы священноле́пнаго благогове́инства, Влады́ко,/ ум мой украси́,/ я́ко да в тишине́ души́ и святоле́пном устрое́нии/ пою́ и прославля́ю Тя, Боже́ственный Паракли́те. Сла́ва Тебе́, Бо́же наш, сла́ва Тебе́. Та́йная плотска́я движе́ния,/ от го́рдостныя стра́сти во мне ражда́емая/ и прескве́рне оскверня́ющая окая́нную ду́шу мою́,/ отню́д истреби́ от ся, Влады́ко, молю́ Ти ся. Сла́ва Тебе́, Бо́же наш, сла́ва Тебе́. Брозда́ми и уздо́ю Боже́ственнаго стра́ха, Влады́ко,/ безсту́дныя души́ моея́ встягни́ устремле́ния,/ я́ко да зе́льным благогове́инством и тре́звенною мы́слию/ пою́ Тя и сла́влю, Боже́ственный Уте́шителю. Сла́ва Тебе́, Бо́же наш, сла́ва Тебе́. Мно́гими блуже́нии растли́вся коне́чне,/ к Тебе́, Пресветле́йшему Со́лнцу, ве́рою притека́ю:/ Боже́ственным твои́м све́том душе́вныя ми о́чи просвети́ти изво́ли,/ Боже́ственный Паракли́те. Слава: Живота́ всех а́ки Пита́тельница, Влады́чице,/ умерщвле́нную мою́ ду́шу скве́рными страстьми́ оживотвори́ти, Чи́стая,/ Боже́ственным Твои́м посеще́нием изво́ли. И ныне: Животво́рных повеле́ний Твоего́ Сы́на, Пречи́стая,/ приле́жна и спе́шна де́лателя покажи́ мя,/ лю́тое разлене́ние и глубо́кое дрема́ние от души́ моея́ отню́д истреби́вши. Таже глаголи стихи сия: Спаси́ от бед раба́ Твоего́, Уте́шителю Благи́й,/ я́ко зело́ и безпреста́нно напада́ют на мя нечи́стии бе́сове/ по́мыслы и мечта́нии скве́рными. При́зри Благоутро́бием, Всепе́тая Богоро́дице,/ на жесто́кое се́рдца моего́ окамене́ние/ и просвети́ тьму души́ моея́. Кондак, глас 2 Всех Живота́, Исто́чника приснотеку́щаго Боже́ственных даро́в,/ Ду́ха Всесвята́го,/ я́ко Отцу́ Единосу́щна/ и Сы́ну Соприсносу́щна,/ в пе́снех благове́рно воспои́м и велича́им/ и я́ко Бо́гу ве́рою поклони́мся. Покланя́юся Тебе́, Влады́ко Уте́шителю Бо́же:/ поми́луй и спаси́ покланя́ющияся Тебе́/ и Бо́га испове́дающия Тя. Песнь 4 Ирмос: Царю́ царе́й,/ Яковы́й от Якова́го,/ Еди́н, Сло́ве, произше́дый/ от Отца́ Безвино́внаго, Равномо́щнаго Твоего́ Ду́ха/ апо́столом и́стинно посла́л еси́/ я́ко Благоде́теля, пою́щим:/ сла́ва держа́ве Твое́й, Го́споди. Сла́ва Тебе́, Бо́же наш, сла́ва Тебе́. Услы́шати сподо́би мя, Го́споди, тогда́ многожела́емое зва́ние Твое́,/ в неве́стник Небе́сный созыва́ющее всех преподо́бных Твои́х. Сла́ва Тебе́, Бо́же наш, сла́ва Тебе́. Осужде́на челове́ка злонача́льника прельще́нием/ взыска́ла и спасла́ еси́, Тро́ице Свята́я, и просла́вила еси́ его́;/ и мое́, изнемо́гшее печа́лию се́рдце свы́ше кре́постию Твое́ю утверди́/ и возбуди́ мы́сли моя́. Сла́ва Тебе́, Бо́же наш, сла́ва Тебе́. Боже́ственным стра́хом пригвозди́ окая́нныя моея́ пло́ти мудрова́ние/ и па́мятию бу́дущих муче́ний ду́шу устраши́. Сла́ва Тебе́, Бо́же наш, сла́ва Тебе́. Дерзнове́ние Боже́ственно пода́ждь ми,/ водруже́нную грехо́м во мне ху́дость истреби́в,/ и Твое́ю просвети́ мя благода́тию. Богоро́дице Всепе́тая,/ смире́нную Боже́ственным дарова́нием обогати́ ду́шу мою́,/ высоту́ смири́вши велича́ния. Слава: Свяще́нное жили́ще Твоего́ Сы́на, Богоро́дице,/ покажи́ ду́шу мою́,/ безчи́сленныя ея́ скве́рны отгна́вши. И ныне: Кре́пце погиба́ема нестрое́нием душе́вным, Всепе́тая,/ моли́твами Твои́ми утверди́ мя в Боже́ственном стра́се и любви́. Песнь 5 Ирмос: Реши́тельное очище́ние грехо́в,/ огнедохнове́нную приими́те Ду́ха ро́су,/ о ча́да светообра́зная церко́вная!/ Ны́не от Сио́на бо изы́де Зако́н,/ языкоогнеобра́зная Ду́ха благода́ть. Сла́ва Тебе́, Бо́же наш, сла́ва Тебе́. Напра́ви живо́т мой, Прису́щественная Тро́ице,/ к Твои́м спаси́тельным за́поведем/ и све́том Твои́м ду́шу мою́ просвети́, молю́ Ти ся. Сла́ва Тебе́, Бо́же наш, сла́ва Тебе́. Обдержи́ма су́ща плени́цами лю́тых прегреше́ний,/ реши́ти мя от сих благоволи́, Преблаги́й,/ и целому́дрия любо́вию Боже́ственною воспери́ мя. Сла́ва Тебе́, Бо́же наш, сла́ва Тебе́. Освети́ Твое́ю Боже́ственною благода́тию, Паракли́те,/ страстьми́ омраче́нную ду́шу мою́/ и глубо́кую неразу́мия тьму от нея́ иждени́. Сла́ва Тебе́, Бо́же наш, сла́ва Тебе́. Зело́ безбоя́зненно по вся дни прогневля́ю Тя/ де́лы же и словесы́ скве́рными, Преблаги́й,/ но молю́ Тя:/ нече́стия сего́ изба́ви мя. Слава: Еди́на ро́ждшая вся́кия прему́дрости Исто́чника,/ преступле́нием Боже́ственных за́поведей/ объюро́девшую ду́шу мою́ отню́д вразуми́, Всепе́тая. И ныне: Истреби́, Чи́стая, от души́ моея́/ стужа́ющия ми безпреста́нно злы́я по́мыслы/ и Богоуго́дными обогати́ мя поуче́нии. Песнь 6 Ирмос: Очище́ние нам, Христе́,/ и спасе́ние, Влады́ко, возсия́л еси́ от Де́вы,/ да, я́ко проро́ка от зве́ря морска́го пе́рсей Ио́ну,/ от тли исхити́ши/ всего́ Ада́ма всеро́дна па́дшаго. Сла́ва Тебе́, Бо́же наш, сла́ва Тебе́. Страстьми́ го́рькими плотски́ми огорче́н быв окая́нною душе́ю мое́ю/ и в тех, а́ки в после́дних бе́зднах, вы́ну, Спа́се мой, потопля́емь, Тебе́ молю́ся:/ струя́ми Живода́тельнаго, и́же у Тебе́, Исто́чника, оживи́ мя. Сла́ва Тебе́, Бо́же наш, сла́ва Тебе́. Вели́каго вои́стину молча́ния досто́йна суть вся Твоя́ та́инства:/ трили́цствуеши бо во Еди́ном Существе́/ и соединяе́ма, пребыва́еши несме́сна./ Но, Безнача́льная Тро́ице,/ Твои́х рук бре́нное созда́ние спаси́ мя. Сла́ва Тебе́, Бо́же наш, сла́ва Тебе́. Весь цел Сын, ве́руем, есть во Отце́ суще́ственне и Дух:/ от Него́ бо, а́ки от Еди́наго Нача́ла, соприсносу́щне О́ба сия́ют/ и пребыва́ют о Себе́ в Живонача́льных Испоста́сех Свои́х. Сла́ва Тебе́, Бо́же наш, сла́ва Тебе́. Ю́ности гну́сными стрека́нии/ на мя вооружи́вся скве́рный вся́ким о́бразом,/ те́ми ду́шу мою́ и живо́т весь оскверни́л есть,/ но, Паракли́те Преблаги́й,/ плода́ми покая́ния исцели́ мя. Сла́ва Тебе́, Бо́же наш, сла́ва Тебе́. В напа́сти лю́тыя по уму́ падо́х,/ и недоуме́нием содержи́мь есмь всю́ду,/ и в беды́ разли́чныя впада́ю,/ и я́коже ладия́ в морско́м волне́нии, обурева́емь есмь,/ но, Преблаги́й Уте́шителю,/ лю́таго сего́ обурева́ния, молю́ Тя, ско́ро исхити́ мя. Слава: Паде́нием лю́тым падо́х,/ преступи́в к Твоему́ Сы́ну обе́ты моя́,/ но, я́ко исто́чника щедро́т и благоутро́бия су́щую пучи́ну,/ Всенепоро́чная, молю́ Тя:/ ми́лостива сотвори́ ми Его́. И ныне: Губи́тельные на мя наве́ты/ неви́димых враго́в мои́х, Де́во, изгоня́й всегда́ от души́ моея́/ непобеди́мою и Боже́ственною си́лою Твое́ю/ и даждь ми на них всеору́жие духо́вное и ра́зум. Таже глаголи стихи сия: Спаси́ от бед раба́ Твоего́, Уте́шителю Благи́й,/ я́ко зело́ и безпреста́нно напада́ют на мя нечи́стии бе́сове/ по́мыслы и мечта́нии скве́рными. При́зри Благоутро́бием, Всепе́тая Богоро́дице,/ на жесто́кое се́рдца моего́ окамене́ние/ и просвети́ тьму души́ моея́. Кондак, глас 2 Всех Животе́, Све́те и Утеше́ние,/ Наде́ждо и Наслажде́ние, Всесвяты́й Ду́ше,/ Бо́га Тя зна́ющих, Отцу́ и Сы́ну Сопресто́льна,/ даро́в Твои́х сподо́би/ и грехо́в отпуще́ние да́руй им. Песнь 7 Ирмос: Согла́сная возшуме́ орга́нская песнь/ почита́ти златосотворе́нный безду́шный истука́н;/ Уте́шителева же светоно́сная благода́ть почеству́ет,/ е́же вопи́ти:/ Тро́ице Еди́ная, Равноси́льная, Безнача́льная, благослове́на еси́. Сла́ва Тебе́, Бо́же наш, сла́ва Тебе́. Вся́кия зло́бы и ху́дости нра́вов свободи́в мя, Спа́се,/ дарова́нии всесвяты́ми Боже́ственнаго Паракли́та обогати́ мя, пою́ща:/ отце́в Бо́же, благослове́н еси́. Сла́ва Тебе́, Бо́же наш, сла́ва Тебе́. Вся́каго желе́за и ка́мене жесточа́йшее се́рдце мое́ умягчи́, Спа́се,/ да и́стинным умиле́нием возопию́, спаса́емь:/ отце́в Бо́же, благослове́н еси́. Сла́ва Тебе́, Бо́же наш, сла́ва Тебе́. Со Отце́м Безнача́льным Сы́на и Ду́ха Соприсносу́щна,/ во Еди́ном Существе́, и Трие́х Ли́цах, богосло́вствующе, пое́м:/ отце́в Бо́же, благослове́н еси́. Сла́ва Тебе́, Бо́же наш, сла́ва Тебе́. Лука́вым обы́чаем грехо́вным ра́бски побежда́емь,/ Тебе́, всех Влады́це, припа́дая, молю́ся:/ скве́рныя сея́ рабо́ты изба́ви мя. Сла́ва Тебе́, Бо́же наш, сла́ва Тебе́. Кре́пкою си́лою Твое́ю/ грехо́м изнемо́гшую ду́шу мою́ утверди́ти благоволи́,/ да воззову́, спаса́емь:/ отце́в Бо́же, благослове́н еси́. Слава: Ра́зумом Боже́ственным и те́плым покая́нием, Богоблагода́тная,/ ум мой и ду́шу, лю́те грехо́м помраче́нную,/ просвети́ти изво́ли, да пою́ Ти со Арха́нгелом:/ ра́дуйся, Влады́чице. И ныне: Пло́ти моея́ беззако́нная и пристра́стная движе́ния, Богороди́тельнице,/ умертви́вши коне́чне,/ благода́ть Паракли́тову в души́ мое́й насади́,/ да святоле́пне Тя, Пресвяту́ю, прославля́ю всегда́. Песнь 8 Ирмос: Разреша́ет у́зы и ороша́ет пла́мень/ трисве́тлый Богонача́лия о́браз, пою́т о́троцы,/ благослови́т же еди́наго Спа́са и Вседе́теля,/ я́ко Благоде́теля,/ сотворе́нная вся́ческая тварь. Сла́ва Тебе́, Бо́же наш, сла́ва Тебе́. Губи́тельнаго разжже́ния беззако́нных помысло́в разреши́ мя, Иису́се мой,/ да чи́стым се́рдцем сла́влю Тя. Сла́ва Тебе́, Бо́же наш, сла́ва Тебе́. Со Безпло́тными слу́гами Твои́ми/ Высоча́йшую и Вседе́тельную Тро́ицу пое́м Тя/ и превозно́сим, пе́рстнии раби́ Твои́. Сла́ва Тебе́, Бо́же наш, сла́ва Тебе́. Губи́тельныя нахо́ды враго́в мои́х неви́димых изгоня́я от души́ моея́,/ благода́ть Твою́ всели́ти в ней, Паракли́те, изво́ли. Сла́ва Тебе́, Бо́же наш, сла́ва Тебе́. Проше́ния, и́хже у Тебе́ прошу́ моли́твою,/ соверша́ти бо́дренно де́лом, и стра́хом,/ и любо́вию сподо́би мя, Уте́шителю. Сла́ва Тебе́, Бо́же наш, сла́ва Тебе́. Па́че блудни́цы и Иса́ва беззако́новав,/ к Твои́м щедро́там прибега́ю:/ не отри́ни мене́ от благода́ти Твоея́, Паракли́те Пресвяты́й. Благослови́м Отца́ и Сы́на, и Свята́го Ду́ха, Го́спода. Слава: Грехолюби́в зело́ па́че всех челове́к сый, Всепе́тая,/ К Тебе́ прибега́ю:/ спаси́ мя, недосто́йнаго раба́ Твоего́. И ныне: Любому́дрия и́стины Боже́ственнаго рачи́теля покажи́ мя, Всепе́тая,/ стра́хом и любо́вию направля́ющи мя. Песнь 9 Ирмос: Ра́дуйся, Цари́це,/ Матероде́вственная Сла́во,/ вся́ка бо удобообраща́тельная благоглаго́ливая уста́/ вити́йствовати не мо́гут,/ Тебе́ пе́ти досто́йно,/ изумева́ет же ум всяк Твое́ рождество́ разуме́ти,/ Те́мже Тя согла́сно сла́вим. Сла́ва Тебе́, Бо́же наш, сла́ва Тебе́. Спа́се мой, просвеще́ние и Защи́тниче,/ от Твоея́ Боже́ственныя ра́дости не отри́ни мене́/ Пречи́стыя Твоея́ Ма́тере моли́твами святы́ми. Сла́ва Тебе́, Бо́же наш, сла́ва Тебе́. С Го́рними Си́лами и аз, со стра́хом ниц пад,/ покланя́ютися, пе́рстный, и любо́вию вопию́ Ти:/ Тро́ице Всесвята́я, сла́ва Тебе́. Сла́ва Тебе́, Бо́же наш, сла́ва Тебе́. Спаси́ мя, пою́щаго, покланя́ющагося и славосло́вящаго/ держа́ву непристу́пныя сла́вы Твоея́. Сла́ва Тебе́, Бо́же наш, сла́ва Тебе́. Бла́гости нра́вов, и наказа́нию зако́на,/ и ра́зуму Боже́ственных догма́т научи́ мя,/ да богоуго́дно пою́ Тя, Боже́ственный Паракли́те. Сла́ва Тебе́, Бо́же наш, сла́ва Тебе́. Всех пра́ведных и благоугоди́вших Ти/ сподо́битися изво́ли ра́достнаго пра́здника,/ да вку́пе с ни́ми пою́ Тя, Пресвяты́й Уте́шителю. Сла́ва Тебе́, Бо́же наш, сла́ва Тебе́. Души́ моея́ страхова́ние, и разли́чныя зло́бы,/ и всю ея́ истреби́в ху́дость,/ доброде́телей венце́м украси́ ю́, Святы́й Паракли́те. Слава: О Всенепоро́чная Де́во,/ растли́вшуюся вся́ческими блуже́нии окая́нную ду́шу мою́/ Твои́ми святы́ми моли́твами исцели́. И ныне: О Боже́ственная Хода́таице Бо́гу и челове́ком,/ худу́ю сию́ моли́тву мою́/ Боже́ственному Паракли́ту принеси́, молю́ Тя, Всесвята́я Богоро́дице. Таже глаголи стихи сия: Спаси́ от бед раба́ Твоего́, Уте́шителю Благи́й,/ я́ко зело́ и безпреста́нно напада́ют на мя нечи́стии бе́сове/ по́мыслы и мечта́нии скве́рными. При́зри Благоутро́бием, Всепе́тая Богоро́дице,/ на жесто́кое се́рдца моего́ окамене́ние/ и просвети́ тьму души́ моея́. И тропари сия: Досто́йно есть вои́стину велича́ти Тя, Бо́га Сло́ва,/ Его́же трепе́щут и ужаса́ются Херуви́ми/ и славосло́вят Си́лы Небе́сныя,/ от Де́вы непрело́жно вопло́щшагося/ Христа́, Жизнода́вца и Го́спода. Досто́йно есть вои́стину превозноси́ти Тя славосло́вии, Всепреблага́го,/ и Всепресвята́го, и Храни́теля жи́зни на́шея,/ со Отце́м и Сы́ном богонача́льно ца́рствующаго ви́димыми и неви́димыми,/ от Отца́ еди́наго исходя́щаго Бо́жия Ду́ха,/ вели́ка же и стра́шна, со стра́хом сла́вити. Слава: Пое́м Тя все боголе́пно пе́нии Боже́ственными,/ Отца́ и Сы́на и Ду́ха Боже́ственнаго,/ Трисоста́вную Держа́ву,/ Еди́но Ца́рство и Госпо́дство. И ныне: Влады́чице, Ма́ти Изба́вителя,/ приими́ моли́твы Твои́х непотре́бных раб,/ и́мже возда́ждь избавле́ние грехо́в/ и богоуго́дныя жи́зни прия́тное исправле́ние. Молитва ко Пресвятому Духу Приими́, Влады́ко, Преблаги́й Паракли́те, Еди́н Сый Святы́я и Покланя́емыя Единосу́щныя же и Нераздели́мыя Тро́ицы, худо́е сие́ моле́ние, ему́же благоволи́л еси́ приноси́му быва́ти Тебе́ от челове́ка гре́шнаго и осужде́ннаго, и прости́ ми согреше́ния моя́, во́льныя и нево́льная, от та́йных мои́х очи́сти мя и от чужди́х пощади́ раба́ Твоего́. Благоволи́ о мне, гре́шнем и непотре́бнем, и не́мощи души́ моея́ посети́ благода́тию Твое́ю и исцели́ сокруше́ние ея́. Поми́луй мя, Влады́ко, Паракли́те, Бо́же, поми́луй мя, освяти́ мою́ ду́шу и те́ло, просвети́ ми ум и ра́зум, очи́сти со́весть душе́вную от вся́кия скве́рны, нечи́стых по́мыслов, умышле́ний лука́вых и разуме́ний ху́льных и от вся́каго превозноше́ния, го́рдости же и киче́ния, высокоу́мия же и де́рзости, и сатани́нскаго шата́ния, и от вся́каго фарисе́йскаго лицеме́рия и презо́рства, и от вся́каго сту́днаго и лука́ваго обы́чая моего́ изба́ви мя до конца́, сла́вы ра́ди и́мене Твоего́, и да́руй ми и́скреннее покая́ние, сокруше́ние се́рдца моего́ и смиренному́дрие, кро́тость же и ти́хость и вся́кое христиа́нское благогове́инство, ра́зум же и худо́жество духо́вное, со вся́ким благоразу́мием, благодаре́нием и терпе́нием соверше́нным. Ей, Бо́же, сла́вы ра́ди и́мене Твоего́ услы́ши мя, гре́шнаго, моля́щагося Тебе́, и сподо́би мя в про́чее вре́мя окая́нныя жи́зни моея́ ка́ятися и́скренне мои́х беззако́ний, со вся́ким смиренному́дрием, целому́дрием же и воздержа́нием и́стинным, отступи́вшу мне вся́каго сомне́ния, двоеду́шия и нечу́вствия, и соблюди́ мя, Влады́ко, во вся́ком благочести́вом и правосла́вном испове́дании ве́ры христиа́нския, да сподо́блюся во вся дни живота́ моего́ без сомне́ния пе́ти Тя, благослови́ти, славосло́вити и глаго́лати: Святы́й Бо́же, О́тче Безнача́льный; Святы́й Кре́пкий, Сы́не Его́ Собезнача́льный; Святы́й Безсме́ртный, Ду́ше Святы́й, от Отца́ исходя́й и в Сы́не пребыва́яй и почива́яй; Тро́ице Всесвята́я, сла́ва Тебе́. Сла́ва Тебе́, Свята́я Тро́ице Единосу́щная, Животворя́щая и Нераздели́мая, всех ра́ди сла́ва Тебе́. Сла́ва Тебе́, Ма́ти Бо́жия, ве́рных прибе́жище, и избавле́ние в лю́тых содержи́мым, и души́ моея́ Боже́ственное утеше́ние; всеокая́нную ду́шу мою́, о Богоблагода́тная, уя́звленную стреля́нии ра́тника, Твоему́ всеси́льному предста́тельству поруча́ю, ю́же соблюда́й, покрыва́й и спаса́й от бесо́вских ко́зней невреди́му, да вопию́ Ти: ра́дуйся, Неве́сто Неневе́стная.

С лики Ангельскими предстоя,/ блаженне княже Вячеславе,/ наслаждаешися Божественныя и неизреченныя доброты/ и, оттуду благодетельныя дары почерп чудес,/ всем, притекающим верою под твою святыню,/ источавши цельбам дарование.

Дух мирен и кроток стяжав,/ твердое упование на милосердие Божие имея,/ блюститель верный Церкве Российския/ и исповедник Христов явился еси,/ священномучениче Петре,/ присный о нас пред Богом предстателю// и молитвенниче о душах наших.

Яко апостолом спричастницы и врачеве предобрии, служители Богоприятнии, / памяти вашей Божественней притекающим, / святии Богомудрии, достоблаженнии, благочестивии князи, / новоявленнии чудотворцы Феодоре и Давиде, и Константине, / сошедшеся любовию в память вашу светло празднуем / в песнех и пениих, радующеся Христа славяще, таковую благодать даровавшего вам исцелением, / граду вашему Ярославлю великое утверждение.

Яко начальнику Крещения/ и кореню веры Божественныя,/ идолов разрушителю,/ блаженне княже Василие равноапостольне, вопием ти:/ слава вразумльшему тя Христу Богу,/ слава освятившему тя Крещением Своим,/ слава просветившему тобою всю страну Русскую.

Днесь веселое наста ныне Твое торжество, Богомати Пречистая,/ вси вернии исполнишася радости и веселия,/ яко сподобльшеся изрядно воспети/ предивное явление честнаго образа Твоего/ и рождшагося из Тебе Младенца, истинна же Бога,/ Егоже двема рукама объемлеши,/ и третиею от напастей и бед нас изымаеши// и избавляеши от всех зол и обстояний.

Днесь душа всяка веселится/ на память успения святителя Христова Геронтия,/ премудрости ревнителя/ и кротости учителя,/ смирению наказателя,/ учением Божественных словес верныя насладившаго./ Русскаго митрополита похвалим,/ святительства паству приимшаго,/ украсившаго Церковь Христову./ Тем и Христос видя твое благопроизволение,/ причте тя в лик праведных,/ святителю Геронтие,/ моли Христа Бога и Пречистую Богородицу/ непрестанно о всех нас.

Евангельския любве служителя,/ правды Божия ревнителя,/ чистоты душевныя и телесныя хранителя,/ веру Христову исповедавша в страданиих,/ праведнаго Иоанна ублажаем и почитаем днесь/ и, житием его назидающеся, поем:/ радуйся, молитвенниче наш, от Бога прославленный.

От земли пленения твоего/ воззвавый тя к Небесным селением,/ Господь соблюдает невредимо и цельбоносно тело твое,/ праведне Иоанне,/ ты бо, в России ятый и во Асию проданный,/ посреде, агарянского злочестия благочестно пожил еси во мнозе терпении/ и, сеяв зде слезами,/ жнеши тамо неизглаголанною радостию.// Темже моли Христа Бога спастися душам нашим.

Духом Божиим наставляемый,/ возлюбил еси безмолвие,/ в немже евангельски подвизающуся,/ пречудный Афонский дар -/ Богоматере икона, даровася ти, всеблаженне,/ и, образ добродетелей быв стаду твоему,/ Арсение отче наш,/ к Горнему торжеству возшел еси,/ идеже со Ангелы ликовствуя,/ моли Христа Бога/ спастися душам нашим.

Глас Божественный слышав, призывающ тя,/ любовь отца презрел еси/ и притекл еси ко Христу, Иакове, с сродником твоим, славне,/ с нимже сподобился еси видети/ Господне Божественное преображение.

Страстотерпцы всечестнии,/ воини Христовы четыредесяте,/ твердии оружницы,/ сквозе бо огнь и воду проидосте/ и Ангелом сограждане бысте,/ с нимиже молитеся Христу о иже верою хвалящих вас./ Слава Давшему вам крепость,/ слава Венчавшему вас,/ слава Подавающему вами всем исцеления.

Моря зловерие обличил еси,/ и идольскаго безбожия лесть верою правоверия уязвил еси/ и, всесожжение Божественное быв,/ чудодействием орошаеши концы,/ отче святителю Феодоте, Христа Бога моли// даровати нам велию милость.

Кондак 1 Избранный чудотворче и изрядный угодниче Христов, святителю отче Питириме, всем прибегающим к тебе скорый помощниче! Сподоби нас недостойными усты воспети тебе сия похвальная. Ты же, яко имеяй велие дерзновение ко Господу, от всяких нас бед свободи, зовущих: Радуйся, святителю Питириме, Тамбовский чудотворче. Икос 1 Ангелом подражатель и человеков наставник был еси, святителю отче Питириме: от юности бо возлюбил еси Божественное учение и, сему последовав, доброму житию поревновал еси. Сего ради тебе, на Небеси и на земли прославленному, вопием сице: Радуйся, от рождения твоего Богом избранный; радуйся, на служение апостольское призванный. Радуйся, избрание твое подвигом благочестия оправдавый; радуйся, образом жития твоего и нам путь к Небеси показавый. Радуйся, от юности иго Христово возлюбивый; радуйся, чистоту сердца твоего до конца сохранивый. Радуйся, яко, сего ради, еще сый на земли, Ангелом уподобился еси; радуйся, яко, сего ради, Господа Славы всегда зрети сподобился еси. Радуйся, святителю Питириме, Тамбовский чудотворче. Кондак 2 Видя Благопромыслитель Господь души твоея доброту, направи помысл твой ко исканию единаго на потребу. Ты же, сего возжелев, еще из детства навыкл еси непрестанно взывати к Богу: Аллилуиа. Икос 2 Разум Божественный имый, всю суету привременныя сласти презрел еси, отче Питириме: темже оставив мир и вся яже в нем, измлада приял еси образ ангельский, всего себе отдав на служение Единому Господу. Таковое убо изволение твое восхваляюще, глаголем ти сицевая: Радуйся, яко путь правый в Царствие Небесное обрел еси; радуйся, яко сим путем невозвратно шел еси. Радуйся, яко красная мира сего ни во чтоже вменил еси; радуйся, яко, земная отринув, Небесная возлюбил еси. Радуйся, сердце твое присно ко Христу имевый; радуйся, Тому Единому служити вожделевый. Радуйся, разум твой в послушание веры пленивый; радуйся, в Бозе благочестно поживый. Радуйся, святителю Питириме, Тамбовский чудотворче. Кондак 3 Силою Божиею укрепляем, отче Питириме, вся послушания монастырская добре проходил еси в Вяземстей обители святаго Предтечи, емуже подражал еси подвиги твоими, всегда взывая к Подвигоположнику всех, Спасу Христу: Аллилуиа. Икос 3 Имея помысл чист, и душу непорочну, священства благодать, еще млад сый, достойно восприял еси, отче Питириме; темже, во игумена обители избран был еси и саном архимандрита почтен, ревностно подвизаяся о спасении Богом врученнаго тебе словеснаго стада. Сего ради вопием ти сице: Радуйся, яко вся послушания иноческая неленостно прошел еси; радуйся, яко сим на высоту добродетелей возшел еси. Радуйся, красото смиренномудрия и воздержания; радуйся, образе кротости и послушания. Радуйся, целомудрия ревнителю; радуйся, девства и чистоты хранителю. Радуйся, иночествующих мудрый начальниче; радуйся, всех, благочестно жити хотящих, добрый наставниче. Радуйся, святителю Питириме, Тамбовский чудотворче. Кондак 4 Бури злословия и людскаго мятежа не убоялся еси, отче Питириме, егда икону преподобнаго Аркадиа, недобре писанную, почитания лишил еси. Темже, о правоверии ревнуя, поучал еси паству твою право взывати к Богу: Аллилуиа. Икос 4 Слышав и видев премногую твою добродетель, блаженный Патриарх Иоаким святителя тебе нарече и паству Тамбовскую смотрению твоему вручи. Мы же, о сем веселящеся, глаголем ти сицевая: Радуйся, вся степени иноческаго звания с честию и славою прошедый; радуйся, на престоле святительстем достойно возседый. Радуйся, страже Церкве Христовы неустрашимый; радуйся, делателю винограда Христова неутомимый. Радуйся, благовременне и безвременне паству твою поучавый; радуйся, ко Христу овцы заблуждшия призвавый. Радуйся, люди, во тьме седящия, светом Христовым озаривый; радуйся, сим от погибели их сохранивый. Радуйся, святителю Питириме, Тамбовский чудотворче. Кондак 5 Боготечное светило, путь жизни твоея озаряющее, бысть тебе угодник Божий Прокопий, егоже именем во святем Крещении наречен был еси и к немуже присно с молитвою прибегал еси, поя Богу: Аллилуиа. Икос 5 Видел еси, отче Питириме, твоима очима угодника Божия Прокопиа, предстояща пред лицем Господа и к Нему молящася сице: Безсмертный Боже, хвалу Тебе воздаю, Царь бо един еси всем; помилуй душу его и сподоби сего Царствия Небеснаго. Сего ради и мы взываем к тебе: не престай молитися о всех нас купно со Прокопием блаженным, да и нас сподобит Господь достигнути Небеснаго Царствия. О сем воздыхающе, похвальная воспеваем ти: Радуйся, очеса твоя всегда на небо возводивый; радуйся, славу Небесную паче всего возлюбивый. Радуйся, непрестанными молитвами сердце твое освятивый; радуйся, мысль твою в Бозе утвердивый. Радуйся, яко Прокопиа святаго, молитвенника дерзновеннаго всегда имел еси; радуйся, яко сему споспешествующу, в радость Господа твоего вшел еси. Радуйся, яко в райских обителех ныне пребываеши; радуйся, яко от Горних высот и нас, многогрешных, милостивно назираеши. Радуйся, святителю Питириме, Тамбовский чудотворче. Кондак 6 Проповедник веры православныя и ревнитель благочестия словом и житием твоим был еси, святителю Питириме. Темже духовная паства твоя непрестанно памятует и вся Российская страна достойно ныне прославляет труды твоя, имиже трудился еси, присно взывая ко Господу: Аллилуиа. Икос 6 Возсиял еси во Церкви Тамбовстей светом Христова учения и ревностию твоею о славе Божией, святителю отче Питириме: ты бо, красоту Господню возлюбив, о устроении храмов святых и о благочинии церковнем всеусердно прилежал еси. Сего ради воспеваем ти сице: Радуйся, славы Христовы ревнителю; радуйся, храмов святых строителю. Радуйся, благочиния церковнаго строгий блюстителю; радуйся, чтения и пения Божественнаго искусный учителю. Радуйся, яко тобою Церковь Русская благоукрасися; радуйся, яко в ней вера Христова тобою утвердися. Радуйся, града Тамбова славо и украшение; радуйся, всем нам защито и ограждение. Радуйся, святителю Питириме, Тамбовский чудотворче. Кондак 7 Хотяй невозбранно возноситися духом в Горняя Селения, безмолвие пустыни возлюбил еси, отче Питириме, идеже многи дни в посте и молитве подвизался еси, овогда же со святителем Митрофаном, другом твоим, беседовал еси, воспевая с ним купно хвалебную песнь: Аллилуиа. Икос 7 Новую обитель в месте пустыннем, якоже тихую пристань, во славу Предтечи Господня создав и в самом граде Тамбове с сестрою твоею Екатериною обитель женскую устроив, сим явил еси нам, отче Питириме, велию твою любовь ко обителем святым. Сего ради воспеваем ти похвальная сия: Радуйся, Предтечу Господня возлюбивый и тому в житии твоем поревновавый; радуйся, строгий подвиг благочестия в себе показавый. Радуйся, пустыни безмолвия любителю; радуйся, поста и молитвы строгий блюстителю. Радуйся, Тамбовския дебри и леса молитвою твоею облагоухавый; радуйся, обитель иноком тамо основавый. Радуйся, святителя Митрофана друже и собеседниче; радуйся, во Царствии Небеснем тому сонаследниче. Радуйся, святителю Питириме, Тамбовский чудотворче. Кондак 8 Странника и пришельца в мире сем помышлял еси себе, отче Питириме. Темже, Небесная возлюбив, сокровище некрадомое сокровиществовал еси, грядущаго града взыскуя и ко Господу радостно взывая: Аллилуиа. Икос 8 Весь исполнь любве Христовы, душу твою за овцы твоя положити готов был еси, спасение всем устрояя и всем во всем угождая, не иский своея, но многих пользы, да всяко некия спасеши. Сего ради чтим святую память твою и усердно вопием ти: Радуйся, отче благосердый, о спасении многих ревновавый; радуйся, не своих си, но ближняго искавый. Радуйся, пастырю добрый, на пажитех тучных чада твоя духовная питавый; радуйся, страже неусыпный, от волков хищных овцы твоя охранявый. Радуйся, нищих кормителю и гладных питателю; радуйся, сирых защитниче и обидимых предстателю. Радуйся, яко и ныне во всяких нуждах скоро нам помогаеши; радуйся, яко и ныне всех, с верою к тебе притекающих, милостивно утешаеши. Радуйся, святителю Питириме, Тамбовский чудотворче. Кондак 9 Всяк возраст и всяко сословие еще в житии твоем величаху тя, яко человека Божия, и в час кончины твоея вся паства твоя плакаше о тебе, яко о отце своем. Зрящи же тя погребаема и новаго предстателя на Небеси имети уповающи, с рыданием, купно же и благодарным сердцем, возглашаше о тебе надгробную песнь: Аллилуиа. Икос 9 Витийство человеческое не довлеет ко прославлению многих чудес твоих, святителю Питириме: новая бо купель Силоамская открыся всем страждущим во источнице твоем, рукама твоима ископаннем; таже и риза твоя честная, на недужныя полагаема, дарует им исцеление, и гроб твой святый явися воистину неоскудная врачебница: никтоже бо, с верою к нему притекаяй, тощ и неутешен отходит. Сего ради гласы хвалебными тя славим: Радуйся, врачу безмездный, туне врачевания всем подаваяй; радуйся, сосуде драгоценный, целебное миро всем верным богатно изливаяй. Радуйся, глухих слышание и слепых прозрение; радуйся, хромых хождение и сляченных исправление. Радуйся, разслабленных укрепителю; радуйся, бесноватых от насилия диавольскаго свободителю. Радуйся, лишенным смысла ум здравый подаваяй; радуйся, в сониих и видениих помощь твою являяй. Радуйся, святителю Питириме, тамбовский чудотворче. Кондак 10 Спасти хотя паству твою, отче Питириме, не судил еси ведети в ней ино что, точию Иисуса Христа, и Сего распята. Сего ради поставил еси образ распятия Господа, знамение нашего спасения, на вратех града, да вси мимоходящии покланяются ему, воспевающе хвалебную песнь: Аллилуиа. Икос 10 Стены необоримыя и Заступницы рода христианскаго икону дивную граду Тамбову даровал еси, отче Питириме, от неяже доднесь всем с верою приходящим токи чудес изливаются. Сего ради благодарне взываем ти сице: Радуйся, все упование твое на Матерь Божию возложивый; радуйся, и град твой покрову Тоя вручивый. Радуйся, икону Ея святую в щит и ограждение граду поставивый; радуйся, залог любве твоея икону Богоматере пастве оставивый. Радуйся, яко иконою тою чудеса многа содеваются; радуйся, яко милости Божия от нея непрестанно изливаются. Радуйся, Богородицу нам указавый от всех бед избавление; радуйся, яко милостию Ея ты еси наша радость и утешение. Радуйся, святителю Питириме, Тамбовский чудотворче. Кондак 11 Пение немолчное даже доднесь совершается у святей иконы твоей, угодниче Божий Питириме: мнози бо, в нуждах сущии, ведят тя помощника благопоспешлива и молитвенника благоуветлива. Темже ныне вся Российская земля благодарне вопиет прославльшему тя Богу: Аллилуиа. Икос 11 Светильник светозарен был еси в земнем житии твоем, отче наш Питириме, благодатно озаряя души верных. Просвети убо молитвами твоими очи душевныя и нам, в пучине греха погибающим, да благодарне вопием ти: Радуйся, великий угодниче Божий, благочестную жизнь на земли возлюбивый; радуйся, веру, надежду и любовь даже до конца сохранивый. Радуйся, светильниче многосветлый, светом истиннаго Богопознания нас озаряяй; радуйся, луче Солнца Правды, теплотою Божественныя любве души наша согреваяй. Радуйся, бисере честный, сиянием Небесныя Славы сердца наша увеселяяй; радуйся, каменю драгий, страну нашу православную украшаяй. Радуйся, яко тобою бездну милосердия Божия призываем; радуйся, яко тобою спасение вечное получити уповаем. Радуйся, святителю Питириме, Тамбовский чудотворче. Кондак 12 Благодать от Бога ти данную ведяще, ныне прилежно молим тя, святителю Питириме: пролей теплую о нас молитву ко Господу, да сохранит Церковь Свою Святую невреждену от ересей и расколов и вся православныя да помилует и спасет, вопиющия Ему: Аллилуиа. Икос 12 Поюще твое Богоугодное житие, отче Питириме, и на Небеси от Бога прославление, величаем безчисленная чудеса и исцеления твоя, и, на неусыпныя молитвы твоя уповающе, взываем ти сицевая: Радуйся, храм Преображения Господня благолепен устроивый; радуйся, вечное покоище себе в нем предуготовавый. Радуйся, житие твое земное благочестне скончавый; радуйся, от Царя Небеснаго венец славы приемый. Радуйся, апостолов собеседниче; радуйся, святителей сопрестольниче и сонаследниче. Радуйся, Архангелов и Ангелов сослужителю; радуйся, всех Небесных Сил сожителю. Радуйся, святителю Питириме, Тамбовский чудотворче. Кондак 13 О преславный чудотворче, угодниче Божий Питириме! Приими сие от любве нашея приносимое тебе благохваление и твоим благоприятным ходатайством избави нас от всяких бед и зол, от внезапныя смерти и будущия муки, да сподобимся купно с тобою во веки пети: Аллилуиа.[Се́й конда́к глаго́лется три́жды.][Далее повторяем 1‑е икос и кондак:]Икос 1 Ангелом подражатель и человеков наставник был еси, святителю отче Питириме: от юности бо возлюбил еси Божественное учение и, сему последовав, доброму житию поревновал еси. Сего ради тебе, на Небеси и на земли прославленному, вопием сице: Радуйся, от рождения твоего Богом избранный; радуйся, на служение апостольское призванный. Радуйся, избрание твое подвигом благочестия оправдавый; радуйся, образом жития твоего и нам путь к Небеси показавый. Радуйся, от юности иго Христово возлюбивый; радуйся, чистоту сердца твоего до конца сохранивый. Радуйся, яко, сего ради, еще сый на земли, Ангелом уподобился еси; радуйся, яко, сего ради, Господа Славы всегда зрети сподобился еси. Радуйся, святителю Питириме, Тамбовский чудотворче. Кондак 1 Избранный чудотворче и изрядный угодниче Христов, святителю отче Питириме, всем прибегающим к тебе скорый помощниче! Сподоби нас недостойными усты воспети тебе сия похвальная. Ты же, яко имеяй велие дерзновение ко Господу, от всяких нас бед свободи, зовущих: Радуйся, святителю Питириме, Тамбовский чудотворче. Молитва О великий угодниче Божий и преславный чудотворче, святителю Питириме! К тебе смиренно припадаем и усердно молимся: яви нам, грешным, любовь твою отеческую и многомощное твое заступление. Веруем бо, яко велие дерзновение имаши ко Господу и яко много может предстательство твое пред Престолом благости Его. Сохрани молитвами твоими Церковь Святую от ересей и расколов, от суеверия и неверия. Испроси нам веру праву, надежду несомненну, любовь нелицемерну, в добрых делех преспеяние, во искушениях мужество, в злостраданиих терпение, в молитвах постоянство, мир и благоустроение стране нашей, здравие же и спасение людем ея. Призри милостивно на предстоящия и молящияся пред святою иконою твоею и вся прошения их во благо исполни, и всем вся в жизни временней и вечней потребная даруй, во славу дивнаго во святых Своих Бога, в Троице славимаго и покланяемаго, Отца и Сына и Святаго Духа, ныне и присно и во веки веков. Аминь.

Минея, 25 Марта, Канон праздника Глас 4 Песнь 1 Ирмос: Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,/ и воспою́, ра́дуйся, Тоя́ чудеса́. Припев: Пресвята́я Богоро́дице, спаси́ на́с. Да пое́т Тебе́, Влады́чице, движа́ свире́ль духо́вную, Дави́д, пра́отец Твой:/ послу́шай, Дщи, ра́дованнаго гла́са от А́нгела,/ ра́дость бо возвеща́ет Тебе́ неизглаго́ланную. Припев: Пресвята́я Богоро́дице, спаси́ на́с. А́нгел возопи́: Вопию́ Тебе́, веселя́ся,/ приклони́ у́хо Твое́ и вонми́ ми,/ Бо́жие возвеща́ющу безсе́менное зача́тие,/ обрела́ бо еси́ благода́ть пред Бо́гом,/ ея́же никогда́же обре́те друга́я, Всечи́стая. Сла́ва Отцу́ и Сы́ну и Свято́му Ду́ху. Богоро́дица рече́: Да разуме́ю, А́нгеле, твои́х глаго́л си́лу,/ ка́ко бу́дет, е́же рекл еси́, глаго́ли я́вственнейше?/ Ка́ко зачну́, Де́ва су́щи, Отрокови́ца?/ Ка́ко же и Ма́ти бу́ду Зижди́теля Моего́? И ны́не и при́сно и во ве́ки веко́в. Ами́нь. А́нгел возопи́: Ле́стно мя веща́ти помышля́еши, я́ко мню,/ и ра́дуюся, зря Твое́ утвержде́ние./ Дерза́й, Влады́чице,/ Бо́гу бо хотя́щу, удо́бь сконча́ются и пресла́вная. Песнь 3 Ирмос: Твоя́ песносло́вцы, Богоро́дице,/ живы́й и незави́стный Исто́чниче,/ лик себе́ совоку́пльшия, духо́вно утверди́,/ в Боже́ственней Твое́й сла́ве/ венце́в сла́вы сподо́би. Припев: Пресвята́я Богоро́дице, спаси́ на́с. Богоро́дица рече́: Оскуде́ кня́зь от Иу́ды, вре́мя наста́ про́чее,/ в не́же яви́тся язы́ков наде́жда, Христо́с;/ ты же, ка́ко Сего́ рожду́, Де́ва су́щи, скажи́? Припев: Пресвята́я Богоро́дице, спаси́ на́с. А́нгел возопи́: И́щеши от Мене́ уве́дети, Де́во, о́браз зача́тия Твоего́,/ но той несказа́нен е́сть:/ Дух же Святы́й, зижди́тельною си́лою осени́в Тя, соверши́т. Сла́ва Отцу́ и Сы́ну и Свято́му Ду́ху. Богоро́дица рече́: Моя́ прама́ти, прие́мши ра́зум змии́н, пи́щи Боже́ственныя изгна́на бы́сть,/ те́мже и Аз бою́ся целова́ния стра́ннаго твоего́,/ стыдя́щися поползнове́ния. И ны́не и при́сно и во ве́ки веко́в. Ами́нь. А́нгел возопи́: Бо́жий предста́тель, по́слан е́смь Боже́ственный пове́дати Тебе́ сове́т./ Что мене́ бои́шися, Всенепоро́чная, па́че Тебе́ боя́щагося?/ Что благогове́еши мне, Влады́чице,/ Тебе́ че́стно благогове́ющему? Седален, глас 8 Сло́во Бо́жие на зе́млю ны́не сни́де, А́нгел предста́, вопия́ Де́ве:/ ра́дуйся, Благослове́нная, Я́же печа́тию еди́на сохра́ншися,/ во утро́бе прие́мши предве́чнаго Сло́ва и Го́спода,/ да от пре́лести спасе́т, я́ко Бог, род челове́ческий. Песнь 4 Ирмос: Седя́й в сла́ве на престо́ле Божества́/ во о́блаце ле́гце,/ прии́де Иису́с Пребоже́ственный/ Нетле́нною Дла́нию и спа́се зову́щия:/ сла́ва, Христе́, си́ле Твое́й. Припев: Пресвята́я Богоро́дице, спаси́ на́с. Богоро́дица рече́: Свяще́нную не́кую Де́ву ражда́ющую слы́шах проро́ка, дре́вле Емману́ила проре́кша;/ хощу́ же разуме́ти, ка́ко Божества́ растворе́ние естество́ челове́ческое претерпи́т? Припев: Пресвята́я Богоро́дице, спаси́ на́с. А́нгел возопи́: Яви́ла е́сть купина́, неопа́льна пребы́вши,/ прие́мши пла́мень, обра́дованная Всепе́тая, на Тебе́ та́инства пресла́вное:/ по рождестве́ бо пребу́деши Чи́стая Присноде́ва. Сла́ва Отцу́ и Сы́ну и Свято́му Ду́ху. Богоро́дица рече́: Освеща́емь сия́нием Бо́га Вседержи́теля,/ и́стины пропове́дниче, глаго́ли, Гаврии́ле, и́стиннейшя:/ ка́ко, нетле́ние бы́вши чистоте́ Мое́й,/ Сло́ва рожду́, с пло́тию Безпло́тнаго? И ны́не и при́сно и во ве́ки веко́в. Ами́нь. А́нгел возопи́: Со стра́хом Тебе́, я́ко раб Госпоже́, предстою́,/ с боя́знию, Отрокови́це, ны́не смотри́ти стыжду́ся Тебе́,/ я́ко бо до́ждь на руно́, сни́дет на Тя Сло́во О́тчее, я́ко благоволи́. Песнь 5 Ирмос: Ужасо́шася вся́ческая/ о Боже́ственней сла́ве Твое́й;/ Ты бо, Неискусобра́чная Де́во,/ име́ла еси́ во утро́бе над все́ми Бо́га/ и родила́ еси́ безле́тнаго Сы́на,/ всем воспева́ющим Тя/ мир подава́ющая. Припев: Пресвята́я Богоро́дице, спаси́ на́с. Богоро́дица рече́: Разуме́ти не могу́ Твои́х слове́с изве́стия:/ чудеса́ бо бы́ша мно́жицею,/ Боже́ственною си́лою чудоде́йствуема,/ зна́мения и о́бразы зако́ннии,/ роди́ же де́ва неискусому́жне никогда́же. Припев: Пресвята́я Богоро́дице, спаси́ на́с. А́нгел возопи́: Диви́т, Всенепоро́чная, и стра́нно бо чу́до Твое́,/ еди́на бо Ты всех Царя́ прии́меши во утро́бе, воплоща́ема,/ и Тя прообразу́ют проро́ческая рече́ния, и гада́ния, и зако́ннии о́бразы. Сла́ва Отцу́ и Сы́ну и Свято́му Ду́ху. Богоро́дица рече́: Все́ми Невмести́мый и все́ми Неви́димый,/ ка́ко сей мо́жет во чре́ве деви́че всели́тися, е́же Сам созда́?/ Ка́ко же и зачну́ Бо́га Сло́ва, собезнача́льна Отцу́ и Ду́ху? И ны́не и при́сно и во ве́ки веко́в. Ами́нь. А́нгел возопи́: К Твоему́ пра́отцу Дави́ду обеща́вся/ посади́ти от плода́ Твоего́ чре́ва на престо́ле ца́рства его́,/ Иа́ковлю Тя добро́ту, еди́ну избра́ в слове́сное селе́ние. Песнь 6 Ирмос: Возопи́, прообразу́я погребе́ние тридне́вное,/ проро́к Ио́на, в ки́те моля́ся:/ от тли изба́ви мя,/ Иису́се, Царю́ сил. Припев: Пресвята́я Богоро́дице, спаси́ на́с. Богоро́дица рече́: Глаго́л твои́х, Гаврии́ле, глас ра́дованен прие́мши, весе́лия Боже́ственнаго испо́лнихся:/ ра́дость бо пове́даеши и весе́лие возвещаеши безконе́чное. Припев: Пресвята́я Богоро́дице, спаси́ на́с. А́нгел возопи́: Тебе́ даде́ся ра́дость, Богома́ти Боже́ственная,/ Тебе́, е́же ра́дуйся, вся тва́рь вопие́т, Богоневе́сто:/ Ты бо еди́на Ма́ти Сы́на Бо́жия пронарече́ся, Чи́стая. Сла́ва Отцу́ и Сы́ну и Свято́му Ду́ху. Богоро́дица рече́: Е́вы Мно́ю ны́не да упраздни́тся осужде́ние,/ да возда́стся Мно́ю долг дне́сь,/ Мно́ю заи́мствование дре́внее да да́стся преиспо́лнено. И ны́не и при́сно и во ве́ки веко́в. Ами́нь. А́нгел возопи́: Обеща́ся Бог Авраа́му пра́отцу/ благослови́тися в се́мени его́ язы́ком, Чи́стая,/ Тобо́ю же коне́ц обеща́ние прие́млет дне́сь. Кондак, глас 8 Взбра́нной Воево́де победи́тельная,/ я́ко изба́вльшеся от злых,/ благода́рственная воспису́ем Ти, раби́ Твои́, Богоро́дице,/ но, я́ко иму́щая держа́ву непобеди́мую,/ от вся́ких нас бед свободи́, да зове́м Ти:/ ра́дуйся, Неве́сто Неневе́стная. Икос А́нгел предста́тель с Небесе́ по́слан бы́сть рещи́ Богоро́дице: ра́дуйся!/ и со безпло́тным гла́сом воплоща́ема Тя зря, Го́споди, ужаса́шеся/ и стоя́ше, зовы́й к Ней такова́я:/ ра́дуйся, Е́юже ра́дость возсия́ет;/ ра́дуйся, Е́юже кля́тва исче́знет./ Ра́дуйся, па́дшаго Ада́ма воззва́ние;/ ра́дуйся, слез Е́виных избавле́ние./ Ра́дуйся, высото́ неудобовосходи́мая челове́ческими по́мыслы;/ ра́дуйся, глубино́ неудобозри́мая и А́нгельскима очи́ма./ Ра́дуйся, я́ко еси́ Царе́во седа́лище;/ ра́дуйся, я́ко но́сиши нося́щаго вся./ Ра́дуйся, звездо́, явля́ющая Со́лнце;/ ра́дуйся, утро́бо Боже́ственнаго воплоще́ния./ Ра́дуйся, Е́юже обновля́ется тва́рь;/ ра́дуйся, Е́юже покланя́емся Творцу́./ Ра́дуйся, Неве́сто Неневе́стная. Песнь 7 Ирмос: Не послужи́ша тва́ри Богому́дрии/ па́че Созда́вшаго,/ но, о́гненное преще́ние му́жески попра́вше,/ ра́довахуся, пою́ще:/ препе́тый отце́в Госпо́дь и Бог, благослове́н еси́. Припев: Пресвята́я Богоро́дице, спаси́ на́с. Богоро́дица рече́: Свет невеще́ственный пове́дая, в веще́ственне телеси́ совокупля́емь за милосе́рдие мно́гое,/ све́тлое благове́щение, Боже́ственная пропове́дания, ны́не взыва́еши Ми:/ благослове́н, Всечи́стая, Плод Твоего́ чре́ва. Припев: Пресвята́я Богоро́дице, спаси́ на́с. А́нгел возопи́: Ра́дуйся, Влады́чице Де́во,/ ра́дуйся, Пречи́стая, ра́дуйся, прия́телище Бо́жие,/ ра́дуйся, све́щниче Све́та, Ада́мово воззва́ние,/ Е́вы избавле́ние, горо́ свята́я,/ прея́вственное свяще́ние и черто́г безсме́ртия. Сла́ва Отцу́ и Сы́ну и Свято́му Ду́ху. Богоро́дица рече́: Ду́шу очи́сти, те́ло освяти́,/ це́рковь сотвори́ мя вмести́тельну Бо́га,/ ски́нию Богоукраше́ну, одушевле́н храм наи́тием Пресвята́го Ду́ха/ и Жи́зни чи́стую Ма́терь. И ны́не и при́сно и во ве́ки веко́в. Ами́нь. А́нгел возопи́: Я́ко многосве́тлую свещу́ и Богоде́ланен черто́г,/ ви́жу Тя ны́не, я́ко злат киво́т,/ зако́на Пода́теля приими́, Богоневе́сто,/ благоизво́лившаго челове́ческое изба́вити Тобо́ю тле́нное существо́. Песнь 8 Ирмос: Слы́ши, Отрокови́це, Де́во чи́стая,/ да рече́т у́бо Гаврии́л/ сове́т Вы́шняго дре́вний и́стинный:/ бу́ди к прия́тию гото́ва Бо́жию,/ Тобо́ю бо Невмести́мый с челове́ки поживе́./ Тем и, ра́дуяся, вопию́:/ благослови́те, вся дела́ Госпо́дня, Го́спода. Припев: Пресвята́я Богоро́дице, спаси́ на́с. Ум всяк побежда́ется земны́х, – отвеща́ Деви́ца, –/ и́щущи, я́же Мне веща́еши, пресла́вная:/ слы́шах твоя́ словеса́, но бою́ся, ужаса́ющися,/ да не ле́стию Мя, я́ко Е́ву, дале́че по́слеши от Бо́га./ Но оба́че се вопию́:/ благослови́те, вся дела́ Госпо́дня, Го́спода и превозноси́те Его́ во ве́ки. Припев: Пресвята́я Богоро́дице, спаси́ на́с. Се Тебе́ недоуме́нное разреши́ся, – глаго́лет к сим Гаврии́л, – до́бре бо рекла́, еси́, ве́щь неудобопости́жна./ Словесе́м Твои́х усте́н повину́ющися про́чее,/ не сумни́ся, я́ко ле́сти, я́коже ве́щи, ве́руй./ Аз бо, ра́дуяся, вопию́:/ благослови́те, вся дела́ Госпо́дня, Го́спода и превозноси́те Его́ во ве́ки. Припев: Пресвята́я Богоро́дице, спаси́ на́с. Зако́н сей от Бо́га е́сть челове́ком, – Непоро́чная а́бие глаго́лет, –/ от о́бщия любве́ рождество́ происхо́дит./ Не вем супру́жника сла́сти всеконе́чно,/ ка́ко, у́бо глаго́леши, я́ко рожду́?/ Бою́ся, еда́ ле́сть глаго́леши?/ Но оба́че се вопию́:/ благослови́те, вся дела́ Госпо́дня, Го́спода и превозноси́те Его́ во ве́ки. Сла́ва Отцу́ и Сы́ну и Свято́му Ду́ху. Глаго́лы, я́же мне веща́еши, Чи́стая, –/ А́нгел па́ки глаго́лет, –/ обы́чая е́сть рождества́ челове́ков сме́ртных,/ и́стинно Бо́га Тебе́ обещава́ю,/ па́че сло́ва же и смы́сла воплоща́ема, я́ко ве́сть, из Тебе́./ Те́мже и, ра́дуяся, вопию́:/ благослови́те, вся дела́ Госпо́дня, Го́спода и превозноси́те Его́ во ве́ки. И ны́не и при́сно и во ве́ки веко́в. Ами́нь. Явля́ешися Мне и́стины веща́тель, – рече́ Де́ва, –/ ра́дости бо о́бщия прише́л еси́ благове́стник./ Ду́шу у́бо очи́стих с те́лом, и по глаго́лу твоему́ бу́ди Мне,/ да всели́тся Бог в Мя, к Нему́же вопию́ с тобо́ю:/ благослови́те, вся дела́ Госпо́дня, Го́спода и превозноси́те Его́ во ве́ки. Песнь 9 Ирмос: Я́ко одушевле́нному Бо́жию киво́ту,/ да ника́коже ко́снется рука́ скве́рных./ Устне́ же ве́рных, Богоро́дице, немо́лчно,/ глас А́нгела воспева́юще,/ с ра́достию да вопию́т:/ ра́дуйся, Благода́тная,/ Госпо́дь с Тобо́ю. Припев: Пресвята́я Богоро́дице, спаси́ на́с. Па́че смы́сла заче́нши Бо́га, естества́ обы́чая утаи́ся, Отрокови́це,/ Ты бо в рождестве́ ма́терскаго избежа́ла еси́ тле́ннаго естества́/ и превы́шши су́щи./ Те́мже досто́йно слы́шиши:/ ра́дуйся, Благода́тная, Госпо́дь с Тобо́ю. Припев: Пресвята́я Богоро́дице, спаси́ на́с. Ка́ко то́чиши млеко́, Де́во Чи́стая, не мо́жет изрещи́ язы́к зе́млен,/ стра́нну бо естества́ показу́еши ве́щь, зако́ннаго рождества́ уста́в прехо́диши./ Те́мже досто́йно слы́шиши:/ ра́дуйся, Благода́тная, Госпо́дь с Тобо́ю. Припев: Пресвята́я Богоро́дице, спаси́ на́с. Та́йно во свяще́нных писа́ниях/ глаго́лася о Тебе́, Ма́ти Вы́шняго,/ ле́ствицу бо дре́вле Иа́ков, Тя образу́ющую, ви́дев, рече́:/ степе́нь Бо́жия сия́./ Те́мже досто́йно слы́шиши:/ ра́дуйся, Благода́тная, Госпо́дь с Тобо́ю. Сла́ва Отцу́ и Сы́ну и Свято́му Ду́ху. Чу́дное священноявле́нному Моисе́ю/ купина́ и о́гнь показа́ чу́до,/ ища́й же конца́ в прехожде́нии време́н, во Отрокови́це чи́стей, рече́, узрю́./ Е́йже, я́ко Богоро́дице, да рече́тся:/ ра́дуйся, Благода́тная, Госпо́дь с Тобо́ю. И ны́не и при́сно и во ве́ки веко́в. Ами́нь. Дании́л Тя го́ру нарече́ мы́сленную,/ роди́тельницу же Бо́жию Иса́ия,/ ви́дит же, я́ко руно́, Гедео́н,/ Дави́д же свяще́ние глаго́лет, две́рь же Тя ин./ Гаврии́л же Тебе́ взыва́ет:/ ра́дуйся, Благода́тная, Госпо́дь с Тобо́ю. Светилен А́нгельских сил Архистрати́г/ по́слан бы́сть от Бо́га Вседержи́теля к Чи́стей и Де́ве/ благовести́ти стра́нное и неизрече́нное чу́до:/ зане́ Бог, я́ко Челове́к, из Ней младоде́йствуется без се́мене,/ назида́яй ве́сь челове́ческий род./ Лю́дие, благовести́те обновле́ние ми́ра. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Е́же от ве́ка дне́сь познава́ется та́инство Бо́жие:/ Бог Сло́во Сын Де́вы Мари́и за милосе́рдие быва́ет,/ и ра́дость благове́щения Гаврии́л провещава́ет./ С ни́мже возопие́м Ей:/ ра́дуйся, Ма́ти Госпо́дня.