Кондак 1
Избранному угоднику Божию, просиявшему святым пустынным житием и ликовствующему ныне в чертозех небесных со Ангелы и всеми святыми, Болдинския обители Чудотворцу, святому Герасиму, приидите, чтущие память Его, акафистную хвалу принесем: ты же, угодниче святый, не отрини сие недостойное приношение наше, но яко со дерзновением предстояй горнему Престолу Вседержителя, услыши нас, зовущих ти:
Радуйся, Герасиме, преподобне отче наш.
Икос 1
Ангелов лики возвеселишася о тебе, угодниче святый, егда измлада прилепився к Богу всем сердцем и желанием возжелев облещися во иноческий ангельский образ, вселился еси в Даниловскую обитель, в нейже приемши пострижение, вождению Богомудраго старца вдался еси и Богови угодил еси житием твоим. Сего ради ублажаем тя сице:
Радуйся, от юности ярем заповедей Христовых на ся вземый.
Радуйся, вся красная мира сего, любве ради Божия, презревый.
Радуйся, земных сродников и другов отчуждивыйся, да не горняго со ангелы дружества лишен будеши.
Радуйся, странником на земли быти изволивый, да не странен на небесех явишися.
Радуйся, равноангельнаго жития ревнителю.
Радуйся, богоносных отец усердный подражателю.
Радуйся, проявителю истиннаго послушания.
Радуйся, попрателю воли своея.
Радуйся, плоть свою со страстьми и похотьми распявый.
Радуйся, воителю противу духов злобы поднебесных крепко ратовавый.
Радуйся, иноческих обетов исполнение.
Радуйся, христоноснаго монашества украшение.
Радуйся, Герасиме, преподобне отче наш.
Кондак 2
Видяще скорое преуспеяние твое в подвизех монашескаго жития, славим за сие дивнаго во святых своих Бога, возводившаго тя от силы в силу и от совершенства к совершенству священнотайне ведшаго тя, и поим ему песнь хвалы: Аллилуиа.
Икос 2
Разум духовен, озарен свыше стяжав, Богомудре, в пустыни, зовемой Болдино, идеже бяху разбойницы, водворился еси работати Господеви, и силою благодати, в тебе сущей, духом кротости и братолюбия, словом убеждения и прещением судеб Божиих, настоянием и слезами к Богу молитвами разгнал еси сонмище их, овех же обратил еси на путь спасения. Темже, исповедающе таковый подвиг твой, взываем ти:
Радуйся, отшельниче, духом Божиим водимый.
Радуйся, гласе, покаятися от души и правы творити стези злодеем внушивый.
Радуйся, славие небесный, пением словес твоих чувствия их умиливый.
Радуйся, оледеневшия тех души огнедухновенными усты твоими расплавивый.
Радуйся, ты бо из жестоких сердец их, якоже Моисей из камене, воду покаянных слез источил еси.
Радуйся, яко теми пустынь, увлажненную кровию невинных путников, омыл еси.
Радуйся, горлице Христова пустыннолюбивая.
Радуйся, ластовице Божия сладкогласная, мир пустыни возвестившая.
Радуйся, крине вертограда Христова, среди тернов беззакония процветший.
Радуйся, благовонный цвете, пустыню злосмрадную облагоухавший.
Радуйся, агнче Христов, среди кровожадных скимнов словесных неврежденно упасшийся.
Радуйся, Данииле вторый, зверства их не убоявшийся.
Радуйся, Герасиме, преподобне отче наш.
Кондак 3
Силою Вышняго укрепляем, преподобне, вар и тяготу, мраз и скудость, скорби и труды пустыннаго жития благодушно понесл еси и непрестанно пел еси Богу: Аллилуиа.
Икос 3
Имеяй в себе теплое произволение и ко телесным трудом, отче святый, собственныма рукама твоима ископал еси пещеру, в нюже, аки во гроб некий, вшел еси, и ангельски паче, неже человечески, зде пожил еси. Того ради восхваляем тя сице:
Радуйся, ангеле земный и человече небесный.
Радуйся, умерший и погребшийся миру прежде кончины твоея.
Радуйся, тружениче честный, Бога ради трудивыйся.
Радуйся, во всяцем деле помощь Божию призывавый.
Радуйся, яко плоть твою духови покорил еси.
Радуйся, ко отечеству небесному повсегда воздыхал еси.
Радуйся, яко ко премирным возхождения в сердцы своем полагал еси.
Радуйся, образ терпения и изнеможения плоти в себе показавый.
Радуйся, добровольный мучениче, по вся дни умирати, Христа ради, словом и делом наставивый.
Радуйся, яко молчанием и бореньми с помыслы лукавых духов побеждал еси.
Радуйся, яко пощением и молитвою над теми власть стяжал еси.
Радуйся, Герасиме, преподобне отче наш.
Кондак 4
Бурю страстей и волны злобы плотския прешед, блаженне, доспел еси в тихое пристанище безстрастия, отнюдуже и не умолкал еси сердцем и усты звати Богу: Аллилуиа.
Икос 4
Слышаще о Бозе житие твое, преподобне, ближнии и дальнии прихождаху к тебе, единии благословения ради и наставления твоего, друзии прошения ради молитв твоих, инии – во еже обитати с тобою, овии воззрения токмо ради на пресветлое лице твое. Ты же, любвиобильне, содержа во уме слово: грядущаго ко мне не изжену вон, никогоже отринул еси. Темже приими от нас песнь сию:
Радуйся, ты бо медоточная струи глагол живота вечнаго источил еси.
Радуйся, ты бо всем жаждущим спасение пестун и отец был еси.
Радуйся, ты бо, яко Авраам, обремененных грехми и молвою житейскою под сению пустыни твоея упокоевал еси.
Радуйся, ты бо притекающих к тебе скорбящих и озлобленных души утешал еси.
Радуйся, яко о тех теплыя к Богу молитвы возсылал еси.
Радуйся, яко мнозех ко Христу привел еси.
Радуйся, усыпленныя совести пробудивый.
Радуйся, ленивых ко исканию Царства Небеснаго понудивый.
Радуйся, яко тобою и в тебе имя Божие прославися.
Радуйся, о камень веры твоея сила веельзевула адскаго сокрушися.
Радуйся, обрадователю ангелов.
Радуйся, преобидителю демонов.
Радуйся, Герасиме, преподобне отче наш.
Кондак 5
Боготечная звезда и строитель мудр был еси, блаженне, егда, желая удобее путеводити к Богу чада своя, учил еси их уставом древних инок пустынножителей, устроил еси обитель общежительну, и в ней, во имя Живоначальныя Троицы устроил еси храм, идеже от устен монашествующаго братства и поныне поется Богу: Аллилуиа.
Икос 5
Видевши новосозданную обитель, красующуюся миром и иноческими добродетельми, возжелал еси водворити сия и близ Вязьмы в пустыни, идеже бысть прибежище корчемником, блудником, разбойником, играм бесовским, душегубство, и велие кровопролитие, и того ради со учеником твоим Симеоном пошел еси туда со тщанием. Мы же, аки бы ныне сретая тя на сем пути, приветствуем любовь твою сице:
Радуйся, Путешественнице, самим Богом на труд пути воздвиженный.
Радуйся, посланниче небес поспешливый, во имя Господне грядый.
Радуйся, голубица Христова, мир благодатный, аки ветвь масличну, вязьме несущая.
Радуйся, орле святый, к злодеем, аки неким плотоядным птицам, на крылех веры летяй.
Радуйся, слуго предобрый, заблудших овец Господа своего взыскати поспешаяй.
Радуйся, стране сетования и плача утешение подати желаяй.
Радуйся, госте драгий, в бедех сущих посетити изволивый.
Радуйся, мужу крепости и упования, крестов, чающих тя, не убоявыйся.
Радуйся, яко душу твою за други положити готов был еси.
Радуйся, яко образ самоотвержения ученику твоему собою подал еси.
Радуйся, яко сопутствующему тебе самому Богу града Вязьмы скоро достигл еси.
Радуйся, яко ту со учеником своим водворился еси.
Радуйся, Герасиме, преподобне отче наш.
Кондак 6
Проповедник богоносен и аки Ангел, с небесных кругов слетевый был еси терзаемей от злодей Вязьме: ты бо страсти их укротил еси молитвою, словом, житием и любовию, разсеял еси сонмище их, и на месте, идеже врази мира живяху, основал еси во имя Предтечи и Крестителя Господня храм и обитель, в нихже от устен верных приносится Богу песнь: Аллилуиа.
Икос 6
Возсия Вязьме свет учения и труженическаго жития твоего, и отгнася от нея радость бесовская: дуси бо лукавии, отче святый, не терпяще крепости молитвы твоея, множицею вопияху, излиха глаголюще: «О, горе нам! Отъята бысть корысть наша. Преподобие обиде нас, несть ктому зде жилище наше, но место преподобническое». Умиренная же тобою Вязьма, с нею же и мы вси благодарственная восписуем ти:
Радуйся, посетителю в горести сущих.
Радуйся, сострадателю страждущим.
Радуйся, злодейских козней разрушителю.
Радуйся, бесов отгнателю.
Радуйся, яко тобою умышление их сокрушивыйся.
Радуйся, яко тобою слава миродержителя тьмы века сего помрачися.
Радуйся, озлобляемых человеков неусыпаемый хранителю.
Радуйся, града Вязьмы великий и приснопамятный благодетелю.
Радуйся, сияние, страну скорбей радостию озарившее.
Радуйся, светило, тучу мятежа и ужасов смертных, облежащих Вязьму, разгнавшее.
Радуйся, яко град Вязьма присно тя славит.
Радуйся, яко Церковь Христова имя твое чтет.
Радуйся, Герасиме, преподобне отче наш.
Кондак 7
Хотя избегнути славы от человек, пустыннолюбче, понесл еси труды новаго путешествия из Вязьмы первее в Брянстии леса к реце Жиздре, последи же в Свирковы Луцы, яже близ Дорогобужа, тамо и зде устроил еси обители, в нихже над братством поставил еси игуменов от испытанных старец, и всех их научил еси Богу пети: Аллилуиа.
Икос 7
Новая благодать возсия святей Болдинстей обители, егда чада ея, узревше тя, возвращшагося к ней, во гласе радования взываху: «Откуду нам сие, да прииде к нам отец наш и свет очию нашею»; ты же, отче святый, зде паки приял еси жезл игуменства во братстве и добре правил еси им, дондеже во гроб снисшел еси, того ради приносим сицевая:
Радуйся, яко тобою пустынь Болдинская достойно радуется.
Радуйся, яко тобою град Дорогобуж и вся Смоленская страна праведне веселится.
Радуйся, яко не оставил еси убогих твоих сиротствовати до конца.
Радуйся, яко паки был еси им во утешителя отца.
Радуйся, смирения неудобозримая глубино.
Радуйся, умныя молитвы неугасимая лампада.
Радуйся, любомудрия духовнаго присногорящий светильниче.
Радуйся, слезнаго течения неоскудный источниче.
Радуйся, мечу разсекаяй демонския прелести яко паучину.
Радуйся, инокам и всем прельщаемым козньми вражиими уясняяй славно истину.
Радуйся, чистоты сокровище.
Радуйся, Божественныя Троицы жилище.
Радуйся, Герасиме, преподобне отче наш.
Кондак 8
Странническое и многотрудное житие святаго отца нашего Герасима видяще, братие монашествующие и вси чтущии память его, отложим дела темныя: блуд, нечистоту, пиянство, всяку похоть вредну и помысл скверный, и устранимся мира, ум на небеса преложше: сего бо ради оное сокровище, угодник святый дадеся нам, да последуем стопам его, дондеже достигнем тоя обители, идеже он со ангелы поет немолчное: Аллилуиа.
Икос 8
Весь в вышних, отче святый, аще и был есть дух твой, егда готовляшеся отъити ко Господу, обаче и нас, нижних чад твоих не оставил еси во гресех наших погибати, но завещал еси нам вся, яже к животу и благочестию. Темже, аки бы ныне зряще тя, воспоминающа о исходе твоем и завещающа нам, еже ко спасению, взываем ти:
Радуйся, отче, памяти смерти незабытная.
Радуйся, надеждо благ вечных, Духом Божиим извещенная.
Радуйся, яко учеником твоим завещеваеши поставляти во игумены из обителей своих мужи, во уставех общежития сведущих.
Радуйся, яко учиши нас пищу, одежду и прочая вся общая имети, души и сердца наша во едино связующи.
Радуйся, яко вся с советом и благословением делати нам сказуеши.
Радуйся, яко почтение ко властем, совершенное послушание и нестяжание во всем нам внушаеши.
Радуйся, воздержниче, хмельное питие, аки бы зелие ядоносное, братству возбраняяй.
Радуйся, образе кротости, падшия, разве непослушливых, не изгоняти, но тихостию и трудом смиряти наставляяй.
Радуйся, страннолюбче, нищия и странныя упокоевати, питати и на путь снабдевати заповедуяй.
Радуйся, наставниче, любовь евангельску повсегда и биение челом пред властьми предержащими в годину навет от злых человек нам советуяй.
Радуйся, яко изобилие в потребных к жизни сей, избавление от бед и всяку милость от Бога испросити хранящим заветы твоя обещеваеши.
Радуйся, Герасиме, преподобне отче наш.
Кондак 9
Все девятичинное горнее естество радовашеся честному души твоея с телом разлучению, ангели сопутствоваху тебе и сретаху тя, грядуща от земли к небеси, поя Богу: Аллилуиа.
Икос 9
Ветии многовещанныя, преподобне, аще и не могут достойно изобразити печали, яже доставил еси демонов в честнем ко Господу преставлении твоем, обаче, очами веры зряще сицевое, дерзаем глаголати недостойнии:
Радуйся, яко земное течение твое добре скончал еси и веру до конца соблюл еси.
Радуйся, яко душею твоею, подобие птице, от многовидных сетей избавльшейся, горняя воспарил еси.
Радуйся, яко воздушных темных сил не убоялся еси.
Радуйся, яко прещение и зверство начальника горьких мытарств ни во что же вменил еси.
Радуйся, яко ничтоже обретеся в тебе достойно радости демонов.
Радуйся, яко честным преставлением твоим плач и рыдание велие сотворися бесом.
Радуйся, ты бо на крылех веры и чистоты, яко на облаце легце, к судии праведному тщался еси.
Радуйся, ты бо града небеснаго, идеже несть болезнь, ни печаль, ни воздыхание, вскоре достигл еси.
Радуйся, яко тебе ради взяшася врата небесная.
Радуйся, яко вшел еси ими во внутренняя завесы райския.
Радуйся, орле, прошедый небеса и Солнце Правды Христа узревый.
Радуйся, от десницы его венец славы приемый.
Радуйся, Герасиме, преподобне отче наш.
Кондак 10
Спасение всесовершенное улучив от привременных бурь, нестроений и нужд горьких, угодниче святый, не забуди и нас, напаствуемых от них, но, в них же сам искушен был, и нам искушаемым помози, да поем Богу: Аллилуиа.
Икос 10
Стена еси обители твоей, отче преподобне, и всем просящим от тебе помощи: тя бо имамы грешнии скораго пособителя во всех скорбех и нуждах наших. Темже и взываем ти:
Радуйся, яко приял еси от Бога благодать обитель твою охраняти.
Радуйся, яко имаши от Бога силу нас земных собратий твоих заступати.
Радуйся, яко светило ангельскою душею твоею в небесных чертозех вечно со Христом живеши.
Радуйся, яко благодатною силою твоею нам присно сопребываеши.
Радуйся, питателю, монастырское оскудение пищи исполняяй.
Радуйся, попечителю, во всех нужных к жизни сей нас снабдеваяй.
Радуйся, от враг видимых и невидимых мощный наш защитителю.
Радуйся, скорбящих и бедствующих скоропредстательный утешителю.
Радуйся, зубных болезней готовейший исцелителю.
Радуйся, от губительных язв, холеры и прочих недуг общих чудный братства твоего и всех к тебе прибегающих хранителю.
Радуйся, древо благосеннолиственное, имже от зноя палящих искушений и страстей покрываемся.
Радуйся, егоже благоприятными молитвами от праведнаго гнева Божия туне спасаемся.
Радуйся, Герасиме, преподобне отче наш.
Кондак 11
Пение наше недостойное, дела наша нечистая, молитва наша грешная не довлеют ко умилостивлению о нас Небеснаго Владыки: како бо дерзнем возвести убогия очеса наша на небо; како помиловани будем от Создателя нашего, омрачении грехом, в тине страстей валяющиеся, аще не ты, о надеждо наша, святый Герасиме, предстательствовати и пети за ны пред Богом будеши: Аллилуиа.
Икос 11
Светодательства светильника пред престолом Агнца Вседержителя стояща и нам, во тьме неразумия и грехов блуждающим, светяща верою зрим тя, отче святый, и твоим сиянием озаряеми, зовем ти таковая:
Радуйся, пастырю наш предобрый.
Радуйся, учителю наш премудрый.
Радуйся, звездо, тверди монашескаго жития светящая.
Радуйся, солнце, любовию к Богу хладная сердца наша согревающее.
Радуйся, советниче, мысли благи на души наша полагаяй.
Радуйся, умирителю, от смущений, междуусобныя вражды и недоумений нас изымаяй.
Радуйся, яко с верою прибегающих к тебе прошение исполняеши.
Радуйся, яко блистанием чудес, от тебе изливающихся, неверие посрамляеши.
Радуйся, яко тобою пленицы грехов, нас связующих, разрешаем.
Радуйся, яко тобою сети лукаваго хитросплетенныя проразумеваем и сокрушаем.
Радуйся, яко тобою обитель болдинская красуется.
Радуйся, яко тобою и все множество посетителей ея духовно утешается.
Радуйся, Герасиме, преподобне отче наш.
Кондак 12
Благодать великую, святые мощи твои имать Болдинская обитель, точат бо токи исцелений и чудес не токмо во умиление души и сердца своя изливающим пред иконою и ракою твоею, но и далече отстоящим, с верою же призывающим святое имя твое и Богу зовущим: Аллилуиа.
Икос 12
Поюще твоя чудеса и в Бозе житие твое, святый Герасиме, недоумеваем, како достойно изрещи сладость благ, ихже вкушаеши на небеси; како подробне исчислити преславная твоя деяния, от нихже множайшия утаена суть от мира и единому Богу доведома; обаче, очима веры зряще тя среди избранных Божиих и назирающею отонуду нас любовию твоею побеждаеми, взываем ти:
Радуйся, яко в белых ризах и с победными финицы в руках у престола Вседержителя стоиши.
Радуйся, яко зрением лица Божия и всех красот горнего мира присно наслаждаешися.
Радуйся, яко в Бозе, аки бы в светлейшем зерцале, всю нашу темность видиши.
Радуйся, яко с Богородицею и всеми святыми выну о нас ко Спасу ходатайствуеши.
Радуйся, яко со архангелы и ангелы веселишися.
Радуйся, яко с преподобными и праведными вечерю брака агнчаго присно торжествуеши.
Радуйся, яко по земных подвизех на лоне Авраамлем упокоеваешися.
Радуйся, яко и нас, в труде и озлоблении сущих, с небесных высот назираеши.
Радуйся, яко от райских источник воды животныя, светлыя аки кристалл, упоеваешися.
Радуйся, яко от древа животнаго присно насыщаешися
Радуйся, Герасиме, преподобне отче наш.
Кондак 13
О, предивный угодниче и великий чудотворче преподобне отче Герасиме, приими малое сие моление наше, в похвалу тебе возносимое, и ныне, предстоя престолу Пресвятыя Троицы, молися о всех нас, да избавимся муки вечныя и сподобимся во Царствии Небеснем со всеми святыми пети Богу: Аллилуиа.[Се́й конда́к глаго́лется три́жды.][Далее повторяем 1‑е икос и кондак:]Икос 1
Ангелов лики возвеселишася о тебе, угодниче святый, егда измлада прилепився к Богу всем сердцем и желанием возжелев облещися во иноческий ангельский образ, вселился еси в Даниловскую обитель, в нейже приемши пострижение, вождению Богомудраго старца вдался еси и Богови угодил еси житием твоим. Сего ради ублажаем тя сице:
Радуйся, от юности ярем заповедей Христовых на ся вземый.
Радуйся, вся красная мира сего, любве ради Божия, презревый.
Радуйся, земных сродников и другов отчуждивыйся, да не горняго со ангелы дружества лишен будеши.
Радуйся, странником на земли быти изволивый, да не странен на небесех явишися.
Радуйся, равноангельнаго жития ревнителю.
Радуйся, богоносных отец усердный подражателю.
Радуйся, проявителю истиннаго послушания.
Радуйся, попрателю воли своея.
Радуйся, плоть свою со страстьми и похотьми распявый.
Радуйся, воителю противу духов злобы поднебесных крепко ратовавый.
Радуйся, иноческих обетов исполнение.
Радуйся, христоноснаго монашества украшение.
Радуйся, Герасиме, преподобне отче наш.
Кондак 1
Избранному угоднику Божию, просиявшему святым пустынным житием и ликовствующему ныне в чертозех небесных со Ангелы и всеми святыми, Болдинския обители Чудотворцу, святому Герасиму, приидите, чтущие память Его, акафистную хвалу принесем: ты же, угодниче святый, не отрини сие недостойное приношение наше, но яко со дерзновением предстояй горнему Престолу Вседержителя, услыши нас, зовущих ти:
Радуйся, Герасиме, преподобне отче наш.
Молитва преподобному отцу нашему Герасиму, Болдинскому чудотворцу
О добре наш пастырю и Богомудрый начальниче, преподобне отче Герасиме, услыши нас молящихся тебе и призывающих в помощь скорое предстательство твое. Виждь нас грешных в толицех обстояниих сущих, виждь нас немощных отвсюду уловляемых, всякаго блага лишенных, и умом от малодушия помраченных; потщися, угодниче Божий, не оставити нас в греховном плену быти, да не будем в радость врагом нашим и не умрем в лукавых деяниих наших. Моли о нас, недостойных, Спаса Господа, Емуже ты со бесплотными лики предстоиши: милостива к нам сотвори Содетеля нашего в нынешнем веце и в будущем, да не воздаст нам по делом нашим и по нечистоте сердец наших, но по Своей благости воздаст нам: на твое бо ходатайство уповая и твоим предстательством хвалимся, твое заступление на помощь призываем и к цельбоносным мощам твоим припадая недостойнии, исцеления просим: избави нас, угодниче Христов, от злых находящих на нас, и укроти волны страстей и бед, восстающих на нас, да ради святых твоих молитв не обымет нас напасть и не погрязнем в пучине греховней и в тине страстей наших. Моли, преподобне отче Герасиме, Христа Бога нашего, да подаст нам мирное жительство, оставление грехов, душам нашим спасение и велию милость.