Молитвы

Сердечная очи, досточудне, ко Господу вперив/ и телесныя страсти из корене исторгая,/ неболезненную жизнь в болезнех восприял еси, преподобне,/ болезнем же лютым даеши исцеление просящим с верою у тебе,/ темже молим тя, досточудне,/ исцели наша болезни душевныя и телесныя, да зовем ти:/ радуйся, Иакове Богомудре, отче наш.

Взбранный воеводо Бога Вышняго,/ силою Креста победивый востание тьмы/ и насадивый благочестие на земли твоей,/ имеяй же дерзновение ко Господу,/ сохраняй молитвами твоими достояние твое, да зовем ти:/ радуйся, равноапостольне царю Борисе,/ крестителю земли Болгарския.

Не имамы иныя помощи,/ не имамы иныя надежды,/ разве Тебе, Владычице./ Ты нам помози,/ на Тебе надеемся/ и Тобою хвалимся,/ Твой бо есмы раби,/ да не постыдимся.

Яко пленных свободитель/ и нищих защититель,/ немощствующих врач,/ православных поборниче,/ победоносче, великомучениче Георгие,/ моли Христа Бога// спастися душам нашим.

Обитель Триипостаснаго Божества,/ достоблаженне отче Ипатие, быв,/ во вселенную Всетворца Бога воскликнул еси./ Благодарственне же чудодействуя,/ вшел еси в Небесный обители,/ тамо моли Всесвятую Троицу, молим тя,/ исцелити телеса и души наша/ в Богосозданную нашу красоту.

От юности твоей весь сам себе Господеви возложив,/ в молитвах, и трудех, и в постех образ быв добродетели,/ отонудуже видев Бог твое благое произволение,/ архиерея тя и пастыря Церкви Своей устрояет./ Темже и по преставлении честное тело твое цело и нетленно соблюдеся,/ Ионо святителю,/ моли Христа Бога да спасет души наша.

Светлости святых насладитися вожделев,/ в темную вселился еси пещеру, прехвальне,/ и добре подвизался еси, Исаакие,/ прельщен же быв от врага,/ паки крепко попрал еси того вся коварства./ И ныне, яко победитель,/ в веселии предстоя Христу Богу,/ проси нам мира и велия милости.

Вышних улучити, премудре, желая,/ долу красных, мудре, преобидел есий/ и, Христу обнищавшему сообнищав,/ радуяся, последовал еси, Иоанне./ К Нему же прилежно не престай моляся о всех нас.

Избраннаго от пелен Христовою благодатию/ и возлюбленнаго от юности Божиим Духом,/ юностный цвет, Савву блаженнаго,/ похвальный венцы, вернии, днесь сплетше/ и Божественную главу его венчающе, воззовем:/ радуйся, отче, Божие жилище.

Великих дарований приемниче и великих чудес силою Божиею творителю, пречудне отче Григорие, яко велие дерзновение имея ко Христу Богу, непрестанно о нас молися Ему, да грехов оставление подаст душам нашим.

Бывый, блаженне Мардарие,/ нестяжатель Христа ради,/ и Того за многая твоя благодеяния/ в сердце твое вселивый,/ молися о нас, поющих тя.

Аудио: Кондак 1 Избранной служительнице слова Божия и подвигом святых апостол подражательнице, залог благословения от Божия Матере, честный крест приявшей и во стране Иверстей водрузившей, благодарственная хваления восписуем ти, цевнице духовная, святая равноапостольная Нино. Ты же, яко имущая дерзновение ко Господу, не престай молящися избавити нас от всяких бед и скорбей, да со умилением благодарственно зовем ти: Радуйся, святая равноапостольная Нино, просветительнице Грузии. Икос 1 Ангела дивна страны Иверския яви тя всея твари Создатель, обратити народы земли сея, седящия во тьме и сени смертней, от прелести идольския и призвати их во язык свят, в люди обновления. Темже мы, благодаряще Бога, прославляем тя яко просветительницу и молитвенницу нашу и прилежно зовем ти: Радуйся, пречудная избраннице Божественнаго Промысла; радуйся, дивно процветшая розго благочестиваго корене. Радуйся, сосуде благодати преизрядный; радуйся, вместилище благодатныя силы. Радуйся, Пресвятыя Девы Богородицы верная посланнице; радуйся, прехвальная апостолом подражательнице. Радуйся, во благовестии первозванному Андрею поревновавшая; радуйся, еюже лжа идольская попрана бысть. Радуйся, еюже святая вера насадися; радуйся, еюже нам земным путь к небесем показуется. Радуйся, святая равноапостольная Нино, просветительнице Грузии. Кондак 2 Видяще исполнение Божественнаго о людех смотрения Отца Небеснаго, Единороднаго Его Сына и Святаго Духа, воздвигшаго пророки и апостолы ко спасительному служению и нашего ради обращения к свету Евангельския истины избравшаго святую равноапостольную Нину, вопием к Богу: Аллилуиа. Икос 2 Разум Божественный возжелевши уразумети святая Нина, не единожды испытоваше от наставницы своея Нианфоры, яже известна быша о Господе Спасителе нашем и Его святом Хитоне, наученная же от нея истинными познании, восхоте поклонитися вседрагому Хитону и месту подвигов святых Апостол. Мы же, благоговения к жизни святыя Нины исполненнии, прославляем ю сице: Радуйся, истины Царствия Божия уразумети имущая; радуйся, от юности Христа возлюбившая. Радуйся, от младости материю своею Сусанною благочестию наученная; радуйся, отца своего Завулона утешение. Радуйся, святителем Иувеналием в страсе Божии упасенная; радуйся, Божиим словесем обученная. Радуйся, во святем граде Иерусалиме возращенная; радуйся, течением своим к славе Божией во младости праведных удивившая. Радуйся, земным благом небесная предпочетшая. Радуйся, святая равноапостольная Нино, просветительнице Грузии. Кондак 3 Сила Вышняго воздвигши тя, святая Нино, любовию благочестия, желанием поклонитися хитону Господню и ревностию апостольскою, постави тя яко светильник лучезарен, да приемлющии от тебе свет Богоразумия взывают к Богу: Аллилуиа. Икос 3 Имущи святая Нина непоколебимую ревность ко благоугождению Господеви, возгарашеся желанием приити во страну Иверскую и поклонитися тамо сокровенным святыням. Мы же, видяще в ней таковое святое ревнование, возопиим к ней: Радуйся, измлада суету мира презревшая; радуйся, истинную мудрость возлюбившая. Радуйся, верное сокровище Богомудрия в Божественном учении обретшая; радуйся, возлюбивших суету мира добродетельным житием превозшедшая. Радуйся, на непоколебимем камени заповедей Христовых утвердившаяся; радуйся, преданностию воле Божией Ангелы и человеки удивившая. Радуйся, постом и молитвою плоть свою духови покорившая; радуйся, любовию своею ко храму Божию томужде многи научившая. Радуйся, добротою нрава к служению апостольства уготовившаяся; радуйся, чрез добродетельное житие свое сосудом Духа Святаго соделавшаяся. Радуйся, святая равноапостольная Нино, просветительнице Грузии. Кондак 4 Бурею житейских страстей смущаеми, недоумеем, како достойно воспевати твое дивное мужество, святая богоизбранная Нино, не устрашила бо ся еси исполнити хотение свое, еже шествовати о имени Христове во языческий град Рим. Пречистая же Матерь Господа нашего благоизволи дати ти честныма рукама Своима святый крест и призвати тя ко благовестию спасения во стране Иверстей всем хотящим взывати Богу: Аллилуиа. Икос 4 Слышав святитель града Господня Иувеналий, яко Пресвятая Богородица призва тя проповедати слово Божие во жребии Ея, во стране Иверстей, и дарова ти в видении крест, егоже ты обвила еси власы своими, нача славити Бога, спасающаго человеки, и звати тебе сице: Радуйся, благодатию Божиею приосененная; радуйся, смирением духа дерзновение ко Господу Иисусу и Пречистой Его Матери приобретшая. Радуйся, обрадованная явлением Богоматере; радуйся, пресладкая словеса от Божия Матере слышавшая. Радуйся, с Нею яко со другинею беседовавшая; радуйся, благоговейно иерусалимскою братиею почтенная. Радуйся, уготование ко просвещению нашему незаходимым Светом; радуйся, свеще, Богом возжженная, во еже разгонити мрак нечестия. Радуйся, честный крест залог твоего преуспеяния во благовестии приимшая. Радуйся, святая равноапостольная Нино, просветительнице Грузии. Кондак 5 Боготечною звездою явися, святая Нино, возсиявши нам изволением Пресвятыя Владычицы нашея Богородицы и просветивши нас благовестием слова Божия. Сию небесную путеводницу, сияющую славою подвигов благочестия и утешающую выну своею помощию всех нас, притекающих к ней с мольбами, ублажающе, наипаче восхвалим Бога, явившаго святую Нину ходатаицею о нас, и возопиим Ему: Аллилуиа. Икос 5 Видевше Христовы невесты, яже со святою Ниною и Рипсимиею постом и молитвою спасахуся, нечестивая помышления беззаконновавшаго Диоклитиана, хотящаго Рипсимию пояти в жену себе и идолослужению научити, вся купно бежаша тайно из идольнаго града Рима во страну Арменскую; таможе преданы бяху смерти повелением язычествовавшаго царя Тивридата. Святую же Нину Господь от сетей Диоклитиана и Тивридата спасе и приведе ю благовестия ради слова Евангельскаго во Иверию. Темже и мы, радующеся сему промышлению Божию о спасении людий, восхваляем Божию посланницу, святую Нину, зовуще: Радуйся, пребыванием своим в Риме путь благовестия себе уяснившая; радуйся, несокрушимостию духа и дивным мужеством в служении слова Божия прославившаяся. Радуйся, трудный путь во Иверию безропотно во славу Божию прошедшая; радуйся, благодатию Божиею от руки Диоклитиана и Тивридата избавленная. Радуйся, сущия у гор Триалетских гласом смирения огласившая; радуйся, образом кротости мир в душах утвердившая. Радуйся, вонею благоухания словес Христовых многие облагоухавшая; радуйся, утверждение наше на пути спасения; радуйся, яко тобою сподобляемся благ вечных. Радуйся, святая равноапостольная Нино, просветительнице Грузии. Кондак 6 Проповедница велия показася святая Нина, трудами бо и болезньми ея во Иверии Церковь Христова насадися, мрак неведения отгнася, свет истины явися, нам же, избавленным святою Ниною от тьмы идолослужения, достойно есть взывати ко Господу: Аллилуиа. Икос 6 Возсия стране Иверстей просвещение истины, егда святая Нина огласи благовестием град Урбниси, отнюдуже мнози хождаху во Грузинский стольный град Мцхет кланятися лживым богом Ормузду и Задену; сих идолов святая Нина молитвами своими сокруши и низпроверже. Темже и мы яко победительницу демонов восхвалим ю сице: Радуйся, всемогущую силу истиннаго Бога во стране Иверстей первее показавшая; радуйся, силою Всевышняго идола Ормузда поразившая. Радуйся, гордость его мольбами своими посрамившая; радуйся, останками его безсилие злаго духа открывшая. Радуйся, демона Задена и его ангелов поправшая; радуйся, властителей тьмы отгнавшая. Радуйся, безсильное царство их разрушившая; радуйся, бесовский пламень нечестия угасившая. Радуйся, бурным дыханием и огнем небесным служение идолом низпровергшая; радуйся, ревностию своею имя истиннаго Бога во Иверии прославившая. Радуйся, сыновом тьмы свет Евангельский показавшая. Радуйся, святая равноапостольная Нино, просветительнице Грузии. Кондак 7 Хотя царь Мириан со слуги своими уразумети силу истиннаго Бога, сокрушившаго безсильныя идолы их, с недоумением глаголаше: что убо сие бысть, яко бози наши падоша? Дом же вертоградаря царева со Авиафаром, иереем иудейским, дщерию его Сидониею и иными девами, благоговейно приявшими благовестие святыя Нины, познавше Господа Христа, возопиша к Богу: Аллилуиа. Икос 7 Новая жизнь дадеся сыновом Иверии приятием от Нины слова истины, вси бо от нея крестишася банею водною во очищение свое от грехов и освящение и достойни соделашася приимати от Бога исцеления мольбами сея предстательницы; царь Мириан, благодатию Божиею прозрев от слепоты, истиннаго Бога уразуме и Христа исповеда; царица Нана возста от одра болезни, отрок же их от духа злаго свободися, и вси в купели пакибытия возродишася. Сего ради вси народи, видяще таковая, подолгу прославляют память святыя Нины, воспевающе ей сице: Радуйся, неверие царя Мириана в веру обратившая; радуйся, верное того исповедание приемшая. Радуйся, томужде от слепоты исцеление подавшая; радуйся, идолом поклонение угасившая. Радуйся, свобождение от языческих заблуждений; радуйся, очищение нравов. Радуйся, избавление от искушений; радуйся, дарование благодеяний требующим. Радуйся, святая равноапостольная Нино, просветительнице Грузии. Кондак 8 Странное чудо показася нам от Бога, яко Той, по благосердию Своему, страну Иверию содела жребием Богоматере и, в знамение Своего благоволения обитающим в ней, от первых же дний благовествования о спасении людий посла честный Хитон Господа Христа и над Хитоном водрузи Живоносный Столп, от негоже и поднесь верующии получают исцеления; еще же и яви в ней дивную и преславную благовестницу святую Нину, и крест со драгими ея власы ко утверждению святыя Своея веры дарова. Сицевая утешения имуще, мы, земнороднии, вознесем умы и сердца своя к горнему Царствию и прославим благодеющаго нам Бога, взывающе к Нему немолчно: Аллилуиа. Икос 8 Вся объята была еси ты, святая Нино, мыслию о горнем и сего ради призвала еси дольних, неведущих Спасителя всех Господа Иисуса Христа, ко общению со наследники Небеснаго Царствия, да и тии уведят величие славы единаго истиннаго Пастыря небесе и земли и прославят Его купно с горними жительми единеми усты и единем сердцем. Темже и мы, взирающе на ревность твою о спасении нашем, со умилением зовем ти таковая: Радуйся, отверзение дверий крещения; радуйся, наше к небесем приведение. Радуйся, святым крещением Грузии велиею радостию святыя Ангелы исполнившая; радуйся, царя Мириана к созиданию рукотвореннаго храма Богу Истинному подвигшая. Радуйся, честный крест от рождий лозных в нем водрузившая; радуйся, залог сей любве своея ко Христу всем чадом Святыя Церкве оставившая. Радуйся, с сонмом подвижниц своих ко святому крещению всех призвавшая; радуйся, сынов Иверии от купели восприявшая. Радуйся, многи в разуме просветившая. Радуйся, святая равноапостольная Нино, просветительнице Грузии. Кондак 9 Всякое естество Небесных Сил радовашеся, егда крещахуся сыны Иверии; един бо от небожителей во образе дивнаго человека явися и утверди чудотворный столп над ризою Господнею, научая всех со святою Ниною воспевати Богу:Аллилуиа. Икос 9 Витии многовещаннии языки своими не возмогут изрещи тебе достойныя хвалы, равноапостольная Нино: славы бо ради Божия и спасения ближних протекла еси от Мцхета Карталинския и Кахетинския земли, идеже вся племена дол и высот, от тебе слышавша словеса Божия, прияша спасение. Мы же, исполненнии радости и благодарения за толикую любовь к нам, от всего сердца взываем ти сице: Радуйся, облечение наше багряницею крещения; радуйся, поточе сладости, напоивый нас водою благочестия. Радуйся, предивная поборнице веры Христовы; радуйся, насаждение на земли рая небеснаго. Радуйся, свобождение наше от рабства греховнаго; радуйся, сокрушение сетей вражиих. Радуйся, посечение злочестия; радуйся, славная победо над неверием. Радуйся, потребление злых обычаев и суеверий; радуйся, сладкозвучная свирель веры. Радуйся, святая равноапостольная Нино, просветительнице Грузии. Кондак 10 Спасти хотящи от вечныя погибели душу свою и ближних, равноапостольная Нино, ты ревностию поревновала еси о славе Божией и подъяла еси многотрудный подвиг апостольский, темже убо и венцем апостольским украсилася еси от Господа на небесех, идеже со всеми святыми предстоящи с мольбою о нас воспеваеши Ему: Аллилуиа. Икос 10 Стену нерушимую воздвиже тя Господь, святая Нино, и показа ограждением нашим от всяких бед и источником исцелений нетленное твое тело во стране Кизикийстей, в веси Бодбе, идеже просветила еси ты царицу Софию и народ ея, да вси, предстательством твоим приемлюще от Бога милости, воззовем ти сице: Радуйся, стено и покрове, не крыющийся от нашего притекания; радуйся, готовая помоще ищущим спасения и истиннаго просвещения. Радуйся, неоскудеваемый источниче благословений и милостей Божиих к почитающим тя; радуйся, защитнице наша от погибели и напастей. Радуйся, благочестивым людем верное поможение; радуйся, истинное умирение мятущияся плоти. Радуйся, радование душ наших. Радуйся, святая равноапостольная Нино, просветительнице Грузии. Кондак 11 Пение всеумиленное принесла еси Пресвятей Троице, святая Нино, умом и делом до конца своея жизни Триединаго Бога возлюбивши. Приими же от прославляющих тя умиленное пение и не презри гласа нашего, к тебе бо в напастех и скорбех прибегаем по Преблагословенней Богоматери и, на твое предстательство уповающе, зовем Богу: Аллилуиа. Икос 11 Светоприемная свеща, святая Нино, свет во тьме явльшая, егда преселяшеся от земли на небо, собра верныя чада своя от купели, яко отрасли новосаждения, и от них некия недужныя исцели, и предаде Богу непорочный дух свой. Видяще же блаженную ея кончину, царь Мириан и ближнии его горько плакаху и, со слезами отходныя песни поюще, взываху к ней таковая: Радуйся, небесный Ангеле во образе земнаго человека явивыйся; радуйся, невесто Христова, уневестившая Небесному Жениху Церковь Иверийскую. Радуйся, благая просветительнице наша, в подвизех дневных и нощных течение совершившая; радуйся, неустанная кормительнице, пищею Божественных словес нас питавшая. Радуйся, непорочная голубице, возлетающая от земли в небесныя обители; радуйся, яко тело твое в нетление облечеся. Радуйся, яко святыя мощи твоя благоухания исполнишася; радуйся, яко тех благоуханием мы, чада твоя, ныне наслаждаемся. Радуйся, святая равноапостольная Нино, просветительнице Грузии. Кондак 12 Благодать, данную ти от Бога, ведуще, по долгу празднуем всечестную память твою, святая равноапостольная Нино, и со умилением сердца притекающе ко образу твоему, честным крестом украшенному, вседушно просим: сохрани нас в жизни сей в вере православней и во всяком благочестии и чистоте, да и в смертном успении нашем обрящемся достойни воспевати Богу: Аллилуиа. Икос 12 Поюще твое к Богу отшествие, всехвальная Нино, почитаем твой подвиг апостольства, величаем ревность по Бозе, хвалим долготерпение, славим смирение и ублажаем кончину твою, чудесы бо многими по отшествии твоем дивно прославилася еси; о нихже дивящеся, вопием ти сице: Радуйся, в сожительство Ангельских чинов и святых любезне приятая; радуйся, собору апостольскому сопричтенная. Радуйся, с лики избранных Божиих в чертог небесный всельшаяся; радуйся, златая кадильнице, фимиам молитвы о нас Богу приносящая. Радуйся, лицезрением небесных вечное блаженство вкушающая; радуйся, с равноапостольными Константином и Еленою славимая. Радуйся, народом Грузинским и всеми православными величаемая; радуйся, чудес Христовых сокровище. Радуйся, яко от честнаго креста, власы твоими повитаго, исцеление душ и телес получаем; радуйся, яко от святых мощей твоих благопотребную помощь обретаем. Радуйся, святая равноапостольная Нино, просветительнице Грузии. Кондак 13 О преславная и предивная просветительнице страны Иверския, присная молитвеннице наша пред Спасителем Богом и Его Пречистою Материю, святая равноапостольная Нино! Нынешнее приемши приношение наше, умоли Господа Богоприятным твоим ходатайством избавити нас от всякия напасти, бед и скорбей, и сподобити вечных благ на небеси, да с тобою выну взываем Богу: Аллилуиа.[Се́й конда́к глаго́лется три́жды.][Далее повторяем 1‑е икос и кондак:]Икос 1 Ангела дивна страны Иверския яви тя всея твари Создатель, обратити народы земли сея, седящия во тьме и сени смертней, от прелести идольския и призвати их во язык свят, в люди обновления. Темже мы, благодаряще Бога, прославляем тя яко просветительницу и молитвенницу нашу и прилежно зовем ти: Радуйся, пречудная избраннице Божественнаго Промысла; радуйся, дивно процветшая розго благочестиваго корене. Радуйся, сосуде благодати преизрядный; радуйся, вместилище благодатныя силы. Радуйся, Пресвятыя Девы Богородицы верная посланнице; радуйся, прехвальная апостолом подражательнице. Радуйся, во благовестии первозванному Андрею поревновавшая; радуйся, еюже лжа идольская попрана бысть. Радуйся, еюже святая вера насадися; радуйся, еюже нам земным путь к небесем показуется. Радуйся, святая равноапостольная Нино, просветительнице Грузии. Кондак 1 Избранной служительнице слова Божия и подвигом святых апостол подражательнице, залог благословения от Божия Матере, честный крест приявшей и во стране Иверстей водрузившей, благодарственная хваления восписуем ти, цевнице духовная, святая равноапостольная Нино. Ты же, яко имущая дерзновение ко Господу, не престай молящися избавити нас от всяких бед и скорбей, да со умилением благодарственно зовем ти: Радуйся, святая равноапостольная Нино, просветительнице Грузии. Молитва О всехвальная и предивная равноапостольная Нино, воистину великое украшение Церкве Православныя и изрядная похвало народу Иверийскому, просветившая всю страну Грузинскую Божественным учением и подвиги апостольства победившая врага нашего спасения, трудом и молитвами насадившая зде вертоград Христов и возращшая его в плод мног. Празднующе святую память твою, притекаем к честному лику твоему и благоговейно лобызаем всехвальный дар тебе от Божия Матере, чудотворный крест, егоже ты обвила еси драгими власы твоими, и умильно просим, яко присную предстательницу нашу: огради нас от всяких зол и скорбей, вразуми врагов Святыя Церкве Христовы и противников благочестия, охраняй твое стадо, упасенное тобою, и моли Всеблагаго Бога, Спасителя нашего, Емуже ты ныне предстоиши, да дарует народу нашему мир, долгоденствие и во всяком добрем начинании поспешение, и да приведет Господь нас в Небесное Свое Царствие, идеже вси святии славословят всесвятое Его Имя ныне, и присно, и во веки веков. Аминь.

Текст акафиста утвержден для употребления за богослужением и в домашней молитве на заседании Священного Синода 24 августа 2023 года (журнал № 68). Кондак 1 Взбра́нной Воево́де, Пречи́стей Влады́чице на́шей Богоро́дице, Засту́пнице христиа́н ско́рей, изба́вльшей зе́млю Ска́нову от смертоно́сныя я́звы хода́тайством Свои́м ко Всеми́лостивому Бо́гу, благода́рственное пе́ние прино́сим недосто́йнии раби́ Твои́. Ты же, я́ко имуща́я держа́ву непобеди́мую, от вся́ких зол и скорбе́й спаса́й нас моли́твами Твои́ми, да зове́м Ти: Ра́дуйся, Всеми́лостивая Влады́чице, любо́вь Бо́жию нам явля́ющая. Икос 1 Арха́нгелов и А́нгелов превы́шшую вся Си́лы Небе́сныя немо́лчно воспева́ют Тя, Всеми́лостивая Влады́чице, и мы, гре́шнии, дивя́щеся ско́рому заступле́нию Твоему́, чрез о́браз чудотво́рный Твой Трубче́вский избавля́емся бед и зол. Те́мже в ра́дости серде́чней, с любо́вию припа́дающе ко пречестно́му о́бразу Твоему́, со умиле́нием прино́сим Ти благохвале́ния сицева́я: Ра́дуйся, Боже́ственное обетова́ние; ра́дуйся, проро́честв исполне́ние. Ра́дуйся, несве́домая Та́йно Боговоплоще́ния; ра́дуйся, с Бо́гом вражды́ прекраще́ние. Ра́дуйся, ми́ра всего́ от греха́ очище́ние; ра́дуйся, нам в Ма́терь Богодарова́нная. Ра́дуйся, ра́йских врат отверзе́ние; ра́дуйся, Небе́сных и земны́х при́сное ра́дование. Ра́дуйся, Всеми́лостивая Влады́чице, любо́вь Бо́жию нам явля́ющая. Кондак 2 Ви́дящи, Пресвята́я Де́во, скорбь бра́тии пу́стыни Ска́новы, от запале́ния о́гненнаго быва́емую, благоволи́ла еси́ во гра́де Трубче́вске Евфи́мием иере́ем о́браз Свой написа́ти и оби́тели Ска́новой дарова́ти, да и мы, избавля́еми и храни́ми Твои́м заступле́нием и Покро́вом, вы́ну зове́м Бо́гу: Аллилу́иа. Икос 2 Чу́до ве́лие дре́вле бысть, Богоро́дице, егда́ Огнь Божества́, прише́дша в мир изба́вити лю́ди от неду́га грехо́внаго, неопа́льно в ложесна́х Твои́х вмести́ла еси́; ны́не же мы немощни́и зрим, ка́ко Ты, Влады́чице, ико́ною Твое́ю Трубче́вскою мно́гия неду́ги врачу́еши, от огня́ и гро́ма защища́еши. Сего́ ра́ди вопие́м Ти такова́я: Ра́дуйся, Купино́ несгара́емая; ра́дуйся, Богоро́дице Присноде́вственная. Ра́дуйся, от о́гненнаго запале́ния сохраня́ющая; ра́дуйся, пла́мень страсте́й на́ших угаша́ющая. Ра́дуйся, любве́ к Бо́гу огнь воспламеня́ющая; ра́дуйся, на ны дви́жимый гнев Бо́жий утоля́ющая. Ра́дуйся, Хода́таице к нам Бо́жия благоволе́ния; ра́дуйся, всего́ ми́ра умире́ние. Ра́дуйся, Всеми́лостивая Влады́чице, любо́вь Бо́жию нам явля́ющая. Кондак 3 Си́ла Вы́шняго осени́ зе́млю Ска́нову, егда́ изнесе́нием из оби́тели о́браза Твоего́ Трубче́вскаго с пе́нием моле́бным на сто́гны гра́да Наровча́та па́губа смертоно́сная прекрати́ся и множа́йшая скорбь рабо́в Твои́х в ра́дость ве́лию преложи́ся, и ти́и возопи́ша Бо́гу: Аллилу́иа. Икос 3 Иму́щи Богоприя́тное дерзнове́ние ко Христу́ Бо́гу, Богоневе́стная Ма́ти и Де́во, чудотвори́ти не престае́ши ны́не, я́коже и дре́вле, ико́ною Твое́ю пречестно́ю, исцеле́ние, отра́ду и утеше́ние е́ю стра́нником земны́м в юдо́ли ско́рби и пла́ча да́руеши. Сего́ ра́ди вопие́м Ти умиле́нно: Ра́дуйся, я́ко Рождество́м Твои́м тля сме́ртная попра́ся; ра́дуйся, я́ко Тобо́ю от земли́ Ска́новы смерть отгна́ся. Ра́дуйся, милосе́рдие Твое́ ико́ною запечатле́вшая; ра́дуйся, оби́тели Ска́новой Стено́ неруши́мая. Ра́дуйся, зной страсте́й на́ших охлажда́ющая; ра́дуйся, грехо́вныя я́звы на́ша врачу́ющая. Ра́дуйся, люде́й Твои́х печа́ль на ра́дость прелага́ющая; ра́дуйся, на ми́лость к нам гре́шным Бо́га приклоня́ющая. Ра́дуйся, Всеми́лостивая Влады́чице, любо́вь Бо́жию нам явля́ющая. Кондак 4 Бу́ря недоуме́ний смуща́ет нас, о, Преблагослове́нная Цари́це, ка́ко возмо́жем воспева́ти недосто́йными усты́ вели́чие сла́вы Твоея́; ико́ною бо Твое́ю свято́ю мно́жество чуде́с нам яви́ла еси́. Сего́ ра́ди, со умиле́нием взира́юще на ико́ну святу́ю Твою́, я́ко от исто́чника неоскудева́емаго в ско́рбех отра́ду почерпа́ем, в печа́лех утеше́ние, в неду́зех тя́жких врачевство́ оби́льное, и взыва́ем благода́рственными гла́сы Сы́ну Твоему́ и Бо́гу на́шему: Аллилу́иа. Икос 4 Слы́ша, Всеми́лостивая Госпоже́, о чудесе́х мно́гих, от ико́ны Твоея́ явля́емых, строи́тель оби́тели Ска́новы Филаре́т о́браз Твой чудотво́рный ри́зы драгоце́нными украси́. Мы же, Пречи́стая, любве́ его́ подража́юще, похвалы́ от благода́рных серде́ц на́ших я́ко ри́зы слове́сныя усты́ ску́дными прино́сим Ти: Ра́дуйся, Боже́ственною сла́вою преукраше́нная; ра́дуйся, доброде́тельми, я́ко ря́сны златы́ми, преиспещре́нная. Ра́дуйся, пречи́стая Порфи́ро Боготка́нная; ра́дуйся, Светоно́сная Неве́сто Неневе́стная. Ра́дуйся, я́ко ико́на Твоя́ оби́тели огражде́ние есть и украше́ние; ра́дуйся, я́ко подоба́ет Тебе́ достоле́пное че́ствование. Ра́дуйся, оскуде́ние душ на́ших еле́ем ми́лости восполня́ющая; ра́дуйся, ду́ши на́ша благоукраша́ющая. Ра́дуйся, Всеми́лостивая Влады́чице, любо́вь Бо́жию нам явля́ющая. Кондак 5 Боготе́чная звезда́ яви́ся нам, Богоро́дице, честна́я ико́на Твоя́ Трубче́вская, луча́ми чуде́с Твои́х всех осиява́ющи, мрак печа́лей и уны́ния прогоня́ющи, всем ко спасе́нию ве́чному путь указу́ющи, с ве́рою к Тебе́ притека́ющим и пою́щим Бо́гу: Аллилу́иа. Икос 5 Ви́дя ве́лия чудеса́, в земли́ Ска́новой от ико́ны Твоея́ явля́емая, возра́довася зело́ Преосвяще́нный Амвро́сий, и ра́ди чудотво́рнаго о́браза Твоего́ Трубче́вскаго созда́ храм святы́й близ оби́тели, да́ вси с любо́вию возсыла́ют Ти похвалы́ сия́: Ра́дуйся, Храме всесвяты́й, Божества́ Прия́телище; ра́дуйся, одушевле́нная Ски́ние Бо́жия снисхожде́ния. Ра́дуйся, Неви́димаго Царя́ Престо́ле Богоно́сный; ра́дуйся, Черто́же Ца́рский и Святы́й. Ра́дуйся, руководи́тельнице к Богове́дению; ра́дуйся, ра́досте Богопозна́ния. Ра́дуйся, высото́ Богомы́слия; ра́дуйся, всех ве́рных воскликнове́ние. Ра́дуйся, Всеми́лостивая Влады́чице, любо́вь Бо́жию нам явля́ющая. Кондак 6 Пропове́дует земля́ Наровча́тская богатыя ми́лости Твоя́ и ско́рое предста́тельство пред Сы́ном Твои́м и Бо́гом, Пресвята́я Влады́чице, зане́ изба́вила еси́ от смертоно́сныя я́звы ве́рныя лю́ди, к о́бразу Твоему́ честно́му притека́вшия и по́мощи проси́вшия. Та́ко и нас, призыва́ющих и́мя Твое́ свято́е, ми́лостивно уврачу́й от вся́кия боле́зни душе́вныя и теле́сныя, да, не тая́ще Твои́х к нам благодея́ний, благода́рственно прославля́ем Бо́га, вопию́ще Ему́: Аллилу́иа. Икос 6 Возсия́ наро́ду на́шему ра́дость ве́лия, егда́ благоволи́ла еси́, Хода́таице Преблага́я, по ле́тех мно́зех, ско́рбех лю́тых и злых обстоя́ниих и́га богобо́рственнаго и запусте́ния ме́рзскаго, умоли́ти Христа́ Бо́га на́шего оби́тель Ска́нову возроди́ти и лю́ди Своя́ возвесели́ти. Сего́ ра́ди вопие́м Ти такова́я: Ра́дуйся, благоволе́ния Бо́жия возвраще́ние; ра́дуйся, Про́мысла Бо́жия исполне́ние. Ра́дуйся, на́ше с Бо́гом примире́ние; ра́дуйся, ве́ры Правосла́вныя возрожде́ние. Ра́дуйся, богопроти́вных низложе́ние; ра́дуйся, бесо́в прогна́ние и устраше́ние. Ра́дуйся, богобо́рных попра́ние; ра́дуйся, правосла́вных ликова́ние. Ра́дуйся, Всеми́лостивая Влады́чице, любо́вь Бо́жию нам явля́ющая. Кондак 7 Хотя́ всем челове́ком спасти́ся и в ра́зум И́стины приити́, Преми́лостивый Госпо́дь и Спас наш возврати́л есть во оби́тель Ска́нову ико́ну святу́ю Трубче́вскую, да вси, моля́щиися пред не́ю, утеша́ются, иму́ще по́мощь и ми́лость Ма́тере Бо́жия, и вопию́ще Бо́гу: Аллилу́иа. Икос 7 Но́вое се́рдце и но́вый дух по проро́ку возсозида́я Госпо́дь в челове́цех, жен благочести́вых и дев благогове́йных во оби́тель Ска́нову призва́, да вси, взира́юще на ико́ну обновле́нную Трубче́вскую, вопию́т благода́рне ко Преблагослове́нней: Ра́дуйся, Пречестна́я Игу́мение и́ноческих оби́телей; ра́дуйся, во́ли Бо́жия в лю́дех соверше́ние. Ра́дуйся, ко и́ноческому по́двигу Бо́жие призыва́ние; ра́дуйся, Богоизбра́нная, избира́ющая из ми́ра Бо́гу на служе́ние. Ра́дуйся, и́ночествующим о́браз во спасе́ние; ра́дуйся, святы́м де́вам Предводи́тельнице. Ра́дуйся, подвиза́ющихся смиренному́дрие и духо́вное трезве́ние; ра́дуйся, душ на́ших преображе́ние и обновле́ние. Ра́дуйся, Всеми́лостивая Влады́чице, любо́вь Бо́жию нам явля́ющая. Кондак 8 Стра́нное и пресла́вное сотвори́ Госпо́дь, егда́ богобо́рнаго зми́я попра́, и лю́ди к Себе́, моли́твами Богоро́дицы, а́ки из небытия́, па́ки призва́. Сея́ ми́лости ра́ди устрани́мся су́етнаго и многомяте́жнаго ми́ра сего́, ум на Небеса́ прело́жше, и вопию́ще Бо́гу: Аллилу́иа. Икос 8 Вся к Небе́сным взята́ еси́, но и земны́х не оставля́еши, Пречи́стая Богома́ти, те́мже утверди́ в Правосла́вии наро́д наш и в ве́рности Влады́це Христу́ сохрани́, да, восхваля́юще, воспева́ем Ти сицева́я: Ра́дуйся, земли́ Ру́сския держа́вная Храни́тельнице; ра́дуйся, наро́да на́шего ми́лостивая Покрови́тельнице. Ра́дуйся, христиа́н му́жество и на враги́ одоле́ние; ра́дуйся, Святы́я Руси́ возстановле́ние. Ра́дуйся, ма́терей му́дросте и благо́е наставле́ние; ра́дуйся, младе́нцев послуша́ние и благогове́ние. Ра́дуйся, дев правосла́вных кро́тосте и целому́дрие; ра́дуйся, всем ве́рным Покро́ве и свяще́нное прибе́жище. Ра́дуйся, Всеми́лостивая Влады́чице, любо́вь Бо́жию нам явля́ющая. Кондак 9 Всяк земноро́дный да возра́дуется, Богома́териею утеша́емь, да ра́дуются безпло́тных собо́ри, я́ко дарова́л еси́, Всеми́лостиве Го́споди, те́плую Засту́пницу ро́ду христиа́нскому, Пречи́стую Влады́чицу Богоро́дицу, ми́лостию Свое́ю с на́ми вы́ну сопребыва́ющую, слы́шащую же Тебе́ вопию́щих: Аллилу́иа. Икос 9 Вети́йства многовеща́нная не довле́ют благохвали́ти по достоя́нию Тя, Пренепоро́чная Ма́ти Де́во, я́ко ико́ною Твое́ю, Трубче́вскою имену́емою, зна́мения ди́вная и чудеса́ пресла́вная в земли́ Ска́новой сотвори́ла еси́. Те́мже за премно́гую любо́вь Твою́ к нам ико́ну Твою́ благоче́стно почита́ем и, ра́дующеся благода́тному заступле́нию Твоему́, благода́рственную песнь воспева́ем Ти си́це: Ра́дуйся, ико́ну честну́ю во оби́тели чудесы́ мно́гими просла́вльшая; ра́дуйся, притека́ющим к Тебе́ ми́лость излива́ющая. Ра́дуйся, неду́ги теле́сныя исцеля́ющая; ра́дуйся, грехо́вную скве́рну омыва́ющая. Ра́дуйся, обурева́емых страстьми́ небу́рное Приста́нище; ра́дуйся, из пле́на грехо́внаго избавле́ние. Ра́дуйся, неви́нных ве́рная Засту́пнице; ра́дуйся, в ско́рбех утеше́ние. Ра́дуйся, Всеми́лостивая Влады́чице, любо́вь Бо́жию нам явля́ющая. Кондак 10 Спасти́ хотя́ лю́ди Твоя́ от искуше́ний, бед и собла́знов, и́же в ми́ре сем, благослови́л еси́, Го́споди, достоя́ние Твое́ дарова́нием Предста́тельницы о нас, Препе́тыя Богоро́дицы, Ея́же моли́твами, Спа́се, душ на́ших боле́зни исцели́, прича́стники насле́дия Небе́снаго покажи́, да пое́м Ти: Аллилу́иа. Икос 10 Стена́ еси́ лю́дем Твои́м, Богоро́дице Де́во, от по́хоти, гне́ва и го́рдости житейския, в сыне́х противле́ния де́йствуемых; низложи́, Влады́чице, прило́ги бесо́вския, огнь нечистоты́ угаси́, от растле́ния ду́хом ми́ра сего́ сохрани́, вся́кий вид зло́бы, гнездя́щийся в нас, искорени́, да прославля́ем Тя си́це: Ра́дуйся, оби́тели Ска́новы Сто́лпе целому́дрия; ра́дуйся, Взбра́нная Воево́до непобеди́мая. Ра́дуйся, дев богому́дрых велича́ние; ра́дуйся, и́ночествующих Боже́ственное увенча́ние. Ра́дуйся, хла́дность душе́вную благода́тно возгрева́ющая; ра́дуйся, окамене́ние серде́чное умягча́ющая. Ра́дуйся, чистоту́ душе́вную нам да́рующая; ра́дуйся, изнемога́ющих си́лою свы́ше укрепля́ющая. Ра́дуйся, Всеми́лостивая Влады́чице, любо́вь Бо́жию нам явля́ющая. Кондак 11 Пе́ние хвале́бное и благода́рственное прино́сим Ти, Ма́ти Всепе́тая, велегла́сно пропове́дуем чудеса́ Твоя́ и мно́гую ми́лость к ро́ду христиа́нскому, чрез о́браз чудотво́рный Трубче́вский и ины́я ико́ны святы́я Твоя́ явля́емыя. Те́мже пе́сньми хвале́бными велича́юще Тя, взыва́ем к Бо́гу: Аллилу́иа. Икос 11 Светоно́сная лампа́да, еле́ем ми́лости к ро́ду челове́ческому преиспо́лненная, яви́лася еси в Це́ркви Христо́вой, Госпоже́ Богоро́дице, дарова́вши оби́тели Тро́ицкой изображе́ние честна́го ли́ка Твоего́, да вси, ви́дяще ми́лость Бо́жию, Тобо́ю нам явля́емую, со слеза́ми мо́лятся: помози́, Преблага́я, напо́лни сосу́ды душ на́ших благи́ми де́лы, па́че же милосе́рдием и смире́нием, да ра́достно вопие́м Ти си́це: Ра́дуйся, уныва́ющих благо́е упова́ние; ра́дуйся, правосла́вных жен тишино́ и незло́бие. Ра́дуйся, даю́щая любо́вь и смире́ние; ра́дуйся, храня́щая в ми́ре милосе́рдие. Ра́дуйся, мир с Бо́гом храни́ти науча́ющая; ра́дуйся, во благоче́стии укрепля́ющая и утвержда́ющая. Ра́дуйся, подаю́щая благоду́шное терпе́ние; ра́дуйся, Отра́до на́ша и Умиле́ние. Ра́дуйся, Всеми́лостивая Влады́чице, любо́вь Бо́жию нам явля́ющая. Кондак 12 Благода́ть Бо́жия подае́тся оби́льно от честны́я ико́ны Твоея́ Трубче́вския, Богоро́дице, лю́дие же христолюби́вии, с любо́вию ей покланя́ющеся, прие́млют да́ры щедро́т Твои́х, и́бо всем вся блага́я и душеполе́зная да́руеши и побужда́еши воспева́ти Бо́гу: Аллилу́иа. Икос 12 Пою́ще чудеса́, от ико́ны Твоея́ быва́емая, Ма́ти Христа́ Бо́га на́шего, припа́даем Ти, и мо́лим Ти ся пред о́бразом Твои́м чудотво́рным: не отврати́ Пречи́стаго Ли́ка Твоего́ от оби́тели Ска́новы, и от всех ве́рных рабо́в Твои́х. Бу́ди, Влады́чице, нам защище́ние по исхо́де души́ из ми́ра сего́ и, егда́ и́мамы предста́ти на Суди́щи Стра́шнем пред Го́сподем и Сы́ном Твои́м, спаси́ ны, Госпоже́, от ве́чнаго осужде́ния и муче́ния гее́нскаго, да со умиле́нием и тре́петом душе́вным воспое́м Ти такова́я: Ра́дуйся, А́нгельских умо́в удивле́ние; ра́дуйся, пра́отцев и проро́ков Ча́яние. Ра́дуйся, Апо́столов Ра́досте благовествова́ния; ра́дуйся, му́чеников дерзнове́ние и ликова́ние. Ра́дуйся, преподо́бных Бо́гу уподобле́ние; ра́дуйся, гре́шных к Бо́гу обраще́ние и всыновле́ние. Ра́дуйся, де́вствующих благоле́пная чистото́; ра́дуйся, всех святы́х Сла́во и Похвало́. Ра́дуйся, Всеми́лостивая Влады́чице, любо́вь Бо́жию нам явля́ющая. Кондак 13 О Премилосе́рдая Засту́пнице ро́да христиа́нскаго, честне́йшая Херуви́м и сла́внейшая без сравне́ния Серафи́м, Де́во Богоро́дице! Приими́ ми́лостивно моле́бное пе́ние, с ве́рою и благогове́нием Тебе́ возноси́мое пред чудотво́рным Твои́м о́бразом. Защити́ нас от враго́в ви́димых и неви́димых, сохрани́ от искуше́ний и грехопаде́ний, и гряду́щаго пра́веднаго гне́ва Бо́жия, и́же за лю́тая беззако́ния на́ша, ми́лостию Твое́ю изба́ви. Умоли́ Го́спода Сла́вы изба́вити нас ве́чнаго муче́ния, да спасе́ннии Тобо́ю, с ли́ки А́нгельскими воспое́м Бо́гу: Аллилу́иа.[Се́й конда́к глаго́лется три́жды.][Далее повторяем 1‑е икос и кондак:]Икос 1 Арха́нгелов и А́нгелов превы́шшую вся Си́лы Небе́сныя немо́лчно воспева́ют Тя, Всеми́лостивая Влады́чице, и мы, гре́шнии, дивя́щеся ско́рому заступле́нию Твоему́, чрез о́браз чудотво́рный Твой Трубче́вский избавля́емся бед и зол. Те́мже в ра́дости серде́чней, с любо́вию припа́дающе ко пречестно́му о́бразу Твоему́, со умиле́нием прино́сим Ти благохвале́ния сицева́я: Ра́дуйся, Боже́ственное обетова́ние; ра́дуйся, проро́честв исполне́ние. Ра́дуйся, несве́домая Та́йно Боговоплоще́ния; ра́дуйся, с Бо́гом вражды́ прекраще́ние. Ра́дуйся, ми́ра всего́ от греха́ очище́ние; ра́дуйся, нам в Ма́терь Богодарова́нная. Ра́дуйся, ра́йских врат отверзе́ние; ра́дуйся, Небе́сных и земны́х при́сное ра́дование. Ра́дуйся, Всеми́лостивая Влады́чице, любо́вь Бо́жию нам явля́ющая. Кондак 1 Взбра́нной Воево́де, Пречи́стей Влады́чице на́шей Богоро́дице, Засту́пнице христиа́н ско́рей, изба́вльшей зе́млю Ска́нову от смертоно́сныя я́звы хода́тайством Свои́м ко Всеми́лостивому Бо́гу, благода́рственное пе́ние прино́сим недосто́йнии раби́ Твои́. Ты же, я́ко имуща́я держа́ву непобеди́мую, от вся́ких зол и скорбе́й спаса́й нас моли́твами Твои́ми, да зове́м Ти: Ра́дуйся, Всеми́лостивая Влады́чице, любо́вь Бо́жию нам явля́ющая. Молитва О Пречи́стая Госпоже́, ми́ра Засту́пнице, Ма́ти Всепе́тая! Воззри́ ми́лостивно на предстоя́щия со стра́хом лю́ди Твоя́ и с ве́рою и любо́вию припа́дающия пред чудотво́рною ико́ною Твое́ю. Вонми́ многоболе́зненному воздыха́нию душ на́ших, при́зри с высоты́ святы́я Твоея́ на нас. Се бо грехми́ погружа́емии и скорбьми́ обурева́емии, взира́юще на о́браз Твой честны́й, я́ко живе́й Ти су́щей с на́ми, смире́нная моле́ния прино́сим Тебе́, Влады́чице. Мо́лим Тя: не отврати́ лица́ Твоего́ от прибега́ющих к Тебе́, бу́ди Хода́таица и Покрови́тельница за нас гре́шных пред Бо́гом, и гнев Его́ пра́ведный, за беззако́ния на́ша дви́жимый на нас, ско́ро ути́ши, и к покая́нию наста́ви нас. Я́коже не́когда поми́ловала еси́ прибега́вших к Тебе́ люде́й земли́ Ска́новы, и изба́вила еси́ их от смертоно́сныя я́звы, та́ко и нас всех, с ве́рою моля́щихся Тебе́, изба́ви от паде́ний грехо́вных, от наве́та злых челове́к, от собла́знов ми́ра и искуше́ний, скорбе́й и бед, и от внеза́пныя сме́рти. Вразуми́ и научи́ ходи́ти без поро́ка по пути́ земна́го сего́ жития́, вложи́ в сердца́ на́ша дух стра́ха Бо́жия, дух благоче́стия, дух кро́тости, смире́ния, терпе́ния, непамятозло́бия, умягчи́ зла́я сердца́ на́ша, низпосли́ ре́вность о спасе́нии душ на́ших и бли́жних на́ших. Да́руй всем нам, моля́щимся Тебе́, христиа́нскую кончи́ну жития́ на́шего, и до́брый отве́т на Стра́шнем Суди́щи Христо́ве. Вруча́ем бо живо́т свой Твоему́ Покро́ву и промышле́нию, да ра́достно всегда́ пое́м Тебе́ со все́ми святы́ми: ра́дуйся, Благода́тная, ра́дуйся, Обра́дованная, ра́дуйся, Преблагослове́нная, ра́дуйся, Препросла́вленная во ве́ки. Ами́нь.

Текст утвержден Священным Синодом Русской Православной Церкви 17 июля 2020 года (журнал № 34)) Кондак 1 Избра́нней от всех родо́в Бо́жией Ма́тери, Небесе́ и земли́ Цари́це, врачевство́ духо́вное всему́ ми́ру подаю́щей, благода́рная пе́ния прино́сим о дарова́нии Боже́ственнаго сокро́вища, чудотво́рныя ико́ны Ея́, Прибавле́ние ума́ нарече́нныя, е́юже огражда́еми, ра́дуемся све́тло и с любо́вию взыва́ем: Ра́дуйся, Всеми́лостивая Влады́чице, прему́дрость и ра́зум ве́рным лю́дем Твои́м да́рующая. Икос 1 А́нгел предста́тель по́слан бы́сть во град Назаре́т к чи́стей Отрокови́це Мари́и рещи́: «Ра́дуйся, Тобо́ю бо Сын Бо́жий воплоти́тся». Пречи́стая же Де́ва, благове́стие Арха́нгела слы́шавши, во смире́нии се́рдца отвеща́: «Се, Раба́ Госпо́дня, бу́ди Мне по глаго́лу твоему́». Мы же гре́шнии, благогове́йно чту́ще Ма́терь Христа́ Бо́га на́шего, я́ко от А́нгела научи́хомся, та́ко со умиле́нием вопие́м Благода́тней: Ра́дуйся, Благослове́нная в жена́х; ра́дуйся, у Го́спода обре́тшая благода́ть. Ра́дуйся, си́лою Всевы́шняго осене́нная; ра́дуйся, Ду́хом Святы́м освяще́нная. Ра́дуйся, ве́рная Рабо́ Госпо́дня; ра́дуйся, Спаси́теля ми́ра ро́ждшая. Ра́дуйся, Богоизбра́нная Отрокови́це; ра́дуйся, Небесе́ и земли́ Цари́це. Ра́дуйся, Ма́ти Све́та, всех просвеща́ющаго; ра́дуйся, ве́рных смы́слы озаря́ющая. Ра́дуйся, прему́дрых превосходя́щая ра́зум; ра́дуйся, я́ко Тя ублажа́ют вси ро́ди. Ра́дуйся, Всеми́лостивая Влады́чице, прему́дрость и ра́зум ве́рным лю́дем Твои́м да́рующая. Кондак 2 Ви́дящи, Всенепоро́чная, жела́ние люде́й новопросвеще́нных, благослови́ла еси́ ева́нгельских та́ин благове́стника апо́стола Луку́ написа́ти пречи́стаго ли́ка Твоего́ изображе́ние, и проглаго́лала еси́: «С сим о́бразом благода́ть Моя́ и си́ла да бу́дет». Те́мже благогове́йно покланя́ющеся пред святы́ми ико́нами Твои́ми, и́миже весь мир христиа́нский украси́ла еси́, благода́рственно вопие́м о Тебе́ Бо́гу: Аллилу́иа. Икос 2 Ра́зум небе́сный открыва́ющи, Пречи́стая Де́во, мно́гажды благоволи́ла еси́ яви́ти всем ве́рным, какова́ есть во́ля Бо́жия, блага́я и соверше́нная, и всяк ум превосходя́щая. При́зри на нас, Всепе́тая Богоро́дице, озари́ све́том и́стины, уте́ши нас, я́ко Ма́ти, наста́ви нас на путь пра́́́вды, да возопии́м моля́щеся Тебе́ та́ко: Ра́дуйся, Бо́жию Прему́дрость, Христа́ роди́вшая; ра́дуйся, Бо́га челове́ком соедини́вшая. Ра́дуйся, све́том ра́зума ду́ши на́ша просвеща́ющая; ра́дуйся, неизрече́нную сла́ву Бо́жию вмеща́ющая. Ра́дуйся, почита́ющих святы́я ико́ны освяща́ющая; ра́дуйся, духо́вная сокро́вища ще́дро раздаю́щая. Ра́дуйся, честны́м Твои́м ико́нам благода́ть да́рующая; ра́дуйся, поклоне́ние пред о́бразы Твои́ми Сама́ прие́млющая. Ра́дуйся, исцеле́ния от ико́н Твои́х излива́ющая; ра́дуйся, к Небесе́м умы́ и сердца́ на́ша возводя́щая. Ра́дуйся, всю вселе́нную луча́ми Твоея́ благода́ти озаря́ющая; ра́дуйся, с Сы́ном Твои́м и Бо́гом ве́чно ца́рствующая. Ра́дуйся, Всеми́лостивая Влады́чице, прему́дрость и ра́зум ве́рным лю́дем Твои́м да́рующая. Кондак 3 Си́лою благода́тною осеня́еми, благочести́вии лю́дие во град Назаре́т приидо́ша и обрето́ша та́мо дом Богоро́дичен, иде́же Пречи́стая Де́ва роди́ся и благове́стие Арха́нгела прия́т, и пренесо́ша дом той в зе́млю Итали́йскую, во гра́д Лоре́то. Верху́ же до́ма о́наго доны́не есть о́браз Богоро́дичен, от дре́ва ре́зан, его́же а́нгельския Небе́сныя Си́лы неви́димо окружа́ют и благоле́пно че́ствуют, ра́достне вопию́ще Бо́гу: Аллилу́иа. Икос 3 Иму́щи к ро́ду христиа́нскому ма́тернее милосе́рдие, вси концы́ земли́ ко спасе́нию призыва́еши, Пречи́стая, те́мже у́бо наро́ди разноязы́чнии от мно́гих стран прихо́дят в дом Твой, и пред ико́ною Твое́ю покая́ние прино́сят, и к жи́зни но́вей благода́тное укрепле́ние прие́млют. Сего́ ра́ди от восто́ка до за́пада просла́влена бысть ико́на Твоя́ чудесы́ мно́гими, и изба́вленнии от боле́зней, скорбе́й и напа́стей лю́дие прино́сят Ти благодаре́ния, взыва́юще: Ра́дуйся, До́ме, Его́же созда́ Себе Прему́дрость Бо́жия; ра́дуйся, Гра́де Бо́жий, И́же от ма́лаго гра́да Назаре́та произы́де. Ра́дуйся, дом Бо́жий вхожде́нием Твои́м озари́вшая; ра́дуйся, Отрокови́це Свята́я, Святы́х бо́льшая. Ра́дуйся, с Предве́чным Богомладе́нцем в Назаре́т прише́дшая; ра́дуйся, та́инству спасе́ния ро́да челове́ческаго послужи́вшая. Ра́дуйся, Ле́ствице, е́юже восхо́дим от земли́ на Не́бо; ра́дуйся, всему́ ми́ру преди́вный Покро́ве. Ра́дуйся, я́ко с ве́рою покланя́емся пречи́стаго ли́ка Твоего́ изображе́нию; ра́дуйся, я́ко от него́ прие́млем благода́тныя да́ры во спасе́ние. Ра́дуйся, ди́вная зна́мения ико́нами Твои́ми соверша́ющая; ра́дуйся, род христиа́нский держа́вно заступа́ющая. Ра́дуйся, Всеми́лостивая Влады́чице, прему́дрость и ра́зум ве́рным лю́дем Твои́м да́рующая. Кондак 4 Бу́рею ско́рби ве́лия одержи́мь бе изо́граф не́кий в помраче́нии ра́зума, от земны́х враче́й по́льзы не получи́вый. Тогда́ Пречи́стая Ма́ти Го́спода яви́ся боля́щему в том же о́бразе, и́же и дом Ея во гра́де Лоре́то освяща́ет, и запове́да ико́ну написа́ти. Сие́ испо́лнив, изо́граф исцели́ся и от сего́ ико́ну новопи́саную Прибавле́ние ума́ нарече́, поя́ пред не́ю хвале́бную песнь Бо́гу: Аллилу́иа. Икос 4 Слы́шавше лю́дие земли́ Ру́сския, я́ко благоизво́ли Пресвята́я Богоро́дица да́ти им в ра́дость и утеше́ние ико́ну Свою́, Прибавле́ние ума́ нарече́нную, украси́ша хра́мы и до́мы своя́ мно́гими спи́сками ея́, от ни́хже ди́вная зна́мения и чудеса́ оби́льно содева́ются всем притека́ющим с ве́рою и пою́щим Преблагослове́нней такова́я: Ра́дуйся, о́браз Твой честны́й во утеше́ние и освяще́ние нам дарова́вшая; ра́дуйся, со ико́нами Твои́ми благода́тными неви́димо в до́мы на́ша входя́щая. Ра́дуйся, боле́зни душе́вныя и теле́сныя ико́ною Твое́ю ско́ро врачу́ющая; ра́дуйся, лю́бящия и чту́щия Твой о́браз от вся́ких бед избавля́ющая. Ра́дуйся, оста́вленных вра́чами на Свои́ всемо́щнеи ру́це прие́млющая; ра́дуйся, благослове́ние, здра́вие и ра́дование тем подаю́щая. Ра́дуйся, я́ко от восто́ка и до за́пада и́мя Твое́ ублажа́ется; ра́дуйся, зе́млю на́шу покро́вом ми́лости Твоея́ осеня́ющая. Ра́дуйся, помраче́нных умо́в исцеле́ние; ра́дуйся, по́мыслов на́ших просвеще́ние. Ра́дуйся, позна́ния и́стины чи́стое зерца́ло; ра́дуйся, ве́ры пра́выя кре́пкое забра́ло. Ра́дуйся, Всеми́лостивая Влады́чице, прему́дрость и ра́зум ве́рным лю́дем Твои́м да́рующая. Кондак 5 Боготе́чней звезде́ подо́бна яви́ся ико́на Твоя́, Богома́ти: страну́ бо на́шу и гра́ды ея́ освяща́ет, су́щих во тьме неве́жества све́том богове́дения озаря́ет, ра́зум наш, страстьми́ помраче́нный, просвеща́ет, заблу́ждшия наставля́ет на путь де́лания за́поведей Сы́на Твоего́ и Бо́га, Ему́же благода́рственно вопие́м: Аллилу́иа. Икос 5 Ви́девше ди́вную ико́ну Богома́тере и позна́вше ю́ и́стинное Боже́ственное сокро́вище, к ней усе́рдно притека́ем, в неду́зех исцеле́ние, в ско́рбех утеше́ние, в беда́х избавле́ние прие́млем и ра́достно пое́м Засту́пнице на́шей: Ра́дуйся, Ма́ти Све́та присносу́щнаго, благода́тию всю вселе́нную озари́вшаго; ра́дуйся, Со́лнце Пра́вды, Христа́ Бо́га на́шего, яви́вшая. Ра́дуйся, мрак неве́дения на́шего разгоня́ющая; ра́дуйся, заря́ми благода́ти нас просвеща́ющая. Ра́дуйся, свеще́ неугаси́мая, пла́мень ве́ры возжига́ющая; ра́дуйся, свет богове́дения всем пролива́ющая. Ра́дуйся, доброде́тели путь освеща́ющая; ра́дуйся, весну́ спасе́ния нам возвеща́ющая. Ра́дуйся, явле́нием ико́ны Твоея́ ве́рных осиява́ющая; ра́дуйся, от бед и напа́стей кре́пкою руко́ю изыма́ющая. Ра́дуйся, любве́ Боже́ственныя свети́льниче; ра́дуйся, святы́ни преми́рныя исто́чниче. Ра́дуйся, Всеми́лостивая Влады́чице, прему́дрость и ра́зум ве́рным лю́дем Твои́м да́рующая. Кондак 6 Пропове́дует мир весь ми́лости Твоя́, Ма́ти Го́спода на́шего, во всех бо конце́х земли́ ико́на Твоя́, Прибавле́ние ума́ имену́емая, луча́ми чуде́с сия́ет, просвеща́ющи ду́ши на́ша све́том Бо́жия благода́ти и подвиза́ющи пе́ти просла́вльшему Тя Бо́гу: Аллилу́иа. Икос 6 Возсия́ в честне́й ико́не Твое́й, Богоро́дице, свет спасе́ния всем, блужда́ющим во тьме грехо́в и страсте́й, и всем моля́щимся пред не́ю с ве́рою и благогове́нием ско́рая по́мощь подае́тся. Умо́в на́ших омраче́ние све́том Твои́м отжени́, Всепе́тая, и да́руй и́стинный Свет узре́ти всем, с любо́вию вопию́щим Ти си́це: Ра́дуйся, звездо́ незаходи́мая, Со́лнце Пра́вды в мир вводя́щая; ра́дуйся, Ма́ти Све́та и́стиннаго, ду́ши ве́рных просвеща́ющаго. Ра́дуйся, све́тлым покро́вом ум наш омраче́нный осеня́ющая; ра́дуйся, заре́ невече́рняя, мглу на́ших грехо́в разгоня́ющая. Ра́дуйся, во благода́тнем уче́нии наставля́ющая; ра́дуйся, тьмы и ве́чных мук нас избавля́ющая. Ра́дуйся, от сете́й вра́жиих свобожда́ющая; ра́дуйся, безу́мие ми́ра побежда́ющая. Ра́дуйся, душевре́дных уче́ний низложе́ние; ра́дуйся, душеполе́зных зна́ний дарова́ние. Ра́дуйся, ико́ною Твое́ю нас утеша́ющая; ра́дуйся, све́том ра́дости ду́ши веселя́щая. Ра́дуйся, Всеми́лостивая Влады́чице, прему́дрость и ра́зум ве́рным лю́дем Твои́м да́рующая. Кондак 7 Хотя́щи всем челове́ком спасти́ся и в ра́зум и́стины приити́, Пречи́стая Ма́ти Свой о́браз, Прибавле́ние ума́ имену́емый, дарова́ла есть нам, да вси, с ве́рою моля́щиися пред ним, кре́пость сло́ва, и ра́зум, и му́дрость прии́мше, в тишине́ помысло́в Царю́ и Бо́гу на́шему пою́т: Аллилу́иа. Икос 7 Но́вая и пресла́вная чудеса́ явля́еши, Ма́ти Бо́жия, ве́рным лю́дем свято́ю ико́ною Твое́ю: си́лою благода́ти Христо́вы помраче́нныя умо́м просвеща́еши, от безу́мия отвраща́еши, разсла́бленныя укрепля́еши и всем притека́ющим к целе́бному Твоему́ о́бразу ско́рую по́мощь подае́ши, подвиза́ющи пе́ти Тебе́ такова́я: Ра́дуйся, из глубины́ неве́дения извлача́ющая; ра́дуйся, мно́гия в ра́зуме просвеща́ющая. Ра́дуйся, сло́во прему́дрости прося́щим да́рующая; ра́дуйся, несмы́сленных разу́мны содева́ющая. Ра́дуйся, грехо́вныя по́мыслы отгоня́ющая; ра́дуйся, сердца́ ожесточе́нная умягча́ющая. Ра́дуйся, ум к Бо́гу возвыша́ющая; ра́дуйся, нему́дрыя умудря́ющая. Ра́дуйся, ко благоче́стию наставля́ющая; ра́дуйся, ве́чною ра́достию одаря́ющая. Ра́дуйся, к Сы́ну Твоему́ и Бо́гу моли́твы ве́рных принося́щая; ра́дуйся, и Сама́ непреста́нно у Престо́ла Вседержи́теля о всех моля́щаяся. Ра́дуйся, Всеми́лостивая Влады́чице, прему́дрость и ра́зум ве́рным лю́дем Твои́м да́рующая. Кондак 8 Стра́нно есть ви́дети, ка́ко ико́на Твоя́, Пречи́стая Богоро́дице Де́во, руко́ю челове́ческою напи́санная, си́лою Твое́ю Боже́ственною ду́хов тьмы прогоня́ет, не́мощию ума́ одержи́мым ра́зум подае́т и всех неудо́бь уча́щихся све́тло умудря́ет; те́мже и мы, во гресе́х погиба́ющии, мо́лим Тя со слеза́ми: изба́ви нас от враг ви́димых и неви́димых, от тьмы неразу́мия и мра́ка пре́лести, да всегда́ пое́м Спаси́телю и Бо́гу на́шему: Аллилу́иа. Икос 8 Вся земля́ на́ша преиспо́лнена есть, а́ки звезда́ми богосве́тлыми, чудотво́рными о́бразами Твои́ми, Богоро́дице Де́во, в не́йже и сия́ ико́на Твоя́, Прибавле́ние ума́ нарече́нная, благода́тию сия́ет и согрева́ет оледене́вшая сердца́ на́ша зна́меньми ми́лости Твоея́ к нам гре́шным. Сего́ ра́ди пред ли́ком Твои́м святы́м прекло́ньше коле́на, воспева́ем Тя, Всепречи́стая Ма́ти на́ша, та́ко: Ра́дуйся, ско́рби на́ша в ра́дость претворя́ющая; ра́дуйся, от разжже́нных стрел лука́ваго нас защища́ющая. Ра́дуйся, ве́рных ра́зум просвеща́ющая; ра́дуйся, неве́рныя посрамля́ющая. Ра́дуйся, младе́нцев воспита́ние и благода́тное охране́ние; ра́дуйся, ю́ных наставле́ние и целому́дренное огражде́ние. Ра́дуйся, неудо́бь уча́щимся ра́зум подаю́щая; ра́дуйся, помраче́нныя умо́м исцеля́ющая. Ра́дуйся, вра́жия се́ти разруша́ющая; ра́дуйся, благода́тию де́моны прогоня́ющая. Ра́дуйся, Ма́ти щедро́т и милосе́рдия; ра́дуйся, спасе́ния на́шего Наде́ждо. Ра́дуйся, Всеми́лостивая Влады́чице, прему́дрость и ра́зум ве́рным лю́дем Твои́м да́рующая. Кондак 9 Вся́кое естество́ А́нгельское благогове́йно Тебе́ слу́жит, Небесе́ и земли́ Цари́це, челове́ческий же род хвалы́ Тебе́ прино́сит и Твою́ святу́ю ико́ну почита́ет, сию́ бо во отра́ду и утеше́ние дарова́ла еси́ нам. Научи́ нас, о Всеблага́я, досто́йно сла́вити Тя и воспева́ти ро́ждшемуся от Тебе́ Спаси́телю ми́ра: Аллилу́иа. Икос 9 Вети́и челове́честии недоумева́ют позна́ти та́йну служе́ния Твоего́ ро́ду христиа́нскому, Богоро́дице, ниже́ мо́гут изъясни́ти си́лу чудотво́рную, от ико́н Твои́х происходя́щую на вся́ку по́льзу душе́вную и теле́сную челове́ком. Мы же, правосла́внии, со слеза́ми ра́дости пред ико́ною Твое́ю свято́ю предстоя́ще, прославля́ем Тя, Благода́тная, и глаго́лем: Ра́дуйся, А́нгелов ра́дование; ра́дуйся, Арха́нгелов ликова́ние. Ра́дуйся, Ю́же на возду́се срета́ют Херуви́ми; ра́дуйся, Е́йже похва́льная прино́сят Серафи́ми. Ра́дуйся, све́тлое Це́ркве Небе́сныя и земны́я украше́ние; ра́дуйся, всех челове́к и безпло́тных удивле́ние. Ра́дуйся, от во́инств Небе́сных почита́емая; ра́дуйся, от земноро́дных поклоне́нием прославля́емая. Ра́дуйся, о́бразом Твои́м умы́ на́ша возводя́щая к ми́ру Го́рнему; ра́дуйся, Путеводи́тельница на́ша к Оте́честву Небе́сному. Ра́дуйся, всех нас при Кресте́ Сы́на Твоего́ усынови́вшая; ра́дуйся, сия́нием души́ Твоея́ всю зе́млю просвети́вшая. Ра́дуйся, Всеми́лостивая Влады́чице, прему́дрость и ра́зум ве́рным лю́дем Твои́м да́рующая. Кондак 10 Спасти́ хотя́ мир от безу́мия и пре́лести вра́жия, Человеколю́бец Госпо́дь чу́дную ико́ну Твою́, Богома́ти, дарова́, пред не́юже помраче́ннии умо́м исцеля́ются, бесну́ющиися от де́монов свобожда́ются, скорбя́щии утеше́ние и ра́дость обрета́ют. Те́мже прославля́юще Бо́га, подаю́щаго нам таковы́я ми́лости, вопие́м Ему́ благода́рне: Аллилу́иа. Икос 10 Стена́ еси́ необори́мая и покро́в нам, Всенепоро́чная, сопроти́в ополче́ний ви́димых и неви́димых враг, огражда́ющи нас от вся́ких бед и боле́зней. Сего́ ра́ди припа́дающе ко ико́не Твое́й с ве́рою в по́мощь благода́тную и врачевство́ всех неду́гов душе́вных и теле́сных, ра́достно вопие́м Ти си́це: Ра́дуйся, от путе́й поги́бельных нас удаля́ющая; ра́дуйся, на вся́ку и́стину и пра́вду наставля́ющая. Ра́дуйся, ду́ха боле́зни и уны́ния отгна́ние; ра́дуйся, ду́ха ра́зума и кре́пости стяжа́ние. Ра́дуйся, враги́ си́лою Бо́жиею посрамля́ющая; ра́дуйся, сове́ты нечести́вых разоря́ющая. Ра́дуйся, бесну́ющимся здра́вие подаю́щая; ра́дуйся, вся лю́тыя неду́ги врачу́ющая. Ра́дуйся, от сме́рти духо́вныя нас избавля́ющая; ра́дуйся, слеза́ми Твои́ми грехи́ на́ша омыва́ющая. Ра́дуйся, ра́достию духо́вною нас ди́вно насыща́ющая; ра́дуйся, в жизнь бу́дущаго ве́ка нас вводя́щая. Ра́дуйся, Всеми́лостивая Влады́чице, прему́дрость и ра́зум ве́рным лю́дем Твои́м да́рующая. Кондак 11 Пе́ние благода́рственное прино́сим пред пречи́стым о́бразом Твои́м, Пренепоро́чная, за неизрече́нное Твое́ милосе́рдие и мо́лимся, о Богоблагода́тная: огради́ ум наш и се́рдце от тлетво́рных уче́ний, неве́рия и суеве́рия, сохрани́ зе́млю на́шу от вся́ких нестрое́ний, врага́ми ве́ры воздвиза́емых, и сподо́би нас чи́стым се́рдцем сла́вити Созда́теля на́шего, пою́ще песнь: Аллилу́иа. Икос 11 Я́ко светоприе́мную свещу́ зрим ико́ну Твою́, Богома́ти, сия́нием чуде́с зе́млю на́шу просвеща́ющую, на путь спасе́ния нас наставля́ющую и сердца́ на́ша любо́вию воспламеня́ющую к Тебе́, Пречи́стей Ма́тери Го́спода. Мы же, ве́дуще си́лу благода́ти Твоея́, пе́сньми ра́достными прославля́ем Тя си́це: Ра́дуйся, прему́дростию Соломо́на превы́шшая; ра́дуйся, сокрове́нныя та́йны Бо́жия ве́рным открыва́ющая. Ра́дуйся, любому́дрыя нему́дрыя явля́ющая; ра́дуйся, мо́лние, ду́ши просвеща́ющая. Ра́дуйся, су́етную му́дрость ве́ка сего́ посрамля́ющая; ра́дуйся, ослепле́нныя е́ю на путь пра́вый наставля́ющая. Ра́дуйся, и́скренне моля́щимся ум обновля́ющая; ра́дуйся, в час недоуме́ний мысль бла́гу на се́рдце полага́ющая. Ра́дуйся, Прему́дрости и бла́гости Бо́жия открове́ние; ра́дуйся, яви́вшая нам ди́вную ико́ну Твою́, я́ко дар Небе́сный. Ра́дуйся, исто́чниче ра́дости непреста́нныя; ра́дуйся, Го́рняго ми́ра Красото́ неизрече́нная. Ра́дуйся, Всеми́лостивая Влады́чице, прему́дрость и ра́зум ве́рным лю́дем Твои́м да́рующая. Кондак 12 Благода́ть Боже́ственную испроси́ у Сы́на Твоего́ и Бо́га, о Всеблага́я, пода́ждь нам ру́ку по́мощи, да не поги́бнем во гресе́х на́ших; согре́й нас любо́вию Твое́ю, очи́сти умы́ на́ша от гордели́вых помысло́в, просвети́ серде́чныя о́чи на́ша к зре́нию пути́ смире́ния и сподо́би нас в жи́зни сей и в Ца́рстве Небе́снем воспева́ти Творцу́ и Созда́телю на́шему: Аллилу́иа. Икос 12 Пою́ще чудеса́, от ико́ны Твоея́ явле́нная, Влады́чице, хва́лим, сла́вим и велича́ем Тя, честне́йшую вои́стину Херуви́м и сла́внейшую без сравне́ния Серафи́м. При́зри с Небесе́, Богоро́дице, на предстоя́щия пред свято́ю ико́ною Твое́ю и благода́ть Твою́ ниспосли́ нам, изба́ви от вся́ких бед и искуше́ний вра́жиих всех, я́ко Засту́пнице и Храни́тельнице на́шей вопию́щих Ти: Ра́дуйся, моли́твами Твои́ми весь мир спаса́ющая; ра́дуйся, све́том чистоты́ Твоея́ всех просвеща́ющая. Ра́дуйся, ны́нешняго ско́рбнаго ве́ка утеше́ние; ра́дуйся, во́ли Госпо́дни открове́ние. Ра́дуйся, зе́млю Ру́сскую в достоя́ние Себе́ избра́вшая; ра́дуйся, явле́нием чудотво́рных ико́н Твои́х сию́ благослови́вшая. Ра́дуйся, чудесы́ от о́браза Твоего́ к Све́ту и́стины нас возводя́щая; ра́дуйся, почита́ющих лик Твой незри́мо благода́тию осеня́ющая. Ра́дуйся, ра́дость благода́тную в сердца́ боголюби́вая излива́ющая; ра́дуйся, две́ри милосе́рдия Бо́жия хода́тайством Твои́м отверза́ющая. Ра́дуйся, в стяжа́нии даро́в Свята́го Ду́ха нам поможе́ние; ра́дуйся, Же́но, еди́на Чи́стая и Благослове́нная. Ра́дуйся, Всеми́лостивая Влады́чице, прему́дрость и ра́зум ве́рным лю́дем Твои́м да́рующая. Кондак 13 О́, Всепе́тая Ма́ти Присносу́щнаго Све́та и О́тчия Прему́дрости! Ты еси́ свет омраче́нных, прибавле́ние ума́ и ра́дость серде́ц на́ших; услы́ши и приими́ моле́ние нас гре́шных, умудри́ нас неразу́мных и наста́ви на пе́ние и моли́тву пред ико́ною Твое́ю ди́вною. Не преста́й моли́ти Сы́на Твоего́ и Бо́га о нас, недосто́йных рабе́х Твои́х, сла́вящих Тя и пою́щих Ему́: Аллилу́иа.[Се́й конда́к глаго́лется три́жды.][Далее повторяем 1‑е икос и кондак:]Икос 1 А́нгел предста́тель по́слан бы́сть во град Назаре́т к чи́стей Отрокови́це Мари́и рещи́: «Ра́дуйся, Тобо́ю бо Сын Бо́жий воплоти́тся». Пречи́стая же Де́ва, благове́стие Арха́нгела слы́шавши, во смире́нии се́рдца отвеща́: «Се, Раба́ Госпо́дня, бу́ди Мне по глаго́лу твоему́». Мы же гре́шнии, благогове́йно чту́ще Ма́терь Христа́ Бо́га на́шего, я́ко от А́нгела научи́хомся, та́ко со умиле́нием вопие́м Благода́тней: Ра́дуйся, Благослове́нная в жена́х; ра́дуйся, у Го́спода обре́тшая благода́ть. Ра́дуйся, си́лою Всевы́шняго осене́нная; ра́дуйся, Ду́хом Святы́м освяще́нная. Ра́дуйся, ве́рная Рабо́ Госпо́дня; ра́дуйся, Спаси́теля ми́ра ро́ждшая. Ра́дуйся, Богоизбра́нная Отрокови́це; ра́дуйся, Небесе́ и земли́ Цари́це. Ра́дуйся, Ма́ти Све́та, всех просвеща́ющаго; ра́дуйся, ве́рных смы́слы озаря́ющая. Ра́дуйся, прему́дрых превосходя́щая ра́зум; ра́дуйся, я́ко Тя ублажа́ют вси ро́ди. Ра́дуйся, Всеми́лостивая Влады́чице, прему́дрость и ра́зум ве́рным лю́дем Твои́м да́рующая. Кондак 1 Избра́нней от всех родо́в Бо́жией Ма́тери, Небесе́ и земли́ Цари́це, врачевство́ духо́вное всему́ ми́ру подаю́щей, благода́рная пе́ния прино́сим о дарова́нии Боже́ственнаго сокро́вища, чудотво́рныя ико́ны Ея́, Прибавле́ние ума́ нарече́нныя, е́юже огражда́еми, ра́дуемся све́тло и с любо́вию взыва́ем: Ра́дуйся, Всеми́лостивая Влады́чице, прему́дрость и ра́зум ве́рным лю́дем Твои́м да́рующая. Молитва О́, Пречи́стая Богоро́дице, даро́в духо́вных Пода́тельнице, До́ме, Его́же созда́ Себе́ Прему́дрость Бо́жия, от ми́ра к преми́рным ум наш возводя́щая и всех к позна́нию ра́зума приводя́щая! Приими́ моле́бное пе́ние от нас, недосто́йных рабо́в Твои́х, с ве́рою и умиле́нием покланя́ющихся пред пречи́стым о́бразом Твои́м. Умоли́ Сы́на Твоего́ и Бо́га на́шего, да да́рует власте́м на́шим му́дрость и си́лу, судия́м пра́вду и нелицеприя́тие, па́стырем му́дрость духо́вную и ре́вность, наста́вником смиренному́дрие, ча́дом послуша́ние, всем же нам дух ра́зума и благоче́стия, дух смире́ния и кро́тости, дух чистоты́ и пра́вды. Пода́ждь нам, Всепе́тая Ма́ти, ума́ прибавле́ние, умири́, соедини́ во вражде́ и разделе́нии су́щия и положи́ им сою́з любви́ неразруши́мый, всех заблу́дших от неразу́мия к све́ту и́стины Христо́вы обрати́, на путь стра́ха Бо́жия, воздержа́ния и трудолю́бия наста́ви, сло́во прему́дрости и душа́м поле́зное зна́ние прося́щим да́руй, осени́ нас ве́чною ра́достию, Херуви́мов честне́йшая и Серафи́мов сла́внейшая су́щи. Мы же, ди́вная дела́ и многоразу́мную прему́дрость Бо́жию в ми́ре и жи́зни на́шей ви́дяще, устрани́мся земны́я суеты́ и лука́вых попече́ний, и умы́, и сердца́ на́ши на Небеса́ возведе́м, я́ко да Твои́м заступле́нием и по́мощию сла́ву, хвалу́, благодаре́ние и поклоне́ние за вся в Тро́ице сла́вимому Бо́гу и всех Созда́телю воздади́м, ны́не и при́сно и во ве́ки веко́в. Ами́нь.

Минея, 1 Августа, Канон на Происхожде́ние честны́х древ Честна́го и Животворя́щего́ Креста́ Глас 6 Песнь 1 Ирмос: Я́ко по су́ху, пешеше́ствовав Изра́иль/ по бе́здне стопа́ми,/ гони́теля фарао́на/ ви́дя потопля́ема,/ Бо́гу побе́дную песнь пои́м, вопия́ше. Припев: Сла́ва, Го́споди, Кресту́ Твоему́ честно́му. Кресту́, ве́рных спасе́нию, покланя́юся,/ и те́пле облобыза́ю, и, объе́мля, вопию́:/ Дре́во всеблаже́нное Христо́во,/ ду́шу мою́ и ум просвети́, молю́ся. Припев: Сла́ва, Го́споди, Кресту́ Твоему́ честно́му. Победоно́сно яви́ся на стра́сти и бе́сы днесь зна́мение Креста́./ Те́мже, ве́рнии вси, све́тло просве́щше ду́ши, ны́не облобыза́ем. Припев: Сла́ва, Го́споди, Кресту́ Твоему́ честно́му. Лучеза́рная облиста́ет сия́ния Крест Честны́й/ и просвеща́ет ве́рно покланя́ющияся ему́ днесь,/ освяща́я ду́ши на́ша и телеса́. Сла́ва Отцу́ и Сы́ну и Свято́му Ду́ху. Жизнода́тельный Крест предлежа́щ и зримь/ светови́дную зарю́ препосыла́ет благода́тей:/ присту́пим и прии́мем просвеще́ние, весе́лие, и спасе́ние, и оставле́ние,/ хвале́ние Го́сподеви принося́ще. И ны́не и при́сно и во ве́ки веко́в. Ами́нь. Богородичен: Пресвята́я Де́во, Я́же Христа́ пло́тию ро́ждши,/ пострада́вшего́ нас ра́ди во́лею на Кресте́,/ Тя блажа́щия че́стно спаса́й мольба́ми Твои́ми. Песнь 3 Ирмос: Несть свят,/ я́коже Ты, Го́споди Бо́же мой,/ вознесы́й рог ве́рных Твои́х, Бла́же,/ и утверди́вый нас на ка́мени/ испове́дания Твоего́. Припев: Сла́ва, Го́споди, Кресту́ Твоему́ честно́му. Ору́жие дре́вле жи́зни блаже́нное дре́во дарова́ся храни́ти/ за преслуша́ние первозда́ннаго Ада́ма,/ Крест же сему́ путь сотвори́. Припев: Сла́ва, Го́споди, Кресту́ Твоему́ честно́му. Очи́ма, устна́ми и душа́ми, ли́цы и се́рдцы/ поклони́мся вси Пресвято́му Кресту́ Жизнода́вца Христа́,/ и́мже мир весь освяща́ется. Припев: Сла́ва, Го́споди, Кресту́ Твоему́ честно́му. Хра́мы Бо́гу проро́чески днесь бы́вше,/ покланя́ющеся дре́ву Пресвята́го Креста́,/ и насле́дницы Его́, со стра́хом вси того целу́ем. Сла́ва Отцу́ и Сы́ну и Свято́му Ду́ху. Песносло́вим тя, Кресте́, ве́рою моля́щиися си́ле твое́й:/ изми́ нас сете́й вра́жиих и упра́ви нас к приста́нищу всех спасе́ния, пою́щих тя. И ны́не и при́сно и во ве́ки веко́в. Ами́нь. Богородичен: Де́вою родила́ еси́ Сына,/ пре́жде Тебе́ рожде́ннаго от Отца́ пре́жде век, без ма́тере от Бо́га,/ распя́таго пло́тию, да спасе́т пре́жде согре́шшия. Седален, глас 6 Крест Твой, Го́споди, освяти́ся,/ в нем бо быва́ют исцеле́ния не́мощным во гресе́х,/ его́же ра́ди припа́даем Ти, поми́луй нас. Песнь 4 Ирмос: Христо́с моя си́ла,/ Бог и Госпо́дь,/ честна́я Це́рковь/ боголе́пно пое́т, взыва́ющи,/ от смы́сла чи́ста, о Го́споде пра́зднующи. Припев: Сла́ва, Го́споди, Кресту́ Твоему́ честно́му. Да кропи́т вся земля́ ра́дование, да веселя́тся древа́ дубра́вная,/ днесь обо́жена Всечестны́м Кресто́м, сия́ющи конце́м. Припев: Сла́ва, Го́споди, Кресту́ Твоему́ честно́му. Показа́вый орга́н умерщвле́ния,/ живоно́сно ми́рови, победотво́рное ору́жие непобеди́мое, пресла́вный Кре́сте,/ сердца́ на́ша просвети́. Припев: Сла́ва, Го́споди, Кресту́ Твоему́ честно́му. Ты Боже́ственная побе́да, ты соде́лование на́шего спасе́ния,/ ты ве́рным соодоле́ние и Боже́ственная же́ртва,/ о Всечестны́й Кре́сте, пою́щия тя освяти́. Сла́ва Отцу́ и Сы́ну и Свято́му Ду́ху. Не́бо всей земли́ свесели́тся,/ страстоте́рпцы, му́ченицы, апосто́ли, ду́ши пра́ведных ра́достно ны́не ра́дуются,/ и вся спаса́ет зри́мо предлежа́щее посреде́ жизнода́тельное Дре́во,/ и ве́рныя освяща́ет благода́тию. И ны́не и при́сно и во ве́ки веко́в. Ами́нь. Богородичен: Вои́стинну Ты яви́лася еси́,/ вои́стинну роди́ла еси́ Сы́на Вы́шняго,/ на Кресте́ ру́це просте́ршаго, Де́во Ма́ти Мари́е,/ и мир призва́вшаго. Песнь 5 Ирмос: Бо́жиим све́том Твои́м, Бла́же,/ у́тренюющих Ти ду́ши любо́вию озари́, молю́ся,/ Тя ве́дети, Сло́ве Бо́жий,/ и́стиннаго Бо́га,/ от мра́ка грехо́внаго взыва́юща. Припев: Сла́ва, Го́споди, Кресту́ Твоему́ честно́му. Поды́мем с ра́достию преблаже́нный Крест,/ в церква́х и гра́дех сей предло́женный, и поклони́мся,/ да долго́в прии́мем оставле́ние. Припев: Сла́ва, Го́споди, Кресту́ Твоему́ честно́му. Умерщвля́ется змий лука́вый ны́не, и́же тьмы нача́льник,/ сия́ния не терпя́, е́же облиста́ет Живоно́сный Крест,/ Боже́ственнаго Царя́ ски́птро честно́е. Припев: Сла́ва, Го́споди, Кресту́ Твоему́ честно́му. Я́ко пресве́тла звезда́ и я́ко би́сер благоле́пен и пресия́нное со́лнце,/ вся озаря́ет земли́ концы́ Крест Госпо́день,/ его́же облобыза́ем. Сла́ва Отцу́ и Сы́ну и Свято́му Ду́ху. Воскли́кните, язы́цы, воспо́йте, игра́йте, коле́на, и по́йте Бо́гу,/ да́вшему Креста́ неруши́мое утвержде́ние, е́же ны́не предлежи́т;/ вси ве́рнии, ра́дуемся, я́ко того́ ра́ди блага́я прие́млюще. И ны́не и при́сно и во ве́ки веко́в. Ами́нь. Богородичен: Спасе́нию Тя нача́ло, вси ве́рнии, ве́дуще, ублажа́ем, Чи́стая:/ Ты бо пре́жде Су́щаго пло́тию родила́ еси́,/ хоте́нием Свои́м пригвожде́нна на Кресте́. Песнь 6 Ирмос: Жите́йское мо́ре,/воздвиза́емое зря напа́стей бу́рею,/к ти́хому приста́нищу Твоему́ прите́к, вопию́ Ти:/возведи́ от тли живо́т мой,/ Многоми́лостиве. Припев: Сла́ва, Го́споди, Кресту́ Твоему́ честно́му. Я́ко Боже́ствен сосу́д, я́ко свети́льник све́тел, в церква́х дне́сь,/ и в хра́мех, и гра́дех Кре́ст предлежа́щ ви́дяще,/ и Уясни́вшаго сего́ воспое́м. Припев: Сла́ва, Го́споди, Кресту́ Твоему́ честно́му. Умерщвля́ется смерть, и уморя́ется тле́ние, и бесо́встии полцы́ отбега́ют,/ побе́дный и стра́шный днесь предлежа́щ ви́дяще Крест Христо́в,/ не сме́юще прикосну́тися ему́. Сла́ва Отцу́ и Сы́ну и Свято́му Ду́ху. Воспева́юще Тя, Бо́га, и Царя́, и Го́спода, я́ко дарова́л еси́ нам Крест сте́ну неруши́му,/ его́же ны́не облобыза́ем ра́достию и лю́тых отбега́ем. И ны́не и при́сно и во ве́ки веко́в. Ами́нь. Богородичен: Я́дом змии́ным пра́баба пи́щею, я́же во Еде́ме, пома́зася,/ Де́ва же, ро́ждши Нача́льника жи́зни,/ источи́ ми́ру нетле́ние и воскресе́ние. Кондак, глас 4 Вознесы́йся на Крест во́лею,/ тезоимени́тому Твоему́ но́вому жи́тельству/ щедро́ты Твоя́ да́руй, Христе́ Бо́же,/ возвесели ́нас си́лою Твое́ю,/ побе́ды дая́ нам на супоста́ты,/ посо́бие иму́щим Твое́ ору́жие ми́ра/ непобеди́мую побе́ду. Икос И́же до тре́тияго Небесе́ восхище́н бысть в рай,/ и глаго́лы слы́шав неизрече́нныя и Боже́ственныя,/ и́хже не леть язы́ки человече́скими глаго́лати,/ что гала́том пи́шет, я́ко рачи́телие писа́ний прочто́сте и позна́ете:/ мне, глаго́лет, хвали́тися да не бу́дет,/ то́кмо во еди́ном Кресте́ Госпо́дни, на не́мже страда́в, уби́ стра́сти./ Того́ у́бо и мы изве́стно да де́ржим, Крест Госпо́день, хвалу́ вси:/ есть бо нам спаси́тельное си́е Дре́во/ ору́жие, ми́ра непобеди́мая побе́да. Песнь 7 Ирмос: Росода́тельну убо пещь/ соде́ла А́нгел/ преподо́бным о́троком,/ халде́и же опаля́ющее/ веле́ние Бо́жие мучи́теля увеща́ вопи́ти:/ благослове́н еси́, Бо́же оте́ц на́ших. Припев: Сла́ва, Го́споди, Кресту́ Твоему́ честно́му. Спаси́тельному дре́ву поклони́мся, Кресту́ пресвято́му,/ ему́же слу́жат А́́нгельская вся во́инства,/ предлежа́щ ви́дяще, ве́рнии, источа́ющ нам освяще́ние и жизнь. Припев: Сла́ва, Го́споди, Кресту́ Твоему́ честно́му. Победоно́сный яви́ся пресвяты́й Крест Животода́вца Христа́,/ свы́ше же бесо́в всем мно́жество отгоня́, ва́рварское шата́ние,/ и победи́теля явля́я во́инство на́ше. Припев: Сла́ва, Го́споди, Кресту́ Твоему́ честно́му. Я́ко одушевле́нну, те́бе, припа́дая, взы́ваю:/ Кресте́ мой пресвяты́й, ты ми просвети́ ду́шу, и ум, и слух, и устне́,/ и язы́к, и дыха́ние, и о́чи к путе́м Ца́рства Христо́ва. Сла́ва Отцу́ и Сы́ну и Свято́му Ду́ху. Пое́м, сла́вим, и покланя́емся, и велича́ем Твою́, Христе́, держа́ву,/ я́ко подаде́ нам, рабо́м Твои́м, Крест Боже́ственный,/ сла́дость неисчерпа́емую и храни́лище душа́м и те́лом на́шим. И ны́не и при́сно и во ве́ки веко́в. Ами́нь. Богородичен: Ю́ноши три пещь не опали́, Рождество́ прообразу́ющи Твое́,/ и́бо Боже́ственный огнь Тя не опали́, всели́вся в Тя и вся научи́в пе́ти:/ Благослове́н Бог оте́ц на́ших. Песнь 8 Ирмос: Ужасни́ся, боя́йся, Не́бо,/ и да подви́жатся основа́ния земли́:/ се бо в мертвеце́х вменя́ется в Вы́шних Живы́й/ и во гроб мал странноприе́млется./ Его́же, о́троцы, Благослови́те,/ свяще́нницы, воспо́йте,/ лю́дие, превозноси́те во вся ве́ки. Припев: Сла́ва, Го́споди, Кресту́ Твоему́ честно́му. Твой Крест прообразу́я Иа́ков иногда́, на вну́ки поло́жь дла́ни преме́нно/ и благослови́в их, благода́ти во язы́цех науча́я:/ о́троцы, Благослови́те, свяще́нницы, по́йте,/ лю́дие, превозноси́те Его́ во ве́ки. Припев: Сла́ва, Го́споди, Кресту́ Твоему́ честно́му. О, неизрече́наго Твоего́, Христе́, сни́тия и неизглаго́ланных благи́х!/ Воплоти́ся и, распя́т быв, смерть прие́м,/ и реши́ши челове́ки от кля́твы, источи́в нетле́ние на треблаже́ннем Дре́ве,/ препросла́вленный Крест сей во ве́ки. Сла́ва Отцу́ и Сы́ну и Свято́му Ду́ху. Пресвяты́й Крест, Боже́ственную побе́ду, жи́зни нача́льника,/ ле́сти потреби́теля, днесь похва́лим Крест всесвяты́й Госпо́день,/ бесо́в губи́теля и ва́рваров прогони́теля, ве́рных победотво́рца и покрови́теля. И ны́не и при́сно и во ве́ки веко́в. Ами́нь. Богородичен: Гвоздьми́ пригвожде́на Христа́, копие́м прободе́на в нетле́нная ре́бра,/ тро́стием в главу́ бие́ма, желчь вкуша́юща, зря́щи, Де́ва вопия́ше:/ где Твоя́ добро́та за́йде, прекра́сное Сло́во,/ Препросла́вленне па́че сыно́в челове́ческих? Песнь 9 Ирмос: Бо́га/ челове́ком невозмо́жно ви́дети,/ на Него́же не сме́ют чи́ни А́нгельстии взира́ти;/ Тобо́ю бо, Всечи́стая, яви́ся челове́ком/ Сло́во воплоще́нно,/ Его́же велича́юще,/ с Небе́сными во́и Тя ублажа́ем. Припев: Сла́ва, Го́споди, Кресту́ Твоему́ честно́му. Тле́нни от преслуша́ния бы́хом, Бо́жия за́поведи престу́пницы я́вльшеся:/ се́го ра́ди смерть прии́де челове́ком./ Те́мже безсме́ртия процвете́ днесь побе́дный Крест Христо́в, его́же целу́ем. Припев: Сла́ва, Го́споди, Кресту́ Твоему́ честно́му. Се Дре́во пресвято́е кре́пкая наде́жда ве́рным яви́ся, кля́твы избавле́ние,/ челове́ком ра́дость предлежи́т, облича́я тьмы нача́льника,/ сему́ поклони́мся, ве́рнии, с весе́лием. Сла́ва Отцу́ и Сы́ну и Свято́му Ду́ху. Нача́ло благослове́ния, и утвержде́ние христиа́н, и стена́, и тве́рдое заступле́ние,/ и кля́твы избавле́ние яви́ся нам Дре́во вожделе́нное, ору́жие непобеди́мое,/ просвети́ и освяти́ нас, покланя́ющихся тебе́. И ны́не и при́сно и во ве́ки веко́в. Ами́нь. Богородичен: Xра́ме и две́ре освяще́ния, Престо́ле Бо́жий,/ о́блаче и све́щниче всесве́тлый и ковче́же благода́ти, Всенепоро́чная,/ че́стне покланя́ющияся о́бразу честно́му Единоро́днаго Твоего́ Сы́на покры́й и сохрани́. Светилен Крест – храни́тель всея́ вселе́нныя,/ Крест – красота́ Це́ркве,/ Крест – на́ша держа́ва,/ Крест – ве́рных утвержде́ние,/ Крест – А́нгелов сла́ва и де́монов я́зва.

О, Пресвята́я Влады́чице и Богоро́дице, вы́сшая Херуви́м и честне́йшая Серафи́м, Богоизбра́нная Отрокови́це, всех скорбя́щих Ра́досте! Пода́ждь утеше́ние и нам, в ско́рби су́щим42: ра́зве бо Тебе́ ино́го прибе́жища и по́мощи не и́мамы. Ты еди́на еси́ ра́дости на́шея Хода́таица, и я́ко Ма́ти Бо́жия и Ма́ти милосе́рдия, предстоя́щи у Престо́ла Пресвяты́я Тро́ицы, мо́жеши нам помощи́: никто́же бо притека́яй к Тебе́ просра́млен отхо́дит. Услы́ши у́бо и нас, ны́не в день ско́рби пред Твое́ю ико́ною припа́дающих и со слеза́ми Тебе́ моля́щихся: отжени́43 от нас належа́щия44 на нас ско́рби и печа́ли в сей вре́менней жи́зни, не лише́ны же сотвори́ ны Твои́м всеси́льным хода́тайством и ве́чныя несконча́емыя ра́дости во Ца́рствии Сы́на Твоего́ и Бо́га на́шего, Ему́же подоба́ет вся́кая сла́ва, честь и поклоне́ние, со Безнача́льным Его́ Отце́м, и со Пресвяты́м и Благи́м и Животворя́щим Его́ Ду́хом, ны́не и при́сно, и во ве́ки веко́в. Ами́нь.

Христу последуя, мучениче Уаре,/ Того испив чашу,/ и мучения венцем увязеся,/ и со Ангелы ликовствуеши:// моли непрестанно за души наша.

Православия наставницы,/ благочестия и чистоты учителие,/ Церкве Вологодский богодарованное украшение,/ молите Милостиваго Бога,/ да вашим предстательством подастся благодать и мир стране нашей/ и душам нашим спасение.

Яко безплотным единожитель/ и всем преподобным сопричастник,/ постническими труды и бдении молитвенными непрестанно себе вооружая, мудре,/ тем и дар приял еси от Бога/ исцеляти недуги и прогоняти бесы./ Того ради вопием ти:/ радуйся, отче наш Сисое преподобне.

Духом Божиим наставляемый,/ возлюбил еси безмолвие,/ в немже евангельски подвизающуся,/ пречудный Афонский дар -/ Богоматере икона, даровася ти, всеблаженне,/ и, образ добродетелей быв стаду твоему,/ Арсение отче наш,/ к Горнему торжеству возшел еси,/ идеже со Ангелы ликовствуя,/ моли Христа Бога/ спастися душам нашим.