Молитвы

Яко удобрение священников, преподобне,/ и предувещание страстотерпцев вси восхваляем/ и просим тя, священномучениче Елевферие:/ любовию память твою празднующия/ бед многообразных свободи,// моля непрестанно о всех нас.

По имени своему за труды велия/ и всегдашнее зде умерщвление плоти в затворе/ безсмертную ныне на Небеси/ жизнь наследовавый,/ молим тя прилежно:/ молися о нас,/ яко да и мы тояжде сподобимся получити.

Кондак 1 Избранный страстотерпче Христов, благоверный княже Игоре, возсиявый людем твоим, яко звезда пресветлая: ты бо славу земнаго княжения оставил еси и во иночестве Господеви работати вожделел еси, страдальчески земное житие скончав, и ныне, радуяся, предстоиши престолу Святыя Троицы. Молитвами твоими от всяких зол и напастей охраняй нас, да благодарственно со умилением зовем ти: Радуйся, святый благоверный княже Игоре, во смирении за истину терпящим скорый помощниче. Икос 1 Ангельски поживши на земли, от юности возлюбил еси Божественное учение и сему последовав добрым житием, немолчно прославлял еси имя Господне чтением книг священных и пением церковным. Сего ради тебе, на небеси и на земли прославленному, вопием сице: Радуйся, от рождения твоего Богом избранный. Радуйся, семя слова Божия от юности восприявый. Радуйся, великий угодниче Божий, благочестивую жизнь на земли возлюбивый. Радуйся, путем трудным и тесным житие земное прошедый. Радуйся, правды ради душу твою положивый. Радуйся, от Царя Небеснаго, венец мученический приемый. Радуйся, святый благоверный княже Игоре, во смирении за истину терпящим скорый помощниче. Кондак 2 Видя Господь чистоту сердца твоего, блаженне княже Игоре, избра тя зрети славу небесную, ты бо паче всего возлюбил еси чистоту душевную и телесную, и ради страданий временных, уповая избежати мучений вечных, великий угодник Божий был еси, и лицем к лицу зрети Господа удостоился еси. Темже притекающе к тихому пристанищу молитв твоих, вопием Христу Богу: Аллилуиа. Икос 2 Разум озаренный благодатию Божиею из млада имел еси, княже Игоре, от юности бо хранил еси в сердце твоем закон Христов, великим угодником Божиим, прошедшим тернистым путем во Царствие Небесное, подражая. Темже и мы, уповая на твое предстательство, молимся: буди нам скорый помощник и покровитель в земном житии нашем, да благодарно вопием ти: Радуйся, избранный и верный рабе Христов. Радуйся, от юности чистоту жития возлюбивый. Радуйся, из млада единому Христу угождавый. Радуйся, Иисуса ради вся напасти безропотно претерпевый. Радуйся, Тому единому всею душею прилепивыйся. Радуйся, всего себе на страдания правды ради предавый. Радуйся, святый благоверный княже Игоре, во смирении за истину терпящим скорый помощниче. Кондак 3 Силою Вышняго, дарованною тебе, и долготерпением твоим укреплен был еси, блаженне, егда враг рода человеческаго наведе на тя люди злы, во еже лишити тя славы княжеския. Темже, дивящеся богатству терпения твоего, воспеваем укрепившему тя Господу песнь: Аллилуиа. Икос 3 Имея желание в души своей вся красная и сладкая мира сего оставити и Христу последовати, еще млад сый, избрал еси себе путь служения Господеви. Мы же, подражая житию твоему и почитающе честная страдания твоя, правды ради претерпенная, величаем тя сице: Радуйся, в души своей имевый желание мир оставити и Господеви послужити. Радуйся, вся красная и сладкая мира сего презревый. Радуйся, совершенную любовь ко Господу стяжавый. Радуйся, за кротость души твоея наследие жизни вечныя получивый. Радуйся, ум твой, сердце и волю в Бозе утвердивый. Радуйся, дивную кротость духа в скорби показавый. Радуйся, святый благоверный княже Игоре, во смирении за истину терпящим скорый помощниче. Кондак 4 Бури житейских бед и напастей не возмогоша поколебати крепости души твоея, благоверный княже Игоре, основана бо бе на твердем веры Христовы камени. Мы же, дивящеся великому терпению твоему, со умилением взываем Богу: Аллилуиа. Икос 4 Слыша и видя, княже блаженне, распри и раздоры, врагом рода человеческаго воздвизаемыя, егда вступи на престол Киевский, абие восхотел еси вразумити люди своя и привести их к миру и благоразумию. Сего ради с любовию взываем ти: Радуйся, яко тобою всякая вражда и злоба побеждаются. Радуйся, чистоты веры и незлобия дивное воплощение. Радуйся, образе кротости и терпения. Радуйся, зерцало совершеннаго незлобия. Радуйся, многими скорбьми в радость Господа твоего вшедый. Радуйся, помогаяй и нам терпети скорби и поношения. Радуйся, святый благоверный княже Игоре, во смирении за истину терпящим скорый помощниче. Кондак 5 Боготечную звезду зрим тя, угодниче Божий, тя бо, восприимшаго великия страдания, прослави Господь, яко вернаго раба Своего, невинно убиеннаго злыми человеки по наущению диавольскому. Мы же, взирающе с любовию на честный образ твой, приклоняем колена, со умилением поя: Аллилуиа. Икос 5 Видевше великий князь Киевский Всеволод, яко преклонился есть к вечеру день жития его, призва тя, Игоре блаженне, и завеща ти престол княжеский. Ты же воли брата твоего, яко воли Божией повинуяся, все упование на Господа возложил еси. Мы же, похваляя таковое смирение твое, воспеваем ти: Радуйся, яко до конца крест жития твоего безропотно понесл еси. Радуйся, благочестием Богови и людем послуживый. Радуйся, велению брата своего покоривыйся. Радуйся, в народоправлении велию добродетель показавый. Радуйся, всем братолюбцем присное ободрение. Радуйся, от людей своих велию любовь стяжавый. Радуйся, святый благоверный княже Игоре, во смирении за истину терпящим скорый помощниче. Кондак 6 Проповедником добродетелей христианских был еси, княже Игоре, поучая любити братию и народ свой. Мы же ублажаем тя, яко добраго и истиннаго последователя Христова, живот свой за люди твоя положившаго, воспевая Господеви песнь: Аллилуиа. Икос 6 Возсиял еси богоугодным житием твоим, благоверный княже Игоре, все упование свое на Господа, вся во благо устрояющаго, возлагая. Мы же, восхваляя подвиги твоя, глаголем сице: Радуйся, яко в житии твоем добродетельми просиявый. Радуйся, чистотою сердца твоего Господа созерцавый. Радуйся, в несении трудов великаго княжения помощь от Господа получивый. Радуйся, яко вместо княжеских почестей — мучения и скорби мужественно претерпевый. Радуйся, иго Христово, благое и легкое, на рамена своя восприявый. Радуйся, терпению Христову верно подражавый. Радуйся, святый благоверный княже Игоре, во смирении за истину терпящим скорый помощниче. Кондак 7 Хотящу ти, блаженне, воли Божией покоритися, не воспротивился еси воином князя Изяслава, егда тии тя, еле жива суща, в хладном порубе заключиша, идеже ты, подобно Даниилу пророку, заточенному в рове львином, непрестанно взывал еси Богу: Аллилуиа. Икос 7 Новаго видим тя избранника Божия, благоверный княже Игоре, егда пременил еси княжения славу во иночества образ смиренный. Ты бо, вся благая презрев, желанием восхотел еси единому Богу поработати. Темже, таковому твоему смирению и кротости дивящеся, вопием ти: Радуйся, страдания лютая невинно претерпевый. Радуйся, образ любве и незлобия нам показавый. Радуйся, вся благая мира сего ни во что же вменивый. Радуйся, злобу и коварство диавола смирением победивый. Радуйся, послушанию иноческому всецело предавыйся. Радуйся, усердным молитвенником за люди твоя явивыйся. Радуйся, святый благоверный княже Игоре, во смирении за истину терпящим скорый помощниче. Кондак 8 Странник и пришлец, по апостолу, явился еси на земли, боголюбезне княже, дольняя бо вся презрев, горняя взыскал еси, все помышление твое ко Господу имеяй. Темже помози и нам, молитвами твоими, добродетельное житие возлюбити, да купно с тобою вопием Богу: Аллилуиа. Икос 8 Всею душею от юности Богу послуживый, блаженне княже Игоре, сего ради Господь прослави тя, Своего угодника, кротости ради и смирения твоего. Мы же, сим добродетелем последовати тщащиися, вопием ти радостно: Радуйся, от юности Господа всею душею возлюбивый. Радуйся, делы благими Христу благоугодивый. Радуйся, всем житием твоим Бога прославивый. Радуйся, тесный путь спасения от юности избравый. Радуйся, благодать Божию в сердце своем стяжавый. Радуйся, житие свое иночеством украсивый. Радуйся, святый благоверный княже Игоре, во смирении за истину терпящим скорый помощниче. Кондак 9 Всего себе покорил еси воли Господни, яко раб благий и верный, егда пострижение иноческое восприим, во обитель святаго Феодора вселился еси, идеже всецело посту и молитве предался еси. Сего ради сподобился внити в радость Господа своего, Емуже предстоиши ныне со Ангелы, поя: Аллилуиа. Икос 9 Витии многовещанныя не возмогут по достоянию восхвалити страдания твоя, страстотерпче Христов, княже Игоре, ниже уразумети глубины упования твоего, приимши бо весть о убиении твоем, потщался еси в церковь Господню, со слезами пред образом Царицы Небесныя моляся. Убийцы же твои, яко звери дивии, емше тя молящагося, бив, повлекоша тя из храма. Ты же, благодатию Божиею укрепляемь, страдания кротко претерпел еси, за убивающих тя Господа умоляя. Сего ради величаем тя сице: Радуйся, все упование на Господа и Его Пречистую Матерь возложивый. Радуйся, на мучение безропотно предавыйся. Радуйся, благодатию Божиею укрепляемь, страдания мужественно претерпевый. Радуйся, яко сего ради венцем мученическим украшенный. Радуйся, за убивающих тя кротко моливыйся. Радуйся, душу свою в руце Божии радостно предавый. Радуйся, святый благоверный княже Игоре, во смирении за истину терпящим скорый помощниче. Кондак 10 Спасти хотя душу свою, вся земная и временная во уметы вменил еси, неуклонно стопам Спасителевым последствовав. И ныне с лики ангельскими веселяся, немолчно вопиеши Прославльшему тя Господеви: Аллилуиа. Икос 10 Стеною терпения оградився, верный раб Царя Небеснаго был еси: вражиих бо устрашений не убоявся, всего себе в руце Божии предал еси и страдания мужественне претерпел еси. Мы же, чтуще святую память твою, ублажаем тя, вопиюще: Радуйся, великий княже Игоре, престолу Небеснаго Владыки предстояй. Радуйся, венец твой княжеский кровными каплями, яко драгими камнями украсил еси. Радуйся, образ вернаго служения Богу терпением своим показавый. Радуйся, житие свое тесною стезею мучений и страданий прошедый. Радуйся, яко пред великим мужеством твоим, вернии преклоняются. Радуйся, яко и ныне не престаеши благодеяти призывающим тя. Радуйся, святый благоверный княже Игоре, во смирении за истину терпящим скорый помощниче. Кондак 11 Пение хвалебное приносим дивному во святых Своих Богу нашему, даровавшаго Церкви Своей и стране нашей дивнаго чудотворца и усерднаго молитвенника — благовернаго князя Игоря, иже и поныне не престает молитися за ны и научая пети всех: Аллилуиа. Икос 11 Свет славы небесныя осия святое и многострадальное тело твое, страстотерпче Христов, егда оное положено бысть в церкви святаго Михаила. Людие же, окрест гроба твоего стоящии, и возжегаемыя невидимою рукою свещи и лампады зряще, приидоша в трепет и ужас, познавая, яко тако прослави Бог угодника Своего; тебе же, богомудре княже, воспеша тако: Радуйся, усердный наш пред Богом молитвенниче и предстателю. Радуйся, яко Господь прослави тя знаменьми и чудесы. Радуйся, сиянием небеснаго света озаренный. Радуйся, непорочную душу твою в руце Божии предавый. Радуйся, нетленное тело твое в помощь нам оставивый. Радуйся, яко за смиренномудрие твое венцем славы от Бога увенчанный. Радуйся, святый благоверный княже Игоре, во смирении за истину терпящим скорый помощниче. Кондак 12 Благодать единения и братолюбия испроси нам у Всещедраго Бога, угодниче Христов, да вси людие возлюбят друг друга и единодушно исповедят веру Православную, воспевая Спасителю нашему: Аллилуиа. Икос 12 Поюще добродетельное житие твое, ублажаем мученическую кончину твою, восхваляем и пренесение честных и многоцелебных мощей твоих из стольнаго града Киева во град Чернигов, воспеваем славу твою, иже на небесех, и усердно молим тя, страстотерпче княже Игоре: не возгнушайся нас, грешных и недостойных, зовущих ти: Радуйся, яко великия благодати от Бога сподобивыйся. Радуйся, яко теплый молитвенник и заступник от Бога нам дарованный. Радуйся, яко всем призывающим тя скорый помощник бываеши. Радуйся, духовнаго веселия сердца наша исполняющий. Радуйся, в лице Русских святых славою многою от Бога превознесенный. Радуйся, яко благочестивых множества любовию празднуют святую память твою. Радуйся, святый благоверный княже Игоре, во смирении за истину терпящим скорый помощниче. Кондак 13 О, многострадальный страстотерпче Христов, благоверный великий княже Игоре! Приими сие малое, обаче от любящих сердец приносимое тебе сие моление наше, защити всех нас, за истину обиды и поношения терпящих, уврачуй душевныя и телесныя недуги, и от всех бед и скорбей избави ны да, благодарни суще, вопием Богу: Аллилуиа.[Се́й конда́к глаго́лется три́жды.][Далее повторяем 1‑е икос и кондак:]Икос 1 Ангельски поживши на земли, от юности возлюбил еси Божественное учение и сему последовав добрым житием, немолчно прославлял еси имя Господне чтением книг священных и пением церковным. Сего ради тебе, на небеси и на земли прославленному, вопием сице: Радуйся, от рождения твоего Богом избранный. Радуйся, семя слова Божия от юности восприявый. Радуйся, великий угодниче Божий, благочестивую жизнь на земли возлюбивый. Радуйся, путем трудным и тесным житие земное прошедый. Радуйся, правды ради душу твою положивый. Радуйся, от Царя Небеснаго, венец мученический приемый. Радуйся, святый благоверный княже Игоре, во смирении за истину терпящим скорый помощниче. Кондак 1 Избранный страстотерпче Христов, благоверный княже Игоре, возсиявый людем твоим, яко звезда пресветлая: ты бо славу земнаго княжения оставил еси и во иночестве Господеви работати вожделел еси, страдальчески земное житие скончав, и ныне, радуяся, предстоиши престолу Святыя Троицы. Молитвами твоими от всяких зол и напастей охраняй нас, да благодарственно со умилением зовем ти: Радуйся, святый благоверный княже Игоре, во смирении за истину терпящим скорый помощниче. Молитва О святый угодниче Божий, страстотерпче благоверный, княже Игоре! Ты из млада Бога возлюбил еси, мудрования плотская, честь и славу княжескую ни во что же вменил еси и монашескаго образа, еще юный леты, достигл еси, к Богу единому всею душею твоею прилепился еси, и благое иго Христово на ся взем, путем спасительным неуклонно шествовал еси даже до смерти мученическия. Сего ради венча тя Господь, блаженне Игоре, венцем славы и прият в Своя Небесныя селения, идеже ты ныне, неизреченныя славы и радости наслаждающеся в невечернем дни Царствия Христова, с лики святых страстотерпцев и всех святых Бога о нас умоляеши. Молимся тебе, святче Божий, припадая к честному образу твоему: молися о нас грешных и непотребных, испроси молитвами твоими мира державе нашей, граду сему (и святому храму сему) благодати и милости. Церковь святую огради молитвами твоими от ересей и расколов, пастырем ея испроси ревность и благочестие, всем же нам любовь нелицемерную и терпение даруй, грехов наших прощение, болезней и всяких недугов исцеление. Покрый и сохрани всех нас от всяких бед, скорбей и напастей, да, благодаряще, прославим Святую Живоначальную Троицу, Отца и Сына и Святаго Духа, во веки веков. Аминь.

Текст акафиста утвержден решением Священного Синода от 26 декабря 2019 года (журнал № 163). Кондак 1 Возбра́нных сил небе́сных ра́дость и хвале́ние, всего́ же ро́да челове́ча исправле́ние, ублажа́ем Тя, Пречи́стая Де́во Ма́ти, Ты же, на́ше упова́ние еди́ное, низпосли́ душа́м отра́ду благода́тную, да пое́м Тебе́, о́браз ди́вный Твой чту́ще: Ра́дуйся, Бо́жия Ма́ти, све́тлая на́ша Отра́до. Икос 1 А́нгелов ли́цы дивя́тся, о́браз афо́нский Тво́й зря́ще, на не́мже, Пречи́стая Де́во и Ма́ти, от уст нетле́нных руко́ю десно́ю десни́цу Младе́нца отво́диши кро́тко. Что́ сие́ есть зна́мение о́браза? Мы же рече́м, пою́ще такова́я: Ра́дуйся, Де́во, Всевы́шняго Ма́ти; ра́дуйся, ди́вный раю́ благода́ти, Ра́дуйся, на́ша Отра́до небе́сная; ра́дуйся, лю́дем Наде́ждо изве́стная. Ра́дуйся, о́браз бо Твой спасе́ние возвеща́ет всей земли́; ра́дуйся, взор бо Твой уте́шение пребыва́ющим во тли. Ра́дуйся, све́те небе́сный, мглу на́ших дний озаря́яй; ра́дуйся, цве́те нетле́нный, тлен на́ших дел оживля́яй. Ра́дуйся, Ты бо моли́твы к Сы́ну за мир твори́ши; ра́дуйся, я́ко в те́плой моли́тве, а́ки свети́льник, гори́ши. Ра́дуйся, ра́достно Ти восклица́ем; ра́дуйся, пе́сненно Тя воспева́ем. Ра́дуйся, Бо́жия Ма́ти, све́тлая на́ша Отра́до. Кондак 2 Недоуме́ет ум до́льний та́йны Твоея́ разуме́ти, Пречи́стая Богоблаже́нная Де́во, Ты бо, в ло́но чи́стое де́йствием Ду́ха прии́мши безсе́менно О́тчее Сло́во, Бо́га челове́ком сочета́еши и песнь повелева́еши всем пе́ти: Аллилу́иа. Икос 2 Го́ру Афо́нскую, Де́во, Сы́ном Ти да́нную в жре́бий, покро́вом Свои́м осеня́ющи свы́ше, храни́ши ди́вно от бед и напа́стей. Благода́тных ико́н Твои́х чудесы́ оби́тели афо́нския сла́вятся и гла́сы преподо́бными Тя хва́лят: Ра́дуйся, Де́во, отра́до в печа́лех; ра́дуйся, скоропослу́шнице в ско́рбех. Ра́дуйся, су́щим в пути́ Одиги́трие; ра́дуйся, хра́мов свяще́нных врата́рнице. Ра́дуйся, до́брая предвозве́стнице уныва́ющим в беде́; ра́дуйся, ве́рное утеше́ние притека́ющим к Тебе́. Ра́дуйся, бе́дным бога́тство, елеоно́сная Же́но; ра́дуйся, чту́щим ака́фист благоволя́щая та́йно. Ра́дуйся, в ке́ллии ста́рцу ре́кшая «Ра́дуйся» чудно; ра́дуйся, живоприе́мная Ма́ти. Ра́дуйся, Тя бо досто́йно есть пе́ти; ра́дуйся, Тя бо по до́лгу вси ублажа́ем. Ра́дуйся, Бо́жия Ма́ти, све́тлая на́ша Отра́до. Кондак 3 Е́вину го́рдую пре́лесть Де́вы смире́нное «Бу́ди» в оча́х Милосе́рднаго всю́ упраздня́ет: се Сын Бо́жий Сын Де́вы быва́ет и Бог непристу́пный живе́т с челове́ки, те́мже благода́рственное пе́ние немо́лчными усты́ возсыла́ем: Аллилу́иа. Икос 3 Ликостоя́ще над мо́рем, све́том моли́твы сия́ют пред Бо́гом святы́ни А́фона и я́ве Бо́жия Ма́тере сла́ва Афо́на святы́я главы́ осеня́ет, к пе́нию на вся́кий час призыва́ющи пусты́нники, Ю́ воспева́ющия: Ра́дуйся, сла́во пусты́нь вожделе́нных; ра́дуйся, чу́до высо́т поднебе́сных. Ра́дуйся, гор и холмо́в осене́ние; ра́дуйся, скал и стремни́н освяще́ние. Ра́дуйся, Е́юже открыва́ется путь в небе́сныя страны́; ра́дуйся, Е́юже отверза́ется рай нетле́нныя весны́. Ра́дуйся, кри́не в юдо́ли, благоуха́нная ра́досте; ра́дуйся, цве́те кра́сный, приснотеку́щая сла́досте. Ра́дуйся, све́та восто́че, до́лы земли́ озари́вый; ра́дуйся, жи́зни пото́че, во́ду живу́ю яви́вый. Ра́дуйся, гла́се немо́лчных моле́ний; ра́дуйся, щи́те свяще́нных селе́ний. Ра́дуйся, Бо́жия Ма́ти, све́тлая на́ша Отра́до. Кондак 4 О челове́честем ро́де, е́же спасти́ ны, о Дево́, в моли́твах пред Сы́ном сладча́йшим стои́ши; о Ма́ти, лю́дем бла́гая Отра́до, Ты зри́ши бе́здну грехо́в на́ших лю́тых, мы же, в ро́ве истле́ния пове́рженнии, не сме́ем возвести́ очеса́ и воспе́ти: Аллилу́иа. Икос 4 Ватопе́дская оби́тель сла́вится о́бразом чу́дным, ему́же есть дре́внее и́мя Отра́да. О нем преда́ние ста́рец блаже́нных храни́т благода́тную ди́вную по́весть, во сла́ву Богоро́дицы засту́пницы, да слы́шаще сию́, пое́м Пречи́стей: Ра́дуйся, ми́ра блага́я Отра́до; ра́дуйся, ве́рным стено́ и огра́до. Ра́дуйся, чу́до чуде́с несказа́нное; ра́дуйся, не́бо небе́с осия́нное. Ра́дуйся, безмо́лвие лю́бящим кра́ю жела́ний; ра́дуйся, безмяте́жия и́щущим раю́ жела́нный. Ра́дуйся, я́ко Тобо́ю вся́ка душа́ ожива́ет; ра́дуйся, я́ко Тобо́ю ме́ртвенный ум воскреса́ет. Ра́дуйся, ве́ры горни́ло, и́мже неве́рие та́ет; ра́дуйся, та́йная си́ло, я́же от тли возставля́ет. Ра́дуйся, сла́во отше́льников тре́звенных; ра́дуйся, кре́посте и́ноков бо́дренных. Ра́дуйся, Бо́жия Ма́ти, све́тлая на́ша Отра́до. Кондак 5 Ро́ждшая жи́знь всему́ ми́ру, я́вльшая ми́лости бе́здну, о Де́во Пречи́стая, о́ком ясне́йшим зри́ши на́ших печа́лей пучи́ну, слы́шиши гла́сы земны́х воздыха́ний, ско́ро на по́мощь к нам притека́еши, и учи́ши нас пе́ти Всебла́гому: Аллилу́иа. Икос 5 А́лчуще зла́та и кро́ве, де́рзко разбо́йницы с мо́ря оби́тель святу́ю в нощи́ облага́ют, да зело́ зау́тра, врато́м отворе́нным, уби́вше мона́хов, расхи́тят святы́ни. Ты же, неусы́пная Засту́пнице, уде́л Свой защища́еши, да сла́вит Тя́: Ра́дуйся, Ватопе́да отра́до; ра́дуйся, вра́жиим ко́знем прегра́до. Ра́дуйся, за́мыслов злы́х обличе́ние; ра́дуйся, лю́тых враго́в отраже́ние. Ра́дуйся, я́ко не усыпа́еши, Свой спаса́ющи удел; ра́дуйся, я́ко отвраща́еши ту́чи смертоно́стных стрел. Ра́дуйся, кре́посте чту́щих свя́тость ико́н Твои́х чу́дных; ра́дуйся, сто́лпе пою́щих сла́ву чуде́с Твои́х мно́гих. Ра́дуйся, кро́тких побе́до и пора́жение го́рдых; ра́дуйся, пра́вых защи́то и посрамле́ние лжи́вых. Ра́дуйся, Ты бо еси́ заблу́дших корми́ло; ра́дуйся, Ты бо еси́ моли́твы кади́ло. Ра́дуйся, Бо́жия Ма́ти, све́тлая на́ша Отра́до. Кондак 6 Де́вственный взор Твой, бла́гая Ма́ти, пото́ки любве́ и щедро́т излива́ет: Ты нас храни́ши в исхо́дех и вхо́дех, спаса́еши ве́рных на су́ши и в мо́ри, а́ще то́кмо искра́ покая́ния возника́ет в се́рдце, е́же воспева́ти: Аллилу́иа. Икос 6 О́бщия моли́твы в час у́тра и́ноцы соверши́вше, отъидо́ша в ке́ллии до Литурги́и, оба́че игу́мен оби́тели, в хра́ме един моля́ся, от ико́ны Твоея́ Отра́ды глас слы́ша: «Врат не отверза́йте днесь», тре́петом же объя́т сый, си́це ста́рец восклица́ше: Ра́дуйся, Де́во, я́ко еси́ стра́жа святы́ни; ра́дуйся, я́ко дом Твой спаса́еши ны́не. Ра́дуйся, щи́те зау́тра и но́щию; ра́дуйся, гро́зная си́лою мно́гою. Ра́дуйся, я́ко милосе́рдием Твои́м щади́ши гре́шныя; ра́дуйся, я́ко поража́еши востаю́щия на ны си́льныя. Ра́дуйся, ве́нче наде́жды, знаменова́ние ми́ра; ра́дуйся, же́зле побе́ды, обетова́ние сла́вы. Ра́дуйся, чи́стый сапфи́ре, подо́бный виде́нию не́ба; ра́дуйся, све́тлый престо́ле и колесни́це Царе́ва. Ра́дуйся, я́ко глас Твой сла́док уши́ма; ра́дуйся, я́ко о́браз Твой кра́сен очи́ма. Ра́дуйся, Бо́жия Ма́ти, све́тлая на́ша Отра́до. Кондак 7 Сын Челове́ческий бли́з есть, Су́д Его Стра́шный при две́рех — веща́ет нам глас богоно́сных Писа́ний, оба́че неради́м о кончи́не, лени́вии су́ще, и гро́зным глаго́лом не вне́млем, вси бо в суете́ пови́ннии во́лею, оба́че с ве́рою и любо́вию к Тебе́, Богома́ти, прибега́юще, вопие́м Бо́гу: Аллилу́иа. Икос 7 Тре́петно ста́рец игу́мен к о́бразу взо́р свой возво́дит и ви́дит: се ли́цы пред ни́м ожива́ют, и Де́ве гро́зный Младе́нец руко́ю уста́ загражда́ет, глаго́ля: О Ма́ти, не провещава́й, да нака́жутся. Ста́рец же, ужаса́яся, пое́т Пречи́стей та́ко: Ра́дуйся, Де́во, Влады́чице ми́ра; ра́дуйся, не́ба Цари́це блага́я. Ра́дуйся, я́ко Бо́жий гнев утоля́еши; ра́дуйся, я́ко гро́зный суд отвраща́еши. Ра́дуйся, Ма́ти всемилосе́рдная, избавле́ние от бед; ра́дуйся, по́моще благода́тная, упова́ние душа́м. Ра́дуйся, Ты бо печа́ли на́ша отго́ниши ско́ро; ра́дуйся, Ты бо боле́зни гре́шных врачу́еши ди́вно. Ра́дуйся, я́коже у́тро, све́т пролива́ющая ти́хий; ра́дуйся, я́коже со́лнце, согрева́ющая хла́дныя ду́ши. Ра́дуйся, чу́дная Отрокови́це; ра́дуйся, ди́вная Богоневе́сто. Ра́дуйся, Бо́жия Ма́ти, све́тлая на́ша Отра́до. Кондак 8 Единомы́сленно, Де́во, взо́ры к Тебе́ обраща́ем, Ты бо в день воздая́ния нас не оставля́еши; простри́ у́бо нам ще́друю Свою́ ру́ку, грехми́ бо падо́хом до а́дския бе́здны, и кто́ нас изба́вит от гряду́щих мук, кто же нас утверди́т, во е́же пе́ти: Аллилу́иа. Икос 8 Ма́ти отво́дит десни́цу сла́дкаго Сы́на и, ма́ло лице́ отклоня́ющи, ста́рцу глаго́лет: «На сте́ны бра́тия вся да выхо́дит и лю́тых разбо́йник да отража́ет!» Ста́рец же всю бра́тию глаша́ет и, ви́девше вси чу́до, воспева́ют: Ра́дуйся, Ма́ти блага́я Христо́ва; ра́дуйся, ти́хой пусты́ни Покро́ве. Ра́дуйся, а́ще и не ве́мы, ки́ими Тя хвале́бными возвели́чим словесы́; ра́дуйся, а́ще и не ве́мы, ки́я благода́тныя принесе́м Ти похвалы́. Ра́дуйся, я́ко Свет преве́чный но́сиши неопали́мо; ра́дуйся, я́ко Огнь ипоста́сный де́ржиши непости́жимо. Ра́дуйся, Тя бо и́мамы необори́мую сте́ну; ра́дуйся, Тя бо вси ве́мы ми́лости ве́лию бе́здну. ра́дуйся, херуви́мов честне́йшая; ра́дуйся, серафи́мов сла́внейшая. Ра́дуйся, Бо́жия Ма́ти, све́тлая на́ша Отра́до. Кондак 9 И́ов, страда́лец пред Бо́гом, му́дренно нас поуча́ет, глаго́ля: се, благоче́стие — му́дрость и бла́го всем уходя́щим от ми́ра и сла́достный по́двиг моли́твы подъе́мшим, и́мже помога́ет Богоро́дица и в моли́твах укрепля́ет, во е́же зва́ти: Аллилу́иа. Икос 9 Ра́достно в хра́ме сем зря́ще спи́сок с ико́ны О́трады афо́нских оби́телей дар драгоце́нный, в моли́тве мы́сленно соедини́мся с хвале́бными ли́ки афо́нских отце́в, и́же от го́рных высо́т, превы́ше о́блак су́щих, Пречи́стую нас пе́ти призыва́ют: Ра́дуйся, стра́н и наро́дов святы́не; ра́дуйся, всех христиа́н благосты́не. Ра́дуйся, О́гнь во утро́бу прии́мшая; ра́дуйся, Сло́во по пло́ти яви́вшая. Ра́дуйся, о́блаче све́та ле́гкий, в мир прине́сший Христа́; ра́дуйся, ле́ствице, веду́щая от земли́ в небеса́. Ра́дуйся, ста́мно ма́нны а́лчущим сла́дкия пи́щи; ра́дуйся, ча́ше злата́я жа́ждущим но́ваго пи́ва. Ра́дуйся, ти́хая А́нгелов сла́во; ра́дуйся, лю́дем блага́я отра́до. Ра́дуйся, вы́шнее не́бо, свет озаря́ющее ве́рным; ра́дуйся, ту́чная ни́во, всем веселя́щая ду́ши. Ра́дуйся, Бо́жия Ма́ти, све́тлая на́ша Отра́до. Кондак 10 У́м к небеси́ устреми́вше, чу́вства возне́сше над тле́ном, о, коль вожделе́нно спасти́ся от ми́ра, иму́ще еди́но ду́ха стремле́ние к го́рним, еди́ну се́рдца наде́жду на Бо́га. Помога́й нам, Де́во Богоро́дице, и в путь веди́ нас пра́вый, е́же пе́ти: Аллилу́иа. Икос 10 О́браз честны́й провожда́я в пу́ть от Афо́на на се́вер в покро́в благода́тный оби́тели но́выя, в зало́г небе́сныя по́мощи гра́ду, честны́й схимона́х святого́рец веща́ет: Се́ благослове́ние Влады́чицы! Моли́теся и ве́руйте, и по́йте: Ра́дуйся, я́ко еси́ нам покро́в благода́тный; ра́дуйся, я́ко еси́ нам зало́г упова́ний. Ра́дуйся, су́щим в беда́х утеше́ние; ра́дуйся, су́щим в греха́х умиле́ние. Ра́дуйся, я́ко в час гне́ва Бо́жия укрепля́еши сердца́; ра́дуйся, я́ко в день испыта́ния умудря́еши умы. Ра́дуйся, я́ко злых наве́тов ту́чи от нас отвраща́еши; ра́дуйся, я́ко в го́ды бе́дствий от поги́бели нас изыма́еши. Ра́дуйся, я́ко во дни бурь безбо́жных Ты́ еси́ нам еди́ная при́стань; ра́дуйся, я́ко мудрова́ний ло́жных на́с избавля́еши при́сно. Ра́дуйся, в жи́зни нам ти́хая ра́досте; ра́дуйся, в ве́чности ра́йская сла́во. Ра́дуйся, Бо́жия Ма́ти, све́тлая на́ша Отра́до. Кондак 11 Те́мныя си́лы в ми́ре си́лою и сла́вою владе́ют и све́та Христо́ва позна́ти не мо́гут, но ве́рным то́кмо моли́тва есть си́ла, им сле́зы — зало́г и побе́ды, и сла́вы. О Де́во Ма́ти, да́ждь нам ту́чу сле́зную и бо́дрственный нам ве́тр возве́й, пою́щим: Аллилу́иа. Икос 11 Ра́дость на ли́цах сия́ет, гла́с вопие́т от Афо́на: Влады́чица ше́ствует к ва́м, исходи́те, срета́йте Де́ву небе́с со свеща́ми, срета́йте же па́че Сию́ со слеза́ми ра́дости, любве́ и умиле́ния и пра́зднуйте, и све́тлым гла́сом по́йте: Ра́дуйся, киво́те освяще́нный; ра́дуйся, престо́ле вознесе́нный, Ра́дуйся, го́рних чино́в воспева́ние; ра́дуйся, а́довых си́л трепета́ние. Ра́дуйся, я́ко еси́ ве́селие челове́ческим сердца́м; ра́дуйся, я́ко еси́ спасе́ние соврати́вшимся душа́м. Ра́дуйся, я́ко глас Твой пресла́дкий ве́чную ра́дость веща́ет; ра́дуйся, я́ко взор Твой прети́хий на́м тишину́ обеща́ет. Ра́дуйся, я́ко Сы́на и Бо́га Ты умоля́еши о лю́дех; ра́дуйся, я́ко ра́йских черто́гов Ты́ нам отверза́еши две́ри. Ра́дуйся, хра́мино Ду́ха Свята́го; ра́дуйся, ски́ние Бо́га жива́го. Ра́дуйся, Бо́жия Ма́ти, све́тлая на́ша Отра́до. Кондак 12 А́нгельски дне́сь воспева́ем пе́снь благода́тней Мари́и: Сия́ бо есть сла́дость, и ра́й, и блаже́нство, отра́да в час испыта́ний и гне́ва, наде́жда блаже́нств безконе́чных по сме́рти. Ра́дуйся у́бо, Засту́пнице усе́рдная, и ра́дость подава́й нам пе́ти Бо́гу: Аллилу́иа. Икос 12 Да защити́т Богома́ти о́бразом ди́вным Отра́ды моли́твы опло́т — монасты́рь сей и хра́мы, да во ве́к не уга́снет лампа́да пред ли́ком спаси́тельным Де́вы, со́нми же мона́хов гла́сом ра́дости с миря́ны немо́лчно взыва́ют: Ра́дуйся, хра́ме, светле́йший Сио́на; ра́дуйся, све́те и сла́во Афо́на. Ра́дуйся, и́ноков мы́сль непреста́нная; ра́дуйся, де́вственных пе́снь неумо́лчная. Ра́дуйся, я́ко ро́су утеше́ния посыла́еши во дни́; ра́дуйся, я́ко сле́зы умиле́ния исторга́еши в нощи́. Ра́дуйся, ди́вное и́мя, чудотворя́щее вта́йне; ра́дуйся, Бо́жие ми́ро, в ми́р излия́нное ще́дро. Ра́дуйся, я́ко Тобо́ю лие́тся нам свет безконе́чный; ра́дуйся, я́ко с Тобо́ю ве́чно Младе́нец предве́чный. Ра́дуйся, све́тлосте лю́дем, Тя чту́щим; ра́дуйся, ра́досте на́м, Тя поющи́м. Ра́дуйся, Бо́жия Ма́ти, све́тлая на́ша Отра́до. Кондак 13 О, всепречи́стая Де́во, све́тлая на́ша Отра́до, сладча́йшаго Сы́на нетле́нная Ма́ти! От вся́ких бе́д и скорбе́й огражда́й нас и бу́дущия му́ки изми́ нас, Блага́я, ра́дости же ве́чныя сподо́би нас у го́рняго престо́ла воспева́ти: Аллилу́иа.[Се́й конда́к глаго́лется три́жды.][Далее повторяем 1‑е икос и кондак:]Икос 1 А́нгелов ли́цы дивя́тся, о́браз афо́нский Тво́й зря́ще, на не́мже, Пречи́стая Де́во и Ма́ти, от уст нетле́нных руко́ю десно́ю десни́цу Младе́нца отво́диши кро́тко. Что́ сие́ есть зна́мение о́браза? Мы же рече́м, пою́ще такова́я: Ра́дуйся, Де́во, Всевы́шняго Ма́ти; ра́дуйся, ди́вный раю́ благода́ти, Ра́дуйся, на́ша Отра́до небе́сная; ра́дуйся, лю́дем Наде́ждо изве́стная. Ра́дуйся, о́браз бо Твой спасе́ние возвеща́ет всей земли́; ра́дуйся, взор бо Твой уте́шение пребыва́ющим во тли. Ра́дуйся, све́те небе́сный, мглу на́ших дний озаря́яй; ра́дуйся, цве́те нетле́нный, тлен на́ших дел оживля́яй. Ра́дуйся, Ты бо моли́твы к Сы́ну за мир твори́ши; ра́дуйся, я́ко в те́плой моли́тве, а́ки свети́льник, гори́ши. Ра́дуйся, ра́достно Ти восклица́ем; ра́дуйся, пе́сненно Тя воспева́ем. Ра́дуйся, Бо́жия Ма́ти, све́тлая на́ша Отра́до. Кондак 1 Возбра́нных сил небе́сных ра́дость и хвале́ние, всего́ же ро́да челове́ча исправле́ние, ублажа́ем Тя, Пречи́стая Де́во Ма́ти, Ты же, на́ше упова́ние еди́ное, низпосли́ душа́м отра́ду благода́тную, да пое́м Тебе́, о́браз ди́вный Твой чту́ще: Ра́дуйся, Бо́жия Ма́ти, све́тлая на́ша Отра́до. Молитва О, Пресвята́я Влады́чице Госпоже́ Де́во Богоро́дице, Неве́сто нетле́нная, Ма́ти благослове́нная, све́тлая на́ша Отра́до, вожделе́нное Утеше́ние! Приими́ ны́не дерзнове́нное и неотсту́пное моле́ние сие́, от гре́шных усте́н и недосто́йных душ Тебе́ приноси́мое пред святы́м и светоза́рным Твои́м о́бразом. Пощади́ ны, ми́лостивая и милосе́рдная и щедролюби́вая на́ша Засту́пнице, и не преда́ждь нас суду́ и гне́ву Сы́на Твоего́ и Спа́са на́шего, Го́спода Иису́са Христа́, Ему́же без числа́ согреши́хом и пови́нни есмы́ осужде́нию и пра́ведному Его́ изрече́нию, е́же наказа́тися по грехо́м на́шим, превозше́дшим вся́кую ме́ру Его́ долготерпе́ния. Прини́кни с высо́т Твои́х го́рних, иде́же А́нгели тре́петно сла́вят Тя, и воззри́ на на́шу до́льнюю нищету́: ка́ко обнища́хом ве́рою, ка́ко бе́дствуем наде́ждею и оскуде́хом любо́вию, ка́ко умо́м омрачи́хомся, се́рдцем же и чу́вствы ожесточи́хомся. Уврачу́й нас моли́твою Твое́ю, Де́во целе́бнице. Возста́ви ны, па́дшия ду́хом, укрепи́ разсла́бленныя умо́м, возбуди́ уны́лыя и отча́янныя, исцели́ боля́щия душе́ю и те́лом. При́зри на гра́д сей [или́: оби́тель сию́, или́: ве́сь сию́] и пощади́ его́, Бо́жий отводя́щи Твои́м предста́тельством гнев. Укроти́ го́рдостная стремле́ния люде́й и богоотсту́пная их шата́ния. Возве́й ти́хое дыха́ние благода́ти Твоея́ на смяте́нныя ду́ши и сокруше́нная сердца́. Сохрани́ супру́жеству чистоту́, матери́нству че́сть, де́вству благослове́ние. Низпосли́ под кров жили́щ на́ших освяща́ющий луч боже́ственнаго све́та, да облича́тся дея́ния неподо́бная и устыдя́тся ре́чи ху́льныя, и укротя́тся мы́сли зло́бныя. О миролю́бивая, бла́гостнейшая и тиша́йшая Де́во Ма́ти, о паде́ниих на́ших скорбя́щая, о спасе́нии на́шем воздыха́ющая! Утоли́ церко́вныя бу́ри, умири́ раско́лы, собери́ расточе́нныя, обрати́ отпа́дшия и всех приведи́ в едине́ние Святы́я Це́ркве, да единоду́шно и единому́дренно сла́вится на земли́, я́коже и на небеси́, еди́ное святе́йшее и спаси́тельное и́мя Единосу́щныя Тро́ицы, Отца́ и Сы́на и Свята́го Ду́ха, во ве́ки веко́в. Ами́нь.

Кано́н усо́пшым: творе́ние Феофа́ново. Пе́снь 1 Ирмо́с: Я́ко по су́ху пешеше́ствовав Изра́иль, по бе́здне стопа́ми, гони́теля фарао́на ви́дя потопля́ема, Бо́гу побе́дную пе́снь пои́м, вопия́ше. Сти́х: Ди́вен Бо́г во святы́х свои́х, Бо́г Изра́илев. В Небе́сных Черто́зех, всегда́ до́блии му́ченицы мо́лят Тя́, Христе́: и́хже от земли́ преста́вил еси́ ве́рныя, ве́чных бла́г получи́ти сподо́би. Сти́х: Поко́й, Го́споди, ду́шы усопших ра́б Твои́х. Украси́вый вся́ческая, живо́тное смеше́нное мя́ челове́ка, посреде́ смире́ния же вку́пе и вели́чества созда́л еси́: те́мже ра́б Твои́х ду́шы, Спа́се, упоко́й. Сла́ва Отцу, и Сы́ну, и Свято́му Ду́ху. Рая́ жи́теля, и де́лателя в нача́ле мя́ учини́л еси́: преступи́вша же Твою́ за́поведь изри́нул еси́. Те́мже рабо́в Твои́х ду́шы, Спа́се, упоко́й. И ны́не, и при́сно, и во ве́ки веко́в, ами́нь. Богородичен: И́же от ребра́ созда́вый Е́ву пе́рвее на́шу прама́терь, из пречи́стаго Твоего́ чре́ва в пло́ть одева́ется: е́юже сме́рти кре́пость, Чи́стая, разруши́л е́сть. Пе́снь 3 Ирмо́с: Не́сть свя́т, я́коже Ты́, Го́споди Бо́же мо́й, вознесы́й ро́г ве́рных Твои́х, Бла́же, и утверди́вый на́с на ка́мени испове́дания Твоего́. Сти́х: Ди́вен Бо́г во святы́х свои́х, Бо́г Изра́илев. Зако́нно пострада́вше Твои́ му́ченицы, Жизнода́вче, и венцы́ побе́ды украси́вшеся от Тебе, приле́жно преста́вльшымся ве́рным ве́чное хода́тайствуют поче́стие. Сти́х: Поко́й, Го́споди, ду́шы усопших ра́б Твои́х. Наказа́в пре́жде мно́гими чудесы́ и зна́меньми мене́ заблу́ждшаго, напосле́док Самого́ Себе́ истощи́л еси́, я́ко сострада́телен: и поиска́в обре́л, и спа́сл еси́. Сла́ва Отцу, и Сы́ну, и Свято́му Ду́ху. От теку́щаго непостоя́тельныя тли́, к Тебе́ прише́дшыя, в селе́ниих ве́чных всели́тися ра́достно сподо́би, Бла́же, оправда́в ве́рою же и благода́тию. И ны́не, и при́сно, и во ве́ки веко́в, ами́нь. Богородичен: Не́сть непоро́чны, я́коже Ты́, Пречи́стая Богома́ти: еди́на бо от ве́ка и́стиннаго Бо́га зачала́ еси́ во чре́ве сме́рти разруши́вшаго си́лу. Седален, глас 6: Вои́стинну суета́ вся́ческая, / житие́ же сень и со́ние, / и́бо всу́е мяте́тся всяк земноро́дный, / я́коже рече́ Писа́ние: / егда́ мiр приобря́щем, / тогда́ во гроб всели́мся, / иде́же вку́пе ца́рие и ни́щии. / Те́мже, Христе́ Бо́же, / преста́вльшияся упоко́й, / я́ко Человеколю́бец. Сла́ва Отцу́, и Сы́ну, и Свято́му Ду́ху, и ны́не, и при́сно, и во ве́ки веко́в. Ами́нь. Богородичен: Всесвята́я Богоро́дице, / во вре́мя живота́ моего́ не оста́ви мене́, / челове́ческому предста́тельству не вве́ри мя, / но Сама́ заступи́ и поми́луй мя. Пе́снь 4 Ирмо́с: Христо́с моя́ си́ла, Бо́г и Госпо́дь, честна́я Це́рковь Боголе́пно пое́т взыва́ющи, от смы́сла чи́ста, о Го́споде пра́зднующи. Сти́х: Ди́вен Бо́г во святы́х свои́х, Бо́г Изра́илев. Прему́дрости бо́льшее явля́я позна́ние, и о даре́х многосоверше́нную, Влады́ко, благосты́ню, му́ченическия ли́ки А́нгелом сочета́л еси́. Сти́х: Поко́й, Го́споди, ду́шы усопших ра́б Твои́х. Пречи́стую сла́ву Твою́ получи́ти сподо́би к Тебе́ преста́вленным, иде́же, Христе́, веселя́щихся е́сть жили́ще, и гла́с чи́стаго ра́дования. Сла́ва Отцу, и Сы́ну, и Свято́му Ду́ху. Пою́щыя приими́ Боже́ственною держа́вою Твое́ю, и́хже от земли́ прия́т, ча́да све́ту те́х соде́лав, грехо́вную мглу́ очища́я, Многоми́лостиве. И ны́не, и при́сно, и во ве́ки веко́в, ами́нь. Богородичен: Прия́телище пречи́стое, Це́рковь непоро́чную, ковче́г всесвя́т, де́вственное ме́сто свяще́ния, Тебе́ добро́ту Иа́ковлю Влады́ка избра́л е́сть. Пе́снь 5 Ирмо́с: Бо́жиим све́том Твои́м, Бла́же, у́тренюющих Ти́ ду́шы любо́вию озари́, молю́ся, Тя́ ве́дети, Сло́ве Бо́жий, и́стиннаго Бо́га, от мра́ка грехо́внаго взыва́юща. Сти́х: Ди́вен Бо́г во святы́х свои́х, Бо́г Изра́илев. Я́ко всепло́дие свяще́нное, и я́ко нача́ток челове́ческаго естества́ му́ченицы, просла́вленному прине́сшеся Бо́гу, на́м спасе́ние при́сно хода́тайствуют. Сти́х: Поко́й, Го́споди, ду́шы усопших ра́б Твои́х. Небе́снаго пребыва́ния, и раздая́ния дарова́ний сподо́би, Го́споди, пре́жде усо́пшыя ве́рныя рабы́ Твоя́, подая́ прегреше́ний избавле́ние. Сла́ва Отцу, и Сы́ну, и Свято́му Ду́ху. И́же еди́н естество́м животво́рец, И́же бла́гости вои́стинну неизсле́димая пучи́на, сконча́вшыяся Ца́рствия Твоего́ сподо́би, Ще́дре, Еди́не Безсме́ртне. И ны́не, и при́сно, и во ве́ки веко́в, ами́нь. Богородичен: Кре́пость и пе́ние, И́же из Тебе́, Влады́чице, ми́ру рожде́йся, и спасе́ние бы́сть поги́бшым, и́же от а́довых вра́т избавля́я ве́рою Тебе́ блажа́щыя. Пе́снь 6 Ирмо́с: Жите́йское мо́ре воздвиза́емое зря́ напа́стей бу́рею, к ти́хому приста́нищу Твоему́ прите́к вопию́ Ти: возведи́ от тли́ живо́т мо́й, Многоми́лостиве. Сти́х: Ди́вен Бо́г во святы́х свои́х, Бо́г Изра́илев. На Кресте́ пригвожда́емь, му́ченическия ли́ки к Себе́ собра́л еси́, подо́бящыяся Стра́сти Твое́й, Бла́же. Те́мже Тя́ мо́лим: к Тебе́ преста́вленныя упоко́й. Сти́х: Поко́й, Го́споди, ду́шы усопших ра́б Твои́х. Неизрече́нною сла́вою Твое́ю, егда́ прии́деши стра́шно суди́ти ми́ру всему́ на о́блацех, благоволи́, Изба́вителю, све́тло сре́сти Тебе́, я́же от земли́ прия́л еси́ ве́рныя рабы́ Твоя́. Сла́ва Отцу, и Сы́ну, и Свято́му Ду́ху. Исто́чник жи́зни сы́й, Влады́ко, в му́жестве Боже́ственнем, окова́нныя изводя́ рабы́ Твоя́ я́же к Тебе́ ве́рно отше́дшыя, в пи́щи ра́йстей всели́. И ны́не, и при́сно, и во ве́ки веко́в, ами́нь. Богородичен: В зе́млю возврати́хомся, преступи́вше Бо́жию за́поведь: Тебе́ же ра́ди, Де́во, на небеса́ от земли́ вознесо́хомся, тлю́ сме́ртную оттря́сше. Кондак, глас 8: Со святы́ми упоко́й, / Христе́, ду́ши раб Твои́х, / иде́же несть боле́знь, ни печа́ль, / ни воздыха́ние, / но жизнь безконе́чная. Икос: Сам еди́н еси́ безсме́ртный, / сотвори́вый и созда́вый челове́ка: / земни́и у́бо от земли́ созда́хомся, / и в зе́млю ту́южде по́йдем, / я́коже повеле́л еси́, созда́вый мя и реки́й ми: / я́ко земля́ еси́, и в зе́млю оты́деши: / а́може вси челове́цы по́йдем, / надгро́бное рыда́ние, творя́ще песнь: / аллилу́ия. Пе́снь 7 Ирмо́с: Росода́тельну у́бо пе́щь соде́ла а́нгел преподо́бным отроко́м, халде́и же опаля́ющее веле́ние Бо́жие мучи́теля увеща́ вопи́ти: благослове́н еси́ Бо́же оте́ц на́ших. Сти́х: Ди́вен Бо́г во святы́х свои́х, Бо́г Изра́илев. Изба́вльшиися Твое́ю кро́вию му́ченицы, пе́рваго преступле́ния, окропи́вшеся же свое́ю кро́вию, прообразу́ют я́ве Твое́ заколе́ние, благослове́н еси́ Бо́же оте́ц на́ших. Сти́х: Поко́й, Го́споди, ду́шы усопших ра́б Твои́х. Свире́пеющую сме́рть умертви́л еси́, Сло́ве Живонача́льнейший, в ве́ре же Твое́й усо́пшыя приими́ Тебе́ пою́щыя, Христе́, и глаго́лющыя: благослове́н Бо́г оте́ц на́ших. Сла́ва Отцу, и Сы́ну, и Свято́му Ду́ху. Воодуши́в мя́ челове́ка вдохнове́нием Боже́ственным, Богонача́льнейший Влады́ко, преста́вленныя Ца́рствия Твоего́ сподо́би, пе́ти Тебе́, Спасе́: благослове́н Бо́г оте́ц на́ших. И ны́не, и при́сно, и во ве́ки веко́в, ами́нь. Богородичен: Превы́шши все́х тва́рей, Пренепоро́чная была́ еси́, заче́нши Бо́га сокруши́вшаго сме́ртная врата́, и вереи́ сте́ршаго. Те́мже Тя́, Чи́стая, песносло́вим ве́рнии, я́ко Богома́терь. Пе́снь 8 Ирмо́с: Из пла́мене преподо́бным ро́су источи́л еси́, и пра́веднаго же́ртву водо́ю попали́л еси́: вся́ бо твори́ши, Христе́, то́кмо е́же хоте́ти. Тя́ превозно́сим во вся́ ве́ки. Сти́х: Ди́вен Бо́г во святы́х свои́х, Бо́г Изра́илев. Кре́пко по́двиги показу́юще, побе́ды венцы́ прия́сте, му́ченицы страстоте́рпцы, Христо́ви зову́ще: Тя́ превозно́сим Го́спода во ве́ки. Сти́х: Поко́й, Го́споди, ду́шы усопших ра́б Твои́х. Свяще́нно ве́рныя жите́йская оста́вльшыя, и к Тебе́, Влады́це, отлучи́вшыяся приими́ кро́тко, и упоко́й, я́ко милосе́рд, Тя́ превознося́щих Го́спода во ве́ки. Сла́ва Отцу, и Сы́ну, и Свято́му Ду́ху. Ны́не в земли́ кро́тких, все́м водворя́тися пре́жде усо́пшым, Спа́се, благоволи́, ве́рою Твое́ю оправда́в и благода́тию, Тя́ превознося́щих Го́спода во ве́ки. И ны́не, и при́сно, и во ве́ки веко́в, ами́нь. Богородичен: Блажи́м Тя́ вси́, Преблаже́нная, я́ко Сло́во вои́стинну Су́щее Блаже́нное Ро́ждшую, пло́ть бы́вшее на́с ра́ди. Его́же превозно́сим во вся́ ве́ки. Пе́снь 9 Ирмо́с: Бо́га челове́ком не возмо́жно ви́дети, на Него́же не сме́ют чи́ни а́нгельстии взира́ти: Тобо́ю же, Всечи́стая, яви́ся челове́ком Сло́во воплоще́нно, Его́же велича́юще, с Небе́сными во́и Тя́ ублажа́ем. Сти́х: Ди́вен Бо́г во святы́х свои́х, Бо́г Изра́илев. Наде́жда му́чеников ли́ки укрепи́, и к Твое́й любви́ распале́нием впери́, бу́дущий си́м предвообрази́вше непоколеби́мый вои́стинну поко́й: его́же преста́вленныя, Бла́же, ве́рныя сподо́би. Сти́х: Поко́й, Го́споди, ду́шы усопших ра́б Твои́х. Све́тлое Твое́, Христе́, и Боже́ственное улучи́ти сия́ние ве́рою преста́вленным благоволи́, и́же в ло́нех Авраа́мовех поко́й, я́ко еди́н ми́лостив те́м да́руя, и ве́чнаго сподобля́я блаже́нства. Сла́ва Отцу, и Сы́ну, и Свято́му Ду́ху. И́же сы́й естество́м бла́г и милосе́рд, и хоти́тель ми́лостей, и благоутро́бия пучи́на, и́хже от ме́ста сего́ озлобле́ния, и се́ни сме́ртныя преста́вил еси́, иде́же сия́ет Тво́й Све́т, Спа́се, те́х учини́. И ны́не, и при́сно, и во ве́ки веко́в, ами́нь. Богородичен: Се́нь святу́ю, Чи́стая, ве́мы Тя́, и ковче́г, и скрижа́ли, зако́на и благода́ти: Тебе́ бо ра́ди оставле́ние дарова́ся, оправда́ным кро́вию Воплоще́ннаго из Твоего́ чре́ва, Всенепоро́чная. Справка: В традиции Православной Церкви с древних времен в разные дни недели (седмицы) за богослужением воспоминаются те или иные события или святые – это называется «седмичным богослужебным кругом». Со временем богослужебная традиция Церкви распространилась на домашние (келейные) молитвы. Богослужение понедельника содержит молитвословия Небесным Силам, вторника – Иоанну Предтече. В среду, пятницу и воскресенье Святая Церковь вспоминает Евангельские события предательства Спасителя, Его Крестной смерти и Воскресения, соответственно и богослужебные тексты посвящены Господу и Пресвятой Богородице. Суббота по традиции день поминовения усопших и особого моления всем святым от века Богу благоугодившим. В четверг совершается память святых апостолов и святителя Николая Чудотворца. См. «Богослужебные круги»

Кано́н Пресвяте́й и Живонача́льней Тро́ице, [его́же краестро́чие: Шесто́е пе́ние приноша́ю тебе́ Божество́.] Творе́ние Митрофа́ново. Гла́с 6. Пе́снь 1 Ирмо́с: Я́ко по су́ху пешеше́ствовав Изра́иль по бе́здне стопа́ми, гони́теля фарао́на ви́дя потопля́ема, Бо́гу побе́дную пе́снь пои́м, вопия́ше. Припе́в: Пресвята́я Тро́ице Бо́же на́ш, сла́ва Тебе́. Три́ ипоста́си пое́м Богонача́льныя, Еди́нственнаго естества́ неизме́нный зра́к, Блага́го Человеколю́бца Бо́га, прегреше́ний очище́ние на́м да́рующа. Пресу́щный еди́не, и трисия́нный начерта́ньми Го́споди, в Божестве́ еди́ном Сы́й, вразуми́ на́с, и сподо́би Твоего́ Боже́ственнаго сия́ния. Сла́ва Отцу́, и Сы́ну, и Свято́му Ду́ху. Невестоукраси́в Па́вел, ю́же от язы́к Це́рковь, Еди́ному Тебе́ Триипоста́сному Бо́гу покланя́тися научи́, от Него́же, и И́мже, и в Не́мже вся́ бы́ша. И ны́не, и при́сно, и во ве́ки веко́в. Ами́нь. Богоро́дичен: Из чре́ва Твоего́ про́йде у́мное, Богоро́дице, Со́лнце, и осия́ на́с Трисве́тлаго Божества́ заря́ми: Его́же пою́ще, благоче́стно Тя́ ублажа́ем. Пе́снь 3 Ирмо́с: Не́сть свя́т, я́коже Ты́, Го́споди, Бо́же мо́й, вознесы́й ро́г ве́рных Твои́х, Бла́же, и утверди́вый на́с на ка́мени испове́дания Твоего́. Украси́в Трисве́тлый Бо́же чи́ны небе́сныя, устро́ил еси́ пе́ти Тя́ трисвяты́ми гла́сы: с ни́миже приими́ и на́с воспева́ющих Твою́ бла́гость. Еди́но непрело́жное Тро́ичное, сообра́зное еди́нственное Богонача́лие пою́ще, мо́лим Тя́ те́пле, грехо́в мно́гих низпосла́ти ны́не на́м проще́ние. Сла́ва Отцу́, и Сы́ну, и Свято́му Ду́ху. У́ме Безнача́льный О́тче, сообра́зный Бо́жий Сло́ве, и Ду́ше Боже́ственный, Благи́й и Пра́вый, воспева́ющыя ве́рно Твою́ держа́ву, соблюди́ я́ко Благоутро́бен. И ны́не, и при́сно, и во ве́ки веко́в. Ами́нь. Богоро́дичен: Па́жить потреби́ тли́, челове́к по существу́ бы́в Бо́г мо́й, во утро́бе Твое́й, Чи́стая: и родонача́льники пре́ждняго осужде́ния Еди́н свободи́. Та́же, Го́споди поми́луй, три́жды. Седа́лен, гла́с 6. Влады́ко Бо́же, при́зри с Небесе́, и ви́ждь на́ше смире́ние я́ко Ще́др, и умилосе́рдися, Человеколю́бче Преблаги́й: ни отку́ду бо наде́емся проще́ние получи́ти злы́х, и́миже согреши́хом. Те́мже бу́ди с на́ми, и никто́же на ны́. Сла́ва Отцу́, и Сы́ну, и Свято́му Ду́ху, и ны́не, и при́сно, и во ве́ки веко́в. Ами́нь. Богоро́дичен: Влады́чице Чи́стая, при́зри, Богоро́дице, ви́ждь на́ших я́зв боле́зни, и умилосе́рдися, Пречи́стая, и исцели́ со́вестное жже́ние, Твое́ю ми́лостию ороша́ющи, и вопию́щи рабо́м Твои́м: Аз е́смь с ва́ми, и никто́же на вы́. Пе́снь 4 Ирмо́с: Христо́с моя́ си́ла, Бо́г и Го́сподь, честна́я Це́рковь, боголе́пно пое́т взыва́ющи, от смы́сла чи́ста о Го́споде пра́зднующи. Возвыша́яй мы́сль, Еди́нице Трисве́тлая, и ду́шу и се́рдце Твои́х певе́ц ско́ро возведи́, и сия́ния Твоего́ и све́тлости сподо́би. Претвори́ и преобрази́ от зло́бы мя́ вся́кия к доброде́тели, Еди́на неизображе́нная, и неизме́нная Тро́ице, и Твои́ми заря́ми просвети́. Сла́ва Отцу́, и Сы́ну, и Свято́му Ду́ху. Помы́слив пре́жде, му́дре соста́вил еси́ А́нгелов чи́ны, служи́тельныя Твоея́ бла́гости, Триипоста́сная Еди́нице, с ни́миже приими́ мою́ хвалу́. И ны́не, и при́сно, и во ве́ки веко́в. Ами́нь. Богоро́дичен: И́же естество́м несозда́нный Бо́г Присносу́щный, созда́нное восприе́м челове́ческое естество́, возобрази́ во Святе́й Твое́й утро́бе, Богоро́дице Присноде́во. Пе́снь 5 Ирмо́с: Бо́жиим све́том Твои́м, Бла́же, у́тренюющих Ти́ ду́шы любо́вию озари́, молю́ся: Тя́ ве́дети, Сло́ве Бо́жий, И́стиннаго Бо́га, от мра́ка грехо́внаго взыва́юща. Помышля́юще естество́ Богонача́льное, промысли́тельное и спаси́тельное все́х су́щее, Владыко, Трисве́тлое же еди́но, к Тебе́ у́тренюем, проще́ния прося́ще грехопаде́ний. О́тче Безнача́льный Бо́же, и Соприсносу́щный Сы́не, и Ду́ше Святы́й, утверди́ Единонача́льная Тро́ице Твоя́ певцы́, и от вся́кия напа́сти изба́ви и ско́рби. Сла́ва Отцу́, и Сы́ну, и Свято́му Ду́ху. Управля́яй сия́ньми Богоде́тельными, и к благоугожде́нию Твоего́ Триипоста́снаго Божества́, Со́лнце Сла́вы, наставля́я мя́ при́сно, и Боже́ственнаго Ца́рствия сотвори́ прича́стника. И ны́не, и при́сно, и во ве́ки веко́в. Ами́нь. Богоро́дичен: И́же вся́ нося́й и соблюда́яй всеси́льною Твое́ю руко́ю, Сло́ве Бо́жий, неизме́нне, сохрани́ и соблюди́ Тя сла́вящыя, моли́твами Ро́ждшия Тя́ Богома́тере. Пе́снь 6 Ирмо́с: Жите́йское мо́ре воздвиза́емое зря́ напа́стей бу́рею, к ти́хому приста́нищу Твоему́ прите́к вопию́ Ти: возведи́ от тли́ живо́т мо́й, Многоми́лостиве. Прему́дрость и ра́зум, Богонача́лие Трисве́тлое певце́м Твои́м да́руй, и добро́ты луча́ми светоде́тельныя Твоея́ бла́гости, осиява́тися все́х сподо́би. [Два́жды.] Сла́ва Отцу́, и Сы́ну, и Свято́му Ду́ху. Све́те Неразде́льный по существу́, Трисия́нне, Вседержи́тельне, Непристу́пне, сердца́ озари́ ве́рно хва́лящих держа́ву Твою́, и к Боже́ственней любви́ впери́. И ны́не, и при́сно, и во ве́ки веко́в. Ами́нь. Богоро́дичен: В Тя́ всели́ся, Присноде́во, я́ве Вседержи́тель и Госпо́дь все́х, и Еди́ному Трисия́нному зра́ку Божества́ челове́ки покланя́тися научи́. Го́споди, поми́луй, три́жды. Седа́лен, гла́с 6: О́тче и Сы́не со Ду́хом Святы́м, при́зри на ны́ ве́рою Тебе́ покланя́ющыяся, и сла́вящыя держа́ву Твою́, Благоутро́бне, со о́гненными бре́ннии, ино́го бо ра́зве Тебе́ не ве́мы, и возопи́й пою́щым Тя́: Аз е́смь с ва́ми, и никто́же на вы́. Сла́ва Отцу́, и Сы́ну, и Свято́му Ду́ху, и ны́не, и при́сно, и во ве́ки веко́в. Ами́нь. Богоро́дичен: При́зри на ны́, Всепе́тая Богоро́дице, возсия́й просвеще́ние сердца́м омраче́нным, и озари́ ста́до Твое́, Пречи́стая. Ели́ко бо хо́щеши и мо́жеши, я́ко Ма́ти су́щи Зижди́теля Твоего́, и возопи́й моля́щым Тя́: Аз е́смь с ва́ми, и никто́же на вы́. Пе́снь 7 Ирмо́с: Росода́тельну у́бо пе́щь соде́ла А́нгел преподо́бным отроко́м, халде́и же опаля́ющее веле́ние Бо́жие мучи́теля увеща́ вопи́ти: благослове́н еси́, Бо́же оте́ц на́ших. Кре́пкую мне́ мы́сль устро́й Трисве́тлая начерта́ньми Еди́нице, е́же храни́ти и соблюда́ти Боже́ственныя за́поведи Твоя́, и всегда́ пе́ти Тебе́ ве́рно: благослове́н еси́, Бо́же оте́ц на́ших. Я́ко то́ждеством естества́ пое́мый, неизрече́нно Еди́нственный Бо́же, Ли́цы же Тро́ицы нося́ число́, соблюди́ все́х на́с от разли́чных искуше́ний и обстоя́ний. Сла́ва Отцу́, и Сы́ну, и Свято́му Ду́ху. Соесте́ственна и Соприсносу́щна сла́вим, Еди́наго Тя́ по существу́ Бо́га, сво́йствы неслия́нне Ипоста́сными Тро́ице, разли́чное про́сто предлага́юще, во зра́це непреме́ннем я́ве. И ны́не, и при́сно, и во ве́ки веко́в. Ами́нь. Богоро́дичен: Бо́г Пресу́щный прия́т, Пречи́стая, от чре́ва Твоего́ чи́стаго на́ше человеколюбе́зне смеше́ние я́ве, и все́х научи́ вопи́ти: благослове́н еси́, Бо́же оте́ц на́ших. Пе́снь 8 Ирмо́с: Из пла́мене преподо́бным ро́су источи́л еси́, и пра́веднаго же́ртву водо́ю попали́л еси́: вся́ бо твори́ши, Христе́, то́кмо е́же хоте́ти: Тя́ превозно́сим во вся́ ве́ки. Очище́ние прегреше́ний ско́ро пода́ждь ми́, и страсте́й многообра́зных избавле́ние, сообра́зная Тро́ице, Еди́нице Триипоста́сная: да Тя́ сла́влю во вся́ ве́ки. Воли́тель ми́лости изве́ствован, я́ко Бо́г ми́лостив, все́х поми́луй, Трисве́тлая Еди́нице и Тро́ице Преблага́я, славосло́вящих Твое́ вели́чествие. Сла́ва Отцу́, и Сы́ну, и Свято́му Ду́ху. От Све́та Присносу́щнаго Отца́, Све́та Соприсносу́щна ро́ждшася Сло́ва, со Ду́хом исхо́дным Све́том, ве́рою сла́вим, и превозно́сим во вся́ ве́ки. И ны́не, и при́сно, и во ве́ки веко́в. Ами́нь. Богоро́дичен: Врача́ челове́ком, Пречи́стая, родила́ еси́ Всеси́льнаго Сло́ва, Христа́ Го́спода, прароди́тельныя я́звы все́х исцеля́юща, превознося́щих Его́ во ве́ки. Пе́снь 9 Ирмо́с: Бо́га челове́ком не возмо́жно ви́дети, на Него́же не сме́ют чи́ни А́нгельстии взира́ти: Тобо́ю же, Всечи́стая, яви́ся челове́ком Сло́во Воплоще́нно. Его́же велича́юще, с Небе́сными во́и Тя́ ублажа́ем. Зре́ти чи́нове херуви́мстии, Влады́ко, добро́ты Твоея́ сла́вы не могу́ще, кри́лы покрыва́ющеся, непреста́нно Тро́ичную пе́снь вопию́т, Триипоста́сную Твоего́ Богонача́лия Еди́нственнаго держа́ву сла́вяще. Твоя́ сия́ния, Со́лнце незаходи́мое, Твои́х рабо́в пода́ждь сердца́м, и просвети́ ду́шы, и изба́ви от мно́гих прегреше́ний, Еди́не Всеми́лостиве, и Триипоста́сне: и нетле́нныя Твоея́ жи́зни на́с сподо́би. Сла́ва Отцу́, и Сы́ну, и Свято́му Ду́ху. Е́же Све́т Единоче́стный, и Трисо́лнечный, и Светоде́тельный, Божество́ су́щее озари́ ве́рою Тя́ пою́щих, и от мра́чнаго изба́ви злоде́йства, и сподо́би светле́йших Твои́х селе́ний, я́ко Преблаги́й. И ны́не, и при́сно, и во ве́ки веко́в. Ами́нь. Богоро́дичен: Прему́дре челове́ка пре́жде созда́ Сы́н Тво́й, Де́во, и истле́вшаго обнови́ Тобо́ю, Всепе́тая: и Боже́ственнаго Све́та зари́ невече́рния все́х испо́лни, Тя́ Богоро́дицу и́стинну ве́рою сла́вящих. Ипакои, глас 6: Во́льною и животворя́щею Твое́ю сме́ртию, Христе́, / врата́ а́дова сокруши́в, я́ко Бог, / отве́рзл еси́ нам дре́вний рай, и воскре́с из ме́ртвых, / изба́вил еси́ от тле́ния живо́т наш. Молитва Пресвятей Троице: Всемогу́щая и Животворя́щая Свята́я Тро́ице и светонача́льная, я́же мирную вся́кую и премирную тварь, за еди́ну бла́гость от не су́щих приведы́й, и промышля́я и содержа́. И́же по про́чих Твои́х неизрече́нных о земно́м ро́де благодея́ниих, и покая́ние нам ра́ди плотска́го неможе́ния до сме́рти дарова́вый: не оста́ви нас окая́нных в лука́вых на́ших дея́ниих умре́ти, ниже́ злонача́льнику и зави́стцу, и губи́телю посме́шство бы́ти. Зри́ши бо Благосе́рде, ели́к у́бо о́наго на нас наве́т и вражда́, ели́ко же и на́ше страстова́ние, и сла́бость, и небреже́ние. Но неоску́дныя Твоя́ бла́гости соде́лай на нас, мо́лим на вся́кий день и час прогне́вающии Тя честны́х и животво́рных за́поведей преступле́нием. И вся у́бо всего́ преше́дшаго живота́ на́шего, и до ны́нешняго часа́ согреше́нная на́ми, в дея́ниих, или́ глаго́ланиих, или́ в помышле́ниих, оста́ви и прости́. Сподо́би же нас, про́чее сконча́ти житие́ в покая́нии, и умиле́нии, и соблюде́нии святы́х Твои́х повеле́ний. А́ще у́бо сла́достию прельсти́вшеся, многообра́зне согреши́хом, или́ ме́рзкими похотьми́ неполе́зными и вре́дными обольсти́вшеся препроводи́хом: а́ще гне́вом и я́ростию подви́гшеся безслове́сною, кого́ бра́та на́шего оскорби́хом, а́ще язы́ком неизбе́жных и стро́потных и кре́пких сете́й объя́хомся: а́ще ко́им чувств на́ших, или́ все́ми, во́лею или́ нево́лею, ве́дуще или́ не ве́дуще, от восхище́ния, или́ поуче́ния безу́мно поползо́хомся: а́ще же лука́выми по́мыслы и су́етными со́весть оскверни́хом: а́ще ли ко́им други́м о́бразом прегреши́хом, от предприя́тия и обы́чая томи́ми зла́го: прости́ нам, и оста́ви вся Всеще́дре, Пребла́же и Многоми́лостиве: и да́руй нам про́чее бо́дрость и си́лу, во е́же твори́ти во́лю Твою́ бла́гу, и благоуго́дну и соверше́нну: да нощна́го и мра́чнаго зла, светови́дным покая́нием преме́ншеся, и я́ко во дни благообра́зно ходя́ще, и очище́ни объяви́мся человеколю́бию Твоему́ недосто́йнии, воспева́юще Тя и велича́юще во ве́ки, ами́нь.

Минея, 27 Июля, Ка́нон свята́го Глас 2 Песнь 1 Ирмос: Во глубине́ постла́ иногда́/ фараони́тское всево́инство преоруже́нная си́ла,/ вопло́щшееся же Сло́во всезло́бный грех потреби́ло есть;/ препросла́вленный Госпо́дь сла́вно бо просла́вися. Припев: Святы́й великому́чениче и целе́бниче Пантелеи́моне, моли́ Бо́га о на́с. Присту́пль усе́рдно ко Христу́,/ пре́жде сконча́ния, е́же о Христе́, мертвеца́ пе́рвее воздви́гл еси́./ Ны́не же мя, пребога́те, умерщвле́на грехо́вным угрызе́нием,/ твои́ми моли́твами, о Пантелеи́моне, оживотвори́. Припев: Святы́й великому́чениче и целе́бниче Пантелеи́моне, моли́ Бо́га о на́с. Возсия́, я́коже звезда́, нося́ в ю́ности ста́ростный и Богому́дрый ра́зум,/ добро́тою же те́ла благоле́пие души́ стяжа́в,/ препросла́вленному Сло́ву яви́лся еси́ прекра́сен. Припев: Святы́й великому́чениче и целе́бниче Пантелеи́моне, моли́ Бо́га о на́с. Умертви́вся ми́ру и во Христа́, блаже́нне, оде́явся ба́нею Креще́ния,/ был еси богоно́сен орга́н и прия́телище де́йства Ду́ху,/ всем угожда́я, всех уврачу́я неду́ги. Сла́ва Отцу́ и Сы́ну и Свято́му Ду́ху. Прему́дрость сестру́ себе́ притвори́в и прича́стник жи́зни ведо́м,/ от нея́ почти́лся еси́/ и венце́м дарова́ний украси́лся еси́,/ Боже́ственныя зари́, блаже́нне, облиста́я све́тлостию. И ны́не и при́сно и во ве́ки веко́в. Ами́нь. Богородичен: Благослове́ньми, Пресвята́я Чи́стая,/ естество́, уда́лено преслуша́нием бы́вшее от Зижди́теля,/ Христа́ ро́ждши, венча́ла еси́ и тле́ния свободи́ла еси́./ Те́мже, ра́дующеся, вси, ве́рнии, Тя ублажа́ем. Песнь 3 Ирмос: Процвела́ есть пусты́ня, я́ко крин, Го́споди,/ язы́ческая неплодя́щая, Це́рковь/ прише́ствием Твои́м,/ в не́йже утвердя́ся мое́ се́рдце. Припев: Святы́й великому́чениче и целе́бниче Пантелеи́моне, моли́ Бо́га о на́с. Словеса́ Ду́ха услы́шав,/ был еси́ я́ко земля́ до́брая и благопло́дная,/ прие́мый се́мя многоце́нно/ и роди́вый, треблаже́нне, спасе́ние душа́м. Припев: Святы́й великому́чениче и целе́бниче Пантелеи́моне, моли́ Бо́га о на́с. Умертви́л еси́ мудрова́ние змии́на угрызе́ния и ду́шу оживи́л еси́,/ богодохнове́нно возроди́вся и Царю́ всех предстоя́. Припев: Святы́й великому́чениче и целе́бниче Пантелеи́моне, моли́ Бо́га о на́с. Посрами́л еси́ безбо́жное мучи́телей повеле́ние и ко Христу́ прите́кл еси́,/ вме́сто всех Сего́ стяжа́в,/ и был еси́, Богому́дре, вели́кий купе́ц. Сла́ва Отцу́ и Сы́ну и Свято́му Ду́ху. Ма́тере твоея́ благоче́стие возлю́бль, сла́вне,/ о́тчее же возненави́дел еси́ безбо́жие многомяте́жное,/ я́ко име́я ра́зум, лу́чшее избра́л еси́. И ны́не и при́сно и во ве́ки веко́в. Ами́нь. Богородичен: Нося́й Боже́ственным манове́нием всю тварь, Госпо́дь/ на руку́ но́сится Твое́ю, Де́во./ Его́же ны́не моли́ изба́вити от бед пою́щия Тя. Седален, глас 4 До́бляго страда́льца благоче́стия Христо́ва восхва́лим све́тло Пантелеи́мона, ве́рнии,/ псалмы́, и пе́нии, и пе́сньми духо́вными,/ и́мже мучи́тельство неви́димаго врага́ си́лою Боже́ственною попра́ся/ и неду́гов исцеле́ние бога́тно от Го́спода дарова́ся/ творя́щим ве́рно Боже́ственный и честны́й пра́здник его́. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Треволне́нии страстны́ми, безсо́вестный аз, обурева́емь, Чи́стая, призыва́ю Тя те́пле:/ да не пре́зриши мене́, окая́ннаго, поги́бнути, бе́здну милосе́рдия ро́ждши,/ ра́зве бо Тебе́ наде́жды не и́мам,/ да не враго́м у́бо обра́дование и смех, наде́явся на Тя, явлю́ся,/ и́бо мо́жеши, ели́ко хо́щеши, я́ко Ма́ти су́щи всех Бо́га. Песнь 4 Ирмос: Прише́л еси́ от Де́вы не хода́тай, ни А́нгел,/ но Сам, Го́споди, вопло́щся,/ и спасл еси́ всего́ мя, челове́ка./ Тем зову́ Ти: сла́ва си́ле Твое́й, Го́споди. Припев: Святы́й великому́чениче и целе́бниче Пантелеи́моне, моли́ Бо́га о на́с. После́дуя Влады́це любо́вию,/ расточи́л еси́ бога́тство ни́щим,/ себе́ обнажа́я к страда́нию,/ е́же и проше́л еси́, ве́чныя наде́жды прови́дев. Припев: Святы́й великому́чениче и целе́бниче Пантелеи́моне, моли́ Бо́га о на́с. Хвале́ния Бо́гу же́ртву прине́сл еси́, я́ве возгнуша́вся и́дольских треб,/ все же шата́ние нечести́вых, страстоте́рпче, попра́л еси́. Припев: Святы́й великому́чениче и целе́бниче Пантелеи́моне, моли́ Бо́га о на́с. Снеда́емым за́вистию и гне́вом бори́мым,/ непобори́мую си́лу сим предста́вил еси́, му́чениче,/ и победи́л еси́ злочести́вое томле́ние, вооружи́вся. Сла́ва Отцу́ и Сы́ну и Свято́му Ду́ху. И́же ста́рца Симео́на рука́ми держи́мый,/ ста́рца тя глаго́лы, Пантелеи́моне, улови́ к Боже́ственному разуме́нию/ и ко мно́гих спасе́нию и избавле́нию. И ны́не и при́сно и во ве́ки веко́в. Ами́нь. Богородичен: Ю́ныя и де́вы во след Тебе́ потеко́ша,/ Де́ву и Отрокови́цу Тя и Ма́терь зря́ще,/ еди́на бо обоя́ во еди́но собрала́ еси́ несказа́нно, Богоневе́сто. Песнь 5 Ирмос: Просвеще́ние во тьме лежа́щих,/ спасе́ние отча́янных, Христе́, Спа́се мой,/ к Тебе́ у́тренюю, Царю́ ми́ра,/ просвети́ мя сия́нием Твои́м,/ ино́го бо ра́зве Тебе́, Бо́га не зна́ю. Припев: Святы́й великому́чениче и целе́бниче Пантелеи́моне, моли́ Бо́га о на́с. Ра́достно по́двиги подъя́л еси́ муче́ния, огражде́н си́лою Боже́ственною,/ и, терпе́нием тве́рдо муче́ния подъе́мля, ра́дуяся, вопия́л еси́:/ ино́го бо, ра́зве Тебе́, бо́га не зна́ем. Припев: Святы́й великому́чениче и целе́бниче Пантелеи́моне, моли́ Бо́га о на́с. На по́двиг борьбы́ вступи́в, блаже́нне, Боже́ственною си́лою превозмо́гл еси́/ безбо́жных нечести́вое тира́нство и неи́стовство идолослуже́ния,/ обле́кся во Христа́, Судию́ и Венча́теля подвиго́в. Припев: Святы́й великому́чениче и целе́бниче Пантелеи́моне, моли́ Бо́га о на́с. Ю́ношеско ты противле́ние име́я и тве́рдостию души́ возставле́ние стяжа́в,/ вся́ку я́зву до́блественне претерпе́л еси́,/ и му́жеским, блаже́нне, умо́м,/ благода́тию Боже́ственнаго Креста́ укрепляемь. Сла́ва Отцу́ и Сы́ну и Свято́му Ду́ху. Несогла́сное отри́ну веща́ние заблу́ждших,/ Небе́сным уче́нием страда́лец и мно́гим спасе́нию пресла́вну бысть вино́вник,/ Твои́м де́йством, Христе́, укрепля́емь. И ны́не и при́сно и во ве́ки веко́в. Ами́нь. Богородичен: Рече́ния прему́дрых, и гада́ния вся, Препросла́вленная,/ и проро́к прорече́ния Тя прообража́ху проявле́нно напосле́док бы́ти Бо́жию Роди́тельницу,/ ины́я бо, ра́зве Тебе́, чи́стыя не зна́ем. Песнь 6 Ирмос: В бе́здне грехо́вней валя́яся,/ неизсле́дную милосе́рдия Твоего́ призыва́ю бе́здну:/ от тли, Бо́же, мя возведи́. Припев: Святы́й великому́чениче и целе́бниче Пантелеи́моне, моли́ Бо́га о на́с. И́долы ле́стныя оплева́л еси́/ и возноси́мую пре́лесть упраздни́л еси́,/ чудоде́йствуя ди́вная и творя́ исцеле́ния, Богому́дре. Припев: Святы́й великому́чениче и целе́бниче Пантелеи́моне, моли́ Бо́га о на́с. Вене́чник показа́лся еси́, всеизря́дне,/ сквозе́ бо огнь ты проше́л еси и во́ду,/ и, на колеси́ протяза́емь,/ пресла́вно погуби́л еси́ безу́мныя. Сла́ва Отцу́ и Сы́ну и Свято́му Ду́ху. Мучи́телей суровство́ низложи́в,/ неудо́бь носи́мая бие́ния теле́сная душе́вною кре́постию,/ пострада́л еси́, Богому́дре, благода́тию. И ны́не и при́сно и во ве́ки веко́в. Ами́нь. Богородичен: Содержа́й концы́ земли́, я́ко Бог,/ Твои́ми, рука́ми, Чи́стая, держи́тся описа́нием те́ла,/ И́же Боже́ственным зра́ком неопи́санный. Кондак, глас 5 Подража́тель сый Ми́лостиваго/ и исцеле́ний благода́ть от Него́ прие́м,/ страстоте́рпче и му́чениче Христа́ Бо́га,/ моли́твами твои́ми душе́вныя на́ша неду́ги исцели́,/ отгоня́ при́сно борца́ собла́зны от вопию́щих ве́рно:/ спаси́ ны, Го́споди. Икос Безсре́бреника па́мять, до́бляго страда́льца, ве́рнаго целе́бника,/ благоче́стно воспое́м, христолю́бцы, да прии́мем ми́лость,/ па́че же оскве́рншии, я́коже и аз, своя́ хра́мы,/ душа́м бо и те́лом, возлю́бленнии, исцеле́ния подава́ет./ Потщи́мся у́бо, ве́рная бра́тия, в сердца́х на́ших име́ти его́ кре́пость,/ избавля́юща от ле́сти вопию́щия:/ спаси́ ны, Го́споди. Песнь 7 Ирмос: Те́лу злато́му прему́дрыя де́ти не послужи́ша,/ и в пла́мень са́ми поидо́ша,/ и бо́ги их обруга́ша,/ среди́ пла́мене возопи́ша, и ороси́ я́ А́нгел:/ услы́шася уже́ уст ва́ших моли́тва. Припев: Святы́й великому́чениче и целе́бниче Пантелеи́моне, моли́ Бо́га о на́с. Зако́нно стражда́ и победи́в врага́,/ приста́нище благоути́шно су́щим в мо́ри, сла́вне, обурева́емым был еси́,/ свет же су́щим во тьме жития́,/ и пе́ти научи́л еси́:/ благослове́н Бог оте́ц на́ших. Припев: Святы́й великому́чениче и целе́бниче Пантелеи́моне, моли́ Бо́га о на́с. Блаже́н еси́, и добро́ тебе́ есть ны́не, преблаже́нне,/ восприи́мшему пребога́тную и блаже́нную наде́жду твою́,/ угото́ванную ве́рою Го́сподеви зову́щим:/ благослове́н Бог оте́ц на́ших. Сла́ва Отцу́ и Сы́ну и Свято́му Ду́ху. Святы́х ду́ши, и пра́ведных ли́цы,/ и Безпло́тных чи́ни А́нгельстии прия́ша слико́вника тя, блаже́нне,/ мече́м бо усе́чен быв во главу́, пое́ши, ра́дуяся:/ благослове́н Бог оте́ц на́ших. И ны́не и при́сно и во ве́ки веко́в. Ами́нь. Богородичен: Ору́жие, е́же пре́жде дре́ва живо́тнаго нас отлучи́вшее,/ ны́не, обраща́емо, прие́млет зна́менавшияся Кро́вию, из ребр Сы́на Твоего́ изше́дшею, Пренепоро́чная./ Благослове́на еси́, Бо́га пло́тию ро́ждшая. Песнь 8 Ирмос: В пещь о́гненную ко отроко́м евре́йским снизше́дшаго/ и пла́мень в ро́су прело́жшаго Бо́га/ по́йте, дела́, я́ко Го́спода,/ и превозноси́те во вся ве́ки. Припев: Святы́й великому́чениче и целе́бниче Пантелеи́моне, моли́ Бо́га о на́с. Благоприя́тное твоея́ хи́трости душе́вное ослепле́ние о́тчее исцеля́ет,/ подаю́щее свет ве́рою, преблаже́нне, притека́ющим/ и ко Спа́су Христу́ наставля́ющее. Припев: Святы́й великому́чениче и целе́бниче Пантелеи́моне, моли́ Бо́га о на́с. За Христа́ закла́н быв, к ве́чней жи́зни премину́л еси́/ и Богозва́нен яви́лся еси́ именова́нием Бо́жиим, Богому́дре./ Тем почита́ем тя и превозно́сим Христа́ во ве́ки. Сла́ва Отцу́ и Сы́ну и Свято́му Ду́ху. Вити́йское отложи́в лю́тое му́дрых глумле́ние,/ Христо́вым призыва́нием боле́зненных страсте́й коре́ния посека́еши,/ исцеля́я превознося́щия Христа́ во ве́ки. И ны́не и при́сно и во ве́ки веко́в. Ами́нь. Богородичен: Безсме́ртия зарю́ ве́мы исто́чника Тя, Богоро́дице,/ я́ко ро́ждшую Сло́во Безсме́ртнаго Отца́, всех сме́рти избавля́ющаго,/ превознося́щих Его́ во ве́ки. Песнь 9 Ирмос: Безнача́льна Роди́теля Сын, Бог и Госпо́дь,/ вопло́щся от Де́вы, нам яви́ся,/ омраче́нная просвети́ти, собра́ти расточе́нная./ Тем Всепе́тую Богоро́дицу велича́ем. Припев: Святы́й великому́чениче и целе́бниче Пантелеи́моне, моли́ Бо́га о на́с. Преста́вился еси́, ра́дуяся, к жела́нию коне́чному,/ иде́же всели́вся, преблаже́нне, блаже́нный коне́ц прия́ти вои́стинну сподо́бился еси́,/ сый со Влады́кою твои́м во ве́ки безконе́чныя. Припев: Святы́й великому́чениче и целе́бниче Пантелеи́моне, моли́ Бо́га о на́с. Жела́ние получи́л еси́ и любве́ твоея́ исполне́ние,/ ка́плющей еще́ те́плей кро́ви, за Христа́ излия́вшейся,/ от Него́же, ра́дуяся, прия́л еси́ венцы́ по́двигов твои́х. Припев: Святы́й великому́чениче и целе́бниче Пантелеи́моне, моли́ Бо́га о на́с. Льво́в уста́ и звере́й зия́ния, я́коже Дании́л дре́вле, ты обузда́л еси́,/ весть бо стыде́тися, му́чениче, доброде́тели и безслове́сное естество́./ Те́мже тя, пресла́вне, соше́дшеся, ублажа́ем. Сла́ва Отцу́ и Сы́ну и Свято́му Ду́ху. Бога́тную бла́гость тебе́ Христо́с да́рует,/ сокро́вище исцеле́ний нам да́руя/ и всеми́лостива изволе́нием тя пода́в вся́кому скорбя́щему,/ и приста́нище ти́хое, и предста́теля, и защи́тителя. И ны́не и при́сно и во ве́ки веко́в. Ами́нь. Богородичен: Я́ко руно́, Всенепоро́чная, до́ждь Небе́сный во утро́бе заче́нши,/ нам родила́ еси́ тишину́ Даю́щаго/ я́ко Бо́га Того́ пою́щим/ и Тя, Всепе́тую Богоро́дицу, пропове́дающим. Светилен Ми́лостивную твою́ ду́шу прови́де Бог, Пантелеи́мона тя пропове́да,/ безсре́брено бо тре́бующим исцеле́ние источа́еши, свя́те,/ мучи́телей свире́пство терпе́нием твои́м победи́вый. Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Богородичен: Пантелеи́моне всему́дре, честны́х безсре́бреников свяще́нная красото́/ и Боже́ственных му́чеников великопобе́дная сла́во,/ свы́ше побе́ды испроси́ правосла́вным, и ми́ру мир,/ и ве́рно сла́вящим тя, свя́те, спасе́ние,/ с Богоро́дицею о всех моля́ся.

Во плоти Ангел,/ пророков основание,/ вторый Предтеча пришествия Христова, Илия славный,/ свыше пославый Елиссееви благодать/ недуги отгоняти/ и прокаженныя очищати,// темже и почитающим его точит исцеления.

Премудростию Божественных твоих словес, Иустине,/ Церковь Божия вся украсившися,/ жития твоего светлостию мир освещает,/ излияния же ради крове венец прием/ и со Ангелы предстоя Христу,// моли непрестанно о всех нас.

В мире радуешися, Симеоне Иерусалимский,/ любезно Христу Богу,/ тело душевное чисто сохранив,/ претерпевши страсть телесную, долготерпеливе, крепко,/ и в конец на кресте распят бысть./ Ты бо, Истинному Рачителю подобяся,/ и от мира скоро отлучися,/ лютыя язвы на себе понесе/ и молишися о душах наших.

Апостолов сопрестольник и святителей украшение/ был еси, блаженне,/ мученически прославився,/ возсиял еси, якоже солнце, всех просвещая,/ Антипо священне,/ разрушил еси безбожия нощь глубокую./ Сего ради тя почитаем,/ яко Божественнаго суща священомученика// и целеб подателя.

Измлада явистеся святии,/ Богомудре Феодоре и блаженне Давиде с Константином славным,/ Божественный сосуди, избранный Богови./ Ныне же источаете нам многа исцеления от честных мощей ваших,/ вся ереси потопляюще,/ и спасающе присно град свой,/ и всех верных сохраняюще невредимо/ от видимых и невидимых враг./ Темже верою молим вас, святии:/ молите Христа Бога/ в мире сохранитися нам и спасти души наша.

Восприемши радостно честныя твоя мощи пречистая церковь,/ в тоже честно вносимы множеством священномонахов и князи благоверными,/ и яже приемши, яко сокровище многоценное./ Темже и мы ныне, твоей ограды словесныя овцы,/ окрест раки твоея предстояще,/ любезно вопием ти:/ не забуди чад твоих, отче,/ ихже мудре собрал и возлюбил еси,/ яко да зовем ти:/ радуйся, святителю Арсение, пастырю и учителю наш.

Ветрилом креста душевный корабль окормив,/ житейская красная оставил еси,/ и от мирскаго мятежа изшед,/ плотския похоти воздержанием многим, отче, умертвил еси,/ пощением и слезами, молитвами и песньми непрестанно прилепляяся Богу:/ темже и жилище достойно Духа Пресвятаго показался еси./ Моли, Поликарпе преподобне, Христа Бога/ оставление прегрешений даровати нам и велию милость.

Красоту мира сего, княжение и славу/ яко временно помышляя,/ и сего ради благочестно в мире пожил еси,/ блаженне княже Романе,/ милостынею и молитвами Богу угодив,/ и по преставлении своем чудес дар приим от Христа Бога,/ и светильник явися пресветлый,/ просвещая своими чудесы, приходящим к тебе с верою здравие подавши и от бед избавлявши./ Тем же Христова Церковь песньми славит тя,/ благочестивый княже Романе,/ граду своему Углечу великий поборниче.

Святителю Христу Богу возлюбленне,/ правило веры и образ милосердия людем был еси,/ бдением же, постом и молитвою,/ яко светильник пресветлый, просиял еси/ и прославлен от Бога явился еси:/ телом убо в нетлении почивая,/ духом же Престолу Божию предстоя,/ чудеса преславная источаеши./ Моли Христа Бога,/ да утвердит нас в Православии и благочестии// и спасет души наша.

Веселия ходатай нам наста/ светоносный днесь страстотерпец праздник,/ егоже совершающе, славим в Вышних сущаго Господа.

Вся красная мира сего/ и тленное богатство нивочтоже вменив,/ обогатился еси многими чудесы и знамении от Христа Бога,/ Емуже в веселии предстоя,/ поминай нас, чтущих любовию память твою, да зовем ти:/ радуйся, Николо пречудне.

Первый учитель прежде темным языческим племенам,/ первый возвеститель им пути спасительнаго,/ апостольски потрудивыйся в просвещении Сибири и Америки,/ святителю отче наш Иннокентие,/ Владыку всех моли/ мир вселенней даровати/ и душам нашим велию милость.

Пустынный житель, и в телеси Ангел,/ и чудотворец явился еси, Богоносе отче наш Сисое,/ постом, бдением, молитвою Небесная дарования приим,/ исцеляеши недужныя и души верою притекающих ти./ Слава Давшему тебе крепость,/ слава Венчавшему тя,/ слава Действующему тобою всем исцеления.