Молитвы

Мира красоту и яже в нем тленная оставив, преподобне,/ в Саровскую обитель вселился еси/ и, тамо ангельски пожив,/ многим путь был еси ко спасению,/ сего ради и Христос тебе, отче Серафиме, прослави/ и даром исцелений и чудес обогати./ Темже вопием ти:// радуйся, Серафиме, преподобне отче наш.

О, всехвальная мученице Фомаидо! За чистоту супружества даже до крове подвизавшися и целомудрия ради душу свою положивши, достойна пред Господем обрелася еси, во еже в лице преподобных дев почтенней тебе быти. Услыши нас молящихся тебе, и якоже древле боримии от плоти целительницу тя имеяху, по дарованной тебе от Бога благодати, сице и ныне прибегающим ко предстательству твоему подаждь отраду и свобождение от плотския брани, и целомудренное житие и незазорное в супружестве и девстве пребывание твоими богоприятными молитвами всем исходатайствовати потщися, яко да телеса наша храм живущаго в нас Святаго Духа будут. О, преизбранная в женах и верная рабо Христова! Помози нам, да не погибнем со страстьми и похотьми нашими, но да управимся умом нашим и укрепимся сердцем нашим во всяком благочестии и чистоте, славяще твою помощь и предстательство, благодать же и милость Триединаго Бога, Отца и Сына и Святаго Духа, во веки веков. Аминь.

Яко апостолом единонравнии/ и словенских стран учителие,/ Кирилле и Мефодие богомудрии,/ Владыку всех молите,/ вся языки словенския утвердити в Православии и единомыслии,// умирити мир и спасти души наша.

Одеждами от кровей украшался,/ Господеви предстоиши, Царю сил, Христофоре приснопамятне,/ отонудуже со Безплотными и мученики поеши/ трисвятым и страшным сладкопением./ Темже молитвами твоими спасай стадо твое.

Священия помазанием и мучения кровию украсистеся,/ славне Ианнуарие и Феодоре,/ и сияете всюду, в Вышних ликующе,/ и нас назирайте, в храм ваш пришедшия/ и в нем непрестанно зовущия:// всех нас соблюдите, моляще Человеколюбца Бога.

Божественнаго верно Евтихия вси поюще, людие,/ любовию да ублажим, яко пастыря велика и служителя,/ и учителя премудра, и прогонителя ересей,// молит бо Господа о всех нас.

Многообразныя раны претерпел еси/ и венец прием от Христа Бога,/ Емуже о нас молися, блаженне Епимаше,/ верно совершающих память твою,// да спасет души наша.

Иже от юности Христовы любве/ прилепившеся усердно, святии/ законы и оправдания Того сохраняюще,/ отнюдуже и чудесными даровании обогатистеся,/ исцеления источаете иже верою вас почитающих,/ темже молите Христа Бога/ спастися душам нашим.

Отечества, преподобне, и всего мирскаго мятежа уклонитися возжелел еси,/ и, в пустыню вселився,/ тамо во блаженнем безмолвии жестокое житие показал еси,/ и чада послушания и смирения в нем возрастил еси./ Сего ради, дерзновение стяжав ко Святей Троице,/ еже молитися, Богоблаженне, о нас, чадех своих, ихже собрал еси,/ и о всех правоверных, да зовем ти:/ радуйся, отче Мартирие, безмолвия пустыннаго любитель.

Воина Христова храбраго,/ щитом преподобия обложшагося/ и воев невидимых крепко победивша,/ приидите, вернии, восхвалим,/ Тита крепкодушнаго и возопиим:/ прииди, святе, к нам и никтоже озлобит ны.

Чудес приял еси Божественную благодать,/ богомудре священне Парфение, чудотворче богоносе,/ вся верных страсти очищая,/ духи лукавства, отче, изгоняя,/ сего ради тя воспеваем,// яко велия таинника Божия благодати.

Предстательство христиан непостыдное,/ ходатайство ко Творцу непреложное,/ не презри грешных молений гласы,/ но предвари, яко Благая, на помощь нас,/ верно зовущих Ти:/ ускори на молитву и потщися на умоление,/ предстательствующи присно, Богородице, чтущих Тя.

Взбранному и дивному нашея земли чудотворцу,/ днесь любовию тебе притекаем, песнь, богоносе, плетуще,/ яко имея дерзновение ко Господу,/ многообразных избави нас обстояний, да зовем ти:// радуйся, утверждение граду нашему.

Яко священника превелиикаго и апостолов совсельника,/ Церковь почитает тя, вся верных, Аверкие:/ юже твоими молитвами соблюдай, блаженне,/ непобедиму и необуреваему от всякия ереси, и нескверну,/ яко приснопамятный.

Истины проповедник и чудотворец дивен показался еси,/ сирот отец и нищих заступник,/ бодрый пастырь словеснаго стада, бесом страшен,/ всех убо от тех нападений заступай, вопиющих ти:/ Аверкие отче наш,/ моли Христа Бога,/ да спасет души наша.

Православия наставницы,/ благочестия и чистоты учителие,/ Церкве Вологодский богодарованное украшение,/ молите Милостиваго Бога,/ да вашим предстательством подастся благодать и мир стране нашей/ и душам нашим спасение.

Яко безплотным единожитель/ и всем преподобным сопричастник,/ постническими труды и бдении молитвенными непрестанно себе вооружая, мудре,/ тем и дар приял еси от Бога/ исцеляти недуги и прогоняти бесы./ Того ради вопием ти:/ радуйся, отче наш Сисое преподобне.

Крилами богоразумия вперивши твой ум,/ возлетела еси превыше видимыя твари,/ взыскавши Бога и Творца всяческих,/ и, Того обретши, паки рождение Крещением прияла еси,/ древа животнаго наслаждающися, нетленна во веки пребываеши,// Ольго приснославная.

Благочестия ревнителю и рачителю,/ иноков и столпников похвале,/ святителю Туровския паствы, преславне,/ златословесный учителю,/ светлым учением богоразумия своего просветивый концы русския,/ в молитве к Богу благодатный грешников споспешниче,/ Кирилле Богомудре, моли Христа Бога/ утвердитися нам, соотечественником твоим,/ во Православии, благочестии и единомыслии.

С высоты приим благодать Духа,/ риторская плетения разрушил еси, апостоле,/ и, языки вся уловив, Марко всеславне,/ твоему Владыце привел еси,// Божественное проповедав Евангелие.