Октоих, Глас 3.7, Неделя, Канон воскресный
Глас 3
Песнь 1
Ирмос: Во́ды дре́вле, ма́нием Боже́ственным, во еди́но со́нмище совокупи́вый, и раздели́вый мо́ре изра́ильтеским лю́дем, Се́й Бо́г на́ш, препросла́влен е́сть: Тому́ Еди́ному пои́м, я́ко просла́вися.
Припев: Сла́ва, Го́споди, свято́му воскресе́нию Твоему́.
И́же зе́млю осуди́в, престу́пльшему по́том изнести́ плода́ те́рние, от те́рния вене́ц из руки́ законопресту́пныя, Се́й Бо́г на́ш, пло́тски прие́мый, кля́тву разруши́л е́сть: я́ко просла́вися.
Сла́ва Отцу́ и Сы́ну и Свято́му Ду́ху.
Победи́тель и Одоле́тель сме́рти, и́же сме́рти убоя́вся, яви́ся: стра́стную бо пло́ть одушевле́нную прие́м, Се́й Бо́г на́ш, и бра́вся с мучи́телем, вся́ совоскреси́: я́ко просла́вися.
И ны́не и при́сно и во ве́ки веко́в. Ами́нь.
Богородичен: И́стинную Богоро́дицу вси́ язы́цы сла́вят Тя́, без се́мене ро́ждшую: соше́д бо во утро́бу освяще́нную Твою́, Се́й Бо́г на́ш, Е́же по на́м осуществова́ся, Бо́г же и Челове́к из Тебе́ роди́ся.
Песнь 3
Ирмос: И́же от не су́щих вся́ приведы́й, Сло́вом созида́емая, соверша́емая Ду́хом, Вседержи́телю Вы́шний, в любви́ Твое́й утверди́ мене́.
Припев: Сла́ва, Го́споди, свято́му воскресе́нию Твоему́.
Кресто́м Твои́м постыде́ся нечести́вый, соде́ла бо я́му, ю́же ископа́, впаде́: смире́нных же вознесе́ся, Христе́, ро́г, во Твое́м воскресе́нии.
Сла́ва Отцу́ и Сы́ну и Свято́му Ду́ху.
Благоче́стия пропове́дание язы́ком, я́ко вода́ покры́ моря́, Человеколю́бче: воскре́с бо от гро́ба, Тро́ический откры́л еси́ све́т.
И ны́не и при́сно и во ве́ки веко́в. Ами́нь.
Богородичен: Пресла́вная глаго́лана бы́ша о Тебе́, Гра́де Одушевле́нный при́сно Ца́рствующаго: Тобо́ю бо, Влады́чице, су́щым на земли́ Бо́г спожи́л е́сть.
Седален, глас 3
Христо́с от ме́ртвых воста́, нача́ток усо́пших: перворожде́н тва́ри, и Соде́тель все́х бы́вших, истле́вшее естество́ ро́да на́шего в себе́ Само́м обнови́. Не ктому́ сме́рте облада́еши: и́бо все́х Влады́ка держа́ву твою́ разруши́. Сти́х: Воскресни́, Го́споди Бо́же мо́й, да вознесе́тся рука́ Твоя́, не забу́ди убо́гих Твои́х до конца́. Пло́тию сме́рти вкуси́в, Го́споди, го́ресть сме́рти пресе́кл еси́ воста́нием Твои́м, и челове́ка на ню́ укрепи́л еси́, пе́рвыя кля́твы одоле́ние призыва́я: Защи́тниче жи́зни на́шея, Го́споди, сла́ва Тебе́.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Богородичен: Красоте́ де́вства Твоего́, и пресве́тлой чистоте́ Твое́й, Гаврии́л удиви́вся, вопия́ше Ти́, Богоро́дице: ку́ю Ти́ похвалу́ принесу́ досто́йную; что́ же возъимену́ю Тя́; недоумева́ю и ужаса́юся. Те́мже я́ко повеле́н бы́х, вопию́ Ти: ра́дуйся, Благода́тная.
Песнь 4
Ирмос: Положи́л еси́ к на́м тве́рдую любо́вь, Го́споди, Единоро́днаго бо Твоего́ Сы́на за ны́ на сме́рть да́л еси́. Те́мже Ти́ зове́м благодаря́ще: сла́ва си́ле Твое́й, Го́споди.
Припев: Сла́ва, Го́споди, свято́му воскресе́нию Твоему́.
Я́звы, Христе́, и ра́ны ми́лостивно подъя́л еси́, доса́ду по лани́тома ударе́ний терпя́, и долготерпели́вне оплева́ния нося́, и́миже соде́лал еси́ мне́ спасе́ние: сла́ва си́ле Твое́й, Го́споди.
Сла́ва Отцу́ и Сы́ну и Свято́му Ду́ху.
Те́лом сме́ртным животе́, сме́рти причасти́лся еси́, стра́сти ра́ди ни́щих, и воздыха́ния убо́гих Твои́х: и растли́в тле́ющаго, Препросла́вленне, все́х совоскреси́л еси́, я́ко просла́вися.
И ны́не и при́сно и во ве́ки веко́в. Ами́нь.
Богородичен: Помяни́, Христе́, е́же стяжа́л еси́ ста́до стра́стию Твое́ю: Препросла́вленныя Твоея́ Ма́тере ми́лостивныя мольбы́ прие́м, и посети́в озло́бленное, изба́ви си́лою Твое́ю, Го́споди.
Песнь 5
Ирмос: К Тебе́ у́тренюю, все́х Творцу́, преиму́щему вся́к у́м ми́рови, зане́ све́т повеле́ния Твоя́: в ни́хже наста́ви мя́.
Припев: Сла́ва, Го́споди, свято́му воскресе́нию Твоему́.
Судии́ непра́ведному, евре́йскою за́вистию пре́дан бы́в, Всеви́дче, и все́й пра́ведне судя́й земли́, Ада́ма дре́вняго изба́вил еси́ осужде́ния.
Сла́ва Отцу́ и Сы́ну и Свято́му Ду́ху.
Тво́й ми́р це́рквам Твои́м, Христе́, непобеди́мою си́лою Креста́ Твоего́, из ме́ртвых воскресы́й пода́ждь, и спаси́ ду́шы на́шя.
И ны́не и при́сно и во ве́ки веко́в. Ами́нь.
Богородичен: Ски́ниа Свята́я, и простра́ннейши небе́с, я́ко И́же во все́й тва́ри Невмести́маго Сло́ва Бо́жия прие́мши, Еди́на яви́лася еси́, Присноде́во.
Песнь 6
Ирмос: Бе́здна после́дняя грехо́в обы́де мя́, и исчеза́ет ду́х мо́й: но простры́й, Влады́ко, высо́кую Твою́ мы́шцу, я́ко Петра́ мя, Упра́вителю, спаси́.
Припев: Сла́ва, Го́споди, свято́му воскресе́нию Твоему́.
Бе́здна ми́лости и щедро́т обы́де мя́, благоутро́бным сни́тием Твои́м: вопло́щься бо, Влады́ко, и бы́в в ра́бии зра́це обожи́л еси́, с Собо́ю сопросла́вив.
Сла́ва Отцу́ и Сы́ну и Свято́му Ду́ху.
Умерщвле́ние подъя́т умертви́тель, умерщвле́наго оживле́нно ви́дя: Твоего́ воскресе́ния си́и су́ть, Христе́, о́бразы, и стра́сти Твоея́ Пречи́стыя победи́тельная.
И ны́не и при́сно и во ве́ки веко́в. Ами́нь.
Богородичен: Пречи́стая, я́же Еди́на Созда́телю и челове́ком, па́че ума́ исхода́таившая, Сы́на Твоего́ ми́лостива прегре́шшым рабо́м Твои́м, и побо́рника бы́ти, помоли́ся.
Кондак, глас 3
Воскре́сл еси́ дне́сь из гро́ба, Ще́дре, и на́с возве́л еси́ от вра́т сме́ртных: дне́сь Ада́м лику́ет, и ра́дуется Е́ва, вку́пе же и проро́цы с патриа́рхи воспева́ют непреста́нно Боже́ственную держа́ву вла́сти Твоея́.
Икос
Не́бо и земля́ дне́сь да ликовству́ют, и Христа́ Бо́га единому́дренно да воспева́ют, я́ко у́зники от гробо́в воскреси́. Сра́дуется вся́ тва́рь, принося́щи досто́йныя пе́сни Созда́телю все́х, и Изба́вителю на́шему: я́ко челове́ки из а́да дне́сь я́ко Жизнода́тель совозве́д, на небеса́ совозвыша́ет, и низлага́ет вра́жия возноше́ния, и врата́ а́дова сокруша́ет Боже́ственною держа́вою вла́сти Своея́.
Песнь 7
Ирмос: Я́коже дре́вле благочести́выя три́ о́троки ороси́л еси́ в пла́мени халде́йстем, све́тлым Божества́ огне́м и на́с озари́, Благослове́н еси́, взыва́ющыя, Бо́же оте́ц на́ших.
Припев: Сла́ва, Го́споди, свято́му воскресе́нию Твоему́.
Раздра́ся церко́вная све́тлая катапета́сма, в распя́тии Соде́теля, сокрове́нную в Писа́нии явля́ющи ве́рным и́стину, благослове́н еси́, зову́щым, Бо́же оте́ц на́ших.
Сла́ва Отцу́ и Сы́ну и Свято́му Ду́ху.
Прободе́нным Твои́м Ре́бром, ка́плями Богото́чныя Животворя́щия Кро́ве, Христе́, смотри́тельно ка́плющия на зе́млю, су́щих от земли́ возсозда́л еси́, благослове́н еси́, зову́щих, Бо́же оте́ц на́ших.
И ны́не и при́сно и во ве́ки веко́в. Ами́нь.
Троичен: Ду́ха Блага́го со Отце́м просла́вим, и с Сы́ном Единоро́дным, Еди́но в Трие́х ве́рнии чту́ще Нача́ло, и Еди́но Божество́: благослове́н еси́, зову́ще, Бо́же оте́ц на́ших.
Песнь 8
Ирмос: Нестерпи́мому огню́ соедини́вшеся, богоче́стия предстоя́ше ю́ноши, пла́менем же неврежде́ни, Боже́ственную пе́снь поя́ху: благослови́те вся́ дела́ Госпо́дня Го́спода, и превозноси́те во вся́ ве́ки.
Припев: Сла́ва, Го́споди, свято́му воскресе́нию Твоему́.
Раздра́ся церко́вная све́тлость, егда́ кре́ст Тво́й водрузи́ся на ло́бнем, и тва́рь преклоня́шеся стра́хом, воспева́ющи: благослови́те вся́ дела́ Госпо́дня Го́спода, по́йте и превозноси́те Его́ во ве́ки.
Сла́ва Отцу́ и Сы́ну и Свято́му Ду́ху.
Воскре́сл еси́, Христе́, из гро́ба, и па́дшаго прельще́нием, дре́вом испра́вил еси́ Боже́ственною си́лою, зову́ща и глаго́люща: благослови́те вся́ дела́ Госпо́дня Го́спода, по́йте и превозноси́те Его́ во ве́ки.
И ны́не и при́сно и во ве́ки веко́в. Ами́нь.
Богородичен: Хра́м Бо́жий яви́лася еси́, Вмести́лище одушевле́нное, и Ковче́г: Творца́ бо челове́ком, Богороди́тельнице Пречи́стая, примири́ла еси́, и досто́йно вся́ дела́ пое́м Тя́, и превозно́сим во вся́ ве́ки.
Песнь 9
Ирмос: Но́вое чу́до и боголе́пное, деви́ческую бо две́рь затворе́ную я́ве прохо́дит Госпо́дь, на́г во вхо́де, и Плотоно́сец яви́ся во исхо́де Бо́г, и пребыва́ет Две́рь затворе́на: Сию́ неизрече́нно, я́ко Богома́терь велича́ем.
Припев: Сла́ва, Го́споди, свято́му воскресе́нию Твоему́.
Стра́шно е́сть зре́ти Тебе́, Творца́, на дре́ве воздви́жена, Сло́ве Бо́жий, пло́тски же стра́ждуща Бо́га за рабы́, и во гро́бе бездыха́нна лежа́ща, ме́ртвыя же из а́да разреши́вша: те́мже Тя́, Христе́, я́ко Всеси́льна велича́ем.
Сла́ва Отцу́ и Сы́ну и Свято́му Ду́ху.
Из тли́ сме́ртныя спа́сл еси́, Христе́, пра́отцы, положе́н бы́в во гро́бе ме́ртв, и живо́т процве́л еси́, ме́ртвыя воскреси́в, руководи́в естество́ челове́ческое ко све́ту, и в Боже́ственное обле́к нетле́ние. Те́мже исто́чника Тя́ све́та при́сно жива́го велича́ем.
И ны́не и при́сно и во ве́ки веко́в. Ами́нь.
Богородичен: Хра́м и Престо́л яви́лася еси́ Бо́жий, во́ньже всели́ся И́же в вы́шних сы́й, рожде́йся неискусому́жно, Всечи́стая, пло́ти Твоея́ не отве́рз вся́чески врата́. Те́мже непреста́нными, Чи́стая, моли́твами Твои́ми, язы́ки ва́рварския ско́ро до конца́ покори́.