Молитвы

Господи Иисусе Христе Боже наш! Ты заповедал еси нам воздавати всем должное, егда рекл еси: "Якоже хощете да творят вам человецы, и вы творите им такожде". Что убо сотворю, Господи, что воздам ныне, во мнозе благотворившему(-шей) мне, но уже отшедшему (-шей) от земли живых рабу Твоему (рабе Твоей)! У Тебе, Господи, у Тебе, богатый в милостех Боже наш, всякое воздаяние есть. Сего ради молю Тя, Подателю благих, приими от мене сие малое моление мое, вкупе же и благодарение за все благодеяния Твои, дарованныя мне в приснопоминаемом(-мой) усопшем(-шей) рабе Твоем (Твоей). Молю Тя, Боже, Спасителю мой призри с высоты Святаго жилища Твоего на молитву мою и помяни милостию Твоею отшедшаго(-ую) к Тебе раба Твоего (рабу Твою) (имя), толико благодеявшаго(-ую) ми; яви ему (ей) силу благости Твоей и неизреченное Твое милосердие в прощении и оставлении грехов и покрый его (ю) оправданием Твоим; подаждь ему, Господи, Царство Небесное и вечный покой, яко помогавшему(-шей) ми и ближним моим в нуждех и лишениях, в скорбех и болезнех и подававшему (-шей) ми благая от избытков даров Твоих. Молюся убо Тебе, Благость вечная, воздай ему (ей) за благотворения его (ея) сторицею - за земныя блага небесными, за временныя вечными, и подаждь ему (ей) вечный покой; и яко научавшему(-шей) мя делам милосердия, кротости, смиренномудрию, терпению, воздержанию, вселявшему (-шей) в мя дух мира и любви христианской, подававшему (-шей) ми благие советы и благие образы христианскаго жития, даруй, Премилосердый Господи, достойно узрети невечерний свет Твоего Царствия и насыти его (ю) от небесныя трапезы Твоея, яко во имя Твое препитавшаго(-ую) жаждущую и алчущую мою душу. Помяни, Господи, и всех отшедших к Тебе, в вере и добродетельном житии подвизавшихся во славу Пресвятаго Имени Твоего, добро творивших сирым, нищим и убогим; упокой в лоне Авраама, Исаака, Иакова, посещавших недугующих, страждущих и в темнице заключенных; приими в чертог Твой принимавших в дому своем странна и пришельца. Помяни, Господи, во Царствии Твоем усопших рабов Твоих, выну предстоявших и молившихся Тебе теплою молитвою о нашем душевном спасении и благоденствии, о сохранении и благостоянии святых Твоих церквей, о мире и спасении всего мира; упокой со святыми Твоими рабов Твоих, молившихся о обращении к Тебе заблудших и отпадших от веры и о спасении погибающих во грехах. Молю Тя, Христе Боже наш, молю Тя, яко Судию, имущаго судити мирови, воздай им по человеколюбию Твоему, и сподоби их услышати вожделенный оный глас: "Приидите, благословеннии Отца Моего, и наследуйте уготованное вам Царствие от сложения мира", и да внидут в онь, хваля и прославляя Твое великолепое имя в безконечные веки. Аминь.

Услыши недостойную молитву нас, грешных (имена), избави нас, преподобная мати, от страстей, воюющих на души наша, от всякия печали и находящия напасти, от внезапныя смерти и от всякого зла, в час же разлучения души и тела отжени, святая угодница, всякую лукавую мысль и лукавые бесы, яко да приимет души наша с миром в место светло Христос Господь Бог наш, яко от него очищение грехов, и Той есть спасение душ наших, Емуже подобает всякая слава, честь; и поклонение со Отцем и Святым Духом во веки веков. Аминь.

О, великий угодниче Божий и чудотворче, святый блаженный Прокопие! Тебе молимся и тебе просим: молися о нас ко всемилостивому Богу и Спасу нашем Иисусу Христу, да проявит милость Свою к нам недостойным и дарует нам вся к животу и благочестию потребная: веры убо и любве преспеяние, благочестия умножение, мира утверждение, земли плодоносие, воздухов благорастворение и во всем благом благое поспешение. Вся грады и веси Российския предстательством твоим соблюди невредимы от всякаго зла. Всем православным христианом, тя молитвенно призывающим, комуждо по нуждам их, потребная даруй: болящим исцеление, скорбящим утешение, бедствующим поможение, унывающим ободрение, нищим снабдение, сирым призрение. Нам же всем дух покаяния и страха Божия испроси, да благочестно временное сие житие скончавше, сподобимся благую христианскую кончину получити и царствие небесное со избранными Божиими наследовати. Ей, праведниче Божий! Не посрами упования нашего, еже на тя смиренно возлагаем, но буди нам помощник и заступник в жизни, при смерти и по смерти нашей; да, твоим предстательством спасение улучивше, купно с тобою прославим Отца и Сына и Святаго Духа, и твое крепкое заступление о нас, во веки веков. Аминь.

О, мира Заступнице, Мати Всепетая! Со страхом, верою и любовию припадающе пред честною иконою Твоею Державною, усердно молим Тя: не отврати лица Твоего от прибегающих к Тебе, умоли, милосердная Мати Света, Сына Твоего и Бога нашего, Сладчайшаго Господа Иисуса Христа, да сохранит в мире страну нашу, да утвердит державу нашу в благоденствии, и избавит нас от междоусобныя брани, да укрепит Святую Церковь нашу Православную, и незыблему соблюдет ю от неверия, раскола и ересей. Не имамы иныя помощи, разве Тебе, Пречистая Дево. Ты еси всесильная христиан заступница пред Богом, праведный гнев Его умягчая. Избави всех с верою Тебе молящихся от падений греховных, от навета злых человек, от глада, скорбей и болезней, даруй нам дух сокрушения, смирение сердца, чистоту помышлений, исправление греховныя жизни и оставление согрешений наших; да вси, благодарственне воспевающе величия Твоя, сподобимся Небеснаго Царствия, и тамо со всеми святыми прославим пречестное и великолепое имя в Троице славимаго Бога, Отца и Сына и Святаго Духа. Аминь.

О, святый великий Архангеле Рафаиле, престолу Божию предстояй! Ты благодатию, от Всемогущаго Врача душ и телес наших, тебе данною, праведнаго мужа Товита от слепоты телесныя исцелил еси, и сына его Товию, спутешествуя ему, от злаго духа сохранил еси. Всеусердно молю тя: буди мне путеводитель в жизни моей. Cохрани от всех видимых и невидимых враг, исцели душевныя и телесныя болезни моя, управи жизнь мою к покаянию во гресех и ко творению добрых дел. О, святый великий Рафаиле Архангеле! Услыши мене грешнаго, молящагося тебе, и сподоби в здешней и будущей жизни благодарити и славити общаго Создателя нашего в безконечныя веки веков. Аминь.  

О, Пресвята́я Влады́чице, Де́во Богоро́дице, Засту́пнице на́ша блага́я и ско́рая! Воспева́ем Ти вси благода́рственная за чу́дная дела́ Твоя́. Песносло́вим от лет дре́вних неотъе́млемое заступле́ние Твое́ гра́ду Москве́ и стране́ на́шей, чудотво́рным о́бразом Твои́м Донски́м всегда́ явля́емое: в бе́гство обраща́ются полцы́ чужди́х, гра́ди и ве́си невреди́ми сохраня́ются, лю́дие же от лю́тыя сме́рти избавля́ются, осуша́ются о́чи слезя́щеи, умолка́ют стена́ния ве́рных, плач в ра́дость о́бщую претворя́ется. Бу́ди и нам, Пречи́стая Богоро́дице, утеше́ние в бе́дствиих, возрожде́ние наде́жды, о́браз му́жества и исто́чник ми́лости; в ско́рбных обстоя́ниих неистощи́мое терпе́ние нам да́руй. Пода́ждь коему́ждо по проше́нию и нужде́ его́: младе́нцы воспита́й, ю́ныя уцелому́дри и стра́ху Бо́жию научи́, уныва́ющия ободри́ и немощну́ю ста́рость поддержи́. Ми́лостию посети́ в боле́знех и печа́лех су́щия, зла́я сердца́ умягчи́, братолю́бие укрепи́, ми́ра и любве́ всех нас испо́лни. Примири́, Благосе́рдая Ма́ти, вражду́ющия и оправда́й оклевета́нныя. Истреби́ поро́ки, да не восхо́дят греси́ на́ши пред Судие́ю вся́ческих, да не пости́гнет нас пра́ведный гнев Бо́жий. Твои́ми моли́твами, всемощны́м Твои́м покро́вом огради́ нас от наше́ствий вра́жиих, от гла́да, губи́тельства, огня́, меча́ и вся́каго ина́го злострада́ния. Упова́ем моли́твами Твои́ми получи́ти грехо́в изглажде́ние и с Бо́гом примире́ние. Умоли́ стяжа́ти нам Ца́рствие Небе́сное и с ли́ки А́нгелов и святы́х та́мо восхвали́ти Пречестно́е И́мя Святы́я Тро́ицы: Отца́, и Сы́на, и Свята́го Ду́ха во ве́ки веко́в. Аминь

О преподобне отче, благоверне княже Олеже! Воззри, преблаженне, милостивно на дом (приход) сей и люди, в нем живущия, и не отвержи требующих твоея помощи, не презри нас, молящихся тебе, но помози нам (имена) скорым предстательством твоим, да всяких бед, напастей и скорбей в сей жизни временней избежавше, кончину непостыдну обрящем, и тако на земли богоугодно поживше, жизни райския на небеси сподобимся, идеже вкупе с тобою прославим человеколюбие и щедроты в Троице славимаго Бога, Отца и Сына и Святаго Духа, во веки веков. Аминь.

Бо́же Святы́й и во святы́х почива́яй, трисвяты́м гла́сом на Небеси́ от А́нгел воспева́емый, на земли́ от челове́к во святы́х Свои́х хва́лимый; да́вый Святы́м Твои́м Ду́хом коему́ждо благода́ть по ме́ре дарова́ния Христо́ва, и то́ю поста́вивый Це́ркви Твое́й святе́й о́вы Апо́столы, о́вы проро́ки, о́вы же благове́стники, о́вы па́стыри и учи́тели, и́хже сло́вом про́поведи, Тебе́ Самому́ де́йствующему вся во всех, мно́зи соверши́шася святи́и в ко́емждо ро́де и ро́де, разли́чными доброде́тельми благоугоди́вшии Тебе́, и к Тебе́, нам о́браз до́брых по́двигов свои́х оста́вивше, в ра́дости преше́дшии, гото́ви, в не́мже са́ми искуше́ни бы́ша, и нам напа́ствуемым помога́ти. Сих святы́х всех воспомина́я и их богоуго́дное похваля́я житие́, Тебе́ Самаго́ в них де́йствовавшаго восхваля́ю и о́нех благотворе́ния Твоя́ дарова́ния бы́ти ве́руя, приле́жно молю́ Тя, Свя́те святы́х, даждь ми, гре́шному, после́довати их уче́нию, житию́, любве́, ве́ре, долготерпе́нию, и их моли́твенною по́мощию, па́че же Твое́ю вседе́йствующею благода́тию, небе́сныя с ни́ми сподо́битися сла́вы, хва́ляще Пресвято́е и́мя Твое́, Отца́ и Сы́на и Свята́го Ду́ха во ве́ки. Ами́нь.

О святый преподобномучениче Корнилие! Милостиво призри на скорби наша душевныя и телесныя, и избаву нам подаждь; помози нам, рабам Божиим (имена), святче Божий, избавитися от навета злых человек, от нихже и сам ты невинно на земли пострадал еси; защити нас от насилия диавола, люте на нас воюющаго. Умоли Господа Бога и Пречистую Его Матерь даровати нам тихое и безгрешное житие, братскую нелицемерную любовь и мирную христианскую кончину, да чистою совестию предстанем нелицеприятному страшному судилищу Христову, и в Царствии Его прославим Животворящую Троицу, Отца и Сына и Святаго Духа, во веки веков. Аминь.

О, святый мучениче Уаре досточудный, ревностию по Владыце Христу разжигаемь, Небеснаго Царя пред мучителем исповедал еси, и о Нем усердно пострадал еси, и ныне предстоиши Ему со ангелы, и в вышних ликуеши, и зриши ясно Святую Троицу, и светом Безначальнаго Сияния наслаждаешися, воспомяни и наших сродников томление, умерших в нечестии, приими наше прошение, и якоже Клеопатрин род неверный молитвами твоими от вечных мук свободил еси, тако воспомяни елицы противобожне погребенныя, умершия некрещенными, потщися испросити оным от вечныя тьмы избавление, да вси едиными усты и единем сердцем восхвалим Премилосерднаго Творца во веки веков. Аминь

О, святый мучениче Христов Трифоне, скорый помощниче всем, к тебе прибегающим и молящимся пред святым твоим образом скоропослушный предстателю! Услыши убо ныне и на всякий час моление нас, недостойных рабов твоих, почитающих святую память твою. Ты убо, угодниче Христов, сам обещался еси прежде исхода твоего от жития сего тленнаго молитися за ны ко Господу и испросил еси у Него дар сей: аще кто в коей-либо нужде и печали своей призывати начнет святое имя твое, той да избавлен будет от всякаго прилога злаго. И якоже ты иногда дщерь цареву в Риме граде от диавола мучиму исцелил еси, сице и нас от лютых его козней сохрани во вся дни живота нашего, наипаче же в день страшный последняго нашего, издыхания предстательствуй о нас, егда темнии зраки лукавых бесов окружати и устрашати нас начнут. Буди нам тогда помощник и скорый прогонитель лукавых бесов, и к Царствию Небесному предводитель, идеже ты ныне предстоиши с ликом святых у Престола Божия, моли Господа, да сподобит и нас причастниками быти присносущнаго веселия и радости, да с тобою купно удостоимся славити Отца и Сына и Святаго Утешителя Духа во веки. Аминь.

О Пресвятая Дево, Мати Христа Бога нашего, Царице Небесе и земли! Вонми многоболезненному воздыханию душ наших, призри с высоты святыя Твоея на нас, с верою и любовию покланяющихся пречистому (и чудотворному) образу Твоему. Се бо, грехми погружаемии и скорбьми обуреваемии, взирающе на Твой образ, яко живей Тебе сущей с нами, приносим смиренная моления наша. Не имамы бо иныя помощи, ни инаго предстательства, ни утешения, токмо Тебе, о Мати всех скорбящих и обремененных! Помози нам немощным, утоли скорби наша, настави на путь правый нас заблуждающих, уврачуй болезненнаясердца наша и спаси безнадежных, даруй нам прочее время жития нашего в мире и покаянии проводити, подаждь христианскую кончину и на Страшнем Суде Сына Твоего явися нам милосердая предстательница, да всегда поем, величаем и славим Тя, яко благую Заступницу рода христианскаго, со всеми угодившими Богу, во веки веков.

Святая славная и всехвальная великомученице Христова Варваро! Собраннии днесь в храме твоем Божественнем людие и раце мощей твоих покланяющиися и с любовию целующии, страдания же твоя мученическая и в их Самаго страстоположника Христа, давшаго тебе, не точию еже в Него веровати, но и еже по Нем страдати, похвалами ублажающе, молим тя, известная желания нашего ходатаице: моли с нами и о нас умоляемаго от Своего благоутробия Бога, да милостивно услышит нас, просящих Его благостыню, и не отставит от нас вся ко спасению и житию нуждная прошения, и дарует христианскую кончину животу нашему безболезненну, непостыдну, мирну, Божественных Таин причастну, и всем на всяком месте, во всякой скорби и обстоянии, требующим Его человеколюбия и помощи, великую Свою подаст милость, да благодатию Божиею и твоим теплым предстательством, душею и телом всегда здравии пребывающе, славим дивнаго во святых Своих Бога Израилева, не удаляющаго помощи Своея от нас всегда, ныне и присно и во веки веков. Аминь.

Боже святый и во святых почиваяй, трисвятым гласом на небеси от ангел воспеваемый, на земли от человек во святых Своих хвалимый, давый Святым Твоим Духом коемуждо благодать по мере дарования Христова, и тою поставивый Церкви Твоей Святей овы апостолы, овы пророки, овы же благовестники, овы пастыри и учители, ихже словом проповеди, Тебе Самому действующему вся во всех, мнози совершишася святии в коемждо роде и роде, различными благодетельми благоугодившии Тебе, и к Тебе, нам образ добрых подвигов своих оставивше, в радости прешедший, готови, в немже сами искушсни быша, и нам напаствуемым помогати. Сих святых всех и святого праведного Иова воспоминая и их богоугодное похваляя житие, Тебе Самаго, в них действовавшаго, восхваляю, и онех благотворения Твоя дарования быти веруя, прилежно молю Тя, Святе святых, даждь ми грешному последовати их учению, житию, любви, вере, долготерпению, и их молитвенною помощию, паче же Твоею вседействующею благодатию, небесныя с ними сподобитися славы, хваляще Пресвятое имя Твое, Отца и Сына и Святаго Духа во веки. Аминь.

Святый, славный и всехвальный великомучениче Христов Георгие! Собраннии во храме твоем и перед иконою твоею святою покланяющиися людие, молим тя, известный желания нашего ходатаю: моли с нами и о нас умоляемаго от Своего благоутробия Бога, да милостивно услышит нас, просящих Его благостыню, и не оставит вся наша ко спасению и житию нуждная прошения, и да укрепит же данною тебе благодатию во бранех православное воинство, разрушит силы возстающих враг, да постыдятся и посрамятся, и дерзость их да сокрушится, и да уведят, яко мы имамы Божественную помощь; и всем в скорби и обстоянии сущим многомощное яви твое заступление. Умоли Господа Бога, всея твари Создателя, избавити нас от вечнаго мучения, да всегда прославляем Отца и Сына и Святаго Духа, и твое исповедуем предстательство, ныне и присно и во веки веков. Аминь.

(читаются только по благословению духовника) Тропарь, глас 4-й: От юности Христа возлюбил еси, блаженне, и Тому Единому работати пламенне вожделев, непрестанною молитвою и трудом в пустыни подвизался еси, умиленным же сердцем любовь Христову стяжав, избранник возлюблен Божия Матери явился еси. Сего ради вопием ти: спасай нас молитвами твоими, Серафиме, преподобне отче наш. Кондак, глас 2-й: Мира красоту и яже в нем тленная оставив, преподобне, в Саровскую обитель вселился еси; и тамо ангельски пожив, многим путь был еси ко спасению. Сего ради и Христос тебе, отче Серафиме, прослави, и даром исцелений и чудес обогати. Темже вопием ти: радуйся, Серафиме, преподобне отче наш. Молитва: О, великий угодниче Божий, преподобне и Богоносне отче наш Серафиме! Призри от Горния славы на нас, смиренных и немощных, обремененных грехми многими, твоея помощи и утешения просящих. Приникни к нам благосердием твоим и помози нам заповеди Господни непорочно сохраняти, веру Православную крепко содержати, покаяние во гресех наших усердно Богу приносити, во благочестии христианстем благодатно преуспевати и достойны быти твоего о нас молитвеннаго к Богу предстательства. Ей, святче Божий, услыши нас, молящихся тебе с верою и любовию и не презри нас, требующих твоего заступления: ныне и в час кончины нашея помози нам и заступи нас молитвами твоими от злобных наветов диавольских, да не обладает нами тех сила, но да сподобимся помощию твоею наследовати блаженство обители райския. На тя бо упование наше ныне возлагаем, отче благосердный: буди нам воистинну ко спасению путевождь и приведи нас к невечернему свету жизни вечныя Богоприятным предстательством твоим у Престола Пресвятыя Троицы, да славим и поем со всеми святыми достопокланяемое имя Отца и Сына и Святаго Духа во веки веков. Аминь.

Песнь 1 Ирмо́с: Воскресения день, просветимся людие: Пасха, Господня Пасха! От смерти бо к жизни, и от земли к Небеси, Христос Бог нас преведе, победную поющия. Припев: Христос воскресе из мертвых. Очистим чувствия, и узрим неприступным светом воскресения Христа блистающася, и радуйтеся рекуща ясно да услышим, победную поюще. Припев: Христос воскресе из мертвых. Небеса убо достойно да веселятся, земля же да радуется, да празднует же мир, видимый же весь и невидимый: Христос бо воста, веселие вечное. Богородичны[∗]: (Поемыя со второго дня Пасхи то отдания) Припев: Пресвятая Богородице, спаси нас. Умерщвления предел сломила еси, вечную жизнь рождшая Христа, из гроба возсиявшаго днесь, Дево всенепорочная, и мир просветившаго. Припев: Пресвятая Богородице, спаси нас. Воскресшаго видевши Сына Твоего и Бога, радуйся со апостолы, Богоблагодатная чистая: и еже радуйся первее, яко всех радости вина, восприяла еси, Богомати всенепорочная. Песнь 3 Ирмо́с: Приидите, пиво пием новое, не от камене неплодна чудодеемое, но нетления источник, из гроба одождивша Христа, в Немже утверждаемся. Христос воскресе из мертвых. Ныне вся исполнишася света, Небо же и земля и преисподняя: да празднует убо вся тварь востание Христово, в Немже утверждается. Христос воскресе из мертвых. Вчера спогребохся Тебе, Христе, совостаю днесь воскресшу Тебе, сраспинахся Тебе вчера, Сам мя спрослави, Спасе, во Царствии Твоем. Богородичны: Пресвятая Богородице, спаси нас. На нетленную жизнь прихожду днесь, благостию Рождшагося из Тебе, Чистая, и всем концем свет облиставшаго. Пресвятая Богородице, спаси нас. Бога, Егоже родила еси плотию, из мертвых, якоже рече, воставша видевши, Чистая, ликуй, и Сего яко Бога, Пречистая, возвеличай. Ипакои, глас 4-й: Предварившия утро яже о Марии, и обретшия камень отвален от гроба, слышаху от Ангела: во свете присносущнем Сущаго, с мертвыми что ищете, яко человека? Видите гробныя пелены, тецыте, и миру проповедите, яко воста Господь, умертвивый смерть, яко есть Сын Бога, спасающаго род человеческий. Песнь 4 Ирмо́с: На божественней стражи, богоглаголивый Аввакум да станет с нами и покажет светоносна ангела, ясно глаголюща: днесь спасение миру, яко воскресе Христос, яко всесилен. Христос воскресе из мертвых. Мужеский убо пол, яко разверзый девственную утробу, явися Христос: яко человек же, Агнец наречеся: непорочен же, яко невкусен скверны, наша Пасха, и яко Бог истинен совершен речеся. Христос воскресе из мертвых. Яко единолетный агнец, благословенный нам венец Христос, волею за всех заклан бысть, Пасха чистительная, и паки из гроба красное правды нам возсия Солнце. Христос воскресе из мертвых. Богоотец убо Давид, пред сенным ковчегом скакаше играя, людие же Божии святии, образов сбытие зряще, веселимся божественне, яко воскресе Христос, яко всесилен. Богородичны: Пресвятая Богородице, спаси нас. Создавый Адама, Твоего праотца, Чистая, зиждется от Тебе, и смертное жилище разори Своею смертию днесь, и озари вся божественными блистаньми воскресения. Пресвятая Богородице, спаси нас. Егоже родила еси Христа, прекрасно из мертвых возсиявша, Чистая, зрящи, добрая и непорочная в женах и красная, днесь во спасение всех, со апостолы радующися, Того прославляй. Песнь 5 Ирмо́с: Утренюем утреннюю глубоку, и вместо мира песнь принесем Владыце, и Христа узрим, Правды Солнце, всем жизнь возсияюща. Христос воскресе из мертвых. Безмерное Твое благоутробие адовыми узами содержимии зряще, к свету идяху Христе, веселыми ногами, Пасху хваляще вечную. Христос воскресе из мертвых. Приступим, свещеноснии, исходящу Христу из гроба яко жениху, и спразднуим любопразднственными чинми Пасху Божию спасительную. Богородичны: Пресвятая Богородице, спаси нас. Просвещается божественными лучами и живоносными воскресения Сына Твоего, Богомати Пречистая, и радости исполняется благочестивых собрание. Пресвятая Богородице, спаси нас. Не разверзл еси врата девства в воплощении, гроба не разрушил еси печатей, Царю создания: отонудуже воскресшаго Тя зрящи, Мати радовашеся. Песнь 6 Ирмо́с: Снизшел еси в преисподняя земли и сокрушил еси вереи вечныя, содержащия связанныя Христе, и тридневен, яко от кита Иона, воскресл еси от гроба. Христос воскресе из мертвых. Сохранив цела знамения, Христе, воскресл еси от гроба, ключи Девы невредивый в рождестве Твоем, и отверзл еси нам райския двери. Христос воскресе из мертвых. Спасе мой, живое же и нежертвенное заколение, яко Бог Сам Себе волею привед Отцу, совоскресил еси всероднаго Адама, воскрес от гроба. Богородичны: Пресвятая Богородице, спаси нас. Возведеся древле держимое смертию и тлением, Воплотившимся от Твоего пречистаго чрева, к нетленней и присносущней жизни, Богородице Дево. Пресвятая Богородице, спаси нас. Сниде в преисподняя земли, в ложесна Твоя, Чистая, cшедый, и вселивыйся и воплотивыйся паче ума, и воздвиже с Собою Адама, воскрес от гроба. Кондак, глас 8-й Аще и во гроб снизшел еси, Безсмертне, но адову разрушил еси силу, и воскресл еси яко победитель, Христе Боже, женам мироносицам вещавый: радуйтеся, и Твоим апостолом мир даруяй, падшим подаяй воскресение. Икос Еже прежде солнца, Солнце зашедшее иногда во гроб, предвариша ко утру, ищущия яко дне мироносицы девы, и друга ко друзей вопияху: О другини! приидите, вонями помажем тело живоносное и погребенное, плоть Воскресившаго падшаго Адама, лежащую во гробе. Идем, потщимся якоже волсви, и поклонимся, и принесем мира яко дары, не в пеленах, но в плащанице Обвитому, и плачим, и возопиим: о Владыко, востани, падшим подаяй воскресение. Воскресение Христово видевше, поклонимся Святому Господу Иисусу, Единому безгрешному, Кресту Твоему покланяемся, Христе, и святое воскресение Твое поем и славим: Ты бо еси Бог наш, разве Тебе иного не знаем, имя Твое именуем. Приидите вси вернии, поклонимся святому Христову воскресению: се, бо прииде Крестом радость всему миру. Всегда благословяще Господа, поем воскресение Его: распятие бо претерпев, смертию смерть разруши. (Трижды) Воскрес Иисус от гроба, якоже прорече, даде нам живот вечный и велию милость. (Трижды) Песнь 7 Ирмо́с: Отроки от пещи избавивый, быв человек, страждет яко смертен, и страстию смертное в нетления облачит благолепие, Един благословен отцев Бог, и препрославлен. Христос воскресе из мертвых. Жены с миры богомудрыя в след Тебе течаху: Егоже яко мертва со слезами искаху, поклонишася радующияся Живому Богу, и Пасху тайную Твоим, Христе, учеником благовестиша. Христос воскресе из мертвых. Смерти празднуем умерщвление, адово разрушение, иного жития вечнаго начало, и играюще поем Виновнаго, единаго благословеннаго отцев Бога и препрославленнаго. Христос воскресе из мертвых. Яко воистинну священная и всепразднственная, сия спасительная нощь, и светозарная, светоноснаго дне, востания сущи провозвестница: в нейже безлетный Свет из гроба плотски всем возсия. Богородичны: Пресвятая Богородице, спаси нас. Умертвив Сын Твой смерть, Всенепорочная, днесь, всем смертным пребывающий живот во веки веков дарова, Един благословенный отцев Бог и препрославленный. Пресвятая Богородице, спаси нас. Всем царствуяй созданием, быв человек, вселися в Твою, Богоблагодатная, утробу, и распятие претерпев и смерть, воскресе боголепно, совозставив нас яко всесилен. Песнь 8 Ирмо́с: Сей нареченный и святый день, един суббот Царь и Господь, праздников праздник, и торжество есть торжеств: в оньже благословим Христа во веки. Христос воскресе из мертвых. Приидите, новаго винограда рождения, божественнаго веселия, в нарочитом дни воскресения, Царствия Христова приобщимся, поюще Его яко Бога во веки. Христос воскресе из мертвых. Возведи окрест очи твои, Сионе, и виждь: се бо приидоша к тебе, яко богосветлая светила, от запада, и севера, и моря, и востока чада твоя, в тебе благословящая Христа во веки. Троичен: Пресвятая Троице Боже наш, слава Тебе. Отче Вседержителю, и Слове, и Душе, треми соединяемое во ипостасех Естество, Пресущественне и Пребожественне, в Тя крестихомся, и Тя благословим во вся веки. Богородичны: Пресвятая Богородице, спаси нас. Прииде Тобою в мир Господь, Дево Богородице, и чрево адово расторг, смертным нам воскресение дарова: темже благословим Его во веки. Пресвятая Богородице, спаси нас. Всю низложив смерти державу Сын Твой, Дево, Своим воскресением, яко Бог крепкий совознесе нас и обожи: темже воспеваем Его во веки. Песнь 9 Припев: Величит душа моя воскресшаго тридневно от гроба Христа Жизнодавца. Ирмо́с: Светися, светися, новый Иерусалиме: слава бо Господня на тебе возсия, ликуй ныне, и веселися, Сионе! Ты же, Чистая, красуйся, Богородице, о востании Рождества Твоего. Припев: Христос новая Пасха, жертва живая, Агнец Божий, вземляй грехи мира. О, божественнаго! О, любезнаго! О, сладчайшаго Твоего гласа! С нами бо неложно обещался еси быти, до скончания века, Христе, Егоже вернии, утверждение надежды имуще, радуемся. Припев: Ангел вопияше Благодатней: чистая Дево, радуйся, и паки реку, радуйся! Твой Сын воскресе тридневен от гроба, и мертвыя воздвигнувый, людие, веселитеся. О, Пасха велия и священнейшая, Христе! О мудросте, и Слове Божий, и Cило! Подавай нам истее Тебе причащатися, в невечернем дни Царствия Твоего. Богородичны: Пресвятая Богородице, спаси нас. Согласно, Дево, Тебе блажим вернии: радуйся, двере Господня, радуйся граде одушевленный; радуйся, Еяже ради нам ныне возсия свет из Тебе Рожденнаго из мертвых воскресения. Пресвятая Богородице, спаси нас. Веселися и радуйся, божественная двере Света: зашедый бо Иисус во гроб, возсия, просияв солнца светлее, и верныя вся озарив, богорадованная Владычице. Ексапостиларий самогласен Плотию уснув, яко мертв, Царю и Господи, тридневен воскресл еси, Адама воздвиг от тли, и упразднив смерть: Пасха нетления, мира спасение. (Трижды) Стихиры Пасхи, глас 5-й: Стих: Да воскреснет Бог, и расточатся врази Его. Пасха священная нам днесь показася: Пасха нова святая, Пасха таинственная, Пасха всечестная, Пасха Христос Избавитель: Пасха непорочная, Пасха великая, Пасха верных, Пасха, двери райския нам отверзающая, Пасха всех освящающая верных. Стих: Яко исчезает дым, да исчезнут. Приидите от видения жены благовестницы, и Сиону рцыте: приими от нас радости благовещения Воскресения Христова; красуйся, ликуй и радуйся, Иерусалиме, Царя Христа узрев из гроба, яко жениха происходяща. Стих: Тако да погибнут грешницы от лица Божия, а праведницы да возвеселятся. Мироносицы жены, утру глубоку, представша гробу Живодавца, обретоша Ангела, на камени седяща, и той провещав им, сице глаголаше: что ищете живаго с мертвыми? Что плачете Нетленнаго во тли? Шедше проповедите учеником Его. Стих: Сей день, егоже сотвори Господь, возрадуемся и возвеселимся в онь. Пасха красная, Пасха, Господня Пасха! Пасха всечестная нам возсия. Пасха! Радостию друг друга обымем. О Пасха! Избавление скорби, ибо из гроба днесь яко от чертога возсияв Христос, жены радости исполни, глаголя: проповедите апостолом. Слава Отцу и Сыну и Святому Духу. И ныне и присно и во веки веков. Аминь. Воскресения день, и просветимся торжеством, и друг друга обымем. Рцем, братие, и ненавидящим нас, простим вся воскресением, и тако возопиим: Христос воскресе из мертвых, смертию смерть поправ, и сущим во гробех живот даровав. Примечания [*]Припев к ним: «Пресвятая Богородице, спаси нас», или «Слава...», «И ныне...»

О Пречистая наша Всеблагословенная и Всемощная Госпоже Владычице Влахернская и всего мира христианского похвало и утверждение, благодарим Тя, яко сподобила еси нас великой Своей милости, творити пресветлое торжество Честнаго Твоего многоцелебного Образа, явленнаго благоволением Твоим во граде Константинополе, послеже во многих градах и весех чудесы просиявшего. Взирая на твой светозарный благодатный лик, Пречистая, со трепетом радости и благоговения и зрим очи Твои голубые, голубиные, небесные, исполненные любовью великою, добротою богатою и смирением совершённым. Твои уста подобно цвету розы, исполненны сладких речей. Руки твои распростертые к нам, исполнены добрых дел. Дивную красоту твою неземную во всем не доступно нам описати, токмо бо в молчании и трепете взываем душею умиленной, сокрушенной в смирении пред всесовершенной святостью твоею. Сице и днесь с трепетом, пред Святою иконою Твоею припадая, умоляя наполнити наше немощное человеческое естество живительными и цельбоносными струями непрестанных молитв Твоих и очиститися от всякой скверны плоти и духа, совершая святыню в страсе Божиим, ибо вемы, яко много может молитва Твоя пред Престолом Триединаго Бога. Се мы, смиренныя и грешныя, обремененнии игом тяжких многих беззаконий наших, во умилении глубоцем просим подать исцеление слепым, хромым, глухим и другим страждущим, одержимыми многими и различными скорбями и недугами, ибо мы вемы, яко ничтоже возможно ходатайству Твоему, аще токмо восхощеши. Темже просим утвердити нашу веру праву, Церкве Русстей мир, тишину и благостроение, укрепить православныя люди в настоящую годину испытания и избавить от душепагубных ересей, расколов и разделений, сподобить соблюсти всех в единомыслии и да познают не верующии и не покланяющиися Честному Образу Твоему, яко Ты еси несравненное наше Украшение, Слава, Небесный и Державный Покров, скорая Помощница, непостыдная Заступница и постоянная Ходатаица у Единого Ходатая Бога и человеков Иисуса Христа. Яко Тя ради подобает всякое благодарение Всесильному и Всеблагому Содетелю, Господу нашему Иисусу Христу купно со Безначальным Его Отцем и с Пресвятым и Благим и Животворящим Его Духом, ныне и присно и во веки веков. Аминь.

О, Боже, Премилосерднейший Христе Иисусе, Искупителю грешных, ради спасения рода человеческаго Ты оставил еси, Всемилостиве, преславная Небеса и вселился еси во юдоль плачевную и многогрешную, Ты приял еси на Божественная рамена Твоя наша немощи, и понесл еси наша болезни; Ты, о Страдальче Святый, уязвлен был за грехи наша и мучим за беззакония наша, а посему и мы к Тебе, Человеколюбче, возносим наши смиренныя мольбы: приими их, о Преблагий Господи, и снизойди к немощам нашим и грехов наших не помяни, и праведный гнев Твой за беззакония наша на ны движимый отврати от нас. Кровию Твоею Всечестною обновивый падшее естество наше, обнови, Господи Иисусе Христе, Спасителю наш, и нас, во тли грехов сущих, и утеши сердца наша радостию всепрощения Твоего. С воплем и безмерными слезами раскаяния припадаем к стопам Твоего Божественного милосердия, и молим Тя: благодатию Твоею очисти нас от всех неправд и беззаконий жития нашего. Да во святыни Твоего Человеколюбия восхвалим Всесвятое Имя Твое, со Отцем и Преблагим и Животворящим Духом, ныне и присно и во веки веков. Аминь.

Преподобнии отцы Феодоре и Василие! Воззрите на нас милостивно и к земли приверженных возведите к высоте небесней. Вы горе на небеси, мы на земли низу, удалены от вас, не толико местом, елико грехми своими и беззаконии, но к вам прибегаем и взываем: наставите нас ходити путем вашим, вразумите и руководствуйте. Вся ваша святая жизнь бысть зерцалом всякия добродетели. Не престаните, угодницы Божии, о нас вопия ко Господу. Испросите предстательством своим у Всемилостиваго Бога нашего мир Церкви Его, под знамением креста воинствующей, согласие в вере и единомудрие, суемудрия же и расколов истребление, утверждение во благих делех, больным исцеление, печальным утешение, обиженным заступление, бедствующим помощь. Не посрамите нас, к вам с верою притекающих. Вси православнии христиане, вашими чудесы исполненнии и милостями облагодетельствованнии, исповедуют вас быти своих покровителей и заступников. Явите древния милости ваша, и ихже отцем всепомоществовали есте, не отрините и нас, чад их, стопами их к вам шествующих. Предстояще всечестней иконе вашей, яко вам живым сущим, припадаем и молимся: приимите моления наша и вознесите их на жертвенник благоутробия Божия, да приимем вами благодать и благовременную в нуждех наших помощь. Укрепите наше малодушие и утвердите нас в вере, да несомненно уповаем получити вся благая от благосердия Владыки молитвами вашими. О, превеликие угодницы Божии! Всем нам, с верою притекающим к вам, помозите предстательством вашим ко Господу, и всех нас управите в мире и покаянии скончати живот наш и преселитися со упованием в блаженныя недра Авраамова, идеже вы радостно во трудех и подвизех ныне почиваете, прославляя со всеми святыми Бога, в Троице славимаго, Отца и Сына и Святаго Духа, ныне и присно и во веки веков. Аминь.