Молитвы

Плотская мудрования, отче Макарие,/ воздержанием и бдением умертвил еси,/ место бо, на немже поты твоя излиял еси,/ яко труба, вопиет к Богу,/ поведающи твоя исправления,/ и по смерти честныя твоя мощи источают исцеления./ Темже вопием ти:/ моли Христа Бога, да спасет души наша.

Якоже светильника превелика, Церковь имать, всеблаженне,/ тебе, паче солнца сияюща,/ юже твоими молитвами сохрани, блаженне,/ непобедиму, и непоколебиму от ереси всякия, и нескверну,// яко приснопамятный.

В постницех явился еси велик,/ во иереех же нарочит/ и в чудотворениях даре показася славен,/ священне отче Панкратие,/ тем тя чтим и ублажаем.

Чистаго ради и непорочнаго твоего жития,/ Богоносе отче Игнатие,/ приемый от Господа чудотворныя дары исцеляти немощныя,/ исцели, молим тя, и немощи наша,/ моля о нас Единаго Человеколюбца.

Возбранному и дивному нашел земли светильнику днесь любовию притекаем/ и песнь тебе, Богоносе, плетем,/ яко имущему дерзновение ко Господу:/ избави нас от многообразных обстояний, да зовем ти:/ радуйся, утверждение отечеству нашему и великий покровителю обители своея.

Кондак 1 Избраннный подвижниче иноческаго делания и молитвенниче о нас изрядный, преподобне отче наш Симеоне, равноангельному житию от юности твоея возревновал еси и, во обитель Печерскую вселивыйся, в простоте и смирении евангельски подвизался еси, темже, обилием благодати от Господа исполненный, от всяких бед и скорбей свободи поющих ти: Радуйся, преподобне Симеоне, Псково-Печерский чудотворче. Икос 1 Ангельския чистоты стяжателю, отче Симеоне, подвигом монашеским добре украсивыйся, райския сладости причастник явился еси, темже и обитель твоя, в нейже Пресвятую Богородицу в молитвах боголепно воспевал еси, ныне о тебе красуется, приносящи ти таковая: Радуйся, нравы ангельскими издетска украшенный; Радуйся, обычаи благими зело удобренный. Радуйся, путь Христов от юности возлюбивый; Радуйся, чистоту телесную Тому сохранивый. Радуйся, кротостию и смирением сердце твое умягчивый; Радуйся, у пещер Богом зданных добродетельми просвещенный. Радуйся, иноческаго жития богомудрый наставниче; Радуйся, о всех к тебе взывающих теплый молитвенниче. Радуйся, преподобне Симеоне, Псково-Печерский чудотворче. Кондак 2 Видя душу твою, издетска подвига желанием Христа ради исполненну, Подвигоположник Господь воспламени ю ко иноческому житию стремлением; ты же, блаженне Симеоне, отрок сый, преподобному Серафиму Саровскому в усердии отай подражал еси, чистыми усты в умилении вознося Богу: Аллилуиа. Икос 2 Разумея вся преходящая мира дольняго, ум свой к горнему восперил еси, и, вся житейская и суетная любве ради ко Господу оставивый, во обитель древнюю Псково-Печерскую, юже измлада зело возлюби, яко к тихому пристанищу притекл еси, да Богу единому поживеши. Сего ради, избранниче Божий, приими от сердца тебе приносимая: Радуйся, к подвижничеству сердце твое склонивый; Радуйся, всего себе воли Божией покоривый. Радуйся, яко молитве и послушанию издетска навыкл еси; Радуйся, яко во отрочестве старец велий наречен был еси. Радуйся, мирския сладости яко огня бежавый; Радуйся, монашескаго жития узкий путь избравый. Радуйся, воздержанием благоукрашенный; Радуйся, Духа Святаго благодатию осиянный. Радуйся, преподобне Симеоне, Псково-Печерский чудотворче. Кондак 3 Силою божественною укрепляемый, отче Симеоне, в послушании ко игумену и братии кротко и смиренно душу твою хранил еси, празднословия всякаго удаляяся, и, труды к трудом неленостно прилагая, чина монашескаго достойна быти показался еси, в подвизех духовных всегда поя Богу: Аллилуиа. Икос 3 Имея ум свой к Богу вознесенный, от силы в силу восходил еси, отче Симеоне, и, благодать священства восприим, молитвою и постом по чреслем препоясався, яко раб благий, во всяцем деле духом твоим бодрствовал еси, единаго ко спасению взыскуя. Мы же, таковую ревность твою прославляюще, приносим ти сицевая: Радуйся, благоуветием и незлобием исполненный; Радуйся, в братолюбии делателю прилежный. Радуйся, чина ангельскаго достойный носителю; Радуйся, обетов иноческих непреложный рачителю. Радуйся, во трудех неленостный послушниче; Радуйся, пред очима Господа усердный постниче. Радуйся, целомудрия и чистоты хранителю; Радуйся, нивы Христовы изрядный возделывателю. Радуйся, преподобне Симеоне, Псково-Печерский чудотворче. Кондак 4 Бурю страстей воздержанием и любовию ко Христу умертвив, вящшаго подвига возжелел еси, богоблаженне Симеоне, темже, кротко пред владыкою представ, иже тя наместника обители видети желаше, по смирению сего отреклся еси, и, схимою облекийся, в келию пещерную водворился еси, да тамо уединенно вопиеши Богу: Аллилуиа. Икос 4 Слышавше молитвы твоя, преподобне Симеоне, яже к Богу от сердца возносимыя, полчища бесовстии зело стужаху ти, устрашити и изгнати тя хотяще, ты же, яко воин Царя Небеснаго, силою креста Господня сатанину детель отражал еси, подвиги твоя усугубляя. Отжени и от нас, отче благодатне, всякаго врага и супостата, да поем тебе сице: Радуйся, в схиму, яко в броню ратную облекийся; Радуйся, молитвою, яко воин мечем вооруживыйся. Радуйся, постом и воздержанием плоть духови покоривый; Радуйся, иго Христово, яко благо, на ся подъявый. Радуйся, демонов твердый устрашителю; Радуйся, бесовских прилогов разорителю. Радуйся, воины русския от враг в пещерах сокрывый; Радуйся, молитвенным стоянием от погубления обитель избавивый. Радуйся, преподобне Симеоне, Псково-Печерский чудотворче. Кондак 5 Богоблагодатна старца показа тя всемилостивый Господь верным, во святей обители яко крин сельный процветшаго; ты бо, отче Симеоне, чудес многих сосуде преизливаемый, вся скорбящия и страждущия любовию о Христе Господе утешал еси, призывая единомысленно пети всех Творцу: Аллилуиа. Икос 5 Видяще тя людие, пастыря добраго и крепкаго пред Богом молитвенника, дары Духа Святаго преисполненна, во множестве прихождаху к ти, в болезнех и скорбех изнемогающии, в ожесточении сущии и страждущии от дух нечистых, и, по прошению своему приемлюще, благодарственно тебе взываху: Радуйся, любовь неложную ко всем явивый; Радуйся, милосердию Христову подражавый. Радуйся, пастырю добрый и любвеобильный; Радуйся, отче, к страждущим благосердный. Радуйся, о земли неплодной втайне нощию молитву творивый; Радуйся, темже неплодие тоя в велие плодоносие претворивый. Радуйся, чистым сердцем дар прозрения от Господа стяжавый; Радуйся, игумена обители патриаршество предзревый. Радуйся, преподобне Симеоне, Псково-Печерский чудотворче. Кондак 6 Проповедник милосердия христианскаго воистинну показался еси, преподобне Симеоне, и, образ быв честнаго иночества, радостию о Господе исполненный мирен дух и велию любовь к творению Его стяжал еси, еже есть радоватися с радующимися и плакати с плачущими. Сего ради братолюбие твое поминающе, вознесем Богу: Аллилуиа. Икос 6 Возсиял еси во обители Печерстей яко светильник лучезарный, богомудре Симеоне, любовию нелицемерною души отчаянныя на путь ко Христу возставляяй, верою несумненною грехми помраченныя ко дверем покаяния приводяй и надеждою неизсякаемою благое терпение в напастех подаваяй. Мы же, молитвами твоими сохраняеми, ублажаем тя тако: Радуйся, грешных пред Богом ходатаю; Радуйся, Слова Божия в сердца наша сеятелю. Радуйся, отчаянныя от смерти вольныя отвращаяй; Радуйся, верныя от напрасныя смерти спасаяй. Радуйся, страждущим тепле сострадавый; Радуйся, от бесов стужаемыя именем Христовым свобождавый. Радуйся, от напастей предлежащих скорый избавителю; Радуйся, благочестия верных мудрый учителю. Радуйся, преподобне Симеоне, Псково-Печерский чудотворче. Кондак 7 Хотяй от единаго Бога милости снискати, предивне Симеоне, людския славы смиренно удалялся еси, благодать дарованную ти от Господа таяй, и тако в труде неустаннем на служение ближним и обители твоей по вся дни до скончания благоплодно подвизался еси, за вся славя и вознося Богу: Аллилуиа. Икос 7 Новую купель Силоамскую в земли Печерстей, явльшуюся по неизреченней милости Божией, вернии обретоша, ибо благодатию, по вере ти данною, чудеса евангельская творил еси, отче Симеоне, егда жены кровоточивыя от лет многих ток уставил еси и отроку ушеса и уста затворенныя отверзл еси. Мы же, имя Христово о толиком зело прославляюще, восхваляем тя глаголы таковыми: Радуйся, Божия благодати смиренный таинниче; Радуйся, судеб Божиих пречудный тайновидче. Радуйся, сокровенная человеков яко в книзе зревый; Радуйся, многия души человеческия ко Господу приведый. Радуйся, разслабленныя здравы сотворяяй; Радуйся, глазами болезнующия исцеляяй. Радуйся, руце и нозе недужныя укрепляяй; Радуйся, удрученныя от зубныя болезни свобождаяй. Радуйся, преподобне Симеоне, Псково-Печерский чудотворче. Кондак 8 Странное и предивное чудо Небесныя благодати видим о тебе, отче Симеоне, егда приближися время отшествия твоего, всю надежду на милость Божию и заступление Пречистыя Владычицы возложивый, яве Богородицу зрети сподобился еси, тебе рекшую: угодниче Мой, скоро возму тя. Темже, тихою радостию о Господе исполняяся, вознесл еси Ему: Аллилуиа. Икос 8 Весь быв образ послушания, якоже в житии твоем, тако и в преставлении ко Господу, богоблаженне Симеоне, егда час кончины твоея, духовно тобою провиденный, по прошению игумена, яко верный послушник, отложил еси, да не в праздник великий погребение твое случится. Мы же, дивящеся таковому послушанию твоему, с любовию тепле глаголем ти: Радуйся, в послушание Христоподражательное неуклонно себе вдавый; Радуйся, смиренномудрия истинный образ явивый. Радуйся, Царицу Небесную немолчно славивый; Радуйся, заступление Тоя себе стяжавый. Радуйся, со Христом быти присно возжелевый; Радуйся, плачем покаянным яко банею себе омывый. Радуйся, чадолюбче, о стаде твоем без устали пекийся; Радуйся, и по смерти попечением твоим ны не оставляяй. Радуйся, преподобне Симеоне, Псково-Печерский чудотворче. Кондак 9 Всего себе на служение Богу и людем предал еси, святче Божий, сего ради, на одре предсмертнем немощствуяй, последняя наставления, утешения и благословения, во еже любовь имети между собою, от пастырскаго сердца чадом твоим преподал еси, и тако, в мире от земных почив, в Небесныя обители блаженно преселился еси; ныне же со Ангелы вопиеши Богу: Аллилуиа. Икос 9 Витии человечестии недоумеют како исповести день пречуднаго погребения твоего, достославне Симеоне, егда от всякия веси и грады чада твоя духовная во обитель Печерскую абие собрани быша дивно, но и, по смерти тя суща жива чтуще, приношаху ти словеса таковая: Радуйся, звездо, путь живота честнаго нам указующая; Радуйся, зарю, верою твоею души наша пробуждающая. Радуйся, свете, любовию Христовою нас озаряяй; Радуйся, лучу, мрак греховный покаянием разсеяваяй. Радуйся, реко исцелений тихоструйная; Радуйся, лампадо в молитвах о нас неугасимая. Радуйся, сосуде даров благодатных неиждиваемый; Радуйся, цвете благоухания Небеснаго исполненный. Радуйся, преподобне Симеоне, Псково-Печерский чудотворче. Кондак 10 Спасения ради вечнаго души твоея, отче Симеоне, труды многи и болезни в терпении кротко понесл еси, о себе ничесоже когда возомнив, обаче, пред всеми ся умаляяй, в дерзновении пред Богом велик явился еси. Темже, славою увенчанный, в радость Господа вшел еси, и нас не остави молитвами твоими, да сподобимся с тобою купно воспети Богу: Аллилуиа. Икос 10 Стена ограждающая от всякаго зла был еси нам, отче Симеоне, и по смерти, якоже обещался еси, ны не оставляеши твоим заступлением и всем, с верою к тебе прибегающим, помощь неоскудную в многоцелебных мощех твоих подаеши. Тебе же, яко мощному о нас молитвеннику у Престола Всевышняго, хвалебная приносим: Радуйся, тяготы чад твоих на себе понесый; Радуйся, истинную любовь ко ближнему нам показуяй. Радуйся, к тебе взывающих скорое услышание; Радуйся, в печалех сущих присное утешение. Радуйся, в помощи к нам неоскудеваяй; Радуйся, в прошениих наших пред Богом ходатайствуяй. Радуйся, чудесы многи от Господа прославленный; Радуйся, подвижниче дарованьми благими исполненный. Радуйся, преподобне Симеоне, Псково-Печерский чудотворче. Кондак 11 Пение всеумиленное приносим у раки мощей твоих, угодниче Божий Симеоне, во всяцей скорби и немощи человечестей к тебе прибегающе, яко воистинну вемы тя крепкаго в бедах помощника и теплаго ходатая за ны пред Господом, да, идеже ты еси, и нас быти сподоби молитвами твоими, взывающих к Богу: Аллилуиа. Икос 11 Светло празднует Печерская обитель честную память твою, преподобне Симеоне, и, божественную благодать в цельботочных мощех твоих видяще, Бога дивнаго во святых Своих прославляет, и тебе, яко благому предстателю, радостне взывает: Радуйся, яко во обители у пещер Богом зданных зело потрудился еси; Радуйся, яко со святыми отцы Печерскими прославился еси. Радуйся, монашествующих духовное радование; Радуйся, верных присное веселие. Радуйся, яко нестяжанием тленнаго души нетление обрел еси; Радуйся, яко от мира преходящаго во обители вечныя преселился еси. Радуйся, николиже тебе просящия помощию оставляяй; Радуйся, и доныне благодатными дары чудодействуяй. Радуйся, преподобне Симеоне, Псково-Печерский чудотворче. Кондак 12 Благодать Божия, от честных мощей твоих обилием чудес преизливающаяся, днесь собра вся верныя, любовию тя почитающия и смиренным сердцем в молении к тебе припадающия, и тя усердно просящия: души наша к покаянию приведи, телеса недужная исцели и всех нас молитвами твоими от всяких бед сохрани, да велегласно воспоем Богу: Аллилуиа. Икос 12 Поюще дивное твое житие, преподобне отче Симеоне, ублажаем труды твоя, в нихже неленостно по вся дни во обители подвизался еси, славим кротость и смирение твое, имиже Христу Богу подражал еси, превозносим любовь твою, еюже ближнему в нуждах добре послужил еси и величаем тя песнопеньми таковыми: Радуйся, милостиве, Богом помилованный; Радуйся, целомудре, от Христа славою увенчанный. Радуйся, кротче, рай Небесный наследивый; Радуйся, трудниче, покой блаженный обретый. Радуйся, молитвенниче, со Ангелы жительствуяй; Радуйся, постниче, благами вечными наслаждаяйся. Радуйся, незлобиве, Бога зрети сподобивыйся; Радуйся, боголюбче, Господом возлюбленный. Радуйся, преподобне Симеоне, Псково-Печерский чудотворче. Кондак 13 О, святый угодниче Божий, преподобне и богоносне отче наш Симеоне! Тебе молебно предстоящих не презри, но твоим мощным о нас заступлением помози богоугодно на земли пожити, да, очистившеся от всякия скверны, невечерний достигнем покой, идеже с тобою вкупе Всемилостивому и Человеколюбцу Богу воспоем ангельскую песнь: Аллилуиа, аллилуиа, аллилуиа.[Се́й конда́к глаго́лется три́жды.][Далее повторяем 1‑е икос и кондак:]Икос 1 Ангельския чистоты стяжателю, отче Симеоне, подвигом монашеским добре украсивыйся, райския сладости причастник явился еси, темже и обитель твоя, в нейже Пресвятую Богородицу в молитвах боголепно воспевал еси, ныне о тебе красуется, приносящи ти таковая: Радуйся, нравы ангельскими издетска украшенный; Радуйся, обычаи благими зело удобренный. Радуйся, путь Христов от юности возлюбивый; Радуйся, чистоту телесную Тому сохранивый. Радуйся, кротостию и смирением сердце твое умягчивый; Радуйся, у пещер Богом зданных добродетельми просвещенный. Радуйся, иноческаго жития богомудрый наставниче; Радуйся, о всех к тебе взывающих теплый молитвенниче. Радуйся, преподобне Симеоне, Псково-Печерский чудотворче. Кондак 1 Избраннный подвижниче иноческаго делания и молитвенниче о нас изрядный, преподобне отче наш Симеоне, равноангельному житию от юности твоея возревновал еси и, во обитель Печерскую вселивыйся, в простоте и смирении евангельски подвизался еси, темже, обилием благодати от Господа исполненный, от всяких бед и скорбей свободи поющих ти: Радуйся, преподобне Симеоне, Псково-Печерский чудотворче. Молитва О, всечестный и богоблаженный отче наш Симеоне! Приими ныне тебе с любовию и верою прилежно молящихся и сохрани нас от всякаго зла, дана бо тебе от Бога велия благодать: недужныя исцеляти, скорбящия утешати, в беду впавшия свобождати. Ты бо аще и миру себе умертвил еси, но, любовь Христову к людем являяй, нечужд их нуждам показался еси. Темже молим тя, буди нам заступник от враг спасения нашего, души наша, грехом уловленныя, к истинному покаянию приведи, телес наших болезни уврачуй, юныя благочестию научи, старыя поддержи, сирых и обездоленных препитай. Обитель убо твою, в нейже усердно многая лета подвизался еси, в мирном благоустроении и благолепии сохрани, и вся, яже монашествующия и добре труждающияся, во благих желаниих утверди и в подвизех иноческих укрепи. Ей, святый отче, испроси нам у Премилостиваго Спаса коемуждо ко спасению благопотребная, да исправивше житие наше, от части шуия отлученни будем и вечное спасение во Царствии Небеснем молитвами твоими улучим, идеже с тобою и всеми святыми сподобимся прославляти в Троице славимаго Бога, Отца и Сына и Святаго Духа, ныне и присно, и во веки веков. Аминь.

Кондак 1 Избранной Богом на сохранение веры Православныя во дни гонений на земли Отечества нашего, хвалебное приносим ти пение, блаженная мати наша Валентино. Ты же, яко имущая дерзновение ко Господу, избави нас от зол душевных и телесных, да со умилением зовем ти: Радуйся, блаженная Валентино, всех приходящих к тебе скоро утешающая. Икос 1 Ангела дивна Белой Руси яви тя всея твари Создатель, обрати ти люди заблуждшия на путь покаяния и призвати их на служение Истине. Темже и мы, благодаряще Бога, прославляем тя, яко просветительницу и заступницу нашу, и усердно вопием ти: Радуйся, пречудная избраннице Промысла Божественнаго. Радуйся, звездо прекрасная небосвода церковнаго. Радуйся, земли белорусския славное украшение. Радуйся, душам нашим пресладкое утешение. Радуйся, в ходатайствах о нас неусыпающая. Радуйся, пламеню молитвы неугасающий. Радуйся, Матерь Божию непрестанно величающая. Радуйся, любити всех нелицемерно Ею наученная. Радуйся, блаженная Валентино, всех приходящих к тебе скоро утешающая. Кондак 2 Созерцала еси радостно, блаженная мати, красоту мира Божия, и любовь премногую к людем имела еси, от лет детских о всем благодарящи Бога ангельскою песнию: Аллилуиа. Икос 2 Разум имущи Божественный, угоднице Божия Валентино, от рождения твоего тщалася еси угождати Господу трудом, верою и молитвою. Еще младенец сущи, ель насадила еси, яже возрасте в древо крепкое во образе Креста. Мы же, видяще знамение благословения Божия на трудех твоих, гласы хвалебными взываем сице: Радуйся, благая отрасле корене благочестиваго. Радуйся, сестры имевши нрава молчаливаго. Радуйся, отца иерейскими молитвами в вере утвержденная. Радуйся, материю в любви к Богу, святым и ближним умудренная. Радуйся, сладость райскую чтением Слова Божия вкусившая. Радуйся, нежность и преданность сродникам щедро дарившая. Радуйся, заповедь послушания родителем кротко исполнившая. Радуйся, и нас ко исполнению велений Божиих призывающая. Радуйся, блаженная Валентино, всех приходящих к тебе скоро утешающая. Кондак 3 Силою Вышняго укрепленной, в путешествии с родителем твоим во град Кронштадт явися ти святый Пантелеймон и рече: «Молися непрестанно!» И абие вознесла еси к Богу чистыя детския молитвы твоя, и избавлен бысть корабль от потопления, человецы же воспеша Творцу и Спасу благодарно: Аллилуиа. Икос 3 Имущи ревность многую о Господе, к пастырю Кронштадтскому притекла еси, блаженная, иже провидя в тебе избранный сосуд Божий, благослови тя, добрую отроковицу, и беседоваше с тобою. Мы же, зряще духовное восхождение твое от силы в силу, со благоговением тебе взываем: Радуйся, с младенства иереи окормляемая. Радуйся, от честных пресвитеров свято почитаемая. Радуйся, измлада молитву возлюбившая. Радуйся, непрестанно Господу трудившаяся. Радуйся, нерадивых и ленивых исправляющая. Радуйся, к делом во славу Божию побуждающая. Радуйся, от Христа дар врачевания приемшая. Радуйся, чудотвореньми Бога прославлявшая. Радуйся, блаженная Валентино, всех приходящих к тебе скоро утешающая. Кондак 4 Бури страстей избежавши, святая Валентино, и приемши благословение Божие и честных родителей, любовию и смирением созидала еси малую церковь семьи благочестивыя, подающи всем пример добродетельныя и кроткия жены, мужу помогающи и поющи Богу: Аллилуиа. Икос 4 Слышавши Христоподражательную жизнь богоносных и великих отцев, со смирением и упованием на милость Божию сретила еси юдоль плачевную земную — утрату сродников и добраго супруга твоего. Чад по плоти не даде ти Господь, обаче чада духовная во множестве обретошася ти смотрением Божиим, иже тебе, духовной матери своей, усердно восклицают: Радуйся, благочестия учительнице. Радуйся, тайных согрешений обличительнице. Радуйся, многодетных семей покровительнице. Радуйся, горделивых жен пред супругами смирительнице. Радуйся, жены непраздныя от греха спасающая. Радуйся, младенцев во чреве матернем сохраняющая. Радуйся, гнев Божий молитвами твоими утоляющая. Радуйся, умы и сердца наша к Небеси устремляющая. Радуйся, блаженная Валентино, всех приходящих к тебе скоро утешающая. Кондак 5 Боготечной звезде уподобилася еси, мати Валентино: подвигу Ксении блаженныя подражающи, удостоилася ты блаженства райскаго за великое смирение твое и терпение скорбей. Ныне же в лице святых воспеваеши Богу хвалу: Аллилуиа. Икос 5 Видевше тя людие, яко Ангела Божия, блаженства евангельская всем сердцем возлюбившую, притекаху к тебе, не могущей ходити, молитв от тебе ищуще. Ты же по глаголу Христову приходивших к тебе не отгоняла еси, но спасению человеческому ревностно служила еси. Научи убо и нас чистым сердцем славити Господа, тебе взывающих: Радуйся, святость твою притчами скрывавшая. Радуйся, на тайныя вопросы явно отвещавшая. Радуйся, жадных и скупых мягко обличающая. Радуйся, в добротворении верных утверждающая. Радуйся, цветы и пояски с молитвою сплетавшая. Радуйся, сия всем приходившим раздаявшая. Радуйся, со Ксениею блаженною в един день величаемая. Радуйся, с Матроною святою богоборцы посрамляющая. Радуйся, блаженная Валентино, всех приходящих к тебе скоро утешающая. Кондак 6 Проповеднице веры Христовы и благочестия христианскаго, праведная Валентино, бури богоборческия не устрашилася еси, но подвиг исповедничества подъемши, души многих скорбящих и во мраце отчаяния пребывающих укрепляла еси, Господу поющи: Аллилуиа. Икос 6 Возсияла еси в немощной плоти светом небесным, святая Валентино, егда мудрейшим юродством, терпением и страданием Христу последовала еси. Сего ради яви тя Господь источник благодати страждущим людем, егда разорени быша храмы земли Минския. Мы же ублажаем тя звании сими: Радуйся, в немощи человеческой силу Божию явившая. Радуйся, спасению народа белорусскаго послужившая. Радуйся, за исцеления мзду не приимавшая. Радуйся, чистым сердцем Господа созерцавшая. Радуйся, гонения за Истину подвигом юродства поправшая. Радуйся, в мирстей жизни высоту иночества показавшая. Радуйся, воли Божией себе предавшая. Радуйся, Господню волю открывающая. Радуйся, блаженная Валентино, всех приходящих к тебе скоро утешающая. Кондак 7 Хотя преблагий Господь страну нашу благодатию обогатити и дати образ хотящим спастися, подвиже тя Духом Святым на вельми скорбное и богоугодное житие, имже удивила еси не токмо человеков на земли, но и Ангелов на Небеси. Каждодневно тяготы людския носившая безропотно, услади любовию и наши души, да поем с тобою Богу: Аллилуиа. Икос 7 Новую видяще тя избранницу Божию, издалеча течаху к тебе и пресвитеры церковнии, обретающе в тебе кладезь мудрости и Божественных откровений. Просвети убо и нас, с верою в помощь твою благодатную вопиющих сице: Радуйся, честное Церкве похваление. Радуйся, Ангела хранителя увеселение. Радуйся, в делании духовном подвизающихся мудро укрепляющая. Радуйся, Господа чисто славословити певчих научающая. Радуйся, строителем храмов Божиих неоскудеваемо помогающая. Радуйся, мольбами твоими от суеты и страстей нас избавляющая. Радуйся, в недоуменный час печали полезныя помыслы ниспосылающая. Радуйся, предстоящих тебе и молящихся от бед соблюдающая. Радуйся, блаженная Валентино, всех приходящих к тебе скоро утешающая. Кондак 8 Странники сущия на земли сей, присно нас враг искушает, да не достигнем Отечества небеснаго. Помози нам, очисти ны от всякия скверны, да исправятся путие жизни нашея, да не постыдит нас Судия на нелицемерном и страшном Суде Своем. Молися о нас, Валентино всеблаженная, да с тобою возрадуемся: Аллилуиа. Икос 8 Всею мыслию у Господа водворялася еси, обаче и Матери Милующей, Царице Небесной, приносила еси пение умиленное, акафисты чести пред иконами Ея всех наставляющи. Темже тебе, теплой молитвеннице о нас к Преблагословенной, взываем, праведная Валентино: Радуйся, славу Приснодевы на всяк день воспевающая. Радуйся, чудотворныя иконы Пречистыя свято почитающая. Радуйся, образом Ахтырским дом твой благоговейно украсившая. Радуйся, Богородицы молитвами тридесятолетнее лежание понесшая. Радуйся, ангельскима крилома в болезни утешенная. Радуйся, на земли небеснаго посещения удостоенная. Радуйся, на ложе твоем ангельскою чистотою сиявшая. Радуйся, с терпением неистощимым болящим помогавшая. Радуйся, блаженная Валентино, всех приходящих к тебе скоро утешающая. Кондак 9 Все естество ангельское удивися подвигу дивнаго лежания твоего: на одре твоем, яко на высоком столпе, духом к Небеси воспаряющи, от Духа прорицающи и цельбы силою Божиею подающи, никогоже от себе тща и неутешена отпущала еси. Мы же, таковому житию твоему дивящеся, поем Всесильному Богу: Аллилуиа. Икос 9 Ветия многовещанныя не возмогут воспети крепость любве твоея, блаженная, явилася бо еси чадолюбивая мати скорбящим в тяжкую годину войны, молитвы возносила еси за воинство наше, помощи и заступления у Господа просящи. И ныне умоли Его в мире страны сохраняти, сердца наша любовию наполняти, да благодарно зовем ти: Радуйся, жизнь и смерть воинов, защитников наших, прозревающая. Радуйся, ко усердной молитве за усопших сродников подвизающая. Радуйся, мир Христов в маловерныя души вселяющая. Радуйся, дыхание жизни хранити научающая. Радуйся, любовь ко Отечеству земному показавшая. Радуйся, величием подвига твоего всех удивившая. Радуйся, веру апостольскую проповедавшая. Радуйся, милосердием Царствие стяжавшая. Радуйся, блаженная Валентино, всех приходящих к тебе скоро утешающая. Кондак 10 Спастися хотяще от различных напастей мира сего, тя, праведная Валентино, многомощную молитвенницу к Богу призываем: буди нам необоримая защитница от враг видимых и невидимых и помощница в нуждах и скорбех, избави же нас ходатайством твоим от лютых бед и искушений, да славим Бога победною песнию: Аллилуиа. Икос 10 Стена крепкая была еси всем во дни жития твоего, блаженная Валентино. Того ради и место погребения твоего прибежище духовное бысть чающим утешения в скорбном мире сем. Целебницу благодатную тя ведуще, приходим ныне ко святому гробу твоему, и от него цельбы безмездныя душам и телесем нашим приемлюще, благодарственное воздаем ти пение: Радуйся, лучами преславных чудес светло облистающая. Радуйся, слепым очи предивно отверзающая. Радуйся, лишенных смысла здравым умом снабдевающая. Радуйся, беснующимся избавление подавающая. Радуйся, вся недуги лютыя врачующая. Радуйся, целомудрию дети наша научающая. Радуйся, сердца ожесточенная умягчающая. Радуйся, от сетей вражиих свобождающая. Радуйся, блаженная Валентино, всех приходящих к тебе скоро утешающая. Кондак 11 Пением акафистным величаем тя, наставницу нашу, светло празднующи святую память твою. Ты же милостивно услыши малое моление сие, да и нас к лику мудрых дев сопричтет Господь Иисус Христос, радостно поющих Ему: Аллилуиа. Икос 11 Светильниче духовный, елеем благодати исполненный, под спудом не сокрытый, святая Валентино, да прославляемо будет о тебе имя Господне! Освети и нам путь ко спасению, в вере и надежде укрепи, разума и благочестия от Бога испроси, да с любовию зовем ти: Радуйся, образе истиннаго смирения. Радуйся, зерцало самоотречения. Радуйся, во псалмопениих духом к Небу воспарявшая. Радуйся, радость пасхальную в прославлении твоем даровавшая. Радуйся, страдания временная ни во что же вменяющая. Радуйся, изнемогающих во брани укрепляющая. Радуйся, росою Духа душу твою омывшая. Радуйся, цветник духовный дивно возрастившая. Радуйся, блаженная Валентино, всех приходящих к тебе скоро утешающая. Кондак 12 Благодать Святаго Духа испроси нам, блаженная Валентино, да и мы, любовию Христовою окормляеми, возможем добре ходити во свете заповедей Божиих, да будем чада единыя Святыя, Соборныя и Апостольския Церкве, веру чисту соблюдающе, единым же сердцем и едиными усты Богу воспевающе: Аллилуиа. Икос 12 Поюще твоя премногая благодеяния и страдания, ублажаем твое непостижимое терпение, мати Валентино, и чтуще святую память твою, молимся тебе: укрепи дух людей православных, даруй совершенную победу света боговедения над тьмою безбожия и приими похвальная сия: Радуйся, веру Православную твердо содержати наставляющая. Радуйся, раскол и суеверия искореняющая. Радуйся, теплотою Божественныя любве души согревающая. Радуйся, спасатися именем Иисусовым вразумляющая. Радуйся, души и телеса наша благодатно исцеляющая. Радуйся, о прославляющих тя Господа молящая. Радуйся, ревнителей крестных ходов сугубо награждающая. Радуйся, надеждою на спасение сердца верных увеселяющая. Радуйся, блаженная Валентино, всех приходящих к тебе скоро утешающая. Кондак 13 О предивная и преславная угоднице Божия, блаженная мати наша Валентино, духовным солнцем Руси Белой возсиявшая! Приими сие благодарственное моление наше, и предстоящи ныне Престолу Господа нашего Иисуса Христа, умоли Его даровати нам телесное здравие, наипаче же душевное спасение, да в день судный радостно воспоем Ему: Аллилуиа.[Се́й конда́к глаго́лется три́жды.][Далее повторяем 1‑е икос и кондак:]Икос 1 Ангела дивна Белой Руси яви тя всея твари Создатель, обрати ти люди заблуждшия на путь покаяния и призвати их на служение Истине. Темже и мы, благодаряще Бога, прославляем тя, яко просветительницу и заступницу нашу, и усердно вопием ти: Радуйся, пречудная избраннице Промысла Божественнаго. Радуйся, звездо прекрасная небосвода церковнаго. Радуйся, земли белорусския славное украшение. Радуйся, душам нашим пресладкое утешение. Радуйся, в ходатайствах о нас неусыпающая. Радуйся, пламеню молитвы неугасающий. Радуйся, Матерь Божию непрестанно величающая. Радуйся, любити всех нелицемерно Ею наученная. Радуйся, блаженная Валентино, всех приходящих к тебе скоро утешающая. Кондак 1 Избранной Богом на сохранение веры Православныя во дни гонений на земли Отечества нашего, хвалебное приносим ти пение, блаженная мати наша Валентино. Ты же, яко имущая дерзновение ко Господу, избави нас от зол душевных и телесных, да со умилением зовем ти: Радуйся, блаженная Валентино, всех приходящих к тебе скоро утешающая. Молитва блаженной Валентине Минской О блаженная мати наша Валентино! Якоже и во дни земныя жизни твоея, с любовию принимала еси всех страждущих и немощствующих, всех в скорбех и болезнех сущих, и молитвами твоими целила недуги их. Такожде и ныне всем, с верою и умилением приходящим к тебе, у Господа исцеления испроси, наипаче же от падений греховных сохрани и на путь спасения настави. Услыши нас недостойных, блаженная Валентино, и принеси наша моления ко Престолу Всевышняго, да с радостию восхвалим Пресвятую Троицу: Отца и Сына и Святаго Духа, ныне и присно и во веки веков. Аминь.

Конда́к 1 Избра́нным уго́дником Бо́жиим, все́м святы́м, от ве́ка во все́м ми́ре просия́вшим и на небеси́ венцы́ сла́вы прия́вшим, похва́льное прино́сим пе́ние. Вы́ же, я́ко иму́щии ве́лие дерзнове́ние ко Го́споду, от вся́ких на́с бе́д свободи́те, да зове́м ва́м хвале́бно: Ра́дуйтеся, вси́ святи́и, те́плии о все́м ми́ре Бо́гу моли́твенницы. И́кос 1 А́нгельский собо́р, ума́ленный паде́нием го́рдых а́нгел и ва́ми, все́ми святы́ми, восполня́емый, све́тло торжеству́ет в де́нь па́мяти ва́шей, и всю́ вселе́нную созыва́ет на весе́лие духо́вное. Мы́ же, и́м подража́юще, зове́м ва́м ра́достно: Ра́дуйтеся, святи́и, от ве́ка Бо́гом предуве́деннии и предуста́вленнии к сла́ве небе́сней; ра́дуйтеся, от все́х родо́в, ме́ст и време́н в служе́ние Го́споду избра́ннии. Ра́дуйтеся, избра́ние ва́ше по́двигами благоче́стия оправда́вшии; ра́дуйтеся, о́бразом до́брых де́л ва́ших пра́вый пу́ть к небеси́ на́м показа́вшии. Ра́дуйтеся, пре́жде пи́саннаго зако́на Бо́жия по зако́ну со́вести пра́ведно пожи́вшии; ра́дуйтеся, в зако́нней се́ни благоче́стно житие́ свое́ соверши́вшии. Ра́дуйтеся, в но́вей благода́ти све́тло доброде́тельми просия́вшии; ра́дуйтеся, в после́дняя сия́ времена́ Бо́гу благоугоди́вшии и мзду́ с пе́рвыми получи́вшии. Ра́дуйтеся, от земны́х скорбе́й преше́дшии к небе́сному поко́ю; ра́дуйтеся, сподо́бльшиися зре́ти неисповеди́мую сла́ву Бо́жию. Ра́дуйтеся, с ли́ки безпло́тных непреста́нно хва́лящии Пресвяту́ю Тро́ицу; ра́дуйтеся, всегда́ моля́щиися Е́й о все́х почита́ющих ва́с. Ра́дуйтеся, вси́ святи́и, те́плии о все́м ми́ре Бо́гу моли́твенницы. Конда́к 2 Ви́дящи Правосла́вная Христо́ва Це́рковь, многочи́сленными ли́ки святы́х, я́ко прекра́сными ра́йскими цве́ты себе́ укра́шену, све́тло почита́ет па́мять и́х и Пречи́стую Богома́терь с Ро́ждшимся от Нея́ Христо́м Бо́гом велича́ет, вопию́щи Тому́ хвале́бную пе́снь: Аллилу́иа. И́кос 2 Ра́зуму на́шему просвеще́ние у Го́спода испроси́те, святи́и уго́дницы Бо́жии, да отря́сши земно́е пристра́стие, вознесе́мся се́рдцем и мы́слию в насле́дованная ва́ми и на́м обеща́нная селе́ния ра́йская, и возопие́м ва́м ра́достно: Ра́дуйтеся, ветхозаве́тнии пра́отцы и патриа́рси, родонача́льницы по пло́ти Христа́ Сы́на Бо́жия; ра́дуйтеся, я́ко благослове́нием Бо́жиим умно́жишася ро́ды ва́ша, я́ко зве́зды небе́сныя. Ра́дуйтеся, среди́ мра́ка дре́вняго нече́стия пра́вую ва́шу ве́ру во и́стиннаго Бо́га сохрани́вшии; ра́дуйтеся, с наде́ждою ча́явшии обетова́ннаго Искупи́теля. Ра́дуйтеся, я́ко от ва́шего пле́мене возсия́ пресве́тлая свеща́ — Богоро́дица Мари́я; ра́дуйтеся, я́ко от Нея́ роди́ся Победи́тель сме́рти и а́да. Ра́дуйтеся, ве́рою во гряду́щаго Христа́ спасе́ние улучи́вшии; ра́дуйтеся, вме́сто дре́вния кля́твы благослове́ние те́м получи́вшии. Ра́дуйтеся, и во а́де Христо́ва прише́ствия ожида́вшии; ра́дуйтеся, а́дских муче́ний И́м изба́вленнии. Ра́дуйтеся, на небеса́ со сла́вою возведе́ннии; ра́дуйтеся, с ли́ки а́нгельскими в ве́чныя оби́тели Отца́ Небе́снаго вселе́ннии. Ра́дуйтеся, вси́ святи́и, те́плии о все́м ми́ре Бо́гу моли́твенницы. Конда́к 3 Си́лою Вы́шняго осенени́ бы́вше, святи́и, дерзнове́нно ополчи́стеся проти́ву нача́л и власте́й зло́бы поднебе́сныя, и победи́вше те́х кова́рства, вся́ блага́я начина́ния ва́ша до́бре соверши́сте, воспева́юще всеси́льному человеколю́бцу Бо́гу: Аллилу́иа. И́кос 3 Иму́ще святи́и проро́цы пресла́вная селе́ния во оби́телех до́му Отца́ Небе́снаго и присносу́щным све́том лица́ Бо́жия просвеща́еми, неизрече́ннаго вои́стину со все́ми святы́ми наслажда́етеся блаже́нства, его́же мы́ земни́и прича́стницы бы́ти жела́юще, воспева́ем ва́м си́це: Ра́дуйтеся, святи́и проро́цы, Бо́гом избра́ннии пре́жде ва́шего рожде́ния; ра́дуйтеся, ве́рно порабо́тавшии Ему́ пре́жде Христо́ва воплоще́ния. Ра́дуйтеся, от младе́нчества благода́тию Свята́го Ду́ха освяще́ннии; ра́дуйтеся, по́сланнии от Го́спода вразумля́ти заблу́ждшия сы́ны Изра́илевы. Ра́дуйтеся, предвозвести́вшии Христо́во от Де́вы сла́вное рожде́ние; ра́дуйтеся, зве́зды, предвари́вшии прише́ствие и́стиннаго Со́лнца. Ра́дуйтеся, законопресту́пных царе́й Изра́илевых дерзнове́нно обличи́вшии; ра́дуйтеся, вся́кое людско́е нече́стие мече́м сло́ва Бо́жия неща́дно посе́кшии. Ра́дуйтеся, ве́рнии раби́ Госпо́дни, вся́ хоте́ния Его́ испо́лнившии; ра́дуйтеся, и́стину небоя́зненно пред властьми́ веща́вшии. Ра́дуйтеся, мно́ги ско́рби в ми́ре претерпе́вшии; ра́дуйтеся, со все́ми избра́нными торжеству́ющии на небеси́ в сла́ве ве́чней. Ра́дуйтеся, вси́ святи́и, те́плии о все́м ми́ре Бо́гу моли́твенницы. Конда́к 4 Бу́ри жите́йския изба́вльшеся, вси́ святи́и, преидо́сте в небе́сный поко́й, на места́ зла́чна и прохла́дна, иде́же пото́цы сла́дости неисповеди́мыя, пи́ща сла́вы Бо́жия нетле́нная, пе́ния и гла́сы пра́зднующих; та́мо у́бо торжеству́ете со все́ми а́нгельскими си́лами, пою́ще Бо́гу: Аллилу́иа. И́кос 4 О́ко не ви́де и у́хо не слы́ша, и на се́рдце земна́го челове́ка не взыдо́ша ра́дости и сла́дости, и́хже вы́ ны́не наслажда́етеся, Апо́столи святи́и. Сего́ ра́ди благогове́йно взыва́ем ва́м: Ра́дуйтеся, святи́и Апо́столи, с Предте́чею Иоа́нном ближа́йшии дру́зи Христо́вы; ра́дуйтеся, по Пресвято́й Де́ве Мари́и, первостоя́телие у Престо́ла Святы́я Тро́ицы. Ра́дуйтеся, возвести́вшии ми́ру та́инство на́шего искупле́ния; ра́дуйтеся, све́том ве́ры Христо́вы омраче́нныя лю́ди просвети́вшии. Ра́дуйтеся, се́мя сло́ва Бо́жия в сердца́ челове́ческая все́явшии; ра́дуйтеся, плоды́ трудо́в ва́ших в небе́сном вертогра́де пожина́ющии. Ра́дуйтеся, святи́и отцы́, седмию́ вселе́нскими собо́ры испове́дание правосла́вныя ве́ры утверди́вшии; ра́дуйтеся, ути́шившии бу́рю ерети́ческаго нече́стия. Ра́дуйтеся, изъясни́вшии на́м догма́ты правосла́вныя ве́ры; ра́дуйтеся, и доны́не уче́нием ва́шим огражда́ющии Це́рковь Христо́ву от ересе́й и раско́лов. Ра́дуйтеся, святи́и иера́рси, сло́вом и житие́м све́тло просия́вшии; ра́дуйтеся, во све́те невече́рнем с духо́вными ва́шими ча́ды ны́не обита́ющии. Ра́дуйтеся, вси́ святи́и, те́плии о все́м ми́ре Бо́гу моли́твенницы. Конда́к 5 Богото́чною, Спа́се, Кро́вию Твое́ю искупле́ннии и ве́рно Тебе́ на земли́ послужи́вшии вси́ святи́и, ны́не на тве́рди церко́вней я́ко зве́зды пресве́тлыя сия́ют, и все́х на́с, по мо́рю стра́стнаго сего́ жития́ пла́вающих, на пу́ть пра́вый, к небе́сному оте́честву веду́щий, наставля́ют; о се́м у́бо с ра́достию благода́рно пое́м Бо́гу: Аллилу́иа. И́кос 5 Ви́девши святи́и му́ченицы, я́ко в ми́ре се́м вся́ су́етна су́ть и тле́нию прича́стна, потща́стеся предве́чному Бо́гу благоугоди́ти и претерпе́нием лю́тых му́к тле́нная на нетле́нная премени́ти, за е́же сподо́бистеся предстоя́ния у стра́шнаго Престо́ла Влады́чня в сла́ве ве́чней, в не́йже не забу́дите и на́с, па́мять ва́шу соверша́ющих и вопию́щих ва́м такова́я: Ра́дуйтеся, святи́и страстоте́рпцы, кро́вию свое́ю запечатле́вшии пра́вую ва́шу во Христа́ ве́ру; ра́дуйтеся, не убоя́вшиися убива́ющих те́ло, души́ же не могу́щих уби́ти. Ра́дуйтеся, претерпе́вшии стра́шная муче́ния; ра́дуйтеся, я́вльшии на себе́ Христо́вых страсте́й изображе́ния. Ра́дуйтеся, победи́вшии лю́тых мучи́телей свире́пства; ра́дуйтеся, чрез о́гнь и во́ду проше́дшии и в поко́й ве́чный вше́дшии. Ра́дуйтеся, испове́дницы и священному́ченицы, пострада́вшии за благоче́стие и почита́ние святы́х ико́н; ра́дуйтеся, преподобному́ченицы, в моли́тве Бо́гу собесе́довавшии и страда́нием диа́вола попра́вшии. Ра́дуйтеся, за сла́ву и че́сть Царя́ Небе́снаго му́жественно во́инствовавшии; ра́дуйтеся, побе́дную по́честь от Христа́ на небеси́ прии́мшии. Ра́дуйтеся, ве́лию благода́ть от Го́спода получи́вшии; ра́дуйтеся, мно́гая и разли́чная чудеса́ в сла́ву Бо́жию в поднебе́сней содева́ющии. Ра́дуйтеся, вси́ святи́и, те́плии о все́м ми́ре Бо́гу моли́твенницы. Конда́к 6 Пропове́дуют христиа́нстии ро́ди сла́ву ва́шу, вси́ святи́и; вы́ бо я́ко ра́й насажде́нный яви́стеся посреде́ Це́ркве, иму́щии дре́во жи́зни Сама́го Го́спода, от него́ же вкуси́вше сла́дости ра́йския, вся́ скороги́бнущая в ми́ре се́м презре́сте, и ра́достно в небе́сный вертогра́д внидо́сте, пою́ще: Аллилу́иа. И́кос 6 Правове́рие и доброде́тели преподо́бных оте́ц, я́ко со́лнце, всему́ ми́ру сия́ют и на́м мра́чный пу́ть жи́зни сея́ просвеща́ют, да не заблуди́м в пусты́ни греха́ и душепа́губных ересе́й. Сего́ ра́ди хвале́бно и́м воспева́ем: Ра́дуйтеся, преподо́бнии отцы́, ми́р и я́же в ми́ре любве́ ра́ди Бо́жия во́лею оста́вившии; ра́дуйтеся, преподо́бнии ма́тери, в по́двизех дневны́х и нощны́х земно́е тече́ние соверши́вшии. Ра́дуйтеся, пусты́нницы, в пеще́рах и гора́х со зверьми́ пожи́вшии; ра́дуйтеся, по́стницы, в а́лчбе и жа́жде вре́менное житие́ препроводи́вшии. Ра́дуйтеся, сто́лпницы, мра́з и зно́й Ца́рствия ра́ди Небе́снаго претерпе́вшии; ра́дуйтеся, затво́рницы, в серде́чней тишине́ Бо́га взыска́вшии. Ра́дуйтеся, де́вственницы, целому́дрие сохрани́вшии и непоро́чному А́гнцу Христу́ после́довавшии; ра́дуйтеся, послу́шницы, Христо́во смире́ние стяжа́вшии. Ра́дуйтеся, в общежи́тиих во взаи́мной бра́тской любви́ а́нгельски пожи́вшии; ра́дуйтеся, му́дрии и кро́тции мона́хов наста́вницы бы́вшии. Ра́дуйтеся, вси́ трудолю́бцы, доброде́телей соверше́нство стяжа́вшии; ра́дуйтеся, в поко́й Го́спода своего́ вше́дшии. Ра́дуйтеся, вси́ святи́и, те́плии о все́м ми́ре Бо́гу моли́твенницы. Конда́к 7 Хотя́ Всеблаги́й Госпо́дь яви́ти ми́ру, я́ко не всу́е тружда́ются вси́ благоугожда́ющии Ему́, но я́ко ве́лия мзда́ угото́вася и́м в Ца́рствии Небе́снем; сего́ ра́ди просла́ви со́нмы святы́х уго́дник Свои́х, разли́чне тому́ на земли́ послужи́вших; да и мы́ поревну́ем те́х житию́, и тоя́ же ве́чныя сла́вы ча́юще, пое́м Ему́: Аллилу́иа. И́кос 7 «Ве́руяй в Мя́, а́ще и у́мрет жи́в бу́дет»,— рече́ Госпо́дь. Ва́м же, святи́и вси́, изря́дно прили́чествуют си́и Влады́чни глаго́лы; вы́ бо а́ще и умро́сте на земли́ пло́тию, но душа́ми в вы́шнем селе́нии всегда́ жи́ви су́ще, мно́гая и неизрече́нная соверша́ете в ми́ре чудеса́, и те́плым ва́шим к Бо́гу хода́тайством посо́бствуете на́м, си́це возглаша́ющим ва́м: Ра́дуйтеся го́рняя му́дрствующим ва́шим умо́м и́стиннаго Бо́га позна́вшии; ра́дуйтеся, пра́вую ва́шу в Святу́ю Тро́ицу ве́ру непоро́чно сохрани́вшии. Ра́дуйтеся, Христа́ Сы́на Бо́жия, и́стиннаго Бо́га и соверше́ннаго Челове́ка испове́давшии; ра́дуйтеся, в спаси́тельныя Его́ стра́сти несумне́нно ве́ровавшии. Ра́дуйтеся, правосла́вием, я́ко зве́зды, блиста́ющии; ра́дуйтеся, пра́ведностию, я́ко фи́никс процвета́ющии. Ра́дуйтеся, пло́тию на земли́, умо́м же на небеси́ пожи́вшии; ра́дуйтеся, вре́менною сме́ртию на безконе́чную жи́знь преше́дшии. Ра́дуйтеся, те́сным путе́м ева́нгельски ше́ствовавшии; ра́дуйтеся, у́зкими враты́ Ца́рствия Небе́снаго дости́гшии. Ра́дуйтеся, ве́чных бла́г насле́дницы; ра́дуйтеся, о спасе́нии на́шем те́плии к Бо́гу хода́таи. Ра́дуйтеся, вси́ святи́и, те́плии о все́м ми́ре Бо́гу моли́твенницы. Конда́к 8 Страну́ ону́ го́рнюю, иде́же вси́ святи́и по труде́х земны́х почива́ют, у́мным очесе́м свои́м представля́юще, а́ще и не мо́жем пости́гнути су́щаго та́мо блаже́нства, мы́ земни́и и пло́тию обложе́ннии, оба́че, ве́рою сие́ проразумева́юще и се́рдцем предвкуша́юще, пое́м ди́вному во святы́х Свои́х Бо́гу: Аллилу́иа. И́кос 8 Исчита́яй мно́жество зве́зд и все́м и́м имена́ нарица́яй, Вседержи́телю Го́споди, Ты́ еди́н ве́си по и́мени все́х благоугоди́вших Тебе́. Мы́ же, де́ло су́ще руку́ Твое́ю, я́коже песка́ морска́го исчести́, си́це и все́х святы́х по и́мени нарещи́ не могу́ще, то́кмо изря́днейшия рабы́ Твоя́, от нача́ла ми́ра Тебе́ благоугоди́вшия, имену́ем, глаго́люще: Ра́дуйтеся, Ада́ме и Е́во, пра́отцы всего́ ро́да челове́ческаго; ра́дуйтеся, А́веле и Си́фе, пе́рвии в ми́ре благоче́стия рачи́телие. Ра́дуйтеся, Но́е, вторы́й ро́да на́шего родонача́льниче, и Авраа́ме, заве́та Бо́жия прие́мниче; ра́дуйтеся, Моисе́е богови́дче и Ааро́не, пе́рвый ветхозаве́тный свяще́нниче. Ра́дуйтеся, Ено́ше и Илие́, пло́тию сме́рти невкуси́вшии и на не́бо восхище́ннии; ра́дуйтеся, Иса́ие, Дави́де и Дании́ле, зри́телие та́ин Бо́га Вседержи́теля. Ра́дуйтеся, Иоаки́ме и А́нно, роди́вшии Де́ву Мари́ю, Ма́терь Христа́ Бо́га на́шего; ра́дуйтеся, Пе́тре, Па́вле, Иа́кове и Иоа́нне, избра́ннейшии Апо́столи Христо́вы. Ра́дуйтеся, Нико́лае, Васи́лие, Григо́рие, Иоа́нне и Афана́сие, непоколеби́мии столпи́ це́ркве Христо́вы; ра́дуйтеся, Анто́ние, Пахо́мие, Евфи́мие, Иларио́не и Са́вво, вели́кие мона́хов наста́вницы. Ра́дуйтеся, Гео́ргие, Дими́трие, Евстра́тие и Пантелеи́моне, вели́ции му́ченицы Христо́вы; ра́дуйтеся, Варва́ро, Ири́но, Параске́во, Екатери́но и вси́ му́ченицы, кро́вию свое́ю торжество́ ве́ры возвели́чившии. Ра́дуйтеся, вси́ святи́и, те́плии о все́м ми́ре Бо́гу моли́твенницы. Конда́к 9 Вси́ святи́и Твои́, Го́споди, а́нгельский подража́я чи́н, безпреста́ни сла́вят Пресвято́е И́мя Твое́ на небеси́, «Свя́т, свя́т, свя́т», — вопию́ще; с ни́ми же и мы́ гре́шнии на земли́ бре́нными устна́ми вопие́м: Аллилу́иа. И́кос 9 Вити́и суему́дрыя недоуме́ют глаго́лати: ка́ко вы́, вси́ святи́и, подобостра́стии на́м бы́вше челове́цы, непреодоле́ни страстьми́ бы́сте, му́жеством ва́шим безпло́тныя враги́ победи́сте. Мы́ же, прославля́юще укрепи́вшаго ва́с Го́спода, хва́лим до́блести ва́ша и умиле́нно вопие́м: Ра́дуйтеся, святи́и, вседу́шно Го́спода возлюби́вшии; ра́дуйтеся, любве́ Его́ ра́ди живота́ своего́ не щади́вшии. Ра́дуйтеся, ми́р и миродержи́теля победи́вшии; ра́дуйтеся, вся́ се́ти дре́вняго зми́я я́ко паучи́ну разори́вшии. Ра́дуйтеся, смири́вшиися под кре́пкую ру́ку всеблага́го про́мысла Бо́жия; ра́дуйтеся, покори́вшии во́лю свою́ во́ле Отца́ Небе́снаго. Ра́дуйтеся, просла́вившии Го́спода в душа́х и телесе́х ва́ших; ра́дуйтеся, возвели́чившии Его́ во все́х де́лех ва́ших. Ра́дуйтеся, воздвиза́вшии ру́це ва́ши на творе́ние де́л благи́х; ра́дуйтеся, направля́вшии стопы́ ва́ша на пу́ть пра́вый. Ра́дуйтеся, не приложи́вшии серде́ц ва́ших к земно́му бога́тству и наслажде́нию; ра́дуйтеся, всегда́ помышля́вшии о бла́гах небе́сных и ве́чном весе́лии. Ра́дуйтеся, вси́ святи́и, те́плии о все́м ми́ре Бо́гу моли́твенницы. Конда́к 10 Спасе́ния путе́м пра́во ше́ствующе и о судьба́х пра́вды Бо́жия поуча́ющеся, вси́ святи́и, яви́стеся я́ко древеса́ благопло́дная при исхо́дищах во́д, и принесо́сте Бо́гу пло́д доброде́телей ва́ших во вре́мя свое́. Ны́не же в го́рнем Еде́ме неизрече́ннаго наслажда́ющеся блаже́нства, помяни́те и на́с, ча́д ва́ших, оте́ческое ва́ше о спасе́нии на́шем попече́ние восхваля́ющих, Бо́гу же пою́щих: Аллилу́иа. И́кос 10 Стена́ тве́рда на́м проти́ву лица́ вра́жия вы́ есте́, вси́ святи́и, и те́плии моли́твенницы ко Христу́ о все́м ро́де христиа́нстем. Те́мже от стре́л неви́димаго бори́теля при́сно ва́ми защища́еми, ра́достно взыва́ем: Ра́дуйтеся, ро́да челове́ческаго ве́лие украше́ние; ра́дуйтеся, в стра́нствии земно́м при́сная на́м отра́да и утеше́ние. Ра́дуйтеся, в бра́ни со врага́ми спасе́ния на́шего си́льнии на́м помо́щницы; ра́дуйтеся, от меча́ гне́ва Бо́жия моли́твами ва́шими на́с защища́ющии. Ра́дуйтеся, са́ми искуше́ни бы́вше, и на́м во искуше́ниих помога́ющии; ра́дуйтеся, покая́нию на́с гре́шных зело́ ра́дующиися. Ра́дуйтеся, на разли́чных ме́стех земли́ во вся́ времена́ пра́ведно пожи́вшии; ра́дуйтеся, а́ще и согреши́вшии, оба́че и́стинным покая́нием и слеза́ми скве́рну грехо́в омы́вшии. Ра́дуйтеся, от Ада́ма да́же до дне́сь в наде́жди жи́зни ве́чныя сконча́вшиися; ра́дуйтеся, от Восто́ка и За́пада прише́дшии и на ло́не Авраа́мли почи́вшии. Ра́дуйтеся, я́ко со́нм ва́ш но́выми с земли́ прише́льцами всегда́ умножа́ется; ра́дуйтеся, я́ко ва́ми ме́сто па́дших духо́в в собо́ре а́нгельском восполня́ется. Ра́дуйтеся, вси́ святи́и, те́плии о все́м ми́ре Бо́гу моли́твенницы. Конда́к 11 Пе́сни на́ша хвале́бныя, а́ще бы и тмочи́слени бы́ли, не довле́ют к прославле́нию доброде́телей ва́ших, вси́ святи́и; и на́м немощны́м удо́бее люби́ти молча́ние; но да не яви́мся лени́ви и неблагода́рни за полу́ченныя ва́с ра́ди ми́лости и благодея́ния Бо́жия, пое́м просла́вльшему ва́с Влады́це: Аллилу́иа. И́кос 11 Свети́льницы све́та невече́рняго вы́ есте́, вси́ святи́и, у Престо́ла Пресвяты́я Тро́ицы с а́нгельскими чи́нми в моли́тве о на́с присногоря́щии, и на све́тлую спасе́ния стезю́ наставля́ющии вопию́щих ва́м си́це: Ра́дуйтеся, свети́льницы огня́ невеще́ственнаго; ра́дуйтеся, насе́льницы оби́телей Отца́ Небе́снаго. Ра́дуйтеся, гро́здие виногра́да Христо́ва; ра́дуйтеся, благоуха́ннии цве́ти ра́йстии. Ра́дуйтеся, живото́чнии ре́ки, в жа́жде духо́вней на́с напоя́ющии; ра́дуйтеся, дождено́снии о́блацы, в зно́и искуше́ний на́с прохлажда́ющии. Ра́дуйтеся, духо́внии ве́три, зи́му уны́ния от серде́ц на́ших прогоня́ющии; ра́дуйтеся, сладкопе́снивии сла́вии, духо́вную ве́сну ве́чнаго блаже́нства на́м возвеща́ющии. Ра́дуйтеся, мы́сленныя го́ры, к небеси́ на́с возводя́щии; ра́дуйтеся, у́мнаго Со́лнца лучи́, ми́лость Его́ на на́с излива́ющии. Ра́дуйтеся, до́брии ко́рмчии, от потопле́ния грехо́внаго на́с спаса́ющии; ра́дуйтеся, ве́рнии путевожди́е, в небе́сное оте́чество на́с путеводя́щии. Ра́дуйтеся, вси́ святи́и, те́плии о все́м ми́ре Бо́гу моли́твенницы. Конда́к 12 Благода́ть, от Бо́га да́нную ва́м в воздая́ние мно́гих доброде́телей ва́ших, кто́ от земноро́дных испове́сти возмо́жет, о святи́и! Я́коже бо ка́пли морски́я по еди́ной исчерпа́ти, си́це чудоде́йствий ва́ших и подава́емых ва́ми на́м благодея́ний не́сть мо́щно исчести́. Сего́ ра́ди ра́достно соверша́ем сла́вное ва́ше торжество́, и вся́ де́йствующему в ва́с Го́споду зове́м: Аллилу́иа. И́кос 12 Пою́ще Тя́, Влады́ко Вседержи́телю, восхваля́ем вси́ Пресвято́е И́мя Твое́, я́ко от нача́ла ми́ра в разли́чная времена́ яви́л еси́ приснопа́мятныя святы́я Твоя́, Тебе́ еди́ному в Тро́ице сла́вимому Бо́гу благоугоди́вшия, и́хже моли́твами от все́х зо́л избавля́еши вопию́щия к ни́м: Ра́дуйтеся, святи́и Бо́жии уго́дницы с Пресвяте́йшею всея́ тва́ри Присноде́вою Мари́ею; ра́дуйтеся, и вы́, безпло́тнии а́нгели, храни́телие ро́да челове́ческаго. Ра́дуйтеся, святи́и ца́рие и кня́зи, на земли́ благочести́во ца́рствовавшии и Небе́сное Ца́рствие насле́дившии; ра́дуйтеся, до́брии градоправи́телие, в небе́сном гра́де обита́ти сподо́бльшиися. Ра́дуйтеся, нелицеприя́тнии земни́и судии́, у небе́снаго Судии́ оправда́ние и ми́лость получи́вшии; ра́дуйтеся, ре́вностнии слове́сных ове́ц па́стырие, от Пастыренача́льника Христа́ похвале́ннии и просла́вленнии. Ра́дуйтеся, пра́веднии земледе́лателие, в простоте́ се́рдца и незло́бии Бо́гу послужи́вшии; ра́дуйтеся, терпели́вии стра́нницы, небе́снаго оте́чества дости́гшии. Ра́дуйтеся, юро́дивии, поноше́ния и укоре́ния Христа́ ра́ди претерпе́вшии; ра́дуйтеся, безсре́бренницы, ту́не боля́щим исцеле́ния подава́вшии и на небеси́ мзду́ прия́вшии. Ра́дуйтеся, во вся́ком во́зрасте и зва́нии угоди́вшии Бо́гу му́жие и жены́, я́ко вы́ еди́но есте́ о Го́споде и ду́ши ва́ша в руце́ Бо́жией; ра́дуйтеся, я́ко в бу́дущем ве́це ку́пно с душа́ми и телеса́ ва́ша ве́чныя сла́вы прича́стны бу́дут. Ра́дуйтеся, вси́ святи́и, те́плии о все́м ми́ре Бо́гу моли́твенницы. Конда́к 13 О всеблаже́ннии уго́дницы Бо́жии, вси́ святи́и, прия́вшии насле́дие бла́г ве́чных! Приими́те сие́ на́ше хвале́бное пе́ние, и благоприя́тными ва́шими к Бо́гу моли́твами испроси́те на́м грехо́в оставле́ние и ве́чных му́к избавле́ние, да с ва́ми в небе́сном на́шем Оте́честве пое́м Бо́гу: Аллилу́иа. Этот конда́к чита́ется три́жды, зате́м и́кос 1-й и конда́к 1-й. И́кос 1 А́нгельский собо́р, ума́ленный паде́нием го́рдых а́нгел и ва́ми, все́ми святы́ми, восполня́емый, све́тло торжеству́ет в де́нь па́мяти ва́шей, и всю́ вселе́нную созыва́ет на весе́лие духо́вное. Мы́ же, и́м подража́юще, зове́м ва́м ра́достно: Ра́дуйтеся, святи́и, от ве́ка Бо́гом предуве́деннии и предуста́вленнии к сла́ве небе́сней; ра́дуйтеся, от все́х родо́в, ме́ст и време́н в служе́ние Го́споду избра́ннии. Ра́дуйтеся, избра́ние ва́ше по́двигами благоче́стия оправда́вшии; ра́дуйтеся, о́бразом до́брых де́л ва́ших пра́вый пу́ть к небеси́ на́м показа́вшии. Ра́дуйтеся, пре́жде пи́саннаго зако́на Бо́жия по зако́ну со́вести пра́ведно пожи́вшии; ра́дуйтеся, в зако́нней се́ни благоче́стно житие́ свое́ соверши́вшии. Ра́дуйтеся, в но́вей благода́ти све́тло доброде́тельми просия́вшии; ра́дуйтеся, в после́дняя сия́ времена́ Бо́гу благоугоди́вшии и мзду́ с пе́рвыми получи́вшии. Ра́дуйтеся, от земны́х скорбе́й преше́дшии к небе́сному поко́ю; ра́дуйтеся, сподо́бльшиися зре́ти неисповеди́мую сла́ву Бо́жию. Ра́дуйтеся, с ли́ки безпло́тных непреста́нно хва́лящии Пресвяту́ю Тро́ицу; ра́дуйтеся, всегда́ моля́щиися Е́й о все́х почита́ющих ва́с. Ра́дуйтеся, вси́ святи́и, те́плии о все́м ми́ре Бо́гу моли́твенницы. Конда́к 1 Избра́нным уго́дником Бо́жиим, все́м святы́м, от ве́ка во все́м ми́ре просия́вшим и на небеси́ венцы́ сла́вы прия́вшим, похва́льное прино́сим пе́ние. Вы́ же, я́ко иму́щии ве́лие дерзнове́ние ко Го́споду, от вся́ких на́с бе́д свободи́те, да зове́м ва́м хвале́бно: Ра́дуйтеся, вси́ святи́и, те́плии о все́м ми́ре Бо́гу моли́твенницы. Моли́тва К ва́м, о святи́и вси́, я́ко путево́дным свети́льником, дея́ньми свои́ми освети́вшим пу́ть небе́снаго восхо́да, а́з, многогре́шный, смире́нно коле́на се́рдца моего́ преклоня́ю и из глубины́ души́ взыва́ю: умоли́те о мне́ Человеколю́бца Бо́га, да не попу́стит ми́ еще́ блужда́ти по распу́тиям греха́, но да просвети́т мо́й у́м и се́рдце све́том бла́гости Своея́, я́ко да то́ю озаря́емь и подкрепля́емь, возмогу́ про́чее вре́мя земна́го жития́ пра́вою стезе́ю непреткнове́нно прейти́ и хода́тайством ва́шим ко Всеблаго́му Го́споду сподо́блюся поне́ вма́ле прича́стник бы́ти духо́вныя ва́шея трапе́зы в небе́снем черто́зе Царя́ сла́вы, Ему́же со Безнача́льным Его́ Отце́м и Пресвяты́м, Благи́м и Животворя́щим Ду́хом бу́ди сла́ва, че́сть и поклоне́ние во ве́ки веко́в. Ами́нь.

Днесь радуется славная страна Сибирь,/ обрет святыя мощи твоя внутрь себе./ Архиереи, священницы и весь сонм людский/ духовне веселящеся, вопием ти: о Богомудре Симеоне!/ Избави нас, иже к тебе прибегающих, от всех бед,/ просяще податися всем по коегождо прошению,/ и избавитися стране сей и граду от огненнаго запаления и поганскаго нашествия и междоусобныя брани и от всякаго зла./ Темже и мы вси чтем ныне честных и многоцелебных мощей твоих пренесение новый целебниче, и вопием :/ слава Дающему тобою всем исцеление!

Яко светильницы явистеся всесветлии / во отоце окияна моря, / преподобнии отцы Зосимо и Савватие, / вы бо, крест Христов на рамо вземше, / усердно Тому последовасте / и, чистотою Богови приближившеся, / отонуду силами чудес обогатистеся. / Темже и мы любезно притекаем к ракам честных мощей ваших и умильно глаголем: / о, преподобнии, молите Христа Бога спастися душам нашим.

Светила богосиянная миру/ и иноков одушевленный зари,/ Фома чудесы, Акакий же послушанием,/ возсиясте светло;/ сих, яко имущих дерзновение к Богу,/ молитвами во бранех пособствовати молим,/ да просят от Христа Бога даровати прощение согрешений/ чтущим их святую память.

Радуйся, Богоневесто, жезле тайный,/ Цвет Неувядаемый процветший,/ радуйся, Владычице, Еюже радости наполняемся/ и жизнь наследствуем.

Тихостию нрава украшен,/ кротость и милосердие кающимся являяй,/ во исповедании православныя веры и любве ко ГосподУ/ тверд и непреклонен пребыл еси,/ святителю Христов Тихоне./ Молися о нас, да не разлучимся от любве Божия,/ яже о Христе Иисусе, Господе нашем.

В тебе, отче, известно спасеся еже по образу,/ приим бо крест, последовал еси Христу,/ и, дея, учил еси презирати убо плоть, преходит бо,/ прилежати же о души, вещи безсмертней./ Темже и со Ангелы срадуется, преподобне Шио, дух твой.

Божественною свыше просветися благодатию, преподобне,/ многим терпением во временной жизни подвиг совершил еси./ Темже источаеши чудес благодать/ всем, с верою приходящим к мощем твоим, Ефреме преблаженне./ Сего ради зовем:/ слава Давшему ти крепость,/ слава Венчавшему тя,/ слава Действующему тобою всем исцеления.

Слова Божия служительнице,/ во апостольстей проповеди первозванному Андрею/ и прочим апостолом подражавшая,/ просветительнице Иверии и Духа Святаго цевнице,/ святая равноапостольная Нино,/ моли Христа Бога// спастися душам нашим.

Светлых твоих подвигов пречестная память,/ яко велие солнце, всем возсиявает,/ лица воспевающих тя просвещает,/ демоны и всяку болезнь отгоняет,/ сего ради, сошедшеся, любовию сию верно восхвалим.

Многочудный Крит почтим,/ процветший честныя цветы, Христовы бисеры,/ мучеников сорасленых,/ десять бо суть числом, блаженнии,/ иже весь идольский народ посрамиша,// темже и венцы прияша, добледушнии.

Иже на земли Христа ради волею в буйство преложися,/ и мира сего красоты отнюд возненавиде,/ и плотская играния увядив постом и жаждою/ и на земли леганием,/ от зимы студению и мразом,/ и от зноя солнечнаго и дождя/ и прочия тяготы никогда же уклонися под кров,/ и на теле своем не имея одеяния,/ Божиею помощию покрываем,/ и душу очистил еси добродетельми своими, яко злато в горниле,/ Прокопие премудре,/ с верою творящим память твою честно/ и усердно притекающим к мощем твоим,/ прославляюще твое святое успение,/ Христу Богу молися, благоюроде,/ да избавит ны Господь от варварскаго нашествия и междоусобныя брани/ и мир мирови дарует/ и душам нашим велию милость.

Яже прежде безплодная, земле,/ ныне веселися:/ се бо Христос светильника в тебе показа,/ яве сияюща в мире/ и исцелевающа недуги и болезни наша./ Сего ради ликуй и веселися со дерзновением:// святитель бо есть Вышняго сия соделоваяй.