Тропари, кондаки и величания

Возсияв, яко звезда многосветлая,/ в соборней церкви пред пречистым и чудотворным образом Пречистей Богородицы,/ за Нюже и за град Смоленск пострада,/ многокозненнаго и богомерзкаго царя Батыя устраши,/ и сильнаго исполина победи, и люди удиви,/ душу свою, многострадальне Меркурие, за благочестие положи,/ яко Захариина и Авелева ясно вопиет твоя кровь ко Господу./ И ныне молися за души наша.

Преподобному во всех делех Господеви преискренне работая,/ и Онаго всегда в церкви преподобных Своих/ преподобным воспевая гласом,/ наследил еси, преподобне Меркурие, часть преподобных,/ с нимиже молися о всех нас.

Присносущныя, блаженне, желая сподобитися жизни, / праведне и непорочне / жизнь свою препроводил еси в нынешнем веце, / темже, Меркурие, желаемаго ты достиг, / моли и нам вечныя сподобитися жизни.

Во бранех непобедимаго воина/ и в бедах непостыдна заступника,/ песньми Меркурия ублажим, славяще,/ празднующия бо память его весело// от бед избавляет и скорбей.

Мученик Твой, Господи, Меркурий/ во страдании своем венец прият нетленный от Тебе, Бога нашего,/ имеяй бо крепость Твою,/ мучителей низложи,/ сокруши и демонов немощныя дерзости./ Того молитвами// спаси души наша.

Воздержанием тело духу поработив,/ душу же равноангельну сотворив,/ святительскою одеялся еси одеждею, яко венец священства,/ и ныне, всех Владыце предстоя,/ моли, всеблаженне Митрофане, умирити и спасти души наша.

Правило веры и образ кротости / словом и житием пастве твоей, отче смиренномудре Митрофане, был еси. / Темже и во светлостех святых / солнца светлейше возсиял еси, / венцем нетления и славы украшаемь, / моли Христа Бога / стране нашей и граду твоему в мире спастися.

Яко добродетелей учителя и святителем украшение/ Церковь, поющи тя, славит, Григорие,/ молитвами твоими подаждь чтущим тя любовию/ добродетелем исправление и соблазн избавление,/ яко непобедим.

Светолучными сиянии Церковь Святаго Духа световодит/ светлое совершающия твое успение,/ преподобне отче всеблаженне Григорие.

Божественный гром, труба Духа,/ веры садоделателю и сечиво ересей, иерарше Амфилохие,/ Троицы угодниче великий,/ со Ангелы предстоя присно,/ моли непрестанно о всех нас.

Боже отец наших,/ творяй присно с нами по Твоей кротости,/ не отстави милость Твою от нас,/ но молитвами их/ в мире управи живот наш.

Величаем тя,/ благоверный княже Александре,/ и чтим святое успение твое,/ и ныне молиши за нас// Христа, Бога нашего.

Яко звезду тя пресветлу, почитаем, от востока возсиявшую и на запад пришедшую,/ всю бо страну сию чудесы и добротою обогащаеши/ и просвещаеши верою чтущия память твою, Александре блаженне./ Сего ради днесь празднуем твое успение, людие твои сущии:/ моли спасти Отечество твое/ и вся притекающия к раце мощей твоих и верно вопиющия ти:// радуйся, граду нашему утверждение.

Яко благочестиваго корене/ пречестная отрасль был еси, блаженне Александре,/ яви бо тя Христос, яко некое Божественное сокровище Российстей земли,/ новаго чудотворца, преславна и богоприятна./ И днесь сошедшеся в память твою верою и любовию,/ во псалмех и пениих радующеся славим Господа,/ давшаго тебе благодать исцелений,/ Егоже моли спасти град сей,/ и державе Российстей/ богоугодней быти,// и сыновом Российским спастися.

Возсия днесь преславная память твоя,/ благородне страстотерпче Христов, Ярополче Богомужне,/ созывающи нас к похвалению Христа, Бога нашего./ Темже, к тебе днесь притекающе,/ с любовию взываем радостно:/ блаженна земля, упитавшаяся кровьми твоими,/ и свята селения, приимшая дух твой,/ идеже в рай, нетленныя пищи наслаждался,/ не забуди нас, воспевающих тя,/ но присно поминай в молитвах твоих к Богу,/ да избавимся от всех бед и скорбей,/ инее присно память твою почитающи.

Яко благоверен и праведен,/ за любовь Христа Бога от своих си смерть приял еси, Ярополче,/ страстотерпче святый, благоверный княже Волынский,/ и пролиял еси кровь твою,/ якоже прежде сродницы твои и страстотерпцы, Богоблаженнии Борис и Глеб,/ ихже подвигом ревнуя благочестно,/ Господеви взывал еси усердно:/ даруй ми кончину, якоже братиям моим,/ да и аз омыю грехи моя кровию моею/ и избавлюся мира сего тщетнаго и мятежнаго./ Темже, днесь сошедшеся в память твою,/ верою и любовию славим Господа,/ укрепившаго Тебе в подвизе напрасныя смерти,/ якоже бо агнец незлобивый,/ от раба заколен еси,/ и себе самаго жертву непорочну Господеви принесл еси,/ Егоже моли, присноблаженне,/ спасти Отечество твое/ и сыновом Российстим спастися.

Вышних ища и земную славу презрев,/ Церковь Божию обагрил еси твоею кровию,/ за Нюже и пострадал еси, святе Михаиле,/ заколение неправедное прием, веселяся./ Темже со Ангелы предстоя Христу Богу,/ моли непрестанно за вся ны.

Возвысив ум твой к Богу,/ и жития со Ангелы возжелел еси,/ тленную славу земную оставил еси, блаженне,/ и положил еси душу твою за люди твоя,/ восприял еси венец противу трудов твоих, Богомудре Михаиле,/ моли Христа Бога о чтущих любовию святую память твою.

Яко звезды всесветлыя, просвещающия концы,/ апостолы Христовы восхвалим,/ Филимона славнаго, и Архиппа священнаго,/ и Онисима, и Марка, и Аполлоса,/ с нимиже и Апфию всемудрую, вопиюще:// молите непрестанно о всех нас.

Апостоли святии,/ молите милостиваго Бога,/ да прегрешений оставление// подаст душам нашим.