Тропари, кондаки и величания

Величаем Тя,/ Пресвятая Дево,/ Богоизбранная Отроковице,/ и чтим еже в храм Господень// вхождение Твое.

Пречистый храм Спасов,/ многоценный чертог и Дева,/ священное сокровище славы Божия,/ днесь вводится в дом Господень, благодать совводящи,/ Яже в Дусе Божественном,/ Юже воспевают Ангели Божии:// Сия есть селение Небесное.

Днесь благоволения Божия предображение/ и человеков спасения проповедание:/ в храме Божии ясно Дева является/ и Христа всем предвозвещает./ Той и мы велегласно возопиим:/ радуйся, смотрения// Зиждителева исполнение.

Веселия днесь/ вселенная исполнися вся/ в благознаменитом празднице/ Богородицы, зовущи:// Та есть сень Небесная.

Радость предобручает всем Анна ныне,/ печали сопротивный плод прозябши, едину Приснодеву,/ Юже и приводит, молитвы исполняющи,/ днесь веселящися, в храм Господень,// яко сущий храм Бога Слова и Матерь чистую.

Всечестнаго святителя, Царскаго града престол украсившаго/ и сокровищем безценным того обогащшаго, пречестными мощмй Златоустовыми,/ имже слово животно стяжа, просвещая верно чтущия его,/ песньми похваления того радостно ублажим, зовуще:/ радуйся, архиерею, отче священный.

Достойно днесь торжествует/ всех градов честнейший воистинну в честном преставлении твоем,// отче отцев, Прокле мудре.

Иже Божественным началом премудрости,/ страхом Господним утверждся,/ оттуду священными восхождении возшел еси/ во ученичество Златоуста,/ и архиерейскаго того престола достоин быв чистоты добротами,/ апостольским правилом себе вообразив,/ не себе живый, но Христу и стаду твоему./ Тем в нетленный живот апостольски вселился еси,/ иерарше Прокле,/ моли Христа Бога/ спастися душам нашим.

От юности, преподобне,/ плотскую волю в постех и молитвах источил еси,/ крест свой взем, Христови последовал еси,/ темже и к Вышним течением радостно устремив себе,/ идеже со всеми святыми Святей Троице предстоиши,/ но и ныне стадо свое посещая,/ поминай чтущих пресвятую память твою,/ да вси благодарно вопием ти:/ радуйся, Богомудре Диодоре, наставниче наш пустынный.

Желанием духа распалився,/ мятеж мирский отринув,/ ко Единому Богу любовию прилепися/ и Того вседушне взыскуя,/ во внутреннюю пустыню отыде,/ при водах вселися,/ идеже в слезах и трудех пребывая многолетное время,/ в терпении мнозе житие Ангельское проходил еси/ в наставлении Божественнаго разума,/ стадо инок собра мудре,/ ихже посещая, не остави, Диодоре преподобне, отче наш,/ Пресвятей Троице моляся/ от зол всяческих избавити и спасти души наша.

Светлое тя солнце Церковь познавает,/ добродетелей красотами и исцелений лучами/ всех просвещая, Христов угодниче:/ темже празднуем честную память твою/ и почитаем подвиги твоя,// всеблаженне отче премудре Григорие.

Образ был еси воздержания,/ Божественным Духом вся просветив:/ правоверия течение совершил еси,/ учением мир просветил еси/ и зловерных обличил еси смыслы,/ отче преподобне Григорие,/ Христа Бога моли даровати нам велию милость.

Боже отец наших,/ творяй присно с нами по Твоей кротости,/ не отстави милость Твою от нас,/ но молитвами их// в мире управи живот наш.

Яко истинный подражатель преподобнаго Сергия,/ добродетель измлада возлюбил еси, богоблаженне Филарете,/ яко пастырь праведный и исповедник непорочный,/ по святем преставлении/ от безбожных поругание и поношения приял еси,/ Бог же знаменьми и чудесы тя прослави// и заступника Церкве нашея яви.

Духа Святаго благодать стяжав,/ богомудре святителю Филарете,/ истину и правду разумом просвещенным/ людем проповедал еси,/ мир и милость сердцем умиленным/ страждущим явил еси,/ яко учитель веры и страж неусыпный/ паству российскую жезлом правости сохранил еси./ Сего ради дерзновение ко Христу Богу имея,/ моли даровати Церкви утверждение// и душам нашим спасение.

Ведый твое из младенства благое изволение, Иоасафе, един сердцеведец Бог,/ и от царствия земнаго в монашеское пребывание приведый тя,/ великому Варлааму последовати сподоби./ С нимже и ныне горний Иерусалим всесветлый отечество имея,/ желаемыя доброты красно наслаждался Святыя Троицы,/ молим тя, царская красото,/ поминай нас, верою чтущия тя.

Из чрева матерня/ прекрасное вселение бысть Святаго Духа,/ преславне Иоасафе,/ и от блаженнаго Варлаама безценный бисер, Христа,/ в сердце своем приял еси,/ и Божественным Крещением Индию просветил еси,/ отеческое же нечестие исправль,/ приведе его от тьмы ко свету Богоразумия/ и, оставив тленное на земли царство,/ пустыню достиг и своего учителя,/ темже на Небесех от Живоначальныя Троицы/ венцем царским венчася,/ моли о нас, чтущих честную твою память.

От духовнаго наставника научився,/ царю Иоасафе, Бога познати,/ Крещением же просветився,/ люди к вере обратил еси,/ и отцу твоему от купели приемник быв,/ царство оставив, пустыню достигл еси/ и в ней трудолюбие подвизался еси./ Моли Христа Бога со учителем твоим Варлаамом/ спастися душам нашим.

Отеческаго прещения не устрашился еси,/ ласканиям того не повинулся еси,/ ниже лестию низложился еси женскою, всечестне Варлааме,/ но непобедимь от тех пребыл еси,/ надеяся на Господа своего, Емуже молися о душах наших.

Мира красная и славу его оставль,/ притекл еси в пещеру,/ идеже от силы преуспевая в силу,/ был еси вождь Христова стада, всеславне Варлааме,/ еже яко упас добре, упаси и нас, молим тя,/ сохраняя от всех зол, да тя ублажаем.