Тропари, кондаки и величания

Чистотою душевною божественно вооружився/ и непрестанный молитвы, яко копие, имый,/ крепко ссекл еси бесовское ополчение,/ Паисие, отче наш,/ моли непрестанно о всех нас.

Слез твоих теченьми пустыни безплодное возделал еси/ и, иже из глубины воздыханьми, во сто трудов уплодоносил еси,/ и был еси светильник вселенней, сияя чудесы, Паисие, отче наш,/ моли Христа Бога/ спастися душам нашим.

Христовы ради любве отечество и род оставил еси/ и, ангельскому житию поревновав,/ духовному отцу твоему преподобному Макарию, подражатель быв,/ града Углеча достигл еси,/ и близ того при водах в пустыню, Ангелом показанную, вселился еси,/ и обитель прекрасну Матери Божией воздвигл еси,/ и множество монахов собрал еси,/ имже и наставник ко спасению быв,/ и чудес дарования от Бога приял еси,/ Паисие преподобне,/ моли Христа Бога спастися душам нашим.

Христовы ради любве отечество и род оставил еси,/ и, ангельскому житию поревновав,/ в пустыню вселился еси,/ в нейже многотрудное житие явил еси/ и чудес дарования от Бога приял еси,/ Паисие преподобне,/ моли Христа Бога спастися душам нашим.

Мученик Христовых лик песньми почтим, пострадавших крепко Христовы ради веры истинныя и вражию гордыню до конца низложивших: озарившеся бо благодатию несозданныя Троицы, славнии, со священномучеником Исидором пострадавшии, яко звезды сияете во всем мире, и ныне молитеся Христу непрестанно, и нас защищаете от враждебных язык нашествия, неусыпнии молитвенницы о душах наших.

Страстотерпцы Господни блаженнии, православную веру Христову со дерзновением проповедасте, и на судищи учения врагов неправая обличисте: того ради и ввержени бысте, святии, во глубину речную, души же ваши вселишася в Небесныя кровы, идеже со святыми предстояще Престолу Царя всех Бога, молитеся Ему за благовернаго императора нашего и за вся православныя люди, подвиги ваша честно почитающия.

Запрещая беззаконнующим беззаконновати, ввержен был еси теми в струи речныя, досточудне Григорие, идеже блаженную воспри­ем кончину. Ныне со Ангелы предстоя Престолу Владычню, молися о ду­шах наших.

Великих дарований приемниче и великих чудес силою Божиею творителю, пречудне отче Григорие, яко велие дерзновение имея ко Христу Богу, непрестанно о нас молися Ему, да грехов оставление подаст душам нашим.

Велием воздержанием и нощными молитвами, преподобне чудотворче отче Григорие, приял еси от Бога дар чудотворения исцеляти недужныя, с верою к тебе притекающия, темже и наша многия болезни исцели, молимся.

Пещерный житель и в телеси Ангел и чудотворец явился еси, богоносе отче наш Григорие, постом, бдением, молитвою небесная дарования приим, исцеляеши недужныя и души верою приходящим ти. Слава Давшему ти крепость, слава Венчавшему тя, слава Действующему тобою всем исцеления.

Явился еси светило пресветлое, Георгие,/ озаряя Божественными зарями верно зовущия ти:/ моли о нас Владыку Христа,/ явльшагося во струях// и просвещшаго земнородныя.

Плотскаго Твоего пришествия убоявся,/ Иордан страхом возвращашеся;/ пророческое же служение исполняя,/ Иоанн трепетом спряташеся;/ Ангельския чини ужасахуся,/ зряще Тя, во струях плотию крещаема;/ и вси, сущии во тьме, озаряхуся,// воспевающе Тя, явльшагося и просветившаго вся.

Память праведнаго с похвалами,/ тебе же довлеет свидетельство Господне, Предтече:/ показал бо ся еси воистинну и пророков честнейший,/ яко и в струях крестити сподобился еси Проповеданнаго./ Темже, за истину пострадав, радуяся,/ благовестил еси и сущим во аде Бога, явльшагося плотию,/ вземлющаго грех мира// и подающаго нам велию милость.

Величаем Тя,/ Живодавче Христе,/ нас ради ныне плотию крестившагося/ от Иоанна// в водах Иорданских.

Явился еси днесь вселенней,/ и свет Твой, Господи, знаменася на нас,/ в разуме поющих Тя:/ пришел еси и явился еси,// Свет Неприступный.

Во Иордане крещающуся Тебе, Господи,/ Тройческое явися поклонение:/ Родителев бо глас свидетельствоваше Тебе,/ возлюбленнаго Тя Сына именуя,/ и Дух в виде голубине/ извествоваше словесе утверждение./ Явлейся Христе Боже// и мир просвещей, слава Тебе.

Всех, Христе, Благоутробне, отъемляй прегрешений множество/ милости ради безмерныя,/ Иорданскими водами креститися грядеши, яко Человек,/ одеждею мя одевая,// славы древния обнаженна люте.

Возвращашеся иногда Иордан река милотию Елиссеевою,/ вознесшуся Илии,/ и разделяхуся воды сюду и сюду/ и бысть ему сух путь, иже мокрый,/ во образ воистинну Крещения,/ имже мы текущее жития преходим шествие:// Христос явися во Иордане освятити воды.

Звезды светлыя, яко двунадесятем способницы, / Христос вас яви, премудрии, / озаряющия мир светом проповеди/ и в веру приведшия множество безчисленно язык, апостоли Божественнии./ Сего ради днесь восхваляем верою вашу память,/ молите спастися душам нашим.

Христовых учеников лик седмьдесят/ Божественно, вернии, в песнех восхвалим,/ теми бо вси навыкохом Троицу почитати Нераздельную,// и пребывают светильницы Божественныя веры.