Апостоли святии,/ молите Милостиваго Бога,/ да прегрешений оставление// подаст душам нашим.
Яко Ангел во плоти на земли показася, / пощением насажден бысть, отче преподобне Феоктисте,/ наставник иноком многим быв,/ сего ради вопием ти: / моли Христа Бога даровати нам велию милость.
Апостоле святый Фаддее,/ моли Милостиваго Бога,/ да прегрешений оставление/ подаст душам нашим.
Днесь Едес град веселится,/ прием тобою Крещения баню,/ и Авгарь, страстей пременен, твою память славит./ С нимиже поем и мы:/ веселия духовнаго исполни живот наш/ и страсти исцели,/ Фаддее апостоле, молитвами твоими.
Свыше благодать прием от Бога, / во святительское подобие облеклся еси/ и от уст твоих благочестно всех научил еси покланятися Троице Единосущней. / Темже память твою чтуще,/ прославляем Бога, прославльшаго тя.
Избран от Бога, возлюблен от людей, / архиереов Божественная красото, / отче Евстафие, Ангелов сослужителю, / таин же Божественных проповедатель был еси,/ темже моли Христа Бога со всеми святыми / избавится от всяких зол / молитвами твоими, блаженне, / и спастися нам, / чтущим любовию святую память твою.
Велие имел еси воистинну воздержание, славне, / и многое показал еси лощение, о Ахило, / зане едва единою в седмицы,/ и се едину малу просфору снедаше/ и бденным стоянием к Нему выну дручашеся,/ тем тя, яко постника и преподобным сообщника/ чтуще, ублажаем.
Постническое житие облобызав/ и многими труды от младых ногтей себе обложив,/ на степень диаконства произведен быв, всечестне, / в коем служил еси в церкви Божия Матере непорочне, / Ейже молися, / во еже спастися душам нашим.
Яко Ангел послужил еси, всеблаженне, / и сподобися преди будущая вещати,/ Господне бо вочеловечение всем уяснил еси,/ темже вопием ти: / радуйся, пророче Божий Малахие, приснопамятне.
Пророчества дарованием богатея, пророче,/ Христово предвозвестил еси пришествие яве и мирови спасение,// Егоже сиянием мир просветися.
Всею любовию днесь Церковь твою память совершает, Гордие, / восхваляющи тайно, / яко по той пострадал еси, / мучеником доброто / и всем верным во Христа похвало.
Твоя поты, преславне, всю землю напоиша,/ и честными кровьми, Гордие, мир весь возвеселил еси./ Молитвами твоими, Богомудре,/ спасай вся, верою тя воспевающия и ублажающия,// вопиющия песнь достойную, всехвальне, яко многострадалец.
Мученик Твой, Господи, Гордий,/ во страдании своем венец прият нетленный от Тебе, Бога нашего:/ имеяй бо крепость Твою,/ мучителей низложи,/ сокруши и демонов немощныя дерзости./ Того молитвами// спаси души наша.
Скоропослушливую помощницу вси, сущии в бедах и болезнех, воспоем Иулианию святую, та бо в мире богоугодно поживе и милостыню к нищим безмерну показа, сего ради обрете благодать чудес Божиим ведением.
На рамо вземши крест свой,/ последовала еси Христу милостынею, постом и молитвою, / всехвальная Иулиания милостивая,/ и всем, в мире живущим, правило явилася еси жития,/ темже Вышнее Царствие наследовавши,/ непрестанно моли/ спастися душам нашим.
Просветившися Божественною благодатию,/ и по смерти светлость жития твоего явила еси:/ источаеши бо миро благовонное всем болящим на исцеление,/ с верою приходящим к мощем твоим,/ праведная мати Иулиание,/ Христа Бога моли/ спастися душам нашим.
Мира красоту и яже в нем тленная оставив, преподобне,/ в Саровскую обитель вселился еси/ и, тамо ангельски пожив,/ многим путь был еси ко спасению,/ сего ради и Христос тебе, отче Серафиме, прослави/ и даром исцелений и чудес обогати./ Темже вопием ти:// радуйся, Серафиме, преподобне отче наш.
От юности Христа возлюбил еси, блаженне,/ и, Тому Единому работати пламенне вожделев,/ непрестанною молитвою и трудом в пустыни подвизался еси,/ умиленным же сердцем любовь Христову стяжав,/ избранник возлюблен Божия Матере явился еси./ Сего ради вопием ти:// спасай нас молитвами твоими, Серафиме, преподобне отче наш.
Всех Господь обрезание терпит/ и человеческая прегрешения, яко Благ, обрезует,/ дает спасение днесь миру./ Радуется же в Вышних и Создателев иерарх,// и светоносный, Божественный таинник Христов Василий.
На Престоле огнезрачнем/ в Вышних седяй со Отцем Безначальным и Божественным Твоим Духом,/ благоволил еси родитися на земли/ от Отроковицы Неискусомужныя, Твоея Матере, Иисусе,/ сего ради и обрезан был еси, яко Человек осмодневный./ Слава всеблагому Твоему совету,/ слава смотрению Твоему,// слава снизхождению Твоему, Едине Человеколюбче.