Тропари, кондаки и величания

Взбранному и крепкому адаманту,/ прогонителю бесов, новому чудотворцу/ победительная, страстей злых свободившеся,/ благодарственная восписуем ти, отче наш Кирилле./ Но яко имея дерзновение у престола Христова,/ верою чтущих тя, град же и люди, молитвою твоею сохраняй,/ ты бо еси стаду твоему похвала и утверждение.

Яко светильник явился еси всесветел/ во отоце Нова езера на Красном острове,/ преподобне отче Кирилле,/ ты бо крест Христов на рамо взем,/ усердно Тому последовал еси,/ чистотою Богови приближився,/ от Негоже и силами чудес обогатися,/ тем и мы любезно прибегаем к раце честных мощей твоих, умильно глаголем:/ о, преподобне отче Кирилле!/ моли Христа Бога спастися душам нашим.

Божиим Духом подвизаемь,/ слез твоих тучами изсохшее напоил еси,/ и безплотное в пустыни житие показал еси,/ и еже из глубины сердца бодренными молитвами и постом/ благодеяния труды уплодоносил еси,/ и вселенную всю просветил еси сиянием чудес твоих,/ отче наш Кирилле./ Моли Христа Бога, спастися душам нашим.

Денницу другую тя Церковь обретши, преславне,/ твоих словес молниями освещаема,/ взывает ти:/ радуйся, всеблаженне Богомудре Исидоре.

В тебе, отче, известно спасеся еже по образу:/ приим бо крест, последовал еси Христу/ и, дея, учил еси презирати убо плоть, преходит бо/ прилежати же о души, вещи безсмертней:/ темже и со Ангелы срадуется, преподобне Исидоре, дух твой.

Христове смерти подобяся, и Того испити чашу возжелев, яко живота, за Него же мужески подвизався, презрев земное царство, от безбожных варвар пострадав до смерти, Георгие богомудре; тем моли спастися христолюбивому императору нашему молитвами твоими.

Христове смерти подобяся/ и Того испити чашу возжелев, яко Живота,/ за Негоже мужески подвизался еси, презрев земное царство,/ от безбожных варвар пострадав до смерти,/ Георгие Богомудре./ Тем моли, спастися верным людем молитвами твоими.

На высоте великаго княжения седя,/ явился еси, благочестием и верою сияя отечеству своему, яко солнце;/ по Святей Троице ревностию разжегся/ и за веру крепко пострадав, кровь твою пролиял еси./ Тем и отсеченая твоя за Христа глава свидетельствует яве о тебе,/ прилепшая по смерти к телеси твоему,/ с неюже и до днесь нетленны пребывают мощи твоя,/ от нихже источаеши исцеления душам и телесем нашим./ Но яко дерзновение имея ко Христу, страстотерпче Георгие,/ непрестанно моли державу твою и сродник твоих/ безвредну сохранити молитвами твоими.

Старец днесь отрешитися/ от юз моляшеся/ сего жития тленнаго,/ Христа восприят на руки,// Зиждителя и Господа.

Симеон старец днесь веселится,/ восприят на руку свою Младенца Превечнаго Бога,/ от уз плоти разрешитися прося/ и вопия: видеста очи мои// спасение Твое мирови.

Красоту мира сего, княжение и славу/ яко временно помышляя,/ и сего ради благочестно в мире пожил еси,/ блаженне княже Романе,/ милостынею и молитвами Богу угодив,/ и по преставлении своем чудес дар приим от Христа Бога,/ и светильник явися пресветлый,/ просвещая своими чудесы, приходящим к тебе с верою здравие подавши и от бед избавлявши./ Тем же Христова Церковь песньми славит тя,/ благочестивый княже Романе,/ граду своему Углечу великий поборниче.

Скончав добрый подвиг,/ и веру соблюде в сердцы своем,/ и венец нетленный от Бога приял еси,/ блаженный княже Романе,/ и славе Его сподобился еси,/ и Престолу предстал еси Спасову./ Молися Господеви спасти град Углеч и вся грады/ от нашествия иноплеменных, и междоусобныя брани, и поганых,/ и твое честное преставление почитающим/ грехов оставление даровати/ чтущим любовию святую память твою.

Яко многосветлая звезда,/ всепразднственная память твоя возсия днесь, благоверный княже Романе,/ созывающи к похвалению люди твоя,/ песньми славословити честное житие твое/ и верно торжествовати святое твое успение,/ в немже молися, святе, ко Христу Богу нашему,/ еже избавитися нам от всех наветов вражиих,/ да вси зовем ти:/ радуйся, Романе пребогате, новый Российский чудотворче.

Явися, яко звезда пресветлая,/ благоверный княже Романе,/ в Богом порученном ти граде Углече,/ в животе своем просветився/ воздержанием и всенощным стоянием,/ постом, и молитвою, и слезами,/ моляся ко Всемилостивому Спасу за град свой/ и за вся страны Русския земли,/ и по преставлении твоем источаеши исцеления неоскудно/ приходящим с верою,/ тем же вопием ти:/ моли Христа Бога/ спастися душам нашим.

Измлада явился еси, Богомудре,/ княже Романе всеблаженне,/ Божественный сосуд избран Богови,/ и ныне точиши нам многая исцеления,/ и вся недуги потоплявши,/ и спаси град свой Углеч,/ и всех верных сохраняй от невидимых и видимых враг,/ верою, молим, блаженне княже Романе,/ моли Христа Бога спастися душам нашим.

От младенства явился еси,/ правоверный княже Романе,/ избран от Бога/ благочестия столп необорим,/ веру непорочну соблюл еси,/ молитвами и милостынею и постом Богу угодил еси;/ темже и по смерти явися светлость жития твоего,/ исцелявши бо недуги немощствующих,/ верою притекающих ко святому твоему гробу./ Сего ради вопием ти:/ радуйся, угодниче Божий Романе,/ града Углеча похвало и утверждение.

Твердаго и Боговещаннаго проповедателя Евангелия Твоего, Господи,/ возмездил еси Боголепно/, труды бо его и болезни приял еси паче всех жертв законных и всесожжении./ Того молитвами соблюди нас от неприязни.

Странника и пришельца прият тя страна Японская,/ равноапостолъне святителю Николае,/ в ней же исперва познал еси себе яко чуждаго,/ обаче теплоту и свет Христов источая,/ прелагал еси враги твоя в сыны духовныя,/ имже раздай благодать Божию, созидал еси Церковь Христову,/ о ней же ныне молися,/ и тебе бо сынове ея и дщери взывают:/ радуйся, пастырю добрый наш.

Яко апостолом сопричастника в трудех и возмездиих/ Церковь тя с любовию почитает,/ святителю отче Николае равноапостольне./ Положив бо многими подвиги начало Православия в Японии язычестей,/ умножил еси в ней чада спасения,/ и по кончине прият тя Бог во обители апостол Своих по достоянию./ Сего ради молим тя/ молися Господеви пребыти и в предняя делу твоему незыблему на веки,/ и ввестися в лоно Церкве Православныя всем погибнути имущим,/ умиритися мирови/ и спастися душам нашим.

Апостолов единонравне и сопрестольне,/ служителю Христов верный и Богомудрый,/ цевнице избранная Божественнаго Духа,/ сосуде преизливающийся любве Христовы,/ Японския земли просветителю,/ святый Николае, иерарше равноапостольне,/ молися Живоначальней Троице/ о всем твоем стаде/ и о всем мире.