Тропари, кондаки и величания

Православия наставниче,/ благочестия учителю и чистоты,/ вселенныя светильниче,/ архиереов богодухновенное удобрение,/ Кирилле премудре,/ ученьми твоими вся просветил еси,/ цевнице духовная,// моли Христа Бога спастися душам нашим.

Пустынный жителю,/ опустевшая ны от благотворных помышлений вражиими прилогми,/ презельным твоим к Богу молением сердца наша очисти,/ яко да благодарственно вопием ти:/ радуйся, яко земным пустынножительствием, Александре,/ дошед Небеснаго Царствия.

Иже земная оставль,/ в пустыню вселився,/ Христовым стопам последовал еси, тепле,/ и Того, славне, на раму своею честньш крест взем,/ умертвил еси плоти взыграния/ труды постническими и желанием духовным, всеблаженне,/ темже зовем ти:/ радуйся, Александре, пустынный жителю.

Во плоти, яко Ангел, на земли подвизася,/ желанием духовным в пустыню вселися/ и, со зверьми живый, весь Христови быв,/ Тому невозвратно шествовал еси, ведом к Небеси,/ последуя Божественным стезям, отче блаженне Александре,/ яко чуден, чудеса источаеши/ и отгонявши недуги к тебе приходящих с верою,/ но яко имея дерзновение ко Господу,/ поминай нас, чтущих честную память твою.

Иже плотским дебельством Богови работати изволи,/ в пустыню вселився,/ в нейже многими поты и труды/ безтелеснаго равноангельнаго пребывания возможе достигнута,/ таже от Бога узрен быв,/ сподобися великих чудес в жизни и по преставлении,/ на нечистыя духи силу восприим,/ изгониши от приходящих к тебе с верою,/ темже, отче Александре,/ за вся ны моли,/ спастися душам нашим.

Всеблагая Чистая Богородице,/ к Тебе прибегаем, вернии,/ Тобою бо познахом милость Божию,/ чудную икону Твою,/ от ней же вси здравие и спасение приемлем.

Явилася еси на древе в Донской земли,/ благодатная Твоя икона. Богородице,/ больныя исцеляти, заблуждшия обращати;/ темже умильно молимся Тебе:/ избави град наш от всякаго зла/ и спаси люди, к Тебе притекающия.

Мужеством души в веру оболкийся/ и глагол Божий, аки копие, в руку взем, врага победил еси,/ мучеников превелий Феодоре,// с ними Христу Богу моляся не престай о всех нас.

Воинствословием истинным, страстотерпче,/ Небеснаго Царя воевода предобрый был еси, Феодоре,/ оружиями бо веры ополчился еси мудренно,/ и победил еси демонов полки,/ и победоносный явился еси страдалец./ Темже тя верою// присно ублажаем.

Яко добродетелей учители,/ молитвами вашими подаете чтущим вас любовию/ добродетелей исправление/ и соблазнов избавление.

Б ожественных и пречестных святителей Христовых и чудотворцев Иоанна и Феодора,/ вернии, поюще, да ублажим, / яко днесь, в память их притекающе к ракам мощей их, / молим многообразных нас обстояний избавити, да вопием вам:/ радуйтеся, граду нашему и Церкви Христовей великое утверждение.

Яко велие солнце,/ возсия преславная память твоя, премудре Феодоре,/ в нейже подававши в бедах сущим спасение,/ притекающим к тебе усердно,/ благодатию, еюже облагодати тя Христос/ в жизни нескончаемой.

Яко апостолом единонравнии,/ и учителие Суждальстей стране,/ и целителие душам и телесем предобрии,/ и служителие Божий благоприятный,/ к ракам честных мощей ваших притекающе,/ святителю великий Иоанне и Феодоре Богоблаженнии,/ сошедшеся днесь, любовию память вашу светло празднуем в песнех и пениих,/ радующеся и Христа славяще,/ Иже таковую благодать даровавшаго исцелений/ и граду Суждалю великое утверждение.

В молитве бдя, Горняя желая,/ дольняя возненавидел еси,/ и, сердцем болезнуя, выну о стаде своем печешися,/ учением бо своим всех просветил еси,/ Феодоре премудре, Христа Бога моли в памяти твоей/ даровати нам велию милость.

Яко апостолом единонравных учителей Суждальския страны,/ и целителей душ и телес премудрых,/ и служителей Богу благоприятных,/ к ракам честных мощей ваших притекающе,/ ублажаем вас, святителие Богоблаженнии, Феодоре и Иоанне,/ в песнех же и пениих, радующеся, славим Христа,/ даровавшаго вам благодать исцелений/ и граду нашему Суждалю великое в вас утверждение.

В молитвах бдя, сердцем же о стаде твоем выну болезнуя,/ учением своим всех просветил еси, Феодоре премудре,/ темже Христа Бога моли,/ в день памяти твоея даровати нам велию милость.

Днесь Церковь разширяет недра своя/ и приемлет многоцелебныя мощи ваши,/ добропобеднии страдальцы,/ Василие славне и Константине Богомудре,/ и, яко шипок благовонный, напояется пречудными ароматы,/ богатными чудодеянии от неистощимых сокровищ,/ от преславных мощей ваших,/ и радостно чад своих созывает вопити, людие:/ радуйся, двоице пречудная, отечеству своему стено необоримая.

Яко цвети честнии различнии,/ в райстей пищи процветше невещественно,/ отечеству своему славу велию/ и сродником похвалу и честь явльше,/ всеистиннии победницы, великий Василие и славный Константине,/ но убо не престайте молящеся о граде вашем и о всех рабех своих,/ избавити их от напастей, и бед, и всяких лютых обхождений, вопиющих вам:/ радуйтеся, граду нашему Ярославлю великое утверждение.

Возвысившеся на добродетель, к желанию крайнему,/ и достигосте к Небесней высоте,/ благовернии велицыи князи Василие и Константине,/ и безстрастным житием украсисте души своя,/ пощением же изрядно победисте бесовския полки/ и воспримете чистую совесть,/ в молитвах яко безплотнии пребысте,/ возсиясте в мире, аки солнце, преславнии,/ молите спастися душам нашим.

Ваше отечество хвалится обагрением кровей ваших,/ Церковь же Божия радуется,/ приемши телеса ваша,/ людие, песненный лик составльше,/ духовною цевницею вопиют:/ ликуй, Василие, радуйся, Константине,/ Ярославлю славо и всей России радосте.