Тропари, кондаки и величания

Наста днесь пресветлый праздник, Пречистая Дево,/ честныя Твоей Табынския иконы, Владычице,/ яже паче лучей солнечных возсия,/ от Источника приснотекущаго, Христа, Бога нашего,/ источаеши целебныя дары/ с верою к Тебе притекающим,/ Тя бо Христос Помощницу людем Своим дарова,/ покрывати и спасати от всякия беды рабы Своя,/ едину Благословенную.

Честнаго образа Твоего знамение празднующе людие Твои, Богородительнице, имже дивную победу на сопротивныя граду Твоему даровала еси. Темже Тебе верою взываем: радуйся, Дево, христиан похвало.

Яко необоримую стену и источник чудес/ стяжавше Тя раби Твои,/ Богородице пречистая,/ сопротивных ополчения низлагаем./ Темже молим Тя:/ мир граду Твоему даруй/ и душам нашим велию милость.

И нравом причастник,/ и престолом наместник апостолом быв,/ деяние обрел еси, богодохновенне,/ в видения восход,/ сего ради, слово истины исправляя,/ и веры ради пострадал еси даже до крове,/ священномучениче Феодоте,/ моли Христа Бога// спастися душам нашим.

Украшен добродетельми, преподобне Паисие Богодухновенне,/ Церкве Христовы красота был еси,/ подвиги бо иноческими украси ю, блаженне./ Темже молим тя:/ молися ко Господу свободити нас от всякия брани борителя, вопиющих ти:/ радуйся, отче преблаженне.

Чистотою душевною божественно вооружився/ и непрестанный молитвы, яко копие, имый,/ крепко ссекл еси бесовское ополчение,/ Паисие, отче наш,/ моли непрестанно о всех нас.

Слез твоих теченьми пустыни безплодное возделал еси/ и, иже из глубины воздыханьми, во сто трудов уплодоносил еси,/ и был еси светильник вселенней, сияя чудесы, Паисие, отче наш,/ моли Христа Бога/ спастися душам нашим.

Христовы ради любве отечество и род оставил еси/ и, ангельскому житию поревновав,/ духовному отцу твоему преподобному Макарию, подражатель быв,/ града Углеча достигл еси,/ и близ того при водах в пустыню, Ангелом показанную, вселился еси,/ и обитель прекрасну Матери Божией воздвигл еси,/ и множество монахов собрал еси,/ имже и наставник ко спасению быв,/ и чудес дарования от Бога приял еси,/ Паисие преподобне,/ моли Христа Бога спастися душам нашим.

Христовы ради любве отечество и род оставил еси,/ и, ангельскому житию поревновав,/ в пустыню вселился еси,/ в нейже многотрудное житие явил еси/ и чудес дарования от Бога приял еси,/ Паисие преподобне,/ моли Христа Бога спастися душам нашим.

Христовым стопам последователь быв, блаженне Ионо,/ радуяся, вселился еси в пустыню,/ Вышняго Промыслом наставляемь,/ и, не убоявся вражиих приражений,/ якоже столп непоколебим,/ уготовал еси себе в жилище Духу Пресвятому,/ мы же, память твою совершающе, вопием радостно:/ радуйся, яко озарявши нас чудесы твоими;/ радуйся, яко оставил еси временная ради будущих благ./ Радуйся, яко возставляеши ленивых ко спасению./ Моли убо Христа Бога, отче преподобне,/ да спасет души наша в День Судный.

Ангельскому житию поревновав, блаженне Ионо,/ оставил еси отечество твое, великий Новград,/ и, пришед в пределы Олонецкия/ и в пустыню вселився,/ в трудех, молитвах и слезах подвизался еси,/ и, яко мудрый купец, Царствие Небесное наследовал еси./ Темже любовию вопием ти:/ моли Христа Бога,/ да спасет души наша.

Святителю Церкви Великопермстей,/ истинный хранителю апостольских преданий,/ столпе непоколебимый Православия,/ благочестия учителю,/ Ионо святителю блаженне,/ Владыку всех моли/ мир пастве твоей/ и всей Русстей земли даровати/ и всем нам спастися.

Ограды живоносныя твоея пажити,/ пастырски невредимо стадо соблюл еси/ и явился еси высотою дел велик, новый Иларионе,/ по благочестии многи муки и скорби прием:/ тем во всерадостный живот вселився Горняго Сиона,// моли за ны, преподобне.

Вышних сил подражав, преподобне,/ образом птиц житие пожил еси,/ временная в забытии положив,/ непрестанным желанием влеком к Небесным добротам Христа Царя,/ дондеже Того достигл еси, Висарионе,// моли непрестанно о всех нас.

Боже отец наших,/ творяй присно с нами по Твоей кротости,/ не отстави милость Твою от нас,/ но молитвами их// в мире управи живот наш.

В благочестии рожденна,/ в страсе Божии воспитана,/ в житии целомудрие стяжавшаго,/ по успении же нетлением телесе просиявшаго,/ благовернаго князя Феодора во святых почитая,/ смиренно молимся Тебе, Всесильный Владыко,/ да и во веки прославляеши святыми Твоими// страны наша российския.

От благочестиваго корене отрасль благочестивая прозябл еси/ и, скончався в юности, лета долга твоими добродетельми исполнил еси,/ благоверный княже Феодоре,/ сего ради Владеющему временами молимся,/ да молитвами твоими подаст нам долготу лет// и низпослет стране нашей велию и богатую милость.

Звезду российскую,/ от Киева возсиявшую/ и Чернигов блаженною кончиною своею озарившую,/ всеблаженнаго святителя Константина почтим,/ просяще его молитися Христу,/ да подаст мир стране нашей/ и душам нашим велию милость.

Апостолов преемниче,/ архиереев сопрестольниче,/ России всея пастырю и учителю,/ всеблаженне отче Константине,/ Владыце всех молися/ мир пастве твоей даровати/ и спасение душам нашим и велию милость.

Изменил еси земнаго княжения славу/ во иночества образ смиренный/ и страдальчески земное житие скончав,/ ныне на Небесех радуешися,/ усердие моляся/ о чтущих тя, Игоре, страдальцев похвало.