Тропари, кондаки и величания

Яко светильницы, явистеся всесветлии/ в вертепе Царицы Богоматери,/ преподобнии отцы наши Марко, Ионо и Корнилие,/ вы бо, крест Христов на рамо вземше,/ усердно тому последовасте/ и, чистотою Богови приближившеся,/ отонудуже силами чудес обогатистеся,/ тем и мы любезно прибегаем к вам и умильно глаголем:/ о преподобнии, молите Христа Бога/ спастися душам нашим.

Псково-Печерская обитель,/ издревле славная чудесы иконы Богоматерни,/ многия иноки Богови воспита,/ тамо и преподобный Корнилий/ подвигом добрым подвизася,/ чудную Богоматерь славя,/ иноверныя просвещая,/ иноки и многия люди спасая,/ обитель же свою дивно украшая и ограждая./ Тамо и мученичества венец/ по многих летех пастырства своего доблестне прият./ Темже воспоим, людие,/ Христа Бога и Пречистую Его Матерь возблагодарим,/ яко даров а нам преподобномученика славна/ и молитвенника о душах наших достоблаженна.

Ведый известно, яко снедию род человечь испаде из рая,/ постом же паки вниде в онь,/ постное избрал еси себе житие,/ в немже крепце подвизался, блаженне Агафоне,/ и бесовская шатания тем низлагая,/ приял еси целебныя дары от Христа Бога,/ Емуже присно молися о душах наших.

Блага Небесная ради дел твоих стяжавый,/ благости тезоимените, Агафоне,/ моли Благаго Господа, молим тя тепле,/ яко да не лишит нас вечных благ Своих.

Яко звезду великую, тя Церковь имущи, Архиппе,/ чудес твоих лучами просвещаема, зовет тебе:/ спаси верою почитающия память твою.

Учениче Павлов и апостоле Христов, Архиппе,/ Евангелия провозвестниче и Колоссаев учителю,/ каменное побиение приемый,/ аки драгоценное украшение,/ имже венец мучения украсив, вшел еси на веселие Царствия,/ идеже помяни нас поющих твою память,/ апостолов сопрестольниче.

На престоле, славне, священства сед/ и львов уста словесных заградив,/ догматы богодухновенными Честныя Троицы/ озарил еси свет богоразумия твоему стаду./ Сего ради прославился еси// яко Божественный таинник Божия благодати.

Православия наставниче,/ благочестия учителю и чистоты,/ вселенныя светильниче, архиереев Богодухновенное удобрение,/ Льве премудре,/ ученьми твоими вся просветил еси, цевнице духовная./ Моли Христа Бога спастися душам нашим.

Душевныя страсти из корене исторгая,/ в пустыню вселился еси, преподобне,/ и неболезненную жизнь в болезнех восприял еси,/ болезнем же лютым уставлявши озлобления просящим у тебе с верою./ Темже разреши болезни наша душевныя и телесныя, да зовем ти:/ радуйся, Космо Богомудре.

Горняго желая премирнаго жития,/ дольняя возненавидел еси,/ и, взем крест свой, последовал еси Христу,/ и в пустыню вселился еси, досточудне,/ в ней подвизася в пениих, в бдениих и пощениих./ Темже в тя вселися Пресвятый Дух,/ но яко имея дерзновение ко Христу Богу,/ испроси людем православным здравие и спасение/ и не забуди посещая чад своих,/ совершающих священную память твою,/ Космо, преподобне отче наш.

Веру Христову, яко щит, внутрь приим в сердце твоем,/ противныя силы попрал еси, многострадальче,/ и венцем Небесным венчался еси вечно, Феодоре,// яко непобедимый.

Темницею и гладом изнуряем,/ даже до смерти верен пребыл еси, блаженне Ермогене,/ малодушие от сердец людей твоих отгоняя/ и на общий подвиг вся призывая./ Темже и нечестивых мятеж низложил еси и страну нашу утвердил еси,/ да вси зовем ти:// радуйся, заступниче Российския земли.

Российския земли первопрестольниче/ и неусыпный о ней к Богу молитвенниче,/ за веру Христову и паству твою душу свою положив,/ страну нашу от нечестия избавил еси./ Темже вопием ти:/ спасай нас молитвами твоими,// священномучениче Ермогене, отче наш.

Мучением страшным предлежащим,/ Господни страдальцы доблии/ в небоязненном радующеся мудровании,/ сим собеседоваша, о плоти нерадивше,/ темже наследствоваша вечнующую славу,/ о нас молящеся присно,// восхваляющих их подвиги.

Помышляя исход души твоея/ и праведное мздовоздаяние по делом,/ непрестанными слезами умолил еси Господа/ даровати тебе неизреченных радостей наследие,/ яже уже со святыми предвкушая, Пафнутие преподобне,/ поминай и нас пред Богом, чтущих тя.

Велия веры исправления,/ в пещернем затворе, яко на воде упокоения,/ преподобне отче Пафнутие, радовался еси,/ огнем бо любве Божественныя распаляемь,/ бдением и молитвою безстрастия достигл еси/ и явился еси равноангельный на земли,/ того молитвами, Христе Боже, спаси души наша.

Яко луча, возсиял еси вселенней,/ зарями сияя солнца, блаженне,/ всесветлаго Павла, мир просветившаго:/ темже тя почитаем,// Онисиме славне.

Апостоле святый Онисиме,/ моли Милостиваго Бога,/ да прегрешений оставление/ подаст душам нашим.

Богатство благодати и сыноположения стяжавше/ многими подвиги и добродетельми,/ ихже ради Христос всели души ваша в Небесная селения Своя,/ даровав благодать нетления и чудес мощем вашим./ Сего ради вопием вам:/ радуйтеся, двоенадесятице честная/ великия церкве Печерския здатели/ и ликов иноческих похвало и утверждение.

Преблаженнии и Богоноснии отцы наши,/ двоенадесятице честная,/ устроению великия церкве Киево-Печерския послуживший/ и равноангельным житием Богу угодивший/ и Того ради дерзновение велие у Него стяжавший,/ молим вас прилежно,/ испросите душам нашим очищение и велию и богатую милость.