Тропари, кондаки и величания

Житие твое служением Господним исправил еси/ и, взем крест, оставил еси вся житейская,/ красото пустыни, преподобне Шио./ Кого убо паче тя, и по смерти жива суща/ страна Иверская почитает/ и мощми твоими, от гроба явленными услаждается,/ темже не престай моляся о нас ко Господу.

В тебе, отче, известно спасеся еже по образу,/ приим бо крест, последовал еси Христу,/ и, дея, учил еси презирати убо плоть, преходит бо,/ прилежати же о души, вещи безсмертней./ Темже и со Ангелы срадуется, преподобне Шио, дух твой.

Солнца мысленнаго праведнаго — Христа/ озарився сиянием, пребогате Михаиле,/ видимому солнцу не поклонился еси/ и твари паче Творца не послужил еси/ и нечестие обуздал еси,/ ярости царя не убоявся/ и крове своей обагрением/ Христови предстал еси, радуяся./ И ныне в пренесении мощей твоих/ нас свыше назирай и Христа Бога моли,/ молимся яко спастися нам/ и Православию непоколебиму пребыти,/ Отечеству нашему соблюстися во всем/ молитвами твоими, святе,/ по велицей Его милости.

Троичнаго Божества осиянием просветився,/ страстотерпче великий княже Михаиле,/ с премудрым болярином ти Феодором,/ самозванна к подвигом устремистася,/ сквозе огнь не идоста,/ кусту же и идолом не поклонистася, но оплеваста/ и нечестиваго царя обличиста,/ Христа же Единаго от Троицы Бога Суща исповедаста./ И того ради кровей своих струями обагристася, славная./ Темже и венца от Него победная прилета,/ и нас свыше назираета,/ молим ва, святая, молите Того,/ яко да вашими молитвами избавит нас от всяких обстоящих ны зол/ и подаст нам вся благая,/ Иже Един Сый прославляемый во святых Своих.

Страстей пещь, преподобне, угасил еси, воздержания росою./ Дарованием обогатился еси исцелений от Бога, Мароне,/ приял еси целити верным болезни тяжкия,/ и бесов отгонити полки./ Сего ради с веседием почитаем тя.

Фарисейскаго тщеславия удаляяся,/ преподобне отче наш Мароне,/ на гору высокую возшел еси,/ и тамо победу показал еси на диавола:/ требище бо бесовское обрет и Богу освятив,/ в нем пребыл еси,/ молитвами твоими огневицу и трясавицу утоляя,/ и бесы прогоняя,/ и от различных недуг свобождая./ Того ради, святе, молися Христу Богу,/ да спасет души наши.

Пресветлое житие твое, отче Мароне,/ Ангелы удивило есть,/ и бесовская шатания яве устраши./ Верных же собрания светло украси./ К Небесному Христову жилищу, повелевая шествовати всегда./ Егоже моли от тли и бед избавитися,/ верою творящим всечестную память твою.

Яко незаходимое солнце возсия нам днесь/ светозарными твоими молитвами, преподобне отче наш Мароне,/ иже некия горы достигл/ и тамо на ней живущими нечестивыми чтом бысть,/ за превосходящую твою к Богу добродетель,/ и тамо обрет требище идольское. Богу освятив, в нем пребывал еси,/ и видев Человеколюбец Бог твой подвиг и труды,/ дарова тебе дар Свой,/ имже пронесеся имя твое в человецех,/ целити скорби, огневицу и трясавицу прибегающим к тебе с верою./ Темже и зовем ти:/ радуйся, целителю наш скорый;/ радуйся, заступниче наш теплый,/ предстоиши бо у Пресвятыя Троицы,/ молися Той о призывающих имя твое святое,/ да избавит от сих тяжких скорбей и спасет души наша.

Твердым и Богодохновенным учением/ просвещая мир пресветлыми зарями,/ обтече, яко молния вселенную, Кирилле блаженне,/ разсевая пресветлое Божие слово,/ на западе, и севере, и юзе, мир просвещая чудесы.

От пелен прилежно Премудрость сестру себе сотворив, Богогласе,/ пресветлую видев, яко девицу чисту,/ юже приемь, приведе,/ яко монисты златыми, сею украсив свою душу и ум,/ и обретеся яко другий Кирилл, блаженне,/ разумом и именем мудре.

Вражию прелесть низложивша и в постничестве светло просиявша,/ приидите, вернии, восхвалим Исаакия победоноснаго,/ иже, яко злато, во искушениих просил/ и просвещает сердца верно к нему притекающих,/ моляся Господеви непрестанно о душах наших.

Светлости святых насладитися вожделев,/ в темную вселился еси пещеру, прехвальне,/ и добре подвизался еси, Исаакие,/ прельщен же быв от врага,/ паки крепко попрал еси того вся коварства./ И ныне, яко победитель,/ в веселии предстоя Христу Богу,/ проси нам мира и велия милости.

Насладився, богомудре, воздержания/ и желания плоти твоея обуздав,/ явился еси, верою сияя,/ якоже сад посреди рая, процвел еси,// Авксентие отче священне.

Пустынный житель, и в телеси Ангел,/ и чудотворец явился еси, Богоносе отче наш Авксентие,/ постом, бдением, молитвою Небесная дарования приим,/ исцелявши недужныя и души верою притекающих ти./ Слава Давшему тебе крепость,/ слава Венчавшему тя,/ слава Действующему тобою всем исцеления.

Вознесыйся на высоту смиренномудрия,/ благочестия учитель явился еси,/ Православия поборниче и странных предстателю,/ монашествующих похвало и пастырю изрядный./ Темже любовию зовем ти:/ радуйся, Серафиме, чудотворче.

Сосуд Божественных даров/ и дом Святыя Троицы явился еси,/ чудотворче святителю отче Серафиме,/ темже, имея дерзновение ко Господу,/ не остави нас сирых/ и, якоже обещался еси,/ испроси нам молитвами твоими/ мир и велию милость.

Божественною ревностию присно распалаемь,/ Православия столп явился еси/ в Софии граде возсияв,/ и благочестием твоим многия люди ко Христу привел еси,/ пастырю добрый, святителю Серафиме,/ моли Христа Бога, спастися душам нашим.

Днесь Симеон с Саввою, блаженнии, в дусе пришедше,/ спасают от обстояний паству их:/ сии бо Троицу проповедаша Единаго Бога,/ Церкве явишася утверждение,/ в преподобных Мироточивый и во святых чудотворец:/ сии бо и во бранех необоримии защитницы ноказашася,/ Афона похвала и народа Сербскаго крепость.

Иго Христово прием, Симеоне,/ и, Того Крест взем, последовал Ему, / насажден в дому Господнем, процвете, яко финике, / якоже кедр, иже в Ливане, умножил еси чада твоя,/ муж желаний духовных, чудотворец бо явися,/ Христа Бога моли непрестанно о всех нас.

Горнюю жизнь возлюбивше, славнии,/ жизнь сущую на земли презресте./ Сего ради в вышних со Ангелы всегда ликующе,/ молите о всех нас.